GEN 1:1 Kanda soo dokopa Anatumi yake pandape isayuupi peparae pyuo ingiyamo dokopa
GEN 1:2 yuu muu dupwana angi ingyapa nao kwao siyamopa ipwa kota pete kyuwae sepala iminjaro karalu kareya. Dokona Anatunya Imambu doko ipwa ketae romo romo pyuo papyuo kareya.
GEN 1:3 Dokopa Anatumi lao, Yuu doko yangena leya. Leyamo dokopa yango rali piya.
GEN 1:4 Pipala Anatumi kandeyamo dokopa yuu yangeya doko keyange lao suu piya. Suu pyapala Anatumi yuu doko lili pipala yangara kwuara pinya leya.
GEN 1:5 Anatumi iminja nayamo doko kingi korakama lao iminjiyamo doko kingi kukwa lao piya. Kwuapala yangapeyamo doko yuu gii mendaki ingiya.
GEN 1:6 Dokopa Anatumi lao, Yake doko ipwa pipa lili pyuo sinya leya. Leyamuli pyuo lili piya.
GEN 1:7 Dopa pyuo ipwa ketae isapana palyuo yake kanya koenya reteya.
GEN 1:8 Anatumi ketae doko Yake lapala kwuara yangara piyamo doko yuu gii lapo ingyuo piya.
GEN 1:9 Anatumi lao, Isa panda dokona ipwa pete lili mendaki dokona sinya. Yuu doko panembena olo sinyale leyamosa dopa pyuo ingyuo peya.
GEN 1:10 Anatumi yuu oo lasi siyamo doko kingi Yuu lao ipwa nyuo pyaso pete siyamo doko Ipwa Kota lapala doko keyange lamo lao suu pyao kandeya.
GEN 1:11 Dokopa Anatumi lao, Isako peparae yuunya pulinya. Kuku pingi dupwape jinginya kapa palenge isa dupwape andena, leya. Leyamuli pyuo ingiya.
GEN 1:12 Pyuo ingiyamo dokopa yuu dupwana isako rara wakale wakale pyuo andeya. Kuku pingi rarape isa jingi lyingipi pulyiya. Dokopa Anatumi doko keyange lamo lao kandeya.
GEN 1:13 Kwuara yangara piya doko yuu gii repo ingiya.
GEN 1:14 Yake dokona yanga paupau lao kukwa korakamape dolapona lili pyuo rao dokome kwai kanape yuu giipi ee kanape dupwa lasaka pinya, leya.
GEN 1:15 Yake dokona rao karo dokopa isa yuu dokona yanganyi pyambunya, leya. Leyamuli pyuo piya.
GEN 1:16 Anatumi yanga paupau lenge andake lama wasiya. Wasiyamodokona kamame andake yanga paupau lenge dokome korakama dokopa kando iso karenalao dee yanga paupau kukili ingyuo lenge dokome kukwa dokopa kando iso karena lao piya. Pipala baame bui dupwa wasiyako.
GEN 1:17 Nakama isa yuu dokona yanganyi peyo karena lao yake dokona sulu sinya lao piya.
GEN 1:18 Piyamo dokome kukwa korakamape dupwana iso karo dee yangara kwuara dolapo liti pirapu pinya, leya. Anatumi doko keyange lamo lao kandeya.
GEN 1:19 Kwuara yangara piyamo doko yuu gii kisima ingiya.
GEN 1:20 Anatumi lao, Ipwa dokona lee renge bange meeree ingyuo sinya lao yaka dupwa yake dokona ketae bii lao oko simu sae pyuo papyuo karena, leya.
GEN 1:21 Anatumi dopa pyuo kota petena oma bange kameya wakasape lete bange ipwa dokona kata papyuo mee ree inginya lao dupwa pyuo yaka peparaepe rara wakale wakale dupwa pyuo wasiyako. Anatumi doko keyange lamo lao kandeya.
GEN 1:22 Kandapala Anatumi mondo lao andena lao elyape keta pisinya pyambuo lao, Nakama jingi kapape pyao malu wai kisinya pyambuo kota pete dupwa kete pyao nyelapape. Dee yaka dupwa yuu dokona wai kiso pinya, leya.
GEN 1:23 Lapaladoo kwuara yangara piyamo doko yuu gii kingi paki ingiya.
GEN 1:24 Anatumi lao, Lete bange rara wakale wakale dupwa isa yuu dokona karena. Anda mena dupwape isakona nuli nao pyao nenge dupwape bange panga panga papingi silyamo dupwape sinya, leya. Leyamuli pyuo piya.
GEN 1:25 Dopa pyuo pipala Anatumi mena pyuo waso bange kuki yuunya panga panga papingipi rara mendaki mendaki lao wasiya. Doko keyange lamo lao kandeya.
GEN 1:26 Kandapala dokopa Anatumi lao, Enda akalipi namwa yale lama isa komba pyao wasamanale. Nakambame ipwa petena oma dupwapeyakena yaka dupwape mena dupwape yuunya panga panga papingi bangepe yuu muu dupwana peparae baa iso kando kararaŋa, leya.
GEN 1:27 Dopa lapala Anatumi enda akalipa baa yale pyuo wasiya.
GEN 1:28 Wasapala dokopa Anatumi nakamba elyape keta pisinyi pyambuo lao, Nakambame jingipi parape pyao raeyo yuu dupwa minyarambuo nyuo dee bange peparaena ketae ingyuo karo pirambi. Dopa pipala ipwa petena oma dupwape yakena yakape lete bange kata paenge semalama pelyamo dupwapena peparae rapu pyuo karena, leya.
GEN 1:29 Dokopa Anatumi nakamba lamaiyuo, Kandalapape, kuku pingipi jingi lyuo kapa palenge isa dupwape yuu muu ree laosilyamo dupwa peparae narambi lao jilyu, leya.
GEN 1:30 Isa yuunya mena rara dupwape yaka ketae papingi rara dupwape bange yuu dokona panga panga papingi dupwanape dee lete bange ŋeeŋae singi peparaepena lao nambame isako kyakange dupwa nakamana nenge ingyuo nena lao mailyuko, leya. Leyamuli pyuo piya.
GEN 1:31 Anatumi bange piyamo dupwa peparae ama keyange ingyuo peyasa kandeya. Kwuara yangara doo piyamo dokome yuu gii pakinyamange ingiya.
GEN 2:1 Dopa pyuo pipala dokopa Anatumi yake yuupi dee ketae isapana bange peparaepe pyuo oteya.
GEN 2:2 Yuu gii yanda ipingi epeyamo dokopa Anatu baa yulu piyamo dupwa pyuo otapala imambu soo peteya.
GEN 2:3 Anatumi yulu peparaepyuo waso nyepala yuu yanda ipingi dokopa imambu soo peteyamo dokona lao yuu gii doko yapasi ingyuo ketae pyambuo rombo palyiya.
GEN 2:4 Dopa pyuo yuu yakepi peparae pyuo wasiya.
GEN 2:5 Kamongo Anatumi apunda isa yuunya pena lapa nayamopa wambu mendeme yuu dokona mondo pira ingya nayamo dokome isako mende see nayamopa waingi dupwa pulyapa nayako.
GEN 2:6 Dopa pyuo piyamopape ipwa yuu dupwana guu lao pyakamiya.
GEN 2:7 Anatumi yuu dokona yuu sinjimu lapo nyepala dokome akali mende elya pyuo wasapala banya gyaa kata dokona poporambaiye lete poo lanyi pyambuyamo dokopa akali doko lenge rao lete ingiya.
GEN 2:8 Dokopa Kamongo Anatumi ee mende kingi Etene lenge neta pyakaengedorena wara pipala akali wasiyamo doko dokona karena leya.
GEN 2:9 Kamongo Anatumi isa rara wakale wakale keyange wambu kyanyi kando jingi lyuo nao pingi dupwa dokona pulyinya, leya. Ee sukusa dokona isa letena renge palenge doko karo dee mende koo keyangepe soo pakana palyingi renge doko karo piya.
GEN 2:10 Pipala Etene dokona ipwa mende guu lao neta pena lao piyamo dokome ee doko mena mena lao nakuo andeya. Dokopa dokona piso ipwa doko paka lakyuo kisima ingyuo epo peya.
GEN 2:11 Ipwa mupwa doko kingi Pisone lenge dokome yuu Apila lenge doko peparae nyuo sukusa palyama penge.
GEN 2:12 Dokona kana golope kana mende kingibeteliyamope mende kana onekesepe yuu dokona singi. Kana golo dokona singi dokoyapasi wakasa.
GEN 2:13 Ipwa lapo doko kingi Giyone lenge doko yuu Kusi lengedoko peparae nyuo sukusa palyama penge.
GEN 2:14 Ipwa repo dokona kingi Taikirisi lenge doko yuu Asiria neta pyakaenge dorename penge dee ipwa kisima doko kingi Yuporisa lenge.
GEN 2:15 Dokopa Kamongo Anatumi akali doko nyuo ee kingi Etene lenge dokona karapala rano pyuo iso karena leya.
GEN 2:16 Karena lapala Kamongo Anatumi baa lamaiyuokondali pyuo lao, Emba ee dokona isa menge peparae karamo dupwa maso nape.
GEN 2:17 Narenepape isa mende koo keyangepe soo pakanapalyingi renge palengende karamo doko iki waso karo naa napipi. Doko nare ramo kumare, leya.
GEN 2:18 Lapala dokopa Kamongo Anatumi lao, Doko akali baa ikikarara doko kapa daa. Dokona nambame baapa kapa manda manjo nyiso yulu piramo mende wasakamiru, leya.
GEN 2:19 Lapala Kamongo Anatumi yuu lapo nyepala mena peparaepe yakena yaka peparaepe wasapala akali kareya dokona kingi apiyakale larali dupwa lena lao lanyuo epeya. Akalimi bange dupwa kando kingi leyamo range dokoko yangisisi siya.
GEN 2:20 Baame yaka rara peparaepe mena wakale wakale dupwape kando kingi leyamopape baapa kapa role pyao nyisaramo mende daa ingiya.
GEN 2:21 Doko kandapala Kamongo Anatumi akali luu palena lapala dokopa luu palyuo siyamopa akali dokona parali kuli dokona mendaki lalyuo nyepala dokopa umbwa pinyi pyambuya.
GEN 2:22 Pyambwapala Kamongo Anatumi akalinya parali kulidoko nyepala dokome enda mende wasiya. Wasapala dokopa akali kareyamo dokona lanyuo epeya.
GEN 2:23 Akalimi kandapala Dake nambana range kuli angi yongo dake nambana yongo angioko. Akalinya pingyuo nyipyamo dokona banya kingi enda ingyara, leya.
GEN 2:24 Dokona lao akali mendeme banya rakange endangipa kaepala banya etenge dokopa pakao yongo mendare ingyuo petenge.
GEN 2:25 Enda akalipa nakamba papara kareyambinyipape elya nayambi.
GEN 3:1 Lete bange peparae Kamongo Anatumi wasiyamo dupwana kau dokome kendepuli ingyapala panga wakasa siya. Dopa pipala baame enda doko lamaiyuo lao, Anatumi lao dokopa ee dokona isa karaminyi dokona mendena jingi lyuo naa narambi lapya lyasili? leya.
GEN 3:2 Dokopa enda baame kau doko isingi lamaiyuo, Ee dokona isa karaminyi dupwana jingi kapa naramba.
GEN 3:3 Kapa naramba doŋo isa mende ee sukusa karamo dokona lao Anatumi dopa leya, Kumasarambi lao isa dokona jingi minyanda nao angi naa naokopyuo karalapape leyaŋa, leya enda dokome.
GEN 3:4 Dopa leyamopape kau baame enda doko lamaiyuo lao, Daa kuma narambi lyakande.
GEN 3:5 Anatumi mende soo leyamo doko jingi dokona narambi yuu gii dokopa lenge pono laramopa Anatu yale ingyuo koo keyangepe soo pakana palyinginyili pyuo soo kararambinyi lao leyalyamo, leya.
GEN 3:6 Leyamo dokopa enda baame nenge keyange doko auwokando karo isa keta mona palenge singinya renge palamo lao soo manji nyepala jingi lapo lyuo neya. Dopa pyuo nao lapo akalingi maiyamo dokopa baa neyako.
GEN 3:7 Dokopa nakambana lenge pono lapala nambwa papara karalambanolamo sepala isapiki lenge dokona yoko lapo nyuo kii pipala sisi panai piyambi.
GEN 3:8 Enakana yuu poo kuiyamo dokopa Kamongo Anatu ee dokona lyapu lao epeyamo sepala akali doko etengepa ee dokona isa kareyaminyi dupwana alya minyuo yalu piyambi.
GEN 3:9 Dopa piyambinyipape Kamongo Anatumi akali doko kee lao, Emba anjalapona karese? leya.
GEN 3:10 Leyamo dokopa baame isingi lao lamaiyuo, Emba ipinyi doko sepala namba papara karapu dokome pakapala yalu pipu, leya.
GEN 3:11 Baame lao, Apimi emba papara karene lao pakana palyuo langipyase? Isa jingi naa nalapape lao langikondali pyuo langiyunu doko nalese? leya.
GEN 3:12 Leyamo dokopa akali dokome lao, Enda role pyao pisirambiŋi lao jii kande dokome isa dokona jingi lapo jipyasa napu, leya.
GEN 3:13 Dokopa Kamongo Anatumi enda lamaiyuo, Emba akinde pipi? leya. Enda baame lao, Kau dokome namba kando nyipili lao ilimungu kalemungu pii lapyasa dokome napu, leya.
GEN 3:14 Dopa leyamo dokopa Kamongo Anatumi kau doko kando lamaiyuo, Emba dopa pipinyi dokona mena rara wakale wakale dupwapemee kapa ingyuo paraminyipa embako yapo koo ingyuo randa nyuo pare. Emba kaeya nao rombame kata wapuo sinjimu nao papiri, leya.
GEN 3:15 Dokopa enda embapa imbu singi nyuo pisipwape, laro. Nakambana wai kiso nyerambi dupwa dopako pyuo pyakando pyuo puu parami. Baame embena ayemba kalyuo pyarakwara. Embame banya kimbu yukuna nao kumuo pyareko, leya Anatumi.
GEN 3:16 Lapala dee enda doko kando lamaiyuo, Emba wane manjinya dokopa mata pyaramopa randa andake nao manjo nyere laro, leya. Randa nyepalape akalinyi nyelana mona nyuo pisirinyipa baa embena mupwa ingyuo karara, leya.
GEN 3:17 Lapala baame akali doko kando dopa leya. Embame etenena pii sepala isa jingi naa nare leyo doko napinyi dokona yuu doko koo inginyi pyambwakaro. Emba lete kararene mange dusipana yuu dokona nenge randa nao wara pyuo nao karare.
GEN 3:18 Neperekepe ranope isako yuu dokona andakara dokopa isako wakale wakale dupwa nao karare.
GEN 3:19 Embame pusimi kumuo yulu pyuo nenge nao karerenepa malu pirami dokona lili pira. Emba yuumi wasiyunusa yuu ingyuo karene dokona dee yuuoko ingyuo pare, leya Anatumi.
GEN 3:20 Akali dokome banya etenge wambu peparaena endangi kyawa ingiyasa dokome kingi Ipi, leya.
GEN 3:21 Leyamo dokopa Kamongo Anatumi mena yanenge nyepala Atame etengepana komau wasapala wapwakamiya.
GEN 3:22 Dokopa Kamongo Anatumi lao, Akali doko namwa yale. Koo keyangepe soo pakana palyuo karamo kande. Baame kingi pyasinju lapala letena renge palenge isa jingi nyuo napala lete karalu karasara, leya.
GEN 3:23 Dokona lao Kamongo Anatumi ee dokona rekya lao nembeya. Nembo yuu nyepala wasiyamo dokonako baa range pyuo wara pyuo karena, leya.
GEN 3:24 Pena lao ralinyi nembapala ee Etene dokona neta pyakaenge dorena letena renge palenge isa karenge dokona kata soo penge dokona aŋala serepimi lenge mendeme iso karena lao wua gela isareuliyapu nyingi mende paki palyuo paki palyuo pyuo karenge dokome iso karena laopiso piya.
GEN 4:1 Enakana Atame banya etenge Ipi lenge doko role paeyapala wane ingiyamopa wane Kene lao mandeya. Manjipala lao, Kamongome namba nyisipyamopa wane kando nyilyano, leya.
GEN 4:2 Dee enakana Kenena yangonge Epolo lao mandeya. Dokopa Epolo baa sipisipi minyuo kareyamopa Kene baa ee yulu pyuo kareya.
GEN 4:3 Yuu mendepa Keneme eena nenge lapo nyepala Kamongo dokona loma soo kiso maiyamopa
GEN 4:4 Epolo banya sipisipi ikyane mupwa mendepa sipisipi kapa rukisi lapopeminyuo epo kiso maiya. Dopa pyuo piyambinyisa Kamongome Epolo minyuo epeyamo dupwa rae maipala
GEN 4:5 Kenena dupwa epe kanda nao kareya. Dopa piyasa Keneme imbwuapala banya lenge kambu poro imbu manjo kareya.
GEN 4:6 Kamongo dokome Kene lamaiyuo, Akipamo emba imbumi kumapala lenge kambu poro imbu manjo karene? leya.
GEN 4:7 Emba rolae piri ramo doko rae maiyuo paa narese? Dee yulu rolae pii napinyi dokona koo renge anda kambu repeta yalu pyuo muumee silyamo. Dokome emba nyipuli yaka lao suu pyao silyamo dokona emba rangeme nyuo anamasi minyuo karape, leya.
GEN 4:8 Leyamopa Keneme banya yangonge Epolo lamaiyuo, Epapu isakosa dokona bonale, leya. Dokopa nakamba pao isakosa dokona kareyambinyi dokopa Keneme sipurapala banya yangonge Epolo pyao kumakaya.
GEN 4:9 Pyao kumakapeyamo dokopa Anatumi Kene piso siya. Embena yangone Epolo anja karase? leya. Leyamo dokopa baame isingi lao, Namba kandakapusi? Nambame nambana yangonge doko rapu pingisi? leya.
GEN 4:10 Dokopa Kamongome lao, Emba doko akinde pipisi? Embena yangonena ranjama dokome yuu ono pupyamo dokona soo namba kee lao letamo, leya.
GEN 4:11 Emba yuu dokopa rekya lao kwao kara lao nembaro. Embena kingi raka dokome yangonena ranjama maipinyipa yuumi nao pupya.
GEN 4:12 Emba yulupyuo kararenepape ee dupwa ipyaka nara. Mendasa angi ingyuo pali nao yuu dupwana ralo papyuo karare, leya.
GEN 4:13 Dokopa Keneme Anatu isingi lamaiyuo, Embaranda jilini doko namba nyepala kapa soo paro ingya nalyamo.
GEN 4:14 Epapu namba yuu kulisa doko kala puu lalyane. Namba papala dokopa embena lenge kambu dokona yalu pilya pyana pyuo kararo. Ralo yuu muu dupwana papirunu wambumi kandarami dokopa pyao kumakasarami, leya.
GEN 4:15 Dopa pyuo leyamopa Anatumi lao, Doko daa. Wambu mendeme Kene emba pyao kumakarami ramo baa apeto yanda ipingi nyepo randa nyuo pyao alowa pisi sera, leya. Dokopa Anatumi Kene keta wambu mendeme baa kandapala pyaa naramiŋi lao mawa pili lao kamu pokwakamiya.
GEN 4:16 Pokwakamiyamo dokopa Keneme Anatu yaki nyepala kata nyuo yuu Note ee Etene neta pyakaenge dorena yuku pao kareya.
GEN 4:17 Keneme banya etengepa paeyapala wane ingiyamopa Inoko mandeya. Baame yuu taone andake waso pipala banya ikinyinginya kingi Inoko lao suu pyao Inokoko, leya.
GEN 4:18 Inoko baame Irate mandeya. Irate dokome Mayunjaele mandeya. Mayunjaeleme Mesusayole mandeya. Mesusayoleme Lameke mandeya.
GEN 4:19 Lameke baa enda lama nyiya. Dolapona enda mende kingi Aita lenge mende Sila lenge.
GEN 4:20 Enda Aita dokome wane Jepele mandeyamopa baa wambu bulamakao yanengeme komau anda pyuo palyuo bulamakao rapu pyuo karo pelyaminyi dupwana rakange kyawa ingyuo kareya.
GEN 4:21 Jepelena yangonge kingi Jupale lenge baa wambu rambyalu kurulupi waso lao kareyaminyi dupwana rakange kyawa ingyuo kareya.
GEN 4:22 Enda Sila baame akali Tupale Kene lenge mandeyamo dokome anepe kone kanapemebange wasingi dupwana rakange kyawa ingyuo peya. Banya pemalenge Naama lenge.
GEN 4:23 Yuu mendepa Lameke epo banya etenge Aita Silapa lamaiyuo, Nakamba nambana pii selapape. Akali parangendeme namba pyao lalyipyasa baa isingi pyao kumakapu.
GEN 4:24 Mendeme Kene pyarami ramo doko isingi yuu yanda ipingi moŋo nyeralya kande. Dee namba Lameke pyao larami ramo doko akalisa pao yanda ipingi dee ipisu yanda ipingi nyepoko apeto yano pyasi sakara, leya.
GEN 4:25 Dee kamba Atame banya etengepa paeyapala wane mende kingi Sete lao mandeyambi. Manjipala enda dokome lao, Keneme Epolo piyamo dokona wane dake Anatumi alo pyuo jipyaŋa lapala kingi Sete, leya.
GEN 4:26 Dokopa Seteme wane mende mandeyamo doko kingi Inoso, leya. Yuu gii dokopana kanda soo wambumi Anatunya kingi Kamongo lao lao kareyami.
GEN 5:1 Atame dokona para pyao nyiyamo dupwana kingi dakena pyasi palamo. Anatumi akali wasiyamo dokopa baa range yale enda akalipa pyuo wasiya.
GEN 5:2 Waso dokopa nakamba elyape keta pisinyi pyambuo kingi enda akalipaŋa, leya.
GEN 5:3 Atame baa ee kana 130 karapala wane mende baa yale isa komba pyao manjipala banya kingi Sete, leya.
GEN 5:4 Sete manjipala, Atame ee kana 800 nyuo nembeya. Nyuo nembo kareyamo mange dokopa wane wanakepe lapo dupwa konda pyuo manjo kareya.
GEN 5:5 Dopapyuo pisipala Atame ee kana 930 ingyuo karapala kumuya.
GEN 5:6 Sete baa eekana 105 karapala dokopa Inoso mandeya.
GEN 5:7 Inoso manjipala ee kana 807 nyuo nembeya. Nyuo nembo kareyamo mange dokopa enakana wane wanakepe lapo dupwa konda pyuo manjo kareya.
GEN 5:8 Dopa pyuo pisipala Seteme ee kana 912 ingyuo karapala kumuya.
GEN 5:9 Inoso baa ee kana 90 karapala dokopa Kenani mandeya.
GEN 5:10 Kenani manjipala ee kana 815 nyuo nembeya. Nyuo nembo kareyamo mangedokopa enakana wane wanakepe lapo dupwa konda pyuo manjo kareya.
GEN 5:11 Dopa pyuo pisipala Inoso ee kana 905 ingyuo karapala kumuya.
GEN 5:12 Kenani baa ee kana 70 nembo karapala dokopa Makalalele mandeya.
GEN 5:13 Makalalele manjipala ee kana 840 nyuo nembeya. Nyuo nembo kareyamo mange dokopa enakana wane wanakepe lapo konda pyuo manjo kareya.
GEN 5:14 Dopa pyuo pisipala Kenani ee kana 910 ingyuo karapala kumuya.
GEN 5:15 Makalalele baame ee kana 65 karapaladokopa Jarete mandeya.
GEN 5:16 Jarete manjipala ee kana 830 nyuo nembeya. Nyuo nembo kareyamo mange dokopa wane wanakepe lapo konda pyuo manjo kareya.
GEN 5:17 Dopa pyuo pisipala Makalalele ee kana 895 ingyuo karapala kumuya.
GEN 5:18 Jarete baame ee kana 162 karapala dokopa Inoko mandeya.
GEN 5:19 Inoko manjipala ee kana 800 nyuo nembeya. Nyuo nembo kareyamo mange dokopa wane wanakepelapo konda pyuo manjo kareya.
GEN 5:20 Dopa pyuo pisipala Jarete ee kana 962 ingyuo karapala kumuya.
GEN 5:21 Inoko baame ee kana 65 karapala dokopa wane Metusala mandeya.
GEN 5:22 Metusala manjipeyamo dokopa Anatu dokona bwua singyuo pyuo paeyo ee kana 300 kareya. Kareyamo mange dokopa wane wanakepe lapo konda pyuo manjo kareya.
GEN 5:23 Dopa pyuo pisipala ee kana 365 kareya.
GEN 5:24 Karapala Inoko ando kareyamo mange dusipana Anatupa bwua singyuo pyuo kareyamopa Anatumi mee nyiyasa pana naya.
GEN 5:25 Metusala baame ee kana 187 karapala dokopa Lameke mandeya.
GEN 5:26 Lameke manjipala ee kana 782 nyuo nembeya. Nyuo nembo kareyamo mange dokopa wane wanakepe lapo dupwa konda pyuo manjo kareya.
GEN 5:27 Dopa pyuo pisipala Metusala ee kana 969 ingyuo karapala kumuya.
GEN 5:28 Lameke baame ee kana 182 karapala wane mende mandeya.
GEN 5:29 Manjipala dopa leya. Anatumi yuu kwaeyo pena leyamo dokonako piso namwa yulu andake kingimi pyuo karamano dokona lao wane dakeme namwa mata kyakao nyera ingilyamo, leya. Dokona lao kingi Noa leya.
GEN 5:30 Lameke Noa manjipeyamo dokopa enakana ee kana 595 kareya. Kareyamo mange dokopa wane wanakepe lapo dupwa konda pyuo manjo kareya.
GEN 5:31 Lameke baa ee kana 777 ingyuo karapala kumuya.
GEN 5:32 Noa baame ee kana 500 karapala enakana wane rema Seme Ame Japetemoo dusipa mandeya.
GEN 6:1 Yuu pandadokona mee wambu wai kiso andakiyamo karo dokopa wanake lapo mandeyami.
GEN 6:2 Mandeyaminyi dokopa kuma nangena ikinyingi dupwame isa wambunya wanenge dupwaawa kandapala mee maso nyuo piyami.
GEN 6:3 Dokopa Kamongome lao, Mee isa wambu ingyuo pelyamo dokona nakambana imambu paleta karo kuku pyaraminde daa. Nakama ee kana 120 dokona yaka lili pirami, leya.
GEN 6:4 Kuma nange wambu dupwame isa wambunya wanenge dupwa nyepala wai kiso nyiyaminyi mange dokopa Nepelimi wambu ando nyimbuyamopaoko karo peyami. Wane mandeyaminyi dupwa kuli palyuo kareyaminyisa nakamana kingi ketae peya.
GEN 6:5 Isa wambu peparae ama yulu koo wakasa pyuo karo suu pingi koo rengeme simbwapyamo karaminyi lao Anatumi kandeya.
GEN 6:6 Dokona baame lao, Namba wambu range wasiyunu yuu dokona kaepala sungwa sungwa pinyi nembaro
GEN 6:7 Mena wambupi bange kuki panga panga paenge dee yakape wasiyunu dokona kondo karo, leya.
GEN 6:8 Dopa pyuo lapalape Kamongome Noa yeelyo kando rae maiyuo kareya.
GEN 6:9 Noana wane rema Seme Ame Japetemoo dusipa mandeya. Wambu peparae kareyaminyi dupwana baaiki rolo pyuo kareya. Baa Anatupa bwua singyuo pyuo kareyambi.
GEN 6:11 Wambudoloma yuu muu peparaena Anatunya lenge kambu dokona kopetame pyuo pyakando kareyami.
GEN 6:12 Isa panda dokona wambu koo pilya pyana pyuo kareyamisa kwao siyamo doko Anatumi kandeya.
GEN 6:13 Dokopa Anatumi Noa lamaiyuo, Wambu peparae rembe nanyi nembalana lao suu pyao kaelyo. Pyakandenge yuu soo karaminyi dokome yuu doko nakama pipya kokwa soronaŋa kandape, leya.
GEN 6:14 Embame sipu kameya mende gopa isa dokome rangena wasalasi. Waso lake karapala kamaandakarepe dupwa mamba pupuri kulisandeme yangenge dokome yangare.
GEN 6:15 Dopa pyuo piri dapa pyuo piri lao sipunya imwa rolae dokona 133 mita londe dopalemakande pyuo palyuo oko soo palyingi isa dokona 22 mita londe dopale makande pyuo palyuo dee roo karenge isa 13 mita londe dopale makande pyuo piri.
GEN 6:16 Anda kauwarami dokopa andopai pulyambanapa lili kopetame maingi doko make 44 sendemite dopale ingyuo nee sinya. Lungwa lungwa rename kambu dowa mende wasapala koe rema ingyuo wasara lao waipi, lamaiya.
GEN 6:17 Nambame yuu dupwa ipwame yambe pinya laronopa yuunya lee renge peparae kumuo rembe narami, leya.
GEN 6:18 Namba embapa lalu lao lao kana minyaro. Embapa etenepa dee embena ikinyi dusipape dusipana etenge dusipape opetae sipu dokona eparami.
GEN 6:19 Lee renge bange rara wakale wakale dupwana lama lao inya kalipa larapu lete nyuo sipu dokonapyambware.
GEN 6:20 Yaka rara wakale wakale dupwape mena rara wakale wakale dupwape yuunya panga panga papingi bange kuki dupwape dupwana lama larapu sukusa eparaminyi dokopa kuma nana lao nyepe.
GEN 6:21 Dee nenge rara peparae emba nao mena nao pirami dupwa nyuo retape, leya.
GEN 6:22 Noame doo piyamo dupwa peparae Anatumi lamaiyamuli pyuo piya.
GEN 7:1 Kamongome Noa lamaiyuo, Embena ree palu dupwa nyepala sipu anda dokona lanyuo pare. Wambu embapa kyawa kapa dupwa karaminyipa emba yeelyo rolae pyuo karene kandelyo, leya.
GEN 7:2 Mena naa nao wasingi dupwana inya kalipa lama lao mena nao karenge dupwana yanda ipingi nyepo nyuoko piri.
GEN 7:3 Dee yaka inya kalipa lao yanda ipingi nyepo rengya wai kisarama lao nyuo palyare.
GEN 7:4 Yuuyanda ipingi nyepo paparamopa nambame apunda yuu dokona kukwa korakamape akalisa kisima (40) epo karena lapala lete bange petaminyi dupwa kokwa sinyi nembaro, leya.
GEN 7:5 Noame Kamongo leyamuli pyuo mende kaeya nao piya.
GEN 7:6 Noa baa ee kana 600 karapeyamopa ipwa dupwame epo yuu yambe piya.
GEN 7:7 Dopa piyamo dokopa Noa etengepa dee ikinyingimoo ikinyingi dusipana etengepe ipwame nasaramo lapala sipu anda dokona kolando peyami.
GEN 7:8 Mena nakama waso nengepe waso naa nangepe yakape dee yuu dupwana panga panga papingi dupwape
GEN 7:9 lama lao inya kalipa larapu Anatumi leyamuli pyuo Noa role pyao sipu dokona kolandeyami.
GEN 7:10 Kolandapeyaminyipa yuu yanda ipingi epo papeyamopa apunda yuu dokona epo yambe piya.
GEN 7:11 Noa banya ee kana 600 epo papeyamopa kana lama dokona yuu gii akalisa ipisu yanda ipingi nyepo mange dokopa ipwa koko dupwa pulipyao neta epo yake kata lumbuyamopa apu isa epeya.
GEN 7:12 Yuu dokona apu kukwa korakamape akalisa kisima epo kareya.
GEN 7:13 Dokopa Noa etengemoo ikinyingi Seme Ame Japetemoo nakamana etenge rema dusipape sipu dokona kolandeyami.
GEN 7:14 Dopa pyuo mena rara peparae dupwape bange isa yuu dokona kata panga panga papingipi yaka rara wakale wakalepe
GEN 7:15 lee renge bange peparae lama lama lao Noa role pyao sipu anda kolando peyami.
GEN 7:16 Anatumi Noa lamaiyamuli pyuo inya kalipa larapu andakare pao oteyaminyipa Kamongo baame kambu upi leya.
GEN 7:17 Yuu akalisa kisima ipwa epo konda konda pipala dokome sipu doko ketae soo minyalyiya.
GEN 7:18 Ipwa dokome yuu peparae anamasi minyuoandakiyamopa sipu doko ipwa dokona ketae siya.
GEN 7:19 Dee kamame kaiya karapala yuu kyau dupwa yalu piya.
GEN 7:20 Dee konda pyuo make mita yanda ipingi dopaleme yuu kyau dupwa nyuo yalo siya.
GEN 7:21 Dokopa yuunya kata papingi peparae yakape menape bange kuki dupwape wambupi kokwa sinyi nembeyamo kumuyami.
GEN 7:22 Yuu olasinya ŋee soo popo nembo petenge dupwa peparae kumuo ote piya.
GEN 7:23 Baame kokwa sinyi nembeyamo dokome wambu menape bange panga panga papingipi yakape yuu dokona mende kara naya. Noamoo wambu baa role pyaosipu anda peteyaminyi dupwa iki lete kareyami.
GEN 7:24 Ipwa yuu dokona ketaesiyamopa yuu yangara kwuara piyamo doko 150 ingyuo epo peya.
GEN 8:1 Anatumi Noamoo mena wakale wakale dupwape sipu anda paleyami dupwana suu pyaro kareya. Baa porambaiye yuu dokona minyinya leyamopa ipwa soko lano peya.
GEN 8:2 Ipwa koko dokona potemo epeyamo dupwape yake kata lumbuo epeyamo dupwape upi leyamopa apunda soko rali piya.
GEN 8:3 Dokopa ipwa doko yuu dokona lano sokwala sokwala peya. Yuu gii 150 dopale ingyuo epo papeyamopa ipwa doko pyai nala nala peya.
GEN 8:4 Dopa pyuo soko peyamopa kana yanda ipingi dokona yuu gii akalisa ipisu yanda ipingi dokopa sipu doko yuu kyau Ararate lenge dokona epo siya.
GEN 8:5 Yuu gii mendaki kana akalisa dokona ipwa ene soko peyamopa yuu kyau pinjingi dupwa paneyamo kandeyami.
GEN 8:6 Dee yuu gii akalisa kisima papeyamopa Noa sipu dokona windowa palyiyamo doko lumbuya.
GEN 8:7 Lumbwapala yaka orapene lenge mende kamanda nembeya. Dopa pyuo piyasa bii lao papyuo kareyamopako ipwa sokoya.
GEN 8:8 Dee kamba ipwa sokolyape lao yaka wayamu mende makande pyuo nembeya.
GEN 8:9 Dopa pyuo nembeyamopape wayamu doko ipwame yuu dupwa nee piyamosa pisiramo panda saka napala sipu dokona laeyo epeya. Dokopa baame kingi pyambwapala yaka andakare nyiya.
GEN 8:10 Dee yuu yanda ipingi nyepo iso pisipala wayamu doko kambako pena lao nembeya.
GEN 8:11 Yaka doko papyuo karo alemanji dokopa isa olipi yoko mende pora pyao nyepala kapuso soo laeyo epeyamo kandeya. Doko kandapala ipwa doko soko otalamolyamo lao siya.
GEN 8:12 Dopa piyasa yuu gii yanda ipingi mende kambako iso karapala yaka doko kamba nembeyamo dokopa kapu kyuo dee epa nalu naya.
GEN 8:13 Noa baa ee kana 601 karapeyamopa ee kana mupwa kanda soo pyaka siyamo yuu gii mupwa dokopa ipwa sokoya. Noa baame sipu dokona kambu nyuo kakondapala yuu doko olasi siyamo kandeya.
GEN 8:14 Kana lama yuu gii akalisa lama ipisu yanda ipingi dokopa yuu doko olo oteya.
GEN 8:15 Olapeyamo dokopa Anatumi Noa lamaiyuo lao,
GEN 8:16 Emba etenepa ikinyimoo ikinyi dupwana endape sipu doko yaki nyuo neta parami.
GEN 8:17 Embame lete bange rara peparae yakape menape bange panga panga papingi kuki dupwape nakama yuu muu dupwana ikyane manjo wai kiso pauinya lao lanyuo pare, leya.
GEN 8:18 Leyamo dokopa Noa etengepa ikinyingi dusipape ikinyingi dusipana endape neta peyami.
GEN 8:19 Dee mena dupwape bange panga panga papingi dupwape yakape kata papingi bange peparae mende kaeya nao rara mendaki dokore larapu lili pyuo neta peyami.
GEN 8:20 Dokopa Noa baa Kamongona laokana pyare leya. Lapala mena yakape nakamba nenge dokore nyepala kana pyare dokona pyao kiso mukinyi nembo maiya.
GEN 8:21 Dokopa Kamongo rendamu keyange doko nyepala baa monarename dopa pyuo suu pyao leya. Nambame wambunya koo dokona lao yuu muu dupwa dee kamba kokwa see naro. Nakamba ene andama epenge dokopa monana suu pingi dupwa kooko paleta karenge. Nambame lete palenge bange dupwa peparaekokwa sipunu dopa pyuo dee kamba kokwa see nalu nao naro, leya.
GEN 8:22 Isa panda yuupi mee seramuli pyuo soo paramo mange dupwana ee wara pingipi angi manjo nengepe kupwa pingi kanape isasa pingi kanape apu epengepe painyi pingi kanapekukwa korakamape dupwanape mende ota nara, leya.
GEN 9:1 Anatumi Noa baape banya ikinyingi dupwape kando elyape keta palyuo karena lao lamaiyuo, Nakamame wambu wai kiso nyuo jingi parape pyarami dokome yuu pandape dupwa minyarambu nyera, leya.
GEN 9:2 Mena rara dupwape yaka rara dupwape yuunya panga panga papingi bange kuki dupwape kota petena oma dupwape nakambame wambu kando inyimungu pako serami. Dupwa peparae emba keta joo kaelyo, leya.
GEN 9:3 Wambo nenge yoko pyuo andenge dupwa jiyukande. Epapu bange peparae kata papyuo lete karenge dupwa nyuo narami lao joo otelyo.
GEN 9:4 Jilyuko doŋo minju dupwa letena renge ranjama palepale naa narami lao mawa pii palyilyu. Wambunya ranjama dokome letena renge palenge dokona pii andake palamo.
GEN 9:5 Mena mendepe panda wambu mendemepe mendali pyara ramo doko nambame kando laro. Wambu mendeme wambu yango pyao kumakara ramo baa opetae kumarako ingilyamo.
GEN 9:6 Mendeme wambu yango mendena ranjama pyao kulimbwakamira ramo dokopa wambu yango lapome banya ranjama isingi pyao kulimbwakamiramiko ingilyamo. Anatumi wambu baa range yale wasiyamo renge dokona lao dopa pira ingilyamo.
GEN 9:7 Nakamame jingi para pyao wai kiso nyuo malu manjaraminyi dupwame yuu pandape dupwana malu wakasa ingyuo kararami.
GEN 9:8 Anatumi Noamoo banya ikinyingi dupwa pipya lamaiyuo dopa leya.
GEN 9:9 Nakamamoo nakamana para pyao para dupwa keta kana minyuo lalu lao lenge pii mende lao palyakalyo.
GEN 9:10 Doko emba role pyao sipunya palyuo potemo epeyami lete karenge peparae yaka dupwape mena rara peparae dupwape kando dopa pyuo leto.
GEN 9:11 Dokona lete karenge bange peparaepe wambu peparaepe ipwame pyaope panda yuu muu dupwa ukiaki minyuope dee pii nara lao lalu lao leto.
GEN 9:12 Anatumi dee lao, Namba nakambamoo lete bange nakama pipya karaminyi dupwape wambu enakanarengya ando kararami dupwa ketape kana minyuo lalu lao leto lao lasaka pili lao
GEN 9:13 nambana kau puiya dokome kopa dokona isa yuupa kanya mauwa palyakalyo.
GEN 9:14 Nambame yuu dokona kopa serono dokopa kau puiya doko soo maro laramo kandarami.
GEN 9:15 Dokopa nakama wambupi dee lee renge bangepe dupwa opetaepe ipwa dokome deeko sipurao pyao kumaka nalu naro daaŋa lao nambamoo nakama pipya kana minyiyu kande lao suu pyaro kararo.
GEN 9:16 Karapala puiya kopa rakapana seramo kandaro dokome namba Anatumi lee renge bangepe dee isa wambupi pipya kana minyuo leyama kande lao suu pyaro, leya.
GEN 9:17 Anatumi Noa lamaiyuo, Nambame isa pandana lete bange silyamo dupwa kando kana minyuo pii lalu lao leto dokona puiya dokome lasaka pyuo sera, leya.
GEN 9:18 Noana ikinyingi sipu dokona piso potemo epeyaminyi dusipa kingi mende Seme lenge mende Ame lenge mende Japete lenge. (Dokona Ame baa Kenanena rakange.)
GEN 9:19 Noana ikinyingi dusipa isa wambu peparae para pyao peya dupwana rakange kyawa ingiyami.
GEN 9:20 Noame ee yulu pyuo dokopa wambu mendeme isa girapo wara pii nayaminyipa baame isa girapo ee andake ingyuo kanda soo wara piya.
GEN 9:21 Dokome ipwa waene waso napala kyawa sisingi bolombalo leyamosa banya komau anda dokona papara luu palyuo siya.
GEN 9:22 Dopa pyuo paleyamo dokopa Ame akali Kenanena rakange dokome epo waa kando kandeya. Kandapala kamanda epo banya yangonge lama dolapo lamaiya.
GEN 9:23 Dokopa wane Seme Japetepame komau mende nyepala nakambana lange dokona reto lumbwa lumbwa minyuo mata nae nae papala rakange papara paleyamo doko kandasarambano lapala nakambana lenge kambu kapu kyaro karo komau dokome papara siyamo dokona yambe pyakamiyambi.
GEN 9:24 Noa baa lenge rapala wane enakana dokome kandalamo lyamo lao siya. Sepala baa keta pii mende lamaiyuo lao,
GEN 9:25 Kenane baa koo keta palira. Banya wane yangonge dolapona kendemande ingyuo karara.
GEN 9:26 Dee Kamongo ketae pyambwamana. Baa Semena Anatu ingyuo pelyamo. Kenane baa Semena kendemande ingyuo para.
GEN 9:27 Anatumi Japetena rara dupwa andakinya lao dee banya para pyara dupwa Semena rara dupwa pipya yalya kando kararaminyipa Kenane baako Japetena kendemande inginya, leya.
GEN 9:28 Ipwa pete sokwapeyamo dokopa Noa baa ee kana 350 nembo kareya.
GEN 9:29 Dee banya ee kana nyuo pyaso ingyuo karapala baa enakana kumuya.
GEN 10:1 Noana wane rema dusipa Seme Ame Japete dusipame ipwa sokwapeyamopa enakana wane mandeyaminyi rara ingyuo peya dupwa
GEN 10:2 Japetena ikinyingi kingi dupwa dakena palamo. Goma Mekoke Matai Japana Tupale Meseke Tirase.
GEN 10:3 Gomana ikinyingi dupwa Asikenasi Oripate Tokama.
GEN 10:4 Japanana ikinyingi Elisa Tasisi Kitimi Dotanimi.
GEN 10:5 Dokona piso wambu ipwa kota pete repeta palenge wambu ingyuo panda wakale wakale dupwana raeyo palyuo peyami. Wambu dupwa Japete baa rakange kyawa ingiyamopa banya wane dupwame pao rara kingi larapu ree palu ingyuo palyuo peyami. Yuu panda wakale dupwana pao pii nakama rangena wakale wakale lao kareyami.
GEN 10:6 Amena ikinyingi dusipana kingi Kusi Isipi Puti Kenane lenge.
GEN 10:7 Kusinya wane mandeya dusipa Sepa Apila Sapita Orama Sapitika. Orama baame Sepa Detanepa mandeya.
GEN 10:8 Kusi baame Nimirote mandeya. Nimiroteme kanda soo rara malu dupwana akali andake porai wakasa ingyuo kareya.
GEN 10:9 Anatumi nyisiyamo dokona baa isa panda dupwana mena nulipi neyamo dokopa papu pii nao embone embone karo angi keta pyao nao pyuo kareya. Renge dokona mendeme menarae lenge angi pilyamo dokopa Anatumi nyisiyamosa Nimirote piyamo dopa pyuo pilyamo, lenge.
GEN 10:10 Baa wambo yuu Sina dokona yuu taone Bapele Ereke Akate dusipana iso kareya.
GEN 10:11 Dokona piso baa yuu Asiria dokona papala yuu taone andake Ninepa Oriyapotia dee Kala lenge dusipa waso piya.
GEN 10:12 Dopa pipala yuu taone kamame andake mende kingi Oresene lenge doko Kalapa Ninepa dolaponakanya dokona waso piya.
GEN 10:13 Akali Isipi baame mandeyamo dupwa Lutimi Anamini Leapimi Napitumi
GEN 10:14 Patirusimi Kapitorimi lenge dusipa mandeya. Isipi mandeyamo dokona mende kingi Kasilusimi lenge doko Pilisitia wambunya rakange kyawa ingyuo peya.
GEN 10:15 Akali Kenane baa wambo wane Saitone manjipalaenakana Ete mandeya.
GEN 10:16 Rara dupwa Jepusi wambu Amo wambu Gukase wambu
GEN 10:17 Ipi wambu Aki wambu Sini wambu
GEN 10:18 Apate wambu Semari wambu Amati akali rara dusipana baa Kenane rakange kyawa ingyuo peya. Enakana Kenanena wambu dupwa palyuo raeyami.
GEN 10:19 Dokopa nakamana yuu lili kingi Saitone dokona karo pao Gera pena penge kata dorena dusa ingyuo yuu kingi Gasa doko singi. Yuu Sotoma silyamo dorena ingyuo kata pao Gomora Atama Sepoimi dusipana piso pao Lasa dokona lili piya.
GEN 10:20 Wambu dusipana Ame baa rakange kyawa ingyuo kareya. Nakama rakange lili pyuo pii wakale wakale lengenyili pyuo rara kingi larapu pao nakamana yuu kareyami dupwana letamo.
GEN 10:21 Akali Seme Japetena yangonge porai doko baa Epa wambunya rakange kyawa baame wane wanake dusipa mandeya.
GEN 10:22 Elame Asu Apakesate Luti Arame dusipa mandeya.
GEN 10:23 Arame baame Usa Uli Geta Masi dusipa mandeya.
GEN 10:24 Apakesate baame Sela mandeya. Sela baame Epa mandeya.
GEN 10:25 Epa baa wane lama manjo wambo doko rara dupwabolombalo ingyuo lili pyuo peyami dokona kingi Peleke leya. Kingi Peleke doko lili pingi dopale lenge. Enakana dokona kingi Jokitane leya.
GEN 10:26 Jokitane baame wane Alomotate Selepe Asamapete Jera
GEN 10:27 Atorame Usale Dikila
GEN 10:28 Opale Apimayale Sipa
GEN 10:29 Opiya Apila Jopape dusipa peparae mandeya.
GEN 10:30 Nakama yuu andape paleyaminyi doko yuu mende kingi Mesa lenge dokonapiso pao yuu Sepa neta epenge dorename ingyuo yuu kyau pyalya pyana pingi dokona palyuo liti piyami.
GEN 10:31 Akali kingi pyasi palamo dusipana Seme baa rakange kyawa ingyuo kareya. Nakama rakange lili pyuo pii wakale wakale lengenyili pyuo rara kingi larapu pao nakamana yuu kareyami dupwana letamo.
GEN 10:32 Noana ikinyingi dupwame wane mandeyami dupwa ree palu wakale wakale rakange kyawanakingi larapu rara wakale wakale ingyuo suku pyuo palu peyami. Ipwa sokwapeyamopa wambu dusipameko wane manjo pauiyami dupwa rara kingi larapu yuu muu dupwana peyami.
GEN 11:1 Yuu muu dupwana peparae wambu dupwame pii raramendaki lao kareyaminyisa pii wakale wakale ingyuo paa naya.
GEN 11:2 Dokopa wambu dupwa neta epelyamo dorena palimwa karama peyami dokopa yuu Sina dokona yuulama keyange mende siyamo kando nyepala dokona papala paleyami.
GEN 11:3 Karapala dokopa pii mende dopa pyuo leyami. Yuu lapo nyepala kana semene inginya lao isare dokona poraiyuo kiso wasamanale, leyami. Dopa pyuo lapala kana nyuo bange lapo wakaiya yale kana rambu larama lao nyuo reteyamiko.
GEN 11:4 Retapala dokopa nakamame lao, Namwa yuu muu dupwana wakale wakale bolombalo lao pasasaramaŋa dokona daaŋa lao namwana kingi ketae pena lao epapu namwame yuu taone andake pyuo dee anda londe mende yake doko kando nyinya lao pyuo pimana, leyami.
GEN 11:5 Dokopa Kamongo doko isa epapala akali dupwame yuu taonepe anda londepe piyami dupwa apa pilyamipi lao kandalana epeya.
GEN 11:6 Epokandapala Kamongome dopa pyuo leya. Kanda, nakama pii mendaki lao rara mendakyako ingyuo karapala yulu andake kanda soo pilyaminyi. Enakana mende pinya lao suupyarami ramo doko yakara pirami ingya nalyamo.
GEN 11:7 Dokona lao nakamame yango mendeme mendena pii doko see nanaleŋe lao nakamana pii dupwa wakale wakale lenale ukiaki minyala isa lupyuo monale, leya.
GEN 11:8 Anatumi dopapyuo bolombalo lao pena leyamosa nakama yuu taone piyaminyi doko yaki nyuo kaepala yuu muu dupwana ralo peyami.
GEN 11:9 Kamongome nakamana pii ukiaki minyapala yuu pandape dokona piso wambu yuu muu dupwana bolombalo lao pena leyamo dokona yuu doko kingi Bapele lenge.
GEN 11:10 Dapwa akali Semena manjo para pyao peya. Ipwa sokwapeyamopa enakana ee kana lama epo papeyamo dokopa Seme ee kana 100 nembo karo wane Apakesate mandeya.
GEN 11:11 Apakesate manjo nyiyamopa enakana ee kana 500 dusipana karo dokopa wane wanakepe lapo opetae konda pyuo mandeya.
GEN 11:12 Apakesate baa ee kana 35 nembo karapala enakana wane Sela mandeya.
GEN 11:13 Manjipala enakana Apakesate ee kana 403 dusipana karo dokopa wane wanakepe lapo opetae konda pyuoko manjo kareya.
GEN 11:14 Sela baa ee kana 30 nembo karapala enakana Epa mandeya.
GEN 11:15 Epa manjipala ee kana 403 dusipana karo wane wanakepe opetae konda pyuo mandeya.
GEN 11:16 Epa baa ee kana 34 nembo karapala dokopa Peleke mandeya.
GEN 11:17 Manjipala ee kana 430 dusipana karo dokopa wane wanakepe opetae konda pyuo mandeya.
GEN 11:18 Peleke baa ee kana 30 nembo karapala baa wane Uru mandeya.
GEN 11:19 Manjipala ee kana 209 dusipana karo dokopa wane wanakepe lapo konda pyuo mandeya.
GEN 11:20 Uru baa ee kana 32 nembo karapala baa Seruku mandeya.
GEN 11:21 Manjipala ee kana 207 dusipana karo dokopa wane wanakepe lapo konda pyuo mandeya.
GEN 11:22 Seruku baa ee kana 30 nembo karapala Neo mandeya.
GEN 11:23 Manjipala ee kana 200 dusipana karo dokopa wane wanakepe lapo opetaeko mandeya.
GEN 11:24 Neo baa ee kana 29 nembo karapala Tera mandeya.
GEN 11:25 Manjipala ee kana 119 dusipana karo wane wanakepe opetae konda pyuo mandeya.
GEN 11:26 Tera baa ee kana 70 nembo karapala Aporame Neo Arane dusipa mandeya.
GEN 11:27 Tera banya wane mandeyamo dupwana kingi mende Aporame Neo Arane dusipana rakange doko kareya. Arane baame Lote mandeya.
GEN 11:28 Arane baa banya rakange Tera kumapa nayamopa yuu banya range kingi Ua lenge Kalitia wambu karenge dokona wambo kumuya.
GEN 11:29 Aporame Neopa enda nyiyambi. Aporame banya etenge doko kingi Sarai lenge. Neo baa enda kingi Milika lenge nyiya. Enda dokona rakangena kingi Arane lenge dokomeko wane Milika Isikapa mandeya.
GEN 11:30 Enda Sarai baa wane manja nao mee ingi poraiyuo pote ingyuo peteya.
GEN 11:31 Akali Tera baame ikinyingi Aporamemoo banya ikinyingi Aranena wane Lotemoo Aporamena etenge Saraimoo nakamana yuu kingi Ua lenge Kalitia wambu palenge doko yaki nyepala yuu Kenane panya peyami. Papala yuu mende kingi Arane lenge dokona pao kando nyepala paleyami.
GEN 11:32 Tera baa ee kana 205 nembo yuu Arane dokona karapala kumuya.
GEN 12:1 Kamongome Aporame lamaiyuo dopa leya. Embena yuupi rakangepe rara ree palupi yaki nyepala yuu panda lasaka piru dokona pare.
GEN 12:2 Dokopa embena rara doko andake ingyuo para. Emba keyange keta paliri laro dokopa embena kingi ketae paramo dokome embena kingi lapapu wambu dupwa elya pyuo karena larami.
GEN 12:3 Wambu lapome emba elyape keta pisarami dupwa nambame nakama elyape ketako pisaro. Dopa pirunupape wambu lapome emba koo keta palyarami dupwa kooko keta palyaro. Wambu rara wakale wakale dupwa embapa lapolapo lao elyapeketa pisirami, leya Anatumi.
GEN 12:4 Aporame baa ee kana 75 nembo karapalayuu Arane yaki nyuo peya. Kamongo leyamuli pyuo Aporame sepala Lotepa role pyaopeyambi.
GEN 12:5 Banya etenge Saraimoo banya yangongena ikinyingi Lotemoo pinji bange peparaepe kendemande wambu lapo yuu Arane dokona baa role pyao kareyamidupwa opetaepe nyepala kata nyuo yuu Kenane panya peya.
GEN 12:6 Kenane sukusa dokona papala yuu Sikeme dokona yuu More isa yapasi karenge dokona repeta paleyami. Yuu gii dokopa Kenane wambu dupwa yuu dokona palyuo kareyami.
GEN 12:7 Kamongo dokome Aporame kareyamo dokona epo maro lapala lamaiyuo lao, Yuu dake nambame embena wane manjo para pyao eparene dupwana ingyuo paraŋa lao jero, leya. Dopa leyamo dokopa Aporame baame Kamongona lao kana pyare lakamiya.
GEN 12:8 Dokopa enakana baa sipuro papala yuu kyau mendena yuu taone Betele neta pyakaenge dorena siyamo dokona peya. Yuu taone Betele doko neta anda penge dokona soo dee yuu mende Eyai lenge neta potomenge dorena soo pingi kanya dolapona baa komau anda pipala paleya. Palipala dokona baame kana pyare lapala Kamongo lakandeya.
GEN 12:9 Dee baa sipuro dusa palipa dasa palipa pyuo pao yuu Nekepe dorena ingyuo panya peya.
GEN 12:10 Yuu gii dokopa yuu Kenane dokona lopo andake siyamosa Aporame baa yuu Isipi donorena ingyuosiyamo dokona yuu gii kuki lama palyuo karalana peya.
GEN 12:11 Yuu Isipi makelili dokona yalo panya karo dokopa banya etenge Sarai lamaiyuo lao, Emba see. Emba enda keyange elyape au pingi.
GEN 12:12 Dokona ingyuo Isipi akali dupwame emba kandapala nambana etenge lamo lapala namba pyao kumakapala emba pyaa narami, leya.
GEN 12:13 Dokona ingyuo emba nambana pemalengeŋe lape. Larene dokopa emba suu pyaraminyi dokome namba kyawa minyuo laresa namba keyange ketapalyuo kararo, lao lamaiyuokondali piya.
GEN 12:14 Dopa lapala yuu Isipi sukusa peyambi dokopa Isipi akali dupwame banya etenge doko kinyi angi auwo kandeyami.
GEN 12:15 Dokopa kiŋi Peraona role pyao karenge akali dupwame enda doko kandapala au pingende petamo lao kiŋi doko lamaiyami. Dokona lao enda baa nyuo lanyuo kiŋinya anda dokona peyami.
GEN 12:16 Peraome enda doko rae maipala Aporame elyape keta piso mena sipisipipi memepe bulamakaope mena dongepe kamelepe dee kendemande akali lapope maiya.
GEN 12:17 Dopa piyamopape Peraome enda Sarai nyiyamo dokona lao Kamongome Perao baa ketape banya wambu dupwa keta anga ikyane koo dupwa kiso maiya.
GEN 12:18 Dopa piyamosa kiŋi dokome Aporame epena lapala piso soo lao, Embame namba kando akinde pipisi? Enda doko embena etenge lao akipamo namba langi napisi?
GEN 12:19 Apa pipyasa baa embena pemalengeŋe lao karapisi? Dopa pyuo lapi dokome nambana etenge inginya lao nyipu. Epapu enda dolo range jilyu. Nyepala puu lao ralinyi nembeya.
GEN 12:20 Dokopa kiŋi dokome banya akali dupwame Aporame Saraipa dee banya bange peparaepe pipya yuu doko yaki nyuo neta lanyuo pao nyuo nanesa nembena lamaiya.
GEN 13:1 Aporame banya bange peparae nyepala etengemoo Lote role pyao Isipi yaki nyepala yuu Nekepe dulurename peyami.
GEN 13:2 Baa uso kamongomena sipisipi meme bulamakaope dee kana golo kulingipi malu mee reto kareya.
GEN 13:3 Baa dusa palipa dasa palipa pyuo pao Nekepe yaki nyuo Betele dorename wamba Betele Eyaipa anda kanya paleyamo dokona dee pao kando nyiya.
GEN 13:4 Baa wambana kana pyare leyamo dokona papala Kamongo lakandeya.
GEN 13:5 Dokopa akali Aporamepa role pyao peyambinyi akali Lote doko banya mena sipisipipi memepe bulamakaope dee ree palu wambupi dupwame andakyuo peya.
GEN 13:6 Nakamba mena malu minyiyambisa yuu mendaki dokona pakao kararambi ingya naya.
GEN 13:7 Dokona lao Aporamena mena rapu pingi akali dupwape Lotena mena rapu pingi akali dupwa pipya pyakandeyami. (Mange dokopa Kenane wambu dee Perisi wambupi palu kareyami.)
GEN 13:8 Dokopa Aporame Lote lamaiyuo, Nambwa mendare dokona nambwana yulu akali dupwa pyakandaraminyi kapa daa.
GEN 13:9 Dokona lao rekya lao wakale wakale bonale. Emba rangeme yuu dupwana mende kando nyerenepa emba kyai rename nyere ramo namba rolae rename parowale. Dee rolae rena nyere ramo namba kyai rename nyerowale, leya.
GEN 13:10 Leyamo dokopa Loteme kandalyuo kandeyamo dokopa yuu Jotane lama lama doko mena mena lao ipwa guu lanyi pyakamo Kamongona ee dopale ingyuo yuu Isipi yale ingyuo yuu Sowa dorena ingyuo soo peyamo doko kandeya. (Doo piyamo doko wamba Kamongome yuu Sotoma Gomorapa pyao kokwa sepa nayamopa piya.)
GEN 13:11 Dokopa Lote baa yuu Jotane lama peparae rangeme rombo palyuo nyepala neta pyakaenge dorena ingyuo peyamopa dopa pyuo nakamba rali rali pyuo peyambi.
GEN 13:12 Dokopa Aporame baa yuu Kenane dokona mee kareya. Lote baa yuku pao yuu lama lama dokona taone singi dupwana palyuo yuu Sotoma dokona repeta lili pyuo paleya.
GEN 13:13 Dokopa akali yuu Sotoma range dupwame kopetame pyuo Kamongona yulu dupwa uki palyuo kareyami.
GEN 13:14 Lote dopa pyuo Aporame rekya lao papeyamo dokopa Kamongome Aporame lamaiyuo lao, Emba karene dokona karapala donorena kando dalyarena kandalyuo kando dumurena kandambu kando dee dambirena kandambu kando pinya, leya.
GEN 13:15 Lapala yuuemba kandarene dupwa peparae nambame emba jeronopa dee embena para pyao manjirinyi dupwana ingyuo sulu sera.
GEN 13:16 Nambame embena para pyao manjirinyi dupwa yuunya sinjimu dopale inginyi pyambwakaro. Mendeme yuunya sinjimu dupwa yaka lao kandenge ramo dokome embena para pyaramo dupwa kapa yaka lao serami lyakande.
GEN 13:17 Doko nambame yuu doo kandarene dupwa jeroŋo dokona epapu sipurapala yuu peparae dupwana lambu laeyo pyuo papyuo kando karape.
GEN 13:18 Dopa pyuo leyamo dokopa Aporame yuku pao yuu Eperone dokona akali Mamarena isayapasi repeta paleya. Palipala dokona Kamongona lao kana pyare leya.
GEN 14:1 Yuu mendepe kiŋi Amirapele yuu Sina range doko baapa kiŋi Ariyoko Elasa rangepe kiŋi Ketoleyoma yuu Ilame rangepe kiŋi dusipa sipurapala yanda pela epeyami.
GEN 14:2 Epapala dokopa Bera yuu Sotoma range kiŋipi Besa yuu Gomora range kiŋipi Sinape yuu Atima range kiŋipi Semepa yuu Sepoimi range kiŋipi dee yuu Bela kingi mende Sowa lengena kiŋipi dusipa pipya yanda piyami.
GEN 14:3 Doo kiŋi kingi paki dusipame yuu lama Sitimi (Kota Pete Kumasi lenge) dokona nyuo pyasapala lao palyiyami.
GEN 14:4 Nakama ee kana akalisa ipisu lama dusipana kiŋi Ketoleyomame isiyamopaisarena ingyuo kareyami. Dopa pyuo kareyaminyipape ee kana akalisa ipisu rema dokona nakama baa kando kamba lao mona wakale palyuo peyami.
GEN 14:5 Dee ee kana akalisa ipisu kisima dokopa Ketoleyomame banya kiŋi yango dupwa nyepala doloma pyao nyuo isa palyuo epo Orepaimi wambu yuu Asetote Kanaimi palengedupwa pyao Susimi wambu yuu Ame palengepe Emimi wambu yuu Sapekiriataimi palengepe
GEN 14:6 Ori wambu nakambana yuu kyau Siya lenge dokona palengepe pyao pyuopao yuu Ele Parane yuu muiyane lili singi dokona pao pyaka siyami.
GEN 14:7 Dokona piso kapu kyuo epo dokopa yuu Ene Misipate kingi mende Katese lenge dokona Amaleke wambu pyao kui lanyi palyapala dee Amo wambu yuu Asasone Tama range dupwa pyaoko piyami.
GEN 14:8 Dopa pyuo wambo piyaminyipa Sotoma range kiŋi dokope Gomora range kiŋipi Atima range kiŋipi Sepoimi range kiŋipi yuu Bela kingi mende Sowa dokona kiŋi dokope potemo epeyaminyipa Sitimi lama dokona pyuo kareyami.
GEN 14:9 Kiŋi kingi paki dusipame dee Ilame range kiŋi Ketoleyomape mende Goimi range kiŋi Taitale lengepe mende kiŋi Amirapele yuu Sina rangepe mende kiŋi Ariyoko yuu Elasa range dokope kiŋi kisima dusipa pipya yanda pimwaiyami.
GEN 14:10 Pyao kareyaminyipa Sotomadee Gomora range dupwape ralo peyami dokopa Sitimi lama dokona ipwa inju yuu wakaiya yale pete siyamo dupwana lungurala pao paleyami dokopa kiŋi rema dusipa yuu kyau dupwana ralo peyami.
GEN 14:11 Dopa pyuo piyasa nyisu petenge dupwame Sotoma Gomorapa wambunya bange keyange dupwa nyuo dee ee apa nao nembopipala peyami.
GEN 14:12 Dopa pyuo nyepala Aporame yangongena ikinyingi Lote lenge Sotoma paleya dokona bange dupwa nyuo baa waiku nyuoko pipala peyami.
GEN 14:13 Dopa pyuo nyuo peyaminyi dokopa enakana akali mende pyakao peyandeme epo Aporame Ipuru akali doko baa Amo akali Mamare lenge dokona isa yapasi repeta paleya doko dopa pyuo pimi lao lamaiya. Akali Mamare dee banya yangonge Esekole Anapa lenge dusipa nakama Aporamena yanda pyuo maiyala penge akali ingyuo kareyami.
GEN 14:14 Dokopa Aporameme banya yangongena wane nyuo peyami leyamo doko sepala banya ree palu mana lamaiyamo akali yandana porai dupwa yeelyo 318 ingyuo nyepala pyao peta pao yuu Dane dokona peya.
GEN 14:15 Dopa pyuo Aporameme yuu dokona papala kukwama banya akali dupwa lili pipala kata kapangu rali rali pyuo nyuonembapala yanda piyami. Dopa pyuo pyao wini pipala peta pao yuu Opa Damasakesa dulurename peyami.
GEN 14:16 Dopa pyuo pyapala bange keyange dupwape Lotemoo enda wanepe dee akali dupwape range nyuo lanyuo epeya.
GEN 14:17 Aporameme kiŋi Ketoleyoma dee role pyao kareyami kiŋi dupwape pyapala epeyamo dokopa Sotoma range kiŋi dokome yuu Sape kingi mende Kiŋinya lama lenge dokona yako lao epeya.
GEN 14:18 Dokopa yuu Saleme kiŋi akali Melekiseteke baa Anatu Ama Ketae dokona purisi ingyuo karengeko dokome borete waenepe lapo Aporamena minyakamyuo epeya.
GEN 14:19 Epapala baame Aporame elyape keta pisinya pyambuo lao, Anatu Ama Ketae yake yuupi wasiyamo dokome Aporame keta mondo lao elyape keta pisinyi pyambwakana.
GEN 14:20 Dee Anatu Ama Ketae dokome embena nyisu petenge dupwa nyuo kingi rakana palyakapyamo dokona lao baa lakandamanale, leya. Dopa pyuo lapeyamo dokopa Aporame baame bange akalisa dupwana pingyuo mendaki yapo nyepa nyepa pyuo Melekiseteke maiya.
GEN 14:21 Maiyamo dokopa Sotoma range kiŋi dokome Aporame lamaiyuo lao, Bange keyange dupwa emba retalaseŋe wambu kiiramo nyipi dupwako range jinya leya.
GEN 14:22 Leyamo dokopa Aporameme Sotoma kiŋi doko lamaiyuo lao, Kamongo Anatu Ama Ketae yake yuupi wasiya doko kando lalu lao leto doko.
GEN 14:23 Nambame puu walepe panda kimbu suu puupi dee embena bange mendepe nyero ingya nalyamo daa lalono, leya. Nyero ramo dokopa embame lao, Nambame Aporame emba kamonganyi nembapu lasareŋe daa, leya.
GEN 14:24 Namba mende range nyii naro. Nambana akalimi apa nami dusipa iki namba keta palenale. Dee yanda pyuo jela imi Ana Esekole Mamaremoo nakamana dupwa range nyinya, leya.
GEN 15:1 Yuumange lama papeyamopa Kamongome Aporame keta pii repa repa pyuo lamaiyuo lao, Aporame emba paka napipi. Namba embena konambe ingyuo karo. Embena yole andake ingyuo paramo nyere, leya.
GEN 15:2 Dopa leyasa Aporame baame isingi lao, O Kamongo Anatu, embame aki mende namba jerese? Namba mee wane manja nao karenge kandapi. Akali Damasakesa range Eliyasa dokome nambana andamuku moyangepe nyera ingilyamo.
GEN 15:3 Embame wane mende namba jii nae kande dokome nambana kendemandeme mandeyami mendeme nambana moyange bange nyera ingilyamo, leya.
GEN 15:4 Dokopa Anatumi pii baa keta isingi lamaiyuo lao, Akali dokome embena moyange bangedupwa nyerande daa. Embena rangena waneme nyera lyakande, leya.
GEN 15:5 Dopa lapala baa kamanda lanyuo papala lao, Emba yakena bui dupwa akipare lao makande pyuo yaka lao kandape. Dopale ingyuo emba keta para pyao pare, leya.
GEN 15:6 Dopa pyuo leyamopa baa Kamongo kapa ingingi lao mona maiyamo dokome Kamongome baarolaeŋe leya.
GEN 15:7 Dokopa Anatumi baa lamaiyuo lao, Namba Kamongo dokome emba Kalitia wambu yuu kingi Ua lenge dokona kareenepa kingi rekya lao yuu dake embena ingyaraŋa lao lanyuo epeyo.
GEN 15:8 Dopa leyamopape Aporame lao, O Kamongo Anatu nambana ingyuo parandelyamo doko apa pyuo soopakana palyarose? lao piso siya.
GEN 15:9 Leyasa Anatumi baa lamaiyuo lao, Bulamakao inya ee kana remana andenge mendepe mena meme inya ee kana remana andenge mendepe sipisipi kalyuwa ee kana remana andenge mendepe yaka wayamu mendepe dee yaka punjinya mendepe pipala minyuo epena leya.
GEN 15:10 Leyamuli pyuo bange peparae dusipa minyuo epeya. Epapala mena dupwa kunjo kyapya kyapya pirapu kyapya mendena mende ketae retapapu pyuo reto piya. Dopa piyamopape baame yaka dolapo lama pyuo kunja napala mee sinya kaeya.
GEN 15:11 Dopa pyuo reteyamopa ulisapumi soo nyela epeyasa pyao ralinyi nembo kareya.
GEN 15:12 Neta anda peyamo gii dokopa Aporame baa luu andake paleyamopa iminjo kondo kondo leya.
GEN 15:13 Dopa pyuo paleyamo dokopa Kamongome Aporame lamaiyuo lao, Embena para pyarene dupwa yuu wakale mendena karala paenge ingyuo parami. Nakama yuu rangena daa. Dokona ee kana 400 randa nao kendemande yulu pyuo kararami doko soo pakana palyape.
GEN 15:14 Dopa pyuo piraminyipape nambame wambu nakama kendemande yulu pyuo karakamirami dupwa kote lao randa mairunupa nakama neta epowale pyuo karo dokopa bange malu nyepala eparami, leya.
GEN 15:15 Dopa piramopape emba range mona pau lao seramopa kapa emapala kumarene malu piraminyipa rora ambasupi kumuyami dupwaketa pare.
GEN 15:16 Amo wambu yulu koo pilyaminyi dokona koo andake ingyuo paramo randa maipengele dokopa ralinyi nembaro. Dokopa embena palu yuu kisima mende ingyuo manjo para pyao nyeparaminyipa dee yuu dake epo nyerami, leya.
GEN 15:17 Leyamopa neta anda pao iminjiyamopa ane pee epengendena isare yangenge dokona sukwa potemo epeyamopa kendapuli rao siyandena mendepa minju kunjasi dusipanapanga panga papiya.
GEN 15:18 Yuu gii dokopa Kamongo dokome Aporamepa kana minyuo pii lalu lao lao dopa leya. Embena wai kisaramo dupwa nambame yuu dake mairuingilyamo. Mairunu yuu doko yuu Isipi lili dokona piso pao ipwa pona andake Yuporisa lenge dokona lili pira lyakande, leya.
GEN 15:19 Akali yuu dokona palengerara dupwana kingi dupwa Kene Kenisi Katimone rarape
GEN 15:20 Iti Perisi Orepaime rarape
GEN 15:21 Amo Kenane Gukase dee Jepusi rarape dupwana yuu dupwa nyuo mairu, leya.
GEN 16:1 Aporamena etenge Sarai lenge doko baa wane manja nao mee pote peteyamopa Isipi range wanake Eka lengende banya anda kendemande yulu pyuo peteya.
GEN 16:2 Dokopa Saraimi Aporame lamaiyuo lao, Namba wane manja nareŋe lao Kamongo dokome ingi poraipyamo peto. Dokona emba nambana kendemande wanake dokonyerenepa baa keta wane mende nambana manjakara, leya. Dokopa Aporameme Sarainya pii doko soo nyiya.
GEN 16:3 Dopa pyuo leyamopa Aporame yuu Kenane dokona ee kana akalisa karapeyamopa banya etenge Sarai dokome kendemande wanake yuu Isipi range Eka doko nyepala Aporamena etenge inginya lao maiya.
GEN 16:4 Dokopa Aporame baa Ekapa role pyao paeyapala ingi anda wane ingiyasa Eka baame kyawa enda Sarai kando semongwanyi nembo peteya.
GEN 16:5 Dokopa Saraimi Aporame lamaiyuo, Namba kando semongwanyi nembo kilya kandelyamo doko emba keta palamo. Nambame kendemande wanake embena nyepakayono dokopa wane palamo mange dokopa namba kandosemongwanyi nembelyamo kandelyo. Dokona Kamongo dokome embapa nambapa apimi ingyuo kopetame pimbwa lao soo rolena, leya.
GEN 16:6 Dopa pyuo leyamopape Aporame Sarai lamaiyuo, Wanake doko embena arapunya isarena ingyuo petamo dokona embame baa kando mende pinya suu pyareneli pyuo piri, leya. Doko sepala Saraimi laiya lao yango palyuo randa maiyamosa baa ralo pyakao peya.
GEN 16:7 Dopa pyuo pao yuu muiyane mendena yuu Sua panya penge kata dusa ipwa guu lao epenge dokona peteyamopa Kamongona aŋala mendeme kando nyiya.
GEN 16:8 Nyepala lao, Eka Sarainya kendemande wanake, Emba anja piso epapala dee anja panya pelese? leya. Dokopa baame isingi lao, Nambana kyawa enda yango peta Sarai doko pakapala wakale ralo panya epano, leya.
GEN 16:9 Leyamopa Kamongona aŋala dokome baa lamaiyuo lao, Embena kyawa enda petamo dokona lambu kapu kyuo paale. Papala banya arapu dokona isarena ingyuo piso anjiki pyuo kendemande yulu pyakamyuo petena leya.
GEN 16:10 Kamongona aŋala dokome konda pyuo lamaiyuo lao, Nambame emba wambu wakasa wai kiso jeronopa mendemepe kando pakana palyuo yaka larami ingya nara.
GEN 16:11 Embena rombanda petamo doko wane ane kyakala pare. Embame wane kingi Isimaele lape. Kingi Isimaele renge doko Kamongome emba randa nyilyane lao kando nyisapya.
GEN 16:12 Baa lamya ingyuo rae lao wambu yango dupwa minyinyi palyili palyili lao karara. Dolomame baa yango palyuwako kararaminyipa baa rara dupwa pipya lakipa nyuo karara, leya.
GEN 16:13 Dokona lao enda dokome Kamongo baa pii lamaiyamo doko kingi lao, Anatu Kandanyi Nembo Karenge, leya. Doko suu pyao, Namba Anatu angi kandapunupape lete pisano kaeyalapa, leya.
GEN 16:14 Dokona ingyuo ipwa kamuo nyingi yuwale doko kingi Bialayaroi lenge. Ipwa doko yuu Katese Beretepa kanya ingyuo singi.
GEN 16:15 Enakana Eka baa Aporamena wane manjakamiya. Mandeyamo doko Aporameme kingi Isimaele, leya.
GEN 16:16 Aporame baa ee kana 86 peyamopa wane doko mandeya.
GEN 17:1 Aporame baa ee kana akalisa mange mendaki ipisu mange mendaki (99) papeyamo dokopa Kamongo dokome baa keta epo nolakapala lao, Namba Anatu Porai Wakasa karo. Embame nambana yulu palengenyili pyuo rolae pyuo karare.
GEN 17:2 Dokopa embapa kana minyuo laramba dokopa embame kapa pyuo nyere dupwa kaiya karara lyakande, leya.
GEN 17:3 Leyamo dokopa Aporame baa pangu siyamopa Anatumi lao,
GEN 17:4 Kandape. Rara malu para pyao paramo dupwana emba rakange kyawa ingyuo pare lao kana minyuo lalu lao leto.
GEN 17:5 Epapu embena kingi Aporameko laraminde daa. Aporakame larami lyakande. Namba emba rara andake malu dupwana rakange kyawa ingyuo parendena lapunu pilyamo.
GEN 17:6 Embame wai kiso malu nyeparenepa emba ketako rara andake ingyuo kapa palyuo para dokona lapo kiŋi akali ingyuo parami.
GEN 17:7 Namba embapa kana minyuo lalu lao lenge pii doko minyaronopa embena enakana manjiri dupwa opetae keta pii doko kulisa ingyuo sulu seramopa dokona nambame nakamana Anatu angingyuo karalu kararoŋo.
GEN 17:8 Yuu mendasa palipa palipa pyuo papyuo karaminyi anda muku yuu Kenane lenge doko nambame emba jeronopa embena para pyarene dupwana sakamira. Dopa pyuokana minyuo lalu lao lapala nambame nakamana Anatu kulisa ingyuo kararo, leya.
GEN 17:9 Anatumi kamba Aporakame lamaiyuo, Embape embena oo mange manjaraminyi dupwanape dee dupwana manjaraminyi dupwamepe nambana kana minyuo pii lalu laolenge doko minyarami.
GEN 17:10 Wane ane manjaraminyi dupwa peparae yanenge kalomanyi nembarami yulu doko embamoo embena para pyaramo dupwame waso minyuo kararami lao leto.
GEN 17:11 Nakama dopa pyuo yanenge awali lao kalomanyi nembaramidokome kana minyuo lalu lao lenge pii doko mawa piro karamo lao panara.
GEN 17:12 Wane manjaraminyipa yuu gii mange lama karo epo paparamo dokopa rangena wanedupwape dee nakamana angi manji narami yuu wakale range wane kana maiyuo ropo pyao nyerami dupwapena yanenge kalomanyi nembarami.
GEN 17:13 Nakamba range manjarami dupwape yuu wakale range wane kaname ropo pyao nyerami dupwape peparae yanenge kalomanyi nembarami. Dopa piraminyi dokome nambana kana minyuo lalu lao lenge pii doko nakambana yanenge dokona lasaka pili laro karara.
GEN 17:14 Doko daaŋa lapala wane dupwana mende yanenge kalomanyi nemba narande ramo doko baa nambana kana minyuo lalu lao lenge pii dokona kamba lao yalo piramo dokome banya wambu yaki nyepala rekya lao neta para.
GEN 17:15 Anatumi Aporakamelamaiyuo, Embena etenge kingi Sarai lenge doko Saraiko laa napala alowa pyuo kingi Sera lare.
GEN 17:16 Nambame baa elyape keta pisinyi pyambwaronopa embena wane mende manjakara. Dopa pyuo baa elyape keta pisirunupa baa rara malu dupwana endangi kyawa ingyuo pisira dee baame para pyaramo dupwana lapo kiŋiingyuo parami, leya.
GEN 17:17 Dokopa Aporakame rangena lenge kambu siyamo dokona pao palipala baa range giyuo lao, Akali ee kana andete mendaki (100) dokome wane kapa manjirape? Dee Sera opetaeko baa ee kana akalisa mange mendaki (90) dokome wane kando nyerape? lao suu piya.
GEN 17:18 Aporakame Anatu kando lao, Embame Isimaele baa kando nambana ikinyingiŋi lao karapili yaka, leya.
GEN 17:19 Leyamo dokopa Anatumi lao, Daaŋa. Embena etenge Sera dokome wane wakale manjakaramopa kingi Aisake lare. Nambame baa keta pii lao kana minyaro doko baapa banya para pyaramo dupwa pipya sulu sera.
GEN 17:20 Isimaelena dokona lao sakao larene doko silyu. Nambame baa elyape keta pisinyi pyambwaronopa baame kaiya karo manjo jingi parape pyao paramopa dupwana akali akalisaipisu lama kamonganyi nembaronopa rara andake ingyuo para.
GEN 17:21 Dopa pyuopirunupape Serame ee kana dumbinya mange dakepa wane Aisake manjira dokona lao baa keta kana minyuo lalu lao lenge pii dake retaro, leya.
GEN 17:22 Pii lao otapala Anatu Aporakame yaki nyepala pulyuo peya.
GEN 17:23 Enakana Aporakame banya ikinyingi Isimaelemoo banya kendemande akali dupwa peparae baa role pyao kareyami dupwape peparae aopa Anatu leyamuli pyuo yanenge kalomanyi nembakamiya.
GEN 17:24 Doo piyamo dokopa Aporakame ee kana akalisa mange mendaki ipisu mangemendaki (99) kareyamopa banya yanenge kalomeyako.
GEN 17:25 Banya ikinyingi Isimaele ee kana akalisa ipisu rema epo pasi doko opetaeko yanenge kalomeya.
GEN 17:26 Yuu gii mendaki dokopa Aporakame ikinyingi Isimaelepa yanenge kalomeyambi.
GEN 17:27 Dee akali baa role pyao kareyami dupwa peparaepe rangena ree palu dokonape kaname ropo pyao yuu wakale range nyiyaminyi akali wanepe opetaeko nyuo pyaso yanenge kalomeyami.
GEN 18:1 Yuu mendepa andowai korakama dokopa Aporakame Mamarena isa yapasi karenge repeta dokona banya komau anda kambu konandawame dokona peteyamopa Kamongo baa keta epo paneyamo kandeya.
GEN 18:2 Baa lenge pendakae lapala kandalyuo kandeyamo dokopa akali rema banya lenge kambu siya dokona roya kareyaminyi kandeya. Kandapala Aporakame anda kambu yaki nyuo makando papala nakama yako lao yuu dokona pangu siya.
GEN 18:3 Sepala dopa leya. Namba embena yulu akalikaro dokona rekya lao paa napipi.
GEN 18:4 Namba ipwa kuki minyuo epena laronopa embena kimbu wate pipala isa renge dokona lungwa lungwa imambu soo pisiri.
GEN 18:5 Emba embena kendemande kandala imi dokona ingyuo namba borete nyuo jeronopa nao ingi palyapala parami, leya. Leyamopa nakamame isingi, Emba letenyili pyuo pipi, leyami.
GEN 18:6 Aporakame Sera andakare peteyamo dokona waiya lao papala lamaiyuo, Palawa keyange dokona sikyali rema dopale nyuo minyapala waso kisare, leya.
GEN 18:7 Lapala baame makando mena karenge dokona papala ikyane ape ape lao rondo lao andengende anga anga lasinde nyepala banya kendemande akali dokona mende maiyamopa waiya lao rapa rapa piya.
GEN 18:8 Dee susu poraipi mee susupi ikyane rondo lasi rapa rapa piyamo dokope nyepala nakama reto maiya. Maipala nao isa lungwa lungwa peteyami dokona role pyao kareya.
GEN 18:9 Nakambame baa piso soo lao, Embena etenge Sera doko apa pipya, leyami. Baame lamaiyuo, Andakare dokona petamo, leya.
GEN 18:10 Dokopa upunili dokona mendeme lao, Nambame yuu gii angi dokopa kamba eparonopa embena etene Serame wane mende manjakara lyakande, leya. Dokopa Sera baa anda kambu dokona akali banya matarena warombo soo peteya.
GEN 18:11 Aporakame Serapa emo kaepala peteyambinyipa Sera baa emo endana pyakame soo piyamo peteya.
GEN 18:12 Dopa pyuo piyamopa Sera pii doko sepala mona anda giinyi pyano lao, Nambapa akali dokopa emo otelyambano doŋo nambame kapa ingyaramo wane doko manjiro lao suu pyao peteya.
GEN 18:13 Dokopa Kamongo dokome Aporakame lamaiyuo, Akipamo Serame giili lapala baa emasi dokome apa pyuo dakepa wane manjiro letase? leya.
GEN 18:14 Kamongome mende pinya saka nangese? Yuu gii angi pyaka seramo ee kana enenge dokona dee eparonopa Sera baa wane manjira, leya.
GEN 18:15 Dopa pyuo leyamopape Serame pakapala lao, Giyapunu pii napya daaŋa, leya. Leyamopa baame isingi lao, Daaŋa embame giyapinyi pipya sipu, leya.
GEN 18:16 Dopa pyuo lapala akali dusipa sipuro peyaminyipa Aporakame role pyao pao yuu Sotoma kandanyi pyanenge dokona karo mapanyi nembeya.
GEN 18:17 Dokopa Kamongome baa range lao, Namba mende pirono doko Aporakame lamai napala kalyamo pirolya silisi laosuu piya.
GEN 18:18 Aporakame dokona banya para pyaramo dupwa rara andake porai ingyara. Rara peparae Aporakamepa lapolapo lao pyuo elya pisarami, leya.
GEN 18:19 Daa. Namba rangeme baame banya ree palu wane wanakepe banya para pyasi wambupi dupwa Kamongona yulu rolaepe kyai rolae lao rolo lenge dupwa iki mana lamaira lao rombo palyiyu. Dokonako rape rape lao pira ramo baa kando pii lalu lao leyamo dupwa banya angi ingyara.
GEN 18:20 Dee yuu Sotoma Gomorapa dokona yulukoo renge palyuo pimisa pii andake palamo namba silyu.
GEN 18:21 Pii malu epelyamo dokona kinyi letamipi lao namba pao kandapala soo rolaro, leya.
GEN 18:22 Dopa lapala akali dupwa dokona piso kapu kyuo Sotoma dorena peyami. Peyaminyipape Kamongo baa Aporakame dokopa mee lama dokona kareya.
GEN 18:23 Karapala Aporakame Kamongo kareyamo dokona repeta papala piso soo lao, Yulu koo pingi dupwapyao kokwa sinyi nembo dokopa keyange pingi mendasipa karaminyi dupwa role pyaonembare lyasili, leya.
GEN 18:24 Rolae pingi akalisa kingi paki (50) kararami ramo nakamana lao yuu andake doko kandapala kyawa minyuo kaeya narese?
GEN 18:25 Koo rolaepa pakao kokwa sinyi nembalena emba yulu dokore nombe nombe petenge kandapi. Emba yuu muu dupwana koo keyangepana lao rolo karenge dokome rolo laa nao wambu koo keyangepe komonda kata palyuo nembarese? leya.
GEN 18:26 Dopa pyuo kongo pyuo leyasa Kamongome isingi lao, Yuu Sotoma dokona wambu rolae pingi 50 pisiraminyi kando nyero ramo doko nakama reke lao yuu pandape doko peparae kokwa see napala kaeyaro, leya.
GEN 18:27 Dopa leyamopape Aporakame dee kamba lao, Nambame kyawa kana palyapala namba doko angi apimi lao karapusa pilyase? Namba mee yuu kuli isare peepe ingyuo dokome lao karalyano, leya.
GEN 18:28 Akalisa kingi paki (50) kara naraminde ramo wambu kingi paki isa pingyuo para ramo dokopa embame yuu taone doko pyao kokwa serese? leya. Baame daa lao, Rolae pingi 45 kararami ramo kokwa see naro ingilyamo, leya.
GEN 18:29 Aporakame dee kambako piso soo, Akalisa kisima kararaminyi kando nyere ramo apa pirisi? leya. Leyasa, Doo 40 kararami ramo dokopa yuu taone doko pyao kokwa see naro, leya.
GEN 18:30 Dee kamba lao, O Kamongo emba dopa leene lao imbwa napipi. Mende larowale. Akalisa rema iki kararaminde ramo apa pirisi? leya. Isingi lao, Akalisa rema ramo doko pyaa naroko, leya.
GEN 18:31 Dee lao, Namba isa akali dokome Kamongo embena lenge kambu dokona pii lao karo dokona akalisa lama ramo doko apa pirisi, leya. Leyasa Kamongome isingi lao, Wambu rolae pingi 20 kararami ramo nakamana reke lao kokwa see naro, leya.
GEN 18:32 Leyamopa dee kamba lao, O Kamongo yuu mendaki iki larowale imbwuasare, leya. Lapala wambu akalisa ramo dokopa apa piri? leya. Kamongome isingi lao, Wambu akalisa kararami ramo nakamana reke lao yuu taone doko pyao kokwa see naroko doŋo apa pilyase? leya.
GEN 18:33 Kamongome Aporakame pii lamaiyuo otapala baa panya piyamo dokona peya. Peyamopa Aporakame baa kapu kyuo anda peya.
GEN 19:1 Dokopa alemanji aŋala dolapo yuu Sotoma dokona epeyambi. Dokopa akali Lote baa yuu Sotoma kame kambu repeta peteya. Peteyamo dokopa aŋala dolapo epeyambinyi doko kandapala baa roya karapalayako lao dokopa yuu dokona pangu siya.
GEN 19:2 Nambana kamongo anelapo, nambanakambana kendemande akali ingyuo karo dokona nakamba kapu kyuo epapala kukwa dakepa nambana anda epo kimbu wate pipala palipale. Wamba yangama sipurapala katanyuo parambi, leya. Dopa pyuo leyamo dokopa nakambame lao, Daa mee kata dokona kamanda paliramba, leyambi.
GEN 19:3 Leyambinyipape baame poraiyuo kongo pyuo leyamosa nakama kaeyapala kapu kyuo banya anda kolando peyambi. Dokopa baame nenge andake wasakamyuo borete isi pyambwa nange kisakamyuo piyamopa nao peteyambi.
GEN 19:4 Dopa pyuo ene palinya peteyaminyipa yuu Sotoma taone dokonaakali kuki porakaipi yama pyuo epo banya anda dokona karo awali leyami.
GEN 19:5 Karapala Lote dokona kyakale lao, Akali lama epapu alemanji embena anda epambinyi dolapo anja petambinyi. Nakamba lanyuo kamanda eparenepa namwa nakamba kando semanaleŋe, leyami.
GEN 19:6 Dokopa Lote baa kamanda potemo papala kambu dowa palyapala
GEN 19:7 baame lao, Nambana yangonemoo nambame nakama langyuokondali pyuo leto. Yulu koo dokona pinya wangu lakapala pii napengeleŋe, leya.
GEN 19:8 Lapala lao, Kandalapa. Nambana wanenge akali nyii nangende lama petambinyi. Nambame lanyuo epakarono dokopa nakama pinya letaminyilipyuo pirami. Akali mee upunili dolapo nambana anda epakalambinyi dokona mende pii nalapape, leya.
GEN 19:9 Dopa leyamopape nakamame lao, Emba kata jii. Embamee endame manjisi yuu wakale range epo karenge dokome namwana koo epengepe laopakana palyuo larepe? Epapu akali dolapo kaeyapala emba keta moŋo jerama, leyami. Lapala nakamame akali Lote baa poraiyuo kaeyo suu lanyi kambu dokona repeta pyambuyamisa lalyalana piya.
GEN 19:10 Dopa piyaminyipape akali andakare peteyambi dolapome kingi pyale lapala Lote baa andakare ipyuo nyepala kambuupi leyambi.
GEN 19:11 Dokopa akali wanyane poraipi anda kambunya kareyami dupwa lenge yamole minyiyasa imi imi isa kanyinginya piso raleyami.
GEN 19:12 Dokopa akali epo banya anda paleyambi dolapome Lote piso soo, Embena palu lapo yuu dakena karamisi? Ikinyipi imwangepe wanengepe kareyami kande doko yuu dake yaki nyuo nyisa wakale lanyuo pena, leyambi.
GEN 19:13 Yuu dake repeta pyao kokwa solomano. Renge doko Kamongona lenge kambu dokona pii andake palipyasa baame kokwa sinyi nembala pupwa lao Kamongome nambwa peeyapyasa epelyambano, leyambi.
GEN 19:14 Dokopa Lote baa wanenge nyelanamokoriya pingi akali dolapo lamaiyuo, Yuu dake yaki nyepala neta pupwale. Kamongome yuu dake oo kokwa selapyamo lamo, leya. Dopa leyamopape baame mee kyambo minyako pyuo letamo lao suu piyambi.
GEN 19:15 Yangao epeyamo dokopa aŋala dolapome Lote pyalana pyuo lamaiyuo lao, Sipurapala embena etene wanenepe dae petaminyi dusipa nyepala lanyuo puu. Yuu dake pyao kokwa seramo dokopanakama dokona kumuo kaki rambe rambe paliserami, leyambi.
GEN 19:16 Leyambinyipape baa pande paa nayamosa Kamongome kondome kumuo sakao kareyamopa aŋala dolapome baamoo wanenge etengepe kii minyuo nyuo yuu taone andake dokona netarename nembeyambi.
GEN 19:17 Mapanyi nembo karo dokopa lamaiyuo, Kumaserambiŋi dee lanao kandana naoko yuu pau panda lama lamape dupwana imambu soo kara naoko kyau dupwana waiya lao pao anji nyuo pena leyambi.
GEN 19:18 Dokopa Loteme isingi lamaiyuo, Nambana kamongo anelapo nakamba letambinyi dokokapa daaŋa, leya.
GEN 19:19 Nakamba namba nakambana kendemande doko embone piso kando epe kando sakao lete nyimbi doko doŋo nambame yuu kyau dokona panya parono dokopa isare randa dokome nyuo rambe rambe palyaramo kumasasaro.
GEN 19:20 Kandalapa. Donorename yuu taone kuki doko repeta ingilyamo. Yuu panda mee kukili ingilyamo dokona paronopa namba lete wai pyao nyera, leya.
GEN 19:21 Baa isingi lamaiyuo, Kapa lalyaneŋe. Embame panda letene doko kokwa seronde daa.
GEN 19:22 Dokona makando lete pare. Emba paparene dokopa pyaro lao iso kararo, leya. Yuu doko taone kuki ingiyamosa dokona kingi Sowa leyami.
GEN 19:23 Neta pyakaeyo rapeyamopa Lote baa yuu dokona paopyaka siya.
GEN 19:24 Dokopa Kamongo dokome yuu Sotoma Gomorapana yake kata lumbwa lao pipala apu epengedopale ingyuo kana dupwa isare paleta isa peeya.
GEN 19:25 Dopa pyuo yuu taonepe andape yuu pau lama lama dokona wambupi ee nengepe andeyamo dupwape peparae pyao minjuku minyinyi nembeya.
GEN 19:26 Dopa pyuo piyamo dokopa Lotena etenge enakayamo dokome kapu kyepala apa pilyamo lao kandeyasa baa rao kana kota ingiya.
GEN 19:27 Dokopa ene yuu yangalana endenge siyamopa Aporakame sipurapala Kamongopa pii lao kareyambi yuu dokona dee kamba pao kareya.
GEN 19:28 Dokona karoyuu Sotoma Gomorape dee yuu pau lama lama rulyiŋa dokope kandano kandeyamo dokopa isare andake rapala kyau lao koo kana lokwasi lao lele isarepe rao pulyuo epenge dopale ingyuo reyamopa kandeya.
GEN 19:29 Anatumi wambu pau rulyiŋa dokona paleyami dupwa kokwa sinyi nembo karo Aporakamena lao sakapala Lote kaki rambe rambe paleyamopape yapanyi nembakamiya.
GEN 19:30 Dokopa Lote baa yuu Sowa dokona palinya pakapala wanenge dolapo pipya yuu kyau dorena pulyuo papala kana anda mendena palyuo kareyami.
GEN 19:31 Dokopa wanenge mupwa dokome banya kakingi enakana doko lamaiyuo lao, Nambwana rakane emakapyamopa yuu muu dupwana endame akali nyingi doko suu pyao akali mende anjarae nyeramba lao sakao leya.
GEN 19:32 Nambwame mendende pimbanaleŋe. Nambwame baa waene ipwange malu mairambanopa role pyao palipala baa keta wane kando nyerambanopa nambwana ree palu dokona para pyaraŋa kae, leya.
GEN 19:33 Lapala yuu gii kukwa dokopa nakambame rakange doko ipwa waene nena lao maiyambi. Dokopa wanenge mupwa dokome role pyao palipala peyamopa rakangeme dopa pyuo epo pwuamo lao see nao kamenge paleya.
GEN 19:34 Dee dokona yangama dokopa wanenge mupwa dokome enakana doko lamaiyuo lao, Kwuaka kukwa dokopa namba rakanepa palipuŋu dokona epapu kukwa opetaeko waene ipwange malu mairambanopa emba role pyao palipaale. Dokopa namwana rara rembe naa nana lao rakane keta wai kiso nyimbana, leya.
GEN 19:35 Dopa pyuo lapala dokopa kukwa dopako pyuo kambako rakange ipwa waene maiyapala wanenge enakana doko pao rakangepa role pyao paleya. Palipala sipurao peyamopape dopa pyuo epo pwuamo lao rakangeme see nao kamenge paleya.
GEN 19:36 Dopa pyuo pipala Lotena wanenge dolapo nakambana rakangemoo pipya palipala rombanda wane ingiya.
GEN 19:37 Dopa piyamopa wanenge mupwa dokome wane kando nyepala kingi Moape, leya. Doko baa Moape rara dupwana rakange kyawa ingyuo dakepa pelyamo.
GEN 19:38 Enakana dokome opetaeko wane manjipala dokopa kingi Benami, leya. Dakepa baa Amone rara dupwana rakange kyawa ingyuo pelyamo.
GEN 20:1 Dokopa piso Aporakame Nekepe yuu panya pao yuu Katese Suape kanya dokona paleya.
GEN 20:2 Enakana Aporakame baa yuu Gera dokona palyuo banya etenge Sera doko banya pemalengeŋe leyasa yuu Gera range kiŋi Apimeleke dokome baa nyiya.
GEN 20:3 Dopa piyamopa yuu gii kukwa mendepa Anatumi baa paleyamo dokona kombeyame epo lamaiyuo lao, Emba enda dae nyipinyi doko akali nyinginde nyipiŋi emba kumare lyakande, leya.
GEN 20:4 Dopa leyamopape Apimeleke baa angi enda dokopa role palipa naya dokona baame lao, O Kamongo koko pii naraminyipa embame mee okoso wambu pingiko lyasili.
GEN 20:5 Baa rangena pii dokome nambana pemalenge leyamopaenda opetaeme lao nambwa pemalengeko lao laa nayambisi? Nambana mona anda rena koo mendelyamo lao sepala pipunde daa mee kamenge ambeambe pipu, leya.
GEN 20:6 Dokopa Anatumi kombeya dokome dee lamaiyuo, Kinyi, namba keta koo pisareŋe enda dokopa role pyaa kaeyape lao lapusa pipya, leya.
GEN 20:7 Epapu akalingi range keta pyamalyarenepa baa poropeta akali kandapi dokome loma sakaramopa mee lete karare. Dee range maiyakami nare ramo doko embape embena ree palupi peparae kumarami, leya.
GEN 20:8 Dokopa Apimeleke baa wamba yangama kukwa sipurapala banya yulu pingi akali peparae kee lao nyepala doo piyamo dupwa peparae lamaiyamosa nakama pakame kumuo yamarangyuo kareyami.
GEN 20:9 Dokopa Apimelekeme Aporakame epena lapala, Embame namwa kando akinde pipisi? Nambame aki kokonde emba kando pipundena embame nambape nambana rarape dupwa keta yulu koo andakedoko minyuo ipisi? leya. Lapala Apimelekeme Aporakame kando lao, Embame doo pipinyi doko pii nangende pyaanelyamo.
GEN 20:10 Akindi suu pyapapala pipisi? leya.
GEN 20:11 Aporakame isingi lao, Yuu dakena wambu mendeme Anatu suu pyao laramo doko paka nao karaminyi dokome namba pyapala nambana enda doko nyeraminyi lao lapu, leya.
GEN 20:12 Baa kinyi angi nambana pemalengeko doŋo. Nambana anyi angi dokome manja nange. Endangi mendenako rakaneme mandeyamo doko nyiyu.
GEN 20:13 Anatumi namba rakanena yuu andape dupwa yaki nyuo yuu wakale dupwana puu leyamo dokopa nambame enda doko lamaiyuo, Embame nambapa lao mona reto kondare ramo doko yuu wakale dupwana parambano dokopa namba banya pemalengeŋe lena lao lamaiyu, leya.
GEN 20:14 Dopa lapeyamo dokopa Apimelekeme enda doko range Aporakame maiyakamiya. Maiyakamyuo karo dokopa mena sipisipi bulamakaope dee kendemande wambu lapope kamba piso maiyuo piya.
GEN 20:15 Maipala lao, Yuu doloma peparae nambana silyamoŋo. Emba mona pyaramo kandareramo panda dokona maso palipi, leya.
GEN 20:16 Lapala baame Sera kando lao, Nambame embena pemalene kana kulingi taosande mendaki (1,000) maiyakalyo doko Seraemba keta koo mende pii napilyamo lao wambu peparaena lenge kambu dokona polasisinya lao pilyu, leya.
GEN 20:17 Dokopa enakana Aporakamena etenge Sera ketamende piyamo dokona lao Kamongo dokome Apimeleke banya ree palunya enda dupwa ingi porayasa wane manjirami ingya naya.
GEN 20:18 Dokopa Aporakameme Apimelekena lao loma sakamiyasa Anatumi kendemande enda dupwape banya etenge dokope pipya wane mandeyami.
GEN 21:1 Kamongo dokome Sera keta epapala mende piroŋo lao lalulao leyamuli pyuo piya.
GEN 21:2 Dokona Sera wane ingiyamopa Aporakame andapaesa Anatumi gii dokopanaŋa leyamuli pyuo wane maiyamo mandeya.
GEN 21:3 Serame wane manjakamiyamo doko Aporakameme kingi Aisake leya.
GEN 21:4 Dokopa Aporakame yuu gii mange lama karo epo papeyamopa Aporakame ikinyingi Aisakenayanenge Anatumi pinya leyamuli pyuo kalomeya.
GEN 21:5 Aporakame baa ee kana andete mendaki (100) epo papeyamopa ikinyingi Aisake mandeya.
GEN 21:6 Dokopa Serame lao, Anatumi namba keta gii pyuo pilyamo dokona baame nambapa dopa pyuo pyaamo lao serami wambu dupwame giyalya giyana pirami, leya.
GEN 21:7 Serame lao, Api mende Aporakame kando lao, Andapae kaki palenge namba yale dokome wane manjakamiralya silisi larase? Dopa pipyamopape nambame Aporakame andapaesa wane manjakamilyu, leya.
GEN 21:8 Dokopa wane Aisake ando otapala anju naneya. Dopa piyamo yuu gii dokopa Aporakameme mena nengepe nyuo kuiyuo pati andake piya.
GEN 21:9 Mange dokopa Serame kandeyamopa Isipi enda Eka Aporakame nyepala mandeya wane dokome Aisakepa role pyao male lao kareyambinyi kandeya.
GEN 21:10 Kandapala baame Aporakame lamaiyuolao, Kendemande enda dake ikinyingipa ralinyi nembape. Kendemande endana ikinyingi dokopa nambana ikinyingi Aisakepame rakangena moyange bange dupwa role pyao mokwa soo nyii narambi, leya.
GEN 21:11 Dopa pyuo leyasa wane Isimaele doko banya ikinyingiko dokome Aporakame baa soo rae mai naya.
GEN 21:12 Dopa piyamopape Anatumi Aporakame lamaiyuo lao, Kendemande enda Eka wane pipya dokona mona nembo kara napala Serame laramuli pyuo pipi. Aisakena wambu para pyaramo dupwa iki embena ingyarami.
GEN 21:13 Dee dopako pyuo kendemande endana wane embena ingilyamo dokona lao baa keta manjira dupwa opetaeko rara andake wasaro, leya.
GEN 21:14 Yangama dokopa Aporakame wamba kukwa sipurapala nenge borete lapope kipwapee ipwa paleta mendepe nyepala enda Eka maiya. Maipala wane nyuo mata kyaunya pisapakamila pena leya. Dopa pyuo pena leyasa baa yaki nyuo peyambi. Papala yuu muiyane Biasipa lenge dokona ralo papyuo kareyambi.
GEN 21:15 Papyuo karo dokopa ipwa peena peteyamo doko nao otapeyambinyi dokopa saka napala enda dokome wane doko isa rengendena retapala baa mee mende dumusale peya.
GEN 21:16 Dopa pyuo enda range lao, Wane kumalena pilyamo doko kumaramo kando narowale, leya. Sakao peteyamopa wane doko pii poraiyuo lapala ee leya.
GEN 21:17 Wane ee lao siyamo doko Anatumi siya. Dokopa Anatunya aŋala mendeme yake panda piso Eka kando pii lamaiyuo, Eka emba apa pipyasa sakao petepe? Paka napipi. Anatumi wanena ee lapyamo doko selamo.
GEN 21:18 Dokona sipurapala wane doko kupyuo nyela puu. Nambame baa keta rara andake ingyuo wai kisinyi pyambwaro, leya.
GEN 21:19 Lapala Anatumi banya lenge pono lakamiyasa ipwa pete mende siyamo kandeya. Kandapala pee dokona kamuo nyuo simbwapala minyuo pao ipwa lapo wane doko maiya.
GEN 21:20 Anatumi wane doko keta nyiso kareyamopa yuu muiyane Parane dokona palu baa ando papala yanda soo nuli nenge akali porai ingyuo kareya.
GEN 21:21 Dokopa banya endangimi yuu Isipi enda mende nyakamiya.
GEN 21:22 Mange dokopa Apimelekepa dee Pikole banya ami akali mupwa dokope dolapome pipala pao Aporakame lamaiyuo lao, Emba yulu peparae pipinyi dupwana Anatu doko role karamo kande.
GEN 21:23 Dakepa dokona lao embame Anatunya lenge kambu dokonakingi lao dokopa nambape nambana wane wanake dupwape dee nambana para pyaro dupwa kando panga see naro lao lalu lao lare, leya. Nambame embapa rolae pyuo kareyo dokonako palyuo emba dapwana karare mange dokopa nambapa rolae pyuo karare, leya.
GEN 21:24 Pii doko sepala Aporakameme dokonako palyuo piru lao lalu lao laokingi ketae nembeya.
GEN 21:25 Dokopa Aporakame banya ipwa yuwale kyasisi doko Apimelekena kendemande akali dupwame nyakamiyamisa suku lao Apimeleke lamaiya.
GEN 21:26 Apimelekeme lao, Doo piminyi doko apimi pipya lao namba doko see nalyano. Embame wambo langi napinyi dokona namba see napunu doko epapu walu lao silyu dokoko, leya.
GEN 21:27 Dopa leyasa Aporakameme mena sipisipi bulamakaope lapo nyuo Apimeleke maiyamopa akali dolapo mawa piinde lao kana minyuo reteyambi.
GEN 21:28 Dokopa Aporakame sipisipi inya yakane yanda ipingi liti pyuo yapo nyiya.
GEN 21:29 Dokopa Apimelekeme Aporakame lamaiyuo, Sipisipi inya yakane yanda ipingi doloma liti pipinyi doko akinde pilini lao renge doko soo pakana palyanalyo, leya.
GEN 21:30 Leyamo dokopa baame lao, Sipisipi inya yanda ipingi dusipa namba keta embame nyepala dokopa ipwa pete singi yuwale dake nambame kyasipya lao panena lao pilyu, leya.
GEN 21:31 Nakamba kana minyuo lalu lao lao reteyambi dokona lao yuu doko kingi Biasipa leyambi.
GEN 21:32 Dokona lao nakamba yuu Biasipa dokona pii dopa pyuo lao palyuo kana minyuo lalu lao leyambi. Lapala dokopa Apimeleke dee Pikole yanda singi mupwa dokopa Pilisitia yuu dokona range lambu peyambi.
GEN 21:33 Dokopa Aporakame isa mende kingi tamarisiki lengende yuu Biasipa dokona wara pipala Kamongo Karalu Karenge Anatu dokona kingi lakando kareya. (Kingi Biasipa doko Ipuru pii ipwa pete kingi pii lalu lao lenge dopale.)
GEN 21:34 Dokopa Aporakame yuu gii malu Pilisitia wambunya yuu dokona palyuo kareya.
GEN 22:1 Enakana dokopa Anatumi Aporakame makande mende pyuo leya. Dokopa Aporakameme, Namba dae karo, leya.
GEN 22:2 Baame lao, Embena wane ikinyi mendaki iki mona wakasa retenge Aisake kandapi doko nyepe. Nyepala lanyuo yuu Moraya papala yuu kyau mende nambame lasaka pirunu dokona pyao kisakare, leya.
GEN 22:3 Dopa leyasa Aporakameme wamba yangama sipurao banya mena donge nyepala petenge bange kwuapala wanyane akali lamape banya wane Aisakemoo pipya role pyao nyuolanyiya. Isa kisaramo dupwa waiyuo soo kata nyuo Anatumi leyamo yuu dokona peyami.
GEN 22:4 Pao yuu gii rema dokopa Aporakameme lenge nyuo kandeyamo dokopa yuu angi doko nanesale siyamo kandeya.
GEN 22:5 Dokopa Aporakame baame wanyane akali dolapo kando lamaiyuo, Nakamba dakena mena dakemoo karalapape. Nambapa wane dakepa donosale Anatu lakandala pelyambano. Papala nakamba karambinyi dokona eparamba, leya.
GEN 22:6 Dopa lapala Aporakameme isa waisi yangarambi dupwa nyuo Aisakeme sinya lapala baame isarepe wua kemape minyiyamo peyambi.
GEN 22:7 Dokopa Aisakeme banya rakange Aporakame kando lao, Nambana rakane Aporakame, leya. Dokopa Aporakame isingi lao, Namba range soo karo, leya. Leyamo dokopa Aisakeme lao, Isare isape iki lyamoŋo mena sipisipi angi kiso mairamba doko anja karase? leya.
GEN 22:8 Aporakame lao, Rakane, Anatu baa rangeme sipisipi pyao yangalapase lao jera ingilyamo, leya. Dokopa dee laparae peyambi.
GEN 22:9 Nakamba Anatumi yuu lamaiyamo mare dokona epeyambi. Dokopa Aporakame kana pyare lao isa dupwa lambuo laeyo rolae reteya. Retapala banya ikinyingi Aisake puu pyapala kana pyare lasinya isa reteyamo dokona ketae reteya.
GEN 22:10 Dopa pyuo Aporakameme ikinyingi pyalana kingi palyapala wua kema kola nyepeya.
GEN 22:11 Dopa piyamopape Kamongona aŋala mende yake dokona karo, Aporakame, Aporakame, leya. Aporakame isingi lao, Dae karo, leya.
GEN 22:12 Baame lao, Wane doko pyaope mende pipa napipi. Embame ikinyingi mendaki nambame jiyunu doko mona yaepapala julu joo jipisa dokome Anatu mupwa lao suu pyao karengende doko panelyamo, leya.
GEN 22:13 Dokopa Aporakame lenge pendakae lapala dokopa mena sipisipi kali mende banya nenge dolapome isako mendena palya minyapala yukaro siyamo kandeya. Kandapala pao nyepala ikinyingi kiso mainya suu piyamo panda dokona mena sipisipi doko pyao kiso maiya.
GEN 22:14 Dokona lao Aporakameyuu doko kingi Kamongome Kando Nyiso Jera dopale, leya. Dakepape mende Kamongona yuu kyau dokona jeramo nolakara lao karaminyi.
GEN 22:15 Dee yuu lapo pyuoyake dokona piso Kamongona aŋala dokome Aporakame kee lao lapala lamaiyuo lao,
GEN 22:16 Namba rangena kingi lao kingi ketae nembo lalu lao leto. Emba nambame wane mendaki jiyunu doko kaka soo joo pipinyi dokona
GEN 22:17 nambame emba elyape keta pisaronopa embena rara andakyara. Embena rara wambu yakenabuipi ipwa pota kee kanape silyamo dopale ingyuo para. Dokona yanda pimwai dupwa nyuo anamasi minyuo kararami.
GEN 22:18 Embame nambana lapunuli pyuo warombo soo pipinyi dokona lao embena manjo wai kiso nyerene dupwa keta rara doloma elyape keta piso parami, leya.
GEN 22:19 Dokopa Aporakame kapu kyuo pao wanyane akali dolapo kando nyiya. Kando nyepala nakama role pyao yuu Biasipa dokona peyambi. Papala Aporakame yuu Biasipa dokona range palyuo kareya.
GEN 22:20 Dopa pyuo piyamo dokopa banya yangonge Neo enda Milika nyingi dokopame wane wanake mandeyambinyi lamaiyamo doko siya.
GEN 22:21 Mupwa doko Usa mandeya lapo pyuo banya yangonge Busi repo Kemele dupwana kingi Aremenarakange doko.
GEN 22:22 Enakana Kesete Aso Pilitaso Jitilapi
GEN 22:23 dee lumwa pyuo Betyuele mandeya. Betyuele baa Orepekena rakange ingyuo peya. Wane mange lama karo dusipa Aporakamena yangonge Neona etenge Milika lenge dokome mandeya.
GEN 22:24 Dee banya kamba enda Uruma lenge dokome Tepa Game Tasi Makamoo manjo piyako.
GEN 23:1 Sera baa ee kana 127 peteya. Pisipala kumuya.
GEN 23:2 Baa yuu Kiriatapa kingi mende Eperone lenge yuu Kenane dokona kumuyasa Aporakame ee lao kumanda peteya.
GEN 23:3 Baa kumanda piso sipurapala Iti akali dupwa lamaiyuo leya.
GEN 23:4 Yuu dake nambana daa. Namba karala paenge ingyuo epo nakama pipya karamano kande. Dokona lao nakamame yuu lapo jelapape dokona nambana endemo kumasi doko malu piruli, leya.
GEN 23:5 Dokopa Iti akali dupwame Aporakame isingi lamaiyuo lao,
GEN 23:6 Emba namwana kamongo andake ingyuo karene dokome namwana pii sepe. Embena enda kumasi doko namwana malu anda keyange mendena malu pyaase. Malu piri dokona namwa mendeme malu anda wasisi mendepe daa larama ingya nalyamo, leyami.
GEN 23:7 Leyaminyi dokopa Aporakame sipurapala ayemba yande lapala yuu range akali dupwa kando kapa lamaiya.
GEN 23:8 Nambana enda kumasi doko yuu dakena malu piro dokokapa lao masarami ramo doko Soyana ikinyingi Eparone piso sakarami.
GEN 23:9 Doko Makepelana kana anda banya ingyuo silyamo doko banya ee wandepa nemba nemba dokona singi doko jinya lamaiyakarami. Nakama kando pisiraminyipa jeramo dokopa yuu dokona kana manda manjo ropo pyao mairu dokopa malu anda doko nambana ingyara.
GEN 23:10 Dokopa Eparone baa yuu taone kame kambu mare yuu wato lenge dokona Iti akali dupwa pipya role pyao soo peteya. Soo pisipala Aporakame kando isingi lamaiya.
GEN 23:11 Kamongo emba letene doko daa. Nambana pii soo pisipi. Nambana wambu dupwa peparae kando kararaminyipa embena enda malu pyaseŋe ee wandepa kananda palepale mee jero dokopa embena malu anda ingyuo sera leto, leya.
GEN 23:12 Dokopa Aporakame yuu range akali dupwa kando ayemba yande lapala ange lao yako leya.
GEN 23:13 Dopa pyuo lao peteyaminyi dokopa Aporakamebaame Eparone lamaiyuo, Embame yuu doko namba joo lee kande doko dake sepe. Yuudokona nambame bange lapo jeroleŋe embame namba keta ŋee lao nyepe. Nyerenepa nambame enda doko yuu dokona malu piruli, leya.
GEN 23:14 Dokopa Eparoneme isingi lamaiyuo,
GEN 23:15 Nambana kamongo, mee yuu doko doŋo kana andete kisima (400) poopengeleŋe. Doŋo aki mendeme namba keta kanya liti pilyase? Kananda dokona enda doko malu pirinyi, leya.
GEN 23:16 Leyamo dokopa Aporakame kapa lapala Eparoneme Iti wambu peparae soo peteyaminyipa kana jinya leyamuli pyuo Aporakame kana kulingi andetekisima (400) nyuo yuu doko ropo pyao maiya.
GEN 23:17 Dokopa yuu mende kingi Mamare neta potemo epenge dorename Eparonena yuu Makepela singi dokona ee wandepa peparae isape kanandape dupwa maiya.
GEN 23:18 Iti wambu dupwa peparae yuu taone kame kambu wato lenge panda dokona kando peteyaminyipa yuu doko Aporakamena inginya lao maiyami.
GEN 23:19 Dopa pyuo maiyaminyi dokopa yuu Kenane dokona yuu kingi Mamare lenge neta potemenge dorena singi doko kingi mende Eparone lenge yuu Makepela dokona kananda singi dokona Aporakame banya etenge Sera malu piya.
GEN 23:20 Dokona Iti akali dupwame yuupi malu anda dokopa Aporakame banya malu anda ingyuo sinya lao maiyami.
GEN 24:1 Dopa pyuo karo pao Aporakame baa ando alemo ingyuo kareya. Karapala baame yulu peparae piyamo dupwana Kamongome elyape keta pisinyi pyambuyamopa piya.
GEN 24:2 Dokopa Aporakame banya kendemande akali mupwa banya bange peparae rapu pyuo karenge doko epena lapala dopa lamaiya.
GEN 24:3 Embena kingi ketae nembapala Kamongo Anatu yake yuupi peparaena karenge dokona kingi lapala Kenane enda akalipi nambamoo pipya role pyao karamano dupwana wanengemende nambana wane dokona etenge ingyaraŋa lao nyuo mai naroŋo lao lalu lao lena leya.
GEN 24:4 Dopa pyuo yuu dakena enda nyakami napala nambana yuu muru rara angi palenge ree palu range dokona papala nambana ikinyingi Aisakena enda mende kotapala nyakamiri, leya.
GEN 24:5 Leyamo dokopa kendemande akali dokome isingi lamaiyuo, Enda dokome banya anda yuupi yaki nyuo nambapa role pyao yuu dakena epa naro lara ramo doko embena ikinyingi doko emba yuu yaki nyepala epeene dokona kamba lanyuo parose? leya.
GEN 24:6 Dokopa Aporakame baa isingi lamaiyuo, Embame nambana ikinyingi lanyuo paa naroŋo lao suu pyao kando karape, leya.
GEN 24:7 Kamongo Anatu yake panda karenge dokome rakanena anda yuupi namba mandeyaminyi dokope dee nambana ree palu dupwape keta yaki nyuo epo dokopa baame namba lalu lao lao langyuo, Embena wane manjirinyi dupwana yuu dake jeroŋo, leya. Dokona lao aŋala mendeembena kata wapwakana lao nembara dokopa nambana ikinyinginya enda mende dokonapao nyakamiri, leya.
GEN 24:8 Dee enda dokome embapa role pyao epa naro lara ramo doko wamba lalu lao laramba lambwa kandapi dokona pii mende pali naraŋa kaeyaramba. Dokona wane dokoko lanyakao yuu dokona paka nare, leya.
GEN 24:9 Leyamo dokopa kendemande akali dokome kingi ketae nembapala banya kamongo Aporakame pinya leyamuli pyuo piruŋu lao lalu lao leya.
GEN 24:10 Dokopa kendemande akali dokome banya kamongona mena kamele akalisa nyepala deeenda yapo nyakamirali bange dupwa nyuo pipala baa kata nyuo pao yuu Mesopotemiadokona yuu taone dokona akali Neo palenge dokona peya.
GEN 24:11 Yuu kwualyamoenda dupwa ipwa kamwala epenge gii dokopa baa yuu Neo nemba nemba dokona kando nyepala ipwa pete yuwale kyaso retenge mare dokona banya mena kamele dupwa alyekelye pyuo luu palyiya.
GEN 24:12 Palyapala loma soo lao dokopa, O nambana akalimupwa Aporakamena Kamongo Anatu embame epapu namba keta embone pisakape. Embamenambana akali mupwa Aporakame mona reto embena pii lalu lao lee kande doko kaeya nare, leya.
GEN 24:13 Namba ipwa pete yuwale kyaso retenge mare dokona karo kande. Dokona yuu taone dakena akali palenge dupwana wanenge dupwa ipwa kamwala epelyaminyi.
GEN 24:14 Enda mapwae dokona mende eparamo doko kando nambame ipwa narowale embena pee dokona kamuo jinya lao laro. Dokopa enda baame isingi langyuo, Emba narene dokopa embena mena kamele dupwa ipwa maiyakaroko lara ramo dokopa Aisakena enda emba rombo palyiinyi dokoko karakana. Dopa piri ramo nambana akali mupwa Aporakame doko embame yuu peparae mona reto baa keta lalu lao leene dokominyaro karenge lamo lao sero, leya.
GEN 24:15 Baa loma soo otapa nayamopa Betyuelena wanenge Orepeka banya ipwa pee langena soo epeya. Orepekana rakange Betyuele lenge banya endangi Milika baa akali Neo nyingi. Neo baa Aporakamena yangonge ingyuo karenge doko.
GEN 24:16 Baa enda mapwae pepo kareta akalimi warendapa nangende epeyamo auwa kandeya. Baa ipwa pete kyasisi dokona papala penge doko kamuo simbwapala minyuo epeya.
GEN 24:17 Dokopa kendemande akali dokome makando pao baa kando nyepala lao, Ipwa lama embena penge dokona naro jinya, leya.
GEN 24:18 Leyamo dokopa enda dokome lao, Nambana kamongo kapaŋa nalale, leya. Lapala waiya lao penge doko banya kingi dokome nyisa nyuo minyaro kareyamopa baa ipwa neya.
GEN 24:19 Napeyamo dokopa Orepeka baame lao, Nambame embena mena kamele dupwa opetaeko ipwa minyuo epo maiyakarono napenyale, leya.
GEN 24:20 Dokopa waiya lao mena kamele ipwa maingi dokona kulimbwapala deeko makando pao ipwa pete dokona kamuo nyepala epo mena kamele peparae maiyakamiya.
GEN 24:21 Dokopa akali baame pii mendepe lumbu laa napala elya kalo kandokondali pyuo piso baa Kamongome kata lanyuo ipya kandapi doko embone piso jepelyase mee laosuu pyao peteya.
GEN 24:22 Mena kamele dupwa ipwa napeyami dokopa akali dokome kana golome wasisi uriŋi mende nyuo wanakena gyaa isakuli ingyuopalyakamyuo dee kisambu golome wasisi lama banya kingi dolapona pisakamyuo piya.
GEN 24:23 Dopa pipala akali dokome piso soo lao, Embena rakane doko api lengese? Banya anda nambamoo nambana akali dupwa pipya kapa ingyuo palirama panda silyase? leya.
GEN 24:24 Leyamo dokopa wanake dokome lao, Nambana rakange Betyuelelenge akali Neopa enda Milikapana ikinyingi, leya.
GEN 24:25 Namwana anda yuupi dokona menana nenge kapa soo nakama palirami panda silyamoko, leya.
GEN 24:26 Leyamopa akali doko wapambu pii pyapala Kamongo lakando lao dopa leya.
GEN 24:27 Nambana akali mupwa Aporakamena Kamongo Anatu dokome Aporakamepa banya lalu lao leyamo pii doko yaki nyii nao minyaro karo mona reto karenge dokona kingi ketae palena. Dee namba keta Kamongome kata lasaka pipyamo Aporakamena ree palu epo kando nyilyu, leya.
GEN 24:28 Dokopa wanake mapwae baame pao endangimoo wambu anda range dupwa dopa pyuonde pilyamo lao lamaiya.
GEN 24:29 Dokopa Orepekana pemalenge Lapane lenge doko ipwa pete singi yuwale dokona makando Aporakamena kendemande akali kandala peya.
GEN 24:30 Lapane baame pemalengena gyaana palyingi bangepe kingi kisambupi dupwa kando dee Orepekame, Akali dokome dopa pyuo lalamo leyamo dupwa sepala baa Aporakamena kendemande akali doko mena kamele retaro ipwa pete singi mare kareyamo dokona kandala peya.
GEN 24:31 Papala lao, Kamongona elyape keta karenge akali doko emba akipamo kamanda karese? Nambame embapalyuo dee mena kamele palyuo piri dupwa rapa rapa pipakalono, leya.
GEN 24:32 Dokopa akali doko andakare peya. Peyamopa Lapaneme mena kamele matana bange manjo epeyami dupwa ramo nyisa nyepala mena dupwa nenge maiya. Maipala enakana baame ipwa minyuo epo Aporakamena kendemande akali dokope dee role pyao epeyami akali dupwapena kimbu wate pinya lao maiya.
GEN 24:33 Maipala banya nenge nena lao retakamiyaminyipape baame lao, Namba napa nao piso pii manjo ipu dokona laowape? leya. Leyasa kapa lena leyami.
GEN 24:34 Leyamisa baame lao, Namba Aporakamena kendemande akaliŋi, leya.
GEN 24:35 Kamongo baame nambana akali mupwa elyape keta pisiyamopa kamongapala bange peparaeme sipyamo karamo. Sipisipi bulamakaope kana kulingipi golope kendemande enda akalipi mena kamelepe mena osepe maiya.
GEN 24:36 Banya etenge Sera emapanda wane manjakamiyasabange dupwa peparae baa keta sera ingilyamo.
GEN 24:37 Dokona lao nambana akali mupwa dokome namba langyuo, Kenane enda akalipi nambamoo pipya role pyao karamano dupwana wanenge mende nambana wane dokona etengeŋe lao nyuo mai naroŋo lao lalu lao laa, leya.
GEN 24:38 Dopa pyuo dakena nyepa naonambana yuu muru rara angi palenge dokona papala nambana ikinyinginya enda mende kotapala nyakamiri, leya.
GEN 24:39 Dopa pyuo langiyamopa nambame baa kando isingi lao, Enda dokome namba role pyao epa nasasara leyosa
GEN 24:40 dee baame langyuo, Kamongo namba iso karenge dokome banya aŋala mende emba kata wapuo lanyinya lao peyaramopa embame nambana wane dokona enda mende nambana rangena wambu rakanena ree palu dokona nyakamiri, lapya.
GEN 24:41 Lapala, Nambana rara dokona piso wanake jii narama daa larami ramo dokopa pii mende pali naraŋa kaeyaramba lapya, leya.
GEN 24:42 Epapu ipwa guu lenge dokona epo piso Anatu piso soo, O nambana akali mupwa Aporakamena Kamongo Anatu embame nambana yulu dupwana embone pisakape.
GEN 24:43 Namba ipwa pete yuwale kyaso retenge mare dokona karo dokopa enda mapwae mende eparamo dokopa nambame ipwa narowale embena pee dokona kamuo jinya lao piso serono dokopa
GEN 24:44 baame isingi langyuo, Emba narene dokopa embena mena kamele dupwa ipwa maiyakaroko lara ramo dokopa Aisakena enda emba rombo palyiinyi doko karakana lao loma sipu.
GEN 24:45 Dopa pyuo monana ateŋa pii lao karapu gii dokopa Orepeka ipwa penge langena soo epo ipwa kamuo nyingi yuwale dokona lupyuo papala kamuo nyipya. Dokopa, Namba ipwa naro jinya, lamaipu.
GEN 24:46 Baame waiya lao penge isa nyuo karapala, Nalale. Nambame mena kamele dupwa opetae maiyakarowale, lapya. Nambaipwa napunupa baame mena kamele dupwa opetae maipya.
GEN 24:47 Dopa piyamopa nambame baa piso soo, Embena rakane doko api lengese? lapu. Baame isingi lao, Nambana rakane doko Betyuele lenge baa akali Neopa enda Milikapana ikinyingi lapya. Dokopa nambame banya gyaana uriŋi kana golome wasisi pyambwakamyuo kisambu kinginya pisakamyuo pipu.
GEN 24:48 Dokopa ayemba ponga napala Aporakamena Kamongo dokona lakando mona maiyu. Baame kata rolae lanyuo ipyamopa Aporakamena yangongena wanenge banya ikinyinginya kando nyakamilyu lapu, leya.
GEN 24:49 Dokona lao embame nambana akali mupwa keta kumuo maiyalana laope daa laope rolo langipi. Dokopa namba koto pupengele ingyaramo dupwana paro, leya.
GEN 24:50 Dopa leyasa Lapane Betyuelepame isingi lao, Kamongo keta mende ipyamo doko nambwame koo keyangepe laramba ingya nalyamo.
GEN 24:51 Dokona Orepeka daa petamokandelene doko Kamongome lapyamuli pyuo baa nyepala lanyuo pao embena akali mupwa Aporakamena ikinyinginya etenge inginya, leyambi.
GEN 24:52 Aporakamena kendemande akali dokome pii doko sepala yuunya pangu soo Kamongo ange lao lakandeya.
GEN 24:53 Dokopa kendemande akali dokome yanengena kalya pingi bange kana golope kulingipimi wasisipi komau keyangepe dupwa nyepala Orepeka maiyuo dee endangipemalengepe kamame kana malu penge bange dupwa maiyuoko piya.
GEN 24:54 Dokopa baa role pyao epeyami dupwa pipya ipwa nengepe nao paleyami. Yangama sipurapala, Namba range mapanyi nembalapa, leya.
GEN 24:55 Dopa leyamopa Orepekena pemalenge endangipame wanake doko yuu gii akalisape mende pisipala parako daa, leyambi.
GEN 24:56 Dopa leyambinyipape baame lamaiyuo, Yuu mendeko yango laa nalapape. Kamongome nyiso kata raeyasa epeyo dee Aporakame petamo dokona parowale kaeyalapape, leya.
GEN 24:57 Nakambame lao, Wanake epena lapala piso semana, leyambi.
GEN 24:58 Dokopa Orepeka epena lapala piso soo, Emba akali dake role pyao parese? leyami. Dokopa baame, Waa paro, leya.
GEN 24:59 Dokopa nakambanapemalenge enda Orepeka dokope dee nakamana palu dokona yulu pyakamingi endemo dokopa role pyao Aporakamena kendemande akali dupwa pipya pena leyami.
GEN 24:60 Dopa lapala Orepeka elyape keta pisinya pyambuo lamaiyuo, Wanake dakeme wambu ama malu taosande pao taosande akalisa para pyao nyeramopa dupwame nyisu petenge dupwa pyao kalyaramiŋi pena, leyami.
GEN 24:61 Dokopa Orepekapa banya kendemande enda dokopa sipurapala mena kamele dupwana piso Aporakamena kendemande akali dupwa pipya role pyao kata nyiyami. Kendemande akali dokome dopa pyuo Orepeka nyepala lanyuo peya.
GEN 24:62 Yuu gii dokopa Aisake Bialayaroe dorena palyuo karo epo yuu Nekepe dokona paleya.
GEN 24:63 Alemanji dokopa Aisake baa sipurapala ee dokona pao poraiyuo suu pyao kareya. Karo dokopa lenge pendakae lapala mena kamele dupwa epeyaminyi kandeya.
GEN 24:64 Dokopa Orepekame Aisake kandapala baa mena kamele dokona peteyamo doko neta epeya.
GEN 24:65 Epapala baame Aporakamena kendemande akali doko piso, Akali ee donona karo namwa yakolala epelyamo doko apisi? leya. Kendemande akali dokome isingi lamaiyuo, Doko nambana akali mupwa dokoŋo, leya. Doko sepala wanake baa banya komau nyepala lenge kambu yambe piya.
GEN 24:66 Dokopa kendemande akali dokome paoepeyamuli pyuo pii dupwa Aisake rolo lamaiya.
GEN 24:67 Dokopa Aisakeme enda doko nyuo lanyuo banya anda peya. Peyamo doko Orepeka banya etenge ingiyamopa mona andake reto kareya. Dokopa Aisakena endangi kumuyamopa enda dokome baa mona minyarambwakamiyamo kareya.
GEN 25:1 Aporakamena kamba enda Ketura lengende nyepala dokome wane mandeya dupwa
GEN 25:2 Simirane Jokisane Metane Mitiane Isipake dee Suwa dusipa mandeya.
GEN 25:3 Jokisane baa Sipa Detanepana rakange dee Detaneme mandeyamo dusipa Asurimi Letusimi Leyumi rara wambu dupwa.
GEN 25:4 Dee Mitianena ikinyingi dusipa Ipa Epe Anoke Apita dee Elieta lenge mandeya. Dusipa peparae Keturana ingyuo para pyao peya.
GEN 25:5 Aporakamena moyange bange peparae dupwa Aisakeketa maiya.
GEN 25:6 Maipala baa lete kareyamo gii dokopa Aporakame banya kamba enda dupwana ikinyingi dupwa Aisakemoo role pyao palyuo kara narami lao neta nembo bange epe epe lao maiyuo yuu neta pyakaenge dorena ingyuo yuu dokona pena leya.
GEN 25:7 Aporakame baa ee kana kareyamo dusipa 175 ando kareya.
GEN 25:8 Banya ee kana malu peyamopa baa yuunya mondo lao emapala yaku nao kumuo penge kata dokona peya.
GEN 25:9 Dokopa ikinyingi Aisake Isimaelepame akali Makepalana kananda Iti akali Soyana ikinyingi Eparonena ee wandepa yuu Mamare neta pyakaenge dorena ingyuo singi dokona malu piyambi.
GEN 25:10 Aporakame wamba Iti wambunya yuu ropo pyao nyuo etenge Sera malu piyamo dokonako Aporakame role pyao malu pyakamiyami.
GEN 25:11 Aporakame baa kumapeyamo dokopa ikinyingi Aisake Anatumi ketae nembo elyape keta pisiyamopa yuu Bialayaroe dokona paleya. (Kingi Bialayaroe doko Kamongo Lete Karalu Karenge namba kando karenge dokona ipwa kamuo nyingi yuwale dopale lenge.)
GEN 25:12 Dasipa Serana kendemande enda yuu Isipi range Eka dokome Aporakame nyepala ikinyingi Isimaele manjakamiya dokome para pyao mandeyamo dusipana kingi palamo.
GEN 25:13 Kingi dasipa Isimaele ikinyingi wambo enakaope mandeyamuli pyuo pyasi palamo. Mupwa Nepayote dee Keta Apitili Mipasame
GEN 25:14 Misima Duma Masa
GEN 25:15 Atate Tema Jeta Napisi dee Ketema lenge.
GEN 25:16 Dusipa Isimaele ikinyinginya kingi. Nakama kamongo akalisa ipisu lamame kyawa nyiyaminyi dusipana lili pyuo rara ingyuo peya.
GEN 25:17 Isimaele banya ee kana 137 epo peyamopa baa kumuya.
GEN 25:18 Banya wambu yuu Apila piso Suakanya yuu singi dokona paleyami. Doko yuu Isipi kanda kanda Asiria kata penge dorena paleyami. Nakama Aisakena rara wambu dupwa pipya lili pyuo paleyami.
GEN 25:19 Aporakame ikinyingi Aisakena para piyamo dupwana kingi pyasi palamo. Aporakame baa Aisakena rakange.
GEN 25:20 Aisake ee kana akalisa kisima (40) ingiyamo Orepeka nyiya. Orepeka baa rakange Areme akali Betyuele yuu Mesopotemia range dokona wanenge. Banya pemalenge doko Lapane lenge.
GEN 25:21 Aisakeme etenge ingi porayapala wane manja nayasa dokona Kamongo piso soo lao ateŋa lao kareya. Kareyamo dokopa Kamongo dokome ateŋa doko sepala yano piyasa Orepekena rombanda wane maiyamo ingiya.
GEN 25:22 Wane lama enda banya ingi anda piso pyakandili leyambisa enda baa, Dopa pyuo pyamo akipamo lete petose? lapala Kamongo dokona piso sela peya.
GEN 25:23 Dokopa Kamongome lao, Embena inginya akali lama palambinyi dolapo manjerene dokopa rekya lao rara lama ingyuo paramopa doko enakana doko porai ingyaramopa wambo dokome banya yulu pyakamyuo karara, leya.
GEN 25:24 Wane mata piyamo gii dokopa lama reme paka piso kyakala peya.
GEN 25:25 Dopa pyuo wanewambakaya doko yongo emanji yuu singi konende mandeyasa kingi Iso leyami.
GEN 25:26 Dee enakana yangonge mata pyama epeya dokome Isona kimbu yukuna doko minyaro siyasa banya kingi Jekope leyami. Wane dolapo mandeyami dokopa Aisake baa ee kana akalisa pakinyamange (60) ingiyamo kareya.
GEN 25:27 Nakamba andeyambinyi dokopa Iso baa nuli nao isako dupwana papingi dee Jekope baa wane anjiki pyuo anda dupwana mee kareya.
GEN 25:28 Dokopa Aisakeme nuli nao maiyamo nakanjapala Iso mono reto kareyamopape Orepekame Jekope mona reteya.
GEN 25:29 Yuu mendepa Jekopeme pengena nenge supu lapo yango paleyamopa Iso isakona karo lopome kumuo epeya.
GEN 25:30 Epapala Isome Jekope lamaiyuo, Lopome kumuo epelyoŋo. Supu kone dokona lamanarowale jinya, leya. (Renge dokona banya kingi Itome lenge. Kingi Itome doko Ipuru pii Kone lenge, leyami.)
GEN 25:31 Dokopa Jekopeme isingi lao, Wambo moyangepe dee emba keta pyambuo jisi dokope namba keta jere ramo dopa piru, leya.
GEN 25:32 Leyamo dokopa Iso isingi lamaiyuo, Namba repeta kumaloponoŋo dokopa rakanena moyange dupwame namba nyisa nara ingilyamo, leya.
GEN 25:33 Jekopeme lao, Moyange bange dupwa jero lao wambo lalu lao lao nambapa kingi ketae nembo lape, leya. Dopa leyasa Isome, Namba kaeyapala keyange nyeroli dupwa emba nyereŋe, lao lalu lao leya.
GEN 25:34 Leyasa Jekopeme Iso borete lapope bini supupi maiyamo napala baa sipurao peya. Iso dopa pyuo banya bange nyerali dupwa kilya kandeya.
GEN 26:1 Yuu dokona wamba Aporakame kareyamo yuu gii dokopa lopo siya dokoko suu pyao dee mende kamba ingyuo lopo siya. Dokopa Aisake baa Pilisitia wambunya kiŋi Apimeleke yuu Gera kareyamo dokona peya.
GEN 26:2 Pao kareyamo dokopa Kamongome Aisake lamaiyuo lao, Emba Isipi dokona paa napipi. Yuu mendenambame emba lasaka pirono dokona palu karare, leya.
GEN 26:3 Dokona palyuo papyuo karare dokopa namba embapa role pyao karapala emba keyange keta pyambuo kararo. Yuu dasipa peparae embamoope dee embena para pyare dupwana sera. Nambame embena rakange Aporakame kando lalu lao leyonuli pyuo jero.
GEN 26:4 Nambame embena manjirinyi dupwa kamame wakasa inginya lao pirunupa yakena bui pilyamo dopaleingyaramopa nambame yuu dake nakama mairu. Mairunupa nakama keta rara peparae elyape keta piso parami.
GEN 26:5 Aporakame namba leyonuli pyuo nambana mawa piidupwape lowa kuki andakepe warombo soo kareyamo dokona lao piralya kande, leya.
GEN 26:6 Dokona lao Aisake baa yuu Gera dokona palu kareya.
GEN 26:7 Kareyamopa yuu dokona range akali dupwame etenge dokona lao pisiyami dokopa banya pemalengeŋe leya. Baame Orepeka au wakasa piyasa dokona etenge laro ramodokopa yuu range akali dupwame baa pyapala enda doko nyeraminyi lapala pemalengeŋe leya.
GEN 26:8 Yuu dokona andarele Aisake baa karapeyamo dokopa Pilisitia kiŋi Apimelekeme windowa kata Aisake etenge Orepekapa kupyaro peteyambinyi kandeya.
GEN 26:9 Dokopa Apimelekeme Aisake kyakale lao epenalapala, Enda dolo embena lamo. Doko akipamo embame embena pemalengeŋe leese? leya. Dokopa Aisakeme isingi lamaiyuo, Enda baa kandapala nambapyaraminyi kandena lapala leyo, leya.
GEN 26:10 Apimelekeme lao, Doko akindeembame kando leese? Mendeme enda baa kinyi mapwaelyamo lapala kamenge pao etenepa role palirasa namwa keta koo nyuo jisari piri, leya.
GEN 26:11 Lapala Apimelekeme doloma porainyi pyambuo lao, Mendeme akali dakepa banya etengepa kando mende pirami ramo dupwa pyao kumakarami ingilyamo, lamaiya.
GEN 26:12 Kamongome Aisake elyape keta pisinyi pyambuyasa ee waingi wara piyamo dokome ee kana mendaki dokona kamame kaiyakaro ando lyiyamo lyepa piya.
GEN 26:13 Dokopa akali baa dopa pyuo kamame kamongonge bange dupwa konda pyuo nyuo reto pao baa kamongo wakasa ingyuo kareya.
GEN 26:14 Dopa pipala banya mena sipisipi bulamakaope dee banya kendemande akalipi malu kareyaminyisa Pilisitia wambumi yango palyuo kareyami.
GEN 26:15 Yango palyuo karapala ipwa kamuo nyingi yuwale banya rakange Aporakamena kendemande akali dupwame kyasiyami dupwa Pilisitia wambu dupwame puu piyami.
GEN 26:16 Dokopa Apimelekeme Aisake lamaiyuo, Emba ulipili ingyuo porainya renge palyuo namwa pipya kapa ingya nalyamo dokona namwana yuu dake yaki nyepala paale, leya.
GEN 26:17 Dopa leyasa Aisake yuu doko kala yuku pao yuu Gera dokona kareya.
GEN 26:18 Karapala rakange Aporakame kareya dokopa ipwa kamuo nyingi yuwale waso kyaso reteyamo Pilisitia wambumi puu piyami dupwa Aisakeme kamba apukii leya. Apukii lapala rakangeme ipwa pete kingi leyamo dupwako leya.
GEN 26:19 Dee Aisakena kendemande akali dupwame yuu anda lamalama dokona yuwale mende kyasipala ipwa guu mende kando nyiyami.
GEN 26:20 Yuu Gera range mena sipisipi rapu pingi akali dupwame Aisakena mena sipisipi rapu pingi akali dupwa pipya apiyanda pyuo laiya lapala, Ipwa pete doko namwana, leyami. Baa ipwa nenge yuwale doko nakamba kuli koo palyuo leyami dokona kingi Eseke leya. (Ipuru pii dokona Eseke lenge doko apiyanda pyuo lenge dopale.)
GEN 26:21 Dee mendeko kyasiyami dokona epo apiyanda piyamisa Aisakeme ipwa pete doko kingi Sitina leya.
GEN 26:22 Dokona lano mendeko kyasiyami dokopa mende lapa nayamisa dokona kingi Oriyapote leya. Dopa lao kingi lao dokopa, Namwa kapa palyuo kararami lao Kamongo panda andake retakalyamo dokona wane malu manjo kulimbarama ingilyamo, leya.
GEN 26:23 Dokona piso pao yuu Biasipa dokona peya.
GEN 26:24 Peyamo dokopako kukwa Kamongo baa keta epapala lamaiyuo lao, Namba embena rakane Aporakamena Anatu. Dokona papa lao paka napipi. Namba embapa role pyao karoŋo. Nambana kendemande Aporakame kando lalu lao leyo dokona nambame emba elyape keta pisinyi pyambuo emba jingi para pyao manjirinyi dupwa andake inginyi pyambwakaro, leya.
GEN 26:25 Dopa leyasa yuu dokona kiso maingi kana pyare lapala Kamongona kingi lao ateŋa leya. Lapala banya anda dokona pipiyamopa Aisakena kendemande akali dupwame ipwa kamuo nyingi yuwale mende kyasiyami.
GEN 26:26 Apimeleke baape banya dopa pyuo piri dapa pyuo piri lao nyiso lenge akali Akusatemoo dee banya yanda singi mupwa Pikole lenge dokomoope yuu Gera dokona karo Aisake kandala epeyami.
GEN 26:27 Epeyaminyi dokopa Aisakeme nakamba piso soo lao, Namba kando epe kanda napala nakamana yuu daa lao pyao ralinyi nembeyaminyi epo karapunu dakena aki nyela epelyamisi? leya.
GEN 26:28 Nakambame isingi lao, Kamongodoko panembena embapa role pyao karapyamo kandapala namwame embapa pii angi mende kana minyuo lalu lao larama.
GEN 26:29 Dokona suu pyao emba koo keta palya nao mondo lao puu leyamanoli pyuo dokona namwa randa jii nalasiŋi. Emba Kamongome ketae pyambwapyamo karene kande, leya.
GEN 26:30 Lapala dokopa Aisakeme nakamba nenge piyamo nao peteyami.
GEN 26:31 Dee dokona yangama sipurao mendeme mende kando lalu lao lapala dokopa Aisakeme nakamba range pena lao mapeyamopa nakama mona siyamo baa yaki nyuo peyami.
GEN 26:32 Yuu gii mendaki dokopako Aisakena kendemande akali dupwame yuwale kyasiyami dokona epo lamaiyuo lao, Namwa yuwale kyasimwa dokona ipwa kando nyimwa, leyami.
GEN 26:33 Dokopa baame kingi doko Sipa leya. Dokona lao dakepa yuu taone doko kingi Biasipa lao karaminyi. (Kingi Biasipa doko Kana Minyuo Lalu Lao Lenge Yuwale dopale lenge.)
GEN 26:34 Aisakena ikinyingi Iso ee kana akalisa kisima (40) epo peyamopa baa Iti enda lama nyiya. Mende akali Beriyana wanenge Jutisi lenge dee mende akali Elonena wanenge Basama lenge dolapo nyiya.
GEN 26:35 Enda dolapome Aisake Orepekapame kando minji nanji pipala sisuku mona palyinyi pyambuyambi.
GEN 27:1 Aisake baa emo lenge nyuo piyasa ikinyingi kyawa Iso doko epena lapala lao, Rakane, leya. Isome isingi lao, Dae karo, leya.
GEN 27:2 Dokopa lamaiyuo, Namba epapu emo otapala peto doko emba kandelene. Dokona kumaro gii doko see nalyoŋo.
GEN 27:3 Dokona embena yanda wangape dupwa nyepala imwana nuli kotako paale.
GEN 27:4 Pao nyuo dokopa nenge rende kyaa pingi namba mona nyuo narole lapo rapa rapa pyakao epo jerene napala dokopa emba elyape keta pisinyi pyambwapala kumaro, leya.
GEN 27:5 Aisakeme doo pii Iso lamaiyuo leyamo dupwa Orepeka soo kareyamo leya. Dokona lao Iso baa nuli nala peyamo dokopa
GEN 27:6 Orepekame ikinyingi Jekope lamaiyuo lao, Namba soo karapunupa embena rakaneme yangone Iso lamaiyuo lao,
GEN 27:7 Baame nuli nala papala nenge kyaa pyuo rende pingi lapo nyuo kiso minyuo epo jerenepa napala dokopa Kamongona lenge kambu dokona emba elyape keta piso kamonganyi nembapala namba kumaro lalyipya, leya.
GEN 27:8 Lapala Orepekameko lao, Dakepa anyi embame nambana piiwarombo soo larono dokona pepe.
GEN 27:9 Dopa pyuo mena karaminyi dokona papala mena meme ikyane keyange lama yapalyapala nyepe. Nyerene dokopa nambame embenarakaneme nenge mona nyuo naramuli pyuo rapa rapa pyakamiru.
GEN 27:10 Dopa pirunupa embame rakane nena lao minyuo pao mairinyipa napala baa kumalena karo dokopa emba elyape keta pisinyi pyambwara, leya.
GEN 27:11 Dopa leyamopape Jekopeendangi Orepeka lamaiyuo, Iso baa akali yongo emanji karenge. Namba mee akali kandapi.
GEN 27:12 Mende dee rakaneme namba minyando sepala nambame baa minyakaopilyanye lapala elyape keta piso kamonganyi nembaramo kakapu koo keta palyasara, leya.
GEN 27:13 Dokopa endangimi baa lamaiyuo, Emba suu pyao nambako koo keta paliroŋo letonuli pyuo pao nyuo jelase, leya.
GEN 27:14 Leyasa pao nyepala epo endangi maiyamopa rakange mona nyuo naramuli pyuo kando rende kyaa pyuo yangakamiya.
GEN 27:15 Dopa pyuo yangapala ikinyingi Isona komau keyangemende anda retakamingi dokona mende nyepala wane enakana Jekope doko wapwakamiya.
GEN 27:16 Dopa pipala mena meme yanenge rekya lasi dokome kingi dolapona minyarambwakamyuo dee pendoko pena pena pisi dokona pyakamyuo piya.
GEN 27:17 Pipala nenge kyaa pingi dokope borete lapo rapa rapa piyamo dupwa pipya banya ikinyingi Jekope maiya.
GEN 27:18 Dokopa rakange peteyamo dokona Jekope baa papala lao, Rakane, leya. Leyasa Aisakeme yaa lapala, Emba apisi? leya.
GEN 27:19 Leyamo dokopa Jekopeme lao, Namba embena ikinyi mupwa Iso dokoŋo. Embame langipinyili pyuo nuli nao minyoko epelyoŋo. Emba roya pisipala naa. Napala dokopa embame namba elyape keta pisinyi pyambwalase, leya.
GEN 27:20 Dopa leyamopape Aisakeme lao, Rakane, dupwa apa pyuo waiya lao kando koto nyelese? leya. Dokopa Jekopeme isingi lao, Embena Kamongo Anatu dokome nyisapyamo koto kando nyipu, leya.
GEN 27:21 Leyamopa Aisakeme Jekope lamaiyuo, Rakane, emba kinyi Isope lao minyando serowaleŋe emba mee mendele dae repeta ipu, leya.
GEN 27:22 Dokopa Jekope banya rakange Aisake peteyamo dokona repeta peyamopa minyandao sepala lao, Pii dokome emba Jekope ingyapyamopape kingi doko Isona pingi dopale lyamo, leya.
GEN 27:23 Dopa pyuo banya kingi dupwa yanenge emanji karo yangonge Isonako ingiyamo dokome baa Jekopeŋe lao soo gisa naya. Dopa pipala baame baa elyape keta pisinyi pyambuya.
GEN 27:24 Dopa pipala piso soo, Emba angi kinyiko nambana wane Isope? leya. Dokopa baame isingi lao, Doko namba, leya.
GEN 27:25 Dokopa Aisakeme lao, Rakane embena nengerende pingi jerene napala emba elyape keta pisinyi pyambuo kararowale, leya. Dopa leyasa nenge nyuo maiyuo ipwa waene lapo maiyuo piyamo neya.
GEN 27:26 Napala rakange Aisakeme lao, Rakane nyinyi pilipu, leya.
GEN 27:27 Dokopa repeta eponyinyi piipyamopa banya komaunya kyaa doko ai sepala baa elyape keta pisinyi pyambuo karapala lao, Rakane emba kyaa pipyamo sipu dokome ee mende Kamongome keyange ingyuo andanyi pyambungi dopale ingyalyamo, leya.
GEN 27:28 Emba Anatumi yakena rombe lengepe yuunya amenge kapape laparae jeramopa dolapona ee ipyoko kararamopa ee waene ipwange malu emba keta palirako.
GEN 27:29 Wambu dupwa peparaeme embena yulu pyakao kararami. Dee wambu yuu muu peparaena embena lenge kambusa pangu soo emba rape rape lao karena. Emba yangonge dupwa pipya kamongo ingyuo kararenepa endakinyinya ikinyingi dupwa embena lenge kambu seramo dokona isa kararamiko. Wambu lapome emba koo keta palyarami dupwa nakama koo ketako palirami deewambu lapome emba elyape keta pisarami dupwa nakama range elyape ketako palyuo karena, leya.
GEN 27:30 Dopa lapala Aisakeme Jekope ketae pyambuo wane mupwa ingyuo karapala papeyamopa yangonge Iso nuli napala aopa anda epeyamo kataalowa piyambi.
GEN 27:31 Epapala nenge kyaa paleta rapa rapa pipala rakange paleya dokona manjo epo, Rakane, sipurapala nuli napala minyuo ipu dupwa napala namba elyape keta pisinyi pyambuo karalase, leya.
GEN 27:32 Dokopa rakange Aisakeme lao, Emba apisi? leya. Leyamo dokopa baame isingi lao, Rakane, namba Iso embena wane mupwa mandeene dokoŋo, leya.
GEN 27:33 Leyasa Aisake pako walu walu lapala mona nembeya. Mona nembapala piso soo, Wambo mendali dae nuli minyuo epo jipyamopa embapa epapa napinyi namba napala baa elyape keta pisinyipyambuo karalono baa apisi? Kinyi baa keta karala paamo, leya.
GEN 27:34 Rakangena pii doko Iso sepala ee lao ipwakuku nyiya. Dopa pyuo lapala Rakaneme, namba opetaeko elyape keta pisinyi pyambwape, leya.
GEN 27:35 Dopa leyamopape Aisakeme lao, Embena yangoneme kendepuli ingyuo epapala namba panga soo minyako pyuo emba ketae pyambuo jerono renge doko nyakalamo lyamo, leya.
GEN 27:36 Dokopa Isome lao, Lamasa lao nambapa panga sepala nambana panda nyilyamo dokome banya kingi Jekope leyami dokona ingyuo pwuamo. (Ipuru pii dokona kingi Jekope doko panga singi dopale lenge.) Wamba baame namba wane mupwa doko keta renge keyange lapo palirali dupwa baameko nyiya. Dee epapu namba elyape keta pisinyi pyambuo karareli dupwa baame nyuo paamo lyasili. Namba pyambwarene bange lama retaka napisi? leya.
GEN 27:37 Dokopa Aisakeme isingi lao, Nambame baa embena kamongo ingyuo karakapu. Dopako pyuo banya yangonge dupwame kendemande ingyuo yulu pyakamirami lapala nenge waene ipwangepe nyiso maiyapuŋu. Dee aki mende rakane embena ingyuo pyakarose? leya.
GEN 27:38 Isome rakange lamaiyuo, Namba ketae pyambwarene renge mendaki yaka kaeyaka napisi? Rakane namba opetaeko elyape keta pisinyi pyambwalase kaeyape. Rakaneya, lao ee marakai leya Isome.
GEN 27:39 Dokopa banya rakange Aisakeme isingi lamaiyuo, Yuunya amenge kapape dee ketae yakena rombe lengepe emba keta pali napala yando naramo palyuo papiri.
GEN 27:40 Emba wua kakupi nenge dokome nenge koto nao paliri. Embame yangone dupwa isaru piri pyuo karowape dee kala panya dokopa banya puu anga embena mangena doko rokwanyi nembare, leya.
GEN 27:41 Lapeyamo dokopa Iso rakangeme angi elyape keta pisinyi pyambwa nayamo dokonalao Jekope kando imbu singi andake manjipala lao rakane repeta kumara ingilyamodoko kumanda piso paparamano dokopa yangonge Jekope pyaro lao suu piya.
GEN 27:42 Dopa lao suu piyamopape Iso wane wambo dokona lasi pii doko endangi Orepekame sepala ikinyingi enakana Jekope doko epena lapala lamaiyuo lao, Embena yangonge Isome baa range mona minyarambu emba pyalena suu pyao lao palyilyamoŋo doko kandelyo, leya.
GEN 27:43 Dokona lao, Anyi nambana pii kamba laa nao sipurapala yuku pao nambana pemalenge Lapane karamo yuu Arane dokona puu, leya.
GEN 27:44 Dokona kararenepa yangonena imbu singi paramo embame baa kando koo piinyi doko kame soo kararamo
GEN 27:45 dokopa nambame wai lao ipu laroŋo. Akipamo yuu gii mendaki dokonako nakamba laparaena lao kondo pisasaro paale, leya.
GEN 27:46 Enakana Orepeka akalingi Aisake lamaiyuo, Iti enda Iso nyiyamo dupwa kando namba epenasilyu. Dee Jekope yuu range Iti enda dopale nyera ramo dokopa namba apa pyuo piso palyuo piru laa, leya.
GEN 28:1 Dokopa Aisakeme Jekope epena lapala baa elyape keta pisinyi pyambuo poraiyuo lamaiyuo, Emba Kenane enda dokonamende nyii nana, leya.
GEN 28:2 Dokona suu pyao sipurapala endakinyinya rakange akali Betyuele palenge yuu Mesopotemia dokona pupi. Pao Lapane endakinyinya pemalenge dokona wanenge mende nyere, leya.
GEN 28:3 Anatu Porai Wakasa dokome emba ketae nembo wai kisaramo dokona wambu akalyanda liti pyuo parami, leya.
GEN 28:4 Dokona ingyuo Anatumi Aporakame elyape keta pisinyi pyambuyamuli pyuo embape embena manjiri dupwape elyape keta pisinyi pyambwara. Dokopa yuu Anatumi Aporakame maiyamo dupwana emba palyuo papyuo karene doko embena ingyuo para, leya.
GEN 28:5 Dopa pyuo lapala Aisakeme Jekope mapanyi nembeyamo dokopa yuu Mesopotemia Areme akali Betyuelena ikinyingi Lapane dokona anda peya. Lapane baa Jekope Isopana apange Orepekena pemalenge doko.
GEN 28:6 Aisakeme Jekope elyape keta pisinyi pyambwapala yuu Mesopotemia enda nyeraŋa kota pena leyamo doko Isome kandeya. Dee Aisakeme Jekope elyape keta pisinyi pyambuo karapala dokopa rakangeme embame Kenane enda mende nyii nana daa lao lamaikondali piya.
GEN 28:7 Aisakeme dopa leyamosa Jekope baame endangirakangepana pii warombo sepala yuu Mesopotemia dokona peya doko Isome kandeyako.
GEN 28:8 Kandapala Isome Aisakeme Kenane enda dupwa rae mai nayamo doko kandeya.
GEN 28:9 Isome kandapala kala pao akali Isimaele Aporakamena ikinyingi dokona wanenge Makalate lengende enda wambo dolapona konda pyuo nyiya. Enda doko Nepayotena pemalenge doko.
GEN 28:10 Jekope yuu Biasipa yaki nyuo Arane dorena ingyuo pena peya.
GEN 28:11 Pao yuu panda mendena peyamo dokopa neta anda papala yuu kwuaya. Dopa piyasa kana mende nyuo kilyanda pyapala luu paleya.
GEN 28:12 Paleyamo dokopa kombeya pipala kandeyamopa lora mende yuunya piso pao yakena pyare lao makaro kareyamopa dokona Anatunya aŋala dupwa pulyuo lupyuo pyuo kareyaminyi kandeya.
GEN 28:13 Kandeyamodokopa Anatu dokona repeta karapala lamaiyuo, Namba Kamongo Anatu embena rakane Aporakamepa Aisakepana Anatu lyakande. Dokona yuu emba palu silini dake nambameembape embena para pyao manjirinyi dupwape keta jero, leya.
GEN 28:14 Embena para pyarene dupwa yuunya sinjimu ingyaramo dokona piso raeyarenepa palyuo yuu muu peparaena dumurena dalyarena donorena dulurena pao piraminyipa nakama keta rara peparae elyape keta pisarami, leya.
GEN 28:15 Kando karape. Nambame embapa karapala anja panda parene dupwa minyuo paeyo dee yuu dakena laeyo lanyuo eparo. Dopa pyuo nambame emba yaki nyii nao karo langipu dokona palyapala kaeyaro, leya.
GEN 28:16 Dokopa Jekope lenge rapala, Kamongo doko angi yuu dakena karelyamosee nalolyamo, leya.
GEN 28:17 Kando pakapala lao, Mona penge yuu dake Anatunya anda dopale. Yakena kata kambu dake lamo, leya.
GEN 28:18 Jekope yangama dokopa wamba kukwa sipurapala kana kilyanda pyaro paleyamo doko nyuo yuunya pisapala ketaerename mamba yangeya.
GEN 28:19 Yangapala yuu doko kingi Betele leya. (Ipuru pii dokona Betele doko Anatunya anda lenge.) Dopa leyamopape yuu taone doko wambo angi kingi Lusi lenge.
GEN 28:20 Lapala Jekope kana minyuo lalu lao laodopa leya. Anatumi kinyi nambapa role pyao dopa pyuo karo lara ramo doko paronodupwana nenge nengepe wapungipi jera.
GEN 28:21 Dopa pyuo kararamo dokopa nambana rakanena anda mona kyuu lao seramo epapala dokopa Kamongo baa nambana Anatu lao kararo.
GEN 28:22 Kana dae pisilyu doko Anatunya anda ingyaramopa bange peparae namba jeramo dupwana akalisa dokona mende nyepapu Anatu range mairu, leya.
GEN 29:1 Dopa lapala Jekope dee kata nyuo pao neta pyakaenge dorena wambu palenge dokona epo pyaka siya.
GEN 29:2 Pyaka sepala ee dokona ipwa nenge yuwalende siyamo kandeya. Dokona mena sipisipi dupwa ipwa maingi mare dokona remasa lao malu palyarapu palu siyami. Yuwale dokona kambu doko kana kameyandeme upi leyami.
GEN 29:3 Dokona mena sipisipi epo malu palyuo otelyaminyi dokopa rapu pingi dupwame kana kao pele pele lanyi nembapala ipwa maipapu upi lapapu pinginyili pyuo pyuo paleyami.
GEN 29:4 Dokopa Jekopeme piso soo lao, Yangonemoo, nakama yuu anja rangese? leya. Dokopa nakamame lao, Namwa yuu Arane range, leyami.
GEN 29:5 Leyaminyi dokopa Jekopeme lao, Nakamba Lapane Neona ikinyingidoko kandengepe lao piso siya. Isingi lao, Baa namwa kandenge, leyami.
GEN 29:6 Baa kapa karase? Jekopeme leya. Nakamame lao, Baa angi kapa karamo. Banya wanenge Oresolo sipisipi dupwa minyuo epelyamo dokoŋo, leyami.
GEN 29:7 Dokopa baame lao, Yuu gii mena ralyuo nyuo anda palyingi doko ene lamoŋo lao kandelyo. Dokona sipisipi dupwa ipwa maipala dee rambinena lanyi pupengele, leya.
GEN 29:8 Leyamopape isingi lao, Namwame dopa pyuo pinya yakara pilyamo. Mena dupwa pao mendakinya malu palyuo otaraminyipa kana kambu doko lopo kakondaramo dokopa sipisipi dupwa ipwa maimanale, leyami.
GEN 29:9 Ene pii lao kareyami dokopa Oresolo banya rakangena sipisipi dupwa reto karengenyili pyuo karalana lanyuo epeya.
GEN 29:10 Dokopa Jekope baame banya endanginya pemalenge Lapane dokona wanenge Oresolo rakangena sipisipi lanyuo epeyamokandapala baa sipurapala pao kana andake doko nyuo kakondapala apangena sipisipi dupwa ipwa maiyakamiya.
GEN 29:11 Maiyakamipala enakana Jekopeme Oresole nyinyi pipala ee poraiyuo leya.
GEN 29:12 Lapala Jekopeme Oresolo lamaiyuo, Namba Orepekena ikinyingi, embena rakane Lapane dokona apange lao rolo lamaiya. Dokopa wanake baame rakange lamaiyalena makando peya.
GEN 29:13 Lapane baame banya pemalengena ikinyingi Jekope dopa pyuo ipwame lao sepala baa makando yako lao nyela peya. Pao kupyuo rau pyao nyinyi pipala lanyuo anda epeya. Dokopa Jekopeme doo piyamo dupwa peparae Lapane rolo lamaiya.
GEN 29:14 Dokopa Lapaneme Jekope kando dopa lamaiya. Emba nambana ranjama yongope mendaki lao yako lao nyiyamopa kana mendaki baa role pyao kareyambi.
GEN 29:15 Enakana Lapane Jekope lamaiyuo, Emba nambana ranjama mendaki dokona mee yulu pyakarende daaŋa. Aki kingi kiso nyero lao namba langi, leya.
GEN 29:16 Gii dokopa Lapane banya wanenge lama peteyambi. Dokona wambo Liya lenge dee enakana doko Oresolo lenge.
GEN 29:17 Wanake Liya banya lenge kambu doko yukwa nenge dee Oresolo baa wanake elyape kyaka napengele ingiya.
GEN 29:18 Jekopeme wanake Oresolo doko mona nyepala dokona baame lao Ee kana yanda ipingi embena wanenge enakana Oresolo dokona lao suu pyao yulu pyakarowale, leya.
GEN 29:19 Lapaneme leya, Akali mende wakale mairu doko kapa ingya napyaleŋe. Emba jero doko kapaŋa role pyao karambana, leya.
GEN 29:20 Doko sepala Jekopeme ee kana yanda ipingi dusipana yulu pyakamiyamopape wanake dokona wakasa mona reteyamo dokome mee lama ingyuo peya.
GEN 29:21 Pyuo otapala Jekopeme Lapane lamaiyuo, Enda doko namba range reto paliruwale jerene. Nambana yuu gii yulu pipu doko otalyamo, leya.
GEN 29:22 Dopa leyasa Lapaneme banya yuu range akali dupwa peparae epena lapala nyuo malu palyuo nenge kisakamiya.
GEN 29:23 Kiso maipala kukwa dokopa wanenge wambo Liya lenge doko lanyuo epo Jekope maiyasa baa role pyao paleyambi.
GEN 29:24 (Dokopa Lapane banya kendemande wanake Silipa lenge dokome wanenge Liyana lao isaru pyakamyuo pisara lao maiya.)
GEN 29:25 Dee yuu yangeyamo dokopa wanake Liya doko lamo lao Jekopeme kandeya. Dokona Jekopeme Lapane kando lao, Dake akinde embame namba kando pyanye, leya. Nambame Oresolona lao yulu pyaka nayose? Akipamo embame namba kando minyako pipisi? leya.
GEN 29:26 Dokopa Lapaneme isingi lao, Namwana yuu dakena wanake manjo pengenyili pyuo wambo doko wambo akali maingi, leya.
GEN 29:27 Wanake wambo nyipi dokona namwana yulu palengenyili pyuo koro mendakinya pakao pisirambi dokopa wanake enakana doko jeramanopa dee ee kana yanda ipingi yulu pyakao karare, leya.
GEN 29:28 Dokopa Jekopeme koro leyamo doko Lapane leyamuli pyuo pyuo otapeyamo dokopa Lapane banya wanenge Oresolo enakana kamba maiya.
GEN 29:29 (Maipala Lapane baame kendemande wanake Bilya dokome wanenge Oresolo isaru pyakamira lao maiya.)
GEN 29:30 Maiyamopa Jekopeme Liya wambo nyiyamopape Oresolo angingyuo mona wakasa retapala baame ee kana yanda ipingi kamba nembo yulu maiyamo dusipana pyakamyuo kareya.
GEN 29:31 Jekopeme Liya kando awa nayamo doko Kamongome kandapala banya ingi pau lakamiyamo waneingiya. Dopa piyamopape Oresolo ingi poraiyuo mee pote peteya.
GEN 29:32 Dokopa Liya wane ingiyamopa manjipala kingi Urupene lao, Kamongome namba ingi koo palyuo pisipunu kandapala pilyamo dokona kandapala nambana akali dakeme nambapa mona retalopyamo, leya.
GEN 29:33 Lapala deeko wane ingiyamo manjipala lao, Namba mata jipyamo doko kandapala Anatumi wane dake jilyamo lapala kingi Simione leya.
GEN 29:34 Dee kamba wane mendeko manjipala repo pyuo manjakamilyu dokona lao dakepa akali dokome namba apetalopyamo lapala dokona kingi Lipae leya.
GEN 29:35 Dee mendeko manjipala doko mando dokopa Kamongo lao lakandarowale lapala dokonalao kingi Juta lapala enakana dee manja naya.
GEN 30:1 Oresolo baame Jekopena wane mende manjakami nalyono lao suu pyao kakingipa sisu nyepala Jekope lamaiyuo, Dokona namba kumasasaroŋo namba wane manjiwaneme kumulyuŋu. Jepenge doko akipamo pilisi? leya.
GEN 30:2 Jekope kando gyaa kata isare sukwa pyambwakamiyasa imbwuapala lao, Namba Anatumi emba wane manja nalase lao kurapu poraipyamo dokona karose? leya.
GEN 30:3 Dokopa Oresolomeisingi lamaiyuo, Nambana kendemande wanake Bilya doko embapa palirambinyipa namba wane manjero doko suu pyao manjakaramopa nambana wane ingyuo penale, leya.
GEN 30:4 Dopa lapala banya isaru pingi enda Bilya doko kamba enda inginya lao maiyasa Jekopepa role paleyambi.
GEN 30:5 Dopa piyambisa Bilya baa wane ingiyamopa Jekopena wane mende manjakamiya.
GEN 30:6 Dokopa Oresolome lao, Anatu dokome nambapa lao rolapala karowape dee nambana pii sepala namba wane jilyamo, lapala dokona kingi Dane leya.
GEN 30:7 Oresolona kendemande enda dokome deeko wane lapo ingyuo manjakamiya.
GEN 30:8 Dokopa Oresolo baame lao, Namba kakingipa sisu andake nyuo piyambanopape nambame baa nyuo isa palyilyu lapala banya kingi Napatalai, leya.
GEN 30:9 Liyame dee kamba wane manjeronde daalyamo lao sepala banya kendemande enda Silipa nyepala Jekopeko kamba enda ingyuo nyuo maiya.
GEN 30:10 Dokopa Liyana isaru pingi enda Silipa dokome Jekopena wane mende manjakamiya.
GEN 30:11 Dokopa Liyame lao, Namba embone petamo, lapala wane banya kingi Gateleya.
GEN 30:12 Dokopa Liyana kendemande enda Silipa dokomeko dee lapo pyuo waneko manjakamiyasa dopa leya.
GEN 30:13 Namba rae maiyelyano dokona enda yango dupwame namba rae maipya larami, lapala kingi Asa leya.
GEN 30:14 Yuu mendepawiti jingi lyingi kana pyaka siyamo dokopa Liyana ikinyingi Urupene ee wandepa dokona papala bange epale amu dopalende kando nyepala rakyuo minyuo epo endangi maiya. Maiyamo kandapala Oresolo Liya lamaiyuo, Ikinyinya epale amu rakyapya dokona lapo narowale jepe, leya.
GEN 30:15 Leyamopape Liyame Oresolo kando isingi lao, Mee ingyalya ingyana pyuo nambana akali doko nyuo pupinyi kandapi dokome dee wanena epale amu dupwa kambako nyipuli lao lalyane, leya. Dokopa Oresolome lao, Ikinyinya epale amu jeramo dokona lao akali doko embapa kukwa reto palyase, lamaiya.
GEN 30:16 Dokopa alemanji Jekope isakota karo epeya dokopa Liya pao katasa karapala dopa lamaiya. Nambana wanena epale amu dupwame enda yangomaipala emba sukusa nyilyu dokona lao epapu palimbanale, leyasa dokona kukwa Jekope baapa role pyao paleyambi.
GEN 30:17 Dokopa Anatumi Liyana pii soo karapala ingi anda wane maiyamopa dokome kingi paki ingyuo Jekopena manjakamiya.
GEN 30:18 Dokopa Liyame lao, Nambana kendemande enda doko akalingi Jekope maiyunusa Anatumi wane dake kiso jilyamo, lapala kingi Isaka leya.
GEN 30:19 Lapala Liyame kambako wane ingiyamopa Jekopena wane pakinyamange ingyuo manjakamiya.
GEN 30:20 Manjipala lao, Anatumi nyisapyasa wane malu mandeyo dokome deeko pakinyamange doko konda pyuo manjo nyilyu dokona akalingimi namba lakando kingi ketae pyambwara ingilyamo, leya. Lapala wane doko kingi Sepyulane leya.
GEN 30:21 Enakanadee kamba wanake manjipala kingi Daina leya.
GEN 30:22 Dee dokona Anatumi Oresolona pii soo suu pyao karapala kurapu pau lakamiya.
GEN 30:23 Dopa piyamopa wane ingiyasa manjipala lao, Ingi porayamosa namba keta pii paleyamo doko Anatumi nyuo nembakapya, leya.
GEN 30:24 Dee Kamongo dokome wane mendeko konda pyuojipyali yaka lapala banya kingi Josepe leya.
GEN 30:25 Oresolome Josepe manjo nyepeyamo dokopa Jekopeme Lapane lamaiyuo, Nambana anda yuupi range dokona panyaŋa mapanyi nemba, leya.
GEN 30:26 Nambame embena yulu rolae pyakao kareyo kande doko. Nambana enda wanepena lao yulu pyakayosa piyaŋa dupwa nyuo parowale, leya.
GEN 30:27 Leyamopape Lapaneme isingi lamaiyuo, Embame dokona palyuo nambame mende lapili lao lare ramo doko nambame kandapunu dokopa Kamongo dokome embapa lapolapo lao namba elyape keta pisipyamo karo.
GEN 30:28 Yole bange dokore jii lao larenepa kapa jerowale, leya.
GEN 30:29 Dokopa Jekopeme lao, Emba soo karene doko nambame embena yulu pyakao dee mena bulamakao dupwa andanyi nembako pipu kandapi.
GEN 30:30 Namba epapa nayono dokopa kuki lama iki minyiipya kande. Namba dae epapala pyuo kareyono palusa Kamongo dokome mena wai kiso kaiya karapala emba pyuo ketae nembeya. Dopa piyunupape nambana anda range wambu dupwa apa pyuo nyisarose? leya.
GEN 30:31 Lapaneme lao, Nambame aki emba joowase? leya. Dokopa Jekopeme, Mende jerende daaŋa. Mende laronuli pyuo pyakare ramo doko nambame embena mena dupwa deeko nenge pyakao kararowale.
GEN 30:32 Nambame embena mena dupwa kandala papipala sipisipi kombe kambe singi dupwape ikyane pupuri dupwape dee meme kombe kambe singi dupwape yapo nyuo nambana yole ingyuo nyero.
GEN 30:33 Dokopa nambame yulu rolae pyuo mende waa nyaka nao kararonde ramo dokoenakana panara. Embame enakana namba range nyereli dupwa kandala eparene dokopamena mee dupwana mende pyambwaro ramo dokopa nambame waa ingyuo nyakaelyamo laokandare ingilyamo, leya.
GEN 30:34 Lapaneme lao, Keyange ingyalyamo. Dokona palyuo pimbana, leya.
GEN 30:35 Dokopa Lapaneme mena meme kalyuwa dee inyape kombe kambe soo kalya pyuo pingi dupwape dee mena sipisipi ikyane pupuri dupwape yapo nyepala ikinyingi dupwame rapu pyuo lanyuo pena leya.
GEN 30:36 Dopa pyuo mena dupwa yuu nanesa minyuo karala pyambuya. Yuu remasa katasa palyuo peyamopa Jekopeme doloma rapu pyakamyuo kareya.
GEN 30:37 Dokopa Jekopeme isa kyaka wakale dupwa pokapala kanya kewa lena lao yanenge dusa kalapa dasa kalapa piya.
GEN 30:38 Dokopa isa rekya lalya lana pinyi nembeya dupwa nyepala mena ipwa nala epenge isa luku luku pisi dupwana kanda kanda kareya. Mena dupwame pinginyili pyuo ipwa nala epo dokopa kalyuwa dupwame inya nyingi.
GEN 30:39 Nyuo dokopa isa kalya pisi dupwa kandapala dokopa yakane kalya pingipi kombe kambe singipi manjira ingiya.
GEN 30:40 Dokopa Jekopeme sipisipi liti pyuo nyepala inya dupwame kokwa dupwape kalya pingipi pupuri dupwape kandaro sinya lao kareya. Dopa pyuo banya rangena dupwa Lapanena dupwana role pyao kara napala malu mee wakale ingyuo nyiya.
GEN 30:41 Dee mena inya andengena dupwa kalyuwame nyiyamo dokopa Jekopeme ipwa dokona isa dupwa kandaraminyi sinya lao pano reteya.
GEN 30:42 Dee koole dupwa nyiyamo dokopa isa dupwa nyuo reta naya. Dokopa mena porai dupwa Jekopena ingyuo peyamopa koo dupwa Lapanena ingiya.
GEN 30:43 Dopako pyuo kareyamosa Jekope baa kamongapala mena malu minyuo kendemande enda akalipi wakasa karo dee mena kamele osepe dupwame kaiya kareya.
GEN 31:1 Jekopeme Lapanena ikinyingi dupwame lao, Jekopeme rakanena bange dupwa nyuo kalyilyamo. Bange rakanena dupwameko baa nyuo kalyapala kamongalanapilyamo lao leyaminyi doko siya.
GEN 31:2 Dokopa Lapaneme Jekope wamba wane mupwasa ingilyamo karenge doko kaelyamo lao kandeya.
GEN 31:3 Dokopa Kamongome Jekope lamaiyuo, Emba rakanena yuu andape range dokona lambuo paale. Namba emba yaki nyii naro, leya.
GEN 31:4 Leyamosa Jekopeme etenge Oresolo Liyapa banya mena karenge yuu isokota dokona karo epena leya.
GEN 31:5 Epeyambinyi dokopa lamaiyuo lao, Namba kandapu dokopa nakambana rakane dokome nambapa wamba mona reto au pyuo piyamuli pyuo pyaka napya. Dopa pipyamopape nambana rakanena Anatu dokome nambapa role pyao karapya, leya.
GEN 31:6 Nambana porai dokome nakambana rakane doko nyisakondali pyakayo doko nakamba silyambinyi.
GEN 31:7 Dopa pyuo piyunupape baame panga sepala nambana yole yuu akalisa alowa piya. Baame namba randa jinya suu piyamopape Anatumi baa panda maiya naya, leya.
GEN 31:8 Lapaneme menakombe kambe singi dupwa embena yulu pilini dokona nyere leyamo dokopa ikyane peparae kombe kambe soo mandeyamopa nyiyu. Dopako pyuo mena kalya pingi embena ingyuo para leyamopa dokona ikyane peparae kalyako pyuo mandeyamo nyiyu.
GEN 31:9 Anatumi dopa pyuo nakambana rakanena mena dupwa nyepala namba jiyamo nyiyu.
GEN 31:10 Mena kalyuwa palyingi gii epeyamo dokopa nambana kombeya dokona mena meme kalyuwa kalya pingipi kombe kambe singipi dupwame iki nyuo karapyamo kandapu.
GEN 31:11 Dokopa Kamongona aŋala mendeme kombeya dokona epapala, Jekope, leya. Leyasa Namba dae karo, leyo.
GEN 31:12 Dokopa dee lao, Mena kalyapingi kombe kambe singipimi yeelyo inya nyilyamo kandapi. Nambame Lapaneme embakando rolo pii napyamo doko kandapunusa pilyamo, leya.
GEN 31:13 Lapala, Namba Anatu yuu Betele dokona emba keta paneyo kande dokoŋo. Doo embame kana londende pisapala dokona mamba kisapala pii nambapa lalu lao langii kande. Dakepa sipurapala emba mandeyaminyi yuu dokona range puu langiya, leya.
GEN 31:14 Dokopa enda Oresolo Liyapame isingi lao, Rakanena anda bange lapo nambwa keta mokwa soo jera mende see nalyamo.
GEN 31:15 Baame namwa kando karala paenge lao suu pilyamo. Nambwa suu pyao yole nyiyamo bange dupwa kokwa soo kaeya.
GEN 31:16 Dokona lao bange rakanena Anatumi neta nyiyamo dupwa namwanape namwana wanepena ingyuo para. Anatumi mende langiramo dokona palyuo piri, leyambi.
GEN 31:17 Dokopa Jekopeme sipurapala banya wane endape nyuo mena kamele dupwana petena leya.
GEN 31:18 Dopa piyamo dokopa banya mena bulamakaope dee dolo mena wakale banya yulu pyuo nyiyamo dupwape yuu Mesopotemia dokona yulu pyuo nyuo kalyiyadupwape minyuo yuu Kenane rakange Aisake kareya dokona panya peya.
GEN 31:19 Lapaneme mena sipisipi yamanji pyakepala peyamo dokopa Oresolome rakangena bange pyarepa kana dopale ingyuo retenge dupwa baa waa nyiya.
GEN 31:20 Dokopa Jekopeme Lapane yuu Areme range doko banya karo laope lamai nao panga sepala peya.
GEN 31:21 Bange banya dupwa nyepala paka sipurao kata nyuo pao ipwa Yuporisa dokona yalo pao yuu kyau Giliate dokona gyaa palyuo peya.
GEN 31:22 Yuu repo epo papeyamo dokopa Jekope kandapi doko pupyapyaŋa lao Lapane lamaiyami.
GEN 31:23 Dokopa banya rara dupwa nyepala yuu yanda ipingi nyepo peteta pao yuu kyau Giliate dulurena dokona role pyapeta peya.
GEN 31:24 Peyamopape Anatumi Areme range Lapane paleyamo dokona kombeyameepo lamaiya. Embame doko mende lalyane lao sepala Jekope kando pii mende langa lanyi palyasereŋe laa napipi, leya.
GEN 31:25 Yuu kyau Giliate Jekope paleyamo dokona Lapane banya akali pipya epo kando nyepala anda pipala peteyami.
GEN 31:26 Dokopa Lapaneme Jekope lamaiyuo lao, Akipamo embame panga soo nambana wanenge dolapo pyao ralipala nyuo penge dopale ingyuo nyuo pupisi? leya.
GEN 31:27 Akipamo embame namba langi nao panga sepala yalu pyuo yuku panya pipisi? Langipili doko nambame kenane keyange pyao rae maiyuo lakuli pii dokopa role pyapeta mapanyi nembapuli.
GEN 31:28 Embame nambana wanenge kauwangepe dupwa nyinyi pyuo pena laa napili lao pipisi? Dopa pyuo kopyali ingyuo pipilyamo.
GEN 31:29 Emba randa jero ramo doko mee jero ingilyamo. Dopa pipyamopa emba rakanena Anatu dokome kukwa kombeyame namba langipya. Jekope kando pii keyange koope mende lasare daa lapya.
GEN 31:30 Emba rakanena anda sakapala dokopa panya pipilyamo doko silyu doŋo. Akipamo nambana pyarepa kana dupwa waa nyepala paane, leya.
GEN 31:31 Dokopa Jekope Lapane isingi lamaiyuo lao, Nambame wanene dolapo range mangarene lao pakapala pipu, leya.
GEN 31:32 Lapala, Nambana wambu dupwa keta embena pyarepa kana paliramo kando nyere ramo doko baa kara nara. Nambana akali dupwana lenge kambu dokona koto kandare ramo range nyelase, leya. Dopa leyamopape Oresolome waa nyiyamo doko baa see nao leya.
GEN 31:33 Leyamopa Lapaneme Jekopena komau andape dee Liyana komau andape dee enda kendemandedolapona komau anda koto saka naya. Saka napala Oresolona komau anda dokona kotala peya.
GEN 31:34 Dopa pyuo koto kareyamopape Oresolome pyarepa kana anda singi dupwa minyarambu nyepala mena kamele mata kyau petenge dokona isa retapala baa ketae peteya. Lapaneme banya komau anda dokona koto nyipuli lao kareyamopape kando nyii naya.
GEN 31:35 Dokopa Oresolome lao, Rakane emba namba kando imbwa napipi. Namba kingi lanyapu dokome roya kararo ingya nalyamo, leya. Dopa leyasa Lapaneme banya pyarepa kana peparae koto kaeya.
GEN 31:36 Dokopa Jekope imbu singi nyepala Lapane kando, Aki koo mende nambame pyuo mawa pii anjukunya yalo pipusa pyalana moko minyuo epelese? leya.
GEN 31:37 Embame nambana anda dupwa kendapuli minyinyi nembelene embena aki mende sipyamo nyilisi? Kando nyerende ramonambana wambupi embena wambupi karaminyi dokona minyuo epo panarenepa nakamame lao rolenale.
GEN 31:38 Doo ee kana akalisa lama emba role pyapeta yulu pyakayodokome embena mena sipisipi memepe dupwame yakane pyao nembo kaeya nao mondo lao manjo kareyamopa embena mena sipisipi kali dupwana lapo nambame pyao kuiyuo nakao pii nayo kande.
GEN 31:39 Mende mena suwapeme pyao nelyamo lao mee lasaka pii napala nambana dupwame panda nyinya lao alowa pyakao kareyo. Kukwa korakamapena mende pana naya ramo dokopa nambame kaeya nao yano pyakapili lao lao karee.
GEN 31:40 Korakama dokopa netame namba rakusi reya. Kukwa dokopa kupwame kumuo lenge luu dupwa nyuo kame siyu.
GEN 31:41 Dopako pyuo karo ee kana akalisa lama dolapona nambame embena yulu pyakao kareyo. Embena wanenge dolapona lao ee kana akalisa mendaki ipisu kisima yulu pyakayo. Dee ee kana pakinyamange dusipa menana suu pyao pyakao kareyo. Pyuo kareyonopape embame kando kaeyo yuu akalisa nambana yole isa nembakae.
GEN 31:42 Nambana rakanepa Aporakamepana Anatu Aisakeme baa mupwa lao wanyi wanyi pyuo kareyamo dokome yaki nyiyali doko kinyi embame namba pendewa pupyamo nembapili. Anatumi namba yasu nao pyuo kareyono kandeyamo dokona lao kwuaka kukwama emba pyalana pyuo lapyapya, leya.
GEN 31:43 Lapaneme Jekope isingi lamaiyuo lao, Wanake dolapo wane pipya dee menape nambana. Dupwa peparae namba rangenako doŋo aki yulu mende nambana wanakepe wane pipya pyuowape? leya.
GEN 31:44 Doko kapaŋa dakepa nambwa range yango sukusa kana minyuo lalu lao lambana. Dopa pirambanopa lasi pii doko dopa lambipya lao kana dokome lasaka pinyale, leya.
GEN 31:45 Dokopa Jekopeme kanande nyepala suu pyao kararamba lao yuunya apu rao pisiya.
GEN 31:46 Dokopa Jekopeme banya akali dupwame kana dupwa yapo nyepala malu palyinya leya. Malu palyuo kyau piyami dokona piso nenge neyami.
GEN 31:47 Lapaneme kana dupwa kingi Jika Saanduta leyasa Jekopeme Galete leya.
GEN 31:48 Dokopa Lapaneme lao, Kana malu palyisi dake nambwame pimbi lao pano sinya, leya. Dokona lao yuu doko kingi Galete lao silyamo.
GEN 31:49 Lapaneme deeko lao, Rali pyuo paramba dokopa Kamongome nambwa kando iso karena, leya. Dokona lao yuu doko Misipa lenge.
GEN 31:50 Lapaneme kaeya nao lao, Embame nambana wanenge dolapo randa mainyi pyambware ramo panda enda lapo konda pyuo nyere ramodoko mendeme kanda naramiŋi Anatumi dake suu pyao kararalya kande, leya.
GEN 31:51 Lapaneme Jekope dee kambako lamaiyuo, Kana malu palyuo piso karo andakele doko nambwana lao pisapunu petamo kandape.
GEN 31:52 Kana dolapo laparaeme mauwa piro kararamopa nambame nyuo yalo emba pyala epa naronopa embame dopako piri lao dokona ingyuo serelyambano.
GEN 31:53 Anatu nambwana rakange kyawa Aporakamemoo Neomoo dupwana Anatu dokome nambwa kondo lara ingilyamo lao Lapaneme leya. Leyamopa Jekopeme rakange Aisakena Anatu mupwa lao suu pyao pako kandenge dokona kingi lao lao kana minyiya.
GEN 31:54 Dokopa Jekopeme yuu kyau dokona mena pyao kiso maiyuo dokopa banya akali dupwa nala epena leya. Napala kukwa dokopa yuu kyau dokona luu paleyami.
GEN 31:55 Wamba yangama dokopa Lapaneme sipurapala banya kauwange wanengepe elyape keta palyuo pakana lao nyinyi pipala kapu kyuo anda peya.
GEN 32:1 Jekope kata nyuo peyamopa Anatunya aŋala lapome baakando nyiyami.
GEN 32:2 Dopa pyuo Jekopeme aŋala dupwa kandapala dokopa, Yuu dakena Anatunya yanda singi ami dupwa palenge lyamo, leya. Lapala yuudoko kingi Makanaime leya.
GEN 32:3 Yuu dokona karo Jekopeme akali wai pii minyingi dupwame yangonge Iso yuu Siya yuu Itome dokona singi dokona kareyamo dokona pii dopa pyuo lamaiyakala pena leya.
GEN 32:4 Nambana akali andake Iso namba Jekope embena yulu akali ingyuo karo. Namba Lapane role pyao kareyo doko epapu dakepa anda epelyo.
GEN 32:5 Nambame bulamakao donge sipisipi meme dee kendemandepe malu dakena reto karo. Emba namba epe kanda naserene lapala wambowana wainembelyo, lamaiyakala pena leya.
GEN 32:6 Wai minyingi akali dupwa papala epo Jekope lamaiyuo lao, Namwa embena yangone Iso kando nyuo lamaipala imwanopa baa akali andete kisima (400) lanyuo emba kandala ipyamo epelyamano, leyami.
GEN 32:7 Dokopa Jekope baa wakasa pakapala mona randaya.
GEN 32:8 Dopa pipala dokopa Jekope pakame kumapala banya wambu menape lamasa lao liti pipala, Mende Isomewambo pyara ramo dokopa mende doko mee pyakao parami, lao piya.
GEN 32:9 Dopa pipala Jekopeme loma soo lao, O Anatu, nambana rakange Aporakame Aisakepana Anatu doko, embame namba kando embena yuu range wambu dupwa keta pao keyange ketapisiri lee kande.
GEN 32:10 Embame namba kando mondo lanyi pyambuo keyange pyakae doŋo nambame embena kendemande koo ingyuo karo. Jotane yalo peyodokopa mee pangali isa dokopa peyo. Ipu dokopa gurupu lamasa lao neta epelyo doko.
GEN 32:11 Nambana yangonge Isona kingi rekya lao kyawa minyape. Baame namwaenda wane peparae kokwa soo pyala epelyamo dokona pakalyo.
GEN 32:12 Embena lalu lao lee kande dokona suu pyape. Embame namba mondo lanyi pyambuo wai kiso para dupwa kapa yaka larami ingya naramopa ipwa pota kee kana ingyuo para langii kande, leya.
GEN 32:13 Lapala kukwa Jekopeme banya mena karenge dokona yangonge Iso mee mairamo dupwa yapo nyiya.
GEN 32:14 Mena meme inya andete lama (200) kalyuwa 20 dee sipisipi inya andete lama (200) kalyuwa 20 mena kamele inya ikyane karekare 30 bulamakao dokona inya 40 kalyuwa 10. Donge inya 20 dee kalyuwa 10 nyuo reto kareya.
GEN 32:16 Dokopa banya kendemande akali dupwa mena rara wakale wakale liti pirapu mokwa soo maiyuo lao, Nakamba wambo pao dokopa kanya neesinya lao minyuo pupwape, leya.
GEN 32:17 Lapala wambeyamo doko lamaiyuo lao, Nambana yangonge Iso kandapala emba piso soo lao, Embena isingi akali doko apisi? Emba yuu anja rangese? Mena apinyi dalapo minyuo pelene leya kande dokopa embame
GEN 32:18 dopa pyuo isingi lao, Mena dupwa embena kendemande akali Jekopenande baame emba banya kamongo doko mee jilyamo lao Jekope baa range enakalyamo, lamaiyalapape, leya.
GEN 32:19 Dee mena enakana minyuo peyami dupwa kando lao, Nakamba Iso kando nyerami dokopa
GEN 32:20 dopa pyuo lamaiyuo, Embena kendemande Jekope repetale epelyamo, lalapape, leya. Jekopeme suu pyao, Nambame baa bange wambo mailyu dokome banya suu pingi alowa pipala koo piyu dupwa kame sakara lao maiya.
GEN 32:21 Baa dopa pyuo bange dupwa wambo mainyi nembapala paleyami mare dokona yuu gii kukwa doko dee kamba paleya.
GEN 32:22 Kukwa dokopako Jekope sipurapala banya enda lama dolapo dee kendemande enda dolapo banya wane wanake akalisa ipisu mendaki pipya nyepala ipwa Japoke keno penge dokona mapanyi pyambuya.
GEN 32:23 Mapanyi pyambwapala bange baa keta siyamo dupwa opetae pyambuo pipala baa iki karo kaeya.
GEN 32:24 Dokopa akali mendeme epo baapa kupyapeta pyuo karo yuu yanganyi reteya.
GEN 32:25 Akali dokome Jekope anamasi minyapa naya doko kandapala banya lengyare kuli doko pyao giilyiyasa kuli neta epeya.
GEN 32:26 Dopa pipala akali dokome lao, Yuu yangelyamo namba parowale pakapu, leya. Dopa leyamopape Jekopeme lao, Emba kapa puu lao panda jii narowale. Namba keyange keta pisapala yaki nyeronopa pare, leya.
GEN 32:27 Dokopa akali dokome Jekope kando lao, Embena kingi api lengese? leya. Isingi lao, Namba Jekope lenge, leya.
GEN 32:28 Leyamopa akali dokome baa lamaiyuo, Embena kingi Jekopeko laa narami. Embame isa wambupi Anatupape pipya poraiyuo pyakandapala anamasi minyalene dokonaembena kingi Isaraele larami, leya.
GEN 32:29 Jekopeme baa kando lao, Embena kingi doko namba langi, leya. Leyasa isingi lao, Akipamo embame nambana kingi dokona piso silisi? leya. Lapala dokona karo baame Jekope yako lao elyape keta pisapala yaki nyuo peya.
GEN 32:30 Peyamopa Jekopeme lao, Nambame Anatupa role pyao karapyamo kandapala dee lete karalyane lapala yuu doko kingi Peniele leya. (Ipuru pii kingi Peniele doko Anatunya lenge kambu dopale.)
GEN 32:31 Dopa pyuo karo neta pyakaeyamopa baa yuu Peniele yaki nyuo lengyare lakiya dokome karayukwara pyuo anda peya.
GEN 32:32 Dopa pyuo piyamo renge dokona lao banya para piyamo Isaraele wambu dupwame mena lengyare minju doko naa nao wasingi. Jekopena lengyare piyamo dokona lao naa nange.
GEN 33:1 Jekope kandeyamo dokopa Iso baa akali andete kisima (400) pipya role pyao epeyami. Doko kandapala wane dupwa Liya Oresolo dee kendemande enda dolapope keta lili pyuo maiya.
GEN 33:2 Maipala enda kendemande dolapo wane pipyawambo karena lao dee Liya wane pipya dokona pako kanya karena lao Oresolo Josepe baapa nyuo lumwa pyuo karo piya.
GEN 33:3 Dopa pipala baa pao wambapala yangongena lenge kambu siya dokona yuu yanda ipingi nyepo pangu sepa piya.
GEN 33:4 Dopa piyamopape Iso waiya lao epapala baa kupyuo nyinyi pyuo nyiyasa dokopa nakamba ee leyambi.
GEN 33:5 Dopa pyuo Isome enda wanepe dupwa kandalyuo kandapala lao, Emba role pyao epelyaminyi dupwa apimoose? leya. Dokopa Jekopemeisingi lao, Anatumi namba embena kendemande akali doko wane wanake dupwa ipyapala jiyamo dupwaŋa, leya.
GEN 33:6 Dokopa kendemande enda dolapo wane pipya repeta epo pangu siyami.
GEN 33:7 Dokopa Liya baa banya wane wanakepe pipya repeta epo pangu siyami. Dee enakana lumwa pyuo dokona Josepe Oresolopa repeta epapala pangu soo yako leyambi.
GEN 33:8 Dokopa Isome lao, Wambu wambo iminyi kando nyipu dupwa apa lao suu pyao peyapisi? leya. Leyamo dokopa Jekopeme isingi lao, Emba nambana kamongo dokome namba rae maiyuo kando nyere laopipu, leya.
GEN 33:9 Dopa leyamopape Isome lao, Nambana bange kapa silyamoŋo embena dupwa mee range sinyale, leya.
GEN 33:10 Dokopa Jekopeme poraiyuo kongo pyuo lao, Daaŋa. Emba nambapa rae mairi ramo doko bange jilyu dupwa nyere. Emba anjiki pyuo namba yako lao nyipisa embena lenge kambu doko Anatunya lenge kambu kandenge dopale ingyapyamo kando nyilyu, leya.
GEN 33:11 Anatumi namba nyisiyasa bange malu dupwa namba keta silyamo dokona lao lasaka pilyu dupwa mee nyelase lao karo nyepeyamo dokopa kaeya.
GEN 33:12 Dokopa Isome lao, Kapaŋa. Nambame laminyaroleŋe kata nyuo role pyao monale, leyamopape
GEN 33:13 Jekope isingi lamaiyuo, Wane nyaŋa dupwa poraiya nalyamo dee mena inya dupwa yakane manjiminyi kandalene. Yuu gii mendaki iki dokona mena dupwa ipyuo minyuo makandarama ramo dokopa kumuo otarami ingilyamo, leya.
GEN 33:14 Emba wambo parenepa dokona namba enakana moko minyuo eparo. Mena wanepe dupwa eparaminyili pyuo lanyuo epo yuu Siya dokona emba kando nyeroŋo, leya.
GEN 33:15 Dokona Isome lao, Dopa pyuo piri ramo doko nambana akali lapo embamoo pipya yaki nyepala parowale, leya. Leyamopa Jekopeme isingi lamaiyuo, Embame nambapa yulu keyange pyuo leene doŋo akali dupwame pirami mende see nalyamo, leya.
GEN 33:16 Leyasa Iso yuu gii dokopa kapu kyepala yuu Siya dokona range peya.
GEN 33:17 Dopa piyamopape enakana Jekope sipurapala yuu Sakote dokona peya. Papala Jekope baa rangena anda pyuo dee mena dupwana anda pyakamyuo piya. Dokona lao yuu doko Sakote leyami.
GEN 33:18 Dokona dee sipurapala epo yuu Kenane dokona taone mende Sikeme lenge doko kando nyiya. Baa wamba yuu Mesopotemia dokonako piso epeya kande. Yuu mende yuu taone dorena ingyuo siyamo dokona komau anda pyuo paleyami.
GEN 33:19 Doo paleyamo yuu dolapo Emona wambu dupwana akali mende Sikemena rakange dokona yuunde doko Jekopeme ropo pyao kana kulingi andete mendaki (100) maiya.
GEN 33:20 Yuu dokona baame mena pyao kiso maingi kana pyare leya. Lapala kingi Ele Isaraelena Anatu doko leya.
GEN 34:1 Jekope Liyapana wanenge Daina lenge doko enda yuu range dupwana lapona anda upunili peya.
GEN 34:2 Dokopa Ipi akali Emonaikinyingi Sikeme baa Ipi yuu dokona mupwa ingyuo kareya dokome wanake baa kandapala kuli koo palyuo minyarapala baa nyuo kepo piya.
GEN 34:3 Dopa pipala baamewanake kando mona reteyamo dokome yako lao pii anjiki pyuo lamaiyuo mona minyarambwaya.
GEN 34:4 Dopa pipala Sikememe banya rakange Emo lamaiyuo, Wanake dake namba nyelana ropo pyakana, leya.
GEN 34:5 Dokopa Jekopeme banya wanenge dokona pii nangende pyaminyilyamo lao siyamopape ikinyingi dupwa mena rapu pyuo isokota kareyamisa epapena lao mali siya.
GEN 34:6 Dokopa Sikemena rakange Emome Jekope lamaiyuo rolala epeya.
GEN 34:7 Doko Jekopena wane dupwa mena iso isokotakaro anda epeyami dokopaleko epeya. Wane dupwame Sikememe wanake doko kuli palyuo Isaraele wambu koo ingyuo kandanyi palyili lao nyiyamo sepala doko pii napengende pyamolamo lao imbumi kumuyami.
GEN 34:8 Dokopa rakange Emome nakama lamaiyuo, Wane Sikeme baame wanake doko mona retapala nyelana nyipyapya nyinyale lao kongo pyuo leya.
GEN 34:9 Lapala, Dopa pyuo wanake alowa pyuo nyepala mendakinyaingyuo karamana lao lao walengena palyamanale.
GEN 34:10 Dokopa nakama namwanayuu dakena role pyao kararama. Dee yuu dapwana range nyepala bisinase yulu pyuopalinya suu pyaraminyili pyuo palipale, leya.
GEN 34:11 Dee akali Sikeme baame Dainana rakange pemalengepe dupwa lamaiyuo, Namwa letamano dokona anjiki pyuo piraminyipa yole dupwa nyelana laraminyili pyuo joo wanake nyerowale, leya.
GEN 34:12 Bange rae mailyaminyili pyuo langyuo dee yapakaro dupwa kamame ketae nembo lalana masilyaminyili pyuo mee lalapape. Dokopa namba baa nyii larami ramo doko bange kingi palyarami dupwa kaeya nao mee jero, leya.
GEN 34:13 Dokopa Jekopena ikinyingi dusipame Sikememe nakamana pemalenge Daina nyepala pundu nyiyamo dokona Sikeme rakange Emopa kando isingi panga soo lamaiyuo lao,
GEN 34:14 Namwana pemalenge doko akali yanenge kaloma nange dupwame nyinya laa narama. Akali dopaleme nyerami dokopa namwa elyarama, leyami.
GEN 34:15 Daaŋa lao, Embena akali dupwa yanenge kalomao namwa pingi dopale pirami ramo dokopako iki emba lare doko serama.
GEN 34:16 Sepala dokopa namwana wanake dupwa emba nyepala embena dupwa namwa nyuo pirama. Dopa pyuo namwa embamoo role palyuo karo piramanopa mendakinya ingyuo para, leyami.
GEN 34:17 Dopa pyuo lamwanopape embamenamwana pii see napala yanenge kaloma nare ramo dokopa wanake range nyepala yuku parama ingilyamo, leyami.
GEN 34:18 Dopa leyaminyi pii dusipana Emo dee ikinyingi Sikemepame kapa keyange ingyuo peyamo siyambi.
GEN 34:19 Sepala akali parange dokome Jekopena wanenge mona reteyamo dokona lao pii leyami dokona yuu gii mende nemba nao piya. Baa banya wambu dupwana kamame mupwa ingyuo kareya.
GEN 34:20 Dokopa Emo banya ikinyingi Sikemepa yuu taone kame kambu wato lenge mare dokona papala nakamana akali yango taonena role pyao karenge dupwa dopa pyuo lamaiyuo,
GEN 34:21 Akali dupwame namwa pipya anjiki pyuo epelyaminyi. Dokona lao nakamba namwa role pyao yuu dapwana mee nyuo nao palenale. Yuu nakamba palirami doko kandamwa dokopa mee kapa andake ingyuo silyamo dokona enda alowa pyuo karamanale.
GEN 34:22 Dopa piramanopape akali dapwa namwa pipya mendakinya ingyuopalimana larami kata doko namwana akali dupwa nakamana pingi dopa pyuo yanenge kalomarama dokopa kapa larami ingilyamo.
GEN 34:23 Role pyao karamana lao pii mendakinya palyuo larama dokopa nakamana mena sipisipipi dee bulamakao pinjili bange dupwape namwana ingyuo para, leyambi.
GEN 34:24 Emo Sikemepa dopa pyuo leyambi dokopa akali dupwame lao, Kapalyamo namwa peparaena yanenge kalomao pimana, leyami.
GEN 34:25 Yuu gii repo epo papeyamopa yongo pyakepeyami dokona randosiyami dokopa Jekopena ikinyingi Simione Lipaepa Dainana pemalenge dolapome nakambana wua gela nyepala yuu taone dokona elya kalo papala akali dupwa peparae pyao kumakayambi.
GEN 34:26 Dopa pyuo ikinyingi rakangepa Emo Sikemepa dolapo pyao kumakapala karo dokopa Daina Sikemena anda peteyamo doko range nyuo peyami.
GEN 34:27 Jekopena ikinyingi lapo dupwa opetaeme pao nakamana pemalenge randa nyiya dokona lao yuu taonena bange keyange peparae andambupi nao nyuo peyami.
GEN 34:28 Dopa pyuo mena sipisipi bulamakao dongepe dee bange wakale wakale taonena siya dupwape isokotapena opetae nyiyami.
GEN 34:29 Bange nengepe dupwa raka pyuo nyuo soo pao karo dokopa enda wanepe opetae karapusi pyao nyuo dee andakare bange wakale wakale singi dupwa andambupi nao nyepala manjo peyami.
GEN 34:30 Jekopeme Simione Lipaepa lamaiyuo lao, Nakambame randa doko namba jelaminyi lyamo. Epapu yuu range akali Kenane dee Perasi rara dolapo pipya namba kando yanda silyamo. Namba akali malu reto kara nalyo. Dokona rara dolapome nyuo pakapala namba pyala epo nambana anda wambu ree palu nambape kokwa sinyi nembasarami, leya.
GEN 34:31 Dokopa nakamame isingi lao, Namwana pemalenge doko mee pamuku inginyi pyambwapya doko kapa ingyuo pelyase? leyami.
GEN 35:1 Anatumi Jekope lamaiyuo, Emba sipurapala yuu Betele dokona palyuo karala pare. Papala dokona embena yangone Iso pako epeenepa Anatu emba keta epo paneya kande dokona mena pyao kiso maingi kana pyare lare, leya.
GEN 35:2 Dokopa Jekope banya role pyao karenge akali dupwape banya ree palupi dupwa lamaiyuo lao, Nakamba yuu wakalemana pyarepa kana dupwa nembapala nakamana kata minyingi dupwa nembo rolo komau elyapedupwa wapwalapape.
GEN 35:3 Dokopa namwa dae yaki nyuo yuu Betele dokona yuku monale. Dokona nambana randa epeyamo dokopa Anatu nyisiya dokona lao mena pyao kiso maingi kana pyare mende lakamiru. Baa namba anja mendasa peyono dupwana yuu peparae yaki nyii napala kyawa minyuo kareya.
GEN 35:4 Dokopa pyarepa kanape dee uriŋi kalena palyingi dupwa nyuo Jekope maiyaminyi dokopa baame nyuo Sikeme repeta isa oke dokona rengesa malu piya.
GEN 35:5 Dopa pipala Jekope ikinyingimoo kata nyuo peyami dokopa wambu yuu taone dokona repeta palenge dupwame pakame kumapala peteta pyala paa nayami.
GEN 35:6 Dokopa Jekope banya wambu pipya yuu Kenane dokona yuu kuki Lusi kingi mende Betele lenge dokona epo mena pyao kiso maingi kana pyare lakamipala yuu doko kingi Ele Betele, leya.
GEN 35:7 Renge doko banya yangonge Iso pako epeyamopa Anatumi epo paneya dokona suu pyao dopa piya.
GEN 35:8 Orepekana kendemande enda Depora doko kumuyasa isa oke renge yuu Betele dokona malu pipala isa doko king Ee Lenge Isande, leyami.
GEN 35:9 Jekope yuu Mesopotemia kala epeyamopa Anatumi kamba epo maro lapala baa elyape keta pisinyi pyambwapala baa lamaiyuo lao,
GEN 35:10 Embena kingi Jekopelenge doko. Dee Jekopeko lao kara napala emba kingi Isaraele larami, leya. Leyasa banya kingi Isaraele leyami.
GEN 35:11 Anatumi deeko lamaiyuo, Namba Anatu Porai Wakasa dokome emba para pyao malu nyere dupwa lapo kiŋi ingyuo parami. Dopa pyuo wane wanake malu manjirinyi rara malu ingyuo para pyao parami.
GEN 35:12 Yuu doo nambame Aporakame Aisakepa maiyu doko emba jero. Dee emba karo paparene dokopa pyuo doko embena para pyao nyere dupwa maiyakaro, leya.
GEN 35:13 Lapala Anatumi Jekope pii lamaiyamo kareyambi yuu doko yaki nyepala yake panda dee peya.
GEN 35:14 Peyamo dokopa Jekopeme Anatu baa pii lamaiyamo mare dokona kana londe mende apu rao pisiya. Pisipala Jekopeme Anatunya kingi lao ipwa lapo kana dokona kulimbwapala isa olipi ipwange lapo kulimbuo piya.
GEN 35:15 Dopa pyuo pipala Jekopeme Anatumi pii lamaiyamo yuu doko kingi Betele leya.
GEN 35:16 Nakama yuu Betele yaki nyepala yuu Eporata ene panya peyami dokopa katasa Oresolo baa wane mata kopetame piya.
GEN 35:17 Sii lao mata piyamo randa koo neya dokopa enda wana manjana rolo peteyambi dokomelao, Mona nembasareŋe dakepa emba wane mendeko manjapene, leya.
GEN 35:18 Dokopa oo lenge kunjalana karo dokopa banya wane doko kingi Benoni leya. Lapala kumuya. Dopa leyamopape rakangeme kingi Benjamene leya.
GEN 35:19 Dopa pyuo enda Oresolo baa kumapeya dokopa yuu Eporata (epapu yuu Beteleme lenge dokona) panya penge kata dorena malu piyami.
GEN 35:20 Pipala malu dokona ketae Jekopeme suu pyao kararoŋo lapala kana londe mende minyuo pao pisiya. Doko dakepape mee Oresolona malu dokona piso karamo.
GEN 35:21 Isaraele baa mee kata pao karo yuu Ita anda londe kaname pisinde kareya doko yalo papala donopisa komau pipala paleyami.
GEN 35:22 Isaraele baa yuu dokona paleyamo dokopa akali Urupeneme banya rakangena kamba enda Bilya lenge dokopa role pyao palimbi leyaminyi sepala Isaraele imbumi kumuya. Jekope baa wane akalisa ipisu lama mandeya.
GEN 35:23 Liyana wane mandeyamo dupwa wane mupwa doko Urupene. Dee lapo dupwana kingi Simione Lipae Juta Isaka dee Sepyulane.
GEN 35:24 Oresolona wane mandeyamo dolapo Josepe Benjamenepa.
GEN 35:25 Oresolona kendemande enda Bilyana wane mandeya dolapo Dane dee Napatalaipa lenge.
GEN 35:26 Liyana kendemande enda Silipana wane mandeyamo dolapo Gate dee Asapa. Wane dupwa Jekopeme yuu Mesopotemia dokona karo mandeya.
GEN 35:27 Jekopeme yuu Mamare rakange Aisake palenge anda range dokona epeya. Yuu mendaki doko kingi Kitiarapu kingi mende Eperone lenge. Yuu dokona Aporakame Aisakepa wambo nakambana kulisa ingyuo paleyambi.
GEN 35:28 Mange dokopa Aisake baa ee kana 180 nembapala kumuya.
GEN 35:29 Baa mondo laokaro yaku nao banya wambu kumuo penge kata dokona peyamopa ikinyingi dolapo Jekope Isopame nyuo malu piyambi.
GEN 36:1 Isona para pyao nyiyamo dupwa. (Dupwana kingi mende Itome lenge.)
GEN 36:2 Iso baa Kenane enda rema nyiya. Dokona mende Iti akali Elone dokona wanenge Ata lenge. Mende Okolipama baa Ana wanenge. Ana baa dee Ipi akali Sipyanena ikinyingi doko.
GEN 36:3 Dee enda mende Basemate baa Isamaelena wanenge Nepayotena pemalenge doko nyingi.
GEN 36:4 Enda Ata baa Elipasi Isona manjakamiya. Basemate baa Uruele mandeya.
GEN 36:5 Okolipama baame Jeyusi Jalame dee Koradusipa mandeya. Wane dusipa Iso yuu Kenane dokona karo mandeya.
GEN 36:6 Dokopa Isome banya enda wanepe dee banya anda role pyao palenge wambu dupwa nyuo mena bulamakao pinji bangepe yuu Kenane dokona kando nyiyamo dupwa peparae nyepala banya yangonge Jekope yaki nyuo yuku mendasa peya.
GEN 36:7 Nakamba mena maluminyapala panda see nayasa dokome pakao kararambi ingya nayamopa dokona rekya lao mendasa peya.
GEN 36:8 Papala Iso kingi mende Itome lenge baa yuu Siya kyau pyalya pyana pingi dokona pao nyuo paleya.
GEN 36:9 Iso para piyamo dupwana kingi dakena palamo. Iso baa Itome wambu yuu kyau Siya dokona paleyami dupwana rakange kyawa.
GEN 36:10 Banya wane mandeyamo dupwana kingi dopa pyuo leya. Banya etenge Ata baa Elipasi mandeya. Etenge mende Basemate lenge baame wane Uruele mandeya.
GEN 36:11 Elipasi baame wane Temane Oma Sepo Gatama Kenasi dusipa mandeya.
GEN 36:12 Dee Isona ikinyingi Elipasinya kamba enda mende kingi Timina lenge baame wane Amaleke mandeya. Wane dusipa Iso etenge Atana para piya dokona ingyuo manjo peyami.
GEN 36:13 Wane dasipa Iso etenge mende Basemate lenge dokona ikinyingi Uruele lenge dokome para pyao nyiya. Nakamana kingi Nayate Sera Sama Misa lenge.
GEN 36:14 Dee Iso etenge mende kingi Okolipama lenge dokome wane rema Jeyusi Jalame Korape mandeya. Enda Okolipama doko Anana wanenge. Dee Anana rakange doko Sipyane lenge.
GEN 36:15 Akali dapwa Isome mandeyamo dokona mendeme para piyamo kamongoyami dupwa Isona wane kyawa baame mandeya. Elipasi baa Isona wane mupwa ingyuo mandeya. Dokome mandeyamo dupwa Temane Oma Sepo Kenasi
GEN 36:16 Kora Gatama Amaleke. Nakama Elipasinya rara dokona kamongapala rakange kyawa ingyuo peyami. Nakama Iso etenge Ata dokona apusingi lapo para pyapala kareyami.
GEN 36:17 Dasipa Iso ikinyingi Uruelena mandeyamo yuu Itome dokona kamongo ingyuo kareyami. Nakamana kingi Nayate Sera Sama dee Misa dusipa Iso etenge Basemate dokome para pyao nyiya dokona ingyuo dupwa rakange kyawa ingyuo peyami.
GEN 36:18 Isona etenge Okolipamame akali andake mandeyamo dusipana kingi Jeyusi Jalame Kora mandeya. Isona etenge Okolipama baa Anana wanenge dokome wanedupwa mandeyamopa akali andake ingyuo peyami.
GEN 36:19 Dusipa Iso dee kingi mende Itome lenge dokona para pyao nyiyamopa rakange kyawa ingyuo peyami.
GEN 36:20 Akali Ori rara Siya lenge banya ikinyingi dupwa Lotane Sopyale Sipyane Ana Disone Esa dee Disane.
GEN 36:21 Nakama Siyana ikinyingi dupwa yuu Itome Ori wambunya rakange kyawa ingyuo nakama yuu dokona range akali ingyuo kareyami.
GEN 36:22 Lotanena pemalenge doko Timina lenge. Lotanena ikinyingi dolapo Ori Imanepa lao pingi.
GEN 36:23 Sopyale ikinyingi dusipana kingi Alopana Manakate Epale Sepo dee Oname lenge.
GEN 36:24 Dee Sipyane ikinyingi dolapo Aiya Anapa lenge. Akali Ana baame yuu muiyane dokona rakangena mena donge rapu pyakamyuo kareyamo dokopa ipwa guunde isasa pyuo epeyamo kando nyiyamo akali doko.
GEN 36:25 Ana baa wane Disone wanake Okolipama lenge dokopa mandeya.
GEN 36:26 Disone baa wane kisima Emitane Esipane Itirane dee Kerane dusipa mandeya.
GEN 36:27 Esa baame mandeyamo dupwana kingi Bilano Sapane dee Akanope lenge.
GEN 36:28 Disane baa wane lama Usa Aranepa mandeya.
GEN 36:29 Ori wambu dusipana akali kyawa dupwa kingi Lotane Sepyale Sipyane Ana
GEN 36:30 Disone Esa dee Disanepe dusipa kareyami. Nakama yuu Siya range akali rara ingyapapu rakange kyawa ingyuo peyami.
GEN 36:31 Isaraele akali mendeme kiŋi ingyuo iso karapa nayamopa yuu Itome dokona akali dasipame kiŋi yulu pyuoko kareyami.
GEN 36:32 Biona ikinyingi Bela yuu Itome dokona iso kareya. Banya yuu taone doko Dinapa lenge.
GEN 36:33 Bela kumapeyamo dokopa yuu Bosera range Serana ikinyingi Jopape dokome banya panda nyepala iso kareya.
GEN 36:34 Dee Jopape baa kumuyamo dokopa yuu Temane range Usame dokome banya panda nyiya.
GEN 36:35 Usame baa kumuyamo dokopa Atate Betatena ikinyingindeme Mitia wambu Moape yuu dokona paleyaminyi pyao nyuo anameya akali dokome banya panda nyiya. Banya taone kingi Apiti lenge.
GEN 36:36 Dee Atate kumuya dokopa yuu Maserika range akali Samila dokome banya panda nyepala kiŋi ingyuo isiya.
GEN 36:37 Samila kumapeya dokopa yuu Oriyapote range ipwa Yuporisa repeta karenge akali Sauli lenge dokome banya panda nyuo iso kareya.
GEN 36:38 Dee Sauli kumapeyamopa Akapona ikinyingi Bealoyane lenge dokome banya panda nyuo kiŋi ingyuo iso kareya.
GEN 36:39 Dee Bealoyane Akapona ikinyingi doko kumuya dokopa Atate banya panda nyiya. Banya taone kingi Pau lenge. Dee etengena kingi Meketapele lao pingi. Baa Matiretena wanenge. Matirete baa Mesakapena wanenge.
GEN 36:40 Dusipa Isona wane akali andake ingiyami dupwanakingi palamo. Nakama rara ingyapapu yuu palengenyili pyuo kingi pyasi palamo. Timina Alopa Jetete
GEN 36:41 Okolipama Ela Pinone
GEN 36:42 Kenasi Temane Mipisa
GEN 36:43 Makitiele dee Iramo. Nakama Iso Itomena rakange dokona wane kamongoyami dupwa yuu range palengenyili pyuo rakange kyawa ingyuo peyami.
GEN 37:1 Jekope baa rakange paleyamo yuu Kenane dokona mee palyuo karalu kareya.
GEN 37:2 Arome pii Jekopena ree palu palyuo peyaminyi dokona lao pyasi palamo. Josepe baa ee kana akalisa ipisu yanda ipingi ingiyamopa banya rakange Isaraelena enda Bilya Silipa dolapome mandeyambinyi yangonge dupwa pipya baa role pyao mena sipisipi memepe iso kareyaminyipa nakama yulu kapa pii nalyaminyi lao rakange lamaiya.
GEN 37:3 Dokopa Isaraeleme emapanda Josepe mandeyamo renge dokona Josepe kando ama mona retapala yangonge dupwa kando mee kuku pyuo rae maiya. Dopa pipala baame komau londe pepingi keyange yapasi kingi epengende wasapala Josepe maiya.
GEN 37:4 Rakangeme dopa pyuo Josepe yapo rae maiyuo kareyamo kandapala banya yangonge dupwame Josepe epe kanda napala yuu peparae isi piyami.
GEN 37:5 Yuu mendepa Josepe kombeya mende pipala yangonge dupwa polo lamaiyamo siyaminyi dokopa baa kando kamame ipyuo peteyami.
GEN 37:6 Baame nakama lamaiyuo, Nambame kombeyande pipu doko apa pyuo pipi lao selapa, leya.
GEN 37:7 Namwa peparae ee dokona witi pyake pasi dupwa yama pyuo karamwa dokopa nambana yama pisi doko sipurapala roya karapya. Roya karapyamopa nakamana yama pisi dupwame nambana dokona karo awali lao isarena ingyuo karo pangu simi, leya.
GEN 37:8 Leyasa banya yangonge dupwame baa imbwuapala piso soo, Emba kiŋi ingyuo karapala namwa iso karapuli lao suu pilisi? leyami. Lapala banya kombeya polo leyamo siyami dokona lao epe kanda nayami.
GEN 37:9 Dee Josepe kombeya mendeko piya dokona yangonge dupwa lamaiyuo lao, Dee kombeya dakena doko neta kana dee bui akalisa ipisu mendakipi namba karapunde dokona isarena pao pangu soo karalaminyi, leya.
GEN 37:10 Banya rakange yangongepe dupwa lamaiyamo dokopa rakange baa pyalana pyuo lao, Kombeya dokome pipya doko apiyakalende pipyamo karene? Embame embena rakanepe endakinyipi dee yangongemoo dupwa emba kando isarena ingyuo karo pangu serama lao suu pilisi? leya.
GEN 37:11 Dokopa Josepe yangonge dupwame baa yango palyiyaminyipape banya rakange dokome dopa pyuo piyamo dupwana suu pyanyi pyano kareya.
GEN 37:12 Yuu mendepa Josepena yangonge dupwa yuu Sikeme dokona rakangena mena rapu pyakamyuo karala peyami.
GEN 37:13 Dokopa Isaraeleme Josepe lamaiyuo, Embena yangongemoo yuu Sikeme dokona menareto karala paminyi dokona paale rapa rapa pyuo karape, leya. Josepeme isingi lao, Namba kapa karo parole, leya.
GEN 37:14 Dokopa banya rakangeme Josepe lamaiyuo, Embena yangongemoo lopao mena dupwa mende pyuo pingi pira kandala papala langyala epale puu, leya. Rakangeme dopa lao, Yuu Eperone lama dokona pisu pena, leya. Josepe baa yuu Sikeme dokona papala
GEN 37:15 pau dupwana papyuo koto kareyamo dokopa yuu range akali mende baa kando nyepala piso soo, Emba aki kotelepe? leya.
GEN 37:16 Nambana yangonge wane dupwa kotelyo. Nakamba mena dupwa lanyuo papala anjale karaminyi lao emba silipi? leya.
GEN 37:17 Akali dokome lao, Nakama dae yaki nyepala mendasa pumi doko yuu Dotane dokona panya laminyi sipu, leya. Doko sepala Josepe banya yangonge dupwa moko minyuo pao yuu Dotane dokona kareyaminyi kando nyiya.
GEN 37:18 Nakama kareyami dokona epana nanesa dulusa epeyamo kandapala apa pyuo pyarama lao leyami.
GEN 37:19 Nakamayango sukusa lao, Yea, kombeya pingi akalinde kandapi doko epelyamo kanda, leyami.
GEN 37:20 Dakepa waiya lao pyapala banya yango doko yuwalena malyapala menarae lengeme pyao nao pipya lapala dokopa banya kombeya dokona aki mende pyakamilyamo lao kandarama, leyami.
GEN 37:21 Urupene baame sepala karo Josepe nyuolete nembaroŋo lao suu piya. Suu pyapala lao, Lete mende pimanale.
GEN 37:22 Baa pyapa napala yuwale mendena mee kupyuo malyamana. Nakamba rangemepyaope pipa nalapape, leya. Urupeneme nakama lenge mende rarami dokopa nyuo rakange keta mapakamiro lao suu pyao leyamo piya.
GEN 37:23 Josepe yangonge dupwa kareyami dokona epeyamo dokopa banya pepingi londe yapasi pyuo epeyamo doko rokonyiyami.
GEN 37:24 Dopa pipala baa yuwale wambarae kyasisi mendena kupyuo malyiyami. Yuwale doko ipwa see nange.
GEN 37:25 Dopa pipala nenge nao piso kandeyami dokopa Isimaelena rara akali lapo yuu Giliate dorena piso epo Isipi panya nakamana mena kamele dupwana isa roo keyange dee mamba rendamu pingi lapope retapala manjo epeyami.
GEN 37:26 Dokopa Juta lenge dokome yangonge dusipa lamaiyuo, Namwame namwana yangonge pyao yalu pirama dokome aki paliramo nyerama lyasilisi?
GEN 37:27 Isimaelena rara akali dupwa maiyuo kana nyemana. Dopa pyuo mairamaramo doko baa randa maiya naramasa pira. Baa namwana yangonge ranjama mendaki doŋo, leya. Leyasa yangonge dusipame kapa lyamo, leyami.
GEN 37:28 Leyaminyipa Mitiane akali bange ropo pyao paenge lapo repeta epeyami dokopa Josepe yuwalena paleya doko pulyuo nyepala kana kulingi akalisa lama jinya lapala Isimaele akali Isipi panya epeyami dusipa ropo pyao nyuo maiyami.
GEN 37:29 Enakana Urupene yuwale dokona palira lao kandala epeya dokona pali nayamosa baa kondome kumuo yanenge pepingi banya doko minyuo rokoya.
GEN 37:30 Rokwapala baa yangonge dupwa kareyami dokona kapu kyuo epapala lao, Wane kandapi doko pali nalyamo. Namba apa pyuowane? leya.
GEN 37:31 Leyamosa nakambame mena meme mende pyapala ranjama dokome Josepena komau londe keyange dokona pareyami.
GEN 37:32 Parapala pao nakamana rakange keta minyuo epapala lao, Komau dapa pisi sipyasa kando nyimwa doko embena wane dokonape lao kanda, leyami.
GEN 37:33 Leyamisa baame ikinyinginya doko lao kandapala lao, Kinyi doko banya doko lamo. Mena rae lengeme pyao injalya injana pyuo nao kaemi lyamo, leya.
GEN 37:34 Jekopeme doko sepala banya komau doko minyuo rokwapala komau pupurindeme kanya puu pisiya. Mona randalyo lao piya. Dopa pyuo banya wane dokona lao yuu malu ee lao kumanda peteya.
GEN 37:35 Dokopa banya wanenge ikinyingipi peparaeme mona minyarambwuamwali lao piyaminyipape baa kapa mona minyarambwuara ingya nayamopa lao, Kararo dusipana wane Josepena lao mee kumanda piso karo pao kumuo pao baa kandapala dokopa kame serona, lapala kaeya nao kumanda peteya.
GEN 37:36 Dopa lao piso kareyamo dokopa Mitiane akali dupwame Josepe Isipi dokona lanyuo pao yanda singi Potipa lenge doko keta kana ropo pyao maiyami. Akali doko kiŋi Peraona anda dokona karo yanda singi yango rapu pyuo kareya.
GEN 38:1 Yuu gii dokopana Juta baame yangonge dupwa yaki nyepala akali mende Ira lenge yuu taone Atulumu palenge dokona peyamopa rolepyao paleyambi.
GEN 38:2 Dokopa Kenane akali Suana wanenge kando rae maipala baa nyiya.
GEN 38:3 Nyepala role paeyambi dokopa wane ingiyamopa Ere lenge doko mandeya.
GEN 38:4 Enakao dee wane paleyamopa wane Onane kando nyiya.
GEN 38:5 Dee wane mendeko manjipala kingi Sela leya. Juta baa yuu mende Kesipi lenge dokona palyuo wane doko mandeya.
GEN 38:6 Juta baa banya wane mupwa Ere dokona wanake mende Tama lenge nyakamiya.
GEN 38:7 Yuu mendepa Ere baa yulu kopetame piyamo dokona Kamongome soo epe nasepala baa pyao kumanyi nembeya.
GEN 38:8 Pyapeyamopa Juta baame ikinyingi enakana Onane kando, Emba yangonena enda waiya dokopa role pyao palirambi. Namwana mawa pii palengenyili pyuo emba ane yangongepa dokome enda waiya dokona nyepala para pyao nyere dupwa yangongena apo dokona kararami, leya.
GEN 38:9 Dopa pyuo leyamopape Onane baame wane nyeramo dupwa banya angingyuo paa narami doko sepala banya yangongena etenge waiya nyuo dokopa ipwange doko mee neta nembeya. Dopa pyuo yangongena apo dokona mende alo pii nana lao piya.
GEN 38:10 Baa dopa pyuo Kamongo kando rae maiya nanyi pyambuyasa Kamongome baa opetae pyao kumakaya.
GEN 38:11 Dopa piyasa Jutame enda kauwange waiya Tama lenge doko lamaiyuo, Nambana wane Sela andapelyape lao embena rakanena anda waiya iso pisiri paale, leya. Doko ikinyingi lama dolapo enda dokomeko reto paleyamo kumuyambi dokona dee wane Sela kumakaramo lao suu pyapala rakangena anda range pena leyamosa peya.
GEN 38:12 Yuu mendepa Jutana etenge Suana wanenge doko kumuya. Kumuyamo dokopa Juta kumanda peteya. Piso polakao nembapala dokopa baaakali Ira yuu Atulumu range banya puu minyingi dokopa yuu Timina banya sipisipiimanji pyake pao kareyami dokona panya peyambi.
GEN 38:13 Peyambinyi dokopa lapome epo Tama lamaiyuo, Kauwane baa yuu Timina sipisipi imanji pyake palanya pelyamo, lamaiyaminyi sepala
GEN 38:14 baame banya enda waiyana komau dupwa neta nyepala komau wakale dupwa nyepala pee pyuo dokopa lenge kambu yambe piya. Yambe pyapala yuu taone Enaimi kata Timina penge dokona iso peteya. Baame wane Sela andapala namba nyepa napyamo mee peto lao suu pyao piyasa piya.
GEN 38:15 Jutabaa epapala dokopa pasende enda dupwame komau nyepala lenge kambu yambe pingi dopale ingiyasa baa pamuku enda lao suu piya.
GEN 38:16 Enda doko banya kauwangelao see napala dokopa baa kata nemba nemba peteyamo dokona papala, Isokota nyembanale bwua, lamaiya. Enda dokome, Aki mende jerenepa nyerambase? lao piso siya.
GEN 38:17 Baame isingi lao, Meme ikyane mende enakana jero, leyamosa enda baame, Kapaŋa mena ikyane doko angi jero lao wambo mee bange mende lasaka pyuo jelase? leya.
GEN 38:18 Aki mende makande pyuo jowase? laopiso siya. Endame isingi lao, Embena kingi pyasi palenge namba puu kareta dokopa pangali minyuo papingi dokope jii, leyasa maiya. Maipala angi nyiyambisa wane ingyara ingiya.
GEN 38:19 Enakana Tama sipurala papala komau lenge kambu yambe piyamo doko roko nyepala banya enda waiyana komau dee pee piya.
GEN 38:20 Yuu mendepa Juta baa meme ikyane mende nyepala banya puu minyingi yuu Atulumu range maiya. Maipala enda bange makande pii lao maipu doko range nyakala pena leya. Dopa pyuo maiyala peyamopape enda baa kota kaeya.
GEN 38:21 Koto saka napala yuu range akali dupwa piso soo, Pasende enda mende Enaimi repeta kata nemba nemba peteyapya doko epapu anja petase? leya. Nakama isingi lao, Yuu dusa pasende enda mende pisa nange daa, leyami.
GEN 38:22 Dokopa baa kapu kyepala Juta kareyamo dokona papala, Namba koto kaepunupa yuu range akali dupwame panda dokona pasende enda mende pisa nange langimisa epelyo, lamaiya.
GEN 38:23 Pii doko sepala Juta baame, Baa pangali nyinya kaeyambana. Dee koto nyii nambanale. Wambu dupwame nambwa kando giyuo lasarami. Mena doko emba keta pyambwapu doko enda kando nyii nalene lyamo doko pii mende pali nara, leya.
GEN 38:24 Kana rema papeyamopa lapome Juta lamaiyuo, Embena kauwane kande doko mendeme nyiyande dakepa wane palamo, leyami. Dokopa Jutame enda baa neta nyepala isare dokona pyao kisinya, leya.
GEN 38:25 Baa nyuo epeyaminyipa kauwange ketapii nembo lao, Bange embena kingi palenge namba puu kareta pangalipi reto peto. Dupwa jiyamo range dokome nyiyamopa wane palamoŋo dupwa kandapala apinya lao kandalase? leya.
GEN 38:26 Jutame dupwana soo manji nyepala lao, Enda baa rolae ingyapyamopa nambame kopetame piyulyamo. Namba wane Selana nyakamipenge doko kaeyo, lapala dee baa kamba nyii napala kaeya.
GEN 38:27 Enda baawane mata piyamo manjo dokopa wane reme paka manjira ingiya.
GEN 38:28 Oo manjo nyelana siyamo dokopa wane mende wambo kingi neta peeya. Kingi peeya dokona enda wane manjinya role pyao peteyambi dokome puu wale kone lapo nyepala banya kingi dokona puu pisakamyuo lao, Dake wane angi, leya.
GEN 38:29 Leyamopape dee kingi kuilanyiyamopa wane mende doko nyuo wambakaya. Dokopa enda wane manjinya role pyao peteya baame wane doko kando lao, Yea dopa pyuo pulipyao range neta epanapyane, leya. Dokona lao wane doko kingi Peresa leyami.
GEN 38:30 Dokopa yangonge puu wale kone kinginya kareta doko mandeya. Doko banya kingi Sara leyami.
GEN 39:1 Isimaele akali dupwame Josepe ropo pyao nyiyami kande doko baa yuu Isipi lanyuo peyami. Lanyuo peyaminyipa Peraona yanda singi mupwa dokona mende Isipi range Potipa lenge dokome Josepe ropo pyao nyiya. Yanda singi doko kiŋinya anda andake dokona yanda singi yango dupwa iso karenge.
GEN 39:2 Dokopa Kamongo dokome Josepe baapa role pyao karapala yulu peparae mondo lanyi pyambwakamiya. Josepe baame Isipi akali mupwa dokona anda palyuo kareya.
GEN 39:3 Banya akali mupwa kando Kamongome Josepe role pyao karapala mondo lanyi pyambwapyamopa yulu peparae elyape ingyuo pyuo karamo lao kandeya.
GEN 39:4 Potipa Josepeme nyiso pyuo kareya dupwana kando epe siya. Sepala banya andape bange dupwa peparaepe iso karena leya.
GEN 39:5 Dopa pyuo peyamopa Kamongome Isipi akalinya anda wambu peparae Josepe lapolapo lao nyisiya. Kamongome Josepe yulu piyamo anda dokonape yuu kamanda dupwanape mondo lanyi pyambuya.
GEN 39:6 Dokopa Potipame banya bange peparae range kaeyo Josepena kingi rakana palyiya. Palyiyamo dokome andana yulu mende range pii napala nenge napapu kaeya. Josepe wane porai lenge kambu keyange kyaka napengelende au pinginde kareyasa dokona
GEN 39:7 Potipana etenge baame kyanyi kando mona nyepala role pyao palimbana, lamaiya.
GEN 39:8 Lamaiyamopa Josepeme lao, Emba range silini doko. Nambana akali kamongo baame banya bange peparae namba keta pyamalyapala mee kamenge karamo.
GEN 39:9 Namba baapa kapa kapa ingyuo bange dupwa rapu pyuo karambano. Baame bange mende yapo reta nalyamoŋo embako ikilyamo. Namba apa pyuo emba letenedokona koo pipala Anatunya lenge kambu dokona yanda pirusi? leya.
GEN 39:10 Leyamopape enda baame yuu yangara kwuara piyamo yaka lao kaeya nao nyelana leyamopape Josepeme pii soo nyakami napala role pyao pali naro daako, leya.
GEN 39:11 Dopa piyamopape yuu mendepa anda iki siyamo akali dupwa pana nayami dokopa Josepe andakare papala yulu pyuo kareya.
GEN 39:12 Dokopa enda doko epapala banyakomau andupingi doko minyapala rate dokona palimbana leyamosa Josepe baa kamanda ralo pyakao peyamopa enda doko banya komau andupingi doko kingi rakana paleya.
GEN 39:13 Josepe dopa pyuo komau yaki nyepala makando peyamo kandapala enda doko yau pyapala
GEN 39:14 yulu akali dupwa kyakale lao, Kandalapa. Nambana akalidokome Ipuru akali doko nyepala andakare pyuo karena leyamopa baame namba keta koo piralyamo. Baame nambana panda epapala role pyao baapa palimbana lapyamopapenambame poraiyuo yau pyapusa
GEN 39:15 sepala banya pepingi roko retalamo dokoyaki nyepala kamanda makando pelyamo, leya.
GEN 39:16 Leyamo dokopa enda baame pepingi doko mee reto akalingi Josepena akali mupwa epelyape lao iso peteya.
GEN 39:17 Epeyamo dokopa, Dopa pyaamo lao wamba leyamuli pyuo Ipuru akali nyiinyi kendemande akali dokome nambana panda epapala koo pilyamo, lamaiya.
GEN 39:18 Dopa pipyamopape nambame yau pyapunu dokopa banya pepingi doko namba karapu dokona yaki nyuo kamanda pyakao pupya, leya.
GEN 39:19 Enda dokome, Dopa pyuoembena kendemande dokome namba makande pyaamo, lamaiyamo dokopa Josepena akali mupwa baa imbu singi koo nyepala
GEN 39:20 Josepe baa nyuo kiŋinya karapusi wambu palenge dokona palyiyasa paleya.
GEN 39:21 Baa karapusi anda paleyamo dokopa Kamongo Anatumi Josepe mona reto puu peyamosa karapusi isingi akalinya lenge kambu baa nyuo elyape inginyi pyambuya.
GEN 39:22 Dokopa karapusi isingi akali dokome yulu peparae iso karena lao rombo palyiyamopa karapusi andana yulu paleya dupwana peparae rapu pyuo kareya.
GEN 39:23 Dokopa karapusi isingi akali dokome yulu peparae Josepe keta retapala kaeya. Renge doko Kamongo baa Josepe keta role pyao kareyasa bange peparae piyamo dupwa elyape ingyuo peya.
GEN 40:1 Yuu mendepa Isipi kiŋi dokona ipwa waenena yulu pyakamingi akali dokopa banya borete wasakamingi dokopame Isipi kiŋi doko kando koo piyambi.
GEN 40:2 Dokopa Peraome doo akali lama yulu pingi akali wakale iso kareyambi dolapo kando imbwaya.
GEN 40:3 Imbwuapala baame puu maiyuo karapusi anda yanda singi mupwa iso kareyamo dokona Josepe kareyamo dokona pyambuya.
GEN 40:4 Yanda singi mupwa dokome nakamba Josepe role pyao nenge kiso karena lao kareya. Nakama karapusi yuu andarele paleyambi.
GEN 40:5 Kukwa mendepa Isipi kiŋinya waenena yulu pyakamyuo borete wasakamyuo pingi dolapome kombeyande piyambi. Akali mendaki range dokona kombeya piyambi dokona range wakale renge paleya.
GEN 40:6 Josepe yangama nakamba peteyambi dokona epeyamo dokopa mona kumuo peteyambinyi kandeya.
GEN 40:7 Josepe nakamba karapusi anda peteyambinyi epokandapala dokopa baame nakamba piso soo, Akipamo epapu nakamba lenge kambu kwuaro silyambinyi? leya.
GEN 40:8 Dokopa nakambame isingi lao, Nambwa range wakale wakale kombeya pimbwa dokona mendeme renge polo langirami ingya napya, leyambi. Dokopa Josepe lao, Nakambana kombeya dokona Anatumi renge polo langiraŋa. Kombeya doko serowale langipwape, leya.
GEN 40:9 Dokopa waenena yulu pyakamingi akali mupwa dokona kombeya doko dopa pipu lao leya. Kombeya dokona isa girapo nambana lenge kambu dokona lyakaro sipya.
GEN 40:10 Namba isa girapo kandapu dokopa wangya remana wakale wakale yoko pipala lyipya.
GEN 40:11 Dokopa Peraona pee kapo nambana kinginya nyuo minyaro karapunde kapo dokona girapo kinginyi retakamipala Perao maiyapupya, leya.
GEN 40:12 Josepeme kombeya iso baa lamaiyuo, Dokona renge doko wangya remana lyakaro sipya doko suu pyao yuu gii rema epo paramopa
GEN 40:13 Peraome embena koo doko kame sepakala yulu pingi dokona range piri laramopa waene kingyuo karo mainginyili pyuo maiyuo karare, leya.
GEN 40:14 Dopa pyuo peya kande dokopape namba kame see napipi. Namba dopa pyuo palipya lao Perao keta arome pyapala karapusi palo doko neta nyereŋe suu pyape, leya.
GEN 40:15 Namba koo mende pii nayonopa Ipuru yuu dokona waa nyuo epeyami dee dopako pyuo dae mende pipundena karapusi piminde daa, leya.
GEN 40:16 Kombeya doko mondo lao nyiso leyamo borete wasingi akali mupwa dokome kandapala baa Josepe lamaiyuo, Namba opetae kombeyande pipupyako, leya. Dokona pisiki minyasi remasa borete paleta nambana kyawa dokona soo pupupya.
GEN 40:17 Pisiki ketae dokona Peraona nenge rara wakale wakale yangasi dupwa sipya. Sipyamopape yakame dokona sipyamo nao soo pumi, leya.
GEN 40:18 Josepeme polo lao, Pisiki rema doko makande pyuo yuu gii rema dopale, leya.
GEN 40:19 Yuu gii rema paramopa Peraome embena mange pyao puku nyepala embena yongo doko isa mendena yukwaramopa yakame embena yongo doko nao soo parami renge dokona pipyalyamo, leya.
GEN 40:20 Yuu gii rema kore yuu sepeyamopa Perao banya mandenge gii pyaka siyamo dokopa banya yulu pingi wambu dupwa nenge andake nala epena leya. Nao peteyaminyi dokona banya waenena yulu pyakamingi borete wasakamyuo pingi dolapo epena leya.
GEN 40:21 Epena leyamopa waene kamwakamingi doko baa dee yulu palenge dokonako Peraona kapo doko minyuo waene kamuo jepa pyuo karena leya.
GEN 40:22 Dopa piyamopape borete wasakamingi doko pyao kumakaya. Doko Josepeme nakambana kombeyana iso leyamo dokonako angi pyaka siya.
GEN 40:23 Dokopa deewaenena yulu pyakamingi akali dokome Josepe nyisinya leyamo doko nyuo kame sepala kaeya.
GEN 41:1 Ee kana lama epo papeyamopa Perao kombeyame baa ipwa Naele pona dokona kareyande
GEN 41:2 bulamakao kameya keyange yanda ipingi nyepo ipwa pona dokona sipuro epapala kembo dupwa nao epeyami.
GEN 41:3 Dee bulamakao moeya nenge koo yanda ipingiko ipwa pona dokonako piso epapala mena doloma kareyaminyi ipwa marenge dokona kareyami.
GEN 41:4 Dopa pipala moeya nenge dusipame kameya yanda ipingi dusipa pyao neyami. Dopa pipala Perao lenge reya.
GEN 41:5 Rapala deeko paleya. Dokopa kenapa renge mendaki dokona yanda ipingi nyepo keyange wambu pyuo peteya.
GEN 41:6 Enakana dokonako kenapa yanda ipingi nyepo dee lokwasiya. Dupwa porambaiyeme pyao netame nao piya.
GEN 41:7 Kenapa moeya nenge dusipame yanda ipingi kameya dusipa pyao neyami dokopa Perao lenge rapala kombeyame lamo lao walu leya.
GEN 41:8 Yangama dokopa baa pyuo saka napala yuu Isipi pipulenge dee singi akalipi nyakala pena leya. Dupwame kombeya dopa pyuo pipu lao lamaiyamopape mendeme renge polo larami ingya naya.
GEN 41:9 Dokopa ipwa waenena yulu pyakamyuo karenge akali dokome lao, Wamba kopetame pyuo kame siyonde epapu suu pilyu.
GEN 41:10 Embame embena kendemande pipa imbwuapala borete wasingiakali mupwa nambapa karapusi anda yanda singi akali mupwa iso kareyamo dokona anjinyi pyambuii kande.
GEN 41:11 Dokona kukwa mendepa nambwa kombeya piyamba. Kombeya dolapona rangena wakale wakalena renge paleya.
GEN 41:12 Ipuru wane parangende kareyamo doko yanda singi mupwa dokona yulu pyakamyuo karo nambwana kombeya piyamba doko renge wakale wakale paleyamopa iso lakaya.
GEN 41:13 Baame pololeyamo doko angi pyaka siya. Dopa pyuo namba range yulu pingi dokona epo dee borete wasingi doko pyao yuku piyami, leya.
GEN 41:14 Dokopa Peraome Josepe lanyakala pena leyasa karapusi paleya dokona waiya lao nyepala epeyami. Dokopa Josepe komau wapuo angasi aku mondo lapala Perao peteyamo dokona epeya.
GEN 41:15 Dokopa Peraome Josepe lamaiyuo, Namba kombeya pipala lakana lapu doko mendeme polo lakalana saka nami. Embame kombeya iso lenge lami, leya.
GEN 41:16 Josepemeisingi lao, Nambame range laa nange. Anatumi Perao rae mairi dokona ingyuo iso lao rolakara, leya.
GEN 41:17 Dokopa Peraome lao, Namba kombeyame ipwa Naele nembange dokona karapunde.
GEN 41:18 Bulamakao kameya keyange yanda ipingi ipwapona dokona epapala kembo londe dokona nao karami.
GEN 41:19 Dokopa dee bulamakao wakale yanda ipingi nyepo moeya nao ipi pingi ronende imi. Nakama yongo karanange dopale yuu Isipi liti dakena namba wamba kanda nange.
GEN 41:20 Moeya nasi dupwame kameya yanda ipingi nyepo dusipa pyao nami.
GEN 41:21 Naminyipape yongo dokona nao palya napala wamba moeya nasi karenge dopaleko karami. Karami dokopa lenge rapu, leya.
GEN 41:22 Dee dopako pyuo kombeya pipala kandapunu dokopakenapa renge mendaki dokona yanda ipingi nyepo keyange wambu pyuo pisipya.
GEN 41:23 Enakana dokonako kenapa yanda ipingi nyepo dee lokwasiya. Dupwa porambaiyeme pyao netame nao piya.
GEN 41:24 Kenapa moeya nenge dusipame yanda ipingi kameya dusipa pyao neyami. Dokona nambame akali singi dupwa lamaipu dokopa mendemerenge polo langyalana saka nami.
GEN 41:25 Josepeme Perao lamaiyuo, Kombeya laparae dolapo mendakinya pipilyamo. Anatumi mende pirandena langilyu lao pipya.
GEN 41:26 Bulamakao yanda ipingi nyepo keyangepe dee kenapa yanda ipingi keyangepe kandapinyi dusipa suu pyao doko ee kana yanda ipingi nyepo dopale. Renge mendaki palamo, leya.
GEN 41:27 Dee bulamakao moeya nasi yanda ipingi nyepo enakana pyakalyo epo dee kenapa porambaiyeme pyao yando nasi dusipa ee kana yanda ipingi nyepo lopo andake sera dokona makande pyuo pipya.
GEN 41:28 Doko mee Anatumi mende pinya Perao emba langipyalyamo lalono dopaleko lyamo, leya.
GEN 41:29 Ee kana yanda ipingi nyepo yuu Isipi dakena nenge andake seramo narami.
GEN 41:30 Dee enakana ee kana yanda ipingi nyepoko lopo sera dokopa dolo ee kana yanda ipingi yuu Isipi nenge andake siyamo dusipa mee bange ingyuo para. Yuu gii dusipana yuu ketange pyao kwaeyo para, leya.
GEN 41:31 Ee kana nenge kakana peyamo neyami dupwa lopo andake seramo dokome mee ingyuo para.
GEN 41:32 Emba kombeya yuu lamasa lao pipinyi renge dokona Anatumi lao kaepala repe angi piroŋo lao pipyalyamo.
GEN 41:33 Dokona lao embame akali angi mona palenge singi mende koto nyepala yuu Isipi panda peparae iso karena lapenge.
GEN 41:34 Dee dopako pyuo akali lapo rombo palyapala yuu Isipi dokona kyawa nyuo iso karo ee kana yanda ipingi nenge kakana paramopa wambumi nenge manjo nyeraminyi dokona nyuu kingipaki pirami dupwana mendaki larapu nyuo nenge retenge anda reto karena lapenge.
GEN 41:35 Nakama ee kana nenge kakana paramo gii dupwana Perao embena kingi lao yuu taone dupwana nenge nyuo malu palyuo rapu pyuo kararami.
GEN 41:36 Nenge dopa pyuo retarami dokome yuu Isipi dakena lopo ee kana yanda ipingi nyepo seramo dokona kandamae pyuo sera dokona Isipi wambu dupwa kuma narami, leya.
GEN 41:37 Dopa leyamo dokopa Peraome dee banya yulu akalipimi doko angi pirandena lyamo lao siyami.
GEN 41:38 Sepala dokopa Peraome banya kendemande dupwa lamaiyuo lao, Namwame akali wakale dopalende anja mende Anatunya Imambumi pyaramo kararande koto nyeramase? leya.
GEN 41:39 Dokopa Perao Josepe kando lamaiyuo, Anatumi emba yapo yulu dupwa lasaka pilyamo. Akali angi mona palenge singi emba yale mende yuu dakena daalyamo.
GEN 41:40 Nambana isingi dupwa emba keta retaronopa nambana wambu dupwa emba lareneli pyuo mawa pii doko minyarami. Namba kiŋi rombo palyisi karo dokomeko iki mupwa ingili lao kararo, leya.
GEN 41:41 Dopa lapala Peraome Josepe lamaiyuo, Emba yuu Isipi dokona mupwa ingyuo karape lao rombo palyilyu kande, leya.
GEN 41:42 Dopa lapala Peraome banya uriŋi malawai lasi kinginya pisingi kiŋinya make palepeta doko neta nyepala Josepena kingi pisiya. Komau keyange nyuo pyakamyuo dee puu sane golome wasisi doko mangena sakamyuo piya.
GEN 41:43 Dokopa banya mena oseme ipyuo penge uliuli lapo pyuo singi dokona petena lapala yanda singi lapome wambu pakapunya lao banya kata retakamyuo wambo pena leya. Dopa pyuo Josepeme Isipi dokona mupwa ingyuo karena lao rombo palyiya.
GEN 41:44 Palyapala Perao Josepe lamaiyuo, Namba Perao kandapi. Yuu Isipi dakena embame mende laa narenepa mendeme kingi romo pyuo pii narami, leya.
GEN 41:45 Dokopa Josepe kando kingi Sapenatepanya lapala yuu Ono range purisi akali Potepera dokona wanenge Asenate baa nyakamiya. Dokopa Josepe Isipi panda dokona papyuo kareya.
GEN 41:46 Josepe baa ee kana akalisa rema ingiyamopa yuu Isipi dokona kiŋi Peraona yulu nyuo pyakamiya. Dopa pyuo palyuo karo yuu Isipi dokona papyuo kareya.
GEN 41:47 Ee kana yanda ipingi dusipana nenge wara piyami dupwa nenge soo kakana piya.
GEN 41:48 Ee kana doo yanda ipingiyuu Isipi nenge siya dusipana Josepeme nenge dupwa nyuo bake pyuo taone dupwanareteya. Mee yuu dusipana kapa pyuo nakamana taone andake palengenyili pyuo nenge nyuo reteyami.
GEN 41:49 Baame nenge andapyule nyuo bake pyuo reteyasa ipwa pota kee malu ingiya. Dopa pyuo kenapa waingi malu mee kakana siyasa yaka lalana saka napala akisipa lao soo gisapa nayami.
GEN 41:50 Ene lopo sepa nayamopa Josepe banya etenge Asenate yuu Ono range purisi Potepera lenge dokona wanenge nyiya dokona wane lama mandeya.
GEN 41:51 Manjipala Josepeme lao, Anatumi namba randa nyiyunupape dee nambana rakanena ree palupi nyuo kame sipili lao jilyamo lapala wane mupwa dokona kingi Manasa, leya.
GEN 41:52 Dee dopako pyuo, Anatumi namba randa nyuo karapunu panda dakena wane jilyamo, lapala wane enakana doko Eporaime leya.
GEN 41:53 Ee kana yanda ipingi yuu Isipi dokona nenge siyamopa nao rae maiyami doko oteyamopa
GEN 41:54 dee ee kana yanda ipingi nyepo Josepeme lopo sera leyamuli pyuo pyaka siya. Yuu menge dupwana lopo kone siyamopape yuu Isipi liti dokona nenge siya.
GEN 41:55 Yuu muu ree lao lopo siyamo dokopa Isipirange dupwa Perao kando lopoe leyami dokopa Peraome, Josepe karamo dokona pao lamaipala laramuli pyuo pipwape, leya.
GEN 41:56 Yuu panda peparae lao lopo konesoo kapa kapa piyamo dokopa Josepe baame nenge singi anda dupwa lumbwapala Isipi wambu ropo pyao nena lao kareya.
GEN 41:57 Yuu muu peparaena lopo kone siyasa Josepe kareya dokonako nenge ropo pyala epeyami.
GEN 42:1 Jekopeme yuu Isipi dokona nenge manjo bake piyaminyi silyamo leyami doko soo nyepala ikinyingi dupwa lamaiyuo, Akipamo nakama mee dupwana karamisi?
GEN 42:2 Nambame sipunu dokopa yuu Isipi dokona nenge silyamo letaminyi dokona ropo pyala pupwape. Namwa kuma namanale, leya.
GEN 42:3 Doko sepala Josepena yangonge akalisa Isipi dokona nenge ropo pyala peyami.
GEN 42:4 Jekopeme Josepena yangonge angi Benjamene doko pyakaramipi piraminyi lao pakapala pena laa naya.
GEN 42:5 Kenane dokona lopo andake siyasa wambu wakale wakalepe dee Isaraelena ikinyingi dupwape nenge ropo pyala peyami.
GEN 42:6 Josepe baa yuu Isipi dokona gapomane mupwa ingyuo karapala yuu muu peparae ropo pyala epeyaminyi baame maiyuo kareya. Dokona Josepenayangonge dupwa epapala banya lenge kambu siyamo dokona baa mupwa lao yuu dokonapangu siyami.
GEN 42:7 Josepeme nakama banya yangonge lao soo kandeyamopape baame kamenge wakalende karene lao masinya lao lao kareya. Baame pyalana pyuo lamaiyuo, Nakama yuu anja rangepe, leya. Isingi lamaiyuo, Namwa yuu Kenane range nenge ropo pyala epelyamano, leyami.
GEN 42:8 Josepe baame yangonge dusipa lao soo nyiyamopape nakamame baaŋa lao soo nyii nayami.
GEN 42:9 Baame nakamana lao kombeya pyakamiyamo dokona suu pyao karapala lao, Nakamame namwana panda poraipi daa lao maa palyuo kandala imilyamo, leya.
GEN 42:10 Dopaleyamo dokopa nakamba isingi lao, O kamongo, emba letene doko daa. Namwa mee embena kendemande akali ingyuo nenge ropo pyalana imwa, leyami.
GEN 42:11 Namwa ane yangongemoo pii kalunja nembo lenge akali epelyamano. Maa palyuo kandala epelyamande daa, leyami.
GEN 42:12 Josepeme nakama lamaiyuo, Kyambo. Nakamame yuupanda dake poraipi daa lao kandala imilyamo, leya.
GEN 42:13 Nakamame lao, Okamongo, namwana rakange mendaki yuu Kenane dokona karo wane akalisa ipisu lamamandeya dokona lumwa pyuo mandeya doko rakangepa karambi dee mende kumuya, leyami.
GEN 42:14 Josepeme lao, Nambame lalono doko angilyamo. Nakamba maa palyuokandalana epo pimi, leya.
GEN 42:15 Renge dokona lao namba dopa pyuo nakamba makande pyuo kandaro, Namba Peraona kingi dokona lao nakamba yangonge kuki anda karamo lami doko dae epa nara ramo nambame nakama yaki nyii naroŋo lalu lao leto.
GEN 42:16 Nakamba mendeme lanyala papale. Doloma iso anjaro kararaminyi dokopa nakamana pii kinyi panda kyambo lamipi lao makande pyuo kandaro. Mende ramo kandena. Perao mee karamo dokona nakamba maa palyuo kandala imilyamo doko lao lyakai soo gisarama.
GEN 42:17 Dopa lapala nakama yuu gii rema karapusi anda karena leya.
GEN 42:18 Dee yuu gii rema epapeyamo dokopa Josepeme lao, Namba Anatu mupwa lao suu pyao kingi lao karengeŋe. Nakamba laronuli pyuo pirami ramo dokome range lete wai pyao nyerami, leya.
GEN 42:19 Lapala, Nakama pii katalunja nembo lenge akali ramo doko nakama mendaki karapusi palaminyipanda dokona palenale. Lapo dupwa nakama nenge ropo pyami kandapi dupwa soo nakamana ree palu lopo siyacmo petaminyi dokona papale, leya.
GEN 42:20 Dopa pyuo papala nakamana yangonge kuki doko lanyuo eparaminyi dokome kinyi lami lao panaramopa nakamba pyao kuma narowale, leya. Sepala kapa leyami.
GEN 42:21 Nakama yango sukusa lao, Kinyi yangonge doko kando kopetame piyama. Namwa randa maiyama dokopa baame namwa kando nyisimili lao pisokondali piyamopape namwame sili see nale laa nayamase? Dokona dakepa randa doko namwa keta epo palamo, leyami.
GEN 42:22 Dokopa Urupeneme lao, Nambame wane doko randa maiya namana leyonopa nakamame sili see nale leyami kande. Dokona epapu baa kumuyamo dokona ranjamadoko namwa keta epo palyuo yano nyilyamano, leya.
GEN 42:23 Josepeme kande dokona letaminyi lao soo manji nyuo kareyamo doko see nayami. Wambo pii roko akali keta lao kareyami dokome nakamana pii see nangende karamo lao suu piyami.
GEN 42:24 Mange dokopa Josepe ee dokome lulaka peyasa nakama yaki nyuo papala ee leya. Ee lao popo nembapala nakama kareyami dokona epo Simione nyepala nakamana lenge kambu siyamo dokona kiimbuya.
GEN 42:25 Josepeme banya akali dupwa keta lao, Nakamana nyuu dupwana witijingi paki pyakamyuo dokopa mone dupwa range paki pyakamipala nenge katasa nao parami dupwa opetae paki pyakamipape, leya. Dokona dopa pyuo pyakamiyami.
GEN 42:26 Dokopa nakamana mena donge dupwana witi jingi nyuo retapala kata nyuo peyami.
GEN 42:27 Pao kwuayamo palirami mare dokona mendeme banya donge nenge mainyadokopa nyuu dokona kambu polo karo kandeyamopa rangena mone dusipa ketae paleyamo kando nyiya.
GEN 42:28 Nyepala yangonge dupwa lamaiyuo, Nambana mone dapwa range paki pyakaminyi nambana nyuu kambusa palamo, lao lasaka piyasa nakama walu lao mona nembo yango sukusa piso soo, Anatumi akinde namwa keta pilyase? leyami.
GEN 42:29 Rakange Jekope yuu Kenane kareyamo dokona epo pyaka sepala dokopa dopa pyuonde pipya lao lamaiyami.
GEN 42:30 Yuu range akali kamongo dokome namwa pyalanako pyuo yuu dokona maa palyuo kandakala imilyamo lao randa jipya.
GEN 42:31 Namwa baa lamaiyuo, Namwa pii kalunja lenge akaliŋi maa palyuokandala imwande daa lamaimwa.
GEN 42:32 Namwa rakange mendakinya wane akalisa ipisu lama mandeya dokona mende kumuyamopa dee lumwa pyuo mandeya doko rakangepayuu Kenane dokona karambinyi, lamwa.
GEN 42:33 Yuu range akali kamgongo baame langyuo, Nakama pii kinyi lenge ramo nakama mendali nambapa karambana. Doloma pao ree palu lopo karaminyi dokona papala
GEN 42:34 wane lumwa pyuo mandeya doko lanyuoko eparami. Dopa pyuo pirami dokopa kinyi nakama kalunja nembo lenge akalidoko panaramopa nakamana yangonge doko mee dee range peyakarowale. Peyaronopa nakama kapa nenge dupwa mee maso ropo pyala eparami, leya.
GEN 42:35 Witi jingi kulimbuyami dokopa akali peparaena nyuunya mone ranju dupwa range paleyande kandapala dokopa nakama rakangemoo pipya pakayami.
GEN 42:36 Rakange Jekopeme lamaiyuo, Namba isange doko kararaminyi kapa daa. Josepe pana naya. Dee Simione dopako pipyamopa dakepa Benjamene nyuo mona letaminyi dupwana namba apa lao paro?
GEN 42:37 Urupene dokome isingi lamaiyuo, Nambame Benjamene lanyuoko epa nayo kande wane nambana dolapo pyao malu piri. Baa namba keta pyamalyarenepa kapa lanyuoko eparo, leya.
GEN 42:38 Dopa leyamopape Jekopeme lao, Nambana wane doko nakama pipya kapa paa nara. Yangonge kumuya dokona baa iki lenge rao silyamo. Baa katasa pyasakarami. Nakambame namba yaku kareta dake randa koo doko jeramisa saka renge paleta kumuo paro, leya.
GEN 43:1 Kenane lopo siya doko soo andakiya.
GEN 43:2 Jekopena ree palu dupwa nenge Isipi rae ropo pyasi dusipa neyaminyioteyasa Jekopeme dee lama ropo pyala paipunya leya.
GEN 43:3 Jutame isingi lao, Akali dokome yangonge wane baa lanyuo eparimi lao kaeyapya. Doko role pyao epa narami ramo namwana lenge kambu dee kanda naro leyaŋa, leya.
GEN 43:4 Embame wane Benjamene lanyuo pupwa lare ramo doko nenge ropo pyakala parama, leya.
GEN 43:5 Wane daa lare ramo doko paa narama. Akali dokome lao, Yangonge wane doko lanyuo epa narami dokopa namba karo dakena dee epa narami, leya lyakande, leya.
GEN 43:6 Isaraele baame lao, Akipamo nakamame namba kopetame randa joo yangonge mende karamo lamaimisi? leya.
GEN 43:7 Nakama isingi lao, Akali dokome namwana ree palu dokona lao mee piso soo sulu sipya. Nakamana rakane lete karape? Nakama dusipakope panda yangone mende karamo? lapyasa namwa isingi lanyuo ipupwape lara lao see napala karapya lamwa, leya.
GEN 43:8 Dokopa Juta dokome rakange Isaraele lamaiyuo, Wane doko namba role pyao pupwa larenepa sipurapala monale. Dokona lao emba dee namwa namwana wanepe kuma namanale, leya.
GEN 43:9 Baa nambana kingi rakana palyapala kaelale. Nambapa pyamalyarenepa baa lao lanyuo anda epa naro ramo doko koo renge doko namba keta kapa kwuanyi nemba nao kararo ingyara, leya.
GEN 43:10 Dae dopa pyuo lao kara namwali doko yuu lamasa lao nenge manjo imwali lao suu pilyu, leya.
GEN 43:11 Dokopa rakange Isaraeleme lamaiyuo lao, Dopa pyuo parandena lyamo dopa pyuo pipa, leya. Yuunya bange angi kapa palenge dupwana lapo paki pipala mamba lapo amburali ipwangepe awa kyaa pingi lapope anga ulyape dee kumba roo lapope manjo pao akali doko mee pakiki mairami.
GEN 43:12 Dee kana mone kenda pyuo minyuo papale. Mone nakamana nyuunya pali narali paleyapya kande dupwa dee manjo parami. See nao kamenge reteyamipi?
GEN 43:13 Sipurapala yangone nyuo lanyuo akali baa karamo dokona dee kamba pupwa, leya.
GEN 43:14 Anatu Porai Wakasa dokome akali banya mona pyakaramopa baamenakama sakame kumaramopa nakamana yangonge mende doko dee Benjamenepa range pupwa lakanale. Nambana wane dupwa dee kando nyii naro ingiya kande doko dokolyamo, leya.
GEN 43:15 Leyamopa nakamame bange mee mairaminyi mone dupwa anda pyuolepe dee Benjamene opetae nyuo rapa rapa pipala Isipi papala Josepena lenge kambudokona pao pyaka siyami.
GEN 43:16 Josepeme Benjamene role pyao epeyaminyi kandapala banya kendemande akali anda yulu pyuo karenge doko lamaiyuo, Akali dupwa lanyuo pao nambamoo korakama nenge role pyao namanale mena mende pyao kisakana, leya.
GEN 43:17 Kendemande baa Josepe leyamuli pyuo pipala akali dupwa Josepenaanda lanyuo epeya.
GEN 43:18 Josepena anda nakama lanyuo peyamisa mone wambodupwa nyuunya paleyamo anda manjo peyamapya renge dokona namwa dae anda lanyuo epelyaminyi rapisi lao suu piyami. Pyapala karapusi pyuo mena donge dupwa nyakaopinya pyaminyi lao suu pyapala pakayami.
GEN 43:19 Pakapala nakama Josepena kendemande mupwa doko kambu repeta kareyamo dokona epo lamaiya.
GEN 43:20 O kamongo mende langimwali yaka emba sepe. Namwa wamba dae nenge ropo pyala epeyama.
GEN 43:21 Doko pao anda kauwa palirama yuu dokona mone range wakale wakale paleyamo kando nyiyama. Namwana mone kenda piyamo lanyuo epeyamano dopaleko range paleyamosa mone doko dee laeyo manjo epo dokopa
GEN 43:22 mone wakale nenge ropo pyarama dupwa manjawako epelyamano. Apimi namwana mone dupwa bake range dokona paki pyakayape? lao see nalyamano, leyami.
GEN 43:23 Kendemande dokome lao, Monanembo paka nalapape. Nakambanape nakama rakanena Anatu baame byake dokona yole retakaya. Wambo ropo piyaminyi mone doko namba keta piyami kande lapala Simione nakama kareyami dokona lanyuo epeya.
GEN 43:24 Dopa pipala nakama baame lanyuo Josepena anda kolandapala nakama ipwame kimbu wate pinya lao maipala baame donge dupwa nenge pyakamiya.
GEN 43:25 Nakama Josepe korakama dokopa role pyao nenge narami doko sepala bange mee mairami dupwa rapa rapa pyuo reto peteyami.
GEN 43:26 Josepe anda epeyamo dokopa bange mee mairami dupwa maipala banya lenge kambu siyamo dokona pangu siyami.
GEN 43:27 Baame nakama piso soo, Nakamana rakane alemo namba langiyami kande doko apa pipyamo karase? Baa kapa karase? leya.
GEN 43:28 Nakama isingi lao, Embena akali kuki namwana rakane doko baa mee letekaramo, lapala banya lenge kambu dokona wapambu karapala pangu siyami.
GEN 43:29 Josepeme kandapeyamo yangonge wane Benjamene endanginya wane doko kareyasa lao, Dake nakamana yangone enakanande langiyami dokose? Rakane Anatumi emba pakiki pyakao karena leya.
GEN 43:30 Dopa lapala Josepe Benjamene kando kondo dokome monarena pulunongo piyamo ee lara ingiyasa waiya lao panda papala ee lao kareya.
GEN 43:31 Enakana lenge kambu wate pyuo mondo lapala range poraiyuo kama eponenge mokwa sinya leya.
GEN 43:32 Dokopa Josepe baa yeelyo piso nenge neyamopabanya yangongepe Isipi wambupi wakale wakale pyuo nenge neyami. Ipuru wambu pipya role pyao nenge dokopa ipyarama lenge renge dokona ingyuo liti pyuo nao peteyami.
GEN 43:33 Yangonge dupwa manjo epengenyili pyuo Josepena lenge kambu siya taepo repeta dokona peteyami. Dopa pyuo pisiyamo doko soo manji nyepala lenge pongo pyalya pyana pipala mona peyamo peteyami.
GEN 43:34 Nenge Josepena taepo dokona piso mokwa sepala Benjamene kamame andarele maiyami nakama baa role pyao nenge ipwape rae maiyuo nao sikya piyami.
GEN 44:1 Josepeme banya kendemande mupwa anda yulu pingi doko lamaiyuo, Akali dupwana byake dokona nenge malu kapa manjaraminyili pyuo paki pyakamyuo dokopa nakamana mone wakale wakale byake kambunya paki pyakaminya, leya.
GEN 44:2 Dee nambana kana kulingimi wasisi kapo doko yangonge wane enakana dokona byakena ketae paki pyakaminya leyamopa leyamuli pyuo piya.
GEN 44:3 Ene yango epeyamo dokopa akali dusipa nakamana donge nyepala kata nyuo peyami.
GEN 44:4 Nakama taone yaki nyuo mee nombisale pelyaminyi lao karo banya kendemande lamaiyuo, Akali dupwa peta pao kando nyuo wambapala dokopa dopa pyuo lamaiyuo, Nakama keta mondo lamwanopa akipamo koo pyuo yano pyapala pelyamisi?
GEN 44:5 Kapo dake nambana kamongona ipwa nenge doko rengyana nyera dupwana pii repa repa piramo dupwana kandalana retenge doko daase? Nakama dopa pimi doko yulu koo pimisa pipya, leya.
GEN 44:6 Kendemandeme pao kando nyuo wambapala dokopa pii leyamo doko makande pyuo leya.
GEN 44:7 Nakamame baa piso, O kamongo, emba pii doko akipamo letene? Namwaembena enda ingyuo karamano dokome yulu dopale pirama ingya nange.
GEN 44:8 Namwana mone nyuunya paleyamo Kenane piso laeyo manjo epeyamano emba kandee lao kande akipamo embena kamongona anda siyamo kana golope kulingipi nyeramase?
GEN 44:9 Kamongo, embame namwa mendena nyuunya paliramo kando nyere ramo doko baa pyao kumakapala namwa doloma karapusi pirinyipa embena kendemande yulu pyuo karalu kararama.
GEN 44:10 Baa isingi lao, Kapa letaminyi doŋo nakama mendali keta kapo doko palira ramo baa karapusi palenale nakama lapo dupwa mee rolae ingyaramo papale, leya.
GEN 44:11 Dokopa nyuu dupwa yuunya waiya lao yaki nyepala range rangu kandeyami.
GEN 44:12 Josepena kendemandeme wambo mandenge dupwana nyuu rangu pao wane enakana dokona lumwa pyuo ranguyamopa Benjamenena nyuunya paleyamo kando nyiya.
GEN 44:13 Dokopa nakama yamarangyuo komau dupwa minyuorokwanyi nembo bange dupwa dongena retapala manjo taone dokona dee lambu peyami.
GEN 44:14 Juta yangongemoo Josepena anda epeyami dokona baa kareyamo kandapala yuunya pangu siyami.
GEN 44:15 Dokopa Josepeme lao, Nakama akinde pimisi? Ene piramo dupwa akali namba yale dokome namba wambo pii repa repa pipala soo karo doko see nalyamisi? leya.
GEN 44:16 Jutame isingi lao, O kamongo namwa ketapii mende langirama ingya nalyamo. Aki mende larama? Apa pyuo namwa koo pii namwa dupwa pano lamape? Namwana koo yambe pyao siyamo doko Anatu nyuo lasaka pipyasa pilyamo. Namwa peparae embena puu maisi ingyuo pelyamano. Kapo sipyamo kando nyipi doko baa iki ingya nara, leya.
GEN 44:17 Dokopa Josepeme lamaiyuo, Dokona palyuo pii naro daa. Akali mende kapo baa keta palipya doko nambana karapusi inginyale. Doloma nakama rakane karamo dokona mona seramopa papale, leya.
GEN 44:18 Jutame Josepe repeta pao lamaiyuo, O nambana kamongo, pii nambana monana epelyamo dupwa peparae langinyaŋa. Nambapa imbwa napipi. Kamongo emba Perao baa yaleko karene kande.
GEN 44:19 Kamongo embameko piso soo, Nakamana yangone rakanepe karamipi lao pisii.
GEN 44:20 Namwame langyuo, Kamongo namwana rakange alemo karamo dokome emapanda mandeya yangonge wane dokopa karambi. Wane banya endangimi pakao mandenge doko kumuyamopa baa iki lete karapyamopa rakangeme baako mona reto karenge, leyama.
GEN 44:21 Dokopa kamongo embame baa kandaronya lanyuo ipupwape, lee.
GEN 44:22 Namwame emba langyuo, Wane doko rakange yaki nyuo epa nara epana pira dokopa rakange yamarangyuo kumara, leyama.
GEN 44:23 Dokopa embame lao, Nakamana yangone wane doko lanyuo epa narami ramo doko dee nenge nyela epa narami, lee.
GEN 44:24 Dokopa namwana rakane embena kendemande doko embame leenyili pyuo lamaiyakayama.
GEN 44:25 Dokopa baame lao, Dee lambu nenge kuki lama ropo pyala pupwa, leyasa
GEN 44:26 namwame isingi lao, Wane enakana doko role pyao pupwa laa nare ramo dokopa kapa ropo pyala paa narama. Wane kuki doko role pyao para ramo dokopa kapa parama, leyama.
GEN 44:27 Dokopa embena kendemande nambana rakange dokome lao, Nambana enda dokome baa wane lama iki mandeya doko silyaminyi.
GEN 44:28 Mende baa namba yaki nyiya. Baa kanda nayoŋo mena rae lengeme naooto piya.
GEN 44:29 Wane dake epapu lanyuo paraminyi pyaope pirami ramo dokomenamba yaku kareta dake mona rando kararonopa kumanyi nembaramisa pira, leya.
GEN 44:30 Dee dakepa kamongo emba rakane karamo dokona wane lanya nao paramano kandara dusa yamarangyuo kumara. Banya mona wane keta yukwaro karenge.
GEN 44:31 Wane doko lanyuo paa naramano kandaramo dokopa baa emasi dokome saka renge dokome yamarangyuo kumara.
GEN 44:32 O kamongo wane dokona lao rakane kando mende lalu lao lenge ingyuo leyo. Wane doko dee lanyuoko epa naro ramo banya ranjama doko namba keta sulu seraŋa, leyo.
GEN 44:33 Dokona lao epapu namba wane banya panda nyeronopa wane doko yangongemoo pipya range pakaminyale.
GEN 44:34 Apa pyuo namba epapu wane yaki nyepala rakane karamo dokona paro? Namba rakane ralo makwa isa minyuo karara doko kanda naroŋo paa naro, leya.
GEN 45:1 Josepe banya doo yuu range akali dupwana lenge kambu dokona poraiyuo lao karara ingya nayasa nakama pyao ralinyi nembo kamanda pena leya. Peyaminyipa, Namba Josepeŋe, lao angi yangongemoo polo lamaiya.
GEN 45:2 Nengya nengya pyao yuu ketae ee leyasa Isipi akalimi sepala kiŋi Peraona anda yuupi dokona lao peyami.
GEN 45:3 Josepeme yangonge dusipa kando namba Josepeŋe rakane mee kapa karengese? leya. Dopa leyamopa yangongedusipame pakame kumapala isingi warapo laa nayami.
GEN 45:4 Dopa piyami dokopabaa karo dokona reperepe pyuo epena leyasa peyami dokopa lao, Namba nakamana yangonge Josepe Isipi wambu kana nyuo ropo pyao maiyami kande dokoŋo, leya.
GEN 45:5 Dokona nakamba keta palamo lao mona nemba nalapape. Nakama kyawalete nyere lapala Anatumi namba dae wambo nyuo peeyapya, leya.
GEN 45:6 Mange doko ee kana lama iki lopo soo epo papeyamopa dee kingi paki ene sera dupwana eewara pyuo manjo pii narami ingiya.
GEN 45:7 Anatumi nakamana rara rembe naa nana lao dokona namba wambo rapa rapa pyuo nembeya. Namba dae peeyamo dokome nakama koo keta pisaraminyi lapala lete wai pyao nyere lao piya.
GEN 45:8 Dopa pilyamo dokona nakama suu pingi nyisasarami Anatumi lyakande. Peraona rakange inginyipyambwapala banya yuu kingi Isipi dake peparae namba jiyamopa iso karapu, leya.
GEN 45:9 Dakepa waiya lao rakane karamo dokona papala embena ikinyi Josepe kande dokome dopa pyuo lalamo larami. Anatumi namba Isipi wambu iso karare lapalaandake ingyuo waso kareyamo karoŋo. Namba keta waiya lao ipupi.
GEN 45:10 Epo dokopa yuu Gosene namba karo repeta palirami. Emba embena ikinyi wanepe embena sipisipi meme bulamakaope bange embena dupwa peparae lanyuo ipupi lalamo lamaipape.
GEN 45:11 Emba Gosene paliri ramo dokopa nambame nenge yano piramuli pyuo nyisaro. Ee kana kingi paki ene lopo seramo dokopa embena ree palu menape nenge yangya nana lao lapunu pilyamo doko lamaipape, leya.
GEN 45:12 Dee yangonge dupwa kando, Dakepa nakama peparae wane Benjamenemoo nakamana lenge angi dokome kandaminyipa pii langyuo leto, leya.
GEN 45:13 Rakane lamaiyuo, Namba iki yuu Isipi darena nambana ingyuo sipyamo karamo lao nakama kandami kandapi dopa pyuo lamaipala dokopa waiya lao mwua lapala lanyuoko dae ipupwape, leya.
GEN 45:14 Lapala yangonge Benjamene kupyuo rau pyapala ee andake leyasa Benjamenebaame banya pendeko dokona yukwaro karo eeko leyamopa
GEN 45:15 Josepe baame yangonge lapo dupwa nyinyi pipala ee lanyi pisiya dokopa yangonge dupwame baa role pyao pii leyami.
GEN 45:16 Josepe yangonge dupwa kala eparami lao Peraona anda dokona leyaminyi sepala banya yulu pingi mupwape baamoo rae maiyami.
GEN 45:17 Rae maipala Peraome Josepe kando lao, Embena yangonemoo lamaiyuo, Bange keyange dupwa nyuo mena kamelena retapala manjo yuu Kenane lambu pena lamainya, leya.
GEN 45:18 Nakamana rakane dee enda wanepe nyepala layo eparaminyipa yuu sukunya jeronopa yuu Isipinya amenge kapape doko nakama nao kararamiŋi epena, leya.
GEN 45:19 Yuu Isipi dakena mena oseme ipyuo papingi uliuli lapo nyuopao enda wanepe rakanemoo nyepala ipupwape, leya.
GEN 45:20 Nakamana yuu andape dupwa konda napala kala ipuwape. Isipi dokona ruu nao kararami lamailapape.
GEN 45:21 Isaraelena wane dupwame leyamuli pyuo piyami. Josepeme uliuli lapo nyuo maiyuo dee nenge katasa nao parami dupwa nyuo pipala maiya.
GEN 45:22 Baame nakama komau wakale wakale dupwa maiyamopape Benjamene dokona kana kulingi andete rema maiyuo dee komau kingi paki maiyuo piya.
GEN 45:23 Dee kamba rakange katasa nao epara dokona suu pyao Isipi nenge keyange wara pingi dupwana nyuo kenapalukusi byake akalisa nyuo dee nenge wakale nyuo donge akalisanya apu sakamyuo pena leya.
GEN 45:24 Dopa pyuo yangonge dupwa mapanyi nembapala karo panya kata nyiyami dokopa lao, Pao karo dokopa mona nemba nalapape, leya.
GEN 45:25 Nakamba Isipi yaki nyepala yuu Kenane rakange Jekope kareyamo dokona epeyami.
GEN 45:26 Josepe lete karapyande kandapala epelyamano. Baa Isipi liti peparaena mupwaingyuo karamo, leyaminyisa Jekopena kyawa sisingi kata papiyasa kinyi letaminyilao soo nyepa naya.
GEN 45:27 Dopa piyamopape nakamba Josepe pii leyamo dupwa makande pyuo lao dee uliuli Josepeme rakange nyela pena lao maiyamo dupwa kandapala baa mona pendakae lapala soo manji nyiya.
GEN 45:28 Dopa pipala lao, Kapakandelyo doko yakaŋa wane Josepe baa lete karalyamo doko kandapala kumaro paro kae, leya.
GEN 46:1 Jekope banya pinji nyuo muu pipala yuu Biasipa rakange Aisakena Anatu baame kana pyare lao rendamu pingi yango maiyamo dokona peya.
GEN 46:2 Kukwa dokopa Anatumi kombeyame Jekope, Jekope, leyasa baa isingi, Soo karo, leya.
GEN 46:3 Dokopa, Namba embena rakanena Anatu doko karo, leya. Isipi panya mona kenda napipi. Nambame embena para piinyi dupwana yuu dokona epo karo rara andake inginya pyambwakaro, leya.
GEN 46:4 Nambame emba role pyao Isipipapala dee embena para pyasi dupwa dakena laeyo lanyuo eparo. Dee emba Josepe kando kararamo kumare, leya.
GEN 46:5 Dokopa Jekope Biasipa piso sipurapala kata nyiya. Banya ikinyingi dupwame rakange Isaraelemoo dee enda wane dupwape Peraome uliuli maiyamo dupwana petena lapala lanyuo peyami.
GEN 46:6 Dopa pyuo nakamana menape dee pinji bangepe Kenane dokona yulu pyuo nyuo retenge dupwa nyepala Isipi epeyami. Jekope banya yulu pyuo nyuo retenge dupwa nyepala Isipi epeyami. Jekope banya jingi para pyao peyamo dupwa
GEN 46:7 ikinyingi wanengepe dee kauwangepe role pyao Isipi peyami.
GEN 46:8 Isaraelena para piyamo yuu Isipi peyami dupwana kingi dakena silyamo. Jekopena wane kyawa Urupene.
GEN 46:9 Urupenebanya wane dupwa Anoke Palu Esarone dee Kami mandeya.
GEN 46:10 Simioneme mandeya dupwa Jemuele Jamini Okate Jakini Soka dee Sauli. Dupwa Kenane enda dokome manjakamiya.
GEN 46:11 Dee Lipaena ikinyingi dupwa Gesoni Kokate dee Merare.
GEN 46:12 Jutana wane dupwa Ere Onane Sela Peresa dee Sara dupwa mandeya. Dokona Ere Onanepa dolapo yuu Kenane kumapeyambinyipa peyami. Peresena wane Eserone Amulipa dolapo.
GEN 46:13 Isakana mandeya dusipa Tola Pupa Jasupi Simironemoo.
GEN 46:14 Doo Sepyulaneme mandeya dupwa Serete Elone Jalele.
GEN 46:15 Wane dusipa Jekopena etenge Liyame yuu Mesopotemia piso mandeya. Wane manjo karo wanake Daina doko opetae mandeya. Liyana mandeyamo dee apusingipi minyuo pyaso 33 ingiya.
GEN 46:16 Gatena mandeyamo dupwa Sipiane Aki Suni Isapone Eri Aroti dee Arelemoo mandeya.
GEN 46:17 Doo Asana mandeya dusipa Imina Isipa Isipi Beriya banya pemalenge Serapa. Beriyana wane dolapo Epa Malikelepa.
GEN 46:18 Lapaneme wanake Silipa Liyana kendemande ingyuo maiya dokome Jekopena wane dalyasipa manjakamiya. Wane peparae 16 ingyuo peya.
GEN 46:19 Jekope etenge Oresolona wane dolapo Josepe Benjamenepa.
GEN 46:20 Josepe akali Potepera purisi akali yuu Ono rangena wanenge Asenate lenge doko nyiyamopa baame wane lama Manasa Eporaimepa lengedolapo yuu Isipi dokona manjakamiya.
GEN 46:21 Benjamenena mandeya dupwa Bela Beka Asapele Gera Nemane Eki Orosi Mupimi Yupimi Atamoo mandeya.
GEN 46:22 Oresolome Jekopena wane manjakamiya dokona 14 ingyuo para pyao peya.
GEN 46:23 Dane dokome Usimi mandeya.
GEN 46:24 Napatalaina wane mandeya duwpa Jasele Guni Jesa Silememoo mandeya.
GEN 46:25 Lapaneme wanenge Oresolona yulu pyakamingi enda Bilya Oresolo maiyamo dokome Jekopena wane dusipa manjakamiya.
GEN 46:26 Jekopena ikinyingi Isipi lanyuo peyamo dupwa minyuo pyaso yaka lapala 66 ingyuo pyasi palamo. Jekope ikinyinginya enda dupwa yaka laa nayami.
GEN 46:27 Josepeme Isipi karo wane lama mandeya. Jekopena ree palu yuu Isipi peyami dupwa nyuo pyaso 70 ingiya.
GEN 46:28 Isaraeleme Juta kando emba wambo yuu Gosene dokona Josepeme namwa kando nyela epena lanyala pena leya. Dee nakama peparae yuu Gosene pyaka siyami.
GEN 46:29 Josepe doko sepala banya uliuli rapa rapa pyakana lapala piso rakange katasa yuu Gosene dokona kando nyela peya. Josepe rakange epeyamo kando nyuo dokopa mangena kingi pongo pyaro karo ee andake leyambi.
GEN 46:30 Dokopa Isaraeleme Josepe kando lao, Emba lete kareende kando kaelyoŋo kapa kumuo parole, leya.
GEN 46:31 Dopa leyasa Josepeme banya yangongemoo dee rakangena wambu palu dupwa lamaiyuo, Nambame nambana rakane banya ree palupi Kenane palenge dupwa epaminyi lao Perao lamaiyala pelyo, leya.
GEN 46:32 Akali dupwa nakamana yulu doko mena rapu pingiŋi nakama range wakale wakale mena minyinginyili pyuominyuo dee nakamana pinji bange peparae minyuoko epelyaminyi lao lamairu, leya.
GEN 46:33 Dokopa Perao nakama, Aki yulu pingisi? lao pisiya kande dokopa isingi lao,
GEN 46:34 O kamongo namwa rakange piyamuli pyuo wane kukisa piso mena bulamakao rapu pingiŋi lamaiyalapale, leya. Dopa pyuo larami dokopa nakama yuu Gosene dakena kapa kararami. Renge doko Isipi rangeme sipisipi iki minyingi wambu dupwa epe kanda nange dokona lao lamaiyuo wambu piya.
GEN 47:1 Dopa lapala Josepe Perao lamaiyuo, Nambana rakane yangonemoo Kenane piso nakamana bulamakao osepe dee nakambana pinji bange peparae minyuo epo dakepa yuu Gosene dokona petaminyi, leya.
GEN 47:2 Lapala yangonge kingi paki nyepala Perao keta lanyuo peya.
GEN 47:3 Peraome, Nakama aki yulu minyingi? lao pisiya. Dokona nakambame, Namwa embena kendemande ingyapyamo karamano dupwame namwana rakange mena rapu piyamo doko suu pyao mena minyuo karenge, leyami.
GEN 47:4 Yuu Kenane dokona rambi mena sipisipi narami pali nao lopo kone soo pipyasa yuudakena karamwali lao imwa. O kamongo namwa yuu Gosene dokona palimwali yaka, leyami.
GEN 47:5 Leyaminyipa Peraome Josepe lamaiyuo, Embena rakane yangonemoo dupwa epaminyi lyamo dokona yuu Isipi doko emba keta silyamo. Dokona rakane yangonemoo yuu sukusa dokona nyuo palyalase, leya. Nakama yuu Gosene dokona palirami. Embame serenepa akali mena yulu pingi lapo kareyami kande doko nambana bulamakao dupwa nenge maiyuo isakana lare, leya.
GEN 47:7 Enakana Josepeme rakange Jekope Perao kareyamo dokona lanyuo epeyamopa Jekopeme Perao kando keyange ingyuo pena lao yako leya.
GEN 47:8 Dokopa Peraome Jekope piso, Embena ee kana akipare kareepe? leya.
GEN 47:9 Jekopeme Perao lamaiyuo, Nambana yuu gii ee kana 130 ingyuo pelyamo. Wamba dokopa rakange kauwangepe dupwa ee wara pyuo nao karapala kumuyamipyaŋa. Namba randa nao ee kana kuki karapala emelyo, leya.
GEN 47:10 Dopa lapala Jekopeme Perao elyape keta piso karena lamaipala kinginyepala peya.
GEN 47:11 Dokopa Josepeme rakange yangongepena yuu ama keyange rombo palyakamipala Perao leyamuli pyuu Oramese dokona palyiya.
GEN 47:12 Palyapala Josepeme nakama dee rakangena ree palu yangonge kuki dokonape nenge pyuo kareya.
GEN 47:13 Yuu muupeparaena lopo kone siyamopa wambu yuu Isipi Kenane dolapo lopo mee ongee pyao paleyami.
GEN 47:14 Josepeme Isipi Kenanepa wambunya nenge ropo piyaminyi kana dupwa nyepala Peraona anda dokona lanyuo peya.
GEN 47:15 Kenane Isipi wambupinya kana pao oteyamo dokopa Isipi wambu dupwa epo Josepe lamaiyuo, Namwana kana otelyamoŋo embame mende pyakape. Akipamo embame kando kaeyarenepa kumaramase? Nenge jepe, leyami.
GEN 47:16 Josepeme isingi lao, Nenge doko jelana karoŋo kana oteyamo leyami kande doko nakamana mena dupwa namba jeraminyipa nenge yano pyao jerowale, leya.
GEN 47:17 Dopa lapala nakamana mena osememe sipisipi bulamakao dee dongepe dupwa minyuo Josepe maiyami dokopa mena dupwana alowa pyuo nenge ee kana dokona maiyuo kareya.
GEN 47:18 Ee kana mende dokona epapala lao, O kamongo, namwana kana dupwa pao oto dee mena dupwa kamongo emba keta soo pilyamo. Epapu mende sepa napyamopa namwana yongo isange doko dee ee wandepape dolapo iki namwa keta silyakande, leyami.
GEN 47:19 Emba mee kandokararene kapa kumaramase? Namwa dee namwana yuupi mee inginya lao kaelese? Embame nenge jerenepa namwana yuu kulisa alowa pyuo jerama dokopa namwape dee namwana yuu dupwape Peraona ingyuo penale. Emba nenge jerene napala kuma narama dokopanamwana yuu doko mee apa see nanale, leyami.
GEN 47:20 Lopo kone siyasa Isipi akali mendemepe kaeya nao nakamana yuu peparae epo ropo pyao kana nyiyaminyipa Josepeme Peraona lao ropo pyakamiyamopa yuu peparae Perao keta soo oteya.
GEN 47:21 Josepeme Isipi wambu dupwa ipwa kumalamo dokona piso kendemande yulu pinyalao maiyuo epo guu dorena suu leya.
GEN 47:22 Peraome kana purisi dupwa sikyali pyuo maiyamo dokome nenge ropo pyao nao palipala nakamana yuu doko iki ropo pyao mai naya.
GEN 47:23 Josepeme lamaiyuo, Nakama epapu kandaminyipa yuu dupwa Peraona lao ropo pyakamilyu kande dokoŋo waingi jero dupwame yuu dokona wara pyapale, leya.
GEN 47:24 Ee manjaraminyi dokopa nyuu kingi paki ramo dokona mendaki Perao maipala lapo dupwa enda wanepe maiyuo nao waingi wara pyuo pirami, leya.
GEN 47:25 Dokopa nakamame lamaiyuo, Embame namwa lete nyuo elyapepyuo karengeŋe. Namwa Peraona kendemande karamanako, leyami.
GEN 47:26 Dokopa Josepeme Isipi dokona lowa palyuo lao, Nyuu kingi paki manjipala dokopa mendaki Perao maipa pirami, leyamo alowa dopale epapu Isipi dokona mee palyuoko pelyaminyi. Purisinya yuu dupwa iki Perao keta see naya.
GEN 47:27 Isaraelena wambu dupwa Isipi panda yuu Gosene dokona epo paleyami dokopa nakama wai kiso malu ingiyamopa rara andake ingyuo peya.
GEN 47:28 Jekope yuu Isipi dokona kareya ee kana dusipa akalisa ipisu yanda ipingi nembo kareyamo dokopa banya ee kana peparae minyuo pyaso 147 ingiya.
GEN 47:29 Isaraele baa kumara ingiyamo mange dokopa banya ikinyingi Josepe kee lao nyepala lamaiyuo, Namba rae maiyuo kumuo paale lao suu pyare ramo doko dae Isipiyuu dakena malu pii naro lao kingi ketae nembalasi.
GEN 47:30 Nambana rakane malu karamo dokona namba kararona suu pilyuŋu kumuyu kande dokopa Isipi yaki nyuo soo pupi, leya. Josepeme letene dokona palyuo piru, leya.
GEN 47:31 Dokopa Isaraele embame lete dokona palyuo pyakaroŋo lao kingi ketae nembarene, leya. Doko sepala Josepeme enambo minyiyamopa Isaraele baa banya rate ayemba singi dorena ponga lyero peteya.
GEN 48:1 Yuu mendalama koreya sepeyamopa Josepe rakane kandapi anga pilyamo lamaiyamisa banya ikinyingi Manasa Eporaimepa lanyuo rakange Jekope kandala peya.
GEN 48:2 Dokopa Jekope embena ikinyi Josepe kandapi doko epelyamo leyaminyi siyamo dokopa poraiyuo rali pipala banya rate dokona roya peteya.
GEN 48:3 Pisipala Josepe lamaiyuo, Anatu Porai Wakasa doko yuu Kenane panda mende Lusi dokona epo panapala namba elyape keta pisaro langyuo,
GEN 48:4 Nambame embena wane wai kisakaronopa embena para pyare dokona rara malu ingyuo paramopa nambame yuu dake maiyakaronopa nakamana kulisa ingyalu ingyuo ingyara, leya.
GEN 48:5 Namba dae Isipi epapa nayonopa wambo wane lama Manasa Eporaimepa mandeepya dolapo nambana ingyuo pelyamo. Nakamba nambana wane mupwa Urupene Simionepa dopale ingyuo parambi.
GEN 48:6 Dopa pyuo laronopape wane enakana manjarene dupwa emba rangena ingyara. Wane dupwa Eporaime Manasapa rakange ingyuo reto kararambi.
GEN 48:7 Namba yuu Mesopotemia piso dee range kala Kenane epana katasa epeyamba dokopa endakinya Oresolo Eporata panda dokona kumuyasa kondome kumuyudokona suu pyao wane apusingi dolapo manjo nyepala karelyo. Nambame baa Eporatakata panya penge dokona malu piyu. Yuu doko epapu Beteleme lenge kandapi, leya.
GEN 48:8 Isaraeleme Josepena ikinyingi dolapo kandapala, Wane dalapo embena dolapope? leya.
GEN 48:9 Dokopa Josepeme lao, Dolapo nambana wane Isipi daena Anatumi jiya, leya. Leyamopa Isaraeleme lao, Nakamba ketae pyambwaro daelanyuo ipu, leya.
GEN 48:10 Isaraele emo lenge nyiyamo dokome kandalana saka naya. Dokopa Josepeme wane dolapo baa kareyamo dokona repeta lanyuo epeyasa kupyuo nyuo nyinyi piya.
GEN 48:11 Isaraeleme Josepe lamaiyuo, Nambame emba kararenekandaronde daa lao masiyu doko kaepala dakepa Anatumi embena wane dolapo opetaekandare lao kata wapwakapya, leya.
GEN 48:12 Josepeme wane dolapo Isaraelena kimbu yukuna siyamo dokona kareyambi doko nyuo kakondapala Jekopena lenge kambu siyamo yuu dokona baa pangu siya.
GEN 48:13 Pangu sepala baame wane dolapo kingi makande pipala Eporaime Isaraelena kingi kyairena kararo lao suu pyao kingi rolae dokome minyuo dee Manasa alemona kingi rolaerena kararo lao suu pyao kingi kyai dokome minyuo nyepala alemo peteyamo dokona lanyuo peya.
GEN 48:14 Dopa pyuo maiyamopape Isaraeleme banya kingi dolapo minyuo alowako pipala wane enakana mandenge Eporaimena ayembana kingi rolaeme minyando dee kingi kyaimi Manasa wanewambo dokona kyawa minyando piya.
GEN 48:15 Dopa pipala Josepe ketae pyambuo karo Nambana rakane Aporakame Aisakepa dolapo role paeyo kareyamo Anatu doko dee namba ene manjinyi peyareyami dokopa role pyapeta karapala dakepa role pyaoko karamo Anatu doko
GEN 48:16 dee aŋalame namba kyawa minyuo karenge dokomepe wane dolapo elyape keta pisinyi pyambwape. Nakamba wai kiso yuu muu dupwana mee ree ingyarambinyi dokome nambanape dee rakange Aporakame Aisekepana kingi isa paa nara, leya.
GEN 48:17 Josepeme rakangena kingi rolae Eporaime keta reteyamo doko mona mako kandeya. Kandapala rakangena kingi laeyo nyepala Manasana kyawa dokona alowa pyakaminya piya.
GEN 48:18 Dopa pyuo rakange lamaiyuo, Rakane embena kingi lawa pyuo minyilini. Wane dakewambowaŋa baa dokona kingi rolaeme minyape, leya.
GEN 48:19 Dokopa alemo dokome, Rakane, soo kaeyapala pilyuŋu daa, leya. Wane wambobaa kamongapala wai kiso nyeramo dupwa rara andake ingyuo parami. Dopa piramopape yangonge enakana Eporaime doko akali nyilyingi wakasa ingyuo kararamopa banyawambu dupwana rara kama andakyara, leya.
GEN 48:20 Dokopa baame nakamba ketae pyambuo lao, Nakambana apo dokona Isaraele wambu peparae keyange keta paliramidokona nakamana wane dupwa kando Anatumi nakama Eporaime Manasapa yale karapyali yaka larami, leya. Jekopeme dopa pyuo Eporaime doko wane kyawa Manasa nyuo enakawale kareya.
GEN 48:21 Enakana Isaraeleme Josepe lamaiyuo, Namba oo repeta kumulyu. Kumuo parono dokopa Anatumi emba lanyuo rakane kauwanepena yuu muru dokona para.
GEN 48:22 Amo wambunya yuu keyange Sikeme nambame yanda kakupi nenge dokome nyiyu doko yangone dupwa kaepala emba jilyu, leya.
GEN 49:1 Jekope banya wane dupwa epena lapala, Epo reperepe pyuo kararaminyipa nakama keta apa pyuo para lao langirowale.
GEN 49:2 Nakama Jekopena ikinyingi dupwa malu palyuo rakane Isaraelena pii dokowarombo soo karalapape.
GEN 49:3 Urupene emba nambana wane kyawa lengya lao pepo kareta dokome mandeyo. Nambana wane doloma karaminyipape emba yapo poraiyuo kaenge wane dokome moŋo kyaŋe soo karenge.
GEN 49:4 Emba akali mee langa rolarapu ipwame kama pyao penge dopaleingyuo papilini. Dokona emba mupwa ingyuo kara nare. Renge doko emba nambana enda doko nyuo rate nambana dokona paleyambisa kwaeyo pelyamo.
GEN 49:5 Simione Lipaepa anelapo yangongepa dolapo mendare pelyambinyi. Nakamba pundu nyuo karambinyi.
GEN 49:6 Yanda pipu lao karambinyi dokona see naro. Wato lao karambinyi dupwana rekya lao kararo. Renge doko nakamba mee ingi napala wambu pyao kareyambi. Mee male male lao bulamakaona kimbu retapu yandanyi nembeyambi.
GEN 49:7 Kuli kuli palyuo imbu singi nyuo karenge. Kale mangu mangu lao pyalanako suu pingi dokona kwao parambi leto. Nambame nakambana ree palu doko Isaraele rara dokona minyuo sukusa rayanga lena laro. Jekopena yuu dokona ralo bolombalo lao pena lakamiru.
GEN 49:8 Dee Juta rakane, embena yangongemoo embalakandarami. Embena nyisu petenge dupwa mata minyinyi palyare. Embena rakanena ikinyingi dupwa emba kando mona joo pangu soo kararami.
GEN 49:9 Juta emba mena laene ene andanda wambu pyalena pingi dopale ingilyamo. Doko embena kuli dupwa sisiki soo rolapala palyuo serenepa mendeme lyapu lao pii narami.
GEN 49:10 Juta embena rombelyame kaikwasi dokoisa paa nara. Embena rara doko kiŋinya rara ingyuo karalu kararami. Kamongonge bange dupwa reto karo pao range eparamo dokopa baa keta pyamalyarami. Wambu peparae baako kando warombo soo banya pii minyaraminyi karara.
GEN 49:11 Ipwa guunya girapo isa ando karenge dokona mena donge dupwa rae maiyuo anjara. Girapo jingi kingyuo waene wasingi. Kana malu penge ipwange kone pingi dokome komau dupwa nyuo wate pira.
GEN 49:12 Banya lenge doko waene ipwange nao kararasa kone pyuo banya nenge doko susu nao kararasa kyewa lao pira.
GEN 49:13 Sepyulane embena rara kota pete mare dokona palirami. Nakamana panda dokona sipu dupwa epo kararami. Nakamana yuu doko pao yuu Saitone lili pira.
GEN 49:14 Isaka baa mena donge porai manda manjo karamo. Doko nyuu komonali kenda pingi silyamo raka dokona palenge.
GEN 49:15 Baa paliramo panda doko keyange ingyuo seramopa yuu doko elyape ingyuo paramo kando nyepala dokome banya kingi yongope porainyi pyambwapala kendemande ingyuo yulu andake doko soo nembo pira.
GEN 49:16 Isaraelena rara lapo dupwa pingi doko suu pyao Daneme banya wambu dupwana baame mupwa ingyuo iso karara.
GEN 49:17 Danena rara kata nemba nembasa kau kyalende isaro sera dopale kau doko katasa isaro sepala dokome mena osena kimbu yukuna doko narasa mango pao palira dokopa akali ketae pisira doko palepale rukimaki lao pao palira.
GEN 49:18 O Kamongo namba mata kyakao nyerene dokonaiso karo.
GEN 49:19 Gatena rara dokona waa nyingi lapome epo pyaraminyipa baa sipurapala isingi peteta pyao para.
GEN 49:20 Asana yuu dokona nenge yapasi dupwa andara nenge doko kiŋinya napengele dokome kiŋi dupwa mokwa soo maira.
GEN 49:21 Napatalai baa mena diya anja nangende mee dupwana makando karenge dopale yakane au koo pingi dupwa para pyao nyingi.
GEN 49:22 Josepe baa mena donge rae lenge dopale baa ipwa guu lao epenge dupwana nao palenge. Yuukyaunya mena ose yakane rae lenge dopale
GEN 49:23 Nuli nala penge dupwame baa pyalana pyuo yanda nyepala baa peteta peyami.
GEN 49:24 Pyalana peyaminyipape yanda ipyuo pyalana saka nayami. Rakane Jekopena Anatu Porai Wakasa dokome nyisiyasa piya. Isaraelena Rapu Pingi Kanana Porai dokome baa nyisiyasa piya.
GEN 49:25 Embena rakanena Anatu dokomeko emba nyisara. Anatu Porai Wakasa dokome emba elyape keta pyambwaramopa Yakena apu epo karamo dokope isa yuu donorena ipwa palamo dokope endana kurapu pau lao anju ipwange palyuope
GEN 49:26 Eena nenge lokwasoo kapa simbu palyuope yuu kyau ketae pilyamo ota nalu nange dupwape yuu kyaukuki keyange sulu singi dupwape renge keyange dusipa Josepe baapa epo palenale baa iki wane yapasi dokona suu pyao baa keta sinyale.
GEN 49:27 Benjamene yana suwa kararope nuli nalana lee minyuo papingi dopale yangama sipurapala pyao nao karenge. Pyao nyuo serelyamo dupwa mokwasoo maiyuo karelyamopa yuu kwuange, leya.
GEN 49:28 Nakamana rakange kyawa Jekopeme Isaraelena rara akalisa mendaki ipisu lama dusipa karo dokopa dopa pyuo lamaiya. Baame banya wane dupwa mendaki mendaki range dokona manda manjo ketae pyambuo kareya.
GEN 49:29 Dokopa Jekopeme lamaiyuokondali pyuo lao, Nambana wambu kumuo peyami kata dokonakumuo panya. Iti range Eparone lenge dokona kana anda nambana rakange kyawa dupwa malu piyami dokonako malu pipwape.
GEN 49:30 Yuu andake Kenane dokona yuu Mamare neta pyakaenge dorena yuu kuki Makepela dokona singi kandale. Aporakameme yuu Iti akali Eparone lenge dokona yuu kananda paletape ropo pyao nyepala yanyanda ingyuo wasiya.
GEN 49:31 Aporakame etenge Serapa dee Aisake etenge Orepekapape nakama dokonako malu pingipya. Dokona nambame Liya malu piyuko lyakande.
GEN 49:32 Yuu kananda paletape Iti wambunyande ropo piyapya, leya.
GEN 49:33 Dopa pyuo pinya lao lao lumwa pipala dokopa Jekope baa kimbu lalyuo nyepala banya wambu kumuo penge kata dokona peya.
GEN 50:1 Dokopa Josepeme rakangena lenge kambu dokona pao palipala kupyuo nyinyi pyuo ee andake leya.
GEN 50:2 Lapala banya dokota akalimi mamba yanenge rumbya nana lao kisingi dokome rakange kisakaminya leya. Leyamosa dokona palyuo yuu gii akalisa kisima kisinginyili pyuo kisakamyuo kareyami.
GEN 50:3 Dokopa Isipi wambu dupwa alemo dokona suu pyao yuu gii akalisa yanda ipingi kumanda peteyami.
GEN 50:4 Kumanda piso polakao papeyami dokopa Josepeme Peraona anda wambu dupwa lamaiyuo, Nakamame namba nyakando kandapili lao suu piyami kande doo pii dake Perao lamaiyakala papale, leya.
GEN 50:5 Alemo rakane baa repe kumaro lao karo namba kanju langyuo, Kumuyu kande dokopa yuu Kenane namba rangeme malu pingi yuwale kyasiyu dokonako malu pela pupi, leya. Dokonako rakane malu pela papala eparo, leya.
GEN 50:6 Peraome lao, Rakaneme pii porai ingyuo leyalyamo dokona kapa malu pela pupi, leya.
GEN 50:7 Dopa leyasa Josepe rakange malu pela peya. Peyasa Peraona kendemande dee banyaanda wambu kyawa wambowape Isipi akali andapae dupwape pao pipala malu piyami.
GEN 50:8 Dopa pyuo pao Josepena ree palu peparae pao banya yangonge dee rakangena ree palupi mende kara nao peyaminyipa wane wanakepe nakamana mena bulamakao meme sipisipi dusipa iki yuu Gosene dokona yaki nyuo peyami.
GEN 50:9 Mena osemeipyuo papingi uliulipi dee akali mena osena petenge dupwa pipa wambu ama renge doo peyami.
GEN 50:10 Pao Jotane neta pyakaenge dorena witi jingi lukungi mare Atate lenge dokona yuu mee londeta Jekope ono reto peteyami. Josepe baame yuu gii yanda ipingi dokona kumanda peteya.
GEN 50:11 Kenane range dupwame yuu Atate dokona dopa pyuo kumanda piso pyuo kareyami doko kandapala, Yulu dake Isipi wambu dupwa ono reto kumanda petenge doko suu pyao pilyaminyi, leyami. Dokona lao yuu doko kingi Epolo Misiraimi leyami. Yuu doko Jotane neta pyakaenge dorename singi.
GEN 50:12 Jekope ikinyingi palu dusipame rakange pinya leyamuli pyuo piyami.
GEN 50:13 Nakamame baa soo Kenane panda dokona epapala kananda leyamo dokona malu piyami. Yuu Makepela neta pyakaenge dorena yuu Mamare Aporakame baa Itiakali Eparone lenge dokona yuu yanyanda palepale ropo piyamo dokona malu piyami.
GEN 50:14 Dokona malu pipala dokopa Josepe banya yangongepa role pyao epeyamidupwa pipya anda Isipi dokona epeyami.
GEN 50:15 Rakange kumuo papeyamo dokopa Josepena yangonge dusipame dopa lao, Baa wamba randa maiyama dokona suu pyao randa isingi jisaramo kandena, leyami.
GEN 50:16 Lapala Josepe kareya dokona pii nembo, Embena rakaneme kumalana karo dokopa pii dapa pyuo leya.
GEN 50:17 Embena yangone koo pyuo mawa pii yaleyami dupwa nyuo kame sakamipi, leya. Dokona lao embena rakanena Anatu dokona kendemande akali ingyuo karamano dupwame koo piyama doko kame soo kaeyakape, leyami. Josepe lamaiyaminyi siyamo dokopa ee dokome mange piya.
GEN 50:18 Enakana yangonge dupwa rangeme epo isa kandalyaro pisipala lao namwa embena kendemandeingyuo pisimwano kandelene doko, leyami.
GEN 50:19 Dopa pyuo leyaminyipape Josepeme lao, Paka nalapape. Namba Anatupa manda manjo kara nalyo dokome nakama kapa laa naro.
GEN 50:20 Nakambame kinyi namba randa joo koo piyami. Dopa piyaminyipape Anatumi wambu malu lete wai pyao nyeronopa epapu karaminyili pyuo kararami lao suu pyapala piya, leya.
GEN 50:21 Dokona lao paka nalapape. Nambame nakama nakamana wane wanakepe mondo lao rapu piroŋo leya. Dopa pyuo leyamo pii anjiki pisi dokome nakamana mona minyarambunyi pyambuya.
GEN 50:22 Josepe rakangena ree palu dupwa role pyao Isipi dokona palyuo karo ee kana 110 ingiyamopa kumuya.
GEN 50:23 Baa mee lete karo Eporaimena wanepe dee dokona ikinyinginya wanepe kandeya. Manasana ikinyingi Makeyana wane wanake mandeyamo dupwa Josepeme banya kingi kapena manjo andanyi nembeya.
GEN 50:24 Josepeme banya yangongemoo lamaiyuo, Namba oo kumarolyamo. Kumuo paronopape Anatumi nakama reto karo yuu dake kala yuu Aporakame Aisake Jekopepena yuu Anatumi maiyalu maiyuo maiya dokona lanyuo para, leya.
GEN 50:25 Lapala Josepeme rakange Isaraelena ikinyingi dupwa kingi ketae nembo lalu lao lenge pii mende lena leya. Anatumi nakama nyisala epeya kande dokopa nambana kuli doko yuu dakena sinya kaeya nao pena dokopa nyepakala pupwape, leya.
GEN 50:26 Lapala Josepe ee kana 110 ingiyamopa kumuya. Dokopa nakamame yongo rumbya nange mamba mendeme kisakamipala bokote wasapala yuu Isipi dokona baa koko palyiyami.
EXO 1:1 Jekope yuu Isipi banya wane dupwa pipya peyami. Nakama nakamana enda wanepe dupwa role pyao peyami. Jekopena wanena kingi dupwa dakena palamo.
EXO 1:2 Urupene Simione Lipae Juta
EXO 1:3 Isaka Sepyulane Benjamene
EXO 1:4 Dane Napatalai Gate dee Asamoo peyami.
EXO 1:5 Jekopena wane mandeyamo dupwa para piyamo dupwa peparae nyuo pyaso akalisa yanda ipingi nyepo (70) ingiyamopa Isipi pao kareyami. Dokopa Josepe baa yuu Isipi wambo papala kareya.
EXO 1:6 Josepemoo yangonge dusipape wambu kapa kapa kareyaminyi dupwa peparaepe Isipi karo kumuyami.
EXO 1:7 Dopa piyamopape Isaraele wambu nakamana para piyamo dupwana wane wanakepe mandeyami doko ama malu mee ingyapala porai ingyuo karo yuu doko simbuya.
EXO 1:8 Dopa pyuo peyamo yuu gii dokopa kiŋi enenge mende Josepe soo gisa nangendeme yuu Isipi dokona rapu piya.
EXO 1:9 Kiŋi dokome Isipi range wambu dupwa lamaiyuo dopa leya. Kandalapape. Isaraele wambu dupwa ama malu mee ingyuo porailyaminyi.
EXO 1:10 Dokona yanda mende sipuro pira ramo dokopa namwana nyisu petenge doko keta nakamba ree maipala namwa pyapala nakamba pasaramiŋi dokona namwame Isaraele wambu dupwa ama kandokondali pyuo rapu pirama. Wambu wai malu mee kisilyamo doko isa pena lao rapu pimanale, lamaiya.
EXO 1:11 Dokopa Isipi akali lapo Isaraele wambu yulu pinya lao rapu piyami dupwame randa wakasa maiyuo yulu andake pinya lao nyuo maiyami. Dopa piyaminyipa Isaraele wambu dupwame Peraona taone andake lamana nenge retenge Pitomo Oramese lenge dolapo pyakamiyami.
EXO 1:12 Isipi wambu dupwame Isaraele wambu dupwa kumuo ree nao otapyali lapala yulu andake maiyaminyipape doko kaepala Isaraele wambu ama malu ando yuu dupwa minyarambu nyinya piya. Dokona lao Isipi wambu dupwame Isaraele wambu kando pakame kumuyami.
EXO 1:13 Pakame kumapala ama randa andake maiyuo karapusi yulu andake maiyami.
EXO 1:14 Isaraele range wambu dupwa randa maiyuo mona kendanyi pyambuo ee yulupi anda pingipi poraiyuo pinya leyami. Dopa pyuo karo nakamame Isaraele wambu dupwa kando sakame kuma nao mee randa maiyuoko pyuo kareyami.
EXO 1:15 Enakana Isipi range kiŋi dokome enda Sipira Puwapa lenge Ipuru enda dupwa wane mandelyaminyi dokopa nyiso mandenge enda dolapo lamaiyuo leya.
EXO 1:16 Nakamba Ipuru enda dupwa wane mandena lao nyiso parambinyi dokopa wane ane ramo doko pyao kumako wanake ramo doko andena kaeyo pipwape, lamaiya.
EXO 1:17 Dopa lamaiyamopape enda dolapome Anatu dokona lao poraiyuo suu pyao pakapala kiŋimi pinya leyamuli pyuo pii napala Ipuru wane dupwa ando karena kaeyambi.
EXO 1:18 Dokopa kiŋi dokome dopa piyambinyi kandapala Sipira Puwapa epena lapala piso soo, Akipamo doo lapu doko pii napala wane dupwa mee ando pena kaeyambisi? leya.
EXO 1:19 Dokopa enda dolapome isingi leyambi. Isaraele enda dupwa Isipi enda dopalende daa. Ipuru enda dupwa awa pyuo waiya lao wane manjo otelyaminyipa nambwa enakana papapu pingi, leyambi.
EXO 1:20 Enda dolapo Anatu baa poraiyuo suu pyao pakayambi dokona baame nakamba keta keyange pyuo rangena wane wai kiso maiya.
EXO 1:21 Maiyamopa Isaraele wambu dupwa konda pyuo manjoko pao porai ingyuo ando kareyami.
EXO 1:22 Dokopa kiŋi Perao dokome mawa pii dake poraiyuo lamaiyuo Ipuru wane nyaŋa manjiraminyi dupwa nyuo ipwa Naelena pyao nembo wanake dupwa andena kaeyo pinya leya.
EXO 2:1 Dokopa akali Lipaena rara dokona mendeme enda rara mendaki dokonako nyiya.
EXO 2:2 Nyiyamopa enda baa wane paleyamopa wane ane mende manjo nyiya. Manjo nyepala enda dokome wane doko ama keyange wakasa ingiyamosa kandapala kana rema yalu pyuo reteya.
EXO 2:3 Enakana wane doko kapa pyuo yalu pira ingya nayamosa pisiki minyasi mende ipwa yalyo pii nana lapala mamba pyake rengendeme kiso rambu lao mondo leya. Dopa pipala pisiki minyasi dokona Mosese retapala ipwa pona nemba nemba dokona wae wae ando londo kareya dokona koko yalu pyuo reteya.
EXO 2:4 Dokopa Mosesena pemalenge dokome yuu nanesale karo apa pyakalyape lao rapu pyuo kando kareya.
EXO 2:5 Dokopa kiŋi Peraona wanenge doko ipwa dokona wate pela epeyamo dokopa banya kendemande enda dupwa opetae ipwa nemba nemba dokona epeyami. Dokopa Peraona wanenge dokome pisiki minyasi doko kandapala banya kendemande wanake mendeme nyela pena leya.
EXO 2:6 Dokopa Peraona wanenge dokome nyepala lumbuo kandeyamo dokopa wane nyaŋa doko ee leya. Ee leyamo doko kandapala kondome kumuya. Dokopa Peraona wanenge dokome lao, Wane doko Ipuru wane dupwana mendelamo, leya.
EXO 2:7 Dokopa Mosesena pemalenge doko epapala piso soo leya. Nambame Isaraele enda mende wane doko rapu pyakana lao kotala paowape? leya.
EXO 2:8 Dokopa Peraona wanenge dokome lamaiyuo, Kapa mendali kotakala pena leya. Dokopa wanake dokome papala Mosesena endangi angi range doko nyepala lanyuo epeya.
EXO 2:9 Peraona wanenge dokome Mosesena endangi doko lamaiyuo, Wane doko nyepala anju maiyuo rapu pyakape. Nambame emba ropo pyaro, leya.
EXO 2:10 Mosesena endangi dokome rapu pyuo peteyamopa wane doko ando oteya dokopa wane doko minyuo pao Peraona wanenge maiya. Dokopa Mosese Peraona wanengena ikinyingi ingiya. Peraona wanenge dokome wane doko ipwana siyamo nyiyuŋu lapala wane kingi Mosese leto, leya. (Kingi Mosese lenge doko ipwana silyamo nyingi dopale lenge.)
EXO 2:11 Yuu mendepa Mosese ando kaepala kareyamo dokopa baa banya Isaraele wambu dupwa apa pyuo yulu andake nyuo maiyaminyi pyuo karamipi lao kandala peya. Peyamo dokopa Isipi akali mendeme Mosese banya wambu rangende pyao kumakayamo kandama peya.
EXO 2:12 Dokopa Mosese kandalya kandana piyamo mendale pana nayaminyi kandapala Isipi akali doko pyao kumakapala ipwa kee dokona yalu piya.
EXO 2:13 Yangama deeko peyamo dokopa Isaraele akali lama pyakando pyuo paleyambinyi kandeya. Dokopa Moseseme akali angi koo piyamo doko lamaiyuo, Akipamo embame Ipuru akali yango doko pilisi? leya.
EXO 2:14 Dokopa akali dokome isingi lao, Apimi emba kote singi akali wasapala namwa rapu pyuo kara lapyase? Embame Isipi akali pyao kumakapi doko suu pyao namba pyao kumakapuli lao letese? leya. Dopa leyamo dokopa Mosese pakaya. Namba doo pipu kandapi doko wambu dupwa similyamo.
EXO 2:15 Dopa piyamo leyaminyi doko kiŋi Perao sepala Mosese pyao kumakalena piya. Dokopa Mosese yuu Isipi doko yaki nyepala yuu Mitiane dokona karala peya. Mosese baa pao yuu Mitiane kando nyepala kareya. Karo dokopa yuu mendepa yuwale kyasisi dokona ipwa guu lao pete silyamopa kamuo nenge dokona papala isa peteya.
EXO 2:16 Dokopa purisi akali mende kingi Jetero lenge yuu Mitiane doko rangendeme wanake yanda ipingi nyepo mandenge. Wanake dusipa peparae rakangena mena sipisipi memepe dupwa ipwa maiyalana kamwala epeyami.
EXO 2:17 Epeyaminyi dokopa mena sipisipi isingi akali lapome Jeterona wanenge dupwa ralinyi nembeyami. Dopa piyaminyipa Moseseme nakama nyiso mena dupwa ipwa kamuo maiyuo pyakamiya.
EXO 2:18 Dopa pyakamiyamopa wanake dusipa rakange kareyamo dokona waiya lao peyami. Dokopa rakangeme piso soo, Akipamo nakamba epapu waiya lao kapa kyuo epelyamisi? leya.
EXO 2:19 Dokopa wanake dusipame isingi lao, Mena sipisipi isingi akali dupwame namwa randa jiminyipa akali Isipi rangendeme namwa nyiso mena dupwa ipwa kamuo maiyuoko pipyamosa epelyamano, leyami.
EXO 2:20 Rakangeme wanenge dupwa piso soo, Akali doko anja karase? Akipamo dokona karena lapala epaminyi? leya. Papala namwa pipya role pyao nenge nala epena lena leya.
EXO 2:21 Dokopa Mosese baa doo palyuo karo pipuli lao suu pyalu pyao piya. Dopa piyasa Jetero banya wanenge Sipora doko Mosesena etenge inginya lao maiya.
EXO 2:22 Mosese nyepala paleyambinyipa enda dokome wane ane mende mandeya. Mandeyamo dokopa Moseseme namba akali wakale doko yuu wakale dakena karalyano lapala wane kingi Gasome leya. (Kingi Gasome lenge doko yuu wakale range lenge dopale.)
EXO 2:23 Ee kana malu epo peyamopa Isipi range kiŋi doko kumuya. Dokopa Isaraele wambu dupwa ee lao nakama karapusi yulu pyuo karo makapala mendeme nyisapyali lao ee lao kareyami. Dokopa Anatumi Isaraele wambu ee lao kareyami doko siya.
EXO 2:24 Ee lao kareyami doko sepala Anatumi kana minyuo nyisaroŋo lao Aporakamemoo Aisakemoo Jekopemoo keta lalu lao leyamo doko suu piya.
EXO 2:25 Anatumi Isaraele wambu dupwa karapusi yulu pyuo peteyami doko kandapala baame nakamana lao suu pyaro kareya.
EXO 3:1 Mosese banya imwange Jetero yuu Mitiane range purisi akali dokona mena sipisipipi memepe dupwa rapu pyakamyuo kareya. Yuu mendepa baa dopa pyuo karo Mosese mena dupwa lanyuo yuu muiyane dokona pao Anatunya yuu kyau kingi Sainai lenge dokona epeya.
EXO 3:2 Dokopa Kamongona aŋala mende isare uliyapu ingyuo isako ambu pyaro kareyamo dokona rao Mosese keta pano epeya. Mosese isare uliyapu nyuo isako dokona rao karo isako angi doko rao ota nayamo kandeya.
EXO 3:3 Kandapala dopa lao suu pyao, Akipamo isako doko rao ota nalyamo? Angi kanda nangende pilyamoŋo kandala paro lao suu piya.
EXO 3:4 Kamongo Mosese repeta epeyamo doko kandapala Anatumi isare rao kareyamo isako palu sukusa dokona karo kyakale lao, Mosese, Mosese, leya. Dokopa Moseseme isingi lao, Namba dae karo, leya.
EXO 3:5 Anatumi Mosese lamaiyuo, Kamame repeta epa napipi. Yuu doo karene doko poo pyasiŋi dokona embena kimbu suu doko kolo nyisa nyepe, leya.
EXO 3:6 Namba embena rakane dusipana Anatuŋu, leya. Leyamo dokonako lao, Aporakamena Anatu Aisakena Anatu Jekopena Anatu dokoŋo leya. Dokopa Mosese Anatu kandalana pakapala banya lenge kambu doko nee piya.
EXO 3:7 Dokopa Kamongome lao, Nambame nambana wambu dupwa Isipi wambu dupwame randa maiyuo pyuo karaminyi doko kandelyo. Dee karapusi yulu rapu pingi akali dupwame kopetame isilyaminyi dokona kiiramo nyuo pumwali lao ee lao karaminyi doko namba silyu. Randa nami dupwa namba soo gisilyu, leya.
EXO 3:8 Nambame Isipi range dupwana kiiramo nyisala epelyo. Kiiramo nyepala yuu Isipi yaki nyuo yuu ama keyange andake mendena lanyuo paro. Yuu doko keyange amenge pingi. Dakepa akali rara Kenane rangepe Iti rangepe Amo rangepe Perasi rangepe Ipi rangepe dee Jepusi rangepe dupwa yuu dokona palaminyi, leya.
EXO 3:9 Isipi wambumi ama kopetame randa maiyuo karaminyi dokona Isaraele wambu dupwa ee lao karaminyi doko kandelyo.
EXO 3:10 Epapu emba puu laronopa kiŋi Perao petamo dokona papala nambana Isaraele wambu dupwa lanyako yuu Isipi doko yaki nyuo parami, leya.
EXO 3:11 Dokopa Moseseme Anatu lamaiyuo, Namba apyakalendeme Perao petamo dokona papala Isaraele wambu dupwa kiiramo nyuo Isipi yaki nyerose? leya.
EXO 3:12 Anatumi isingi lamaiyuo, Nambame emba pipya role pyao kararo. Wambu dupwa lanyuo Isipi yaki nyuo epare dokopa yuu kyau dakena namba kingi lao pisirami. Dopa pirinyi dokome nambame emba puu lapu lao lasaka pirasa pira, lamaiya.
EXO 3:13 Lamaiyamopa Moseseme Anatu isingi lamaiyuo, Namba Isaraele wambu petaminyi dokona papala nakama lamaiyuo, Anatu nakambana rakane kauwanepe loma soo piyami dokome namba nakama karaminyi dokona puu lapyamo epelyo laro dokopa nakamame namba piso soo, Banya kingi doko apisi? larami. Dokopa nambame nakama kando isingi apa larose? leya.
EXO 3:14 Dokopa Anatumi Mosese lamaiyuo, Namba Doko Nambako. Pii dake embame Isaraele wambu dupwa lamairi. Namba Doko Nambako laypamo dokome namba nakama keta puu lao peyapyamo epano lare.
EXO 3:15 Lapala Isaraele wambu dupwa lamaiyuo lao, Namba Kamongo doko nakamana rakane kauwanepena Anatu Aporakamemoo Aisake Jekope dusipana Anatuko dokome namba puu lapyamo epano lare. Dake nambana kingi sulu soo sera. Dokoko wambu ene manjiraminyi dupwame namba kando larami, leya.
EXO 3:16 Dokopa Anatumi Mosese lamaiyuo, Emba papala Isaraele akali mupwa dupwa nyuo elyambu pipala nakama dopa lamairi. Namba Kamongo doko nakamana rakane kauwanepena Anatu Aporakamemoo Aisake Jekopemoo dusipana Anatuko doko namba keta epo paneya. Panapala nakama langyala pupwa lapyamo epano. Anatu baame nakama Isipi range dupwame doo pyuo karaminyi doko kando karo lapya lare, leya.
EXO 3:17 Nambame suu pilyu doko nakama Isipi wambu dupwame kopetame rapu pyuo karaminyi dokona yuu doko yaki nyuo yuu mende ama keyange amenge pingi dokona lanyuo paro. Yuu dokona Kenane rangepe Iti rangepe Amo rangepe Perasi rangepe Ipi rangepe Jepusi rangepe palaminyi dokona lanyuo paro lapyaŋa lare, leya.
EXO 3:18 Larenepa nambana wambu dupwame emba lare doko serami, leya. Dokopa Isipi range kiŋi petamo dokona Isaraele akali mupwa dupwa pipya epapala dopa lare. Isaraele wambu dupwana Kamongo Anatu namwa keta epo pii langiya. Dokona lao namwa yuu muiyane dokona yuu gii rema pao mena pyao kiso namwana Kamongo Anatu doko maiyala pupwa lena larami, leya.
EXO 3:19 Yuu range kiŋi dokome nakama mee pupwa laa nara. Mendeme baa kando poraiyuo suu lao lara ramo doko kapa pupwa lara lao namba soo gisilyu.
EXO 3:20 Dokopa nambana porai dokome yulu yamarangunyi pyambungi lapo Isipi wambu randa mairu. Enakana dokopa kiŋi dokome nakama pupwa lapala kaeyara, leya.
EXO 3:21 Nambame Isipi range wambu dupwame nakamana kingi rape rape lena pirunupa nakama puu pao paraminyi dokopa mee kingipa paa narami.
EXO 3:22 Isaraele enda mendaki mendaki lao dupwame nakamana anda parali maki palenge Isipi wambu dupwape dee Isipi enda yango nakama role pyao palenge dupwape piso soo kana kulingipi kana golope komaupi jinya larami. Isaraele wambu dupwame Isipi wambunya bange nyulu nyuo nyepala nakamana wane wanakepe keta sinyi palyakamirami. Dopa pyuo Isipi wambu dupwa kokwa sinyi nembaramisa pira, leya.
EXO 4:1 Dokopa Moseseme isingi lao, Dopa pirunupape Isaraele wambu dupwame Kamongo doko emba keta maro laa nalyamo doko lapala kinyi lao suu pyaa nao nambana pii wangu lakao see naraminyi dokopa apa pirusi? leya.
EXO 4:2 Dokopa Kamongome Mosese kando piso soo, Minyaro karene doko akipi? leya. Moseseme isingi lao, Pangali dokoŋo, lamaiya.
EXO 4:3 Dokopa Kamongome lao, Yuu dokona yaki nyuo kanda, leya. Moseseme yuunya yaki nyuo kandeyamo dokopa kau ingiyamosa baa pakao ralo peya.
EXO 4:4 Dokopa Kamongome Mosese kando lao, Kingi pyasinju lapala konali dokona minyarapala nyii, leya. Leyamopa Moseseme kingi pyasinju lapala konali dokona rambuki nyepala banya kingi dokona soo dokopa dee pangali ingiya.
EXO 4:5 Dokona lao wambu dupwame nakamana rakange kyawa dupwana Anatu Aporakame Aisake Jekopemoo dusipana Anatuko dokome emba keta epo lapyalyamo lao serami, leya.
EXO 4:6 Lapala Kamongo dokome Mosese deeyoko lamaiyuo, Embena kingi doko komau pee pingi dokona minyalyapala koko pyambunya leya. Leyamuli pyuo pipala neta nyuo kandeyamo dokopa rete rapa pyuo kewa lao pee lombakinyi peyo epeya.
EXO 4:7 Epeyamo dokopa Kamongome deeyoko lao, Embena kingi doko komau pee pingi dokona kambako pyambuo kanda, leya. Leyamuli pyuo pipala neta nyiyamo dokopa yanenge mee karengenyili pyuo rali piyamo kandeya.
EXO 4:8 Dokopa Kamongome lao, Nakamame yulu wambo doko kando kinyi lao suu pyaa narami ramo dokopa dee lapo pyuo pirinyi dakeme kinyi lao serami, leya.
EXO 4:9 Embame yulu lama dolapo pirinyipape nakamame kando see nao dee embame lare doko soo nembeyami kande dokopa ipwa Naele epo penge dokona kamwapala yuu oo lasi dokona kulimbwape. Dokopa ipwa doko ranjama ingyuo epo para, leya.
EXO 4:10 Moseseme Kamongo kando pii leyamo dokona lao kalyuo leya. Namba wambu malunya lenge kambu dokona sipurapala pii laa nange kandale. Dee yuu gii embame namba kando nyepala langi kande dokona piso pao dakepape laa naowako karo. Namba pii lalana saka napala mona palyuo ŋeŋe lao lenge leya.
EXO 4:11 Dokopa Kamongome lao, Apimi wambunya nenge kata retakamiyase? Apimi renge kuiyuo kale poeyo pii pyakame soo pingisi? Apimi baa kandena lao lenge ranyi retope dee kwaeyo pingisi? Yulu dupwana pingi doko Kamongo nambaŋa.
EXO 4:12 Dokona lao dakepa emba paaleŋe. Nambame emba nyiso dopa pyuo laa lao pyongo pyaro lyakande, leya.
EXO 4:13 Dopa lao dake leyamopape Moseseme lao, Daa. Kamongo emba mendali wakale kapa lao suu pyarende pena lao nembape, leya.
EXO 4:14 Kamongo baame Mosese kando imbu singi nyepala lao, Embena yangone Erone Lipae rara baa kara nalyase? Baame pii kapa lenge doko silyu. Doko dakepa baa emba kandala epelyamo. Baame rae maiyuo emba kando nyolopyamo.
EXO 4:15 Erone laramo dupwa dopa pyuo lena lao embame lamairi. Lamairinyipa nambame nakamba laparae nyisaronopa pii lao yulu pirambi dupwana apa pyuo pirambi lao lasaka piru.
EXO 4:16 Baame wambu dupwa kando embena lakara. Baa embena pii minyingi akali ingyuo karara. Dokopa embame Anatumi dopa pinya dapa pinya lenge dopale ingyuo lao karare.
EXO 4:17 Pangali dake embena kingi raka dokona minyuo dokome yulu andake wambumi kanda nange dupwa piriŋi, leya.
EXO 4:18 Mosesena imwange Jetero kareyamo dokona lambuo peya. Papala lao, Yuu Isipi dokona nambana wambu dupwa mende pii napyamo kapa karamipi lao kandala parowale, leya. Dokopa Jeterome kapaŋa pena leya.
EXO 4:19 Leyamo dokopa Kamongome yuu Mitiane dokona epo Mosese lamaiyuo, Dakepa yuu Isipi dokona lambuo paaleŋe. Wambu emba pyalana piyami kande dupwa kumuo oteyami lyakande, leya.
EXO 4:20 Dokopa Mosese banya enda wanepe nyuo mena donge dokona petena lapala lanyuo Isipi dokona lambuo peya. Dopa pyuo pao baa range Anatumi pangali maiyamo doko nyuo wakyuo peya.
EXO 4:21 Dokopa Kamongome Mosese lamaiyuo, Epapu emba Isipi pelene kande dokona wambumi yulu kanda nangende nambana porai dokome piriŋi lao jiyu kande doko Peraona lenge kambu dokona kandokondali pyuo pipi. Pirinyipa nambame banya mona doko kana pokaronopa wambu dupwa kaka soo yaki nyii nara lyakande, leya.
EXO 4:22 Dokopa embame Perao lamaiyuo, Kamongo dokome dopa letamo. Isaraele rara dupwa nambana wane mupwa kyawalengya lao mandengeŋe.
EXO 4:23 Nambana wane nakamame namba lakandena pena laka lapunupape embame kamba lao karene dokona lao dakepa nambame embena wane mupwasa doko pyao kumakaro letamo lare, leya.
EXO 4:24 Mosese baa yuu Isipi panya peyamo katasa palimwa penge yuu andape dokona Kamongome Mosese kando nyepala baa pyalana piya.
EXO 4:25 Dopa piyamo dokopa Mosesena etenge Sipora lenge dokome kana nenge karengendeme banya ikinyingi yanenge kalomakamipala yanenge dokome Mosesena kimbu doko warendakamiya.
EXO 4:26 Yanenge kalomenge yulu dokona lao baame Mosese lamaiyuo, Emba nambana akalingi ingyapyamopape emba yanenge kalomenge akali dokonaŋa, leya. Dopa leyamo dokona Kamongome Mosese baa pyaa nao mee karena kaeya.
EXO 4:27 Dokopa Kamongome Erone lamaiyuo, Yuu muiyane dokona Mosese epelyamoŋo kando nyela pena leya. Dokopa Eroneme Anatunya yuu kyau poo pyasi dokona kando nyela peya. Pao epeyamo kando nyepala Eroneme Mosese nyinyi piya.
EXO 4:28 Dopa piyamopa Mosese Kamongome yuu Isipi pena lao karo dokopa wambumi kanda nange yulu pinya leyamo dupwa Erone polo lamaiya.
EXO 4:29 Dokopa Mosese Eronepa yuu Isipi papala Ipuru akali mupwa dupwa nyuo malu palyiyambi.
EXO 4:30 Dokona Kamongome Mosese lamaiyamo dupwa peparae Eroneme nakama lamaiya. Lamaiyamopa Moseseme yulu wambu kanda nange dupwa wambunya lenge kambu siyamo dokona piya. Doko kandapala wambu dupwame kinyilyamo lao suu piyami.
EXO 4:31 Suu pyapala Kamongo Anatumi nakamana randa dupwa kandapala epamolyamo lao sepala nakama mona kando Anatunya kingi lakandeyami.
EXO 5:1 Mosese Eronepa Perao kareyamo dokona peyambi. Papala lamaiyuo, Isaraele wambunya Kamongo Anatu dokome nambana wambu dupwa nakama yuu muiyane dokona papala namba rape rape lao suu pyao nenge andake nengenyili pyuo nala pena lape letamo, leyambi.
EXO 5:2 Peraome isingi lao, Kamongo doko baa angi apinde nambame banya pii soo Isaraele wambu dupwa pena larose? Namba Kamongo baa soo gisa nalyoŋo Isaraele dupwa pena laa naro daa, leya.
EXO 5:3 Nakambame lao, Ipurumana Anatu dokome epo nambwa keta kando nyipyaŋa. Yuu remasa pao muiyane dokona namwana Anatu dokona lao mena pyao kiso maiyuo monale. Yaki nyuo kaeyape lao poraiyuo leyambi. Dopa pii narama ramo dokopa anga ikyane kiso joo yanda pimwai dupwame pinya lao nyuo suu lasara, leyambi.
EXO 5:4 Isipi kiŋi dokome Mosese Eronepa kando lao, Nakambame akipamo wambu dupwa mata kara nembo dopa pyuo lambisi? Nakamba karapusi dupwa yulu pinginyili pyuo pela pena lalapape.
EXO 5:5 Peraome pii kareta soo lao, Wambu dupwa wambu wai andake kisilyamo doko nakambame yulu yaki nyuo kaena lao lambisa pilyase? leya.
EXO 5:6 Yuu gii mendaki dokonako Peraome banya akali Isaraele wambu pyalana pyuo yulu maingipi dee nakamana isingi akali dupwape kando lamaiyuo,
EXO 5:7 Wambu dupwa wara nyuo yangi doko sukusa palyapala semene bange kana dopakale dee wasarami dokopa yangi mai napala range kota nyinya lamaiyalapa.
EXO 5:8 Dopa pyuo dokopa kana semene bange wambo dokopa akipare wasingi kandalese lao dopaleko ingyuo manda manjo wasinya lalapape. Dee alowa pipala kuki pyuo wasaramiŋi doko daa. Nakama yulu pinya rae mai napala dokona Anatu kingi lao yuu muiyane dokona mena kiso maiyala panyaŋa lao karaminyi kande.
EXO 5:9 Nakamana pii kyambo letaminyi dupwa sisaramiŋi dokona yulu ama poraiyuo maipala pyuo karena lalapape, leya.
EXO 5:10 Leyamopa wambu pyalana pyuo yulu maingipi dee nakamana akali range dokona isingi akali ingyuo kareyami dupwame Isaraele wambu dupwa kareyaminyi dokona papala Peraome bange yangi dopale semeneme rambu lao reto anda pingi doko nakama jii naroŋo letamo.
EXO 5:11 Dokona lao nakama rangeme yangi seramo kandaraminyi dupwa koto nyepala semene bange malu wasingi kandale dopaleko wasalapape, letamo, leyami.
EXO 5:12 Dopa leyasa wambu peparae yuu Isipi dokona papyuo yangi dopale semene pakao reto pingi dupwa koto kareyami.
EXO 5:13 Dokopa yulu maingi akali dupwame pyalana pyuo lao nakama yangi dopale semene rambu lao pingi dupwa nyuo jiyaminyi semene bange wasiyami kande doko suu pyao maluko ingyuo pena lao waso karalapape lao kareyami.
EXO 5:14 Peraona akali Isaraele wambu yulu maingi dupwame Isaraele isingi akali dupwa pyao randa maiyuo kareyami. Randa maipala, Akipamo nakama kana semene bange malu wamba wasingi kandale dopale epapu wasa nalyamipi? leyami.
EXO 5:15 Enakana Isaraele isingi akali karenge dupwame papala Perao piso soo lao suku lao, Akali andake emba karalendelamo akipamo embame namwa kando dopa pilisi? leyami.
EXO 5:16 Dokopa yangi dopale jii nalyaminyipape semene malu wasinginyili pyuoko waso karalapape letaminyi doko akipamo letamisi? Dee dakepa nakamame namwa pyao karaminyi dokona kopetame doko emba keta palamo, leyami.
EXO 5:17 Dokopa Peraome isingi lao, Nakama makalana wangu lakapala makalyaminyi renge dokona lao yuu muiyane dokona Kamongo lakando nenge rendamu pingi kiso maiyala pupwa laa lao piso soo karaminyi kande, leya.
EXO 5:18 Dopa lapala Nakamana yulu dokona pila pupwape lao yangi doko jii naramaŋa semene wamba wasingi kandale dopako pyuo wasalapape, leya.
EXO 5:19 Leyamo dokopa Isaraelena isingi akali dupwame semene wamba wasinginyili pyuo yuu peparae waso karalapape leyami doko kandapala randa nyilyamano lao soo manji nyiyami.
EXO 5:20 Dokopa nakama Perao yaki nyuo papala Mosese Eronepa nakamana lao epo iso kareyambi dolapo kando nyiyami.
EXO 5:21 Dokopa isingi akali dupwame Mosese Eronepa kando, Nakamba sipurapala mende piyambinyi dokona Perao banya wambu pipya namwa kando awa nalyaminyi. Dokona Anatumi nakamba kando kote lao randa mainyale. Nakambame namwa pinya lao wua nyuo kingi rakana palyakamyuo nyuo kisambisa pipya, leyami.
EXO 5:22 Dee kambako Moseseme Kamongo lamaiyuo, Kamongo akipamo embena wambu dupwa kyawa yaki nyuo kaeyo randa mailipi? leya. Aki rengendena namba wambu dupwa kandala puu leese?
EXO 5:23 Nambame Perao lamaiyakala epeyono dokona piso pao dakepape baame embena wambu dupwa mee randa maiyuoko karamo. Karapyamopape embame nakama nyisaroŋo laope mende ingya nalene, leya.
EXO 6:1 Dokopa Kamongome Mosese lamaiyuo, Dakepa nambame Perao kando mende pingi pyapono doko pao kandalale. Perao banya kingi porai dokome banya yuu doko yaki nyuo pena lapala wambu dupwa poraiyuo suu lanyi nembara, leya.
EXO 6:2 Anatumi Mosese lamaiyuo, Kamongo doko namba lyakande, leya.
EXO 6:3 Namba Anatu Porai Wakasa dokoŋo lao Aporakamemoo Aisake Jekope keta epo paneyo. Nambana kingi Yawai lenge lao rangeme sinya lao lamai nayo lyakande.
EXO 6:4 Nakama yuu Kenane nakama mee upunili palima paenge ingyuo epo papiyami doko mairuŋu lao kana minyuo lalu lao leyo.
EXO 6:5 Dopako pyuo Isaraelena rara dupwa Isipi akali dupwame karapusi pyaminyipa randa nao ingi koo palyuo karaminyi dokona kandapala nambana kana minyuo lalu lao leyono pii dokona suu pyaro karoŋo.
EXO 6:6 Dokona lao embame Isaraele wambu dupwa lamaiyuo Kamongo doko nambaŋa. Nakama Isipi dupwame karapusi pyuo yulu nyuo suu lao joo karaminyi dokona nambame nakama karapusi yulu pyakamyuo karaminyi dokona kingi rekya lao nyero. Nambana kingi porai dokome nakama pyao rekya lalana pyuo karo dokome nakamba randa koo maipala nakama kyawa lete nyero.
EXO 6:7 Dopa pyuo nakama namba rangena ingyuo nyepala namba nakamana Anatu ingyuo kararo. Dokopa namba nakamana Kamongo Anatu dokome Isipi wambu dupwa randa joo kareyaminyipa moko nyii kande dokolyamo lao serami, leya.
EXO 6:8 Dopa pyuo lao, Nambame yuunde Aporakame Aisake Jekopemoo mairuŋu lao kingi ketae nembo lalu lao leyono dokona nakama rangena kipungi inginya lao jero. Namba Kamongo doko karo letamo lao lamairi, leya.
EXO 6:9 Dokopa Moseseme pii doko Isaraele wambu dupwa lamaiyamopape nakama karapusi yulu kopetame maiyaminyi pyuo karapala makame kumuo kareyami dokome pii doko soo nyii nayami.
EXO 6:10 Dokopa Kamongome Mosese lamaiyuo,
EXO 6:11 Emba Isaraele wambu dupwa kingi raka lao yaki nyinya lao Isipi wambunya kiŋi Perao baa lamaiyala puu, leya.
EXO 6:12 Dopa leyamopape Moseseme Kamongo lamaiyuo, Isaraele wambu dupwame nambana pii soo nembami kandapi doko doŋo dee Peraome apa pyuo nambana pii doko serase? Namba pii angingyuo laa nange kandapi, leya.
EXO 6:13 Pii doko soo kaeyo Kamongome Mosese Eronepa lamaiyuo, Isipi wambunya kiŋi Peraomoo Isaraele wambu dupwape Kamongome Isaraele wambu yuu Isipi doko yaki nyuo lanyuo pupwa lapyasa epelyambano larambi, leya.
EXO 6:28 Kamongome yuu Isipi dokona Mosese lamaiyuo,
EXO 6:29 Namba Kamongo doko, Pii peparae nambame langilyu dusipa minyuo pao yuu Isipi wambunya kiŋi doko lamaipi, leya.
EXO 6:30 Dopa leyamo dokopa Moseseme Anatu kando lao, Namba pii lalana yakara pingi doko emba silini. Apa pyuo kiŋi dokome nambana pii serase? leya.
EXO 7:1 Dokopa Kamongome Mosese lamaiyuo, Kanda, nambame emba kiŋinya lenge kambu dokona Anatu yale inginyi pyambwaronopa embena yangone Erone dokome embena poropeta dopale ingyapala pii lamaiyakara.
EXO 7:2 Nambame emba dopa pipi dopa pipi lao pii langilyu dusipa peparae pao Erone lamaipi. Lamairinyi dokopa baame pao kiŋi doko lamaiyuo, Isaraele wambu dupwa yuu doko yaki nyuo pena lena lara.
EXO 7:3 Dopa piramopape nambame kiŋi doko mona pokanyi pyambwaro. Pyambwapala nambame yulu wambumi pii nange lapo pirunupape baame embena pii soo nyii nara.
EXO 7:4 Dokopa nambame yuu Isipi range dupwa randa andake mairunupa nambana Isaraele wambu dupwa Isipi yaki nyuo lanyuo paro.
EXO 7:5 Dopa pyuo nambame nakama kanda soo pyaronopa Isaraele wambu dupwa yuu Isipi yaki nyuo lanyuo eparami. Dokopa Isipi range dupwame namba Anatu lao soo nyerami, leya.
EXO 7:6 Mosese Eronepa Anatu leyamuli pyuo piyambi.
EXO 7:7 Nakambame kiŋi kando pii lamaiyambinyi yuu gii dokopa Mosese baa ee kana akalisa mange lama karo (80) dee Erone ee kana akalisa mange lama ipisu rema (83) nembo kareya.
EXO 7:8 Kamongome Mosese Eronepa kando lamaiyuo,
EXO 7:9 Peraome nakamba kando yulu andake wambumi pii nange mende nakamba keta porai renge palamo lao lasaka pyuo pipwape leya kande dokopa Erone banya pangali isa doko Peraona lenge kambu sera dokona pyao pyambunya lao lamaipi. Dopa piramo dokopa pangali doko pao kau ingyara, leya.
EXO 7:10 Lapeyamo dokopa Mosese Eronepa Perao kareyamo dokona peyambi. Papala Anatu leyamuli pyuo Eroneme banya pangali isa doko Peraomoo banya yulu pingi akali mupwa dusipa kareyaminyi dokona pyao pyambuyamo dokopa doko pao kau ingiya.
EXO 7:11 Doko kandapala dokopa Peraome banya soo gisingi akalipi pipu lenge akalipi lapo epena leya. Leyamo dokopa pipu lenge dupwa epapala nakamana porai dokome yulu dopaleko isingi piyami.
EXO 7:12 Nakamana pangali isa dupwa pyao pyambuyaminyi dokopa pao kauko ingiya. Dopa piyaminyipape Eronena pangali isa dokome doloma peparae nao goe leya.
EXO 7:13 Dopa piyaminyipape Anatumi kiŋi baame warombo see nara lao leyamuli pyuo Mosesepa Eronepa pii leyambinyi doko see nao banya mona kana pokapala kareya.
EXO 7:14 Dokopa Kamongome Mosese lamaiyuo, Perao baa ama porayapala wambu dupwa kingi raka lao pena laa nalyamo.
EXO 7:15 Dokona yangama nakamba ipwa Naele pona dokona paraŋa dokona papala Perao kando nyerambi. Nakambame pangali isa kau ingiyamo doko minyuo papala ipwa kee kama dokona baa isaro karalapape.
EXO 7:16 Dokopa embame kiŋi doko lamaiyuo lao, Ipuru wambu dupwa yuu muiyane dokona papala nambana kingi lakando kararami lao Kamongo nakamana Anatu dokome embame nakama pena lape lao puu lapyasa epo leto. Dopa lapunupape wamba langiyunu simbi simbi piinyi dopaleko ingyuo epapu pilini.
EXO 7:17 Epapu emba kiŋi doko aki mende nambame piru doko kandapala embame namba apiŋi lao soo nyera lao Kamongome letamo. Kanda. Kusape dakeme ipwa ketae dokona pyaronopa ipwa doko alowa pyuo ranjama ingyara.
EXO 7:18 Dopa piramo dokopa kau oma dupwa kumarami dokopa ipwa doko ama ai wakasa pyarasa Isipi range wambu dupwa kapa pyuo kamuo nalana saka narami lare, leya.
EXO 7:19 Kamongome Mosese lamaiyuo lao, Embame Erone lamaiyuo banya pangali isa doko nyepala yuu Isipi dokona ipwa epo pengepe ipwa epo pena lao suu nyingipi ipwa pete singipi dupwa peparaena ketae palyuo minyaro karena lamairi. Dopa piramo dokopa ipwa peparae ranjama ingyuo dee isa lukuluku pisinya ipwa singi dupwanape dee kana wasisinya ipwa petenge dupwanape opetaeko ranjama ingyuo yuu peparaene ranjama soo pira.
EXO 7:20 Mosese Eronepa Anatumi leyamuli pyuo piyambi. Kiŋi Peraomoo banya yulu akali mupwa dupwa pipya kareyaminyi lenge kambu dokona Eroneme banya pangali isa doko minyalyapala ipwa doko piya. Piyamo dokopa ipwa dupwa alowa pipala ranjama ingiya.
EXO 7:21 Dopa piyamopa kau oma ipwana singi dupwa kumuyami. Dokopa ipwa dupwa ama ai wakasa piyasa Isipi range dupwa kapa ipwa naa nayami. Yuu Isipi dokona ranjama dokome mee ree ingiya.
EXO 7:22 Dokopa Isipi range akali pipu lenge dupwame epo yulu mendaki dopaleko piyami. Piyaminyipa Perao baa poraiyuo kaeya. Kamongome dopa pira leyamuli pyuo kiŋi dokome Mosese Eronepa pii see naya.
EXO 7:23 Doo piyamo dupwana mendepe soo nyuo laa napala Perao banya anda kapu kyuo peya.
EXO 7:24 Isipi range wambu dupwa ipwa epenge dokona kapa narami ingya nayasa ipwa marenge dokona apu rapala ipwa siyamo doko neyami.
EXO 7:25 Kamongome ipwa piyamo dokopa yuu gii yanda ipingi nembo ipwa doko ranjama ingiya.
EXO 8:1 Dokopa Kamongome Mosese lamaiyuo, Perao karamo dokona pao dopa lamaiyuo, Kamongome dopa letamo. Namba lakandarami lao nambana wambu dupwa pena lakape.
EXO 8:2 Nambana wambu dupwa pena laa nare ramo dokopa namba embena yuu dokona keta randa joo yuu Isipi peparae mungi peyaro.
EXO 8:3 Ipwa Naele pona dupwana mungi malu piso kete pyapala lapo yaki nyuo embena anda dokona eparami. Epo embena luu palenge pandape embena ratepe dee embena yulu pingi akali mupwa dupwana andape embena wambu dupwa peparaena anda dupwanape eparami. Isare pete dupwanape borete wasingi penge dupwanape epo paliramiko.
EXO 8:4 Dopa piraminyipa embape embena wambupi dee embena yulu pingi akali mupwa dupwa peparaena yongo dupwana pyakao epo pisirami lare, leya.
EXO 8:5 Kamongome Mosese lamaiyuo lao, Embame Erone lamaiyuo banya pangali isa doko nyepala ipwa epo pengepe ipwa epo pena lao suu nyingipi ipwa pete singipi dupwa peparaena ketae palyuo minyaro karena. Dopa piramo dokopa mungi dupwa ketae epo yuu Isipi dokona mee ree ingyara lare, leya.
EXO 8:6 Leyamo dokopa Eroneme banya pangali isa doko ipwa peparaena ketae palyuo minyalyiyamo dokopa mungi dupwa ketae epapala yuu dupwa minyarambu nyiya.
EXO 8:7 Dopa piyamopape pipu lenge dupwame pipu lapala mungi dupwa dopako pyuo yuu dokona epena lao piyami.
EXO 8:8 Piyaminyi dokopa kiŋi Peraome Mosese Eronepa epena lao kee lapala dopa lamaiyuo, Kamongome mungi dupwa nyuo nembakana lao ateŋa lalapape. Dopa pirambinyi dokopa nakamana wambu dupwame mena pyao kiso Kamongo mairami lao nambame nakama pena laro, leya.
EXO 8:9 Dokopa Moseseme Perao isingi lamaiya. Nambame rae maiyuo ateŋa lakaro. Embame yuu gii rombo palyarene dokona embape embena yulu pingi akali mupwa dupwape embena wambu dupwapena ateŋa lakaro. Dopa pirunu dokopa mungi peparae neta pao ipwa Naele dokona iki serami.
EXO 8:10 Kiŋi dokome isingi lao, Rakya embame nambana lao ateŋa lakare, leya. Leyamo dokopa Moseseme lao, Emba piso silinyili pyuo piru. Pirunu dokopa anatu wakale mende Kamongo namwana Anatu dopakale daa lao soo gisare.
EXO 8:11 Mungi dupwame embape embena wambupi embena yulu pingi akali mupwa dupwa peparaepe yaki nyepala ipwa Naele dokona iki serami, leya.
EXO 8:12 Dokopa Mosese Eronepame Perao yaki nyuo peyambi dokopa Moseseme mungi dupwa kiŋi keta peteyamo dupwa nyisa nyuo nembena lao Anatu kando ateŋa poraiyuo piya.
EXO 8:13 Dokopa Kamongome Mosese leyamuli pyuo mungi anda dupwanape anda kamapi ee dupwanape peteyaminyi dupwa kumuo pao siyami.
EXO 8:14 Dokopa Isipi wambu dupwame mungi dupwa yapo nyuo kamba kamba malu palyuo reteyaminyi dokopa yuu dokona nyenenge ai wakasa piya.
EXO 8:15 Piyamopa Perao baame mungi dupwa kumuo pao mee ingiyamo kandapala dokopa mona kamba kana poko poraiyuo kaepala Kamongome leyamuli pyuo baame Mosese Eronepana pii see naya.
EXO 8:16 Kamongome Mosese lamaiya. Embame Erone lamaiyuo banya pangali isa dokome yuu dokona pinya. Pyaramo dokopa sinjimu dupwa pao oro ingyapala yuu Isipi minyarambu nyera lare, leya.
EXO 8:17 Leyamo pii doko sepala Eroneme banya pangali isa doko minyalyapala yuu dokona pyao pisiya. Dokopa yuu Isipi dokona sinjimu peparae dupwa alowa pyuo oro ingyapala mena wambupi yongo dupwana minyarambu nyiya.
EXO 8:18 Pipu lenge akali dupwame dopako pyuo makande minyuo pinya piyaminyipape kapa ingyuo pii nayami. Nakamana menape nakamana yongope dupwa peparaena oro mee peteya.
EXO 8:19 Dokona lao pipu lenge akali dupwame Perao kando yulu dake Anatumi pipyalyamo leyami. Dopa leyaminyipape Perao baa ama porayapala Kamongome leyamuli pyuo baame Mosese Eronepana pii see naya.
EXO 8:20 Kamongome Mosese lamaiyuo, Rakya wamba yangama Perao baa ipwa maresa paramo dokopa emba pao kando nyepala dopa lamairi. Kamongome dopa letamo, Nambana wambu dupwa namba lakandarami lao pena lare.
EXO 8:21 Embame nambana wambu dupwa pena laa nare ramo doko kinyi kinyi langilyu nambame wambena malu mee embape embena wambupi embena yulu pingi akali mupwa dupwape keta peyaro. Peyarono dokopa Isipi rangena anda dupwanape yuu peparaenape wambename minyarambu nyuo sera.
EXO 8:22 Dopa piramopa nambame yuu Gosane nambana wambu palaminyi dokona lili pyuo wambena peya naro. Dopa pirunu dokome namba Kamongo doko yuu dakena yulu pyuo karene lao nakamame soo nyerami.
EXO 8:23 Nambame nambana wambupi embena wambupi komandapala yulu pii naro. Yulu wambumi pii nange dakeme rakya panda nyuo pira, leya.
EXO 8:24 Kamongome wambena ama malu mee peyamopa Peraona andape banya yulu pingi akali mupwa dupwana andape siya. Dokona lao yuu Isipi peparae ama kokwa soo peya.
EXO 8:25 Peraome Mosese Eronepa epena lapala lamaiyuo, Yuu dakena mena dupwa pyao kiso nakambana Anatu maiya pupwa, leya.
EXO 8:26 Leyamo dokopa Moseseme isingi lao, Namwame yuu dakena mena dupwa pyao kiso namwana Kamongo Anatu mairama ramo yulu doko kapa ingya nara. Doko Isipi wambumi kandapala ipyarami. Namwame Isipi wambunya lenge kambu dokona mena pyao kiso mairama ramo dokopa nakamame rae mai nao ipyapala namwa kaname pyao kumakarami.
EXO 8:27 Namwa yuu gii rema nembo yuu muiyane dokona pao karapala dokopa namwana Kamongo Anatumi langiyamuli pyuo mena dupwa pyao kiso mairama, leya.
EXO 8:28 Leyamo dokopa Peraome dopa lamaiyuo, Nakama ama nanesa paa narami ramo doko nambame nakama yuu muiyane dokona nakamana Kamongo Anatu mena dupwa pyao kiso maiyala kapa pupwa, laro. Nambana lao ateŋa lakalapape, leya.
EXO 8:29 Moseseme isingi lao, Mee mende usale namba papala rakya wambena dupwame embape embena yulu pingi akali mupwa dupwape embena wambupi yaki nyuo pena lao Anatu kando ateŋa lakaro. Dopa piru dokopa embame namwa dee minyoko pyuo wambu dupwame Anatu mena kiso maiya parami dupwa daa lao minyaro see napipi, leya.
EXO 8:30 Dopa lapala Moseseme Perao yaki nyepala baa pao Kamongo kando ateŋa leya.
EXO 8:31 Ateŋa lao Moseseme piso siyamuli pyuo Kamongome Perao banya wambupi banya yulu akali mupwa dupwape keta wambena dupwa rekya lao nembeya. Nembeyamo dokopa kuki mendepe ama pisa naya.
EXO 8:32 Dopa pepeyamopape Peraome dee ama poraiyuo mona kana poko karapala Isaraele wambu dupwa kaka soo pena laa naya.
EXO 9:1 Anatumi Mosese lamaiya. Embame kiŋi Perao karamo dokona papala baa dopa lamaiyuo, Kamongo Ipuru wambunya Anatu dokome lao, Nambana wambu dupwame nambana kingi minyalyuo lao lakandarami lao pena lakape.
EXO 9:2 Embame wambu dupwa pena laa napala mee minyaro sere ramo dokopa nambame randa andake anga yakane koo ree lapo
EXO 9:3 embena mena dongepe ose kamele bulamakao sipisipi memepe peparaena peyaro.
EXO 9:4 Dokopa Isaraele wambunya mena dupwape Isipi wambu dupwana mena dupwape liti pirunu dokome Isaraele wambunya mena dupwana mendepe kuma nara.
EXO 9:5 Namba Kamongo doko yuu gii reto rakya piru lao lalu lao lapya lare, lao Kamongome Mosese lamaiya.
EXO 9:6 Dokopa yangama Anatu leyamuli pyuo piyamo dokopa Isipi wambunya mena peparae kumuo oteyami. Dopa piyamopape Isaraele wambunya mena dupwana mendepe kuma naya.
EXO 9:7 Dokopa Peraome piso soo, Apa pipyase? leya. Leyamo dokopa Isaraele wambunya mena dupwana mende kuma napya lao lamaiyami. Dopa leyaminyipape Peraome porayapala wambu dupwa kaka soo yaki nyuo pena laa naya.
EXO 9:8 Anatumi Mosese Eronepa lamaiyuo, Isare pete dokona kingi laparaeme pee dupwa nyerambinyi dokopa Moseseme Perao karamo dorena ketae pyao nembara.
EXO 9:9 Pyao nembaramo dokopa sinjimu kyau lenge dopakale ingyuo yuu Isipi peparaena raeyo para. Paramo dokopa mena wambupi peparae keta amungi pisipala poro lalya lana pipala rete andake pira, leya.
EXO 9:10 Dopa lapeyamo dokopa isare pete dokona pee dupwa nyepala Perao kareyamo dokona pao kareyambi. Pao kareyambinyi dokopa Moseseme pee doko ketae nembeya. Nembeyamo dokopa pao mena wambupi peparae amungi pisipala poro lalya lana pyuo rete piya.
EXO 9:11 Isipi range menge dupwa rete piya doko suu pyao nakama pipu lenge akali dupwa dopako piyasa siyaminyi dokome Mosese kareyamo dokona isingi dopako pyuo eparami ingya naya.
EXO 9:12 Kamongome kiŋi dokona mona kana pokanyi pyambuyasa Kamongome leyamuli pyuo Mosese Eronepana pii doko soo nyii naya.
EXO 9:13 Dokopa Kamongome Mosese lamaiya. Rakya wamba yangama sipurapala Perao kando nyepala dopa lamairi. Kamongo doko Ipuru wambunya Anatu dokome dopa lao, Nambana wambu dupwame nambana kingi minyalyuo lao lakandarami lao pena lakape.
EXO 9:14 Yuu gii dakepa randa dake embena yulu pingi akali mupwa dupwape embena wambu dupwape keta iki eparande daa. Emba keta opetaeko epara. Eparamo dokopa yuu muu peparaena namba yale mende kara nange doko soo gisare.
EXO 9:15 Namba nambana kingi ketae palyapala embape embena wambupi keta anga peyapuli doko nakama peparae kumuo otamili.
EXO 9:16 Dopa pii napala nakamame nambana porai doko kandarami lao lasaka pyuo nakama mee lete karalapa lao kaeyo. Dokona lao wambu dupwame yuu muu peparaena nambana kingi nyuo ketae nembarami lao piyu.
EXO 9:17 Dopa piyunupape emba range mupwa lao suu pyao lakandamili lapala nambana wambu dupwa pena lao yaki nyerende daa.
EXO 9:18 Yuu gii dakepale rakyana nambame randake kapa ama romende epena laro. Wamba yuu Isipi dakena dopale mende epelyamo mare kanda nangende epara.
EXO 9:19 Dopa piramo dokona embena mena bulamakaope dee bange peparae kamanda silyamo dupwape nyepala kapa kararami lao panda andakare mendena pao retena lamaipi. Randake kapa eparamo dokopa mena rara peparaepe akalipi pyakuiyuo kamanda kararaminyi dupwa kumarami lare, leya.
EXO 9:20 Peraona yulu pingi akali mupwa dupwana lapome Kamongome pii leyamo doko soo pakapala nakamana kendemande dupwape mena dupwa kapa kararami lao andakare lanyuo epeyami.
EXO 9:21 Dopa piyaminyipape wambu lapo Kamongona pii see napala menape kendemandepe kamanda mee karena kaeyami.
EXO 9:22 Kamongome Mosese lamaiyuo, Embena kingi doko yake dulunya kanda kanda pyambwarene dokopa menape wambupi nenge eena andenge dupwa peparaepe yuu Isipi dokona singi dupwana kapa kapa pyuo randake kapa epara, leya.
EXO 9:23 Leyamuli pyuo Mosese banya pangali doko yake dokona pyalyiya. Pyalyiyamo dokopa Kamongome randa maiyuo yuu pele pyuo gala lao randake kapa peyo piya. Dopa pyuo Kamongome randake kapa romende yuu Isipi dokona peya.
EXO 9:24 Dopa pyuo karo porambaiye andake minyuo randake kapa epo yuu pele pyuo gala lao pyuo porambaiye apunda ama andake wamba wambu yuu Isipi paleyaminyi dokopa mende dopale epa nange doko epo sulu siya.
EXO 9:25 Yuu Isipi peparae wambu mena suwape bange peparae kamanda kareyami dupwa randake kapame piya. Isako dupwa pyao kumako dee isa dupwa pyao lakao piya.
EXO 9:26 Yuu Gosane Isaraele wambu paleyami doko iki randake kapame pyaa naya.
EXO 9:27 Doko kandapala kiŋi Peraome Mosese Eronepa lamaiyuo, Yuu gii dakepa namba koo pipu. Kamongo Anatu baa rolae pipyamo nambana wambu dupwa nambamoo koo pimwa lao polo leya.
EXO 9:28 Kamongo Anatu kando ateŋa lakape. Yuu galape randake kapape doko namwa kapa nyepelyamanoŋo, leya. Namba lalu lao leto. Namba epapu nakamba yaki nyero parami dee ama pisi narami, leya.
EXO 9:29 Leyamo dokopa Moseseme baa lamaiyuo, Namba taone andake dake yaki nyuo paparo dokopa aopa yake dokona Kamongo Anatu karamo dokona nambana kingi pyalyuo ateŋa laro. Dokopa yuu galape apunda randake kapape dupwa epa nara. Dopa piramo dokopa yuu muu doo silyamo dupwa Kamongonalyamo lao sere, leya.
EXO 9:30 Dopa pipyamopape embape embena akali mupwape dupwa Kamongo Anatu mupwa lao suu pyao paka nalyaminyi namba silyu, leya.
EXO 9:31 Puu lapya isa jingi dopale yalende bui rao isa bali jingi dupwa wambu pyuo poo rao oteyamopape randake dokome pyao parakwayasa rumbiya.
EXO 9:32 Dopa piyamopape witi jingi enakana ingyuo poo renge dokome kuki mende rumbya naya.
EXO 9:33 Mosese Perao yaki nyuo taone andake dokona nyisarena peya. Papala banya kingi yake dokona pyambuo Anatu lao ateŋa leya. Yuu gii dokopa yuu gala laa nao randake kapa epa nao dee apu epa nao soko piya.
EXO 9:34 Yuu gii dokopa yuu gala laa nao randake kapa epa nao dee apu epa nao piya. Peraome doko kandapala deeyako koo pyuo banya akali mupwa dupwa pipya mona kana pokapala karo kaeyami.
EXO 9:35 Kamongome Mosese keta lamaiyamuli pyuo Perao banya mona andarena kana pokapala Isaraele wambu dupwa pena laa naya.
EXO 10:1 Dokopa Kamongo dokome Mosese lamaiyuo, Embame kiŋi Perao kandala puu. Doko nambame akalimi pii nange yulu dopale nakama keta pinya suu pyapala baape banya yulu pingi akali mupwapena monarena kana pokanyi pyambuyu.
EXO 10:2 Dopa lapala dokopa lao, Nambame yulu akalimi pii nange pyuo Isipi wambu kopyali minyinyi nembeyo doko nakamame dopa pyuonde piyaŋa lao nakamana wanepe dee wanena ikinyi kauwanepe dupwa keta arome pyao lamairamiŋi dokona piyu. Dokona doko Kamongo dokolyamo lao soo manjo nyerami, leya.
EXO 10:3 Dopa lapeyamo dokopa Erone Mosesepa pao kiŋi doko kando dopa lamaiyambi. Ipuru wambunya Kamongo Anatu dokome lao, Yuu mange akipare dee nambana pii soo nyii nao kamba lao kararepe? Nambana wambu dupwame namba kingi minyalyuo lao lakandarami lao pena lakape.
EXO 10:4 Emba nambana pii soo nyii nalu nao nare ramo doko rakya nambame embena yuu dokona aimbu polanyi peyakaro.
EXO 10:5 Dokopa ama malu soo kaeyo pisiraminyi dokome epo yuu pandape minyarambu nyerami. Nyepala isa yoko nengepe lapo randake kapame pyao maleyamo dupwana mendepe yaparonge nyii naramiŋi lao nao otarami.
EXO 10:6 Dopa pyuo epo embena andape embena yulu pingi akali mupwa dupwana andape embena wambu peparaena anda dupwape epo simbuo rangu paraŋa. Yulu koo dopale mende embena kauwange imbwangepe wamba dupwa kareyaminyi dupwana kanda nange doko pyaka soo pira ingilyamo letamo, leyambi. Leyambinyi dokopa kiŋi dokome kapu kyepala yaki nyuo peya.
EXO 10:7 Dokopa banya yulu pingi akali mupwa dupwame kiŋi lamaiyuo lao, Yuu Isipi dake repeta kwaeyo para lao masa nalese? Yuu gii akipare namwa randa joo karase? Isaraele akali dupwa yaki nyuo nakamana Kamongo Anatu doko lakandaramiŋi pena lakamipi, leyami.
EXO 10:8 Dopa lapala Mosese Eronepa kiŋi peteyamo dokona lanyuo epeyami. Epeyami dokopa kiŋimi lamaiyuo, Nakambana Kamongo Anatu doko range lakandala parami ingilyamo, leya. Dopa lapala piso soo, Paramiko doŋo apimoo angingyuo paramisi? leya.
EXO 10:9 Dokopa Moseseme isingi lao, Namwa peparae paramanopa namwana wane dee alemo endemope opetaeko parami. Kamongo Anatu lakando banya kingi ketae pyambuo mena pyao kiso pati lao nao pisirama ingilyamo dokona namwame namwana wanenge ikinyingipi mena bulamakaope sipisipi memepe dupwa opetaeko lanyuo parama, leya.
EXO 10:10 Dokopa kiŋimi lao, Enda wanepe opetae paa narami lao Kamongona kingi dokona lao kaeyapunu pilyamo. Daaŋa lapala lanyuo parami doko nakamame kopetame pirami lyakande.
EXO 10:11 Ama daaŋa. Nakama panya suu piyami kande doko akali iki pao Anatu kingi lala parami, leya. Leyamo dokopa Mosese Eronepa kiŋinya lenge kambu siya dokona kara nana lao ralinyi nembeyami.
EXO 10:12 Dopa pyuo leyasa kandapala Kamongome Mosese lamaiyuo, Embena kingi dokome yuu Isipi silyamo dorena ingyuo pyambwapala aimbu nyinyi peyape. Dokopa aimbu dupwame epapala awa yoko isakope kyakange dupwa mende randake kapame yaki nyiyamo dupwa nao yuu rokwa lena leya.
EXO 10:13 Dokopa Moseseme pangali isa doko minyalyiyasa Kamongome yuu dokona porambaiye yuu neta pyakaenge dorena piso korakama peparae minyuo pao kukwa peparae ingiya. Dokopa yangama aimbu angi dupwa nyuo soo epo malu palyiya.
EXO 10:14 Dopa pyuo bii lao epo yuu liti dokona simbuyami. Wamba yuu mendepape aimbu yanda kambu dopale mende epelyamo kanda nange dee rengya dopa pyuo malu eparamo kanda naramiliko ingyuo kaiya karo epeya.
EXO 10:15 Yuu sero kareyasa yuu dupwa kandalana saka nayami. Nakamame yuu dokona nenge isa yokope dupwa randake kapame pyao maleyamo dupwa kamame nao yuu rokwa leyami. Dopa pyuo nao dokopa isa jingi isana lyiyamo dupwa opetae neyami. Isa yoko nenge mendepe yuu Isipi dokona kyakao siyamo kanda nayami.
EXO 10:16 Dopa piyasa kiŋi dokome yamarangyuo karo waiya lao Mosese Eronepa epena lapala lao, Nambame nakambana Kamongo Anatupi nakambape kando yanda pimwaiyuo kopetame pipulyamo.
EXO 10:17 Epapu dakepa nambana kopetame pipunu doko nyuo kame sakana lao randa nao koo keta pali nara lao nakambana Kamongo Anatu doko kando ateŋa lao lamaiyakalapape, leya.
EXO 10:18 Dopa lapeyamo dokopa Mosese baa kiŋi yaki nyuo pao Kamongo kando ateŋa lakamiya.
EXO 10:19 Dokopa Kamongome dee neta pyakaenge dorena piso poo leyamo doko alowa pyuo neta yalyingi dokona piso porai ingyuo renge kuiyuo lapala aimbu peparae nyepala ipwa kota Kone lenge dorena soo kaki piya. Dokopa Isipi dokona aimbu mendaki mendepe pyarepala pao pisa naya.
EXO 10:20 Doko kandeyamo dokopa Kamongome kiŋinya monarena kana pokanyi pyambuyasa Isaraele wambu dupwa dakepa dee paa naramiŋi daa, leya.
EXO 10:21 Kamongo dokome Mosese lamaiyuo, Embena kingi doko ketae palyapala yake dorena pyambwarene dokopa yuu Isipi dokona iminjo koro koro lara.
EXO 10:22 Moseseme dopa piyasa yuu Isipi dokona yuu remasa lao iminjaro kareya.
EXO 10:23 Dopa piyasa Isipi wambu range yango sukusa kandalana saka nayami. Dopa pipala andakare mee siyami. Dopa piyamopape Isaraele wambu paleyaminyi dokona mee yanga paupau lasi siya.
EXO 10:24 Dopa piyasa kiŋi dokome Mosese epena lapala dopa lamaiyuo, Nakamana Kamongo mona maiyuo kingi lao pisa paraminyi doko kapaŋa dokona nakamana enda wanepe dupwa opetae pupwaleŋe nakamana mena sipisipipi memepe bulamakaope dupwako dae karena, leya.
EXO 10:25 Dokopa Moseseme isingi lao, Doko kapalyamo. Namwana Kamongo Anatunylao mena yapasi lapo kiso maiyuo dee kiso mukinyi nembo piramano dokona lapo emba jere ingilyamo.
EXO 10:26 Dopa piralyamo dokona dakepa namwana mena dupwana mendepe kara nana lao range nyuo parama. Namwame Anatu kingi lao kiso maiyuo pisiramano mena dupwa rangeme yapalyuo nyerama ingilyamo. Doko angi maresa paramano dokopa mena dokorekende pyao yangakaramiŋi lapyalyamo lao soo pakana palyarama, leya.
EXO 10:27 Dokopa Kamongome kiŋi mona kana pokanyi pyambuyasa akali dupwa pena lao yaki nyii naya.
EXO 10:28 Dopa pipala kiŋimi Mosese kando lao, Emba dasape kara nao popengeŋe dee kando laro ramo dokopa kumapengeŋe, leya.
EXO 10:29 Dokopa Moseseme isingi lao, Emba kapa leteneŋe. Embame namba dee kamba kanda nareko, leya.
EXO 11:1 Kamongome Mosese keta lao, Randa mende opetaeko lumwa pyuo Isipi kiŋi dee banya wambupi nakama mairuwale. Randa doko paparamo dokopa baame nakama kingi raka lao yaki nyolopyamo. Dopa pyuo nakama peparae ralinyi nembara.
EXO 11:2 Dakepa embame Isaraele wambu dupwa peparaeme nakamana parali maki wambu dupwa lamaiyuo, Bange kana golomepe kana kulingimipi wasisi dupwa jinya lena lape, leya.
EXO 11:3 Kamongome Isipi wambu nakamame Isaraele wambu dupwa kando mena suwape ingyuo suu pyaa nana lao piya. Dokona lao yulu pingi akali mupwa dee wambu peparaepeme Mosese baa akali andake wakasa lao suu piyami.
EXO 11:4 Dokopa Moseseme Isipi kiŋi baa lamaiyuo lao, Epapu Kamongo dokome kukwama anda sukulya dokopa nambame Isipi sukusa dokona papiru, letamo.
EXO 11:5 Dopa piru dokopa Isipi wambu peparaena wane kyawa dupwa kumarami ingilyamo. Kiŋi Peraona wane kyawa banya panda nyeramo doko kumaramo dokopa banya kendemande endame kenapa jingi pyao injingi dokona wane mupwa doko opetae kumarako. Dee mena bulamakao wambo kata pyao mandeyamo dupwa kumapengeŋe.
EXO 11:6 Dokona lao yuu Isipi dokona ee lao kumaralerale dopale mende wamba ama laa nange dee rengyape laa naramilende pyaka soo larami ingilyamo.
EXO 11:7 Dopa piramopape Isaraele wambu dupwa nakamana mena bangepe opetae suwa mendemepe dee wambumipi pyao koo keta palyarami ingya nalyamo lao serami. Namba Kamongo Anatumi Isaraele Isipipa kanya dokona liti pipyalyamo lao soo nyere, letamo, leya.
EXO 11:8 Lapala Moseseme pii lao oto lumwa pyuo lao, Embena yulu pingi akali mupwa dupwa isale pao palipala namba mupwalyamo lapala nambape nambana wambu dupwape kala lanyuo puu larami lyakande. Dopa laraminyi dokopa namwa kapa yaki nyuo parama, leya. Dopa lapala Mosese imbumi kumapala Perao yaki nyuo peya.
EXO 11:9 Dokopa Kamongome Mosese kando lao, Peraome embena pii see naraŋa. Renge dokona nambame yulu lapo wambumi pii nange dupwa konda pyuo Isipi yuu dokona pepalase lao dopale ingyuo para, leya.
EXO 11:10 Mosese Eronepame yulu wambumi pii nange malu piyamo dupwa kiŋi lasaka piyambinyipape Kamongome kiŋinya mona kana pokanyi pyambuyasa kapa soo nyii napala Isaraele wambu nakama yuu Isipi yaki nyuo pena lara ingya naya.
EXO 12:1 Yuu Isipi dokona Kamongome Erone Mosesepa pii dopa lao lamaiyuo,
EXO 12:2 Kana dake nakambana ee kana dokona kana mupwa ingyuo pyaka silyamoŋo.
EXO 12:3 Mana pii dake dopa letamo lao Isaraele wambu peparae lamaipape. Kana dakena yuu gii akalisa dokopa akali ree palu dokona larapu mena sipisipi yakane mendaki panda meme yakane mendaki larapu yapo nyinyale.
EXO 12:4 Mena dokona ree palu dokome kapa nao ota narami ingyara ramo doko parali maki palenge dupwa role pyao piso nakama peparaeme menapa wambupa manda manjo mokwa soo maiyuo narami.
EXO 12:5 Mena sipisipi panda meme mende nyepala kuiyuo naramiko doŋo, mena kali ene ee kana mendaki pasi dopale anga yakane palyuope rete pyuope pii nange doko nyerami.
EXO 12:6 Nyepala kana dokona yuu gii akalisa ipisu kisima kukwa dokopa Isaraele wambu peparaeme mena pyarami.
EXO 12:7 Wambu dupwame mena nala paraminyi anda dupwana mena ranjama lapo nyepala kambu konando penge dokona isa karenge dolapona kiso dee ketae isa lambuo palyingi dokona kiso pirami.
EXO 12:8 Kukwama dokopako mena doko isareme yango narami ingilyamo. Nao dokopa borete isi pyambwa nange nenge dokope awa kyalyape kau pingi dupwa pipya kopo narami.
EXO 12:9 Dopa lapala mena kyaka panda sanapengena kiso bolo pyapalape mende naa nao mena dokona kimbu ayembape ingi pungipi peparae kiso mukyepala narami.
EXO 12:10 Dopa pyuo injisi lapo pyarepala pao yangama dokopa sisaraŋa nao otalapape. Injisipi lama siya kande doko isarena yango nembalu nembo nembarami.
EXO 12:11 Dopa pipala nakama kata paraminyi dokona rapa rapa pyuo kimbu suu wapuo pangali isa nyuo minyuo panya lao suu pyao karo nenge waiya lao narami. Doko Pasopa Nenge nao nakamame namba Kamongo doko rape rape laramisa pira.
EXO 12:12 Kukwa doo leto angi dokopa nambame yuu Isipi suku suku peparaena papyuo wane mupwasa dupwa peparaepe mena kali wambo mandenge dupwa peparaepe pyao kumakaro. Dopa pyuo pyao mee bange anatuŋu lao Isipi dokona lakandenge dupwa pyao nembo piru. Namba Kamongo doko karoŋo.
EXO 12:13 Isipi wambu dupwa dopa pyuo pyarono dokopa anda kambu isa pote dokona ranjama yangasi dokome nakama palaminyiŋi lao panara doko kando pyaa nao yalo papa piruŋu.
EXO 12:14 Namba Kamongome dopa piya lao suu pyao kame see naramiŋi dokona ee kana peparae yaka lao yuu gii dake dopa pyuo misi lao nenge nao nambana lao suu pyao pisirami, leya.
EXO 12:15 Kamongome lao, Yuu yanda ipingi nyepo dusipana nakamame borete isi pyambuo wasingi doko naa narami. Borete isi pyambwa nao wasisi doko iki narami. Daaŋa lao yuu gii dusipana mendeme isi pyambwasi doko nao lara ramo doko nambana wambu ingyuo kara nana dokona yuu gii mupwa dokopa nenge isi nakamana anda singi dupwa peparae nyuo nembarami, leya.
EXO 12:16 Yuu gii mupwa dokope yuu gii yanda ipingi dokona kambape nakama malu palyuo misi larami. Yuu gii dolapona yulu mendepe minyanda nao pisipala nenge dokoko iki rapa rapa pirami.
EXO 12:17 Nakamana rara yuu Isipi piso yuu gii dakena lanyuo epeyaŋa lao kaeya nao misi lao nenge nenge yuu gii doko minyuo pyuo kararami. Ee kana peparaena yuu gii dake eparamo dokopa dopako pyuo karalu kararami.
EXO 12:18 Kana mupwa dokona yuu gii akalisa ipisu kisima kukwa doko piso pao yuu gii akalisa lama ipisu mendaki dokona kukwama borete isi pyambuo wasisi doko wasaka pyuo kararami.
EXO 12:19 Yuu gii yanda ipingi dusipana isi mende nakamana anda seramo kanda napenge. Daaŋa lao Juu rangepe dee wambu wakale mendemepe borete isi pyambwasi nara ramo doko nambana wambu ingyuo pisi nalyamo lao suu pyaroŋo, leya.
EXO 12:21 Moseseme Isaraele akali kyawa dupwa kyakale lapala dopa lamaiya. Nakamana ree palu dupwa Pasopa dokona nenge narami lao nakama peparae range wakale wakaleme mena sipisipi yakane panda meme yakane nyepala pyarami.
EXO 12:22 Pyaraminyi dokona menana ranjama doko nyepala pere warake dokona retapala isa yoko lapo nyepala ranjama pere warake seramo dokona poeyapala pyarenda lanyi kambu konando penge dokona isa karenge dolapona kiso dee ketae isa lambuo palyingi dokona kiso pirami. Nakama dokona mendepe andakare yaki nyuo kamanda paa naraminyipa yangama inginya.
EXO 12:23 Kamongome yuu Isipi sukusa papyuo Isipi wambu pyala pao isa ketae lambuo palyingi dee kambu dowa isa dolapona ranjama pisiramo doko kandaramo dokopa aŋala wambu pyao kumakara doko nakamana anda dupwana nakama pyao kumakala paa nana lara.
EXO 12:24 Nakamape nakamana wane wanakepe dupwape mawa pii dusipa minyuo karalu kararami.
EXO 12:25 Kamongome nakama yuu jeroŋo lao lalu lao leya kande dokona pao pyaka soo kararaminyi dokopa Pasopa nenge naowako pisirami.
EXO 12:26 Dopa pyuo kiso nao pisiraminyi kandapala nakamana wane wanakepeme akinde lao piso seraminyi dokopa dopa pyuo isingi lao,
EXO 12:27 Dokopa Nenge Pasopa lengende Kamongome Isipi wane mupwa dupwa pyao oteya dokopa Isaraele wambunya anda yaki nyuo kaeyo nakamana wane mupwa dupwa pyaa nayamo dokona banya kingi lakando ketae pyambuo namwame pilyamano larami, leya. Dokopa Isaraele wambu nakamame pii doko sepala baa mupwaŋa lao kingi wapambupi lakao mona maiyuo lakandeyami.
EXO 12:28 Dopa pipala pao Kamongome Mosese Eronepa pinya lamaiyamuli pyuo piyami.
EXO 12:29 Anda sukulya dokopa Kamongome Isipi wane kyawa dupwa pyao kumakao karo dokopa kiŋinya ikinyingi banya panda nyeramo wane doko pyao dee karapusi yuu anda koona paleyamo dokona ikinyingi mupwa doko opetae palepale pyao kumakaya. Dopa pyuo pyao karo dokopa mena wambo mandenge dupwa pyao kumakaoko piya.
EXO 12:30 Kukwa dokopa kiŋi dee banya yulu pingi akali mupwape mee wambupi peparae lenge reyami. Lenge rapala yuu Isipi liti doko peparae anda mendakipi kaeya nao wane mupwa kumasi siyasa ee lao minyuo kaiya kareyami.
EXO 12:31 Kukwa angi dokopako kiŋi baame Mosese Eronepa kee lao epena lamaiyuo, Sipurapala nakambame nakambana Isaraele wambu dupwa range lanyuo yuu dake yaki nyakao Kamongo doko kingi lao pisa panyaŋa leyami kande dokona pupwape.
EXO 12:32 Nakambana mena sipisipipi memepe bulamakaope dupwa peparae nyepala yaki nyuo pao karo dokopa nambana randa dakena suu pyao elyape keta pisinya lao loma sakama pupwape, leya.
EXO 12:33 Isipi wambu dupwame nakamana yuu doko waiya lao yaki nyii nao mona palyuo parami ramo doko kumuo otasaramaŋa yaki nyuo pena lao laokondali pyuo leyami.
EXO 12:34 Dokopa Isaraele wambu dupwame palawa borete isi pyambwa nao wasalana rapa rapa pipala penge palawa yangaraminyi dupwana pyambwapala nakamana komaumi yake pipala soo peyami.
EXO 12:35 Isaraele wambumi Moseseme pinya leyamuli pyuo Isipi wambu dupwame bange kana golomepe kana kulingimipi wasisi dupwape komau wasisi dupwape jinya lao piso siyami.
EXO 12:36 Piso siyaminyi dokopa Kamongome Isipi wambu nakamame Isaraele wambu dupwa kando mena suwape ingyuo suu pyaa nana lao piyasa nakamame bange kee leyami dupwa kaeya napala maiyami. Dopa piyamo dokome Isaraele wambumi Isipi wambunya kamongonge bange peparae nyuo pao oteyami.
EXO 12:37 Isaraele wambu dupwa yuu Oramese piso kata nyuo yuu Sakote dokona panya yuu kata peyami. Peyaminyi dokopa akali ama malu (600,000) dee enda wanepe dupwa opetaeko peyami.
EXO 12:38 Peyaminyi dokopa wambu rara wakale malu dupwape mena sipisipi memepe bulamakaope malupi opetaeko role pyao peyami.
EXO 12:39 Kiŋi Peraome nakama waiya lao yuu Isipi yaki nyuo pena leyamo dokome nengepe palawa dokome borete isi pyambungi doko wasarami dokope wambo kapa rapa rapa pii nayami. Dokona lao nakamame yuu Isipi yaki nyiyaminyipa palawa borete isi pyambwa nange wasalana rapa rapa pipala soo peyaminyi dokome borete waso kisiyami.
EXO 12:40 Isaraele wambu dupwa ee kana malu (430) yuu Isipi dokona palyuo kareyami.
EXO 12:41 Ee kana 430 dusipa epo papeyamo yuu gii dokopa nakama Kamongona rara dupwa peparae yuu Isipi yaki nyiyami.
EXO 12:42 Kukwama dokopa yuu Isipi yaki nyuo Kamongome nakama waa keta paliraminyi kandokondali pyuo nyuo lanyuo epeya. Kukwa doko Kamongo baa keta yuu rakyamepe pyamalyuo retapala doko mende piya kande lao Isaraele wambu dupwame suu pyao pisirami ingiya.
EXO 12:43 Kamongome Erone Mosesepa lamaiyuo, Dapwa Pasopa narami dokona pii dupwaŋa. Wambu rara wakale dokona mendeme epo Pasopa nenge narami doko nasaramiŋi daa.
EXO 12:44 Kendemande mende nakamame ropo pyao nyiyaminde dokona yanenge wambo kalomakamirami ramo doko Pasopa nenge doko kapa nara.
EXO 12:45 Wambu mende yuu gii malu role pyao kara naramo dokope panda wambu mende kana maiyuo nyepala yulu pyakana laraminyi dokope Pasopa nenge naa nara.
EXO 12:46 Nenge angi peparae anda nenge rapa rapa pirami dokona narami lyakande. Kamanda minyuo paa narami. Mena akipi kisarami dokopa kuli dupwana mendepe minyuo roo pyaa narami.
EXO 12:47 Isaraele wambu mendepe neta paa nao nakama peparaeme Pasopa nenge nao pisarami.
EXO 12:48 Dopa pyuo naraminyipape akali yanenge kaloma nange mendemepe naa nara. Akali rara wakale mende nakama pipya palyuo karo nenge Pasopa doko kiso Kamongo ketae pyambuo naro leya kande dokopa wambo baape dee banya palenge akali opetaepe yanenge kalomakamirami. Kalomakamipala dokopa baa Isaraele akali dopale ingyuo nenge kiso Pasopa nenge doko nena larami.
EXO 12:49 Wane dae manjisipi yuu rangepe dee rara wakale range nakama pipya role pyao karengepe dupwa peparae keta pii mendaki dokoko palira.
EXO 12:50 Kamongome Mosese Eronepa kando yulu dopa pinya dapa pinya leyamuli pyuo Isaraele wambu peparaeme warombo soo piyami.
EXO 12:51 Yuu gii dokopa Kamongome Isaraele wambu dupwa yuu Isipi yaki nyuo lanyuo epeya.
EXO 13:1 Kamongome Mosese lamaiyuo,
EXO 13:2 Nakamana wane mupwasa dupwa namba jipwape. Isaraele wane mupwa dupwape mena kali wambo manjisi dupwape nambanaŋa, leya.
EXO 13:3 Moseseme wambu dupwa lamaiyuo, Nakama Isipi karapusi karo neta epeyami kande doko dakepa suu pyalapape. Anatumi banya porai renge dokome nyuo lanyuo epeya kande doko yuu gii dakeŋe. Borete isi pyambwasi doko wasaka pyuo naa nalapape.
EXO 13:4 Mange doo yuu gii mupwa kana mupwa Apipi lenge dokona yuu Isipi yaki nyuo epelyaminyi.
EXO 13:5 Kamongome nakamana rora ambasupinya wambu dupwa kando Kenane wambupi Iti wambupi Amo wambupi Ipi wambupi Jepusi wambupi dupwa peparaena yuu jero lao kana minyuo lalu lao leya. Dokona lao baame nakama yuu amenge pingi dokona lanyuo eparamo dokopa ee kana peparaena kana mupwa dokona yaka lao nenge dake nao misi lao pipwape.
EXO 13:6 Yuu gii yanda ipingi dusipana borete isi pyambwa nange narami. Doko napala yuu gii yanda ipingi dokopa malu palyuo nenge nao Kamongo lakando banya kingi ketae pyambuo pisarami.
EXO 13:7 Yuu gii yanda ipingi dusipana borete isi pyambwasi dokona mende nasaramano lao wasaka pyuo pisipwape. Yuu liti dasipana isipi borete isi pyambungi mendepe see nana.
EXO 13:8 Nenge kanda soo kiso karo dokopa Anatumi yuu Isipi yaki nyiyama dokona piso dopa pyuonde lanyuo epeyandena pilyamano lao angi doko nakamana wane dupwa polo lamaipape.
EXO 13:9 Dopa pyuo lao reto nakamana enamba kinginyape puu pisapala kando karenge kandale dopale ingyuo paraŋa, leya. Dopa pyuo pirami dokome piyamiŋi lao panele laramopa Kamongona porainya renge dokome Isipi piso nyuo epeyaŋa lao banya mawa pii dupwa suu pyaro karo mana nyuo polo lao kararamiŋi.
EXO 13:10 Ee kana yaka lao yuu gii rombo palyuo retami dokonako dopa pyuo yulu dake pipwape, leya.
EXO 13:11 Nakamana rora ambasupi nakamape kando kana minyuo lalu lao leyamuli pyuo Kamongome nakama yuu Kenane dokona lanyuo epara.
EXO 13:12 Dokona lanyuo eparamo dokopa nakamana wane ane mupwasa dupwa peparae Kamongo keta maiyalapape. Dee dopako pyuo mena kali wambo manjisi dupwa peparae Kamongo banya ingyara.
EXO 13:13 Dopa pyuo dokopa mena donge kali dokoko sipisipimi panda nyinyale lao Kamongo maipala ropo pyao nyuo kaeyalapape. Dee daaŋa lao donge ropo pyao nyii naroŋo lao suu piyami kande doko kaepala mange doko minyuo koko pyalapape. Nakamana wane ane mupwasa dupwa dopako pyuo ropo pyao neta nyelapape.
EXO 13:14 Rakyame nakamana ikinyingi dupwame doko akinde pilyaminyi lao piso siyami kande dokopa yuu Isipi dokona anjaro paleyamanopa Kamongona porainya renge palyuo moko nyiya dokona dopa pyuo karamano lao renge doko lamaipape.
EXO 13:15 Isipi kiŋi dokome mona kana pokapala paa narami lao kamba leyamosa Kamongome yuu Isipi dokona mena wanepe mupwasa dupwa peparae pyao kumuo oteya. Dokona lao namwame mena kali mupwa mandenge dupwa peparae pyao kiso Kamongo maiyuo karamwanopape wane mupwa dupwa dee ropo pyao range laeyo nyingiŋi, lamaipape.
EXO 13:16 Dopa pyuo lao reto nakamana enamba kinginyape puu pisapala kando karenge kandale dopale ingyuo paraŋa. Dopa pyuo pirami dokome piyamiŋi lao panele laramopa Kamongome banya porainya renge dokome Isipi piso namwa nyuo lanyuo epeyaŋa lao suu pyaramaŋa lao pingi ingyara, leya.
EXO 13:17 Isipi kiŋi dokome Isaraele wambu pena lao yaki nyiyamo dokopa Anatumi ipwa kota nemba nemba kata soo yuu Pilisitia penge doko muu ingiyamopape dokona lanyuo paa naya. Renge doko nakama wambu yanda pimwai lapo katasa kandapala pako suu pingi alowa pipala yuu Isipi dokona dee pasaramiŋi dokona lanyuo paa naro lao Anatumi suu piya.
EXO 13:18 Dopa pyuo parami dokona kaeyapala yuu muiyane ipwa kota Kone lenge dorena ingyuo lanyuo kyai mai pilya pyana pyuo panya peya. Peyamo dokopa Isaraele wambu dupwa yanda pela panya yanda kakupi nyuo rapa rapa pyuo minyiyami.
EXO 13:19 Wamba Josepe Isaraele wambu kando pii lao kana minyingi ingyuo lamaiyakondali pyuo lao dopa leya. Nakama Anatumi yuu dakena kiiramo neta nyuo pao leya kande dokopa nambana kuli dupwa nyuo nakama yuu paraminyi dokona soo pupwape, leya. Dokona ingyuo Josepeme Isaraele wambu dupwa kana minyuo lalu lao lao lamaiyamuli pyuo Moseseme Josepena kuli dupwa nyepala soo peya.
EXO 13:20 Dokopa Isaraele wambu nakama yuu Sakote yaki nyepala yuu muiyane siyamo pinjingi dusa yuu Etame lenge dokona pao paleyami.
EXO 13:21 Korakama dokopa Kamongome nakama dopa soo lanyuo pao dee kukwa dokopa isare rao kata lasaka pyuo lanyuo pao piya. Dopa pyuo nakama kukwa korakamape laparaena kata pena lapala piya.
EXO 13:22 Kata nyuo peyaminyi yuu gii dusipana kopa dokome lenge kambu siyamo dokona kata lanyuo kukwa dokopa isare dokome kata lasaka pyuo pyuo lanyuo puu pao peya.
EXO 14:1 Dokopa Kamongome Mosese lamaiyuo lao,
EXO 14:2 Embame Isaraele wambu kando lao, Nakama kapu kyuo papala yuu Mikitole dee ipwa kota Kone lenge dolapona kanya yuu Piyairote dorena yuu Bealo Sepone repeta silyamo dokona palya pena lare.
EXO 14:3 Kiŋimi lao suu pyao karo dokopa Isaraele wambu dupwame yuu muiyane dokona karo awali lao kata panya saka nalya saka nana pyuo karaminyi lao suu pyara.
EXO 14:4 Dokopa Kamongo nambame kiŋi banya mona kana pokanyi pyambuo kararo dokopa baame nakama pyalana peta epara. Eparamo dokopa baape banya yanda singi dupwape pyao isa palyaronopa nambana kingi ketae para. Dokopa Isipi wambumi namba Kamongo lao serami, leya. Dokopa Isaraele wambu dupwame pinya lao leyamo dupwa piyami.
EXO 14:5 Yuu gii dokopa Isaraele wambu dupwa neta pao kaeyamilyamo lao lamaiyaminyi doko sepala Isipi kiŋi banya yanda singi dupwamepe suu pingi alowa pipala lao doko akinde pyamase? leyami. Namwame kandakinya Isaraele wambu dupwa karapusi ingyuo namwana yulu pyakao karenge dupwa pena lapala kaeyamwanosa pyakao papelyaminyiŋi, leyami.
EXO 14:6 Lapala kiŋi dokome banya mena oseme ipyuo yanda pela penge uliuli yanda singi dupwape nyuo rapa rapa piya.
EXO 14:7 Rapa rapa pipala banya mena oseme ipyuo penge uliuli dupwa peparae nyepala kata nyuo peya. Peyamo dokopa mena oseme ipyuo penge uliuli dupwana ama keyange wakasa andete pakinyamange (600) dupwa banya yulu pingi akali mupwa dupwame rolo rolo pyuo minyuo peyami.
EXO 14:8 Peyamopa Isaraele wambu dupwame namwame wini pyuo pelyamano lao rae maiyuo yaki nyuo peyaminyipa Kamongome kiŋinya mona kana pokanyi pyambuyasa baame Isaraele wambu dupwa rokeyakandeme imanji aku nyili lao peta ralyuo peya.
EXO 14:9 Ipwa kota Kone maronge dokona yuu Piyairote dee Bealo Seponepa repeta pao palyuo kareyaminyi dokopa Isipi range yanda singi amipi mena osepe mena oseme ipyuo penge uliuli piso yanda pela pengepe dee akali uliuli minyuo pengepe dupwame peteta minyaruli minyaruli pyuo epapala ralingi nyiyami.
EXO 14:10 Dopa pyuo kiŋi dee banya amipi kimbu kingipi pyao piso epo pyala epeyaminyisa Isaraele wambu dupwame nakama kando yamarangupala Kamongome nyisinya lao kee leyami.
EXO 14:11 Dokopa Mosese kando lao nembo, Yuu Isipi dokona malu anda mende see nangese? Yuu muiyane dakena namwa pyao kumanyi nembalana suu pyao embame lanyuo ipisi? Isipi yaki nyuo yuu muiyane dakena lanyuo ipi kandapi doko mendende pyuo ingyalana pilyamo kandape.
EXO 14:12 Wambo yuu Isipi yaki nyuo epapa nayama dokopa dopa pisaraŋa lao langya nayamase? Namwa Isipi wambunya karapusi ingyuo kendemande yulu pyakamyuo kararamako karalapa lao yaki nyepala kaeya lao langiyama kande. Isipi dokona karapusi yulu lenge rao pyuo kararamano kakapu kokwaeŋe yuu muiyane dakena lenge ralu ralu kumalamano lamoŋo, leyami.
EXO 14:13 Leyamisa Moseseme isingi lamaiyuo, Paka napala Kamongome apa pyuo nakama epapu kyawa lete nyilyape lao mee karalapa. Nakamame Isipi range dupwa dee kandaraminde daa.
EXO 14:14 Kamongome nakamana lao yanda pyakalopyamo. Nakambame mende piraminde daaŋa, leya.
EXO 14:15 Lapeyamo dokopa Kamongome Mosese lamaiyuo lao, Akipamo embame nyisalipu lao kee letese? Embena wambu dupwa pelyaminyi dokona mee mende kamame lambuo pena, lamai.
EXO 14:16 Lamaipala embena pangali doko kota pete dokona ketae palyaro karape. Dopa pirinyipa kota pete doko dulu kata dono kata pipala kee maro laramopa Isaraele wambu yuu oo lasi seramo dokona sukusa kapa kata parami.
EXO 14:17 Nambame Isipi akali dupwana mona kana pokanyi pyambwaronopa nakamame nakama peteta parami. Dokopa kiŋipi banya ami yanda singipi mena oseme ipyuo penge uliuli piso yanda pela pengepe dee banya uliuli minyuo penge akalipi nyuo isa palyaronopa nambana kingi doko ketae palira.
EXO 14:18 Nambame angi pyao anamasi minyarono sepala dokopa Isipi wambu dupwame namba Kamongo doko karene lao soo nyerami, leya.
EXO 14:19 Anatunya aŋala Isaraele wambu lanyuo wambeya doko nakama rekya lao matarena epo kareya. Dopako pyuo kopa soo kata lanyiyamo doko
EXO 14:20 Isipi wambupi Isaraele wambupi peyaminyi kanya lili dokona epo siya. Isaraele keta rao dokopa kendali ingyuo yanga paupau lao rao dee Isipi kareyami dorena iminjanyi pyambuo soo piya. Dokopa paki pakipinya ami yanda singi kareyami doko kukwa dokopa mendalinya yuu dorena kapa pyuo epena saka nayami.
EXO 14:21 Dokopa Mosesena kingi doko ipwa kota dorena ketae palyiyamo dokopa Kamongome neta pyakaenge dorena porambaiye ama porakai mende minyapala ipwa kota doko pyao soo peya. Minyuo pao yuu gii dokona kukwa peparaepe mende minyoko siyasa ipwa kota doko kaepala mee yuu oo lasi ingyuo siya.
EXO 14:22 Dopa pipala ipwa doko lili pyuo wangu paki pakipi kame ingyaro kareyamopa Isaraele wambu dupwa yuu oo lasi mee siyamo dokona dumurena pakoeya piyami.
EXO 14:23 Doko kandelyamano lapala Isipi wambu nakamana mena osepe mena oseme ipyuo penge uliuli yanda pela pengepe dee uliuli minyingi akalipi dupwa peparaeme Isaraele wambu peteta kanda kanda kota pete oo lasi dokona ralingi nyela peyami.
EXO 14:24 Yuu yangalana ene endenge siyamo dokopa Kamongome yake dokona kopa rakapana isare reyamo dokona kandaro karo Isipi wambu nakama yama luwasipwa pyaralyapala ii dupwa rombana puli pyao epeya.
EXO 14:25 Dokopa baame mena oseme ipyuo pengena uliuli kimbu dupwa ipwa kee dokona yalyiyasa panya saka nayami. Isipi wambu dupwa doko mende piyasa kandapala Kamongome Isaraele wambu dapwa nyisapala namwa pyalyamoŋo dakena karo kaeyamana, leyami.
EXO 14:26 Dokopa Kamongome Mosese lamaiyuo lao, Embena kingi doko ipwa kota dorena ketae palyare. Palyarene dokopa ipwa dokome Isipi wambupi nakamana mena oseme ipyuo penge uliulipi dee dupwana minyingi wambupi nyuo yambe pyara, leya.
EXO 14:27 Doko sepala Mosese banya kingi ipwa kota dorena ketae palyaro kareya. Yuu yangeyamo dokopa ipwa doko wambo singinyili pyuo siyamo kandeyami. Dopa piyamo dokopa Isipi wambu dupwa yalo neta imwali lao epeyaminyipape Kamongome nyuo ipwa kota sukusako pyambuya.
EXO 14:28 Dopa pipala mena oseme ipyuo penge uliulipi dee dupwana minyingi akali dupwape Isipi ama yanda singipi Isaraele wambu peteta kanda kanda peyami dupwa ipwame nyuo yambe piya. Mendaki mendepe lete paa nana lao peparae yambe piya.
EXO 14:29 Dopa piyamopape ipwa paki pakipi kipwa kipwa dolapona nyuo karalyaro kareyamo dokopa Isaraele wambu dupwa sukusa yuu oo lasi siyamo dokona peyami.
EXO 14:30 Gii dokona Kamongome Isaraele wambu dupwa Isipi wambu keta nenge rekya lao nyiya. Nyiyamo dokopa Isaraele wambu dupwame Isipi wambu dupwa kee kama dupwana kumasi siyaminyi kandeyami.
EXO 14:31 Kamongome Isipi wambu dupwa banya porai renge andake dokome pyao kumasiyamo doko kandapala dokopa baa mupwa wakasa lao suu pyao pakayami. Dopa pipala Kamongome angi mende kapa pira lao soo nyuo dee banya kendemande akali Mosese opetaepe soo nyuo piyami.
EXO 15:1 Mosesemoo Isaraele wambu dupwapeme kenane dake Kamongo dokona pyao leyami. Anatu baame mupwa wakasa dokome nyuo anamasi minyapya dokona lao Kamongo doko kando kenane dake pyaro. Baame mena ose dupwape dee osena piso penge dupwape ipwa kota dokona pyao sukusa nembeya.
EXO 15:2 Kamongome namba porainyi pyambwapyamo porai ingyuo karo. Baame namba elyape keta palyuo kiiramo nyiya. Nyiyamo dokona baa nambana Anatu dokona nambame banya kingi lakandaro. Baa nambana rakanena Anatu. Banya kingi andake dokona lao nambame lakandaro.
EXO 15:3 Kamongo baa soo giso yanda pimwaingi akali. Doko Kamongo banya kingi.
EXO 15:4 Peraona mena oseme ipyuo penge uliuli dupwape banya yanda singi dupwape baame ipwa kota sukusa dokona pyao nembeya. Banya yanda singi mupwa dupwana lapo yapasi dupwa ipwa kota Kone lenge dokona yalyiyami.
EXO 15:5 Ipwa kota yalu dokona yambe piya. Nakama kamame ipwa kokorena kana petenge dopale ingyuo isa pao siyami.
EXO 15:6 Kamongo embena kingi rolaerena poraingi renge doko ama mupwa wakasa. Dokome yanda pimwai dupwa pyao poro lapala inji ranji pingi.
EXO 15:7 Embena porai wakasa mupwa ingyapinyi dokome embena yanda pimwai dupwa pyao nembelene. Embena imbu singi renge doko wakasa palyapala yangi manda isareme renge dopale ingyuo wambu dupwa rao otelyamo.
EXO 15:8 Embame poo lapinyi dokona porambaiye dokome ipwa doko wangu dolapona karalyapala kame ingyuo londanyi pyambwapi. Dokopa ipwa romo pyuo paenge doko anda apya dopale ingyuo roya karapya. Dopa pipala ipwa pete yalu doko opetae porai wakasa ingyapya.
EXO 15:9 Dokopa yanda pimwai dokome lao, Nambame nakama peteta epapala nakama minyarapala nyero. Nambame bange nakamana dupwa wakale liti pira pira pipala namba nyelana maserono bange dupwa nyero. Nambana wua gela kolo nyepala dokopa nambana porai dokome nakama bange peparae retaraminyi doko nyero, lapya.
EXO 15:10 Dopa pipyamopape embame yuu mendaki ŋee soo poo lapi dokopa ipwa kota dokome wambu dupwa yambe pyapya. Ipwa pete paka pingi dokona kenda kenda pisi bange yalyingi dopale ingyuo yalyiyami.
EXO 15:11 Kamongo, anatuŋu lenge dupwana mende emba yalese? Api mupwa wakasa poo pyasi emba yalese? Api emba yalendeme yulu wambumi kapa pii nange dupwa pyuo yulu pakaramili porai dupwa pyuo pirase?
EXO 15:12 Embena kingi rolaerena pyasinju laro karene dokopa yuu dokome namwana yanda pimwai wambu dupwa nao goe lao oteya.
EXO 15:13 Embena wambu kiiramo nyiinyi dupwa embena pii lao kana minyuo leene doko reto kaeya napala dokona palyuo mondo koo lao laminyii. Embena porai dokome wambu dupwa laminyuo yuu yapasi dokona pee.
EXO 15:14 Dokopa wambu dupwame sepala nakama yamarangyuo pakame kumulyaminyi. Enda wane manjinya pingi dokopa randa nyingi dopale ingyuo Pilisitia wambu dupwa randa nyuo pakalyaminyi.
EXO 15:15 Yuu Itome karenge wambunya akali mupwa dupwa pakame kumulyaminyi. Moape range akali porai dupwa walu walu lao pungwa pungwa pilyaminyi. Wambu peparae yuu Kenane palenge dupwa nakamana porainya renge pao otelyamo.
EXO 15:16 Walu lao pakange renge dupwa nakama keta palamo. Embena porainya renge wakasa palipyamo dokona nakama romo pii nao isa karele letaminyi. O Kamongo, embena wambu dupwame pakiki palyama mee parami. Dee embena wambu angi range kulisa embame kiiramo nyipinyi dupwa dopako pyuo parami.
EXO 15:17 Embame wambu dupwa lanyuo epo embena yuu kyau dokona wara pinyi palyare. Kamongo, yuu doko embena anda piinyi mare doko. Tembole anda Kamongo emba range yeelyo piinyi doko.
EXO 15:18 Kamongo emba yuu peparae kiŋi ingyuo karalu karare.
EXO 15:19 Isaraele wambu wambo ipwa kotana peyami dupwa ipwa kota karalyapala yuu oo lasi siyamo dokona sukusa peyami. Dopa pyuo peyaminyipape Peraona mena oseme ipyuo penge uliuli dupwape dee dupwana minyingi dupwape ipwa kota sukusa peyaminyi dokopa Kamongo dokome ipwa doko nyuo pyasiya dokopa ipwa dokome nakama dupwa yambe piya.
EXO 15:20 Poropeta enda Miriame Eronena pemalenge doko laikuli kuki mende nyiya. Dokopa enda peparae laikuli kuki lapo nyepala banya matarename pao karo laikuli pyao danjiŋi piyami.
EXO 15:21 Miriame baame nakamana kenane pyakamiya. Koo andake dupwa nyuo anamasi minyapya dokona Kaomongo banya kingi lakando kenane pyamanale. Baame mena ose dupwape osena piso penge akali dupwape ipwa kota dokona sukusa pyao nembapya, leya.
EXO 15:22 Moseseme Isaraele wambu dupwa ipwa kota Kone lenge doko yaki nyuo lanyuo peya. Peyamo dokopa nakama yuu muiyane Sua lenge dokona peyami. Pao yuu gii rema nembo yuu muiyane dokona kata pao kareyaminyipape ipwa mende epeyamo kanda nayami.
EXO 15:23 Kanda napala yuu kingi Mara lenge dokona epo ipwa kau pingi mende kando nyiyami. Dokopa nakama ipwa doko rende pii nalu nao nayamosa nakama naa napala kaeyami. Renge dokona yuu doko kingi Mara leyami. (Juunya pii lenge doko kingi Mara doko kau pingi dopale lenge.)
EXO 15:24 Wambu dupwame Mosese kando mumu andake lao piso siyami. Namwa ipwa aki naramase? leyami.
EXO 15:25 Dopa leyaminyi dokopa Moseseme Kamongo doko kando poraiyuo ateŋa piya. Piyamo dokopa Kamongo dokome baa isa mende lasaka piya. Dokopa baame isa doko nyepala ipwa dokona sukusa pyao nembeya. Nembeyamo dokopa ipwa doko mee rende pyuo rali piya. Dokona Kamongo dokome nakama mawa pii maiya. Maiyuo dee nakama makande pyuo kandoko piya.
EXO 15:26 Baame dopa leya. Namba nakamana Kamongo Anatu doko nakamame kamba laa nalu nao napala nambame rolae lao suu pilyu dokona palyuo pyuo nambana dopa pipenge laro dupwa dopa lalyane lao soo nambana mawa pii dupwa minyarami ramo doko nambame nakamba Isipi wambu anga yakane kiso maiyunuli pyuo nakama jii naro. Namba doko Kamongo nakama pyuo lete nyilyuŋu doko karo.
EXO 15:27 Enakana nakama yuu Ilimi dokona ipwa guu lenge akalisa ipisu lama epo dee isa bona akalisa yanda ipingi nyepo karo pingi dokona ipwa repeta dokona nakama epo anda pyuo paleyami.
EXO 16:1 Isaraele wambu rara peparae yuu Ilimi dokona yaki nyiyami. Yaki nyepala yuu Isipi piso pao kana lamana yuu gii akalisa ipisu kingi paki dokopa nakama yuu muiyane kingi Sini lenge doko yuu Ilimi Sainaipana kanya dokona singi dokona epeyami.
EXO 16:2 Epapala yuu muiyane dokona karo nakama peparaeme Mosesepa Eronepa kando mumu andake leyami.
EXO 16:3 Lao dokopa dopa leyami. Namwa yuu Isipi dokona kareyamano dokopa Kamongome pyao kuma siyali doko kapa ingiyali. Dokona namwa lambo lao pisapala mena minjupi nenge rara wakalepe nalana masiyamano doko peparae neyama. Dopa piyamanopape epapu nakambame namwa yuu muiyane dakena lanyuo epapala lopome kumanyi nembelyambinyi, leyami.
EXO 16:4 Kamongo dokome Mosese lamaiyuo, Epapu nambame nakama peparae nenge yake panda piso apunda epenge dopale ingyuo jero dokona wambu dupwa nakamame yuu peparae yuu gii mendaki lao nenge kapa naramili pyuo nyela papa pirami. Dopa pirunu dokona nakamame nambana mana pii lasi dokona moko minyuo pilyamipi lao makande pyuo kandaro.
EXO 16:5 Yuu gii mange pyakambwaro dokopa nakamame yuu gii lamasa lao nenge yapo nyepala rapa rapa pirami.
EXO 16:6 Dokona Mosese Eronepame Isaraele wambu dupwa lamaiyuo, Kamongo dokome nakama yuu Isipi yaki nyuo lanyuo epeya lao epapu kukwa soo gisarami.
EXO 16:7 Lao dokopa Kamongona yanga paupau lenge doko rakya yangama kandarami. Dokona nambwame Anatumi dopa pipwa dopa pipwa langiyamuli pyuo piyambano dokona nakamame nambwa kando mumu lao karo nakamame Anatu kando mumu leyamisa piya. Dokona nakamame Anatu baa kando mumu leyaminyi doko baame soo oteya, leyambi.
EXO 16:8 Moseseme nakama lamaiyuo, Kamongo dokome nakamame baa kando mumu andake leyaminyi dokona kando soo otapala kukwa minju narami dokona joo yangama borete naraminyili pyuo joo pira. Nakamame nambwa kando mumu leyaminyi doko Kamongo kando mumu leyamisako piya.
EXO 16:9 Dopa lapala Moseseme Erone lamaiyuo, Wambu nakamana mumu leyaminyi doko Kamongo dokome soo oteyaŋa dokona wambu dupwa peparae banya lenge kambu dokona epo karena lamaipi, leya.
EXO 16:10 Eroneme wambu dupwa peparae lamaireyamo dokopa nakama kapu kyepala yuu muiyane dorena kandaro kareyaminyipa Kamongona yanga paupau lenge doko kopa rakapana paneya.
EXO 16:11 Paneyamo dokopa Kamongome Mosese lamaiyuo,
EXO 16:12 Namba Isaraele wambu dupwame mumu laminyi silyuŋu dokona pii dake lamaipi. Alemanji kone pupuripi dokopa minju narami dee wamba yangama dokopa borete nalana suu pilyaminyi dupwa peparae narami. Dokopa namba Kamongo doko nakamana Anatuŋu lao soo nyerami, leya.
EXO 16:13 Alemanji kone pupuripi dokopa yaka kuki dupwa bii lao epapala yuu paleyaminyi dokona bwaa lepa minyiya. Dee yangama dokopa paleyaminyi yuu dokona pipyae raiya peteya.
EXO 16:14 Pipyae doko olo oteyamo mee wakakinya yuu dokona nenge myana kuki rekya lasi keyange doko siya.
EXO 16:15 Dopa piyamo dokopa Isaraele wambu dupwame kandapala doko aki bange lao soo gisa napala mendali pisara pisara pyuo, Doko aki bangese? leyami. Dokopa Moseseme nakama lamaiyuo, Dake nenge Kamongome nakama narami lao jipyaŋa doko.
EXO 16:16 Kamongo dokome mawa pii lao, Nakama mendaki mendaki lao naraminyili pyuo nyuo malu palyarami. Palyaraminyi dokopa wambu ree palu dokona mendaki mendaki lao sikyali lita lama larapu nyerami, leya.
EXO 16:17 Dokopa leyamuli pyuo Isaraele wambu lapome nenge malu nyiyami. Dee lapome kuki lama yeelyo nyiyami.
EXO 16:18 Dopa pyuo nyepala makande piyaminyi dokopa malu mee nyiyaminyi dupwa kamame andakya naya. Dee lapo kuki lama nyiyaminyi dupwa kamame kukya naya. Nakama naraminyili pyuo manda manjo yapo nyiyami.
EXO 16:19 Dokopa Mosese baame nakama lamaiyuo, Nenge yangamana narami dokona mendepe mendeme reta napala nao ote pinya, leya.
EXO 16:20 Dopa leyamopape nakama wambu lapome Mosesena pii see nayami. See napala nenge lapo yangama narama lapala reto kaeyami. Dokona yangamarena nenge reteyaminyi dupwana kimwakapa pyapala ama nyenenge ai piya. Dopa piyaminyisa Moseseme nakama kandapala imbwaya.
EXO 16:21 Yangama peparae yaka lao nakama nenge naraminyili pyuo nyuo malu palyara piyami. Dokopa neta rao andakiyamo dokopa nenge lapo pyarepala pao siyamo dupwa lili lao peya.
EXO 16:22 Yuu gii pakinyamange dokopa nakamame nenge yuu gii lama napengele makande manjo wambu mendakinyi suu pyao lita kisima ingyuo nyuo malu palyiyami. Dopa piyaminyi dokona akali mupwa wambu dupwa iso kareyaminyi dupwame epapala Mosese kando lamaiyami.
EXO 16:23 Lamaiyaminyi dokopa baame nakama dopa lamaiya. Dake Kamongo dokome dopa lao mawa pii reteya. Reteyamo dokona rakya yuu gii mupwa dokopa imambu soo Kamongona kingi iki lakandenge. Nenge mee isarena kisaramili dupwa kiso dee sanepena kisaramili dupwa kiso pipwape. Piraminyipa neta kakana pao siya kande dupwa wakale retapala rakya narami.
EXO 16:24 Dokopa Mosese lamaiyamuli pyuo nenge kakana peyamo dupwa rakyana lao reteyaminyi dupwa rumbyuo kimwakapa pyaope pii naya.
EXO 16:25 Moseseme nakama lamaiyuo, Epapu koro petenge yuu gii dake imambu soo Kamongona kingi lakandenge dokona nenge dake nalapape. Nenge lapo kamanda dokona seramo kando nyii narami.
EXO 16:26 Yuu gii pakinyamange dusipana nenge nyuo malu palyarami. Palyapala yuu gii yanda ipingi dokopa imambu soo Kamongona kingi lakandenge dokome yuu dokona nenge yapo nyerami lao see nara, leya.
EXO 16:27 Yuu yanda ipingi nyepo dokopa wambu lapo nenge yapo nyela peyami. Peyaminyipape dupwame dokona mende yoko pongo siyamo kando nyii nayami.
EXO 16:28 Dokopa Kamongo dokome Mosese lamaiyuo lao, Yuu gii akipare nembo nakama wambu dupwame nambana mawa pii kamba laramisi?
EXO 16:29 Namba Kamongo dokome yuu gii imambu serami doko jipu kandapi doko silyaminyi. Dokona lao yuu gii pakinyamange dokopa nenge kapa yuu gii lamasa napenge jero. Yuu gii yanda ipingi nyepo dokopa wambu peparae mendali banya anda yuupi yaki nyuo paa narami ingilyamo, leya.
EXO 16:30 Dokona lao wambu dupwa yuu gii yanda ipingi nyepo dokopa yulu pii nayami.
EXO 16:31 Isaraele wambu dupwame nenge doko kingi myana leyami. Leyaminyi doko ee waingi kuki kewa lenge dopale. Angi doko bisikiti amburali ipwangeme wasisi rende pingi dopale.
EXO 16:32 Moseseme lao, Dake Kamongo dokome mawa pii ingyuo reto lao, Nambame yuu Isipi yaki nyuo yuu muiyane dokona lanyuo epo nenge jiyunu doko nakamana para pyao manjiraminyi dupwame kandarami lao nenge myana lapo nyuo retalapape letamo, leya.
EXO 16:33 Lapala Moseseme Erone lamaiyuo, Nenge myana sikyali lita lama makande manjo nyuo pee kaname wasisi dokona pyambuo retare. Doko namwana para pyao manjiraminyi dupwame kandarami lao Kamongona lenge kambu dorena retare, leya.
EXO 16:34 Kamongome Mosese mawa pii lamaiyamuli pyuo Eroneme Anatunya Kana Minyuo Lalu Lao Lenge Pii Palenge Bokote dokona lenge kambusa au pyuo sera lao reteya.
EXO 16:35 Dokopa Isaraele wambu dupwa ee kana akalisa kisima nembo nenge myana dokoko nao karo pao yuu Kenane kando nyepala palyuo kareyami.
EXO 16:36 (Yuu gii dokopa sikyali kuki makande pingi dokome lita lama ingiya. Sikyali doko botole andake mendena pyambuo simbuya dopale. Dee sikyali andake makande pingi dokome lita akalisa lama dopale ingyuo jerame mendena pyambuo simbuya.)
EXO 17:1 Isaraele wambu dupwa peparae yuu muiyane kingi Sini lenge doko yaki nyepala Kamongome leyamuli pyuo yuu mendasa palipa mendasa palipa pyuo peyami. Papala yuu Orepitimi dokona palyuo kareyaminyipape yuu dokona wambu dupwa ipwa narami lao mende epa naya.
EXO 17:2 Dopa piyamosa Mosese kando nakamame mumu andake lao ipwa nalana jinya, leyami. Leyaminyi dokopa Moseseme isingi lao, Akipamo namba kando mumu letamisi? Akipamo nakamame Kamongo doko kando makande pilyamisi? leya.
EXO 17:3 Dokopa wambu dupwa ipwa nano wakasa piyasa Mosese kando mumu andake leyami. Akipamo embame namwa yuu Isipi yaki nyuo lanyuo epeese? Dokona namwape wane wanakepe menape ipwa nanapala kumarami lapala piisi? leyami.
EXO 17:4 Dokopa Moseseme Kamongo poraiyuo loma siya. Nambame wambu dapwa apa pirusi? Nakamame namba oo repeta kaname pyalana pilyaminyi, leya.
EXO 17:5 Dokopa Kamongo dokome Mosese lamaiyuo dopa lao, Wambu dupwa enakana lapala Isaraele akali mupwa dupwana lapo wambo kyawa nyuo lanyuo pupi. Pao dokopa pangali isa ipwa Naele piinyi doko opetae nyuo minyuo pupi.
EXO 17:6 Yuu kyau Sainai mare dokona kana mendena namba embena lenge kambusa kararo. Kararono dokopa kana doko pangalimi pyare dokopa wambu dupwa ipwa narami lao guu lao potemara, leya. Dokopa Isaraele akali mupwa dupwa kando kareyaminyipa Moseseme kana doko pangali dokome piya.
EXO 17:7 Isaraele wambu dupwame Kamongo doko kando makande pyuo mumu lao lao, Kamongo doko namwa pipya role pyao kara panda daase? leyaminyi dokome Moseseme yuu doko kingi lama Masa dee Merepa, leya. (Kingi Masa doko makande pingi dopale. Dee kingi Merepa doko mumu lenge dopale.)
EXO 17:8 Isaraele wambu dupwa yuu Orepitimi dokona paleyaminyipa Amaleke wambu dupwame pyala epeyami.
EXO 17:9 Epeyaminyi dokopa Moseseme Josua lamaiyuo lao, Rakya Amaleke wambu pyala parami lao akali lapo rombo palyakare. Palyakarene dokopa namba yuu kyau manda dokona Anatumi pangali jiyamo doko minyaro kararo, leya.
EXO 17:10 Josua baa Moseseme lamaiyamuli pyuo Amaleke wambu pyala peyamo dokopa Mosese Erone Uamoo yuu kyau dokona ketae peyami.
EXO 17:11 Peyaminyi dokopa Mosese banya kingi doko ketae palyaro kareyamo dokopa Isaraele wambu dupwame mupwa ingyuo anamasi minyiyami. Dopa piyaminyipape Mosese banya kingi isa yaki nyiyamo dokopa Amaleke wambu dupwa mupwa ingyuo kanda soo wini pyuo piyami.
EXO 17:12 Piyaminyi dokopa Mosese banya kingi dolapo kele neyamo dokopa Erone Uapa kana mende baa isa petena lao nyuo reteyambi. Reteyambinyi dokopa baa ketae dokona peteyamo dokopa nakamba wangu wangu pyuo karapala banya kingi minyalyaro kareyambi. Kareyambinyipako pao neta anda pendo leya.
EXO 17:13 Dopa piyaminyi dokome Josuame Amaleke wambu dupwa yaka lao pyao oteya.
EXO 17:14 Dokopa Kamongome Mosese lamaiyuo lao, Wambu dupwame suu pyaramiŋi lao dopa pyuo Amaleke wambu pyao anamasi minyiyamaŋa lao arome pyaramiŋi sinju pii pyao retape. Dee Josua lamaiyuo, Nambame Amaleke wambu dupwa kingi see nana lao pyao nembalu nembo nembaro lapya lape, leya.
EXO 17:15 Moseseme mena pyao kiso maingi kana pyare mende wasiya. Wasapala Kamongo doko nambana Palake dopale ingilyamo lao kingi leya.
EXO 17:16 Lao dokopa Kamongona palake doko ketae palyuo minyalyarami. Dokopa Kamongo dokome Amaleke wambu dupwa pyao karalu karara, leya.
EXO 18:1 Jetero baa Mosesena imwange yuu Mitiane dokona purisi ingyuo karenge dokome Anatumi Mosesemoo banya Isaraele wambu dupwa peparaepe nyiso yuu Isipi yaki nyuo mondo lao lanyuo epeyamo doko sepala kandala epeya.
EXO 18:2 Mosesena etenge Sipora lenge doko banya yuusa petena lapala peyamo doko banya imwange Jetero dokome lanyakamyuo epeya.
EXO 18:3 Jeterome Siporana ikinyingi Gasome Eliasepa dolapo opetaeko lanyakamyuo epeya. Moseseme namba upunili ingyuo yuu wakalemana dokona karapu lapala banya wane mende kingi Gasome leya. (Kingi Gasome doko upunili dopale lenge.)
EXO 18:4 Kiŋi Perao dokome pyao randa jii nana lapala nambana rakangena Anatu dokome namba nyiso kyawa minyiya. Lapala banya wane mende dokona kingi Eliase leya. (Kingi Eliase doko Anatumi namba nyisingi dopale lenge.)
EXO 18:5 Mosese baa Anatunya yuu kyau poo pyasi dokona paleyamo dokona Jeterome banya wanenge dokope dee banya kauwange wane dolapope yuu muiyane dokona lanyakamyuo epeya.
EXO 18:6 Jeterome wambo Mosese wai nembo lamaiyuo, Namba embena imwane Jetero dokome embena endape wane dolapope lanyakao epelyo, leya.
EXO 18:7 Leyamo doko sepala Mosese papala kando nyepala pangu sepala yako lao nyinyi pyuo piya. Pipala dokopa kapa palyuo karapipi lao mendeme mende piso silya sana pipala Moseseme komau anda dokona andakare peyambi.
EXO 18:8 Pao pisipala dokopa Isaraele wambunya reke lao Kamongo dokome Peraope dee Isipi wambu dupwape randa maiyamo doko peparae Moseseme Jetero polo lamaiya. Dee nakama kata epo randa nyiyaminyipa Kamongo dokome lete wai pyao nyiyamo dokona opetae lamaiya.
EXO 18:9 Lamaiyamo doko sepala Jetero baa rae wakasa maiyuo dopa lao,
EXO 18:10 Peraomoo Isipi wambu dupwape nee nyuo Kamongome emba nyisiya dokona banya kingi ketae palena. Isipi wambu dupwana kendemande yulu pyakamyuo kareyaminyipa Kamongo dokome kiiramo nyiya dokona Kamongo banya kingi ketae palena.
EXO 18:11 Isipi wambu dupwame Isaraele wambu dupwa kando kilya kando epe kanda nayami dokopa Kamongome nyisiyamosa baame mee bange wasisi anatuŋu lao dupwa nyuo isa palyuo kamame andake wakasa karenge doko epapu soo otelyo, leya.
EXO 18:12 Lapala Jeterome bange mende isareme kiso oto Anatu keta maiya. Dee lapo opetae kiso rendamu pingi Anatu keta maiya. Maiyamo dokopa Eronemoo Isaraele isingi akali mupwa dupwape dee Mosesena imwange dokomoo role pyao Anatunya lenge kambu dokona piso nenge neyami.
EXO 18:13 Dee yangama dokopa Mosese isa pisipala wambu dupwa kote leyaminyipa soo roleya. Kote siyamo dokopa wamba yangama kete pyaro karo pao yuu kwuaya.
EXO 18:14 Kwuayamosa Moseseme pyuo kareyamo doko kandapala banya imwange Jetero dokome dopa lao piso soo, Emba doo wambu dupwa kando pilini doko akisi? Akipamo emba yeelyo pisipala wambu dupwa wamba yangama kako pyaro karo pao yuu kwuanyi reto piso soo karamisi? leya.
EXO 18:15 Moseseme isingi lao, Anatumi mende pyakapyali lao koto namba keta epelyaminyi dokona namba kapa piru.
EXO 18:16 Wamba lama apiyanda pipala namba keta epenge dokopa namba apinya angi rolae lao yapalyuo soo rolenge. Rolapala dokopa Anatunya mawa pii dupwa polo lamaingi, leya.
EXO 18:17 Dokopa Jeterome Mosese lamaiyuo, Emba angi rolae pii nalene.
EXO 18:18 Dopa pirinyi dokome embapa wambu dupwape nombe nombe piso makame kumarami. Dake yulu ama andake dokona emba iki dokome kapa yeelyo pii nara.
EXO 18:19 Dokona epapu emba manasa keyange lapo pyarowale. Nambana pii serene dokopa Anatu baa emba role pyao karara. Kararamo dokopa Anatunya lenge kambu dokona emba wambu dupwana wai minyingi akali ingyuo karo nakama apiyaanda pirami doko Anatu keta minyuo parene doko yulu rolae.
EXO 18:20 Embame Anatunya mawa pii dupwa mana lamaiyuo wambu dupwa apa pyuo mondo lao palyuo karapenge dee aki yulu pipenge lao polo lamairi.
EXO 18:21 Dee yulu mende opetae piri. Akali mora petenge lapo rombo palyarene dupwame mupwa ingyuo karo wambu dupwa isarami. Isaraminyi dokopa lapome wambu taosande mendaki (1,000) iso dee lapome andete mendaki (100) iso dee lapome akalisa kingi paki (50) iso dee lapome mee akalisa mendakipi iso pirami. Nakama Anatu mupwa lao suu pyao pako karo wambumi yulu kapa pirami lao suu pyaraminde. Wambu lapome nakama kando pii elyape laraminyi dupwa yeelyo nyisa naramili lapo rombo palyape.
EXO 18:22 Yuu peparae nakamame range kote soo wambu dupwa yapalyuo rolarami. Dopa pyuo randa andake dupwa emba keta minyuo eparami. Eparaminyipape nakama range kuki laiya lenge dupwa soo rolarami. Nakamame kukinyi pyambuo dopa piraminyi dokopa emba randa nao yulu pii nare.
EXO 18:23 Emba Anatumi langilyamuli pyuo dopa piri ramo dokopa maka nao mona karo piri. Pirinyi dokopa wambu dupwana kote lala eparaminyi doko rolasi seramopa nakama mona yaepo anda parami, leya.
EXO 18:24 Mosese baame Jeterona pii leyamo doko sepala leyamuli pyuo pyuo
EXO 18:25 Isaraele akali peparaena mora petenge akali dupwa yapo rombo palyapala lapome wambu taosande mendaki (1,000) iso dee lapome andete mendaki (100) iso dee lapome akalisa kingi paki (50) iso dee lapome akalisa mendakipi iso karena leya.
EXO 18:26 Leyamo dokopa nakama yuu peparae rangeme wambu dupwana kote pii dupwa soo rolapa piyami. Dopa pyuo randa andake dupwa Mosese keta minyuo epeyami. Epeyaminyipape kuki dupwa nakama rangeme soo rolapa piyami.
EXO 18:27 Dokopa Moseseme banya imwange kingi nyuo pena leyamopa Jetero banya yuu range dokona kapu kyuo peya.
EXO 19:1 Isaraele wambu dupwa yuu Isipi yaki nyiyami. Yaki nyepala kana rema yuu gii kanda soo dokona nakama yuu Orepitimi kaeyapala yuu muiyane Sainai lenge dokona epeyami.
EXO 19:2 Epapala yuu kyau dokona isarena palyuo kareyami.
EXO 19:3 Kareyaminyi dokopa Mosese yuu kyau dokona Anatu kando nyela peya. Peyamo dokopa Kamongo dokome yuu kyau dokona karo kyakale lapala embame Jekopena para pyasi Isaraele wambu dupwa dopa lamainya leya.
EXO 19:4 Namba Kamongo dokome Isipi wambu dupwa piyunu doko nakama kandeyami kande. Yaka kambe dokome banya ikyane papake dokona koko palyuo lanyuo penge dopale ingyuo nambame nakama lanyuo epeyo kande. Epapala nakama namba pipya role pyao karamano.
EXO 19:5 Epapu nakama nambana pii warombo soo kana minyuo lalu lao lenge pii doko minyaro kararami ramo doko nakama namba rangena wambu ingyalu ingyuo ingyarami. Isa yuu dake peparae nambana ingyapyamopape nakama nambana rombo palyisi wambu ingyarami.
EXO 19:6 Dopa piramopa nakama wambu namba joo otasi dokome purisi ingyuo nambana yulu pyakarami, lao Kamongome leya. Renge dusipana embame Isaraele wambu dupwa lamaipi, lao Anatumi Mosese lamaiya.
EXO 19:7 Dokona Mosese baa isa lupyuo papala akali mupwa dupwa kee lao sukusa nyepala dokopa Kamongome pii peparae lamaiyamuli pyuo nakama polo lamaiya.
EXO 19:8 Polo lamaiyamo dokopa wambu dupwa peparaeme isingi lao dopa leyami. Kamongo dokome lapyamo dusipa peparae kapa pirama, leyami. Leyaminyisa Moseseme dopa letaminyi lao Kamongo baa lamaiya.
EXO 19:9 Dokopa Kamongo dokome Mosese lamaiyuo, Namba kopa romende rakapana piso emba keta eparo. Epapala wambu dupwa kapa serami lao emba pii langiru. Renge dokona lao wambu dupwame yuu peparae kinyi lapilyamo lao soo nyerami, leya. Leyamo dokopa wambu dupwana pii isingi leyaminyi doko Moseseme Kamongo baa lamaiya.
EXO 19:10 Kamongo dokome Mosese lamaiyuo, Wambu petaminyi suku dokona pao nambana kingi ketae pyambuo lakandarami dokona epapu rakyapana nakamana koo dupwa polo lao rapa rapa pinya lamairi. Nakamana komau dupwa wate pipala
EXO 19:11 jimwa dokopa nakama rapa rapa pisi kararami. Yuu gii dokopa namba yuu kyau manda Sainai lenge dokona eparonopa wambu peparaeme namba kandarami.
EXO 19:12 Wambu dupwa yalo epa nana lapala yuu kyau dokona repeta rombo palyuo liti pipala dopa lamaiyuo, Nakama yuu kyau dokona pulyuo paope repeta paope pii nana lamairi. Daaŋa lapala mendeme dokona kimbu palyuo para ramo doko kumara.
EXO 19:13 Dopa piramo dokopa mendemepe baa minyandapa naramopa wanga kanapeme pyarami. Pii dake mena wambupi peparae keta epelyamo. Nakama peparae kumarami. Dopa piraminyipape bikuli pii laramo dokopa wambu dupwa yuu kyau dokona pulyuo parami, leya.
EXO 19:14 Dokopa Mosese yuu kyau dokona karo wambu peteyaminyi dokona epapala Kamongo kingi ketae pyambuo lakandarami lao rapa rapa pinya leya. Dokona nakamana komau dupwa wate piyami.
EXO 19:15 Piyaminyi dokopa Mosese nakama lamaiyuo, Jimwa yuu gii dokopa nakama rapa rapa pisi kararami. Dokona epapu rakyapana enda akalipa nyingi dolapo role pyao pali nalapape, leya.
EXO 19:16 Yuu gii repo dokopa yangama yuu kyau dokona yuu gala lao yuu pele pyuo dee kopa andake soo pipala bikuli pii andake leya. Leyamo dokopa wambu palyuo kareyaminyi dupwa sepala walu lao pakame kumuyami.
EXO 19:17 Moseseme wambu palyuo kareyaminyi dokona yaki neypala Anatu kando nyinya lao laminyuo peya. Nakama pao yuu kyau dokona isarena kareyami.
EXO 19:18 Kareyaminyi dokopa Kamongo doko isare piso yuu kyau manda Sainai dokona epeyamosa yuu kyau doko sukwa dokome yambe pyao oteya. Poo kisilyaminyipa isare sukwa pulyuo penge dopale ingyuo sukwa doko pulyuo peya. Peyamo dokopa wambu dupwa peparae pakame kumuo walu walu lao kareyami.
EXO 19:19 Bikuli pii andake lao ama ketae palyuo uliuli leyamo dokopa Moseseme pii leyamopa Anatumi yuu gala role pyapeta banya pii isingi leya.
EXO 19:20 Lapala Kamongo doko yuu kyau manda Sainai dokona isa epapala baame Mosese yuu kyau dokona pulyuo epena lao kee leya. Kee leyamo dokopa Mosese baa yuu kyau dokona pulyuo peya.
EXO 19:21 Dokopa Kamongo dokome Mosese lamaiyuo, Emba lupyuo papala wambu dupwame namba kandarama lao yuu liti doko yalo epa nana lao repe repe pii lamairi. Doko kaepala eparami ramo doko wambu malu kumarami.
EXO 19:22 Dee purisi akali namba repeta epo kararaminyi dupwa nakama poo pyasi ingyuo kararami. Poo pyasi ingyuo kara naraminyi dupwa nambame nakama randa mairu, leya.
EXO 19:23 Moseseme Kamongo doko lamaiyuo, Emba namwa kando repe repe lao yuu kyau doko liti pyuo poo pyasi ingyuo sinyale lao langyuo otee kande dokona wambu dupwa pulyuo epa narami, leya.
EXO 19:24 Dokopa Kamongo dokome Mosese isingi lamaiyuo, Emba isa lupyuo papala dokopa Erone nyuo minyuo kapu kyuo ipupi. Eparene dokopa purisi akali dupwape mee wambu dupwape yuu liti doko yalapala namba kandala epa narami. Eparami ramo doko nakama nambame randa mairu, leya.
EXO 19:25 Leyamo dokopa Mosese baa wambu peteyaminyi dokona isa lupyuo papala nakama Kamongome leyamuli pyuo lamaiya.
EXO 20:1 Pii dasipa peparae Anatu baame leya.
EXO 20:2 Namba nakamana Kamongo Anatu dokome nakama yuu Isipi dokona karapusi ingyuo kendemande yulu pyuo kareyaminyipa neta nyuo lanyuo epeyoŋo doko.
EXO 20:3 Nakambame namba iki lakando anatu wakale mende lakanda nalapape.
EXO 20:4 Nakamame yake ketae bange singipi panda isa yuunya singipi panda ipwa isarena yuu koko palenge dokona singipi dupwana yale mendeme anatuŋu lao wasa nalapape.
EXO 20:5 Namba nakamana Kamongo Anatu. Wakale mendeme nambana panda nyinya lao maiya nange. Dokona lao mee bange anatu angi daa dupwana ponga napala kingi ketae pyambuo lakanda nalapape. Wambu mendeme namba awa nara ramo dokopa nakamana para pyaraminyi dupwame manjo jingi para pyao paraminyipa rema panda kisima ingyuo manjiraminyi dusipana mende keta randa mairu.
EXO 20:6 Dopa pirunupape wambu malu mee namba mona retapala nambana mawa pii dusipa minyaro kararaminyi dupwa nambame mona retalu reto retenge.
EXO 20:7 Namba nakamana Kamongo Anatu dokome nambana kingi dokona kopetame koo ingyuo laraminyi dupwa randa mairu dokona nakamame nambana kingi doko kopetame ingyuo kwuanyi nembo laa nalapape.
EXO 20:8 Koro petenge yuu gii dokona lao poraiyuo suu pyao minyaro karo yapasi ingyuo Kamongo keta pyambwarami.
EXO 20:9 Pyambwapala yuu gii pakinyamange dusipana nakamana yulu dupwa kapa pirami ingilyamo.
EXO 20:10 Pipala yuu gii yanda ipingi nyepo dokona imambu soo karo nakamana Kamongo Anatu lao poraiyuo suu pyao kararami. Yuu gii dokopa nakamape nakamana wane wanakepe nakamana kendemande yulu pyakange akalipi menape yuu nanesa range nakamana yuu dokona karengepe peparae yulu pii narami.
EXO 20:11 Yuu gii pakinyamange dusipana namba Kamongo dokome yakepe yuupi ipwa kotape dee dusipana bange peparae singipi dupwa wasiyu. Wasiyunupape yuu gii yanda ipingi dokona namba imambu soo peteyo. Renge dokona namba Kamongo dokome koro petenge yuu gii doko mupwa lao yapasi ingyuo sinya lao reteyo.
EXO 20:12 Endangi rakangepa kando rape rape lao karalapape. Nambame nakama yuu jilyu dokona yuu gii londesa palyuo kararama lao dopa pirami.
EXO 20:13 Wambu pyao kumaka nalapape.
EXO 20:14 Endame akali wakale kepo pyakami nao akali mendeme enda wakale kepo pyakami nao pipwape.
EXO 20:15 Waa nyakami nalapape.
EXO 20:16 Nakamame wambu yango mende kando koo pipya lamo lao panga soo kyambo lakami nalapape.
EXO 20:17 Akali mendena anda awuapala nyipuli nyipuli lao suu pyaa nalapape. Banya etengepe kendemande akalipi mena bulamakaope mena dongepe dee banya bange wakale wakale silyamo dupwana mendepe nyipuli nyipuli lao suu pyaa nalapape.
EXO 20:18 Wambu dupwa yuu gala lao bikuli pii andake lao piyamo doko soo dee yuu kyau dokona yuu pele lao sukwa dokome yambe piyamo doko kando pipala walu lao pakame kumapala nanesa wakale kareyami.
EXO 20:19 Karapala nakamame Mosese lamaiyuo, Embame namwa pii langirinyi dokopa namwa pii serama. Dopa piramopape Anatumi namwa pii langira ramo dokopa namwa kumaseramano lao pakame kumulyamano, leyami.
EXO 20:20 Leyaminyi dokopa Moseseme wambu dupwa isingi lamaiyuo, Paka nalapape. Nakama yuu peparae Anatu baa mupwa lao suu pyao pakame kumuo karapala yulu koo dokona pii narami lao baame nakama makande pilyamo, leya.
EXO 20:21 Dopa leyamopape wambu dupwa nanesako karo peyaminyipa kopa soo iminjo koro koro leyamo Anatu baa kareyamo dokona Mosese baa iki repeta peya.
EXO 24:1 Kamongome Mosese lamaiyuo lao, Embamoo Erone Natapi Apiyumoo dee Isaraele wambunya akali mupwa akalisa yanda ipingi nyepo dusipa pipya yuu kyau namba karo dokona pulyuo ipupwape. Epapala nakama mee mende nanesale epo karo dokopa wapambu pii pyaro piso nambana kingi ketae pyambuo lakandarami.
EXO 24:2 Dopa pipala emba iki namba repeta eparenepa akali mupwa dupwana mende namba repeta epa narami. Dee wambu dupwana mendepe kamame yuu kyau dokona pulyuo epa naramiko, leya.
EXO 24:3 Leyamo dokopa Mosese baa wambu peteyaminyi sukusa dokona papala Kamongona mawa pii leyamo dupwa peparaepe banya mana piipi lamaiya. Lamaiyamo dokopa wambu peparaeme kapa kapa isingi lao, Kapa namwame Kamongo dokome lapyamuli pyuo peparae pirama, leyami.
EXO 24:4 Dokopa Moseseme Kamongona mawa pii dusipa peparae pepana pyao reteya. Retapala yuu gii mende dokona wamba yangama baame yuu kyau isarena dokona kana pyare lao mena kiso maingi rate piya. Pipala kana akalisa ipisu lama malu palyuo pyuo reteya. Reteyamo dusipa Isaraele rara akalisa ipisu lamako dusipana kana mendaki mendaki lao retakamiya.
EXO 24:5 Dopa pipala dokopa baame akali parange lapo pena leyamopa papala nakamame mena pyao isareme kiso mukinyi nembo Kamongo maiyuo dee Anatupa wambupi mona mendaki palyuo mena bulamakao lapo pyao kiso maiyuo piyami.
EXO 24:6 Moseseme mena ranjama dokona lapo pingyu kamuo nyuo pere warake dupwana reteya. Retapala ranjama pingyasi siyamo doko kamuo nyuo kana pyare lasi dokona pyarenda lanyi pisiya.
EXO 24:7 Dopa pipala enakana kana minyuo lalu lao lenge pii palenge buku dokona Kamongona mawa pii pyasi palenge doko baame nyiya. Nyepala pii ketae palyuo wambu dupwa yaka lao lamaiya. Lamaiyamo dokopa wambu dupwame lao, Namwame Kamongo warombo soo baame pelapa lao mawa pii langilyamuli pyuo yulu peparae pirama, leyami.
EXO 24:8 Enakana Moseseme ranjama pere dupwana siyamo doko nyepala wambu dupwa keta pyarenda lanyi pisiya. Pisapala baame dopa leya. Mawa pii peparae joo karo dokopa Kamongo dokome nakama pipya kana minyuo lalu lao leyamo pii dupwa ranjama dakeme kiso pii kapa wai wara pisi silyamo, leya.
EXO 24:9 Mosesemoo Erone Natapi Apiyumoo dee Isaraele wambunya akali kyawa akalisa yanda ipingi nyepo dusipa pipya yuu kyau dokona pulyuo peyami.
EXO 24:10 Papala Isaraele wambunya Anatu doko angi kandeyami. Kandeyaminyi dokopa banya kimbu siyamo dokona isarena kata kana kameya mende sapaiya lenge dokome wasisi siya. Kana doko kala ama muku wakasa yake dopale ingyuo siya.
EXO 24:11 Isaraele akali mupwa dusipame Anatu kandeyaminyipape baame nakama randa maiyuo pyaa naya. Enakana nakama pyaso piso nenge ipwape neyami.
EXO 24:12 Kamongo dokome Mosese lamaiyuo, Emba yuu kyau namba karo dakena ipupi. Epo kararene dokopa wambu dupwa lowa peparae kapa mana nyerami lao kana para lamana pyao reteyono dolapo jero.
EXO 24:13 Mosesepa banya nyisingi Josuapa rapa rapa pyuo oteyambinyipa Mosese baa yuu kyau poo pyasi dokona kanda soo pulyuo peya.
EXO 24:14 Moseseme akali mupwa dupwa lamaiyuo, Namba kamba kapu kyuo epelyambipi lao isaro karalapape. Eronepa Uapa nakama pipya role pyao karaminyi. Dokona nakama mendali randa mende paleya kande dokopa akali dolapome lao rolakarambiŋi nakamba keta maiyuo pupwape, leya.
EXO 24:15 Mosese baa yuu kyau Sainai dokona pulyuo peyamo dokopa kopa dokome yambe piya.
EXO 24:16 Kamongona lepo lepo pyuo yanga paupau lenge doko yuu Sainai kyau dokona isa epeya. Epeyamo doko Isaraele wambu dupwame Kamongona yanga paupau lenge doko isare dopale ingyuo yuu kyau dokona rao kareyamo kandeyami. Dokopa yuu gii pakinyamange kopa dokome yuu kyau doko yambe pyaro karalu kareya. Kareyamopa yuu gii yanda ipingi nyepo dokona kopa rakapana sukusa Kamongo dokome Mosese lao kee leya.
EXO 24:18 Kee leyamo dokopa Mosese baa kopa rakapana sukusa dokona pao yuu kyau dokona pulyuo peya. Papala baa yuu kyau dokona yuu gii akalisa kisima dee kukwama akalisa kisimako kareya.
EXO 31:18 Yuu Sainai kyau dokona Kamongome Mosese pii lamaiyuo otapala kana para dolapona baa rangeme mawa pii dupwa pyao palyapala maiya.
EXO 32:1 Mosese baa isa epa nao yuu kyau dokona andarele kareyamopa wambu dupwame kandapala Erone kareyamo dokona sukusa sukusa pyuo epapala dopa lamaiyuo, Namwa Isipi kareyamanopa nyuo lanyuo epeyamo akali Mosese doko epapu apa pilyamo lao soo gisa nalyamano. Dokona mee bange anatu lao mende wasakape. Dokome namwa lanyuo penale, leyami.
EXO 32:2 Dokopa Eroneme nakama lamaiyuo, Nakamana endape wanepe wanakepe dupwana kana golome kalena pingi bange dupwa nyepala namba karo dakena minyuo ipupwape, leya.
EXO 32:3 Dokopa wambu peparaeme kana golome kalena pingi bange dupwa nyisa nyepala minyuo epo Erone maiyami.
EXO 32:4 Dokopa baame kana golo kalena pingi dupwa nyepala kiso lili lao ipwa ingiya. Ingiyamopa yuwale mena bulamakao dopale ingyuo apu rao reteyaminyi dokona golo ipwange doko kulimbwanyi pyambuya. Pyambuyamopa golo dokome bulamakao ikyane wasiya. Dokopa wambu dupwame lao, Isaraele dupwa dake namwana anatu yuu Isipi yaki nyuo lanyuo epeyamo dokoŋo, leyami.
EXO 32:5 Dokopa Eroneme golome wasisi mena bulamakao kareyamo lenge kambu dokona kana pyare mende leya. Lapala lao, Rakya Kamongo doko kingi ketae pyambuo lakando nenge andake kiso mairama, leya.
EXO 32:6 Leyamo dokopa yuu gii mende dokona wamba yangama dokopa wambu dupwame mena lapo minyuo epo pyao kiso maiyuo dee lapo dupwa nakama pipya Anatumoo mona mendaki palyuo kiso maiyuo piyami. Pipala nakama nenge nao piso kopetame pyuo ipwa biya nao kepo pyuo peteyami.
EXO 32:7 Dopa piyaminyisa Kamongo dokome Mosese lamaiyuo lao, Embena wambu yuu Isipi yaki nyuo lanyuo epee kande dupwame namba mata joo yulu koo pilyaminyi dokona dakepa aopa waiya lao lupyuo puu, leya.
EXO 32:8 Dopa lao, Nambame nakama mawa pii lamaipala moko minyuo pinya leyono doko yaki nyuo otami. Dopa pipala nakama kana golo kiso lili lapala mena bulamakao mende wasami. Wasapala doko lakando mena pyao kiso maimi. Maipala nakamame lao, Dake namwana anatu namwa yuu Isipi yaki nyuo lanyuo epeyamo dokoŋo, lami.
EXO 32:9 Nakamana mona kana poko pilyaminyi doko namba silyu, leya.
EXO 32:10 Namba nakama pipya imbuo pyao kokwa sero dokona epapu embame namba daa lao kata rokwa napipi. Dopa pirunu dokopa embape embena para pyarene dupwape jingi para pyao andakinyi pyambwaro, leya Kamongome.
EXO 32:11 Leyamopape Moseseme banya Kamongo Anatu doko kando poraiyuo piso sokondali pyuo lao, Kamongo embame embena wambu dupwa kyawa lete nyuo yuu Isipi piso embena porainya renge dokome nyuo minyuo epee dupwa akipamo nakama kando imbumi kumarese?
EXO 32:12 Isipi wambu dupwame dopa lao, Embena wambu yuu Isipi yaki nyuo lanyuo pee dupwa yuu kyau dokona pyao kumuo kokwa soo nembalu nembo nembalana lanyuo pee lyamo lao akipamo laramisi? Dokona imbwa nao embena suu pingi alowa pipala embena wambu dupwa keta randa doko mai napipi.
EXO 32:13 Embena kendemande akali Aporakame Aisake Jekopemoo dusipana lao suu pyaro karape. Karo nakama kando embena pii lalu lao lao, Nakamana wane manjiraminyi dupwa kamame wakasa yakena bui dopale ingyuo ando kararami. Nakamana para pyaraminyi dupwame yuu mairu lalu lao leene doko nakamana ingyuo dokona palyuo karalu kararami leene doko suu pyaro karape, leya.
EXO 32:14 Leyamosa Kamongo dokome banya wambu dupwa randa maiyuo pyalana suu piyamo doko alowa pipala pyaa naya.
EXO 32:15 Dokopa Mosese yuu kyau doko yaki nyuo kana para lamana paki pakipi mawa pii dupwa pyasi paleyamo dolapo soo lupyuo peya.
EXO 32:16 Anatumi baa rangme kana para lama wasapala dolapona mawa pii peparae pyao reteya.
EXO 32:17 Wambu dupwame pii porakai leyaminyi doko Josuame sepala Mosese lamaiyuo lao, Wambu dupwa paliminyi yuu dokona yanda pyuo pii laminyi doko silyu, leya.
EXO 32:18 Leyamo dokopa Moseseme lao, Doo letaminyi dokome yanda pyuo wini pipala letaminyi ingya naope panda pyao anamasi minya napala ee lenge dopale ingya naope pilyamo. Doko mee kenane poponge epelyamo, leya.
EXO 32:19 Lapala Mosese baa yuu paleyaminyi dokona repetale epo karo mena bulamakao dokope wambu rae maiyuo kenane pyao malya pyao kareyaminyi dupwape kandeya. Kandapala baa ama imbumi kumapala kana lama soo epeyamo dolapo yuu kyau dokona isarena pyao pisiyasa poro leya.
EXO 32:20 Dopa pipala baame mena bulamakao wasiyaminyi doko nyepala isarena kiso kuku piya. Pipala kuku pisi dupwa nyuo ipwa dokona pyasiya. Pyasapala Isaraele wambu dupwa kamuo nena leya.
EXO 32:21 Dokopa Moseseme Erone kando lao, Wambu dupwame emba kando aki koo mende pimisa embame nakama yulu koo andake dake kapa pinya lao panda maipisi? leya.
EXO 32:22 Dokopa Eroneme isingi lao, Embame namba kando imbwa napipi. Wambu dapwa rangeme porayapala yulu koo doko pimwalinya suu pyao karenge doko emba soo otelene.
EXO 32:23 Wambu dupwa dopa lanyuo, Mosese Isipi karo namwa nyuo lanyuo epeya doko epapu baa apa pilyape lao see nalyamano dokona epapu embame anatu mende namwa lanyuo para lao wasakape, leyami.
EXO 32:24 Dopa leyaminyi dokopa kana golome wasisi kalya pingi bange dupwa minyuo epo jinya leyo. Dokopa wambu lapome bange reteyaminyi dupwa nyisa nyepala jiyami. Jiyaminyi dupwa isare dokona pyao pyambuyu dokopa bulamakao ikyane dake mee maso sipuro epeya, leya.
EXO 32:25 Erone baame Isaraele wambu dupwa poraiyuo rapu pii nayamosa mee bolombalo lao karo yulu kopetame pyuo kareyaminyipa yanda pimwai dupwame nakama kando giyuo kareyami. Dopa piyaminyi doko Mosese kandeya.
EXO 32:26 Kandapala Mosese baa yuu paleyaminyi kame kambu doko karapala poraiyuo kyakale lao, Nakama lapo Kamongona wambu ingyuo karaminyi dupwa namba karo dakena ipupwape, leya. Leyamo dokopa Lipae wambu peparae dupwa baa kareyamo dokona epo malu palyiyami.
EXO 32:27 Baame nakama lamaiyuo lao, Kamongo Isaraele wambunya Anatu dokome nakama peparae langyuo, Mendaki mendaki lao embena wua gela doko nyuo minyapala yuu palaminyi dokona kanda kanda kame kambu dakena piso pao paki oto embena yangonepe puu minyingipi dee parali maki palengepe dupwa pyao kumakalapape letamo, leya.
EXO 32:28 Leyamo yuu gii dokopako Lipae akali dupwame warombo sepala wambu ama malu taosande rema (3,000) pyao kumuyami.
EXO 32:29 Dokopa Moseseme Lipae akali dupwa lamaiyuo lao, Nakamana yangongepe ikinyingipi dupwa pyao kumakami dokona nakama yapasi ingyuo Kamongona purisi karaminyi. Dokona Kamongo dokome nakama elyape keta pisapya, leya.
EXO 32:30 Yuu gii yangama dokopa Moseseme wambu dupwa lamaiyuo, Nakamame yulu koo dae pimi dake kamame koo ingyuo pelyamo. Dokona epapu namba yuu kyau Kamongo karamo doko dee kamba paro. Papala nambame nakamana koo dupwa nyuo kame sakana lao piso sero dokopa baame kame sakara rapisi, leya.
EXO 32:31 Lapala Mosese kamba kapu kyuo pulyuo papala Kamongo doko lamaiyuo, Wambu dupwame yulu koo andake pyuo kana golome anatu wakale wasapala doko lakando karami.
EXO 32:32 Dokona nakamana koo dupwa nyuo kame sakamipi. Kame sakami nare ramo doko buku embena wambu dupwa kingi pyao palyingi dokona nambana kingi palamo doko kwuanyi nembakape, leya.
EXO 32:33 Leyamo dokopa Kamongo dokome isingi lao, Doko wambu namba kando koo piminyi dupwana kingi dupwa nambana buku dokona pali nana lao kwuanyi nembaro, leya.
EXO 32:34 Dokona epapu nambame emba langiyunu yuu dokona wambu dupwa lanyuo pupi. Parene dokopa nambana aŋala dokome emba rapu pyuo karara. Dopa piramopape wambu dupwa koo piyami dokona randa mairunu yuu gii doko pyaka sera, leya.
EXO 32:35 Wambu dupwame Erone kando mena bulamakao ikyane golome wasakana leyaminyi dokona Kamongo dokome anga ikyane mende wambu keta peeya.
EXO 33:1 Kamongo dokome Mosese lamaiyuo lao, Embape embena wambu yuu Isipi yaki nyuo lanyuo epee dupwape yuu dake yaki nyepala nambame Aporakame Aisake Jekopemoope dee dupwana para pyaraminyi dupwape kando yuu mairuŋu lao lalu lao leyono dokona pupwape.
EXO 33:2 Nambame aŋala mende nakama rapu pinya lao mapanyi peeyapala nambame Kenane rangepe Amo rangepe Ipi rangepe Perasi rangepe Iti rangepe dee Jepusi rangepe peparae ralinyi nembaro.
EXO 33:3 Dokopa nakama yuu keyange amenge kapape pingi dokona parami. Dopa pyuo paraminyipape nakama waiya lao mona kana pokonge dokona nambame katasa nakama pyao kokwa soo nembasaroŋo namba range role pyao paa narama, leya.
EXO 33:4 Wambu dupwame pii porai doko sepala nakama kondome kumuo ee lao mona kendo karo nakamana kalya pingi bange dupwa dee nyuo pirami ingya nayami.
EXO 33:5 Dopa piyaminyi dokopa Kamongome Mosese kando wambu dupwa lamainya lao lao, Nakama wambu mona kana pokonge dapwa namba nakama role pyao mee kuki lama pao lapuli doko nambame nakama pyao kokwa soo nembalu nembo nembapuli. Namba nakama keta aki mende piru lao suu pyarole. Epapu nakamana kalya pingi bange dupwa kako lao nyisa nyelapape, leya.
EXO 33:6 Leyamo dokona lao nakama yuu kyau Sainai yaki nyuo papeyaminyi dokopa Isaraele wambu dupwa kalya pingi bange dupwa pyuo kara nayami.
EXO 33:7 Yuu dupwana mendepe Isaraele wambu komau anda dupwa pyuo palenge dokopa Mosese baame komau anda poo pyasi doko nyepala yuu palenge dokona mee mende nanesale ingyuo piya. Pipala doko komau anda dokona Kamongo karenge doko leyami. Dokopa wambu lapo Anatu pii mende piso selana masiyami dupwa dokona pao pii lamaiyami.
EXO 33:8 Yuu gii lapo Mosese komau anda dokona panya peyamo dokopa wambu dupwa peparae nakamana komau anda kambu dokona kando karo pao konandeyamo dokopa kaeyami.
EXO 33:9 Enakana Mosese baa andakare pao oteyamo dokopa kopa rau doko epo komau anda kambu dowa dokona siya. Dokopa kopa rakapana piso Kamongome Mosese pii lamaiya.
EXO 33:10 Dokopa wambu dupwame kopa rau komau anda kambu dokona epo siyamo doko kandapala aopa wapambu pii pyaro pangu soo Anatu lakandeyami.
EXO 33:11 Doko wambu puu minyingi dupwa rolae lenge kambu kando pii lenge dokoko suu pyao Kamongome Mosese role pyao karo lenge kambu kando pii lamaiya. Lamaipala Mosese baa wambu dupwa palenge yuu dokona peya. Dopa pyuo peyamopape banya nyisingi wane parange akali Nanena ikinyingi Josua lenge doko komau anda dokona yaki nyii nao mee andakare kareya.
EXO 33:12 Dokopa Mosese Kamongo doko lamaiyuo lao, Doko kinyi. Emba namba langyuo, Wambu dapwa minyuo yuu dokona puu lee. Leenepape embame wambu mende nambapa role parambi peeyaro lao namba langi nae. Embame lao, Namba emba soo oto rae mailyu, lee.
EXO 33:13 Epapu embame namba kando rae mairi ramo doko embena rapa rapa piinyi dupwa namba langipi. Dokona nambame embena yulu pyakao emba rae maiyuo puu paro. Dee wambu rara dake emba rangena ingyara lao rombo palyinyi doko suu pyao karape, leya.
EXO 33:14 Leyamo dokopa Kamongo dokome lao, Namba nakama role paramanopa nakamame anamasi minyuo wini pirami, leya.
EXO 33:15 Dokopa Moseseme isingi lao, Emba namwa role pyao paa narama ramo doko namwa yuu dake yaki nyelapa lao laa napipi.
EXO 33:16 Emba namwa pipya paa narama ramo doko embame embena wambupi nambape kando rae mailiŋi lao apa pyuo wambu mendeme soo nyerase? Emba namwa pipya role parama ramo doko wambu dupwame namwa rara wakaleŋe lao soo nyerami, leya.
EXO 33:17 Dokopa Kamongome Mosese lamaiyuo lao, Nambame emba soo giso rae maiyuo pilyu dokona embame piso silinyili pyuo piru, leya.
EXO 33:18 Dokopa Moseseme piso soo lao, Embena yanga paupau lao lepo lepo pingi doko namba lasaka pii, leya.
EXO 33:19 Kamongo dokome isingi lao, Nambame nambana yanga paupau lenge peparae emba lasaka pyuo embena lenge kambu dokona nambana kingi poo pyasi doko polo langiru. Namba Kamongo doko. Namba rangeme mendali sakame kumuo kondo nyiso kararo laro ramo doko sakame kumuo kondo nyiso kararo.
EXO 33:20 Mendeme namba kandapala lete paa nange dokona emba nambana lenge kambu doko kanda laa naro.
EXO 33:21 Dopa piramopape emba kanana ketae karare lao namba karo dakena paki panda mende silyamo.
EXO 33:22 Nambana yanga paupau lao lepo lepo pingi doko embena lenge kambu dokona eparamo dokopa nambame kana dokona kata silyamo koko dokona emba palyapala nambana kingi dokome emba yambe pyaro. Yambe pyapala namba pao otaro.
EXO 33:23 Pao otapala enakana nambana kingi neta nyero dokopa embame nambana matarena yeelyo kandare. Nambana lenge kamburena kanda nare, leya.
EXO 34:1 Kamongome Mosese lamaiyuo lao, Kana wambo dopale ingyuo embame kana lama kunjo wasape. Wasarene dokopa kana wambo embame pyao poro leene dolapona pii paleyamo dupwa nambame dee kamba pyao retaro.
EXO 34:2 Rakya yangama rapa rapa pipala yuu kyau Sainai dokona epo ketae nambapa role pyao kararamba.
EXO 34:3 Wambu mende role pyao epa nara. Dee yuu kyau dupwana mendasape wambu mende kara narami. Mena sipisipipi panda mena bulamakaope dupwame yuu kyau wangu kipwa kipwa isako nao pii nana, leya.
EXO 34:4 Dokona lao Moseseme kana lama kamba kunjo wasiya. Wasapala Kamongome lamaiyamuli pyuo wamba yangama dokopa yuu kyau Sainai dokona soo pulyuo peya.
EXO 34:5 Dokopa Kamongo baa kopa rakapana isa epo dokona baapa role kareya. Karo dokopa banya kingi poo pyasi Kamongo doko leya.
EXO 34:6 Dokopa Kamongome Mosesena lenge kambusa papala kee lao lao, Namba Kamongo doko Anatu kondome kumuo nyiso karenge. Dopa pyuo karo dokopa namba waiya lao imbwa nange. Dee namba yaki nyii nao mona retenge renge andake doko nakama keta palyingi.
EXO 34:7 Nambame nakamana para pyasi dupwana mendeme mende manjipa pyuo penge ama malu soo kaeyo dupwa keta lalu lao leyonde pyuo pyuo koo pingi peparae kame sakamyuo karenge. Dopa pirunupape endangi rakangepe koo piraminyi dokona palyuo nambame nakamana ikinyingi wanengepe apusingipi kauwangepe dee dupwana para pyasi wambu rara lama manjiraminyi dupwape randa malisa nao mairu.
EXO 34:8 Mosese baa waiya lao yuu dokona wapambu pii pyaro piso Anatu lakandeya.
EXO 34:9 Lakando baame lao, Kamongo embame namba kando angi rae mairi ramo doko namwa pipya emba role pyao mona ipu lao piso silyu. Wambu dapwa mona kana pokolyaminyipape embame namwana koo peparae nyuo kame sakapala namwa emba rangena wambu ingyuo manjo nyepe, leya.
EXO 34:10 Leyamo dokopa Kamongome Mosese lamaiyuo lao, Epapu nambame Isaraele wambu dupwa keta kana minyuo lalu lao lenge pii doko retelyo. Nambame yuu muu dakenape mendasa wambu rara palaminyi dupwa ketape yulu pii nangende Isaraele wambunya lenge kambu dokona piru. Nambame yulu mende wambu kando yamarangyuo kararaminyi doko nakamana lao pyakaro dokona wambu peparaeme namba Kamongo dokome aki yulu andake lapo pilini lao kandarami.
EXO 34:11 Nambame nakama epapu mawa pii jilyu dupwa warombo soo karalapape. Nakama paraminyi dokona nambame wambo pao Amo rangepe Kenane rangepe Iti rangepe Perasi rangepe Ipi rangepe dee Jepusi rangepe peparae neta pyao ralinyi nembaro.
EXO 34:12 Kando pupwape. Papala nakama yuu dokona range wambu dupwa pipya pelyaminyi pii lalu lao laa nalapape. Dopa pirami ramo nakama randa nyuo koo keta pao konena lyakaro karele lasarami.
EXO 34:13 Dopa pyuo kara nao nakamana nenge kiso maingi kana pyare dupwa lalyuo nembalapape. Nakamana isa pote poo pyasi lenge dupwa pyao lalyalapape. Lalyapala dee nakamana isa lapo kando Asera enda anatu lenge doko pyakepo muu muu pinyi nembo pipwape.
EXO 34:14 Nakamame anatu wakale lapo lakanda nalapape. Namba Kamongo dokome nambana wambu dupwa yulu kopetame dopale dupwa pinya lao yaki nyii nao nakama nambana iki ingyuo karamili yaka lao suu pilyu.
EXO 34:15 Doko wambu dupwame mee bange anatu lenge doko mena pyao kiso mainya lao nakama dokona role pyao yalya kando pisala ipupwa lao piso seraminyi dokopa wambu dupwana anatu nenge kisaraminyi doko walu lapala nyuo nasaramiŋi dokona yuu range wambu dupwa kando pii lalu lao laa nalapape.
EXO 34:16 Dokona nakamana ikinyingi dupwame yuu wakale range enda dupwa nyerami ramo enda dupwame nakama kata koo dokona lanyuo paraminyisa nakamame namba angi suu pyaa napala mee bange anatu kyambo lenge dupwa lakandarami ingilyamo.
EXO 34:17 Nakamame kana golope kulingipi dupwame mee bange anatu lao wasapala lakanda nalapape.
EXO 34:18 Nakama Borete Isi Pyambwa Nange Nenge Nenge yuu gii doko minyuo karalapape. Karapala nambame langiyunuli pyuo nakama borete isi pyambwa nange doko kana Apipi dokona yuu yanda ipingi dusipana narami. Kana Apipi dokona nakama yuu Isipi yaki nyuo epeyaminyi dokona ingyuo narami.
EXO 34:19 Nakamana wane ane mupwa manjiraminyi peparaepe bulamakao kali mupwape mena sipisipipinya kali mupwape manjiraminyi dupwa peparae nambana ingyara.
EXO 34:20 Dopa piramopape nakamame mena donge wambo mandenge dupwa ropo pyao nyuo mena sipisipi ikyane dupwa panda nyuo kiso jerami. Dopa pyuo kiso jii narami ramo doko dongena mange dupwa minyuo roo pyarami. Dopa pipala nakamana wane wambo mandenge dupwa ropo pyao range nyerami. Dokona mendeme nenge kiso jii napala mee nambana arapu dokona epo maro laa narami.
EXO 34:21 Dokona nakamame yulu pirami lao yuu gii pakinyamange silyamo. Sipyamopa yuu gii yanda ipingi dokona yulu pii nalapape. Dee yuu ape ape pingi dokopape witi jingi lyingi dokopape yuu gii yanda ipingi dokona kamame pii narami.
EXO 34:22 Nakamame witi jingi kanda soo mupwa lyuo nyeraminyi dokopa wambu nenge nao nyuo malu palyingi doko yaki nyii nao minyaro karalapape. Karapala nakamana isa jingi poo relyamo lyuo anda kauwa dokona piso nenge nenge yuu gii doko minyuo karo pipwape.
EXO 34:23 Ee kana yaka lao yuu gii rema larapu nakamana akali dupwa peparaeme namba Kamongo doo Isaraele wambunya Anatu lakandarapu pinya.
EXO 34:24 Nambame nakamana lenge kambu dokona wambu rara dupwa pyao ralinyi nembaparono dokopa nakamana yuu doko konda pyuo andake ingyakaro. Dokopa nakama nenge nyuo malu palyuo naraminyi yuu gii rema dusipana mendemepe nakamana yuu doko nyuo isa palyuo anamasi minya narami ingilyamo.
EXO 34:25 Namba mena pyao kiso jeraminyi dokopa nakamame borete isi pyambwange doko role pyao kisa nalapape. Dee Pasopa Nenge Nenge yuu gii dokona mena pyao kisaraminyi dokona mena injisipi rakya yangamana lao mende reta nalapape.
EXO 34:26 Dokona ee kana yaka lao witi jingi mupwa kanda soo lyeraminyi dupwa Kamongona anda dokona minyuo ipupwape. Dee mena sipisipi ikyanepe mena meme ikyanepe kisaraminyi dupwa endanginya anju ipwange kamuo nyepala pyambuo kisa nalapape, leya.
EXO 34:27 Lapala Kamongo dokome Mosese lamaiyuo, Pii dasipame nambame embape Isaraele wambupi pipya kana minyuo lalu lao leto dokoŋo pyao retape, leya.
EXO 34:28 Dokopa kukwa yuu gii akalisa kisimako korakama yuu gii akalisa kisimako dusipana Mosese baa nenge ipwape naa nao Anatupa role pyao kareyambi. Dokopa baame pii kana minyuo lalu lao lenge mawa pii akalisa dusipa kana para dolapona pyao reteya.
EXO 34:29 Mosese baa yuu kyau Sainai dokona karo mawa pii akalisa pyasi palenge kana para lama soo lupyuo peya. Peyamo dokopa baa Kamongopa pii lao kareyambinyi dokome banya lenge kambu doko yanga paupau leya. Leyamopape baa soo gisa naya.
EXO 34:30 Dopa piyamopa Eronemoo wambu dupwa pipya Mosesena lenge kambu doko yanga paupau lao lepo lepo piyamo doko kandapala nakama repeta panya pakayami.
EXO 34:31 Dopa piyamopape Mosese nakama kee leya. Leyamo dokopa Eronemoo Isaraele wambunya akali mupwa dupwa pipya baa kareyamo dokona peyami. Peyaminyipa Moseseme nakama pii lamaiya.
EXO 34:32 Enakana dokopa wambu peparae Mosese kareyamo dokona sukusa sukusa pyuo epeyami. Dopa piyaminyipa Kamongome yuu kyau Sainai dokona mawa pii maiyamo dupwa peparae wambu dupwa lamaiya.
EXO 34:33 Mosese baame wambu dupwa pii lamaiyuo otapala dokopa komau mendeme banya lenge kambu doko yambe piya.
EXO 34:34 Yuu lapo Mosese baa Kamongona komau anda dokona Kamongo pii lamaila papapu dokopa lenge kambunya komau yambe pingi doko neta nyingi. Dee baa kamanda epo dokopa Kamongome pii lamainya lao lamaingi dupwa peparae Isaraele wambu dupwa lamaipa pingi.
EXO 34:35 Dokopa wambu dupwame banya lenge kambu doko yanga paupau lao lepo lepo pilyamo kandenge. Dokopa banya komau dokome lenge kambu yambe pingi doko pyaro karelyamopa pao yuu gii mendepa Kamongo pii lamaila panya dokopa nyisa nyingi.
EXO 40:17 Nakama yuu Isipi yaki nyuo epapeyaminyi dokopa enakana ee kana lapona kana mupwa dokona yuu gii mupwa dokopa Kamongona komau anda doko kanda soo piyami.
EXO 40:18 Moseseme isa yuu dokona susa pyao isa retapala wangu dupwa isa pyano piya. Dopa pipala wangu dokona isa lapo palyiya. Palyapala komau anda dokona kambu dowa dokona isa pote lapo pyaneya.
EXO 40:19 Dopa pipala Kamongome pinya leyamuli pyuo baame komau anda doko komau mendeme wambo kaowapala dee enakana mendeme kamba lapo pyuo doko kao piya.
EXO 40:20 Kaowapala baame kana para dolapo nyepala Kana Minyuo Lalu Lao Lenge Pii Palenge Bokote dokona palyiya. Palyapala baame isa lama bokote pinjingi kingi minyingi dolapona pyambwapala bokote doko upi leya.
EXO 40:21 Upi lapala baame bokote doko minyuo pao komau anda dokona retapala komau mendeme nee pyuo yukunyi palyiya. Dopa piyamo doko baame Kamongome leyamuli pyuo Kana Minyuo Lalu Lao Lenge Pii Palenge Bokote doko yambe pyao reteya.
EXO 40:22 Baame misi anda komaumi wasisi dokona taepo doko komau yukwaro kareyamo dokona kamarena kingi kyairena reteya.
EXO 40:23 Kamongome leyamuli pyuo borete Kamongo kiso maingi dupwa taepo dokona ketae reteya.
EXO 40:24 Baame misi anda komaumi wasisi dokona lambe kisingi bange doko minyuo pao taepo kanda kanda kingi rolaerename reteya.
EXO 40:25 Retapala baame Kamongome leyamuli pyuo lambe dupwa Kamongona lenge kambu dokona kaiya.
EXO 40:26 Baame kana golome wasisi kana pyare lasi minyuo pao komau anda kambu konando penge dokona komau yukwaro kareyamo lenge kambusa andakare reteya.
EXO 40:27 Retapala Kamongome leyamuli pyuo rendamu kyaa keyange pingi bange dupwa dokona kisiya.
EXO 40:28 Komau anda kambu konandowame dokona komau doko yukunyi palyiya.
EXO 40:29 Doo komau yukuyamo dokona lenge kambusa kamarena mena pyao kiso maingi kana pyare lasi doko reteya. Reteyamo dokona baame Kamongome leyamuli pyuo mena pyao kiso maiyuo witi jingi dupwa kiso maiyuo piya.
EXO 40:30 Pipala mena pyao kiso maingi kana pyare dokope komau andape kanya dokona wate pingi disi warake doko retapala dokona ipwa kamuo simbuo reteya.
EXO 40:31 Kamongome lamaiyamuli pyuo Mosesemoo Eronemoo Erone banya ikinyingimoo yuu gii lapo nakama komau andape kana pyare lasi dokonape pena dokopa kingi kimbupi wate pipa pingi.
EXO 40:33 Komau anda dokope bange kiso maingi kana pyare dokope laparae nyuo sukusa palyuo kame awali lao piya. Pipala kambu konando penge dokona komau doko yukunyi palyiya. Dopa pipala Moseseme yulu peparae pyuo oteya.
EXO 40:34 Misi anda komaumi wasisi dokona kopa dokome epo yambe piya. Dokopa Anatunya yanga paupau lenge renge dokome leya leya piyamo dokome komau anda doko palyuo simbuya.
EXO 40:35 Dopa piyamosa Mosese komau anda dokona kolando paa naya.
EXO 40:36 Kopa komau anda dokona siyamo doko sipuro peyamo dokopa iki Isaraele wambu dupwa yuu paleyaminyi doko yaki nyuo yuu mendasa parapu paleyami.
EXO 40:37 Kopa doko mee dokona sulu siyamo dokopa nakama paleyaminyi yuu doko yaki nyuo paa nayami.
EXO 40:38 Yuu gii peparae korakama dokopa nakama kata papyuo kareyaminyi dokopa kopa dokome Kamongo karamo lao lasaka pyuo komau anda ketae siyamo doko kandeyami. Dee kukwa dokopa komau anda ketae isare rao kareyamo kandeyami.
LEV 16:1 Eronena ikinyingi dolapome Kamongona lenge kambu dokona isare kopetame kiso kareyambinyisa nakamba kumuyambinyipa enakana Kamongome Mosese pii lamaiya.
LEV 16:2 Dopa lamaiyuo, Embame yangone Erone lamaiyuo, Panda Kamame Poo Pyasi dokona namba kopa rakapana epo Kana Minyuo Lalu Lao Lenge Pii Palenge Bokote roma dokona ketae epengeŋe dokona yuu gii angi rolae dokopa iki komau andake yukwaro karamo dokona matarena baa epapa pinya lamairi. Daaŋa lapala larono dokona palyuo pii napala kamba lara ramo doko baa pyao kumakaro.
LEV 16:3 Wambo baame mena bulamakao kali dusa kanya kanyande wambunya koo dupwana kame sakaminya lao pyao kisakamyuo dee sipisipi kali doko isarena kiso mukunyi nembo maiyuo karapala dokopa Panda Kamame Poo Pyasi dokona sukusa para, leya.
LEV 16:4 Dokopa enakana Kamongome dopa pinya lamaiya. Erone baa andakare Panda Kamame Poo Pyasi dokona panya karo dokopa ipwame wate pipala purisinya komau dupwa nyuo wapwara. Komau rasisi mende wapupala dee komau keyange londe mende pee pipala dokona ketae marapu mendeme rambu lao wapu pipala komau mendeme kyawa dokona andu pinyi palyara.
LEV 16:5 Isaraele wambu peparaeme Erone mena meme kali lama wambunya koo dupwana lao pyao kiso mainyale lao maiyuo dee sipisipi kali mende isarena kiso mukinyi nembena lao maiyuo pirami.
LEV 16:6 Erone baame mena bulamakao mende banya rangena koo dupwanape banya ree palunya koo dupwanape lao pyao yangara.
LEV 16:7 Dokopa baame Kamongona komau anda kambu konandowame dokona mena meme kali lama nyepala minyuo para.
LEV 16:8 Baame kana lama nyepala mende Kamongonaŋa lao mende Asasele lengendenaŋa lao reto pipala kana dolapo kanda nao karo mende ipyuo nyera.
LEV 16:9 Ipyuo nyeramo dokopa mena meme Kamongonaŋa lao rombo palyaramo doko Eroneme wambunya koo dupwana lao pyao kisakamira.
LEV 16:10 Mena meme Asasele lengendenaŋa lao rombo palyaramo doko lenge rape rape Kamongo maipala yuu muiyane dokona Asasele keta mainyi nembara. Dopa piramo dokome wambunya koo dupwa nyuo nembakamira.
LEV 16:11 Erone baame banya ree palu dee baa rangepena koo dupwana lao bulamakao kalinde pyao kisakamyuo
LEV 16:12 dokopa isare pee nembenge kapa mendena isa lengya nyuo simbuo reto dee kingi kape laparaena kete pyao rendamu bange kyaa pingi mende nyuo pipala Panda Kamame Poo Pyasi dokona peparae minyuo para.
LEV 16:13 Papala dokopa Kamongona lenge kambu dokona bange rendamu pingi doko isarena retara. Retaramo dokopa rendamu pingi bange dokona sukwa dokome Kana Minyuo Lalu Lao Lenge Pii Palenge Bokote roma doko yambe pyara. Yambe pyaramo dokona Erone baame doko kandapala kuma nara.
LEV 16:14 Baame mena bulamakao kali dokona ranjama lapo nyepala kingi pambu dokome minyuo pyarenda lanyi bokote roma lenge kambusa pisara. Pisapala dee Kana Minyuo Lalu Lao Lenge Pii Palenge Bokote seramo dokona lenge kambusa yuu yanda ipingi nyepo ranjama dokome pyarendanyi pisara.
LEV 16:15 Pisapala baame mena memende wambunya koo dupwana lao pyapala dokona ranjama nyepala Panda Kamame Poo Pyasi dokona minyuo epo bulamakaona ranjama dokome wambo piyamuli pyuo baame bokote roma dokonape Kana Minyuo Lalu Lao Lenge Pii Palenge Bokote dokona lenge kambusa dokonape pyarendanyi pisara.
LEV 16:16 Yulu dopa piramo dokopa Panda Kamame Poo Pyasi doko pyuo elya pinyi retara. Isaraele wambu nakama keyange ingya nao Anatupa kamba koo lao kareyaminyisa banya Panda Kamame Poo Pyasi doko kokwa siyamisa piyamo dokona Eroneme baa dopako pira. Yuu paleyaminyi doko poo pyasi ingya napyamo sukusa dokona Anatunya komau anda karapyamosa Erone baame dopako pira.
LEV 16:17 Erone baame banya koope dee banya ree palunya koope Isaraele wambu peparaena koope dupwa nyuo kame sakaminya lao yulu piramo mange dokopa komau anda andakare dokona wambu mendepe pisa nara.
LEV 16:18 Dokopa baame Anatunya lao kana pyare lasi dokona kiso mukinyi nembo maingi doko elyape inginyi pyambuo para. Dopa pyuo dokopa mena bulamakao kalinya ranjamape dee memena ranjama lapo nyepala kana pyare pinjingi kisima siyamo dusipana raeyo reto pira.
LEV 16:19 Banya kingi pambu dokome ranjama doko nyepala kana pyare lasi dokona yuu yanda ipingi nyepo pyarenda lanyi pisara. Dopa piramo dokome Isaraele wambunya koo dupwame kana pyare lasi kokwa siyaminyi doko keyange inginyi pyambuo poo pyarasa pira.
LEV 16:20 Eroneme Panda Kamame Poo Pyasipi Kamongona komau anda panda wakalepe kana pyare lasipi dusipana mondo lao pyuo rolo otapala dokopa mena meme mende lenge rao Asaselena rombo palyisi doko kararamopa Kamongo keta minyuo epo maira.
LEV 16:21 Maipala banya kingi dolapo memena ayemba dokona ketae retaro karo Isaraele wambunya yulu koope kamba lao Anatu mata maiyuo yulu pingipi polo lamaiyuo memena ayemba keta pisara. Pisapala akali mendeme meme doko nyuo lanyuo neta para lao rombo palyiyami dokome yuu muiyane dokona meme mapanyi nembara.
LEV 16:22 Mena meme dokome Isaraele wambunya koo dupwa nyepala paleta wambu pali nange panda keroŋo mendena para.
LEV 16:23 Yulu doko pyuo otapala dokopa Erone baame Panda Kamame Poo Pyasi dorena kolandalana karo purisi komau wapuyamo dupwa Kamongona komau anda dokona papala roko neta nyuo retara.
LEV 16:24 Retapala baame yuu poo pyasi dokona wate pipala rangena komau doko nyuo wapupala pao baa rangenape dee wambu dupwanape koo dupwana lao mena isarena kiso mukinyi nembara.
LEV 16:25 Baame kana pyare lasi dokona wambunya koo dupwana lao mena pyao kiso maiyamo dokona kapa rukisi dupwa kisakamira.
LEV 16:26 Akali mena meme Asaselena lao yuu muiyane dokona mapanyi nembala peyamo doko pao yuu paleyami dokona epana dokopa komau yanengepe wambo wate pipala sukusa kolando epara.
LEV 16:27 Purisi dokome mena bulamakao kali dee memepe dolapona ranjama nyepala lanyuo Panda Kamame Poo Pyasi dokona koo dupwana nyuo kame soo nembakana lao minyuo kolandeya. Bulamakaope memepe dolapona yanenge ingi minjupi dupwa peparae yuu kame netarena minyuo papala kisinyi nembara.
LEV 16:28 Akali kisinyi nembaramo doko yuu paliraminyi dokona kapu kyuo sukusa epana dokopa yanenge komaupi wate pipala epara, leya.
LEV 16:29 Nakamame yuu gii doko kame see napala minyuo karalu kararami. Kana yanda ipingi dokona yuu gii akalisa dokopa Isaraele wambu rangepe dee karala papingi dupwa nakama role pyao palaminyi dupwape nenge wasaka pyuo yulu minyanda nao mee pisirami.
LEV 16:30 Yuu gii dokopa purisi dokome yulu Kamongome pinya leyamuli pyuo piramopa Kamongome nakamana koo dupwa nyuo kame sakaramopa elyape ingyuo kararami.
LEV 16:31 Yuu gii doko ama poo pyasi ingyuo sera. Dokopa nakamame nenge wasaka pyuo yulu pii nao mee imambu soo pisirami ingilyamo. Yuu peparae mawa pii dapwa minyuo kararami.
LEV 16:32 Akali mendeme purisi mupwana yulu pyuo karalana rakangena panda nyeramo doko nakamame rolae pyuo rombo palyuo baa Anatunya yulu iki lili pyuo pinya lao larami. Laraminyi dokopa baame wambunya koo dupwa nyuo kame sakamira lao Anatumi leyamuli pyuo pira. Dopa pyuo pinya piso dokopa purisimi komau wapungi doko nyuo pee pipala
LEV 16:33 Panda Kamame Poo Pyasipi Kamongona komau anda panda wakalepe kana pyare lasipi purisi akalipi Isaraele wambu peparaepe Anatunya lenge kambu dokona poo pyasi ingyuo sera lao koo dupwa nyuo nembakamira.
LEV 16:34 Yulu dopale dokopa yuu peparae kaeya nao pipa pyuo kararami. Purisi mupwa baame ee kana yaka lao Isaraele wambu dupwana koo dupwa nyuo kame sakamyuo Anatunya lenge kambu dokona rolae ingyuo petena lao pipa pira, leya. Dokona Kamongome leyamuli pyuo Moseseme piya.
LEV 19:1 Kamongome Mosese Isaraele wambu dupwa lamainya lao lamaiyuo,
LEV 19:2 Namba nakamana Kamongo Anatu poo pyasi karo dokona lao nakama poo pyasi karalapape, leya.
LEV 19:3 Nakama mendaki mendaki lao suu pingi dokona embena endangi rakangepa dolapo angingyuo karambinyi lao rape rape lao suu pyaro karalapape. Karapala nambame leyonoli pyuo koro petenge gii doko minyaro karalapape. Namba Kamongo doko nakamana Anatuŋu karo.
LEV 19:4 Namba kame soo yaki nyuo kingimi wasisi dupwa anatuŋu lao mona nyii nalapape. Mee kapa pyakepasi dupwame kiso wambu ingyuo wasapala anatuŋu lao lakanda nalapape. Namba Kamongo doko nakamana Anatu doko namba karo kande.
LEV 19:5 Nakama mona mendare palyuo yalya kando karo mena pyao kisaraminyi dokopa mawa pii lapo langyuo kandapi dupwa minyuo suu pyao kisarami ramo dokopa mona yuu lao nyero.
LEV 19:6 Minju angi dupwa pyao kisaraminyi yuu gii dokopape panda dokona yangamape dolapona iki napala yuu gii repo pyuo siya kande dupwa naa nao mee kisinyi nembarami.
LEV 19:7 Mena yuu repona seramo doko poo pyasi ingya naramosa mendeme napala banya kiso jipyamo doko nyakami nao kaeyaro.
LEV 19:8 Daaŋa lapala enda akalipi mendeme yuu repo pyuo seramo doko nao lara ramo dokopa bange nambapa lao kiso jisi doko pao mee inginyi pyambuo pirasa pira. Dokona lao baa mee nambana wambuko ingyuo kara nana lao raka lanyi nembaro.
LEV 19:9 Nakamana ee dokona witi jingi wambu piyamopa pyakepo manjo kande dokopa kame nemba nembasa petamo dupwa petena kaeyalapape. Dee lapo suku dupwana kalyinyi palyiyami kande dupwa dee pao pyakepo manjo nyii nalapape.
LEV 19:10 Nakamana isa girapo ee dokona jingi lyiyami kande dokopa kana pope dee lapo isapasipi dupwa dee nyela paa nalapape. Pendewa wambu dee wambu wakale lapo nakamana yuunya epo petenge dupwana ingyuo sakaminya kaeyalapape. Namba Kamongo doko nakamana Anatu ingyuo karapunu pilyamo.
LEV 19:11 Nakama mendena waa naa nao mendena bange doko pii panga soo nyakami nao dee kyambo pii laa nao pipwape.
LEV 19:12 Wambu mendali kando kinyi lapunu pilyamo lao sinya lapala nambana kingi lapala lamaiyami kande doko dee alowa pii nalapape. Lapala kaeyarami ramo doko seramo dokome nambana kingi doko uki minyuo lara ingyasara. Namba Kamongo doko nakamana Anatuŋu karo.
LEV 19:13 Nakamame mendalinya bange dupwa waa nyakamyuo pyao koo keta palya nalapape. Akali mendeme embena yulu pyakanya lao nyii kande dokopa yuu gii rolae dokopa banya yole maiyakamipi. Rakya jimwa lao reto yuu mendeko yanga napipi.
LEV 19:14 Wambu lenge koo dupwa lukumao simili lao bange lapo pao wambo reto kalepoe dupwa kando pii langa lao pii nalapape. Namba Kamongo doko nakamana Anatuŋu karo dokome nakama namba mupwa lao suu pyao pako karalapape.
LEV 19:15 Nakamame kote mende siyami kande dokopa kinyi lao rolae pyuo lakamipape. Nakamame wambu koo dupwa nyisaramisa kote pii doko mee wini lasarami doko kaeyalapape. Dopako pyuo wambu lapo kingi lengepe dee namba petengepe mupwa ingyuowale kandale lao pako mona manjipala mee nyisaramisa kote doko mee wini lasarami doko ama daa.
LEV 19:16 Wambu mendena lao wakale dupwa kyambo lamaiya nalapape. Wambu mende moŋo andake nyeramopa kote lakamiraminyipa embena piimi nyisare kata siya kande dokona nyisape. Namba nakamana Kamongo karapunu pilyamo.
LEV 19:17 Embena andare mendeme emba keta kopetame pyuo pisiya kande doko baapa lao imbu singi doko suu pyanyi pyano kara napipi. Dopa pyuo koo doko emba keta manjo kara narowale lao suu pyao baapa isa piso lao rolapala dokopa banya lao koo mende pii naresa pira.
LEV 19:18 Embame koo dokona isingi yano nyelana suu pyaa nao dee koo embapa piramo wambu dokopa imbu paleta kara nao pipi. Emba rangena yongo mona nyuo karene doko suu pyao parali maki palenge wambu dupwa mona reto karape. Namba Kamongo doko karo.
LEV 19:19 Nambana mawa pii letamuli pyuo minyalapape. Nakamana mena bulamakao dupwa mena rara wakale dupwa pipya pyaso kepo pyuo yakane manja kaena dee waingi rara lama minyuo pyaso ee mendakinya wara pii nalapape. Komau eleko rara lamame pyaso wapu nalapape.
LEV 19:20 Akali mendeme banya kendemande wanake doko akali mendena kalya pyuo mairamo doko yapa nara ramo doko akali kalya pyakamira dokopa yuu lapo role pyao palirambi ramo pyao kuma nao mee kote serami. Renge doko wanake baa akali banya mee kendemande pyuo pisirako.
LEV 19:21 Dokona lao nyerambinyi akali baame sipisipi kali mende namba Kamongona komau anda kambu kolandowame dokona banya koo pipu dokona lao pyao kisala epenale.
LEV 19:22 Koo Anatu baapa ingyuo piyamo doko nyuo nembakana lao purisi akalimi mena sipisipi pyao kisaramo dokopa Anatumi nyuo kame sakamira.
LEV 19:23 Nakama yuu Kenane epo kando nyepala dokopa jingi lyingi isa rara dupwa wara piyami kande dokopa koo ingyasaraŋa ee kana remana naa nao wasaka pyuo kararami.
LEV 19:24 Ee kana kisima doko epeya kande dokopa ee isa jingi dupwa peparae lyepala namba keta joo nambana kingi ketae pyambuli lao piramisa pira.
LEV 19:25 Dopa piraminyipape ee kana kingi paki dokopa kanda soo isa jingi lyuo narami. Nakama dopale pirami ramo dokopa isa jingi lyuo kakana pira. Namba nakamana Kamongo Anatuŋu karo.
LEV 19:26 Minju lapo ranjama paleta siya kande doko naa nalapape. Pipu mauli ropaka kemalipi kingi lenge dokona mendepe nakamame minyalyuo pyuo laa narami.
LEV 19:27 Nakamana kyawa wangupi angasi pinjingi dupwape pyakepowape pisarami doko daaŋa leto.
LEV 19:28 Nakama yongo kamu kepaope dee enda akalipi mende kumuyami kande dokopa yanenge kunjowape pii narami. Namba doko Kamongo karapunu pilyamo.
LEV 19:29 Nakamame nakamana wanene dupwa mee bange anatuŋu lenge tembole anda dupwana kepo yulu pingi dokona pyuo petena lao maiya nalapape. Daaŋa lao maiyuo larami ramo dokopa namba yaki nyepala mee bange anatuŋu lao suu pingi doko mana nyeraminyipa nakamana yuu andape dupwa pamuku yulu dokome simbwara ingilyamo.
LEV 19:30 Koro petenge yuu gii doko yaki nyii napala misi lao namba lakandenge panda doko kyawa nyuo minyuo karalapape. Namba Kamongoŋo karo.
LEV 19:31 Nakamame wambu lapome wambu kumasinya imambu pipya ropaka piso singi dupwa keta papala ropaka piso sisaramiŋi doko daa leto. Dopale dupwana pao kale yuku soo pisirami ramo doko nambapa kopeta kapeta kwaeyo sera ingilyamo. Namba nakamana Kamongo Anatuŋu karo.
LEV 19:32 Nakamame endemo alemope dupwa angingyuo karaminyiŋi lao suu pyao rape rape lao karalapape. Namba Kamongo doko mupwaŋa lao suu pyapala pako karalapape.
LEV 19:33 Nakamame yuu wakale wambu karala papingi nakamana yuu palaminyi dupwa kando kopetame pyuo randa mai nalapape.
LEV 19:34 Nakamana rara pipya yulu pyuo nenge rambo lao pilyaminyi doko suu pyaowako doloma pipya pipwape. Nakama range doko mona reto karaminyi suu pingi mendaki dokonako palyuo doloma mona retalapape. Nakama yuu wakale Isipi wambunya yuu dokona karala papingi ingyuo kareyami kande doko apiyakalende ingyuo kareyamape lao dokona suu pyalapape. Namba nakamana Kamongo Anatu dokome leto.
LEV 19:35 Mendeme nakamana bange mende ropo pyao nyelena epeya kande dokopa sikyali pyuo kandapala kuki andake lao nyuo makande pirami dokopa kyambo mendena palyapala uli pili laa nalapape.
LEV 19:36 Kandokondali pyuo angi dokona sikyali pyuo nyuo makande pyuo kapa kapa ingyuowape lao kenda bange peparae rolae dokona sikyali pipwape. Renge dokona namba nakamana Kamongo Anatuŋu karo. Nakama Isipi dokona kareyaminyipa nambame nyuo lanyuo dae epeyo kande dokome karo lapunu pilyamo.
LEV 19:37 Namba Kamongo dokome mawa piipi mana pii dupwape jiyu kande dupwa poraiyuo minyuo karalapape.
LEV 23:1 Kamongome Mosese lamaiyuo,
LEV 23:2 Isaraele wambu dupwa yuu gii mupwa Anatunya kingi ketae minyalyuo lao elyambu pyuo nenge nao misi andake lao kararaminyi dokopa apa pyuo kararami lao lamaiya.
LEV 23:3 Yuu pakinyamange dusipa nakamana ingyuo silyamoŋo dusipana yulu pirami. Yanda ipingi dokopa imambu soo pisirama lao suu pyalapape. Yuu gii dokona yulu pii napala elyambu pyuo misi lao pisirami. Yuu anja lapona karare dokona pii mende daa. Koro petenge yuu gii doko namba Kamongona ingyuo silyamo.
LEV 23:4 Dakepa nambana yuu gii andake dusipana wambu peparae nyuo malu palyuo misi lena lao lao retelyo. Yuu gii angi rolae doko pyaka seramo dokopa embame wambu dupwa dopa pinya dopa pinya lao lamairi.
LEV 23:5 Kamongo kingi ketae pyambuo nenge Pasopa Nenge doko kana mupwa yuu gii akalisa ipisu kisima dokona neta anda penge dokopa pyaka sepa pingi.
LEV 23:6 Kana dokona yuu gii akalisa ipisu kingi paki dokopa borete isi pyambwa nao nenge yuu gii doko pyaka sepa pingi. Pyaka sepa piramo dokopa nakama borete isi pyambwange doko naa narami.
LEV 23:7 Yuu gii mupwa dokopa nakama yuu peparae yulu pinginyili pyuo pii napala nambana kingi iki suu pyao lakando pisirami.
LEV 23:8 Yuu yanda ipingi nyepo Anatu baa nenge kiso mairami. Yuu gii yanda ipingi dokona nakamana nenge nenge yulu dupwana mende minyanda napala misi lao mee pisirami.
LEV 23:9 Nakama Kamongome yuu jipyamo dokona epapala dokopa witi eepe wara pyuo manjo nyiyami kande dokopa wambo kyawa nyuo puu pyarami doko purisi akali dupwa mairami.
LEV 23:11 Koro petenge yuu gii dokopa yangamana Kamongome nakama kando rolae petaminyi lao soo nyinyaleŋe purisi dokome witi yama doko Kamongo maiyakara.
LEV 23:12 Yuu gii witi jeraminyi dokopako nakamame mena sipisipi kali yakane ee kana mendaki pasi yanenge kwaeyo rete pyuowape pii nange mende namba joo isarena kiso sunjura pinyi nembarami.
LEV 23:13 Dokopa role pyapeta nenge reto jerami dokona ingyuo palawa kilokerame lama nyuo isa olipi ipwange pipya pyasapala kiso jerami. Dokona kyaa dokome Kamongo baa soo epe sera. Dokonako ingyuo waene ipwange sanapenge kuki mendakinya (lita mendaki) minyuo konda pyuo jerami.
LEV 23:14 Nakamame Anatu bange ene maipa napala dokopa witi wambo wambu pingi dupwana kyakape kisasipi witimi wasisi boretepe dupwana mendepe naa narami. Naa naraminyi doko nakamana para pyasi wambu dupwame ee kana peparae dopako pyulu pyuo kararami.
LEV 23:15 Koro petenge yuu gii dokopa yangamana witi jingi yama mende namba jepala dokopa koro yanda ipingi ingilyape lao yaka lao kararami.
LEV 23:16 Koro yanda ipingi paparamopa dee yangama (yuu gii 50) dokopa namba Kamongo doko witi enenge lapo jerami.
LEV 23:17 Ree palu mendaki mendaki laome borete lama lama lao minyuo epo bange angi jilyamanoŋo lao soo jerami. Palawa kilokerame lama nyepala isi kuki pyambuo borete mendaki mendaki lao waso kisapala nakamame witi wambo wambu piyamo jiyaminyili pyuo namba Kamongo dokona lao jerami.
LEV 23:18 Bange lapo opetae konda pyuo kiso jepenge. Nakamame sipisipi yakane yanda ipingi nyepo ee kana mendaki pasipi bulamakao kali mendaki meme lamape pyao jerami. Mena mumba palyuo yanyi nyuo pisi dupwa jii narami. Bange dusipa Kamongo keta minyuo epo isareme kiso sunjura pinyi nembo jerami. Joo karo dokopa waene witipi opetae dokona konda pyuo jerami. Dokona kyaa dokome namba Kamongo dokome epe soo kararo.
LEV 23:19 Mena meme kali mendeme koo dupwana lao pyao kiso dee sipisipi yakane kali ee kana mendaki pasi lama nyuo pipala mona mendaki palyuo yalya kando karalana lao jerami.
LEV 23:20 Purisi dokome boretepe mena sipisipi yakane lamape namba Kamongo doko purisi dupwana lao jilyuŋu lao jera. Jeramo bange dusipa poo pyasi ingyuo para.
LEV 23:21 Yuu gii dokopa nakamana nenge nenge yulu dupwana mende minyanda napala misi lao mee pisirami. Pisiraminyi dokopa nakamana para pyasi wambu dupwame yuu muu dupwana karo yaka lao dopako pyulu pyuo pyuo kararami.
LEV 23:22 Nakamana ee dokona witi jingi wambu piyamopa pyakepo manjo kande dokopa kame nemba nembasa petamo dupwa petena kaeyalapape. Dee lapo suku dupwana kalyinyi palyiyami kande dupwa dee pao pyakepo manjo nyii nalapape. Pendewa wambu dee wambu wakale lapo nakamana yuunya epo petenge dupwana ingyuo sakaminya kaeyalapape. Kamongo doko nakamana Anatuŋu.
LEV 23:23 Kamongome Mosese kando lao,
LEV 23:24 Kana yanda ipingi dokona yuu gii mupwa dokopa yuu gii angingyuo imambu soo mee pisirami. Dopa pyuo pisiraminyipa bikuli pii laramo dokopa misi lala epo nyuo malu palyarami.
LEV 23:25 Dokopa nakamana nenge nenge yulu dupwana mendepe pii napala namba Kamongo doko nenge kiso jerami, leya.
LEV 23:26 Kamongome Mosese dopa lamaiya. Kana yanda ipingi nyepo dokona yuu gii akalisa dokopa bange lapo wambunya koo dupwana nyuo kame sakaminya lao jerami. Yuu gii dokopa nenge wasaka pyuo misi iki kingi wapambupi lakao pisipala namba Kamongo nenge kiso jerami.
LEV 23:28 Namba nakamana Kamongo Anatu dokome nakamana koo dupwa nyuo kame sakara lao nakama yulu pii nao mee kararami.
LEV 23:29 Daaŋa lapala nakama wambu dupwana mendeme yuu gii dokopa nenge nara ramo doko baa nambana wambu ingyuo kara nara.
LEV 23:30 Mendeme yuu gii dokona yulu pyuo lara ramo doko namba Kamongo rangeme baa pyao kumasero.
LEV 23:31 Mawa pii dake nakamana para pyao parami dupwane ingyara. Yuu anjale palyuo kararami dokona pii mende daa.
LEV 23:32 Imambu singi yuu gii angingyuo suu pyao karo yuu gii mange mendaki neta yapao sii piramo dokona piso pao yuu gii akalisana dee neta yalu piramo dokopa nenge kuki injisi mendepe naa narami, leya.
LEV 23:33 Kamongome Mosese kando pii dapa lao Isaraele wambu dupwa lamainya leya.
LEV 23:34 Kana yanda ipingi dokona yuu gii akalisa ipisu kingi paki dokopa anda kauwana nenge nenge yuu gii doko pyaka sera. Pyaka sepala yuu yanda ipingi dusipana mee sooko para.
LEV 23:35 Koro dakena yuu gii mupwa dokopa nakama rangena yulu yaki nyepala nyuo malu palyuo namba lakando misi lao pisirami.
LEV 23:36 Koro dakena yuu gii yaka lao nakamame namba nenge kiso jerami. Jepala yuu gii mange lama karo dokona kamba epo nyuo malu palyuo lakando piso nenge kiso jerami. Yuu gii doko mee misi iki lao piso yulu pii narami.
LEV 23:37 Yuu gii andake dusipana nakama malu palyuo piso namba lakando nenge kiso joo bange kiso sunjura pinyi nembo witipi waenepe joo mena pyao kiso joo nambame nakama yuu peparae dopa pipwape dapa pipwape lao langiyunuli pyuo piraminyi dokopa nambana kingi ketae pyambuo kararaminyisa pira.
LEV 23:38 Nakamame koro petenge yuu gii dokopa imambu soo nambana lao suu pyao piso bange maipa pyuope bange joo pii lalu lao lasi dupwana manda manjo paramo dupwa joope dee range lapo maso jimwali lao suu pyao kararaminyipape nakama yuu gii andake dasipa opetae poraiyuo minyuo misi lao bange joo kararami.
LEV 23:39 Nakamana ee dokona nenge manjo nyuo otapala dokopa kana yanda ipingi dokona yuu gii akalisa ipisu kingi paki dokopa nyuo malu palyuo yuu gii yanda ipingi nyepo nambame langiyunuli pyuo pyuo pisirami. Yuu gii dusipana yuu gii mupwa doko angingyuo imambu soo pisirami.
LEV 23:40 Nakamame yuu gii mupwa dokona nakamana isa jingi lyingi dupwana lyuo nyuo dee yala isa wangyape isa yoko malu mandenge wangya dupwape lakyuo nyuo pipala yuu gii yanda ipingi nyepo nakamana Kamongo Anatu dokona lenge kambu dokona baapa lao ketae nembo rae maiyuo pisirami.
LEV 23:41 Kana yanda ipingi dokona yuu gii yanda ipingi nyero yuu gii mupwa ingyuo nambanaŋa lao retarami. Nakamana para pyasi wambu dupwame ee kana peparae dopako pyulu pyuo pyuo parami.
LEV 23:42 Nakama Isaraele enda akalipi dupwa anda kauwa dupwana yuu yanda ipingi nyepo palyuo kararami.
LEV 23:43 Dokona lao nakamana para pyasi dupwame nakama dopa pyuo palyuo kararaminyi kandapala dokopa Kamongo dokome Isaraele wambu yuu Isipi dokona kareyaminyi dupwa nyuo lanyuo epeyamopa nakama anda kauwa dupwana palena leyaŋa lao soo nyerami. Baa nakamana Kamongo Anatu.
LEV 23:44 Dopako pyuo Moseseme Isaraele wambu dupwa yuu gii andake dupwa apa pyuo minyuo pyuo Kamongona kingi ketae palena lao pyuo kararami lao lamaiya.
NUM 6:22 Kamongome Mosese kando dopa lamaiyuo, Eronemoo banya ikinyingi dusipape
NUM 6:23 Isaraele wambu dupwa nyuo elyape keta pisinya lao pii dapakale lena lamairi, leya.
NUM 6:24 Kamongome nakama nyuo elyape keta piso isaro pyuo pinya.
NUM 6:25 Kamongo baame anjiki pyuo ipyapala mona keyange palyuo nakama keta pyakao karena.
NUM 6:26 Kamongome nakama kando rae maiyuo poraiyuo suu pyao nakama mona kyuu lao singi renge doko jinya.
NUM 6:27 Kamongome dopa lao, Mendeme nambana kingi lao Isaraele wambu dupwa elyape keta pisinya lao ateŋa larami ramo dokopa nambame nakama nyuo elyape keta pisaroko, leya.
NUM 9:15 Kamongona komau anda doko piyaminyi yuu gii dokopa kopa dokome epo yambe piya. Kukwama dokopa kopa doko isare dopale ingiya.
NUM 9:17 Kopa doko soo minyalyuo neta peyamo dokopa Isaraele wambu dupwame nakamana komau anda wambu paleyaminyi dupwa lalyuo soo panda pao yuu mendasa kopa isa epeyamo dokona kamba komau anda dupwa pipwa piyami.
NUM 9:18 Kamongome nakamana komau anda dupwa lalyuo soo pena lao leyamuli pyuo piyami. Dopako pyuo baame komau anda dee pinya leyamo dokopa piyami. Kopa doko komau anda dokona ketae mee siyamo dokopa wambu dupwa mendasa paa nao yuu dokona mee palyuo kareyami.
NUM 9:19 Kopa doko komau anda dokona yuu gii malu mee sulu siya dokopa wambu dupwame Kamongo kando warombo sepala yuu mendasa paa nayami.
NUM 9:20 Yuu lapo kopa doko yuu gii kuki lama iki komau anda dokona ketae siya. Yuu peparae Kamongome leyamuli pyuo mee karo panda dee kata nyuo pao piyami.
NUM 9:21 Yuu lapo kopa doko kukwa piso sepala soo pao yangeya. Dee kopa doko minyalyuo peyamo dokopa aopa wambu dupwa kata nyuo peyami. Dopa pyuo korakama panda kukwa kopa doko minyalyuo peyamuli pyuo wambu dupwa kata nyuo papapu piyami.
NUM 9:22 Yuu gii lama panda kana mende kuma soo panda ee kana mende epo pao piyamopape kopa doko komau anda ketae mee sulu siyamo dokopa wambu dupwa yuu doko yaki nyuo mendasa paa nayami. Dopa piyamopape kopa doko sipuro peyamo dokopa wambu dupwa peyami.
NUM 9:23 Kamongome Mosese keta leyamo pii doko warombo sepala wambu dupwame komau anda pyuo dee lalyuo soo peyami.
NUM 10:33 Wambu dupwame yuu kyau poo pyasi mende kingi Sainai lenge doko yaki nyepala yuu gii rema nembo peyaminyi dokopa Kamongona Kana Minyuo Lalu Lao Lenge Pii Palenge Bokote doko soo wambako pao nakama paliraminyi yuu pandape lasaka pira lao koto peyami.
NUM 10:34 Nakama paliraminyi panda dorena papapu piyaminyi dokopa Kamongona kopa doko yangama pao alemanji sepapu piya.
NUM 10:35 Piyamo dokopa Kamongona Kana Minyuo Lalu Lao Lenge Pii Palenge Bokote doko soo panya kata nyuo peyaminyi dokopa Moseseme lao, Kamongo emba sipurape. Embena yanda pimwai dupwape dee wambu lapome emba kando awa nao epe kanda nao kareyami kande dupwa ralinyi nemba, leya.
NUM 10:36 Dopako pyuo Kamongona Kana Minyuo Lalu Lao Lenge Pii Palenge Bokote doko soo pao kaeyaminyi dokopa Moseseme lao, Kamongo Isaraele wambu malu mee dupwa keta kapu kyuo ipu, leya.
NUM 11:1 Wambu dupwame embone pisa nao randa nao karo Kamongo kando mumu lao kareyami. Kareyaminyi dokopa Kamongo baame pii doko sepala imbwuapala isare doko wambu dupwa keta rena lao pyambuya. Pyambuyamo dokopa isare dokome komau anda pyuo paleyaminyi yuu andape pinjingi pakirena reya.
NUM 11:2 Dokopa wambu dupwame Mosese kando nyisinya lao ee leyami. Leyaminyisa baame Kamongona kingi lao ateŋa leya dokopa isare doko kunjo isa peya.
NUM 11:3 Kamongona isare dokome nakama keta rao kareyamosa dokona yuu doko kingi Tapera leyami. (Kingi Tapera doko Ipuru pii isareme renge dopale lenge.)
NUM 11:4 Yuu wakale range wambu lapo Isaraele wambu dupwa pipya role pyao peyaminyi dupwame minju ama namane lao suu piyami. Suu piyaminyi dokona Isaraele wambu nakama range mumu lao karo, Namwa iki minju lapo sipyali doko namwa kapa karamwali, leyami.
NUM 11:5 Lapala namwa yuu Isipi dokona karo kau oma naramanuli pyuo nao karenge. Nao karenge doko namwa mendeme ropo pyao naa nange. Namwa yuu Isipi dokona ropetape pambekinipi ananepe nenge dopale lapope neyama kande.
NUM 11:6 Dopa piyamanopape epapu namwana porai doko isa pao kapa ingya nao petamano. Yuu yangara kwuara piramo dokopa nenge myana dakeko silyamo. Doko iki nelyamano. Mendeme kapa narama mende see nalu nao nalyamo.
NUM 11:7 Myana doko ee waingi ama kuki dopale. Kala doko kwai kaulya kapa kaa renge dopale.
NUM 11:8 Kukwama pipya dokopa role pyapeta nenge myana dupwa wambu paleyaminyi dokona isa epeya. Yangama dokopa wambu dupwame nenge myana doko yapo nyepala waingi dupwa pyao injo palawa ingiyami. Dopa pipala kiso bolo pyapala nao nenge kake palawa dopale waso neyami. Dopa nenge borete olipi ipwange pyambuo kisilyaminyi rende pingi dopale ingiya.
NUM 11:10 Wambu dupwa nakama liti pira liti pira pyuo kaparo karo komau anda kambu konandowame dupwana mumu leyaminyi pii doko Mosese siya. Siyamo dokopa Kamongome wambu dupwa kando imbwayamo dokona Mosese soo yamaranguya.
NUM 11:11 Yamarangupala Mosese baame kamongo kando dopa lao piso soo, Akipamo embame namba keta randa jilisi? Akipamo embame namba kando rae mai nalese? Akipamo embame namba wambu dapwa rapu pyakao karape, leese?
NUM 11:12 Nambame wambu dupwa pyuo wasa nao dee manjo minyuo pyuo epa nayo. Nakamana rora ambasupi dupwa kando embame yuu enenge mairu lao lalu lao leene dokona akipamo embame namba endangi dupwame nyaŋa kingi kalengena reto kupyuo papingi dopale ingyuo nakama lanyuo yuu dokona puu leese?
NUM 11:13 Wambu dapwa kapa narami lao nambame anjarae minju nyerose? Nakamana minju dokona lao piso sepa sepa pyuo jii jii letaminyi.
NUM 11:14 Namba rangeme iki wambu dupwa kapa pyuo rapu pii naro ingilyamo. Kenda doko nambame kapa pyuo piru ingya nalyamo.
NUM 11:15 Embame namba kando dopa piri ramo doko embame namba sakao karapala pyao kumakare. Dokopa kenda namba keta jiinyi dupwa dee nyii nalu naro, leya.
NUM 11:16 Kamongome Mosese lamaiyuo, Wambu dupwame akali lapo mupwa ingyuo karaminyi lao suu pilyaminyi dupwana akalisa yanda ipingi nyepo dupwa nyuo malu palyapala nambana komau anda dokona namba keta lanyuo epare. Epapala nakama emba kararene dorenako karena lamairi.
NUM 11:17 Namba isa epapala dokona nakama pipya pii langiru. Dee nambame Imambunya porainya renge nambame emba jiyunu dupwana lapo nyuo nakama mairu. Dokopa akali dupwame emba nyiso wambu dupwa rapu pyuo yulu pyakamiraminyi dokopa embame iki yulu pii nare.
NUM 11:18 Dakepa wambu dupwa lamai. Rakya nakama minju naraminyi dokona nakama rapa rapa pyuo ama poo pyasi wakasa ingyuo karalapape. Nakama minju lapo opetae namwali lao lao dee yuu Isipi dokona mondo lao kareyamaŋa lapala mumu leyaminyi doko Kamongome siya. Sepala epapu Kamongome minju dupwa nakama jeramo dokopa narami.
NUM 11:19 Nakama yuu gii mendaki panda lama panda kingi paki panda akalisa panda akalisa lama dopakale iki nao kara narambi.
NUM 11:20 Dopa piramopape kana mendaki nao otarami. Yuu gii dokopa nakamana kale kata dokona nenge myana neta eparamopa nalana rae mai narami. Kamongo nakama keta dae karapyamo doko kame soo mata maiyuo karo baa kando mumu lao namwa yuu Isipi yaki nyii namwali doko kapa ingyapyali leyaminyi dokona dopako pira, leya.
NUM 11:21 Leyamo dokopa Mosese baame Kamongo lamaiyuo, Nambame wambu ama malu mee (600,000) dupwa lanyuo pelyonopape embame lao, Kana mendaki dokona minju kapa narami lao mairu lapi.
NUM 11:22 Wambu dupwa kapa sikya pyuo narami lao mena bulamakao sipisipipi pyao kapa mairamisi? Ipwa kota dokona kau oma silyamo dupwa peparae nyimili nakama kapa sikya pyuo namilisi? leya.
NUM 11:23 Kamongome isingi lao, Mendeme nambana porainya renge doko kata lyokwarase? Namba lalono doko pyaka soo pira panda pii nara lao repeta kandarami, leya.
NUM 11:24 Dokopa Mosese baa neta papala Anatumi lamaiyamo dupwa wambu dupwa lamaipala baame akali mupwa akalisa yanda ipingi nyepo dusipa banya komau anda nemba nemba roya karena lao lamaiya.
NUM 11:25 Yuu gii dokopa Kamongo kopa rakapana isa epapala baa pii lamaiya. Baame Imambunya porainya renge lapo Mosese maiyamo dokona nyepala akali mupwa akalisa yanda ipingi nyepo dusipa maiya. Imambu doko nakama keta epeyamo dokopa nakamame pii andake lao poropeta akali lengenyili pyuo leyami. Leyaminyipape waiya lao oteya.
NUM 11:26 Akali mupwa akalisa yanda ipingi nyepo dupwana akali lama nakambana kingi Elitate Mitate lenge dolapo Kamongona komau anda dokona paa napala paleyaminyi yuu dokona mee kareyambi. Kareyambinyi dokopa Imambu doko nakamba keta epo maralyiya dokopa poropeta ingyuo pii andake lao kareyambi.
NUM 11:27 Dokopa wane parange mende Mosese kareyamo dokona makando papala Elitate Mitatepa pelambinyi lao lamaiya.
NUM 11:28 Nanena ikinyingi akali Josua lenge wane parange karo pao Mosese nyiso kareyamo dokome Mosese kando pii lamaiyuo lao, Nambana akali mupwa nakamba kaena lape, leya.
NUM 11:29 Leyamo dokopa Moseseme isingi lao, Embame nambana lao poraiyuo suu pilisi? Nambame Kamongo dokome banya wambu peparae poropeta ingyuo pii andake larami lao nakama keta banya Imambu doko maipyali yaka lao suu pilyu, leya.
NUM 11:30 Lapala Mosese baamoo akali akalisa yanda ipingi nyepo dusipape komau anda paleyaminyi dokona dee kapu kyuo peyami.
NUM 11:31 Dokopa aopa Kamongome porambaiye doko ipwa kota pete repeta piso minyiyamosa yaka kewale lenge kiwaki dopale soo epeyami. Soo ketae epo pai koe minyiya. Dopa piyamo dokopa yuu paleyaminyi dokona isa epo piso yuu wangu paki pakipi dupwana kuki nanesale peyami.
NUM 11:32 Yuu gii dokopa piso yangama pao kukwape dee yangama dokope wambu peparae yaka kewale yapo nyuo kareyami. Wambu mendaki mendaki lao yaka kewale dupwa kilokerame taosande mendaki (1,000) sikyali dopale nyiyami. Nakama paleyaminyi yuu dokona awali lao yaka kewale dupwa oo lena lao raeyo neta pyao reteyami.
NUM 11:33 Nakama yaka minju malu mee kapa naramili lao mee siyamopa Kamongome wambu dupwa kando imbwaya. Imbwuapala nakama keta sukusa anga pingi renge andake mende maiya.
NUM 11:34 Wambu dupwame minju namwali lao suu piyaminyi dupwa dokona malu piyaminyi dokome yuu doko kingi Minju Nyuo Napuli Lao Suu Pingi Malu Pingi Yuu doko, leyami.
NUM 11:35 Dokona piso wambu dupwa yuu Aseroti dokona papala komau anda pyuo paleyami.
NUM 12:1 Mosese baame Kusi enda mende nyiyamo dokona Miriamepa Eronepame Mosese kando iso leyambi.
NUM 12:2 Lapala nakamba dopa lao piso soo, Kamongome Mosese keta iki pii lamaipyase? Baame nambwa keta dopako pyuo pii lamai napyase? leyami. Leyambinyi pii doko Kamongome siya.
NUM 12:3 Mosese baa akali ama inyimungu karenge. Yuu muu peparaena baa yale mendali daa.
NUM 12:4 Dokopa aopa Kamongome Mosese Miriame Eronemoo dopa lamaiyuo, Nakama rema dusipa nambana komau anda dokona imili lao suu pilyu, leya.
NUM 12:5 Dokopa nakama peyami dokopa Kamongo doko kopa rau londe siyamo dokona rakapana isa epo komau anda dokona kambu konandowame karapala pii lao Erone Miriamepa kyakale leya. Kyakale leyamo dokopa nakamba repeta peyambi.
NUM 12:6 Peyambinyi dokopa Kamongome lamaiyuo, Epapu nambana pii doko selapape. Poropeta dupwa nakamba pipya karenge dokopa namba rangeme nakama keta pano epo repa repa pyuo dee kombeyame pii lamaiyuo pingi.
NUM 12:7 Dopa pilyunupape nambame nambana kendemande akali Mosese pii lamaingi doko wakaleko. Nambame Isaraele wambu dupwa peparae baa keta maiyuo rapu pingi mupwa ingyuo nakama rapu pyuo karena leyo.
NUM 12:8 Dokona lao nambame baa rolae lenge kambu kando pii lamaiyuo kongwalu palyuo lamai nao angi rolae lamaingi. Dokopa baame nambana yanga paupau lenge renge doko angi kandenge. Apa pyuo nakambame paka nao nambana kendemande akali Mosese yanda pimwaiyuo pii lambisi? leya.
NUM 13:1 Kamongome Mosese lamaiyuo,
NUM 13:2 Rara akalisa ipisu lama dokona akali mupwa mendaki mendaki lao rombo palyuo nyepala yuu Kenane nambame Isaraele wambu mailyu dokona apa pyuo silyape lao waa kando kandala pena lao mapanyi nemba, leya.
NUM 13:25 Yuu apa pyuo silyamo lao kando peyaminyipa yuu gii akalisa kisima nembo pao kandapala yuu Katese lenge yuu muiyane Patane dokona singi Mosese Eronemoo Isaraele wambu dupwa peparae pipya dokona kareyaminyi dokona kapu kyuo epeyami. Epapala nakama kandeyaminyi dupwa polo lamaiyuo dee isa jingi minyuo epeyaminyi dupwa lasaka pyuo piyami.
NUM 13:27 Akali dusipame Mosese lamaiyuo, Namwa yuu kandala pumwa kandape doko ama yuu amenge pingi keyange dokona nenge malu singi. Dokona isa jingi lapo minyuo imwa dupwa dae silyamo kandape, leyami.
NUM 13:28 Dopa pipyamopape yuu range wambu dupwa ama porai wakasapya. Nakamana taone andake dupwana kana kame awali lao palenge dokona mendeme sukusa panya saka nange. Dee yuu dokona namwame akali reeko Anakena para pyasi kareyaminyi dupwa kandeyama.
NUM 13:29 Amaleke rara dupwa yuu dokona donorena palenge. Iti Jepusi dee Amo rara dusipa yuu kyau pyalya pyana pingi dorena palenge. Dee Kenane rara dupwa ipwa kota Metitaraniane lenge repeta palyuo ipwa Jotane epo penge dorena palyuo pingi.
NUM 13:30 Wambu dupwame Mosese kando mumu leyamisa akali Kelepe lenge dokome mumu laa nao elya kalo karalapa. Namwa porayapala kapa winimi pirama dokona epapu namwame yuu doko pyao nyela parama ingilyamo, leya.
NUM 13:31 Dopa leyamopa akali Kelepe role pyao peyaminyi dupwa dopa leyami. Wambu ama porai wakasa namwa yale daa. Dokona namwame kapa pyuo nakama poraiyuo pyala paa narama.
NUM 13:32 Akali yuu waa kando kandala peyaminyi dusipame Isaraele wambu dupwa yuu dokona lao kyambo lamaiyuo, Yuu range wambu dupwame kapa nao palirami lao nenge angi mende yuu dokona anda nangepya. Dopako pyuo wambu peparae namwa kandeyamano dupwa londeko kareyami. Namwa akali Anakena para pyasi wambu ama reeko wakasa kareyaminyi kandeyama.
NUM 13:33 Dokona namwa goemba dopakale ingilyamo lao suu pyao dee nakamame namwa kandapala dopako pyuo suu pilyaminyi lao masiyama, leyami.
NUM 14:1 Kukwa dokopa wambu dupwa ee andake lao pii porakai leyami.
NUM 14:2 Wambu dupwa Mosese Eronepa kando mumu lao lao, Yuu Isipi dokonape panda yuu muiyane karamano dakenape kumuyamali doko kapa ingyapyali.
NUM 14:3 Akipamo Kamongo dokome namwa yuu dokona lanyuo pelyase? Yanda pyuo karo dokopa nakamame namwa pyao kumakarami. Pyao kumakapala nakamame namwana enda wanepe dupwa puu maiyuo nyerami. Yuu Isipi dokona kamba kapu kyuo parama ramo doko kapa ingyara, leyami.
NUM 14:4 Dokona lao nakama range mendeme mendali kando lao, Namwa range akali mupwa mende rombo palyapala yuu Isipi dokona dee kamba monale, leyami.
NUM 14:5 Leyaminyi dokopa Mosese Eronepa wambu kareyaminyi lenge kambu dokona pangu siyambi.
NUM 14:6 Nanena ikinyingi Josua lengepe Kelepe Jepuna ikinyingipi yuu dokona waa kando kandala peyambinyi dolapome kondome kumapala nakambana komau minyuo kanguyambi.
NUM 14:7 Kangupala dokopa wambu dupwa kando lamaiyuo, Namwa yuu kandala peyama kande doko ama keyange wakasa.
NUM 14:8 Dokona Kamongome namwa kando rae maira ramo doko baame namwa nyuo yuu dokona lanyuo papala yuu amenge pingi nenge malu andenge doko namwa jera.
NUM 14:9 Dokona Kamongo kando kamba lao apiyanda pii napala yuu range wambu dupwa kando paka nalapape. Paka nao namwame nakama kapa mee manda rasi pyao anamasi minyarama. Kamongo doko namwa keta karapyamo dokome nakamana mee bange anatu lao lakandenge dupwa nyuo anamasi minyiyamo dokona lao namwa paka nao karamana, leyambi.
NUM 14:10 Wambu yuu dokona palenge dupwa peparae kapa pyuo kaname pyao kumakamwalinya suu piyami. Dopa piyaminyipape aopa Kamongona komau anda ketae dorena Kamongona yanga paupau lenge renge dokome epo kendale piyamo dokopa kandeyami.
NUM 14:11 Kamongome Mosese lamaiyuo, Yuu gii akipare nembo wambu dupwame namba mata joo yaki nyuo kaeyaramisi? Wambu dupwa keta nambame yulu kanda nange dupwa pipunupape yuu gii akipare wambu dupwame mona kana poko namba kapa ingingi lao suu pyaa naramisi?
NUM 14:12 Nambame yanyi renge peyapala wambu dupwa pyaro. Dopa pirunupape nambame emba rakange kyawa inginyi pyambwaronopa rara enenge andake ingyuo dee porainya renge doko palyuo simbwaramopa rara wamba paleyami dupwa isa palyuo kararami, leya.
NUM 14:13 Dopa leyamo dokopa Mosese baame Kamongo lamaiyuo, Embame embena porai renge dokome yuu Isipi dokona karo wambu dupwa nyuo lanyuo epee. Embena wambu dupwa kando embame yulu piinyi doko Isipi range dupwame seraminyi dokopa
NUM 14:14 nakamame wambu yuu dakena palenge dupwa lamairami. Kamongo emba namwa keta epo karenge doko wambu dapwame soo otelyaminyi. Embena kopa doko namwa kareyama dokona epo siyamo dokopa emba epo panee. Dee korakama namwa penge dokopa emba wambo pao kopa rau londe ingyuo dee kukwa dokopa emba isare ingyuo pao pingi doko silyaminyi.
NUM 14:15 Epapu embame embena wambu dupwa pyao kumakare ramo doko wambu rara wakale dupwame emba pilini doko sepala dopa lao,
NUM 14:16 Kamongo dokome yuu mairu lalu lao leyamo dokona kapa pyuo wambu dupwa lanyuo epa nara ingyapyasa yuu muiyane dokona nakama pyao kumapya, larami.
NUM 14:17 Dokona lao epapu Kamongo ateŋa leto. Embena porai doko namwa lasaka pyuo emba piruŋu lalu lao leeneli pyuo piri. Emba dopa lao,
NUM 14:18 Namba Kamongo, doko waiya lao imbwa nao wambu dupwa ama mona reto yaki nyii nao koo pyuo mata jilyaminyipape kame sakamingi. Nakamana endangi rakangepe koo pingi dokona nambame ikinyipi wanengepe apusingi kauwangepe dupwa koo keta palyuo pyao randa mairu. Randa maiyuo nakamame para pyao wane manjo manjo paraminyi dupwa randa maiyuo piru, lee.
NUM 14:19 Embena mona retenge doko kamame wakasa alowa pii nange leene dokome embame wambu dapwa yuu Isipi yaki nyuo epeyaminyi dokona piso pao dakepa nakamana koo dupwa nyuo kame sakaminyili pyuo kame sakamipi, leya.
NUM 14:20 Kamongome isingi lao, Embame namba piso silinyili pyuo nambame wambu dupwana koo nyuo kame sakamiru, leya.
NUM 14:21 Dopa pirunupape namba lete karo nambana yanga paupau lenge renge doko yuu dakena pano silyamo dokona kinyi lengenyili pyuo lalu lao lao,
NUM 14:22 Wambu dapwana mendemepe yuu dokona sukusa pao pali nara. Nakama nambana yanga paupau lenge renge dokome epo kendale piyasa kandeyaminyi dokope dee yuu Isipi dokonape yuu muiyane dokonape yulu mendeme pii nange dupwa piyunu kandeyami. Kandeyaminyipape nakamame nambana maka nange renge doko makande pipa pyuo nambana pii warombo see napala kamba leyami.
NUM 14:23 Nambame nakamana rora ambasu dupwa yuu doko mairu lao lalu lao leyo dokona nakama paa narami. Nakamame namba mata jilyaminyi dupwana mendemepe yuu dokona kapa pao kara nara.
NUM 14:24 Dopa piramopape nambana kendemande akali Kelepe banya mona wakale palyuo karo namba yaki nyii nange dokona baa yuu waa kando kandala peyamo dokona nambame baa lanyuo paro. Dokopa yuu dokona yuu angi lama lama dupwana Amaleke wambupi Kenane wambupi dupwa epapu palaminyi banya para pyaramo dupwana ingyara.
NUM 14:25 Dokona rakya nakama dee kapu kyuo yuu muiyane dokona ipwa kota pete Kone lenge doko kanda kanda parami.
NUM 14:26 Kamongome Mosese Eronepa lamaiyuo lao,
NUM 14:27 Yuu gii akipare nembo wambu koo pingi dapwame namba kando mumu lao kararamisi? Doo mumu letaminyi dasipa yakana namba silyu.
NUM 14:28 Dokona epapu nakambame nakama dopa lao isingi lamaiyuo, Namba Kamongo dopa leto. Nambame kinyi kinyi lalu lao lao, Mende pyakapili lao piso siminyili pyuo nakama keta pyakaro, leto.
NUM 14:29 Nakama kumaraminyi dokopa nakamana yanenge kaoma dupwa yuu muiyane dokona muu raleya lao nembarami. Namba kando mumu lao karaminyi dokona nakama ee kana akalisa lama pasi dupwana mendalimipi yuu dokona paa narami.
NUM 14:30 Nakama yuu dokona pao palirami lao lalu lao leyonopape nakama mendemepe pali naraminyipa akali Kelepe Josuapa iki yuu dokona pao palirambi.
NUM 14:31 Nakamame namwana wane wanake dupwa karapusi pyao nyerami lao leyami. Dopa leyaminyipape nakamame yuu doko rae mai nao paa narama leyaminyi dokona nambame wane wanakepe dupwa lanyuo paronopa nakama rangena yuu ingyara.
NUM 14:32 Nakama yuu muiyane dakena kumarami.
NUM 14:33 Nakamame namba epe kanda nao mata joo kareyaminyi dokona nakamana wane wanakepe dupwa randa nao ee kana akalisa kisima dusipana yuu muiyane dakena ralo papyuo kararami. Dopa pyuo papyuo karo pao nakama peparae kumaraminyipa wane wanakepe dupwa yuu dokona parami.
NUM 14:34 Nakamame koo piyaminyi dokona ee kana akalisa kisima randa nao kararami. Yuu doko yuu gii akalisa kisima nembo kando papyuo kareyaminyi dokona ee kana akalisa kisimako randa nao kararami. Nambame nakama kando rae mai nalene lao soo nyerami.
NUM 14:35 Nakama wambu koo pingi dupwa nyuo pyasapala namba kando mata joo karaminyi dupwa keta nambame lapunuli pyuo piru lao lalu lao leto. Yuu muiyane dakena nakama peparae kumarami lao namba Kamongome lalu lao lapu.
NUM 14:36 Moseseme akali lapo yuu doko apiyakale lao kandala pena leyamopa nakama pao kapu kyuo epapala kyambo leyaminyi dokome wambu dupwa Anatu kando mumu leyami.
NUM 14:37 Dokona Kamongome nakama keta anga pingi renge maiyamosa nakama kumuyami.
NUM 14:38 Dopa pyuo kumuyaminyipape akali akalisa ipisu lama yuu doko apiyakale lao kandala peyaminyi dusipana Josua Kelepepa iki mee lete kareyambi.
NUM 14:39 Kamongome leyamuli pyuo Moseseme Isaraele wambu dupwa kando lamaiyamo dokopa nakama soo mona randayami.
NUM 14:40 Dokopa wambu dupwa wamba yangama sipurapala yuu kyau pyalya pyana pingi dokona ketae pulyuo yuu enenge nyela pao karo lao Kamongome yuu jero lao lalu lao leyamo dokona epapu namwa rapa rapa pisi karamano kapa parama. Namwa koo piyama lao silyamano, leyami.
NUM 14:41 Dopa leyaminyipape Moseseme lamaiyuo, Akipamo epapu nakamame Kamongo kando kamba letamisi? Nakama embone pisa nara.
NUM 14:42 Nakama paa nalapape. Nakama pipya Kamongo role kara nalyamo dokona nakamana nyisu petenge dupwame nakama anamasi minyarami.
NUM 14:43 Nakama Amaleke wambu dupwape Kenane wambu dupwape pipya yanda pyalana pao lenge kambusa kararaminyi dokopa nakama yandana kumarami. Nakamame Kamongome langiyamuli pyuo moko minyuo pii nayaminyi dokona Kamongo nakama keta role kara nara, leya.
NUM 14:44 Dopa leyamopa Mosese baape dee Kamongona Kana Minyuo Lalu Lao Lenge Pii Palenge Bokote dokope paleyaminyi yuu doko yaki nyuo paa nayaminyipape nakama yuu kyau pyalya pyana pingi dokona mee langa pulyuo panyako suu piyami.
NUM 14:45 Pulyuo peyaminyi dokopa Amaleke wambupi Kenane wambupi yuu dokona paleyaminyi dupwame nakama pyao isa palyapala pyao peta pao yuu Orima pyambuo kaeyami.
NUM 20:1 Ee kana enenge dokopa Isaraele wambu peparae dupwa yuu muiyane Sene lenge dokona epapala yuu Katese dokona paleyami. Paleyaminyi dokona enda Miriame baa kumuyasa malu piyami.
NUM 20:2 Dokopa nakama malu palyuo paleyaminyi yuu dokona ipwa epa nayamosa wambu dupwame mona mendare palyuo Mosese Eronepa kando mumu leyami.
NUM 20:3 Mumu lao lao, Namwana yangonge dupwa Kamongona komau anda lenge kambusa dopa pyuo namwa kukuyamali doko kapa ingiyali, leyami.
NUM 20:4 Akipamo embame namwa yuu muiyane dakena lanyuo epeese? Namwana mena dupwa pipya kumaramiŋi lao dae lanyuo epeese?
NUM 20:5 Akipamo embame namwa yuu Isipi yaki nyuo yuu koo mende anda nange dakena lanyuo epeese? Isa pikipi isa girapope isa pomekanetepe jingi dupwa yuu dakena kara nao dee kamame ipwa kuki mendepe epa nao pingi lamo, leyami.
NUM 20:6 Leyaminyi dokopa Mosese Eronepa wambu malu palyuo peteyaminyi dupwa yaki nyepala Kamongona komau anda kambu konandowame dokona pao kareyambi. Karapala wapambu pii pyapala pangu siyambinyi dokopa Kamongona yanga paupau lenge renge doko pano epeyamo kandeyambi.
NUM 20:7 Dokopa Kamongome Mosese pii lamaiyuo,
NUM 20:8 Pangali isa Kana Minyuo Lalu Lao Lenge Pii Palenge Bokote lenge kambusa silyamo doko nyepala embapa Eronepa wambu peparae epena lao nyuo malu palyalapape. Dopa pipala nakamana lenge kambu dokona karo kana doo dumu petamo doko kando pii lamaipi. Dopa pirinyi dokopa ipwa potemo epara. Dopa pipala kanana ipwa potemo eparamo doko wambupi nakamana mena dupwape narami.
NUM 20:9 Kamongome leyamuli pyuo papala Moseseme pangali doko nyiya.
NUM 20:10 Baapa Eronepa kana peteyamo lenge kambusa dokona wambu peparae nyuo malu palyapala Moseseme lao, Nakama mona kana pokonge dupwa selapape. Nambwame kana dakena nakamana ipwa epena lao nyakarambase? leya.
NUM 20:11 Lapala Moseseme banya pangali isa doko minyalyapala yuu lama lao kana dokona piya. Piyamo dokopa ipwa ama soo kaeyo malu mee epeyamopa mena wambupi peparaeme neyami.
NUM 20:12 Dopa pyuo neyaminyipape Kamongome Mosese Eronepa lamaiyuo, Kamongome Isaraele wambu keta banya porai renge poo pyasi kapa lasaka pira lao soo nyii nambinyi dokona nambame nakamba yuu jero lalu lao leyono dokona wambu dupwa lanyuo paa narambi, leya.
NUM 20:13 Isaraele wambu dupwame Kamongo kando mumu lao kareyaminyipa Kamongo baa poo pyasinyi lao nakama lasaka piyamo yuu doko Meripa lenge.
NUM 20:14 Mosese baa yuu Katese karo akali lapo pii minyuo yuu Itome kiŋi doko lamaila pena leya. Papala nakamame lao, Pii dake embena akali yango Isaraele rara dupwa peyami. Namwa randa neyamano dupwa emba silini, leyami.
NUM 20:15 Namwana rora ambasu dupwa yuu Isipi dokona papala ee kana malu nembo kareyami. Kareyaminyi dokopa Isipi wambu dupwame nakamape namwape kopetame pyuo randa jiyami.
NUM 20:16 Dokopa Kamongome namwa nyisinya lao baa kande ee lao kareyama. Ee lao kareyamano doko sepala yuu Isipi yaki nyuo lanyuo pena lao banya aŋala mende peya. Epapu namwa yuu taone Katese lenge embena yuu liti dokona karamana.
NUM 20:17 Embena yuu dokona sukusa kata pupwa, lape. Namwape namwana mena bulumakao dupwape kata yaki nyuo wangu embena ee dupwanape isa girapo ee dupwanape paa narama. Paa napala embena ipwa kamuo nenge yuwale dupwana kamuo naope pii narama. Namwa kata andake dokonako pao karo pao embena yuu doko yaki nyerama, leyami.
NUM 20:18 Dopa leyaminyipape Itome wambu dupwame nakama isingi lamaiyami. Namwana yuu dokona nakama kapa pyuo epo paa narami. Nakama panya lao eparami ramo namwame nyisa epapala nakama pyarama.
NUM 20:19 Dokopa Isaraele wambu dupwame lao namwa kata andake dokona iki parama. Dokopa namwape namwana mena dupwamepe nakamana ipwa dupwana mende narama ramo namwame ropo pyakarama. Namwame mee kata dokona sukusa panya suu pilyamano, leyami.
NUM 20:20 Dopa leyaminyipape Itome wambu dupwame dee kamba lao, Nakama dakena epa narami lapala nakamape yanda singi porai malu mee dupwamepe Isaraele wambu dupwa pyala epeyami.
NUM 20:21 Itome wambu dupwame nakamana yuu dokona Isaraele wambu dupwa epo paa narami leyaminyisa Isaraele wambu dupwa kapu kyuo kata wakalena peyami.
NUM 20:22 Isaraele wambu dupwa peparae yuu Katese yaki nyuo yuu kyau Ori lenge yuu Itome liti dokona singi dokona epo pyaka siyami.
NUM 20:23 Dokona Kamongome Mosese Eronepa lamaiyuo lao,
NUM 20:24 Nambame Isaraele wambu yuu mairu lao lalu lao leyo dokona Erone baa kapa paa nara. Yuu Meripa dokona nambame pii langiyunuli pyuo pii nayambi dokona baa kumara.
NUM 20:25 Dokona Eronepa banya ikinyingi Eliasapa lanyuo yuu kyau Ori dokona papala Eronena purisi komau wapungi doko kolo nyuo Eliasa wapwakamiri. Erone baa dokona kumara, leya.
NUM 20:27 Kamongome leyamuli pyuo Moseseme piya. Nakama wambu peparae malu palyuo kareyaminyi lenge kambu dokona yuu kyau Ori lenge dokona pulyuo peyami.
NUM 20:28 Dokopa Moseseme Eronena purisi komau dupwa roko nyepala Eliasa wapwakamiya. Wapwakamiyamo dokopa Erone yuu kyau dokona kumuya. Dopa pyuo kumuyamo dokopa Mosese Eliasapa lupyuo epeyambi.
NUM 20:29 Epeyambinyi dokopa wambu peparaeme Erone kumapya lamo leyambinyi doko siyami. Sepala nakama peparae yuu akalisa rema baa kondo lao kumanda peteyami.
NUM 21:1 Yuu Arate yuu Kenane donorena singi dokona kiŋi Kenane akali mende Isaraele wambu dupwa Atarimi kata dokona epelyaminyi leyaminyi siya. Sepala baame nakama pyao wambu dupwana lapo puu maiyuo nyuo piya.
NUM 21:2 Piyamo dokopa Isaraele wambu dupwame Kamongo kando pii lalu lao leyami. Namwame wambu dupwa pyao isa palyalapa lao embame jere ramo doko namwame nakamape nakamana yuu taonepe emba keta julu joo jepala peparae pyao kokwa soo nembarama, leyami.
NUM 21:3 Pii leyaminyi doko Kamongome sepala nyisiyamopa Kenane range dupwa pyao isa palyiyami. Dokona lao Isaraele wambu dupwame nakamape nakamana yuu taonepe pyao nembalu nembo nembapala yuu doko kingi Orima, leyami.
NUM 21:4 Isaraele wambu dupwa yuu kyau Ori yaki nyuo kata mende soo ipwa kota pete Kone lenge penge dokona pao yuu Itome awali lao panya peyami. Panya peyaminyipape nakama makapala
NUM 21:5 Anatu Mosesepa kando kamba lao mumu leyami. Yuu muiyana nenge ipwape see nange dakena kumaramiŋi lao akipamo embame namwa yuu Isipi yaki nyuo dae lanyuo ipisi? Namwame nenge koo dapwa rae maiyuo kamba naa narama, leyami.
NUM 21:6 Dokopa Kamongome wambu pingi kau lapo nakama keta peyamosa kau dupwame Isaraele wambu malu piyamisa kumuyami.
NUM 21:7 Dokopa Mosese kareyamo dokona wambu dupwa epapala dopa lamaiyuo, Namwa embapa Kamongopa kando kamba lao karamwano doko koo pimwa. Dokona epapu Kamongome kau dapwa nyuo nembakana lao ateŋa lakape. Leyaminyi dokopa Moseseme wambu dupwana lao ateŋa lakamiya.
NUM 21:8 Dokopa Kamongome Mosese lamaiyuo, Kone kana dokona lapo nyepala kau ingyuo pyuo wasapala isa lomasi dokona yukunyi palyape. Dokona kau menge dupwame wambu mende narami dokopa kau dake kandapala dokopa baa mee ingyara, leya.
NUM 21:9 Leyamo dokona Moseseme kone kana dokome kau mende wasapala isa dokona yukunyi palyiya. Kau menge dupwame wambu mende neyaminyi dokopa kau wasisi yukunyi palyiyamo doko kandapala mee ingiya.
NUM 22:1 Isaraele wambu dupwa paleyaminyi yuu doko yaki nyuo ipwa Jotane neta potemenge dorena ingyuo yuu Jereko paki siyamopa yuu Moape lama lama dokona komau anda pyuo paleyami.
NUM 22:2 Moapena kiŋi Sipona ikinyingi Beleke lenge dokome Isaraele wambu dupwame Amo wambu dupwa kando yulu mende piyaminyi doko soo
NUM 22:3 baamoo banya wambupi dupwa peparaeme Isaraele wambu dupwa ama soo kaeyo epo piyaminyisa kando pakayami.
NUM 22:4 Moape range wambu dupwame Mitiane range akali mupwa dupwa kando leyami. Mena bulamakao kalyuwame rambe akipi nenge kandale doko suu pyao wambu dae epelyaminyi dupwame oo repeta namwana bange dupwa peparae ukiaki minyuo kokwa serami.
NUM 22:5 Dokona lao kiŋi Belekeme wai minyingi akali lapome Beona ikinyingi Belame yuu Peto ipwa Yuporisa repeta yuu Amau dokona kareyamo doko epena lao lamaila pena leya. Wambu wai pii minyuo pao dopa leyami. Beleke nakama dopa langyuo, Yuu mendakinya wambu peparae Isipi yaki nyuo dae epo yuu dakena wakale wakale raeyo palipala namwana yuu dake nyelana letaminyi doko emba sipili yaka lao langilyu lapya, leyami.
NUM 22:6 Wambu dupwa ama malu mee namwa isa palyilyaminyi dokona emba waiya lao epo nambana lao nakama koo keta palyuo mende pyakape. Dopa piri ramo namwame kapa pyuo anamasi minyuo yuu dakena pyao ralinyi nembarama rapisi. Embame wambu dupwa elyape keta petena lapinyi dokopa elyape keta petaminyiko. Randa maiyuo koo keta pena lapinyi dokopa kooko keta pelyaminyi. Doko namba silyu.
NUM 22:7 Dokona lao Moape rangepe Mitiane rangepe akali mupwa dupwame Isaraele wambu dupwa randa maiyuo koo keta pena lara lao Belame kareyamo dokona papala kana mone maiyuo Belekena pii doko lamaiyuo piyami.
NUM 22:8 Piyaminyi dokopa Belameme nakama lamaiyuo lao, Epapu kukwa nembo dae palimanalese. Dopa pyuo palirama dokopa Kamongome namba pii langiramo dusipa rakya nambame nakama langiru. Dokona lao Moape range akali mupwa dusipa Belamemoo pipya paleyami.
NUM 22:9 Anatumi Belame kareyamo dokona epapala piso soo, Akali embamoo petaminyi dasipa apimoose? leya.
NUM 22:10 Baame isingi lao, Yuu Moape range kiŋi Beleke dokome pii langyala pena lapyasa imi.
NUM 22:11 Doko wambu lapo Isipi yaki nyuo dae epapala yuu dakena wakale wakale nyuo yoko lapala palaminyi lapya. Baame wambu dupwa pyao ralinyi nembaro lao nambame banya lao wambu dupwa randa maiyuo koo keta palyakape lapya, leya.
NUM 22:12 Anatumi Belame lamaiyuo, Akali dasipa pipya role pyao paa napipi. Nambame Isaraele wambu dupwa elyape keta pisingiŋi dokona randa maiya napipi.
NUM 22:13 Dokopa yangama Belame Belekena wai pii minyuo epeyaminyi akali dupwa lamaiyuo, Anda kapu kyuo pupwape. Kamongome namba nakama role pyao paa napipi letamo, leya.
NUM 22:14 Dokopa akali dusipa Beleke kareyamo dokona peyami. Papala dopa lamaiyuo, Namwa pipya role pyao epa naro lapya, leyami.
NUM 22:15 Dokopa Belekeme akali wambo pena leyamopape enakana konda pyuo akali kamongo dupwa pena leya.
NUM 22:16 Akali dupwa Belame kareyamo dokona papala Beleke pii leyamo dupwa lamaiyuo, Namba keta epa naroŋo lapala yulu mende wakale pii napipi.
NUM 22:17 Nambame emba kando yano pyao bange joo kamonganyi pyambuo embame langirinyili pyuo pyakao piru. Dokona wambu dapwa randa maiyakala ipupi lapya, leyami.
NUM 22:18 Dopa leyamopape Belameme isingi lao, Beleke baame namba kana kulingipi golope banya anda dokona singi dupwa peparae jeramopape namba Anatumi langilyamuli pyuo kamba laa naro ingilyamo. Kamame randa kuki laponape Kamongo nambana Anatunya pii kuki mende iki kapa isa pena lapala piru ingya nalyamo.
NUM 22:19 Dopa pipyamopape akali lapo dae paleyami dopale ingyuo nakama epapu kukwa dae palimanale. Dokona Kamongome namba pii lapo dupwana lao langilyape mee lao sero, leya.
NUM 22:20 Kukwa yuu gii dokopa Belame paleyamo dokona epapala Anatumi dopa lamaiyuo, Akali dusipame emba role pyao mona lao piso simi ramo doko panya rapa rapa pii. Dopa pirinyipape nambame langiru doko iki piri, leya.
NUM 22:21 Dokona lao yangama dokopa Belame sipurapala mena donge mende nyepala piso Moape akali kamongo dupwa pipya role pyao peyami.
NUM 22:22 Belame banya mena donge matana piso banya kendemande akali lama pipya role pyao peyamisa Anatumi imbwaya. Imbwayamo dokona nakama panya peyaminyi dokona Kamongona aŋala mendeme kata roko kareya.
NUM 22:23 Dokopa aŋala dokome kata dokona wua gela minyaro kareyamo mena donge dokome kandapala panya peyamo kata doko yaki nyuo ee yuu dokona peya. Peyamo dokopa Belameme mena donge doko pyaroko pyapala kapu kyuo kata dokona lanyuo epeya.
NUM 22:24 Dokopa isa girapo ee paki paki pinya kata kuki sukusa siyamo dokona nemba nemba dolapona kana kame piru kareyamo kata dokona aŋala doko kareya.
NUM 22:25 Dokopa donge dokome aŋala doko kandapala pakao pupuli lao kata koteyamo dokopa kana kame dokona Belamena kimbu doko pyao pisiya. Pyao pisiyamo dokopa Belameme donge doko pyaroko piya.
NUM 22:26 Aŋala dokome dee mendasa papala kata paki pakipi parami kata see nayandena kata upi lao kareyamosa donge panya saka naya.
NUM 22:27 Dokopa donge dokome aŋala doko kandapala baa isa yuu dokona siya. Siyamosa Belameme imbwuapala banya pangali isa dokome donge doko pyaroko piya.
NUM 22:28 Piyamo dokopa Kamongo dokome donge doko pii lena lao maiyasa donge dokome Belame kando lamaiyuo lao, Nambame emba apa pipusi? Akipamo embame namba yuu rema pyalese? leya.
NUM 22:29 Leyamo dokopa Belame isingi lao, Embame namba kopyali inginyi nembalene dokona nambame emba pyalono. Nambana wua gela sipyali doko emba pyao kumakapuli, leya.
NUM 22:30 Mena donge dokome isingi lao, Emba wamba ene wane karo dokopa piso papyuo karo pao emelene donge dokoko namba daase? Wamba namba dapa pingi kandalese? leya. Leyamo dokopa Belame isingi lamaiyuo, Daa, leya.
NUM 22:31 Dokopa aŋala dokome wua gela minyaro kata dokona kareya doko Belameme kandena lao Kamongome lasaka piya. Lasaka piyamo doko kandapala Belame banya lenge kambu yuu dokona suu lapala pao paleya.
NUM 22:32 Pao paleyamo dokopa aŋala dokome pii poraiyuo lao piso soo, Akipamo embena mena donge doko yuu rema pyalese? Emba kata dake paa napenge ingyapyamo dokona emba kapa paa nareŋe lao nambame kata roko karo.
NUM 22:33 Dopa pipunu dokopa embena donge dokome namba kandapala yuu rema kapu kyuo panya pipya. Dopa pii napyali doko nambame emba pyao kumapala donge doko mee lete karena lapuli, leya.
NUM 22:34 Belameme isingi lao, Namba yulu koo pyano. Embame namba paa nare lao kata roko karalene lao soo gisa nalono. Dopa pipunupape epapu embame namba kopetame pwuane lao suu pyare ramo doko namba kaepala kapu kyuo anda paro, leya.
NUM 22:35 Leyamopape aŋala dokome lao, Akali dasipa pipya role pyapeta pupwa. Dopa pyuo parenepape nambame emba laa lao langirunuli pyuo iki lape, leya. Leyamo dokopa Belame akali dusipa pipya role pyapeta peyami.
NUM 22:36 Belekeme Belame epelyamo leyaminyi doko sepala baa yuu taone andake kingi Aa lenge ipwa Anone repeta singi yuu Moape liti dokona kando nyela peya.
NUM 22:37 Belekeme Belame kando lao, Nambame emba keta wambo kanda soo pii peyono dokopa akipamo emba epa naese? Nambame emba kapa pyuo pee pii nare lao suu piisi? leya.
NUM 22:38 Belameme isingi lao, Namba epo wetapunupape nambana porai mendeme emba keta yulu pyakaronde daa. Anatumi langiramuli pyuo iki lakaro, leya.
NUM 22:39 Belame Beleke role pyao yuu taone Usote dokona peyambi.
NUM 22:40 Papala Belekeme mena bulamakaope sipisipipi pyapala minju dupwana lapo Belamemoo akali mupwa role peyaminyi dupwape maiya.
NUM 22:41 Dokopa yangama Belekeme Belame nyuo lanyuo yuu kyau Bamote Bealo lenge dokona pulyuo peyamo dokopa Belameme Isaraele wambu kareyaminyi dupwana lapo kapa kandara ingiya.
NUM 23:1 Kandapala Belameme Beleke lamaiyuo, Nenge kiso maingi kana pyare yanda ipingi nyepo dakena pyakape. Pyakapala mena bulamakao kali yanda ipingi nyepo dusipape dee mena sipisipi kali yanda ipingi nyepo dusipape nyepala minyakao ipupi, leya.
NUM 23:2 Baame lamaiyamuli pyuo Belekeme piya. Piyamo dokopa baapa Belamepa mena bulamakao kalipi mena sipisipi kalipi larapu nenge kiso maingi kana pyare dusipana mendaki mendaki lao kiso maiyambi.
NUM 23:3 Dokopa Belameme Beleke lamaiyuo, Kamongome namba mende langilyape mee lao kandala paroleŋe embena mena kiso maipinyi mare dakena karape. Baame namba pano langiramuli pyuo emba langiru, leya. Dopa lapala baa iki yuu kyau dokona ketae pulyuo peya.
NUM 23:4 Peyamo dokopa Anatumi baa kando nyiya. Nyiyamopa Belameme baa kando lao, Nambame nenge kiso maingi kana pyare yanda ipingi nyepo lapala dokona mendaki mendaki lao mena bulamakao kalipi mena sipisipi kalipi kisapu, leya.
NUM 23:5 Kamongome Belame aki pii laramo dupwa lamaipala pii dupwa Beleke lamaila kapu kyuo pena leya.
NUM 23:6 Baa kapu kyuo papala Beleke nenge kiso maiyamo dokonako Moape range akali mupwa dupwa pipya kareyamopa kando nyiya.
NUM 23:7 Belameme poropeta pii pyongo pyao lao lao, Yuu Moape range kiŋi Beleke dokome namba kyakale lao ipu, leya. Neta pyakaenge yuu kyau dorena karapunupa baame namba pii lakala ipu, leya. Isaraele wambu dupwa keta randa maiyakape, leya.
NUM 23:8 Kamongome wambu dupwa keta randa epena lao laa nalyamo dokona nambame apa pyuo wambu dupwa keta randa epena larose? Kamongome wambu dupwa koo keta pena laa nalyamo dokona nambame apa pyuo dopa pyuo larose?
NUM 23:9 Yuu kyau dupwana karo dokopa nambame wambu dupwa kandenge. Nakama wambu rara wakale ingyuo palyuo kamame wakasa ingyuo Kamongome wambu lapo dupwa kaepala nakama elyape keta pisingi lao silyaminyi.
NUM 23:10 Sinjimu dupwa kapa yaka laa nange doko suu pyao Isaraele para pyasi dupwa sinjimu ingyapyasa kapa yaka laa nalyaminyi. Anatunya wambu mende yuu gii otapyamo kumulyaminyi dopale ingyuo namba kumapuli. Anatunya yulu rolae pingi wambu dupwa mona kyuu lao sipyamo kumulyaminyi dopale ingyuo namba mona kyuu lao seramo kumapuli, leya.
NUM 23:11 Dokopa Belekeme Belame lamaiyuo, Aki yulunde namba keta pilisi? Nambame emba dae lanyuo epeyono doko nambana nyisu petenge dupwa randa maiyakalase lao piyu. Dopa piyunupape embame pipinyi doko wambu dapwa peparae elyape keta pisinyi pyambulini doko iki, leya.
NUM 23:12 Baame isingi lao, Kamongome laa lao namba langilyamo dusipa iki nambame kapa laro, leya.
NUM 23:13 Dokopa Belekeme Belame kando lao, Namba role pyao yuu mendasa bona ipu. Yuu dokona karo dokopa Isaraele wambu dupwana lapo iki kandare. Yuu dokona pao karapala dokopa wambu dupwa keta randa maiyakare, leya.
NUM 23:14 Belekeme Belame Sopiminya yuu dokona Pisika kyau dokona ketae singi dokona nyuo lanyuo peya. Peyamo dokopa Belameme yuu dokona opetae nenge kiso maingi kana pyare yanda ipingi nyepo lapala mena bulamakao kalipi mena sipisipi kalipi mendaki mendaki lao larapu kiso maiyambi.
NUM 23:15 Belameme Beleke kando lao, Embena kiso maipinyi mare dakena karape. Namba dumunya Anatu kando nyela paro, leya.
NUM 23:16 Lapala peyamo dokopa Kamongome Belame kando nyepala aki pii laramo dupwa lamaipala pii dupwa Beleke lamaiyakala pena leya.
NUM 23:17 Baa kapu kyuo papala Beleke nenge kiso maiyamo dokonako Moape range akali mupwa dupwa pipya kareyamopa kando nyiya. Kamongome apa lalamo lao Belekeme piso siya.
NUM 23:18 Dokopa Belameme poropeta pii pyongo pyao lao dake leya. Sipona ikinyingi Beleke, epapu namba aki pii letene lao sela ipu.
NUM 23:19 Anatu doko baa akali kyambo lenge dopakale daa. Isa akalinya suu pingi alowa pyuo lenge. Anatu baa dopakale daa. Aki yulu mende baame piru lao lalu lao lenge doko baa angi pingi. Baame piru lapala dokopa angi pingi.
NUM 23:20 Namba elyape keta pisa lao langilyamuli pyuo wambu dupwa elyape keta pisaro. Anatumi elyape keta pisaramo nambame nyuo alowa pii naro ingilyamo.
NUM 23:21 Rengya Isaraele keta randa mende epa nao embone pisira lao dakepa soo gisilyu. Kamongo nakamana Anatu doko nakama keta role karamo. Wambu dupwame pii poraiyuo lao, Kamongo namwana kiŋi lao karaminyi.
NUM 23:22 Anatumi wambu dupwa yuu Isipi karo nyuo lanyuo epeya. Mena bulamakao kali rae lenge dopakale ingyuo baame yanda pimwai dupwa pyao nembakamingi.
NUM 23:23 Wambu mendeme Isaraele wambu dupwa keta pyamwali lao nemongape pipupi kapa laa nara ingilyamo. Epapu wambu dupwame Isaraele dupwa kando lao, Anatumi aki yulu mende pipyamo doko kandalapape, larami.
NUM 23:24 Mena laene porai dokome mena yango dupwa pyapala ranjamape minjupi dupwa nao otenge. Doko suu pyao Isaraele rara dupwa porai dopakale, leya.
NUM 23:25 Leyamo dokopa Belekeme Belame kando lao, Embame Isaraele wambu dupwa keta nambame randa mai naro lapinyipape wambu dupwa elyape keta pisa nareko, leya.
NUM 23:26 Belameme isingi lao, Kamongome namba langilyamuli pyuo yulu peparae piruŋu lao nambame emba pii doko langya napusi? leya.
NUM 23:27 Belekeme Belame lamaiyuo, Namba role pyao ipu. Eparene dokopa nambame emba nyuo lanyuo yuu mendasako paro. Embame yuu dumunya karo Isaraele wambu dupwa keta randa maiyakalase lao Anatumi emba kapa langira rapisi, leya.
NUM 23:28 Lapala baame Belame nyuo lanyuo yuu Piyo kyau dokona peya. Yuu Piyo kyau dokona karo isa yuu muiyane lama lama doko kapa kandenge.
NUM 23:29 Belameme baa kando lao, Nenge kiso maingi kana pyare yanda ipingi neypo dakena pyakape. Pipala mena bulamakao kali yanda ipingi nyepo dee mena sipisipi kali yanda ipingi nyepo dusipa nyepala minyakao ipu.
NUM 23:30 Leyamuli pyuo Belekeme piya. Dee mena bulamakao kalipi mena sipisipi kalipi mendaki mendaki larapu kana pyare dupwana reto kiso maiya.
NUM 24:1 Dakepa Kamongo baame Isaraele wambu dupwa elyape keta pisakapili lao suu pyapyamo doko soo nyepala baa wamba piyamuli pyuo Kamongo piso sela paa naya. Paa napala kapu kyuo baa yuu muiyane dorena kando kareya.
NUM 24:2 Karo Isaraele wambu dupwa rara liti pira pira pyuo paleyaminyipa kandeya. Dokopa Anatunya Imambu doko epo baa keta maralyiya.
NUM 24:3 Epo maralyiyamopa baame poropeta pii pyongo pyao leya. Namba Beona ikinyingi Belamena pii dake. Nambame wambu kando soo giso karenge.
NUM 24:4 Anatumi pii letamo dupwa namba singi. Nambame lenge rakaro karo. Anatu Porai Wakasa dokome pii repa repa pilyamo dupwa angi rolae kandenge.
NUM 24:5 Isaraele wambunya komau anda piyaminyi dupwa ama keyange ingilyamo.
NUM 24:6 Bona isa malu maki maki pyuo karenge dopakale ingilyamo. Ipwa marenge dokona ee wara pingi dopale ingilyamo. Isa alo lengende Anatumi wara piyamo dupwa dopale ingilyamo. Dee isa sita lenge lapo ipwa marenge dokona karenge dopale ingilyamo.
NUM 24:7 Yuu Isaraele dokona apunda malu eparamopa yuu ipwange palira dupwana nakamame ee wara pirami. Nakamana kiŋi doko mupwa wakasa ingyapala kiŋi Akake nyuo isa palyara. Banya isingi yulu dokome yuu andake dokona wambu peparae keta palyuo suu lara.
NUM 24:8 Anatumi wambu dupwa Isipi karo lanyuo epeya. Baame mena bulamakao kali rae lenge dopakale ingyuo wambu dupwa pyao ralinyi nembakamyuo karenge. Nakamame nakamana nyisu petenge dupwa pyao kuli rukyuo walikya dupwa pyao roo payo mumu pingi.
NUM 24:9 Mena laene porai luu palenge dokopa mendeme pyaleta nange doko suu pyao Isaraele wambu dupwa dopale ingingi. Wambu mendeme Isaraele elyape keta pisiramo doko elyape ketako pisira. Wambu mendeme Isaraele randa mairamo dokopa randako baa nyera.
NUM 24:10 Beleke baame Belame kando imbumi kumuo pyalana kingi rangome malikyapala dopa leya. Nambame emba kyakale lao nyepala nambana nyisu petenge dupwa randa maiyakape lapunupape yuu rema wambu dupwa elyape keta pisilini.
NUM 24:11 Epapu anda puu. Nambame emba pee piruŋu lao lalu lao leyonopape Kamongome daa lao kata rokolyamo.
NUM 24:12 Belame isingi lao, Embame embena wai pii minyingi akali dupwa dopa lamaiyuo,
NUM 24:13 Embena anda dokona kana kulingipi golope singi dupwa peparae jerenepape Kamongome langiyamuli pyuo kamba lao namba rangeme maso pii naro ingilyamo. Kamongome pii langiramo doko iki nambame laro lamaiyu, leya.
NUM 24:14 Belameme Beleke kando lao, Nambana wambu range karaminyi dupwa keta kapu kyuo pelyo. Ene papa naronopa nambame emba Isaraele wambu dupwame embena wambu dupwa kando rengya aki mende pirami dokona lao repe repe pii langilyu.
NUM 24:15 Ene piramo dupwana poropeta pii pyongo pyao leya. Namba Beona ikinyingi Belamena pii dake. Nambame wambu kando soo giso karenge.
NUM 24:16 Anatumi pii letamo dupwa namba singi. Nambame soo gisingi renge Anatu Ama Ketae doko keta piso epelyamo doko kando nyingi. Nambame lenge rakaro karo. Anatu Porai Wakasa dokome pii repa repa pilyamo dupwa angi rolae kandenge.
NUM 24:17 Rengya pira dokona kando suu pyao Isaraele rara dupwame pirami doko silyu. Kiŋi doko bui yanga paupau wakasa lenge dopakale ingyuo Isaraele rara dupwana sipurapala karara. Isaraele karo epo baame Moape range akali mupwa dupwa pyara. Dee Sete wambu dupwa peparae pyao isa palyuo kokwa soo nembara.
NUM 24:18 Baame banya nyisu petenge yuu Itome palenge dupwa pyao wini pipala nakamana yuu doko nyuo banya ingyara. Dopa piramopa Isaraele wambu dupwa wini pyuo puu parami.
NUM 24:19 Isaraele rara dupwame kimbumi kalyuo minjuku minyuo parami. Wambu yaki nyerami dupwa pyao ote pyuo pyarami.
NUM 24:20 Yuu gii dokopa Belame banya pii repa repa piyamo dokona Amaleke wambu dupwa kandapala rengya pira dupwana pyongo pyao lamaiya. Wambu rara menge dupwa nyuo isa palyuo Amaleke rara doko ama porai wakasa. Porai wakasa ingyapyamopape rengya peparae kwaeyalu kwaeyo kwaeyarami.
NUM 24:21 Banya pii repa repa piyamo dokona baame Kene wambu dupwa kandeya. Kandapala rengya pira dupwana pyongo pyao lamaiya. Yaka kusimwa dupwame mendemepe nyii nana lao rondona kapa retenge doko suu pyao yuu nakama palyuo karaminyi doko mende pii nao kapa sera.
NUM 24:22 Dopa pyuo kararaminyipape Asiria range dupwame nakama Kene wambu dupwa pyapala karapusi ingyuo nyeraminyi dokopa nakama kwaeyo parami, leya.
NUM 24:23 Belameme poropeta pii pyongo pyao lao, Wambu dulurena epo malu palyilyaminyi dupwa apimoose?
NUM 24:24 Wambu dupwame yuu Saiporasa karo ipwa kota dokona sipunya piso epo yuu Asiria rangepe dee yuu Ipa rangepe nyuo anamasi minyuo pyarami. Pyaraminyipape enakana nakama opetae kumalu kumuo kumarami, leya.
NUM 24:25 Lao otapala dokopa Belame sipurapala anda kapu kyuo peya. Peyamo dokopa Beleke baa rangena anda panya kata nyuo peya.
NUM 27:12 Kamongome Mosese kando lamaiyuo, Yuu Aparimi kyau dokona pulyuo papala nambame Isaraele wambu yuu mairu doko kando karape.
NUM 27:13 Kandaparene dokopa embena yangone Erone piyamo doko suu pyao enakana emba kumare.
NUM 27:14 Yuu muiyane Sene dokona nakamba laparaeme nambana pii doko kamba lao yanda pimwaiyambinyi dokona kumare. Meripa dokona wambu peparae mumu lao yanda pimwaiyaminyi dokopa embame nambana porainya renge doko wambu dupwa keta lasaka pyake nae, leya. (Meripa doko ipwa guu lenge yuu Katese doko yuu muiyane Sene dokona singi.)
NUM 27:15 Moseseme ateŋa lao,
NUM 27:16 Kamongo Anatu lete rengena renge kuiyuo karenge dokome akali mendeme embena wambu dupwa isako karara lao rombo palyepe lao leya.
NUM 27:17 Yanda pela paraminyi dokopa baame poraiyuo iso dopa pinya dapa pinya lao karara. Dokona lao embena wambu peparae mena sipisipi isingi akali kara nalyamopa ralo karenge dopakale ingya narami, leya.
NUM 27:18 Kamongome Mosese lamaiyuo, Nanena ikinyingi Josua keta Imambu palyuo akali mora petenge doko nyepala embena kingi doko banya kyawa dokona retare.
NUM 27:19 Retapala purisi Eliasa dee wambu peparaena lenge kambu dokona baa roya karena lare. Dokona karo wambu peparaeme sinya lao baame embena panda nyilyamo lao lamairi.
NUM 27:20 Isaraele wambu peparaeme baa laramuli pirami lao emba rangena porai dupwana lapo baa maipi.
NUM 27:21 Baame purisi akali Eliasana arapu dokona karo pii soo yulu pira. Dokopa Eliasame kana lama kingi Urimi dee Tumini lenge dolapome minyuo nambame aki mende piri lao suu pyao karo doko soo gisara. Dopa pyuo baame Josuamoo dee Isaraele wambu peparaepe nakamana yulu dupwana apa pyuo kararami lao mana lamaiyuo lasaka pira, leya.
NUM 27:22 Moseseme Kamongome lamaiyamuli pyuo piya. Baame Josua purisi akali Eliasa dee Isaraele wambu peparaena lenge kambu dokona roya karena lapala
NUM 27:23 Kamongome leyamuli pyuo banya kingi doko Josuana kyawa dokona reto nambana panda nyilyamo lao wambu dupwa lamaiya.
DEU 1:1 Neta pyakaenge ipwa Jotane dorena yuu muiyane dokona pao kareyaminyi dokopa Moseseme Isaraele wambu dupwa pii lamaiyamo dupwa buku dakena pyasi palamo. Wambu dupwa ipwa Jotane rapu yuu Supi repeta kareyami. Yuu Parane taone doko pakirena siya. Dee yuu Topele taonepe Lepane taonepe Aserote taonepe Disakape taonepe dupwa pakirena siyamo kanya dokona nakama kareyami.
DEU 1:2 Yuu Sainai kyau dokona piso yuu Itome dokona kyau pyalya pyana pingi dokona kata pao karo yuu gii akalisa ipisu mendaki nembo yuu Katese Paneya dokona pao kando nyingi.
DEU 1:3 Isipi yaki nyuo epeyaminyipa ee kana akalisa kisima epo peyamopa yuu gii mupwa kana akalisa ipisu mendaki dokona Moseseme wambu dupwa Kamongome pii lamainya lao lamaiyamo dupwa peparae lamaiya.
DEU 1:4 Kamongome Amo wambunya kiŋi Saiyone lenge yuu Esepone taone doko isingi dokope dee Basane wambunya kiŋi Oke lenge yuu Asatote Etetipi taone dolapo isingi dokope pyao anamasi minyapala enakana pii dusipa Mosese lamaiya.
DEU 1:5 Yuu Moape dokona ipwa Jotane neta pyakaenge dorena pao kareyaminyi dokopa Moseseme Anatunya Mawa Pii dupwa kanda soo polo mana lamaiya. Moseseme lamaiyuo lao,
DEU 1:6 Namwa yuu Sainai kyau dokona kareyamano dokopa namwana Kamongo Anatu dokome namwa kando dopa langyuo, Nakama yuu kyau dakena yuu andarele karaminyi, leya.
DEU 1:7 Nakamame nakamana pinji dupwa pyao rapa rapa pipala komau anda dupwa lalyuo minyuo yuu mendasa parami. Yuu kyau pyalya pyana pingi Amote wambu kareyaminyi dokonape dee yuu dokona awali laope ipwa Jotane rapu dokonape yuu kyau pyalya pyana pingipi yuu lama lama dupwanape yuu donarenamepe dee ipwa kota Metitaraniane kipwa kipwa dokonape yuu Kenane dokonape pao yuu Lepanone kyau dokona dumurena ipwa Yuporisa pona andake ama nanesa dokona parami.
DEU 1:8 Yuu dake peparae namba Kamongo dokome nakamana rora ambasu Aporakamemoo Aisakemoo Jekopemoo dee dupwana para pyaraminyi dupwa mairu, lao lalu lao leyo. Yuu dokona pao palyuo karalapape.
DEU 4:1 Moseseme wambu dupwa lamaiyuo, Nambame mawa pii mana langilyu dupwa peparae warombo serami ramo doko nakama lete karo Kamongo doko nakamana rora ambasu dupwana Anatu dokome yuu doko jipyamo dokona palyuo kararami.
DEU 4:2 Nambame langipunu dupwana pii wakale lapo konda pii nalapape. Dee dokona mende neta nemba nalapape. Nakamana Kamongo Anatu dokona mawa pii nambame langipunu dupwa warombo soo minyuo pyuo karalapape.
DEU 4:3 Yuu kyau Piyo lenge dokona Kamongome yulu mende piyamo doko nakama kandeyami kande Bealo doko anatuŋu lao lakandeyaminyi wambu dupwa peparae pyao kokwa sinyi nembeya.
DEU 4:4 Dopa piyamopape nakama dupwame nakamana Kamongo Anatu yaki nyii nayaminyi dokome epapu mee karalu karaminyi.
DEU 4:5 Nambana Kamongo Anatu dokome langiyamo lowa dupwa peparae nakama mana langiyu. Yuu doko pao nyepala paliraminyi dokona lowa dupwa minyuo pyuo kararami.
DEU 4:6 Nakamame lowa dupwa poraiyuo minyuo warombo soo karalu kararami ramo dokopa wambu rara wakale dupwame nakamana mona palenge renge doko kandarami. Wambu dupwame lowa pii peparae dapwana sepala dokopa nakamame lao, Wambu dapwa mona palenge rengepe soo nyingi rengepe palyuo simbwapyamo rara andake ingyuo karaminyi lao larami.
DEU 4:7 Namwame mende pinya nyisinya lao pisingi dokopa namwana Kamongo Anatu doko repeta karenge. Yuu wakale dupwana rara andake mendenape anatu dopakale mende daa. Namwame nyisinya lao kyakale lenge dokopa baame isingi yano pyakange.
DEU 4:8 Epapu lowa pii mana langipunu dupwa ama rolae pingi. Yuu wakale dupwana rara andake ingyaramopape lowa dopale mende minya nalyaminyi.
DEU 4:9 Nakama kandokondali pyuo karalapape. Yulu dupwa nakama rangena lengeme kandeyaminyi dupwa yuu gii kararaminyi dusipana kame see nalapape.
DEU 4:10 Yuu gii mendepa yuu Sainai kyau dokona nakamana Kamongo Anatunya lenge kambu dorena kareyaminyi dokona lao nakamana ikinyingipi wanengepe kauwangepe dupwa lamairami. Yuu gii dokopa Kamongome namba langyuo, Wambu dupwa nyuo malu palyuo karena lape. Yuu peparae karo dokopa nambana pii mana nyuo warombo soo dee nakamana wane wanakepe dupwame namba kando mupwa lao suu pyao pako karena lao mana lamairami lao nambana pii laro doko simili yaka lao suu pilyu, leya.
DEU 4:11 Nakama yuu kyau isarena pao kareyaminyipa kopa rau romendende isare sukwa pupuri dokome yuu kyau yambe piyamopa isare andake rao yake dokona pulyuo peya kande doko nakamana wane wanakepe polo lamairami.
DEU 4:12 Kamongo dokome isare rakapana pii leya. Dopa pyuo pii leyamo doko siyamanopape baa angi kata mendenape kanda nayama lao nakama lamairami.
DEU 4:13 Baame nakama pipya kana minyuo lalu lao lenge pii doko minyuo pyuo mawa pii akalisa kana para lamana pyao reteyamo dusipa warombo soo karalapape, langiya.
DEU 4:14 Nakama yuu doko pao nyepala palinya pilyaminyi dokona mawa pii minyuo pyuo kararaminyi dupwa Kamongome namba langyuo, Nakama mana lamaipi, leya.
DEU 4:15 Yuu Sainai kyau dokona karo isare rakapana Kamongome nakama pii langiyamo dokopa nakamame yongo lenge kambupi mende kanda nayami.
DEU 4:16 Dokona lao nakamame mee bange anatu lapo akali panda enda yale
DEU 4:17 panda mena yakape yale
DEU 4:18 panda kau omape yale waso pii napala koo keta pasaramano lao kando karalapape. Dopa pirami ramo keyange ingyuo kararami.
DEU 4:19 Nakamame yake dokona netape kanape buipi dupwa kandapala dokopa walu lao lakando dusipana lao minyuo yulu pii nalapape. Nakamana Kamongo Anatumi wambu wakale keta bange dusipa lakandena lao maiya.
DEU 4:20 Dopa piyamopape yuu Isipi dokona randa nyuo isare papiyamo kareyaminyi dokopa baame nakama kiiramo minyuo epeya. Baame nakama baa rangena wambu ingyarami lao nyuo minyuo epeyamo dokona epapu dae petaminyi.
DEU 4:21 Nakama wambu dupwana lao nakamana Kamongo Anatumi namba kando imbwayamosa ipwa Jotane yalo wangu pakirename nenge ando amenge pingi yuu nakama jiyamo dokona paa nare lao langiya.
DEU 4:22 Langiyamo dokona ipwa doko yalo kamame paa napala yuu dakena karo kumaro. Dopa piramopape nakama ipwa doko mee yalo papala nenge ando amenge pingi yuu dokona pao palirami.
DEU 4:23 Nakamana Kamongo Anatu dokome nakama keta kana minyuo lalu lao lenge langiyamo doko kame seramano lao kando karalapape. Nakama rangeme mee bange anatu lapo waseramano kando lao karo banya mawa pii warombo soo minyuo karalapape.
DEU 4:24 Dokona lao nakamana Kamongo Anatu doko isare uliyapu puu pae lenge dopale dokome baame mendali banya panda mai nange.
DEU 4:25 Nakama yuu dakena ee kana malu mee pao karapala wane manjiraminyi dupwana dee wane manjiraminyipape nakama range koo pyuo mee bange anatu wakalena mendemepe waso pii narami. Yulu doko Kamongona lenge kambu dokona koo ingyuo papala baa imbwanyi pyambwara.
DEU 4:26 Nambame yake dokopa isa yuu dokopame epapu nakama pipya pii langilyu dokona usinisi ingyuo lakaramiŋi lao kee leto. Nakamame nambana pii warombo see narami ramo doko nakama oo repeta yuu dakena pali nalomene. Doko ipwa Jotane yalo nakama yuu dokona palinya suu pilyaminyi dokona yuu gii andare palyuo kara narami. Nakama pyao kokwa soo nembalu nembo nembaro.
DEU 4:27 Dopa pipala Kamongo dokome nakama pyao kokwa soo yuu wambu rara wakale palenge dupwana ralinyi nembaramopa wambu nakama dupwana mendaki mendaki lao palyuo kararami.
DEU 4:28 Yuu dupwana nakamame akalinyi kingimi isa kanapeme mee bange anatu lao wasisi lenge rao kandope pii soope nenge naope dee bange ai soope pii nange dupwa lakando minyuo yulu pyakamyuo kararami.
DEU 4:29 Dokona nakamana Kamongo Anatu doko koto kandarami. Nakamana mona suu pingipi dupwa peparaeme poraiyuo suu pyao kararami ramo doko koto kando nyerami.
DEU 4:30 Dokopa nakama keta randa mende epope dee yulu kopetame koope lapo sipuro piramopa nakama Kamongo keta kapu kyuo papala banya pii warombo soo pyuo kararami.
DEU 4:31 Anatu baame sakame kumuo pyuo nyingi. Baame nakama kyawa yaki nyuope dee pyao kokwa soo nembope pii nara. Dee nakamana rora ambasu dupwa keta pii kana minyuo lalu lao lao baa rangeme leyamo doko kame see nara.
DEU 4:32 Nakama manjipa nayaminyipa yuu gii wamba dokona doko kapu kyuo suu pyalapape. Yuu dakena Anatumi akali mupwa wambo wasiyamo doko piso suu pyao karalapape. Nakamame yuu muu silyamo kipwa kipwa dupwana peparae pao kandalapape. Yulu andake pilyamo dopale mende wamba piyase? Wambu mendeme pii dopalepe mende wamba siyamisi?
DEU 4:33 Anatumi isare rakapana piso nakama pii langiyamo doko sepala dokona mee lete kareyami doko suu pyao wambu wakale lapo dopa pyuo nakamana mee bange anatunya pii sepala lete karamisi?
DEU 4:34 Nakama yuu Isipi dokona kareyaminyi dokopa Anatumi nakama baa rangena wambu ingyarami lao nyuo minyuo epeya. Doko suu pyao anatu wakale mendeme wambu rara mendena wambu dupwa neta nyepala baa rangena ingyuo karena leyase? Anatumi nakamana lenge kambu dorena banya porainya renge andake dokome anga ikyanepe yanda pingi yulupi sipuro epena lao minyuo piya. Dopa pyuo yulu wambumi pii nangepe dee wambu pakanyi pyambuo yulupi dupwa piya.
DEU 4:35 Yulu andake dopale dupwa pipala Kamongo dokome nakama lasaka pyuo baa iki Anatuŋu. Mende kara nange lao piya.
DEU 4:36 Baame nakama mana langiru lao banya pii yake panda piso selapape lao piya. Isa yuu dakena banya isare poo pyasi kandalapa lao dokona rakapana pii langyuo piya.
DEU 4:37 Nakamana rora ambasu dupwa mona reteyamo dokona baame nakama rombo palyuo banya porainya renge wakasa dokome baa rangeme nakama yuu Isipi yaki nyuo kiiramo minyuo epeya.
DEU 4:38 Nakama pao kareyaminyipa rara wakale dupwame ama andake ingyuo porainya renge andake palyuo nakama isa palyiyaminyipape baame pao raliya. Dokona lao baame nakama nyuo minyuo epapala rara wakalena yuu doko jeronopa nakamana ingyara lao pyao raliya. Dopa piyamo dokona yuu doko nakamanako ingyuo silyamo.
DEU 4:39 Yake pandape isa yuupi peparaena Kamongo baa Anatu. Anatu wakale mende kara nange dokona lao epapu yuu gii dakepa suu pyao karo kame see nalu nalapape.
DEU 4:40 Epapu nambame nakama banya mawa pi jelono dokona rape rape lao kararami ramo nakamape nakamana manjiraminyi dupwape kapa karo parami. Nakamana Kamongo Anatumi yuu nakamana ingyuo sulu sera lao jilyamo dokona nakama mee palyuo puu parami.
DEU 6:1 Nakamana Kamongo Anatu dokome mawa pii dapwa peparae nambame nakama mana lamaipi lao namba langiya. Nakama palyuo kararami yuu pyaka soo panya pilyaminyi dokona karo warombo soo karalapape.
DEU 6:2 Yuu gii malu palyuo kararami dokopa nakamape nakamana manjiraminyi dupwana para pyarami dupwamepe nakamana Kamongo Anatu doko rape rape lao banya mawa pii nambame nakama jilyu dupwa peparae warombo soo minyuo pyuo kararami. Dokona lao nakama yuu gii malu nembo yuu dokona palyuo kararami.
DEU 6:3 Nakama Isaraele wambu dupwame mawa pii dupwa selapape. Sepala warombo soo minyuo pyuo karalapape. Dopa piraminyi dokopa Kamongo namwana rora ambasu dupwana Anatu dokome lalu lao leyamuli pyuo nakama elyape keta piso yulu keyange pyuo bange peparae au pyuo soo puu paramopa rara porai ingyuo karo yuu amenge pingi dokona kapa palyuo kararami.
DEU 6:4 Isaraele wambu dupwa dake poraiyuo suu pyao karalapape. Namwana Kamongo Anatu baa yeelyo angingyuo karamo.
DEU 6:5 Nakamana monape nakamana imambupi nakamana porainya rengepe dupwa peparaeme nakamana Kamongo Anatu doko mona retalapape.
DEU 6:6 Epapu nambame mawa pii nakama langilyu dapwa kame see nalu nalapape.
DEU 6:7 Nakamana wane wanakepe dupwa mana lamailapape. Nakama anda dokona pisope mendasa wakale paope imambu soo pisope dee yulu pyuo kararaminyi dupwanape kamba kamba lamaiyuoko karalapape.
DEU 6:8 Kame see naramana lao nakamame pii dapwa pepana pyapala nakamana kingi kalenge dupwana puu pyanyi piso dee enamba dupwana piso pipwape.
DEU 6:9 Nakamana anda kambu dowa isa pote dupwanape dee kame kambu dupwanape pepa pyao palyalapape.
DEU 6:10 Nakamana Kamongo Anatu dokome nakamana rora ambasu Aporakame Aisake dee Jekopemoo dusipa kando lalu lao lao lamaiyuo, Nambame yuu taone andake dupwa bange keyange singi nakamame pii nayami doko mairu leyamuli pyuo baame nakama jera.
DEU 6:11 Anda dupwana nakamame wambo bange reto pali nangenyepape bange keyange dupwa soo kandarami. Nakamame ipwa kamuo nyingi yuwale ipwa simbwaraŋa lao wambo kyaso reta nayami dupwa mee yuwale kyasisi sera. Dee isa girapope isa olipi wara pii nayami dupwa wara pisi kararamo kandarami. Yuu dokona Kamongome nakama minyuo paramo dokopa nakama nenge nalena suu pyarami dupwa naraminyipa
DEU 6:12 nakama yuu Isipi dokona kendemande ingyuo karapusi kareyaminyipa Kamongo kiiramo minyuo epeyamo doko kame sisaramano kando lao suu pyao karalapape.
DEU 6:13 Nakamana Kamongo Anatu doko mupwa lao suu pyao pako baa iki lakandalapape. Dee nakamame banya yulu iki pyuo karalapape.
DEU 6:14 Wambu lapo nakama repeta palyuo karaminyi dupwame mee bange anatu lakandelyaminyi dupwana role pyao lakanda nalapape.
DEU 6:15 Nakama dopa pirami ramo dokopa Kamongona imbu singi doko nakama keta isare ingyuo epo palipala nakama pyao kokwa soo nembara. Doko nakamana Kamongo Anatu nakama pipya karenge dokona panda mendemepe nyii narami ingilyamo lao suu pilyamo.
DEU 6:16 Yuu Masa dokona nakamame nakamana Kamongo Anatu doko makande pyuo kandeyami doko suu pyao apa pilyape lao kandalana makande pii nalapape.
DEU 6:17 Mawa pii dupwa peparae nakama jipya kandapi dupwa kandokondali pyuo rape rape lao minyuo karalapape.
DEU 6:18 Kamongome nakama yulu rolae keyangepe pelapa lao lara dupwa pipwape. Doko nakama keta bange dupwa peparae au pyuo mondo lao soo puu para. Yuu keyange amenge kapape pingi dokona lao Kamongome nakamana rora ambasu dupwa kando nyerami lao lalu lao leyamo dokona pao palirami.
DEU 6:19 Palipala baam lalu lao leyamuli pyuo nakamame nakamana nyisu petenge dupwa pyao ralinyi nembarami.
DEU 6:20 Yuu gii ene eparamo dupwana nakamana wane wanakepe dupwame nakama kando piso soo lao, Akipamo namwana Kamongo Anatu dokome namwa mawa pii dupwa peparae rape rape lao minyuo karalapape, leyase? larami.
DEU 6:21 Dokopa nakama lamaiyuo lalapape. Namwa Isipi range kiŋi dokona kendemande yulu pyuo karapusi kareyamanopa Kamongome banya porainya renge wakasa dokome namwa kiiramo nyiya.
DEU 6:22 Namwana lenge dokome kandeyamanopa baame yulu wambumi pii nange dupwa pyaka soo pyuo dee Isipi range wambupi nakamana kiŋi dokope banya yulu pingi akali mupwa dupwape keta peparae yamarangunyi nembo pakanyi pyambuo piya.
DEU 6:23 Dopa pipala namwana rora ambasu dupwa kando yuu doko jeroŋo lao lalu lao leyamuli pyuo baame namwa yuu Isipi kareyamanopa mee manda rao nyuo minyuo dae epapala yuu dake jiya.
DEU 6:24 Dokopa namwana Kamongo Anatu dokome namwa mana langyuo mawa pii dapwa peparae rape rape lao minyuo baa mupwa lao suu pyao pako karalapape, leya. Namwa dopa pirama ramo dokopa baame yuu peparae namwana rara dupwa iso karo nyisaramopa kapa mondo lao au pyuo palyuo puu parama.
DEU 6:25 Anatumi namwa langiyamo pii dupwa peparae yaki nyii nao rape rape lao minyuo pyuo kararama ramo dokopa Anatumi namwa kando rae maira.
DEU 7:1 Nakamana Kamongo Anatu dokome yuu nakama palyuo kararami dokona nakama sukusa lanyuo para. Dokopa baame rara malu dupwa pyao neta ralinyi nembara. Nakama wambo pao kararaminyipa baame akali rara ama andake nakama nyuo isa palyuo porainya renge palenge rara yanda ipingi dusipa pyao ralinyi nembara. Rara dusipa Iti wambupi Gukasi wambupi Amo wambupi Kenane wambupi Perasi wambupi Ipi wambupi Jepusi wambu dupwa peparae ralinyi nembara.
DEU 7:2 Nakamana Kamongo Anatu dokome nakamana porai dokona wambu dupwa kingi rakana palyakaramopa nakamame rara dupwa pyao anamasi minyuo wini piyami kande dokopa wambu peparae pyao kumakalapape. Nakama pipya pii lalu lao laope dee kondome kumuo nyisope pii nalapape.
DEU 7:3 Wambu rara dupwana enda lapo nakamame nyii nalapape. Dee nakamana wane manjiraminyi dupwame enda dupwana mendepe nyinya lao laa nalapape.
DEU 7:4 Dokona lao enda dupwame wane dupwa Anatu mata maipala anatu wakale dupwa lakandena lao kata koo lasaka pyuo lanyuo pasarami. Dopa pirami ramo doko Kamongome nakama kando imbwuapala yuu mendaki pyao kokwa soo nembara.
DEU 7:5 Dokona nakamana kana pyare lasi dupwa pyao lalyuo kana londe poo pyasi lenge dupwa pyao poro lao muu muu pyuo mee bange enda anatu Asera lenge lakandenge doko pyakepo nembo dee mee bange kingimi wasapala anatu lenge dupwa kisinyi nembo pirami.
DEU 7:6 Doko nakama nakamana Kamongo Anatu dokona wambu angingyuo karaminyi dokome dopa pirami. Wambu yuu muu dupwana palaminyi dupwa peparaena baame nakama banya wambu angi range wakasa ingyuo rombo palyiya.
DEU 7:7 Nakama wambu menge dupwa pipya manda manja nao malu kara nayaminyipape Kamongome nakama mee mona reto rombo palyiya. Yuu muu peparaena nakama wambu rara ama kuki ingyuo palaminyi.
DEU 7:8 Dopa pipyamopape Kamongome nakama mona retapala nakamana rora ambasu dupwa kando lalu lao leyamo pii doko yaki nyii nao minyuo karapuli lao suu piyamo dokome nakama Isipi kiŋi dokona kendemande pyakamyuo karapusi kareyaminyipa banya porai andake wakasa dokome nakama kyawa lete nyuo manda rao kiiramo minyuo epeya.
DEU 7:9 Nakamana Kamongo Anatu doko baa iki Anatu. Baame nakama yaki nyii nange. Doko suu pyao karalapape. Wambu para pyasi taosande mendaki (1,000) paraminyi dupwana lapome baa mona retapala banya mawa pii dupwa warombo soo minyuo pyuo kararami dupwa keta banya mona reto karalu karenge renge doko lasaka pyuo banya kana minyuo lalu lao lenge pii doko yaki nyii nao minyaro karara.
DEU 7:10 Dopa piramopape wambu lapome baa epe kanda naraminyi dupwa malisa nao randa maira.
DEU 7:11 Dokona lao nakama mana langiyaminyi pii dupwa warombo soo karalapape. Dopa pyuo karo dokopa epapu nambame mawa pii jilyu dupwa peparae rape rape lao minyuo karalapape.
DEU 7:12 Nakamame mawa pii dapwa sepala warombo soo poraiyuo minyuo karalu kararami ramo doko nakamana Kamongo Anatu dokome nakamana rora ambasu dupwa kando lalu lao lamaiyamuli pyuo banya kana minyuo lalu lao lenge pii doko nakama keta reto puu para. Dee banya mona retenge doko alowa pii nao nakama lasaka pyuo pira.
DEU 7:13 Baame nakama mona reto dee elyape keta piso pira. Dopa piramo dokopa nakama ama wakasa andake ingyuo dee wane wanakepe dupwa malu manjirami. Nakamana isa olipi ipwangepe kenapape waene ipwangepe dupwa andaramo naramiŋi lao baame nakamana ee yuu dupwa elyape keta pisinyi pyambwakara. Dee mena bulamakao mena sipisipipi malu dupwa elyape keta pisinyi pyambuo nakama jera. Baame nakamana rora ambasu dupwa kando lao yuu jeroŋo lao lalu lao leyamo yuu dokona yulu peparae pyuo nakama elyape keta pisara.
DEU 7:14 Baame nakama kamonganyi nembo elyape keta pisinyi pyambwapyamo palaminyi dopa pyuo yuu muu wambu palaminyi dupwana mendali elyape keta pisa nara. Nakamape nakamana mena bulamakao dupwape mee ingi poraiyaramopa wane manji naraminde daa.
DEU 7:15 Anga yanyipi peparae eparamo dokopa Kamongome nakama keta poraiyuo alya isa ingyara. Yuu Isipi kareyaminyi dokopa anga yanyipi koo mange nao piyamo kando nyiyami kande dopale mende baame nakama keta jii nara. Dopa pii naramopape baame nakamana nyisu petenge wambu peparae keta maira.
DEU 7:16 Nakamana Kamongo Anatu dokome akali rara peparae nakamana porainya renge dokona kingi rakana pyalyakaramo dokopa pyao kokwa soo nembalapape. Nembapala sako kondome kumuo nyisa nalapape. Dokona lao nakamana mee bange anatu lenge dupwa lakandakami nalapape. Dopa pirami ramo doko nakama kumarami.
DEU 7:17 Nakama rangeme lao, Wambu dapwa ama soo kaeyo namwa pipya manda manja nalyamo. Dokona kapa pyuo pyao neta nemba naramalyamo lao laa nalapape.
DEU 7:18 Dopa pipala wambu dupwa kando paka nalapape. Kamongo nakamana Anatu dokome yuu Isipi kiŋi dokope dee banya wambu dupwape peparae kando yulu mende pyakamiyamo doko nakama suu pyalapape.
DEU 7:19 Dopa pipala ama randa wakale wakalepe anga ikyane andakepe nakamana lenge angi dokome kandeyami kande dupwa yulu wambumi pii nangepe dee yulu wambumi kando yamarangungipi piya kande dupwa dee porainya renge andake dokome role pyapeta nakamana Kamongo Anatu dokome nakama kiiramo nyiyamo manda rasi mee epeyami doko suu pyalapape. Baame Isipi range dupwa pyao kokwa soo nembeya kande dopaleko ingyuo epapu nakamame wambu pakalyaminyi dupwa peparae baame pyao kokwa soo nembakara.
DEU 7:20 Baame nakama keta sukusa kamame pakange rengepe dupwa maipala wambu lapo range kyawa lete nyuo yalu pyuo koko paraminyi dupwa pyao kokwa soo nembarako.
DEU 7:21 Dokona lao wambu dapwa kando paka nalapape. Nakamana Kamongo Anatu doko nakama pipya role karamo. Anatu baa mupwa andake wakasa ingyuo karamo dokona baa iki pako kararami.
DEU 7:22 Nakama wambo mee mendele paraminyi dokopa baame rara dapwa kuki lama larapu pyao nyisa nembara. Dopa piramopape nakamame kapa pyuo yuu gii mendakinya peparae pyao kokwa soo nemba narami. Doko daaŋa lapala yuu mendaki pyamili doko mena suwape rae lenge ama malu soo kaeyo dupwa konda konda pyuo epapala nakama pakanyi pyambuo randa jimili.
DEU 7:23 Kamongo dokome nakamana nyisu petenge dupwa nyepala nakamana porai dokona kingi rakana palyakapala wambu dupwa pakanyi pyambwaramopa pyao kokwa soo nembarami.
DEU 7:24 Dokopa baame wambu dupwana kiŋi dupwa nakamana porai dokona kingi rakana palyakaramopa nakamame pyao kumakarami. Dopa piraminyipa wambu dupwame kiŋi dupwa kame serami. Dokopa wambu mendeme kaeyalapa lao nakama minyuo nyii naraminyipa nakamame wambu peparae pyao kokwa soo nembarami.
DEU 7:25 Wambu dupwana mee bange anatu lenge dupwa nyuo isarena kisarami kana kulingi golopeme mee bange anatu lao wasiyaminyi dokona nakamame nyimwalinya suu pyaa nalapape. Dee dupwa nakama rangena ingyuo nyii nalapape. Doko daaŋa lapala nyerami ramo doko Kamongo dokome mee bange anatu lenge dupwa epe kanda nange dokona nakama peparae kumarami.
DEU 7:26 Mee bange anatu lenge wasisi dupwanape lapo nakamana anda dupwana minyuo epa nalapape. Dopa piraminyisa mee bange anatu doloma randa nyiminyi mendare dopale dokoko nakama nyerami. Kamongome mee bange wasisi anatu lenge dupwa koo keta pyambuo isa palyipyamo silyaminyi dokona nakamame epe kanda nao kilya kando karalapape.
DEU 8:1 Epapu nambame mawa pii nakama jilyu dupwa rape rape lao kandokondali pyuo minyuo karalapape. Dokona lao Kamongo dokome nakamana rora ambasu dupwa kando yuu jeroŋo lao lalu lao leyamo dokona nakama ama malu soo kaeyo ingyaramopa palyuo kararami.
DEU 8:2 Dokona ee kana akalisa kisima epo peyamo dusipana nakamana Kamongo Anatumi yuu muiyane dokona kata londena lanyuo epeyamo doko suu pyalapape. Baame nakama keta randa wakale wakale dupwa pyuo dee nakamana mona dokona aki mende suu pilyaminyi lao kandope banya mawa pii dupwana warombo soo minyuo karamipi lao nakama makande pyuo yulu piyamo doko suu pyalapape.
DEU 8:3 Doko baame nakama lopanyi nembeya. Dopa pipalape dokopa enakana baame nakama nenge myana lenge doko nalapa lao jiya. Jiyamo nenge doko nakamape nakamana rora ambasu dupwamepe wamba nakanju nao kanda nange. Baame dopa piyamo dokome nakama mana langyuo, Akali borete iki nao lete kara nange. Anatunya kambunya pii epelyamo dupwa soo lete karenge, leya Kamongome.
DEU 8:4 Ee kana doo akalisa kisima dusipana nakamana komau dupwana mendepe kangyuo nyisa paa nao nakamana kimbu dupwa rondo lao pii naya.
DEU 8:5 Dokona rakange dupwame nakamana wane wanakepe dupwa mana lao pyalana pyuo rolenge dopale ingyuo nakamana Kamongo Anatu dokome nakama randa joo sukundi ingyuo kiso rolo mana langingi doko suu pyalapape.
DEU 8:6 Dokona lao nakama Kamongome mana langilyamuli pyuo pyuo karalapape. Dee banya mawa pii dupwana letamuli pyuo minyuo palyuo karo baa mupwaŋa lao suu pyao pako karalapape.
DEU 8:7 Nakamana Kamongo Anatu dokome yuu keyange amenge pingi dokona nakama minyuo epopyamo. Yuu doko ipwa ponape ipwa guu lengepe dee ipwa isa yuunya palu potemo epapala yuu lama lama dupwanape dee yuu kyau dupwanape ranju epo pengepe
DEU 8:8 dee yuu doko nenge witipi balipi isa girapo isa piki isa pomekeranate isa olipi dupwana jingipi amburali ipwangepe singi dokona nakama lanyuo epopyamo.
DEU 8:9 Dokona nakama kamame lopome kumuope panda kapa kararamali lao bange nyelana suu pyaraminyi dupwa yangyarande daa. Dopa piramopa yuu dokona kana dupwana kapa palenge. Dee yuu kyau dupwana kone kana dopale mende apu rao nyerami.
DEU 8:10 Nenge peparae naramili lao nakama keta sera. Yuu amenge pingi nakamana Kamongo Anatu dokome nakama jiyamo dokona ange lao kararami.
DEU 8:11 Nakamana Kamongo Anatu doko nakamame kame sisaramano lao kandokondali pyuo karalapape. Banya mawa pii nambame epapu nakama jilyu dupwana mendepe isa paa nana lao kando rape rape lao karalapape.
DEU 8:12 Nakama nenge naramili dupwa kapa seramo dokopape anda keyange paliraminyi dupwa pyuo otapala dokopape
DEU 8:13 nakamana mena bulamakao sipisipi dupwape nakamana kana kulingi golope dee nakamana bange wakale wakale peparae dupwa malu ingyuo kapa soo piramo dokopa
DEU 8:14 nakama range ketae pyambuo lakandelyaminyi lapala nakamana Kamongo Anatu dokome nakama yuu Isipi karapusi ingyuo kendemande yulu pyuo kareyaminyipa kiiramo nyuo lanyuo epeya doko kame sisarami kando karalapape.
DEU 8:15 Yuu muiyane andake koo singi kau kyalende popokyalyape singi dokona baame nakama suku suku nyuo lanyuo peya. Yuu yando nasi ipwa epa nange dokona nakamana lao baame kana dokona piso ipwa guu lanyi peya.
DEU 8:16 Yuu muiyane dokona nenge rara wakale myana lenge nakamana rora ambasu dupwame nao kanda nange doko nakama nalapa lao jiya. Randa joo lumwa dokona baame bange keyange joo nakama elyape keta pisaroŋo lao baame nakama randa joo makande piya.
DEU 8:17 Dokona lao nakama rangena porai dokome porainyi pyambuo yulu dupwa kamonganyi nembo pyuo karamano lao suu pyaa nalapape.
DEU 8:18 Nakamana Kamongo Anatu dokome porainya renge nakama jiyamosa kamonganyi nembo karamano lao poraiyuo suu pyalapape. Nakamana rora ambasu dupwa keta lao kana minyuo lalu lao leyamo dokona yaki nyii nao minyuo karoŋo lao yulu dake pipyamo pilyamo.
DEU 8:19 Nakamana Kamongo Anatu doko ama kame see napala anatu wakale dupwana yulu pyakamyuo lakando paa nalapape. Doko kaepala nakama dopa pirami ramo Anatumi nakama pyao kokwa soo nembara lao repe pii langilyu.
DEU 8:20 Nakama wambako pao kararaminyuipa Kamongome rara wakale dupwa pyao kokwa soo nembara doko suu pyao nakama Kamongona pii warombo soo kara narami ramo doko baame nakama pyao kokwa soo nembarako.
DEU 9:1 Isaraele wambu dupwa selapa. Nakama ipwa Jotane oo repeta yalo papala yuu nyuo palirami doko rara wakale palenge dupwa andake ingyuo nakamana porai renge doko isa palyuo karaminyi dupwana yuu ingyuo silyamo. Nakamana taone andake kana kame londe dokome pyuo yaki dokona suu lenge.
DEU 9:2 Wambu doo palenge dupwa ama londe wakasa porai karenge. Nakama ama raeko karenge. Wambu mendemepe nakama pipya sipuro pimwai nangeŋe lao letaminyi doko nakama singi.
DEU 9:3 Dopa piminyipape epapu nakamana Kamongo Anatu dokome isareŋe rao nakamana lenge kambu dorena wambo paramo doko nakama rangeme kandarami. Nakama wambo pao kararaminyipa baame wambu doloma anamasi minyuo karara. Dokona lao baame lalu lao leyamuli pyuo nakamame doloma neta nembo waiya lao pyao kokwa soo nembarami.
DEU 9:4 Nakamana Kamongo Anatumi wambu dupwa neta ralinyi nembakaramo dokopa nakama rangeme lao namwa keyange karamwasa Anatumi namwa yuu dakena lanyuo epeya laa nalapape. Doko daa. Wambu dupwa yulu koo piyaminyisa Kamongome dupwa neta ralinyi nembakara.
DEU 9:5 Nakama keyange ingyuo rolae pyuo karamindena Kamongome nakama wambu dolomana yuu doko nyelapa lapyande daa. Wambu doloma koo pingi dokona baame ralinyi nembakara. Dopa piramo dokona nakamana rora ambasu Aporakame Aisake Jekopemoo dusipa keta pii lalu lao lao rape rape lao piruŋu leyamo dokome pira.
DEU 9:6 Nakama keyange pyuo karamindena Kamongome yuu keyange amenge pyuo nenge andenge doko nyuo jerande daa. Nakama keyange daa. Nakama mona kana poko karenge wambu ingyuo karaminyi.
DEU 9:7 Yuu muiyane dokona nakamame kopetame pyuo Anatu imbwanyi pyambuyami kande doko kame see nalapape. Nakama Isipi yaki nyuo epeyaminyi yuu gii dokona piso dae epo pyaka siyaminyi dokopa nakamame banya pii kamba lao mata maiyami.
DEU 9:8 Dee yuu Sainai kyau dokonape kamame nakamame Kamongona imbu singi nyakamiyami. Imbu singi andake nyepala baame nakama oo repeta pyao kokwa soo nembara ingiya.
DEU 9:9 Namba yuu kyau dokona pulyuo pao kana para lama dolapona Kamongome nakama pipya pii lao kana minyuo pepa pyao palyiyamo doko nyakala peyo. Papala yuu kyau dokona namba kukwa akalisa kisima korakama akalisa kisimako ipwa nengepe mende naa nao kareyo.
DEU 9:10 Kareyono dokopa nakama yuu kyau dokona epo malu palyuo kareyaminyi dokopa Kamongome isare dokona rakapana pii langiya dupwa pii kana para lamana banya kingi dokome pepa pyao palyapala namba jiya.
DEU 9:11 Kinyi, kukwa akalisa kisima korakama akalisa kisimako dusipa epo papeyamopa pii dupwa lalu lao lao kana minyuo Kamongome kana para lamana pepa pyao palyiyamo dolapo namba jiya.
DEU 9:12 Pyao jepala dokopa Kamongome namba langyuo, Embena wambu yuu Isipi yaki nyuo lanyuo epee kande dupwame yulu kopetame pyuo nambame yulu pinya lao mawa pii lamaiyunu dupwa kaeyo otapala nakama rangena mee bange anatu doko wasiyami. Dokona lao yuu kyau dokona karo waiya lao lupyuo puu, leya.
DEU 9:13 Kamongome namba dee langyuo, Nambame wambu dapwa mona kana poko karaminyi doko silyu.
DEU 9:14 Wambu mendeme nakama suu pyaa naramiŋi lao nambame wambu dupwa pyao kumakalana lao pilyu. Dokona embame namba pyaa napipi lao kata rokwa nare. Dopa pirunu dokopa nambame emba wambu rara ama andake porai dupwana rakange kyawa ingyuo kara, laro. Wambu dupwame doloma pipya isa palyarami ingilyamo, leya.
DEU 9:15 Dokona lao namba kyau dokona karo kapu kyuo dokopa para lamana lalu lao lenge pii pyasi paleyamo dolapo soo lupyuo peyo. Dokopa isare uliyapu doko yuu kyau dokona potemo reya.
DEU 9:16 Dokopa nakamame nakamana Kamongo Anatu dokome mawa pii jiyamo dupwa kamba lao oto banya lenge kambu dorena yulu koo pyuo kana dokome bulamakao kali yale mende anatuŋu lao wasiyami doko namba kandeyo.
DEU 9:17 Dopa piyaminyi dokona nakamana lenge kambu dokona kana para lama dolapo pyao pisiyunusa poro lao muu muu piya.
DEU 9:18 Dokopa namba Kamongona lenge kambu dokona kambako isa pangu siyunupa kukwa akalisa kisima korakama akalisa kisimako nenge ipwape naa nao kareyo. Doo piyunu doko nakama Kamongona lenge kambu dokona koo pyuo baa imbu singi manjinyi pyambuyaminyisa piyu.
DEU 9:19 Kamongome nakama kando ama wakasa imbwuapala nakama pyalana lao suu piyamosa namba pakame kumuyu. Dopa piyamopape Kamongome nambana pii dee kambako siya.
DEU 9:20 Dopako pyuo Kamongome Erone kando ama wakasa imbwuapala baa opetae pyao kumakalana lao suu piyamosa yuu gii mendaki dokopa nambame Eronena lao ateŋa lakamiyu.
DEU 9:21 Nakamame yulu koo pyuo bulamakao wasiyaminyi doko nambame nyepala isarena pyao pyambuyu. Pyambwapala dee nyuo pyao kau lao sinjimu inginyi nembapala sinjimu ingiyamo dupwa yuu kyau dokona ipwa lupyuo epenge dokona pyao nembeyo.
DEU 9:22 Yuu Tapara yuu Masa dee yuu Kipirote Atapa dupwana karo epeyaminyi dokopa nakamame dopako pyuo nakamana Kamongo Anatu doko imbu singi manjinyi pyambuyami.
DEU 9:23 Dokopa baame nakama yuu Katese Paneya dokona karo yuu jiyamo dokona nakama palya pupwa leyamopa nakamame baa yanda pimwaiyuo baa keta pyamalya napala banya pii warombo see nayami.
DEU 9:24 Yuu gii nambame isiyunu dokona piso epo dakepa nakamame Kamongo kando yanda pimwaiyami doko namba silyu.
DEU 9:25 Dokona lao Kamongo kareyamo dorena kukwa korakamape yuu gii akalisa kisima dusipa isa pangu siyu. Doo piyunu doko baame nakama pyaro lao suu pyalu pyao piyamo doko sepala piyu.
DEU 9:26 Dokopa nambame ateŋa lao, Kamongo Mupwa Wakasa doko emba rangena wambu embena porainya renge dokome alya minyuo yuu Isipi karo lanyuo epee dupwa pyao kumaka napipi.
DEU 9:27 Embena kendemande akali Aporakame Aisake Jekopemoope palyuo kareyami dupwa suu pyaro karape. Dopa pipala wambu mona kana poko yulu kopetame pyuo koo pilyaminyi dupwana lao poraiyuo suu pyaa napipi.
DEU 9:28 Wambu dupwa pyalana lao suu pyare ramo dokopa Isipi wambu dupwame kando dopa lao, Embame embena wambu dupwa yuu mairuŋu lalu lao leene dokona minyuo pana yakara pipala nakama kando epe nasepala yuu muiyane dokona nakama pyao kumaro lao lanyuo peelyamo, larami.
DEU 9:29 Wambu dasipa emba rangena lao rombo palyepala embena porai renge andake dokome yuu Isipi yaki nyuo lanyuo epee kande. Dokona lao embame nakama pyao kokwa soo nemba nare ingilyamo lao ateŋa leyo, leya Moseseme.
DEU 10:1 Dokopa Kamongome namba langyuo, Kana para wambo dopakale lama kunjapala dee isa bokote mende wasape. Dopa pipala yuu kyau namba karo dakena kana dolapo minyuo ipupi.
DEU 10:2 Dokopa wambo kana poro leene dolapona pii piyu dusipako dee kamba kana dolapona pyao palyaro dokopa bokote dokona palyare.
DEU 10:3 Dokopa nambame isa akasiya lenge dokome bokote mende wasapala kana para wambo dopakale lama kunjapala yuu kyau dokona minyuo pulyuo peyo.
DEU 10:4 Peyono dokopa Kamongome kana para dolapona pii wambo piyamo dusipako dee pyao palyiya. Palyiyamo doko nakama yuu kyau dokona malu palyuo pao kareyami dokopa baa isare rakapana pii lao mawa pii akalisa dusipa nakama jiya kande. Dokopa Kamongome namba kana para lama jiyamopa
DEU 10:5 dee kapu kyuo yuu kyau dokona lupyuo peyo. Papala dokopa Kamongome leyamuli pyuo bokote nambame wasiyunu dokona palyiyu. Doko dakepape mee soo karamo.
DEU 10:6 (Isaraele wambu dupwame Jakane wambunya ipwa kamuo nyingi yuwale kyasisi dupwa yaki nyepala yuu Mosera dokona peyami. Yuu dokona Erone kumuyamopa malu piyami. Dokopa banya ikinyingi Eliasa lenge dokome rakangena panda doko nyuo purisi ingiya.
DEU 10:7 Dokona piso yuu Gutota papala dee yuu Jotipata ipwa malu epenge yuu dokona peyami.
DEU 10:8 Dokopa yuu kyau dokona Kamongome Lipae rara akali dupwa rombo palyapala Kana Minyuo Lalu Lao Lenge Pii Palenge Bokote doko iso karo purisi ingyuo banya yulu pyakamyuo banya kingi lao wambu dupwa keta elyape pisinya lao karena leya. Leyamuli pyuo yulu doko mee dakepape pyuoko karaminyi.
DEU 10:9 Dokona lao rara wakale dupwame yuu nyiyaminyipa Lipae dupwa nyii nayami. Nyii nayaminyipape nakamana Kamongo Anatu dokome lalu lao leyamuli pyuo nakama yulu angingyuo nyepala Kamongona purisi yulu pyuo kareyami.)
DEU 10:10 Namba yuu kyau dokona kukwa korakamape akalisa kisimako dusipa wamba yuu gii piyunu dokoko suu pyao palyuo kareyo. Kareyo dokopa Kamongome nambana pii ŋee lao sepala wambu dupwa pyao kokwa see naro, leya.
DEU 10:11 Nakamana rora ambasu dupwa keta mairu lao lalu lao leyamo yuu dokona nakama palyuo kararami lao baame namba nakama lanyuo pupi, lao langiya.
DEU 10:12 Nakamana Kamongo Anatu dokome aki yulu lapo epapu nakama pipwape langilyape lao Isaraele wambu dupwa selapape. Kamongo mupwa lao suu pyao pako lakando karo dokopa baame langilyamo dupwa peparae pilapape. Nakama mona maingi rengepe imambupi peparaeme baa mona reto banya yulu pyakamilapape.
DEU 10:13 Dee banya mawa pii dupwa warombo soo karalapape. Dakepa mawa pii nambame nakama jilyu dusipame nakama nyiso elyape keta pisara.
DEU 10:14 Yake ketae silyamo dokope isa yuu dokope dee isa yuu dakena bange peparae silyamo dupwape Kamongona.
DEU 10:15 Dopa piyamopape Kamongome nakamana rora ambasu dupwa mona wakasa reteyamo dokome baame wambu rara menge lapo rombo palyapengele doko kaepala nakama rombo palyiya. Rombo palyiyamo dokona banya rombo palyisi wambuko mee petaminyi.
DEU 10:16 Dokona epapu Kamongona pii warombo soo mona kana poka kaeyalapape.
DEU 10:17 Nakamana Kamongo Anatu doko kamame wakasa. Anatu menge dupwape porai renge wakale dupwape peparae isa palyingi. Baa kamame andake wakasa porai karapyamo dokome wambu dupwa baa mupwa lao suu pyao pako kararami. Baame mendali koo keta palyuo mendali elyape keta palyuo pira doko suu pyaa nao ama rolae pyuo wambu peparae kapa kapa nyisingi. Dee baame nyisapyali lao isa kata bange maingi dokopa epe kando nyii nange.
DEU 10:18 Baame wane wanake muiyanepe enda waiyape dupwa kando rolae pyakamingi. Baa yuu rara wakale wambu namwa pipya palenge dupwa mona reto nenge komaupi maingi.
DEU 10:19 Dokona lao nakama yuu Isipi dokona wakale ingyuo kareyami kande dokona suu pyao rara wakale wambu dupwa mona reto karalapape.
DEU 10:20 Nakamana Kamongo Anatu doko mupwa lao suu pyao pako baa iki ketae pyambuo lakandarami. Baa yaki nyii nao dee banya kingi dokona iki lao lalu lao pii larami.
DEU 10:21 Baa lakandalapape. Baa nakamana Anatu dokome yulu andakepe yulu yamarangunyi pyambungipi dupwa nakamana lao pyakayamo dupwa nakama rangena lenge dokome kandeyami.
DEU 10:22 Nakamana rora ambasu dupwa yuu Isipi peyaminyi dokopa nakama akalisa yanda ipingi nyepo iki pao kareyami. Dopa piyaminyipape epapu nakamana Kamongo Anatu dokome wambu kamame wakasa wai nyiyasa yakena bui dopale ingyuo karaminyi.
DEU 12:1 Kamongo doko nakamana rora ambasunya Anatu dokome yuu dake nakama jilyamo dokona nakamame mawa pii dapwa rape rape lao palirami. Mawa pii dapwa selapape.
DEU 12:2 Yuu dokona nakama nyuo palirami dokona wambu dolomame yuu kyaupi yuu kungyupi isa renge isarenape nakamana anatu menge lakandelyaminyi panda dupwa peparae pyao kokwa serami.
DEU 12:3 Kana pyare dupwa lalyuo kana londe poo pyasi lenge dupwa pyao kau lao muu muu pipwape. Dee isame wasingi mee bange enda Asera anatu lenge dupwa nyuo kisinyi nembo nakamana mee bange wasisi anatu lenge dupwa pyakepo nembo pipwape. Dopa piraminyi dokopa nakamame panda dusipana kamame kamba lakanda narami ingilyamo.
DEU 12:4 Wambu dolomame nakamana mee bange anatu dupwa lakando karengenyili pyuo nakamana Kamongo Anatu doko lakanda nalapape.
DEU 12:5 Nakamana rara peparae palaminyi dupwana Kamongome yuu mendakindena wambu dupwa banya lenge kambu dorena karo lakandarami lao rombo palyara.
DEU 12:6 Rombo palyaramo yuu dokona nakamame bange wakale wakale dupwa Kamongo mairami. Bange kiso maingi dupwape mee maingi dupwape bange akalisa dusipana pingyu nyuo maipa pingipi dee lapo mee konda pyuo maingipi dee wambo Anatu mairu lao lalu lao leyaminyili pyuo maingipi dee bange mee maso maiyalana suu pyaraminyili pyuo maingipi dee nakamana mena bulamakao sipisipipinya wambo mupwa mandenge dupwape mairami.
DEU 12:7 Nakamana Kamongo Anatunya lenge kambu dokona nakamape nakamana ree palu dupwape nenge nao nakamame keyange nyelana lao yulu poraiyuo piyaminyi dokopa Anatumi elyape keta pisiyamo dokona ama rae wakasa maiyuo pisirami.
DEU 12:8 Anatumi panda baa lakandarami lao wasaramo dokopa nakamame epapu mee maso lakando karaminyili pyuo kara narami.
DEU 12:9 Doko nakama manda rao palyuo kararami lao nakamana Kamongo Anatu dokome yuu jilyamo dokona pao pyaka sepa naraminyi dokome mee maso lakandelyaminyi.
DEU 12:10 Nakama ipwa Jotane yalo paparaminyi dokopa Kamongome yuu dokona palipa lao jeramopa nakama palirami. Dokopa baame nakamana nyisu petenge dupwa keta alya isa minyaro kararamopa nakama manda rao palyuo kararami.
DEU 12:11 Baa kingi lakando pisirami lao yuu mendakinde Kamongome rombo palyara dokopa nakamame bange jelapape langiyamo dupwa peparae minyuo eparami. Nakamana bange kiso mairamili dupwape mee mairamili dupwape bange akalisa dusipana pingyu nyuo maipa pirami dupwape mee konda pyuo mairami dupwape dee wambo bange keyange Kamongo mairama lao lalu lao leyami dupwape minyuo eparami.
DEU 12:12 Nakamape nakamana wane wanakepe nakamana kendemandepe dee Lipae rara nakamana taone dokona palaminyi dupwape peparae banya lenge kambu dokona ama rae wakasa maiyuo kararami. Lipae rara dupwa nakama rangena yuu mende pingyu see nara doko poraiyuo suu pyalapape.
DEU 12:13 Nakamame mee maso yuu lapo rombo palyaraminyi dupwana nakamana bange dupwa kiso mai narami.
DEU 12:14 Nakamana rara palaminyi dupwana yuu mende Kamongome rombo palyaramo dokona iki bange mairami. Yuu mendaki dokona iki nakamana bange kiso maiyuo dee yulu wakale peparae pipwape langiyunu dupwa pyuo kararami.
DEU 12:15 Dopa piraminyipape nakama palyuo kararaminyi dupwana nakamana mena dupwa mee maso pyao kiso nao kararami. Kamongome kukipi andakepe pyuo jeramuli pyuo kapa narami. Wate pyuo poo pingi pyaa nangepe dupwa peparaeme nenge narami. Nakama peparaeme mena rae lengena minju nengenyili pyuo narami.
DEU 12:16 Dopa pyuo naraminyipape mena dupwana ranjama doko nenge ingyuo naa nalapape. Naa napala ipwa dopale ingyuo yuu dokona kulimbwanyi nembalapape.
DEU 12:17 Nakama yuu palyuo kararaminyi dupwana Kamongo bange mairaminyi mendepe naa narami ingilyamo. Nakamana isa jingi witi akalisa pingyu nyuo maipa pingipi nakamana ipwa waene akalisa pingyu nyuo maipa pingipi nakamana olipi ipwange akalisa pingyu nyuo maipa pingipi dee mena bulamakao sipisipipinya wambo mupwa mandengepe Anatu bange mairama lao lalu lao lao lengepe mee maso maingipi dee bange wakale lapo maingipi dupwana mendepe naa narami.
DEU 12:18 Nakamape nakamana wane wanakepe dupwape kendemande dupwape dee Lipae rara nakamana taone dupwana palenge dupwa peparaeme nakamana Kamongo Anatu dokome yuu mendakinde rombo palyiyamo dokona piso banya lenge kambu dokona nenge dupwa narami. Nao karo dokopa yuu dokona yulu peparae piminyi dupwana lao rae maiyuo kararami.
DEU 12:19 Nakamana yuu dokona palyuo karo dokopa nakamame Lipae rara dupwa kame sisaramano kando lao karalapape.
DEU 12:20 Nakamana Kamongo Anatu dokome nakamana yuu lapo konda pyuo jero lao lalu lao leyamuli pyuo jeramo dokopa nakama minju nalana suu pyaraminyili pyuo kapa narami.
DEU 12:21 Kamongo lakandenge panda mende nanesa wakasa ingiya kande dokopa nambame nakama langiyunuli pyuo nakamame mena bulamakao sipisipipi Kamongome nakama jiyamo dupwana mende pyao kisapala nakamana anda dokona nao pisiramo.
DEU 12:22 Wambu mendali wate pyuo poo pingi pyaa nangepe mena rae lengena minju nengenyili pyuo minju doko kapa nara.
DEU 12:23 Mena minju neyami kande dokopa ranjama dokona mee pero kareya kande dupwa naa narami. Renge dokona ranjama dokona lete karenge renge palamo. Dokona lao letena renge doko nakamame minju pipya role pyao naa narami.
DEU 12:24 Ranjama doko nenge ingyuo naa napala ipwa ingyuo yuu dokona kulimbwanyi nembarami.
DEU 12:25 Dopa pyuo ranjama naa narami ramo dokopa Kamongome nakama kando rae mairamopa nakamape nakamana manjiraminyi dupwape keta yulu dupwa peparae mondo lao au pyuo soo puu para.
DEU 12:26 Nakamana bange mairaminyi dupwape dee Kamongo mairama lao lalu lao leyaminyi dupwape nyepala lakandenge panda mendakinya minyuo parami.
DEU 12:27 Dokona Kamongona kana pyare dokona bange reto kiso sinjura pinyi nembaramili dupwa mairami. Dee lapo nakamame ranjama dupwa kana pyare dokona kulimbwanyi pisapala minju dupwa nakama naraminyi dupwa opetae kiso mairami.
DEU 12:28 Nambame mawa pii langiyunu dupwa rape rape lao yaki nyii naraminyi dokopa nakamame yulu rolaepe nakamana Kamongo Anatu rae mainyi pyambungipi piraminyi dokome nakamape nakamana manjiraminyi dupwape keta peparae kapa ingyuo soo puu para.
DEU 12:29 Mosese baame wambu dupwa lamaiya. Nakama wambu rara wakalena yuu dupwana paraminyipa nakamana Anatu dokome wambu dupwa pyao kokwa sera. Kokwa seramo dokopa nakama yuu doko nyepala palyuo kararami.
DEU 12:30 Dokopa Kamongome wambu rara dupwa pyao nembaparamo dokopa nakamana bange wasisi lakando misi ingyuo lenge dupwana moko minyuo pasaramano kando lao karalapape. Dopa pirami ramo doko nakama kumarami. Dokona lao nakamame kata mendaki dokonako pao lakandarama lao dolomana mee bange anatu lakandenge yulu dupwa mana nyelana koto nyii narami.
DEU 12:31 Dolomana mee bange anatu dupwa lakandengenyili pyuo nakamame nakamana Kamongo Anatu lakanda narami. Dokona lao dolomame nakamana mee bange anatu lakandenge dokopa yulu ama koo Kamongome epe kanda nange dupwa pingi. Pyuo kamame nakamana wane wanakepe dupwa kana pyare dupwana kisingi.
DEU 12:32 Mawa pii peparae nambame nakama langiyunuli pyuo pipwape. Pipala yulu mende konda pyuo pii naope dee yulu mende neta nembope pii nalapape.
DEU 13:1 Pii nolakao lenge akali mendeme panda kombeya iso polo lenge akali mendemepe nakama kando lalu lao lao, Yulu wambumi pii nangepe kando yamarangungipi dupwa pirama, larami.
DEU 13:2 Doko dolomame nakama kata koona lanyuo pao dolomana mee bange anatu nakama wamba lakanda nange dupwa lakandako yulu pyakao pimili lao larami. Kamame dolomana lalu lao laraminyi pii doko kinyi angi dokona paleya kande
DEU 13:3 dokopa dupwana pii sakami nalapape. Doko nakamana Kamongo Anatu dokome akali doko keta minyuo yulu pyuo nakamana mona peparaeme Kamongo baa mona retamipi lao kandalana makande pilyamo.
DEU 13:4 Kamongo doko mupwa lao suu pyao pako karo baa moko minyuo karalapape. Baa rape rape lao banya mawa pii dupwa warombo soo minyuo karalapape. Banya kingi minyalyuo lao baa yaki nyii nao poraiyuo minyuo karalapape.
DEU 13:5 Nakamana Kamongo dokome kendemande ingyuo yuu Isipi kareyaminyipa kiiramo nyuo minyuo epeya doko kame soo mata maipwase lao pii nolakao lenge mendepe panda kombeya iso polo lenge akali mendemepe leya kande doko pyao kumakalapape. Akali dopale mende koo palenge dokome Kamongome nakama au pyuo palyuo karamili lao suu pilyamo doko yaki nyuo kata wakalena lanyuo pupuli lao pira. Doko nakama range koo dokona nenge rekya lao nyuo dokopa akali doko pyao kumarami.
DEU 13:6 Kamame nakamana yangonge mendemepe panda nakamana wane wanakepe dupwana mendemepe panda nakamana etene angi mona retenge dokomepe panda nakamana puu minyingi angi dokomepe mee bange anatu nakamana rora ambasu dupwamepe kamame lakanda nange dupwa nakama lakandamili lao kongo pyuo langyuo lara.
DEU 13:7 Dokopa mendeme nakama kando mee bange anatu wambu repeta palenge dupwana lakandamili lara panda wambu nanesa palenge dupwana mee bange anatu dupwa lakandamili lao lara.
DEU 13:8 Dolomame nakama koo keta pyambwalana kongo pyuo pii larami doko see nao dee banya pii sakami nao pipwape. Pipala nakamame baa kando kumuo nyiso kyawa minyuo kara nalapape.
DEU 13:9 Baa pyao kumakalapape. Wambo kaname pyare. Pyapala enakana wambu peparaeme kaname pinya lare.
DEU 13:10 Nakama kendemande ingyuo yuu Isipi kareyaminyipa nakamana Kamongo Anatu kiiramo nyuo minyuo epeyamo doko yaki nyuo kata wakalena pupwale lao lapya. Dokona lao kana dupwame pyao kumakalapape.
DEU 13:11 Dokopa Isaraele wambu dupwa doo pimi larami doko sepala nakama pakarami. Pakapala mendemepe koo dopale dupwa kamba sipuro pii nara.
DEU 18:14 Dokopa dee enakana Moseseme nakama lamaiyuo, Yuu nakama nyepala angingyuo nao palirami dokona range wambu dupwa kemali pingipi yanda pepe minyingipi pyuo karenge. Yulu dupwa nakamana Kamongo Anatumi pipa lao panda jii napala kando imbwaraŋa dokona mana makandepe nyii nao karalapape.
DEU 18:15 Dopa pii narami lao suu pilyamo dokona nakama rangena wambu dupwana poropeta akali namba yale mende Kamongo Anatumi rombo palyuo peyaramopa baa rape rape lao warombo soo kararami.
DEU 18:16 Yuu Sainai kyau dokona epo malu palyiyaminyi mange dokopa nakamame laokondali pyuo Kamongo embame pii larene doko dee soope dee emba isare ingyuo role pyapeta eparene dokope kandarama ramo dokopa kumasaramaŋa lapala pako poraiyuo daa leyami kande.
DEU 18:17 Dokopa Kamongome namba langyuo, Mona palyuo pii anginde piso simisa pilyamo.
DEU 18:18 Nambame nakama rangena wambu dupwana poropeta akali emba yale mende rombo palyuo peyaro. Peyapala pii lara dupwa dopa pyuo lena dapa pyuo lena lao manasa pyaro. Dopa pipwape lao pii laro dupwa peparae yoko suu nyepala wambu dupwa lamaira.
DEU 18:19 Baame nambana kingi dokona lao kararamo dokopa wambu mendeme banya pii rape rape lao lao soo nyii naramo doko randa mairu.
DEU 18:20 Poropeta akali mendeme nambame lena laa naronopa namba letamo lao laramo doko kumara ingilyamo. Dopako pyuo anatu wakale lapona kingi dupwana laramo poropeta doko kumarako ingilyamo.
DEU 18:21 Poropetana pii anjuku doko Kamongo keta piso epa nalyamo lao apa pyuo soo pakana palyaramase lao nakama range suu pyanyi pyano lao kararami ingilyamo.
DEU 18:22 Poropeta mendeme Kamongo dokona kingi lao lapyamo leto lao laramopa pii doko angi pyaka see nara ramo doko Kamongona pii daa mee larasa pira. Poropeta akali dopale doko baa rangena porai dokome larasa piraŋa mona nembo pako kara narami.
DEU 19:15 Akali mendakimi koo piramo dokona wambu mendakimi angiŋi lao laramo doko mee mendena ketae ingyara dokona ingyuo wambu lamame kandambwa lao larambi doko kapa ingyara.
DEU 19:16 Akali mendeme kyambo lao akali mende koo keta palyapuli lao suu pyao baa koo pipya lara ramo dokopa
DEU 19:17 nakamba laparae misi lenge panda mendena parami. Paraminyipa purisi akalipi kote singi akalipi kararaminyi dupwame soo rolarami.
DEU 19:18 Dokopa akali kote singi dupwame poraiyuo soo rolarami. Rolaraminyi dokopa akali dokome banya Isaraele yango doko mee kyambo lao kote lakamirande ramo akali dokona yano doko baa nyera.
DEU 19:19 Dopa pyuo randa mairami dokome nakama yulu koo dake rekya lanyi nembaramisa pira.
DEU 19:20 Dokopa wambu menge dupwa peparaeme dopa piramo doko sepala dokopa nakama pakame kumuo yulu koo dopale dee mendemepe pii narami.
DEU 19:21 Akali mendeme yulu koo dopale piramo doko sakame kumuo panda mai nalapape. Lenge nenge kingi kimbupi dusa mende piyami kande doko piyaminyi panda dusako isingi pyao kondanyi nembalapape.
DEU 24:1 Akali mendeme enda nyepala piso enakana koo mende paliramo kandapala nyii nalana suu pyara ramo doko ramanyi nembenge pepa pase doko pyao maipala banya anda yaki nyuo pena lao nembara.
DEU 24:2 Dopa pirasa pao akali mendeko nyera.
DEU 24:3 Nyeramo akali dokome dopako pyuo nyii nalana suu pyapala ramanyi nembenge pepa pyao maipala banya anda yuupi yaki nyuo nembara panda akalingi baa kumara ramo
DEU 24:4 renge dolapo laparaena ingyuo akali wambo nyiyamo nembeya dokome dee kamba baa nyii nara ingyara. Doko enda baa Anatunya lenge kambu dokona poo pyasi ingyuo pisa nange lao suu pyara. Baa kamba range dee nyera ramo dokopa Kamongona lenge kambu dokona koo ingyuo parasa pira. Nakamana Kamongo Anatumi yuu jilyamo dokona yulu koo andake dopale mende pii narami ingilyamo.
DEU 24:5 Dokona akali mende enda ene nyepala dokopa baa yanda singi ami dokona pena laa narami dee gapomane yulu andake dupwa pela paope pii nara. Dopa pyuo baa ee kana mendaki ingyuo yulu yaki nyuo anda karo kaeyara. Dopa piramo dokome etenge rae mainyi pyambwarasa pira.
DEU 24:6 Akali mendeme kana jii lao kee lara ramo maipala dokopa embame lalu lao lao kana doko yano pyakareŋe lao suu pyao kararaŋa banya kenapa pyao injingi kana para lama dolapo jinya lao nyakami nare. Dopa pyuo nyakamiri ramo dokopa banya ree palu dupwame kenapa pyao injelana saka napala lopome kumarami.
DEU 24:7 Mendeme Isaraele akali range yango dokona mende nyuo mee banya karapusi ingyuo kendemande yulu pyakana laope panda yuu wakale lapona karapusi ingyuo kendemande yulu pira lao maipala kana ropo pyao nyera ramo doko baa pyao kumakapenge. Dopa pyuo pirami kata dokome yulu koo doko ramanyi nembaramisa pira.
DEU 24:8 Nakamana yongo dokona rete rapa piya kande dokopa Lipae akali purisi yulu pilyaminyi dupwame langiraminyili pyuo moko minyuo pipwape. Nambame nakama pii maiyu dupwa peparaena palyuo pipwape.
DEU 24:9 Nakama Isipi karo epapeyami dokopa Kamongo dokome Miriame keta apa piya kandese lao suu pyalapape.
DEU 24:10 Akali mende bange yano reto maipala dokopa baame isingi emba jeroŋo lao lalu lao leyamo komau doko banya anda andakare dokona nyela paa nare.
DEU 24:11 Baa range dokome minyako epena lao kamanda mee isaro karape.
DEU 24:12 Baa akali pendewa ramo doko baa kukwa dokona komau doko mee retaro karakami napipi.
DEU 24:13 Kukwa dupwana yaka lao range maiyakamiri. Dopa pirinyi dokopa baame raeko maiyuo reto luu palenale. Rae maiyuo paramo doko nakamana Kamongo Anatu dokome nakama epe kandenale.
DEU 24:14 Yulu pingi akali Isaraele rangepe panda yuu wakale rangepe pendewa ingyuo bange reta nange mende banya yolena suu pyao yulu andake piyasa dokona kana doko panga soo nyakami napipi.
DEU 24:15 Yuu gii yaka lao neta anda peya kande dokona aopa banya yulu dokona yole maipi. Baa mone dokoko nyelana suu pyale pyale yulu pira ingilyamo. Daaŋa lao embame baa yole mai nare ramo dokona lao baame saka renge doko Kamongo lamairasa koo doko emba keta palira ingilyamo.
DEU 24:16 Wane wanakepe dupwame koo mende pirami dokopa endangi rakangepe dupwa pyao kumaka narami. Dee endangi rakangepe dupwame koo mende pirami dokopa wane wanakepe dupwa pyao kumaka narami. Dopa pii naraminyipape wambu koo piramo doko baa range banya koo dokona yano nyuo kumara.
DEU 24:17 Nakamame wane wanake muiyane dupwape dee wambu yuu wakale range karala paenge dupwape bange nyeraminyi dupwa daaŋa lao kata rokakami narami. Enda waiya bange yano reto maipala isingi jeraŋa lao banya komau nyakami nalapape.
DEU 24:18 Nakama Isipi dokona karapusi paleyaminyipa Kamongome nakama kiiramo nyiya kande lao soo karalapape. Renge dokona lao mawa pii dake jilyu kande.
DEU 24:19 Nakamana ee wambu piramo isa jingi witi pyaraminyi dupwana lapo isa pao siya kande dupwa kapu kyuo nyela paa narami. Dopako pyuo nakamana isa olipi jingipi panda isa girapo jingipi lyiyami kande dokopa lapo kakana sera dupwa dee kamba nyela paa narami. Dopa pyuo witi isa pao seramopape isa olipi jingipi mee kakana seramo nyii naraminyi dupwape yuu wakale rangepe wane wanake muiyanepe enda waiyape dupwana ingyuo sakamira. Dopa piraminyi dokopa nakamana Kamongo Anatu dokome yulu peparaena nyiso elyape keta pisara.
DEU 24:22 Nakama Isipi dokona karapusi ingyuo kendemande yulu pyuo paleyami kande doko kame sisaramano kando lao soo soowako pyuo karalapape. Renge dokona lao nambame mawa pii dake jipunu pilyamo.
DEU 25:1 Isaraele akali lama nakamba apiyanda pii mende palirasa kote lala parambinyipa kote lenge akali dokome mende doko keta koo paliramopa mendali mee ingyara doko kandara.
DEU 25:2 Koo paliramo akali doko kusapeme pyao yano nyinya lao larami ramo dokopa kote singi akali dokome baa lenge kambu yuu kando sinya lapala pyaroko pinya lara. Banya koo piyamo dokona yuu akipare kusapeme pyarama lao soo rolarami.
DEU 25:3 Rolapala pyao pao akalisa kisima ingyuo pyapala dee mende konda pyuo pyaa narami. Dokona lao wambunya lenge kambu dokona konda pyuo pyarami dokome baa elya nyera.
DEU 25:4 Mena bulamakaome witi jingi kambena lao kalyiya kande dokopa kamba doko puu pyakami narami.
DEU 25:5 Anelapo yangongepa lama yuu mendaki dokona palengende mende wane manja nao kumaramopa etenge waiya doko pisira ramo dokopa neta akali mende nyii napala yangonge angi dokomeko yokoya pinya.
DEU 25:6 Dopa pyuo nyepala wane mupwa manjirambi doko yangonge kumaramo dokona ikinyingi larami. Dokona lao yangongena panda doko mee isa paa naramopa Isaraele rara dokona mee palyuo puu parami.
DEU 25:7 Dopa piramopape yangongeme baa yokoya pyaa narolyamo daa lara ramo doko taonena akali kyawa dupwa kando nambana akalinginya yangonge angi dokome nyii naro letamo lao lamainya. Baame Isaraele rara dokona yangonena ree palu dokona paka karo wai kiso pyambwa naro lapyasa pilyamo, lara.
DEU 25:8 Dokopa taonena akali kyawa dupwame nyepengeŋe lao lamairaminyi soo nembo nyii nara ramo
DEU 25:9 dokopa enda waiya baa taone akali kyawa dupwa pii minyuo papala akali baa nyii naro laramo dokona kimbu suu doko roko nyepakamipala banya lenge kambu seramo dokona kepakali kyasinyi pisinya lapala lao akali mendeme enda doko nyepala yangongena panda nyuo wane manja naro lao suu pyara ramo doko baa dopa pyuo mango paraŋa lena.
DEU 25:10 Akali banya wane manjiramo dupwa akalindena suu kolo nyiyamo dokona wane lao Isaraele wambu dupwame soo nyerami.
DEU 26:1 Moseseme pii leya. Anatumi yuu jilyamo dokona pao nyuo paleyami kande dokopa
DEU 26:2 nakama range mendaki mendaki lao ee nengepe wakale wakale kanda soo manjo nyuo karo dokopa pisiki minyasi mendaki mendaki laonya paki pyuo minyuo misi lenge panda Anatumi rombo palyiyamo dokona parami.
DEU 26:3 Yuu gii dokopa purisi rapu pyuo kararamo doko keta papala baa lamaiyuo, Nambana Kamongo Anatunya lenge kambu sipyamo dokona karo leto. Yuu baame namwana imbwange dupwa jero lao kana minyuo leyamo dokona epapu epo palyuo karo, larami.
DEU 26:4 Dokopa purisi dokome nakamana pisiki minyasi doko nyepala nakamana Kamongo Anatu nenge kiso maingi kana pyare lasi dokona lenge kambusa minyuo pao retara.
DEU 26:5 Retaparamo dokopa embame pii dasipa Kamongo keta pena lao lare. Nambana rakange kyawa doko baa yuu Arame range akali anda angi mendena pali nao banya ree palu lanyuo yuu yaki nyuo Isipi dokona palyuo karala peya. Nakamba yuu dokona peyaminyipa wambu malu ingya nayamopape enakana malu ingyapala ama rara porai ingyuo paleyami.
DEU 26:6 Paleyaminyi dokopa Isipi wambu dupwame namwa randa joo kopetame rapu pipala karapusi ingyuo kendemande yulu pyakalapa lao nyuo suu leyami.
DEU 26:7 Dopa piyaminyi dokopa namwana rakange kyawa dupwana Kamongo Anatu dokome nyisinya lao kyakale leyama dokopa baame namwa sepala randa andake nyuo koo keta palyuo kareyamano doko kandeya.
DEU 26:8 Banya porainya renge dokome Isipi dupwa keta namwa kingi rekya lao nyiya. Baame wambumi yulu kanda nangepe yulu wambumi kando yamarangyuo pakanyi pyambungipi dupwa pyuo piya.
DEU 26:9 Dopa pyuo namwa lanyuo dae epapala yuu kamongo amenge pingi nenge poro lao karenge dake jiya.
DEU 26:10 Dokona dakepa nambame ee wara pyuo mupwa manjipunu dupwana Kamongome jiyamo dokona minyakamyuo epelyo. Dopa lapala nenge paleta pisiki doko Kamongona lenge kambu dokona pyambwapala baa lao mona maiyuo kingi lakandare.
DEU 26:11 Lakando lao embena Kamongo Anatu dokome bange keyange dupwa embape dee embena ree palu dupwa keta jiyamo doko kandapala baa kando ange andake lao karare. Dopa pyuo ange lao rae maiyuo kararaminyi dokopa Lipae akali dee akali wakale karala paengepe nakama role palenge dupwa pipya rae maiyuo yalya kando pisimana epena lare.
DEU 26:12 Ee kana repo dokona yaka lao embena ee nengepe wambu piramo manjirinyi dokopa akalisa dusipana pingyu nyepala Lipae akalipi karala paenge akali muiyane waiyape dupwa maipa piri. Dopa pirinyi dokopa wambu palaminyi dokona nenge yangya naramopa nao palenale. Embame dopa pyuo maipala
DEU 26:13 dokopa Kamongo doko lamaiyuo, Bange nengepe manju nyipunu akalisa dusipana pingyu nyepala emba jeroŋo lao dokona mende nambana anda dokona pyakuiyuo yalu pipunu see nalyamo, lamairi. Embame Lipae akalipi karala paengepe muiyane waiyape dupwa maiyapengeŋe langipinyi kandapi dokonako nambame maipunu pilyamo, lare. Bange akalisa dusipana pingyu nyuo maiyapengeŋe langipinyi pii dokona mende kamba lao kame soo kaeyapunde daa.
DEU 26:14 Namba kumanda piso dokopa nenge pingyasa dokona mendepe nyuo naa nange. Nambame embena lenge kambu dokona poo pyasi ingyuo kara napalape dokopa nambana anda silyamo dokona mendepe nyuo kamanda minyuo paa nange. Dee dokona lapome nyuo wambu kumuyaminyi dupwana lao kiso mainginde daa. Kamongo embapa lao nambame kamba laa nalyo. Bange akalisa dusipana pingyu nyuo jepengeŋe lao letene dupwa pyuo otelyo.
DEU 26:15 Embena yake panda poo pyasi dokona karo embena Isaraele wambu dupwa kandapala elyape keta piso kamonganyi nembape. Dopako pyuo namwana rakange kyawa dupwa pipya yuunde jeroŋo lalu lao lao kana minyapala yuu kamongo amenge pingi namwa jiinyi doko elyape keta pisinyi pyambwakape.
DEU 26:16 Epapu nakamana Kamongo Anatu dokome banya mawa pii dupwa minyalapa lao langilyamo. Dopa letamo dokona lao mona anda dokona piso minyiliŋi lao warombo soo karalapape.
DEU 26:17 Epapu nakamana Kamongo Anatuŋu lao lao otapala baa rape rape lao kararama lao lalu lao lapala banya lowa pii dupwa minyuo karo baame pelapa lao laramuli pyuo kararama, letaminyi.
DEU 26:18 Epapu Kamongome nakama baa rangena wambuŋu lao kando nyerono lalu lao leyamo dokona palyuo kando nyilyakande. Dopa pipala piso dokopa nakama banya lowape dee mawa pii kuki andakepe dupwa minyalapa lao langilyamo.
DEU 26:19 Dopa pilyamo dokona baame nakama andanyi nembaramopa yuu liti menge baameko wasiyamo palaminyi rara dupwa pipya manda manja naramopa nakamame banya kingi doko londo lao lakandarami. Dopa piraminyipa baame nakama baa rangena wambu ingyuo paramiŋi lao lao kana minyiyamo dokona ingyuo para.
DEU 30:1 Epapu nambame kata lama ingyuo elyape keta pisingipi koo keta pisingipi dolapona mendaki rombo palyarami lao jilyu. Dopa piya kande dokopa nakamame yuu liti wakale wakale wambu palaminyi dupwana nakamana Kamongo Anatu dokome nembeya kande dokopa nambame kata mendaki rombo palyalapape leya kande doko suu pyao kararami.
DEU 30:2 Dopa pyuo paramo karo dokopa nakamape nakamana para pyao nyeraminyi dupwape kamba kapu kyuo Kamongo keta pyamalyuo karo nakamana mona peparaeme nambame banya mawa pii dakepa langilyu dupwa suu pyao manjo kararami ramo dokopa nakamana Kamongo Anatu dokome nakama kando sakame kumuo karara.
DEU 30:3 Karapala baame yuu muu wakalende nakama nembeyamo bolombalo lao peyami dupwana piso range nyuo minyuo epo nakama dee kapa palyuo karalapa lao pira.
DEU 30:4 Nakama yuu nanesa pinjingi dolapona bolombalo lao pao kararaminyipape nakamana Kamongo Anatu dokome range yapo nyuo pyasapala lanyuo epara.
DEU 30:5 Lanyuo epo nakamana imbwange kauwangepe palenge yuu doko nyuo palipa lara. Dopa pyuo nakamana kauwange dupwa kareyaminyipape nakama kamame ulupili ingyuo andakinyi pyambwaramo palyuo karo pirami.
DEU 30:6 Dopa pyuo karo dokopa nakamana Kamongo Anatu dokome nakamana monarena baapa rape rape lao karenge renge doko jeramopa nakamana mona imambupi peparaeme baa mona retapala yuu dokona nao palyuo karalu kararami.
DEU 30:7 Dokopa nakamana yanda pimwai dupwame randa joo koo keta palyuo karaminyi dupwa Kamongo dokome koo keta pyambungi dupwana lao langiyamuli pyuo pyakamira.
DEU 30:8 Dokopa nakamame baapa rape rape lao karo mawa pii lapo epapu langilyu dupwana minyuo kararami.
DEU 30:9 Kamongome nakama pirami dupwana mona kare kare karo kamonganyi pyambuo karara. Dopa pyuo nakama wane wanakepe malu manjo mena bulamakao pungi palyuo piramopa nakamana ee dupwana nenge malu seramopa manjo narami. Dokopa baame rae maiyuo nakamana kauwange dupwa kamonganyi pyambuyamuli pyuo nakama kamonganyi pyambwara.
DEU 30:10 Dopa pirako doŋo nakamame baapa rape rape lao buku dakena banya lowa p dupwape mana pii dupwape pyasi palamo dupwa kamba laa narami. Dopa pyuo karo dokopa kapu kyuo pao baa keta nakamana mona peparaeme mona reto kararami.
DEU 30:11 Dopa pyuo kararami dokona mawa pii epapu nambame jilyu doko kamame koko pao randa naowalende minyuo pyuo kararami lao jilyunde daa.
DEU 30:12 Mawa pii dake yake ketae silyande daaŋa. Nakamame piso soo, Dokona namwa soo nyepala warombo soo rape rape lao karalapase lao apimi yake panda pulyuo papala namwana lao nyuo minyako isa eparase? laa narami ingilyamo.
DEU 30:13 Dee mende mawa pii doko ipwa kota dumuwangu silyande daaŋa. Dokona nakamame piso soo, Namwa warombo soo rape rape lao minyuo pyuo karalapase lao apimi ipwa kota yalo nyuo minyuo epakarase? laraminde daa.
DEU 30:14 Doko daa. Dae nakama pipya repeta angi suu pingi monape dokona palipyamo doko nakama maso kambunya lao karaminyi. Dokona lao epapu mawa pii doko warombo soo karalapape.
DEU 30:15 Epapu nambame nakama kata lama ingyuo lasaka pilyu. Kata mendena rombo palyuo parami ramo letena renge nyepala yuu gii peparae kapa palyuo kararami. Kata wakale mendena rombo palyuo parami ramo koo pyuo karapala kwaeyo kumuo parami.
DEU 30:16 Nakamana Kamongo Anatu dokona mawa pii epapu nambame nakama jilyu dupwa warombo soo pyuo karo baa mona reto baa leyamuli pyuo pyuo banya lowa pii dupwa mondo lao reto minyuo pyuo karo pirami ramo dokopa nakama kamonganyi pyambuo wambu rara malu ingyuo palyuo kararami. Dokopa nakamana Kamongo Anatu dokome yuu nakama nyuo palya panya pilyaminyi dokona nakama elyape keta pisara.
DEU 30:17 Dopa piramopape nakama sili see nale lao kamba lao wambu menge dupwame pii elyape larami soo mee bange anatuŋu lao lakandenge lapo lakandala parami ramo doko Anatumi nakama pyao isa kanapena piso kokwa soo nembara lao epapu dakepa nambame nakama repe repe langilyu.
DEU 30:18 Doko nakama ipwa Jotane yalo yuu enenge dokona palya karala panya pilyaminyi dokona yuu gii andarele palyuo kara narami.
DEU 30:19 Dokona nambame epapu renge kata lama jilyu dolapo lete karenge dokope kumungi dokope dee Anatumi elyape keta pisingi dokope dee koo keta pisingi dokope jilyu. Jepala nambame yake yuupi dolapome nakama angi renge dolapona mende rombo palyuo nyeraminyi dokona usinisi lakana lao kee leto. Lete karenge renge doko rombo palyalapape.
DEU 30:20 Nakamana Kamongo Anatu doko mona nyepala baapa rape rape lao yaki nyii nalapape. Dokopa nakamape nakamana wane para pyao manjo paraminyi dupwa pipya yuu nakamana imbwange Aporakame Aisake Jekopemoo mairuŋu lao lalu lao lao kaeyamo dokona yuu gii andarele palyuo kararami ingilyamo.
DEU 31:1 Moseseme Isaraele wambu dupwa kaeya nao lamaiyuoko karo lao,
DEU 31:2 Epapu namba ee kana 120 ingilyamo dokona namba kapa pyuo nakamana mupwa ingyuo kara narolyamo. Dee mende opetae Kamongo dokome namba langyuo, Namba kapa pyuo ipwa Jotane doko yalo paa nare, lapya.
DEU 31:3 Nakamana Kamongo Anatu doko baa range wamboko pao yuu dokona wambu palenge dupwa pyao kokwa soo nembaramopa yuu dokona nakama palyuo kararami. Dopa pyuo nakama yuu dokona palirami dokopa Kamongome leyamuli pyuo Josua baa mupwa ingyuo iso karara.
DEU 31:4 Kamongo dokome Amo kiŋi kingi Saiyone lengepe Oke lengepe pyao anamasi minyuo dee nakambana yuu pyao kokwa soo piyamo doko suu pyaoko wambu doloma pyara.
DEU 31:5 Kamongome yanda pyao rakae selapa lao nyiso porainya renge jeramopa wambu doloma pyao anamasi minyaramiŋi. Nambame wambu doloma kando pipwa lao langiyunuli pyuo pirami ingilyamo.
DEU 31:6 Nakama kando poraiyuo karo wambu doloma kandapala pyuku lao paka nalapape. Nakamana Kamongo Anatu baa rangeme nakama pipya role karara. Baame nakama yaki nyuo kaeya nara, Moseseme leya.
DEU 31:7 Dokopa Moseseme Josua epena lapala Isaraele wambu peparaena lenge kambu dokona karo baa lamaiyuo, Embame wambu dapwa yuu dokona palyuo kararami lao Kamongome nakamana rora ambasu dupwa kando yuu mairuŋu lao lalu lao lao leyamo dokona lanyuo pare. Emba pako pyuku laa napala kando poraiyuo karape.
DEU 31:8 Kamongo baa rangeme emba yaki nyuo kaeya nara. Dokona lao emba kumasi ingyuo pyuku lao pako kara napipi.
DEU 31:9 Dokona lao Moseseme Anatunya lowa pii dupwa pyao palyapala Lipae akali purisi ingyuo Kamongona Kana Minyuo Lalu Lao Lenge Pii Palenge Bokote doko rapu pyuo karenge dupwape dee Isaraele wambunya mupwa ingyuo karenge akali dupwape maiya.
DEU 31:10 Maipala baame nakama pii lamaiyuo, Ee kana yanda ipingi epo paparamo yaka lao bange kanape yano singi dupwa isingi jii nao kame soo kaena laraminyi yuu gii dokopa wambu dupwame anda kauwa pipala palyuo nenge nenge gii dokopa lowa pii dapwa wambu peparaeme sinya lao yaka lao lamairami.
DEU 31:11 Dokona lao lakandenge yuu mendakinya nakamana Kamongo Anatu doko lakandala eparami dokopa Isaraele wambu dupwa kando yaka lao lamairami.
DEU 31:12 Dokona wambu peparaeme sepala nakamana Kamongo Anatu doko pako karo banya mawa pii dupwa mondo lao minyuo kararami lao embame enda akali peparaepe nakamana wane wanake peparaepe wambu yuu wakale range embena taone dupwana palaminyi dupwape kee lao nyuo sukusa sukusa piri.
DEU 31:13 Dopa pyuo piri dokopa embena para pyao nyerene Anatunya mawa pii see nange dupwame rengya serami ingyara. Dopa pyuo Anatu mupwa lao suu pyao warombo soo karo ipwa Jotane yalo yuu nyuo palya panya pilyaminyi dokona palyuo kararami, leya.
DEU 31:14 Dokopa Kamongome Mosese lamaiyuo, Emba yuu gii andarele palyuo kara nare ingilyamo. Dokona embame Josua kee lapala baa komau anda dokona nyuo minyuo ipupi. Dokopa nambame baa dopa pyuo karena lao lamairu, leya. Dokopa Mosese Josuapa komau anda dokona peyambi.
DEU 31:15 Peyambi dokopa Kamongo doko kopa rau pipya role pyapeta komau anda kambu dowa dokona epo kareyande nakamba keta paneya.
DEU 31:16 Panapala dokopa Kamongo dokome Mosese lamaiyuo lao, Emba repeta kumare ingilyamo. Kumaparene dokopa enakana wambu dupwame namba mona jii napala nambana nakama pipya kana minyuo lalu lao leyamo pii dupwa kamba larami. Nakamame namba kame soo kaepala yuu nyuo palya panya pilyaminyi dokona mee bange anatuŋu lao lakandenge dupwa lakandaramilyamo.
DEU 31:17 Dopa piraminyi dokopa nambame nakama kando imbwuapala kyawa yaki nyuo kaeyaronosa koo keta palyuo kwaeyo parami. Randa wakale wakale dupwa epo nakama keta paliramopa nakanjo sepala dokopa namba nakamana Anatu nakama pipya kara nalyane dokona randa nyilyamano lao soo nyerami.
DEU 31:18 Dopa pyuo soo nyeraminyipape nyisalana suu pyaa naro ingilyamo. Renge doko nakamame kopetame pyuo mee bange anatuŋu lao lakandenge dupwa mona maiyuo lakandelyaminyi Kamongome Mosese lamaiya.
DEU 31:19 Embame dakepa kenane dake pepa pyapala Isaraele wambu nakama mana lamairi. Dokopa kenane dokome nakama pipya nambana usinisi ingyuo yango palyuo pyasi palira.
DEU 31:20 Nambame nakama yuu amenge pingi nakamana rakange kyawa dupwa kando mairuŋu lao lalu lao leyo dokona lanyuo paro. Paronopa nakamame nenge nalana suu pyaraminyi dupwa kapa nao mona minyarambu mona nyeramo kararami. Dopa piraminyipape namba mata jepala mee bange anatuŋu lao lakandenge dupwa mona nyuo lakando kararami. Nakamame namba epe kanda nao yaki nyepala nambana mawa pii palenge kamba lao nembarami.
DEU 31:21 Randa koo malu mee nakama keta epara. Dopa piramopape kenane para pyao nyerami dupwame pyao kararami dakeme nambana usinisi ingyuo koo piyaminyi dupwa lasaka pira. Nambame yuu mairuŋu lao kaeyasi kandale dokona lanyuo papa naronopape epapu nambame dopa pyuo suu pyao karaminyilyamo lao soo karapunu pilyamo, Anutumi Mosese lamaiya.
DEU 31:22 Yuu gii mendaki dokopako Moseseme kenane doko pyao retapala Isaraele wambu dupwa mana lamaiya.
DEU 31:23 Mange dokopa dee Anatumi akali Nanena ikinyingi Josua baa lamaiyuo, Paka nao mona porayapala karape. Dopa pyuo embame Isaraele wambu yuu nambame mairuŋu lao kana minyuo lalu lao leyo kande dokona lanyuo pareŋe namba embapa role kararo, leya.
DEU 31:24 Dokopa Moseseme Anatunya mawa pii dupwa bukunya piya. Pyao dokopa mendaki mendepe isa nemba naya.
DEU 31:25 Pyao otapala dokopa baame Lipae purisi Kamongona Kana Minyuo Lalu Lao Lenge Pii Palenge Bokote doko rapu pyuo karenge akali dupwa lamaiyuo,
DEU 31:26 Buku Anatunya mawa pii pyasi palenge dake nyepala Kamongo nakamana Anatunya Kana Minyuo Lalu Lao Lenge Pii Palenge Bokote repeta retarami. Dokome banya wambu dupwa kopetame pisaraminyi lao lasaka pyuo serasa pira.
DEU 31:27 Nakama mona kana pokapala kambako lao parami doko silyu. Namba ene kumapa nalyo dakepa Kamongopa kamba lao karaminyi dokona kumaro dokopa angingyuo suku manjo kamba laramilyamo.
DEU 31:28 Nakamana rara dupwana akali kyawa iso karaminyi dupwape isingi akali dupwape pii lamairuŋu nambana lenge kambu dokona sukusa sukusa pyuo epena lao nyuo malu palyarami. Nambame yake yuupa dolapo nambana usinisi ingyuo sinya laro.
DEU 31:29 Kumaparo dokopa wambu dolomame ama koo angingyuo karo nambame nakama pii mana lamaiyuo dupwa kamba lao nembarami doko silyu. Dopa pyuo yuu gii ene eparamo dupwana Kamongome daa lenge dupwa pyuo kararami dokome baa imbwanyi pyambuo randa nyeramilyamo, leya.
DEU 31:30 Enakana Moseseme kenane pii peparae lamaiyamo dokopa Isaraele wambu peparaeme soo kareyami.
DEU 32:1 Isa yuu yakepe dolapo pii lalopono dupwa selapa. Kale yukupala nambana pii sokondali pipwape.
DEU 32:2 Nambana mana pii doko apu dopale ingyuo isa epara. Eparamo dokopa isa yuu dokona pipyae lenge lenge papyuo ipwa ingyuo pete sera. Nambana pii doko apu raa raa pyao ee nyaŋa dupwana epenge dopale ingyara.
DEU 32:3 Nambame Kamongona kingi doko lakandaro dokopa banya wambu dupwame baame yulu andake pilyamo lao polo larami.
DEU 32:4 Kamongo baa nakamana kyawa minyuo iso karenge ama porai wakasa. Baame yulu peparae dupwana mende kyai pii nao rolae iki pingi. Nakamana Anatu baa alowa pii nao kinyi angi dokona palyuo karenge. Baame rolae ingyuo karo wambu peparae keta kapa kapa pingi.
DEU 32:5 Dopa pyuo karapyamopape nakamame baa yaki nyuo kaelyaminyi dokona banya wambu angingyuo kapa kara narami ingilyamo. Nakamame yulu koo pyuo minyako pyuo karaminyi.
DEU 32:6 Nakama kopyali kyawa sisingi pali nange dupwa dopa pyuo nakamame Kamongo doko rape rape lao kararamisi? Baa nakamana rakange dokome nakama wasiya. Baame nakama rara andake ingyuo wasinyi pyambuya.
DEU 32:7 Yuu gii kamame yuu wamba epo peyamo dupwana lao suu pyalapape. Dokopa apa piya lao nakamana rakange dupwa piso soo langinya lalapape. Yuu wamba piyamo dupwa akali alemo dupwame langinya lao piso selapape.
DEU 32:8 Kamongo Ama Ketae karenge dokome wambu rara wakale wakale dupwa yuu kapa paliraminyi dupwa rombo palyuo mokwa soo maiya. Wambu anja palirami lao rombo palyiya. Baame rara mendaki mendaki lao rapu pira lao aŋala mende rombo palyiya.
DEU 32:9 Dopa piyamopape Jekopena para pyasi wambu dupwa baa rangena ingyara lao rombo palyiya.
DEU 32:10 Baame nakama yuu muiyane mende see nange penda penda dokona nyepo nyuo pambu lao papyuo kareyaminyipa kando nyiya. Baa range poraiyuo iso karengenyili pyuo konambe ingyuo nakama kako pyao mondo lao rapu piya.
DEU 32:11 Yaka kambeme yakane bii lena lao mana lamaiyuo banya papake pee letamopa epo petenge doko suu pyao Kamongome Isaraele wambu dupwa isa paa nana lao banya arapu dokona lanyuo papiya.
DEU 32:12 Yuu liti wakale dupwana mee bangeme wasisi anatu dupwana mendeme nyisa naya. Kamongo baame iki banya wambu dupwa laminyuo peya.
DEU 32:13 Dopa pipala nakamame yuu kyau singi yuu dupwa isinya leya. Iso karo yuu dupwana ee dupwana nenge andeyamo dupwa nakama neyami. Nakama kana dupwana amburali ipwange lyiyamo kando nyiyami. Dee nakamana isa olipi dupwa kana yuu dupwana mena mena lao andeya.
DEU 32:14 Nakamana mena bulamakao memepe dupwana anju ipwange endange palyuo kareyamopa kamuo nyiyami. Mena bulamakao sipisipi memepe dupwa kameya rondo lasiko minyiyami. Nenge witi elyapepe dee waene ipwange keyange rae mairamili dupwape nao kareyami.
DEU 32:15 Kamongona wambu dupwa kamongoyaminyipape nakama mona kana poko kamba leyami. Dopa pyuo nakama mendasape kakasera kando lao nenge pyano sepala ando ama rondo lasi ingyuo kareyami. Nakamana Anatu dokome nakama wasiyamo doko kame soo kaepala dee nakama lete wai pyao nyingi akali porai doko mata maiyami.
DEU 32:16 Nakamame isa kanapeme wasisi dupwa kando lakandeyami dokome Kamongopa yango palyinyi pyambuyami. Dee yulu koo piyaminyi dokome Kamongo imbwanyi pyambuyami.
DEU 32:17 Nakamame mee imambu koo anatu angi daa dupwa keta mena pyao kiso maiyuo kareyami. Mee bange lapo Isaraele akali nakamana imbwange kauwangepe dupwa wamba nyuo pyuo warombo soo kara nayami dupwa lakando kareyami.
DEU 32:18 Nakamame nakamana Anatu dokome nakama lete wai pyao pyuo nyingi porai dokome nakama letena renge maiyamo doko kame siyami.
DEU 32:19 Kamongome banya ikinyingi wanengepeme dopa pyuo koo piyaminyi doko kandapala imbu singi nyepala nakama mata maiya.
DEU 32:20 Anatumi lao dokopa, Wambu mona kana poko namba yaki nyuo kaelyaminyi dupwa nambame nakama kamame nyisa naro. Dopa piru dokopa nakama apa pyuo kararamipi lao lenge makande pyuo kando kararole.
DEU 32:21 Nakamame nakamana isa kanapeme mee bange wasisi anatu dupwame imbu singi nyakayaminyisa mee bange anatu angi daa dupwana yango palyuo karo. Dokona lao wambu rara angingyuo kara nalyaminyi dupwa keta nakama imbu singi nyinyi retaro. Dopako pyuo wambu kopyali minyingi dupwa keta nakama pipya yango palyinyi pyambwaro.
DEU 32:22 Nambana imbu singi dokome isare kekenge ingyuo boletoko lapala isa yuunya bange peparae rara. Dopa pyuo rao isa yuu koko dono kando nyepala yuu kyau dupwana pingi moko minyuo rara.
DEU 32:23 Nambame nakama keta randa maiyuo karalu kararo dokopa nakama pipya pimwaiyuo nambana wanga walakape peparaeme minyuo pyaro.
DEU 32:24 Nakama lopo yanenge isasape dokome kumarami. Nakama anga yakaneme koo mange naramo kumarami. Nambame mena suwape rae lenge dupwape dee kau wambu nenge dupwape nakama keta ralinyi peyaronopa dupwame wambu dupwa pyao narami.
DEU 32:25 Yanda andake sipurarasa wambu dupwa kata barete dupwana pyasi serami. Anda dupwana yamarangusi sepala kumarami. Dopa piramo dokopa mapwae parangepe dupwa kumarami. Wane nyaŋa dee alemope peparae popo paa nao kumarami.
DEU 32:26 Wambu mendemepe nakama suu pyao kara narami lao nambame nakama pyao otapuli lao suu piyu.
DEU 32:27 Dopa lao suu piyunupape namba rangeme pyao minjuku minyinyi nembeyo dokome nakambana yanda pimwai dupwame nambana wambu dupwa pyao isa palyilyamano kae lao nanga kapape lyinya lao panda maiya naro ingilyamo, leya.
DEU 32:28 Isaraele wambu dupwa kyawa sisingi bolombalo lao mona kuki mendepe pali napyamo karaminyi.
DEU 32:29 Yanda pimwai dupwame nakama akipamo anamasi minyiyamipi lao soo nyii nalyaminyi. Apa pyuo piyape lao soo gisa nalyaminyi.
DEU 32:30 Apa pyuo lama ikimi taosande akalisa anamasi minyuo dee mendakimi taosande mende pyao isa palyuo piyape? lao suu pilyaminyi. Renge doko nakamana Kamongo Anatu dokome nakama yaki nyuo kaeyasa piya. Nakamana Anatu Porai dokome nakamana yanda pimwainya kingi rakana palyakamiyasa piya.
DEU 32:31 Yanda pimwai dupwame nakamana anatuŋu lenge dupwa angi mende daalyamo. Isaraele wambunya Anatu doko ama porai wakasande karamo lao silyaminyi.
DEU 32:32 Nakamana yanda pimwai dupwa yuu Sotoma Gomorape koo keta paleyami dopale ingyuo pelyaminyi. Nakama girapo isa jingi kau pingi lyingipi dee jingi napala kumungi lyingipi dopale ingyuo pelyaminyi.
DEU 32:33 Kaumi wambu pinginya ipwange dokome waene wasingi dopale ingyuo pelyaminyi.
DEU 32:34 Kamongo nakamana yanda pimwaimi dopande pyuo karaminyi lao soo karamo. Baame yuu gii angi pyaka sera mendepa randa mairuŋu lao isaro karamo.
DEU 32:35 Kamongome koo pirami dupwana bakeme pyuo isingi pyakamira Yuu gii nakama randa narami doko repeta ipyamo pilyamo. Dokopa isa paomene.
DEU 32:36 Kamongo banya wambu dupwa rale male lapala poraiyapa naramo kararaminyi dokopa koo dupwa neta rekya lanyi nembo nyera. Banya yulu pingi dupwa iki ingyuo saka nao karelyaminyi kandapala dokopa sakame kumuo nyisara.
DEU 32:37 Dopa pyuo banya wambu dupwa nyisapala dokopa piso soo lao, Nakamana mee bange anatu poraiŋi lao keta pyamalyiyaminyi dupwa anja karamisi? lara.
DEU 32:38 Nakama mena pyao kisiyaminyi dupwana kapa rukyuo maiyuo ipwa waene nena lao maiyuo piyami dupwame dakepa nyisala epena larami. Dakepa randa dokona nenge rekya lao nyera dokona pyakao epena larami.
DEU 32:39 Namba doko iki Anatu ingyuo karo. Wakale dupwa Anatu angi mende daa. Nambame pyao kumasepala dee lete renge maingi. Nambame wambu pyao ranjama nyepala dee pyuo nyingi. Nambame pilyunu dupwa mendeme yanda pimwaiyarami ingya nange.
DEU 32:40 Kinyi kinyi namba Anatu mee karawako karenge dokome kingi minyalyuo lalu lao leto.
DEU 32:41 Nambana yanda pingi wua gela doko nanga sepala rolae pyuo nambame yanda pimwai pipya koo dupwana yano nyuo dee nambapa epe kanda narami dupwa pipya randa mairu ingilyamo.
DEU 32:42 Wambunya ranjama dupwa nambana wanga walakape nenge dupwana ropo lao lyuo karara. Nambana wua gela dokome wambu namba yanda pimwaingi dupwa pyao kumakaro. Mendeme nambapa yanda pimwaiyara doko lete karena laa naro. Dopa pyuo ranjama nyuo pyasipi karapusi palengepe dupwa kumarami.
DEU 32:43 Dokona yuu mure lao Kamongona wambu dupwa lakandarami ingilyamo. Kamongome banya wambu pyao kumakaelyaminyi dupwa isingi pyao randa maira ingilyamo. Dokopa baame banya yanda pimwai dupwa keta yano nyuo banya wambu dupwana koo dupwa nyuo kame sakamyuo pingi, leya.
DEU 32:44 Isaraele wambu dupwa seramiŋi lao Mosesepa Josua Nanena ikinyingi dokopame kenane dake kamba lao lao piyambi.
DEU 32:45 Moseseme Anatunya mana pii dupwa wambu lamaiyuo otapala
DEU 32:46 dokopa baame lao, Nakama epapu mawa pii dapwa peparae langilyu dupwa warombo soo minyuo pyuo karamape lao kandokondali pyuo karalapape. Dopako pyuo nakamana wanenge ikinyingipi dupwame Anatunya mana pii peparae yaki nyii nao rape rape lao minyarami lao nakamame nakama kamba lamaiyuo lamaiyuo pirami.
DEU 32:47 Mana pii dapwa mee pii yeelyo ingya nalyamo. Pii dupwame nakama palyuo kararami dokopa pingi pyaramo kararami ingilyamo. Dokona pii dupwa warombo soo rape rape lao minyuo karapala nakama ipwa Jotane yalo yuu nyuo palya panya pilyaminyi dokona yuu gii malu palyuo kararami ingilyamo, leya.
DEU 32:48 Yuu gii mendaki dokopako Kamongome Mosese lamaiyuo,
DEU 32:49 Yuu taone Jereko kanda kanda Moape wambunya yuu dokona yuu kyau Apirame singi dupwana papala yuu kyau Nipo dokona pulyuo pao karapala nambame Isaraele wambu dupwa yuu Kenane mainya pilyunu doko kandape.
DEU 32:50 Kandapala dokopa embena yangone Erone yuu kyau Oo dokona karo kumunya dopaleko ingyuo emba yuu kyau dokona karo kumare.
DEU 32:51 Renge kumarambinya doko nakamba laparaeme Isaraele wambunya lenge kambu dokona namba rape rape lao kara nayambi. Dee nakamba yuu muiyane Sini dokona yuu taone Katese repeta ipwa Merepa mare dokona karo nakambame wambu dupwana lenge kambu dokona namba kando nambana kingi ketae pyambwa nayambi.
DEU 32:52 Embame yuu angi doko nanesale karo kandare. Dopa pyuo kandarenepape namba Isaraele wambu yuu mairunu dokona emba sukusa paa nare, leya.
DEU 33:1 Moseseme baa Anatunya pii lamaingi akali dokome yuu gii repeta kumara ingiyamo dokopa Isaraele dupwa elyape keta pisara pii dapwa lamaiya.
DEU 33:2 Kamongo doko yuu Sainai kyau dokona piso epeya. Epo yuu Itome neta pyakaenge dorena neta potemengenyili pyuo epo dokopa baa yuu kyau Parane piso banya wambu keta neta ranyi pisiya. Aŋala taosande akalisa baa pipya kareyaminyipa banya kingi rolaerena isare uliyapu rao kareya.
DEU 33:3 Kamongome banya wambu dupwa mona reto kyawa minyingi dokona lao namwa banya kimbu silyamo dorena pangu sepala baame langilyamuli pyuo warombo singi.
DEU 33:4 Namba Moseseme Mawa Pii langiyu dupwa namwame yaki nyii nalyamano. Namwana yuu liti dakena mawa pii dapwa wakasale ingyuo nyuo retarama ingilyamo.
DEU 33:5 Isaraele wambu dupwana mupwape dee rara peparaepe nakama mendakinya pyasiyaminyi dokopa Kamongo baa epo nakama Isaraele wambu dupwana kiŋi ingyuo kareya, leya.
DEU 33:6 Dokopa Moseseme akali Urupenena rara dokona lao lao, Banya rara andake ingya napyamopape kapa pyuo rembe naa nana, leya.
DEU 33:7 Jutana rara dokona lao lao, Kamongo embame nyisapili lao kee laraminyi doko sepala rara wakale dupwa pipya deyako nyuo pyasapala nakamana yanda pimwai pipya yanda pimwaiyakamiri, leya.
DEU 33:8 Lipaena rara dokona lao dopa lamaiya. Emba Kamongo dokome kana Urimi Tumimi dolapo keta karo Lipae rara dupwa emba mende pipyali yaka lao suu pingi doko pano lasaka pyakamingi. Embame yuu Masa dokonape dee ipwa Merepa dokonape apa pilyamipi lao kandalana makande pyuo kandee dokopa nakama rolae pyuo yaki nyii nao karaminyi kandee.
DEU 33:9 Nakamame endangipa rakangepa kandowape dee pemalenge yangongepe kando sakao pyuo kareyaminyipape embena mawa pii dupwa kamame ama porai wakasa minyuo pyuo emba rape rape lao kareyami. Dopa pipala embena mawa pii dupwape kana minyuo lalu lao lenge pii dupwape mondo lao minyuo kareyami.
DEU 33:10 Dopa pipala embena wambumi Mawa Pii dupwa warombo soo minyinya lao mana lamaiyakarami. Nakamame embena kana pyare dokona mena pyao kiso joo kararami.
DEU 33:11 Dupwana lao Kamongo embame nakamana rara dupwa porai ingyuo penale lao wai kisakamipala nakamana yulu pyuo pii laraminyi dupwa epe sakamyuo karape. Dopa pyuo dokopa nakamana yanda pimwai dokona mende dee sipura nana lao pyao ruki ruki lanyi nembakamipi, leya.
DEU 33:12 Benjamenena rara dokona lao dopa leya. Rara dake Kamongome mona retapala kyawa minyuo karapenge. Kwuara yangara piramo yaka lao baame nakama koo keta pali nana lao baa nakama pipya role pyao karenge, leya.
DEU 33:13 Josepena rara dokona lao dopa leya. Kamongome nakamana yuu doko elyape keta pisinyi pyambuo apunda peyakamyuo dee yuu dokona ipwa guu lamu lae pyuo karakamyuo pinya.
DEU 33:14 Kamongome yuu dokona neta petenge yuu ingyuo pipwakamipala nenge wambu pyuo poo rakamyuo pinyale. Dopa piramopa panyi apundape kana peparaena enengeme kamonganyi nembo manjo nao karenale.
DEU 33:15 Nakamana yuu kyau mee sulu singi dupwa pyuo wara piraminyipa nenge keyange dupwame simbwaro karena.
DEU 33:16 Nakamana yuu doko mena nengepe keyange dupwame mee poro lao keta pyao sinya lao Kamongo baa keta keyange renge palenge yuu isoko dokona isare kekenge ingyuo rao epo Mosese keta pii leyamo dokome dopa pyuo elyape keta pisara. Josepe baame yangonge dupwana kyawa ingyuo kareyamo dokona Josepena rara dupwa keta renge keyange dapwa epena.
DEU 33:17 Josepe baa bulamakao kalinya porai renge dopale palenge. Dee yulu pingi bulamakao kali okese lenge dokona kyawa kulinya nenge potemo epenge dopale ingyuo nyuo pee pipala karara. Banya kyawa kulinya nenge kyai doko Manasana akali taosandeme poraiyuo karaminyi. Dokona mendeke ingyuo Eporaimena wambu ama malu taosande akalisa (10,000) karaminyi dopale. Manda manjo pao piramopa porai dokome yuu liti wakale dupwana wambu rara dupwa pyao Suu lanyi kipwa kipwasa palyuo karara, leya.
DEU 33:18 Sepyulane Isakana rara dolapona lao dopa lamaiyuo, Sepyulane ipwa kotana pao bisinase yulu doko pyuo kakana pinya dee Isaka banya bange dupwame banya yuu dokona pyuo andanyi nembara.
DEU 33:19 Nakamame wambu yuu muu wakale range dupwa nakamana yuu kyau dokona epena lapala bange Kamongome letamuli pyuo pyao kiso maiyuo ipwa kota dokonape kee kama dupwanape bange seramo nyuo kamongarami, leya.
DEU 33:20 Gatena rara dokona lao dopa lamaiya. Kamongo Anatu nakamana yuu andake ingyanyi nembeyamo dokona kingi doko lakandalapape. Gatena rara dupwame mena laeneme isaro soo ayemba kingipi pyanyi nembalamuli pyuo pyao karenge.
DEU 33:21 Isaraele mupwa dupwame yuu mokwa siyaminyi dokopa Gatena rara dupwa yuu keyange amenge pingiko nyiyami. Nyiyaminyi yuu doko nakamana akali mupwa dupwa iki kapa nyerami ingiya. Isaraele akali mupwa dupwa malu palyuo kareyaminyi dokopa nakamame Kamongona lowa piipi mawa piipi dupwa warombo siyami, leya.
DEU 33:22 Danena rara dokona lao dopa lamaiya. Dane mena laene yakane dopale ingyuo yuu Basane karo pyakao neta epenge, leya.
DEU 33:23 Napatalaina rara dokona lao dopa lamaiya. Napatalaina rara doko Kamongome epe kandapala mena wai kiso nenge andakamyuo kamonganyi nembenge. Nakamana yuu mendaki dokonako pao yuu dulurena piso epo ipwa Galili pete dokona suu lapala dee lama donorele para.
DEU 33:24 Asana rara dokona lao dopa lamaiya. Asana rara dokona rara doloma nyuo isa palyili lao ee wara pyuo nao mena wai kiso pirasa banya yangonge dupwame baa mona reto epe kando karena. Banya yuu dupwa olipi isa dupwame kamonganyi nembena.
DEU 33:25 Banya yuu taone dupwana kapa kararami lao ane isa dupwame kambu kii palyinya. Baa keta pundu yandape epa naramo karena, leya.
DEU 33:26 Isaraele wambu dupwa selapape. Anatu mende nakamana Anatu kamame andake neta renge dokome yake dorena piso oko soo epo dee kopa rakapana dokona piso nakama nyisala epenge kandale dopale mende kara nalyamo.
DEU 33:27 Anatu baa yuu peparae nakama kyawa minyuo karenge. Banya kingi dolapome nakama paka pyao soo karalu karenge. Nakamame pyao pelyaminyi dokopa baame nakamana yanda pimwai dupwa pyao ralinyi nembakange. Dopa pyakapala nakama langyuo, Pyao kokwa selapape, lao langingi.
DEU 33:28 Dokopa Jekopena para pyasi dupwa mona seramo piso palyuo pilyaminyi. Yuu dokona pundu yandape mende pisa napyamopa yake dokona piso pipyae kondanyi yuu dokona pisilyamo dokona witi jingipi ipwa waenepe mondo lao andara.
DEU 33:29 Isaraele wambu nakama raeme kumulyaminyi kande. Kamongome nakama nyiso lete nyipyamo dopale ingyuo yuu liti menge dupwa Kamongome nyisapyamo kara nalyaminyi. Kamongo baa nakamana konambe wua gelape ingyuo baa nenge nyakalyamo. Dopa pipala nakamana yanda pimwai dupwame sakame kumuo karamili lao piso soo epeyami kande dokopa nakama pyao kalya pisi pisi pyuo anamo kararami.
DEU 34:1 Mosese baa yuu lama yuu Moape dokona singi piso Nipo kyau lao siyamo dokona pao yuu kyau Pisika yuu taone Jereko doko neta pyakaenge dorena siyamo dokona mandarena peya. Pao dokona kareyamo dokopa Anatumi yuu andake doko peparae lasaka piya. Lasaka piyamo doko yuu Giliate wambunya yuu dokona piso lasaka pyuo pao Dane wambunya taone dokona peya.
DEU 34:2 Yuu lasaka piyamo dupwa Napatalai wambunya yuupi Eporaime wambupi dee Manasa wambupinya yuupi Juta wambunya yuu soo pao neta yalyingi kata dorena piso pao ipwa kota Metitaraniane pete dokonape liti pyuo suu lao lasaka piya.
DEU 34:3 Juta wambunya yuu donorena pao yuu Jowa dokona piso yuu lama lama soo pao yuu taone Jereko isa malu bona isa yale andenge dokona suu lao lasaka piya.
DEU 34:4 Dokopa dokona karo Kamongome Mosese baa dopa lamaiya. Wamba nambame Aporakame Aisake Jekopemoo nakamana wai kiso nyeraminyi dupwa mairu lao lao kana minyuo leyono yuu doko dakeŋe. Dokona nambame emba mee kanda lao pilyu. Dopa pipunupape nambame emba dokona puu laa nalapono, leya.
DEU 34:5 Dokopa Kamongona kendemande Mosese baa Moape wambunya yuu dokona Kamongome dopande piraŋa leyamuli pyuo kumuya.
DEU 34:6 Dopa piyasa Kamongome Mosese yuu Moape dokona yuu taone Betepiyo lama kanda kanda singi dokona nyuo malu piya. Dopa pyuo malu piyamopape yuu dusape panda dasape malu pisi karamo lao malu piya doko mendemepe kando soo gisa nalyaminyi.
DEU 34:7 Mosese baa ee kana andete mendaki dee akalisa lama (120) nembo karapala kumuya. Baa lenge nyuope pii nayamo mee kana yale doko karo kumuya.
DEU 34:8 Isaraele wambu dupwa banya lao yuu gii akalisa rema Moape yuu dokona kumanda ee lao peteyami.
DEU 34:9 Ee lao piso oteyaminyi dokopa akali Nanena ikinyingi Josua mona palenge renge palyuo pyoko pyoko leya. Renge doko Mosese baame banya panda nyera lao rombo palyuo dokopa leyamuli pyuo piya. Isaraele wambu nakamame Mosese keta Anatunya mawa pii epeyamo dupwa Josuame leyamo dokona rape rape lao minyiyami.
DEU 34:10 Mosese kumapeyamo mange dokopa enakana Isaraele wambunya poropeta baa yale mende sipuro kara naya. Kamongopa baa angi rolae lenge kambu kando pii lenge.
DEU 34:11 Kamongome Mosese keta yulu wambumi pii nangepe yulu wambumi kando yamarangungipi Isipi kiŋipi dee dokona isingi akalipi minyanyi palyuo yuu liti doko peparaena piyamo dopale mende poropeta akali mendemepe pii naya.
DEU 34:12 Moseseme Isaraele wambunya lenge kambu dorena pakanyi pyambuo yamarangunyi sero yulu andake pingi dopale poropeta mendeme kapa pirami ingya nange.
JOS 1:1 Kamongona kendemande akali Mosese kumapeyamo dokopa enakana Mosesena nyiso yulu pingi akali Nanena ikinyingi Josua doko kando Kamongome pii lamaiya.
JOS 1:2 Baame lamaiyuo lao, Nambana kendemande akali Mosese doko kumapya dokona epapu rapa rapa pipala embape dee Isaraele wambu peparaepe ipwa Jotane doko yalo pao yuu nambame nakama mailyunu dokona sukusa pali pupwape.
JOS 1:3 Mosese lamaiyunuli pyuo nakama kimbu kimbu kalyuo eparami yuu peparae embape nambana wambu dupwanape lao retakayo, leya.
JOS 1:4 Nakamana yuu liti make doko yuu muiyane dokona pisipala pao yuu Lepanone kyau dupwana suu lara. Dee ipwa andake Yuporisa lenge dokona piso pao Itai wambunya yuu peparaena piso pao neta anda pao yalyingi dorename ipwa kota pete andake Metitaraniane lenge dokona pao nakamana lili ingyara.
JOS 1:5 Josua emba lete kararene yuu gii dusipana mendemepe emba nyuo isa palyuo wini pira ingya nalyamo. Namba Mosese keta pyakamyuo kareyonoli pyuo emba keta dopako pyakao kararo. Dee yuu peparae namba emba role karo emba yaki nyuo kaeyaronde daa.
JOS 1:6 Embame mona kumapala yulu dokona pilyuŋu lao suu pyao kandokondali pyuo poraiyuo pepe. Dokona lao nambame nakamana rora ambasu dupwa keta yuu mairu lao lalu lao leyono dokona nakama palyuo kararaminyi dokopa emba wambu dapwana mupwa ingyuo iso karare.
JOS 1:7 Dokona kando mona kumapala porai ingyuo karo nambana kendemande akali Moseseme Mawa Pii emba jiya dusipa peparae warombo soo minyuo pyuo karape. Mawa Pii peparae dupwana mende yaki nyii napipi. Dopa pyuo karo dokopa kata peparae papirinyi dupwana kapa ingyara.
JOS 1:8 Embame Mawa Pii buku doko kambunya lao lao pyuo karape. Yuu peparae kukwa korakama lao mana nyepala pii dokona pyasi palamo dusipa peparae suu pyanyi pyano piso dokopa warombo sepe. Dokopa emba au pyuo keyange ingyuo elyape keta pare.
JOS 1:9 Nambame emba kando, Mona kumapala porai ingyuo yulu dokona kandokondali pyuo karape lao mana langiyu kande. Dokona lao namba embena Kamongo Anatu emba anja panda parene dupwana role pyapeta paramba dokona paka nao mona nemba nao poraiyuo karape, lao Kamongome leya.
JOS 1:10 Dokopa Josuame akali mupwa dupwame wambu palyuo petaminyi yuu dokona papyuo pii lamainya lao lamaiyuo,
JOS 1:11 Yuu gii rema paparamopa ipwa Jotane doko yalo nakamana Kamongo Anatu dokome yuu jipyamo dokona karala paramaŋa dokona nenge lapo rapa rapa pinya lena leya.
JOS 1:12 Josuame akali Urupene rarape Gatena rarape dee akali Manasana rara pingyasi pakipi lamaiyuo lao,
JOS 1:13 Kamongona kendemande akali Mosese dokome nakama langiya kande. Doko nakamana Kamongo Anatu dokome ipwa Jotane epenge yuu neta pyakalyingi dorena nakama rangena ingyara lao jeraŋa, leya.
JOS 1:14 Nakamana enda wanepe dee mena bulamakaope dupwa dae kararaminyipa nakamana yanda singi dupwa yanda pingi bange dupwa minyuo nakamana Isaraele yango dupwa enakao epena lapala nakama nyiso wambo parami. Pao nakamana Kamongo Anatu dokome ipwa Jotane epenge yuu neta anda pao yalyingi dorena maipyamo dokona kapa pao kararami doko kandapala kaeyarami. Kapa kareyami kande doko kandapala Isaraele rara dupwa peparae nakama kapu kyuo epo ipa Jotane neta epenge yuu dorename akali Moseseme nakamba yuu rangena lao jiyamo dokona palyuo kararami, leya.
JOS 1:16 Leyamo dokopa nakamame Josua isingi lamaiyuo lao, Embame pii peparae namwa langilinyili pyuo pirama dee embame anja pupwa larenele pyuo parama.
JOS 1:17 Namwame yuu peparae Mosesena pii warombo singi dokoko suu pyao embena pii warombo serama. Dokona embena Kamongo Anatu Mosese role karenge dokoko suu pyao emba keta role pyao karena.
JOS 1:18 Namwana wambu dupwana mendeme embena yulu dupwana pisalya pisana pyuo dee embena pii larene dupwana lapo kamba lao pirami dupwa pyao kumakarama. Dokona mona kumapala porai ingyuo yulu doko kandokondali pyuo pyuo karape, leyami.
JOS 2:1 Dokopa Josuame akali lama yuu Akasia wambu palyuo paleyaminyi dokona yaki nyuo yuu Kenane doko yalu pyuo kandala pena leya. Yuu Kenane doko kando nyepala yuu taone andake mende Jereko lenge doko angingyuo poraiyuo kandena leya. Nakamba yuu Jereko dokona epo yuu gii kukwa dokopa enda pamuku mende kingi Oreapa lenge dokona anda pali peyambi.
JOS 2:2 Kukwa dokopa Isaraele akali lapome yuu doko yalu pyuo kandala imi leyaminyipa Jereko kiŋi dokome siya.
JOS 2:3 Sepala dokona lao baame Oreapa keta pii nembapala lao, Akali embena anda petambinyi dolapome yuu dake peparae yalu pyuo kandala imbi. Dokona nakamba kamanda lanyuo ipupi, leya.
JOS 2:4 Leyamo dokopa enda dokome isingi lao, Kinyi akali lapo nambana anda iminyipape nakamba anja range lao namba see nalyo. Doko nakamba neta anda pupyamopa yuu taone kambu kii doko palyapa naminyipa nambana anda yaki nyuo pumbi. Doko anja pelyambinyi lao piso see napu. Embame pumbinyi dokona waiya lao moko minyuo pare ramo doko kapa kando nyere, leya. (Enda Oreapame akali dolapo anda ketae dorena lanyuo papala puu yaki dopale reteya dokona minyalyapala yalu pyuo koko petena leya.)
JOS 2:7 Dokopa kiŋinya akali lapo yuu taone doko yaki nyuo papeyami dokopa kambu kii doko paleya. Nakama Isaraele akali lama yalu pyuo yuu waa kandala epeyambi dolapo koto pao ama nanesa wakasa kata ipwa Jotane yalo penge dokona peyami.
JOS 2:8 Yuu gii kukwa dokopa akali dolapo luu palipa nayambinyipa enda Oreapa doko anda ketae dokona peya.
JOS 2:9 Papala nakamba lamaiyuo lao, Kamongo dokome yuu dake nakamba jipyamo doko namba silyu. Doko yuu dakena range wambu peparae dupwa nakamba kando pakalyaminyi.
JOS 2:10 Nakama yuu Isipi yaki nyuo epeyaminyipa Kamongo dokome ipwa Kota Kone lenge doko soko rali piyamopa nakama dokona kata siyamo epeyami doko namwa siyama. Dee ipwa Jotane epenge yuu neta pyakalyingi dorena Amote akali kiŋi lama kingi Sayone dee Oke lenge dolapo pyao kumakayami doko namwa siyamako.
JOS 2:11 Namwa doko siyama dokopa aopa pakayama. Nakama ama porai ingilyaminyi leyami doko sepala namwana porai renge doko isa puu pao peya. Nakamana Kamongo Anatu doko yake panda ketae dokona baako karenge dee isa yuu pandape peparaena baako karenge.
JOS 2:12 Epapu banya kingi lao, nambame nakamba anjiki pyuo rapu pilyu doko suu pyao nakambame nambana ree palu dupwa anjiki pyuo rapu pyakaramba lao lalu lao lalapape. Dee nambame nakamba kinyi angiŋi lao suu pyaroleŋe yulu mende pyuo lasaka pipwape.
JOS 2:13 Pipala nambana anyipi rakanepe kakingipi pemalengepe dee dupwana ree palu peparaepe kyawa lete nyakaramaŋa lao namba kando lalu lao lalapape. Dee namwa pyao kumakana lao kyawa yaki nyii nalapape, leya.
JOS 2:14 Leyamo dokopa akali dolapome enda doko lamaiyuo lao, Namwa letamanuli pyuo pii narama ramo doko namwana Anatu dokome namwa pyao kumakana. Nambwa yulu pimbwano doko embame mendali lamai nare ramo doko Kamongome yuu dake namwa jeramo dokopa emba poraiyuo rapu pyuo kararama lao lalu lao letambano, leyambi.
JOS 2:15 Enda Oreapa banya anda doko pyuo pao yuu taone dokona kana kame dokona suu lasindena palenge. Dokome akali dolapo puu karapala windowa kata dokona isa pena lao malyiya.
JOS 2:16 Dopa pipala enda dokome nakamba lamaiyuo, Kiŋi dokona akali dupwame koto kando nyisarimiŋi yuu kyau pingi dulunya papala yuu gii rema yalu pyuo karalapape. Kararaminyipa akali dusipa anda kapu kyuo eparaminyipa nakamba range kata nyuo parambi, leya.
JOS 2:17 Dokopa akali dolapome enda doko kando lao, Nambwame emba kando pii lalu lao lenge doko minyuo kararamba, leyambi.
JOS 2:18 Dokona embame dopa pepe. Namwame embena yuu dakena sukusa epo pyao nyela epeyama kande dokopa puu kone dokome windowa kata nambwa pupwa lao nembelene dokona puu pyanyi palyape. Palyapala embena endakinyi rakanepe dee embena kakingi pemalengepe dee embena rakanena ree palu wambu dupwape malu palyuo embena anda dokona petena lare.
JOS 2:19 Doko kaepala mendali anda doko yaki nyuo nyisa kama epo paramo dokopa pyao kumarami ramo doko baa rangena yulu. Dokona namwana yulu mende daa. Dopa piraminyipape mendali embena anda dokona pisipala randa nyera ramo doko namwana yulu.
JOS 2:20 Dopa piramopape embame nambwa yalu pyuo epo pelyambano doko wambu dupwa lamairi ramo doko nambwame emba keta lalu lao letambano pii doko minyaro kararamba ingya nara, leyambi.
JOS 2:21 Dokopa enda baame kapa lapala nakamba pena leya. Dopa pipala enda dokome puu kone doko windowa dokona puu pyanyi palyiya.
JOS 2:22 Dokopa akali yalu pyuo yuu waa kandala epeyambi dolapo yuu kyau dokona papala yalu piyambi. Dokopa kiŋi dokona akali dupwame yuu wangu dupwana yuu gii rema nakama koteyami. Koteyaminyipape koto kando nyii napala nakama kapu kyuo Jereko epeyami.
JOS 2:23 Dokopa enakana akali lama dolapo yuu kyau dokona lupyuo epo ipwa yalapala kapu kyuo epo Josua peteyamo dokona peyambi. Papala yulu peparae piyamo dupwa baa lamaiyambi.
JOS 2:24 Lamaipala dee lao, Kamongo dokome yuu doko peparae namwa jipyamo doko nambwa silyambano. Doko wambu yuu dokona palaminyi dupwa peparaeme namwa kando pakalyaminyi, leyambi.
JOS 3:1 Yuu gii yangama dokopa Josuamoo dee Isaraele wambu peparaepe wamba sipurapala Akasia dokona palyuo paleyaminyi doko yaki nyepala ipwa Jotane maresa peyami. Papala ipwa Jotane yalo parama lao komau anda pipala isaro kareyami.
JOS 3:2 Yuu gii rema papeyamopa akali mupwa dupwame wambu paleyaminyi dupwana papyuo dopa lamaiyami.
JOS 3:3 Purisi dupwame nakamana Kamongo Anatu dokona Kana Minyuo Lalu Lao Lenge Pii Palenge Bokote doko soo wambao paraminyi kandapala dokopa nakamana pinji pyapala komau anda dupwa lalyuo nyepala moko minyuo pupwape.
JOS 3:4 Nakama wambape dae kamame epa nange kandale dokona purisi dupwame nakama kata lasaka pyuo parami. Dopa piraminyipape Kana Minyuo Lalu Lao Lenge Pii Palenge Bokote doko soo parami dokona repeta paa nalapape. Mee mende donosale kilomita mendaki dopale ingyuo matarena pupwape, leya.
JOS 3:5 Dokopa Josuame wambu dupwa dopa lamaiyuo, Rakya Kamongo dokome wambumi yulu pii nange lapo nakama keta piraŋa dokona nakama rapa rapa pyuo poo pyasi ingyuo karalapape, leya.
JOS 3:6 Lapala baame purisi dupwa lamaiyuo, Wambu dupwa enakana epenaleŋe nakama Kana Minyuo Lalu Lao Lenge Pii Palenge Bokote soo wambo pena leya. Leyamo dokopa nakamame baa leyamuli pyuo peyami.
JOS 3:7 Dokopa Kamongo dokome Josua lamaiyuo lao, Epapu nambame mende pirunu dokome Isaraele wambu dupwame kando emba akali andakeŋe lao yako lao ketae pyambuo kararami. Dee namba Mosese role kareyo doko suu pyao embapa karambinyi lao soo gisarami.
JOS 3:8 Dee purisi akali Kana Minyuo Lalu Lao Lenge Pii Palenge Bokote soo parami dupwa lamaiyuo, Nakama ipwa doko kando nyepala dokopa ipwa dokona papala ipwa kee kama repeta pao karena lape, leya.
JOS 3:9 Dokopa Josuame wambu dupwa lamaiyuo, Dae epapala nakamana Kamongo Anatumi pii mende langira doko selapape.
JOS 3:10 Nakama parami dokopa baame Kenane wambupi Iti wambupi Ipi wambupi Perasi wambupi Gukasi wambupi Amote wambupi dee Jepusi wambupi dupwa pyao ralinyi nembara.
JOS 3:11 Kamongo yuu muu peparaena iso karenge dokona Kana Minyuo Lalu Lao Lenge Pii Palenge Bokote ipwa Jotane yalo wambo soo peyami kande dokopa Kamongo lete karalu karenge doko nakama pipya karapyalyamo lao soo gisarami.
JOS 3:12 Dokona epapu Isaraele rara akalisa ipisu lama dusipana akali mendaki mendaki lao rombo palyuo nyelapape.
JOS 3:13 Purisi akali dupwame Kamongo yuu muu peparaena iso karenge dokona Kana Minyuo Lalu Lao Lenge Pii Palenge Bokote doko soo pao ipwa dokona kimbu kararaminyi dokopa ipwa Jotane doko epa nara. Epa naramopa ipwa doko yuu kyau dopale ingyaro karara, leya.
JOS 3:14 Nenge nenge mandenge yuu gii dokopandeme ipwa doko wakasa paleya. Dokopa wambu dupwa komau anda pyuo paleyami yuu doko yaki nyepala ipwa doko keno pena peyami. Peyaminyi dokopa purisi dupwa Kana Minyuo Lalu Lao Lenge Pii Palenge Bokote doko nyepala soo wambo peyami. Dokopa purisi dupwame ipwa dokona moko palyeteyaminyi dokopa ipwa doko soko rali piya.
JOS 3:16 Dulurename yuu nanesa yuu Atae lenge yuu Saretane repeta singi dokona ipwa doko yuu kyau dopale ingyaro kareya. Dee ipwa lano pao Ipwa Kumungi dokona penge doko soko rali piyamosa wambu dupwa awa pyuo yalo yuu angi Jereko dokona repeta parami ingiya.
JOS 3:17 Wambu dupwa peparae yuu oo lasi dokona pao kareyaminyipa purisi dupwame Kamongona Kana Minyuo Lalu Lao Lenge Pii Palenge Bokote doko ipwa Jotane dokona sukusa mee yuu oo lasi ingyuo siyamopa sakaro kareyami. Karapala wambu peparae wangu dumarena pao oteyaminyipa purisi dupwa kaeyami.
JOS 4:1 Wambu rara peparae Jotane yalo papeyami dokopa Kamongo dokome Josua lamaiyuo,
JOS 4:2 Rara akalisa ipisu lama dupwana akali mendaki mendaki lao rombo palyuo nyepe.
JOS 4:3 Nyepala purisi dupwa ipwa Jotane anda suku dokona kareyaminyi panda dokona rolae kana akalisa ipisu lama nyinya lamaipi. Lamaipala kana dupwa nakama nyepala soo epapala nakama rengya kukwa komau anda pyuo palirami dokona isa retena lao lamaipi, leya.
JOS 4:4 Dokopa akali akalisa ipisu lama Josuame rombo palyiyamo dusipa kee leya. Lapala lao,
JOS 4:5 Nakamana Kamongo Anatunya Kana Minyuo Lalu Lao Lenge Pii Palenge Bokote soo paraminyi dokona nakama wambo pao Jotane sukusa pupwape. Papala nakama kana mendaki mendaki lao nyepala langena soo ipupwape. Eparaminyi dokopa Isaraele rara peparaena kana mendaki mendaki lao ingyara.
JOS 4:6 Wambu dupwame kana dusipa kandapa pirami dokopa Kamongo dokome yulu pipyamo doko suu pyapa pirami. Dokona rakyame nakamana wane wanake dupwame kana dupwana lao aki renge palamo lao piso serami.
JOS 4:7 Piso seraminyi dokopa embame nakama lamaiyuo, Kamongona Kana Minyuo Lalu Lao Lenge Pii Palenge Bokote doko ipwa dokona yalo minyuo peyama dokopa ipwa Jotane doko soko rali piya, lare. Dokona Isaraele wambu dupwame kana dusipa kandapala yuu dakena dopande piyaŋa lao suu pyao kararami, leya.
JOS 4:8 Akali dupwame Josuame leyamuli pyuo piyami. Kamongome Josua lamaiyamuli pyuo kana akalisa ipisu lama (12) ipwa Jotane dokona sukusa nyiyami. Isaraele rara peparaena suu pyao kana mendaki mendaki lao nyepala soo pao komau anda pyuo paleyami yuu dokona isa reteyami.
JOS 4:9 Purisi dupwame Kana Minyuo Lalu Lao Lenge Pii Palenge Bokote doko soo pao ipwa Jotane sukusa kareyaminyi panda dokona Josuame kana akalisa ipisu lama (12) kamameko nyepala isa reteya. (Kana dusipa dakepa mee dokona silyamo.)
JOS 4:10 Kamongo dokome Josua wambu pinya lena leyamo yulu dupwa pilyamipi lao purisi dupwa ipwa Jotane suku dokona mee isaro kareyami. Doko Moseseme leyamuli pyuo piyami. Dokopa wambu dupwa waiya lao ipwa doko yalo peyami.
JOS 4:11 Wambu dupwa peparae ipwa dumarena peyami dokopa purisi akali Kamongona Kana Minyuo Lalu Lao Lenge Pii Palenge Bokote siyami dupwa soo wambo peyaminyipa wambu dupwa enakana peyami.
JOS 4:12 Dokopa akali Urupene rarape Gatena rarape dee akali Manasana rara pingyasipi dupwa Moseseme pinya lao lamaiyamuli pyuo yanda pinya rapa rapa pyuo wambo peyami. Wambu menge dupwa enakana peyami.
JOS 4:13 Peyaminyi dokopa Kamongona lenge kambu dokona akali taosande akalisa kisima (40,000) yanda pinya rapa rapa pyuo yuu pau lama lama Jereko repeta singi dokona yalo peyami.
JOS 4:14 Yuu gii dokopa Kamongome yulu piyamo doko Isaraele wambu dupwame kandapala Josua baa akali kamame andake lao soo nyiyami. Nakamame Mosese yako lao banya kingi ketae pyambuo karenge doko suu pyao banya yuu gii kareyamo dusipana nakamame Josua yako lao banya kingi ketae pyambuo kareyami.
JOS 4:15 Dokopa Kamongome Josua lamaiyuo, Purisi dupwame Kana Minyuo Lalu Lao Lenge Pii Palenge Bokote doko ipwa Jotane sukusa yaki nyuo soo nyisa epena lena leya.
JOS 4:17 Leyamo dokopa Josuame leyamuli pyuo piyami.
JOS 4:18 Dokopa purisi dupwa ipwa kee dokona epo kando nyepeyami dokopa ipwa doko yuu mendaki aopa epo papala dee paleyamuli pyuo paleya.
JOS 4:19 Wambu dupwa kana mupwa dokona pao yuu gii akalisa dokopa ipwa Jotane doko yalo peyami. Papala yuu Jereko neta epenge dorena yuu Gilikale lenge dokona komau anda piyami.
JOS 4:20 Dokona kana akalisa ipisu lama ipwa Jotane dokona nyiyami dusipa apu rao pisiya.
JOS 4:21 Baame Isaraele wambu dupwa lamaiyuo, Rakyame nakamana wane wanake dupwame kana dupwana aki renge palase lao piso siyami kande dokopa
JOS 4:22 ipwa Jotane doko soko rali piyamopa mee yuu oo lasi siyamo dokona Isaraele wambu dupwa kata poko pyao peyaminyi dokona lao lamainya leya.
JOS 4:23 Nakama lamaiyuo, Nakamana Kamongo Anatu dokome ipwa kota Kone lenge doko soko rali piyamo doko suu pyaoko dee ipwa Jotane doko dopako piyamo dokopa yalo epeyama.
JOS 4:24 Renge dokona lao isa yuu dakena wambu peparaeme Kamongona porainya renge doko andake wakasaŋa lao soo gisarami. Dee nakamame nakamana Kamongo Anatu doko lakando kingi ketae pyambuo karalu kararami ingilyamo, leya.
JOS 5:1 Isaraele wambu dupwa ipwa Jotane dokona sukusa kata pena lao ipwa Jotane doko Kamongome soko rali pipya leyami doko yuu Amote wambunya kiŋi ipwa Jotane neta yalyingi dorena karenge peparaepe dee Kenane wambunya kiŋi dupwa peparaeme ipwa kota Metitaraniane lenge kipwa kipwa dokona palenge dupwapeme siyami. Dokona lao Isaraele wambu epelyaminyi lao suu pyao nakama pakapala nakamana porainya renge doko isa peya.
JOS 5:2 Dokopa Kamongo dokome Josua lamaiyuo, Kana nenge karenge wakasa lapome wua kema lapo ingyuo wasapala dupwame Isaraele akali dupwa yanenge kalomakaminya leya.
JOS 5:3 Dokona lao Josuame wua kema lapo wasapala yuu kyau kingi Yanenge Kalomenge lenge dokona nakamana yanenge kalomakamiya.
JOS 5:4 Isaraele wambu dupwa yuu Isipi yaki nyepala epeyaminyi dokopa wanepe akalipi peparae yanenge kalomo otasi kareyami.
JOS 5:5 Dopa piyamopape nakama yuu muiyane dokona ee kana akalisa kisima kata pao kareyami dokopa wane dupwa mandeyaminyi dupwa nakamana yanenge kalomakami nayami. Dopa piyamo dokopa Isipi yaki nyuo epeyaminyi
JOS 5:6 akali kapa yanda piramili dupwame Kamongo kando kamba lao kareyamisa yuu muiyane kata papeyaminyipa peparae kumuo oteyami. Baame akali kumuyaminyi dupwa lamaiyuo, Yuu amenge pingi ee nengepe ando kamonganyi nembenge doko nakama jeroŋo lao nakamana rora ambasu dupwa pipya lalu lao lao lamaiyunu nakama doko kapa kanda narami lao lalu lao leyamuli pyuo piya.
JOS 5:7 Dokopa nakamana ikinyingi nakamana panda nyiyami dupwa yuu muiyane dokona pao karo yanenge kaloma nayami. Dokona lao Josuame nakamana yanenge kalomakamiya.
JOS 5:8 Yanenge kalomenge yulu doko otapeyamo dokopa rete dupwa umbwa pilyape lao rara peparae nakamana komau anda pipala paleyami dupwana peteyami.
JOS 5:9 Dokopa Kamongo dokome Josua kando lao, Nakama Isipi wambunya kendemande ingyuo yulu pyakamyuo kareyamisa elyange renge nyiyami doko epapu nambame nyisa nembakapu. Renge dokona yuu doko kingi Gilikale lenge. Kingi Gilikale lenge doko bange nyisa nembenge dopale.
JOS 5:10 Isaraele wambu dupwa yuu Gilikale yuu anda lama lama dokona yuu Jereko repeta singi komau anda pyuo palyuo kareyami. Dokopa nakamame kana dokonako yuu gii akalisa ipisu kisima dokona kukwa Nenge Pasopa neyami.
JOS 5:11 Yuu gii dokopa yangama yuu Kenane dokona nenge andenge lapo kanda soo neyami. Doko witi kisasipi dee nenge borete isi pyambwa nao wasisipi neyami.
JOS 5:12 Dokopa nenge myana lenge Isaraele wambu dupwa mee maipa piyamo doko Anatumi dee kamba maiya naya. Dokopa nenge yuu Kenane dokona andeyamo dupwa nao palyuo karo piyami.
JOS 5:13 Josua baa yuu Jereko dokona repeta karo baame akali mende banya lenge kambu siyamo dorena wua gela minyaro kareyamo doko kandeya. Kandapala dokopa akali baa kareyamo dokona papala dopa lao piso soo, Emba namwana yanda singi dokona mendepe panda namwana yanda pimwaisi? leya.
JOS 5:14 Leyamo dokopa akali dokome isingi lao, Namba embena yanda singi daa. Dee namba embena yanda pimwai daa. Kamongona ami dokona namba mupwa ingyuo karenge, leya. Leyamo dokopa Josua baa yuu dokona pangu sepala akali dokona kingi ketae pyambuo lakando lao, Namba embena kendemande yulu pyakange akali. Embame namba apa pyakapili lao suu pilisi? leya.
JOS 5:15 Leyamo dokopa Kamongona ami dokona mupwa ingyuo karenge dokome Josua kando lamaiyuo, Embena kimbu suu doko nyisa nyepe. Renge dokona lao yuu emba karene doko kamame poo pyasi wakasa, leya. Dopa pinya lao Josua lamaiyamuli pyuo piya.
JOS 6:1 Isaraele wambu dupwa repeta epeyamisa yuu Jereko dokona kana kame kambu dupwa upi lapala Isaraele dupwa epasaramiŋi lao poraiyuo kando kareyami. Dopa pipala mendali baa yuu taone doko yaki nyuo kama paa nana lao dee mendali kama karo andakare epa nana lao piyami.
JOS 6:2 Dokopa Kamongo dokome Josua lamaiyuo, Nambame yuu Jerekope dokona kiŋipi yanda singi porai karaminyi dupwape emba keta retelyo.
JOS 6:3 Dokona yuu gii pakinyamange dusipana yuu peparae yuu mendaki larapu embape embena yanda singi dupwape pipya yuu taone andake doko awali lao maki maki pyuo kimbu pyao piso kata parami.
JOS 6:4 Purisi akali yanda ipingi wakale wakale bikuli dusipa minyuo nakama Kana Minyuo Lalu Lao Lenge Pii Palenge Bokote doko soo parami dokona wambo pena. Yuu gii yanda ipingi dokopa purisi dupwame bikuli poo laraminyi dokopa embape embena yanda singi dupwa pipya yuu yanda ipingi nyepo taone andake dokona awali lao maki maki pyuo kimbu pyao piso kata parami.
JOS 6:5 Dokopa nakamame bikuli pii mende imambu see nao poo londe mende larami. Doko emba aopa sepala dokopa wambu peparaeme pii ketae palyuo laraminyipa yuu taone andake dokona kana kame awali lao karenge doko lalyuo bolombalo lao isa para. Dokopa ami yanda singi peparae yuu taone andake dokona sukusa rolae parami, Kamongome leya.
JOS 6:6 Leyamo dokopa Josuame purisi dusipa kee lao dopa leya. Nakamame Kana Minyuo Lalu Lao Lenge Pii Palenge Bokote doko nyelapape. Nyepala akali yanda ipingi nyepo dusipame bikuli minyuo wambo pupwape.
JOS 6:7 Lapala dokopa baame akali dupwa lamaiyuo, Yuu taone andake dokona awali lao kanda soo maki maki pyuo kimbu pyao piso pena leya. Kamongona Kana Minyuo Lalu Lao Lenge Pii Palenge Bokote soo parami dokona yanda singi lapo wambo iso pena leya.
JOS 6:8 Dokopa nakamame Josua lamaiyamuli pyuo piyami. Yanda singi lapo kamame wambo peyami. Peyaminyi dokopa purisi akali yanda ipingi nyepo dusipame bikuli poo lao peyami.
JOS 6:9 Dokopa dee purisi akali wakale lapome Kamongona Kana Minyuo Lalu Lao Lenge Pii Palenge Bokote doko soo peyami. Kamame enakana yanda singi lapoko peyami. Dopa pyuo peyaminyi dokopa bikuli poo lao peyami.
JOS 6:10 Dopa piyaminyipape Josuame banya akali dupwa lamaiyuo, Pii poraiyuo laa nana dee isa isa pii kuki mendepe laa nana ama daa, leya. Nambame langirunu dokopa nakamame kapa larami, leya.
JOS 6:11 Dokona lao baame purisi dupwa lamaiyuo, Kamongona Kana Minyuo Lalu Lao Lenge Pii Palenge Bokote doko nyepala soo yuu mendaki yuu taone andake dokona awali lena leya. Leyamo dokopa nakama dopa pipala komau anda pyuo paleyami dokona dee kamba kapu kyuo epapala kukwa dokopa paleyami.
JOS 6:12 Yuu gii dokopa yangama wamba kukwa Josua baa sipureyamo dokopa yuu lapo ingyuo banya yanda singi lapo yuu taone doko awali lao wambo peyaminyi dokopa purisi akali yanda ipingi nyepo dusipame enakana bikuli poo lao peyami. Peyaminyi dokopa dee purisi akali wakale lapome Kana Minyuo Lalu Lao Lenge Pii Palenge Bokote doko soo peyami. Kamame enakana yanda singi lapo peyami. Dopa pyuo peyaminyi dokopa bikuli poo lao peyami.
JOS 6:14 Yuu gii lapo dokona nakama yuu taone andake dokona kamba yuu mendaki awali lao maki maki pyuo kimbu pyao piso papala nakama kapu kyuo komau anda paleyami yuu dokona dee epeyami. Nakama yuu gii pakinyamange nembo mee dopako pyuo kareyami.
JOS 6:15 Yuu gii yanda ipingi dokopa nakama yango rali piyamo sipuro papala wambo piyami dopaleko ingyuo yuu taone andake doko awali lao yuu yanda ipingiko maki maki pyuo kimbu pyao piso kata peyami. Yuu gii doko iki yuu yanda ipingi dopa piyami.
JOS 6:16 Yuu yanda ipingi awali leyami dokopa purisi dupwame bikuli pii repeta lalana piyami. Dokopa Josua banya akali dupwa pii poraiyuo lena leya. Lapala baame lao, Kamongo dokome yuu taone andake doko nakama jipya, leya.
JOS 6:17 Yuu taone andake dokope bange peparae singi dupwape yaka lao pyao kokwa soo nembarami. Dopa pyuo nakamame Anatu bange maingi doko suu pyao pirami. Dopa pipala namwana akali lama yuu dake waa kandala epeyambinyi dokopa pamuku enda Oreapa nakamba yalu pyuo pisiyamo doko dee banya ree palu dokope yaki nyuo kaeyarami.
JOS 6:18 Dopa pipalape bange pyao kokwa soo nembaraminyi dupwana mende nyii nalapape. Doko daaŋa lapala nyerami ramo doko Isaraele wambu dupwa koo keta pao randa andake nyerami.
JOS 6:19 Bange peparae kana kulingipi kana golope kone kanape anepe dusipame wasisi dupwa peparae Kamongona lao liti pyuo retarami. Kamongona kana retenge dokona retarami.
JOS 6:20 Dokona lao purisi dupwame bikuli poo leyami dokopa akali dupwame aopa sepala nakama pii poraiyuo kaeyo leyaminyipa kana kame awali lao paleyamo doko lalyuo bolombalo lao isa peya. Dokopa yanda singi dupwa yuu kyau dokona pulyuo papala yuu taone andake dokona sukusa rolae pao yuu doko nyiyami.
JOS 6:21 Nyepala nakamana wua gela dupwame yuu dokona wambu peparae peteyami dupwa piyami. Enda akalipi endemo alemope dee mapwae parangepe dupwa pyao kumakayami. Nakamame mena sipisipi mena dongepe mena bulamakaope dupwa peparae pyao kumakayami.
JOS 6:22 Dokopa Josuame akali lama yuu yalu pyuo waa kandala peyambinyi dolapo lamaiyuo, Nakambame baa kando lalu lao lao lamaiyambinyili pyuo enda pamuku dokona anda papala baape banya ree palu dupwape nyuo minyuo nyisa ipupwape, leya.
JOS 6:23 Dokopa nakamba papala enda Oreapa banya endangi rakangepa dee banya pemalenge dupwape dee banya ree palu dupwa pipya nyuo minyuo nyisa epeyambi. Nakamba wambu ree palupi dee kendemande wambupi dupwa peparae lete kararami lao Isaraele wambu komau anda pyuo paleyami dokona repeta minyuo epo pisiyami.
JOS 6:24 Dokopa enakana nakama yuu taone andake doko isare palyiyamisa rao yuu minyiya. Dokona bange siyamo dupwa role pyapeta reya. Reyamopape bange kana golope kana kulingipi kone kanape anepe dusipame wasingi dupwa nakamame nyepala Kamongona kana retenge dokona reteyami.
JOS 6:25 Dopa piyamopape Josuame akali lama yalu pyuo yuu Jereko doko waa kandala pena leyamo dokopa pamuku enda Oreapa dokome nyuo yalu pyuo pisiyamo dokona Josuame baape banya ree palu dupwape lete wai pyao nyiya. Banya para pyasi dupwa yuu Isaraele dokona karo yuu gii dakepa palu karaminyi.
JOS 6:26 Yuu gii dokopa Josuame repe repe pii lamaikondali pyuo lao, Wambu mendeme yuu taone Jereko dake kamba pira ramo doko Kamongome baa koo keta pisara. Dokona lao mendeme anda dokona pinya suu pyao kana susa retaramo dokona ikinyingi mupwa doko kumara. Dee mendeme kana kame kambu dupwa wasera ramo dokona ikinyingi enakana mandenge doko kumara.
JOS 6:27 Dokona lao Kamongo doko Josuapa role pyao kareyambisa banya kingi doko yuu muu dupwana raeyo soo kapa kapa piyami.
JOS 10:1 Josuame yuu taone Jereko pyao kokwa soo dee yuu dokona kiŋi pyao kokwa soo piya. Dopa pipala yuu Eyai dokona dopako pyuo piyamo doko leyaminyi Jerusaleme range kiŋi banya kingi Atoniseteke lenge dokome siya. Sepala Gipione wambu dupwame mona siyamopa Isaraele wambu dupwa pipya manda rao peteyami doko leyaminyi siyako.
JOS 10:2 Dokona lao Jerusaleme wambu dupwa ama pakayami. Renge dokona lao yuu taone wakale wakale kiŋi iso kareyaminyi dupwa yuu Gipione doko andake dopale. Yuu Eyai doko mee taone kuki iki. Dee yuu Gipione range yanda singi dupwame yanda poraiyuo pingi.
JOS 10:3 Dokona lao akali Atonisetekeme pii nembo akali Oyame yuu Eperonena kiŋi dokope akali Pirame yuu Jamurana kiŋi dokope akali Japia yuu Lakisinya kiŋi dokope dee akali Depa yuu Ekelonena kiŋi dokope dopa lamaiya.
JOS 10:4 Gipione range wambu dupwame Josuamoo Isaraele wambu dupwa pipya mona sipyamopa puu minyuo pisiminyi dokona nakama dae epapala nambamoo pipya Gipione range wambu dupwa yanda pyuo pyamanale, leya.
JOS 10:5 Amote kiŋi kingi paki dusipame Jerusaleme range kiŋi dokope Eperone range kiŋi dokope Jamura range kiŋi dokope Lakisi dee Ekelone range kiŋi dolapope nakamana yanda singi dupwa peparae nyuo malu palyuo yuu Gipione doko awali lao karo yanda piyami.
JOS 10:6 Dokopa Gipione range dupwame Josua yuu Gilikale paleyamo dokona pii wai nembo leyami. Embame namwa yaki nyii napipi. Emba waiya lao aopa epo namwa nyiso lete wai pyao nyelase. Amote kiŋi yuu kyau dupwana palenge dupwa peparaeme malu palyapala namwa pyala epelyaminyi, leyami.
JOS 10:7 Leyaminyi doko sepala Josua banya yanda singi peparae dupwa pipya yuu Gilikale yaki nyepala nyisala peyami.
JOS 10:8 Peyaminyi dokopa Kamongome Josua lamaiyuo, Ama paka napipi. Wambu dupwana mendeme emba pyao isa palya narami. Nambana porainya renge dokome embame wambu dupwa nyuo anamasi minyare, leya.
JOS 10:9 Leyamo dokopa Josua dee banya yanda singi dupwape kukwa yuu Gilikale dokona karo yuu Gipione peyami. Papala Amote wambu dupwa rapa rapa pii nayaminyipa nakamame wambu dupwa walu lao piyami.
JOS 10:10 Amote wambu dupwame Isaraele yanda singi dupwa epeyaminyi kandeyaminyi dokopa Kamongome nakama pakanyi pyambuya. Pyambuyamo dokopa Isaraele wambu dupwame Amote wambu yuu Gipione dokona pyapala yuu Beterome kyau kata kuki mendena pyao lano ralinyi nembeyami. Ralinyi nembo pao yuu Aseka dee Maketa yuu donorena singi dokona pyambuyami.
JOS 10:11 Isaraele wambu dupwame peteta peyaminyi dokopa Amote wambu dupwa lano makando peyaminyipa Kamongome yake dokona piso randake kapa isa peyapala wambu malumee pyao kumakaya. Isaraele wambu dupwame wambu pyao kumakayaminyipape randake kapame kamame wakasa pyao kumakaya.
JOS 10:12 Kamongo dokome Isaraele akali dupwa nyisiyamopa Amote akali dupwa pyao wini piyami. Yuu gii dokopa Josuame Kamongo pii lamaiya. Baame Isaraele wambunya lenge kambu dokona dopa leya. Neta, yuu Gipione kanda kanda dokona mee rao kara. Kana, yuu Ainjalone rapu dorena kanda kanda mee rao kara.
JOS 10:13 Isaraele wambu dupwame ene wini pinya piyaminyi dokopa neta kanape dolapo mee romo pii nao rao karalu kareyambi. Dopa piyamo dokopa yake suku dokona neta mee rao karalu kareya. Dopa piyamo dokopa yuu yangama piso pao yuu kukwa opetaeko rao karalu kareya. Dopa piyaŋa lao Akali Rolae Pingi Dupwana Buku dokona pyasi palamo.
JOS 10:14 Yuu wamba kanda soo dokopa piso pao epapupi yulu dopale pyuo Kamongome mee akalinya pii mendepe warombo see nange. Isaraele wambu dupwame yanda pyuo kareyaminyipa Kamongome nakama poraiyuo nyiso kareyamo piyami.
JOS 10:15 Enakana dokopa Josuamoo banya yanda singi dupwa pipya nakama paleyaminyi yuu Gilikale dokona dee kapu kyuo peyami.
JOS 24:1 Josuame Isaraele rara dupwa peparae kyakale lao nyuo yuu Sikeme dokona malu palyiya. Baame akali kyawape akali mupwa ingyuo karengepe jasi akalipi Isaraele wambunya iso karengepe dupwa peparae epena lao kyakale leyamo dokopa wambu dupwa peparae Anatunya lenge kambu siyamo dokona epo kareyami.
JOS 24:2 Dokopa Josuame wambu dupwa peparae kando lamaiyuo, Kamongo Isaraele wambunya Anatu dokome pii dake dopa letamo, leya. Ama yuu wamba nakamana rora ambasu dupwa ipwa Yuporisa wangu pakirename kareyaminyi dokopa bange wakale anatuŋu lao lakando kareyami. Nakamana rora amabasu dupwana akali mendaki baa Tera lenge doko Aporakamepa Nayopana rakange.
JOS 24:3 Yuu gii dokopa nakamana kauwange Aporakame ipwa Yuporisa wangu pakirename kareyamopa nambame nyuo lanyuo yuu Kenane peparae dokona sukusa mondo lao laminyuo peyo. Papala dokopa banya para pyasi ree palu andake inginyi pyambuyu.
JOS 24:4 Nambame baa wane Aisake maiyu. Maipala nambame dee Aisake keta Jekope Isopa maiyu. Dee yuu kyau kuki pingi singi yuu Itome lenge doko Iso banya yuu inginya lao maiyu. Dopa piyunupape nakamana rora ambasu Jekope lenge banya wane wanakepe dupwa pipya yuu Isipi dokona lano peyami.
JOS 24:5 Dokopa enakana nambame Mosese Eronepa mapanyi peyapala yuu Isipi keta randa andake pena leyo. Dopa leyonopape nambame nakama nyisa nyiyu.
JOS 24:6 Nakamana rora ambasu dupwa yuu Isipi kareyaminyipa nambame neta nyuo lanyuo epeyo. Lanyuo epeyonopa Isipi range wambu dupwame mena matana pisope dee mena oseme ipyuo penge uliuli dupwana piso pyao peta ralyuo nyela epeyami.
JOS 24:7 Epeyaminyi dokopa nakamana rora ambasu dupwa ipwa kota Kone lenge dokona kando nyepala namba keta ateŋa lao kandokondali pyuo nyisinya lao piso soo leyami. Leyaminyi dokopa nambame Isaraele wambupi Isipi wambupi dupwana kanya dokona liti pyuo yuu doko iminjanyi pyambuyu. Pyambwapala nambame Isipi range dupwa ipwa kota dokome nyuo yambe pyapala ipwame nena leyo. Nambame Isipi wambu dupwa keta yulu piyu doko nakama soo nyilyaminyi. Nakama yuu muiyane dokona ee kana malu mee nembo paleyami.
JOS 24:8 Ipwa Jotane yuu neta pyakayo epenge dorena Amote wambu palenge dokona nakama nyuo lanyuo epeyo. Epeyo dokopa wambu dupwame nakama piyaminyipape nambame nakama nyisiyunusa wambu dupwa nyuo pyao anamasi minyiyami. Nakama pao kareyaminyipa nambame doloma pyao kokwa siyunusa nakamame nakambana yuu doko nyiyami.
JOS 24:9 Dee yuu Moape dokona kiŋi akali Beleke Sipona ikinyingi dokome nakama piya. Baame Biona ikinyingi Belame kareyamo dokona pii nembo piso soo nakama keta randa palena lakana leya.
JOS 24:10 Dopa piyamopape nambame Belameme pii leyamo doko sakame napuli lao suu piyu dokona baame nakama keta elyape pisiya. Dokona lao nambame nakama Beleke keta kingi raka lao nyiyu.
JOS 24:11 Dokopa nakama Jotane oko soo Jereko epeyami dokopa Jereko range akali dupwame nakama piyami. Dokopa Amote wambupi Perisi wambupi Kenane wambupi Iti wambupi Gukasi wambupi Ipi wambupi dee Jepusi wambupi dupwa peparaeme nakama yanda pyuo kareyaminyipape nambana porainya renge dokome nakama anamasi minyiyami.
JOS 24:12 Nakama epeyaminyi dokopa namba wambo pao wambu dupwa pakanyi andake pyambuyu. Dopa pyuo nakamame Amote kiŋi lama pyao raliyaminyisa piya. Nakamana yandape wua gelape dupwame mendali piyaminde daa.
JOS 24:13 Nambame yuu mendena nakamame mende yulu pyuo wara pii nange dokope dee taone nakamame waso pii nayami dupwape nyuo jiyu. Dokona lao epapu dakepa nakama yuu dokona karapala isa girapo olipipi dupwa nakamame wara pii nayami dupwana jingi lyuo nao palaminyi, Kamongome dopa letamo lao Josuame leya.
JOS 24:14 Dopa lapala Josua pii konda pyuo leya. Epapu dakepa Kamongo doko rape rape lao banya yulu rolae pyakamyuo yaki nyii nalapape. Nakamana rora ambasu dupwa yuu Mesopotemia dee yuu Isipi dokona bange wakale anatuŋu lao lakandeyami dupwa nyuo nembalapape. Nembapala nakamame Kamongona yulu iki pyakamilapape.
JOS 24:15 Dokona lao nakamame Kamongona yulu dokona pinya lao suu pyaa narami ramo nakamame mendena yulu pyakamirami lao suu piyami kande doko dakepa rombo palyuo lalapape. Nakamana rora ambasu dupwa yuu Mesopotemia dokona karo bange wakale anatuŋu lao lakandeyami dupwape panda yuu Amote karaminyi dokona wambunya anatu wakale dupwana lao rombo palyuo lalapape. Dopa piraminyipape nambamoo nambana ree palu dupwape Kamongona yulu pyakamirama, leya.
JOS 24:16 Leyamo dokopa wambu dupwame isingi lao, Kamongo Anatu yaki nyii napala anatu menge dupwana yulu pyakami narama ingilyamo, leyami.
JOS 24:17 Lapala namwana Kamongo Anatu dokome namwana rakange dupwape namwape yuu Isipi dokona kendemande yulu pyakamyuo kareyamano dokopa neta nyuo lanyuo epeya. Epeyamo dokopa yulu andake piyamo dupwa namwame kandeyama. Namwa panya peyamano dupwana akali rara wakale wakale dupwame namwa pyalana piyaminyipape Anatumi namwa nyuo retaro karo nyiso lanyuo peya.
JOS 24:18 Namwa epeyama dokopa namwana Kamongo Anatu dokome Amote wambu yuu dakena palenge dupwa pyao ralinyi nembakaya. Nembakayamo dokona lao namwa opetae Kamongona yulu pyakamirama. Baa namwana Anatu, leyami.
JOS 24:19 Leyaminyi dokopa Josuame wambu dupwa kando dopa lamaiyuo, Nakamame Kamongona yulu kapa pyakami narami ingilyamo rapisi. Baa Anatu poo pyasi wakasa dokome kyambo anatu dupwa lakanda narami lao suu pilyamo. Baame nakamana koo dupwa nyuo kame saka nara ingilyamo.
JOS 24:20 Dee mende nakamame Anatu yaki nyepala rara wakalena kyambo anatu lenge dupwana yulu pyakamyuo kararami ramo Anatu baame nakamana yanda pimwai ingyuo randa joo pira. Wamba baame nakama keta elyape ingyuo pisiyamopape epapu baame nakama pyao kokwa sera, leya.
JOS 24:21 Leyamo dokopa wambu dupwame Josua lamaiyuo, Doko daa. Namwame Kamongona yulu pyakamirama, leyami.
JOS 24:22 Leyami dokopa Josuame isingi lamaiyuo, Kamongona yulu pirama lao nakama range lalu lao lao karaminyi, leya. Leyamo dokopa nakamame dopa lao, Kinyi. Namwa rangeme lalu lao letamano, leyami.
JOS 24:23 Leyaminyipa Josuame lamaiyuo, Nakamame pii doo letaminyi dokona rara wakalena kyambo anatu nyisa nembapala Kamongo Isaraele wambunya Anatu doko iki yapalyepala mona kapu kyuo maipwape, leya.
JOS 24:24 Leyamo dokopa wambu dupwame Josua kando isingi lao, Namwana Kamongo Anatunya yulu pyakamyuo banya pii dupwa laramuli pyuo warombo soo kararama, leyami.
JOS 24:25 Leyaminyi dokona Josuame kana minyuo lalu lao lenge pii wambu dupwana lao pyao palyiya. Pyao palyapala yuu Sikeme dokona baame nakamame mawa piipi mana piipi minyuo pyuo kararami lao maiya.
JOS 24:26 Maipala Josuame mawa pii dupwa buku Anatunya lowa pii pyasi palenge dokona pyao reteya. Retapala kana andake mende nyepala Kamongona misi lenge panda dokona isa oke lenge kareyamo renge dokona reteya.
JOS 24:27 Retapala Josuame wambu dupwa lamaiyuo, Kamongome namwa pii langipyamo dupwa peparae kana dakeme sipyamosa namwame yuu peparae kana kandapala kana minyuo lalu lao lenge pii dokona lao suu pyarama. Suu pyapala kana dokome lasaka pili lao nakamame namwana Anatu baa kando kamba laa naramisa pira ingilyamo, leya.
JOS 24:28 Lapala dokopa Josuame wambu peparae dupwa nakama rangena yuu wakale wakale dupwana pena leyamopa peyami.
JOS 24:29 Enakana Josua Nanena ikinyingi baa Kamongona kendemande akali ee kana andete mendaki dee akalisa mendaki (110) nembo karapala kumuya.
JOS 24:30 Kumuyamo dokopa nakamame banya yuu angi dokona yuu Timinate Sera lenge dokona malu piyami. Yuu kyau kingi Gasi lenge dulurena yuu Eporaime kyau pyalya pyana pingi dokona malu piyami.
JOS 24:31 Josua baa lete kareyamopa Isaraele wambu dupwame Kamongona yulu pyakamyuo kareyami. Dopa pyuo karapala Josua kumapeyamo dokopa Kamongona yulu pyuoko kareyami. Karapala nakamana akali kyawa ingyuo karenge Kamongo banya wambu dupwana lao yulu andake pyakamiyamo dupwa rangeme kandeyaminyi dupwa lete kareyaminyi dokopa Kamongona yulu pyuo kareyamiko.
JOS 24:32 Isaraele wambu dupwa yuu Isipi yaki nyuo epeyaminyi dokopa Josepena kuli yeelyo minyuo epapala yuu Sikeme dokona malu piyami. Yuu malu piyaminyi doko akali Jekope baame Amo yuu Sikeme dokona rakange ingyuo kareyamo dokona ikinyingi dupwa kana kulingi andete mendaki (100) dokome ropo pyao nyiyamo doko Josepena para pyasi wambu dupwana ingyuo nyiyami.
JOS 24:33 Eliasa Eronena ikinyingi kumuyamo dokopa banya ikinyingi Pineyasena yuu Gipia dokona malu piyami. Yuu taone Gipia doko yuu Eporaime kyau kuki pingi singi dokona siya.
JDG 2:1 Kamongona aŋala doko yuu Gilikale piso pao yuu Bokimi dokona peya. Papala baame Isaraele wambu dupwa lamaiyuo, Nambame nakama nyepala yuu Isipi doko yaki nyuo nakama lanyuo pao yuu nambame kana minyuo kinyi lalu lao nakamana kauwange dupwa kando leyono dokona lanyuo epeyo. Dokona nambame nakama kando pii kana minyuo leyo dokona dee lili pii naro, leya.
JDG 2:2 Dee nakamame wambu yuu dakena palaminyi dupwamoo pipya kana minyuo pii laa narami. Nakamana mena pyao kiso anatu lao maingi doko pyao lalyinyi nembarami, langiyu. Langiyunu kande doko pii nayami. Pii napala yulu piyaminyi doko range soo kandalapa.
JDG 2:3 Dokona lao nambame nakama epapu langilyu. Nakama yuu dokona sukusa paraminyi dokopa nambame wambu dupwa neta ralinyi nembaka naro. Wambu dupwa nakamana yanda pimwai ingyarami. Wambu dupwana mee bange anatunya lao makande piraminyi dokopa nakamame koo piramisa pira, leya.
JDG 2:4 Aŋalame dopa leyamo dokopa Isaraele wambu peparae pii doko sepala nakama ee leyami.
JDG 2:5 Ee leyaminyi dokona nakamame yuu doko kingi Bokimi leyami. Nakamame yuu Bokimi dokona Kamongo lakando mena pyao kiso maiyami.
JDG 2:6 Josuame Isaraele wambu dupwa kapa pena lao nembeyamopa nakama akali dupwa mendaki mendaki lao pao nakamana yuu range dokona palengenyili pyuo pao kareyami.
JDG 2:7 Josua baa ee kana malu kareyamo dusipana Isaraele wambu dupwame Kamongo dokona lao suu pyao banya yulu piyami. Dee enakana Josua baa kumapeyamo dokopa akali lapo Kamongome Isaraele wambu keta yulu piyamo peparae soo giso rapu pyuo kareyami dokopa Isaraele wambumi kaeya nao Kamongona yulu pyuo kareyami.
JDG 2:8 Kamongona kendemande akali Josua baa akali Nane lenge dokona ikinyingi baa ee kana andete mendaki dee akalisa mendaki (110) karapala kumuya.
JDG 2:9 Dokopa banya yanenge nyepala yuu banya range dokona malu piyami. Yuu kyau Gasi lenge dokona dumarena pao yuu kyau malu singi Eporaime lenge dokona yuu mende Timinati Erese dokona malu piyami.
JDG 2:10 Dee banya rara yango nyuo doo baamoo kapa kapa ando laeyuo kareyaminyi opetae kumuyami. Dee dokona enakana wambu ando kareyaminyi dupwame Kamongo baa nyuo kame soo dee Kamongome yulu peparae Isaraele wambu dupwa keta piyamo doko see nayami.
JDG 2:11 Enakana Isaraele wambu dupwa Kamongona lenge kambu dokona yulu koo pyuo anatu angi daa kingi Bealo lenge dupwana yulu pyuo kareyami.
JDG 2:12 Karo nakama Kamongona kingi yaki nyiyami. Anatumi nakamana kauwange dupwa yuu Isipi yaki nyuo lanyuo epeyamo doko soo gisa nayami. Nakamame kanda soo wambu rara wakale role pyao paleyaminyi dupwana kyambo anatu kingi lakando kareyami. Nakamame mata punjinyi nembo mee kyambo anatu dupwana lao kingi leyaminyi dokopa Kamongo baa imbwaya.
JDG 2:13 Nakamame Kamongo Anatu kando dee kingi ketae pyambuo lakanda nao dokopa wambu wakalena kyambo anatu Bealo Asetatepa lenge dolapona lao yulu pyuo kareyami.
JDG 2:14 Dokopa Kamongo Anatumi Isaraele wambu dupwa kando ama wakasa imbwaya. Imbwuapala waa nyingi wambu dupwame nakama pyao bange nyerami, leya. Kamongo baame dee lao, Yanda pimwai dupwa palu awali lenge dupwame epo sukusa sukusa pipala Isaraele wambu dupwa pyao dee nakama iso karena leya. Dokopa Isaraele wambu dupwa nakama range kapa mendasa alyasa minyuo kararami ingya naya.
JDG 2:15 Yuu peparae nakama yanda pela peyaminyi dokopa Kamongome wamba leyamuli pyuo nakama kyawa yaki nyuo koo keta pumili lao yanda pimwaiya. Dopa piyamosa nakama ama randa andake nyuo kareyami.
JDG 2:16 Randa nyuo kareyaminyi dokopa enakana Anatumi Isaraele wambu dupwa yanda pimwai dupwa keta kiiramo nyeraŋa lao lita akali porai lapo maiya.
JDG 2:17 Dopa pyuo lita maiyamopape Isaraele wambu dupwame nakamana lita dupwa kando pii soo nyii nayami. Nakama Kamongo kame soo kaepala kyambo anatu dupwana lao iki kingi lakando kareyami. Nakamana rakange akali dupwa Kamongona mawa pii leyamo dupwa warombo soo pyuo kareyaminyipape wane nakamana enako mandeyami dupwa pii see nao kamba lao kareyami. Kareyaminyipape Kamongome lita akali maipapu pyuo kareya. Yuu gii dokopa akali doko Kamongome nyisapapu pyuo kareya.
JDG 2:18 Lita akali dupwa lete kareyaminyi yuu gii dokopa Kamongome yanda pimwai dupwame wambu dupwa pyao anamasi minya nana lapala nyiso karapa piya. Dopa pyuo dokopa wambu dupwa randa nyuo mona kendo pisipala Kamongo doko kando ee leyaminyisa dokona Kamongome nakama kondo sakame kumuo karapa piya.
JDG 2:19 Piyamopape lita akali dupwa kumuyaminyi dokopa Isaraele wambu nakama kapu kyuo wambarae yulu pingi dokona pipa piyami. Nakamana rora ambasupi koo piyami dokona nakamame koo dokona konda konda pyuo pao andakyapa piyami. Dopa pyuo nakamame kyambo anatu dupwana kingi ketae pyambuo dupwana yulu pyuo nakamana mona kana pokapala simbi simbi pyuo yulu koo dokona pyuo karapa piyami.
JDG 2:20 Dokopa Kamongome Isaraele wambu dupwa kando ama wakasa imbwaya. Imbwuapala baame lao, Pii lalu lao lenge dokona nakamana kauwange dupwa kando dopa pipwape lao leyono doko kokwa soo yaleyami, leya. Dee lao, Nambame leyonuli pyuo Isaraele wambumi rape rape lao soo nyii nayaminyi dokona
JDG 2:21 Josua kumuyamo dokopa akali yuu rara wakale range yaki nyiyamo dupwa dakena kararaminyipa nambame ralinyi neta nembakami naro, leya.
JDG 2:22 Dopa pyuo nambame nakamana kauwange dupwa lamaiyunuli pyuo moko minyuo piyami doko waiso namba larono doko moko minyuo piramipi lao kandaro, leya.
JDG 2:23 Dokona Kamongo dokome akali rara wakale dupwa yuu dokona mee karena leya. Lapala baame nakama waiya lao ralinyi nembope dee Josuame isinya lao kingi rakana palyuope pii naya.
JDG 4:1 Akali Iyuti baa kumapeyamo dokopa Isaraele wambu dupwame Kamongona lenge kambu dokona kambako yulu koo ama malu mee piyami.
JDG 4:2 Dokopa Kamongome nakama kyawa yaki nyiyamopa akali Jepene lenge baa kiŋi yulu pyuo yuu Kenane lenge yuu taone andake Aso lenge dokona rapu pingi dokome Isaraele wambu pyao anamasi minyiya. Jepene banya yanda singi ami mende mupwa ingyuo rapu pingi akali kingi Sisira lenge baa yuu Arosete Akoimi lenge dokona paleya.
JDG 4:3 Akali Jepene banya mena oseme ipyuo penge uliuli andete mange mendaki (900) siya. Siyamopa baame Isaraele wambu dupwa kopetame randa andake maiyuo ee kana akalisa lama iso kareya. Kareyamo dokopa Isaraele wambu dupwame ee andake lao Kamongome nakama nyisinya leyami.
JDG 4:4 Depora baa poropeta enda akali Lapitote lenge dokona etenge. Enda baa peteyamo yuu gii dokopa Isaraele wambu dupwame pii lapo piso soo kareyaminyipa baame Anatunya pii isingi yano pyao lamaiyuo peteya.
JDG 4:5 Piso yuu Orama dee yuu Betelepa lenge kanya dokona yuu kyau malu singi Eporaime lenge dokona bona isa dopale mende kareyamo dokona isa renge dokona isa peteya. Dokona Isaraele wambu dupwa epapala enda baame yapalya yapana pyuo pii angi yano pyao laramo doko sela epeyami.
JDG 4:6 Dokopa enda baame akali Bereke lenge doko epena lao wai nembeya. Bereke baa Apinome banya ikinyingi baa yuu Napatalai lenge taone andake Ketese lenge dokona kareya. Bereke epeyamopa baa lamaiyuo, Kamongo Isaraele wambunya Anatu dokome dopa pipi lao langipya. Dee embame Napatalai rarape Sepyulane rarape dolapona akali taosande akalisa (10,000) dupwa nyuo yuu kyau Tapo dokona lanyuo pare, langipya, leya.
JDG 4:7 Nambame Sisira baa akali Jepene lenge dokona yanda singi ami akali mupwa ingyuo karenge doko lanyuo eparo. Eparonopa embapa ipwa Kisone dokona yanda pirambi. Akali Sisira banya mena oseme ipyuo papingi uliuli dupwape yanda singi dupwape reto kararamopape nambame emba pyao anamasi minyingi renge jeronopa baa anamasi minyare, langipya, leya Deporame.
JDG 4:8 Dokopa Bereke baame enda Depora lamaiyuo leya. Emba namba role pyao epare ramo doko kapa paro. Dee emba daa lare ramo dokopa namba opetae paa naroko, leya.
JDG 4:9 Enda baame isingi leya. Kapa letene. Namba role pyao paramba. Role pyao parambano dokopa Anatumi enda doko keta yulu andake mairamopa enda dokome akali Sisira pyao anamasi minyara. Minyaramo dokona wambumi embame pyapiŋi lao kingi ketae pyambuo laa narami, leya. Lapala dokopa enda Depora baa sipurapala Bereke baapa role pyao yuu Ketese dokona peyambi.
JDG 4:10 Dokopa Bereke baame Sepyulane rarape dee Napatalai rarape peparae kyakale lao yuu Ketese dokona epena leya. Dokopa akali taosande akalisa (10,000) baame leyamuli pyuo epeyaminyipa enda Depora baa opetae role pyao peyami.
JDG 4:11 Dokopa akali Ipua lenge yuu Kene range doko banya komau anda yuu Ketese repeta isa oke lenge mende karenge yuu Sananimi lenge dokona piya. Akali yuu Kene range dupwa yaki nyuo kakondo pao yuu mendena peya. Mosese banya imwange Opape lenge dokona rara wai kiso karenge rara dupwa Kene lenge.
JDG 4:12 Dokopa mendeme Sisira lamaiyuo, Bereke akali Apinome banya ikinyingi baa yuu kyau Tapo lenge dokona pulyuo pupya, lamaiya.
JDG 4:13 Leyamo dokopa banya akali dupwa peparaepe mena oseme ipyuo penge uliuli andete mange mendaki (900) dupwape epena lao kyakale leya. Nakama epeyaminyi dokopa yuu Arosete Akoimi yaki nyuo ipwa Kisone mare dokona nembeya.
JDG 4:14 Dokopa dee Depora baame akali Bereke lamaiyuo leya. Mee pao pilinyili pyuo pupi. Epapu yuu gii Kamongome Sisira baa pyao ralinyi nembalase lao yuu gii jilyamo. Jepala Kamongome emba dopa pii lao kata lasaka pyuo karamo, leya. Dokopa Bereke baa yuu kyau Tapo lenge doko yaki nyuo banya akali taosande akalisa (10,000) dupwa pipya lupyuo peyami.
JDG 4:15 Dokopa akali Bereke banya yanda singi akali dupwa pipya epeyaminyipa Kamongo mende piyamo dokona Sisiramoo banya yanda singi dupwape dee banya mena oseme ipyuo penge uliuli dupwape minyuo pyasapala mona nembo apa piramape lao see nayami. Dokopa Sisira baa mena oseme ipyuo penge uliuli dokona peteyamo doko yaki nyepala baa ralo peya.
JDG 4:16 Sisira baa ralo peyamo dokopa banya ami peparae yuu Arosete Akoimi dokona panya ralo peyami. Peyaminyi dokopa Berekemoo banya yanda singi dupwapeme peteta papala mende nyisa para kando lao pyao malu palyiyami.
JDG 4:17 Sisira baa ralo pako pao dokopa enda Jaele lenge Kene rara akali Ipuana etenge banya komau anda dokona pao kando nyiya. Nambana kiŋi Jepene yuu Aso karenge doko akali Ipua manda rao role pyao palyambinyi lao suu pyapala Sisira baa dokona peya.
JDG 4:18 Peyamo dokopa enda Jaele baame akali Sisira baa epena lapala lamaiyuo, Emba nambana komau anda dakena andakare epena leya. Lapala dokopa, Emba paka napipi, lamaiya. Dokopa akali baa komau anda dokona andakare peyamo dokopa anda donge dokona komau porai lapome nee pipala yalu pyuo petena leya.
JDG 4:19 Dokopa akali dokome enda baa lamaiyuo, Embame namba ipwa nano pilyamo nalana kamuo jinya leya. Dokopa enda dokome menana yanenge ipwa pee yale wasisi dokona susu ipwange peteyamo doko nyepala nena lao nyuo maiya. Maipala napeyamo dokopa Sisira dee kamba yalu piya.
JDG 4:20 Enakana akali baame enda doko kando lamaiya. Emba anda kambu repeta roya kararenepa wambu mendeme emba kando wambu mende dae ipyape leyami kande doko daaŋa lape, leya.
JDG 4:21 Lapala Sisira baa maka piyasa baa luu andake paleya. Baa paleyamo dokona enda Jaele dokome ama mende dee isa wangya mendepe nyepala minyuo elya kalo peya. Papala isa dokome akalinya rambusa dokona suu lapala ama dokome pyao kareyamosa kolapala isa pinjingi paki yuu dokona yalyiya. Dopa piyamosa baa kumuya.
JDG 4:22 Enakana akali Bereke baa Sisira mendasa karara lao koto epeya. Dokopa enda Jaele baa kama papala akali baa kando pii lamaiyuo, Akali kotelene doko lasaka pirowale. Emba dae ipu, leya. Enda baame Bereke nyuo lanyuo andakare peya. Papala komau anda dokona isa wangya karenge dokome banya kyawa doko pyao rambuki nyepala kumuyamo doko lasaka piya.
JDG 4:23 Yuu gii dokopa Anatumi Isaraele wambunya lao akali Jepene baa yuu Kenane wambunya kiŋi doko anamasi minyuo nyuo isa palyiya.
JDG 4:24 Dokopa Isaraele wambu dupwame Jepene baa kando rondanyi pyuo randa maiyuo yanda pimwaiyuo karo pao baa pyao kokwa soo nembalu nembo nembeyami.
JDG 5:1 Yuu gii dokopa enda Deporapa akali Bereke Apinomena ikinyingi dokopame kenane dake piyambi.
JDG 5:2 Isaraele wambu dupwana lita dupwame angingyuo yanda pelana suu piyami. Wambu dupwa rae maiyuo mee yanda pela peyami. Dokona lao Kamongo doko lakandalapape.
JDG 5:3 Kiŋi dupwa selapape. Nakama kamongo dupwa warombo soo karalapape. Isaraele wambunya Anatu Kamongo doko kando namba kenane pyao kurulu rambyalupi lao piru.
JDG 5:4 Kamongo, emba yuu Siya dokona yuu kyau singi dupwa dee yuu Itome yaki nyepala epene dokopa yuusili minyapala yake dokona piso apu epeya. Kinyi, kopa dokona piso ipwa kulimbwanyi peyo epeya.
JDG 5:5 Isaraele wambunya Kamongo Anatunya lenge kambu dokonape dee yuu kyau Sainai dokona Kamongona lenge kambu dokonape piso yuu kyau dupwa yuusili minyili lao pyuku pyuku leya.
JDG 5:6 Dokopa akali lapo mena kamele maki maki pyuo lanyuo mata dupwana bange keyange reto kana nyuo bisinase pyuo papingi dupwa akali Samika Anatinya ikinyingi ando kareyamo yuu gii dokopape dee enda Jaele ando kareyamo yuu gii dokopape yuu dokona kata sukusa dopa pyuo paa nayami. Dee wambu lapo kata londe panya peyami dupwa nemba nemba kata kuki dupwana iki peyami.
JDG 5:7 Isaraele wambu dupwame nakamana taone dupwa kame soo yaki nyiyami. Depora, emba ene epapa naenepa mende pii nao mee kareyami. Emba Isaraele wambunya endangi dopale ingyuo epee.
JDG 5:8 Enakana Isaraele wambu dupwa mee bange anatuŋu lenge enenge dupwa rombo palyuo nyiyami dokopa yuu dokona yanda sipureya. Dokopa Isaraele yanda singi akali taosande akalisa kisima (40,000) dupwana mendalipi konambe kakupi minya nayami.
JDG 5:9 Nambana mona doko Isaraele wambunya yanda singi dupwana akali iso karenge dupwa keta silyamo. Dee wambu lapo mee rae maiyuo yanda pela peyaminyi dupwana keta silyamoko. Kamongo doko lakandalapape.
JDG 5:10 Wambu mena donge kewa lengena mata dokona isa petenge bange retapala petaminyi dupwape dee nakama mee kata papingipi pii dake polo lamailapape.
JDG 5:11 Selapa. Wambu pii malu lao ipwa kamuo nyingi yuwale repeta karaminyi dupwame Kamongome anamasi minyiyamo dupwanape dee Isaraele wambu dupwame wini piyaminyi dupwana lao lao karaminyi. Dokopa Kamongona wambu dupwa nakamana yuu taone andake karenge dupwa yaki nyepala nakama lano epeyami.
JDG 5:12 Dokopa lao, Depora emba wambo puu. Kenane mende pyao wambo pupi. Akali Bereke Apinomena ikinyingi wambo pao embena karapusi wambu dupwa lanyuo puu, leyami.
JDG 5:13 Dokopa enakana akali yaki nyii nange dupwa nakamana lita dupwa keta epeyami. Dokopa Kamongona wambu dupwa baa keta epo rapa rapa pipala yanda pela epeyami.
JDG 5:14 Yuu Eporaime wambu dupwa nakamana yuu dokona piso akali Benjamenena rara wambu dupwana matarena epo yuu anda lama lama dokona epo sukusa pyaka siyami dokopa yanda singi isingi akali dupwa yuu Maki piso epeyami. Dee akali mupwa dupwa yuu Sepyulane dokona piso epo piyami.
JDG 5:15 Isakana rara dokona akali mupwa dupwa poropeta enda Depora role pyao epeyami. Kinyi, Isakana rara dee Bereke opetaeko epeya. Dokopa nakama Bereke moko minyuo yuu pau lama lama dokona peyami. Dopa piyamopape Urupenena rara dupwa lili pyuo pingisi palipala nakama parama panda paa narama lao see nayami.
JDG 5:16 Akipamo nakama mena sipisipi dupwa pipya karo kaeyamisi? Nakama kareyami doko mena sipisipi rapu pingi akali dupwame mena sipisipi kee larami doko selana kareyamisi? Waa. Urupenena rara dupwa lili pipala pingisi paleya. Dokona nakama parama panda paa narama lao see nayami.
JDG 5:17 Dokona Gate rara dupwa ipwa Jotane neta pyakalyingi dorena kareyami. Dokopa Danena rara dupwa sipu dupwana yulu pyuo karo kaeyami. Dokopa Asana rara dupwa ipwa kota kipwa kipwa wangu dupwana kareyami. Doko nakama ipwa kee kama dupwana mee kareyami.
JDG 5:18 Dopa piyaminyipape Sepyulane wambupi dee Napatalai wambupi dupwa nakama kumarami dokona suu pyaa napala nakama range kumuo maiyuo yanda pingi yuu dokona yanda pyuo kareyami.
JDG 5:19 Dokopa yuu Tanake dokona ipwa Meketo repeta dokona kiŋi dupwa epapala yanda piyami. Yuu Kenane kiŋi dupwame yanda piyaminyipape nakama kana kulingi mendepe nyuo lanyuo paa nayami.
JDG 5:20 Bui dupwa yake dokona pyakando pyuo oko soo peyami. Dopa pyuo peyaminyi dokopa nakama Sisirapa yanda pimwai ingyuo piyami.
JDG 5:21 Ipwa Kisone lenge doko palipala nakama peparae soo peya. Dokona namba porai ingyuo karo kimbu pyao piso paro.
JDG 5:22 Dokopa mena ose dupwa poraiyuo makando nakamana kimbu dupwame yuu pyao inju epeyami.
JDG 5:23 Kamongona aŋala dokome lao, Yuu Metose keta randa maipwape. Dee yuu dokona palaminyi dupwa keta randa maipwape. Nakama yanda singi dopale ingyuo epo Kamongo nyiso banya lao yanda pela epa nayami.
JDG 5:24 Dokona enda Jaele lenge Kene rara akali Ipua lenge dokona etenge baa embone piso petenge. Enda wakale komau anda dupwana petenge dupwa embone piso pisiminyipape enda Jaele baa kamame wakasa embone petenge.
JDG 5:25 Dokopa akali Sisirame ipwa naro jinya lao piso siyamopape enda dokome susu ipwange maiya. Pere ama keyange mendena susu ipwange angi retapala minyuo epo maiya.
JDG 5:26 Maipala enda baame komau anda puu anjingi isa pirimi dopale mende kingi pakirena minyiya. Dee kingi paki dokome yulu pingi akali mendena ama doko nyuo minyiya. Dopa pipala minyuo pao akali Sisira pyao banya kyawa kuli doko poro leya. Poro lapala enamba dokona arekyo piya.
JDG 5:27 Dokopa akali doko ruki maki lao Jaelena kimbu siyamo dokona pao paleya. Palipala akali baa kumuya.
JDG 5:28 Dokopa Sisirana endangi dokome windowa kata dokona karo ikinyingi doko anda epelyape lao mee kandaro kareya. Karo dokopa enda baa range piso soo lao, Akipamo akali dokona mena osena uliuli ipyuo penge doko enakana ingyuo epelyase? Dee akipamo banya mena ose dupwa mona palyuo kamba kapu kyuo epelyamisi? leya.
JDG 5:29 Dokopa banya soo gisingi enda dupwame isingi lamaiyuo,
JDG 5:30 Nakama bange koto nyuo mokwa soo lili pyuo nyilyaminyi ingilyamo. Doko wanake mapwae nyuo yanda singi dupwa lama larapu nyilyaminyi. Dee komau keyange kamonganyi nembenge dupwa akali Sisira dokona lao nyakamilyaminyi. Dee mola suku pisi ama keyange dupwa enda kuini dokona mangena sera lao nyakamilyaminyi, leya. Leyamo doko sepala Sisirana endangi dokome poraiyuo suu pyao peteya.
JDG 5:31 O Kamongo, embena nyisu petenge dupwa dopale ingyuo kumunya. Dopa piraminyipape embena puu minyingi dupwa neta potemo epo rao karenge doko suu pyao karena. Dee yuu palu kareyami dokona ee kana akalisa kisima dusipana manda rengepe mona kyuu lao singi rengepe siya.
JDG 6:1 Isaraele wambu dupwame dee kamba Kamongo kando koo piyami. Piyaminyisa Kamongo dokome ee kana yanda ipingi dusipana Mitiane wambu dupwame nakama iso rapu pyuo karena kaeya.
JDG 6:2 Dokopa Mitiane wambu dupwana porainya renge dokome Isaraele wambunya porainya renge nyuo isa palyiya. Dokona lao Isaraele wambu kananda dupwanape dee yuu kyau dupwana laponape yalu piyami.
JDG 6:3 Yuu lapo Isaraele wambu dupwame ee wai dupwa randa leyaminyi andeyamo dokopa Mitiane rara dupwape Amaleke rara dupwape dee yuu muiyane dokona wambu palenge rara dupwamepe role pyao epo Isaraele wambu dupwa yanda pyuo pyapa piyami.
JDG 6:4 Nakama yuu dokona komau anda pyuo palipala yuu donorena nanesale ingyuo yuu Gasa pao ee nengepe dupwa peparae pyao nembapa piyami. Nakama mena bulamakaope dee mena sipisipi mena dongepe dupwa nyepala Isaraele dupwa keta bange mende reto palena lao yaki nyii nayami.
JDG 6:5 Nakama menape dee komau andape dupwa minyuo epo aimbu malu mee epenge dopale ingyuo epeyami. Dokopa nakamape dee nakamana mena kamele dupwa peparae mendeme kapa yaka lalana saka naya. Doko nakama epapala yuu doko pyao kokwa soo nembo otalu oto oteyami.
JDG 6:6 Dokopa Isaraele wambu dupwame mende nakamba range nyiso wambu dupwa isingi pyarami ingya naya.
JDG 6:7 Dokopa Mitiane wambu dupwame nakama randa maiyuo kareyaminyisa Isaraele wambu dupwame Kamongo kando nyisinya lao kee lao piso siyami.
JDG 6:8 Piso siyaminyipa baame poropeta akali mende nakama keta peyamo dokome Isaraele wambunya Kamongo Anatu dokona wai pii doko minyuo epeya. Kamongona wai pii dapa lao, Nambame nakama yuu Isipi dokona kendemande ingyuo kareyaminyipa kiiramo nyuo minyuo epeyo.
JDG 6:9 Nambame nakama Isipi wambu dupwana kingi rekya lao nyiyu. Dee yuu dakena wambu dupwame nakamba piyaminyi dokopa kyawa lete nyuo piyu. Nakama wambo epeyaminyi dokopa doloma pyao ralinyi nembeyo. Ralinyi nembapala nambame nakamana yuu doko nyepala jiyu.
JDG 6:10 Nambame nakamba langyuo, Namba nakamana Kamongo Anatu dokoŋo. Yuu nakama epapu palaminyi dokona Amote wambunya mee bange kingimi wasisi anatuŋu lao lakandenge dupwa lakanda nalapape, langiyu. Langiyunupape nakamame nambana pii see nayami, leya.
JDG 6:11 Dokopa Kamongona aŋala mende yuu kingi Opora lenge dokona epeya. Epapala akali Apisasena rara dokona akali Joase lengena yuu dokona epo banya isa oke renge dokona peteya. Mitiane akali dupwame kanda naramiŋi lao Joasena ikinyingi Gitione doko waene kingingi dokona witi jingi dupwa pyao inju baa yalu pyuo kareya.
JDG 6:12 Kareyamo dokona Kamongona aŋala doko papala baa dopa lamaiyuo lao, Emba akali paka nao dee porai wakasa ingyuo karenge. Kamongo emba keta karamo, leya.
JDG 6:13 Dokopa Gitioneme baa lamaiyuo, Namba pii mende piso sipuli leto. Kamongo doko namwa keta role pyao karara ramo doko akipamo yulu dupwa namwa keta pilyase? Yulu ama keyange wakasa Kamongo dokome pingi dupwa apa pilyase? Baame yuu Isipi dokona piso nyuo lanyuo epeyamo doko namwana rakane dupwame dopa pyuo epeyama lao langiyami. Kamongo dokome namwa kame soo kaepala Mitiane wambu dupwa keta yaki nyuo pyambuya.
JDG 6:14 Dokopa Kamongo dokome baa isingi lamaiyuo, Embena porainya renge andake doko paleta papala Isaraele wambu dupwa Mitiane wambu dupwa kiiramo nyela puu. Namba rangeme emba puu lao langilyu, leya.
JDG 6:15 Dokopa Gitione isingi lao, Dopa piramopape nambame apa pyuo Isaraele kiiramo lete nyerose? Nambana rara kuki Manasana rara andake dokona petamano doko kamame porai daa. Dee nambana ree palu dokona namba akali kamame numi daa. Namba mee akali kuki ingyuo karenge, leya.
JDG 6:16 Leyamo dokopa Kamongo dokome isingi lamaiyuo, Nambame emba nyisaroŋo dokopa embame kapa piri. Embame akali mendaki pyao injinyi nembenge doko suu pyao Mitiane wambu dupwa pyao injinyi nembare, leya.
JDG 6:17 Leyamo dokopa Gitioneme isingi lao, Emba namba kando rae mairi ramo doko emba Kamongoŋo lao namba yulu andake mende pyuo lasaka pii.
JDG 6:18 Namba nenge lapo minyuo epo jerowaleŋe emba yaki nyuo paa napipi, leya. Leyamo dokopa aŋala dokome isingi lao, Namba dakena kararonopa emba kapu kyuo epare, leya.
JDG 6:19 Dokona lao Gitione baa banya anda papala mena meme yakane mende pyao kiso dee nenge palawa sikyali kilokerame akalisa dopale nyepala isi pyambwa nao borete waso kisiya. Kisapala mena angi doko nyuu pisiki minyasi dokona palyuo mena ipwange supu doko pee sosepyane dokona kyano pipala minyiya. Minyuo Kamongona aŋala doko isa oke renge dokona peteyamo dokona epapala nenge dupwa maiya.
JDG 6:20 Dokopa aŋala dokome baa lamaiyuo, Mena dokope borete dupwape kana dakena retapala mena ipwange supu dokome ketae kulimbunya leya. Leyamuli pyuo Gitioneme piya.
JDG 6:21 Dokopa Kamongona aŋala dokome kingi pyasinju lapala banya pangali minyiyamo pinjingi dokome nenge dupwana warendeya. Warendeyamo dokopa isare kana dokona piso epapala menape boretepe dupwa reya. Dokopa aŋala doko baa pana naya.
JDG 6:22 Gitione doko Kamongona aŋala namba kandapulyamo lao suu pyapala baame yamarangyuo pakame kumuo lao, Kamongo Mupwa Andake Wakasa. Nambame embena aŋala dokona lenge kambu rolae kandapu. Dokona lao namba keta aki mende pyakarese? leya.
JDG 6:23 Dopa leyamopape Kamongo dokome baa isingi lamaiyuo, Manda rao mona kyuu lao seramopa emba kuma nareŋe dokona lao paka napipi, leya.
JDG 6:24 Dokopa Gitioneme bange kiso maingi kana pyare lao Kamongona lao wasapala baame kingi lao, Kamongo doko mona kyuu lao singi, leya. Doko akali Apiasena rara dokona yuu kingi Opora lenge dokona bange kiso maingi kana pyare doko mee perao karamo.
JDG 6:25 Yuu gii kukwa dokopa Kamongo dokome Gitione lamaiyuo, Embena rakanena mena bulamakao kali mende nyuo dee bulamakao kali wakale ee kana yanda ipingi pao otasi doko nyuo pipala embena rakanena kana pyare lasi doko anatu angi daa Bealo lenge dokona lao singi doko lalyuo nembape. Dee enda kingi Asera lenge anatuŋu lao lakandenge dokona lao suu pyao isa pote repeta perao karamo doko pyakepo nembape.
JDG 6:26 Yuu mundu ketae dakena embena Kamongo Anatu dokona lao kana pyare lasi keyange mende wasape. Wasapala isa pote doko kando enda kingi Asera lenge anatuŋu lao lakandenge pyakepapinyi doko isa ingyuo kisapala mena bulamakao kali lapo doko nyuo kana pyare lasi dokona pyao yangape.
JDG 6:27 Dokona lao Gitioneme banya kendemande akali akalisa nyiya. Nyepala Kamongo baame pinya lao lamaiyamuli pyuo piya. Baame wambu yuu taone dokona palenge dupwape dee banya ree palu wambu dupwape kando pakapala korakama pii naya. Dokona lao baame kukwa dokopa piya.
JDG 6:28 Yuu gii yangama dokopa wambu yuu taonena palenge dupwa wamba kukwa sipurapala nakamame anatu angi daa kingi Bealo lenge dokona mena pyao kiso maingi kane pyare lasi dokope dee isa pote kando enda kingi Asera lenge anatuŋu lao lakandenge pyakepasi siyamo kandeyami. Dee mena bulamakao kali lapo ingyuo doko kana pyare lasi enenge piyamo dokona yangasi siyamo doko kandeyami.
JDG 6:29 Dokopa nakama mendeme mende piso soo lao, Yulu dake apimi pipyase? leyami. Lapala nakama pii malu lao mendali pisalya pisana pipala akali Gitione Joasena ikinyingi dokome pipyalyamo lao kando nyiyami.
JDG 6:30 Kando nyepala nakamame Joase lamaiyuo, Embena ikinyi dokome anatu angi daa Bealo lenge dokona kana pyare lasi doko lalyuo koo inginyi nembo dee enda kingi Asera lenge anatuŋu lao lakandenge dokona isa pote pyakepanyi nembapyamo dokome namwame baa pyao kumakamanale. Dokona lao embame baa dae minyuo ipu, leyami.
JDG 6:31 Joaseme wambu banya lenge kambu dokona mumu lao kareyaminyi dupwa kando lao, Nakama anatu angi daa Bealo lenge doko nyisamwali yaka lao suu pyao karo pii poraiyuo letamisi? Mendeme banya lao kingi lara ramo doko yuu yangapa naramopa baa pyao kumakarami. Kana pyare lasi lalyuo isa pupya doko banya doko doŋo. Dokona lao Bealo baa anatu angi ramo baa rangeme nyiso kyawa lete nyinya leya.
JDG 6:32 Doko Joaseme lao, Anatu angi daa kingi Bealo dokona kana pyare lasi doko lalyuo isa pupya dokona baa rangeme kyawa lete nyinya leyamo dokona Gitione banya kingi alowa pipala Jerembealo leyami.
JDG 6:33 Dokopa Mitiane wambu peparaepe Amaleke wambu dupwape dee yuu muiyane dokona wambu palenge dupwape peparae nyuo malu palyapala ipwa Jotane doko yalo papala yuu lama lama kingi Jeserele lenge dokona komau anda pyuo paleyami.
JDG 6:34 Kamongona imambu dokome Gitione baa keta maralyiyamo dokopa baame bikuli poo lao Apisana rara dupwa baa moko minyuo epena leya.
JDG 6:35 Dee baame yuu Manasa andake dokona wangu paki pakipi laparaena pii wai nembo wambu dupwa kee lapala baa moko minyuo epena lena leya. Lapala baame dee akali Asana rarape Sepyulanena rarape dee Napatalaina rarape dupwa wai nembeyamosa nakama baa keta pakalana kimbu soo epeyami.
JDG 6:36 Dokopa Gitioneme Anatu kando lao, Embame lao dokopa embame namba keta Isaraele wambu dupwa nyiso kyawa lete nyero lee kande doko, leya.
JDG 6:37 Kapaŋa. Namwa witi pyao injingi panda dokona nambame mena sipisipinya imanji lapo yuu dokona retelyo. Doko wamba yangama dokopa pipyae dupwa mena sipisipinya imanji dokona pisipala yuu dokona pisa nara ramo doko embame namba keta Isaraele wambu dupwa kyawa lete nyere lyamo lao sero, leya.
JDG 6:38 Dokopa leyamuli pyuo piya. Doko yangama dokopa Gitione baa palu sipurapala baame mena sipisipinya imanji doko kingiya dokopa disi mende ipwange dokome soo simbwaya.
JDG 6:39 Dokopa Gitioneme Anatu kando lao, Nambapa imbwa napipi. Yuu mendaki dee kamba pii mende larole. Doko dee kamba yuu mendaki mena sipisipinya imanji dokome makande mende piruli. Yuu gii dakepa mena sipisipinya imanji doko oo lapala yuu doko rombe lena laa, leya.
JDG 6:40 Yuu gii dokona kukwa dokopa Gitioneme dopa pyakana lao leyamuli pyuo Anatumi piya. Yangama dokopa mena sipisipinya imanji doko oo lasi siyamopape yuu doko pipyaeme rombe lao siya.
JDG 7:1 Yuu gii mendepa Gitionemoo banya akali peparae dupwa pipya wamba kukwa sipurapala ipwa guu Arote lenge dokona wangu dorena komau anda pyuo paleyami. Dee Mitiane wambu dupwa nakama paleyami dokona dumurena ingyuo yuu lama lama mendena yuu kyau Mora repeta komau anda pyuo paleyami.
JDG 7:2 Dokopa Kamongo dokome Gitione lamaiyuo lao, Akali embame retaro karene dupwa nambame kandapu dokopa ama malu ingilyamo. Dokona nambame Mitiane wambu pipya pyao wini pela paase lao kapa nyisaro ingya nalyamo. Nakamame nakama malu dokona mee wini pimwa lao suu pyapala nambame angi nyisapi lao suu pyaa narami.
JDG 7:3 Dokona embame wambu dupwa lamaiyuo, Nakama lapo pakayami kande dupwa anda kapu kyuo paraminyipa namwa lapo yuu kyau Giliate dakena pisimanale lena leya. Leyamo dokopa lao akali ama malu mee taosande akalisa lama ipisu lama (22,000) anda peyaminyipape akali taosande akalisa (10,000) piso kaeyami.
JDG 7:4 Dokopa Kamongome Gitione lamaiyuo, Emba kamame akali soo kaeyoko retaro kareneŋe nakama lanyuo ipwa mare dokona pupi. Dokopa nambame dokona lili pyakaro. Dokopa nambame akali mende embapa role parambi laro ramo doko kapa baa para. Dee akali mende embapa paa narambi laro ramo doko baa paa narako, leya.
JDG 7:5 Leyamo dokopa Gitioneme akali dupwa lanyuo ipwa dokona peya. Peyamo dokopa Kamongo dokome baa lamaiyuo, Akali lapo suwa ingyuo ipwa kekengeme nyuo naraminyi dupwa yapalyuo nyepe. Dee akali lapo wapambu pii pyaro piso ipwa naraminyi dupwa yapalyuo wakale ingyuo nyepe.
JDG 7:6 Akali andete remame (300) ipwa kingi kapena ranju nyuo neyami dee menge dupwa wapambu pii pyaro piso neyami.
JDG 7:7 Dokopa Kamongo dokome Gitione lamaiyuo, Akali andete remame (300) ipwa kingi kapena reto ranju nyuo naminyi dusipa pipya nambame emba kyawa lete nyuo Mitiane wambu pyalase lao wini pingi renge jeroŋo dokona akali menge dupwa anda pena lao lamaipi, leya.
JDG 7:8 Lapala Gitione baame warame wasisi ipwa penge dupwape bikuli dupwape yapo nyepala akali andete rema (300) dusipa iki mee karena lapala wakale dupwa peparae anda pena leya. Dokopa Isaraele wambu paleyaminyi isa lunga lunga yuu lama lama dokona Mitiane wambu komau anda pyuo paleyami.
JDG 7:9 Yuu gii kukwa dokopa Kamongome Gitione kando lamaiyuo, Nakama sipurapala Mitiane wambu komau anda pyuo palaminyi dupwa pyala pupwape. Dokona lao nakamame kapa wini pirami lao nambame nyisaro, leya.
JDG 7:10 Dopa piraminyipape emba pyala pana pakare ramo doko embena kendemande akali Pura dokopa embapa Mitiane wambu anda pyuo palaminyi dokona pupwape.
JDG 7:11 Dokopa emba pii laraminyi dupwa sepala poraiyaramopa kambu minyuo pyare, leya. Dokona lao Gitionepa banya kendemande akali Purapa nakambana nyisu petenge dupwa paleyaminyi dokona wangu dokona peyambi.
JDG 7:12 Dokopa Mitiane wambupi Amaleke wambupi dee yuu muiyanena akali rara lapo dupwape aimbu ama malu wakasa dopale ingyuo pau dokona muu rale lao raeyami. Dee nakamana mena kamele ama malu wakasa ipwa kota kee kama wangunya singi dopale ingyuo kareyami.
JDG 7:13 Dokopa Gitione repeta epo pyaka sepeyamo dokopa akali mende banya puu minyingi mende kombeya lamaiyuo paleyamo siya. Akali dokome lao, Namba kombeya pipu doko nenge borete balimi wasisi dokome namwana komau anda karaminyi dokona bele bele epapala komau anda mende pyapya. Dokopa komau anda doko boo lapala rambi kuiyuo yuu dokona isa sipya, leya.
JDG 7:14 Dokopa banya puu minyingi dokome isingi lao, Doko mende lao pii napya. Isaraele akali Gitione baa akali Joasena ikinyingi dokona wua gela dokoŋo, leya. Lapala Anatumi namwana yanda singipi peparae dee Mitiane wambupi pipya nyuo isa palyuo baa wini pingi renge maipya, leya.
JDG 7:15 Gitioneme akali dokona kombeya doko soo dee dokona renge doko soo pipala baa wapambu pii pyaro piso Anatu lakandeya. Dopa pipale baa enakana Isaraele wambu paleyami dokona kamba papala lao, Sipuralapape. Kamongo dokome Mitiane yanda singi dupwa isa palyuo nakama wini pingi renge jilyamo, leya.
JDG 7:16 Baame banya akali andete rema (300) dusipa lili pyuo lane rema ingyuo wasapala akali mendaki mendaki lao bikuli maiyuo dee warame wasisi ipwa penge dokona kendapuli yama koko palena lapala maiyuo piya.
JDG 7:17 Dopa pipala baame nakama lamaiyuo, Namba wambu palaminyi anda pinjingi wangu dusa paro dokopa namba kandaro karapala nambame piyu kande dopa pyuo pipwape, leya.
JDG 7:18 Nambape dee nambana lane dupwape namwana bikuli poo leyama kande dokopa Mitiane wambu pyuo paleyaminyi dokona awali lao pao nakamana bikuli poo lao pii poraiyuo lao lao, Namwa Kamongona dee namwa Gitionena lao lalapape, leya.
JDG 7:19 Yuu gii doko repeta andasukulya ingyala epeyamopa yanda singi kambu iso kareyaminyi dupwa alowa pyuo wakale karala epapeyaminyipa Gitioneme banya akali andete mendaki (100) dusipa komau anda paleyaminyi wangu dokona epo kando nyiyami. Kando nyepala nakamana bikuli dupwa poo lao dee warame wasisi ipwa penge minyuo kareyaminyi dupwa pyao yuunya piso poro lao piyami.
JDG 7:20 Dokopa dee lane lama dolapo dopako piyami. Pipala nakama peparaeme kendapuli dupwa kingi kyairename minyiyami dee rolaerename bikuli dupwa minyapala pii poraiyuo lao, Wua gela doko Kamongona dee Gitionena, leyami.
JDG 7:21 Dokopa wambu doloma komau anda paleyami yuu dokona awali lao akali dupwa karo pao suu leyami dokopa nakamana nyisu petenge Mitiane range yanda singi dupwa ala lao ralo bolambalo lao peyami.
JDG 7:22 Gitionena akali dupwa nakamana bikuli poo lao kareyami dokopa Kamongo dokome nyisu petenge wambu malu kareyami dupwa rangena wua gela dupwame mende pyapa pyapa pyuo pinya lao yulu piyamosa piyami. Nakama ralo makando pao yuu Saretane kata dokona pao yuu Betesita kando nyiyami. Nakama yuu taone Epolo Melola lenge yuu Tapate repeta singi dokona peyami.
JDG 7:23 Dokopa Napatalaina rara akalipi Asana rara akalipi dee Manasana rara akali peparaepe dupwa Gitioneme kee lapala nakamame Mitiane rara dupwa peta ralu pyao nembeyami.
JDG 7:24 Dokopa Gitioneme yuu kyau pyalya pyana pingi dupwana singi yuu Eporaime lenge dokona pii wai nembo lao, Nakama lupyuo epo Mitiane wambu dupwa pyala ipupwape. Mitiane wambu dupwa yalo pasaramiŋi lao ipwa Jotanepe dee ipwa kuki epengepe dupwana karo pao yuu Bete Bara dokona poraiyuo iso karalapape, leya. Leyamo dokopa Eporaime akali dupwa kee lao sukusa sukusa pipala ipwa Jotane dee ipwa kuki epenge dupwana karo pao yuu Bete Bara dokona poraiyuo kando iso kareyami.
JDG 7:25 Dokopa nakamame Mitiane akali mupwa lama mende Sipi lenge dee mende Orepe lenge minyarapala nyiyami. Dokona akali Orepe doko kana mende kingi Orepe lenge petenge dokona pyao kumakayami. Dee akali Sipi doko banya waene ipwange kingingi panda dokona pyao kumakayami. Nakamame Mitiane wambu dupwa mee peteta ralyuo pao dokopa akali Orepena ayemba pukusipi dee akali Sipinya ayemba pukusipi dolapo minyuo epo Gitione baa ipwa Jotane neta pyakaenge yuu dorena ingyuo kareyamo doko maiyami.
JDG 8:1 Dokopa Eporaime akali dupwame Gitione lamaiyuo, Embame Mitiane wambu pyala panya dokopa akipamo embame namwa langya naese? Akipamo embame namwa dopa pyuo piisi? Nakama dokona lao mona randame kumuo kamame wakasa imbuo leyami.
JDG 8:2 Dopa leyaminyipape baame isingi lao, Nambame mende piyunu doko nakambana piminyi dokopa kapa pyuo manda manja nalyamo. Nakama Eporaimena akali dupwame kamame kuki mende piminyi dupwame nambana akali rara peparaeme pimwa dupwa kuki koole ingyuo nyuo isa palyilyamo.
JDG 8:3 Kamongona porainya renge dokome nakamame akali Sipi dee Orepepe pyao kumakayami. Dokona nambame makande mende pyuo manda manja nayo, leya. Baame dopa leyamo dokopa nakambana imbu singi ama wakasa doko isa peya.
JDG 8:4 Yuu gii dokopaleko Gitionemoo banya akali andete rema (300) dusipa epapala ipwa Jotane doko yalo peyami. Nakama ama mako lopo piyamopape nakamana nyisu petenge dupwa peteta ralyuo pyaoko kareyami.
JDG 8:5 Nakama yuu Sakote dokona epeyaminyi dokopa baame yuu range akali dupwa lamaiyuo, Nambana akali dapwa ama mako lopome kumulyaminyi dokona nenge borete lapo maiyakalapa. Nambame Mitiane kiŋi Salemuna Sipapa peteta ralyuo pyala papilyu, leya.
JDG 8:6 Dopa leyamopape yuu Sakote dokona akali mupwa dupwame lao, Nakamame akali Salemunapa Sipapa minyarapala angi nyii nami. Dokona akipamo namwame embena yanda singi dupwa nenge maiyakaramase? leyami.
JDG 8:7 Dokopa Gitioneme lao, Kapaŋa. Kamongo dokome Salemuna Sipapa nyuo namba keta jera dokopa nambame yuu muiyane dokona nepereke isape ikyaikyape andenge dupwame nakama pyaro, leya.
JDG 8:8 Lapala Gitioneme yuu Penele dokona papala wambu dupwame banya yanda singi dupwa borete maiyakana leya. Leyamopape yuu Penele range wambu dupwame yuu Sakote range dupwame leyaminyi pii mendaki dokoko isingi leyami.
JDG 8:9 Leyaminyi dokona baame nakama isingi lamaiyuo, Mitiane wambu dupwame namba pyao kumaka naraminyipa mee lete kapu kyuo eparo. Epapala dokopa nambame nakamana anda londe doko pyao lalyaro, leya.
JDG 8:10 Dokopa akali Sipa Salemunapa nakambana yanda singi dupwa pipya yuu Kariko dokona kareyami. Yuu muiyane dokona akali palenge rara dupwana yanda singi taosande akalisa ipisu kingi paki (15,000) mee lete kareyami. Kareyaminyipape akali yanda singi ama soo kaeyo (120,000) pyao kumakayami.
JDG 8:11 Gitione baa yuu Nopa dee yuu Jokope dolapona neta potemenge dorena ingyuo yuu muiyane kipwa kipwa kata dokona peya. Papala yanda singi ami dupwa kamenge kareyaminyipa walu lao pyao minyaro nyiya.
JDG 8:12 Dokopa yuu Mitiane kiŋi akali lama Sipa Salemunapa dolapo ralo makando peyambi. Dopa pyuo peyambinyipape baame peteta papala nakamba minyaro nyiya. Dokona lao nakambana yanda singi dupwa peparae ama pakame kumuo kareyami.
JDG 8:13 Gitione baa yanda pyuo karo kamba kapu kyuo kata Etese rambu rambu dokona epapala dokopa
JDG 8:14 yuu Sakote range akali parange mende minyaro nyepala baa yuu Sakote dokona api mupwa ingyuo karamo lao piso siya. Dokopa akali parange dokome yuu Sakote dokona akali mupwa isingi dupwa akalisa yanda ipingi dee ipisu yanda ipingiko nyepo dusipana kingi pepana pyao retakamipala Gitione maiya.
JDG 8:15 Dokopa Gitione baame yuu Sakote dokona akali dupwa kando lamaiyuo, Namba nakamame nyisa narama lao kamba leyaminyi dokona lao suu pyalapape. Nambame akali Salemuna Sipapa waiya lao minyaro nyii nalene lapala nakamame nambana yanda singi dupwa makame kumuo lopo epeyami dupwa nenge maiya narama ingilyamo leyami kande. Kapaŋa. Akali dolapo dae karambiny leya.
JDG 8:16 Lapala dokopa enakana baame yuu muiyane dokona nepereke ikyaikyape lapo nyepala dupwame minyuo yuu Sakote dokona akali mupwa dupwa randa maiyuo piya.
JDG 8:17 Baameko yuu Penele dokona anda londe mende pisi karenge doko pyao lalyiya. Lalyapala taone dokona akali dupwa pyao kumakayami.
JDG 8:18 Enakana Gitioneme Sipa Salemunapa piso soo, Nakambame yuu Tapo dokona akali pyao kumakayambi dupwa lenge kambu apyakalese? leya. Dokopa nakambame isingi lao, Akali dupwa embena lenge kambu nyingi. Dee peparae nakama kiŋinya ikinyingi yale, leyambi.
JDG 8:19 Dokopa Gitioneme lao, Nakama nambana yangonge. Namba rangena endangi dokome mandenge. Namba laokondali pyuo lalu lao leto. Nakambame akali dupwa pyao kumaka nayambili doko nambame nakamba pyao kuma napuli, leya.
JDG 8:20 Lapala baame banya wane ikinyingi mupwa Jeta lenge doko lamaiyuo, Nakamba pyao kumakana leya. Dopa leyamopape wane dokome banya wua gela doko nyisa nyii naya. Baa wane kuki iki doŋo lao suu pyapala rakangeme pinya leyamo doko sepala waiya lao pii naya.
JDG 8:21 Dokopa akali Sipa Salemunapame Gitione lamaiyuo, Akalinya yulu doko akali baa rangemeko pingiŋi dokona emba rangeme nambwa pyao kumakana leyambi. Dokona lao Gitioneme nakamba pyao kumakapala dokopa mena kamele dolapona mange dokona kalya pingi bange singi dupwa roko nyiya.
JDG 8:22 Dokopa enakana Isaraele wambu dupwame Gitione lamaiyuo, Embame Mitiane wambu dupwa keta namwa kiiramo nyipi dokona namwana akali mupwa ingyuo karalase. Enakana embena para pyasi wambu dupwame namwana akali mupwako ingyuo karo parami, leyami.
JDG 8:23 Dokopa Gitioneme isingi lao, Namba nakamana mupwa ingyuo kara naro dee nambana ikinyingi dokona mendepe mupwa ingyuo kara narami. Kamongo dokome mupwa ingyuo nakama iso karara, leya.
JDG 8:24 Lapala baame lao, Nambame pii mende nakama keta piso serowale. Doko nakamame wambu pyapala kalena palyingi bange uriŋi nyiyaminyi dupwa namba jepape, leya. Mitiane wambu dupwa Isimaelena rara dokona karenge dupwa nakambana kalena uriŋi palyingi.
JDG 8:25 Leyamo dokopa wambu dupwame isingi lao, Namwame dupwa rae maiyuo emba jerama, leyami. Lapala komau mende yuu dokona pee lao kwuapala nakamame kalena uriŋi nyiyaminyi dupwa reteyami.
JDG 8:26 Golome wasisi kalena uriŋi Gitioneme nyiyamo dupwa kilokerame akalisa lama ingiya. Dee Mitiane kiŋi dupwana molape kalya pingi bangepe komau muku lapo wapungi dupwape mena kamele mange dokona kalya pingi dupwape opetae nyepala uriŋi role pyao makande pyuo sikyali pii nayami.
JDG 8:27 Gitioneme golo dupwame anatuŋu lao mende wasapala banya yuu range taone Opera lenge dokona pisiya. Isaraele wambu peparae Anatu angi doko kame sepala bangeme wasisi anatuŋu lao lakandala peyami. Dopa piyamo dokona Gitione baa dee banya ree palu wambu dupwa pipya konena nyuo pyamalyiyasa piya.
JDG 8:28 Isaraele dupwame Mitiane wambu pipya pyao wini pipala dee dokona pako kara nayami. Yuu doko ee kana akalisa kisima mee manda rao siyamopa palyuo karo pao Gitione baa kumuya.
JDG 8:29 Gitione baa banya rangena yuu dokona kapu kyuo papala palyuo kareya.
JDG 8:30 Baa enda malu nyiyamo dokome wane akalisa yanda ipingi nyepo (70) mandeya.
JDG 8:31 Dee yuu Sikeme dokona baame enda mende nyiya dokome wane ane mende mandeya. Doko Gitioneme banya kingi Apimaleke leya.
JDG 8:32 Dokopa Gitione akali Joasena ikinyingi doko baa alemo ingyuo kaepala kumuyamopa akali Apiasena rara dokona yuu taone Opera dokona rakange Joasena malu karenge dokona baa malu piyami.
JDG 8:33 Gitione baa kumapeyamo dokopa Isaraele wambu dupwa dee kamba Anatu yaki nyepala nakamame mee bange anatu kingi Bealo lenge dupwa lakandeyami. Lakando nakamame nakamana mee bange anatu Bealo Bereti lenge doko waso nakamana anatuŋu lao lakandeyami.
JDG 8:34 Dopa pipala nakamana nyisu petenge dupwame pyalana awali lao kareyaminyi dokopa nakamana Kamongo Anatumi nakama nyiso kyawa lete nyiyamo dokona yulu pyakamyuo lakanda nayami.
JDG 8:35 Gitioneme Isaraele wambunya lao yulu keyange piyamopape Isaraele wambu dupwa Gitionena ree palu kando nyiso rae maiyuo pii nayami.
JDG 9:1 Akali Gitionena ikinyingi Apimaleke lenge doko banya endanginya wambu ree palu dupwa palenge yuu taone Sikeme lenge dokona peya. Papala nakama lamaiyuo lao,
JDG 9:2 Yuu Sikeme akali dupwa anjuku nakamame rae mailyamisi? lao piso sinya leya. Doko akali Gitionena ikinyingi akalisa yanda ipingi nyepo dusipa peparaeme gapomane ingyuo nakama iso kararamisi panda dee akali mendaki mendeme pirase? lao piso sinya leya. Apimaleke doko nakamana yongo ranjamape mendaki doko nakama suu pyalapape, leya.
JDG 9:3 Dokopa banya endanginya wambu ree palu dupwame pii dokona banya lao yuu Sikeme akali dupwa lamaiyakamiyami. Dokopa akali yuu Sikeme range dupwame suu pyapala Apimaleke baa namwana ree paluŋu lao letamo dokome moko minyuo pirama, leyami.
JDG 9:4 Lapala nakamame kana kulingi akalisa yanda ipingi nyepo mee bange anatuŋu lao kingi Bealo Beriti lenge dokona tembole andana nyepala maiyami. Maiyaminyi kana dokome akali koo pyuo kapa ingyuo kara nange lapo baa role epena lao kana reto sukusa ropo pyao nyiya.
JDG 9:5 Nyepala baa rakangena anda yuu Opera dokona papala kana mendena ketae dokona Gitionena ikinyingi banya yangonge akalisa yanda ipingi dusipa pyao kumakaya. Dopa piyamopape wane Joteme Gitionena ikinyingi kamame enakana doko baa ralo pao yalu piyasa Apimaleke baame pyao kumaka naya.
JDG 9:6 Dokopa Sikeme wambu peparaepe dee yuu Betemilo rangepe dupwa opetaeko Sikeme dokona isa oke poo pyasi mende karenge dokona papala akali Apimaleke baa nakamana kiŋi inginya lao leyami.
JDG 9:7 Leyaminyipa Jotememe pii doko sepala baa yuu kyau Gerisimi lenge dokona ketae pulyuo papala wambu peparae kando pii ketae palyuo lao, Nakama yuu Sikeme akali dupwa nambana pii selapape. Dopa pirami ramo Anatumi nakamana pii larami doko sakarako rapisi.
JDG 9:8 Yuu mendepa isa dupwa nyuo pyaso karo nakama rangena kiŋi mende rombo palyelana leyami. Nakamame olipi isa doko kando lao, Emba namwana kiŋi ingyape, leyami.
JDG 9:9 Doko olipi isa dokome isingi lao, Nambana jingi lyepala mamba wele kingapala wambunya kingipi bange anatuŋu lenge dupwana kingipi minyalyingi. Nambame nakama iso yulu piru ramo dee jingi lyii narosa pira ingilyamo, leya.
JDG 9:10 Dopa leyamo dokopa isa dupwame piki isa doko kando lao, Emba epo namwana kiŋi ingyape, leyami.
JDG 9:11 Leyaminyi dokopa piki isa dokome isingi lao, Nambame nakama iso rapu piru ramo dokopa nambana jingi rende pingi doko yaki nyuo lyii nasaro, leya.
JDG 9:12 Dopa leyamosa isa dupwame girapo isa doko lamaiyuo lao, Emba epo namwana kiŋi ingyape, leyami.
JDG 9:13 Leyaminyipape girapo isa dokome isingi lao, Nambana waene ipwange doko nyepala mee bange anatupi dee wambu dupwape rae mainyi pyambungi doko namba nakama iso rapu piru ramo doko dee jingi lyii nasaro, leya.
JDG 9:14 Dokona lao isa dupwa peparae nepereke isa doko lamaiyuo lao, Emba epo namwana kiŋi ingyalase, leyami.
JDG 9:15 Leyaminyi dokopa nepereke dokome isingi lao, Nakamame namba angingyuo nakamana kiŋi wasalana suu pyarami ramo doko nambana wangya isarena dokona nakama epo rau lao pisi ipupwape. Dopa pii narami ramo doko nambana isa kuki reke reke dupwana isare potemapala isa sita yuu Lepanone dokona karenge dupwa rara, leya.
JDG 9:16 Dokopa Jotememe deeko lao, Nakamame akali Apimaleke kiŋi karena leyaminyi dokopa angi kinyi angingyuo suu pyapala leyamisi? leya. Gitione baame yulu keyange pyakayamo dokona nakamame Gitionena lao poraiyuo suu pyao dee banya wambu ree palu dupwa kandokondali pyuo rapu pyuo piyamisi? leya.
JDG 9:17 Nambana rakaneme nakamana lao yanda pyakaya kande. Mitiane wambu pipya nakama kyawa lete nyipuli lao piyasa baa randa neya.
JDG 9:18 Dopa piyamopape epapu nakamame nambana rakanena ree palu dupwa mata maiyakapala kana mendaki dokona banya ikinyingi akalisa yanda ipingi nyepo dusipa pyao kumakapala dee banya ikinyingi Apimaleke lenge Gitione banya kendemande wanake dokome mandeya doko nakamana ree palu dokome nakamame baa yuu Sikeme kiŋi ingyuo wasiyami, leya.
JDG 9:19 Epapu nakamame Gitionepa banya ree palu dupwa ketape yulu pyuo kinyi angingyuo rolae piyami kande doko nakama Apimaleke kando rae maiyuo kararami. Dee baame nakama kando rae maiyuoko karena.
JDG 9:20 Dopa pii narami ramo doko isare uliyapu doko Apimaleke keta epapala Sikeme akali dupwape Betemilo akali dupwape rao pinya. Yuu Sikeme akali dupwa ketape dee Betemilo akali dupwa ketape isare uliyapu epapala Apimaleke rena.
JDG 9:21 Dokopa banya yangonge Apimaleke doko pakapala Joteme baa ralo pao yuu Biya dokona palya peya.
JDG 9:22 Dokopa Apimaleke baame ee kana rema Isaraele wambu dupwa iso rapu pyuo kareya.
JDG 13:1 Isaraele wambu dupwame Kamongo kando kamba lao yulu kooko pyuo kareyamisa baame Pilisitia wambu dupwame Isaraele wambu dupwa ee kana akalisa kisima iso karena lao yaki nyiya.
JDG 13:2 Dokopa akali mende kingi Manoa lenge yuu taone Jora range dokona kareya. Baa akali Dane lengende kareya dokona rara. Manoa banya etenge doko wane manji nao mee ingi poraiyuo petenge.
JDG 13:3 Dokopa Anatunya aŋala mende baa peteyamo dokona epapala lamaiya. Emba wane manji nao mee petenge kandale doko epapu emba repeta wane rombanda ingyaramopa wane ane manjiri, lamaiya.
JDG 13:4 Emba sepe. Ipwa waene biyape panda nenge koope dupwana mende naa napipi.
JDG 13:5 Dee dopa pyuo emba wane rombanda ingyaramopa wane ane manjiri doko embame wane banya kyawasi doko pyake pakami nare. Wane baa banya mandenge yuu gii eparamo dokopa baa Nasaraite ingyuo karo baa rangeme Anatu mona peparae maira. Wane baame kanda soo yulu piramo doko Pilisitia wambu dupwame Isaraele wambu dupwa randa maiyuo karaminyi dokona Isaraele wambu dupwa rekya lao nyera, leya.
JDG 13:6 Enakana enda baa anda pao akalingi lamaiyuo, Anatunya akali mende namba pisipu dokona ipya. Ipyamo dokopa banya lenge kambu doko Anatunya aŋala dopale ingyapyamosa namba paka pipya. Dokopa nambame yuu anja karo ipya lao piso see napu. Dee aŋala banya kingi namba langi napyako, leya.
JDG 13:7 Dopa pipyamopape akali baame namba langyuo, Embena rombanda wane paliramopa wane ane manjiri, lapya. Baame namba langyuo, Ipwa waenepe ipwa ama porai dupwape nenge koope dupwa naa nao pepe. Doko wane baa range peparae Anatu maira. Baa kararamo yuu gii dusipana Nasaraite akali ingyuo karara, lapya, leya.
JDG 13:8 Dokopa Manoame Anatu lao ateŋa leya. O Kamongo, embena akali pena lapipya doko dee kamba namba keta epena. Epapala dokome nambwa langyuo, Wane angi manjipala dokopa dopa pilapape lao langinya, leya.
JDG 13:9 Anatumi Manoa piso soo leyamuli pyuo piya. Banya aŋala dee kamba kapu kyuo enda baa ee dokona peteyamo dokona epeya. Dokopa enda banya akalingi role pyao ee dokona kara nayambi.
JDG 13:10 Dokopa enda baa makando akalingi lamaiyala peya. Akali wamba namba pii langiya kande doko epapu dee epamo, lamaiya.
JDG 13:11 Dokopa Manoa sipurapala etenge peyamo dokona peya. Pao aŋala kareyamo dokona papala baa piso soo, Emba akali wamba nambana enda doko kando pii lami dokose? leya. Dokopa aŋala baame, Kinyi letene dokoŋo, lamaiya.
JDG 13:12 Enakana akali Manoa baame leya, Epapu dee emba letene doko angi pyaka seramo dokopa wane baa apa pirase? lao piso siya. Dee baa aki yulu pirase? lao piso siya.
JDG 13:13 Kamongona aŋala baame Manoa lamaiyuo, Embena enda doko yulu peparae nambame lamaipunyili pyuo pyuokondali pinya leya.
JDG 13:14 Enda baa isa girapo jingipi ipwa waenepe biyape nenge koope dupwa naa nao baa yulu peparae namba lapunyili pyuo pinya leya.
JDG 13:15 Dokopa baa Kamongona aŋala lao soo gisa napala Manoa baame aŋala doko lamaiyuo, Emba paa napipi. Namwame emba mena meme kumambona doko pyao yangakamanale, lamaiya. Dokopa aŋala baame Manoa isingi lamaiyuo lao, Namba dae pisipuli doko embena nenge doko namba naa napuli. Emba rapa rapa pipuli lao suu pii kande doko Kamongo keta pyao kiso mairi, leya.
JDG 13:17 Dokopa Manoa baame aŋala doko lamaiyuo, Embena kingi doko nambwa langi. Dokopa nambwame embena pii lao langipi doko kinyi angilyamo lao sepala nambwame embena kingi ketae nembo lakandaramba, leya.
JDG 13:18 Aŋala baame Manoa piso soo lamaiya, Akipamo embame nambana kingi api lao piso silisi? Nambana kingi dokona lao wambu dupwa yamarangyuo poraiyuo suu pingi.
JDG 13:19 Doko sepala Manoame mena meme kumambona doko nyepala dee nenge witi jingi lapo nyuo lanyuo papala kana pyare lasi dokona Kamongo yulu wambumi pii nange dupwa pingi doko keta kiso maiya.
JDG 13:20 Dokopa isare kyau ulingi kana pyare lasi dokona piso yake dokona peyamo dokopa Manoa etengepa kandeyambinyipa Kamongona aŋala role pyapeta peyamo doko kandapala nakambana lenge kambu yuu kandapala mukumbalu siyambi.
JDG 13:21 Manoa etengepa dee aŋala doko kanda nayambi. Dokopa Manoa baa akali doko angi Kamongona aŋalalyamo lao siya.
JDG 13:22 Manoame etenge kamba lamaiyuo, Anatu kanda nange doko kandalyambano dokona nambwa kumarambana pilyape? leya.
JDG 13:23 Dokopa etengeme isingi lao, Kamongome nambwa pyalana pili doko baame nambwana mena yangambwa doko kando rae mai napyali. Rae mai napala nambwa lasaka pyuo dee pii angi langyuo pilamo kandapi doko pii napyali, leya.
JDG 13:24 Enda baa wane nyaŋa mandeya. Wane banya kingi Samasone leyambi. Wane baa andeyamo dokopa Anatumi baa elyape keta pisiya.
JDG 13:25 Baa yuu Jora dee Esataolepana kanya dokona akali Danena rara wambu paleyaminyi dokona kareyamo dokopa Kamongona Imambu dokome baa kanda soo arombanyi nembeya.
JDG 14:1 Samasone yuu Timina dokona lano peyamo dokopa Pilisitia wanake mende kareyamo kandeya.
JDG 14:2 Kandapala wane dokome anda papala rakange endangipa lamaiyuo, Namba Pilisitia wanake mende kandapu doko nambana etenge ingyara nyakarambi, lamaiya.
JDG 14:3 Dokopa banya rakange endangipame lamaiyuo, Wane emba apa pipyasa pao Pilisitia wambu rara wakale mona kapu kyaa nange dokona enda doko nyelana letese? Emba wanake lapo embena rangena ree palupi dee namwana rara dokonape kanda nalese? leyambi. Dokopa Samasone baame rakange lamaiyuo, Namba wanake doko kando rae mailyu. Embame wanake dokoko nyakare, leya.
JDG 14:4 Banya rakange endangipa nakamba Kamongome Samasone baa rapu piya dokome dopa pinya leyamo doko soo gisa nayambi. Kamongome Pilisitia wambu dupwa pyaraŋa lao suu piya. Yuu gii dokopa Pilisitia wambu dupwame Isaraele wambu dupwa iso kareyami.
JDG 14:5 Samasone banya rakange endangipa role pyao yuu Timina dokona peyami. Papala nakama isa girapo ee dokona sukusa peyaminyi dokopa yuu dokona mena laene mendeme Samasone baa kando gasimwa poko baa nalana epeya.
JDG 14:6 Dopa piyamopape Anatunya Imambu dokome Samasone baa porainyi pyambuyamopa baame mena laene doko kingimi minyuo kumuya. Mee wambumi mena meme ikyane minyuo kumungi dopale ingyuo piya. Dokopa Samasone baame dopa pelono lao rakange endangipa lamai naya.
JDG 14:7 Enakana Samasone baame pao wanake doko kando pii lamaiya. Lamaipala baame wanake doko kando rae wakasa maiya.
JDG 14:8 Dokopa yuu gii kuki lama epo papeyamopa Samasone baame wanake doko nyelana suu pyapala peya. Peyamo kata angi doko yaki nyepala mena laene piyamo kumasi doko kandala peya. Papala dokopa amburali ama malu epo kapo karo mena laene yongo kumasi koko dokona lyiyamo kandeya.
JDG 14:9 Kandapala Samasone baame kingi pyambwapala amburali lyuo nyiya. Nyepala baa kata pao dokopa nama peya. Pao banya rakange endangipa kando nyepala lapo maiyamo neyambi. Dokopa Samasone baame mena laene yanenge kumasi dokona amburali kapa lyipu lao endangi rakangepa lamai naya.
JDG 14:10 Samasone banya rakange baa wanake dokona anda peyamo dokopa wane wanyane dupwame pinginyili pyuo Samasone baame yuu dokona nenge andake rapa rapa piya.
JDG 14:11 Dokopa Pilisitia wambu dupwame baa kandapala nakamana parange akali akalisa rema dusipa baamoo pipya role pyao karena lao lanyuo epo kareyami.
JDG 14:12 Dokopa Samasone baame nakama lamaiyuo leya. Nambame nakama kando pii lapo piso serowale. Enda nyuo nenge nenge yuu gii yanda ipingi nyepo dusipa ene epapa naramopa nakamame pii doko kapa polo larami ramo nambame komau ama porai akalisa rema dee komau peparae wapungi akalisa rema jero. Dee nakamame rolae langi narami ramo doko namba komau ama porai akalisa rema dee komau peparae wapungi akalisa rema jerami, leya. Dokopa nakamame baa kando leyami. Embena pii piso singi angi doko namwa semanale laa, leyami.
JDG 14:14 Dokopa Samasone baame nakama lamaiya. Nenge malu nenge dokona ingi dokona nenge sipurao neta epeya. Porai mende keta rende pingi epeya, leya. Yuu gii rema peyamopape wambu dupwame pii doko akinde lao lamailana saka nayami.
JDG 14:15 Yuu gii kisima dokopa nakamame Samasone banya etenge lamaiyuo, Embena akalinyi kando panga soo pii Samasoneme lapya doko embame piso sepala namwa embame renge angi doko langinya. Embame namwa langi nare ramo doko namwame embena rakanena anda doko yangarama dokopa emba opetae rare. Namwana bange dupwa mee waa nyerama lao namwa kee lao ipupwa lamisi? leyami.
JDG 14:16 Dokopa Samasonena etenge baame ee lao pao akalingi lamaiya. Embame namba mona reta nalene lao masilyu. Embame namba awa nalene lao suu pilyu. Embame nambana wambu dupwa kando pii piso singi lapo piso sipipya dupwana namba renge angi doko langi nalene, lamaiya. Dokopa Samasone baame etenge doko lamaiyuo, Nambana rakane anyipi dolapo polo lamai napunu dokona dee emba akipamo langirusi? leya.
JDG 14:17 Dokopa enda baa akalinginya lenge kambu dokona eeko lao yuu gii yanda ipingi nenge malu palyuo nao peteyaminyi dokopa peteya. Dee yuu gii yanda ipingi lumwa dokopa baame kaeya nao eeko leyasa Samasone baame etenge angi polo lamaiya. Dokopa enda baame pii renge sepala banya wambu dupwa polo lamaiya.
JDG 14:18 Lamaiyamo yuu gii dokopa akali yuu dokona range dupwame neta anda panya piyamopa Samasone lamaiyuo, Aki mende amburali ipwange rende pingi dopalese? Dee aki mende ama porai wakasa mena laene dopalese? lao Samasoneme wamba piso siyamo dokona isingi lamaiyami. Dokopa Samasone baame isingi lao, Nakamame nambana etenge doko isa pii lamaiyaka namili doko pii renge lamai napuli. Dee nakama soo laa namili, lamaiya.
JDG 14:19 Lamaiyamo dokopa Kamongona Imambu dokome Samasone baa porainyi pyambuya. Pyambuyamo dokopa baa yuu Asekelone dokona lano papala akali akalisa rema pyao kumakaya. Kumakapala nakamana komau keyange dupwa roko nyepala akali wambo banya pii leyamo dokona yano pyao leyami dupwa maiya. Maipala Samasone baa imbumi kumuo yuu doko yaki nyuo kaepala kapu kyuo rakangena anda peya.
JDG 14:20 Peyamo dokopa banya etenge doko nyepala akali mende Samasonepa wamba role pyao puu minyuo kareyambi doko maiyami.
JDG 15:1 Enakana yuu gii lapo epo papeyamopa witi jingi kanda soo lyuo nyingi dokopa Samasone baa etenge peteyamo dokona mena meme ikyane lanyuo etenge kandala peya. Papala enda banya palenge panda dokona panya lao suu piya. Dokopa enda dokona rakange dokome baa kapa paa nara daa, leya.
JDG 15:2 Lapala baame Samasone lamaiyuo, Nambame emba enda doko kinyi kinyi awa nalene lao suu piyu. Suu pyapala enda baa embena puu minyingi akali baa nyinya lao maiyu. Dokona suu pyao emba epapu banya kakingi kuki baa mapwae au pingi keyange petamo doko nyelase, lamaiya.
JDG 15:3 Samasoneme lamaiyuo, Dakepa nambame kapa pyuo Pilisitia wambu dupwa kando randa mende mairu, leya.
JDG 15:4 Dopa lapala Samasone baa papala yana suwa kararope andete rema (300) nyuo malu palyiya. Palyapala lama larapu nyepala kanya dokona kendapuli palyarapu kunali dolapome puu piya.
JDG 15:5 Enakana Samasone baame kendapuli dokona isare kainyi palyapala yana suwa kararope dupwa Pilisitia wambunya witi jingi ee andake dokona nembeya. Nembeyamo dokopa papala Pilisitia wambunya witi jingi lyingi dee witi singi pyake pasi dupwape isa olipi lenge ee dokona karenge dupwape ama peparae rao oteya.
JDG 15:6 Enakana Pilisitia wambu dupwame ee doko kandapala lao, Apimi pipyase? lao piso siyami. Dokopa Samasone Timina akalinya imwange dokome pipyalyamo. Banya etenge doko rakangeme nyepala akali wakale maipya dokona imbwuapala pipyalyamo, leyambinyi siyami. Sepala Pilisitia wambu dupwame epapala enda dokopa banya rakangepa dee banya andape isare palyuo kisiyami.
JDG 15:7 Dokopa Samasoneme lao, Dopa piminyi dokona nambame kinyi kinyi leto. Nakama kando isingi kooko piru. Pipala namba yaki nyuo puu pao paro, leya.
JDG 15:8 Lapala Samasone baame Pilisitia akali dupwa pipya yanda pimwaiyapala akali ama malu baame pyao kumakaya. Enakana yuu Etame lenge dokona kananda mende karenge dokona pao palu karo piya.
JDG 15:9 Pilisitia wambu dupwa nakama epo yuu Juta dokona komau anda pyuo palyuo kareyami. Karo dokopa yuu taone Liya dokona papala wambu dupwa pyao bange dupwa minyarambu nyuo piyami.
JDG 15:10 Dokopa Juta akali dupwame Pilisitia akali dupwa piso soo leyami. Akipamo nakamame namwa pyao ralinyi nembo namwana yuu doko nyakalyamisi? leyami. Dokopa nakamame isingi lamaiyuo, Namwame Samasone baa puu maiyuo retalena epelyamano. Baame namwa kando piyamuli pyuo baa isingi pyarama, leyami.
JDG 15:11 Doko sepala Juta range akali taosande rema (3,000) nakama yuu Etame lenge kananda karenge Samasone baa palu kareyamo dokona papala Samasone kando dopa lamaiyami. Pilisitia wambu dupwame namwa iso karaminyi doko emba see nalese? Embame aki mende piinyisa namwa keta randa dake epelyase? leyami. Dokopa baame isingi lamaiyuo, Nakamame namba dopa piyamiŋi dokona nambame nakama dopako piyu, leya.
JDG 15:12 Nakamame baa lamaiyuo, Namwame dae epo emba puu pyao nyepala Pilisitia wambu dupwa maiyalena epamano, leyami. Dokopa Samasoneme nakama lamaiyuo, Nakama rangeme namba pyaa narama lao kinyi kinyi langilapa, leya.
JDG 15:13 Dokopa nakamame baa lamaiyuo, Daa, pyaa narama. Namwame emba mee puu pyao nyepala Pilisitia wambu dupwa keta mairama, leyami. Lapala nakamame puu enenge lamame pakapala Samasone baa puu pyapala lanyuo kananda yaki nyuo epeyami.
JDG 15:14 Baa yuu Liya dokona epeyamo dokopa Pilisitia wambu dupwame pii poraiyuo lao kando nyela epeyami. Dokopa Kamongona Imambu dokome baa porainyi pyambuyamopa banya kingi dokona puu piyaminyi dupwa isareme rasi ingyuo roko isa peya.
JDG 15:15 Dokopa baame mena dongena angapu kuli kyaka kenda pingi doko kandapala kingi pyambwapala minyalyuo nyiya. Nyepala dokome wambu taosande mendaki (1,000) pyao kumakaya.
JDG 15:16 Dopa pyuo pyapala Samasone baame kenane pyao rae maiyuo dopa leya. Dongena angapu kuli dokome minyuo akali taosande mendaki dupwa pyao kumakapu. Dongena angapu kuli dokome akali malu konda konda pyuo pyao malu palyapu, leya.
JDG 15:17 Pii lao otapala dokopa Samasone baame mena dongena angapu kuli doko pyao nembeya. Nembeyamo yuu angi pao siyamo doko Angapu Kuli Kyau, leyami.
JDG 15:18 Samasone baa ipwa nano wakasa piyasa baame Kamongo Anatu piso soo leya. Embame namba yulu andake dake jipinyipa wambu malu pyao karapunupape epapu ipwa nano dokome namba kumaro ingilyase? Dee rara wakale Pilisitia wambu Anatu suu pyaa nange dupwame nyuo puu maiyuo nyeramisi? leya.
JDG 15:19 Dokopa Anatumi yuu ipwa epa nange dokona kapa ipwa epena leyamopa yuu Liya dokona ipwa guu lao epeya. Dokopa Samasone baa ipwa doko neya. Neyamo dokopa banya porainya renge dee epo paleya. Dokona lao ipwa kingi doko Akali Kyakale Leyamo Dokona Ipwa Guu Lenge, leyami. Ipwa doko dakepa yuu Liya dokona epo karamo.
JDG 15:20 Samasone baa ee kana akalisa lama dusipana Isaraele wambunya lita akali ingyuo kareya. Kareyamopa Pilisitia wambu dupwame Isaraele yuu dokona iso kareyami.
JDG 16:1 Samasone baa dokona karo yuu Gasa dokona pao enda pamuku mende kando nyepala enda dokopa role pyao paleyambi.
JDG 16:2 Dokopa yuu Gasa range wambu dupwame Samasone baa epo kareyamo doko kandeyami. Kandapala nakama yuu dokona pao karo awali lapala baa paramo lao kukwa dokopa yuu taone andake kame kambu dokona iso kareyami. Doko yuu gii kukwa dokopa nakama elya kalo karo yuu yangaramo dokopa baa neta eparamo pyamanale lao suu pyao kareyami.
JDG 16:3 Samasone baa palyuo soo pao andasukulya ingiya. Dokopa sipurapala taone andake dokona kame kambu dowa doko minyuo romo pyuo lalyepala pote isa dusipape dee kambu kii paleta nyuo banya lange dokona reteya. Retapala yuu kyau mende Eperone kandanyi peyo karenge dokona pulyuo soo papala kando kareya.
JDG 16:4 Enakana dokopa Samasoneme enda Delaela lenge yuu Soreke pau lama lama dokona palenge doko kando ama mona wakasa reteya.
JDG 16:5 Dokopa Pilisitia akali kamongo kingi paki nakama enda doko kareyamo dokona papala lamaiyami. Embame akali doko kando kyatepa pyuo baa ama wakasa porailyamo doko renge akipi lao sepe leyami. Namwame apa pyuo banya porailyamo renge doko nyuo anamo pirama lao sepe. Baa namwa pyaa nana lao puu maipi, leyami. Dopa pirinyi dokopa namwame mendaki mendaki lao kana kulingi taosande mendaki ipisu andete mendaki (1,100) dupwa jerama, leyami.
JDG 16:6 Doko sepala Delaela baame Samasone piso soo, Emba ama wakasa porailini renge doko langipi. Wambu lapome emba puu maiyuo emba poraiya nalase lao pirami doko apa pyuo piramisi? lao pisiya.
JDG 16:7 Samasone baame isingi lamaiyuo leya. Nakamame namba yanda imbu kyaka yanda ipingi dusipame puu mairami ramo dokopa namba poraiya naro. Ama pyuku lasi akali menge dopale ingyaro, lamaiya.
JDG 16:8 Dokopa Pilisitia akali kamongo lapome yanda imbu kyaka yanda ipingi nyepa minyuo epo enda Delaela doko maiyaminyipa dusipame enda baame Samasone puu maiya.
JDG 16:9 Enda baame akali dupwana lapo iso anda luu palenge donge mendena yalu pyuo petena leyamo dupwa simili lao enda baame pii poraiyuo leya. Samasone, Pilisitia dupwa epelyaminyi, lamaiya. Dokopa yanda imbu puu maiyamo doko isareme rao rokonge dopale ingyuo waiya lao rokoya. Dokopa nakamame baa yalu pyuo nyisapyamopa porailyamo renge doko aki lao soo gisa nayami.
JDG 16:10 Delaelame Samasone kambako lamaiyuo, See, embame namba kando mee male lao kyambo langilini. Doko kaepala wambu lapome emba apa pyuo puu mairamisi dokona lao namba angi rolae langipi, leya.
JDG 16:11 Dokopa Samasoneme enda doko dee lamaiyuo, Nakamame puu enenge wambo mende pii nangendeme namba puu mairami ramo doko namba kapa poraiya nao ama pyuku lasi wambu menge dopale ingyaro, lamaiya.
JDG 16:12 Doko sepala Delaela baame puu ama enenge lapo nyepala dokome Samasone baa puu maiya. Maipala enda baame pii poraiyuo lao, Samasone, Pilisitia wambu dupwa epelyaminyi, leya. Doko akali lapo anda donge pakirena iso yalu pyuo kareyami dupwa simili lao leyamo dokopa Samasoneme puu banya kingi dokona piyamo doko minyuo rokoyamopa mee isa peya. Puu enenge doko rokoyamo dokopa puu doko nyuu puu kuki dopale ingyuo rokoya.
JDG 16:13 Delaelame Samasone kando leya. Embame yuu peparae male lao namba kyambo langyuo karene. Doko kaepala namba langyuo, Wambu lapome emba apa pyuo puu mairami lao langipi, leya. Dokopa Samasone baame enda doko lamaiyuo, Masini dokome komau waso puu isa palyuo ketae palyuo pingi kandale. Masini dokona nambana kyawasi wanyama yanda ipingi nyepo dusipame isa palyuo ketae palyuo pipala pyao gii lao piri ramo dokopa namba ama poraiya nao pyuku lasi akali menge dopale ingyaro, lamaiya.
JDG 16:14 Delaela baame elya kalo pii isa isa lao anjiki pyuo pisipala Samasone nyuo luu palyiya. Palyapala baa luu paleyamo dokopa banya kyawasi wanyama yanda ipingi nyepo dusipame masini dokona isa palyuo ketae palyuo pipala pyao gii lao piya. Pipala dee pii poraiyuo lao, Samasone, Pilisitia wambu dupwa epelyaminyi, leya. Leyamo dokopa Samasone lenge rao roya pisipala banya kyawasi dusipa range mee ipyuo nyiya.
JDG 16:15 Dokopa enda dokome baa lamaiyuo, Akipamo embame namba mona retelyo letese? Angi kinyi mona reta nalene. Embame yuu gii rema namba kando mee male male lao kyambo langyuo minyoko pipi. Dee emba ama porailini renge doko namba langi nalene, leya.
JDG 16:16 Lapala enda baame yuu peparae poraiyuo kaeyo piso siyamosa akali baame pii doko soo makapala kumarolyamo lao suu piya.
JDG 16:17 Suu pyapala dokopa Samasone baame angi renge rolae enda baa polo lamaiya. Namba porailyu doko nambana kyawasi doko pyakepa nange dokome pilyu. Dee yuu gii mandeyamo dokopa namba Anatu lao rombo palyuo Nasaraite akali ingyuo karara, aŋalame leya. Dokona nambana kyawasi doko pyake pyara ramo dokopa nambana porai doko pao otapala namba kapa poraiya naro. Namba dokopa ama pyuku lasi akali menge karaminyi dopale ingyaro, lamaiya.
JDG 16:18 Dokopa Delaelame ama kinyi Samasone baame langilyamo lao soo nyepala baa rae maiyuo Pilisitia kamongo akali dupwa keta pii waili nembeya. Nakama yuu gii mende kamba epena lao lamaiya. Akali baame epapu angi kinyi doko namba langipya, lamaiya. Lamaiyamo dokopa Pilisitia akali dupwame sepala nakamana kana dupwa minyuo epeyami.
JDG 16:19 Enda dokome pii anjiki pyuo isa isa lao Samasone nyuo enda banya pai dokona kyawa pyare lao nyuo luu palyiya. Luu paleyamo dokopa enda baame akali mende epena leya. Akali dokome epapala Samasonena kyawasi wanyama yanda ipingi nyepo dusipa pyake panyi nembeya. Nembeyamopa enda baame makande pyuo Samasone pyalereyamo dokopa baa ama poraiya naya. Banya porainya renge pao oteya.
JDG 16:20 Enda baame pii ama ketae palyuo lao, Samasone, Pilisitia dupwa epelyaminyi, leya. Dokopa Samasone baa roya pisipala namba panju pingi doko suu pyao mee parolyamo lao suu piya. Doko Kamongome baa kyawa yaki nyiyamo doko see naya.
JDG 16:21 Dokopa Pilisitia akali dupwame baa minyarapala nyiyami. Nyepala banya lenge dolapo lukunyi nembeyami. Nembapala nakamame baa lanyuo yuu Gasa dokona lanyuo peyami. Papala puu sane lapome kingi kimbupi dokona puu piyami. Samasone baa yulu pinya lao kana andake lapome nenge witi jingi dupwa lukuo dee pyao inju palawa inginya lao pingi dokona pyuo karapusi anda paleya.
JDG 16:22 Dokopa Samasone banya kyawasi doko kamba dee epanya kanda soo epeya.
JDG 16:23 Pilisitia kamongo akali dupwa nakama epo malu palyapala nenge keyange dupwa nyuo nakamana anatu lao isa kanape lapome wasapala dokona nenge kuiyuo maiyuo loma soo rae maiyuo lakandeyami. Dokona kingi Dakone lenge doko lakando nakamame kenane pyao nambana anatu dokome nyiso jipyamopa namwana yanda pimwai Samasone baa nyilyamano lao rae maiyami.
JDG 16:24 Dee wambu dupwame rae maiyuo kenane pyao nakamana anatu doko kingi lakando lao, Namwana anatu dokome emboneme jipyamopa namwana yanda pimwai wamba namwana yuu andape pyao kwaeyanyi nembo dee namwana akali malu pyao kumako piya kande doko nyuo anamasi minyilyamano, leyami. Lao nakamana monarename range ama rae maiyuo leyami. Samasone baa kyakale lao epena lapala namwame baa kando ikitokondo male lao baa kando lamanale, leyami. Lapala dee nakamame Samasone karapusi anda paleyamo doko epena lao nyuo lanyuo neta epeyami. Epapala nakamame baa kando male lao giyalya giyana pyuo dokopa anda dokona pote isa londe lama ralipi kareyamo dokona baa kanya karena leyami.
JDG 16:26 Dokopa Samasoneme wane kuki mendeme baa nyiso kii minyuo kata lasaka pyuo papiyamo doko lamaiyuo, Embame nambana kingi doko nyuo pote isa repeta ralipi karamo dokona namba minyuo pao angi dokona minyasakana. Nambame isa dolapo minyaro karapuli, leya.
JDG 16:27 Anda dokona kamongo akali kingi paki dusipa dee enda akalipi taosande rema (3,000) epo anda yangi dupwana ama kete pyao Samasone baa isa karo baa kando ikitokondo giyalya giyana pyuo lao peteyami.
JDG 16:28 Dee Samasoneme dokopa ateŋa lao, Kamongo Andake Mupwa Wakasa, embame namba suu pyape. Anatu embame namba yuu gii mendaki iki porainya renge kamba jii. Dopa piri dokopa dokome yuu mendakinde nambana lenge lama dolapona reke lao Pilisitia wambu dapwa pyarowale, leya.
JDG 16:29 Dopa lapala Samasone baame anda kanya dokona isa pote londe wara pyuo piyaminyi dolapo minyaro kareya. Karapala banya kingi dolapome isa dolapo minyuo poraiyuo suu leya.
JDG 16:30 Dokopa baame pii ketae palyuo lao, Namba Pilisitia dupwa pipya role pyao kumarowale, leya. Lapala akali banya porainya renge dokome anda doko suu leyamosa anda doko boo lapala kamongo akalipi dee mee wambu peparae pyao kumakaya. Samasone baame wambo wambu malu pyao kuma siyamopape enakana dokopa wambu ama malu wakasa pyao kuma soo dee baa opetae kumuo piya.
JDG 16:31 Dokopa banya yangongepe dee banya ree palu dupwa epapala banya yanenge doko nyiyami. Nyepala nakamame lanyuo anda papala baa yuu Jorapa dee Esataolepa kanya yanyanda dokona malu piyami. Wamba banya rakange Manoa malu piyaminyi dokona baa malu piyami. Samasone baa Isaraele wambu dupwa rapu pyuo kareyamopa ee kana akalisa lama epo peya.
RUT 1:1 Kamongo akali dupwame Isaraele wambu dupwa isiyami. Yuu gii dokopa yuu dokona lopo andake siya. Dopa piyasa yuu Beteleme yuu andake yuu Juta dokona singi range akali banya etengemoo ikinyingi dolapo pipya yuu Moape dokona yuu gii lapo karala peyami.
RUT 1:2 Akali banya kingi Elimeleke lenge. Banya etenge Nayomi ikinyingi dolapona kingi Malone Kiliyonepa lenge. Nakama yuu Beteleme range. Yuu doko kingi Eporata lenge. Yuu Juta dokona singi. Dokona nakama yuu Moape papala palyuo karo piyami.
RUT 1:3 Elimeleke kumapeyamo dokopa Nayomi baa banya ikinyingi dolapo pipya palyuo karo piyami.
RUT 1:4 Dokopa wane dolapo Moape enda lama nyiyambi. Enda mende Opa lenge mende Uruti lenge. Enakana ee kana akalisa dopale epo papeya.
RUT 1:5 Epo papeyamopa Malone Kiliyonepa dopako pyuo kumuyambinyipa Nayomi baa iki pyarepala peya. Akali wanepe kumuo oteyaminyipa baa iki peteya.
RUT 1:6 Kamongo Anatu dokome banya wambu dupwa nyiso ee nengepe mailyamo leyami doko Nayomi baa siya. Sepala banya enda aeyange dolapo pipya yuu Moape yaki nyuo panya rapa rapa piyami.
RUT 1:7 Nakama yuu Moape yaki nyepala yuu Juta dokona kapu kyuo peyami.
RUT 1:8 Katasa pawali pyuo karo dokopa Nayomimi enda aeyange dolapo lamaiyuo leya. Nakambana yuu range dokona kapu kyuo pao endakinyi dolapo pipya role pyao pisirambi pena leya. Nakambame nambape wambu kumuyami dupwape rapu piyambi dokona Kamongona keyange renge doko nakamba keta palena leya.
RUT 1:9 Nakambame akali dee kamba nyepala mona seramopa pisirambi lao Kamongo Anatumi kata wapwakana leya. Dopa lapala enda dolapo nyinyi pisala pena leya. Dokopa ee andake lao yamarangupala dopa lamaiyambi.
RUT 1:10 Daaŋa nambwa embamoo pipya embena wambu petaminyi dokona parama, leyambi.
RUT 1:11 Nayomimi isingi lao, Nambana anyi dolapo daaŋa range lambuo pupwale. Akipamo nakamba nambamoo pipya role pyao paramase? Apa pyuo nambame wane lama manjirunu nakamba nyerambi ingilyase?
RUT 1:12 Namba emo otelyo dokome dee akali nyero ingya nalyamo dokona nakamba kapu kyuo anda pupwale. Namba akali nyelana suu pyao peto lapulipi panda epapu kukwama akali nyepala wane manjiru ingilyamo lapulipi doko.
RUT 1:13 Nakamba kapa pyuo isaro pisipala anda parambinyi dokopa nyerambi lapulisi? Ene andarande dokona lao mendali nyerambi kata pyakepelyase? Nambana anyi dolapo dopa pirambi doko kapa ingyuo paa nara doko silyambinyi. Kamongo Anatu dokome namba kyawa yaki nyuo koo keta pisapya dokona nakamba kondome kumulyu, leya.
RUT 1:14 Dopa leyasa deeko ipwa kuku nyuo ee leyambi. Lapala Opa baame enda aeyange doko yako lao nyinyi pyuo petena lapala baa banya wambu dupwa keta range peya. Dopa pyuo peyamopape Uruti baame aeyange yaki nyii nara ingiya.
RUT 1:15 Dopa piyasa kandapala Nayomimi Uruti lamaiyuo, Kanda, embena enda yango doko banya wambupi dee banya mee bange anatuŋu lengepe dupwana range pana pelyamolamo dokona anda range role pyao pupwa.
RUT 1:16 Dopa leyamopape Urutimi isingi lamaiyuo dopa leya. Nambame emba yaki nyii lao pisa napipi. Dopako pyuo embapa role pyao paa napipi lao kata rokwa napipi. Emba anja mendasa parene dupwana namba paro. Emba anja mendasa palirinyi dupwana namba paliroko. Embena wambu dupwa nambana wambuko dee embena Anatu doko nambana Anatuko ingyara.
RUT 1:17 Emba anja mendasa kumarene dokona namba kumaro. Dokonako namba malu pirami. Namba kinyi kinyi kana minyuo lalu lao leto. Yuu gii lete pisirunu dokopa embapa wakale wakale lili pyuo pisa naro. Daa lapala dopa piru ramo doko Kamongo Anatunya randa andake doko namba keta epo palena leto, leya.
RUT 1:18 Uruti Nayomipa role pyao paramba lao suu pyao oteyamo kandapala Nayomimi dee mende lara ingya naya.
RUT 1:19 Nakamba pao karo yuu Beteleme dokona pao pyaka siyambi. Pao pyaka siyambinyi dokopa wambu dupwame mona nembo kando nyiyami. Kandapala enda dupwame doko Nayomisi? piso soo leyami.
RUT 1:20 Namba Nayomi laa nalapape. (Kingi doko rae maingi dopale.) Anatu Porai Wakasa dokome randa andake jiya. Renge dokona namba kingi Mata lalapape, leya. (Kingi doko ingi randange dopale).
RUT 1:21 Namba dae yaki nyuo peyo dokopa bange malu siya dae anda kapu kyuo ipunu dokopa Kamongo Anatumi namba kingipa lanyuo ipya. Kamongo Anatu Porai Wakasa dokome namba randa joo elyape keta palya napyamo dokopa akipamo namba kingi rae maingi doko letaminyi?
RUT 1:22 Pii dake Nayomi yuu Moape yaki nyepala enda aeyange Moape range doko rolo pyao yuu Beteleme epeyambi doko. Nakamba Beteleme epo pyaka siyambi doko yuu gii isa bali jingi kanda soo lyingi dokopa epeyambi.
RUT 2:1 Nayominya akalinginya akalyanda dokona akali mende Bawase lenge. Baa akali numi ingyuo kareya. Akali doko Nayominya akalingi Elimeleke kumuyamo dokona ree palunde kareya.
RUT 2:2 Urutimi Nayomi lamaiyuo leya. Anyi yulu akali dupwa bali jingi pyakepelyaminyi dokona yaki nyerami dupwa yapo nyela parowale. Akali lapome namba kapa nakamana ee dokona yulu pii larami ramo dokopa nakamana matarena karo bali jingi yaki nyerami dupwa mungyala paro, leya. Dokopa Nayomi baame isingi lamaiyuo, Nambana anyi emba kapa pela pale, leya.
RUT 2:3 Dokopa Uruti baa ee mendena papala yulu akali dupwame bali jingi pyakepo peyaminyipa baa matarena enakapala bali jingi yaki nyiyami dupwa yapo nyuo peya. Uruti baa kamenge ingyako Elimelekena ree palu kulisa akali Bawasena ee dokona peya.
RUT 2:4 Dokopa Bawase baa yuu Beteleme dokona karo epapala banya yulu akali dupwa kando lamaiyuo, Kamongo Anatu nakama pipya role pyao karena leya. Dokopa yulu akali dupwame isingi lao, Kamongo Anatumi emba elya pyuo nyisoko karena leyami.
RUT 2:5 Dokopa Bawaseme banya kendemande akali yulu rapu pingi doko piso soo, Enda mapwae karamo doko apinyase? leya.
RUT 2:6 Kendemande akali dokome isingi leya. Enda doko yuu wakale Moape dokona rangende Nayomi anda epeyamo dokopa role pyao epeyambi dokoŋo.
RUT 2:7 Dokopa namba piso sokondali pyuo lapya, Namba yulu akali pilyaminyi dokona bali jingi pyakepasi dupwa malu palyuo karala pupuli yaka lapya. Dopa lapala enda baa yangamana piso yulu pyuo pao ene dae ee andana imambu soo petamo, leya.
RUT 2:8 Enakana Bawaseme Uruti lamaiyuo, Ee wakale mendasa bali jingi pyakepasi mungyala paa napala ee dakenako nambana kendemande enda dupwa pipya pyuo karena leya.
RUT 2:9 Anja bali jingi lyuo karaminyi lao karo kandapala dokona role pyao karalapape. Emba lao nembo pii nana lao akali dupwa lamaipu. Ipwa nano piya kande dokopa ipwa kamunyi pisingi pee dokona petamo doko napapu piri, leya.
RUT 2:10 Dokopa Urutimi ponga napala yuunya lenge kambu suu lapala Bawase lamaiyuo leya. Namba yuu naneta range doko akipamo namba kando rae maiyuo rau lao pii letene? leya.
RUT 2:11 Bawaseme isingi leya. Embena akalinyi kumapeyamo dokopa embena aeyane doko yulu pyuo nyiso petene dupwa peparae langiminyi sipu. Embena rakane endakinyipi yaki nyuo embena yuu range doko yaki nyuo epo wambu emba soo gisa nange dupwa pipya palyuo karo pilini doko namba silyu, leya.
RUT 2:12 Emba dopa piinyi renge dokona Kamongo Anatumi yano nyuo jinya. Isaraele wambunya Kamongo Anatu dokona awa piruŋu lao epee dokona lao masa narene dokona yano andake apeto jinya, leya.
RUT 2:13 Namba embena kendemande dupwa pipya kapa makande minya napyamopape embame namba anjiki pyuo pii langipinyi dokome namba porainyi pyambulini, leya.
RUT 2:14 Nenge nenge mange dokopa Bawaseme Uruti kando leya. Emba dae repeta epapala borete kunjasi silyamo dokona nyepala waene dokona poeyapapu nare, lamaiya. Dokopa Uruti baa yulu akali dupwa pipya role pyao peteyaminyipa Bawase baame nenge bali jingi kisasi dokona nyuo Uruti maiya. Dokopa Uruti baa nao sikya piyamopa lapo kakana mee siya.
RUT 2:15 Nenge nao otapala Uruti baa bali jingi mungyala peya. Dokopa Bawase banya yulu akali dupwa lamaiyuo, Uruti baa bali jingi mungyuo yulu pinyale. Nakamame giyalya giyana pii nalapape lao poraiyuo lamaiya.
RUT 2:16 Bali nyuo simu pyao puu pyasi dupwana lapo ipyuo nyuo nyisa retarami dokopa Urutimi yapo nyuo epenale lao lao nemba nalapape, leya.
RUT 2:17 Dokopa Uruti baa ee dokona bali jingi yapo nyuo kareyamopa neta anda peyamo dokopa pyuo oteya. Dee bali jingi mungyuo nyiyamo dupwa kusapeme pyao lukwapala kapa angi nenge dupwa malu palyiyamopa pao sikyali kilokerame akalisa ingiya.
RUT 2:18 Bali jingi dupwa manjo anda peya. Papala bali jingi mungiyamo dupwa aeyange lasaka piya. Dopako pyuo nenge nao malasi minyiya dupwa maiyuo piya.
RUT 2:19 Dokopa Nayomimi Uruti baa kando leya. Epapu yuu anja emba bali jingi dupwa mungyuo karalene? Dee ee apinyandena yulu pyuo karapi? Kamongo Anatumi emba kando rape rape lapya doko elyape keta pisinya leya. Dokopa Urutimi Nayomi lamaiyuo, Ee range akali doko kingi Bawase lengendena yulu pyuo karapu, leya.
RUT 2:20 Dokopa Nayomimi Uruti lamaiyuo, Kamongo Anatumi piru lenge doko isa paa nange dokome wambu lete karaminyipape kumuyaminyipape dupwa nyisingi dokome Bawase baa elyape keta pisaramopa karena leya. Nayomimi leyamo dokonako lao, Akali doko baa nambwana ree palu dokona baame rapu pyuo nyisaraliŋi, leya.
RUT 2:21 Urutimi Nayomi lamaiyuo, Bawaseme namba pii doloma langipyamopape pii anginde langipya doko emba bali ee dokona nambana kendemande dupwa pipya yulu pyuo karo bali otaramo dokopa kaere, lapya, leya.
RUT 2:22 Nayomimi Uruti lamaiyuo, Kinyi anyi emba ee yulu mendena dokona pare ramo dokopa minyoko pirami dokona Bawasena yulu wambu dupwa pipya kararami doko keyange, leya.
RUT 2:23 Dokopa Urutimi Bawasena yulu wambu dupwa pipya role pyao pyuo karo bali witipi oteyamo dokopa kaeya. Uruti baa aeyange Nayomi dokopako role pyao palyuo karo piya.
RUT 3:1 Enakana Nayomimi Uruti lamaiyuo, Nambana anyi akali mende koto kandakaro. Dokopa emba kapa pyuo anda paliri.
RUT 3:2 Akali banya kendemande enda role pyao yulu pyakamyuo karapinyi Bawase kandapi doko nambwana anginde lyakande. Pii dae sepe. Rengya kwualepalepa Bawase baa bali kapa lukuo karara.
RUT 3:3 Dokona emba wate pyuo mondo lapala mamba wele kyaa pingi lapo yangapala komau keyange lapo nyuo pipala Bawase baa bali jingi pyao kararamo dokona pale. Dokopa pao dusa karalyane lao see nana lao pao kararenepa baa ipwa nengepe nao otenale lao karape.
RUT 3:4 Bawase baa luu palyuo seramo dokona anja palamo lao panda kandapala dokopa pao porangelye kimbu yambe pyaramo doko nyuo minyalyapala emba kimbu seramo dokona paliri. Dokopa Bawaseme emba dopa pyuo piri lao langira, leya.
RUT 3:5 Urutimi isingi lamaiyuo, Emba yulu pipi letene dusipa piru, leya.
RUT 3:6 Dopa lapala Uruti baa bali jingi pyao lukungi panda dokona papala aeyangeme leyamo pii dokona mende isa nemba nao piya.
RUT 3:7 Yuu gii dokopa Bawaseme ipwa nengepe napala baa sikya piyamopa rae maiyuo papala bali jingi pyakepasi malu palyiyami dokona palyuo siya. Siyamo dokopa Uruti ama elya kalo papala porangelye yapunaro paleya doko minyalyapala kimbu siyamo dokona pao luu palyuo siya.
RUT 3:8 Kukwa yuu gii dokopa Bawase baa walu lao lenge rapala parali paki kapu kyuo karo kandeyamo dokopa enda mende banya kimbu siyamo dokona palyuo siyamo kando yamaranguya.
RUT 3:9 Kandapala Bawaseme, Emba apisi? lao piso siya. Dokopa isingi lao, Namba Uruti embena kendemande enda doko. Emba ree palu akalyanda mendaki ingyuo emba kapa pyuo rapu piri ingilyamo dokona embame namba yokoya pyalase, leya.
RUT 3:10 Dokopa Bawaseme Uruti lamaiyuo, Nambana rakane, embame ree palunya yulu rape rape lao embena aeyane doko keta piinyako doŋo epapu akali kamongo pendewape dupwa apetarapu paeyo kara napinyi dokome yulu keyange wakasa pilini dokona Kamongo Anatumi emba keta elyape pisinya leya.
RUT 3:11 Kapa nambana rakane emba paka napipi. Yuu dae range wambu dupwame emba enda keyange lao soo otelyaminyi. Embame mende pyaka larene dokopa pyakaro.
RUT 3:12 Embame namba ree palu mendaki lapi doko kinyiŋi. Emba isaro piruliko doŋo dopa pipyamopape akali mende ree palu sukusa mende karamoko namba mee mende umbiliŋi.
RUT 3:13 Epapu kukwa dae palyuo kaepala yuu yangaramo dokopa akali dokome emba kapa rapu piru letape lao pyasaka pyuo sero. Akali baame kapa lara ramo doko keyangeko dee daa lara ramo doko Kamongo Anatu karalu karenge doko keta kana minyuo lalu lao lamaiyuo leto. Nambame emba nyepala rapu piru leto. Emba kapa luu pali puu, leya Bawasame.
RUT 3:14 Dokopa Uruti baa Bawasena kimbu siyamo dokona palyuo karo yangapala ene yangalana endenge siyamo dokopa wambu lapome kanda nana lao peya. Renge doko Bawaseme Uruti lamaiyuo, Emba dae epapala paene lao see nana lao pena leyamuli pyuo peya.
RUT 3:15 Enakana Bawaseme Uruti lamaiyuo, Embena komau andu pyuo ipinyi doko dasa minyuo epo pee lena leya. Minyuo epo pee leyamo dokopa Bawaseme bali jingi sikyali wakasa kilokerame akalisa lama ingiyamopa nyuo kulimbwakamiya. Dopa pipala nyuo manjo pena lapala minyalyakamiyamopa nyepala manjo anda taone dokona peya.
RUT 3:16 Uruti baa aeyangena anda peya dokopa aeyangeme piso siya. Mona, apa pyuo pao epelene? leya. Dokopa Urutimi lao Bawaseme nenge maiyamopape dee pii leyamopape dupwa peparae lamaiya.
RUT 3:17 Dopako pyuo Urutimi aeyange lamaiyuo, Bawaseme anda mee kingipa paa nare lapala bali jingi malu dapwa baame jipyamo manjo epano, leya.
RUT 3:18 Dokopa Nayomimi isingi lamaiyuo, Nambana anyi emba mali soo apa pilyamo lao kando piso kaeyape. Bawase baame sepala kaeya nara pii lao otapalako kaeyara, leya.
RUT 4:1 Bawase baa wato lenge mare Beteleme kame kambu konando penge mare dokona pao peteya. Dokopa aopa Elimelekena tee palu repeta Bawaseme arome piyamo akali doko epeya. Dokopa Bawaseme akali doko lamaiyuo, Nambana puu minyingi dasa epo pisipunya, leya. Leyamo dokopa papala isa peteya.
RUT 4:2 Dopa lapala Bawaseme taone dokona range akali kamongo akalisa mendaki nyepala opetae isa petena leyamo dokopa peteyami.
RUT 4:3 Enakana Bawaseme Elimelekena ree palu kulisa doko kando leya. Epapu Nayomi yuu Moape piso anda kapu kyuo epapala nambwana ree palu Elimelekena yuu dupwa ropo pyao mainya lao letamo, leya.
RUT 4:4 Dopa pilyamo lao langinya suu pyapunde dokome lalono, leya. Epapu dakepa emba ropo pyalana suu pyare ramo doko kamongo akalipi mee wambupi petaminyi lenge kambu dokona ropo pyalase. Dee emba daa lao suu pyare ramo doko namba langiri. Wambo doko embame ingyuo ropo pyare. Namba matasa kandapi. Emba kaere ramo dokopako nambame ropo pyaroŋo namba langipi, leya. Akali dokome isingi lao, Nambame ropo pyaro, leya.
RUT 4:5 Enakana Bawaseme leya, Emba Nayomi keta yuu ropo pyare ramo doko Uruti yuu Moape range enda waiya doko embena etene ingyare. Dokopa yuu doko pao wambu kumuyaminyi ree palu dokona ingyuo sera.
RUT 4:6 Dokopa akali dokome Bawase isingi lamaiyuo, Namba ropo pyaro doko rolae ingipyamopape yuu doko ropo pyaro dokopa namba rangena moyange dupwa kwaeyara ingilyamo dokona namba kaeyarowale. Namba ropo pyapengele doko embame ropo pyalase, leya.
RUT 4:7 Yuu yango alowa pyuope dee yuu ropo pyaope yulu pipala dokopa Isaraele dokona dopa pyuo rolenge. Yuu ropo pyao maingi akali dokome banya kimbu suu doko neta nyepala ropo pyala epenge akali doko maingi. Dopa pingi renge doko Isaraele wambu dupwa pii lamwa doko epapu otelyamo lao lasaka pingi.
RUT 4:8 Akali dokome Bawase lamaiyuo, Embame ingyuo ropo pyalase lapala banya kimbu suu neta nyuo Bawase maiya.
RUT 4:9 Bawaseme akali kamongo dupwape mee akali dupwape lamaiyuo leya. Malone Kiliyone Elimelekemoona moyange bange peparae Nayomi keta ropo pilyunu dokona nakama peparae epapu usinisi ingyarami.
RUT 4:10 Pii mende doko Uruti yuu Moape range Malonena enda waiya doko nambana etenge ingyara. Dopa piramo dokopa akali kumuyamo dokona moyange bange dupwa banya ree palu dupwa keta sera dokopa akali dokona kingi isa paa nana lao nyuo kalyapusa pilyamo. Epapu dokona nakama usinisi ingyalapape, leya.
RUT 4:11 Dokopa mee wambupi kamongo akalipi dupwame lao, Epapu namwa usinisi ingyuo karamano, Kamongo Anatumi enda dake embena anda ipyamo doko keta Oresolo Liyapa Isaraele wane wai kisinyi pyambuyambi dopale inginyi pyambunyale. Yuu Eporata dokona emba kamongo ingyuo kararenepa yuu Beteleme dokona embena kingi ketae penale, leyami.
RUT 4:12 Kamongo Anatumi wane wanekepe enda mapwae dake keta jeramo manjarambinyi dupwa Peresena ree palu Juta Tamapana ikinyingi dopale ingyara, leyami.
RUT 4:13 Dokopa Bawaseme Uruti nyepala lanyuo banya anda peya. Dokopa Bawase Urutipa paleyambinyi dokopa Kamongo Anatumi enda doko keta wane mende maiyamopa mandeyambi.
RUT 4:14 Enda dupwame Nayomi lamaiyuo, Kamongo doko lakandamana, leyami. Yuu gii dakepa Kamongo Anatumi apusinyi mende emba rapu pira lao jipya. Wane doko banya kingi ketae paramopa Isaraele wambu dupwame soo kapa piraminyipa karenale.
RUT 4:15 Wane dokome emba emarene dokopa rapu pyuo nyisaramopa rae maiyuo manda rao emo pare. Embena aeyane wane manjakapya dokome emba mona retelyamo dokona ikinyi yanda ipingi nyepome emba nyisaramili doko suu pyao aeyaneme kapa pipya lyamo, leyami.
RUT 4:16 Nayomimi wane doko kupyuo mona anda pyambwapala mondo lao rapu pyuo peteya.
RUT 4:17 Enda range ree palu sukusa lapome wane banya kingi Opeta leyami. Dee enda dupwameko lao wane doko Nayominya, leyami. Wane baa ando karo banya mandeyamo doko Jese lenge. Jese baa Dapitinya rakange.
RUT 4:18 Pii dake Peresena rara dokona piso pao Dapiti mandeyami. Akali Peresa dokome Esarono mandeya, Esaronome Orame mandeya, Orameme Aminatape mandeya, Aminatapeme Nasano mandeya, Nasanome Samone mandeya, Samoneme Bawase mandeya, Bawaseme Opeta mandeya, Opetame Jese mandeya, Jeseme Dapiti mandeya.
1SA 1:1 Akali mende Eporaime rara dokona Elekana lengende yuu taone Orama lenge doko yuu Eporaime doko yuu kyau pyalya pyana pingi dorena siyamo dokona palyuo kareya. Baa Jerokamena ikinyingi. Banya kauwange Eliyu lenge. Baa Toyunya ree palu dokonande dee banya rara kuki Supi lenge.
1SA 1:2 Elekana baame enda lama nyiya. Nyiyamo dolapona kingi Ana Peninapa lenge. Penina baa wane mandeyamopa Ana mee pote peteya.
1SA 1:3 Elekana baame ee kana peparaena lao banya taone Orama lenge dokona palyuo Kamongo Porai Wakasa dokona lao lakando mena pyao kiso maiyala yuu Sailo dokona peya. Yuu Sailo dokona Ilaina ikinyingi Opini Pineyasepa dolapo Kamongo dokona purisi akali ingyuo kareyambi.
1SA 1:4 Elekaname banya mena pyao kiso maiyuo dokopa lapo etenge Penina maiyuo dee banya wane dupwa mendaki mendaki lao maipa piya.
1SA 1:5 Maiyuo karo dokopa enda Ana baa kandokondali pyuo maipa piya. Kamongome enda Ana banya ingi poraiyamopape akali baame mona andake reteya.
1SA 1:6 Dopa piyamopape Kamongo baame Ana wane mende maiya nalyamo lapala Penina baame enda yango doko kando giyalya giyana pyuo pendewa nembele lao peteya.
1SA 1:7 Ee kana peparaena dopa pyuo karalu kareyambi. Dopa pyuo Kamongona anda peyaminyi yaka lao Peniname Ana imbu singi nyakamipako piyasa eeyoko lao piso nenge dupwa naa napa piya.
1SA 1:8 Akalingi Elekaname baa piso soo, Ana, emba apa pipyasa eeyoko lao petene? Akipamo nenge doko wasaka pilipi? Akipamo yuu peparae mona kendame kumuo pisipa pyuo karepe? Wane akalisa mandeyambali doko embame namba mupwa lao suu pyaa napilisi? lao piso siya.
1SA 1:9 Yuu mendepa yuu Sailo dokona piso nenge nao otapeyaminyi dokopa Ana baa roya kareya. Dokopa Ilai purisi akali doko Kamongona tembole anda kambu banya petenge mare dokona peteya.
1SA 1:10 Aname Kamongo lao ateŋa lao dokopa ingi rando ee andake lao ateŋa lao peteya.
1SA 1:11 Baame lalu lao lenge pii doko alowa pii nara ingyuo lao, Kamongo Porai Wakasa embame namba embena kendemande enda kandape. Randa nyilyu dokona nambana lao suu pyapala kame soo kaeya napipi leya. Embame ikinyingi mende joo lare ramo doko nambame baa emba keta pyamalyapala lalu lao lenge pii ingyuo lao kyawasi rokwa nao mee kareta karena laro, leya.
1SA 1:12 Enda Aname Kamongo kando ateŋa lao rokonda nayasa Ilaime kambu kandaro siya.
1SA 1:13 Baame kambu romo romo pyuo ateŋa leyamopa pii angi lumbu laa nayasa Ilaime baa biya napala pyuo pisamo lamo lao suu piya.
1SA 1:14 Suu pyapala, emba rangeme biya napala peto lao kopyali minyuo pisa napipi. Biya naa kaepala mee petengenyili pyuo pisipi, lamaiya.
1SA 1:15 Dopa leyasa Aname isingi lao, Akali pii doko kinyi letende daa. Namba biya mende naa napu. Namba randa nyepala Kamongo baa keta ateŋa lao polo lamaiyalono.
1SA 1:16 Namba enda kyakangendeme lao petamo lao suu pyaa napipi. Namba kopyali pakana palipyasa dokona rae mai napala dopa pyuo ateŋa lao pisano, leya.
1SA 1:17 Dopa lapeyamo dokopa Ilaime lao, Mona kyuu lao seramo pupi. Isaraele wambunya Anatu dokome kee lapinyi doko jinyale, leya.
1SA 1:18 Leyamopa Aname lao, Embame namba kondo karalu karape lao lamaipala peya. Papala nenge nao mona rando peteya doko kame soo kaeyo peteya.
1SA 1:19 Dokona yangama Elekana banya ree palupi wamba kukwa sipurapala Kamongo mona maiyuo kingi lao lakandeyami. Lakandapala nakamana anda yuu Orama dokona peyami. Papala Elekana Anapa role piyambinyipa Kamongome ateŋa lao peteyamo dokona lao pii kapa wai pyakamiya.
1SA 1:20 Dokona lao baa wane ingiyamopa wane ane mandeya. Manjipala Ana baame wane kingi Samyuele leya. Samyuele leyamo renge doko nambame Kamongo piso siyu dopaleŋe lao lamaiya.
1SA 1:21 Elekana banya ree palu pipa yuu Sailo dokona ee kana yaka lao yuu gii dokopa Elekana baame mena pyao kiso Kamongo mainginyili pyuo maiyala penge yuu gii doko kamba epeyamopa peyami. Kamongopa kiso mairuŋu lao lalu lao leyamo doko opetaeko kiso maiyala peya.
1SA 1:22 Dopa piyamopape Ana baa paa napala banya akalingi ene panya kareyamopa lamaiyuo, Wane anju naa naramo dokopa Kamongona anda karalu kararaŋa lao lanyuo paroŋo leya.
1SA 1:23 Dopa leyasa Elekaname isingi lamaiyuo, Anju pyakapala dokopa Kamongona anda pareŋe suu pyao leteneli pyuo anda mee pisipi, leya. Dopa lapala, Dee Kamongo dokome embena pii lene doko angi leyamuli pyuo pyaka sakana leya. Dopa leyasa Ana anda dokona wane anju maiyuo piso kaeya.
1SA 1:24 Enda Ana banya wane anju pyakapala baa kuki ingiyamopape lanyuo panya dokopa mena bulamakao kali angi mendepe nenge palawa kilokerame akalisape ipwa waene lapope nyuo pipala lanyuo Kamongona anda yuu Sailo dokona peyambi.
1SA 1:25 Papala mena bulamakao doko pyao retapala wane doko lanyuo Ilai kareyamo dokona peyambi.
1SA 1:26 Aname Ilai kando lao, Pii mende langirole lapala lamaiyuo, Namba enda mende dakena karo Kamongo lao ateŋa lao kareya kande dokoŋo lao kando soo gisa nalepe? leya.
1SA 1:27 Nambame wane dake jinya lao Kamongo dokona ateŋa leyonopa angi leyono doko dake jiyaŋa leya.
1SA 1:28 Renge dokona lao baa Kamongo manjo mailyuŋu. Baa kararamo gii dusipana Kamongona ingyuo karalu kararaŋa, leya. Dopa lapala dokona karo Kamongo lakando kingi leyami.
1SA 2:1 Ana baame dopa pyuo ateŋa lao peteya. Kamongome nambana monarena rae maiyanyi pyambwapya. Baame mende pipyamo dokona lao rae mailyu. Nambana randa jingi wambu dupwa kando giyalya giyana pilyu. Anatumi nyisapya dokona namba raeme kumulyu.
1SA 2:2 Mendali Kamongo poo pyasi dopale ingyuo kara nalyamo. Mendali Kamongo dokopa manda manjo karande daa. Anatu baa namwana konambena mendeke ingyuo karamo dopale ingyuo karande daa.
1SA 2:3 Kamongo doko baa Anatu karamo dokome akalinya pilyaminyi dupwa soo karamo. Yulu koo keyangepena yapalya yapana pyuo lao karenge. Dokona lao emba piimi range yuku napala mangalyilinyi doko kaeyape. Pelyanyi nembo range mupwa lao suu pyao pii leene doko kui lape.
1SA 2:4 Ami yanda singi porai dupwana yanda imbu dupwa rokapyamopape poraiya nange dupwana yulu doko andelyamo.
1SA 2:5 Nenge kakana silyamo nao pisamo dupwa nenge isa pelyamo. Dokona lao yulu mendena pyakamipala nenge nyuo narami. Lopange dupwa dee lopa nalyamo. Ingi porailyamo petenge doko wane yanda ipingi nyero kando nyilyamo. Wane malunya endangi doko wane mendepa role pali nalyamo.
1SA 2:6 Kamongome pyao kumasepala dee lete nyingi. Baame wambu kumuo penge panda nembapala dee nyingiko.
1SA 2:7 Kamongo baame akali lapo pendewa inginyi pyambwapala menge dupwa kamonganyi pyambungi. Baame lapo inyimungyu kuki ingyuo kararaminyipa menge dupwa andake ingyuo karena lao pingi.
1SA 2:8 Baame pendewa pelyamo palyuo karenge dupwa nyiso dee yangilyamo pee paro singi dupwa nyuo minyalyuo pingi. Baame nakama kiŋinya akali mupwa dupwa pipya puu minyinyi pyambungi. Baame nakama yulu andakena wambumi ketae nembaramili dupwa maingi. Yuu doko Kamongome kanda soo susa pyao waso reteyamo silyamo. Yuu dokona baame bange peparae konda pyuo wasiinyi pyambuya.
1SA 2:9 Kamongome wambu banya yulu kare kare soo pyuo karenge dupwa kyawa minyingi. Dopa pilyamopape yulu koo pingi dupwa iminjingi dokona nyuo ope ape pokenge. Akali rangena poraindeme koo dupwa nyuo kalyuo anamengende daa.
1SA 2:10 Kamongome yake panda piso pii porakaiyuo lapala banya nyisu petenge dupwa pyao kokwa sinyi nembara. Kamongome yuu muu peparaena wambu nakama yapalya yapana pyuo lara. Baame banya kiŋi doko porai renge maipala banya rombo palyisi kiŋi dokome wakale dupwa pyao isa palyinya lao pira, leya Aname.
1SA 2:11 Dokopa akali Elekana banya yuu Orama dokona dee lambu peya. Peyamopape wane doko purisi akali Ilai yuu Sailo dokona Kamongona yulu pyuo kareyamo dokona role pyao nyiso kareya.
1SA 2:12 Ilaina ikinyingi dolapo kapa kara nayambi. Nakamba Kamongome mende lalyamo lao kale yuku see nayambi.
1SA 2:13 Purisi dolapome mena minju naramili pyuo nyinya lao mawa pii retenge doko kaepala yalalya yalana piyambi. Dopa pyuo akali mendeme mena pyao kiso maiyala epeyamo dokopa purisinya kendemande akali dokome isakuli paka rema karetande minyuo epenge.
1SA 2:14 Epapala mena minju rao karenge penge dokona ene rao karelyamo dokona rano karapala dokona pare peta epelyamo doko purisinya ingingi Ilaina ikinyingi dolapome yuu Sailo dokona Isaraele wambu dupwame mena pyao kiso maiyala epeyaminyi dokona dopa pipa pyuo kareyambi.
1SA 2:15 Koo mende opetaeko pyuo mawa pii dokona yaleyambi. Mena kapa dorena kisinyi ene nembapa nayami dokopa purisi akalinya kendemande dokome epapala mena pyao kiso maingi akali doko kando lao purisi baa mena lapo isarena kisara lao kyaka maikamipi lenge. Mena sanena kisasi doko rae mai naraŋa kyaka mainya lenge.
1SA 2:16 Dokopa baame isingi lamaiyuo, Kapa kisinginyili pyuo kisa paramanopa nyelapaleŋe leya ramo dokopa kendemandeme lao, Daaŋa dakepa namba jepe. Daaŋa lapala jii narami ramo dokopa rolae nyoloponoŋo lenge.
1SA 2:17 Kamongo mena pyao kiso maingi dokona Ilaina ikinyingi dolapome male male lapala mambu inginyi palyiyambinyisa Kamongo dokome ama koo pilyambinyi lao suu piya.
1SA 2:18 Wane Samyuele baa komau yapasinde wapwaro karo Kamongona yulu dokona kaeya nao piya.
1SA 2:19 Banya endangimi rakangepa ee kana yaka lao mena pyao kiso maipa pinginyili pyuo maiyala pao karo dokopa ikinyingi banya komau kimbunya pao suu lao pee pingi mende waso minyakamyuo papa piya.
1SA 2:20 Dokopa Ilaime Elekana etengepa yako lao lamaiyuo, Elekana emba Kamongome enda dake keta wane lapo wane Anatu maipinyi dokona panda nyinya lao jera lapa piya. Dopa lapa piyamo dokopa anda papa piyambi.
1SA 2:21 Kamongome enda Ana elyape keta pisipala wane rema wanake lamape dee konda pyuo maiya. Wane Samyuele Kamongona yulu dokona moko minyuo pyuo karo ando peya.
1SA 2:22 Ilai baa emo oteyamo dokopa ikinyingi dolapome Isaraele wambu dupwa keta yulu apa pyuo pyakamilyambinyi lao soo kareyamopa enda Kamongona komau anda kambu konandowame dokona yulu pingi dupwa pipya reto palambinyi leyaminyi siya.
1SA 2:23 Sepala nakamba lamaiyuo, Wambu peparaeme nakamba yulu koo pilyambinyi lao langimiŋi. Akipamo koo doko pilyambisi? leya.
1SA 2:24 Rakane nakambame yulu koo dopale doko yaki nyuo kaeyapenge lao silyu. Kamongona wambu dupwame kando mambo pyao letaminyi doko kwaeyo pelyamo.
1SA 2:25 Akali mendeme akali yango mende kando koo pirande ramo doko Kamongome banya lao pii lakamira ingilyamo. Dopa pipyamopape akali mendeme Anatu kando koo pira ramo doko apimi soo lakamirase? leya. Dopa leyamopape Kamongome pyalana suu pyao oteyamo dokome nakambame rakangena mana pii doko mende lalyamo lao sakami nayambi.
1SA 2:26 Dokopa wane Samyuele baa Kamongopa mee wambupinya lenge kambu dokona rolae wakasa pyuo ando pelyamo lao kandeyami.
1SA 2:27 Kamongona pii dake poropeta mendeme minyuo epo Ilai lamaiyala epeya. Embena imbwange akali Erone banya ree palu pipya kiŋi Perona karapusi yulu pyakamyuo yuu Isipi paleyamo dokopa namba rangeme epo baa keta maro leyoŋo, leya.
1SA 2:28 Isaraele doloma kareyaminyipa banya ree palu doko nambame rombo palyuo purisi wambu ingyuo rendamu pingi kiso maingi kana pyarena kiso yulu pyuo karo purisinya komau wapuo nambana yulu dokona soo karena leyo. Nambame kana pyarena kisiyaminyi rao kareyamo dokona nakama lapo kata rolaena kapa nyinya leyo.
1SA 2:29 Akipamo nakama yama lenge kambu nyepala nambana kisakana lapu dupwa napuli napuli lao suu pilyamisi? Akipamo nambana wambu dupwame namba pyao kiso jiminyi dokona kapa palenge angi dusa ingyuo Ilai embena wane dolapo namba lakandarenele pyuo lakanda minya minya pyuo nao karena lapala kaelese?
1SA 2:30 Ilai embena ree palu dee embena rarape dupwa namba Kamongo Isaraele wambunya Anatu dokome purisi yulu yuu peparaena piramiŋi lao langyuo kaeyo leyo kande. Dopa leyoko doŋo dee dakepa nakambameko pyakamili lao suu pyaa nalyo. Nakambame pingi kandale doko suu pyao mendeme namba lakanda minya minya pirami dupwa kando isingi dopako pyuo lakando dee namba kilya kandanyi nembarami dupwa isingi kilya kandaroko.
1SA 2:31 Epapu embena ree palu dee embena rarape dokona wanyane akali dupwa langa kanya pyao kumakaronopa pyuo mendalipi karo emapala kuma narami. Gii doko epapu dakeŋe.
1SA 2:32 Nambame Isaraele wambu doloma renge keyange mairunu dupwana kando gyaa soo yango palyuo kararaminyipape nakamana ree palu dokona mendepe karo emaraminde daa.
1SA 2:33 Dopa piramopape embena ree palu dokona mende lete wai pyaronopa baame purisi yulu pyakara. Pyakaramopape baa lenge koo ingyuo saka nalya nana pyuo mee isa sulu sulu karara. Embena para pyao nyerene wakale dupwa peparae randako nao kumuo parami.
1SA 2:34 Dopa pyuo embena wane Opini Pineyasepa yuu gii mendaki dokonako kumarambinyi kandarene dokopa namba leto dake kinyi lalyane lao panaramo kandare.
1SA 2:35 Nambame purisi mende yulu kare kare soo pyuo dee nambame yulu peparae suu pilyu dokona moko minyuo pirande kando rombo palyaro. Nambame baa para pyao nyeraminyi dupwape kiso mairunupa dupwame yuu peparae nambame kiŋi mende rombo palyarono lenge kambu dokona nambana yulu pyakao kararami.
1SA 2:36 Embena para pyao nyeraminyi dupwana lapo lete kararami ramo dupwame nenge nalena dokopa purisi pisiramo dokona papala kana nengepe jinya lao kee lao dee purisi dupwa nyisamape lao poraiyuo piso soo pirami.
1SA 3:1 Yuu gii dusipana wane Samyuele baa Kamongona yulu pyakamyuo akali Ilaime yulu pinya leyamuli pyuo pyuo kareyamo dokopa Kamongo keta piso pii kuki iki epo dee pii repa repa yuu gii lapo iki pepapu piya.
1SA 3:2 Yuu gii kukwama mendepa Ilai baa oo repeta lenge kwaeyara ingiyamo doko banya luu palenge rate dokona paleya.
1SA 3:3 Dokopa panda poo pyasi Anatunya Kana Minyuo Lalu Lao Lenge Pii Palenge Bokote siyamo dokona Samyuele baa luu paleya. Paleyamo dokopa yuu yangapa nayamopa lambe doko mee rao kareya.
1SA 3:4 Dokopa Anatumi Samyuele lao kyakale leyamo dokopa Samyuele Yaa, leya.
1SA 3:5 Yaa lapala Ilai paleyamo dokona makando papala lamaiyuo, Namba kyakale lapi dokona dae epelyo, leya. Leyamopape Ilaime isingi lao, Nambame kyakale laa napu. Dee pali puu, leya. Dokona lao Samyuele dee kamba pali peya.
1SA 3:6 Pao palipiyamo dokopa Kamongome dee kamba Samyuele lao kee leya. Kamongo dokome yuu mendepape pii lamai nange dokona wane dokome doko Kamongome lalyamo lao soo nyii naya. Dokona lao baa sipurapala Ilai paleyamo dokona papala lao, Embame namba kee lalene doko namba dae epelyo, leya. Leyamopape Ilaime isingi lao, Nambana wane, nambame emba kee laa nalonoŋo. Emba kamba kapu kyuo pali puu, leya.
1SA 3:8 Kamongome yuu rema ingyuo Samyuele kambako kyakale leya. Dokopa Samyuele sipurapala Ilai paleyamo dokona papala dee lao, Embame kyakale lalene dokona dee epelyo leya. Dokopa Kamongome wane doko kee lalyamo lao Ilaime soo nyiya.
1SA 3:9 Soo nyepala dopa lamaiya. Dee pali pupi. Palirene dokopa dee kyakale lalyiyasili dokopa Kamongo embena kendemande doko dae soo palo lape, leya. Dopa lamaiyamo dokopa Samyuele dee pali peya.
1SA 3:10 Pao palipiyamo dokopa Anatu epo dokona karapala dee wambo leyamo doko suu pyao, Samyuele, Samyuele, lao kee leya. Dokopa Samyueleme isingi lao, Laa, embena kendemande doko soo palamo, leya.
1SA 3:11 Dokopa Anatumi dopa lamaiyuo, Nambame Isaraele wambu dupwa keta randa andake mende peeyaronopa wambu peparae doo seraminyi dupwa yamarangyuo mona nembo kararami, lao lamaiya.
1SA 3:12 Yuu gii doko pirunu dokopa Ilaina ree palu dupwa keta randa wakale wakale mairuŋu lao leyonuli pyuo maiyuo otaro, leya.
1SA 3:13 Nambame baa wamba lamaiyuo epeyo. Doko banya wane dupwame namba kando koo laminyi dokona nambame banya ree palu dupwa randa maiyuo karalu kararo, leyo. Doo koo laminyi doko Ilai baa kando soo karapalape mende pyalana pyuo kaena laa nange.
1SA 3:14 Dokona lao nambame Ilaina ree palu wambu dupwa kando lalu lao lao, Nakamana koo dupwa nyuo nembara lao mena pyao kiso maingipi mee bange maingipi kata mende see nalu nao nara ingyara, leya.
1SA 3:15 Dopa pipala Samyuele baa mee rate dokona palu siyamopa yuu yangeya. Dokopa baa sipurapala pao Kamongona anda kambu doko kii lumbuya. Lumbwapala pii repa repa piyamo dupwana lao Ilai lamaiyalana pakaya.
1SA 3:16 Dokopa Ilaime baa kyakale lao, Nambana wane, Samyuele, leya. Leyamo dokopa Samyuele isingi, Yaa, leya.
1SA 3:17 Leyamo dokopa Ilaime piso soo lao, Kamongo dokome emba apa langipyase? Namba kando mende leya kande doko kalyamaka napipi. Emba doo langipyamo dupwa peparae namba langya nare ramo dokopa Anatumi emba randa andake jera, leya.
1SA 3:18 Dokopa doo lamaiyamo dupwa peparae Samyuele Ilai polo lamaiya. Mendepe kalyamo palena lao kaeya naya. Dokopa Ilaime lao, Baa Kamongoŋo. Baa range keyangeŋe lao mende pinya suu pilyamo doko mee kapa pira, leya.
1SA 3:19 Samyuele ando oteyamo dokopa Kamongo doko baa keta role pyao kareya. Role pyao karapala Samyueleme pii leyamo dupwa angi kinyi dokonako pinya lao piyasa angiko pyuo peya.
1SA 3:20 Dokona Isaraele wambu yuu pinjingi paki piso pao paki suu lao dupwa peparaeme Samyuele baa Kamongona poropeta angi lao soo nyiyami.
1SA 3:21 Dokopa yuu Sailo dokona Kamongome wamba Samyuele keta pano epeyamo dokoko suu pyao epapa piya. Dopa piyamopa Samyueleme Isaraele wambu pii lamaiyamo siyami.
1SA 4:1 Yuu gii dokopa Pilisitia rara dupwa nyuo malu palyapala Isaraele rara dupwa pyala panya piyami. Dokona lao Isaraele dupwame nakama pyala panya kata nyiyami. Doko Isaraele dupwa komau anda pipala yuu Epenesa dokona paleyami dee Pilisitia wambu dupwa yuu Apeke dokona komau anda dupwa pyuo paleyami.
1SA 4:2 Enakana Pilisitia wambu dupwame Isaraele wambu dupwa pyao yanda andake pyuo wini pipala akali taosande kisima (4,000) pyao kumasiyami.
1SA 4:3 Dokopa ami yanda singi lapo kapu kyuo nakama paleyami dokona epeyami dokopa Isaraele akali mupwa dupwame lao, Akipamo Kamongo dokome epapu namwa kyawa yaki nyuo Pilisitia wambu dupwame namwa pyao isa palyuo nakama wini pinya lapyase? Kamongome namwa role pyao papyuo karapala namwana nyisu petenge dupwa keta kyawa lete nyuo nyisara lao namwame yuu Sailo dokona banya Kana Minyuo Lalu Lao Lenge Pii Palenge Bokote silyamo doko nyela monale, leyami.
1SA 4:4 Bokote ketae dokona aŋala lama wasisi petenge. Doko suu pyao Kamongo Porai Wakasa dokona kiŋinya isa petenge dopale ingingi. Dokona lao nakamame yuu Sailo dokona akali lapo papala. Kamongome bokote doko nyuo soo epeyaminyi dokopa Ilaina ikinyingi akali Opini Pineyasepa lenge dolapo role pyao epeyambi.
1SA 4:5 Kamongona Kana Minyuo Lalu Lao Lenge Pii Palenge Bokote epo pyaka sepeyamo dokopa Isaraele wambu dupwa rae maiyuo pii ketae palyuo leyaminyisa yuu dupwa pyuku pyuku leya.
1SA 4:6 Dokopa Pilisitia wambu dupwame pii poraiyuo leyami doko sepala lao, Ipuru wambu komau anda pyuo palaminyi dokona pii porai letaminyi doko selapape. Doko renge apa pyuo letamisi? leyami. Enakana nakama Kamongona Kana Minyuo Lalu Lao Lenge Pii Palenge Bokote doko Ipuru wambu paleyami dokona epo pyaka silyamo leyami doko sepala
1SA 4:7 nakama pakame kumapala lao, Mee bange anatu mende wambu dumu palimi dokona ipwaamo. Namwa isa pwaamano doo pipyamo kando letaminyi doko suu pyao namwa kando mende wamba pii naya kande leyami.
1SA 4:8 Mee bange anatu porainya renge palenge dupwana kingi raka lao namwa apimi kyawa lete nyerase? Mee bange anatu dupwame Isipi wambu dupwa yuu muiyane dokona pyao kumasiyami.
1SA 4:9 Pilisitia wambu dupwa kando paka nao porai ingyuo karalapape. Karapala akalimi yanda pingi dopale ingyuo pyalapape. Dokona Ipuru dupwa wamba namwana kendemande ingyuo kareyami dopale ingyuo namwa nakamana kendemande ingyasaramaŋa akalimi karo pingi dopale ingyuo kando pyalapape.
1SA 4:10 Pilisitia wambu yanda poraiyuo pipala Isaraele yanda singi taosande akalisa rema (30,000) pyao kumakayami dokopa Isaraele wambu dupwa ralo bolombalo lao peyami.
1SA 4:11 Anatunya Kana Minyuo Lalu Lao Lenge Pii Palenge Bokote doko nyuo minyuo peyami dee Ilaina ikinyingi lama Opini Pineyasepa dolapo opetaeko pyao kumakayami.
1SA 4:12 Akali mende Benjamenena rara dokona yanda pyuo kareyaminyi kamapi yaki nyepala yuu gii mendaki dokopako makando pao suu Sailo dokona kando nyiya. Baa mona randayamo dokona banya komau minyuo pilyuo dee banya lenge kambu kyawasipi awai piya.
1SA 4:13 Dokopa Ilaime Anatunya Kana Minyuo Lalu Lao Lenge Pii Palenge Bokote dokona lao mona randapala banya isa petenge seya dokona kata repeta mee kandaro peteya. Dokopa akali dokome piyamo pii dupwa yuu taone dokona lao pauwiyasa wambu peparae ee lao pakame kumuyami.
1SA 4:14 Dokopa Ilaime doo lao kareyaminyi doko sepala piso soo, Doo letaminyi doko aki kando letamisi? leya. Dokopa akali doko waiya lao Ilai peteyamo dokona papala pii arome doko epo lamaiya.
1SA 4:15 (Ilai baa ee kana akalisa mange mendaki dee ipisu mange lama karo kareyamopa banya lenge doko kwaeyo oo repeta kwaeyalu kwaeyo kwaeyara ingiya.)
1SA 4:16 Akali dokome lao, Namba yanda pimi dokona kyawa lete epapala dokona piso lano makando epo dae epapu epelyo, leya. Leyamo dokopa Ilaime lao, Nambana wane apa pipyape? leya.
1SA 4:17 Dokopa pii minyuo epeyamo akali dokome isingi lamaiyuo, Pilisitia wambu dupwame Isaraele wambu dupwa kopetame pyao anamasi minyiyaminyisa nakama pakao pumi. Dokopa embena wane Opini Pineyasepa pyao kumakami. Pyao kumakapala dokopa Anatunya Kana Minyuo Lalu Lao Lenge Pii Palenge Bokote doko nyuo pumi, leya.
1SA 4:18 Akali dokome Anatunya Kana Minyuo Lalu Lao Lenge Pii Palenge Bokote dokona lao leyamo pii doko sepala Ilai baa kame kambu repeta banya petenge isa dokona peteyamo doko lungu rao matarena pao paleya. Pao paleyamo dokopa baa ama alemo ingyuo ando rondo lasi peteyamo dokome banya mange doko rukyapala baa kumuya. Baa Isaraele wambu dupwana mupwa ingyuo ee kana akalisa kisima iso kareya.
1SA 4:19 Ilaina kauwange Pineyasena etenge doko wane paleya. Doko nyaŋa kando nyera yuu gii oo repeta ingiya. Ingiyamo dokopa Anatunya Kana Minyuo Lalu Lao Lenge Pii Palenge Bokote doko nyuo pelyaminyi leyaminyi dokope dee banya kauwange akalingipa kumuyambinyi leyaminyi doko soo peteya. Soo peteyamo dokopa aopa enda baa mata pyapala wane mandeya.
1SA 4:20 Mata piyamo dokopa baa randame kumuo oo repeta kumara ingiya. Dokopa enda yango baa nyiso kareyami dupwame dopa lamaiyuo, Paka napipi. Wane ane mende manjene, leya. Dopa lamaiyaminyipape pii see napala isingi lamai naya.
1SA 4:21 Enda baame Anatunya yanga paupau lenge doko Isaraele wambu dupwa yaki nyuo kaeyapyamosa wanena kingi Ikapote leya. Ipuru pii lenge dokona kingi Ikapote lenge dokona renge Anatunya yanga paupau lenge doko pali nange. Dokona lao Anatunya Kana Minyuo Lalu Lao Lenge Pii Palenge Bokote dokonape dee banya kauwange akalingipa kumuyambi dolapona lao suu pyao kingi doko leya.
1SA 4:22 Lapala enda dokome lao, Anatunya Kana Minyuo Lalu Lao Lenge Pii Palenge Bokote doko nyuo peyaminyi dokona Anatunya yanga paupau lenge doko Isaraele wambu dupwa keta yaki nyuo kaeya, leya.
1SA 5:1 Pilisitia wambu dupwame Kana Minyuo Lalu Lao Lenge Pii Palenge Bokote doko nyepala enakana yuu Epenesa dokona piso soo pao nakamana yuu taone Asote lenge dokona peyami.
1SA 5:2 Papala nakamana mee bange anatu lao lakandenge kingi Dakene lenge banya misi anda dokona minyuo andakare papala wambu yale Dakene dopale ingyuo wasisi pisingi repeta reteyami.
1SA 5:3 Reteyaminyi dokopa yangama wamba kukwa dokopa Asote wambu dupwame pao kandeyami dokopa mee bange anatu lao lakandenge kingi Dakene lenge pikisa wasisi doko Kamongona Kana Minyuo Lalu Lao Lenge Pii Palenge Bokote siyamo dokona lenge kambusa lakao pao siya. Dopa piyasa nakamame minyalyuo nyepala kamba petengenyili pyuo pisiyami.
1SA 5:4 Doo pisiyaminyi yangama dokopa bange wasisi doko kambako Kamongona Kana Minyuo Lalu Lao Lenge Pii Palenge Bokote doko siyamo dokona lenge kambusa lano siyamo kandeyami. Yuu gii dokopa bange dokona ayemba kingipi dupwa poro lapala kambu konandowame dokona siyamopa romba kyangalipi dupwa iki pyarepala pao siyamo kandeyami.
1SA 5:5 (Renge dokona mee bange anatu kingi Dakene lenge dokona purisi akali dupwamepe dee baa lakandenge wambu peparaemepe kamame epapu dakepa yuu Asote dokona panda dokona mee kimbu kalyuo papi napala yalarapu papingi.)
1SA 5:6 Kamongo dokome yuu Asote wambu dupwa soo nyinya lao randa maiyuo paka mona palyinyi pyambuya. Baame yuu taone Asote dokona dee yuu kipwa kipwa dupwanape wambu dupwa randa maiyuo nakamana yongo dupwana amungi ama kameya dupwa pinya leyasa nakama ama randa nyiyami.
1SA 5:7 Nakamame doo piyamo doko kandeyami. Kandapala nakamame lao, Isaraele wambunya Kamongo Anatu dokome namwape namwana mee bange anatu kingi Dakene lenge dokope randa jilyamo. Dokona namwa Kana Minyuo Lalu Lao Lenge Pii Palenge Bokote doko dae yuu gii mende nembo sinya laa namanale leyami.
1SA 5:8 Lapala nakamame wai pii minyingi akali lapo wai minyuo pena lao nembapala Pilisitia kiŋi kingi paki epena lao nyiyami. Nyepala piso soo lao, Isaraele wambunya Anatunya Kana Minyuo Lalu Lao Lenge Pii Palenge Bokote doko apa pimase? leyami. Dokopa akali dusipame isingi lao, Yuu Gati dokona minyuo pena leyami. Dokona lao nakamame yuu Gati doko Pilisitia wambunya yuu taone mende dokona minyuo peyami.
1SA 5:9 Dopa pyuo minyuo papeyaminyi dokopa Kamongo dokome yuu dokona wambu dupwa soo nyinya lao paka mona palyinyi pyambuo randa andake maiya. Baame wambu kuki andapaepe peparae keta amungi andake dupwa maiyasa randa nyiyami.
1SA 5:10 Dopa piyasa nakamame Kana Minyuo Lalu Lao Lenge Pii Palenge Bokote doko yuu Ekerono dokona minyuo peyami. Yuu dokona minyuo pao pyaka sepeyaminyipape wambu doo range dupwame ee lao lao, Namwa pyao kumakana lao Isaraele wambunya Kamongo Anatu dokona Kana Minyuo Lalu Lao Lenge Pii Palenge Bokote doko dae soo epelyaminyi, leyami.
1SA 5:11 Lapala nakamame kambako Pilisitia kiŋi peparae epena lapala lao, Namwape namwana wambu ree palupi dupwa pyao kumasa naraŋa lao Isaraele wambunya Kana Minyuo Lalu Lao Lenge Pii Palenge Bokote doko banya yuu range dokona kapu kyuo nembakaminya leyami. Doko Anatumi soo nyimili lao randa maiyasa wambu malu kumuyamisa nakama pakame kumuo kareyami.
1SA 5:12 Wambu lapo kuma napala amungi peteyamo dupwame mee wambu dupwamepe nakamana mee bange anatu dupwame nyisinya lao ee leyami.
1SA 6:1 Kamongona Kana Minyuo Lalu Lao Lenge Pii Palenge Bokote doko yuu Pilisitia dokona kana yanda ipingi sepeyamopa
1SA 6:2 enakana wambu dupwame purisi akalipi dee nemonga lengepe dupwa epena lapala piso soo lao, Kamongona Kana Minyuo Lalu Lao Lenge Pii Palenge Bokote doko apa pyakamiramase, leyami. Namwame wambu range dupwa keta kapu kyuo maiyakamirama ramo doko aki bange lapo opetae dokona role pyao mairamase? leyami.
1SA 6:3 Dokopa nakamame isingi lao, Isaraele wambunya Anatu dokona Kana Minyuo Lalu Lao Lenge Pii Palenge Bokote doko range kapu kyuo maiyakamirami ramo doko nakamana koo dupwana yano pyao ropo pili lao bange lapo opetae baa mainya leyami. Lapala Kana Minyuo Lalu Lao Lenge Pii Palenge Bokote doko yeelyo paa nana. Bange lapo palepeta pena. Dopa pirami ramo dokopa nakama mee kapa piso dee akipamo baame nakama randako joo karenge lao soo gisarami, leyami.
1SA 6:4 Wambu dupwame aki bange lapo mairamase? leyami. Dokopa nakamame isingi lao, Kana golome amungi yale wasisi kingi pakipi dee golomeko wii yale wasisi kingi pakipi pipala Pilisitia kiŋi kingi pakiko dusipana suu pyao mairami, leyami. Nakama randa nyiyaminyi dokoko Pilisitia kiŋi kingi paki dupwa keta epeya.
1SA 6:5 Nakamame amungipi wiipi nakamana yuu dokona kokwa soo randa jipya doko suu pyao bange yale wasarami. Wasapala Isaraele wambunya Anatu doko keta nakamana koo dupwa polo lao banya kingi lakando ketae pyambwarami. Nakamame dopa pirami ramo dokopa Anatumi nakamape nakamana anatupi dee yuupi dupwa pyao kokwa soo randa jii nara rapisi.
1SA 6:6 Isipi kiŋi dokope Isipi wambu dupwape mona kana pokoyaminyi kande dokoko suu pyao akipamo nakama dopale ingyuo kararamisi? Anatumi nakama kopyali inginyi nemboko pao Isaraele dupwa Isipi yaki nyuo leyami dokopa kaeya.
1SA 6:7 Dokona nakamame uliuli mename ipyuo penge dokore mende wasapala mena bulamakao inya wamba yulu pii nange mee karenge lama nyepala uliuli dokona anjinyi palyalapape. Palyapala mena dolapona ikyane dupwa bulamakao karenge kame dokona ralinyi pyambwalapape.
1SA 6:8 Dopa pipala Kamongona Kana Minyuo Lalu Lao Lenge Pii Palenge Bokote doko nyepala uliuli dokona ketae retarami. Retapala mee bokote wakale mende nyepala wii yale golome wasisipi dee amungi yale golome wasisipi nakamana koo dupwana kame sakana lao Anatu maimi dupwa bokote dokona palyapala Kamongona Kana Minyuo Lalu Lao Lenge Pii Palenge Bokote silyamo dokona repeta retarami. Dopa pipala uliuli doko mena bulamakao dolapome maso ipyuo pena lapala kaeyarami.
1SA 6:9 Kaeyapala range pena lao kando karalapape. Kararaminyipa yuu taone Betesemese dorena ingyuo peya kande doko Isaraele wambunya Anatu dokome randa andake koo doko namwa keta jilyamo lao suu pyarama. Doko kaeyapala yuu dorena ingyuo kata paa naya kande doko randa dupwa Anatumi jii nayalyamo mee sisu lao randa epeyalyamo lao soo nyerama leyami.
1SA 6:10 Leyaminyi doko sepala pinya lao lamaiyaminyili pyuo piyami. Nakamame mena bulamakao lama nyepala uliuli dokona anjiyami. Anjapala yakane dupwa mena karenge kame dokona palyapala kambu upi leyami.
1SA 6:11 Dopa pipala Kana Minyuo Lalu Lao Lenge Pii Palenge Bokote doko uliuli dokona reteyami. Reto karo dokopa kana golome wasisi wii amungipi yale palyiyaminyi bokote doko opetae reteyami.
1SA 6:12 Dokopa mena bulamakao dolapome yuu Betesemese kata dokona iki pao kapu kyuo wakale paa napala rolae kanda kanda peyambi. Nakamba pao karo dokopa pii lao kae lao peyambi. Dokopa Pilisitia kiŋi kingi paki dusipame enakana moko minyuo pao karo pao yuu Betesemese lili dokona pyambuyami.
1SA 6:13 Dokopa yuu Betesemese wambu dupwa yuu pau lama lama dokona witi jingi pyakepo manjo kareyami. Karapala aopa nakama kandalyareyaminyi dokopa Kana Minyuo Lalu Lao Lenge Pii Palenge Bokote doko kandeyami. Kandapala nakama rae wakasa maiyami.
1SA 6:14 Dokopa mena dolapome uliuli ipyuo peyambi doko pao akali mende Josua lenge yuu Betesemese palenge dokona ee yuu mendena papala kana kameya mende peteya repeta pao kareyambi. Dokopa wambu dupwame uliuli dokona isa dupwa lalyuo waiyuo kisapala mena dolapo pyao kiso mukinyi nembo Kamongo maiyami.
1SA 6:15 Maipala Lipae akali dupwame Kamongona Kana Minyuo Lalu Lao Lenge Pii Palenge Bokote dokopa dee bokote mende kana golome bange wasapala palyiyami dokopa nyepala kana kameya dokona ketae reteyami. Dokopa Betesemese wambu dupwame mena pyao kiso mukinyi nembo Kamongo maiyuo dee mena mee pyao kiso Kamongo maiyuoko piyambi.
1SA 6:16 Dopa piyami doko Pilisitia kiŋi kingi paki dusipame kando karapala yuu mendaki dokopako nakama yuu Ekerono dokona kapu kyuo peyami.
1SA 6:17 Pilisitia wambu dupwame kana golome amungi yale wasisi kingi paki nakamana koo dupwa kame sakana lao Kamongo maiyami. Kana maiyaminyi dupwa yuu taone Asotepe Gasape Asekelonepe Gati dee yuu Ekeronope dusipana mendaki mendaki lao nyepala maiyami.
1SA 6:18 Dopako pyuo kana golome wii yale wasisi taone mendaki mendakinya lao nyepala kana kame porai pingi yuupi dee yuu kuki kame pii nangepe kiŋi kingi pakimi iso karenge dusipana lao maiyami. Yuu Betesemese range akali kingi Josua lengena ee dokona kana kameya mende petenge dokona Kamongona Kana Minyuo Lalu Lao Lenge Pii Palenge Bokote doko reteyami doko yuu dokona yulu piyamo dupwa lasaka pili laro dakepa silyamo.
1SA 6:19 Yuu Betesemese range akali akalisa yanda ipingi (70) dusipame Kamongona Kana Minyuo Lalu Lao Lenge Pii Palenge Bokote doko lumbuo koko kandeyamisa Kamongo dokome mali see nao nakama pyao kumakayamosa wambu dupwa kumanda ee lao peteyami.
1SA 6:20 Dokona lao yuu Betesemese akali dupwame lao, Kamongo doko Anatu Poo Pyasi dokona mende banya lenge kambu dokona kapa kara nara ingingi. Namwa pipya kakondo karena lao namwame baa anja nembaramase? leyami.
1SA 6:21 Nakamame wambu lapo pii wai minyuo yuu Kiriate Jirimi wambu dupwa lamaila pena lao lao, Pilisitia wambu dupwame Anatunya Kana Minyuo Lalu Lao Lenge Pii Palenge Bokote doko nyuo peeyami. Nakamame nyela epena leyami.
1SA 7:1 Dokona lao yuu Kiriate Jirimi wambu dupwame Kamongona Kana Minyuo Lalu Lao Lenge Pii Palenge Bokote nyepala soo pao yuu kyaunya palenge akali Apinatape lenge dokona anda peyami. Dokopa wambu dupwame banya ikinyingi Eliasa dokome iso karena lao rombo palyiyami.
1SA 7:2 Kamongona Kana Minyuo Lalu Lao Lenge Pii Palenge Bokote doko taone Kiriate Jirimi dokona mee soo kareyamopa ee kana akalisa lama epo peya. Yuu gii dusipana Isaraele wambu dupwa Kamongome nyisinya lao ee lao kareyami.
1SA 7:3 Samyuele Isaraele wambu dupwa lamaiyuo lao, Nakamana suu pingi monape peparae Kamongo keta pyamalyapala kapu kyuo baa karamo dokona panya suu piyami kande dokopa yuu wakale range dupwana mee bange anatu lenge dupwape dee mee bange anatu enda Aseta yale lao pyuo waso lakandenge dupwape neta nembalapape. Nembapala dokopa nakama peparae Kamongo maiyalu maiyuo maipala baa iki lakandalapape. Dokopa baame nakama Pilisitia wambunya porai doko anamasi minyuo kingi raka lao nyera, leya.
1SA 7:4 Leyamo dokopa Isaraele wambu dupwame nakamana mee bange anatu kingi Bealo lenge dupwape dee mee bange anatu enda Aseta lenge dupwape nyisa nembapala Kamongo doko iki lakandeyami.
1SA 7:5 Dokopa Samyueleme Isaraele wambu dupwa peparae yuu Misipa dokona pao malu palyinya, leya. Lao dokopa, Yuu dokona nakamana lao Kamongo kando ateŋa lakaro, leya.
1SA 7:6 Dokona nakama peparae yuu Misipa dokona pao malu palyuo peteyami. Pisipala nakamame ipwa dupwa ipwa yuwale pete singi dokona kamuo nyepala Kamongona kingi lao kulimbuo dee yuu gii doko nenge wasaka pyuo piso piyami. Dopa pipala nakamame lao, Namwame Kamongona lenge kambu dokona koo piyama kande leyami. (Doko yuu Misipa dokona Samyueleme Isaraele wambu keta randa paleyamo dupwa kote soo rolakamiya.)
1SA 7:7 Dokopa Isaraele wambu dupwa yuu Misipa dokona malu palyuo petaminyi leyami doko Pilisitia wambu dupwame sepala nakamana kiŋi akali kingi pakimi nakamana yanda singi ami dupwa lanyuo pyala peyami. Isaraele wambu dupwame pii doko sepala ama pakame kumuyami.
1SA 7:8 Pakame kumapala Samyuele kando lao, Kamongo namwana Anatu dokome Pilisitia wambu dupwa ramanyi nembo namwa kyawa lete nyinya lao ateŋa lakaoko karena, leyami.
1SA 7:9 Dokopa Samyueleme mena sipisipi kumambona mende peparae pyao kiso Kamongo maipala dokopa baame Isaraele wambu dupwa nyisinya lao loma siya. Dokopa Kamongome loma siyamo dokona isingi yano pyakamiya.
1SA 7:10 Samyueleme baa mena sipisipi yakane doko pyao kiso maiyuo paleyamo dokopa Pilisitia wambu dupwa oo repe kura lapala pyala epeyami. Pyala epeyaminyi yuu gii dokopa Kamongo dokome yake dokona piso nakama keta pimwaiyuo yuu gala andake leya. Leyamosa wambu dupwa komondo kata palyuo ralo kopyali ingyuo bolombalo lao peyami.
1SA 7:11 Isaraele akali dupwame yuu Misipa dokona piso yaki nyepala Pilisitia wambu dupwa peta ralyuo pao kata dokona lapo pyao kumakapala nakama yuu Beteka dokona repeta epeyami.
1SA 7:12 Dokopa Samyueleme kana mende nyepala yuu Misipa yuu Senepa lili kanya dokona pisipala lao, Kamongome namwa kata imwano dupwana peparae nyisapya. Dokona lao kana dake Nyisingi Kana larama, leya.
1SA 7:13 Dokona lao Isaraele wambu dupwame Pilisitia wambu dupwa anamasi minyiyami. Dokopa Kamongome Samyuele lete palyuo kareyamo dokopa Isaraele wambunya yuu doko rapu piyamosa kapa kamba pyala eparami ingya naya.
1SA 7:14 Dokopa Pilisitia wambu dupwame yuu Ekerono Gatipana kanya yuu taone singi pyapala nyiyami dupwa kamba Isaraele range keta peya. Dokopa Isaraele wambu dupwa nakamana yuu peparae range nyiyami. Dopa piyaminyi dokopa Kenane wambupi Isaraele wambupi pipya nyisu pisa nao mona kyuu lao siyamo palyuo karo piyami.
1SA 7:15 Samyuele lete palyuo kareyamo dokopa Isaraele wambu dupwana mupwa ingyuo iso karo pao kumuya.
1SA 7:16 Ee kana peparaena baa yuu Betele, Gilikale dee Misipa dusipana awali lao papyuo karo Isaraele wambu dupwana randa mende aki palamo lao kote pii soo rolakamyuo papiya.
1SA 7:17 Dokopa enakana banya rangena yuu Orama dokona kapu kyuo peya. Dokona papala baa kote soo yulu dopaleko piya. Pipala yuu Orama dokona baame mena pyao kiso maingi kana pyare mende Kamongona lakamiya.
1SA 8:1 Samyuele baa ando alemo ingyapala dokopa banya ikinyingi lama dolapome mupwa ingyuo Isaraele wambu dupwa rapu pyuo isinya leya.
1SA 8:2 Ikinyingi mupwa dokona kingi doko Joele. Dee enakana wane kuki doko kingi doko Apinja lenge. Dolapome yuu Biasipa wambu dupwa rapu pyuo kareyambi.
1SA 8:3 Dopa pyuo kareyambinyipape wane dolapome rakangena yulu pinginyili pyuo moko minyuo pii nayambi. Nakamba kana iki nyelana lao suu piyambi. Dopa pipala nakamba wambunya girisi pii leyaminyi doko soo kana nyepala wambu dupwana kote pii angi rolae dupwana soo rolakami nayambi.
1SA 8:4 Dokopa Isaraele akali mupwa dupwame wato lapala Samyuele peteyamo yuu Orama dokona peyami.
1SA 8:5 Papala lao, Sepe. Emba alemo ingyuo otelene. Dokopa embena wane dolapome embena mana nyuo yulu rolae pii nalyambinyi. Dokona yuu muu wakale dupwana kiŋi iso karaminyi doko suu pyao embame kiŋi mende namwa isinya lao rombo palyakape, leyami.
1SA 8:6 Dokopa Samyuele baa doo piso siyami doko epe kanda napala Kamongo kando loma siya.
1SA 8:7 Dokopa Kamongo dokome lao, Wambu dupwame aki mende emba langiyami kande dupwa isa nemba nao peparae sakamipi. Wambu dupwame emba makapala nyisa nembamwali lao letaminyi suu pyaa napipi. Doko daa. Namba nakamana kiŋi karapunu doko rae mai napala namba nyisa nembaminyisa pilyamo.
1SA 8:8 Nambame nakama yuu Isipi dokona karo lanyuo epeyono yuu gii dokona piso nakamame namba mata joo pao mee bange anatu rara wakale wakale dupwa lakandeyami. Dee nakamame yuu peparae namba kando piyami dokoko suu pyao epapu nakamame emba kando pilyaminyi.
1SA 8:9 Dokona lao, Nakamana pii dupwa sakamipi. Dopa pyuo serenepape embame ama poraiyuo nakama repe repe pii lamaiyuo dee apa pyuo nakamana kiŋi dupwame isarami lao lamaipi, leya.
1SA 8:10 Samyueleme wambu kiŋi nyelana lao rombo palyakana leyaminyi dupwa Kamongome baa pii lamaiyamo dupwa peparae polo lamaiya.
1SA 8:11 Dapa pyuo nakamana kiŋi dokome rapu pyakara lao, Samyueleme polo lamaiya. Kiŋi dokome nakamana ikinyingi dupwa nyepala ami ingyuo rombo palyuo nyera. Lapo dupwa mena oseme ipyuo penge uliuli dupwana piso yanda pela parami. Dee lapo dupwa mena osena mata dupwana piso yanda pela paramiko. Dee lapo dupwa uliuli paraminyi lenge kambu dokona wambo makando pao kararami.
1SA 8:12 Dokopa baame akali lapo rombo palyuo nakamame akali taosande dusipa isinya lara. Dee menge dupwame mupwa ingyuo karo akali akalisa kingi paki dupwa isinya lara. Nakamana wane dupwame banya ee yuu api api pyakamyuo ee jingi dupwa lyakamyuo dee banya yanda pingi bange dupwape banya uliuli piso penge dupwana bangepe wasakamyuo karena lara, leya.
1SA 8:13 Nakamana wanenge dupwame bange mamba kyaa pingi lapo wasakamyuo banya boretepe nenge wakalepe waso kisakamyuo pirami.
1SA 8:14 Dokopa baame nakamana ee yuu keyangepe isa girapo andenge eepe isa olipi jingi eepe dupwa peparae nyuo banya akali mupwa dupwa maira.
1SA 8:15 Baame banya kote singi akali mupwa dupwape dee akali menge mupwa dupwana lao nakamana witi jingi akalisa dupwanape dee isa girapo akalisa dupwanape mendaki lao pingyu nyuo nyakamira.
1SA 8:16 Baame nakamana kendemande akali dupwape mena bulamakao keyange dupwape dee mena donge dupwape nyepala banya yulu pyakana lara.
1SA 8:17 Nakamana mena sipisipi akalisa dupwana mendaki lao pingyu nyera. Dee nakama banya kendemande ingyuo yulu pyakamiramiko.
1SA 8:18 Yuu gii doko pyaka seramo dokopa nakamana kiŋi nakama rangeme rombo palyiyami dokona lao mumu andake lao kararaminyipape Kamongo dokome nakamana pii doko see nara, leya.
1SA 8:19 Dopa leyamopape wambu dupwame Samyuelena pii doko soo nyii nao namwa kiŋi mende nyelana letamano.
1SA 8:20 Dokopa namwa rara wakale dupwa palaminyi dopale ingyuo palirama. Namwa rangena kiŋi dokome namwa iso namwa lanyuo yanda pela pao pira, leyami.
1SA 8:21 Dokopa Samyueleme pii leyaminyi dupwa peparae soo nyepala pao Kamongo lamaiya.
1SA 8:22 Dokopa Kamongome isingi lamaiyuo, Nakamame mende pipili lao suu pilyaminyi dokona palyuo pyakamipala kiŋi mende rombo palyuo maipi, leya. Leyamo dokopa Samyueleme Isaraele akali peparae kapu kyuo anda pena, leya.
1SA 9:1 Akali mende bange malu reto suu pingi porai palyuo pii dupwa kando laa napengele dupwa lao pingi banya kingi Kisi lenge baa akali Benjamena rara dokona kareya. Kisi baa akali Apielena ikinyingi. Apiele baa Serona ikinyingi. Dee Sero baa Bekoratena ikinyingi. Dee Bekorate baa Apiana ikinyingi kareya.
1SA 9:2 Kisinya ikinyingi mende kingi Sole lenge baa ando kareyamo dokopa akali keyange porai wakasa ingyuo kareya. Baa Isaraele akali menge dupwa isa palyuo baa akali ama londe wakasa dee banya lenge kambu keyange karenge.
1SA 9:3 Dokopa Kisinya mena donge lapo pana nayamisa baame Sole lamaiyuo lao, Embame kendemande akali dupwana mende nyepala lanyuo mena donge dupwa kotala pena, leya.
1SA 9:4 Nakamba yuu kyau pyalya pyana pingi yuu Eporaime dokonape yuu Salisa dokonape koto pao dee yuu Salimi dokona koto papala nakamba Benjamenena rarana yuu dokona koto peyambinyipape yuu dupwana angi koto kando nyii nayambi.
1SA 9:5 Dee enakana yuu Jupa dokona epeyambinyi dokopa Soleme banya kendemande doko lamaiyuo, Nambwa kandakala anda bwua. Nambwa anda paa naramba ramo nambana rakaneme donge dupwana suu pyaa nao nambwa lao suu pyao mona rando piso pilyamo rapisi leya.
1SA 9:6 Dokopa kendemande akali dokome isingi lao, See. Yuu taone dakena Anatunya akalinde dopa pyuo koto saka nange doko dusa karamo lenge doko angi rolae lenge. Dokona lao wambu dupwame baa angingyuo karamo lao suu pyaro karaminyi. Akali karamo dokona nambwa bwua. Parambano dokopa dusa karamo lao laramo dokopa angi koto nyimbanale leya.
1SA 9:7 Nambwa dokona paramba ramo dokopa aki bange mende mairambase? lao Soleme piso siya. Nambwana nyuukwuanyi dokona nenge mende pali nalyamo. Dee nambwame bange mende mairamba ingilyande daa, leya.
1SA 9:8 Dokopa kendemande akali dokome isingi dopa lao, Namba kana kulingi kuki mende mando doko mairu dokopa donge dupwa dusa karamo lao nambwa langira, leya.
1SA 9:9 Dokopa Soleme isingi lao, Doko keyangelyamo bwua leya. Dopa lapala Anatunya akali palenge taone dokona peyambi. Taone dokona panya kyau dokona pulyuo peyambinyi dokopa wanake lapo ipwa kamwala epeyaminyipa katasa kandeyambi. Dokopa akali dolapome wanake dupwa kando, Anatunya akali doko taone dokona karape? lao piso siyambi. (Yuu gii dokopa poropeta akali pii pyongo pyao lenge, leyami. Dokona lao wambu mendeme Anatu pii mende pisalana dokopa baame lao, Namwa pii pyongo pyao lenge akali karamo dokona mwua larapu pingi.)
1SA 9:12 Dokopa wanake dupwame isingi lao, Waa baa karamo. Ene dae baa wambo pelyamo. Nakamba waiya lao parambi ramo doko pao baa ralingi nyerambi. Nakamba yuu taone dokona aopa papala baa kando nyerambi. Doko wambu dupwa yuu kyau dulunya kana pyare lasi dokona mena pyao kiso mairamindena baa epapu taonena epamo. Baame wambo nenge naraminyi dupwana elyape keta pisinya lao loma singi dokome wambu nenge nala epena lapyamo dupwame wambo nenge napa naraminyipa baa para. Dokona lao nakamba dakepa parambi ramo doko baa yuu kyau dokona nenge nala papa naramopa kando nyerambi, leyami.
1SA 9:14 Lapeyaminyi dokopa Solepa banya kendemande dokopa yuu taone dokona peyambi. Pao taone sukusa peyambinyi dokopa nakambana lenge kambu siyamo dorena Samyuele baa Anatu lakandenge yuu dokona panya lano epeyamo kandeyambi.
1SA 9:15 Kwuaka yuu gii dokopa Kamongo dokome Samyuele lamaiyuo lao,
1SA 9:16 Rakya yuu gii dakepaleko ingyuo nambame akali Benjamenena rara dokona mende emba keta peyarono epara. Eparamo embame baa nambana Isaraele wambu dupwana kiŋi kararaŋa lao banya kyawa dokona mamba wele kisakamyuo rombo palyare. Dokopa baame nakama Pilisitia wambu dupwa keta lekeleke koo rao karaminyi dupwa kiiramo nyera. Nambame nambana wambu dupwa randa naminyi doko kando dee nyisa lao ee laminyi doko soo pilyu, leya.
1SA 9:17 Dokopa Samyueleme Sole kando nyiyamo dokopa Kamongome baa lamaiyuo lao, Akali dakesa nambame emba langipu kandapi. Baame nambana wambu dupwa iso rapu pyakara, leya.
1SA 9:18 Dokopa Sole baa Samyuele kareyamo dokona kame kambu repeta papala piso soo, Akali mendeme pyongo pyao pii lenge doko anja palengese? leya.
1SA 9:19 Leyamo dokopa Samyueleme isingi lao, Doko nambaŋa. Dokona Kamongo lakandenge yuu dokona mona pupwape. Epapu nakamba laparae nambamoo role pyao piso nenge narama. Rakya yangama nakambana suu pilyambinyi dupwana isingi langipala nakamba pena imbinyi kata dokona nembaronopa parambi.
1SA 9:20 Mena donge yuu gii rema nembo pana napyamo dupwana lao mona randa nalapape. Mena dusipa wambana koto nyisi silyamo. Dokona Isaraele wambu dupwame angi api nyelana lao poraiyuo suu pilyamisi? Doko emba embape embena ree palu wambu dupwape nyelana lao suu pilyaminyi, leya.
1SA 9:21 Leyamo dokopa Soleme isingi lao, Namba akali Benjamenena rara dokona Isaraele wambunya rara dupwana doko rara kuki ingyuo singi dee nambana ree palu wambu dupwa rara dokona mee kuki isa pele lao palenge. Dokona akipamo embame namba kando pii dopale langilisi? leya Soleme.
1SA 9:22 Dokopa Samyueleme Solepa kando banya kendemande akali dokopa nyepala panda andake nenge nao petenge dokona banya akali akalisa rema nenge nala epena leyamo dupwa wambo pisapeyaminyipa lanyuo papala petenge isa mupwa dokona petena leya.
1SA 9:23 Samyueleme nenge kisingi akali doko kando lao, Mena minju lapo emba joo karo dokopa dusa reta lapu kandapi doko minyuo ipu, leya.
1SA 9:24 Dokopa nenge kisingi akali dokome mena kimbu aumwua lasi doko nyuo minyuo epo Sole peteyamo dokona lenge kambusa reteya. Dokopa Samyueleme lao, Kanda. Mena kuki embena lao retakapuŋu doko nape. Nambame wambu nenge nala epena lapu dupwa pipya yuu gii dakepa role pyao narami lao nambame retakapu, leya. Yuu gii dokopa Sole baa Samyuelemoo nenge nao role pyao peteyami.
1SA 9:25 Nakama Anatu lakandenge yuu dokona piso lano taone dokona peyami. Papala dokopa anda ketae dokona Sole luu palira lao luu palenge panda rapa rapa pyakamiyami.
1SA 9:26 Dokona Sole baa luu paleya. Paleyamo yangama dokopa Samyueleme Sole ketae paleya doko kee leya. Lapala, Sipurape nambame emba anda puu lao maparowale, leya. Leyamo dokopa Sole baa sipuro epeyamopa baapa Samyuelepa role pyao kata dokona peyambi.
1SA 9:27 Nakamba epo yuu taone pinjingisa epeyambinyi dokopa Samyueleme Sole lamaiyuo lao, Kendemande akali doko wambo pao karena lena leya. Leyamopa kendemande akali dokome nakamba yaki nyepala pao kareya. Dokopa Samyueleme lao, Dakena yuu gii kuki lama kararenepa nambame Kamongome lapyamo dupwa langirole, leya.
1SA 10:1 Dokopa Samyueleme isa olipi jingi mamba wele ipwange pee doko nyepala Solena kyawa dokona kulimbwakamipala baa nyinyi piya. Nyinyi pipala lao, Kamongo dokome emba mupwa ingyuo banya Isaraele wambu dupwa isakare lao rombo palyilyamo. Emba wambu dupwa isakamyuo karo nakamana nyisu petenge dupwa alya isa minyili laro karare. Kamongome rombo palyuo otelyoŋo lao doko emba katasa parene dokopa mende piramo dokome nolakarasa pira, leya.
1SA 10:2 Lapala lao, Emba namba yaki nyuo parene dokopa akali Benjamenena yuu dokona yuu Selesa singi dokona enda Oresolona malu pero karenge repeta papala dokopa emba akali lama eparambinyi kando nyere. Dolapome emba langyuo, Mena donge koto papipi doko kando nyimi. Dokona embena rakaneme mena dupwana lao mona randa nalyamo. Emba suu pyao sakao mona rando piso baa range lao, Namba wane dokona lao apa pirusi? letamo larambi, leya.
1SA 10:3 Dokopa dokona piso pao yuu Tapo dokona papala isa yapasi mende karenge dokona pao karo dokopa akali rema yuu Betele dokona mena pyao kiso Anatu maiyala panya eparaminyi kando nyere. Dokona mendeme mena meme ikyane rema kata laminyara. Mendeme nenge borete remako minyara. Dee mendeme nyuukwuanyi mendena ipwa waene simbuo manjira.
1SA 10:4 Nakambame emba yako lao nyepala nenge borete dokona lama jeraminyi dokopa dolapo nyepe.
1SA 10:5 Dokopa emba Anatunya yuu kyau yuu Gipiya dokona singi dokona Pilisitia wambu dupwa komau anda pyuo palaminyi dokona pupi. Parene dokopa yuu taone dokona kambu konandowame dokona poropeta akali Anatunya pii nolako lenge dupwa yuu kyau kana pyare laro karenge dokona piso lupyuo epo musiki lao bange wakale wakale dupwa pyao eparaminyi kando nyere.
1SA 10:6 Nakama rae maiyuo pii poraiyuo lao wamya lyuo eparami. Imambu dokome emba maralyapala minyuo yulu piramosa emba dokona konda pipala nakama yulu pinginyili pyuo kenane pyao pii poraiyuo lao rae maiyuo wamya lyuo karo emba alowa pipala enenge ingyare.
1SA 10:7 Yulu dupwa pira dokopa Anatumi emba dopa pii dapa pii lao mende langiya kande doko pepe.
1SA 10:8 Dokona emba wambo yuu Gilikale dokona pao karape. Yuu dokona nambame emba kando nyepala mena pyao kisinyi nembope dee wambu mona mendaki palyinyi pyambuo mena pyao kiso piru. Dokona nambame epapala emba dopa pii lao mana langiruŋu yuu gii yanda ipingi doo isaro karape.
1SA 10:9 Dokopa Soleme Samyuele yaki nyepala panya kapu kyiyamo dokopa Anatumi Sole alowa pyuo enenge ingyapala suu pingi monape enenge palyakamiya. Dee Samyueleme yulu lapo pira lao lamaiyamo dusipa yuu gii dokopa piya.
1SA 10:10 Dokopa Solepa kendemande dokopa yuu Gipiya dokona epeyambinyi dokopa Anatunya poropeta akali pii nolako lenge dusipame kando nyiyami. Dokopa Anatunya Imambu dokome Sole minyuo yulu piyasa nakama piyaminyili pyuo kenane pyao pii poraiyuo lao wamya lyuo kareya.
1SA 10:11 Sole doo baa pyuo peyamo doko kandapala wambu lapome baa wamba kando otenge dupwame mendeme mende piso soo lao, Akali Kisinya ikinyingi doko apa pelase? leyami. Sole baa poropeta ingyapyase? leyami.
1SA 10:12 Akali yuu range dokona mendeme piso soo, Poropeta akali menge dupwana rakange dupwa apimoo lao suu pilyamisi? Dokona lao dopa pyuo kanda soo leyami. Sole baa opetae Anatunya poropeta akali ingyapyase? leyami.
1SA 10:13 Sole rae maiyuo baa pii poraiyuo lao, Wamya lyuo otapala dokopa baa yuu kyau kana pyare laro karenge dokona pulyuo peya.
1SA 10:14 Dokopa Solena rakange kuki dokome Sole baapa banya kendemande dokopa kandapala nakamba piso soo lao, Nakamba anja peyambisi? leya. Dokopa Soleme isingi lao, Nambwa mena donge kotala peyamba. Doko nambwa koto nyii napala akali Samyuele kandala peyamba, leya.
1SA 10:15 Leyamopa Solena rakange kukimi isingi lao, Baame apa langipyase? leya.
1SA 10:16 Dokopa Soleme isingi lao, Baame mena dupwa koto kando nyimi nambwa langipya, leya. Leyamopape Samyueleme baa kiŋi ingyara leyamo dokona mendepe arome pyao banya rakange kuki doko lamai naya.
1SA 10:17 Samyueleme wambu dupwa yuu Misipa dokona nyuo malu palyuo misi andake lamana epena leya.
1SA 10:18 Epena lao dopa lamaiya. Kamongo doko Isaraelena Anatu dokome letamo. Nambame nakama yuu Isipi dokona yaki nyuo nyuo lanyuo epeyo. Isipi range wambu dupwa keta kiiramo dee wambu rara wakale dupwame nakama nyuo isa palyamwali leyaminyi dupwa keta nyuo nyuo epo piyu letamo, leya.
1SA 10:19 Namba nakamana Anatu. Nambame nakama randa wakale wakale dupwana kiiramo kyawa lete nyingi. Doko kaepala epapu nakamame namba mata jepala mende wakale jii lao piso silyaminyi. Doko kapaŋa. Kamongona lenge kambu dokona nakamana rara lili pyuo dee akalyanda lili pyuo nyuo malu palyuo pisipwape, leya.
1SA 10:20 Peteyaminyi dokopa Samyueleme rara dupwana mendaki mendaki lao epena larapu piyamopa Kamongome akali Benjamenena rara doko rombo palyiya.
1SA 10:21 Dokopa Samyueleme Benjamenena rara dokona akalyanda mendaki mendaki lao epena larapu piyamopa akali Matirinya akalyanda rombo palyiya. Rombo palyapala Matirinya akalyanda dokona akali Kisinya ikinyingi Sole doko rombo palyuo nyiya. Nyepala nakamame akali baa koteyaminyipape baa angi koto nyii nayami.
1SA 10:22 Dokona lao nakamame Kamongo piso soo lao, Mende opetae wakale mende eparase? leyami. Kamongome isingi lao, Sole baa dumu nakamana bange retenge dokona yalu piru karamo, leya.
1SA 10:23 Dokopa nakama makando papala Sole nyuo minyuo epo wambu peteyami dokona epeyami. Doko nakamame kandeyaminyi dokopa akali menge dupwa isa palyuo baa iki londeya.
1SA 10:24 Dokopa Samyueleme wambu dupwa lamaiyuo, Akali Kamongome rombo palyipyamo doko dakeŋe. Namwa peparae mendali baa yale mende kara nalyamano, leya. Dokopa wambu peparaeme pii poraiyuo lao, Kiŋi doko pulyuo karalu karena, leyami.
1SA 10:25 Samyueleme wambu dupwa kando kiŋi dokome yulu kapa piraliŋi lao polo lamaiya. Dopa pipala enakana pepa dokona pyao palyiya. Palyiyamo dupwa Anatunya panda poo pyasi dokona pyao reteya. Retapala dokopa wambu dupwa anda pena leya.
1SA 10:26 Sole baa opetae anda kapu kyuo yuu Gipiya dokona peya. Peyamo dokopa porai renge palyuo simbwange akali lapo Anatunya pii dokome nakamana monarena piyasa baa role pyao peyami.
1SA 10:27 Dokopa wambu kopyali lapome lao, Akali dakeme apa pyuo namwa keyange ingyuo nyisarase? leyami. Lapala nakamame Sole awa nao kilya kandapala bange lapo rae maiyuo mai nayami.
1SA 11:1 Kana mendena enakanale Amone wambunya kiŋi Nayaseme banya yanda singi dupwa lanyuo taone Jepese lenge yuu andake Giliate dokona singi doko nyuo sukusa palyuo pyao nyela peyami. Dokopa Jepese range akali dupwame akali Nayase lamaiyuo lao, Emba namwa pipya pyuo minyuo anjiki pyuo kararama lao lare ramo doko emba namwana akali mupwa ingyuo karare larama, leyami.
1SA 11:2 Dokopa Nayaseme isingi lao, Nambame kata mendakinya iki palyuo nakama pipya role pyao kararama laro. Doko nambame nakama peparaena lenge rolaerena lukunyi nembaro. Isaraele wambu peparae ama elyanyi pyambuo pyakaro, leya.
1SA 11:3 Leyamo dokopa Jepese dokona akali mupwa dupwame lao, Namwa nyisala epena lao Isaraele yuu peparaena pii wai nembamanaleŋe yuu gii yanda ipingi jelapape. Mendemepe namwa nyisala epa narami ramo dokopa namwa embame isa lao jepala kaeyarama, leyami.
1SA 11:4 Pii wai minyuo peyami akali dupwa yuu Gipiya Sole palenge dokona pao pyaka siyami. Dopa pyuo papala pii angi dupwa lamaiyami dokopa wambu dupwa yamarangyuo pakame kumuo ee andake leyami.
1SA 11:5 Dokopa Sole baa banya ee yuu dokona karapala banya mena bulamakao dopale okose lenge dokopa tole pyapeta anda ene oo epeya. Epapala baa piso soo lao, Apa pelamo? Akipamo wambu peparae ee letamisi? leya. Leyamo doko yuu Jepese range wai pii minyuo epo peyaminyi pii dupwa nakamame Sole baa lamaiyami.
1SA 11:6 Pii dupwa Sole baa siyamo dokopa Anatunya Imambu dokome baa keta epo yulu piyasa baa ama wakasa imbwaya.
1SA 11:7 Dopa pipala banya mena okose lama nyepala pyao kunjo kuki kuki pipala wai pii minyuo peyaminyi akali dupwame Isaraele yuu peparaena awali lao soo paeyo repe repe pii dake lamainya leya. Wambu mendeme Sole Samyuelepa role pyao yanda pela paa nara ramo dokona banya mena bulamakao dupwa keta randa dapaleko palira lena, leya. Doko sepala Isaraele wambu peparae Kamongome mende piramo doko pakapala nakama peparae mendalipi anda kara napala role pyao epeyami.
1SA 11:8 Soleme yuu Beseke dokona nakama nyuo malu palyiya. Palyiyamo dokopa Isaraele wambu ama malu (300,000) ingiya dee Juta wambu malu (30,000) dupwa ingyuo piya.
1SA 11:9 Nakamame yuu Jepese akali wai pii minyuo peyaminyi dupwa lamaiyuo lao, Rakya ene korakama ingyapa naramopa nakama kiiramo nyisi kararami lao lamainya, leyami. Leyaminyi pii dupwa pao lamaiyamisa Jepese wambu dupwa sepala ama rae wakasa maiyuo mona pyakalyuo piyamo kareyami.
1SA 11:10 Karapala nakamame Nayase lamaiyuo, Rakya namwa emba kararene dokona isa lao eparamanopa embame yulu mende namwa pipya pyakalana suu pyare dupwa piri, leyami.
1SA 11:11 Dokona wamba yangama Soleme banya akali dupwa liti rema piya. Piyamopa yuu yangeyamo dokopa nakama yanda pimwai palenge dokona waiya lao Amone range dupwa pyala peyami. Korakama dokopa pao angi piyami. Pao piyaminyipa akali angi mende pyaa nao mee rali pilya pyana piyaminyipa akali mee neta pyakao oteyami.
1SA 11:12 Dokopa Isaraele wambu dupwame Samyuele lamaiyuo lao, Wambu lapome Sole baa namwana kiŋi kara nara lami dupwa anja karamisi? Wambu dupwa namwame pyao kumakamanaleŋe nyuo jelapape, leyami.
1SA 11:13 Leyaminyipape Soleme isingi lao, Yuu gii dake Kamongome Isaraele wambu dupwa kyawa lete nyipyamo dokona epapu mendali pyao kumaka napengeŋe, leya.
1SA 11:14 Samyueleme nakama lamaiyuo, Namwa peparae yuu Gilikale dokona papala yuu mendaki kamba ketae palyuo lao, Sole baa namwana kiŋi karamo lala mwua, leya.
1SA 11:15 Dopa pipala nakama peparae yuu Gilikale dokona peyami. Papala Anatunya yuu poo pyasi dokona karo nakamame Sole namwana kiŋi karamo, leyami. Lapala Sole baape wambu peparaepe nakama Anatu pipya mona mendaki palyuo kararama lao rae maiyuo mena pyao kiso maiyuo peteyami.
1SA 12:1 Samyueleme Isaraele wambu dupwa lamaiyuo lao, Nambame pyaka lao langimi doko pyakapu. Nambame nakama iso rapu pira lao kiŋi mende rombo palyakapu.
1SA 12:2 Dokona epapu baa nakamana mupwa ingyuo karara. Namba doko ando oto kyawa yaku epo nambana wane dupwa nakama pipya karaminyi. Namba wamba parange dokopa nakama iso karo pao epapu emelyo.
1SA 12:3 Dokona namba dae karo dakeŋe namba nakama keta kopetame mende piyunde ramo doko Kamongo banya lenge kambu dokonape epo namba randa joo lalapape. Nambame nakama mendena mena bulamakaope dee mena dongepe dupwana mende nyakayose? Nambame mendali kando randa maiyuo panga sepala mendena waa nyakamipusi? Panda akali mende nambame girisi pyuo nyiso kote sakamipusi? Nambame doo leto dupwana lapo piyunde ramo doko angi bange nyiyunu dupwana isingi range yano pyakaro, leya.
1SA 12:4 Dokopa wambu dupwame isingi lao, Daaŋa. Embame namwa randa joo panga soo bange dupwa waa nyaka nangeko, leyami.
1SA 12:5 Samyueleme isingi lao, Kamongo dokomepe dee kiŋi baame rombo palyipya dokomepe nakambame namba kopetame pii nange lao letaminyi dokona usinisi lakambi, leya. Leyamo dokopa, Kinyiŋi Kamongo dokome usinisi ingyuo karamo, leyami.
1SA 12:6 Samyueleme deeko lao, Kamongo dokome Mosese Eronepa rombo palyiyako. Dee nakamana rora ambasupi dupwa yuu Isipi yaki nyuo kiiramo lanyuo epeya.
1SA 12:7 Epapu nakama karaminyi dokona mee karalapape. Nakamape nakamana rora ambasu dupwape pyuo nyepala kyawa lete minyaro lao Kamongo dokome banya porainya renge andake dokome pyakayamo dupwana lao dee polo langiru. Dopa piru dokopa nakamame Kamongona lenge kambu dokona koo ingyuo kararami.
1SA 12:8 Jekopemoo banya ree palu dusipa yuu Isipi peyami. Pao kareyaminyi dokopa Isipi range dupwame nakamana rora ambasu dupwa randa maiyami dokopa Kamongome nyisinya lao kando ee lamaiyamisa Kamongome nyiso Mosese Eronepa peeya. Dolapome Isipi yaki nyuo Isaraele wambu dupwa nyuo lanyuo yuu dakena epeyambi.
1SA 12:9 Dopa piyamopa wambu dupwame nakamana Kamongo Anatu doko kame siyami. Dopa piyaminyisa Pilisitia wambu dupwamepe yuu Moape kiŋi dokomepe Sisira kiŋi dokomepe dee yuu taone Aso dokona ami yanda singi mupwa dupwamepe nakamana rora ambasu dupwa pimwaiyuo pinya leyasa pyao anamasi minyuo wini piyami.
1SA 12:10 Dokopa nakamame Kamongo kando ee lao nyisinya lao lao, Namwa Kamongo emba mata joo pyao mee bange wasisi anatu kingi Bealo lenge dupwa lakando dee mee bange enda anatu kingi Aseta lenge doko lakando piyama dokona namwa koo piyama. Dokona namwana nyisu petenge dupwa pipya kingi raka lao kyawa lete nyepe. Dokopa namwame emba lakandarama, leyami.
1SA 12:11 Dokopa Kamongome akali Gitionemoo Berekemoo Jepetamoo dee mende nambamoo pipya pupwa lao nembeya. Namwame nakamana nyisu petengena kingi raka lao nyiyamano dokopa nakama kapa manda rao palyuo kareyami.
1SA 12:12 Yuu Amone range kiŋi Nayase dokome pyala epeya dokopa nakamame Kamongo doko nakamana kiŋi ingyuo kareyamo doko mata maipala namba kando lao, Namwa kiŋi mendeme namwa iso karapyali yaka lao suu pilyamano leyami kande, leya.
1SA 12:13 Epapu kiŋi dake nakama rangeme rombo palyimi. Nakamame kiŋi nyelana lao piso simi dokona epapu Kamongome nakama jipya.
1SA 12:14 Nakamana Kamongo Anatu doko kingi ketae pyambuo banya yulu pyakamyuo banya pii sakamyuo banya mawa pii dupwana warombo soo dee nakamamepe nakamana kiŋi dokomepe baa moko minyuo karo pirami ramo dokopa nakama palyuo karo pirami dupwana peparae keyange ingyuo para.
1SA 12:15 Dopa piraminyipape nakamame Kamongona pii see napala banya mawa pii dokona kamba lao waromnbo see narami ramo dokopa baame nakamape nakamana kiŋi dokope mata joo randa jera.
1SA 12:16 Dokona lao nakama karaminyi dokona mee karapala Kamongo dokome yulu andake mende pinya suu pilyamo doko piramo kandalapape.
1SA 12:17 Epapu doko panyi pilyamo. Dopa pipyamopape nambame ateŋa laro dokopa Kamongome apunda peyo yuu gala lao pira. Dopa piramo dokopa nakama baa kiŋi mende jinya lao piso siyami doko Kamongo keta koo andake piyamalyamo lao soo gisarami, leya.
1SA 12:18 Lapala Samyuele baame ateŋa piya. Piyamo yuu gii mendaki dokopako Kamongome yuu gala lao apu peeya. Dokopa wambu dupwame Anatu baa mupwa lao suu pyao pako dee Samyuele opetae kando pakoko piyami.
1SA 12:19 Nakamame Samyuele kando lao, Samyuele namwa kuma narami lao embena Kamongo Anatu doko kando ateŋa lakape. Doko namwana koo wambo piyama dupwa rambe rambe palyapala namwame kiŋi jinya lao Kamongo piso siyama dokopa koo konda pyuo piyama lao epapu namwa soo nyilyamano, leyami.
1SA 12:20 Leyaminyi dokopa Samyueleme isingi lao, Nakama paka nalapape. Nakamame kamame koo mende pipalape dokopa Kamongo baa mata maiyuo paa nalapape. Dopa pipala nakamana suu pingi monape peparaeme banya yulu pyakamilapape.
1SA 12:21 Dopa pipala mee bange anatuŋu lao kyambo lakandenge dupwana moko minyuo paa nalapape. Dupwa anatu angi daa dokome nakama nyiso kyawa minyuope pii narami ingilyamo.
1SA 12:22 Kamongome nakama nyuo banya rangena wambu ingyapulinya lao suu pyao kana minyuo lalu lao leyamo dokona baame nakama kame soo yaki nyii nara.
1SA 12:23 Namba nakama ateŋa lakaro ingilyamo. Dopa pii naro Kamongo kando koo pirusa pira. Dokona lao nambame nakama yulu rolae keyangepe dupwana pilapa lao mana langiru.
1SA 12:24 Dokopa Kamongo kando warombo soo nakama mona maipala banya yulu dokona poraiyuo pyamalyapala yaki nyii nao pyakamirami. Dopa pipala baame nakama keta yulu andake pyakayamo doko suu pyaro karalapape.
1SA 12:25 Dopa pii nao nakama yulu koo dupwa mee pyuoko parami ramo doko nakamape nakamana kiŋi dupwape pyao kokwa soo nembara, leya.
1SA 13:1 Sole baa ee kana lama kiŋi ingyuo karapala baame akali taosande rema (3,000) rombo palyuo nyiya. Nyepala akali taosande lama (2,000) baamoo pipya yuu Mikimase lenge yuu kyau pyalya pyana pingi Betele dokona singi dokona kareyami. Dee akali taosande mendaki (1,000) dusipa banya ikinyingi Jonatanemoo role pyao yuu Gipiya lenge akali Benjamenena rara dokona yuu dokona singi dokona pena lao nembeya. Dopa pipala akali menge dupwa anda pena, leya.
1SA 13:3 Dokopa Jonataneme yuu Gepa dokona Pilisitia yanda singi mupwa doko pyao kumakaya. Doko Pilisitia wambu dupwame siyami. Dokopa Soleme wai minyingi akali lapo Ipuru wambu dupwame yuu muu peparaena bikuli poo lao yanda pela epena lao kee lala pena lao nembeya.
1SA 13:4 Dokopa Soleme Pilisitia yanda singi mupwa doko pyao kumakapyasa Pilisitia wambu dupwa imbuo awa nalyaminyi lao lamaiyami doko Isaraele wambu dupwa siyami. Sepala akali peparae epo yuu Gilikale dokona Solemoo pipya malu palyuo kareyami.
1SA 13:5 Dokopa Pilisitia akali dupwame Isaraele wambu dupwa pyalena epo malu palyiyami. Nakamana yanda pela piso penge uliuli taosande akalisa rema (30,000) dee mena ose matana petenge akali taosande pakinyamange (6,000) dee ami yanda singi ama malu soo kaeyo ipwa kee silyamo dopale ingyuo karo piyami. Nakama dupwa yuu Mikimase yuu Betapene neta potemenge dorena ingyuo papala komau anda pyuo paleyami.
1SA 13:6 Dopa pipala Pilisitia wambu yanda porai ingyuo piyaminyisa Isaraele wambu dupwa randa nao kareyami. Dopa pyuo karo nakamana lapo kananda dupwanape yuwale dupwanape kana rondo dupwanape ipwa kamuo nyingi yuwale dupwanape yalu piyami.
1SA 13:7 Lapo dupwa ipwa Jotane yalo yuu andake Gate lenge dee Giliate lenge dolapona peyami. Dokopa Sole baa yuu Gilikale dokona mee kareyamopa wambu baa role pyao kareyami dupwa ama pakame kumuo walu walu leyami.
1SA 13:8 Dokopa Soleme yuu gii yanda ipingi Samyueleme isinya leyamuli pyuo iso kareya. Dopa pyuo isaro kareyamopape Samyuele baa yuu Gilikale dokona epa naya. Dokopa wambu dupwa Sole yaki nyuo wakale wakale peyami.
1SA 13:9 Dokopa baame wambu dupwa lamaipala, Mena pyao kiso mukinyi nembo maingi dupwa minyuo dee bange mona mendakinya palyuo piso maiyuo pingi dupwa minyuo epo pinya leya. Minyuo epeyaminyi dokopa baame bange kiso mukinyi nembo maingi dupwa kisapeyamo dokopa
1SA 13:10 aopa Samyuele baa epeya. Dokopa Sole baa papala yako lao nyiya.
1SA 13:11 Dopa piyamopape Samyueleme lao, Emba apa pilisi? leya. Leyamo dokopa Soleme lao wambu dupwame namba yaki nyuo wakale wakale pumi. Dee emba eparo lee kande doko epa napi. Dokona ingyuo Pilisitia wambu dupwa yuu Mikimase dokona komau anda pyuo palaminyi.
1SA 13:12 Dokona lao nambame suu pyao dokopa Pilisitia wambu dupwame yuu Gilikale dakena namba pyala eparami. Dokona namba Kamongo baa namba nyisinya lao mona elyape palyuo bange mende mairu ingya napyasa dokona nambame mena kiso maiyapulinya suu pyao maipu, leya.
1SA 13:13 Dokopa Samyueleme isingi lao, Doko kopyali minyuo kopetame pipi. Embena Kamongo Anatu dokome pii langiyamuli pyuo pii napi. Embame warombo sipili doko embape dee embena manjirinyi dupwapeme Isaraele wambu dupwa mupwa ingyuo iso karalu karena lapyali.
1SA 13:14 Dokona epapu embena isingi yulu doko iso karo puu paa nare. Doko embame Kamongona pii warombo see napi dokona Kamongo dokome akali anjiki pingi mende suu pilyamo doko rombo palyapala banya wambu dupwa iso karena lara, leya.
1SA 13:15 Lapala Samyuele baa yuu Gilikale yaki nyuo pena kata nyuo peya. Dokopa wambu menge dupwa Sole banya yanda singi duwpa kando nyela peyamo dokona peyami. Nakama yuu Gilikale dokona piso pao yuu Gipiya Benjamenena yuu dokona singi dokona peyami. Papala dokopa Soleme banya yanda singi ami dupwa kapa karamipi lao yaka lao kandeyamo dokopa andete pakinyamange (600) kareyami.
1SA 13:16 Sole baape banya ikinyingi Jonatanepe dee nakambana akali dupwape yuu Gepa akali Benjamenena yuu dokona singi dokona komau anda pyuo paleyami. Pilisitia wambu dupwa yuu Mikimase dokona komau anda pyuo paleyami.
1SA 13:17 Pilisitia yanda singi dupwa yuu paleyaminyi dokona yaki nyuo pingyu lane rema pipala Isaraele dupwa pyala peyami. Lane mendaki yuu andake Suwale dokona yuu kuki Opora lenge dokona panya peyami.
1SA 13:18 Lane mende yuu Betorone panya peyami. Dee lane mende yuu liti dokona pao Sepoimi rapu dokope yuu wambu pali nange dokope kando kareyami.
1SA 13:19 Pilisitia wambu dupwame Isaraele wambu dupwame wua gelape kakupi kapa wasa narami lao suu pyao aneme bange pyuo wasingi akali dupwa yuu Isaraele dokona kara nana leyami.
1SA 13:20 Dokopa Isaraele wambu dupwa Pilisitia wambu kareyami dokona pao nakamana yuu apu nenge bangepe wua rumbiwape kemape saporope dupwa nanga sela peyami.
1SA 13:21 Pilisitia wambu dupwame nakamana wua rumbiwa nanga siyaminyi dokopa panda bange mendeme mena okose pyao pingi doko elya piyaminyi dokopa Pilisitia wambu dupwa kana mendaki maiyami. Dokoko pyuo nakamana yuu apu renge bange dokope piki dokope nanga siyaminyi dokopa Isaraele wambu dupwame Pilisitia wambu dupwa kana lama maiyami.
1SA 13:22 Yuu angi yanda piyami dokopa Isaraele menge dupwa minya nayaminyipa Solepa ikinyingi Jonatanepa iki wua gelape kakupi minyiyambi.
1SA 13:23 Pilisitia wambu dupwame yanda singi lapo kando lamaiyuo, Nakama papala yuu Mikimase dokona kata mende ama poraiyuo isaro karala pena leyami.
1SA 14:1 Yuu gii mendepa Jonataneme akali parange mende banya yanda pingi bange dupwa minyakamingi doko kando lamaiyuo lao, Nambwa Pilisitia wambu palaminyi yuu dokona lambuo bonale leya. Lapala Jonataneme pelyoŋo laope banya rakange doko lamai naya.
1SA 14:2 Yuu gii dokopa Sole baa yuu Mikarone dokona isa pomekaranate lenge renge isarena komau anda pipala yuu Gipiya repeta paleya. Paleyamo dokona akali andete pakinyamange (600) baa role pyao paleyami.
1SA 14:3 (Purisi akali Ainja baa purisinya komau wapungi doko wapuya. Ainja baa Ayitapena ikinyingi. Ayitape baa akali Ikapotena yangonge. Ayitape baa akali Pineyasena ikinyingi dee Pineyase baa akali Ilaina kauwange. Ilai baa wamba yuu Sailo dokona Kamongona purisi ingyuo kareya.) Akali dupwame Jonatane baa yaki nyuo peyamo doko see nayami.
1SA 14:4 Pilisitia wambu komau anda pyuo paleyaminyi yuu dokona kando nyero lao baa kata penge kyau dokona oko soo peya. Kata kuki dokona kana nenge nenge karenge lama kata ralipi piro karenge. Kana dokona mende kingi Bosese lenge. Dee mendena kingi Sene lenge.
1SA 14:5 Kana dokona mende yuu Mikimase dorename kanda kanda petenge. Dee mende doko yuu Gipiya dorena kanda kanda petenge.
1SA 14:6 Jonataneme akali parange doko kando lao, Anatu mona reta nange wambu Pilisitia rara dupwa palaminyi dokona oko soo bona. Parambano dokopa Kamongome nambwa nyisara rapisi? Baame nyisara ramo dokopa nambwa wambu kuki lama iki kararambanopape wini pyuo mendeme nambwa kaeyalapa laa narami ingilyamo leya.
1SA 14:7 Dokopa akali parange dokome lao, Aki mende emba pinya piri dupwana namba emba role pyao kararo, leya.
1SA 14:8 Jonataneme lao, Doko kapaŋa. Nambwa Pilisitia wambu dupwame kandena lao yalo oko soo bonale.
1SA 14:9 Nakama nambwa kararambano dokona imwanale isaro karalapa larami ramo doko isaro kararamba.
1SA 14:10 Dee nakamame nambwa nakama karaminyi dokona ipupwa larami ramo doko kapa paramba. Renge doko Kamongome nambwa pyao anamasi minyuo wini pirambi lao lasaka pili larasa pira.
1SA 14:11 Dokona lao nakambame Pilisitia wambu dupwame kandena lao epeyambi. Dokopa Pilisitia dupwame lao, Kandalapa. Ipuru akali lapo yuu rumbisi dupwana yalu piyami dupwa neta epelyaminyi, leyami.
1SA 14:12 Lapala nakamame Jonatanepa banya akali parange dokopa kee lapala lao, Waiya lao dae lalyuo ipupwa. Namwame pii mende langimanale leyami. Leyaminyi dokopa Jonataneme akali parange doko lamaiyuo, Namba paroli pyuo emba ipu. Kamongome Isaraele dupwa keta pyao anamasi minyalapase lao nyiso porainya renge jipya, leya.
1SA 14:13 Dokopa Jonatane baa kata kana rondo dokona isa piso kingi wapambupi pii pyao peyamo dokopa akali parange doko Jonatane peyamuli pyuo peya. Papala Jonataneme Pilisitia wambu dupwa minyarapala nyerapu piyamopa akali parange dokome pyao kumakaya.
1SA 14:14 Jonatanepa akali parange dokopame yanda doko kanda sepala akali akalisa lama pyao kumakayambi. Doko yuu ama kuki mendena papala piyambi.
1SA 14:15 Dokopa Pilisitia wambu peparae yuu kipwa kipwa dupwana palenge dupwa pakayami. Dee ami yanda singipi akali anda pyao lalyuo yango mena bangepe dupwa waa nyuo pingi dupwape komau anda pyuo paleyaminyi dupwape walu walu lao pakayami. Dokopa yuu dupwa opetae romo romo piyamosa wambu dupwa kopyali ingyuo ralo wakale wakale peyami.
1SA 14:16 Solena akali lapo yuu Gipiya Benjamenena yuu dokona singi dokona iso kareyami dupwame Pilisitia akali dupwa kopyali ingyalya ingyana pyuo ralo makandeyaminyi kandeyami.
1SA 14:17 Dokopa Soleme banya akali dupwa kando lao, Yanda singi ami dupwa yaka lapala api mende pana nalyamo lao kandena leya. Leyamosa nakama yaka lao kandeyami dokopa Jonatanepa akali parange banya yanda pingi bange dupwa sakamingi dokopa pana nayambi.
1SA 14:18 Dokopa Soleme purisi akali Ainja doko lamaiyuo, Kana Minyuo Lalu Lao Lenge Pii Palenge Bokote doko dae minyuo epena leya. Yuu gii dokopa akali Ainja Isaraele wambu kareyami dupwana lenge kambu dokona soo epeya.
1SA 14:19 Sole baa purisi akali doko pii lamaiyuo kareyamo gii dokopa Pilisitia wambu komau anda pyuo paleyami yuu dokona kyawa sisingi bolombalo letamo pingi dopale ingyuo wambu dupwa makandalya makandana pyuo pii poraiyuo leyaminyi siyami. Sepala Soleme purisi doko lamaiyuo lao, Kamongome pii mende langilyape lao isarama yuu gii mende see nalyamo.
1SA 14:20 Pilisitia wambu dupwa bolombalo lao papala nakama range pyakando piyami. Dopa piyaminyi dokona Soleme banya akali dupwa pipya role pyao yanda lakao pyala peyami.
1SA 14:21 Dokopa Ipuru wambu lapo pao Pilisitia wambu pipya kareyami dupwa nakama Pilisitia wambu pipya role pyao komau anda pyuo paleyami. Paleyaminyi dupwa dee alowa pipala Sole Jonatanepana wambu kareyaminyi dokona konda pyuo peyami.
1SA 14:22 Isaraele wambu lapo yuu kyau pyalya pyana pingi yuu Eporaime singi dupwana yalu piru siyaminyi dupwame Pilisitia wambu dupwa ralo makando pelyaminyi leyami doko sepala nakama dolona konda pipala peta pyala peyami.
1SA 14:23 Dopa pipala yuu Betepane dokona lano pyao pao kareyami. Yuu gii dokopa Kamongo dokome Isaraele wambu dupwa nyiso kyawa lete nyiya.
1SA 14:24 Soleme pii ama poraiyuo lalu lao lao, Nambana nyisu petenge dupwa epapu ene yano pyarono dokopa wambu mendeme nenge nara ramo doko keta koo palenale, leto leya. Dopa leyamosa yuu gii dokopa wambu dupwa nenge naa napala lopome kumuo pyuku lasi kareyami.
1SA 14:25 Dokopa wambu dupwa yuu imwa mendena epeyaminyi dokopa amburali dupwa yuu minyarambu nyuo lyiyamo kandeyami.
1SA 14:26 Imwa dokona amburali wakasa lyiyamopape Soleme nenge narami dupwa kumarami leya dokona pakapala mendemepe nyuo naa nayami.
1SA 14:27 Dopa piyamopape Jonatanena rakangeme wambu dupwa randa mairuŋu leyamo doko Jonatane see naya. Dokona lao baame banya pangali isa soo peyamo dokome minyalyapala amburali andarange dokona suku pyuo lapo lyepala baa neya. Napeyamo dokopa aopa baa kapa porai ingyuo sikya piya.
1SA 14:28 Dopa pyuo neyamopa akali mendeme lao, Namwa lopome kumuo pyuku lasi karamano. Dopa pipyamopape embena rakane dokome namwa poraiyuo langikondali pyuo lao, Wambu mendalimi epapu nenge nyuo nara ramo doko keta randa palira lapya, leya.
1SA 14:29 Dokopa Jonataneme isingi leya. Nambana rakane dokome namwana wambu dupwa randa maiyuo lapyalamo. Namba amburali ipwange napala porai ingyuo karoŋo kandalapa, leya.
1SA 14:30 Epapu namwana wambu dupwame yanda pimwai dupwa pyao anamasi minyaminyi dokopa nenge nyepala namili doko ama keyange ingyapyali. Dopa pimili Pilisitia wambu ama malu mee konda pyuo pyamili, leya.
1SA 14:31 Yuu gii dokopa Isaraele wambu dupwame Pilisitia wambu dupwa wini pyuo anamasi minyuo piyami. Dopa pyuo yuu Mikimase dokona piso pyao pao yuu Ainjalono dokona suu lao piyami. Yuu gii dokopa Isaraele dupwa nakama lopo dokome raowe lao kumuyami.
1SA 14:32 Dopa pipala nakamana nyisu petenge dupwana mena bulamakaope mena sipisipi nyiyaminyi dupwa nyepala pyao kumapala minju dupwa mee ranjama paleta lyuo kareyamo neyami.
1SA 14:33 Neyaminyi dokopa wambu lapome Isaraele wambu dupwame koo pyuo Kamongona lenge kambu dokona mena minju ranjama paleta nelyaminyi lao Sole lamaiyaminyi siya. Sepala Soleme pii ketae palyuo lao, Nakama wambu koo pyuo Anatu mata mailyaminyi dupwa. Kana kameya mende namba peto dakena bele bele epena peyalapape, leya.
1SA 14:34 Lapala baame kamba pii mendeko lamaiya. Lamaipala lao wambu palaminyi dupwana papala nakama peparaeme nakamana mena bulamakaope dee mena sipisipipi dupwape nyuo minyuo dae epena larami. Laraminyi dupwa nakamame dae pyapala dakena narami. Nakamame Kamongona lenge kambu dokona koo pyuo mena minju ranjama paleta naa narami, leya. Dokona lao yuu gii kukwa dokopako nakamana mena dupwa dokona minyuo papala piyami.
1SA 14:35 Dokopa Sole baame kana pyare mende Kamongona lao lakamiya. Doo kana pyare leyamo doko Sole baame kanda soo ingyuo piya.
1SA 14:36 Pipala dokopa Soleme banya akali dupwa lamaiyuo lao, Namwa Pilisitia wambu komau anda pyuo palaminyi dokona kukwa pao piso yuu yangara dokopa wambu dupwana bange nyuo wambu dupwa peparae pyao kumako piramaŋa mona, leya. Leyamo dokopa nakamame isingi lao, Embame mende suu pyarene keyange ingiya kande dokona palyuo pipi, leyami. Dopa leyaminyipape purisi mendeme lao, Namwa wambo kanda soo Kamongo Anatu piso sema, leya.
1SA 14:37 Leyamo dokona lao, Soleme Anatu piso soo, Nambame Pilisitia wambu dupwa pyala parose? Embame pyao anamasi minyingi renge jerese? leya. Piso siyamopape Anatumi yuu gii dokopa isingi yano pyao laa naya.
1SA 14:38 Dopa piyasa Soleme wambu dupwana akali mupwa dupwa lamaiyuo lao, Dae epapala epapu apimi koo mende pipyape lao koto kandamanale, leya.
1SA 14:39 Nambame Kamongo letena renge palyuo karalu karenge Isaraele dupwa keta pyao anamasi minyingi renge maingi doko keta lalu lao lao mendali koo pipyamo doko pyao kumaserama. Kamame Jonatane nambana ikinyingi baa ingyaramopape opetaeko leya. Leyamopape mendemepe dokona mende yuku laa nayami.
1SA 14:40 Enakana Soleme nakama lamaiyuo lao, Nakama peparae dupwa dumurena karalapape. Nambapa Jonatanepa daerena karambanale, leya. Nakamame isingi lao, Embame suu pyarene keyange ingiya kande dokona palyuo pipi, leyami.
1SA 14:41 Soleme Anatu Isaraele wambunya Kamongo doko kando lamaiyuo lao, Kamongo akipamo embame namba epapu isingi langya nalese? Kamongo Isaraele wambunya Anatu kana poo pyasi dolapona keta mende pyuo namba isingi langipi. Angi koo doko nambapa Jonatanepa keta paliramo doko kana kingi Urumi lenge silyamo doko keta mende pyuo isingi yano pyape. Dee embena Isaraele wambu dupwa keta koo paleya kande doko kana mende Tumini lenge silyamo doko keta mende pyuo isingi yano pyape, leya. Isingi yano pyao dokopa Jonatanepa Solepa keta koo palamolamo lao lasaka piya. Dokopa wambu keta koo mende pali naya.
1SA 14:42 Dokopa Soleme lao nambapa Jonatanepana api mendali angi koo doko palamo lao lasaka pinyale. Kana dolapo pyao nembena leya. Leyamo dokopa Jonatane keta koo palamo lao kana dolapome lasaka piya.
1SA 14:43 Dokopa Soleme Jonatane piso soo, Emba aki yulu koo mende pipisi? leya. Leyamo dokopa Jonataneme isingi lao, Namba amburali ipwange kuki lama neyo. Doko namba dae kumalena rapa rapa piru karo kapa kumaro, leya.
1SA 14:44 Dokopa Soleme Jonatane lamaiyuo lao, Kinyiŋi, emba kumalase. Nambame emba pyao kumaka naro ramo dokopa Anatumi namba pyao kumakana, leya.
1SA 14:45 Leyamopape wambu dupwa Sole kando lao, Jonatane Isaraele wambunya yanda andake wini pyuo pyao anamasi minyapya doko pyao kumaramisi? Daa namwame Kamongo lete karalu karenge dokona kingi lao lalu lao, Kamame banya kyawasi kuki dokona mendepe yaki nyuo kaeya nara, letamano. Baame epapu yulu pipyamo dupwa Kamongome nyisapyamo pipya, leyami. Lapala wambu dupwame Jonatane pyao kumaka napala mee karena kaeyami.
1SA 14:46 Enakana dokopa Soleme Pilisitia dupwa peta ralyuo pyaa nayasa nakama yuu rangena dupwana kamba kapu kyuo peyami.
1SA 14:47 Sole baa Isaraele wambunya kiŋi karapeyamo dokopa banya nyisu petenge dupwa anja panda anja kareyami dupwa peparae pyao oteya. Dokona Moape wambupi Amone wambupi Itome wambupi dee yuu Sopa kiŋi dupwape Pilisitia wambu dupwape pyao oteya. Yuu dupwana mendasa pyala peyamo dokopa pyao winiko piya.
1SA 14:48 Baame Amaleke wambu dupwa kando paka napala pyao raliya. Wambu dupwame Isaraele wambu dupwa pyala epeyami dokopa baame kiiramo nyiya.
1SA 14:49 Solena ikinyingi dupwa mende kingi Jonatane mende kingi Isipi dee mende Malikisua lenge. Wanenge porakai dokona kingi doko Merape dee wanenge mende dokona kingi doko Maekele lenge.
1SA 14:50 Banya etenge doko Akinome lenge doko akali Akimase dokona wanenge. Banya yanda singi dupwana mupwa akali doko Apena lenge. Doko baa Solena rakange kuki Nua lenge dokona ikinyingi.
1SA 14:51 Dee Solena rakange Kisi dokopa Apenana rakange Nuapa dolapo nakamba akali Apielena ikinyingi.
1SA 14:52 Yuu andarele lama baa karapala Soleme Pilisitia wambu dupwa ama poraiyuo pyao kareya. Pyao karo dokopa akali porai paka nange mende baa kando nyiyamo dokopa banya yanda singi karena leya.
1SA 15:1 Samyuele baame Sole lamaiyuo, Kamongo Anatumi banya Isaraele wambu dupwana emba kiŋi mupwa ingyuo karareŋe lao nambame rombo palyala puu lapyamosa epelyo. Emba Kamongo Porai Wakasa dokome letamo pii doko sepe.
1SA 15:2 Isaraele wambu dupwa yuu Isipi piso epeyaminyi dokopa Amaleke wambu dupwame pyao randa maiyaminyi dokona Kamongo Anatu baame nakama randa maira.
1SA 15:3 Amaleke wambu dupwa pyala papala mendali lete palyuo pyaa napala nakama peparae pyao otape. Enda akalipi wane wanake andapaepe dee nyaŋape mena bulamakaope mena sipisipi kamelepe dee dongepe dupwa peparae pyao kumakape, leya.
1SA 15:4 Leyamo dokopa Soleme banya yanda singi dupwa nyuo malu palyuo yuu Teleme dokona epena lao kandeya. Kandeyamo dokopa ama malu mee (200,000) yuu Isaraele range dee yuu Juta range taosande akalisa (10,000) dopa pyuo yanda singi kareyaminyi kandeya.
1SA 15:5 Dokopa enakana Solemoo banya yanda singi dupwa pipya yuu taone andake Amaleke dokona peyami. Papala dokopa ipwa kama pyasi panda dokona yalu pyuo kando isaro kareyami.
1SA 15:6 Kareyaminyi dokopa Soleme Kene wambu dupwa repe repe pii lamaiya. Nakamame Isaraele wambu dupwa yuu Isipi dokona piso epeyaminyi dokopa yako lao pena leyaminyi dokona nakama Amaleke wambu dupwa pipya pyao kumaka narowale dupwa yaki nyuo neta pupwape, leya. Dopa pyuo leyamo dokona Kene wambu dupwa yaki nyuo peyami.
1SA 15:7 Soleme yuu Apila piso pyao pao yuu Sua yuu Isipi neta pyakaenge dorena Amaleke wambu dupwa pyao winimi piya.
1SA 15:8 Baame Amalekena kiŋi Akake doko minyarala lete nyiya. Nyepala wambu mee dupwa peparae pyao kumakaya.
1SA 15:9 Solemoo banya yanda singi dupwapeme kiŋi Akake pyao kumaka nao dee sipisipipi bulamakaope dee dupwana yakanepe bange keyange au pingi dupwa pyao kumaka nayami. Dopa piyaminyipape bange kamame koole dupwa mende pyarepala paa nana lao pyao uki minyuo nembeyami.
1SA 15:10 Kamongo Anatu baame Samyuele lamaiya.
1SA 15:11 Namba wama yako. Nambame Sole kiŋi wasiyu kande doko baame nambana mawa pii dupwa kamba lao namba mata joo pelyamo, leya. Dopa leyamo dokopa Samyuele imbwuapala yuu peparae kukwa baa Kamongo Anatu lao piso sokondali pyuo loma poraiyuo siya.
1SA 15:12 Dokona yangama wamba kukwa baame Sole kotala peya. Dokopa Sole yuu taone Kamele dokona pao bange andake mende baa lao suu pyarami lao rangeme wasapala yuu Gilikale dokona peya leyaminyi doko Samyuele baa siya.
1SA 15:13 Samyuele baa Sole kareyamo dokona peya. Peyamo dokopa Soleme baa kando yako lao Kamongo Anatumi keyange renge emba keta jera. Doko namba banya mawa pii leyamo doko warombo sipu, leya.
1SA 15:14 Samyuele Sole piso soo dopa leya. Warombo sipili akipamo nambame enakana bulamakaope dee sipisipipi dupwa kae laminyi sipulisi? leya.
1SA 15:15 Soleme isingi lamaiyuo, Nambana akali dupwame Amaleke wambu dupwa keta nyiyami. Mena sipisipi bulamakaope keyange dupwa embena Kamongo Anatu doko lakando kiso mairama lao suu pyao nyuo dee mee bange koole dupwa peparae pyao otamwa, leya.
1SA 15:16 Dopa leyamo dokopa Samyueleme baa lamaiyuo, Kamongo Anatumi kwuaka kukwa namba mende langipya doko langirowale sepe, leya. Dokopa Soleme lao, Langi, leya.
1SA 15:17 Samyueleme isingi dopa lamaiya, Emba rangeme mupwa wakasa lao suu pyao kara napinyipape Isaraele rara dupwana mupwa ingyuo karene. Kamongo Anatumi emba Isaraele wambu dupwana lao kiŋi ingyuo rombo palyiya.
1SA 15:18 Rombo palyapala Amaleke wambu kopetame pyuo karaminyi dupwa pyala pupwape, leya. Dopa lao langyuo dokopa wambu peparae pyao kumakape, langiya.
1SA 15:19 Akipamo emba lapyamuli pyuo pii napisi? Akipamo emba waiya lao bange dupwa nyuo Kamongo rae mai narali dupwa pipisi? leya.
1SA 15:20 Soleme isingi lao, Namba Kamongo lapyamuli pyuo pipu. Namba baame puu leyamuli pyuo kiŋi Akake lanyuo epo dee Amaleke wambu dupwa peparae pyao kumakao pipu, leya.
1SA 15:21 Nambana akali dupwame sipisipi bulamakaope keyange nyiyami dupwa pyao kumaka nayami. Dopa pingi kandale doko suu pyao nakamame dae Gilikale lanyuo epapala embena Kamongo Anatu bange kiso maingi kandale dopa pyuo kiso mainya piyami.
1SA 15:22 Kamongo dokome angi anjuku keyange lao suu pilyase? Samyueleme leya. Warombo singi dokope panda bange kiso maingi doko rolaese? Warombo soo pingi doko mupwa. Mee mena sipisipi kiso maingi doko mupwa daa.
1SA 15:23 Embame Anatu laramuli pyuo pii nare ramo doko mauli pyuo pingi dopale ingyuo pirisa pira. Dee range ketae pyambuo lakando karare ramo doko kyambo anatu kingimi wasisi lakandenge dopale ingyuo yulu koo dopale pirisa pira. Doko emba Kamongome lapyamuli pyuo pii napinyi dokome baame emba kiŋi kara nare letamo, leya.
1SA 15:24 Soleme isingi lao, Namba koo andake pipu. Nambame Kamongona mawa pii dokope dee embena mana lapi dupwape kamba lapu doko nambana akali dupwa pakapala nakama laminyili pyuo pipu.
1SA 15:25 Dokona epapu nambame emba piso sokondali pyuo, Nambana koo dupwa nyuo kame sakape, leto. Kame sakapala nambame Kamongo doko lakandaro lao dee kapu kyuo nambapa Gilikale dokona role pyao bonale leya.
1SA 15:26 Namba embapa kamba kapu kyuo paa naramba daa, leya Samyueleme. Emba Kamongome lapyamo doo daa lapi dokona dee baame emba Isaraele wambu dupwana kiŋi kara nare daa letamo, leya.
1SA 15:27 Dopa lapala Samyueleme baa yaki nyuo panya piya dokopa Soleme komau doko minyapala kangukamiya.
1SA 15:28 Dopa piyamo dokopa Samyueleme baa lamaiyuo, Kamongome Isaraele wambu dupwana kiŋi yulu embena doko epapu nyepala emba yale daa akali keyange wakasa mende keta maipya, leya.
1SA 15:29 Isaraele wambu dupwana Anatu Mupwa Wakasa dokome kyambo laa nange. Suu pingi doko alowa pii nange. Baa mee akali daa, leya.
1SA 15:30 Leyamo dokopa Soleme isingi lamaiyuo, Namba koo andake pipunupape nambana wambu dupwana litape dee Isaraele wambu peparaepe dupwana lenge kambu dokona namba elya nare lao rape rape lao karape, leya. Lapala embena Kamongo Anatu doko lakandaro lao emba kamba kapu kyuo nambapa bonale, leya.
1SA 15:31 Dopa leyamo dokopa Samyuele baa yuu Gilikale dokona role pyao baapa peyambi dokopa Sole baa Kamongo lakandeya.
1SA 15:32 Samyueleme Sole kandao kiŋi Akake dae lanyuo epena leya. Dokopa Akake baa mona dupwa pulu nongo pyao paka pyuo kareyamopa kumungi doko renge ama koo lao suu pyao kareya.
1SA 15:33 Kareyamo dokopa Samyueleme dopa lamaiyuo, Embena wua gela dokome enda malunya nyaŋa pyao kumapi dokona endangi dupwa wane manji nange ingyuo petaminyi doko suu pyao emba epapu kumare dokopa embena endangi doko wane manji nangeko ingyara. Lapala yuu Gilikale dokona bange kiso maingi kana pyare repeta dokona Akake poko pyao lamalya lomana piya.
1SA 15:34 Enakana Samyuele yuu Orama dolama peya. Peyamo dokopa Sole banya anda yuu Gipiya dokona peya.
1SA 15:35 Samyuele baa kareyamo dupwa pipya kiŋi doko kanda naya. Dopa pipala baa mona rando kondo kareya. Kareyamo dokopa Kamongo Anatumi Isaraele wambu dupwana kiŋi Sole rombo palyiya dokona kondo kareya.
1SA 16:1 Kamongo Anatumi Samyuele lamaiyuo, Yuu akipare emba Solena lao mona rando kararepe? Nambame baa Isaraele wambu dupwana kiŋi ingyuo kara nara leyo kande. Emba isa olipinya mamba wele ipwange doko nyepe. Nyepala minyuo pao nambame emba yuu Beteleme dokona akali mende banya kingi Jese lenge karamo dokona mapanyi nembelyo. Wamba nambame dokona ikinyingi mende kiŋi ingyuo karara lao rombo palyuo wasiyu dokona mapanyi nembelyo, leya.
1SA 16:2 Samyuele piso soo leya. Apa pyuo namba doko pirusi? Soleme sera ramo doko baame namba pyao kumakara, leya. Leyamo dokopa Kamongome isingi lamaiya, Bulamakao ikyane dokona mende nyepala lanyuo pao baa lamaiyuo, Namba Kamongo bange kiso maiyala epelyo, lape.
1SA 16:3 Lapala dokopa Jese bange kiso maingi dokona epena larene dokopa nambame emba dopa pii dapa pii lao langiru. Nambame langirunu akali doko kiŋi rombo palyare.
1SA 16:4 Kamongome leyamuli pyuo Samyuele baa yuu taone Beteleme dokona peya. Peyamo dokopa akali mupwa dupwame baa walu lao kando nyepala dopa lao piso soo, Poropeta, emba mona kyuu lao sera mendena epelepe? leyami.
1SA 16:5 Baame isingi lao, Waa, namba Kamongo lakando bange kiso maiyala epelyo. Nakama kando poo pyapala nambamoo role pyao mona ipupwape. Akali Jese dee banya ikinyingimoo nakama opetae poo pinya lapala bange kiso maingi dokona epena leya.
1SA 16:6 Nakama epo pyaka siyaminyi dokopa Samyueleme Jesena ikinyingi Eliape epeyamo kandeya. Kandapala baa range lao suu pyao, Akali dake Kamongome rombo palyiya angilamo doko Kamongona lenge kambu dokona dae karamo lao suu piya.
1SA 16:7 Suu piyamopape Kamongome baa lamaiyuo, Yanengena au pingi dupwana suu pyaa napipi. Mee wambumi yapalya yapana pyuo lenge dopa pyuo nambame lengende daa. Wambu dupwame yongona ketae pingi doko mee kandenge nambame monarena kandenge, leya.
1SA 16:8 Enakana Jeseme banya ikinyingi Apinatape kyakale lao nyepala Samyuele kareyamo dokona lanyuo epeya. Dokopa Samyuele doko Kamongome rombo palya napya daa leya.
1SA 16:9 Jeseme Sama lanyuo epo maiyamo dokopa Kamongome rombo palya napya daako, leya.
1SA 16:10 Dopa pyuo pao Jeseme banya wane yanda ipingi lanyuo epo Samyuele maiya. Dokopa Samyueleme baa isingi lamaiyuo, Dasipa Kamongome rombo palya napya daa, leya.
1SA 16:11 Dokopa enakana piso soo, Embena wane dasipa ikisi? leya. Jeseme isingi lamaiyuo, Wane kuki doko iki baame mena sipisipi rapu pyuo karamo. Dopa leyamo dokopa Samyueleme lao, Baa dae epo karena lamai. Baa dae eparamo dokopa Kamongo bange rendamu pingi kiso maingi dokona mairama, leya.
1SA 16:12 Jeseme wane doko lanyala pena leya. Wane kuki yanenge keyange karenge lenge sipi kone pyuo renge doko epeya. Dokopa Kamongome Samyuele lamaiyuo, Dakesa lapu baa rombo palyinya, leya.
1SA 16:13 Samyueleme mamba wele doko nyepala Dapiti banya yangonge dupwana lenge kambu siya dokona epena lapala kyawa dokona mamba kisakamyuo rombo palyiya. Palyiyamo yuu gii dokona piso Kamongo Anatunya Imambu dokome epo Dapiti baa keta palyuo simbwaro karalu kareya. Dopa piyamo dokopa Samyuele yuu Orama dokona kapu kyuo peya.
1SA 16:14 Kamongona Imambu dokome Sole yaki nyiya. Imambu koo dokome Sole keta randa maiyuo Kamongome pena lao mapanyi nembeya.
1SA 16:15 Dokopa banya kendemande dupwame baa kando leyami. Anatumi imambu koo dokome randa jela pena lapyalyamo doko namwa silyamano.
1SA 16:16 Pepa mende namwa pyao jinya leyami. Dee namwame akali rambyalu lenge mende koto kandamanale. Dokopa enakana imambu koo doko eparamo dokopa rambyalu doko pyao laramo dokopa mee emba keta epa naramo kapa karare, leyami.
1SA 16:17 Dokopa Soleme akali rambyalu keyange lenge mende kotakala papala dae lanyuo epena leya.
1SA 16:18 Leyamo dokopa akali kareyaminyi dokona mendeme leya. Jese yuu taone Beteleme range dokona ikinyingi doko rambyalu dokome musiki pyao ama keyange lenge. Baa akali paka nange yanda singi keyange baame pii mondo lao lenge dee yanenge keyange karenge. Kamongo Anatu role pyao karelyamopa karenge, leya.
1SA 16:19 Doko sepala Soleme pii wai nembo Jese lamaiyuo, Embena wane Dapiti mena sipisipi rapu pyuo karamo doko namba jinya leya.
1SA 16:20 Jeseme mena yanengendeme kipwa pee wasisi ipwa waene palenge dokope mena meme yakane mendepe borete dupwa pipya mena donge mata dokona retapala Dapiti minyuo Sole kareya dokona pena leya.
1SA 16:21 Dapitimi Sole kareyamo dokona epo banya yulu pyakamyuo kareya. Dokopa Sole baa rae wakasa maipala banya yanda pingi bange dupwa soo pena lao maiya.
1SA 16:22 Enakana Soleme Jese wai lao, Embena wane Dapiti doko namba rae mailyu doko nambapa dae karambanale kae, leya.
1SA 16:23 Dokona piso enakana Anatumi imambu koo doko Sole keta epo maralyinya leya dokopa Dapitimi banya rambyalu doko nyepala leya. Dopa pyuo leyamo dokopa imambu koo dokome Sole rekya lao yaki nyuo peya dokopa dee baa kapa kareya.
1SA 17:1 Pilisitia wambu dupwa yanda pela pena yuu taone Soko yuu Juta singi dokona malu palyuo kareyami. Nakamana pao paleyaminyi yuu angi doo Epese Damimi lenge yuu Sokopa Aseka kanya dokona singi.
1SA 17:2 Solemoo dee Isaraele wambu dupwa pipya yuu pau lama lama Ela lenge dokona nakama Pilisitia wambu dupwa pipya yanda angi pirama lao rapa rapa pyuo epo kareyami.
1SA 17:3 Pilisitia wambu dupwa yuu kyau mendena maki maki pyuo kareyami dokopa dee Isaraele wambu dupwa pakirena kareyami yuu pau lama lama doko kanya siya.
1SA 17:4 Akali Golayate lenge yuu taone Gati lenge dokona palenge doko Pilisitia wambu kareyaminyi dokona piso epeya. Epapala Isaraele wambu dupwa pipya yanda pimanale epena leya. Akali baa ama londe wakasa mita rema dopale ingyuo kareya.
1SA 17:5 Baa kyawa rarange kapame wasisi pee pipala konambepe yanda pingi bange dupwa pee piyamo dupwa ama kenda wakasa piyamo sikyali kilokerame akalisa kingi paki ipisu yanda ipingi ingiya.
1SA 17:6 Banya kimbu dupwa konambe yale mendeme yambe pyao dee kaku kapame wasisi doko banya lange dokona soo peya.
1SA 17:7 Banya kaku doko ama romende nenge doko kenda kenda pingi sikyali doko kilokerame yanda ipingi ingiya. Yanda singi mendeme banya konambe doko banya lenge kambu siyamo dorena minyuo peya.
1SA 17:8 Golayateme pii poraiyuo kaeyo Isaraele wambu dupwa kando lao, Nakama apa pilyaminyi? Nakamame yanda pirama lao maki maki piru karamisi? Namba Pilisitia akali. Nakama Solena kendemande akali dupwa. Nakamana akali dokona mende rombo palyapala namba pyala pena lalapa.
1SA 17:9 Baame namba pyao kumakara ramo doko namwame nakamana kendemande yulu pyakarama. Dee kandaramano nambame baa pyao kumakaro ramo doko nakamame namwana kendemande yulu pyakarami.
1SA 17:10 Epapu dakepa Isaraele yanda singi dupwa yanda pimana ipupwa lao karo. Nakama mendeme namba pyaralyamo lao elya nao rombo palyalapape, leya.
1SA 17:11 Solemoo banya akali dupwape pii doko soo pakame kumuyami.
1SA 17:12 Dapiti baa Jesena ikinyingi Eporata akali doko yuu Beteleme Juta singi dokona kareya. Jese banya wane mange lama karo mandeyamo yuu gii dokopa Sole baa kiŋi ingyuo kareyamo dokopa Jese baa alemo ingyuo kareya.
1SA 17:13 Wane banya andapae rema dusipa nakama Solemoo paleta yanda pila peyami. Wane andapae dusipana kingi Eliape dee mendena kingi doko Apinatape dee rema dokona kingi Sama lenge.
1SA 17:14 Dapiti doko wane lumwa pyuo mandeya. Wane andapae rema dusipa Solemoo role pyao kareyaminyi dokopa
1SA 17:15 Dapiti baa yuu Beteleme pao epo pyuo rakangena mena sipisipi dupwa rapu pyuo kareya.
1SA 17:16 Yuu gii peparae yangama alemanji lao Golayate Isaraele wambu dupwa yanda pimana epena lao kareyamo yuu gii akalisa kisima epo peya.
1SA 17:17 Yuu gii mendepa Jeseme Dapiti lamaiyuo, Borete akalisape dee witi jingi kisasi sikyali kilokerame akalisa dopale ingyuo dasipa minyuo embena yangone dupwa yanda pyuo karaminyi dupwa waiya lao mai paipunya, leya.
1SA 17:18 Dee nenge sisi lenge akalisa dasipa yanda singi mupwa maiyakala pena, leya. Embena yangone dupwa apa pyuo karamipi lao kandape. Kandapala nambame kapa karamilyamo lao soo gisareŋe lapala bange mende nakama keta nyepala minyuo ipupi, leya.
1SA 17:19 Kiŋi Solemoo embena yangone dee Isaraele wambu dupwa pipya yuu pau lama lama Ela lenge dokona Pilisitia wambu dupwa pipya yanda pyuo karaminyi.
1SA 17:20 Dapiti dee yangama wamba kukwa ene yango epeyamo dokopa sipurapala mena sipisipi dupwa mendeme rapu pinya lapala baame nenge minyuo rakange Jese lamaiyamuli pyuo peya. Isaraele wambu dupwame yanda lakao yuwa lao kareyaminyi Dapiti baa pao pyaka siya.
1SA 17:21 Pilisitia yanda singipi dee Isaraele dupwa pipya yanda pirami dokona suu pyao maki maki pipala mendeme mende kando kando pyuo kareyami.
1SA 17:22 Dapiti nenge minyuo peya doko nenge rapu pingi akali doko kareya dokona yaki nyepala baa yanda pinya kareyaminyi mare dokona peya. Pao banya yangonge dupwa apa pyuo karamipi lao piso siya.
1SA 17:23 Dopa lao kareyami dokopa Golayate wamba pinginyili pyuo Isaraele wambu dupwa yanda pimana epena lao kareya doko Dapiti soo kareya.
1SA 17:24 Golayate epeyamo doko kandapala Isaraele dupwa ralo pako peyami.
1SA 17:25 Nakama lao, Akali doo epelyamo doko kandalapape. Baa yanda pimana letamo doko selapape. Mendeme pyao kumaramo doko kiŋi dokome bange keyange malu baa keta maiyuo kamonganyi pyambwara. Banya wanenge nyinya lao maiyuo dee akali dokona rakangena ree palu dupwa takisi pyao pii narami lara, leyami.
1SA 17:26 Akali doo baa kareyamo dokona kareyami dupwa Dapitimi piso soo, Pilisitia akali dake pyapala Isaraele wambu dupwa mona rando karaminyi dokona kiiramo nyera ramo doko aki bange mende nyerase? Dee dokopa Pilisitia akali Anatu suu pyaa nange doko akipamo Anatu Lete Karengena yanda singi dupwa isa palyarase? leya.
1SA 17:27 Akali mendeme Golayate pyao kumaramo doko dopa pira lao nakamame baa lamaiyami.
1SA 17:28 Dapitimi wambu dupwa pii doo lamaiyami doko Eliape banya yangonge porai dokome siya. Sepala baa imbuo dopa leya. Emba dakena aki nyela epelene? Embena mena sipisipi duluma apimi rapu pyuo yuu pau dulunya karase? Emba wane kopyali range mupwa lao suu pyapala yanda pimi dake kandala epane doko namba silyu, leya.
1SA 17:29 Namba epapu apa pyanope? Nambame pii mende piso see narose? leya Dapitimi.
1SA 17:30 Akali mende kando pii mendaki dokoko piso siya dokopa wambu dupwame pii isingi mendaki leyaminyi dokoko leyaminyi siya.
1SA 17:31 Akali lapome Dapiti baa leyamo pii doko sepala Sole lamaiyami. Dokopa Soleme baa kee lao epena leya.
1SA 17:32 Dapitimi Sole lamaiyuo, Emba kiŋi ingyuo karenge doko suu pyao wambu mendeme Pilisitia dake kando paka nara ingilyamo. Nambame baa kapa pyala paro ingilyamo, leya.
1SA 17:33 Dopa leyamo dokopa Soleme lao, Daa, embame apa pyuo baa pyarepe? Emba mee wane. Baa ene wane dokopa karo yuu gii peparaena baa yanda singi yulu pyuo kareyamoko karamo, leya.
1SA 17:34 Emba kiŋi ingyuo karenge, leya Dapitimi. Nambame nambana rakanena sipisipi dupwa kapa mee rapu pyuo karenge. Karelyonopa mena laenepe panda mena beyape dupwa epapala sipisipi ikyane mende nyuo soo penge dokopa
1SA 17:35 nambame peta rambu lapala nakama ralinyi karapala sipisipi ikyane dupwa kiiramo nyingi. Nyilyunu dokopa mena laene panda mena beya dupwame kapu kyepala namba nalana pingi dokopa nambame pendoko dokona minyarapala pyao kumakange.
1SA 17:36 Nambame laene beyape dupwa pyao kumakange dopa pyuo Pilisitia akali Anatu suu pyaa nange dakeme Anatu Lete Karengena yanda singi dupwa pipya yanda pimana lao karamo doko nambame pyao kumaro, leya.
1SA 17:37 Kamongome nyisiyamopa mena laene beyape dupwa piyu. Dopa pyuo nyisaramopa Pilisitia dake pyao kumakalopono, leya. Soleme isingi lao, Doko kapa. Kamongo Anatu emba role pyao karenale lapala pupi, leya.
1SA 17:38 Solena yanda pingi bange dupwa Dapiti baa pinya lao maiya. Dee kyawa rarange kapame wasisi Dapitinya kyawa dokona pee pyakamyuo dee konambepe yanda pingi bange dupwape pee pyuo pinya lao maiya.
1SA 17:39 Dapiti dupwa nyepala wua gela doko manjo makande pyuo kandeya doko baa dokore pyuo kanda nange dokome kapa ingya naya. Baame Sole lamaiyuo lao, Namba dapwa pyuo kapa yanda pila paa naro, leya. Dopa lapala kako lao neta nyiya.
1SA 17:40 Neta nyepala dokopa banya mena rapu pyuo karenge pangali doko nyuo dee kana pena pena pisi kingi paki nyuo banya nyuu dokona paki piya. Paki pipala dokopa kana palyuo pingi puu doko minyuo Golayate kareya dokona peya.
1SA 17:41 Dopa piyamo dokopa Pilisitia akali andake doko Dapiti kareya dokona laeyo epeyamo dokopa akali mendeme banya konambe minyakamyuo lenge kambu siya dokona epeya. Dokopa baa mee repeta kaeya nao epeya.
1SA 17:42 Pilisitia dokome Dapiti angi kando baa wane kuki elyape dae doo lao suu pyao kandanyi palyuo leya.
1SA 17:43 Golayateme Dapiti piso, Pangali dokome apa piripi? Namba suwa daa. Lapala banya mee bange anatu dokome epo Dapiti randa mainya lao kee leya.
1SA 17:44 Dokopa Golayateme pimbanale epena lapala dopa leya. Nambame emba pyao kumakaronopa yakape menape dupwame nenale.
1SA 17:45 Dokopa Dapitimi isingi lao, Embame namba pimwaiyuo kaku yandape wua gela dupwa minyuo epelene doŋo. Nambame emba pimwaiyuo Kamongo Porai Wakasa dokona kingi lao pyarowale. Embame baa Isaraele yanda singi dupwana Anatu yanda pimwaiyuo karene dokona kingi lao epelyo, leya.
1SA 17:46 Yuu gii dakepako Kamongome emba namba keta jeramopa emba pyao anamasi minyuo embena mange doko pukupala dee Pilisitia yanda singi dupwana yanenge mena yakape mairunupa dupwame narami. Dopa pirami dokopa Kamongo Anatu doko Isaraele yuu dokona karengelyamo lao wambu peparae soo rali pirami.
1SA 17:47 Wambu dae karaminyi dupwame Anatu baame kaku yandape dupwa minya nao banya wambu dupwa lete wai pyao pyuo nyeramo doko kandarami. Baa yanda pyuo winimi pingi dokona baame nakama Pilisitia wambu dupwa peparae namwa keta jera ingilyamo, leya.
1SA 17:48 Dopa leyamo dokopa Golayate baa Dapiti kareyamo dokona laeyo kambako epeya dokopa Dapiti makando Pilisitia wambu maki maki pyuo kareyami dokona lambu pao baa pyala peya.
1SA 17:49 Dapiti banya nyuu dokona kingi palyapala kana mende rangu nyiya. Nyepala kana palyuo pingi puu dokona palyapala Golayate piya. Piyamo dokopa banya enamba kuli dokona pyao pyalusi piya dokopa Golayate baa pao yuu dokona mukumbalu paleya.
1SA 17:50 Dapiti wua mendepe minya nao mee kana palyuo pingi puu dokona kana palyapala Golayate pyao kumakaya.
1SA 17:51 Pyapala makando repe kura lapala Golayatena wua gela doko kolo nyepala mange doko puku pyao kumakaya. Pilisitia dupwa nakamana akali kyawa doko kumuyamo doko kandapala nakama ralo pyako peyami.
1SA 17:52 Isaraele akali dupwape Juta akali dupwape yuwa lao yuu Gati dee yuu Ekerono kame kambu karenge peta ralyuo peyami. Yuu Saaraime piso pao yuu Ekerono Gatipi ralyuo pyao peyaminyipa Pilisitia wambu dupwa lukunduo soo peyami.
1SA 17:53 Isaraele dupwa Pilisitia wambu dupwa pyao ralinyi nembapala nakama kapu kyuo epo Pilisitia wambu dupwana bange dupwa nyiyami.
1SA 17:54 Dapitimi Golayatena ayemba pukusi doko nyepala yuu Jerusaleme dokona minyuo peya. Dee Golayatena kaku yandape dupwa banya komau anda dokona reteya.
1SA 17:55 Soleme Dapiti Golayate pyala peyamo dokopa kandapala Apena banya yanda singi isingi akali doko piso soo lao, Apena, wane doko apinya ikinyingisi? leya. Apename isingi lao, Emba kiŋi doko, namba kanda nange, lamaiya.
1SA 17:56 Soleme lao, Baa apisi lao piso sela pupi, leya.
1SA 17:57 Dapitimi Golayate pyapala enakana yanda singi palenge yuu dokona kapu kyuo epeya. Epeyamo dokopa Apename baa lanyuo Sole peteyamo dokona peya. Dokopa Dapitimi Golayatena ayemba pukusi doko soowako peya.
1SA 17:58 Peyamo dokopa Soleme piso soo leya. Wane emba apinya ikinyingisi? Dokopa Dapitimi isingi lao, Embena kendemande akali Jese yuu Beteleme range dokona namba ikinyingi, leya.
1SA 18:1 Solepa Dapitipa nakamba pii lao oteyambi. Dokopa enakana Solena ikinyingi Jonatane lenge baa Dapiti kando nyuo rae maipala baame range mona reteya doko suu pyao Dapiti mona reteyako.
1SA 18:2 Soleme Dapiti yuu gii dokona piso pao anda paa nana lapala baa role pyao karena leya
1SA 18:3 Jonataneme Dapiti mona wakasa reteyamosa puu minyuo karalu kararamba, lalu lao leya.
1SA 18:4 Baame banya komau londe doko roko nyepala Dapiti pinya lao maiyuo yanda pingi bange dupwape marapupi yandape wua gelape dupwa peparae maiya.
1SA 18:5 Soleme Dapiti yulu pinya leya dupwa kapa piyasa kandapala Soleme Dapiti baa yanda singi dupwana mupwa ingyuo karena leya. Dopa piyamo dokome Solena akali dupwape yanda singi mupwa dupwape peparae rae maiyuo kareyami.
1SA 18:6 Dapiti Golayate pyapala epeya dokopa yanda singi dupwa anda epeyami. Epeyaminyi dokopa yuu taone peparae Isaraele dokona range enda dupwa peparae kiŋi Sole kandala epeyami. Epo dokopa kenane keyange lapo pyao nakama lyuo lakuli pyao rambyalu lao rae maiyuo epeyami.
1SA 18:7 Enda dupwame kenane piyami dokona pyao dokopa Soleme wambu taosande mendaki (1,000) pyao kumuya lao Dapiti nyuo ketae pyambuo taosande akalisa (10,000) pyao kumuya, leyami.
1SA 18:8 Dokopa Sole baa rae mai napala baa wakasa imbumi kumuya. Imbumi kumapala pii dopa leya. Dapitimi taosande akalisa (10,000) pyao kumuya lao taosande mendaki (1,000) iki nambame pyao kumii, letaminyi. Dokona yulu mendaki iki silyamo doko baa kiŋi ingyuo karena larami, leya.
1SA 18:9 Dokona lao yuu gii dokopa piso pao Soleme Dapiti yango palyiya.
1SA 18:10 Yuu gii dokopa yangama Anatumi imambu koo dokome Sole makande pela pena leya. Dopa leyamo dokopa baa kopyali ingilya ingyana pyuo banya anda kareya. Dopa pyuo kareyamo dokopa Dapiti baa rambyalu yuu peparae lengenyili pyuo lao kareyamo dokopa Sole baa kaku mende minyaro kareya.
1SA 18:11 Soleme dopa lao range suu pyao, Nambame Dapiti kakumi pyaronopa apya dokona pararo karenale, leya. Dopa lapala kakumi yuu lamasa lao piyamo doko Dapitimi mee wanjinyi nembeya.
1SA 18:12 Dopa piyamopa Kamongo dokome Sole yaki nyepala Dapiti keta kareyamosa Sole baame Dapiti kando pakaya.
1SA 18:13 Pakapala Soleme Dapiti pena lao baa akali taosande mendaki dupwa iso mupwa ingyuo karena leya. Dopa leyamo dokopa Dapitimi akali angi dusipa lanyuo yanda pela peya.
1SA 18:14 Kamongo baame Dapiti keta kareyamo dokome Dapiti banya yulu peparae kapa pyuo peya.
1SA 18:15 Sole Dapitinya yulu keyange piyamo doko kandapala dokopa kamame wakasa pako kareya.
1SA 18:16 Dapiti baame yulu keyange pyuo kareyamo dokona Isaraele dee Juta wambu peparaeme baa mona wakasa reteyami.
1SA 18:17 Soleme Dapiti lamaiyuo, Dake nambana wanenge mupwa doko Merape lenge. Embame nambana yanda singi ingyuo paka nao yaki nyii nao karapala Kamongona lao yanda pyakamiri ramo dokopa namba wanake doko nyere lao jero, leya. (Sole baa rangeme Dapiti kapa pyuo pyara ingya nayasa Pilisitia wambu dupwame dopa pyuo Dapiti pyarami lao suu piya.)
1SA 18:18 Dapitimi isingi lao, Namba koo kandale. Nambana ree palu dupwa pendewa dokona namba api lao kiŋinya imwange ingyarose? leya.
1SA 18:19 Merape baa Dapiti mairaminyi yuu gii doko pyaka siya dokopa nakamame Dapiti kaepala baa akali Ariele lenge yuu Meyola range doko maiyami.
1SA 18:20 Maiyaminyipape Solena wanenge mende Maekele lenge dokopa Dapitipa ama mona wakasa reteyambinyi dokona Sole soo rae maiya.
1SA 18:21 Baa dopa lao suu piya. Namba Maekele Dapiti mairu ramo doko baame Dapiti anjili laramopa Pilisitia wambu dupwame pyao kumarami lao suu piya. Suu pyapala Soleme Dapiti kamba lamaiyuo, Emba nambana imwange ingyare, leya.
1SA 18:22 Soleme banya akali mupwa dupwa epena lapala lao, Nakamame Dapiti yalu pyuo lamaiyuo, Dakepa kiŋi dokope dee banya akali mupwa dupwa peparaepe emba kando rae mailyaminyi dokona emba banya wanenge kapa nyere lena, leya.
1SA 18:23 Dopa leyamo dokopa nakamame Dapiti pao lamaiyami. Lamaiyaminyi dokopa baa isingi lao, Mendeme kiŋinya wanenge nyeramo doko wambu dupwame kandapala banya kingi ketae pyambwarami. Namba pendewa koo dokome kapa nyero ingya nalyamo, leya.
1SA 18:24 Akali mupwa dupwame Dapitimi pii leyamo doko pao Sole lamaiyami.
1SA 18:25 Lamaiyaminyi dokopa Soleme nakamame Dapiti dopa lena lamaiya. Enda nyerene dokona kiŋi baame emba keta mende nyipuli yaka lao suu pilyamo. Banya yanda pimwai dupwa yano pyao embame Pilisitia akali andete mendaki (100) dupwa pyao kumasipili lao suu pilyamo. Pyao kumasepala nakamana yongo yanenge pyakepanyi nembapala yanenge dupwa kiŋi karapyamo dokona minyuo epena leyami. (Dopa pyuo Soleme Pilisitia wambu dupwame Dapiti pyao kumarami lao palyiya.)
1SA 18:26 Solena akali mupwa dupwame Solena pii leyamo dupwa Dapiti lamaiyami. Dokopa Dapiti baa kiŋinya imwange larolyamo lao rae maiya.
1SA 18:27 Wambo nyepa nao karo dokopa Dapitimoo banya akali dupwa pipya papala Pilisitia wambu andete lama (200) pyao kumakayami. Dopa pipala baame pongo kambu dupwa pyakepo nyuo karo minyuo pao kiŋinya lenge kambu dokona yaka lao lasaka piya. Doko baa kiŋinya imwange ingyapuli lao sepala piya. Dokopa Soleme wanenge Maekele doko Dapiti nyinya lao maiya.
1SA 18:28 Kamongo baa Dapiti keta kareyamo dokope dee banya wanengeme Dapiti mona reteyamo dokope Soleme soo nyiya.
1SA 18:29 Yuu gii dokopa Sole baame Dapiti kando kamame wakasa pakame kumuya. Dee baa palyuo kareyamo yuu gii dusipana banya nyisu petenge ingiya.
1SA 18:30 Dokopa Pilisitia yanda singi dupwame pyala epapa piyami. Dopa piyaminyipape Solena yanda singi mupwa dupwa porai ingyuo kareyaminyipape yanda peparaena Dapiti baa kamame porai wakasa ingyuo kareya. Renge dokona lao Dapiti banya kingi ketae peyamo wambu soo oteyami.
1SA 19:1 Soleme banya ikinyingi Jonatanepa banya yanda singi dupwape lamaiyuo, Dapiti pyao kumakalana leto lao reteya. Dopa piyamopape Jonatane baa Dapiti mona wakasa reto puu minyuo kareyambi.
1SA 19:2 Dopa piyambinyi dokome pao Dapiti lamaiyuo lao, Nambana rakaneme emba pyalana lao retapyaŋa rakya yangama kandokondali pyuo karapala panda nee pingi mendena papala yalu pyuo karape.
1SA 19:3 Emba yuu yalu pyuo kararene dokona namba pao rakanena arapu dokona karapala rakane embena lao lamairu. Dokopa nambana rakaneme embena lao mende lakara ramo doko emba see lao langiru, leya.
1SA 19:4 Jonataneme Dapiti lakando Sole lamaiyuo, Embena kendemande akali Dapiti doko baa randa mende mai napipi. Baa koo mende emba kando pii naya. Dopa pii nayamopape baame yulu peparae pipyamo dupwana emba kamame andake wakasa ingyuo nyisakondali pyuo piya.
1SA 19:5 Baa kumara doko suu pyaa nao baame Golayate pyao kumakayamo dokopa Dapiti baa kumuyaliko doŋo kuma naya. Doko Kamongo dokome pyao anamasi minyuo wini pingi renge doko Isaraele keta maiya doko emba kandapala dokopa ama rae mai kande. Dokona lao epapu embame akali koo mende pali nange doko kando kopetame pyuo renge angi mende daa dokona akipamo Dapiti pyao kumakarese? leya.
1SA 19:6 Dokopa Soleme Jonatane pii doko ŋee lao sepala baa kana minyuo lalu lao lao dopa pyuo leya. Kamongo karalu karenge dokona kingi lao nambame Dapiti baa pyao kumaka naro, leya.
1SA 19:7 Dokopa Jonataneme Dapiti kyakale lapala pii Soleme leyamo dupwa peparae lamaiya. Lamaipala dokopa Dapiti baa Sole peteyamo dokona lanyuo peya. Peyamo dokopa Dapiti baa wamba kiŋi Solena yulu pyakamiya doko suu pyaoko pyakamyuo kareya.
1SA 19:8 Dokopa Pilisitia wambu pipya yanda doko kamba sipureya. Dokopa Dapitimi banya yanda singi dupwa pipya porai wakasa ingyuo yanda nengena karo pyao wini piyasa Pilisitia wambu dupwa ralo bolombalo lao pyako peyami.
1SA 19:9 Yuu mendepa Kamongome imambu koo mende Sole makande pela pena leya. Dopa piyasa Sole baa kaku mende sakaro banya anda peteya dokopa Dapiti baa rambyalu lao peteya.
1SA 19:10 Sole banya kaku dokome Dapiti anda apya kolapanalu arekyo pyalena piya. Dopa piyamopape Dapitimi kaku doko wanjiyasa anda apya dokona peteya. Dokopa Dapiti baa range kyawa lete nyuo makando wakale peya.
1SA 19:11 Yuu gii dokopako kukwa Soleme yangama dokopa baa pyao kumakaramaŋa lapala akali lapo Dapitinya anda dokona lee minyuo karala pena leya. Dokopa Dapitinya etenge Maekele dokome baa wai pii lao repe repe lamaiyuo, Emba epapu kukwa neta yalu pyuo wakale paa nare ramo doko rakya emba pyao kumakarami, leya.
1SA 19:12 Dopa lapala baame windowa lumbwapala Dapiti neta pena lao nembeyasa baa neta yalu pyuo makando peya.
1SA 19:13 Lapala enakana enda baame mee bangende isame wasisi wambu yalende anda dokona singi doko nyiya. Nyepala luu palenge rate dokona luu palyuo reteya. Retapala kyawa kilyanda pingi bange mende mena meme emanjimi wasisi doko nyuo bange wambu yalena kyawa dokona kyawasi ingyuo pinyi palyakamiya. Dopa pipala komau dokome yambe piya.
1SA 19:14 Dopa pyuo Solena akali dupwame Dapiti nyela epeyami dokopa enda Maekele dokome Dapiti baa anga pyapya, leya.
1SA 19:15 Dopa leyamopape Soleme akali dusipame kamba kapu kyuo nakamame angi rolae minyando kandala pena leya. Lapala baame nakama lamaiyuo, Banya luu palenge rate isa dokona sinya lapala soo ipupwape. Dokopa nambame baa pyao kumakaro, leya.
1SA 19:16 Leyamo dokopa nakama papala pao andakare peyami. Pao kandeyami dokopa mee bange kingimi wasisi wambu yale doko mena memena emanjimi kyawa kilyanda pingi bange doko kyawasi ingyuo piro kareyamo kandeyami. Soleme Maekele piso soo lao, Embame namba akipamo minyako pipala nambana yanda pimwai doko pena lapipi, leya. Leyamo dokopa enda dokome isingi lao, Embame namba nyisa nare ramo doko baame namba pyao kumakaro lapya, leya.
1SA 19:18 Dapiti baa ralo pao Samyuele yuu Orama kareyamo dokona peya. Papala Soleme baa pyalana piya dupwa dopa pipya lao lamaiya. Dokopa enakana Samyuele baapa role pyao yuu Nayote dokona pao kareyambi.
1SA 19:19 Kareyambinyi dokopa wambu lapome Sole lamaiyuo, Dapiti yuu andake Orama dokona yuu mende Nayote lenge singi dokona karamo, leyaminyi siya.
1SA 19:20 Sepala Soleme akali lapome Dapiti baa minyarapala nyela pena leya. Pao karo kandeyaminyi dokopa Samyuele baame mupwa ingyuo kyawa nyepala poropeta akali menge dupwa pipya rae maiyuo pii poraiyuo lao pyakalyuo pyao kenane pyao wamya lyuo kareyaminyi kandeyami. Dokopa Anatunya imambu dokome Solena akali dupwa opetae minyuo yulu piyasa dolo leyami dopako pyuo leyami.
1SA 19:21 Sole baa pii doko sepala banya wai pii minyuo lapo dee kamba dokona pena leya. Dupwa opetaeko pao dokona konda pipala doo leyami dupwana laoko kareyami. Dopa piyasa yuu repo pyuo akali lapo wai minyuo pena leyamo peyami dupwa dopako pyuo dokona konda piyami.
1SA 19:22 Dopa pyuo epa nayamisa enakana Sole baa range yuu Orama dokona panya peya. Pao ipwa pete yuwale kyasisi yuu Siku dokona singi doko kando nyepala Soleme Samyuele Dapitipa anja karambinyi lao piso siya. Piso siyamo dokopa wambu dupwame lao, Nakamba yuu Nayote dokona karambinyi, leyami.
1SA 19:23 Leyaminyi doko sepala baa yuu Nayote dokona peya. Peyamo dokopa Anatunya Imambu dokome baa opetaeko minyuo yulu piyasa doo lao kareyaminyi dopako pyuo baa pii poraiyuo lao wamya lyuo pao yuu Nayote dokona peya.
1SA 19:24 Papala banya komau dupwa roko nyuo pii poraiyuo lao Samyuelena lenge kambu dokona wamya lyuo kareya. Karapala baa yuu korakama dokope dee kukwa dokope paparae palyuo kareya. (Renge dokona lao wambu dupwa lao, Sole baa opetae poropeta ingyuo karase? lao kanda soo leyami.)
1SA 20:1 Sole baa yuu Nayote yuu Orama singi dokona epeyamo dokopa Dapiti baa kala Jonatane kareya dokona peya. Papala baame piso soo, Nambame aki koo mende pipusi? Nambame aki kopetame mende embena rakane kando pipunusa namba pyao kumakalana pilyase? leya.
1SA 20:2 Jonataneme Dapiti isingi lamaiyuo, Doko daa. Emba kuma nare ingilyamo. Nambana rakaneme yulu kukipi andakepe peparae piruŋu lao mende yalu pii nao peparae polo langingi. Dokona lao baame yulu dake yalu pii nara ingilyamo. Baame emba kumaka nara ingilyamo, leya.
1SA 20:3 Dopa leyamopape Dapitimi isingi lao, Embame namba mona wakasa retapi doko embena rakane dokome soo otelyamo. Dokona emba mona randarene lapala baame namba pyara kata lapona lao reto rapa rapa pilyamo dupwa emba langi nalyamo. Nambame Kamongo lete karalu karenge doko keta kinyi kinyi lao, Embena rakaneme namba oo repeta pyao kumakara leto, leya.
1SA 20:4 Dokopa Jonataneme isingi lao, Nambame emba mende pinya masere dupwa pyakaro, leya.
1SA 20:5 Dapitimi isingi lao, Rakya kana enenge yapasara dokopa kiŋi pipya nenge nao yalya kando pisiru ingilyamo. Dopa piramopape emba kapa lare ramo namba ee dokona yalu pela papala piso pao jimwa kukwa dokopa dee eparo, leya.
1SA 20:6 Embena rakaneme lao maso dokopa namba baamoo pipya role pyao pisa nalyamano leya kande doko baa dopa lamai. Yuu Beteleme dokona ee kana peparae yaka lao Dapitinya ree palu wambu dupwame nakama peparaena lao mena pyao kiso Anatu maingi dokona yuu gii pyaka silyamo. Dokona lao Dapitimi namba piso sokondali pyuo lao, Baa anda waiya lao puu lena lapya, lare.
1SA 20:7 Larene dokopa baa kapa lara ramo doko namba nyisarasa pira. Daaŋa lapala imbwuara ramo doko namba pyaro lao suu pyarasa pira doko emba soo nyere, leya.
1SA 20:8 Embame namba kando elyape pepe. Pipala embame namba kando Kamongona kingi lao lalu lao leene pii doko yaki nyii nao minyaro karape. Dopa pirinyipape nambame kopetame mende piyu kande doko embame namba pyao kumakape. Akipamo embena rakane dokome namba pyao kumakana lao lanyuo pao mairisi? leya.
1SA 20:9 Dokopa Jonataneme isingi lao, Embame dopa pyuo suu pyaa napipi. Nambana rakane dokome emba pyalena suu pyaramo doko soo nyipuli namba emba epo langya napulisi? leya.
1SA 20:10 Leyamopa Dapitimi isingi lao, Embena rakane dokome imbu singi nyuo pii isingi yano pyara ramo doko apimi namba langirase? leya.
1SA 20:11 Leyamo dokopa Jonataneme Dapiti lamaiyuo, Epale isako lapona yalu pyuo pii lala bwua leya. Dokopa nakamba peyambi.
1SA 20:12 Jonataneme Dapiti lamaiyuo, Isaraele wambunya Kamongo Anatumi nambwana pii letambano doko sinya. Rakya jimwape nambame rakane piso sero. Embena lao banya masingi keyange ingyara ramo doko nambame emba langiru.
1SA 20:13 Rakaneme emba pyalena suu pyao kipwa goe lalu lao laramopa nambame emba kyawa lete nyuo nyisa nembo langi nao laro ramo doko Kamongo dokome namba pyao kumakana. Kamongo nambana rakane role kareyamo doko emba role karena.
1SA 20:14 Namba kuma nao mee lete kararo ramo doko embena lalu lao leene doko minyaro karapala namba kando rape rape lao karape. Daaŋa lapala namba kumuyu kande
1SA 20:15 nambana ree palu dupwa kando elyape pyuo anjiki pyakao karalu karape. Dee Kamongo dokome embena nyisu petenge dupwa pyao kokwa soo nembalu nembo nembaramo dokopa
1SA 20:16 nambwana lalu lao letambano doko nyisa nembo yaki nyii nambanale. Kaepala emba yaki nyere ramo doko Kamongome emba randa jera.
1SA 20:17 Jonataneme baa range mona retenge doko maso Dapiti mona wakasa reteya. Yuu mendepa Jonataneme Dapitimi baa mona retaro lao lalu lao langinya lamaiya.
1SA 20:18 Dokopa Jonataneme Dapiti lamaiyuo, Rakya doko kana yapasara dokona nyuo malu palyuo nenge narami. Dokopa embena panda iki soo emba pana nao pirinyi doko kandapala rakaneme soo nyera.
1SA 20:19 Dee jimwa dokopa emba kamame pana narene dokopa rakaneme kamame andake ingyuo suu pingi nyera. Dokona emba yuu mendepa yalu piinyi panda kande dokona papala kana malu palyaro karamo dokona yalu pipi.
1SA 20:20 Dokopa nambame wanga rema pisirinyi dokona make angi rolae doko ingyuo pyao peyaro.
1SA 20:21 Dokopa nambana kendemande akali doko lamaipala kotala pena laro. Lapala nambame baa lamaiyuo, Kanda, wanga dusipa emba pupinyi daerena ingyuo palamoŋo nyinya leyo kande doko emba mee lete nyuo nyisa epare. Kamongo lete karalu karenge doko keta lalu lao lao, Nambame emba randa nenge mendena dee kara nare langilyu, leya Jonataneme.
1SA 20:22 Lapala lao, Wanga dusipa emba petene dumurena ingyuo palamo lao akali doko lamaiyu kande doko Kamongo dokome emba nyisa nyuo nembarasa piraŋa emba pisirinyi panda doko yaki nyuo wakale mendasa pupi.
1SA 20:23 Namba range keta lalu lao leyambano doko Kamongo dokome kandokondali pyuo yaki nyii nao minyaro karalu kararambi lao suu pyaro karara.
1SA 20:24 Dokona lao Dapiti baa epale isako dokona yalu pyuo karala peya. Dokopa kana enenge doko yapasiyamo dokopa nenge nyuo malu palyuo peteyaminyipa kiŋi Sole baa nenge doko nala epeya.
1SA 20:25 Epapala Sole baa banya panda range petenge dokona apya repeta dorena peteya. Dokopa akali Apena doko banya parali maki peteya. Dokopa Jonatane rakange Sole kanda kanda ingyuo paki peteyamopa Dapitinya panda iki siya. Mee siyamopape
1SA 20:26 Sole baa yuu gii dokopa mende laa naya. Renge dokona lao baa keta mende pipyamosa poo pyasi ingya napyamosa epa nalyamo lao suu piya.
1SA 20:27 Kana enenge nenge malu palyuo piso nenge yuu gii papeyamo dokona yangama dokopa Dapitinya panda doko ikiko siyamo kandeya. Kandapala Soleme Jonatane piso soo lao, Akipamo epapu kwuakapi Dapiti nenge nala epa nalyase? leya.
1SA 20:28 Dokopa Jonataneme isingi lao, Baame namba piso sokondali pyuo baa Beteleme pupuli lao lapya, leya.
1SA 20:29 Lapala baame lao, Nambana ree palu dupwa yuu taone dokona nyuo malu palyuo mena pyao kisarami dokona nambana yangonge dokome namba ipupi, lapya. Dokona lao namba puu, lape. Emba nambana puu minyingi angi ramo doko nambana ree palu dupwa kandala paroleŋe puu laa lapyasa kapa pena lapu. Renge dokona Dapiti banya panda iki silyamo, leya.
1SA 20:30 Dokopa Sole baa Jonatane kando imbumi kumapala lao, Emba endakinyi koo kamba lenge kopyalinya ikinyingi endakinyinya lenge kambu karenge dake. Emba Dapiti rae maipinyi doko epapu namba silyuŋu Dokona lao elya renge andake doko embapa endakinyipa keta palira.
1SA 20:31 Dapiti baa lete kararamo yuu gii dusipana emba yuu dakena kiŋi kara naro, lao see nalese? Dokona epapu papala Dapiti baa dae nyuo minyuo ipupi. Dokopa baa kumapenge ingilyamo. leya.
1SA 20:32 Leyamo dokopa Jonataneme isingi lao, Akipamo baa kumarase? Baame aki koo mende pipyase? leya.
1SA 20:33 Yuu gii dokopa Soleme Jonatane pyao kumakalana suu pyao banya kaku dokome peteyamo dokona piya. Dopa piyasa Jonataneme banya rakange dokome Dapiti angi pyao kumakalana suu pyao kipwa goe lao otapyalyamo lao soo nyiya.
1SA 20:34 Dokona yangama dokopa kana enenge yapasiyamo nenge malu palyuo nenge yuu gii lapo dokopa Jonatane baa imbwuapala rate peteyamo doko yaki nyuo sipurapala nenge naa nao peya. Peyamo doko Soleme Dapiti kando koo pinya suu piyamo dokona baa Dapitinya lao kondome kumuo mona randapala peya.
1SA 20:35 Dokona yangama dokopa Jonatanepa Dapitipa leyambinyili pyuo Jonatane baa Dapiti yalu piyamo panda dokona kandala peya. Baa pao karo dokopa wane parange mende opetae nyema peya.
1SA 20:36 Nyema papala wane baa lamaiyuo, Nambame wanga dake pyarowaleŋe makando kotala puu, leya. Leyamopa wane doko makando peya dokopa Jonataneme wane doko yalaponalu wanga doko pyao nembeya.
1SA 20:37 Dokopa wane doko wanga isa peyamo mare doko pao kando nyiyamo dokopa Jonataneme pii poraiyuo lao wanga doko dumbisale palamo kandena, leya.
1SA 20:38 Lapala lao, Mee dokona kara napipi. Waiya lao epena, leya. Dokopa wane dokome wanga nyepala kapu kyuo banya akali mupwa doko kareyamo dokona peya.
1SA 20:39 Doo piyamo dupwana renge angi wane dokome see naya. Dapiti Jonatanepame range soo nyiyambi.
1SA 20:40 Dopa pipala Jonataneme yanda wangape dupwa wane doko maipala yuu taone dokona kapu kyuo minyuo pena lamaiya.
1SA 20:41 Wane doko yaki nyuo papeyamo dokopa Dapiti kana malunya yalu piru siyamo doko sipuro neta epeya. Epapala dokopa wapambu pii pyaro pisipala yuu remasa banya lenge kambu dokome pangu siya. Dopa pipala Jonatanepa Dapitipa laparae nyinyi pyuo karo dokopa ee leyambi. Ee leyambinyi dokopa Dapitimi Jonatane kando mona randayamo doko kamame wakasako ingiya.
1SA 20:42 Jonataneme Dapiti lamaiyuo, Anatumi emba keta nyiso kararaŋa pupi. Nambwana wane enakana manjirambano jingi para pyao paramo dupwanape nambwa ketape pii lalu lao leyambano doko Kamongome soo karapala yaki nyii nao minyuo pyuo karo puu pumbili lao masilyamo, leya. Leyamopa Dapiti baa yaki nyuo peyamopa Jonatane baa yuu taone dokona kapu kyuo peya.
1SA 21:1 Dapiti baa pao purisi Aimeleke kareyamo yuu Nopo dokona peya. Dokopa Aimeleke baa banya anda pisipala walu lao mona nembapala kamanda yako lala epeya. Epapala baa piso soo lao, Akipamo emba iki dae epelene? leya.
1SA 21:2 Dokopa Dapitimi isingi lao, Namba dae ipunu doko kiŋinya renge dokona epano. Namba dae yulu mende pela puu lapyamo doko baame namba langyuo mendemepe sinya laa napipi, lapya. Nambana akali dupwa doo nambame nakama lamaiyuo, Yuu panda kando mendasa nambamoo kando nyerama, lapu.
1SA 21:3 Dokona epapu emba aki nenge lapo silyase? Namba nenge borete kingi paki joo dee nenge lapo sera ramo dupwa joo pipi, leya.
1SA 21:4 Purisi dokome isingi lao, Namba keta borete poo pyasi keyange doko iki silyamo. Mee borete see nalyamo. Dokona embena akali dupwa enda pipya role pyao pali naminde ramo doko kapa emba nyere, leya.
1SA 21:5 Leyamo dokopa Dapitimi isingi lao, Nakama enda pipya pali naoko pimiŋi. Namwa yuu peparae mee yulu dapale dupwa neta pela panya dokopa nambana akali dupwa nakama koo mende piramano kando lao waso keyange ingyuo karapala pela penge. Namwa wamba yulu pela papingiko doŋo epapu namwa yulu mupwa wakasa ingyuo pimwano dokome kamame keyange ingyuo karamwali lao suu pilyamano, leya.
1SA 21:6 Dokona lao purisi dokome Dapiti baa borete poo pyasi dokona maiya. Renge doko purisi dokome borete Anatu maiyamo doko iki reteya. Doko rate poo pyasi dokona siyamo doko nyepala alowa pyuo panda nyuo borete wakale enenge reteya. Retapala baame borete wambo rate siyamo dusipana lapo Dapiti maiya.
1SA 24:1 Sole Pilisitia wambu pipya yanda pyuo karo kapu kyuo epeyamo dokopa Dapiti baa yuu Engete repeta yuu muiyane dokona karamo leyaminyi siya.
1SA 24:2 Sepala Soleme Isaraele yanda singi akali porai dupwana yeelyo taosande rema (3,000) yapalyuo nyepala dee Dapiti baape banya akali dupwape yuu neta pyakaenge dorena kana kingi Mena Meme Rae Lenge lenge petenge dokona kareyaminyi koto peyami.
1SA 24:3 Pao nakama kananda mendena repeta wangu dusa mena sipisipinya kame piru karenge dokona peyami. Peyaminyi dokopa kananda karengendena Sole baa rone rala peya. Peyamo dokopa Dapitimoo banya akali dupwape kananda dokona lukuna dumbisale yalu piro siyami.
1SA 24:4 Dokopa Dapitinya akali dupwame Dapiti lamaiyuo, See. Epapu yuu gii dake embena yanda pimwai doko pyao kumakapenge. Doko Kamongo dokome emba langyuo oto, Embena nyisu petenge doko embena kingi rakana palyakaro. Embame baa keta mende pinya suu pii kande doko pipi leya, leyami. Dokopa Dapiti baa elya kalo sipurapala pao Solena komau londe dokona pinjingisa kuki lama baa see nana lao pyakepo nyiya.
1SA 24:5 Dopa piyamopa doo piyamo dokona lao suu piyamosa Dapiti banya mona rena yanyi piya.
1SA 24:6 Baame banya akali dupwa lamaiyuo, Kamongo dokome nambana kamongo akali kiŋi karena lao rombo palyiyamo doko randa mende mai nalase lao namba minyuo karena. Baa kiŋi akali Kamongome rombo palyiyamo dokoŋo nambame baa randa maiyuo pyaa naro, leya.
1SA 24:7 Dapitimi banya akali dupwa pii porai ingyuo lamaiyuo lao, Namwame Sole baa pyaa narama daa, leya. Dokopa Sole baa sipurapala kananda doko yaki nyuo pena peyamo kata dokona peya.
1SA 24:8 Peyamo dokopa Dapiti baa matarename rapetane papala lao, Emba kiŋi andake doko, leya. Leyasa Sole baa kapu kyepala kandeya dokopa Dapiti Sole banya kingi ketae nembelyoŋo lao baa yuu dokona pangu sepala lao,
1SA 24:9 Nambame emba pyalana piliniŋi lao wambu wakaleme langiminyi pii doko akipamo embame soo nyilisi?
1SA 24:10 Ene dae epapu kananda dokona Kamongo dokome emba namba nyuo jelamo doko silini. Jipyamo dokopa nambana akali dupwana lapome emba pyao kumaka laminyipape nambame emba kondapala lao, Emba Kamongome kiŋi rombo palyiya dokona nambame emba pyaa naro, lapu.
1SA 24:11 Nambana rakane kanda. Embena komau dolona kangusi kuki dalapo namba minyaro karo dake kanda. Nambame pyao kumakaro lapuli doko pyapuliŋi doko kaepala embena komau doko dake iki kunjo nyipu. Doo pipunu dokome namba emba kando mona kana pokapala koo pyuope randa joope pii naroŋo lao lasaka pili lao pupu. Nambame emba kando koo mende kamame pii napunupape embame namba mena marakae kotele lao koto pyalana papilini.
1SA 24:12 Nambwa dolapona mendalimi api kopetame pipya lao Kamongo dokome soo rolena. Namba randa jii naroŋo embame namba kando koo pipinyi dokona Kamongo baame emba randa jinya.
1SA 24:13 Pii wambarae wakale wambunya lenge dupwa emba silini. Yulu koo dupwa akali kopyali koo palenge dupwameko pingi lenge. Dokona nambame emba randa pyaa naro.
1SA 24:14 Isaraele kiŋi dokome koto pyalana pyuo karamo doko kandalapa. Baame peta ralu pyala pelyamo doko kandalapa. Suwa mee kumasi sipyamo dokope panda silyape mende pyalana pilisi?
1SA 24:15 Kamongome iki yapo api koo pipya lao renge doko kando lara. Doko api keta palamo lao lao namba nyiso embena kingi rekya lao nyinya, leya.
1SA 24:16 Dapiti baa pii lao otapeyamo dokopa Soleme lao, Dapiti nambana ikinyingi doko angi kinyi embase? leya. Lapala baa dokona piso ee leya.
1SA 24:17 Ee lapala enakana baame Dapiti lamaiyuo lao, Emba kapa letene. Namba kopetame pipu. Nambame yulu koo dopale dapale dupwa emba keta pipunupape embame namba kando anjiki pyuo elyape pilini.
1SA 24:18 Namba Kamongome emba nyuo jepapyamopape emba namba pyaa napala epapu emba namba kando keyange pyuo karoŋo lao lasaka pilini.
1SA 24:19 Akali mendeme banya yanda pimwai minyaro nyepala dee pena lao yaki nyuo kaeya nange. Dokona epapu embame namba kando keyange pyuo puu lapala kaeyapi dokona emba Kamongome nyiso elyape keta pisara.
1SA 24:20 Epapu nambame silyu doko emba Isaraele wambunya kiŋi ingyuo karare. Kararene dokopa kiŋinya yulu dupwa embame isarene dokopa au pyuo soo puu para.
1SA 24:21 Dokona nambana kingi dokope dee nambana ree palu dupwana kingipi kame see naramiŋi lao, Embame nambana para pyao paramo dupwa pyao kumaka naro lao namba kando Kamongona kingi dokona lao lalu lao, Laa, leya.
1SA 24:22 Dokopa Dapitimi, Dopa piruŋu lao lalu lao leto, leya. Lapeyamo dokopa enakana Sole banya anda kapu kyuo peya. Peyamopa Dapiti banya akali dupwa lanyuo yalu piyamo mare dokona peya.
1SA 25:1 Samyuele kumuya. Kumuyamo dokopa Isaraele wambu dupwa kondome kumuo kumanda ee lao peteyami. Pisipala nakamame banya anda kambusa yuu Orama dokona malu piyami.
1SA 28:1 Yuu mendepa Pilisitia wambu dupwa kambu palyuo karo Isaraele dupwa pyala epeyami. Epeyaminyi dokopa akali Akisi dokome Dapiti lamaiyuo, Embape embena akali dupwa pipya nambamoo yanda pirama doko emba silini, leya.
1SA 28:2 Dapitimi isingi lao, Kinyi letene. Namba embena kendemande. Embame namba mende piruŋu doko kandare, leya. Akisimi lao, Doko keyange. Nambame emba namba iso karare lao rombo palyaro, leya.
1SA 28:3 Samyuele kumuyamo dokopa Isaraele wambu dupwa peparaeme baa rangena yuu taone Orama dokona ee lao malu piyami. Soleme kata minyingipi ropaka epengepe dupwa Isaraele yaki nyuo neta pena lao nembeya.
1SA 28:4 Pilisitia wambu dupwa nyuo kambu palyuo yuu taone Suneme repeta kareyami. Kareyaminyi dokopa Soleme banya Isaraele wambu dupwa nyuo yuu kyau Gilipoa dokona malu palyiya.
1SA 28:5 Dopa pyuo karo dokopa Soleme Pilisitia yanda singi dupwa kando pakame kumuya.
1SA 28:6 Dopa piyasa apa piru lao see napala baame Kamongo piso siya. Dopa piyamopape Kamongome kombeyamepe dee poropeta akali dupwa keta pii laowape kana kingi Urimi Tumini dolapona kongwalu kuki mende pyuowape isingi mende laa naya.
1SA 28:7 Dopa piyasa enakana Soleme banya yanda singi mupwa dupwa lamaiyuo, Enda kata minyingi mende koto nyakala pupwa. Koto nyeraminyi dokopa nambame baa piso sela paro, leya. Leyamo dokopa yuu Endo dokona enda mendaki kingi silyamano, leyami.
1SA 28:8 Sole komau wakale mende nyuo pipala baa wakale maro lao peteya. Enakana dusa yuu iminjiya dokopa banya akali dokona lama nyuo lanyuo enda doko kandala papala dopa lao, Kata minyuo sakao namba apa pira lao piso sepala namba langipi. Akali dokona kingi larono doko ropaka piso sakape, leya.
1SA 28:9 Enda dokome isingi lao dopa leya. Kinyi kinyi emba silini. Kiŋi Soleme kata minyingipi ropaka epengepe dupwa Isaraele yaki nyuo neta pena lao nembeya. Dokona lao akipamo nakamame namba minyarapala pyao kumakalana pilyamipi? leya.
1SA 28:10 Enakana Soleme Anatunya kingi lao lalu lao leya. Nambame Kamongo lete karenge keta lalu lao, Embame dopa pyuo yulu pyakarene dokona randa nyii nare, leya.
1SA 28:11 Nambame api lao kee lakarose? enda dokome leya. Dokopa Soleme isingi lao, Samyuele baa kee lao epena lakare, leya.
1SA 28:12 Enda dokome Samyuele epeyamo doko kando yau pyao pii andake leya. Lapala baame Sole kando lamaiyuo, Akipamo embame namba minyako pilini? Emba Kiŋi Sole lamo, leya.
1SA 28:13 Emba paka napipi, Kiŋi dokome lao, Aki kando pakalese? leya. Dokopa enda dokome isingi lao, Nambame imambu mende yuu dakena sipuro ipyamo doko kandelyo, leya.
1SA 28:14 Soleme doko apiyakalepe? lao piso siya. Enda dokome baa lamaiyuo, Akali alemo komau londe wapunginde yuu dokona sipuro epamo, leya. Dopa leyamo dokopa Soleme doko Samyuele epamo lamo lao suu pyapala yuu dokona pangu soo lakandeya.
1SA 28:15 Samyueleme Sole lamaiyuo, Akipamo namba uki minyuo lene? Namba akipamo kamba kapu kyuo ipu letene? leya. Soleme isingi lao, Namba randa nyuo mona kendalyo. Doko Pilisitia wambu dupwame nambamoo yanda pimwailyaminyi dokopa Anatumi namba kyawa yaki nyilyamo. Yaki nyipyamosa baa pisapu dokopa poropeta dupwa ketape dee kombeyamepe pii mende isingi langya nalyamo. Dopa pipyasa namba mende pirunu dupwa langilase lapala piso sipu, leya.
1SA 28:16 Samyueleme lao, Kamongome emba yaki nyuo embena yanda pimwai ingyapyamo dokopa akipamo embame namba kyakale letene? leya.
1SA 28:17 Kamongome namba keta emba kando langiyamo doko pyaka silyamo. Baame embena kiŋinya isingi yulu doko neta nyuo Dapiti keta maiyuo embena panda nyuo yulu pinya, lapya.
1SA 28:18 Emba Kamongome leyamo doko kamba lapala Amaleke wambu dupwa pyao kumakao dee nakambana bange peparae kokwa sinyi nembo pii nae. Dokona lao dakepa Kamongome emba kando dopa pilyamo.
1SA 28:19 Baame embamoo Isaraele wambu dupwape nyuo Pilisitia wambu dupwa keta maira. Rakya embamoo embena ikinyingi dupwape nambamoo kararamano dokopa Kamongome Isaraele yanda singi dupwa Pilisitia dupwame pyao wini pirami lao maira, leya.
1SA 28:20 Yuu gii dokopa Sole yuu dokona pao palipala kingi kimbupi enekoro kareya. Samyueleme pii dusipa lapeyamo doko sepala yamarangyuo pakame kumuya. Baa yuu kukwa korakamape peparae nenge naa nayamo dokome baa porai ingya naya.
1SA 28:21 Dokopa enda dokome baa pao siyamo dokona papala piyamo doko kandapala dopa leya. Yako, nambame range suu pyaa nao embame pyaka lapinyili pyuo pipu.
1SA 28:22 Dokona epapu nambame langilyunuli pyuo pipi. Embame nenge lapo kapa nare lao namba rapa rapa pyakaowa emba porairamopa kata kapa paroŋo lao nenge nare, leya.
1SA 28:23 Leyamopa Soleme, Ama daa nenge dupwa naa naro, leya. Dopa leyamopape banya yanda singi mupwa dupwame lamaikondali pyuo nena leyami. Leyaminyi dokopa baa mona kumuo maipala kapa nenge naro lao sipurapala rate dokona peteya.
1SA 28:24 Dopa piyamo dokopa enda dokome banya mena bulamakao yakane mondo rondo lasi doko pyao yangao palawa lapome borete isi pyambwa nao waso piya.
1SA 28:25 Dopa pipala Solemoo banya yanda singi mupwa dupwape nenge maiyamo dokopa neyami. Napala yuu gii mendaki kukwa dokopako yaki nyuo peyami.
1SA 31:1 Yuu kyau Gilipoa dokona Pilisitia wambu dupwame Isaraele wambu dupwa pyala epeyamisa yanda piyami. Piyaminyi dokopa Isaraele wambu malu dokona pyao kumakayami dee lapo ralo pyako peyami. Peyaminyi dokona kiŋi Sole dee banya ikinyingi dupwape opetae pyako peyami.
1SA 31:2 Dopa pyuo peyaminyipape Pilisitia wambu dupwame nakama minyarapala nyuo Solena ikinyingi rema dusipa Jonatanemoo Apinatapemoo dee Malikisua paleta pyao kumakayami.
1SA 31:3 Yanda andake pipala Sole baa yanda pimwainya waleka dupwame pisipala kopetame ranjama epeya. Wane parange mendeme banya yanda pingi bange dupwa soo peyamo doko kando lao,
1SA 31:4 Pilisitia wambu Anatu suu pyaa nange dupwame male male lao pyao kumaka narami lao embena wua gela doko neta nyepala namba pyao kumakape, leya. Dopa leyamopape wanyane akali dokome apa pyuo pyaro lao soo mona nembo kareya. Dokopa Sole banya wua gela nyepala baa range pyao kumakaya.
1SA 31:5 Wanyane akali doko Sole range banya wua gela dokome pyao kumakayamo doko kandapala banya wua gela doko nyepala baa range pyao kumakapala Solepa role pyao kumuya.
1SA 31:6 Solemoo banya ikinyingi rema dusipa pipya wanyane akali dokomoo dopa pyuo kumuyami. Solena akali dusipa peparae yuu gii mendaki dokona kumuyami.
1SA 31:7 Isaraele wambu lapo Jeserele pau pakirena karo dee ipwa Jotane pona neta epenge dorena kareyami dupwame Solemoo banya ikinyingi dupwamoo piyaminyi dokopa Isaraele yanda singi menge dupwa ralo peyami doko leyaminyi siyami. Sepala nakamana yuu taone dupwa yaki nyuo ralo peyami. Peyaminyi dokopa Pilisitia wambu dupwa taone dupwana epo paleyami.
1SA 31:8 Yanda pyuo palenge yangama dokopa Pilisitia wambu dupwa yuu kyau Gilipoa dokona akali pyasi siyami dupwana bange keyange lapo paleta siyamo dupwa waa nyela peyami. Pao Sole baape ikinyingi rema dusipape yuu kyau Gilipoa dokona kumasi siyaminyi dupwa kando nyiyami.
1SA 31:9 Nyepala Solena mange doko pyao pukupala banya yanda pingi bange dupwa roko nyiyami. Nyepala pii wai minyingi akali lapome bange dupwa nyuo minyuo yuu Pilisitia dokona wambupi mee bange anatu lao wasingi dupwape Sole kumuyamo doko waili pii keyange lamaiyuo raeyala pena leyami.
1SA 31:10 Dokopa nakamame mee bange enda anatu lao lakandenge kingi Aserate lenge banya tembole anda dokona Solena yanda kakupi dupwa reteyami. Retapala yuu taone Betesane lenge dokona kana kame awali lao kareyamo dokona Solena yongo yukunyi palyiyami.
1SA 31:11 Jepese wambu Giliate palenge dupwame Sole baa Pilisitia wambu dupwame pyao kumakayami doko sepala
1SA 31:12 akali paka nange porai lapome kukwa dokopa kata nyuo kimbu pyao piso yanda mako papala yuu yangeyamo dokopa yuu Betesane kando nyiyami. Kando nyepala Solena yongope banya ikinyingi dusipana yongope dupwa kondo nyepala minyuo yuu Jepese dokona kisinyi nembala peyami.
1SA 31:13 Kisinyi nembapala kuli dupwa nyepala yuu taone dokona isa tamarisiki renge dokona malu piyami. Malu pipala yuu gii yanda ipingi nyepo nenge wasaka pyuo peteyami.
2SA 1:1 Sole kumapeyamopa Dapiti Amaleke wambu pipya yanda pyuo anamasi minyuo isa palyapala baa epo yuu Sikilake dokona yuu gii lama kareya.
2SA 1:2 Dokopa yangama yulu repo dokona wane parange mende Solena komau anda pyuo paleyamo dokona piso epeya. Dokome banya kondange renge doko lasaka pilyuŋu lao dokopa banya komau dupwa minyuo kanguo dee banya kyawa awai pyao pipala Dapiti peteya dokona papala baa yuu dokona pangu soo piya.
2SA 1:3 Dokopa Dapitimi akali doko piso soo lao, Emba anja karo epane? leya. Leyamo dokopa akali dokome isingi lao, Namba Isaraele wambu komau anda pyuo palimi dokona namba iki kyawa lete nyuo epelyo, leya.
2SA 1:4 Dokopa Dapitimi lao, Doo pipyamo dupwa apa pipyape namba langi, leya. Namwana yanda singi dupwa pyakao pumisa namwana akali dupwa pyao kumako otami. Dee Solepa banya ikinyingi Jonatanepa opetaeko pyao kumakami, leya.
2SA 1:5 Dokopa Dapitimi piso soo lao, Emba Sole Jonatanepa kumambi lao apa pipala silisi? leya.
2SA 1:6 Dokopa akali dokome isingi lao, Namba yuu kyau Gilipoa dokona karapala kandapu dokopa Sole banya kaku dokome yuu dokona pii pyaro baa roya karapya. Dokopa mena oseme ipyuo penge uliuli dupwana yanda pela piso penge akali dupwape dee mena ose matana piso yanda pela penge dupwamepe baa repe kura lapala pyalena piyami.
2SA 1:7 Dokopa baame kapu kyepala namba kandapala kee leya. Nambame isingi lao, Yaa, leyo.
2SA 1:8 Dokopa baame namba apipi lao piso siya. Piso siyamosa cambame baa lamaiyuo, Namba Amaleke akali, leyo.
2SA 1:9 Leyono dokopa Soleme lao, Nakamame namba pyaminyi dokome randa andake nyuo koo keta palyuo repeta kumaro ingilyamo dokona emba dae epapala namba pyao kumaka, leya.
2SA 1:10 Leyamo dokopa baa pao palipala kumwara doko namba soo oteyo dokona namba baa pyao kumakala peyo. Dopa pipala kiŋinya kyawa rarange pee pingi dokope dee kinginya pisingi bange dokope nyepala emba minyuo jela epelyo, leya.
2SA 1:11 Leyamo pii dupwa sepala Dapitimi baa kondome kumuo mona randapala banya komau dupwa minyuo pilyiya dee banya akali dupwa opetae dopako piyami.
2SA 1:12 Dopa pipala nakama Sole dee Jonatanepa dee Isaraele rara Kamongona wambu malu yanda dokona kumuyaminyi dokona mona rando kumanda piso nenge naa nao pao alemanji ingiyami.
2SA 1:13 Dokopa Dapitimi akali parange wai pii minyuo epeyamo doko pcco soo lao, Emba yuu anja rangese? leya. Leyamopa akali dokome isingi lao, Namba Amaleke rara dokonaŋa. Namba nakamana yuu dakena palyuo karenge, leya.
2SA 1:14 Dokopa Dapitimi baa piso soo lao, Doko dee apa pipyasa paka nao Kamongona rombo palyuo nyisi kiŋi doko pyao kumakamipisi? leya.
2SA 1:15 Dapitimi banya akali dupwana mende kee lao nyepala, Baa pyao kumakana leya. Dokopa akali dokome Amaleke range doko waiya lao minyarapala baa pyao kumakaya.
2SA 1:16 Dokopa Dapitimi Amaleke kumasi siyamo doko kando lao, Emba rangena kopetame pipi dokona emba kumulini. Kamongo dokome kiŋi karena lao rombo palyiyamo doko embame pyao kumakapu lapi kandape dokona emba range kumulini kande leya.
2SA 1:17 Dapitimi kondome kumuo kenane dake Sole dee banya ikinyingi Jonatanepana suu pyao piya.
2SA 1:18 Dee kenane doko Juta wambu dupwa peparae mana lamainya lao lamaiya. Kenane doko Akali Rolae Pingi Dupwana Buku dokona pyasi palamo.
2SA 1:19 Isaraele wambunya yuu kyau dupwana namwana lita akali dupwa kumami. Dee namwana ami yanda singi akali porai paka nange dupwa isa palimi.
2SA 1:20 Dopa pipya lao yuu Gati dokonape dee yuu taone Asekelone kata barete dupwanape arome pyao laa nalapape. Dee Pilisitia enda dupwa rae mainyi pyambwa nalapape. Dee anatu lao suu pyaa nange wambu dupwana wanenge dupwa rae mainya laa nalapape.
2SA 1:21 Yuu kyau Gilipoa dokona namwana yanda singi paka nange porai dupwa kumuyami dupwana konambe dupwa mee silyamo. Dee Solena konambe mamba dokome kisapa naminyi mee silyamo. Renge dokona apu pipyaepe dupwa yuu Gilipoa kyau dupwana pisa nana dee yuu dokona nenge pulya nana.
2SA 1:22 Jonatanena yanda dokome wambu malu piya. Dee Sole baame wambu sakame kuma nao banya wua gela dokome wambu porai dupwa pyao yanda pimwai dupwa pyao kumako piya.
2SA 1:23 Wambu peparaeme Sole Jonatanepa kando rae maingi. Nakamba laparae akali keyange. Nakamba yuu gii peparae lete karo dokopa range puu minyuo karenge. Dee nakamba laparae kapa kapa kumambi. Nakambame mena laene poraipi dee yaka kambe puu lao makando pengenye dupwa isa palyuo nakamba kamame wakase makandapala nakambana nyisu petenge dupwa pingi.
2SA 1:24 Isaraele enda dupwa, Solena lao kumanda pisipwape. Baame nakama komau kone keyange kana malu penge dupwa nyuo jingi. Dee kana goleme wasisi bange dupwame nakama kalya pyakange.
2SA 1:25 Yanda singi porai paka nange dupwa isa palimi. Nakamba yanda piyami dokona pyao kumuyami. Yuu kyau dupwana Jonatane kumasi silyamo.
2SA 1:26 Nambana yangone Jonatane nambame emba range ingi rando kondalyo. Nambame emba mona wakasa reto pingi dee embame namba mona kulisa wakasa retenge. Akalimi enda mona retenge dokope daa kamame wakasa ingyuo nambwa mona retenge.
2SA 1:27 Yanda singi porai paka nange dupwa yanda dokona isa palyuo oteyami. Dee yanda pingi bange dupwa kwaeyo mee bange ingyuo peya.
2SA 2:1 Dokopa enakana Dapitimi Kamongo piso soo lao, Nambame yuu Juta taone dokona mende iso karala paowase? leya. Dokopa Kamongo dokome isingi lao, Kapa, leya. Dapitimi kamba piso soo, Yuu taone angi anjukunya pao kararose? leya. Dokopa Kamongo dokome isingi lao, Emba yuu Eperone dokona palyuo karala pena leya.
2SA 2:2 Leyamosa Dapitimi banya etenge lama dolapo nyepala lanyuo yuu Eperone dokona peya. Enda mende Ainoame lenge yuu Jeserele range dee mende Apikale lenge yuu Kamele range akali Napalena enda waiya.
2SA 2:3 Pao dokopa banya akalipi nakamana ree palupi dupwa minyuo pao yuu Eperone dokonape dee taone repeta singi dupwanape paleyami.
2SA 2:4 Dokopa Juta akali dupwa yuu Eperone epapala Dapiti Juta wambunya kiŋi karena lao rombo palyiyami. Dopa piyami dokopa Dapitimi Jepese wambu yuu Giliate range dupwame Sole baa malu pilyaminyi leyami doko siya.
2SA 2:5 Sepala baa akali lapo wai pii minyuo pena lao nembeya. Nembo lao, Nakamana kiŋi Sole baa ketae nembo rape rape letamano lao banya mondo lao malu piyami dokona Kamongo dokome nakama elyape keta pisinya.
2SA 2:6 Kamongo dokome nakama anjiki pyuo iso karo yaki nyii nana. Nakamame Sole kando keyange piyami dokona nambame opetae nakama kando anjiki pyuo nyiso kararo, leya.
2SA 2:7 Dokona nakamana kiŋi Sole doko kumuya. Dokopa Juta wambu dupwame namba nakamana kiŋi karare lao rombo palyiyami. Dokona nakama bange mende paka napala kandokondali pyuo porai ingyuo karalapape.
2SA 5:1 Enakana Isaraele rara dupwa peparae Dapiti baa yuu Eperone dokona kareya dokopa epeyami. Epapala baa lamaiyuo lao, Namwa embena rangena yongo ranjamape dokona leyami.
2SA 5:2 Yuu wamba dokopa Sole baa namwana kiŋi kareya dokopa embame Isaraele wambu dupwa yanda piyami dokona laminyuo pee. Kamongo dokome emba kando lalu lao lao, Embame banya wambu dupwa rapu pyakamyuo dee emba nakamana kiŋi ingyuo karo piri, leya.
2SA 5:3 Dokopa Isaraele akali mupwa dupwa peparae kiŋi Dapiti kareya dokona yuu Eperone epeyami. Dokopa baame Kamongona lenge kambu dokona nakama kando kana minyuo lalu lao leyamopa nakamame banya kyawa doko wele dokome kisakamiyaminyipa baa Isaraele wambu dupwana kiŋi ingiya.
2SA 5:4 Dapiti baa ee kana akalisa rema ingyuo ando kareyamopa baa kiŋi ingiya. Dee baa kiŋi yulu pyuo kareyamo pao ee kana akalisa kisima ingiya.
2SA 5:5 Dopa pyuo dee baa yuu Eperone dokona Juta peparae iso kareyamopa ee kana yanda ipingi dee kanya ingyuo peya. Dee yuu Jerusaleme dokona Isaraele wambupi Juta wambupi peparae pyuo iso karo piyamo pao ee kana akalisa rema dee ipisu rema peya.
2SA 5:6 Kiŋi Dapitimi banya akali dupwa pipya yuu taone Jerusaleme doko pyao nyela parami yuu gii doko pyaka siya. Yuu taone dokona Jepusi rara dupwa palenge dupwame Dapiti baame kapa pyuo yuu taone doko pyao wini pyuo nyii nara lao suu piyami. Dokona lao nakamame Dapiti lamaiyuo lao, Nakama yuu dakena epa nalu narami. Dee kamame wambu lenge koope kimbu kwaengepe dupwame kata rokwarami ingilyamo, leyami.
2SA 5:7 (Dopa leyaminyipape Dapiti baame nakamana yuu taone kame porai awali lao pisi kareyamo doko kingi Sayone lenge pyapala nyiyami. Nyepala nakamame kingi alowa pyuo Dapitinya taone, leyami.)
2SA 5:8 Yuu gii dokopa Dapitimi banya akali dupwa lamaiyuo lao, Jepusi wambu dupwa namba epe kanda nange. Nakama dupwana mendeme Jepusi wambu dupwa epe kanda napala pyao kumakalana laoko karamisi? Nakamame dopa lao suu pyarami ramo dupwame suu ipyalukyana dokona kolo papala lenge koope kimbu kwaengepe dupwa peparae pyao kumakarami. (Renge dokona lao wambu kimbu koope lenge kwaengepe dupwa Kamongona anda dokona kolando epa narami, lenge.)
2SA 5:9 Yuu taone kame porai awali lao pisi doko nyepala Dapiti dokona palipala yuu doko kingi Dapitinya taone, leya. Lapala baame yuu kyau kuki neta pyakaenge dorena yuu kyuwa ingiyasa yuu kyaso pambu karo simbuo ketae nyiyami dokona taone doko kanda soo piya.
2SA 5:10 Kamongo Anatu Porai Wakasa doko baapa role kareyamosa Dapiti baa yuu gii peparae porainya renge paleyamopa ando porai ingyuo kareya.
2SA 5:11 Yuu Taya dokona kiŋi akali Airame lenge kareyamo dokome Dapiti baa wai pii lamaiyuo isa kingi sita lenge dupwa peeyo dee kamonda akali anda pingi dupwape dee kana semene minyuo anda pingi akali dupwape peparae kiŋi Dapitinya anda kameya mende pyakaminya lao peeya.
2SA 5:12 Dapitimi dopa piyamo doko kandapala dokopa Kamongo dokome namba Isaraele wambunya kiŋi angi karare lao rombo palyapyalyamo lao suu piya. Kamongo dokome banya wambu dupwa nyisalana suu pyao Isaraele yuu doko au pyuo palyiya.
2SA 5:13 Dapiti baa yuu Eperone piso Jerusaleme pao dokopa kamba enda nyuo dee enda lapo konda pyuo nyuo piyamo dupwame yuu Jerusaleme dokona wane wanakepe mandeyami.
2SA 5:14 Wane ane dupwana kingi dupwa dapa pyuo lao, Samua Sopape Netane Solomone,
2SA 5:15 Ipya Elisua Nepeke Japiya,
2SA 5:16 Elisama Eliyata Elipelete, leya.
2SA 5:17 Dapiti baa Isaraele wambunya kiŋi rombo palyami leyaminyi doko Pilisitia wambu dupwa siyami. Sepala nakamame baa pyalana minyarapala nyinya piyami. Doo leyaminyi doko anda porai mendena yalu pela peya.
2SA 5:18 Dokopa Pilisitia wambu dupwa yuu pau lama lama Orepaime lenge dokona papala paleyami.
2SA 5:19 Dokopa Dapitimi Kamongo doko piso soo lao, Nambame Pilisitia wambu dupwa pyaowape panda kaewase? Dee namwame pyala parama ramo doko embame namwa nyisarenepa pyao anamasi minyuo wini piramape mee lao piso siya. Nambame emba porainya renge joo nyisaroŋo kapa pyala pena, leya.
2SA 5:20 Dokona lao Dapiti yuu Bealo Perasimi dokona papala Pilisitia wambu pyao anamasi minyiya. Minyapala baame lao, Ipwa mee wau kanya palenge dopale ingyuo Kamongo dokome nambana nyisu petenge dupwa mee kanya kulimbwanyi peyakapya, leya. Renge dokona lao yuu kingi doko Bealo Perasimi lenge. Bealo Perasimi doko Kamongo dokome mee kanya kulimbwanyi peyapya dopale lenge.
2SA 5:21 Pilisitia wambu dupwa pyakao ralo peyaminyi dokopa nakamana mee bange anatu lenge kingimi wasisi dupwa yaki nyepala peyami. Dupwa Dapitimi banya akali dupwa pipya nyuo soo peyami.
2SA 5:22 Enakana Pilisitia wambu dupwa yuu pau lama Orepaime dokonako kamba papala palyuo kareyami.
2SA 5:23 Dokopa namwame apa piramase lao Dapitimi Kamongo piso siya. Dokopa Kamongo dokome isingi yano pyao lao, Nakamame dakena piso rolae pao pyaa nalapape. Doloma palaminyi dokona donorena isa balasame lenge karamo dokona yanda pirami dokona rapa rapa pyuo karalapape, leya.
2SA 5:24 Dokopa ketae isa mungi dulunya wambu lapome kalyuo paraminyi kimbu gulu galu lele laramo siyami kande doko nakamame dolama pyala pupwape. Pilisitia yanda singi ami dupwa pyao isa palyuo anamasi minyarami lao nambame nakama laminyuo wambo paro dokona kapa pyala pupwape, leya.
2SA 5:25 Dokopa Dapitimi Kamongome pinya leyamuli pyuo Isaraele dupwame yuu taone Gepa piso Pilisitia dupwa pyao ralyuo pao yuu taone Gesa lenge dokona suu leyami.
2SA 6:1 Dapiti dee kamba mendepa Isaraele yanda singi dupwana akali yanda soo oto pingi dupwa yeelyo nyuo pao akali taosande akalisa rema (30,000) nyiya.
2SA 6:2 Doko pipala Dapitimi akali dusipa lanyuo yuu taone Bala lenge yuu Juta dokona singi dokona Kamongona Kana Minyuo Lalu Lao Lenge Pii Palenge Bokote doko nyela peyami. Nakamame bokote doko Kamongo Porai Wakasa dokona lenge. Bokote ketae dokona aŋala yale wasisi lama karenge. Dokopa Kamongona petenge isa doko aŋala dolapona ketaerena singi.
2SA 6:3 Akali Apinatapena anda yuu kyau dokona karenge dokona siyamo nyepala epo uliuli mena oseme ipyuo minyuo penge enenge dokona reteyami. Dokopa akali Usa Aiyopa Apinatapena ikinyingi dolapo uliuli doko minyuo peyambi.
2SA 6:4 Aiyo dokome uliuli ipyuo peyamo dokona wambako peya.
2SA 6:5 Dokopa uliuli ipyuo peyamo dokona Dapitimoo dee Isaraele wambu peparaepe rae maiyuo kenane andake pyao pyakalyuo pyao Anatunya kingi ketae pyambuo peyami. Dopa pyuo nakamame rambyalu lao kurulu lao lakuli pyao isa lomasi doo doo lao gita pyao peyami.
2SA 6:6 Pao akali Nakonena yuu nenge witi pyao injingi mare dokona epeyami. Dokona mena bulamakao yale kingi okose lenge dolapo lukumapala pao palinya piyambisa akali Usa baame kingi pyambwapala Anatunya Kana Minyuo Lalu Lenge Pii Palenge Bokote doko minyareya.
2SA 6:7 Doko Usame Kana Minyuo Lalu Lao Lenge Pii Palenge Bokote doko angi mende daaŋa lao suu pyao minyandeyasa dokopako aopa Kamongo dokome imbwuapala baa pyao kumuya. Dopa piyasa Usa baa yuu dokona Kana Minyuo Lalu Lao Lenge Pii Palenge Bokote siyamo dokona repeta kumuya.
2SA 6:8 Dokona yuu doko kingi Perese Usa lenge. Renge doko Kamongome Usa randa maiya lao lenge. Kamongo dokome imbu singi nyepala Usa baa randa maiyasa Dapiti baa ama wakasa imbwaya.
2SA 6:9 Enakana Dapiti baame Kamongo doko kando pakapala lao, Epapu apa pyuo nambame Kamongona Kana Minyuo Lalu Lao Lenge Pii Palenge Bokote doko nyuo minyuo parose? leya.
2SA 6:10 Lapala Dapiti bokote doko nyuo minyuo banya yuu taone Jerusaleme dokona paa naro, leya. Baame Kamongona Kana Minyuo Lalu Lao Lenge Pii Palenge Bokote doko nyepala Jerusaleme kata penge doko yaki nyepala yuu taone Gati range akali Opetitome lenge dokona anda lanyuo peya.
2SA 6:11 Akali Opetitomena anda dokona Kamongona Kana Minyuo Lalu Lao Lenge Pii Palenge Bokote doko siyamo pao kana rema ingiya. Dopa piyamo dokopa Kamongome Opetitome baape banya ree palu dupwape elyape keta pisinyi pyambuya.
2SA 6:12 Kamongona Kana Minyuo Lalu Lao Lenge Pii Palenge Bokote doko akali Opetitomena anda siya dokome Opetitome baape banya ree palu dupwape dee banya bange dupwanape Kamongome elyape keta pisilyamo leyami doko Dapitimi siya. Dokona lao Dapitimi Kamongona Kana Minyuo Lalu Lao Lenge Pii Palenge Bokote doko akali Opetitomena anda siyamo doko nyuo minyuo Jerusaleme panya wambu peparae rae wakasa maiyami.
2SA 6:13 Dokopa akali dupwame bokote doko soo kata nyuo peyami. Pao yuu kuki lama kata nyuo papeyaminyi dokopa Dapitimi karena, leya. Lapala Dapitimi Kamongo doko mena bulamakao kali mendepa dee mena bulamakao yakane rondo lasi mendepa pyao kiso maiya.
2SA 6:14 Dapiti baa komau ama keyange mende bole bale lao wapupala banya porai renge peparaeme Kamongo lakando kenane pyao rae maiyuo wamya lyuo kareya.
2SA 6:15 Dopa pyuo Dapiti baape Isaraele wambu peparaepe pii poraiyuo lao rae maiyuo bikuli pii poo lao Kamongona Kana Minyuo Lalu Lao Lenge Pii Palenge Bokote doko nyuo minyuo Jerusaleme peyami.
2SA 6:16 Yuu taone dokona bokote doko minyuo sukusa dokona peyami dokopa kiŋi Dapiti baa rae maiyuo wamya lyuo malya pyao Anatunya kingi ketae pyambuo peya. Dokopa Solena wanenge Maikele lenge dokome Dapiti doo piyamo doko windowa kata kandapala epe kando awa naya.
2SA 6:17 Nakamame bokote doko minyuo papala Dapitimi kapa seraŋa lao komau anda piyamo dokona reteyami. Retapala enakana baame mena pyao kiso dee Kamongopa nakamape malu palyuo yalya kando piso maiyuo piyami.
2SA 6:18 Dopa pyuo baame mena pyao kiso maiyuo otapala dokopa baame Kamongona kingi lao wambu dupwa elyape keta pisiya.
2SA 6:19 Dopa pipala Dapitimi wambu peparae nenge mokwa soo maiya. Baame Isaraele enda akalipi dupwa mendaki mendaki lao nenge borete mendaki larapu maiyuo mena minju isarena kisasi mendaki lao maiyuo dee isa girapo jingi yando dupwa maiyuo piya. Dokopa wambu peparae anda peyami.
2SA 6:20 Dokopa enakana Dapiti baa banya ree palu dupwa yako lao anda peya. Dokopa enda Maikele doko baa Dapiti kandala epeya. Epapala lao, Isaraele wambunya kiŋi doko, epapu baa range kingi ketae nembo karo ipwamo, leya. Banya akali mupwa dupwana kendemande wanake dupwana lenge kambu dokona elya pali nao pyaloko lalya lana pyuo kopyali ingyuo karalamo, leya.
2SA 6:21 Dokopa Dapitimi isingi lao, Namba doo pipunu dupwa Kamongona kingi ketae nembo pipu. Embena rakanepe dee embena ree palupi dupwana panda nyuo namba banya Isaraele wambu peparaena kiŋi ingyuo rombo palyiya. Dokona namba rae maiyuo wamya lyuo pyakalyuo pyao Kamongona kingi ketae nembo ene pyuoko paro ingilyamo.
2SA 6:22 Dopa pyuo namba kamame elya renge nyeronopa namba kamame isa paronopape embame namba mende daaŋa lao suu pyarenepape wanake doo letene dusipame namba mee mende ulipilinyi lao suu pyarami, leya.
2SA 6:23 Maikele Solena wanenge doko wane wanakepe mende manja nao mee petenge.
2SA 7:1 Kiŋi Dapiti banya anda dokona kapa palu pisipiyamo dokopa Kamongo dokome banya nyisu petenge dupwame pyasasaramiŋi lapala nyiso kyawa lete nyiya.
2SA 7:2 Dokopa kiŋi dokome poropeta akali Netane lamaiyuo lao, Namba dae isa sita lengeme anda pisi dokona palo. Dopa pipunupape Kamongona Kana Minyuo Lalu Lao Lenge Pii Palenge Bokote doko mee komau anda pisi dokona silyamo. Doko kapa daa, leya.
2SA 7:3 Dokopa Netaneme isingi lao, Emba keta Kamongo doko karamo dokome embena suu pinginya pinya suu pilini dupwa pipi, leya.
2SA 7:4 Leyamopape yuu gii kukwa dokopa Kamongome Netane dopa lamaiyuo lao,
2SA 7:5 Nambana kendemande akali Dapiti doko kando nambame lalamo lao lamaila pupi. Embame ingyuo nambana tembole anda doko pyaka nare, lape.
2SA 7:6 Nambame Isaraele wambu dupwa yuu Isipi piso kiiramo nyuo lanyuo epeyono yuu gii dokona piso pao dakepa nambana tembole anda mende pyaka nayami. Namba mee komau anda dokona iki palipapu papyuo kareyo.
2SA 7:7 Namba Isaraele wambu dupwa pipya papyuo karapunu dupwana nambame akali mupwa rombo palyiyunu dupwa kando, Akipamo nakamame isa sita lenge dokome nambana tembole anda mende pyaka nalyamisi? lao piso see nalu nange.
2SA 7:8 Dokona lao nambana kendemande Dapiti lamaipi, Namba Kamongo Porai Wakasa dokome emba mena sipisipi rapu pyuo kakopasa karenepa nyepala emba nambana Isaraele wambu dupwana kiŋi ingyuo karare lao rombo palyiyu kande.
2SA 7:9 Nambame emba peene dupwa peparae role peyo. Dee nambame embena nyisu petenge dupwa nyuo isa palyakayo. Dee yuu muu dupwana akali mupwa porai lapo kingi ketae pupyamo karaminyi dopale ingyuo embena kingi andake ingyuo ketae nembakaro.
2SA 7:10 Nambana Isaraele wambu dupwa nambame yuu mende rombo palyuo nyakamiyu dokona nakama au pyuo palyuo kararami. Dokopa nakama wambu koo mendemepe pyaope randa maiyuope pii nalu narami. Wamba kanda soo yuu dakena epo piso pao epapu karaminyi dokopape wambu koo dupwame nakama pyao randa maiyuo kareyami. Dopa piyaminyipape deeko dopa pii nara ingilyamo. Embena nyisu petenge dupwame pyasasaramiŋi lapala nambame emba kyawa lete nyuo dee embena rara dupwa jingi para pyao para lao lalu lao langilyu.
2SA 7:12 Emba kumarene dokopa embena rora ambasu dupwa pipya role pyao malu pirami. Dokopa nambame embena ikinyi dokona mende kiŋi rombo palyaro. Dopa pirunupa banya kiŋi yulu doko porai ingyuo ando para.
2SA 7:13 Doo kiŋi rombo palyuo kararono dokome nambana tembole anda pyakara. Dee nambame banya manjo paramo dupwanako akali dupwa kiŋi ingyarapu palyuo puu parami lao rombo palyarapu piru.
2SA 7:14 Namba banya rakange ingyaro dee baa nambana ikinyingi ingyuo para. Baa koo piramo dokopa rakangeme banya ikinyingi pyalana pyuo randa mainginyili pyuo randa mairu.
2SA 7:15 Dokona nambana mona reto alowa pii nange renge doko Sole keta nyisa nyiyu doko suu pyao baa keta nyisa nyii naro. Sole keta dopa piyunu doko emba banya panda nyuo kiŋi karalase lao piyu.
2SA 7:16 Yuu peparae emba wane manjo jingi parape lao puu pare. Nambame embena kiŋi yulu doko sulu jinya lao piru. Dee nambame embena rara dokona akali dupwa iki embena panda nyuo kiŋi inginya lao rombo palyarapu pyuo puu paro, lapya, lamaipi, leya.
2SA 7:17 Anatumi nolakao epo lamaiyamo dupwa peparae Netaneme Dapiti lamaiya.
2SA 7:18 Kiŋi Dapiti baa Kamongona komau anda dokona kolando pao banya lenge kambu dokona isa pisipala ateŋa lao lao, Kamongo Mupwa Andake Wakasa doko, embame wambo nambana lao yulu pipinyi dupwa nambape dee nambana ree palu dupwa yulu keyange pimwandena pipinde daa.
2SA 7:19 Kamongo Mupwa Andake Wakasa doko, epapu embame kamame wakasako ingyuo pilini. Dee ee kana ene eparamo dupwana embame nambana para pyasi dupwa kando apa pyakare dupwana lao lalu lao lapi. Dokona embame namba lasaka pipi kandapi.
2SA 7:20 Dokona nambame emba aki mende konda pyuo langiru. Namba embena kendemande akali embame soo gisilini.
2SA 7:21 Doo yulu andake pipinyi dupwa embena yulu pinya suu pyapinyili pyuo pipi. Embame namba yulu andake pipinyi dupwa see, lao langipi.
2SA 7:22 Emba ama ketaele, Kamongo Mupwa Andake Wakasa doko. Emba yale mendali kara nange. Namwame yuu peparae emba iki Anatu karenge lao soo nyilyamano.
2SA 7:23 Isaraele wambu karapusi ingyuo kendemande yulu pyuo kareyaminyipa embena rangena wambu ingyuo kiiramo nyuo lanyuo epee kande. Yuu mupwa dupwa peparaena Isaraele rara dopale rara mende pali nange. Embame yulu andake keyange dupwa namwa keta pii dokome yuu muu dusipana embena kingi doko ketae pelyamo. Isaraele wambu Isipi piso emba rangena ingyuo manda rao nyingi dupwa nakama epo palena laro karo dokopa embame wambu rara wakale dupwape nakamana mee bange anatu lenge dupwape pyao nembee.
2SA 7:24 Isaraele dupwa embame emba rangena wambu ingyuo puu parami lao rombo palyapala emba Kamongo doko namwana Anatu angingyuo karenge.
2SA 7:25 Dokona epapu Kamongo Anatu, nambape nambana ree palu dupwape kando embame mende piru lao lalu lao lee kande doko pipi. Dee dopaleko yuu peparae pyuo karalu karape.
2SA 7:26 Dokopa embena kingi doko ketae para. Dopa piramopa wambu dupwame laoko karo, Kamongo Porai Wakasa doko Isaraele peparae keta karamo, larami. Embame nambana rara dokona akali dupwa iki kiŋi ingyuo karena lao yuu gii peparae rombo palyarapu piri.
2SA 7:27 Kamongo Porai Wakasa Isaraele wambunya Anatu. Embame yulu pyakarene dupwa peparae namba nolakao langyuo dee nambana rara dokona akali dupwa kiŋi ingyuo karena laro langii kande dokome namba paka nao emba kando ateŋa dake langilyu.
2SA 7:28 Dokona epapu Kamongo Mupwa Andake Wakasa doko emba Anatu. Emba lalu lao lenge pii doko alowa pii nao minyuo karalu karenge. Lalu lao lenge pii keyange dake namba keta langii kande.
2SA 7:29 Nambame nambana wambu dupwa elyape keta pisinyi dopaleko ingyuo pisakape lao emba piso silyu. Emba Kamongo Mupwa Andake Wakasa dokome dopa lao lalu lao leene dokome embena elyape pisingi renge doko nambana para pyasi dupwa keta palyuo puu para, leya.
2SA 9:1 Yuu mendepa Dapitimi piso soo lao, Akali Solena ree palu dokona wambu pyarepala peya mende karase? Mendali karara ramo doko Jonatanena reke lao nambame baa anjiki pyuo nyisalana, leya.
2SA 9:2 Solena ree palu dupwana kendemande akali Sipa lenge doko kareya. Baa kee lapala kiŋi doko kandala pena leyami. Leyamisa baa kiŋi peteyamo dokona peya. Peyamo dokopa kiŋi dokome piso soo lao, Emba Sipase? leya. Leyamo dokopa Waa. Namba embena kendemandeko, leya.
2SA 9:3 Dokopa kiŋi dokome kambako piso soo, Nambame Kamongo Anatu kando lalu lao lao anjiki pyuo nyisaro leyo dokona kiŋi Solena ree palu dokona wambu lapo pyarepala pao karamisi? leya. Dokopa Sipame isingi lao, Jonatanena ikinyingi mendeko iki pyarepala peyamo karamo doko baa kimbu kooŋo, leya.
2SA 9:4 Dokopa kiŋi dokome piso soo, Baa anja karase? leya. Dokopa baame lao, Yuu Lotemba dokona akali Makya Amielena ikinyingi dokona anda karamo, leya.
2SA 9:5 Leyasa kiŋi Dapitimi akali lapome baa nyela pena lamaiya.
2SA 9:6 Jonatanena ikinyingi Solena kauwange akali Mipiposeta baa epeya. Epapala baame Dapiti angingyuo karamo lao suu pyao yuu dokona pangu siya. Dokopa Dapitimi baa yako lao kingi nyiya dokopa baa namba embena yulu pyakange akali doko, leya.
2SA 9:7 Dapitimi isingi lao, Emba paka napipi. Embena rakane Jonatane doko nambame kame see nao suu pyao karo banya reke lao nambame emba anjiki pyuo nyisaro. Nambame embena kauwane Sole dokona yuu dupwa peparae emba range jero. Dee emba yuu peparae nambapa nenge role pyao nala epare, leya.
2SA 9:8 Dokopa Mipiposeta baa kambako yuu dokona pangu sepala lao, Namba suwa kumasi dokona mendeke ingyuo peto doŋo akipamo embame namba kando ama keyange pilisi? leya.
2SA 9:9 Dokopa kiŋi Dapitimi Solena kendemande akali Sipa doko epena lapala lamaiyuo lao, Nambame Solena yuu dupwape dee banya ree palu wambu dupwana bange peparaepe embena akali mupwa Sole dokona kauwange akali Mipiposeta doko mai, leya.
2SA 9:10 Dokona embape embena wane dupwape dee kendemande akali dupwapeme embena akali mupwa Solena ree palu dupwana lao yuu dokona yulu pyuo nenge wara pyakamirami. Dopa pipala nenge wambu piramo dupwa minyuo epo Solena wambu ree palu dupwa mairami. Dopa piraminyipape Mipiposeta baa yuu peparae nambapa role pyao nenge nala epara, leya. Akali Sipa banya ikinyingi akalisa ipisu kingi paki (15) dee banya kendemande akali akalisa lama (20) karenge.
2SA 9:11 Sipame isingi lao, Emba kiŋi andake dokome pipi letenele pyuo nambame peparae piru, leya. Mipiposeta baa kiŋinya ikinyingi angiko ingyuo kiŋi role piso nenge neya.
2SA 9:12 Mipiposeta banya ikinyingi parange mende Makya lenge. Akali Sipana ree palu dupwa peparae Mipiposetana kendemande ingyuo karo yulu pyakamiyami.
2SA 9:13 Dokopa akali Mipiposeta kimbu laparae kwaeyasi doko yuu Jerusaleme paleya. Palipala baa kwuara yangara peparae lao kiŋi role pyao nenge nao kareya.
2SA 11:1 Ee kana peparae lao kupwa pingi yuu gii doko otara ingiyamopa kiŋi peparae nakamana nyisu petenge dupwa pipya yanda pela parapu pingi. Dokopa Dapitimi banya akali mupwa dupwape dee Isaraele yanda singi dupwape akali Joapeme role pyao yanda pela pena lao nembeya. Dupwame papala Amone wambu dupwa pyao isa palyuo anamasi minyapala nakamame yuu taone Orapa doko nyiyami. Dopa piyaminyipa Dapiti baa Jerusaleme karo kaeya.
2SA 11:2 Yuu gii mendepa alemanji kwualepalepa Dapiti baa luu palu soo lenge rapala kiŋinya anda ketae dokona pulyuo peya. Dokona pao karo kandeyamo dokopa enda mende wate pyuo kareyamo kandeya. Enda baa ama keyange wakasa mende kareya.
2SA 11:3 Dokona enda baa apipi lao kando pyarako sela pena lao akali mende nembeya. Dokopa enda doko akali Elamena wanenge Betesepa lenge doko yuu Iti range akali Yurayana etenge lao lamaiyamo siya.
2SA 11:4 Sepala Dapitimi wai pii minyingi akali dupwame enda doko nyela pena leya. Leyamopa akali dupwame papala enda doko nyuo minyuo epo maiyaminyipa baame ama mona wakasa retapala role pyao palu karo piya. Enda baa kamanda anda palipala mee ingiyamopa dee kapa peteya. Dokopa enda baa kapu kyuo anda peya.
2SA 11:5 Dokopa enakana enda baa wane paleyasa baa dopa pilyamo lao Dapiti lamainya lao wai nembeya.
2SA 11:6 Enakana Dapitimi akali Joape keta wai pii nembapala lao, Yuu Iti range akali Yuraya doko namba karo dokona pena lena leya. Dokona lao Joapeme akali Yuraya baa Dapiti keta pena leya.
2SA 11:7 Leyamopa Yuraya baa epo pyaka sepeyamo dokopa Dapitimi baa piso soo, Joapemoo dee yanda singi dupwape kapa karamisi dee yanda angi pimi dupwa apa pyuo pimisi? leya.
2SA 11:8 Lapala baame Yuraya kandoko lao, Anda imambu kuki sela pena leya. Dokopa Yuraya baa yaki nyuo peya. Peyamopa Dapitimi bange lapo baa mainya lao akali dupwame minyuo pena leya.
2SA 11:9 Dopa pyuo pena leyamopape Yuraya baa anda paa napala kiŋi Dapitinya isingi akali dupwa pipya kiŋinya anda yuupi kame kambu kii mare dokona paleya.
2SA 11:10 Doko Yuraya baa anda paa napya leyaminyi Dapitimi sepala baa piso soo lao, Emba yuu wambale anda yuupi yaki nyepala dee ipi kandape akipamo emba anda paa napisi? leya.
2SA 11:11 Leyamo dokopa Yurayame isingi lao, Isaraele akali dupwape Juta akali dupwape yandana wakale karaminyipa Kana Minyuo Lalu Lao Lenge Pii Palenge Bokote doko nakamame reto karaminyi. Dee nambana akali mupwa Joapemoo banya akali mupwa dupwa pipya yanda kamana pao komau anda pyuo palaminyiko. Dokona nambame apa pipala anda pao nenge ipwape nao dee nambana enda dokopa palu pirusi? Nambame kinyi kinyi lalu lao leto doko nambame yulu dopale dupwa pii naro leya.
2SA 11:12 Dokopa Dapitimi lao, Kapaŋa. Yuu gii epapu peparae dae kararenepa rakya emba anda kapu kyuo puu lao nembaro, leya. Dokona lao akali Yuraya baa yuu gii doko karo dee yangama opetae Jerusaleme dokona karo piya.
2SA 11:13 Dopa piyasa Dapitimi banya anda epena lapala nengepe ipwa biyape maiya. Maiyamopa Yuraya baa ipwa biya napala kyawa sisingi bolombalo leyasa yuu gii kukwa dokopa baa anda paa naya. Paa napala banya porangelye dokome yapu napala kiŋinya isingi akali dupwana palenge panda dokona pao paleya.
2SA 11:14 Paleyamo yangama dokopa Dapitimi pepa mende pyapala Yurayame Joape maiyakana lao minyuo pena leya.
2SA 11:15 Dokona baame dopa lao piya. Akali Yuraya dake yanda isare rao piyami kande dokopa lane mupwa dokona nenge nyuo palyape. Dopa pipala nyisu petenge dupwame baa pyao kumakanaleŋe nakama mee mendele lano pao karalapape, leya.
2SA 11:16 Joape baamoo yanda singi dupwape yuu taone doko nyelana pyao pena karo dokopa Joape Yuraya baa yanda isare rao piyami dokona nengena pena leya.
2SA 11:17 Dokopa nyisu petenge yanda singi Amone range dupwa yuu taone dokona nyisa epapala Joapena yanda singi dupwa pipya yanda piyami. Dokopa Dapitinya akali mupwa lapo pyao kumakayami dee Yuraya baa pyao kumakayamiko.
2SA 11:18 Dokopa Joapeme yanda piyaminyi dupwana lao pii lapo Dapiti lamaiyuo nembeya.
2SA 11:19 Baame pii angi minyuo paramo akali doko lamaikondali pyuo lao, Embame yanda pimwano dupwana lao lamaiparenepa
2SA 11:20 mende baa imbwuapala emba piso soo lao, Akipamo nakamame yuu taone dokona ama repeta doloma pyala pumisi? Nakamana nyisu petenge dupwame kana kame dokona ketae karo walekyame pyarami doko see namisi?
2SA 11:21 Akali Apimeleke Gitionena ikinyingi doko pyao kumakayami kande doko nakama suu pyaa namisi? Doko yuu Tepese dokonako enda mendeme kana kame dokona ketae karapala kana kameya mende malyapala pyao kumakaya kande. Dokona akipamo nakama kana kame dokona ama repeta pumisi? lao laralya kande. Dopa pyuo kiŋi dokome piso siya kande dokopa embame baa lamaiyuo, Embena akali mupwa Yuraya kandape doko opetae pyao kumakami lape leya, Joapeme.
2SA 11:22 Dokona lao wai minyingi akali doko Dapiti peteya dokona papala Joapeme lena lao lamaiyamuli pyuo pii dupwa Dapiti lamaiya.
2SA 11:23 Lamaipala lao, Namwana nyisu petenge dupwa porayapala yuu taone nyisa epo namwa pyala iminyipape namwame nakama pyao pao yuu taone kame kambu dokona pyambwamwa.
2SA 11:24 Dokopa nakamame kana kame dokona ketae karapala walekya dupwame namwa piyami dokopa emba kiŋi andake dokona akali yanda singi mupwa lapo pyao kumakao dee embena akali mupwa Yuraya baa opetaeko pyao kumakayami, leya.
2SA 11:25 Dokopa Dapitimi pii wai minyingi akali doko lamaiyuo lao, Embame Joape baa mona minyarambu lamaiyuo, Baa mona randa nana lape. Renge doko yanda dokona api kumara doko see nange kandale. Dokona embame baa lamaipala yanda kando porai ingyuo pipala Amone wambu dupwa pyao isa palyuo anamasi minyapala yuu taone doko pyao kokwa soo nembena lena leya.
2SA 11:26 Dokopa enda Betesepame banya akalingi doko yandana kumulyamo leyaminyi doko sepala baa kumanda peteya.
2SA 11:27 Dopa pyuo kumanda piso otapeyaminyi gii dokopa Dapitimi enda doko banya anda epena lao wai nembeya. Enda doko epo banya etenge ingyuo pisipala wane mende manjakamiya. Dopa piyamopape Kamongo dokome Dapitimi doo piyamo dokona rae mai naya.
2SA 12:1 Kamongome poropeta akali Netane Dapiti kareya dokona pena leya, Netaneme Dapiti kareya dokona papala baa lamaiyuo lao, Akali lama yuu taone mendakinyako paleyambi. Doo paleyambi dokona mende akali kamongo dee mende akali pendewa.
2SA 12:2 Akali kamongo doko mena bulamakaope sipisipipi dupwa malu minyiya.
2SA 12:3 Dokopa akali pendewa dokome mena sipisipi ikyane inya mendaki iki ropo pyao nyepala minyiya. Baame mena doko au pyuo rapu piyasa banya anda dokona karo andapala banya wane wanakepe dupwa pipya role pyao kareyami. Dokopa banya nenge dupwana maiyuo pee kapo baa rangena dokona ipwa nena lao dee banya pai dupwana kupyaro piso piya. Dopa pipala mena sipisipi ikyane doko banya wanenge dopale ingiya.
2SA 12:4 Yuu mendepa upunili wambu mende akali kamongo dokona anda epeya. Dokopa akali kamongo dokome banya mena rangena dokona mende nyepala upunili minyuo pyao kisakaminya lao suu pyaa naya. Dopa pipala akali pendewa dokona mena sipisipi ikyane doko nyepala pyao kiso akali doko nenge piya, leya. Netaneme Dapiti lamaiya.
2SA 12:5 Dokopa Dapitimi akali kamongo bange malu retenge doko kando ama wakasa imbwuapala lao, Namba Kamongo Lete Karenge doko kando lalu lao leto. Akali doo piyamo doko baa pyao kumapengeleŋe.
2SA 12:6 Renge doko baa yulu kopetame piya dokona baame bange kisima larapu akali pendewa doko maira, leya.
2SA 12:7 Leyamo dokopa Netaneme lao, Emba akali dokoŋo, leya. Lapala lao, Kamongo Isaraele wambunya Anatu dokome dapa lapya. Nambame emba Sole keta kingi raka lao kiiramo nyepala Isaraele wambunya kiŋi wasiyu kande.
2SA 12:8 Nambame banya kiŋi yulupi dee banya endape dupwa nyuo jiyu. Jepala Isaraele peparaepe dee Juta peparaepena emba kiŋi ingyuo nambame rombo palyiyu. Doko jiyunu dusipa kapa ingya napyali doko lama konda pyuo jipuli.
2SA 12:9 Dokona lao akipamo embame nambana mawa pii dupwa warombo see nalese? Akipamo embame yulu koo dake piisi? Embame akali Yuraya nyepala yandana pyao kumakae. Embame Amone akali dupwame pyao kumakana lee. Lapala dokopa enakana banya etenge embame nyakamipi.
2SA 12:10 Embame namba kando kamba lapala akali Yurayana etenge nyakami dokona epapu embena para pyao manjiraminyi dupwana yaka lao randa andake lapo nyuo pyao kumarapuko pyuo para.
2SA 12:11 Nambame emba kando lalu lao leto, Doko emba range ree palu dokona mendeme emba keta randa nyuo jinya lao piru. Pipala nambame embena etene dupwa nyepala akali wakale mende mairunupa akali baame enda dupwa panembena kepo pyuo nyeramopa emba kandare.
2SA 12:12 Renge doko emba koo yalu pyuo pii. Piinyipape nambame dake Isaraele wambu peparaeme kandena lao panembena pinya lao piru, lapya, leya.
2SA 12:13 Dokopa Dapitimi lao, Namba Kamongopa ingyuo koo pipu, leya. Netaneme isingi lao, Kamongo dokome nyuo kame sakaraŋa. Emba kuma nare.
2SA 12:14 Dopa pirinyipape embame yulu koo dopale pyuo Kamongo angiŋi lao suu pyaa naene dokona embena wane Betesepame mandeyamo doko kumara, leya.
2SA 12:15 Lapala Netane baa anda peya. Kamongome Yurayana etenge dokome Dapitinya wane manjakamiya doko anga pinya lao randa maiya.
2SA 12:16 Dokopa Dapitimi Kamongo kando wane doko mee petena lao ateŋa leya. Dopa piyamopape Dapiti baa nenge wasaka pyuo yuu kukwa peparae banya luu palenge panda dokona papala rate ketae pali nao mee isa panda dokona palipapu piya.
2SA 12:17 Banya anda dokona yulu pingi akali mupwa dupwame baa paleya dokona papala pyaleto nyuo roya pisimwali lao piyaminyipape baa simbi simbi pipala nakama pipya role pyao nenge mendepe naa naya.
2SA 12:18 Dopa pyuo karo mende papeyamopa enakana wane doko kumuya. Dokopa Dapitinya akali mupwa dupwame dopa pyuo wane doko kumapya lao baa lamainya pakayami. Pakapala nakamame lao, Wane doko lenge rao peteyamo pii lamaiyama dokopa Dapitimi namwa pii langya naya kande. Banya wane doko kumapya lao apa pyuo namwame baa lamairamase? Mende dee baa range randa lapo nyisasara, leyami.
2SA 12:19 Dokopa Dapitimi doloma mendeme mende kando isa isa pii leyami doko kandeya. Kandapala baame wane doko kumalamolyamo lao soo nyiya. Dopa pipala baame nakama piso soo lao, Wane doko kumapyase? leya. Dokopa nakamame isingi lao, Waa, baa kumapya, leyami.
2SA 12:20 Dokopa Dapiti banya panda dokona isa yuu dokona paleya doko sipurapala wate piya. Pipala banya kyawasi kome pipala komau alowa pyuo wakale wapuya. Enakana baa Kamongona anda papala Kamongo lakandeya. Dopa pyuo lakando piso banya anda papala nenge jinya lao piso sepala mokwa soo maiyapeyaminyi dokopa neya.
2SA 12:21 Dopa piyasa banya akali mupwa dupwame emba doo pilini doko namwa soo gisa nalyamano, lao baa kando leyami. Wane doko lenge rao pisipyamo dokopa emba nenge naa nao ee lao pisipi. Dopa pyuo pisipinyipape baa kumapapya dokopa aopa emba sipurapala nenge nelene, leyami.
2SA 12:22 Dapitimi isingi lao, Waa. Kinyi wane baa mee lenge rao peteyamo dokopa namba nenge wasaka pyuo ee lao peteyo. Renge doko Kamongome namba kondome kumuo nyisapala wane doko kumunya laka nara lao suu piyu.
2SA 12:23 Dopa piyunupape epapu wane baa kumapya dokona namba akipamo nenge naa nao pisiru. Dopa piru dokome nambame wane doko lete dee nyerose? Yuu gii lapona namba baa pupyamo kata dokonako paro. Baa dee namba keta kapu kyuo epa nara, leya Dapitimi.
2SA 12:24 Enakana Dapitimi banya etenge Betesepa mona minyarambu rapu piya. Dopa pyuo baa enda dokopa role paleyambi. Dokopa enda baa wane ane mandeya. Doko Dapitimi wane kingi Solomone leya. Kamongo dokome wane doko mona reteya.
2SA 12:25 Retapala poropeta akali Netane lamaiyuo, Kamongome baa mona reteyamo dokome wane kingi Jetitaya lena leya. Kingi Jetitaya lenge doko Ipuru pii dokona Kamongome mona wakasa retenge lenge.
2SA 14:21 Enakana kiŋi dokome Joape lamaiyuo lao, Embame piso sipinyi dokona nambame piru lao suu pyapu. Emba papala akali parange Epesalome doko nyepala minyuo dae ipupi, leya.
2SA 14:22 Dokopa Dapiti peteyamo lenge kambusa Joapeme yuu dokona pangu sepala lao, Emba kiŋi andake doko Anatumi emba elyape keta pisinya. Embame nambana piso sipunu dokona kapa lao sakapi dokona epapu embame namba rae mailini doko namba silyu, leya.
2SA 14:23 Lapala Joape baa sipurapala yuu Gesa papala Epesalome nyuo minyuo Jerusaleme epeya.
2SA 14:24 Dokopa kiŋi dokome Epesalome baa kiŋinya anda dokona pali nara lao lalu lao leya. Lapala lao, Baame Epesalome kanda naro daa, leya. Dokona Epesalome baa rangena anda palu karapala kiŋi peteya dokona epo maro laope pii naya.
2SA 14:25 Epesalome baa akali ama keyange Isaraele wambu dupwame baa kando lakanda minya minya pingi. Banya yongo peparae kombe palyuope pii nange.
2SA 14:26 Banya kyawa dokona kyawasi ama malu karo dee ama londe wakasa kenda pingi. Dokome ee kana yaka lao yuu mendaki larapu pyakepo rokonge. Kyawasi romende doko kiŋinya sikyali pingi dokona sikyali kilokerame lama ingiya.
2SA 14:27 Epesalome baa wane rema mandenge. Dee wanake mendaki baa ama elyape keyange wakasa kingi Tama lenge manjo pingi.
2SA 14:28 Epesalome baa kiŋi doko kanda nao ee kana lama Jerusaleme palyuo kareya.
2SA 14:29 Karapala enakana baame Joape baa kiŋi doko petamo dokona pena lao piso serowaleŋe nyela pena lao akali lapo nembeya. Dopa piyamopape Joape baa epa naya. Epesalomeme kambako nyela pena leya. Dee kambako Joape simbi simbi pyuo epa naya.
2SA 14:30 Dokopa Epesalomeme banya kendemande akali dupwa lamaiyuo lao, Kandalapa, Joapena ee yuu doko nambana repeta silyamo dokona bali jingi ando karamo. Dokona papala isare palyinya leya. Dokona lao nakama papala ee yuu dokona isare palyiyami.
2SA 14:31 Doko sepala Joape baa Epesalomena anda papala lamaiyuo lao, Akipamo embena kendemande akali dupwame nambana ee yuu dokona isare palyalamisi? leya.
2SA 14:32 Epesalome isingi lao, Doo pimi renge doko nambame emba nyela pena lapu doko emba epa napi dokona pimi, leya. Lapala lao, Nambame emba kiŋi doko petamo dokona papala piso sakao, Namba akipamo yuu Gesa doko yaki nyuo dae epeyose? Namba doo kareyoli doko keyange ingyapyali lapya lakapili lao suu piyu. Lapala deeko lao, Namba kiŋi doko kandala pare lao embame kiŋi dokome yuu gii mende jinya lao piso sakape. Dokopa namba keta koo mende palira ramo doko kiŋi dokome namba pyao kumakana, leya.
2SA 14:33 Dokopa Joape baa kiŋi Dapiti peteyamo dokona papala Epesalomeme leyamo dupwa baa lamaiya. Dopa pyuo lamaiyasa kiŋi dokome Epesalome banya anda epena nyela pena leya. Leyasa Epesalome nyela peyaminyipa kiŋi peteyamo dokona lenge kambusa epapala yuu dokona pangu siya. Dokopa kiŋi dokome baa nyinyi pyuo yako lao nyiya.
2SA 15:1 Dokopa enakana akali Epesalome baa rangena mename ipyuo uliuli piso paenge mende nyuo dee mena ose lapo nyuo piya. Dee yanda singi akali akalisa kingi paki (50) baa paramo dokona role pyao baa lanyuo parami dupwa nyiyako.
2SA 15:2 Baa wamba kukwa dokopa sipurarapu yuu taone dokona kame kambu dokona karapapu piya. Wambu mendepe dee wambu lamape imbu laiya lapala kote lao kiŋi dokome soo rolena lao epeyami. Dokopa Epesalome baame wambu doo epeyami dupwa kee lapala baame anja range lao piso sepa piya. Dokopa wambu dupwame isingi lao, namba yuu dusa rangeŋe rara dokonaŋa lapa piyami.
2SA 15:3 Dokopa Epesalome baame lao, Embena pii doko rolae ingyuo silyamo. Dokona kiŋi dokome akali mende embena pii sakara doko rombo palya naya, leya.
2SA 15:4 Dokopa Epesalome baame konda pyuo lao, Namba kote singi akali ingyapuli lao suu pyakonda pilyu. Dokona namba dopale karapuli doko wambu mendali pii dopale palipyali soo rolakamirunupa pii dupwa rolasi sipyali, leya.
2SA 15:5 Dokopa akali mendeme Epesalome peteya dokona repeta papala pangu sepa piya dokopa Epesalome banya kingi pyasinju lapala akali doko kupyuo nyepala nyinyi pipa piya.
2SA 15:6 Dokopa Epesalome baame Isaraele peparae kiŋi peteya dokona kote sakana lao epeyaminyi dupwa kando dopa pirapu piya. Dopa pyuo wambunya mona dupwa pyao kui leyasa baa kando mona maiyuo rae wakasa maiyami.
2SA 15:7 Ee kana kisima epo papeyamo dokopa Epesalome baame kiŋi Dapiti kando lao, Kiŋi namba yuu Eperone dokona Kamongo doko kando lalu lao pii leyonoli pyuo piri lao namba puu lape.
2SA 15:8 Namba yuu Gesu yuu Siria dokona singi yuu dokona paleyo dokopa nambame Kamongo kando lalu lao lao, Baame namba yuu Jerusaleme kamba kapu kyuo lanyuo para ramo doko nambame baa yuu Eperone dokona lakandaro, leyo, leya.
2SA 15:9 Dokopa kiŋi dokome baa lamaiyuo lao, Manda rao mona seramo pupi leya dokome Epesalome baa yuu Eperone dokona peya.
2SA 15:10 Dopa pyuo peyamopape baame wai pii minyingi akali lapome Isaraele rara peparae dapa lena lao lamaiyala pena, leya. Nakama bikuli pii poraiyuo ketae laramo siyami kande doko Epesalome baa yuu Eperone dokona kiŋi karamo lalapape lena lao lamainya, leya.
2SA 15:11 Epesalome baame akali andete lama (200) baa role pyao Jerusaleme piso mona epena leya. Dokopa baame mende pinya suu piyamo doko akali dupwa see nayami.
2SA 15:12 Baa mena pyao kiso maiyuo karo dokopa kiŋi Dapitinya dopa pyuo piri dapa pyuo piri lao nyiso lenge akali Ayitopele lenge doko Epesalome baame taone yuu Gaelo dokona nyela pena leya. Dokopa akali Ayitopele lenge doko epeyamopa kiŋi Dapitinya yulu isa nembalana lao yalu pyuo leyaminyi doko ama wakasa ingyuo lao andakiyami. Dopa piyamosa wambu Epesalome kando rae maiyami dupwa malu ingiya.
2SA 15:13 Wai pii minyingi akali mendeme Dapiti dopa lamaiya. Isaraele wambu dupwame Epesalomena pii dokona soo rape rape lao kararama lao lalu lao letaminyi, leya.
2SA 15:14 Dokona lao Dapitimi banya akali mupwa lapo baa role pyao yuu Jerusaleme dokona kareyami dupwa lamaiyuo lao, Namwa akali Epesalome dokome pyaa nana lao range kyawa lete nyelana suu pyapala dokopa yuu gii dakepako yuu mendasa mwua. Mende dee baa dae repe palipala namwa pyao isa palyapala wambu peparae yuu taone dokona petaminyi dupwa pyasaramiŋi yapa mwua, leya.
2SA 15:15 Dokopa nakamame isingi lao, Waa emba kiŋi andake doko, embame aki mende larene dupwana namwame mee pirama, leyami.
2SA 15:16 Dopa leyamisa kiŋi Dapiti baape banya ree palu dupwape dee banya akali mupwa dupwape peparae yuu Jerusaleme yaki nyuo peyami. Papala banya enda lapo konda pyuo nyiyamo akalisame banya yuu andape dupwa isako karena, leya.
2SA 15:17 Lapala kiŋi baape dee wambu peparaepe Jerusaleme yaki nyuo peyami. Pao nakama yuu taone dokona wangu dusa anda mende kareyamo dokona imambu siyami.
2SA 15:18 Dokopa banya akali mupwa dupwa peparae baa peteyamo dokona repeta karapala dokopa akali Keritena rarape dee akali Pilitena rarape epo peyaminyi dupwa kandeyami. Dokopa yuu Gati yanda singi akali andete pakinyamange (600) baa epeyamo dokona moko minyuo epeyami dupwa epo peyaminyi kandeyamiko.
2SA 15:19 Dokopa kiŋi dokome nakamana akali mupwa Itai lenge doko kando lao, Emba akipamo namwa pipya epelese? Kapu kyuo papala kiŋi enenge dokopa pisa pupi. Emba akali yuu wakale range upinili. Wakale dupwame emba embena yuu rangena nyisa nembeyamisa epee kande leya.
2SA 15:20 Emba dae yuu gii kuki lama palyuo karapi dokona nambapa akipamo awali lao mee dupwana papyuo kararambase? Namba anja pelyono lao namba kamame see nalyo. Dokona emba anda kapu kyuo pao dokopa embena akali role pyao epeyami dupwa opetae nyuo lanyuo pupi. Dokopa Kamongo dokome anjiki pyuo keyange ingyuo nakama poraiyuo nyiso rapu pyuo karena leto, leya.
2SA 15:21 Dopa leyamopape Itai baame isingi lao, Emba kiŋi doko, nambame Kamongona kingi dokona lao lalu lao emba kando leto. Emba anja panda anja mendasa parene dupwana yuu peparae namba parambako. Dee emba pyao kumakarami ramo dokopa namba pyao kumakaramiko, leya.
2SA 15:22 Dokopa Dapiti baa lamaiyuo, Kapaŋa. Epapu nakamame mona wambako pena, leya. Dopa leyasa Itai baape banya yanda singi dupwape dee nakamana ree palu wambupi wambo peyami.
2SA 15:23 Dapitimoo banya wambu dupwa peparaepe yuu Jerusaleme yaki nyuo peyaminyi dokopa yuu dokona palenge wambu dupwa ee poraiyuo kaeyo leyami. Dokopa kiŋi doko ipwa kuki Kirone lenge doko yalo peyamo dokopa banya akali dupwa enakana yaloko peyami. Pao yuu muiyane dorena ingyuo peyami.
2SA 15:24 Purisi akali mende Satoko lenge doko dokona kareya. Kareyamo dokona Lipae akali lapo role pyapeta kareyaminyi dupwame Kamongona Kana Minyuo Lalu Lao Lenge Pii Palenge Bokote doko sakaro kareyami. Dokopa bokote doko isa reteyami. Dopa pipala wambu dupwa peparae yuu taone doko yaki nyuo pao oteyami dokopa enakana bokote doko nyepala soo peyami. Purisi akali Apiata lenge baa opetaeko dokona kareya.
2SA 15:25 Dokopa kiŋi dokome akali Satoko doko lamaiyuo lao, Lalu Lao Lenge Pii Palenge Bokote doko nyepala minyuo pao yuu taone dokona retala puu. Kamongo dokome namba kando rae maira ramo doko yuu gii mendepa bokote dokope dee seramo panda dokope kamba kapu kyuo kandala puu lara.
2SA 15:26 Dee baame namba kando rae mai nara ramo doko kapako. Baame namba keta pinya suu pilyamo dupwa pinya, leya.
2SA 15:27 Dee baame Satoko kando lao, Kanda. Embena ikinyi Aimase dokopa dee akali Apiatana ikinyingi Jonatane dokopa nyepala mona kyuu lao seramopa kamba kapu kyuo lanyuo yuu taone dokona pupi.
2SA 15:28 Yuu gii dokopa namba yuu muiyane dokona ipwa yalo penge pona dokona isaro kararono pao embena pii mende namba sepala dokopa kaeyaro, leya.
2SA 15:29 Dokona lao akali Satoko dee Apiatapame Lalu Lao Lenge Pii Palenge Bokote doko soo kamba kapu kyuo Jerusaleme papala kareyambi.
2SA 15:30 Dapiti baa yuu Olipi kyau dokona ee lao pulyuo peya. Baa kimbu suu pii nao kondome kumuo mona rando kyawasi yambe pyapala peya. Wambu lapo baa moko minyuo peyaminyi dupwa opetae dopako pyuo kyawa yambe pyao ee lao pulyuo peyami.
2SA 15:31 Dokopa akali Ayitopele doko akali Epesalome dokome Dapitinya kiŋinya yulu isa nembalana leyamo dokona rae mailyamo lao lamaiyaminyi Dapiti siya. Sepala baame ateŋa lao lao, Kamongo, akali Ayitopele pii dopa pinya dapa pinya laramo dupwa kopyali ingyuo pena lao kyawa sisingi bolombalo lanyi nembape, leya.
2SA 15:32 Dapiti yuu kyau ketae lakandenge panda angi doko kando nyela peyamo dokopa banya mona reto puu minyingi akali Asai lenge yuu Aki range dokome banya komau dupwa minyuo pilyuo awai kyawasinya pyao pipala peteyamo kando nyiya.
2SA 15:33 Kando nyepala Dapitimi baa lamaiyuo lao, Emba namba role pyao epare ramo doko embame namba nyisa nare ingilyamo, leya.
2SA 15:34 Dopa pirinyipape embame namba nyiso yuu taone dokona kapu kyuo papala akali Ayitopele kiŋi doko kando pii dopa pinya dapa pinya lao lenge dupwa pipya pimwaiyuo role karape. Karapala Epesalome lamaiyuo, Emba Kamongo doko. Nambame embena rakanena pii soo yulu pyuo kareyono doko suu pyao epapu nambame embena lao pyakaro, lena leya.
2SA 15:35 Dokopa purisi akali Satoko Apaitapa dokona kararambi lyakande. Dokopa embame kiŋinya anda piso pii serene dupwa peparae kaeya nao akali dolapo lamaipi.
2SA 15:36 Nakamba nakambana ikinyingi Aimase Jonatanepa reto karambinyi dokome emba pii serene dusipa peparae nyuo simu pyao maipala nakambame namba langyala pena lare, leya.
2SA 15:37 Akali Epesalome doko epeyamo dokopa Dapitinya puu minyingi akali Asai doko kapu kyuo yuu taone dokona epeya.
2SA 16:1 Dapiti baa yuu kyau ketae yaki nyepala lupyuo donorena peyamo dokopa aopa Mipiposetana kendemande akali Sipa lenge dokome baa kando nyiya. Sipa baame borete andete lamape isa girapo jingi yando enge kareta andete mendakipi dee isa jingi kana poo renge simu pyasi andete mendakipi menana yanengeme pee wasisi ipwa waene paleta mendepe pipala dupwa peparae mena donge lamana retapala minyuo epeya.
2SA 16:2 Epeyamo dokopa kiŋi Dapitimi baa piso soo lao, Bange dupwame peparae emba apa pirisi? leya. Dokopa Sipame isingi lao, Mena donge dupwa embena ree palu dupwana piso papirami. Nenge boretepe isa jingipi akali dupwa narami. Dee ipwa waene doko nakama yuu muiyane dokona pao maka piramo dokopa narami, leya.
2SA 16:3 Dokopa kiŋi dokome baa piso soo lao, Embena akali mupwa Solena kauwange Mipiposeta lenge baa anja karase? leya. Leyamo dokopa Sipame isingi lao, Banya kauwange Solena kiŋi yulu doko rolo otapala Isaraele wambu dupwame baa keta jimili lao suu pyapala baa Jerusaleme dokona karamo, leya.
2SA 16:4 Dokopa kiŋi dokome Sipa lamaiyuo lao, Bange peparae Mipiposetana ingyuo singi dupwa embena ingyara, leya. Dokopa Sipame isingi lao, Namba embena kendemande akali. Emba kiŋi andake doko, nambame yuu peparae emba rae mainyi pyambuo karapuli yaka leto, leya.
2SA 16:5 Kiŋi Dapiti baa yuu Bakurimi dokona pao pyaka siyamo dokopa akali mende Solena ree palu karengende kingi Simai lenge akali Gerana ikinyingi dokome baa kando nyepala randa maiyuo koo keta palyuo lao nembeya.
2SA 16:6 Dopa pipala Dapiti baa banya akali dupwape dee banya isingi akali dupwamepe nyuo kako pyao nee piyaminyipape Simai baame kana lapo nyepala Dapitimoo banya akali mupwa pipya peyaminyi dokona pyao pyambuo piya.
2SA 16:7 Pyapala baame lao nembo lao, Emba neta puu. Emba wambu pyao kumakange akali doko. Emba akali koo pingi doko. Emba puu pao puu, leya.
2SA 16:8 Emba Solena panda nyepala kiŋi ingyuo karene. Dopa pipala Solena ree palu wambu malu pyao kumakalene. Dokona Kamongo dokome emba soo otapala emba nyuo alowa pipala embena ikinyi Epesalome doko namwa Isaraele wambunya kiŋi ingyuo karena lao romba palyapya. Emba wambu pyao kumungi dokona Anatumi emba pyao kokwa soo nembalopyamo, leya.
2SA 16:9 Akali Apisai lenge enda Seruyana ikinyingi dokome kiŋi doko kando lao, Emba kiŋi andake doko. Akipamo akali kopyali dakeme suwa ingyuo randa jinya lao kaelese? Namba dokona dumu pao banya mange puku pyala puu larene, leya.
2SA 16:10 Kiŋi dokome akali Apisaipa dee banya yangonge Joapepa kando lao, Doko nakambana yulu mende daa. Kamongo dokome pinya lao lamairamo dokona baa namba randa jera ramo doko api rolae pingipi mendeme piso soo akipamo pilyamo larami ingilyase? leya.
2SA 16:11 Dokopa Dapitimi akali Apisaimoo banya akali mupwa dupwape peparae lamaiyuo lao, Namba rangena ikinyingi dokome namba pyao kumakalana pilyamo dokona akipamo Benjamenena rara dokona akali dakeme doo pilyamo dokona kando yamarangyuo mona nembaramisi? leya. Kamongo dokome namba kando pinya lao pii koo dupwa lena lao lamaipyamo pilyamo dokona baa yaki nyuo panda maiyuo yulu koo doko pinya kaeyalapape, leya.
2SA 16:12 Kamongo dokome nambana mona randalyo doko kandapala namba koo keta palyuo pii lapyamo doko alowa pyuo namba elyape keta pisara rapisi.
2SA 16:13 Dokona lao Dapitimoo banya akali dupwape kata nyuo peyaminyi dokopa Simai baa yuu kyau kipwa kipwa dorena kanda kanda pyuo paowali pyuo karo dokopa pii koo dupwa lao kanape yuu kulipi dupwa pyao pyambuo piya.
2SA 16:14 Dokopa kiŋi dokope banya akali dupwape pao ipwa Jotane doko kando nyiyami. Dopa pyuo nakama kata pao karo maka pyuo kimbu randa pyuo piyasa ipwa mare dokona imambu soo peteyami.
2SA 16:15 Akali Epesalomemoo dee Isaraele akali lapo baa role kareyami dupwa peparaepe Jerusaleme sukusa peyami dokopa akali Ayitopele baa opetae dokona role pyao kareyami.
2SA 16:16 Dapiti banya mona kulisa reto puu minyingi akali Asai lenge dokome Epesalome kando nyepala lao, Kiŋi doko palu karalu karena. Kiŋi doko palu karalu karena, leya.
2SA 16:17 Dokopa Epesalomeme Asai baa piso soo lao, Embena mona kulisa retenge dee embena puu minyingi Dapiti doko apa pipyase? Emba akipamo baa role pyao paa napisi? leya.
2SA 16:18 Dokona Asaimi isingi lao, Namba apa pyuo parose? Namba Kamongomepe wambu dupwamepe dee Isaraele peparaemepe rombo palyiyaminyi kiŋi dokona daerename ingyuo karo.
2SA 16:19 Nambana akali mupwa dokona ikinyingi dokona yulu pyakami naro ramo nambame apinya yulu pyakamirusi? Nambame embena rakanena yulu pyakamiyu doko suu pyao epapu nambame embena yulu pyakaro, leya.
2SA 16:20 Dokopa Epesalomeme kapu kyuo Ayitopele piso soo, Epapu namwa dae karamano. Dokona namwame apa piramase? Embena suu pilini dupwa namba serole langipi, leya.
2SA 16:21 Dokopa Ayitopeleme isingi lao, Embena rakanena enda lapo konda pyuo nyiyamo dupwa anda yuupi rapu pyuo petena lapala peyamo dupwa kepo pyuo nyela puu. Dokopa embame embena rakanepe kinyi angi nyisu piso yanda pimwai ingyapilyamo lao Isaraele peparaeme soo nyerami. Soo nyepala wambu peparae embena pii lareneli pyuo pyuo kararami, leya.
2SA 16:22 Dokona lao nakamana kiŋinya anda dokona yangi ketae dulunya komau anda mende Epesalomena pyakamiyami. Dokopa wambu peparaena lenge kambu dokona andakare papala rakangena enda lapo konda pyuo nyiyamo dupwa pipya kepo pyuo nyiya.
2SA 16:23 Yuu gii dusipana Ayitopelena pii leyamo dupwa sepala Anatumi lele leyasa wambu peparaeme moko minyuo piyami. Wamba Dapitimi warombo soo piya. Dee enakana Epesalome baame opetaeko warombo soo pinya piya.
2SA 17:1 Kuki enakana Ayitopeleme Epesalome lamaiyuo lao, Nambame akali taosande akalisa ipisu lama (12,000) rombo palyapala rengya kukwa akali dupwa pipya role pyao Dapiti paramo dokona moko minyuo parole.
2SA 17:2 Baa makame kumuo mona kumapala yame yame laramo pisira. Mange dokopa baa pakame kumuo pisiramopa banya akali dupwa ralo parami. Dokopa nambame kiŋi doko iki pyao kumakaro.
2SA 17:3 Enda akali nyingi dupwa kapu kyuo akalingi karenge dokona epenge dopale ingyuo akali menge dupwa lanyuo emba petene dokona eparo. Embame akali mendaki iki pyalena suu pyapi doko pyao kumakare ramo dokopa endakalipi menge dupwa yanda pii nao kapa palyuo kararami, leya.
2SA 17:4 Leyamo dokopa Isaraele akali mupwa dupwamepe dee Epesalome baamepe pii doo leyamo doko keyange ingyuo pelyamo, lao siyami.
2SA 17:5 Epesalome baame lao, Epapu Asai baa opetae epena lao kee lalapape. Laraminyi dokopa baame pii laramo dupwa namwa semanale, leya.
2SA 17:6 Akali Asai doko epeyamo dokopa Epesalome baame lamaiyuo lao, Pii dake akali Ayitopele dokome namwa langipyaŋa. Namwa doko moko minyuo pemase? Dee daa ramo doko embame namwa apa pirami lao langipi, leya.
2SA 17:7 Asaimi isingi lao, Pii Ayitopeleme epapu nakama langipya doko kwaelyamo, leya.
2SA 17:8 Embena rakane dokope akali menge dupwape nakama yanda ama poraiyuo pyuo yanda nengena petenge doko emba silini. Dee nakama mena marakae dupwana yakane waa nyakamingi dokopa pondoma pyuo nalana pingi dopale ingilyaminyi. Dee embena rakane doko yandana yulu soo oto pyuo retenge dokome baa kukwa dokopa banya akali dupwa pipya pali nange doko emba silini.
2SA 17:9 Epapu dakepa baa kananda mendenape panda yuu mendasa yalu pyuo sera ramo soo pilyamo. Dopa pipala Dapiti baame aopa embena akali dupwa minyarapala pyara. Dopa pyuo pilyamo laraminyi sepala wambu dupwame embena akali dupwa pyao anamasi minyuo isa palyilyamo larami.
2SA 17:10 Dapitimi dopa piramo dokopa embena rakane doko yanda singi andake wakasa dee banya akali dupwa yandana soo otenge doko Isaraele wambu peparae soo otelyaminyi dokona mena laeneme bange mendepe paka nange dopale ingyuo yanda singi porai yanda pingi dupwa pakao pyuo penge dupwa mee pakarami.
2SA 17:11 Dokona nambana mana pii emba langilyu doko. Yuu pinjingi pakirena piso pao yuu pinjingi paki suu lao Isaraele akali peparae ipwa kee ipwa kota marengena singi dopale ingyuo nyuo pyasape. Pyasapala nakama lanyuo emba rangeme Dapitinya lenge kambu dokona yanda pela pupi, leya.
2SA 17:12 Namwame Dapiti baa yuu anja angi karamo doko koto nyerama. Koto nyepala namwame Dapiti baape banya akali dupwape mende piraŋa lao see nao kamenge kararaminyipa namwame nakama pyarama. Namwa Dapiti baape banya akali dupwape peparae pyao kumakarama dokopa mendepe lete kara nara.
2SA 17:13 Baa yuu taone mendena pao yalu pira ramo doko namwana wambu dupwame puu londe lapo minyuo epapala yuu taone doko puu dokome palyuo awali lapala ipyaraminyi dokopa lalyuo isa yuu pau lama lama dokona para. Dokopa kana kuki mendepe yuu kyau ketae dokona see nara, leya.
2SA 17:14 Akali Epesalomemoo dee Isaraele akali peparae dupwame lao, Akali Ayitopelena pii doko keyange ingyapyamopape akali Asainya doko ama keyangelyamo, leyami. Kamongome akali Ayitopelena pii keyange doko minyuo pii narami dokopa randa andake doko akali Epesalome keta epara lao soo nyiya.
2SA 17:15 Enakana Asai baame mana pii akali Epesalomemoo Isaraele akali mupwa dupwape lamaiyamo dokope dee Ayitopeleme lamaiyamo dokope purisi akali Satokopa Apiatapa lamaiya.
2SA 17:16 Dokopa Asaimi konda pyuo lao, Epapu waiya lao Dapiti keta pii wai nembapala yuu muiyane ipwa keno paenge doko yuu gii kukwa mende nembo pali nana. Epapu dakepa baape banya akali dupwa pipya peparae nyepala pyao kumaka nanaleŋe dakepa aopa ipwa Jotane doko yalo pena lena, leya.
2SA 17:17 Dokopa akali Apiatana ikinyingi Jonatanepa dee akali Satokona ikinyingi Aimasepa yuu Jerusaleme repeta yuu Enerokele lenge dokona isaro kareyambi. Doko nakamba taone dokona sukusa parambano dokopa wambu dupwame kandasarami lapala piyambi. Dokopa kendemande wanakendeme mende piyamo dokopa yuu peparae lao nakamba lamairapu piyamosa nakambame pao kiŋi Dapiti lamaila parapu piyambi.
2SA 17:18 Dopa piyambinyipape yuu gii mendepa wane mendeme nakamba kandapala baame akali Epesalome lamaiyamosa nakamba yuu Bakurimi dokona akali mendena anda papala waiya lao yalu pela peyambi. Dokopa banya anda repeta dusa banya yuwale singindena nakamba dokona koko pao yalu pyuo peteyambi.
2SA 17:19 Dokopa akali dokona etenge dokome bange komau porai lapo nyepala yuwale kambu dokona yambe piya. Pyapala wambu mendemepe soo giso kanda naramiŋi lapala nenge witi jingi dupwa ketae dokona minyuo raeyo reteya.
2SA 17:20 Dokopa Epesalomena akali mupwa dupwa anda dokona epapala enda doko piso soo lao, Aimase Jonatanepa anja karambisi? leyami. Dokopa enda dokome isingi lao, Nakamba ipwa doko yalo papambi, leya. Dokopa akali dupwame nakamba koto peyami. Peyaminyipape koto kando nyii napala nakama kapu kyuo Jerusaleme peyami.
2SA 17:21 Enakana nakama yaki nyuo peyaminyi dokopa Aimase Jonatanepa yuwale dokona peteyambi doko nyisa epeyambi. Epapala pii dupwa Dapiti lamaila peyambi. Akali Ayitopeleme baa keta yanda pyuo pii lao reteyamo dupwa lamaiyambi. Lamaipala lao, Waiya lao ipwa doko yalo pupi, leyambi.
2SA 17:22 Dokopa Dapitimoo banya akali dupwa pipya ipwa Jotane doko yalo peyami. Pao yuu yango rali dokopa nakama peparae ipwa dumurena yalo pao oteyami.
2SA 17:23 Dokopa akali Ayitopele banya pii leyamo dupwa moko minyuo pyakami nayamisa banya mena donge doko nyepala piso para dokona rapa rapa pipala banya rangena yuu taone dokona peya. Enakana banya rangena yuupi bangepe dupwa peparae rapa rapa pyuo rolo otapala baa rangeme puu neya. Dopa piyamosa banya wambu ree palu malu pingi yuu dokona malu piyami.
2SA 17:24 Akali Epesalomemoo Isaraele akali dupwa pipya Dapiti pyala pao ipwa Jotane doko yaleyami yuu gii dokopa Dapiti baa pao yuu taone Makanaimi lenge dokona pyaka siya.
2SA 17:25 (Dokopa Epesalomeme akali Joapena panda nyuo akali Amasa doko yanda singi ami dupwana mupwa ingyuo isinya lao rombo palyiya. Amasa baa Isimaelena rara akali Jeta lenge dokona ikinyingi. Banya endangi doko Apikale lenge, Apikale baa akali Nasena wanenge dee akali Joapena endangi Seruya lenge dokona kakingi.)
2SA 17:26 Epesalomemoo dee banya akali dupwa pipya yuu Giliate dokona komau anda pyuo paleyami.
2SA 17:27 Yuu gii dokopa Dapiti baa yuu Makanaimi epeyamo dokopa akali remame baa kando nyiyami. Akali Sopi Nasena ikinyingi yuu taone Orapa Amone singi dokona rangepe Maka Amielena ikinyingi yuu taone Lotepa rangepe dee Basilai yuu Orokelimi yuu Giliate singi dokona rangepe dusipame kando nyiyami.
2SA 17:28 Kando nyepala nakamame Dapitimoo banya akali dupwapena perepe penge warame wasisipi luu palenge komaupi nengepe minyuo epo maiyami. Dopa pyuo nenge witi jingipi bali jingipi palawape witi kisasipi mee binipi dee bini piipi amburali ipwangepe bulamakao susu ipwangepe dee nenge wasisi sisi lengepe mena sipisipi lapope dupwa peparae minyuo epo maiyuo piyami. Doko Dapitimoo banya akali dupwape yuu muiyane dokona kata papipala lopome kumuo ipwa nano kumuo maka pipyamo epelyaminyi lao soo nyepala nenge maiyami.
2SA 18:1 Kiŋi Dapitimi banya akali dupwa peparae nyuo malu palyiya. Palyapala akali dupwa lili pirapu akali taosande mendaki lili wakale piya dee andete mende ingyarapu lili wakale pirapu karo piya. Dopa pipala akali mupwa iso laminyaraminyi dupwa lili dupwana mendaki larapu karo peya.
2SA 18:2 Dopa pipala yanda angi pyala pena lao dokopa baame liti remana ingyuo wakale wakale akali Joapemoo dee Joapena yangonge akali Apisaimoo dee yuu Gati range akali Itaimoome pipya role pyao laminyuo iso pena, leya. Lapala kiŋi dokome banya akali dupwa lamaiyuo lao, Namba range nakama pipya role pyao paro, leya.
2SA 18:3 Dokopa nakamame isingi lao, Emba namwa pipya epa nare. Namwa lapo kapu kyuo ralo makando paramanopape panda pingisi paki pyao kumakaraminyipape dokona nyisu petenge dupwa keta mende ingya nara. Dopa piramopape emba angingyuo pyalena lao karaminyi. Renge doko embame kyawa nyepala namwa taosande akalisa (10,000) ingilini. Dokona emba mee yuu taone dakena piso kaepala namwa nyisaramili lapo peyarapu pepe, leyami.
2SA 18:4 Dokopa kiŋi dokome isingi lao, Nakamame mende keyange lao suu pyaraminyi doko nambame piru, leya. Lapala baa kame kambu kii wangu dokona kareyamopa banya akali dupwa kimbu pyao piso liti taosande mende ingyarapu andete mende ingyarapu pyuo peyami.
2SA 18:5 Baame akali Joapemoo Apisaimoo dee Itaimoo pii lamaiyuo lao, Nambana kingi dokona lao akali parange Epesalome doko randa maiyaka nana, leya. Doko Dapitimi banya akali mupwa dupwa peparae pii dake lamaiyamopa yanda singi dupwa peparaeme soo oteyami.
2SA 18:6 Dokopa Dapitinya yanda singi ami dupwa pao yuu kipwa kipwa dorena papala yuu Eporaime imwa dokona nakama Isaraele pipya yanda piyami.
2SA 18:7 Dapitinya akali dupwame Isaraele akali dupwa pyao wini piyami. Dopa pyuo yanda isare rao pipala pyao wini piyaminyipa yuu gii dokopako akali ama malu taosande akalisa (20,000) kumuyami.
2SA 18:8 Yuu muu kipwa kipwa dokona yanda doko pyuo andakyapala akali yandana kumuyaminyipape daa mee lapo kamame wakasa ingyuo imwa dokona kumuo peyami.
2SA 18:9 Dokopa aopa akali Epesalome dokome Dapitinya akali lapo kando nyiya. Epesalome baa mena donge matana piso peya. Pao isa kameya mende oke lenge kareya dokona isa lungwa lungwarena peyamosa isa wangya dokome banya ayemba rambuki nyepala mee yukwaro kareya. Dokopa mena donge doko makandoko peyamopa baa yeelyo isa dokona pero kareya.
2SA 18:10 Dokopa Dapitinya akali dokona mendeme kandapala akali Joape doko kando lamaiyuo lao, Nambame Epesalome baa isa oke mendena yukwaro karapyamo kandapu, leya.
2SA 18:11 Dokopa Joapeme isingi lao, Embame kandapala dokopa akipamo aopa pyao kumaka napisi? Embame baa pyapili doko namba rangeme emba kana kulingi akalisa dee marapu mende pipala emba jipuli, leya.
2SA 18:12 Dopa leyamopape akali dokome isingi lao, Embame namba kana kulingi taosande mendaki jipilinyipape nambame kiŋinya ikinyingi doko yango palyili lao nambana kingi kuki dokona mendeme minyalyuo pyaa napuli, leya. Doko kiŋi dokome lao, Nambana lao suu pyao akali parange Epesalome doko randa maiyaka nalapape, lao embamoo akali Apisaimoo dee Itaimoope pii lao langiyamo doko namwa peparae siyama kande.
2SA 18:13 Kiŋi baame mende pingi dupwa peparae soo otenge dokona nambame banya pii warombo see napala baa pyapuli doko dopa pyuo pyapi lao pii baa sipyali. Sepala baame namba randa jipyali embame namba nyisa napili, leya.
2SA 18:14 Dokopa Joapeme lao, Yuu gii malu nembo namba embapa pii laa naramba, leya. Lapala Epesalome baa isa oke dokona lete yukwaro kareyamopa kaku rema nyepala Epesalomena kyangali dokona pyao pisiya.
2SA 18:15 Dokopa Joapena yanda singi akali akalisame karo awali lapala Epesalome baa angi pyao kumakayami.
2SA 18:16 Doko Joapeme yanda piyama doko kaena lao bikuli poo lena leyamo dokopa banya yanda singi malumi Isaraele dupwa peta ralyuo piyami dupwa yaki nyuo kaepala anda epeyami.
2SA 18:17 Dokopa nakamame akali Epesalomena yongo doko nyepala imwa dokona yuwale kyuwa mendena malyiyami. Malyapala kana malumi ama ketae reto yambe pyao pulyuo nyiyami. Dokopa Isaraele akali peparae mendaki mendaki lao nakama rangena anda dupwana ralo makando peyami.
2SA 18:18 Epesalome banya kingi dokona lao mendeme panda nyera wane ikinyingi mende manja naya dokome baa lete kareyamo yuu gii dokopa banya kingi doko ota naramopa suu pyao kararamiŋi lao kana londe mende Kiŋinya Yuu Pau Lama Lama dokona yuu apu rao pisiya. Pisiyamo yuu gii dokona piso pao dakepape wambu dupwame kana doko Epesalomena Kana lenge.
2SA 18:19 Dokopa akali Aimase Satokona ikinyingi dokome Joape lamaiyuo lao, Kamongo dokome banya nyisu petenge dupwa pipya kiŋi doko kyawa lete nyuo nyisapyaŋa lao wai pii keyange doko minyuo kiŋi petamo dokona lamaila makando paowa, leya.
2SA 18:20 Dokopa Joapeme lao, Daa. Epapu emba wai pii keyange lapo minyuo paa nare. Doko kiŋinya ikinyingi doko kumapyamo dokona yuu gii mendepa emba minyuo pare. Epapu daa, leya.
2SA 18:21 Dokona banya kendemande akali Itiopia range doko lamaiyuo lao, Emba doo pipyamo kandapi dupwa kiŋi doko lamaiya puu, leya. Dokopa kendemande akali dokome Joape kando pangu sepala makando peya.
2SA 18:22 Aimase suu lao lao, Namba mende pira dupwana mende masa nalyoŋo. Wai pii doko kamame minyuo parole, leya. Dokopa Joapeme isingi lao, Nambana ikinyingi, emba dokona yano mende nyii nare doŋo akipamo dopa pinya suu pilisi? leya.
2SA 18:23 Aimaseme kamba lao, Mende pira dupwana wari laa nalyo mee panya suu pilyu, leya. Dokopa Joapeme lao, Doko kapaŋa puu, leya. Dokona lao baa kata dokona makando lupyapala yuu Jotane Pau Lama Lama dokona suku suku papala Itiopia akali doko yaki nyuo baa wambo peya.
2SA 18:24 Yuu taone dokona kame kambu dowa kamandape dee andakarepe kanya iki siyamo dokona Dapiti baa peteya. Dokona yuu taonena kambu isingi akali mende kana kame doko ketae pulyuo peya. Papala kambu dorena ketae anda yangi ingyuo perao karenge dokona kareya. Karapala dokopa akali mende baa iki makando repeta repeta epeyamo doko kandeya.
2SA 18:25 Kandapala baame isa kee lapala kiŋi doko lamaiya. Dokopa kiŋi dokome lao, Baa iki epara ramo doko baame wai pii keyange mende minyuo epara, leya. Dokopa akali makandeyamo doko makando repeta repeta epeya.
2SA 18:26 Dokopa dee isingi akali dokome akali mendeko iki makando epeyamo kandeya. Kandapala baame akali kame kambu dowa dokona iso karenge doko kee lapala, Kanda. Akali mendeko makandelyamo, leya. Dokopa kiŋi dokome isingi lao, Akali dokome opetae wai pii keyange mende minyuo epelyamo, leya.
2SA 18:27 Dokopa isingi akali dokome lao, Nambame kandapu dokopa akali wambo makandapya doko Aimasena makandenge dopale ingyapya, leya. Dokopa kiŋi dokome lao, Baa akali keyange. Baame wai pii keyange mende minyuo epo pilyamo, leya.
2SA 18:28 Dokopa Aimaseme kiŋi doko pii ketae palyuo yako lapala banya lenge kambu siyamo dokona pangu soo dopa lamaiyuo, Embena Kamongo Anatu lakando karape. Renge dokona lao akali dupwame emba kiŋi andake doko isa nembalana lao karaminyi dupwa keta baame anamasi minyingi renge doko jiya, leya.
2SA 18:29 Dokopa kiŋi dokome piso soo lao, Akali parange Epesalome doko kapa lete karase? leya. Aimaseme isingi lao, Kamongo, embena akali mupwa Joapeme namba puu lapyamo dokopa wambu peparae mona rando pii malu lao akema lalya lana pyuo karami. Doko piminyipape doko apa pipya lao namba langi nami, leya.
2SA 18:30 Doko kiŋi dokome baa lamaiyuo lao, Dumbisa karena leya. Dokopa baa dokona papala kareya.
2SA 18:31 Dokopa Itiopia kendemande akali doko epapala kiŋi doko lamaiyuo lao, Emba kiŋi andake doko, nambame wai pii keyange mende minyakao ipu. Epapu Kamongo dokome wambu emba kando pimwaiyuo nyuo isa palyalana kareyami dupwa isa palyuo anamasi minyakapya, leya.
2SA 18:32 Dokopa kiŋi dokome piso soo lao, Akali parange Epesalome kapa lete karase? leya. Dokopa Itiopia kendemande akali dokome isingi lao, Kamongo, baa keta mende pipyamo doko embena nyisu petenge dupwape dee emba mata joo penge dupwape peparae keta pipyali yaka lao suu pilyu, leya.
2SA 18:33 Dokopa kiŋi doko baa wakasa mona randaya. Kame kambu penge dorena ingyuo panda kuki ketae dokona papala ee lao peteya. Baa pao dokopa ee dopa pyuo leya. O nambana ikinyingi, nambana Epesalome. Epesalome nambana ikinyingi. Namba embena panda doko nyepala kumapuli doko kapa ingyapyali. Nambana ikinyingi Epesalome, nambana ikinyingi, lao ee leya.
2SA 19:1 Kiŋi Dapiti baa Epesalomena lao ee lao kumanda petamo lao Joape lamaiyaminyi siya.
2SA 19:2 Kiŋi doko banya ikinyingi doko kondo kumanda petamo leyami doko sepala Dapitinya akali malu dupwa rae maiyuo wini pingi renge paleya doko alowa pipala mona randame kumuo kumandako peteyami.
2SA 19:3 Nakama yanda singi dupwa yandana pakao nyisa papala elyapala elya kalo karenge dopale ingyuo yuu taone dokona elya kalo sukusa dee peyami.
2SA 19:4 Dokopa kiŋi dokome banya lenge kambu yambe pyapala ee poraiyuo lao lao, O nambana ikinyingi. Nambana ikinyingi Epesalome. Epesalome nambana ikinyingi, lao ee leya.
2SA 19:5 Dokopa Joape baa kiŋinya anda papala kiŋi doko kando lao, Epapu embena akali dupwa koo pepeya ingyuo wasinyi pyambuo pelyamo. Akali embena ikinyi wanenyepe lete nyiminyipape dee embena etene dupwape enda lapo konda pyuo nyingi dupwape lete nyiminyi dupwa koo inginyi nembapi kandapi.
2SA 19:6 Embame wambu emba mona retaminyi dupwa kando yanda pimwailini. Dee emba kando rae mai nami wambu dupwa kando mona minyarambu karalene. Embena akali mupwa dupwape mee akali dupwape angi mende daa lao suu pilini. Nambame Epesalome baa epapu lete epapala namwa peparae kumamwali doko emba kuki rae maipili lamo lao kandelyo.
2SA 19:7 Epapu papala embena akali dupwa anjiki pyuo pii lamaila pare. Dopa pii nare ramo doko nambame Kamongona kingi lao rakya yangama dokona mendaki mendepe embamoo role kara narami, leto. Emba palu karenge yuu gii dupwana randa andake koo nao palu karare, leya.
2SA 19:8 Dokopa kiŋi doko roya karapala yuu taone dokona kame kambu repeta peteya. Banya akali dupwame baa dokona petamo leyami doko sepala nakama peparae dokona pao malu palyiyami. Yuu gii dokopa Isaraele peparae ralo wakale wakale pyuo nakama rangena anda dupwana peyami.
2SA 19:9 Yuu Isaraele dokona peparae nakama range lao laiya lao apyanda pyuo lao nakama range lao lao, Kiŋi Dapitimi namwana nyisu petenge dupwa pipya kyawa lete nyiya. Namwa Pilisitia wambu pipya kyawa lete nyiya kande. Epapu Epesalomena reke lao ralo papala yuu yaki nyuo pelyamo, leyami.
2SA 19:10 Namwa akali Epesalome doko namwana kiŋi ingyara lao kyawa dokona mamba kulimbuo kisakamyuo rombo palyiyama. Dopa pyuo rombo palyiyamanopape baa yanda dokona piyaminyisa kumuya. Dokona lao akipamo mendeme kiŋi Dapiti doko kamba minyuo dae eparamo dokona lao laa nalyamisi? leyami.
2SA 19:11 Pii doo Isaraele wambu leyaminyi doko Dapiti keta waiya lao peya. Dopa piyamosa baame purisi akali Satoko Apiatapame Juta akali mupwa dupwa piso sela pena leya. Isaraele akali namba kiŋi dee karapili lao suu pilyaminyipape akipamo nakama enakana kiŋi doko banya anda dokona minyuo eparami ingilyase?
2SA 19:12 Nakama nambana ree palu, Nakama nambana yongo mendare dee ranjama mendaki. Dokona nakamame akipamo namba enakana lanyuo eparamisi? leya.
2SA 19:13 Dapitimi Amasa lamainya lao lamaiyuo, Emba nambana ree palu. Epapu dakepa nambame emba Joapena panda joo yanda singi dupwana mupwa ingyuo karape leto. Nambame dopa pii naro ramo dokopa nambana Anatumi namba randa jinya leto, leya.
2SA 19:14 Nakama Dapitinya pii doko sepala Juta akali peparae mona piyasa baa keta mona maiyuo pyamalyapala baamoo banya akali mupwa dupwa peparaepe kamba kapu kyuo epena leyami.
2SA 19:15 Baa kapu kyuo epeyamo dokopa katasa ipwa Jotane pona dokona Juta akali lapo yuu Gilikale dokona kiŋi akali ipwa dokona yalo lanyala epeyaminyi dupwa kando nyiya.
2SA 19:16 Yuu gii mendaki dokopako Benjamenena rara akali Simai lenge Gerana ikinyingi yuu Bakurimi range doko ipwa Jotane dokona Dapiti kando nyela epeya.
2SA 19:17 Epo dokopa Benjamenena akali rara taosande mendaki (1,000) dee akali Sipa lenge Solena ree palu dokona kendemande karenge dokopa dee banya ikinyingi akalisa ipisu kingi paki dusipape dee banya kendemande akali akalisa lama pipala nyuo ipwa Jotane dokona kiŋi doko kando nyela epeyami. Epeyaminyi dokopa kiŋi baa banya akali dupwape ene epapa nayaminyisa nakama ipwa Jotane dokona epeyami.
2SA 19:18 Nakama kiŋi andake dokope banya wambu pipya epeyaminyi dupwape ipwa doko yalo lanyala epo dee kiŋi dokome leyamuli pyuo pirama lao ipwa yalo peyami. Kiŋi doko ipwa dokona yalo panya rapa rapa piyamo dokopa akali Simaimi baa range pyakao papala kiŋinya lenge kambu siyamo dokona pangu siya.
2SA 19:19 Sepala lao, Emba kiŋi andake doko, yuu Jerusaleme yaki nyinyi yuu gii dokopa nambame kopetame piyu doko nyuo kame sakape. Dokona dee nambapa yanda pimwaiyuo minyaro karo suu pyao karalu kara napipi.
2SA 19:20 Namba koo piyuŋu doko namba silyu. Renge dokona namba mendaki dokoko yuu dulurena rara dokona piso epapu epapala emba kiŋi doko yako lao nyela epelyo, leya.
2SA 19:21 Leyamo dokopa akali Apisai Seruyana ikinyingi dokome ketae palyuo pii lao, Kamongo dokome kiŋi karena lao wasiyamo doko keta koo mende palena leyamo dokona Simai baa pyao kumakamana, leya.
2SA 19:22 Dopa leyamopape Dapitimi Apisaipa banya yangonge Joapepa lamaiyuo lao, Nakambana suu pingi doko apimi piso silyase? Nakambame namba randa jelana letambisi? Namba dake epapu Isaraele wambunya kiŋi ingyuo karo dokona epapu Isaraele wambu kuki mende kumunya lao randa mai narama, leya.
2SA 19:23 Lapala baame Simai lamaiyuo lao, Nambame emba pyao kumaka narami lao lalu lao langilyu, leya.
2SA 19:24 Dokopa Mipiposeta Solena kauwange akali doko kiŋi doko yako lao nyela epeya. Doko baa kiŋi doko Jerusaleme yaki nyiyamo yuu gii dokopa Mipiposeta banya angasipi kyawasipi dupwa rokwa nao dee kimbu dupwa wate pii nao komau dupwa wate pii naope piyamopa pao kiŋi doko wini pipala kamba kapu kyuo epeya.
2SA 19:25 Mipiposeta baa kiŋi doko yako lao nyero lao Jerusaleme piso epeyamo dokopa kiŋi dokome baa lamaiyuo lao, Mipiposeta akipamo emba nambapa role pyao epa naese? leya.
2SA 19:26 Baame isingi lao, Emba kiŋi andake doko, nambana kimbu dolapo koo doko emba silini. Dokome namba embapa role pyao parambaŋa lapala nambana kendemande akali doko lamaiyuo, Nambana mena donge dokona piso embapa role parambaŋa komau kwuo rapa rapa pyakana leyonopape baame namba kyambo langipala pyaka naya.
2SA 19:27 Emba kiŋi andake doko. Baame nambana lao kyambo langiya. Dopa leyamopape emba Anatunya aŋala dopale dokome embame kandarene rolara dupwa pepe.
2SA 19:28 Emba kiŋi andake doko. Nambana rakanena ree palu dupwa peparae kokwa soo kumunginya pyambuili doko rolae ingiyali. Dopa piyamopape embame embena rate dokona nenge nala ipu lee kande. Emba kiŋi andake doko. Nambame emba keta anjiki pyuo nyisa laope bange mendepe jii lao piso serono kata mende see nalyamo, leya.
2SA 19:29 Dokopa kiŋi dokome isingi lao, Emba dee kamba lama konda pyuo laa nare ingilyamo. Embapa Sipapa Solena bange dupwape dee yuu dupwape mokwa soo nyerambi lao suu pyao otapu, leya.
2SA 19:30 Mipiposetame isingi lao, Sipa baa dupwa peparae nyinya kae, Emba kiŋi andake doko anda lete ipi dokona namba rae mailyu. Dokona mende nyii naro, leya.
2SA 19:31 Akali Basilai yuu Giliate range doko opetaeko yuu Orokelimi yaki nyuo kiŋi doko ipwa Jotane keno epena piyamo doko nyiso nyela epeya.
2SA 19:32 Basilai baa akali alemo. Baa ee kana akalisa mange lama (80) ingiya. Doko baa ama akali kamongo ingyuo bange malu retenge. Dokome kiŋi doko yuu Makanaime dokona peteyamo dokopa nenge dupwa maiya epeya.
2SA 19:33 Epeyamo dokopa kiŋi dokome baa lamaiyuo lao, Nambame emba rapu piruŋu Jerusaleme namba role pyao bona epena leya.
2SA 19:34 Dopa leyamopape Basilaimi isingi lao, Namba yuu gii malu palu kara naro doŋo. Emba kiŋi andake dokopa namba akipamo Jerusaleme parambase? leya.
2SA 19:35 Namba ee kana akalisa mange lama (80) karamo dokona dee bange mendeme namba rae mainyi pyambwa nara. Namba ipwa nengepe napu dupwana rende pingi palipyamo naa nalyo. Dee kenane pyami dupwa see nalyo. Emba kiŋi doko nambame emba randa jisasaroŋo daa leya.
2SA 19:36 Nambame yano andake dupwa nyii naro ingilyamo. Dokona lao namba mee kuki lama emba role pyao ipwa Jotane keno unipili papala kaeyo emba puu larole, leya.
2SA 19:37 Lapala nambana anda papala nambana ree palu dupwana malu anda repeta kumaro kapu kyuo parole. Dake nambana ikinyingi Kimikame lenge embena yulu pyakara. Emba role nyuo lanyuo pupi. Emba kiŋi andake doko, embame keyange lao suu pilini dupwa banya lao pyakamipi, leya.
2SA 19:38 Kiŋi dokome isingi lao, Nambame baa lanyuo papala yulu embame pipili lao suu pilini dupwa piru. Dee embame mende pyaka lao piso serene dupwa pyakaro, leya.
2SA 19:39 Dokopa Dapitimoo banya akali dupwa pipya ipwa Jotane doko yalo dumurena peyami. Dokopa baame akali Basilai doko nyinyi pipala yako lao elyape keta pisiyamopa anda kapu kyuo peya.
2SA 19:40 Kiŋi doko ipwa yalo oteyamo dokopa Juta akali peparaemepe dee Isaraele akali pingyasi lapomepe baa kako pyao nyiso minyuo peyami. Baa yuu Gilikale dokona peyamo dokopa akali Kimikame baa dokona role pyapeta peyambi.
2SA 19:41 Dokopa Isaraele peparaeme kiŋi peteya dokona papala baa kando lao, Emba kiŋi andake dokope embena ree palu wambu dupwape embena akali dupwape akipamo namwana yangonge Juta akali dupwame keyange pilyamano lao suu pyao nakama nyepala Jotane yalo minyuo rapu pyuo pumisi? leyami.
2SA 19:42 Juta akali dupwame isingi lao, Namwa doo pimwano doko kiŋi doko namwa pipya mendarendeme pimwaŋa. Dokome nakama akipamo imbu singi manjinyi pyambwarase? Baame namwa nenge ropo pyao joo dee bange mende joope pii napya, leyami.
2SA 19:43 Leyaminyi dokopa Isaraele akali dupwame isingi lao, Kiŋi Dapiti baa nakamana rara angingyuo karapyamopape namwa rara akalisa karo nakama mendaki iki isa palyilyamano. Dokona lao akipamo nakamame namwa kilya kando lao karamisi? leyami. Lapala namwa wambo suu pyao kiŋi doko dae lanyala eparama lao leyama doko kame see nalapape, leyami. Leyaminyipape Juta range dupwame Isaraele wambunya pii isa palyili lao poraiyuo leyami.
2SA 22:1 Kamongo baame Dapiti banya nyisu petenge akali Solemoo dee akali lapo dupwa keta baa kyawa lete nyiyamo dokona kenane dake Dapitimi Kamongo doko kando piya.
2SA 22:2 Kamongo doko nambana kyawa lete nyuo alya isa ingingi akali. Baa kame porai dopale ingyuo namba kako pyaro karenge.
2SA 22:3 Nambana Anatu doko nambana alya minyingi akali dokona namba baa keta kyawa lete epelyo. Baame konambe dopale ingyuo namba alya minyingi. Dee baa nambana lete wai pyao nyingi akali wambu dupwame namba pyalana randa jilyaminyi dokopa baame namba keta alya minyuo nyisingi.
2SA 22:4 Nambame Kamongo doko kee letono dokopa baame nambana nyisu petenge dupwa keta kyawa lete nyuo nyisingi. Dokona Kamongo lakandamanale.
2SA 22:5 Ipwa kota kasakole minyuo ipwa marengena epenge dopale ingyuo kumungi renge dokome namba nyuo sukusa pyambuya. Dee ipwa kasakole minyingi dopaleko ingyuo randa renge dupwame namba nyuo bwuakiki piya.
2SA 22:6 Kumungi rengena randa dokome namba keta kako piya. Dokopa malu andana kone dokome nambana lao makaro siya.
2SA 22:7 Dokopa namba randa nao karo Kamongo doko kee leyo. Nambame nambana Anatu doko nyisinya lao kee leyo. Dokopa banya tembole anda dokona karo baame nambana pii soo namba nyisinya lao ee leyono doko siya.
2SA 22:8 Dokopa yuu dupwa pyuku pyuku lao romo romo piya. Anatu baa imbwayamosa yake doko ama romo romo piya.
2SA 22:9 Dokopa banya gyaa kata dokona isare sukwa potemo epeya. Dee isare rao uliyapu nyingi lelenge dupwape dee sungwa lengya dupwape banya nenge kata dokona epeya.
2SA 22:10 Dokopa baame yake doko nyuo karalyapala banya kimbu isarename kopa pupuri rau dokopa role pyapeta baa isa epeya.
2SA 22:11 Baa aŋala dokona mata dokona piso isa epeya. Epapala baa poo raiyana papake dopale ingyuo dokona piso kata papiya.
2SA 22:12 Baa range iminjingi dokome yambe piya. Dopa pipala baa kopa romende ipwa malu petenge dupwame baa keta piso kako piya.
2SA 22:13 Baa peteyamo dokona yuu pele pipala isareme rasi sungwa lengya dupwa lele pyao soo ketae peya.
2SA 22:14 Dokopa Kamongo dokome yake dokona piso yuu gala leya. Leyamo dokopa Anatu Porai Wakasa dokona pii doko wambu peparaeme siyami.
2SA 22:15 Akali mendeme banya nyisu petenge dupwa wanga dupwame pingi dokopa nakama ralo penge doko suu pyao yuu pele piyamo dokopa banya nyisu petenge dupwa wakale wakale pyuo makando peyami.
2SA 22:16 Dokopa Kamongo dokome banya nyisu petenge dupwa kando mena nalena pingi ingyuo imbu singi manjo pii poraiyuo lao piyamopa banya pii doko poo raiya andakeme bange minyalya minyana pingi doko suu pyao ipwa kota pete isa donorename dupwa epo maro leya. Dee yuu dokona isa susa pingi bange dupwa mee epo panembena siya.
2SA 22:17 Kamongo dokome yake panda piso isa epapala namba nyiya. Baame namba ipwa koko dupwana paleyono dokopa nyisa ipyuo nyiya.
2SA 22:18 Baame nambana nyisu petenge ama porai palenge dupwa keta baame kiiramo nyiya. Dee lapome namba awa nayami dupwa keta opetaeko kiiramo nyiya. Nakama ama porai wakasa dokome namba anamasi minyaro ingya nalyamo.
2SA 22:19 Namba randa nyuo kareyono dokopa nakamame namba minyarapala nyiyami. Dopa piyaminyipape Kamongo dokome namba alya isa ingyuo kyawa lete nyiya.
2SA 22:20 Nambana randa epeya dupwana baame namba neta nyuo nyisiya. Baame nambapa rae maiyuo epe kandeya dokome namba kyawa lete nyuo nyisiya.
2SA 22:21 Namba rolae pingi dokona Kamongome namba yano pyakange. Namba koo mende pii nange dokona baame namba elyape keta pisingi.
2SA 22:22 Nambame Kamongona lowa dupwa warombo singi. Nambame nambana Anatu kando mata maiyuo kapu kyuo paa nange.
2SA 22:23 Nambame banya lowa dupwana peparae letamuli pyuo kando minyuo pyuo karenge. Banya mawa pii dupwana namba kamba lao warombo see nangende daa.
2SA 22:24 Nambame koo mende pisarono kando lao nyokonyuo karenge dee namba koo mende pii nange doko baa silyamo.
2SA 22:25 Dokona lao namba rolae pingi dokome baame namba yano jingi. Renge doko baame namba keta koo mende pali nange doko baame soo gisingi.
2SA 22:26 Kamongo wamba lapome emba poraiyuo suu pyao yaki nyii nao karenge dupwa kando embame nakama keta lalu lao leeneli pyuo poraiyuo suu pyaoko karenge. Dee wambu lapo kopetame pii nao kata rolae dokona iki pyuo karenge dupwa kando embame keyangeko pingi.
2SA 22:27 Wambu mendeme poo pyasi ingyuo karenge ramo doko keta embame baa embena poo pyasi renge doko lasaka pingi. Dopa pinginyipape wambu mende yulu koo pingi ramo doko keta embame yano pyao randa maingi.
2SA 22:28 Embame wambu range kuki ingyuo inyimungu karenge dupwa kyawa lete nyingi. Dopa pinginyipape wambu range mupwa lao suu pyao ulipili ingingi dupwa kando embame nyuo isa palyingi.
2SA 22:29 Emba Kamongo doko, Nambana kendapulinya mendeke ingyuo karenge. Dee embame namba keta iminjingi dupwa nyuo nembakapala yanganyi retakange.
2SA 22:30 Embame nambana nyisu petenge dupwa pyaa lao namba porainya renge jingi. Dee embame namba porainya renge jingi dokopa nyisu petenge dupwana yuu taone dupwana kana kame dupwa mee pyao lalyuo kokwa soo nembenge.
2SA 22:31 Anatu doko, banya yulu pipyamo dupwa ama mondo lao rolae ingyuo pelyamo. Dee baame mende lalu lao lapyamo pii dupwa kinyi angingyuo pelyamo. Dopa pyuo wambu lapo baame kyawa minyinya lao koto parami ramo dupwa keta baa konambe dopale ingyara.
2SA 22:32 Kamongo baa iki doko Anatu. Dee Anatu baako nambwana nee isa ingyaro karamo.
2SA 22:33 Anatu doko namba porainyi pyambuo namba anja panda anja dupwana penge dokopa iso karenge.
2SA 22:34 Baame namba mena diya lenge lukuma nao kata papingi dopale ingyuo papi lao pingi. Dee namba yuu kyau dupwana kata papyuo karenge dokopa baame namba nyisingiko.
2SA 22:35 Doko yanda enekongo porai dupwa minyuo yanda piriŋi lapala baame namba yanda dupwana mana langingi.
2SA 22:36 O Kamongo, Embame namba alya isa ingyuo karo lete wai pyao nyingi. Embena nyisapinyi renge dokome wambu peparaena lenge kambu dokona nambana kingi doko ando pelyamo.
2SA 22:37 Dopa pipala embame nambana yanda pimwai dupwame minyarapala nyisasarami lao iso karapinyipa namba isa paa nange.
2SA 22:38 Nambame nyisu petenge dupwa peta ralyuo pyapala anamasi minyingi. Nambame kaeya napala nakama pyao kokwa soo nembapala dokopa kaenge.
2SA 22:39 Dopa pipala nambame nakama pyao isa palyingi dokopa nakama sipuro epa nange. Nakama nambana kimbu isarena kumasi singi.
2SA 22:40 Embame yandana namba porainya renge jingi. Nambame nyisu petenge dupwa pipya pyao anamasi minyare lao nyisingi.
2SA 22:41 Embame nambana nyisu petenge dupwa namba kando makando pena lao pingi. Dokopa wambu namba epe kanda nange dupwa nambame pyao kokwa soo nembenge.
2SA 22:42 Dokopa nakama wambu lapome nyisamili lao kotelyaminyipa mendemepe nakama kyawa lete nyuo nyisa nange. Nakamame Kamongo doko nyisinya lao kee letaminyipape baame nakama isingi yano pyaa nange.
2SA 22:43 Nambame nakama pyao inji ranji pingi dokopa nakama sinjimu dopale ingingi. Dopa pipala nambame nakama katana wara silyamopa kalyuo papingi dopale ingyuo isa palyingi.
2SA 22:44 Embame wambu namba kando kamba lao mata joo kareyaminyi dupwa keta namba kyawa lete nyuo nyisingi. Embame wambu rara peparae keta namba kiŋi kara lao rombo palyapala iso karenge. Wambu namba kando see nange dupwame nambana yulu pyakalyaminyi.
2SA 22:45 Dopa pipala wambu yuu wakale range dupwame nambana lenge kambusa pangu singi. Nakamame nambana pii sepala dokopa warombo singi.
2SA 22:46 Nakamana paka nange renge doko isa penge. Dopa pilyamopa nakamana anda porai dokona piso walu walu lao nyisa epo nambana arapunya role pyao karala epenge.
2SA 22:47 Kamongo doko lete karalu karenge. Baa nambana nee isa ingyuo karenge doko lakandena. Anatu porainya renge palenge dokome namba lete wai pyao nyingi dokona kingi ketae pena lao leto.
2SA 22:48 Nambame nyisu petenge dupwa isa palyuo anamasi minyare lao nyisingi. Nyisapala baame wambu rara lapo dupwa namba isarena karena lao pingi.
2SA 22:49 Nambana nyisu petenge dupwa keta baame nyiso neta nyingi. Kamongo nambana nyisu petenge dupwa isa palyuo anamasi minya lao nyisingi. Embame namba alya isa minyuo karapinyipa akali wambu pyao randa maingi dupwame namba pyao kumaka nalyaminyi.
2SA 22:50 Dokona lao wambu rara peparaena lenge kambusa karo nambame emba lakandelyo. Nambame emba kando lakando kenane pilyu.
2SA 22:51 Namba banya kiŋi Dapiti dokome nyisu petenge dupwa anamasi minyare lao Anatumi porainya renge jingi ingyuo karenge. Baame namba banya rombo palyiyamo akali doko mona kulisa retenge. Dopa pipala namba Dapiti ketape dee nambana para pyaramo dupwa ketape mona reto karalu karara.
2SA 23:1 Dapiti akali Jesena ikinyingi dokome Kamongome mupwa inginyi nembeya. Akali doko Jekopena Anatu dokome baa kiŋi ingyuo rombo palyiya dokome kenane pii keyange dupwa Isaraele wambunya pyao retakamiya. Dokona pii dake Dapitimi lumwa pyuo leya.
2SA 23:2 Kamongona Imambu dokome namba keta pii letamo. Banya wai pii dupwa nambame lakare lao jingi.
2SA 23:3 Isaraele wambunya Anatu dokome pii leya. Isaraele wambunya konambe ingyuo alya isa ingingi dokome namba langyuo lao, Kiŋi akali kata rolae dokona iki wambu dupwa iso karo dee Anatu lengenyili pyuo iso karenge doko
2SA 23:4 wamba yangama kopa yake dokona see nalyamopa neta iki rao karenge dopale ingilyamo. Dee baa apunda epo sokwa pelyamopa netame isako dupwa leya leya pinyi pyambungi dopale ingilyamo.
2SA 23:5 Kamongome namba kando pii kana minyuo lalu lao leya dokona Anatumi nambana manjirunu dupwa elyape keta pisinyi pyambwakara. Dee pii angi kinyi walengena palyuo yaki nyuo kaeya naro, leya. Pii lalu lao lapala alowa pii nange dokona namba moname nyilyamo. Dokona Anatumi namba dopa pyuo angi pyakaramo dokopa anamasi minyuo kararo.
2SA 23:6 Dopa piramopa akali Anatu suu pyaa nange dupwa nepereke neta nembenge dopale ingyuo nembenge. Dokopa wambu mendemepe kingimi minyandara ingya nange.
2SA 23:7 Mendeme puu reke karenge doko minyandalena suu pyarami ramo doko bange aneme wasisipi dee kakupi lapo nyepala minyarami. Dokopa nepereke puu doko isareme rao otalu oto otara.
1KI 1:1 Kiŋi Dapiti baa ando emo ingiyamo dokopa banya kendemande akali dupwame porangelye yambe piyaminyipape baa mee kupwame kumuoko palyuo siya.
1KI 1:2 Dokopa banya akali mupwa dupwame baa lamaiyuo dopa leyami. Emba kiŋi andake doko, namwame enda mapwae mende embapa role pyao palyuo emba rapu pira kotakamanale. Kota kando nyakaramano dokopa wanake dokome emba kupyaro paliramo emba kupwa nao paliri, leyami.
1KI 1:3 Lapala nakamame Isaraele yuu muu dupwa peparaena enda mapwae keyange mende petape lao koto kareyami. Koto karo yuu Suneme lenge dokona wanake mende kingi Apisake lenge peteyamo kando nyiyami. Nyepala baa lanyuo kiŋi peteyamo dokona peyami.
1KI 1:4 Peyaminyipa enda mapwae ama keyange wakasa dokome kiŋi baa iso rapu piya. Dopa piyamopape enda dokopa angi nyii nao mee palyuo kareyambi.
1KI 1:5 Dokopa akali Epesalome baa kumuyamo dokopa akali Atonainja lenge Dapiti Akitipana ikinyingi doko wane mupwa doko baa kuma nao mee lete ando kareya ingiya. Baa akali elyape ingyuo ando kareya Dapitimi wane doko pyalana pyuo laa nange. Dokona Atonainja baa kiŋi karapuli lao suu pyao kareya. Baame mename uliuli ipyuo pengepe mena osepe dupwa baa rangena lao reteya. Dee baa rapu pirami akali dupwa akalisa kingi paki karo piyami.
1KI 1:7 Baamoo akali Joape enda Seruyana ikinyingimoo purisi akali Apiatamoo role pyao pii lao kareyami. Kareyaminyipa nakamba pipya lao banya yulu dokona renge palyuo poraiyuo lakamiramba, leyambi.
1KI 1:8 Dopa leyaminyipape purisi akali Satokomoo Benaya Jiyoatana ikinyingimoo dee poropeta Netanemoo Simaimoo Oraimoo dee Dapiti banya yongo rapu pyuo karaminyi akali dupwamepe Atonainja banya pii leyamo dorena kara nayami.
1KI 1:9 Yuu mendepa Atonainjame bange mena sipisipipi bulamakaope dee mena bulamakao yakane rondo lasipi lapo Kau Kana lenge dokona ipwa Enerokele guu lenge doko repeta kiso maiya. Maipala baame kiŋi Dapitinya ikinyingi menge dupwape dee kiŋi Dapiti banya akali mupwa yuu Juta range dupwape nenge malu palyuo kisiyamo dokona epena leya.
1KI 1:10 Leyamopape banya yangonge Solomonemoo poropeta Netanemoo Benayamoo dee kiŋinya yongo rapu pyakamyuo karenge dupwape epena laa naya.
1KI 1:11 Enakana Netane baa Solomonena endangi Betesepa lenge peteyamo dokona papala baa piso soo dopa leya. Emba Akitinya ikinyingi Atonainja baa rangeme kiŋi karalana lao rombo palyapya doko see napisi? Dokopa kiŋi Dapiti pii dokona mendepe ama see nalyamo, leya.
1KI 1:12 Embame embapa embena ikinyingi Solomonepa range lete kyawa doko kame pyuo minyaramba lao masiyambi kande doko nambame pelapa lao langirunuli pyuo pelapape, leya.
1KI 1:13 Yuu gii aopa dakepa kiŋi Dapiti petamo dokona papala piso soo lao, Emba kiŋi andake doko, embena panda doko nambana ikinyingi Solomoneme nyepala baa kiŋi ingyuo karara lao lalu lao lao namba langya naese? Dokona lao, Akipamo akali Atonainja baa kiŋi karase? leya.
1KI 1:14 Dopa lapala dokopa Netaneme konda pyuo lao dopa leya. Emba kiŋi Dapitipa pii lao kararambi dokopa nambame epapala embame pii letene dokonako lareneli pyuo kamba laokondali pyuo lakaro, leya.
1KI 1:15 Dokona lao Betesepa baa kiŋi banya luu palenge panda paleyamo dokona kandala peya. Peyamo dokopa baa ama alemo ingyuo oteya. Dokopa yuu Suneme range wanake dokome kandokondali pyuo rapu piya.
1KI 1:16 Dokopa enda Betesepa baa kiŋi paleyamo dokona lenge kambusa pangu siya. Dokopa kiŋi dokome baa piso soo lao, Emba aki nyerese? leya.
1KI 1:17 Enda dokome isingi lamaiyuo dopa leya. Emba kiŋi andake, embame embena Kamongo Anatunya kingi lao lalu lao lapala nambana ikinyingi Solomone baa embena mata kiŋi ingyuo karara lao namba kando lee kande leya.
1KI 1:18 Dopa leenepape Atonainja baa kiŋi karo otapya dokona mendepe emba see nalene kande.
1KI 1:19 Baame mena bulamakao kali malupi mena sipisipipi dee mena bulamakao ikyane rondo lasipi lapo pyao yangapala embena ikinyingi dupwape purisi akali Apiatamoo dee Joape embena yanda singi ami dupwana mupwa ingyuo karenge dokomoo epena lapala embena ikinyi Solomone iki epena laa napyapya, leya.
1KI 1:20 Emba kiŋi andake doko Isaraele wambu peparaeme apimi embena panda nyuo kiŋi karena lao langilipi lao embako isaro karaminyi.
1KI 1:21 Embame laa nare ramo doko emba kumaparene dokopa nambana ikinyingi Solomonepa nambapa emba mata kando lao kararambi lao wambu dupwame suu pyarami, leya.
1KI 1:22 Enda doko mee pii lao kareyamopako akali Netane baa kiŋinya anda dokona epeya.
1KI 1:23 Epeyamo doko dopa pyuo poropeta doko epo karamo lao kiŋi doko lamaiyami. Dokopa Netane baa andakare papala kiŋinya lenge kambu dokona isa pangu siya.
1KI 1:24 Sepala baame lao, Emba kiŋi andake doko akali Atonainjame doko embena panda nyuo kiŋi ingyara, lapisi?
1KI 1:25 Yuu gii mendaki dokopako baa mena bulamakao kali malupi sipisipipi mena bulamakao yakane rondo lasipi pyao yango maiyala paamo. Papala baame embena ikinyingi dupwa peparae epena lapya. Lapala Joape embena ami yanda singi dupwana mupwa dokope Apiata purisi akali dokope pipala epena lapya. Lapyamopa epapu dakepa nakama baamoo pipya role pyao piso nenge nao pii ketae palyuo poraiyuo lao Atonainja emba kiŋi ingyuo palyuo karalu karape, letaminyi.
1KI 1:26 Dopa pipyamopape nambamoo purisi akali Satokomoo Benayamoo dee Solomonemoo nenge nala ipupwa laa napya.
1KI 1:27 Embame yulu doo pipyamo dupwa kando kapa lao suu pyapala embena akali mupwa dupwa kando lamaiyuo, Embena kiŋi yulu doko apimi nyera lao lamai naese?
1KI 1:28 Kiŋi Dapitimi enda Betesepa baa dee kapu kyuo epena leya. Dopa leyamosa enda baa epapala Dapitinya lenge kambu siyamo dokona kareya.
1KI 1:29 Epo kareyamo dokopa Dapitimi enda lamaiyuo dopa leya. Nambame Kamongo lete karalu karenge dokome namba randa malu nao kareyonopa kiiramo nyiyamo dokona kingi lao lalu lao lao,
1KI 1:30 Epapu nambame emba kando Isaraele wambunya Kamongo Anatunya kingi dokona lao embena ikinyingi Solomone baa nambana panda nyuo kiŋi ingyuo karara lao lalu lao leyo kande doko alowa pii naro, leya.
1KI 1:31 Leyamo dokopa Betesepame pangu sepala lao, Nambana kamongo baa karalu karena leya.
1KI 1:32 Leyamo dokopa kiŋi Dapitimi akali Satoko Netane dee Benayamoo epena leya. Nakama epeyaminyi dokopa baame akali dusipa lamaiyuo dopa leya.
1KI 1:33 Nakamame nambana yulu pyakange akali mupwa dusipa nyuo lanyuo nambana ikinyingi Solomone baa nambana mena ose matana piso papingi dokona petena lapala lanyuo ipwa guu lao epenge yuu Giyone dokona pupwape.
1KI 1:34 Yuu dokona Satoko Netanepame baa Isaraele wambunya kiŋi karena lao kyawana mamba kisakamirambi. Dopa pirambinyi dokopa bikuli poo lao pii poraiyuo lao lao, Kiŋi Solomone doko palu karalu karara lena, leya.
1KI 1:35 Lapala baa anda kapu kyuo nambana kiŋi ingyuo petenge seya dokona pisa epeya kande dokopa baa eparamuli pyuo ipupwape. Nambame Solomone baa mupwa ingyuo nambana panda nyepala Isaraele wambupi dee Juu wambupi iso karara lao rombo palyiyu dokona baa nambana panda alowa pyuo nyera, leya.
1KI 1:36 Benayame isingi lao, Embame letenyili pyuo pirama. Dokona Kamongo Anatumi emba letene doko kapa lena, leya.
1KI 1:37 Emba kiŋi andake doko, yulu pyuo karene dokopa Kamongo baa emba nyiso role kareya dopako pyuo Solomone nyiso kararamopa emba kiŋi yulu piinyi andanyi pyambuyamopape banya yulu pyuo wambu isaramo doko kamame ulipili ingyuo ando para, leya.
1KI 1:38 Lapala Satoko Netane Benayamoo dee akali kiŋi rapu pyuo karenge dusipame Solomone baa kiŋi Dapitinya mena osena mata dokona petena lapala rapu pyuo lanyuo ipwa guu lao epenge yuu Giyone dokona peyami.
1KI 1:39 Papala Satokome olipi ipwange petenge penge Kamongona komau anda dokona nyuo minyuo peyamo doko nyepala Solomone kiŋi ingyuo karena lao mamba kisakamiya. Kisakamipala dokopa nakamame bikuli pii poo lao wambu peparae pii poraiyuo lapala Solomone baa kiŋi ingyuo karalu karena leyami.
1KI 1:40 Lapala nakama peparae Solomone epeyamuli pyuo kapu kyuo epo rae maiyuo pii ketae palyuo lao kurulu dupwa lao pii poraiyuo lao epeyaminyisa yuu dupwa pyuku pyuku leya.
1KI 1:41 Atonainjamoo dee banya upunili wambu dupwa peparaepe nenge nao oteyami dokopa pii poponge doko siyami. Dokopa Joapeme bikuli pii leyami doko sepala dopa leya. Aki rengendena yuu taone dokona pii palase? leya.
1KI 1:42 Pii lao otapa nayamopa Jonatane purisi Apiatana ikinyingi doko epeya. Epeyamo dokopa Atonainjame baa lamaiyuo lao, Akali keyange doko, pii keyange mende minyuo epenge epeleneŋe andakare ipu, leya.
1KI 1:43 Dokopa Jonataneme isingi lamaiyuo, Kondo. Nambame pii angi mende minyuo epa nalyoŋo. Doko kiŋi Dapitimi banya kiŋi yulu Solomone nyinya lao rombo palyapya, leya.
1KI 1:44 Kiŋi Dapitimi akali Satoko Netane dee Benayamoo dee banya akali baa rapu pyuo karenge dupwape pipala Solomone rapu pyuo iso nyela pena lapya. Lapyasa akali dusipame baa kiŋinya mena osena mata dokona petena lapala lanyuo pumi, leya.
1KI 1:45 Papala Satoko Netanepame kiŋi karena lao ipwa guu lao epenge yuu Giyone dokona kiŋi wasambipya. Dopa pipala dokopa baa lanyuo yuu taone dokona rae maiyuo pii poraiyuo lao pumisa dokome yuu doko wambu dupwa kilyipu kilyipu karaminyi doko emba selenelyamo.
1KI 1:46 Solomone baa epapu kiŋi ingilyamo, leya.
1KI 1:47 Dee mende palamo. Dapitinya yulu pyakamingi akali mupwa dupwame kiŋi Dapiti baa ketae pyambwala papala dopa leyami. Embena Kamongo Anatumi Solomone embapa manda manja naramopa baa mupwa wakasa ingyuo karena lena. Baame iso kararamo dokopa elyape wakasa ingyuo pena, leyami. Dokopa kiŋi Dapitimi banya luu palenge panda dokona pangu soo Anatu ketae pyambuo lakando ateŋa leya.
1KI 1:48 Lapala nakama lamaiyuo, Kamongo Isaraele wambunya Anatumi nambana ikinyingi dokona mende kiŋi karena lapala nambame kando karape letamo dokona baa lakandamana, leya.
1KI 1:49 Dokopa Atonainjana upunili wambu dupwa pakapala nakama sipuro yoko lapala kata wakale wakale dupwana peyami.
1KI 1:50 Atonainja baa kiŋi Solomone kando pakapala Kamongona komau anda dokona konando papala Anatu mena pyao kiso maingi kana pyare laro karenge dokona papala pinjingi dusipa minyaro kareya.
1KI 1:51 Karapala baame dopa leya. Kiŋi Solomone namba pyao kumasa naro lao wambo lalu lao lena lao karamo leyami doko kiŋi Solomoneme soo kareya.
1KI 1:52 Sepala Solomoneme isingi lao, Baa kapa warombo soo rape rape lao karara ramo doko banya kyawasi dokona kuki mendepe minyanda narami. Dopa pii nara ramo doko baa kumara, leya.
1KI 1:53 Lapala dokopa kiŋi Solomoneme akali Atonainja lanyuo lano epena leya. Dopa leyasa Atonainja baa kiŋi kareyamo dokona epapala wapambu pii pyao pangu siya. Dopa piyasa kiŋi Solomoneme baa anda pena leya.
1KI 2:1 Dapiti baa oo repeta kumara ingiyamo dokopa banya ikinyingi Solomone epena lapala mana pii lumwa pyuo dopa lamaiya.
1KI 2:2 Nambana kumarono yuu gii doko repeta epelyamo. Dokona emba kando porayapala akali ingyuo karape.
1KI 2:3 Karo dokopa embena Kamongo Anatumi aki mende pii lao laramuli pyuo pyuo karape. Banya mawa pii dupwa Mosesena lowa pii dokona pyasi palamo dupwa warombo soo minyuo pyuo karape. Dopa pirinyi dokopa emba anja panda anja dupwana yulu pirinyi dupwana kapa palyuo para.
1KI 2:4 Nakamame banya pii warombo serami ramo doko Kamongome namba langyuo lalu lao lao langiya doko yaki nyuo kame soo kaeya nara. Dopa lao lalu lao langyuo, Nambana para pyasi dupwame nakamana suu pingi monape peparaeme banya mawa pii dupwa kandokondali pyuo warombo soo kararami ramo doko Isaraele dupwa rapu pyuo iso kararami, leya.
1KI 2:5 Pii mende palamoko. Akali Joapeme Isaraele wambunya yanda singi mupwa lama Apena Nuana ikinyingi dokopa Amasa Jetana ikinyingi dokopa namba keta pyao peyo piya kande doko suu pyape. Akali dokome namwa manda rao kareyamano dokopa yanda dokona akali lapo pyao kumakayami kande doko yano nyuo piya. Akali dolapome koo mende pii nayambinyipa mee piyamosa banya yulu doko namba keta ipyamosa randa nyilyu.
1KI 2:6 Dokona emba mende piri doko silini. Doko embame baa mee wambu kumungi dopa pyuo kumunya lao yaki nyii napipi.
1KI 2:7 Namba embena yangone Epesalomeme pyalana piyamo pakao ralo peyono dokopa nakamame namba anjiki pyuo nyisiyamiŋi. Dokona yuu Giliate range akali Basilainya ikinyingi dupwa embame kando anjiki pyuo nyiso karape.
1KI 2:8 Dokona akali mende opetae Simai lenge akali Gerana ikinyingi akali Benjamenena yuu dokona yuu taone Barumi lenge singi dokona range dokome namba yuu Makanaime dokona pena peyono yuu gii dokopa baame namba koo keta paliri, leya. Dopa piyamopape ipwa Jotane mare dokona baame namba kando nyiyamo dokopa nambame baa kando Kamongo dokona kingi lao lalu lao lao nambame baa nyuo pyao kumaka naro, leyo.
1KI 2:9 Dopa leyonopape embame baa randa mai napala mee karena kaeya napipi. Emba apa piru lao doko silini dokona angi kandapala baa pyao kumakape, leya.
1KI 2:10 Dapiti baa kumuyamo dokopa banya yuu taone dokona malu piyami.
1KI 2:11 Baa ee kana akalisa kisima Isaraele wambunya kiŋi ingyuo kareya. Karapala ee kana yanda ipingi nyepo yuu Eperone dokona kiŋi yulu pyuo kareya dee yuu Jerusaleme dokona ee kana akalisa rema dee ipisu remako nembo kiŋi yulu pyuo karo piya.
1KI 2:12 Dokopa enakana Solomoneme banya rakange Dapitinya panda nyuo baa kiŋi kareya. Karapala banya kiŋi yulu piyamo doko kandokondali pyuo minyaro karo piyamosa yulu doko ando peya.
1KI 3:1 Yuu Isipi kiŋi dokona wanenge doko nyepala Solomoneme kiŋi dokopa kando puu minyuo kararamba lao lalu lao leya. Baame enda doko nyepala minyuo pao Dapitinya yuu taone dokona reto palyuo karo banya andape tembole andape dee yuu Jerusaleme kana kame awali lao dupwape pyuo oteya.
1KI 3:2 Tembole anda doko Kamongona lao pyakamipa nayaminyi dokona wambu dupwame kana pyare lasi wakale wakale dupwana mena pyao kiso maiyuo kareyami.
1KI 3:3 Dokopa Solomoneme Kamongo mona retapala banya rakange Dapitimi mana leyamo dupwana moko minyuo piya. Dopa piyamopape baame mena dupwa opetae pyao kumakarapu kana pyare lasi wakale wakale dupwana kiso maipapu piya.
1KI 3:4 Yuu mendepa baa yuu Gipione lenge dokona mena pyao kiso maiyala peya. Peyamo renge doko kana pyare lasi dokona singi doko ama wambumi soo otenge dokome peya. Baame wamba dokona kiso mukinyi nembo maingi doko andete lapo malu dopale kiso maingi.
1KI 3:5 Yuu gii kukwa dokopa baa paleyamo dokona kombeyame Kamongo pano epapala baa piso soo lao, Nambame emba aki mende jii lao suu pilisi? leya.
1KI 3:6 Dokopa Solomoneme isingi lao, Embame embena kendemande akali nambana rakange Dapiti doko kando embame yuu peparae mona retenge renge andake doko lasaka pii. Dopa piinyipa baame embena lenge kambu dorena kinyi rolae pyuo kareya. Dopa pyuo kareyasa embame baa mona retalu retenge renge andake doko lasaka pyuo puu pelyoŋo lao dokopa banya wane epapu banya panda nyuo iso karamo doko mai.
1KI 3:7 O Kamongo Anatu, namba wane kuki dee wambu dupwa kapa isaro ingya napyamopape embame namba kiŋi ingyuo rakanena panda nyii, lene.
1KI 3:8 Dokona wambu embena rangena ingyarami lao rombo palyiinyi dupwa pipya namba dae role pyao karamano. Wambu ama kamame malu soo kaeyo mendemepe yaka lao sukusa kapa paa narami.
1KI 3:9 Dokona lao keyange koopena wakale wakale doko anjuku lao soo nyuo dee kata rolae dokona soo rolo piru ingilyamo dokona embena mona palenge singinya renge doko namba jepe. Jii nare ramo doko embena wambu malu dapwa nambame apa pyuo reto karo rapu pyakarose? leya.
1KI 3:10 Solomoneme dokona lao piso siyamo dokopa Kamongo doko rae maiya.
1KI 3:11 Rae maipala Kamongome baa lamaiyuo lao, Emba rangena yuu gii londe palyuo kararene dokonape kamongo ingyuo bange malu retarene dokonape panda embena nyisu petenge dupwa pyao anamasi minyuo kararene dokonape piso sepengeli doko kaepala embame wambu dupwa rolae rapu pyuo kararoŋo lao singinya renge jii lao piso silini.
1KI 3:12 Dokona embame piso silini dupwa nambame piru. Pipala nambame emba singinya renge konda pyuo joo dee soo nyinginya renge joo piru doko wambu mendemepe wamba nyii nalu nange dee mendemepe rengya nyii nalu naramiko doko jero.
1KI 3:13 Embame piso see napinyi lapo opetaeko nambame emba jero. Emba palu kararene yuu gii dusipana peparae kiŋi menge dupwa nyuo isa palyuo bange malu seramopa emba ketae pyambuo kararami.
1KI 3:14 Embena rakane Dapiti piyamo doko suu pyao embame namba rape rape lao nambana mawa piipi lowa piipi dupwa warombo soo minyuo pyuo karare ramo doko yuu malu palyuo karare lao yuu gii londe jero, leya.
1KI 3:15 Enakana Solomone sipurapala kandeyamo dokopa Kamongo dokome kombeyame pii lamaiya ingiyamosa baa soo gisiya. Dopa pipala baa yuu Jerusaleme papala Kamongona Kana Minyuo Lalu Lao Lenge Pii Palenge Bokote siyamo dokona lenge kambusa roya karapala bange kiso mukinyi nembo dupwape dee nyuo malu palyuo yalya kando piso bange maingi dupwape Kamongo maiyuo piya. Enakana dokopa banya akali mupwa peparae malu palyuo nenge kiso maiya.
1KI 3:16 Yuu gii mende pamuku enda lama kiŋi Solomone peteya dokona epo kareyambi.
1KI 3:17 Dokona mendeme lao, Emba kiŋi andake doko, enda dakepa nambapa anda mendakinya palenge. Enda baa peteyamopa namba anda dokona wane nyaŋa mandeyo.
1KI 3:18 Nambana wane doko mandeyono yuu gii lama epo peyamopa baa waneko nyaŋa mandeya. Nambwa lama dolapo iki anda dokona peteyamba dokopa mendalipi epa nayami.
1KI 3:19 Yuu mendepa kukwa baame parali paki kapu kyama pao banya nyaŋa dokona ketae kalyiyamosa porambaiye nyii napala kumuya.
1KI 3:20 Dokopa enda baa kukwa sipurapala namba luu paleyonopa wane nambana ikinyingi namba repeta paleyamo doko nyuo minyuo pao banya luu palenge panda dokona peya. Papala enda baame wane kumasi doko nambana panda reteyapya.
1KI 3:21 Yuu gii yangama dokopa namba lenge rapala wane anju mairu lao piyu dokopa wane kumasi dake siyamo kandeyo. Kandapala namba repeta suu lao kandeyo dokopa doko nambana wane dokona lenge kambu nyii naya, leyo, leya.
1KI 3:22 Leyamo dokopa enda mende dokome lao, Daa wane lete doko nambana. Kumasi doko embena, leya. Dokopa enda wambo dokome lao, Daa wane lete doko nambana. Kumasi doko embena, leya. Dokona lao nakamba kiŋinya lenge kambu dokona apyanda piyambi.
1KI 3:23 Dokopa kiŋi Solomoneme lao, Nakamba mendeme lao wane nyaŋa lete doko nambama dee kumasi doko mendenaŋa lao letambinyi, leya.
1KI 3:24 Lapala baame wua gela mende nyela pena leya. Leyamo dokopa nyuo minyuo epeyaminyi dokopa
1KI 3:25 baame lao, Wane lete doko kanya dokona lama pyuo kunjapala paki enda mende maiyuo paki enda mende maiyuo pinya, leya.
1KI 3:26 Endangi angi dokome banya mona retenge renge doko banya wane keta peparae peyasa baame kiŋi doko lamaiyuo lao, Emba kiŋi andake doko, wane doko pyaa napala enda doko mai, leya. Dopa leyamopape enda mende dokome lao, Nambwa dalapona mendepe jii napipi. Suu pilini dokona palyuo lama ingyuo kunjape, leya.
1KI 3:27 Dokopa Solomoneme lao, Wane doko pyao kumaka kae. Enda wambo doko wane dokona endangi angi doko lamoŋo. Wane doko enda doko range mainya, leya.
1KI 3:28 Isaraele wambu dupwame Solomonena yulu nyuo rolo piyamo doko sepala dopa pyuo kapa ingya nao apyanda pisi seramo dupwa Kamongome rolena lao singinya renge maiyalyamo lao soo nyiyami. Dopa pipala nakama peparae baa ketae pyambuo kareyami.
1KI 5:1 Kiŋi Airimi lenge yuu Taya range doko Dapitipa yuu peparae puu minyuo karenge. Doko Solomone baa kiŋi ingyuo rakange Dapitinya panda nyiya leyami doko sepala baame pii minyakamingi akali lapo Solomone peteya dokona pena leya.
1KI 5:2 Dokona Solomoneme wai pii doko kapu kyuo Airimi lamaiya.
1KI 5:3 Nambana rakane Dapitimi yuu muu baa nyisu petenge dupwa pipya yanda yaki nyii nao mee pyulu pyuo piyami. Dokona banya Kamongo dokome banya nyisu petenge dupwa pipya pyao wini pii lao wini pingi renge ene maipa nayamo dokopa banya Kamongo Anatu lakandenge tembole anda doko pyakamiru lapala kapa pii naya doko emba silini.
1KI 5:4 Dopa piyamopape nambana Kamongo Anatu dokome nambana yuu lili dupwana manda rao mona kyuu lao singi renge jipya. Dokona nambana nyisu petenge mende kara nalyaminyi. Dee namwa pyao minyarapala nyeraminyi kata mende see nalyamoko.
1KI 5:5 Kamongo dokome nambana rakane Dapiti kando lalu lao lao, Embena ikinyi nambame embena mata kiŋi wasaro dokome nambana tembole anda doko pyakara, leya. Dokona epapu nambame tembole anda doko nambana Kamongo Anatunya lakandenge anda doko pyakamiru lao suu pilyu, leya.
1KI 5:6 Emba soo otelene. Embena akali dupwa isa pokonge yulu doko soo otenge. Dopa pyuo nambana akali dupwa isa pokalena saka nange. Dokona lao embena akali lapo yuu Lepanone dokona isa sita lapo nambana pokakanale pena lape. Larenepa nambana akali dupwa nakama pipya role yulu pirami. Piraminyipa embame bange aki mende larenyili pyuo embena akali dupwa ropo pyakaro.
1KI 5:7 Airimi baa Solomonena wai pii doko nyepala ama rae wakasa maipala baame lao, Dapiti banya panda nyepala wambu rara andake dokona kiŋi karara lao Dapitinya ikinyingi keyange singi renge doko maiyamo dokona lao epapu Kamongona kingi lakandamana, leya.
1KI 5:8 Lapala Airimimi wai pii lapo dee kapu kyuo Solomone lamaiyuo lao, Namba embena wai pii doko nyipu. Nyepala embame piso sipinyili pyuo piru lao rapa rapa pilyu. Nambame isa sitape dee siya isape dupwa rapa rapa pyakaro.
1KI 5:9 Nambana akali dupwame yuu Lepanone piso isa pote dupwa minyuo epo ipwa kota dokona peyarami. Dokopa yuu emba rombo palyiinyi dokona soo pao retena lao isa para para dopale ingyuo nyuo pyaso puu pyarami. Soo pao retarami dokopa nambana akali dupwame puu polarami dokopa embena akali dupwame nyepala iso kararami. Dokopa embena yulu doko nambana akali dupwa nenge maso mairinyipa nao karena lao namba suu pilyu, leya.
1KI 5:10 Lapala Airimimi isa sitape dee siya isa potepe Solomoneme nyelana suu piyamo dupwa maiya.
1KI 5:11 Dokona Solomoneme nenge witi sikyali taosande lama ama malu dee isa olipi ipwange ama maluko soo kaeyo ee kana yaka lao banya akali dupwa maiyuo nenge pyakamiya.
1KI 5:12 Kamongo dokome banya lalu lao leyamo doko kame see napapu karapala Solomone singinya renge doko maipapu piya. Akali Airimi Solomonepa keta mona kyuu lao singinya renge doko paleyamosa nakamba mona mendaki palyuo yulu dupwa dopa piramba dopa piramba lao lao palyiyambi.
1KI 5:13 Kiŋi Solomoneme akali taosande akalisa rema Isaraele peparaena rombo palyuo nyepala yulu pinya leya.
1KI 5:14 Lapala akali Andonirame lenge doko baa mupwa ingyuo dokona rapu pinya leya. Baame akali dupwa lili rema pyuo lane mendaki akali taosande akalisa ingyapala lane mendaki mendaki lao larapu yuu Lepanone dokona kana mendaki yulu pyuo karo dee kana lama larapu anda karo pinya leya.
1KI 5:15 Dokopa Solomoneme akali taosande akalisa mange lama (80,000) karo nyepala yuu kyau dupwana kana dupwa pyao nyinya leya. Dee akali taosande akalisa yanda ipingi nyepome (70,000) kana dupwa soo pena leya.
1KI 5:16 Dee akali mupwa taosande rema dee andete remameko yulu dupwana mupwa ingyuo isinya leya.
1KI 5:17 Kiŋi Solomoneme leyamuli pyuo nakamame kana andake keyange tembole anda dokona susa sera dupwa nyiyami.
1KI 5:18 Solomonena yulu pingi akali dupwape Airiminya yulu pingi akali dupwape dee yuu taone Bipilose range akali dupwapeme tembole anda pirami dupwana isa kanape dupwa rapa rapa piyami.
1KI 6:1 Isaraele wambu dupwa yuu Isipi yaki nyuo epo kareyaminyipa ee kana malu (480) epo papeyamopa kiŋi Solomone dokome Isaraele iso kareya. Iso kareyamopa ee kana kisima papeyamopa kana lapo kingi Sipi lenge dokona Solomoneme tembole anda pinya kando soo piya.
1KI 6:2 Doko andakare dorena puu rombo minyuo makande pyuo isa makando akalisa lama ipisu yanda ipingi (27 mita) dopale ingiya. Dee wangu dolapona isa makando mange mendaki (9 mita) ingiya. Dee ketae dorena makande piyaminyi isa makando akalisa mendaki ipisu rema dee mende pakirena opetae (13.5 mita) dopale ingyuo piya.
1KI 6:3 Dokopa panda konandowame doko makande pyuo isa makando kisima dee pakirena (4.5 mita) dopale ingiya. Dee wangu dolapona tembole anda angi dopale ingyuo isa makando mange mendaki karo (9 mita) dopale ingiya.
1KI 6:4 Anda dokona apya windowa kamarename kuki ingyapala andakarerena andake ingyuo sinya lao wasiyami.
1KI 6:5 Panda poo pyasi wangu dolaponape dee matarenape panda lama konda pyuo reteyami. Anda dokona anda liti rema ingyuo kamba kamba kareya. Dokona panda kuki lapo opetae kunjo reteyami.
1KI 6:6 Urumu mendaki lao wambo isa anda dokona apya doko kameya pyuo pyapala mende kanya dokona apya doko maena ingyuo pyao karo pipala kamame ketae doko kamame maena kuki ingyuo sukusa paowale kareyami. Anda liti dokona ketae pulyuo pyuo dokopa apya parali dolapo kukinya pyambuo kareyamisa andakare andake ingiya. Isa anda doko isa makando lama dee kuki mende konda pyuo dopale ingiya (2.2 mita). Kanya anda doko isa makando lama dee pakirena dee kuki konda pyuo dopale ingiya (2.7 mita). Ketae anda doko isa makando rema dee kuki konda pyuo dopale ingiya (3.1 mita).
1KI 6:7 Tembole anda doko pimiŋi lao ama doope wua jaa laope dee mee bange kela kalope dupwame panasara lapala kana tembole anda dokona palyuo piraminyi dupwa kana apuro nyiyaminyi mare dokona piso rapa rapa pipala peyami.
1KI 6:8 Anda liti lamape remape panya dokopa lora makayami doko yuu dulurena kanda kanda makayami.
1KI 6:9 Dopa pyuo kiŋi Solomoneme tembole anda pyuo oteya. Baame isa siya polaŋe pisi dokome ketae lulyano ingyuo lambuo laeyo pyuo waso dee dokomeko anda yangi ingyuo kaowa piya.
1KI 6:10 Anda liti rema dokona pinjingi dusipa isa makando dee kuki konda pyuo dopale kapa kapa pyuo ketae pyambuo piyami. Panda poo pyasi kamarena dokona siya isa dokome pyuo nyokonyapala dokopa wakale panda netarena konda pyuo reteyami.
1KI 6:11 Kamongo dokome Solomone lamaiyuo dopa leya,
1KI 6:12 Emba nambana lowa peparaepe dee mawa pii peparaepe warombo soo minyare ramo doko embena rakane Dapiti keta lalu lao leyono doko emba keta pyakaro.
1KI 6:13 Embame tembole anda pilini dakena namba nambana Isaraele wambu dapwa pipya sukusa dokona role pyao karo nambame nakama kame soo yaki nyii naro, leya.
1KI 6:14 Dokona lao Solomoneme tembole anda doko pyuo oteya.
1KI 6:15 Anda apya andakare dorena isa panda dokona piso pulyuo isa kingi sita lenge dokome kalya pyuo ketae peyami. Dee isa panda doko siya isa dokome wasiyami.
1KI 6:16 Dee andakare sukusa dokona urumu mende kingi Kamame Poo Pyasi lenge doko tembole anda matarena ingyuo piyami. Doko makande pyuo isa makando mange mendaki karo (9 mita) londe dopale ingiya doko isa sita make dokona lili pipala isa panda dokona piso pao ketae yangi dokona suu lao piyami.
1KI 6:17 Dee urumu Kamame Poo Pyasi lenge dokona panda mende kambusa siyamo doko makande pyuo isa makando akalisa ipisu mange lama karo (18 mita) londe ingyuo waso reteya.
1KI 6:18 Dee isa sitame wasisi polaŋe dupwa isa jingipi kipwa pengepe isame wasisi bange dupwame kalya piyami. Pipala andakare peparae dupwa isa sitame wasisi polaŋe dupwame kaname kame pyuo apya wasiyami dupwa kanda nana lao yambe pyao oteyami.
1KI 6:19 Kamongona Kana Minyuo Lalu Lao Lenge Pii Palenge Bokote doko retarami ingiya dokome tembole anda matarename dokona panda sukusa doko wasiyami.
1KI 6:20 Doo panda sukusa andakarelyamo doko makande pyuo isa makando mange mendaki karo (9 mita) londe dee isa makando mange mendaki karo (9 mita) ketae ingyuo dee isa makando mange mendaki karo (9 mita) oko soo dopale ingyuo piya. Dupwa peparae kana golo karo pisa nange dupwame nee piyami. Dee kana pyare lasi doko isa sita dupwana polaŋe dupwame yambe piyami.
1KI 6:21 Dopa pipala tembole anda andakare apya dupwa kana golo dupwame yambe piyami. Dee kana golo kii puu dupwame panda sukusa kambu konandowame dokona yukuyami. Dokona apya opetaeko kana golo dupwame yambe piyami.
1KI 6:22 Dee tembole anda andakare apya dupwa peparae kana golo dupwame yambe piyami. Dee urumu Kamame Poo Pyasi dokona kana pyare lasi singi dupwa opetaeko kana golo dupwame yambe piyami.
1KI 6:23 Aŋala lama olipi isame wasisi dolapo urumu Kamame Poo Pyasi dokona reteyami. Dolapo laparae makande pyuo isa makando kisimako dee pakirena (4.5 mita) londe dopale ingyuo reteyami.
1KI 6:24 Laparae wangu dolapona mendare ingiya dee pinjingi dolapo mendareko ingiya. Dolapo laparae mendena mendena pyuo papake lamako karenge. Dolapo makande pyuo isa makando londe lama dee kuki mende (2.2 mita) dopale ingiya. Dokona lao papake pinjingi mendena dokome pao mende dokona doko kando nyiya. Doko makande pyuo isa makando pao kisima dee pakirena (4.4 mita) dopale ingiya.
1KI 6:27 Nakambame dolapo laparae maki pyuo urumu Kamame Poo Pyasi dokona pisiyami. Nakambana papake dolapo laparaeme pyasinju laro karo mendena dokome mende kando nyuo mendena dokome mende kando nyuo pipala pao panda suku dokona kando nyinya lao pyuo dee paki lama dolapome pao apya doko kando nyinya lao pyuo piyami.
1KI 6:28 Aŋala lama wasisi dolapo kana golo dupwame yambe pyao nyiyamo siyambi.
1KI 6:29 Dokopa panda angi andake dokope panda ama sukusa andakare dokope peparae isame wasisi bange yala isape isa jingipi aŋalape dupwame kalya pyuo waso pisiyami.
1KI 6:30 Dopa pipala isa panda dupwa kamame kana golo dupwame yambe piyami.
1KI 6:31 Yambe pyapala olipi isame kambu dowa lama maki pyuo wasapala urumu Kamame Poo Pyasinya kambu konando penge dokona palyiyami. Kambu dowa pinjingi peyamo ketae dulurename anda kuki mende piyami.
1KI 6:32 Pipala kambu dowa dolapo isame wasisi bange yala isape isa jingipi aŋalape dupwame kalya pyuo wasiyami. Dokona kambu dowa dolapope aŋala dupwape yala isa dupwape peparae kana golo dupwame ketae minyarambu nyuo yambe piyami.
1KI 6:33 Dopa pipala panda angi andake kambu konando penge wangu dolaponape dee ketae lambuo palyingi dokonape olipi isame wasiyami.
1KI 6:34 Dee siya isame kambu lama wasiyami.
1KI 6:35 Dolapo isame wasisi bange yala isape isa jingipi dee aŋalape dupwame kalya pyuo waso pisiyami. Bange dupwame kana golome kapa kapa pyuo kalya pyuo yambe piyami.
1KI 6:36 Kana kunjasi pote rema wara piyami dokona kanda kanda anda poo pyasi dokona andakarena ingyuo isa sita mendaki lao retarapu dee kana rema lao retarapu dokome pyuo nenge lyolo piyami.
1KI 6:37 Ee kana kisima dokona Solomoneme kiŋi yulu pyuo kareyamo yuu gii dokopa kana lapo kingi Sipi lenge dokona tembole anda doko pinya kanda soo puu rombo minyuo isa susa reteya.
1KI 6:38 Dopa pipala ee kana akalisa ipisu mendaki karo dokona Solomonemeko isiyamopa kana mange lama karo doko kana Bulu lenge dokona rapa rapa pyuo reteyamo dopale angi dokonako palyapala tembole anda doko pyuo oteya. Tembole anda angi doko Solomoneme ee kana yanda ipingi nembo pyuo oteya.
1KI 8:1 Kamongona Kana Minyuo Lalu Lao Lenge Pii Palenge Bokote doko yuu Sayone kiŋi Dapitinya taone dokona silyamo doko nyuo soo tembole anda dokona monaleŋe lao Solomoneme Isaraelena rarape akalyandape dupwana akali mupwa ingyuo karenge dupwape peparae baa karo dokona epena lao kee leya.
1KI 8:2 Nakama peparae kana kingi Etanimi lenge dokona nakamame kauwa anda pipala palyuo nenge nenge gii doko pyaka siyamo dokopa malu palyiyami.
1KI 8:3 Dokopa lita akali dupwa peparae epo malu palyiyaminyi dokopa purisi dupwame Kana Minyuo Lalu Lao Lenge Pii Palenge Bokote doko minyalyapala soo pao
1KI 8:4 tembole anda dokona peyami. Dokopa purisi dupwamepe Lipae akali dupwamepe Kamongona komau anda dokope dee bange dokona singi dupwa peparaepe nyuo minyuo tembole anda dokona peyami.
1KI 8:5 Kiŋi Solomonemoo Isaraele wambu peparaepe epo Kamongona Kana Minyuo Lalu Lao Lenge Pii Palenge Bokote siyamo dokona lenge kambusa karo mena sipisipi dee mena bulamakaope dupwa ama malu soo kaeyo kapa yaka lao ota narami ingyuo pyao kiso maiyami.
1KI 8:6 Dokopa purisi dupwame Kana Minyuo Lalu Lao Lenge Pii Palenge Bokote doko tembole anda andakare urumu Kamame Poo Pyasi dokona aŋala lama wasisi kareyambinyi dolapo isarena lunga lunga reteyami.
1KI 8:7 Dokopa nakambana papake dolapome bokote dokope bokote singi isa kalya isa dolapope yambe piya.
1KI 8:8 Dopa piyamo dokopa wambu mendeme urumu Kamame Poo Pyasi dokona lenge kambu siyamo dokona karapala isa kalya isa dokona pinjingi dolapo rolae kandarami ingiya. Dee mendasa karo kapa kanda narami ingiya. (Yuu gii pii dake Buku dakena pii dake pyao reteyaminyi yuu gii dokopa isa kalya isa dolapo yuu dokona mee siya.)
1KI 8:9 Isaraele wambu dupwa yuu Isipi piso epeyaminyi dokopa Kamongome nakama pipya kana minyuo lalu lao leyamopa Moseseme yuu kyau Sainai dokona karo pii dupwa kana lamana pyasi doko Kana Minyuo Lalu Lao Lenge Pii Palenge Bokote dokona palyiyamo dolapoko iki paleya.
1KI 8:10 Purisi dupwa tembole anda doko yaki nyuo kama epeyaminyi dokopa aopa kopa dokome soo simbwapala
1KI 8:11 Kamongona yanga paupau lenge dokome nakamana lenge kambu dupwana lepo lepo piyasa nakamana yulu dupwana kamba kapu kyuo andakare pela parami ingya naya.
1KI 8:12 Dokopa Solomoneme ateŋa lao, Kamongo, Embame neta doko yake dokona rao karena leenepape emba kopape yuu iminjingipi dupwana mee kararo lee kande.
1KI 8:13 Dopa leenepape epapu nambame embena lao tembole anda kamame keyange wakasa doko pyakapu. Panda dokona emba epo karalu karare.
1KI 8:14 Wambu dupwa dokona kareyaminyi dokopa kiŋi Solomone kapu kyepala nakama kandaro karapala Anatu baame nakama elyape keta pisinya lao piso siya.
1KI 8:15 Baame lao, Isaraele wambunya Kamongo Anatu doko lakandamana. Nambana rakane Dapiti kando lalu lao leyamo doko alowa pii nalyamo, leya.
1KI 8:16 Kamongome lao, Nambana wambu dupwa yuu Isipi piso lanyuo epeyono dokopa Isaraele wambunya yuu dupwana nambame yuu taone mendena tembole anda pipala namba dokona lakandaramiŋi lao rombo palya nayo. Dopa pii nayonopape nambame Dapiti emba nambana wambu dupwa rapu pyakape lao rombo palyiyu, leya.
1KI 8:17 Lapala Solomoneme deeko lao, Nambana rakane Dapitimi Isaraele wambumi Kamongo Anatu lakandarami lao tembole anda mende pinya lao rapa rapa piya.
1KI 8:18 Piyamopape Kamongo dokome baa lamaiyuo lao, Emba nambana lao tembole anda pyakapulinya kumulini doko kapaŋa.
1KI 8:19 Dopa pipinyipape embame tembole anda doko pii nalu nao nare, langilyu. Doko embena wane emba rangena ikinyi angi dokome nambana tembole anda doko pyakara, leya.
1KI 8:20 Dokona epapu Kamongo dokome banya pii lalu lao leyamo doko retaro karamo. Namba Isaraele wambunya kiŋi ingyuo nambana rakanena panda nyuo nambame Isaraele wambu nakamana Kamongo Anatu lakando kararami lao tembole anda doko pyakamiyu.
1KI 8:21 Namwana rora ambasu dupwa baame yuu Isipi piso lanyuo epo Kamongome kana minyuo lalu lao pii leyamo kana dolapona palenge bokotena palyingi doko opetae tembole anda dokona retara lao nambame panda wasakamiyu, Solomoneme leya.
1KI 8:22 Dokopa wambunya lenge kambu dupwana Solomone papala kana pyare lasi dokona lenge kambusa kareya. Karapala banya kingi ketae pyambwapala ateŋa lao,
1KI 8:23 Isaraele wambunya Kamongo Anatu, mendasa yake panda ketaepe isa yuu dakenape Anatu emba yale mende kara nange. Embena wambu dupwame emba kando mona kare kare karo embame larene dupwa pyuo palyuo karo piraminyi dokopa embena kana minyuo lalu lao leene pii doko embena wambu dupwa keta reto karo nakama mona reto karenge.
1KI 8:24 Nambana rakane Dapiti kando lalu lao leene doko embame minyaro karene. Epapu pii peparae pyaka silyamo.
1KI 8:25 Dokona epapu Isaraele wambunya Kamongo Anatu, nambame ateŋa lao, embame lalu lao lenge pii lapo nambana rakane kando lao doko opetaeko yaki nyii nao minyuo karape. Banya para pyaramo dupwame nambana rakangeme emba warombo soo kareyamuli pyuo piraminyi dokopa nakamana mendeme Isaraele wambunya kiŋi ingyuo yuu peparae rapu pyuo karara lao lalu lao leepya.
1KI 8:26 Dokona lao Isaraele wambunya Anatu, epapu embena kendemande akali nambana rakane Dapiti kando pii leene dupwa peparae angingyuo pinya leya.
1KI 8:27 Dopa piramopape Anatu, emba kinyi angingyuo isa yuu dakena palyuo karo pilisi? Yake peparae emba kapa karare ingya nalyamo. Dokona apa pipala emba tembole anda piyunu dakena kapa kararese?
1KI 8:28 Kamongo nambana Anatu, namba embena kendemande akali. Nambana ateŋa pilyu doko sakape. Sakapala epapu nambame emba pii piso silyu dupwa pyakape.
1KI 8:29 Tembole anda dakena lakandaramiŋi lao embame rombo palyii dokona kukwa korakamape rapu pyuo karape. Nambame tembole anda dakena lenge kambu pyambwapala ateŋa laro dokopa sakape.
1KI 8:30 Yuu dakena nakamame lenge kambu pyambwapala ateŋa leyami kande dokopa embena wambu dupwana ateŋa dupwape nambana ateŋa dupwape sakape. Embena anda yake panda dokona karo sepala namwana koo dupwa nyuo kame sakape.
1KI 8:31 Wambu mendeme wambu mendale yango kando koo pipyaŋa lapala baa pii naroŋo lao lalu lao lara lao tembole anda dakena embena kana pyare lasi dokona lanyuo eparami.
1KI 8:32 Eparaminyi dokopa O Kamongo yake panda karo sepala embena kendemande dupwa iso rolo pinya karape. Mendeme kokwa soo koo piya kande doko baa randa maipi. Dee mendeme koo pali nalyamo lao suu pyao rolae pyuo kareya kande doko kiiramo nyepe.
1KI 8:33 Embena Isaraele wambu dupwame emba keta koo piraminyi dokona nakamana nyisu petenge dupwame nyuo isa palyarami. Dokopa dee nakama emba keta kapu kyuo epapala tembole anda dakena nakamana koo dupwa nyuo kame saka lao epo inyimungu piso seraminyipa
1KI 8:34 emba yake panda dokona karo nakamana pii sakamipi. Embena wambu dupwana koo dupwa nyuo kame sakamipala nakamana rora ambasupi yuu mainyi dokona minyuo pupi.
1KI 8:35 Embena wambu dupwame emba kando koo piraminyisa embame apu epa nana lao minyarene dokopa dee nakamana koo dupwa kaepala polo lapala tembole anda dakena lenge kambu maro lao epo inyimungu piso ateŋa laraminyipa
1KI 8:36 emba yake panda dokona karo nakamana ateŋa doko sakamipi. Isaraele wambu dupwana koo dupwape dee kiŋi dokona koo dupwape nyuo kame sakamipi. Dopa pipala yulu rolae dokona pinya lao mana lamaipi. Mana lamaipala, O Kamongo embena wambu dupwa palu karo pirami lao embena yuu angi ingyuo maiyalu maiyuo mainyi dakena apu epo karena lape.
1KI 8:37 Dopa pipala yuu dakena lopo andake seramo panda wambu peparae yanyi andake pyaramo panda poo raiya andake minyapala ee dupwa kumaramo panda aimbu malu ee naraminyi panda embena wambu dupwa nakamana nyisu petenge dupwame pyalana piraminyi panda yanyi angape nakama keta palira dokopape
1KI 8:38 nakamana ateŋa doko sakamipi. Embena Isaraele wambu dupwana mende mona randame kumuo tembole anda dakena lenge kambusa nakamana kingi pyambwapala ateŋa larami dokopa
1KI 8:39 nakamana ateŋa doko sakamipi. Embena anda yake panda dokona karo nakamana ateŋa sakamipi. Sepala nakamana koo dupwa nyuo kame sakamyuo nakama nyisape. Embame iki isa akalinya mona suu pingipi dupwa soo gisilini. Wambu yulu wakale wakale pilyaminyili pyuo yano pyakamipi.
1KI 8:40 Dokona lao embena wambu dupwame embame namwana rora ambasupi yuu mainyi dokona palu karo yuu peparae emba warombo sinya.
1KI 8:41 Wambu rara wakale yuu nanesa palenge mendeme embena kingi andake dokope embena yulu andake dokope embena wambu keta piinyi dupwape sepala emba lakandala epo tembole anda dakena ateŋa lala eparamo dokopa
1KI 8:43 banya ateŋa doko sakamipi. Yake panda emba palenge dokona karo banya ateŋa doko sakamipala emba pii lao piso seramo doko pepe. Dokona lao wambu yuu muu peparaena karenge dupwame embena Isaraele wambu dupwame emba soo nyuo warombo soo kararaminyili pyuo pirami. Dokopa nakamame tembole anda nambame piyunu dake emba lakandenge panda lao soo nyerami.
1KI 8:44 Embena wambu dupwa nakamana nyisu petenge wambu dupwa pipya pimwaiyuo yanda pela pena lao lamairinyi dokopa nakamame emba kando ateŋa larami. Yuu wakale wakale dupwana karo yuu taone embame rombo palyiinyi dakepe dee tembole anda nambame embena lao pyakayono dakepe kandaro karo ateŋa leyami kande dokopa
1KI 8:45 nakamana ateŋa dupwa sakamipi. Emba yake panda dokona karo nakamana ateŋa dupwa sakamipala nakamana nyisu petenge dupwa kapa anamasi minyarami lao poraiyuo nyisape.
1KI 8:46 Wambu mendeme koo pii narande daa. Dokona embena wambu dupwame emba kando koo piraminyipa emba imbwuapala nakamana nyisu petenge dupwame nakama pipya pyao wini pinya lapala nakama yuu wakale dupwana karapusi ingyuo lanyuo pena lao pepe. Dopa pirinyipa yuu doko nanesa wakasa ingyaramopape
1KI 8:47 embena wambu dupwana ateŋa laraminyi doko sakamipi. Yuu dokona nakamana koo dupwana lao kondapala polo lao kopetame kareyami dupwana lao ateŋa leyami kande dokopa, O Kamongo nakamana ateŋa doko sakamipi.
1KI 8:48 Tembole anda nambame embena lao pyakayono dokope embame namwana rora ambasupi yuu mainyi dakepe dee yuu taone embame rombo palyiinyi dakepe dupwana kandaro piso yuu dokona angi kinyi nakamana koo dupwana polo lao ateŋa larami ramo dokopa
1KI 8:49 nakamana ateŋa doko sakamipi. Embena anda yake panda dokona karo sepala nakama sakame kumuo nyiso karape.
1KI 8:50 Nakamana koo dupwa peparaepe dee emba kando mata jilyaminyi dupwape nyuo kame sakamipi. Dopa pipala nakamana nyisu petenge dupwame nakama keta anjiki pyuo pinya lao pyakamipi.
1KI 8:51 Nakama embena range kipungi wambu. Yuu Isipi dokona randa andake nao kareyaminyi dokopa nakama nyuo minyuo epee kande.
1KI 8:52 Kamongo Mupwa Andake Wakasa, embena Isaraele wambu dupwape nakamana kiŋi dokope kando anjiki koo pyuo dee nakama embame dopako pyuo nyisalase lao piso soo kee larami dokopa nakamana ateŋa doko sakamipi.
1KI 8:53 Embame wambu dupwa embena range ingyara lao wambu peparaena rombo palyii kande. Namwana rora ambasu dupwa Isipi yaki nyuo minyuo epeene dokopa embena kendemande akali Mosese keta nakama dopa lamai.
1KI 8:54 Solomoneme baa kana pyare lasi lenge kambu siyamo dokona wapambu pii pyaro piso kingi ketae pyambuo Kamongo kando ateŋa leya. Ateŋa lao otapala baa roya kareya.
1KI 8:55 Wambu nyuo malu palyuo peteyami dupwa keta Kamongona elyape keta pisingi renge doko peena lao baame pii poraiyuo lao piso siya. Baame lao,
1KI 8:56 Kamongo banya wambu dupwa manda rao mona kyuu lao singi renge mairuŋu lao lalu lao leyamuli pyuo mailyamo doko lakandamana. Banya kendemande akali Mosese keta yulu keyange pyakaro lao lalu lao leyamo dupwa peparaena mende isa nemba nao baa range suu pyaro karamo.
1KI 8:57 Namwana Kamongo Anatu doko namwa role karena. Namwana rora ambasu dupwa pipya role kareya doko suu pyao baame namwa yaki nyii nana dee baame namwa kame soo kaeya nanako.
1KI 8:58 Baame namwana rora ambasupi dupwa keta mawa piipi lowa piipi maiyami dupwa minyuo dee namwa yuu peparae baame laramuli pyuo pyuo kararama lao baame namwa warombo soo pyuo karalamisi lao pinya.
1KI 8:59 Namwana Kamongo Anatu ateŋa dake dee yulu lapo pyakapyali lao piso singi dupwape yuu gii peparae kame see nao suu pyao karena. Namwana yuu peparae bange nyeramili pyuo baame yuu peparae Isaraele wambu dupwape dee nakamana kiŋi dokope keta sakame kumuo nyiso pyuo nyuo karena.
1KI 8:60 Dokona lao wambu rara yuu muu dupwana peparaeme Kamongo baa iki doko Anatu. Dee dokona mendali daa lao soo nyinyale.
1KI 8:61 Nakama banya wambu dupwa yuu peparae Kamongo namwana Anatu doko kando baa yaki nyii nao suu pyaro karo banya mawa piipi lowa piipi dupwa peparae epapu warombo soo karaminyili pyuo karena.
1KI 8:62 Dokopa kiŋi Solomonemoo wambu peparae dokona kareyami dupwamepe Kamongo mena pyao kiso maiyami.
1KI 8:63 Baame yalya kando piso bange maingi dokona ingyuo mena bulamakao taosande akalisa lama ipisu lamako (22,000) dee mena sipisipi ama malu (120,000) pyao kiso maiyuo piya. Pipala kiŋi dokope wambu peparaepeme dopa pyuo tembole anda doko Anatu keta pyambuo misi leyami.
1KI 8:64 Pipala yuu gii mendaki dokopako baame tembole anda dokona lenge kambusa kamapi siyamo dokona sukusa doko poo pyasiŋi lao Anatu keta pyambuya. Dopa pipala dokona baame mena pyao peparae kisinyi nembo witi jingi maiyuo dee yalya kando nyuo malu palyuo piso bange maingi dokopa mena kapa dupwa maiyuo piya. Baame doo piyamo doko kone kaname kana pyare lasi doko ama kuki ingyapala bange maiyamo dupwa peparae kapa ingya nayasa piya.
1KI 8:65 Doo tembole anda dokona Solomonemoo Isaraele wambu peparaepe kauwa anda pipala nenge nyuo malu palyuo nenge dokona yuu gii yanda ipingi nembo misi lao peteyami. Dokopa wambu ama malu yuu Amate Kata Penge dokona suu lao epo dee yuu Isipi liti dokona minyuo epo piyami.
1KI 8:66 Dopa piyaminyipa yuu mange lama karo dokopa Solomoneme wambu dupwa anda pena leya. Kamongo dokome banya kendemande Dapiti baa elyape keta pisingi renge maiyuo dee banya Isaraele wambu dupwa keta maiyuo piya dokona nakama peparaeme baa lakandapala rae maiyuo anda peyami.
1KI 9:1 Kiŋi Solomoneme tembole andape dee banya andape dee bange peparae baa pinya suu piyamo dupwa peparae pyuo oteyamo
1KI 9:2 dokopa baa yuu Gipione dokona kareyamopa epeya doko suu pyao Kamongo doko baa keta epo maro leya.
1KI 9:3 Dopa pipala Kamongo dokome baa lamaiyuo lao, Nambame embena ateŋa doko sipu. Namba yuu peparae lakando karalu kararami panda ingyuo embame waso pipinyi tembole anda dake nambame poo pyasi inginyi pyambulyu. Dopa pyuo nambame au pyuo rapu pyuo kyawa minyuo karalu kararo.
1KI 9:4 Embena rakane Dapiti piyamo doko suu pyao nambana yulu dokona wangu lakapala angi kinyi yulu rolae dokona pyuo pulyuo pao dee nambana lowa pii dupwa warombo soo rape rape lao nambana mawa pii emba mana langiyu dupwa peparae minyuo pyuo piri ramo doko
1KI 9:5 nambame embena rakane Dapiti lamaiyuo, Embena para pyasi wambu dupwame Isaraele wambu dupwa iso rapu pyuo parami lao lalu lao leyono pii doko nambame minyaro kararo.
1KI 9:6 Dopa pirunupape embape embena para pyarene dupwamepe namba moko minyuo epa napala nambana lowape mawa piipi dupwame nambame emba jiyunu warombo soo minyuo pyuo kara napala mee bange kingimi wasisi anatu wakale dupwa lakando parami ramo dokopa
1KI 9:7 nambame nambana Isaraele wambu dupwa yuu nakama maiyunu dokona pali nana lao nyisa pena laro. Tembole anda nambame poo pyasi ingyuo waso rae maiyuo nambana lakandenge pandaŋa lao karenge dake nyuo kame soo yaki nyuo kaeyaro. Wambu yuu muu dupwana peparaeme Isaraele wambu dupwa kando giyalya giyana pyuo kilya kando larami.
1KI 9:8 Tembole anda dake lalyuo momo nao seramopa wambu dokona epo parami dupwame kando walu lao mona nembarami. Dopa pipala nakamame piso soo lao, Akipamo Kamongo dokome yuu dakepe dee tembole anda dakepe keta yulu doko pipyase? larami.
1KI 9:9 Dokopa wambu dupwame isingi lao, Nakamana Kamongo Anatu dokome nakamana rora ambasu dupwa yuu Isipi yaki nyuo minyuo epeyamo doko kame soo mata maiyaminyisa pipya, larami. Nakamana mona suu pingipi mee bange kingimi wasisi anatu dupwa keta suu pyao papala lakandelyaminyi. Dopa piyaminyi dokona randa doko Anatumi nakama keta mailyamo.
1KI 10:1 Yuu Sipa range kuini enda dokome Solomonena kingi petamo leyami doko siya. Sepala enda baame yuu Jerusaleme epo Solomone piso singi pii porai lapo piso soo makande pyuo kandalana leya.
1KI 10:2 Lao dokopa enda baame wambu lapo role pyao nyiso papingi dupwa lanyuo nenge rende pinya lao pyambungi bange lapope kalya bangepe dee kana golo ama malupi dupwa mena kamele matana retapala lanyuo epeya. Epo Solomone kando nyepala enda baame piso singi pii peparae suu piyamuli pyuo piso siya.
1KI 10:3 Dokopa Solomoneme pisiyamo dupwa peparae isingi yano piya. Mendepe dokona ama andake ingiyamopa randa nao polo lara ingya naya.
1KI 10:4 Yuu Sipa range kuini enda dokome Solomonena mona palenge singinya renge dokona lao baa siya. Dee kiŋinya anda baame piyamo doko kandeyako.
1KI 10:5 Enda baame Solomonena nenge nenge rate dokona nenge mokwa sisi siyamo dupwape banya akali mupwa dupwana palenge yuupi banya anda dokona yulu pingi akali dupwana yulu lao rolo retakamingi dupwape dee dupwana komau kala mendare palenge nakama wapungi dupwape dee nenge nao nyuo malu palyingi dokopa Solomone baa isaro karenge kendemande akali dupwape dee tembole anda dokona mena pyao kiso maingi dupwape kandeya. Kandapala baa nenge longanyi nembo yamaranguya.
1KI 10:6 Dopa pipala baame kiŋi Solomone kando lao, Nambana yuu range dokona piso embape embena mona palenge singinya renge dokopena lao sipu doko kinyi angi lamo, leya.
1KI 10:7 Sepala dokopa namba kinyi lao soo nyii nange doko namba rangeme epapala kandelyo, leya. Kandapunupape nambame wamba angingyuo peparae see nange doko namba langiyaminyi siyu. Dokona dupwa isa palyuo embena mona palenge singinya renge dokope kamongonge bange retenge dupwape ama andake ulipili lamo, leya.
1KI 10:8 Nakamana enda dupwa rae maiyuo pelyaminyi. Dee nakamana kendemande akali dupwa embena lenge kambu dokona mee karoko pao embena mona palenge singinya renge pii dokonako soo karaminyi dupwa rae maiyuo pelyaminyi.
1KI 10:9 Nakamana Kamongo Anatu doko lakandalapa. Baame embapa role pyao karo dokopa rae maiyuŋu lao lasaka pyuo emba Isaraele wambunya kiŋi wasiya. Banya mona retenge doko Isaraele wambunya lao sulu singi dokona baame emba lowa dupwanape dee rolaena renge dupwanape paka pyao soo karareŋe lao kiŋi rombo palyiya.
1KI 10:10 Enda baame bange minyuo epeyamo dupwa kiŋi Solomone maiya. Maiyamo dupwa kana golo taosande kisima (4,000) daako mee mendele ulipili maiya dee kalya bangepe dee nenge rende pinya lao reto maingi ama wakasa maiyuo piya. Dopa pipala nenge kyaa pyuo rende pinya lao pyambungi dupwa panju nyelamopape dolome ama malu maiya.
1KI 10:11 Akali Airiminya sipu dupwa yuu Opia piso kana golo lapo manjo epeyami. Dee yuu dokona isa kingi junipa lenge malu dee kalya bange lapo opetaeko manjo epeyami.
1KI 10:12 Solomoneme isa dupwame tembole anda dokonape dee banya anda dokonape alala ingyuo palyuo piya. Pipala isa dupwana lapome musiki pingi wambunya lao kurulu rambyalupi dopale pyuo wasiya. Dopa pyuo isa junipa ama keyange wakasa. Yuu gii dokona piso pao epapu dakepa yuu Isaraele dokona isa junipa dopale mende kandelyaminde daa.
1KI 10:13 Kiŋi Solomoneme yuu Sipa range kuini enda doko yuu dokona bange mainginyili pyuo maiyuo dee baame bange peparae jinya lao piso siyamuli pyuo maiyako. Dokopa enda baape banya wambu role pyao nyiso epeyami dupwape kapu kyuo nakama rangena yuu Sipa peyami.
1KI 10:14 Ee kana yaka lao kiŋi Solomone baa kana golo kilokerame taosande akalisa lama ipisu rema (23,000) larapu nyiya.
1KI 10:15 Dee bisinase akali dupwame takisi kana piyaminyi dupwape bisinase yulu pyuo poropiti kana epeya dokope yuu Arapia kiŋi akalipi yuu Isaraele dokona yuu liti dupwana gapomane akali dupwamepe Solomone baa mupwa ingyuo karapyamo nakama karamanoŋo lao kana piyami dupwana peparaepe Solomone nyiyako.
1KI 10:16 Kiŋi Solomoneme konambe kameya andete lama (200) pipala dupwana kana golo kilokerame yanda ipingi larapu konambe dupwana reto simbuya.
1KI 10:17 Dopa pipala baame konambe kuki lapo andete rema (300) kambako pipala dupwana kana golo kilokerame lama ingyuo konambe dupwana reto simbuya. Baame doo piyamo konambe dupwa peparae yuu Lepanone Imwa Anda Andake dokona reteya.
1KI 10:18 Baame kiŋinya petenge isa seya kameya mende opetaeko wasiya. Wasiyamo dokona pakirename mena elepanena nenge dupwame yambe piya. Dee pakirename peparae kana golo keyange dupwame yambe piya.
1KI 10:19 Petenge isa angi piyamo doko kimbu kalyuo palyuo penge dusipa pakinyamange ingyuo singi. Doo isa pulyuo soo penge dusipana pinjingi kipwa kipwa dokona mendaki mendaki lao lalyuo mena laene yale dupwa waso pisiya. Mena laene waso pisiyamo dupwa akalisa ipisu lama ingiya. Dee petenge isa matarena dorena mena bulamakao kali ayemba dopale waso pisiya dee kingi retenge dolapona ralipi mena laene lama waso pisiya. Dokona petenge isa dopale mendepe kiŋi lapona isingi yuu dupwana see nange.
1KI 10:21 Solomonena ipwa nenge pee kapo dupwa peparae kana golome wasisi. Dee bange peparae yuu Lepanone Imwa Anda Andake dokona yulu pingi bange dupwa kana golo keyange dupwame wasisi siya. Dokona kana kulingimi wasingi mendepe see naya. Renge doko Solomone kareyamo yuu gii dokopa kana kulingi doko mee bangeŋe lao suu piyami.
1KI 10:22 Solomonena sipu andake dupwape Airimi yuu Taya kiŋi dokona sipu dupwa pipya ipwa kota andake dokona peyami. Ee kana rema yaka lao banya sipu dupwa kapu kyuo epo dokopa kana golope kulingipi mena elepanena nengepe mena mangi rara lamape dupwa peparae manjo epapapu piyami.
1KI 10:23 Kiŋi Solomone baa kiŋi menge dupwa isa palyuo baa kamongo ingyuo mona angi palyuo soo kareya.
1KI 10:24 Dopa piyasa yuu peparaena wambu dupwame banya mona palenge singinya renge Anatumi maiyamo dokona selana epeyami.
1KI 10:25 Wambu peparae epeyaminyi dupwame kana golope kulingipi komau londepe yanda pingi bangepe nenge rende pinya pyambungipi dee mena osepe dongepe minyuo epapapu piyami. Doko ee kana yaka lao dopako pyuo kareyami.
1KI 10:26 Solomoneme mena oseme ipyuo papingi uliuli taosande mendaki andete kisima (1,400) waso dee mena ose yanda singi pisapa pingi dupwa taosande akalisa ipisu lama (12,000) waso reteya. Dupwana lapo yuu Jerusaleme dokona reto dee lapo yuu taone wakale wakale dupwana reto piya.
1KI 10:27 Solomone baame isiyamo yuu gii dokopa kana kulingi dupwa Jerusaleme dokona mee kana dopale ingyuo peya. Dee isa sita keyange dupwa malu ingyuo mee isa sikamoo lenge dopale ingyuo siya.
1KI 10:28 Kiŋi Solomone baame mena ose dupwa Silisia dokona nyiya. Banya lao bisinase pyakamingi akali dupwame mena ose dupwa kana leyamuli pyuo ropo pyao nyakamiyami.
1KI 10:29 Dee yuu Isipi dokona piso mena oseme ipyuo penge uliuli dupwa nyiyami. Nyepala nakamame Iti kiŋipi dee Siria kiŋipi dupwa mena osepe dee mena oseme ipyuo penge uliulipi dupwa ropo pyao maiyami. Maiyuo mena oseme ipyuo penge uliuli lapo dupwa maiyuo nakama mendaki mendaki laona kana kulingi andete pakinyamange (600) dokona lao ropo pyao nyiyami dee mena ose dupwana mendaki mendaki lao kana kulingi andete mendaki ipisu akalisa kingi paki (150) larapu nyepala maiyuo piyami.
1KI 11:26 Akali mende kiŋi Solomone mata maiyamo doko banya akali mupwa dupwana mende kingi Jeropome lenge baa akali Nepatena ikinyingi doko baa yuu Sereta lenge yuu Eporaime singi dokona range. Akali banya endangi doko enda waiya kingi Serua lenge.
1KI 11:27 Sinju pii dake wambumi sipuro gapomane pipya pulyuo yanda pyuo leyami pii doko. Dokopa Solomone baa yuu Jerusaleme neta pyakaenge dorena ingyuo yuu rapu siyasa yuu kyaso pyambuo ketae nyuo yuu taone dokona kana kame doko elya piya.
1KI 11:28 Dokopa akali parange Jeropome doko baa yulu dupwana mora piso baa yulu poraiyuo piyamo doko Solomoneme kandeya. Kandapala Solomoneme baa akali Manasa Eporaimepana rara dolapona yuu dokona wambu karapusi ingyuo yulu poraiyuo piyaminyi dupwa peparaena baa mupwa ingyuo iso karena, leya.
1KI 11:29 Yuu gii mendepa Jeropome baa Jerusaleme piso peyamo dokopa poropeta akali Ainja yuu Sailo range dokome yuu wambu pali nange mendena baa katasa kando nyiya.
1KI 11:30 Kando nyepala Ainja banya komau enengende wapuya doko roko nyepala minyuo pilyuo kuki kuki pyuo akalisa ipisu lama ingiya.
1KI 11:31 Dopa pipala Jeropome lamaiyuo lao, Kamongo Isaraele wambunya Anatu dokome emba langyuo, Solomonena kiŋi yulu doko nyisa nyepala nambame emba rara akalisa jeroŋo dokona komau kangusi kuki kuki dokona akalisako nyepe, lapya, leya.
1KI 11:32 Isaraele yuu peparaena piso nambana kendemande Dapiti dokona kingi lao dee yuu taone Jerusaleme namba rangena ingyara lao rombo palyiyu dokona kingi lao Solomone baa rara mendaki iki iso karara.
1KI 11:33 Nambame doo pirunu renge doko Solomone baame namba mata joo yuu wakale range anatu lakandeya. Baame mee bange enda anatu kingi Asetate lenge yuu Saitone range doko lakando dee mee bange anatu kingi Kemosa lenge yuu Moape range doko lakando dee mee bange anatu kingi Milokome lenge yuu Amone range doko lakando piya. Dopa pipala namba warombo see nao baa yulu kopetame pyuo dee banya rakange Dapitimi piyamo doko suu pyao nambana lowa pii mawa piipi dupwa minyuo pyuo kara nalyamo.
1KI 11:34 Dopa pipyamopape nambame kiŋi yulu peparae Solomonena kingi rekya lao nyeronde daa. Baa mee lete kararamo yuu gii dusipana nambame baa porainya renge maiyuoko kararo. Doo pirunu doko nambana kendemande Dapiti nambame rombo palyiyunupa nambana mawa piipi lowa piipi dupwa warombo soo pyuo kareya dokona kingi lao piru.
1KI 11:35 Pipala namba Solomonena ikinyingi dokona kiŋi yulu doko nyisa nyepala emba rara akalisa jero.
1KI 11:36 Jeronopape yuu taone Jerusaleme wambu dupwame namba lakandenge namba range rombo palyiyunu dokona nambana kendemande Dapitinya para pyasi dupwana mendeme iso karalu karara lao nambame Solomonena ikinyingi doko rara mendaki reto karena laro.
1KI 11:37 Lapala lao Jeropome nambame emba Isaraele wambunya kiŋi wasaronopa emba yuu muu rapu pinya suu pyarenyili pyuo rapu piri.
1KI 11:38 Embame nambana pii warombo sulu soo soo nambana mana pii minyuo pyuo palyuo karo nambana kendemande akali Dapitimi namba lengenyili pyuo pyuo karapala namba rae mainyi pyambungi doko suu pyao embame piri ramo yuu peparae namba embapa role pyao kararo.
1KI 11:39 Solomonena koo piyamo dokona Dapitinya para pyasi dupwa randa mairu. Mairunupape yuu gii peparaena mairunde daa.
1KI 11:40 Doko Solomoneme Jeropome pyalana piyamopape yuu Isipi kiŋi Sisake kareyamo dokona kyawa lete nyuo pao karala peya. Pao dokona kareyamopa Solomone baa kumuya.
1KI 11:41 Doko yulu lapo opetae Solomone piyamo dupwape banya yulu pyuo minyuo papiyamo dupwape dee banya mona palyuo singinya renge dupwapena peparae Solomonena Arome Pii Buku dokona pyasi palamo.
1KI 11:42 Baa yuu Jerusaleme dokona Isaraele wambu peparaena kiŋi ingyuo ee kana akalisa kisima (40) iso kareya.
1KI 11:43 Baa kumuyamopa Dapitinya yuu taone dokona malu piyami. Dokopa banya ikinyingi Oriapome doko panda nyuo kiŋi kareya.
1KI 12:1 Akali Oriapome baa yuu Sikeme dokona Isaraele wambu dulurena palenge dupwa nyuo malu palyapala baa kiŋi ingyuo karena lalana piyaminyi dokona peya.
1KI 12:2 Dokopa Nepatena ikinyingi Jeropome baa kiŋi Solomoneme pyalana piyamosa pako pao yuu Isipi kareyamo dokome doo pilyaminyi leyami doko siya. Sepala Jeropome baa Isipi yaki nyuo kapu kyuo peya.
1KI 12:3 Wambu dulurena palenge rara dupwame malu palyuo karapala baa epena leyami. Lapala dokopa nakama peparae Oriapome kareyamo dokona papala lamaiyuo lao,
1KI 12:4 Embena rakane Solomoneme namwa randa joo kenda dupwa namwa keta reteya. Embame kenda dupwa kukyuo yaepo namwa awa awa pyuo karalapa lao lao piri ramo doko namwa emba rape rape lao embena yulu pyakarama, leyami.
1KI 12:5 Dokopa baame isingi lao, Yuu gii rema paparamo dokopa kamba kapu kyuo ipupwape. Dokopa nambana pii isingi langiru, leya. Leyamosa nakama baa yaki nyuo peyami.
1KI 12:6 Dokopa Oriapome akali alemo wamba rakange Solomone kando dopa pyuo piri dapa pyuo piri lao nyiso lamaingi lapo kandala peya. Wambu dapwame namba pii piso simi dokona lao aki pii keyange mende nambame nakama isingi lamairi lao suu pilyamisi? leya.
1KI 12:7 Dokopa nakamame isingi lao, Embame wambu dupwa mondo lao rapu pinya suu pyare ramo doko nakamana piso simi dokona nyiso kondali pyuo isingi pii keyange nakama mona pyara mende lamairinyi dokopa nakamame emba iki rape rape lao yulu pyakarami, leyami.
1KI 12:8 Dopa piyamopape akali andapae dupwana pii soo nyii napala akali baa kyawa kapa ando kareyami dupwa banya dopa pyuo piri dapa pyuo piri lao nyiso karenge akali dupwa keta peya.
1KI 12:9 Dokopa baame nakama piso soo lao, Nakamame namba apa pyuo dopa pii dapa pii lao suu pilyamisi? Wambu dupwame nakamana kenda dupwa yaepo nembaka lao namba pisami dokona namba wambu dupwa kando apa larose? leya.
1KI 12:10 Leyamo dokopa nakamame isingi lamaiyuo lao, Dake embame lamaipingili. Nambana kingi kuki dakepa nambana rakanena ingi rombape dokopa manda daa lao lamaipi.
1KI 12:11 Lamaipala dee lao, Nambana rakane dokome nakama randa andake jiya. Dopa piyamopape nambame nakama kamame ulipili ingyuo randa jero. Baame nakama lisa marapu dokome piya kande. Nambame nakama mena osena wiki pepona dokome pyaro lena, leyami.
1KI 12:12 Yuu gii rema papeyamopa baame nakama lamaiyamuli pyuo Jeropomemoo Isaraele wambu dupwa pipya kiŋi Oriapome peteyamo dokona peyami.
1KI 12:13 Peyaminyi dokopa kiŋi dokome akali andapae dupwame dopa pinya dapa pinya leyami pii dupwa soo koo inginyi nembapala wambu dupwa kando pii poraiyuo pondoma pyuo leya.
1KI 12:14 Akali enye dupwame dopa pinya dapa pinya lena leyaminyili pyuo baame lao, Nambana rakane dokome nakama randa andake jiya. Dopa piyamopape kamame ulipili ingyuo randa jero. Baame nakama lisa marapu dokome piya kande. Nambame nakama mena osena wiki pepona dokome pyaro, leya.
1KI 12:15 Yuu Sailo range akali poropeta Ainja keta Jeropome Nepatena ikinyingi doko keta pii lamaiyamo doko Kamongome pyaka sipyali yaka leya. Renge dokona kiŋi dokome wambu dupwa kando anjiki pyuo kara naya.
1KI 12:16 Wambu dupwame kiŋi dokome nakamana pii soo nyii nara ingiya doko kandapala nakamame pii poraiyuo lao, Dapiti baape banya ree palu dupwape isa pena. Nakamame namwa angi mende nyisa nalyaminyi. Namwa Isaraele range dupwa anda mwua. Oriapome baa rangena wambu dupwa mee iso karena leyami. Dopa pyuo Isaraele wambu dulurena palenge dupwame Oriapome mata maiyuo yaki nyuo kaeyami.
1KI 12:17 Oriapome baame wambu yuu Juta palenge dupwa iki iso kareya.
1KI 12:18 Dokopa kiŋi Oriapome yulu pingi karapusi ingyuo kareyaminyi dupwana akali mupwa Andonirame lenge doko Isaraele wambu dupwa kareyaminyi dokona pena leya. Dokopa Isaraele akali dupwame baa kaname pyao kumakayami. Yuu gii dokopa Oriapome banya mena oseme uliuli ipyuo piso papingi dokona piso baa range kyawa lete nyuo yuu Jerusaleme dokona peya.
1KI 12:19 Yuu gii dokona piso Isaraele wambu dulurena palenge dupwame Dapitinya panda nyuo akali kiŋi karo peyaminyi dupwa pipya yanda pimwaiyami.
1KI 12:20 Isaraele wambu dupwame Jeropome Isipi kapu kyuo epeya leyaminyi doko sepala nakama wato lenge dokona epena lapala baa Isaraele wambu dupwana kiŋi ingyuo karena lao rombo palyiyami. Jutana rara dupwa yeelyo Dapitinya para pyasi wambu dupwa pipya mona maiyuo pyamalyapala kareyami.
1KI 12:21 Dokopa Jeropome baa Jerusaleme epo pyaka sepala baame Juta rara dokonape dee Benjamenena rara dokonape ami yanda singi akali keyange ama malu (180,000) ingyuo epena lao nyuo malu palyiya. Palyapala baa Isaraele wambu dulurena palenge dupwa baame kamba range au pyuo rapu pinya suu pyao yanda pela para ingiya.
1KI 12:22 Dopa piyamopape Anatumi poropeta akali Semaya pii wai dake akali Oriapomemoo dee Juta Benjamenepana rara wambu dupwa peparaepe lamainya lao lamaiya.
1KI 12:24 Nakamana yangone angi Isaraele wambu dupwa pyaa nalapape. Doo mende pipyamo doko nambame pipuŋu. Nakama peparae anda pupwape lena leya. Leyamo dokopa nakamame Kamongona pii doko warombo sepala kapu kyuo anda peyami.
1KI 12:25 Isaraele kiŋi Jeropomeme yuu taone kingi Sikeme lenge yuu kyau pyalya pyana pingi yuu Eporaime dokona singi doko nyepala baa poraiyuo kame pyuo minyuo yuu gii kuki lama palyuo kareya. Karapala yuu doko yaki nyuo dee yuu taone Penele lenge doko nyepala porai ingyuo sinya lao kame pyuo minyiya.
1KI 12:26 Dokopa kiŋi Jeropome baa rangena mona anda dopa lao suu piya. Nambana wambu dupwa Jerusaleme papala tembole anda doo karamo dokona mena pyao kiso mairami ramo dokopa yuu Juta range kiŋi Oriapome kando banya yulu pyakaminya lao lalu lao lapala namba pyao kumakarami lao suu piya.
1KI 12:28 Suu pyao otapala enakana baame kana golo dokome mee bange anatuŋu lao mena bulamakao kali lama pyuo wasapala banya wambu dupwa lamaiyuo lao, Nakama Jerusaleme Anatu lakandala kapa papelyaminyiŋi. Dokona Isaraele wambu dupwa nakama Isipi kareyaminyipa kiiramo minyuo epeyamo nakamana anatu dalapoŋo, leya.
1KI 12:29 Lapala baame mena kali golome wasisi dokona mende yuu Betele lenge dokona pisiya dee mende yuu Dane lenge dokona pisiya.
1KI 12:30 Dopa piyamopa wambu dupwa koo pipala dokopa yuu Betele Danepe dolapona mee bange dolapo anatuŋu lao lakandala peyami.
1KI 12:31 Dokopa Jeropomeme lakandenge panda lapo opetae yuu kyau ketae dupwana pyuo waso retapala dokopa dee ree palu Lipaena rara dokona daa akali lapo purisi ingyuo rombo palyuo nyiya.
1KI 12:32 Dokopa yuu Juta dokona nenge nyuo malu palyuo nenge nenge doko suu pyao kana mange lama karo dokona yuu gii akalisa ipisu kingi paki dokopa nenge nyuo malu palyuo nao misi larami lao Jeropomeme rombo palyuo reteya. Retapala kana pyare lasi yuu Betele siyamo dokona mena bulamakao kali kana golome waso reteyamo dolapo keta mena pyao kiso maiya. Baame purisi akali yulu pirami dupwa lakandenge panda yuu Betele dokona wasiyamo dupwana karena leya.
1KI 12:33 Pipala kana mange lama karo dokona yuu gii akalisa ipisu kingi paki dokopa baa rangeme yuu gii waso leyamo dokona baa yuu Betele papala kana pyare lasi dokona mena pyao kiso maiya. Isaraele wambunya lao malu palyuo nenge nenge yuu gii waso reteyamuli pyuo piya.
1KI 16:29 Yuu Juta range kiŋi Asa ee kana akalisa rema ipisu mange lama (38) yulu pyuo kareyamo yuu gii dokopa Omirinya ikinyingi Ayapeme Isaraele wambunya kiŋi ingyapala Isaraele wambu dupwa rapu pyuo iso ee kana akalisa lama ipisu lama (22) yuu Samaria dokona kareya.
1KI 16:30 Kiŋi akali wambo karenge dupwame koo piyaminyipape baame Kamongo kando yulu koo kamame wakasako pyuo kareya.
1KI 16:31 Kareyamo dokopa Kiŋi Jeropomeme koo piyamo doko suu pyao Ayape baame kamame ulipiliko pyuo papala yuu Saitone range Kiŋi Etepalona wanenge kingi Jesapele lenge doko nyiya. Nyepala mee bange kingimi wasisi Bealo lenge doko lakando kareya.
1KI 16:32 Baame tembole anda mende mee bange kingimi wasisi Bealo lenge dokona lao yuu Samaria dokona pyakamiya. Pyakamipala mena pyao kiso maingi kana pyare mende banya lao wasakamipala tembole anda dokona andakare reteya.
1KI 16:33 Retapala baame mee bange enda anatu Asera lenge dopale mende opetaeko pisiya. Isaraele kiŋi wambo kopetame pyuo kareyaminyipape baame koo pipala Kamongo Isaraele wambunya Anatu dokona imbu singi doko kamame wakasako ketae ingyuo nyakamiya.
1KI 16:34 Doo baa yulu pyuo kareyamo gii dokopa akali Iyelo lenge yuu Betele range dokome yuu Jereko doko kamba waso piya. Kamongo dokome Josua Nanena ikinyingi keta lamaiyamuli pyuo Iyelo baame kana susa reteyamo dokopa banya ikinyingi mupwa Apirame doko kumuya. Dee kame kambu doko waso piyamo dokopa banya ikinyingi enakana Sekupu lenge doko kumuya.
1KI 17:1 Poropeta akali kingi Ilainja lenge yuu Tisipi yuu Giliate dokona singi range dokome kiŋi Ayape lamaiyuo lao, Kamongo Isaraele wambunya Anatu lete karalu karenge dokona namba yulu pyakamingi dokona kingi lao nambame emba pii dake langilyu. Ee kana dumbinya lamape remape mendena apupi pipyaepe epa nalu nao nara. Namba apu dee epara larono dokopa eparako, leya.
1KI 17:2 Dokopa Kamongo dokome Ilainja lamaiyuo, Emba yuu dake yaki nyepala neta pyakaenge dorena papala ipwa Jotane neta pyakaenge dorena ipwa kukinde kingi Seriti lenge epelyamo dokona repeta yalu pinya leya.
1KI 17:4 Lapala dee lao, Emba ipwa kuki dokona kamuo nao karare. Dee yaka orapene lenge dupwame emba nenge minyuo epo jinya lao lamaipu, leya.
1KI 17:5 Leyamo dokopa Ilainja Kamongona pii warombo sepala ipwa kuki epenge Seriti lenge dokona repeta palyuo piso kareya.
1KI 17:6 Dokopa baa yaka dupwame yangama alemanji lao nenge minyuo epo maiyami dee ipwa kuki dokona ipwa epeyamo kamuo neya.
1KI 17:7 Dokopa enakana dusale apu epa naya dokome ipwa kuki dokona ipwa epeya doko sokoya.
1KI 17:8 Dokopa Kamongo dokome Ilainja lamaiyuo lao,
1KI 17:9 Epapu yuu taone Serepate lenge yuu Saitone repeta singi dokona emba karala pupi. Dokopa enda waiyande doo palenge dokome emba nenge pinya lao lamaipu, leya.
1KI 17:10 Dokona lao Ilainja baa yuu Serepate peya. Pao yuu taone dokona kame kambu dokona peyamo dokopa enda waiya doko isa ponale yapo nyuo kareyamo kandeya. Kandapala baame enda doko kando lao, Ipwa kamuo jinya, leya.
1KI 17:11 Dopa leyasa enda doko ipwa nyela peyamo dokopa dee kamba kee lapala nenge borete lapo opetae minyuo epo jinyako leya.
1KI 17:12 Dokopa enda dokome isingi lao, Embena Kamongo lete karalu karenge Anatu doko kando lalu lao lao, Namba borete mendepe reta napu. Namba retapu dusipa kingi kete pyao dopale palawa kuki lama pere dokona silyamo dee isa olipi ipwange lama pee dokona petamo. Namba dae isa ponale mungyuo nyela ipuŋu minyuo anda papala nenge kuki retapu dolapome nambana wane dokopa nambapa suu pyao nenge wasaro. Dolapo nao ote pyuo narambanopa dee enakana lopo dokome nambwa angi kumaramba lyamo, leya.
1KI 17:13 Leyamo dokopa Ilainjame enda doko lamaiyuo lao, Mona randa napala mee pao embena seramo dupwana wambo nambana borete kuki mende wasakapala minyakao ipu. Enakana seramo dupwa embapa ikinyipa ingyuo range wasareŋe, leya.
1KI 17:14 Dokona lao Kamongo Isaraele wambunya Anatu dokome dopa lapya. Namba Kamongo dokome apu peyapa narono dokopa pere dokona palawa ota nara dee pee dokona isa olipi ipwange dupwa ota narako lapya, leya.
1KI 17:15 Dokopa enda waiya dokome Ilainja pinya leyamuli pyuo piya dokopa yuu gii malu dupwana nakama nenge kapa siyamo neyami.
1KI 17:16 Doko Kamongo dokome Ilainja keta lalu lao lao lamaiyamuli pyuo pere dokona palawa ota naya dee pee dokona isa olipi ipwange ota nayako.
1KI 17:17 Dokopa enakana mendepa enda waiya dokona ikinyingi doko anga piya doko ama pyao konda nyepala kopetame piyamopa baa kumuo oteya.
1KI 17:18 Dokopa enda dokome Ilainja kando lao, Anatunya akali doko. Embame namba keta akipamo yulu dake pilisi? Anatumi nambana koo dupwana kamba suu pyapala dokona dee nambana wane kumungi dokona pyambwakana lao ipisi? leya.
1KI 17:19 Dokopa Ilainjame enda doko lamaiyuo lao, Wane doko namba jinya, leya. Lapala wane doko endangimi kupyaro kareya doko nyepala soo anda ketae baa paleya dokona papala ratena ketae reteya.
1KI 17:20 Retapala baame ateŋa poraiyuo pyao lao, O Kamongo nambana Anatu, enda waiya dake kando yulu koo dopale doko akipamo pilisi? Enda baame namba kapa ingyuo rapu pipapyamopa dee epapu embame banya ikinyingi doko pyakamilyane, leya.
1KI 17:21 Enakana Ilainja baa yuu remasa wane yongo dokona ketae pangu sepala ateŋa lao, O nambana Kamongo Anatu, wane dake kamba lete pyuo nyepe, leya.
1KI 17:22 Dokopa Kamongome Ilainjana ateŋa dokona isingi yano pyakamiya. Doko wane baa yongo peparae lenge rapala ŋee ŋaepe siya.
1KI 17:23 Dopa piyamo dokopa Ilainjame wane doko minyuo anda isarena endangi peteyamo dokona minyuo papala enda baa kando lao, Kanda, embena wane ikinyi doko lenge ralamo, leya.
1KI 17:24 Dokopa enda dokome isingi lao, Epapu namba silyu doko, emba Anatunya akali angi Kamongo dokome emba angi kinyi pii langipyalamo lao epapu namba silyu, leya.
1KI 18:1 Yuu gii lapo epo papeyamopa ee kana rema apu epa nayamo gii dusipa ro, leya.
1KI 18:2 Dopa leyasa Ilainja kata nyuo peya. Dokopa yuu Samaria lopo siyamo doko soo andakiya.
1KI 18:3 Dokopa kiŋi Ayapeme akali mende kiŋinya anda dokona mupwa ingyuo karenge Opetaya lenge doko kee lao nyiya. (Opetaya baa suu pingi keyange suu pyao ateŋa lao Anatu lakando karenge.
1KI 18:4 Dokopa enda Jesapele dokome Anatunya poropeta akali dupwa pyao kumakayamopa akali Opetaya dokome akali andete (100) nyiya. Nyepala kananda lapona gurupu lama wasapala pingyu akalisa kingi paki (50) ingyapala palena lapala ipwa nengepe maipapu piya.)
1KI 18:5 Dopa piyamo dokopa kiŋi Ayapeme Opetaya lamaiyuo, Mena dongepe osepe dupwana rambi lapo kapa nao kararami lao ipwa guu lao epengepe ipwa ponape peparae dupwana mende silyape lao koto kando bwua, leya. Lapala lao, Mende ramo nambwana mena dupwana lapo pyao naa naramba, leya.
1KI 18:6 Nakamba mendali mendalipi yuu anjarename paramba lao lao mendakinya palyapala kata nyuo wakale wakale peyambi.
1KI 18:7 Dokopa Opetaya enye katasa peyamopa aopa Ilainja epeyamo kando nyiya. Nyepala baame Ilainjaŋa lao lenge kambu kandapala baa epeyamo dokona pangu isa siya. Sepala baame piso soo lao, Doko angi embase? leya.
1KI 18:8 Dokopa baame isingi lao, Waa, namba Ilainjaŋa. Namba dae epanyeŋe lao embena kamongo doko lamaila puu, leya.
1KI 18:9 Dokopa Opetayame isingi lao, Nambame aki yulu koo pipusa embame randa dokona pyambwalana suu pyao kiŋi Ayapeme pyao kumakana lao letese? leya.
1KI 18:10 Embena Anatu lete karenge Kamongo dokona kingi lalu lao lao yuu muu dupwa peparaena awali lao kiŋi dokome emba koto papipya. Yuu gii mendepape isingi akali dokome emba yuu dokona kara naeŋe lao lamaiyamopa Ayapeme baa doko angiŋi lao lalu lao lena leto, leya.
1KI 18:11 Dokopa dee epapu embame namba emba dae epo karene lao baa lamaila pupili lao suu pilisi? leya.
1KI 18:12 Nambame emba yaki nyuo parono yuu gii dokopa Kamongona Imambu dokome yuu kanda nange mendena emba nyuo lanyuo para ramo doko apa pirase? Dokopa emba dae karenge lao Ayape lamairu dokopa baa epo emba kotaramopa kara narene kandapala namba pyao kumakara. Namba wamba wane dokopa piso suu pingi keyange palyuo yuu peparae Kamongo lakando ateŋa lao karenge kandale doko emba suu pyaa, leya.
1KI 18:13 Lapala dee lao, Enda Jesapele dokome Kamongona poropeta akali dupwa pyao kumakaya dokopa nambame akali andete mendaki (100) nyepala kananda lapona gurupu lama wasapala pingyu akalisa kingi paki (50) ingyapala yalu pyuo palena lapala nenge ipwape maipapu piyu doko emba see naese? leya.
1KI 18:14 Dokona baame namba pyao kumakasaraŋa embame namba apa pyuo emba dae epo karene lao lamaila puu lao letese? leya.
1KI 18:15 Dokopa Ilainjame isingi lao, Kamongo Porai Wakasa namba yulu pyakamingi dokona kingi lao lalu lao leto. Namba range kiŋi baa petamo dokona paro, leya.
1KI 18:16 Leyamosa Opetayame kiŋi Ayape peteyamo dokona papala lamaiyamopa kiŋi Ayapeme kata nyuo Ilainja kandala epeya.
1KI 18:17 Dokopa Ayapeme Ilainja kandapala dopa leya, Isaraele dokona randa andake palyuo karene doko emba epelene dokose, leya.
1KI 18:18 Dokopa Ilainjame isingi lao, Nambame randa epena lao pii nange, leya. Embapa embena rakanepa yuu Isaraele dokona randa palyuo karambinyi. Emba mee bange anatu lao kingimi wasingi Bealo doko lakandapala Kamongona mawa pii dupwana kamba lao karene, leya.
1KI 18:19 Lapala, Yuu kyau Kamele dokona Isaraele wambu dupwa peparae kee lao sukusa sukusa pipala namba kandala epena lape. Epo dokopa mee bange anatu kingimi wasisi kingi Bealo lenge dokona poropeta akali andete kisima dee akalisa kingi paki (450) dusipape dee mee bange enda anatu Asera lenge dokona poropeta akali andete kisima (400) kuini Jesapeleme paka pyao sipyamo karaminyi dupwa lanyuo epena leya.
1KI 18:20 Leyamosa kiŋi Ayapeme Isaraele wambu peparaepe dee mee bange anatu kingi Bealo lenge dokona poropeta akali dupwa peparaepe yuu kyau Kamele lenge dokona kee lao nyuo sukusa sukusa piya.
1KI 18:21 Dokopa Ilainjame wambu dupwa peteyaminyi dokona papala dopa leya. Nakama suu pingi lama manjo karo anjokorape mendaki palyaramisi? Kamongo doko Anatu ramo baa lakandalapape. Dee Bealo doko Anatu ramo baa lakandalapape, leya. Dopa leyamopape wambu dupwame pii kuki mende laa nayami.
1KI 18:22 Dokopa Ilainjame lao, Nakama mee bange anatu lao lakandenge kingi Bealo lenge poropeta akali malu (450) karaminyi. Dopa pipyamopape Kamongona poropeta dokona namba iki pyarepala pupyamo karo, leya.
1KI 18:23 Lapala mena bulamakao kali lama nyelapape. Nyepala mende mee bange anatu lenge kingi Bealo dokona poropeta akali dupwana mende nyuo pyao kunjo kuki kuki pipala isa dokona ketae retapala isare kaiyuo palya nana. Namba mena bulamakao kali mende dokome dopako piru, leya.
1KI 18:24 Dokopa mee bange kingi Bealo anatu lao lakandenge poropeta dupwame nakamana anatu doko kando ateŋa larami. Laraminyi dokopa namba Kamongo kando ateŋa laro. Dokopa mendeme isingi yano pyakalyoŋo lao isare jera doko baa Anatuŋu, leya. Dokopa wambu peparaeme isingi lao, Doko kapaŋa, leyami.
1KI 18:25 Lapala dee Ilainjame mee bange Bealo lakandenge poropeta dupwa kando lao, Nakama malu dokona mena kali doko nyepala wambo rapa rapa pipwape. Pipala isa dokona isare kaiyuo palya napala nakamana mee bange anatu kando ateŋa lalapape, leya.
1KI 18:26 Leyamo dokopa nakamana mena minyakamyuo epeyaminyi doko nyepala wambo rapa rapa piyami. Pipala mee bange anatu kingi Bealo lenge doko kando ateŋa lao kareyaminyi pao yuu kwuaya. Dopa piyasa nakama pii ketae lao, Bealo namwa kando isingi yano pyakape, lao kana pyare leyaminyi dokona awali lao mee wamya lyuo lao kareyami. Kareyaminyipape mee bange anatu kingi Bealo dokona piso isingi mende laa naya.
1KI 18:27 Dokopa yuu gii korokama dokopa Ilainjame mee bange anatu kingi Bealo dokona poropeta dupwa kando minyako pyuo mora pii lao lao anatu Bealo dokona ateŋa poraiyuo pyalapape. Mende ramo baa korakama kombeya pilyamo panda mee kamanda pase panda baa kata londe mendasa pupyase. Panda baa luu palase dokona nakamame baa pyaleto minyalyuo nyeraminyi, leya.
1KI 18:28 Leyamo dokopa poropeta dupwame ateŋa pii ketae lao wamba mena pyao kiso maiyuo yulu palenge doko suu pyao wua kema dupwame nakama range poko pyao kareyaminyi pao ranjama epeya.
1KI 18:29 Epeyamo dokopa nakama pii kara pao ketae lao dee pii koo kae lao lao kareyaminyi pao alemanji ingiya. Ingiyamopape ateŋa isingi yano pyaope mende pii naya dee pii kuki mendepe leyamo siyaminde daako.
1KI 18:30 Dokopa Ilainjame wambu dupwa kando lao, Namba karo dakena repeta epena, leya. Leyamosa wambu peparae baa kareya dokona pao malu palyiyami. Dokopa baame Kamongona kana pyare lasi wambarae kwaeyamo doko kamba rolo pyare lao wasiya.
1KI 18:31 Wasapala dokopa Kamongo dokome kingi Isaraele akali Jekope lao maiyamo dokona para piyamo rara akalisa ipisu lama (12) dusipana mendaki mendaki lao baame kana akalisa ipisu lamako (12) nyiya.
1KI 18:32 Nyepala kana dusipame Kamongo mena pyao kiso maiyuo lakandenge kana pyare lasi doko kamba pyare lao piya. Pipala suu nyuo awali leya. Doo suu nyiyamo dokona ipwa bakete lama make lita akalisa ipisu kisima ingyuo kulimbwaramo doko kapa isa pao seraŋa lao piya.
1KI 18:33 Dopa pipala enakana kana pyare lasi dokona isa ketae reteya. Retapala mena doko pyao kunjo kuki kuki pipala isa dokona ketae lambuo lae pyuo reteya. Retapala baame lao, Ipwa pee kuki kisima kamuo simbwapala kulimbuo mena dokona piso dee isa dokona piso pinya, leya. Leyamuli pyuo piyami.
1KI 18:34 Dokopa baame lao, Kambako pinya, leya. Leyamosa kambako piyami. Dokopa yuu mendaki kamba konda pyuo pinya, leya. Dokopa nakamame dopale piyami.
1KI 18:35 Dokopa ipwa doko kana pyare lasi dokona makando lupyapala suu nyisi dokona soo simbwaya.
1KI 18:36 Dokopa mena pyao kiso maingi yuu gii alemanji dokopa kana pyare lasi dokona poropeta Ilainja repeta papala ateŋa lao, O Kamongo, Jekope, Aisake, Aporakamemoo dusipana Anatu, namba embena kendemande yulu pyakange dokome embena mawa pii lapinyili pyuo dapwa pyakapu dokonape epapu emba Isaraele wambunya Anatuŋu laope pakanya palyuo lasaka pepe.
1KI 18:37 Isingi yano pyakape. Kamongo, isingi yano pyakape. Dokona lao wambu dapwame emba Kamongo Anatu nakama emba rangena ingyuo kamba kapu kyuo nyiinyi dokoŋo lao soo nyinyale, leya.
1KI 18:38 Leyamo dokopa Kamongo dokome isare isa peyamosa mena pyao kiso maiyamo dokope rao isa dupwape rao kana dupwape rao pipala mee yuu nyisa wangu dupwana rapala ipwa suu nyuo awali lasinya siyamo dupwa sokwapala olo rali piya.
1KI 18:39 Doko wambu dupwame kandapala nakama yuu dokona pangu sepala lao, Kamongo doko Anatu. Kamongo baa iki doko Anatu, leyami.
1KI 18:40 Dokopa Ilainjame mee bange kingi Bealo lakandenge poropeta dupwana mendalipi nyisa paa nana lao nakamame minyarapala pyao nyinya leya. Dokopa wambu dupwame pyao nyiyaminyi dokopa Ilainjame yuu ipwa Kisone dokona minyuo papala peparae pyao kumakaya.
1KI 18:41 Dokopa enakana Ilainjame kiŋi Ayape lamaiyuo lao, Namba apunda repeta oo lao ipyamo silyuŋu. Epapu emba nenge nala puu, leya.
1KI 18:42 Dopa leyamo dokopa Ayape baa nenge nala peyamopa Ilainja baa yuu kyau Kamele lenge dokona ketae pulyuo peya. Papala wapambu karapala banya ayemba ponga nao mona kando peteya.
1KI 18:43 Pisipala banya kendemande akali mende lamaiyuo lao, Papala ipwa kota dorena kandena, leya. Leyamosa kendemande akali dokome pao kandapala dee kapu kyuo epo lao, Namba bange mende kanda nalyo, leya. Dokopa Ilainjame yuu yanda ipingi nyepo kandala penako leya.
1KI 18:44 Yuu yanda ipingi dokona kendemande akali doko pao kapu kyuo epapala lao, Ipwa kota dokona piso kopa kuki lama sipyamo kandapu doko andake daa mee akalinya kingi dopale ingyuo sipyamo kandalono, leya. Dokopa Ilainjame kendemande akali doko lamaiyuo lao, Kiŋi Ayape baa apu dokome kata rokwasaraŋa banya mena oseme ipyuo papingi uliuli doko nyepala apu epa nalyamo dakepa wambo anda piso pena lena, leya.
1KI 18:45 Leyamo dokopa yuu gii kuki lamana aopa kopa dupwa pupuro kondo kondo lapala yake yambe pyao dee poo raiya minyapala apu reeko kanda soo epeya. Dokopa kiŋi Ayape banya mena oseme ipyuo papingi uliuli doko nyepala yuu Jeserele dokona kapu kyuo anda range peya.
1KI 18:46 Dokopa Anatunya porainya renge dokome Ilainja keta epeyamopa kandokondali pyuo banya komau awali lao gii lao wapupala kiŋi Ayape peyamo dokona baa wambo makando kata pao yuu Jeserele kame kambu dokona peya.
1KI 19:1 Kiŋi Ayapeme Ilainja baame yulu peparae pyuo mee bange kingi Bealo lenge anatu lao lakandenge poropeta dupwa peparae pyao kumakao piyamo dokona lao banya etenge Jesapele lenge doko lamaiya.
1KI 19:2 Dokopa enda dokome Ilainja peteyamo dokona pii wai nembapala lao, Embame poropeta dupwa pyapi doko suu pyao epapu rakyape mende nambame emba pyaa naro ramo dokopa mee bange anatu dupwame namba kumungi dokona pyambuo pinya, leya.
1KI 19:3 Leyamo pii doko Ilainja soo pakapala baa range kyawa lete nyuo banya kendemande akali doko nyepala pakao yuu Biasipa yuu Juta singi dokona peya. Papala banya kendemande akali doko dokona karena lapala
1KI 19:4 Ilainja yuu gii mendaki yuu muiyane mendena kata pao kareya. Pao karo isa renge rau leya mendena imambu soo peteya. Piso dokopa baa kumuowane lao suu piya. Pyapala baame ateŋa lao, Kamongo namba keta kenda palamo. Namba kumaro doko kapaŋa. Nambana lete karenge doko nyepe, leya.
1KI 19:5 Lapala baa isa renge dokona luu paleya dokopa aopa aŋala mendeme baa epo minyandapala lenge rapala nenge nena, leya.
1KI 19:6 Leyamosa lenge rapala kandeyamo dokopa kyawa reteya dokona borete mende soo dee pee mendena ipwa kamusi piso piyamo kandeya. Dolapo napala dee kambako luu paleya.
1KI 19:7 Paleyamo dokopa Kamongona aŋala doko yuu lapo ingyuo epo pyalerapala lamaiyuo, Kata parene doko londe ingyasaraŋa lenge rapala nenge ipwape dupwa nena, leya.
1KI 19:8 Dokopa Ilainja lenge rapala nenge ipwape duwpa neya. Nenge neyamo dokome baa kapa sikya pyuo poraiyamopa yuu gii akalisa kisima kata pao karo pao yuu kyau poo pyasi Sainai dokona para ingiyamopa peya.
1KI 19:9 Papala kukwa dokopa kananda mendena pao paleya. Dokopa aopa Kamongo dokome pii lamaiyuo, Ilainja emba dakena apa pilisi? leya.
1KI 19:10 Ilainjame isingi lao, Kamongo Anatu Porai Wakasa, namba embena yulu keyange pyakange kandale. Dopa pipunupape Isaraele wambu dupwame embena poropeta dupwa pyao kumakao embena tembole andana kiso maingi kana pyare lasi dupwa lalyinyi nembo dee embapa lao pii kana minyuo lalu lao leyaminyi doko kokwa soo pimi dokona namba yeelyo karapunupa pyao kumakamwali lao suu pilyaminyi, leya.
1KI 19:11 Leyamo dokopa Kamongo dokome baa lamaiyuo, lao, Papala nambana lenge kambu dorena yuu kyau dokona karape, leya. Dokopa enakana Kamongome ama poo raiya andake mende peeyamosa yuu kyau dupwa poro lao rali pipala kana dupwa lakao mumu piya. Piyamopape Kamongo baa poo raiya dokona kara naya. Dee enakana poo raiya minyuo oteya dokopa dee yuusili minyiya. Minyiyamopape Kamongo baa yuusili dokona kara naya.
1KI 19:12 Yuusili minyuo otapeyamo dokopa enakana isare reya. Reyamopape Kamongo baa isare dokona kara nayako. Isare rao oteyamo dokopa isa isa pii mende elya kalo leya.
1KI 19:13 Pii doko Ilainja sepala banya komau dokome lenge kambu yambe pyapala kananda kambu konandowame dokona karala peya. Dokopa pii dokome baa lamaiyuo, Ilainja emba dakena apa pyuo karese? leya.
1KI 19:14 Ilainjame isingi lao, Kamongo Anatu Porai Wakasa, namba embena yulu iki pyakange kandale. Dopa pipunupape Isaraele wambu dupwame embena poropeta dupwa pyao kumakao embena tembole andana kiso maingi kana pyare lasi dupwa lalyinyi nembo dee embapa lao pii kana minyuo lalu lao leyami doko kokwa soo pimi dokona namba yeelyo karapunupa pyao kumakamwali lao suu pilyaminyi, leya.
1KI 19:15 Dokopa Kamongome lao, Kapu kyuo yuu Damasakesa repeta yuu muiyane dokona pupi. Papala yuu taone andake dokona sukusa pao akali Aseyele lenge baa Siria wambunya kiŋi ingyuo rombo palyape.
1KI 19:16 Palyapala Nimisinya ikinyingi akali Jiyu baa Isaraele wambunya kiŋi ingyuo rombo palyuo dee Sapatena ikinyingi akali Ilaisa yuu Epolo Meyola range doko opetae poropeta ingyuo embena panda nyeraŋa rombo palyuo pepe.
1KI 19:17 Pipala wambu mendali kiŋi Aseyele dokome randa maiyuo pyao kumaka nara ramo doko kiŋi Jiyumi pyao kumakara. Dee wambu mendali Jiyumi pyaa nara ramo doko Ilaisame pyao kumakara.
1KI 19:18 Dopa piramopape wambu malu (7,000) namba rape rape lao yaki nyii napala isa bange kingi Bealo lenge lakanda nao dee bange kingimi wasisi lakandenge doko nyinyi pii nao karaminyi dupwa yuu Isaraele dokona mee lete petena kaeyaro, leya.
1KI 19:19 Dokopa Ilainja yaki nyuo Ilaisa koto kandala peya. Kandeyamo dokopa mena okese lapo minyuo yuu ape ape pyao kareya. Kareyamo dokona mena okese gurupu akalisa ipisu mendaki wambo pyuo peyaminyipa baa mende enakaya dokopa dokona ape ape pyao peya. Dopa piyamo dokopa Ilainjame banya komau londe doko roko nyepala Ilaisa wapwakamiya.
1KI 19:20 Dokopa Ilaisa banya mena okese dupwa yaki nyepala Ilainja peyamo dokona makando papala lao, Enakana embapa role pyao bonaleŋe. Nambana anyi rakanepe yako lao nyinyi pyuo karena larowale, leya. Dokopa Ilainjame isingi lao, Kapaŋa nambame emba kaeya laa nalyo. Kapu kyuo pupi, leya.
1KI 19:21 Leyamo dokopa Ilaisa kapu kyuo papala banya mena dupwa piya. Pyapala mena angi dupwa mange dokona isa mamando palenge dokome kisiya. Dopa pipala mena angi kisiyamo dupwa banya wambu dupwa nena lao maiyamopa nakama neyami. Enakana baame Ilainja nyiso yulu piru lao Ilainja peyamuli pyuo peya.
1KI 21:1 Yuu Jeserele dokona kiŋi Ayapena anda kambu repeta dokona akali Napote lenge dokona isa girapo ee andenge.
1KI 21:2 Yuu gii mendepa Ayapeme Napote lamaiyuo lao, Embena isa girapo ee yuu doko nambana anda kambu repeta singi dokona namba anane kapisupi lapo wara pinyaŋa yuu doko namba nyerowale. Nyepala nambame emba girapo ee wakale mende jero. Panda range rae mai nare ramo doko nambame emba bange keyange lapo joo ropo pyao nyero, leya.
1KI 21:3 Leyamo dokopa Napoteme isingi lao, Namba girapo ee dake nambana rora ambasu dupwana nyiyuŋu nambame emba nyii laro dokopa Kamongo dokome daa lena, leya.
1KI 21:4 Ayape baa Napoteme pii lamaiyamo doko sepala ama mona kendo dee imbumi kumuo anda peya. Papala nenge naa nao banya luu palenge rate dokona papala lenge kambu apya dorena pyambwapala palyuo siya.
1KI 21:5 Dokopa banya etenge Jesapele papala piso soo lao, Akipamo emba nenge naa nao mona randame kumuo silisi? leya.
1KI 21:6 Ayapeme isingi lao, Namba Napotena isa girapo ee doko ropo pyao nyero panda baa range rae mai nara ramo doko nambame ee wakale maiyuo banya ee dokona nyero lapu dokopa baame namba daa langipyamo dokona dopa pyuo peto, leya.
1KI 21:7 Leyamo dokopa Jesapeleme isingi lao, Kapa emba kiŋi panda kiŋi daase? Rate dokona sipuro epo mona kare kare rae maiyuo piso nenge nape. Nambame Napotena isa girapo ee doko nyakaroŋo, leya.
1KI 21:8 Lapala enakana enda baame Ayapena kingi palyuo pepa mende pyapala waa lumbuo kandasarami lapala make mende ketae pisiya. Pisapala yuu Jeserele akali mupwa dupwape wambu lita ingyuo karenge dupwape maiya.
1KI 21:9 Maiyamo pepa dokona dopa lao piya. Wambu dupwa kee lao nyuo malu palyapala nenge wasaka pyuo piso Napote baa kingi ketae pyambuo lakandalapape, leya.
1KI 21:10 Lapala orasakele akali lama nyepala baa kooŋo lapala Anatunya lenge kambupi kiŋinya lenge kambupi dolapona kokwa soo pipi lena. Lapala yuu taone dokona baa minyuo nyisa papala kaname pyao kumakalapape, leya.
1KI 21:11 Dokopa yuu Jeserele dokona akali mupwa dupwape wambu lita ingyuo karenge dupwapeme enda Jesapeleme pinya leyamuli pyuo piyami.
1KI 21:12 Nakamame wambu dupwa nyuo malu palyuo nenge wasaka pyuo piso Napote baa kingi ketae pyambuo lakandeyami.
1KI 21:13 Lapala orasakele akali dolapome baa kooŋo Anatunya lenge kambupi dee kiŋinya lenge kambupi dolapona kokwa soo pipya leyambi dokopa yuu taone dokona Napote minyuo nyisa papala kaname pyao kumakayami.
1KI 21:14 Dokopa Napote pyao kumakalyamo lao Jesapele peteyamo dokona pii wai nembeyami.
1KI 21:15 Pii wai doko Jesapele sepala aopa dokopako Ayape lamaiyuo, Napote baa kumapyaŋa dokona lao banya isa girapo ee yuu emba jelana simbi simbi piyamo doko emba nyela puu, leya.
1KI 21:16 Yuu gii mendaki dokopako Ayape ee doko nyela peya.
1KI 21:17 Peyamo dokopa Kamongo dokome yuu Tisipi range poropeta Ilainja lamaiyuo,
1KI 21:18 Yuu Samaria range kiŋi Ayapeme Napote isa girapo ee doko nyakaminya pilyamoŋo baa petamo dokona puu.
1KI 21:19 Papala namba Kamongo dokome lapya lao baa lamaiyuo, Embame akali doko pyao kumakapala dokopa enakana banya ee doko emba nyerene keyangese? Nambame dapa lapya lao, baa lamaipi. Suwa dupwame Napotena ranjama pendo naminyi yuu dokonako embena ranjama pendo narami lapya lape, leya.
1KI 21:20 Ayapeme Ilainja kandapala dopa leya, Nambana nyisu petenge, embame namba minyarapala nyela epelese? leya. Leyamo dokopa Ilainjame isingi lao, Emba Kamongona lenge kambu dorena emba rangeme koo pipala nyisa rekya lao pao otapi dokona waa nambame emba nyela epelyo.
1KI 21:21 Dokona lao Kamongome emba dopa langilyamo. Nambame emba keta randa andake jero. Doko embena ree palu dokona wane dupwa peparae kuki andapaepe mende pyarepala paa nana lao pyaro, lapya.
1KI 21:22 Embame Isaraele wambu dupwa kata koona lanyuo pao koo pinya lao pipinyi dokona nambana imbu singi nyakaleneŋe embena ree palu dupwa kiŋi Jeropome Nepatena ikinyingi piyamo doko waiso dee kiŋi Basa Ainjana ikinyingi piyamo doko waiso pirami, lapya.
1KI 21:23 Enda Jesapele dokona lao doko Kamongo dokome lao, Yuu taone Jeserele dokona banya yongo doko suwa dupwame narami lapya, leya.
1KI 21:24 Dee embena wambu range lapo yuu taone dokona kumarami dupwa suwa dupwame narami dee wambu lapo mee neta dupwana kumarami dupwa yaka ketae papingi dupwame narami, lapya.
1KI 21:25 (Banya etenge Jesapeleme kyawame suu lao piyamo dokome Kamongona lenge kambu dokona Ayape baame ama koo pyulu pyuo piya. Banya koo piyamo doko wakale dupwana mendeme isa palya nayami.
1KI 21:26 Kamongo dokome Isaraele wambunya lenge kambu dokona Amo wambu yulu koo elya pingi pyuo mee bange kingimi wasisi dupwa lakando kareyaminyi dupwa nyisa nembeya. Nakama koo pyuo kareyaminyili pyuo Ayapeme piya.)
1KI 21:27 Ilainja pii lao otapeyamo dokopa kiŋi Ayapeme banya komau doko minyuo kangunyi nembapala baa kumanda wapungi komau wapuo nenge naa nao mee luu palyuo baa mona randame kumuo peteya.
1KI 21:28 Dokopa Kamongo dokome poropeta Ilainja lamaiyuo,
1KI 21:29 Epapu kiŋi Ayape kandape. Namba kando inyimungu pisipyamo doko emba kandelese? Dopa pyuo karapyamo dokona nambame epapu baa lete karamo yuu gii dakepa baa keta randa mai naro. Rengya banya ikinyingi dupwa kararami yuu gii dokopape Ayape banya ree palu dupwape keta randa doko mairu, leya.
1KI 22:1 Ee kana lamana Isaraele wambu dupwa Siria wambu pipya manda rao lambo lao mona siyamopa palu karo piyami.
1KI 22:2 Piyaminyipape ee kana repo dokona yuu Juta range kiŋi Jiosapatame Isaraele wambunya kiŋi Ayape kandala peya.
1KI 22:3 Peyamo dokopa Ayapeme banya akali mupwa dupwa piso soo lao, Oramote yuu Giliate singi doko namwana doŋo. Akipamo namwame yuu Oramote yuu Giliate singi doko Siria wambunya kiŋi rekya lao nyerama lao mende pii nalyamase? leya.
1KI 22:4 Lapala Ayapeme Jiosapata kando lao, Emba namba role pyao Oramote wambu dupwa pyao nyela parambase? leya. Dokopa Jiosapatame isingi lao, Nambape nambana yanda singipi dee yanda singi mena ose matana petengepe dupwa rapa rapa pyuo otapuŋu. Dusipa peparae emba rangena ingilyamo, leya.
1KI 22:5 Dopa piramopape wambo Kamongo doko keta kapa lao piso soo kandamanale, leya.
1KI 22:6 Dokona lao Ayapeme poropeta akali andete kisima (400) epena lapala piso soo lao, Nambame Oramote wambu dupwa kapa pyala paowa panda kaeyowase? leya. Leyamo dokopa isingi lao, Kamongome pyao wini pii lao emba keta embone kararaŋa kapa pyala pare, leyami.
1KI 22:7 Leyaminyipape Jiosapatame piso soo lao, Kamongome apa letamo lao, poropeta mendali keta serama mende kara nalyase? leya.
1KI 22:8 Dokopa Ayapeme isingi lao, Imilana ikinyingi poropeta Maekaya karamo. Karapyamopape baame namba rengya mende pira lao keyange dokona langya napala yuu peparae koo dupwanako langingi dokona nambame baa awa nalyo, leya. Jiosapatame isingi lao, Emba dopa laa nare ingilyamo, leya.
1KI 22:9 Leyasa kiŋi Ayapeme banya anda karenge akali mupwa mende kee lao nyepala yuu gii mendaki dakepako poropeta Maekaya nyela pena leya.
1KI 22:10 Lapala kiŋi dolapo nakambana komau londe dupwa wapupala yuu Samaria kame nyisarena witi pyao injingi mare dokona nakambana petenge isa dokona peteyambinyipa poropeta dupwame nakambana lenge kambu siya dorena karo mende rengya pira dokona lamaipa pyuo kareyami.
1KI 22:11 Kareyaminyi dokopa akali mende Senanana ikinyingi Setekaya lenge dokome baa rangeme ane poraimi mena bulamakaona nenge yale wasiya. Wasapala Ayape lamaiyuo, Kamongo dokome bange dake minyuo Siria wambu dupwa doko kapa pyao ralinyi nembapala kaeyare letamo, leya.
1KI 22:12 Leyamo dokopa poropeta menge dupwa dokonako palyuo lao, Kamongo dokome porainya renge jeramopa Oramote wambu kararaminyi dokona pao nakama nyuo wini piri, leyami.
1KI 22:13 Dopa pyuo kareyaminyipa akali mupwa poropeta Maekaya nyela peyamo dokome epo lao, Poropeta menge dupwame kiŋi doko rae mainyi pyambuo pii mendareko lami dopa pyuo emba dokonako ingyuo lape, leya.
1KI 22:14 Leyamo dokopa Maekayame isingi lao, Kamongo lete karenge dokona lao lalu lao lao baame namba dopa laa lao langiramo doko laro, leya.
1KI 22:15 Enakana baa kiŋi peteya dokona peyamo dokopa kiŋi dokome baa piso soo lao, Maekaya, kiŋi Jiosapata nambapame Oramote wambu dupwa pyala bwua panda kaeyambase? leya. Dokopa Maekayame isingi lao, Kapa pupwa. Kamongo dokome embone karenge jeramopa nakambame pyao anda pisirambi, leya.
1KI 22:16 Leyamo dokopa Ayapeme isingi lao, Kamongo dokona kingi lao embame namba pii kinyi dokona iki langi. Yuu akipare nambame emba dopa pii lao langirusi? leya.
1KI 22:17 Maekayame isingi lao, Isaraele ami yanda singi dupwa mena sipisipi rapu pingi kara nalyaminyi ralo karenge dopale ingyuo yuu kyau dupwana wakale wakale ralo pao karaminyi kandeyo. Dokopa Kamongo dokome lao, Wambu dupwana rapu pingi akali mupwa mende kara nange lamoŋo dokona mee mona seramo anda pena lapya, leya.
1KI 22:18 Dokopa Ayapeme Jiosapata lamaiyuo, Baame namba keta keyange piraŋa lao langi napala yuu peparae koo dokonako langingiŋi lao emba langya napu kandapisi? leya.
1KI 22:19 Leyamo dokopa Maekayame deeyako lao, Epapu Kamongo dokome apa letamo lao sepe. Kamongo doko yake panda dokona banya petenge isa dokona pisipyamo banya aŋala dupwa baa pisipyamo wangusa karaminyi kandapu.
1KI 22:20 Dokopa Kamongo dokome piso soo, Apimi Ayape baa yuu Oramote dokona papala kumara lao minyako pela parase? leya. Leyamo dokopa aŋala lapome pii mendakinya palyuo leyami dee lapome mendena palyuo leyami.
1KI 22:21 Lao peteyaminyipa imambu mende epo Kamongo peteyamo dokona papala akali doko nambame minyako pela paro, leya.
1KI 22:22 Leyamo dokopa Kamongome piso soo lao, Apa pyuo pirisi? leya. Dokopa imambu dokome isingi lao, Nambame papala Ayapena poropeta akali dupwa kyambo lena lao kunji pyaro, leya. Dokopa Kamongo dokome lao, Emba wini piriŋi baa minyako pela puu, leya.
1KI 22:23 Dokopa Maekayame lao oto lao dopa leya. Dopa pipya lyakande. Kamongo dokome embena poropeta dapwa kando kyambo lena lao kunji pyapya. Dopa pipyamopape Kamongo baa rangeme emba koo keta palyuo lapya, leya.
1KI 22:24 Leyamo dokopa poropeta akali Setekaya doko Maekaya kareya dokona papala Maekayana lenge kambu dokona rakyuo pyao lao, Kamongona Imambu dokome namba yaki nyuo epo apa pyuo emba pii kanda soo langilyase? leya.
1KI 22:25 Leyamo dokopa Maekayame isingi lao, Emba panda kuki matarena dokona yalu pela pare dokopa koto kandare, leya.
1KI 22:26 Dokopa kiŋi Ayapeme banya akali mupwa dokona mende lamaiyuo, Maekaya minyarapala nyepala yuu taone andake dokona gapomane akali mupwa Amonepa dee kiŋinya ikinyingi kingi Joasepa minyuo pao maipi.
1KI 22:27 Maipala dokopa nakamba lamaiyuo, Baa karapusi anda palyapala nenge borete ipwape iki maiyuo karena lare. Dopa pyuo kararaminyipa namba kapa lete eparo, leya.
1KI 22:28 Dokopa Maekayame pii poraiyuo lao, Wambu peparaeme nambana pii selapape. Ayape, emba lete anda kapu kyuo epare ramo dokoyaka Kamongo dokome namba keta pii langya napyalyamo lao kandaro, leya.
1KI 22:29 Isaraele wambunya kiŋi Ayapepa Juta wambunya kiŋi Jiosapatapame yuu Giliate dokona Oramote wambu dupwa pyala peyambi.
1KI 22:30 Ayapeme Jiosapata lamaiyuo, Emba yanda pela paramba dokopa kiŋi komau dupwa wapupala kiŋi ingyuo pupi. Dopa pirinyipa namba wambu dupwame nambaŋa lao kanda seramiŋi namba komau wakale wapupala paro, leya. Lapala Isaraele kiŋi doko alowa pyuo wakale ingyuo yanda pela peya.
1KI 22:31 Peyamo dokopa Siria wambunya kiŋi dokome akali banya mena oseme ipyuo papingi uliuli dupwa rapu pyuo karenge dupwa pii poraiyuo lamaiyuo, Akali kuki andakepe dupwa pyaa napala Isaraele kiŋi doko iki pinya leya.
1KI 22:32 Dokopa nakamame kiŋi Jiosapata epeyamo doko kandapala Isaraele kiŋi dokoŋo lao peparaeme suu piyami. Suu pyapala pyala peyami dokopa baa pii ketae lao ee leya.
1KI 22:33 Ee leyamo dokome doko Isaraele kiŋi doko daalyamo lao sepala pyala peyaminyi doko kaeyami.
1KI 22:34 Kaeyaminyipape Siria yanda singi dokona mendeme banya kakumi mee kamenge piyamopa papala kiŋi Ayapena ane komau porai kimbuso kii pingi dokona pisipala pao anju renge dokona peteya. Peteyamosa akali banya mena oseme ipyuo papingi uliuli yulu minyuo penge doko kando ee poraiyuo lapala, Namba kandape. Namba pisipilyamoŋo yanda dakena yaki nyuo ipyuo minyuo nyisa pupi, leya.
1KI 22:35 Yuu gii dokopa yanda andeyamosa kiŋi Ayape baa Siria range kareyami dorena lenge kambu pyambwaro banya mena oseme ipyuo papingi uliuli dokona bange lapome pyare lapala peteya. Peteyamopa kaku peteya dokona ranjama dupwa epo karo uliuli panda isarena raeyo siya. Dokpa kukwama baa kumuya.
1KI 22:36 Neta anda repeta para ingiyamo dokopa Isaraele yanda singi kareyaminyi dokona pii mende lao sukusa pao akali peparae nakamana taone yuupi dupwana kapu kyuo pena, leya.
1KI 22:37 Dopa pyuo kiŋi Ayape kumuya. Banya yongo doko minyuo pao yuu Samaria dokona malu piyami.
1KI 22:38 Kamongome pira leyamuli pyuo banya uliuli doko minyuo pao ipwa Samaria pete dokona wate piyami dokopa ranjama dupwa suwa dupwame pendo nao dee pamuku enda dupwame dokona wate pyuo piyami.
1KI 22:39 Yulu peparae kiŋi Ayape piyamopa anda ama keyange piyamope dee yuu taone karenge wasiyamope dupwana lao Isaraele Kiŋi Dupwana Arome Pii Buku dokona pyao reteyami.
1KI 22:40 Baa kumuyamo dokopa banya panda nyuo ikinyingi Ayasaya lenge doko kiŋi kareya.
2KI 2:1 Yuu gii Kamongome Ilainja yake panda ketae nyuo lanyuo poo raiya minyuo malawai lao nyuo para doko pyaka siya. Dokopa Ilainjapa Ilaisapa yuu Gilikale yaki nyuo peyambi.
2KI 2:2 Peyambinyipa katasa pao Ilainjame Ilaisa dopa lamaiya. Kamongo dokome namba langyuo, Yuu Betele dokona puu lalamo dokona parowale. Emba dakena karena leya. Leyamopape Ilaisame isingi lao, Nambame yuu peparae Kamongo lete karenge doko kando yaki nyii nao rape rape lao karenge. Dokona lao namba lalu lao langyuo, Emba yaki nyii naro, leya. Dokopa nakamba yuu Betele dokona peyambi.
2KI 2:3 Akali poropeta malu palyuo doo palenge dupwame Ilaisa kareyamo dokona pao piso soo leyami. Kamongo Anatumi embena kamongo doko emba yaki nyuo kaeyo nyepala epapu para doko emba silipi mee? leyami. Waa, namba silyu, Ilaisame isingi leya. Dokonako lao pii laa kaemanale, leya.
2KI 2:4 Enakana Ilainjame Ilaisa lamaiya. Kamongo dokome namba langyuo yuu Jereko puu lalamo dokona parowale. Emba dakena mee karena leya. Dokopa Ilaisame isingi lao, Nambame yuu peparae Kamongo lete karenge doko kando yaki nyii nao rape rape lao karenge. Dokona lao namba lalu lao langyuo, Emba yaki nyii naro, leya. Dokopa nakamba yuu Jereko dokona peyambi.
2KI 2:5 Akali poropeta malu palyuo doo palenge dupwame Ilaisa kareyamo dokona pao piso soo leyami. Kamongo Anatumi embena kamongo doko emba yaki nyuo kaeyo nyepala epapu para doko emba silipi mee? leyami. Waa namba silyu, Ilaisame isingi leya. Dokonako lao pii laa kaemanale, leya.
2KI 2:6 Enakana Ilainjame Ilaisa lamaiya. Kamongo dokome namba langyuo, Ipwa Jotane dokona puu lalamo dokona parowale. Emba dakena karena leya. Dokopa Ilaisame isingi lao, Nambame yuu peparae Kamongo lete karenge doko kando yaki nyii nao rape rape lao karenge. Dokona lao namba lalu lao langyuo, Emba yaki nyii naro, leya. Dopa lapala nakamba peyambinyili pyuo peyambi.
2KI 2:7 Dokopa akali akalisa kingi pakimi nakamba peyambinyili pyuo moko minyuo ipwa Jotane dokona peyami. Dokopa Ilainja Ilaisapa ipwa repeta dokona imambu soo kareyambinyipa poropeta akali akalisa kingi paki dusipa mee umbisale kareyami.
2KI 2:8 Enakana Ilainja banya komau roko nyepala malawai lao rongo pipala ipwa doko piya. Piyamo dokopa ipwa doko kanya dokona liti pyuo nyuo karalyiya. Kata siyamo dokona Ilaisa baapa ipwa dumurena poko pyao peyambi.
2KI 2:9 Dumurena peyambinyipa Ilainjame Ilaisa piso soo leya, Namba ene nyepala paa naronopa wambo nambame aki mende emba keta pyakapili lao suu pilini, leya. Dokopa Ilaisame isingi lao, Rakange dokome banya ikinyingi moyange bange maingi doko suu pyao namba embena porainya renge doko jerene kando nyepala dokopa namba emba alo pyuo embena panda nyero doko, leya.
2KI 2:10 Leyamo dokopa Ilainjame isingi lamaiyuo, Embame pisingi pii andake piso silini. Nambame emba yaki nyuo paronopa kandare ramo doko emba porainya renge nyeresa pira. Dee kaepala embame namba kanda nare ramo doko emba porainya renge nyii naresa pira.
2KI 2:11 Nakamba kaeya nao pii lao kata pao peyambinyi dokopa aopa mena oseme ipyuo penge uliuli dopale mende isare rao epeya. Epapala nakamba peyambinyi kanya dokona isare rao kareya. Kareyamo dokopa poo raiya minyuo malawai lao epo Ilainja nyepala yake panda minyuo peya.
2KI 2:12 Peyamo dokopa Ilaisa doko kandapala Ilainja kando ee lao, Nambana rakane nambana rakane Isaraele poraiyuo iso karenge emba pelene lamo leya. Lapala baame Ilainja dee kanda naya. Baame Ilaisa sakame kumapala banya komau doko kanguo lamasa piya.
2KI 2:13 Dopa pipala enakana Ilainjana komau isa pao siyamo doko nyepala dee kapu kyuo ipwa Jotane marenge dokona pao kareya.
2KI 2:14 Karapala Ilainjana komau dokome ipwa doko pyapala baame yee lapala, Kamongo Ilainjana Anatu doko anja karape? leya. Lapala ipwa doko dee kamba piyamo dokopa ipwa doko paki paki nyuo karalyiya dokopa baa dokona kata pao dumurena peya.
2KI 2:15 Peyamo dokopa poropeta akali akalisa kingi paki Jereko range dupwame baa kandapala dopa lao, Ilainjana porainya renge doko Ilaisa keta palyamo, leyami. Dopa lapala nakama Ilaisa kando nyela pao nakama banya lenge kambu siyamo dokona pao ponga neyami.
2KI 2:16 Ponga nao karo dopa leyami. Namwa dae akali akalisa kingi paki porai dasipa karamano. Namwa embena kamongo akali doko koto kandala mwua. Kamongona Imambu dokome baa minyuo pao yuu kyau mendenape panda yuu lama mendenape yaki nyuo mee karena lapala pasaraŋa rapisi leyami. Dopa leyaminyi dokopa Ilaisa isingi lao, Daa nakama dokona paa nalapape, leya.
2KI 2:17 Dopa leyamopape nakama lao karalu kareyamisa epe naso makapala enakana dusale kapa koto kandala pena leyasa peyami. Papala akali akalisa kingi paki dusipame yuu gii rema nembo panda peparaena Ilainja koto kando papiyaminyipape baa kando nyii nayami.
2KI 2:18 Enakana nakama kapu kyuo Ilaisa yuu Jereko isaro kareyamo dokona peyami dokopa Ilaisame nakama kando dopa leya. Nambame nakama paa nalapape langi napusi? lamaiya.
2KI 2:19 Akali Jereko range lapome Ilaisa kareyamo dokona papala baa kando dopa leyami. Emba silini. Taone dake ama keyange wakasa sipyamopape ipwa koo wakasa ingyuo ipyamo dokona nyaŋa elya pyuo manjo nyii nalyaminyi, leyami.
2KI 2:20 Leyaminyi dokopa baame lao, Kota lapo disi enenge mendena palyapala minyuo epo namba jinya leya. Dopa pipala minyuo epo maiyami.
2KI 2:21 Dee baa ipwa guu lao epenge dokona peya. Papala kota doko pyale lao ipwa dokona nembapala dopa leya. Dake Kamongome dopa letamo. Nambame ipwa dake koo ingya nao kamame keyange wakasa ingyuo epena lao pipu. Dokona ipwa dokome wambu kuma nao dee wane mandenge dupwa mende pii nara, leya.
2KI 2:22 Ilaisame leyamuli pyuo yuu gii dokopa piso pao epapu ipwa kamame wakasa keyange ingyuo epenge.
2KI 2:23 Ilaisa Jereko yaki nyuo kaeyo yuu Betele dokona panya peyamo dokopa katasa wane lapome taone dokona karo epapala giyalya giyana pyuo baa kando leyami. Nakamame pii poraiyuo lapala, Emba banakapa singinde dakena epa kae, leyami.
2KI 2:24 Dokopa Ilaisa kapu kyepala imbumi kumuo nakama poraiyuo kandapala Kamongo dokona kingi lao nakama keta randa mende epena leya. Leyamo dokopa mena beya inya lama imwa dokona piso epapala wane akalisa kisima ipisu lama nao rokwalya rokwana pyuo nembeyambi.
2KI 2:25 Ilaisa baa yuu kyau Kamele dokona papala dee enakana yuu Samaria dokona kapu kyuo peya.
2KI 4:8 Yuu mendepa Ilaisa yuu Suneme kamongo enda palenge dokona peya. Dokona enda dokome Ilaisa banya anda nenge nala epena leya. Dee enakana dokona piso yuu peparae baa Suneme para pao banya anda nenge nao pisapa piya.
2KI 4:9 Enda dokome banya akalingi doko lamaiyuo, Akali dae yuu peparae epo karamo doko baa akali poo pyasi lamo lao silyu.
2KI 4:10 Nambwame anda kuki mende anda yangi ketae dokona pyakamimbanale. Dokona bete ratepe taepope isa petenge seyape dee lambepe retakamiramba. Dokopa yuu lapo baa dae epapa piramo dokopa baa anda dokona palipa pira, leya.
2KI 4:11 Yuu gii mendepa Ilaisa baa yuu Suneme dee kapu kyuo papala banya panda ketae dokona imambu sela peya.
2KI 4:12 Baame banya kendemande akali Geyasi lamaiyuo, Enda doko dae epena lena leya. Leyamo dokopa enda doko epeyamo dokopa
2KI 4:13 Ilaisa baame Geyasi dopa lamaiyuo, Enda dokome namwana lao randa nao bange rapa rapa pyakao nyisipyamo dokome baa nambame aki mende isingi nyisaro lao piso sinya leya. Kiŋi akali panda ami rapu pingi akali doko kando banya lao pii mende lamaiyakala pupili yaka lao suu pyara rapisi, leya. Leyamopape namba nambana range wambu dupwa pipya kapa karamano. Dokona bange mendeme yangyara ingya nalyamo, leya.
2KI 4:14 Ilaisame Geyasi piso soo, Dee nambame aki mende enda baa keta piro, leya. Geyasi isingi lao, Enda banya akalingi doko ando emo kaenge dee nakamba wane mende manja nange kandale, leya.
2KI 4:15 Leyamo dokopa Ilaisame Geyasi enda doko dae epena lena leya. Dokopa baa epo kambu dowa dokona kareya.
2KI 4:16 Kareyamo dokopa dee Ilaisame baa kando dopa leya. Rakya ee kana dokona yuu gii dakepa embame wane mende embena kingi dokona kupyuo retaro pisiri, leya. Wama anemapwae, Emba namba kando kyambo langi napipi. Emba Anatunya akali kandapi, leya.
2KI 4:17 Dopa leyamopape Ilaisa leyamuli pyuo ee kana epo peyamo dokopa enda doko wane kando nyiya.
2KI 4:18 Ee kana lapo pao otapeyamopa ee mandenge gii pyaka siyamopa yangama mendepa wane doko banya rakange ee dokona akali nyisingi dupwa pipya kareyamo dokona baa role pyao karala peya.
2KI 4:19 Pao kareyamo dokopa waiya lao baame banya rakange kyakale lao, Nambana ayemba randa pilyamo. Nambana ayemba randa pilyamo, leya. Leyamo dokopa rakangeme kendemande akali mende kando wane doko soo pao banya endangi mainya leya.
2KI 4:20 Leyamo dokopa kendemande akali dokome wane doko soo pao endangi maiyamopa endangimi pai dokona kupyaro peteyamo pao andawai korakama ingiyamopa wane doko kumuya.
2KI 4:21 Dokopa enda dokome wane doko manjo Ilaisana panda ketae dokona pulyuo pao banya luu palenge rate dokona retapala yaki nyuo kambu dowa upi lama neta epeya.
2KI 4:22 Epapala banya akalingi kyakale lapala dopa lamaiya, Kendemande akali dokona mende mena dongepa dae epena lena. Namba poropeta Ilaisa karamo dokona pupenge ingilyamo. Papala namba waiya lao dae dee kamba eparo, leya.
2KI 4:23 Dokopa akalingimi piso soo, Emba akipamo epapu parese? Doko epapu koro petenge misi lenge yuu gii panda kana enengena misi lenge yuu giipi ingya nalyamo, leya. Leyamo dokopa etengeme isingi lao, Doko mende daa kapa ingyara, leya.
2KI 4:24 Lapala baame mena donge mata dokona isa petenge doko retena lao dee banya kendemande akali doko dapa pinya lao, Donge doko ama waiya koo lao pena dee mona palyuo pyuo mende pii nana. Nambame mende langiru ramo dokopa iki mona palyuo piri, leya.
2KI 4:25 Dopa pyuo rapa rapa pipala enda baa yuu kyau Kamele Ilaisa kareyamo dokona peya. Ene dulisale epo kareyamopa Ilaisa baame epeyamo doko kandeya. Kandapala banya kendemande akali Geyasi lamaiyuo, Kanda. Enda Suneme range doko dulu epelyamo.
2KI 4:26 Emba waiya lao papala baamoo banya akalingi ikinyingipi nakama peparae kapa karamipi lao piso sela pare, leya. Piso siyamopa enda dokome Geyasi lamaiyuo, Peparae kapa ingilyamo, leya.
2KI 4:27 Dopa leyamopape enda baa Ilaisa kareyamo dokona epapala ponga naro karo banya kimbu doko minyareya. Dokopa Geyasimi enda doko repeta suu lanyi nembalana piya. Dopa piyamopape Ilaisame lamaiyuo, Enda doko minyanda nana daa. Enda doko ama mona nembo ingi randame kumuo epelyamo doko emba kanda nalese? Dopa pipyamopape Kamongome namba pii mende langya napya, leya.
2KI 4:28 Enda dokome Ilaisa lamaiyuo, Nambame emba piso soo, Wane jii, leyose? Namba kando minyako pii napipi lao langya nayose? leya.
2KI 4:29 Dokopa Ilaisa kapu kyepala Geyasi kando dopa lamaiyuo, Nambana pangali doko nyepala waiya lao puu. Parenepa katasa mendali kandee kande yako laa napipi. Dee mendeme emba yako leya kande yuu gii lapo nembo isingi laa napipi. Emba anda dokona rolae papala nambana pangali doko wane doko silyamo dokona ketae minyaro karape, leya.
2KI 4:30 Enda dokome Ilaisa lamaiyuo, Kamongo lete karenge dokope embape dolapona kingi lao nambame emba yaki nyii naro lao lalu lao leto, leya. Dopa lapala nakamba laparae dee kapu kyuo laeyo epeyambi.
2KI 4:31 Dokopa Geyasi baa wambo epapala Ilaisana pangali doko wane siya dokona ketae minyalyaro kareya. Dopa piyamopape mende dokona koo pyuo lenge rele lao pii naya. Dopa piyasa baa dee kapu kyuo Ilaisa kareya dokona papala baa lamaiyuo, Wane doko lenge raa nalamo, leya.
2KI 4:32 Dopa leyamo dokopa Ilaisa epapala baa iki luu palenge panda dokona pao wane kumasi siya doko kando nyiya.
2KI 4:33 Kando nyepala baa kambu upi lapala Kamongo kando ateŋa leya.
2KI 4:34 Ateŋa lapala enakana wane paleya dokona ketae banya kambu lengepe dee kingipi dupwa wanena kambu lenge kingipi dokona kapa kapa pyuo retapala baa ketae dokona paleya. Dopa pyuo baa sisiki silyi lao pyasinju leyamo dokopa wanena yongo doko isasa piya.
2KI 4:35 Dokopa Ilaisa sipurapala panda dupwana awali lao papyuo karo dee enakana wane siya dokona dee papala ketae dokona pyasinju lapala wambo siyamuli pyuo siya. Dokopa wane doko yuu yanda ipingi nyepo imwaketa pyapala enakana baa lenge reya.
2KI 4:36 Ilaisame Geyasi kyakale lapala baa lamaiyuo, Wanena endangi kee lena leya. Enda doko andakare epeyamo dokopa Ilaisame baa lamaiyuo, Embena ikinyingi doko kupyuo nyepe, leya.
2KI 4:37 Dokopa enda baa Ilaisame kimbu siyamo dokona pao palipala banya lenge kambu dokome yuu warendaro karena lapala enakana baame banya ikinyingi range nyepala peya.
2KI 5:1 Nemane baa yuu Siria range yanda singi dupwana rapu pingi mupwa ingyuo kareya. Dopa pyuo kareyamo dokopa Kamongo dokome nyisiyamopa Siria yanda singi dupwame nakamana nyisu petenge pyao anamasi minyiyami. Dokona lao Siria kiŋi dokome Nemane wakasale ingyuo suu pyao banya kingi minyuo ketae pyambuya. Baa yanda singi andake ingyuo kareyamopape baa banya yanenge dokona rete rapa neyamo kareya.
2KI 5:2 Yuu gii mendepa Siria wambu dupwame Isaraele dupwa walu lao pyapala Isaraele wanake mende nyuo lanyuo peyami doko Nemanena etengena kendemande ingyuo peteya.
2KI 5:3 Yuu mendepa wanake dokome emba banya yulu pyakamingi doko lamaiyuo dopa leya. Nambame nambana kamongo doko poropeta akali yuu Samaria palenge doko kandala pupyali yaka lao suu pilyu. Baame banya anga yakane doko kapa pyuo nyera, leya.
2KI 5:4 Nemane baame pii doko sepala baa kiŋi peteyamo dokona papala baa wanake dokome pii leyamo doko lamaiya.
2KI 5:5 Dokopa kiŋi dokome dopa lamaiya. Isaraele kiŋi pisipyamo dokona pepa dake minyuo pena leya. Leyamo dokopa Nemane panya rapa rapa pyuo kana kulingi taosande akalisa rema (30,000) kana golo taosande pakinyamange (6,000) dee komau ama keyange akalisape nyepala minyuo peya.
2KI 5:6 Baame pepa minyuo peya dokona pii dopa lao paleya. Pepa dakeme nambana yanda singi akali mupwa Nemane lenge dokona lao langira. Embame banya rete rapa neyamo doko pyuo nyipili yaka lao suu pilyu.
2KI 5:7 Isaraele kiŋi dokome pepa doko yaka lapala baa mona nembo pako banya komau doko minyuo kanguo wama yaa, leya. Akipamo yuu Siria range kiŋi dokome nambame akali dake pyuo nyere lao suu pilyase? Baame namba Anatu lao suu pyao letena rengepe dee kumunginya rengepe dolapona porai renge doko namba keta palenge lao suu pilyase? leya. Doko angi rolae doko baame namba pipya laiya lambwali yaka lao suu pilyamo, leya.
2KI 5:8 Pii doko dopa pilyamo leyami doko poropeta Ilaisa sepala baame kiŋi doko keta pii wai nembo lao, Emba akipamo mona rando karene? Akali doko namba mapanyi peya. Dopa pirinyi dokopa poropeta akali mende yuu Isaraele dakena karapyalyamo lao soo gisara lao lasaka piru, leya.
2KI 5:9 Dokopa Nemane banya oseme ipyuo papingi uliuli dokona piso pao Ilaisana anda kata penge dokona pao imambu soo kareya.
2KI 5:10 Dokopa Ilaisame banya kendemande dokona mende dopa lao lamaila pena leya. Leyamo dokopa baame Nemane baa lamaiyuo, Ipwa Jotane dokona yuu yanda ipingi nyepo wate pipa pyuo kararene dokopa banya anga yakane rete rapa nenge doko ama peparae otara, lamaiya.
2KI 5:11 Dopa lao lamaiyamopape Nemane imbumi kumuo baa range dopa leya. Baame namba karo dokona kamanda epo banya Kamongo Anatu doko kando ateŋa lao banya kingi dokome nambana rete dokona ketae pyao nembo namba pyuo nyipyali lao suu pyapu, leya.
2KI 5:12 Dee mende opetae dopa leya. Yuu Isaraele dokona ipwa epenge dupwa manda manjo daa. Ipwa Apana Papape yuu Damasakesa dokona epenge ama keyange wakasa. Namba ipwa dolapona mendena wate pipuli dee dokopa nambana rete dupwa otapyali, leya.
2KI 5:13 Dokopa banya kendemande akali dupwame baa kareyamo dokona papala baa lamaiyuo, Kamongo, poropeta akali dokome yulu andake mende pii, langipyali doko emba mee kapa pipili. Dokona epapu dakepa embena rete doko umbwa pira lao akipamo emba mee wate pipala paa nare? leyami.
2KI 5:14 Dokopa Ilaisame leyamuli pyuo Nemane ipwa Jotane dokona lano pao yuu yanda ipingi nyepo ipwa dokona kuru pao wate pipa piyamo dokopa banya yongo peparae keyange ingiya. Rete umbwa pyuo oteya. Banya yanenge doko keyange wakasa ingyapala wane nyaŋana yongo dopale ingiya.
2KI 5:15 Baa kapu kyuo banya akali dupwa pipya Ilaisa kareyamo dokona pao dopa leya. Namba epapu silyu. Anatu wakale mende kara nange. Isaraele wambunya Anatu dokoko angi karenge. Dokona nambana bange rae maiyuo jilyu dake emba nyepe, leya.
2KI 5:16 Ilaisame isingi lamaiyuo, Kamongo lete karenge nambame lakandenge dokona kingi lao embena bange jerene doko nyii naro lalu lao leto, leya. Nemane baame bange maiyuokondali pyuo kareyamopape Ilaisame nyii nalu nao naro, leya.
2KI 5:17 Dopa piyasa Nemane dopa leya. Embame bange jipu dupwa daa letene doko kapa kaeyalase. Nambame yuu lapo kyaso nyepala nambana mena donge lamana mata dokona nyuo pyambwapala minyuo nambana yuu range dokona retaro. Dokona lao embame namba nyii, larene. Renge dokona lao, Epapu dakena piso pao dee rengyape nambame bange rendamu pingi mende yango anatu wakale mende mai naro. Kamongo Anatu dokoko iki mairu.
2KI 5:18 Dokona lao namba nambana kiŋi doko pipya Orimone Siria wambunya anatu wakale mendena tembole anda dokona lakandala paronopape Kamongo dokome namba yaki nyii nao kame sakapyali lao suu pilyu, leya.
2KI 5:19 Ilaisame baa lamaiyuo, Emba manda rao pupu leyamo dokopa Nemane yuu doko yaki nyepala mee mende dulisale peya.
2KI 5:20 Peyamopa Ilaisana kendemande akali Geyasimi range dopa lao suu piya. Nambana kamongo dokome Nemaneme mende ropo pyao jii napyamo mee pena lalamo kandapi. Baame Siria range akali dokome bange mainya doko nyipyali doko kapa ingyapyali. Kamongo lete karenge dokona kingi lao namba baa pelyamo dokona makando papala bange lapo nyero, leya.
2KI 5:21 Dopa lapala baa kata nyepala Nemane peteta peya. Dokopa Nemaneme akali mende makando baa peteta epeyamo doko kandapala baa banya mena oseme ipyuo papingi uliuli dokona piso isa epo baa kando nyela epeya. Epapala baa piso soo, Mende kapa ingya nalyase? lao piso siya.
2KI 5:22 Dokopa Geyasi isingi dopa lao, Doko mende pii nalyamo daa, leya. Dopa piyamopape nambana kamongo dokome namba emba langyala puu lapyamo epelyo. Doko ene dakepa akali poropeta lapo yuu kyau Eporaime palenge dokona lama epambinyi. Dolapo imbinyi dokona Nemane baame nakama kana kulingi taosande rema (3,000) dee komau keyange lama maipili yaka letamo, leya.
2KI 5:23 Dokopa Nemane isingi lao, Doko kapa. Kana kulingi taosande pakinyamange (6,000) nyepala pena, leya. Nemaneme nyinyakao lao kana kulingi dupwa nyuu lamana paki pyuo yaki pyuo baa komau ama keyange lama dolapo nyuo banya kendemande akali lama maiya. Maiyamo dokopa nakamba wambarapala minyuo pena lao enakana Geyasi pena leya.
2KI 5:24 Nakama Ilaisa palenge yuu kyau repeta kando nyepala dokopa Geyasimi kana nyuu dolapo nyepala soo pao anda dokona peya. Dopa pipala enakana Nemanena kendemande akali dolapo range dee kapu kyuo pena leya.
2KI 5:25 Lapala dokopa baa anda dokona peyamo dokopa Ilaisame baa piso soo, Emba anja piso epane? leya. Namba mendasa paa napu, isingi leya.
2KI 5:26 Dopa leyamopape Ilaisame lao, Akali baa banya oseme ipyuo papingi uliuli yaki nyuo isa epo emba kando nyela ipyamo dokopa namba imambu ingyuo kando kara napusi? Yuu gii dakepa kanape komaupi ee dupwana isa olipi girapope andenge dupwape sipisipipi bulamakaope kendemande dupwape nyepengele daa.
2KI 5:27 Dokona epapu Nemanena rete rapa nenge doko emba keta palena dee rengya embena wai kiso nyere para pyasi dupwa keta palu puu pao para, leya. Enakana Geyasi yaki nyuo peyamopa baa rete doko angi kando sepala banya yanenge doko kewa wakasa lao mara yoko kondasi dopale ingiyamo peya.
2KI 6:1 Yuu gii mendepa poropeta akali Ilaisamoo role yulu pyuo karenge dupwame baa kando mumu lao, Namwa yuu palimwa dake kamame kuki koo ingilyamo, leyami.
2KI 6:2 Dokona namwa anda mende pipala dokona palirama lao embame namwa ipwa Jotane repeta isa dupwa pokala pupwa, larene, leyami. Dokopa Ilaisame isingi lao, Doko kapa pinya, leya.
2KI 6:3 Leyamo dokopa mendeme baa piso sokondali pyuo baa opetae nakama pipya monale leya.
2KI 6:4 Leyamo dokopa baa kapa lapala nakama peparae role pyao peyami. Pao Jotane repeta epapala dokopa nakama kanda soo yulu piyami.
2KI 6:5 Mendeme isa pokanyi palyiyamo dokopa aopa banya kapwa wua rumbiwa denge pyakupala ipwa dokona isa peya. Isa peyamopa akali dokome Ilaisa kando lao, Anemapwae, namba apa pirusi? Wua doko wakalemana kee lao nyipu, leya.
2KI 6:6 Dokopa Ilaisame lao, Anjalapona ingyuo isa paamo lao piso siya. Piso siyamopa akali dokome panda peyamo doko lasaka piya dokopa Ilaisame isakuli mende pyakepo nyepala ipwa dokona pyao nembeya. Dopa piyamopa wua kapwa doko ketae soo papiya.
2KI 6:7 Dokopa baa akali doko waiya lao nyisa nyinya leyasa akali dokome ponga napala banya kingi dokome minyalyuo nyiya.
2KI 6:8 Yuu Siria kiŋi doko Isaraelepa yanda pyuo kareyami. Baame banya yanda singi mupwa dupwa pipya pii wato lao panda mendena nakama anda pyuo palirama lao rombo palyiya.
2KI 6:9 Dopa piyamosa Ilaisame Isaraele kiŋi peteyamo dokona pii wai mende nembapala lamaikondali pyuo yuu dokona repeta paa nana daa leya. Renge dokona Siria yanda singi dupwa isaro pyalana pyuo kareyaminyi dokona paa nana daa lao leya.
2KI 6:10 Dokopa Isaraele kiŋi dokome pii doko sepala akali yuu dokona paleyami dupwa pii repe repe pyuo lamaiyamopa nakama kando isaro kareyami. Yuu gii mendasipa kiŋi dokome dopa pipa piya.
2KI 6:11 Dopa piyamosa yuu Siria kiŋi akali dokome wakasa imbwuapala banya yanda singi mupwa dupwa epena lapala piso siya. Nakama api mende Isaraele kiŋinya arapu dokona karase? leya.
2KI 6:12 Mendeme dokona isingi lao, O kiŋi andake doko, mende Isaraele role pyao kara nalyaminyi. Poropeta akali Ilaisame emba iki embena urumu dokona piso pii elya kalo lenge doko Isaraele kiŋi doko lamaingi, leyami.
2KI 6:13 Dokopa kiŋi dokome nakama lamaiyuo, Baa anja karamo lao koto kandalapape. Dopa piraminyipa nambame baa minyaro nyero, leya. Ilaisa baa yuu Dotane dokona karapyaŋa lao lamaiyaminyipa
2KI 6:14 baame banya yanda singi malu dupwa mena oseme ipyuo penge uliuli dokona piso dee mena osena mata dokona piso pena lao nembeya. Nakama kukwa pao yuu taone doko kando nyepala yuu doko sukusa palyuo kako pyao oteyami.
2KI 6:15 Wamba kukwa dokopa Ilaisana kendemande akali doko sipurapala anda yaki nyuo kamanda peya. Papala baame Siria yanda singi dupwa nakamana mena osena matana piso dee mena oseme ipyuo papingi uliuli dokona piso kareyaminyi dupwa taone dokona kako piyami doko kandeya. Kandapala baa kapu kyuo Ilaisa kareyamo dokona papala, Anemapwae namwa apa piramape? Namwa epapu kumalomano lamo, leya.
2KI 6:16 Dokopa Ilaisame baa lamaiyuo, Emba paka napipi. Nakamana dorena karaminyipape namwana darena malu mee karamano, leya.
2KI 6:17 Lapala dokopa baa ateŋa leya. O Kamongo, banya lenge lumbwakamipi. Dokopa baa kandenale, leya. Dokopa Kamongo dokome ateŋa doko isingi yano pyakamiya. Dokopa Ilaisana kendemande akali doko ketae kandalyiyamo dokopa yuu kyau dokona mena osepe mena oseme ipyuo papingipi uliuli isare pipya Ilaisa kareya dokona kako pyaro kareyaminyi kandeya.
2KI 6:18 Siria yanda singi dupwame kata roko pyalana piyami dokopa Ilaisa ateŋa piya. O Kamongo, akali dasipa pyao lenge kwuanyi nemba, leya. Dokopa Kamongo dokome ateŋa doko isingi yano pyakamyuo akali lenge dupwa pyao kwuanyi nembeya.
2KI 6:19 Nembapeyamo dokopa nakama kareyami dokona Ilaisa papala nakama lamaiyuo, Nakama kata angi dokona kara nalyaminyi yuu taone nakama kando nyelana lao suu pilyaminyi doko dake daa. Namba paronuli pyuo eparaminyi dokopa nambame akali nakama kandalana lao suu pilyaminyi doko karapyamo dokona lanyuo paro, leya. Dopa lapala baame nakama lanyuo yuu Samaria dokona peya.
2KI 6:20 Nakama yuu taone doko kolando papeyaminyi dokopa Ilaisa baa aopa ateŋa piya. O Kamongo, nakamana lenge rena lakamipi. Dokopa nakama kandenale, leya. Dokopa Kamongo dokome ateŋa doko isingi yano pyakamiya. Dokopa nakamana lenge dee epo rengenyili pyuo reyami. Rapala kandeyaminyi dokopa nakama Samaria sukusa kareyami.
2KI 6:21 Dokopa Isaraele kiŋi dokome Siria yanda singi dupwa kandapala baame Ilaisa piso soo, Nambame dupwa pyaowape? Yangone, dupwa nambame pyao kumakaowape? leya.
2KI 6:22 Baame isingi lao, Daa, leya. Embame yanda singi dupwa yanda pipala winimi pyuo anjo minyaro karene dupwa pyao kuma nare ingilyamo. Dokona lao embame akali dupwa ipwape nengepe lapo nena lao maipala nakamana kiŋi petamo dokona kamba kapu kyuo pena lape, leya.
2KI 6:23 Dokopa Isaraele kiŋi dokome nakamana nenge andake rapa rapa pyakamiya. Enakana ipwa nenge dupwa napeyaminyi dokopa akali dupwa Siria kiŋi peteyamo yuu dokona range pena leya. Dokopa dee enakana dokona piso Siria range dupwame Isaraele yuu doko nyelana suu lao piyami doko kaepala kaeyami.
2KI 6:24 Yuu gii lapo papeyamopa enakana yuu Siria kiŋi Benatate lenge dokome banya yanda singi peparae lanyuo Isaraele dupwa pipya yando palyuo yuu taone Samaria dokona epo nyiyami.
2KI 6:25 Dopa piyaminyi dokome taone dokona nenge see nayamosa lopo andake sepala mena dongena ayemba doko kana kulingi akalisa mange lama karo nembo ropo piyami. Dee epalesa anane kuki lamana kana kulingi kingi paki peya.
2KI 6:26 Peyamo dokopa Isaraele kiŋi doko baa yuu taonena kana kame dokona ketae kata pao kareyamopa enda mendeme ee lao, O kiŋi andake, namba nyisa, leya.
2KI 6:27 Dokopa baame isingi lamaiyuo, Kamongo dokome emba nyisa nara ramo doko apa pyuo nambame emba nyisakaro ingilyape? Nambana witi panda waene mende silyase?
2KI 6:28 Embena aki randa mende epelyamo, lao piso siya. Piso siyamo dokopa enda baame isingi leya. Yuu mendepa enda dae karamo dakeme suu pyapala nambana wane doko nambana lapya. Dee rakya yangama banya wane doko naramba, leya.
2KI 6:29 Dopa leyasa nambana wane yangapala baa neyamba. Dee yangama nambame baa lamaipala banya wane doko nambanale, leyo. Doko kaepala banya wane doko yalu piyapya.
2KI 6:30 Pii dake kiŋi doko sepala baa mona nembo pako banya komau doko kanguya. Dokopa wambu kame repeta kareyami dupwame kandapala baame kumanda wapungi komau mende banya komau isarena wapupyalyamo, leyami.
2KI 6:31 Anemapwae yuu gii dake ene otapa naramopa wambu mendeme Ilaisana mange doko pyakepanyi nemba nara ramo Anatumi namba pinya, leya.
2KI 6:32 Dopa lapala baame wai pii minyingi akali mende Ilaisa nyela pena leya. Yuu gii dokopa Ilaisa baa banya anda akali andapae lapo baa kandala epeyami dupwa pipya role peteyami. Wambo kiŋinya wai pii minyingi doko epapa nayamopa Ilaisame akali andapae dupwa lamaiyuo, Akali wambu pyao kumakaenge dokome mendali dae namba pyala pena lalamo lamo. Epapu baa dae repeta epeya kande doko kambu dowa doko upi lapala baa andakare epa nana lamailapape. Kiŋi baa enakana oo repeta epara, leya.
2KI 6:33 Pii dake lao oteyamopa aopa kiŋi doko epo pyaka sepala dopa leya. Randa dake Kamongo dokome namwa jilyamo. Dokona baa mende pira lao akipamo namba lama opetae isaro kararope? leya.
2KI 7:1 Ilaisame isingi lao, Kamongo dokome aki letamo lao see. Yuu gii dapwa pipya rakya embame Samaria makete dokona witi kilokerame rema panda bali kilokerame pakinyamange emba kana kulingi mendaki maiyuo ropo pyare ingilyamo, leya.
2KI 7:2 Akali kiŋi dokopa role pyao pao baa nyiso karenge dokome Ilaisa lamaiyuo, Doko pii nara ingilyamo. Kamongo baa rangeme apunda waiya lao dakepa pena laramopape doko kapa ingya nara. Dokopa Ilaisame isingi lamaiyuo, Embame doko piramo kandare. Kandarenepape embame nenge dupwana lapo nyuo naa nare, leya.
2KI 7:3 Akali kisima nakamana yanenge dokona rete rapa pingi dokome randa nao karenge dusipa yuu taonena kana kame kambu dokona kamandarena karapala nakama range mendali kanda kanda pyuo dopa leyami. Akipamo namwa dakena isaro karo namwa kumaramase?
2KI 7:4 Dopa piramopape namwa yuu taone sukusa dokona papala lopome kumarama dokome paa narama ingilyamo. Dopa piramopape namwa dakena kararama ramo namwa kumaramakolyamo. Dopa piralyamo dokona namwa Siria wambu dupwa komau anda pyuo palimi dokona monale. Dokona namwa kando koo andake ingyuo pyakarami doko namwa pyao kumakarami. Dee mende ramo namwa kyawa minyuo kaeyakarami rapisi, leyami.
2KI 7:5 Dopa lapala yuu kwuala peyamo dokopa nakama Siria wambu komau anda pyuo paleyami dokona peyami. Dopa pyuo pao repeta kando nyiyaminyi dokopa mendali dokona kara nayami.
2KI 7:6 Kamongo dokome Siria ami yanda singi dupwa sinya lao yanda singi mena ose matana pisope dee mena oseme ipyuo penge uliuli pii lenge dopale ingyuo leya. Dokopa Isaraele wambu dupwame Iti wambunya kiŋipi dee Isipi wambunya kiŋipi dee nakamana ami yanda singipi dupwa nakama pyala pena lao kana maimilyamo lao Siria dupwame suu pyao kareyami.
2KI 7:7 Dokona lao Siria wambu dupwa nakamana mena osepe dongepe dee komau andape dupwa yaki nyuo nakama kuma narama lao pyako wakale wakale peyami. Dokopa yuu anda paleyami dupwa singi dopale ingyuo sinya lao mee yaki nyuo peyami.
2KI 7:8 Dokopa akali kisima komau anda pyuo paleyami dokona kaepeta dusa pao kando nyepala komau anda mendena kolando peyami. Papala nenge ipwape doo siyamo dupwa nyuo neyami. Napala kana kulingipi dee kana golope dee komaupi lapo siyamo kandeyami dupwa nyiyami. Nyepala anda doko yaki nyuo papala bange dupwa yalu piyami. Pipala kambako kapu kyuo epeyami. Epo komau anda mendenako konando peyami. Papala doo piyami dopako pyuo bange siyamo dupwa nyiyami.
2KI 7:9 Enakana nakama range mendeme mende kando lao, Namwa dapa pii napala namwa wai pii enenge doko sepala retaro kara narama ingilyamo. Namwa pii doko rakya yangama lamairama lapala kaeyarama ramo doko namwa randa nyerama. Dokona lao yuu gii dakepa aopa papala kiŋinya akali mupwa dupwa lamaila mwua, leyami.
2KI 7:10 Dokona lao nakama Siria wambunya komau anda pyuo paleyaminyi doko yaki nyepala yuu taone Samaria dokona kapu kyuo peyami. Papala kame kambu dokona akali iso karenge dupwa kee leyami. Lapala lamaiyuo lao, Namwa Siria wambu palimi dokona pumwa doko mendali kandope pii mende soope pii nalamano. Dee mena ose dongepe dupwa anjaro palimi. Komau anda dupwa Siria wambumi yaki nyuo peyaminyi dopaleko karapya, leyami.
2KI 7:11 Dokopa kame kambu dokona iso karenge akali dupwame pii doko arome pyao leyaminyisa pii doko pao kiŋinya anda dokona polo lamaiyami.
2KI 7:12 Dokopa yuu doko mee kukwa ingyuo kareyamopa kiŋi doo rate dokona luu paleya doko sipurapala banya akali mupwa dupwa lamaiyuo lao, Siria wambu dupwame namwana lao mende lao lao rapa rapa pyuo retakami doko nakama langiruwale. Nakamame dae namwa lopo andake sipyamo doko soo nyimi. Soo nyepala dokona lao nakama palimi anda yuupi dupwa yaki nyepala yuu muu wangu kipwa kipwa dupwana yalu pela pumi. Nakamame namwa yuu taone dake yaki nyepala nenge koto parami dokopa nakamame namwa lete minyaro nyepala yuu taone doko nakama nyerama lao suu pyami, leya.
2KI 7:13 Dokopa banya akali mupwa dupwana mendeme lao, Wambu yuu taone dakena dae petaminyi dapwa wambu wambo lapo kumuyami kande dopale ingyuo kumalaminyi. Dokona lao namwame akali lapo mena ose kingi paki pyarepala pao karaminyi dakena piso pena lama. Lapala namwame apa pilyape lao kandamanale, leya.
2KI 7:14 Dokopa nakama akali lapo rombo palyapala kiŋi dokome mena oseme ipyuo papingi uliuli lamana piso pena leya. Papala Siria yanda singi dupwa apa pimi lao karo kando sepala epena leya.
2KI 7:15 Dokopa akali dupwa Jotane nanesale pao karo kandeyami dokopa Siria dupwa pyako pao bange dupwape komau dupwape yaki nyiyami dupwa siyamo kandeyami. Kandapala nakama kapu kyuo epo kiŋi doko lamaiyami.
2KI 7:16 Dokopa Samaria wambu dupwame Siria wambu dupwa anda pyuo paleyami dokona papala bange peparae nyuo oteyami. Dokopa Kamongome leyamuli pyuo nenge witi keyange kilokerame rema ingyuo panda nenge bali jingi kilokerame pakinyamange ingyuo ropo pyao maiyuo kana kulingi mendaki nyiyami.
2KI 7:17 Dokopa kiŋi dokome akali mupwa baa nyiso role pyao papiyambi doko yuu taone kame kambu dokona iso karena leya. Kiŋi doko wamba Ilaisa kandala peyamo dokopa dopa pira leyamuli pyuo akali mupwa doko wambu dupwame baa kalyuo injiyamisa baa kumuya.
2KI 7:18 Ilaisame akali kiŋi doko lamaiyuo, Yuu gii dakepa rakya nenge witi keyange kilokerame rema ingyuo panda nenge bali jingi kilokerame pakinyamange ingyuo dupwa Samaria makete dokona kana kulingi mendaki maiyuo ropo pyarami, leya.
2KI 7:19 Dokona lao akali mupwa dokome isingi lao, Dopa pii nara Kamongo dokome epapu dakepa aopa apu peyapyali doko dopa pii napyaliko, leya. Leyamo dokopa Ilaisame isingi lao, Dopa piramo doko emba angi kandarenepape nenge angi mende naa nare, leya.
2KI 7:20 Doo leyamo dokona ingyuo baa kumuya. Wambu lapo yuu taone dokona kame kambu repeta kareyaminyi dupwame akali iso karenge doko kalyuo injiyamisa baa kumuya.
2KI 13:14 Poropeta akali Ilaisa baa wambu kumungi angande pyapala kumara ingiyamopa luu palyuo siya. Siyamo dokopa Isaraele wambunya kiŋi Joaseme baa kandala peya. Papala baa pii poraiyuo lao ee lao lao, Nambana rakane, nambana rakane, emba Isaraele wambu dupwa porai ingyuo rapu pyuo karenge, leya.
2KI 13:15 Leyamo dokopa Ilaisame baa lamaiyuo, Yanda wangape lapo nyinya leya. Leyamosa Joaseme yanda wangape dupwa nyiya.
2KI 13:16 Nyiyamo dokopa Ilaisame pyara doko suu pyao rapa rapa piru karena leya. Dokopa kiŋi dokome lamaiyamuli pyuo rapa rapa piru kareya. Piyamo dokopa Ilaisame banya kingi dolapo kiŋinya kingi dokona ketae reteya.
2KI 13:17 Dokopa poropeta dokome pii lamaiyamuli pyuo dokopa kiŋi dokome yuu Siria kanda kanda windowa doko lumbuya. Dokopa Ilaisame lao, Wanga doko pinya leya. Dokopa kiŋi dokome piyamo dokopa aopa Ilaisame lao, Emba Kamongona wanga dopale. Emba keta baame Siria wambu pipya pyao wini pira. Emba Siria wambu dupwa yuu Apeke dokona palenge dupwa pyarene pao wini pipala kaeyare, leya.
2KI 13:18 Dokopa Ilaisame kiŋi doko lamaiyuo, Wanga mende nyepala doloma pipya yuu dokona pyao pisinya leya. Dokopa kiŋi dokome yuu dokona yuu rema pyao pisapala kaeya.
2KI 13:19 Dopa piyamo dokome Ilaisa imbwuapala kiŋi doko lamaiyuo lao, Emba yuu dokona yuu kingi pakipi dee pakinyamangepe pyao pisapili doko Siria pipya pyao wini pyuo pyao otapili. Doko kaepala epapu embame yuu rema iki pyao wini piri, leya.
2KI 13:20 Dokopa Ilaisa kumuyasa malu piyami. Ee kana yaka lao Moape rara dupwame Isaraele wambunya yuu dokona pyao nyelana pyuo epeyami.
2KI 13:21 Yuu gii mendepa wambu dupwame akali mende malu pyuo karo dokopa Moape akali doo epeyaminyi dupwana lapo epeyaminyi kandeyami. Kandapala yanenge kakapange doko Ilaisana malu anda dokona nyuo nembapala nakama makando peyami. Dokopa aopa kumasi yongo doko pao Ilaisana kuli doko kando nyiyamo dokopa akali doko sipuro lete epo roya kareya.
2KI 18:9 Ee kana kisima Esekaya yulu piyamo dokopa kiŋi Osea ee kana yanda ipingi nyepo Isaraele yuu dokona kiŋi ingyuo kareya. Dokopa Asiria akali mupwa kingi Salemanesa lenge dokome yuu Isaraele dokona sukusa epo pyao nembo dee Samaria nyuo karapusi palyuo piya.
2KI 18:10 Karapusi sukusa paleyaminyi pao ee kana rema dokona Samaria doko isa peya. Kiŋi akali Esekayame ee kana pakinyamange dokona kiŋi yulu pyuo kareyamopa Oseame baa ee kana mange mendaki karo kiŋi yulu pyuo kareyamopa Samaria isa peya.
2KI 18:11 Dokopa yuu Asiria akali mupwa dokome Isaraele wambu dupwa karapusi pyao minyuo yuu Asiria dokona papala wambu lapo yuu taone Ala lenge dokona karena lao dee lapo yuu Gosane dokona ipwa kingi Apo lenge epenge repeta dokona palena lao yaki nyuo dee wambu lapo yuu Mitia taone dupwana palena lao yaki nyiyami.
2KI 18:12 Doko nakamana Kamongo Anatu warombo see nayami dokona Samaria wambu dupwa nakama isa peyami. Dopa pyuo Kamongome nakama pipya kana minyuo lalu lao leyamo pii doko minyuo pii nayami dee Kamongona kendemande akali Mosese keta lowa pii maiyamo dupwa warombo soo minyuo kara nayami. Nakama dupwana soo nyuope warombo soo minyuo pyuope pirami ingya naya.
2KI 18:13 Ee kana akalisa ipisu kisima dokona kiŋi Esekaya baa iso kareyamo dokopa yuu Asiria akali mupwa Senakeripi lenge dokome Juta taone kana kame andake awali lao pingi dupwa pyao wini pyuo isa palyiya.
2KI 18:14 Dokopa Esekayame akali Senakeripi yuu Lakisi dokona kareyamo doko keta pii wai nembo lao, Nambame kopetame pyuo koo piyuŋu dokona embame akali bange mende jii lao pyuo jeroŋo yuu pyao kokwa soo nyilini doko kaeyape, leya. Leyamo dokopa akali mupwa dokome pii isingi lao, Akali Esekaya dokome kana kulingi kilokerame taosande akalisa (10,000) joo dee kana golo kilokerame taosande mendaki (1,000) ingyuo joo pinya leya.
2KI 18:15 Dokopa Esekayame tembole anda dokona kana kulingi siyamo dupwape dee kiŋinya opisi kana retenge panda dokona siyamo dupwa peparaepe nyuo maiya.
2KI 18:16 Maipala dee kamame kana golo tembole anda kambu dowa dokona pisingi dupwa rekya lao nyuo dee kambu dowa palyalena isa kareyami dokona baa rangeme rambu lao pisiyamo dupwa nyuo pipala Senakeripi maiya.
2KI 18:17 Dokopa yuu Asiria akali mupwa dokome yuu Lakisi yanda singi ami ama malu dupwame Esekaya baa yuu Jerusaleme kareyamo dokona pyala pena leya. Peyaminyi dokopa banya akali mupwa rema dusipame dopa pinya dapa pinya lao wambo laminyiyami. Nakama Jerusaleme epo pyaka sepala dokopa panda komau wasingi dokona kata repeta singi dokona kareyami. Kata doko ipwa pete ketae singi doko minyuo epenge suu dokona repeta siya.
2KI 18:18 Dokopa nakama kiŋi Esekaya epena leyamo dokopa banya akali mupwa rema dusipa nakama kando nyela peyami. Ilikayana ikinyingi kingi Eleakimi lenge akali doko baa kiŋinya anda mupwa ingyuo karenge dokope dee akali Sepena lenge kote singi dupwana pii dupwa pepana pyao pisakamingi dokope dee akali Asapena ikinyingi kingi Joa lenge baa pepa pingi dupwana mupwa ingyuo iso karenge dokope kando nyela peyami.
2KI 18:19 Dokopa yuu Asiria akali mupwa dusipana mendeme nakama lamaiyuo, Apa pipyamosa kiŋi Esekaya baa range wini pira lao akali mupwa dokome selana letamo, leya.
2KI 18:20 Baa piso sokondali pyuo lao, Embame pii dupwa yanda pyuo mora petengepe poraingipi dupwa kapa isa palyarami lao suu pilisi? Asiria akali dupwa mata mairu lao apimi emba nyisara lao suu pilisi?
2KI 18:21 Isipi range dupwame emba nyisarami lao suu pyale pyale karene. Dopa lao suu pyarenepape wambu dupwame yangi lapo pangali ingyuo minyuo paraminyipa yangi punjapala kingi nara. Doko suu pyao wambu mendali Isipi wambunya kiŋi dokome nyisapyali lao baa rungi rungi pingi dokopa dopako pira, leya.
2KI 18:22 Lapala baa konda pyuo lao, Nakama nakamana Kamongo Anatu keta pyamalyuo karamanoŋo doko namba langiramisi? Esekayame Kamongona lakandenge panda poo pyasipi dee kana pyare lasipi dupwa kokwa sinyi nembeya. Nembapala Juta wambupi dee Jerusaleme wambupi dupwa lamaiyuo, Yuu Jerusaleme kana pyare lasi dokona iki lakando karena, leya.
2KI 18:23 Lapala lao, Asiria akali mupwa dokona kingi lao nambame nakama nyuo pyasaro dee nakamame kapa akali malu lapo mena ose matana petena lao koto nyerami ramo doko nambame nakama mena ose taosande lama (2,000) jero, leya.
2KI 18:24 Yuu Asiria range yanda singi isingi akali kuki dokome nakama isa palyilyamo. Dopa pyuo karapyamopape Isipi wambu dupwame nakama nyiso mena ose matana petenge akali dupwape oseme ipyuo papingi uliulipi jerami lao isaro karaminyi.
2KI 18:25 Kamongome namba nyisa nayamopa nakamana yuu doko pyao kokwa soo nembo nyii naeŋe lao suu pilyamisi? Kamongo baa rangeme embena yuu doko pyao kokwa soo nyuo pipi lao namba langipya.
2KI 18:26 Dokopa Eleakimimoo Sepenamoo dee Joamoo akali mupwa doko lamaiyuo lao, Arame wambunya pii lao namwa langipi. Pii doko namwa singi. Wambu apya dokona karaminyi dupwa silyaminyi dokome Ipuru pii lao langi kae, leyami.
2KI 18:27 Dokopa baame isingi lao, Nakamape kiŋi dokope iki mupwaŋa lapala Asiria kiŋi dokome nakama iki pii dupwa peparae lareŋe lao puu leya suu pilyamisi? Daa lyakande. Wambu dae kamena petaminyi dapwa opetae nambame pii lamailyuŋu. Nakama rangena ii dupwa nao dee puu nakama rangena dupwa nao piraminyili pyuo nakama naramiko, leya.
2KI 18:28 Lapala akali mupwa baa roya karapala Ipuru pii lao poraiyuo kaeyo lao, Asiria kiŋi dokome nakama pii langilyamo doko selapape, leya.
2KI 18:29 Akali Esekayame nakama koo keta palyuo minyako pii nana lao Asiria kiŋi dokome nakama repe repe pii langilyamo. Esekaya baame nakama kyawa lete nyuo nyisa nara ingilyamo leya.
2KI 18:30 Nakama Kamongo doko keta poraiyuo pyamalyaramaŋa lao baame nakama anjiki pyuo langi nana. Kamongo dokome nakama kyawa lete nyepala dee namwana yuu Asiria yanda singi dupwame nakamana yuu taone doko baame pyao nyela pena laa nara lao suu pyaa nalapape.
2KI 18:31 Akali Esekayana pii see nalapape. Yuu Asiria kiŋi dokome nakama yuu taone doko yaki nyepala nakama baa maiyuo oto ipupwa lao letamo. Nakama peparae rangena isa girapo jingi lyuo narami. Dee isa piki jingi nakama rangena isa dokona lyuo narami. Dee ipwa pete yuwale nakama rangena singi dokona kamuo nyuo nao pirami, leya.
2KI 18:32 Naraminyipa pao kiŋi akali dokome yuu nakamana yale dopale mendenako wangu lakao pisaramopa pisirami. Doko isa girapo eena ipwa waene kapa waso narami dee witi dupwame nenge borete waso narami. Yuu dokona isa olipi andenge dee olipi ipwangepe amburali ipwangepe singi. Nakama baame mawa pii langiramo doko moko minyuo pirami ramo doko nakama kuma nao lete palyuo kararami. Kamongo dokome nakama kyawa lete nyeraŋa lao Esekayame minyako pyuo laa nana.
2KI 18:33 Yuu Asiria kiŋi doko keta wambu rara wakale lapona mee bange kingimi wasisi anatuŋu lao lakandenge dupwame nakamana yuu dupwa kyawa lete nyuo nyisingisi?
2KI 18:34 Yuu Amati rangepe Arepate rangepe yuu Sepatipai Sepamame rangepe yuu Ena rangepe Ipa rangepe dupwa peparaena mee bange anja kingimi wasisi anatuŋu lao lakandenge karamisi? Dokona mendeme Samaria wambu dupwa kyawa lete nyiyamisi?
2KI 18:35 Yuu gii anjokorape yuu muu peparae dusipana mee bange anatu dupwame namwana kiŋi akali doko isa palyuo banya kingi rekya lao nakamana yuu doko nyiso kyawa lete nyiyamisi? Dokona lao Kamongo dokome Jerusaleme nyisaraŋa lao emba aki mendeme suu pyao letese?
2KI 18:36 Kiŋi Esekayame wambu dupwa elya kalo petena lao lamaiyamuli pyuo nakamame pii kuki mende yano pyaa nao elya kalo peteyami.
2KI 18:37 Dokopa Eleakimimoo Sepenamoo Joamoo mona randame kumapala nakamana komau dupwa minyuo pilyiyami. Pilyapala Asiria akali mupwa dokome leyamo pii dupwa Isaraele kiŋi doko lamaiyala peyami.
2KI 19:1 Akali dusipame epo pii lamaiyaminyi doko sepala dokopa aopa kiŋi Esekaya dokome mona randame kumuo banya komau pingi dupwa minyuo pilyapala baa kumanda piso kondome kumuo komau wapungi dupwa wapupala Kamongona tembole anda dokona peya.
2KI 19:2 Papala baame akali Eleakimi kiŋinya anda iso karenge akali mupwa dokope kote singi dupwana pepa pingi akali Sepena lenge dokope dee purisi andapae dupwape akali Amosena ikinyingi poropeta Aisaya lenge kareyamo dokona pena leya. Nakama opetaeko kondome kumuo komau wapungi dupwa wapuyami.
2KI 19:3 Wai pii dake baame Aisaya lamainya lao lamaiya. Epapu yuu gii dake randa nyingi yuu gii. Dokona namwa randa nyuo elyame kumulyamano. Namwa enda wane repeta manjalana pingi doko kapa manjira ingya nange dopale ingilyamano.
2KI 19:4 Yuu Asiria kiŋi akali dokome banya akali mupwa dokome Anatu lete karenge doko kando kilya kando lala pena leya. Embena Kamongo Anatu dokome doo kilya kando letaminyi wambu dupwana pii sepala nakama randa mainya. Dokona lao namwana wambu lapo mee lete piso petaminyi dupwana lao Anatu keta ateŋa lakaminya lena leya.
2KI 19:5 Dokopa Aisayame kiŋi Esekayana pii doko sepala
2KI 19:6 dokopa banya pii dake isingi leya. Kamongo dokome emba nyiso kyawa lete nyii naraŋa lao Asiria wambu dupwame pakanyi pyambuo laraminyipape nakama paka nao karalapape, Kamongo dokome nakama langilyamo.
2KI 19:7 Kamongo dokome kiŋi akali doko pii kyambo lapo sepala banya rangena yuu dokona kapu kyuo pena lao pira. Dokopa Kamongo dokome baa nyepala yuu dokona wambu lapome baa pyao kumakaminya lara, leya.
2KI 19:8 Yuu Asiria kiŋi akali dokome yuu Lakisi yaki nyepala yuu repeta taone Lipina dokona wambu dupwa pipya pimwaiyuo pyala peyamo doko yuu Asiria akali mupwa dokome leyaminyi siya. Dokona lao baa pii lamaila peya.
2KI 19:9 Yuu Isipi yanda singi dupwa Itiopia kiŋi akali Tiraka lenge dokome laminyuo epo nakama pyala epelyamo leyami pii doko Asiria wambu dupwa siyami. Pii doko yuu Asiria kiŋi akali dokome sepala pepa pase mende kiŋi Esekaya yuu Juta range maiya.
2KI 19:10 Pyao maiyuo lao, Anatu emba keta pyamalyuo karene dokome emba isa pao nambana kingi raka dokona palya nareŋe lao langipya. Dopa pyuo langipyamopape dokome emba kokwa soo koo keta nemba nana lape, leya.
2KI 19:11 Yuu Asiria kiŋi akali dokome yuu muu wakale dupwana mendepe pyao kokwa seroŋo lao suu pingi dupwa pyao kokwa sepala kaenge doko emba singi. Embame suu pyapinyi dokopa emba range kyawa lete nyero lao silisi?
2KI 19:12 Nambana rora ambasu dupwame yuu taone Gosanepe yuu Arane dee Oresepe pyao kokwa siyami. Kokwa sepala yuu Betetene wambu yuu Telasa palenge dupwa pyao kumakayami. Dokopa nakamana mee bange kingimi wasisi anatuŋu lao lakandenge dupwana mendeme nyiso kyawa lete nyii nayami.
2KI 19:13 Yuu taone Amati kiŋi dokope yuu Arepate range kiŋipi yuu Separaime kiŋipi yuu Ena kiŋipi dee yuu Ipa kiŋipi dupwa anja karamisi lao pepa piya.
2KI 19:14 Dokopa kiŋi Esekayame wai pii minyingi akali dupwa keta pepa pyasi minyuo epeyami doko nyepala yaka leya. Lapala baa tembole anda dokona peya. Papala pepa pyasi doko Kamongona lenge kambu siyamo dokona pee lao reteya.
2KI 19:15 Retapala ateŋa lao, O Kamongo Isaraele wambunya Anatu, lete bange papake karenge ketae embena kiŋi petenge isa dokona petenge. Emba Anatu mendaki iki. Emba yuu muu dupwana rara karenge dupwa peparae isingi. Embame yake yuupi dupwa pyuo wasii.
2KI 19:16 Epapu Kamongo namwa keta mende pilyamo doko kandape. Kamongo emba lete karenge doko kando akali Senakeripi dokome kilya kando letamo pii dupwa peparae sepe.
2KI 19:17 Kamongo, namwa peparae silyamano. Doko yuu Asiria kiŋi akali dupwame akali rara malu pyao kokwa soo dee nakamana yuu dupwana mende pulya nana lao apa nyuo pingi.
2KI 19:18 Pipala nakamana mee bange anatu dupwa kisinyi nembakamingi. Dupwa anatu angi daa isa kanapeme anatuŋu lao mee wambunya kingimi wasisi dupwa kiso nembenge.
2KI 19:19 Dokona epapu Kamongo namwana Anatu Asiria wambu dupwa pipya namwa kyawa lete nyuo nyisape. Dokona lao yuu muu dupwana wambu rara palaminyi dupwame peparae Kamongo emba iki Anatu lao soo nyinyale, leya.
2KI 19:20 Dokopa Aisayame kiŋi Esekaya lamaiyuo, Kamongo dokome kiŋi dokona ateŋa doko sepala isingi yano pyapya lao wai nembeya.
2KI 19:21 Kamongo dokome lao, Senakeripi yuu taone Jerusaleme dokona wambu dupwame emba kando giyuo karenge. Giyuo karapala emba kando kilya kando lao male lalya lana pingi.
2KI 19:22 Embame api kilya kando letoŋo lao suu pyapisi? Isaraele wambunya Anatu Poo Pyasi doko embame nambana kingi ketae pyambuo laa napi.
2KI 19:23 Embena wai pii minyingi akali dupwame namba keta emba range lakando embena mena oseme ipyuo papingi uliuli dupwa peparaeme yuu Lepanone dokona yuu kyau kamame ketae dupwa isa palyuo wini pipu laope dee emba range lakando pyuo isa sita lenge ama londe dupwa poko isa palyuo dee isa saiporose ama keyange dupwa poko pao imwa anda suku dokona kando nyipu lapi.
2KI 19:24 Emba range lakando lao yuu wakale dupwana yuwale apu rapala ipwa kamuo nenge doko lapi. Dee embena yanda singi dupwa yanda makao kimbu pyao piso epo ipwa Naele sokona lao pisimi lapi.
2KI 19:25 Nambame dupwa peparae yuu wamba rapa rapa pyuo reteyo doko emba kaname see nangese? Epapu dakepa nambame minyuo pulyuo raelyo. Yuu taone kana kame porai awali lao palenge dupwa nyuo koo ingyuo kokwa sinyi nembo pepe lao nambame emba porainya renge jiyu.
2KI 19:26 Wambu dokona palenge dupwa porainya renge mende pali naya. Dokona pako walu lao mona nembo yamaranguyami. Nakama rambe yuunya andenge panda isako anda yanginya andenge dupwa neta potemenge dorena isasa pyuo piso dokopa rakusi renge dopale ingiyami.
2KI 19:27 Dopa pipyamopape nambame emba peparae soo otelyo. Emba aki mende pipipi dee anja mendasa pupipi dupwa silyu. Emba nambapa pimwaiyuo imbwapi doko soo otelyo, leya.
2KI 19:28 Nambame embena imbu singi andake dokope dee range mupwaŋa lao suu pyape dokope namba langiminyi soo nyipu. Dokona nambame embena gyaa kata dokona waeya puu palyaro dee ane bange mende nenge kata dokona palyaro. Palyapala wamba emba epee kata kande dokonako kamba kapu kyuo lanyuo paro, leya.
2KI 19:29 Enakana Aisayame kiŋi Esekaya lamaiyuo lao, Rengya mende pira dokona wambo dake pilyamo. Ee kana dakenape dee ee kana dumbinyape nakama witi jingi wambunya wara pii nange mee isa yokona poro lao andenge dupwa narami. Dopa piraminyipape ee kana ene eparamo dupwana nakama witi wara pipala pyakepo nyuo narami dee isa girapo wara pipala girapo jingi dupwa narami.
2KI 19:30 Yuu Juta dokona wambu lapo lete pisiraminyi dupwa au pyuo andapala ee waingi wara pilyaminyipa pingi pyao yuu koko papala jingi kapape pyao andenge dopale ingyuo ando kararami.
2KI 19:31 Yuu Jerusalemepe dee yuu kyau Sayonepe wambu pisiraminyi dupwa lapo lete ando kararamiŋi lao Kamongo dokome poraiyuo suu pyao leyamuli pyuo kararami.
2KI 19:32 Asiria kiŋi akali dokona lao Kamongo dokome pii dake leya. Baame yuu taone dakena sukusa pyaka soo dee wanga kakupi kuki mende yanda pimwaiyuo pyao sukusa peya narako. Dee yanda singi kuki mendemepe konambe embo yuu taone dakena repetape epa nara dee yanda singi dupwamepe yuu doko nyelana pyuo karapusi pyao kame pyuo sukusa palya naramiko, leya.
2KI 19:33 Asiria kiŋi akali doko kata wambo epeyamo dokonako dee kamba kapu kyuo para. Dokopa yuu taone dakena sukusa epa nara. Namba Kamongo dokome lapusa pilyamo, leya.
2KI 19:34 Nambana kendemande akali Dapiti kando lalu lao leyono dokome namba rangena kingi lao nambame yuu taone dake keta pyamalyapala nyisaro, leya.
2KI 19:35 Yuu gii kukwa dokopa Kamongona aŋala mende Asiria akali komau anda pyuo paleyami dokona papala akali ama malu (185,000) pyao kumakaya. Yuu gii mendena yangama dokopa nakama peparae kumasi siyami.
2KI 19:36 Dokopa yuu Asiria kiŋi akali Senakeripi baa yaki nyepala kapu kyuo yuu Ninepa dokona peya.
2KI 19:37 Yuu mendepa banya mee bange kingimi wasisi anatuŋu lao lakandenge kingi Nisiroko lenge banya tembole anda dokona lakando kareyamo dokopa banya ikinyingi lama mende Aterameleke lenge mende Saresa lenge dolapome nakambana wua gela dokome baa pyao kumakayambi. Kumakapala nakamba range kyawa lete nyuo yuu Ararate lenge dokona peyambi. Dokopa ikinyingi mende Isarone lenge dokome rakangena panda nyuo kiŋi ingyuo kareya.
2KI 22:1 Josaya baa ee kana mange lama karo dokopa yuu Juta dokona kiŋi kareya. Karapala ee kana akalisa rema ipisu mendaki baame yuu Jerusaleme doko iso kareya. Banya endangi doko kingi Jetita lenge akali Ataya lenge yuu taone Bosekate range dokona wanenge.
2KI 22:2 Akali Josayame Kamongo rae mairali yulu dupwa iki pyuo kareya. Dee banya rora ambasu akali kiŋi Dapitimi yulu piyamo dupwana moko minyuo pyuo kareya. Dopa pyuo karapala Anatunya lowa pii dupwa peparae warombo soo rape rape lao pira ingiya.
2KI 22:3 Ee kana akalisa mange lama karo kiŋi yulu pyuo iso kareyamo dokopa Josayame kote singi dupwana pepa pingi akali Sapane lenge akali Asalayana ikinyingi akali Mesulamena kauwange doko tembole anda dokona pena leya.
2KI 22:4 Pao purisi mupwa akali Ilikaya pisipyamo dokona papala purisi menge dupwa yulu palipyamopa tembole anda kambu konandowame dokona wambu dupwa keta kana nyiminyi dokona kana namba akipare nyimi lao yaka lao nyela pena leya.
2KI 22:5 Pao baa lamaipala kana angi dupwa tembole anda doko kwaepyamo dokopa lalyuo waso pingi akali dupwana akali mupwa dupwa mainya lena leya.
2KI 22:6 Dokopa nakamame kamonda akalipi anda pingi akalipi kana semene minyuo yulu pingi akalipi dupwa peparae kana maiyuo dee isa kanape anda kwaelyamo lalyuo pingi dupwa ropo pyao nyuo pirami.
2KI 22:7 Dokona mupwa ingyuo yulu pyuo karaminyi akali dupwa yulu rolae pinginde karamiŋi dokome kana dupwa apa pyuo pyao nembami lao piso see narami ingilyamo leya.
2KI 22:8 Leyamo dokopa kiŋi dokona pii dupwa Sapaneme nyepala akali Ilikaya lamaiyamo dokopa Ilikayame lowa pii dupwa palenge buku doko tembole anda dokona sipyamo koto nyipu lao baa lamaiya. Lamaipala buku doko baa maiyamopa Sapaneme yaka leya.
2KI 22:9 Lapala baa kiŋi peteyamo dokona kapu kyuo papala lamaiyuo lao, Embena kendemande akali dupwame tembole anda dokona kana sipyamo dupwa nyepala anda kwaelyamo lalyuo pingi akali mupwa dupwa maimipya, leya.
2KI 22:10 Lapala enakana baame lao, Buku dake akali Ilikayame jipya, leya. Lapala baame kiŋi doko sinya lao pii poraiyuo yaka lao lamaiya.
2KI 22:11 Buku yaka leyamo doko kiŋi dokome sepala kondome kumuo banya komau doko minyuo kanguya.
2KI 22:12 Kangwapala baame purisi akali Ilikayamoo akali Sapanena ikinyingi Ayikamemoo dee akali Maekayana ikinyingi Akipomoo dee kote singi dokopa pepa pingi akali Sapanemoo dee kiŋi dokona role pyao nyiso papingi akali Aisayamoo pipya pii dapwa lamaiyuo lao,
2KI 22:13 Papala buku dakena mana letamo dokona lao Juta wambu peparae dupwana laope dee nambana laope Kamongo doko piso sakalapape. Namwana rora ambasu dupwame buku dakena pinya leyamo dupwa pii nayami dokona Kamongo dokome namwa pipya imbwualyamo.
2KI 22:14 Akali Ilikayamoo Ayikamemoo Akipomoo Sapanemoo Asayamoo papala poropeta enda Uluta lenge yuu Jerusaleme enenge ingyuo pyuo nyokonyiyami dokona palenge doko piso sela peyami. Banya akalingi doko Salumi lenge akali Tikipana ikinyingi Atasena kauwange doko tembole anda dokona komau dupwa baame rapu pyuo karenge. Nakamame doo piyamo dupwa enda doko lamaiyami.
2KI 22:15 Dokopa enda baame nakama lamaiyuo, Kapu kyuo kiŋi petamo dokona papala
2KI 22:16 Kamongo keta pii piso ipyamo dupwa baa lamaila pena leya. Buku dokona pyasi palipyamo kiŋi doko yaka lapyamuli pyuo namba Kamongome yuu Jerusaleme dee wambu dokona palaminyi dupwape randa maiyuo pyaro.
2KI 22:17 Nakamame namba kilya kando mata joo dee mee bange kingimi wasisi anatuŋu lenge dupwa mena pyao kiso maiyuo dee yulu peparae piminyi dupwame nambana imbu singi doko sipurao nakao pilyaminyi. Dokona nambana imbu singi doko Jerusaleme wambu pipya sipurao epelyamo doko dee lokwalyuo isa paa naralyamo, leya.
2KI 22:18 Kiŋi baa rangena lao dake namba Isaraele wambunya Kamongo Anatumi letoŋo. Emba buku dokona pyasi palipyamo pii dupwana lao warombo sipilyamo, leya.
2KI 22:19 Nambame Jerusalemepe dee dokona wambupi dupwa randa mairunu dokona pii sepala nambana lenge kambu dokona embena koo dupwana kondome kumuo inyimungu piso embena komau minyuo kanguo ee lao petee. Nambame yuu Jerusaleme keta randa mairu dokopa wambu dupwa mona nembo pakame kumuo kandena lao piru. Dopa piru dokopa wambu dupwame yuu doko kooŋo larami. Laraminyipape nambame embena ateŋa doko sakapu.
2KI 22:20 Namba randa mende Jerusaleme peyaro doko emba kumaparenepa peyaro. Nambame emba mee manda rao kuma lao kaeyaro. Akali dupwame wai pii doko minyuo kapu kyuo kiŋi Josaya peteyamo dokona epeyami.
2KI 23:1 Kiŋi Josaya Juta lita akalipi dee Jerusaleme lita akalipi dupwa peparae kee lao epena, leya.
2KI 23:2 Lapala nakama malu palyuo purisi dupwape poropeta dupwape dee wambu kamongo pendewa peparaepe role pyao tembole anda dokona peyami. Wambu peparaena lenge kambu dokona kiŋi dokome kana minyuo lalu lao lenge pii palenge buku tembole anda dokona siyamo nyiyami dokona pii paleya dupwa peparae lopo yaka lamaiya.
2KI 23:3 Baa kiŋinya isa pote karenge dokona makaro karapala banya suu pingi monape dokome Kamongona mawa piipi dee lowa piipi dupwa minyuo karo baa warombo soo kararo dee mawa pii dupwana rolae ingyuo pyuo paro, leya. Dokopa wambu dupwa peparaeme mawa pii dupwa minyuo pyuo kararama lao lalu lao leyami.
2KI 23:4 Dokopa Josayame purisi akali mupwa Ilikaya lenge dokope banya nyisingi purisi akali dupwape dee tembole anda kambu konandowame dokona yulu palelyamopa rapu pyuo karenge dupwape lamaiyuo, Mee bange kingimi wasisi dupwame enda Asera anatu lenge dokope dee bui dupwape dee mee bange anatu kingi Bealo lenge dokope lakandenge peparae tembole anda dokona kama minyuo epena leya. Lapala kiŋi dokome bange dupwa peparae yuu taone dokona nyisarena yuu pau lama lama kingi Kirone lenge dokona kisiya. Kisapala sungwa lengya dupwa nakama minyuo yuu Betele dokona pena leya.
2KI 23:5 Yuu taone yuu Juta singi dupwanape dee Jerusaleme repeta yuu dupwanape kana pyare kyambo lenge dupwana mena pyao kiso mainya lao Juta kiŋi dupwame rombo palyiyami purisi dupwape dee purisi peparae mee bange anatu kingi Bealo lenge dokope netape kanape dee yakena bange silyamo dupwape mena pyao kiso maingi dupwa neta pena leya.
2KI 23:6 Isa pote mende poo pyasi lao waso kalya pipala mee bange enda anatu kingi Asera lenge dopale ingyuo tembole anda dokona pisingi doko nyepala yuu taone dokona minyuo nyisa pao yuu pau lama lama kingi Kirone lenge dokona kisinyi nembeya. Nembapala dokona sungwa lengya dupwa pyao kuku pyuo sinjimu ingyapala wambu peparaena malu pingi yuu dokona pyao wakale wakale pyuo muu raleya lao nembeya.
2KI 23:7 Tembole anda dokona panda angi sukusa andake singi dokona enda akalipi pamuku yulu pingi doko pyao kokwa sinyi nembeya. (Panda dokona enda dupwame enda Asera anatu lenge doko lakando komau pyuo petenge dupwa waso peteyami.)
2KI 23:8 Baame purisi lapo yuu taone Juta singi dupwana kareyaminyi dupwa Jerusaleme minyuo peya. Dee yuu muu peparaena kana pyare laro karenge nakama mena pyao kiso maingi dupwa opetaeko lalyuo kokwa soo nembeya. Yuu taone dokona gapomane akali andake Josua dokome kame kambu andake konando penge piyamo dokona kingi kyairename kana pyare lasi kalya pipala mena meme imambu koo palenge dupwa lakandenge dupwa pyao lalyinyi nembeya.
2KI 23:9 Purisi akali dupwa tembole anda dokona yulu pinya lao panda mai nayami. Dopa pii nayaminyipape purisi yango dupwana nenge borete isi pali nange rapa rapa pyakamingi dupwana mokwa soo maiminyipa nakama nao kareyami.
2KI 23:10 Dokona lao mendeme banya ikinyingi panda wanengepe dupwa kyambo lenge pandana mena pyao kiso maingi doko suu pyao mee bange kingimi wasisi anatu kingi Moloko doko pyao kiso mairaminyi lapala yuu Topete lenge yuu Inome pau lama lama dokona singi doko kiŋi Josayame pyao kokwa soo nembeya.
2KI 23:11 Baame kamame Juta kiŋi dupwame mena ose lapo kalya pyuo neta doko lakando maingi dupwa nyuo nembeya. Dee mena ipyuo papingi uliuli lakandenge dokona ingyuo singi dupwa kisinyi nembeya. (Bange dupwa tembole anda kamapi dokona kame kambu dokona repeta retenge. Doko akali mupwa kingi Netane Meleke lenge dokona panda repeta singi.)
2KI 23:12 Juta kiŋi dupwame kana pyare lapo kiŋi Ayasana panda dokona ketae ingyuo kiŋinya anda yangi dokona piyaminyi dupwa kiŋi Josayame pyao lalyuo isa nembeya. Dee kiŋi Manasame tembole anda kamapi lama dolapona kana pyare leyamo dolapo lalyuo isa nembeya. Dopa pipala baame dupwa peparae muu muu pipala yuu pau lama lama Kirone lenge dokona pyao nembeya.
2KI 23:13 Nembapala Saitone wambunya mee bange enda anatu kingi Asera lenge Moape wambunya mee bange anatu kingi Kemose lenge dokope dee Amone wambunya anatu kingi Moloko lenge dokonape lakandeyaminyi kana pyare lasi kiŋi Solomoneme Jerusaleme neta pyakaenge dorena ingyuo dee yuu Olipi kyau dumurena ingyuo waso piyamo dupwa kokwa soo nembeya.
2KI 23:14 Kiŋi Josayame kaname isa pote kareyaminyi dupwa pyao lalyuo muu muu piya. Dee isa pote poo pyasiŋi lao mee bange enda anatu kingi Asera lenge kingi lao lakandenge doko pyakepo nembeya. Dee isa pyananyi palyingi yuu dolapo mee wambunya kuli dokome nee pyuo yambe piya.
2KI 23:15 Dopa pipala kiŋi akali Jeropome akali Nepetena ikinyingi dokome Isaraele wambu dupwa kata koo lasaka pyuo yuu Betele dokona lakandenge panda doko kiŋi Josayame pyao lalyiya. Lalyapala Josayame kana pyare doko ipyuo nyepala kana dupwa lalyuo muu muu pipala yuu inginyi nembeya. Baame opetaeko isa pote poo pyasiŋi lao mee bange enda anatu kingi Asera lenge kingi lao lakandenge doko kisinyi nembeya.
2KI 23:16 Enakana Josayame kando pyapiyamo dokopa yuu kyau dokona wambu malu pingi anda dupwa kandeya. Kandapala wambu kuli siyamo dupwa nyiya. Nyepala kana pyare dokona kisiya. Doo pyuo kisiyamo dokona kana pyare doko koo inginyi pyambuo piya. Jeropome baa kana pyare dokona repeta kareyamopa poropeta doko dopa piraŋa lao nolakao leyami dokona angi piya. Pipala kiŋi Josayame awali lao kandeyamo dokopa dopa piraŋa lao pii nolakao lao kareyamo poropeta dokona malu anda doko siyamo kandeya.
2KI 23:17 Baame piso soo lao, Malu anda doko apinyase? leya. Dokopa Betele wambu dupwame isingi lao, Malu anda doko Juta range poropeta akalinde embame kana pyare dapwa kando pilini yulu dupwa dopa piramiŋi lao nolakao lao kareya kande akali dokonaŋa, leyami.
2KI 23:18 Josayame lamaiyuo lao, Malu anda doko silyamo dopa piru sinya kaena leya. Lapala banya kuli dupwa nyisa nyii nana leya. Dokona lao banya kuli dupwape dee poropeta Samaria range dokona kuli dupwape nyisa nyii nayami.
2KI 23:19 Isaraele yuu taone dupwa peparaena kyambo lao lakandenge panda Isaraele kiŋi peparaeme wasiyami dupwame Kamongona imbu singi dupwa sipurao nyakamiyamisa kiŋi Josayame pyao lalyinyi nembeya. Baame yuu Betele dokona kana pyare lasi dupwa kokwa soo lalyuo nembeya dopaleko ingyuo kana pyare lasi yuu dokona siyamo dupwa lalyuo nembeya.
2KI 23:20 Baame kyambo lenge purisi akali peparae kana pyare lasi nakama yulu pyuo kareyaminyi dupwana pyao kumakaya. Dee mee wambunya kuli dupwa kana pyare lasi peparaena kiso oteya. Dopa pipala baa enakana kapu kyuo Jerusaleme peya.
2KI 23:21 Kana minyuo lalu lao lenge pii palenge buku dokona lao pyasi paleyamo doko moko minyuo kiŋi Josayame wambu dupwa lamaiyuo lao, Pasopa nenge nenge yuu gii doko suu pyao piso nenge nyuo malu palyuo nao nakamana Kamongo Anatu rape rape lao ketae pyambuo au pyuo minyuo pyuo karena leya.
2KI 23:22 Yuu gii wamba akali mupwa dupwame rara doko isiyaminyi gii dokona piso pao yuu gii dokopa Juta kiŋi dupwape dee Isaraele kiŋi dupwamepe Pasopa Nenge Nenge Yuu Gii dopale mende au pyuo minyuo pyuo kara nayami.
2KI 23:23 Dopa pyuo ee kana malu mee nembeyaminyipape kiŋi Josayame ee kana akalisa ipisu mange lama karo (18) iso karapala yuu Jerusaleme dokona Pasopa Nenge Nenge Yuu Gii suu pyao piso nenge nyuo malu palyuo neyami.
2KI 23:24 Purisi mupwa Ilikayame buku tembole anda dokona koto nyiyamo dokona lowa pii pyasi palenge dupwa uki palira kando lao poraiyuo minyuo reteya. Dokona Josayame yuu Jerusalemepe yuu Jutape dolapona peparae papala pipu lengepe nemonga lengepe dee mee bange waso retapala anatu lao lakandenge dupwape dee kyambo lao lakandenge panda dupwape peparae pyao lalyuo kwaeyo nyuo nembo piya.
2KI 23:25 Banya mona dokomepe suu pingi dokomepe dee banya porainya renge dokomepe Mosesena lowa dupwa peparae warombo soo minyuo Kamongona yulu pyakamyuo kareya. Wambape enakanape baa yale kiŋi mende kara nayami.
2KI 23:26 Dopa piyamopape kiŋi Manasame koo piyamo dokona Kamongona imbu singi nyakamiya. Doko yuu gii dokopa kumuo isa paa naya.
2KI 23:27 Kamongome lao, Nambame Isaraele wambu dupwa keta yulu piyunu dopale ingyuo Juta wambu dupwa nambana lenge kambu dokona nyisa nembaro. Nembapala Jerusaleme taone namba rombo palyiyu dokope dee tembole anda dokona wambu dupwame namba lakandarami ingilyamo lao leyono dokope namba yaki nyuo kaeyaro, leya.
2KI 23:28 Kiŋi Josayame yulu wakale piyamo dupwa peparae Juta Kiŋi Dupwana Arome Pii dokona pyasi palamo.
2KI 23:29 Josaya baa kiŋi kareyamo dokopa yuu Isipi kiŋi Nekome Asiria kiŋi doko nyiso ami yanda singi dupwa minyuo ipwa Yuporisa pona dokona lanyuo peya. Dokopa yuu Meketo dokona kiŋi Josayame Isipi yanda singi dupwa kaena lao minyuo nyela peyamosa baa yanda dokona piyaminyi kumuya.
2KI 23:30 Banya akali mupwa dupwame banya yongo doko nyepala mena oseme ipyuo papingi uliuli dokona pyambwapala minyuo Jerusaleme peyami. Papala baa kiŋi dupwa malu pingi malu anda dokona malu piyami. Dopa pipala Juta wambu dupwame Josayana ikinyingi Joayase rombo palyiyami. Palyapala baa kiŋi inginya lao mamba kisakamiyami.
2KI 24:8 Jiyoakini baa ee kana akalisa ipisu mange lama karo dokopa baa Juta wambunya kiŋi kareya. Karapala baame yuu Jerusaleme dokona kana rema nembo kiŋi ingyuo iso kareya. Banya endangi doko Nekusitane lenge yuu Jerusaleme range akali Elenatane dokona wanenge.
2KI 24:9 Jiyoakini banya rakange yulu pingi dupwana mana nyepala Kamongona lenge kambu dokona kooko pyuo kareya.
2KI 24:10 Banya iso kareyamo yuu gii dokopa kiŋi Nepukatenesana akali mupwa dupwame yuu Bapilone ami yanda singi dupwa lanyuo yuu Jerusaleme pyao nyela epeyami.
2KI 24:11 Dopa pyuo kareyaminyi dokopa kiŋi Nepukatenesa baa yuu Jerusaleme epeya.
2KI 24:12 Dokopa kiŋi Jiyoakini banya ikinyingi dupwape banya endangi dokope dee banya akali mupwa dupwape dee kiŋinya anda yuupi dupwana akali mupwa dupwape pipya Bapilone wambu keta peyami. Doko Nepukatenesa baa ee kana mange lama karo wambu dupwa iso kareyamo gii dokopa akali Jiyoakini puu maiyuo nyepala peya.
2KI 24:13 Dokopa tembole anda dokonape dee kiŋinya anda dokonape bange kulisa rungi rungi pisi singi dupwa peparae nyuo yuu Bapilone minyuo peya. Kiŋi Solomoneme tembole anda dokona yulu piramiŋi lao kana golome bange waso reteyamo dupwa Kamongo wamba lamaiyamuli pyuo Nepukatenesame pyao poro lanyi nembeya.
2KI 24:14 Akali mupwa peparaepe kiŋinya wane peparaepe dee Jerusaleme wambu peparaepe nyuo pyaso dokopa taosande akalisa (10,000) kiŋi Nepukatenesame puu maiyuo nyuo peya. Papala baame akali mora piso yulu pingi dupwape dee ane dupwame bange wasingi akali dupwape opetaeko yuu wakale mendena karapusi ingyuo nembeya. Dopa pipala wambu pendewale dupwa iki yuu Juta petena lao yaki nyuo kaeya.
2KI 24:15 Dopa pipala Nepukatenesame akali Jiyoakini baa karapusi ingyuo yuu Bapilone lanyuo peya. Dee kamame banya endangipi etengepe banya akali mupwape dee Juta akali kyawa dupwape opetaeko puu maiyuo minyuo peya.
2KI 24:16 Nepukatenesame akali kamongo dupwa peparae yuu Bapilone nembo oteya. Nyuo pyaso dokopa taosande yanda ipingi (7,000) ingiya. Dee mora piso yulu pingi akali taosande mendaki nyiya. Dee dokona pyasapala ane isame bange wasingi akali dupwa opetaeko nyuo piya. Doo nyiyamo dupwa peparae akali kuli poraingiko yanda singinyape kapa karapengele akali dupwa nyuo peya.
2KI 24:17 Nepukatenesame Jiyoakininya apange Matanaya lenge doko Juta wambunya kiŋi ingyuo karena rombo palyiya. Dopa pipala banya kingi alowa pyuo Setekaya leya.
2KI 24:18 Setekaya baa ee kana akalisa lama ipisu mendaki dokopa Juta wambunya kiŋi kareya. Karapala baa kiŋi ingyuo yuu Jerusaleme dokona iso kareyamopa ee kana akalisa ipisu mendaki epo peya. Banya endangi doko Amutale lenge yuu taone Lipina range akali Jeremaya lengena wanenge.
2KI 24:19 Kiŋi Jiyoakwimi Kamongo kando koo dokome piyamo dopaleko ingyuo kiŋi Setekayame Kamongo kando kooko pyuo kareya.
2KI 24:20 Dopa piyamosa Kamongo dokome Jerusaleme wambupi dee Juta wambu dupwape keta ama wakasa imbwuapala banya lenge kambu dokona rekya lao nyisa nembeya.
2KI 25:1 Setekayame yuu Bapilone kiŋi Nepukatenesa kando kamba lao mata maiya. Dopa piyasa ee kana mange mendaki karo dokopa kana akalisa dokona yuu gii akalisa dokopa kiŋi Setekayame isiyamo yuu gii dokopa Nepukatenesa banya ami yanda singi dupwa peparae epapala yuu Jerusaleme pyao nyiyami. Nakamame yuu taone wangu dupwana komau anda pyuo palyuo wambu dupwa nyisa epa nana lao karapusi pyao yuu taone dokona kana kame mende awali lao piyami.
2KI 25:2 Kame pisi dokona sukusa palyuo kareyaminyi pao Setekaya baa ee kana akalisa ipisu mendaki ingyuo kiŋi kareya.
2KI 25:3 Ee kana mendaki dokonako pao kana kisimana yuu gii mange mendaki karo dokopa ama lopo andake kopetame siyamopa wambu dupwa nenge mende pyarepala paramo narami ingya naya.
2KI 25:4 Dokopa yuu taone dokona kana kame dupwa pyao lalyiyami. Dokopa Bapilone yanda singi dupwame yuu taone dokona karo awali leyami. Dopa piyaminyipape kukwa dokopa yanda singi peparae range kyawa lete nyuo peyami. Nakama kiŋi dokona ee kata doko pao kana kame andake dolapo pyuo epo suu lenge kata kambu dokona nyisa epapala yuu Jotane pau lama lama dorena ingyuo pyako peyami.
2KI 25:5 Dopa pyuo peyaminyipape Bapilone ami yanda singi dupwame kiŋi Setekaya baa peta pao yuu Jereko repeta yuu lama lamandena minyaro nyiyaminyi dokopa banya yanda singi dupwame baa yaki nyepala peyami.
2KI 25:6 Setekaya baa minyuo pao kiŋi Nepukatenesa yuu taone kingi Oripila lenge dokona peteyamo maiyami. Dokopa dokona Nepukatenesame pii dupwa piso soo kote leya.
2KI 25:7 Dokopa Setekaya baa kandako kareyamo dokopa banya ikinyingi dusipa pyao kumakayami. Dokopa kiŋi Nepukatenesame kiŋi Setekayana lenge doko lukunyi nembena leyasa nembeyami. Dopa pipala puu maiyuo minyuo yuu Bapilone dokona peyami.
2KI 25:8 Ee kana akalisa ipisu mange mendaki karo dokona kana kingi paki yuu gii yanda ipingi dokopa kiŋi Nepukatenesame yuu Bapilone kiŋi kareyamopa akali Nepusaratane baame kiŋi dopa pinya dapa pinya lao karo dee banya yanda singi dupwana mupwa karenge doko yuu Jerusaleme dokona sukusa peya.
2KI 25:9 Papala baame tembole anda doko kiso kiŋinya anda doko kiso dee wambu kamongo Jerusaleme palenge dupwana anda dupwa peparae kiso piya.
2KI 25:10 Piyamo dokopa banya yanda singi dupwame yuu taone dokona kana kame doko pyao lalyuo isa palyiyami.
2KI 25:11 Dokopa Nepusarataneme wambu mora petengepe dee wambu lapo Jerusaleme dokona pyarepala pyao peteyaminyi dupwa dee lapo nakama Bapilone wambu keta rangeme maiyami dupwape nyuo lanyuo Bapilone peya.
2KI 25:12 Dopa piyamopa wambu muiyane lapo bange see nange dupwa yuu Juta dokona ee yuu dupwanape dee isa girapo ee dupwanape yulu pyuo petena leya.
2KI 25:13 Dokopa Bapilone wambu dupwame isa potende kone kaname waso karenge doko pyao poro leyami. Dee rate lapo tembole anda dokona siyamo dupwa pyao lalyiyami dee wate pingi disi kamame andake kone kaname wasingi doko pyao poro leyami. Lapala bange kone kana yale dupwa peparae nyuo yuu Bapilone dokona peyami.
2KI 25:14 Nakamame saporo dupwa nyuo dee kana pyare dupwa au pyuo pee nembenge penge dupwa nyuo yulu bange lambe minyaro karenge dupwa nyuo dee mena pyao kiso maingi dokopa pere mena ranjama warakyuo nyingi dupwa nyuo bange nenge rendamu pingi kiso reto maingi pere warake dupwa nyuo dee kone kana dopaleme bange wasisi tembole anda dokona minyuo yulu pingi dupwa nyuo piyami.
2KI 25:15 Nakama bange peparae golome wasisipi dee kana kulingimi wasisipi dupwa opetae nyuo peyami dee isare lengya minyuo papingi bangepe dee pere kukipi dupwa peparae nyuo peyami.
2KI 25:16 Kiŋi Solomoneme tembole anda dokona lao kone kaname bange kameya lapo waso reteya. Dokona rate lapope disi andake mendepe dee isa pote lamape waso reteya. Reteyamo dusipa ama kenda wakasa pingi. Dokome sikyali angi doko kapa pii nange.
2KI 25:17 Bange dolapo laparae mendare. Mende mendepe laparae mita mange lama karo ketae peya. Dokopa ketae dolapona laparae kone kana pere dopaleme wasisi mita mendaki dee kanya ingiya. Dolapona laparae awali lao kalya pyuo kone kaname waso bange isa jingi pomekeranate yale dupwa yuku awali leyami.
2KI 25:18 Nepusaratane akali yanda singinya mupwa dokome akali Setaya lenge purisi mupwa dokope akali Sepanaya lenge purisi lanena lapo ingyuo karenge dokope dee akalii rema mendasipa tembole anda dokona mupwa karenge dusipape opetae karapusi pyao minyuo peya.
2KI 25:19 Yuu taone dokona akali mende yanda singinya mupwa ingyuo iso karenge dokope dee akali kingi paki kiŋi doko dopa pyuo piri dapa pyuo piri lao nyiso lenge yuu taone dokona pyarepala pao kareyami dusipape yanda singi mupwa iso karenge dokona pepa dupwa isakamingi akali dokope dee akali mupwa akalisa pakinyamange dusipape opetae nyuo minyuo peya.
2KI 25:20 Papala Nepusarataneme Bapilone kiŋi doko yuu taone Oripila lenge yuu andake Amati dokona singi dokona peteyamo doko maiya.
2KI 25:21 Maiyamopa kiŋi dokome nakama nyepala randa andake maipala nakama pyao kumakaya. Dokona lao Juta wambu dupwa nakamana yuu yaki nyuo karapusi ingyuo minyuo peyami.
2KI 25:22 Yuu Bapilone range kiŋi Nepukatenesame akali Getalaya akali Aikamena ikinyingi Sapanena kauwange doko Juta wambunya gapomane ingyuo karena lao rombo palyiya. Rombo palyapala wambu lapo karapusi ingyuo nyuo minyuo yuu Bapilone paa napala kareyami dupwana baa mupwa ingyuo karena leya.
2KI 25:23 Dokopa Jutia akali mupwape dee yanda singi lapope nakama rangeme Bapilone wambu keta mai nao mee kareyami dupwame pii doko siyami. Sepala yuu Misipa dokona akali Getalaya kareyamo dokona peyami. Akali mupwa dusipana mende Isimaele lenge akali Netanayana ikinyingipi Joanane lenge akali Kareyana ikinyingipi Seraya lenge akali Tanumetena ikinyingi yuu taone Netopa range dee mende Jesanaya lenge yuu Makya range dusipa peyami.
2KI 25:24 Dokopa Getalayame nakama lamaiyuo lao, Nakamame yuu Bapilone akali mupwa dupwa kando paka nalapape lao nakama lalu lao langilyu. Yuu dakena wangu lakao palipala yuu Bapilone kiŋi dokona yulu pyakamyuo kararami ramo dokopa nakama keta yulu dupwana peparae kapa elyape ingyuo para, leya.
2KI 25:25 Dopa leyamopape ee kana dokona kana yanda ipingi dokopa akali Isimaele Netanayana ikinyingi akali Elisamana kauwange baa kiŋinya ree palu wambu dokome dee akali akalisa opetaeko konda pyuo role pyapeta yuu Misipa dokona papala akali Getalaya doko minyaro nyepala pyao kumakayami. Baame Bapilone akali lapope dee Isaraele wambu lapope role pyao kareyami dupwa opetaeko pyao kumakaya.
2KI 25:26 Nakama Bapilone wambu dupwa kando pakapala Isaraele wambu peparae pendewa kamongope dee ami yanda singi mupwape dupwa mendaki kata palyapala yuu doko yaki nyuo yuu Isipi peyami.
2KI 25:27 Akali Ipilimorotake Bapilone wambunya kiŋi ingyuo kareyamo ee kana dokopa baame Juta kiŋi Jiyoakini doko kando anjiki pyuo mona reto karapusi paleyamo doko nyisa pena leya. Doo piyamo doko Jiyoakini baa karapusi pyao minyuo papeyaminyipa ee kana akalisa rema ipisu yanda ipingi dokona kana akalisa ipisu lama yuu gii akalisa lama ipisu yanda ipingi dokopa dopa piya.
2KI 25:28 Ipilimorotakeme kiŋi menge karapusi pyao minyuo yuu Bapilone peyaminyi dupwa kando anjiki piyamopape baa kiŋi Jiyoakini yulu andake maiyuo kingi ketae pyambuo anjiki pyuo kareya.
2KI 25:29 Dokona lao Jiyoakini banya karapusi komau alowa pipala kiŋinya nenge nenge dokona nao yuu gii lete kareyamo peparae palyuo karo piya.
2KI 25:30 Yuu gii peparae baa palyuo karo piyamo dokopa baa nenge narali dupwa maiyaminyi dokoko suu pyao maipa piyami.
1CH 1:1 ...
EZR 1:1 Ee kana mupwa dokopa Kiŋi Sairose baa yuu Pesa dokona kiŋi ingyuo kareyamo dokopa Kamongo dokome Sairosena monarename pyongo pyao lamaiyamopa baame lowa lapo lao wasapala pyao palyapala yuu muu baame rapu piyamo dusipana maiyuo kapa piya. Doo piyamo doko wamba Kamongo Anatumi poropeta Jeremaya keta lamaiyamo pii dupwa angi kinyi ingyuo peya.
EZR 1:2 Kiŋi Sairose yuu Pesa range dokome pii dake dapa lao leto. Kamongo Anatu yake panda karenge dokome namba rombo palyapala yuu muu peparaena rapu pyuo karo tembole anda andake doko yuu Juta singi dokona yuu Jerusaleme dokona karamo doko kamba pyakape, langiya.
EZR 1:3 Nakamba Anatunya wambu dupwa Anatu role pyao karena. Dopa piramopa nakama yuu Jerusaleme dokona papala Isaraele wambunya Anatu yuu Jerusaleme dokona lakandenge Kamongo dokona tembole anda doko kamba pyakamipwape.
EZR 1:4 Anatunya wambu karapusi palyuo kareyaminyi dupwana lapo anda kamba panya nyisarami lao suu pyarami ramo doko nakamana wambu parali maki dupwame dapa pyuo nyisarami. Nakamame kana kulingipi golope nengepe dee mena matana bange pinji reto minyuo paraminyi dupwape mairami. Dupwa mairaminyipape Jerusaleme Anatunya tembole anda dokona baa mairamili dupwa mairamiko, leya.
EZR 1:5 Juta Benjamenepana rara dokona akali kyawa dupwamepe purisi akali dupwape Lipae akali dupwape dee wambu menge dupwana lapo Kamongo dokome nakamana monarena pyongo pyao lamaiyamo dupwape rapa rapa pipala Kamongona tembole anda Jerusaleme dokona kamba pyakamila parami ingiya.
EZR 1:6 Dokopa wambu parali maki dupwame nyiso bange malu maiyami. Kana kulingimi wasisi bangepe golope mena matana bange pinji minyuo paraminyi dupwape mee bange keyange lapope dee tembole anda dokona Anatu lakando mairamili bange lapo opetae maiyami.
EZR 1:7 Kiŋi Nepukatenesame kapope dee bange warake disi yalepe lapo Jerusaleme siyamo nyuo pao banya tembole anda mee bange dupwa anatu lao lakandenge dokona reteya dupwa kiŋi Sairoseme nyuo maiya.
EZR 1:8 Kiŋi baame bange dusipa akali Mitiretate baa kiŋinya bange peparae iso kareyamo doko keta maiya. Maiyamo dokopa baame bange peparae au pyuo yaka lao pepa pyao nyepala yuu Juta gapomane akali mupwa Sesepasa doko maiya.
EZR 1:9 Yaka leyamo dusipa pere malawai lasi kana golome wasisi lapo Anatu rae maiyuo maingi bange retenge akalisa rema: 30 pere warake kana kulingimi wasisi lapo Anatu rae maiyuo maingi bange retenge taosande mendaki: 1,000 mee pere malawai lasi akalisa lama dee mange mendaki karo: 29 pere kuki golome wasisi akalisa rema: 30 dee pere kana kulingimi wasisi kuki andete kisima dee akalisa mendaki: 410 dee mee bangeme nenge Anatu pyao kiso maingi dupwa taosande mendaki: 1,000 dusipa ingiya.
EZR 1:11 Sesepasamoo wambu karapusi palyuo kareyaminyi dupwa pipya yuu Bapilone yaki nyepala Jerusaleme peyaminyipa bange peparae nyuo pyaso golome wasisi pere dupwape kana kulingimi wasisi pere dupwape dee bange wakalepe ama malu (5,400) ingiya.
EZR 3:1 Kana yanda ipingi pyaka siyamo dokopa Isaraele wambu dupwa lambo lao nakamana yuu taone dupwana kapa paleyami. Palipala enakana nakama peparae yuu Jerusaleme dokona malu palyuo peteyami.
EZR 3:2 Dokopa Josua Josatakena ikinyingi dokope banya purisi yango lapope dee Serapapele Siyatielena ikinyingi dokope banya ree palu lapo opetae pyasapala Isaraele wambunya Anatu dokona mena pyao kiso maingi kana pyare doko dee kamba piyami. Doo piyaminyi doko Anatunya akali Mosesena lowa pyao reteyamo dokona ingyuo mena pyao kiso Anatu mairamaŋa lao piyami.
EZR 3:3 Dopa piyaminyipa wambu menge yuu dokona palenge dupwa kando pakayami. Pakayaminyipape nakama kana pyare wamba laro karenge dokonako kamba pipala enakana bange kiso mainginyili pyuo yangama alemanji lao kiso maiyuo kareyami.
EZR 3:4 Karapala dokopa Anatumi leyamuli pyuo nakama anda kauwa pipala nenge andake malu palyuo nao dee yuu gii yaka lao Kamongome pinya leyamuli pyuo bange kiso maiyami.
EZR 3:5 Dopa pyuo dupwa nakamame koro petenge yuu gii dusipana nenge dupwa kiso mukinyi nembo maipapu piyami. Kana enenge pyaka siyamo dokona lapo kiso maiyuo wambu nyuo pyaso elyambu pyuo peteyaminyi dokona Kamongo lakando kiso maiyuo piyami. Dee lapo opetae wambu dupwame Kamongo suu pyao mee maiyaminyi dupwa kiso maiyami.
EZR 3:6 Dokona lao wambu dupwame tembole anda doko dee kamba kanda soo pipa nayaminyipape nakamame kana yanda ipingi nyepo yuu gii mupwa dokona kanda soo mena pyao kiso Kamongo maiyami.
EZR 3:7 Wambu dupwame kaname anda pingi akali dupwape kamonda dupwape nakamana yulu dokona yole nyerami lao kana piyami. Pyapala yuu taone Taya dee Saitone dolapona wambu dupwame isa sita lapo yuu Lepanone dokona karenge dupwa jinya lao nenge ipwape isa olipi ipwangepe lapo maiyami. Maiyaminyi dokopa isa dupwa ipwa kota dokona sipunya yuu Jopa dokona manjo epeya. Maiyuo peyaminyi dokopa peparae kiŋi Sairoseme kapa leyamuli pyuo piyami.
EZR 3:8 Nakama yuu Jerusaleme dokona Anatunya tembole anda kareyamo dokona epapala ee kana mendaki kareyami. Karapala ee kana enenge epeyamo dokona kana lama dokopa tembole anda dee kamba pinya kanda siyami. Serapapele Josuamoo dee nakamana akali yango dupwape purisipi Lipae akali dupwape wambu peparae karapusi palyuo karo yuu Jerusaleme kapu kyuo epeyaminyi dupwa pipya role pyao yulu piyami. Lipae akali peparae ee kana akalisa lamape panda ulipilipi nembo andengepe dupwa tembole anda kamba piyaminyi dokona mupwa ingyuo rapu pyuo karena lao rombo palyiyami.
EZR 3:9 Dokopa Lipae akali mende Jesua lenge dokope banya ikinyingi dee ree palu wambupi Katimielemoo banya ikinyingi dusipape nakama nyuo simu pyapala tembole anda kamba piyaminyi dokona mupwa ingyuo iso kareyami. Wambu dusipa nyuo pyasapala akali Otapiana akalyanda ingyuo kareyami. (Lipae akali Enatatena akalyanda kareyaminyi dupwame nakama nyisiyami.)
EZR 3:10 Dokopa akali dupwame tembole anda doko kanda soo susa isa reto piyami dokopa purisi dupwa nakamana komau londe dupwa wapupala bikuli dupwa minyaro kareyami. Kareyaminyi dokopa Lipae akali Asapana akalyanda mendaki dupwame sanape dopale lama kingi ralipi minyapala pyao kareyami. Karo dokopa kiŋi Dapitimi mana lamaiyamuli pyuo nakama Kamongo Anatu lakando lao kareyami.
EZR 3:11 Karapala Kamongo Anatu lakando lao rae maiyuo kenane keyange doko kamba lao lao pyuo kareyami. Dokona Kamongo doko keyange dokome Isaraele wambu dupwa kulisa palyuo mona reto karalu karenge, dopa leyami. Lapala tembole anda doko kanda soo puu rombo minyuo susa kana reto piyami dokome nakama peparae rae maiyuo pii ketae lao Kamongo lakando kareyami.
EZR 3:12 Dokopa purisipi Lipaepe andapae dupwamepe akalyanda wakale wakale dupwana kamongo dupwamepe tembole anda wambo kareyamo dokona kandenge dokome tembole anda enenge dokona isa susa reteyaminyi doko kando karapala yamarangyuo ee lao kareyami. Dopa pyuo kareyaminyipape wambu menge dokona kareyami dupwa rae maiyuo pii poraiyuo lao kareyami.
EZR 3:13 Karapala nakamame eepe pii porai rae maiyuo leyaminyi dupwape ketae palyuo yuu wangu paki pakipi peyamosa mendemepe kapa pyuo kenane eepe dupwa soo pakana palyarami ingya naya.
EZR 6:1 Dokopa kiŋi Darisimi kiŋi dupwame pii lamaiyuo pepa pyasi yuu Bapilonena reteyami dupwana koto kandena leya.
EZR 6:2 Dokona koteyaminyipape yuu Mitia yuu taone Ekepatana lenge dokona pepa rongo pisi siyamo dokona pii pyasi dasipa paleyamo doko kando nyiyami.
EZR 6:3 Ee kana mupwa banya kiŋi yulu kanda soo pyuo kareyamo dokopa kiŋi Sairose baame nakama lamaiyuo tembole anda Jerusaleme karenge doko kamba pinya leya. Dokona wambu dupwame Anatu mena pyao kiso maiyuo dee bange wakale lapo kiso mairami lao pinya leya. Tembole anda isa piso puu rombo minyuo ketae pao doko mita akalisa lama ipisu yanda ipingi (27) ingyuo para. Dee dopako pyuo pinjingi paki piso pao pakirena puu rombo minyuo mita akalisa lama ipisu yanda ipingiko minyarami.
EZR 6:4 Minyaraminyi dokopa kana dupwa maki maki pyuo mendena mende ketae yuu rema ingyuo retapala kanya raka dokona isa mendaki retarami. Dokopa anda dokona kana paramili pyuo doko kiŋinya anda kana bange silyamo dokome nyuo ropo pyarami.
EZR 6:5 Dee golope kana kulingipimi wasisi bange lapo dupwa wamba kiŋi Nepukatenesame yuu Jerusaleme tembole anda dokona siyamo dupwa nyepala lanyuo yuu Bapilone pao reteya kande dupwa dee nyuo minyuo pao Jerusaleme tembole anda dokona singinyili pyuo panda rolae dupwana retarami, leya.
EZR 6:6 Dokopa kiŋi Darisimi dopa lao pepa isingi pyao maiya. O Tatenai, ipwa Yuporisa neta anda penge dorena yuunya gapomane akali mupwa doko dee Setaposenaimoo akali yango isingi yulu role pyao pingi dupwape nakama peparae tembole anda dokona paa napala nyokono karalapape.
EZR 6:7 Karapala nakamame tembole anda pilyaminyi dokona kopeta kapeta pimili lao maka sukusuku mainyi pyambwaseramiŋi kaeyalapape. Kaepala Juta gapomane akali mupwa doko pipya Juu lita akali dupwamepe Anatunya tembole anda doko wamba kareya dokonako pinya kaeyalapape.
EZR 6:8 Nambame anda doko nakama nyiso pelapape, leto. Dokona lao anda doko kapa pyuo otarami lao ipwa Yuporisa neta anda penge dorena yuunya piso takisi nyiyaminyi kana dokome anda dokona bange ropo pyao pepengele dupwa waiya lao ropo pyarami.
EZR 6:9 Yangama yangama lao kaeya nao nakamame purisi akali Jerusaleme range dusipa bange mende see nalyamo lao langiyami kande dokopa maipwape. Anatu yake panda karenge doko pyao kiso mukinyi nembo mairami. Mairami dupwa mena sipisipipi bulamakao yakanepe sipisipi yakanepe lao maipwape. Dee witi jingipi kotape waene ipwangepe olipi ipwangepe dupwa maipwape.
EZR 6:10 Dopa pyuo mairaminyi dokopa nakamame Anatu yake panda karenge doko rae mainyi pyambuo bange kiso maiyuo dee Anatumi nambamoo nambana ikinyingi dupwape elyape keta pisinya lao ateŋa lakarami.
EZR 6:11 Lakaraminyi dokopa pii doo leto dupwa akali mende warombo see nara ramo doko banya anda dokona isa pulyaka mende nyepala mumuna pakirena kaku ingyuo nanga lyepala dokome banya yongo dokona arekyaraminyipa banya anda doko lalyuo momo nao ai pyao para.
EZR 6:12 Anatu yuu Jerusaleme dokona baa lakandarami lao rombo palyiya kiŋi mendemepe wambu rara mendemepe mawa pii dake kamba lao tembole anda kokwa selana lao kararami dupwape pyao kwaeyanyi nembakana leto. Namba Darisimi mawa pii doko ama poraiyuo langilyu. Nakamame warombo soo minyuo karalu karalapape.
EZR 6:13 Dokopa gapomane akali mupwa Tatenaimoo Setaposenai dee akali yango isingi yulu role pyao pingi dupwape kiŋi banya pii leyamuli pyuo piyami.
EZR 6:14 Poropeta Akaipa Sekarayapame nakama mona minyarambu porainyi pyambuyaminyisa Juu lita akali dupwame anda doko elya pyuo waiya lao au pyuo oteyami. Wamba Isaraele wambunya Anatu dokomepe dee Pesa wambunya kiŋi mupwa Sairosemoo Darisimoo Atasesisimoo dusipamepe pii reto leyaminyili pyuo pyuo oteyami.
EZR 6:15 Dokopa kiŋi Darisi kareyamo yuu gii doko ee kana pakinyamange dokopa kana akalisa mendaki ipisu lama yuu gii rema dokona tembole anda doko pyuo oteyami.
EZR 6:16 Oteyaminyipa Isaraele wambu purisi akalipi Lipae akalipi mee wambu dupwape karapusi ingyuo palyuo karo epeyami dupwa pipya rae wakasa maiyuo tembole anda doko misi lao kii lumbuyami.
EZR 6:17 Kii lumbuyami dokopa nakamame mena bulamakao andete mendakipi (100) sipisipi andete lama (200) dee sipisipi yakane andete kisimape (400) pyapala Anatu kiso maiyami. Maipala Isaraele akali rara akalisa mendaki ipisu lama palenge doko suu pyao mena meme akalisa ipisu lamako nyepala nakamana koo dupwa nyuo kame sakana lao maiyami.
EZR 6:18 Maipala Mosesena buku dokona pii leyamuli pyuo purisipi Lipaepe dupwa tembole anda dokona yulu pirami dupwana suu pyao rapa rapa piyami.
EZR 6:19 Ee kana enenge kana mupwa yuu gii akalisa ipisu kisima dokopa Pasopa Nenge Nenge yuu gii doko pyaka siyamopa wambu karapusi palyuo karo epeyaminyi dupwa rae maiyuo nenge nao peteyami.
EZR 6:20 Purisi dupwape Lipae dupwape nakama ama yapasi ingyapala poo pyasi wakasa ingyuo peteyami. Dokopa Pasopa Nenge narami lao Lipae dupwame wambu karapusi palyuo paeyo karo epeyami dupwanape purisi dupwanape dee nakama rangenape lao mena pyao kisiyami.
EZR 6:21 Kisiyaminyi dupwa Isaraele wambu karapusi palyuo karo Jerusaleme dee kapu kyuo epeyaminyi dupwame neyami. Dee yuu dokona wambu Anatu angi suu pyaa nao koo pyuo kareyaminyi dupwana lapo mona kapu kyuo Isaraelena Kamongo Anatu lakando kareyaminyi dupwa opetaeko neyami.
EZR 6:22 Borete Isi Pyambwa Nao Nenge Yuu Gii doko pyaka siyamosa yuu gii yanda ipingi nyepo dusipana nakama rae maiyuo yalya kando nenge andake kiso nao kareyami. Doo rae maiyaminyi doko Anatumi Pesa wambunya kiŋi doko keta mona rambi lanyi pyambwakamiyamosa nakamana yulu dupwana nyisiyamo dokopa Isaraele wambunya Anatunya tembole anda doko kamba piyami.
EZR 7:1 Ee kana malu epo papeyamopa akali Atasesisi doko baa yuu Pesa dokona mupwa ingyuo kareyamopa Esera kareya. Eserana rora ambasu wambu dupwana akali Erone baa purisi mupwa ingyuo kareyamo doko rakange angingyuo kareya. Esera baa Serayana ikinyingi. Seraya baa Asarayana ikinyingi. Asaraya baa Ilikayana ikinyingi.
EZR 7:2 Ilikaya baa Saluminya ikinyingi. Salumi baa Satokona ikinyingi. Satoko baa Akitupinya iki-nyingi.
EZR 7:3 Akitupi baa Amarayana ikinyingi. Amaraya baa Asarayana ikinyingi. Asaraya baa Merayotena ikinyingi.
EZR 7:4 Merayote baa Serayana ikinyingi. Seraya baa Usinya ikinyingi. Usi baa Bukinya ikinyingi.
EZR 7:5 Buki baa Apisuyana ikinyingi. Apisuya baa Pineyasena ikinyingi. Pineyase baa Eliasana ikinyingi. Eliasa baa Eronena ikinyingi.
EZR 7:6 Esera baa mana nyisi akali. Kamongo Isaraele wambunya Anatu dokome lowa pii peparae Mosese maiyamo dupwa mana nyepala soo gisiya. Kamongo banya Anatumi Esera keta elyape pisakamiyamo dokome baa kee lao piso siyamuli pyuo gapomane akali mupwa dokome baa bange peparae maiya. Atasesisi baa kiŋi karo ee kana yanda ipingi nembo kareyamopa Esera baa Bapilone piso yuu Jerusaleme panya peya. Pao dokopa baame Isaraele akali purisi dupwape Lipae dupwape tembole anda dokona musiki pingipi tembole anda isingipi yulu pingi akalipi lapo lanyuo peya.
EZR 7:8 Kana mupwa dokona yuu gii mupwa dokona Bapilone yaki nyepala Anatumi nyisiyamosa kana kingi paki dokona yuu gii mupwa dokopa yuu Jerusaleme epo pyaka siyami.
EZR 7:10 Eserame Kamongona lowa dupwa rae maiyuo mana nyepala moko minyuo karo lowa dupwa Isaraele wambu mana lamaiyuo kareya.
EZR 7:11 Kiŋi Atasesisimi purisi akali Esera lenge dokome mawa pii Kamongome Isaraele wambu dupwa maiyamo dupwa soo giso kareyamo doko pepa pase dapa lao pyao palyapala maiya.
EZR 7:12 Namba kiŋi Atasesisimi emba purisi akali Esera Anatu yake panda karenge dokona mawa pii dupwa soo gisingi doko pyao jilyu.
EZR 7:13 Nambame yuu rapu pyuo karenge dokona Isaraele wambupi purisi dupwape Lipae dupwape yuu Jerusaleme panya lao suu pilyaminyi dupwa emba role pyao kapa pena lao lalu lao leto.
EZR 7:14 Nambamoo namba nyiso yulu pingi akali yanda ipingi nyepo dusipamepe Anatunya lowa dupwa emba keta jiyamo dupwa yuu Jerusaleme dokonape Juta dokonape apa pyuo mondo lao minyuo karamipi lao kandala puu letamano.
EZR 7:15 Anatu bange reto maingi dupwa nambape namba nyiso yulu pingi akali dusipamepe Isaraele wambunya Anatu banya tembole anda yuu Jerusaleme karenge doko kana golope kana kulingipi maimwali lao suu pilyamano dupwa embame nyepala minyuo pare.
EZR 7:16 Embame kana golope kulingipi yuu Bapilone dokona nyiinyi dupwape dee bange peparae Isaraele wambupi nakamana purisi dupwapeme nakamana Anatunya tembole anda Jerusaleme karenge dokona mee mailyaminyi dupwa opetae nyuo minyuo pare.
EZR 7:17 Nakamame kana doko kando mondo lao keyange ingyuo nembo mena bulamakao kalipi sipisipi kalipi sipisipi yakanepe witi jingipi waene ipwangepe ropo pyapala Jerusaleme tembole anda kana pyare lasi dokona reto Anatu mairi.
EZR 7:18 Maipala kana kulingipi kana golope kakana silyamo dupwame nyepala embape embena akali yango dupwape pinya suu pilyaminyili pyuo Anatumi pimili lao suu pilyamo dokona palyuo pirami.
EZR 7:19 Bange wakale wakale dupwa tembole anda dokona yulu pirami lao jiyami dupwa peparae yuu Jerusaleme dokona Anatu mairi.
EZR 7:20 Maipala tembole anda dokona yulu pinya saka nayami kande dokopa nambana kana retenge anda dokona nyere.
EZR 7:21 Namba kiŋi Atasesisimi akali kana rapu pingi ipwa Yuporisa neta anda penge dorena yuunya karaminyi dupwame purisi akali Esera lenge Anatu yake panda karenge dokona lowa soo gisingi doko bange kee laramo dupwa peparae mainya leto.
EZR 7:22 Mairaminyi dupwa kana kulingi kilokerame malu mee (3,400) dee witi kilokerame malu mee (10,000) dee waene lita malu (2,000) dee olipi ipwange lita 2,000 opetaeko dusipa iki manda manju mairami. Maipala kota peparae nyimwali lao suu pyaraminyili pyuo kapa mairami.
EZR 7:23 Dokona nakamame bange peparae Anatumi banya tembole anda dokona nyipuli lao suu pyaramuli pyuo mondo lao maiyalapape. Dokopa Anatumi nambape dee enakana akali nambana panda nyuo kararami dupwape kando imbwa nara.
EZR 7:24 Nakamame purisipi Lipaepe musiki pingi akalipi tembole andana kama waa nyii nana lao rapu pyuo karenge dupwape yulu pingi akalipi tembole anda dokona yulu wakale mende pyuo karenge wambu dupwape keta takisi kapa nyii nare.
EZR 7:25 Emba, Eserame Anatumi mona palenge singinya renge jiyamo dokome iso karenge akali lapope kote singi akali lapope rombo palyare. Palyarene dokopa ipwa Yuporisa neta anda penge dorename yuunya wambu Anatunya lowa minyuo karaminyi dupwa rapu pyuo kararami. Kararaminyi dokopa wambu mende lowa dupwana see nayami kande doko mana lamairi.
EZR 7:26 Mendemepe Anatunya lowa dupwanape kiŋinya lowa dupwanape kamba lara ramo dokopa waiya lao randa nyera. Nyeramo doko pyao kumarami panda yuu mendasa karapusi ingyuo pena larami panda banya yuupi bangepe nyerami panda karapusi dokona palyaraminyi kata dusipana mende randa nyera.
EZR 7:27 Esera baame lao, Kamongo namwana rora ambasu dupwana Anatu doko lakando karalapape. Baame kiŋi akali doko Kamongona tembole anda Jerusaleme dokona karenge doko angiŋi lao ketae nembara lao banya mona piya.
EZR 7:28 Anatumi namba kando sakame kumuo kareyamosa kiŋi dokope banya akali nyiso yulu pingi dupwape banya akali mupwa porai renge palenge dupwapeme namba kando rae mailyaminyi. Nambana Kamongo Anatu dokome nambana mona porainyi pyambuyamosa nambame Isaraele rara dupwana akali kyawa malu dupwa kongo piyunusa namba pipya kapu kyuo Jerusaleme epeyami.
NEH 1:1 Akalayana ikinyingi Niyamaya banya arome pii dupwa pyasi palamo. Niyamaya baame dopa leya. Yuu Pesa kiŋi akali Atasesisi baa kiŋi yulu kanda soo pyuo karo enakana ee kana akalisa lama banya yulu minyiyamopa kana Kisilepe dokopa yuu taone mupwa Susa lenge dokona kareyo.
NEH 1:2 Kareyono dokopa nambana yangonge Ananimoo Juta akali lapo pipya epeyami. Epeyaminyi dokopa nambame Juu akali dupwa pyao kumaka nao yuu wakale mendasa puu maiyuo nyii nayami dokona lao piso siyu. Dopako pyuo yuu Jerusaleme dokona lao opetae piso siyu.
NEH 1:3 Piso siyunu dokopa nakamame namba langyuo, Wambu yuu Jerusaleme karaminyi dupwa akali dupwa pyao kumaka nao yuu wakale mendena puu maiyuo nyii nayami dupwa nakama randa andake nyuo elyame kumuo karaminyi. Karaminyipa Jerusaleme kana kame kameya awali lao piro karenge doko lalyuo bolombalo lasi silyamo. Dee Jerusaleme kambu dowa kameya dupwa isareme rao lalyuo kokwa siya, leyami.
NEH 1:4 Leyaminyi doko sepala yuu gii lapo ee lao kumanda peteyo. Pisipala dokopa namba nenge naa nao Anatu yake panda karenge doko ateŋa lao kandalyo kando peteyo.
NEH 1:5 Pisipala dokopa dopa leyo, O Numi Anatu, Emba Kamongo mupwa wakasa ingyuo karene doko namwa pako karamano. Wambu emba kando mona retenge dupwape embena mawa pii yaki nyii nao minyuo pyuo karenge dupwape pipya emba pii lao kana minyuo kinyi lalu lao lenge doko minyaro karene.
NEH 1:6 Embena kendemande Isaraele wambu dupwa emba kando koo piyama dupwana kondapala polo langyuo kukwa korakamape ateŋa lao pyuo karo doko emba kando sepe. Kinyi nambape nambana rakangena ree palupi koo piyamako, lamaiyu.
NEH 1:7 Lamaipala dokopa embena kendemande akali Mosese keta mawa pii jiinyi dupwape moko minyuo pyuo kara nalyamano. Dopa pyuo karo embame namwa pelapa langiinyi dupwa kamba lao yulu kopetame pyuo karamano.
NEH 1:8 Pii embena kendemande akali Mosese lamaii. Embame baa dopa lamaiyuo, Nakama Isaraele wambu dupwa langirunuli pyuo kara narami ramo dokopa nambame nakama yuu wakale dupwana bolombalo lao nembaro doko kame see nao karape.
NEH 1:9 Dokopa nakama namba karo dakena dee kamba kapa kyuo epapala nambana mawa pii doko yaki nyii nao minyakao kararami ramo dokopa nakamana wambu dupwa yuu nanesa puu maiyuo nyuo minyuo paraminyipape nambame nakama yaki nyii napala range nyuo sukusa sukusa pipala yuu mupwa enenge mendena namba lakando kararamiŋi lao yapalyo nyepala dokona karalapa lao jero, lamaii kande, leyo.
NEH 1:10 Lapala dokopa Kamongo doko dapwa embena kendemande emba rangena wambu kandale. Embena porainya renge andake dokome kiiramo nyii dupwa karaminyi.
NEH 1:11 Embena kendemande akali Niyamayana ateŋa lenge dokope embena Isaraele kendemande wambu menge dupwa emba rape rape lao karalana suu pingi dupwana ateŋa lenge dupwape sepe. Epapu namba embone pisinyi pyambuo akali kiŋi karamo dakeme namba kandapala kondana lao nyisinya lao karape, Anatu lamaiyu. Yuu gii dusipana namba kiŋi akalinya nenge ipwa waenepe minyakamyuo epo maipapu pingi akali ingyuo karapala yulu dupwa pyuo kareyo, leya Niyamayame.
NEH 2:1 Kiŋi Atasesisi ee kana akalisa lama kiŋi yulu pyuo kareyamo dokopa kana Nisane dokopa ipwa waene siyamo doko nyepala kiŋi doko minyuo pao maiyu. Wamba namba kiŋinya lenge kambu dokona namba mona rando kumasi lenge kambu nyilyunu doko kanda nange.
NEH 2:2 Rae mai nayo dokona kiŋimi apa pipyasa embena lenge kambu yanga nalyamo lao piso siya. Piso sepala dopa lao, Emba anga pyaa nalyamo. Rae mai napisa embena mona kendo pilini, langiya. Langiyamo dokona namba walu lao pakame kumuyu.
NEH 2:3 Pakame kumapala kiŋi lamaiyuo, O Kiŋi palu karalu karape. Nambana rora ambasupi yuu dokona malu piyami doko momo nao dee yuu dokona kame kambu dupwa isareme rao kokwa sinyi nembeyaminyi dokome apa pyuo namba porayapala mee mona kyuku renge kararose? lamaiyu.
NEH 2:4 Lamaiyunu dokopa kiŋimi namba langyuo, Nambame apa pyakapili lao piso silini? leya. Dokona lao Anatu yake panda karamo doko kando piso soo ateŋa leyo.
NEH 2:5 Ateŋa lapala enakana kiŋi lamaiyuo, Embame embena kendemande akali namba kando ama raeko maiyuo karare ramo doko namba yuu Juta dokona yuu taone andake nambana wambu rora ambasupi karo kumuo peyami dokona taone doko elya pyuo karala puu lao nembape, lamaiyu.
NEH 2:6 Enda kuini doko baa maki pyuo peteyamopa kiŋi dokome yuu gii akipare karapala eparese lao piso siya. Piso siyamopa namba yuu gii dusipa karapala eparo lao lamaiyuokondali piyu. Dokopa kiŋi dokome namba kapa puu langiya.
NEH 2:7 Pii mende kiŋi lamaiyuo, Emba namba kando rae mairi ramo doko pepa pase pyapala jere. Jerenepa nambame minyuo pao gapomane akali dupwa yuu doko yuu kiŋi Ipwa Yuporisa Dumarena lenge dokona iso karenge dupwa mairu. Mairunu dokopa nakamame namba kapa puu lao nembaraminyipa namba yuu Juta epo kando nyepala kararo lao kiŋi baa lamaiyu.
NEH 2:8 Lapala dokopa embame pepa pase mende jerenepa minyuo pao akali kiŋi Asape lenge kiŋinya imwa rapu pingi akali dokome isa pinginyape imwape lapo jeramo dokome yanda singi tembole anda rapu pingi dupwana anda dokona kame kambu kameya pyakamiru. Pipala yuu taone andake dokona ka'a kame doko opetae pipala dokopa namba range anda palirunu doko opetae piruko, lamaiyu. Lamaipala dokopa nambana Anatumi namba yisiyasa kiŋi dokome namba mende pyakapyali lao piso siyunu dokopa jiya.
NEH 2:9 Jepala kiŋi akali dokome yanda singi mupwa dupwape akali ose matana petenge dupwa pipya nambamoo wambo role pyao pupwa lao nembeya. Nembeyamo dokopa yuu kingi Ipwa Yuporisa Dumarena lenge kata lyuo peyo. Papala dokona kiŋinya pepa pase doko gapomane akali dupwa maiyu.
NEH 2:10 Dokopa yuu Orane akali kingi Sanepelate lengepe akali kingi Topaya lenge yuu Amo dokona mupwa karengepe dolapome namba Isaraele wambu nyisala epeyo doko sepala ama imbuo kareyambi.
NEH 2:11 Dopa pyuo kareyambinyi dokopa namba Jerusaleme kando nyepala dokona yuu gii rema mee kareyo.
NEH 2:12 Karapala dokopa nambana Anatumi Jerusaleme dokona mende pipi lao monarena langiyamo doko nambame mendali lamai nayo. Lamai napala namba kukwa sipurapala akali mendasipa nambamoo role pyao peyamano dokopa mena donge dupwa karena lapala mendaki iki nyepala piso peyo.
NEH 2:13 Peyo dokopa kukwa dokopako nambame yuu taone doko yaki nyuo kame kambu kingi Yuu Lama Lama lenge neta yalyingi dorena singi kata dokona pao ipwa kamuo nyingi pete kingi Kau Pambeya donorena singi lenge dorena palyama palyama pao kame kambu kingi Rone Nembenge lenge doko kando nyiyama. Paole pyuo karo dokopa namba Jerusaleme kana kame lalyiyamo dokope dee kame kambu isareme rao kwaeya dusipa repeta pao poraiyuo kandama peyo.
NEH 2:14 Papala yuu taone andake dokona neta potemenge dorena dulurena pao kame kambu Ipwa Guu Lenge lenge dokona epapala Kiŋinya Ipwa Pete Singi dokona epeyo. Epeyo dokopa donge namba piso epeyono doko paramo kata doko see nayasa saka naya.
NEH 2:15 Saka napala kukwa dokopa pao yuu lama lama kingi Kitone lenge dokona lano pao dokopa kana kame doko kandama peyo. Papala namba peyono kata dokona kapa kyuo epo kame kambu kingi yuu Lama Lama lenge dokona sukusa pao yuu taone dokona kamba peyo.
NEH 2:16 Dokopa akali kamongo dupwame namba anja pupi laope apa pipi laope see nayami. See nayaminyipa Juu yango purisi akali dupwape lita akali dupwape kamongo akali dupwape wambu menge yulu dokona piramale dupwape dupwana mendepe lamai nayo.
NEH 2:17 Dopa piyunupape enakana nakama lamaiyuo, Nakama namwa randa nyimwa doko kandelyaminyi doko yuu Jerusaleme rao banamau lapya kame kambu dupwa rao kwaeyo pipyamo doko kandelyaminyi. Namwa elya napala Jerusaleme kana kame doko dee kamba range pimanale ipupwa, leyo.
NEH 2:18 Lapala dokopa nambana Anatu dokome namba nyisiyamo dokona lao nakama lamaiyuo kiŋinya pii langiya dupwa opetae lamaiyuko. Lamaiyunu dokopa nakamame namba langyuo, Sipurapala pimanale, leyami. Lapala nakama yulu keyange dokona suu pyao poraiyuo pelana kanda siyami.
NEH 2:19 Dopa piyaminyi dokopa Sanepelatemoo Topayamoo Arape akali Geseme dokomoo doo pinya piyamano doko sepala dokopa giyalya giyana pyuo lao kilya kandalya kandana pyuo dopa lao kareyami. Doko apa pilyamisi? Kiŋi doko kando kamba lao isa palyamwali lao piramisi? leyami.
NEH 2:20 Dokopa nakama isingi lamaiyu, Anatu yake panda karenge dokome namwa ree jepala mondo lao pipala karalamisi laramo dokona namwa banya kendemande wambu dupwa sipurapala pirama. Piramanopape Jerusaleme liti mende kana semene palya nasi dokome yuu nakamana ingya nalyamoko, lamaiyu.
NEH 4:1 Sanepelateme namwa kana kame piyama dokona sepala baame imbu singi manjo Juu wambu dupwa kando giyalya giyana pyuo minyoko pili lao kareya.
NEH 4:2 Banya yangonge dupwape Samaria yanda pingi akali dupwapena lenge kambu kando dopa leya, Juu wambu wale wale lasi dupwa apa pilyamisi? Nakamame bange kwaenge dupwa kapa pyuo dee singinyili pyuo pyuo waselana pilyamisi? Nakamame mena pyao kiso maipala yuu gii mendakinya kana kame pyuo otaramisi? Kana rao longasi dupwa isa pao siyamo dupwame apa pyuo kapa nyuo kana kame piramisi? piso siya.
NEH 4:3 Piso siyamo dokopa Amo akali Topaya lenge doko akali Sanepelate role pyao karapala dopa leya. Kinyi lene. Suwa rae lenge mendeme nakamana kana kame dokona pulyara ramo dokopa kana kame doko boo lara, lamaiya.
NEH 4:4 Dokopa Niyamayame loma soo lao, Namwana Anatu wambu dupwame namwa rae pisa nalyaminyi dokona pii dake sakape. Pii doko nakama letaminyili pyuo nakama range keta kyawa sisinginya palyakamipi. Nakamana yuu doko namwana yuu kwaeya siya dopaleko ingyuo kwaeyo sinya lakape. Dee nakama dopako pyuo puu maiyuo yuu wakale mendena lanyuo pena lakape.
NEH 4:5 Akali kana kame pilyaminyi dupwana lenge kambu dokona nakamame imbu singi nyakamilyaminyi dokona nakamana yulu koo pilyaminyi dupwa nyuo kame sakami napipi.
NEH 4:6 Wambu dupwa nakamana suu pingi dokome poraiyuo suu pyapala kapa pirama leyami dokona kana kame doko piyama. Pipala dokopa kana kame doko anda kanya dokona pyuo palyiyama.
NEH 4:7 Dokopa Sanepelate Topayapa dee Arape wambu dupwape Amone wambu dupwape Asotote wambu dupwape Jerusaleme kana kame kamba waso mondo lao piyamano dokope dee kana kame lalyisi rete dupwa kanda soo upi leyaminyi dokope sepala nakama imbumi kumuyami.
NEH 4:8 Imbumi kumapala nakama peparae epo lao palyapala Jerusaleme wambu dupwa pyao yulu doko kuimu kaimu palyuo nembalana leyami.
NEH 4:9 Leyaminyipape namwame namwana Anatu baa kando lao ateŋa lapala namwana kando iso karenge akali lapo karo nyisu petenge wambu dupwa epa nana lao kando iso karena leyama.
NEH 4:10 Leyamano dokopa Juta akali dupwame kenane pyao dopa leyami. Yulu malu pipala yulu pingi akali dupwa maka suku suku nelyaminyi. Kana longasi malu sipyamosa namwame kana kame kapa pinya saka nalyamano, leyami.
NEH 4:11 Leyaminyi dokopa namwana nyisu petenge wambu dupwame lao, Nakamame namwa kando soope pipa naraminyipa sukusa epapala nakama pyao kumakao yulu doko kaena larama, leyami.
NEH 4:12 Dokopa Juu akali lapo nyisu petenge wambu maki palenge dupwa epo namwa kareyama dokona pao kamba kamba langiyaminyi siyama. Namwana nyisu petenge dupwame namwa pyalana lao lao reteyami doko langiyami.
NEH 4:13 Dopa pipala nambame nakama kana kame matarena kata rete siyamo repeta nakamana rara wambu lili pyuo petena lapala nakamana wua gelape kaku yandape dupwa rapa rapa pyuo minyaro petena leyo.
NEH 4:14 Dopa pipala kando sipurao lita akali dupwape akali isingi dupwape dee wambu menge dusipape lamaiyuo, Nakamame doloma kando paka nalapape. Kamongo wakasa ama porai doko baa suu pyapala nakamana yangongepe ikinyingipi wanengepe endape dee ree palu dupwana lao reke lao yanda pilapape, lamaiyu.
NEH 4:15 Lamaiyunu dokopa namwana nyisu petengeme nakamana pii lao palyuo reteyami doko siyamilyamo lao siyami. Siyaminyi dokopa namwa peparae kapu kyuo pao kamba kana kame yulu piyama.
NEH 4:16 Yuu gii dokona piso nambana wambu kanya dupwa liti pipala mendeme kana kame doko piyami dokopa liti mendeme namwana kakupi konambepe yandape kapame wasisi bange poraipi minyaro kareyama. Dokopa lita akali dupwame Juu wambumi kana kame pyuo kareyaminyi dupwa paka pyao siyaminyipa piyami.
NEH 4:17 Dokopa yulu bange soo epenge akali dupwame kingi pakirena yulu pyuo kingi pakimi nakamana yanda kakupi minyaro karo epeyami.
NEH 4:18 Yulu pingi akali peparae wua gela mendaki mendaki lao marapunya manjaro karo yulu piyami. Piyaminyi dokopa akali byara yale bikuli poo lenge doko namba repeta kareya.
NEH 4:19 Nambame lita akali dupwape akali isingi dupwape wambu menge yulu piyami dusipape kando lamaiyuo, Yulu doko andake ingyuo siyasa namwa panda wakale wakale karo raeyo pela pelyamano, lamaiyu.
NEH 4:20 Lamaipala bikuli pii akali poo laramo doko siyami kande dokopa yuu dokona namba pipya epo malu palyarami. Namwana Anatu dokome namwana lao yanda pyakara, lamaiyu.
NEH 4:21 Dokona lao yuu gii peparae namwa pakimi yulu poraiyuo pyuo kareyamanopa pakimi kaku dupwa minyaro karo pao kwualepalepa bui pyakayamo dokopa kaepa piyami.
NEH 4:22 Yuu gii dokopa wambu dupwa dopako pyuo lamaiyuo, Namwa akali peparae dupwape namwana kendemande dupwape Jerusaleme kame sukusarena kukwa dokopa palimanale. Kukwa dokopa namwa iso palu yuu yangaramo dokopa yulu pirama, lamaiyu.
NEH 4:23 Lamaipala dokopa nambamoope nambana yangonepe nambana kendemandepe iso karenge akali namba pelyonyili pyuo epenge dupwape namwana komau dupwa roko alowa pii nayama. Alowa pii napala akali peparaeme yanda kaku kingi rakana palyaro kareyama.
NEH 8:1 Wambu dupwa peparae kana kame kambu kingi Ipwa lenge repeta kamapi dokona sukusa sukusa pyuo malu palyiyami. Dopa pipala dokopa nakamame Mawa Pii mana lenge akali kingi Esera lenge doko lamaiyuo, Mosesena Mawa Pii buku Anatumi Isaraele wambu maiyamo doko minyuo epena lamaiyami.
NEH 8:2 Purisi akali Esera dokome baa Mawa Pii buku doko wambu malu palyuo peteyaminyi dokona minyuo epeya. Epapala dokopa kana yanda ipingi yuu gii mendaki dokona enda akalipi wane wanakepe api mendeme Mawa Pii seramili dupwame soo peteyaminyipa Esera Mawa Pii doko yaka leya.
NEH 8:3 Dopa pyuo leyamopa yangamana piso pao korakama kana kame kambu kingi Ipwa lenge repeta dokona kanda kanda piso yaka leya. Dokopa wambu peparaeme kale yukupala pii sokondali pyuo peteyami.
NEH 8:4 Mawa Pii mana lenge akali Esera doko baa pii lao karenge ratende pyuo wasiyami dokona ketae kareya. Kareyamopa akali Matitayamoo Sema Anaya Uraya Ilikaya dee Masayamoo dusipa banya kingi rolaerena kareyami. Kareyaminyi dokopa akali Petayamoo Misaele Malikasa Asumu Asapatana Sakaraya dee Mesulamemoo dusipa banya kingi kyairena kareyami.
NEH 8:5 Dopa piyaminyipa Esera baa rate dokona ketae kareyamosa wambunya lenge kambu dokona buku doko lumbuyamopa kapa kandapala nakama peparae roya kareyami.
NEH 8:6 Kareyaminyi dokopa Eserame Kamongo Anatu andake ingyuo karamo doko lakandeya. Dopa pyuo lakandeyamopa wambu peparaeme nakamana kingi ketae pyambuo kinyi kinyi lamaiyami. Lamaipala dokopa nakamana wapambu pii pyaro piso Kamongona kingi lao ayemba pongwa nao peteyami.
NEH 8:7 Wambu dupwa soo kareyaminyi dokopa Jesuamoo Bani Serepaya Jamini Akupu Sapetae Otaya Masaya Keleta Asaraya Josapate Anane Pelayamoome wambu dupwa Mawa Pii dokona polo lamaiyami.
NEH 8:8 Polo lamaiyuo dokopa nakamame Anatunya Mawa Pii buku dokona kambunya eŋa nembo leyami. Dokona lao wambu dupwa soo nyeramiŋi lao renge angi polo yaka leyami.
NEH 8:9 Wambu dupwa peparaeme mawa pii sepala dokopa ee leyami. Dokona lao yaka leyaminyipa Niyamaya baa Jerusaleme gapomane yulu pyuo kareyamo dokope Esera purisi yulupi mawa pii mana lenge yulupi pyuo kareyamo dokope dee Lipae wambumi mawa pii polo lamaiyuo kareyaminyi dupwape nakama peparaeme wambu dopa pyuo lamaiyami, Yuu gii dake nakamana Kamongo Anatunya yuu gii poo pyasi ingyuo silyamo dokona nakama ee lao kumaralerale nyii nalapape, lamaiyami.
NEH 8:10 Dokopa Esera nakama lamaiyuo, Nakamana anda wakale wakale keyange papala nenge dupwa nao waene ipwange rende pingi doko nao dee wambu dolo nenge rapa rapa pii nayami dupwa mokwa soo maiyuo pyuo pupwale. Renge doko yuu gii dake namwana Kamongopa poo pyasi ingyuo silyamo dokona yamarangyuo ee laa nalapape. Kamongona rae maingi renge dokome nakama porainyi pyambwara, leya.
NEH 8:11 Lipae akali dupwame wambu peparae mona sinya lao lao, Yuu gii dake poo pyasi ingyuo silyamo dokome ee lao kumaralerale nyii nalapape, lamaiyami.
NEH 8:12 Pii doko soo nyiyaminyi dokome wambu peparae kata nyuo papala nenge nao ipwa nao nenge mokwa soo maiyuo raeme kumuo piyami.
NEH 8:13 Mawa Pii mana nyeramaŋa lao yuu gii lapo dokopa ree palunya rakange kyawa dupwape purisi akalipi Lipae akali dupwapeme Esera mawa pii mana lenge akali kareyamo dokona epo pyasiyami.
NEH 8:14 Dokopa nakamame mawa pii pepa pyasi Kamongo dokome Mosese keta pyao retena leyamo doko Isaraele wambu dupwa nenge yalya kando nenge nenge kana yanda ipingi dokopa anda kauwa dupwana mee palirami leyamo doko kando nyiyami.
NEH 8:15 Dopa pyuo kando nyepala dokopa yuu taone dupwanape yuu Jerusaleme dokonape pyao reto lamaiyuo, Anda kauwa pinya karo dokopa yuu kyau kuki dupwana papala isa olipi anginya wangyape olipi ayangena wangyape isa metilipi bona isape dee isa wakalena wangyape nyerami lao pyasi palamo dokona letamuli pyuo pirama.
NEH 8:16 Dopa pyuo wambumi pao nyepala dokome nakamana semene anda yangi ketae warake dupwanape kamapi dupwanape Anatunya anda kamapi dokonape kame kambu kingi Ipwa lengena kamapi dokonape dee kame kambu kingi Eporaime lengena kamapi dokonape dusipana peparae anda kauwa rangena piyami.
NEH 8:17 Dokopa wambu yuu nanesa karapusi ingyuo palyuo epeyami dupwame anda kauwa pipala paleyami. Doko yuu gii Josua Nanena ikinyingi kareyamo dokona piso pao anda kauwa dopale pii naoko pao dolomame kanda soo piyami. Dopa pyuo pipala nakama raeme kumuyami.
NEH 8:18 Koro mendakinya nenge nao peteyaminyi dokopa yuu peparae lao Esera baame Anatunya Mawa Pii palenge buku dokona yaka lapa piya. Dee yuu gii mange lama dokopa Mawa Pii leyamuli pyuo misi lao kii palyiyami.
NEH 9:1 Kana mendaki dokonako yuu gii akalisa lama ipisu kisima dokopa Isaraele wambu dupwa epo mendakinya pisipala nakamana koo dupwana lao sakame kumuo nenge naa nao peteyami.
NEH 9:2 Nakama yuu wakale range wambu dupwa liti pipala kareyami. Dopa pipala dokopa kumanda piso wapungi komau wapuo pee awaipi pyapala nakamana koope dee rora ambasupi dupwana yulu koo piyami dupwa kanda soo polo leyami.
NEH 9:3 Leyaminyi dokopa wambu lapome Anatunya mawa pii dupwa keloke gii rema nembo yaka leyami. Lapala dokopa dee keloke gii remako nembo nakamana koo dupwa polo lao dee nakamana Kamongo Anatu lakando kareyami.
NEH 9:4 Jesuamoo Bani Katemele Sepanaya Buni Serepaya Bani dee Kenanimoo dupwa peparae Lipae rara dokona kareyami. Rate kuki dokona karo nakamana Kamongo Anatu lao pii ketae palyuo ateŋa leyami.
NEH 9:5 Lipae rara dupwa ateŋa lao piyami dokona wambu dupwa dopako pyuo misi lao pinya leyami. Jesuamoo Katemele Bani Asapenaya Serepaya Otaya Sepanaya Petatayamoo dusipame lao, Roya karapala nakamana Kamongo Anatunya lao kingi lakandalapape. Baa yuu peparae lakando karalu karalapape. Karapala mee akalimi ingyuo embena kingi kapa lakanda nalyaminyipape Kamongo embena kingi neta renge doko wambu peparaeme angi ingyuo lakandenale.
NEH 9:6 Isaraele wambu dupwame ateŋa dake piyami. Kamongo doko embako iki Kamongo ingilyamo. Embame yakepe yakena buipi pyuo wasii. Embame yuupi ipwa kotape bange silyamo dupwa peparaepe embame pyuo wasii. Bange dupwa peparae embame letena renge maii. Aŋala yake panda karaminyi dupwame emba lao pangu soo lakandenge.
NEH 9:7 Emba Kamongo Anatu, embame Aporame rombo palyii. Embame baa yuu Bapilone yuu kuki Ua doko yaki nyuo lanyuo pee. Papala embame banya kingi doko alowa pyuo Aporakame lee.
NEH 9:8 Embena yulu dokona yaki nyii nao mondo lao pyakao kareyamo kandee. Dokona embame baapa kando lao kana minyuo lalu lao lee. Embame yuu Kenanepe Iti rangepe Amo rangepe Perasi rangepe Jepusi rangepe Gukase range dupwa palenge dupwanape banya ree palu dupwa palirami lao Mairu lao doko lalu lao leepya Embame lenge nyili pyuo pingi dokona embena lalu lao lenge doko kaeya nao minyingi.
NEH 9:9 Namwana rora ambasupi dupwa apa pyuo yuu Isipi dokona randa nyiyami doko kandee kande. Wambu dupwame Ipwa Kota Pete Kone lenge marenge dokona karo nyisala ipu leyami doko emba sii.
NEH 9:10 Embena wambu dupwa randa maiyami doko emba sepala Embame yulu pii nange yamarangaramili dupwa kiŋi Peraope banya akali mupwape dee banya yuu range wambupi keta randa maiyuo pii. Dopa pyuo anamasi minyii dokona embena kingi doko andake ingyuo silyamo.
NEH 9:11 Ipwa kota dokona sukusa embena wambu dupwa pena lapala kata lanyuo peenesa oo lasi siyamo dokona epeyami. Peteta epeyami dupwa embame ipwa kota kiwa dokona kana nyuo yalyalamuli pyuo nyuo yalu piipya.
NEH 9:12 Korakama dokopa kopa soo lanyuo pao kukwa dokopa isare rao lanyuo pao piipya.
NEH 9:13 Yake dokona karo epo yuu Sainai kyau dokona embena wambu dupwa pii lamaii. Mawa pii keyange dupwa maiyuo mana pii rolae dupwa lamaiyuo pii.
NEH 9:14 Juu wambunya koro petenge yuu gii poo pyasi dokona waso karena lao mana lamaiyuo dee embena kendemande Mosese keta embena mawa pii dupwa maiyuo pii.
NEH 9:15 Wambu dupwa lopayami dokopa yake dokona piso borete maiyuo dee ipwa nanayami dokopa kana dokona ipwa guu lanyi peyakamyuo piipya. Embame yuu mairu lao lalu lao lene doko nyuo kalyinya lao lamaii.
NEH 9:16 Dopa piyamopape namwana rora ambasu dupwame nakama range andanyi nembo mona kana pokapala embena mawa pii dupwa kando kamba lao kareyami.
NEH 9:17 Embena yulu piinyi dupwa nyuo kame sepala kamba leyami. Embame yulu pii napengele lapo pii kande dupwa kame sepala kamba leyami. Nakama kyaŋe soo karo akali mupwa mende Isipi dokona kapu kyuo wambu dupwa kendemande ingyuo karena lao dee lanyuo pena lao rangeme rombo palyiyami. Dopa piyamopape emba Anatu dokome nyuo kame singi. Emba ipyapala mona keyange palenge. Emba mona reto karenge. Emba waiya lao imbwa nange. Embena kondo sakange kumungi renge doko kamame andake. Embame nakama yaki nyii nange.
NEH 9:18 Wambu dupwame kingimi mena bulamakao yale mende pyuo wasapala doko namwa Isipi karo nyuo lanyuo epeya dokoŋo leyami. Yuu malu mee leyaminyi dokopa Kamongo emba isipyao leyami.
NEH 9:19 Dopa leyaminyipape embena kondo sakame kumungi renge doko kamame wakasa dokome yuu muiyane dokona embame wambu dupwa kyawa yaki nyuo kaeya naye. Kukwa korakamape kata lasaka piinyi doko isare kopape dolapo nyisa nyii naye.
NEH 9:20 Emba keta renge keyange palenge dokome nakama apa pyuo pirami dokona lao mana lamaiyuo dee nenge myanape ipwape nena lao maiyuo kareya.
NEH 9:21 Ee kana akalisa kisima dusipana yuu muiyane dokona epo kareyami dokopa nenge naramili dupwa maii. Nakamana komau dupwa kangu paa nao dee nakamana kimbu dupwa randa pyuo rondo laa nao piya.
NEH 9:22 Embame wambu rarape yuu isingipi dee nakamana yuu range dokona repeta singi yuupi anamasi minyinya lee kande kiŋi Sayone banya iso karenge yuu doko Esepone anamasi minyiyami. Dee kiŋi Okona yuu Besane doko opetaeko anamasi minyiyamiko.
NEH 9:23 Embame akali wai kisinyipa yakena bui karapyamo mendeme yaka laa nalyaminyi dopale inginyi pyambii. Nakamana rora ambasu dupwa yuu doko mairunupa palirami lao lalu lao leene dokona nakamame anamasi minyuo epo palena lee.
NEH 9:24 Nakamame yuu Kenane doko pyao isa palyiyami. Embame wambu yuu dokona paleyami dupwa pyao anamasi minyii. Minyapala dokopa wambu dupwape dee kiŋi dupwape yuu Kenane kareyaminyi dupwa nakama keta maipala pyalana suu pilyaminyili pyuo mee pinya lapala kaeyo.
NEH 9:25 Yuu taone andake kana kame porai dokome minyaro karengepe yuu amenge pingipi anda bange keyange kana malu parali dupwa pale palepe ipwa yuwale kyasi sinya singipi olipi isape jingi lyingi isa lapope dee isa girapo ee dupwape peparae embena wambu dupwame nyiyami. Nakama nalana suu piyami dupwa mee napala ando rondo lasi ingiyami. Embame bange keyange maingi dupwana lao moname nyiyami.
NEH 9:26 Dopa piinyipape embena wambu dupwame emba kando kamba lao embena Mawa Pii dupwa yalo kareyami. Nakama emba keta kapu kyuo epena lao repe repe lao kareyami poropeta akali dupwa pyao kumakayami. Nakamame emba kando yuu yangama yangama lao kilya kando lao kareyami.
NEH 9:27 Dokona embame nakamana yanda pimwai dupwame nakama anamasi minyapala iso karena lao pii. Nakamana randa nyepala emba nyisapili lao kee leyami dokopa embame yake dokona piso nakamana pii sepala nyiso karee. Embame kondo sakame kumungi dokome nakamana nyisu petenge dupwa keta kiiramo nyeramiŋi lao akali mupwa dupwa mai.
NEH 9:28 Mona kyuu lao siyamo kareyami dokopa dee yulu koo dupwa pyuoko kareyami. Dopa piyaminyisa nakamana yanda pimwai dupwame dee kamba nyuo anamasi minyinya lao kata maipala kaeye. Dopa piinyi dokopa nakamana koo dupwa polo lao dee emba nyisa lao piso siyami dokopa yake panda karo sepala embena kondo sakame kumungi renge dokome deeko kyawa lete nyuo karee.
NEH 9:29 Embena mana pii doko rape rape lao pinya lapala repe repe lamaiyuo karee. Akali mendeme embena Mawa Pii minyuo karenge doko lete para kata singi. Dopa piyamopape wambu dupwa moŋo kyaŋe siyami dokome embena Mawa Pii dupwa yaki nyakao mata maiyami. Ayemba suu pipala mona kana poko emba letenyili pyuo pii narama daa lao kareyami.
NEH 9:30 Ee kana peparae embame wambu dupwa pipya imbu singi nyii nao waa waa lao repe repe lamaiyuo karee. Embena poropeta akali dupwa keta nakama pii lamainyipa embena wambu dupwa kale poeyasa see nayami. Dokona lao wambu yuu lili wakale lapome embena wambu dupwa iso karena lao panda maiyuo kaeye.
NEH 9:31 Dopa piyamopape embena kondo sakame kumungi renge doko kamame wakasa ingiyasa nakama pyao kokwa soo koo keta palya nana lao yaki nyii naye. Emba ama sakame kumungi Anatu dokome ipyuo mona keyange palyuo dopa pyuo nyiso karenge.
NEH 9:32 Anatu, Namwana Anatu doko emba kamame wakasa. Emba ama porainya renge palenge doko wambu soo pako karaminyi. Embena pii lalu lao lao kana minyingi doko emba yaki nyii nange. Asiria kiŋi dupwame namwa piyaminyi yuu gii dokona piso pao epapu dokona namwa randa andake nyuo karamano. Namwana kiŋi dupwape namwana lita dupwape namwana purisi dupwape namwana poropeta dupwape namwana rora ambasu dupwape dee namwana wambu peparaepe randa nyuo kareyami. Dokona namwa randa kuki lama nyiyamape lao suu pyape.
NEH 9:33 Namwa koo pingi dokopa embame namwa rolae pyuo pyalana pyuo randa jingi. Dopa pyuo namwa koo pilyamanopape embame namwa yaki nyii nange.
NEH 9:34 Namwana rora ambasupi namwana kiŋipi namwana litape dee purisipi dupwa peparaeme embena Mawa Pii doko minya nayami. Nakamame embena repe repe piipi embena pinya lao pii poraiyuo ingyuo lengepe dupwa see nayami.
NEH 9:35 Embame nakama elyape keta pisi dokopa kiŋi dupwame embena wambu dupwa mondo lao iso kareyami. Embame yuu amenge kapape paleta pee lasi doko mainyipape koo dupwa wanja nayami dokome embena yulu pii nayami.
NEH 9:36 Dakepa doko embame namwa yuu amengeko nenge kakana pingi jiinyi dokona epapu kendemande ingyuo karamano.
NEH 9:37 Lao namwa koo piyamano dokome embame kiŋi dupwa namwa isinya lao jiinyisa yuunya nenge jingi wara piyama dupwa nakama keta pelyamo. Namwana mena dee namwape nakama mende pinya suu pyaminyili pyuo piminyisa randa nyuo mona rumbingi karamano.
NEH 9:38 Yulu dupwa peparae piyamo dokona namwa Juu wambu dupwa epapu namwa pii kinyi mendakinya palyuo lapala pepa pyao retelyamano. Dokona namwana litape namwana Lipae rarape namwana purisipi dupwame nakamana kingi pyao make retelyaminyi.
EST 1:1 ...
JOB 1:1 Yuu Ase dokona akali mende kingi Jopo lenge doko kareya. Karapala baa elyape ingyuo yuu peparae yulu rolae pyuo kareya. Dee akali doko Anatu pakale pakale lao lakando pyuo yulu koo dupwa wanjo kareya.
JOB 1:2 Baame wane yanda ipingi nyepo dee wanake rema manjo pingi.
JOB 1:3 Banya mena sipisipi dupwa taosande yanda ipingi nyepo (7,000) kareyami. Banya mena kamele dupwa taosande rema (3,000) kareyami. Banya mena bulamakao yale kingi okese lenge dupwa taosande mendaki (1,000) kareyami. Banya mena donge andete kingi paki (500) kareyami dee banya kendemande akali soo kaeyoko kareyami. Kareyaminyipa Jopo baa yuu neta pyakaenge dorena kamongo doloma manda manja nayamo kareya.
JOB 1:4 Kareyamo dokopa akali dokona ikinyingi dupwame yuu gii enenge pyaka silyamo dokopa nakamana anda range dupwana nenge malu palyuo napapu pingi. Yuu gii dokopa nakamana pemalenge rema dusipa dae nengepe ipwape nala epena lapapu pingi.
JOB 1:5 Yuu gii dusipana nenge nao otelyaminyi dokopa akali Jopo banya ikinyingi dupwa kee lapala nakama kando ateŋa lakamyuo poo pyasi ingyuo pinya lao lapapu piya. Wamba kukwa sipurapala baaame wane dusipa suu pyao mena mendaki mendaki lao wakale wakale pyapapu pyakamiya. Pyakamipala dokopa dopa lao leya. Nambana ikinyingi dupwa koo mende piyami ramo doko Anatu mata maiyami ramo dokome dopa rapisi lao pilyu.
JOB 1:6 Yuu mende yake panda karenge dupwa Anatupa wato lala epeyaminyi dokopa Satane opetae epo peteya.
JOB 1:7 Epeyamo dokopa Kamongome Satane lamaiyuo, Anja piso ipisi? lamaiya. Lamaiyamo dokopa Satane isingi lamaiyuo, Yuu muu dokona kata papyuo karo pulyuo pao lupyuo epo paeyalya paeyana pyuo karo ipu, lamaiya.
JOB 1:8 Lamaiyamo dokopa Anatumi Satane piso soo, Embame nambana kendemande akali Jopo doko apyakale karamo lao soo karepe daa? piso siya. Akali mende baa yale kara nalyamo. Baa iki akali elyape ingyuo yuu peparae yulu rolae pyuo karamo. Baame namba Anatu pakale pakale lao lakando pyuo yulu koo dupwa waso karamo kande.
JOB 1:9 Dokopa Satane baame Kamongo isingi lamaiya. Jopo baame emba keta nyiso karulipi nao kararo lao kingi lakandengepe? Doko kinyi daase?
JOB 1:10 Embame baa range banya ree palupi banya bange dupwape peparae nyuo arapunya palyuo minyakamyuo karenge kandale. Embame banya yulu piya doko ando keyange ingyuo pena lao baa rangena mena wai kiso yuu keta pinya lao nyiso karene.
JOB 1:11 Karenepape embame banya bange dupwa minyando randa mairi ramo doko baame Kamongo embena lenge kambunya karo embena kingi kokwa soo lara, Sataneme lamaiya.
JOB 1:12 Lamaiyamo dokopa Kamongo dokome Satane lamaiyuo, Kapa, see. Bange baa ayapya dupwa peparae embena porai dokona silyamo. Sipyamopape banya yongo doko kokwa see napipi, lamaiya. Lamaiyamo dokopa Sataneme Kamongo baa rekya lao peya.
JOB 1:13 Yuu gii mendepa Jopo banya ikinyingi porai dokona anda ikinyingi menge dupwa pipya role pyao nengepe ipwa waenepe yalya kando nao peteyami.
JOB 1:14 Peteyaminyi dokopa pii minyuo papingi akali mendeme epo Jopo lamaiya. Mena bulamakao yale kingi okese lenge dupwame ee dokona isa ipyuo nyuo yuu apu rao karamwano dokopa mena donge dupwa isayoko nao mee repeta karami.
JOB 1:15 Karaminyipa Sapeyane akali dupwame waiya lao epo mena dupwa minyarala nyepala kendemande akali dupwa pyao kumami. Pyao kumakamisa namba iki pyakao epo emba langyala epano, lamaiya.
JOB 1:16 Pii doko ene lao wetapa nayamo dokopa kendemande akali mendeko epo lao, Yuu pele yake panda dokona piso Anatumi malyasa epo mena sipisipi kendemande akalipi dupwa nao otalamo. Namba iki pyakao epo emba langyala epano, lamaiya.
JOB 1:17 Lamaiyamopa dee akali dokome lao kareyamo dokopa kendemande akali mendeko epapala lao, Kalitia akali dupwa liti rema ingyuo mokwa soo waiya lao epapala mena kamele dupwa minyarala nyepala kendemande akali dupwape peparae pyao kumakaminyi dokopa namba iki pyakao epo emba langyala epano, lamaiya.
JOB 1:18 Dopa lao kareyamo dokopa akali mendeko epo pii lamaiya. Embena ikinyipi wanenepe dupwa nenge nao ipwa waene naope wane porai dokona anda pisimi.
JOB 1:19 Pisiminyi dokopa porambaiye andake doko yuu muiyane dokona piso minyuo epapala anda kyukyunaya dusipana lalyalamo. Lalyapala pisiminyi dokona boo lao palipala wane wanake dusipa pyao kumalamo. Namba iki pyakao epo emba langilyu, lamaiya.
JOB 1:20 Lamaiyamo dokopa Jopo roya karo banya komau pilyini nembapala yuu dokona mukumbwalo sepala baa randa epeyamo dokona kyawasi angasi pyao Anatu lakandeya.
JOB 1:21 Dee baame leya. Namba anyimi ene doo manjo nyepeyamo dokopa namba komau yambalepe wapuo epa nayo doko suu pyao kumuo paro dokopa dopako piru. Kamongo bange jiyamo dokome range nyuo pwuamo. Pwuamo dokona banya kingi doko lakandapenge, leya.
JOB 1:22 Randa malu epeyamopape Jopo yulu koo pii nao Anatu keta sero suku laa naya.
JOB 2:1 Dee yuu mende yake panda karenge dupwame Anatupa wato lala epeyaminyi dokopa Satane baa opetae sukusa epo peteya.
JOB 2:2 Epeyamo dokopa Kamongome, Emba anja piso ipisi? lao piso siya. Leyamopa Sataneme isingi lamaiya. Yuu muu dokona kata papyuo karo pulyuo pao lupyuo epo paeyalya paeyana pyuo karo ipu, lamaiya.
JOB 2:3 Lamaiyamo dokopa Kamongome Satane piso soo, Embame nambana kendemande akali Jopo doko apyakale karamo lao soo karepe daa? piso siya. Akali mende baa yale kara nalyamo. Baa iki akali elyape ingyuo yuu peparae yulu rolae pyuo karamo. Baame namba pakale pakale lao lakando pyuo yulu koo dupwa waso karamo kande. Kamongome Satane pii mende lamaiyuo, Embame Jopo mee randa maipuli lao namba kongo pyuo poraiyuo lapinyisa piyale lao panda joo kaeyapunupape Jopo baa mee wamba pingi mona dokako palyuo karamo, leya.
JOB 2:4 Sataneme Kamongo isingi lamaiyuo, Akali mendeme baa range lete karalana karo banya bange wanepe dupwa kombe maiyuo kaelyamo.
JOB 2:5 Dopa pyuo karamo dokona lao embame baa rangena yongo kulipi dokona randa mairi ramo dokopa Jopo baame embena kingi nyuo kokwa soo kando lara, lamaiya.
JOB 2:6 Lamaiyamopa Kamongo dokome Satane kando lao, Kapa lalyeneko doŋo Jopo baa embena kingi rakana karamo. Pinya suu pyarenyili pyuo piri doŋo kumasaka napipi, leya.
JOB 2:7 Dokopa Sataneme Kamongo yaki nyuo papala akali Jopo banya yongo peparaena rete kinju kiso maiya.
JOB 2:8 Dokopa Jopo bange nenge pinjingi nembenge mare dokona pao pisipala pere kambasi mende nyepala yanenge yuu pyuo peteya.
JOB 2:9 Dokopa Jopona etengeme baa lamaiya. Emba Anatu kilya kando lao nembo dee kumuo papala kaeya nana. Akipamo mee mondo mondo lao suu pyao waso karene? leya.
JOB 2:10 Leyamopa Jopo baame lamaiyuo, Emba enda kyawa sisingi pali nao mee yanenge piinde lalyaneŋe. Bange keyange Anatumi jilyamo dokopa namwa mona kare kare nyingi kandale. Dee randa jilyamo dokopa akipamo mumu laramase? leya. Randa epo kareyamopape Jopome Anatu kando kuki pipalape pii koo mendepe nenge rako ipyuo laa naya.
JOB 2:11 Akali Jopona puu minyingi rema dusipa banya randa epeyamo dokona lao sepala nakama rangena yuu dokona karo epeyami. Nakama dusipa rara Temane kingi Elipasemoo rara Sua kingi Bilitate rara Namate kingi Sopamoo wato wambo lapala enakana Jopo kondo andake piyasa yara lao yako lala monale lao epeyami.
JOB 2:12 Lapala nakama katasa epo nanesa karo baa kando gisa nayami. Enakana baa lamo lao kandapala dokopa nakama ee lao yamarangyuo nakamana komau pee pingi dupwa pilyini nembo pee awaipi pyambuyami.
JOB 2:13 Dopa pipala nakama Jopomoo pipya yuu dokona koro mendaki yalya kando peteyami. Akali dupwame randa andake nyiya doko ama reeko ingilyamo lao suu pyapala pii pyakama nao mee yalya kando peteyami.
JOB 3:1 Pii laa nao koo piku piku pao peteyaminyi dokopa Jopome baa mandeyaminyi yuu gii doko epe see naya.
JOB 3:2 O Anatu, namba mandeyaminyi yuu gii koo inginyi nembape. Dee namba anyinya ingi anda ranjama rongo piyamo yuu gii doko kooŋo lape.
JOB 3:4 Anatu yuu gii doko alowa pyuo iminjinya lape. Dee kamba yuu gii doko suu pyaa nalu nareŋe lao pipi. Doko eŋa pao see nana lape.
JOB 3:5 Yuu gii eŋa pao iminjilyamo doko kaepala iminjalu iminjo iminjinya lape. Kopame yambe pyapala neta kata doko nee pipi.
JOB 3:6 Ee kana dokona yuu gii kukwa doko pyakepanyi neta nembalu nembo nembape. Yuu gii doko dee kamba yaka lao sero kara namanale.
JOB 3:7 Kukwa gii doko rae mai nao mee pote murumuru ingyuo sinya lape.
JOB 3:8 Wambu nemonga lao oma kameya kemali pingi silyamo ipwa koko kiwa dokona pii lamaingi dupwame nemonga lapala yuu gii doko kwaenyi nembenako.
JOB 3:9 Yangama bui kana renge doko raa nana lare. Yuu yango rali pelana pilyamo doko angingyuo yango ota nana lare.
JOB 3:10 Yuu gii kukwa anyimi namba mandeyamo doko kokwa sinyi nembape. Namba mandeyamosa namba keta mona randange rengepe randa nyingi rengepe dupwa panembena epelyamo.
JOB 3:11 Namba anyinya ingi anda dokonape dee manjinyi peyareyamo dokopape kumuyuli yaka.
JOB 3:12 Akipamo nambana anyimi banya kingi kalengena reto lanyuo papiyase? Akipamo anyimi manjepala anju jiyase?
JOB 3:13 Namba dokopa kumuyuli doko dakepa koo sipuli.
JOB 3:14 Kiŋi akalipi wambu iso karenge akalipi kiŋinya anda lalyasi dee kamba piyami dupwa malu anda luu palaminyi doko suu pyao luu palipuli.
JOB 3:15 Dopa pyuo namba kiŋinya ikinyingi dupwa kana golope kana kulingipi nyuo andana retapala nakama malu anda luu palaminyi doko suu pyao sipuli.
JOB 3:16 Wane wanakepe nyaŋa manjinyi peyarelyaminyi kumungi dopale ingyuo luu palipuli.
JOB 3:17 Yulu koo pingi dupwa malu anda palenge dokopa nakamana koo dupwa pii nange. Dee yulu andake pipala makame kumungi dupwa malu anda palyuo dokopa imambu singi.
JOB 3:18 Dee karapusi palenge wambu kumapala dokopa pyalana pyuo pii porakai lengenyili pyuo letaminyi see nao koo soo palenge.
JOB 3:19 Wambu peparae kuki andakepe karaminyi dee kendemande akali anjarae karo yulu pingi dupwa kumuo palyuo dokopa mokwasi koo soo karaminyi.
JOB 3:20 Akipamo akali dupwa mona randaminyipa mee lete karena lao kaelese? Ingi randa sakame kumaminyipa akipamo yuu gii mende apeto mailisi?
JOB 3:21 Nakama kumalena kumungi renge doko epelyape lao isaro karaminyipape angi doko epa nalyamo. Nakamame bange au pisi mona nyingi dupwa angingyuo suu pyaa napala malu anda kumuo palirami dokona mona nyilyaminyi.
JOB 3:22 Nakama lete karo dokopa rae mai nao pao kumuo malu anda palyuo dokopa rae maingi.
JOB 3:23 Anatumi pinjingi mendepe kanda nalamisi lapala mee pyuo retelyamo. Baame rengya nyerali dupwa yalu pyuo retenge.
JOB 3:24 Namba nenge nenge kandale doko suu pyao mee ee lao yanga mangau lao karo. Namba ota nao mona rando ŋee lao karalu karo.
JOB 3:25 Nambame yulu mende pirali pakapunu dupwako namba keta angi pipa pilyamo.
JOB 3:26 Nambana mona kyuu lao see napyamo manda rao kara napunupa mee randa dupwa ota nao yoko lapu lapu pyuo epoko karamo, leya Jopome.
JOB 4:1 Elipaseme dopa leya. Namba pii laro dokopa emba mona kendarese? Nambame embena pii lapinyi sipunu dokome mee romo napyuo kararo ingya nalyamo.
JOB 4:3 Embame wambu malu mana lamaiyuo karee kande. Dee embame wambu yulu pii nange kingi yukusi dupwa porainyi pyambuii kande.
JOB 4:4 Wambu lapo poraiya nao luwaro sepala pao palipa piyaminyipa embame piimi lao minyalyuo karee kande.
JOB 4:5 Wambo wambu dupwa randa nyiyaminyi nyisii kande epapu kapu kyepala randa emba keta epara panda silyamo. Dokopa papa lao rolao karapala emba apa piro lao see nalene.
JOB 4:6 Wamba emba Anatu lakando karee dokopa emba keta koo mende pali naya. Dokona lao emba Anatu mende pyakara dokona suu pyale pyale karapengele ingilyamo.
JOB 4:7 Wamba piyamo yulu dupwana lapo apa piya kande lao suu pyape. Suu pyapala akali rolae pingi mende doko anjuku wambana randa andake wakasa epeyamo neya lao suu pyapala langipi.
JOB 4:8 Nambame kandeyono dokopa wambu lapome Satanena yuu dokona apyape pyao koo doko ee waingi dopale ingyuo wara pyuo kareyami. Doko lyuo nyingi mange dakepa yulu koo doko wane ingyuo manjo nyuo karaminyi kandelyo.
JOB 4:9 Anatumi wambu dupwa banya imbu singi dokome yuu galame pili lenge.
JOB 4:10 Mena laene dokome angamae manjo gaa lenge doko suu pyao wambu yulu koo andake pingi dupwame nenge sisi pyapala pii rekyae lenge. Dokopa Anatumi pii koo dupwa laa kaena lao kambu pyao pyarambulyasa nenge longo pingi.
JOB 4:11 Mena laene dupwame mena yango pyao naramili dupwa kara narami ramo dokopa nakama lopapala kumungi. Dopaleko ingyuo wambu yulu koo andake pingi dupwa kumulyaminyi dokopa nakamana wane wanake dupwa mee ralo karenge.
JOB 4:12 Yuu mendepa pii wainde yalu pyuo elya kalo epeya. Ama pii isa isa randa nao serolinde lao epeya.
JOB 4:13 Doko kukwa kombeya kopetame pyuo luu paleyono doko rokondakaya dopale ingiya.
JOB 4:14 Pii doko sepala namba walu walu lao pungwa pungwa piya. Piyamo dokopa nambana yongo peparae paka renge nyuo walu leyo.
JOB 4:15 Dokopa nambana lenge kambu dokona porambaiyende minyili leya. Minyili leyasa nambana yanenge doko kupwasa karo pakayo.
JOB 4:16 Pakapala karo namba mende dumusa kararamo kandaroli lapala nambame kandaro siyu. Siyunupape angi dokoŋo lao lenge kambu maro laa naya. Enakana koo piku piku peyamo dokopa namba pii mende siyu.
JOB 4:17 Dokona lao, Api mende Anatunya lenge kambu dorena rolae wakasa pyuo kararamo kandarase? Apimi baa pyuo wasiyamo dokona lenge kambu dorena poo pyasi ingyuo kararamo kando kararase?
JOB 4:18 Anatumi banya yake pandana aŋala pii wai minyingi dupwa rolae angyako pyuo karaminyi lao mona pyamalya nange. Kyai pilyaminyi kandengeko.
JOB 4:19 Embame suu pyapinyi dokopa wambu yuumi wasisi dupwa rolae angyako pyuo karaminyi lao mona pyamalyara lao suu pilisi? Wambu mee pyuku lasi maimai kuki kuki kumunginyili pyuo kumungi dupwa rolae ingyuo karaminyi lao mona pyamalyara lao silisi?
JOB 4:20 Akali mende yangama lete karelyamo kandenge doko alemanji see nalyaminyi mee kumungiko.
JOB 4:21 Baa kumungi dokopa banya bange dupwa yaki nyuo kaenge. Dee baa keta mona palenge singinya renge doko otengeko.
JOB 5:1 Jopo embame mendeme isingi letape lao kandalase kyakale lao kandape. Aŋala mende karara ramo doko emba nyisinya larese?
JOB 5:2 Wambu dupwame emba keta kapa pii nalyaminyi lao suu pyanyi pyano karo kumare ramo doko suu pingi pali nao kopyali ingyuo pirisa pira.
JOB 5:3 Nambame akali mona pali nange lapo mee mona palenge karele lao karaminyi kandapunupape nakamana anda yuupi dupwa kwaeyo pena lao piyu.
JOB 5:4 Nakambana wane dupwa moŋo ketako kararami kotena paraminyi dokopa mendeme nyisa narami ingyara.
JOB 5:5 Lopange wambu dupwame kopyali dokona ee kwaipi dupwana epo manjo narami ingyara. Witi jingi ikyaikyana andara dupwa lyuo naraminyipa ipwa nano kararaminyi wambu dupwame kando lyanolyano pyuo kararami.
JOB 5:6 Koo dupwa mee yuu dokona sisu lao pulya nao randa doko yuu dokona mee sisu lao sipura naoko pingi.
JOB 5:7 Wambu rangeme isare ingyuo ango karo randa nyingi.
JOB 5:8 Namba emba pyali namba Anatu keta pyamalyuo randa doko baa lamaipuli.
JOB 5:9 Baame bange andake dopa pyuo pilyamo dupwa namwa kapa soo ota nalyamano. Dee baame wambumi pii nange yulu dupwa pyuo karamo dupwa ama malu ingilyamo.
JOB 5:10 Baame yuu doko pau lena lao apunda peyo karenge.
JOB 5:11 Anatu baame wambu inyimungu karenge dupwa minyalyuo ee lao karenge dupwa rae mainyi pyambuo pingi.
JOB 5:12 Baame akali panga singi dupwana mende piru lao rapa rapa pingi dupwa nyuo laowa pipakamipala isa wambunya singinya renge dokome nyepala range randa maiyuo mangena minyingi. Dopa pilyasa nakamana yulu peparae kapa pali nange.
JOB 5:14 Nakama mee korakama karelyaminyipape kata angi doko kukwama ingilyamo karenge.
JOB 5:15 Anatumi wambu pendewa koo keta palenge dupwa yaki nyii nao pyao isa palyilyaminyi karenge dupwa kyawa lete nyuo pingi.
JOB 5:16 Baame pendewa dupwa rengya nyera dupwana soo karena lao suu pingi maiyuo koo pingi dupwa kambu pyarambuo karena lao pingi.
JOB 5:17 Wambu mende Anatumi sukunde ingyuo kiso rolara dokopa rae maiyuo karare ingilyamo. Dokona pyalana pyuo mana leya kande dokopa kapa laa nalyamo lao suu pyaa napipi.
JOB 5:18 Anatumi emba ranjama nyuo pyapala dokopa pyaramo panda doko baa rangeme yaki pyakange. Banya kingimi emba pyapala dee kingi dokomeko umbwa pyuo nyingi.
JOB 5:19 Yuu gii pao epo piramo dupwa peparaena emba koo keta palirinyi lao kyawa minyuo karenge.
JOB 5:20 Lopo singi dokopa emba nenge joo karenge. Yanda sipurelyamo dokopa emba pyaa nana lao kyawa minyuo karenge.
JOB 5:21 Piimi emba lao koo keta palyaraminyi dokopa Anatumi emba kiiramo nyera. Koo keta paliri yuu gii eparamo dokopa emba kyawa lete nyuo pira.
JOB 5:22 Ee kwaipi apa nao lopo seramo yuu gii dokopa emba mee giyuo karare. Mena rae lenge dupwa emba paka nareko ingilyamo.
JOB 5:23 Yulu pirinyi panda dupwana yuu kapa doko iki seramopa mena rae lenge dupwame emba mona jeraminyi karare.
JOB 5:24 Embena ree palu pipya komau anda dokona mona seramo palyuo karare. Embena mena sipisipi dupwa mondo lao kararaminyi dupwa kapa kandare.
JOB 5:25 Embena wane wanakepe dupwa yanginya kuku palu palu piramo mendeme yaka laa narami.
JOB 5:26 Witi jingi poo relyamo nyingi doko suu pyao emba karo pao yaku nao kumare.
JOB 5:27 Jopo pii dupwa yuu malu mee mana nyimwanopa kinyi ingilyamo. Dokona dakepa emba soo nyepe.
JOB 14:1 Jopome leya. Namwa endagimi manjisi porai ingya nalyamo dupwa yuu gii malu kararamo ingya nalyamopa randa doko simbwaro sipyamo karamano.
JOB 14:2 Namwa ee rasinya ambwa sinya ingyapala dee pana narama ingilyamo. Namwa mee imambulinde karapala pana narama ingilyamo.
JOB 14:3 Namba dopale ingyuo karo dokona Anatu embame namba nyuo pyalya pyana pyuo kandarese?
JOB 14:4 Akali mendaki mendemepe renge karo petenge dupwana renge poo pyasi mende alowa pyuo pirami ingya nalu nao nalyamo.
JOB 14:5 Banya yuu gii kanape karara dusipa embame lao retenge dokona kapa karapala yalara ingya nalyamo.
JOB 14:6 Dokona baa maso rae maiyuo pyuo karenale yaki nyepala kae.
JOB 14:7 Isa mende poko lakalyaminyi dokona dee imbu pira kata doko singiko. Doko dee kamba imbu pipala andengeko.
JOB 14:8 Isa pokonge dokona sinju doko yando nao pingi dupwa rumbyuo pilyamopape
JOB 14:9 imbu doko rangeme ipwa manjo andenge.
JOB 14:10 Isa doko dopa pyuo pelyamopape akali baa kumuo otengepya. Baa kumapelyamopa dee anja epo karase?
JOB 14:11 Akali kumungi doko dee epa nangepya. Mee ipwa sokole lengepya.
JOB 14:12 Yake doko singinyili pyuo silyamo dokopa akali doko luu palyuo sili lao kumasi sulu soo singipya.
JOB 14:13 Anatu embame namba luu luu kumuo puu lapala yaki nyuo kaepili yaka. Dopa pipala embena imbu singi doko otaramopa namba dee suu pyaro lao yuu gii mende nyipili yaka.
JOB 14:14 Akali doko kumara ramo doko dee lete eparase? Nambana randa epelyamo doko pao otaparamopa yuu gii elyape dokona epo kararo lao iso karapuli yaka.
JOB 14:15 Dokopa embame namba kyakale larenepa namba wasiinyi dokome pii isingi laronopa emba rae maiyuo karare.
JOB 14:16 Dopa pyuo paramo dokopa embame namba apa pyuo karena lao lee minyuo karapala koo piru dupwana yaka lao kara nare.
JOB 14:17 Embame nyuo yalu pyuo retapala kame sakao kaeyare. Koo piru dupwa kwuanyi nemboko karare.
JOB 14:18 Yuu kyau dupwa angi lakao nyingi. Rondo dupwana kana munjamae porai dupwa mendasa lakao pao singi.
JOB 14:19 Kana dupwa ipwa nyingiko. Apu reeko dupwame yuu dupwa kalao soo pengeko. Doko suu pyao embame akali doko ene suu pyao karapya dupwa kata roko pyao kumasilini.
JOB 14:20 Emba keta iki porai renge palipala akali doko dopa pyuo dee epa nara lao pyao nembalu nembo nembelene. Banya lenge kambu doko alowa pyuo gyaa kyai pyuo kumuo pelyamo.
JOB 14:21 Banya ikinyingi dupwa ketae pao akali ingyuo kararamipi panda randa mairaminyi isa paramipi lao sepa nao mee kopyali ingyuo kumuo pena letene.
JOB 14:22 Banya yanenge sii lapyamo dokona iki suu pyao kyawa sisingi baa rangena randa pipyamo dolapona iki suu pyao sepala kumulyamo.
JOB 19:1 Jopome isingi lao dopa leya. Akipamo embame namba yaki nyii nao pii dokome kare kare soo randa joo epelese?
JOB 19:3 Yuu peparae embame namba mona randanyi pyambuo elya pali napala namba mona kendanyi pyambuli lao lao puu pelene.
JOB 19:4 Dee namba range koo piyunde ramo dokome apa pyuo emba randa jilyase?
JOB 19:5 Embame namba kandanyi palyili palyili lapala nambana randa nyipunu dokona namba koo pingi lao suu pilini.
JOB 19:6 Randa doko Anatumi namba jilyamo lao kanda nalese? Baame namba makande pyuo kandapyasa pilyamo.
JOB 19:7 Baame namba randa joo karamo dokona nambame baa kando mumu lapunupape mendeme see nalyaminyi. Dee nambana lao yulu rolae pyakana lao ee lapunupape mendeme see nalyaminyi.
JOB 19:8 Anatumi nambana kata rokapyamopa panya saka nalyo. Baame nambana kata doko nee pipyasa iminjilyamo.
JOB 19:9 Nee pipala Anatumi nambana bange peparae namba keta see nana lao nyipya. Nyepala nambana kingi doko kokwa sinyi nembapya.
JOB 19:10 Randa dupwa namba keta mendasa iki see nao epapala pyao bembae lapyasa mona kara napyamo karo.
JOB 19:11 Randa ipyamo dupwa Anatumi namba imbwuapala lanyuo pao mena rae lenge dopale ingyuo pyao kokwa sinyi nembelyamo. Nambana yanda pimwai angimi randa joo pirami dokona palyuo jilyamo.
JOB 19:12 Banya yanda singi ami dupwa pena lapyamopa epo nambamoo pipya yanda pyuo nakamame namba palenge yuu dokona epo kuinya palepe lao kone makapala iso karaminyi.
JOB 19:13 Anatumi nambana yangonge dupwame kyawa yaki nyuo kaena lao pilyamo. Wambo namba kandenge dupwame wakale ingyuo ii kandele letaminyi.
JOB 19:14 Dopa piminyi dokopa nambana wambu ree palupi puu minyingipi dupwa namba yaki nyilyaminyi.
JOB 19:15 Dee wambu nambana anda yalya kando petenge dupwame namba kame soo kaelyaminyi. Nambana kendemande wanake dupwame namba wakale kandele letaminyi.
JOB 19:16 Nambana kendemande akali mende kyakale lao poraiyuo nyisinya lao lapunupape dokona isingi mende laa nalyamo.
JOB 19:17 Namba ŋee ŋaepe lapunu doko enda dokome aiyerono lapala repeta epa nalyamo. Dee nambana yangonge angi dupwame dopako pilyaminyi.
JOB 19:18 Namba roya karalono dokopa wane dupwame namba kando male male lao giyalya giyana pilyaminyi.
JOB 19:19 Dee nambana puu minyingi angi dupwame namba kandaro sepala awa nalyaminyi. Wambu nambame mona retenge angi dupwame kapu kyepala kata jilyaminyi.
JOB 19:20 Dopa piminyisa namba moya nao kuli yongopa rambu letamo. Namba kumuo otapala imbu pyuo karo.
JOB 19:21 Anatumi namba randa jilyamo dokona nakama nambana puu minyingi dupwame sakame kumuo karalapape.
JOB 19:22 Doko akipamo nakamame Anatumi pipyamo dopaka pyuo namba peta ralimbulyaminyi? Nakamame namba randa andake joo otapa nalyamisi?
JOB 19:23 Wambu lapome pii nambana larono doko dopa letene lao soo suu pyao pepa pyao buku dokona retamili yaka lao suu pilyu.
JOB 19:24 Nambana pii doko ane pyanjili dokome kana dokona kiki pyuo pyaraminyi sulu seramopa wambu dupwame yaka lao kando simili yaka leto.
JOB 19:25 Dopa pyuo lapunupape akali kamame wakasa mende yake panda dokona karamo dokome lumwa pyuo epapala namba pyuo nyera lao soo otelyo.
JOB 19:26 Nambana yanenge opetae doko anga yakaneme nao kopetame kokwa sinyi nembaramopape Anatu doko kandalopono.
JOB 19:27 Dee namba rangena lenge angi dokome baa kandaronopa baa nambana puu minyingi angingyuo karalopyamo. Nakambame namba koo pingiko lao dee namba keta koo renge palengeko laminyi dokona lao
JOB 19:28 namba mona rando karapu.
JOB 19:29 Dopa pipunupape nakama yasu narami dokona kando karalapape. Anatumi koo dupwana imbwuapala nakama wua kakupi nenge dokona nyuo pisara ingilyamo. Dokopa sepala akali koo dupwana lao rolenge doko karamo lao serami.
JOB 31:1 Nambame kinyi kinyi lalu lao lapala lamaiyuo, Wanake dupwa kandapala kepo pyuo nyuo reto palipuli lao suu pyaa naro, leyo.
JOB 31:2 Anatu Porai Wakasa dokome namwa kando aki mende pirase? Wambunya yulu koo pilyaminyi dupwana apa pyuo baame yano pyarase?
JOB 31:3 Wambu lapo koo pirami dupwa baame randa andake maiyuo koo keta palyara.
JOB 31:4 Anatumi nambana yulu pilyu dupwape kata papilyu dupwape soo karamo.
JOB 31:5 Nambame yulu koo mendepe pipala wambu menge dupwa minyako pii nange lao kingi ketae nembo leto.
JOB 31:6 Anatumi sikyali angi rolae mendena namba sikyali pipala namba koo mendepe pali nalyamo doko kandara.
JOB 31:7 Namba kata keyange dokona yaki nyero ramo panda yulu koo pinya wangu lakaro ramo dee nambana kingi dokome koo piru ramo
JOB 31:8 dokopa nambana ee dupwa kokwa sinyi nembena lao dee wambu lapo dupwame nambana nenge wara pingi dupwa manjo nena lareko.
JOB 31:9 Nambana parali maki palenge akali dokona enda doko auwapala nambapa palimbwali lao suu pyapala enda banya anda kambu dokona yalu pyuo maa palyuo karapuli
JOB 31:10 dokopa nambana enda dokome akali wakale mende nenge maiyuo baapa palyuo pipyali.
JOB 31:11 Kepo yulu dopale dokome kanya pyapo lao kuma lao kyawa yaki nyasara.
JOB 31:12 Koo doko Satanena panda isareme rao karenge dopale ingyuo nambana bange peparae rao pyalingi nyera.
JOB 31:13 Nambana kendemande dokona mendeme namba kando mumu laramo dokopa nambame sepala mondo lao nyisaro.
JOB 31:14 Nambame dopa pii naro ramo doko Anatu kando apa larose? Namba keta kote laramo dokopa aki pii larose?
JOB 31:15 Anatu mendaki namba wasiyamo dokomeko nambana kendemande dupwa wasiya.
JOB 31:16 Nambame pendewa dupwa nyisalana maka suku suku nengende daa. Enda waiya dupwa pee lombanyi karalyo sinya lapala kaengende daa.
JOB 31:17 Dee namba nenge napala dokopa muiyane dupwa lopome kumuo pena lapala kaengende daa.
JOB 31:18 Yuu gii peparae nambame nakama poraiyuo suu pyao rapu pyuo karenge.
JOB 31:19 Wambu muiyane mende komau yangyaramo dupwa nyelana saka naramo kandaro ramo dokopa
JOB 31:20 komau rangena mena sipisipi yamanji wapusi keyange doko mairu. Dokopa baame banya mona andarename peparae piso rae maiyuo nambana kingi minyalyara.
JOB 31:21 Nambame kote lao wini piroŋo lao sepala wambu muiyane dupwa minyako piyuli
JOB 31:22 doko nambana kingi doko roo piyali dee nambana lange dokona piso rekya lao yuku nyisa epeyali.
JOB 31:23 Renge doko namba Anatumi kote lara ingilyamo dokona soo paka renge ipyasa namba yulu dopalepe mende kamame pii napuli lao suu pyao karo.
JOB 31:24 Namba isa bange kamongonge dupwana mona nyii nange
JOB 31:25 Nambana mena bangepe dee kana malupi retenge dupwana namba range mupwa lao suu pyaa nange.
JOB 31:26 Neta rao yanga paupau lenge dokona lao nambame neta doko lakandengende panda kana rao kendapuli minyingi dokona lao kana doko lakandengende daa.
JOB 31:27 Namba nyuo isoko kata nembaramopa dupwa kingi lakando ketae pyambulyu lao nambana kingi dupwana makando lapo pyuope pinginde daa.
JOB 31:28 Koo dopale dokome Anatu Porai Wakasa doko mata maipala kumuo randa nyingi.
JOB 31:29 Nambana nyisu petenge dupwa yasu nenge dokopa namba rae maiyuo karengende daa. Dee nakama randa andake nyingi dokopa namba kapaŋa lao rae mainginde daa.
JOB 31:30 Nambame koo pyuo wambu dupwa kuminya lao ateŋa pyakami nange.
JOB 31:31 Akali nambana yulu pyakange dupwame wambu upunili dupwa yuu peparae yako lao nenge pilyunu doko kandenge.
JOB 31:32 Wambu kata londe pena epenge dupwa katana palena lao kaeya napala nambana anda yako lao nyuo palyingi.
JOB 31:33 Akali menge dupwame nakamana koo dupwa yalu pipala kaenge. Dopa pilyaminyipape nambana koo dupwa pano polo lao karenge.
JOB 31:34 Namba wambumi mende larami dupwana paka nange. Nakamana pii koo lao giyalya giyana pyuo larami dupwana pakapala namba elya kalo andakare kara nange.
JOB 31:35 Namba pii leto dokona mendemepe aki letene lao see naramisi? Pii peparae kinyiŋi lao lalu lao leto. Anatu Porai Wakasa dokome isingi yano pyakana. Nambana koo pingi dupwana lao nambana nyisu petenge dupwame yango palyuo minyuo eparaminyi dokopa namba randa nyereŋe lao pepana pyasi sipyali
JOB 31:36 Dupwa peparae nyuo nambana lange dokona mona kare kare embo kyawa rarange ingyuo kyawana pee pyuo wambu peparaeme kandena lao dupwa ketae minyalyapuli.
JOB 31:37 Nambame yulu pipunu dusipa peparae Anatu lamaipala banya lenge kambu dokona namba enamba see napala karapuli.
JOB 31:38 Nambana ee nenge reto mena minyuo pilyunu yuu doko waa nyepala
JOB 31:39 wambu mendena wakalende nyepala dokona nenge ando karamo dupwa napala yuu range pama yulu pingi akali doko mee lopo karena lapuli
JOB 31:40 dokopa witi jingipi bali jingi andenge doko suu pyao yuu dokona mano jingipi rano pisi api pyapyali. Jopona pii dupwa oteya.
JOB 38:1 Porambaiye minyuo apu epeyamo dokona rakapana Kamongo dokome Jopo pii lamaiya. Kamongo dokome letamo.
JOB 38:2 Emba apimi nambana singinya renge dokona piso serese? Emba pii kapa palya nao kekenge pii lenge akali dake.
JOB 38:3 Angi akali karenge doko suu pyao roya karapala nambame piso singi pii pisaro dokopa isingi yano pyape.
JOB 38:4 Nambame yuu muu dupwa wasiyu dokopa emba dokona kareese? Dokona kando siinde ramo doko dopa pyuo lao kandee lao polo langipi.
JOB 38:5 Yuu kameya apiyakale serale lao apimi suu piyase? Dee apimi yuu liti dupwa makande pyuo kandeyase? Pii dupwana isingi peparae kapa langirisi?
JOB 38:6 Yuu doko akimi pingi pyaro karase? Dee yuu muu pinjingi dusipana kaname paka pyaro karamo doko apimi kareyase?
JOB 38:7 Yuu gii yangama dokopa bui dupwa kenane pyao nyuo malu palyiyaminyi dokopa yake panda karenge dupwa rae maiyuo pii porakaeyo ketae leyami.
JOB 38:8 Ipwa kota doko singi dokona soo neta yuunya epa nana lao apimi kambu kii minyaro kareyase?
JOB 38:9 Namba dokome ipwa kota doko iminjingi dupwame nyuo yaki pipala kopa dokome yambe piyu lyakande.
JOB 38:10 Ipwa kota liti piramo yuu pinjingi dupwa nambame rombo palyuo reteyo. Retapala kame pyuo kii palyiyu.
JOB 38:11 Dopa pipala nambame ipwa baa lamaiyuo, Dake kapa andakele pee lao sepeleneŋe dee kamame andake ingyuo puŋu paŋu lao soo paa napala dakena banya kasakole minyuo pondoma pingi renge doko yaki nyuo liti pinya, leyo.
JOB 38:12 Jopo emba ando karene yuu gii dusipana yuu yangelyamo doko dopa pyuo yango rali pinya lao lamaisi?
JOB 38:13 Embame yuu yango neta koo epelyamo dokome yuu muu doko minyarala nyepala minyaro karo wambu koo yalu pyuo karaminyi dupwa minyuo walu walu lakana lao lamaisi?
JOB 38:14 Yuu yangelyamo dokopa yuu kungu rapu kukipi lama lamape dupwa liti pira pira pyuo rombo palyuo pano singi.
JOB 38:15 Yuu yango neta rao yanga paupau lenge dokome wambu yulu koo pingi dupwa pii nana lao neta ranyi pyambungi.
JOB 38:16 Emba ipwa kota doko guu lenge dokona pengese? Emba ipwa kotana isa panda dokona kimbu warendo kalyo pengese?
JOB 38:17 Mendemepe emba yuu iminjo kondo kondo lenge kumungi panda dokona rapu pingi kame kii doko lasaka pingisi?
JOB 38:18 Yuu dake andakepe panda kukipi apiyakale lao silisi? Sere ramo doko namba langipi.
JOB 38:19 Yuu yanganyi peengepe iminjinyi peengepe dolapo anja piso epelyamo lao emba silisi?
JOB 38:20 Embame dolapo anjali pao liti pipala kala pena lao larese?
JOB 38:21 Doo leto dupwa piri lao sepala leto. Renge doko yuu muu dupwa wasiyunu dokopa akali andapae dopale doko karenge karo pii lao silyu.
JOB 38:22 Nambame randake kapape apupi dupwa retenge panda doko emba pao kandengese?
JOB 38:23 Randa eparamo yuu giipi yanda pela paraminyipape dopalena rapa rapa pyuo dopalena suu pyao retenge.
JOB 38:24 Emba poraiya minyuo epenge kata dorena piso neta pyakaeyo epenge mare dokona pengese?
JOB 38:25 Apimi apu epena lao suu nyakamingisi dee apimi yuu gala lao poraiya andake dokona lao kata wapwakamingisi?
JOB 38:26 Yuu wambu pali nange dupwana apimi apu epo pena lengese?
JOB 38:27 Apimi yuu oo lasi ipwa epa nangepe dupwa isoko andena lao ipwa pingisi?
JOB 38:28 Apu pipyaepe dolapo nakambana rakange mende karengese?
JOB 38:29 Bange randake kapa yale ase lenge dokome ipwa dupwa kapu kyuo kana inginyi pyambuo dee ipwa kota dupwa manda ranyi pyambuo pingi dokona endangi doko apisi?
JOB 38:31 Bui kingi Pelaetese lenge lapo karaminyi dupwa embame nyuo kambwa pyao mendakyapala bui kingi Orayone lenge karenge dupwana panda doko dopako pyuo nyuo alowa pingisi?
JOB 38:32 Ee kana lyakange dupwana bui dupwa embame rapu pyuo pingisi? Embame bui kingi Mena Beya Kameya Beya Kukipi lenge dolapo dusa pena dusa pena lao lamaingisi?
JOB 38:33 Yake panda dopa pyuo sinya dopa pyuo sinya lao minyaro silyamo doko apa pipala silyamo lao emba singisi? Dee embame dopale ingyuo yuu dake wasarese?
JOB 38:34 Embame kopa dupwa kando pii poraiyuo lapala emba rombe lalana apu epena lao lamaingisi?
JOB 38:35 Embame yuu pele pinya lare ramo dokopa dokome emba karare dokona epapala namba embena kendemande pingi emba letene dopa pyuo piru, larase?
JOB 38:36 Apimi ipwa Naele pona dokona yaka kingi aipisi lenge yaka omani yale petamo doko ipwa andake palipyamo lao lamairase? Panda yaka kola kali doko apu epelyamo lao apimi lamairase?
JOB 38:37 Api mende soo gisingi mendeme kopa dupwa yaka lapala nyuo
JOB 38:38 kapu kyuo apu dokome sinjimu dupwa soo yuu inginyi pyambuo epenge dopa pyuo epena lao pirase?
JOB 38:39 Mena laene dupwa nakamana palenge anda dokona isaro palenge dokopape nakamana kananda dupwana yalu piro singi dokopape
JOB 38:40 embame mena laene dupwana nenge nena lao kotakamyuo laene yakane lopo karenge dupwa nenge sikya pyuo nena lao maiyuo pingisi?
JOB 38:41 Yaka orapene lenge dupwa lopo ralo karengepe dee yakane dupwa namba kando lopoe lenge dokopape wambu apimi nenge pingisi?
JOB 39:1 Mena meme yuu kyauna karenge dupwa ikyane manjira yuu gii doko emba singisi? Mena rae lenge kingi diya lenge dupwa ikyane manjana pingi dokopa emba isaro karengese?
JOB 39:2 Emba kana yaka lao karapala mena diya rae lenge nyaŋa dupwa manjira yuu gii doko singisi?
JOB 39:3 Nakama romba puu rombo minyuo wale lapala oo repeta yakane yuu muu dupwana pauwinya lao manjana pingi dokopa emba singisi?
JOB 39:4 Imwa andake dupwana mena diya yakane dupwa ando porayapala dokopa nakama rae lao puu pao penge.
JOB 39:5 Apimi mena donge rae lenge dupwa mee mokwasi karena leyase? Dee apimi mee dupwana papyuo karena leyase?
JOB 39:6 Yuu muiyane dupwa nambame nakamana anda inginyi pyambwakamyuo dee yuu lama lama kota singi dupwana palyuo karena leyo.
JOB 39:7 Nakama yuu taone andake dupwana wambunya pii dupwa pakapala nyisa wakale palenge dee mendemepe mondo pipala nyuo yulu maiya nange.
JOB 39:8 Yuu kyau dupwana isoko malu karenge nakamame nao karenge. Dokona nakama narama lao rambi kyakange mende karape lao kota penge.
JOB 39:9 Mena bulamakao rae lenge dokome embena yulu pyakarase? Dee yuu gii kukwa mendepa baa embena mena bulamakao palenge anda dokona rae maiyuo palirase?
JOB 39:10 Dokona mende embame puumi bukapala yuu ape ape pyakana larese panda embena ee yuu dokona ape ape pingi masene doko ipinya larese?
JOB 39:11 Embame banya porai dokona mona yukupala embena yulu kenda dupwa pyakaraŋa lao suu pilisi?
JOB 39:12 Embena nenge witi jingi lyingi dokopa baame nenge pyao injingi mare dokona minyakao epara lao silisi?
JOB 39:13 Yaka oserese doko papake dokome puu lao makando penge. Dopa pilyamopape yaka soko dokome waiya lao bii lao pao yaka oserese doko nyuo enakao penge.
JOB 39:14 Yuu popo dokome yaka kapa isasa piramopa seraŋa lao yaka oserese dokome banya kapa dupwa yuu dokona retenge.
JOB 39:15 Retapala dokopa baa wambumi kimbu kalyo poro lao mena rae lenge dupwame pyao kambo pirami doko suu pyaa nao mee retenge.
JOB 39:16 Baame banya kapa retenge dupwa banya lao suu pyaa napala banya yulu andake doko mee ingyuo paralyamo lapala saka nalyamo.
JOB 39:17 Renge doko nambame baa kopyali inginyi nembapala mona palenge renge doko mai nayosa pilyamo.
JOB 39:18 Dopa piyunupape baa kanda soo makandaramo dokopa baame mena osepe ose matana petenge akali dupwape nyuo enakapala nakamba kando giyalya giyana pira.
JOB 39:19 Mena ose dupwa porai wakasa ingyuo wasapala imanji matarena lamya mange imanji ingisi doko Jopo embame pyuo ingiisi?
JOB 39:20 Nakama goemba ingyuo pyaka pyaka pinya lao embame wasapala dee nakamana guu gaa dokome akali dupwa paka sinyi retaraŋa lao piisi?
JOB 39:21 Nakama yuu pau dokona moko gulugalu lao panya soo pyale letasa yuu kyasinyi nemba nemba pyuo karo nakamana porainya renge paleta dokome yanda pela penge.
JOB 39:22 Nakama keta paka renge doko see nange dee yanda pingi dokopa wua gela doko kandapala kapu kyuo ralo paa nange.
JOB 39:23 Dokopa nakamana mata dokona petenge akali dupwana wiki pepona dolapo jaa jaa lao pingi dokopa netame rapala lepolepo pipala lenge kiki pingi.
JOB 39:24 Nakama bikuli lenge dokopa ose dupwa suu makaro kara napala rae maiyuo makandapala pyala panya walu walu lenge.
JOB 39:25 Bikuli ketae poraiyuo lenge yaka lao dokopa nakamana gyaa yasu kando ketae palyapala yanda pingi maresa paa nao karo wambo ai singi. Sepala yanda singinya akali mupwa dupwame dopa pinya dopa pinya lao pii ketae letaminyi doko singiko.
JOB 39:26 Yaka ulisapu dokome bii lao yuu donorena panya dokopa banya papake bii lalana nyuo rolo piso dokopa apa pyuo bii laro lao emba piso singisi?
JOB 39:27 Yaka kambe dokome embame langirinyipa banya anda yuu kyau dokona kamame ketae piru lao isaro petengese?
JOB 39:28 Yaka dupwame kana wangya ketae wambu paa naramili dupwana anda pingi.
JOB 39:29 Dokona piso nanesa repetape dupwana baa bange lapo pyapala nara dokona suu pyao kando isaro petenge.
JOB 39:30 Bange lapo kumasi singi dupwana yaka kambe dupwa epo malu palyingi dokopa yaka kambe yakane dupwame ranjama dupwa nyuo nenge.
JOB 40:1 Kamongome lao, Jopo, embame Anatu Porai Wakasa doko makande pyuo karapi. Epapu emba sikya pilyase panda isingi mende lare ingilyase? leya.
JOB 40:3 Kamongo, namba kopyali ingyuo lao kareyo. Dokona isingi aki pii larose? Nambame dee mende laro ingya nalyamo.
JOB 40:5 Namba pii laroli dusipa lao otapu kandapi, leya Jopome.
JOB 40:6 Dokopa poraiya minyiyamo raka raka dokona Kamongo dokome Jopo dee kamba pii lamaiya.
JOB 40:7 Akali angingyuo roya karapala nambana piso singi pii dupwa yano pyakape.
JOB 40:8 Embame namba rolae pii nangeŋe lao lasaka pyuo yapalya yapana pyuo koo keta palyapala emba range rolae pingi inginyi pyambuo karese?
JOB 40:9 Emba porai namba yalese? Nambana pii poraiyuo yuu gala lele lao lenge dopa pyuo embame lengese?
JOB 40:10 Doko kinyi ramo doko emba range lakando pyakalyuo pyao karo kiŋi ingyuo suu pyao karape.
JOB 40:11 Wambu range mupwa lao suu pyao karaminyi dupwa kanda. Kandapala embena imbu singi dokome nakama randa maiyuo kuki ingyuo inyimungu karena lare.
JOB 40:12 Kinyi, nakama range ketae pyambuo karaminyi dupwa kandapala isa nyepe. Koo pyuo karaminyi panda dokona nakama pyao kokwa sepe.
JOB 40:13 Dopa pipala yuu dokona malu pepala kumungi yuu dokona kiimbanyi palyalapape.
JOB 40:14 Dopa pirinyi dokopa akali mendeme lakandapa naraminyipa nambame wambo embame yulu doko pyuo wambalene lamo lao lakandaro.
JOB 40:15 Mena ama kameya kingi Bimote lenge doko kandape. Nambame doko waso emba wasoko piyu lyakande. Baame mena bulamakao ingyuo isoko dupwa nao karenge.
JOB 40:16 Dopa pyuo nelyamopape banya yongo doko ama porai renge palenge. Banya kingi minju isa mando yale dupwa aki porai lao see nalyo.
JOB 40:17 Banya konali doko isa siya ingyuo rolae roya karenge dee banya kimbu dokona minju ama porai wakasa.
JOB 40:18 Banya kuli dupwa ama porai kana wasingi bange dopale dee banya kimbu dupwa ane isa yale.
JOB 40:19 Wambu andareleme kata papingi bange wasiyu dupwa kando yamarangyuo karaminyipape mena dake kandapala kamame yamarangyuo kandenge. Dopa pilyaminyipape wasiyamo dokome range sinyi nembo karenge.
JOB 40:20 Yuu kyau mena rae lenge dupwa male lao karenge dupwana nenge nara isoko dupwa ando karenge.
JOB 40:21 Baa nepereke renge dupwana palyuo soo dee ipwa pona waewae dupwana yalu pyuo soo pingi.
JOB 40:22 Neperekepe ipwa repeta karenge isape dupwana isarena rau lao singi.
JOB 40:23 Baa ipwa Jotane palipala ranjo epo banya lenge kambu petelyamo dokopa baa paka nao elya kalo palyuo singi.
JOB 40:24 Apimi banya lenge lukupala baa minyarapala nyerase? Apimi kone makapala gyaana minyaramo ramarase? leya Kamongo dokome.
JOB 41:1 Embame oma kameya kemali pingi Lipaetane lenge doko ukumi kapa pyao nyerese? Panda banya kekenge doko puumi bwuakarese?
JOB 41:2 Embame banya gyaa kata dokona puu pyambware panda banya angapu dokona uku puu dokome pyambwarese?
JOB 41:3 Embame nembapili lao emba piso sokondali pirase? Embame baa sakame kumapili lapala angangi pii larase?
JOB 41:4 Baame embapa lao palyapala embena yulu pyakao karalu kararo lao lalu lao larase?
JOB 41:5 Embena kendemande wanake dupwa rae maiyuo kando karamili lao suu pyao embame yaka mondo nenge ipwape maiyuo rapu pinginyili pyuo baa rapu pirisi?
JOB 41:6 Oma pingi akali dupwame baa kandapala akema lao kana kando mena belye pyuo isa nembo nyeramisi? Dee ropo pingi akali dupwame baa pyao kunjapala kana nyeramisi?
JOB 41:7 Embena oma pingi kaku dokome banya yanenge dokona yalyarase panda kaku dokome banya ayemba dokona arekyarese?
JOB 41:8 Embame yuu gii mendaki minyandare ramo doko dee minyandalana iki lara.
JOB 41:9 Mendeme oma kameya kemali pingi Lipaetane doko kandaramo doko yamarangupala mee walu lao pao palira.
JOB 41:10 Baa apu pingi dokopa mena nalana pingi ingyuo gasimwa pokelyamosa wambu mendemepe palenge dokona para ingya nange.
JOB 41:11 Api mendeme baa minyapala nyera ramo wambu doko range lete kararase? Yuu muu dupwana peparae wambu mendemepe dopa pirami ingya nange.
JOB 41:12 Nambame Lipaetanena kimbu dokona banya poraipi dee apa pyuo andake laope dolapona lao polo langiruwale.
JOB 41:13 Mendemepe banya kapa porai pee pingi dokona arekeyo pyaa narami dee banya yanenge doko minyuo pilya naramiko.
JOB 41:14 Apimi banya angapu nenge pakame kumuo karenge doko minyuo angapu lakirase?
JOB 41:15 Banya mata doko konambe wasisi dopale ingyuo pao suu lapala kana ingingi.
JOB 41:16 Mendaki mendaki lao mendena gii koo lao poraiyuo pakara pakara pyuo silyasa kanya ŋee soo kaka soope pii nange.
JOB 41:17 Dupwa peparae nyuo minyarambwapala pyuo pyakondape pilyamosa mendemepe ipyuo wakale wakale pyuo nyii nange.
JOB 41:18 Baa imaketa pilyamo dokopa yuu pele pipala yanga paupau lao rali pingi. Banya lenge doko neta potemenge dopale.
JOB 41:19 Banya nenge kata dokona isare uliyapu nyuo yanga paupau lao epo dee lelenge dupwa lele pyale pyuo nyisa epo penge.
JOB 41:20 Banya gyaa kata dokona isare sukwa epelyamo doko kulimbwanyi pelyamo dokopa isa yoko rapala kyau lenge dopale ingyuo epenge.
JOB 41:21 Banya ŋee ŋae dokome isare ingyuo kanda soo relyamo dokopa lelenge dupwa banya nenge kata dokona pyakao epenge.
JOB 41:22 Banya mange dokona porai renge wakasa palelyamosa wambu peparaeme kandelyaminyi dupwa kando paka renge nyingi.
JOB 41:23 Banya yongo doko kuki pepalape dusa piku piku laa nange ama porai ane isa mendeme minyuo punjarami ingya nange dopale ingingi.
JOB 41:24 Banya mona kana pokapala ipwa peta kana mundu ingilyasa paka nange.
JOB 41:25 Baa roya karenge dokopa imambu wakale dupwame pakapala mende pinya saka nange.
JOB 41:26 Wua gela mendemepe baa pyao ranjama nyuope wua kaku walekyape dupwame pyaraminyi kapa ingya nara.
JOB 41:27 Baa keta ane isa porai dupwa mee kaka yau ingingi dee kana porai dupwa isa kupwa dopale ingyuo pingi.
JOB 41:28 Baa kaku dupwa kando pyakao paa nange. Dee kaname baa pilyaminyi dupwa mee bange ingyuo penge.
JOB 41:29 Baa keta akali dupwame kakumi pilyaminyi dokopa kando gilya giyana pyuo kusape dupwa mende ingya nange.
JOB 41:30 Banya yamanji kinju dupwa galase kambasi waepala dopale dokome yuu warape dupwana kalyingi dokopa wara dupwa lumbalya lumbana pyuo koko palyuo karenge.
JOB 41:31 Baame ipwa kota dupwa nyuo kapu kyuo sanena ipwape mambape kisilyamano bolo pingi dopale ingingi.
JOB 41:32 Baa kata nyuo pelyamo dokopa matarena leya leya pingi. Ipwa kota doko maki maki manjo kasakole minyuo pinya lao nyuo kapu kyingi.
JOB 41:33 Isa yuunya mena suwape mendepa manda manja nange. Baa iki keta paka renge mende pali nange.
JOB 41:34 Baame mena suwape range mupwa lao suu pingi dupwa kandanyi isa palyapala mena suwape rae lenge rara wakale wakale wasiyamo silyamo dupwana baa iki kiŋi ingyuo karenge.
JOB 42:1 Jopome dee Kamongo kando isingi leya.
JOB 42:2 Kamongo emba keta porai renge peparae palenge doko namba soo karo. Embame pinya suu pyare ramo dupwa mee kapa piri ingilyamo.
JOB 42:3 Namba mona kumuo kyawa kana palyapala nambame kopyali ingyuo lao karapu dokopa emba pipinyi dupwana akipamo nambame piso silini lao piso silyane. Doko yulu andake dupwana lapo kamame reeko ingiyasa Namba soo gisa nange dokona lao leyo.
JOB 42:4 Embame namba langyuo, Embena pii leto doko sokondali pipala isingi yano pyaka, lenge.
JOB 42:5 Dokopa nambame emba doko wambu menge dupwame langilyaminyi doko iki singi. Dopa pipunupape dakepa doko nambana rangena lenge angi dolapome emba kandelyo.
JOB 42:6 Dokona lao namba pii peparae lapunu dupwana elyalyo dokona kondome kumuo pee awaipi pyapala pisiru, leya Jopome.
JOB 42:7 Kamongome pii dupwa peparae Jopo keta lao otapala dokopa baame akali Elipase lamaiyuo leya. Nambana kendemande akali Jopome namba kando pii kinyi lengenyili pyuo embape embena puu minyingi lama dolapope laa nayaminyi dokona nambame nakama pipya imbwualyo.
JOB 42:8 Dokona epapu mena bulamakao kali yanda ipingi nyepo sipisipi kali yanda ipingiko nyepala minyuo Jopo karamo dokona papala emba rangena ingyuo pyao kisape. Dokopa Jopome ateŋa lakara dokopa nambame banya ateŋa doko isingi yano pyakaro dee embame yulu kopetame pipinyi dupwana nambame elya renge jii naro. Baame nambana lao pii kinyi dupwa lengenyili pyuo laa nami.
JOB 42:9 Akali Elipase Bilitate Sopamoome Kamongome pinya lamaiyamuli pyuo piyami dokopa Kamongo dokome Jopona ateŋa doko isingi yano pyakamiya.
JOB 42:10 Dokopa enakana Jopo banya puu minyingi rema dupwana lao ateŋa lakamyuo otapeyamopa Kamongome bange keyange ama malu retena lao maiyamosa bange isa peyamo dupwa dee wai kiso nyakamyuo dokopa mee lama kamame konda pyuowale maiya.
JOB 42:11 Dokopa Jopona yangonge pemalengepe dee banya wamba puu minyingi dupwape peparae baa kando yako lala epo banya anda nenge nyuo malu palyuo nao peteyami. Kamongome Jopo randa maipya dokona kondalyamano lao baa mona minyarambunyi pyambuo epeyaminyi dupwame mendaki mendaki lao kana lapope dee kana golo uriŋipi maiyami.
JOB 42:12 Kamongome wambo dokopa Jopo elyape keta pisiyamopape enakana randa maipaesa kamame wakasa elyape keta pisiya. Yuu gii dokopa Jopona mena sipisipi taosande akalisa ipisu kisima (14,000) mena kamele lenge taosande pakinyamange (6,000) mena bulamakao taosande lama (2,000) dee mena donge taosande mendaki (1,000) pyuo minyiya.
JOB 42:13 Dee banya wane yanda ipingi nyepo wanake rema dusipana rakange ingyuo kareya.
JOB 42:14 Banya wanenge porai doko kingi Jemaema lenge dokona kanya doko kingi Keseya lenge dee enakana doko kingi Kerenapuku lao mandeya.
JOB 42:15 Yuu muu dupwana Jopona wanenge ama keyange dusipa yale mende mendasa pisa nange. Nakamana rakange dokome wanake dusipape dee pemalenge dusipape peparae banya moyange bange dupwa kapa kapa pyuo mokwa soo maiya.
JOB 42:16 Maipala Jopo baa ee kana andete mendaki dee akalisako pao kisima (140) nembo kareya. Karapala banya wanena wane mandeyaminyipape dee dupwana mandeyaminyipape dupwa kapa pyuo kandeya.
JOB 42:17 Enakana baa ama emo alemo ingyuo sepala sukundala peya.
PSA 1:1 Akali mende koo pinya lao kunji pyaraminyi dupwa yaki nyuo Satanena yulu pirami dokona mana koo nyii nao Anatu kando giyalya giyana pyuo lenge dupwana role pyao kara nao piramo akalinde ramo doko rae maiyuo pyakalyuo pyao karara ingilyamo.
PSA 1:2 Yulu koo pingi kandale doko suu pyao alowa pyuo banya rae maingi dokome Kamongona Mawa Pii lasi singi dokona warombo soo yuu peparae kukwa korakamape yaka lao poraiyuo suu pingi.
PSA 1:3 Akali doko baa isa ipwa epo penge repeta ando karenge dopale doko. Yuu gii jingi mondo lao lyingi yuu gii dokopa keyange pyuo lyingi. Dee banya yoko dupwa yando naa nange. Akali dokona yulu suu pingipi peparae kapa palyuo penge.
PSA 1:4 Akali koo pingi dupwa dopale ingya nange. Yangi porambaiyeme poo lanyi nembenge dopale ingyuo penge.
PSA 1:5 Akali koo pingi dupwa Anatumi kote lao randa maira. Koo pingi dupwa yulu rolae pingi dupwa pipya mendare ingya nara.
PSA 1:6 Kamongome rolae pingi dupwa kyawa minyuo kata lasaka pyuo karamo. Dopa pyuo karapyamopape koo pingi dupwa koo dokona kimbu malyaro karaminyi.
PSA 2:1 Akipamo yuu muu dupwana wambu dupwame Kamongopa sisu nyuo karo yulu koo lapo pinya lao suu pyao rapa rapa piminyipape angi kapa pii nalyamisi?
PSA 2:2 Nakamana kiŋi dupwa porai ingyuo karo dee akali mupwa dupwa wato lao karapala Kamongope banya rombo palyisi kiŋi dokope yanda pimwailyaminyi.
PSA 2:3 Nakambame namwa isilyambinyi doko iso kara nanale ramanyi nembamana, letaminyi.
PSA 2:4 Kamongome yake panda banya kiŋinya petenge isa dokona piso nakama kopyali ingyuo pimana lao karaminyi dupwa kandapala giyalya giyana pingi.
PSA 2:5 Baame nakama imbu singi paleta repe repe pii lamaiyuo dokopa nakama pakanya pyambuo lao,
PSA 2:6 Nambana yuu kyau poo pyasi Sayone lenge dokona nambame nambana kiŋi doko rombo palyuo karena lamaipu, letamo.
PSA 2:7 Kiŋi dokome lao, Kamongo dokome lapyamo pii dupwa nambame polo larole. Baame namba langyuo, Emba nambana ikinyingiŋi. Epapu dakepa namba embena rakange ingyuo karoŋo.
PSA 2:8 Piso serene dokopa yuu muu dupwa emba jeronopa peparae embena ingyuo para.
PSA 2:9 Embame ane pangalimi pyao kambo dee nakama pee warame wasisi pyao kambele lao piri, lapya letamo.
PSA 2:10 Dakepa nakama kiŋi dupwa repe repe pii dake selapape. Wambu iso karenge akali nakamame kale yukupala doko mende lalyane lao mana nyelapa.
PSA 2:11 Kamongo baa mupwa lao suu pyao pako banya yulu pyakamyuokaralapape.
PSA 2:12 Baa mupwa lao mona nembo karo kingi wapambu lakao mona maipape. Dopa pii narami ramo banya imbu singi waiya lao sipuraramo dokopa nakama aopa kumarami. Dokona baa keta mata kui lao kararamidupwa rae mairami ingilyamo.
PSA 8:1 O Kamongo, namwana Kamongo, yuu muu peparae emba andake ingyuo pelyamo doko kandelyaminyi. Embena kingi lakandase dokome pao yake sungwapyamosa
PSA 8:2 wane wanakepe nyaŋape opetaeko kenane pyao lakandelyaminyi. Emba range kame pyuo minyaro karapisa yanda pimwainya panda mai nalene dokona randa jerami ingya nalyamo.
PSA 8:3 Nambame yake panda kandapu dokopa bui neta kanape nakamana yuu range karara lao wasiinyi dokona rao karapyamo kandelyo.
PSA 8:4 Wambu dupwa akinde dokona embame baa suupyale pyale karese? Dee wambu dupwa apimawana lao embame ketae pyambuo karese?
PSA 8:5 Embame emba range mupwa wakasa ingyuo kararonopa akali baa mee mende emba yaleko ingyuo karara lao wasii. Embame baa neta renge ingyuo ketae pyambuo lakanda minya minya pilini.
PSA 8:6 Embame bange peparaena baa kyawa nyuo karo wasiinyi dupwana iso karena lee.
PSA 8:7 Mena sipisipi bulamakao dee rae lengepe dupwa opetaeko rapu pyuo
PSA 8:8 oma yakape kata papingi bange peparae ipwa kotana silyamopape dupwa isinya leeyako.
PSA 8:9 O Kamongo, namwana Kamongo, yuumuu peparaena emba andake ingyuo pelyamo doko kandelyaminyi.
PSA 14:1 Kopyali kopetame pingi dupwame lao dokopa Anatu kara nange letaminyi. Nakama peparae kwao piminyisa pilyamo Nakama kopetame pilyaminyi. Mendakimipi rolae pyuo kararama lao suu pyaa nalyaminyi.
PSA 14:2 Kamongome yake dorena piso akali mendemepe mona palyuo baa kingi wapambupi lakao kingi letamipi lao kando karamo.
PSA 14:3 Mendakimipi rolae pirama lao ingyapa napala peparaeme mendare kata palyuo kopetame koo pyuo karaminyi.
PSA 14:4 Nakama see napala kamenge koo pilyamipi? lao Kamongome pisilyamo. Koo angi pyuo karaminyi dupwa soo gisa nange wambupi? Nakamame nambana wambu dupwana bange waa nao karapala namba lao ateŋa laa nalyaminyi.
PSA 14:5 Dopa pyuo karaminyipape Anatu doko banya rape rape lenge dupwa keta kararamosa nakama yamarangurami ingilyamo.
PSA 14:6 Wambu koo pingi dupwame akali inyimungu karenge dokona mende pinya rapa rapa pingi doko kata rokwalyaminyipape Kamongo dokome baa kyawa minyingi.
PSA 14:7 Isaraele wambu mata kyakao nyeramo doko yuu Sayonepiso epo epena lao ateŋa leto. Kamongome wambu dupwa dee minyalyaramopa Isaraele wambu dupwa raeme kumuo pisirami.
PSA 15:1 Kamongo, api embena tembole anda dokona sukusa eparape? Api embenayuu kyau poo pyasi Sayone dokona kingi lala eparape?
PSA 15:2 Akali mende Anatupa rape rape lao pyuo rolae doko anjuku lao pyuo karo pii angi nyera kinyi dupwa iki lao karenge dopale doko.
PSA 15:3 Wambu yango dupwa kilya kando laa nao banya puu dupwa kopetame pyuo pisa nao parali maki dupwa kando dopande piralyamo lao nembo nembo minyuo lao pali nange.
PSA 15:4 Anatumi awa nange dupwa baame nakama epe kanda nange. Dopa pipyamopape Kamongo rape rape lenge dupwa baame ketae pyambungi. Baame piru lengenyili pyuo kaeya nao andake dokona palyilyamopape pipala kaenge.
PSA 15:5 Bange mailyamo dokona mende konda pyuo nyipulinya suu pyaa nao mailyamo dolapoko range nyingi. Wambu koo pii nange dupwa kando wambu lapome bange jeramaŋa wambu lapo kando pii kyatepa pyuo lakana lenge dokona lakami nange. Yulu doo letamo dusipa piramo wambu doko range kame pyuo minyarasa pira.
PSA 16:1 Anatumi namba kyawa lete nyere lao suu pyapala epelyo dokona embame kyawa yaki nyii napipi.
PSA 16:2 Nambame Kamongo lamaiyuo, Emba nambana Kamongo. Nambana bange peparae keyange silyamo dupwa emba keta iki epenge lao karo.
PSA 16:3 Kamongona yulu yaki nyii nao pyakamingi wambu dupwa ama keyange wakasa. Namba nakama pipya karo dokopa rae wakasa mailyu.
PSA 16:4 Nakama lapo anatu wakale lakando pelyaminyi dokome nakama range keta randa malu sukusa nyilyaminyi. Nakamana mena pyao kiso maingi dokonape namba opetae pii naro. Nakamana anatu dupwa namba lakanda naroko.
PSA 16:5 Emba iki nambana Kamongo ingyuo karene. Mendale daa. Embame namba yano pipyamo dupwa joo karene. Namba rengyana nyera dupwa embame minyaro karene.
PSA 16:6 Embame bange elyape wakasa dupwa namba mee jiinyi dupwa ama keyange wakasa ingilyamo.
PSA 16:7 Kamongo dokome namba kata lasaka pilyamo dokona lao baa lakandelyo. Kukwa dokopa doko kyaiŋi lao repe repe pii ingyuo langilyamo.
PSA 16:8 Yuu peparae Kamongo doko namba role pyao karapyamo doko soo karo. Baa repeta karamo dokona namba walu lao kara naro.
PSA 16:9 Dopa pipyamo dokome namba rae maingi rengepe mona pyakalyuo pingi rengepe palyuo simbwalyamo. Namba embena kame dokona epo mona kare kare karo.
PSA 16:10 Rengedoko embame namba kumunginya porai renge doko neta nembo kyawa minyilini. Embame mendali mona retenge doko wambu kumasi palenge dokona nemba nangepya.
PSA 16:11 Embame kata pao lete pandana penge doko namba lasaka piri. Emba yuu peparae namba repeta karene dokome rae mainyi nembapyasa mona pyakalyuo pyao karalu kararo ingilyamo.
PSA 19:1 Yake dokome Kamongo Anatu baa neta renge ingyuo karamo doko panelyamo. Pyuo wasiyamo kingi mono dokome banya kingiŋi lao panelyamo.
PSA 19:2 Yuu gii kwuara yangara pyuo pao epo pipyamo dokome Anatumi pyuo wasiyaŋa lao pano lapa lapa pilyamo.
PSA 19:3 Mendasa wambu ingyuo epo pii lao dee lyapu lao pipyamo see nange.
PSA 19:4 Dopa pipyamopape nakambana neta rao yuu muu dupwana pumbinyi dokome yake yuupi rambungi dolapona kapa kapa pyuo soo otelyaminyi. Anatumi yake dokona renge kuiyuo rao karena lao panda wasakamiya.
PSA 19:5 Enda mapwae lenge kambu nyuo akali makandalana rungi rungi pingi dopale ingyuo rao potemo epenge.
PSA 19:6 Yake pinjingi pakirena kanda sepala pao pinjingi paki dokona oko singi. Kama ketae piso rao karelyamopa bange mendemepe kapa nee pii nange.
PSA 19:7 Kamongona mawa pii dupwa nyisu yakunaipi pisa nao singi dokome wambu enenge ingyuo porai renge maingi. Kamongona mawa pii dupwa soo nyepala karapenge ingilyamo dokome yangilyamo karelyaminyi wambu dupwa singinya renge maingi.
PSA 19:8 Kamongona mawa pii dupwa rolae ingyuo penge. Mendeme dokona soo rape rape lao minyaraminyi dupwa rae maiyuo parami. Banya mawa pii pinya lao lenge dupwa angi dokona lenge dokome soo nyingi renge maingi.
PSA 19:9 Kamongo lao kingi wapambupi lakao lakandenge doko keyange ingyuo singi. Dokona dopako pyuo soo para ingilyamo. Kamongome koo keyangepe lao yapalya yapana pyuo angi dokona lenge. Doko peparae rolae ingyuo penge.
PSA 19:10 Anatunya mawa pii rungi rungi pingi dupwame kana golo ama keyange doko nyuo isa palyingi. Dee mende suu pyao doko amburalinya ipwange rende pipyamopape Anatunya mawa pii doko ama rende wakasa pingi.
PSA 19:11 Mawa pii dupwame namba embena kendemande karo doko soo nyinginya renge nyuo jingi. Jilyamopa nambame banya pii doko rape rape lao pyakamingi dokona baame renge keyange isingi jingi.
PSA 19:12 Wambu dupwa range kopetamekamenge pilyaminyi doko soo gisa nalyaminyi. Kamongo embame namba koo pilyuŋu lao suu pyaa nao mee pyaka sipyamo pipilyu dupwana kingi rekyalao nyepe.
PSA 19:13 Koo pinya wangu lakao suu pilyu dupwana namba pasarene lao minyape. Dupwame namba poraiyuo minyuo isinya laa nare. Dopa pirinyi dokopa namba rolae ingyuo nyisu yakunaipi pisa naronopa mendeme namba kando koo pingiŋi laa narami ingilyamo.
PSA 19:14 Kamongo, namba kyawa lete nyepala lete wai pyao nyingi. Dokome nambanapii dee suu pingipi dolapo embame angi lalyane lao soo nyakape.
PSA 22:1 Nambana Anatu nambana Anatu, akipamo namba kame soo yaki nyipisi? Namba saka napala nyisapili lao ee lapu. Lapunupape emba nyisala epa napi kandapi.
PSA 22:2 Nambana Anatu, korakama dokopa emba nyisapili lao kee lapu. Lapunupape pii isu pii napi. Namba kukwa dokopa kee laoko karo luu sikya sikya pilyamo.
PSA 22:3 Dopa pipunupape emba poo pyasi karenge doko kiŋi karapinyisa emba lakandelyaminyi.
PSA 22:4 Namwanakauwange rora ambasupi dupwame emba keta pyamalyapala kareyami. Dopa pyuo kareyaminyisa embame akali dupwa nyiso pyuo nyii kande.
PSA 22:5 Nakamaemba kingi lapala dokopa koo keta palirami kata doko wanjiyami. Nakama emba kapa ingingi lao suu piyaminyi dokopa nakamana mona kenda nayami.
PSA 22:6 Dopa piyamopape namba epapu wambu ingya nalyamo. Namba mee kau kui dopale. Wambu dupwame namba kando awa nao giyalya giyana pyuo karaminyi.
PSA 22:7 Wambu namba kandaminyi dupwame kando giyuo karaminyi. Nakama kambu kelo wale pyuo ayemba wangaro wangaro pyuo lao karaminyi.
PSA 22:8 Nakamame lao, Emba Kamongo keta pyamalyapala karee kande. Akipamo baame emba pyuo nyii nalyase? Kamongome emba kando awuara ramo doko akipamo nyisa nalyase? letaminyi.
PSA 22:9 Namba mandeyaminyi dokopa embame mondo lao rapu pyuo nyii. Dee dopako pyuo namba nyaŋa siyu dokopa embame namba kyawa minyuo kareepya.
PSA 22:10 Namba mandeyami gii dokopa piso embena kingi kapena siyunupa emba nambana Anatu ingyuo karee.
PSA 22:11 Randa dupwa repeta ipyamopa mendeme namba nyisarami ingya nalyamo dokona embame namba yaki nyepala nanesa kara napipi.
PSA 22:12 Nyisu petenge akali malu mee mena bulamakao kalyuwa dopale ingyuo karapala namba nyuo sukusa pyambwasi karaminyi karo. Yuu Besane bulamakao kalyuwa wambu pingi karenge dopale karaminyi.
PSA 22:13 Nakama mena laene ingyuo nenge kata ŋaa lapala gasimwa poko namba gala lapala pyao nao pilyinyi nembalana pyuo karaminyi.
PSA 22:14 Dopa piminyi dokopa nambana porainya renge doko pao otelyamo. Ipwayuunya kulimbuo penge dopale ingyuo pupya. Nambana kuli peparae bolombalo lapya. Nambana porainya renge doko mena kapa sungu pele letamo.
PSA 22:15 Nambana pendoko doko yuu sinjimu yando nasi ingyuo oo lapya. Dee nambana kekenge yando napala neketaiye dokona parapya. Embame namba sinjimu dokona soo kumalale lao yaki nyuo kaeyapi.
PSA 22:16 Akali koopingi malumi epo karo namba kako pilyaminyi. Nakamame suwa dopale ingyuowua lao namba repeta epelyaminyi. Nakamame nambana kimbupi dupwa nao rokwanyi nembelyaminyi.
PSA 22:17 Nambana kuli dupwa peparae kapa kandarami ingilyamo. Nambana nyisu petenge dupwame namba lenge poraiyuo rapala kanda yoyo letaminyi.
PSA 22:18 Nakamame nambana komau dupwa nyepala apimi nyera lao reto lake pyuo petaminyi.
PSA 22:19 Nambana Kamongo, namba yaki nyepala wakale kara napipi. Embame iliki maliki laa napala aopa epo namba nenge rekya lao nyepe.
PSA 22:20 Namba wua kakupi nenge dupwana kyawa minyuo suwa dupwa keta lete nyuo pipi.
PSA 22:21 Mena laene dupwame namba naa nana lao pyuo nyepe. Dee mena bulamakao kalyuwa rae lenge dupwame namba nala eparaminyi dokopa namba range kapa nyisaro ingya nalyamo.
PSA 22:22 Emba dopa pilinyiŋi lao nambana wambu dupwa misilarami dokopa kenane embena lao ranaisa poko pyaro ingilyamo.
PSA 22:23 Isaraele wambu Jekopena para pyasi Kamongona kendemande dupwa nakamame Anatunya kingi doko ketae pyambuo kingi wapambupi lakao baa lakando pisipwape.
PSA 22:24 Baame wambu pendewa dupwa yaki nyuo kaeya nange. Nakama randa nyilyaminyi dupwa kandapala meŋe lao kaengende daa. Baame nakama mata mai nange. Mata mai napala nyisinya lenge dokopa yano pyakamingi.
PSA 22:25 Mitiŋi andake lao pisirami dokopanambame embena yulu piinyi dupwana kingi lakando laro ingilyamo. Dopa pyuo wambu embapa kingi wapambupi lakao lakandelyaminyi dupwana lenge kambu dokona bange kiso jero lao lalu lao lasi dupwa kiso jero ingilyamo.
PSA 22:26 Pendewa dupwa nenge nalana suu pyarami dupwa nakonda pirami. Wambu Kamongo keta eparami dupwa baa lakandarami ingilyamo. Dopa pyuo nakama yuu dokona yulu pyuo nenge nao kapa palyuo karalu karena.
PSA 22:27 Dopa pyuo yuu muu peparaeme liti kuki mendepe neta paa nao dee kone pupuripi peparaemepe Kamongo lao suu pyao loma soo kingi wapambupi lakao misi larami ingilyamo.
PSA 22:28 Kamongo baa kiŋi ingyuo karamo dokome yuu muu dupwa iso karamo.
PSA 22:29 Moŋokyaŋe singi wambu dupwa baa mupwa lao pangu soo dee mendalipi karo kana ingyuo isa lumbi lyeraminde daa dupwa opetaeme baa keta pangu soo mona maiyuo kararami.
PSA 22:30 Rengyana ando kararaminyi dupwame banya yulu pyakamirami. Akali dupwame Kamongona lao enakana manjirami dupwa lamairami ingilyamo.
PSA 22:31 Kamongome banya wambu dupwa nyiso kyawa lete nyiyaŋa lao laraminyi doko wambu ene manjipa nalyaminyi dupwa manjirami dokopa serami.
PSA 23:1 Kamongo doko namba mena sipisipi ingyuo rapu pyuo karamo. Namba mendeme yangilyande daa.
PSA 23:2 Baame namba yuu isako kyakange dokona imambu soo pale lao panda joo dee ipwa pete manda rasi dokonalanyuo pao pingi.
PSA 23:3 Baame namba porai renge deeko jepa pingi. Baame dopa piro dopande pirona lao lalamuli pyuo namba kata angi dokona lasaka pingi.
PSA 23:4 Nambame koo keta palirunupape Kamongo emba role pyao karapinyi dokome mona nembo kara naro. Emba mena rapupingi akalinya pangalinya mendeke ingyuo namba pingi pyao kyawa minyuo paenge.
PSA 23:5 Embame nambana yanda pimwainya lenge kambu dokona nenge andake yaowakalana rapa rapa pilini. Embame kyawa dokona mamba kulimbwakao kisakapinyi dokome embame upinili mende epelyamo yako lao nyingi dopale ingyuo namba laku nyingi.
PSA 23:6 Namba yuu gii kararo dusipana embena keyange rengepe mona retenge rengepe dolapo namba keta soo puu paralyamo doko silyu. Dopa piramopa embena anda yuupi doko nambana ingyuo puu parolyamo.
PSA 24:1 Yuu muu silyamo dokope bange peparae yuu dokona silyamo dupwape Kamongona ingyuo silyamo. Yuu dokope wambu dokona palaminyi dupwa opetaeko banya ingyuo pelyamo.
PSA 24:2 Baame wasiyamo doko ipwa pete yalu yuu kokorena kando wasiya. Ipwa kota andake koko dokona susa ingyuo pyapala wasiya.
PSA 24:3 Kamongona yuu kyau dokona api rolae ingyuopulyuo para ingilyase? Api baa kapa pyuo banya tembole anda poo pyasi dokona konando para ingilyase?
PSA 24:4 Dokona akali mende yulu piramo dokopa koo pii nao suu pingi keyange palyuo bange kingimi wasisi dupwa lakanda nao kyambo lao kana minya nao pira.
PSA 24:5 Dopa piramo doko Kamongomebaa elyape keta piso pyuo nyera. Anatu baa kando koo mende pii nayalyamolara.
PSA 24:6 Wambu dopale Anatu keta eparaminyi dupwa. Jekopena Anatu dokona lenge kambu dokona eparamisa pira.
PSA 24:7 Kame kambu doko pyaali lao lumbuo pee lare. Kambu dowa wambarae doko lumbware. Dokopa kiŋi mupwa doko sukusa epara.
PSA 24:8 Kiŋi mupwa doko apisi? Baa Kamongo porai, porainya renge palenge doko epara. Kamongo yanda sipurenge dokopa baame nyuo anamasi minyingi doko epara.
PSA 24:9 Kame kambu doko pyaali lao lumbuo pee lare. Kambu dowa wambarae doko lumbware. Dokopa kiŋi mupwa doko sukusa epara.
PSA 24:10 Kiŋi mupwa doko apisi? Nyuo anamasi minyingi Kamongo doko baa kiŋi mupwa ingyuo karamo.
PSA 27:1 Kamongo doko nambana pyuo nyingi kendalinya mendeke karamo dokona kupwa sipyamo karonde daa. Kamongo doko nambana matarena konambe mendeke ingyaro karapyamo karoŋo wambu pakaro doko angi api karase?
PSA 27:2 Akali koo pingi dupwame namba nyuo kuinya palyuo pyamwali lao piraminyi dokopa nakama lukumapala pao palirami ingilyamo.
PSA 27:3 Namba ami yanda singi peparaeme nyuo kako pyaraminyipape paka naro ingilyamo. Dee nambana yanda pimwai dupwame nyuo kuinya palyaraminyipape Anatu keta mona yukwarala karalu kararo.
PSA 27:4 Nambame renge mendaki mende Kamongo piso sipu. Renge mendaki iki nyelana suu pilyu. Doko namba lete kararono dokopa Kamongona anda dokona iki palyuo karapuli yaka. Dokona karobaa keyange wakasa ingyuo karamo lao soo nyuo rae maipala nambame baa kata keyange lasaka pinya lao piso soo kararowale.
PSA 27:5 Randa eparamo gii dokopa baame namba nee pyuo reto karara. Baame banya tembole anda dokonape dee kana londe ketae dokonape lete wai pyao nyuo yalu pyuo reto karara.
PSA 27:6 Dopa piramopa nambame nambana yanda pimwai karo kako pilyaminyi dupwa nyuo anamasi minyapala yuwa lao mambo pyakaro. Dokona pii ketaepalyuo rae maiyuo tembole anda dokona bange pyao kiso maipala Kamongo baa kenane pyao lakandaro ingilyamo.
PSA 27:7 Kamongo emba lao kyakale laro dokopa soo sakame kumuo karapala pii yano pyakape.
PSA 27:8 Kamongo emba karo dokona epo kingi wapambupi lakao lao pisi ipu lapinyi dokopa isingi lao, Kamongo namba eparowale, lapu.
PSA 27:9 Nambapa lao yalu pii napipi. Nambapa imbwa napipi. Embena kendemande kala pena laa napipi. O Anatu, nambana pyuo nyingi doko embame namba nyiso karapi kandapi dokona namba kyawa yaki nyuo kaeya napipi.
PSA 27:10 Nambana endangi rakangepame namba yaki nyuo kaeyarambinyipape Kamongo baame namba sakao yaki nyii nao karara.
PSA 27:11 Nambana yanda pimwai yuu silyaminyi dokona lao Kamongo embame namba apa pipili lao suu pilini dokona mana langipala elyape keta paliru kata dokona lanyuo pupi.
PSA 27:12 Nambana yanda pimwai dupwame namba kuinya palyuo kyambo pii laokoo keta pyambuo karaminyi dokona mata joo panda maiya napipi.
PSA 27:13 Dae karo dakepa Kamongome wambu keta keyange piramo doko kandalanasuu pyao karapusa pilyamo.
PSA 27:14 Kamongo keta pyamalyuo karape. Baa kapa ingingi lao suu pyao karape. Mona nemba napala baa keta pyamalyuo karape.
PSA 32:1 Mendena koo dupwa nyuo yambe pyao kame sakao kaeyasi seramodokona raeme kumuo pena. Akali mendena koo dupwana Kamongo Anatumi nyuo yaka lao reta nao kame sakamira doko raeme kumuo karara.
PSA 32:2 Akali panga soo laa nange dokome koo pirami dupwana Kamongome koo lao laa nara dokona rae maiyuo para.
PSA 32:3 Koo dupwa polo laa nayono dokopa ee lao karo kwuanyi serapala nenge sikya piya.
PSA 32:4 Kukwa korakamape kamongo embame namba randa jii. Panyi pipala yuu rombe laa nangenyili pyuo nambana porainya renge doko mee ingiya.
PSA 32:5 Nambana koo dupwa emba keta polo langiyu. Kopetame pingi dupwa yalu pinya saka napala emba polo langinya suu piyu. Dokona embame nambana koo pingi dupwa peparae kwuanyi nembakaeye.
PSA 32:6 Embena pii mondo laominyingi wambu dupwame yuu gii randa epelyamo dokopa emba kando loma serami ingilyamo. Randa dupwa apunda ingyuo kulimbwanyi peyo epenge dokopa randa epenge dokome nakama nyera ingya nangepya.
PSA 32:7 Emba nambana yalu pingipanda doko. Randa nyero dokopa namba nyisare ingilyamo. Emba nambana randa epara dupwana kyawa lete nyere ingilyamo dokona lao wee kenanepe lao ranaisa pokao poraiyuo lao karo.
PSA 32:8 Kamongome lao dokopa, Nambame emba apa pyuo palyuo karo piri lao mana langiru, letamo. Nambame dopa pyuo pipingi lao mana pii langiru.
PSA 32:9 Mena osepe panda dongepe kyakange ingilyamosa pii rape rape lao simili lao nenge katana kapa bange poraipi puupi dolapome anjapala minyilyaminyi paenge dopale ingyuo kara nalapape.
PSA 32:10 Koo yaki nyii nao pingi dupwa randa nao pisirami. Dopa piraminyipape Kamongo baa keta mona pyamalyuo karaminyi dupwa embena mona reto puu penge renge dokome kyawa minyarene karenale.
PSA 32:11 Rolae pyakamyuo karaminyi dupwa Kamongome nyisapya dokona rae maiyuo parami ingilyamo. Banya pii warombo singi dupwa rae maipala pii porakaiyuo lao para ingilyamo.
PSA 33:1 Rolae pingi dupwa Kamongome mende pyakapya dokona lao pii ketae palyuo lao rae maiyuo karalapape. Banya pii warombo singi dupwa peparae nakama banya kingi lakandalapape.
PSA 33:2 Kurulu rambyalu gitape dupwame Anatu dokona ange lao kingi lakando karalapape.
PSA 33:3 Banya lao kenane enenge pyao dokopa rambyalu gitape dupwa mora mora piso pyao pii ketae palyuo lao rae maiyuo karalapape.
PSA 33:4 Kamongona yulu dupwa angingyuo pao banyapii dupwa kinyi ingyuo silyamo.
PSA 33:5 Kamongome rolaena renge dokona mona retelyamopa banya mona retenge ota nange dokome yuu muu peparaena silyamo.
PSA 33:6 Yake doko Kamongo baame sinya lao lao wasiya. Neta kana buipi banya piimi sipureya.
PSA 33:7 Baame kota pete doko muupyuo yuu mendakisa sinya leya. Baame kota peteme lumu doko minyuo neta epa nana lao mapi pyao kata roko reteya.
PSA 33:8 Isa wambu peparaeme Kamongo pakalapape. Yuu muu rae lao palyuo pelene wambu peparaeme baa mupwa lao suu pyao pakale lao karalapape.
PSA 33:9 Baame pii leyamo dokopayuu muu peparae ingiya. Dopa pyuo pena leyamopa bange peparae epo maro leya.
PSA 33:10 Kamongome yuu liti andake dupwana yulu piramili dupwa kata rokonge. Pirama lao lao rapa rapa pingi dupwa pao kata roko minyilyasa pyuo pee laa nange.
PSA 33:11 Dopa pipala baa range pinya lenge dupwa waiya lao mee ingyuo paa napala kulisa ingyuo soo penge.
PSA 33:12 Yuu liti andake mende Anatu Kamongo ingyuo pelyamo lao suu pilyaminyi dupwa rae maiyuo parami. Wambu baa rangena lao rombo palyuo nyiya ingilyamo dupwa rae maiyuo parami.
PSA 33:13 Kamongome yake dorena karo kandano kandapyamo dokopa wambu peparae kando karamo.
PSA 33:14 Banya iso karenge yuu dokona karo isa yuunya wambu palaminyi dupwa kandano kandelyamo.
PSA 33:15 Baame nakamana suu pingi dupwa maiyuo dee dopande pilinilyamo lao soo karamo.
PSA 33:16 Kiŋi yanda singi malu karaminyipape nakamana porai dokome yandana pyao anamasi minyara ingya nange. Yanda singi mendeme banya porainya renge dokome anamasi minya nange.
PSA 33:17 Yanda pela penge mena ose dupwa wua rombasi ingyuo paramosa kapa pyuo wini laa narami. Nakamana porai renge dokome angi mende pii nara.
PSA 33:18 Kamongona mona reto karalu karenge dokona baa keta pyamalyuo banya pii warombo soo karenge dupwa baame kandokondali pyuo kandaro karenge.
PSA 33:19 Baame kumarami dokona kyawa minyuo karo lopo singi dokopa reto karo pingi.
PSA 33:20 Namwa Kamongo keta pyamalyapala karamano lao sepala kararama. Baame namwa nyiso kingi kapeme nee pyuo minyuo papingi.
PSA 33:21 Baa karamo dokona lao namwa rae maipala banyakingi poo pyasi doko angingyuo minyilyamano.
PSA 33:22 Emba keta mende pira lao mona kare kare karamano. Dokona embena mona retenge renge doko namwa keta palyako puu pena.
PSA 34:1 Nambame yuu peparae Kamongo kando ange lao kararo ingilyamo. Baa kaeya nao lakando karalu kararo.
PSA 34:2 Baame yulu piyamo dupwana suu pyapala lakandaro. Randa nyuo koo keta palaminyi dupwa sepala rae maiyuo parami.
PSA 34:3 Kamongo baa wakasa ingyuo karamo lao namba lamailyu dokona lamaiyuo banya kingi doko role pyao lakandamanale.
PSA 34:4 Nambame Kamongo lao loma soo piso siyunu dokopa dokona isingi langiya. Nambana paka renge dupwana baame namba kiiramo neta nyiya.
PSA 34:5 Koo keta palyaraminyi kararamidupwa baa kandalyuo kando rae mairami. Nakama isa nembenge dupwame dee laa nalu nao naraminyi kararami.
PSA 34:6 Range nyisarami ingya nange dupwa baa nyisinya larami dokopa nyisingi. Baame nakamana randa epelyamo dupwana kyawa minyuo nyiso karamo.
PSA 34:7 Kamongo banya pii rape rape lao minyingi dupwa iso karo banya aŋala dokome randa epelyamo dokopa kyawa minyuo karenge.
PSA 34:8 Kamongo doko baa apa pyuo keyangelao emba range kotapala apiyakalepe lao nakanjo soo kandare. Kamongo baakando nyeparamo doko kyawa minyara panda doko nyilyamo doko rae maiyuo karenge.
PSA 34:9 Banya wambu dupwa banya pii rape rape lao minyuo karena. Dopa pyuo karaminyi dupwa yano pipyamo dupwa nakama keta palira.
PSA 34:10 Mena laene dupwa nenge yano pilyamo dokopa mee lopome kumungi. Dopa pingi dokona wambu banya pii warombo singi dupwa mende yano pyuo yangya nange.
PSA 34:11 Wanyane wambu nambana puu minyingi dupwa epo namba apa letepe lao sela ipupwa. Dokopa apa pyuo Kamongo ketae pyambuo kararami lao mana langiru.
PSA 34:12 Emba raeme kumuo karapuli yaka lao suu pilipi daa? Emba karo yaku napala rae maiyuo kumalana suu pilipi daa?
PSA 34:13 Doko ramo doko kyambo pii laa nalu nao napala mata kando lenge dupwa yama pyuo minyuo kaeyare.
PSA 34:14 Koo dupwa mata maiyuo kaeyo keyange pipi. Mona kyuu lao singi renge dokona reoe lao yulu poraiyuo pipala koto nyere.
PSA 34:15 Kamongome waso rolae pingi dupwa kandokondali pyuo kandaro karo nakamana mona rando lenge doko soo karenge.
PSA 34:16 Dopa pipyamopape koo pyuo karenge dupwa baame kando epe nasepala mata maiyuo karenge. Renge doko nakama kumarami dokopa wambu dupwame kame soo kaena lao pingi.
PSA 34:17 Akali rolae pingi dupwa Kamongo kyakale lenge doko sakaro karenge. Randa epelyamo dupwa baame kunjinyi nembo nyingi.
PSA 34:18 Wambu baa rangena yulu dokona uki minyuo pelyasa dokona isa pwuamano lao sepala mona nembenge dupwa keta Kamongo doko repeta karenge. Dee keyange eparali dupwa isa pwuamo lao suu pilyaminyi dupwa baame minyalyingi.
PSA 34:19 Akali keyange doko keta randa malu nyilyamopape Kamongo dokome baa nyisingi.
PSA 34:20 Kamongo baame akali keyange doko koo keta paa nana lao rapu pyuo kararamopa banya kuli dokona mendakipi koko pyaa nara.
PSA 34:21 Koo pinginya renge dokome yulu koo pingi dupwa pyao kumakara. Wambu yulu rolae pingi dupwa kando awa naraminyi wambu dupwa randa nyerami.
PSA 34:22 Kamongome banya kendemande ingyuo dupwa kyawa lete nyingi. Baa keta pao alya minyingi dupwa koo keta pali nana lao reto karenge.
PSA 37:1 Koo pilyaminyi dupwana mona nembo kara nao kopetame pilyaminyi dupwana yango palyuo kara nao pipi.
PSA 37:2 Nakama rambi isokope mee yando nao isa pamuli pyuo waiya lao isa parami ingilyamo.
PSA 37:3 Kamongo keta pyamalyuo karapala wambu dupwa pipya yulu mondo lao pyuo karare. Dopa piri ramo dokopa embena yuu dokona koo keta pali nao mee palyuo karare.
PSA 37:4 Emba rae mairinyi renge doko Kamongo keta koto karare. Dokopa embena monarena suu pilinyili pyuo jeramo karare.
PSA 37:5 Emba Kamongo kumuo maipala baa keta pyamalyuo karare dokopa baame emba nyisara.
PSA 37:6 Baame embena yulu rolae dupwa nyepala korakama neta renge dopale ingyuo rao eŋa nembakaramo karare.
PSA 37:7 Koo dupwana dopa pirama lao wambu koo dupwame angingyuo lao rapa rapa yulu pyuo pirami dupwana mona nemba napala Kamongona lenge kambudokona mona sinya lao baame panda nyuo wambo pinya lao male soo karare.
PSA 37:8 Imbwa kaeyape dee pyalana suu pyaa napipi. Mona nembo katakaeyare renge dopaleme emba nyisa nange.
PSA 37:9 Kamongo keta pyamalyuokararami dupwa yuu range dokona nao paliraminyipa koo pirami dupwa neta nembarami ingilyamo.
PSA 37:10 Koo pyuo kararami dupwa dusa kata serandena pana narami ingilyamo. Kararaminyi kandalana piri doko kanda nareingilyamo.
PSA 37:11 Range pau lasi ingyuo kararami dupwa yuu dokona nakama kapa palyuo mona seramopa nao kararami.
PSA 37:12 Akali koo pingi dokome akali keyange pingi kando pyalana suu pingi. Suu pyapalalenge polo epe kanda nao karenge.
PSA 37:13 Dopa piramopape Kamongome akali koo pingi dupwa kando repe koo keta palyaminyi lapala giyalya giyana pyuo karenge.
PSA 37:14 Akali koo pingi dupwame nakamana wua gela dupwa nyuo wakyuo nakamana yanda dupwa ipyapala wambu pendewa dupwa pyalana lao karaminyi. Dopako pyuo akali keyange pingi dupwa opetaeko pyao kumakalana pilyaminyi.
PSA 37:15 Dopa piraminyipape nakamana wua gela dokome nakama range naramopa yanda dupwa mee punju para.
PSA 37:16 Akali keyange pingi dokona bange kuki serara dupwame akali koo pingi dupwana bange malu seraraminyi dupwa isa palyuo sera ingilyamo.
PSA 37:17 Kamongome koo pingi dupwana porai renge doko pyao bembai lanyi nembapala yulu keyange pingi dupwa yapo kame pyuo minyakamira.
PSA 37:18 Banya letamuli pyuo warombo soo pii minyingi dupwa baame mondo lao rapu pyuo kararamopa yuu doko nakamana ingyalu ingyuo ingyara.
PSA 37:19 Nakama randa eparamo dokopa moŋo nyii narami. Lopo seramo dokopa nakama nenge kapa seramopa koo keta pali narami.
PSA 37:20 Koo pyuo karenge dupwa kumarami ingilyamo. Kamongo nyisu petenge wambu dupwa mee isa jingi rele lao kalya pipala mee ingyuo pao yangama yangama kopana mendeke ingyuo meeingyuo parami ingilyamo.
PSA 37:21 Wambu kopetame pingi dupwana yulu doko bange saka napala mee yari ingyuo kee lao nyepala dee range maiyakami nange. Dopa piramopape akali keyange dokome bange mee mairamo doko ketae reto maiyuo maiyuo karara.
PSA 37:22 Kamongo baame rae maiyuo elyape keta petenge wambu dupwa yuu dokona kapa palirami. Dopa piramopape Kamongome rae mai nara wambu dupwa yuu dokona ralinyi nembara ingilyamo.
PSA 37:23 Kamongome akali baa apa pyuo karara kata dokona lanyuo penge. Dopa pyuo baa rae mainyi pyambuo pingi wambu dupwa kyawa minyuo karenge.
PSA 37:24 Isa penge ramo dokopa Kamongome nyisilyasa isa puu pao paa nange.
PSA 37:25 Namba yuu gii malu nembo kareyo doko dakepa emo kaelyo. Dopa pipunupape akali keyange mende Kamongome kyawa yaki nyiyamo kanda nayo. Dopako pyuo banya wane wanakepeme nenge jinya lao kongo pyuo kareyaminyi kanda nayo.
PSA 37:26 Yuu peparae baame pakiki maiyuo dee yano reto maiyuoko pingi. Dopa pilyamopa banya wane wanakepe dupwa baa rae mainyi pyambungi.
PSA 37:27 Yulu koo dupwa yaki nyuo kaepala keyange pyuo karape. Dopa pyuo karapala dokopa embena para pyarinyi dupwa yuu dokona mondo lao nao palyuo kararami.
PSA 37:28 Kamongome yulu rolae dupwa mona nyingi. Wambu banya yulu mondo mondo lao pingi dupwa yaki nyuo kaeyara ingya nalyamo. Kamongo baame nakama kyawa minyuo karenge. Dopa pilyamopape kopetame pinginya para pyao nyerami dupwa neta nembara.
PSA 37:29 Rolae pilyaminyi dupwa yuu range dokona mee mondo lao nao palu palirami.
PSA 37:30 Wambu mona palengena pii doko keyange ingyuo penge. Baame laramo dupwa angi kapa dokonako lara.
PSA 37:31 Baame banya Anatunya lowapii dupwa mona anda dokona reto minyingi. Yuu mendepe reto yaki nyuo kaeya nange.
PSA 37:32 Akali koo dokome akali keyange doko pyalana leeminyuo karenge.
PSA 37:33 Dopa pilyamopape Kamongo baame yanda pimwainyapawa dokona baa anamasi minyinya lao kyawa yaki nyii nara. Kote minyaramo dokopa koo pingi dokome kote pii lao wini lapala karapusi nembena lao panda mai nara.
PSA 37:34 Kamongome keyange mende pira lao suu pilini dokona baa keta pyamalyuo karapala banya mawa pii dupwa rape rape lao minyuo karape. Dokopa yuu dokona nao karalapa lao baame porai renge jeramo karo kandare dokopa koo pingi dupwa ralinyi neta nembara ingilyamo.
PSA 37:35 Akali koo sungwa sungwa pyuo kareya doko namba kandeyo. Baa iki londapala doloma nyuo isa palyuo karenge doko kandeyo.
PSA 37:36 Enakana pao karo kandeyo dokopa baa dokona kara nayamo kandeyo. Koto kareyo dokopa kando nyii nayo.
PSA 37:37 Pii dake angi mende letamo lao selapape. Wambu rolae pingi dupwana kandapala mana nyelapape. Wambu mona sinya lao piso karo pingi dokona para pyaramo dupwa nakama pisirami ingyara.
PSA 37:38 Koo pingi dupwa koo keta palirami dokopa nakamana para pyao nyisi dupwa opetae pyao nembarami.
PSA 37:39 Kamongome rolae pingi akali dupwa nyiso karapala randa epelyamo dokopa kyawa minyuo karenge.
PSA 37:40 Baame nyiso randa epelyamo dupwana lao nenge rekya lao nyingi. Koo pyuo karelyaminyi dupwana nakama koo keta pali namili lao baame nyisinya letaminyi dokopa nyiso kyawa minyingi.
PSA 40:1 Kamongo dokome namba nyisara lao suu pyao mee isaro kareyo. Dokopa enakana nambana ee leyo doko baame siya.
PSA 40:2 Yuwale koo andake ipwanju singi mendena paleyonopa baame kyawa lete nyepala kana dokona pisiya.
PSA 40:3 Baame namba namwana Anatu lakandenge kenane enenge mende pyao mana langiya. Wambu malu dupwame dake kando pako karo repe repe laramo doko soo Kamongo baa kapa pira lao suu pyarami.
PSA 40:4 Wambu isa kanape anatu lao kingi lenge dupwape anatu kyambo lenge dupwape angi lao suu pyao kara napala Kamongo doko kapa ingingi lao suu pyao karaminyi dupwa rae maiyuo kararami.
PSA 40:5 Kamongo Anatu embame namwana renge malu pyakao karenge. Emba yale mende kara nalyamo. Embame rengya keyange nyera dupwa peparae rapa rapa pyakalene. Namba embena yulu peparaena lao lapuli doko yulu malu mee sipyamosa saka naro ingilyamo.
PSA 40:6 Emba menana rendamu nyelana rae mai napala namba yanenge wai pyapala kumuo jelase lao rapa rapa pyaane leya. Nakamana koo dupwa kame sakalase lao mena pyao kiso jilyaminyi doko rae maiyuo nyii nalene kandelyo.
PSA 40:7 Kandapala nambame buku kao pele pele lasi dokona leyamuli pyuo dae karo.
PSA 40:8 Emba suu pyarenyili pyuo piri. Embena mawa pii doko nambana monarena manjo karenge, leya.
PSA 40:9 Embena wambu dupwa wato leyami dokona nambame waili pii embame nyisiinyi doko polo lamaiyu. Nambame wambu dupwa kaeya nao lamaiyuoko kararo doko emba silini.
PSA 40:10 Lete wai pyao nyiyamo doko namba yeelyo iki sepala kaeya napu. Nambame yuu peparae embena yulu keyange pyuo nyisilini dupwa lamaiyuoko karenge. Embena wambu dupwa wato letaminyi yaka lao namba roma napyuo pisa nange. Emba alowa pii nao mona reto puu pelene dokona lao lamaiyuoko karenge.
PSA 40:11 Kamongo, embame namba yuu peparae sakame kumuo karalu karare doko namba silyu. Embena alowa pii nao mona reto karalu karenge suu pingi dokome namba yuu peparae kyawa minyuo reto karara.
PSA 40:12 Randa malu mee namba keta soo kako pipyasa kapa pyuo yaka lalana saka nalyo. Nambana koo dupwame namba kalya nasi minyapyasa kapa kandaro ingya nalyamo. Nambana ayembana kyawasi malu mee karamo dopale ingyuo sipyasa nambana suu pingi doko isa pupyamo karo.
PSA 40:13 Kamongo, embame namba pyuo nyepala dakepa nyiso karape.
PSA 40:14 Wambu nambapyao kumakalana lao suu pilyaminyi dupwa nyuo anamasi minyuo kyawa sisingi bolombalo laramo penale. Lapo namba randa nyipu dokopa rae maimi dupwa kapu kyepala elyo penale.
PSA 40:15 Namba kando giyalya giyana pimi dupwa nakama isa palaminyi dokona elyame kumuo karenale.
PSA 40:16 Embaketa epelyaminyi dupwa mona pyakalyuo pyaramopa rae maiyuo kararami. Embame pyuo nyiinyi dokona lao sangyu lao karaminyi dupwame yuu peparae lao, Kamongo doko baa aki Kamongo lao karenale.
PSA 40:17 Namba mendali range palya nao mee isale karenge. Dopa pyuo karalonopape Kamongoembame namba kame see nange. Emba nambana Anatu nambana pyuo nyingi ingyuo karene dokome waiyako lao namba nyiso karape.
PSA 42:1 O Anatu, mena diya doko ipwa manda renge doko nano karenge doko suu pyao namba embapa karalana nano karo.
PSA 42:2 Anatu emba lete karenge dokona lao ipwa ingyuo nano pipyamo karo. Anjokorape nambame embena lenge kambu dokona kingi wapambu lakao emba lakandala parose?
PSA 42:3 Kukwa korakamape ee lao karapusa ee ipwange dokome nenge ingyuo sikya pilyamo. Dopa pipyamodokopa nambana yanda pimwai dupwame piso soo, Embena Anatu doko anja karamo, lao karaminyi.
PSA 42:4 Wamba apa piyamano dokona suu pyapu dokopa nambana mona kwaelyamo. Namba wambu dupwa pipya role pyao Anatunya anda peyama dokopa wambu dupwa rae maiyuo kenane pyao pii porakai lao Anatu lakando peyaminyipa lanyuo peyo.
PSA 42:5 Akipamo namba sakame kumulyusi? Akipamo namba randa andake nyilyusi? Nambame Anatu keyange piralao suu pyao baa nambana pyuo nyingi ingyuo karamo doko dee kambalakando kararo.
PSA 42:6 Dae karapusi karo mona kenda pipyasa baa lao suu pyao karo. Baame kondo renge doko nambana mona dokona ipwaingyuo kulimbwanyi peyapya.
PSA 42:7 Randa andake dokome apunda epelyamoipwa palenge dopale ingyuo yuu kyau Emonepe yuu kyau Misape dolapona piso ipwa jerae pyao ipwa Jotane gulu galu lao malyingi dopale ingyapya.
PSA 42:8 Yuu yangaramo dokopa Kamongome banya mona reto karalu karenge doko lasaka pyuo karena. Dopa piramo dokopa nambame kukwa dokopa kenane pyao Anatu nambapa karapyamo pilyamo lao ateŋa lao piru.
PSA 42:9 Anatu nambana kyawa minyuo karenge doko kando leto. Akipamo namba yaki nyilisi? Nambana yanda pimwai dupwame akipamo namba koo keta palyuo randa joo puu pao pena lao kaelese?
PSA 42:10 Nakamana giyalya giyana pyuo pii lami dokome namba mata rukyuo pili lao, Embena Anatu doko anja karase lao piso soo karalu karaminyi.
PSA 42:11 Akipamo namba sakame kumulyusi? Akipamo namba randa andake nyilyusi? Nambame Anatumi kapa pira lao soo manjo baa nambana pyuo nyingi karamo doko dee kamba lakando kararo.
PSA 43:1 O Anatu, wambu emba suu pyaa nange dupwame namba kando pii kopetame laminyi dupwana raka dokona namba rolae ingyuo karene lao panolape. Dopa pyuo wambu yulu koo pingipi kyambo lengepe karaminyi dokona namba kyawa minyuo minyalyuo nyepe.
PSA 43:2 Emba nambana alya minyingi ingyuo karene. Akipamo embame namba yaki nyelese? Yanda pimwai dupwame namba randa kopetame ingyuo joo kararaminyipa akipamo namba randa dokonyuoko parose?
PSA 43:3 Embena yanga paupau lengepe kinyinya rengepe dolapo peyakape. Embena yuu kyau poo pyasi Sayone lenge dokonape embena tembole anda emba palenge dokonape namba dee kamba laminyuo penale.
PSA 43:4 O Anatu, enakana namba embena kana pyare laro karenge dokonaparo. Emba keta nambana mona pyakalyuo pyao rae maingi renge potemo epenge. Anatu, nambana Anatu, nambana rambyalu lao kenane pyao emba lakandaro.
PSA 43:5 Akipamo namba ama kondalyose? Akipamo nambana mona dokona randa nyilyusi? Nambana Anatu baa kapa pira lao suu pyao kararo. Baa nambana lete wai pyao nyingi baa nambana Anatu ingyuo karamo lao dee lakandaro ingilyamo.
PSA 46:1 Anatu namwana konambena mendeke ingyuo porai renge joo pyuo karenge. Randa epelyamo dupwana kaeya nao yuu peparae rapa rapa piru karapala nyisingi.
PSA 46:2 Dokona lao isa yuu dake walu walu andake laowape dee yuu kyau dupwa poro lapala ipwa kota sukusa pao piramopape namwa paka narama.
PSA 46:3 Dee mende ipwa kota doko mangalya mangana pyuo oo lao eparamo dokopa yuu kyau dupwa walu walu laraminyipape namwa paka narama.
PSA 46:4 Ipwa Anatunya yuu taone dokona epopelyamo dokome rae maingi renge minyuo epo penge. Epo Anatu Ama Ketaena anda poo pyasi dokona penge.
PSA 46:5 Anatu baa yuu taone andake dokona palyuo karelyasa kapa kwaeya nange. Ene yango rombalo piramo dokopa baame nyisala epara.
PSA 46:6 Yuu muu ree lao dupwa peparae pakame kumaraminyipa kiŋinya isingi yulu dupwa peparae walu larami. Anatu pii reeko yuu gono lele laramo dokopa yuu dupwa mee ingyuo rali pira.
PSA 46:7 Kamongo Porai Wakasa doko namwa pipya role pyao karapyamo pilyamo. Jekopena Anatu doko namwana yalu pingi panda ingyuo karamo.
PSA 46:8 Kamongome aki yulu mende pilyamo lao kandala ipupwa. Baame yulu wambumikando yamarangungi dupwa isa yuu dakena pilyamo kandalapa.
PSA 46:9 Baame yuu muu peparaena yanda pilyaminyi dupwa kaena lao nenge rekya lao nyilyamo. Baame yanda kakupi dupwa punjinyi nembo konambe dupwa nyuo isarena yango pilyamo.
PSA 46:10 Yanda pilyaminyi dupwa kaepala namba doko Anatu ingyuo karapunu pilyamoŋo doko soo nyelapape. Yuu liti dupwanape dee yuu muu ree lao dupwanape mupwa ingyuo karoŋo letamo.
PSA 46:11 Kamongo Porai Wakasa doko namwa pipya role pyao karapyamo pilyamo. Jekopena Anatu doko namwana yalu pingi panda ingyuo karamo.
PSA 47:1 Wambu peparae rae maiyuo kingi kape pyalapape. Kenane keyange lapo poraiyuo pyao dokome Anatu lakandalapape.
PSA 47:2 Kamongo Ama Ketae doko baa andake lao suu pyao pako kararami. Baa iki kiŋi andake ingyuo karenge dokome yuu muu dupwa peparaena iso karenge.
PSA 47:3 Baame wambu peparae nyuo isa palyakao yuu liti peparae iso kararami lao pyakaya.
PSA 47:4 Namwa yuu palamano doko baame palirami lao nyuo jiya. Wambu baame mona reteyamo dupwa yuu dokonyuo palipala kimbu pisipyamo karamano lao suu pilyaminyi.
PSA 47:5 Anatu banya kiŋinya petenge isa pao nyilyamo. Nyipyamo dokopa wambu dupwa mona pyakalyuo pipyasa pii porakai lao bikuli dupwa pyao karaminyi.
PSA 47:6 Anatu lakando kenane pyamana. Namwana kiŋidoko lakandamana.
PSA 47:7 Anatu baa kiŋi doko yuu muu dupwapeparaena iso karamo dokona kenane pyao lakandamana.
PSA 47:8 Anatu banya kiŋinya petenge isa poo pyasi dokona pisapala baame wambu dupwa iso karamo.
PSA 47:9 Wambu iso karenge akali dupwa pipya Aporakamena Anatu dokona wambu dupwa role pyao karaminyi. Baame ami yanda singinya porai renge dupwa manda manja nange. Baa keta porainyarenge palipala kiŋi dupwana ketaele ingyuo iso karenge.
PSA 49:1 Pii dake wambu piso palyuo pelene dupwame kale yukupala selapa.
PSA 49:2 Pii serami dupwa kamongo pendewape dee kuki epengepe peparaeme soo nyuoko pipwape.
PSA 49:3 Nambame pii suu pyaro dupwa koko pao suu pyaro. Pyapala soo nyinginya renge doko laro.
PSA 49:4 Dopa pyuo nambame kongwalu pii pyasi doko soo gisalena sokondali pyuo karapala renge doko rambyalu lao dokopa dokona polo larono serami.
PSA 49:5 Yanda pimwai yulu koo paleta dupwame namba nyuo sukusa palyaraminyi dokopa randa eparamopa namba pakame kumuo kara naro.
PSA 49:6 Wambu koo pingi mendeme isa bangena mona yukupala karara dokome mena bangepe dupwana iki range dokona ketae pyambuli lao lao kararasa pira dokona namba randa eparamo dokopa pakame kumuo kara naro.
PSA 49:7 Wambumi mende koo dupwana lao baa range kapa kiiramo nyii nara. Baa rangeme Anatu keta bange mendeme ropo pyapala lete karara kapa pii nara.
PSA 49:8 Renge doko akalinya koo renge dupwana bangeme ropo pyaramo dokona manda manja napala andake ingyuo pelyamo. Banya minyuo epo ropo pilyamo dupwame
PSA 49:9 baa malu anda pali nao lete eparande daa. Dee dopako pyuo baa lete renge mairamo kararandedaa.
PSA 49:10 Akali mona palenge palya nangepe dee kopetame pingipi pii nangepe peparae kumuo penge doko kandelyamano. Nakamana mena bangepe dupwa para pyaramo dupwa keta reto kumuo penge.
PSA 49:11 Dakepa yuu andape range sipyamo piso karo piminyipape rengya nakama malu pirami. Mare dokopa malu anda doko nakamana anda yuupi ingyalu ingyuo ingyaralyamo. Nakama angingyuo dokona palyuo otarami ingyara.
PSA 49:12 Akalinya kamongonge renge dokome baa kuma nana lao kyawa minyarande daa. Baa mee mena suwape ingyuo kumuo para ingilyamo.
PSA 49:13 Wambu rangena suupingi dokona iki pyamalyapala karaminyi dupwa keta aki rengende pilyamo lao kando karamanale. Mena bangepena angingyuo minyaro karaminyi dupwasa leto.
PSA 49:14 Nakama mena sipisipi kumuli lapa pirami. Piraminyipa kumunginya renge dokome nakamana mena sipisipi rapu akali ingyaro karara. Wambu dasipa kumapala nakamana yanenge kakapangepe nakama rangena anda nanesa karo kumunginya yuu dokona palyuo waiya lao rumbyuo kwaeyarami. Kwaeyaraminyipa rolae pingi dupwame nakama anamasi minyarami.
PSA 49:15 Dopa piramopape Anatumi namba kyawa minyara. Baame namba kumungi rengena porai dokona piso kingi rekya lao nyera ingilyamo.
PSA 49:16 Akali dupwa kamongoyami kande dokopape dee nakamana mena bangepe dupwame kamame andakiya kandedokopa mona kendame kumuo kara napipi.
PSA 49:17 Baa kumaramo dokopa minyuo paowape dee kyangali suku suku retapala malu anda palirande daa.
PSA 49:18 Akali baame yulu wakasa mora piso pingi lao suu pyao karo isa yulu dupwana kamongo ingyuo paramosa lakandaraminyipape
PSA 49:19 kumungi gii dokopa imbwange kauwangepe kumuo penge kata dokona puu pao para ingingi. Yuu iminjaro karalu karo karenge dokona para.
PSA 49:20 Akalinya kamongonge renge dokome baa kuma nana lao kyawa minyarande daa. Baamee mena suwape kumuli lara.
PSA 51:1 Anatu yuu peparae kaeya nao mona reto puu penge dokona embame namba kando sakame kumuo karape. Embame namba sakame kumulini dokona nambanakoo dupwa kwuanyi nembakare.
PSA 51:2 Nambana koo dupwa peparae nyuo wate pipala elya pyuo nembakare.
PSA 51:3 Nambame kyai pyuo pingi dupwa angi silyu. Namba yuu peparae nambana koo dupwa range soo manjo karo.
PSA 51:4 Nambame emba keta koo pimwaiyuo pipu doko emba iki pimwaipu. Embame koo lao masipinyi doko peparae pipu. Dokona embame koo pipi lao lare doko rolae ingyuo lare ingilyamo. Dee embame namba koo pipi lao randa jere doko rolao laresa pira.
PSA 51:5 Namba endangimi manjipa nayamo dokopa koo doko namba keta paleya. Manjo neta nyepeyamo dokopa koo doko namba keta palamoko.
PSA 51:6 Kinyi angi kapa dokona lenge doko emba rae mailini dokona nambana kyawa sisinginya embena mona palenge singinya renge palyuo simbwakape.
PSA 51:7 Nambana koo dupwa nyuo kakondakare dokopa au pyuo keyange ingyuo pisiru. Nambana koo dupwa wate pyakarenedokopa kamame kyowao lao kopa dopakale ingyuo kararo.
PSA 51:8 Namba raemaiyuo mona elyape palenge jaa doko kale katana palenale. Namba pyao inji ranji pinyi nembapinyipape namba dee kamba rae mairu.
PSA 51:9 Nambana koo dupwana kanda nao lenge iminjapala nambana koo wakale wakale peparae kwuanyi nembakare.
PSA 51:10 O Anatu, mona au pisi sinya laowasakare. Dee imambu enenge emba keta yaki nyii nao yulu pingi doko namba keta jereko.
PSA 51:11 Namba embena arapu dokona pyao neta nemba nao embena Imambu Poo Pyasi namba keta rekya lao nyuo pii nare.
PSA 51:12 Embame namba pyuo nyiinyi dokona piso mona pyakalyuo pingi renge doko epenge. Doko dee range jepe. Jepala dokopa namba waa waa karo rape rape lao pingirenge jere.
PSA 51:13 Dokopa enakana koo pingi dupwa nambame embena mawapii dokona lamaiyakaro dokopa nakama kapu kyuo emba keta lanyuo epenale.
PSA 51:14 Anatu embame namba kyawa minyuo pyuo nyepe. Dokopa nambame rae maiyuo karo embena yulu rolae dokona lamaiyakao parowale.
PSA 51:15 O Kamongo, pii mora piso nyisape. Dokopa nambame embena kingi lakandarowale.
PSA 51:16 Emba mena pyao kiso maingi dokona rae mai nange. Rae maipili nambame kapa jipuli. Dee mena kiso rendamu pyuo maingi dokona emba rae mai nange kandaleko.
PSA 51:17 O Anatu, nambame mena pyao kiso maingi dokona lao suu pyao nambana imambu inyimungu karenge doko emba keta jilyu. Doko akali inyimungu koo dupwana kondo karenge doko emba yaki nyii nange kandale.
PSA 51:18 Anatu, embame anjiki pipala yuu kyau Sayone doko nyisape. Jerusaleme kame doko kamba piri.
PSA 51:19 Enakana angi mupwa pyao mairaminyi dokopa emba rae mairi. Mena pyao kisomaingi dupwa kandapala rae mairi. Dee bulamakao kali dupwa embena pyao kiso maingi rate dokona pyao kiso mairamiko.
PSA 63:1 Anatu emba nambana Anatu dokoŋo. Namba embapa role pyao karapuli yaka. Nambana suu pingi peparaeme emba keta karapuli yaka lao suu pilyu. Yuu penda penda ipwa pali nange dopale ingyuo karapala nambana imambu dokome embapa karalana ipwa ingyuo nano pipyamo karo.
PSA 63:2 Nambame emba porai ingyuo yanga paupau lao karene doko misi anda dokona karo kandalana suu pyao karo.
PSA 63:3 Embame yaki nyii nao mona reto puu penge doko angi ingyapyasa isa yuu dakena piso karo pingi doko mee ingyuo pelyamo dokona embena kingi ketae pyambuo lakando kararo ingilyamo.
PSA 63:4 Namba kararo mange dupwa pipya emba kando ange lao nambana kingi ketae pyambuo ateŋa laro ingilyamo.
PSA 63:5 Nambana imambu doko imambunya nenge nao sikya pira dokopa nambame emba kenane pyao lakandaro.
PSA 63:6 Nambana luu palenge panda dokona palyuo soo dokopa embena lao suu pyao palyuo singi. Kukwa peparae namba embapa lao suu pyale pyale palenge.
PSA 63:7 Renge dokona lao embame namba yuu peparae nyisingi. Embena arapu dokona karenge dokona lao rae maingi kenane dupwa pyao karo.
PSA 63:8 Nambame emba poraiyuo minyaro soo pelyo. Dokona namba kyawa minyuo karene kande.
PSA 63:9 Wambu lapome namba pyao kumakalana pilyaminyi dupwa kumasi wambunya yuu dokona isa parami.
PSA 63:10 Nakamame yanda pipala pyaraminyipa nakamana yanenge kakapange doko suwa rae lenge dupwame nao kararami.
PSA 63:11 Anatumi pyao anamasi minyakamira dokona kiŋi baa rae maira. Wambu Anatupa pii kana minyuo lengedupwame banya kingi lakandaraminyipa kyambo lenge wambu dupwa pii pali naramo parami.
PSA 65:1 Anatu, yuu Sayone dokona namwame emba lakandapengeli ingilyamo. Namwame dopa pirama lao lalu lao lenge pii doko minyapenge ingilyamo.
PSA 65:2 Embame namwana ateŋa pii doko sepala yano pyakange dokonadopa pirama. Wambu dupwa peparae emba keta epo nakamana koo dupwa polo langyala eparami ingilyamo.
PSA 65:3 Namwana koo dupwame nyuo isa palyingi. Palyilyamopape embame namwana koo dupwa nyuo kame sakange.
PSA 65:4 Embena rombo palyisi wambu dupwa lanyuo emba pipya role pyao karaminyi dusipa rae maiyuo kararami. Embena tembole anda yapasi dokona karo embena keyange rengepe dee bangepe jingi dupwa kapa pyuo nyeramanopa mende yangya nara.
PSA 65:5 Embame namwana ateŋa lenge dupwa yano pyakao namwa keta yulu keyange pyuo kyawa lete nyuo karenge. Wambu yuumuu dupwana palaminyi dupwamepe dee ipwa kota yalo yuu nanesa range dupwamepe emba mupwa kapa pira lao suu pyao karaminyi.
PSA 65:6 Embena porai dokome yuu kyau dupwa waso pisiinyi dokome embena kamame porai renge dokolasaka pilyamo.
PSA 65:7 Ipwa kota doko kasakole minyuo gono gono lao mango epenge dokopa embame singinyili pyuo sinya lenge dokopa mee pyai nao rali pingi. Doko suu pyao wambu kilyipu kilyipu karenge dokopa embame nyuo kui lenge.
PSA 65:8 Wambu yuu muu dupwana peparaeme embena yulu andake pingi dupwa kandapala yamarangyuo mona pyakalyuo pilyamo karenge.
PSA 65:9 Embame yuu dupwa mondo lao rapu pilyuŋu lao lasaka pyuo apu peelene. Dopa pipinyi dokona yuu amenge kapape dokona nenge andenge. Embame ipwa pona dupwa ipwa epo rangu pena lao pingi. Embame yuu dupwana nenge andena lao peenge. Embame pingi doko dapa pyuo pingi.
PSA 65:10 Embame yuu ape ape pyasi dupwana apunda malu peelenepa yuu doko rombe lao singi. Embame apunda kuki raa raa pyao peenge dokome yuu dupwa pyuku lapala ee waingi dupwa andena lao pyuo karenge.
PSA 65:11 Embame wambu dupwa elyape keta pisapinyi dokome ee nengepe malu manjo nyilyaminyi. Emba anja panda anja mendasa pupinyi dupwana nenge malu silyamo.
PSA 65:12 Yuu isako malu andenge dupwana mena sipisipi malu karaminyi. Yuu kyau dupwana ee nengepe yuu sero karapyasa yuu kyau dupwa ama rae wakasa maiyuo karaminyi.
PSA 65:13 Yuu pau dupwana mena sipisipi dupwame minyarambu nyuo karaminyi. Yuu lama dupwana witi dupwame minyarambu nyuo ando karaminyi. Dopa pipyamo dokome bange peparaeme mona pyakalyuo pyao kenane pyao karaminyi.
PSA 67:1 Anatu embame namwa sakame kumapala elyape keta piso kalya pyuo nembape. Namwa koo nono ingyuo kanda napala anjiki pyuo kandape.
PSA 67:2 Dopa pirinyi dokopa yuu muu peparaeme embena pimili lao suu pilini doko sinyale. Dopa pyuo soo embena pyuo nyingi yulu doko dopa pyuo palyuo penge lamo lao kandenale.
PSA 67:3 Wambu dupwame Anatu emba lakandenale. Wambu peparaeme emba lakandena.
PSA 67:4 Embame yuu muu peparae mondo lao kata lasaka pyuo lao rolare renge dokona embena lao mona pyakalyuo pyao rae maiyuo kenane pyao lakandenale.
PSA 67:5 Wambu dupwame Anatu emba lakandenale. wambu peparaeme emba lakandena.
PSA 67:6 Namwana Anatumi namwa nyiso elyape keta pisapinyi dokome yuu dokona nenge kakana pilyamo.
PSA 67:7 Anatumi namwa elyape keta piso nyisapyamo dokona wambu peparae anja anja palaminyi dupwame baa ketae pyambuo lakandena.
PSA 69:1 O Anatu, ipwa dokome epo nambana mange koe nyilyamo nyisape.
PSA 69:2 Namba ipwa inju mendena nyuo yalu pilyamo. Yuu porai mende see nalyamo. Namba ipwa kota ama yalu mendenakaro. Ipwa kota kasakole minyuo ipwa dokome namba oo nyuo napalana pilyamo.
PSA 69:3 Namba nysinya lao kyakale lapu doko lao lisa pipala pendoko rokolyamo. Nyisala eparali lao lenge nyuo karo lenge alyilyamo.
PSA 69:4 Renge angi mende palya napyamopa namba awa nao karaminyi dupwa ama malu ingyapyasa nambana kyawasi malu karamo dupwa manda manja nalyamo. Nambana yanda pimwai dupwame kando kyambo lao yanda pimwailyaminyi. Nakamame namba pyalana poraiyuo kaelyaminyi. Dopa pipala bange dupwa waa nyiyu ingyuo range maiyakami letaminyi.
PSA 69:5 Nambana koo dupwa Anatu embapa yalu pyuo silyande daa. Namba kopyali ingyuo pyuo karene lao embame soo kaeyo karene doko.
PSA 69:6 Kamongo Mupwa Andake Wakasa Ama Porai, Emba Isaraele wambunya Anatu doko. Namba koo pirunusa embena wambuemba mona retenge dupwa mona kenda nana lao suu pyao karape. Wambu kingiwapambupi lakao emba kingi lenge dupwa nambame koo pirunusa emba Isaraele wambunya Anatu elya nyii namili lao suu pyao karape.
PSA 69:7 Embena kingi reke lao karapusa wambu dupwame giyalya giyana pyuo karaminyi elyame kumulyu.
PSA 69:8 Namba nambana yangonge dupwa pipya kanda nange upunili ingyuo pelyamo. Nambana endangi rakangepa dupwa pipya namba yuu nanesa wambu enenge ingyuo pelyamo.
PSA 69:9 Embena tembole anda suu pyao yulu andake isare rao pyuo kararo. Emba kando pii kopyali minyinyi nembo leyaminyi dupwa namba keta soo punjilyamo.
PSA 69:10 Namba range inyimungu karapala nenge wasaka pyuo pisipunupa wambumi kilya kando letaminyi.
PSA 69:11 Namba kumanda piso ee lao wapungi komau wapwaro pisipu dokopa giyalya giyana pilyamini.
PSA 69:12 Kata jima jima dupwana karo nambanalao lakao karaminyipa ipwa biya nenge akali dupwame nambapa lao kenane rana isa poko pyao karaminyi.
PSA 69:13 Dopa lao karaminyipape nambaramo doko Kamongo embapa lao loma soo kararowale. Anatu, yuu gii mende embame rombo palyuo nyepala namba isingi langipi. Embame namba mona andakeretelene dokona laope embame kyawa lete nyero lenge pii doko minyingi dokome isingi langipi.
PSA 69:14 Ipwa injunya yalyilyu dokona nyisape. Nambana yanda pimwai dee ipwa andake dolapona nenge rekya lao nyepe.
PSA 69:15 Namba ipwa palyuo koo mange nelyamo dokome nyuo koko palya nanale. Namba yuwale kyasisi londe dokona malu pisi kara narowale.
PSA 69:16 Kamongo embena mona reto puu penge keyange dokona piso pii yano pyaka. Embena saka renge palenge doko paleta namba keta ipupi.
PSA 69:17 Embena kendemande akali doko kandele kanda nale lao kara napipi. Namba angi randa nyilyu dokona dakepa embame nyisa.
PSA 69:18 Namba keta epapala nyisape. Nambana yanda pimwai dapwana namba nenge rekya lao nyepe.
PSA 69:19 Nambana kingi doko kokwa soo lao koo keta palyamisa elya nyilyu doko emba silini. Embame nambana yanda pimwai dupwa peparae kandasi karene.
PSA 69:20 Kingi kokwa soo laminyi dokome nambana mona doko kwaepyasa namba kopyali pakana palamo. Namba dopa pyuo pilini lao mendeme kenda dokona nakanju sepala mona minyaramburami kandena lao lengenyipunu dokopa mendali daa ingilyamo.
PSA 69:21 Namba lopo piyamo dokopamauli nyuo jiyami. Namba ipwa nano piyamo dokopa ipwa waene kau pingi doko nyuo jiyami.
PSA 69:22 Nakamana pati andake laminyi dupwame nakama kokwa sinyi nembo penale. Nakamana nenge nenge yuu gii dokona kone makarami dokona mangena minyinya.
PSA 69:23 Pyao lenge kwaenyi nembape. Nakamana mata dupwa poraiya nanale lao pipi.
PSA 69:24 Embena imbu singi doko nakama keta kulimbwanyi palyapala imbu singi dokome pyao yamasu pyanyi palyape.
PSA 69:25 Nakamana piso palyuo pyuo papilyaminyi panda doko mee apa sinyale. Nakamana komau anda dokona mendepe lenge rao see nanale.
PSA 69:26 Embame koo piyaminyi pyao yano nyiinyi dupwako randa mailyaminyi. Nakamame embame pyao ranjama nyiinyi wambu dupwanako pii lakamyuo palaminyi.
PSA 69:27 Nakama lete parami panda dorena maiya narene. Nakamana koo dupwa mondo lao pepana pyao retakamyuo karape.
PSA 69:28 Lete karengena buku dokona nakamana kingi doko kwuanyi nembasi palena. Nakama embena wambunya kingi silyamo dokona sisara daa.
PSA 69:29 Namba mona rando mona kendo pilyu. O Anatu, embame namba minyalyuo nyepala nyisape.
PSA 69:30 Nambame banya lao suu pyao kenane romope lao rana isa poko baa suu pyao kararo. Banya yulu keyange wakasa dupwana namba banyalao sangyu lao lao panaro.
PSA 69:31 Renge dokome Kamongo baa rae mainyipyambwaramopa mena bulamakao kali kameya mairaminyi dupwa mee ingyuo para.
PSA 69:32 Pendewa dupwame doko kandaraminyi dokopa raeme kumarami. Dopako pyuo Anatu kingi lenge wambu dupwa dokome porainyi pyambwaramo larami.
PSA 69:33 Kamongome bange yano pilyamo karelyaminyi dupwana pii doko soo nyuo dee banya wambu karapusi palenge dupwa kame see naowako karo pingi.
PSA 69:34 Anatu baa yake yuupi laparaeme lakando wee kenanepe lena. Ipwa kota dee bange wasiyamo silyamo dupwa opetaeme baa lakandena.
PSA 69:35 Baame yuu Jerusaleme doko nyiso Juta wambunya taone dupwa dee kamba pyakamira dokopa banya wambu dupwa dokona yuu rombo pyao nyuo nao palirami ingilyamo.
PSA 69:36 Banya kendemande wambunya para pyao nyerami. Wambu baa mona retarami dupwame dokona panda nyuo nao palirami.
PSA 72:1 Anatu, embena rolaena renge dokona palyuo kote lalenyili pyuo lena lao kiŋi baa mana lamaipi. Dokopa emba range katalunji nembo pii lenge dopale lamairi.
PSA 72:2 Dokopa embena wambu dupwa pipya pii katalunjidokona lao dee pendewa dupwa pipya gapomane yulu angi rolae dokona palyuo iso karara.
PSA 72:3 Yuu dokona kapa palyuo nao karapala rolaenarenge doko soo nyisi kararami.
PSA 72:4 Dopa piramopa kiŋi baame mee pendewa wambu dupwa pipya kote kata angi dokona pao lena. Dopa pyuo nyisapenge kata dupwana nyiso dee ingi pungipi nao wambu pipya moŋo maiyuo karenge dupwa isa nembo karenale.
PSA 72:5 Embena wambudupwame emba neta doko rao karalu karenge doko suu pyao kingi wapambupi lakao embena kingi lakando karalu karenale. Kana doko rao karalu karara doko suupyao emba lakando puu pena.
PSA 72:6 Kiŋi baa ee yuupinya apunda kulimbwanyi peyalamuli pyuope dee apunda pura pura pyao epo yuu pyuku lanyi pyambwalamuli pyuo karena.
PSA 72:7 Rolaena renge doko baa kararamo gii dusipana mondo lao ando paramopa kukwa kana rao karalu karo kararamo dupwana banya wambu dupwa kapa palyuo nao petenale.
PSA 72:8 Banya isingi yulu doko ipwa kota mendasa piso pao kota pete mendena suu lao dee ipwa Yuporisa lenge dokona piso pao yuu wangu dolapona kapa kapa pira.
PSA 72:9 Dokopa yuu muiyanena palenge wambu dupwame baa mupwaŋa lao pongwa nao banya kingi lakandarami. Banya yanda pimwai dupwame isa yuu sinjimu dupwana yuu paro oko soo soo pirami.
PSA 72:10 Dopa pyuo yuu Sepene range kiŋipi dee yuu ipwa kota sukusa singi dupwana kiŋipi dupwame baa bange kipungi ingyuo maiyala eparaminyipa yuu Arapia rangepe yuu Itiopia rangepe dupwana kiŋi dupwame dopako pirami.
PSA 72:11 Dopa pyuo kiŋi peparaeme baa mupwa lao mona mairaminyipa yuu muu dupwana wambu peparaeme banya yulu pyakamyuo pirami.
PSA 72:12 Baame pendewa wambupi bange aeya nange wambupi dee wambu mendeme nyuo sukusa pyambwa nangepe dupwame baa kyakale larami dupwa kyawa minyara.
PSA 72:13 Baame poraya nange dupwape pendewape dupwa sakame kumuo karo dee bange yano piramo kararami dupwa kyawa minyuo karenge.
PSA 72:14 Nakama banya mona nyingi bange angi dopale ingyarasa dokona nakama pipya pyalana pingi wambu dupwa keta nenge rekya lao nyingi.
PSA 72:15 Kiŋi baa karo yaku nao kumunya. Baa yuu Arapia range wambumi kana golo maiyuo karena. Banya lao ateŋa doko lapa lapa pyuo sakaminya. Anatumi kalya pyuo nembenge renge doko baa keta palipa palipa pyuo pena.
PSA 72:16 Yuu dokona nenge witi jingipi kakana pyakaminya. Yuu kyauli dupwa ee nengepeme pana naramopa yuu Lepanone dokona nenge kakana pipyamo nelyaminyi dopaleko inginya. Yuu taone andake dupwanawambu wai kiso simbunyi pyale laramopa yangi kuku alemakai pokwalipi ingyuo pena.
PSA 72:17 Banya kingi doko kame see nao suu pyale pyale karena. Banya karenge arome pii doko neta rao karalu karenge dopale ingyuo pena. Yuu muu ree lao baa lakandenale. Wambu peparaeme kiŋidoko rae maiyuo karapyali lao Anatumi nakamba elyape keta pisinya lao pirami.
PSA 72:18 Isaraele wambunya Kamongo Anatu dokona kingi doko iki lakando palena. Baame yeelyo yulu elyape ingyuo dapwa pilyamo.
PSA 72:19 Banya kingi neta renge ingyuo karamo doko lakando karalu kararaminyipa banya neta renge yulu dokome yuu pinjingi dolapona kapa kapa pinyale.
PSA 72:20 Dakena epo akali Jesena ikinyingi Dapitimi ateŋa pii lao epo lumwa piya.
PSA 73:1 Anatumi Isaraele wambu keta yulu elyape pingi. Kinyi, wambu monarena yapasi seramo dupwa keta elyape ingyuo penge.
PSA 73:2 Dopa piramopape namba oo repeta isa paro ingiya. Nambana kimbu doko keta keta pipala Anatu kapa ingingi lao suu pingi doko oo yaki nyepala isa pwuano lao siyu.
PSA 73:3 Akali koo pingi dupwa kamongapala bange dupwa ando peyasa kandapala kyaŋe singi dupwa pipya yango palyiyu dokome namba isa paro ingiya.
PSA 73:4 Nakamana randa pingi mende epa napyamopa nakama poraiyuo yanenge keyange karo karaminyi.
PSA 73:5 Nakama wakale dupwa pilyaminyi doko suu pyaoranda nyii nalyaminyi. Wakale dupwa randa wakale wakale nyiminyi dopale doko nakama keta epa nalyamoko.
PSA 73:6 Dopa pipyasa nakama mee yongona andanyi nembo kyaŋe silyaminyi. Dopa pyuo karo akali menge dupwa pyapala kokwa sinyi nembo karaminyi.
PSA 73:7 Nakamana mona dupwana yulu koo wakale wakale dupwa neta epenge. Dee nakamana suu pingi dupwana yulu koo dupwa imambu see nao rapa rapa pilyaminyi.
PSA 73:8 Nakamame wakale dupwa kando pii koo lao giyalya giyana pilyaminyi. Nakama range mupwa lao suu pyapala enda akalipi wakale dupwa randa maiyuo kokwa seraminyi dokona lao suu pyao lao palaminyi.
PSA 73:9 Nakamame yake dorena karenge Anatu baakando pii kopetame letaminyi. Nakama rangena kingi doko ketae pyambuo lao isa wambu dupwa dopa pinya dopa pinya lao karaminyi.
PSA 73:10 Dopa piminyisa Anatunya wambu angi dupwamepe kapu kyepala nakamana pii laminyi doko soo kale yukupala angi lao suu pilyaminyi.
PSA 73:11 Namwa pilyamano dupwa Anatumi see nara, letaminyi. Kamongo Ama Ketae karenge dokome koto kanda nara, letaminyi.
PSA 73:12 Wambu koo pingi dupwana yulu doko dopa pyuo pilyaminyi. Nakama bange ama malu sipyamopape mee nyelanako suu pyao lao karaminyi.
PSA 73:13 Namba mondo lao waso karo mona yapasi silyamo dee nambana kingi dokome koo mende pii nalyo. Doko mee ingyuo parase?
PSA 73:14 Anatu, embame kukwa korakamape yuu gii yaka lao namba randa jookarenge. Dee yangama peparae namba moŋo jingi.
PSA 73:15 Namba pii kopetame leyaminyi doko lapuli embena wambu pii lao nenge rambo lao pingi dopale pii napuli.
PSA 73:16 Dokona lao renge angi dokona randa nao serama ingyapyamopape sipuli lao pyuo lisa pyuo karapu.
PSA 73:17 Dopa pipunupape namba embena tembole anda dokona papala koo pingi dupwa keta renge dopa pyuonde paliralyamo lao soo pakana palyipu.
PSA 73:18 Kinyi, embame nakama kata keta keta pyuo puu pelyamo dokona nyuo karapala pyao lukundo soo randa nyinya lao piri ingilyamo.
PSA 73:19 Nakama waiya lao koo keta palyuo randa nao otarami.
PSA 73:20 Kamongo nakama mee kukwama kombeya pipala yangama sipurenge dokopa mee ingyalya ingyana pilyasa kame soo kaenge dopakale ingyuo karaminyi.
PSA 73:21 Dokopa nambana suu pingi koo manjo mona rando karo
PSA 73:22 namba kopyali ingyapala emba angi sepa nayo. Namba rangeme embena lenge kambu dokona suwa menape ingyuo peyo.
PSA 73:23 Dopa pipunupape namba embapa role pyao karapunu dokona lao embame nambana kingi minyaro karene.
PSA 73:24 Embame dopa pyuo dapa pyuo karape lao namba kata lasaka pipinyi karo pelyo. Pao lumwa pyuo dusa nambana kingi ketae pyambuo lakando nyere ingilyamo.
PSA 73:25 Yake panda dokona api mende nambana lao karase? Embakoiki ingilyamo. Isa yuu dakena namba karapunu dokopa embapako angingyuo karo.
PSA 73:26 Nambana suu pingipi dee yongope poraya nara ramo dokopa Anatu doko nambana porainya renge ingilyamo. Anatu nambapa kararamo dokopa namba sikya pirasa pira. Mendeme yangyuo yano piramo kararonde daalamo.
PSA 73:27 Kinyi, enda akalipi emba yaki nyeraminyi dupwa kumuo parami ingyaramopa lapome embapa mondo lao au pyuo kara naraminyi dupwa embamekokwa sinyi nembo karare.
PSA 73:28 Dopa pyuo karena lao namba range doko Anatu embapa lungwa lungwa pyuo kararo doko keyange lao soo nyuo karo. Kamongo Mupwa Andake Wakasa namba kyawa minyaramopa banya yulu pilyamo dupwa polo lao kararo.
PSA 80:1 Isaraele Wambunya Iso Karenge embame namwana pii soo karape. Emba aŋala dupwana kyawa ingyuo karenge dokome
PSA 80:2 emba Eporaime rarape Benjamenena rarape Manasana rarape dusipa keta epo lasaka pyuo panape. Embena porai renge namwa lasaka pyuo epo namwa pyuonyepe.
PSA 80:3 Anatu embame namwa range sukusa nyepe. Embena sakame kumungi renge doko lasaka pirinyi dokopa namwa kyawa minyinyale.
PSA 80:4 Anatu Porai Wakasa doko embame yuu akipare embena wambunya ateŋa doko soo imbumi kumuo kararese?
PSA 80:5 Embame kondange renge doko nenge ingyuo nalapa lao jilini. Ee ipwange kenda doko penge kapo dokona sero simbwapala ipwa ingyuo nalapa letene.
PSA 80:6 Namwana parali maki dupwame namwana yuu doko yanda pyuo nyinya lao panda maiyuo kaelene. Yanda pimwai dupwame namwa kando pii mora nyuo giyalya giyana pilyaminyi.
PSA 80:7 Anatu Porai Wakasa dokome namwa range sukusa nyepe. Embame sakame kumungi renge doko lasaka pirinyi dokopa namwa kyawa minyinyale.
PSA 80:8 Wamba dokopa embame isa girapo mende yuu Isipi dokona nyepala minyuo epepya. Dopa pipala rara wakale dupwa pyao ralinyi karapala dokopa isa doko nakamana yuu dokona wara pinyi palyipya.
PSA 80:9 Embame andara panda doko panda pyuo renge pinyi nembeepya. Baa pingi kamame koko pao andapala angi dokome yuu peparae minyarambu nyiya.
PSA 80:10 Isa girapo doko ando pangwapala isa imambu dokome yuu kyau doko pau lao sembeya. Wangya pangepe dokome mee isa ama londe dupwa rau lanyi pyambuya.
PSA 80:11 Wangya pangepe pyao panguyamo dokome nanesa pao ipwa kota pete andake Metitaraniane lenge doko kando nyuo dee ipwa Yuporisa lenge nanesa epeya dokona kando nyuo pao suu lao piya.
PSA 80:12 Akipamo embame kame pirukarenge doko lalyinyi retelepe? Wambu peparae kata papirami dupwame kandapala isa girapo jingi waa lyuo nyerami ingilyamo.
PSA 80:13 Isa girapo doko mena rae lengeme kalyuo pyarakwaminyi dokopa wii saape mee dokome naopelyaminyi.
PSA 80:14 Anatu Porai Wakasa doko embame namwa kame soo kaeya napipi. Yake dorena karo kandanyi malyo kandapala namwa embena wambu dupwa pyuo nyepe.
PSA 80:15 Namwa embame isa girapo ingyuo wara piinyi palyipya dupwa nyisala ipu. Namwa isa girapo ene nyaŋa dopale doko embame minyuo ando porainyi pyambui.
PSA 80:16 Namwana yanda pimwai dupwame pyakepo isarena yangeyami kande dokopa embame imbu singi manjo kandapala nakama randa maiyuo kokwa sinyi nembape.
PSA 80:17 Namwa emba rangeme embena wambu lao rombo palyuo nyiinyi dokome range nyiso kando kyawa minyuo karape. Embame namwa ando porai inginyi pyambui kande.
PSA 80:18 Namwa emba deeko yaki nyuo neta paa narama. Namwa lete karalapa lao pirinyipa namwame embena kingi lakando kararama.
PSA 80:19 Kamongo Anatu Porai Wakasa dokome namwa range sukusa nyepe. Embena sakame kumungi renge doko lasaka pirinyi dokopa namwa kyawa minyinyale.
PSA 84:1 Anatu Porai Wakasa doko embena tembole anda doko namba mona nyilyu.
PSA 84:2 Mona nyepala namba dokona karapuli lao suu pyale pyale karo. Nambana yongo mona dolapona piso renge kuiyuo Anatu lete karenge dokona lao raemaiyuo wee romope lao karo.
PSA 84:3 Kamongo emba Porai Wakasa nambana kiŋi dee nambana Anatu. Yaka mambiname dupwame nakamana yakanedupwa embena mena pyao kiso jingi kana pyare lenge dokona repeta anda pyuo retapala rapu pyuo petenge.
PSA 84:4 Wambu embena tembole anda palyuo karo piso pingi dupwame embapa rae maipala yuu peparae kenane pyao lakandenge.
PSA 84:5 Wambu dupwa emba keta porai renge nyepala yuukyau Sayone dokona panya rae wakasa maiyuo karaminyi.
PSA 84:6 Yuu pau lama lama ketange pyasi kingi Baka lenge dokona yalo pelyaminyi dokopa ipwa guu lanyi pyakamenge. Apu epa nange mange dokopa wambo epapala pete kuki malu simusae pingi.
PSA 84:7 Nakama pao dokopa ando poraiyuo penge. Nakama mee bange anatuŋu letaminyi dupwa nyuo isa palyuo Anatu mupwa doko yuu Sayone dokona kandarami.
PSA 84:8 Kamongo Anatu Porai Wakasa dokome nambana ateŋa pii doko soo karape. Jekopena Anatu embame sepe.
PSA 84:9 Anatu embame namwana kiŋi rombo palyakaene doko elyape keta pisakape.
PSA 84:10 Yuu gii mendakiembena tembole anda pao pisiru doko angingyuo papala yuu gii taosande nembo yuu wakalena mee kata papyuo kararo dusipa mee ingyuo pelyamo. Yulu koo pinginya anda dupwana kara nao nambana Anatunya anda kambu konandawamedokona karapuli yaka lao suu pilyu.
PSA 84:11 Kamongo doko baa namwana konambe ingyuo karo kiŋi neta renge ingyuo karenge. Baame namwa elyape keta piso anjiki pyuo namwa nyuo ketae pyambuo karenge. Baame wambu lapo rolae pyuo karenge dupwa bange keyange mainya kata rokwakami nange.
PSA 84:12 Anatu Porai Wakasa doko, wambu lapome emba kapa ingingi laosuu pilyaminyi dupwa rae maiyuo kararami ingilyamo.
PSA 87:1 Yuu kyau poo pyasi dokona Kamongome banya yuu taone andake wasiya.
PSA 87:2 Isaraele dokona yuu wakale wakale singi dupwa nyuo isa palyuo Anatumi Jerusaleme doko mona wakasaretenge.
PSA 87:3 Wambu Anatunya taone andake dokona palaminyi dupwa Anatumi yulu keyange pipa pipa pyakalyamo doko selapape.
PSA 87:4 Nambapa kamba laa naminyi yuu dupwa yaka laronopa Isipi Bapilonepa opetae yaka laro ingilyamo. Pilisitia Taiya dee Itiopia wambu dusipa Jerusaleme dopakaleko ingilyamo laro.
PSA 87:5 Jerusaleme doko wambu rara wakale wakale peparaena ingilyamo lao Anatu Porai Wakasa dokome Jerusaleme doko porainyi pyambwara, larami.
PSA 87:6 Kamongo baame wambu rara peparaena yaka lao kingi pepa pyao nakama peparae yuu Jerusaleme rangeŋe lao retara.
PSA 87:7 Wambu peparae pyakalyuo pyao dopa laokyaponga pilyaminyi. Yuu Jerusaleme dokona renge keyange dupwa peparae sipurenge lao pilyaminyi.
PSA 89:1 Kamongo embena mona reto puu penge dokona kenane pyao karalu karo embame yaki nyii nange lao polo lamairu.
PSA 89:2 Embena mona retenge renge palu palyuo palira. Dee embena yaki nyii nange renge yakena mendeko ingyuo pingi pyao sulu sera doko namba silyu.
PSA 89:3 Akali nambana rombo palyisi pipa lao kana minyilyu. Nambana kendemande akali Dapitipa
PSA 89:4 para pyao nyere dupwa kiŋiko ingyuo parami. Embena para pyao nyere wambu keta kiŋinya isingi yulu doko boneŋe sinya lao nyakaro lee kande.
PSA 89:5 Yake pandana aŋala dupwame keyange pilini dupwana kenane pilyaminyi. Kamongo, embena mondo lao pingi dokona lao pilyaminyi.
PSA 89:6 Yakena karenge dupwa Kamongo emba yale daa. Aŋala dupwa embapamanda manji nara.
PSA 89:7 Yake pandana aŋala mupwa dupwa wato lenge dokopa emba ketae nembo lenge. Peparaeme emba mupwa lao suu pyaopako karenge.
PSA 89:8 Kamongo Anatu Porai Wakasa emba yale mende daa. Yulu peparaena Kamongo emba isa paa nange.
PSA 89:9 Ipwa kotaporai doko minyuo iso karenge. Kasakole minyuo naro ipupwa lao epenge doko meme pingi.
PSA 89:10 Koo renge mena poraingi Oreapa lenge doko emba yuu mendaki kalyuo pyao kumasii. Embena porainya renge dokona embena yandapimwai dupwa nyuo anamasi minyii.
PSA 89:11 Yake doko embena ingyuo silyamo. Dee yuu doko opetaeko. Embame yuupi yuu muu dupwana bange wakale wakale singi dupwape wasii.
PSA 89:12 Yuu parali dolapo wasiinyi silyamo. Yuu Tapo Emonepa kyau dolapome embena lao rae maiyuo kenane pyakange.
PSA 89:13 Anemapwae. Emba ama porai renge wakasa palenge. Embena porai renge doko bange mendepa manda manjipa nalyamo.
PSA 89:14 Embena isingi yulu doko rolae pingi rengepe kote rolae lenge rengepe dolapona ingyuo renge kuiyaro karapyamo silyamo. Embena mona reto pingipi mondo lao pingipi dolapo yulu pipi dokona panelyamo.
PSA 89:15 Emba mona joo misi kenane pyao kingi wapambupi lakandenge wambu nakama rae maiyuo paramilyamo. Nakama embena anjiki pingi renge eŋa pasi dokona moko ware pyuo karenge.
PSA 89:16 Emba karenge dokona lao nakama rae maiyuo pao yuu kwuanyi serenge. Dopa pyuo embame keyange pingi dupwana lakandenge.
PSA 89:17 Emba keta renge kuiyuo namwa anamasi minyingi renge jingi. Embena mona retenge dokona moko karo anamasi minyingi.
PSA 89:18 Kamongo embame namwa kyawa minyara doko rombo palyiipya. Emba doko Isaraele wambunya Anatu Poo Pyasi dokome namwa kiŋi doko jiipya.
PSA 89:19 Yuu wamba embena kendemande akali yulu mondomondo lao pingi dupwa keta pii repa repa pyuo lao, Nambame ami yanda pyuo mupwa ingiyamo doko kiŋinya kyawa rarange maiyuo namba wambu kareyaminyi dokona rombo palyiyu doko kiŋinya petenge isa doko maiyu.
PSA 89:20 Nambame nambana kendemande akali Dapiti baa mamba poo pyasi dokome kiso kiŋi ingyuo karena lao piyu.
PSA 89:21 Nambana porai renge dokome baapa yuu peparae role pyao karara. Nambana porai dokome baa porai sinyi pyambwara.
PSA 89:22 Banya yanda pimwai dupwame baa randa mainya pyuo lisa pirami. Koo pingi dupwame baa kapa pyuo anamasi minya narami.
PSA 89:23 Banya yanda pimwai dupwa kalyuo inji ranji pinyi nembapala baapa epe kanda nalyaminyi dupwa pyao kumakaro.
PSA 89:24 Nambame baa mona wakasa reto baa keta renge renge soo kararo. Nambamebanya yanda pimwai anamasi minyingi inginyi pyambwaro.
PSA 89:25 Nambamebanya isingi yulu doko ipwa kota andake Metitaraniane pete lenge dokona piso renge kuiyapala pao ipwa Yuporisa dorena ando nyimbunya lao piru.
PSA 89:26 Dokopa baame namba kando, Emba nambana rakange dee nambana Anatuŋu, lara. Emba nambana kyawa minyingi dee nambana lete wai pyao nyingi akali karene, lara.
PSA 89:27 Nambame baa wane mupwasa ingyaro. Kiŋi doloma peparae manda manji nao ketaele karena lao piru.
PSA 89:28 Nambame baapa pii lalu lao leyo lao suu pyao kararo. Deelao kana minyiyambano doko sulu soo sera.
PSA 89:29 Baa keta piso kiŋi para pyao paraminyi dokona mendeko kiŋi ingyapa pira. Banya isingi yulu doko yake doko pingi pyaro karamo dopako ingyuo puu para.
PSA 89:30 Dopa pyuo paramopape banya para pyao nyeramo dupwame nambana mawa pii minya nao kamba lapala nambana yulu katape singi dokona paa napala
PSA 89:31 mata joo karapala nambana mana pii laronuli pyuo moko minyuo paa narami ramo
PSA 89:32 doko nakamana koo dupwana lao randadokome peponame ingyuo pyaro. Nambame nakamana kyai pirami dupwana randadokome isareme ingyuo kisaro.
PSA 89:33 Dopa pirunupape nambame Dapitipamona retenge kata doko rokwa napala baapa pii mende lalu lao leyo dokonaisa nemba naroko.
PSA 89:34 Nambame baapa kana minyuo lalu lao leyono doko yala naowape dee pii lalu lao leyono dupwana mendepe nyuo alowa pyuowape pii naro.
PSA 89:35 Nambana kingi poo pyasi dokona lao yuu gii mendakisa leyo doko yuu peparaena ingyuo pena lao lalu lao leyonosa piya. Doko Dapitipa kyambo ingyuo pena lao pii naro.
PSA 89:36 Yuu peparae banya para pyao pyaramo dupwa rembe naa naramopa banya kiŋi yulu doko nambana lenge kambu dokona neta rao karamo dopale ingyuo soo puu para.
PSA 89:37 Dopako pyuo kana doko yake dokona rao karalu karengeŋe lao panenge doko suu pyao banya isingi yulu doko pano sera.
PSA 89:38 Dakepa kiŋi emba range rombo palyii dokona lao emba baa mata maipala yaki nyuo imbwualene.
PSA 89:39 Embena kendemande akali kiŋi dokopa kana minyuo pii lalu lao leene doko mee inginyi nembee. Embame kiŋinya kyawa rarange doko yuunya kupinyi yaki nyipisa mee yuu parapala kwaelyamo.
PSA 89:40 Embame banya taone dokona kame porai doko pyao lalyanyi nembee. Dopa pipala banya anda porai dupwa pyao kokwa sii.
PSA 89:41 Wambu baa repetale kata pumi dupwame banya bange dupwa waa nyuo kaelyaminyi. Banya parali maki dupwame peparae baako kando giyalya giyana pilyaminyi.
PSA 89:42 Embame banya yanda pimwaimi baa pyao anamena lao kae. Nakamana monarename rae mainyipyambwakamii.
PSA 89:43 Embame banya yanda kakupi dupwa nyuo nenge kara nange ingyanyi pyambwapinyisa yanda angi dokona baa anamasi minyilyaminyi.
PSA 89:44 Embame baa kiŋi ingyuo kara nanale lao nyuo isa palyapisa banya isingi yulu doko otelyamo.
PSA 89:45 Embame baa banya yuu gii oto emapa napyamopa kanya kapwa pyuo minyuo pyaminyisa baa elyako nyilyamo.
PSA 89:46 O Kamongo, emba yuu peparae yalu pyuo karalu kararese? Yuu akipare embena imbu singi doko isare ingyuo rao kararamo kararese?
PSA 89:47 Kamongo embame akali dupwa yuu malu kararaminde daa lamo doko suu pyao karape. Embame namwa wasiinyipape namwa kumungi dokona ingyuo pelyamo laosuu pyaowako karape.
PSA 89:48 Api mendeme kuma nao mee karalu kararase? Apa pyuo malu anda paa naro lao range porayapala karalu kararamisi?
PSA 89:49 Kamongo embame baa mona retalu reto reteene doko anja peyape? Embena lalu lao lenge pii Dapitipa leyambinyi dupwa anja silyase?
PSA 89:50 Kamongo namba embena kendemande kandale doko kame soo kaeya napipi. Dopande pyuo kilya kando lalyaminyi lao sowako karape. Namba wambu Anatu suu pyaa nange dupwa peparaeme kaeya nao elya kendape dupwa jiminyi silyamo.
PSA 89:51 Kamongo, embena yanda pimwai dupwame embena rombo palyisi kiŋi doko kilya kando anja mendasa para dupwa mee lao nembowakopelyaminyi.
PSA 89:52 Kamongona kingi doko lakando karalu karamanadoko.
PSA 90:1 Kamongo emba yuu peparae namwanaanda angingyuo karenge.
PSA 90:2 Yuu kyau dupwa wasapa nao karowape dee yuu muu peparae ingyalana karowape Anatu emba letena renge palyuo Anatu ingyuo karalu karengepya. Dokoko Anatu ingyuo karo puu parepya.
PSA 90:3 Emba akali dupwa siyamo nyiinyi mare dokona range pao sinya leepya. Embame dee range alowa pyuo yuu inginyi pyambuipya.
PSA 90:4 Ee kana taosande dupwa embame kandelene dokopa mee yuu gii mendaki ingingipya. Kwuaka yuu gii pupya kandapi dopale ingingipya. Yuu gii mee kukwamuu dopale ingingipya.
PSA 90:5 Embame akalinya karenge gii doko pyarapanyi nembengepya. Kumulyaminyisa karenge gii dolapo mee kombeyame ingingipya. Nakama rambinya pipyae raiya doko mee yangama kondalamuli pyuo andarekara nao kumuo pengepya.
PSA 90:6 Nakama isa jinginya mendeke yangama dokopa rao pee lapala alemanji olo kope lao kumunginyili pyuo penge.
PSA 90:7 Embena imbu singi dokome namwa pyao kokwa sinyi nembapyamo karamano. Embena imbu singi wakasa nyipisa namwa pako karamano.
PSA 90:8 Embame namwana koo dupwa kapa kandanyi nembo karene. Namwana koo yalu pyuo pilyamano dupwa kapa kanda nare ingya nalyamo.
PSA 90:9 Namwa lete karenge renge doko embena imbu singi dokome andare kara nange. Namwa mee yuu kanda pele pele pipala pengelamo.
PSA 90:10 Ee kana akalisakao pao akalisa yanda ipingi iki dusipa angi karamano. Kararama ingilyamo dee namwa porai ingyuo kararamande ramo doko ee kana akalisa mange lama ingyuo kararama ingyara. Dopa pyuo kararamanopape dolapona angi mende ingya napala mona nembengepe dee randape dupwanako mapyaramo kararamalyamo. Dopa pipala andare kara nao otarama ingilyamo.
PSA 90:11 Emba dopa pyuo renge palyuo imbwualene lao angi apimi soo pakana palyuo silyase? Embena pakao imbwange renge minyuo epenge doko apimi pakame kumapala soo otengese?
PSA 90:12 Yuu gii langa andare see naralyamo lao mana langirinyipa mona palenge akali ingyuo soo manjo karamwali yaka.
PSA 90:13 Yuu gii akipare embena imbu singi doko mee serase? O Kamongo, embena kendemande dupwa kando sakao karape.
PSA 90:14 Yangama peparaena embena mona reto karalu karenge renge dokome pakapyakape. Dokopa kenane pyao raeme kumuo karalu kararama ingilyamo.
PSA 90:15 Namwana ee kana randa nyepala monarena londeta ingyuo kendao karalu kareyama kande dokona suu pyao rae maingi renge doko dopale manda manjo jepe.
PSA 90:16 Namwa embena kendemande dupwame embenayulu doko porainya renge kuiyuo pirinyipa kandenale. Namwana jingi parape dupwame embena neta rengena yulu porai doko kandenale lao piri.
PSA 90:17 Namwana Kamongo Anatu embena elyape renge doko namwa keta palena lapala pirama laramano dupwa peparaena kapa palyinyi pyambwakape.
PSA 91:1 Wambu mende Kamongome kyawa minyinya lao para ramo dee wambu mende Anatunya arapu porai renge palenge dokona panao mee karo pira ramo dokome Kamongo kando lamaiyuo,
PSA 91:2 Embame nambana kyawa lete nyingipi dee konambena mendeke ingyuo karene dokona nambana Anatuŋu namba emba keta pyamalyuo karo, lara.
PSA 91:3 Baame emba yulu koo kandapa nao yalu pyuo seramo dokona randa nyere dupwape dee anga renge koo wambu pyao kuma singi dupwanape emba kyawa minyuo karara.
PSA 91:4 Emba banya arapu dokona kolame yakane yambe pyalamuli pyuo lanyuo papira. Baame emba kyawa minyuo reto kararamo kapa karare. Baame banya reto yaki nyii nao pyuo karenge renge dokome pyuo emba kyawa minyara.
PSA 91:5 Emba kukwa dokopa randa jerami lao paka renge nyuowape dee korakama dokopa pyarami lao suu pyaowape
PSA 91:6 dee kukwa anga yakane koo kisaramopa koo renge dupwame yuu yangaramo dokopa emba pyao kumakara lyamo laope dusipana pako kara napipi.
PSA 91:7 Wambu dupwame emba kararene dusa wambu taosande malu pyao kuma soo eparaminyipape emba mee mondo lao karo epare ingyara.
PSA 91:8 Kopetame pingidupwa apa pyuo koo keta palyuo randa nyilyaminyi lao kando soo karare.
PSA 91:9 Embame Kamongo Ama Ketae doko embena konambe ingyaro karamo lao sepala wane nyaŋana mendeke ingyuo karapinyi pilyamo.
PSA 91:10 Dokona randa andake mendeme emba isa pyao palya nara. Koo keta palirili yulu randa dokona mende embena anda kambusa epa nara.
PSA 91:11 Emba parene kata dupwana Anatumi banya aŋala dupwa emba rapu pyakana lao jera.
PSA 91:12 Embena kimbu doko kaname isa pyaa nana lao nakamana kingi kapena emba ketae reto nyerami.
PSA 91:13 Embame mena laene wambu nenge dupwape dee kau wambu pingipi dupwa pyao rambetaku pyarene mee kimbumi nara ingilyamo.
PSA 91:14 Anatumi lao dokopa nambame namba mona retarami dupwa nyiso dee namba Kamongo doko karene lao soo karaminyi dupwa kyawa lete nyero, letamo.
PSA 91:15 Nambame nyisape lao kyakale laraminyi dokopa isingi pii yano doko pyakamiro. Nakamba randa nyepala pisiraminyi dokopa kaeya nao role pyao piso nenge rekya lao nyepala dokopa nakama lakando kingi ketae pyambuo piro.
PSA 91:16 Nambame nakama angi kyawa minyuo karo. Nakama lapo yano pyao mailyuŋu lao dokopa karo yaku nao kumunya laro ingilyamo.
PSA 93:1 Kamongo baa kiŋi. Banya kingi kamame nyilyingi dokomepe porainya renge dokomepe range komau ingyuo pee pipala karamo. Isa yuu dake reteyamuli pyuo porai wakasa ingyuo romo pii nao sulu soo singi.
PSA 93:2 O Kamongo, embena kiŋinya yulu doko yuu kanda soo wasiyamo dokopa piso pao porai ingyuo sulu singi. Yuu gii ene kanda sepa nayamo dokopa emba mee karalu karenge.
PSA 93:3 Kamongo, ipwa kota andake ama kyuwa dokona singi dokome ama kasakole minyuo pii lao gono gono lenge.
PSA 93:4 Ipwa kota ama kasakole minyuo gono gono lao porai ingyuo silyamopape Kamongobaa yake panda dokona mupwa karo ama porai wakasa ingyuo iso karenge.
PSA 93:5 Kamongo, embena lowa dupwa yuu peparae sulu singi. Embena tembole anda doko ama poo pyasi wakasa ingyuo karalu karara.
PSA 95:1 Nakama ipupwa. Kamongo lakandamana. Anatumi namwa kyawa minyuo karenge dokonasuu pyao rae maiyuo kenane pyamana.
PSA 95:2 Namwa banya lenge kambu silyamo dokona karo sangyu lao rae maiyuo kenane rae wakasa maiyuo pingi dupwame pyao baa lakandamana.
PSA 95:3 Kamongo baa doko Anatu porai ingyuo karamo. Dokona lao baa kiŋi mupwa isame bange wasisi anatuŋu lao dupwa nyuo isa palyuo karamo.
PSA 95:4 Kananda koko dorenapiso yuu kyau ama ketae dokona pao baame yuu muu dupwa peparae iso karamo.
PSA 95:5 Yuupi ipwa kotape baame wasiya dolapo range iso karamo.
PSA 95:6 Namwa wapambu pii pyaro piso Kamongo namwa wasiyamo dokolakandamana. Ipupwa.
PSA 95:7 Baa namwana Anatu. Namwa banya wambu mena sipisipi dopale baame nenge joo rapu pyuo karamo. Epapu dokonamwa peparae baame apa letamo lao semana.
PSA 95:8 Yuu muiyane dokona yuu kingi Meripa lengepe yuu Masa lengepe dolapona nakamana rakange kyawa dupwa mona kana pokapala Anatupa male male lao kamba lao kareyami kande dokonakopalyuo pii nalapape.
PSA 95:9 Nakamame nambana yulu piyunu doko kando karapalape namba alyungu mambu ingyuo minyuo kui leyami.
PSA 95:10 Ee kana akalisa kisima namba imbu singi nyakayami. Nambame endakalipi yuu peparae kopetame suu pyao karenge, leyo. Nambana nenge rambo lao piso karo pingi doko kamba lao mana nyii nalu nao nayami.
PSA 95:11 Namba imbu singi nyepala lalu lao lao, Nambamoo pipya koo sela epa narami, leyo.
PSA 96:1 Kamongo kando kenane enenge pyalapape. Yuu muu peparaena wambu dupwame Kamongona lao kenane pyalapape.
PSA 96:2 Kamongo kando kenane pyao banya kingi ketae pyambuo karalapape. Baame namwa kyawa lete nyiyamo waili pii keyange doko yuu peparae polo lamaiyuo karalapape.
PSA 96:3 Banya neta renge wakasa ingyuo karamo dokona lao wambu rara peparae dupwa polo lamaiyuo karalapape. Banya yulu porai wakasa wambu peparae keta piyamo dokona lao polo lamaiyuoko karalapape.
PSA 96:4 Kamongo andake wakasa doko kamame ketaele lakandapengele ingilyamo. Isa bange kingimi wasisi dupwa isa palyuo baa kamame ulipili ingyuo kingi minyalyuo ketae pyambwapenge ingilyamo.
PSA 96:5 Wambu yuu liti wakale dupwa kingimi wasisi bange dupwa anatuŋu lao lakandenge. Dee Kamongo dokome yake pandape bange peparae silyamo dupwa wasiya.
PSA 96:6 Banya neta renge yulupi kingi kamame nyilyingi dokope baa keta soo awali lenge. Banya porainya rengepe keyange rengepe banya tembole anda dokona soo simbwualyamo.
PSA 96:7 Isa wambu peparaeme Kamongo lakandalapa. Banya porainya rengepe neta renge yulupi dolapona lao suu pyao lakando karalapape.
PSA 96:8 Kamongona kingi keyange ketae palenge doko lakandalapa. Bange Anatu mee maingi mende minyuo banya tembole anda dokona epo karalapape.
PSA 96:9 Nakama mona yapasi dokome Kamongona lenge kambusa wapambu pii pyaro piso lakandalapape. Wambu peparaeme baa mupwa lao suu pyao walu lao pakao karalapape.
PSA 96:10 Kamongo doko kiŋiŋi lao wambu yuu muu ree lao peparae lamailapape. Isa yuu dake reteyamuli pyuo porai wakasa ingyuo romo pii nao sulu soo silyamo. Banya kote wambu pipa lara doko rolae ingyuo lara.
PSA 96:11 Yake yuupi dupwa rae maiyuo sinya. Ipwa kotape ipwa kotana bange ama rara wakale wakale silyamo dupwape poro paro lena.
PSA 96:12 Ee yuupi dupwana bange silyamo dupwape rae maiyuo sinya. Kamongo isa yuu dakena kiŋi ingyuo isala epara dokopa
PSA 96:13 imwa kuki dupwana isa karenge dupwame rae maiyuo karo pii poraiyuo larami. Baame isa wambu dupwa iso karo rolae dokona palyuo yapalya yapana pira.
PSA 100:1 Yuu muu peparaena wambu dupwame Kamongo kando kenane pyao karalapape.
PSA 100:2 Mona pyakalyuo pyao kenane lapo pyao rae maiyuo Kamongo lakando karalapape.
PSA 100:3 Kamongo doko Anatuŋu lao kame see nalapape. Baame namwa wasiya dokona namwa banya wambu ingilyamo. Namwa banya sipisipi dopale.
PSA 100:4 Tembole anda kambu dokona sangyu lao parami. Andakare kolando dokopa Anatunya kingi minyalyuo baa kando sangyu lao lakando pupwape.
PSA 100:5 Kamongo doko keyange. Baame namwa kulisa palyuo mona reto karalu karenge. Baame namwa yaki nyii nao namwa keta keyangeko pyuo puu penge.
PSA 103:1 Nambana imambu dokome Kamongo doko lakandarowale. Nambana yongope suu pingi imambupi peparaeme banya kingi poo pyasi doko lakandarowale.
PSA 103:2 Baa anjiki pingi doko kame soo kaeya nao nambana imambu dokome Kamongo baa lakandaro.
PSA 103:3 Baame nambana koo dupwa peparae nyuo anamasi minyuo baame nambana anga yakane peparae pyuo lete nyuo mee ingingi.
PSA 103:4 Baame nambamalu anda pasarene lao minyaro karenge. Baame sakame kumapala mona reto nyisingi.
PSA 103:5 Baame bange keyange renge dupwa namba keta palyuo simbwange. Dokona namba enenge ingyuo karo yaka kambe yongo nyuo kararo.
PSA 103:6 Kamongome mondo lao yapalyuo wambu koo keta palyuo isingi dupwana lao rolo nakama nyelana pyuo karenge dokoko maingi.
PSA 103:7 Baame yulu lao masiyamo dusipa Mosese keta paneya. Dopa pyuo Isaraele wambu dupwame banya yulu porai dupwa kandena lao piya.
PSA 103:8 Kamongo doko baame sakame kumuo mona reto pingi. Baa waiya lao imbwa nao mona reto puupenge. Renge doko baa keta palyuo pyoko pyoko lenge.
PSA 103:9 Baame lao nembo pyalana pyuo karalu karo pii nange. Baa imbu singi nyuo karalu kara nange.
PSA 103:10 Namwa randa nyeramali dokona baame randa jii nange. Namwana koo kyai pyuo pingi dupwana yano nyeramali dokona yano pyara nange.
PSA 103:11 Wambumi baa ketae pyambungi dupwa keta banya mona retenge renge doko isa yuu dakena piso yake sungange dopale ingyuo mona retenge.
PSA 103:12 Neta epenge dokona piso pao neta yalyingi doko londesa dopale baame namwana koo dupwa nyuo kame soo nyuo nembakange.
PSA 103:13 Rakangeme banya ikinyingi kando yako yako lao anjiki pinginyili pyuo Kamongome wambu baa ketae pyambungi dupwa pipya anjiki pingi.
PSA 103:14 Baamenamwa akimi wasisi karaminyi lao soo karamo. Namwa sinjimu dokome wasisikande lao soo karamo.
PSA 103:15 Akali doko banya lete karene doko isoko dopakale. Baa ando karo epaleta isa jingi apu epelyamo dokopa elyape ingyuo lyuo panyi pilyamo dokopa loo lao pingi dopale.
PSA 103:16 Enakana porambaiye dokona minyilyamo dokopa soo neta penge. Mendeme dee kamba silyamo kanda nange.
PSA 103:17 Dopa pyuo pelyamopape wambu baa kingi ketaepyambuo lakandaraminyi dupwa Kamongona mona retenge doko nakama keta sulu soo singi.
PSA 103:18 Banya kana minyuo lalu lao lenge doko minyaro karengepe dee banya mawa pii yaki nyii nao rape rape lao minyingipi dupwana para pyao nyerami dupwa keta banya keyange renge soo puu pao penge.
PSA 103:19 Kamongome baa yake panda dokona kiŋi ingyuo pisipala wambu peparae rapu pyuo karamo.
PSA 103:20 Nakama aŋala porai banya mawa pii rape rape lao piraminyi dupwape baa laramopii doko waa lao kale yukupala soo pisiraminyi dupwapeme Kamongo doko lakandarami.
PSA 103:21 Nakama yake dokona karenge banya kendemande dupwa baame pimili lao suu pyapyamo pilyaminyi dupwame Kamongo doko lakandarami.
PSA 103:22 Yuu baame isilyamo dupwa peparaena kata papingi bange peparae Kamongo wasiyamo dupwame baa lakandarami. Dopako pyuo namba Kamongodoko lakandarowale.
PSA 104:1 Nambana imambu dokome Kamongo lakandape. O Kamongo, nambana Anatu, emba kamame mupwa wakasa. Kingi ketae pao kingi neta renge ingyuo karo pingi dopale emba ketako paleta karenge.
PSA 104:2 Emba kendali dokome komauna mendeke ingyuo pee piro karenge. Yake doko komau anda ingyuo kawake lapala karene. Ipwa ketae dorena embena anda pisi karenge kandale. Kopa dupwa mena ose ipyuo penge uliuli ingyaro karo porambaiye dokome papake ingyaro karena lao piso pengepya.
PSA 104:4 Porambaiye doko embena pii minyuo papingi ingyuo yuu pele dupwa embena kendemande ingyuo pingipya.
PSA 104:5 Embame yuu dake puu rombo minyuo susa piinyi dokopa walu walu laa naraŋa lao poraiyuo pyuokonda piinyi piro karamo.
PSA 104:6 Embame ipwa kota kameya dokome komau londe dopale inginyi pyambwapala yuu kyau dupwa yambe pyaoreteepya.
PSA 104:7 Embame ipwa poraiyuo pyalana pyuo leene dokopa waiya lao kata nyingipya. Embame pii dopa pinya lao pii ketae palyuo leene dokopa nakama aopa pengepya.
PSA 104:8 Yuu kyau dupwana lupyuo epo lama dorenaparaŋa lao panda retakaminyi dokona pengepya.
PSA 104:9 Embame ipwa doko banya kata liti pyuo pona dokona pena lee dokome dee yalo epo yuu dupwa yambe pyaa nangepya.
PSA 104:10 Embame yuu pau lama lama dupwana ipwa guu lanyi pyakamao dee ipwa pona dupwa yuu kyau kuki dupwana piso lupyuo pena leepya.
PSA 104:11 Wii saape rae lenge dupwame nao mena donge rae lenge dupwa ipwa nano pira dokopa narami lao pyakamii.
PSA 104:12 Ipwa repeta isa dupwana yaka dupwa nakambana anda pipala pii lao lyuo karenge.
PSA 104:13 Embame yake panda piso yuu kyau dupwana apunda peeyo isa yuu dake elya pyuo kalya pinyi nembelene.
PSA 104:14 Embame mena bulamakao dupwa isako doko narami lao andanyi pyambwakamingi. Nenge dupwa wambu dupwana rangeme wara pyuo narami lao pyakamingi.
PSA 104:15 Rae maiyuo kararami lao ipwa waene maiyuo gii mona paliramo karena lao olipi ipwange maiyuo lopa nao kararami lao borete maiyuo pingipya.
PSA 104:16 Kamongo rangena isa sita yuu Lepanone dokona wara piyamo dupwame apunda malu mandenge.
PSA 104:17 Yaka dupwame isa dupwana epo nakamana anda pingi. Luu isa yale dupwana yaka kameya mende soko lenge nakamana anda pingi.
PSA 104:18 Mena meme rae lenge dupwa yuu kyau manda dupwana palenge. Mena kuki saa yale dupwa yuu kana lapu lapu rondo dupwana yalu pyuo palenge.
PSA 104:19 Embame kana dokome ee kana minyinya lao wasiipya. Neta anda paramo doko soo otenge.
PSA 104:20 Embame yuu kwuange gii reteenesa kwualyamo dokopa mena suwa rae lenge dupwa neta kata nyuo epo pengepya.
PSA 104:21 Mena laene ene anda anda dupwa nuli nao nenge Anatumi mailyamo dupwana pao dokopa pii porakai lao papingipya.
PSA 104:22 Neta pyakaelyamo dokopa nakamana anda palenge dupwana kapu kyuo pao palyuo singipya.
PSA 104:23 Dokopa enakana wambu dupwa nakamana yulu pela penge. Pao pyuo karo alemanji ingingi.
PSA 104:24 Kamongo, embame bange malu mee soo kaeyo wasiipya. Apa pyuo mona palyakondali pipala wasiipi? lao suu pyao karo. Isa yuu dake embame wasiinyi dupwameko simbwaro silyamo.
PSA 104:25 Kota pete ruŋupaŋu pyuo andake waso reteenesa oo bangepe lee renge kuki epengepe dupwa mendeme yaka lao sukusa parami ingya nalyamo.
PSA 104:26 Sipu duwpa ketae papyuo karenge dupwana koko kau oma reeko mende Lipaitene lengedoko ipwa kota dokona male lao sinya lao wasii.
PSA 104:27 Nakama nenge yano pilyamo dokopa embame jingi kandale jere lao masingi.
PSA 104:28 Embame nenge rapa rapa pyuo mailini dokopa nakama nyuo nao sikya pingi.
PSA 104:29 Embame nakama yaki nyilini dokopa pakame kumuo karenge. Ŋee ŋaape singi nyokonyapinyi dokopa nakama kumulyaminyi. Kumapala yuu epeyami dokona dee range pao singi.
PSA 104:30 Dopa pipinyipape embame porambaiye maipinyi dokopa lee rao karaminyi. Embame isa yuu dake letena renge enenge maingi.
PSA 104:31 Kamongona neta renge yulu doko sulu sinya. Kamongo banya bange wasiyamo dupwana lao rae maiyuo karenale.
PSA 104:32 Baame isa yuu dake kandapyamo dokopainju ingyuo pyuku pyuku lala lala pelyamo. Yuu kyau dupwa minyandapyamo dokopa isare kyau lao nyilyilyamo.
PSA 104:33 Namba Kamongo dokona lao kenane pyao karalu kararo. Namba kararo yuu gii dusipana nambana Anatulakando kenane pyaro.
PSA 104:34 Nambana rae maingi renge doko baa keta epenge dokona nambame kenane pyaro dokome baa epe sinyale.
PSA 104:35 Wambu yulu koo pingi dupwa isa yuu dakena koo keta palyuo penale. Yulu koo pingi wambu dupwa dee pii nanale. Nambana imambu dokome Kamongodoko lakandape. Banya kingi doko minyalyuo lakando palena.
PSA 105:1 Kamongo baapa ange lao dokopa baa andake wakasale ingyuo karo yulu pipyamo dupwa kamame yamarangunyi nembo ingyuo silyamo lao yuu muu dupwana dopa pyuo karamoŋo sinya lao lamaimana.
PSA 105:2 Kenane dokome pyao dokopa yulu keyange pipyamo dupwana lamaiyuo baa lakandamanale.
PSA 105:3 Namwa banya ingyuo karamano dokona lao rae maimanale. Dopa pyuo wambu baa kingipi wapambupi lakao baa kingi letaminyi dupwa rae maiyuo penale.
PSA 105:4 Kamongo karamo dokona nyisinya lao pupwape. Papala banya kingi lakando karalu karalapape.
PSA 105:5 Nakama banya kendemande Aporakamena para pyao nyisi dupwa karaminyi. Nakama Jekope Anatumi rombo palyiyamo dokona para pyao nyiyamo dupwakaraminyiko. Dokona Anatunya yulu keyange pyuo wambumi pii nange yulu piyamopape kote rolae leyamopape dupwana doko mende kande lao suu pyao karalapape.
PSA 105:7 Kamongo doko namwana Anatuŋu. Banya mawa pii dupwa wambu yuu muu ree lao palaminyi dupwa peparaena ingyuo silyamo.
PSA 105:8 Banya pii lao kana minyalamo doko leyoŋo lao suupyao karara ingingi. Rengya para pyao puu paramo dupwanape banya lalu lao lenge pii doko ama kame see nao suu pyaro karalu karara.
PSA 105:9 Aporakamepa keta piruŋu lao kana minyuo leyamo doko kame see nao suu pyaro karara. Aisake keta lalu lao leyamo dokona dopako pira.
PSA 105:10 Dopako pyuo Kamongome Jekope keta piruŋu lao kana minyiyamo pii doko kulisa ingyo sulu sera.
PSA 105:11 Baame lao, Nambame yuu Kenanedoko nyuo jeroŋo. Jeroŋo dokopa nakama rangena ingyuo yuu nyuo palyuo kararami, leya.
PSA 105:12 Anatunya wambu kukilama yuu Kenane dokona mee upunili ingyuo peyami.
PSA 105:13 Pao dokopa yuu pandape wambu palenge dupwa nyinyi peyo dee yuu kiŋi wakalemana isingi dupwa nyuo yalo peyami.
PSA 105:14 Dopa pyuo peyaminyipape nakama Anatumi koo keta mapya naya. Anatu baame kiŋi dupwa repe repe lamaiyuo, Nambana yapalyuo nyisi kendemande dupwa meeelya pyuo karakana. Nambana poropeta akali dupwa minyandaka nalapape, leya. Dopa lao banya wambu dupwa kyawa minyuo kareya.
PSA 105:16 Anatumi lopo andake mende Isaraele wambu dupwa kiso maipala nenge dupwalembeke nyinyi nembeya.
PSA 105:17 Dopa piyamopape baame akali mende kingi Josepe lengende maipala kana ropo pyao nyiyami dokome wambo panda rapa rapa pyakamyuo karara lao piyasa piya.
PSA 105:18 Banya kimbu dokona puu saneme poraiyuo kiimbuo banya mange dokona puu sane dokome puu karo piyami.
PSA 105:19 Piyaminyipa dopa piraŋa lao pyasi paleyamo doko angi pyaka siya. Dopa piraŋa lao leyamo Kamongona pii doko kinyi angi rolae ingyuo peya.
PSA 105:20 Dokona Isipi kiŋi dokomebaa moko nembeya. Yuu dupwana isingi dokome baa kiiramo nyiya.
PSA 105:21 Baame banya gapomane yulu mupwape dee yuu litipi dokona mupwa ingyuo iso karenale lao panda maiya.
PSA 105:22 Maipala baame kiŋinya akali kyawa dupwa pawa palyuo iso karena lao panda maiya. Kiŋinya dopa piri dapa piri lao nyiso lenge akali dupwa baame lamainya lao panda maiya.
PSA 105:23 Dokopa Jekope yuu Isipi dokona pao palyuo kareya.
PSA 105:24 Kamongome banya wambu dupwa wane wai kiso nakama yanda pimwai dupwa pipya porai ingyuo karena lao piya.
PSA 105:25 Kamongome Isipi akali dupwame banya kendemande wambu dupwa pipya epe kanda napala panga silya sana pyuo karena lao piya.
PSA 105:26 Dopa pipala banya kendemande akali Mosese Eronepa baame rombo palyuo nyiyamo dolapo pena leya.
PSA 105:27 Nakamame Anatunya yulu ama andake doko pyuo mirakale yulu dupwa yuu Isipi dokona pyuo kareyambi.
PSA 105:28 Anatu baame yuu doko iminjanyi peyamopape Isipi wambu dupwame doko mende pyaamo lao leyamo dokona palyuo pii nayami.
PSA 105:29 Baame ipwa dupwa ranjama wai pyapala nakamana oma dupwa pyao kumasinyi nembeya.
PSA 105:30 Nakamana yuu liti doko mungimi simbwapala kiŋinya anda opetaeko simbuya.
PSA 105:31 Anatumi wambena dee oto epo simbunya leyamo doko suu pyao yuu liti dokona epo kete piya.
PSA 105:32 Nakamana yuu dokona apunda epenge kandale doko suu pyao yuu pele pipala randake kapa isa malyiya.
PSA 105:33 Baame nakamana isa girapope piki isape peparae kokwa sinyi nembeya. Isa dupwa peparae pyao roo pyalya pyana pinyi nembeya.
PSA 105:34 Baamegoemba mendeme kapa pyuo yaka larami ingya nara dopale dupwa epena lao nyinyi peeya.
PSA 105:35 Dopa piyasa ee nenge isokope dupwa neyamisa saa raki piso pupya ingiya.
PSA 105:36 Baame Isipi wambunya ree palu peparaena wane mupwasa dupwa mende neta paa nana lao pyao kumasiya.
PSA 105:37 Dopa pipala piso Isaraele wambu dupwa neta nyuo nembeya. Nembeyamodokopa nakamame kana kulingi golope nyuo manjo peyami. Nakama mendali anga nyuope pii nao porai ingyuo kareyami.
PSA 105:38 Isipi wambumi Isaraelewambu dupwa kando pakame kumuyaminyi dokona nakama kala peyaminyi dokoparae maiyami.
PSA 105:39 Banya wambu keta kopa soo lanyuo pao dee kukwa dokopa isare rao yanga paupau lao lanyuo peya.
PSA 105:40 Nakamame jinya lao kee leyami dokopa baame yaka kuki dupwa peyakamiya. Baame yake panda rae nenge dupwa nao sikya pinya lao maiya.
PSA 105:41 Baame kana dokona nyuo karalyapala ipwa guu lanyi peyakamiyasa yuu yando nasi dokona ipwapona wasinyuo epo peya.
PSA 105:42 Baame banya kendemande akali Aporakameketa pii yalu pyuo lalu lao leyamo doko suu pyao kareya.
PSA 105:43 Karo baame banya rombo palyisi wambu dupwa nyuo neta nembeya. Nembeyamo dokopa rae maingi kenane dupwa pii ketae palyuo lao pyao peyami.
PSA 105:44 Baame yuu wakalemana dupwa nyuo maiya. Maipala ee nengepe dokonasiyamo dupwa rombo pyao nyinya leya.
PSA 105:45 Renge doko banya wambu dupwame banya lowa dupwana kamba laa nao karo mawa pii lasi dupwa minyakao karo pirami lao piya.
PSA 107:1 Kamongo baa elyapeko doko karapyamopa banya mona retenge doko kulisa ingyuo silyamo dokona baa ange lao karamana.
PSA 107:2 Pii wamba ange lamwa dusipwako nyepala baa lakando dee larami ingilyamo. Nakama baame kyawa lete nyiyamo wambu dee yanda pimwai nenge rekya lao nyiyamo wambupi dupwame baa keyange ingyuo banya monaretenge kulisa ingyuo pelyamo lao lakandapa pyuo kararami.
PSA 107:3 Nakama dono yuu muu wakalemana neta pyakaenge neta yalyingi donorena dulurenape piso nyuo epeya.
PSA 107:4 Nakama lapo yuu muiyane kata see nangedokona paeyo karo yuu taonena palyuo kararama lao panya kata koto saka nayamipya.
PSA 107:5 Dopa pyuo karo nakama lopome kumuo ipwa nano pipala suu pyao kareyami dupwa mende pii naraŋa kae lapala yaki nyuo kaeyamipya.
PSA 107:6 Dopa pyuo karapala nakama rangena randa nyiyaminyi dokona Kamongome nyisinya lao kyakale leyamisa nyisiyapya.
PSA 107:7 Baame nakama taone palyuo kararami kata rolae dokona nyuo nembeyapya.
PSA 107:8 Nakamame Kamongo banya mona reto puu penge dokona baa ange lao dokopa yulu keyange nakama keta pyakamyuo karamo dupwana baa ange lapenge ingilyamo.
PSA 107:9 Baame ipwa nano pilyamo karelyaminyi dupwa sikya pinyi pyambuo dee lopange dupwa keyange dupwame iki pyasu makaro sinya lenge.
PSA 107:10 Lapo dupwa iminjingi dokona eŋa paa nayamo sanepuumi kiimbwasi randa nyuo kareyami.
PSA 107:11 Anatu Porai Wakasa dokonalowa kamba lenge ingyuo dopa pinya dapa pinya lao mana lalamo kata doko yaki nyuo karapala randa nyiyami.
PSA 107:12 Nakama yulu marakai pipala yongo kisinyi nembeyami. Nakamame isa peyaminyi dokopa mendeme nyisa naya.
PSA 107:13 Dopa pyuo karapala nakama rangena randa nyiyaminyi dokona Kamongome nyisinya lao kyakale leyamisa nyisiyapya.
PSA 107:14 Baame iminjo eŋa paa nayamo kareyaminyi dokona piso nyuo epeya. Baame puu sane dupwa pyao rokao sinjimu inginyi nembo nyuo epeya.
PSA 107:15 Nakamame Kamongo banya mona reto puu penge dokona baa ange lao dokopa yulu keyange nakama keta pyakamyuo karamo dupwana baa ange lapenge ingilyamo.
PSA 107:16 Baame kambu kana poraimi dowa wasisi dupwa pyao lalyapala aene isa dupwa pyao muu pinyi retenge.
PSA 107:17 Wambu lapo kopyali ingyuo nakamana koo piyaminyi dokona anga pyao dee randa epeyamo doko yasuko neyami.
PSA 107:18 Nakama nenge dupwa ipyapala naa napala repeta kumuo panya piyami.
PSA 107:19 Nakamana randa epeyamo dokona mona randapala Kamongo lamaiyuo nyisinya leyamisa nyisiya.
PSA 107:20 Banya dopa pyuo pinya lao lamaingi pii dokome pyuo nyepala malu anda palenge dokona pyuo nyiya.
PSA 107:21 Nakamame Kamongo banya mona reto puu penge dokona baaange lao dokopa yulu keyange nakama keta pyakamyuo karamo dupwana baa ange lapenge ingilyamo.
PSA 107:22 Nyisiyamo dupwana peparae suu pyao banya kingi lakandelyamano lao dokopa sangyu lao mena pyao kiso maiyuo dee kenane rae maiyuo pingi dupwa pyao kararami.
PSA 107:23 Wambu lapo ipwa sipu yulu pingi dupwa kota pete dokonako yulu pyuo yole nyuo nao paleyami.
PSA 107:24 Dupwame Kamongome dopa pyuo yulu andake doko piyande silyamo lao banya kingi mona doko ipwa kotana paleyamo kandeyami.
PSA 107:25 Baame dopa pinya leyamosa porambaiye andake doko pyaka soo minyapala ipwa kota doko minyuo kasakole minyinyi reteya.
PSA 107:26 Ipwa sipu dupwa kota petena ketae sepala paleta isa peyamosa kumulyamano lapala mee kikurenge kareyami.
PSA 107:27 Nakama ipwa biya napala pili lao lukumao sepala nakamana yulu mora petenge renge doko mee inginyi nembeyami.
PSA 107:28 Nakama rangena randa nyiyaminyi dokona Kamongome nyisinya lao kyakaleleyamisa nyisiyapya.
PSA 107:29 Baame ipwa kotana raiya pambake doko lambo lao serao dee pete kasakole minyuo pyakalya pyakana pingi doko pyai naopiya.
PSA 107:30 Ipwa kota lambo lao siyamo dokopa rae maiyami. Nakama epana suu pilyaminyi kipwa kipwa dokona lanyuo epo peeya.
PSA 107:31 Nakamame Kamongo banya mona reto puu penge dokona baa ange lao dokopa yulu keyange nakama keta pyakamyuo karamo dupwana baa ange lapenge ingilyamo.
PSA 107:32 Anatunya wambu malu palyuo larami panda dokona baa kamame wakasa ingilyamo dokona lao lamairami. Dopa pyuo dee lita akali wato lenge dupwa pisarami dokona lenge kambu sera dokona karo lakandarami.
PSA 107:33 Kamongome ipwa pona dupwa sokwao kee maro lao dee guu lenge dupwa pyakalyuo epa nana lao piya.
PSA 107:34 Baame wambu koo pingi dupwa yuu dokona paleyaminyisa kandapala yuu amenge pingi dupwa nyuo kwaeyo mee ketange pyanyi nembeya.
PSA 107:35 Baame yuu muiyane dupwa nyuo ipwa pete sinyi pyambuo dee oo lasi dupwa nyuo ipwa guu lanyi peeyo piya.
PSA 107:36 Baamelopange wambu dupwa yuu dokona yuu nyuo palyuo taone andake palyuo kararami doko pyuo wasinya lao piya.
PSA 107:37 Nakamame waingi dupwa randa laoisa girapo dupwa wara pyuo piyaminyi dokopa angi ando jingi dupwa kakanapiyamo lyuo nyiyami.
PSA 107:38 Baame banya wambu dupwa elyape keta pisiyasa wane wai kisiya. Dee nakamana mena bulamakao dupwa wai kiso andakyuo piya.
PSA 107:39 Wambu Anatunya wambu pyao isa palyuo kilya kandele lao isa nenge kara nange dokome suu leyamisa yasu nao karenge dokopa
PSA 107:40 Anatu baame nyisu petenge wambu dupwa epe kanda napala yuu muiyane kata see nange dokona ralinyi palyiyasa mee ralo papyuo kareyami.
PSA 107:41 Baame pendewa mona kondo petenge dupwa kiiramo nyepala ree paludoko mena ingyuo wai kisinya lao andanyi nembeya.
PSA 107:42 Dokopa rolaepingi dupwame doko kandapala rae mailyaminyipa koo pingi dupwa muu rakaro singi.
PSA 107:43 Wambu mona palenge dupwame dake doko mende lyamolao suu pyao karena. Dopa pyuo Kamongona kare kare soo mona retenge dokona suu pyapala mona kumuo maiyuo karena.
PSA 110:1 Kamongo dokome nambana kamongo doko lamaiyuo, Nambana kingi rolaerename pisa ipu. Embena yanda pimwai ingyuo dupwa nambame nyuo embena kimbu yukuna dokona rambukinyinyi pyambwakaro.
PSA 110:2 Yuu Sayone dokona piso Kamongome embena kiŋinya yulu doko nyuo andakyanyi pyambwakaro. Dopa pipala embena yanda pimwai dupwa iso karalase lao piru, letamo.
PSA 110:3 Embame embena yanda pimwai pipya yanda pirinyi dokopa embena wambu dupwame yanda pinya mona kumapala epo yanda pimana larami. Yangama yangama pipyae raeya malu singi dopale ingyuo embena wanyane akali dupwa emba karare dokona eparami.
PSA 110:4 Kamongome lao, Purisi akali Melekiseteke pyuo kareyamodoko suu pyao emba purisi dopale mee karalu karare. Baame mee epeepe lao yakane ingyuo leyande daa. Pii lalu lao lao reteya, leya.
PSA 110:5 Kamongo baa embena kingi rolaerename karo baa imbu piramo dokopakiŋi dupwa nyuo isa palyapa pira.
PSA 110:6 Baame yuu muu dupwana nyuo kyai rolae lao kote lapala yanda pingi yuu dokona wambu malu mee pyao kumasera. Baame kiŋi yuu muu peparaena karaminyi dupwapyao nyuo isa palyara.
PSA 110:7 Kiŋi dokome kata repeta ipwaepenge dokona kamuo nara. Dopa pyuo paramopa baa porakai wakasa pyapetalende ingyuo karara.
PSA 115:1 Emba yeelyo Kamongo. Embena kingi doko iki lakandarama. Namwana kingi doko isa palena. Emba mondo lao pyuo karo mona retalu reto retapinyi dokona lakandarama.
PSA 115:2 Akipamo wambu yuu muu dupwana peparaeme piso soo, Embena Anatu doko anja karase? letaminyi.
PSA 115:3 Namwana Anatu doko yake panda karamo. Baame pinya suu pilyamuli pyuo pingi.
PSA 115:4 Nakamana anatu dupwa kana kulingipi golope dokome wasisi. Nakamame wambunya kingi dokome yeelyo pyuo wasiyami.
PSA 115:5 Kingimi wasisi dupwa nenge kata singi dokome pii kapa laa nange. Lenge rao karenge dokome kapa pyuo kanda nange.
PSA 115:6 Nakama kale kata singi dokome pii angi see nange. Gyaa kata singi dokome kapa ai see nange.
PSA 115:7 Nakama kingi karenge dokome kapa minyanda nange. Moko karenge dokome kapa kata papya nange. Nakama kula kalu lao jaa laowape pii nange.
PSA 115:8 Wambu mee bange dupwa wasiyaminyi dupwape dee wambu bange dupwa keta mona pyamalyuo karenge dupwa nakama pao mee isa kanape dopale ingyuo pena.
PSA 115:9 Isaraele wambu dupwa Kamongo doko kapa ingingi lao suu pyalapape. Baame nakama nyiso kyawa minyuo karamo.
PSA 115:10 Nakama Anatunya purisi akali dupwa Kamongo doko kapa ingingi lao suu pyalapape. Baame nakama nyiso kyawa minyuo karamo.
PSA 115:11 Baa mupwa lao kingi wapambu lakao karenge wambu dupwame Kamongo doko kapa ingingi lao suu pyalapape. Baame nakama nyiso kyawa minyuo karamo.
PSA 115:12 Kamongome namwa suu pyao karamo dokome baame namwaelyape keta pisara. Baame Isaraele wambu dupwa elyape keta pisara. Dee Anatunya purisi akali peparae elyape keta pisarako.
PSA 115:13 Wambupeparae koo epengepe baa ketae pyambungi dupwa baame kapa elyape keta pisara.
PSA 115:14 Kamongome nakama keta wane wanakepe jinyale. Nakamape dee nakamana wane wanakepe dee dupwana para pyao nyeraminyi dupwa ketajinyaleko.
PSA 115:15 Yake pandape isa yuupi pyuo wasiyamo Kamongo dokome nakama renge keyange jinyale.
PSA 115:16 Yake panda doko Kamongonaiki silyamo. Sipyamopape Kamongome isa yuu doko mee akali dupwa keta maiya.
PSA 115:17 Wambu kumaraminyi dupwame Kamongo baa lakanda narami. Wambu lapo kumungi panda pao palyuo otaraminyi dupwame lakanda naramiko.
PSA 115:18 Dokona namwa wambu epapu lete petamano dupwame Anatu baa kando sangyu lao dakepape rengyape lao karalu karo kararama. Kamongona kingi doko lakando palena.
PSA 116:1 Nambana pii sipyamo dokona Kamongo doko mona maiyuo karo. Baame nambana ateŋa lao karapu dupwa silyamo.
PSA 116:2 Yuu mendepape kaeya nao baa kyakale lapunu yaka lao nambana pii soo karamo.
PSA 116:3 Kumunginya puu dokome namba nyuo boke bake pyuo kiimbwanyi palyiya. Kumunginya paka renge dokome repeta epo kaeya. Rengya dopa pyuo parondelyamo lao suu pyao paka dokome kumuo kareyo.
PSA 116:4 Dopa pyuo karapala nambame Kamongo doko kyakale lao poraiyuo piso sokondali pyuo lao, Nyisape, leyo.
PSA 116:5 Kamongo baa keyange renge palenge dokome sakame kumungi. Namwana Anatu dokome namwa mondo lao suu pyao karenge.
PSA 116:6 Kamongo baame rangeme kapa nyisarami ingya nange dupwa minyalyingi. Namba koo keta palyuo mona rumbingi kareyo dokopa baame nyisiya.
PSA 116:7 Kamongome namba kando keyange pilyamo dokona nambanamona doko baa keta yukulyuŋu yukwaro karape.
PSA 116:8 Kamongome namba kumaro dokona kyawa lete nyiya. Baame ee kwuakao namba pyao isa palyapa nana lao piya.
PSA 116:9 Dokona lao namba isa wambu palaminyi yuu dokona Kamongona lenge kambu sipyamo dorena role papyuo karo.
PSA 116:10 Namba kandale doko kwaeyo pao otalyano letono mange dupwanape dee paka renge nyepala api keta pyamalyuo kararo lao suu pingi dokopape baa keta mona yukwaro karalu karenge.
PSA 116:12 Kamongo baame nambapa lao yulu keyange pilyamo dokona aki mende banya pipakamiwane lao sepa nalyo.
PSA 116:13 Nambame ipwa waene doko minyuo epo Kamongome nyisiyamo dokona ange lao mairu ingilyamo.
PSA 116:14 Banya wambu epo wato larami dokona nambame baa mairu lao kaeyonuli pyuo mairu.
PSA 116:15 Kamongo banya wambu dokona mende kumungi dokopa baa mona rando karenge.
PSA 116:16 Kamongo namba embena kendemande kandapi. Nambame anyimi embena yulu pyakao kareyamo dopaleko ingyuo pyuo karo. Embame namba kumaro dokona lete wai pyao nyii kande.
PSA 116:17 Nambame ange lao emba bange pyao kiso joo dokopa nambana ateŋa pii doko opetae jero ingilyamo.
PSA 116:18 Jerusaleme tembole anda kambu dokonape embena wambu wato laraminyi dokonape nambame emba jinya lao kaenge kandale doko jero ingilyamo. Kamongona kingi doko lakando palena.
PSA 118:1 Kamongo baa elyapeko doko karapyamopa banya mona retenge doko kulisa ingyuo silyamo dokona baa kando ange lao karamana.
PSA 118:2 Isaraele wambu dupwa nakamame banya mona retenge doko kulisa sulu sera ingyuo silyamo lena.
PSA 118:3 Banya purisi akali dupwame dopako lena.
PSA 118:4 Wambu baa kingi wapambupi lakao lakandelyaminyi dupwa opetaeme banya mona retenge doko kulisa sulu sera ingyuo silyamo lena.
PSA 118:5 Namba randa nyuo karo Kamongo kyakale leyo yuu gii dokopa baame isingi yano pyakao namba kiiramo nyiya.
PSA 118:6 Kamongo doko namba role pyao karamo dokona wambumi namba mende pirami dokona pakame kumuo kara naro.
PSA 118:7 Nambana yanda pimwai dupwa anamasi minyuoisa palirami dokopa nambana Kamongome namba nyisapyasa pilyamo lao kandaro.
PSA 118:8 Kamongo keta mona pyamalyaro kararamo doko suu pyao wambu keta mona pyamalyaro kararamo doko kapa ingya nara.
PSA 118:9 Lita akali dupwa keta pyamalyaro kararenepape Anatu keta dopa piri doko wakasa ingilyamo.
PSA 118:10 Yanda pimwai soo kaeyo dupwame nambamoo pipya karo awali laminyipape Kamongona porai dokome mee ote pinyi nembeyo.
PSA 118:11 Nakamame kata paro dupwa peparaena roko iminyipape Kamongona porai renge dokome pyao anamasi minyiyu.
PSA 118:12 Nakamame namba nyuo sukusa pyambwapala amburalimi pili laminyipa Anatunya porai renge dokome nambame nakamba nepereke palunya isare pele letosa otenge.
PSA 118:13 Namba kuinya palyimisa yasu nalyano lao mona rumbingi karapunupape Kamongo baame namba nyisingi.
PSA 118:14 Kamongo baa namba ama porai kana lopalopa inginyi pyambungi. Doko baame namba pyuo nyilyasa pingi.
PSA 118:15 Anatunya wambunya komau anda dupwana yanda pyuo rakae sepala wii aupilao kenane pyao karaminyiŋi selapa. Kamongona porainya rengedokome doko pipyasa pilyamo.
PSA 118:16 Namba banya porai renge dokome pyao anamasi minyakalyamo. Banya porai renge dokome yanda angi pyao penge.
PSA 118:17 Namba kuma naro. Kumungi kandale doko suu pyao lete karapala Kamongome apa pyakalyamo dupwa polo lamairu.
PSA 118:18 Baame namba poraiyuo yasuko nalasi lao randa jipyamopape kumunginya palyuo jii nange.
PSA 118:19 Nakamame tembole andana kame kambu doko nambana laolumbwa-kalapape. Dokopa Kamongo baapa ange lala parole.
PSA 118:20 Kamongona kame kambu doko dakena silyamoŋo dokona rolae pingi dupwa iki kolando eparami.
PSA 118:21 Nambame Kamongo embenakingi doko lakandelyo. Renge doko embame yanda dupwana pyuo rakae salaselao jingi.
PSA 118:22 Doko akali anda pyuo kareyami dupwame kana mende nyuo nembeyami. Kana doko enakana anda donge dokona mupwa ingyuo epo siya.
PSA 118:23 Yulu doko mee akalimi pii nayami. Kamongo dokome piya. Piyamo doko namwa mona nembo kandelyamano.
PSA 118:24 Yuu gii dake elyape Kamongome yandana pyao rakae selapa lao jipyasa pilyamo dokona raekomaiyuo yuu andape kalya pyuo karamanale.
PSA 118:25 Kamongo embame pyuo nyii. Embame namwa pyuo nyepala mondo lao pyuokondanyi nembo karalapa lao jere.
PSA 118:26 Kamongona kingi lao epelyamo doko Anatumi elyape keta penale. Kamongona tembole anda dokona piso emba elyape keta pisale letamano.
PSA 118:27 Kamongo doko Anatu ingyuo karamo baame namwa pipya yulu elyape pipya. Nakamana kingi raka isa yoko lakao minyarami dokome kanda soo yuu andape kalya pyuo kana pyare dokona kenane pyao awali lao pyuo kararami.
PSA 118:28 Emba nambana Anatu karene dokona kando ange leto. Nambame embena yulu wakasa ingyuo penge dupwana lao lamairu ingilyamo.
PSA 118:29 Kamongo baa keyange ingyuo karo banya mona retenge doko kulisa ingyuo pelyamo dokona ange lao karalapape.
PSA 119:97 Nambame embena mawa pii dupwa mona nyepala yuu peparae kaeya nao suu pyao karo.
PSA 119:98 Embena mawa pii doko yuu peparae namba keta silyamo dokona dokome nambana yanda pimwai pipya namba nyuo mona palenge inginyi pyambulyamo.
PSA 119:99 Nambame embena dopa pinya dapa pinya lao mana lenge dupwa poraiyuo suu pyao minyapu dokona mana lenge dupwa pipya mee mende ulipili ingyuo soo karo.
PSA 119:100 Nambame embena mawa pii doko kamba laa nao karapala dokome akali andapae karaminyi dupwana nambana soo nyingi renge doko andake ingyuo palipyamo karo.
PSA 119:101 Emba suu pingi doo minyalana suu pyapala Satanena kata dupwa wasinyi nembo karo.
PSA 119:102 Emba rangeme namba mana langilini dokome embena mawa pii dupwa soo nemba nalyo.
PSA 119:103 Embena pii doko nakanju sipunupa amburali ipwangena rende dupwa nyuo isa palyuo silyamo.
PSA 119:104 Nambame embena lowana soo nyingi renge soo nyipundeme kata koo dupwa epe kanda nalyo.
PSA 119:105 Embena pii doko lambeme pinginyili pyuo namba kata lasaka pingi. Dopa pyuo namba pelyono dokona kendali ingyuo namba rao lanyuo penge.
PSA 119:106 Nambame embena mana pii rolae doko rape rape lao minyuo yaki nyii naroŋo lao pii lalu lao lenge ingyuo andakena palyuo lao retapunu pilyamo.
PSA 119:107 Namba kopeta kapeta randa nyilyu dokona Kamongo embame namba lete nyero lao lao kaene dokona palyuo pipi.
PSA 119:108 Nambana sangyu lao leto pii doko Kamongo embame soo nyepala embena mawa pii dokona mana langipi.
PSA 119:109 Randa ipyamo dokona mee mona kumapala pyuo karo. Embame lowadoko kame see nao pyuo karo.
PSA 119:110 Akali koo dupwame nambapa randa jinya puu anga retaminyipape nambame embena mawa pii doko kamba laa nalyo.
PSA 119:111 Embena mawa pii dupwa namba rangena ingyuo minyuo karalu kararo. Mawa pii dupwa nambana monarena raeme kumunginya renge doko ingyuo silyamo.
PSA 119:112 Nambame embena mawa pii kuki dupwa rape rape lao minyuo paronopa kumarono dokopa otaraŋa lao suu pilyu.
PSA 119:129 Embena mana pii dupwa kamame wakasa. Nambana monarename pii dupwa kamba laa nao karo.
PSA 119:130 Embena mana lenge doko pano eŋa papala yakara pingi wambu dupwa soo nyingi renge maipinyipa soo karaminyi.
PSA 119:131 Nambaembena mawa pii doko ipwa ingyuo nano pipyasa suwa ingyuo make make lyepala nanumi kumulyu.
PSA 119:132 Embena mona retenge dupwa kando pingi dokosuu pyao namba lenge kambu joo sakame kumuo karape.
PSA 119:133 Satanena kata dupwame namba nyuo anamasi minyuo isa nembena lao baa panda mai naro lalu lao leenyili pyuo mai napipi.
PSA 119:134 Wambu namba keta randa jerami dokona kiiramo nyepe. Nyerenepa embena mawa pii dupwana rape rape lao piruwale.
PSA 119:135 Embame namba eŋa nembapala embena lowa dupwa mana langipi.
PSA 119:136 Wambu dupwame embena mawa pii doko minya namisa nambana ee doko ipwa ingyuo guu lao karapyamo karo.
PSA 119:137 Kamongo emba rolaena renge dokona embena lowa doko rolaeyako ingyuo silyamo.
PSA 119:138 Embena mawa pii kuki ingyuo lapo leene dupwa rolae dokona palyuo kapako ingyuo pelyamo.
PSA 119:139 Nambana nyisu petenge dupwameemba lapinyi doko sili see nale lamisa imbu singi wakasa nyilyu.
PSA 119:140 Namba embena lalu lao leene doko angi piraŋa doko soo kaepala mona nyuo karo.
PSA 119:141 Namba embapa manda daa dokona nakamame namba kando ipyarami ingilya kande. Dopa pipyamopape embena mana piikuki ingyuo retenge dupwa yaki nyii nalyo.
PSA 119:142 Embena rolaena renge dupwa mee kulisa pao sulu seramopa embena lowa dupwa yuu mendepape kyambo ingya nara.
PSA 119:143 Namba keta randa renge simbuo sipyamosa mona randame kumulyu. Dopa pipunupape embena mawa pii dokome namba rae mainyi pyambulyamo.
PSA 119:144 Embena mana langingi yulu dupwa katalunji nembo silyamo. Namba singinya renge jerenepa kararole lao pisilyu.
PSA 121:1 Nambame yuu kyau ketae dorena kandalyo kandelyo. Nambana nyisingi doko anjapiso eparase?
PSA 121:2 Kamongo yake yuupi wasiyamo doko keta nambana nyisingi epara.
PSA 121:3 Baame emba isa pupili lao suu pyaa napala kyawa minyuo kararamo doko lenge rakaro karenge.
PSA 121:4 Isaraele wambunya kyawa minyingi dokome luu pali nao isingi.
PSA 121:5 Kamongo baame emba kararene dorena karapala emba kyawa minyaro karara.
PSA 121:6 Korakama dokopa emba neta randa nao kukwa kana raramodokopa dopako pyuo pinya lao pira.
PSA 121:7 Kamongo baame randa dupwana emba kingi raka lanyi nembo kyawa minyara.
PSA 121:8 Kamongo baame emba yulu pyuo minyuo papyuo kararene dupwana kyawa minyuo karalu karara.
PSA 122:1 Nakamame namba langyuo, Kamongona anda dokona mwua leyaminyi dokopa namba rae maiyu.
PSA 122:2 Doko epapu namwa dae angi Jerusaleme kame kambu andakarerena epo karamano.
PSA 122:3 Jerusaleme taone andake doko elya pyuo pinjingi lyolope yalu pyuo kapa kapa piyaminyi au piro karamo.
PSA 122:4 Dopa pyuo piyaminyidokome lowana letamo dokona palyuo Isaraele rara dupwame Kamongo kando ange lala epenge.
PSA 122:5 Dake Isaraele wambunya kiŋi dupwame wambunya kote pii soo peteyami.
PSA 122:6 Jerusaleme doko mona kyuu lao seramopa petena lao ateŋa lakamipwape. Wambu Jerusaleme mona nyilyaminyi dupwa yuunya amenge doko nao sikya piramo petenale.
PSA 122:7 Kana kame andakare dorena mondo lao mona seramo soo kiŋinya palenge anda dupwa moŋo see nanale.
PSA 122:8 Nambana ree palupi puu minyingipi dupwana reke lao Jerusaleme dokona mona kyuu lao seramo pisipwape, leto.
PSA 122:9 Kamongo baa dae palyuo karamo dokona lao nakamana ee yuupi ipinya lao ateŋa lakalyo.
PSA 124:1 Kamongo baa namwa role pyao kara napyali apa pipyali? Isaraele wambu dupwame isingi lalapape.
PSA 124:2 Namwana yanda pimwai dupwame namwa pyalana piyaminyi dokopa Anatu namwa pipya role pyao kara nayali doko nakamame namwa lenge rao kareyamanopa nakamana imbu singi dokome namwa lee rapeta nao goe leyamili.
PSA 124:4 Dokopaapunda epo ipwa kama piyamo dokome namwa soo pao ipwa dokome namwa yambepyao piyali.
PSA 124:5 Ipwa endangi palyuo uu lao epapala namwa nyuo yalupiyasa kumuyamali.
PSA 124:6 Namwana yanda pimwai dupwa keta pinya lao suu laa nalyamo dokona Kamongo baa lakandamanale.
PSA 124:7 Nuli nenge akalinya yaka kone makanyi palyingi dokona yaka baa kuinya palipa nao wanjingi dopale ingyuo karamano. Kone makami doko petapyasa namwa kiiramo pasi karamano.
PSA 124:8 Namwa nyisara doko Kamongo yake yuupi wasiya doko keta epenge.
PSA 126:1 Kamongome yuu Sayone dokona namwa lanyuo epeyamo dokopa mee kombeyame ingyalya ingyana piya.
PSA 126:2 Namwana giyuo giyuo piyamanopape dee kenane pyao rae rae maiyamanopape dokona yuu muu menge dupwana sepala namwana lakao Kamongo dokome yulu andake doko pyakamilyamo, leyami.
PSA 126:3 Ama kinyi kinyi baame yulu andake doko pyakayasa namwa ama raeme kumuyama.
PSA 126:4 Kamongo embame namwaipwa sokwasi doko apundame range epengenyili pyamuli pyuo namwa rangena yuunya dee lanyuo ipupi.
PSA 126:5 Dokona lao ee pipya karo ee waingi warapiyami dupwa manjo nao karo dokopa rae mainyale.
PSA 126:6 Wambu ee waingi manjo pao karo dokopa ee pipya manjo peyami dupwa angi naomanjo laeyo epo dokopa rae maiyuo kenane pyao eparami.
PSA 127:1 Kamongome anda doko pii naramo anda pingi akalimi iki sisu lao pirami ramo doko nakamana yulu doko mee ingyuo para. Kamongome taone doko kando iso kara nara ramo dokopa akali taone iso kararami dupwa mee ingyuo para.
PSA 127:2 Kamongo baame mona retenge wambu dupwa kamenge luu palenge dokopa nakama yano pilyamo dupwa maingi. Dokona suu pyao namwa kukwako sipurao yulu andake pyuo kukwako pao palyuo pyuo kararama doko meekopirama ingilyamo.
PSA 127:3 Wane wanakepe mandenge doko Kamongome mee jilyasa pingi nakama namwa elyape keta piso jipyasa pilyamo.
PSA 127:4 Akali mende wanyane ingyuo karo wane mandenge dupwa yanda singingya kingi dokona yanda kakupi minyaro karenge dopale ingyuo karaminyi.
PSA 127:5 Ikinyingi malu yanda kakupi dopale ingyuo mandamo dokome yanda pimwai dupwa kote lenge dokona nyuo anamasi minyarami ingya nalyamo dokona raemaiyuo karara.
PSA 130:1 Namba randa sepala kata mende see napyasa panya saka napala Kamongo emba kee leto.
PSA 130:2 Namba ee lao karo doko Kamongo embame sakape. Nyisapili lao kyakale leto doko kaleyukupala sepe.
PSA 130:3 Embame namwana koo dupwa peparae bukunya pyao reteeli apimi kumungi renge doko wanjiyalisi?
PSA 130:4 Doko daa ingilyamo dokona embame nyuo kame sakarenepa namwa embame lasarene lao suu suu pyao karamanale.
PSA 130:5 Namba Kamongome banya pii dokona letamodoko kinyi lao sepala nyisaramo dokona wangu lakapala isaro karo.
PSA 130:6 Yuu isingi akalimi yuu yangena lao isaro karelyaminyipape nambame Kamongo doko epena lao isaro karapu doko mee mende andarele ingilyamo.
PSA 130:7 Nakama Isaraele wambu dupwame Kamongome nakama mona reto karalu karapala baa yuu peparae nyisalana rae maipala nyiso karamo dokona nakama Kamongo Anatu baa keta pyamalyuo karalapape.
PSA 130:8 Baame banya Isaraele wambu dupwa nakamana koo dupwana nenge rekya lao nyera.
PSA 132:1 Kamongo embame Dapiti baa randa nyuo soo pyuo kareya kande doko kame see napipi.
PSA 132:2 Baame embapa lao kana minyuo Isaraele wambunya Anatu Porai dokome pii porai leyamo doko suu pyao karape.
PSA 132:3 Namba anda paowape luu palenge panda paowape
PSA 132:4 imambu soo luu palyuo soope pii naro.
PSA 132:5 Dopa pyuo pao Kamongo karara yuu dokope dee anda Isaraele wambunya Anatu Porai doko palira anda doko maipala dokopa luu palyuo nenge nao kame sero.
PSA 132:6 Yuu Beteleme dokona Kana Minyuo Lalu Lao Lenge Pii Palenge Bokote doko silyamo dokona leyaminyi siyama. Dee yuu Jirimi dokona siyamo dokona kando nyiyama.
PSA 132:7 Namwame lao dokopa Kamongona anda dokona mwua leyama. Banya petenge isa silyamodorena kingi wapambupi lakao kyaponga pyao misi lama leyama.
PSA 132:8 O Kamongo, embena Kana Minyuo Lalu Lao Lenge Pii Palenge Bokote dokona embena porainya renge kongwalu ingyuo palamo doko tembole anda dokona minyuo epo karalu karape.
PSA 132:9 Embena purisi akali dupwa rolae doko anjuku lao pyuo karenale. Embena wambu dupwa raeko maiyuo pii porakai lenale.
PSA 132:10 Embena kendemande akali Dapitipa pii lalu lao lee kande. Embena rombo palyisi kiŋi doko mata maiyuo kaeya napipi.
PSA 132:11 Embame Dapiti kando pii lalu lao lee doko dee range nyii nare ingyara. Pii Dapiti kando leene dupwa nambame embena ikinyingi mende kiŋi wasaronopa emba karenge alo dokona nakama iso karara, lee.
PSA 132:12 Embena ikinyingi dupwame nambana lalu lao lenge pii doko minyuo karo dee nambana mawa pii maingi dupwa kamba laa narami ramo nakamana ikinyingi dupwa opetayako emba pinginyili pyuo yuu peparae kiŋi ingyuo kararami, lee.
PSA 132:13 Kamongome yuu Sayone doko rombo palyuo nyepala banya anda dokona pinya letamo.
PSA 132:14 Yuu dakena namba palyuo karalu kararo. Yuu dake nambame iso karalana suu pilyu.
PSA 132:15 Nambame yuu Sayone dokona bange yangipyamo karaminyi dokona malu mee mairu. Nambame nenge pendewa pupyamo karaminyi dokona mairunupa kapa nao sikya piramo kararami.
PSA 132:16 Nambame nakamana purisi dupwa mondo lanyipyambuo piru. Banya wambu dupwame rae maiyuo kenane pyao pii ketae palyuo lao kararami.
PSA 132:17 Nambame Dapitinya para pyasi mende dae kiŋi wakasa ingyuo karena lao wasaro. Wasapala nambana kiŋi rombo palyisi doko dae rapu pyuo karalu karena lao piru.
PSA 132:18 Nambame banya yanda pimwai dupwa elya dokome kako pyaramopa karena laro. Laronopape banya kiŋi yulu doko ando paramopa mupwa ingyuo karara.
PSA 137:1 Yuu Bapilone ipwa pona dupwana piso yuu Sayone suu pyao ee lao peteyama.
PSA 137:2 Ee lao piso dokopa namwanagita dupwa walilyame pusinyai dopale ipwa repeta kareyamo dupwana mee yukunyi palyiyama.
PSA 137:3 Namwa karapusi pyao lanyuo epeyami dupwame kenane pyalapa, leyami. Nakama rae maimana lapala yuu Sayone dokona lao kenane pyalapa, leyami.
PSA 137:4 Yuu wakale dokona piso apa pyuo Kamongona lao kenane pyaramase?
PSA 137:5 Nambame Jerusaleme emba kame sookaeyo laro ramo gita dee kamba pyaa nalu nao narowale.
PSA 137:6 Nambame emba kando nyilini dokopa rae andake maingiŋi lao dee suu pyaa nao kame soo kaeyo laro ramo doko kenane pinginyili pyuo paa naoyaki nyuo kaeyaro.
PSA 137:7 Kamongo embame Jerusaleme wambu anjo nyuo peyami dokopa yuu Itome wambu dupwame koo piyami kande doko kame soo kaeya napala suu pyao karape. Suu pyao karo dokopa nakamame yuu andape lalyuo bolombalo nembena lao lapa pyuo kareyami kande.
PSA 137:8 Bapilone emba koo keta palyuo pare ingilyamo. Embame namwa piinyili pyuo isingi pyakao
PSA 137:9 embena wane dupwa nyepala pyao kana dupwana piso pyakaramo akali doko rae maiyuo karara.
PSA 139:1 Kamongo embame namba mondo lao kando soo kaeyapi kandapi.
PSA 139:2 Namba pilyu dupwa peparae embame silini. Emba kamame nanesa karapalape nambame suu pilyu dupwa soo gisiliniko.
PSA 139:3 Nambame yulu angi pilipi panda mee luu palu silini lao kando silini. Dee yulu peparae pipunu dupwa embame silini.
PSA 139:4 Kamame pii ene laroli dupwa dopa larelyamo lao soo oto karene.
PSA 139:5 Namba karapunu pisipunu palipunu dusipana embako karo kapa pilini. Embena porainya renge dokome namba kyawa minyuo karene.
PSA 139:6 Embame namba apiyakale lao soo gisapinyi doko nambame soo nyero ingya nalyamo.
PSA 139:7 Nambame embena imambu dokome silini doko yuu anda mende nee pilyandena papala kanda nalase lao parose? Emba anjalapona kara napindena dokona pao yalu pirusi?
PSA 139:8 Yake panda pulyuo paroramo dokopa emba dokona karareko ingilyamo. Dee kumuo yuu koko paliru ramo dokopa emba dokona karareko ingilyamo.
PSA 139:9 Namba neta pyakaenge dorena ingyuo yalu pyuo paronopape dee neta yalyingi dorena nanesale ingyuo paronopape
PSA 139:10 embame dokonako karo namba nyiso lanyuo papiri ingilyamo.
PSA 139:11 Nambame iminjingi dokome namba karo dokona nyuo yalu pinya laope dee yangenge doko namba karo dokona iminjinya laope larolapuli kapa lapuli.
PSA 139:12 Dopa lapuliko doŋo iminjingi doko emba keta iminja nao mee korakama ingyaro karamo. Iminjingi dokope yangenge dokope emba keta mende ingya nao mee yangenge dopaleko ingilyamo.
PSA 139:13 Nambana yanenge dokona mende embame wasa naende kara nalyamo Embame namba anyinya rombanda dokona kimbu sera sera pyuo inginyi retee.
PSA 139:14 Embena kingi lakandapenge dokoko nambame lakandelyo. Embame yulu peparae pilini dupwa wambumi kanda nange keyange wakasa dupwa pilini. Dupwa nambana mona dokona soo manjo karo.
PSA 139:15 Nambana anyinya rombanda dokona nee pyuo andeyonopa kuli dupwa kimbu sera sera piyamo dokopa embame dokona palene lao soo karee.
PSA 139:16 Namba manjapa nayamopa embame kando sii. Namba ene ando karo yuu gii kararole dupwa wambo embame sepala embena buku dokona pyao retee.
PSA 139:17 O Anatu, embena suu pingi dupwa nambame randa koo nao soo nyerolyamo. Embena suu pingi dupwa mee kuki pyuo ingya nalyamo.
PSA 139:18 Nambame yakalao kandaro ramo dokopa ipwa pota kee kana dupwa nyuo isa palyili laro kararami. Namba lenge rapala dokopa emba role pyao mee kararoko.
PSA 139:19 O Anatu, nambame yulu koo pingi dupwa pyapili lao suu pilyu. Reke reke karo randa jingi akali dupwame namba wakale karalase lao kaeyamili lao suu pilyu.
PSA 139:20 Embena lao pii koo letaminyi. Embena kingi doko randa joo mokwalipi letaminyi.
PSA 139:21 O Kamongo, emba epe kanda nami dupwa nakama nambame epe kanda nalyo. Dee emba kilya kandaminyi dupwa nakama nambame kilya kando karoko.
PSA 139:22 Nambame nakama imbumi kumuo nambana yanda pimwaiŋi lao soo karo.
PSA 139:23 Embamenamba makande pyuo kandapala dopa pyuo suu pilini lao kandape. Dopa pyuonambana suu pilyu doko kando koto nyepe.
PSA 139:24 Namba keta kyambona renge mende palape lao pyapi pyuo kandapala lete karalu kararo kata dokonalanyuo papipi.
PSA 145:1 Nambana Anatu emba kiŋi ingyuokarene doko embena yulu andake dupwa nambame lao panaro. Nambame embena kingi dokona ange lao karalu kararo.
PSA 145:2 Yuu peparae nambame ateŋa lao embapa sangyu lao kararo. Nambame embena kingi dokona lakando puu paro.
PSA 145:3 Kamongo doko wakasa ingyuo dokome kamame ulipili lakandapengele ingilyamo. Baa mupwa wakasa ingilyamo doko mendeme kapa soonyepa nara.
PSA 145:4 Embame piinyi dupwana wane manjo parami dupwame kaeya nao lao puu pao parami. Nakamame embena yulu keyange porai piinyi dupwana polo lamairami.
PSA 145:5 Akalimi embena neta renge yulu wakasa dokona lao polo lamairami. Dokopa nambame embena yulu keyange dokona suu pyaokondali pyuo kararo.
PSA 145:6 Akalimi embena yulu porai dupwana aromepyao laraminyipa nambame emba apa pyuo wakasa dokona polo laro ingilyamo.
PSA 145:7 Nakamame embena yulu elyape pingi dokona lamaiyuo dokopa emba anjiki pingi dokona lao kenane dupwa pyarami.
PSA 145:8 Kamongo doko baame mona reto sakame kumuo karenge. Waiya lao imbu singi nyii nao meemona reto puu penge.
PSA 145:9 Baame wambu lapo iki angi angi lao yulu keyange pii nange. Baame wasiyamo dupwa peparae kondome kumuo nyiso karenge.
PSA 145:10 Wasiinyi dupwa peparaeme Kamongo emba lakandarami. Dee embena wambu dupwame emba kando sangyu larami.
PSA 145:11 Embame embena kiŋi yulu neta renge dokona lao larami. Dee embena poraidokona lao laramiko.
PSA 145:12 Dopa pyuo lao dokopa embena yulu andake dokope embena isingi yulu neta renge keyange wakasa dokope soo nyeramisa pira.
PSA 145:13 Embena isingi yulu doko ota naramopa emba kiŋi ingyuo karo puu pare. Kamongo dokome yulu pira letamo dupwapipala kaenge. Banya yulu pilyamo dupwa peparae keyange ingingi.
PSA 145:14 Baame randa nyerami dupwa nyiso dee isa parami dupwa nyuo minyalyuo pira.
PSA 145:15 Wasiinyi lete karaminyi dupwame Kamongo emba iki kando karaminyi. Dee nenge yano pilyamo dokopa embame nenge maingi.
PSA 145:16 Embame kapa naraminyili pyuo maiyuo dee nakamana yano pilyamo karenge dupwa sikya pinyi pyambungi.
PSA 145:17 Kamongo baame yulu pilyamo dupwa rolae dokonako pingi. Baa wambunya lao sakame kumuo yulupyakamyuo karenge.
PSA 145:18 Wambu dupwame baa keta kulisa palyuo kee letaminyi dupwa peparae keta baa repeta karamo.
PSA 145:19 Wambu baa ketae pyambungi dupwana yano pilyamo karenge dupwa maingi. Baame nakamanaee laminyi doko soo nyepala pyuo nyisingi.
PSA 145:20 Mendeme baapa mona retaminyi dupwa peparae nyuo arapunya palyuo baapa koo pingi dupwa peparae kokwa sinyi nembo pira.
PSA 145:21 Nambame yuu peparae Kamongo doko lakandaro. Kimbu karenge kata papingi dupwa peparaeme banya kingi poo pyasi dokona lakando karalu karena.
PSA 148:1 Kamongo doko baa lakandamana. Yake panda range dupwame Kamongo yake ketaerena karamo doko baa lakandalapape.
PSA 148:2 Banya aŋala dupwamepe dee aŋala peparae pyaso karaminyi dupwamepe baa lakandalapape.
PSA 148:3 Neta kanapeme baa lakandalapape. Dee bui lepo pyuo rao karenge dupwame baa lakandena.
PSA 148:4 Yake kamame ketae dorenape dee ipwa yake dulurena ketaerena silyamo dokomepe baa lakandena.
PSA 148:5 Kamongome dopa pyuo pulyinya lao wasiyamo dupwa peparaeme Kamongona kingi dokona lakando karena.
PSA 148:6 Baame suu pyao wasapala rangena panda wakale wakale dokonako kararami lao maiyamo dokona kamba lao panda kareyamo dokona yaki nyii narami ingyaro karamo.
PSA 148:7 Isa yuu dakena range dupwame Kamongo lakandalapape. Ipwa kotana lenge renge bange andake silyamo dupwamepe kota pete kyuwa dupwamepe Kamongo baalakandalapape.
PSA 148:8 Yuu pelepe randake kapape ipwa ase dokope kopape porambaiye porai dupwamepe nakama pii laramuli pyuo pingi dupwame baa lakandalapape.
PSA 148:9 Yuu kyau kuki andakepe isa jingi nengelyingi isa dupwape imwa isape nakamame Kamongo lakandalapape.
PSA 148:10 Anda suwa menape suwa mena rae lengepe kimbu kara nange rombame kata papingi kaupi yakape nakamame Kamongo lakandalapape.
PSA 148:11 Kiŋipi mee wambupi kiŋinya ikinyingipi yuu isingi akali dupwamepe baa lakandalapape.
PSA 148:12 Mapwae parangepe dee andapae wane nyaŋape nakama opetae lakandalapape.
PSA 148:13 Nakama peparaeme Kamongona kingi doko lakandena. Banya kingi doko andake wakasa ingilyamo dokona menge dupwa pipya manda manja nalyamo. Banya neta renge yulu dokome yake yuupi andake ingyuo silyamo dolapo nyuo isa palyuo silyamo.
PSA 148:14 Baame banya Isaraele wambu mona wakasa retenge dupwame baa lakando kararami lao porainyi pyambuya. Kamongo baa lakandamanale.
PSA 150:1 Kamongona kingi lakando palena. Anatu banya tembole anda dokona piso baa lakandamana. Yake dorena banya porai renge palamo dokona lakandamana.
PSA 150:2 Banya yulu porai ingyuo piyamo dupwana lakando dokopa baa kamame andake wakasa dokona lao lakandamana.
PSA 150:3 Bikuli poo lao rambyalu lao gita pyao baa lakandamanale.
PSA 150:4 Baa laikuli pyao mali lyuo rambyalu kurulupi lao banya kingi lakandamanale.
PSA 150:5 Bange jaa lenge dupwame minyuo kele kalo lao baa lakandamana.
PSA 150:6 Yuu muu dupwana wasiyamo piso pelyaminyi dupwa peparaeme Kamongo lakandalapape. Kamongo baa lakandamana.
PRO 1:1 Dapitinya ikinyingi kiŋi Solomone Isaraele wambunya kiŋi dokona mana pii lasi palamo.
PRO 1:2 Palamo dupwa soo nyerami ramo dokopa pii wakale wakale laraminyi dupwana pii anjuku rolae lao soo dee pii anjuku keyange lao soo nyerami. Dopa pyuo soo dokopa renge angi koko palamo dupwa soo gisarami.
PRO 1:3 Mana pii lasi palamo dakena mana nyerami ramo dokome singinya renge palenge wambu ingyuo yulu katalunji nembo pyuo pii katalunji nembo lao pinya suu pyapala pirami.
PRO 1:4 Dokonako ingyuo sepa narami dupwame mana pii palamo dokona mana nyepala kendepuli ingyuo pirami. Dee wanyane akali dupwame mana nyepala dopa pipengelelyamo lao range koto nyuo pirami.
PRO 1:5 Dopa pyuo pii palamo dakena mana nyeraminyi dokome mona palenge soo nyingi akali dupwame kamame soo londaraminyipa mana nyisi wambu dupwa dee konda pyuo soo mana nyerami.
PRO 1:6 Dopa piramo dopaleko ingyuo mona palenge akalinya kongwalu dupwape mana pii lasi dokona renge angi palamo dupwape soo nyeramisa pira.
PRO 1:7 Wambo Kamongo baa andakeŋe lao suu pyapala dokopa nakama soo nyerami ingilyamo. Dee mona angi pali nange wambu dupwame mona palenge soo nyingi wambu dupwa meeŋe lao nyuo mambunya palyarami dokome mana nyii naramalyamo lao suu pyao karenge.
PRO 1:8 Rakane, embame rakane endakinyipame larambinyili pyuo soo pyuo karape.
PRO 1:9 Akali kalya pyuo eparamo doko kandapala au pyuo karengelamo lao suu pyarami. Doko suu pyao emba endakinyi rakanepana pii warombo soo karapala kapa palyuo karare dokopa auwo kandarami.
PRO 1:10 Rakane, yulu koo pingi akali dupwame emba koo pii lao makande piraminyi dokopa pii napipi.
PRO 1:11 Nakamame dopa lao langirami. Akali mende koto kando pyala monale. Wambu mee kamenge petaminyi dupwa male male lao pyao kumasemana.
PRO 1:12 Ene kandaparamano dokopa wambu petele larami doko kaepala pyarama dokopa kumasi pao serami ingilyamo.
PRO 1:13 Dopa pyuo pyapala nakamana pinji bange dupwa peparae namwana ingyuo nyuo retamanale.
PRO 1:14 Emba namwa ree jela ipu. Eparene dokopa pinji bange waa nyimwa dupwa mokwa soo nyerama lao langirami lyakande.
PRO 1:15 Rakane, emba dopa langirami ramo dokopa wambu dopalena pii sakami nao wakale nyokonyuo karape.
PRO 1:16 Yulu koo pinya kambu nakepanyi nembo pyaraminyi dokonako suu pyaro karaminyi.
PRO 1:17 Yaka lyinya lao kone makaramo doko kando pisiramo dokopa makara doko kapa ingya nara.
PRO 1:18 Yaka dokome kendepuli ingyuo wanjepala paramopape akali yango mende randa mainya anga pyuo karapala nakama range kame seraminyisa kone makarami dokome mangena minyarasa kumarami.
PRO 1:19 Doko suu pyao akali kendepo nenge nakama yale lapome nakama waa nenge dupwako pyao kumakarami lao letamo.
PRO 1:20 Kote lao karenge mare dokonape makete yuu dokonape yuu wambu epo malu palyuo karenge peparae dupwanape mona palenge singinya renge dokome wambu ingyuo kyakale lao karamo. Doko kale yukupala selapape.
PRO 1:22 Mona palenge singinya renge dokome wambu ingyuo pii dapa pyuo letamo. Mona pali nange wambu dupwa yuu gii akipare mona pali nange ingyuo karalana suu pilyamisi? Yuu gii akipare soo nyingi wambu dupwa kando meeŋe lao giyalya giyana pyuo nyuo mambunya palyuo kararamisi? Anjokorape mana nyelana pyuo kararamisi?
PRO 1:23 Kopetame pilyaminyi lao pyalana pyuo laro dokopa warombo selapape. Dokopa dopa pyuo role pipa lao nakama pii angi mana langiru.
PRO 1:24 Nambame nakama panda joo ipupwa lao kyakale lapunupape nakama kale yukupala see nalyaminyi. Doko mende lalyane lao wangu lakapala selana suu pyaa nalyaminyi.
PRO 1:25 Nambame nakama dopa pyuo pipingi lapunu doko sili see nale lao karaminyi. Nambame dopande piralyamo lao langyuo rolapuliŋi lao suu pyapunu doko nakamame langipili lao suu pyaa nalyaminyi.
PRO 1:26 Dokona lao nakama randa nyerami dokopa nambame giyalya giyana piru. Dopako pyuo nakama keta paka renge sukusa eparamo dokopa giyalya giyana pyuo kopyali inginyi nembaro.
PRO 1:27 Randa renge andake porambaiye koo minyuo epenge dopale ingyuo epo randa jeramo koo keta palyuo pisirami.
PRO 1:28 Dopa pyuo piso nakamame namba kyakale laraminyipape dusa karoŋo lao isingi laa naro. Karepe lao koto paeyo kararaminyi panda dupwana kararono kando nyeraminde daa.
PRO 1:29 Nakama soo nyingi akali ingyuo karapuli lao suu pyao kara nalyaminyi. Kamongo baa pakale pakale lao lakando kara nalana suu pyao karaminyi.
PRO 1:30 Nakamame nambame dopa pyuo pipingi lao langya napili lao suu pyao karaminyi. Dee nambame dopande piralyamo lao langipunu dokopa sili see nale lao karaminyi.
PRO 1:31 Dopa pyuo karo koo piminyi dokona lao koo doko nakama keta epara ingilyamo.
PRO 1:32 See nange wambu dupwa mona palenge ingyuo kara namwali lao suu pyapala kumasi ingyuo karaminyi. Wambu angi rolae suu pyaa nao mee male male lao kopyali ingyuo palyuo karo pingi dupwa kwaeyo paramisa pira.
PRO 1:33 Dopa piraminyipape mendeme doko mende lalyane lao soo nyerami dupwa range kyawa lete nyerami. Mona seramo pisipala nakama keta koo epasara lao paka narami. Dopa lao mona palenge singinya renge dokome wambu ingyuo kyakale lao karamo.
PRO 3:5 Emba rangena suu pinginya suu pilyu ote lao pii napala mona peparaeme Anatu kapa ingingi lao suu pyao karape.
PRO 3:6 Yulu peparae pilini dupwana Kamongome kando kaeyo karamo lao suu pyao kararenepa kata rolae lasaka pira.
PRO 3:7 Emba range kamame mona palyuo mama nyinginde karo lao suu pyaa napala Kamongo baa mupwa lao pako karo koo pinya wangu laka napipi.
PRO 3:8 Dopa piri ramo doko embena kingi kimbupi pokonge dokopa maresane keyange dokome randa pilyamo dupwape dee rete angi dupwape waiya lao umbwa pingi doko suu pyao nyiso otara.
PRO 3:9 Embena yuu dokona nenge mupwasa manjo nyerene dokome Anatunya kingi lakando kisi mairi.
PRO 3:10 Emba dopa pyuo mairi ramo dokome embena nenge retenge anda dokona nenge doko soo simbwara. Dee embena ipwa waene doko kakana pirasa retenge panda dokona retalana saka nare.
PRO 3:11 Wane, emba sukunde ingyuo kiso rolo randa jiyu kande dokopa meeŋe lao suu pyaa napipi.
PRO 3:12 Baame wambu mona retelyamo dupwa baa pyalana koo pyuo leya kande dokopa monarena yamarangwa nalapape.
PRO 3:13 Akali mona palenge ingyuo pii soo nyera doko rae maiyuo karena.
PRO 3:14 Doko mona palenge singinya renge doko kana golope kulingipinya poropiti nyilyamo dupwa nyuo isa palyuo nyera ingilyamo.
PRO 3:15 Mona palenge singinya renge dokome embena mamakupi kii puupi dupwa pipya manda manja nara. Dee mona palenge singinya renge dokome embena bange nyelana suu pilini dokopa manda manja nalyamoko.
PRO 3:16 Mona palenge singinya renge dokome yaku nao kumare. Dopako pyuo emba kapa paliramo kararenepa lakandarami.
PRO 3:17 Mona palenge singinya renge dokome emba mona kyaka palyuo kata angi lasaka pyuo kyawa minyaramo karare.
PRO 3:18 Mona palenge dupwa rae maiyuo parami. Mona palenge singinya renge dokome isame jingi lyelamuli pyuo lete kararami.
PRO 6:6 Maka suku suku nenge wambu dupwame sipurali kando apa pyuo palu karo pingi dokona mana nyerami ingilyamo.
PRO 6:7 Nakamana kamongo mupwa mendepe dee rapu pingi mendepe kara nange.
PRO 6:8 Dopa pilyamopape apunda kana pyaka seramo dokopa naramaŋa lao nenge dupwa panyi kana dokopa nyuo malu palyuo retenge.
PRO 6:9 Yuu gii akipare akali maka suku suku nenge doko luu palu anda serase? Dee baa anjokorape sipurapala lenge rao kararase?
PRO 6:10 Baame lao, Imambu soo nambana kingi kilyanda pyapala luu kuki mee paliru, lara.
PRO 6:11 Dopa lapala ramberaku pyao paramo luu palyuo kararamo dokopa luunya renge dokome baa pendewa nembara ingilyamo.
PRO 6:16 Kamongome bange yanda ipingi nyepo epe kanda napala daa lalu lao lenge. Wambu kandamili kandamili lengepe pii kyambo lengepe wambu koo pii nalyaminyi kingimi pyao kumungipi suu pinginya suu pingi kopetame yulu pipuli lao suu pingipi koo pelana wangu lakapala makando pengepe mendali kando nembo nembo pii minyuo kyambo lakamingipi dee akali mendeme banya puu minyingi dupwa pipya pyakandanyi retengepe dupwana Kamongo doko kando epe kanda nange.
PRO 7:1 Rakane nambame langilyu dupwa suu pyao karo dokopa nambame pipi lao langilyu dupwa kame see napipi.
PRO 7:2 Nambame mana langilyu dupwa pipala kapa karare ingilyamo. Embena bange keyange dupwa mona nyilini doko suu pyao nambana mawa pii doo mondo lao rapu pyuo pyuo karare.
PRO 7:3 Yuu gii peparae nambana mana pii doko kandokondali pyuo minyapala embena mona andarename pepa ingyuo pyasi palena.
PRO 7:4 Dopa pipala mona palenge singinya renge doko embena pemalenge ingyuo pena dee soo gisinginya renge doko embena puu minyingi kulisa ingyuo pena.
PRO 7:5 Dopa pirinyi dokome akali wakalena endape dee enda akali girisi pii lenge dupwape emba kyawa minyaramo karare ingilyamo.
PRO 7:6 Yuu mendepa nambana anda windowa dokona kata kandeyo.
PRO 7:7 Kandeyono dokopa akali parange lapo suu pyaa nao api kame kame lao papingi dupwa kareyaminyi kandeyo. Dee dokona rambe rambe wane mona pali nange kopyali mende kareyamo kandeyo.
PRO 7:8 Yuu taone kata kyukunai repeta enda pamuku angi
PRO 7:9 doko palenge dorena ingyuo yuu kwualepalepa wane doko pakiki palyama epo peyamo kandeyo.
PRO 7:10 Dokopa enakana enda dokome baa kando nyiya. Enda doko baa ama komau keyange wapupala kyawa elya pyuo koteŋa renge pyapala peteya.
PRO 7:11 Dopa pyuo pisipala enda baa elya pii nao enyeko kaeyo suu pilyu ote lao yuu peparae kata dupwana papyuo kareya.
PRO 7:12 Dopa pyuo yuu lapo baa yuu taone dokona kata kyukunai dupwana akali isaro kareya. Dee yuu lapo makete dupwana isaro karo dee yuu lapo taone dupwana isaro karo pipa piya.
PRO 7:13 Dopa pyuo enda banya kingi pee lapala wane parange doko kupyuo rau pyao laeyo nyepala akali doko lenge wane ingingi dokome rolae kandaro sepala nyinyi pyuo karo dokopa lamaiyuo lao,
PRO 7:14 Epapu namba lalu lao leyonoli pyuo mena pyao kisalono.
PRO 7:15 Dokona emba kotalana suu pyapundeme namba emba koto nyisa epanoŋo dokona emba kando nyilyu, leya.
PRO 7:16 Lapala lao, Nambana rate doko komau kalya pingi yuu Isipi raendeme kwuanyi palyapu.
PRO 7:17 Dee dopako pyuo lao mamba ama kyaa keyange pingindeme kisapunu kyaa pyuo silyamo.
PRO 7:18 Dokona nambwa range yuu gii kukwa peparae kingi mendena dokome mende kupyaramo rae maiyuo kupyaro serambaŋa bona ipu.
PRO 7:19 Nambana akalingi doko anda kara nalyamo. Baa kata londe pupya.
PRO 7:20 Pupyamo dokopa kana ama malu minyuo pupyaŋa epa naramopa koro lama para, leya.
PRO 7:21 Dopa leyamo dokopa enda dokona girisi pii dokome wane baa makande piyasa moname nyuo otapala enda doko mona maiya.
PRO 7:22 Mena kuiyalana palelyaminyipa anjiki pipala anda epamuli pyuo mona kondo pao kaenge doko laa lapala peya. Wii kone makange dokopa kamenge pao konena lyingi dopale ingyalana peya.
PRO 7:23 Dee omande sinyana malyilyaminyipa baa kumara doko see nao mee panda rapisi lao pao palipala randa nyingi dopale ingyuo wane doko baa peya.
PRO 7:24 Wane dupwa nambana pii sokondali pipala doko mende lee kande lao soo karalapape.
PRO 7:25 Karapala enda dopale dupwame nakamana monarena kongo pyuo nyuo anamasi minya nana lapala enda paramuli pyuo pete pete papyuo kara nalapape.
PRO 7:26 Enda dokome akali malu nyuo palyuo pinyi nembelyamo. Dee akali maluko reto palyuo kumanyi nembenge dupwa kapa pyuo yaka lao sukusa paa narami.
PRO 7:27 Enda banya anda dokona pare ramo doko emba kumungi yuu kata repeta dokona waiya lao pao kando nyingi dokona panya parenesa pira.
PRO 8:1 Selapa. Mona palenge singinya renge dokome wambu ingyuo kee letamo. Renge angi dokome wambu serami lao paneya.
PRO 8:2 Yuu kyau dupwana kata nemba dupwanape dee kata kandamae dupwanape baa karenge.
PRO 8:3 Yuu taone andake kambu kondandawame dokona kame kambu kilikili rename piso kyakale lenge.
PRO 8:4 Wambu dupwa nambame nakama poraiyuo piso sokondali pilyu. Nambame isa wambu peparae kando kee leto.
PRO 8:5 Emba nyaŋa ingyuo karee kande doko suu pingi ando oto kando suu pyao karape. Emba kopyali ingyuo karee kande doko kando mona palenge ingyuo karape.
PRO 8:6 Nambana pii ama keyange langilyu dupwa rolaeŋe sepe.
PRO 8:7 Namba pii kinyi angi lenge dokome pii kyambo dupwa epe kanda nange.
PRO 8:8 Dokona nambame pii letono dupwa peparae kinyiko lenge dee mendepe kyambo lapala mendena kata palyuo pii nange.
PRO 8:9 Akali mendeme mona kandapala soo walengena palyuo karenge dee mendeme mana poraiyuo nyingi ramo doko baa soo oto karenge.
PRO 8:10 Dokona kana kulingi nyingi doko suu pyao nambana mana pii doko nyelapape. Dee kana golo rao kui kui lasi rombo palyuo nyingi doko suu pyao nambana mona palenge singinya renge doko rombo palyuo nyelapape.
PRO 8:11 Namba mona palenge singinya renge doko kamame wakasa ingyapala mamakupi kalya pingi bangepe isa palyingi. Dokona ingyuo emba range nyelana suu pilini doko namba mona palenge singinya rengepa manda manja nara ingyara.
PRO 8:12 Namba mona palenge singinya renge dokome soo gisinginya renge doko namba keta palenge. Dee soo nyinginya renge palengeko dokome namba kote dupwa rolae ingyuo singi.
PRO 8:13 Nambame wambu range mupwa wakasa lao suu pyapala pii panga soo karo kata koona penge dupwa kando epe kanda nange. Dokona ingyuo akali mendeme Anatu andakeŋe lao pakao pyuo karara ramo doko baa koo dupwa epe kanda nao kararasa pira.
PRO 8:14 Nambame dopa pyuo piru lao rapa rapa pyuo pipala angi dokona palyuo pyuo penge. Dopa pyuo namba soo nyuo porai ingyuo karenge.
PRO 8:15 Nambame kiŋi dupwa iso karena lao dee gapomane dupwa lowa waso lena lao nambame nyisingi.
PRO 8:16 Isa yuu dakena gapomanena akali kamongope kiŋipi karaminyi dupwa nambame nyisapunu pyuo karaminyi.
PRO 8:17 Mendeme namba kotara ramo dokome namba kando nyera. Nambame wambu namba mona retenge dupwa isingi monako retenge.
PRO 8:18 Namba keta bange aelyamo karenge dokome mainya rae maipala ketae pyambuo maingi. Dopa pyuo namba kapa palyuo kamongapala maiyuo kumakange.
PRO 8:19 Namba keta emba bange soo nyilini dupwa kana golo rao kui kui lasi dokopa manda daa. Dee kana kulingi keyange dokopa kapa daako.
PRO 8:20 Namba yulu rolaena kata iki pao kote singi kata angi dokona moko minyuo penge.
PRO 8:21 Namba mona retenge dupwa bange malu maingi dee bange dupwame nakamana anda dupwa soo ketae penge.
PRO 8:22 Kamongome yuu wamba kanda soo dokopa bange dupwa wasalana karo dokopa namba mona palenge singinya renge doko wambo ingyuo wasiya.
PRO 8:23 Yuu muu dupwa kanda sepa nao karo wambo peparae doko namba kanda soo wasiya.
PRO 8:24 Dee namba ipwa kotape ipwa guu lao epengepe dupwa epapa nayamopa namba doko wambo manjo nyiya.
PRO 8:25 Namba yuu kyaupi dee yuu manda dupwa silyamuli pyuo sepa nayamopa namba doko wambo mandeya.
PRO 8:26 Anatumi isa yuu dakepa yuu isako pulyuo silyamo dupwape yuu sinjimu wambo siya dokope wasepa nayamopa namba doko wambo mandeya.
PRO 8:27 Dee yake doko sera panda reteyamo dokopa namba dokona kareyo. Dopa pyuo yake yuupa pakali lao koe pyao peyamo dokopa namba dokona opetae kareyoko.
PRO 8:28 Baame yake dokona kopa sinya lao ipwa kota pete dokona piso mee ipwa guu lena lao waso
PRO 8:29 dee ipwa kota dokona siyamo dupwa kando baame lao raeyo paa napala silyamuli pyuo sinya lao leyamo dokopa namba kareyo. Dopako pyuo dee yuu kikurenge dupwa waso reteyamo dokopa namba dokona kareyoko.
PRO 8:30 Yuu gii dupwa pipya namba akali anda puu rombo minyingi dopale ingyuo baa role kareyo. Yuu peparae nambame baa rae mainyi pyambuo dee namba baa role karapala rae maiyuo piyu.
PRO 8:31 Wambu isa yuunya enenge sipurao paleyaminyi dupwa kando dee yuu muu peparae dupwana kando pipala rae maiyuo kareyo.
PRO 8:32 Epapu akali parange dupwa nambana pii selapape. Sepala nambame letonoli pyuo pirami ramo doko nakama rae mairami.
PRO 8:33 Nakama mana letono doko selapa. Mona palenge singinya renge doko nyuo kame kame see nalapape.
PRO 8:34 Akali mende nambana anda kame kambu konandawame dokona isaro petengepe dee akali mende nambana pii soo nyingipi dupwa rae mairami.
PRO 8:35 Akali mendeme namba kotara dokome lete karenge renge doko kando nyera. Nyeramo dokopa Kamongome baa kando rae maira.
PRO 8:36 Akali mendeme namba kando nyii nara ramo doko baa range randa nyera. Mendeme namba epe kanda nara ramo doko baa range kumungi renge doko mona reto kararasa pira, leya.
PRO 13:1 Wane mona palenge dokome rakangeme pyalana pyuo mana letamo dokopa warombo soo petenge. Dopa pilyamopape akali moŋo kyaŋe soo range wakasa lao suu pingi dokome doko pii soo nyii napala baa kopetame pyuo penge.
PRO 13:2 Dokona akali keyange dupwana pii larami dokona yano nyerami. Yano nyeraminyipape akali panga singi dupwame pyakando yanda pinya wangu lakao karaminyi.
PRO 13:3 Dopa piraminyi pii angi suu pyaa nao langa lenge dokome baa range kokwa soo koo keta penge kandale. Dokona suu pyao emba pii kandokondali pyuo lapala embena lete kyawa doko range minyuo lao karare.
PRO 13:4 Akali yulu poraiyuo pingi dokome baa nyelana suu pilyamo dupwa peparae nyingi kandale. Akali yulu pinya maka suku suku nenge dokome nyelana lao poraiyuo suu pilyamopape dupwa angi kapa nyii nange.
PRO 13:5 Wambu pii angi dokonako iki lenge dupwame kyambo pii dupwa epe kanda nange. Dopa pilyaminyipape akali kopetame pinginya pii dupwame wambu elya nyingi.
PRO 13:6 Yulu rolae pingi dokome wambu koo pii nange dupwa kyawa minyilyamopape yulu koo pingi dokome wambu koo pingi dupwa nyuo koo keta palyingi.
PRO 13:7 Wambo lapo pii dokome bange malu aenge ingyuo lenge doko reta napala mee lenge. Lapo pendewa karele lao karelyaminyipape dupwa nakama moyange bange malu retenge.
PRO 13:8 Akali bange malu retenge dokona kana dokome baa range kyawa minyara. Dopa piramopape akali pendewana bange kingi rukyu nyerami ramo doko kapa daa.
PRO 13:9 Wambu yulu rolae pingi dupwa isare pawa rao yanga paupau lao karenge dopale. Wambu yulu koo pingi dupwa isare lambe rele raa nale lao karo kunjingi dopale.
PRO 13:10 Dokona wambu range ulipili lao suu pingi dokome mende nyii napala randako iki nyingi. Wambu mendeme laraminyi soo nyelana piso singi doko renge angi soo nyingi kata dopale.
PRO 13:11 Embena bange dupwa awa awa pyuo nyuo retare ramo doko dee waiya lao nembo otare. Dopa pii napala yulu pyuo randa nao nyuo retare ramo doko kamame lapo konda pyuo sera.
PRO 13:12 Mende angi pinya karo pira lao suu pyarene doko mee kambara ramo doko embena mona doko opetae ipwa pee kambele lara. Dopa piramopape baa mende pinya lao suu piya doko angi pira ramo dokopa mona rae maingi doko ando nyimbara.
PRO 13:13 Wambu keyange mendeme nyisaro laramo daa lare ramo doko emba randa nyere. Nyiso laramo dokona moko minyuo piri ramo doko koo keta palya nare.
PRO 13:14 Akali angingyuo mona palenge dokona mana pii doko ipwa guunya mendeke ingyuo emba kararene yuu gii dusipana koo keta parene lao ramo nyuo lenge kandale.
PRO 13:15 Mee wambu dupwame akali singi dupwa yako lao ketae pyambungi. Dee wambu kapa pii nalyamo lao suu pilyaminyi doko angi kwao paramo kata dokona karelyasa pingi.
PRO 13:16 Akali mona palenge dokome baa aki piru lao wambo suu pyapala pira. Dee akali mona pali nange dokome banya yulu kopetame piramo dokopa wambu yango dupwame baa mende suu pyaa naenae pingi doko lasaka pili lao pira.
PRO 13:17 Pii angingyuo sepa naenae lenge dupwame wambu dupwa randa nyuo maingi. Dopa piramopape pii kapa larami lao suu pyarami wambu dupwame manda ranyi pyambuo pingi.
PRO 13:18 Akali mende angi mana nyii naramo doko baa elya nyuo pendewa ingyuo karara. Dee akali mende baa waipi larami doko kale yukupala sera ramo dokopa wambu menge dupwame baa yako lao ketae pyambungi.
PRO 13:19 Wambu kopyali dupwame koo dokona kapa wanjarami ingya nalyamo. Emba bange nyelana suu pilini doko nyepala dokopa rae mairi.
PRO 13:20 Emba wambu mona angi palenge dupwa pipya role pyao karo mana nyere ramo doko emba wambu mona palenge ingyuo karare. Dee akali kopyali dupwa puu minyuo karare ramo dokopa emba kwao kararesa pira.
PRO 15:1 Wambu mendepe imbwara ramo dokopa pii anjiki pyuo laramano dokopa imbu singi doko isa para. Dopa piramopape pii poraiyuo lao imbu singi nyerama ramo dokopa isare lopo yangenge dokopa uliyapu nyuo renge dopale ingyuo imbu singi doko andara.
PRO 15:2 Akali mona angi palenge dokome pii lenge dokopa singinya renge dokona au pyuo penge. Dee akali kopyali dupwame pii lenge doko sane peena ipwa rao bolo pyao popo kau kau lao penge dopale ingingi.
PRO 15:3 Kamongo dokome yuu muu dupwana peparae apa pilyape lao kando karenge. Namwa yulu koo pilyamanopape panda keyange pilyamanopape baame kando iso karenge.
PRO 15:4 Pii anjiki pyuo lenge dokome letena renge minyuo epenge. Dee pii kanda nao imbu singi nyuo lenge dokome wambunya mona kwaenyi pyambuo lenge.
PRO 15:5 Embena rakaneme dopa pii dapa pii lao mana langira doko soo kamba lare ramo doko kopyali minyare. Dee embena rakanena mana pii laramo doko soo nyere ramo doko emba wambu angi mona palenge ingyuo karare.
PRO 15:6 Akali yulu rolae pingi dupwame nakamana bange dupwa elya pyuo retenge. Dee akali yulu koo pingi dupwame yuu gii mende randa epelyamo dokopa nakamana bange mee pyao nembenge.
PRO 15:7 Mona angi palenge akali dupwame pii lenge dokopa soo nyinginya renge doko pao raenge. Akali kopyali dupwame pii letaminyi dokopa dopa pii nange.
PRO 15:8 Akali keyange mona angi palenge dupwame ateŋa letaminyi dokopa Kamongo doko rae maingi. Dopa pilyamopape akali koo pingi dupwame mena pyao kiso mailyaminyi dokopa baame epe kanda nange.
PRO 15:9 Kamongome akali koo pingi dupwana yulu dupwa rae mai nange. Dopa pilyamopape baame akali mendeme yulu rolae pingi doko kando mona retenge.
PRO 20:1 Ipwa biya dokomepe ipwa waene dokomepe napala wambu kopyali minyinyi nembo pii poraiyuo lao lenge. Dokona ipwa nenge doko yulu koo kopyali ingyuo pelyamo.
PRO 20:2 Emba mena laene dokome wambu nalana gasimwa poko ŋiliŋili letamo doko kando pakange kandale. Doko suu pyao kiŋi akali waiya lao imbwuange doko kando pakape. Doko kaepala embame baa imbwana lao piri ramo doko emba range pyao kumakaresa pira.
PRO 20:3 Akali kopyali dupwame laiye kanda soo leyami kande dokopa emba wakale pyarepanyi pyambuo karare ramo doko keyange ingyara-mopa emba lakandarami.
PRO 20:4 Akali ee wara pingi dokome baa yuu ape ape pyarali yuu gii dokopa maka suku suku napala kaenge doko dee jingi lyuo nyingi yuu gii eparamo dokopa baa angi mende lyuo nyii nara.
PRO 20:5 Dokona akalinya suu pingi doko yuwale kyuwana ipwa pete singi dopale. Dopa pyuo seramopape wambu mende soo gisingi ramo dokome kapa kamuo nyera.
PRO 20:6 Dee wambu peparae namba au pyuo mondo lao karenge larami. Dopa laraminyipape akali koto au pyuo mondo lao karenge doko nakama randa nao koto kandarami.
PRO 20:7 Wane wanake dupwana rakangepe dupwa pii angi kinyi dokonako lao dee yulu rolae pyuo pinginde ramo doko nakama embone kone petenge.
PRO 22:1 Emba bange malu retarenepape embena yulu pyuo larene kata dokona embena kingi doko keyange ingyuo ketae pelyamo lao wambu menge dupwame suu pyarami doko mupwa wakasa ingilyamo.
PRO 22:2 Kamongo dokome kamongope dee pendewape laparae wasiyamo dokome mendali wakasa ingya nalyamo.
PRO 22:3 Akali poraiyuo suu pingi dokome randa epelyamo dupwa kandapala wanjinyi nembo karelyaminyipa kopyali dupwa kyawame suu lao karapala enakana randa nyingi.
PRO 22:4 Emba Kamongo doko mupwaŋa lao suu pyao pako inyimungu karapala emba kapa palyuo karo lakandaraminyipa yaku nao kumare ingilyamo.
PRO 22:5 Embena yongo doko range mona nyere ramo doko wambu yulu koo pingi dupwa nyelana anga piru silyamo dupwana repeta paa napipi.
PRO 22:6 Dopa pyuo karapala wane doko apa pyuo palyuo karo pisa dokona mana lamai. Dokopa baa ando palyuo karo piramo yuu gii dusipana doko mende kandale lao suu pyale pyale karara.
PRO 22:12 Kamongome pii kinyi lenge dupwa angingyuo pena lao karo pii kyambo lenge dupwa rolae ingyuo paa nange doko panenge.
PRO 22:13 Akali maka suku suku nao mee anda petenge dokome lao, Namba neta kamanda dupwana paro ramo doko mena laeneme baa nyuo nara ingilyamo, lenge.
PRO 22:14 Kepo pingi yulu doko kone makange dopale. Dokona wambu lapo Kamongome kando imbwuange dupwa dokona pao lyingi.
PRO 22:15 Wane wanake dupwame mee langa male male lao yulu kopetame pingi. Dopa piminyipape nakamame poraiyuo mana lao pyarami ramo dokopa nakama yulu rolae dupwana mana nyuo piramisa pira.
PRO 23:4 Emba bange malu retapuli lao pirisa emba range kokwa soo makasareŋe. Wambu angi mona palenge ingyuo karape. Bange dupwa dusa kata serandena mee pao yuu pele pirasa saka nare ingilyamo. Yaka ulisapame kui lasi soo nembele lapala embena kana doko mee nembare ingilyamo.
PRO 23:13 Wane wanake dupwa pyao mondo lao mana lare doko kumaraminde daa. Dokona wane wanake dupwa mee wamya lyuo karena lapala mange karo kaeya napipi.
PRO 23:14 Dopa pirami dokome wane wanake dupwa koo keta pali nao kyawa lete nyeramisa pira.
PRO 23:19 Nambana ikinyingi, sepe. Emba mee langa kara napala apa pyuo palyuo karo pirusi lao suu pyakondali pyuo karape.
PRO 23:20 Dopa pyuo karapala wambu nenge malu suu lanyi pyano nengepe ipwa waene malu nengepe dupwa pipya role pyao kara napipi.
PRO 23:21 Nakama pendewa ingyarami ingilyamo dokona waso karape. Emba mende pilyu lao dokopa luuko palu nengeko pyasumako nao karare ramo doko oo repeta komau rokwasi iki wapuri ingilyamo.
PRO 23:22 Dokona rakane kara nayali doko emba andengena dopale piso karo pii napiliŋi. Rakanena pii minyuo endakinyi emaramo dokopa yaso nao mandeyaŋa dokona lao suu pyao karape.
PRO 23:23 Dokona kinyinya rengepe mona palenge singinya rengepe mana nyinginya rengepe dee keyange ingyuo soo gisingipi dusipa ama keyange. Dupwa kana malu mee ropo pyao nyepengele ingyapyamopape embena bange kulisa ingilyamo dokona rungi rungi pyao karene.
PRO 23:24 Wane akalipi rolae pingi dokopa rakange doko renge keyange dokona lao rae mairi. Dee embena ikinyi doko mona angi palenge dokona lao emba kapa lakanda minya minya pyuo ketae pyambware.
PRO 23:25 Dokona ingyuo wane embame rakane embena endakinyipi rae maiyuo karena lao yulu rolae pyuo karape. Endakinyi mandeyamo doko dopa pyuo rae maiyuo pyambwape.
PRO 23:26 Wane rakane, embame namba mona joo kararene dokopa nambana yulu pyuo pii lao kata papyuo pilyu dupwa embena ingyaramo kando mana nyere.
PRO 23:27 Enda wakalena akalingi kepo pingipi enda kana nyuo akali kepo pingipi kata doko rakaiye kyuwa rakingi dokona pao palipala kumungi dopale ingyuo silyamo.
PRO 23:28 Dokome emba epelepe lao nakama range parakinya sipinyame ingyuo isaro singi. Akali dupwa nakamana enda yaki nyinya lao pingi.
PRO 23:29 Wambu mende ipwa waene biyapa malu nengepe dee ipwa biya mendereke nalana karengepe dupwa namba lasaka pepe. Dokopa nambame wambu range kondome kumuo mona rando karenge mende emba lasaka piru. Akali doko randa mapinyi reto mumu lao suku lao manjo karenge doko banya lenge dupwa kone yuu lapala baa rangeme susu lao isakanyinginya piso pingi.
PRO 23:31 Ipwa waene rombe polende kapona auko pyuo pao sera. Dee pendoko dokona mondako lao lupyuo para ingyara. Dopa piralyamo lao kandarenepape dokome emba makande pyuo nyuo isa palya nanale.
PRO 23:32 Daaŋa lao emba napala doko palyuo sipurarene dokopa kaumi pilyamo pingi doko suu pyao yasoko nao sipurare.
PRO 23:33 Dopa pyuo paka pinya kombeya kopetame pyuo aa lao yamarangyuo kyawa sisingi bolombalo laramo karare.
PRO 23:34 Karo piso penge dokopa minyuo maka delyamisa malawai lao miku kasarami ingingi dopale ingyuo karare.
PRO 23:35 Dokopa embame lao mendeme namba pyalaminyilyamo, lare. Lapala pyaminyipape namba suu pyaa nalyo lao karare. Lao karapala akipamo nambana lenge kendaro silyape? Namba ipwa biya mende koto kandarowale, lare.
PRO 24:3 Mona palenge singinya renge dokomepe soo gisinginya renge dokomepe anda dupwana isa susa pyao pingi dopale ingilyamo.
PRO 24:4 Soo nyinginya renge soo manjipyamo palamo dorena andana andakare bange elyape rungi rungi pingi dupwame kalya pyuo retenge dopale ingyuo silyamo.
PRO 24:5 Dokona wambu porai ingyuo karenge dupwa kapako doŋo mona angi palenge dupwa ama kapa ingyuo karenge. Kinyi, porainya renge doko baa mupwako doŋo soo nyinginya renge doko baa kamame wakasa mupwa.
PRO 24:6 Dokona yanda piroŋo lapala wambo emba kandokondali pyuo lao retape. Emba nyisarali pii keyange malu dupwa soo nyepala yanda piri ramo doko emba keyange ingyuo pyao wini piri.
PRO 24:17 Embena nyisu petenge dupwa randa angi nyiyami kande dokopa emba rae mai napipi. Dee baa lukumao paleya kande dokopa rae maiyuo kara napipi.
PRO 24:18 Emba dopa piri ramo dokopa Kamongo dokome sepala rae mai nara. Dopa pipala baame wambu embena nyisu petenge doko randa mai nasera.
PRO 24:19 Wambu yulu koo pingi dupwame emba mona randanyi pyambwa nana lao karare. Dee bange lapo nakama retarami dupwana kanda lyanolyano pyuo kara napipi.
PRO 24:20 Akali koo pingi dokome karo dolapokolyamo lapala akali dokona dee rakya mende see nara. Dee keyange mende rakya nyepenge lao suu pyaa nange.
PRO 25:11 Suu pingi angi doko rolo laramo doko golome wasisi bange keyange dopale ingyuo sera.
PRO 25:12 Singi akali dokome repe repe lamairamo wangu lakapala soo nyingi doko kana golo panda rao kui kui lasi pipa manda manja nara.
PRO 25:13 Waili pii minyingi akali baa kandokondali pyuo makando minyuo eparamo dokome yuu gii isasa pilyamopa ipwa manda renge nao mona waeŋe lenge dopalelyamo lao sera.
PRO 25:14 Wambu bange lapo wambu yango mairama lao lalu lao lapala enakana mai narami dupwa kopa soo poraiya minyuo mane mane pyuo karapala apu angi epa nange dopale ingyarami.
PRO 25:21 Embena nyisu petenge akali lopo pira ramo doko baa nenge nena lao mairi. Ipwa naa nara ramo dokopa ipwa mairi.
PRO 25:22 Dopa pira ramo dokopa baa range elyame kumara. Dokopa Kamongo keta emba yano nyere.
PRO 27:1 Epapu rakyapena piramo doko see nalene dokona mende piru lao ene dokona range lakanda napipi.
PRO 27:2 Wambu wakale menge dupwamepe dee kamame kanda nange dupwamepe lakandenaleŋe. Emba rangeme lakanda nalu nao napipi.
PRO 27:3 Wambu kopetame pingimi randa nyingi dokome isa kanapena kenda dupwa pipya manda manja nara.
PRO 27:4 Imbu singi dokome ingi pungipi nenge ingilyamopape yango palyingi renge dokome wambu kamame kokwa sinyi nembenge.
PRO 27:5 Wambu yongo mende kando koo pira ramo dokopa masa nalene lao masa nanale. Emba rolo ketae nyuo panembena mende pipala pinya lamaipi.
PRO 27:6 Embena puu minyingi dokome emba lao randa jeramopape emba mana lao larasa pira. Dopa piramopape embena yanda pimwai dokome mange kupyuo nyiya kande dokopa kando karape.
PRO 29:15 Mana lao pyalena pingi renge doko wane wanakepe keta keyange ingyuo pelyamo. Waneme nakama range suu pilyamano ote lao pirami ramo doko baa keta endangi elya nyera.
PRO 29:16 Akali koo pingi dupwame yuu doko isaraminyi dokopa yulu kopetame dupwa andanyi nyimbuo penge. Dopa piminyipape akali rolae pingi dupwame akali dopale isa penge dupwa kando kararami.
PRO 29:17 Embena wane doko mana lao pyalena pirinyipa yuu peparae embame baa kando rae maiyuo karare. Dopa pirinyipa baame emba raeko mainyi pyambuo karo elya renge nyuo jii nara.
PRO 29:18 Wambu rara Anatunya pii soo nyii nao mee kamba lao karaminyi dupwa ukiaki minyuo koo keta palirami. Akali mendeme Anatunya lowa pii moko minyuo kararamo doko rae maiyuo kararako.
PRO 30:18 Yaka kambi yakena bii lalamo dokonape kau kana mandana imu papyalamo dokonape ipwa sipi kota petena kata pamo dokonape enda akalipa mange nyokonyuo mona retalambinyi dokonape renge kisima dusipa yalu pyuo sipyasa selana sakame kumulyu.
PRO 31:10 Enda ama mora piso sinyi pingi doko kalu kalu paeyo mee langa pisa nange enda doko baa ama bange mena mako rusipi dupwa nyuo isa palyuoko baa mee mende ulipiliko pisira. Enda dopale dokona mende randa nao koto nyere.
PRO 31:11 Akalingi banya mona enda baa keta yukwapala pendewa ingya narolyamo lao sepala kamenge karenge.
PRO 31:12 Baa lete pisiramo mange dusipana akalingi keta randa maiyuo mona kendanyi reta napala yulu keyange pyakamyuo petenge.
PRO 31:13 Baa range mee pisa napala romo pyuo nyuu yambale wapuo lee kyaso komau kii pyuo petenge.
PRO 31:14 Pipala karona bange nanesa sipyamo manjo epelyamo dopale ingyuo baame ee kwaipi nanesa dupwana nenge nyuo manjo anda epenge.
PRO 31:15 Enda baa ene endenge singi dokopa sipurao banya ree palu dupwana nenge rapa rapa pyuo dee banya kendemande wanake dupwa dopa pinya dapa pinya lao lamaiyuo pingi.
PRO 31:16 Baa yuu mende kandapala isa girapo dupwa dokona wara piruŋu lao sepala enda rangena kana dokome ropo pingi.
PRO 31:17 Baa enda porai wakasa yulu pinya wangu lakapala pyuo pinjingi lyolo pingi.
PRO 31:18 Baa bange wasingi dupwa dusipa nyerolyamo lao sepala yulu pyuo piso kukwa ingyapala enako luu palenge.
PRO 31:19 Baa rangeme elyoko wale pyao banya nyuu yambalepe dupwa wapungi.
PRO 31:20 Wapupala wambu pendewa ingyuo karenge dupwa mumu laa nao nyiso maiyuo petenge.
PRO 31:21 Banya ree palu dupwa kupwa komau isasa pingi waso maiyuo kaenge dokona lao kupwame kumungi yuu gii dokopa baa mona randa nange.
PRO 31:22 Baame yapo nao palenge komau dupwa waso dee komau muku keyange elyoko kumapala dokome komau waso wapungi.
PRO 31:23 Banya akalingi baa akali kyawa ingyuo karenge dokona wambu peparaeme soo gisingi.
PRO 31:24 Enda baame mola marapu dupwa pyaope dee komau dupwa wasope pipala wambu bange malu ropo pingi dupwa maipala kana nyingi.
PRO 31:25 Dopa pingi dokona wambu dupwame baa enda porai kapa palyuo petamo dopa lao suu pingi dokopa enda dokome rengya pira dupwana paka manja nao petenge.
PRO 31:26 Baa pii dupwa mona palenge singinya renge dokome soo nembo wane wane karo lenge.
PRO 31:27 Baa enda yuu peparae romo pyuo karo banya ree palu dupwa aki mende aeya napya kandapi lao poraiyuo rapu pingi.
PRO 31:28 Dopa pilyasa banya wane wanake dupwame namwana anyi doko keyangeŋe lao ketae pyambuo karenge. Dee banya akalingi dokome baa lakanda minya minya pilyamo petenge.
PRO 31:29 Pipala baame lao, Enda menge malu dupwa keyange petaminyiko doŋo emba mee mende ulipisali keyange petenge lao suu pingi.
PRO 31:30 Enda wambu yako lao laku nyingi dupwa yuu lapo mee kunji kunji pingi. Dee dopako pyuo enda keyange elyape dupwa emo otarami. Dopa piramopape Kamongopa ketae pyambuo pisiramo doko mee lakandarami ingilyamo.
PRO 31:31 Enda dopa pingi doko yulu keyange pyakayamo dupwana suu pyao awuapala banya kingi lakandapengele ingilyamo.
ECC 3:1 Yulu peparae isa yuu muu dapwana pilyamo dupwa Anatumi yuu gii rombo palyinginyili pyuo pingi.
ECC 3:2 Mandenge yuu gii dokope kumungi yuu gii dokope ee wara pingi yuu gii dokope manjo nenge yuu gii dokope dusipa baame rombo palyuo retenge.
ECC 3:3 Yuu gii pyao kumakaraminyi dokope yuu gii pyuo lete nyeraminyi dokope yuu gii anda wambarae lalyaraminyi dokope yuu gii anda enenge piraminyi dokope baame rombo palyuo retenge.
ECC 3:4 Anjokorape mona rando karope dee rae maiyuo karope dee kumanda ee lao pisope dee rae maiyuo malya pyao kararami dusipape baame rombo palyingi.
ECC 3:5 Yuu gii enda akalipa mendakinya palenge dokope dee yuu gii pali nange dokope yuu gii bange maingi dokope yuu gii bange mai nange dokope baame pyuo waso retenge.
ECC 3:6 Yuu gii bange nembengepe yuu gii nembapala koto nyingipi yuu gii kana nyuo retengepe yuu gii kana pyao nembengepe baame rombo palyingi.
ECC 3:7 Anjokorape komau kangurami dokope kii pirami dokope romo napyuo mee pisirami dokope dee pii lao pisirami dokope dusipa baame waso retenge.
ECC 3:8 Yuu gii mona retengepe yango palyuo epe kanda nangepe yuu gii yanda pingipi yuu gii kui lao mona silyamo karengepe dusipa baame waso retengeko.
ECC 3:9 Namwa yulu andake pipala dokona aki mende nyingisi?
ECC 3:10 Anatumi kenda namwa keta retakayamo dupwa namba silyu.
ECC 3:11 Baame yulu peparae dupwana yuu gii angi rolae doko waso reteya. Retapala dokopa namwame rengya mende piraŋa lao soo nyimwali suu pingi doko Anatumi namwa keta palyakaya. Dopa piyamopape baame yulu pingi dupwana lapo namwame soo gisa narami lao piya.
ECC 3:12 Dokona lao namwa lete kararamano dokopa rae maiyuo yulu elyape pyuo kararama lao soo nyiyu.
ECC 3:13 Namwame yulu pipala nenge ipwape nyepala rae maiyuo narama. Dupwa Antumi jiya.
ECC 3:14 Anatumi yulu peparae pingi dupwa ama sulu seraŋa lao pingi doko namba silyu. Embame dokona mende konda pyuo pyuope dee dokona mende nyisa nyuo nembope pii nare ingilyamo. Anatumi namwame baa mupwa lao suu pyao pako paliramiŋi lao pingi.
ECC 3:15 Yulu lapo dakepa pilyamo dupwa wamba dopa piyako. Dee yulu lapo ene pira dupwa wamba dopa piyako. Anatumi wamba yulu pinginyili pyuo kamba kamba pyuoko pingi.
ECC 3:16 Doko iki daa. Isa yuu dakena pii doko soo rolo lengepe rolaena rengepe panda nyeramuli pyuo koonya renge singi doko namba soo nyilyu.
ECC 3:17 Yulu peparae Anatumi yuu gii rombo palyiyamuli pyuo piramo dokona baame rolae pingipi koo pingipi peparae mendare kata dokona palyuo kote lara namba rangeme lao suu pyapu.
ECC 3:18 Anatumi namwa makande pyuo nakama mena dupwa pipya manda manja nalyamo lao lasaka pipyamo doko soo nyipu.
ECC 3:19 Mena wambupi kata mendakinya pao kumungi. Dokona nakamana lete karenge renge doko kapa kapa palenge. Lete karenge dokona nakama peparae renge mende see naminyi dokona wambu dupwa nakama kamame wakasa daa mena dupwa pipya kapa kapa ingyuo pelyamo.
ECC 3:20 Dokona mena wambupi panda mendare yuu sinjimu dokona parami. Doko nakama peparae yuu sinjimu dokonako wasiyamo dokome nakama kamba dokonako parami.
ECC 3:21 Dokopa menana imambu doko isa yuu donena paramopa wambunya imambu doko ketae panda paraŋa lao wambu mendeme apa pipala soo gisilyase?
ECC 3:22 Namwa kumaparamano dokopa mende piraŋa lao seramano kata mende see nalyamo dokona namwame yulu pyuo rae maiyuo palyuo kararama ingilyamo. Yulu mende wakale pirama ingya nalyamo lao kandapu.
ECC 9:7 Anatumi kapaŋa lao suu pyapyamo dokona embena nenge nao rae maiyuo karo embena ipwa waene nao gii mona palyuo karape.
ECC 9:8 Yuu peparae wambu peparaena lenge kambu dokona rae maiyuo gii mona palyuo karape.
ECC 9:9 Anatumi renge mende palya nao emba lete karape lao jiyamo dokona embapa enda embame mona retelene dokopa role pyao rae maiyuo palyuo karape. Emba randa nao karapinyipape mende nyere ingya nalyamo. Dokona lao yuu gii peparae koree ingilyamo dokona enda pipya mee rae maiyuo palyuo karape.
ECC 9:10 Kumunginya yuu dokona emba pare dokona yulu pingipi suu pingipi soo gisinginya rengepe mona palyuo soo nyinginya rengepe dupwa see naramo dokona emba yulu aki mende pinya suu pyao pilini dupwa poraiyuo pepe.
ECC 9:11 Dee mende namba lao kandapu. Doko isa yuu dakena wambu puu lao makandelyaminyipape dupwana lapome wini pii nange. Akali paka mona manja nao yanda pingi dokopa yuu peparae wini pii nangeko. Akali mona palenge dupwame bange kanape dupwa yuu peparae mondo lao reta nange. Akali kyawa sisingi palenge dupwame yuu peparae bange malu reto kamongo ingyuo kara nange. Akali mora mora petenge dupwame yuu peparae kamame ulipilipi paa nangeko. Dopa pyuo yuu gii lapona wambu peparae embone kara nao randa nyingi.
ECC 9:12 Dopa pilyamo dokona emba anjokorape embone kara nao randa nyere lao see nalene. Yaka konene lyingi dee oma sinyanana malyilyaminyipa kamenge pao palengepe dolapo suu pyao yuu gii lapo namwa see nao karo koo eparamo dokopa mee walu lao oma yakape ingyuo randa nyerama.
ECC 11:1 Embena kana mone dokome yuu wakale wakale dupwana bisinase pepe. Pyuo karo yuu gii mendepa kamame konda pyuo manjeramopa poropiti kana nyere.
ECC 11:2 Emba isa yuu dakena koo mende piramopa apa pyuo embone kara nare lao emba see nalene dokona embena kana dupwame bisinase wakale wakale pyuo byange wakale wakalena retape.
ECC 11:3 Doko kopa dupwana ipwa malu pisipala dokopa isa yuunya apu epenge. Dee isa mende lakange dokopa wangu paki panda pakirena pao lakao palenge doko mende pii napala isa lakao pelyamuli pyuo pao palenge.
ECC 11:4 Emba ee wara pinya lao karo panda nenge manjo nyelana karo netape kopape porambaiyepe kandaro karare ramo mende wara pii nao dee nenge manja naoko piri.
ECC 11:5 Embame enda wane ranjama yaki pingi doko soo nyii nange dopako pyuo Anatumi bange peparae pyuo waso reto yulu pyuo karenge dupwa soo nyii nare ingilyamo.
ECC 11:6 Embena ee doko yangama alemanjipi laparaena wara piri. Dokona ee peparae elya pyuo andara panda mende yangama wara pirinyi doko kwaeyara dee alemanji wara pirinyi doko kapa andara lao see nange.
ECC 12:1 Yuu giipi ee kanape emba rae mai nalyo larene dupwa epapa naramopa emba parange yuu gii lete palu karo dokopa baame emba wasiyamo dokona lao suu pyaro karape.
ECC 12:2 Dokopa apu petenge dupwa kakondo nisa paa naramopa neta rao yanga paupau lenge dupwape dee bui kanape dupwape embena lenge kambu dokona kopa papyuo iminjili lara.
ECC 12:3 Dokopa enakana embena kimbu porai ingilyamo dupwa pyuku laowape embena kingi emba minyaro karamo dolapo walu walu laowape embena nenge dupwa kuki lama iki kararamopa nenge kapa naa nare dee embena lenge doko kopa papyuo iminjeramopa bange dupwa kapa pyuo kanda nare.
ECC 12:4 Embena kale dokome makete yuunya karo pii laraminyi dupwa see nao karo muu laramo dokope laikuli pii laramo dokope kuki iki serenepape emba luu palirinyi dokopa yaka kenane pyaramo dokome lenge pyale rara.
ECC 12:5 Emba kata kore pulyuo dupwana pakapala randa nyuo papyuo embena kyawa doko alowa pipala yaku epo emba ponga ponga papyuo emba wamba karo yulu pyuo nenge nao kata papyuo pelene dusipa mee ingyuo isa para. Namwa kumapala dokopa karalu kararamano panda dokona paramanopa wambu dupwa ee lao kumanda pisirami.
ECC 12:6 Dokopa embena kii puu kulingi doko roko lama ingyara. Dee lambe golome wasisi doko isa paramopa poro lara. Ipwa kamuo nyingi yuwale dokona pee warame wasisi doko puu karo malyapala ipwa kamuo nyingi puu londe doko rokwaramopa pee doko poro lao muu muu pira.
ECC 12:7 Dokopa namwana yongo doko kapu kyuo isa yuu sinjimu dokona para. Imambu lete karenge Anatumi namwa jiyamo doko dee range baa keta para.
ECC 12:8 Akali renge angi dupwana lao suu pingi dokome dopa lao, Peparae mee ingyuo penge. Renge mende pali nalyamo, leya.
SOL 1:1 ...
ISA 1:1 Buku dakeme Juta wambu Jerusaleme paleyami dupwana lao kiŋi Usaya Jotame Easa Esekaya kiŋi yulu pyuo kareyami dokopa Anatumi poropeta Aisaya Emosena ikinyingi keta epo leyamo dokona lasi silyamo.
ISA 1:2 Kamongome lao, Yake yuupa dolapona nambame pii leto doko apa pyuo leene lao serambi, leya. Wane wanakepe nambame manju andanyi pyambwapu dupwame namba yanda pimwailyaminyi.
ISA 1:3 Bulamakaome otange minyingi range ai singi. Dee mena donge dupwame nenge maingi mare doko soo gisingi. Menana yulu doko nyuo isa palyuo Isaraele wambu dupwame namba keta piramili doko kaelyaminyi.
ISA 1:4 Nakama mena kuiyalana pilyaminyi anda epenge dopale ingyuo karaminyi. Nakama yuu dakena wambu dupwa mona pali napyamo koona para pyasi wambu ingyuo pelyaminyi. Embena Isaraele wambunya Kamongo Poo Pyasi Anatu doko embame mata maiyuo kaelene. Koo pilini dokome emba nyuo isa pyakalopyamolamo lao silyu.
ISA 1:5 Isaraele akipamo embame yanda pimwaiyuo puu pelepe. Emba dee kamba yasu kee letepe? Isaraele embena kyawa dorena wua kakupi nyuo pisapala mona suu pingipi dorena kumapyamo karene.
ISA 1:6 Embena yanenge peparae mendasa iki sepa nao kwaelyamo. Mendasa yaki pyuo umbwa pyuo nyisi kara nalyaminyi, leya.
ISA 1:7 Nakamana yuu doko kokwa soo dee taone dupwa lalyasi silyamo. Rara wakale wambu dupwa epo nakamame mee lenge makando pipala kaelyaminyisa epo nakamana yuu nyepakala bange singi dupwa ukiaki minyuo apa nelyaminyi.
ISA 1:8 Jerusaleme yuu taone doko iki yanda pimwai lenge lenge raminyipa ropeta ee kame piro kara nange dokona iso karenge akalinya anda kauwa ingyaro silyamo, leya.
ISA 1:9 Kamongo Porai Wakasa dokome apa pilyaminyi lao kata kandala pena lao laa nayali doko Jerusaleme mende yapa ronge nyii nao yuu Sotoma Gomorapana piyamo dopale ingyuo pupyali.
ISA 1:10 Jerusaleme akali kanjili komiti lowa minyingi dee nakamana wambupi dupwa yuu Sotoma Gomora wambu peteyaminyi dopaleko ingyuo pelyaminyi. Dupwa Kamongome nakama kando apa langilyamo lao selapa. Banya mana letamo dokona doko mende lalyamo lao wangu lakapala selapape.
ISA 1:11 Baame lao dokopa nakamame rendamu pingi namba kaeya nao kiso jilyaminyi dupwana namba kyanyi kandakalene lao suu pilyamipi? letamo. Namba nakamana mena sipisipi dee mee mena bulamakaope akipi keyange kapako namba kiso jilyaminyi dusipana deyako yano pipyamo kara nalyo. Mena sipisipi bulamakao memepena ranjama jilyaminyi dusipa epapu namba nombe nombe petamo.
ISA 1:12 Apimi tembole anda dokona nambana lao kingi wapambupi lakao pisinya dokopa bange dupwa minyakao wamya lyuo ipupwa lao lapyasa epelyape?
ISA 1:13 Nakamame kiso jilyaminyi doko mee ingyuo pelyamo. Nakamana saa yakape kiso jiminyi rendamu dokome namba nyiki nyiki pipyamo karo. Nakamana Satate Kukinyape dee kana enengena nenge malu palyuo nenge nengepe dee malu palyuo andake tembole mitiŋi lengepe dupwa nakamana koo dupwame mendena ketae ingyuo pupyasa soo rae maiyaka nalyo.
ISA 1:14 Dopako pyuo nakamana kana enengena nenge malu palyuo naminyipape dee yuu gii poo pyasi lao nyilyamano laminyipape dupwame namba kenda jimisa selana rae mai nalyo, leya.
ISA 1:15 Embame kingi ketae pyambwapala ateŋa larene dokopa nambame lengeme emba kandalena eeya lara. Ateŋa malu lare panda akipare lare dusipana namba mende saka naro ingilyamo. Renge doko emba kingi ranjamako dokome karo larenesa dokona yaka laka naro ingilyamo.
ISA 1:16 Nakama range wate pyuokondali pipala rolae ingyuo seramo karalapape. Renge koo nakama pipya nambana lenge kambu sipyamo darena silyamo dusipa ramanyi nembapala
ISA 1:17 yulu keyange dupwa mana nyuo pimwali lao pipwape. Kote dokona rolo lalapape. Randa nyilyaminyi dupwa nyisalapape. Wane wanake muiyane enda waiya dupwape bange dupwa nyiso rungi pyapeta sakaminya lao karalapape.
ISA 1:18 Kamongome dopa letamo. Dakepa kwaelyamo dupwana rolo lamanale. Nakama koo dokome ranga yuku napyasa koo pilyaminyi dopa pilyaminyiko doŋo dopa piraminyipape nambame nakamana koo dupwa wate pyuo kewa lanyi nembakaronopa maa bilima kapa ingyuo kewa lao rao karenale. Nakamana koo dupwa kamame pingi pyao silyamo doko kaepala kwuala pao kewa lenale.
ISA 1:19 Nambame laro dokona iki warombo soo pyuo larami ramo doko yuunya ando eparamo amenge kapape doko kapa nao kararami.
ISA 1:20 Kaepala sili nasili lao soo nembo larami ramo wua nenge dokome yasuko nao kumarami lao namba Kamongo dokome dopa lapyaŋa lalapape.
ISA 1:21 Taone mona kare kare mondo lao piyami kande doko epapu pundange lenge kambupi nyiyaminyi. Wamba kandeyo dokopa yulu keyange rolae dokome simbwaro siya. Dopa piyamopape epapu dakepa wambunya ranjama nenge yeelyo karaminyi, leya.
ISA 1:22 Jerusaleme emba wamba kana kulingi kulisa palengena mendekepe dee ipwa waene yapasinya mendeke ingyuope karale kandale doko kaepala dakepa mee mendena ketae ingyuo pelene, leya.
ISA 1:23 Nakamanana lita akali dupwa mendale isa palyili palyili lao waa nyingi dupwana puu kulisa ingilyaminyi. Nakama karena lakaro bange sinya lao diriki pyuo nyuo lao karaminyi. Dopako pyuo dee muiyane wambu enda waiyape dupwana moŋo ipyamo minyuo kotena iminyi dupwa mondo lao lakami nalyaminyi.
ISA 1:24 Dokona lao dakepa Anatu Isaraele wambunya Kamongo Porai Wakasa dokome apa letamo lao selapa. Nambana yanda pimwai dupwa nakamana koo dupwana bekeme pyakaronopa dokona nakamame namba isingi randa dee jeraminde daa lao silyu.
ISA 1:25 Nambame epapu nakama angi pyaro. Nambame nakama akalimi kana kisalamuli pyuo kiso kwaelyamo dupwa nembo wasaronopa angi doko randa dokome lili pyuo yapalyara, leya.
ISA 1:26 Nambame nakama akali kyawa wamba kareyami dopale lapope mende pinya dokopa banya pii sepala piyami dopale lapope wakale jero. Dopa pirunu dokopa Jerusaleme taone doko taone keyange yulu mondo lao piminyi rolae silyamo lao larami ingyara.
ISA 1:27 Kamongo baa rolaena renge palenge dokome koo dupwa koo dupwa kondarami dokopa Jerusaleme doko pyuo elyape keta pisara ingilyamo.
ISA 1:28 Dopa pyuoko dee mendeme baapa yanda pimwairaminyi dupwa minyuo poo poo lao pyanyi reto banya kingi dokona yaki nyeramo wambu doko pyao kumakao pira ingilyamo.
ISA 1:29 Dopa piramo dokopa isako waingi kemali pingi lapo wara pipalape isa renge kemali pingi laponape moname nyinyi nembo kingi lao petenge lamo dupwa yamarangyuo yaki nyuo kaeyarami ingilyamo, leya.
ISA 1:30 Nakama yuu kulisa dokopa kapya waingi ipwa pyaa nalyamo yando nalamuli pyuope ee waingi neta kone dokona ipwa yangyuo yando nalamuli pyuo soo parami, leya.
ISA 1:31 Yuu anda piro singi dokona isare kainyi palyingi dokopa mendeme minyara nange kandale. Doko suu pyao akali ama porai ingyuo karo koo pyuo karaminyi dupwa yulu koo dokome nakama nyuo orambo palyuo kokwa seramo dokopa mendeme nyisalana saka narami.
ISA 2:1 Pii dake Anatumi Juta wambu Jerusaleme paleyami dupwana lao Aisaya Emose ikinyingi doko lamaiya.
ISA 2:2 Yuu gii mende pyaka sera ingilyamo dokopa tembole anda karamo yuu kyau dokome dokopa yuu kyau doloma nyuo isa palyuo sera ingyara. Seramo dokona yuu muu doloma mee kaeya nao ipwa ingyuo kulimbwanyi peeyo epo karalu kararami ingyara.
ISA 2:3 Yuu dupwana wambu dupwame lao dokopa Isaraele wambunya Kamongo Anatunya yuu kyau tembole anda dokona monako lao parami ingyara. Namwa baame apa pimili lao suu pilyamo dokona mana nyuo baame kata parama doko wapwakao otapya dokona pao pimanale. Kamongona mana pii doko yuu Jerusaleme dokona piso epara yuu Sayone dokona piso banya wambu dupwa lamailyamo.
ISA 2:4 Baame yuu muu andake dupwana apiyanda pyuo lao kararami dupwa kooso karena lao rolara. Nakamana wua gela dupwa yanda kaepala yuu apu renge ane isa ingyuo wasarami. Nakamana kaku dupwame kope pyakepenge wua ingyuo wasarami. Yuu muu andake dupwa dee yanda pela pelyamano lao paminyili pyuo paa nao dee yanda pingya mata wara pyuo karo puminyili pyuo paraminde daa.
ISA 2:5 Dakapa Jekopena para piyamo dupwa Kamongona kata yalu pii napala ena pasi silyamo dokona papyuo pyuo karo pimanale ipupwa.
ISA 5:1 Nambana mona retenge dokona suu pyaa. Mona retenge kenane dokome banya girapo ee dokona pyao ranaisa poko pyarowale. Nambana mona dokome banya girapo ee doko yuu mandarena rumbyasi keyange dokona wara pipala karenge
ISA 5:2 Baame kana dupwa nyuo kakondao yuu ape ape pyao pingi. Dopa pipala baame girapo keyange wingi dupwa wara pingi. Baame girapo kingyaramo yuwale dupwa kyaso dee anda kama dululi pipala isaro karara anda doko pipala girapo poo relyape lao isaro karenge. Dopa pipyamopape girapo peparae kau pingi aiyange dupwa lyepa piya.
ISA 5:3 Dokona lao Juta Jerusaleme palenge wambu nakamame namba mende pii napusa pilyape panda girapo ee baame pilyape lao soo kandapala lalapape.
ISA 5:4 Nambame piruli mende kaeyapala namba isa pupunusa pilyape? Dopa pyuo isa paa naronde ramo doko akipamo keyange lyera lao kandaro karapunu kata dokona kau pingi aiyange doko yapo lyilyape?
ISA 5:5 Nambame piru doko dapa pyuo pirunu kandalapale. Doko kame maronge dupwa lalyuo asu pinyi nembapala kame angi suwa menape kame piro karena lao piyu dupwa lalyinyi nembo mena rakaiye wii saape kame lalyuo nyuo pirunupa nao mena gulungalu lao karenale.
ISA 5:6 Ranome ando girapo anamasi minyinya laro lao dokopa pyakepanyi nembo yuu kapu kyuo pii naro. Dopa pingi kandale doko suu pyao nepereke ikyaikyape pulyinya lao piru. Namba kopa dokome apu kata mai nana lao lamairu.
ISA 5:7 Isaraele wambu dupwa Kamongo Porai Wakasana isa girapo ee mendeke ingyuo serenge. Juta wambu dupwa girapo angi baame warapiyamo andenge dopale. Dokome baame nakama keyange pimili lao suu piyamo dokona palyuo pyuo kara napala wambu pungi yando nao kwaeyami. Rolae karamili lao suu piya dokona palya napala mendeme mendali nyuo isa palyalanako suu pyao piyaminyi dokome range mende pyao isa palyingi dokopa kote rolae lakanako lao minyuo pao karenge.
ISA 6:1 Ee kana kiŋi Usaya kumuyamo dokopa Kamongo doko kandeyo. Baa kiŋinya petenge isa dokona mupwa ingyuo peteyamo dokopa banya komau londe dokome tembole anda panda dokona soo simbwaya.
ISA 6:2 Baa peteya dokona lee renge bange lapo karo awali leyaminyi kandeyo. Dusipana mendaki mendaki lao range dokona papake pakinyamange karapa piyamo kareyaminyi kandeyo. Lee renge bange mendaki dokome rangena papake pakinyamange dokona lamame nyuo lenge kambu yambe pyao lamame nyuo yanenge dokona yambe pyao lamame nyuo bii lao pao pipa peyaminyi kandeyo.
ISA 6:3 Nakama range yango sukusa pii lao alowa pyuo lao, Poo pyasi, poo pyasi, poo pyasi, Kamongo Porai Wakasa doko poo pyasi. Banya neta renge yulu dokome yuu muu dupwana soo kapa kapa pinyale leyami.
ISA 6:4 Pii poporambaiye dokome tembole anda doko minyuo pyuku pyuku lapala isare kyau lao rali piya.
ISA 6:5 Dopa piyasa namba kumuo kaeyalyano lao mee kikurenge doko kareyo. Karo suu pyao, Nambame kambunya pii epenge dupwa karo petenge dupwako epenge dokoŋo dee wambu pii koo kambunya lao piso palyuo piminyi dupwa pipya piso palyuo pyuo karenge. Dopa pyuo karapunupape nambana lenge angi dokome Kamongo Porai Wakasa Kiŋi doko angi kandelyo lao suu piyu.
ISA 6:6 Dokopa lenge renge bange dokona mende namba kareyo dokona petakareme isarena kana pyare lasinya kiso maingi dokona isa lengya mende rapo nyiyande minyuo epeya.
ISA 6:7 Epapala isa lengya rao siya dokome nambana kambu dokona warendapala lao dakepa embena koo dupwa pupyamopa nyuo kame sakao kaeyasi silyamo, leya.
ISA 6:8 Enakana Kamongome lalyiyamo siyunupa lao, Api mendali mapanyi nembarope? Apimi mendeme nambana pii minyakao parape? leyamo siyu. Sepala nambame baa lamaiyuo, Namba parowale. Nembena, leyo.
ISA 6:9 Dokopa namba pao wambu dupwa pii dake lamaiyape, leya. Kamame malu soo kararaminyipape angi doko soo rola narami. Kamame malu kando kararaminyipape angi doko apa pipala pilyamo lao angi kando gisapa narami, leya.
ISA 6:10 Lapala namba langyuo, Nakama lengeme kando kaleme soo suu pinginya soo manji nyuo kara narami lao wambu dusipana suu pingi kendanyi nembo kale kata poeyanyi nembo lenge iminjinyi pyambuo karape. Nakama soo manji nyuo karamili mona kapu kyimili dokome namba pyuo nyipuli, leya.
ISA 6:11 Dokopa nambame baa piso soo, Kamongo yuu gii akipare dopale ingyuo serape? leyo. Baame isingi langyuo, Yuu taone andake dupwa kwaeyo alowa pyuo iki sero dee anda dupwa pii karo dee yuu angi doko muiyane ingyuo soo piramo dokopa lalono dopale pira, leya.
ISA 6:12 Nambame wambu dupwa nanesa nembapala yuu doko peparae apa sinya lao piru, leya.
ISA 6:13 Wambu akalisa dokona doloma pena lapala mendaki karo kaeyara ramo doko isa kapya angi doko poko mapu pipala angalu doko yaki nyilyaminyi doloma rapala ralamuli pyuo kokwa soo para. (Isa yanengena kongwalu pii doko Anatumi banya wambu keta yulu enenge pyakamira dokona letamo.)
ISA 7:1 Yuu gii kiŋi Easa Jotamena ikinyingi Usayana kauwange doko Juta wambunya kiŋi yulu pyuo kareyamo dokopa yanda andake sipureya. Siria wambunya kiŋi Oresenepa Isaraele wambunya kiŋi Peka Oremalayana ikinyingi dokopame Jerusaleme pyala epapeyambinyipa kapa ingya nao mee pepe piyambi.
ISA 7:2 Juta wambunya kiŋi dokome siyamo dokopa Siria wambunya ami dupwame Isaraele wambunya yuu dorena pyala epelyaminyi lamo lao sepala kiŋi baa banya wambu pipya pakao minyuo inju ingyuo pyuku pyuku lapala isa kanyinginya peteyami.
ISA 7:3 Dokopa Kamongome Aisaya lamaiyuo, Embena ikinyi Seanjasupi nyepala lanyuo kiŋi Easa karamo dokona puu, leya. Baa ipwa pete dulunya soo suunya minyuo epenge pinjingi dokona komau wasingi dupwa yulu pyuo karenge mare dorena karara kando nyere, leya.
ISA 7:4 Kiŋi doko kando nyepala lenge rao mona seramopa paka nao karena lare, leya. Kiŋi Oresene banya Siria wambu dupwape dee kiŋi Pekana imbu singi dokope mee lyipongona yao isare dopaleŋe paka nalapape, leya.
ISA 7:5 Siria wambupi Isaraele wambupi pipya dee Isaraelena kiŋipi nakambame yulu koo mende pinya lao palyiyami.
ISA 7:6 Nakamame Juta wambu dupwa pyalana pyuo nakama pipa kombani lamana epo role pinya lao lao pakasinyi serapala akali Tapalena ikinyingi doko kiŋi karena lao wasalana lao suu pilyaminyi, leya.
ISA 7:7 Dopa pilyaminyiko doŋo namba doko Kamongo dokome pano lao doo letaminyi dokona pali nara leto, leya.
ISA 7:8 Akipamo dopa letope? Renge doko Siria wambu dupwa Damasakesa wambu taone mupwa doko manda manja nara. Dee Damasakesa doko baa porai ingya naramopa kiŋi Oresene baa poraili ingyuo karamo. Dopa pyuo silyamo dokona Isaraele wambu dupwana lao ee kana 65 paparamo dokopa penge kamba sinya ipwa pele lapala dusa kata serandena minyuo rali pipala yuu liti doko angingyuo see nara, leya.
ISA 7:9 Isaraele baa Samaria wambupa manda daa. Dee Samaria wambu nakama kiŋi Pekana porai dokopa manda manja nalyamoko. Dokona lao embame kapa ingingi lao suu pingi doko ando puu paa nara ramo dokome emba kapa kara nare ingyara, leya.
ISA 7:10 Kamongome dee pii mende Easa keta lamaiya.
ISA 7:11 Doko dopa leya. Embena Kamongo Anatu dokome wambu kumuo penge yuu dorena ingyuowape dee yake ketae dulurena pisowape kongwalu mende pyuo lasaka pinya lao piso sepe, leya.
ISA 7:12 Dokopa Easame isingi lao, Nambame Kamongo Anatu doko dopale pinya lao piso see naro. Dopako pyuo Kamongo doko makande pyuo kanda naro ingilyamo, leya.
ISA 7:13 Aisayame pii dokona kando isingi lao, Kiŋi Dapitinya para pyasi doko embame dakepa mende pyamo lao sepe. Akalimi iki mali soo karo makana lao pilini doko iki kapa daaŋa. Anatu opetaeko mali soo karo makana lao piriko, leya.
ISA 7:14 Dakepa Kamongo baa rangeme emba renge lyakai mende pyuo lasaka piramo doko dopale. Doko enda mapwae mende petamo doko keta wane ingyaramo manjipala dokopa kingi doko Imanuele larami, leya. (Imanuele kingi doko Anatu namwa role pyao karamo dopale.)
ISA 7:15 Wane baa ando mona palyuo range suu pyao pingi mange kandale dokopa wambu dupwa amburali ipwangepe mena anju ipwangepe nao kararami.
ISA 7:16 Yuu gii doko pyaka sepa naramopa akali doo kiŋi lama dolapome emba paka renge jilyambinyi dolapona yuu doko apa nao kwaeyasi sera, leya.
ISA 7:17 Kamongo dokome randa mende nyuo emba embena wambu akalyanda dokona pisara ingilyamo. Randa angi doko wamba Isaraele wambu dupwa paka lakyuo Juta ingyuo peyamipya kande dopale ingya napala wakasale epara. Doko baame Asiria kiŋi doko kame lalyinyi peyara ingilyamo, leya.
ISA 7:18 Dopa piramo mange dokopako Kamongome Isipi wambu dupwa ipwa pona kuki epo Naelena donorena nanesa piso wambena polo epamuli pyuo dee Asiria wambu dupwa amburali polo epamuli pyuo epena lao kongwalu lapo pyuo nyuo peyara, leya.
ISA 7:19 Epo yuu pau lama lama kana pisalya pisana pingi dokonape kana anda imwa isako panda rambipi nepereke kaireke maupi dupwanape epo buu minyinya lao nyuo peyakara, leya.
ISA 7:20 Yuu gii doko pyaka seramo dokopa Kamongome kyawa rokonge akali Asiria kiŋi doko yuu Yuporisa dokona oko soo epena lao kyakale lao nyakaronopa dokome epo nakamana kyawasi angasi dee yongo yamanjipi dusipa roko wapya pyanyi nembakara, leya.
ISA 7:21 Yuu gii doko pyaka seramo dokopa pama akali baa mena bulamakao andanda mendaki mee mena meme lama ingyaramopape
ISA 7:22 anju ipwange soo kaeyo palirasa baa yano pirali dupwana kapa pyuo nao pisirami. Dopa piramopa yuu dokona wambu yaka lengele iki palu kararami dupwame anju ipwange amburali ipwangepe seramo nao pisirami ingyara.
ISA 7:23 Mange dokopa isa girapo puu marange taosande dokona puu wakale wakale manda manjo kana taosandeko nyingi yuu dupwa rano epale soo ikyaikya mamunyipi mau soo kwaeyara, leya.
ISA 7:24 Wambumi dokona pao yanda kakupi soo wii saape pyao nala pao kararami. Kinyi yuu lili doko peparae nepereke kairekepe pulyara, leya.
ISA 7:25 Yuu kyau ee wara pingi dupwa peparaena reke reke isa dupwame ando balo serasa wambu mendepe dusa moko palyuo paa narami, leya. Yuu doko mena sipisipi bulamakaope isako nenge nala pao kararami ingyara, leya.
ISA 8:1 Kamongome namba langyuo, Pepa yoko kameyali mende nyepala dokona pyao pingi kameya ingyuo pyapala pyao palyape. Pii dake, Waiya Lao Kokwa Soo Apa Nenge, pyao palyape.
ISA 8:2 Lapala lao akali angi pirambili purisi Yuraya Sekeraya Jeperekayana ikinyingi dolapome usinisi yulu pinya lare, leya.
ISA 8:3 Yuu gii lapo epo papeyamo dokopa nambana enda doko wane ingiya. Wane manjo nyiyamo dokopa Kamongo dokome langyuo, Banya kingi Waiya Lao Kokwa Soo Apa Nenge lape, leya.
ISA 8:4 Lao dokopa lao, Wane doko ene ando anyi rakane lapa naramo mange dokopa Asiria kiŋi dokome Damasakesa wambu Samaria wambupinya yuu dokona epo pyao andambupi nao pyapala apa nao nyuo parami, leya.
ISA 8:5 Kamongome namba deyako langyuo lao,
ISA 8:6 Wambu dapwa ipwa Sailoa elya kalo epenge doko yaki nyuo kaepala kiŋi Oresene Pekapa kando walu walu lao karaminyi dokona lao
ISA 8:7 namba Kamongo dokome Asiria wambunya kiŋi banya amipi nyinyi peyapala Juta wambu dupwa pyarowale. Namba Kamongo dokome dopa pyuo pyasinya lalopono. Nakamame epo pyao pyaramisa mendepe yapa ronge nyii nao ipwa Yuporisa marongepe mende see nao kama pyao epo penge dopale ingyuo popyamo, leya.
ISA 8:8 Dopa pyuo Juta yuu peparae ipwa lyepala bange peparae yambe pyao epo mange dokona lili pyuo anamasi minyara ingilyamo, leya. Anatu namwa pipya karamo. Banya papake ketae palyuo pee yuu dake kyawa minyara ingilyamo.
ISA 8:9 Yuu muu ree lao palyuo pelene dupwape matasa palaminyi dupwape yanda pirami dokona mata wara pyuo karalapape. Doŋo apa pyuo piramape lao repe repe laowako palyuo pupwape.
ISA 8:10 Rapa rapa pipalape angi pinya laminyi dokona pali nara ingyara. Apa piramape lao nakama nyelana suu pyaraminyi dokona palyuo karaminyipape Anatu baa namwa pipya karara dokome pii larami dupwa mee ingyuo para.
ISA 8:11 Kamongome banya porai renge dokome renge kuiyuo namba repe repe ingyuo langyuo dokopa wambu dupwa pelyaminyi kata dokonako paa napipi, leya.
ISA 8:12 Wambunya mende piramo lao lao retelyaminyipape dee bange lapona paka renge nyilyaminyipape dupwana emba rambe rambe palyuo suu pyaa napipi.
ISA 8:13 Namba Kamongo Porai Wakasa kandale doko emba silini dokoŋo namba poo pyasi ingyuo karoŋo. Namba iki pakao karape, leya.
ISA 8:14 Namba poo pyasi ingyuo puu penge dokona lao kana wambu dupwa pyalya minyapala lukumarami dopale ingyuo saa kone dopale ingyuo karo dokona Juta wambupi Isaraele wambupi Jerusaleme wambupi dupwa minyaro ingilyamo.
ISA 8:15 Wambu soo kaeyo lukumapala pao palirami ingyara. Nakama isa papala rambetaku pyao waa keta palirami ingilyamo.
ISA 8:16 Nakama nambana disaepole dupwame Anatumi banya pii namba keta jiyamo dupwa rakwa pyuo reto minyuo kararami ingilyamo.
ISA 8:17 Kamongo dokome banya wambu pipya nombe nombe pisipyasa lenge kambu nee pyuo karapyamopape namba doko baame mende pyakarakao lao baa keta pyamalyaro kararo.
ISA 8:18 Kamongo baame wambu jiinyi dupwa pipya namba role dae karo. Kamongo Porai Wakasa doko banya kiŋinya petenge isa yuu kyau Sayone dokona sipyamo karamo. Dokome namwa karamano dakepa banya pii doko pano minyuo Isaraele wambu keta pupwa lao nembelyamo.
ISA 8:19 Dopa pyuo paramanopape wambu dupwame nakama kando ropaka pisingi dupwape mali mali sakangepe dupwa keta pii eparamo semanaleŋe piso selapa, larami. Dopa pyuo pisirami dupwa nyuo isa palyawaka imambunya pii lena lao piso soo pisiramiko piso soo dokopa kumuyami kande dupwa nakamame namwa nyisala epena lao larami doko kapaŋa larami ingilyamo.
ISA 8:20 Embame wambu dopale dupwana pii yano pyakamyuo dopa lamairi. Nakama Kamongo Anatumi aki mende mana langyalyamo lao kale yuku selapape. Ropakape pipu lengepe dupwa kale yuku sakami nalapape. Dopale langilyaminyi dokome nakama uki minyara ingilyamo.
ISA 8:21 Wambu peparae yuu dokona suku suku lenge nyuo papyuo dokopa mona kendo lopo parami ingilyamo. Nakamana lopo imbu singipi dokome nakamana Anatu nakamana mee kiŋipi kando koo keta palyuo larami. Nakama yake dorena kandalyuo kandarami.
ISA 8:22 Dokopa yuu dokona apa pipala pilyamo lao lenge lukunyi peyapala mona nembo kandaro serami dokopa mee mende maro laa napala randa dokako maro maro larami. Kandarami dokome nakama paka renge maiyarala soo pao koo dokona nembaramopa koo doko kapa. Wanjarami kata mende sepa nara.
ISA 9:1 Napatalai Sepyulanepa rara dolapona yuu doko wamba randa epeyamo elya nyuo peteyami doko enakana yuu nakamana dorena kapa seramo pisirami. Ipwa Metitaraniane pete silyamo yuu neta pyakaenge ipwa Jotane dumu wangu ingyuo yuu Galili angi sukusa wambu rara wakale range epo palenge dorena ingyuo pyaka sera.
ISA 9:2 Wambu iminjiyamo dokona peteyami dupwa ama yanga paupau leyamo kandeyami. Wambu kumungi renge dokome yambe piyamo peteyami dupwana lao yanga paupau lenge doko pyaka sakamiyaŋa lao palamo.
ISA 9:3 Kamongo embame andake ingi raeme kumunya lao rae mainyi pyambulini. Nakama ee mupwasa doko manjo karo dokopa rae maingi doko suu pyao embame apa pyakamipi dokona rae mailyaminyiko.
ISA 9:4 Mena bulamakaome yulu pinya bange kendande matarena ipyuo penge nakama dopale ingyuo karenge doko neta nyuo kokwa soo nembee. Embame Mitiane ami pyao isa palyinyili pyuo embena wambu yulu andake maiyuo nyuo isa palyuo kareyami yuu lili doko isingi pyao isa palyii kande.
ISA 9:5 Ami nakama pyala epeyaminyi dupwana kimbu suu komau ranjama pareyape dupwa isareme rao otara.
ISA 9:6 Wane mende manjakarami. Ikinyingi doko jera ingilyamo. Doko namwa iso karara. Banya kingi doko Rapu Pingi Nyiso Karenge Elyapiŋi laraminyi karara. Anatu Porai doko, Letena Renge Palenge Rakaneŋe, larami. Kiŋi Mona Kyuu Lao Singinya Ikinyingi, larami.
ISA 9:7 Banya kiŋi yulunya iso karengena porai renge doko ando puu para. Banya isingi panda doko yuu peparae mona kyuu lao soo puu para. Baa kiŋi Dapiti kareyamo alonge dokona karara. Banya porai renge doko rolae angi dokona seramopa rolo lao karo pao yuu gii rengya lumwa piramo dokona ingyara. Anatu Porai Wakasa dokome pii lapyamo dusipana palyuo pinya suu pyalu pyao pilyamo.
ISA 11:1 Kiŋi Dapitinya kiŋi yulu alonge dokona banya rara dokona mende pulyara. Doko isa pokwasi renge dokona angalu pyakalyingi dopale ingyara.
ISA 11:2 Anatunya Imambu dokome baa mona palenge singinya renge soo gisinginya rengepe mora petengena rengepe baa keta mairamopa baame banya wambu dupwa iso karara. Baame Anatumi dopa pipyali lao suu pyaramo dupwana soo gisapala baa ketae pyambuo kararamopa
ISA 11:3 banya yulu dupwa rae maiyuo pira. Baame yanengena ketae kandapalape lasi pii iki soope kote laa nara ingyara.
ISA 11:4 Baame pendewa dupwa angi rolae dokonako palyuo lao rolara. Baame range kapa nyiso laa naramili dupwana rolae pingi renge dupwa kame see nao paka pyao sakamyuo lara. Banya laramo dokona palyuo wambu dupwa moŋo maiyuo koo pingi dupwa kumuo pirami.
ISA 11:5 Baame banya wambu dupwa pipya rolo ingyuo paramopa lao mona angi palenge ingyuo iso karara ingilyamo.
ISA 11:6 Yana suwa kararope dee mena sipisipipi mendakinya mona seramo piso karo pirami. Mena lepete dupwa mena meme ene dupwa pipya mendare palyuo serami ingyara. Bulamakao ikyane mena laene ikyanepe pipa pakao nenge nao kararami. Dokopa wane wanakepeme rapu pyuo kararami.
ISA 11:7 Mena beya bulamakaope nenge role pyao nao kararaminyipa nakamana yakane dupwa mendakinya mona seramopa palyuo serami. Mena laene dupwame rambi yando mena bulamakaome nengenyili pyuo narami.
ISA 11:8 Dopako pyuo wane wanakepe kau kyalende sera mare dokona nyuo male laraminyipape nao kumaka nara ingyara.
ISA 11:9 Yuu Sayone Anatunya yuu kyau poo pyasi dokona randape Satane yulupi sepa nara ingyara. Ipwa kota soo simbuo eparamo dokonako palyuo yuu dokona Anatunya soo nyinginya renge dokome soo simbuo rangu para.
ISA 28:1 Isaraele wambunya kiŋi yulu doko mee ketae yanengena mamba kyaa pingi ingyapala lita wambu biya napala karele lao kyaŋe soo kumasinya mendeke ingyuo silyamo dokona pyao kokwa serami ingilyamo.
ISA 28:2 Kamongo doko akali mende eneko porakai nakama nyuo kwuinya palyuo suu pyao karamo. Baa eparamo dokopa apu romende randake kapa pale pale epo pyalamo dopale ingyuo yuu doko kewaipimi anda lalyuo nyili lapala ipwa kama pyao isa kanape manjo pyalamuli pyuo pyara ingilyamo.
ISA 28:3 Akali kyawa dupwame kyaŋe soo kumasi ingyuo pyuo karaminyi dupwa mee rambetaku pyao kimbumi nara ingilyamo.
ISA 28:4 Akali kyawa kyaŋe singi dupwa bange nakama kamonganyi pyambulyamo dupwa ropeta suwanyi panasi waneme lyuo nelyamosa dee pana nange dopale ingyuo parami ingilyamo.
ISA 28:5 Yuu gii mende ene pyaka sera dokopa Kamongo Porai Wakasa doko banya wambu pyao wapu lasi dupwana kyawa rarange kalya pisi doko dopale ingyara.
ISA 28:6 Baame kote serami akali dupwa suu pingi keyange maiyuo yanda pimwai taone kame kambu repeta eparami dupwa makembo kararami dupwa nakamana mona porainyi pyambwakamira.
ISA 28:7 Poropeta purisipi dupwa opetae biya napala rolo papi nalyaminyi. Nakama ipwa waene soo kaeyo napala lukumapala angi rolae doko kanda nalyaminyi. Dopa pipala poropeta dupwa Anatumi pii repa repa pyuo lapo lapyamo dupwape dee purisi dupwana renge lapo ipyamo dupwa apa pipala epelyape lao kandalana saka nalyaminyi.
ISA 28:8 Taepo dupwa miku yusoro karapyasa mee mendasa au pyuo see nalyamo.
ISA 28:9 Nambapa kando suku lao dopa letaminyi. Baame akali api mana letoŋo lao letase? letaminyi. Apimi banya pii doko yano pipyamo karase? Wane ene anju pyakasi dupwa serami ingilyamo.
ISA 28:10 Baame namwa pepa kimbu dokonape liti dokonape liti pyuo mana langyuo dee renge dokona wamendo mana langipuli lao langilyamo, letaminyi.
ISA 28:11 Dokona nakamame nambana pii see narami ramo doko Anatumi wambu wakale pii wakale lenge lapo nyepala pii kanda nange mende mana langinya laramopa dokona renge mende mana nyerami ingilyamo.
ISA 28:12 Baame nakama peparae imambu selapa lao mona minyarambu piyamopa nakamame selana makayami.
ISA 28:13 Dokona lao Kamongome nakama pepa kimbu litipi renge angi dokope liti pyuo mana langira ingilyamo. Dopa piramopape yulu peparae nyere kata dupwana emba pyalya minyaramo pao paliri ingilyamo. Emba ranjama nyuo pyaraminyipa apa pipala pilyamo lao sepa narenepa kiimbapala karapusi anda minyuo para ingyara.
ISA 28:14 Dakepa nakama akali mupwa yuu Jerusaleme iso karaminyi moŋokyaŋe singi dupwa Kamongome letamo doko apa letamo lao selapa.
ISA 28:15 Nakamame kumungi renge dokopa wato lao kana minyamaŋa kuma narami lao rangena kingi dokona lakanda minya minya pyuo lao karaminyi. Nakama kyambo doko kinyi inginyi pyambuo lao nakama mee kyawa minyuo lete karamwali aiya lao lao karamisa pilyamo. Dokona randa eparamo dokopa kapa wanja narama ingilyamo, letaminyi.
ISA 28:16 Dokona lao Kamongo Mupwa Andake Wakasa dokome dakepa dopa letamo. Nambame yuu Sayone dokona kana mende pinginya ingyuo pisirunupa pyuku laa nara letamo. Kana keyangepe mee lao makande pyuo kando otasi kana doko kulisa wakasa. Yuu donge dokona pinginya pyano mupwa ingyuo karara. Mende kana dokona pepa pyasi palira kapa ingingi lao pyamalyapala mona maiyuo kararamo doko mee porai ingyaramo mali sero karara.
ISA 28:17 Lao rolenge renge dupwa kanda soo pinginya pinya makande pingi dopale. Panga soo kyambo laa nange renge doko roya karo makande pingi dopale. Dopa piramopape apunda randake kapa epapala kyambona renge nakama angi mende lakalyamo lao minyuo petaminyi dupwa pyao soo kaki pira ingilyamo. Ipwa palipala nakamana kapa mondo lao karamano lao suu pingi renge doko kokwa sinyi nembara.
ISA 30:1 Kamongome dopa letamo. Akali lapo yuu Juta iso karaminyi dupwa nambamoo kamba lao mata joo karaminyi dokona nakama kokwa soo nembaro ingilyamo. Nambame kata lapo waso reta nayono dupwana nakamame papala rara wakale dupwa pipya pii palyuo lao nambamoo leyono dupwana isa palyiyami. Yulu koo wambo piyaminyi dupwana kamba ketae pukwai pyuo pyuoko pelyaminyi.
ISA 30:2 Nakama namba kando apa pirama lao langyalase lao piso see napala yuu Isipi range dupwame nyisinya lao pumi. Nakama Isipi range dupwame kyawa lete nyinya lao suu pyami. Dokona nakamame Isipi kiŋi doko keta mona mailyaminyi.
ISA 30:3 Dopa piraminyipape kiŋi dokome porainya kapa pyuo pali naramopa nyisalana saka nara. Dee Isipi wambumi nakama kyawa minyarami lao suu pyaraminyipape randa andake nakama keta epo palira.
ISA 30:4 Dokopa gapomane akali lapo yuu Isipi wambunya yuu taone Soane Anesapana epo pyaka sepaminyipape
ISA 30:5 wambu dupwame nakama angi nyisa narami dupwa keta mona maiminyi dokome Juu wambu dupwa mona rando kando kararami. Juu wambu dupwame rara mendeme nakama nyisakamili lao suu pyaraminyi dupwame nyisalana yakara pira.
ISA 30:6 Anatunya pii dake yuu muiyane penda penda donorena palenge suwa menape dupwana lao letamo. Gapomane akali nakamana yuu dokona lao yuu wakale dupwana lamaila penge dupwa yuu koo randa singi mena laenepe kau wambu pingipi kau pambeya bii lao pengepe dupwa soo male lenge kata yuupi dokona pelyaminyi. Nakamana mena dongepe mena kamelepe mata dupwana kana malu nembo nyingi bange malu retapala rara dolomame nyisaramiŋi lao mailana lao pelyaminyi. Dopa piraminyipape wambu dupwame nakama angi mende nyisa narami ingilyamo.
ISA 30:7 Isipi wambu dupwame nyisaminyi doko kapa ingya napya. Dokona Isipi baa kingi wakale lapu doko Kau Pambeya Angi Dokome Wambu Pyalana Saka Nange dopaleŋe lapu.
ISA 30:8 Anatumi namba langyuo, Wambu dupwa apa pyuo karaminyi lao pepana pyao reta, leya. Dokona lao wambu dupwa koo pilyaminyi dokona pii doko angingyuo sulu sera, leya.
ISA 30:9 Nakamame yuu peparae Anatu kyambo lao banya mana pii dupwana mondo lao see nao kamba lao mata maiyuo karenge.
ISA 30:10 Nakamame poropeta akali dupwa pii laa kaena lao pyalana pingi. Dopa pipala nakamame lao, Yulu rolae dupwana lao namwa langya kaena lenge. Lapala, Namwa mende rae maiyuo selana suu pilyamano dupwa langinya lenge. Namwame bange angi kapa pali nara doko mee rae maipala mende pira lapala suu pilyamano doko minyaro karalapa lena, lenge.
ISA 30:11 Namwana kata doko rokwaka napala namwana kata dokona kakondo karalapape. Isaraele wambunya Anatu Poo Pyasi dokona lao laraminyi selana lao suu pyaa nalyamano, lenge.
ISA 30:12 Dopa laminyipape Isaraele wambunya Anatu poo pyasi dokome dopa letamo. Nakama nambame lapu doko sili see nale lapala apiyanda pyuo pii angi dokona palyuo laa nao minyoko pyuo piminyi dupwame nakama nyisaraŋa lao suu pilyaminyi.
ISA 30:13 Nakama kopetame pilyaminyi. Nakama kana kame andake lano poro laro karenge dopale ingyapala nakama aopa kulimbuo kalimbuo minyuo isa parami ingilyamo.
ISA 30:14 Nakama pee warame wasisi poro lenge dopale ingyuo poro lao muu muu pirami. Ama kopetame poro laramopa kuki mendeme isare pee nyuo nembarami laope panda ipwa kamuo nyerami laope see nara.
ISA 30:15 Kamongo Mupwa Andake Wakasa Isaraele wambunya Anatu poo pyasi dokome wambu dupwa lamaiyuo lao, Nakama kapu kyuo epo kui lao namba keta pyamalyuo karalapa. Dokopa nakama porai ingyuo randa dupwana kapa namba alya minyapala kararami. Dopa pipwa lapunupape nakama dopa pinya kamba letaminyi, letamo.
ISA 30:16 Nakamame namba keta pyamalyeramili doko kaepala nakamana mena ose kata makandenge dupwa nyepala piso pao nakamana yanda pimwai dupwa wanjinyi nembarama lao suu pyao rapa rapa pilyaminyi. Doko nakama wanjinyi nembaramaŋa lao suu pilyaminyi doko rolaeko doŋo nakamana mena ose dupwa kapa puu lao makandenge lao suu pilyaminyi. Dopa pyuo suu pyaminyipape wambu lapome nakama minyaro nyuo pyala eparaminyi dupwa kamame puu wakasa lao makandarami.
ISA 30:17 Yanda pimwai yanda singi mendaki iki kandapala dokopa nakama dokona wambu taosande pako makando parami. Yanda singi kingi paki eparaminyi dusipa kandapala nakama peparae pako makando parami ingilyamo. Nakama dupwana mendale kara naraminyipa komau palake yukungi isa doko iki yuu kyau dokona pero karara, Kamongome letamo.
ISA 30:18 Dopa piraminyipape Kamongome sakame kumuo nakama nyisalana lao isaro karamo. Kamongo baame yuu peparae anjuku rolae lao dokonako pingi dokome nakama kando kondome kumuo nyisalana suu pyao rapa rapa pisi karamo. Kamongo kapa ingingi lao suu pyao mona pyamalyapala karaminyi wambu dupwa rae maiyuo parami ingilyamo.
ISA 31:1 Nakama yuu Isipi nyisinya lao pelyaminyi dupwa kumuo rumbyuo parami. Nakama Isipi yanda singi malu porai renge palengepe mena osepe mena ose ipyuo papingi uliulipi yanda singi dupwape kandapala nyisaramiŋi lao suu pyao mona maiyuo pelyaminyi. Dopa pipala Isaraelena Kamongo Anatu poo pyasi dokome nyisaramo kararama lao pyamalyuo paope dee baame nyisinya lao piso soope pii nalyaminyi.
ISA 31:2 Baa akinde pilyu lao doko range singi. Sepala baame randa dupwa peenge. Peyapala wambu koo pingi dupwape dee wambu lapome koo dokona nyisingipi dupwa keta randa mailana lao rapa rapa pingi doko maipala kaenge.
ISA 31:3 Isipi wambu dupwa nakama anatunde daa. Nakama mee wambu dokoreko. Nakamana mena ose dupwa imambu palengende daa. Anatumi lenge angimi kandaramo dokopa wambu rara porai dupwa kalyuo sinjimu ingyuo nakamame wambu rara porai daa nyisiyami dupwa opetae isa palyara. Dopa pipala dolapo laparae pyao kokwa sinyi nembara.
ISA 31:4 Kamongome namba langyuo lao, Mena sipisipi rapu pingi akali dupwame pii poraiyuo lao ala laraminyipape mena laene dokome mena pyasi doko yaki nyuo pena lao mona pakanyi pyambuo ralinyi nemba narami ingilyamo. Doko suu pyao namba Kamongo Porai Wakasa dokome yuu kyau Sayone doko kyawa minyaroŋo lao laro dokopa mendemepe kata rokwa nara ingilyamo.
ISA 31:5 Yakame banya anda dokona yakane dupwa kupyaro soo rapu pelamuli pyuo namba Kamongo Porai Wakasa dokome Jerusaleme reto yaki nyii nao range kupyaro sero.
ISA 31:6 Kamongome lao, Isaraele wambu dupwa nakamame namba kando koo pipala namba mata rukyuo pilyaminyi. Dopa pilyaminyiko doŋo epapu namba karo dokona range kapu kyuo ipupwape.
ISA 31:7 Yuu gii mende epara ingilyamo. Dokopa nakama peparaeme kana golomepe kana kulingimipi yulu koo bange anatuŋu lao kingimi wasiyaminyi dupwa nembarami.
ISA 31:8 Asiria wambu dupwa yanda pipala yandana kokwa soo koo keta palyuo paraminyipa mee akalinya porainya renge mendeme pyaraminde daa. Dokopa Asiria akali dupwa yandana pako pyako paraminyipa nakamana wane parange dupwa karapusi ingyuo kendemande yulu pyakamyuo kararami.
ISA 31:9 Nakamana kiŋi doko pako yamarangupala pyako para. Dokopa akali ami mupwa dupwa ama wakasa pakapala yanda pela pao dokopa minyuo penge komau palake dupwa kame soo yaki nyepala parami. Kamongo Jerusaleme dokona misi lao lakandenge dokona isare rao karelyamopa mena pyao kiso maingi, Kamongo dokome leya.
ISA 32:1 Yuu mendepa kiŋi mona angi palenge mendeme rolae pyuo iso dee mee wambunya lita akali dupwame yulu rolo pyuo kararami.
ISA 32:2 Nakama mendaki mendaki lao dupwa yuu penda penda dokona raiya minyuo neta rao randa piramo dokopa kananda dokona yalu pingi dopale ingyuo dee porambaiye eparamopa mendena pao alya minyingi dopakale ingyuo parami. Nakama yuu muiyanena ipwa epo penge dopakale ingyuo dee yuu ee nengepe jingi lyuo anda nange dupwana kana londe lapo petenge dokona rau lenge dopale ingyuo parami.
ISA 32:3 Nakama wambu yango bange aeya naramo kararami dupwa nyisalana lao lenge rao dee kale lumbuo soo pyuo kararami.
ISA 32:4 Nakama mee langa puu pae lao pii narami ingilyamo. Nakama soo giso yulu pyuo dopa lao letoŋo lao renge angi doko soo larami ingilyamo.
ISA 32:5 Wambu mendeme kopyali ingyuo karenge doko lakanda minya minya pyuo kara naope panda arasekolo akali doko angi kinyinya lenge ingyuo karamo lao laa naramiko.
ISA 32:6 Wambu kopyali dokome pii kopyaliko dupwana palyuo lapala yulu koo dupwanako suu pyara pyara pyuo pira ingingi. Baame yulu pyuope pii laope Kamongopa kilya kando lapala baame wambu lopo karenge nenge mai nao dee wambu ipwa nano karo pingi dupwa mai naoko pingi.
ISA 32:7 Wambu mona pali nange kopyali dokome yulu kopetame dupwako pingi. Baame wambu pendewa dupwa kando kyambo panga soo pii lapo lamaipala koo ingyuo kokwa sinyi nembalana lao pyuo dee bange angi rolae nyeramili dupwa nyii nana lao kata rokwamingi.
ISA 32:8 Dopa pilyaminyipape akali angili dokome panga see nao angi kinyi lao rolae doko anjuku lao dokona yaki nyii nao poraiyuo pyuo karenge.
ISA 32:9 Nakama enda dupwa enyana soo manda rao awa awa pyuo piso nakama keta mona randange renge mende pali nange dupwa apa letene lao selapape.
ISA 32:10 Dakepa nakama sikya pipyamo pisiminyipape dakepa ee kana dumbinya nakama isa girapo jingi lyuo nyerami ingya narasa yangyaramo kararami ingilyamo.
ISA 32:11 Wamba nakama randa epa napyamo awa awa pyuo koo soo piso karo pimi kandapi dupwa dakepa pakame kumuo walu walu lao karo nakamana komau rokwanyi nembapala mee asingi dupwame kanya romba dupwana bole bale lapala karalapape.
ISA 32:12 Nakamana ee yuupi amenge pingi dupwa dee isa girapo eepe paleta kokwa soo pao ikyaikya neperekepe nambana wambunya yuu dokona andelyamo dokona nakama kondome kumuo kyangali kingi rangome pyao pyao pyuo karalapape.
ISA 32:13 Wamba dokopa nakamana anda dee yuu taonepe rae maingi rengeme simbwayamo mona kyaka palyuo wambu paleyami kande dokona suu pyao ee lalapape.
ISA 32:14 Dokonako ingyuo kamame kiŋinya anda doko kame soo yaki nyuo kaeyapala yuu taone kyawa doko kame soo kaeyara. Dee anda dupwape dokona bange porai nee pyuo iso karenge dupwape peparae momo nao para. Mena donge rae lenge dupwa dokona mee langarale papyuo kararaminyipa mena sipisipi dupwame dokona rambe isoko andaramo narami.
ISA 32:15 Dopa piramopape Anatumi banya Imambu doko dee namwa keta mapanyi peyara. Yuu kwaeyo mee soo paramo dupwa amenge pira. Dee ee yuu dupwa nenge jingi angi mupwa dupwa ando palira.
ISA 32:16 Yuu dupwa peparaena kapa kapa pyuo wambu peparaeme rolae doko anjuku lao pyuo dee kote pii soo rolo pirami.
ISA 32:17 Doko wambu dupwa peparaeme yulu rolae doko anjuku lao pirami dokome mona kyuu lao seramopa koo keta pali nao karalu kararami.
ISA 32:18 Anatunya wambu mona nemba nao nakamana anda dupwana mona seramopa koo dupwa sukusa nyepa nao piso karo pirami ingingi.
ISA 32:19 (Dopa piramopape imwa dokona randake kapame pyaramo dokopa taone andake doko lalyuo sipirape pinyi nembarami.)
ISA 32:20 Ee nengepe dupwa rombe lao andaramopa yuu peparaena mena donge mena bulamakaope rambi nao koo soo ando kararaminyipa wambu peparae rae maiyuo kararami ingilyamo.
ISA 33:1 Namwana yanda pimwai dupwa nyuo anamasi minyaraŋa. Wambu wakale dupwame nakama pyao anda yuupi yanga nayaminyipape nakamame pyao anda yuupi yangeyami. Pyapala anda yuupi yangapala nakama randa nyerami yuu gii epara lao mona rando parami.
ISA 33:2 Kamongo embame mende piri lao soo karamano dokona namwa kando sakame kumuo karape. Namwa yangaramo yaka lao nyiso randa eparamo gii dokopa kyawa minyuo karape.
ISA 33:3 Embame namwana lao yanda pyakarene dokopa yuu muu andake dupwana wambu wakale dupwa yanda keparoko doko sepala mee paka parami ingilyamo.
ISA 33:4 Nakamana pinji andape dupwa waiya lao epo nyuo arete pirami ingilyamo.
ISA 33:5 Kamongome bange wambupi peparae iso karenge dokona baa apa pyuo wakasa lao see narami. Baame Jerusaleme dokona akali pii angi lao mona palyuo rolae pingipi dee rolo angi dokoko lengepe dupwame simbwaro karena lara.
ISA 33:6 Dopa pyuo simbunya lapala wambu peparae porai ingyuo kame piru karena lara. Baame banya wambu dupwa kyawa minyapala mona angi palyuo singinya renge soo nyinginya rengepe maingi. Nakamana bange kulisa andake ingyuo retenge doko Kamongo baa wakasa lao suu pingi doko retenge.
ISA 33:7 Akali paka nange dupwame nyisinya lao kyakale letaminyi. Pii lakala pena lenge akali dupwa koo pyuku pyuku penge renge minyuo epena saka napala ee ramu ramu pyuo letaminyi.
ISA 33:8 Kata andake jima jima dupwana yulu moŋo sipyasa wambu dokona papi nalyaminyi. Pyaso mendaki ingyarama lao wato lenge makande dokona waingi pyao minya nalyaminyi. Yulu dupwa kulimbuo dopa pyuo piramaŋa lao mona mendaki palyuo larami dupwa waingi pyao minya nalyaminyi. Dee yango mendena kingi dupwa ketae pyambwa nao kwuanyi nembo pilyaminyi.
ISA 33:9 Yuu doko mee sinya lao yaki nyuo pelyaminyi. Lepanone imwa andake dokona isa yoko dupwa kope kape lapyamopa yuu Sarone amenge pingi rapu doko pao penda penda ingilyamopa yuu Besane yuu kyau Kamele dolapona isa yoko panda dupwa kirali pao kwaelyamo.
ISA 33:10 Kamongome wambu yuu liti wakale wakale dupwa lamaiyuo, Namba dakepa sipuraroŋo nambana porai renge palenge lao lasaka piroŋo kandalapale, letamo.
ISA 33:11 Nakama dopa pyuonde pimana lami dupwa angi ingya nao para dupwana mee kekenge pii lamisa isare dopale ingyuo nakama range kokwa silyamo.
ISA 33:12 Nakama nepereke karenge doko isareme kingi naso ralamuli pyuowape dee kana doko isareme rao lakao ranapala mee isare pee ingyuo isa puu pao parami.
ISA 33:13 Wambu repeta palenge dupwape nanesa dupwape nambame piyunu pii raiya dupwa sepala namba porainya renge palenge lao soo gisirami.
ISA 33:14 Sayone range wambu dupwa yulu koo pinya wangu lakange pako walu walu lao karo lao, Anatunya kote lao rolenge dokome isare ingyuo rao karalu karara dokona namwa apa pyuo lete kararama?
ISA 33:15 Lete karalana ramo doko rolae doko anjuku lao pirami. Nakama pendewa dupwa kando panga soo ilimungu kalimungu lao bange nyakami narami. Dopa pyuo kunji pyuo kana nakami nalapape. Nakamame wambu pyao kumakalana pingipi yulu koo wakale wakale pinya pingipi pipya role pyao kara nalapape.
ISA 33:16 Dopale karaminyi dokome yuu kyau dokona anda porai karenge dopale ingyuo au pyuo kararami dokopa nakamana yuu dokona nenge ipwape seramuli pyuo nao palu karalu kararami ingilyamo.
ISA 33:17 Dopako pyuo kiŋi mendeme banya iso karenge yuu kata luna dusipana suu laro karo nanesa keyange ingyuo ando nyimbara dusipana iso kararamo kandarami.
ISA 33:18 Nakama mende pakao karaminyi doko yuu wakale range dupwame kana takisi nyakayaminyi dupwape yalu pyuo yuu pandape kandanyi lyakala epenge akali dupwape mee kombeyame ingyuo para.
ISA 33:19 Nakama kyaŋe singi wambu yuu nanesa range pii wakale lenge dupwana mende dee lenge kambu kanda narami.
ISA 33:20 Sayone yuu taone andake namwana misi lenge dokona pati lao kalya makandope pyuo pingi doko kandalapa. Jerusaleme doko randa see nange ingyaraŋa dokona yuu palu palenge ingyuo sera ingilyamo doko kandalapa. Yuu doko komau anda kana ingyaro karenge dopale ingyuo dee pinginya isa anda simu pyao minyaro karenge dopale dee banya puu doko porai rokwa nange dopalepe ingyuo sera.
ISA 33:21 Kamongome banya neta renge yulu doko namwa lasaka pira ingilyamo. Namwa ipwa kameya ruŋupaŋu pyuo epengepe ipwa pona kukipi repeta palyuo kararama ingilyamo. Dopa piramanopape yanda pimwai sipu dupwa minyuo repeta epa narami.
ISA 33:22 Ipwa sipunya komau porambaiye nyingi dupwa kaolena saka narami dokona komau rongo pipala mee serarami.
ISA 33:23 Ami yanda pimwai dupwana mena bangepe dupwa namwame nyuo soo parama ingilyamo. Mena bangepe ama malu seramosa kata papya nange wambu dupwame soo kaeyo seramo dokona nyerami ingilyamo. Kamongo baa range namwana kiŋi mupwa ingyuo namwa kyawa minyuo iso karara.
ISA 33:24 Dee namwana yuu dokona palirami dupwa peparae anga pilyamo lao mumu laa narami ingyara. Dee koo peparae nyuo kame sisi sera.
ISA 35:1 Yuu bange anda nange muiyane doko rae wakasa maira. Yuu dopale dokona kalya pingi isa dupwa jingi lyuo rao karara.
ISA 35:2 Yuu bange anda nange doko yuu kyau Lepanone au piyamuli pyuo rae maipala kenane poraiyuo pyara. Yuu Kamele amenge pinginyili pyuo yuu muiyane doko seramopa wambu peparaeme Anatunya porai rengepe neta rengepe yulu wakasape doko angi kandarami.
ISA 35:3 Kingi kondelyamo dupwape dee kimbu walu lenge dupwape porainyi pyambuo karalapape.
ISA 35:4 Wambu yamarangyuo yaki nyelana pilyaminyi dupwa dopa lamaiyuo, Anatumi nakamana yanda pimwai dupwa isingi moŋo maiyakala epana pilyamo dokona paka nana, lamai.
ISA 35:5 Lenge koo dupwa lenge rao kando kalepoe dupwa pii soo pirami.
ISA 35:6 Papae rambungi dupwa sipurapala malya pyao pii laa nange dupwa rae maiyuo kyakale lao pirami. Yuu muiyane yando dokona ipwa lyuo para.
ISA 35:7 Yuu kee netame kana ingyuo rao alyingi dokona ipwa pete sera. Yuu oo lasi dupwana ipwa renge palyuo guu lara. Yuu koo yana suwa kararope palyuo kareyaminyi dokona maimbupaka pulyuo pyuo karara.
ISA 35:8 Yuu dokona aewae kata ingyuo wasaramopa kingi Poo Pyasi Kata laraminyipa koo pingi dupwa kata dokona papya narami ingyara. Kopyali minyingi dupwame kata dokona paa narami ingyara.
ISA 35:9 Mena nalana pingi dee mena laenepe dupwa kata dokona papya naraminyipa Anatumi kiiramo nyisi wambu dupwa iki anda kata dokona parami.
ISA 35:10 Nakama rae maiyuo Jerusaleme kando nyuo dokopa kenane poraiyuo pyao rae maiyuo parami. Saka rengepe mona randange rengepe dupwa nakama keta epa naramopa rae maiyuo karalu kararami.
ISA 40:1 Namwana Anatumi lao, Nambana wambu dupwa nyisakao mona minyarambu karape, letamo.
ISA 40:2 Jerusaleme wambu dupwa nyiso mona porainyi pyambuo karape. Nakama lamaiyuo, Randa doko yuu andarele kapa napelyaminyi. Epapu nakamana koo dupwa kame sisi silyamo, lao lamaipi. Doko nambame nakamana yulu koo dupwana manda manjo randa doko maiyuo kaepu.
ISA 40:3 Pii mende dopa lao kyakale lao, Kamongona kata mende yuu muiyane dokona mondo lao retakamipape. Yuu nenge anda nange muiyane dokona namwana Anatunya kata doko wapuo rolae pyuo karalapape, letamo.
ISA 40:4 Yuu oko dupwa peparae pyao rolena. Dopa pipala yuu kyau andakepe kukipi dupwa peparae pyao panda lama lama inginya. Dee yuu koo kyau pyalya pyana pingi dupwa rambi kwuasi sera.
ISA 40:5 Dokopa Kamongona neta renge yulu maro lao panara. Dokopa wambu peparaeme kandarami. Doko Kamongo baa rangeme dake lalu lao lao kaeyamo dokona pira.
ISA 40:6 Pii mende ketae palyuo lao, Wai pii mende lamaila puu, lapya. Lapyamosa aki wai pii mende nambame lamairusi lao piso sipu. Dokopa lao, Wambu peparae makwa isa ingyuo karo kuku pyaraminde daa letamo. Jingi bui renge dupwa yuu gii mendasipa iki au pipala loo lenge kandale.
ISA 40:7 Kamongome poo raiya dupwa ketae minyinya lao pelyamosa isako dupwa yando napala isa jingi dupwa loo lao isa penge. Wambu dupwa isako manda manjo waiya lao otarami.
ISA 40:8 Doko suu pyao wambu dupwa mee dokona mendeke ingyuo karaminyi pilyamo. Kamongona pii doko mee isa sulu sera letamo.
ISA 40:9 Jerusaleme, yuu kyau ketae dokona pulyuo papala waili pii keyange doko lamaipi. Pii ketae palyuo kee lao, Sayone wambu dupwa waili pii keyange doko lamai. Dopa pyuo lao papyuo paka napipi. Yuu Juta taone wambu dupwa lamaiyuo, Nakamana Anatu doko epelyamoŋo, lao lape.
ISA 40:10 Kamongo Mupwa Andake Wakasa dokome porainya renge palyuo banya wambu dupwa iso karala epelyamo. Epo dokopa banya wambu kiiramo nyiyamo dupwa role pyapeta lanyuo epelyamo.
ISA 40:11 Baame banya mena sipisipi dupwa sipisipi rapu pingi akalimi pyamuli pyuo mondo lao rapu pira. Baame mena sipisipi yakane dupwa nyuo pyasepala banya kingi kalengena reto kupyuo lanyuo papira. Baame sipisipi yakane dupwana endangi dupwa anjiki pyuo laminyuo para.
ISA 40:12 Mendalimi ipwa kota pete doko nyuo kingi kapena retapala makande pyuope panda yake dulu kingi dokome makande pyuo pira ingilyase? Mendeme yuu dakena yuu dupwa pee kapona pyambwapala minyara ingilyase? Panda yuu kyau kuki epengepe dupwa nyuo makande pyuo sikyali pirase?
ISA 40:13 Api mendeme Kamongona suu pingi dokona serase? Api mendeme baa kando dopa pyuo pipingi mana laramopa pirase?
ISA 40:14 Apimoo pipya Anatu saka nalyasa dopa pipala pirama ramo kapa ingyara lao wato lao petengese?
ISA 40:15 Kamongona lenge kambu dokona wambu yuu muu liti andakena petaminyi dupwa mee kuki ingingi. Nakamame Kamongome kandapyamo dokopa ipwa goe mendaki dopale ingyuo penge. Yuu kuki ipwa kota nanesa singi dupwa banya lenge kambu dokona mee sinjimu yaepa dopale ingingi.
ISA 40:16 Yuu Lepanone imwa dokona mena karaminyi dupwa peparae Anatu pyao kiso mairaminyi kapa pii nara ingilyamo. Dee isa malu dokona karamo dokome kapa pyuo waiyuo isare kisa narami ingilyamo.
ISA 40:17 Yuu muu peparaena wambu malu petamano lao suu pilyaminyi dupwa Anatunya lenge kambu dokona angi mende daa ingilyamo.
ISA 40:18 Api mendeme Anatupa manda manjo larase? Apa pyuo embame baa apiyakalende lao polo larese?
ISA 40:19 Yulu pingi akali dupwame mee bange anatuŋu lao kingimi waso kana golome yambe pyuo rate kuki kana kulingimi wasingi dokona ketae retenge dopalende daa.
ISA 40:20 Akali mendeme kana kulingipi kana golope dupwa kapa ropo pyara ingya nange dokopa isa kwaeya nara lapo kando nyerami. Nyepala baame akali lapo kando mora piso wambu ingyuo wasingi mende koto nyepala akali ingyuo rolae pisapenge doko wasakana larami.
ISA 40:21 Emba see nangese? Emba yuu wamba langya nayamisi? Emba yuu doko apa pipala kanda siya lao see nangese?
ISA 40:22 Baa isa yuu dokona ketaepe yake dulunya pena banya petenge isa dokona petenge dokome wasiya. Wambu isa palaminyi dupwa baa sipurali kuki dopale ingilyamo kandenge. Baame yake doko komau ingyuo minyuo pee lao komau anda pipala palenge dopale inginya lao pingi.
ISA 40:23 Baame gapomane akali wambu iso karenge porai dupwa isa palyuo kingi laa nana lao karenge.
ISA 40:24 Nakama angi pingi pyao karapa narami doko Kamongome porambaiye peyara dokopa dupwa mee kalendau porakana ingyara.
ISA 40:25 Api mendepa Anatu poo pyasi dokopa manda manjo karara ingilyase? Baa yale mende mendasa karase?
ISA 40:26 Yake dokona kandalyuo kandape. Embame bui kandelene dupwa apimi wasiyase? Mende yanda singi ami ingyuo laminyuo penge dokome akipare karaminyi lao soo otenge dee bui mendaki mendaki lao kingi lenge. Banya porainya renge doko kamame andake wakasa dokome mendaki mendepe neta pyarepala paa nana lao singi.
ISA 40:27 Isaraele akipamo embena randa dupwa Kamongome sepa napala lao rolaka naralyamo lao suku lao karepe?
ISA 40:28 Kamongo baa lete karo puu penge. Baame yuu muu peparae wasiya. Baa makame kumuo mende pii nara inginginde daa. Banya suu pingi dupwa mendemepe sakami nange. Doko nakama see nao soo nyii nao pingisi?
ISA 40:29 Baame wambu lapo kapa ingya nao makame kumuo karenge dupwa porainyi pyambungi.
ISA 40:30 Nakama parange ingyuo kararaminyipape poraya naramo kararami. Akali parange dupwa makame kumapala mee isa paramiko ingilyamo.
ISA 40:31 Dopa piramopape wambu Kamongo nyisara lao baa keta pyamalyuo kapa ingingi lao suu pyao karaminyi dupwa porainya renge enenge nyuo kararami. Yaka kambe banya papakeme ketae poraiyuo soo penge dopale ingyuo kararami. Nakama makando paraminyipape maka narami. Dee kata paparaminyipape nakama mee porai ingyuo kararami.
ISA 41:1 Anatumi lao dopa leya. Nakama yuu nanesa palaminyi dupwa nambana pii soo elya kalo karalapape. Kote pii dupwana lalapale rapa rapa pyuo karalapape. Nakamana pii laraminyi yuu gii doko sera ingilyamo dokona api doko angi rolae larape lao lao semanale.
ISA 41:2 Apimi yanda pyuo anamasi minyingi akali doko neta potemenge dorena piso lanyuo epeyase? Dee baa anja panda anja mendasa pelyamo dupwana baa wini pinya lao pingisi? Apimi kiŋi akalipi yuu liti wakale wakale wambu dupwape nyuo amena lao porai renge mailyase? Banya wua gela dokome nakama pyao mee sinjimu inginyi nembenge. Banya walekya dupwame nakama pyao poo raiyame kalendakuna polo nembele lenge.
ISA 41:3 Baa minyaro nyelana makando peta papala range kyawa lete nyuo kimbu pyao piso penge. Ama puu wakasa lao papala kimbu yukuna doko eketa rapu dokona palipae pilyasa yuu dokona angingyuo warenda nange.
ISA 41:4 Apimi dokona karapala yulu dopale dupwa pyaka sinya lao piyase? Api mendeme wambo pyuo kaeyamo dupwana doko mende wamba piyaŋa lao soo giso lara ingiyase? Namba Kamongo doko wamba enye kanda siyamo dokopa kareyo. Dee namba Kamongo doko lumwa piramo dokopa dokona kararoko ingilyamo.
ISA 41:5 Yuu nanesa palenge wambu dupwame nambana yulu piyunu doko kando kaeyami. Kando pakapala nakama walu walu lao pakame kumulyaminyi. Dokona lao nakama nyuo malu palyapala imi.
ISA 41:6 Bange wasingi akali dupwame mendeme mende nyisalya nyisana pyuo rangeme porainyi pyambuo pingi.
ISA 41:7 Kamonda akalimi kana golome anatu ingyuo wasingi dokome au pyuo pipyalyamo, lenge. Pena pena pinya lao wasingi akali dokome akali mende pirimi pyao bange angi doko nyuo pyaso wasaramo doko kandokondali pyuo pinya lao porainyi pyambuo lara. Dee nakamame lao, Yango kimbu soo wasisi doko keyange pipyalyamo lenge. Lapala mee bange anatu kingimi wasisi doko pisarami panda dokona pirimi pyao rambu lao pisingi.
ISA 41:8 Dopa pyuo karaminyipape Isaraele dupwa nakama nambana kendemande wambu. Nambana puu minying akali Aporakamena para pyasi dupwa nambame nakama rombo palyuo nyiyu.
ISA 41:9 Nambame nakama emba yake yuupi lili rambungi dokona piso minyuo epeyo. Nambame nakama yuu kyukunaiya kamame nanesa peteyaminyipa kee lao nyiyu. Nyepala nakama langyuo lao, Nakama nambana kendemande wambuŋu. Nambame nakama kilya kando mata jii napala nakama rombo palyuo nyiyu.
ISA 41:10 Namba nakama pipya role karapunu pilyamoŋo pakame kumuo kara nalapape. Namba nakamana Anatuŋu bange mendemepe nakama keta paka mona palyinyi pyambwa nanale. Nambame nakama porainyi pyambuo nyiso kararo. Namba konambena mendeke alya isa ingyuo kyawa lete nyuo nyiso kararo.
ISA 41:11 Wambu lapome nakama pipya imbu singi manjarami dupwa kingi isa paramopa pyao anamasi minyaraminyi renge doko soo nyerami. Dee dopako pyuo lapome nakama pipya yanda pimwairami dupwa kumarami.
ISA 41:12 Dee isa yuu dakena mende laa nao mee opeape poko pana narami.
ISA 41:13 Namba nakamana Kamongo Anatu doko ingyuo karo. Nambame porainyi pyambuo lao, Nyisaroŋo dokona paka nalapape lapunu pilyamo.
ISA 41:14 Kamongo dokome lao, Isaraele wambu dupwa nakama kuki ingyapala porai ingya napyamopape namba nakama nyisaroŋo paka nalapape. Namba Isaraele wambunya Anatu poo pyasi dokome nakama kyawa lete nyuo nyisiyu kande.
ISA 41:15 Nambame nakama isa warake dokona nenge pyao injingi dopale inginyi pyambwaro. Isa warake dokona pirimi yale nenge karenge dupwa potemaro karara. Nakamame yuu kyau dupwa pyao injo kokwa soo nembarami ingilyamo. Yuu manda kuki dupwa inji ranji pyuo sinjimu inginyi nembarami.
ISA 41:16 Dopa pipala pyao yake dulunya nembaraminyipa porambaiyeme soo pao kopa apupi dokona raeyara. Dokopa namba nakamana Anatu dokona nakama rae mairami. Nakamame namba Isaraele wambunya Anatu poo pyasi doko lakandarami ingilyamo.
ISA 41:17 Nambana wambu dupwa bange ipwape yano pyaramopa nanapala ipwa kotarami dokopape nakamana pendoko oo laramo ipwa nanarami dokopape namba Kamongo dokome nakamana ateŋa doko isingi yano pyakamiru. Namba Isaraele wambunya Anatu dokome nakama kame soo yaki nyii naro.
ISA 41:18 Nambame yuu kyau mende anda nange dupwana ipwa epena lao peyaronopa dee yuu pau lama lama dorena ipwa guu lanyi peyaro. Nambame yuu muiyane doko alowa pyuo ipwa pete sinya lao dee yuu yando penda penda dupwana ipwa endangi palyuo epo karena lao piru.
ISA 41:19 Nambame yuu muiyane dupwana isa rara wakale wakale dupwa pulyuo andena lao piru. Dopa pipala yuu mende anda nange dupwana ando imwa palira. Paliramo dokona isa rara wakale wakale ando kararami.
ISA 41:20 Wambu dupwame doko kandapala namba Kamongo Anatu dokome piilyamo lao soo nyerami. Isaraele wambunya Anatu poo pyasi dokome dopa pinya lao piyasa piyalyamo lao nakama soo gisarami.
ISA 41:21 Kamongo Isaraele wambunya kiŋi dokome dapa lara ingilyamo. Wambu rara peparaena mee bange anatu dupwa nakamana pii dupwa minyuo epo peyalapape. Nakamana apiyanda pyuo lenge pii dusipa yapapala minyuo ipupwape.
ISA 41:22 Dae epapala rengya apa pira lao dokona polo lalapape. Laraminyipa yuu gii dokopa piralyamo lao namwa soo nyepala kararama ingilyamo. Dokona nakamame kote pii lenge dokona wamba apa piyamo dupwana lao polo lamailapape. Lamaipala renge angi aki lao dokona wapu lao langyuo pipwape.
ISA 41:23 Rengya mende piramo doko namwa langipwape. Dokopa namwame nakama anatuŋu lao soo nyerama. Yulu keyange lapo pyuope panda randa lapo minyuo epope pipwa. Pipala namwa keta yamarangyuo paka mona manjinyi pyambwalapape, leya.
ISA 41:24 Lapala lao, Nakamape nakamame yulu pilyaminyi dupwa angi mende ingya napala mee ingyuo pelyamo. Dee wambu lapome nakama kingi wapambupi lakao jilyaminyi dupwa kando ipyuo miku kasilyu.
ISA 41:25 Dokona lao nambame neta pyakaenge dorena range akali mende rombo palyuo kaeyapu. Baa dulurena karo wambu palaminyi dupwa pinya lao lanyuo eparo. Dokopa akali pee warame wasingi dokome banya kimbumi wara kalyuo injo pingi doko suu pyao baame akali mupwa dupwa wara ingyuo kalyuo isa palyara ingilyamo.
ISA 41:26 Dokopa namwame kinyi emba kapa angi rolae dokona letene larami lao nakama dokona api mendeme doo leto doko kinyi angi piraŋa lao lamisi? Nakama mendeme dokona lao pii kuki mende laa nayami kande. Nakama mendemepe pii kuki mendepe laminyi see nayami kande.
ISA 41:27 Namba Kamongo dokome wambo kanda soo yuu Sayone dokona pii wai nembeyo. Nambame yuu Jerusaleme dokona pii minyingi akali mende nembo lao, Nakamana wambu dupwa anda epelyaminyi lyakande leyo.
ISA 41:28 Nambame mee bange kingimi wasisi anatu dupwa kandapunu dokopa dokona mendemepe mende larami ingya napya. Dee kamame mendaki mendeme pii nambana piso sipunu dokona isingi yano pyakamarami ingya napyako.
ISA 41:29 Bange anatuŋu letaminyi dupwa mee ingyuo pelyamo. Nakamame yulu mendepe pirami ingya nalyamo. Mee bange isa kanapeme wasisi dapwa pyuku lasi nakama keta porainya renge mende pali nalyamoko, leya.
ISA 42:1 Kamongome lao, Nambana kendemande nambame baa porainyi pyambungi. Nambame baa rombo palyapala baa kando raeko maingi. Baa keta nambana imambu dokome maralyiyu. Dokopa baame wambu rara peparae yulu rolae dokona polo lamaira.
ISA 42:2 Baame pii porakai ketae palyuo laa nara. Dee yuu taone dupwana kata dupwana pii rekyae lao lao kara nara.
ISA 42:3 Baame angi kwaeyamo doko kokwa see nara. Dee lambe kuki rao seramo doko kunjinyi nemba nara. Baame pii lao rolenge kulisa ingyuo sulu singi doko wambu keta palyara.
ISA 42:4 Baame keyange mende piraŋa lao soo manji nyepala karara. Baame isa yuunya lao rolo lenge renge doko minyalyara. Yuu nanesa range dupwame banya mana pii doko langinya lao mata kui lapala isaro karaminyi.
ISA 42:5 Anatu baame yake doko pyuo wasapala minyuo panguya. Baame isa yuu dake pyuo wasapala dokona lenge renge bange soo pelyamo dupwa pyuo wasiya. Baame wambu dupwa poporambaiye pyambuo lete renge maiyuo piya. Dokona lao dakepa Kamongo Anatu dokome banya kendemande akali doko lamaiyuo lao,
ISA 42:6 Namba Kamongo dokome emba kee lapala isa yuu dakena lao rolare ingyaraŋa lao porai renge jiyu. Emba keta nambame wambu peparae pipya kana minyuo lalu lao lenge pii laro. Emba ketako nambame wambu rara peparae dupwa keta yanga paupau lanyi pyambwaro.
ISA 42:7 Embame lenge koo dupwa lenge ranyi reto dee karapusi ingyuo iminjinginya petaminyi dupwa kiiramo nyuo piri ingyara.
ISA 42:8 Namba iki doko embena Kamongo Anatu. Bange anatu lenge dupwa namba kingi lenge dokona role pyao laa narami. Nambame kingimi wasisi dupwa nambana lakandenge panda dokona lakandena lao panda serakami naro.
ISA 42:9 Renge lapo dopa pyuo paralyamo lao wambo pipa nayamopa langiyunu dupwa dakepa kinyi angingyuo pipyamo kandelyaminyi. Enenge piramo dupwa kamame wambo pipa naramopa dakepa nambame langiruwale.
ISA 42:10 Kamongo kando kenane enenge pyalapape. Yuu muu peparaena wambu dupwame baa lakando kenane pyalapape. Nakama lapo ipwa kotana piso papiyaminyi dupwame baa lakandalapape. Ipwa kota dupwana lete bange silyaminyi dupwame baa lakandalapape. Yuu nanesape dee dupwana wambu palaminyi dupwa peparaepeme kenane pyalapape.
ISA 42:11 Yuu muiyanepe taone dokona singipi dupwame Anatu lakandena. Wambu yuu Keta rangeme baa lakandena. Dee yuu taone Sela range wambupi dupwame yuu kyau ketae dorena karo rae wakasa maiyuo pii porakai lao baa lakandena.
ISA 42:12 Yuu nanesa range wambu nakamame Anatu baa kamame ulupili dokona lakando palyuo pena.
ISA 42:13 Kamongo ami yanda singi porai paka nao kyawame suu lao yanda pela panya karengenyili piru karamo. Baa yanda pinya mata kui lapala rapa rapa piru karamo. Baame yanda lakana lao pyuo karamo. Banya porai renge doko dopakaleŋe lao yanda pimwai dupwa pyao lasaka pira.
ISA 42:14 Anatumi lao, Yuu gii andarele namba romo napyuo kareyo. Nambana wambu dupwa kando yano pyao pii mende lamai nayo. Dopa piyunupape epapu yuu gii angi mende piru doko epelyamo. Doko nambame enda wane mata pilyamo ee lenge dopale ingyuo ee lao karo.
ISA 42:15 Nambame yuu kyau kuki epengepe dupwa pyao kokwa sinyi nembo karo dokopa isako isape dupwa yanda nanyi pyambwaro. Dopa pyuo yuu lama lamana ipwa epenge dupwa muiyane penda penda ingyuo nembo dee ipwa pete dupwa sokwanyi nembo piru.
ISA 42:16 Nambana wambu lenge koo dupwa kata laminyaronopa nakama kata wamba kando paa nange kyakasa dupwana pao kararami. Dopa pyuo nakama iminjinginya petaminyi doko yanganyi reto nakamana lenge kambu dorena yuu pulyuo lupyuo pingi dupwa pyao rambikwanyi reto piru. Doo leto dapwa nambana lalu lao lenge pii letoŋo. Nambame yaki nyerono kando lao minyaro kararo.
ISA 42:17 Wambu lapo mee bange anatu dupwa mona maiyuo dee isa kanapeme anatu yale ingyuo wasapala nakamana anatuŋu letaminyi dupwape peparae isale ingyuo karo elya renge nyerami.
ISA 42:18 Kamongo dokome lao, Kalepoe wambu dupwa selapa. Nakama lenge koo dupwa repeta suu lao kandalapa.
ISA 42:19 Nambana kendemande lenge koo ingyapyamopape kamame lenge koo mende karase? Dee nambana wai pii minyakao pena leyono akali doko kalepoe ingyapyamopape mendali kalepoe mende karase?
ISA 42:20 Isaraele nakama angi malu mee pipyamo kandami. Kandaminyipape dokona aki renge mende mana nyilyamisi? Nakama kale kata sepala pii silyaminyi. Siminyipape aki renge angi doko soo nyimisi?
ISA 42:21 Kamongo Anatu baame wambu kyawa lete nyelana suu pyao mona nyilyamo. Dokona lao banya mana piipi mawa piipi dupwa ketae nembo banya wambu dupwame rape rape lamili lao suu piya.
ISA 42:22 Dopa lao suu piyamopape wambu rara wakale dupwame Isaraele wambunya yuupi bangepe pyao kokwa soo waa nyiyami. Waa nyepala nakamame Isaraele wambu dupwa karapusi palena lao kii palyuo yalu piyami. Dopa piyaminyipa mendeme nakama kyawa lete nyela eparami ingya naya.
ISA 42:23 Nakama mendeme pii dake sakamiramisi? Dakepa piso pao rengya nakama mondo lao seramisi?
ISA 42:24 Isaraele wambu dupwa apimi yanda pimwai dupwa keta maiyase? Doko Kamongo kando yanda pimwaiyuo koo piyamano dokome maiya. Namwa baame piso palyuo pimili laope panda banya mana pii simili lao suu pyapyamo kata doko yaki nyuo kaeyamanosa Kamongome namwa yaki nyiya.
ISA 42:25 Dokona lao baame namwa banya imbu singi porai doko nakanjo soo kandalapase lao piya. Dee yanda porai wakasa dokona randa nyelapase lao piyako. Banya imbu singi doko Isaraele peparae keta isare ingyuo raeyo reya. Dopa piyamopape doo piyamo doko soo nyii nayama. Namwa doko mende pyamo lao soo nyii nayamako.
ISA 43:1 Isaraele wambu dupwa, nakama wasiyamo Kamongo Anatu dokome lao, Nambame nakama kyawa minyaroŋo paka nalapape, letamo. Nambame nakama kingi leyoŋo. Nakama nambana angingyuo karaminyiŋi.
ISA 43:2 Nakama ipwa rapu koko kyuwa dupwa yalo paraminyi dokopa namba range nakama role kararo. Nakamana randa dupwame nakama kapa nyuo anamasi minya nara. Isare rao kararamo dupwana sukusa parami dokopa nakama isare dokome kapa raa narami. Dee makande pingi andake dupwa nakama keta eparamo dokopa randa nyii narami.
ISA 43:3 Namba nakama Isaraele wambunya Kamongo Anatu poo pyasi nakama kyawa lete nyingi doko. Nambame nakama mona seramo karalapase lao Isipi wambu dupwa kyawa yaki nyuo nakama kiiramo nyero. Dee namba Itiopia wambupi Sepa wambupi opetae kyawa yaki nyeroko.
ISA 43:4 Nambame nakama pipya mona reto dee ketae pyambuo pilyu. Dee nambame nakama moname nyuo rungi rungi pyapunu karaminyi. Dokona lao nakama kyawa lete nyuo wambu peparae yuu lapona palaminyi dupwa kame soo kyawa yaki nyero.
ISA 43:5 Namba nakama role karoŋo dokona paka nao karalapape. Nambame neta pyakaenge dorena pisowape dee neta yalyingi dorena pisowape nakamana wambu dupwa range nyuo anda lanyoko eparo.
ISA 43:6 Dopa pyuo karaminyi dokopa yuu dulurena wambu dupwa lamaiyuo dokopa nambana wambu dupwa kakaso pena kaeyakana laro. Dee donorena wambu dupwa lamaiyuo dokopa penaleŋe minya sili sili laa nana lao piru. Dokopa kamame panda lao saka nange yuu muu wakale wakale dupwana naneta kararaminyi dupwape dee yuu muu peparae kipwa kipwa dupwana kararaminyi dupwape andako kili kali pyuo epena.
ISA 43:7 Nakama namba rangena wambu. Nakamame nambana kingi andakinyi nembo yulu pirami lao nambame nakama wasiyu.
ISA 43:8 Anatumi lao, Nambana wambu dupwa kote lala epena lao lamailapape. Nakama lenge rao karaminyipape lenge koo ingilyaminyi. Dee nakama kale kata siminyipape kalepoenge ingilyaminyi.
ISA 43:9 Yuu muu peparaena rara dupwa api mende porailyamo doko makande pyuo kandala epena lare. Dopa pirinyi dokopa nakamana mee bange anatu dupwana api mendeme rengya piramo dupwana larase? Dee nakama dupwa anjuku mendeme dakepa pyaka silyamo dupwa dopa piraŋa lao leyase? Mee bange anatu dapwame nakama kinyi angi rolae leyamiŋi lao lakarami usinisi dupwa lanyuo epena.
ISA 43:10 Isaraele wambu dupwa nakama nambana usinisi lakarami. Namba nakamame soo nyuo suu pyao dee namba Anatu mendaki iki lao serami lao nambame nakama nambana kendemande wambu ingyuo rombo palyiyu. Namba iki Anatu karo. Anatu wakale mende kara nalyamo. Dokonako ingyuo wamba mende kara nange. Dee rengyape mende kara narako.
ISA 43:11 Nakama lete wai pyao nyeramo Kamongo doko nambako iki karenge.
ISA 43:12 Rengya nyera dupwana see nao kareyaminyi dokopa dopa piralyamo lao langingi. Langipala dee paki kata palipala nakama nyiso epenge kandape. Doko suu pyao yuu pandape wakale dupwana mee bange anatu mendeme dopa pyuo pingiŋi leyaminyi see nayami. Dokona lao nakama nambana usinisi ingyuo karaminyi.
ISA 43:13 Namba Anatuŋu lao leto doko mee karengenyili pyuo kararo ingyapyasa leto. Mendemepe nambana porainya renge doko wanja narami. Dee nambame pingi lengepe dupwa mendeme kapa alowa pii naramiko.
ISA 43:14 Isaraelena Anatu poo pyasi nakamana Kamongo nyiso kyawa lete nyingi dokome lao, Nakama nyiso kyawa lete nyuo nambame ami yanda singi dupwa yuu Bapilone pyala pena lao peyaro. Nambame yuu taonena kame kambu dupwa pyao lalyapala dee Bapilone wambu pii poraiyuo lao mambo pyao karaminyi dupwa dee nyuo ee lena lao piru.
ISA 43:15 Namba Kamongo doko nakamana Anatu poo pyasi ingyuo karo. Nambame nakama Isaraele wambu dupwa pyuo wasiyu. Wasapala namba nakamana kiŋi ingyuo karo.
ISA 43:16 Yuu wamba dokopa ipwa kota pete pyao karalyiyamo dokona Kamongo dokome kata wapuo reteya.
ISA 43:17 Baame ami yanda singi poraipi uliuli mename ipilyamo piso papingipi mena osepe peparae pyao kokwa soo nembo oteya kande. Nakama isa paleyaminyi doko lambe puku lapala kunjapala raa nalamuli pyuo nakama kamba lete sipurao epa nao isa palu palyuo paleyami.
ISA 43:18 Dopa piyamopape Kamongome lao dokopa wambowana piyunu dupwako paka pyao soo lao kara nalapape.
ISA 43:19 Nambame yulu enenge lapo piru ingilyamo dokona kandaro karalapape. Doko dakepa lapo pilyamo dupwa nakama angi kandelyaminyi. Namba yuu muiyane dokona kata wapwakaro. Dee dokona ipwa guu lao epena laro.
ISA 43:20 Nambana rombo palyuo nyiyunu wambu dupwana lao yuu muiyane dokona ipwa endangi palyuo epo karena lao mairunu dokopa yaka kameyape yana suwa kararopepe mena rae lengepe dupwa peparaeme kandapala nambana kingi ketae pyambuo lakandarami.
ISA 43:21 Nakama nambana wambu namba rangeme wasiyunu petaminyi dupwame namba lakando kenane pyarami ingilyamo.
ISA 43:22 Kamongo dokome lao, Dopa piyunupape Isaraele wambu nakamame nambamoo pipya makame kumapala namba lakanda nayami.
ISA 43:23 Nakamana mena sipisipi kiso jingi doko kaeyami. Nakamame mena pyao kiso joo nambana kingi lakanda nayami. Nambame dopa pyuo kiso jipa lao mona kendanyi pyambuo piso see nayo. Dee parali angae lao rendamu pingi jipa lao piso see nayo kande.
ISA 43:24 Nakamame rendamu pingi bange lapo ropo pyao nyaka nayami. Dee mena kapa rukisipi kiso jiminyi namba sikya pipyamo karonde daa. Dopa pii nayaminyipape nakamame koo pipala namba mona kendanyi pyambuo kareyami. Nakamame kopetame piyaminyi dokome yame yame lanyi pyambuo karo piyami.
ISA 43:25 Dopa pyuo kareyaminyipape namba Anatu dokome nakamana koo renge dupwa nyuo kame sakao karo. Doo pilyu doko nambaŋa lao sepala dopa piru, leya. Nakamana koo dupwana suu pingi nyepala minyuo karo nakama pipya yanda pimwaiyuo yango palya naro.
ISA 43:26 Nakamana pii larami dupwa minyuo epo dokopa kotena minyuo pao lamanale. Embena pii angi palamo doko lamairinyi dokopa emba rolae doko panenale.
ISA 43:27 Nakamana akali kyawa wamba kanda soo kareyamo dokome koo piya. Dee nakamana akali mupwa dupwame koo piyamiko.
ISA 43:28 Nakamana akali isingi dupwame nambana tembole anda kokwa soo kwaenyi nembeyami. Dokona lao nambame Isaraele wambu dupwa keta randa maiyuo nakama namba rangena wambu dupwa elya nyinya lao pyuo piyu.
ISA 44:1 Kamongo dopa letamo. Isaraele wambu nambana kendemande nambana rombo palyisi Jekopena para pyao nyisi dupwa epapu pii dake selapa.
ISA 44:2 Namba Kamongo dokome nakama wasiyu. Nakama ene nyaŋa manjo nyiyami dokona piso nambame nyiso epeyo. Nakama paka nalapape. Nakama nambana kendemande wambu. Namba rangena rombo palyiyu dokona nambame mona retelyo.
ISA 44:3 Nambame yuu oo lasi dokona rombe lanyi pyambwakaro. Yuu kulisa pao yando nasi dupwana ipwa guu lanyi pyakamena lao piru. Dopa pipala nambana porai renge doko nakamana wane wanakepe dupwa keta kulimbwanyi peyaro dee nakamana para pyao paraminyi dupwa elyape keta pisakaro.
ISA 44:4 Nakama andaramisa yanenge dupwa ipwa epo pengena isoko mokwame isape andele lapala puiya nongopa soo karara.
ISA 44:5 Dokopa mendaki mendaki lao wambu dupwame lao, Namba Kamongona wambu karo lao epo Isaraele wambu pipya konda konda pirami. Dopa pipala wambu mendaki mendaki lao nakamana kingi sukuli dokona Kamongona kingi pyanyi palyarami. Palyapala baa range Anatunya wambu dokona mende karo, larami.
ISA 44:6 Kamongo baame Isaraele wambu dupwa iso kyawa minyuo karenge doko Kamongo Porai Wakasa dokome pii dake palipyasa lalana letamo. Kama wambowana nambako kareyo doko lumwa pyuo dokopa namba kararoko. Anatu mende mendasa kara nange. Anatu doko nambako iki karenge.
ISA 44:7 Mendeme namba piyunu dopale piyamende karase? Api mende ene kanda soo dokona piso yuu gii lumwa piramo dupwana dopa piraŋa lao leyamende karase?
ISA 44:8 Nambana wambu dupwa nakama paka nalapape. Wamba kanda soo dokona piso pao dakepape rengya nyera dorena polo lenge kandapi dokona nakama nambame dopa pyuo lengeŋe lao usinisi lakarami ingilyamo. Anatu mende wakale karase? Anatu mende wakale porai renge palengende kararamo sepa nayonde ramo kandena.
ISA 44:9 Wambu isa kanape kingimi imambuŋu lao wasilyaminyi dupwa keyange angi ingya nalyamopa mee bange anatuŋu lao mange karelyaminyi dupwa mee ingyuo para ingilyamo. Wambu dupwame anatuŋu lao mona maiyuo lakandelyaminyi dupwa lenge kwaeyo sepa napala letaminyi dokona elya nyerami ingilyamo.
ISA 44:10 Kana ane palenge dupwame kingi kokwa soo wasapala anatu ingyuo kingi lao kararami doko kapa ingya nalyamo.
ISA 44:11 Mendeme mona maiyuo kingi wapambupi lakao lao pisarami dupwa mee elya nyerami ingilyamo. Isa kana dopa pyuo wasarami wambu dupwa mee isa wambu ingyapala renge mende pali nalyamo. Nakama kote dokona nyuo epena lao panda maiyuo laramanopa randa nyuo pako elya nyinyale.
ISA 44:12 Kapame pyuo wasingi akali dokome kapa kunjasi mende nyepala isarena yango wasara. Banya kingi porai dokome ama minyuo pyao ponga lyuo lenge kambu waso nyingi. Dopa pyuo yulu pipala makame kumuo lopo ipwa nano pingi.
ISA 44:13 Kamondame isa angi doko makande pyuo kandenge. Kandapala banya makande isa dokome wambu yalende lenge kambu keyange inginyi pyambuo rombo palyuo wasingi. Pipala wambu yale doko lanyuo epo banya anda dokona retenge.
ISA 44:14 Dopa pyuo dokopa baame sita isa kameya dupwa poko nyuo isa oke panda saiperese isape imwa dokona karapyamo dupwa koto pao yapo nyilyamo. Dopako pyuo yuu lapo lorele isa dupwa wara pipala apunda dokome andena lapala mali soo karenge.
ISA 44:15 Akalimi isa dokonako nyepala pakirena dorena isarena yangapala soo piso borete minyuo yango pingi. Dee pakirena dorena anatuŋu lao wambu yale wasapala kingi wapambupi lakao kingi lenge.
ISA 44:16 Isa dokona lapo mee isa yangapala dokona mena minju ketae kiso napala sikya pilyamo karenge. Baa range isare soo isasa pilyamo dokopa lao, Isare keyange doko silyuŋu isale lenge.
ISA 44:17 Isa dolo silyamo dupwame mee bange anatuŋu lao wasingi. Wasapala kingi wapambupi lakao kingi lao ateŋa pyao dokopa, Emba nambana anatuŋu embame namba kyawa lete nyepe, lenge.
ISA 44:18 Wambu doo nakama yale doko angi mende pilyamanoko lao kopyali ingyuo karo aki pilyamano lao see nange. Nakama lenge raa nao ayemba suu pipala pyuo karo kinyi angi doko kanda nange.
ISA 44:19 Isame anatuŋu lao waso karenge akali dokome lao, Isa lapo mee yango lapome borete yango waso dee mena minju yangapala nao pyuo dokopa silyamo dupwame anatu ingyuo wasapala mee isa dokona kingi wapambupi lakao piso dokopa isa dokona lao kopyali ingyuo pyuo lao karalyano lao suu pyao laowape pii nange.
ISA 44:20 Isareme raramo sungwa lengya doko nyuo mona palya napala narama ingya nalyamo. Banya suu pingi kopyali dokome baa nyuo isoko kata nembapyasa apa pilyu lao see nalyamo dokona mendeme nyisarami ingya nalyamo. Baa rangeme sepa napala bange kingi rakana minyuo karamo doko anatu angi daaŋa lao meelyamo lao soo nyii nalyamo.
ISA 44:21 Kamongo dokome lao, Isaraele nakama renge dasipa suu pyalapape, letamo. Doko nambame nakama nambana kendemande ingyuo kararami lao wasiyu. Nakama nambana kendemande ingyuo karaminyi. Nakama kame soo yaki nyeronde daa.
ISA 44:22 Nambame nakamana koo dupwa kopa apupi pyao nembele lao kwuanyi nembakayoŋo. Nambame nakama lete wai pyao nyilyuŋu. Namba range karo dakena ipupwape.
ISA 44:23 Kamongome banya yulu andake pyuo lasaka pyuo banya Isaraele wambu dupwa nyiso pyuo lete nyiya dokona nakama yake panda dorenape isa yuu rapunya palenge dupwape dee imwa isape yuu kyaupi dupwa nakama pii ketae palyuo lao rae maiyuo karalapape.
ISA 44:24 Namba Kamongo doko nakamana pyuo nyingi akali. Nambame iki nakama wasiyu. Nambameko Kamongo ingyuo karapala bange silyamo dupwa peparae wasiyu. Nambame iki yake doko nyuo pyasinju lanyi reteyo. Dopa pyuo isa yuu dake wasiyuŋu dokopape mendalimi namba nyiso kara nayako.
ISA 44:25 Nambame wambu lapome mali mali sakange dupwa kopyali ingyuo letaminyi lao pyuo lasaka pingi. Nambame wambu bui dupwa dopa pira dapa pira lao isaro karenge dupwa uki minyuo nembakamingi. Akali soo nyinginya pii dupwa pyao isa nembakamyuo nakamana mona palenge singinya renge dupwa kopyali ingyuo pelyamo lao lasaka pingi.
ISA 44:26 Dopa pipyamopape nambana kendemande dupwa rengya mende piraŋa lao lenge. Nambame wai pii minyakange akali dokome nambame mende rengya piruŋu lao rapa rapa pyuo retenge doko pano lakale peenge. Dopa pipala doo ene rengya mende pira letono dupwape dee mende pinya rapa rapa pilyuŋu dupwape angi kinyi lao panenge. Nambame Jerusaleme range wambu dupwa range epo dee paliraminyipa Juta wambunya taone dupwa kamba range piramiŋi leto. Taone dupwa lalyuo kwaeyasi doko minyalyuo pirami ingyara, namba dopa pyuo leto.
ISA 44:27 Ipwa kota andake dupwa sokonya laronopa mee sokwara.
ISA 44:28 Nambame akali Sairose lamaiyuo, Embame nambana wambu dupwa isakao kara, laro. Namba pinya suu pilyu dupwana palyuo pyakare. Jerusaleme doko dee kamba minyalyinya lakare. Dopa lao dokopa tembole anda pirami dokona puu rombo minyakao susa isa retako pinya lao lamaikare, lapusa pilyamo.
ISA 45:1 Kamongo dokome akali Sairose baa kiŋi ingyuo yuu liti wakale dupwa pyao anamasi minyinya lao rombo palyiya. Baame kiŋi yango dupwana pawa dupwa pyao kui lao isa palyala pena leya. Kamongo yuu taone dupwana kame kambu dupwa banya lao pyao lumbwanyi retakamira. Sairose kando Kamongo lao dokopa
ISA 45:2 Embena lao namba rangeme kata rapa rapa pyakao yuu kyau kuki andakepe pyao kapa kapa pyuo retaro. Nambame kana koneme kambu wasingi dupwa pyao lalyaro dee ane isa porai dupwa roo pyao muu muu pyakaro.
ISA 45:3 Nambame kamongonge bange wakale iminjinginya yalu pyuo singi dupwa emba jero. Dokopa emba namba Kamongoŋo lao soo nyuo dee Isaraele wambunya Anatu dokome emba kingi lao kee lapyalamo lao soo nyere.
ISA 45:4 Isaraele wambu nambana kendemande dupwa namba rangeme rombo palyuo nyiyunu dupwa embame nyisakare lao emba rombo palyilyu. Embame namba soo nyii napinyipape namba emba kingi ketae pyambuo rape rape lao karapu.
ISA 45:5 Namba iki Kamongo. Anatu wakale mende kara nange. Embame namba soo nyii napinyipape nambame emba yano piramo kararene dokopa porai renge jero.
ISA 45:6 Wambu peparae yuu muu pinjingi paki piso pao paki suu lao dupwame anatu wakale mende kara nange. Namba iki Kamongo lao soo nyerami lao dopa piru.
ISA 45:7 Nambame yangange iminjingipi dolapo pyuo wasingi. Nambameko elyape keta pisingipi dee randa maingi rengepe dolapo peenge. Namba Kamongo dokome yulu dasipa pingi.
ISA 45:8 Nambame yake dokona piso apunda epengenyili pyuo rolaena renge peyaro. Isa yuunya wambu dupwame lenge pee lao nyelana kararami. Dopa piramo dokopa isa jingi kalya pingi lokwa sinyi peenge dopale ingyuo kiiramo nyingipi pii soo rolo lengepe peyakamiru. Doko namba Kamongo dokome dopa pyuo pinya laronosa pira.
ISA 45:9 Penge warame wasisi lapo serami dupwanako yale mendeme akali pee wasaramo doko kando apiyanda pyuo larase. Dee wara dokome akali doko kando apa pipyasa dopa pilini lao piso serase? Penge dokome akali wasaramo doko kando emba mora pisa nange lamo lao mumu larase?
ISA 45:10 Mendeme banya endangi rakangepe kando piso sokondali pyuo, Akipamo embame namba lenge kambu dopale ingyuo manjo nyiisi? larase?
ISA 45:11 Dokona lao Isaraele wambunya Kamongo Anatu poo pyasi rengyana nyera dupwana singi dokome lao, Nakamame nambana wane wanake dupwana lao namba piso soope dee dopa pyuo piri laope namba langirami ingya nalyamo.
ISA 45:12 Nambame yuu doko wasapala dokona wambu rara dupwa palena leyo. Nambana porai renge dokome palepeta pyasinju leyo dokopa yake doko pee leya. Nambame renge palyuo neta kana buipi panda range dokona karena lao rapu pyuo karenge.
ISA 45:13 Nambame Sairosena mona doko pyao kui laronopa nambana yulu dokona pyuokondali pyuo yulu kwaeyaramo dupwa rolae ingyuo retara. Nambame baa nyiso kata dupwa peparaena paramo dupwa wapuo rolae ingyuo retaro. Dokopa baame nambana taone Jerusaleme doko dee pipala nambana anjisi wambu dupwa kiiramo nyera. Mendeme baa bange mairuŋu yulu pyakana laope dee panga soo kana maiyuo nyepala yulu pinya laope pii nara ingilyamo. Kamongo Porai Wakasa dokome lapyamo pilyamo.
ISA 45:14 Kamongome Isaraele wambu dupwa lamaiyuo lao, Itiopia wambupi dee Isipi wambupinya mena bangepe dupwa nakamana ingyara dee yuu Sepa akali londe dupwa karapusi ingyuo karo nakamana yulu pakao kararami. Karapala nakama puu maisi karo nakama moko minyuo paeyarami. Dopa pyuo karo nakamame nakama kando pangu soo karo Anatu nakama pipya role pyao karamo doko baa iki Anatu angi lao polo larami.
ISA 45:15 Isaraele wambunya Anatu banya wambu dupwa lete pyuo nyingi doko baa range yalu yalu pyuo karenge.
ISA 45:16 Wambu isa kanapeme anatuŋu lao wasilyaminyi dupwa mende neta paa nao elya nyerami.
ISA 45:17 Dopa piraminyipape Isaraele wambu dupwa Kamongome lete pyuo nyilyamo doko soo puu para ingilyamo. Dee banya wambu dupwa kamame elya renge nyii narami.
ISA 45:18 Kamongo dokome yake doko wasiya. Doko baa ikiko Anatu karamo. Baame yuu doko see nayamopa pyuo ingiya. Baame kandokondali pyuo wasapala sulu seraŋa lao piya. Baame yuu muiyane penda penda ingyuo mee soo paraŋa lao wasiyande daa. Yuu doko wambu paliramiŋi lao piya. Dopa pyuo wasiya dokome lao, Namba doko Kamongo. Dokona Anatu wakale mende kara nange lao letamo.
ISA 45:19 Nambame pii yalu pyuo laa nao mende pinya dokopa kalyama nange. Isaraele wambu dupwa yuu muiyane nenge anda nange dokona namba kotala pena laa nayo. Namba Kamongo dokome pii kinyi lenge dee aki mende rolae ingingi dupwa soo nyepala karena lao lamaingi.
ISA 45:20 Kamongo dokome lao, Nakamana yuu liti wakale wakale dupwa pyao kokwa soo nembeyaminyipa wambu lapo kyawa lete nyisi karaminyi dupwa epo nyuo pyaselapape. Kote letaminyi dokona nakama ipupwape. Wambu nakamana mee bange isame wasisi dupwa kalya pyuo pao dee mee bange anatu lenge nakama kyawa lete nyii narami dupwa kando loma silyaminyi dupwa renge angi doko soo nyii nange dupwa nakama peparae eparami, letamo.
ISA 45:21 Nakamana kote pii palamo dupwa minyuo kotena ipupwape. Wambumi nakama nyiso letaminyi dupwa mendeme mende pisalya pisana pyuo lena. Rengya mende piraŋa apimi wambo nolakao leyase? Doko namba Kamongo Anatu banya wambu dupwa nyiso kyawa lete nyingi dokomeko leyo. Anatu wakale mendepe kara nange.
ISA 45:22 Dakepa yuu muu peparaena wambu palaminyi dupwa nakama namba keta kapu kyuo epapala range kyawa lete nyelapape. Anatu doko iki namba karo.
ISA 45:23 Nambana lalu lao lenge doko angi kinyi dokona dee alowa pii naro. Namba keta kana minyuo lalu lao lao, Wambu peparae nambana lenge kambu dokona epo wapambu pii pyaro piso lalu lao lao, nakama namba kando rape rape lao yulu poraiyuo pyakarama lao larami, leyo.
ISA 45:24 Nakamame lao namba keta iki anamasi minyuo wini pingi rengepe dee porainya rengepe dupwa kando nyerama ingilyamo larami. Dopa piraminyipape wambu lapo namba kando epe kanda nalyaminyi dupwa randa andake nyuo elyame kumuo kararami.
ISA 45:25 Namba Kamongo dokome Jekopena para pyasi dupwa peparae kiiramo nyeronopa nakamame namba lakando kararami.
ISA 46:1 Yuu Bapilonena mee bange anatuŋu lenge dolapo pyao kokwa soo nembo ote piya. Wambu dupwame Belo Nepopa yuu gii mendaki lakandepeyaminyipape nakama mena dongena mata dokona nyuo retapala manjo peyami. Isa kanape anatuŋu lenge dolapo kenda pingi dokome mena dupwa kendo yame yame leyamo manjo peyami.
ISA 46:2 Anatu lao kyambo lasi dolapo range kyawa lete nyuo neta epena saka nayambi range karapusi anjisi pelyambinyi. Dopa pipala yuu Bapilonena mee bange anatuŋu lenge dolapo pyao kokwa soo nembo oteya.
ISA 46:3 Isaraele rara dokona rembe nanao palaminyi Jekopena para pyasi dupwa nambana pii dake selapa. Nakama romba anda paleyaminyipape dee manjinyi peyaminyipape nambame rapu pyuo karo andanyi pyambuyu kande dokome letoŋo.
ISA 46:4 Namba nakamana Anatu doko. Nakama epapu piso pao nakamana kyawa yaku eparamo dokopa alemo ingyuo karaminyi dokopa nambame wasiyunu dokona yaki nyii nao lanyuo papyuo karo pao kyawa lete nyuo kararo.
ISA 46:5 Api mende namba yale karapyandeme makande pyuo nambapa manda manjirase? Namba yale mende mendasa karase? Kamongome dopa letamo.
ISA 46:6 Wambumi kana palyingi nyuu dupwa lumbwanyi karalyapala kana golo dupwa mee male male lao nembo nakamame kana kulingi sikyali dokona piyami. Dopa pipala kana golome wasingi akali dupwame anatuŋu lao wasinya lao kingi wapambu lakao dokonako suu pyao misi lao karengepya.
ISA 46:7 Nakamba anatuŋu lenge bange minyalyapala lange dokome soo anda papala banya singi mare dokona retenge. Retenge dokopa romo pii nao sulu soo singi. Mendeme nyisinya lao piso soo loma singi ramo dokopa romo napyuo pii isingi laa nao dee randa nyilyamo dokona kyawa minya nangeko.
ISA 46:8 Koo pingi wambu dupwa nakama namba mende piyunu doko apa pii lao dee kamba suu pyao pinginya nyuo manjipwape.
ISA 46:9 Yuu wamba yulu lapo piyamo dupwa suu pyalapape. Namba iki Anatu angi doko. Dee wakale mende namba yale manda minyuo mende mendasa karapyamo kara nalyamoŋo lao soo gisalapape.
ISA 46:10 Ene pirunu dupwana wambo kanda soo dokopa polo lao oteyo doko. Nambame yuu wamba leyono dupwa pipala kaeyaro. Nambana mende pinya lao rapa rapa pingi doko isa paa nange. Dee nambame mende renge palyuo piruŋu lenge doko kaeya nao peparae pipala kaeyaro, leyo.
ISA 46:11 Nambame akali yuu neta pyakaenge dorena range mende epena lao kyakale leto. Baame yaka ulisapu rendamu nyepala lupyuo epengenyili pyuo waiya lao lupyuo isa epapala nambame rapa rapa pinyi reteyonoli pyuo pyuo otara. Nambame leyo doko angi leyonoli pyuo pira.
ISA 46:12 Mona kana pokapala nakama simbi simbi pingi wambu dupwa nambana mata kyakao nyerono renge doko nanesale silyamo lao suu pyao karaminyi dupwame kale yukupala selapape.
ISA 46:13 Namba pyao mata kyakao nyero yuu gii doko oo repeta minyuo epelyo panda londesa see nalyamo. Nambame anamasi minyuo pyuo nyero yuu gii doko oo repe repe pyuo retelyo. Nambame yuu taone Jerusaleme doko nyiso pyuo nyuo Isaraele wambu dupwa dokome kingi ketae palyinyi nembaro, leya Anatumi.
ISA 49:1 Wambu yuu muu ree lao nanesa palyuo pelyaminyi dupwame nambana pii dake selapape. Doko yuu wamba namba manjipa nayaminyi dokopa Kamongo dokome namba banya kendemande ingyuo karareŋe lao rombo palyiya.
ISA 49:2 Baame nambana pii doko mora pisinyi pyambuyasa wua gelana mendeke ingyuo neya. Baa rangena kingi kape dokona namba reto lanyuo papiya. Baame namba walakana mendeke ingyuo rapa rapa pinyi sero pyuo wasiya.
ISA 49:3 Dopa pipala baame namba langyuo, Isaraele emba nambana kendemande. Wambu dupwame emba dokona kandapala namba lakandarami.
ISA 49:4 Nambame lao, Nambame yulu pipunupape mendena ketae ingyuo pwamoŋo, leyo. Nambame yongo kisinyi nembo nambana porai renge dokome yulu pipunupape angi mende pyuo kapa pali nalyo. Dopa pipunupape nambame Kamongo keta kamame pyuo pyamalyuo pilyu dokona baame yulu pilyunu dupwana yano jera.
ISA 49:5 Kamongo dokome namba manjipa nayami dokopa banya kendemande ingyapala Isaraele wambu dupwa sukusa sukusa pyuo nyuo kapu kyuo lanyuo epare lapala rombo palyiyapya. Dopa pyuo Kamongome nambana kingi ketae pyambuo pingi. Yulu peparaena porai renge dupwa baa keta piso epenge.
ISA 49:6 Kamongome namba langyuo, Nambana kendemande akali doko emba yulu andake mende retakapunu silyamo. Embame Isaraele wambu kyawa lete nyisi karaminyi dupwa iki keyange ingyuo palyuo karalu karena lao piriŋi lao laa nalyo. Dopa piramopape wambu rara peparaena lambe mendeke ingyuo karalase lao lao rombo palyaro. Dokona lao yuu muu peparaena wambu nambana lete penge kata lasaka pirami ingilyamo.
ISA 49:7 Akali mende baa kando yuu liti wakale wakale range dupwame kilya kando awa nao karaminyi doko randa nao karo baa isingi akali mupwana kendemande yulu pyakamyuo karenge akali doko kando Isaraele wambunya Anatu poo pyasi lete wai pyao nyingi dokome dopa pira, letamo. Kiŋi dupwame emba kiiramo epare kandapala nakamame sipurapala rape rape lao kararami. Dee kiŋinya wane dupwame emba kandapala isa pangu soo embena kingi ketae pyambuo lakandarami, lamailyamo. Dopa pyuo para renge doko Kamongo dokome banya kendemande akali doko rombo palyiya. Isaraele wambunya Anatu poo pyasi doko banya pii lalu lao lapala kaeya nange
ISA 49:8 Kamongo dokome banya wambu dupwa lamaiyuo, Yuu gii angi nakama lete wai pyao nyero doko pyaka seramo dokopa nambame nakama anjiki pyuo nyisa lao ee lao karaminyi dokona isingi yano pyakaro. Nambame nakama rapu pyuo karo konambe ingyaro kararonopa nakama keta wambu dupwa peparae kana minyuo lalu lao laro. Nambame nakamana yuu dakepa mee apa soo peelyamo dokona range piso palyuo pipwa, laro.
ISA 49:9 Nambame wambu karapusi palaminyi dupwa kando lao, Mee manda rasi nyisa pupwape, laro. Dee lapo iminjinginya petaminyi dupwa yanga paupau lengena epena lao piru. Dopa piru dokopa nakama mena sipisipi yuu kyaunya rambi nao mondo lao karenge dopale ingyuo kararami.
ISA 49:10 Nakama dee ipwa nanome kumuope lopome kumuope pii nalu narami. Mendeme nakama mona reto karapyamo dokome nakama lanyuo paramo dokona yuu muiyane dokona neta dokomepe isasa pingi dokomepe nakama rao rakusi raa nara. Baame ipwa guu lao epenge dupwanako lanyuo para.
ISA 49:11 Nambame yuu kyau dorena oko soo aewae kata ingyuo pyao retapala nambana wambu dupwa pena lao kata mende wapuo retakamiru.
ISA 49:12 Nambana wambu dupwa kaname nanesa piso eparami. Eparaminyi dupwa dulurena pisope neta yalyingi dorena pisope dee yuu taone Asawane yuu Isipi dokona donorena singi dokona pisope eparami.
ISA 49:13 Dokona yake pandana palaminyi dupwa kenane pyalapape. Isa yuu dokome rae maiyuo pii ketae palyuo lape. Yuu kyau dupwana piso kenane doko ipwa ingyuo langa kulimbwanyi peeyo epena. Kamongo dokome banya wambu randa nyuo karaminyi dupwa sakame kumuo mona minyarambu minyaro karara, leya.
ISA 49:14 Dopa leyamopape Jerusaleme wambu dupwame lao, Kamongo dokome namwa kame soo kaeyo kyawa yaki nyilyamo, leyami.
ISA 49:15 Dokopa Kamongo dokome isingi lao, Endame wane banya rangena doko kame sepala kaengese? Banya wane angi mandenge doko mona reta nangese? Dokona lao kamame endangi dokome banya wane kame seramopape nambame nakama kame see nalu nao naro.
ISA 49:16 Jerusaleme nambame yuu mendepape nakama kame soo kaeya naro ingilyamo. Nambana kingi kape dokona nakamana kingi doko pyasi palamo.
ISA 49:17 Nakama dee minyalyuo nyerami dupwa oo repeta epelyaminyi dokopa nakama kokwa siyaminyi dupwa yaki nyuo kala parami ingilyamo.
ISA 49:18 Kamenge kara napala apa pilyamo lao paki pakipi kandarapu pyuo karalapape. Nakamana wambu dupwa anda epena elyambu pyuo epelyaminyi. Kinyi namba lete karalu karenge Anatu doko suu pyao nakamame nakamana wambu kandapala dokopa enda mapwaeme lyange mamakupi soo kalya pyuo akalinya anda pao rae maiyuo pamoli pyuo rae mairami ingyara.
ISA 49:19 Nakamana yuu doko mee kokwa soo peya kande. Dopa piyamopape epapu wambu malu palya epelyaminyi dokome yuu doko kuki ingyapala kete pyara. Nakama kokwa soo momo nao pinyi nembeyami wambu dupwa nakama yaki nyuo yuu nanesa wakale parami.
ISA 49:20 Yuu mendepa embena wambu karapusi karo mandeyami dupwame nakama kando lao, Yuu dake ama kuki lamoŋa. Namwa palyuo karo piramano panda lama kamame konda pyuo nyimwali aiya larami.
ISA 49:21 Dokopa Jerusaleme wambu palirami dupwame range lao, Apimi wane dupwa namwana lao manjo jiyape? Wane angi namwana dupwa nembo kaeyo epo dee manjirama ingya naya. Namwa karapusi ingyuo puu maiyuo nyuo minyuo wakale peyamiŋi. Apimi wane dapwa wai kiso nyiyase? Namwa iki yeelyo yaki nyuo kaeyamiŋi wane dapwa anja karo epeyamisi? larami, leya.
ISA 49:22 Kamongo Mupwa Andake Wakasa dokome banya wambu dupwa lamaiyuo lao, Wambu yuu liti wakale wakale dupwa keta kongwalu mende pyuo lasaka pirunupa nakamame embena wane dupwa minyakao anda eparami.
ISA 49:23 Kiŋi dupwa nakamana rakange dopale ingyarami. Dee enda kuini dupwa nakamana endangi ingyuo parami. Dopa pipala nakamame kingi wapambupi lakao pangu soo nakama lakando ketae pyambuo kuki ingyuo inyimungu karo rape rape lao kararami. Dokopa nakamame namba Kamongo lao soo nyerami. Dee mendeme nambame nyisareŋe lao isaro karara ramo doko mona maka nara, leya.
ISA 49:24 Nakamame ami yanda singinya yanda pimwai porainya pinji nyepala eparamo doko nyuo nembaramisi? Dee gapomane koo porai mende keta nakamame wambu karapusi lekeleke rao palaminyi dupwa mee kapa kiiramo moko nyeramisi?
ISA 49:25 Kamongo dokome isingi lao, Doo leto doko nambame pirowaleŋe. Yanda singinya karapusi wambu palyarami dupwa nyuo lanyuo pao dee yanda singimi yanda pimwainya pinji bange nyuo soo parami. Dupwa nyuo nembo pipala mendeme nakama pyalana piramo doko nambame yanda pimwaiyuo pyalana pyuo nakamana wane wanakepe dupwa kiiramo nyakaro.
ISA 49:26 Nambame nakama pyalana piraminyi wambu dupwa yango sukusa range pyao kumasinya lao piru. Wambu ipwa biya napala kopyali kyakaenge doko suu pyao nakamame wambu yango mende pyao kumako imbu singi andake manjo kararami. Dokopa wambu rara peparae dupwame namba Kamongo nakama kyawa lete nyuo kiiramo nyii doko lamo lao soo nyerami. Nakamame namba Isaraele wambunya porai renge palenge Anatu doko lamo lao soo nyuo pirami.
ISA 50:1 Kamongo dokome lao Nakamame suu pyaminyi dokopa akalimi enda ramanyi nembenge dopale ingyuo nambame nambana wambu dupwa neta ramanyi nembo kaeŋe lao suu pilyamisi? Dopa pyuo suu pyarami ramo ramanyi nembelyo lao pepa piyunu angi doko anja silyase? Akali mendeme banya wane dupwa karapusi ingyuo yulu pyuo pena lao maiyuo kana nyingi dopale ingyuo nambame nakama karapusi ingyuo pupwa lapala maiyuo bange nyiiŋi lao suu pilyamisi? Daa nakama karapusi ingyuo peyami doko nakama rangeme koo pipala lowa yalo piyaminyi dokona peyamisa piya.
ISA 50:2 Nambame nakama keta pao kyawa lete nyela peyo dokopa nambana wambu akipamo namba keta epa nayamisi? Nambame kee leyono dokopa nakamame akipamo isingi yaa lao yano pyaa nayamisi? Nambame nakama kapa pyuo nyiso kyawa lete nyero ingya nalyase? Nambame ipwa kota pete kameya doko mee soko rali pinya lao dee ipwa epo penge dupwa nyuo kee maro lanyi pyambuo soko oma dupwana selamo dupwa mee ipwa nanapala kumuo parami ingilyamo.
ISA 50:3 Wambu kumaminyi dokopa kumanda karo piso petengenyili pyuo nambame yake doko iminjinyi pyambwaro.
ISA 50:4 Kamongo Mupwa Andake Wakasa dokome namba pii apa pyuo laro dupwa mana langiya. Dopa pyuo langiyamo dokona nambame wambu makange dupwa porainyi pyambuo laro ingiya. Yangama peparae baame namba pii mana langiramo dupwana namba nyuo wangu lakanyi pyambuo pipala mana pii langingi.
ISA 50:5 Kamongo dokome namba pii langiyamopa nambame baa mona kana poko yaki nyuo paa nayo.
ISA 50:6 Nambana matarena pinya lao yongo maiyuo kaeyo. Nambana angasi dupwa minyuo ipyuo nyuo lenge kambu kepakali kyasinyi piso kilya kando laminyi dokopa kaena laowape laa nayo.
ISA 50:7 Kamongo Mupwa Andake Wakasa dokome namba nyiso karapyamo dokome nakamame namba kilya kando laminyi dokome nambana monarena pyapyande daa. Dopa pyuo lami dokona namba elya nyii naro doko soo kaepala mee kyawame suu lao pupunu pilyamo.
ISA 50:8 Anatu dae repeta karamo dokome namba keta koo mende pali nalyamo lao pano lara. Mendeme namba kando koo piiŋi lao kote larase? Dopa laramo wambu dokopa kote lambanale. Banya pii angi palamo doko minyuo epena.
ISA 50:9 Nambana Kamongo Mupwa Andake Wakasa dokome namba kyawa minyuo karenge. Namba koo piiŋi lao lao pakana palyara doko apisi? Nambapa yanda pyuo laraminyi dupwa dusa kata serandena pana narami ingilyamo. Nakama komau pinjingi nakepasi dee kando nyii narami dopale ingilyamo.
ISA 52:1 Wambu Anatu suu pyaa nange dupwa Jerusalemena kame kambu doko dee yalo sukusa epa narami dokome Jerusaleme emba kandokondali pyuo dee porai ingyuo karape. Wambumi komau keyange wapungi doko suu pyao Anatunya yuu taone poo pyasi doko mondo lao elya pyuo sepe.
ISA 52:2 Jerusaleme emba karapusi palenge kandapi doko sinjimu para para pyuo sipinyi doko pyarendanyi nembapala sipurapala kiŋinya petenge isa dokona pisipi. Yuu Sayone wambu karapusi pyao nyuo peyaminyi anjisi karaminyi dupwa mokwalapape.
ISA 52:3 Kamongome banya wambu dupwa kando lamaiyuo lao, Kana mendeme nakama ropo pyao nyuo karapusi palyiyaminde daa. Dokona ingyuo nakama nyisa moko eparami lao kana reto nyeraminde daa.
ISA 52:4 Nakama kata londe wambu ingyuo yuu Isipi dokona pao palyuo kareyami dokopa nakama range panya lao suu piyaminyili pyuo peyami. Dopa piyaminyipape Asiria wambu dupwame nakama suu lao lanyuo papala angi kanape mende reta nayami.
ISA 52:5 Epapu yuu Bapilone dokona doo piyami dopako pyuo pilyaminyi. Nakama karapusi ingyuo nyuo papala bange mendepe nakama ropo pyao reta nayami. Wambu dupwame nakama iso karapala range mupwa ulipiliŋi lao suu pyao nambana kingi pendewa nembo lao karaminyi.
ISA 52:6 Yuu gii ene eparamo dokopa namba Anatu dokome nakama langilyamo lao soo nyerami.
ISA 52:7 Waili pii minyuo papingi mende yuu kyau dorena piso waili pii keyange mona kyuu lao seramo doko lao epelyamo doko wambu raeme kumuo serami. Baame epo anamasi minyarami lao yuu Sayone wambu dupwa kando lao, Nakamana Anatu doko kiŋi ingyuo karamo, letamo.
ISA 52:8 Wambu lapo yuu taone doko iso karaminyi dupwa ama rae wakasa maiyuo pii poraiyuo letaminyi. Kamongo kapu kyuo yuu Sayone dokona epelyamo doko nakamana lenge angi rangena dokome kandelyaminyi.
ISA 52:9 Kamongo dokome banya wambu dupwa mona minyarambu banya yuu taone doko kyawa lete nyeramo dokome Jerusaleme momo nao pasi doko raeme kumuo pii poraiyuo lape.
ISA 52:10 Kamongome banya porai renge poo pyasi dokome banya wambu lete wai pyao nyeramopa yuu muu peparaeme kandarami ingilyamo.
ISA 52:11 Nakama tembole anda dokona bange singi nyuo penge dupwa yuu Bapilone yaki nyuo kandokondali pyuo ipupwape. Dopa pipala bange koo palenge dupwa minyandasaramano kando lao waso karo nakama range poo pyasi ingyuo karapala yaki nyuo ipupwape.
ISA 52:12 Yuu gii dakepa doko nakama wanjamwali lapala puu pae lao epa nalapape. Nakamana Kamongo Anatu dokome kata peparaena embena konambena mendeke ingyuo lanyuo papira ingilyamo.
ISA 52:13 Kamongo dokome lao, Nambana kendemande dokome banya yulu dupwa peparae kapa pira. Baa mee mende ulipili ketae nembaraminyipa karara.
ISA 52:14 Wambu malumi baa kandeyami dokopa yamarangyuo mona nembeyami. Banya yongo doko kiki pilya pyana pyuo kombe kwua kwua leyasa wambu lenge kambu nyii naya.
ISA 52:15 Dopa piyamopape epapu wambu rara malumi baa mupwa lao suu pyao yamarangyuo kandarami dokopa kiŋi akali dupwame mona nembo pii lalana saka narami ingilyamo. Dokopa nakama wambape dopale mende kando sepa nange doko kandapala soo nyerami.
ISA 53:1 Dokopa wambu dupwame isingi lao, Namwame kandapala letamano dokona apimi kinyilyamo lao soo nyera ingilyase? Dee dokona yulu dakena Kamongona porainya renge doko apimi kandara ingilyase?
ISA 53:2 Kamongome suu piyamili pyuo isa wai mende yuu ketange pyasi mee dokona lee rao andengenyili pyuo banya kendemande akali doko poro lena leya. Wambumi epe kandaraminyi panda lakanda minya minya pingipi baa keta pali nana lao kareyamopa mendeme baa lengeme auwa kandarami ingya naya.
ISA 53:3 Namwame baa epe kanda nale nale lapala baa mata maiyuo kareyama. Baame randa dupwa epeyamopa yasu nao rando kareya. Dopa pyuo kareyamopa mendeme baa kandalana suu pyaa nayami. namwame baa mende daaŋa lao suu piyama.
ISA 53:4 Dopa pyuo ando peyamopape randa doo neyamo dupwa namwa neyamali. Baame randa nao kareyamo doko kandapala Anatumi baa keta randa mailyamo lao suu piyama.
ISA 53:5 Dopa pyuo peyamopape namwana koo pingi dupwana lao baa randa maiyuo pyaroko piyami. Baa yanenge poro lao randa nyiyamo dokome namwa pyuo lete nyiya.
ISA 53:6 Doko namwa peparae mena sipisipi pana nange dopale ingyuo kareyama. Karapala namwa rangena suu piyamano kata dupwana iki pao kareyama. Dopa piyamopape namwa peparaeme koo piyamano randa nyerama ingiya doko Kamongo dokome baa keta kulimbuo palena lao maiya.
ISA 53:7 Baa koo keta palyuo pyao lao randa maiyaminyipape kambu lumbuo pii mendepe laa napala koo nono ingyuo elya kalo randa nyiya. Mena sipisipinya ikyane pyalana lanyuo penge dokopa kae laa nao penge panda sipisipi mendena emanji pyaki pilyaminyipa sipisipi doko kae laa nao karenge doko suu pyao baa pii mende laa nao kareya.
ISA 53:8 Baa minyaro nyepala pii piso soo kote leyami. Kote lapala baa lanyuo pyao kumakala peyami. Dokopa mendeme baa doo randa nyera dokona mendeme pii palyuo lakaminya suu pyaa nayami. Baa namwana wambunya koo dupwana lao reke lao pyao kumakayami.
ISA 53:9 Baa lowa mende yalope pii kyambo mende laope pii nayamopape baa koo pingi wambu pipya role pyao malu piyami. Baa akali kamongona panda dokona malu piyamiko.
ISA 53:10 Kamongome lao, Nambame baa randa nyuo yasu napyali lao suu piyu dokona randa nyiya. Dopa pyuo baa kumuyamo dokopa mena pyao kiso maingi dopale ingyuo wambunya koo dupwa kame soo kaeyasi siya. Dokona lao baame banya para pyasi wambu dupwa range kando nyera. Baa yuu gii londe andarele karara. Dokopa baa kumaramo renge doko nambana yulu dupwa jingi lyuo kapa palyuo para.
ISA 53:11 Baa randa yasupi naparamo dokopa enakana baa rae maingi renge dee kamba nyera. Baa doo randa naramo dupwa mee male male lao randa neyolyamo lao suu pyaa nara. Nambana kendemande dokome namba mona retenge doko kando namba rae maingi. Baame peparaena koo dupwana randa nyeramopa banya lao nambame nakamana koo dupwa kame sakamiru.
ISA 53:12 Dopa pyuo paramopa nambame baa ketae pyambuo baa akali kamame wakasa porai dupwa pipya karena laro. Wambu koo pingi dupwana panda nyuo randa nao baa range kumuo mainya mona kumapala baame wambu koo pingi malunya panda nyepala ateŋa lao Anatumi nakamana koo dupwa kame sakaminya lamaiyuo kumuya.
ISA 54:1 Jerusaleme emba enda ingi porailyamo wane manja nao petenge dopale ingilyamo karenge doko raeme kumuo kenane ketae palyuo karape. Renge doko enda akalingimi yaki nyuo peyamopa baa wane malu manjiramopa akali role pingi dokome wane mendasipa iki manjira.
ISA 54:2 Emba palirene komau anda doko andake ingyuo piri. Pipala puu doko kaka soo pyuo pee lao pyasinju lape. Pinjingi isakulimi dupwa poraiyuo pimba pyare.
ISA 54:3 Embena yuu paki pakipi peparaena liti doko yuu neta yalele lao konda pyuo nyuo kalyape. Dokopa wambu rara lapome dakepa yuu nao palaminyi dupwa embena wambu dupwame nyerami. Yuu taone apa silyamo dupwa dee wambumi palyuo kete pyarami.
ISA 54:4 Emba dee kamba elya nyii nare ingilyamo dokona pakame kumuo kara napipi. Dee mendeme emba nyuo isa palya narami. Enda akalingi kanda soo nyepala yulu mondo lao pii napala elya nyuo petengenyili pyuo petee kande dopako pyuo parende daa. Enda waiya ingyuo kale paka paka leyamo peteene kande dokona kame sere.
ISA 54:5 Bange peparae pyuo wasiyamo doko embena akalingi mendeke ingyuo karara. Dokona lao Kamongo Porai Wakasa letamano doko banya kingi dokosa lenge. Isaraele wambunya Anatu poo pyasi dokome nakama nyiso kyawa lete nyera. Doko baa yuu muu peparaena mupwa ingyuo karamo.
ISA 54:6 Isaraele emba enda mapwae akalingimi role pyaa nalyamosa randa nyingi dopale ingilyamo. Dopa pipyamopape Kamongome emba range kapu kyuo ipu lao kee lapala lao,
ISA 54:7 Yuu mange kuki lama nakama mee yaki nyuo kaeyapunu pipyaŋa. Dee nambame mona andake retapunu dokome range nyero.
ISA 54:8 Namba imbwayo dokona yuu gii kuki lama nakama mata jiyu. Dopa piyunupape nambame nambana mona retenge renge doko lasaka pyuo karalu kararo, lao Kamongo emba pyuo nyilyamo dokome letamo.
ISA 54:9 Wamba Noa kareyamo dokopa ipwame piyunu dopaleme mende pii naro lao lalu lao leyo. Dee epapu nakama kando imbu singi manja nao dee koo dupwana kando nakama koo pingiŋi laope randa jii narona lao lao lalu lao leto.
ISA 54:10 Yuu kyau kuki andakepe dupwa poro lao para. Dopa piramopape nambame nakama mona retelyo doko ota nalu nara. Nakama keta mona kyuu lao seraŋa lao lao kana minyuo leto pii doko minyaro. Kamongo nakama mona retelyamo dokome dopa letamo.
ISA 54:11 Kamongome dopa letamo. O Jerusaleme taone randako nyingi kapa mende piri ingya nange dake. Emba mendemepe mona minyarambwa narami ingilyamo. Dokona lao nambame kana bange nyingi rungi rungi pingi dupwame nakamana isa susa reto dee kamba wasakaro.
ISA 54:12 Dopa pipala namba nakamana anda ketae londe dupwa kana kone keyange dupwame pyakapala dee nakamana kame kambu dupwa kana isare ingyuo rao kui kui lasi dopaleme pyakao dee kana kame awali lao palenge doko kana golome wasisi wambumi nyuo kinginya piso kalya pingi bange dokoreme pyakao piru ingilyamo.
ISA 54:13 Namba rangeme embena wambu dupwa mana lamaikapala mona seramopa yulu peparaena kapa palyuo pena lao piru.
ISA 54:14 Rolaena renge dokome emba porainyi pyambwara. Moŋo emba keta peyo lengepe paka rengepe dupwana emba kyawa minyaramo karare.
ISA 54:15 Mendeme emba nyuo kuinya palyuo pyalana piramo doko Nambame suu pyaa naro dokona rangeme suu pilyu ote lao pira. Mendeme baa emba yanda pimwaiyuo kararamo doko isa para ingilyamo.
ISA 54:16 Nambame yanda kakupi isareme kiso poraiyuo wasingi akali doko nambame akali dopale inginyi pyambuyu. Nambame dopako pyuo ami dupwame yanda kakupi wasisi dupwa nyepala wambu pyao kumakala penge doko inginyi pyambuyu.
ISA 54:17 Dopa pyuo piyunu kaku dokona mendeme emba keta yalya nara lyakande. Emba koo keta palyuo larami dupwa lao rolakamyuo karare. Nambana kendemande dupwa arapunya palyuo reto kararonopa nakamana yanda pimwai anamasi minyuo kararami, pii doko Kamongome letamo.
ISA 55:1 Kamongome lamaiyuo, Wambu peparae nano karenge dupwa dae ipwa silyamo dokona ipupwa. Kana dalyamo dupwa palawa ropo pyao nala ipupwa. Ipwa waene susupi dupwa mee pakiki nyuo nala ipupwape.
ISA 55:2 Nenge sikya pii nara dokona akipamo kana nembo nelyamisi? Akipamo embena pee nyingi kana dokome nembo ropo pyao napapinyipape mee lopoko karese? Nambame laro doko sepala dokome moko minyuo piri dokome nenge doloma nyuo isa palyuo rae maiyuo nengende nare.
ISA 55:3 Nambana wambu dupwa pii leto dakepa sepala namba keta ipupwape. Dopa pyuo namba keta epo lete karenge renge nyerami. Dokopa nambame kana minyuo lenge pii sulu sera mende nambame Dapiti kando elyape keta pisaro lao lalu lao leyono dokona elyape keta pisingi renge doko nakama jeroko.
ISA 55:4 Nambame baa wambu rara peparaena akali kyawa ingyuo wasiyu. Wasapala baa keta nambana porai renge doko nakama lasaka piyu.
ISA 55:5 Dakepa nakamame yuu wakale range wambu dupwa epena lao kyakale larami ingilyamo. Wamba wambu dupwame nakama see nayami kande. Dopa piyaminyipape epapu nakama karaminyi dokona makando ree lao eparami ingilyamo. Namba nakamana Kamongo Anatu Isaraele wambunya Anatu poo pyasi dokome renge dupwa pyaka sinya laro. Nambame nakama kingi ketae pyambuo rape rape lena lao piru.
ISA 55:6 Kamongo baa keta kapu kyuo papala ateŋa lalapape. Dakepa baa nakama repeta epo karamo.
ISA 55:7 Wambu koo pilyaminyi dupwame nakamana yulu koo dupwa yaki nyuo kaena. Pipala nakamana suu pingi koo dupwa alowa pinya. Nakama namwana Kamongo Anatu sakame kumuo waiyuo lao nyuo kame sakamingi doko keta kapu kyuo pena.
ISA 55:8 Kamongome lao, Namba suu pyao yulu pyuo nenge rambo lao pingi dupwa nakamana dopale daa, letamo.
ISA 55:9 Yake doko yuu dokona kamame yuu ketae ingyaro karamo doko suu pyao nambana suu pingipi yulu pingipi doko kamame ketaele wakasa ingilyamo.
ISA 55:10 Apu pipyaepe dolapo mee dasa piso imbu napala yake dokona piso lyuo epo ee yuupi ipwa pyao nenge andanyi pyambungi. Dolapome nenge jingi maiyuo dee kakana pyuo pilyunupa nenge. Nambana pii doko dopale ingyuo sipyamo pilyamo.
ISA 55:11 Dopa pyuo nambame mende pirunya lao retelyono doko mee isa paa nange. Angi letono dokonako kapa wai wara pyuo pipala pyuo otenge.
ISA 55:12 Nakama yuu Bapilone mona seramopa raeme kumuo yaki nyerami. Yuu kyau kuki andakepe nakama paraminyi kata dokona silyamo dupwame puli pyao kenane pyarami dee isa dupwame rae maiyuo pii ketae palyuo larami.
ISA 55:13 Saiperese isa dupwa nepereke mau panda koo dupwana andarami. Dee matele isa dupwa ikyaikya andenge dupwana poro lao andarami. Dopa piramo dokopa namba Kamongo dokome yulu andake piiŋi lao suu pyarami lao lasaka pili laro karalu karara.
ISA 58:1 Kamongo dokome lao, Pii poraiyuo kaeyo lao nambana Isaraele wambu dupwana koo dupwana lao lamaipi, letamo.
ISA 58:2 Nakamame namba yuu peparae kingi wapambupi lakao kingi letaminyi. Lapala lao nakamame nambana yulu dupwa soo wangu lakao nambana mawa pii rape rape lao rolae dokona palyuo pimwali lao letaminyi. Lapala nambame nakama mawa pii rolae dupwa jipiliŋi lao namba rae maiyuo lakandelyamano, letaminyi.
ISA 58:3 Lapala wambu dupwame piso soo lao, Nenge wasaka pyuo pisaramano dokopa Kamongome kando gisa nara ramo doko akipamo wasaka piramase? Namwame nenge naa nao kararamano dokopa Kamongome mende suu pyaa nara ramo akipamo namwa dopa piramase? Kamongome nakama lamaiyuo lao, Kinyi nakama nenge wasaka pilyaminyi. Piminyipape nakama rangena bange yulupi dupwana lao suu pyao nakamana yulu pingi wambu dupwa mona kendanyi pyambuo pilyaminyi.
ISA 58:4 Dopa pyuo nakamana nenge naa nao wasaka pyuo pisiminyi dokome laiya lao pyakando pyuo karaminyi. Dokona nakamame suu pyaminyi dokopa doo nenge wasaka pyuo petaminyi yulu dokome nambame nakamana ateŋa doko sakareŋe lao suu pilyamisi?
ISA 58:5 Nakama nenge wasaka piminyi gii dokopa nakama range randa nyuo rambi pau pyao kamba kamba paleyamuli pyuo ayemba rukyuo kumanda piso wapungi komau kwuayo pee lombo retapala ketae palaminyi. Doo pilyaminyi dopa pyuo nakamame nenge wasaka pilyamano lengese? Nakambame suu pyaminyi dokopa namba doko rae mairiŋi lao suu pilyamisi?
ISA 58:6 Nambame nenge wasaka pyuo petenge yulu mende suu pilyu doko dake. Wambu lapo mona kendo randa nyilyaminyi dupwape dee wambu lapo nakamana yangome nakama kando rolae ingyuo pyakamyuo kara nalyaminyi dupwape kiiramo nyerami ingilyamo.
ISA 58:7 Wambu lopange dupwa nakamana nenge maiyuo andana pali nange dupwa nakamana andana palyuo dee komau aeya nalyamo karenge dupwa komau wapunya lao maiyuo karo dokopa nakamana andare ree palu mendaki dupwa kaeya nao nyisarami ingilyamo.
ISA 58:8 Dopa pirami dokopa nambame nakama kando epe kando yangamana neta lepo lepo pyuo nakama keta ranyi peenge dopale inginyi pisaro. Dopa piru dokopa nakamana yongo dupwana mendasa wua kakupi pisiramo dokopa waiya lao umbwa pinyi retakaro. Nambame yuu peparae nakama pipya role pyao karo kyawa lete nyuo kararo. Nambame dorena darena pyuo nakama konambe ingyuo alyasa minyaro.
ISA 58:9 Nakama ateŋa laraminyi dokopa nambame yano pyakaro. Dee nakamame namba kyakale laraminyi dokopa aopa ŋee lao sakaro. Renge doko nakamame wambu randa maingi yulupi kingi sikisame suu lao kooŋo lao lengepe pii koo lengepe dupwa yaki nyuo kaepala
ISA 58:10 nakamame lopange wambu nenge maiyuo dee mende aeya naramo kararaminyi dupwa bange maiyuo kararami ramo dokopa nakama keta iminjapyamo karaminyi doko alowa pipala yango rali pira.
ISA 58:11 Dokopa yuu peparae nambame nakama bange keyange dupwame mende yangya naramo karamili lao joo kata angi lasaka pyuo kararo. Dopa pyuo dokopa nambame nakama yanenge reto porai ingyuo karalapa lao minyaro kararo. Dokopa nakama ee nenge ipwa apupi nyepala menya menya lao andenge dopale ingyuo kararami. Dee ipwa guu doko sokwa nao epo karenge dopale ingyuo palyuo karo pirami.
ISA 58:12 Dokopa nakamana wambu dupwame anda wamba kwaeyasi silyamo dupwa karenge panda dokonako dee pirami. Dokopa nakama kana kame awali lao kamba pyuo dee anda momo nao lalyuo pasi doko kamba karengenyili pyuo piyaminyi dupwaŋa lao kingi larami.
ISA 58:13 Kamongo dokome lao, Nambana koro petenge yuu gii doko poo pyasiŋi lao suu pyapala rangena rae maiyaraminyili pyuo yuu gii dokona pii nalapape. Nambana yuu gii doko rape rape lao karo kata papyuope yulu pyuope pii kopetame laope kara narami ramo
ISA 58:14 nambana yulu pyakarami dokona rae maingi renge eparamo kando nyerami. Nambame nakamana kingi ketae pyambuo yuu muu dupwana uu lepa lepa pena laronopa yuu nambame nakamana kauwane Jekope keta maiyunu dokona kapa rae maiyuo nao palirami lao namba Kamongo dokome lapunu pilyamo.
ISA 60:1 Jerusaleme emba epapu eŋa nembo neta dopale ingyuo rao sipurape. Dokopa Kamongome banya neta renge yulu doko nakama keta ranyi pisilyamo.
ISA 60:2 Yuu muu liti wakale wakale dupwa iminjingi dokome yambe pyaramo kararami. Dopa piramopape Kamongona neta renge dokome nakama keta yanga paupau lao rao karara. Dopa pyuo banya eŋa penge renge doko nakama keta palira.
ISA 60:3 Dokopa wambu rara wakale dupwa nakamana yanga paupau lenge dokona eparami. Dee kiŋi dupwa nakamana yuu gii enenge yangaramo dokona eparami.
ISA 60:4 Nakama lenge pendekae lapala apa pilyape lao kandalapape. Nakamana wambu dupwa anda epena lao malu palyuo karaminyi. Nakama ikinyingi dupwa yuu nanesa piso eparaminyipa nakamana wanenge dupwa wane wanakepe nyaŋa ingyuo wambu wakale dupwame apu soo eparami.
ISA 60:5 Nakama doko kandapala rae wakasa maiyuo kararami. Dopa pyuo kando mona pulunongo pyao kararami. Wambu rara dupwana kamongonge bange dupwa ipwa kota dupwa yalo nakamana lao minyakao eparami.
ISA 60:6 Yuu Mitiane Epape dolapona piso mena kamele malu suku piro karo eparami. Dopa piraminyipa mena kamele lapo yuu Sipa dorena karo kana golope rendamu pingi bangepe minyuo eparami. Dokopa Kamongome yulu keyange pipyaŋa lao wambu dupwame waili pii doko larami.
ISA 60:7 Yuu Keta Nepayotepena mena sipisipi peparae nakamame pyao kiso mairamiŋi lao minyuo eparami. Doo minyuo eparaminyi dupwa kana pyare lasi dokona pyao kiso maiyuo Kamongo rae mainyi pyambwarami. Doko Kamongo dokome banya tembole anda doko kamame wakasa ingyuo neta ranyi retara.
ISA 60:8 Ipwa sipu dupwa kopa isa isa puu pae lao epamuli pyuope dee yaka waiyamu waiya lao bii lao anda epamuli pyuo epelyaminyi dupwa aki lapose?
ISA 60:9 Sipu dupwame yuu nanesa piso Anatunya wambu dupwa range anda lanyuo imisa pilyamo. Kamongo dokona kingi ketae pyambuo karena lao nakamame kana kulingipi kana golope dupwa minyuo epelyaminyi. Kamongo doo yuu muu peparaena wambu dupwame banya wambu dupwa ketae pyambuo karena lao pilyamo doko Isaraele wambunya Anatu poo pyasi ingyuo karamo.
ISA 60:10 Kamongo dokome Jerusaleme kando dopa letamo. Wambu yuu wakale range dupwame nakamana kana kame awali lao doko dee kamba pyakarami. Dokopa wambu dupwana kiŋi dupwame nakamana yulu pyakarami. Nambana imbu singi dokome nakama randa jiyu. Dopa piyunupape dakepa nambame nakama epe kando sakame kumuo kararo.
ISA 60:11 Dokopa kukwa korakamape dupwana nakamana kame kambu dupwa lumbasi sera. Seramo dokopa yuu muu dupwana kiŋi dupwame nakamana kamongonge bange dupwa minyakao epo kararami.
ISA 60:12 Dopa piraminyipa wambu yuu liti lapome nakamana yulu pyaka narami dupwa pyao kokwa soo nembalu nembo nembaro.
ISA 60:13 Dopa pirunupa isa rara wakale wakale dupwamepe dee yuu Lepanone imwa dokona isa keyange dupwamepe minyuo epo yuu Jerusaleme dee kamba wasarami. Doo minyuo eparami dokome nambana tembole anda doko au pinya lao pyuo nambana taone andake doko netaŋa rao lepo lepo pyuo karena lao wasarami.
ISA 60:14 Akali nakama randa joo kareyaminyi dupwana ikinyingi dupwame epo nakama mee mende ulipili ingyuo karaminyi karamano lao lasaka pyuo pangu serami. Wambu nakama angi mende daaŋa lao suu piyaminyi dupwame epo nakamana kimbu seramo dokona piso nakama lakando lao Kamongona yuu taone andake, larami. Lao dokopa, Isaraele wambunya Anatu poo pyasi dokona taone Sayone lenge, larami.
ISA 60:15 Dokopa nakama epe kanda naope yaki nyuo kame soope pii narami. Dopa piraminyipa yuu taone andake yaki nyuo kaelyaminyi apa soo wambu pali nalyaminyi singi dopale ingyuo see nara. Nambame nakama andake ingyuo au wakasa pyuo yuu rae maiyuo karalu karenge inginyi pyambwaro.
ISA 60:16 Dokopa endangimi dokome banya wane rapu pinginyili pyuo wambu rara dupwamepe kiŋi dupwamepe nakama rapu pirami. Dokopa namba Kamongo Isaraele wambunya Anatu porai dokome nakama kyawa lete nyuo kiiramo nyiilyamo lao serami.
ISA 60:17 Nambame kone kana jepenge doko suu pyao kana golo jero. Dee anepe isape jepenge doko suu pyao kana kulingipi kone kanape jero. Jepala mee kana jepenge doko kaepala ane jero. Dokopa nakamana akali mupwa dupwame randa joo kopetame rapu pii narami. Nambame nakama mona seramo rolae pyuo iso karena lao piru.
ISA 60:18 Yanda pelana suu pyao yanda lakange pii dopale mendepe see narami. Nakamana yuu doko dee pyao kokwa soo minjuku minyinyi nemba narami. Nambame nakama konambe mendeke ingyuo kame pyuo minyaro. Dopa pyuo kyawa lete nyerono dokona lao nakamame namba lakandarami ingilyamo.
ISA 60:19 Dopa piramopape kukwa korakamape nakamana neta dee kanape renge panda dokona namba Kamongo doko nakamana yanga paupau lenge kulisa ingyuo rao karalu kararo. Nambana neta renge dokona yanga paupau lenge doko nakama keta ranyi peyara.
ISA 60:20 Nakamana mona rando ee lenge yuu gii dusipa lumwa pira. Dokopa namba Kamongo doko kendali ingyuo neta kanape dolapo yalaponalu rao sulu sero.
ISA 60:21 Dokopa nakamana wambu dupwame rolae doko anjuku lao pyuo yuu doko nyuo palu palirami. Nambana yulu andake dupwa nakama keta lasaka pyuo panaro lao nambame nakama nyuo pingi pyao wara pipala wasiyu.
ISA 60:22 Dee nakamana ree palu kamame kukilipi inyimungu karengepe dupwa rara andake porai renge palenge dopale ingyuo palirami. Dokona yuu gii rolae doko eparamo dokopa doo leto dake waiya lao pyaka sinya laro. Namba Kamongo dokome leto.
ISA 61:1 Kamongo Mupwa Andake Wakasa dokome banya imambu doko namba keta palyuo simbwapya. Baame wambu pendewa dupwa waili pii keyange doko boo pyao lamaiyuo karape lao namba rombo palyapya. Mona yanyi pyapyamo karaminyi dupwa pyuo nyuo puu maisi karaminyi dupwa moko nyuo wambu isare rapyamo karaminyi dupwa mokwala pupi lapyasa epelyo.
ISA 61:2 Kamongome banya wambu lete wai pyao nyuo nakamana yanda pimwai dupwa anamasi minyara ee kana pyaka seramo yuu gii doko boo pyala pupi lapyasa epelyo leya. Dee wambu lapo ee lao kumanda petaminyi dupwa mona minyarambu puu lao peyapyasa epelyo.
ISA 61:3 Lapala lao wambu lapo yuu Sayone dokona kumanda petaminyi dupwa mona rando kondange doko suu pyao rae maingi renge maiyuo dee kumanda piso ee lenge doko suu pyao lakandenge kenane maiyuo puu lapyasa epelyo. Nakama Kamongo rangeme isa wara pilyamo andenge dopale ingyarami. Dokopa nakama peparaeme yulu rolae doko anjuku lao pirami. Dokopa Anatu baame yulu piyamo dupwana lao baa lakandarami ingyara.
ISA 61:4 Nakamame yuu taone lalyuo kwaeyasi dupwa dee kamba minyalyuo pirami.
ISA 61:5 Nambana wambu dupwa yuu wakale range wambu dupwame epo yulu pyakao kararami. Nakamana mena sipisipi dupwa rapu pyakao nakamana yuu dupwana yulu pyakao ee nengepe wara pyuo isa girapo ee dupwa mondo lao rapu pyakao pirami.
ISA 61:6 Dokopa nakama Kamongona purisi akali ingyuo karaminyi laope Anatunya kendemande akali karo pilyaminyi lao wambu menge dupwame soo nyerami. Dokopa wambu rara yuu muu dupwana kamongonge bange dupwame nakama ketae palyuo karo rae mairami. Rae maipala dupwa peparae nakamanaŋa lao yongo nyimbwaramo kararami.
ISA 61:7 Nakamana elya nyuo karenge doko mee otara. Nakamana yuu muru range dokona paliraminyipa mena bangepe dupwa mee lama opetaeli konda pyuo seramo kararami. Dopa piraminyipa nakamana rae maingi renge doko soo puu para.
ISA 61:8 Kamongo dokome lao, Namba kyai rolaepena anjuku lao lao rolenge yulu mona nyepala wambu randa maingi yulupi yulu kopetame pingipi epe kanda nange. Nambame nambana wambu dupwa yaki nyii nao nakama kingi kiso maiyuo nakama pipya kana minyuo lalu lao lenge pii ingyuo laro.
ISA 61:9 Nakamana kingi doko yuu muu dupwana ulepalepa paramopa wambu kando serami. Wambu peparae dupwana mendeme nakama kandapala dokopa nambame keyange inginyi pyambuyalyamo lao soo gisarami.
ISA 61:10 Jerusaleme enda mapwaeme akali anda panya kalya pipala penge dopale ingilyamo doko Kamongome dopa pyuonde pyakapya lao kenane pyao rae maiyuo karenge. Anatumi baa anamasi minyingi rengepe lete pyuo nyingi rengepe dolapome kalya pipala pisapyasa pilyamo.
ISA 61:11 Ee dokona wara pingi dokopa waingi dupwa poro lamu lae pipala andengenyili pyuo Kamongo Mupwa Andake Wakasa dokome banya wambu dupwa kyawa lete nyuo nyisara. Dokopa wambu yuu muu peparaeme baa lakandarami.
ISA 63:1 Yuu Itome dokona yuu taone Bosera lenge dokona piso epelyamo doko baa apisi? Porainya renge palenge porai wakasa mende kimbu pyao piso komau kone keyange pinginde epelyamo doko baa apisi? Doko Kamongo banya porai renge palenge dokome lete wai pyao nyingi dokome banya pyao anamasi minyingi renge dokona lao boo pyao lala epelyamo.
ISA 63:2 Akipamo banya komau doko alemakai pyao kingyuo karami ingyuo kone wakasa pilyape? leya.
ISA 63:3 Kamongome isingi lao, Nambame yuu muunya wambu rara peparae alemakai minyuo kingili lao kalyuo injo rambetaku piyunu dokopa mendemepe epo namba nyisa nayami. Dopa pyuo nambana imbu singi paleta nakama kalyuo injo rambetaku piyunusa nakamana ranjama dokome nambana komau peparaena alemakai kii ingyuo kaeyo nyiya.
ISA 63:4 Nambana wambu lete wai pyao nyerono yuu gii doko ipwamo lao soo manjo oteyo. Gii dokopa nakamana yanda pimwai dupwa pyao randa mairu doko pyaka sepelyamo lao soo nyiyu.
ISA 63:5 Nambame kandeyo dokopa mendalimipi nyisaramaŋa lao ingya nayamisa mona nembo kareyo. Dopa piyunupape nambana imbu singi andake dokome namba porainyi pyambuyasa namba rangeme pyao anamasi minyiyu.
ISA 63:6 Nambana imbu singi dokome yuu muu peparaena wambu dupwa pyao inji ranji pyuo minyuo alemakai kingili lanyi nembeyo. Nambame nakamana lete ranjama doko kulimbwanyi isa yuu dokona nembeyo.
ISA 63:7 Nambame Kamongona mona reto puu penge dokona lamairu. Nambame namwana lao yulu peparae pyakalyamo dokona lao banya kingi lakandaro. Banya mona retalu reto retenge rengepe sakame kumuo nyisingi rengepe dokome Isaraele wambu dupwa elyape keta piso nyisiya.
ISA 63:8 Kamongo dokome lao, Nakama nambana wambuŋu. Namba minyako pii narami, leya. Dopa lapala baame nakamana randa dupwana kyawa lete nyiya.
ISA 63:9 Doko aŋala mendeme nakama nyiso kyawa lete nyiyande daa. Kamongo baa rangeme nakama nyiso kyawa lete nyiya. Banya mona reto kondange renge dokome nakama kiiramo nyiya. Wamba dokopa baame nakama yuu peparae au pyuo rapu pyakamiya.
ISA 63:10 Dopa piyamopape nakamame baa kando mata maipala mona randanyi pyambuyami. Dopa piyamisa Kamongo doko nakamana yanda pimwai ingyuo papala nakama yanda piya.
ISA 63:11 Dopa piyamosa wambana Kamongona kendemande Mosese kareyamo doko suu pyapala piso soo lao, Wamba Isaraele wambunya Kamongo dokome Isaraele wambunya lita dupwa kota pete dokona kyawa lete nyisiyamo doko epapu anja karase? leyami. Akali Mosese keta banya Imambu Poo Pyasi maiyamo Kamongo doko epapu anja karase? leyami.
ISA 63:12 Kamongo banya porai renge dokome nyepala Mosese keta yulu andake piya. Wambu dupwame baa rangena kingi minyalyuo karalu kararami lao baame ipwa kota doko pyao karalyapala sukusa dokona lanyuo peyamo Kamongo doko anja karase?
ISA 63:13 Kamongome kata lanyuo epeyamo dokome nakama kimbu rukyuope lukumu soope pii nayami.
ISA 63:14 Mena bulamakao yuu anda lama lama anenge andengena lanyuo pao lasaka pinginyili pyuo Kamongo dokome banya wambu dupwa mata sisiki nembena lao lanyuo pao panda doko maiya. Dopa pyuo Kamongome banya wambu dupwa lanyuo epeyamosa banya kingi ketae paleya.
ISA 63:15 Kamongo embena yake panda poo pyasi neta renge yuu dokona palyuo karene dokona karo namwa kandanyi peyo kandape. Embena namwa poraiyuo suu pingi doko anja silyase? Embena porai renge doko anja silyase? Embame namwa mona reto kondange renge doko anja silyase? Namwa pipya kandele kanda nale laa napipi.
ISA 63:16 Emba doko namwana rakange angi. Namwana rora ambasu Aporakame Jekopepame namwa soo nyii nange. Dopa pimbinyipape emba Kamongo namwana rakange dokome yuu peparae namwa koo dupwana nenge raka lao nyuo karenge.
ISA 63:17 Akipamo embame namwa embena kata dupwana yaki nyuo ralo karalapa lao kaelese? Akipamo embame namwa yuu peparae mona kana pokalu poko pokapala yaki nyuo pumili lao pilisi? Wambu lapo embena yulu pyakalyaminyi dupwana lapolapo lao lapo yuu peparae embena ingyuo peyaminyi dupwana lapolapo lao kapu kyuo ipupi.
ISA 63:18 Namwa embena wambu poo pyasi dupwa namwana yanda pimwai dupwame pyao nyisa ralinyi nembeyaminyipa yuu gii lapo pisipeyama. Dee nakamame embena tembole anda poo pyasi doko pyao lalyuo kalyuo muu muu pinyi nembeyami.
ISA 63:19 Embame namwa iso kara nalenepa namwa embena wambu ingyuo pisi nangende ingyuo pelyamo.
ISA 64:1 Akipamo emba yake doko kanguo nyuo karalyapala isa lupyuo epa nalese? Dopa piri ramo yuu kyau dupwa emba kandapala walu lao paka renge nyerami.
ISA 64:2 Dokopa nakama pengena ipwa pisapala isare kisilyaminyipa rao bolo pinginyili pyuo walu walu larami ingilyamo. Emba epo embena wambu nyisu petenge dupwa keta embena porai renge doko panembena lasaka pepe. Lasaka pipala yuu liti wambu dupwa embena lenge kambu dokona epo walu walu lao karena lao pepe.
ISA 64:3 Embame yuu mendepa epo wambu yamarangyuo pakaramilinde piri lao see nayama dupwa pyaka soo piinyisa yuu kyau emba kandeyaminyi dupwame embapa pakame kumuo walu walu leyami kande.
ISA 64:4 Wambu Anatu embapa karo mende pirandelyamo lao soo manji nyisi karaminyi dupwa keta yulu andake pyakamingipya. Dokona Anatu emba yale mende karelyamo soo dee kando nyuowape pipa nangepya.
ISA 64:5 Wambu rolae doko anjuku lao soo nyuo rae maiyuo pingi dupwa embame yako lao nyingi. Embame nakama apa pyuo piso karo pimili lao suu pilini dokona palyuo pyuo petenge dupwa yako lao nyingipya. Embame namwa kando imbu singi nyipinyipape namwame koo doko pyuo puu pelyamano. Embame randa jelana imbu singi manjipinyipape wamba koo pyuo kareyaminyili pyuo namwa pyuoko pelyamano.
ISA 64:6 Namwa peparaeme koo pyuowako karamano. Namwana yulu rolae angi pilyamano lao pyuo pumwanopape yulu dupwanako peparae karo piso koo ingyuo pelyamo. Namwana koo dokome namwa mee isa porakana yao ingyuo soo papiyamo karamano.
ISA 64:7 Mendemepe moname nyinyi nembo emba keta nyisapili lao ateŋa pyao epana lao suu pyapa nalyaminyi. Embame namwana koo dupwana namwa yaki nyuo kaeyalana embena lenge kambu doko namwa pipya nee piru karene.
ISA 64:8 Dopa pilinyiko doŋo Kamongo emba namwana rakange. Namwa mee wara yuu komba awai dopale ingyuo karamano. Dee emba yuu dokome penge angi wasingi akali dopale ingyuo karene. Embame namwa pyuo wasii kande.
ISA 64:9 Dokona lao namwa pipya imbumi kuma napipi. Namwana koo dupwana minyaro karo moŋo joo karalu kararoŋo lao suu pyao kara napipi. Namwa embenako wambu petamano dokona sakame kumuoko karape.
ISA 64:10 Embena yuu taone poo pyasi dupwa yuu muiyane penda penda ingyuo silyamo. Jerusaleme doko apa yuu ingyuo momo nao pelyamo.
ISA 64:11 Namwa tembole anda poo pyasi au pinginde namwana rora ambasupimi embena kingi lao lakando kareyami kande doko isareme yango kokwa soo muku reteyami kande. Yuu pandape namwame mona nyingi kandale dupwa pyao kwaeyo nembasi silyamo.
ISA 64:12 Dokona lao Kamongo embame mende piroŋo lao suu pyaa napala mee kanaŋa karepe? Namwa randa nyingi dee kamame wakasa nyelapa lapala embame mende pyuo namwa nyisare ingya nalyase?
ISA 65:1 Kamongome nambana wambunya ateŋa pii doko sepala yano pyalana rapa rapa piro kareyonopape angi laa nayami letamo. Nakamame namba anja karene lao koto kandamilinya kareyonopa nakamame kotalana suu pyao kara nayami. Nambame dae karo lapala nyiso yano doko pyalana lao kareyonopape yuu liti andake range karaminyi peparaeme ateŋa lao piso see nayami.
ISA 65:2 Nambame nambana wambu mona kana pokapala rangena suu pilyu ote lao rangena kata wapuo pelyaminyi dupwa yuu peparae nyisarowale lao rapa rapa piru karenge.
ISA 65:3 Nakama elya pali napala namba imbu singi nyakao pyuowako karaminyi. Nakamame semango imambu suu pyapala mena yakape yaonge mare dupwana yao maiyuo karaminyi. Dopa pyuo dokopa loma soo semango yao maingi kana pyare lasi dupwana rendamu pingi dupwa kiso maiyuo karaminyi.
ISA 65:4 Yuu gii kukwa dokopa kananda yanyandape dupwana papyuo wambu kumasinya imambu dupwame ropaka epo kemali kongwalupi pyuo langiraminyi pimana lao sela pao karaminyi. Wambu dopale dupwame mena minjupi mena ipwangepe anatu ingyuo imambu bange wakale dupwa loma soo kuiyuo maiyaminyi dupwape nao papyuo pyuo karaminyi.
ISA 65:5 Dopa pingi wambu dupwame wambu menge kando lao, Namwa angi yapasi ingyuo karamwano pilyamoŋo warendasaramiŋi repeta epa nalapape, letaminyi. Wambu dopa pilyaminyi dupwame nambana gyaa kata sisuku pyambwakaminyisa nambana imbu singi nakama keta palamo doko isare ingyuo rao kookana lokwasi lapala waiya lao awa awa pyuo otara ingya nalyamo.
ISA 65:17 Kamongome dopa letamo. Nambame yake yuupi enenge ingyuo wasaronopa wambowana pingi dupwa dopale kandape panda dapale kandape lao suu pyaa narami, letamo.
ISA 65:18 Nambame pyuo wasakaro dokona lao rae maiyuo kenane pyao karalu kararami. Nambame Jerusaleme enengende wasarono dokona raeme kumungi renge iki simbwaro seramopa banya range wambu dupwa raeme kumarami.
ISA 65:19 Yuu enengepe dokona wambu dupwape kandarono dokopa namba range keta rae maingi renge palyuo simbwara. Yuu dokona ee lengepe dee mende pirasa nyisinya lao pisingipi mende see nara.
ISA 65:20 Wane wanakepe ene nyaŋasa dokopa kuma narami. Wambu peparae palyuo karo emo kumungi kakapu kumarami. Wambu ee kana andete (100) nembo pisirami dupwa kandarami dokopa mapwae parangepeko lao kandarami. Ee kana andete (100) dusipa karapa nao wambo kanya pyapu lao kumarami ramo dokopa nambame nakama keta randa palena lapisa pilyamo larami.
ISA 65:21 Wambu dupwame anda pipala dokona nakama rangeko paliraminyipa wambu wakale mendeme panda nyakami narami. Wambu isa girapo ee wara pipala nakama rangeme jingi lyuo ipwa waene wasapala rae maiyuo naraminyipa mendeme nyakami naramiko.
ISA 65:22 Nambana wambu dupwa makwa isa ingyuo karo kuku pyaraminyipa nakama bange nyelana randa nao yulu andake piyami dupwa nyepala rae maiyuo minyuo kararami.
ISA 65:23 Yulu pirami dupwa mona karo andaramopa nakamana wane wanakepe dupwa randa andake nyii narami. Nambame nakamape dee ene manjo para pyao paraminyi dupwape yuu gii ene eparamo dupwana elyape keta piso puu paro.
ISA 65:24 Dopa pyuowako dee nakama nambapa lao ene ateŋa lao otapa naraminyipa kanyasa isingi yano pyakamiru.
ISA 65:25 Yana suwa kararope sipisipi yakane dupwape nenge mendakinya narami. Mena laene dupwame bulamakao nenge rambi yanda dupwa nengenyili pyuo nao kararami. Kau dupwa wambu nalanako pinginyili pyuo paa napala anjiki pyuo serami. Sayone nambana yuu kyau poo pyasi dokona koo renge dee randa nyingi rengepe mende see nara.
ISA 66:1 Kamongome lao, Yake doko nambana kiŋinya isa petenge rate silyamo. Isa yuu doko nambana kimbu kararo petenge. Anda apiyakale mende pyakaramisi? Yuu anjukundena namba palirusi? letamo.
ISA 66:2 Namba rangena kingi dokome yuu muu peparae pyuo wasiyu. Wambu lapome namba iki mupwa lao suu pyao pako warombo soo nakamana koo dupwa polo lao yaki nyepala inyimungu karenge dupwa kando namba epe soo karenge, letamo.
JER 1:1 Pii dapwa akali Jeremaya Ilikayana ikinyingi doko pii leyamo dupwa palamo. Ilikaya baa yuu taone Anatote lenge akali Benjamena yuu lili dokona purisi yulu pyuo karenge.
JER 1:2 Akali Josaya Amonena ikinyingi doko Juta wambunya kiŋi ee kana akalisa ipisu rema kareyamo dokopa Kamongo dokome Jeremaya keta pii lamaiya.
JER 1:3 Dee Josayana ikinyingi Jiyoakwimi baa kiŋi kareyamo dokopa Kamongo dokome kambako pii lamaiya. Dokopa Kamongome baa enakana yuu malu mee pii lamaiyamo pao Josayana ikinyingi akali Setekaya dokome isiyamo pao ee kana akalisa ipisu mendaki ingiya. Ee kana dokona kana kingi paki dokopa Jerusaleme wambu dupwa karapusi ingyuo puu maiyuo nyuo peyami.
JER 1:4 Kamongo dokome namba Jeremaya langyuo lao,
JER 1:5 Nambame emba endakinyinya ingi anda dokona wane ingyalana karo dokopa wambo rombo palyiyu. Dee emba manjipa nayaminyipa wambu rara dupwana peparae emba poropeta karare lao wambo rombo palyuo kaeyo, leya.
JER 1:6 Dopa leyamosa nambame isingi lao, Kamongo Mupwa Andake Wakasa, namba wane ene. Namba pii lalana saka nange, leyo.
JER 1:7 Dopa leyonopape Kamongome soo nembo lao, Emba wane ene karo laa napala pao nambame lape leto pii dupwa wambu keta lamaiyakape, leya.
JER 1:8 Dokona lao namba embapa role pyao kyawa minyaroŋo nakamame mende pirami lao paka nyii napipi. Namba Kamongo dokome leto, leya.
JER 1:9 Lapala enakana Kamongo banya kingi doko pyasinju lapala nambana kambu doko minyandeya. Minyandapala namba langyuo lao, See! Nambame pii emba langilyu dupwa emba kaeya nao lape.
JER 1:10 Epapu dakepa nambame emba pawa jepala yuu muu wakale wakale dupwa kiŋinya yuu wakale wakalena iso karape lao rombo palyipunu pilyamoŋo. Pyao lalyinyi nembo pyao kokwa sinyi nembo pyao rakapyanyi nembo pyao ralyuo neta kupinyi nembo apa yuu pyao dee minyalyuo pyuo pyuo pupi lao rombo palyilyu kande, leya.
JER 1:11 Lapala Kamongo dokome namba piso soo, Jeremaya emba aki kandelepe? leya. Dokopa nambame isingi lao, Isa mende kingi amene lenge dokona wangya doko kandelyo, leyo. Ipurunya pii dokona kingi amene doko iso kando karenge kuki dopale lenge.
JER 1:12 Dokopa Kamongo dokome lao, Emba kapa letene. Nambana pii dupwa kinyi angingyuo epelyape lao iso kando karo, leya. Ipurunya pii dokona kingi amene doko iso kando karenge kuki dopale lenge.
JER 1:13 Dokopa enakana Kamongo dokome namba kamba pii langyuo, Emba dee bange aki kandelese? lao namba piso siya. Dokopa nambame isingi lao, Namba kandelyo doko yuu dulurena sanapenge mendena ipwa bolo pyao karamo doko daerena ingyuo kulimbuo palinya pilyamo, leyo.
JER 1:14 Wambu rara peparae yuu dakena palaminyi dupwa keta randa doko ipwa ingyuo bolo pyao dorena piso nakama keta epara.
JER 1:15 Renge dokona wambu dorena ingyuo palaminyi rara dupwa peparae epena lao nambame kee leto. Nakamana kiŋi dupwame yuu Jerusaleme kana kamena kambu dokona nakamana kiŋinya petenge isa dupwa nyuo reto dee kana kame dokona awali lao reto pirami. Pipala Juta yuu menge taone karenge dupwana opetaeko awali lao pirami.
JER 1:16 Nambana wambu dupwame yulu koo pyuo namba kame sepala yaki nyilyaminyi dokona nambame nakama randa mairu. Nakamame anatu wakale dupwa mena pyao kiso mailyaminyi dee mee bange anatu lao kingimi wasapala lakandelyaminyi.
JER 1:17 Jeremaya, rapa rapa pipala namba emba pii peparae lape lao pii langilyu dupwa nakama pao lamaipi. Epapu nakama kando paka napipi. Epapu emba pakare ramo nakama pipya role kararaminyi dokopa emba pakanyi pyambwasasaroŋo paka napipi.
JER 1:18 Jeremaya, emba see. Wambu peparae yuu dakena range dupwamepe Juta kiŋi dupwamepe akali mupwa dupwamepe purisi dupwamepe dee wambu dupwamepe emba kando pimwaiyuo larami. Dopa laraminyipape yuu taone porai ane isame pingi dee kone kaname kana kame awali lao pingi porai dopale ingyuo wambu dupwa nyuo isa palyuo emba karalase lao nambame porainya renge jilyu. Nakamame emba nyuo isa palya narami. Nambame emba role karo konambe ingyuo alya minyaronopa karare. Namba Kamongo dokome leto, leya.
JER 2:1 Kamongome namba langyuo,
JER 2:2 Wambu peparae Jerusaleme petaminyi dupwa wai pii dake lamaila pupi. Nakama wane ene dokopa namba yaki nyii nao suu pyao mona reto kareyami kande lao suu pyao karapunu pilyamo. Enda mapwae kanda soo yapo nyepala dokopa mona retalamuli pyuo nakamame namba mona reto kareyami. Nakama yuu muiyane dokonape dee yuu ee nengepe wara pii nange dokonape nakama namba moko minyuo epeyami.
JER 2:3 Isaraele wambu nakama nambana iki yapasi ingyuo wanyi wanyi pyuo peteyami. Wambumi nakama randa jiyami dupwa keta nambane lekeleke koo rao randa nyinya lao maingi. Namba Kamongo dokome leto, leya.
JER 2:4 Nakama Isaraele rara dupwa peparae Kamongona pii dake, selapa.
JER 2:5 Kamongome letamo. Aki yulu koo lapo embena rora ambasu dupwame namba keta kando nyiyamisi? Aki mendeme nakama namba yaki nyuo peyamisi? Nakamame mee bange angi daale dupwa lakando papala nakama kapa palyuo kara nalyaminyi.
JER 2:6 Namba nakama Isipi wambu keta kiiramo nyiyu. Nyepala yuu muiyane nenge pulya nange yuu yando dee dokonape mendali pao pii nange yuu dokona lanyuo peyo. Peyonopape nakamame namba Kamongo dokoŋo lao pyapi pyuo soo kara nayami.
JER 2:7 Nambame nakama yuu amenge pingi nenge jingi lyingipi singi dupwana rae maiyuo dee nenge lapo dupwana rae maiyuo pirami lapala nambame nakama lanyuo peyo. Dopa piyunupape nakamame yuu au pyuo narami doko suu pyao nakamame nambana yuu doko lulya ranyi nembo kokwa siyami.
JER 2:8 Purisi dupwame Kamongo anja karase? lao piso see nayami. Namba rangena purisi dupwame namba soo nyii nayami. Akali mupwa dupwame nambamoo pipya mona kana pokoyami. Poropeta dupwame mee bange kingimi wasisi Bealo lenge dokona lao poropeta pii leyami dee mee bange angi mende ingya nayamo dupwana kingi lao peyami.
JER 2:9 Dokona lao namba Kamongo dokome nambana wambu dupwa pipya yanda pimwaiyuo nambana kote pii doko lao retakamiru. Nakamana para pyaraminyi dupwa keta nambame nakama koo piyami laro.
JER 2:10 Neta yalyingi dorena yuu kuki Saiporasa dokona pupi. Papala yuu Keta dokona neta pyakaenge dorena ingyuo mendali pena lape. Larene dokopa yulu dapale mende wamba pii nangende piyamo kanda nangende pira doko emba kandare.
JER 2:11 Wambu rara yuu liti wakale dupwame nakamana anatu dupwa anatu angi daa ingiyamopape yaki nyepala kaeya nange. Dopa piyamopape nambana wambu dupwa nambame nakama rape rape lao minyingi doko kaepala mee bange anatu dupwame nakama kando mende pii nara doko nambana panda dokona alowa pyuo dupwana kingi lao karaminyi.
JER 2:12 Dokona nambame yake doko yuusili minyili lao paka pinyi pyambuo yamarangunya lao romo romo andake pinya lao leto.
JER 2:13 Dokona lao nambana wambu dupwame yulu koo lama ingyuo piyami. Nakamame namba ipwa kamuo nenge guu lao epenge doko mata jiyami. Jepala nakamame ipwa pete sinya lao yuwale kyasiyami. Kyasiyaminyipape yuu kipwa kipwa dupwa yando nao poro lao rali pipala ipwa naku pao karo angi see naya.
JER 2:14 Isaraele wambu dupwa nakama kendemande daa. Nakama kendemande ingyuo manjo nyii nayami. Nakamana nyisu pentenge dupwame akipamo koto pyao karamisi?
JER 2:15 Nakamame Isaraele dupwa kando menda laene ingyuo nenge pyakilyapala pii letaminyi. Nakamame Isaraele wambunya yuu dupwa pyao apa yuu retelyaminyi. Dee nakamana yuu taone dupwa mee ukiaki minyasi sipyamo kame soo kaeyo otelyaminyi.
JER 2:16 Waa, yuu Memipisi akalipi dee yuu Tapanese akali dupwamepe Isaraele wambunya kyawa kuli doko pyao poro lakamilyaminyi.
JER 2:17 Nambame nakama Isaraele wambunya kata wapwakao pupunu dokopa nakamame namba nakamana Kamongo Anatu doko kame soo yaki nyiyami dokome randa dake nakama range keta nyilyaminyi.
JER 2:18 Nakamame Isipi pao ipwa Naele dokona ipwa napala aki bange mende nyerama lao suu pilyamisi? Nakama yuu Asiria pao ipwa Yuporisa dokona ipwa napala aki bange mende nyerama lao suu pilyamisi?
JER 2:19 Nakama rangena koo dokome nakama randa jera. Dee nakamame namba mata jiyami dokome koo ingyuo karaminyi lao lasaka pirasa pira. Dopa piramo dokopa nakamana Kamongo Anatu namba doko yaki nyuo kaeyamo doko yulu ama koo wakasa lao soo nyerami. Namba Kamongo Mupwa Andake Wakasa Ama Porai dokome lapunu pilyamo.
JER 2:20 Kamongo Mupwa Andake Wakasa dokome lao, Isaraele wambu dupwa nakamame yuu wamba nambana porainya renge doko kilya kandeyami. Nakamame namba kamba lao warombo soo lakanda nayami. Lapala yuu kyau ketae dupwanape dee isa renge isarena dupwana anatu angi daa dupwame namwana ee nengepe menape ree palupi dupwa kapa andanyi pyambungi lao lakandeyami.
JER 2:21 Nambame nakama isa girapo yapasi waingi angi doko dopale wara piyu. Dopa piyunupape nakama epapu apiyakale karamano lao kandalapa. Nakama isa girapo momo nao kupwa nenge koo dopale ingilyaminyi.
JER 2:22 Nakama sopo porai dokome wate piminyipape nakamana koo doko kyaya roo dopale ingyuo mee piro karapyamo kandelyo.
JER 2:23 Apa pyuo namwa range koo pali nangeŋe. Namwa mee bange anatu kingi Bealo doko lakanda nangeŋe laramisi? Nakama yuu anda lama lama dokona apa pyuo koo piyami doko kandalapa. Nakama mena kamele inya pundapala kalyuwa koto ralo papyuo karenge dopale ingilyaminyi.
JER 2:24 Yuu muiyane dokona papyuo karenge mena kamele pundapala kalyuwa nyelana suu pingi dokopa mendeme baa minyaro see nange ingilyamo. Dee mena kamele kalyuwa mendeme mena kamele inya doko nyelana suu pingi dokome koto paa nange. Kamele inya dokome wambo pao rapa rapa piru karenge. Nakama dopale ingilyaminyi.
JER 2:25 Isaraele dupwa mee anatu angi daa dupwa anja lao pete pete papiramisa nakama kimbu kape rando dee nakamana pendoko nyuo pisaraŋa dopa pyuo papi nalapape. Pii naraminyipape nakamame lao, Daaŋa namwa kapu kyuo epa narama. Namwa mee bange anatu wakale dupwa mona retapala dupwa moko minyuo panya pilyamano letaminyi.
JER 2:26 Kamongo dokome lao, Waa nyingi akali doko minyaro nyepala kando lenge dokopa baa pakao elyange. Doko suu pyao nakama Isaraele wambu peparae elyame kumarami. Nakamana kiŋipi akali mupwa dupwape purisi dupwape poropeta dupwape peparae elyame kumarami.
JER 2:27 Nakamame lao, Isa doko namwana rakane dee kana doko namwana endangi letaminyi. Dokona nakama peparae elya nyerami. Dokona nakamame namba mata jepala namba karo dokona kapu kyuo epa naminyidokona dake pipalako kaeyaro. Dopa piminyipape nakama randa nyepala dokopa nambame nakama kyawa lete nyele ipu lao piso singi.
JER 2:28 Nakama rangena anatu kingimi wasiyami dupwa anja karamisi? Nakama koo keta palipala rangena anatu dupwame nyisingi ramo doko nyisinya larami. Juta wambu dupwa nakamana yuu taone malu karenge dokoko suu pyao nakamana mee bange malu anatuŋu lao karaminyi.
JER 2:29 Nakama mumu lao pii letaminyi doko akisi? Akipamo nakamame nambamoo pipya yanda pimwaiyuo letamisi?
JER 2:30 Nambame nakama mana langyuo pyalana pipunupape dokome nakama nyiso rola nalyamo. Nambame nakama kata rolae lasaka pyuo dopa pii dapa lao langi laa nalyaminyi. Mena laene gasimwa pokapala nenge nenge manjo pii lenge dopale ingyuo nakamame nakamana poropeta dupwa pyao kumuyami.
JER 2:31 Isaraele wambu dupwa nambame apa letene lao selapape. Nambame nakama kando yuu muiyane dopale ingyuo dee yuu iminjingipi randa sipurengepe yuu dopale ingyuo karose? Namba dopa pii nange dokona akipamo nakama namba karo dokona kapu kyuo epa naramaŋa lao yulu nakama rae mailyamanuli pyuo pinya letamisi?
JER 2:32 Enda mapwae dokome baa kalya pyuo akali nyela penge dokona banya mamakupi dee kalya bangepe dupwa kame soo yaki nyingisi? Doko daa. Dopa pii nange doko kaepala nambana wambu dupwame yuu gii malu namba kame silyaminyi doko yaka lapenge daa.
JER 2:33 Isaraele wambu dupwa nakama pamuku endame akali anja karaminyi lao pyarako soo nyingi dopale ingyuo palyaminyi. Nakamame kamame koo wakasa pilyaminyi dokona pamuku enda wakale dupwa nakamana yulu koo pilyaminyi doko kando mana nyilyaminyi.
JER 2:34 Akali kuki mee kamenge karenge dupwa waa nyakaminyipili lao pyaminyisa ranjama dupwame nakamana komau dupwa para para pilyamo. Dopa pyuo karapalape
JER 2:35 nakamame lao, Namwa koo pii nange. Kamongo dokome namwa kando imbwa nara, lao letaminyi. Dopa laraminyipape nakama koo pipala koo pii nalyamano letaminyi dokona namba Kamongo dokome nakama randa jero.
JER 2:36 Pamuku enda kepo pyuo papingi doko suu pyao nakamana suu pingi alowa pilya pyana pyuo kata wakale wakale pelyaminyi. Dokona Asiria wambu dupwame nakama nyisa nayami. Dopaleko ingyuo Isipi wambu dupwame nakama nyisa naramiko ingyaramopa nakama mona randarami.
JER 2:37 Namba Kamongo dakeme wambu nakama mona mailyaminyi dupwa nambame mata mailyuŋu dokona nakama keta bange mendepe jeraminyi nyuo paa narami. Dokona nakama ayemba yuwa lapala elyame kumuo Isipi yaki nyuo eparami.
JER 6:16 Kamongo dokome banya wambu dupwa kando lao, Kata kandamae dupwana karapala kandalapa. Kandapala kata anjuku ama wambarae doko lao piso selapape. Piso sepala kata ama keyange doko anja silyape lao pisalapape. Dopa pipala dokona nakama pupwape. Dokopa mona kyuu lao singi renge doko nakama keta paliramo palyuo kararami, leya. Leyamopape nakamame lao, Namwa kata dokona paa narama, leyami.
JER 6:17 Dokopa wambu yanda pela epelyaminyi lao pii repe repe lamaiyuo bikuli pii poo lenge doko letape lao isingi akali lapo soo karena lao Kamongo dokome rombo palyiya. Palyiyamopape nakamame lao, Namwa doko see narama, leyami.
JER 6:18 Dokona lao Kamongo dokome lao, Nakama wambu rara dupwa peparae selapape. Sepala nambana wambu dupwa keta mende piramo doko nakama mana nyelapape.
JER 6:19 Isa yuu dokona palaminyi dupwa selapa. Nakamame koo pimwali yaka lao suu pyao nambana pii warombo see nao dee nambana mana pii dokona kamba lao piminyi dokona wambu dupwa nambame pyao kokwa soo kumuo nembaro, leya.
JER 6:20 Yuu Sepa piso nakamame rendamu pingi doko namba keta minyuo epeyaminyipape mona karo nyaka nalyo. Panda yuu wakale nanesa rae bange lapo nenge rende pinya lao minyuo epeyaminyipape dupwana lao mona nyii nalyo. Nakamana nenge kiso jeraminyi dupwa nambame rae maiyuo nyakami naro. Dee mena pyao kiso jeraminyi dupwana nambame rae maiyakami naroko.
JER 6:21 Dokona lao namba Kamongo dokome wambu dupwa lukumakapala pao palena lao piru. Pirunu dokopa ikinyingi rakangepe dupwa kumarami dee parali maki palengepe puu minyingipi dupwa opetae kumaramiko.
JER 6:22 Kamongo dokome lao, Yuu dulurena piso yuu mendena range wambu lapo epelyaminyi. Wambu rara nanesa wakale porai lapome yanda pinya lao rapa rapa pilyaminyi.
JER 6:23 Nakama wambu sakame kumuo nyisa nao randa maiyuo pyakando pingi dupwame nakamana yandape wua gelape nyilyaminyi. Nakamana mena ose matana piso epenge dokopa ipwa kota pete doko kasakole minyuo pii lenge dopa pyuo gulu galu lao epenge. Nakama Jerusaleme wambu pipya yanda pinya lao rapa rapa pisi epelyaminyi.
JER 6:24 Dokopa Jerusaleme wambu dupwame lao, Namwa pii doko simwa. Sepala namwa porainya renge mende pali napala namwana kingi dupwa yukyuo wale letamo. Enda wane manjinya mata pilyamo dokopa randa andake nao karenge doko suu pyao randa reeko doko namwa keta sii lao epelyamo.
JER 6:25 Doko namwana nyisu petenge dupwame nakamana pepona dupwa minyaro karo pyalana lao rapa rapa pyuo paka renge andake paleta namwa nyuo kako pyao karaminyi dokome namwa yuu muu wangupi dee yuu katape dupwana panya pakalyamano, leyami.
JER 6:26 Dokopa Kamongome lao, Nambana wambu dupwa kumanda piso wapungi komau doko wapuo pee pyapala kumanda pisipwape. Mendalimi nakama pyao kokwa sela epelyamo doko aopa minyarara dokona nakamana ikinyingi mendaki doko kumulyamopa ee lao kaumi kumuo petengenyili pyuo pisirami.
JER 6:27 Jeremaya, Embame kana golo dupwa kisapala apiyakale lao makande pyuo kandenge dopale ingyuo embame nambana wambu dupwa makande pyuo kandape.
JER 6:28 Nakama mona kana pokapala kamba lao simbi simbi pyuo pilyaminyi. Nakama kone kanape anepe poraingi dopale ingyuo pelyaminyi. Nakama peparae koo pyuo nembo nembo pii minyuo papyuo karaminyi.
JER 6:29 Kana golope anepe kisingi panda doko rao isasa pyuo alyuo karenge. Dopa pilyamopape kana golo koo dupwa rao lili lao nyisa epo paa nange. Doko nambana wambu koo pingi dupwa nyisa nyuo paa nange dokome nakama elyape inginya lao rolo waso pii narama ingilyamo.
JER 6:30 Namba Kamongo dokome nakama kando rae mai nao mata maiyu dokona nakama mee koo ingyuo nembenge dopale larami, Kamongome letamo.
JER 7:1 Dokopa Kamongo dokome Juta wambu dupwa tembole anda kame kambu kingi wapambupi lakao misi lala peyaminyi dokona namba puu lao nembeya. Baame namba Jeremaya langyuo lao, Emba dokona karapala Isaraele wambunya Anatu Kamongo Porai Wakasa dokome nakama mende lamairu doko nambame nyuo lamaipi, leya. Nambame nakama palaminyi dokona palyuo karalapa lao larowaleŋe nakamana nenge nao kata papyuo pii laope dee yulu pyuope pilyaminyi dupwa alowa pipwape lapya.
JER 7:4 Wambu lapome nakama minyako pyuo kyambo langyuo, Dake Kamongona tembole anda dokome namwa randa nyii nao kapa karamano lao larami pii dupwa soo nyii nalapape.
JER 7:5 Nakama palu karo pilyaminyi dupwa alowa pipwape. Dee yulu pilyaminyi dupwa kaeyalapape. Nakama yango mendali kando angi angi lapala lapo kandanyi palyili lao kara nalapape.
JER 7:6 Karo wambu yuu wakale rangepe wambu muiyanepe enda waiyape dupwa isa palyili lao laa narami. Dee yuu dakena wambu kamenge karaminyi dupwa pyao kumaka nalapape. Dopa pipala nakama kokwa sisaraŋa mee bange kingimi wasisi anatuŋu lenge dupwa lakanda nalapape.
JER 7:7 Nakama yulu koo doko yaki nyerami ramo dokopa yuu nambame nakamana rora ambasupi maiyalu maiyuo maiyunu dakena palyuo karalu karalapa lao piru lapya Kamongo dokome.
JER 7:8 Kandalapa. Nakamame kyambo lao panga soo minyako pyuo pii lenge dupwana soo nyuo minyilyaminyi.
JER 7:9 Dopa pyuo pao nakamame waa nyuo wambu yango pyamwalinya suu pyao enda kepo pyuo dee kinyi angi lete lao kingi ketae nembo kyambo lengepe mee bange anatu kingimi wasisi kingi Bealo lenge doko mena pyao kiso maiyuo dee kingimi wasisi bange wakale anatuŋu lenge lapo nakama wamba soo kanda nange dupwa lakando pelyaminyi.
JER 7:10 Nakamame namba yulu rae mai nao epe kanda napunu dupwa pilyaminyi. Pipala dokopa namba rangena tembole anda dokona epo nambana lenge kambu sipya dokona karapala lao, Namwa kyawa lete nyisi karamano, letaminyi.
JER 7:11 Nambana tembole anda doko waa nyingi dupwana yalu pingi panda lao suu pilyamisi? Nakamame doo pilyaminyi dupwa nambame kandelyo. Nambame panda wambo kanda soo namba lakandena lao rombo palyiyunu yuu Sailo dokona pupwape. Papala dokona nambana Isaraele wambu dupwa koo piyaminyisa nambame apa pyuo randa maiyu doko kandalapape.
JER 7:13 Nakamame yulu koo peparae nambame kingi lalono kandape dusipa pingi. Dopa piminyisa nambame nakama kamba kamba langyuo kareyonopape kamba lenge. Lapala nambame kee leyono dokona isingi yano pyaa nange.
JER 7:14 Dokona lao yuu Sailo tembole anda dokona piyunu yulu dokoko nambana tembole anda nakama mona pyamalyaro karaminyi dakena piru. Dae yuu dake nambame nakamana rora ambasu dupwa maiyuo dee nakama joo piyunu doko nambame yuu Sailo randa maiyuo yulu piyunu doko suu pyao piru.
JER 7:15 Nambame nakamana ree palu wambu Isaraele rara dupwa nyisa rekya lao nembeyo dokoko suu pyao nambame nakama nambana lenge kambu dokona nyisa ramanyi rekya lao nembaro lao namba Kamongo dokome leto. Kamongome lapya namba lare leya Anatumi.
JER 7:16 Kamongo dokome lao, Jeremaya wambu dapwana lao ateŋa lakami napipi. Dee ee laope nakamana reke lao ateŋa laope pii nareko. Nambame embena ateŋa doko soo nyuo yano pyaka naroŋo dokona namba piso sokondali pyuo laa napipi.
JER 7:17 Yuu Jerusaleme kata dupwanape dee yuu Juta taone dupwanape yulu pilyaminyi doko emba kanda nalese?
JER 7:18 Doko wane wanake dupwame isa ponale yapo nyuo malu palyilyaminyi. Akali dupwame isare pete wasilyaminyi dokopa enda dupwame mee bange kingimi wasisi enda anatu yake pandana kuini lenge dokona nenge palawa doko ipwa pipya pyaso minyapala nenge kyake wasakamilyaminyi. Dopa pipala nakamame namba randa jelana suu pyao ipwa waene dupwa kamame kulimbuo anatu wakale dupwa mailyaminyiko.
JER 7:19 Dopa piminyipape namba rolae angi doko randa jilyamisi? Daa nakama range keta randa nyuo dee elya renge nakama rangeme nyilyaminyiko.
JER 7:20 Dokona lao namba Kamongo Mupwa Andake Wakasa dokome nambana imbu singi andake doko tembole anda dakena kulimbwanyi peyaro. Dee mena wambupi keta kulimbuo peyaroko. Peyapala kamame isape dee ee nengepe isa jingipi dupwana opetaeko peyaro. Nambana imbu singi doko isare dopale mendemepe kapa kunja narami.
JER 7:21 Nambana wambu dupwa kana pyare lasi dokona mena pyao kiso jingi lapo kiso otalu oto otarami. Dopa pipala lapo nakama kiso mee joo narami. Dopa piraminyipape namba Kamongo dokome lao, Mena peparae mee langa kamenge narami, langilyu.
JER 7:22 Nakamana rora ambasu dupwa yuu Isipi piso lanyuo epeyono dokopa nambame mena pyao kiso mukinyi nembo maingi dokonape nenge kiso maingi dokonape mawa pii mende reta nayo.
JER 7:23 Reta nayonopape nakama nambana wambu ingyuo namba nakamana Anatu ingyuo piruŋu nakamame nambana pii dupwa warombo sinya lao lamaiyu. Dokona lao nakama keta bange peparae au pyuo puu paraŋa lao nambame nakama mawa pii lamaiyunuli pyuo palyuo kararami, lamaiyu.
JER 7:24 Dopa lamaiyunupape nakama warombo soo kui lao karope pirami ingya nayami. Dopa pingi kandale doko suu pyao nakamana mona koo kana pokonge dupwamepe mende pinya lao lamaiyamo dupwa piyami. Pipala elyape ingyuo kararami doko suu pyao ama kopetame kareyami.
JER 7:25 Nakamana rora ambasupi dupwa yuu Isipi yaki nyuo epeyaminyi yuu gii dokona piso pao yuu gii epapu dakepa nambana kendemande akali poropeta dupwa nakama keta peyoko karo.
JER 7:26 Nakama kamame mendeme pii wangu lakapala soo pii nayami. Dopa pyuo au pyuo karapenge doko kaepala nakamana rora ambasupi kwaeyaminyi dokope daa. Nakama mona kana pokapala mata joo pelyaminyi.
JER 7:27 Dokona lao Jeremaya, embame pii dasipa peparae nambana wambu dupwa lamairi. Lamairinyipape nakamame embena pii see narami. Dee embame kee larenepapae nakamame isingi yano pyao laa naramiko.
JER 7:28 Embame nakama lamaiyuo, Nakamana rara dupwame nakamana Kamongo Anatu doko namba kando warombo see nao dee nakamana randa epeyamo dupwana mana nyuo kando soo gisa nangeko lare. Anatu kando mondo lao suu pingi doko kumuo pelyamo. Nakamame renge doko dee arome pyao see narami ingilyamo, lare leya.
JER 7:29 Jerusaleme wambu dupwa kyawasi angasipi pyao kumanda pisipwape. Namba Kamongo dokome imbu singi nyuo nambana wambu dupwa mata maiyuo kilya kandeyo dokona yuu kyau ketae dupwana malu pinya ee lao kenane pingi pyao karalapape.
JER 7:30 Juta wambu dupwa yulu koo piyami. Nambana tembole anda dokona nakamana mee bange kingimi wasisi anatuŋu lenge namba epe kanda napunu dupwa nambana tembole anda dokona retakapala koo inginyi nembeyami.
JER 7:31 Dokona nakamana ikinyingi wanengepe dupwa isare dokona pyao kisaramaŋa lao yuu pau lama lama Inomo lenge dokona kana pyare kingi Topete lenge doko wasiyami. Nambame nakama dopa pinya lao lamai nayo dee doo yulu piyaminyi dokome nambana mona pyaa naya.
JER 7:32 Dokona lao yuu koree yuu mende sepa naramopa yuu doko kingi Topete laope panda yuu pau lama lama kingi Inomo laope pii narami yuu gii doko epara. Dopa pyuo laa naraminyipape yuu doko Kingi Wambu Pyao Kumakange Yuu Pau Lama Lama larami. Dokona nakamame wambu dupwa malu piraminyi yuu mendasa wakale see nalyamo dokona wambu malu pirami.
JER 7:33 Dokopa kumasi yongo dupwa mena rae lengepe dee yakape dupwana nenge ingyuo nao kararaminyipa mendeme pakanyi pyambuo ralinyi nemba narami.
JER 7:34 Dokopa yuu doko muiyane ingyuo sera. Seramopa yuu Juta taone dupwanape dee yuu Jerusaleme dokona kata dupwanape mona pyakalyuo pyao rae maingi rengepe dee endakalipi yapo nyuo rae maiyuo nenge nao petenge dupwape nambame mee ote pinyi nembaro, Kamongome leya.
JER 9:10 Yuu kyaupi dee rambi mena nenge nengepe yando nao kyapuo oteyamo dokona mona randapala ee lao kumaralerale nyuo pisiru. Mendali dokona kata papirami ingya nalyamo. Mena bulamakaope mendepe pii laramo see narami ingilyamo. Yakape mena rae lengepe dupwa ralo puu pao peyami, namba Jeremayame leyo.
JER 9:11 Kamongo dokome lao, Nambame yuu Jerusaleme doko kokwa sinya laro. Dopa pipala yuu doko suwa rae lenge makando karena lao piru. Juu wambunya yuu taone dupwa nyuo mee inginyi nembo yuu muiyane seramopa panda dokona mendali pali narami.
JER 9:12 Nambame piso soo, Kamongo, akipamo yuu dokona wambu dupwa moko palyuo paa nana lao bulu bulu pyao ukiaki minyasi silyape? Akali api mende mona palikonda pingindeme renge dake soo nyerase? Api keta embame pii doko polo lamaipinyipa pao baame wakale dupwa lamairase? leyo.
JER 9:13 Kamongome isingi dopa leya, Nambana mawa pii nakama keta pyao retapu dupwa yaki nyuo nambana kambunya pii ipyamo dupwa letamuli pyuo soo minya napala kamba letaminyi. Dee nambame mende pinya lapunu doko pii nalyaminyi.
JER 9:14 Dopa pirami doko suu pyao mona kana pokapala nakamana rakange dupwame pinya lao mana lamaiyaminyili pyuo nakama rangena suu pingi ipyamo doko yeelyo moko minyuo mee bange anatuŋu lao kingi Bealo lenge dupwa kingi wapambupi lakao lakandelyaminyi.
JER 9:15 Dopa pilyaminyi dokona namba Isaraele wambunya Anatu Kamongo Porai Wakasa dokome mende piru doko selapape, leya. Nambana wambu dupwa ee nenge kau pingi lapo nena lao maiyuo mauli ipwa lapo nao pinya lao mairu.
JER 9:16 Nambame nakama yuu wakale lapo nakamape nakamana rora ambasupimi paa nange dupwana pyao ralyuo bolombalo lao pena lapala nambame ami yanda singi keta nyinyi piso pyao kokwa sinyi nembaro.
JER 9:17 Kamongo Porai Wakasa dokome lao, Mende apa pipya kandapisi lao poraiyuo suu pyalapape. Enda kumanda piso ee lao petenge dupwa epena lalapape. Malu pinya pilyaminyipa enda lapome ee lao kenane pingi dupwa epena lalapape, leya.
JER 9:18 Dokopa wambu dupwame lao, Yuu gii mende mee nemba nao waiya lao namwana lao malu pinya ee lao kenane pingi mende pyao petena lalapape. Namwana lenge kapa doko ee ipwangeme simbuo lembakisa doko rombe laramo pisimanale.
JER 9:19 Ee poponge yuu Sayone dokona piso ipyamo doko apa pyuo koo keta palipala letaminyi lao selapa. Namwa elya nyulu nyuo nyilyamano. Renge namwana anda yuupi dupwa kwaeyasi silyamo dokona namwa yaki nyuo kaeyalu kaeyo kaeyarama ingilyamo.
JER 9:20 Enda dupwa Kamongo dokome apa letamo lao sinya leyo. Banya pii doko kale yukupala selapape, leyo. Wanenge dupwa kumanda piso ee larami lao mana lamainya. Dee nakamana puu minyingi dupwa malu pinya dokopa apa pyuo kenane pingi doko mana lamairami, leyo.
JER 9:21 Kumungi renge doko namwana windowa kata dokona kolando epelyamo. Epo namwana kiŋinya anda kambu dokona epelyamo. Epapala yuu taone kata barete andake dupwana wane wanakepe karaminyi dupwa pyao nyilyamo. Dee makete yuu dupwana akali parange karaminyi dupwa epo pyao nyilyamoko.
JER 9:22 Dopa pipala yongo kumasi dupwa yuu dupwana muu raleya. Dopa pipala menana ii rasi yuu dupwana malu palyarapu singi dopale ingyuo silyamo. Dee witi pyakepenge dokome mungyuo nyingi akali dupwame nyerami lapala mendemepe nyuo malu palya nange pyakepo bolombalo lao yaki nyingi dopale ingyuo silyamo. Kamongo dokome pii dokona lakape, langipya, leya.
JER 9:23 Kamongo dokome letamo. Mona palenge akali dupwame nakamana mona palyuo soo nyinginya renge doko lakanda nana. Panda akali porai dupwame nakamana porainya renge doko range lakanda nanako. Akali bange malu retenge dupwame nakamana bange dupwana lao range lakanda nanako.
JER 9:24 Mendeme range lakandalana suu pyara ramo doko baame namba Kamongo doko soo nyuo soo giso pilyamo dokona lakandara. Renge dokona nambame wambu mona retenge doko reto puu penge. Dopako pyuo nambame pii pali nana lao yulu rolae dupwa kapa pyuo puu penge. Renge dolapome namba rae mainyi pyambungi, Kamongo dokome letamo.
JER 14:1 Yuu panyi pyuo nenge see nao piyamo dokona lao Kamongona pii doko namba Jeremaya keta epo leya.
JER 14:2 Juta wambu dupwa ee lao kumaralerale nyuo kumanda petaminyi. Nakamana yuu taone dupwa isa pelyamo. Nakamana wambu dupwa mona randame kumuo isa yuu dupwana nangalo kyaso silyaminyi. Dee Jerusaleme wambu dupwa nyisinya lao ee letaminyi.
JER 14:3 Wambu bange malu retenge kamongo dupwame nakamana kendemande dupwa ipwa kamwala pena lami. Ipwa petenge isa yuunya singi mauli pete yale dokona kamwala pumi doko pisa napyamo kamuo nyii nalyaminyi. Dopa pipala nakama mee pee minyuo anda epelyaminyi. Epapala nakama ipwa pisa nalyamo lao pao mona kendapala apa pirama lao ee lao lenge kambu yambe pyao nee pyuo epelyaminyi.
JER 14:4 Dopa pyuo apu epa napyamo dokome yuu dupwa yando nao kyapwapala oo lapyasa pama akali dupwa mona yanyi pilyamo karapala nakama lenge kambu dupwa yambe pyao karaminyi.
JER 14:5 Dokopa ee yuu rambi andenge dupwa ando kara napyamosa mena diya lenge dokome banya yakane doko anju kipa nao sinya lapala kaelyamo.
JER 14:6 Mena donge rae lenge dupwa yuu kyau ketae dupwana karapala yana suwa kararope dopale ingyuo imambu ŋeeŋaepa lao kumuo nenge isakope naa nayami dokome lopo malawai lapyamopa karaminyi.
JER 14:7 Nambana wambu dupwame namba kando ee langyuo dokopa namwana koo wakasa piyama dupwame namwa range randa joo koo keta palyilyamo. Namwa emba karenge lao suu pyao kara napala kata malunya mata joo pao kaeyama. Namwa emba kando koo dupwa piyama. Dopa piyamanopape Kamongo embame nyisaro lao lao kaeyene dokona palyuo nyisape.
JER 14:8 Embame Isaraele wambu dupwame mende pirinyi lao sepala mona pyamalyuo lao karenge. Embameko namwana randa dupwana kyawa minyingi. Doko akipamo emba namwana yuu dakena upunili ingyalya ingyana pyuo yuu mendaki mee panya epo luu palipala penge dopale ingyuo karese?
JER 14:9 Emba akipamo akali mona nembako kamenge walu lao nyingi dopale ingyuo dee akipamo emba yanda singi lapo porainya renge pali napala nyisalana pako karenge dopale ingilisi? Kamongo emba namwa role karene doko siyamano. Namwa embena wambu embame namwa kyawa yaki nyii napipi, lao letaminyi, leya.
JER 14:10 Kamongo dokome wambu dapwana lao leya. Nakama namba yaki nyuo ralo makando pena mona nyilyaminyi. Dopa pipala nakama range kame pyuo minya narami. Dokona lao nambame nakama pipya rae mai nalyo. Dokona nakamana yulu kopetame pilyaminyi dupwa nambame suu pyaro. Suu pyapala nakamana koo dupwana randa mairu, leya.
JER 14:11 Kamongo dokome namba langyuo lao, Wambu dapwa nyisapili lao namba piso see napipi, leya.
JER 14:12 Nakama nenge naa napala nambame nyisa lao ee laraminyipape nambame nakamana ee see naro. Nakamame namba mena kiso joope dee nenge witi jingi kiso joope piraminyipape nambame nakama kando rae mai naro. Dokona ingyuo nambame nakama yanda pirami mendena lopo maiyuo yanyi maiyuo pyao kumakaro, leya.
JER 14:13 Dokopa nambame lao, Kamongo Mupwa Andake Wakasa, poropeta akali dupwame wambu dupwa lamaiyuo, Liti dakena yanda mende pii nao lopo see nara. Renge doko embame lalu lao lao mona kyuu lao singi renge doko iki yuu dakena seramo pisirami lapiŋi lao lao karaminyi, leyo.
JER 14:14 Dopa leyonopape Kamongo dokome isingi lao, Poropeta akali dupwame nambana kingi dokona lao kyambo letaminyi. Nambame nakama lala pena lao peeya nao nambame nakama dopa pyuo lena lao pii mendaki mendepe mana lamai napu. Nakama pii repa repa pyuo lenge mee wakale lapo unyi anyi pyuo range pipala letaminyi dupwape mende nambame pinya lao maiyunde daa. Nakama dopa pira dapa piralyamo lao mee tangeme suu pyao letaminyi dupwa mee ingyuo pelyamo.
JER 14:15 Renge dokona lao namba Kamongo dokome poropeta akali dupwa namba pena laa napunupa mee rangeme sisu lao nambana kingi lao mee letaminyi dupwa mende piru lao letoŋo. Poropeta pii lao yuu dakena lopo see nao wambu kaku wuape nenge dokona nyuo mapisa nareŋe langilyaminyi dupwa yuu dakena nakama lopo maiyuo wua kakupi nenge dokona nyinyi pisarono kumarami ingilyamo.
JER 14:16 Wambu lapo opetae pii letaminyi doko soo karaminyi dupwa dopaleko ingyuo pyao kumakarami. Dokopa nakamana yongo dupwa yuu Jerusaleme kata barete andake dupwana nembaraminyipa wambu mendeme au pyuo nyuo malu pii narami ingyara. Doko etenge ikinyingi wanengepe wambu peparaepe dopako pirami. Nakamana yulu koo dupwana nambame yano nyuo dopa piru, leya.
JER 14:17 Kamongo dokome nambana mona rando karapunu dokona wambu dupwa lamairi doko pii dapwa lamaipi, langiya. Nambana wambu dupwa wua kakupi piso kopeta kapeta pyami dokona kukwa korakamape ee dupwa palyamo kata pali naramopa lao kararo ingilyamo.
JER 14:18 Namba yuu neta dorena kandaro dokopa akali ayemba pukusi dupwa male lao seramo kandarolyamo. Dee taone dorena parono dokopa wambu dupwa lopome kumuo karaminyi dupwa kandarolyamo. Poropeta purisi akalipi dupwame nakamana yulu doko mee kyawame suu lao pyuo pelyaminyiko dokoŋo angi doko aki pilyamano lao see nalyaminyi.
JER 14:19 Kamongo, emba Juta wambu pipya kinyi kinyi mata maiyuo letese? Yuu kyau Sayone wambu dupwa embame epe kanda nalese? Akipamo embame namwa pyuo nyii namili lao randa andake jilisi? Namwa mona seramo karalana koto pumwano dokopa keyange mende kando nyii nalyamano. Namwa pyuo nyereŋe lao suu pyamwanopape paka renge doko epelyamo.
JER 14:20 Kamongo, namwame emba kando koo pimwa. Doko namwa rangena koo dupwa polo lao dee namwana rora ambasu dupwana koo dupwa polo letamano.
JER 14:21 Embena lalu lao lenge pii dupwa kame see napala embena kingi dokona reke lao namwa mata joo kaeya napipi. Kiŋinya palyuo karenge yuu Jerusaleme dokona elya renge doko minyuo epa napipi. Embena kana minyuo lalu lao lenge pii porai kandale doko yala napipi.
JER 14:22 Yuu liti wakale wakale wambunya mee bange anatuŋu lao isa kanape wasisi dupwame apu peya narami. Yake dokome susu lao apu pura pura pyao epena lao nyuo peya nara. Yulu dupwa peparae embame iki inginyi peengepya. Dokona lao namwana Kamongo Anatu emba keta dupwa peparae epara lao soo karamano.
JER 15:1 Enakana Kamongo dokome namba langyuo lao, Akali Mosese Samyuelepa dakena karapala namba piso sokondali pyuo lambili doko nambame wambu dapwa sakame kumuo pyuo nyii napuli. Wambu dupwa nyisa pena lape. Wambu dupwa nambana lenge kambu silyamo dokona kara napala neta pena lape.
JER 15:2 Nakamame emba piso soo, Anja paramase? leyami kande dokopa nambame letono doko nakama lamaipwape. Lapo yanyi nyepala kumuo parami ingilyamo dokona nakama parami. Lapo yandana kumarami ingiyamo dokona lao parami. Lapo lopome kumuo parami ingilyamo dokona lao parami. Dee lapo dupwa karapusi pyuo minyuo parami ingilyamo dokona parami leto.
JER 15:3 Namba Kamongo dokome yulu kisima mona randanyi pyambuo epara dusipa nakama keta pyaka sinya lao suu pyao retelyo. Nakama yanda dokona pao kumaraminyipa nakamana yanenge dupwa suwame ipyalya ipyana pyuo soo parami. Dokopa yaka dupwame napala malarami dupwa suwa menape rae lenge dupwame yuu mendaki nao yuu mapu pinyi nembarami.
JER 15:4 Yuu muu peparaena wambu dupwa namba Juta wambu Esakayana ikinyingi Manasa baa Juta wambunya kiŋi ingyuo karo dokopa yuu Jerusaleme dokona yulu koo piyamo dokona lao isingi piru doko kando yamarangyuo pakarami.
JER 15:5 Kamongo dokome lao, Jerusaleme wambu dupwa apimi nakama kondome kumuo dee apimi nakama mona randame kumuo ee lao apimi kapa pyuo wangu lakao karo nakama apa pipyamo karaminyi lao piso serase? letamo.
JER 15:6 Wambu nakamame namba yaki nyuo kaeyo mata jiminyi dokona nambana imbu singi doko kame pyuo minyuo makapu dokome nambana kingi pyasinju lapala nakama pyao kokwa sinyi nembapu.
JER 15:7 Yuu taone peparaena nambame nakama kalendakuna porakana pyao nembele lao nakama nambana wambu dupwa kokwa sinyi nembeyo. Nakamana yulu koo pingi karo doko yaki nyuo kaeya nao minyaro siyaminyi dokona nambame nakamana wane wanake dupwa opetae pyao kumakayo.
JER 15:8 Nakama rangena yuu dokona enda waiya dupwa ipwa kota kee kana dupwa manda manja nao kamame wakasa petaminyi. Nambame nakamana wane parange andengena dupwa pyao kumakapala endangi dupwa mona rumbingi petena lao piyu kande. Aopa nambame nakama keta yuu mendaki paka rengepe mona randange rengepe paleta epo piyu.
JER 15:9 Enda mendena wane yanda ipingi nyepo kumapyasa baa lulaka pao pembetoko pyapyasa popo nembalana saka nalyamo. Baa eŋa nembo petenge dopa pyuo pisa napala mona rumbingi petamo. Nakama lapo pyapa nalyaminyi dupwa Kamame yanda pimwai keta nyuo mapi sero dokopa pyarami. Pii dusipa namba Kamongo dokome lapusa pilyamo.
JER 15:10 Namba keta rae maingi renge pali nalyamo doko aki akalinde karose? Akipamo nambana anyi dokome isa yuu dakena manjo nyiyase? Nambame yuu dakena wambu peparae kando laiya lao apiyanda pyuoko kararolyamo. Nambame kana lapo kyanju pyao nyakamyuope dee nambame lapo mainyi palyuowape pii nangeko. Doŋo wambu peparaeme namba koo keta palyuo letaminyi.
JER 15:11 Kamongo nambame embena yulu pyaka nao kinyi letaminyi dupwa pyaka naronde ramo nakamame namba keta koo mende palena letaminyi pii dupwa angi inginya. Dee nambana yanda pimwai randa nao kareyaminyi dokopa nyisa naronde ramo doko randa dupwa namba keta palena.
JER 15:12 (Mendeme ane isa doko minyuo roo pyarami ingya nalyamo. Ane isa dulurena kone kaname palya palya pyuo wasingi dupwasa leto, lao, Jeremayame leya.)
JER 15:13 Dokopa Kamongo dokome namba langyuo lao, Nambame yanda pimwai dupwa epena lapala nambana wambunya kanape kamongonge bangepe yuu dokona silyamo dupwa nyuo soo pena laro. Renge doko nakama yuu palaminyi dokona kapa kapa pyuo koo pilyaminyi dokona randa maiyuo dopa piru.
JER 15:14 Pipala nambana imbu singi doko isare ingyuo angao karalu karamo dokona nambame nakama see naraminyi panda mendasa nakamana yanda pimwai wambu dupwana yulu pyakaminya lao piru, leya.
JER 15:15 Leyamo dokopa nambame lao, Kamongo emba silini. Namba suu pyapala nyisape. Wambu lapome namba randa jilyaminyi dupwa isingi randa mairuwale. Nakamame namba pyao kumakalena pilyaminyi dokona embame nakama pyuo karena lao iso karo panda maiyuo kaeya napipi. Embena kingi dokona reke lao karapusi namba kando kilya kando letaminyi doko suu pyape.
JER 15:16 Embame namba pii langii dokopa pii mende isa nemba nao siyu kande. Kamongo Anatu Porai Wakasa doko, namba embena kandale. Dokona lao embena pii doko nambana monarena rae maingi mona pyakalyuo pingipi renge dupwa pipya palyuo simbulyamo.
JER 15:17 Nambana yuu gii doko wambu lapo pipya mee giinyi kamba sero rae maiyuo mee role pisa nange kandale. Embena pii leene doko warombo soo namba range iki piso wambu koo piyaminyi dupwa kando imbu singi dokome palyuo simbuyamo peteyo kande.
JER 15:18 Namba akipamo mee randa nyuoko karose? Akipamo nambana monarena rete dupwa umbwa pii nalyase? Akipamo umbwa pii nalyase? Panyi pipala ipwa epenge sokolyasa nalana lisa pingi. Nambame embapa dopale ingyuo suu pyao karalase lao pilisi?
JER 15:19 Dokona dee Kamongo dokome isingi lao, Emba kapu kyuo epare ramo doko nambame emba nyepala dee kamba emba nambana kendemande akali ingyare. Ingyapala pii koo lao papilini doko suu pyao emba wai pii keyange doko larenepa emba dee kamba nambana poropeta akali ingyare. Wambu dupwa kapu kyuo emba karare dokona eparaminyipa emba dee nakama kararami dokona pare ingya nara.
JER 15:20 Nambame emba kone kana yale kapa dupwame kana kame porai pingi dopale ingyuo kareene lao suu pyapala nakamame emba isa palya narami ingyara. Nambame emba kyawa minyuo lete wai pyao nyuo kararo.
JER 15:21 Nambame akali koo kopetame pingi dupwana porainya renge dupwana emba kyawa minyuo reto kararo lao namba Kamongo dokome lapusa pilyamo, leya.
JER 18:1 Kamongome namba langyuo,
JER 18:2 Yuumi pere warake wasingi akali banya anda parenepa dokona nambana pii emba langiru, leya.
JER 18:3 Dopa leyasa papala pere warake wasingi akali banya wasingi taepo repeta yulu pyuo peteyamo kandeyo.
JER 18:4 Pere wasiyamo dokona pao kwaeyamo ramo dokopa dee minyuo uki minyapala wara dokome pere mendere wakale wasapa piya.
JER 18:5 Dokopa Kamongome namba langyuo,
JER 18:6 Nambame nakama Isaraele wambu dupwa pipya pere wasingi akalinya pere wasalana suu pyapyamo doko kaepala uki minyuo wakale wasiyamuli pyuo pii narose? Akali wara minyaro karo mende mende pyuo wasalana suu pilyamuli pyuo pingi kandale. Dopa pyuo nakama nambana kingi kapena karaminyi dupwa dokona palyuo piru.
JER 18:7 Nambame yuu lapo maso yuu liti mende lalyuo kokwa sinyi nembaro laronopa
JER 18:8 wambu dupwana suu pingi yulu koope dupwa mata maiyuo kaeyarami ramo dokopa namba laro dokona palya nao alowa pyuo kaeyaro, leya.
JER 18:9 Dopa pirunupape nambame lao dokopa yuu liti mende pyuo andanyi nembaro laronopape
JER 18:10 koo pirami ramo doko pinya larono suu pingi doko kaeyaro, leya.
JER 18:11 Dokona lao embame Juta wambupi Jerusaleme palaminyi dupwape randa mainya pipunu dokona dakepa oo randa mainya rapa rapa pyuo kaelyo letamo lao lamaipala koo pilyaminyi dupwa yaki nyuo kata koo papilyaminyi dupwa alowa pyuo kaena lao lamaipi, leya.
JER 18:12 Lamairinyipa nakamame isingi kamba lao, Akipamo pii naramase? Namwa mona kana pokapala koo pinya suu pilyamuli pyuo pirama larami, leya Kamongome.
JER 18:13 Kamongome lao doko, Isaraele wambu dupwame renge ama koo wakasa lapo pilyaminyi. Renge dopale yuu liti wakale dupwana pyaka siyape lao piso sepe.
JER 18:14 Yuu Lepanone kyau ama ketae dokona ase doko yuu lapo see nangese? Yuu manda renge kyaunya ipwa guu lapala epo penge dupwa sokongese? Dopa pii nange.
JER 18:15 Dupwa alowa pii napyamopape nambana wambu nakamame namba kame soo kaeyapala mee bange kingimi wasisi dupwana lao rendamu pingi bange kiso mailyaminyi. Nakama paraminyi kata rolae doko ranilyaminyi. Wamba paenge kata doko yaki nyuo kaeyapala nakama kata kyakana pelyaminyi.
JER 18:16 Nakama rangena yuu andape kwao paliminyipa kandapala giyalya giyana pyuo karalu karaminyi. Kata lalyalana pirami dupwame kando epe nasepala nenge longanyi nembo pakarami.
JER 18:17 Nambame nambana wambu dupwa nakama mata maipala yanda pimwainya lenge kambu dokona porambaiye poraindeme sinjimu poo lao soo pyambuli laro. Lapala randa andake eparamo dokopape nyisa naro, leya Kamongome.
JER 18:18 Sepala dokopa wambu dupwame lao, Jeremaya randa maiyuo pyao ralinyi nembamanale, leyami. Lapala dee lao purisi akali lowa mana lengepe dopa pipa dapa pipa lao mana langingi akalipi poropeta akali pii nolako lenge dusipa lao karalu kararami. Dokona lao Jeremaya banya pii laramo doko sakame naramaŋa randa maiyuo kote lamanale, leyami.
JER 18:19 Dokona lao nambame ateŋa lao dokopa dopa leyo. O Kamongo, embame nambana pii kale yukupala soo dokopa nambana yanda pimwai dupwame namba randa jinya letaminyi doko soo karakape.
JER 18:20 Mendeme keyange piramo dokona koo dokome yole mairaminyi kapase? Dopa piraminyi kapa ingya napyamopape rakaya palena lao kyuwa kyasingi dopale ingyuo namba randa jinya suu pyami. Wamba dokopa Kamongo embame nakama imbu singi nyii napili lapala nakamana lao langyala epeyo kande.
JER 18:21 Dopa pyuo karakamyuo kande doko kaepala dakepa nambapa koo pilyaminyi dokona Kamongo embame nakamana wane wanakepe dupwa lopanyi nembapala kumanyi nembape. Yanda dupwana angi nyuo suu lape. Enda dupwana ikinyingi akalingipi kumanyi nembakamipi. Wanyane akali dupwa yandana nyuo papala kumaraminyipa andapae dupwa anga yakane kapape kisapala kumunyale.
JER 18:22 Wambu yanda kambu dupwame repe repe lamai nao nakamana anda epapala andambupi nenale leto. Dopa pyuo andakare pisaraminyi dupwa pakame kumapala aa lao ipwa kaku nyinyale. Rakaya palena lao kyuwa kyasili lao namba randa jinya kone makalyaminyi.
JER 18:23 Dopako pyuo nakamame namba pyao kumaselana suu pyao karaminyi doko Kamongo emba silini kande. Nakamana koo pilyaminyi doko kame sakami napipi. Koo dupwa nakama keta sinya kaeyape. Embame imbu singi nyepala dokona nakama isa palyuoko karena lao kandaro karape, leya Jeremayame.
JER 19:1 Kamongo dokome namba langyuo, Ipwa pee warame wasisi mende ropo pyala puu, leya. Baame namba kamame langyuo, Wambunya akali kyawa dupwana lapope dee purisi akali dupwana lapope nyuo minyuo pupi, leya.
JER 19:2 Papala Penge Warame Wasisi Kambilyamo Nembenge Kame Kambu dokona kata pao yuu lama Inomo lenge dokona papala dokona karo baame pii langira dupwa laro ingiya.
JER 19:3 Dokopa Kamongo dokome namba dopa lape, langiya. Juta wambunya kiŋi dupwape Jerusaleme wambu dupwape Isaraele wambunya Anatu namba Kamongo Porai Wakasa dokome lalopono doko selapape. Nambame randa andake mende yuu dakena minyuo eparonopa wambu mendeme doko sera ramo doko mona nembo yamarangyuo karara.
JER 19:4 Nambame doo pirunu doko wambu dupwame namba kame soo yaki nyepala yuu dake koo inginyi pyambuo kokwa soo mena pyao kiso anatu wakale dupwa maiyami. Nakamape dee nakamana rora ambasupi dee Juta wambunya kiŋi dupwape mee bange anatu see nange dupwa kiso maiyami. Nakamame wambu yulu koo pii nange dupwana ranjama dupwa kulimbuo nembo kareyami dokona dopa piru.
JER 19:5 Dopa pipala mee bange anatu kingi Bealo lenge dokona mena kiso maingi dopale ingyuo nakamana wane wanake dupwa isarena kiso mairami dokona Bealona lao kana pyare leyami. Nambame nakama dopa pinya lao mana lamai nange. Dee suu pinginyape epa nangeko.
JER 19:6 Dokona ingyuo yuu gii doko oo repeta epelyamo dokopa yuu dake kingi Topete panda yuu Inomo lamako laa narami Wambu Pyao Kuma Singi Yuu Lama laraminyi serami, leya.
JER 19:7 Yuu dokona Jerusaleme wambu peparaepe dee Juta wambu peparaepe mende pirama lao lao retelyaminyi dupwa nambame ukiaki minyinyi nembaro. Nakamana yanda pimwai dupwame pyao wini pipala yandana nakama pyao kumakana laro. Nambame nakamana yanenge kakapange kumasi dupwa mena rae lenge yakape dupwame nenge ingyuo nena lao mairu.
JER 19:8 Nambame yuu taone dakena randa dopale minyuo epo kokwa seronopa wambu kandama epo paparaminyi dupwa walu lao mona nembo kandarami.
JER 19:9 Dokopa wambu yanda pimwai dupwame yuu taone doko nyuo sukusa palyapala wambu pyalena pirami. Pyaraminyi randa doko kamame kopetame wakasa ingyuo paramosa wambu angi yuu taone dokona pisirami dupwame yango mendeme mende pyao nao wane wanake dupwa range pyao nao pirami, leya.
JER 19:10 Lapala Kamongo dokome namba langyuo, Akali namba role pyao iminyi dupwana lenge kambu dokona pee warame wasisi doko pyao poro lape, leya.
JER 19:11 Lapala wambu dupwa lamaiyuo, Kamongo Porai Wakasa dokome lapya lape. Nambame wambu dupwa kanya pyao liti pyuo yuu taone dupwa pyao lalyuo pirunupa ipwa pee warame wasisi poro lasi dee kamba nyuo kimbu kimbu soo wasa nange dopale ingyarami. Wambu dupwame nakamana kumasi yongo dupwa yuu mendasa malu pirami ingya narasa yuu Topete dokonako malu pirami.
JER 19:12 Nambame lalu lao leto. Namba yuu taone Jerusaleme dakepe wambu dakena palaminyi dupwape nyuo yuu Topete dopale inginyi pyambwaro.
JER 19:13 Yuu Jerusaleme dokona anda dupwape Juta kiŋi dupwana andape dee anda lapo dupwanape anda yangi ketaerena rendamu pingi dupwa kiso bui dupwa kingi lao maiyami dupwape dee lapona mena kiso maingi dopale ingyuo ipwa waene dupwa mee bange anatu lenge dupwana kulimbuo palyiyami dupwa peparae yuu Topete koo dokome kwaeyasi silyamo dopale ingyuo para, leya.
JER 19:14 Dokopa namba Kamongo banya wai pii lakala puu leyamo peyono yuu Topete doko yaki nyuo peyo. Pao tembole anda kamapisa karapala wambu peparae lamaiyuo,
JER 19:15 Isaraele wambunya Anatu Kamongo Porai Wakasa dokome lao, Nakama mona kana pokapala nambana pii lapunu doko see nalyaminyi dokona nambame yuu taone dakenape dee yuu taone repeta silyamo dupwanape peparae randa andake mairu lao nambame leyonoli pyuo piru letamo, leyo.
JER 20:1 Dokopa purisi akali Pasa lenge akali Imana ikinyingi doko tembole anda dokona mupwa ingyuo kareyamo dokome namba pii renge dokona lao kareyono doko siya.
JER 20:2 Sepala baame tembole anda Benjamene Kame Kambu Ketae lenge dokona repeta namba pyapala ane angapumi kiimbuo nyinya leya.
JER 20:3 Dokona yangama dokopa Pasame namba neta nyiyamo dokopa nambame baa lamaiyuo, Kamongo dokome embena kingi Pasa kaepala Wambu Paka Renge Maiyuo Paenge Akaliŋi lape lapya, leya.
JER 20:4 Kamongo baa rangeme lao, Nambame emba range paka renge joo dee embena puu minyingi dupwa maiyuo pirunupa nakama peparae nakamana nyisu petenge dupwame wua gelame pyao kumakaraminyipa emba kandare, leya. Nambame Juta wambu dupwa peparae nyuo Bapilonena kiŋi akali doko keta mairunupa baa lapo karapusi ingyuo puu maiyuo nyuo banya yuu dokona lanyuo pao dee lapo pyao kumako pira, leya.
JER 20:5 Nambame nakamana yanda pimwai dupwame yuu taone andake dakena panda maiyuo kaeyaronopa epo nakambana mena bangepe kamonganyi nembengepe rungi rungi pingipi dupwa peparae andambupi nao nyuo pao dokopa Juta kiŋi dupwana kana bangepe dupwa opetae nyuo yuu Bapilone dokona nyuo pao kaki pirami.
JER 20:6 Pasa emba doko embena ree palu dupwape peparae minyarapala nyepala yuu Bapilone dokona lanyuo parami. Dokona emba kumarenepa embena puu minyingi lapo kyambo malu lamaiyuo kareene dupwa pipya malu pirami.
JER 20:7 Kamongo embame namba minyoko piinyipa namba minyoko pisi karalyono silyu. Emba keta porai palenge dokome nambapa manda manja nalyamo. Dokona lao wambu dupwame namba kando giyalya giyana pyuo nyuo male male lao karaminyi.
JER 20:8 Namba yuu peparaena pii lapunu yaka lao ee lao pii poraiyuo lao pilyu doko Randa Andake Epo Yuu Doko Kwaeyo Para ingilyamo lao lao karapunu pilyamo. Kamongo namba embena pii dokona lao lakao papipunu dokona namba kando yuu peparae giyalya giyana pyuo isa nembele lao letaminyi.
JER 20:9 Dopa pipyamo dokona nambame Kamongo kame soo kaepala banya kingi dokona laa naro lao karapunupape Kamongo embena pii pyasi doko nambana mona dokona isare ingyuo koko rao ango silyamo. Sipyasa pii doko neta nyuo laa nalana suu pyapunupape kapa kame pyuo minyaro ingya nao nambana kambu dokona neta epelyamo.
JER 20:10 Namba sipunu dokopa wambu peparaeme isa isa paeyo lao, Yuu peparaena paka renge dokonako maipilyamoŋo, letaminyi. Gapomane akali dupwa banya lao lamaimanale. Dopako pyuo nambana puu minyingi angi dupwame namba koo keta palepe lao kandaro karaminyi. Nakamame lao, Mendeme baa alyikilyi pyuo nyuo iso kota nembara dokopa namwame baa minyarapala moŋo mairama, letaminyi.
JER 20:11 Dopa laminyipape Kamongo emba ama kamame porai wakasa doko nambapa karene dokona lapome namba randa jilyaminyi dupwa isa parami. Nakama pyuo ayemba palyarami ingya nalyamo dokona elya nyuo karalu kararami. Nakama wini pirama kata mende see nayasa elya nyiyama lao kararami.
JER 20:12 Dopa piraminyipape Kamongo Porai Wakasa embame wambu peparae rolae dokona makande pyuo kandenge. Nakamana mona kyawa sisingipi dupwana aki palamo doko embame soo oto karapinyi pilyamo. Dokona nambana randa dupwa embena kingi raka dokona palyilyu. Dokona nambame nyisu petenge dupwa pipya moŋo maiya kare doko kandarowale.
JER 20:13 Akali yulu koo pingi dupwame randa maiminyi karaminyi wambu dupwa kiiramo nyingi dokona suu pyao Kamongo doko kenane pyao banya kingi ketae pyambuo lakandamanale.
JER 20:14 Namba mandeyaminyi yuu gii doko kopyaliŋi lamana. Anyimi namba mandeyamo yuu gii doko mupwa lao suu pyaa namanale. Kopyali ingyuo peelyamo lao suu pyamana.
JER 20:15 Akali mendeme namba mandeyaminyi dokopa wane mende manjakalaminyi lao epo rakane lamaiyuo rae mainyi pyambuyamo akali dokona kingi kopyali ingyuo penale.
JER 20:16 Kamongome yuu taone lapo sakame kuma nao pyao kokwa siya dopale ingyuo baa penale. Baa yangama dokopa rando ee larami dokope korakama dokopa yanda pyala panya kee kupi larami dolapo soo karena.
JER 20:17 Renge dokona lao namba ingi anda peteyono dokopa akali dokome namba pyao kumaka naya. Manjipa nayamopa namba piyali dokopa nambana anyinya ingi anda doko nambana malu anda ingiyali.
JER 20:18 Namba akipamo mandeyamisi? Randa nyuo mona rando elya paleta karo kumare lao mandeyamisi?
JER 23:1 Wambunya akali kyawa dupwame Kamongona wambu dupwa randa maiyuo pyao kokwa soo ralinyi nembo karaminyi dupwa Kamongona kote lenge yuu gii pyaka seramo dokopa randa andake nyeramilyamo.
JER 23:2 Isaraele wambunya Kamongo Anatu dokome dopa letamo. Isaraele wambunya akali kyawa dupwame nambana wambu rapu pyakamiramili kata dokona pyaka nalyaminyi. Nakamame pyao kusape palyuo bolombalo lanyi nembakalyaminyi. Dopa pyuo yulu koo doo pilyaminyi dokona lao nambame nakama randa jero, letamo.
JER 23:3 Nambame nambana wambu lapo dupwa bolombalo lao yuu wakale dupwana nembeyono dupwa nyuo malu palyuo lanyuo epo yuu andape range dokona peyaro. Dopa pirunupa nakama keta wane wanakepe malu wai kisaronopa rara doko ando nyimbwara.
JER 23:4 Nambame akali kyawa lapo rombo palyapala nakama iso karena laro. Nambame nakama kamba randa mai naronopa nambana wambu dupwa dee pako yamarangyuo kara narami. Namba Kamongo dokome lapusa pilyamo.
JER 23:5 Kamongo dokome lao, Dapitinya para pyasi dokona yulu rolae pingi mende kiŋi inginya lao wasaro yuu gii doko epelyamo. Yuu liti dokona kapa kapa pyuo kiŋi dokome mona angi palipala anjuku rolae lao rolo pyuo rapu pyuo karara.
JER 23:6 Baa kiŋi ingyaramo dokopa Juta wambu dupwa kyawa minyara. Dee Isaraele wambu dupwa manda rao mona seramo palyuo karo pirami. Banya kingi doko Kamongo Namwana Lete Wai Pyao Nyingi, larami.
JER 23:7 Kamongo dokome lao, Kamongo lete karalu karenge dokome Isaraele wambu dupwa yuu Isipi piso nyuo minyuo epeyono doko kando wambu dupwame pii porakai mende lalana dokopa nambana kingi lao kinyi leto lao laa narami gii doko epelyamo.
JER 23:8 Dopa laa naraminyipape yuu dulurena dee yuu wakale wakale dupwana nambame nakama bolombalo lao nembeyono pao kareyaminyi dupwa nyuo minyuo epeyono Anatu lete karalu karenge doko kando pii porakai mende lalana dokopa nambana kingi lao kinyi leto larami. Dokopa nakama rangena yuu dokona palu kararami.
JER 23:9 Namba poropeta akali dupwana lao suu pyao mona rumbingi karo mona pupyamo walu walu lao karo. Kamongo dokomepe dee banya pii poo pyasi dokomepe namba ipwa biya napala karenge dopale inginyi pyambulyamo. Akali mende ipwa waene malu napala lao kararamuli pyuo lao karalyono.
JER 23:10 Wambu malu yuu dakena simbuo palipala Kamongona yulu mondo lao pii nao kaelyaminyi. Nakama yulu koo dupwanako suu pyao pimisa nakamana yulu angi doko yaki nyilyaminyi. Kamongome yuu doko kwaeyo pena leyamo dokona rambi isakope dupwa kyapuo yanda nao kumuo pupyamosa ee lao kumanda petaminyi.
JER 23:11 Kamongo dokome lao, Poropeta purisi akalipi dupwa Anatu soo nyii nalyaminyi. Tembole anda angi dokona pao yulu koo pyuo kareyaminyi kando nyiyu, letamo.
JER 23:12 Nakama kata moko minyuo pelyaminyi dupwa iminjo keta keta pira. Nambame nakama lukumakapala pao palena lao piru. Nambame nakama keta randa andake mairu. Nakamana randa nyerami yuu gii doko epelyamo. Namba Kamongo dokome leto.
JER 23:13 Yuu Samaria dokona poropeta akali dupwame koo piminyi doko kandelyo. Nakambame mee bange anatu lao Bealo lenge dokona kingi lapala nambana wambu dupwa ralinyi neta nembelyaminyi.
JER 23:14 Dopa piminyipape yuu Jerusaleme dokona poropeta akali karaminyi dupwame yulu koo ai pingi doko piminyi kandelyo. Nakamame enda kepo pipala pii kyambo letaminyi. Wambu dupwa yulu koo pinya lao kata lasaka pyuo karaminyi dokome wambu mendeme yulu koo dupwa yaki nyii narami ingilyamo. Nambame kandapu dokopa yuu Sotoma Gomora dolapona koo piyaminyi dopale manda manjo pelyamo.
JER 23:15 Dokona lao namba Kamongo Porai Waksa dokome Jerusaleme poropeta dupwana lao dake leto. Nakamame Anatunya akali ingyuo kara naminyi dokona wambu dupwa mana nyilyaminyi. Dokona nambame isako kau pingi wara piru karamo dupwa nena lao maiyuo mauli dupwa ipwa ingyuo kamuo nena keko pyakamyuo piru.
JER 23:16 Kamongo Porai Wakasa dokome Jerusaleme wambu dupwa lamaiyuo, Poropeta dupwana pii letaminyi dupwa sakami nalapape. Nakamame rengya mende pira lao kekenge pii malu letaminyi. Nambame mende lapunupa langya nalyaminyi. Nakamba range mende pira rapisi lao mee waso nyepala langilyaminyi.
JER 23:17 Poropeta dupwame wambu lapo nambame lapunu pii dupwa selana kamba letaminyi dupwa kando lao wambu nakama keta mee kapa ingyuo para lyakande letaminyi. Karapala mona kana poko lao karenge wambu dupwa peparae lamaiyuo, Nakama dupwa keta randa andake doko epa nara, letaminyi.
JER 23:18 Nambame lao, Poropeta akali dapwame mendemepe Kamongona suu pinginya yalu pyuo silyamo dupwa soo nyii nange. Dee nakama mendemepe banya pii doko soope dee soo nyuope pii nange. Banya pii lapyamo dupwana doko mende lalyamo lao sakaminginde daa.
JER 23:19 Banya imbu singi doko ama raiya pambake yale dokome wambu koo pilyaminyi dupwana ayemba peparaena pyao soo kyaya lyaape ingyuo kaiki pilya pyana pyuo pira.
JER 23:20 Dopa pyuo banya pinya suu pilyamo dupwa pyuo otaparamo dokopa banya imbu singi doko pyai nara. Enakana dokopa banya wambu dupwame dopa pyuonde piyalyamo lao soo pakana palyarami.
JER 23:21 Kamongo dokome lao, Nambame poropeta dapwa pena laa nayonopape nakamame maso peyami. Nambame nakama dopa pyuo lena lao pii mende lamai nayonopape nakamame nambana kingi dokona mee laoko kareyami.
JER 23:22 Nakamame nambana suu pingi yalu pyuo silyamo dupwa simili doko nakamame nambana pii dupwa nyepala nambana wambu dupwa polo lamaikaraminyipa Satane yulu dupwa yaki nyuo kaeyo karo yulu koo pyuo karaminyi dupwa alowa pyuo kaeyamili.
JER 23:23 Namba Anatu doko yuu muu peparaena kapa kapa pyuo karenge. Mendakisa yeelyo karengende daa.
JER 23:24 Mendemepe nambame kanda naro panda mendena yalu pyuo kara nara. Namba yake panda dorenape isa yuu panda darenape peparaena kapa kapa pyuo karo doko emba see nalese?
JER 23:25 Poropeta akali dupwame nambana kingi dokona lao kyambo laminyi doko namba silyu. Dee nakamame polo lao nambana wai pii doko nakamana kombeya pimwa dokona jilini, letaminyi.
JER 23:26 Yuu gii akipare poropeta dupwame nambana wambu dupwa kando mee pii waso nyepala kyambo lao kata kyai dokona lanyuoko pao kararamisi?
JER 23:27 Nakamana rakange dupwame mee bange anatu kingi Bealo doko keta mona maiyuo papala namba kame siyami doko suu pyao nakamana kombeya lamailyamano dokome nambana wambu dupwame namba kame serami katandena pimisa pilyamo.
JER 23:28 Doko poropeta kombeya pilyaminyi dupwame doko mee kombeyaŋa larami ingilyamo. Dopa laraminyipape poropeta nambana pii silyaminyi dupwame pii doko mondo lao polo larami ingilyamo. Nambana pii doko jingi angi ingyapyamopape poropeta akalinya pii doko mee yanenge ingilyamo.
JER 23:29 Nambana pii doko isarena mendeke dee ama porai kana dupwa pyao longo sinjimu ingingi dopale ingyuo silyamo.
JER 23:30 Poropeta akali dupwa nakama range yango sukusa pii lami dupwa nyepala nambame lapunu lele lao letaminyi dupwa namba kando yanda pimwaiyuo karo.
JER 23:31 Poropeta lapo nakama rangena pii lao dokopa namba keta ipyamo soo nyepala imi ingyalya ingyana pyuo letaminyi dupwa opetae awa nao karo.
JER 23:32 Namba Kamongo dokome mende lalyane lao selapape. Poropeta lapome nakamana kombeya dupwana kyambo pii malu palyuo laminyi dupwa awa nao karo. Nakamame kombeya dupwa lamaiyuo kyambo laminyi dupwamepe dee range ketae pyambuo lakandaminyi dupwamepe nambana wambu dupwa kata kyai dokona lanyuo pelyaminyi. Nambame nakama nembo dopa pyuo laramiŋi pena lao laa nayo. Nakamame lami dokome wambu dupwa nyiso laa nalyaminyiko. Namba Kamongo dokome lapusa pilyamo.
JER 26:1 Josayana ikinyingi Jiyoakwimi lenge doko Juta wambunya kiŋi ingyuo kanda soo kareyamopa Kamongome namba kando langyuo,
JER 26:2 Tembole anda kamapi dokona karapala wambu yuu Juta taone dupwana piso dokona lakandala eparami dupwa nambame emba pii langilyu dupwa peparae lamaipi. Pii dupwanape kuki mende kame soo yaki nyuo kaeya nao lamaipi.
JER 26:3 Wambu dupwame pii doko sepala nakamana yulu koo dupwa kame soo yaki nyerami rapisi. Nakamana yulu koo dupwa peparaena nambame nakama keta randa mairu lao rapa rapa piyu doko nambana suu pingi alowa pyuo kaeyaro.
JER 26:4 Kamongome wambu dupwa lamai lao namba langiya. Namba Kamongo dokome leto. Nakamame namba warombo soo nambame pii mana langilyu dupwa kamba laa nao moko minyuo pyuo karalapape.
JER 26:5 Dopako pyuo nambana kendemande akali poropeta dupwa nakama keta kaeya nao mapanyi peyapa pyuo kareyo dupwa apa letaminyi lao sokondali pyuo karalapape. Wamba nakamana pii warombo see nayami.
JER 26:6 Nakama mee kamba lao karalu kararami ramo doko nambame yuu Sailo tembole anda doko koo inginyi nembeyonoli pyuo tembole anda dake koo inginyi nembaroko. Dopa pirunupa wambu yuu muu dupwana palaminyi dupwame pii koo mende letamano lao dokopa yuu taone dakena kingi lapapu larami, leya.
JER 26:7 Purisi dupwape poropeta dupwape dee wambu dupwa peparaemepe yulu dupwana lao nambame tembole anda dokona leyono doko siyami.
JER 26:8 Kamongo dokome namba lape lao pii peparae lamaiyunuli pyuo lao otapeyono dokopa aopa role pyapeta pyakaeyapala pii poraiyuo kaeyo lao, Emba doo letene dokona pyao kumakapengele, leyami.
JER 26:9 Dopa lapala, Akipamo embame Kamongona kingi dokona lao tembole anda dake yuu Sailo tembole koo ingiya dopale ingyaramopa yuu taone dake pyao kokwa soo piramopa wambu mendalipi dakena pali narami, letese? leyami. Lapala wambu dupwame namba nyuo sukusa palyuo kako piyami.
JER 26:10 Dopa piyami doko Juta lita akali dupwame sepala nakamame kiŋinya anda doko yaki nyuo waiya lao tembole anda dokona papala Kame Kambu Enenge palyiyaminyi dokona isaro kareyami.
JER 26:11 Gii dokopa purisi akalipi poropeta akalipi dupwame lita akalipi dee wambu dupwape kando lamaiyuo lao, Akali dakeme yasu kee lao namwana yuu taone doko kando koo inginyi nembo pulyuo letamo dokona baa randa maiyuo piso soo kote lao pyao kumarami ingilyamo. Dokona pii lapyamo dupwa nakama rangena kale dokome rolae simi kandapi, leyami.
JER 26:12 Dokopa nambame lao, Yuu taone andake dakenape tembole anda dakenape pulyuo pimwaiyuo nambame pii lapunu simi kandapi dupwa peparae Kamongo dokome lala puu lapyamo epo lapu.
JER 26:13 Nakama palyuo karo pilyaminyi kata dupwape dee pilyaminyi dupwape alowa pipwape. Pipala nakamana Kamongo Anatu dokona pii laramuli pyuo kamba laa nao pipwape. Dopa pirami ramo dokopa baame randa mende peyo pyao kokwa sero leyamo doko alowa pipala kaeyara.
JER 26:14 Namba doko nakamana kingi raka dokona karo. Dokona nakamame namba kando aki mende nakama pipya kapa ingyuo para pinya suu pilyaminyi doko mee pipwape.
JER 26:15 Namba pyaramiko dokona renge mende palape lao selapape. Nakamame namba pyao larami ramo doko nakamape wambu yuu taone dakena palaminyi dupwape wambu koko pii nange dokome Anatumi repe repe lala puu lapyamo ipu doko pyaramisa pira, leya.
JER 26:16 Leyamo dokopa lita akalipi wambu dupwapeme poropeta akalipi purisi dupwape kando lamaiyuo lao, Akali dakeme namwana Kamongo Anatunya kingi lao pii langipyaŋa. Baa pyao kumaka narama ingilyamo, leyami.
JER 26:17 Dokopa enakana akali andapae lapome sipurapala wambu malu palyuo peteyami dupwa lamaiyuo lao,
JER 26:18 Akali Esakaya baa Juta wambunya kiŋi ingyuo kareyamo dokopa poropeta akali Maeka yuu Moresete range dokome Kamongo Porai Wakasa dokome leyamo pii dupwa wambu peparae lamaiya. Yuu Sayone doko kwai mapu lapo pyasi sili lao yuu Jerusaleme doko ama pyao kokwa sinyi nembo dee tembole anda karenge dokona imwa palyuo pira.
JER 26:19 Lapala kiŋi Esakayamoo Juta wambu dupwapeme akali Maeka baa pyao kumaka nayami. Pyao kumakapenge doko suu pyao akali Esekayame Kamongo doko pakapala baame Kamongo rae mairali yulu lapo piya. Dopa piyasa Kamongo dokome nakama keta randa mairu leyamo doko nyuo alowa pipala kaeya. Dokona epapu namwa rangeme randa ama koo andake nyelana minji nanji pilyamano.
JER 26:20 (Dokona akali mende wakale kingi Yuraya lenge akali Semayana ikinyingi yuu Kiriate Jirimi range doko akali Jeremayame leyamo dopako suu pyao baame Kamongona kingi dokona lao yuu taone dakepe dee wambu rara dupwape koo ingyuo paraŋa lao pulyuo pimwaiyuo leya.
JER 26:21 Leyamo pii doko kiŋi Jiyoakwimimoo banya yanda singi dupwape dee akali mupwa dupwapeme siyami. Sepala dokopa kiŋi dokome baa nyepala pyao kumakalana suu piya. Dopa pyuo suu piyamopape doo leyaminyi pii doko akali Yurayame sepala baa pakame kumuo baa range kyawa lete nyuo yuu Isipi dokona peya.
JER 26:22 Dopa piyamopape kiŋi Jiyoakwimi baame akali Akipona ikinyingi Elanatane dee akali lapo pipya yuu Isipi dokona akali Yuraya nyela pena lao nembeya.
JER 26:23 Akali dusipame Yuraya nyuo lanyuo epo kiŋi Jiyoakwimi maiyamisa baame nyepala pyao kumakapala banya yongo doko wambu peparaena malu pingi yuu dokona pyao nembeyami.)
JER 26:24 Dopa piyaminyipape namba Jeremayame akali Aikami Sapanena ikinyingi dokona matarena karo yulu piyu dokome wambu dupwame pyao kumakana lao mai nayami.
JER 31:1 Kamongo dokome lao, Namba Anatu Isaraele rara peparaena ingyaronopa nakama nambana wambu ingyarami yuu gii doko repeta epelyamo.
JER 31:2 Isaraele wambu lapo yanda pimwai keta kumarami doko wanjo epeyaminyi dupwa yuu muiyane dokona nambame sakame kumungi renge doko lasaka piyu. Dokopa nakama koo selana lao koto aiye leyaminyi dokopa
JER 31:3 namba nanesale karo nakama keta nolakayo. Isaraele wambu dupwa nambame nakama yuu peparae mona retengenyili pyuo nambana mona reto retenge puu penge renge doko lasaka pyuo karalu kararo.
JER 31:4 Nambame nakama dee kamba dopona pili lao andanyi pyambwaronopa nakama nakamana lakuli nyepala pyao rae maiyuo mali lyuo wamya lyuo pyakalyuo pyao kararami.
JER 31:5 Yuu kyau Samaria dokona dee kamba isa girapo ee wara pirami. Pipala wambu wara piraminyi dupwame girapo ee dokona jingi lyeramuli pyuo lyuo narami.
JER 31:6 Waa. Yuu kyau Eporaime dokona karo isingi akali dupwame lao lao, Yuu kyau Sayone namwana Kamongo Anatu petamo dokona monale kee larami yuu gii doko epelyamo.
JER 31:7 Kamongo dokome letamo, Wambu rara dupwana kamame andake doko Isaraeleŋe lao lakando kenane pyalapa. Kamongo dokome banya wambu dupwa kyawa lete nyipya. Baame wambu pingyasi lapo petaminyi dupwa kiiramo nyipya dokona nakamana kenane lakando pingi doko pyalapape.
JER 31:8 Nambame yuu dulurename piso minyuo epo dee yuu muu peparaena nakama nyuo malu palyaro. Dokopa wambu lenge koope kimbu koope enda wane paletape dee repeta manjalana piraminyipi dupwa doloma pipya role pyapeta eparami. Nakama yuu dokona rara andake ingyuo kamba eparami.
JER 31:9 Nambana wambu dupwa ee pipya kapu kyuo ateŋa lao range lanyaronopa anda eparami. Nambame ipwa guu dupwana iso lanyuo pao dee nakama lukuma sasaramiŋi lao nambame kata rambe kwuasi dokona lanyuo paro. Dokopa namba Isaraelena rakange dopale ingyaronopa Eporaime nambana wane mupwasa ingyara.
JER 31:10 Kamongo dokome lao, Wambu rara dupwa nambana pii selapa. Sepala yuu nanesa ipwa marenge dupwana nambana pii dupwa lamaila pupya. Nambana Isaraele wambu wakale wakale bolomabalo lao nembeyo dupwa nyuo malu palyaro. Palyapala mena sipisipi rapu pingi dokome banya mena sipisipi rapu pingi dopale ingyuo rapu piru.
JER 31:11 Nambame Isaraele wambu dupwa manda rena lao kiiramo nyiyu. Nyepala dee akali yuu rara ama porai wakasa dupwa keta nyiso kyawa lete nyuo piyu.
JER 31:12 Nakama yuu kyau Sayone dokona epo raeme kumuo kenane pyao pisirami. Dee nambana bange witi jingipi ipwa waenepe olipi ipwangepe mena sipisipi dee mena bulamakaope mairunu dupwa kando rae maiyuo kando nyerami. Dokopa nakama palu karo pirami dupwa ee nengepe ipwa apumi nenge pipala mena mena lao andenge dopale ingyarami dee nakama aki bange mende yano piramo kararami dupwa peparae nakama keta palira.
JER 31:13 Dokopa wanake dupwa mali lyuo wamya lyuo rae mairami. Dee akali parange alemope dupwa rae maiyuo mona pyakalyuo pyaramo kararami. Dokopa nambame nakama mona minyarambunyi pyambwapala nakamana kumanda piso ee lao dupwa alowa pyuo mona pyakalyuo pyao rae maingi renge mairu. Dee kondange renge paleta karenge dupwa rae mainyi pyambwaro.
JER 31:14 Dopa pipala nambame purisi dupwa nenge keyange dupwa mairu. Dee nambana wambu dupwa mende aeya naramo pisirami dupwa kando nyuo nenge piru, lao namba Kamongo dokome lapusa pilyamo.
JER 31:15 Kamongo dokome lao, Yuu Orama dokona pii mende leyamo siyami. Ee andake lao kumaralerale nyuo lao Enda Oresolo banya wane wanakepe dupwana lao ee lao peteya. Mona minyarambu nyisalana leyami dokopa Banya wane wanakepe lete pisa nalyaminyiŋi dokona daa leya.
JER 31:16 Embena ee letene doko kaepala embena ee ipwange dupwa pyao nembape. Embena wane wanakepe dupwana lao yulu pipi dokona emba yano nyere. Nakama nyisu petenge yuu dokona piso kapu kyuo eparami.
JER 31:17 Embena lao rengya mende keyange pyakara. Embena wane wanake dupwa kamba kapu kyuo anda eparami. Namba, Kamongo dokome lapusa pilyamo.
JER 31:18 Isaraele wambu dupwa mona randame kumuo laminyi doko namba silyu. Kamongo namwa mena kali rae lenge mona kana pokonge dopale ingyuo kareyama. Dopa piyamanopape namwa kamba lao nao warombo selapa lao mana langii kande. Emba Kamongo, namwana Anatu. Namwa emba keta lanyuo ipupi. Dokopa kapu kyuo emba karene dokona epanya epelyamano.
JER 31:19 Namwa emba mata joo peyamanopape dee range epanya piyama. Embame namwa randa jiinyi dokopa namwa rangeme kyawa suu lao kondome kumuyama. Doko namwa enye wane parange karo yulu koo dupwa piyama dokona elyayama.
JER 31:20 Isaraele nakama nambana wane mona wakasa retenge ingyuo karaminyi. Wane nambame mona angingyuo retenge dupwa nakama iki. Yuu lapo nambame nakamana kingi dokona arome pyao dokopa nambame nakama mona reto suu pyao lenge. Nambana mona doko nakama keta silyamo. Nambame nakama sakame kumuo kararo.
JER 31:21 Nakama Isaraele dupwame kata angi doko kongwalu mende pipala pano wapuo retalapape. Nakama anjukunya namba yaki nyepala neta peyaminyi kata doko dee kotalapape. Kotapala poraiyuo suu pyalapape, Isaraele wambu dupwa yuu taone nakama yaki nyuo peyaminyi dupwana anda ipupwape.
JER 31:22 Yuu gii akipare nakama Anatunya yulu mondo lao pyakami nao mona lamana palyuo kararamisi? Akalimi enda rapu pyuo karengenyili pyuo endame akali rapu pira ramo ama wakale ingyuo pira. Doko suu pyao nambame yulu enenge mende ama wakale ingyuo pipu.
JER 31:23 Isaraele wambunya Kamongo Anatu Porai Wakasa dokome lao, Nambame wambu dupwa nakamana yuu palenge dokona kamba palyuo karo pinya laro dokopa yuu Juta dokonape dee dokona yuu taone dupwanape nakama dee kamba lao, Kamongo dokome Jerusaleme yuu kyau yapasi panda poo pyasi baa palu karenge doko elyape keta pisinya larami.
JER 31:24 Wambu dupwa yuu Juta dokona palyuo dee taone dupwana palyuo pirami. Piraminyipa nakamana lapome ee wara pirami dee lapome sipisipi rapu pyuo pirami.
JER 31:25 Dokopa wambu makarami dupwa nambame mona keyange palyinyi pyambwaro. Dee loparami dupwa nambame nenge pirunupa nao sikya piramo kararami.
JER 31:26 Dokopa wambu dupwame lao, Namba luu palipu doko luu rende palyuo yongo keyange karo sipurelyo, larami, Kamongome letamo.
JER 31:27 Namba Kamongo dokome leto. Isaraele wambunya yuu dokonape Juta wambunya yuu dokonape nambame mena wambupi dupwa peyaronopa kete pyao nyera leyo yuu gii doko repeta epelyamo.
JER 31:28 Nambame nakamana ee dupwana yukunyi nembo nakamana taone dupwa kokwa sinyi nembo pyao lalyuo oteyo doko suu pyao nambame dee dopona pyuo minyalyalopono ingilyamo.
JER 31:29 Yuu gii doko pyaka seramo dokopa wambu dupwame lao, Endangipi rakangepe dupwame isa girapo jingi keke pingi doko nelyaminyipa nakamana wane wanakepe dupwame keke doko nakanjilyaminyi lenge dopa pyuo dee laa narami.
JER 31:30 Dokona ingyuo wambu mendeme isa girapo jingi keke pingi doko nara ramo doko baa rangeme banya nenge pinjingi dolapona nakanju sera. Dee wambu mendaki mendaki lao baa rangena koo dokona kumara.
JER 31:31 Kamongo dokome lao, Isaraele wambu pipya dee Juta wambu pipya pii enenge kana minyuo lalu lao larono yuu gii doko epelyamo.
JER 31:32 Pii enenge kana minyuo lalu lao larono doko nakamana kauwanemoo pipa yuu Isipi dokona neta nyiyu dokopa nambame kii minyuo pao kana minyuo pii lalu lao leyono dopale daa. Dokona namba nakamana akalingi dopale ingyuo kareyonopape nakamame kana minyuo pii lalu lao lenge doko minyuo pyuo kara nayami.
JER 31:33 Kana minyuo lalu lao lenge pii enenge nambame Isaraele wambu pipa larono doko dapale ingyara. Nambana lowa dupwa nakamana mona anda dokona pyao retapala nakamana suu pingi dokona pyao palyakaro. Dopa pipala namba nakamana Anatu angingyuo kararonopa nakama nambana wambu angingyuo parami.
JER 31:34 Nakamana andare dokona yango sukusa dopa pinya dapa pinya lao kara naramioko. Yuu gii dokopa wambu kuki andakepe peparae namba soo nyerami. Nambame nakamana yulu koo dupwa nyuo kame sakamirunupa dee koo piraminyi dupwana deeko suu pyale pyale kara naro. Namba Kamongo dokome lapusa pilyamo, leya.
JER 31:35 Kamongo yuu yangama korakamape dokopa neta dokome rena lao dee kukwa dokopa kana buipi dupwame rena lao pingi. Baame ipwa kota dupwa kasakole minyuo ranju ketae epena lao pingi. Banya kingi Kamongo Porai Wakasa.
JER 31:36 Dokona yake yuupa dolapo pinginyili pyuo kuara yangara pyuo kararamo dusipana peparae Israele rara doko palu karalu kararami, lalu lao letamo.
JER 31:37 Yuu gii mendepa akali mendeme yake doko makande pyuo dee isa yuu dokona susa dokona koko pao soo oto pipyali doko Anatu baame Isaraele wambu dupwa dokopa iki mata maipyali. Doko nakama peparae koo piyaminyi dokome dopa pipyali, Kamongo dokome lapyasa pilyamo.
JER 31:38 Kamongo dokome letamo, Yuu taone Jerusaleme doko nambana ingyuo dee kamba pirami doko yuu Ananele Anda Londe dambirena piso epo Donge Kame Kambu dokona suu larami yuu gii doko repeta epelyamo.
JER 31:39 Dokopa yuu make wangu doo yuu dorena palyuoko pao pao neta anda penge dorena yuu kyau Garepe dokona pao dee yuu Goa dokona palu awali lara.
JER 31:40 Yuu pau lama lama wambu kumasipi dee nenge pinjingipi dupwa malu palyuo nembenge doko peparaepe dee ipwa Kitone doko yuu peparaepe pao Mena Ose Kame Kambu neta pyakaenge dorena suu lao doko nambana lenge kambunya poo pyasi ingyuo sera. Yuu taone doko dee kamba kokwa soo kwaeyo lalyuo isa paa nara.
JER 36:1 Ee kana kisima dokopa akali Josayana ikinyingi Jiyoakwimi baa Juta wambunya kiŋi kareyamo dokopa Kamongo dokome namba langyuo lao,
JER 36:2 Pepa yoko kao pele pele lasi doko nyepala nambame Isaraele wambunya laope Juta wambunya laope dee rara peparaena laope langiyunu pii dupwa peparae pepa dokona pyao retape. Yuu gii Josaya baa kiŋi kareyamo dokopa wambo langyuo pao epapu langipunupape dupwa peparae pyao retape.
JER 36:3 Mende dee Juta wambu dupwa keta randa peparae nambame mairu lao lao reteyo doko sepala nakama koo pyuo kata koona pelyaminyi dupwa yaki nyuo kaeyaramiko rapisi. Dokopa nakamana yulu kopetame pilyaminyi dupwape dee koo pilyaminyi dupwape nambame nyuo kame sakamiru.
JER 36:4 Dokona lao Nerayana ikinyingi Baruku kee lao nyepala Kamongome namba pii langiyamo dupwa peparae lamaiyu. Dokopa pepa yoko kao pele pele lasi dokona Baruku pyao palyiya.
JER 36:5 Dokopa enakana nambame pii lapo opetae lamaiyuo, Namba tembole anda dokona dee kamba kolando kapa paa nalu nao naro ingilyamo.
JER 36:6 Dopa pirunupape wambu dupwa nenge dee wasaka pyuo peteyami kande dokopa emba tembole anda dokona papala pepa kao pele pele lasi doko ketae palyuo poraiyuo yaka lape. Lare dokopa Kamongo dokome namba langipyamo pii peparae nambame emba jipunu dupwa serami. Wambu dupwa peparae serami pandandena yulu doko pipi. Dee Juta wambu dupwa nakamana yuu taone dupwana piso iminyi dupwa opetaeko serami.
JER 36:7 Kamongo dokome banya imbu singi andake isare ingyuo ango karapya dokome wambu dupwa pipya randa mairu lapyamo doko silyaminyi dokona nakama Kamongo kando ateŋa lao nakamana koo dupwa yaki nyuo kapu kyuo eparami rapisi, leyo.
JER 36:8 Dokona Baruku buku kao pele pele lasi doko nambame lena leyonuli pyuo wai lyaro soo tembole anda dokona yaka leya.
JER 36:9 Ee kana kingi paki kana mange mendaki karo dokona akali Jiyoakwimi baa Juta wambunya kiŋi ingyuo kareya. Dokopa wambu dupwa Kamongome rae maiyuo karena lao pilyamano lapala nenge wasaka pyuo kareyami. Wambu Jerusaleme palenge dupwape dee wambu dupwa yuu Juta taone dupwana piso epeyami dupwape peparae nenge naa nayamiko.
JER 36:10 Dokopa wambu dupwa peparae soo peteyaminyipa Barukumi pepa kao pele pele lasi dokona nambame pii leyono dupwa mende isa nemba nao wai lyaro soo yaka leya. Baa doo piyamo doko kiŋinya pepa pingi akali Gemaraya lenge Sapanena ikinyingi dokona panda kuki dokona karo piya. Banya panda kuki doko tembole anda dokona Kame Kambu Enenge konandowame dorena malu palyuo pii lenge panda ketae dokona ingyuo singi.
JER 36:11 Akali Maekaya Gemarayana ikinyingi Sapanena kauwange dokome Kamongo dokome leyamo pii dupwa pepa kao pele pele lasi dokona paleyamo akali Baruku dokome yaka leyamo siya.
JER 36:12 Sepala baa kiŋinya anda dokona peya. Pao kiŋinya pepa pingi akali dokona panda kuki dokona akali mupwa dupwa pii wato lao peteyaminyi dokona peya. Peteyaminyi akali dokona mende kiŋinya pepa pyakamingi akali Elesema dee mende Semayana ikinyingi Delaya lenge mende akali Akipona ikinyingi Elanatane lenge mende Saparena ikinyingi Gemaraya lenge dee mende Ananayana ikinyingi Setekaya lenge dee akali mupwa wakale lapo opetaeko dokona peteyami.
JER 36:13 Dokona Maekaya akali Barukumi yaka leyamo pii siyamo dupwa peparae nakama lamaiya.
JER 36:14 Lamaiyamosa akali mupwa dupwame akali Juti (Netanayana ikinyingi, Selamayana kauwange dee kauwange kyawa doko Kusi lenge) dokome pepa kao pele pele lasi wambu yaka lamaiyuo karapyamo doko minyuo epena Baruku lamaiyala pena leyami. Dokopa Baruku buku kao pele pele lasi doko minyuo akali mupwa dupwa peteyami dokona peya.
JER 36:15 Peyamo dokopa nakamame lao, Isa pisipi. Pisipala pepa kao pele pele lasi doko namwa yaka lao langipi. Dokona lao Barukumi nakama yaka lao lamaiya.
JER 36:16 Yaka lao lamaiyuo otapeyamo dokopa nakama pakame kumuo yango mendeme mende kando pipala Baruku lamaiyuo lao, Namwame pii dake pao kiŋi doko lamairama, leyami.
JER 36:17 Lapala nakamame baa piso soo lao, Epapu dakepa namwa langyuo apa pyuo embame pii dapwa peparae pyapisi? Jeremayame pyape lao emba langipyase? leyami.
JER 36:18 Dokopa Barukumi isingi lao, Jeremayame pii peparae langipyamopa nambame pepa kao pele pele lasi dakena pyanjilimi pyapu, leya.
JER 36:19 Dokopa nakamame baa lamaiyuo, Embapa Jeremayapa wambu mendeme dusa petambinyi lao see nana lao yalu pela pupwape, leyami.
JER 36:20 Akali mupwa dupwame pepa kao pele pele lasi doko kiŋinya pepa pyakamingi akali Elesemana panda kuki dokona reteyami. Retapala nakama kiŋi peteyamo panda dokona papala pii peparae paleya dupwa lamaiyami.
JER 36:21 Dokopa kiŋi dokome Juti buku kao pele pele lasi doko nyela pena leya. Leyamosa akali Elesemana panda kuki dokona siyamo nyepala pao kiŋi akali dokope dee akali mupwa awali lao kareyami dupwa pipya yaka lao lamaiya.
JER 36:22 Yuu gii doko kupwa pingi dokopa dokona kiŋi baa banya anda kupwa pingi yuu gii dupwana palenge dokona isare repeta petenge panda dokona soo peteya.
JER 36:23 Dokona akali Jutimi pepa pyasi dokona lane remape kisimape mende yaka lapeyamo dokopa kiŋi dokome kema wua kuki mendeme kunjapala isarena kiso peteyamo pao buku kao pele pele lasi doko rao oteya.
JER 36:24 Dopa piyamopape kiŋi dokope panda banya akali mupwa dupwape lapo pii doko siyaminyi dupwa nakama pakame kumuo kondapala renge lao mende lasaka pyuo pii nayami.
JER 36:25 Akali Elanatanemoo Delayamoo Gemarayamoo dusipame buku kao pele pele lasi doko kiŋi dokome kisa napyali lao piso sokondali pyuo leyaminyipape baame nakama doko mende lalyaminyi lao see naya.
JER 36:26 See napala baame kiŋinya ikinyingi Jeramelemoo Aserelena ikinyingi Serayamoo role pyapeta dee Apetelena ikinyingi Selemayamoome namba poropeta akali Jeremayapa nambana pepa pyakamingi akali Baruku opetaeko puu maiyuo nyela pena leya, Dopa leyamopape Kamongome nambwa nyuo yalu piya.
JER 36:27 Baruku pii lamaiyamo pepa kao pele pele lasi dokona dupwa kiŋi Jiyoakwimi kisapeyamo dokopa Kamongo dokome namba langyuo lao,
JER 36:28 Pepa kao pele pele lasi wakale mende nyepala pepa wambo doko pii palenge dupwa peparae pyao retape lao langiya.
JER 36:29 Kamongome kiŋi doko dopa lamaipi, leya. Embame buku kao pele pele lasi doko kiso dokopa Jeremaya piso soo, Akipamo Bapilone kiŋi dokome epapala yuu dake pyao kokwa soo dee wambu menape dupwa pyao kumuo pira ingilyamo lapipi lee kande, leya.
JER 36:30 Dokona lao kiŋi Jiyoakwimi, Namba Kamongo dokome emba langilyu. Embena para pyao manjo parene dokona mendeme kiŋi Dapitinya panda nyuo kiŋi yulu pii nara. Emba kumarene dokopa embena yongo doko neta renge panda mendena nembaraminyipa yuu gii korakama dokopa netame rao karara dee kukwa dokopa kalapetame pyao karara.
JER 36:31 Nakama peparae koo pilyaminyi dokona nambame emba randa joo embena manjirinyi dupwa randa maiyuo dee embena akali mupwa dupwa randa maiyuo piru. Dokona embape dee Jerusaleme wambu dupwape Juta wambu dupwape nambana pii mende piraŋa lao repe repe langipunu dokona see nalyaminyi dokona nambame nakama peparae keta lao randa jero leyonuli pyuo pyakaro.
JER 36:32 Dokopa enakana nambame buku kao pele pele lenge mende wakale nyepala nambana pepa pyakange akali Baruku maiyunusa akali dokome nambame pii lamaiyu dupwa peparae pyao reteya. Buku kao pele pele lasi wambo kiŋi Jiyoakwimi isarena kisiyamo dokona palenge dusipana mende pyarepala para kando lao peparae pyao reteya. Dee nambame pii dopale lapo lamaiyunu dupwa opetae konda pyuo pyao reteyako.
JER 37:1 Kiŋi Nepukatenesa yuu Bapilone range dokome akali Setekaya yuu Juta kiŋi Josaya dokona ikinyingi doko akali Jiyoakini lenge akali Jiyoakwiminya ikinyingi dokona panda nyinya lao rombo palyiya.
JER 37:2 Dopa piyamopape Kamongome wai pii namba lape lao jiyamo doko kiŋi Seteyakamepe wambu dupwamepe banya akali mupwa dupwamepe warombo see nayami.
JER 37:3 Dokopa kiŋi Setekayame Selemayana ikinyingi Jukale dee Masayana ikinyingi purisi akali Sepanayapa namba peteyo dokona pena leya. Epapala nakambame namba langyuo, Namwana wambu peparae dupwana lao namwana Kamongo Anatu kando ateŋa lakape, langiyambi.
JER 37:4 Langiyambinyi dokopa namba puu maipa nayaminyipa mee wambu pipya papyuo kareyo.
JER 37:5 Dokopa Bapilone ami yanda singi dupwame yuu Jerusaleme doko pyao kareyami. Dopa pyuo kareyaminyipape yuu Isipi ami yanda singi dupwa Isipi yuu lili make piyami doko yalo epelyaminyi leyami doko sepala nakama yaki nyuo kala peyami.
JER 37:6 Dopa piyamo dokopa Isaraele wambunya Kamongo Anatu dokome namba langyuo,
JER 37:7 Akali Setekaya pii lamaipi lao leya. Yuu Isipi ami yanda singi dupwa nakama nyisalana lao enye katasa epelyaminyi. Dopa pyuo iminyipape anda kapu kyuo parami.
JER 37:8 Dokopa Bapilone akali dupwa kapu kyuo epapala yuu taone doko panda nyepala pyao kokwa soo kiso nembarami.
JER 37:9 Bapilone wambu dupwa kapu kyuo epapalako kaeyarami lyakande dokona lao nakama rangeme kopyali ingyuo Bapilone wambu dupwa dee kapu kyuo epa narami lao suu pyaa nalapape lao namba Kamongo dokome nakama repe repe lao langilyu.
JER 37:10 Kamame nakamame yuu Bapilone ami yanda singi dupwa peparae pyao isa palyuo winimi piparaminyipape akali lapo nakama yanenge poro lao ranjama eparamo nakamana komau anda dokona luu palyuo seraminyi dupwame sowale pyuo karo sipurapala yuu taone dake pyao kiso isa palyarami ingilyamo. Kamongo dokome nambame Setekaya lamaipi lao langiya.
JER 37:11 Yuu Isipi ami yanda singi dupwa repeta epeyamisa yuu Bapilone ami yanda singi dupwa Jerusaleme karo kapu kyuo peyami.
JER 37:12 Dokopa namba yuu Jerusaleme piso yaki nyuo Benjamenena yuu dokona nambana ree palunya yuu dokona namba kararo panda dokona lama nyela peyo.
JER 37:13 Dopa piyamopape namba Benjamenena Kame Kambu dokona pao pyaka siyunu dokopa yanda singi dupwana mupwa doko yulu paleyande baa dokona yulu pyuo kareya. Doo kareyamo akali doko kingi Irinja lenge akali Selemayana ikinyingi Ananayana kauwange dokome namba kata pasi pipala piso soo lao, Emba dae yaki nyuo Bapilone wambu pipya konda pela pelese? leya.
JER 37:14 Nambame isingi lao, Embame angi lao nalene. Namba dokona apeto paa naro, lamaiyu. Dopa lamaiyunupape Irinjame nambana pii soo nyii naya. Dopa pipala baame namba minyaro nyepala minyuo akali mupwa dupwa peteyami dokona peya.
JER 37:15 Peyamo dokopa akali dupwame namba kando imbumi kumapala akali lapo lamaiyuo pyarako pyapala minyuo pao kiŋinya pepa pyakamingi Jonatane lenge dokona anda palyapala kii pyao keto lena leyami. Banya anda doko karapusi anda ingyuo wasiyami.
JER 37:16 Namba karapusi anda dokona yuu rumbyapala panda kuki singindena koko palyiyaminyi dokona yuu gii malu palyuo kareyo.
JER 37:17 Dokopa enakana dusa kiŋi Setekaya peteya dokona namba lanyuo peyaminyipa banya anda dokona baame namba yalu pyuo piso soo lao, Wai pii mende Anatu keta piso ipyape? leya. Dokopa nambame isingi lao, Pii lapo langipya, leyo. Lapala kiŋi doko pii konda pyuo lamaiyuo, Nakama Bapilone kiŋi porainya renge palenge doko keta kingi rekya lao mairu lapya, leyo.
JER 37:18 Lapala nambame piso soo lao, Nambame wambu dupwa kandope emba kandope dee embena akali mupwa dupwa kandope lowa anjukunya yaleyosa nakama suu pingi nyuo namba karapusi palyarami ingiyase? leyo.
JER 37:19 Embena poropeta akali yuu Bapilone kiŋi dokome embape dee embena yuupi dupwa pyao nyii nara lao emba langiyaminyi dupwa apa piyamisi?
JER 37:20 Dokona emba kiŋi andake doko, dakepa nambame emba piso sokondali pyuo nambana pii see lao leto. Sepala nambame emba piso silyu dokona kaeya nao pyakape. Doko embame namba akali Jonatanena anda dokona dee kamba kapu kyuo karapusi pyambwa napipi. Emba dopa piri ramo namba dokona angi kumaro ingilyamo.
JER 37:21 Dokona lao kiŋi Setekayame namba kiŋinya yanda singi panda dokona pao karapala kii palyinya leyamo kareyo dokopa nenge borete kiso wasingi anda dokona kunjasi mendaki larapu yuu gii mendakinya lao joo kareyaminyi pao yuu taone dokona nenge borete dupwa oteya.
JER 38:1 Akali Matanena ikinyingi Sepatayamoo Pasana ikinyingi Getalayamoo Selemayana ikinyingi Jukalemoo dee Malekayana ikinyingi Pasamoo dusipame nambame wambu dupwa lamaiyuo Kamongo dokome leyamo pii dupwa lao papilini leyami doko nakama siyami.
JER 38:2 Lamaiyunu doko, Kamongo dokome lao wambu mendali yuu taone dakena palyuo karara ramo doko yanda andake mende piraminyi dokona kumuope panda nenge see naramo lopo andake pipala kumuope panda yanyi nyepala kumuope pirami. Dopa piraminyipape mendeme neta pao Bapilone ami dupwame waiku nyinya lapala kaeyara ramo doko baa kuma nara. Baa range yongo lete nyuo mee palyuo karara.
JER 38:3 Nambame nakama dopako pyuo lamaiyuo, Kamongome lao dokopa yuu taone dake Bapilone ami nyerami lapya, leyo.
JER 38:4 Dokopa akali mupwa dupwame kiŋi doko peteyamo dokona papala lamaiyuo lao, Akali dake pyao kumakamana. Baame pii dopale lapya dokome yuu taone dokona yanda singi karenge dupwa paka renge manjinyi pyambuo letamo. Dee wambu pyarepala pao yuu taone dokona pisiminyi dupwa dopako pinyi pyambuo letamo. Akali dakeme wambu dupwa nyisalana suu pyao laa nalyamo. Baame wambu dapwa isa nenge kara nange dokome suu lao randa maiyuo letamo, leyami.
JER 38:5 Dopa leyaminyi dokona kiŋi Setekayame isingi lao, Doko kapa. Nambame nakama kaeyalapa laa naroŋo. Nakamame baa keta pinya suu pilyaminyi doko pipwape, leya.
JER 38:6 Dokona lao kiŋinya yanda singinya panda dokona kiŋinya ikinyingi Malekayana ipwa petende singi dokona namba minyuo pao pyambuyami. Nakamame puu karapala malyiyami. Yuwale dokona ipwa pete see napala wara yeelyo siyandena namba nyuo pee kuku piya.
JER 38:7 Dopa piyaminyipape Itiopia akali Epetemeleke lenge kiŋi dokona anda yulu pyuo kareyamo dokome namba yuwale dokona nyuo malyiyaminyi leyami doko siya. Yuu gii dokopa kiŋi doko Benjamenena Kame Kambu dokona kote soo peteya.
JER 38:8 Dokopa akali Epetemeleke baame kiŋi doko peteyamo dokona papala lamaiyuo lao,
JER 38:9 Emba kiŋi andake doko, akali dapwame mende piminyi doko ama kopetame pimi. Doko yuu taone dakena nenge mendepe see napya dokome nakamame akali Jeremaya doko lopome kumapala kumaraŋa lao soo yuwale dokona pyambwami, leya.
JER 38:10 Dokopa kiŋi dokome akali Epetemeleke lamaiyuo, Akali dae karaminyi dokona rema nyepala Jeremaya baa kumapa nanaleŋe yuwale dokona palamo doko ipyuo nyela pena leyapya.
JER 38:11 Dokona lao Epetemelekeme akali dupwa nyuo lanyuo kiŋi dokona yulu pingi bange retenge anda dokona papala komau kangusi lapo puu karo yuwale dokona namba nyelana malyiya.
JER 38:12 Malyapala Epetemelekeme namba langyuo lao, Puu dokome emba naa nana lao komau kangusi dupwame embena arokwa kata dokona palyepala palyape, leya. Leyamuli pyuo namba dopa piyu.
JER 38:13 Dokopa nakamame namba yuu paleta ipyuo nyiyaminyisa namba yuwale dokona nyisa epeyo. Epapala kiŋinya yanda singi panda dokona kareyo.
JER 38:14 Yuu gii mendepa tembole anda dokona kambu repo ingyuo singi konandowame dokona namba kiŋi Setekaya peteyamo dokona lanyuo peyami. Peyaminyipa baame namba langyuo lao, Nambame emba piso singi pii mende pisaroŋo embame namba kando lapo kalyama napala angi peparae kinyi dokona langipi, leya.
JER 38:15 Dokopa nambame isingi lao, Nambame kinyi dokona laro ramo doko embame namba pyao kumakare. Dee nambame dopa piri dapa piri lao nyiso laro ramo doko emba sili see nale lao karare, leya.
JER 38:16 Dokona lao kiŋi Setekayame namba kando yalu pyuo pii mende lalu lao lao dopa leya, Anatu Lete Karenge dokome namwa letena renge jiyamo dokona kingi lao kana minyuo lao, Namba emba pyao kumaka naro dee akali lapome emba pyao kumalena lami dupwa keta mai naroko, leya.
JER 38:17 Dokopa enakana nambame Setekaya lamaiyuo, Kamongo Porai Wakasa Isaraele wambunya Anatu dokome lao, Emba rangeme yuu Bapilone ami akali dupwa waiku nyinya lao kumuo maiyuo kaeyare ramo doko emba range kyawa lete nyuo dee yuu taone doko raa nara. Dee embape embena ree palupi laparae kyawa lete nyera, leya.
JER 38:18 Dopa piraminyipape emba waiku nyinya lao kumuo maiyuo kaeya nare ramo doko yuu taone andake dake Bapilone akalinya kingi rakana palyakamiramopa pyao kisarami. Dopa piramopa emba kapa wanjo lete paa nareko, leya.
JER 38:19 Leyamo dokopa kiŋi Setekayame isingi lao, Namwana Juu akali lapo Bapilone range ingyuo karaminyi dupwa namba pakalyo. Dokona nakamana kingi rakana palyara ramo dokopa nakamame randa jerami, leya.
JER 38:20 Nambame lao, Emba nakamana kingi rakana palya nara. Nambame emba piso sokondali pyuo lao, Kamongo dokona wai pii doko warombo sepe. Dopa pirinyi dokopa bange peparae dupwa emba keta kapa ingyuo paramopa emba range kyawa lete pare.
JER 38:21 Emba Bapilone ami akali dupwa waiku nyinya lao kumuo maiyuo kaeya nare ramo dokopa Kamongo dokome mende piramo doko namba pii repa repa pyuo lasaka pipya leyo.
JER 38:22 Nambame dokona kandapunu Juta enda dokopa kiŋinya anda dokona pisimi dupwa Bapilone kiŋi dokona akali mupwa dupwa karami dokona lanyuo pumi. Dokona nakama pao karo dokopa apa lami lao sepe. Nakamame dopa lao pumi. Kiŋi dupwana puu minyingi angi dupwame baa minyoko pyuo kata koona lanyuo pumi Dokopa nakamame baa isa palyimi. Banya kimbu dolapo warana yalyipyamopa banya puu minyingi dupwame baa yaki nyimi lao puminyi sipu leya.
JER 38:23 Dokopa nambame konda pyuo lao, Embena enda peparaepe dee wane wanakepe dupwa yuu Bapilone lanyuo parami. Dee emba range nakama keta kyawa lete nyii nareko. Emba yuu Bapilone kiŋi dokome karapusi ingyuo nyuo minyuo paramopa yuu taone dake rao muku sera, leyo.
JER 38:24 Leyono dokopa Setekayame isingi lao, Pii doo iso letambano doko embame mendali sinya lao lamai nare ramo doko emba randa nyii nare, leya.
JER 38:25 Akali mupwa dupwame namba embapa pii lao pisimbi lao serami ramo doko apa lambi lao emba piso sela eparami lyakande. Dokona embame pii peparae lamairi ramo doko nakamame emba kando pyao kumaka narama lao lalu lao lao langirami lyakande, leya.
JER 38:26 Dopa laraminyipape embame nakama lamaiyuo, Namba karapusi anda dokona kumalase lao kamba lanyuo paa nana lao nambame piso sokondali pyuo pisapu lape, leya.
JER 38:27 Leyamo dokopa akali mupwa dupwame namba peteyo dokona epapala piso siyami dokopa kiŋi dokome lape lao langiyamuli pyuo leyo. Dokopa mendemepe pii iso yalu pyuo leyambano doko see nayami dokome dee nakamame mende dusa pirami ingya naya.
JER 38:28 Dokopa namba kiŋi dokona yanda singinya panda dokona karapusi kareyonopa Jerusaleme pyao epo anamasi minyiyami.
JER 52:1 Setekaya baa ee kana akalisa lama ipisu mendaki nembo karapala dokopa baa Juta wambunya kiŋi ingiya. Baa ee kana akalisa ipisu mendaki yuu Jerusaleme doko iso kareya. Banya endangi doko Amutale lenge. Enda doko baa akali mende wakale kingi Jeremaya lenge yuu taone Lipina palenge dokona wanenge.
JER 52:2 Kiŋi Jiyoakwimi Kamongo dokona lenge kambu dokona yulu koo pyuo kareyamo dokoko suu pyao kiŋi Setekayame koo piya.
JER 52:3 Dokona lao yuu Jerusaleme Juta wambupi dupwa pipya Kamongo dokome ama wakasa imbwuapala nakama karapusi ingyuo nyuo minyuo yuu wakale mendena pena lao ralinyi nembeya. Dokopa Setekaya baa yuu Bapilonena kiŋi Nepukatenesa kando isarena karalana suu pyaa napala kamba leya.
JER 52:4 Dokona yuu gii akalisa kana akalisa dokona ee kana mange mendaki karo dokopa Setekaya baa yuu Juta dokona kiŋi ingyuo kareya. Kareyamo dokopa kiŋi Nepukatenesame banya ami yanda singi dupwa lanyuo epapala yuu Jerusaleme doko pyao nyelana piya. Pipala nakama taone kipwa kipwa dupwana komau anda pyuo palipala yanda pirama lao awali lao paka yuku karo kame piyami.
JER 52:5 Dopa pyuo Jerusaleme taone doko nyuo kamena sukusa palyuo pisi kareyaminyipa pao Setekaya kiŋi yulu piyamo ee kana akalisa ipisu mendaki dokona ingiya.
JER 52:6 Dokopa yuu gii mange mendaki karo kana kisima dokona ee kana mendaki dokonako lopo ama kopetame siyamosa wambu dupwa mende narami ingya naya.
JER 52:7 Dokopa yuu taone dokona kana kame doko pyao lalyapala sukusa peyami. Dopa piyami dokopa Bapilone akali dupwa yuu taone dokona nyuo sukusa palyuo karo awali leyaminyipape Jerusaleme yanda singi dupwa kukwa dokopa mee neta peyami. Nakama kiŋinya ee dokona kata sukusa penge dokona papala kana kame pinjingi paki paki dolapo epo suu lenge dokona kame kambu kata dokona peyami. Pao yuu Jotane pau lama lama dorena ingyuo pyakao peyami.
JER 52:8 Dopa pyuo peyaminyipape Bapilone yanda singi dupwame kiŋi Setekaya pete pete pao yuu Jereko repeta yuu lama lama dokona minyaro nyiyami. Dokopa banya yanda singi peparae dupwame baa yaki nyiyami.
JER 52:9 Kiŋi Nepukatenesa yuu taone Oripila lenge yuu Amate dokona singi dokona kareyamo dokona kiŋi Setekaya baa karapusi pyao lanyuo peyami. Peyaminyi dokopa kiŋi Nepukatenesame piso soo kote sepala baa koo piya, leya.
JER 52:10 Yuu Oripila dokona Setekayame kando kareyamopa Nepukatenesa baame Setekayana ikinyingi dusipa pyao kumakaya. Dee Juta akali mupwa dupwa opetaeko pyao kumakana, leya.
JER 52:11 Dopa pipala enakana baame Setekayana lenge dolapo pyao lukwapala baa puu maipala minyuo yuu Bapilone dokona peyami. Dokona Setekaya baa karapusi palyuo karo kumuya.
JER 52:12 Bapilone range kiŋi Nepukatenesa ee kana akalisa ipisu mange mendaki karo kareyamopa kana kingi paki dokona yuu gii akalisa dokopa kiŋinya dopa pyuo piri dapa pyuo piri lao nyiso lenge akalimi ami yanda singi iso karenge doko Nepusaratane yuu Jerusaleme dokona sukusa peya.
JER 52:13 Papala tembole anda dokope kiŋinya anda dokope dee kamongo wambu yuu Jerusaleme palenge dupwana anda dupwape kiso oteya.
JER 52:14 Dee banya yanda singi dupwame yuu taone dokona kana kame awali lao karenge doko pyao lalyuo isa nembeyami.
JER 52:15 Dokopa akali Nepusaratane baame wambu yuu dokona pyarepala pao peteyami dupwape akali lapo mora petenge dupwape dee Juu akali lapo wamba Bapilone kiŋi dokona enda ingyuo kumuo maipala pao kareyami dupwape karapusi pyao minyuo yuu Bapilone dokona peya.
JER 52:16 Dopa piyamopape Juu lapo wambu pendewa muiyane yuu reta nange dupwa baame yuu Juta dokona piso isa girapo ee dokonape dee ee yuu dupwanape yulu pinya leya.
JER 52:17 Yuu Bapilone akali dupwame anda pinginya kone kana dopaleme wasisi ane isa pyanenge dupwape bange reto ipyuo minyuo papingi rate tembole anda dokona siyamo dupwape penge kameya mende kone kana dopaleme wasisi ipwa pisingi dokona siyamo dokope peparae pyao muu muu pyuo nembapala kone kana dupwa peparae nyuo minyuo yuu Bapilone dokona peyami.
JER 52:18 Dee nakamame kana pyare dokona pee nyuo nembenge pengepe bange saporo kuki dupwape lambe elya pingi yulu bange dupwape dee mena pyao kiso maingi dokopa mena ranjama reto nyingi pere dupwape dee pere lapo bange rendamu pingi kiso maingi dupwape dee kone kaname wasisi bange tembole andana yulu pingi singi dupwa peparae nyuo peyami.
JER 52:19 Nakamame bange peparae kana golope kulingipimi wasisi dupwa nyuo minyuo peyami. Pere kukipi isare sungwa lengya nembenge kapape mena pyao kiso maingi dokona ranjama retenge perepe pee nembenge pengepe lambe retenge ratepe bange rendamu pingi reto kiso maingi perepe ipwa waene Anatu reto maingi pere dupwape peparae nyuo minyuo peyami.
JER 52:20 Dee kiŋi Solomoneme bange lapo kone kana dopaleme waso tembole anda dokona reteya. Isa pinginya lamape bange reto ipyuo minyuo papingi ratepe penge kameya mendepe dee mena bulamakao kali wasisi akalisa ipisu lamame penge minyaro karenge dupwa ama kenda pingi dokome sikyali pinya saka nayami.
JER 52:21 Isa pinginya lama mendaki dopale. Mita mange lama londe ingiya dee wangu awali lao doko mita kingi paki ingiya. Nakamba sukusa sisingi kata singi dee kapa romende kingi lenge muu dopale ingiya.
JER 52:22 Isa pinginya lamana ketae pinjingi dokona kyawa ingyuo kalya piyami. Doko mita lama londe ingiya. Nyuu ingyuo kalya pyuo lambuo laeyo pyuo palyuo wasisi dokona isa jingi kingi pomekaranate lengende waso kalya piyami.
JER 52:23 Isa pinginya kyawa dokona nyuu ingyuo wasisi dokona isa jingi kingi pomekaranate lenge andete mendaki dusipana akalisa mange mendaki karo ipisu pakinyamange dusipa isa yuu dokona karo kandenge.
JER 52:24 Doo piyamo dokopako Bapilone yanda singi dupwana mupwa isingi akali Nepusaratane lenge dokome purisi mupwa Seraya lenge dokope dee purisi lapo ingyuo karenge Sepanaya lenge dokope dee akali rema tembole anda dokona mupwa ingyuo karenge dusipa pipya karapusi pyao minyuo peya.
JER 52:25 Yuu taone dokona akali mende Juu yanda singi ami dupwana mupwa ingyuo karenge dokope akali yanda ipingi nyepo kiŋi doko kando dopa pyuo piri dapa pyuo piri lao nyiso lenge dusipa mee yuu dokona kareyami dupwape dee yanda singi ami dupwa pepa pyakamingi akali dokope dee akali kamongo lapo akalisa pakinyamange dupwa pipya puu maiyuo nyuo peya.
JER 52:26 Nepusarataneme akali dusipa minyuo yuu Bapilone kiŋi doko yuu taone Oripila yuu Amate dokona singi peteyamo dokona minyuo peya.
JER 52:27 Dokona yuu Bapilone kiŋi dokome nakama randa andake maipala pyao kumakana leya. Dopa pyuo Juta wambu dupwa nakamana yuu yaki nyuo karapusi pyao minyuo yuu wakale peyami.
JER 52:28 Nepukatenesame wambu dupwa karapusi pyao minyuo peyami pii dupwa dakena pyasi palamo. Baa ee kana yanda ipingi dokopa kiŋi karapala wambu ama malu (3,023) karapusi pyao nyuo peya.
JER 52:29 Dee banya ee kana akalisa ipisu mange lama kiŋi karo dokopa Jerusaleme piso wambu malu 832 puu maiyuo nyuo peya.
JER 52:30 Dee baa ee kana akalisa lama ipisu rema kiŋi karo dokopa akali Nepusarataneme wambu malu 745 puu maiyuo nyuo peya. Dokona wambu peparae nyuo pyasapala dokopa 4,600 puu maiyuo karapusi pyao nyuo peya.
JER 52:31 Kiŋi Jiyoakini ee kana akalisa rema ipisu yanda ipingi yuu gii akalisa lama ipisu kingi paki dokona kana akalisa ipisu lama dokona karapusi dokona palyuo kareya. Kareyamo dokopa ee kana dokona akali Epelemerotake baa Bapilone wambunya kiŋi karapala yuu Juta range kiŋi Jiyoakini baa kando anjiki pyuo karapusi paleyamo doko nyiso nyisa nyiya.
JER 52:32 Akali Epelemerotake dokome Jiyoakini baa kando anjiki pyuo elya pyuo reto karapala kiŋi menge yuu Bapilone dokona karo Jiyoakinimoo karapusi ingyuo role pyapeta paleyaminyi dupwa yulu maiyamopape baa yulu andake ama wakasa mende maiyuo banya kingi ketae pyambuo piya.
JER 52:33 Dopa piyamo dokopa Jiyoakini banya karapusi komau dupwa alowa pipala baa lete palyuo karo piyamo yuu gii dusipana kiŋinya nenge nenge rate dokona yuu peparae role pyao piso nao kareya.
JER 52:34 Yuu gii yaka lao baa palu karo piyamo dokopa baa nenge maiyami dopaleko ingyuo kana bangepe yano piyamo kareyamo dupwa maiyaminyi kapa nao palyuo karo piya.
LAM 1:1 ...
EZE 1:1 Namba purisi akali Isikiolo, Businya ikinyingi doko. Kana kisima yuu gii kingi paki ee kana akalisa ipisu rema dokopa Juu wambu yuu Bapilone karapusi pao kareyaminyi dupwa pipya ipwa Sepa pona dokona peteyama. Dokopa yake kata lumbwapala Anatu pii repa repa mende piyamo kandeyo.
EZE 1:2 Kiŋi Jiyoakini ee kana kingi paki karapusi anda paleyamopa kana dokona mendena yuu gii kingi paki dokona pii repa repa dake piyamo kandeyo.
EZE 1:3 Yuu Bapilone dokona ipwa Sepa nemba nemba namba Kamongome pii langiyamo siyunu dokopa banya porai renge doko namba keta ipuyamo soo kareyo.
EZE 1:4 Namba pendakae lapala kandalyapeyo dokopa kopa apupi reeko doko dulurena piso epeyamo kandeyo. Kopa dokona piso yuu pele isare ingyuo rao yake peparaena raeyo peya. Yuu pele pyakalyiyamo dokona bange kana kone lepo lepo pisi dopalende rao kareya.
EZE 1:5 Kopa apupi rakapana suku dokona bange lete karenge kisima wambu yale kandeyo.
EZE 1:6 Dusipana mendaki mendaki lao lenge kambu kisimako karo papake kisimako karo piya.
EZE 1:7 Nakamana kimbu dupwa rolae dee kimbu kaperena bulamakao kalinya kimbu kape dopale kareya. Bange dusipa kana kone isokome pyao nembasi ingyuo lepo lepo pyuo rao kareya.
EZE 1:8 Dopa pyuo karo nakama mendaki mendaki lao kisima dusipana papake isarena wambunya kingi mendakiko karapa piyamopa nyuo pyaso kisimako ingiya.
EZE 1:9 Papake yango mendena kimbu silya sana piru kareyami. Bokote pinjingi kisima ingyaro karenge dopale ingiya. Panya dokopa longo raeya nao kapu kilya kapu kyana pii nao pipala mee suu laro karo rolae peyami.
EZE 1:10 Bange lete karenge dusipana lenge kambu wakale wakale kisimako karapa piya. Lenge kambu dorena wambunya lenge kambu nyuo rolaerena mena laenena lenge kambu nyuo kyairena mena bulamakaona lenge kambu nyuo matarena yaka ulisapunya lenge kambu nyuo piyami.
EZE 1:11 Nakamana papake kisima larapu karenge dokona lama dolapome mendena pinjingi dokome pee lapala mendena pao keto lapa piyami. Dee lama dolapome nakamana yongo dokona yambe pyapapu piyami.
EZE 1:12 Nakama peparaena lenge kambu kisima karenge dokome mendasa panya dokopa kapu kyii napala mee rolelyamuli pyuo kando penge.
EZE 1:13 Bange lete karenge kareyami sukusa dokona kendapuli yale mende kaeya nao rao papyuo kareya. Kareyamo dokona isare uliyapu nyuo lelenge pyao rao peya.
EZE 1:14 Yuu pele waiya lao yanga paupau lengenyili pyuo bange lete karenge dusipa nakama lambu papa laeyo epapa pyuo peyami.
EZE 1:15 Namba bange lete karenge kisima kareyaminyi dusipana repeta nakamana uliuli bunu mendaki larapu siyamo kandeyo.
EZE 1:16 Uliuli bunu kisima dusipa mendarele ingyuo siya. Uliuli bunu dusipa kana lulya renge kana malu nembo ropo pingi dopale ingyuo lepo lepo piya. Uliuli bunu dusipa mendena lama larapu mende dokona anjokoyamo kandeyo.
EZE 1:17 Kandeyono dusipame maso kata paki pakipi nyokonyuo parami ingiya.
EZE 1:18 Uliuli bunu pinjingi dusipana peparae lenge ramurae pipala kandala kandala peyami.
EZE 1:19 Bange lete karenge dupwa mendasa panya kata nyokonyiyami dokopa uliuli bunu dupwa role pyapeta peyami. Dee pulyuo peyami dokopa uliuli bunu dusipa dopako pyuo peyami.
EZE 1:20 Bange lete karenge dupwame uliuli bunu dusipa renge kuiyuo minyaro karenge dokome nakama anja mendasa panya suu piyami dokonako palyuo uliuli bunu dusipa role pyapeta peyami.
EZE 1:21 Yuu gii peparae bange lete karenge dusipa kata paope mee karope sipuro yake ketae pao uliuli bunu dusipa mendare dokonako palyuo peyami.
EZE 1:22 Bange lete karenge dusipana kyawa siyamo ketaerena anda kauwasi yale lepo lepo pisi wasisi mende lepo lepo pyuo rao kareya.
EZE 1:23 Dokona isarena bange lete karenge dusipa mendaki mendaki lao dokona papake pakirena lama karenge dokome pee lapala yango mende dumbinya dokona keto lapa piru kareyami. Nakamana yongo doko papake paki lama dolapome yambe pyarapu piyami.
EZE 1:24 Nakamana papake dupwame bii leyaminyi dokopa poroparo lao peyamo siyu. Siyunu pii doko ipwa kota gono lele lao ami yanda kambu pili lao pyao dokopa Anatu Porai Wakasa dokona pii lele lao peyaminyi siyu. Nakama bii lao pao peteyami dokopa papake dupwa range nyuo kaki pyuo palyiyami.
EZE 1:25 Dopa piyaminyipape anda kauwasi yale nakamana kyawa ketae siyamo dorename piso pii doko lao ee epeya.
EZE 1:26 Anda kauwasi yale dokona ketaerena bange kiŋinya petenge isa yale kana kala muku dopale mende siya. Dokona wambu yale mende peteya.
EZE 1:27 Dokona wambu yale mende doko isare dokona kana kone ingyuo rao lepo lepo pyuo kareyamo kandeyo. Yanga paupau leyamo dokome puiya nengepe singi dopale ingyuo kala wakale wakale rao kareyamo doko kandeyo.
EZE 1:28 Kamongo baa yanga paupau lao karo lao lasaka piyamo kandeyo.
EZE 2:1 Dopa piyamo kandeyono dokopa nambana kingi wapambupi lakao pao paleyo. Palipala pii mende leyamo siyu dokopa, Makwa isa ingyuo karo kuku pyaa nare akali doko nambame mende langiruwale sipura, leya.
EZE 2:2 Pii leyamo doko lao kareyamo dokopa Anatunya Imambu dokome namba keta maralyapala nambana moko dokome namba nyuo roya kareyamo dokopa pii doko leyamuli pyuo mee lalu lao kareyamo siyu.
EZE 2:3 Makwa isa ingyuo karo kuku pyaa nare akali doko emba nyepala Isaraele wambu dupwa keta nembelyo. Nakamame namba kando kamba koo lao mata joo karaminyi kande doko wambu kauwange dupwame piyaminyili pyuoko pilyaminyi, leya.
EZE 2:4 Nakamana mona kana pokapala namba mupwa lao suu pyao pii nalyaminyi. Dokona lao nambame emba kando Kamongo Mupwa Andake Wakasa dokome lamailyuŋu lamaila puu, leya.
EZE 2:5 Nakamame embena pii see naraminyipape panda seraminyipape poropeta akali mendeme nakama keta epo lapyamo pilyamo lao soo nyerami.
EZE 2:6 Emba makwa isa ingyuo kuku pyaa nare akali doko nakama kando paka nao dee pii letaminyi dupwa soo pako pii napipi. Nakamame emba kando koo keta palyuo kilya kando larami ingilyamo. Isarepa moko palyuo karenge dopale ingyara. Dopa piramopape kamba lenge wambu dupwa kando paka nao dee pii larami dupwa soo paka nao pipi.
EZE 2:7 Nakama soo nyeraminyipape soo nyii naraminyipape nambame emba langilyu dupwa lamairi. Nakamba kamba lenge wambu kandape doko emba silini, leya.
EZE 2:8 Makwa isa ingyuo karo kuku pyaa nare akali doko emba nambana pii langilyu doko sepe. Nambame jiyu kande dupwa nenge kata ŋaa lapala nape. Nakamba pilyaminyi doko suu pyao kamba lao kara napipi, leya.
EZE 2:9 Leyamo dokopa namba kareyono dorena kingi peyara kande dokopa pepa rongo pisi doko peyamo kandeyo.
EZE 2:10 Pepa rongo pisi doko kingi dokome poleyamo kande dokopa pii pyasi paki pakipa laparaena paleyamo kandeyo. Dokopa mona rando ee lenge dee kumanda piso ee lao yamarangunya pingipi pii dupwa pyasi paleyamo kandeyo.
EZE 3:1 Anatumi dopa leya, Makwa isa ingyuo kuku pyaa nare akali dake embame pepa rongo pisi dolo nyepala naa. Napala Isaraele wambu dupwa pii lamaila pupi, leya.
EZE 3:2 Dopa leyamosa nambana nenge kata ŋaa leyo dokopa pepa rongo pisi doko naa lao jiya.
EZE 3:3 Jepala baame dopa lao, Makwa isa ingyuo kuku pyaa nare akali nambame pepa rongo pisi jilyu dake nape. Nao inginya palyape, leya. Dopa leyasa neyono dokopa lyaa pala rende piya.
EZE 3:4 Dokopa Anatumi namba langyuo, Makwa isa ingyuo kuku pyaa nare akali doko emba Isaraele wambu karaminyi dokona papala nambame pii langilyu dupwa lamaila puu, leya.
EZE 3:5 Nambame emba yuu liti wakale pii wakale lenge mendena randa nao lare lao nembelyonde daa. Isaraele wambu keta emba nembelyo.
EZE 3:6 Nambame emba yuu liti wakale andake lapona nakamana pii see narele lapona nembeyoli dokopa nakamame embena pii siyamili.
EZE 3:7 Isaraele wambu dupwana mendaki mendemepe pii doko selana makarami. Nakama nambana pii see naramiko. Nakama dupwa peparae mona kana pokapala kamba letaminyi, leya.
EZE 3:8 Nakama mona kana pokapa kambako letaminyi dokona epapu nambame emba kamame mona porayapala poraiko inginyi pyambwaro ingilyamo.
EZE 3:9 Nambame emba kana dopale ingyuo porainyi pyambwaronopa kana munjamae dopale ingyuo karapala kamba letaminyi dupwa kando paka nare, leya.
EZE 3:10 Anatumi pii leyamo dokonako yaki nyii nao, Makwa isa ingyuo karo kuku pyaa nare akali doko pii langilyu dupwa peparae aki piinde lao elya kalo soo suu pyao minyaro karape.
EZE 3:11 Embena wambu yuu wakale dokona karapusi palaminyi dupwa kando pii lamailyu dupwa soo minyarami panda see naraminyipape namba Kamongo Mupwa Andake Wakasa dokome letonuli pyuo lamaila puu, leya.
EZE 3:12 Enakana Anatunya Imambu dokome namba minyalyuo nyepala matarena karo pii poraiko leyamo siyunu dokopa Kamongo yake panda ketae karamo banya nyilyingi yulu doko ketae pyambuo lakandape, leya.
EZE 3:13 Dokopa bange lete karenge dupwana papake dupwa poroparo lao ketae kareyamo siyu dokopa dee uliuli kimbu dupwa malawai lao poraiyuo kaeyo yuusili minyilyamo uu lenge dopale ingiya.
EZE 3:14 Dokopa Kamongona Imambu dokome namba minyalyuo nyepala soo peya. Banya porai renge dokome namba keta epeyamo dokopa kata jiyasa epe see napala imbu singi nyiyu.
EZE 3:15 Dopa pyuo namba yuu Telapipi lenge ipwa Sepa repeta wambu karapusi palenge dokona epo paleyono dokopa bange doo kando soo piyunu dupwame namba nyuo kui yanyi pyapala isa palyiyasa yuu gii yanda ipingi nyepo mee peteyo.
EZE 3:16 Yuu gii yanda ipingi nyepo dusipa epo papeyamo dokopa Kamongome namba pii langiya.
EZE 3:17 Baame dopa lao, Makwa isa ingyuo kuku pyaa nare akali doko nambame emba Isaraele wambu dupwana iso karenge akali ingyuo rombo palyilyu. Nambana repe repe pii emba langirunu dupwa nakama lamaiyakare.
EZE 3:18 Akali koo pingi mende kumaraŋa lao larono sepala repe repe doko nyuo lamaiyuo mona enenge palyuo alowa pinya lamai narenepa koo paleta karo kumara ramo doko nambame emba keta renge laro.
EZE 3:19 Embame wambunya koo dupwana yaki nyinya lao repe repe lamaiparenepa minyuo yaki nyapa napala kumarami ramo dokopa emba keta pii palya nara, leya.
EZE 3:20 Akali rolae pyuo karara mendeme nambame kyawa yaki nyuo makande pyuo kandaronopa koo keta paliramo dokopa embame repe repe lamai nare ramo banya koo dokona lao kumara. Banya yulu keyange wamba pyuo kareyamo dupwa mende yaka lakami naro. Dopa pyuo koo keta palira dokona lao banya kumasi ranjama doko emba keta palena laro.
EZE 3:21 Embame akali keyange pingi doko koo pii nana lao repe repe lamairinyipa doko mende lalyane lao sepala lete para ramo dokona lao embena doko kyawa minyakaro, leya.
EZE 3:22 Kamongona porainya renge doko namba keta epo apu sepala pii mende lalyiyamo siyu dokome sipurapala yuu anda lama lama dokona puu. Dokona mende langiruwale, leya.
EZE 3:23 Dopa leyamo dokopa yuu anda lama lama dokona peyono dokopa Kamongona yanga paupau lenge ipwa Sepa dokona wamba kandeyo mee dopaleko kandeyo. Kandapala dokopa kingi wapambu lakao mona kando kareyo.
EZE 3:24 Dopa piyamo dokopa Anatunya Imambu dokome namba keta maralyapala nyuo roya kareyamo kareyo. Dokopa Kamongome namba langyuo, Anda papala embena anda dokona romo napyuo karape, leya.
EZE 3:25 Makwa isa ingyuo kuku pyaa nare akali doko emba kiimbwasi serene wambunya lenge kambu dokona kapa pare ingya nara, leya.
EZE 3:26 Wambu kamba lenge dupwa repe repe lamai nare lao nambame embena kekenge neketaiyapa dolapo kumbwa kiso rambularo, leya.
EZE 3:27 Dee enakana pii kamba langyuo, Pii manjo lenge renge doko peeyakaro dokopa namba Kamongo Mupwa Andake Wakasa dokome dopa letamo lao lamairi. Lamairinyi dokopa nakama kamba lengena para pyasi dokome lapome seraminyipape lapome see nao mata jerami, leya.
EZE 18:1 Kamongome namba langyuo
EZE 18:2 baame dopa leya. Dake aki kongwalu piinde wambu dupwa keta yuu Isaraele dokona kamba kamba letamisi? Rakange dupwa isa girapo kau pingi neyami. Neyaminyi dokome wane wanake dupwa nenge niki niki piya.
EZE 18:3 Kamongo Mupwa Andake Wakasa karenge dokome dopa lao, Namba Anatu lete karalu karenge dokome kinyi kinyi leto. Nakamame kongwalu pii dake kamba yuu Isaraele dakena laa nalu nao narami.
EZE 18:4 Wambu peparae nambana. Rakange wanepe dupwa peparae nambanako. Mende koo pira ramo doko iki kumara.
EZE 18:5 Akali mende elyape dokome angi dokonako palyuo lao rolae pyuo pira ramo
EZE 18:6 doko baa Isaraele wambu dupwame bange lapo anatu lao wasisi semango karo bange lapo lakando pyao kiso maingi dupwana naa nange ingyara. Baa akali mendena enda kepo pyakami nao panda enda nenge range nao petenge dokopa kepo pii nange ingyuo karara.
EZE 18:7 Baame minyako pyuo waa nyii nange. Bange mende yulu pipalana lao nyuo pao dokopa range peyakarono dokopa jereŋe bange mende minyaro karena lao maipala nyuo penge doko enakana peyakamilyaminyi dokopa dolo range mondo lao maingi. Komau see nangepe dee lopolyaminyi dupwa baa nenge pyuo komau maiyuo pingi.
EZE 18:8 Baame kana matana piso nyipuli lao maiya nange. Koo dupwa pinya pakapala kote dupwana kinyi dokona iki lao kunjingi.
EZE 18:9 Akali dopale dokome namba letonuli pyuo lowa dupwana mondo lao minyingi. Baa rolae pingi dokona yuu gii andarele karara. Kamongo Mupwa Andake Wakasa dokome dopa letamo.
EZE 18:10 Akali dopale dokona wane mandeyande ramo dokome yulu koo doo rakange pii nange dupwa pyuo waa nao wambu pyao bange pyao kiso semango karenge dupwana nenge nao dee akali wakalena enda kepo pyakamyuo pira.
EZE 18:12 Baame wambu pendewa dupwa minyako pyuo waa nao bange lapo yulu pipala range jinya lao maingi dupwa baa nyuo semango kingi lenge mare dupwana pao bange lapo kingimi wasisi dupwa lakando
EZE 18:13 kana lapo baa matana piso nyipulinyako suu pyao maiyuo pyuo karenge. Akali dopale doko kapa lete kararase? Ama daa. Baa koo dopale dupwako pyuo papira dokome baa kumara ingilyamo. Rangeme kandakinya pyuo karapala kumuo para ingilyamo.
EZE 18:14 Dee akali mende lapo dokome wane mandeyali doko banya rakangeme koo piyamo dupwa kandapala mana nyuo pii nalana suu piya.
EZE 18:15 Isaraele wambu dupwana anatu lao isa kanapeme wasisi dupwa semango karo lakanda nao Anatumi daa lenge panda dupwana bange lapo pyao kiso maingi dupwana wane baa naa nao akali mendena enda dupwa kepo pyakami nao
EZE 18:16 wambu dupwa mata rukyuo pyao waa nyii nao pingi. Bange mende yulu pipalana nyuo pao dokopa range peyakarono dokopa jereŋe bange mende minyaro karena lao maipala nyuo penge doko enakana peyakamilyaminyi dokopa dolo range mondo lao maiyakamingi. Wambu lopalyaminyipape dee komau see nangepe dupwa komau nengepe maingi.
EZE 18:17 Baa koo dupwa pii napalape dee kana dupwa matana piso nyii nange. Baa nambana lowa minyuo letonuli pyuo karara. Dopa pira ramo doko banya rakangena yulu koo dupwana lao kuma napala baa mee lete karara.
EZE 18:18 Banya rakangena yulu doko wakale ingyuo pelyamo. Baame wambu minyako pyuo waa nao yuu peparae yulu koo pyuo kareyamo dokona kumuya.
EZE 18:19 Dopa piyamopape nakamame piso soo, Akipamo banya rakangena koo dupwana ikinyingi randa nyii nalyase? letaminyi. Dokona isingi pii doko ikinyingi doko baa keyange rolae pingi. Nambana lowa letamuli pyuo karenge dokome baa mee karara.
EZE 18:20 Mendaki doko koo pingi dokona baa kumungi. Rakangena koo piyamo dokona lao ikinyingi yano nyerande daa. Dee ikinyinginya koo pingi dokona rakange yano nyii narako. Koo keyangepe pirambinyi dokonako manda manju range yano nyingi.
EZE 18:21 Akali yulu koo pyuo karara mendeme koo yaki nyuo kaepala nambana mawa pii dupwa minyuo dee rolae pira ramo doko baa kuma nara. Baa mee lete karara.
EZE 18:22 Dopa piramopa baa yulu keyange piramo dokona banya koo wambarae dupwa nyuo kame sakamirunu baa mee karara.
EZE 18:23 Akali koo pingi kumara dokopa namba mona seramopa rae maiyuo karare lao suu pilyamisi? Dopa lao Kamongo Mupwa Andake Wakasa dokome piso silyamo. Ama daa baa mona enenge palyuo epo lete kararamo dokopa kando namba rae mairu.
EZE 18:24 Akali rolae pingi dokome keyange piyamo dupwa kupyuo yaki nyepala koo dupwana sukusa pao wambu wakalena koo pipala elya nyingi dupwana mana makandope nyepala pyuo karara ramo doko baa lete karara ingyarase? Ama daa mendeme banya keyange wambo piyamo dupwana dee suu pyaa naro. Baa yaki nyuo yulu koo pyuo kareyamo dokona kumara.
EZE 18:25 Nakamame dopa letaminyi. Kamongome pilyamo doko angi rolae daa letaminyi. Nakama Isaraele dupwa nambame apa leene lao soo karalapape. Nakamame nambame pilyu dupwa rolae angi daa lao suu pilyamisi? Namba daa. Nakamame angi kyai doko pimisa pilyamo.
EZE 18:26 Akali rolae pingi mendeme kaepala koo dupwa kanda soo piramopa baa kumara. Doko koo banya dokome range kumarasa pira.
EZE 18:27 Dee akali koo pingi mendeme koo doko mata maiyuo kaepala epo keyange rolae pira ramo baa range lete wai pyao nyerasa pira.
EZE 18:28 Baa koo piyamo doko soo nyepala yaki nyipyamo dokome baa kuma nao mee karara.
EZE 18:29 Nakama Isaraele dupwame dopa lao, Kamongome pilyamo doko rolae daalyamo lao karaminyi. Nakamame nambame pipu doko rolae daa lao suu pilyaminyi doko kinyisi? Nakambana pilyaminyi doko rolae daa.
EZE 18:30 Namba Kamongo Mupwa Andake Wakasa dokome nakamba Isaraele wambu dupwa langilyu. Koo emba rangena pilini dokona wakale wakale yapalya yapana pyuo laro ingilyamo koo dokome nakama kokwasi nanale dupwa yaki nyepala ipupwa.
EZE 18:31 Nakamana koo doo pyuo karaminyi dupwa mata maiyuo kaeyalapa. Kaepala suu pingi enenge palyuo mona alowa pyuo pipwape. Nakama Isaraele wambu dupwa akipamo kyawa kana palyapala kumalana karamipi?
EZE 18:32 Dokona lao Kamongo Mupwa Andake Wakasa dokome nakama mendali kumarami dokona rae mai nalyo. Dokona lao koo dupwa yaki nyepala lete karalapa, letamo.
EZE 33:1 Kamongome namba langyuo,
EZE 33:2 Makwa isa ingyuo karo kuku pyaa nare akali doko embena wambu dupwa lamaiyuo, Nambame yuu mendena yanda sipurelyono dokopa nakamana range akali dokona mende nyepala nakama iso kararaŋa lao rombo palyingi kandale.
EZE 33:3 Baame yanda pimwai dupwa repeta eparaminyi kandapala epelyaminyi lao lyakai pyuo bikuli pii lao wambu dupwa lamaira.
EZE 33:4 Lamairamo dokopa repe repe doko mende palyamo lao mendeme see nao mona kana pokapala sili see nale lao kararamo pyarami ramo doko baa range keta palira.
EZE 33:5 Kumaramo doko baa rangena piyamo dokona ingilyamo. Daaŋa lapala bikuli pii doko mende lalyamo lao sipyali doko kapa wanjipyali.
EZE 33:6 Dopa piramopape iso karenge akali dokome yanda pimwa eparami doko kandapala epelyaminyi lao bikuli pii laa naramopa koo pingi wambu dupwa pyao kumkarami ramo dokopa iso karenge akali dokopa nambapa pii palira.
EZE 33:7 Epapu makwa isa ingyuo karo kuku pyaa nare akali doko emba nambame Isaraelena yuu liti dokona iso karare lao rombo palyiyu. Dokona nambame repe repe pii langiru dupwa kaeya nao lamaipa pyuo karare.
EZE 33:8 Akali koo pingi mende kumaraŋa lao larono sepala repe repe doko nyuo lamaiyuo mona enenge palyuo alowa pinya lamai narenepa koo paleta karo kumara ramo doko nambame emba keta renge laro.
EZE 33:9 Embame wambunya koo dupwana yaki nyinya lao repe repe lamaiparenepa minyuo yaki nyapa napala kumarami ramo dokopa emba keta pii palya nara, leya.
EZE 33:10 Kamongome langyuo dopa leya. Makwa isa ingyuo karo kuku pyaa nare akali doko embame Isaraele akali dupwame suu pyao letaminyi doko range dee kamba polo lamaiyakamipi. Dopa letaminyi, Namwana koo pimwa dupwame kendame kumuo karamano. Koo doko namwa keta suku suku palu palyuo palamo. Namwa apa pyuo piso karo piramase?
EZE 33:11 Namba Kamongo Mupwa Andake Wakasa doko Anatu karalu karene dokome nambame kinyi leto. Akali mende koo pyuo karo kumara ramo doko rae maiyuo kanda naro. Baa koo dupwa yaki nyepala karalu kararamo kandapuli yaka. Isaraele wambu dupwame koo pilyaminyi doko yaki nyuo kaeyalapape. Akipamo nakamba kumalana suu pilyamisi?
EZE 33:12 Dakepa makwa isa ingyuo karo kuku pyaa nare akali doko embame Isaraele wambu dupwa dapa lamaipi. Akali mendeme yulu keyange pyuo karapala enakana koo pira ramo doko wambo keyange pyuo karara dokome baa kyawa minya nara. Koo pyuo karenge dokona mendeme koo doko mata maiyuo kaeyara ramo doko baa range kyawa lete nyerasa pira. Dee akali keyange pingi mende yaki nyepala kanda soo koo pira ramo doko baa lete paa nara.
EZE 33:13 Nambame akali rolae pingi doko lete karara lao lalu lao laronopape baa wambo keyange pyuo kaepala karoŋo dusipa kapa lapala koo lapo pira ramo doko wambo keyange piyamo dupwa yaka lakamirunde daa. Baa rangena koo dokona kumara dokona karara ingilyamo.
EZE 33:14 Nambame akali koo pingi doko baa kumaralyamo lao repe repe lamaingi. Lamairunupape baa koo rangeme dupwa sepala yaki nyuo rolae doko anjuku lao nyuo pira ramo doko kapa ingyara.
EZE 33:15 Rolae dupwa dapale. Bange mende nyuo yulu pinya laramo maipala minyakao epare dokopa range peyakaroŋo embena wuape mende retakao kararo peena lapala anda maiyakami epenge dokopa dolo range maiyakamingi. Dopa pyuo nyuo kalyingi doko range yulu maiyakamyuo waa nyiya dupwa range maiyakamyuo koo dupwa yaki nyuo lowa anjukunya pirusa lete paro lao kata koto karara ramo doko baa kuma napala lete karara.
EZE 33:16 Nambame koo piya dupwa nyuo kame sakamirunupa baame rolae suu pyao keyange pipyamo dokona mee lete karara.
EZE 33:17 Embena wambu dupwame lao dokopa nambame pyuo karenge dupwa rolae daa letaminyi. Doko ama kapa laa nalyaminyi. Nakamana pilyaminyi dupwa rolae ingya nalyamo.
EZE 33:18 Akali wambo rolae pyuo kararamo doko kupyuo yaki nyepala koo dokona kanda soo pira ramo doko koo pira dokona baa kumara ingilyamo.
EZE 33:19 Akali wambo koo pyuo kararamo doko yaki nyepala keyange dokona rolae pira ramo dokopa baa range kyawa minyara.
EZE 33:20 Dopa pira doko sepala nakama Isaraele wambu dupwame nambame pilini dupwa rolae daa letaminyiŋi. Dokona nambame nakama pilyaminyi dupwana dopale dopale lao kote laro ingilyamo.
EZE 33:21 Yuu gii kingi paki kana akalisa ee kana akalisa ipisu lama dokona namwa anjo nyuo peyaminyi yuu wakalena kareyamano dokopa akali mende yuu Jerusaleme yaki nyuo pyakao peyandeme epo lao dopa leya. Yuu taone andake doko lalyisi silyamo, leya.
EZE 33:22 Leyamo akali doko epapyamo lao kukwa dokopa Kamongona porai renge doko namba keta epeyamo siyu. Dokona yangama akali baa epapeyamo dokopa Kamongome namba pii lengenyili pyuo lalese lao kambu range lumbakaya.
EZE 33:23 Kamongome namba dopa langiya.
EZE 33:24 Makwa isa ingyuo karo kuku pyaa nare akali doko yuu Isaraele dokona taone pyao lalyisi dupwana palenge wambu dupwame dopa letaminyi. Aporakame baa akali mendaki doko kareyamopa Anatumi baa yuu peparae maiya. Epapu dakepa wambu malu karamano dokome yuu doko namwana ingilyamo.
EZE 33:25 Namba Kamongo Mupwa Andake Wakasa dokome dopa letamo lao lamaipi. Nakama mena minju doko ranjama paleta nao isa kanape dupwame wasisi dupwa anatuŋu lao lakando karo wambu dupwa ranjama kulimbuo pyao pyuo karaminyi. Dopa pyuo karaminyi dokona apa pipala yuu doko nakamana ingyarape?
EZE 33:26 Nakama wua gela dokome kyawa minyara lao suu pyaro karo yulu pii napenge dupwa ipi pipyamopa pyuo karaminyi. Nakama peparaeme kepo yulu dokonako karaminyi. Dopa pyuo karaminyi dokona apa pipala yuu doko nakamana ingyara lao suu pilyamisi?
EZE 33:27 Namba Kamongo Mupwa Andake Wakasa dokome repe repe letamo lao lamaipi. Namba Anatu karalu karenge dokome kinyi kinyi leto. Wambu lapo taone andake lalyiyamo dupwana palaminyi dupwa pyao kumarami. Mee yuu dupwana palaminyi dupwa mena rakaiya dupwame narami. Lapo yuu kyau dorenape dee kana anda dokona yalu pyuo palaminyi dupwa anga yakane nyuo kumarami.
EZE 33:28 Yuu doko ketange pyanyi nembaro. Renge porai lapo palipyamo eneko kaelyaminyi doko nyuo mee inginyi nembaro. Isaraele dokona yuu kyau dupwa apa yuu ingyuo seraronopa wambu kapa parami ingya nara.
EZE 33:29 Nambame wambu dupwa nakamana koo dokona randa maiyuo yuu doko pendewa nembaro dokopa namba Kamongo lyamo lao soo nyerami, leya.
EZE 33:30 Kamongome leya. Makwa isa ingyuo karo kuku pyaa nare akali doko embena wambu dupwame nakamana anda kambupi yuu taone kana kame piso karenge dokonape kando nyepala dokopa nakamba lao emba kando lao karaminyi. Kamongo keta aki pii letamo lao sela mwua, lao karaminyi.
EZE 33:31 Nambana wambu soo kaeyome embame apa lene lao sela epelyaminyi. Epapalape angi pinya lamaipi doko pii nalyaminyi. Embena pii doko nyuo kuki inginyi nembapala nakama bangepe nengepe nyerami dupwana iki mona nyepala pyuo papilyaminyi.
EZE 33:32 Wane kukimi male lao kenane pili lao karaminyi dokopa wambu menge soo kando karaminyi dupwame renge mende pali nalyamo lao suu pyao mee giyuo karenge. Dopale ingyuo nambana wambu dupwame embena pii doko mee inginyi pyambuo nyuo male lapala pii angi lapinyi dokona mendakipi rape rape lao minya nalyaminyi.
EZE 33:33 Dopa pyuo lao karaminyipape embena pii lao karene doko angi pyaka sera. Pyaka seramo dokopa poropetande pii lao karapya kandapi doko anginde lamo lao soo nyerami.
EZE 34:1 Kamongome namba dopa langiya.
EZE 34:2 Makwa isa ingyuo karo kuku pyaa nare akali doko Isaraele wambunya iso karenge akali dupwa lao nembele lao pii lamaipi. Poropeta piimi lao, Namba Kamongo Mupwa Andake Wakasa dokome letamo lao lamaipi. Isaraele iso karenge akali dupwa nakama range dokona iki suu pyapala sipisipi dupwa yaki nyuo kaelyaminyi dokona nakama keta randa epara.
EZE 34:3 Nakama menana anju ipwange elyape doko nao komau kupinyi yambale ingyuo sipisipi imanjimi wapusi dupwa iki wapuo mena sipisipi angi pena pena pisi dupwa pyao kuiyuo naminyipape pyuo karaminyi. Dopa pyuo karapinyipape embame iso karalene wambu kandale dupwa yaki nyilyaminyi.
EZE 34:4 Embame porai napyamo karaminyi dupwa suu pyaa nao anga pyapyamo karaminyi dupwa pyuo nyii nao rete pipyamo dupwa yaki pyakami nao neta puminyi dupwa sukusa nyii nao pyuo karene. Dopa piri doko suu pyao wambu dupwa randa maiyuo karene.
EZE 34:5 Dopa pyuo sipisipi isingi akali yangilyamo dokona lao bolombalo lao waa keta pelyaminyi.
EZE 34:6 Dopa pyuo nambana sipisipi dupwa yuu kyau kukipi andakepe dupwana ralo pelyaminyi. Dopa pyuo bolombalo lao isa yuu peparaena puminyipa mendeme kando nyelana suu pyao kota nalyaminyi.
EZE 34:7 Dokona nakama sipisipi rapu pingi dupwa. Epapu dakepa namba Kamongo dokome aki pii mende langilini lao selapa.
EZE 34:8 Anatu doko namba kareyonoko karenge dokome langilyu. Dake doko mende lalyane lao soo nyelapa. Nambana mena sipisipi dupwa isingi dupwame iso kara namisa dokona lao suwa menape rae lenge dupwame pyapala nelyaminyi. Nambana sipisipi rapu pingi dupwame mena sipisipi dupwa anja karaminyi lao koto kandala paa napala nakama range yongo rapu pyuo karapala mena sipisipi dupwa suu pyaa nalyaminyi.
EZE 34:9 Dopa pyuo pelyamo dokona lao sipisipi rapu pingi dupwa nakama nambame apa langilini lao selapape.
EZE 34:10 Namba Kamongo Mupwa Andake Wakasa karenge kandale doko epapu nakamana yanda pimwai ingyuo pelyo lao panelyo. Nambana wambu dupwa epapu range nyepala nakamame yuu mendepe rapu pyakao karalapape lao jii naro. Nakamana yanenge dokonako suu pyao alisi minyuo karaminyi. Doko dee pii nalapape lao kararoko. Nambame nambana sipisipi dupwa nakamame dee pyao naa nalamisi lao kiiramo nyero leto, leya.
EZE 34:11 Namba Kamongo Mupwa Andake Wakasa karenge dokome sipisipi dupwa namba rangeme koto nyepala mondo lao rapu pyuo kararona lao nakama langilyu.
EZE 34:12 Mena sipisipi rapu pingi akali dokome bolombalo lao pelyaminyi dupwa nyuo elyambu pingi. Doko suu pyao randa epeyamo yuu muu wakale wakale dupwana bolombalo lao peyaminyi dupwana piso range nyuo eparo.
EZE 34:13 Yuu wakale dupwana kararami dupwa nyuo malu palyuo karo nambame nakambana yuu range dokona lanyuo eparo. Lanyuo epo dokopa nakamana yuu kyau dupwana range karo dee ipwa pona kuki dupwana pyambuo pirunupa nenge malu keyange dupwa nao kararami.
EZE 34:14 Nambame yuu kyau keyange nenge malu elyape singi dupwanape dee yuu anda lama lama rambi keyange singi dupwanape nakamba koo keta pali napala nao karena lao lama pyaro.
EZE 34:15 Namba range sipisipi rapu pingi akali ingyuo karapala nakama pau lao pisirami panda doko koto nyakamiru lao Kamongo Mupwa Andake Wakasa karenge dokome lapunu pilyamo.
EZE 34:16 Nambame isa pelyaminyi dupwa koto karo neta puu pao otasi dupwa nyuo lanyuo epo rete pira dupwa yaki pyakamyuo anga pyara dupwa lete nyuo pyuo kararo. Dopa pirunupape wambu rondo lasipi porai ingyuo karaminyipape dupwa pyao kokwa sinyi nembaro. Renge doko namba sipisipi rapu pingi ingyuo karo dokome rolae doko anjuku lao mee dopa piru ingilyamo.
EZE 34:17 Nambana wambu dupwa namba Kamongo Mupwa Andake Wakasa karenge dokome koo keyangepe yapalya yapana pyuo mena sipisipi memepe yapo liti pinya karo lao nakama dakepa langilyu.
EZE 34:18 Nakama dupwana lapome nenge nao karapala kando kaeyo nao malasi dupwa moko karo rambetaku pyanyi nembenge. Nakama ipwa keyange napala malasi dorena uki palyinyi nembenge.
EZE 34:19 Nambana sipisipi lapo dupwame nenge nakamame kalyuo parakwami dupwa nao ipwa uki palyisi dupwa nao kararami.
EZE 34:20 Epapu dakepa namba Kamongo Mupwa Andake Wakasa karenge dokome lao mena sipisipi porai ingyuo karaminyi dupwape porai ingya nao karaminyi dupwape pipala yapalya yapana pyuo laro lao langilyu.
EZE 34:21 Nakama mena sipisipi porai ingyuo karaminyi dupwame porai ingya nange dupwa yuu dokona kara nana lao pyao suu lao ralinyi nembelyaminyi.
EZE 34:22 Dopa pilyaminyi dokona nambana sipisipi dupwa kiiramo nyeronopa wakale dupwame nakama randa mende mai narami ingilyamo. Nambana sipisipi dupwa mendaki mendaki lao rolao lao dokopa koo keyangepe liti piru.
EZE 34:23 Nambame kiŋi mende nambana kendemande akali Dapiti yalende mairu. Mairunu dokome sipisipi peparaena rapu pingi mendaki doko ingyuo karapala baame mondo lao rapu pira.
EZE 34:24 Namba Kamongo doko nakamana Anatu ingyuo kararo dokopa kiŋi mende nambana kendemande akali Dapiti yale dokome nakama iso karara. Dopa lao lapunu pilyamo.
EZE 34:25 Mona seramopa koo keta pali nao kararami lao namba nakama pipya lao kana minayro. Mena suwape wambu nalana pingi dupwa yuu dokona pali nana lao pyao ralinyi nembaro dokopa nambana sipisipi dupwa yuu dokonape imwa dupwanape mondo lao palyuo kararami.
EZE 34:26 Dokopa nambame nakama kalya pinyi nembo yuu kyau poo pyasi dokona palyuo karena laro. Palyuo karo apunda ipyali lao maseraminyi dokopa nambame dupwa elyape keta pisinyi pyambuo apunda kulimbwanyi peyo mairu.
EZE 34:27 Mairunu dokopa nenge isa dupwa jingi lyuo yuu dokona nenge ando pira. Dopa piramopa nakama mendaki mendaki lao yuu renge dokona mondo lao palyuo kararami. Kararaminyi dokopa nambame nambana wambu kendemande pingi puu sane doko rokwaronopa namba Kamongo doko lyamo lao soo nyerami.
EZE 34:28 Wambu Anatu suu pyaa nange dupwame dee epo pyao bange dupwa lalyuo nyuo pii narami. Dee mena suwape wambu nalana pingi dupwame nakama pyao nao pii naramiko. Nakama mondo lao palyuo kararaminyipa mendeme nakama paka renge maiyuo pii narami ingilyamo.
EZE 34:29 Nambame yuu amenge pingi dupwa maiyuo nenge soo kakana pyuo pinya laro. Yuu muu wakale dupwame nakama kandanyi palyuo giyalya giyana pyuo lengenyili pyuo laa nana lao piru.
EZE 34:30 Wambu peparaena nambame Isaraele wambu dupwa kyawa minyilini doko nakama nambana wambu lao serami lao namba Kamongo Mupwa Andake Wakasa dokome lapusa pilyamo.
EZE 34:31 Nakama nambana sipisipi nenge jilyu dupwa nambana wambuŋu. Dee namba nakamana Anatu ingyuo dupwa nambana wambuŋu karoŋo lao namba Kamongo Mupwa Andake Wakasa dokome lapusa pilyamo.
EZE 36:1 Kamongome lao makwa isa ingyuo kuku pyaa nare akali doko Isaraelena yuu kyau dupwa kando lamaiyuo, Namba Kamongo Mupwa Andake Wakasa karenge.
EZE 36:2 Dokome waili pii nakamana lao letamo doko sinya lare, langiya. Isaraelena yanda pimwai dupwame nakama range nyisu yakunaiyape mende pisi nalyamo dokona kendepulinde karamano lao suu pyapala lao dakepa yuu kyau sulu singi dupwa nakamana lyakande, letaminyi.
EZE 36:3 Dokona lao namba Kamongo Mupwa Andake Wakasa karenge dokome pii leto doko dapa letamo lao polo lamaipi. Yuu lili wakale parali maki palenge dupwame Isaraelena yuu kyau dupwa ukiaki minyuo epo nyiyaminyi dokopa Isaraele wambu dupwa kando kilya kando lao piyami.
EZE 36:4 Dokona nakama yuu kyau kuki andakepe ipwa pona kukipi yuu anda lama lamape dee yuu kwaeyasi silyamo dupwape dee taone yuu liti wakale parali maki palenge dupwame pyuo kilya kando kwaeyaminyi dupwa mee apu silyamo dupwape namba Kamongo Mupwa Andake Wakasa karenge dokome apa letene lao selapape.
EZE 36:5 Nakama yuu liti wakale wambu parali maki palami dupwana lao namba Kamongo Mupwa Andake Wakasa karenge dokome imbu singi kana ingyuo rao alyuo karamo dokona piso nakama pyalana pyuo lamaipu. Yuu Itome range nakama angingyuole kando lapu. Nakamame namwa kilya kandalya kandana pipala rae maiyuo epo mena naraminyi nenge malu singi dupwa epo nyakami.
EZE 36:6 Dokona lao pii dake Isaraele wambu dupwa angingyuo lamairi. Nakama yuu liti wakale range dupwame Isaraele wambu pyao bembailanyi pyambuo elya maiyuo dee kilya kandele lao piyaminyi dokona namba Kamongo Mupwa Andake Wakasa karenge dokome imbu singi paleta nakama pipya yango koo palyuo karoŋo dokona lao yuu kyau ipwa pona kukipi yuu lamape dupwa dopa letamo lao lamaipi.
EZE 36:7 Namba Kamongo Mupwa Andake Wakasa karenge dokome yuu liti parali maki dupwa nyuo isa nembaronopa elya nyerami lao kingi ketae nembo lapunu pilyamo.
EZE 36:8 Yuu doloma dopa pyakamirunupape Isaraele yuu kyau dupwana Isaraele wambunya lao isa dupwa deeyako yoko byalu lao angi jingi lyuo lokwaso palyuo piraŋa nakama oo repetale range anda epaminyi.
EZE 36:9 Namba nakamana dorena karapunu pilyamoŋo nakamana yuu doko ape ape pyao dokona nenge jingi randa lakao piru.
EZE 36:10 Nambame nakamana ree palu dokona wambu wai kiso andakyaro dokopa nakama yuu taone pyao lalyinyi nembeyami kwaeyasi silyamo dupwa kamba minyalyuo pirami.
EZE 36:11 Nambame mena bulamakaope dee wambupi dupwa wai kiso andakyakaro. Nakama wamba kara nange wambu dokona lama konda pyuo sipuro kararami dokopa wane maluko konda pyuo jero. Nambame nakama ee wara pyuo nao kapa palyuo wamba palyuo karengenyili pyuo karalapale lao piru doko soo kandapala dokopa namba doko Kamongo dokolyamo lao kando serami.
EZE 36:12 Nambame nakama nambana Isaraele wambu dupwa yuu range dokona palyuo karalapale lao dee lanyuo eparo. Eparono dokopa yuu doko nakama rangena ingyara. Ingyaramo dokopa nakamana wane dupwa dee dopako pyuo papyuo kararaminde daa.
EZE 36:13 Yuu dake kando wambu pyao nao yuu range wane wanakepe waa nyuo pyuo palyuo karenge lao karaminyi doko namba Kamongo Mupwa Andake Wakasa karenge dokome soo leto.
EZE 36:14 Dopa letaminyi soo karoŋo epapu dakepana piso pao rengyape rakane nakamana wane waa nyakao wambu pyao pyakepo naope pii narami lao lapunu pilyamo.
EZE 36:15 Epapu nakamana yuu kwaeyasi doko kando dee giyalya giyana pyuo gyaa kai pyuo laa narami lyakande. Isaraele yuu dokome nakamana wane wanakepe dupwa waa nyaka narako lao namba Kamongo Mupwa Andake Wakasa karenge dokome lapunu pilyamo.
EZE 36:16 Kamongome namba langyuo,
EZE 36:17 Makwa isa ingyuo karo kuku pyaa nare akali doko langilyu. Nakama Isaraele akali dupwa piso palyuo piyaminyi doko nama napala myuku piya. Nambame nakama kandeyo dokopa enda kingi lanyuo petelyamo ipyange dopale ingyuo peya.
EZE 36:18 Yuu dokona wambu pyapalako karo dee kingimi wasisi dupwa kyawa nyuo kingi lao yuu doko kokwayamisa dokona nambana imbu singi doko nakama keta kulimbuo epo palira lao pena lao kaeyo.
EZE 36:19 Nakama dopa pyuo kopetame pyuo paleyaminyi dokona lao kooŋo lao lao koo keta palyapala yuu liti wakale dupwana bolombalo lao pena lao pyao ralinyi nembeyo.
EZE 36:20 Yuu wambupi wakale dupwana peyami dokopa wambu dupwame lao dokopa nakamana Anatu dokome yuu maiyamo doko yaki nyuo kaeyapenge ingiyasa yaki nyiyami leyami dokopa nambana kingi poo pyasi doko kwaeyo peya.
EZE 36:21 Isaraele wambu anja peyami dupwana nambana kingi poo pyasi doko nyuo yuu paranyi nembo peyaminyi doko kandapala nambame nambana kingi doko range sakao kareyo.
EZE 36:22 Dakepa doko namba Kamongo Mupwa Andake Wakasa karenge dokona pii Isaraele wambu nakama lamainya pilyu doko lamaiyakape. Nambame renge mende pyupono lamo doko Isaraele wambu nakamana reke lao pinya pilini lao suu pyasaramiŋi doko daa. Nakama yuu liti wakale wakale dupwana peyaminyi dokona nambana kingi poo pyasi doko nyuo yuu paranyi nembo peyaminyi dokona lao piru.
EZE 36:23 Nambame yuu liti wakalena nakama pao nambana kingi nyuo yuu paranyi nembo peyaminyi dupwana yulu angi mende kandapala nambana kingi doko poo pyasilyamo lao kando serami dokona palyuo pirunu dokopa dupwame namba doko Kamongo lao serami lyakande. Nambame nakama nyuo yulu pipala namba doko poo pyasiŋi lao yuu dupwana wambu lasaka piruŋu. Namba Kamongo Mupwa Andake Wakasa karenge dokome letoŋo.
EZE 36:24 Nambame nakama yuu liti wakale wakale kuki andakepe dupwana karaminyi doko nyepala lanyuo epo yuu nakamana range dokona dee lanyuo eparo.
EZE 36:25 Nambame nakamana kopetame koo pyuo isa kanape suu pyao karaminyi dupwana ipwa karo pisi nange dokome kulimbwanyi palyuo wate poo pyao nyero.
EZE 36:26 Nambame nakamana mona suu pingipi dolapo enenge inginyi pyambwakaro. Nakamana mona kana poko kamba lenge doko nyuo nembakapala laronuli pyuo rape rape lao pingi suu pingi doko jero.
EZE 36:27 Nambame nambana imambu doko nakamana mona rena palyapala nambana lowa pii kuki epengepe jiyunu dupwa apa pyuo minyilyaminyi lao kando kararo.
EZE 36:28 Dopa pipala dokopa nakamana rakange kyawa dupwa yuu maiyunu dokona kararami dokopa nakama nambana wambu kararaminyipa namba nakamana Anatu kararo.
EZE 36:29 Dopa pyuo paramo dokopa nambame nakama keta renge kwaeyo para mendepe epa nanya lao nyiso kararo. Nambame nakama keta lopo dee see naraŋa lapala kenapa ee dupwa ando kakana pyakaro.
EZE 36:30 Dopako pyuo lopo kone seramopa yuu liti andake dupwa pipa moŋo nyuo palya namili lapala isa jingi nenge isa dupwana lokwaso palyuo kakana pinyi nembakaro.
EZE 36:31 Dokopa nakamana yulu koo piyaminyi dupwa suu pyao lao karapala akipamo piyama lao elyame kumarami.
EZE 36:32 Nambana yulu keyange pilyu dupwa Isaraele wambu nakamana reke lao pilini lao masarami doko daa. Nakama nambana yulu keyange doko kando koo dupwana elya nyimili lapala pipunu pilyamo, dopa lao namba Kamongo Mupwa Andake Wakasa karenge dokome pii dake lapunu pilyamo.
EZE 36:33 Namba Kamongo Mupwa Andake Wakasa karenge dokome dopa leto. Nambame nakamana koo dupwana pyuo poo pyao nyepala dokopa nakamana taone dupwana range palyuo karalapa larono dokopa yuu andape kwaeyasi dupwa range dee kamba minyalyarami.
EZE 36:34 Wambu nakamana yuu dokona kata okosowape epo pao karo kandeyami dupwame doko aki yuu lao see nayaminyipa isoko dupwa yoko lapu lapu pipala kaeya. Dopa pyuo peyamopape nambame dee singinyili pyuo penale apa yuu pyao epo palipa laro.
EZE 36:35 Wambu epo dee kandarami dupwame lao yuu taone dake wamba lalyale pau lao kwaeyo apa siya kande doko yuu porai ingyaramopa ee Etenena nenge andenge dopale ingyuo wambu palengende pyuo kareyalyamo larami.
EZE 36:36 Dopa lao yuu wakale range parali maki yuu palenge wambu dupwame yuu doko Kamongo nambame yuu taone lalyale pau lao siyamo dupwape dee yuu isa ee nengepe dupwa minyalyilinyi larami doko. Namba Kamongo dokome piso lao lao kaeyo leto. Doko dokona palyuo piru.
EZE 36:37 Namba Kamongo Mupwa Andake Wakasa dokome letamo. Isaraele wambu dupwame nambame nakama nyisapili lao piso sela imili lao suu pilyu. Dee nakamana wambu doko ipwa pota kee kana ingyuo kakana pena lao suu pilyu.
EZE 36:38 Taone lalyuo buru bara pasi silyamo dupwa rengya dokopa wambu simbuo rangu papala yuu Jerusaleme dokona mena sipisipi Anatu pyao kiso maiyamisa menapa yuupa aopa laro karo pyao kiso maiyami kande dopale ingyaro karara. Doo pyuo parami doko kandapala namba doko Kamongo lao soo nyerami.
EZE 37:1 Namba Anatunya porai renge palenge doko nambapa role pyao karapyamo nakanjo sepapunu dokopa banya Imambu dokome namba nyuo soo pao yuu anda lama lama mendena pupyamo dokopa wambu kuli malu palyaro karapyamo kandapu.
EZE 37:2 Baame namba lanyuo yuu dokona sukusa pupyamo kandapu dokopa kuli dupwa ama malu mee dee ama yando mee ingyapyamo kandapu.
EZE 37:3 Dokopa namba langyuo, Makwa isa ingyuo karo kuku pyaa nare akali doko kuli malu yando dapwa dee lete parami lape lao piso sipya. Dokopa nambame isingi lao, Kamongo Mupwa Andake Wakasa karenge doko embame ramo doko dopa pyuo mende pinya lao lare ingilyamo lape.
EZE 37:4 Baame isingi langyuo dokopa kuli dupwa poropeta pii lamaiyuo, Nakama kuli malu kana malu ingyaro karaminyi dapwa Kamongona pii doko mende lalyamo lao soo nyinya lamaipi.
EZE 37:5 Namba Kamongo Mupwa Andake Wakasa karenge dokome pii dapa pyuo letamo lao kuli dupwa lamaipi. Doko porambaiye poo lanyi pyano nakama wambu ingyuo dee lete nyero.
EZE 37:6 Nambame kuli angae laro karamo dokona kata nyuo pena lao minju nyuo palyoko yanenge wai pyakao poo porambaiye maiyuo wambu ingyuo dee lete nyerono nakamame kandapala namba doko Kamongo lao serami.
EZE 37:7 Dokopa dopa pyuo poropeta pii lape lao langiyamo doko leyo. Ene pii lao kareyono dokopa kuli malu kaparo kareyamo dupwa ginyi ganyi keke kake lao kata nyuo pao range dokona kimbu sera sera piyaminyi siyu.
EZE 37:8 Nambame kuli angae laro kareyami dupwa apa pilyamo lao kandaro kareyonopa pao minju wailyu dee simbiyu kongapupi wailyu yanenge enenge dokona epo maralyuo piyamo kandeyo. Dopa piyamopape angi wambu ingyuo ŋeeŋae soo lete papa nayaminyi kandeyo.
EZE 37:9 Dokopa Anatumi langyuo, Makwa isa ingyuo karo kuku pyaa nare akali doko embame porambaiye dupwa poropeta pii lamaiyuo dokopa Kamongo Mupwa Andake Wakasa dokome dopa pyuo letamo lao lamaipi. Porambaiye dupwa kata luna dusipana piso minyuo epo yanenge lete see nalyamo dapwana lanyi pyano lete nyinya lamairi, leya.
EZE 37:10 Leyamosa nambame poropeta pii lape leyamuli pyuo leyo. Yanenge kaoma dokona poo rambaiya minyinyi pyaneyasa wambu ingyuo lenge rao roya peteyaminyi kandeyo. Dopa pyuo yanda kambu marakai doko kareyaminyi kandeyo.
EZE 37:11 Dokopa Anatumi namba langyuo, Makwa isa ingyuo karo kuku pyaa nare akali doko Isaraele wambu dupwa mee kuli malu sipyamo kandelene kande dopaleŋe, leya. Nakamame lao dokopa, Namwana kuli dupwa yando nao kaelyamo. Dee lenge raa narama lyamo. Namwa mee otao kaeyarama ingyuo pelyamo lao karaminyi.
EZE 37:12 Embame nambana Isaraele wambu dupwa poropeta pii lao lamaiyakao, Namba Kamongo Mupwa Andake Wakasa dokome nakamana malu anda dupwa kii lumbwaro. Dopa pyuo nambame nakama neta nyuo Isaraele wambunya yuu dokona dee lanyuo paro letamo lamairi, leya.
EZE 37:13 Nambana wambu malu anda palaminyi kambu doko lumbuo neta nyerono dokopa namba Kamongo doko lao serami, lyakande.
EZE 37:14 Nambame poporambaiye maiyuo lete nyuo nakama yuu kareyaminyi dokona dee lanyuo eparono dokopa namba doko Kamongo doko lamo lao kandarami. Angi piru lao lalu lao kaeyo lapunu pilyamo doko angi pipala kaeyaro lao Kamongo nambame leto.
EZE 37:15 Kamongome namba deyako langiya.
EZE 37:16 Makwa isa ingyuo karo kuku pyaa nare akali doko isa lomasi mende nyepala dokona Jutana kiŋi yulu dokona suu pyao pepa pyape. Pepa pyapala dee isa lomasi mende nyepala dokona Israelena kiŋi yulu dokona suu pyao pepa pyare.
EZE 37:17 Pepa pyapala isa lomasi dolapona pinjingi nyuo keto laro kararene dokopa mendaki ingyuo penale, leya.
EZE 37:18 Dokopa embena wambu dupwame kandapala pilyu doko langi lao pisiyaminyi lamaiyuo kande dokopa
EZE 37:19 dapa lamairi. Namba Kamongo Mupwa Andake Wakasa dokome Isaraele wambupi Juta wambupi makande pyuo silyambinyi dolapo nyepala nakamba lama ingyaro karambinyi. Doko mendaki ingyanyi pyambwapala nambana kingi rakana minyaro kararo, leya.
EZE 37:20 Isa lomasi pepa pyapinyi dolapo wambu dupwa kandena lao embena kingi rakana minyaro karape.
EZE 37:21 Dopa pyuo karo nakama lamaiyuo, Namba Kamongo Mupwa Andake Wakasa dokome nambana wambu yuu muu wakale dupwana karo pelyaminyi dupwa nyuo pyaso karo yuu range dokona lanyuo epo kararo letamo, lamairi.
EZE 37:22 Dopa pipala dokopa nambame nakama wambu yuu liti mendakinya palenge dopale ingyuo pena lao yuu kyau Isaraele wambunya dupwana nyuo pyasaro. Kiŋi mendakimi iso kararamopa dee kambako yuu wambupi doko lama ingyuo karo kiŋi wakale wakale ingyuo liti pyuo karo pii narambi, leya.
EZE 37:23 Nakama mona karo petelyamopa isa kanape dupwa angiko ingyuo kingi lao wambarae yulu suu pingipi pyaminyi kata dupwana deeko pii narami. Nambame nakama koo dopale mata kando pilyaminyi dokome namba yanda pimwailyamo doko nenge rekya lao nyero. Nakama dopa pyuo poo pyao nyeronopa nakama nambana wambu paraminyipa namba nakamana Anatu kararo, leya.
EZE 37:24 Kiŋi mende nambana kendemande Dapiti yale dokome nakama iso karara. Nakama kiŋi mendakimi isaramo dokopa mendakinya ingyuo nambana mawa pii dupwa warombo soo mondoko lao minyarami.
EZE 37:25 Nakama yuu nambana kendemande akali Jekope maiyunu dokona palirami. Jekopena para pyasi nakamana rora ambasupi ingyuo dupwa palyuo kareyami. Nakamape nakamana wane dee dupwana para pyao paramo dupwape dokona palyuo karalu kararami dokopa kiŋi mende nambana kendemande akali Dapiti yale dokome nakama iso karalu karara.
EZE 37:26 Nambame nakama pipya pii lalu lao lao kana minyuo laronopa nakama keta mumbwa palyaramopa elyape keta palyuo puu parami. Namba dopa pyuo kanda soo pipala wambu wai kiso andake inginyi pyambwapala nambana tembole anda doko nakamana yuu dokona wasaronopa karalu karara, leya.
EZE 37:27 Namba doo nakama paliraminyi dokona palyuo kararo. Dopa pyuo namba nakamana Anatu ingyuo kararonopa nakama nambana wambu ingyuo kararami.
EZE 37:28 Nambame nambana tembole anda doko nakama pipya yuu dokona karalu karara lao wasarono dokopa yuu muu wakale dupwame namba Kamongo dokome Isaraele wambu dupwa rangena kipungi ingyarami lao rombo palyuo nyilyamo lao serami, leya.
DAN 1:1 Ee kana repo dokona akali Jiyoakwimi doko Juta wambunya kiŋi ingyuo kareyamo dokopa yuu Bapilone dokona kiŋi Nepukatenesame yuu Jerusaleme pyao nyuo kako piya.
DAN 1:2 Kamongo dokome kiŋi Nepukatenesame kiŋi Jiyoakwimipa tembole anda bange keyange singi dupwana lapope nyinya leya. Baame wambu lapo karapusi ingyuo nyuo minyuo mee bange anatuŋu lao lakandenge dupwana tembole anda yuu Bapilone dokona lanyuo peya. Dee bange keyange nyiyamo dupwa tembole anda dokona bange retenge panda dokona reteya.
DAN 1:3 Dokopa kiŋi dokome akali Asepenase banya isingi akali mupwa doko lamaiyuo, Isaraele akali karapusi palaminyi dokona kiŋinya ree palu dupwanape wambu mupwa ingyuo karenge dupwanape wane parange lapo rombo palyuo nyepe, leya.
DAN 1:4 Nakama wane au pingipi dee nakamana yanenge dokona koo mende pali nao suu pingi keyange palyuo sukuli andake mana nyisipi dee wane waiya lao soo nyingipi dupwa kapa ingyuo kiŋinya anda dokona yulu pyuo kararami lao rombo palyuo nyepe, leya. Akali Asepenase dokome nakama yuu Bapilone rangena pii yaka laowape pepa pyaowape kararami lao mana lamaira ingiya.
DAN 1:5 Dokopa wambu kiŋi dokona anda palyuo nengepe ipwa waenepe neyaminyi doko suu pyao yuu peparae nenge mendare dopako pyuo wane dusipa nena lao lamaiya. Dokopa sukuli mana nyuo karo ee kana rema epo paparamopa nakama kiŋinya lenge kambu sera dokona kandena lao epo kararami, leya.
DAN 1:6 Wane angi rombo palyiyamo dupwana wane mende kingi Daniele lenge mende Ananaya lenge dee mende Misaele lenge dee mende Asaraya lenge. Nakama peparae Jutana rara dokona ingyuo kareyami.
DAN 1:7 Dokopa akali isingi mupwa dokome wane dusipa kingi wakale enenge leya. Wane mende kingi Beletesasa mende Satarake mende Mesake dee mende Apeneko leya.
DAN 1:8 Dokopa kiŋinya anda nenge neyaminyi dokome Daniele banya yongo doko kokwa sasaroŋo naa naro lao suu pyaro kareya. Dopa pipala akali isingi mupwa Asepenase dokome baa nyisinya lao piso siya.
DAN 1:9 Dokopa akali Asepenase doko Anatumi nyisiyamosa baame Daniele kando sakame kumuo nyisalana suu piya.
DAN 1:10 Suu pyapala Asepenaseme kiŋi dokona lao pakapala Daniele lamaiyuo, Kiŋi dokome nakama nenge ipwape naramiŋi lapyamo doko lao oto lapyasa pipya. Dee wane yango menge dupwa nenge ipwape kapa napala kararaminyipa nakama lopo lenge kambu nyero kararaminyisa kandapala namba pyao kumakasara, leya.
DAN 1:11 Dopa leyamo dokopa Asepenaseme isingi akali mendeme wane rema dusipape dee Danielepe iso karena lao rombo palyiyamo doko kareyamo dokona Daniele peya.
DAN 1:12 Papala baame lao, Namwa ipwa nenge awape iki yuu gii akalisa nalapa lao joo embame makande pyuo kandape, leya.
DAN 1:13 Dokopa wane parange kiŋinya anda nenge angi nao karaminyi dupwa pipya namwa pyasapala api kapa au pyuo karamipi lao kandapala embame langiri, leya.
DAN 1:14 Dopa leyamopa akali nakamana isingi dokome yuu gii akalisa iki makande pyuo nenge awa ipwape iki nena leya.
DAN 1:15 Yuu gii akalisa dusipa epo papeyamo dokopa wane dolosipame wane menge kiŋinya nenge porai neyami dupwa isa palyuo yongo keyange karo porai ingyuo kareyami.
DAN 1:16 Dokona lao isingi akali dokome kiŋinya nenge porai maiya nao ipwa nenge awape dupwa iki maiya.
DAN 1:17 Dokopa Anatumi akali parange kisima dusipa soo nyinginya renge maiyuo buku yaka lenge dupwana mora piso elyape inginyi pyambuo dee renge wakale wakale angi dupwana soo gisinya lao maiyuo piya. Dopa pipala baame Daniele pii repa repa pingipi dee kombeya pingipi dupwana renge angi polo lara lao suu pingi keyange maiya.
DAN 1:18 Ee kana rema dusipa epo papeyamo dokopa kiŋinya lao reteyamo dokona palyuo isingi akali Asepenaseme wane parange dupwa peparae lanyuo Nepukatenesa peteyamo dokona peya.
DAN 1:19 Peyamo dokopa kiŋi dokome peparae pii lamaiyuo karo kandeyamo dokopa wane menge dupwa nyuo isa palyuo wane Danielemoo Ananayamoo Misaelemoo Asarayamoo dusipa kamame ulipili mupwa ingiyamo kando nyiya. Nyepala dokona lao nakama kiŋinya anda dokona ree palu ingyuo kareyami.
DAN 1:20 Dokopa kiŋi dokome piso singi pii mendepe dee randa mendepe sipureyamopa mali mali sakangepe nemonga lenge dupwape nyuo isa palyuo wane parange dusipame kamame ulipili ingyuo renge dupwana konda pyuo soo nyuo lao kareyami.
DAN 1:21 Daniele baa kiŋinya anda dokona yulu pyuo kareyamopa pao Sairose baa yuu Pesa wambunya kiŋi dokome Bapilone pyao nyiya.
DAN 2:1 Ee kana lapo doko Nepukatenesa baa kiŋi kareyamo dokopa baa kombeya mende piya. Dokome baa mona randa malu piyamosa kapa pyuo luu palira ingya naya.
DAN 2:2 Dokona lao banya mali mali sakangepe pipu lengepe nemonga lengepe pepe minyingipi akali dupwame kombeya dokona renge doko polo langyala epena leya. Epapala nakama kiŋinya lenge kambu siyamo dokona roya kareyami.
DAN 2:3 Dokopa kiŋi dokome lao, Namba kombeya mende pipu dokome namba mona randa pilyamo dokona namba renge angi doko apa lao pipu lao selana suu pilyu, leya.
DAN 2:4 Leyamo dokopa nakamame Arame pii lao isingi lao, Emba kiŋi dokoŋo palu karalu karena. Embena kombeya doko namwa langipi. Dopa pirinyi dokopa namwame renge doko polo langirama, leyami.
DAN 2:5 Kiŋi dokome doo pipu lenge akali dupwa lamaiyuo, Nakamame kombeya doko akiŋi laope dee renge dokonaŋa laope polo langirami lao suu pyaro karo. Dopa pyuo langya narami ramo nambame nakamana kingi kimbu yongo dupwa pyao suu lao nyuo dee nakamana anda dupwa kokwa sinyi nembo piru lao suu pyao otapu.
DAN 2:6 Dopa pirunupape nakamame kombeya dokona langyuo renge dokoŋo lao polo langirami ramo doko nambame nakama yano pyao bange lapo jero dee nakamana kingi ketae pyambuo lakandaro. Epapu dakepa kombeya doko akiŋi laope dee dokona renge dokope polo langipwape, leya.
DAN 2:7 Leyamo dokopa pipu lenge akali dupwame kiŋi kando kamba piso soo lao, Embame kombeya doko akiŋi lao langiri ramo doko renge doko polo langirama, leyami.
DAN 2:8 Dokopa kiŋi dokome pii poraiyuo lao, Nambame pii lapunu doko alowa pii naro doko kandapala nakamame kyambo yuu gii nembo letaminyi doko angi soo nyilyu.
DAN 2:9 Nakamame kombeya dokona langya narami ramo doko nakama peparae randa mendaki dokoko nyerami. Namba suu pingi alowa pipili yaka lao nakamame mona mendaki palyuo namba kyambo langirama lao lao retami. Nakamame kombeya doko akiŋi lao langirami ramo doko nakamame namba kombeyana renge dokoŋo lao langiramilyamo lao soo nyero, leya.
DAN 2:10 Leyamo dokopa kiŋinya dopa pyuo piri dapa pyuo piri lao nyiso lenge akali dupwame baa isingi lao, Emba selana suu pilini doko yuu muu peparaena mendemepe embena kombeya dokona kapa langya narami. Kiŋi kamame andake mendemepe panda ama porainya renge palenge mendemepe banya akali pipu lengepe nemonga lengepe mali mali sakangepe dupwa kando piso singi pii andake dopale mendepe piso see nange.
DAN 2:11 Emba kiŋi doko. Emba pii andake piso silini dokona mendemepe kapa isingi laa narami ingilyamo. Kapa laa naraminyipa mee bange anatuŋu lao lakandenge dupwame iki kapa langirami. Langiraminyipape nakamame mee wambu role pyao kara nange.
DAN 2:12 Yuu gii dokopa kiŋi baa imbu singi nyepala yuu Bapilone dokona kiŋi baa dopa pyuo piri dapa pyuo piri lao nyiso lamaiyuo karenge dupwa peparae lapome mange pyakepo pinya laro lao kareya.
DAN 2:13 Pii leyamo doko akali peparaepe dee Danielemoo wane dolosipa pipya peparae rambe rambe palyuo pyaroŋo lao lamaiyuo oteya.
DAN 2:14 Yanda singi dupwame kiŋi iso karenge dupwana akali mupwa Arioko lenge kareyamo dokona Daniele baa peya. Akali Arioko lenge dokome akali kombeya polo lenge dusipana mange pyakepo pinya leyamisa Daniele baa mona palipala peya.
DAN 2:15 Papala dokopa baame Arioko piso soo lao, Kiŋi dokome akipamo imbu singi nyuo pii dopale doko lapyase? leya. Leyamo dokopa Ariokome dopa piyaŋa lao Daniele lamaiya.
DAN 2:16 Dokopa Daniele aopa papala baame kiŋi doko kombeya renge angi doko polo langiru lao yuu gii kuki lama mee jinya leya.
DAN 2:17 Lapala dokopa Daniele baa anda papala banya puu minyingi Ananaya Misaele Asarayamoo doo piyamo dupwa polo lamaiya.
DAN 2:18 Yuu Bapilone dokona akali lapo kiŋi doko dopa pyuo piri dapa pyuo piri lao nyiso lenge dupwa pyao kumara dokopa namwa kumwa naramaŋa Anatu yake panda karenge dokome kondome kumuo nyiso kombeya renge angi doko polo langinya lao Anatu piso sokondali pyuo ateŋa lena leya.
DAN 2:19 Enakana yuu gii kukwa dokopa Anatumi renge angi doko Daniele keta pii repa repa pyuo lasaka piyamosa baame Anatu yake panda karenge doko lakandeya.
DAN 2:20 Anatu baa soo nyuo angingyuo porainya renge palenge dokome banya kingi lakando karalu karamana.
DAN 2:21 Baame neta pingipi apu pingipi yuu gii dupwa rapu pingi. Baame kiŋi dupwa rombo palyepala dee nyuo isa nembenge. Baame akali dupwa soo gisinginya rengepe dee singinya rengepe maingi.
DAN 2:22 Mee wambumi see nangepe dee renge yalu piru karengepe dupwa baame panenge. Dee baame lapo iminjinginya yalu pyuo singi dupwa soo gisingi. Baa keta yanga paupau lao karenge.
DAN 2:23 Embame namwa kiŋi doko aki lamairami lao lasaka pyuo embame nambana ateŋa dokona isingi yano pyakao dee embame namba soo nyinginya rengepe porainya rengepe joo pilini dokona nambana rora ambasupi dupwana Anatu nambame emba rape rape lao lakando karo.
DAN 2:24 Akali Arioko lenge dokome kiŋi baame banya dopa pyuo piri dapa pyuo piri lao nyiso lenge akali dupwana mange pyakepo pinya leyamo doko kareyamo dokona Daniele peya. Papala lao, Embame nakama pyao kumaka napipi. Nambame banya kombeya dokona renge doko polo lamairu lao namba minyuo kiŋi petamo dokona paipu, leya.
DAN 2:25 Dokopa Ariokome aopa Daniele lanyuo kiŋinya lenge kambu dokona papala kiŋi doko lamaiyuo lao, Embame wambu yuu Juta range puu maiyuo nyingi dokona mende kando nyipunu dokome embena kombeya dokona renge aki lao polo langira, leya.
DAN 2:26 Kiŋi dokome Daniele banya kingi mende Beletesasa lenge doko lamaiyuo, Embame namba kombeya pipu dokonape dee kombeya renge dokonape langirisi? leya.
DAN 2:27 Dokopa Daniele isingi lao, Emba kiŋi andake, pipu lenge akali mendepe nemonga lenge mendemepe mali mali sakange mendemepe dee akali bui rapu pingi akali dupwana mendemepe emba dokona langirami ingya nalyamo.
DAN 2:28 Dopa piramopape Anatu yake panda karenge dokome kongwalu pii dupwa pano lamaingi. O kiŋi baame emba rengya mende pira lao langipya. Emba luu palipinyi pii repa repa pipi kandapi doko kombeya dakeŋe epapu nambame polo langiruwale.
DAN 2:29 Emba kiŋi doko luu palipinyipa Anatu renge angi yalu pisi singi dupwa panenge dokome kombeyame rengya pira dupwana lao lasaka pipya.
DAN 2:30 Nambana soo nyingi renge doko andake ingyuo mee akali dupwana suu pingi nyuo isa palyuo pingindena Anatumi renge angi namba lasaka pipyande daa. Emba kiŋi andake doko embena kombeya dokona renge doko soo nyuo dee suu pingi emba keta ipyamo dupwa soo nyuo pelese lao pipya.
DAN 2:31 Emba kiŋi andake doko. Embena pii repa repa pipinyi dokopa kaname wasisi ama andake wambu yalende yanga paupau lao leya leya pipyamo doko kandalana pakapi.
DAN 2:32 Dokona kyawa doko kana golo keyangeme wasisi dee banya kingi kyangalipi dupwa kana kulingi dokome wasisi dee banya romba lengyarepe dupwa kone kana yalendeme wasisi.
DAN 2:33 Banya kimbu dolapo aneme wasisi dee kimbu kape dolapo paki aneme wasapa dee paki warame wasapa pingi.
DAN 2:34 Emba doko kando palene dokopa kana reeko wambumi minyanda nayaminyi mende maso epapala bange dokona kimbu kape ane warapeme wasisi doko piyamosa poro lao muu muu piya.
DAN 2:35 Yuu gii mendaki dokopa anepe warape bange kone kana yalepe kana kulingipi dee kana golope poro lao muu muu pipala panyi pilyamopa sinjimu singi dopale ingiya. Dopa piyamo dokopa poraiye dokome kuki mendepe pyarepala paa nana lao soo peya. Dopa piyamopape kana doko ando yuu kyau ingyuo andakyapala yuu muu dupwa peparae minyarambu nyiya.
DAN 2:36 Doko embena kombeya dokoŋo. Epapu nambame kiŋi andake doko renge angi doko polo langiruwale.
DAN 2:37 Emba kiŋi andake doko. Kiŋi menge dupwana emba iki mupwa. Anatu yake panda karenge dokome emba kiŋi rombo palyuo porainya renge joo wambu wakale dupwame emba kando rape rape lao lakando karena leya.
DAN 2:38 Dokona mena suwape yakape peparae dee wambu yuu muunya palaminyi dupwape emba mupwa ingyuo iso karare lao wasiya. Emba kyawa kana golome wasisi doko dopale karene.
DAN 2:39 Emba kiŋi karaparene dokopa dee kiŋi mendeko karara. Doko emba karene dopa pyuo andake ingyuo kara nara. Dee doko soo paparamo dokopa repo pyuo kiŋi mendeko dokome yuu muu dupwa peparae iso karara. Baa kone kana wasisi yale karara.
DAN 2:40 Dokopa enakana kiŋi kisima ingyuo doko ama porai ane dopale ingyuo karara. Ane dokome isa palipala bange lapo pyao injo muu muu pingi doko suu pyao kiŋi dokome kiŋi wamba karenge dupwa pyao nembalu nembo nembara.
DAN 2:41 Kimbu kapepe pambupi aneme pakiki wasisi dee paki warame wasisi kandee kande. Renge doko kiŋinya isingi yulu dupwa liti pyuo wakale wakale sera. Ane doko wara dokopa pyasiyamo dokona anena porainya renge mende palamo lao sera.
DAN 2:42 Doko kimbu pambu paki ane dee paki wara dokona suu pyao renge doko kiŋinya isingi yulu dokona lapo porai ingyuo dee lapo mee manda rao isa para.
DAN 2:43 Embame ane doko wara dokopa kiminjiyamo kandeko doko suu pyao doko kiŋinya isingi dokona akali mupwa dupwame nakamana ree palu nyuo pyasimwali lao mendena wanenge doko yango mendali maiyuo pilya pena pirami. Dopa piraminyipape ane doko wara dokopa kapa pyasa nangenyili pyuo nakama kapa pii narami.
DAN 2:44 Yuu gii kiŋi dusipame iso kararaminyi dokopa Anatu yake panda karenge dokome kiŋi enenge mende rombo palyuo baa mee karalu karena lara. Kiŋi wakale dupwame baa pyao anamasi minya narami. Dopa piramopape baame kiŋi doloma peparae pyao isa palyapala baa mee iso palyuo puu para.
DAN 2:45 Embame kandene dokopa kana mende yuu kyau dokona pisapala mendeme minyanda nayaminyipa rangeme lukundo epapala anepe kone kanape warape kana kulingipi dee golopeme wasisi bange wambu yale piyamo kandee kande. Anatu Kamame Andake Wakasa dokome rengya mende pira dokona emba kiŋi andake doko lasaka pilyamo. Nambame kombeya angi emba pipinyili pyuo langilyu dee dokona renge angi kinyi rolae dusipa langyuo pilyu, leya Danieleme.
DAN 2:46 Doko kiŋi Nepukatenesame Danielena lenge kambu siyamo dokona wapambu pii pyao pangu sepala baa bange lapo maiyuo dee rendamu pingi kiso maiyuo pimana lao wambu dupwa lamaiya.
DAN 2:47 Embame nambana kombeyana renge angi dokona polo langipinyi dokona embena Anatu doko kamame andake wakasa mee bange anatu dupwa nyuo isa palyuo baa Kamongo kiŋi dupwana baa ketae ingyuo karenge dee baameko kombeya renge angi dupwa panenge doko soo nyilyu, leya.
DAN 2:48 Lapala baame Daniele yulu andake maiyuo yuu Bapilone doko iso karena lao dee akali lapo kiŋi doko yulu dopa pyuo piri dapa pyuo piri lao nyiso karenge dupwana baa mupwa ingyuo karo pinya lapala bange keyange dupwa maiya.
DAN 2:49 Danieleme mende piso siyamuli pyuo kiŋi dokome Setarakemoo Mesakemoo Apenekomoo dusipa yuu Bapilone dokona yulu wakale wakale singi dupwa rapu pyuo karena leya. Leyamo dokopa Daniele baa yuu Bapilone kiŋinya anda dokona yulu pyuo kareya.
DAN 3:1 Kiŋi Nepukatenesame wambu yale kana golome banya akali dupwame wasinya leyamo doko ama londe mita akalisa lama ipisu yanda ipingi dee ama andake doko mita rema dopale ingiya. Wasapala yuu lama lama kingi Dura lenge yuu Bapilone singi dokona pisinya leya.
DAN 3:2 Lapala dokopa banya akali mupwape isingi akali dupwape kana isingi dupwape kote singi dupwape gapomane mupwa dupwape gapomane kukipi dee akali mupwa dupwa peparae yuu liti dokona range dupwape nyuo pyaso malu palyinya leya. Kiŋi Nepukatenesame mee bange wambu yale kana golome wasapala ketae pisiyamo dokona nakama lakando ketae pyambwakala epena leya.
DAN 3:3 Dokopa akali mupwa dupwa peparae epo wambu yale bange doko ketae pyambwarami lao nyuo malu palyapala wambu yale bange dokona lenge kambu siyamo dokona kareyami.
DAN 3:4 Dokopa kiŋinya pii polo lenge akali dokome pii poraiyuo ketae palyuo lao,
DAN 3:5 Akali yuu muu dupwana range peparaepe pii wakale wakale lenge dupwape, Nakama bikuli laraminyi pii doko sepala dee musiki rara wakale wakale laraminyi pii dupwa soo pipala aopa kiŋi Nepukatenesame wambu yale kana golome wasisi pisiyamo doko wapambu pii pyao pangu sepala lakandarami ingilyamo.
DAN 3:6 Wambu mendeme pangu sepala lakanda naramo doko waiya lao isare ama alyu rao karenge dokona sukusa pyambwarami, leya.
DAN 3:7 Dokona lao akali yuu muu wakale wakale rangepe pii wakale wakale lengepe dupwa peparaeme musiki doloma pii leyamo dokopa aopa pangu sepala mee bange wambu yale kana golome wasisi kiŋi Nepukatenesame pisiyamo doko lakandeyami.
DAN 3:8 Dokopa Bapilone akali lapo akali kiŋi kareyamo dokona epapala Juu akali dusipana lao yango palyuo isa palyamwali lao leyami.
DAN 3:9 Nakamame kiŋi Nepukatenesa kando lao, Emba kiŋi andake doko palu karalu karare, leyami.
DAN 3:10 Emba kiŋi andake doko, musiki kanda soo laramopa wambu peparae aopa pangu sepala mee bange wambu yale kana golome wasisi doko lakandapengele.
DAN 3:11 Dee wambu mendeme pangu soo lakanda nara ramo doko isare ama alyu uliyapu nyuo rao karenge dokona sukusa pyambwarami lapi kandape.
DAN 3:12 Juu akali lapo Setarakemoo Mesake Apenekomoo yuu Bapilone dokona mupwa ingyuo karena lao rombo palyii kande dupwame emba kiŋi andake dokome mawa pii lapinyi doko warombo see nalyaminyi. Nakamame embena mee bange anatuŋu lenge doko lakanda nao dee wambu yale kana golome wasisi pisinyi doko kando pangu soo lakanda nalyaminyiko.
DAN 3:13 Yuu gii dokopa kiŋi doko baa ama wakasa imbwuapala akali rema dusipa baa peteyamo dokona minyuo epena leya.
DAN 3:14 Lapala baame nakama lamaiyuo lao, Setarake Mesake Apeneko nakamame nambana mee bange wambu yale kana golome wasisi pisiyunu doko kando pangu soo lakanda nao dee nambana mee bange anatuŋu lenge doko lakandaka nao pimi. Doko kinyisi?
DAN 3:15 Epapu dakepa bikuli piipi musiki wakale wakale piipi laramo sepala dokopa aopa nakama pangu soo wambu yale kana golome wasisi doko lakandalapape. Daaŋa lapala nakama dopa pii narami ramo doko aopa dokopako ane isame kame pisi panda sukusa isare alyu uliyapu nyuo rao karenge dokona sukusa pyambwarami. Dokopa anatu mendeme nakama lete nyeraŋa lao suu pilyamisi? leya.
DAN 3:16 Dopa leyamo dokopa Setarake Mesake Apenekomoome isingi lao, Emba kiŋi andake doko, namwa rangena lao yanda pyuo isingi mende laa narama.
DAN 3:17 Anatu namwa yulu pyakamilyamano dokome doo isare alyu uliyapu nyingipi sukusa dokonape dee embena porai renge dokonape mee kapa pyuo kyawa lete nyero lara ramo kapa lete nyera.
DAN 3:18 Baame kamame namwa lete nyii naramopape namwa emba kiŋi doko soo lape. Namwame embena mee bange antuŋu lenge doko lakanda narama dee wambu yale kana golome wasisi pisinyi doko pangu soo lakandaka naramako, leyami.
DAN 3:19 Dokopa Setarake Mesake Apenekomoo kando kiŋi Nepukatenesa baa ama lenge kambu poro imbu manjo wakasa imbwaya. Imbwuapala banya akali dupwa lamaiyuo isare doko ama andake ingyuo rena leŋe yuu yanda ipingi ingyuo isa pyambuo kisinya leya.
DAN 3:20 Banya yanda singi ami akali porai dupwame lamaiyuo akali rema dusipa puu pyapala isare alyu uliyapu nyingi dokona pyambunya leya.
DAN 3:21 Dokona lao nakamame nakamana komau piyaminyi dupwa mee wapuro kareyaminyipa puu pyapala isare alyu uliyapu nyingi sukusa dokona pyambuyami.
DAN 3:22 Dokopa kiŋi doko pii lao isare doko ama wakasa rao alyinya leyamosa isare ulingi dupwame akali lanyuo pyao pyambwala peyami dupwa rao kumuyami.
DAN 3:23 Dokona lao wane Setarake Mesake Apenekomoo dusipa puu pyaro karo isa rao ulikasi nyuo kareyamo anda suku dokona pyambuyamisa lukundaro pao paleyami.
DAN 3:24 Dokopa Nepukatenesame banya petenge isa dokona piso pyakao epapala mona nembaoko banya akali mupwa dupwa piso soo lao, Namwame akali rema dusipa puu pyapala isare sukusa dokona pyambwa namwase? leya. Nakamame isingi lao, Emba kiŋi andake doko. Waa, namwame pyambwamwa, leyami.
DAN 3:25 Doko dee akipamo nambame akali kisima isare dokona kata papyuo karaminyi kandelyose? lao piso siya. Nakama puu pyaro kara nami dee isare dokome nakama raope pii napya. Dokona akali kisima doko baa anatu yalende karamo, leya.
DAN 3:26 Kiŋi Nepukatenesa baa isare alyu uliyapu nyuo rao karenge dokona kambu dokona papala nakama kee lao, Setarake, Mesake, Apeneko, Anatu Mupwa Andake Wakasa dokona kendemande akali dusipa nyisa ipupwa, leya. Leyamo dokopa nakama aopa nyisa epeyami.
DAN 3:27 Dokopa gapomane mupwape gapomane kuki dupwape dee kiŋinya akali mupwape nyuo pyasapala akali isarena randa nyuo raa nayaminyi dusipa kandala epeyami. Nakamana kyawasi dusipana pinjingisape mende raa nayami. Nakamana komau dupwana mende raa nayamo dee nakamana yongo dupwana isare sukwa ai pyuope pii naya.
DAN 3:28 Dokopa kiŋi dokome lao, Setarake Mesake Apenekomoona Anatu doko lakandamana. Baame banya aŋala doko peyapala akali baa keta pyamalyuo mona maiyuo karo banya yulu pyakamingi dasipa kyawa lete nyipyalyamo. Nakamame nambana pii lapunu dokona warombo see napala nakama range randa nyisasaramano lao paka napala mee bange anatuŋu lenge lapo pangu sepala lakandenge kandale doko suu pyao nakama rangena doko iki lakandeyami.
DAN 3:29 Dokona epapu namba mawa pii palyuo leto, leya. Yuu muu peparae dupwana wambu mendemepe dee pii rara wakale wakale lenge dupwana mendemepe Setarake Mesakemoo Apenekomoona Anatu dokona kingi doko nyuo isa palyaramo wambu doko banya kimbu kingipi pyao suu lanyi nembo banya anda doko yuu sinjimupi manjomomo nao para. Nakamana Anatu nyiso lete nyipyamo dopale mendepe kara nange.
DAN 3:30 Yuu Bapilone dokona wane Setarake Mesake Apenekomoo dusipa wambo yulu pyuo karengenepape kiŋi dokome yulu ulipili andake ingyuo maiya.
DAN 4:1 Yuu muu peparaena wambu palengepe dee rara wakale wakalepe dee wambu pii wakale wakale lengepe dupwa peparae kiŋi Nepukatenesame wai nembo nakama peparae, Yako leto, leya.
DAN 4:2 Anatu Mupwa Andake Wakasa yake panda karenge dokome yulu wambumi kando yamarangungipi yulu andake wambumi pii nangendepe namba keta pyuo lasaka pipyamo doko nakama langiruwale, selapape.
DAN 4:3 Anatumi yulu andake wambumi kando yamarangungi dupwa pyuo lasaka pingi. Baame yulu porai wambumi pii nange dupwa pingi. Anatu doko baa kiŋi dokome yuu gii peparae iso karo puu para.
DAN 4:4 Namba Nepukatenesa bange malu retapunu dupwana range rae maiyuo nambana anda dokona waa lao kapa palipu.
DAN 4:5 Dopa pipunupape namba luu palipunu dokopa kombeya paka pingi mende pipala pii repa repa pyuo kandapala pakame kumapu.
DAN 4:6 Dokona lao kombeya renge dokona nakamame langiramiŋi lapala nambame yuu Bapilone dokona kiŋinya akali lapo yulu dopa pyuo piri dapa pyuo piri lao nyiso lenge dupwa namba pisipu dokona lanyuo epena lapu.
DAN 4:7 Dokopa mali mali sakangepe nemonga lengepe pipu lengepe dee bui kandaro karo apa pirase lao karengepe dupwa peparae lanyuo imi. Iminyipa nambana kombeya angi piyunu doko lamaipu. Lamaipunupape nakamame renge angi doko polo langya nami.
DAN 4:8 Dokopa Daniele baa enakana andakare ipya. (Banya kingi mende doko Beletesasa lenge. Doko nambana anatuŋu lao kingi lenge doko.) Anatu Poo Pyasi dokona imambu doko baa keta paleyamo dokome kombeya angi pipunu doko nambame baa lamaipu.
DAN 4:9 Nambame baa kando lao, Beletesasa, akali mali mali sakange dupwana mupwa doko Anatu Poo Pyasi dokona imambu doko emba keta karamo doko namba emba silyu. Dokona emba kongwalu pii peparae dupwana emba silini dokona nambana kombeya pipunu doko dakeŋe. Renge aki lao namba langipi, leyo.
DAN 4:10 Namba luu palipunu dokopa yuu muu peparaena anda suku dokona isa ama londe mende karapyamo pii repa repa pyuo kandapu.
DAN 4:11 Doko ando kameyako ingyuo kamame ando ama londe ingyapala yake dulu kando nyipyamo dokopa yuu muu dupwana wambu peparaeme kandarami ingyapya.
DAN 4:12 Banya isa yokonge dupwa ama keyange wakasa dee jingi dupwa lyuo kui lao epenge dupwa yuu muu peparaena wambu karenge dupwa kapa lyuo narami ingingi. Dee mena rae lenge dupwa isa renge rau lenge dokona imambu soo karengepya dee yaka dupwa banya wangya dupwana anda pingipya. Dee bange lete karenge dupwa peparaeme banya jingi doko lyuo nengeko.
DAN 4:13 Namba pii repa repa dokona lao suu pyao palipunu dokopa aŋala yuu peparae iso karenge mende yake panda piso isa ipyamo doko kandapu.
DAN 4:14 Epapala baame pii poraiyuo lao, Isa doko poko isa palyapala wangya pangepe dupwa muu muu pepe. Dee isa yokonge dupwa loo lapala jingi dupwa yuu wakale wakale dupwana pyao nembape. Nembapala mena isa palu silyaminyi dupwa ralinyi nembo dee banya wangya dokona yaka petaminyi dupwa ralinyi nembo pipi, lapya.
DAN 4:15 Dopa pirinyipape ane puu dokome dee kone kana puu dokomepe isa sinju doko awali lao puu pyanyi palyapala kaeyape. Yuu dokona rambi pipya petena kaeyare. Epapu akali dake keta pipyae dupwa kondo petena dee baa mena rarape dee ee nenge rarape dupwana pipya role pyapeta palena.
DAN 4:16 Ee kana yanda ipingi nyepo baa keta wambunya suu pingi doko pali nara. Baa keta menana suu pingi palira.
DAN 4:17 Dake aŋala iso karalu karenge dupwana pii lalu lao lao palyimi doko. Anatu Mupwa Andake Wakasa dokona porai renge dokome mee akali kiŋi dupwana isingi yulu doko nyuo isa palyingi. Baame range maso akali mende kiŋi inginyi pyambuo rombo palyingi. Akali kamame kuki karelyaminyipape baame mende rombo palyilyamo doko kiŋi wasingi. Dokona lao pii doko wambu peparae sinya, lapya.
DAN 4:18 Kiŋi Nepukatenesame lao, Kombeya doko namba pipuŋu. Beletasasa epapu renge doko aki lao langipi. Nambana akali angi dopa pyuo piri dapa pyuo piri lao nyiso lenge dupwame langi naminyipape emba doo Anatu Poo Pyasi dokona imambu doko emba keta karapyamo dokome embame kapa langiri ingilyamo, leya.
DAN 4:19 Daniele banya kingi mende Beletesasa lenge dokome kombeya dokona lao sepala mona randame kumuo baa mende lara ingya naya. Dopa piyamosa kiŋi dokome lao, Beletesasa, emba kombeya dokomepe dee dokona renge dokomepe emba mona randanyi pyambunya laa napipi, leya. Leyamo dokopa Beletesasame isingi lao, Emba kiŋi andake doko, kombeya dokope dee dokona renge angi epara dokope emba keta pali nao embena nyisu petenge dupwa keta palipyali doko kapa ingyapyali, leya.
DAN 4:20 Isa kamame ando ama londe doko yake dulu kando nyipyamo dokopa yuu muu dupwana wambu peparaeme kandarami ingyapya.
DAN 4:21 Banya yoko dupwa ama keyange ingyapala dee banya jingi lyingi kapa lyepala yuu muu peparaena wambu dupwa kapa lyuo narami ingyapya. Dee mena suwa rae lenge dupwa isa renge rau lenge dokona imambu soo karami dee banya wangya dokona yaka dupwa anda pimi leya.
DAN 4:22 Emba kiŋi andake doko. Emba isa dopale. Emba ama londe porai wakasa. Emba ando ama andake ingyapala yake kando nyepala embena porainya renge dokome yuu muu dusipa peparae iso karenge.
DAN 4:23 Emba kiŋi andake dokome kando karapinyi dokopa aŋala mende yake panda piso epo lapya. Isa doko pokanyi isa palyapala dokopa kokwa soo nembena lapya. Dopa pirinyipape isa sinju doko yuu dokona petena kaeyare. Kaepala renge dokona ane puu dokomepe dee kone kana puu dokomepe awali lao puu pyapala yuu dokona rambi pipya petena kaeyare. Dopa pipala akali dake keta pipyae dupwa kondo petena dee ee kana yanda ipingi nyepo baa mena dupwa pipya palyuo karena lapya leya.
DAN 4:24 Emba kiŋi andake doko. Dake renge angi doko. Dake Anatu Mupwa Andake Wakasa dokome emba keta piraŋa lao leyamo doko.
DAN 4:25 Emba wambu menge dupwa pipya rekya lao nyisa papala mena suwa rae lengepe pipya palyuo kararami. Dee emba mena bulamakao yale okese lenge rambi nenge dopale ingyuo nao ee kana yanda ipingi kamanda palyuo kararenepa pipyae dupwa kondo epo emba keta piso karara. Dokopa embame lao, Mee isa wambunya kiŋinya isingi yulu dupwa peparae Anatu Mupwa Andake Wakasa dokome rolo rapu pyuo karenge. Baame yuu dupwana kiŋi karena lao rombo palyingi lare, leya.
DAN 4:26 Aŋala dupwame isa sinju doko mee yuu dokona petena lao pii leya. Dokona renge angi doko embame Anatumi yuu muu dupwa peparae rolo rapu pyuo karenge lao larene dokopa emba dee kamba range kiŋi karare.
DAN 4:27 Dokona lao Emba kiŋi andake doko. Namba dopa pii dapa pii leto dupwa moko minyuo piri. Koo pilini dupwa yaki nyuo kaepala yulu keyange pyuo wambu pendewa dupwa sakame kumuo nyisare. Dopa pirinyi dokopa emba dee kapa palyuo karare, leya.
DAN 4:28 Leyamuli pyuo yulu dusipa peparae kiŋi Nepukatenesa baa keta piya.
DAN 4:29 Kana akalisa ipisu lama iki papeyamo dokopa yuu Bapilone doko banya kiŋinya anda yangi ketae dokona kata papyuo kareya.
DAN 4:30 Karapala baame lao, kanda. Yuu Bapilone andake doko. Nambana taone mupwa dokome nambana porainya rengepe yanga paupau lenge rengepe neta rengepe dupwa lasaka pipuli lao piyu, leya.
DAN 4:31 Pii doko ene banya nenge kata dokona potemo lalana piyamo dokopa yake panda piso pii mende epo lao, Kiŋi Nepukatenesa, nambame pii leto dake sepe. Epapu embena kiŋinya isingi yulu doko emba keta kingi raka lao nyisa pelyamo.
DAN 4:32 Dokopa emba mee wambu dupwa palaminyi dokona dopale ingyuo pali napala nyisa pao mena suwa rae lenge pipya palu kararami. Dee mena bulamakao yale okese lenge rambi nenge dopale ingyuo rambi dupwa nao palu kararenepa ee kana yanda ipingi nyepo dusipa epo para. Dokopa embame polo lao Anatu Mupwa Andake Wakasa dokome banya porainya renge dokome mee isa akali kiŋinya isingi yulu dupwa rapu pyuo karenge dee baame yuu dupwana akali mende kiŋi karena lao rombo palyingi lare, leya.
DAN 4:33 Pii doo leyamo dusipa aopa pyaka siya. Dokopa kiŋi Nepukatenesa baa wambu pipya role pyao pali napala nyisa pao mena suwa rae lenge pipya palyuo karo pyuo mena okese rambi nenge dopale ingyuo dokona nao palyuo kareya. Dokopa pipyae dupwa kondo pao baa keta piso kareya. Dee banya kyawa dupwa ando londapala yaka kambe imanji yale ingiya. Dee banya kinjipa dupwa epo kyanga ingyapala yaka kinjipa ingiya.
DAN 4:34 Kiŋi dokome lao, Ee kana yanda ipingi nyepo papeyamo dokopa yake dulu kandalyuo kandeyo. Kandapala suu pingi wambu kopyali minyuo suu pyao kareyo doko kaepala Anatu Mupwa Andake Wakasa karenge doko ketae pyambuo rape rape lao lakandeyo. Baame iso rapu pyuo karalu karara. Banya isingi yulu doko yuu gii peparae soo puu para.
DAN 4:35 Wambu isa yuu dakena palaminyi dupwa angi mende daaŋa lao kandanyi nembelyamo. Aŋala yake panda dokona karenge dupwape wambu isa yunya palaminyi dupwape baa isarena karaminyi. Mendemepe banya yulu pilyamo dupwana yango palya nao dee baame yulu aki pilyamo dupwa piso see narami ingilyamo, leya.
DAN 4:36 Nambana suu pingi keyange rolae doko range epo paleyamo dokopa nambana kingi andake lenge dokope wambu yuupi iso karenge yulu dokope dee nambana isa yulunya neta rengepe namba range keta jiya. Dokopa nambana yulu pingi akali lapope dee akali mupwa ingyuo karenge dupwape namba yako lao nyepala kiŋinya porainya renge joo wambumi namba wamba lakandengenepape epapu kamame ulipili pyambuo rape rape lao lakandeyami.
DAN 4:37 Dokona epapu namba Nepukatenesame, Yake Pandana Kiŋi doko kingi ketae pyambuo rape rape lao lakandelyo. Renge doko yulu peparae baa keyangeko pingi. Baa yuu peparae rolaeko pyuo karo wambu mendali kamame ulipili mupwa lao suu pingi dupwa nyuo kui lao kuki ingyuo inyimungu karena lao pingi, leya.
DAN 5:1 Belesasa baa kiŋi ingyuo kareyamo gii dokopa pati andake lao nenge kisapala akali mupwa taosande mendaki (1,000) epena lao nakama role pyao piso ipwa waene neyami.
DAN 5:2 Nakama ipwa nao peteyaminyi dokopa Belesasame lamaiyuo, Kana golo kana kulingipimi wasisi kapope pere warakepe Jerusaleme tembole anda dokona siyamo banya rakange Nepukatenesame nyuo minyuo epeyamo dupwa minyuo epena leya. Kiŋi dokome baape banya akali mupwa dupwape banya etengepe dee enda konda pyuo nyingipi ipwa dokona kyano pyuo naramaŋa lao nyepala epena leya.
DAN 5:3 Leyamo yuu gii mendaki dokopa pere warakepe kapope dupwa nyuo minyuo epeyaminyipa dupwana ipwa waene kyano pyuo nyuo neyami.
DAN 5:4 Napala mee bange anatu kana golope kana kulingipi kone kanape anepe isape dee mee kanapeme wasisi dupwa lakandeyami.
DAN 5:5 Dokopa aopa kiŋinya anda dokona kana semene apya isare lambe reyamo dokona yanga paupau leyamo dorena ingyuo wambu kinginde epo maro lapala pepa piya. Doo pepa piyamo dokopa kiŋi dokome kingi doko kandeya.
DAN 5:6 Dokopa baa yongo nembo pakame kumuo banya kimbu dupwa walu walu leya.
DAN 5:7 Dopa pipala baa pii porai lao wambu mendeme pipu lenge akalipi nemonga lenge akalipi bui isingi ene rengya mende pira lao lenge akali dupwape nyela pena leya. Nakama epeyaminyi dokopa kiŋi dokome lamaiyuo lao, Mendeme pepa doko yaka lapala renge dokona aki lao langiramo wambu doko komau muku londe mende wapupala dee kana golo kii puu banya mange dokona soo piramo doko kandapala wambu dupwame baa lakandarami. Dokopa baa kiŋinya isingi yulu porai dokona repo ingyuo pisira.
DAN 5:8 Dokopa kiŋinya akali dopa pyuo piri dapa pyuo piri lao nyiso lenge dupwa peparae repeta epeyami. Epeyaminyipape pepa doko laope panda renge dokonape mende lamairami ingya naya.
DAN 5:9 Dokona lao kiŋi Belesasa baa mona randame kumapala ama yongo nembeyamo dokopa banya akali mupwa dupwa mende aki pirama lao see nayami.
DAN 5:10 Dokopa kiŋipi banya akali mupwape dupwana leyaminyi doko sepala enda kuini baa nenge nao petenge panda dokona konando peya. Papala baame lao, Emba kiŋi andake palu karalu karare. Emba mona randame kumuo embena yongo nemba napipi, leya.
DAN 5:11 Embena kiŋinya isingi panda dokona akali mende Anatu Poo Pyasi dokona imambu doko palengende karamo. Wamba embena rakane kiŋi kareyamo dokopa akali doko kyawa sisingi keyange palenge rengepe singinya rengepe soo nyinginya renge mee bange anatunya soo nyinginya renge dopalepe baa keta paleyamo lasaka piya. Dopa piyamosa kiŋi Nepukatenesa embena rakane dokome doo pipu lenge akalipi nemonga lengepe mali mali sakangepe dee bui isingi ene mende pira dokona polo lengepe dupwana baa mupwa ingyuo karena lao rombo palyiya.
DAN 5:12 Akali doko baa menge dupwa isa palyili lao ama mora piso kombeya rengepe kongwalu pii dupwana angi rengepe pii yalu pyuo lenge dupwana rengepe polo lao baa mona angi palyuo soo nyuo karenge. Dokona lao akali Daniele kiŋi dokome kingi mende Beletesasa leyamo doko nyela pena lape. Epapala dokopa renge angi dupwana peparae polo langira, leya.
DAN 5:13 Dokopa aopa Daniele baa minyuo kiŋinya lenge kambu dokona peyami. Dokopa kiŋi dokome kando lao, Emba Danielese? Nambana rakane kiŋi dokome Juta piso, Emba Juu akali karapusi ingyuo minyuo epeya dokose? lao piso siya.
DAN 5:14 Anatu Poo Pyasinya imambu doko emba keta palipyasa mora piso singinya rengepe soo nyinginya rengepe emba keta palamo laminyi doko namba sipu.
DAN 5:15 Doko pipu lenge akalipi dopa pyuo piri dapa pyuo piri lao nyiso lenge akalipi dupwa minyuo epo pepa pyasi dake yaka lao renge dokona namba langinya lapu. Dopa lapunupape nakamame renge angi dokona polo langya nami.
DAN 5:16 Dokona embame kongwalu pii dupwanape dee pii yalu pyuo suu pingi dupwanape koto nyuo dee renge angi dupwa embame polo lenge laminyi doko epapu namba sipu. Dokona embame pepa dake yaka lapala renge polo langiri ramo doko emba komau muku londe mende wapuri. Emba akali mupwaŋa lao wambumi serami lao kana golome wasisi kii puu doko embena mange dokona awali lao sere. Dopa pipala emba kiŋinya isingi yulu dokona repo ingyuo karare, leya.
DAN 5:17 Leyamo dokopa Danieleme isingi lao, Embena bange jelana letene dupwa range reto panda wambu wakale lapo mairi. Dokopa nambame kiŋi andake doko pepa dokona palipyamo doko yaka lapala renge angi dokona aki lao doko polo langiru, leya.
DAN 5:18 Anatu Mupwa Andake Wakasa dokome embena rakane Nepukatenesa doko kiŋi ingyuo waso banya kingi ketae pyambuo yulu andake maiya.
DAN 5:19 Baa ama akali andake dokome wambu yuu muu dupwana peparaemepe wambu rara dupwamepe pii wakale wakale lenge dupwamepe baa kando pakapala walu walu lao karenge. Baame wambu mendali pyao kumapulinya suu pingi ramo doko pyao kumakapalako kaenge. Dee wambu mendali lete pena lao suu pingi ramo doko lete pena kaenge. Baame wambu mendali lakandanyi pyambuo rape rape laope panda elyanyi pyambuope pinya suu pingi doko pipala kaenge.
DAN 5:20 Dopa pinginyipape baa mona kana pokapala range mupwa lao suu pyao wambu menge dupwa mona randanyi pyambungi dokome banya kiŋinya yulu doko yaki nyuo kaepala wambu dupwame baa rape rape lao kara nayaminyipa baa isa peya.
DAN 5:21 Baa wambu palenge raka dokona pali napala nyisa papala banya suu pingi doko menana dopale ingyuo paleya. Baa mena donge rae lenge dupwa pipya palu karapala mena bulamakao yale okese lenge rambi nenge dopale ingyuo neya. Dee baa pipyae dupwana mende yambe pyaa nao kamanda mee wau kanya dupwana langa palu karo piya. Dopa pipala Anatu Mupwa Andake Wakasa dokome mee akalinya kiŋi yulu dupwa iso karo wambu mende baame rombo palyingi doko maingi lao baa soo gisiya.
DAN 5:22 Dupwa peparae sipinyipape emba banya ikinyingi doko range kuki ingyuo inyimungu kara nalene.
DAN 5:23 Dopa pipala emba Anatu yake panda karenge dokopa kamba lapala banya tembole anda dokona pee kapo pere warakepe singi dupwa nyepala minyuo epee kande. Dopa pyuo epapala embape embena akali mupwa dupwape embena etene dupwape dee enda lapo mee konda pyuo nyingi peteyami. Pisipala dupwa pipya kapo dupwana ipwa waene kyano pyuo nao role pyao kana golope kana kulingipi kone kanape anepe isape mee kanape dupwame mee bange anatu wambu kanda nangepe dee pii see nangepe dee mende maso suu pyaa nangepe dupwa waso lakandeyami. Dopa piminyipape emba kumarene dupwanape lete karare dupwanape rolo dee emba yulu peparae pilini dupwana iso karo pilyamo Anatu doko embame rape rape lao ketae pyambuo lakanda nalene.
DAN 5:24 Renge dokona pepa pii dusipa pinya lao Anatumi kingi doko peeyapya.
DAN 5:25 Dopa lao pepa angi doko pyasi paleya. Yaka lengepe, yaka lengepe, sikyali pyuo kenda pingipi, liti pingipi, pii dupwa pyasi paleya.
DAN 5:26 Epapu renge angi doko dake. Yaka lengena renge doko. Embena kiŋinya isingi yuu gii dusipa Anatumi yaka lao karapala ote pinya nembara.
DAN 5:27 Kenda pingi dokona renge doko, Emba sikyali mendena makande pyuo kandeyamo dokopa ama kaka yau yaepa ingiya.
DAN 5:28 Liti pingi dokona renge dake. Embena kiŋinya isingi panda dusipa wakale wakale pyuo liti pipala Mitia wambu maiyuo dee Pesa wambu maiyuo pira ingiya, Danieleme leya.
DAN 5:29 Yuu gii dokopako aopa Belesasame Daniele komau muku londe mende wapakamyuo baa akali mupwaŋa lao wambumi serami lao kana golome wasisi kii puu doko banya mange dokona sakamyuo pinya leya. Dopa pipala baa kiŋinya isingi yulu dokona repo ingyuo petena lao wasiya.
DAN 5:30 Yuu gii kukwa mendaki dokopako Belesasa yuu Bapilone kiŋi doko pyao kumakayami.
DAN 5:31 Dokopa akali Darisi lenge yuu Mitia range dokome ee kana akalisa pakinyamange ipisu lama (62) nembo karapala kiŋinya panda nyiya.
DAN 6:1 Dokopa banya yuu liti isingi dusipana mupwa ingyuo iso kararami lao Darisimi gapomane akali andete mendaki dee akalisa lama (120) rombo palyiya.
DAN 6:2 Palyapala banya bange dupwape dee gapomane akali dupwape isinya lao Daniele baape akali lama dolapope rombo palyiya.
DAN 6:3 Dokopa Danieleme gapomane akali dupwape yulu isingi akali dolapope nyuo isa palyuo baa yulu kamame keyange ingyuo pinya piya. Baa ama mondo koo lao pinya piyamosa kiŋi dokome banya isingi yuu peparaena Daniele baa mupwa ingyuo karapyali lao suu piya.
DAN 6:4 Dopa piyamosa akali yango yulu iso karenge dolapomepe dee gapomane dupwamepe Danieleme kiŋinya yuu iso karo yulu piyamo dokona aki koo mende pilyamo lao kando koto kareyami. Dopa piyaminyipape Daniele baa rape rape lao yulu angi kinyi keyange dokonako pipala yulu koope kopetamepe mende pii naya dokome baa aki koo mende pilyamo lao kotalana saka nayami.
DAN 6:5 Dopa pipala nakama range lao dopa leyami. Namwame Daniele baa yulu mendena koo pingi lao koto nyii naramalyamo. Dopa piramopape baa misi yulu pilyamo dokona iki koo mende kando nyerama, leyami.
DAN 6:6 Dopa lapala nakama kiŋi kandala peyami. Papala dopa lao, Kiŋi Darisi, emba kiŋi andake palu karalu karare, leyami.
DAN 6:7 Namwa peparae embena yulu isoko kando karenge dupwa yulu rapu pingipi gapomanepe gapomane kuki dupwape dee yulu wakale pingi dupwapeme lao palyamwa doko emba kiŋi andake dokome lowa porai mende lao wasapala alowa pii nao minyaro karalu karare. Mawa pii pyao reto yuu gii akalisa rema (30) dusipana mendemepe mee bange anatuŋu lao lakandenge lapope akali lapope bange jinya lao piso see nana. Emba kiŋi andake dokona iki keta piso sinya lare. Larenepa mendeme pii doko warombo see nara ramo doko mena laene palenge yuwale dokona pyambware, leyami.
DAN 6:8 Emba kiŋi andake doko mawa pii dake pyao palyuo pepa dokona embena kingi pyao palyape. Dokopa dokona palu paliramopa yuu Mitia dee yuu Pesape dolapona lowa pyasi palenge dupwa alowa pii nangenyili pyuo mee pyasi palira.
DAN 6:9 Dokopa kiŋi Darisimi mawa pii leyamo doko pyao retapala banya kingi isarena piya.
DAN 6:10 Mawa pii doo pyao palyami leyaminyi doko Daniele sepala banya anda peya. Banya anda dokona ketae dulurename panda singi dokona windowa lapo Jerusaleme kanda kanda singi. Dokona baa yuu peparae pinginyili pyuo windowa lumbwapala wapambu pii pyaro piso yuu gii mendakinya yuu remasa lao Anatu ateŋa leya.
DAN 6:11 Dokopa akali dusipa Danieleme Anatu kando ateŋa leyamo dokopa epo kando kareyami.
DAN 6:12 Karapala peparae nyuo pyasapala Danieleme koo pingi lamo lao kiŋi peteyamo dokona peyami. Papala nakamame lao, Emba kiŋi andake doko embame wambu mendeme yuu gii akalisa rema dusipana mee bange anatuŋu lao lakandenge mendepe akali mendepe keta bange piso see nana lao emba keta iki piso sinya. Mendeme dopa pii nara ramo doko mena laene palenge yuwale dokona pyambwaro lao mawa pii doko pepa pyao palyii kande, leyami. Dokopa kiŋi dokome isingi lao, Waa, pii ama porai doko yuu Mitia dee yuu Pesape dolapona lowa pii doko alowa pii nange dopale, leya.
DAN 6:13 Leyamo dokopa nakamame kiŋi doko lamaiyuo, Daniele yuu Juta range doko yaki nyuo karapusi ingyuo epeyamo dokome emba kiŋi andakeŋe lao rape rape laa nalyamo dee mawa pii emba lao palyiinyi doko warombo soo pii nalyamoko. Baa yuu peparae yuu gii mendakinya yuu remasa lao ateŋa lao karamo, leyami.
DAN 6:14 Pii leyaminyi doko kiŋi dokome sepala baa mona randapala kata wakale mendena Daniele baa kyawa lete nyipuli lao koto kareya. Baa kapa pipala lete nyero lao ene makande pyuo suu pyao kareyamo pao neta anda peya.
DAN 6:15 Dokopa akali dupwa kiŋi peteyamo dokona dee kamba epapala baa lamaiyuo lao, Emba kiŋi doko silini. Yuu Mitia yuu Pesa dolapona lowa letamuli pyuo mawa pii kiŋimi waso lenge doko dee alowa pii nara ingilyamo, leyami.
DAN 6:16 Dokopa kiŋi dokome akali dupwa kando lamaiyuo, Daniele baa mena laene palenge yuwale dokona minyuo pao pyambwala pena leya. Lapala baame Daniele kando lao, Embena Anatu, embame yulu rape rape lao pyakamingi dokome emba kyawa lete nyinya leya.
DAN 6:17 Dokopa nakamame kana kameya mende nyepala yuwale kambu ketae dokona upi lao reteyami. Dokopa mendeme Daniele baa pao kyawa lete nyuo neta nyisaramiŋi lapala kiŋi banya namba dokomepe banya akali mupwa dupwana namba dupwamepe isa roo yale dupwame pepa pyao make dopale ingyuo rambu lanyi palyiya.
DAN 6:18 Kiŋi doko kapu kyuo banya anda papala yuu gii kukwa dokopa baa nenge naa nao dee male laa nao baa kamame luu kuki mendepe pali naya.
DAN 6:19 Yangama neta pyakayamo dokopa kiŋi baa sipurapala mena laene palenge yuwale dokona waiya lao peya.
DAN 6:20 Baa repeta papala dokopa pii poraiyuo yamarangyuo lao, Daniele Anatu lete karenge embame banya yulu pyakamingi dokome mena laene dupwa naa nana lao emba kyawa lete nyuo nyisapyase? piso soo leya.
DAN 6:21 Leyamo dokopa Danieleme isingi lao, Emba kiŋi andake karalu karena.
DAN 6:22 Mena laene dupwame namba randa joo naa nana lao nakamana nenge kata dupwa upi larami lao Anatumi banya aŋala dupwa peeyapya. Dokona namba keta koo mende pali nao dee nambame emba kiŋi andake doko keta koo mende pii nao pingi doko baa singi dokome dopa pipya, leya.
DAN 6:23 Leyamo dokopa kiŋi baa ama rae wakasa maipala mena laene yuwale dokona Daniele baa nyisa ipyuo nyinya leya. Dokopa nakamame baa neta ipyuo nyepala kandeyaminyi dokopa baa Anatu kapa ingingi lao poraiyuo suu piyamo dokome baa mendasape randa nyuope pii nayamo kandeyami.
DAN 6:24 Dokopa kiŋi dokome mawa pii retapala akali lapome Daniele kando koo pilyamo leyaminyi dupwape dee dupwana enda wanepe dupwa peparae pyasapala mena laene palenge yuwale dokona nyuo pyambunya leya. Pyambuyaminyi dokopa nakama angi doko koko papa nayaminyipa wambo mena laene dupwame kapusapala nakamana kuli dupwa peparae roo pyao muu muu piyami.
DAN 6:25 Dokopa kiŋi Darisimi wambu yuu muu dupwanape wambu rara dupwanape dee pii wakale lenge paleyaminyi dupwanape peparae nakama pepa pyao maiyuo yako leto, leya.
DAN 6:26 Nambame mawa pii dake reto lalu lao leto. Yuu muu nambame isingi dupwana wambu peparaeme Danielena Anatu doko mupwa lao suu pyao pakame kumuo rape rape lao laramuli pyuo kararami ingilyamo. Baa Anatu lete karalu karenge. Dee baame iso karo puu para. Banya kiŋi yulu doko kamame kokwa see narami. Dee banya porainya renge doko kamame ote pii nara.
DAN 6:27 Baame wambu randa nyilyaminyi dokopa kyawa lete nyuo nyisingi. Baame wambumi kando mona nembako yulu akalimi pii nange dupwa yake pandanape isa yuunyape pingi. Baame Daniele mena laene dupwame kapa pyao naa narami lao kyawa lete nyipya, leya.
DAN 6:28 Doko Darisi baa kiŋi karo dee Sairose yuu Pesa range doko kiŋi karo piyamo dokopa Daniele baa akali andake angingyuo kapa palyuo kareya.
DAN 7:1 Ee kana mupwa dokopa akali Belesasa baa kiŋi ingyuo yuu Bapilone dokona kareya dokopa namba Danieleme kombeya pipala kukwa dokopa pii repa repa pyuo kandeyo. Kandapala kombeya angi doko pepana pyao reteyo. Kukwa dokopa angi dake kandeyo doko dee pyasi palamo.
DAN 7:2 Yuu muu kipwa kipwa dupwana peparae piso poo raiya andake minyapala ipwa kota doko pyao kupyalya kupyana piya.
DAN 7:3 Piyamo dokopa mena kisima mendare ingya nange rara wakale wakale dusipa ipwa kota dokona piso sipurao epeyami.
DAN 7:4 Mena dusipana mupwa doko mena laene yale ingiya. Ingiyamopape yaka kambe ingyuo papake kareya. Doko namba kando peteyono dokopa papake dolapo kondo yuku nyisa epeya. Dokopa mena doko nyuo minyalyapala akali dopale ingyuo roya karena leya. Enakana akalinya suu pingi renge doko baa maiya.
DAN 7:5 Nambame mena lapo doko kandeyo. Doko baa mena beya yale ingyapala banya kenge kimbu dolapome roya kareya. Karapala banya nenge dokona kanya dolapona parali kuli rema kapusaro kareya. Dokopa pii mendeme baa lamaiyuo, Minju malu mee emba nalana lao suu pilinyili pyuo nape, leya.
DAN 7:6 Namba mee dokona kandaroko siyunu dokopa mena mendeko epeyamo kandeyo. Doko mena lepete lenge dopale. Dopale ingiyamopape banya mata dokona yakana papake dopale kisima kareya. Dee banya kyawa kisimako kareya. Baa keta porainya renge paleyamo dokome wambu iso karara ingiya.
DAN 7:7 Dee dopako pyuo isaro karo kandeyono dokopa mena kisima doko kandeyo. Doko ama porai wakasa dokome wambunya mona pakanyi pyambwara ingiya. Baa nenge kameya isa ane yale karenge dokome wambu dupwa pyao lungu ranyi palyapala ketae dokona kalyuo para ingiya. Baa mena dolomana mendare ingya napala banya ayemba dokona nenge akalisa kareya.
DAN 7:8 Dopa piyamopa nambame nenge dusipa kandaroko siyunu dokopa kanya dokona nenge kuki mende potemo epeyamo kandeyo. Kandeyono dokome wambo nenge rema kareyami dusipa pyao lalyinyi nembeya. Doko baa wambunya lenge renge dopale renge. Dee wambunya kambu dopale banya kambu kareya. Baame pii dupwa range mupwa lao lakanda minya minya pyuo leya.
DAN 7:9 Namba kandeyono dokopa petenge isa dupwa singinyili pyuo reteyamo kandeyo. Dokopa mendali palu karalu karenge doko baa petenge isa mendena peteya. Banya komau doko ama kewa wakasa lao randake kapa yale dee banya kyawa doko puu ulu karo pisa nange dopale. Banya petenge isa dokona isare uliyapu ingyuo rao dee isa petengena kimbu ipyuo minyuo penge dusipana isare ingyuo rao piyako.
DAN 7:10 Doko rao range palu lombo nyisa epeya. Dokopa wambu ama malu mee banya yulu pyakamyuo dee wambu ama malu wakasame banya lenge kambu siyamo dokona roya kareyami. Dupwana kote pii kanda soo lalana buku dupwa lumbuyami.
DAN 7:11 Namba kandeyono dokopa nenge kuki dokome baa range mupwa lao suu pyao pii ketae palyuo laoko kareyamo siyu. Kando iso kareyono dokopa mena kisima doko pyapala banya yongo doko isare uliyapu dokona pyambuo kiso kokwa sinyi nembeyami.
DAN 7:12 Mena menge dupwana renge porai dupwa nyisa nyiya. Nyiyamopape nakama yuu gii kuki lama palu karena lao yaki nyiya.
DAN 7:13 Yuu gii kukwa dokopa kombeya pyuo pii repa repa piyunu dokonako wambu yale mende kandeyo. Baa namba kareyono dokona repeta epapala kopa dokome bolotoko lapala baa mendali lete palu karalu karenge doko peteyamo dokona peyamopa baa apipi lao polo leyami.
DAN 7:14 Dokopa wambu yuu muu peparae palenge dupwamepe pii wakale wakale lenge dupwamepe wambu rara peparae dupwamepe banya yulu pyakamirami lao baa porainya rengepe kingi ketae pyambuo lakandenge rengepe dee kiŋinya porai rengepe dusipa maiya. Banya porainya renge doko sulu sera dee banya kiŋi yulu doko ota nara ingiya.
DAN 7:15 Namba pii repa repa pyuo kandeyono dokome namba pakanyi pyambuyamosa namba yamarangyuo kareyo.
DAN 7:16 Dokopa namba wambu roya kareyaminyi dokona papala mendeme renge dupwa peparae polo langinya lao piso siyu. Dokona lao baame renge angi doko akipi lao langiya.
DAN 7:17 Dokopa baame lao, Doko doo mena kisima dusipa suu pyao doko kiŋinya isingi yulu kisimako isa yuu dakena sipurao sera.
DAN 7:18 Seramopa Anatu Mupwa Andake Wakasa dokona wambu dupwa kiŋinya porai renge nyepala minyaro karalu kararami, leya.
DAN 7:19 Leyamo dokopa nambame mena kisima doko mena menge dusipa yale daa dokona lao konda pyuo selana suu piyu. Wambu pakanyi pyambuo isa ane yale nenge karenge dee kone kana yale kinjipa wanga karenge dupwame wambu dupwa pyao lungu ranyi palyapala ketae dokona kalyuo para ingiyamo dokona lao selana suu piyu.
DAN 7:20 Dee banya ayemba dokona nenge akalisa epeyamo dusipana lao dee mendaki enakana epeya dokome nenge dolomana rema pyao lalyiyamo dokona lao selana suu piyu. Nenge enakana epeyamo doko lenge rao nenge kata soo pingindeme range ketae pyambuo lakandeya. Doloma paka piyamopape baa paka wakasa pingipya dokona renge lama kaname selanako suu piyu.
DAN 7:21 Namba kandoko peteyono dokopa doo nenge dokome Anatunya wambu pipya yanda pipala nakama pyao isa palyiya.
DAN 7:22 Dokopa mende lete palu karalu karenge doko epeya. Epapala Anatu Mupwa Andake Wakasa dokona wambu dupwa keta anjiki pyuo kote leya. Yuu gii doko Anatunya wambu dupwa kiŋinya porai renge doko nyerami lao pyaka siya.
DAN 7:23 Dake renge angi doko namba polo langyuo jiya. Mena kisima doko kiŋinya isingi yulu kisima doko isa yuu dokona sera. Dokopa kiŋinya isingi yulu doloma nyuo isa palyuo doko wakale mendereko ingyuo sera. Dokome yuu muu peparae isa palyaramopa pyao injo kalyuo sinjimu ingyarami.
DAN 7:24 Menana nenge akalisa dusipa suu pyao doko kiŋi akali akalisa kiŋinya isingi yulu dokona sipurao pirami. Dokopa kiŋi wakale mende sipurao karara. Doko baa kiŋi wambo karenge dupwa yale daa. Baa kiŋi rara wakale ingyuo karara. Karapala kiŋi rema dusipa pyao nembara.
DAN 7:25 Baame Anatu Mupwa Andake Wakasa doko kando kamba lapala Anatunya wambu dupwa randa maiyuo kopetame isara. Dopa pipala baame nakamana misinya mawa piipi nenge malu palyuo lakando nao petenge yuu giipi alowa pinya piramo dokopa Anatunya wambu dupwa ee kana rema dee kanya ingyuo banya porai dokome isaramopa isarena kararami.
DAN 7:26 Dokopa yake pandana kote singi doko kote soo pisara dokome banya porai renge doko nyisa nyepala pyao kokwa soo nembalu nembo nembara.
DAN 7:27 Isa yuunya kiŋinya isingi yulu dokona yulu andakepe porai rengepe dupwa Anatu Mupwa Andake Wakasa dokona wambu dupwa nyuo maira. Mairamo dokopa isa yuunya akali mupwa karenge dupwame nakamana pii warombo soo yulu pyakamyuo kararaminyi dokopa kiŋinya porai renge nakama keta palira doko ota nalu nara.
DAN 7:28 Dokona kombeya pii repa repa angi doko dakena ote. Namba lenge kambu yongo nembapala wakasa pakayo. Dopa pyuo pakapala kombeya angi pii repa repa piyunu dusipa peparae kame see nao namba range suu pyaro kareyo.
DAN 9:1 Akali Darisi yuu Mitia range Sekesena ikinyingi doko kiŋi ingyuo yuu Bapilone iso kareya.
DAN 9:2 Ee kana mupwa dokona akali baa kiŋi ingyuo kareyamo dokopa namba Danieleme buku poo pyasi dokona mana nyuo kareyo. Doko ee kana akalisa yanda ipingi dusipana yuu Jerusaleme doko kwaeyo momo nao paraŋa lao poropeta Jeremaya lamaiyamuli pyuo mana nyiyu.
DAN 9:3 Dokopa namba kumanda piso wapungi komau wapuo nenge wasaka pyuo peena piso Kamongo Anatu lao ateŋa poraiyuo lao baa piso sokondali pyuo peteyo.
DAN 9:4 Nambana wambu dupwana koo dupwa kame sakaminya lao nambana Kamongo Anatu kando ateŋa lakamiyu. Nambame lao, Kamongo Anatu emba kamame andake. Namwame emba ketae pyambuo rape rape lao lakando karamano. Emba embena kana minyuo lalu lao lenge pii doko suu pyao minyaro karenge. Dee wambu lapome emba mona reto embame pii lengenyili pyuo pingi dupwa embame mona retalu reto retenge.
DAN 9:5 Namwa yulu koo pingi. Namwa koo dokome kopetame pyuo karenge. Embame namwa mawa pii langyuo dopa pipwa dapa pipwa leene dupwa namwame kamba lao mata joo peyama. Dee embame yulu rolae lasaka pii dupwa yaki nyuo kaeyama.
DAN 9:6 Embena kendemande akali poropeta dupwame embena kingi dokona lao namwana kiŋi akalipi akali mupwape rora ambasupi dee namwana wambu peparaepe lamaingi dokopa namwa see nalu nayama.
DAN 9:7 Emba Kamongo yuu peparae rolae pyuo karapinyipape namwa yulu koo pyuo range keta elya nyuo karamano. Namwa wambu yuu Juta palengepe yuu Jerusaleme palengepe dee Isaraele wambu peparaepe emba yaki nyuo kaeyama. Dokona lao embame repeta nanesape dupwana palu pena lao minyuo muu raleya lao nembee dupwame dopa pyuo kareyama.
DAN 9:8 Namwana kiŋipi akali mupwape rora ambasupi dupwame yulu elya pingi dupwa pyuo dee Kamongo ema kando yulu koo pyuo kareyami.
DAN 9:9 Namwame emba kando koo pyuo mona kana poko mata jiyamanopape embame sakame kumuo kame sakame kumuo kame sakao karenge.
DAN 9:10 Embena kendemande poropeta dupwa keta lowa pii namwa jiinyi dokome laramuli pyuo palipwa lao namwa langipinyipape Kamongo Anatu namwame embena pii doko soo nyii nayama.
DAN 9:11 Isaraele wambu peparaeme embena lowa doko kamba lapala embame lapinyi dokona selena wangu laka nayami. Namwame emba kando koo piyamanosa koo keta palena lenge pii dupwa embena kendemande Mosesena lowa dokona pyasi palamo dupwa embame namwa keta palena leene.
DAN 9:12 Namwa iso karenge akali dupwape dee namwape keta mende piru leene doko mee pii. Dokona lao yuu taone isa yuu dakena silyaminyi dupwa pyao kokwa soo nembenepape embame Jerusaleme kamame wakasako ingyuo randa maiyuo pyao kokwa sinyi nembee.
DAN 9:13 Mosesena lowa dokona randa nyerami lao lapyamo dusipa pepare namwa jii. Jiinyipape kamame epapu Kamongo Anatu namwana koo dupwa yaki nyuo panda embena pii kinyi angi dokona moko minyuo pao emba rae mainyi pyambwalana lao suu pyaa nayama.
DAN 9:14 Emba namwana Kamongo Anatu doko yuu peparae rolae pingi dokome namwa randa jelana rapa rapa pipala angi randa jii kande. Dopa piinyipape namwame embena pii sili see nale lao kareyama.
DAN 9:15 Namwana Kamongo Anatu, yuu Isipi piso embena wambu dupwa lanyuo epeene dokome embena porai renge doko lasaka pii. Dokona lao wambu dupwame embena porai renge dokona lao mee suu pyaro karaminyi. Dopa piinyipa namwame kopetame pyuo yulu koo pyuo karamano.
DAN 9:16 Wamba dokopa emba namwa pipya pyamalyuo nyiso karenge. Dokona lao Jerusaleme pipya imbuo karalu kara napipi. Jerusaleme embena yuu taone doko. Dee embena yuu kyau poo pyasi. Namwana koo dupwanape dee namwana rora ambasu dupwana yulu koo piyaminyi dokona wambu yuu liti wakale wakale maki palenge dupwa peparaeme namwa kilya kandelyaminyi.
DAN 9:17 Anatu nambana ateŋa piso sokondali pyuo leto doko sepe. Sepala embena tembole anda kokwa siyamo doko karengenyili pyuo elya pepe. Emba Anatuŋu lao wambu peparaeme soo nyinyaleŋe dokona tembole anda doko kamba elya pepe.
DAN 9:18 Anatu namwana pii sepe. Sepala namwa randa aki nyilyaminyi lao kandape. Yuu taone dokona embena kingi singi dokona wambu dupwa randa nyilyaminyi doko kandape. Namwa rolae pyuo karamwandena daa. Embame sakame kumuo nyisingi dokome namwa emba kando ateŋa letamano.
DAN 9:19 Kamongo, namwana ateŋa sakape. Sakapala Kamongo namwana koo dupwa nyuo kame sakape. Kamongo namwana pii sepala namwa keta yulu keyange mende pyakape. Wambu peparaeme emba Anatu lao soo nyinyaleŋe dokona mende pinya suu pilini doko waiya lao pepe. Yuu taone dake embena. Dee wambu dae karenge dupwa embenako.
DAN 9:20 Nambame nambana Kamongo Anatu doko kando ateŋa lao nambana Isaraele wambu dupwana koo dupwa polo lakamyuo dee nambana koo dupwa polo lamaiyuo banya tembole anda poo pyasi doko karengenyili pyuo kamba elya pinya lao piso sokondali piyu.
DAN 9:21 Namba ateŋa pyao piso dokopa aŋala Geperiele kombeya wambo pii repa repa piyunu dokona kandeyono doko namba peteyono mare dokona bii lao epeyamo kandeyo. Doko kukwa mena pyao kiso maingi doko mairama yuu gii ingiyamopa kandeyo.
DAN 9:22 Baame polo lao, Daniele rengya mende pira dokona emba soo gisilase lao nyiso langyala epelyo, leya.
DAN 9:23 Embame kanda soo Anatu kando ateŋa lao piso sokondali pyuo leene dokopa baame emba isingi yano piya. Anatumi emba mona retenge dokome ateŋa isingi yano pyapyamo pii doko langyala epelyo. Dokona nambame pii repa repa angi piinyi dokona polo langirunu dokopa emba elya kalo soo pisipi.
DAN 9:24 Ee kana andete kisima ipisu akalisa mange mendaki (490) epo paparamopa Anatumi embena wambupi embena yuu taone poo pyasipi koo keta moko nyero lao rombo palyiya. Yuu gii dokopa koo dupwa kame sakaramo dokopa wambu dupwa rolae pyuo karalu kararami. Dopa piramo dokopa pii repa repa piinyi dokope dee rengya mende pira lao poropeta pii leyamo dokope angi kinyi ingyuo para. Paramo dokopa tembole anda doko dee yapasi ingyuo karara.
DAN 9:25 Dokona pii dake soo nyepe. Yuu Jerusaleme kamba elya pinya lao lamairamo yuu gii dokona piso pao Anatumi akali mende kyawa ingyuo rombo palyiyamo doko kararamo yuu gii dokopa ee kana akalisa kisima ipisu mange mendaki (49) dusipa epo para. Dokopa enakana yuu taone Jerusalemepe kata sukusa singi dupwape kana kame porai awali lao karengepe dupwa elya piraminyipa ee kana malu (434) karara. Kararamopape ee kana dusipana randa malu epara.
DAN 9:26 Ee kana 434 epo paparamopa nakamame Anatunya rombo palyisi akali mupwa doko mee langa pyao kumakarami. Dokopa wambu iso karenge akali mupwa mendena ami yanda singi dupwame epapala yuu taonepe tembole andape dupwa pyao lalyuo kokwa serami. Anatumi yanda pyuo randa epo pira lao reteyamo doko ipwa kopetame palyuo epenge dopale ingyuo lumwa pyuo epara.
DAN 9:27 Wambu iso karenge akali dokome wambu malu dupwa pipya ee kana yanda ipingi nembo mona mendaki palyuo pii walengena lao kararami. Ee kana rema dee kanya dusa ingyuo baame mena pyao kiso maingipi bange maingipi dupwa ote pyuo kaena lara. Dopa pyuo kaena lapala baame mee bange anatu kingimi wasisi mende tembole anda pinjingi londe dokona ketae pisara. Pisaramo doko pisaramoko pao akali pisiyamo dokona lao Anatumi yuu gii lumwa pyuo randa mairu lao rapa rapa pyuo reteyamo doko pyaka seramo dokopa otara.
HOS 1:1 Kiŋi Usaya Jotame Easa dee Esekayamoo Juta wambunya kiŋi ingyuo kareyami dee Jeropome Jewasena ikinyingi doko Isaraele wambunya kiŋi ingyuo karo piyamo yuu gii dokopa Berinya ikinyingi Osia keta Kamongo dokome wai pii lamaiyamo dupwana lao buku dakena pyasi palamo.
HOS 1:2 Kamongome wambo kanda soo Osia keta Isaraele wambu dupwa pii lamaiyamo dokopa baa dopa leya. Emba pamuku enda mende nyela puu. Embena enda dokome embapa mondo lao pali naramopa banya wane wanakepe dupwa baa yaleko ingyuo parami. Dokona suu pyao wambu yuu dakena range dupwame namba yaki nyepala bange isa kanape dupwana mona maiyuo pelyaminyi, leya.
HOS 1:3 Leyamo dokopa Osiame akali Dipilaimena wanenge Goma lenge doko nyiya. Dokopa enda doko wane paleyamopa wane ane mende mandeya.
HOS 1:4 Banya rora ambasu akali Jiyu baame yuu Jeserele dokona koo piyamo dokona nambame Isaraele wambunya kiŋi doko randa mairunu yuu gii mende mee kore yuu sera ingya nalyamo dokona lao banya kingi Jeserele lena leya Kamongo dokome. Lapala lao Jiyunya rora ambasumi Isaraele rapu pilyaminyi dupwa nambame ote pinyi nembaro, leya.
HOS 1:5 Yuu gii dokopa yuu pau lama lama Jeserele dokona Isaraele wambunya ami dokona porai renge palipyamo renge kuilyaminyi dupwa pyao kokwa sinyi nembaro, leya.
HOS 1:6 Leyamo dokopa enda Goma baa dee kamba wane paleyamopa wanake mende manjo nyiya. Yuu gii dokopa Kamongome Osia lamaiyuo, Nambame Isaraele wambu dupwa mona randame kumuo nakamana koo dupwa nyuo kame sakamiru ingya nalyamo dokona wanake kingi Mona Reta Nange lena leya.
HOS 1:7 Dopa piramopape nambame Juta wambu dupwa kondome kumuo nyisaro. Namba nakamana Kamongo Anatu dokome nakama nyisaro. Nyisarono doko yanda piraminyipa wua gelape yanda kakupimi nyisaronde daa. Dee mena osemepe mena ose matana petenge akali dupwa pipyamo nyisaronde daako.
HOS 1:8 Dokopa Goma baame wanake anju pyakapala wane paleyamopa wane ane mende kamba mandeya.
HOS 1:9 Dokopa Kamongo dokome lao, Wane banya kingi doko Nambana Wambu Daa lare, leya. Doko nakama Isaraele wambu dupwa nambana wambu daa dee namba nakamana Anatu daako, leya.
HOS 1:10 Isaraele wambu dupwa ipwa kotana kee silyamo dopale ingyuo ando parami. Dokopa yaka laope makande pyuope pii narami. Epapu nakama langyuo lao, Nakama nambana wambu daa. Dopa laronopape yuu gii mende eparamo dokopa nakama kando lao nakama Anatu lete karenge dokona wane wanakepeŋe lara.
HOS 2:1 Dokona lao nakamana Isaraele yango dupwa kando Anatunya wambu ingyuo karaminyi lare Kamongo dokome mona reto karamoŋo, lare.
HOS 2:2 Nambana wane wanake dupwa. Nakamana endakinyi doko lamaiyuo, Baa nambana etenge ingya nalyamo. Namba banya akalingi ingyuo kara nalyoko lao letamo lao lamaikondali pipwape, leya. Baa lamaikondali pyuo baa akali kepo pingi yulu doko kaena larami.
HOS 2:3 Daaŋa lao kepo pyuo puu para ramo doko nambame papara pena lao rokwanyi nembakamirunupa baa ene manjinyi peyaminyi papara siyamo dopale ingyuo para. Dopa pipala enda baa yuu ingyuo ketange pyanyi pyambwaronopa ipwa nanome kumuo pisira.
HOS 2:4 Baa pamuku yulu pipala wane wanakepe dupwa mandeyamo dokona lao nambame epe kandakami nao kararo, leya.
HOS 2:5 Dokopa kepo pingi enda elya pali nange dokome lao, Nambana akali mona retenge dupwa piya paro dokopa nakamame namba nenge ipwa dee komau ipwa waene isa olipi ipwange dupwa jerami, leya.
HOS 2:6 Dokona lao nambame baa neta epa nana lao nepereke isa dupwame kame pyuo palyaro.
HOS 2:7 Dopa piramopape banya mona retenge akali dupwa kando nyipuli lapala makando kararamopape kapa pyuo kando nyii nara. Baame nakama kando nyipuli lapala lenge nyuo kararamopape angi kando nyii narako. Dopa pipala enakana enda baame lao, Namba epapu kapaŋa nambana akali wambo dokona anda range parolyamo, lara. Namba wambo dokopa kapa paleyo. Dopa pyuo dakepa pisa nalyono, lara.
HOS 2:8 Nambame baa isa olipi ipwangepe ipwa waenepe dee kenapape dupwa baa jiiŋi lao soo gisa nalyamo. Dee kana kulingi golope dupwa minyuo pao mee bange kingi Bealo lenge anatuŋu lao lakandenge dokona lakando karamo dupwa nambameko maiyu.
HOS 2:9 Dokona nenge wambu pingi kana pyaka seramo dokopa nambame kenapape waenepe maiyunu doko range nyero dee komau wapuo andu pyuo pinya lao maiyunu dupwa range nyuo piru.
HOS 2:10 Nambame banya akali mona reto kepo pyuo papilyamo dupwana lenge kambu dokona paparae pena lao pyao rokwanyi nembakamiru. Dopa pirunupa nambanya poraimi pirunu dokona mendeme baa nyisalena saka narami ingyara.
HOS 2:11 Dokopa banya ee kana yaka lao pati andakepe kana yaka lao pati lengepe dee banya koro yaka lao kalya pyuo nenge nengepe dee banya misi singi dupwa peparaepe dupwa pii nana lao ote pinyi nembaro.
HOS 2:12 Nembapala dokopa banya mona retenge akali dupwame yulu pyakape lao isa girapope isa pikipi dupwa jiyamiko letamo dupwa nambame pyao kokwa sinyi nembaro. Nambame enda banya isa girapope dee isape dupwa yuu ketange pyasi inginyi nembaronopa mena rae lenge dupwa nao kokwa sinyi nembarami.
HOS 2:13 Dee enda baame namba kame siyamo dokopa baa kalya pipala akali banya mona retenge dupwa peta ralyuo karo dee nenge rendamu pingi dupwa mee bange anatuŋu lenge Bealo doko kiso maiyuo piya dokona nambame baa randa mairu. Kamongo dokome dopa letamo.
HOS 2:14 Dokona lao nambame enda baa lanyuo yuu muiyane nenge see nange dokona dee papala mona retenge piindeme range lao laku nyero.
HOS 2:15 Dopa pipala banya isa girapo ee nyiyunu dupwa range mairu. Maipala Yuu Pau Lama Lama Randa Epenge dokona rengya mende keyange piraŋa lao mona kare kare karenge kambu doko wasaro. Dokopa enda baa yuu Isipi piso kyawa lete nyuo epeyamo dokona baa wamba mapwaesa piso piyamo dopale ingyuo banya mona retenge renge doko lasaka pyuo dee namba range keta epara.
HOS 2:16 Epapala enda baame namba kando kingi Bealo lao karalu kara nara. Dee kamba namba banya akalingi, lara.
HOS 2:17 Nambame enda baame Bealo kingi dokona dee minyalya nalu nao nana laro.
HOS 2:18 Yuu gii dokopa mena suwa rae lenge dupwa pipyape dee wii saa yaka dupwa nambamoo pipya lalu lao lapala nambana wambu dupwa randa maiyaka nana laro. Yuu dokona yanda pingi bange wua gela yandape dupwa peparae nyuo nembaro. Nembaronopa nambana wambu dupwa mona seramopa manda rao palena lao piru.
HOS 2:19 Isaraele wambu dupwa nakama nambana enda inginyi pyambwaro. Nambame yulu angingyuo mondo lao piru. Pipala nambana mona retalu reto retenge dokope dee sakao pyuo nyingi renge dokope nakama lasaka piru. Dopa pirunupa nakama nambana ingyalu ingyuo ingyarami.
HOS 2:20 Nambana lalu lao lenge pii doko range yaki pyuo minyaronopa nakama nambana ingyarami. Dokopa nakamame namba Kamongo dokoŋo lao soo nyerami.
HOS 2:21 Yuu gii dokopa nambana Isaraele wambu dupwana ateŋa dupwa isingi yano pyakamyuo isa yuu dokona nambame apu peyo piru.
HOS 2:22 Dokopa yuu dokona kenapa isa girapo jingi olipi jingipi dupwa ando lyera.
HOS 2:23 Nambame nambana wambu dupwa yuu dokona porai ingyuo kapa palyuo karena lao piru. Pipala wambu lapo nambame mona reta nalyamo letaminyi dupwa nambame mona retenge renge doko lasaka piru. Dee wambu lapome lao nakama nambana wambu daa letaminyi dupwa kando lao, Nakama nambana wambu laro. Dokopa nakamame isingi lao, Emba namwana Anatuŋu larami.
HOS 3:1 Kamongome namba dopa langiya. Enda baa akalingi wambo dokome mona reto karapyamopa wakaleko kepo pyuo pelyamoŋo doko baa range deyako pao mona retala puu, langiya. Isaraele wambu dupwame isa girapo jingi kiso isa kanape wasisi anatuŋu lenge dupwa mailyaminyi. Maiminyipako nakama mona reto karo doko suu pyao embame enda doko mona reto karape.
HOS 3:2 Dokona lao nambame enda baa kana kulingi akalisa ipisu kingi paki dee nenge bali jingi kilokerame andete mendaki dee akalisa kingi paki (150) rase bake pakinyamangena kenda dopale maiyuo nyiyu.
HOS 3:3 Nambame baa lamaiyuo, Emba nambana etenge ingyuo petene dokona yuu gii malu mee pisiri, lamaiyu. Emba pamuku yulu pyuo akali wakale mendepape pali nare lamaipala namba dopako piru, leyo.
HOS 3:4 Renge dopale dokome Isaraele wambu dupwa yuu rengyape mende nakamana kiŋi mende kara nara dee akali mupwape mende kara narako. Mena pyao kiso maiyuope mee kana mende wasapala lakandaope pyarepa kana minyuope ama rengyana mendepe koto kanda naramiko.
HOS 3:5 Dokopa enakana Isaraele wambu dupwa dee kamba nakamana Kamongo Anatu doko keta kamba range papala kiŋi Dapitinya para pyao nyeramo doko keta parami. Yuu gii doko eparamo dokopa nakama Kamongo kando baa mupwa lao suu pyao pakame kumuo karapala Anatumi bange keyange mee mairamo dupwa nyuo kararami.
HOS 4:1 Isaraele wambu nakama Anatunya pii epelyamo dake selapa. Kamongome Isaraele wambu nakama yuu dakena palaminyi dupwa pipya apiyanda pii ingyuo letamo. Yuu dakena wambu dupwame namba yaki nyuo mona reta nao namba Anatuŋu lao soo nyii nalyaminyi.
HOS 4:2 Dopa pipala wambu dupwame pii lalu lao lenge doko lapala dee yalelyaminyi. Nakama pii kyambo lao wambu yango pyao kumakao waa nyuo enda kepo pyuo pyuo karaminyi. Nakamana yulu koo dupwa ando pelyamo dee nakama wambu pyasu makao pyao kumakalyaminyi.
HOS 4:3 Dokona lao yuu doko yando nao rali piramopa bange peparae dokona palyuo ando pyuo karaminyi dupwa kumuo rali pira. Mena rara peparaepe yakape dupwa kumuo dee omape dupwa kamame kumuo rembe nara.
HOS 4:4 Kamongo dokome lao, Wambu mendemepe wambu kando koo pingi koo pingi lao lao nemba nana lalapape. Namba purisi dupwa kando suku leto.
HOS 4:5 Yuu kukwa korakama dusipana nakama mee rombalya rombana pyuo pyuo karaminyi. Poropeta dupwame nakama pimi dopako pyuo kopetame pilyaminyi. Dokona Isaraele embena endangi ingyuo siki nyilyaminyi dupwa pyao kokwa sakaro ingilyamo.
HOS 4:6 Nambana wambu dupwame namba Anatuŋu lao soo nyii nalyaminyi dokona nakama kwaeyo pelyaminyi. Nakama purisi dupwa namba soo nyii napala nambana mana lapunu pii doko nembaminyi dokona nambame nakama nembo kaepala ikinyi dupwa nambana purisi angi lao suu pyaa naro.
HOS 4:7 Purisi kamame konda pyuoko pupyamo dokopa koo renge dupwa konda pyuoko pilyaminyi. Dokona lao wambumi nakama kando ketae pyambulyaminyi karenge kandale doko epapu nyuo alowa pyuo nakama elya sinyi retaro.
HOS 4:8 Nambana wambumi koo piyami dokome nakama kamonganyi nembeyamosa dee kamba koo malu konda pyuo pimili lao suu pilyaminyi.
HOS 4:9 Nambame nakama koo piyaminyi kata dokona yano nyuo randa jero. Dokopa wambu dupwa yasu naraminyi makande dokonako nakamba yasu narami.
HOS 4:10 Isa kanapeme anatu lao wasisi nenge kiso maingi dokona nakamba mokwa soo jilyaminyi nenge dokona napalape mee sikya pii naramo kararami. Nakamame wane manjinya suu pyao isa kanape anatuŋu lenge dupwa kando kingi ketae larami. Laraminyipape nakama namba mata joo anatu wakale dupwa moko minyuo pelyaminyi dokona kamame wane manja narami.
HOS 4:11 Kamongome lao, Ipwa waene dokome nambana wambu dupwana kyawa sisingi suu pingi doko waa nyakamilyamo, letamo.
HOS 4:12 Nakamame isa lomasi doko akali kulimi yanda pepe minyinginyili pyuo mende pira dokona semana lao pisilyaminyi. Dopa pyuo karapala nakamame namba enda pamuku mee yaki nyilyaminyi papingi dopale ingyuo namba yaki nyepala nakama range anatu menge dupwa keta pyamalyuo pelyaminyi.
HOS 4:13 Papala yuu kyau ketae kemali pingi dupwana mena pyao kiso mailyaminyi dee yuu kyau kuki isa palu isarena pau lenge dupwana manda rao piso rende kyaa pingi dupwa kiso maiyuo petaminyi. Dopa pilyaminyi renge dokona nakamana wanenge dupwa pamuku ingyuo puminyipa nakamana ikinyi dupwana etenge dupwa kepo pyuo pilyaminyi.
HOS 4:14 Dopa pilyaminyi lapala nambame wanake dupwa randa mai naro. Renge doko nakama akali angi dupwame isa kanape anatuŋu lenge dupwana tembole anda dusipana pamuku enda dupwa pipya papala mena dupwa kiso mailyaminyi. Wambu suu pingi pali nange dupwa rangeme range kokwa sinyi nembelyaminyi.
HOS 4:15 Dokonako ingyuo Isaraele wambu nakamame namba yaki nyilyaminyi Juta wambu dupwa dopako pyuo koo dopaleko pii nana. Yuu Gilikale dokonape yuu Betele dokonape misi lala pao Kamongo lete karenge dokona kingi lao lalu lao lenge pii dupwa lao pii nalapape.
HOS 4:16 Nakama mena ingyuo Isaraele wambu dupwa mona kana pokolyaminyi. Dokona lao sipisipi ikyane dupwa rambi andelyamo nenge dopale ingyuo nambame nakama apa pyuo nenge pirusi?
HOS 4:17 Isaraele wambu dupwa mee bange anatu lenge dokona kingi lao karaminyi lao karena kae.
HOS 4:18 Nakama ipwa malu napala dokopa enda kepo yulu doko ketae nyepala nakambana kingi doko isa palyalana suu pilyaminyi.
HOS 4:19 Nakama mee kalendakuna porakanale lapo mee papyuo karaminyi. Mee bange dupwa anatuŋu lao lakandelyaminyi dokona elya nyerami.
HOS 5:1 Nakama purisi dupwa dake selapape. Isaraele wambu dupwa pii dake kale yukupala selapape. Nakama kiŋinya ree palu dupwa selapapeko. Nakamame kote dupwa rolae lapenge lyakande. Dokona nakama keta kote palira ingilyamoŋo kando karalapape. Yuu Misipa yuu kyau Tapo dolapona nakamame wambu nyuo koo keta palyalana anga pyuo kone makasi ingyaro silyaminyi.
HOS 5:2 Yuu Sitimi dokona yuwale kyuwa mendena koko puu pawaleko pelyaminyi dokona nambame nakama peparae randa jero.
HOS 5:3 Nambame Isaraele wambu nakama dopale kandale lao soo gisilyu dokona nakama namba kando kapa yalu pii narami. Dokona nakamame namba yaki nyepala karaminyi dokome namba lakandaraminyi kapa ingya nalyamo.
HOS 5:4 Wambu dupwana koo piminyi dokome nakama kata maipyasa Anatu keta kamba kapu kyuo eparami ingya nalyamo. Mee bange isa kanapeme wasisi anatuŋu lao karaminyi dokome nakama poraiyuo minyapyasa Kamongo doko baaŋa lao soo nyii nalyaminyi.
HOS 5:5 Isaraele wambunya range mupwa karamano lao suu pingi renge dokome nakamana lenge kambu dokona epo panelyamo. Dokopa nakamana koo dokome pyalya minyapyasa lukuma sepala isa puminyi dokona Juta wambu dupwa pale pale pelyaminyi.
HOS 5:6 Nakamame nakamana mena sipisipi bulamakaope dupwa Kamongo doko pyao kiso maiyaminyipape baa kando nyii nami. Renge doko Kamongo baame nakama yaki nyuo kaepya dokona kando nyii nami.
HOS 5:7 Nakamame Kamongo yaki nyiminyi dokona nakamana wane wanake dupwa banya ingya nalyamo. Dokona epapu nakamana yuu dupwa pyao kokwa sera.
HOS 5:8 Yanda pirama lao bikuli lenge dupwa yuu Gipiya dokona poo lalapape. Yuu Orama dokona randa epelyamo lao repe repe lamaipwape. Lamaipala yuu Betele dokona yuwa pisalapape. Benjamenena akali dupwa yanda dokona pupwa.
HOS 5:9 Isaraele wambu dupwana anda yuupi dupwa kwaeyo dusa siyaŋa larami ingilyamo. Yuu gii doko oo epelyamo. Nakama Isaraele wambu dupwa keta renge dake angi kinyi pyaka sela pyamo lyakande.
HOS 5:10 Kamongo dokome lao, Juta rarana akali kyawa dupwame Isaraele wambunya yuu waa nyakamimi dokona namba imbwualyo. Dokona lao nambana imbu singi doko nakama keta ipwa ingyuo kulimbwanyi palyaro, leya.
HOS 5:11 Wambu nyisa naramili dupwa pipa ree laminyisa Isaraele wambu dupwa randa nyuo nakamana yuu angi kulisa dupwa kombe maiyuo kaelyaminyi.
HOS 5:12 Isaraele wambu dupwa pyao kokwa sinyi nembo Juta wambu dupwa mendepe popo paa nana lao pyao piru.
HOS 5:13 Dokopa Isaraele dupwa nakama kwaeyamo doko kandeyami dee Juta wambu dupwame wua kakupi peteyamo dupwa range kandeyamiko. Kandapala Isaraele dupwame yuu Asiria dokona papala kiŋi dokome nyisinya lao piso sela peyami. Dopa pyuo pisiyaminyipape kiŋi dokome nyiso pyuo nyuo dee rete dupwa au pyuo umbwa pyuo nyera ingya naya.
HOS 5:14 Dokona nambame Isaraele wambupi Juta wambupi dupwa mena laeneme porayapala pili lao pyaro. Pyao pilyalya pilyana pyuo raepala puu pao paro. Nambame pyao ipyuo soo paronopa mendemepe nyisa narami.
HOS 5:15 Nambame nambana wambu dupwa yaki nyuo kaeyapala kararonopa nakama koo dupwana yasu nao sikya pipala dokopa namba kararo dokona nakamame koto eparami. Yasu nalu palyuo dokopa namba koto eparami rapisa.
HOS 6:1 Wambu dupwame lao, Kamongo karamo dokona range mwua. Baame namwa randa joo piyamopape dee kinyi lete nyera ingilyamo. Dee baameko namwana yongo dupwana wua kakupi nyinyi piso piyamo kata dupwa baame yaki pyakara.
HOS 6:2 Yuu gii lama remape epo paparamopa baame namwa lete nyeramopa baamoo pipya karalomano.
HOS 6:3 Dokopa Kamongo baa soo nyimwali lao suu pyao karamana. Dokona lao baa yuu rombe lao apunda epenge yuu gii dokopa epapala kaenge dee yuu yangenge gii dokopa yangapala kaenge doko suu pyao baa epapala kaeyara doko silyamano.
HOS 6:4 Kamongome lao, Isaraele Jutape dupwa nambame nakama apa pyuowase? Nakamame namba mona retami doko wamba yangama yangama kopa puu pae lapala waiya lao dusa kata silyandena pengepe dee yangamana pipyae sepala korakama waiya lao mee olo rali pingipi dopale ingyuo pilyamo.
HOS 6:5 Dokona lao nambame nambana poropeta akali dupwa keta nambana lao randa maiyuo pyao kokwa serono wai pii doko role pyapeta nakama mapanyi peeyo. Nambame nakama lapo pimili lao suu pimili lao suu pilyu dupwa panembena eŋa pao silyamo.
HOS 6:6 Mena pyao kiso jilyaminyi dupwa kapako doŋo nakamame namba kare kare soo mona retenge doko rungi rungi pyao karo. Nambana wambu dupwame mena pyao kiso joo karowape namba soo pakana palyarami doko angi ingilyamo.
HOS 11:1 Kamongo dokome leya. Isaraele wambu dupwa wane nyaŋana mendeke ingyuo kareyaminyi dokopa nambame mona reto kareyo. Karo yuu Isipi yaki nyuo nambana waneŋe lao neta epena leyo.
HOS 11:2 Lapala nambame nakama epenako lao kyakale lao nyuo peyonopa nakamame koo doko konda konda pyuo pyuo puu pao peyami. Nambana wambumi mee bange anatu lao wasisi kingi Bealo doko mena pyao kiso maiyuo. dee isa kanapeme wasisi dupwa rendamu pingi bange kiso maiyuoko pyuo kareyami.
HOS 11:3 Dopa piyaminyipape namba dakemeko Isaraele dupwa kata dopa pyuo pena dopa pyuo pena lao mana lamaiyuo dee nambana kingi kapena reto minyuo papyuo piya. Dopa piyunupape nakamame nambalyamo lao soo nyii nayami.
HOS 11:4 Nambame nakama anjiki pyuo mona reteyo. Nambame nakama minyalyuo nyuo angapu punji punjirena karena lao reto kareyo. Nakama peteyami dokona isa mata kui lao pisipala nenge piyu.
HOS 11:5 Nakama namba karo dokona kapu kyuo epa narama lao kamba letaminyi dokona Asiria wambu dupwame nakama rapu piraŋa yuu Isipi dokona kapu kyuo parami.
HOS 11:6 Dokopa nakamana yuu taone dokona sukusa yanda piraminyipa taonena kame kambu dupwa pyao lalyuo buru bara para. Dopa piramopa nambana wambu dupwame rangena suu pingi doko angiŋi lao minyingi dokona lao nakama pyao kokwa soo nembara.
HOS 11:7 Nakama namba mata julu jooko jilyaminyi. Dee nakama keta kenda silyamo dokome ee lao kararaminyipape mendeme nakama kiiramo minyalyuo nyii nara.
HOS 11:8 Isaraele wambu dupwa nambame nakama apa pyuo yaki nyuo kame soo kaeyarose? Yuu taone Atama Sepoimipa pyao kokwa siyunuli pyuo nakama pyarose? Namba nakama mona retapu doko mee ketae ketae reta nange dokona nakama pyaro ingya nalyamo.
HOS 11:9 Dokona lao namba mee akali daa namba Anatu. Nambana imbu singi dokome nakama randa jii naro dee Isaraele wambu dupwa dee kamba pyao kokwa see naroko. Namba doko ama Poo Pyasi ingyuo karo. Namba doko nakama role pyao karo. Dokona namba imbu singi paleta nakama keta epa naro, leya Kamongo dokome.
HOS 13:4 Dokopa Kamongome lao, Namba nakamana Kamongo Anatu yuu Isipi piso lanyuo epeyo doko, leya. Nakamame anatu wakale mende soo nyii napala namba iki soo nyepenge. Namba ikiko nakamana pyuo nyingi ingyuo karenge.
HOS 13:5 Yuu muiyane yando nao oo lasi nenge see nange dokona nambame nakama rapu pyuo kareyo.
HOS 13:6 Dopa piyunupape nakama yuu keyange doko pao kando nyuo nenge nao sikya pipyamo kapa karapala dokopa kimbu pyao piso nakama namba kame silyaminyi.
HOS 13:7 Dokona lao nambame nakama mena laeneme minyarapala nyili lao mena lepete ingyuo nakamana kata nee paelyaminyi dupwana isaro soo piru.
HOS 13:8 Sepala mena beyame ikyane nembapala wambu kanda kanda pyao nala epamuli pyuo epo nao roko kata lumbwasero. Nambame mena laeneme nakama waiya lao nalamuli pyuo naro. Mena rae lenge ingyuo pyao suu lalya lana pyuo nembaro.
HOS 13:9 Isaraele wambu dupwa nambame pyao kokwa sero dokopa apimi nakama nyisarase?
HOS 13:10 Nakamame kiŋi akali mendepe dee akali rapu pyuo mupwa kararami lapope jii lao piso silyaminyi doko akali dusipame apa pyuo nakama akali rara doko nyiso kararamisi?
HOS 13:11 Nambana imbu singi paleta karo nakama kiŋi dupwa jiyu doko dee kamame wakasa imbwayono dokome kiŋi dupwa ramo nyisa nembeyo.
HOS 13:12 Isaraele wambunya koo piyami dupwa pepana pyasi silyamo. Dee pepana pyasi silyamo dupwa kando panda mendena retapunu silyamo.
HOS 13:13 Isaraele dupwa yuu gii mende mairunu palu kararami ingyapyamopa nakama wane nyaŋa ene manjana pilyaminyipa romba anda piso epana saka nange dopale ingyo yuu gii doko nyelana kopyali minyuo yakara pilyaminyi.
HOS 13:14 Nambame wambu dapwa kumakarami lao nyiso dee kumapala kumasi wambu penge panda dokona paka nana lao kyawa lete nyuope pii naro. Kumunginya renge porai doko epara dokopa nambame kiiramo nyii naroko. Dokona lao kumungi renge doko embena porai renge doko anja palipyandeme namwa randa jerase? Embena anamasi minyare renge doko anja silyase? Wambu dupwa kando dee sakame kumuoko karalu kara naro ingyara.
HOS 13:15 Isaraele wambu dupwa mee ee pisinya ukunanyi andele laraminyipape yuu muiyane neta pyakaenge dorena piso porambaiye ama isasa pingi mende peyaronopa dokome ipwa isa yuunya piso potemo epengepe dee ipwa guu lao epengepe dupwa soko rali pira. Dee porambaiye dokomeko nakamana bange wakale wakale mona nyingi dupwa nyuo nembarasa pira, leya.
HOS 13:16 Samaria wambu dupwa nambapa kamba leyaminyi dokona randa narami ingilyamo. Dokopa banya wambu dupwa yanda piraminyi dokona kumarami. Dee wane nyaŋa dupwa kalyuo inju konda pyao nembarami dee enda wane palenge dupwa kalyuo poro larami.
HOS 14:1 Isaraele wambu dupwa nakamana Kamongo Anatu karamo dokona kapu kyuo pupwape. Nakamana koo dupwame nakama lukumakapala pao palimi kandape.
HOS 14:2 Kamongo karamo dokona kapu kyuo papala mena pyao kiso maingi dopale ingyuo penale ateŋa dapa lao lalapape. Namwana koo dupwa nyuo kame sakapala ateŋa letamano doko soo nyepe. Soo nyerene dokopa namwa lalu lao leyamanoli pyuo emba lakandarama.
HOS 14:3 Asiria wambu dupwame namwa nyisa naraminyipa dee yanda pingi mena ose dupwame kyawa minya naramiko. Namwame namwana isa kanapeme wasisi dupwa nakama namwana anatuŋu lao laa naramako. O Kamongo, embame wambu mendalimi nyisara ingya napyamo karaminyi dupwa sakame kumuo nyiso karenge.
HOS 14:4 Kamongome dopa leya. Nambana wambu dupwa namba range keta lanyuo eparo. Namba nakama kando imbwa nalu nao naro dokona nambana mona dokona piso mona retaro.
HOS 14:5 Nambame yuu yando oo lasinya apu epe pau lanyi pyambungi doko suu pyao Isaraele wambu pipya kararo. Dopa pirunu dokopa yuu Lepanone isa andenge dopale ingyuo poraiyuo pingi pyao karo isa jingi kalya pingi pakona pinyi peyo lokwasingi dopale ingyuo ando karo pirami.
HOS 14:6 Nakama enenge ingyuo pingi pyao olipi isa au pyuo andenge dopale ingyuo au pyuo ando kararami. Dopa pyuo nakama yuu Lepanone dokona isa kingi sita lengende kyaa keyange pilyamo karenge dopale ingyuo ando kararami.
HOS 14:7 Dopako pyuo nambame nakama kyawa minyuo kararono kararami. Nakama ee menya menya lao andenge dopale ingyuo ando isa girapo ee ando jingi lyuo kakana pingi dopale ingyuo kararami. Yuu Lepanone dokona ipwa waene ama keyange wasingi lao wambu peparaeme singi doko suu pyao nakamana kingi doko uu lepa lepa paramo kararami.
HOS 14:8 Isaraele wambu dupwa nakamana isa kanapeme wasisi dupwana lao mende piraminde daa. Nambame nakamana ateŋa dupwana isingi yano pyakao nakama rapu pyuo piru. Pipala nambame isa yoko kyako ando karalu karenge dopale ingyuo nakama keta sinyinyi peyakaro. Namba nakamana bange elyape dupwana ipwa ingyuo guu lao karakalyo.
HOS 14:9 Wambu lapo mona angi palenge dupwame pii pyasi palamo dupwa soo nyuo dokopa mona andarena soo mandenale. Kamongo banya kata dupwa rolaena renge palenge dokona wambu yulu rolae pingi dupwa rolaena renge palenge dokona ingyuo karenge. Dopa piramopape sili see nale lao koo pingi dupwa lukumapala pao palenge.
JOE 1:1 Dake Kamongona wai pii Petuwelena ikinyingi Joele lenge doko keta maiya.
JOE 1:2 Selapa, nakama wambu andapae dupwa. Wambu peparae yuu Juta dokona karaminyi dupwa peparaeme selapapeko. Yulu dapale mende emba ando karene yuu gii dokopape panda embena rakane ando kareyamo yuu gii dokopape mende piyase?
JOE 1:3 Dokona lao nakamana wane wanake dupwa lamaipwape. Dokopa nakamame nakamana wane wanake manjiraminyi dupwa lamairami dokopa dupwame rengya wai kiso nyeraminyi dupwa lamairami.
JOE 1:4 Aimbu ambo dupwa epo ee jingi dupwana minyarambuyami. Ambo mendeme neyamo pyarepala peya doko ambo enakaya nao dee dokome neyamo pyarepala peyamo doko mendeme nao piyami.
JOE 1:5 Doko girapo jingi waene enenge wasarami dupwa kokwa sipyamo dokona nakama ipwa biya nenge dupwa sipurao lenge rapala ee lao yamarangwalapape. Nakama ipwa waene nenge dupwa ee lalapapeko.
JOE 1:6 Akali rara mendeme yanda pinya nyuo suku pingi dopale ingyuo aimbu epo malu palyapala namwana ee yuupi nao otami. Nakama ama malu porai wakasa yaka lao sukusa paa napengele. Nakamana nenge wanga dupwa mena laenena nenge dopale.
JOE 1:7 Nakamame namwana isa girapo marange dupwa kokwa simi dee namwana piki isa dupwa nao rango pyanyi nembami. Dopa pyuo isa yanenge nao rekya lao nembaminyisa wangya dupwa kuli kewa lasi karaminyi.
JOE 1:8 Dokona nakama wambu dupwa wanake akali nyelana pingi kumulyamopa ee lao kumanda petenge dopale ingyuo ee lalapape.
JOE 1:9 Waene nengepe tembole anda dokona Anatu mairami mende see nalyamo. Dokona purisi dupwa Kamongo nenge jingi maingi dupwa ingi rando karaminyi.
JOE 1:10 Nenge witi jingi dupwa kokwa soo nembo girapo dupwa yanda nao olipi dupwa kyapuo pipya. Dokona yuu mee muiyane sipyamo dokona yuu dokome wambu ingyuo ee lao yamarangyuo silyamo.
JOE 1:11 Witi jingipi bali jingipi dee ee nenge dupwa peparae kokwa siyamo dokona nakama ee rapu pingi dupwa mona rando ee lao karalapape.
JOE 1:12 Girapo isape piki isape dupwa kumalana kuliya. Jingi lyuo nenge isa dupwa peparae kumapala yando nao karaminyi. Dopa pipala wambu dupwana rae maingi renge dupwa inyimungu rali pipya.
JOE 1:13 Nakama purisi dupwa Kamongona kana pyare lasi dokona bange kiso maingi dupwa kumanda piso komau pingi dupwa pipala tembole anda dokona papala yuu gii ee lao piso yanganyi retalapape. Nakamana Anatunya anda dokona nenge waenepe mairami mende see nalyamo dokona dopa pyuo pisipwape.
JOE 1:14 Wambu dupwa nenge wasaka pyuo malu palyuo petena lamaiyalapape. Akali mupwa dupwape mee Juta wambu dupwape peparae elyambu pipala nakamana Kamongo Anatu dokona tembole anda dokona kolando papala Anatu kando ee lao lalapape.
JOE 1:15 Kamongona yuu gii doko repeta epelyamo. Eparamo dokopa Anatu Porai Wakasa dokome pyao kokwa sinya lao randa andake jera. Yuu gii dokona paka renge wakasa epara.
JOE 1:16 Namwana lenge angi dokome wambo kandamwanopa nenge jingi dupwa kokwa sinyi nembapya. Dokopa namwana Anatunya tembole anda dokona rae maingi renge mendepe see nalyamo.
JOE 1:17 Yuu yando dokona ee waingi dupwa kumulyamo. Dokona nenge jingi nyuo malu palyuo retarami ingya nalyamo. Dopa piramo dokome nenge jingi retenge anda dupwa mee kwua karo momo nao lalyara.
JOE 1:18 Rambi mena nenge dupwa pali napyasa mena bulamakao dupwa lopapala kae lao karaminyi. Mena sipisipi kaparo karaminyi dupwa opetae lopalyaminyiko.
JOE 1:19 Isareme rapala pinginyili pyuo rambipi isape yando nelyamo. Dopa pipyasa nambame Kamongo emba keta ee lao piso silyu.
JOE 1:20 Dopako pyuo ipwa guu lengepe rambi andenge pandape dupwa isareme renge dopale ingyuo kyapuo yando nelyamo dokona mena rae lenge dupwame kamameko emba kando ee letaminyi.
JOE 2:1 Anatunya yuu kyau yapasi Sayone dokona wambu dupwa kamenge karasarami byara pyalapape. Kamongona yuu gii doko repeta epara dokona Juta wambu dupwa peparae pakame kumuo walu walu lalapape.
JOE 2:2 Dokopa yuu gii doko iminjo kwuamembe lapala kopa soo pyarambwara. Aimbu ama soo kaeyo doko yuu kyau dupwa minyarambu nyuo imisa pupurapala yuu sembelyamo pingi dopale ingilyamo. Wamba randa dopale yale mende epa nange dokona dee rengyana dopale mende epa nalu nao narako.
JOE 2:3 Dokopa isareme rao otenge dopale ingyuo aimbumi ee wara pisi dupwa nao otarami. Aimbumi ene nao panya parami dorena doko ee Etene yale seramo wambo kalyuo nao parami dorename ipwa kama pyasi sili laramo kandarami. Dokona bange mende aimbu dupwame yaki nyeraminyi yoko pyuo see nara.
JOE 2:4 Nakama mena ose lenge kambu nyera. Yanda pelana piso puu lao makandenge dopale ingyuo makandarami.
JOE 2:5 Aimbu dupwa yuu kyau ketae dupwana makandenge dokopa uliuli kilya kalu lao epele lao isareme isako poro paro lao renge dopale ingyuo pira. Nakama akali yanda pinya nyuo suku pyuo karenge dopale ingyuo maki maki pyuo kararami.
JOE 2:6 Aimbu dupwa repe repe pyuo eparami dokopa wambu peparae pakapala nakamana lenge kambu dupwa kumasi ingyara.
JOE 2:7 Nakama yanda pingi akali dopale ingyuo kana rondo dupwana pulyuo yanda pimwai pyalana pili lao pyuo pirami. Nakama peparae kata parami dokona kanda kanda suku piro karo papala mendasa longapala alowa pyuo ruku raka pyuo paa narami. Nakama panya paraminyi dokona bange mende sera ramo dokona karo kaeya napala mee yalapala puu pao parami.
JOE 2:9 Dopa pyuo aimbu dupwa taone andake dokona pyalana makando pao kana kame dupwana pulyapala yalala pao anda dupwana pulyuo papala waa nenge wambu dopale ingyapala windowa kata dupwana kolo parami.
JOE 2:10 Dopa piraminyisa yuu muu dupwa piku piku laramopa yake doko romo romo pira. Piramo dokopa neta kanape dolapo iminjiramopa bui dupwa yake dokona raa narako.
JOE 2:11 Kamongo dokome yuu gala lele lao banya ami akali dupwa dopa pinya dapa pinya lao pii poraiyuo lamaira. Yanda singi banya pii warombo singi dupwa ama malu mee dupwa porai wakasako. Kamongona yuu gii doko koo mangepe nao randa nyuo epara dokona api mendeme paka nao mona porayapala kararase?
JOE 2:12 Dopa piramopape epapu dakepa Kamongo dokome lao, Nakamana koo dupwana angi poraiyuo suu pyaokondali pyuo kondapala nenge naa nao ee lao yamarangyuo kondome kumuo namba karo dokona kapu kyuo ipupwa, leya.
JOE 2:13 Nakamana komau doko mee langa kangwa napala nakamana mona anda angi kinyi kinyi kondalapape. Nakamana Kamongo Anatu keta kamba range kapu kyuo ipupwape. Anjiki pipala sakao pyuo nyingi renge doko baa keta simbwaro karenge. Baa waiya lao imbwa napala banya lalu lao lenge pii dupwa mee suu pyaro karalu karenge. Baame yuu peparae koo dupwa kame sepala randa maiya nange.
JOE 2:14 Mende ramo namwana Kamongo Anatumi randa jelana suu pyara doko alowa pipala namwa keyange keta pyambuo ee nenge dupwa ama malu jera. Dokopa namwame nengepe waenepe dupwa Kamongo doko mairama.
JOE 2:15 Yuu kyau Sayone dokona byara pyao dokopa wambu dupwa nenge wasaka pyuo nyuo malu palyuo epena lamailapape.
JOE 2:16 Wambu dupwa epena lao nyuo malu palyapala Kamongona lao wato larami dokona rapa rapa pilapape. Wambu andapae dupwa lanyuo epo Wane wanake kuki dupwa nyuo malu palyuo dee wane nyaŋa dupwa opetaeko nyuo malu palyuo pirami. Kamame akali endape ene doo nyepala pisirami dupwa nakamana anda yaki nyepala ipupwapeko.
JOE 2:17 Purisi akali Kamongome yulu pyakamyuo tembole anda kolandenge dokopa mena pyao kiso maingi rate dokopana kanya dokona yulu pingi dupwame ee lao ateŋa dapa lao lalapape. O Kamongo, embena wambu dupwa kando sakape. Yuu wakale wakale dupwana wambu dupwame namwa kando giyalya giyana pyuo kilya kando nakamana Anatu doko anja karamo laope laa nana, lape.
JOE 2:18 Enakana Kamongo dokome banya yuu doko suu pyao kondo karapala banya wambu dupwa kondome kumuo piya.
JOE 2:19 Baame nakama isingi lamaiyuo, Epapu nambame nakama witi jingipi ipwa waenepe olipi ipwangepe dupwa jeronopa nakama nao sikya piramopa kararami. Dokopa wambu rara menge dupwame dee nakama kilya kando laa narami, leya.
JOE 2:20 Aimbu dupwame nakama pyalena lao dulurena karo epeyaminyi dupwa lapo yuu muiyane dokona pena laro. Dee lapo wambo epeyaminyi dupwa Kumungi Ipwa dokona ralinya nembaro. lapo enakaminyi dupwa Ipwa Kota Metiteraniane dokona ralinyi nembaroko. Dokopa nakamana yongo kumasi dupwa rumbyuo ai pyara. Nambame dopa pyuo dupwa pyao kokwa sero doko nakama peparae kando piyaminyi dokona isingi yano nyakarosa pira.
JOE 2:21 Dokona yuu dupwa paka nalapape. Kamongo dokome nakamana lao yulu peparae pyakalyamo dokona rae maiyuo karalapape.
JOE 2:22 Mena dupwa paka nalapape. Rambi andenge yuu dupwa kyaka yoko pyakalyilyamo. Isa dupwa jingi lyilyamoko piki isape girapo isape dupwa ando jingi malu lyuo karaminyi.
JOE 2:23 Sayone wambu dupwa rae maiyuo karalapape. Kamongome nakama reke lao apunda kamame andake dee kamame kuki jii napala mee kapa manda minyuo jiya. Enakana apunda kapa andake kulimbuo dee wambape dopa pyuo jinginyili pyuo jiya.
JOE 2:24 Dokopa witi lukungi mare dokona nenge dupwa soo simbwara. Girapo olipi kingingi mauli pete dokona waene welepe ipwange dokome soo simbuo pyoko pyoko lao epo nyisa pao karara.
JOE 2:25 Aimbu malu dupwame nakamana ee jingi nao oteyaminyi ee kana dupwana nakamana bange isa peyamo peteyami dupwa nambame nakama yano pyakao jero. Doko nambame aimbu malu dupwa nakama keta peeyo lyakande.
JOE 2:26 Epapu nakama nenge malu seramo napala sikya piramo kararami. Nakamana Kamongo Anatu yulu keyange nakamana lao pyakayamo doko lakandarami. Dokona rara lapome nambana wambu dupwa dee kamba kilya kando laka narami.
JOE 2:27 Dokopa Isaraele wambu dupwa, namba nakama pipya repeta karalyane lao serami. Namba Kamongo nakamana Anatu doko iki dokona wakale mende kara nalyamo lao serami. Dokopa wambu dupwame nambana wambu dupwa dee kamba giyalya giyana pyuo kilya kando laka narami, leya Anatumi.
JOE 2:28 Enakana nambame nambana Imambu wambu dupwa peparaena maralyinya laro. Dokopa nakamana ikinyipi wanenepe dupwame nambana pii boo pyao larami. Nakamana alemo dupwame kombeya pirami. Nakamana wanyane akali dupwa pii repa repa pyuo kandarami.
JOE 2:29 Dopa piramo yuu gii dusipana mee kendemande enda akalipi dupwa keta opetaeko nambana Imambu maralyinya laro.
JOE 2:30 Repe repe lamaiyuo dokopa yake dulunya yulu andake wambu dupwame kando yamarangwarami dopale pyuo isa yuu dokona wambu kandena lao yulu andake lapo lasaka pyuo piru. Ranjama kulimbuo soo isare rao isare sukwa doko kopa soo rali pyuo pira dusipa kandena lao lasaka piru.
JOE 2:31 Neta doko iminjo rali pyuo kana doko ranjama ingyuo pira. Wambo dopa piparamo dokopa enakana Kamongona yuu gii koo randa doko pyaka sera.
JOE 2:32 Dokopa mendeme Kamongona kingi lapala baa lete wai pyao nyakapili lao lara ramo doko baa nyiso pyuo nyera. Kamongome leyamuli pyuo yuu kyau Sayone dokonape dee Jerusaleme dokonape lapo mee lete kararami. Dokopa Kamongome wambu lapo rombo palyuo nyeramo dupwa kuma nao lete kararami.
JOE 3:1 Kamongome dopa letamo. Yuu gii dokopa nambame wambu yuu Juta Jerusaleme range dupwa bange ongore angerepe wakale wakale dupwa kamba mairunupa kapa rae maiyuo kararami.
JOE 3:2 Nambame wambu rara peparae nyuo pyasepala yuu pau lama Jiyosapata lenge dokona lanyuo paro. Yuu dokona nambana wambu range dupwa kando randa maiyakayami dokona nakama kando kote laro. Nakama Isaraele wambu dupwa yuu wakale dupwana nyuo nembapala nambana yuu doko lili pyuo wakale wakale nakama nyiyami.
JOE 3:3 Nyepala nambana wambu dupwa kendemande yulu pyakamili lapala kate pyuo bange wini pyuo nyingi dopale ingyuo wambu dupwa kate pipala mokwa soo nyuo dee wane wanake dupwa nyepala ropo pyao maipala nakama kana nyiyaminyi dupwame enda pamuku dupwa kana maiyuo nyuo ipwa waene ropo pyao nao piyami.
JOE 3:4 Yuu taone Taya Saitonepa dee Pilisitia range dupwa peparae namba kando apa pinya pilyamisi? Renge mende namba keta palipyasa dokona lao nakamame namba isingi yano pyamwali lao pilyamisi? Kinyi nakama renge mendena pirami ramo doko nambame waiya lao isingi yano pyakaro.
JOE 3:5 Nakamame nambana kana golope kana kulingipi dupwa nyimi dee nambana bange namba kamonganyi nembenge dupwa nyuo soo pao nakamana tembole anda dupwana reteyami.
JOE 3:6 Nakamame Juta wambu dupwape Jerusaleme wambu dupwape rangena yuu yaki nyepala nyuo yuu nanesa lanyuo pao Giriki wambu dupwa ropo pyao maiyami.
JOE 3:7 Epapu nambame yuu ropo pyao maiyaminyi petaminyi dupwa kaepala nakama nyisa nyuo lanyuo eparo. Dokopa nakamame nambana wambu randa maiyakayami dokona nambame dopako pyuo nakama randa jero.
JOE 3:8 Dopako pyuo nambame nakamana wane wanake dupwa Juta wambu dupwame ropo pyao nyinya laro. Nyepala nakamame dupwa Sapeyane wambu yuu nanesa range duwpa maipala bange nyerami. Kamongome dopa leya.
JOE 3:9 Pii dake rara peparae keta lamaipi. Yanda pingi akali peparae mupwape meepe dupwa kee lao nyuo sukusa sukusa pipala yanda pirami dokona wato rapa rapa pipwape.
JOE 3:10 Nakamana ee yulu pyuo yuu apu renge ane isa dupwa kamame rakyuo wua gela waso nakamana kema wua isa pyakepenge dupwa nyepala kaku waso pipwape. Dopa pipala kamame akali kuki yanda pii nange dupwa pyuoko pirami.
JOE 3:11 Nakama rara awali lao palaminyi dupwa waiya lao epo yuu pau lama dokona malu palyuo pisipwape. Dokopa Kamongo embena yanda pingi akali porai wakasa dupwa epena lare.
JOE 3:12 Rara dupwa peparae rapa rapa pipala yuu Jiyosapata pau lama dokona eparami. Yuu dokona namba Kamongo doko pisipala rara peparae awali lao palu pelyaminyi dupwa kote laro.
JOE 3:13 Nakama ama koo andake pilyaminyi. Dokona witi jingi wambu pilyamo pyakepo lyingi dopakale ingyuo nakama pyao pyakepo isa girapo jingi kalyuo pyaraku kingilyaminyi waene ipwange epo soo simbuo penge dopale ingyuo nakama kalyuo pyaraku piri.
JOE 3:14 Wambu taosande malu dupwa yuu pau lama kote lara dokona karaminyi. Yuu dokona Kamongona yuu gii doko repeta epara.
JOE 3:15 Neta kanapa dolapo iminjapyamopa bui dupwa rao kara nalyaminyi.
JOE 3:16 Kamongome dokome yuu kyau Sayone dokona pii poraiyuo lao dee yuu gala lenge dopale ingyuo baame yuu Jerusaleme dokona pii lao piramopa yake yuupi dupwa piku piku lala lala para. Dopa piramopape baa rangeme banya wambu dupwa yaki nyii nao rapu pyuo karara.
JOE 3:17 Dokopa Isaraele wambu dupwame namba nakamana Kamongo Anatulyamo lao soo nyerami. Yuu kyau yapasi Sayone lenge dokona namba palenge. Dokopa yuu taone Jerusaleme doko poo pyasi ingyuo andake seramopa wambu rara wakale dupwame kamba nyuo isa palya narami.
JOE 3:18 Yuu gii dokopa girapo isa dupwa yuu kyau dupwana paeyo mee bange ingyuo andaramopa mena dupwa yuu kyau peparaena buu minyuo kararaminyi kandarami. Juta wambu dupwana ipwa epenge dupwana ipwa malu epara. Kamongona tembole anda dokona piso ipwa mende guu lao jerae pyao lupyuo eparamo dokome yuu Akasiya pau lama lama dokona isa andenge dupwa nenge pira.
JOE 3:19 Yuu Isipi wambupi yuu Itome wambupi dupwame yuu Juta wambu anjiki pyuo kareyaminyi dupwa piyaminyi dokona yuu Isipi doko muiyane ingyuo sinya lao dee yuu Itome doko pyao kokwa soo momo nanyi nembo pira.
JOE 3:20 Nambame wambu pyao kumuyaminyi dupwana reke lao yano pyakamyuo nakama randa mairu. Nambame wambu piyaminyi dupwa lete kara nana lao pyaro. Dopa pirunupape yuu Juta Jerusalemepe dolapona wambu dupwa mende pii naramo mee palu karalu kararami. Dokopa Kamongo doko yuu kyau Sayone dokona karara.
AMO 1:1 Akali mena sipisipi rapu pyuo karenge yuu Tekowa range akali Emosa banya pii dasipa lasi silyamo. Usaya baa Juta wambunya kiŋi ingyuo karo Jeropome Jewasena ikinyingi baa Isaraele wambunya kiŋi ingyuo karo piyamo dokopa Anatunya pii Emosa keta Isaraele wambu dupwana lao pano epeya. Epo lapeyamo dokopa ee kana lama epo papeyamopa enakana yuusili doko minyiya.
AMO 1:2 Emosa dopa leya. Yuu kungu kyau Sayone dokona Kamongo doko karo pii andake lao, Jerusaleme dokona piso banya pii ketae palyuo epo lao isoko kyaka dupwa yando nelyamo. Napyamo yuu gii dokopa yuu Kamele kyau dokona isoko kyaka dupwa rakusi rapala kwaeyo pilyamo, leya.
AMO 1:3 Damasakesa wambu dupwame yulu koo doko kamba pyuo kamba pyuo pilyaminyi dokona nambame nakama kaeya nao randa mairu, Kamongo dokome leya. Nakamame Giliate wambu kopetame minyuo koeya siyamiŋi.
AMO 1:4 Dokona lao anda kiŋi Aseyele piyamo dokona nambame isare mende peyaro. Peyo kiŋi Benatate banya kana kame piyamo doko yanganyi nembo piru, leya.
AMO 1:5 Yuu taone andake Damasakesa dokona kana kame dokona kambu konandenge doko pyao lalyaro. Dopa pipala yuu Apene lama lama wambu palenge dupwa nyuo kakondo yuu Betetene dokona gapomane akali mupwa ingyuo karenge doko nyuo kakondo piru. Pipala yuu Siria range wambu dupwa karapusi pyuo yuu Kua dokona nembo piru, leya.
AMO 1:6 Kamongo dokome leya. Gasa wambu dupwame yulu koo kamba pyuo pyuo pilyaminyi dokona nambame nakama angi randa mairu. Nakamame wambu rara mende peparae lanyuo pao Itome wambu dupwana kendemande ingyuo karena lapala maipala kana nyiyami.
AMO 1:7 Dokona lao nambame yuu taone andake Gasa dokona kame dokona isare peyaronopa kame porai doko rao otara.
AMO 1:8 Nambame yuu Asitotepe yuu Asekelonepe dolapona akali mupwa dupwa neta nyuo kakondaro, leya. Kakondapala Ekerono wambu dupwa randa mairu. Mairunupa Pilisitia wambu pingisi petaminyi dupwa peparae kumarami, leya.
AMO 1:9 Kamongo dokome dopa leya. Yuu Taya range wambu dupwame yulu koo doko pyulu pyuo pilyaminyi dokona nambame nakama randa mairu. Nakamame wambu rara mende peparae yuu Itome dokona karapusi ingyuo lanyuo peyami. Nakamame wambu dupwa pipya puu minyuo karalu kararama lao lalu lao leyami doko masa nao piyami.
AMO 1:10 Renge dokona nambame yuu Taya kana kame dokona isare peyaro dokopa taone dokona anda peparae rao otara.
AMO 1:11 Kamongo dokome dopa leya. Yuu Itome range wambu dupwame yulu koo doko kamba pyuo kamba pyuo karenge dokona nambame nakama randa mairu, leya. Nakamame nakamana yangonge Isaraele wambu dupwa mena rae lenge pyalaminyili pyuo roko nyinyi palyuo pyao kareyami. Dopa pyuo piyaminyipa saka renge mende nakama keta pali naya. Nakamana imbu singi doko ipwa ingyuo guu lao kareya. Dokome kame soo kaeyarami ingya naya.
AMO 1:12 Dokona nambame yuu Temane dokona isare peyaro dokopa yuu Bosara taone dokona anda peparae rao otara.
AMO 1:13 Kamongo dokome lao, Yuu Amone range wambu dupwame yulu koo doko yaki nyii nalyaminyi dokona nambame nakama angi randa mairu. Nakama yuu liti wakale mendena doko nyelana yanda pyuo dokopa yuu Giliate range enda wane paleta dupwa pyao pyarokapapu pipala reteyami, leya.
AMO 1:14 Dokona nambame yuu Orapa dokona kana kame dokona isare peyaro dokopa taone dokona anda peparae rao lalyara. Yanda kanda soo piraminyi yuu gii dokopa pii andake palyuo karara. Kararamopa yanda angi piraminyi doko raiya pambake andake mende epenge dopale ingyuo koo mange nara.
AMO 1:15 Dokopa nakamana kiŋi dokope banya yulu pingi akali kyawa dupwape karapusi akali ingyuo yuu wakale lapona parami.
AMO 2:1 Kamongo dokome lao, Moape wambu dupwame yulu koo doko pyuo sulu silyaminyi dokona nambame angi nakama randa mairu, leya. Nakamame kiŋi yuu Itome range dokona kuli doko nyuo yanganyi nembo banya kingi doko nyuo mee bange inginyi nembeyami.
AMO 2:2 Nambame yuu Moape dokona isare peyaro dokopa Kereyote taone dokona anda peparae rao lalyara. Dopa piramo dokopa yanda kambu pyao laikuli pii lao piramo dokopa Moape wambu dupwa kumarami.
AMO 2:3 Kamongome lao, Nambame yuu Moape dokona iso karenge akali mupwa doko pyao kumaso dokopa yuu dokona akali kamongo ingyuo karaminyi dupwa opetae pyaro, leya.
AMO 2:4 Kamongo dokome dopa leya. Juta wambu dupwame yulu koo doko kamba pyuo pyuo karaminyi dokona nambame angi nakama randa mairu. nakamame nambana mana pii dupwa awa nale lao dee nambana mawa pii dupwa minyaro kara napala kupyuo yaki nyingi. Nakamana rora ambasupi dupwame mee bange lapo anatuŋu lao kingi lao kareyaminyi suu pingi dokonako pyulu pyuoko pelyaminyi.
AMO 2:5 Dokona nambame isare yuu Juta dokona peyaronopa Jerusaleme kana kame porai doko rao lalyara.
AMO 2:6 Kamongome dopa lao, Isaraele wambu dupwa yulu koo doko kamba pyuo kamba pyuo karaminyi dokona nambame nakama angi randa mairu, leya. Isaraele wambu dupwame akali rolae karenge kana aeya nalyamopa kuki mendeme kimbu suu kana kuki penge dupwa ropo pyaramana laope sera nange dupwa kendemande ingyuo karena lao kana nyuo karapusi pyuo nembelyaminyi.
AMO 2:7 Nakamame pyuku lenge range poraiya nange dupwape kalyo ramberaku pyao dee pendewa dupwa pyao ralinyi neta nembo pilyaminyi. Dopa pipala dokopa kendemande yulu pingi wanake dupwa ikinyingi rakangepa laparaeme kepo pyuo pilyaminyi. Dopa pyuo karapala nambana kingi poo pyasi doko kokwa soo mee inginyi nembeyami, leya.
AMO 2:8 Pendewa dupwame kamongo akali dupwana kana mone kyanje ingyuo nyiyami. Nyiyaminyisa yano pyakaraminyi dokopa komau dupwa range peyakarama lapala pendewa dupwana komau dupwa nyepala kingi wapambu lakao misi lenge panda dupwana kwuapala palyuo silyaminyi. Nakamana Anatunya anda dokona kana mone yano reto nyiyaminyi dupwa keta ipwa waene nyepala nao karaminyi.
AMO 2:9 Dopa pyuo karaminyipape nambana wambu nakamana kingi reke lao Amone akali ama londe mano isa ingyuo lombala pasi dupwape ando ama isa napupa manda manjo poraingi dupwape pyao kokwa soo nembeyo kande.
AMO 2:10 Nambame nakama yuu Isipi piso neta nyuo lanyuo epeyo. Epapala ee kana akalisa pao kisima nembo yuu muiyane dokona laminyuo epeyo. Epapala dokopa Amo wambunya yuu doko nakamana inginya lao nyuo jiyu, kande.
AMO 2:11 Jepala dokopa nakamana ikinyingi dupwana lapo nambame poropeta ingyuo karena lao rombo palyuo nakamana akali parange dupwana lapo Anatu nakama maipala role karamano lao kyawa roka nao ipwa biya naa nao kumasi wambu minyanda nao lao kana minyapala kararami lao rombo palyuo piyu. Isaraele wambu dupwa doko kinyi panda daase? Namba Kamongo dokome pii dake lapusa pilyamo.
AMO 2:12 Dopa piyunupape nakamame akali parange kyawa roka nao karenge dupwa ipwa biya nena lao nyuo mapiso poropeta akali dupwa nambana pii laka nana lao kata roko piyami.
AMO 2:13 Dokona dakepa nambame nakama yuu dokona kalyo minjiku minyaronopa semene kenda pingi doko manjipala yuu pyao rambetaku pyao nembenge dopale ingyuo parami.
AMO 2:14 Dopa piraminyi dokopa akali kata wakasa makando penge dupwa kapa paa narami. Dee akali porai dupwa nakamana porainya renge nembarami. Dee yanda singi dupwa nakama rangena kyawa lete minya naramiko.
AMO 2:15 Yanda pingi akali dupwa nakamana panda isa para. Akali makando penge dupwa makando panya saka narami. Mena osena piso penge dupwa kata mende serandena papa narami.
AMO 2:16 Mange dokopa yanda singi paka nange dupwa nakamana kaku yanda walekyape dupwa yaki nyepala pako makando parami. Kamongo dokome pii dake letamo, leya.
AMO 3:1 Nakama Isaraele wambu dupwa peparae Kamongo dokome Isipi piso nyuo lanyuo epeya. Dokona nakamana lao baame pii dake langilyamo selapape.
AMO 3:2 Wambu malu mee isa yuu dakena karaminyipape nambame nakama iki kando nyuo mondo lao rapu pingi. Renge dokona nakamana koo doko andake wakasa ingyuo pelyamo. Dopa pilyamo dokona nakama randa jero.
AMO 3:3 Akali lamame dusa paramba dusa paramba lao lao palya napala mee kata nyingisi?
AMO 3:4 Mena laene dokome imwa dokona nuli nara mende kanda nao karo mee wuakaepe lengese? Mena laene yakane dokome banya kame palo dokona palyuo dokopa nuli wiipi mende pyao minyaro pisi napala dokopa ŋili ŋili lengese?
AMO 3:5 Kone dokona nenge angi doko retapala pimanyi palya narami ramo dokona yaka epo lyakaro serase? Angi mende epo kone makasi dokona paa naramopa kone dokome mee petelyapala lyerase?
AMO 3:6 Wambu pyala epenge dupwame yuu taone mendena karo yanda pingi byara pyarami dokopa wambu dupwa paka naramisi? Yuu taone andake mendena pundu sipuro randa andake sipyali doko Kamongome peya napyali doko ipyalisi?
AMO 3:7 Kamongo wambu dupwana mupwa ingyuo iso karenge dokome yulu peparae pinya dokopa banya kendemande poropeta akali dupwa wambo panao lamaingi.
AMO 3:8 Laene juraŋa pokaramo dokopa api mendeme paka nao mona kana pokapala kararase? Kamongo Mupwa Andake Wakasa karenge dokona pii laramo dokopa apimi pii doko nyuo lakami nao kaeyarase?
AMO 3:9 Nakamame wambu peparae yuu Asitote dee Isipi dolapona kiŋinya anda dupwana karaminyi dupwa kee lao lamaiyuo, Yuu Samaria nyuo awali lao kyau kuki kuki silyamo dupwana malu palyepala dokopa enda akalipi ama pauli lao koo andake wakale wakale dupwa sipuro pilyamo doko kandena lao lamaipi, leya.
AMO 3:10 Kamongo dokome dopa letamo. Nakama wambu dupwana anda andake dupwa bange yulu koo pyuo nyiyaminyi kande dupwame reto simbwalyaminyi kande lao lamaiyalapa. Kinyi angi dokona palyuo panembena lao karenge yulu doko angi see nalyaminyi.
AMO 3:11 Dokona akali yanda pimwai dupwame nakamana yuu dokona epo karo awali lapala kame andake porai taone sukusa palyuo piro karenge doko pyao lalyarami. Lalyapala wambu dupwana bange ama keyange nakamana anda kameya dupwana seramo dupwa nyerami.
AMO 3:12 Kamongome Samaria wambu nakama yongome yoko pyuo Anatunya wambu lapala isarena range dokona iki suu pyao kepo pyuo kalya malyape pyuo kawango yuku silyaminyi dupwa kando dopa letamo. Mena laeneme sipisipi pyao nelyamopa mena isingi akalimi kimbu kalepe kondasi iki kando nyingi dopale ingyuo nakama parami, leya.
AMO 3:13 Kamongo Mupwa Andake Wakasa karenge dokome pii dake Jekopena para pyasi wambu dupwa kale yukupala selapa lao letamo.
AMO 3:14 Nambame Isaraele wambu dupwa nakama yulu koo pilyaminyi dokona randa mairunu yuu gii dokopa yuu Betele dokona mena bangepe kiso maingi kana pyare dupwa pyao lalyanyi nembaro. Nembaronopa kana pyare paki pakipi pinjingi dusipa longalya longana pira.
AMO 3:15 Nambame kupwa pyuo manda renge dokopa palenge andape isasa pingi yuu giinya manda rao palenge andape dolapo laparae pyao lalyanyi nembaro. Kana andake penge bange anda kalya pyuo retenge dupwa pyao kokwa soo anda kamame andake wakasa dupwa pyao kokwa soo piru.
AMO 4:1 Samaria enda dupwa nakama pii dake selapape. Nakama mena bulamakao yuu Basane dokona karenge dupwame nenge malu napala ando kameya ingyuo rondo lenge dopale ingyuo rondo lasi mee dolapo petaminyi. Nakamame wambu porai renge palya nange dupwa pyuo kopetame pisilyaminyi. Wambu pendewa dupwa randa maipala nakamame wambu dupwa kuki perala konda nalyaminyiko ama daa. Nakamame nakamana akali dupwa kando dopa letaminyi. Ipwa biya malu nao sepake lalana kaeya nao minyakao ipupwa letaminyi.
AMO 4:2 Kamongo Mupwa Andake Wakasa karenge baa poo pyasi dokome pii lalu lao lao dopa leya. Kinyi kinyi leto yuu gii mendasipa pyaka sera. Pyaka seramo dokopa nakama koe anga serapala dokona ukunya ingyuo lyeraminyipa wambu dupwame nakama ipyuo nyuo parami. Nakama peparae mendaki mendaki lao oma ingyuo ukunya kareta pele laro kararaminyipa nyuo parami, leya.
AMO 4:3 Wambu dupwame nakama ipyuo lanyuo pao yuu taone dusa kame repetale lalyarae kararamo dokona pyao pyale larami.
AMO 4:4 Kamongo Mupwa Andake Wakasa dokome Isaraele wambu dupwa kando dopa leya. Nakama yuu Betele poo pyasi dokona kaeya nao yulu koo pela pupenge ingiya kande doko pao yuu Gilikale dokona koo doko ando penale pyuo pupwape. Yuu peparae yangama dokopa mena yakape dupwa kiso maiyuo yuu gii rema epo papapiramo dokopa nakamana bange retelyaminyi dupwana akalisa dokona mendena mendena pyuo akalisa piramo doko longo minyuo epo pipwape, leya.
AMO 4:5 Nakama namba kando sangyu lao borete yangao joo nakamame bange matana piso namba jinya minyuo epelyamano lao eparaminyi doko nakama rangena kingi ketae pyambuo pinya mona nyepala pyuo karaminyi.
AMO 4:6 Nambame yuu taone peparaena lopo sinya leyo dokopa nakama keta nenge see nayamopape nakama kuki perala mona kapu kyaa nayami, leya.
AMO 4:7 Apunda kana ee nengepe andenge mange dokona nambame apunda jepa napala yambe pyuo minyaro karo kaeyo. Nambame yuu taone mendakinya apunda jiyu dokopa taone mende dokona jii nayo. Yuu liti lapona apunda peyonopa liti lapo peya dupwana ee jingi yanda neya.
AMO 4:8 Kamongome dopa lamaiyuo, Yuu taone mendasipana palenge wambu dupwa ipwa nano dokome lokerapo leyasa ralo yuu taone mendena ipwa serali lao peyami. Peyaminyi yuu dupwana ipwa mendasa narami ingya nayamo doko soo kandapala dokopa namba keta kapu kyuo epa nayami.
AMO 4:9 Nambame poo rambaya rakusi renge mende ee jingi dupwa rakusi rena lao peyo. Aimbu dupwame nakamana girapo eepe isa pikipi isa olipi dupwa nao lembeke nyinyi reteyaminyipape nakamame namba keta kapu kyuo epa nayami.
AMO 4:10 Yuu Isipi dokona kumaro anga peyono dopale ingyuo nakama nakamana yuupi kwuanyi nembeyoli pyuo peyapu yanda piyami dokopa nakamana wanyane akali dupwa wua gela dokome pyao kumakayo. Dopa pipala mena ose dupwa neta nyuo nembo piyunupa nakama yanda kama kareyami dokona wambu nakamana wambu kumasi dokona gyaa kata dokona nenenge ai pyanyi pyambwakayo. Dopa piyunupape nakama namba keta kapu kyuo epa nayamiko, leya.
AMO 4:11 Kamongo dokome dopa lamaiyuo, Nambame yuu Sotoma Gomorape pyao kokwa sinyi nembeyo dopale ingyuo nakama lapo pyao kokwa sinyi nembeyo. Nakama lapo pyarepala peyami dupwa poo rao pao isa mende rao wapu lenge dopale ingyapala lete peyami. Dopa piyunupape nakamame namba kareyo dokona kapu kyuo epa nayamiko.
AMO 4:12 Renge dokona nambame nakama Isaraele wambu dupwa randa jero. Nambame dopa piru dokona randa jeramo nyerama lyamo lao rapa rapa pyuo karalapape, leya.
AMO 4:13 Anatu baame iki yuu kyau dupwa pyuo waso porambaiye dupwa pyuo piya. Baame banya suu pingi dupwa akali dupwa soo nyinya lao lamaingi. Baameko yuu yango karenge doko iminjinyi lao alowa pingi. Baa yuu muu dupwana kyawa nyuo kata papingi. Dopa pingi dokona kingi doko Kamongo Anatu Porai Wakasa lenge.
AMO 5:1 Nakama Isaraele wambu dupwa pii dake selapape. Wambu malu pinya yanyanda mareta piso ee romo lenge dokoreke doko nakamana lao leto, leya.
AMO 5:2 Isaraele doko enda mapwae akali mare kanda nange dopale kandale doko sipurao epa nao isa pao palu palyuo palamo. Mendeme nyuo sukusa pyambwa naminyipa isa pao palu palyuo palamo doko mendeme baa nyiso minyalyuo nyii nara ingilyamo.
AMO 5:3 Kamongo Mupwa Andake Wakasa karenge dokome pii dapa letamo leya. Isaraele wambunya yuu taone andake mendakinya yanda singi taosande mendaki (1,000) yanda pela pena lao nembaraminyi dokopa andete mendaki (100) iki anda kapu kyuo eparami. Dee taone andake mendena yanda singi andete mendaki (100) yanda pela pena lao nembaraminyi dokopa akalisa iki anda kapu kyuo eparami.
AMO 5:4 Kamongo dokome Isaraele wambu dupwa lamaiyuo, Nakama namba keta ipupwape. Epapala dokopa nakama lete kararami.
AMO 5:5 Nakama yuu Biasipa dokona kingi wapambupi lakao misi lala paa nalapape. Yuu Betele doko buru bara paramo mena wambupi mende yapo rungi nyii naraŋa dokona namba karepe lao kotala paa nalapape. Yuu Gilikale dokona nakama paa nalapape. Dokona palenge wambu dupwa yuu wakale mendena karapusi pyuo lanyuo parami ingilyamo leya.
AMO 5:6 Nakama Kamongo karara dokona papala lete karalapape. Doko kaepala paa narami ramo doko baa isare kekenge dopale ingyuo nakama Isaraele wambu dupwa keta epara. Isare dokome nakama yuu Betele wambu dupwa rao otara. Dokopa mendeme isare doko kapa kunja nara.
AMO 5:7 Akali kote pii angi lakamiramili doko kaepala kwaeyo lakamilyaminyi dupwape yulu rolae dupwa isa nembelyaminyi dupwape pyuo kokwa sinyi nembasi silyamo.
AMO 5:8 Kamongo dokome bui kingi Pelaetesepi Orayonepe dupwa wasiya. Baameko yuu iminjingi doko yangena lao yangenge doko iminjinya lao pingi. Dopako pyuo baame ipwa kota dupwa pulyuo epena lao nyepala dee apunda ingyuo kulimbwanyi yuu dokona isa peenge. Banya kingi doko Kamongo ingyuo palena.
AMO 5:9 Baame akali porai dupwa kokwa soo pena lao nakama kimbu isa ingyuo minyaro karelyamo poraiyuo karenge dupwa pyao lokwalyo pingi.
AMO 5:10 Nakama Isaraele wambu dupwame wambu nakama kyai pilyaminyi lao lao panami dupwape kotena pii rolae laminyi dupwape awa nalyaminyi.
AMO 5:11 Nakamame wambu pendewa dupwa pyalana pyuo kalyinyi palyapala nakamana nenge dupwa waa nyakamyuo karaminyi kande. Dokona lao nakamana kaname anda keyange piyaminyi dupwana pali nao nakamba range girapo ee keyange wara piyaminyi dokona ipwa waene elyape dupwa naa nao pirami, leya.
AMO 5:12 Nakamana koo wakasa pilyaminyi dupwape kendepo kendepo wakasa nao pyuo karaminyi dusipa nambame yaka lanyi pyambuo soo karo. Nakamame akali keyange dupwa randa maiyuo karaminyi. Nakamame girisi pyuo kana jimi dupwa nyepala akali pendewa dupwana kote dupwa angi mondo lao sakami nalyaminyi, leya.
AMO 5:13 Dokona kwaelyamo yuu gii dokopa elya kalo karenge doko ama mona palipala pingi.
AMO 5:14 Yulu koo dupwa yaki nyuo kaepala yulu rolae dupwana anjuku lao moko minyuo pyuo kararaminyi dokopa nakama kapa pisirami. Nakamame dokopa Kamongo Anatu Porai Wakasa doko namwa pipya karamano letaminyi doko letaminyili pyuo baa kinyi nakama piya role pyao karara.
AMO 5:15 Yulu koo dupwa epe kanda nao karapala yulu rolae dupwana mona nyuo pyuo karalapape. Nakamame kote pii dupwa rolae angi dokona palyuo lao karalapape. Dopa pyuo kararami ramo dokopa Kamongo dokome nakamana rara dokona mee kyaka petaminyi dupwa sakame kumuo karara rapisi.
AMO 5:16 Dokona lao Kamongo Anatu Porai Wakasa dokome dopa letamo. Taone andake dupwana kata dupwana kondome kumuo ee lao kumaralerale nyuo pisirami. Mena rapu pyuo ee wara pyuo pingi akali dupwa ee lala epena laraminyi opetaeko ee lakana lao kana mailyaminyi lenge dupwa piya wambu kumarami dupwana yongo dupwana lao ee larami.
AMO 5:17 Isa girapo ee dupwa peparaena ee lao kumaralerale nyuo pisirami. Doo leto dupwa piya kande doko nambame randa jerosa pira, Kamongo dokome leya.
AMO 5:18 Kamongona yuu gii doko ipyali yaka lao isilyaminyi dupwa kondo adake. Yuu gii dokome bange keyange aki mende minyakao eparase? Yuu gii dokome nakama iminjingi dokome yambe pyara. Yangaramo pisa narami.
AMO 5:19 Yuu gii dokopa akali mende mena laene kando paka pelyoŋo lapala mena beya karara dokona pao romeya dopale ingyara. Dopako pyuo akali mende anda range pao nambana anda dake dokoŋo lapala apya dokona kingi minyanyi pirasa kaumi naramo dopale ingyara.
AMO 5:20 Kamongona yuu gii doko elyape ingyuo eŋa pao gii palya nara.
AMO 5:21 Kamongo dokome pii dopa letamo. Nakamana yuu gii andake nyuo malu palyuo nenge nao misi lenge dupwa nambame kando rae maiyuo awaka nalyo.
AMO 5:22 Nakamame nenge kiso mukinyi nembo maingipi witi jingi maingipi dolapo minyuo epo jeraminyi dokopa nambame rae maiyuo ama nyii naro. Nakamame mena susu lao nenge maipala ando rondo lapyamo minyapala namba jela eparaminyi dupwa kando aiyaka lao nyii naroko.
AMO 5:23 Nakamana kenane dokome ipwa uu lele lao karaminyi doko kaeyalapape. Nakamana gita pilyamano laminyi dokopa namba soo epe nasilyo.
AMO 5:24 Doo piminyi dupwa kaepala rolenge renge doko nakama keta ipwa ingyuo lyuo karena. Dopa pipala yulu rolae dupwa nakama keta ipwa ingyuo sokwa nao guu lao karena.
AMO 5:25 Nakama Isaraele wambu dupwa ee kana akalisa kisima nenge see nange yuu muiyane dokona palyuo lanyuo epeyo dokopa nambame nakama mena yakape kiso joo bange dupwa joo pilapa lao kongo pii nayo.
AMO 5:26 Dopa piyuko doŋo epapuli nakamame kiŋi Sakutipa bui Kaewanepa dolapo anatuŋu lao isa kanapeme wasapala dolapo anatu ingyuo lakando karaminyi.
AMO 5:27 Dokona nambame nakama yuu wakale Damasakesa dumurena karapusi nembeyo kande dokopa nakamana mee bangeme anatu lao wasisi dupwa range role pyapeta soo parami. Namba Kamongo kingi Anatu Porai Wakasa dokome pii dake leto.
AMO 6:1 Nakama yuu Sayone dokona mende pirape lao rae maiyuo petaminyi dupwape nakama wambu yuu Samaria range dupwame randa mende namba keta eparande daa lao suu pyao karaminyi dupwape Isaraele yuu mupwa dokona akali andake ingyuo wambu iso karaminyi dupwa nakama Isaraele wambu mee dupwa epo pyamalyarami ingilyamo dupwape nakama peparae kwaeyo koo keta palirami ingilyamo dokona kondo andake pilyamo.
AMO 6:2 Nakamame yuu taone Kalena dokona pao kandalapa. Dopa pyuo kando pao yuu taone ama andake Emate doko kandama pao kama yuu taone Gati Pilisitia wambu palenge doko kando lano pupwa. Dopa pyuo kandapala dupwana yulu dokome nakama Juta wambupi Isaraele wambupi dupwana yulu nyuo isa palyili laro karapyalyape lao selapape? Dupwana yuu doko reeko sipyamopa nakamana doko kukindena palimwalyamo lao silyamisi?
AMO 6:3 Dokona nakamame suu pyaminyi dokopa yuu gii pyao kokwa sera doko nakama keta epa nara lao suu pilyaminyi. Nakamame yulu wakale wakale pilyaminyi dokome yuu gii koo doko repeta lanyuo imisa pilyamo.
AMO 6:4 Mena bulamakao yakanepe mena sipisipi yakanepe dupwa kuiyuo napala rate keyange dupwana ipyalo laro karaminyi dupwa nakama keta randa epara ingilyamo kando waso karalapape.
AMO 6:5 Nakama wambu dupwa Dapitimi piyamuli pyuo kenane enenge rae maiyuo mana nyuo pilyaminyi. Dopa pyuo gita dupwame minyuo kenane dupwa pyao karaminyi.
AMO 6:6 Nakama ipwa waene sipyamuli pyuo nakondali pyuo mamba kyapingi ama keyange dupwa kiso kondali pyuo pipala Isaraele wambu dupwa isa pwaminyi lao mona rando larami doko kame kame soo kaelyaminyi.
AMO 6:7 Dopa pyuo karaminyi dokona lao nakama dupwa wambo kyawa nyuo yuu wakale mendena karapusi palya parami. Dopa pyuo paraminyi dokopa nenge andake nao pati lenge dupwa mee ingyuo paramopa naa nalapale, leya.
AMO 6:8 Kamongo Mupwa Andake Wakasa Ama Porai karenge dokome repe repe pii dapwa poraiyuo letamo. Isaraele wambu dupwa range mupwa lao suu pyao moŋo kyaŋe singi dokona nambame epe naso karo. Nakamana anda ama reeko keyange wakasa dupwa ipyalyo. Dokona nambame wambu dupwana taone andake mupwa dokope dee dokona bange silyamo dupwa peparaepe nakamana wambu yanda pimwai dupwa keta mairu, leya.
AMO 6:9 Akali akalisa anda mendakinya palirami ramo doko peparae kumuo otarami.
AMO 6:10 Akali mende kumasi seramo dokopa banya akali ree palu mendaki mendeme banya yongo doko malu pelana nyela epara. Epapala akali raiyoko mendaki dokome akali mende andakare yalu piro silyape lao kee lao kando lara. Akali mende mee karape panda daase? lara. Isingi pii mende lapala, Daa lara. Dokopa akali raiyoko mendaki dokome baa lamaiyuo, Pii laa napipi, lara, Namwame Kamongo dokona kingi lalana dokopa waso lamanale, lara.
AMO 6:11 Kamongo dokome pii laramo dokopa anda kuki epengepe peparae lalyuo buru bara para.
AMO 6:12 Mena ose kana andake dokona kapa makandengese? Akali dupwame mena bulamakaome yuu apu renge masene dokome ipwa kota doko pyao injingisi? Pii nara doko soo kaepala nakamame yulu mendaki dopaleko pilyaminyi. Nakamame rolenge renge dupwa minyuo mauli inginyi nembelyaminyi. Nakamame yulu rolae dupwa minyuo kyai dokona palyuo karaminyi.
AMO 6:13 Nakamame yanda pyuo mupwa ingyapala yuu taone Lotepa nyilyamano lao rae wakasa maiyuo nanga kapape lyuo karaminyi. Namwa rangena porai dokome yuu taone Kanaime doko nyiyamoko kande letaminyi.
AMO 6:14 Laminyipape Kamongo Anatu Porai Wakasa dokome pii dake letamo. Isaraele wambu dupwa nambame nakama ami rara wakale mende nyuo peyaronopa nakamana yuu dokona yulu andele lao nyuo palirami. Akali rara mende lyamo dokome nakama yuu Amate dulurena piso pyao ralyo pao yuu Arapa donorena suu lara, leya.
AMO 7:1 Kamongo Mupwa Andake Wakasa karenge dokome renge mende namba lasaka piyamo pii repa repa pyuo kandeyo. Kandeyono dokona akali yulu pingi dupwame rambi isoko kiŋi mairami dupwa pyakepo oteyami. Oteyaminyipa renge dokona rambi enenge kene piyamo dokopa Kamongo dokome aimbu malu mee peeyamo kandeyo.
AMO 7:2 Nambana pii repa repa piyu dokona kandeyo dokopa aimbu dupwa peparaeme yuu dokona isoko andeyamo dupwa peparae nao otanyi nembeyami. Nembeyaminyi dokopa nambame pii dopa leyo. Kamongo Mupwa Andake Wakasa karenge doko embame Isaraele wambu dupwana koo doko nyuo kame sakamipi. Nakama rara kuki dokona nakama keta porainya renge palya nange dokona nakama apa pipala lete wai pyao paramisi? leyo.
AMO 7:3 Dokopa Kamongo banya suu pingi alowa pipala dopa leya. Renge emba doo kandapinyi doko sipurao epa nara, leya.
AMO 7:4 Kamongo Mupwa Andake Wakasa karenge dokome renge mendeko namba lasaka piyamo kandeyo. Kandeyono dokona Kamongo dokome banya wambu dupwa isarena pyao yangalana rapa rapa piyamo kandeyo. Isare dokome yuu kokorena ipwa kota andake doko reyamo kandeyo. Rao epo yuu dake ralana kanda soo reyamo kandeyo.
AMO 7:5 Dokopa wambu dupwa rara ama kuki dokome poraya narami ingilyamo dokona apa pipala nakama lete wai pyao paramisi?
AMO 7:6 Dokopa Kamongo banya suu pingi doko kamba alowa pipala renge kandapi doko sipura narako, leya.
AMO 7:7 Kamongo dokome namba renge wakale mendeko lasaka piyamo kandeyo. Kandeyono dokona Kamongo doko anda dokona apya repeta roya kareya. Akali dupwa peparaeme anda puu minyuo rolae panda kyai lao kandenge puu ane kuki peteta doko minyuo anda pyaminde Kamongo dokome puu doko minyaro kareyamo nambame kandeyo.
AMO 7:8 Kamongo dokome namba piso soo dopa leya. Emosa emba aki bange kandelese? leya. Dokopa nambame isingi dopa leyo. Puu kame minyuo rolo pingi dokore mende kandelyo, leyo. Baame namba isingi langyuo, Nambame puu dokome nambana wambu dupwa anda apya ingyaro karenge rombo doko pyakuiyuo neta pumisa dokona nyepala lasaka pilyu. Wambu dupwana yulu koo dupwana lao nambame randa mairu. Mairunu doko nambana suu pingi doko kamba alowa pii nalu nao naro.
AMO 7:9 Yuu Aisakena wambu para pyasi dupwa nakamana misi lenge panda dupwa ukiaki minyuo Isaraele wambunya yuu yapasi dupwa kokwa soo piru. Nambame kiŋi Jeropome banya rara dupwa peparae pyao rembe naro, leya.
AMO 7:10 Yuu Betele range purisi akali Amasaya dokome Isaraele wambunya kiŋi Jeropome renge lapo paleyamo dupwa dopa pilyamoŋo lao lamaiyala pena lao wai nembeya. Emosa baame Isaraele wambu dupwa pipya embamoo yanda pimwai inginya lao dupwa kunji kunji pilyamo. Embame baa yuu dakena karena lao kaeyare ramo dokopa banya pii dokome yuu dake minyuo kwaeyaralyamo.
AMO 7:11 Pii dapa pyuo letamo. Yanda andake mende piraminyi dokona Jeropome baa kumara. Dokopa Isaraele wambu dupwa nakamana yuu yaki nyuo mendasa karapusi pyao lanyuo parami lao karamo, leya.
AMO 7:12 Dokopa purisi Amasaya dokome Emosa lamaiyuo, Poropeta, kapa lapeleneŋe. Epapu yuu Juta dokona range lano misi lao karala puu. Dokopa yulu dokona emba kingi kisarami.
AMO 7:13 Yuu Betele dakena poropeta pii kamba laa napipi. Renge doko kiŋinya misi lenge panda doko wambu peparaena tembole anda andake sipyamo pilyamo, leya.
AMO 7:14 Emosame pii isingi yano pyao dopa leya. Namba poropeta menge karaminyi dokore daa. Namba poropeta pii doko kana ropo pinya lao lenge dokore daa. Namba mena sipisipi dupwa isingi akali karo piki isa dupwa mondo lao iso karo pingi.
AMO 7:15 Namba nambana mena sipisipi isingi yulu dokona pyuo kareyonopa Kamongo dokome namba nyepala pii dopa lao langiya. Emba pao nambana Isaraele wambu dupwa pii jero dupwa lamaiyakala puu, langiya.
AMO 7:16 Dokona lao Kamongo baame dakepa apa letamo lao see leya. Embame poropeta pii laa nao karape lao dee Isaraele wambu dupwa pyalana pyuo laa napipi lao pilini.
AMO 7:17 Amasaya embame pii dake leene dokona epapu Kamongo dokome emba kando pii langilyamo. Embena enda doko kata barete dapwana pamuku yulu pyuo pisiramopa embena wane dupwa yanda pipala pyao kumaso embena yuu doko sukusa liti pyuo kunjo wambu wakale lapo maiyuo piraminyipa emba Anatu kingi soo laa nange yuu liti mendena pao kumare. Dopa pirinyipa Isaraele wambu dupwa pyao lanyuo pao yuu wakale mendena karapusi pyuo pirami, leya. Pisiki Minyasi Dokona Nenge Isa Jingi Rara Wakale Wakale Paleyamo Pii Repa Repa Pyuo Kandeya
AMO 8:1 Kamongo Mupwa Andake Wakasa karenge dokome pii repa repa pyuo pii mende kamba langiyamo siyu. Isa jingi pisiki minyasi dokona paleta siyamo kandeyo.
AMO 8:2 Kamongo dokome namba langyuo, Emosa emba aki bange kandelese? leya. Nambame isingi lao, Isa jingi pisiki minyasi mendena sipyasa kandelyo, leyo. Dokopa Kamongo dokome namba pii langyuo dopa leya. Isaraele wambu dupwa randa nyerami yuu gii doko epelyamo. Nambame Isaraele range wambu dupwa randa mairu. Dokona nambana suu pingi dee alowa pii nalu nao naro.
AMO 8:3 Yuu gii dokopa enda akalipi dupwa peparae kiŋinya anda pisiraminyi dupwa kenane pyao rae mai napala nakama ee lao kararami. Akali mange pukusi dupwa ranaro kararamo mumiko isu pyuo nyuo nembarami.
AMO 8:4 Nakama kale yukupala selapa. Nakamame bange yano pipyamo petaminyi dupwa nyuo kalyinyi palyuo yuu dokona wambu pendewa dupwa pyuo koo keta piso pilyaminyi.
AMO 8:5 Nakama range lanyi pyano dopa lao karaminyi. Yuu gii poo pyasi doko waiya lao paa nalepe dokopa namwana nenge dapwame minyuo kana nyemanale. Nenge dapwa waiya lao maketena nembamanale misi lenge gii doko anjukupa otara kandapisi lao suu pyao petaminyi. Dokona namwame bange dupwa kana namba ketae palyarama. Palyaramano dokona sikyali angi rolaena pii napala kyambo lao maiyuo wambu dupwa dereke pyuo bange ropo pinya lao kana nyerama.
AMO 8:6 Borete wasingi witi koole dupwa kana andake lao nyemanale. Kimbu suu kana penge dopale dinau nyepala isingi ropo pyalena saka nara akali dupwa namwame ropo pyao nyepala namwana kendemande ingyuo karena lamanale lao karaminyi.
AMO 8:7 Kamongo, Isaraele wambunya Anatu dokome pii kana minyuo lalu lao lao, Nambame Isaraele wambunya yulu koo dupwa kame see napala suu pyaro kararo.
AMO 8:8 Dopa pirono dokopa yuusili andake minyara. Minyaramo dokopa wambu yuu range dupwa peparae koo keta palyuo ee lao pisirami. Yuu dokona yuu muu dupwa peparaena yuusili andake minyara. Ipwa Naele andake ingyuo palipala pyao sepala enakana lyaneya doko suu pyao yuu doko ando ketae papala enakana isa para.
AMO 8:9 Yuu gii mende eparamo dokopa andawai korakama neta karara doko kaepala anda pao alemanji ingyuo yapa sii pyuo yalyinya laro. Korakama neta rao karenge gii dokopa yuu doko iminjo umi ami lena laro. Lao, Namba Kamongo Mupwa Andake Wakasa karenge dokome pii dake lapunu pilyamo, leya.
AMO 8:10 Nambame nakamana kanape ee kanape minyuo nenge yaowa nao mali lyuo pingi dupwa alowa pyuo wambu malu pyuo kumanda piso pingi yuu gii dokore ingyuo retakaro. Dopa pyuo rae maiyuo kenane pingi kenane dupwa alowa pyuo mona rando ee lenge yuu gii inginyi pyambwakaro. Enda akalipa wane mendaki iki doko nembarala piso ee palelyamo lengenyili pyuo larami. Dopa pyuo endangipa rakangepa kyawasi rokapala kumanda piso wapungi bange dupwa nyuo yanenge yambe pyao wapuo petengenyili pyuo pirami. Yuu gii dusipa kwao nyiki nyiki piramoko karo paraminyipa lumwa pira.
AMO 8:11 Yuu gii mende eparamo dokopa yuu dokona lopo sinya laro. Wambu dupwa loparami doko nenge ipwape lopa daa. Kamongo dokona pii doko nakama keta epa narasa doko ipwa nengepe ingyuo nanarami. Namba Kamongo Mupwa Andake Wakasa karenge dokome pii dake lapunu pilyamo.
AMO 8:12 Wambu dupwa yuu muu peparaena Kamongona pii soo nyelana koto paeyaraminyipa kapa pyuo kando nyii narami.
AMO 8:13 Yuu gii dusipana enda mapwae keyange dupwape akali parange porai dupwape peparae ipwa nanome kumapala malawai laramo pao palirami.
AMO 8:14 Dopa piraminyi dokopa wambu lapome yuu Samaria dokona kingimi wasisi anatuŋu lenge dupwa kando pii lalu lao lenge dupwa yuu Dane dokona anatu dokona kingi lao yuu Biasipa dokona anatu dokona kingi lao letamano lao lao karaminyi. Doo lao karaminyi dupwa kumarami doko dee lenge rao sipura narami, Kamongome leya.
AMO 9:1 Rendamu pingi kiso maingi bokote misi anda andakare singi dokona repeta Kamongo doko roya karapyamo namba kandapu. Karapala baame dopa leya. Tembole and dokona pote isa londe ketae dokona poraiyuo kusape palya. Dokopa anda doko peparae walu walu lena. Laramo dokopa pote dupwa peparae lalyuo lambuo palyuo laiyo palyuo pipala bolombalo lapala wambu dupwana kyawa dupwa pyao poro lapala nakama kumarami. Kumaraminyipa wambu menge lete pisiraminyi dupwa nambame yanda dokona nyuo kisaronopa kumarami. Dopa piramopa mendakipi mendali neta paa nana lao pyaro.
AMO 9:2 Akali lapome namba yaki nyuo pao yuwale kyaso ama kumungi wambu palenge dokona kando nyeramopape nambame nakama pao minyarapala nyero. Dee wambu dupwa yake panda pulyuo pao otaraminyipape nambame nakama isa ipyuo nyero.
AMO 9:3 Wambu dupwa yuu kyau Kamele lenge dokona ama ketae pao yalu piraminyipape nambame mee koto pao kando minyarapala nyero. Dee wambu dupwa ipwa kota kokorena yalu pirami ramo dokopa nambame kau andake mende ipwa dokona koko singi dokome nena laro.
AMO 9:4 Wambu yanda pimwai dupwame nakama nyuo lanyuo karapusi pela parami ramo dokopa nambame yanda pimwai dupwa lamaipala pyao kumasinya laro. Nambame wambu dupwa kokwa sinyi nembaro lao suu pyalu pyao pilyu. Nambame wambu dupwa nyisaro lao suu pyaa nalyo.
AMO 9:5 Kamongo Mupwa Andake Wakasa Ama Porai karenge doko banya kingi dokome yuu doko minyandelyamo dokopa yuu doko pyuku pyuku lenge. Dokopa wambu yuu dokona palenge dupwa mona rando ee lenge. Ipwa Naele palelyamo dokopa ando ketae papala panyi pilyamo dokopa isa pao lyanenge dopale ingyuo yuu muu dupwa peparae ketae papala enakana isa para.
AMO 9:6 Kamongo dokome banya anda doko yake panda dokona pingi. Pipala dokopa yake doko malawai lasi kyawa kuli dopale doko isa yuu dakena ketae pee pinyi palyiyamo piru karenge. Baame ipwa kota doko kee lao pulyuo nyepala dokopa kulimbanyi yuu dokona peenge. Doko banya kingi doko Kamongo lenge.
AMO 9:7 Kamongo dokome dopa leya. Isaraele wambu dupwa nakama nambame mondo lao suu pyao karenge dopaleko ingyuo Itiopia wambu dupwa suu pyao karapunu pilyamo, leya. Doko nakama yuu Isipi dokona peteyaminyipa nyuo lanyuo epeyo kande dokoko suu pyao nambame Pilisitia wambu dupwa yuu Kirita dokona peteyaminyi lanyuo epo Siria wambu dupwa yuu Kua dokona peteyaminyipa lanyuo epo piyu, leya.
AMO 9:8 Namba Kamongo Mupwa Andake Wakasa karenge dokome Isaraele wambunya Kiŋi dokome isingi yuu doko poraiyuo kando karo. Dokopa yuu dokona yulu koo dupwa palyuo simbwalyamo. Simbwalyamo renge dokona nambame nakama pyao kokwa soo nembalu nembo nembaro. Nembaronopape Jekopena ree palu dokona lapo kyawa minyaro.
AMO 9:9 Nambame Isaraele wambu dupwa makande pyuo kandaronopa koo dupwa ipwame soo nembengenyili pyuo nakama neta peyaro. Nambame yuu liti wakale dupwame nakamba makande pyuo minyalya minyana pyuo kandena laronopa kapa pali nange mee ruku raka pyuo kararami dupwa yapanyi nembarami.
AMO 9:10 Dokopa wambu yulu koo pingi nambana wambu pipya ruku raka pyuo karaminyi dupwame lao dokopa Anatumi namwa bange mendeme randa jinya laa nara lao kararami. Dopa laraminyipape wambu nyisu petenge dupwame yanda dokona nakama pyao kumakana laro, leya.
AMO 9:11 Kamongo dokome dopa letamo. Dapitinya rara dokona kiŋi yulu doko anda lalyisi kwaeyo singi dopakale ingyuo silyamo. Dokona lao yuu gii mende pyaka solopyamo dokopa anda lalyuo kwaeyasi isa andopaepe peparae minyalyingi dopale ingyalopyamo. Dokopa yuu wamba Dapiti kareyamo yuu siya dopale ingyara.
AMO 9:12 Isaraele wambu dupwa yanda pyuo wini pipala yuu Itome paki wamba nyiyami dokona paki opetae nyerami. Nyepala yuu wakale dupwa peparae wamba nambana ingyuo siya dupwa nyeramiko. Kamongo dokome letamo dokome pyaka sera.
AMO 9:13 Kamongo dokome dopa letamo. Yuu gii mende pyaka seramo dokopa nenge dupwa waiya lao andara. Andapala jingi malu lyeramo dokona akali dupwame peparae kapa manjo otalana saka narami. Ipwa waene dupwa peparae waiya lao andapala jingi malu mee lyeramo dokona waene wasingi wambu dupwame wasingi panda soo simbwarasa wasalana saka narami. Dokopa enda akalipi peparae waene rende pingi malu mee nakama keta sera. Doko yuu kyau dokona ipwa palyuo simbwapala potemo neta penge dopale ingyara.
AMO 9:14 Ingyaramo dokopa nambame nambana wambu dupwa nakamana yuu range wambo palenge dokona lanyuo eparo. Eparono dokopa yuu andape lalyisi dupwa range waso palirami. Palipala nakamame isa waene dee wara pipala jingi lyeramo dokome ipwa waene waso narami. Nakama ee dupwa pyuo wara pipala range manjo narami.
AMO 9:15 Nambame nambana wambu dupwa yuu range maiyunu dokona minyuo epo petena laro. Larono dokopa akali mendeme wambu dupwa kapa kamba neta ralinyi nemba nara. Kamongo nakamana Anatu dokome dopa lapusa pilyamo.
OBA 1:1 ...
JON 1:1 Anatumi akali Amitaena ikinyingi Jona lamaiyuo,
JON 1:2 Emba rapa rapa pipala taone andake Ninepa dokona pare, leya. Papala yuu dokona wambu yulu koo pyuo karaminyi laminyi doko namba sipu. Dupwa pii poraiyuo lamaiyala pare, leya.
JON 1:3 Dopa leyamopape Jona baa Anatunya pii leyamo doko yaki nyuo soo nembapala baa yuu Tasisi dokona panya peya. Baa pao yuu Jopa dokona peya. Papala sipu wambu piso papingi mende yuu Tasisi dokona panya pyuo siyamo pao kando nyiya. Kando nyepala sipu dokona kana rangeme pyapala dokona ketae pulyuo papala akali sipu dokona yulu pingi dupwa pipya role pyao piso yuu Tasisi dokona panya peyami. Dokona Anatu baame kanda naraŋa lao suu pyao pena peya.
JON 1:4 Peyamopape Kamongome porambaiye andake mende ipwa kota dokona minyiyamosa ipwa kota doko kasakole minyuo ketae epapala nakamba sipu paleta nyuo kapu kyalena piya.
JON 1:5 Dopa piyasa sipu akali dupwa pakame kumuyami. Kumapala nakamana anatu wakale wakale dupwame nyisinya lao poraiyuo loma siyami. Dopa sipu doko yaepena lao bange minyiyaminyi dupwa pyao ipwa kota dokona nembeyami. Dopa piyaminyipape Jona baa papala sipu koko donge siyamo dusa luu palu palyuo paleya.
JON 1:6 Dokopa akali sipu minyingi mupwa dokome baa dokona paleyamo kandapala dopa lamaiya. Emba akipamo luu palese? lao piso siya. Sipurapala embena anatu dokome nyisinya lao piso sinya. Mende pyuo baame namwa kondapala kuma nalamisi lao nyisaramo nakandena.
JON 1:7 Dokopa sipu akali dupwame nakama range lao dopa leyami. Namwa randa nyilyamano doko apinya renge mendena lao kandamanale. Namwana kingi pyapala bokote dokona palyamanale. Dokopa mendena kingi ketae eparamo akali dokona rengendena namwa randa nyimwalyamo lao kandamanale leyami. Dopa piyaminyi dokopa Jonana kingi doko kando nyiyami.
JON 1:8 Nakamame Jona lamaiyuo dopa leyami, Epapu embame namwa langipi. Apimi koo mende pipyasa dopa pilyape? lao pisiyami. Akipamo emba namwana sipu dakena epo pisane? Emba yuu anja rangese? Emba rara apinyisi? lao pisiyami.
JON 1:9 Dokopa Joname isingi dopa leya. Namba Ipuru akali. Nambame Kamongo Anatu yaka panda ketae karo isa yuu pandape dee ipwa kotape pyuo wasiyamo doko lakando loma singi.
JON 1:10 Dokopa baa Anatu yaki nyepala epeyamo doko Joname nakama lamaiyamo sepala sipu akali dupwa pakame kumapala Jona baa lamaiyuo, Embame yulu koo andake pipilyamo, leyami.
JON 1:11 Yuu gii dokopa porambaiye doko minyuo andakyapala nakama pyao nembalana piyasa dokopa sipu akali dupwame Jona lamaiyuo dopa leyami. Namwame emba apa piramanopa ipwa kota doko singinyili pyuo serase? lao pisiyami.
JON 1:12 Joname isingi lamaiyuo, Namba kupyuo nyepala ipwa kota dokona pyao nembalapape. Dokopa ipwa kota doko singinyili pyuo sera. Nambana renge dokona porambaiye andake minyapyamopa nakama randa andake nyilyaminyi doko namba silyu, leya.
JON 1:13 Sipu akali dupwa sipu dokona piso ipwa kota marenge dokona parama lao poraiyuo yulu pyuo peyami. Peyaminyipape porambaiye doko minyuo andakyamo dokopa nakama kapa pao kando nyerami ingya naya.
JON 1:14 Dopa piyamosa nakama Anatu lao ee andake leyami. Lapala, O Kamongo, namwa akali dake pyao kumalana suu pilyamano dokona namwa range kuma namanale lao emba piso silyamano. Embame namwa pyao kumungi dopale ingyuo randa jii napipi. O Kamongo embame namwa dopa pilapa lao lasaka pipi leyami.
JON 1:15 Dokopa nakamame Jona kupyuo nyepala ipwa kota dokona pyao nembeyami. Dokopa aopa porambaiye yasu lapala ipwa kota doko singinyili pyuo siya.
JON 1:16 Dopa piyamosa kandapala sipunya yulu pingi akali dupwame Kamongo pakame kumapala bange au pingipi rendamu pingipi lapo baa pyao kiso maiyuo banya yulu pyakamyuo kararama lao lalu lao leyami.
JON 1:17 Dokopa Kamongome oma kameya mendeme Jona mee nyuo goe lena leya. Dokopa korakama yuu gii remako dee kukwa remako Jona baa oma ingi dokona paleya.
JON 2:1 Oma dokona koko palyuo Joname banya Kamongo Anatu lao ateŋa piya.
JON 2:2 Ateŋa pyao dopa leya. O Kamongo namba keta randa ipyamo dokopa nambame emba pisapu dokopa embame isingi pyaka lao kumungi panda koko dokona palu nambame nyisa lao ee lapu dokopa embame nambana pii doko sipi.
JON 2:3 Embame namba nyuo koko isa pyambwapisa namba ipwa kota dokome koko kako pyapala nyuo yambe pyapya.
JON 2:4 Namba dopa lapu. Namba emba karene yuu doko yaki nyepala puu lapinyi dokona embena tembole anda poo pyasi keyange doko kamba kandarope daa?
JON 2:5 Ipwa kota dokome namba yambe pyalu pyao pyapya dokopa namba walu lapala kumalena pipu dee ipwa kota dokona isoko ipwa koko andenge dupwame nambana ayemba yaki pipya.
JON 2:6 Dopa pilyamo O nambana Kamongo Anatu namba lanyuo papala yuu kyau dupwana ama isarena kame kii palenge dokona saka nao kumungi panda dokona paleyo. Dopa piyunupape embame namba lete nyipi kandape, leya.
JON 2:7 O Kamongo namba repeta kumalena pipala dokopa emba suu pyao ateŋa lapu dokopa embena tembole anda poo pyasi keyange dokona karo sipi.
JON 2:8 Enda akalipi isa kanape kingimi wasapala anatu lao lakando karaminyi dupwa emba yaki nyuo kaelyaminyi.
JON 2:9 Dopa piminyipape nambame kenane pyao embena kingi minyalyuo bange rendamu pingi lapo yango jero. Pii lalu lao lapunuli pyuo piruŋu, leto. O Kamongo embame namwa pyuo lete nyingi renge jingi kandape, Joname dopa leya.
JON 2:10 Dokopa Kamongo dokome oma doko lamaiyuo, Jona baa kasinyi ipwa kota pete marenge dokona peena leyasa kasinyi peeya.
JON 3:1 Dee kamba Kamongome Jona lamaiyuo,
JON 3:2 Rapa rapa pipala taone andake Ninepa dokona papala pii langipu doko wambu dupwa polo lamairi, leya.
JON 3:3 Dokopa Jona baa rapa rapa pipala Anatumi leyamuli pyuo yuu Ninepa dokona peya. Taone andake Ninepa dokona pinjingi paki piso pao yuu gii rema nembo papala pinjingi pakirena pyaka singi.
JON 3:4 Jona baa kata nyuo pao taone andake dokona peya. Pao dokopa yuu gii mendaki nembo papala dokopa wambu yuu Ninepa range dupwa lamaiyuo, Yuu gii akalisa kisima epo paparamopa yuu dake pyao kokwa sinyi nembaralyamo, leya Joname.
JON 3:5 Dokopa enda akalipi yuu Ninepa range dupwa Anatunya pii Joname lamaiyamo doko soo nyiyami soo nyepala nakama peparae nenge naa narama, leyami. Dokopa wambu koo keyangepe dupwa peparae nakamana koo pingi dupwana lao suu pyao kondome kumuo komau wapungi doko wapupala nakamana koo pingi dupwana kondome kumulyamano lao lasaka piyami.
JON 3:6 Dokopa yuu Ninepa kiŋi dokome pii doko sepala banya kiŋinya petenge isa doko yaki nyuo roya karapala banya komau ketae pingi doko kolo nyiya. Nyepala nakama koo pipala kondome kumuo komau wapungi doko wapupala isare pete dokona papala baa pee piya.
JON 3:7 Baame Ninepa wambu dupwa pii wai nembapala dopa leya. Namba kiŋi dokomoo nambana akali mupwa dupwapeme pii dake poraiyuo letamano. Enda akalipi dee mena sipisipi bulamakaope peparae nenge ipwape naa nana.
JON 3:8 Dokopa enda akalipi dee mena rara dupwa peparae komau nakamana koo pipala kondome kumuo wapungi doko wapupala nakama Anatu poraiyuo suu pyao ateŋa lao dee enda akalipi dupwa peparae randa nao yulu koo pyuo karaminyi dupwa yaki nyuo kaeyalapape.
JON 3:9 Dopa piramano dokopa Anatumi banya suu pingi alowa pipala doko imbwa nara ramo doko namwa dee kuma narama, leyami.
JON 3:10 Dokopa Anatumi nakama yulu koo piyaminyi dupwa yaki nyepala keyange pyuo peteyaminyi kandapala nakama randa mairu leyamo doko dee suu pingi alowa pipala kaeya.
JON 4:1 Dopa piyamosa Jona baa rae mai napala wakasa imbumi kumuya.
JON 4:2 Dokopa Kamongo lao loma soo dopa leya. Namba ene anda yaki nyelana dokopa dake dopa piri lao laa nayope? lao Kamongo doko piso siya. Renge dokona namba kaepala yuu Tasisi dokona panya peyo, leya. Embame Anatu waa waa lao kondome wakasa kumungi doko namba siyu. Yuu peparae emba keta renge keyange dupwa ipyali lao enda akalipi dupwa anjiki pyuo mona reto karenge. Dee yuu peparae embena suu pingi alowa pyuo randa mairu lenge doko kaenge kandape leya.
JON 4:3 Lapala Kamongo epapu namba kumarole. Kumaro ramo doko manda raro, leya.
JON 4:4 Dokopa Kamongome isingi lamaiyuo, Embame dokona imbu karene doko kapa lao silisi? leya.
JON 4:5 Dokopa Jona baa yuu doko yaki nyepala yuu neta epenge dorena pao peteya. Baa anda kauwa kuki mende range pipala pau leyamo koko dokona piso yuu taone Ninepa doko apa pilyape lao kando peteya.
JON 4:6 Dopa piyamo dokopa Kamongo Anatumi Jona peteyamo dusa isa mende baa pau lao petena lao wai piya. Dokopa Joname isa wai doko kando rae wakasa maiya.
JON 4:7 Dopa piyamopape dee yangama neta pyakalyiyamo yuu gii dokopa Anatumi kau kuki mendeme isa doko nena leyamosa isa wai doko nao kyapuya.
JON 4:8 Dokopa dee Anatumi neta epenge kata dorena porambaiye isasa pingi mende minyiyasa Jonana ayemba doko netame rao makyapala lenge doko malawai lapala kumasi selana piya. Dopa piyamopa namba lete kararo doko kapako dokoŋo kumaro doko iki kapa lao suu pilyu, leya.
JON 4:9 Dopa leyamopape Anatumi baa lamaiyuo, Isa wai dokona lao imbuo karene doko kapase? leya. Leyamo dokopa Joname lao, Kinyi, dokona namba imbwualyo. Imbu arorome manjo kumaro, leya.
JON 4:10 Dokopa Kamongome Jona dopa lamaiya, Isa wai dake kukwa yuu gii mendaki ando karapala dee kukwa kyapwapyamo dokopa embame andena lao napinyipape isa wai kuki dakena emba mee kondalene.
JON 4:11 Doko suu pyao nambame taone andake Ninepa dokona kondome kumulyu. Renge doko taone andake dokona wane wanakepe kuli koo pii nange taosande ama malu (120,000) dee mena bulamakao ama malu dokona lao Anatumi ama kondome kumulyu, leya.
MIC 1:1 Akali Jotame Easa Esekayamoo dusipa Juta rara dokona kiŋi yulu pyuo kareyaminyi yuu gii dokopa Kamongo Anatumi akali Maeka yuu Moresete range doko pii lamaiyamo dupwa buku dakena pyasi palamo. Kamongo dokome pii dasipa yuu Samaria Jerusaleme dolapona ingyuo Maeka nolakao lamaiya.
MIC 1:2 Wambu peparae nakama pii dake selapape. Isa yuu panda karaminyi dupwa peparaeme pii dake selapape. Kamongo Mupwa Andake Wakasa dokome nakama koo pimiŋi lao banya yake panda tembole anda dokona karo, lara.
MIC 1:3 Kamongo doko banya yuu poo pyasi dokona piso epelyamo. Isa epapala yuu kyau ketae dupwana kata papira.
MIC 1:4 Papiramo dokopa yuu kyau moko kararamo dupwa rao lili lao ipwa ingyapala yuu lama lama dupwana kyau ipwa lyuo epele lao epara.
MIC 1:5 Yulu dopa piramo renge doko Isaraele wambu dupwame Anatu kando koo pyuo kamba lao karaminyi dokona ingyuo pira. Isaraele wambumi kamba lami dokona apinya rengendena pilyamo laramisi? Samaria wambu keta palamo. Api mendeme yuu Juta dokona mee bange anatu lao lakando koo pyuo karase? Jerusaleme wambu dupwame koo doko pilyaminyi.
MIC 1:6 Dokona lao Kamongo dokome letamo. Nambame yuu Samaria taone dupwa kokwa seronopa anda muku dokona isa girapo wara pyuo narami. Nambame taone kaname pisi dupwa pyao sinjimu ingyapala lama dokona kulimbwanyi nembaronopa susa kana dupwa iki sera.
MIC 1:7 Nakamana mee bange yapasi lapo anatu ingyuo retenge dupwa pyao kokwa soo inji ranji pyuo para. Bange peparae tembole anda dokona pamuku yulu pinya lao maimi dupwa isareme yango kokwa sinyi nembaro. Dopa pipala mee bange anatu lao kingimi wasisi dupwa pyao mee bange inginyi nembaro. Samaria wambu dupwame bange dupwa nyepala anatu lao pyuo karapala Anatu angi doko kando koo pyuo kareyami dupwa epapu nakamana yanda pimwai dupwame bange dupwa nyuo yuu wakale lapona paraminyipa anatuŋu lao misi lele lao kararami.
MIC 1:8 Dokopa Maekame dopa leya. Dopa pira dokona suu pyao namba ee lao ingi randarolyamo. Namba sakalyo lao nolako dokopa kimbu suu pii nao mee papara karo piru. Namba yana suwa kararope wua londe lenge dopale ingyuo lao yaka ulyakili pii ketae lenge dopale ingyuo ee poraiyuo ketae larolyamo.
MIC 1:9 Dokona lao Samaria wambunya randa dupwa kapa umbwa pii nara ingilyamo. Juta wambu dupwa randa mendare nyerami ingyapya doko epapu angi Jerusaleme kame kambu dokona sukusa nambana wambu palenge dokona oo pyaka silyamo.
MIC 1:10 Namwa nyuo isa palyuo kaeyasi petamano doko Gati wambu dupwa lamai nalapa. Ee lao petene laope kanda nana lao pisipwa. Wambu yuu Bete Leapora range dupwa mende pirami ingya nalyamo doko lasaka pyuo dokopa yuu sinjimu dokona kimu kiki pyuo bai bai pipwape.
MIC 1:11 Nakama yuu Sapia range dupwa papara elya nyuo yuu wakale mendena karapusi pyao lanyuo parami. Yuu taone andake Sanane palenge wambu dupwa pakapala neta epa narami. Nakama yuu Betesele wambu dupwa ee lao kumaralerale nyiyami kande doko sepala nakama range kana lambo mendena pao lyolo pii naramalyamo lao suu pyalapape.
MIC 1:12 Yuu Marote range wambu dupwa Kamongo dokome Jerusaleme nakamana yuu repeta doko randa maiyamo kandapala nakama manda rao kiiramo pumwali yaka lao ingi randayami.
MIC 1:13 Yuu Lakisi palenge wambu dupwa nakamana mena oseme ipyuo penge uliuli doko yapa lao kimbu selapape. Nakama Isaraele wambunya koo dupwa makande minyuo pipala Jerusaleme doko yulu koo pinya lao lasaka piyami.
MIC 1:14 Epapu Juta wambu dupwa nakama yuu Moresete Gati doko range sepe lalapape. Dokona lao Isaraele kiŋi dupwa yuu taone Akisipi dokome kapa nyisara ingya nalyamo.
MIC 1:15 Nakama Maresa wambu dupwa Kamongo dokome lao, Baame nakama minyuo pao yanda pimwai keta pyamalyeronopa yanda pimwai dupwa epo nakama pyao nembo nakamana yuu taone doko nyerami letamo. Dopa piraminyipa Isaraele kiŋi dupwa ralo pao yuu Atalame kana anda dokona yalu pirami.
MIC 1:16 Juta wambu dupwa nakamana wane wanake mona retenge dupwa suu pyao kyawasi angasipi pyao kumanda pisipwape. Nakamana wane wanake dupwa nyuo minyuo parami dupwana suu pyao nakamana kyawasi angasipi pyao yaka dopo yamanji akusuli doo pisirami.
MIC 2:1 Wambu luu palenge rate dokona piso yulu koo dopa pirama lao lao palyuo piso pilyaminyi dupwa nakama ingi rando pakarami. Yuu yangaramo dokopa nakama mende pirama lao lao palyaminyi dokona pilyaminyi.
MIC 2:2 Nakamame yuu mende mango nyimwali aiya lami ramo doko mee nyilyaminyi. Nakamame anda lapo mango nyimwali aiya lami ramo doko mee nyilyaminyiko. Dee nakamame wambu anda range dupwa pyao kokwa soo nembo bange dupwa minyarambu nyakamilyaminyiko.
MIC 2:3 Dopa pilyaminyi dokona lao Kamongome dopa letamo. Nambame nakama keta randa andake mende jero lao lao palyilyu dokona nakama mendali lete pao awa pii narami. Yuu gii dokopa nakama keta keyange ingya nao randa palira dokopa nakama keta rolae pingi lao suu pyao karaminyili pyuo kara narami.
MIC 2:4 Yuu gii doko eparamo dokopa wambu dupwame nakamana randa nyerami sinju arome pii doko sepala dokopa randa nyingi doko dopa pyuo nyingilyamo, larami. Lapala ingi kauwao kenane nombe nombe pisinyi pyambuo dapa lao pyarami. Namwa pyao uki palyalu palyuo palyiyami. Kamongo dokome namwana yuu doko nyiya. Nyepala baame wambu namwa anjo minyuo peyami dupwa maiya lao pyarami.
MIC 2:5 Dopa pipala enakana Kamongona wambu dupwana yuu doko range maira dokopa kamba rombo pyao nyerami yuu gii dokopa nakama mendepe nyii narami.
MIC 2:6 Wambu dupwame namba kando dopa langilyaminyi. Embame pii namwa kando langya napipi. Randa dokona lao namwa boo pyao langya napipi. Anatumi namwa kando awa narande daa.
MIC 2:7 Isaraele wambu dupwa kapa koo keta palirami lao silisi? Kamongo baa waiya lao imbwa nange doko kame sipyase? Baame letene dupwa kinyi pirase? Baame wambu yulu rolae pingi dupwa kando pii anjiki pyuo laa nangese? lao langilyaminyi.
MIC 2:8 Kamongo dokome isingi dopa letamo. Dopako dooŋo nakamame nambana wambu dupwa pyao yanda pimwai dopale ingilyaminyi. Nakamame pau lasi wambu yanda otapyamo lete ipwamano lao imi dokopa nakamana komau matarena ketae dupwa epo roko nyakamilyaminyi.
MIC 2:9 Nakamame nambana wambu dupwana enda dupwa nakamana anda mona retenge dokona pisiminyi pyao ralinyi nembo nakamana wane wanake mona retenge nambame nyisingi dupwa pyao kokwa sakamyuo pilyaminyi.
MIC 2:10 Yuu dakena nakama lete penge panda mende see nange waiya lao sipurao pupwape. Nakamana koo dupwana nakama pyao kokwa seramopa kando ingi randarami.
MIC 2:11 Akali mende dupwana papyuo poropeta karo angi mende pira ingyapyamo kando lete lao kyambo malu lao nakama keta waene biyape mee soo kakana para lapyamo poropeta doko kando wambu dupwame rae mailyaminyi.
MIC 2:12 Dopa piramopape nambame Isaraele wambu pyarepala pao karaminyi dupwa peparae nyuo pyasaro. Nambame nakama mena sipisipi ingyuo kame sukusa karo isakona karo pilyaminyipa lanyuo epenge doko suu pyao nakama lanyuo eparo. Nakamana yuu dokona wambu palyuo kete pyarami, leya Kamongome.
MIC 2:13 Anatumi nakamana kata wapwakamyuo karapusi pyao lanyuo peyami doko mokwapala nyisa nyuo nembara. Nakama taone andake kame kambu dowa dupwa pyao lalyapala mee nyisa epo parami. Nakamana kiŋi doko Kamongo Anatu dokome baa range kata lanyuo para.
MIC 3:1 Isaraele lita dupwa nakama pii dake selapape. Nakama yulu rolae yapasi dupwa pepengele doko kaepala
MIC 3:2 yulu koo dupwa mona maipala yulu keyange dupwa awa nalyaminyi. Nakamame nambana wambu dupwana yongo yanenge dupwa raka pyao nyakamyuo minju kuli dokona parara kando lao nyuo pilyaminyi.
MIC 3:3 Nakamame nambana wambu dupwa pyao nao otelyaminyi. Nakamana yanenge dupwa rekya lao kuli dupwa roo pyao minju dupwa kunjo kalomo mena minju sanana yangalana pingi dopale ingyuo pilyaminyi.
MIC 3:4 Nakama Kamongo kando ee larami yuu gii doko epelyamo dokopa ee laraminyipape baame nakama yulu koo pimi dokona nakamana ateŋa dupwa saka nara.
MIC 3:5 Poropeta lapome wambu dupwame kana jimi dokopa kyambo panga soo dopa letaminyi. Nakama mona seramo kararami, letaminyi. Wambu kana jii nami dupwa keta yanda sipurena lao karaminyi. Poropeta dupwasa kando Kamongo dokome dopa letamo.
MIC 3:6 Nakama dopa pyuo nambana wambu kando rapu pyaka nao kata koo lasaka pyakao karaminyi. Dokona nakama keta ene piramo dupwana pii repa repa pyuo kanda narami dee nakamame yulu dopa pira ingilyamo laope kapa laa narami. Poropeta dupwa nakamana yuu gii doko repe otelyamo. Nakamana yulu isa pao kaepyamo karaminyi.
MIC 3:7 Poropeta mendasipa ene mende pira larami doko pii naramosa dokona elya nyerami. Nakama peparae Anatumi isingi mende kotaraminyi doko mai narasa kopyali ingyuo saka narami, leya Maekame.
MIC 3:8 Saka naraminyipape Kamongo dokome namba banya Imambu dokome paka pyao soo porai renge joo pipya dokome kapa rolelyo lao silyu. Dopa pilyu dokome porayapala Isaraele wambu dupwana koo dupwa pano polo lamaiyakamiru.
MIC 3:9 Nambana pii dake selapape. Nakama Isaraele wambunya lita dupwa yulu koona lao rolenge dupwa awa nao yulu rolae dupwa nyuo alowa pipala koo inginyi reto karaminyi.
MIC 3:10 Wambu pyanyi malu palyuo yulu koo dupwa lao rola nao Anatunya taone andake Jerusaleme doko pilyaminyi.
MIC 3:11 Taone andake dokona lita dupwame panga soo bange nyelana lao palyapala iso karaminyi. Purisi dupwame kana nao sisi Anatunya mawa pii polo lamailyaminyi. Poropeta dupwame ene mende piramo duwpa kana jinya lao polo lamailyaminyi. Nakama peparaeme nakama keta Kamongo role pyao karamo, letaminyi. Nakamame lao, Kamongo doko namwa role pyao karamo. Randa dupwa namwa keta epa naraŋa letaminyi.
MIC 3:12 Nakamame dopa pilyaminyi dokona ingyuo yuu Sayone doko kwai mapu lapo pyasi sili lao yuu Jerusaleme doko ama pyao kokwa sinyi nembo dee tembole misi anda karenge dokona imwa palyuo pira.
MIC 4:1 Yuu gii ene eparamo dupwana yuu kyau tembole misi anda karamo yuu doko kamame ketaele ingyuo sera. Seramo dokona wambu rara wakale malu mee dupwa epo kararami.
MIC 4:2 Dokopa nakamana wambu dupwame lao, Kamongona yuu kyau ketae dokona mwua. Isaraele wambunya Anatu banya tembole anda dokona mwua. Namwa baame yulu pimili lao suu pilyamo dupwa mana langira. Baame namwa kata parami lao rombo palyakayamo dupwana parama. Kamongona mana pii dupwa yuu Jerusaleme piso epelyamo. Yuu Sayone piso banya wambu dupwa pii lamailyamo.
MIC 4:3 Baame wambu yuu muu ree lao bange arete pyuo akema lao langa lao karaminyi dupwa nyuo kui lao karara. Karapala wambu porai wakasa Isaraele role pyaa nao naneta karaminyi dupwape repeta dupwape kote lao yapalya yapana pira. Dokopa nakamana wua gela dupwa amame pyao rakyuo yuu apu renge ane isa inginyi pyambwapala kaku duwpa rakyapala kope pyakepenge bange waso pirami. Yuu muu wakale wambu dupwa dee kamba yanda pela paa nalu nao napala nakama yanda pela panya rapa rapape pii naramiko.
MIC 4:4 Wambu peparae manda rao mona seramopa nakama rangena isa girapope pikipi ee repeta palyuo mendena lao paka nao palyuo kararami. Anatu Kamongo Porai Wakasa dokome pii dake lalu lao leya.
MIC 4:5 Wambu rara wakale wakale dupwame mendaki lao nakama rangena anatu lenge dupwa lakando pii warombo serami dokopa namwa namwana Kamongo Anatu karalu karenge dokona pii warombo soo lakando karalu kararama.
MIC 4:6 Kamongo dokome dopa letamo. Nambame wambu randa maiyunu wambu wakale dupwame karapusi lanyuo peyaminyi yasu neyaminyi dupwa range sukusa nyuo pyasaro yuu gii doko oo epelyamo.
MIC 4:7 Wambu papae rambungi ingyuo anda nanesa karapyamo petaminyi dupwa nambame enenge ingyuo kanda soo wasaronopa nakama rara ama wakasa andake ingyuo para. Dokopa nambame yuu Sayone kyau dokona karo yuu gii dokopa piso kanda soo rapu piru doko pyuo karalu kararo, leya.
MIC 4:8 Dokopa nakama Jerusaleme wambu Anatu baa rangeme isilyamo dokona nakamana yuu taone andake mupwa wamba siyamo doko dee kamba mupwako ingyuo sera.
MIC 4:9 Nakama akipamo ee poraiyuo kaeyo letamisi? Akipamo nakama enda wane manjana mata pilyamo randange doko suu pyao ingi randalyamisi? Nakama dopa pilyaminyi doko nakamana kiŋi akali mende kara nao kanjili dupwa kumuo piyami dokona suu pyao ingi rando karamisi?
MIC 4:10 Jerusaleme wambu dupwa enda wane manjana nenge sisi pyao ee lenge doko suu pyao ee poraiyuo lalapape. Epapu nakama yuu taone andake doko yaki nyuo pao yuu mee langa pau dupwana palirami. Nakama yuu Bapilone parami. Dopa pyuo yuu dokona yanda pimwai dupwame pyalena piraminyipape Kamongo dokome nakama kiiramo nyeramo eparami.
MIC 4:11 Wambu rara wakale malumi nakama pyalena elyambu pilyaminyi. Nakamame lao dokopa Jerusaleme doko kokwa soo pupyali yaka lao letaminyi. Namwame yuu doko pyao kokwa seramo kandamwali yaka letaminyi.
MIC 4:12 Dopa laminyipape wambu rara dupwame Kamongona lao suu pyapyamo doko see nalyaminyi. Dopa pipyamopape nakama mendakinya nyuo malu palyapala randa maiyuo lisi ingyuo minyuo gisimu gasimu laro lao suu pyapyamo doko see nalyaminyi.
MIC 4:13 Kamongome dopa letamo. Jerusaleme wambu dupwa nakamana yanda pimwai dupwa randa nenge kyai ane isa dopale manda manjo wasanyi pyambwaro. Nakamame wambu rara malu anamasi minyinyi palyuo kararami dokona nakamana bange dupwa peparae nambana ingyuo dee Kamongo yuu muu peparaena ingyuo karamo dokona ingyara.
MIC 5:1 Jerusaleme wambu dupwa nakamana yanda pepengele akali dupwa nyuo malu palyalapa. Namwa pyalena nyuo kako pyapelyaminyi. Kako pyapala Isaraele wambunya akali lita doko pyalena pilyaminyi.
MIC 5:2 Yuu Juta dokona Beteleme Eporata taone ama kuki ingyaramopape nambame nakama range sukusa dokona mende Isaraele wambu rapu pirande rombo palyuo nyero. Banya rora ambasupi dokona wamba malu mee karo peyami dokonandeme rapu piraŋa lao rombo palyaro.
MIC 5:3 Kamongome banya wambu dupwa nakamana yanda pimwai dupwa keta maipala kaeyaramo pao enda mende wane manjira ingilyamo doko angi manjira gii doko pyaka sera. Dokopa banya rara dokona lapo anjisi yuu wakalena karaminyi dupwa dee rangena wambu dupwa pipya karengenyili pyuo pyasapala range kararami.
MIC 5:4 Baa eparamo dokopa porai renge Kamongo keta palenge dokomepe Kamongo Anatu kamame mee mende nyilyingili karenge doko baa range keta eparamopa dolapome nyuo rapu pyuo karara. Banya wambu dupwa koo keta pali nao lete kararami. Dokona lao wambu yuu muu ree lao peparaeme banya porai andake wakasa doko soo gisaraminyipa banya mona kyuu lao singinya renge doko maira. Dokopa Asiria wambu yanda pimwai dupwame epo namwana yuu doko ama pyao kwaenyi nembala eparami dokopa namwame namwana akali lita porai dupwame yanda pela pena lao nembarama.
MIC 5:6 Nembaramanopa nakamana yanda kaku wuape dokome porayapala yuu Asiria doko nyuo isa palyarami. Asiria wambu dupwame namwana yuu doko pyao uki palyamwali lao pirami dokopa dopa pyuo pyapala namwa nyiso kyawa lete nyerami.
MIC 5:7 Isaraele wambu palyuo karalu kararami dupwa pipyaeme manda rao mona kyakange dopale ingyaramopa Kamongome rara wakale dupwa keta nyisala pena lao nembara. Dokopa nakamame mee akali yaki nyepala Anatu keta kamba kamba serami.
MIC 5:8 Isaraele wambu lapo yuu wakale dupwana mende yaka yaka lao mena laene nenge koto isako imwa dupwana paenge dopale ingyuo paeyo kararami. Nakama mena sipisipi kararami dupwana sukusa pao kararaminyipa pyakala lambwapala kapuso nyepala nao rokwalya rokwana pinyi nembarami. Mendeme nyisara lao suu pyaa narami.
MIC 5:9 Dopa pyuo Isaraele dupwame nakamana yanda pimwai dupwa pyao isa palyuo kokwa soo nembarami.
MIC 5:10 Kamongo dokome lao, Yuu gii dokopa nambame nakamana mona mena ose dupwa pyao nembo mena oseme ipyuo penge uliuli dupwa pyao kokwa soo nembakao piru, letamo.
MIC 5:11 Nambame nakamana yuu taone dupwa pyao kokwa soo yanda lome yanda karenge kame dupwa pyao lalyinyi nembo piru.
MIC 5:12 Nambame nakamana isako yalu pyuo wara pyuo wambu lao pingi dupwa pyuo kokwa soo uki palyakao nakamana pipuli wambu dupwa mende pyarepala paa nana lao piru.
MIC 5:13 Nambame nakamana semango lao mee isa lapo wasapala lakandenge dupwa pyao kokwa soo nembaro. Nembaronopa bange rangena wasisi dupwa dee lakanda narami.
MIC 5:14 Nakamana yuu dokona mee bange enda anatu kingi Asera lenge dopale wasisi dupwa pyao lakao palyuo nakamana yuu taone andake dupwa pyao inji ranji pyuo kokwa soo nembaro.
MIC 5:15 Namba ama imbumi kumuo karo wambu rara nambana pii rape rape lao pii nalyaminyi dupwa pyapala yano nyero, letamo.
MIC 6:1 Kamongo dokome Isaraele wambu pipya makapala koo kandale lao pii lara doko selapape. O Kamongo, sipurapala embena renge palamo doko laa. Larene dokopa yuu kyau kuki andakepe dupwame pii larene doko sinyale.
MIC 6:2 Yuu kyau isa yuu dokona susa pyao sulu singi dupwa Kamongona pii laramo doko selapape. Kamongo dokome banya Isaraele wambu dupwa pipya koo kando lalana suu pilyamuli pyuo lara.
MIC 6:3 Kamongo dokome dopa letamo. Nambana wambu dupwa nambame nakama pipya apa pipu? Nambame apa pyuo nakama mona kendanyi pyambwapusi? Isingi langyalapape.
MIC 6:4 Nambame nakama Isipi piso minyuo epeyo. Nambame nakama kendemande yulu pyuo kareyaminyi kiiramo nyiyu. Nambame Mosesemoo Eronemoo Miriamemoo dusipame nakama lanyuo paramiŋi lao peeyakayo.
MIC 6:5 Nambana wambu dupwa nakama keta kiŋi Beleke yuu Moape range dokome mende piruna lao lao palyiyamopa Belame Beona ikinyingi dokome baa isingi apa lamaiyape lao suu pyalapa. Dee yuu taone Akasiya dokona piso pao yuu Gilikale panya penge kata dokona yulu mende piya kande doko nakama masalapapeko. Yulu dupwa suu pyapala nambame nakama keta apa pyuo lete nyelana mende piyu doko soo gisarami.
MIC 6:6 Nambame Kamongo Anatu yake panda karengedoko lakandala pao dokopa aki bange minyuo pao mairusi? Nambame mena bulamakao ikyane ama keyange minyuo epo kiso mairusi?
MIC 6:7 Nambame mena sipisipi taosande malu minyuo epo maiyuo dee isa olipi ipwange ipwa ingyuo guu lao karalu karena lao soo kaeyo minyuo epo maiyuo piru ramo Kamongo dokome doko kando rae mairase? Dee nambana wane mupwasa doko nambana koo dupwana suu pyao nyuo kame sakana lao mairusi? Doko daa.
MIC 6:8 Kamongome keyange doko anjuku lao langipya kandapi. Dokona nakama keta yulu pimili lao suu pilyamo doko dakeŋe selapape. Yulu rolae yapasi dupwa pyuo nakamana mona retalu reto retenge doko lasaka pyuo nakamana Kamongo dokona inyimungu rape rape lao karo pirami.
MIC 6:9 Kamongo doko andake lao pakao kararami ramo doko mona palyuokondali pyuo kararamisa pira. Kamongome wambu yuu taone andake dokona palenge dupwa kando dopa lao kee letamo. Selapape. Nakama wambu yuu taone andake dokona elyambu pilyaminyi dupwa.
MIC 6:10 Akali yulu koo pingi dupwana anda dupwana kanape mee bange andakepe kyambo lao panga soo nyuo retelyaminyi. Nakama ropo pingi dokopa make angi dokona palya nao kana nyilyaminyi. Yulu dopale doko namba awa nange.
MIC 6:11 Akali dopa pyuo kopetame sikyali pyuo ropo pingi dupwa kapa nyuo kame sakamirase?
MIC 6:12 Nakamana akali numi dupwame wambu pendewa dupwana bange dupwa mee nyakamyuo kamame pendewa panyi nembo taonena palaminyi dupwa peparae pii kyambo lenge.
MIC 6:13 Dokona lao epapu nambame nakamana koo dupwana suu pyao nakama kanda soo pyao uki palyuo kokwa soo nembalana pyano.
MIC 6:14 Nakama nenge naraminyipape sikya pii napala mee yango nano nano piramo kararami. Nakamana pinji dupwa nyakarami lapala soo pelyamano lao paraminyipape kapa wai rombo nyii narami. Pinji lapo range nyuo parami dupwa nambame yanda pipala pyao kokwa sinya laro.
MIC 6:15 Nakama ee wara piraminyipape angi doko naa narami. Isa olipi ipwange kingyuo kamwaraminyipape range kapa mamba doko yanga narami. Dee waene ipwange kingyuo kamwaraminyipape angi doko kapa naa naramiko.
MIC 6:16 Nakamame kiŋi Omiripa banya ikinyingi kiŋi Ayapepa dolapona yulu koo dupwa moko minyuo pilyaminyi. Nakama nakambana pii leyambinyili pyuo kaeya nao pyuo puu pao pelyaminyi dokona nambame nakama pyao kokwa seronopa wambu menge yuu mure lao dupwa peparaeme nakama kilya kando gilya giyana pyuo lena lao piru.
MIC 7:1 Mona kare kare kara nalyo. Namba akali mendeme lopapala isa dupwana jingi lyilyape lao kandelyamo lyii nao isa girapo dupwana jingi lyii nalyamo kando pingi dopale ingilyamo. Doo girapo jingipi piki jingi rende pingipi dupwa peparae lyuo otami.
MIC 7:2 Akali yulu rolae pingi mende yuu dokona kara nalyamo. Mendeme Anatu warombo serami ingya nalyamo. Nakama peparae kumuo oteyami. Wambu peparae pyao kumalena yuu gii angi mende pilyape lao isilyaminyi. Nakama pepareme yango dupwa pyalena lao koto karaminyi.
MIC 7:3 Nakama peparae yulu koo dupwana pinya ama mora piso otasi karaminyi. Akali mupwa dupwape kote singi dupwapeme yulu koo dokona panga soo nyisamana kana jinya lao nyakamyuo karaminyi. Akali andake dokome lao dokopa, Dopa pimili lao suu pilyu, lapyamo dokopa menge dupwa pipya wato lao petaminyi.
MIC 7:4 Lapo ama keyange pyuo karamano lao suu pilyaminyi dupwape dee lapo rolae wakasa pyuo karamano lao suu pilyaminyi dupwape mee kapa pali napyamo ipi pyuo pyuo karaminyi. Yuu gii Anatumi wambu dupwa randa mairu lao poropeta akali dupwa keta repe repe pii lao reteyamo doko epapelyamo. Nakama dokona apa pimwane lao suu pyao saka nalyaminyi.
MIC 7:5 Embena anda maki palenge dokope embena puu minyingi dokomepe pii langirami dupwa angi lapo langilyaminyi lao suu pyaa napipi. Dee kamame embena etene dokope kandokondali pyuo pii waso lamaipi.
MIC 7:6 Yuu gii pyaka seramo dokopa ikinyingi dupwame rakange dupwa kopyali inginyi nembo wanenge dupwame endangi dupwa kando mata rukyuo pyao enda dupwame ayangepa sisi nyuo pirami. Akali mendena ree palu mendaki dupwa banya yanda pimwaiko ingyarami.
MIC 7:7 Dopa piraminyipape nambame Kamongo kandaro kararo. Namba mona porayapala Kamongo dokome namba pyuo nyeramo doko keta isaro kararo. Nambana Anatu dokome nambana pii sera.
MIC 7:8 Namwana yanda pimwai dupwame renge mende pali naramopa namwa kilya kando gilya giyana pyuo rae maiya nalapape. Namwa koo keta papalape dee keyange keta palirama ingilyamo. Dopako pyuo namwa dakepa iminjingi dokona karamano doko Kamongo dokome yanga paupau lenge renge jera.
MIC 7:9 Namwa Kamongo kando koo piyamano dokona banya imbu singi doko namwa keta kapa popokau laramo nyemanale. Nyeramanopa enakana baame namwa kando koo piminyi dupwa nyuo rolakao nyiso pira. Dopa pipala baame namwa yangenge dorena nyuo pisaramo namwa rangeme nyiso kyawa minyara doko kandaramako.
MIC 7:10 Dopa piramo doko kandapala dokopa nambana yanda pimwai dupwa elya nyerami. Wamba dokopa nakamame namba piso soo male male lao, Embena Kamongo Anatu doko anja karamo? leyami. Leyaminyi dupwa rengya kata dokona wara ingyuo kalyuo pyarakwuarami ingilyamo.
MIC 7:11 Jerusaleme wambu dupwa yuu taone andake dokona kana kame kamba pirami yuu gii doko epelyamo. Yuu gii dokopa nakamana yuu doko dumbili dumbili lao konda pyuo nyerami lyakande.
MIC 7:12 Yuu gii dokopa nakamana wambu yuu Asiria dulurena petaminyi dupwape yuu Isipi donorena petaminyi dupwape ipwa Yuporisa repeta petaminyi dupwape dee ipwa kota ama londeta repeta piso palyuo pao kamame yuu kyau naneta pelyaminyi wambu dupwape peparae range sukusa epo pyasarami.
MIC 7:13 Dopa piraminyipape wambu yuu dokona palaminyi dupwame yulu koo pilyaminyi dokona lao yuu doko penda penda ingyuo para.
MIC 7:14 Kamongo, embena wambu yapo rombo palyuo nyiinyi dupwana emba rapu pingi akali karape. Nakama yuu muiyane dokona palyuo karaminyipape paki pakipi yuu elyape sipyamoko palaminyi. Yuu Besane yuu Giliatepe nenge singi yuu dolapona wamba piyaminyili pyuo nao palyuo karala pena lapili yaka.
MIC 7:15 Kamongo, wamba yuu Isipi doko yaki nyuo epeyamanopa yulu kanda nange yamarangwaramili lapo pii kande doko suu pyao dakepa pyakape.
MIC 7:16 Yuu muu dupwana wambu porai karamano lao suu pilyaminyi dupwame yulu doko dopa pirinyi kandapala elya nyerami. Nakama kambu upi lapala kalepoe karele larami.
MIC 7:17 Nakama rombame kata wapuo yuu dokona kau ingyuo nakamana yalu pyuo pisiraminyi panda doko yaki nyuo neta walu walu lao eparami. Nakama pakame kumuo namwana Kamongo Anatu doko keta kapu kyuo eparami.
MIC 7:18 Kamongo emba yale anatu mende kara nalyaminyi. Embena wambu mee kumapa nao lete karaminyi dusipana koo dupwa nyuo kame sakamilini. Emba mee imbuo karalu kara napala embena mona retalu reto retenge renge doko namwa keta lasaka pingi.
MIC 7:19 Embame namwa deeko kondo sakao nyiso karare. Embame namwana koo dupwa yuu dokona kalyuo minjiku minyapala kota pete yalu dokona nembare.
MIC 7:20 Embame embena yulu keyange pyakao karalu karenge dokope embena mona retalu reto retenge renge dokope dolapo embena Isaraele wambu Aporakame Jekopepena para pyasi dupwa lasaka piri. Wamba namwana rora ambasu dupwa dopa piruŋu lalu lao leeneli pyuo lasaka pirisa pira.
NAH 1:1 ...
HAB 1:1 Poropeta Apakukumi Kamongo Anatu baa keta epo nolakayamo kandeya dokona lao pii palamo.
HAB 1:2 O Kamongo, Namwa randa andake nao karamano dokona yuu akipare nyisa lao kee laro dokopa sepala namwa nyisarese?
HAB 1:3 Akipamo namba randa dupwanako lenge lenge rao kara, letese? Embame dee apa pyuo koo dupwa pyuo karena lapala mee kando karese? Pyao kokwa singi yulupi randa dupwape namba karapu dokona minyuo buale minyuo laiya lao pyakando pyuo epelyaminyi.
HAB 1:4 Mawa pii dupwa angi ingya napala kote pii dupwa rolae laa nalyaminyi. Kote rolae doko nyuo kapu kyepala akali koo pingi dupwame yulu rolae doko nyuo anamasi minyilyaminyi.
HAB 1:5 Kamongome banya wambu dupwa lamaiyuo dopa leya. Nakamame wambu rara wakale nakamana parali maki ingyuo palaminyi dupwa kandalapape. Nakama kararami gii dusipana yulu mende piru doko mendeme langyuo rolara ramo doko nakama kinyilyamo lao suu pyaa narami ingilya kande.
HAB 1:6 Bapilone wambu poraiyuo kaepala kui lao kara nange dupwa lanyuo epelyo. Epelyo dupwa yanda lakao epapala wambu dupwa pyao anamasi minyalominyi.
HAB 1:7 Nakamame Anatunya mawa pii kamba lao karenge dokopa wambu dupwame kando pakame kumuo karaminyi.
HAB 1:8 Dokopa nakamana mena ose dupwame mena lepete dupwa nyuo enakao makandenge. Makandapala lopapala nalana pingi dopale ingya napala kamame nalana wakasa pingi. Dopa pilyamopa nakama nanesa dupwame mena ose matana piso waiya lao pyala epenge. Yaka kambeme kinjipa pongo pyapala nyingi dopale ingyuo nyela epelyaminyi.
HAB 1:9 Nakamana yanda singi dupwame wambu dupwa pyao kumakala epelyaminyi. Epelyaminyi dokopa wambu dupwame kando pakame kumulyaminyi. Wambu puu maiyuo lanyuo eparami dupwa ipwa kee ingyarasa kando yaka lalana saka narami.
HAB 1:10 Nakamame kiŋi akali dupwape kamongo yulu andake pingi dupwape kilya kando giyalya giyana pyuo lenge. Wambu epa nana lao kana kame londe pingi dupwana panya saka naa nange. Nakamame mee yuu kyaso reto ketae nyepala yalala sukusa papala yuu andape mee nyingi.
HAB 1:11 Rangena porainya renge anatuŋu lao lakandenge akali dupwame porambaiye dopale ingyuo waiya lao epo penge.
HAB 1:12 Kamongo emba ene lokoyamopa baa Anatuko karee. Emba nambana Anatu poo pyasi lete karalu karenge. Kamongo nambana Anatu namba kyawa minyuo karenge dokome Bapilone wambu dupwa namwa randa jinya lapala porainyi pyambuo rombo palyuo pii.
HAB 1:13 Embame akali koo panga singi dupwa akipamo mee pyuo karena lapala kando karese? Embena lenge ama poo pyasi keyange dokome koo dupwa kandare ingya nange. Wambu yulu koo pingi dupwa embame epe kanda nange. Dokona akipamo yulu koo pingi wambu dupwame wambu yulu rolae pingi dupwa kokwa sinya lapala romo napyuo karese?
HAB 1:14 Aki rengendena wambu dupwa kau oma ingyuo galu aimbupi ingyuo nakamana lita kara nange ingyuo pyao nembapala kaelese?
HAB 1:15 Bapilone wambu dupwame wambu dupwa kau oma sinyana malyuo nyingi doko suu pyao oma ingyuo waiko nyingi. Nyuo nyuuna palyapala ipyuo pao dokopa dopa pyuo nyimwa lao rae maiyuo wamya lyingi.
HAB 1:16 Dopa pipala nakamame nakamana oma nyingi sinyana dupwame oma keyange dupwako nyuo jingi lapala bange rendamu pingi dupwa kiso maiyuo lakandenge.
HAB 1:17 Dopa pyuo karo dokopa nakamame wua gela dupwame yuu peparae minyaro karo wambu dupwa konda nao pyao uki palyuo karalu kararamisi?
HAB 2:1 Nambame Kamongo kando mumu lao lamaiyunu dokona isingi yano pyao apa lape langilyape lao kando isaro kararo.
HAB 2:2 Dokopa Kamogome isingi dopa langiya. Namba emba keta epo nolakaro dupwana lao pepa pyao retare, leya. Retarene dokome awa awa pyuo yaka larami.
HAB 2:3 Pii langiru doko aopa pyaka see nara ingilyamo dokona lao pepa pyao retare. Angi yulu pira lao lasaka pirunu doko waiya lao pira. Piramo doko mona palyuwale epelyamo lao masere. Maserenepape kaeya napala isaro karare. Nambame yuu gii retelyo dokona pira. Yuu gii retelyo dokona ama papu pii nara.
HAB 2:4 Dake pii angi doko wambu yulu koo pingi doko lete kara nara. Kara naramopape mendali Anatu baa kapa ingingi lao suu pyara dokome Anatupa rolae ingyuo karara dokome baa lete para ingilyamo, leya.
HAB 2:5 Bange malu dokome suu pingi pauli pyuo nyingi. Nyipuli nyipuli lao karenge akali dupwa nakama wakasa lao suu pyao lambo lao kara nange. Kumungi renge doko mendena pyakambwara pyakambwara pingi doko suu pyao nakama rangeme sisu lao yuu rara wakale mende pyao anamasi minyuo mende pyao anamasi minyuo pingi.
HAB 2:6 Wambu pyao anamasi minyasi dupwame wambu pyao anamasi minyingi dupwa kando elyanyi pyambuo pii dupwame nakama kilya kando larami. Nakamame dopa larami dokopa bange wakalemana dupwa waa nyilyaminyi. Nyepala nakama kwaeyo pelyaminyi. Yuu gii akipare nakamame wambu nakamana yano retakange dupwa pyalena pyuo yano pyakana lapala bange dupwame nakama kamonganyi nembo kararamisi?
HAB 2:7 Wambu wakale dupwa nyuo anamasi minyamwa kandapi lao kamenge kararaminyipa wambu wakale dupwame nakama bange lapo yano retakamirami dupwana nakama pyalana pipala bange lapo matana piso jelapa, larami. Nakamana yanda pimwai dupwame epo nakama paka renge jepala yuu doko pyao kokwa soo apa narami.
HAB 2:8 Nakamame wambu peparae pyao randa andake maiyuo piyaminyi dokona lapo lete karaminyi dupwame nakamana yuu pyao apa narami.
HAB 2:9 Nakama kumarami. Nakamame wambu pyapala bange nyiyami dupwame nakamana ree palu dupwa kamongolyaminyi. Nakama anda nakamana dupwana randa epa nana lao mondo leyami.
HAB 2:10 Nakama rangeme yulu pirama lao rapa rapa piyami dokomeko range nakamana ree palu dupwa pyao kokwa sinyi nembamisa nakama elya nyilyaminyi. Wambu rara malu pyao kokwa siyami dokome nakama range keta ukiaki minyilyaminyi.
HAB 2:11 Dokona nakamana kana kame piro karamo dupwame nakama laiya langirami. Laiya langiraminyipa poponge dokome pulyambana isa dupwana wuambalombalo papipala pii larami dupwa palenda ingyara.
HAB 2:12 Yulu koo pyuo wambu pyapala yuu taone mende wasiyami dokona nakama kumarami.
HAB 2:13 Wambu nakamame nyuo anamasi minyiyami dupwa mee nakamame kumuo yulu andake piyaminyipa angi piyami dupwa isareme rao ote piya. Doo piyamo doko Kamongo Porai Wakasa dokome piya.
HAB 2:14 Kota pete doko ipwame soo simbwange doko suu pyao Anatunya soo nyinginya renge yanga paupau lenge dokome isa yuu dokona soo simbwara.
HAB 2:15 Nakama kwaeyalu kwaeyo kwaeyo pelyaminyi. Nakamana imbu singi dokome wambu nakama parali maki palenge dupwa randa maiyuo pyao pendewa nembeyami. Nembapala ipwa biya nenge akali ingyuo pyao bembai lanyi nembeyami.
HAB 2:16 Nakama lakanda minya minya piyaminyi karaminyi doko alowa pipala elya nyuo kararami. Nakama Anatunya randa doko rangeme nyepala bembai lao isa parami ingilyamo. Kamongome randa renge doko ipwa ingyuo keko pyakaramo naraminyipa mendeme ketae nembelyaminyi dopa pii naraminyipa elya nyuo kararami.
HAB 2:17 Nakamame Lepanone imwa dokona isa dupwa pokoyami doko suu pyao nakama poko pyarami. Nakamame mena suwa dupwa pyao kumakayami. Epapu mena suwape dupwame nakama nalana pyuo paka renge jerami. Nakama randa jerami renge doko nakamame wambu pyao kumakao dee wambu yuu taonena palenge dupwa randa maiyuo piyami dokomeko nakama isingi randa doko narami.
HAB 2:18 Bange kingimi wasisi anatu ingyuo suu pilyaminyi dokome aki dokona nyisilyase? Akalimi mee iki wasiyami dokome pii mende emba langya napala kyambo yeelyo langingi. Akali banya bange pii laa nange anatu lao wasiyamo dokome range kinyi lao sinya lapala aki yulu keyange mende pingisi?
HAB 2:19 Nakama randa nao kumarami. Nakama pii laa nange isa doko lenge raa lao kana pii laa nange doko sipurena letaminyi. Bange kingimi wasisi dokome nolako langingisi? Kana golo kulingipi dupwame bange wasisi dupwa ketae kalya pyuo mamba yangelyaminyipape nakama keta letena renge mende pali nange.
HAB 2:20 Kamongo baa banya misi anda poo pyasi dokona karenge. Dokona isa wambu peparaeme banya lenge kambu dokona koo pyuku pyuku paramo karena.
HAB 3:1 Dake poropeta akali Apakukumi ateŋa leya doko.
HAB 3:2 Kamongo embame yulu pii doko kando siyu. Sepala namba yamarangyuo karo. Yulu andake pinginyili pyuo namwa karamano dakepa pipi. Imbu piya kandepe namwa sako karape.
HAB 3:3 Anatu baame yuu Itome karo kamba epelyamo. Anatu poo pyasi doko baa yuu kyau Parane dokona karo epelyamo. Banya yanga paupau lenge dokome yake doko kako penge. Dokona isa yuu dokona karo baa ketae pyambuo lakandelyaminyi.
HAB 3:4 Kamongo Anatu baa yanga paupau lao yuu pele ingyuo epenge. Banya kingi kape dokona piso yanga paupau lao epenge. Bange porainya renge doko banya kingi kape dokona yalu piru karenge.
HAB 3:5 Anatu baame yanyi pingi doko wambu keta pena lenge. Enakana kumungi renge doko pena lenge.
HAB 3:6 Lao karo otapelyamo dokopa yuusili minyingi. Baame lengeme kandelyamo dokopa wambu dupwa walu walu lenge. Yuu kyau sulu singi dupwa longwalya longwana pinya lenge. Pilyamopa yuu kyau baa wamba papyuo kareyamo dokopa siyamoko singi dupwa purukwo ranenge.
HAB 3:7 Namba Kusane range wambu dupwa pakayaminyipa Mitiane wambu dupwa pakapala walu walu lao karo piyaminyi kandeyo.
HAB 3:8 Ipwa dupwame Kamongo emba imbwanyi reteyamisi? Ipwa kota dokome embena imbu singi nyakayase? Emba kopa dokona piso epo apu milirandakuna doko embena mena oseme ipyuo minyuo penge uliuli ingyuo ralipinya lapala embena wambu dupwa dolona pyao anamena lao nyisii.
HAB 3:9 Embame embena yanda dokome pyalana rapa rapa pinyi dokopa yanda ipyuo dokopa wanga dupwa simbwaro kareyamo dokopa Embena yuu pele dokome isa yuu doko pyao rali pii, leya.
HAB 3:10 Dokopa yuu kyau dupwame emba kandeyami dokopa walu walu lao siyami. Siyaminyipa yake dokona piso ipwa kulimbuo isa epeyamopa Yuunya ipwa dupwa uu lao kasakole minyuo ama ketae peya.
HAB 3:11 Peyamopa kaku walekape embena doko pundai pipala yanga paupau lao peyamosa neta kanape dolapo romo pii nao mee kareyambi.
HAB 3:12 Emba yuu dokona imbu singi paleta yanda kata pao okosi sepala yuu muu peparaena wambu dupwa kalyuo injii.
HAB 3:13 Embame papala embena wambu dupwa nyiso dokopa embena rombo palyasi kiŋi doko nyisiiko. Akali yulu koona mupwa ingingi doko pyapala banya letamuli pyuo pingi dupwa pyao kokwa sinya nembalu nembo nembee.
HAB 3:14 Banya yanda pimwai dupwa ipwaŋa kulimbuli lao epo namwa pyao bolombalo lanyi nembala epeyami. Bange aya nange wambu dupwana bange dupwa yalu pyuo kingi rukyuo nyakamyuo pingi dopale ingyuo epeyami. Dopa piyaminyipape dupwana yanda singi mupwa doko embame angi keta pii.
HAB 3:15 Embena ose akali dupwame ipwa kota dokona yanda kata peyamisa kota doko kipwa kipwa dolapona nyuo karalyapala mee dulu ketae make make manjaro kareya.
HAB 3:16 Dopa pyuo pelyamo lao sepala walu lao kareyonosa dokome namba kambu walu walu lapala pakalyo. Pakapala nambana yongo doko wale wale lao yaku kuisi ingyapala namba kimbu doko walu walu lapala pao palinya pilyu. Anatumi namwa pyalana pilyaminyi dupwa randa mairamo yuu gii doko epelyape lao elya kalo isaro pisiru.
HAB 3:17 Isa piki dupwa jingi lyii naramopape dee isa girapo jingi dupwa lyii naramopape dee isa olipi dupwana jingi lyii naramopape dee ee dupwa jingi lyuo pii naramopape dee sipisipi dupwa peparae kumuo otaraminyipape dee bulamakao karenge panda dupwa apa seramopape
HAB 3:18 Kamongo Anatu baa nambana nyisingi akali dokona namba mee rae maiyuo kararo ingilyamo.
HAB 3:19 Kamongome namba porainya renge joo karenge. Baame namba suwa kata makandapala yuu kyau pyaa narami panda mondo lao karenge dokona puu lao pingi.
ZEP 1:1 ...
HAG 1:1 ...
ZEC 9:9 Yuu Sayone wambu nakama rae rae maiyuo karalapape. Jerusaleme wambu dupwa rae maiyuo pii porakai lalapape. Nakamana kiŋi doko epapu nakama keta epelyamo kandalapa. Banya yanda pimwai anamasi minyuo isa palyuo epelyamo. Dopa pyuo ipyamopape baa pau lao epo donge dokona piso epelyamo. Donge ikyane kumwambona dokona piso epelyamo.
ZEC 9:10 Kamongome dopa letamo. Nambame yanda pingi mena oseme ipyuo penge uliuli Isaraele dokona singi dupwa nyuo nembo Jerusaleme rae yanda pela piso penge mena ose dupwa nyuo nembo piru. Yanda walakape minyuo yanda pilyaminyi dupwa nyuo uki aki minyinyi nembaroko. Nakamana kiŋi dokome yuu muu dupwana wambu mona kyuu lao seramo palena lao pira. Kiŋi baame ipwa kota Metiteraniane piso iso pao Kumungi Ipwa dokona para. Ipwa Yuporisa dokona piso iso pao yuu yakepe pinjingi dolapona suu lara.
ZEC 9:11 Kamongome dopa letamo. Nakamame mena pyao kiso jiyaminyi dokona ranjama isa peyamo dokome nambana kana minyuo lalu lao leyono pii doko kapa wai wara pisi sipyamosa nambame nakamana wambu dupwa karapusi ingyuo ipwa naa nao yuwale kameyana koko palaminyi dokona kiiramo nembaro.
ZEC 9:12 Nakama karapusi palyuo kareyaminyi dupwa epapu keyange mende epara lao silyaminyi dokona kapu kyuo anda ipupwape. Nakama yuu kapa manda rao kararaminyi dokona kapu kyuo ipupwape. Kama yasuko naminyi dokona lao nambame nakama elyape keta pyambuo yano pyao dee konda pyuo nyiso piru lao langilyu.
ZEC 9:13 Nambame Juta wambu dupwa aminya yanda dopale ingyuo nyuo minyuo Isaraele dupwa walekyana mende ingyuo minyuo piru. Sayone akali dupwa yanda pingi wua ingyuo nyuo minyuo Girisi akali dupwa pyaro.
ZEC 9:14 Dokopa Kamongo baa banya wambu kararami dokona ketae epo maro lara. Lapala banya walekya dupwa yuu pele pingi dopale ingyapala waiya lao pyara. Dopa pyuo dokopa Kamongo Mupwa Andake Wakasa dokome bikuli pii lao baa sipurapala kopa apupi rakapana dokona donorena piso pao yanda pyala panya yanda kata epara.
ZEC 9:15 Kamongo Porai Wakasa dokome banya wambu dupwa kyawa minyaramopa nakambame yanda pimwai dupwa pyao anda bui nao kokwa serami. Nakamame ipwa biya napala lete lao aa mambope pyao yanda papala yanda pimwai dupwana ranjama kulimbwanyi nembo pyarami. Pyaraminyipa nakama mena pyao kiso mailyaminyi dokopa ranjama lyuo epo pelyamopa pere retapala kamuo nyuo kulimbuo kana pyare lasinya pisingi dopale ingyuo epo para.
ZEC 9:16 Yuu gii doko pyaka seramo dokopa mena sipisipi rapu pingi dokome randa epelyamopa banya sipisipi dupwa nenge rekya lao kyawa lete nyinginyili pyuo Kamongome banya wambu dupwa kyawa lete nyera. Dopa pyuo nyeramo dokopa nakama banya yuu dokona bange lepo lepo pingi dopale ingyuo kararami.
ZEC 9:17 Yuu doko ama keyange wakasa ingyuo au pyuo sera. Dokopa wanyane wambu dupwa witi jingipi waene ipwangepe dupwa napala ando poraiyuo kararami, lao Kamongo dokome Sekaraya keta leya.
MAL 1:1 Wai pii dake Isaraele wambu dupwa lamainya lao Kamongome Malakae maiya.
MAL 1:2 Kamongome lao, Nambame nakama yuu peparae mona retelyo, letamo. Dopa pipunupape wambu nakamame isingi lao dokopa, Embame apa pyuo namwa mona retengese? letaminyi. Dokopa Kamongome isingi lao, Iso Jekopepa ane yangongepa dokona nambame Jekope baape banya rara wambu wai kiso nyiyamo dupwa peparaepe mona retelyo, leya.
MAL 1:3 Dee Iso baape banya wai kiso nyiyamo wambu dupwa peparaepe nambame awa napala Isona yuu kyau pyalya pyana pingi dupwa apa sinyi nembapala yuu doko mena rae lenge dupwa keta pyambuyu, leya Anatumi.
MAL 1:4 Isona rara Itome range wambu dupwame lao, Namwana taone dupwa kokwa siyamoko doŋo namwame kamba pirama larami. Kamba pirama larami dokopa Kamongome isingi dopa lao, Nakamame dee pinyali dokopa nambame kambako lalyinyi nembaro, letamo. Dokopa wambu wakale dupwame kandapala yuu doko koo ingilyamo, larami. Wambu rara dokona palirami dupwa Kamongome kando imbu karalu kararalyamo, larami.
MAL 1:5 Nakama Isaraele wambu dupwame doko kandapala dokopa nakamame lao, Kamongo dokome Isaraele wambunya yuu nyisarena dupwana opetaeko poraiyuo karamo, larami.
MAL 1:6 Kamongo Porai Wakasa dokome purisi dupwa lamaiyuo lao, Ikinyingimi rakange rape rape lenge kandape. Dee kendemande akali dokome banya yulu pyakamingi akali doko kando rape rape lenge kandapi. Namba nakamana rakane doŋo akipamo nakamame namba kando rape rape laa nalyamisi? Namba nakamana mupwa doŋo akipamo nakamame namba paka nalyamisi? Nakamame namba kilya kando kandelyaminyi. Kandapala piso soo lao, Apa pyuo namwame emba kilya kandelyamase? letaminyi.
MAL 1:7 Dopa pyuo nenge koo dupwa minyuo epo nambana kana pyare lasi dokona kisapala dokopa dopa lao piso silyaminyi. Apa pyuo namwame emba kando paka nalyamase? letaminyi. Dokona nambana mena pyao kiso jingi kana pyare lasi doko koo ingyuo kilya kando lao karaminyi, leto.
MAL 1:8 Nakamame mena lenge koope kimbu kwaengepe anga palengepe koole dupwa iki minyuo epo pyao kiso jepala dokopa nakamame doko kapa lao suu pilyamisi? Dopa pyuo mena koo dopale dupwa nakamana gapomane doko maiyuo kandalapape. Dokopa baame nakama kando rae maipala nakamana keyange mende pyakarase?
MAL 1:9 Epapu nakama purisi dupwame Anatumi namwa kando keyange pinya lao piso soo kandalapape. Dokopa nakamana ateŋa doko isingi yano pyaka nara ramo doko nakama kwaeyarami dokona pira.
MAL 1:10 Kamongo Porai Wakasa dokome lao, Nakama mendeme tembole anda kambu dowa doko upi lamili leto. Dopa pirami dokome nambana kana pyare lasi dokona isare dupwa mee langa kisa namili. Nambame nakama rae mai nalyo dokona nambame nakamana nenge minyuo epo jeraminyi dupwa kando rae maiyuo nyii naro, letamo.
MAL 1:11 Wambu yuu muu dupwana peparaeme namba rape rape lao karaminyi. Dupwana peparaeme bange rendamu pingi dupwa kiso joo dee bange rae maiyuo nyeroli dupwa jilyaminyi. Jepala peparaeme namba rape rape lao karaminyi.
MAL 1:12 Nakambame nambana kana pyare lasi doko kwaelyamo lapala namba ketae pyambwa nalyaminyi. Nenge awa nami dupwa kana pyare lasi dokona kiso jiminyi doko kilya kandaminyi doko kandelyo.
MAL 1:13 Nakamame lao, Namwame dupwana peparae ama makalyamano lapala namba kando gyaa silyaminyi. Nakamame mena minyuo epo kiso jilyamano lapala mena anga ikyane palengepe kimbu koope waa menape dupwa minyuo epo jilyaminyi. Nambame dupwa rae maiyuo nyereŋe lao nakamame suu pilyamisi?
MAL 1:14 Akali mendeme banya mena karenge dokona keyange mende jero lao lalu lao lapala kaeyo joo dokopa dee mena koo mende pyao kiso jera ramo baa keta koo palena leto. Dokona lao namba kiŋi andake mupwa dokome wambu peparaeme namba kando pakalyaminyi, Kamongome dopa letamo.
MAL 2:1 Epapu dopa pipwape lao pii dake nakama purisi dupwa kando, Kamongo Porai Wakasa dokome langilyamo.
MAL 2:2 Nakama yulu pilyaminyi dupwana namba ketae pyambuo pelapape. Nakamame nambana pii larono doko see nao minji nanji pyuo kararami ramo doko nambame nakama keta koo renge kiso joo dee nakama purisi karo bange keyange nyingi dupwana koo inginyi pyambuo piru. Kinyiko leto, nambana pii doko mupwa lao soo nyaka nami dokona nambame nakama keta koo inginyi pyambwapapu.
MAL 2:3 Nambame nakamana wane wanake dupwa lao nembapala nakamana mena pyao kiso jeraminyi dokona ingi dokome nakamana lenge kambu dokona kome kisakapala dupwa paleta nakama pipya pyao nembaro, leya.
MAL 2:4 Kamongo Porai Wakasa dokome lao, Dopa pipwape lao pii dake nambame jiilyamo lao nakama serami. Sepala Lipaena para pyasi purisi akali dupwa pii lalu lao lamaiyu doko ota napala sulu soo sera, leto.
MAL 2:5 Nakamame namba kando rape rape lao pyuo kararaminyipa nakama lete karengepe dee keyange palengepe dupwa nakama keta mairu, lalu lao lamaiyu. Dokona nakama namba kando rape rape lao pakao kareyami.
MAL 2:6 Nakamame yulu rolae dokona mana lamaiyami. Koo dokona daa. Nakama nambamoo rae maiyuo role pyao kareyamanopa nakama rolae dokona pyuo wambu koo piyami dupwa pii nana lao lamaiyuo piyami.
MAL 2:7 Purisi dupwana yulu doko Anatunya rolae soo nyinginya renge doko wambu mana lamaipenge. Purisi dupwa nambana wai pii minyingi akali karaminyi dokome wambu peparae dupwa karaminyi dokona papala nambana pii mana nyepengele.
MAL 2:8 Doko kaepala nakama purisi karaminyi dupwa kata rolae doko mata mailyaminyi. Nakamame mana lamaimisa dokome wambu malu koo pilyaminyi. Nambame nakama pipya kana minyuo pii lalu lao leyono doko nakama kokwa soo yalelyaminyi, leya Kamongo Porai Wakasa dokome.
MAL 2:9 Nakama nambana mana lapunu dokona moko minya nalyaminyi dokona dee nakamame nambana yulu dokona mana lamaiyu dokopa wambu peparae mendaki lao rae maiminyili pyuo laa nalyaminyi dokona namba kapu kyepala Isaraele wambu dupwame nakama kando kilya kandena lao laro, leya.
MAL 2:10 Anatu mendaki namwa wasiyamo doko namwa peparaena rakange mendare daase? Akipamo namwana pii lalu lao lenge doko yango mendali kando kokwa soo yalelyamase? Dee akipamo namwame namwana wambu rora ambasu pipya Anatumi kana minyuo pii lalu lao leyamo doko kilya kando karamase?
MAL 2:11 Juta wambu dupwame Anatu lamaiyuo lalu lao leyami pii doko kokwa soo yalapala yuu Jerusaleme dokonape dee Isaraele dokonape yulu ama koo piyami. Nakamame Kamongona tembole anda mona retenge doko kwaeyanyi nembeyami. Akali dupwame rara wakalena kyambo anatu lao lakando petenge enda lapo nyiyami.
MAL 2:12 Kamongo dokome wambu lapome dopa pirami dupwa kokwa soo nembena. Nembapala namwana wambu mena pyao kiso Kamongo Porai Wakasa doko mailyaminyi dokona namwana rara ingyuo kamba kara nana.
MAL 2:13 Yulu mende nakama dapa pilyaminyi. Nakama mena pyao kiso epo mairami doko baame dokona epapu rae maiyuo nyii nalyamo. Dokona ee pipya yamarangyuo kondome kumamisa ee ipwange dokome Kamongona kana pyare lasi doko yambe pilyamo.
MAL 2:14 Dee nakamame akipamo mena kiso maimwa dupwa nyii nalyamo lao pisilyaminyi. Doko nakama parange karapala nakamana etene nyiminyi dupwa kando nakamana lalu lao lamaingi pii doko kokwa soo yalaminyi baa silyamo. Enda doko nakama pipya role piya. Piyamo dokopa Anatu kando enda doko nemba narama lalu lao leyaminyi pii doko nakama kokwa soo yalamiko ingilyamo.
MAL 2:15 Anatumi enda dokopa nakama pipya yanenge imambupi mendakinya ingyuo wasa nayase? Akipamo dopa piyase? Doko nakamame wane wanake manjirami doko Anatunya wambu kinyi angingyuo kararami lao piya. Dokona lao nakama range kando karalapape. Parange karapala enda nyuo karo pii lalu lao leene doko nakama mendalimi yalarama lao kando karalapape.
MAL 2:16 Isaraele wambunya Kamongo Anatu dokome lao, Namba enda nembenge doko baa awa nange, letamo. Nakama mendalimi etene nembarami ramo doko enda randa mairamisa pira. Randa maingi doko namba Kamongome awa nange. Dokona lao nakama range kando karapala nakamana etene nemba narama lalu lao leyami doko kokwa soo yala nalapape leto, letamo.
MAL 2:17 Nakamana pii dokome Anatu maka pinyi pyambulyaminyi. Dopa piminyipape nakamame lao, Namwame apa pyuo baa maka mainyi pyambulyamase? letaminyi. Dokona doko Kamongo Porai Wakasa dokome yulu koo pingi dupwa keyange lao suu pilyamo, letaminyi. Kinyiko, nakamana lao rae mailyamo, letaminyi. Panda Anatu kinyi rolae rapu pilyamo doko anja karamo lao piso silyaminyi. Dopa pyuo baa maka mainyi pyambulyaminyi.
MAL 3:1 Pii dakena sepala Kamongo Porai Wakasa dokome isingi lao, Nambame nambana kata wapwakana lao nambana wai minyingi akali mende wambo pena laro. Dokopa aopa nakama Kamongo kandalana kotelyaminyi doko banya tembole anda dokona epara. Dokona waili pii minyingi akali kandamwali lao suu pilyaminyi doko epapala nambana kana minyuo lalu lao lenge pii dokona polo langira.
MAL 3:2 Dopa piramopape baa eparamo yuu gii dokopa api mendeme lambo lao mee kararase? Baa epo maro laramo dokopa api kuma nao mee pyuo serase? Akali baa isareme kapa kiso au pingi dopale ingyuope sopo poraimi wate pingi dokopa karo waiya lao penge dopalepe ingyuo karara.
MAL 3:3 Baa mendeme kana kulingi keyange inginya lao waso karenge dopale ingyuo yapalya yapana pela epara. Isareme kana golope kana kulingipi kiso au pingi dopale ingyuo baame epo purisi akali dupwa poo pyanyi pyambwala epara. Dokopa nakamame nakamana bange rolae keyange dupwa minyuo epo Anatu mairami.
MAL 3:4 Nakama wamba pingi doko suu pyao Juta wambupi dee Jerusaleme wambupi dupwame nenge minyuo epo Kamongo mairami dokona lao baa rae maira.
MAL 3:5 Kamongo Porai Wakasa dokome lao, Nambame nakama yapalya yapana pela eparo. Epapala pipu lao karenge wambu dupwape kepo pingi dupwape panga soo kote pii lenge dupwape dee yulu pyakamingi akali dupwame kana lapo waa pyakepo nyakamingipi enda waiyape wane muiyanepe wambu yuu wakale rangepe minyoko pingi dupwape dee namba rape rape laa nao karengepe wambu dupwana peparae namba epapala aopa isa palyuo lakamiru.
MAL 3:6 Namba Kamongo doko namba dee alowa pii nange. Dokona lao nakama Jekopena wai kiso nyiyamo dupwa peparae nembo otasi kara nalyaminyi.
MAL 3:7 Wamba nakamana wambu rora ambasu dupwame nambana lowa dupwana mata maipala minyuo pyuo kara nalyaminyi dopaleko ingyuo nakama pilyaminy. Kamongo Porai Wakasa dokome lao, Nakama dopa pilyaminyi doko kaepala namba karo dokona kapu kyuo ipupwape. Dokopa namba nakama karaminyi dokona kapu kyuo eparo, leya. Nakamame piso soo, Namwame aki mende pipala emba karene dokona kapu kyuo eparamase? letaminyi.
MAL 3:8 Dokopa nambame piso soo, Akali dupwame Anatunya bange dupwa panga soo waa nyuo pirami doko kapase? Kapa ingya nalyamo. Ingya napyamopape nakamame nambana bange panga soo waa nyilyaminyi. Apa pyuo waa nyilyamano lao piso silyaminyi. Doko mena pyao kiso dee bange akalisa dupwana mendena mendena pyuo mendaki yapo nyepapu namba apa pyuo jerami lao leyo dokonape panga soo waa nyilyaminyiko, leto.
MAL 3:9 Wambu rara peparaeme namba kando yalu pyuo waa nyilyaminyi dokona peparae keta koo renge doko epena.
MAL 3:10 Nakamame bange akalisa mendena mendena pyuo mendaki yapo nyepapu jerami dupwa peparae tembole anda dokona minyuo ipupwape. Minyuo eparami dokopa nenge kapa sera. Namba apa pilipi lao makande pyuo pipwape. Dokopa nambame yake panda bange singi dupwa lumbwapala nakama keta bange malu mee keyange dupwa kulimbuo jerono nakama kandarami.
MAL 3:11 Nakamana ee jingi dupwa kau kuki dupwame nao kwaena laa naronopa nakamana isa girapo marange dokona jingi malu mee lyera.
MAL 3:12 Dokopa nakamana yuu doko keyange dokona palirami dokome wambu yuu muu dupwana peparaeme nakama kando nakama rae mailyaminyi, larami.
MAL 3:13 Kamongome lao, Nakamame pii koo dupwa namba kando letaminyi, leya. Dokopa nakamame lao, Namwame aki emba kando letamase? letaminyi.
MAL 3:14 Kamongome isingi lao, Nakama dopa letaminyi Anatunya yulu pyakamingi doko kooŋo, letaminyi. Dee baa letamuli pyuo pingi doko keyangese? Panda namwa koo pingi dupwana kondalyamano larama ramo doko kapase? lao piso silyaminyi letamo, leya.
MAL 3:15 Dee wambu range mupwa lao suu pingi dupwa iki rae maiminyi kandelyamano. Dee yulu koo pingi dupwame bange malu mee retaminyipape nakamana yulu koo dokome Anatu makande pyuo baa isingi pyaa nange lamo letaminyi, leya.
MAL 3:16 Pii doko sepala wambu Anatu kando mona kendo pakange dupwame yango mendali kando pii lamailya lamaina piyami doko Kamongome dopa lalyaminyi dopa lalyaminyi soo kareya. Dokopa wambu Kamongo kando mona kendo pakapala baa rape rape lao pyuo kareyami dupwana kingi dupwa buku mende Kamongo kareyamo dokona singi mendena pepa pyao reteyami.
MAL 3:17 Kamongo Porai Wakasa dokome lao, Nakama dupwa peparae nambana wambu ingyarami, leya. Lapala yuu gii mende pirunu dokopa nakama nambana rangena wambu angingyuo kararami, leya. Dokopa ikinyingimi rakange nyiso yulu banya pyakamilyamo dokopa rakangeme kondome kumuo ikinyingi sakao nyiso karenge doko suu pyao nambame nakama kondome kumuo sakao nyiso kararo, leya.
MAL 3:18 Dokopa wambu lapo yulu rolae pingipi rolae pii nangepe dee wambu nambana yulu pyakangepe pyaka nangepe dupwana wakale wakale doko nakama kamba kandarami, leya Anatumi.
MAL 4:1 Selapape, wambu koo pingipi range mupwa lao suu pingipi dupwa isako yando yau renge dopale ingyuo rao kararami yuu gii doko epelyamo. Kamongo Porai Wakasa dokome lao, Yuu gii dokopa nakama rao otaraminyipa mendepe nakama pyarepala paa nara, leya.
MAL 4:2 Lapala dopa piramopape lapo namba kando warombo silyaminyi dupwa nakama nyiso neta rengenyili pyuo nambana pyuo nyingi porainya renge dokome nakama keta sipurao nyisala epara. Mena ikyane andana palu kamanda epapala male lao mokwasi karengenyili pyuo nakama rae maiyuo kararami.
MAL 4:3 Kamongo Porai Wakasa dokome lao, Yuu gii nambame mende pirunu dokopa nakamame koo pingi dupwa anamasi minyapala nakamana kimbu kape isarename sinjimu petamo dopale ingyarami, leya.
MAL 4:4 Isaraele wambu peparae warombo sinya lao yuu kyau Sainai dokona karo mawa piipi mana piipi dupwa Mosese maiyu. Dokona lao nambana kendemande akali Mosesena mana nyiyamo dupwa kame see nao karalapape, leya.
MAL 4:5 Dopa piramopape Kamongo eparamo yuu gii andake rando doko enakana epara lapala wambo nakama keta poropeta akali Ilainja lenge doko peyaro.
MAL 4:6 Nambame epapala nakamana yuu doko pyao kokwa sisinyi nembasasaroŋo dokona dopa pii nareŋe lao Ilainja baame epapala nakamana rora ambasupi wai kiso nyiyaminyipi dupwa nyuo mendakinya pyasara, leya.
MAT 1:1 Pii pyasi dake Yesu Koraisana rora ambasu dupwana lao pyasi palamo. Yesu baa Dapitinya rara dokona dee Dapiti baa Aporakamena rara dokona.
MAT 1:2 Aporakameme Aisake manjo, Aisakame Jekope manjo, Jekopeme Jutamoo banya yangonge dusipa pipya manjo piya.
MAT 1:3 Jutame enda Tama nyepala Peresapa Sarapa manjo, Peresame Esorone manjo, Esorone Oramo manjo piya.
MAT 1:4 Oramome Aminatape manjo, Aminatapeme Nasone manjo, Nasoneme Salomane manjo piya.
MAT 1:5 Salomaneme enda Oreapa nyepala Boasa manjo, Boasame enda Uruti nyepala, Opeta manjo, Opetame Jese manjo piya.
MAT 1:6 Jeseme Dapiti kiŋi akali doko mandeya. Dopa pipala Dapitimi Yuraya kumuyamo dokona enda waiya nyepala Solomone mandeya.
MAT 1:7 Solomoneme Oriapome manjo, Oriapome Apaisa manjo, Apaisame Esa manjo,
MAT 1:8 Esame Jiosapata manjo, Jiosapatame Jorama manjo, Joramame Usaya manjo piya.
MAT 1:9 Usayame Jotame manjo, Jotameme Easa manjo, Easame Esekaya manjo piya.
MAT 1:10 Esekayame Manasa manjo, Manasame Emosa manjo, Emosame Josaya manjo piya.
MAT 1:11 Josayame Jekenayamoo yangonge dusipa pipya manjo piya. Dopa piyamopa yuu Bapilone range dupwame Juu wambu pyao anjo lanyuo peyami.
MAT 1:12 Yuu Bapilone dokona pyao anjo lanyuo peyaminyipa kareyaminyi dokopa Jekenayame Siatiele manjo, Siatieleme Serapapele manjo piya.
MAT 1:13 Serapapeleme Apiata manjo, Apiatame Elayakimi manjo, Elayakimimi Eso manjo piya.
MAT 1:14 Esome Saitoko manjo, Saitokome Ekimi manjo, Ekimimi Elayata manjo piya.
MAT 1:15 Elayatame Eliesa manjo, Eliesame Matana manjo, Mataname Jekope manjo piya.
MAT 1:16 Jekopeme Josepe mandeya. Dokopa enda Mariame Yesu kingi Koraisa lenge doko mandeya. Enda doko Josepeme nyiya.
MAT 1:17 Aporakame kareya dokona piso rakange akalisa mendaki ipisu kisima karo kumuo peyami dokona epo Dapiti mandeyami. Dee Dapiti kareyamo dokona piso epo yuu Bapilone dokona Juu wambu dupwa pyao waiku nyuo lanyuo peyami dokona rakange akalisa mendaki ipisu kisima karo kumuo peyamioko. Dokona piso rakange akalisa mendaki dee ipisu kisima ando karo papeyami dokona epo Yesu mandeyami.
MAT 1:18 Yesu Koraisa mandeyami doko dopa pyuo mandeyami. Josepeme Maria ene nyelana mokoriya pyao kareyamo dokopa Imambu Poo Pyasimi renge kuiyamosa wane rombanda palyamo lao Mariame soo peteya.
MAT 1:19 Josepeme Maria mokoriya piyamo doko elya maiyuo pano daa laro ramo doko elyara lao suu pyapala yalu pyuo nembaro lao suu piya.
MAT 1:20 Dopa piru lao suu pyao kareyamo dokopa Kamongona aŋala mende kombeyame epapala baa lamaiyuo, Josepe Dapitinya para pyasi embena enda Maria wane petamo doko Imambu Poo Pyasimi renge kuiyapya dokona nyerono lao paka napipi.
MAT 1:21 Baame wane mende manjiramopa wane dokome banya wambunya koo dupwa raka lanyi nembo pyuo nyera dokona embame banya kingi Yesu lare leya.
MAT 1:22 Dopa piraŋa lao Kamongo dokome poropeta akali keta leya dokona palyuo pyaka siya.
MAT 1:23 Doko enda mapwae mende wane pisaramopa wane mende manjira dokopa banya kingi Imanuele larami leya. (Kingi Imanuele doko Anatu namwa pipya role pyao karamo dopale.)
MAT 1:24 Josepe lenge rapala dokopa Kamongona aŋala dokome leyamuli pyuo Maria nyepala kaeya.
MAT 1:25 Nyiyamopape enda wane manjapa naya dokopa role pyao palipa nayambi. Enakana wane kando nyiyamo dokopa Josepeme kingi Yesu leya.
MAT 2:1 Eroteme kiŋi yulu pyuo kareyamo gii dokopa Yesu yuu Beteleme doko yuu Jutia dokona siyamo dokona mandeyami. Dokopa akali lapo bui karenge dupwana yulu dupwa soo gisingi dusipa neta pyakaenge dorena karo yuu Jerusaleme epapala dopa leyami.
MAT 2:2 Juu wambunya kiŋi manjiminyi doko anja silyamo? Neta pyakaenge dorena karo banya bui doko kandapala baa mupwa lao yako lala epelyamano, leyami.
MAT 2:3 Pii doko sepala kiŋi Erote Jerusaleme wambu dupwa peparaepe mona yanyi piyamo kareyami.
MAT 2:4 Dokopa baame purisi akali mupwa dupwape, Mawa Pii mana lenge akali dupwape, sukusa sukusa pinya lapala, Koraisa anja manjarami, lao nakama piso siya.
MAT 2:5 Nakamame baa lamaiyuo, Yuu Jutia dokona yuu Beteleme doko silyamo dokona manjarami ingilyamo. Anatunya poropeta akali dokome dopa lao pyao reteya.
MAT 2:6 Yuu Juta dokona Beteleme taone doko kuki ingya napala taone doloma pipya Beteleme yapo kingi londara. Dokona ingyuo Beteleme range akali mende sipurao Kamongo ingyapala Isaraele wambu dupwa mondo lao rapu pyuo karara leya.
MAT 2:7 Dokopa Eroteme upunili akali yuu donorena range dusipa yalu pyuo epena lapala, Yuu gii anjokorape bui doko kanda soo maro leyase? lao piso sepala lamaiyaminyi siya.
MAT 2:8 Sepala yuu Beteleme dokona pena lao dopa lamaiya. Wane doko mondo lao kotala pupwa. Namba opetae baa mupwa lao yako lala eparo lao suu pilyu dokona wane kando nyepala dokopa namba langyala ipupwape leya.
MAT 2:9 Kiŋi akali dopa leyamo sepala dokopa nakama kata nyuo peyami. Pao dokopa bui wamba neta pyakaenge dorena kandeyami doko dee maro leya. Maro lapala wambo pao wane siyamo dokona ketae kanda kanda kareya.
MAT 2:10 Dokopa bui doko kandapala ama mona pyakalyuo pyao kareyami.
MAT 2:11 Karapala anda dokona kolando papala wane doko endangi Mariapa peteyambinyi kandapala pongwa nao baa mupwa lao mona maiyuo peteyami. Pisipala nakamana bokote dusipa lumbwapala bange keyange palyuo minyiyaminyi kana rao kuikui lasipi wakaiya dopale rendamu pingipi mamba rendamu pingipi dupwa maiyami.
MAT 2:12 Maipala, Erote karamo kata dokona paa nalapape lao kombeyame pii repa repa pyuo lamaiyasa kata wakale mendena yuu range dokona peyami.
MAT 2:13 Papeyaminyi dokopa Kamongona aŋala mende kombeyame Josepe paleya dokona pano epapala dopa leya. Sipurapala wane dokopa endangipa lanyuo yuu Isipi dokona paka pupwa. Yuu dokona mee isaro karo nambame pupwa laro dokopako parami leya. Erote baame wane pyalana kotara ingilyamo leya.
MAT 2:14 Dokopa baa sipurapala wane dokopa endangipa lanyuo kukwama Isipi dokona peya.
MAT 2:15 Papala Erote ene kumapa nayamo dokopa yuu dokona mee kareyami. Dopa piyami doko Kamongo dokome dopa piraŋa lao wamba poropeta akali keta dopa lamaiya. Nambana ikinyingi doko yuu Isipi dokona karapala epena laroŋo, leyamo, dokona ingyuo peya.
MAT 2:16 Dokopa Eroteme bui dupwana yulu singi akali dusipame namba minyoko pyuo langiyamilyamo lao soo gisapala ama imbuo dokome sii leyamo kareya. Sii leyasa bui dupwana yulu singi akali dusipame, wane manjimilyamo leyami pii dokona suu pyapala yuu Beteleme dokonape yuu dokona kipwa kipwa dupwanape wane ee kana lama epo pasi dupwape nyaŋa dupwape peparae pyao kumakana leya.
MAT 2:17 Doko Anatunya poropeta akali Jeremaya dokome pii mende leya doko leyamuli pyuo pyaka siya. Baa dopa leya.
MAT 2:18 Yuu Orama dokona pii mende leyamo siyami. Ee andake lao kumaralerale nyuo lao enda Oresolo banya wane wanakepe dupwana lao ee lao peteya. Mona minyarambu nyisalana leyami dokopa lete pisa nalyaminyiŋi dokona daa leya.
MAT 2:19 Enakana Erote kumapeyamo dokopa Kamongona aŋala mendeme Josepe yuu Isipi paleya dokona kombeyame lamaiyuo,
MAT 2:20 Emba sipurapala wane dokopa endangipa lanyuo Isaraele yuu dokona puu. Wane doko pyalana piyami wambu dupwa kumuyami, leya.
MAT 2:21 Dokopa sipurapala wane dokopa endangipa lanyuo Isaraele yuu dokona peyami.
MAT 2:22 Papala akali Akelesa banya rakange Erote ene kiŋi yulu alowa pyuo nyiya doko sepala Josepe yuu dokona panya pakaya. Dokopa Anatumi kombeyame pii repa repa pyuo lamaiyasa pakiki palyama yuu Galili dokona peya.
MAT 2:23 Pao yuu taone Nasarete lenge dokona pao kareya. Dopa piyamo doko Anatunya poropeta akali dupwame, Baa Nasarete range larami, leyami pii dokona palyuo piya.
MAT 3:1 Yuu gii dusipana Jone bapitisimo nyakamaingi dokome epapala yuu Jutia dokona yuu muiyane siya dokona boo pyao lamaiyuo kareya.
MAT 3:2 Yake pandana isingi yulu doko repeta pyaka selana pilyamo dokona mona enenge palyuo karalapape lao kareya.
MAT 3:3 Anatunya poropeta akali Aisayame pii mende leya doko baasa kando leya. Yuu muiyane dokona pii mende dopa lao kyakale lao karara, Kamongona kata doko mondo lao retalapa, banya kata dupwa wapuo rolae pyuo karalapa, leya.
MAT 3:4 Jone baa komau mena kamelena yamanji dokome wapusinde lisa marapu mendeme minyanyi pyuo wapwaro karo aimbupi amburali ipwangepe nao kareya.
MAT 3:5 Dokopa Jerusaleme wambu dupwape Jutia range peparaepe ipwa Jotane kipwa kipwa dupwana wambu dupwa peparaepe baa kareyamo dokona peyami.
MAT 3:6 Papala nakamana yulu koo dupwa polo leyaminyipa ipwa Jotane dokona baame bapitisimo nyakamipa pyuo kareya.
MAT 3:7 Dokopa Parisi akalipi Satyusi akalipi malu bapitisimo nyela epeyaminyisa kandapala Joneme nakama kando dopa lamaiya. Nakama kau ikyane ingyuo mendakinya kaparao karaminyi dupwa kote andake palisara ralo pupwa lao apimi repe repe langipyasa epelyamisi?
MAT 3:8 Nakama mona enenge palyapala karaminyi doko panena lao yulu keyange pyuo karalapape.
MAT 3:9 Aporakame namwana rakange kyawa ingiyamopa karamano lao nakama range ketae pyambuo laa nalapape. Dokona ingyuo Anatumi mee kana dupwa nyuo Aporakamena wane wanakepe ingyuo petena lao kapa wasara.
MAT 3:10 Ene epapu wua rumbiwa dokome isa dupwa pokwalana pyuo maliki maliki lao karamo. Dokona isa jingi keyange lyii nange dupwa peparae pokwapapu isare dokona pyambwapa pira ingilyamo.
MAT 3:11 Nambame nakama mona enenge palyuo karalapape lao mee ipwa dokome bapitisimo nyakao karo. Dopa pipunupape mende enakana epelyamo dokome namba kando porakai wakasa ingyuo karamo dokona kimbu suu lyolo doko polarono namba kwaeyamo dokome kapa ingya nalyamo. Baame Imambu Poo Pyasi dokopa isarepana nakama bapitisimo nyakara.
MAT 3:12 Baa witi jingi lukungi saporo andake doko minyaro karamo. Baa witi peparae yapo nyepala jingi angi dupwa anda retowa, imbu dupwa isare rao sulu singi dokona kisanyi nembara leya.
MAT 3:13 Dokopa Yesu Joneme bapitisimo nyakana lao yuu Galili karo ipwa Jotane mareta Jone kareya dokona epeya.
MAT 3:14 Joneme baa kaeyapyali lapala, Embame namba bapitisimo nyakare doŋo nambame emba nyakalase lao epelese? leya.
MAT 3:15 Dopa leyamopa Yesumi isingi lamaiyuo, Dopa pyuo piramba ramo doko Anatunya yulu rolae dupwa peparae moko minyuo paramba ingilyamo leya. Leyamopa Jone kapalyamo lao soo nyiya.
MAT 3:16 Soo nyepala Yesu bapitisimo nyakamiyamo ipwana sipurao neta epeyamopa yake dulu lumbwapala Anatunya Imambu yaka wayamu dopale mende isa lupyuo baa keta epo peteyamo kandeya.
MAT 3:17 Dokopa yake dokona pii mende lao epapala, Nambana Ikinyingi mona retelyo dake. Nambame baa raeko maiyuo karo leya.
MAT 4:1 Dokopa Imambu dokome Yesu nyuo lanyuo yuu muiyane dokona peyamopa Sataneme baa makande piya.
MAT 4:2 Dokopa baa yuu akalisa kisimape kukwa akalisa kisimape nenge naa nao karapala enakana lopaya.
MAT 4:3 Dokopa Makande Pingi dokome epapala baa lamaiyuo, Emba Anatunya Ikinyingi ramo doko kana dapwa borete inginya lare, leya.
MAT 4:4 Dopa leyamopape Yesumi isingi lamaiyuo, Dopa lao pyasi palamo. Akali borete dokome iki nao lete kara narami. Anatunya kambunya pii epelyamo dupwa soo lete kararami ingilyamo leya.
MAT 4:5 Dokopa Sataneme baa nyuo lanyuo yuu poo pyasi anda malu palyuo karenge dokona papala tembole anda ketae londe mendena karena lao
MAT 4:6 karapala baa dopa lamaiya. Emba Anatunya Ikinyingi ramo doko emba range langa isa pyakala puu. Dokona lao pii pyasi dopa lao palamo, Banya aŋala dupwa emba rapu pyakana lao jera, lao palipala, embena kimbu doko kaname isa pyaa nana lao nakamana kingi kapena emba ketae reto nyerami, lao palamo, leya.
MAT 4:7 Yesumi baa dopa lamaiya, Dee pii mende dopa lao pyasi palamo. Embena Kamongo Anatu doko apa pilyape lao kandalena makande pii nare, leya.
MAT 4:8 Dee Sataneme baa lanyuo yuu kyau kameya ketae mendena papala isa yuu dokona rara peparae au piyamopa kandena lao lasaka piya.
MAT 4:9 Lasaka pipala, Emba pangu sepala namba embena mupwa lao yako lare ramo doko nambame dupwa peparae emba jero, leya.
MAT 4:10 Dokopa Yesumi baa dopa lamaiya, Satane, emba puu. Buku Baepole dokona dopa lao pyasi palamo, Embena Kamongo Anatu baako suu pyao mona kando kingi lao karare. Banya yulu iki pyuo karalapape leya.
MAT 4:11 Dokopa Satane doko baa yaki nyepala peyamopa aŋala lapome epapala Yesu nyisiyami.
MAT 4:12 Yesumi Jone baa karapusi anda palyamiŋi leyaminyi sepala baa yuu Galili dokona peya.
MAT 4:13 Yuu Nasarete pao kando nyepala yuu Kapaneame doko ipwa muiyane pete maronge dokona Sepyulanepa Napatalaipa dolapona kanya siyamo dokona peya.
MAT 4:14 Anatunya poropeta akali Aisaya mende piraŋa leyamo dokona karala peya.
MAT 4:15 Pii doko yuu Sepyulanepa yuu Napatalaipa ipwa Jotane dumurena ipwa kota pete silyamo dorena singi, wambu rara wakale dupwana yuu Galili dokona wambu iminjiyamo dokona peteyami dupwa ama yanga paupau leyamo kandeyami.
MAT 4:16 Wambu kumungi renge dokome yambe piyamo peteyami dupwana lao yanga paupau lenge doko pyaka sakamiyaŋa lao palamo.
MAT 4:17 Yuu gii dokopa Yesumi kanda soo boo pyao, Yake pandana isingi yulu pyaka selena pilyamo dokona mona enenge palyuo karalapape, lao lao kareya.
MAT 4:18 Galili ipwa muiyane pete nemba nembana pao dokopa ane yangonepa lama Saimone kingi mende Pita lenge doko banya yangonge Endurupa nakamba oma nyingi akali ingyuo karapala oma nyingi nyuu doko ipwa dokona pyao pyano malyuo kareyambinyi pao kando nyiya.
MAT 4:19 Kando nyepala nakamba lamaiyuo, Namba paronuli pyuo ipupwape. Nakamba oma nyuo karambinyi doko suu pyao akali yango nyelapape lao piru, leya.
MAT 4:20 Leyamopa nakamba oma nyingi nyuu dusipa aopa yaki nyepala baa peyamuli pyuo peyambi.
MAT 4:21 Dokopa dokona karo mee mende lanapala dee ane yangongepa lama Jemesa Sepetena ikinyingi doko banya yangonge Jonepa kareyambinyi pao kando nyiya. Nakamba sipu dokona rakange Sepetemoo pipya oma nyingi nyuu dusipa lee kyaso paleyaminyi kandapala epena leya.
MAT 4:22 Nakamba aopa rakange bote dokona peteyamopa yaki nyepala baa peyamuli pyuo peyambi.
MAT 4:23 Dokopa yuu Galili kapa kapa pyuo pao sinakoke anda dupwana mana lao Anatunya isingi yulu dokona waili pii keyange doko boo pyao lao wambu anga wakale wakale piyamo dupwape kingi kimbu kwaeyami dupwape peparae pyuo elya pyuo nyuo pyuo papiya.
MAT 4:24 Dokopa yuu Siria dupwana baa dopa pilyamo lao lao raeyamisa wambu anga pyao randa wakale wakale epeyamo dupwape imambu koo soo pyale leya dupwape manda rengeme mandeya dupwape papae rambungi dupwape anga rara wakale wakale piya dupwa peparae baa kareyamo dokona soo epeyaminyipa baame nakama pyuo elya pyuo nyuo kareya.
MAT 4:25 Dokopa Galili rangepe Dekapolisa rangepe Jerusaleme rangepe Jutia rangepe ipwa Jotane dumurena rangepe wambu ama malu rukuraka pyuo baa peyamuli pyuo peyami.
MAT 5:1 Wambu ama malu rukuraka pyuo kareyaminyi kandapala baa yuu kyau dokona pulyuo peya. Pulyuo pao pisapeyamo dokopa banya disaepole dupwa baa peteya dokona epeyami.
MAT 5:2 Dokopa baame kambu roma lumbwapala dopa lao mana lamaiya.
MAT 5:3 Wambu range kuki lao suu pyapala inyimungu karaminyi dupwa yake pandana isingi yulu doko nakamana ingyuo silyamo dokona nakama rae maiyuo pelyaminyi.
MAT 5:4 Wambu monarename sakame kumungi dupwa mona minyarambu poraiyakamira dokona rae maiyuo pelyaminyi.
MAT 5:5 Wambu pau lasi dupwa yuu muu dupwa nakamana sera dokona nakama rae maiyuo pelyaminyi.
MAT 5:6 Wambu yulu rolae pimwali yaka lao nanome kumuo karenge dupwa sikya pira ingilyamo dokona nakama rae maiyuo pelyaminyi.
MAT 5:7 Wambu yango sakame kumuo karenge wambu dupwa kando Anatumi kondoko karara dokona nakama rae maiyuo pelyaminyi.
MAT 5:8 Wambu mona mendaki palyuo karaminyi dupwame Anatu kandarami dokona nakama rae maiyuo pelyaminyi.
MAT 5:9 Pau lanyi pyambuo minyuo nyepa pingi wambu dupwa Anatunya wane ingyuo karaminyi larami dokona nakama rae maiyuo pelyaminyi.
MAT 5:10 Wambu lapo rolaena renge dokona lao randa nyerami dupwa yake pandana isingi yulu doko nakamana silyamo dokona nakama rae maiyuo pelyaminyi.
MAT 5:11 Nakama nambana wambu ingyuo kararaminyisa akali lapome nakama kilya kandalya kandana pyuo lao lekeleke ralamisi lao nakama yulu koo wakale wakale malu pingiŋi lao kyambo leyami kande dokopa nakama keta renge keyange paliramo kararami.
MAT 5:12 Dokopa yake panda dokona renge kulisa andake nyerami lyakande. Dokona mona anda pyakalyuo pyao raeko maiyuo karalapape. Dokonako palyuo Anatumi banya poropeta akali wambo kareyami dupwa akali dupwame dopako pyuo lekeleke rena lapa pyuo kareyami.
MAT 5:13 Nakama isa yuu dakena kota dopale ingyuo karaminyi. Karaminyipape kota kemara ramo doko apa pyuo keke pinya larami. Kemasi dokome angi mende kapa pii narama. Mee nembaramanopa akali dupwame kimbu yukuna dokome kalyarami ingilyamo.
MAT 5:14 Nakama isa wambu dupwana kukwa kendapulinyi mendeke ingyuo karaminyi. Yuu kyau dokona taone andake mende pirami ramo doko yalu pii nange.
MAT 5:15 Doko suu pyao wambu lambe kaipala penge mendena pee pii napala rate singi dokona retenge. Dokopa anda dongepe dupwa peparaena rao yanga paupau lenge.
MAT 5:16 Doko suu pyao nakama kukwana kendapulinya mendeke ingyuo wambu dupwana lenge kambu dokona karo yanga paupau lao karalapape. Dokopa nakamana yulu keyange pyuo kararami dupwa kandapala Rakange yake panda karamo doko ketae pyambwamili lao pyuo kararami.
MAT 5:17 Mawa Pii dokope Anatunya poropeta lao kareyami akali dupwana pii dokope nambame isa pena lala epeeŋe lao suu pyaa nalapape. Isa pena lala epeyonde daa. Mawa pii leyami dupwa peparae namba keta angi ingyuo para.
MAT 5:18 Dokona lao kinyi langilyu, yake pandape isa yuupi pyakuiyuo isa paa nao mee seramopa pii palamuli pyuo peparae dokona mawa pii kuki mendepe pepa litinya silyamo dokona mendepe yuu gii ene pyaka sepa naramopa isa paa nara lao daa leto.
MAT 5:19 Dokona wamba mendeme mee Mawa Pii kuki dokona mende yalo papala wambu yango dupwa dopako pipwape lao mana lamairami ramo doko yake pandana isingi yulu dokona karaminyi dupwana kamame isa pele lao karaminyiŋi larami. Dopa laraminyipa wambu mendeme pii palamo dokonako palyuo pyuo dopa pimana pipwape lao mana lao kararami ramo doko yake pandana isingi yulu palamo sukusa karaminyi dupwana mupwa ingyuo karaminyiŋi larami.
MAT 5:20 Dokona lao dopa langilyu. Mawa Pii mana lenge akalipi Parisi akalipi dupwana yulu kapa ingya nayasa nakamana yulu rolae dokome dolomana yulu doko nyuo enaka nara ramo doko yake pandana isingi yulu dokona sukusa paa narami leya.
MAT 5:21 Wambu yango pyaa nalapape lao mawa pii doko yuu wamba paleyamo siyami. Mendeme mendali pyara ramo doko kote larami ingilyamo, lenge doko nakama singi.
MAT 5:22 Dopa leyako doŋo nambame nakama dopa langilyu. Mendeme yangonge mende kando imbwuara ramo doko baa keta kote sera ingilyamo. Mendeme yangonge mende kilya kandalya kandana pyuo lara ramo doko kote andake doko baa keta palira ingilyamo. Mendeme yangonge mende kando, Emba kopyali lao koo keta palyuo lao nembara ramo doko baa isare panda para ingyuowale karara.
MAT 5:23 Dokona suu pyao Anatu suu pyao mena kiso maingi rate dokona bange mende maiyala eparaminyipa yangonge mendeme namba kando ingi koo palyuo karapya kandapi lao range suu piyami kande doko.
MAT 5:24 Bange reto maingi dokona mairamili bange doko mee retapala kandakala pao wambo yangonge doko ingi keyange palyinyi pyambwapala enakana bange doko Anatu suu pyao maiyalapape.
MAT 5:25 Dopako pyuo dee embapa kote laramo akali angi dokopa ene karara kote lala pao karo dokopa baapa waiya lao mona mendaki palyuo pako lapala kuma soo kandape. Dopa pipa nare ramo dokopa emba nyuo jasi keta mairasa dokome yanda singi mairamopa emba puu anda palyasasara.
MAT 5:26 Kinyi langilyu, kana kuki lasaka pirinyi dokopa mokwa nara. Kumasi kana maiyuo lyolo pirinyi gii dokopa emba moko nembara.
MAT 5:27 Kepo pyakami nalapape, lao kareyami doko nakama singi kandale.
MAT 5:28 Dopa leyako doŋo nambame mende langiru. Mendeme kepo pipuli lao suu pyara ramo doko banya suu pingi dokome enda dokopa kepo pyuo kaeyarasa pira.
MAT 5:29 Embena lenge rolae dokome emba suu longwanyi koo keta pyambuya kande doko lukunyi nembape. Embena yongo dokona kuki pingyu isa para ramo doko kapa. Dokona doŋo embena yanenge peparae isare panda nembarami doko ama kapa daa.
MAT 5:30 Dopako pyuo embena kingi rolae dokome emba suu longwanyi koo keta pyambuya kande doko pyao pyakepanyi nembape. Embena yanenge dokona mende isa para ramo doko kapa kuki. Dokoko doŋo yongo peparae isare panda para ramo doko ama kapa daa.
MAT 5:31 Dee pii mende lao, Akali mendeme banya enda ramanyi nembara ramo doko pepa pase mende ramanyi nembelyo lao pyapala maira, lenge kandapi.
MAT 5:32 Dopa leyako doŋo nambame pil mende langiru doko, Akali mendeme banya etenge dokome akali wakale mende kepo pii naramopa ramanyi nembara ramo doko enda doko kepo pyuo petena lao nembarasa pira. Akali mendeme enda ramanyi nembasi doko nyera ramo doko kepo pili laoko nyerasa pira.
MAT 5:33 Yuu wamba dokopa mendeme Anatu kando karamo lapala mende piro lao kingi ketae nembara ramo dokopa enakana kaeyaramo doko koo leyami kande.
MAT 5:34 Dopa pyuo leyami doŋo nakama mende pinya lao lalu lao larami ramo dokopa, kingi ketae nemba nawape yake panda doko Anatunya petenge isa dokona kingi laa nawape
MAT 5:35 isa yuu doko banya kimbu isa dokona kingi laa nawape dee Jerusaleme taone doko Kiŋi Andakena ingilyamo dokona kingi lao kingi ketae nembo laa nalapape leto.
MAT 5:36 Dee kyawasi minyuo pii kinyi leto lao laa nalapapeko. Dokona lao kyawa yaku doko pupu ranyi reto dee pupuri doko yaku epanyi sero piraminde daa.
MAT 5:37 Kinyi larama lao suu pyarami ramo doko mee, Waa, lalapape. Dee, Daa, larama lao suu pyarami ramo doko mee, Daa, lalapape. Pii mende dokona konda pyuo larami ramo doko kopetame suu pyapala laramisa pira.
MAT 5:38 Wamba pii mende lao dokopa mendeme wambu yangonya lenge pyao ranjarami ramo dokopa banya lenge dokoko isingi pyao ranjarami. Nenge dokona mende pyao longwarami ramo dokopa banya nenge dokona mendeko isingi pyao longwarami, leyaminyi nakama singi kandale.
MAT 5:39 Dopa leyaminyiko doŋo nambame pii mende langilyu. Wambu koo mendeme emba randa jiya kande dokopa baa isingi pyaa nalapape. Wakena paki pyapeya kande dokopa baame dee pakirena pinya lao kapu kyelapape.
MAT 5:40 Mende doko, wambu mendeme kote lapala embena komau isa pee pingi doko nyiya kande dokopa dee komau ketae pee pingi doko opetae maipwape.
MAT 5:41 Dee, wambu mendeme emba puu maiyuo nanesale mendasa ipu leya kande dokopa dee kata dopale lama kamameko konda pyuo pupwape.
MAT 5:42 Bange mende mee julu joo jipili yaka leyami kande dokopa mee maipwape. Dee, range peyakaro lao jii leyami kande dokopa daa laa nalapape.
MAT 5:43 Nakama pipya parali maki pyuo palenge wambu dupwa mona reto nyisu petenge wambu dupwa awa nao pyuo karalapape, leyaminyi nakama singi kandale.
MAT 5:44 Dopa leyaminyiko doŋo nambame nakama pii mende langiru. Nakama pipya nyisu petenge wambu dupwa mona reto, randa nalamisi lao piyami dupwa ateŋa lakamyuo pyuo karalapape.
MAT 5:45 Dopa pyuo pirami ramo dokopa nakamana Rakane yake panda karenge dokona wane wanakepe ingyuo parami. Dokona lao baame banya neta doko wambu koo keyangepe peparaena lao pyakalyapala rena lenge. Dopako pyuo apunda doko wambu rolae pingi rolae pii nangepe peparaena lao epena lenge.
MAT 5:46 Nakama mona retarami wambu dusipa yeelyo isingi mona retaraminde ramo doko keyange keta parama lao suu pyaa nalapape. Takisi nyingi akali dupwame dopako pii nangese?
MAT 5:47 Dee yangone dupwa iki yako lao kararami ramo doko mee wambu dopako pyuo karaminyi dokona nakamame aki yulu wakasa mende piramisa pirase? Juu daa rara wakale wambu dupwa opetae dopako pii nangese?
MAT 5:48 Dokona nakamana Rakane yake panda karenge doko ama rolae wakasa pyuo karamo doko suu pyao nakama ama rolae wakasako pyuo karalapape.
MAT 6:1 Akali wambu dupwame kandena lao nakamana lenge kambu dokona yulu keyange pisarama kando lao waso karalapape. Akali dupwame kandena lao pyuo kararami ramo doko nakamana Rakane yake panda karamo dokome kingi kisa nara.
MAT 6:2 Yanengena mamba kiso lao karenge dupwame sinakoke anda dee kata dupwanape mee wambu dupwame namba kandamili lao akali mende wambunya lenge kambu dokona wambo lakao pena lenge doko suu pyao wambu pendewa dupwa bange maiyuo dokopa mee wambu kandamili lao maiya nalapape. Namba kinyi kinyi langilyu, wambu dopa pingi dupwa kingi kiso nyeramili dupwa nyepelyaminyi.
MAT 6:3 Nakamame wambu pendewa dupwa kingi rolae dokome bange mee mairami dokopa kingi kyai dokome kanda nana lao yalu pyuo maipwape.
MAT 6:4 Nakamana yulu keyange dupwa maro laa nana lao dopa pipwape. Dopa pirami dokopa nakamana Rakaneme yulu maro laa narali dupwa kando karenge dokome kandapala nakama renge kulisa jera.
MAT 6:5 Yanengena mamba kiso lao karenge wambu dupwame wambu peparaeme kandamili lao suu pyapala sinakoke anda dupwanape kata kyukunaiya dupwanape wangu lakao ateŋa lao karenge doko suu pyao nakama dopa pyuo ateŋa laa nalapape. Namba kinyi kinyi langilyu, wambu dopa pingi dupwa kingi kiso nyeramili dupwa nyepelyaminyi.
MAT 6:6 Dopa piraminyipape nakama ateŋa lalana dokopa panda donge dupwana papala kambu upi lapala yalu pyuo piso wambumi kanda nana lao nakamana Rakane ateŋa lao lamaipwape. Dopa pirami dokopa nakamana Rakaneme maro laa narali yulu dupwa kandenge dokome renge kulisa jera.
MAT 6:7 Renge mende doko, ateŋa lao dokopa Juu daa rara wakale dupwame mee kambunya pii malu konda konda pyuo lenge doko suu pyao nakamame laa nalapape. Nakamame pii malu larama ramo dokopa sakaraŋa lao suu pilyaminyi.
MAT 6:8 Nakama nakamana Rakane ene piso selana pirami dokopa wambo nakamana lao dopa pyakamirulyamo lao soo gisara dokona Juu daa rara wakale wambu dupwame pinginyili pyuo pii nalapape.
MAT 6:9 Dokona ateŋa dapale lalapape. Namwana Rakane yake panda karene doko, embena kingi doko poo pyasi ingyuo palenale.
MAT 6:10 Embena isingi yulu doko epo palenale. Yake panda dokona lapinyili pyuo karaminyi doko suu pyao isa yuu dakena pyuo karamanale.
MAT 6:11 Yuu peparae namwa nenge napengele doko joo karape.
MAT 6:12 Namwa kando koo pyakaenge dupwana koo dupwa kame sakamilyamano dopako suu pyao namwana koo dupwa nyuo kame sakao karape.
MAT 6:13 Namwa makande pira ingilyamo dokona embame namwa lanyuo paa napala koo dokome maralyasara lao kyawa minyuo karape. Pii dopale lao ateŋa lalapape.
MAT 6:14 Dokona lao nakama akali nakama pipya kopetame pingi dupwa nyuo kame sakamirami ramo dokopa nakamana Rakane yake panda karenge dokome nakamana koo dupwa nyuo kame sakarako.
MAT 6:15 Nakamame akali kopetame pingi dupwa nyuo kame sakami narami ramo dokopa nakamana Rakaneme nakamana kopetame pingi dupwa nyuo kame saka narako.
MAT 6:16 Renge mende doko, nakama Anatu suu pyao nenge wasaka pyuo piso dokopa yanengena mamba kiso lao karenge dupwame lenge kambu imi piro singi doko suu pyao pii nalapape. Dokona lao akali dupwame mee wambu dupwa nenge wasaka pyuo pisanelyamo lao kandamili lao suu pyapala lenge kambu kokwa soo pee pyapala petenge. Kinyi langilyu, wambu dopa pingi dupwa keta rae maingi renge epo palirali doko epo palamo.
MAT 6:17 Dopa piramopape nakamame nenge wasaka pyuo piso dokopa kyawasi mamba kiso lenge kambu wate pyuo pipala pisipwape.
MAT 6:18 Nenge naa nao pisanelyamo lao mee wambu dupwame kanda nana lapala nakamana Rakanemoo pipya lao kana minyuo karalapape. Dokopa nakamana Rakaneme maro laa narali yulu dupwa kandenge dokome renge kulisa jera.
MAT 6:19 Isa yuu dakena rungi rungi pingi bange lisiwameme nao lulya rao mee kokwa soo, waa nyingi wambu dupwame anda pyao lalyapala waa nyuo pingi bange dupwa konda konda pyuo reto kara nalapape.
MAT 6:20 Rungi rungi pingi renge kulisa yake panda singi dupwa lisiwameme naa naope lulya raa naope waa nyingi wambu dupwa anda pyao lalyapala waa nyii nao pirami renge dupwa konda konda pyuo sakana lao pyuo karalapape.
MAT 6:21 Dokona lao nakamana mona doko rungi rungi pingi bange retenge mate dokona yukwaro karamo.
MAT 6:22 Lenge doko yanengena lambe dopale. Embena lenge doko rao karara ramo doko yanenge peparae yangaramopa karare.
MAT 6:23 Embena lenge doko kwaera ramo doko embena yanenge peparae isa sulusulu ingyaramo karare dokome lenge emba keta yangarali doko kaepala iminjara ramo doko ama iminjalu iminjo iminjara.
MAT 6:24 Kendemande akali mendeme kamongo lamana yulu kapa pyakamyuo kara nara. Baame mende awa napala mende mona reto karara. Panda mendepa angingyuo puu minyuo karapala mende kando kilya kando pyuo karara. Anatupa kana monepa dolapo laparaena yulu kapa pyuo kara narami.
MAT 6:25 Renge dokona lao, Aki nenge ipwape napala kapa kararo laope yanenge dokona aki komau pee piro laope suu pyakonda pyuo kara nalapape. Nenge dokome iki wambu kapa ingyarase? Yongo doko komau wapusi dokome iki elyape keta parase? Pii mende daase?
MAT 6:26 Yaka dupwa apa pyuo petaminyi lao kandape. Nakama ee wara pyuo manjo nenge retenge anda retao, waingi nyuo pii nalyaminyisa namwana Rakane yake panda karenge dokome nenge pingi. Dokona nakama yaka dupwa nyuo anamasi minyuo kara nalyamisi?
MAT 6:27 Apimi suu pyale pyale karara dokome yuu gii lapo opetae konda pyuo lete kararase?
MAT 6:28 Akipamo nakama aki komau pee piro lao suu pyao mona yanyi pyaramo kararamisi? Isako dupwana jingi apa pyuo andenge lao kandalapa. Dupwa yulu pii nao puu wale pyaa nao mee ando karenge.
MAT 6:29 Solomoneme kiŋinya komau au piyamo pyuo kareyamo doko isa jinginya au piyamo dupwame Solomonena au doko isa nembele laro karamo.
MAT 6:30 Dokona suu pyao isako dupwa epapu andelyamopa rakya dokopa isarena kisingi dupwa suu pyao Anatumi yanenge keyange au pyuo wapwakamiramo dokonako ingyuo nakamana reke lao wapwaka narase? Nakama Anatu kapa pira lao angingyuo suu pyao kara nalyaminyi.
MAT 6:31 Dokona aki nengepe ipwape narama laope komau aki wapurama laope suu pyao yanyi pyaramo kara nalapape.
MAT 6:32 Anatu suu pyaa nange wambu dupwame yanengena bange kotenge kandale. Nakamana Rakane yake panda karenge dokome nakama isa bange dokorende nyepenge ingilyamo lao soo karamo.
MAT 6:33 Dokona yanyi pyaramo kara napala banya isingi yulu dokope yulu rolae dokope nyuo wambakao mupwa wakasa lao kando nyimwali lao karalapape. Dokopa bange dopale dupwa peparae konda pyuo nakamana ingyasi sera.
MAT 6:34 Dokona rakya apa pirama lao suu pyao mona yanyi pyaramo kara nalapape. Rakya dokopa mende pipengele ingyara ramo doko rakyana yulu wakale. Yuu mendaki dokona randa epara ingyara dokona yeelyo iki suu pyao kondanyi nembalapape.
MAT 7:1 Emba kando yapalya yapana pinyi nembo laa namili lao suu pyao embame wambu dupwa kando yapalya yapana pinyi nembo laa napipi.
MAT 7:2 Dokona lao embame wambu dupwa kando yapalya yapana pinyi nembo larenyili pyuoko emba kando yapalya yapana pinyi nembo larami. Dopako pyuo mairinyili pyuo isingi nyere.
MAT 7:3 Akipamo yango mendena lenge sinjimu kuki doko kando lao pupinyipa isa lomasi andakende embena lenge dokona silyamo doko kanda nangese?
MAT 7:4 Embena lenge dokona isa lomasi andakende seramo dokome apa pyuo wambu yango mende doko kando, Embena lenge dokona sinjimu silyamo doko nyakawa larese?
MAT 7:5 Emba yanengena mamba kiso lao karenge doko. Wambo embena lenge dokona isa pyakepasi dopale silyamo doko neta nyuo nembape. Nembapala dokome embena yangonena sinjimu silyamo doko rolae kandapala kapa neta nyakamiri.
MAT 7:6 Bange poo pyasi dupwa suwa maiya nao mola yapasi dupwa mena panda pyambwa nao pyuo karalapape. Bange dupwa nyuo kalyapala dee kapu kyepala nakama nasara ingilyamo.
MAT 7:7 Piso seraminyi dokopa jera. Kotaraminyi dokopa kando nyerami. Kambu dowa doko kapakapa piraminyi dokopa lumbwakara.
MAT 7:8 Dokona lao piso singi wambu dupwame kapa nyingi, kotenge wambu dupwameko kando nyingi, kambu kapakapa pirami dokopa lumbwakamira.
MAT 7:9 Nakama petaminyi dupwana mendalimi ikinyingi borete mende jii lara ramo dokopa mee kana mairamisi?
MAT 7:10 Dee oma jii lara ramo dokopa kau koo mairamisi?
MAT 7:11 Dokona suu pyao nakama koo ingyuo petaminyi dokome wane wanakepe dupwa bange keyange maingi doko suu pyao Rakane yake panda karenge doko wakasa ingyuo karamo dokome baa piso serami wambu dupwa renge keyange mai narase?
MAT 7:12 Wambu yango dupwame emba keta yulu keyange pyakamili lao suu pilinyi doko suu pyao nakama keta pyakamyuo karape. Dopa pyuo pirinyi kata doko lowana renge doko ingilyamo, Pii renge doko poropeta dupwame leyamisa piya.
MAT 7:13 Kambu pee lasi dokona kata kameya silyamopa awa awa pyuo penge dokona pao kwaeyalu kwaeyo kwaeyasaramiŋi. Dokona ingyuo kambu dowa rambu rambu dokona pupwape. Kambu pee lasi dokona wambu malu penge.
MAT 7:14 Pelyaminyipape kambu kata rambu rambu dokona lekeleke rao penge dokona pao lete karalu karenge. Kata doko wambu mendasipame iki kando nyingi.
MAT 7:15 Kyambo lenge poropeta akali dupwa kando waso karalapape. Akali dupwame yanenge dorena mena sipisipi ingyuo pau lasi epapala monarename yana suwa kararope andake asiŋiliŋili lao karenge dopale ingyuo epenge.
MAT 7:16 Nakama keta jingi lyeramo dupwa kandapala dokopa dokorekelamo lao kando singi doko suu pyao akali dupwa pyuo kararami dupwa kandapala dokome dopa pyuo dokome dopa pyuo pingilyamo lao kandarami. Nepereke dokona girapo jingi lyingisi? Dee ikyaikya dupwame piki jingi lyingisi?
MAT 7:17 Doko suu pyao isa angi dupwa peparae jingi keyange lyingi, isa koo dupwana jingi koo lyingi.
MAT 7:18 Isa angi dokome jingi koo dupwa kapa lyii naramopa isa koo dokome jingi keyange kapa lyii narako ingilyamo.
MAT 7:19 Isa jingi koo lyingi dupwa peparae pokapala isare dokona pyambungi.
MAT 7:20 Doko suu pyao jingi lyeramo dupwa apiyakale lao kandapala nakama dokorendelamo lao kandarami.
MAT 7:21 Namba kando, Kamongo, Kamongo larami wambu dupwa peparae yake pandana isingi yulu dokona sukusa paraminde daa. Nambana Rakane yake panda karenge dokona pii warombo soo kararami dupwa yapo kapa parami.
MAT 7:22 Yuu gii doko pyaka seramo dokopa wambu malumi namba langyuo, Kamongo, Kamongo, embena kingi dokona lao Anatunya pii nolako lao, embena kingi dokona lao imambu koo dupwa rekya lanyi nembo, embena kingi dokonako lao yulu andake malu pyuo kara nayamase? larami.
MAT 7:23 Dopa larami dokopa nambame nakama lamaiyuo, Nambame nakama kanda nange. Yulu koo pingi dupwa namba yaki nyepala pupwa, laro leya.
MAT 7:24 Wambu nambana pii dusipa warombo serami dupwa peparae akali mona palenge banya anda kana dokona ketae piya dopale ingyarami.
MAT 7:25 Baa anda piyamopa apunda epo ipwa palyuo poraiya minyuo pipala anda doko kana dokona ketae piyamo dokome poraiyasa lalyalana pyuo lisa piya.
MAT 7:26 Wambu nambana pii dusipa sepala dopa pii narami ramo dupwa peparae akali kopyali baame kee dokona anda piya dopale ingyarami.
MAT 7:27 Baame anda doko kee dokona piyamopa apunda epo, ipwa andake palyuo, porambaiye minyuo pipala anda doko pyao lalyiya. Kinyi anda doko koo keta palyuo lalyiya leya.
MAT 7:28 Pii dusipa lapeyamo dokopa wambu malu peteyami dupwame banya Mana Pii doko sepala mona nembeyami.
MAT 7:29 Dokona lao nakamana mawa pii mana lenge akali dupwame mana lao karenge dopale ingya napala baame porainya renge palyuo mana lamaiyuo kareya.
MAT 8:1 Yesu yuu kyau yaki nyuo lupyuo epeyamo dokopa wambu ama malu baa epeyamuli pyuo epeyami.
MAT 8:2 Dokopa akali rapa neya mende baa kareyamo dokona epapala lenge kambu siyamo dokona wapambu pii pyaro pisipala Kamongo, Embame namba pyuo nyero lao suu pyare ramo kapa pyuo nyere, leya.
MAT 8:3 Dokopa Yesu banya kingi doko pyasinju lapala minyandapala, pyuo nyero lao suu pilyu emba elyape karape, leya. Dokopa banya rapa doko aopa loo leya.
MAT 8:4 Dokopa Yesumi baa lamaiyuo, Wambu mendali kando nambame dopa pipyaŋa lao lamai napipi. Purisi akali doko embena yanenge range lasaka pela puu. Moseseme wamba rete rapa loo laramo dokopa bange mende Anatu mairami leya dokoko embame mairi. Embena rete rapa kene loo lapyamo karapilyamo lao wambu dupwame sinyale lao mairi, leya.
MAT 8:5 Anda malu palyuo karenge yuu Kapaneame lenge dokona sukusa peya dokopa yanda singi mupwa akali mende Yesu baa peyamo dokona laeyo epapala piso sokondali pyuo lao,
MAT 8:6 Kamongo nambana kendemande akali doko anda dokona papae rambwapala sii andake lapyamopa silyamo, leya.
MAT 8:7 Leyamopa Yesumi baa lamaiyuo, Nambame pyuo nyakala eparowale leya.
MAT 8:8 Yesu dopa leyamo dokopa yanda singi akali mupwa dokome pii mende lamaiya. Kamongo, namba kwaepyamo karo dokona nambana anda dokona andakare eparene doko kapa ingya naraŋa. Dokona mee piimi iki larene dokopa nambana kendemande akali doko mee inginya leya.
MAT 8:9 Dokona lao lapome namba dopa pii dapa pii lao rapu pyuo karaminyipa nambame mee yanda singi lapo dupwa rapu pyuo karenge. Karo dokopa, mendali lamaiyuo, Emba puu lenge dokopa baa penge, mendali lamaiyuo, Emba ipu lenge dokopa baa dopa pyuo pingi leya.
MAT 8:10 Dopa leyamo pii doko sepala Yesumi baa kando yamaranguya. Yamarangupala wambu lapo matarename epeyami dupwa lamaiyuo, Namba kinyi langilyu, Baa Anatu kapa ingingi lao poraiyuo suu pyao karamo suu pingi dokome Isaraele wambunya suu piyami dupwape isa palyuowale suu pilyamo leya.
MAT 8:11 Dopa langilyu, wambu malu neta pyakaenge dorenape neta anda penge dorenape karo epapala Aporakamemoo Aisakemoo Jekopemoo pipya yake panda dokona role pyao nenge nao pisarami.
MAT 8:12 Pisaraminyipa yake panda sukusa pupingele dupwa iminjingi neta dorena nyuo pyambwara. Dokopa ee lao nenge ginyi ganyi lao kararami, leya.
MAT 8:13 Lapala Yesumi yanda singi akali mupwa doko lamaiyuo, Emba kapa pira lao suu pyapinyili pyuo pira ingilyamo dokona anda paale leya. Leyamo yuu gii dokopako kendemande akali doko mee ingiya.
MAT 8:14 Yesu Pitana anda kolando peyamo dokopa Pitana enda imwange doko yanenge isare rao anga piyamo siyamo kandeya.
MAT 8:15 Baame banya kingi doko minyandeyamo dokopa yanenge isare reya doko pyai nao rali piyamopa baame sipurapala Yesunya nenge rapa rapa pyakamiya.
MAT 8:16 Alemanji dokopa wambu malu imambu koo soo pyale leyamo dupwa baa kareyamo dokona soo epeyami. Dokopa Yesumi imambu dupwa piimi lao ralinyi nembo wambu anga piyamo dupwa peparae pyuo nyuo pyuo kareya.
MAT 8:17 Dopa piya doko Anatunya poropeta akali Aisaya pii leyamuli pyuo pyaka siya. Pii leya doko dopa lao palamo, Baame namwana anga wakale wakale dupwa pyuo nyuo, namwana yanyi pingi renge dupwa rekya lanyi nembakao kareya leya.
MAT 8:18 Yesumi wambu ama malu rukuraka pyuo baa kareya dokona karo awali leyami doko kandapala ipwa dumuwangu monale leya.
MAT 8:19 Dokopa Mawa Pii mana lenge akali mende baa kareyamo dokona epapala dopa lamaiya. Mana lenge, emba papirinyili pyuo papyuo kararo, leya.
MAT 8:20 Leyamo dokopa Yesumi baa isingi lamaiyuo dopa leya. Yana suwa kararope dupwa yuu rumbyapala palyuo, yaka bii lao papingi dupwa anda pipala palyuo pilyaminyipa Ikinyingi Akali doko mendasa kyawa koŋondapala karara ingya nange, leya.
MAT 8:21 Disaepole kareyami dokona wakale mendeme baa lamaiyuo, Kamongo, Namba wambo rakane malu pipala enakana eparo doko kapase? leya.
MAT 8:22 Dokopa Yesumi baa lamaiyuo, Kumasi dupwa kumasi yango dupwame range malu pinya lapala namba paronuli pyuo ipu, leya.
MAT 8:23 Lapala sipu dokona pyakambuya dokopa banya disaepole dupwa dokonako peyami.
MAT 8:24 Dokopa porambaiye andake minyuo epapala ipwa muiyane pete doko kasakole minyuo mango epapala sipu dokona simbwalana piya. Dopa piyamopape baa luu paleya.
MAT 8:25 Dokopa baa pao pyalerapala, Kamongo, namwa kumarama ingilyamo nyisape, leyami.
MAT 8:26 Dokopa baame nakama lamaiyuo, Anatu kapa nyisara lao suu pyao kara napala akipamo pakalyamisi? leya. Lapala sipurapala porambaiyepe ipwape pyalana pyuo kaena leya. Dokopa koo pyuku pyuku peya.
MAT 8:27 Dokopa akali dupwa yako lao mona nembapala, Porambaiye ipwape baa letamuli pyuo pingikolamo, baa aki akali? leyami.
MAT 8:28 Dokopa ipwa dumuwangu Gatata wambu palenge dokona epeyamo dokopa akali lama kopyali imambu koome soo pyale leyamo kareyambi. Dokona mendali kapa epo paa nayami dolapo yanyanda dokona karo baa epeyamo dokona epo kandamae nyiyambi.
MAT 8:29 Kandamae nyepala pii porakaiyuo kaeyo lapala, Anatunya Ikinyingi, embame nambwa apa pyuo pirisi? Yuu gii lekeleke rao kararamba doko pyaka sepa naramopa wambo lekeleke ralambisi lao epelepe? leyambi.
MAT 8:30 Yuu dokona mena malu repetale kambu nao kareyami.
MAT 8:31 Dokopa imambu koo dupwame baa lamaiyuokondali pyuo, Namwa ralinyi nembare ramo doko mena karaminyi dupwana pupwa laa, leyami.
MAT 8:32 Leyaminyi dokopa baame nakama lamaiyuo, Kapaŋa pupwa, leya. Dokopa mena dupwa peparae makandapala rondo dokona alayuwa lapala ipwa muiyane pete dokona pao yalyapala kumuyami.
MAT 8:33 Kumuyamisa akali mena rapu pyuo kareyami dupwa ralo anda malu palyuo karenge dokona papala dopa pipya lao peparae polo lamaiyuo, akali imambu koo soo pyale lenge dolapo dopa pipya lamaiyuo piyami.
MAT 8:34 Dokopa anda repe repe pyuo karenge dokona wambu dupwa peparae Yesu baa kareya dokona kando nyela epeyami. Epo baa kandapala nakamana yuu doko kanjakala pupyali lao lamaiyuokandali piyami.
MAT 9:1 Dokopa Yesu bote mendena pyakambwapala piso oko soo epo anda repe repe pyuo karenge banya yuu range dokona epeya.
MAT 9:2 Dokopa akali papae rambungi mende luu palenge dokona siyamopa baa kareyamo dokona soo epeyami. Dokopa nakama Yesu kapa pyuo nyera lao suu pyao kaepala soo epeyamisa, kandapala Yesumi papae rambungi akali doko lamaiyuo, Rakane, emba porayapala sepe. Embena koo dupwa nyuo kame sakasi silyamo, leya.
MAT 9:3 Dokopa Mawa Pii mana lenge akali kareyami dupwana lapome, Akali dakeme Anatunya lenge kambu dokona kokwa soo lalyamo, lao monarenako suu piyami.
MAT 9:4 Dopa piyaminyipa Yesumi nakama suu piyaminyi doko kandapala, Akipamo nakama monarena kopetame suu pilyamisi?
MAT 9:5 Yulu anjuku doko awa awa pyuo pingisi? Nambame koo dupwa nyuo kame sakamyuo kaeyasi silyamo lapu doko awa awa pyuo pingi panda sipurapala pena laro doko yulu awa awa pyuo pingisi?
MAT 9:6 Dokako doŋo Ikinyingi Akali renge palyuo koo dupwa isa yuu dakena kapa nyuo kame soo kaeyakamira nakama selapa lao akali dake pyuo nyilyu, leya. Lapala papae rambungi akali doko lamaiyuo, Emba sipurapala embena luu palenge rate doko nyuo soo anda puu leto, leya.
MAT 9:7 Dopa leyamo dokopa akali doko sipurapala anda peya.
MAT 9:8 Dopa piyamo doko kandapala wambu malu kareyaminyi dupwa pakayami. Pakapala, Anatumi isa akali renge palyuo yulu dopale pyuo karena lapyalyamo, lapala Anatu lakandeyami.
MAT 9:9 Yuu doko yaki nyepala pao dokopa akali mende kingi Matyu lenge doko takisi nyingi anda dokona peteyamo kandeya. Kandapala baa lamaiyuo, Namba paronuli pyuo ipu, leya. Dokopa baa sipurapala Yesu peyamuli pyuo peya.
MAT 9:10 Banya anda dokona nenge nao peteyaminyi dokopa takisi nyingi akali malupi yulu koo pingi malupi epapala Yesumoo banya disaepole dupwa role pyao peteyami.
MAT 9:11 Dopa piyaminyi kandapala Parisi dupwame banya disaepole dupwa lamaiyuo, Akipamo nakamana mana lenge doko baa takisi nyingi akali dupwa yulu koo pingi wambu dupwa pipa role pyao nenge nao petaminyi? leyami.
MAT 9:12 Dokopa pii doko sepala baa dopa leya. Wambu porai mee karenge dupwa dokotame pyuo elya pyakana lao epa narami. Anga pingi dupwa iki dokotame pyuo nyingi.
MAT 9:13 Baepolena pii mende pyasi palamo doko, Nakamame mena pyao kiso jimili lao suu pyaa napala wambu yango kondo nyiso kararami doko keyange lao suu pilyu. Pii dokona renge doko palamo dupwa soo nyelapape. Dokona lao yulu rolae pingi dupwa epena lao sukusa nyela epeyonde daa, yulu koo pingi dupwa sukusa epena lala epeyo, leya.
MAT 9:14 Dokopa Jonena disaepole dupwa baa kareyamo dokona epapala dopa leyami. Akipamo namwape Parisi dupwape nenge naa nao pisimwanopa embena disaepole dupwa nenge mee nao petaminyi? leyami.
MAT 9:15 Dokopa Yesumi nakama dopa lamaiya. Akali enda nyelana lara doko banya puu minyingi dupwa role pyao pisirami dokopa puu minyingi dupwame kondaramisi? Enda nyelana lara akali doko nakama yaki nyepala paramo yuu gii dokopako nenge naa nao pisirami leya.
MAT 9:16 Dee wambu mendeme komau wambarae rokwara dokopa yango enenge palyuo kii pipala wate pirami dokopa wambarae doko rokwara. Rokwaramo dokopa komau andake ingyuo kwaro karara.
MAT 9:17 Dee wambu mendeme mena yanengendeme kipwa pee wasisi wambarae dokona waene ipwange enenge kyano pii nange. Dopa pirami ramo dokopa waene ipwange enenge dokome penge doko momo napala enakana poro lara. Dokopa waene ipwange doko isa paramopa kipwa pee poro lasi sera. Dokopa waene ipwange enenge doko kipwa pee enenge dokona kyano pipingi. Dokona laparae kapa sera leya.
MAT 9:18 Baame nakama pii lamaiyuo kareyamo dokopa rapu pingi akali mende andakare epapala banya lenge kambu siyamo dokona wapambu pii pyaro pisipala, Nambana wanenge doko ene dakepa kumapalamo. Emba epapala embena kingi baa ketae retakarene dokopa mee lete petenale bwua leya.
MAT 9:19 Dokopa Yesu sipurapala akali doko peyamuli pyuo banya disaepole dupwa pipya peyami.
MAT 9:20 Pao dokopa enda mende ee kana akalisa ipisu lama endana doko ipwa ingyuo guu lao kareyamopa peteyamo doko baa peyamo dokona matarena epapala banya komau pinjingi dusa minyandeya.
MAT 9:21 Nambame banya komau doko mee minyandaro ramo dokopa namba mee ingyara lao suu pyapala piya.
MAT 9:22 Yesu kapu kyuo baa kandapala, Nambana wanenge, emba mona porayapala pisipi. Kapa pyuo nyakare lao suu pyapi dokome anga doko mee ingilyamo, leya. Dopa leyamo dokopa aopa endana doko mee ingiya.
MAT 9:23 Enakana Yesu rapu pingi akali dokona anda dokona epapala wambu kurulu lenge dupwape wambu malu kilyipu kilyipu karo kareyaminyi doko kandapala
MAT 9:24 baame lao, Kaepala pupwa. Wanake doko kuma napala mee luu palamoŋo leya. Dokopa nakamame baa kando gilya giyana piyami.
MAT 9:25 Dopa piyaminyipa wambu malu dupwa ralinyi kama nembeyaminyipa baa donge dokona papala wanake dokona kingi minyuo nyiyamo dokopa sipureya.
MAT 9:26 Dokopa baa dopa pipyaŋa lao yuu dokona wambu dupwame soo kapa kapa piyami.
MAT 9:27 Dopa pipala Yesu panya yuu doko yaki nyepala pyuo peyamo dokopa akali lenge koo lamame baa peyamuli pyuo pao pii ama poraiyuo kaeyo lapala, Dapitinya ikinyingi, nambwa kondapala pyuo nyii, leyambi.
MAT 9:28 Baa anda mendena peyamo dokopa akali lenge koo lama dolapo baa kareya dokona epeyambi. Dokopa Yesumi nakamba lamaiyuo, Namba kapa piri lao suu pilyambisi? leya. Nakamba isingi lamaiyuo, Emba kapa piri lao suu pilyambano leyambi.
MAT 9:29 Dokopa baame nakambana lenge minyinyi pisakamipala, Nakambame kapa piri lao suu pyambinyili pyuo palena, leya.
MAT 9:30 Dokopa nakambana lenge doko mee reyambi. Dokopa Yesumi nakamba poraiyuo lamaiyuokondali pyuo, Dopa pipi lao sisasarami lao kando waso karalapape, leya.
MAT 9:31 Dopa leyamopape nakambame papala yuu dokona wambu kipwa kipwa dupwana lao raeyambi.
MAT 9:32 Dolapo papeyambi dokopa imambu koome soo pyale letamopa pii laa nange akali mende baa kareyamo dokona lanyuo epeyami.
MAT 9:33 Dokopa imambu koo doko raka lanyi nembeyamosa pii laa nange akali doko pii leya. Dokopa wambu rukuraka pyuo kareyami dupwame kando ayaka lao, Isaraele yuu dakena dopa pyuo mende pilyamo wamba kanda nange, leyami.
MAT 9:34 Dopa leyaminyipape Parisi dupwame lao, Baa imambu koo dupwana kamongo dokome renge kuipyasa baame imambu koo dupwa raka lanyi nembo karamo, leyami.
MAT 9:35 Dokopa Yesumi taone dupwanape yuu kuki dupwa peparaenape papyuo nakamana sinakoke anda dupwana mana lao banya isingi yulu dokona waili pii keyange doko boo pyao lao anga pingi wakale wakale dupwa peparaepe kingi kimbupi kwaenge peparaepe pyuo nyepa pyuo kareya.
MAT 9:36 Wambu malu rukuraka pyuo kareyaminyi dupwa mena sipisipi isingi akali yangilyasa ralo apa pimane lao saka nao pyuo karenge dopale ingyuo pyuo kareyamisa Yesumi kandapala kondome kumuya.
MAT 9:37 Dokopa baame banya disaepole dupwa lamaiyuo, Isa jingi wambu pipala kaikaro sipyamopa lyerami wambu dupwa mendasipa iki ingilyamo.
MAT 9:38 Dokona isa jingi wambu pipala silyamo dokona Kamongo dokome yulu pingi wambu lapo lyela pena lapyali lao ateŋa lalapape, leya.
MAT 10:1 Yesumi banya disaepole akalisa ipisu lama dusipa baa kareyamo dokona epena lapala imambu koo dupwa raka lanyi nembarami renge dokope anga pingi wakale wakale dupwa peparaepe kingi kimbupi kwaenge wakale wakale dupwa peparaepe pyuo nyerami renge dokope maiya.
MAT 10:2 Aposele akali akalisa ipisu lama dusipana kingi dusipa, wambo Saimone kingi mende Pita lenge doko yangonge Endurupa, Jemesa Sepetena ikinyingi yangonge Jonepa, Pilipa Batolomyupa, Tomasa, Matyu takisi nyingi akali dokope, Jemesa Aopiasana ikinyingi doko Tatiasapa,
MAT 10:4 Saimone Orome gapomane awa nao kareya dokope Jutasa Isakeriote Yesu mata kando leya dokope, dusipa.
MAT 10:5 Yesumi akali akalisa ipisu lama dusipa neta pena lao dokopa dopa leya. Wambu rara wakale dupwa karaminyi dokona mendena paa nao Samaria wambu dupwana anda malu palyuo karenge dupwana mendena sukusa paa nao pipala
MAT 10:6 Isaraele rara dupwa sipisipi ingyuo ralo karaminyi dupwana pupwape.
MAT 10:7 Pao pii boo pyao papyuo dokopa, Yake pandana isingi yulu doko pyaka selena silyamo, lao lao pupwape.
MAT 10:8 Anga pyara dupwa pyuo nyuo, kumasi dupwa lete sipurena lao, rapa nara dupwa loo lena lao, imambu koo dupwa raka lanyi nembo pyuo pupwape. Nakama ropo pyaa nao nyepala pirami dokona suu pyao pyakalyuo lao ropo pinya laa nao pyuo pupwape.
MAT 10:9 Kana rao kuikui lengepe kana kyewa lengepe kumasi kana mendepe nakamana marapu dokona manja nao pupwape.
MAT 10:10 Kata pao nyuukwuanyi embenge emba nao komau mende lapo lao minya nao kimbu suu pii nao pangali minya nao mee pupwape. Dokona lao wambu nyisingi dupwa kando rae maipala nenge pingi kandale.
MAT 10:11 Nakama taone dupwanape yuu anda kuki pyuo karenge dupwanape parami dokopa yuu range akali mende api kapa karenge lao sepala yuu doko kanjakala paa nao dokopa baamoo role pyao palipwape.
MAT 10:12 Anda dokona kolando pao dokopa nakama mona kyuu lao seramo petena lao yako lalapape.
MAT 10:13 Dokopa anda range wambu dupwame yako larami ramo doko nakamana yako lenge pii doko mee ketae ingyuo paa nara. Yako laa narami dokopa yako lare pii doko mendena ketae ingyuo para leya.
MAT 10:14 Dokopa wambu mendalimi nakama yako lao nyii nao nakamana pii see nao pirami ramo dokopa anda dokope anda repe repe pyuo karenge dokopa yaki nyepala pao dokopa kimbu dokona sinjimu pisira doko pyarendo retama pupwape.
MAT 10:15 Kinyi langilyu, yuu gii kote paliramo kambuyanda piramo dokopa yuu Sotoma rangepe yuu Gomora rangepe dupwa randa kuki pyuo naraminyipa taone dakena wambu dupwa randa wakasa narami.
MAT 10:16 Nambame nakama mena sipisipinde suwa rae lenge dokona nyuo suu lete lao nembelyo kande. Dokona yaka wayamu ingyuo dee kau kulasi dopale ingyuo pao mona angi palenge ingyuo pupwape.
MAT 10:17 Wambu nakama nyepala kote lenge dupwana pao maiyuo sinakoke anda dupwana pyaroko pyao pirami dupwa waso karalapape.
MAT 10:18 Dokopa nakamba nambana wambu karaminyiŋi lapala kote singi akalipi kiŋinya lenge kambu dupwanape wambu rara wakale dupwana lenge kambu kote laraminyipa nakambame Anatunya kingi lamaiyuoko karalapape.
MAT 10:19 Kote lamanale lapala nakamba nyuo mairami dokopa apa pyuo larama laope apa laparama laope mona yanyi pyaramopa kara nalapape. Yuu gii dokopa pii laramili dupwa pyongo pyara.
MAT 10:20 Nakamba pii mende range maso laraminde daa, Nakambana Rakanena Imambu dokome nakamba dopa lalapape lao langira.
MAT 10:21 Yangonge mendeme banya yangonge pyao kumakana lao minyuo epo maira. Dokona ingyuo rakange mendeme banya wane doko dopako pira. Dokopa wane wanakepe dupwame endangi rakangepe kando kamba lapala pyao kumakana larami.
MAT 10:22 Wambu peparaeme nambana kingi reke lao kararami dokona nakama awa narami. Dopa piraminyipape mendeme mee randako nao kaeya nao pyuo karo otaramo doko baa Anatumi nyiso pyuo nyera.
MAT 10:23 Taone mendena randa jiyami kande dokopa taone mende maki pyuo karara dokona ralo papa pipape. Dokona lao kinyi langilyu, Isaraele wambu dupwana anda repe repe pyuo karenge dupwana nakama ene papipa naraminyipa Ikinyingi Akali epara.
MAT 10:24 Mana nyingi akalimi banya mana lenge akali dokona baa andake ingyuo kararande daa. Dokako suu pyao yulu akali dokome banya kamongo dokopa baa andake ingyuo kara nara.
MAT 10:25 Mana nyingi mendeme banya mana lamaingi dokako mendeke ingyuo para ramo doko kapa ingyara. Yulu akali mendeme banya kamongo nyuo enakaro lao suu pyaramo doko kapa daa. Dokona ingyuo nakamana kamongo kando Satane Belesapula larami ramo doko nakamana kingi kokwa sinya nembo larami ingya nalyase?
MAT 10:26 Nakama kando paka nalapape. Mende kyanga pyaro karenge ramo doko pinjingi minyalyara, mende yalu pyuo singi ramo doko panasi sera.
MAT 10:27 Nambame ene yango ipyamopa langilyu dupwa angi yangaramo dokopa lalapape. Isa isa pii serami doko andayange dokona pulyuo papala pii ketae palyuo lalapape.
MAT 10:28 Dokona suu pyao nakamana yanenge ketae iki pyao kumakapala imambu pyao kumakalana saka narami dupwa paka nalapape. Imambu yongope laparae isare panda dokona kapa kokwa sinyi nembara doko kando pakalapape.
MAT 10:29 Yaka kuki lama maiyapala kumasi kana mendaki iki nyii nangese? Dopa pingiko doŋo yaka dokona mende nakamana Rakane kanda nao kamenge karelyamopa mee yuu dokona kumuo paa nange.
MAT 10:30 Nakamana kyawasi dupwa peparae yaka lasiko karamo.
MAT 10:31 Dokona lao paka nalapape. Yaka kuki malu dupwa Anatumi rungi rungi pilyamopape nakama wakasa rungi rungi pingi.
MAT 10:32 Wambu mendeme isa wambunya lenge kambu dokona nambana lao polo larami dupwa peparae nambana Rakane yake panda karenge dokona lenge kambu dokona karo nambame nakama nyiso lao kararoko.
MAT 10:33 Laronopape isa akali dupwana lenge kambu dokona namba mata joo larami wambu dupwa peparae nambana Rakane yake panda karenge dokona lenge kambu dokona nambame nakama mata maiyuo laroko.
MAT 10:34 Isa yuu dakena kui lao kararami lao epeeŋe lao suu pyaa nalapape. Kui lao kararami lao epeyonde daa. Wua gela minyuo yanda pyuo kararami lao epeyo.
MAT 10:35 Akali mendeme rakange kando sisu nyuo enda mendeme endangi kando sisu nyuo enda mendeme ayange kando sisu nyuo pirami lao epeyo.
MAT 10:36 Akali mendali banya ree palu dupwa pipya range sukusa yanda pimwai ingyara.
MAT 10:37 Mendeme namba mona reto karope endangi panda rakange kamame wakasa mona reto karara ramo doko nambana ingyuo kapa kara nara. Dopako pyuo mendeme namba mona reto karope ikinyingi panda wanenge dokona kamame wakasa mona reto karara ramo doko nambana ingyuo kapa kara narako.
MAT 10:38 Dee, mendeme rangena isa mamando doko nyepala soo namba paronuli pyuo epa nara ramo doko nambana ingyuo kapa kara narako.
MAT 10:39 Mendeme range kyawa lete nyera ramo doko baa koo keta palirasa pira. Dee mendeme nambana reke lao kumaramo doko range lete wai pyao nyera ingilyamo.
MAT 10:40 Mendeme nakama yako lao nyera ramo doko baame namba yako lao nyerasa pira. Dee, mendeme namba yako lao nyera ramo doko baame namba mapanyi peeyamo doko yako lao nyerasa pira.
MAT 10:41 Mendeme Anatunya poropeta akali mende kando baa poropeta akaliŋi lao yako lao nyera ramo doko Anatunya poropeta akali keta renge kulisa epenge dopale baa keta eparako. Dopako pyuo mendeme rolae pingi akalilamo lao kandapala yako lao nyera ramo doko rolae pingi akali keta renge kulisa epenge doko baa keta eparako.
MAT 10:42 Dee, mendeme wambu kuki karaminyi dupwana mende kando baa Kuriseneŋe lao kandapala pengena ipwa manda renge peteta maira ramo doko baa keta renge keyange yano nyera doko isa panaramo nyera leya Yesumi.
MAT 11:1 Yesumi banya disaepole akalisa ipisu lama dusipa mana lamaiyuo otapala wambu dupwana anda malu repe repe pyuo karenge dupwana mana lamaiyuo boo pyao lao papiya.
MAT 11:2 Dokopa Jone baa karapusi anda palyuo Koraisa dopa pilyamo dopa pilyamo lao sepala banya disaepole lapo keta Yesu dokona dopa lao piso siya.
MAT 11:3 Mende epara doko emba panda wakale mende epelyape lao koto kararamase? leya.
MAT 11:4 Dokopa Yesumi nakama isingi lamaiyuo, Nakamame soo kando pilyaminyi dupwa Jone lamaiyala pupwa.
MAT 11:5 Lenge kwaenge dupwa lenge rao, kimbu koo dupwa kata papyuo, rapa nenge dupwa loo lao, kale poenge dupwa pii soo, kumasi dupwa sipurao epo, pendewa wambu dupwa waili pii keyange doko boo pyao lamwanopa soo pilyaminyi.
MAT 11:6 Mendeme namba kando suu pingi lama manjo kara nara ramo doko baa rae maiyuo para lao Jone lamaiyala pupwape leya.
MAT 11:7 Nakama papeyami dokopa Yesumi wambu rukuraka pyuo kareyami dupwa kando, Jone dokona lao leya, Yuu muiyane dokona aki kandala peyamisi? Mee porambaiyeme yangi yoko pyao lakaki pisi karapyamo doko kandala pumisi?
MAT 11:8 Aki mende kandalana peyamisi? Wambu komau keyange au pyuo wapuo karenge dupwa kiŋi akali dupwana anda karenge kandale.
MAT 11:9 Aki mende kandarama lao dokona peyamisi? Anatunya poropeta akali mende kandala peyamisi? Kinyi, poropeta kandalana peyami doŋo baame poropeta doloma isa palyili lao karamo.
MAT 11:10 Pii mende baasa lao pyasi palamo doko, Embena lenge kambu dokona nambana wai minyingi akali wambo pena leto, kande. Baame wambo pao embena kata wapwakao karara.
MAT 11:11 Kinyi langilyu isa wambu dupwana wai pyao nyiyami dokona mendeme Jone bapitisimo nyakamaingi dokopa kando wakasa ingyuo kara nalyaminyi. Kara nayaminyipape yake pandana isingi yulu sukusa dokona kamame kuki ingyuo karaminyi dupwame baa kando kamame wakasa ingyuo karaminyi.
MAT 11:12 Joneme kanda soo waili pii lao kareyamo yuu gii dokopa piso epo akali enokonge dupwame yake pandana isingi yulu doko nyelana kuli palyuo pyuo karo nyelana pilyaminyi.
MAT 11:13 Dokona lao Jone ene epapa nayamopa Mawa Pii dokonape Anatunya poropeta akali dupwa peparaena pii dokonape dopa pyuo pyaka sera lao paleya.
MAT 11:14 Dokonako palyuo Ilainja epara ingilyamo lao kareyaminyi doko suu pyao Jone epapala karamo. Pii doko kinyilyamo lao suu pyarami ramo doko selapa.
MAT 11:15 Nakamana kale kata singi ramo dokome selapape leto.
MAT 11:16 Akali epapu yuu gii dakepana ando karaminyi dupwa aki mendena makande pyuo larose? Nakama wane wanakepe lapome makete pingi kamapisa piso role pyao male lenge yango lapo kando pii ketae palyuo kyakale larami dopale ingyuo karaminyi.
MAT 11:17 Namwa laikuli pyakao karamwano dokopape nakama kyaponga pyaa nami. Dee ee lao kumaralerale nyuo pisimwano dokopape nakama ee laa nawako pisimi.
MAT 11:18 Dokona lao Jone baa epapala dokopa nenge naa nao waene ipwange naa nao kareyamo dokona, baa imambu koo palipyamo karamo, leyami.
MAT 11:19 Dee Ikinyingi Akali epapala nenge nao waene ipwange nao pyuo karapyamo kandapala nakamame baa kyawa sisingi bolombalo lapyamopa takisi nyingi akalipi dee yulu koo pingi wambupi dupwana puu minyingi ingilyamo, letaminyi. Dopa pyuo laminyipape Anatunya singinya renge dokome yulu angi kulisa doko potemelyamo.
MAT 11:20 Yesu baa taone lapona wambo yulu andake wambumi pii nange dupwa pyuo kareyamopa yuu range wambu dupwame mona kapu kyaa nayami dokona baame lao nembo dopa leya.
MAT 11:21 Yuu Korasina wambu dupwa, nakama keta randa narami. Betesaita wambu dupwa, nakama keta randa naramiko. Nakamana yuu dolapona yulu andake pyuo kareyo dupwa yuu Taya Saitonepa dolapona pyuo kareyoli doko nakama yuu wamba dokopa mona enenge palyuo karapala kumanda piso wapungi bange dupwa nyuo yanenge yambe pyao wapupala pee pyambuo peteyamuli.
MAT 11:22 Dokona suu pyao dopa langilyu, Anatumi yapalya yapana pyuo laramo dokopa nakama randa andake naraminyipa Taya Saitonepa range dupwa randa kuki pyuo narami.
MAT 11:23 Nakama Kapaneame wambu dupwa yake panda dokona minyalyuo nyeramo parama lao suu pilyamipi? Daa, nakama Satane panda Aitisi dokona isa pyao pyambwara. Dokona lao nakamana yuu dokona yulu andake pyuo kareyo dupwa yuu Sotoma dokona pyuo kareyoli doko yuu doko koo keta paa napala mee kapa sulu soo sipyali.
MAT 11:24 Dokona suu pyao nakama dopa langilyu. Anatumi kote andake laramo yuu gii dokopa nakama randa andake naraminyipa yuu Sotoma range dupwa kuki randa narami, leya.
MAT 11:25 Yuu gii dokopa Yesumi dopa leya, Rakane yake pandape isa pandape dolapona Kamongo karene doko embame akali mora petenge dee kendepuli suu pingi palengepe dupwa keta nolaka napala wambu koole dupwa keta panelene dokona ange leto.
MAT 11:26 Kinyi, Rakane dopa piro lao rae maiyuo suu pyapala pipilyamo.
MAT 11:27 Nambana Rakaneme bange peparae namba keta palena lao joo kaeya. Mendeme Ikinyingi doko soo gisa nange, Rakange baame iki soo gisingi. Dee wambu mendeme Rakange doko soo gisa nange, Ikinyingi dokome baa iki soo gisingi. Dee Ikinyingimi Rakange doko lasaka piramopa wambu lapo seramioko.
MAT 11:28 Wambu yulu andake kendame kumuo pyuo karaminyi dupwa namba karo dokona ipupwape. Dokopa nambame nakama mata kyakao nyero.
MAT 11:29 Yulu pingi bulamakao soo gisingi dokome isa mamando puu pyanyi palyapala soo mendeme mana lamaiyuo maki pyuo soo penge dokona suu pyao nambapa wambu mende larapu namba pironuli pyuo mana nyuo isa mamando role pyao soo papimbanale. Namba range monarena koonono ingyuo elya kalo karenge dokona nakama mona seramopa kararami.
MAT 11:30 Dokona lao nambana isa mamando palyuo puu pingi doko awa awa pyuo singi, nambana langena singi bange doko yaepenge, leya.
MAT 12:1 Koro petenge dokopa Yesu witi jingi eendena sukusa peya. Peyamopa banya disaepole dupwa lopapala witi jingi nalena lyepala neyami.
MAT 12:2 Dopa pyuo piyami doko Parisi akali dupwame kandapala nakamame Yesu lamaiyuo, Kanda. Embena disaepole dupwame koro petenge dokopa kapa pii nange doko pilyaminyi, leyami.
MAT 12:3 Baame nakama lamaiyuo, Dapiti lopo piyamo dokopa banya akali dupwa pipya mende piyami pii doko pyasi palamo doko nakamame kando yaka laa nangese?
MAT 12:4 Baame Anatunya anda kolando papala borete Anatu banya lenge kambu dokona retenge doko baamoo baa role pyao kareyami dupwa pipya kapa naa naraminyipa purisi akali dupwame iki narami ingiya doko mee neyami kande.
MAT 12:5 Dee Mawa Pii pyasi palamo dokona, Koro petenge yuu gii dokopa tembole anda dokona purisi akali dupwame koro petenge mawa pii ukiaki minyuo karaminyipape kopetame pilyaminyi lao larama ingya nalyamo, dopa lao pyasi palamo doko nakamame kando yaka laa nangese?
MAT 12:6 Tembole anda doko makande pyuo renge kamame wakasa mende palamo lao langilyu.
MAT 12:7 Pii pyasi dokona, Mendali kondapala nyiso pyuo karamili lao suu pilyu, bange pyao kiso joo karamili lao suu paa nalyo. Pii pyasi dokona renge doko nakamame simili doko akali lapo keta kote renge pali nange dupwa kando kote lao kopetame pisa namili.
MAT 12:8 Ikinyingi Akali doko koro petenge dokona kamongo ingyuo karamo, leya.
MAT 12:9 Lapala dokona karo pao nakamana sinakoke anda dokona kolando peya.
MAT 12:10 Dokopa akali mende banya kingi anjikipwa nengende peteya. Dokopa lapome Yesu kopetame lara ramo baa kote lamanale lapala baa piso soo, Koro petenge dokopa anga pingi doko kapa pyuo nyingipi mee? leyami.
MAT 12:11 Baame nakama lamaiyuo, Nakama karaminyi akali dokona mendena sipisipi mendaki karara doko misi lenge gii dokopa yuwale mendena yalyara ramo dokopa baame nyuo minyarapala minyalyuo neta nyii narase?
MAT 12:12 Namwa sipisipi kando rungi rungi pyao kararama ramo dokome akali yango mende kando angingyuo rungi rungi pyao kararama lyakande. Dokona koro petenge dokopa wambu kapa nyiso pyuo karenge leya.
MAT 12:13 Lapala akali doko lamaiyuo, Embena kingi pyasinju laa, leya. Dokopa akali dokona kingi pyasinju leya dokopa kingi pakirena dopale mee ingiya.
MAT 12:14 Dopa piyamopape Parisi dupwame potemo papala baa apa pyuo pyao kumakarama lao wato leyami.
MAT 12:15 Dopa pyuo leyaminyi doko Yesumi soo gisapala yuu doko yaki nyepala kakondo peya. Dokopa wambu malu baa peyamuli pyuo peyaminyi dokopa baame anga pingi dupwa peparae pyuo nyepapu dokopa baame dopa pipya lao mendali lamai nana lapa piya.
MAT 12:17 Dopa piyamo dokopa Anatunya poropeta akali Aisaya lenge dokome pii leyamo doko pyaka siya.
MAT 12:18 Nambana kendemande akali nambame nyuo rombo palyiyu, nambame mona retelyo doko kando monarena raeko maiyuo karo doko kandalapa. Baa keta nambana imambu doko maralyaronopa baame rara wakale peparae yulu rolae dokona lao polo lamaira.
MAT 12:19 Baa laiya lao pii rekyae lao laa naramopa baa yuu taone dupwana kata dupwana pii rekyae lao lao kara nara.
MAT 12:20 Baame angi kwaeyamo doko kokwa see nara. Dee lambe kuki rao seramo doko kunjinyi nemba nara. Baa yulu rolae pingi doko wakasa inginyi pyambwara.
MAT 12:21 Banya kingi dokona suu pyao rara peparae mona kare kare kararami leya.
MAT 12:22 Dokopa akali lenge koo pii laa nange imambu koo paleya doko Yesu kareyamo dokona lanyuo epeyami. Dokopa akali pii laa nange doko pii lao lenge rao pinya lao pyuo nyiya.
MAT 12:23 Dokopa wambu peparaeme kandapala mona nembeyami Mona nembapala, Doko Dapitinya Ikinyingi daase? leyami.
MAT 12:24 Dopa leyaminyipape Parisi dupwame sepala, Imambu koo dupwana kamongo Belesapulu lenge dokome baa minyapyasa imambu koo dupwa rekya lanyi nembelyamo, leyami.
MAT 12:25 Nakama dopa lao suu pyamilyamo lao sepala Yesumi nakama dopa lamaiya. Rara mendena yango sukusa sisu nyuo kararami ramo doko ukiaki minyuo kararami. Dee, taonena palenge wambupi ree palu mendepe yango sukusa sisu nyuo kararami ramo doko kapa kara narami.
MAT 12:26 Doko suu pyao Satane baa rangeme rekya lanyi nembara ramo doko baa rangeme rangeko kando sisu nyerasa pira. Dopa pira ramo dokona banya isingi yulu doko apa pyuo kapa palirase?
MAT 12:27 Dee, Satane Belesapulu dokome namba minyapyamopa nambame imambu koo dupwa raka lanyi nembaro ramo doko nakamana palu dupwa aki dokome minyapyamopa imambu koo dupwa raka lanyi nembelyamisi? Lao rolo langipwape leya. Nakama pii kopetame letaminyi lao sepala nakama rangena wambu lapome nakama kando larami ingilyamo leya.
MAT 12:28 Dopa piraminyipape Anatunya Imambu dokome minyapyamopa imambu koo dupwa raka lanyi nembaro ramo doko Anatunya isingi yulu doko nakama keta ipyasa pipya.
MAT 12:29 Dee, mendeme akali porai mendena anda dokona pao apa pyuo banya bange dupwa kendepo nao waa nyakamiramisi? Wambo akali porai doko puu mainyi reta napala ramo dokopa kapa nyii narami.
MAT 12:30 Namba role pyao karo nyiso kara narami dupwa nambapa sisu nyuo kararamisa pira. Mendeme nambapa wambu nyuo sukusa sukusa pyuo kara naramba ramo doko baame nakama ralinyi nembarasa pira.
MAT 12:31 Dokona dopa langilyu. Akali dupwame yulu koo pyuo Anatunya yulu kokwa soo pii wakale wakale larami ramo Anatumi nakamana koo dupwa peparae kapa nyuo kame sakamira. Kame sakamipalape mendeme Imambu Poo Pyasi doko kokwa soo lao karara ramo doko Anatumi banya yulu koo doko nyuo kame sakami nara.
MAT 12:32 Mendeme Ikinyingi Akali doko kando pii mende lara ramo doko Anatumi pii doko nyuo kame sakamira. Dopa piramopape mendeme Imambu Poo Pyasi doko kando lao karara ramo doko Anatumi dakepape rengya rengyape pii doko nyuo kame sakami nara.
MAT 12:33 Isa keyange dokome jingi keyangeko lyeramopa isa koo dokome range jingi koowako lyera ingilyamo. Doko suu pyao jingi dupwa kandapala dokopa isa doko apiyakale lao rolo singi kandale.
MAT 12:34 Nakama kau ikyane dupwa. Nakama koo ingyuo karapala dokopa apa pyuo pii keyange laramisi? Mona anda palyuo simbulyamo renge doko kambunya lumbuo lenge.
MAT 12:35 Akali keyange dokome banya pinjale rungi rungi pingi keyange dokona bange keyange dupwako range nyuo, akali koo dokome banya pinjale koo rungi rungi pingi dokonako bange koo dupwa range nyuo pingi.
MAT 12:36 Dopa langilyu, Anatumi kote lao kararamo gii dokopa wambu nakama pii langa lao karaminyi dupwa peparaena range larami ingilyamo.
MAT 12:37 Dokona lao nakamana pii dupwana minyuo emba rolae pingi laope kyai pingi laope pakana palyuo rolo lara ingilyamo, leya.
MAT 12:38 Dokopa Mawa Pii mana lenge dupwape Parisi dupwapena lapome baa lamaiyuo, Mana Lenge, Embame yulu andake mende wambumi pii nange dopale lasaka pii, leyami.
MAT 12:39 Dopa leyaminyipape baame nakama isingi lamaiyuo dopa leya, Wambu Anatupa rekya lapala koo ingyuo karenge dupwame yulu andake mende lasaka pii lenge. Letaminyako doŋo yulu andake mende lasaka pii naro. Anatumi poropeta akali Jona lenge baa keta yulu andake piyamo dopale mende lasaka pirono kandarami.
MAT 12:40 Doko Jona baa korakama remape kukwa remape oma kameya dokona anda romba dokona paleya doko suu pyao Ikinyingi Akali baa yuu koko dokona kukwa korakamape remako palira ingilyamo.
MAT 12:41 Anatumi kote laramo gii dokopa yuu Ninepa akali dupwame epapu ando karaminyi wambu dupwa kando kote larami ingilyamo. Yuu Ninepa range dupwame Joname boo pyao leyamo pii doko sepala nakama mona kapu kyiyami dokome Anatunya kote laramo dokopa nakambame nakama kondo kote larami ingilyamo. Jona baa akali andake doŋo mende baapa manda manja nalyamo doko dae karamo leto leya.
MAT 12:42 Kote laramo yuu gii dokopa enda mende kuini ingyuo yuu donorena peteya dokome epapu ando karaminyi dupwa pipya sipurapala nakama kando nama nalyamo lao kote larasa pira. Dokona lao baa yuu pinjingi donorena piso Solomonena pii rolae doko sela epeya doko suu pyao baame nakama kote lara ingilyamo. Dopa piya doko mendeme Solomone kando wakasa ingilyamo doko dae kata kande.
MAT 12:43 Imambu koo mende akali mende yaki nyuo dokopa yuu ipwa epa nange dupwana anja paliru lao koto papingi.
MAT 12:44 Palirali mende kando nyii napala dopa lara. Nambana anda palyuo ipu dokona kapu kyuo dee parole, lara. Laeyo epapala dokopa anda doko pii karo dee bange dupwa polanyi nembasi panda rolae soo piramo kandara.
MAT 12:45 Kandapala imambu yanda ipingi nyero baa yale daa, ama koo wakasa lapo lanyuo eparamopa dokona kolando pao palirami. Dokopa enakana akali doko wambo koo kareyamo dopale ingyuo kara nara, ama kamame koo ingyuo kararasa pira. Doko suu pyao epapu koo ando karaminyi dupwa keta dopako pira.
MAT 12:46 Baame wambu dupwa pii ene lamaiyuo kareyamo dokopa banya endangi yangongepe epo kamarena karapala baa pii mende lamaimwali yaka lapala lamaiyakana leyami.
MAT 12:47 Dokopa lapome Yesu lamaiyuo, Embena endakinyi yangonepe dupwame pii mende langimana lao kamarena karaminyi, leyami.
MAT 12:48 Dopa leyaminyipape baame akali doko lamaiyuo, Nambana endangi yangongepe dupwa apimoose? leya.
MAT 12:49 Lapala banya disaepole peteyami dorena kingi pyasinju lapala dopa leya. Nambana endangi yangongepe dupwa dae petaminyi kande.
MAT 12:50 Nambana Rakange yake panda karamo dokome lapyamuli pyuo pyuo karaminyi dupwa nambana yangonge pemalenge endangipi ingyuo pelyaminyi leya.
MAT 13:1 Yuu gii dokopako Yesu anda dokona potemo papala ipwa muiyane pete maronge dokona peteya.
MAT 13:2 Dokopa wambu ama malu epo rukuraka pyuo baa nyuo kako piyamisa baa botena papala peteya. Dokopa wambu rukuraka pyuo kareyami dupwa peparae kee dokona soo kareyami dokopa baame pii malu kongwalu lao lamaiyuo dopa leya. Ee waingi wara pingi akali mendeme banya ee waingi randa lala peya.
MAT 13:4 Baame ee waingi pyao pyale pyale lao randa leyamo dokopa waingi lapo kata dokona peya. Dokona peyasa yaka dupwa epapala napeyami.
MAT 13:5 Waingi lapo kana malu isa yuu dokona siyasa yuu kuki lama iki ketae siyamo dokona peyamo dupwa yuu maena siyamopa waiya lao kene piya.
MAT 13:6 Enakana neta pyakaeyapala epo rolae karapala ee waingi kene piyamo doko pingi pyaa nayamo dokome rao rakusi rapala yando neya.
MAT 13:7 Waingi lapo ikyaikya siyamo dokona pao siya. Siyamopa ikyaikya ando palu manjipala lungwa lungwapala pyao neya.
MAT 13:8 Waingi lapo yuu keyangena peya. Doko andapala jingi lyiya. Lapo jingi akalisa pao akalisa lapo jingi akalisa pakinyamange nyero, dee lapo akalisa rema lyiya.
MAT 13:9 Kale kata singi ramo pii dake selapape, leya.
MAT 13:10 Enakana disaepole dupwa epapala baa lamaiyuo, Akipamo embame pii lamainya dokopa kongwalunya palyuo lengese? leyami.
MAT 13:11 Dokopa baa isingi lao dopa leya. Nakamame yake pandana isingi yulu yalu pisi silyamo renge dupwa kapa silyaminyi. Siminyipape wambu menge dupwa kapa see nalyaminyi.
MAT 13:12 Dokona lao akali mendeme kuki lama soo karara ramo doko maiyuo konda piramopa malu sera. Akali mende angi poraiyuo minya nao karara ramo doko kuki lama seramo dolapo range nyera.
MAT 13:13 Renge dokona lao nambame kongwalu lao lamaingi. Nakama kanda pele pele pipala kando gisa nange. Kalena ketae sepala renge dupwa angingyuo soo nyepa nange.
MAT 13:14 Aisaya pii polo leya doko wambu dupwa keta pyaka silyamo. Pii doko dopa lao pyasi palamo. Nakama soo pisipala renge angi soo gisa nalu nao narami. Lengeme kandapala angi doko aki lao kando gisa narami.
MAT 13:15 Dokona lao wambu dapwana monarena sinjimu lombo palamo. Nakama kalepoe ingyapala lenge raa nao karaminyi. Dopa pilyaminyi dokome nakamana lenge dokome angi kanda nao, nakamana kale dokome see nao, nakamana monarena soo gisa nao pyuo karapala namba pyuo elya pyuo nyakalase lao kapu kyepala epa nalyaminyi, lao pyasi palamo.
MAT 13:16 Dopa lao palipyamopape nakamba dae petaminyi dupwana lenge angi kandenge dokona lenge doko keta keyange palamo. Nakamana kale singi dokona kale doko keta keyangeko palamo.
MAT 13:17 Kinyi langilyu, Anatunya poropeta akalipi yulu rolae pyuo kareyami akalipi malu dupwame nakama epapu kandelyaminyi dupwa kandamwali lao poraiyuo suu pyao kareyami doko kanda nayami. Dee, nakama silyaminyi dopa pyuo semane lao poraiyuo suu pyapala angi see nayami leya.
MAT 13:18 Akali ee waingi randa leya kongwalu pii lapu dokona renge doko langiru, selapape.
MAT 13:19 Lapome Anatunya isingi yulu dokona renge pii lapo sepala soo gisa naramopa monarena pii palira doko koo dokome epo pyaso nyuo nembara doko suu pyao waingi lapo kata dokona peya.
MAT 13:20 Waingi yuu kana malu palenge dokona peya doko suu pyao mendeme pii doko sepala aopa rae maiyuo yako lara ingilyamo.
MAT 13:21 Dopa piramopape waingi pingi angingyuo pyaa naya doko suu pyao baa monarena suu pyao poraiya nao karara. Yuu gii mendasipa suu pyale pyale kararamopa, enakana waili pii keyange dokona reke lao randa eparamo dokopa mona kuki palyuo kara napala waiya lao kaenge.
MAT 13:22 Waingi lapo ikyaikya dokona peyamo doko suu pyao mendeme pii doko seramopa isa yuunya suu pingipi kana mone mona nyingipi dupwame pii doko lungwa lungwapala pyao narasa pendewa para.
MAT 13:23 Waingi lapo yuu keyange dokona peya doko suu pyao mendeme pii doko sepala angi soo gisara. Jingi angi lyiya doko suu pyao baame yulu keyange pyuo karara. Jingi lapo akalisa pao akalisa lyiyamo doko suu pyao mendeme yulu keyange wakasa pyuo karara. Jingi lapo akalisa pao pakinyamange lyiyamo doko suu pyao mendeme yulu keyange andake pyuo karara. Jingi lapo akalisa pao rema lyiyamo doko suu pyao mendeme yulu keyange pyuo karara, leya.
MAT 13:24 Yesumi yake pandana isingi yulu dokona lao kongwalu pii mende nakama sinya lao dopa lamaiya. Akali mendeme banya yuu dokona waingi keyange randa leya.
MAT 13:25 Baa randa lao peyamopa kukwama wambu luu paleyaminyi dokopa banya yanda pimwai dokome epapala witi jingi randa leya dokona mee ranona jingi dupwa rukuraka pyuo randa lanyi palyapala peya.
MAT 13:26 Dokona waingi angi dupwa andapala jingi lyiyami dokopa rano dupwa opetae kene piya.
MAT 13:27 Dokopa akali angi dokona ee range kendemande akali dupwame epapala baa lamaiyuo, Kamongo, embena yuu dokona waingi keyange randa laa naese? Apa pipyasa rano pulyilyamo? leyami.
MAT 13:28 Baame nakama lamaiyuo, Yanda pimwai mendeme dopa piyalyamo, leya. Kendemande dupwame baa lamaiyuo, Dopa piya doko embame namwa rano wapwakala pumili lao suu pilipi mee? leyami.
MAT 13:29 Dokopa baame lao, Rano dupwa yuku nyuo wapwarami dokopa witi pale pale yuku epasasaraŋa daa leya.
MAT 13:30 Jingi lyingi gii epapa naramo dokopa laparae rukuraka pyuo andena kaeyalapa leya. Jingi lyingi gii dokopa pyakepao yake pingi wambu dupwa lamaiyuo, Wambo rano dupwa kisarama lao nyuo puu pyapala enakana witi jingi dupwa retenge anda dokona retena, laro, leya.
MAT 13:31 Yesumi kongwalu pii mende nakama lamaiyuo dopa leya. Isa masatana waingi banya yulu doko suu pyao yake pandana isingi yulu doko dopale.
MAT 13:32 Waingi doko jingi ama kuki ingingi. Jingi menge dupwa pipya manda manja nange. Dopa pilyamopape kene pyao ando dokopa isa pusinai manjo karenge wakale wakale lapo dupwa pipa kapa ingya nange. Doko isa andake wakasa ingyuo andenge. Dokopa wangya manjamu manjae pilyamopa yaka dupwa bii lao epo wangya dupwana anda pyuo petenge, leya.
MAT 13:33 Kongwalu pii mende baame nakama lamaiya. Yake pandana isingi yulu doko isi boretena retelyaminyi andenge dopale leya. Enda mendeme penge sosepyane dokome nenge nenge palawa lenge doko yuu rema ingyuo nyuo mendakinya retapala isi doko koko reteyamo dokopa isi dokome borete doko ando kameya ingiya, leya.
MAT 13:34 Yesumi wambu rukuraka pyuo peteyami dupwana mee pii mende laa napala kongwalunya iki palyuo lamaiya.
MAT 13:35 Anatunya poropeta akali dokome wamba dopa piru dopa piru lao kareyamo dokonako palyuo Yesumi kongwalu pii lamaiya. Poropeta akali dokome dopa leya. Namba kambu roma lumbwapala kongwalu pii wakale wakale laro, isa yuu dupwa pyuo ingyuo reteya dokona piso pii kyanga pyaro karalu kareyamo doko nambame laro lao leya. Leyamo pii dokonako palyuo lamaiyuo kareya.
MAT 13:36 Lamaiyuo karapala wambu malu mee kareyami dupwa yaki nyepala andakare peya. Dokopa banya disaepole dupwa baa peteyamo dokona epapala, Emba kongwalu pii lao rano dupwa ee dokona andeya lalene kandapi dokona renge doko polo langipi, leyami.
MAT 13:37 Dokopa baame isingi lao dopa leya. Akali waingi keyange randa leya doko Ikinyingi Akali dokonasa makande pyuo leto.
MAT 13:38 Ee doko isa yuu dopale. Waingi keyange doko Anatunya isingi pandana sukusa karenge wambu ingilyamo. Rano dupwa koo dokona wambu dupwa ingilyamo.
MAT 13:39 Yanda pimwai akali ranona jingi randa leya doko Satane. Jingi lyerami doko suu pyao yuu muu dupwa lumwa pira dokonasa letamo. Jingi lyerami wambu dupwa aŋala.
MAT 13:40 Rano dupwa nyuo malu palyuo retapala isareme kisingi doko suu pyao yuu lumwa pira gii doko makande minyuo dopa pirami.
MAT 13:41 Ikinyingi Akali dokome banya aŋala dupwa pena laramopa dupwame epo banya isingi panda dokona koo renge wakale wakale paliramo dupwa peparaepe koo pingi wambu kararami dupwa peparaepe yapalyuo nyerami.
MAT 13:42 Yapalyuo nyepala isare pete uliyapu nyuo karara dokona pyambwarami. Dokona nakamame ee lao nenge ginyi ganyi lao kararami.
MAT 13:43 Dokopa rolae pingi wambu dupwame nakamana Rakangena isingi panda sukusa dokona karo neta doko rao karenge doko suu pyao yanga paupau lao kararami. Mendeme kale kata singi ramo dokome pii dake selapape.
MAT 13:44 Yake pandana isingi yulu doko bange kulisa rungi rungi pingi yuu mendena yalu pyuo sera dopale. Akali mendeme bange kulisa doko kando nyepala dee kyanga pyanyi palyara. Palyapala mona mona karo pao banya bange dupwa peparae ropo pyao maiyuo kana nyepala yuu angi bange yalu pyuo seramo doko pale pale baa ropo pyao nyera.
MAT 13:45 Dee yake pandana isingi yulu doko bisinase akali mendeme mola kapa keyange lapo koto papyara dopale ingyuo pelyamo.
MAT 13:46 Baame mola kapa keyange wakasa mendaki mende kando nyepala dokopa pao banya bange dupwa peparae ropo pyao maiyuo kana nyepala mola keyange mendaki doko ropo pyao nyera.
MAT 13:47 Deeko, yake pandana isingi yulu doko oma nyingi nyuu ipwa kota dokona pyao pyambwapala oma rara wakale wakale dupwa minyarapala nyiyami doko dopale.
MAT 13:48 Nyuu doko simbuo paleyamo dokopa akali dupwame ipwa kota marenge dokona oma nyuu doko ipyuo minyuo epeyami. Epapala isa pisipala oma keyange dupwa yapalyuo nyuo penge lapona reto koo dupwa yapanyi nembo pyuo peteyami.
MAT 13:49 Doko suu pyao yuu gii lumwa pira doko pyaka seramo dokopa dopaleko ingyara. Aŋala dupwame neta epapala koo dupwape keyange dupwape mendakinya seramopa koo dupwa yapalyuo nyepala isare pete dokona pyambwarami. Dokona akali dupwa ee lao nenge ginyi ganyi lao kararami, leya.
MAT 13:51 Yesumi kongwalu lapala, Namba pii lalono dupwa peparae soo nyelamipi? leya. Waa, leyami.
MAT 13:52 Dokopa baame nakama lamaiyuo, Dokona suu pyao wambu Mawa Pii wambarae dupwa soo giso karapala yake pandana isingi yulu dokona sukusa parami dupwame, anda range akali mende banya bange kulisa rungi rungi pingi seramo dokona bange enengepe wambaraepe yapalyuo nyera dopale, ingyuo pelyaminyi leya.
MAT 13:53 Dopa lao kongwalu pii dupwa lao otapala,
MAT 13:54 Yesumi banya yuu range epapala nakamana sinakoke anda dokona mana lamaiyuo kareyamosa nakama mona nembo lao, Akali dake pii rolae letamo renge doko anjarae nyiyase? Yulu andake wambumi pii nange renge doko anjarae nyiyase?
MAT 13:55 Baa kaponda yulu pingi akali dokona ikinyingi daa lyasilisi? Banya endangi Maria daakose? Banya yangonge dupwa Jemesamoo Josepemoo Saimonenoo Jutasamoo daako lyasilisi?
MAT 13:56 Banya pemalenge dupwa peparae namwa pipya pisi nalyami lyasili? Dopa lapala akali dake renge andake dapwa anjarae nyiyase? leyami.
MAT 13:57 Lapala baa kando epekanda nayami. Epekanda nayami doko kandapala Yesumi lao wambu peparae Anatunya poropeta akali dupwa lakanda minya minya pyuo karelyaminyipape banya yuu range wambu dupwame baa epekanda nao karenge leya.
MAT 13:58 Dokopa wambu yuu range dupwame baa kapa pira lao suu pyaa nayaminyisa yuu dokona Yesumi yulu andake pyuo kara naya.
MAT 14:1 Yuu gii dokopa Kiŋi Erote yuu Galili rapu pyuo karo Yesunya kingi leyaminyi soo kareya.
MAT 14:2 Sepala baame banya yulu pingi akali lapo lamaiyuo, Akali doko Jone bapitisimo nyakamaingi dokolyamo. Baa kumuo palipala lopo ipyalyamo. Epapala renge porai mende baa keta palipyasa yulu andake doko pyuo karalyamo, leya. Doko wamba Eroteme banya yangonge Pilipana etenge Eroteyase lenge doko mango nyiyamosa Joneme Erote lamaiyuo,
MAT 14:4 Enda doko mango nyuo karene doko kapa pii napyamo pyuo karene leyamo dokona imbwuapala karapusi palyiya.
MAT 14:5 Palyapala pyao kumakapuli yaka lao suu piyamopape mee wambu dupwame Jone baa Anatunya poropeta akali lao suu pyao kareyami dokona Erote baame pyalana pakaya.
MAT 14:6 Dopa piyamopape Erote baa mandeyaminyi gii doko pyaka siyamo dokopa wambu role pyao yalya kando peteyaminyi dokopa dupwana lenge kambu dokona Eroteyasena wanenge doko mali lyiyasa Erote kando rae maiya.
MAT 14:7 Rae maipala wanake doko lamaiyuo, Mende jii lare ramo doko mee jero lao lalu lao leto, leya.
MAT 14:8 Dokopa banya endangi pao lamaiyamopa enda dokome, Jone bapitisimo nyakamaingi dokona ayemba pukupala doko pere paleta dae namba jelase, leya.
MAT 14:9 Leyamo dokona kiŋi dokome soo kondaya. Kondapalape wambu soo karena lao lalu lao lapunupa, wambu namba pipya nenge nao yalya kando pisimwano dokona pii doko lapunu selaminyi kandapi lao suu pyapala ayemba doko kapa nyuo mainya leya.
MAT 14:10 Baame Jone karapusi anda paleyamopa ayemba puku nyela pena leya.
MAT 14:11 Leyamuli pyuo pyao nyepala ayemba doko pere paleta minyuo epo wanake doko maiyaminyipa baame minyuo epo endangi maiya.
MAT 14:12 Enakana Jonena disaepole dupwame epapala yanenge kaoma kusasi doko soo pao malu piyami. Malu pipala Yesu lamaiyala peyami.
MAT 14:13 Yesu baame sepala yuu doko yaki nyepala botena piso nyokonyuo yuu iki singindena peya. Peyamopape wambu malu kareyami dupwame baa dopa piyamo sepala anda malu repe repe pyuo karenge dupwa yaki nyepala baa peyamo dokona mee kata peyami.
MAT 14:14 Baa ipwa maronge dokona pyaka sowale pyuo karo dokopa wambu ama malu lyingi lyangi minyuo kareyaminyi kandeya. Kandapala baame nakama kando kondaya. Kondapala nakamana wambu lapo anga piyamo dupwa pyuo nyepa piya.
MAT 14:15 Yuu kwuayamo dokopa disaepole dupwame baa kareyamo dokona epapala dopa lamaiyami. Karaminyi dupwa anda malu repe repe pyuo karamo dupwana nenge range narami lapo ropo pyao nyela pena laa, leyami.
MAT 14:16 Yesumi dopa leya. Wambu dupwa kaepala parami ingya nalyamo. Nakamame nenge nena lao maiyalapape, leya.
MAT 14:17 Dokopa nakamame baa lamaiyuo, Borete kingi pakipi oma lamape iki silyamo, leyami.
MAT 14:18 Dokopa, Minyuo ipupwa, leya.
MAT 14:19 Lapala wambu malu mee rukuraka pyuo kareyami dupwa rambi dokona isa petena leya. Lapala borete kingi paki oma lama nyepala yake dulu kandalyo kandapala ange lao ateŋa leya. Ateŋa lapala borete kau lao disaepole dupwa maiyamopa nakamame wambu malu peteyami dupwa mokwa soo maiyami.
MAT 14:20 Dokopa wambu peparae nao sikya piyami. Dokopa nenge kau lasi kakana siyamo dupwa yapo nyuo pisiki minyasi akalisa ipisu lama dusipana paki pyuo simbuyami.
MAT 14:21 Nenge neyami dupwa akali akalisa kingi paki iki daako, ama malu wakasa (5,000) kareyami. Dee enda wane wanakepe opetae role pyao peteyami.
MAT 14:22 Dokopa baame banya disaepole dupwa lamaiyuo, Wambu dupwa pena lapala namba enakana eparo ingilyamo. Nakama wambo ipwa dumurena botena piso pupwape leya.
MAT 14:23 Wambu rukuraka pyuo kareyami dupwa pena lapala baa iki yuu kyau dokona ateŋa lala peya. Yuu kwuayamo dokopa yuu dokona baa yeelyo kareya.
MAT 14:24 Bote doko ipwa pete dokona sukusale piso peyami. Dokopa bote peyamo dorena piso porambaiye minyuo epapala pyao lalyuo palyapala ipwa doko kasokole minyiya. Minyapala bote doko pyao mangalya mangana piya.
MAT 14:25 Ene endenge siyamo dokopa nakama peteyami dorena Yesu baa ipwa pete dokona mee ketae moko karo yana yana peya.
MAT 14:26 Disaepole dupwame baa ipwa dokona yana yana epeyamo doko kando semangolamo lapala pakame kumapala pii poraiyuo lao ipwa kuku nyiyami.
MAT 14:27 Dokopa Yesumi nakama aopa lamaiyuo, Nakama monarena poraiyuo rali pipala paka nalapape. Dake namba ipunu pilyamo. Mona nemba nalapape, leya.
MAT 14:28 Dokopa Pitame isingi lao, Kamongo, emba ramo doko ipwa pete dokona yana yana emba karene dokona namba ipu laa, leya. Dokopa baa epena leya.
MAT 14:29 Dokopa Pita bote doko yaki nyepala pyakala ipwa pete dokona papala Yesu kareyamo dokona yana yana panya peya.
MAT 14:30 Dopa piyamopape porambaiye doko kandapala pakaya. Pakapala ipwa dokona yalyalana piya. Dopa pipala pii rekyae lao lapala, Kamongo namba lete nyii, leya.
MAT 14:31 Dokopa Yesumi kingi aopa pyasinju lapala baa minyarala nyepala dopa lamaiya. Akali Anatu kapa ingingi lao poraiyuo suu pyaa nange dake, akipamo embena mona dokona pii lama suu pyalepe? leya.
MAT 14:32 Nakamba bote dokona pao peteyambinyi dokopa porambaiye doko pyai nao rali piya.
MAT 14:33 Dokopa wambu bote dokona peteyami dupwame banya lenge kambu dokona pangu sepala, Kinyi emba Anatunya Ikinyingilyamo leyami.
MAT 14:34 Ipwa pete doko yalo papala yuu Genesarete pao kando nyiyami.
MAT 14:35 Yuu dokona range akali dupwame baalamo lao kandapala yuu kipwa kipwa dupwa peparaena lapo pena leyaminyisa anga pingi wambu peparae baa kareyamo dokona lanyuo epeyami.
MAT 14:36 Epapala wambu dupwa banya komau pinjingi doko kapa minyandena lapyali lao piso sakamiyami. Dokopa minyandapa piyami dupwako mee ingiya.
MAT 15:1 Dokopa Parisi dupwape Mawa Pii mana lenge akali dupwapeme Jerusaleme dokona karo epo Yesu kareyamo dokona epapala dopa lamaiyami.
MAT 15:2 Rakange kyawa dupwame piyaminyili pyuo pyuo karamano doko akipamo embena disaepole dupwa kaepala dopa pii nalyamisi? Nakama nenge nalana dokopa kingi wate pii napala nenge kandale, leyami.
MAT 15:3 Baame nakama isingi dopa lamaiya. Akipamo nakama rangena yulu pingi renge dokona reke lao Anatunya mawa pii doko kaepala pii nalyamipi?
MAT 15:4 Dokona lao Anatumi dopa pipwape leya. Endangi rakangepa rape rape lao karalapape. Mendeme rakange panda endangi kilya kando lara ramo baa pyao kumakalu pirami, leya.
MAT 15:5 Dopa leyamopape nakamame lao dokopa dopa lenge. Akali mende endangi panda rakange lamaiyuo, Nambana bange emba nyereli doko Anatunya ingyuo waso retapunu silyamo, lara ramo
MAT 15:6 doko banya rakange rape rape lao nyisa nara ingilyamo, lao karaminyi. Dopa lao karaminyi dokonako suu pyao nakamame doo minyuo pyuo karenge dokona reke lao Anatunya mawa pii kambanyi nembo karaminyi.
MAT 15:7 Nakama yanengena mamba kiso karenge akali dupwa Anatunya akali Aisayame nakamasa kando nolako dopa leya.
MAT 15:8 Wambu dapwa mee kambunya lao namba ketae pyambuo petaminyi. Namba suu pyaa napala ama wakale wakale suu pyaro petaminyi.
MAT 15:9 Nakama yanengena mamba kiso nambana kingi lao karapalape nakama rangena mawa pii dupwa Anatunya lapala mana lamaiyuo karaminyi, leya Yesumi.
MAT 15:10 Wambu malu kareyami dupwa epena lapala Yesumi dopa lamaiya. Kalena sepala soo gisalapape, leto.
MAT 15:11 Neta singi bange dupwa nenge katana penge dokome imambu kwaeya nange. Nenge katana pii potemo epenge dokome imambu kwaenge, leya.
MAT 15:12 Banya disaepole dupwa epapala baa dopa lamaiyami. Parisi dupwame embena pii lapinyi doko soo epe nasami doko emba silipi? leyami.
MAT 15:13 Baame isingi dopa leya. Rakane yake panda karamo dokome ee waingi wara pii naya dupwa peparae yuku nyuo nembarami.
MAT 15:14 Nakama lao karenale kaeyalapa. Nakamame lenge koo ingyuo karo akali lenge koo yango lapo lanyuo pelyaminyi. Lenge koo mendeme lenge koo yango lanyuo para ramo doko laparae suu mendena rukyala pao palirambi leya.
MAT 15:15 Dokopa Pitame isingi lamaiyuo, Kongwalu pii doko namwa renge polo langipi, leya.
MAT 15:16 Dokopa Yesumi dopa leya. Nakama opetae ene soo gisapa nalyamipi?
MAT 15:17 Neta singi bange nenge kata papala mee andoromba dokona piso ii ranyi nembenge doko see nalyamipi?
MAT 15:18 Doko pii kambunya epenge doko mona dokona piso epenge dokomeko wambunya imambu kwaenge.
MAT 15:19 Dokona lao bange monana koko sepala neta epenge dupwa suu pingi koo dupwape wambu pingipi kepo pingipi yuu yuu pyuo pundapala pyuo karenge yulupi waa nyingipi kote lao panga singipi mata kando kyambo lengepe koo yulu dupwa neta epenge.
MAT 15:20 Renge koo dupwame wambunya imambu kwaenge. Dopa pilyamopape kingi wate pii napala nenge nenge dokome wambunya imambu kwaeya nange, leya.
MAT 15:21 Yesu yuu doko yaki nyepala yuu Rayapa yuu Saitonepana pinjingi dolapona peya.
MAT 15:22 Dokopa Kenane enda yuu range mende epapala baa pii ketae palyuo dopa lamaiya. Kamongo, Dapitinya Ikinyingi, namba kando kondapala nyisape. Nambana wanenge doko imambu koo dokome baa maralyapyamopa randa andake nyilyamo, leya.
MAT 15:23 Dokopa baame isingi mende laa naya. Banya disaepole dupwame epapala baa piso soo, Enda matarena pii rekyae lao epelyamo doko kaepala pena lamai, leyami.
MAT 15:24 Baame isingi lao, Isaraele rara wambu lapo sipisipi dopale ingyuo ralo pyuo neta karaminyi dupwana iki namba puu lao mapanyi peeya lyakande, leya.
MAT 15:25 Dopa leyamopape enda doko epo banya lenge kambu dokona wapambu pii pyaro pisipala, Kamongo, namba pyuo nyisape, leya.
MAT 15:26 Baame isingi lao dopa leya. Wane wanakepena nenge nyuo suwa dupwa karamo dokona pyambuo mairama doko kapa ingya nalyamo, leya.
MAT 15:27 Dokopa enda dokome dopa leya. Kinyi, Kamongo, dokoko doŋo suwa kauwange dokona nenge kapa injisi rate isa penge doko suwa doko kapa nyuo napa pingi leya.
MAT 15:28 Dokopa Yesumi baa isingi lamaiyuo dopa leya. Enda, emba kapa ingyara lao poraiyuo suu pyalyane doko kandelyo. Mende pyakapyali yaka lao suu pyapinyi doko angi pinya, leya. Dokopa yuu gii dokopako enda dokona wanenge doko aopa mee ingiya.
MAT 15:29 Yesu yuu doko yaki nyepala ipwa Galili pete maronge kipwa kipwa dokona kata peya. Papala yuu kyau mendena pulyuo pao peteya.
MAT 15:30 Dokopa wambu ama malu baa peteyamo dokona epeyami. Kata paa nange dupwape lenge kwaenge papae rambungi pii laa nange dupwape dee anga pingi wambu malu opetaepe lanyuo epapala banya kimbu siyamo dokona reteyaminyipa baame pyuo elya pyuo nyepa piya.
MAT 15:31 Dokopa pii laa nange dupwa pii lao, papae rambungi dupwa elya pyuo karo, kata papya nange dupwa kata papyuo, lenge koo dupwa lenge rao piyaminyi doko wambu malu kareyaminyi dupwame kandapala nakama ayaka lao mona nembeyami. Mona nembapala Anatu Isaraele wambu dupwame suu pyao karenge doko lakando ketae pyambuyami.
MAT 15:32 Dokopa Yesumi banya disaepole dupwa epena lapala dopa lamaiya. Wambu malu nambamoo pipya role pyao yuu rema karamwanopa nakama nenge narami see nalyamo dokona namba kondo pilyamo. Kata parami dokopa lopo dokome yame yame lasara lapala nenge naa naraminyipa pena laro lao suu pyaa nalyo, leya.
MAT 15:33 Dokopa banya disaepole dupwame baa lamaiyuo, Wambu ama malu karaminyi dapwa borete kapa narami dupwa yuu muiyane dakena anjarae nyeramase? leyami.
MAT 15:34 Yesumi nakama lamaiyuo, Nakamana borete akipare silyase? leya. Nakamame lao, Yanda ipingi nyero oma mendasipa opetae silyamo, leyami.
MAT 15:35 Wambu malu rukuraka pyuo kareyami dupwa isa yuu dokona petena leya.
MAT 15:36 Lapala baame borete yanda ipingi nyero dusipape oma dusipape nyepala ange lao ateŋa lapala kau lao disaepole dupwa maiyamopa disaepole dupwame wambu dupwa mokwa soo maiyami.
MAT 15:37 Dokopa wambu peparae nao sikya pyuo neyami. Enakana nenge kau lasi kakana siyamo dupwa yapo nyuo pisiki minyasi yanda ipingi nyero simbuyami.
MAT 15:38 Nenge neyami dupwa akali akalisa pao kisima daako, ama malu wakasa (4,000) enda wane wanakepe opetae.
MAT 15:39 Baame wambu malu dupwa pena lapala bote mendena pisipala yuu Makatana lenge dokona epeya.
MAT 16:1 Parisi dupwape Satyusi dupwapeme epapala baa apa pilyape lao kandalana, yake panda dokona yulu palenge mende namwa pyuo lasaka pirinyi, lao baa piso soo leyami.
MAT 16:2 Baame nakama isingi lamaiyuo, Alemanji dokopa nakama lao, Yake doko kone wakasa pilyamo dokona kandapala rakya panyi piralyamo lenge kandale.
MAT 16:3 Yangama dokopa, Yake doko kondamu raro karamo dokona epapu apunda andake epara, lenge kandale. Dopa lao nakamame yake dopa pilyamo dopa pilyamo lao kandapala dopa piralyamo lao singi. Yulu doko silyaminyipape namwa karamano yuu gii dakepale pyuo karaminyi dupwa kandapala enakana mende dopa piralyamo lao kando see nalyaminyi.
MAT 16:4 Wambu epapu ando karaminyi dupwa koo ingyuo range isakalya pyuo karaminyi. Nakama yulu andake mende pyuo lasaka pii lao karaminyipape yulu andake mende lasaka pii naro. Akali Jona keta piyamo doko suu pyao dopale mende piramopa doko iki kandarami, leya. Lapala nakama yaki nyepala peya.
MAT 16:5 Banya disaepole dupwa ipwa pete dumuwangu epo kando nyuo dokopa borete kame sepala minya nao mee epo kando nyiyami.
MAT 16:6 Yesumi nakama lamaiyuo, Parisi dupwape Satyusi dupwapena isi doko pyarepanyi nembo waso karalapape, leya.
MAT 16:7 Dokopa nakamame range sukusa lao, Namwa borete minya nao imwano kandapala lalamo kandapi, leyami.
MAT 16:8 Dokopa Yesu dopa lalyaminyi lao sepala dopa leya. Nakama kapa ingingi lao suu pyaa nale nale lao karaminyi akali dupwa, akipamo nakamame, yango sukusa borete see nalyamo dokona lao karamisi?
MAT 16:9 Kando sepa nalyamisi? Wambu akalisa pao akalisa kingi paki daako ama malu wakasa (5,000) dupwame borete kingi paki dusipa neyami dokopa nenge kakana siyamo yapo nyuo pisiki minyasi akiparena reteyama lao suu pyaa nao karamisi?
MAT 16:10 Dokonako ingyuo wambu akalisa kisima daako ama malu wakasa (4,000) dupwame borete yanda ipingi dusipa neyami dokona nenge kakana siyamo yapo nyuo pisiki minyasi akipare reteyama lao suu pyaa naoko karamisi?
MAT 16:11 Nambame lao Parisi dupwape Satyusi dupwapena isi doko waso minyuo karalapape, lapu kandapi dokopa mee borete dokona laa napu doko apa pyuo nakama see nalyamisi? leya.
MAT 16:12 Dopa leyamo dokopa mee boretena isi doko waso kando karalapape laa napyalyamo. Parisi dupwape Satyusi dupwapena mana pii dokonasa lapyalyamo lao soo manjo nyiyami.
MAT 16:13 Yesu yuu Sisaria Pilipai kipwa kipwa dokona epapala baame banya disaepole dupwa piso soo, Akali dupwame Ikinyingi Akali doko kando apiŋi lao apa lami kandapisi? leya.
MAT 16:14 Dokopa nakamame lao, Lapome emba Jone bapitisimo nyakamaingi akali doko, lami. Lapome Ilainja lenge, lapome Jeremaya, panda akali Anatunya poropeta akali ingyuo karene lenge, leyami.
MAT 16:15 Dokopa baame nakama lamaiyuo, Dopa lalyaminyiko doŋo nakama rangeme namba kando apa pyuondeŋe lao suu pilyamisi? leya.
MAT 16:16 Saimone Pitame isingi lao, Emba Koraisa, Anatu lete karalu karenge dokona Ikinyingi doko, leya.
MAT 16:17 Dopa leyamo dokopa Yesumi baa isingi lamaiyuo, Saimone Jonena Ikinyingi doko, emba keta renge keyange palamo. Isa akali mendeme doko langyapyande daa. Anatu yake panda karamo dokome emba pyongo pyapyamopa lapi lyakande.
MAT 16:18 Dokonako ingyuo emba Pita lenge (pii doko kana dopale) doko suu pyao kana andake dokona nambame nambana Elyambu Pingi doko pyakalyinya lao elya piru. Dokopa kumunginya renge porai dokome Elyambu Pingi doko kapa pyao amasu minya nara.
MAT 16:19 Yake pandana isingi yulu dokona sukusa kambu lumbungi kii yakane dusipa emba jero. Emba isa panda dakena lapo daa larenepape kapalamo larenepape doko yake dorena larene dokonako ingyaraŋa leya.
MAT 16:20 Lapala baame disaepole dupwa lamaiyuo, Namba kando Koraisa karamo lao mendali lamai nalapape lao lamaiyuokondali piya.
MAT 16:21 Yuu gii dokopale piso Yesumi banya disaepole dupwa lamaiyuo, Jerusaleme dokona paronopa kamongo dupwape purisi mupwa dupwape Mawa Pii mana lenge akali dupwamepe randa malu jepa pyuo karapala pyao kumakaraminyipa yuu repo dokona lete minyalyuo nyeramo paro ingilyamo, leya.
MAT 16:22 Dopa leyamo dokopa Pitame baa lambuo nyepala pyalana pyuo lao, Kamongo, Anatumi dopa pii nana lena. Emba keta dopa pyuo paa nana, leya.
MAT 16:23 Dokopa Yesumi kapu kyepala Pita lamaiyuo, Satane, emba nambana lenge kambu silyamo dorena kata kaepala matarena puu. Mena gyaana kyalende oko sili lao lapisa pilyamo. Emba Anatu suu pyao karamo dokona daa. Isa wambumi suu pinginyili pyuo lapilyamo leya.
MAT 16:24 Lapala Yesumi banya disaepole dupwa lamaiyuo, Akali mende namba paronuli pyuo eparo lao suu pyara ramo doko baa range kame soo kaepala banya isa mamando minyalyuo nyepala soo namba paronuli pyuo epara.
MAT 16:25 Mendeme baa range kyawa lete nyera ramo doko lete karenge doko pyakuiyuo nembarasa pira. Dee mendeme nambana kingi reke lao koo keta palyuo kumara ramo dokome range lete wai pyao nyerasa pira.
MAT 16:26 Dokona lao akali mendeme yuu muu dupwana bange peparae nyuo karara ramo dokopa banya kyakana renge doko yaki nyuo kaeyara ramo dokome elyape keta parase? Mendeme banya kyakana renge doko yaki nyuo kaera ramo doko bange akimi range yano pyao nyerase?
MAT 16:27 Dokona lao Ikinyingi Akali doko banya Rakangena yanga paupau lenge doko paleta banya aŋala dupwa role pyao epapala akali dupwa peparae nakamana yulu pyuo karengenyili pyuo yole maira.
MAT 16:28 Kinyi langilyu, lapo dae karaminyi dusipame ene kumapa naraminyipa Ikinyingi Akali kiŋi ingyuo eparamo kandarami, leya.
MAT 17:1 Yuu pakinyamange epo papeyamopa Yesumi Pitamoo Jemesa yangonge Jonemoo nyuo lanyuo yuu kyau londe mendena nakama yeelyo karala peyami.
MAT 17:2 Peyaminyi dokopa baame nakama dusipana lenge kambu siyamo dorena karapala baa wamba yongo karenge doko kaepala yongo wakale maralyiya. Dokopa banya lenge kambu doko neta rao karenge doko suu pyao rao kareyamopa banya komau dusipa yanga paupau lao kyewa lao mama nyiya.
MAT 17:3 Dokopa Ilainja Mosesepa pano epapala nakamba Yesumoo pipya nakama lao pii mende leyaminyi akali dusipame kando kareyami.
MAT 17:4 Dokopa Pitame Yesu lamaiyuo, Kamongo, namwa dae kapa karamano. Embame dopa pipili lao suu pyare ramo doko namba anda paka rema yukurole. Mende embena mende Mosesena mende Ilainjana pyakamyuo piruwale, leya.
MAT 17:5 Ene lao kareyamo dokopa kopa kyewa lenge mende epo nakama kareyami dokona yambe piya. Yambe piyamo dokopa kopa dokona piso pii mende lao epeya. Akali dake nambana Ikinyingiŋi nambame baa mona retapala rae mailyu. Banya pii soo karalapape, leya.
MAT 17:6 Disaepole dusipame pii doko sepala pangu soo lenge kambu yambe pyaro soo ama pakayami.
MAT 17:7 Dopa piyaminyipape Yesumi epo nakama minyandapala, Paka napala sipuralapape, leya.
MAT 17:8 Dokopa nakamame lenge pendekae lapala Yesu baa iki kareyamo kandeyami.
MAT 17:9 Yuu kyau dokona lupyuo epo dokopa Yesumi nakama lamaiyuokondali pyuo lao Ikinyingi Akali ene kumuo palyuo lopo minyalyuo nyepa naramo dokopa pii repa repa pipyamo kandalaminyi kandapi doko dopa pipyaŋa lao wambu mendali lamai nalapape, leya.
MAT 17:10 Dokopa disaepole dusipame baa piso soo, Dopa lapinyipape, akipamo Mawa Pii mana lenge akali dupwame Ilainja wambo epara ingilyamo lao karengese? leyami.
MAT 17:11 Yesumi isingi lao, Ilainja baa wambo eparako doŋo. Epapala dokopa yulu peparae rolae sinya lao pyuo rapa rapa pira ingilyamo.
MAT 17:12 Ilainja baa wambo epapeya leto. Epeyamo dokopa wambumi baalyamo lao soo gisa napala baa kando suu pilyamano ote lao mee langa pyuo kareyami. Doko suu pyao Ikinyingi Akali baa dopa piraminyipa randa nara, leya.
MAT 17:13 Dopa leyamo dokopa disaepole dusipame Jone bapitisimo nyakamaingi dokonasa lalyamo lao soo manjo nyiyami.
MAT 17:14 Wambu malu rukuraka pyuo kareyami dokona epeyaminyi dokopa akali mende dokona epapala wapambu pii pyaro piso dopa leya.
MAT 17:15 Kamongo, Yesu embame nambana ikinyingi doko kondapala pyuo nyakape. Baa manda rengeme manjipa pilyamopa baa randa andake nao karenge. Yuu malu baa isare dokona rukyala pao palipa pingi, yuu malu ipwa dokona rukyala pao palipa pingiko.
MAT 17:16 Doko embena disaepole dupwa karaminyi dokona baa lanyuo ipunupa nakamame baa pyuo elya pyuo nyelana saka nalaminyi, leya.
MAT 17:17 Dopa leyamo dokopa Yesumi dopa lao isingi leya. Nakama wambu epapu ando karaminyi dupwa Anatu kapa ingingi lao suu pyaa napala simbi simbi pyuo karaminyi. Yuu akipare namba nakama pipya role pyao kararamase? Yuu akipare nakama ukiaki minyuo kararaminyipa nambame nakama mata kui lao mana langyuo kararose? Namba karo dakena wane doko lanyuo ipupwa, leya.
MAT 17:18 Dokopa Yesumi imambu koo doko kando pyalana pyuo lamaiyamopa imambu koo doko wane yaki nyuo neta epeyamopa wane doko aopa mee kareya.
MAT 17:19 Enakana Yesu iki kareyamo dokopa banya disaepole dupwa epo baa piso siyami. Imambu koo doko raka lanyi nembalana saka namwa doko apa pipyasa pipya, leyami.
MAT 17:20 Baame nakama lamaiyuo, Anatumi kapa ingingi doko angingyuo suu pyaa nami dokona saka nami. Dokona lao kinyi langilyu, isa masata waingi kuki ingilyamo dokona manda manju Anatu kapa ingingi lao suu pyarami ramo doko nakamame yuu kyau dake kando purukuo dumurena pena laraminyipa dokona para. Dokona mende pinya saka naa narami.
MAT 17:21 Doko nenge wasaka pyuo ateŋa lao pisa narami ramo doko yulu dopale kapa pii narami, leya.
MAT 17:22 Yuu Galili dokona disaepole dupwa epo sukusa sukusa pyuo kareyami dokopa Yesumi nakama lamaiyuo, Ikinyingi Akali doko akali lapo keta minya sakamiraminyipa
MAT 17:23 pyao kumakaraminyipa yuu repo dokopa lete minyalyuo nyera ingilyamo, leya. Dokopa nakama monarena randame kumuo kareyami.
MAT 17:24 Yuu Kapaneame dokona epeyaminyi dokopa tembole anda dokona lao takisi nyingi akali dusipame Pita kareyamo dokona papala, Embena mana lenge dokome tembole anda dokona lao takisi pyaa nangese? leyami.
MAT 17:25 Baame lao, Daa, baa takisi pingi, leya. Lapala anda epeyamo dokopa Yesumi wambo baa lamaiyuo, Saimone, embame apa lao suu pilipi? Isa yuu dakena kiŋi akali dupwame apimoome takisi kana pinya lengese? Nakambana yuu range wambu dupwa panda wambu menge dupwase? leya.
MAT 17:26 Dokopa, Wambu menge dupwa pinya lao karenge, leyamo dokopa Yesumi baa lamaiyuo, Dokona lao banya wambu dupwa koo soo karenge.
MAT 17:27 Koo soo karengeko doŋo akali dusipa imbu singi nyakamisarama lapala embame ipwa kota dokona papala uku pyambware. Dokopa oma wambo peparae nenge kata doko angapu lakipala kana mone mende kando nyere. Doko nyepala namwana takisi doko suu pyao akali dusipa mairi, leya.
MAT 18:1 Yuu gii dokopa disaepole dupwa Yesu kareyamo dokona epapala, Yake pandana isingi yulu dokona api mendali mupwa wakasa ingyuo karape? leyami.
MAT 18:2 Dopa leyami dokopa baame wane mende epena lapala nakama kareyami dokona sukusa pyambuya.
MAT 18:3 Pyambwapala dopa leya. Kinyi langilyu, nakama mona kapu kyepala wane wanakepena mona palenge dopale ingyuo kara narami ramo doko nakama yake pandana isingi yulu dokona sukusa kando nyii naramisa pira.
MAT 18:4 Mendeme wane dake namba kuki ingyuo karo lao suu pinginyili pyuo suu pyao karara ramo doko yake pandana isingi yulu dokona mupwa ingyuo kararasa pira.
MAT 18:5 Mendeme nambana kingi lao wane dapale yako lao nyera ramo doko namba yako lao nyerasa pira leya.
MAT 18:6 Dokonako suu pyao mendeme namba kapa ingingi lao suu pyao petaminyi wambu kuki dokona mende suu longwanyi koo keta pyambwara ramo doko akali pyambwara dokona pendoko dokona kana reeko mende anjapala baa ipwa kota dokona koko kumunya lao pyao pyambwamili doko kapa ingyapyali.
MAT 18:7 Isa yuunya akalimi akali yango kata koona ralinyi pyambwarami dupwa kondo piralyamo. Kinyi yulu dopale pyaka serako doŋo, akali angi randa nyuo maira doko koo keta paliralyamo.
MAT 18:8 Dokona suu pyao embena kingi pakipi panda kimbu pakipimi emba suu longwanyi koo keta pyambwara ramo doko pyao pyakepanyi nembare. Emba kingi paki panda kimbu pakipi molo molo pisi kareta karo lete karenge arapu dokona parene dokome kapa pira. Doko kaepala emba kingi laparaepe panda kimbu laparaepe karepeta kararenepa isare uliyapu nyuo rao karalu karenge panda dokona emba nyuo pyambwarami ramo doko kapa pii nara.
MAT 18:9 Doko suu pyao embena lenge dokome emba koo dokona suu longwanyi pyambwara ramo doko emba lukunyi nembare. Emba lenge paki iki rao seramo lete karenge arapu dokona parene dokome kapa piramopa lenge laparae rao seramo kararenepa isare panda dokona pyambwarami doko kapa pii nara.
MAT 18:10 Wambu kuki karaminyi dapwana mende kando angi daaŋa lao suu pyasarama lao waso karalapape. Dokona lao nakama dopa langilyu. Wambu kuki dupwana aŋala dupwa yake panda dokona karapala nambana Rakange yake panda karenge dokona lenge kambu kando karaminyi.
MAT 18:11 Dokona suu pyao Ikinyingi Akali dokome wambu koo keta pupingele petaminyi dupwa nyiso pyuo nyela epeya.
MAT 18:12 Apa lao suu pilyamisi? Akali mende banya mena sipisipi akalisa pao akalisa kararaminyi dokona mende anda epa nara ramo dokopa baame sipisipi akalisa mange mendaki dee ipisu mange mendakiko karo dupwa yuu kyau pyalya pyana pingi dokona mee karena lapala mendaki pana nayamo doko koto nyela paa narase?
MAT 18:13 Dokona suu pyao kinyi langilyu, sipisipi akalisa mange mendaki dee ipisu mange mendakiko neta paa narami dupwa rae maiyuo kondaramopape mende paramo nyera doko ama wakasa rae maiyuo kondara.
MAT 18:14 Doko suu pyao nambana Rakange yake panda karenge dokome wambu kuki karaminyi dokona mende isa paa namili lao suu pyao karamo.
MAT 18:15 Akali yango mendeme yulu koo emba keta piya kande doko baa karamo dokona papala nakamba iki piso baa koo pyuo karamo dokona rolo lamairi. Baame embena pii sera ramo doko embena yangonepa puu minyuo kararambisa pira.
MAT 18:16 Paa see nara ramo doko akali lama panda rema Baepole letamuli pyuo nakambana pii sinya lao lanyuo pare.
MAT 18:17 Baa dee nakambana pii see nara ramo emba Elyambu Pingi lamaipi. Dokopa Elyambu Pinginya wambu larami doko see nara ramo doko baa Juu daa rara wakale akalipi takisi nyingipi ingyuo karena lapala baa puu minya nare.
MAT 18:18 Kinyi langilyu, nakama isa yuu dakena lapo daa laraminyipape kapalamo laraminyipape doko yake panda dorena larene dokonako ingyaraŋa leya.
MAT 18:19 Dee mende langilyu. Nakama isa yuu dakena karo dokopa mendakinya palyuo mende pinya lao suu pyao ateŋa larami dokopa nambana Rakange yake panda karenge dokome pyakara.
MAT 18:20 Dokona lao wambu lama panda rema nambana kingi lao elyambu pyuo pisirami ramo dokona namba sukusa role pyao pisirusa pira, leya.
MAT 18:21 Dokopa Pitame baa kareyamo dokona epapala dopa leya. Kamongo, yuu akipare nambana yangongeme namba kando yulu koo jepa piramopa nambame nyuo kame sakamyuo kararose? Yuu yanda ipingi nyero piramopa nambame kame sakamipa pirose? leya.
MAT 18:22 Leyamopa Yesumi baa dopa lamaiya. Mee yanda ipingi iki daa, yuu akalisa pao akalisa yanda ipingi nyeroko daa, ama malu wakasa koo embapa pipa piramopa nyuo kame sakamyuo karare leto, leya.
MAT 18:23 Lapala dopa leya. Dokona suu pyao kiŋi akali mendeme banya yulu pingi akali dupwa baa keta bange mairamili dupwa joo otena laro leya doko suu pyao yake pandana isingi yulu doko kapa makande minyuo larama.
MAT 18:24 Baame kana akipare jerami ingilyase lao kanda soo yaka leyamo dokopa akali mende baame kana ama malu paka milyane dopale doko lanyuo baa kareyamo dokona epeya.
MAT 18:25 Dokopa baa maiyalana saka nayamo dokona banya kamongo dokome lao, Baamoo banya etengemoo banya wane wanake dusipape banya bange retenge dupwa peparaepe ropo pyao maipala dokome baa namba kana jerali dusipa range nyero, leya.
MAT 18:26 Dopa leyamo dokopa kendemande akali dokome wapambu pii pyaro pisipala dopa lao ama piso sokondali piya. Kamongo embame namba waiyako lao laa napipi. Bange peparae kapa jeroŋo leya.
MAT 18:27 Dokopa kendemande akali dokona kamongo dokome kondapala baa mokwapala baa kana mairali dupwa kaena lao nyuo kame sakamiya.
MAT 18:28 Dopa piyamopape kendemande akali dokomeko potemo paowale pyuo karo kandeyamo kendemande akali yango mende baa kana kina mendasipa serakamiyande mairali doko kareyamo kando nyiya. Kando nyepala banya mange doko minyapala, kana jereli dupwa peyakana leya.
MAT 18:29 Dopa leyamo dokopa kendemande yango doko yuunya pongwa naro pisipala poraiyuo piso sokondali pyuo, Namba waiyako lao laa napipi. Dokopa kana kapa yano pyakaro, leya.
MAT 18:30 Leyamopa kana range akali baame daa lapala kana ene jepa nara mange dusipana karapusi anda dokona palena leya.
MAT 18:31 Dokopa kendemande yango lapo dupwame dopa piyamo doko kandapala mona randayami. Mona randapala nakamana kamongo kareyamo dokona pao dopa pipya dopa pipya lao baa pakana palyuo lamaiyami.
MAT 18:32 Dokopa banya kamongo dokome baa epena lapala dopa lamaiya. Emba kendemande akali ama koo. Embame namba rolo piso sokondali pipinyisa dokona kana malu wakasa jereli dupwa peparae kame sakao kaeyapu.
MAT 18:33 Kaeyapunupa nambame emba kando sakapala kaeyapu doko suu pyao embame kendemande akali yango doko kando kame sakamipala kaeyaronde pipu lao suu pyaa nalese? leya.
MAT 18:34 Lapala imbwuapala banya kamongo dokome kana jereli dupwa peparae ene jepa naro ramo dokopa karapusi dokona palu palira lao karapusi rapu pingi akali dusipa keta maiya.
MAT 18:35 Doko suu pyao nakamame nakamana yangone mendena koo dupwa monarena nyuo kame sakami narami ramo doko nambana Rakange yake panda karenge dokome nakama dopako pira, leya.
MAT 19:1 Yesu pii dupwa lao otapala yuu Galili doko yaki nyepala yuu Jutia dokona ipwa Jotane dumwarena pyakambuo peya.
MAT 19:2 Peyamopa wambu malu mee rukuraka pyuo baa peyamuli pyuo peyaminyipa baame yuu dokona karo nakama pyuo nyepa piya.
MAT 19:3 Dokopa Parisi dupwame baa kareyamo dokona epapala baa apa letape lao selana makande pyuo dopa lao piso siyami. Namwana Mawa Pii palenge buku dokona renge anjukunya ingyuo enda kapa ramanyi nembarama lao apa letase? leyami.
MAT 19:4 Baame isingi lao, Kanda soo dokopa Anatumi wambu enda akalipa pyuo wasiyamo doko yaka lao kanda nayamisi?
MAT 19:5 Akali mende banya endangi rakangepa yaki nyuo banya enda dokopa pako mendaki ingyuo pisirambi, leyamo pii pyasi palamo doko nakamame kando yaka laa nangese? leya.
MAT 19:6 Anatumi lao, Dokopa mendaki ingyuo pisirambi, leyamo dokona wamba nakamba wakale wakale ingyuo pisirambi doko kaepala mendaki ingyuo pisirambi. Dokona Anatumi pakaramo doko wambumi rekya laa nana, leya Yesumi.
MAT 19:7 Nakamame baa lamaiyuo, Dopa leeneko doŋo akipamo Moseseme lao, Enda ramanyi nembalana lao kande dokopa pepa pase pyao maipala dokopa kapa enda ramanyi nembalapape, leyase? leyami.
MAT 19:8 Yesumi nakama lamaiyuo, Nakama mona kana pokapala kareyaminyisa dokona Moseseme saka napala enda kapa ramanyi nembarami leya. Dopa leyamopape ene kanda soo busiyamo kareyaminyi dokopa yulu doko pali naya.
MAT 19:9 Dokona dopa langilyu, Mendeme banya enda doko ramanyi nembapala enda mende wakale nyera ramo doko kepo pili lao pirasa pira. Enda mende akali wakale mendepa kepo pirambi ramo renge dokona iki kapa ramanyi nembara, leya.
MAT 19:10 Disaepole dupwame baa lamaiyuo, Enda akalipa nyingi dokopa dopa piralyamo dokona enda nyii napenge ingyalyamo leyami.
MAT 19:11 Yesumi lao, Pii doko akali peparae keta pali nara ingilyamo. Lapome kapa piramili dupwame iki soo yako lao nyerami ingilyamo.
MAT 19:12 Dokona suu pyao akali lapo etembo ingyuo mandeyami, akali lapo enda nyii naramili ingyuo karena lao yulu mende piyamisa etembo ingyuo karaminyi, akali lapo yake pandana isingi yulu dokona lao etembo ingyuo karamana lapala enda wanjo karaminyi. Dae leto dake akali mendeme soo yako lao kapa nyerami dupwame soo yako lao nyelapape, leya.
MAT 19:13 Dokopa wane wanakepe lapo baa kareyamo dokona lanyuo epo kingi ketae reto ateŋa lakapyali lao lanyuo epeyami. Dokopa disaepole dupwame wambu dupwa pyalana pyuo epa kaena leyami.
MAT 19:14 Dopa leyaminyipa Yesumi lao, Wane wanakepe dupwa namba karo dokona epenaleŋe kaena laa nalapape. Wane wanake dopalena yake dorena isingi panda doko sakamilyamo, leya.
MAT 19:15 Lapala banya kingi nakama ketae retakamipala yuu doko yaki nyepala peya.
MAT 19:16 Baa peyamo dokona akali mendeme epapala baa dopa lamaiya. Mana Lenge aki yulu keyange mende pyuo kararonosa kyakana renge kulisa palu palenge doko nyero lyasilisi? leya.
MAT 19:17 Dokopa Yesumi baa lamaiyuo, Aki rengendena embame yulu keyange dokona namba piso silisi? Mendaki iki keyange ingyuo karamo. Embame kyakana renge palu palenge arapu dokona sukusa paro lao suu pyare ramo doko mawa pii dupwa minyuo rolae pyuo karape, leya.
MAT 19:18 Akali dokome Yesu lamaiyuo, Mawa pii akisipa? leya. Dokopa Yesumi lao, Wambu yango pyaa nalapape, Kepo pyakami nalapape, Waa nyii nalapape, Kyambo laa nalapape,
MAT 19:19 Endangi rakangepa rape rape lao karalapape. Dee mende doko range mona reto karaminyi doko suu pyao wambu maki palenge dupwa kando dopako pyuo mona reto karalapape, mawa pii dusipana leto, leya.
MAT 19:20 Wanyane akali dokome baa lamaiyuo, Yulu dusipa peparae nambame pyuoko karenge. Aki yulu mende nambame pii nange doko piru ingilyape? leya.
MAT 19:21 Yesumi baa lamaiyuo, Embame mondo wakasa lao kararo lao suu pyare ramo doko embena bange retenge dupwa ropo pyao maipala kana laeyo nyuo pendewa wambu dupwa mokwa soo mairi. Dokopa yake panda dorename renge kulisa emba keta sakaraŋa. Dopa pipala namba paronuli pyuo ipupi, leya.
MAT 19:22 Pii doko sepala wanyane akali dokona bange malu mee retenge dokona baa sakapala kala peya.
MAT 19:23 Dokopa Yesumi banya disaepole dupwa lamaiyuo, Kinyi langilyu, Akali bange malu retenge dupwame yake pandana isingi yulu dokona sukusa panya suu pyarami ramo doko randa nao kando nyerami, leya.
MAT 19:24 Dee mende langilyu. Mena kamele doko wamyale dalyarena rumbisi kata dokona kolala kapa paa nange doko kolala pupyali doko randa nawale pupyali leya. Dokako suu pyao akali bange malu retenge mendeme Anatunya isingi yulu dokona sukusa parowale lara ramo dokopa randa nawale parali leya.
MAT 19:25 Dopa leyamo sepala disaepole dupwame mona nembo ralo pisipala lao, Wambu apimoo lete wai pyao nyeramo parami leyami.
MAT 19:26 Dokopa Yesumi nakama kando dopa lamaiya. Isa akali dupwame kapa pirami ingya nalyamo. Ingya napyamopa Anatu baa yulu peparae kapa awa awa pyuo pira, leya.
MAT 19:27 Dokopa Pitame dopa leya. Namwame namwana bangepe rarape dupwa peparae yaki nyuo kaeyo emba peenyili pyuo epeyama kande. Dokona aki mende nyeramase? leya.
MAT 19:28 Yuu gii enenge doko pyaka seramo dokopa Ikinyingi Akali baa kiŋinya petenge isa neta renge dokona pisira. Dokopa nakama namba moko minyuo epenge dupwa petenge isa akalisa ipisu lama dusipana pisipala Isaraele rara akalisa ipisu lama dusipa rapu pili laro kararami leya.
MAT 19:29 Dokona suu pyao wambu mendeme andape panda yangonge dupwape panda pemalengepe panda rakange endangipi panda wane wanakepe panda yuu rangepe nambana kingi reke lao yaki nyiyami ramo dupwame akalisa pao akalisa pyasara pyasara pyuo alo pyuo nyerami. Nyepala kyakana renge kulisa palu palenge doko nyeramiko.
MAT 19:30 Doko wambu epapu mupwa ingyuo karaminyi dupwa kamame kuki ingyarami. Dokopa kamame kuki ingyuo karaminyi dupwa mupwa ingyuo kararami, leya Yesumi.
MAT 20:1 Lapala dopa leya. Dokona lao akali angingyuo karenge mendeme wamba kukwa banya isa girapo ee dokona yulu pyakarami lapala yulu pingi akali lapo rombo palyuo lanyala peyamo doko yake pandana isingi yulu doko dopale.
MAT 20:2 Baa papala yuu mendaki yulu pirami dokopa kana mone mendaki jero leyamosa kapaŋa leyami. Kapa leyami dokopa banya girapo ee dokona yulu pela pena leya.
MAT 20:3 Enakana mena moko rali pingi (nane keloke ingyuowale) dokopa baa dee kamba papala akali wakale lapo ropo pingi kamapi dokona mee kareyaminyi kandeya.
MAT 20:4 Kandapala baame nakama lamaiyuo, Nakama opetae nambana girapo ee dokona yulu pela pupwa. Dokopa kana nyingi doko suu pyao manda manjo jero, leya. Dokopa nakama peyami.
MAT 20:5 Enakana dee neta damasa penge dokopape dee kamba papa pyuo yulu akali lapo nyepa piya.
MAT 20:6 Kama enakana neta yapa sii pingi dokopa baa deeko papala akali wakale lapo kareyaminyi kandeyako. Kandapala dopa lamaiya. Akipamo nakama doo koto koto doko karamisi? leya.
MAT 20:7 Nakamame baa lamaiyuo, Mendeme namwa yulu nyuo jii napya dokona mee karamano, leyami. Baame nakama lamaiyuo, Nakama opetae nambana girapo ee dokona pyaa pupwa, leya.
MAT 20:8 Yuu kone pupuripi piyamo dokopa girapo ee range akali dokome banya yulu pingi akali yango rapu pyuo karenge akali doko lamaiyuo, Yulu pilyaminyi akali dupwa epena lapala kingi kiso nembape. Kamame enakana imi dupwa wambo kingi kiso pao wambakao imi duwpa enakana kingi kiso pipi, leya.
MAT 20:9 Dokopa neta yapa sii pingipa yulu nyuo maiya akali dupwa epapala dokopa nakama peparae kana angi mendaki lao nyepa piyami.
MAT 20:10 Wambakao yulu pela epeyami dupwa epapala dokopa kana konda pyuwale nyerama lao masiyami. Masiyaminyipape nakama peparae mee kana mendakiko lao nyepa piyami.
MAT 20:11 Nyepala nakamame akali kamongo angi doko kando mumu leyami.
MAT 20:12 Kamame enakana imi dupwa keloke gii mendaki iki pyuo karaminyipape namwa yulu andake pyuo neta dokona kepo minyuo karo pimwa doko nakama namwa dopale ingyuowako maipilyamo, leyami.
MAT 20:13 Dopa leyaminyipa baame nakama kareyaminyi dokona mende kando isingi dopa lamaiya. Yangone nambame emba koo mende pyaka nalyo. Kana mendaki jero lapunu dokopa embame kapa laa napi kandapisi?
MAT 20:14 Embena ingilyamo doko nyepala anda puu. Nakama kana jelono doko kamame enakana iminyi dupwa dopako pyuo mairu lao suu pyapala maiyalono.
MAT 20:15 Nambana range mone dokome mende piroŋo lao suu pyaronuli pyuo kapa mee pii narose? Nambame ipyuo mailinyi lapala nakama ingi koo palyaramisi? leya.
MAT 20:16 Dopa pilyamo doko suu pyao enakaro palaminyi dupwa wambakaro palirami. Dokopa wambakaro palaminyi dupwa enakaro palirami, leya Yesumi.
MAT 20:17 Enakana Yesumi Jerusaleme dokona lalyuo pao dokopa disaepole akalisa ipisu lama dupwa yapalyuo nyepala katasa nakama yalu pyuo dopa lamaiya.
MAT 20:18 Namwa Jerusaleme dokona lalyuo pelyama kande. Dokona Ikinyingi Akali doko purisi akali mupwa dupwape mawa pii mana lenge akali dupwape keta mairaminyipa nakamame kote lao baa kapa kumunya larami.
MAT 20:19 Lao otapala wambu rara wakale dupwa keta mairaminyipa nakamame baa giyalya giyana pyuo pyaroko pyao isa mamandona pyao palyuo pirami. Piraminyipa yuu repo dokopa lete minyalyuo nyera, leya.
MAT 20:20 Sepetena etenge dokome banya ikinyingi dolapo lanyuo Yesu kareyamo dokona epo wapambu pii pyaro piso mende pyakana lao piso siya.
MAT 20:21 Dokopa baame enda doko lamaiyuo, Apa pyakalase lao letepe? leya. Baame Yesu lamaiyuo, Embena isingi panda dokona nambana ikinyingi dalapo embena kingi ralipi pisirambi lakape, leya.
MAT 20:22 Dokopa Yesumi isingi lao, Emba piso silinyi doko renge soo gisa nalene. Namba kapo mendena naro dokonako nakambame kapa narambisi? leya. Nakambame baa lamaiyuo, Nambwa kapa naramba, leyambi.
MAT 20:23 Baame nakamba dopa lamaiya. Namba kapo naro dokonako narambi doŋo nambana kingi rolaerenape kingi kyairenape pisirambi dokona namba laro ingya nalyamo. Nambana Rakangeme lao rapa rapa pingi dupwa pisirami, leya.
MAT 20:24 Dokopa akali akalisa kareyami dusipame dopa lalyambinyi lao sepala yangonge dolapo kando imbwuayami.
MAT 20:25 Dokopa Yesumi nakama epena lapala dopa leya. Juu daa rara wakale dupwana kamongo dupwame isare rao iso karo nakamana akali mupwa dupwame dopa pinya dapa pinya lao karelyaminyipa pingi kandale doko nakamame silyaminyi.
MAT 20:26 Yulu dopa pingi makande doko nakama nyii nalapape. Mendeme nakama dokona andake ingyuo karapuli lao suu pyare ramo doko nakamana isaro pingi ingyuo pyuo karare.
MAT 20:27 Mendeme nakama dokona mupwa ingyuo karapuli lao suu pyare ramo doko nakamana kendemande ingyuo karare.
MAT 20:28 Doko suu pyao Ikinyingi Akalimi baa wambumi isaro pyuo karena lao epa napala baame wambu dupwa isaro pyuo karala epeya. Baa range kumuo maira dokome wambu malu kiiramo nyela epeya.
MAT 20:29 Enakana yuu Jereko yaki nyuo peyami dokopa wambu malu mee rukuraka pyuo peyamuli pyuo peyami.
MAT 20:30 Dokopa akali lama lenge kwaengende kata nemba nemba dokona peteyambi. Nakambame Yesu epo pelyamo leyaminyi doko sepala kyakale lao, Dapitinya Ikinyingi, nambwa kando kondome kumuo pyuo nyepe, leyambi.
MAT 20:31 Dokopa wambu dupwame nakamba pyalana pyuo pii laa kaena leyami. Leyaminyipape nakambame porakaiyuo kaeyo dee kyakale lao, Kamongo, Dapitinya Ikinyingi, nambwa kando kondome kumuo pyuo nyepe, leyambi.
MAT 20:32 Dokopa Yesumi mee karapala nakamba epena lamaiyuo, Aki mende pyakalese lao suu pilyambipi? leya.
MAT 20:33 Nakambame baa lamaiyuo, Kamongo, nambwana lenge dolapo elya pyuo nyakape, leyambi.
MAT 20:34 Dokopa Yesumi nakamba kondapala lenge dolapo minyanyi pyakamiyamosa aopa lenge rapala baa peyamuli pyuo peyambi.
MAT 21:1 Enakana nakama yuu Jerusaleme repeta epo Isa Olipi Kyau dokona yuu Betepasi singi dokona epeyami dokopa Yesumi disaepole lama pena lao dopa lamaiya. Yuu damasa anda lapo repe repe pyuo karenge dokona papala donge kumwambona mende endangi dokopa role pyao anjaro palirambinyi aopa kandarambi. Dolapo polapala namba karo dakena minyuo ipupwape.
MAT 21:3 Wambu mendeme nakamba kando larami ramo doko Kamongo dokome mende piru lapyasa nyilyambano lao range waiya lao dakena lanyakao pena lalopyamo larambi, leya.
MAT 21:4 Dopa piyamo doko Anatunya poropeta akali mende wamba leya pii doko pyaka siya. Poropetana pii doko dopa leya.
MAT 21:5 Nakamana Kiŋi doko epapu nakama keta epelyamo lao, Yuu Sayone range wambu dupwa lamaiyalapape. Pau lao epo donge dokona petamo, dongena ikyane kumwambona dokona petamo, leya.
MAT 21:6 Yesumi disaepole dolapo dopa pinya leyamuli pyuo pao nyiyambi.
MAT 21:7 Donge endangi kumwambonapa dolapo lanyuo epapala nakambana komau ketae reteyambinyipa Yesu baa dokona peteya.
MAT 21:8 Wambu malu rukuraka pyuo kareyami dupwana andapyuwale lapome nakamana komau dupwa nyuo kata barete dokona kwuayaminyi wambu lapome isa yokonge pyake pyao nyuo kata dokona kwuayamiko.
MAT 21:9 Dokona wambu malu wamboko enakao pyuo peyaminyi dupwame pii porakaiyuo kaeyo lao dopa leyami. Dapitinya ikinyingi doko neta ipwamo kandalapa, Kamongona kingi lao epelyamo doko elyape keta penale. Yake dorena lakandamana leyami.
MAT 21:10 Dokopa baa Jerusaleme dokona sukusa peyamopa anda repe repe pyuo karenge dokona wambu peparae kilyipu kilyipu karalya karana pipala, Doko apisi? leyami.
MAT 21:11 Dokopa wambu malu rukuraka pyuo epeyami dupwame, Dake Anatunya poropeta Yesu yuu Galili yuu Nasarete range doko, leyami.
MAT 21:12 Dokopa Yesumi Anatunya tembole dokona kolando papala tembole anda dokona wambu bange ropo pyao lambuo maiyuo laeyo nyuo kareyami dupwa peparae kamanda ralinyi nembeya. Nembapala akali kana mone yango isingi maingi dusipana rate dusipape akali yaka wayamu ropo pyao maingi dusipana isa petenge dusipape baa minyalyapala pyao pyale leya.
MAT 21:13 Baame nakama lamaiyuo, Dopa lao pyasi palamo. Nambana anda doko ateŋa lenge anda laraminyipa karara, lenge. Dopa lapyamopape nakamame waa nyingi akali dupwana anda ingyuo karena leyamilyamo, leya.
MAT 21:14 Dokopa wambu lenge koo kimbu kwaengepe dupwa baa tembole anda kareyamo dokona epeyaminyisa baame elya pyuo nyiya.
MAT 21:15 Dopa piyamopape purisi akali mupwa dupwape Mawa Pii mana lenge akali dupwapeme Yesu yulu ama keyange dupwana pyuo kareyamo dokonape wane wanakepe tembole anda dokona pii porakaiyuo kaeyo lao, Dapitinya Ikinyingi neta ipwamo kandalapa lao kareyaminyi dokope kandapala imbwuayami.
MAT 21:16 Imbwuapala nakamame baa lamaiyuo, Dupwame apa letaminyi lao silipi? leyami. Dokopa Yesumi nakama lamaiyuo, Baepolena pii mende palenge doko nakamame yaka lao kanda nangese? Ene nyaŋa dupwape anju nenge dupwape kambu dokona, lakandenge pii ama rolae larami lao rapa rapa pipilyamo lao pepa piya, leya.
MAT 21:17 Lapala nakama yaki nyepala anda repe repe pyuo karenge dokona karo kaepala pao yuu Betani dokona paleya.
MAT 21:18 Yangama dokopa Yesu dee kapu kyuo anda repe repe pyuo karenge dokona laeyo epo dokopa lopaya.
MAT 21:19 Lopayamo dokopa isa piki mende kata nemba nemba dokona ando kareyamo kandapala repeta papala isa doko kalu kalu paeyo yoko iki pyuo kareyamo kandeya. Kandapala isa doko kando, Emba rengya jingi ama lyii nalu nao nare, leya. Dokopa isa piki doko waiya lao yando nalepo piya.
MAT 21:20 Dopa piyamo kandapala disaepole dupwame mona nembapala, Isa piki doko apa pipala aopa yando nalape? leyami.
MAT 21:21 Dokopa Yesumi nakama isingi lamaiyuo, Nakama kinyi langilyu. Nakamame lamana suu pyaa nao Anatumi kapa pira lao suu pyao kararami ramo doko isa piki doko nambame mende pipu doko iki piraminde daa. Yuu kyau dake lamaiyuo, Yuu kyau, emba puruku nyepala Anatumi ipwa kota pete dokona pyambwaramopa dokona karare, larami ramo dokona dopa pira.
MAT 21:22 Doko suu pyao nakamame ateŋa lao Anatumi kapa pira lao suu pyapala piso serami ramo dokoko dopa pyakara, leya.
MAT 21:23 Yesumi tembole anda dokona kolandapala mana lao kareyamo dokopa purisi akali mupwa dupwape wambunya kamongo dupwapeme epapala dopa leyami. Pyuo karene doko anja sipyamo nyepala renge palyuo pyuo karene. Apimi emba renge palyapyamopa pyuo karepe? leyami.
MAT 21:24 Yesumi nakama isingi lamaiyuo, Nambame nakama mende piso seroko. Nakamame isingi lao namba rolo langirami ramo dokopa nambame renge palipyamopa pyuo karo yulu dupwa anja sipyamo nyepala pyuo karo lao nakama langiru, leya.
MAT 21:25 Lapala, Jone bapitisimo nyakamyuo kareya banya yulu doko anjarae epeya, yake panda dokona piso renge kuiyamo piya panda isa akali dupwame renge kuiyaminyipa piyase? leya. Dokopa nakamame akema lao dopa leyami. Yake panda dokona piso renge kuiyamo piya larama ramo dokopa baame namwa langyuo akipamo Joneme kinyi lalyamo lao suu pyaa nayamisi? laramo lapala
MAT 21:26 Jonena yulu mee isa akalinya yulu larama ramo doko mee wambu dupwame baa Anatunya poropeta akali lao suu pyao karaminyi dokome namwa laramiŋi lao pakalyamano, leyami.
MAT 21:27 Lapala dokopa nakamame Yesu isingi lamaiyuo, Namwa see nalyamano, leyami. Dokopa Yesumi nakama lamaiyuo, Dopa letaminyi dokoko suu pyao nambame renge palenge yulu dupwa anja sipyamo nyepala pyuo karo lao isingi langi naro, leya.
MAT 21:28 Apa lao suu pilyamipi? Akali mendena ikinyingi lama kareyambi. Dokopa baame wane mupwa kareya dokona papala dopa lamaiya. Rakane, epapu emba isa girapo ee dokona yulu pela puu, leya.
MAT 21:29 Dokopa baame isingi lao, Paa naro daa leya. Dopa leyamopape enakana suu pingi alowa pipala kapa peya.
MAT 21:30 Rakange dokome wane enakana kareya dokona papala wane mupwa lamaiya dopako pyuo lamaiyamopa baame, Rakane, namba kapaŋa pelyo kae leya. Lapala paa naya.
MAT 21:31 Wane lama kareyambi dokona anjukumi rakange leyamuli pyuo piyase? leya. Nakamame lao, Wane mupwa doko, leyami. Yesumi nakama lamaiyuo, Kinyi langilyu. Takisi nyingi akali dupwape enda pamuku dupwape Anatunya isingi yulu palenge dokona sukusa pao nakamba dupwa nyuo enakalyaminyi.
MAT 21:32 Dokona lao Jone yulu rolae pyuo epeya dokopa baa kinyi lalyamo lao nakamba suu pyaa nayami. Suu pyaa nayaminyipape takisi nyingi akali dupwape enda pamuku dupwape kinyi lalyamo lao suu piyami. Suu piyami doko kandapala enakana nakambame mona enenge palyapala kinyi lalyamo lao suu pyaa nayami, leya.
MAT 21:33 Yesumi kongwalu pii mende laro selapape leya. Akali kamongo mendeme isa girapo ee mende pipala kame piya. Dokona girapo ee kame pipala wara piya. Kalyuo pyarakwalana girapo jinginya ipwange pao seraŋa lao kanana yuwale kyasiya. Kyasapala ketae anda londe mende piya. Pipala akali lapo ee doko kando karena lao maipala yuu mendasa wakale peya.
MAT 21:34 Jingi lyingi gii doko pyaka selena piyamo dokopa akali dokome banya yulu pingi akali lapo lamaiyuo, Nambana ee kando karaminyi akali dusipa karaminyi dokona papala nambana jingi lyuo jinya lapala minyakao ipupwape, leya.
MAT 21:35 Dokona peyaminyipa akali ee kando kareyaminyi dusipame yulu pingi akali dusipa nyuo yoko lapala mendali pyaroko pyao mendali pyao kumakao mendali kaname pyao piyami.
MAT 21:36 Dokopa ee range akali dokome yulu pingi akali andapyuwale dee pena leya. Dokopa akali dusipa dee dopako pyao piyami.
MAT 21:37 Enakana nambana ikinyingiŋi lao seramiŋi lapala banya ikinyingi doko nakama kareyami dokona pena leya.
MAT 21:38 Dopa leyamopape ee kando kareyami akali dusipame ikinyingi doko kandapala nakama range lao, Wane dake rakangena moyange nyera ingilyamo doko epelyamo. Baa pyao kumakamanale, mwua. Rakange kumaramo moyange baa nyerali dupwa namwa nyerama, leyami.
MAT 21:39 Lapala baa nyuo pyapala girapo ee neta dorena pyao nembeyami.
MAT 21:40 Dokopa girapo ee range akali dokome epapala dokopa ee kando kararami akali dusipa apa pira, leya Yesumi.
MAT 21:41 Dokopa nakamame baa lamaiyuo, Baame akali koo dupwa koo keta palena lao pyao kumakara. Dopa pipala waene ee doko nyuo jingi lyera gii dusipana baa kapa maipapu pirami akali lapo nyuo maira, leyami.
MAT 21:42 Yesumi nakama lamaiyuo, Nakamame pii pyasi palamo doko yaka lao kanda nangese? Doko akali kana anda pyuo kareyami dupwame kana mende nyuo nembeyami, doko enakana anda donge dokona mupwa ingyuo epo siya. Dopa piyamo doko Kamongome renge kuiyuo piyamosa piya. Dopa piyami dokona namwame lengeme kandapala mona nembo karamano.
MAT 21:43 Dokona nambame nakama dopa langilyu, leya Yesumi. Anatunya isingi yulu nakama keta pali nana lapala range nyuo wambu rara wakale jingi mondo lao lyuo kararami dupwa maira.
MAT 21:44 Wambu kana dokona mangala pao serami dupwa pyao inji ranji pira. Piramopa kana dokome wambu mende pisiramo dokona lakao epapala dokopa pyao minjiku minyinyi nembara, leya.
MAT 21:45 Purisi mupwa dupwape Parisi dupwape banya kongwalu pii dusipa sepala namwasa lalyamo lao soo manji nyiyami.
MAT 21:46 Manji nyepala nakamame baa puu maiyalana piyami dokopa wambu malu mee baa Anatunya poropeta akali lao suu piyami dokona baa puu maiyalana pakayami.
MAT 22:1 Yesumi dee kamba kongwalu pii lapala dopa lao lamaiya.
MAT 22:2 Kiŋi akali banya ikinyingi dokona enda nyera lapala nenge andake namanale leya doko suu pyao yake pandana isingi yulu doko dopale.
MAT 22:3 Akali dokome banya kendemande akali dupwa lamaiyuo, Enda nyakamiru dokona nenge nala eparamili dupwa epena lala pena leya. Leyamo dokopa nakama pao lamaiyaminyi dokopa, Epa narama daa, leyami.
MAT 22:4 Dee banya kendemande akali wakale lapo pena lao lamaiyuo, Eparamili dupwa dopa lamaipwape, Nenge narama doko rapa rapa pipu. Nambana bulamakao lapope bulamakao ikyane rondo lasi dupwape pyapamwa doko peparae rapa rapa pisi silyamo. Enda nyakamiru dokona nenge narama ipupwape, letamo lao lamainya, leya.
MAT 22:5 Dopa leyamopa wambu dupwame minyakaso kaepala pao, mende ee dokona pao mende banya yulu pingi anda pao
MAT 22:6 menge dupwame banya kendemande akali dupwa minyarapala kilya kandalya kandana pipala pyao kumakayami.
MAT 22:7 Dokopa kiŋi akali dokome imbwuapala banya yanda pingi akali pena leyamosa nakamame wambu yango longa pingi dupwa pyao kumakao nakamana anda dupwa yango banamau lao piyami.
MAT 22:8 Dokopa baame banya kendemande akali dupwa lamaiyuo, Enda nyakamiru dokona nenge narama doko rapa rapa pisi silyamo. Sipyamopape wambu eparamili dupwa koo ingyuo karaminyi dokona epa narami.
MAT 22:9 Dokona kata dupwana papala wambu kando nyeramili dupwa enda nyakamiru dokona nenge narama dokona epena lalapape, leya.
MAT 22:10 Dokopa kendemande akali dupwame kata dupwana papala wambu kando nyiyaminyili pyuo koo keyangepe dupwa peparae nyuo malu palyiyami. Dokopa nenge narami anda doko wambumi kete piya.
MAT 22:11 Kete piyamopa kiŋi akali dokome wambu dupwa kandala kolando epapala kandeyamo dokopa enda nyingi gii dokopa komau keyange pingi dopale akali mende baa pee pii nao peteyamo kandeya.
MAT 22:12 Kandapala baa dopa lamaiya. Yangone enda nyingi gii dokopa komau keyange pingi dopale emba pii napala apa pyuo kolando andakare dakena ipisi? leya. Dokona akali dokome roma napyuo peteya.
MAT 22:13 Dokopa kiŋi dokome banya yulu pyaka maingi dupwa lamaiyuo, Baa nyuo kingi kimbupi puu pyapapala iminjingi netarena pyambwalapape. Iminjingi dorenako akali dupwa ee lao nenge ginyi ganyi lao kararami, leya.
MAT 22:14 Dokona lao malu epena letamopape mendasipa yapalyuo nyingi, leya Yesumi.
MAT 22:15 Dokopa Parisi akali dupwame pao wato lao piso, Apa pipala baa kopetame lenale lao kawanyi mendena palyuo laramase? leyami.
MAT 22:16 Lapala nakamana disaepole dupwape Erote nyimbunya lao nyiso kareyami akali lapo dupwape Yesu kareyamo dokona pena leyamisa dopa leyami. Mana Lenge, emba rolae pyuo Anatunya yulu dokona lao angi kinyi mana lao karo, dokopa Kamongoŋo lao wambu dopale dapale lao suu pyaa nao pyuo karene doko namwame silyamano.
MAT 22:17 Dokona apa lao suu pilipi? namwa isingi langipi. Namwa Sisa takisi mailyamano doko namwana Lowa dokona yalelyamase? leyami.
MAT 22:18 Dokopa Yesumi nakama baa koo keta palena lao lalyaminyi lao soo gisapala dopa leya. Nakama yanengena mamba kiso lao karaminyi dupwa, akipamo nakamame namba apa letepe lao selana nyuo kuinya palyuo makande pyuo letamipi?
MAT 22:19 Takisi maingi doko suu pyao kana mende namba lasaka pipwape, leya. Dokopa baa kana mende minyuo epo maiyami.
MAT 22:20 Dokopa Yesumi nakama lamaiyuo, Kana dakena wambu ayemba pukusi petamo pii yasi opetae palamo dolapo apinya? leya.
MAT 22:21 Nakamame, Sisana, leyami. Dokopa baame nakama lamaiyuo, Sisana bange dupwa Sisa range maiyuo, Anatunya bange dupwa Anatu range maiyuo pipwape, leya.
MAT 22:22 Nakama pii doko soo mona nembapala baa yaki nyuo peyami.
MAT 22:23 Yuu gii dokopako Satyusi dupwame wambu kumapala lopo lete epa nange lao karenge dupwa epapala baa mende piso soo dopa leyami.
MAT 22:24 Mana Lenge, Moseseme lao dopa leya. Akali mende wane manja nao kumara ramo doko banya yangonge dokome banya enda waiya doko kalyapala apo dokona wane manjakamira, leya kande.
MAT 22:25 Dokona suu pyao yangonge yanda ipingi nyero kareyami. Yangonge mupwa doko enda nyepala kumuya. Baame wane manja nayamo dokona yangonge dokome banya etenge doko kalyakana lao kumuya.
MAT 22:26 Dopako pyuo yangonge lapo dokope yangonge repo dokope pao yangonge yanda ipingi nyero dokope dusipa dopako pyuo kumuyami.
MAT 22:27 Yangonge peparae kumapeyaminyipa enakana enda doko kumuya.
MAT 22:28 Dokona lete lopo epo kararami gii dokopa akali yanda ipingi kararami dokona anjukunya mendena etenge ingyuo pisirase? Nakama peparaeme enda doko nyepa piyami kande, leyami.
MAT 22:29 Dokopa Yesumi isingi lamaiyuo, Nakamame pii pyasi dokope Anatunya porainya renge dokope soo nyepa napala kopetame lalaminyilyamo.
MAT 22:30 Lete lopo paraminyi gii dokopa akali mendeme enda nyii nao rakangeme wanenge akali mai nao pyuo kararaminyipa aŋala yake panda dokona karaminyi doko suu pyao kararami.
MAT 22:31 Deeko, wambu kumuo lete lopo eparama dokona suu pyao Anatumi nakama pii langiyamo pyasi palamo doko nakamame kando yaka laa nangese? Namba Aporakamena Anatu ingyuo karo, namba Aisakena Anatu ingyuo karo, namba Jekopena Anatu ingyuo karo pilyu, leya kande. Baa kumuo palaminyi dupwana Anatu ingyuo kara nange baa lete karaminyi dupwana Anatu ingyuo karamo, leya Yesumi.
MAT 22:33 Dopa leyamo dokopa wambu malu rukuraka pyuo kareyami dupwame sepala banya mana pii doko soo mona nembeyami.
MAT 22:34 Dokopa Parisi akali dupwame Yesumi Satyusi akali dupwa kui lanyi pyambwapyalyamo lao sepala epo sukusa sukusa piyami.
MAT 22:35 Dokopa nakama kareyami dokona Mawa Pii singi mendeme baa apa letape lao selana makande pyuo mende piso siya.
MAT 22:36 Mana Lenge, Mawa Pii palamo dokona anjuku doko mupwa wakasase? leya.
MAT 22:37 Leyamopa baa lamaiyuo, Nakamame nakamana Kamongo Anatu mona maingi renge dokomepe imambu dokomepe suu pingi dokomepe baako mona maiyuo karalapa letamo.
MAT 22:38 Doko mawa pii mendaki ama andake ingyuo palamo. Dokona suu pyao mawa pii mende lapo pyuo palamo doko dopale. Doko, nakama range kando mona retenge doko suu pyao wambu maki palenge dupwa mona reto karalapape, lao palamo.
MAT 22:40 Mawa Pii wakale wakale dupwa peparaepe Anatunya poropeta akali dupwana pii peparaepe mawa pii lama dolapome minyaro karamo, leya.
MAT 22:41 Parisi dupwa sukusa sukusa pyuo kareyami dokopa Yesumi nakama pii mende piso soo dopa leya.
MAT 22:42 Koraisa doko apa pyuonde lao suu pilyamisi? Apinya ikinyingi ingyuo karase? leya. Nakamame baa lamaiyuo, Dapitinya ikinyingi, leyami.
MAT 22:43 Baame nakama lamaiyuo, Dopa laminyipape akipamo Dapitimi Imambumi pyongo piyamosa baa kando Kamongo, lao leyase? Baa dopa leya kande.
MAT 22:44 Kamongo dokome nambana Kamongo lamaiyuo, Nambana kingi rolaerename pisa ipu. Embena yanda pimwai ingyuo dupwa nambame nyuo embena kimbu yukuna dokona rambuki nyinyi pyambwakaro. leya.
MAT 22:45 Dapiti baa kando Kamongoŋo leyapya doko apa pyuo dee banya para pyao nyiyamo dokona ingiyase?
MAT 22:46 Dokopa nakama mendeme baa isingi lamaiyalana saka nayami dokona yuu gii dokona piso pao pii lapo baa kapa piso selana pakayami.
MAT 23:1 Yesumi wambu malu mee rukuraka pyuo kareyami dupwape banya disaepole dupwape lamaiyuo dopa leya.
MAT 23:2 Mawa Pii mana lenge akali dupwape Parisi dupwape Mosesena apo dokona alo pyuo petaminyi.
MAT 23:3 Dokona nakamame nakama dopa pipwape lao langiraminyili pyuo minyuo pyuo karalapape. Karapalape nakamana yulu pinginyili pyuo kara nalapape. Dokona lao nakamame mana langilyaminyili pyuo range pii nalyaminyi.
MAT 23:4 Nakamame bange kenda andake pingi lekeleke rao singi dupwa yama pipala akali dupwana lange dokona retenge. Retapalape nakamana kingi pyambuo nyisa nange.
MAT 23:5 Nakamame yulu pingi dupwa peparae wambu dupwame kandamili lao pyuo karenge. Dokona lao nakamame Baepolena pii pyasi palenge malu nyuu byake dokona nyimbunyale lao embo nakamana komau pinjingi londenale lao pee pyuo karenge.
MAT 23:6 Wambu nenge andake nao petenge dokopa akali mupwa petenge dokonape sinakoke anda dupwana petenge mupwa dupwanape pisimwali yaka lao rungi rungi pyao karenge.
MAT 23:7 Ropo pingi kamapi dupwana karo wambu dupwame nakama kando ayaka lao, Rapu Pingi, Rapu Pingi, lao karamili yaka lao suu pyao karenge.
MAT 23:8 Wambumi nakama kando Mana Lenge lao larami doko kapa ingya nalyamo. Doko nakama peparae yangonge ingyuo karaminyipa nakamana mana lenge angi mendakiko karamo.
MAT 23:9 Doko suu pyao isa yuu dakena akali mende kando rakane emba mupwaŋa lao laa nalapape. Nakamana Rakane mendaki iki doko yake panda dokona karamo.
MAT 23:10 Dokonako suu pyao wambu dupwame nakama kando, Kamongo, lena laa nalapape. Nakamana Kamongo mendaki iki Koraisa lenge doko karamo.
MAT 23:11 Nakamana akali mupwa ramo doko baa nakamana kendemande ingyuo karena.
MAT 23:12 Mendeme namba range mupwa karo lao suu pyarami dupwa bulu bulu pyapala kuki ingyuo kararami. Mendeme namba range kuki karo lao suu pyarami dupwa anda nyimbuo mupwa ingyuo kararami.
MAT 23:13 Mawa Pii mana lenge akalipi Parisi akalipi nakama yanengena mamba kiso lao karo yake pandana isingi yulu palenge dokona wambu dupwa sukusa paa nana lao nee pyuo karenge dokona nakama keta randa epara ingilyamo. Nakama range sukusa paa nao wambu lapo sukusa panya laminyi dupwa kaena lao daako letaminyi.
MAT 23:14 Mawa Pii mana lenge akalipi Parisi akalipi yanengena mamba kiso lao karenge dupwa nakama keta randa epara ingilyamo leto. Nakamame enda waiya dupwana anda dupwa mamando pyuo pyaso nyuope mee panga soo ateŋa londe laope pyuo karenge. Dopa pilyaminyi dokona Anatumi nakama moŋo kamame andake jera.
MAT 23:15 Mawa Pii mana lenge akalipi Parisi akalipi nakama yanengena mamba kiso lao karenge dupwa nakamame akali mendakipi mende nakamana yongo nyinya lao suu pyao ipwa kotanape yuu dupwanape papyuo koto karenge. Enakana akali doko nakamana yongo nyepelyamo dokopa nakama isare pandana wane ingyuo karaminyi doko suu pyao baa ama isare pandana wane ingyuo karena lao lenge dokona nakama keta randa epara ingilyamo.
MAT 23:16 Nakama lenge kwaenge dokome wambu kata dupwana lanyuo pelyaminyi dokona nakama randa epara ingilyamo. Nakama dopa lenge kandale. Mendeme tembole anda dokona kingi lao mende pirunya lao kingi ketae nembo lapala enakana laramuli pyuo pii nara ramo doko pii pali nara lenge. Dee mendeme tembole andana kana golo dokona kingi minyuo lao mende pirunya lara ramo dokome baa mangena minyara ingilyamo lao karaminyi.
MAT 23:17 Nakama kopyali lenge kwaenge dapwa. Anjuku doko mupwase? Kana golo dokope panda tembole andame golo poo pyasi inginyi pyambulyamo dokona tembole anda dokose?
MAT 23:18 Dokonako palyuo nakamame mende opetaeko kopetame lao, mendeme bange kiso maingi rate dokona kingi minyuo mende pirunya lao kingi ketae nembo lapala enakana laramuli pyuo pii nara ramo doko pii pali nara. Dee mendeme bange maisi rate seramo dokona kingi minyuo lara ramo baa mangena minyara ingilyamo.
MAT 23:19 Nakama lenge kwaenge dapwa anjuku doko mupwase? Bange dokope panda mena kiso maingi rateme bange poo pyasi inginyi pyambulyamo dokose?
MAT 23:20 Dokona lao mendeme Anatu bange maiyuo retenge rate doko suu pyao kingi ketae nembara ramo doko ratepe bange silyamo dokope pale pale larasa pira.
MAT 23:21 Deeko, mendeme tembole anda doko kingi lao kinyi kinyi letoŋo lao, lalu lao lara ramo doko anda dokope anda dokona karenge baape laparaena palyuo larasa pira.
MAT 23:22 Dee pii mendeko doko, mendeme yake panda doko minyuo kinyi kinyi letoŋo lao lalu lao lara ramo doko Anatunya kiŋi petenge isa dokope angi baa petenge dokope laparaena palyuo larasa pirako.
MAT 23:23 Mawa Pii mana lenge akalipi Parisi akalipi yanengena mamba kiso lao karenge dupwa nakama randa andake narami ingilyamo. Dokona lao nakamame mokwamepe yambya yokope alamu yoko dee awa yokope dupwa peparaena akalisa silyamo dokona mendaki larapu Anatu maingi. Mailyaminyiko doŋo Mawa Pii palamo dokona pii kenda dusipa wambu yango kando rolae maingipi yulu angi dasipa nakamame kame sepala kaelyaminyi. Kuki doloma pyuo karo yulu angi dasipa opetae piraminde pilyaminyi.
MAT 23:24 Nakama lenge kwaenge dokome wambu kata lasaka pilyamano lao pilyaminyi. Nakama ipwa nalena dokopa bange kuki ipwana silyamo dupwa nyuo nembelyaminyipape ipwa mena kamele paleta mee nao goe letaminyisa pingi.
MAT 23:25 Mawa Pii mana lenge akalipi Parisi akalipi yanengena mamba kiso lao karenge dupwa, nakama randa narami ingilyamo. Nakamame kapope pere warakepe netarena wate pyuo karaminyipape kokorena panga soo pyaso nyuo karenge renge dupwa simbulyamo.
MAT 23:26 Parisi akali lenge kwaenge dupwa nakama kapope pere warakepe netarena elyape seraŋa lapala kokorena wate pipwape.
MAT 23:27 Mawa Pii mana lenge akalipi Parisi akalipi yanengena mamba kiso lao karenge dupwa nakama randa narami ingilyamo. Malu pingi anda kamarena mamba kakepame kisasi dokome dorename iki au koo pyuo karelyamopape kokorena akali rumbyasi dupwana kuli kwaesi dupwa simbwaro karamo dupwa nakama dopale.
MAT 23:28 Nakamame dopako pyuo wambu kandaminyipa yanengena rolae pili lao mee pyuo karaminyi. Karaminyipape nakama yanengena mamba kiso lao karengepe koo keta keke soo karengepe dusipa simbwaro karaminyi.
MAT 23:29 Mawa Pii mana lenge akalipi Parisi akalipi yanengena mamba kiso lao karenge dupwa nakama randa narami ingilyamo. Nakamame Anatunya poropeta akali dupwana malu anda pyuo wasakamyuo yulu rolae pyuo karenge wambu dupwana malu anda ketae dokona kana sulu singi doko mondo koo lao kalya pyuo karenge.
MAT 23:30 Nakamame dopa pyuo karo dokopa dopa lenge. Namwana rakange kyawa kareyami dupwa pipya kareyamili doko nakamame Anatunya poropeta akali dupwana ranjama kulimbuyami dokopa namwame dopako pyuo kulimbwakami nayamali lenge kandale.
MAT 23:31 Dokona ingyuo nakama Anatunya poropeta akali dupwa langa pyapa piyami dupwana rara karamano lao range polo lamisa pilyamo.
MAT 23:32 Dokona nakamana rakange kyawa dupwame pyuo kareyami dokonako palyuo makande minyuo pyuokondali pyuo pipwape.
MAT 23:33 Nakama kau ikyane ingyuo kaparao karaminyi. Anatumi nakama kando kote lao isare pandana yapalya yapana pinyi nembara doko apa pipala wanjinyi nembaramisi?
MAT 23:34 Dokona Anatunya poropeta akalipi rolae suu pingi akalipi mawa pii mana lenge akalipi lapo nakama karaminyi dokona mapanyi peelyo. Dokopa nakama dupwana lapo pyao kumakao isa mamandona pyao palyuo, lapo nakamana sinakoke anda dupwana pyarako pyao, lapo anda repe repe pyuo karenge dupwana randa maipapu pyuo kararami.
MAT 23:35 Dopa pyuo kararami dokopa isa yuu dakena wambu rolae pingi kareyami dupwana ranjama kulimbwapa piyami dupwa peparae nakama dupwa keta sera. Akali Epolo baa nyisu mende peteyamo kara nayamopa pyao kumakaya dokona ranjama dokona kanda soo piso pao kama enakana Berokayana ikinyingi Sakaraya doko Anatu bange kiso maingi rate dokope tembole anda donge dokope dolapo karalyaro kareyambinyipa sukusa dokona nakama dapwame baa pyao kumakayami dokona ranjama dokope kiminjapala nakama keta sera.
MAT 23:36 Kinyi langilyu, wambu dusipana ranjama peparae wambu ando karaminyi dupwa keta epo sera ingilyamo.
MAT 23:37 O Jerusaleme, Jerusaleme, Anatunya poropeta akali dupwa pyao kumakao, pii minyakamyuo epenge dupwa kaname pyapa pingi. Kola inya dokome banya ikyane dupwa papaki dokona lungwa lungwa nyuo pyambungi doko suu pyao yuu malu mee embena wane wanakepe sukusa nyipuli lao suu piyunupa emba daa lee kande.
MAT 23:38 Embena anda doko mee pii karo kwaesi sera.
MAT 23:39 Dokona lao kinyi langilyu. Nakamba namba dee kanda narami. Namba Anatunya kingi lao eparonopa nakamame lao kandalapa neta ipwamo lao karo dokopa dee kandarami leya.
MAT 24:1 Yesu tembole anda yaki nyepala katasa panya peyamo dokopa banya disaepole dupwame epapala baa tembole anda dokona pisi karenge dokoŋo kandena leyami.
MAT 24:2 Dopa leyaminyipa baame nakama lamaiyuo, Nakamame dapwa kandelyamisi? Kinyi langilyu, Pyao lalyinyi nembaraminyipa kana mendena kana yango ketae see nara, leya.
MAT 24:3 Baa Isa Olipi Kyau dokona peteyamopa disaepole dupwa iki epapala dopa leyami. Emba leene doko anjokorape pira lao rolo langipi leyami. Emba eparene dokope isa wambu dupwana yuu gii doko lumwa piramo doko wambo apa piramo kandaramanopa enakana angi doko pyaka serase? leyami.
MAT 24:4 Dokopa Yesumi nakama isingi dopa lamaiya. Akali lapome nakama suu longo nyii nana lao pyare pyanyi pyambuo waso karalapape.
MAT 24:5 Dokona lao wambu malumi nambana kingi lao, Namba Koraisa karo lapala wambu malu suu longo nyerami.
MAT 24:6 Dokopa yanda pilyaminyi lao angi rolae leyaminyipape lape lape pii leyaminyipape dopa pyuo mende siyami kande dokopa nakama paka nao ambeambe karalapape. Dokona lao rengya dopa pira ingilyamoko. Dopa pyuo pyaka seramo dokopa ene pyai napa nara.
MAT 24:7 Dokona lao yuu mendena range wambu dupwame yuu mendena range wambu dupwa pyala parami. Kiŋi rara mendeme kiŋi rara mende pyala para. Dokopa yuu wakale wakale dupwana yuusili andake minyaramo wambu dupwa lopo andake seramo kararami.
MAT 24:8 Doko enda wane ene mata pyalana kanda singi dopale ingyara.
MAT 24:9 Dokona lao yuu gii enakana dokopa akali dupwame nakama randa andake dokona nyuo minya sepala pyao kumakarami. Dokopa rara wakale wakale dupwame nakamame nambana kingi lao kararaminyi dokona kando awa narami.
MAT 24:10 Dokopa wambu malu suu longo neta papala karo, mendeme mendali mata kando lao, mendeme mendali awa nao pyuo kararami.
MAT 24:11 Dokopa akali lapome, Anatu pyongo pyapyamo nolako lao karo lao panga soo karenge dupwame sipurapala wambu malu suu longo nyerami.
MAT 24:12 Dokopa yulu koo doko konda konda pyuo ama reeko ingyaramo dokona akali andapyuwale mona reto karenge kata dupwa kii nara.
MAT 24:13 Dopa piramopa wambu nambana yulu minyuo pyuo kararaminyi dupwa yuu gii lumwa piramo dokopa kaeya nao mee pyuo karalu kararaminyi dusipa Anatumi lete wai pyao nyera.
MAT 24:14 Dokona suu pyao Anatunya isingi yulu dokona lao waili pii keyange, doko isa yuu muu dupwana boo pyao, rara wakale wakale wambu dupwa peparae sinya lao, rolo lamaiyuo pao kapa kapa pirami dokopa gii doko lumwa pira.
MAT 24:15 Anatunya poropeta akali Daniele lenge dokome, Anda poo pyasi dokona bange ama koo Anatunya lenge kambu dokona kokwa soo retarami leya doko leyamuli pyuo piya kande dokopa yuu Jutia kararaminyi wambu dupwa yuu kyau dupwana bolombalo lao ralo pupwape. (Pii dake kongwalu letamo dokona poraiyuo selapa.)
MAT 24:17 Akali mende anda yangi dokona pisira ramo doko banya bange andakare singi dupwa minyuo parowale lao andakare nyela paa nao mee ralo para.
MAT 24:18 Akali mende ee dokona karara ramo doko dee epo banya komau nyii napala mee ralo pupingele.
MAT 24:19 Yuu gii dusipana enda wane rombanda palenge dupwape wane anju kareta singi enda dupwape apa pipala parami?
MAT 24:20 Apunda pilyamopa kupwa pingi gii dokopape koro petenge dokopape yulu dusipa pyaka sepa nana lao ateŋa lalapape.
MAT 24:21 Yuu gii dusipana randa andake wakasa mende pyaka sera. Doko isa yuu kanda soo busiyamopa randa nao kareyami dokona piso epo epapu randako nao karaminyi, rengya kamame randako nao kararaminyipa randa andake wakasa seramo dokome doloma pipya manda minya naralyamo.
MAT 24:22 Anatumi yuu gii nyuo muu pinyi nemba nayali doko wambu peparae koo keta palyuo kumuo oteyamuli. Doko kaepala banya wambu lapo rombo palyiyamo dupwana reke lao repele pyakanya lao muu pinyi nembara.
MAT 24:23 Yuu gii dusipana wambu mendeme nakama langyuo, Koraisa baa isa dae kata kande, panda, Baa isa dalyesa karamo leyami kande dokopa kinyi lalyaminyi lao suu pyaa nalapape.
MAT 24:24 Dokona lao akali lapome kyambo lao, Namba Koraisa karoŋo, lao sipurapala wambu kando yamaranguramili yulu andake dopale lapo lasaka pyuo pyuo kararami. Akali dupwame mee wambu dupwa suu longo nyuo karo dokopa Anatunya rombo palyisi wambu dupwa opetae suu longo nyelana lao pyuo kararami.
MAT 24:25 Ene dopa pipa naramopa dopa piraŋa lao wambo langilyu kande.
MAT 24:26 Dokona wambu dupwame nakama langyuo, Baa yuu muiyane dokona karamo larami ramo nakama dokona paa nalapape. Dee, Baa andakare lukuna karamo larami ramo doko kinyi lalyaminyi lao suu pyaa nalapape.
MAT 24:27 Dokona lao neta pyakaenge dorena piso yuu pele renge kuiyuo pipala, yuu dupwa yanga paupau lao pao neta yalyingi dorena kandenge doko suu pyao Ikinyingi Akali doko epara lyakande.
MAT 24:28 Yanenge kaoma seramo dokonako yaka ulisapu dupwa epo elyambu pyuo pisirami ingingi.
MAT 24:29 Randa andake nao kararami gii doko otaramopa aopa neta doko raa napala iminjowape, kana doko raa nao, bui dupwa yake dokona piso kondo isa epo karo yake bange porai dupwa romo romo pyuo pyuo karara.
MAT 24:30 Dokopa Ikinyingi Akali epelyamo lao yake dokona lyakai pyuo panara. Panaramopa yuu muu dupwana rara wakale wakale dupwa peparaeme ee lao kondome kumuo kararami. Dopa piraminyipa Ikinyingi Akali doko yake panda kopa rakapana dokona ama yanga paupau lapala porai wakasa ingyuo eparamo kandarami.
MAT 24:31 Dokopa bikuli andake laramopa banya aŋala dupwame porambaiye renge kuiyuo epenge yuu pinjingi kisima dusipana pao banya wambu yapasi dupwa nyela pena lara.
MAT 24:32 Isa piki doko kandapala renge mende mana nyelapape. Isa wangya piso andenge dokona byalu lapala yoko karo penge doko kandapala ee kana musi doko pyaka selana pyamolamo lao kandenge.
MAT 24:33 Doko suu pyao yulu doo lalono kandapi dusipa pyaka seramo kandeyami kande dokopa baa repeta epo pyamolyamo, kinyi kakota lumbungi repeta karalamolyamo, lao soo gisarami.
MAT 24:34 Kinyi langilyu, doo lalono kandapi dusipa ene pyaka sepa naramopa isa wambu epapu ando karaminyi dupwa wambo ota narami.
MAT 24:35 Yake yuupa otara ingyapyamopa nambana pii dupwa ota nara ingilyamo.
MAT 24:36 Dopa pira doŋo baa eparamo yuu gii dokope keloke gii dokope wambu peparae soo gisa nalyaminyi. Aŋala yake panda karaminyi dupwape Ikinyingi opetaeme soo gisa nalyaminyiko. Rakangeme iki soo karamo.
MAT 24:37 Akali Noa baa kareyamo yuu gii dokopa wambu kamenge karo yulu mee pyuo kareyami doko suu pyao Ikinyingi Akali eparamo dokopa dopako pirami.
MAT 24:38 Ipwa andake yuu muu dupwa ene yambe pyaa nayamopa wambu dupwame kamenge karo, nenge ipwape nao, enda yapo nyuo pyuoko kareyaminyipa, Noa baa sipu andake dokona kolando peya.
MAT 24:39 Mende oo piramo doko see napala langa pyuo kareyaminyipa ipwa dokome epo nakama neya. Dokoko suu pyao Ikinyingi Akali eparamo gii dokopa dopako pira.
MAT 24:40 Dokopa akali lama ee dokona kararambinyipa mende nyera, mende kaeyara.
MAT 24:41 Enda lama role pyao isa jingi pyao injo pisirambinyipa mende nyera mende kaeyara.
MAT 24:42 Dokona suu pyao nakama lenge rao karalapape. Nakamana Kamongo doko yuu gii anjokorape epara lao see nalyaminyi.
MAT 24:43 See naminyipape pii dake soo gisalapape. Anda range akali dokome waa nyingi akali doko kukwa eparape panda korakama epara lao soo gisapyali doko lenge rao isaro pisipala anda kambu lalyinyi nembapala epa nana lapyali.
MAT 24:44 Doko suu pyao Ikinyingi Akali doko keloke gii anjukunya epara lao see nalyaminyi dokona epelyape lao nakama rapa rapa pyuo isaro karalapape.
MAT 24:45 Kendemande akali apiyakalende mupwa ingyuo parase? Doko akali mende mona palenge dokome yulu kaeya nao pyuo kararamopa banya kamongo dokome baa yapo nyepala doloma rapu pyuo nenge mokwa soo maipa pyuo karena lara doko.
MAT 24:46 Kamongo dee kapu kyuo epo kendemande akali yulu rolae pyuo kararamo kandaramo dokopa kendemande akali doko baa rae maiyuo para.
MAT 24:47 Kinyi langilyu, kamongo baame banya bange peparae rapu pyuo karena lao rombo palyara.
MAT 24:48 Dopa piramopape yulu pingi akali baa kopyali ingyapala, Nambana kamongo waiya lao epa nalyamo lao suu pyara.
MAT 24:49 Suu pyapala yulu pingi wambu yango dupwa pyaroko pyao baamoo wambu yango role pyao nenge nao waene ipwange malu nao pipala kyawa sisingi bolombalo laramo pisirami.
MAT 24:50 Dopa pyuo piso kamongo doko waiya lao epa nara lao suu pyao kamenge pisiramo yuu gii dokopa banya kamongo epara.
MAT 24:51 Epapala baa pyakepanyi nembo kaepala wambu yanengena mamba kiso lao kararami dupwa koo keta kararami dokonako pyambwara. Koo keta kararami dokona akali doko ee lao nenge ginyi ganyi lao karara.
MAT 25:1 Yuu gii doko wanake mapwae akalisame nakamana lambe nyuo minya akali enda nyeramo doko lanyala peyaminyi doko makande minyuo yake pandana isingi yulu dopale ingyuo para.
MAT 25:2 Doko enda mapwae peyami dusipana kingi paki mona pali nange, dee mona palenge kingi pakiko.
MAT 25:3 Enda mapwae mona pali nange dusipame lambe iki minyapala keresene minya nayami.
MAT 25:4 Dee enda mona palenge dusipame lambe keresene ipwange paleta batolonape minyuo peyami.
MAT 25:5 Enda nyelana pingi akali doko yuu andarele epo peyamopa waiya lao epa nayasa enda dupwa lenge luwapala luu paleyami.
MAT 25:6 Kukwa andasukulya dokopa pii andakende lapala, Kandalapa. Enda nyelana pingi akali doko angi epelyamo. Baa epelyamo dokona kando nyela ipupwa, leya.
MAT 25:7 Dokopa enda mapwae dupwa peparae sipurapala nakamana lambe dupwa rapa rapa piyami.
MAT 25:8 Dokopa mona pali nange dusipame mona palenge dusipa lamaiyuo, Namwana lambe dusipa kunjalana pilyamo dokona nakamana ipwange lama jelapape, leyami.
MAT 25:9 Dopa leyaminyipape mona palenge dusipame isingi lao, Nakamape namwape peparae ipwange mendakinya nyerama ramo doko kapa ingyara lyasilisi? Dokona nakamame kaepala sito anda dokona papala lapo range ropo pyala pupwape, leyami.
MAT 25:10 Dokopa nakama ropo pyala ene katasa peyaminyipa enda nyelana pingi akali doko epeya. Dokopa wanake rapa rapa pyuo otapala peteyaminyi dupwa baamoo pipya role pyao enda nyingi dokopa nenge nenge anda dokona andakare peyami. Peyaminyipa kambu upi leyami.
MAT 25:11 Enakana enda mapwae menge dusipa epapala, Kamongo, Kamongo, kambu lumbwakape, leyami.
MAT 25:12 Dopa leyaminyipa baame isingi lao, Kinyi langilyu, nambame nakama apimoo lao kando gisa nange, leya.
MAT 25:13 Doko suu pyao anjokorape eparape lao yuu giipi keloke giipi see nalyaminyi dokona kando isaro karalapape, leya Yesumi.
MAT 25:14 Dokona suu pyao akali mende kata nanesa panya lao kareyamo dokome banya yulu pyakamaingi akali dusipa epena lapala banya bange dupwa retakao karena leya.
MAT 25:15 Akali mendepe mendepe yulu palengenyili pyuo mende kana kina kingi paki maiyuo mende kina lama maiyuo mende kina mendaki maiyuo piya. Maipala baa peya.
MAT 25:16 Dokopa akali kana kina kingi paki nyiya dokome aopa minyuo pao bange lapo ropo pyao nyepapu dee kana nyuo maipapu pyuo karo enakana kina kingi paki apeto konda pyuo nyiya.
MAT 25:17 Akali kina lama nyiya dokome dopako pyuo kina lama apeto konda pyuo nyiya.
MAT 25:18 Dopa piyambinyipa akali kina mendaki nyiya dokome papala yuu apu rao banya kamongona mone doko yalu pyuo koko palyiya.
MAT 25:19 Yuu andarele epo papeyamopa yulu pingi akali dusipana kamongo dokome epapala kana dokona lao roleyami.
MAT 25:20 Dokopa akali kina kingi paki nyiya doko kina kingi paki apetasi laeyo minyuo, epapala dopa leya. Kamongo, embame kina kingi paki namba minyando jii kande doko kina kingi paki kame apeto nyepala dae minyakao epelyo, leya.
MAT 25:21 Dokopa banya kamongo dokome baa lamaiyuo, Emba yulu pingi akali keyange. Nambana pii yaki nyii nao mee pyuo karenge doko, emba mondo lao pyuo karapilyamo. Embame yulu kuki yaki nyii nao mee rolae pyuo karapi dokona embame yulu andake renge palyuo rapu pyuo karape laro. Andakare eparenepa nambapa role pyao rae maiyuo karamanale leya.
MAT 25:22 Dokopa akali kina lama reto kareya dokome epapala, Kamongo, embame kina lama jii kande doko kina lama kamame nyepala dae minyakao, epelyo, leya.
MAT 25:23 Banya kamongo dokome baa lamaiyuo, Emba yulu pingi akali keyange. Nambana pii yaki nyii nalu nao napala mee pyuo karenge doko, emba mondo lao pyuo karapilyamo. Embame yulu kuki yaki nyii nao mee rolae pyuo karapi dokona embame yulu andake renge palyuo rapu pyuo karape laro. Andakare eparenepa nambapa role pyao rae maiyuo karamanale leya.
MAT 25:24 Akali kina mendaki nyiyamo doko opetae epapala, Kamongo, emba akali pundumwa pyuo karapala waingi wara pii nange dokona mee lyuo karo imbu nemba napala embame mee lukusi nyuo karenge doko silyu.
MAT 25:25 Dokona pakapala embena kina doko yuunya apu rapala koko palyiyu. Kana dokoko dae minyuoko epelyo, leya.
MAT 25:26 Dopa leyamopape banya kamongo dokome baa isingi lamaiyuo dopa leya. Emba kendemande koo pyuo makalana wangu lakao karenge dake, namba waingi wara pii nange dokona mee lyuo karo imbu nemba napala mee lukusi nyuo karenge doko silinyi.
MAT 25:27 Dokome akipamo nambana mone doko byange dokona retaka nana pii. Dopa piili doko namba epapala dokopa nambana range dokope kana matana piso eparamo seramo dokope namba nyipuli, lamaiya.
MAT 25:28 Lamaipala, kina minyaro kareyamo doko nyepala kina akalisa minyaro kareyamo akali doko nyuo mainya leya.
MAT 25:29 Dokona lao wambu bange minyaro karaminyi dupwa peparae konda pyuo maironopa kaiyakaro sera. Wambu mendeme angingyuo minya naramopape koo lama minyara doko range nyeroko.
MAT 25:30 Dokonako suu pyao kendemande akali kopyali doko iminjingi netarena ralinyi nembalapa. Iminjingi dokona akali dupwa ee lao nenge ginyi ganyi lao kararami, leya.
MAT 25:31 Ikinyingi Akali baa aŋala dupwa peparae pale pale yanga paupau lao epapala dokopa baa banya kiŋinya petenge yanga paupau lenge dokona pisira.
MAT 25:32 Banya lenge kambu dokona wambu rara wakale wakale dupwa peparae epo sukusa sukusa pirami. Dokopa mena rapu pingi akali dokome sipisipi dupwape meme dupwape wakale yapalyuo liti pingi doko suu pyao wambu dupwa yapalyuo liti pira.
MAT 25:33 Dokopa baame sipisipi dupwa banya kingi rolaerena karena lara, meme dupwa banya kingi kyairena karena lara.
MAT 25:34 Dokopa Kiŋi dokome banya kingi rolaerena kararami dupwa kando dopa lara. Rakangeme nyiso elyape keta pisiyamo dupwa baa yuu kanda soo wasiyamo dokopa isingi panda keyange mende wasakayamo dokona karala ipupwa lara.
MAT 25:35 Namba lopo piyamopa nakamame nenge jiyami kande, namba ipwa nano piyamopa nakamame ipwa jiyami kande, namba upunili epeyonopa nakamame yako lao nyiyami kande
MAT 25:36 Namba papara epeyonopa nakamame komau wapwakayami kande, namba anga piyamopa nakamame namba kandala epeyami kande, namba karapusi anda paleyonopa nakama yako lala epeyami kande lara.
MAT 25:37 Dopa laramo dokopa yulu rolae pingi wambu dupwame baa isingi lamaiyuo dopa larami. Kamongo, anjokorape emba lopo kareene kandapala namwa nenge jiyamase panda ipwa nano kareene kandapala namwa ipwa kamuo jiyamase?
MAT 25:38 Dee emba anjokorape upunili epeene kandapala namwa yako lao nyiyamase panda papara epeenepa namwa emba komau wapwakayamase?
MAT 25:39 Anjokorape anga piyamo siinyipape panda karapusi anda dokona paleenepape kandala epeyamase? larami.
MAT 25:40 Dokopa Kiŋi dokome nakama isingi dopa lamaira. Kinyi langilyu, nambana yangonge kuki karaminyi dapwana kuki wakasa mende kando pyakamiyami kande doko nambasa kando piyamisa piya, lara.
MAT 25:41 Lapala banya kingi kyairena kararami dupwa lamaiyuo dopa lara. Nakama koo keta palirami dupwa, namba yaki nyepala pao isare rao karalu karene dokona Satanemoo banya aŋala koo dupwa pipya kararami dokona pupwa.
MAT 25:42 Dokona lao namba lopo piyamo kareyonopa nakamame nenge jii nayami kande namba ipwa nano piyamo kareyonopa ipwa kamuo jii nayami kande.
MAT 25:43 Namba upunili epeyonopa nakamame yako lao nyii nayami kande, namba papara kareyonopa nakamame komau jii nayami kande, namba anga piyamo siyunupape panda karapusi anda paleyonopape kandala epa nayami kande, lara.
MAT 25:44 Dopa laramo dokopa nakamame opetae dopa lao isingi larami. Kamongo, emba anjokorape lopo kareenepape panda ipwa nano kareenepape panda upunili epeenepape panda papara epeenepape panda anga piyamo siinyipape panda karapusi anda dokona paleenepape namwame kandapala epo isaro pii nayamase? larami.
MAT 25:45 Dokopa baame nakama isingi lamaiyuo dopa lara. Nakama kinyi langilyu, wambu kuki karaminyi dapwana kuki koonde kando pyakami nayami doko nambasa kando piyamisa piya, lara.
MAT 25:46 Dokona nakama yaki nyepala randa nao karalu karala paraminyipape rolae pingi wambu dupwa kyakana renge palu palenge doko nyerami leya Yesumi.
MAT 26:1 Yesumi pii dupwa lao otapala banya disaepole dusipa kando dopa lamaiya.
MAT 26:2 Yuu gii lama epo paparamopa Pasopa nenge nenge doko pyaka sera. Dokopa Ikinyingi Akali doko isa mamandona pyao yukunya lao nyuo minya serami doko nakama silyaminyi, leya.
MAT 26:3 Dokopa purisi akali mupwa dupwape wambunya kamongo dupwape purisi akali mupwa wakasa Kayapasa lenge dokona anda andake dokona epo sukusa sukusa piyami.
MAT 26:4 Pipala, Yesu apa pipala yalu pyuo puu maipala pyarama, lao wato leyami.
MAT 26:5 Doko mee wambu dupwa kilyipu kilyipu karasarami lapala Pasopa nenge ene nao kararama dokopa kaeyamanale, leyami.
MAT 26:6 Yesu yuu Betani Saimone rete rapa nenge akali dokona anda dokona peteyamo dokopa
MAT 26:7 enda mende mamba luli lenge pee mende minyuo baa peteyamo dokona epeya. Mamba doko kana malu penge. Doko minyuo epapala Yesu taepo repeta peteyamopa enda dokome mamba doko banya kyawa dokona kulimbwakamiya.
MAT 26:8 Dopa piyamo dokopa disaepole dupwa kandapala imbwuayami. Imbwuapala, Akipamo doko kokwa soo kulimbwanyi nembelyamo? leyami.
MAT 26:9 Dopa pii napyali mamba dokome maipala kana malu ropo pyao nyepala pendewa wambu mokwa soo maimwali, leyami.
MAT 26:10 Dopa leyaminyipa dopa lalyaminyi lao sepala Yesumi nakama lamaiyuo, Akipamo enda doko randa maiyuo karaminyi? Baame yulu keyange namba pyakalamo.
MAT 26:11 Dokona lao pendewa wambu dupwa nakama pipya role pyao karalu kararaminyipa namba nakama pipya role pyao karalu kara narama.
MAT 26:12 Nambana yanenge dokona mamba doko kulimbwakalamo doko namba malu pirami dokona suu pyapala rapa rapa pipyasa pipya.
MAT 26:13 Kinyi langilyu, waili pii keyange doko yuu muu dupwana boo pyao lao kararaminyili pyuo enda dokome pyamo dokona dopa piya lao suu pyao lao kararami, leya.
MAT 26:14 Akali akalisa ipisu lama kareyami dokona mende Jutasa Isakeriote lenge dokome purisi akali mupwa dupwa kareyami dokona papala dopa leya.
MAT 26:15 Nambame Yesu nakama keta minya sakaro ramo doko aki bange mende jerami, leya. Dokopa kana kulingi akalisa rema baa maiyami.
MAT 26:16 Maiyaminyi yuu gii dokonako piso Yesu mata kando lalana apa pyuo laowane lao kando kareya.
MAT 26:17 Borete isi reta nange nenge yuu gii mupwa dokopa disaepole dupwa Yesu kareyamo doko epo, Emba Pasopa nenge narene doko namwa anja rapa rapa pyakala pamisi lao suu pilipi? leyami.
MAT 26:18 Dokopa baame lao, Anda malu karenge dokona papala akali mende kararaŋa doko kando dopa lao lamaiyalapape. Mana Lengeme lao, Nambana yuu gii doko repeta pyaka silyamo. Embena anda dokona nambana disaepole dupwa pipya role pyao Pasopa nenge narama, lapyasa langyala epelyamano lao lamaiyalapape, leya.
MAT 26:19 Dokopa disaepole dusipa Yesu pinya lao leyamuli pyuo dokona palyuo Pasopa nenge rapa rapa piyami.
MAT 26:20 Yuu kwualepalepa dokopa baamoo akali akalisa ipisu lama kareyami dupwa pipya taepo repeta peteyami.
MAT 26:21 Nenge nao peteyaminyi dokopa baa dopa leya. Kinyi langilyu, nakama petaminyi dokona mendeme namba mata kando lara, leya.
MAT 26:22 Dokopa nakama mona rando piso baa lamaiyuo mendaki lao, Emba nambasa lalyane lao suu pyaa napusande lalyane, leyami.
MAT 26:23 Baame isingi lao, Pee warake ipwange lapo peteta sipyamopa dokona namba role pyao borete poeyo nao pisimbwano dokome namba mata kando lara.
MAT 26:24 Pii pyasi palamo doko, Ikinyingi Akali baa paraŋa lao leyamuli pyuo para ingilyamo. Para ingyapyamopape akali mendeme Ikinyingi Akali mata kando lao nyuo maira doko baa randa andake nara. Dokona lao baa randa koo nyisaraŋa endangimi manja narande piya, leya.
MAT 26:25 Dopa leyamo dokopa Jutasa baa angi mata kando lara dokome lao, Mana Lenge, dopa piramo doko nambape? leya. Dokopa baame baa lamaiyuo, Emba leene doko leya.
MAT 26:26 Nakama ene nenge nao peteyaminyi dokopa Yesumi borete nyepala ateŋa lapala kau lao disaepole dupwa mokwa soo maiyuo, Nyuo nalapape. Dake nambana yongo doko leya.
MAT 26:27 Lapala pee lomasi mende nyepala ateŋa lao ange lapala nakama maiyuo dopa leya, Nakama peparae nalapa.
MAT 26:28 Dake nambana ranjama wambu peparaena lao kulimbuo isa para. Nambana ranjama dokome Anatunya lalu lao lenge pii enenge doko kapawai wara pira leya.
MAT 26:29 Dopa langilyu, waene ipwange doko dee naa naro. Nambana Rakangena isingi yulu paliramopa nambamoo nakama pipya waene enenge lapo role pyao narama dokopa dee naroko leya.
MAT 26:30 Enakana kenane pyao otapala neta pao yuu Olipi Kyau dokona peyami.
MAT 26:31 Dokopa Yesumi nakama lamaiyuo, Kukwa dakepa namba keta mende piramo renge dokona nakama peparaeme namba yaki nyerami. Dokona lao pii dopa lao pyasi palamo. Anatumi sipisipinya rapu pingi akali pyarono dokopa sipisipi dupwa bolombalo larami, lao palamo.
MAT 26:32 Bolombalo laraminyipape namba minyalyuo nyeramopa nakama yuu Galili eparami mare dokona namba wambo paro leya.
MAT 26:33 Dokopa Pitame Yesu lamaiyuo, Nakama peparaeme emba yaki nyepala suu pyaa nao parami ramo doko nambame dopa pii naro, leya.
MAT 26:34 Yesumi baa lamaiyuo, Kinyi langilyu, kukwa dakepako kola kali ene pii lapa naramopa embame namba repo pyuo mata joo lare, leya.
MAT 26:35 Pitame baa lamaiyuo, Namba embapa kumaramba ingyaramopape nambame emba mata joo laa naro leya. Dokopa disaepole dupwa peparae dopako lao pao suu leyami.
MAT 26:36 Dokopa Yesu nakama role pyao yuu Gesemani dokona papala baame banya disaepole dupwa lamaiyuo, Namba dulusale ateŋa lala pelyoŋo nakama dakena pisipwape, leya.
MAT 26:37 Lapala Pitamoo Sepetena ikinyingi dolapo pipya lanyuo papala baa monarename pulunongo piyamo randame kumuo kareya.
MAT 26:38 Dokopa baame nakama lamaiyuo, Namba monarename randame kumulyu. Nambamoo lenge rao karamanale, leya.
MAT 26:39 Dopa lapala mee mende papala pangu sepala ateŋa lao dopa leya. Nambana Rakane, kapa ingyara ramo pee lomasi dake namba kaepala pena lapili yaka. Dopa lapili lao suu pyapunupape nambame laro doko kapa daa, emba lare doko kapa, leya.
MAT 26:40 Lapala disaepole dusipa peteyami dokona epapala luu paleyaminyi kandeya. Kandapala baame Pita lamaiyuo, Keloke gii mendaki iki nambamoo kapa lenge rao kapa pisa nalyamisi?
MAT 26:41 Nakama makande pii nana lao lenge rao ateŋa lao pisipwape. Imambu dokome kapa pinya lao suu pyapyamopape yanenge dokome yame yame lapyamo petaminyi, leya.
MAT 26:42 Lapala dee yuu lapo pyuo papala ateŋa lao dopa leya. Rakane, pee lomasi dake naa naronopape namba kaepala paa nara ramo doko emba suu pilinyili pyuo namba keta palena, leya.
MAT 26:43 Lapala dee kamba epeya. Dokopa nakama lenge kenda kenda piyasa luu palyuo siyaminyi kandeya.
MAT 26:44 Kandapala nakama yaki nyepala dee repo pyuo papala wamba leyamo dopako lao ateŋa leya.
MAT 26:45 Lapala disaepole peteyaminyi dokona epapala dopa lamaiya. Luu palimi doko suu pyao dee kamba imambu soo luu palamisi? Ikinyingi Akali doko yulu koo pingi akali dupwa keta nyuo maira gii doko epapu pyaka silya kande.
MAT 26:46 Sipuro monale. Namba mata kando lapyamo akali doko repeta epelya kande, leya.
MAT 26:47 Baa ene pii lao kareyamo dokopa akali akalisa ipisu lama kareyami dokona Jutasa doko epeya. Akali malu mee rukuraka pyuo epo wua gelape kusapepe minyuo purisi akali mupwa dupwape wambunya kamongo dupwapeme pena leyamisa baamoo pipya epeyami.
MAT 26:48 Akali mata kando lara dokome wambo lao, Mende nyinyi piyu kande doko baa kararaŋa minyaralapape leya.
MAT 26:49 Lapala epo Yesu kareyamo dokona aopa repeta epapala, Rapu Pingi emba yako leto leya. Lapala baa nyinyi piya.
MAT 26:50 Yesumi baa lamaiyuo, Puu minyingi, akipamo dae epelepe? leya. Dokopa nakamame Yesu minyarapala minyaro kareyami.
MAT 26:51 Dokopa Yesu role pyao kareyami dokona mendeme banya kingi pyasinju lapala banya wua gela ipyuo nyepala purisi mupwa dokona kendemande akali dokona kale doko kondala pena leya.
MAT 26:52 Dokopa Yesumi baa lamaiyuo, Embena wua gela doko nyuo range manjipala kae. Wambu gela nyuo minyingi dupwa peparae gela dokoremeko isingi pilyaminyipa kumungi.
MAT 26:53 Nambana Rakange piso seronopa baame yanda singi aŋala rara akalisa ipisu lama yanda kambu dokome namba nyisala pena lara lao suu pyaa nalese?
MAT 26:54 Kapa pena larako doŋo pii pyasi mende pira ingilyamo lao palamo doko apa pyuo pyaka sera? leya.
MAT 26:55 Yuu gii dokopa Yesumi wambu malu rukuraka pyuo kareyami dupwa lamaiyuo, Nakambame namba kendepo kendepo nao waa nyuo karenge akali dokoreŋe lao suu pyapala kusape wua gelape minyuo namba puu maiyala epelyamisi? Yuu yangeyamo yaka lao namba tembole anda dokona mana lao peteyonopa nakamame namba kote lalana minyara nayami kande.
MAT 26:56 Doko Anatunya poropeta akali nolako lao pepa pyao reteyami pii dupwa pyaka sipyamopa dopa pilyaminyi leya. Dokopa disaepole dupwa peparae baa yaki nyuo kaepala ralo peyami.
MAT 26:57 Dokopa Yesu minyareyami dupwame baa lanyuo pao purisi akali mupwa wakasa Kayapasa kareyamo dokona Mawa Pii mana lenge akali dupwape kamongo dupwape epo sukusa sukusa piyaminyipa dokona lanyuo peyami.
MAT 26:58 Peyaminyipa baa peyamo dokona Pita nanesale peteta enakana pao purisi akali mupwa dokona anda kamapi dokona peya. Pao sukusa papala anda iso karenge akali dupwa pipya role pyao piso apa pipelyape lao kando peteya.
MAT 26:59 Purisi akali mupwa dupwape wato andake lenge akali dupwa peparaepeme Yesu kapa pyao kumakamanale lapala baa kando kote lao kyambo lenale lao akali lapo koteyami.
MAT 26:60 Koteyaminyipape akali malu lala epeyaminyipa kote renge angi mende minyuo lalana lisa piyami. Enakana akali lama epapala dopa leyambi.
MAT 26:61 Akali dakeme Anatunya tembole anda doko lalyinyi nembapala yuu rema kapa pyuo otaro, leya, leyambi.
MAT 26:62 Dokopa purisi akali mupwa wakasa dokome roya karapala dopa leya. Emba isingi mende warapo lare ingya nalyase? Nakambame embasa kando kote lao akinde lalambipi? leya.
MAT 26:63 Dopa leyamopa Yesu roma napyuo kareya. Dokopa purisi akali mupwa wakasa dokome baa lamaiyuo, Anatu lete karamo dokona kingi lao, Emba Koraisa Anatunya Ikinyingipi mee lao namwa rolo langipi, leya.
MAT 26:64 Yesumi baa lamaiyuo, Emba leene doŋo Ikinyingi Akali doko Porai Renge Palengena kingi rolae dokona piso yake dokona kopa dokopa role pyao lupyuo epara doko nakama kandarami, leya.
MAT 26:65 Dokopa purisi akali mupwa dokome banya range komau pee pingi doko minyuo pilyiya. Pilyapala, baame Anatunya lenge kambu dokona kokwa soo lalyamo. Akipamo dee akali lapome baasa kando lenako laramase? Baame Anatunya lenge kambu dokona kokwa soo lalamo doko nakamame selaminyi.
MAT 26:66 Apa lao suu pilyamisi? leya. Nakamame isingi lao. Baa kopetame pilyamo kapa kumunya, leyami.
MAT 26:67 Lapala banya lenge kambu dokona kepakali kyasinyi piso kingi rangome pyao kareyami. Dokopa lapome baa kingi kapeme pyao, dopa leyami.
MAT 26:68 Koraisa embame mendeme pyalaminyi dupwa apimipi lao pii repa repa pyuo kandapala dokomeŋe lape leyami.
MAT 26:69 Pita baa kamanda anda kamapi dokona peteya. Dokopa kendemande enda mendeme baa peteyamo dokona epapala, Yesu Galili range doko embapa role pyao karambi doko, leya.
MAT 26:70 Dopa leyamopa nakama peparae soo peteyaminyipa Pita baame, Apa letene lao soo saka nalyo, lao daa leya.
MAT 26:71 Lapala kakota lumbungi dokona peyamo dokopa kendemande enda mendeme baa kandapala wambu lapo doo kareyami dupwa lamaiyuo, Akali dake Yesu Nasarete range dokopa karambi, leya.
MAT 26:72 Dokopa Pita baame dee kamba daa lapala, Akali doko nambame kando gisa nange lao lalu lao leto, leya.
MAT 26:73 Nee lama sepeyamopa wambu doo kareyami dupwame epapala Pita dopa lamaiyami. Kinyi kinyi emba nakamana yongo dokore nyuo karene. Embena pii lapinyi dokome emba Galili akaliŋi lao panelyamo, leyami.
MAT 26:74 Dokopa baame, Namba kyambo laro ramo doko Anatumi namba pinyale, lao enamba minyuo, akali doko namba kando gisa nange, leya. Dokopa aopa kola kali mende pii leya.
MAT 26:75 Dokopa Yesu wamba pii leyamo doko, Kola kali ene pii lapa naramopa embame namba kando repo pyuo mata joo lao karare, leya pii doko Pitame suu piya. Suu pyapala baa netarena papala nengya nengya pyao, ee lao kareya.
MAT 27:1 Yuu yangeyamo dokopa purisi akali mupwa dupwape wambunya kamongo dupwape peparaeme Yesusa kando wato lao baa pyao kumakarama, leyami.
MAT 27:2 Lapala kimbwapala baa lanyuo pao Pailate kyapo mupwa doko keta minya siyami.
MAT 27:3 Jutasa baa mata kando leyamo dokome baa kando kote lao kapa ingyuo palira kumunya lao kaeyami doko kandeya. Kandapala mona enenge palyapala kana akalisa rema dupwa laeyo minyuo epo purisi mupwa dupwape kamongo dupwape range maipala dopa leya.
MAT 27:4 Nambame mata kando lapunu doko baa koo mende pii nao ambeambe karapyamo akali dokona ranjama doko isa pena lao lapu doko namba koo pipunusa pipya, leya. Nakamame lao, Renge anjukundena namwa keta palase? Emba rangeme pii kande, leyami.
MAT 27:5 Dokopa baame kana dupwa tembole anda dokona isa pyao pyambwapala baa range koe nao kumalana kala peya.
MAT 27:6 Dokopa purisi mupwa dupwame kana mungyu nyepala akali pyao kumakarama lao yole maimwa kana doko nyuo misi andana kana pyasu retasarama dokona Mawa Pii palamo leyami.
MAT 27:7 Dopa lao wato lapala pee wasingi akalinya yuu doko ropo pyapala nanesa wambu kumaraminyi dupwa dokona malu pirama lao nyiyami.
MAT 27:8 Dopa piyaminyi dokona yuu doko kingi Ranjamareta leyami. Leyaminyi kingi dokoko dakepa mee lao karaminyi.
MAT 27:9 Dopa piyami doko Anatunya poropeta akali Jeremaya lenge dokona leyamo pii doko pyaka siya. Baa dopa leya. Isaraele akali lapome akali mende kana dusipame ropo pyao nyerami leya. Kana dusipako nyiyami.
MAT 27:10 Nyepala pee wasingi akali dokona yuu doko Kamongome langiyamuli pyuo ropo piya.
MAT 27:11 Yesu kyapo mupwa dokona lenge kambu dokona kareya. Dokopa kyapo mupwa dokome baa piso soo, Emba Juu wambunya kiŋisi? leya. Yesumi baa lamaiyuo, Emba leene doko, leya.
MAT 27:12 Dopa leyamopape purisi akali mupwa dupwape kamongo dupwapeme baa kando koo pingiŋi leyaminyi dokopa baa mende isingi warapo laa naya.
MAT 27:13 Dokopa Pailateme baa lamaiyuo, Nakamame emba kando dopa pingi dapa pingi lao kote lalyalana pilyaminyi doko see nalese? leya.
MAT 27:14 Dopa leyamopape kote renge wakale wakale baa kando leyaminyi dupwana mendepe ama warapo isingi laa nayako. Dopa piyamo dokopa kyapo mupwa doko mona nembo kareya.
MAT 27:15 Pasopa nenge nenge gii dokopa wambu rukuraka pyuo karapala karapusi anda palenge dokona mende kingi lapala mokwakana letaminyili pyuo kyapo mupwa dokome mokwakamipapu pingi.
MAT 27:16 Yuu gii dokopa akali kuli palyuo koo pingi wakasa mende Barapasa lenge doko karapusi anda dokona paleya.
MAT 27:17 Dokopa epo malu palyuo kareyami dokopa Pailateme nakama lamaiyuo, Anjuku mokwakapili lao suu pilyamisi? Barapasa panda Yesu Koraisa lenge doko? leya.
MAT 27:18 Dokona lao Yesu kando yango palyapala kote lamana lao minya selaminyilyamo lao soo gisiya.
MAT 27:19 Baa kote soo petenge dokona peteyamo dokopa banya etenge dokome pii repe repe nembo dopa leya. Akali yulu rolae pingi doko mende pinya palyareŋe pii napipi. Banya lao namba epapu kombeya mende pipala monarena kenda andake pipyamo peto, leya.
MAT 27:20 Purisi akali mupwa dupwape kamongo dupwapeme mee wambu dupwa nembo nembo pipala Barapasa mokwakao Yesu pyao kumakao pinya leyami.
MAT 27:21 Kyapo mupwa dokome nakama dee lamaiyuo, Akali lama karambinyi dolapona mende anjuku mokwakapili lao letamisi? leya. Dokopa nakamame lao Barapasa, leyami.
MAT 27:22 Pailateme nakama lamaiyuo, Yesu Koraisa lenge doko apa pirose? leya. Nakama peparaeme lao, Baa isa mamandona kumuo palena, leyami.
MAT 27:23 Dokopa baame lao, Akipamo? Aki yulu koo mende pipyase? leya. Dopa leyamopa nakamame pii porakaiyuo kaeyo lapala, Baa isa mamandona kumuo palena, leyami.
MAT 27:24 Pailateme namba pii lao karapu doko soo nyaka napala kilyipu kilyipu karalana pilyaminyi lao kandapala ipwa nyepala wambu malu rukuraka pyuo kareyaminyi dupwana lenge kambu dokona banya kingi doko wate piya. Wate pyuo karo dokopa, Akali dakena ranjama doko namba keta pali nana. Nakama range keta palena lao kando nyelapape, leya.
MAT 27:25 Dokopa wambu peparaeme isingi lao dopa leyami. Banya ranjama doko namwape namwana wane wanakepe dupwa keta paliraŋa palena, leyami.
MAT 27:26 Dokopa Barapasa mokwakamipala Yesu pyaroko pyao isa mamandona pyao palyinya lao nakama keta minya sakamiya.
MAT 27:27 Dokopa kyapo mupwa dokona yanda singi dupwame Yesu kyapona anda andakare lanyuo pao yanda singi yango dupwa peparae epena leyami. Lapala baa nyuo sukusa pyambuyami.
MAT 27:28 Pyambwapala banya komau roko nyepala komau kone mendeme baa bole bale lapala
MAT 27:29 nepereke lapome minyuo kamenyongo lengapu pipala kyawa dokona pee pyakamiyami. Pangali mende banya kingi rolaerena minyinya lao maiyami. Maipala banya lenge kambu dokona wapambu pii pyaro piso baa giyalya giyana pyuo, Yako lete lao Juu wambunya Kiŋi doko, leyami.
MAT 27:30 Lapala baa kepakali kyasinyi piso pangali doko neta nyepala banya ayemba dorena pyaroko piyami.
MAT 27:31 Dopa pyuo baa kando giyalya giyana pipala komau kone neta nyepala banya komau range dusipa pee pyakamiyami. Pyakamipala baa isa mamandona pyao palyalana lanyuo peyami.
MAT 27:32 Jerusaleme yaki nyepala neta peyaminyi dokopa akali Sairini range mende kingi Saimone lenge doko katasa kandamae nyiyami. Akali doko puu maili lao Yesunya isa mamando doko soo pakaminya leyami.
MAT 27:33 Enakana yuu mende Golokota lenge dokona epeyami. (Kingi doko yuu kyawa kuli dopale.)
MAT 27:34 Epeyaminyi dokopa waene ipwange kau pingi wakale randa andake pii nana lao nenge konda pisi dokore nena lao maiyami. Maiyaminyipape nakanju sepala baame naa naro leya.
MAT 27:35 Dokopa baa isa mamandona pyao palyapala banya komau dusipa api mendeme embone piso nyerape lao nakama yulu mende pyuo nyepa piyami.
MAT 27:36 Pipala dokona baa kandaro peteyami.
MAT 27:37 Dokopa banya kyawa siya dorena baa kando kote leyami pii renge doko pepana pyao palyiyami. Pii doko dopa leya. Yesu dake Juu wambunya Kiŋi doko.
MAT 27:38 Dokopa waa nyuo kendepo kendepo nao karenge akali lama baa pale pale mende kingi rolaerena mende kingi kyairena isa mamandona pyao palyiyami.
MAT 27:39 Dokopa wambu lapome kata dokona epo pao karo baa kando kilya kandalya kandana pyuo ayemba yande lao dopa leyami.
MAT 27:40 Emba tembole anda doko lalyinyi nembapala yuu rema dee mende pyuo nyero lee kande doko suu pyao embame range lete wai pyuo nyii. Emba Anatunya Ikinyingi ramo dokome isa mamando dake yaki nyepala emba isa lupyuo ipu, leyami.
MAT 27:41 Dopako pyuo purisi mupwa dupwape Mawa Pii mana lao karenge dupwape kamongo dupwapeme baa kando giyalya giyana pyuo dopa leyami.
MAT 27:42 Baame wambu lapo pyuo lete nyiyapyako doŋo baa range lete nyelana saka nalyamo. Baa Isaraelena Kiŋi dokome dakepa isa mamando doko yaki nyepala isa lupyuo epena. Dopa pira ramo doko baa kinyilyamo lao suu pyarama.
MAT 27:43 Baame Anatu kapa ingingi lao suu pyao karamo dokome Anatumi baa banya yulu pipyali lao suu pyara ramo doko dakepa baa nyiso pyuo lete nyinya. Dokona lao baame namba Anatunya Ikinyingi lapya kandapi, leyami.
MAT 27:44 Dokopa waa nyuo kendepo kendepo nao karenge akali baa pale pale isa mamandona kumuo paleyambi dolapome baa kando dopako pyuo kilya kandalya kandana pyuo leyambi.
MAT 27:45 Andawai korakama towalo keloke piso yuu dupwa iminjiya. Kwuarao karo neta damasa peyamo sere keloke dokopa yuu yangeya.
MAT 27:46 Dokopa neta damasa peyamo sere keloke ingyuowale dokopa Yesu pii porakaiyuo lapala, Eli, Eli lama sapakesani, lao paleya. Pii doko, Nambana Anatu, nambana Anatu, akipamo embame namba yaki nyuo kaelene dopale.
MAT 27:47 Dopa leyamo dokopa akali lapo dusa kareyami dupwame pii doko sepala, Baame Ilainja kyakale lalyamo, leyami.
MAT 27:48 Dokopa kareyami dokona mendeme makandapala isa lumbi mende nyepala waene kau pingi dokona palyuo nyuo isa mendena suku pipala Yesu nena lao maiya.
MAT 27:49 Dopa piyamopape akali lapome dopa leyami. Mee iso karape. Ilainjame baa lete wai pyao nyela epelyape mee lao kando karamana, leyami.
MAT 27:50 Dokopa Yesumi dee kamba porakaiyuo lapala banya imambu dokome baa yaki nyuo rekya leyamopa kumuya.
MAT 27:51 Dokopa tembole anda dokona komau yukwaro kareya doko mee dulunya piso kangu epo donena karapala lama ingyuo yukwaro kareya. Dokopa yuusili minyuo kana dupwa sukusa poro lao amongwao piya.
MAT 27:52 Malu anda dupwa roma lumbwapala wambu poo pyasi luu palele lao kumasi paleyami dupwana lapo lete epeyami.
MAT 27:53 Yesu neta minyalyuo nyepeyamo dokopa enakana nakamame malu anda soo neta epapala Jerusaleme taone poo pyasi dokona pao wambu kareyami dupwana malumi kandena lao paneyami.
MAT 27:54 Yanda singi yango rapu pyuo karenge dokomoo akali baa pale pale kareyami dupwa pipya Yesu iso kando kareyami dupwame yuusili minyuo dopa pyuo piyamo kandapala pakame kumuyami. Pakame kumapala, Kinyi dake Anatunya ikinyinginde karapyalyamo, leyami.
MAT 27:55 Enda malu opetae dokona nanesale piso kando peteyami. Nakamame Yesu yuu Galili karo epeyamuli pyuo wamba baa isaru pyuo papiyami.
MAT 27:56 Enda dupwa peteyami dokona mende Maria Makatala range doko mende Maria Jemesa Josepepana endangi doko mende Sepetena ikinyingi dolapona endangi doko.
MAT 27:57 Alemanji dokopa yuu Arimatia range akali bange malu retenge mende kingi Josepe lenge Yesunya disaepole ingyuo kareyako doko epeya.
MAT 27:58 Baame Pailate kareyamo dokona papala Yesunya yanenge kaoma doko jinya lao piso siya. Dokopa Pailateme banya akali mendeme nyuo mainya leya.
MAT 27:59 Dokopa Josepeme yanenge kaoma doko nyepala komau londe keyange elyape dokome yama piya.
MAT 27:60 Pipala baa rangeme banya malu anda enenge kana andake luku luku pyuo rumbyuo reteyamo dokona malu piya. Malu pipala kana andake bai bai minyuo kao pele pele lao epapala malu anda kambu doko upi leya. Upi lapala peya.
MAT 27:61 Maria Makatala range dokopa Maria mende wakale dokopa malu anda lenge kambu siyamo dokona rolae peteyambi.
MAT 27:62 Misi lalana rapa rapa piyaminyi dokona yangama dokopako purisi mupwa dupwape Parisi dupwapeme Pailatena lenge kambu siyamo dokona sukusa sukusa pyuo karapala dopa leyami.
MAT 27:63 Rapu Pingi, akali panga singi dokome ene kumapa nao dokopa, yuu rema epo paparamopa dee lete lopo eparo leya kande doko suu pyao karamano.
MAT 27:64 Dokona yuu repo doko ene otapa naramopa banya disaepole dupwame pao baa waa nyisaramiŋi lao embena akali dusipame malu anda dokona poraiyuo rapu pyuo karena lamaipi. Baa waa nyepala mee wambu dupwa lamaiyuo, Baa kumuo palipala lopo ipyalyamo larami ramo doko enakana dopa lao panga soo kararami dokome wamba panga soo kareya doko kaeyapala koo wakasa ingyuo para, leyami.
MAT 27:65 Dokopa Pailateme Parisi duwpa nakama lamaiyuo, Yanda singi lapo malu anda kando iso karenale lao nyuo lanyuo pupwape. Pao malu anda doko wambu lapome epo baa lopo nyii nana lao rapu pyuo isaro karalapape, leya.
MAT 27:66 Leyamo dokopa malu anda dokona papala wambumi baa nyii nana lao malu anda kambu dokona kana pakaro kareya dokona wakaiye rambu lapala upi leyami. Palyapala yanda singi lapome kando iso karena leyami.
MAT 28:1 Koro petenge otapeyamopa koro yuu gii mupwa dokopa neta pyakaeyalana piyamo dokopa Maria Makatala range dokope Maria mende dokope dolapome malu anda doko kandala peyambi.
MAT 28:2 Dokopa yuusili andake minyiya. Dopa piyamo dokopa Kamongona aŋala mendeme yake panda dokona karo epapala kana doko minyuo neta kao pele pele lapala baa dokona ketae peteya.
MAT 28:3 Banya yanenge doko yuupele dopale komau doko kyewa lao mama nyingi.
MAT 28:4 Dokopa yanda singi iso kareyami dupwame baa kando pakapala walu walu lao kumasi dopale ingyuo kyukurenge mee kareyami.
MAT 28:5 Dokopa aŋala dokome enda dolapo lamaiyuo, Paka nalapape. Yesu isa mamandona pyao palyiyami doko kandala epelyambinyi doko namba silyu.
MAT 28:6 Baa dae see nalyamo. Dopa piroŋo lao leyamuli pyuo lopo pupyalyamo. Baa sipyamo mare doko kandala ipupwa.
MAT 28:7 Kandapala waiya lao pao, Baa kumuo palipala lopo pupyapya, lao banya disaepole dupwa lamaiyalapape. Nakama enakana eparami lapala yuu Galili dokona wambo pelya kande. Yuu dokona nakamame baa kandarami leyapya kande, leya.
MAT 28:8 Dokopa nakamba malu anda doko waiya lao yaki nyepala paka piyamopa monanda pyakalyuo pyao makando papala banya disaepole dupwa lamaiyala peyambi.
MAT 28:9 Dokopa Yesumi nakamba kandamae nyepala, Yako lamaiya. Dokopa baa kareyamo dokona epapala nakambame banya kimbu minyandaro piso baa mona maiyuo kingi lao peteyambi.
MAT 28:10 Dokopa Yesumi nakamba lamaiyuo, Paka nalapape. Nambana yangonge dupwa yuu Galili dokona pena lala pupwa. Yuu dokona nakamame namba kararonopa kandarami, leya.
MAT 28:11 Ene katasa peyambinyi dokopa yanda singi malu anda rapu pyuo kareyami dusipana lapo anda repe repe pyuo karenge dokona sukusa papala purisi akali mupwa dupwa dopa pipya dopa pipya lao lamaiyami.
MAT 28:12 Dokopa enakana purisi mupwa dupwa nakama kamongo dupwa pipya epo sukusa sukusa pyuo wato leyaminyi dokopa kamongo dupwame yanda singi dusipa kando kana lapo maiyuo dokopa dopa leyami.
MAT 28:13 Nakamame, namwa luu palimwanopa banya disaepole dupwame kukwama epapala baa waa nyepala pumi, lao lamaipwape leyami.
MAT 28:14 Dopa lao kararaminyi dokopa lasi pii doko kyapo mupwa banya kale dokona palira ramo doko baame nakama randa jii nana lao namwame nakama nyisarama ingilyamo, leyami.
MAT 28:15 Dokopa yanda singi dusipame kana dupwa nyepala lena leyami dokona palyuo leyami. Dokopa lasi pii doko Juu wambu kareyami dupwana lao raeyaminyi doko suu pyao epapu laoko karaminyi.
MAT 28:16 Disaepole akalisa ipisu mendaki dupwa yuu Galili dokona pao yuu kyau mendena Yesumi wamba pena leyamo dokonako peyami.
MAT 28:17 Pao baa kandapala baa mona kando lakandeyami. Dopa piyaminyipape lapome, Baa angi epo karape lao lamana suu pyao kareyami.
MAT 28:18 Dokopa Yesumi epo nakama dopa lamaiya. Renge palenge yake panda silyamopape isa panda silyamopape peparae namba keta jipyamopa karo.
MAT 28:19 Dokona nakamame pao rara wakale wakale dupwa peparae disaepole ingyuo karena lao Rakane Ikinyingi Imambu Poo Pyasimoo dusipana kingi lao bapitisimo nyakamyuo pupwa.
MAT 28:20 Nambame nakama dopa pipwape dopa pipwape lao langyuo karenge pii dupwa peparae minyuo pyuo karena lao mana lamaipwape. Dokopa isa wambu karamano yuu gii doko ene lumwa pipa naramopa namba nakama pipya yuu peparae role pyao kararama lyakande, leya.
MAR 1:1 Yesu Koraisa Anatunya Ikinyingi dokona lao waili pii keyange dakena pyasi palamo.
MAR 1:2 Dokona lao poropeta Aisayana buku dokona pii mende palamo. Nambame nambana waili akali doko embena lenge kambu dokona wambo nembelyo kande. Embena kata wapuo para.
MAR 1:3 Yuu muiyane dokona pii mende dopa lao kyakale lao karara. Kamongona kata mondo lalapa, banya kata dupwa wapuo rolae pyuo karalapa lara.
MAR 1:4 Aisayana pii leyamuli pyuo Jone bapitisimo nyakamaingi baa yuu muiyane dokona pano epeya. Epapala, Nakama mona kapu kyuo bapitisimo nyelapape, dokopa nakamana koo dupwa Anatumi nyuo kame sakara, lao kareya.
MAR 1:5 Yuu Jutia range dupwa peparaepe Jerusaleme wambu dupwa peparaepe baa kareyamo dokona peyami. Pao kareyaminyi dokopa baame nakama bapitisimo nyakamyuo kareyamopa nakamana koo dupwa polo lao ipwa Jotane dokona bapitisimo nyiyami.
MAR 1:6 Jone banya komau kamelena imanjimi wasisinde lisa marapu mendeme minyanyi pyuo wapungi doko wapuro kareya. Aimbupi amburali ipwangepe nao kareya.
MAR 1:7 Baame wambu dupwa pii boo pyao lamaiyuo dopa leya. Porakai mende nambapa kapa pii nara baa enakana epelyamo. Namba akali koo dokome pongwa napala banya kimbu suu lyolo doko polarono kapa ingya nalyamo.
MAR 1:8 Nambame nakama ipwa dokome bapitisimo nyakao karo. Nambame ipwame bapitisimo nyakao karapunupape baame nakama Imambu Poo Pyasi dokome bapitisimo nyakara, leya.
MAR 1:9 Yuu gii dokopa Yesu yuu Galili dokona yuu kuki lama Nasarete lenge doko yaki nyepala epeyamo dokopa Joneme baa ipwa Jotane dokona bapitisimo nyakamiya.
MAR 1:10 Baa ipwa dokona sipurao neta epeyamo dokopa yake dulu aopa lumbwapala Imambu Poo Pyasi yaka wayamu dopale mende baa keta pisinya isa lupyuo epeyamo doko Yesu kandeya.
MAR 1:11 Dokopa yake dokona piso pii mende epeya. Emba nambana Ikinyingi mona retelyo doko. Nambame emba raeko maiyuo karo, leya.
MAR 1:12 Dokopa Imambu dokome aopa Yesu nyuo lanyuo yuu muiyane dokona peya.
MAR 1:13 Yuu muiyane dokona Sataneme yuu akalisa kisima baa apa pilyape lao kandalana makande pyuo kareyamopa kareya. Dokopa baa mena suwape kama palenge dupwa pipya role pyapeta kareya. Dopa pyuo kareyamo dokopa aŋala dupwame baa isaro pyuo kareyami.
MAR 1:14 Yuu mendepa Jone puu maiyaminyipa Yesu yuu Galili dokona Anatunya waili pii keyange boo pyao lao epeya.
MAR 1:15 Baame yuu gii pyaka sepelyamo dokona Anatunya isingi yulu repetale epelyamo. Nakama mona kapu kyuo waili pii keyange doko kinyi lao suu pyalapape, leya.
MAR 1:16 Yesu Galili ipwa muiyane pete nemba nemba papyuo kareyamo dokona Saimone yangonge Endurupa nakambana oma nyingi yulu pyuo karo nyuu oma nyingi mende ipwa dokona pyambuo kareyambinyi kando nyiya.
MAR 1:17 Kandapala Yesu dopa leya. Namba paronuli pyuo ipupwape. Nakamba oma nyuo karambi doko suu pyao namba nyisaronopa akali yango nyerami ingilyamo, leya.
MAR 1:18 Nakamba oma nyuu dusipa aopa yaki nyepala baa peyamuli pyuo peyambi.
MAR 1:19 Baa kata dokona mee mende peyamo dokopa Jemesa Sepetena ikinyingi doko banya yangonge Jonepa nakambana bote dokona karo nyuu oma nyingi dusipa lee kyaso paleyambinyi pao kando nyiya.
MAR 1:20 Kandapala aopa epena leya. Leyamo dokopa Sepete nakambana rakange banya yulu pingi akali pipwa bote dokona kareyaminyi raka lanyi yaki nyepala baa peyamuli pyuo peyambi.
MAR 1:21 Dokopa yuu Kapaneame dokona peyami. Peyaminyi dokopa yuu koro petenge dokopa sinakoke anda dokona kolando papala mana lao kareya.
MAR 1:22 Baa misi pii lenge akalinya pii moko minyuo laa napala baa renge palyuo lao mana lamaiyuo kareyamopa banya pii dokome nakamana monarena piya.
MAR 1:23 Dokopa nakamana sinakoke anda dokona akali mende kopyali imambu koo dokome soo pyale leyamo peteya.
MAR 1:24 Pisipala baa pii porakaiyuo kaeyo dopa pyuo leya. Yesu Nasarete range doko embame namwa apa pinya lao pilinyi? Embame namwa kokwa sela ipisi? Emba apipi lao namba silyu. Emba Anatunya akali yapasi, leya.
MAR 1:25 Dokopa Yesumi baa isingi pyalana pyuo lamaiya. Emba pii laa kae. Akali doko raka lanyi yaki nyinya leya.
MAR 1:26 Leyamo dokopa imambu koo dokome baa nyuo walu walu leya. Walu walu lapala pii porakaiyuo kaeyo lapala raka lanyi yaki nyiya.
MAR 1:27 Yaki nyiyamo dokopa wambu dupwa peparae mona nembapala nenge pakara pakara pyuo lao, Doko akisi? Doko mana pii enengendelamo. Yesu renge palyuo lapyamo dokopa imambu koo dupwa letamuli pingilamo, leyami.
MAR 1:28 Yesu baa renge palyuo yulu andake pilyamo lao aopa yuu Galili kipwa kipwa peparae dupwana kapa kapa siyami.
MAR 1:29 Baa sinakoke anda yaki nyepala aopa Saimone Endurupana anda Jemesa Jonepa role pyao kolandeyami.
MAR 1:30 Dokopa Saimonena enda imwange dokona yanenge isaro rao anga piyamo siya. Siyamopa, Enda doko anga pyapya, lao Yesu lamaiyami.
MAR 1:31 Lamaiyaminyi dokopa baame endana kingi kii minyuo minyalyuo nyiya. Nyiyamo dokopa yanenge isare reyamo doko pyai neyamopa mee ingiya. Mee ingiyamopa enda dokome nakama nyiso nenge pyuo kareya.
MAR 1:32 Neta anda pao kone pupuri piyamo gii dokopa anga pingipi kopyali imambu koo dokome soo pyale leyamo karengepe baa kareyamo dokona lanyuo epeyami.
MAR 1:33 Wambu yuu range peparae kambu dokona kapo kareyami.
MAR 1:34 Wambu malu anga wakale wakale piyamo dupwa baame pyuo elya pyuo nyuo imambu koo malu dupwa raka lanyi nembo kareya. Imambu koo dupwa Yesu dopa pyuondelyamo lao siyamisa dokona baa nakama pii laa nana lao pena leya.
MAR 1:35 Yuu yangalana ene endenge siyamo dokopa baa sipurao kama papala yuu iki siyamo mendena ateŋa lao peteya.
MAR 1:36 Dokopa Saimonemoo akali role pyao kareyami dupwape baa peyamo dokona moko minyuo peyami.
MAR 1:37 Nakamame baa kando nyepala dokopa baa lamaiyuo, Wambu peparae emba koto papilyaminyi, leyami.
MAR 1:38 Dopa leyaminyi dokopa baame nakama dopa lamaiya. Yuu wakale lapo dupwana kama monale. Dupwana opetae namba boo pyao mana lamairu. Namba dopa piruŋu lao epeyo, leya.
MAR 1:39 Dopa lapala baa yuu Galili kapa kapa pyuo pao yuu rangena sinakoke anda dupwana pii boo pyao lao imambu koo dupwa raka lanyi nembo papiya.
MAR 1:40 Dokopa akali rapa neyamo mende Yesu kareyamo dokona epapala piso sokondali pyuo wapambu pii pyaro piso lao, Embame namba elya pyuo nyipuli lare ramo doko namba kapa elya pyuo nyere leya.
MAR 1:41 Dokopa Yesumi kondome kumapala banya kingi pyasinju lapala minyandapala baa lamaiyuo, Nambame emba pyuo nyipuli yaka leto. Emba elyape karape, leya.
MAR 1:42 Leyamo dokopa banya rapa aopa loo leyamopa baa elyape kareya.
MAR 1:43 Dokopa Yesumi akali pena lamaiyuo dokopa,
MAR 1:44 Namba pyuo nyipyaŋa lao akali mende lamai napipi lao laokondali piya. Emba papala anga mee ingiya doko purisi akali lasaka piri. Wamba Moseseme anga mee ingyaramo dokopa bange pyao kiso Anatu mairami leya dokoko embame maiyala puu. Dokopa embena anga mee ingilyamo doko wambu dupwa serami leya.
MAR 1:45 Yesu dopa pyuo leyamopape akali dokome wambu malu mee lamaiyuo, Namba Yesumi pyuo nyipyaŋa, lao boo pyao lamaiyuo peyamopa kapa kapa piya. Kapa kapa piyamo dokona wambu malu mee Yesu kandalana kareyaminyisa Yesu baa taone dupwana enakana kapa para ingya naya. Baa yuu iki siyamo dupwana kareya. Dokona kareyamopa yuu muu dupwana wambu peparae baa koto epeyami.
MAR 2:1 Yuu lapo epo papeyamopa Yesu yuu Kapaneame dee laeyo epeyamo dokopa wambu dupwa baa anda karapyalyamo lao kareyami.
MAR 2:2 Dokopa wambu malu epo malu palyuo peteyami. Anda kete piyamopa andakare pandape kambu doko opetaepe kaka see naya. Dokopa baame pii boo pyao lamaiyuo kareya.
MAR 2:3 Lamaiyuo kareyamo dokona papae rambungi mende lanyuo epeyami. Akali kisima dusipame baa soo epeyami.
MAR 2:4 Epapala Yesu kareyamo dokona repeta panya saka napala Yesu kareyamo dusa kanda kanda andeyange doko rano karo purukwapala nyuo kakondeyami. Kakondapala rumbyasi dokona papae rambungi doko palenge isa paleta isa elya kalo malyiyami.
MAR 2:5 Dokopa akali dusipame Yesu kapa lete nyakara ingilyamo lao suu pyapala soo epeyaminyi doko kandapala Yesumi papae rambungi akali lamaiyuo, Rakane, embena yulu koo dupwa kame sakao kaeyasi silyamo leya.
MAR 2:6 Leyamo dokopa Sekeraepo akali lapo monarename suu pyanyi pyano pyuo peteyami.
MAR 2:7 Baa akipamo pii dopale letase? Baa Anatunya lenge kambu dokona kokwa soo letamo, lao suu piyami. Apimi koo dupwa kapa nyuo kame soo kaeyakamira ingilyase? Anatu baa iki wambunya koo dupwa kapa kame soo kaeyakamira, lao suu pyao peteyami.
MAR 2:8 Nakamana monarena dopa lao suu pyanyi pyano peteyaminyi doko Yesumi monarename kandeya. Kandapala baa aopa nakama lamaiyuo, Akipamo nakama monarename dopa lao suu pyanyi pyano petaminyi? leya.
MAR 2:9 Yulu anjuku doko awa awa pyuo pingi. Nambame banya koo dupwa kame sakamyuo kaeyasi silyamo lapu doko awa awa pyuo pingi panda sipurapala pena laro doko yulu awa awa pyuo pingisi? leya.
MAR 2:10 Ikinyingi Akali renge palyuo wambunya koo dupwa isa yuu dakena kapa nyuo kame soo kaeyakamira nakama selapa lao akali dake pyuo nyilyu, leya. Lapala papae rambungi lamaiyuo,
MAR 2:11 Emba sipurapala embena palu isa doko soo anda puu leto, leya.
MAR 2:12 Leyamo dokopa akali doko sipurapala aopa banya palu isa nyepala wambu peparaena lenge kambu dokona kama peya. Dopa piyamo dokona wambu dupwa peparae mona nembapala Anatu lakandao, Wamba dopa pyuo pilyaminyi namwa kanda nange, lao peteyami.
MAR 2:13 Yesu dee kamba ipwa muiyane pete maronge dokona peya. Baa kareyamo dokona enda akali malu epo kapo peteyami. Kapo peteyaminyi dokopa baame nakama mana lamaiya.
MAR 2:14 Lamaipala baa kata nyuo papala akali Lipae lenge Aopiasa ikinyingi takisi mone nyingi akali doko takisi nyingi anda peteyamopa Yesu kando nyiya. Kando nyepala, Namba paronuli pyuo ipu, lamaiyuo leya. Leyamo dokopa peyamuli pyuo peya.
MAR 2:15 Enakana Yesu baa Lipaena anda dokona nenge nao peteyamo dokopa takisi nyingi akali lapope yulu koo pingi malu dupwape Yesu banya disaepole dupwa pipya role pyao nenge nao peteyami.
MAR 2:16 Yesu baa wambu koo pingipi takisi nyingi akali dupwape role pyao nenge nao peteyaminyi doko kandapala Parisi mana lenge akali dupwame disaepole dupwa kando dopa lamaiyami. Akipamo baa takisi nyingi akali dupwape yulu koo pingi akali dupwa pipwape nenge nao petaminyi? leyami.
MAR 2:17 Yesu pii doko sepala isingi lamaiyuo, Akali mee karenge dupwa dokota akalimi pyuo elya pyakana lao kota nange kandale. Anga pingi wambu dupwa dokotame pyuo elya pyakana lao koto karenge. Namba rolae pingi akali dupwa kee lala epa nayo. Yulu koo pingi akali dupwa epena lao kee lao epeyo lyakande.
MAR 2:18 Yuu mendepa Jonena disaepole dupwape Parisi akali dupwape yulu mende pinginyili pyuo Anatu suu pyao nenge naa nao waso peteyami. Waso peteyaminyi doko kandapala wambu lapo epo Yesu piso siyami. Akipamo Jonena disaepole dupwape Parisinya disaepole dupwape yuu gii lapo nenge naa nao waso pisiminyipa embena disaepole dupwa nenge naoko petamisi? leyami.
MAR 2:19 Leyaminyi dokopa Yesu dopa lamaiya. Enda yapo nyuo dokopa nenge andake pirami dokopa puu minyingi wambu dupwa nenge naa napala waso kararamipi? Ama daa. Akali enda nyeramo dokopa role pyao nenge yalya kando naoko pisirami.
MAR 2:20 Dokona ingyuo yuu mendepa enda nyeramo akali doko nakama yaki nyepala para. Paramo dokopa nakama kapa nenge naa nao pisirami.
MAR 2:21 Komau wambarae rokwasi nyepala komau enenge lapo dokona palyapala elya pyuo kii pii nange kandale. Dopa pyuo pirami ramo dokopa enenge palyarami doko minya minya see nao rokwala neta para. Neta paramo dokopa wambarae doko kama andake pilyisi sera.
MAR 2:22 Wambu mendeme mena yanenge dokome penge wasisi wambarae momone dokona waene ipwange enenge kyano pii nange kandale. Dopa pyuo pirami ramo dokopa waene ipwange dokome kipwa pee doko enakana poro lara. Poro laramo dokopa waene ipwange isa paramopa, kipwa pee poro lasi sera. Doko waene ipwange enenge doko kipwa pee enenge dokona kapa kapa kyano pingi kandale, leya.
MAR 2:23 Koro petenge dokopa witi jingi eendena sukusa kata dokona peya. Dokopa banya disaepole dupwa role pyao pao witi jingi lapo lyiyami.
MAR 2:24 Lyiyaminyi dokopa Parisi akali dupwame baa lamaiyuo, Emba kandape. Akipamo nakama yuu gii koro petenge dokopa yulu kapa pii nange doko pilyaminyi? leyami.
MAR 2:25 Dopa leyaminyi dokopa Yesu isingi dopa lamaiya. Dapiti lopo piyamo dokopa banya akali dupwa pipya mende piyami pii doko pyasi palamo doko nakama kando yaka laa nangese?
MAR 2:26 Baame Anatunya anda kolando papala akali Apayata purisi mupwa kareyamo gii dokopa borete lapo Anatunya lenge kambu dokona retenge dupwa nyuo nao kareya. Mee wambu dupwa, borete yapasi dokore doko naa nange, purisi akali yeelyo nenge. Dapiti baa borete doko nao, banya akali opetae mokwa soo maiya, leya.
MAR 2:27 Dopa lapala mende leya. Anatumi wambu dupwana lao koro petenge yuu gii wasakamaiya. Doko koro dokona lao akali wasakami naya.
MAR 2:28 Ikinyingi Akali baa koro petenge yuu gii dokona kamongo ingyuo karamoko, leya.
MAR 3:1 Baa sinakoke anda dokona kolando peya. Peyamo dokona akali mende banya kingi anjukipa nengende peteya.
MAR 3:2 Dokopa lapo peteyaminyi dupwame baame akali doko koro petenge dokopa pyuo elya pyuo nyakamirape lao nyakamira ramo doko kambuyanda pirama lao kando peteyami.
MAR 3:3 Dokopa baame akali kingi anjukipa nenge doko lamaiyuo, Sipurapala sukusa laeyo ipu, leya.
MAR 3:4 Lapala baame nakama piso soo lamaiya. Koro petenge gii dokopa wambu pyuo mondo lao nyingi panda kokwa singipi pyuo nyiso lete nyingipi panda pyao kumakaengepe yulu anjuku doko kapa pingi? leya. Dopa leyamo dokopa nakama romo napyuo peteyami.
MAR 3:5 Dopa pyuo nakama mona kana pokwapala peteyaminyi dokona Yesu baa imbuo mona randa piyamosa kandayoyo lao kareya. Dopa pyuo lao karapala akali doko, Embena kingi pyasinju lena, lamaiya. Lamaiyamo dokopa baa kingi pyasinju leya. Dokopa banya kingi mee ingiyamo kareya.
MAR 3:6 Dokopa Parisi akali dupwa sinakoke anda yaki nyepala Erotena akali dupwa pipya Yesu apa pyuo pyao kumakarama lao wato lao peteyami.
MAR 3:7 Yuu doko yaki nyepala, Yesu banya disaepole dupwa pipya role pyao ipwa maronge dokona peyami. Papala wambu malu yuu Galili range dupwa baa peyamuli pyuo peyami. Dokopa Jutia rangepe
MAR 3:8 Jerusaleme rangepe Itumia rangepe ipwa Jotane dumurena rangepe Taya Saitonepe dolapona repe ingyuo palenge dupwape wambu ama malu baa dopa pyuo kareyamo doko sepala kandala epeyami.
MAR 3:9 Wambu malu epeyaminyi dokopa, Wambu namba rambuki nyii nanale bote dokona eparowale, lao Yesumi banya disaepole dupwa bote mende rapa rapa pinya lamaiya.
MAR 3:10 Wambu malu anga piyamo dupwa pyuo nyepa piyamosa wambu lapo yanyi piyamo dupwa peparaeme baa minyandalana lao epo pisilyinyi pyambuyami.
MAR 3:11 Wambu kopyali imambu koo dokome soo pyale leyamo karenge dupwame baa kandapapu dokopa banya lenge kambu dokona nangalo kyaso soo pii porakaiyuo lao, Emba Anatunya Ikinyingi, lapo piyami.
MAR 3:12 Dokopa baame nakama lamaiyuokondali pyuo, Namba dopa pyuoŋo lao lamai nalapa, daa leya.
MAR 3:13 Baa yuu kyau dokona pulyuo papala kanya dusa piso akali lapo nyero lao suu piyamo dupwa epena leya. Leyamo dokopa nakama baa peteyamo dokona epeyami.
MAR 3:14 Dokopa Yesu baame akali akalisa ipisu lama aposele akaliŋi lao rombo palyiya. Nakama baa role pyao karena lao pii boo pyao lamaiyuo,
MAR 3:15 imambu koo kapa raka lanyi nembarami ingilyamo lao suu pyapala rombo palyiyu leya.
MAR 3:16 Baa akali dusipa rombo palyiya. Saimone banya kingi mende Pita lenge doko.
MAR 3:17 Jemesa baa Sepetena ikinyingi banya yangonge Jonepa (Nakambana kingi mende doko Boanesisa leya. Renge doko nakamba Yuu Gonona Ikinyingi dopale.)
MAR 3:18 Enduru, Pilipa, Batolomyu, Matyu, Tomasa, Jemesa baa Aopiasana ikinyingi doko, Tatiasa, Saimone Selote,
MAR 3:19 Jutasa Isakeriote Yesu mata kando leya akali doko. Yesumi akali dusipa rombo palyiya. Rombo palyapala anda peya.
MAR 3:20 Peyamopa wambu malu dee kamba nakama peteyaminyi dokona epo malu palyiyami. Dokopa wambu malu epeyaminyisa nenge nalana saka nayami.
MAR 3:21 Banya palu dusipame banya suu pingi bolombalo lapyamopa karapyalyamo lasi pii doko sepala baa lanyala kata nyuo epeyami.
MAR 3:22 Sekeraepo akali lapo yuu Jerusaleme range dupwa lano epapala, Belesapulu dokome baa minyilyamo, leyami. Imambu koo dupwana kamongo dokome baa minyapyamo dokome imambu koo dupwa raka lanyi nembo karamo, leyami.
MAR 3:23 Dopa leyaminyi dokopa nakama epena lapala baame kongwalu pii lamaiyuo kareya. Satane dokome Satane yango doko apa pyuo raka lanyi nembara? leya.
MAR 3:24 Rara mendakindeme liti pipala yango sukusa yanda pirami ramo doko rara doko waiya lao otarasa pira.
MAR 3:25 Dee akalyanda liti mendeme paka lakyuo yango palyuo pira ramo doko waiya lao isa para.
MAR 3:26 Dokona suu pyao Sataneme baa range paka lakyuo karara ramo doko banya isingi yulu doko apa pyuo sulu serase?
MAR 3:27 Mendeme akali porai mendena anda papala banya bange dupwa kapa kendepo nao waa nyakami nara. Baa wambo akali doko puu pyanyi retapala ramo doko kapa nyera, leya.
MAR 3:28 Kinyi langilyu, isa wambu dupwame Anatunya yulu kokwa soo pii wakale wakale larami ramo Anatumi nakamana koo dupwa peparae nyuo kame sakamira.
MAR 3:29 Kame sakamipalape mendeme Imambu Poo Pyasi doko kando kokwa soo lao karara ramo doko Anatumi banya koo doko nyuo kame sakami nara. Banya yulu koo doko kulisa ingyuo palu palira, leya.
MAR 3:30 (Nakamame, Baa imambu koo mendeme minyilyamo, leyami doko sepala dopa leya.)
MAR 3:31 Dokopa banya yangonge dupwa endangimoo pipwa epo kama kareyami. Karapala, Namwa dakena epo karamano Yesu epena lamaipwa, leyami.
MAR 3:32 Dokopa baa peteyamo dokona wambu malu kako pyao peteyami dupwame baa lamaiyuo, Embena endangimoo yangonge dupwa pipya kama emba kando nyela epo karaminyi kande, leyami.
MAR 3:33 Leyaminyi dokopa baa isingi lamaiyuo, Apisipa nambana endangi yangongepese? leya.
MAR 3:34 Lapala kamba kamba peteyaminyi dupwa kandanyi palyapala, Dupwa nambana endangi yangongepe.
MAR 3:35 Anatumi letamuli pyuo karaminyi dupwa nambana yangongepe pemalengepe endangipi lyakande, leya.
MAR 4:1 Ipwa muiyane pete maronge dokona Yesu dee kamba mana lamaiyalana kareya. Dokopa wambu ama malu epo baa kareyamo dokona sukusa sukusa piyamisa yuu kete piyamo dokopa bote ipwa pete dokona siyamo dokona pyakambwapala isa peteya. Wambu peparae ipwa maronge dokona peteyami.
MAR 4:2 Dokopa baame nakama mana lamaiyuo kongwalu pii malu lao peteya. Baame nakama mana lamaiyuo dopa lao peteya.
MAR 4:3 Selapape. Akali mendeme banya ee waingi randa lala peyapya.
MAR 4:4 Baame ee waingi pyao pyale pyale lao randa leyamo dokopa waingi lapo kata nemba nemba dokona peya. Dokona peyasa yaka dupwa epapala napeyami.
MAR 4:5 Waingi lapo kana malu isa yuu dokona palipala yuu kuki lama ketae siyamo dokona peyamo dupwa yuu maena siyamopa waiya lao kene piya.
MAR 4:6 Enakana neta pyakayarala epo rolae karapala ee waingi kene piyamo doko rao rakusi rapala pingi pyaa nayamo dokome enakana yando neya.
MAR 4:7 Waingi lapo ikyaikya siyamo dokona pao siya. Siyamopa ikyaikya ando palu manjipala lungwa lungwaya. Lungwa lungwayamo dokona jingi lyii naya.
MAR 4:8 Waingi lapo yuu keyangena peya. Doko kene pyapala menamena lao andapala, lapo jingi akalisa rema, lapo jingi akalisa pakinyamange, lapo jingi akalisa pao akalisa lyiya, leya.
MAR 4:9 Dopa lapala, Nakama kale kata singi ramo dokome pii dake selapape, leya.
MAR 4:10 Yesu iki peteyamo dokopa wambu baa role pyao karenge dupwape akali akalisa ipisu lama kareyami dusipa opetaepe kongwalu pii leyamo dusipa apa lalamo lao piso siyami.
MAR 4:11 Dokopa baa dopa lao mana lamaiya. Anatunya isingi yulu dokona lao pii renge yalu pyuo singi dupwa nakama kapa serami. Wambu menge doloma kongwalu pii doko iki serami dokome,
MAR 4:12 Kando pele pele pipala kando gisa narami. Kalena iki sepala soo gisa narami. Angingyuo simili dokopa Anatu dokona mona kapu kyepala, nakamana koo dupwa kame sakasi sipyamo karamili.
MAR 4:13 Namba kongwalu pii angi lalono kandapi doko nakama renge doko suu pyaa nalyamipi? Kongwalu lapo dupwa peparae renge dupwa apa pyuo suu pyarami? leya.
MAR 4:14 Wara pingi akali baa waingi pyao pyale pyale lao randa leya doko suu pyao Anatunya pii mokwa singi.
MAR 4:15 Waingi lapo kata dokona peyamosa yaka epo neyami doko suu pyao Anatunya pii wambu lapo dupwana monarename eparamo dokopa Satane aopa epapala pii doko nyuo nembara.
MAR 4:16 Doko suu pyaoko pii mende, waingi lapo yuu kana malu siyamo dokona papala kene pyapala yuunya pingi pyaa napala waiya lao yando neya doko suu pyao wambu lapo pii sepala aopa rae maiyuo yako larami.
MAR 4:17 Lapala monarename suu pyao poraiya nao karapala mee yuu gii mendasipa suu pyale pyale kararami. Kararaminyipa yanengena randa mende pyaka seramo dokope panda Anatunya pii singiŋi lenge dokona lekeleke ralamisi lao piraminyi dokope aki rengendena pyuo karo, lapala raka lanyi yaki nyerami.
MAR 4:18 Waingi lapo ikyaikya dokona peyamopa ikyaikyame lungwa lungwaya doko suu pyao wambu lapo pii soo nyerami.
MAR 4:19 Soo nyepala dokopa isa bange dupwa mona nyuo karengepe yanengena rae maingi yulu dupwana poraiyuo suu pyao karengepe dupwame monarena isa pyakuiyuo nyilyamopa nakama keta yulu angi doko ando nyimbwa nange.
MAR 4:20 Waingi lapo yuu keyangena papala kene pyapala menamena lao andapala lapo jingi akalisa rema lyiyamo doko suu pyao wambu lapo Anatunya pii dokona mana nyuo pipala dokopa pao enakana yulu keyange pyuo kararami. Lapo jingi akalisa pakinyamange lyiyamo doko suu pyao wambu lapo yulu keyange andake pyuo kararami. Lapo jingi akalisa akalisa pao akalisa lyiyamo doko suu pyao wambu lapo yulu ama keyange wakasa pyuo kararami, leya.
MAR 4:21 Kongwalu mende lamaiya. Mendeme lambe nyepala pee dokome nee pyuo retengepe panda luu palenge rate lungwa lungwa dokona minyuo epo retengepe? Lambe singi rate dokona reta nangese?
MAR 4:22 Mende yalu pyuo singi ramo doko pinjingi minyalyara. Mende kalyamo karenge ramo doko panasi sera.
MAR 4:23 Nakama kale kata singi ramo dokome selapape, leya.
MAR 4:24 Wangu lakao soo pisipwape. Nakama wambu yango keta yulu pyakamaingi dokona ingyuo range laeyo konda pyuo nyerami.
MAR 4:25 Keyange minyaro karaminyi dupwa konda pyuo nyerami ingilyamo. Angingyuo nyepa nalyaminyi dupwa kuki lama minyilyaminyi doko Anatumi range nyera ingilyamo.
MAR 4:26 Lapala mende leya. Anatunya isingi yulu doko dopale ingilyamo. Akali ee waingi yuu dokona pyao pyale pyale lao randa lara.
MAR 4:27 Randa lapala kwuaramo dokopa palipapu yangaramo dokopa sipuro epo karapapu pyuo karara dokopa waingi kene pyapala andara. Dokopa apa pyuo andelyamo lao soo gisa nara.
MAR 4:28 Yuu dokome renge palyuo andara. Wambo yoko kuki pyuo pyakalyara, enakana angi pisinya kuku pyakalyara, kama enakana angi pisira.
MAR 4:29 Wambu pilyamo lyuo nyingi gii pyaka seramo dokopa kema enge kyai mendeme pyakuro lyuo nyerami, leya.
MAR 4:30 Lapala mende leya. Anatunya isingi yulu dokona namwa aki mendeme makande pyuo laramase? Akinya palyuo kongwalu palyuo laramase?
MAR 4:31 Doko isa masatana waingi dopale, leya. Kanda soo wara pingi dokopa jingi menge dupwa pipwa manda minya nange. Doko jingi ama kuki ingingi.
MAR 4:32 Dopa pilyamopa waingi doko wara pingi dokopa kene pyao ando dokopa isa pusinai manjo karenge wakale wakale lapo duwpa kapa ingya nange. Doko andake wakasa ingyuo andenge. Anda wangya manjamo manjae pilyamopa yaka dupwa kapa epo pau lao petenge, leya.
MAR 4:33 Nakama kapa seraminyili pyuo kongwalu pii malu leyamo dopa pyuoko pii doko lamaiyuo kareya.
MAR 4:34 Mee pii laa napala kongwalu iki palyuo lao kareya. Lao karapala baame banya disaepole dupwa nakama iki kareyami dokopa kongwalu peparae polo lamaipa piya.
MAR 4:35 Kone pupuri piyamo kareyami dokopako Yesumi, Ipwa dumuwangurena mwua, leya.
MAR 4:36 Leyamo dokopa wambu malu palyuo peteyami dupwa yaki nyepala baa bote dokona peteyamopa disaepole dupwame lanyuo peyami. Dokopa bote lapo opetae role pyao peyami.
MAR 4:37 Peyami dokopa porambaiye andake minyuo epeya. Dokopa ipwa kasakole minyuo mango epapala bote dokona simbwalana piya.
MAR 4:38 Dopa piyamopape Yesu baa lukuna dokona kilyanda pyapala luu paleya. Dokopa nakamame baa pyalerapala lamaiyuo, Mana Lenge, namwa kumarama ingyapyamopa emba namwa konda nao palese? leyami.
MAR 4:39 Leyaminyi dokopa baa lenge rao sipurapala porambaiye kaena lapala, ipwa lamaiyuo, Emba lambo lao selenyili pyuo see, leya. Dopa leyamo dokopa porambaiye pyai nao rali piya. Dokopa koo pyuku pyuku peya.
MAR 4:40 Baame nakama lamaiya. Apa pipyasa dopa pyuo pakalyamipi? Apa pipyamosa nakama Anatu kapa nyisara lao suu pyao pisa nalyamipi? leya.
MAR 4:41 Dokopa nakama pakame kumuo pisipala nakama lao, Porambaiye ipwapa dolapo opetaeko nakama banya pii letamuli pyuo sakamangilyamo, Baa aki akali? leyami.
MAR 5:1 Dokopa ipwa dumuwangu Getasa wambunya yuu dokona pao pyaka siyami.
MAR 5:2 Pyaka sepala baa bote yaki nyiyamo dokopa akali kopyali imambu koo soo pyale leyamo karenge mende yanyanda karo yaki nyepala laeyo epo Yesu epeyamo dokona kando nyela epeya. Baa puu dokome puu mainya piyami doko kapa pira ingya naya.
MAR 5:4 Yuu malu puu sanepe anangapupeme puu maipa piyaminyipa baa rokwanyi peyasa piya. Anangapu pyao yasu pyao rokwanyi peyasa piya. Baa minyuo pau lanyi palyalana saka nao kareyami.
MAR 5:5 Kukwa korakamape yanyandape yuu kyau dupwanape karo pyalusi pyao pii lao ala lao banya yanenge rangeme kana dupwame pyao pilyuo kareya.
MAR 5:6 Baame Yesu nanetale kareyamo kandapala makando papala pangu soo baa ketae pyambuya.
MAR 5:7 Dokopa pii poraiyuo lao, Yesu ketae dulu Anatunya Ikinyingi, embame namba pyuo apa piri? Anatumi emba soo rolae kandelyamo lao suu pyapala namba lekeleke ralase lao pii nare lao kinyi lena, leya.
MAR 5:8 Yesumi, Akali doko yaki nyepala imambu koo doko neta epena, leyamo dokonasa leya.
MAR 5:9 Dokopa Yesumi baa piso siya. Emba kingi api lengese? leya. Leyamo dokopa baa isingi dopa leya. Namwa malu mee palenge dokona nambana kingi malu lenge, leya.
MAR 5:10 Lapala, Nakama ralinyi nembo yuu dake yaki nyuo pena laa napyali yaka, lao lamaiyuokondali piya.
MAR 5:11 Dokopa yuu kyau dokona mena yuwalyu kambu nao kareyami.
MAR 5:12 Dokopa imambu koo dupwame baa lamaiyuokondali piyami. Embame namwa mena karaminyi dokona ralinyi pyambuo namwa dokona maralyalapa lapili yaka, leyami.
MAR 5:13 Dopa leyaminyi dokopa, Yesumi, Kapa letaminyili pyuo pupwa, leya. Dokopa imambu koo dupwame baa yaki nyuo neta epapala mena kareyami dokona maralyiyami. Maralyiyaminyi dokopa mena akalisa lama daako ama malu wakasa (2,000) kareyami dupwa makandapala rondo dokona alayuwa lapala ipwa muiyane pete dokona pao yalyapala kumuyami.
MAR 5:14 Mena rapu pingi akali dupwa ralo bumbwa lao papala, yuu wambu malu palenge dokonape yuu wambu dusa kata dasa kata pyuo palenge dupwanape pao lamaiyuo kapa piyami. Dopa pyamo lamaiyamisa wambu dupwa kandala epeyami.
MAR 5:15 Epo Yesu kareya dokona epapala akali kopyali imambu koo malu soo pyale leyamo karenge doko komau wapuo banya suu pingi doko rolae paleyamo dokona peteyamo kando pakayami.
MAR 5:16 Dokopa akali kopyali imambu koo soo pyale leyamo karengepe mena dupwape dopa pyamo lao kando kareyami dupwame nakama pakana palyuo lamaiyami.
MAR 5:17 Dokopa nakamame Yesu lamaiyuokondali pyuo, Embame namwana yuu kala pupili, lao lamaiyami.
MAR 5:18 Dokopa Yesu bote dokona pyakambuyamo dokopa akali kopyali imambu koo soo pyale leyamo kareyamo dokome Yesu, Emba role pyao bona epowape, lao lamaiyuokondali pyuo leya.
MAR 5:19 Dopa leyamopape, Paa naramba, leya. Lapala, Emba anda range papala embena puu minyingi dupwa Kamongo dokome kondapala pyuo nyipyamopa epelyo lao lamaiya puu, leya.
MAR 5:20 Dopa leyamo dokopa baa papala yuu Dekapolisa dokona, Yesumi namba pyuo nyipyamopa epelyo lao boo pyao lamaiyuo peya. Lamaiyamo dokopa akali dupwa peparae sepala mona nembapala yako leyami.
MAR 5:21 Yesu bote dokona piso peyamo dorena dee laeyo epeyamo dokopa wambu ama malu baa ipwa maronge dokona peteyamo dokona epo piso walyapapalu piyami.
MAR 5:22 Dokopa sinakoke anda rapu akali mende kingi Jairasa lenge doko epeya. Epo Yesu kandapala banya kimbu siyamo dokona pao pangu sepala lamaiyuokondali pyuo dopa leya.
MAR 5:23 Nambana wanenge doko kumalana pyuo silyamo. Pyuo nyakarene, kyakao petena lao baa kingimi minyandalale bwua, leya.
MAR 5:24 Dokopa Yesu role pyao peyambi. Peyambinyi dokopa wambu malu suu lao kapo peyambinyili pyuo peyami.
MAR 5:25 Dokopa enda mende ee kana akalisa ipisu lama endana doko ipwa ingyuo guu lao kareyamopa peteya.
MAR 5:26 Dokota malumi baa pyuo nyolomano lao suu pyao pipa piyami dokopa pyuo andapa piyamopa banya kana mone peparae kokwa soo maipapu randa nao peteya.
MAR 5:27 Enda doko Yesumi pyuo nyilyamo leyaminyi lasi pii doko sepala lyakapu minyuo kareyami dokona rukuraka pyuo papala Yesu matarena kando nyepala banya komau doko minyandeya.
MAR 5:28 Nambame banya komau mee minyandaro ramo dokopa namba mee ingyara lao suu pyapala piya.
MAR 5:29 Dokopa endana aopa sokwalepo piya. Piyamo dokopa anga doko otalyamo lao soo gisiya.
MAR 5:30 Dokopa Yesu banya pyuo nyingi renge raa lasi doko enda keta maralyiyasa renge raa lasi range yaki nyelamolamo lao sepala lyakapu minyuo epeyami dokona baame kapu kyeapala, Apimi nambana komau minyandalamo? leya.
MAR 5:31 Dopa leyamo dokopa banya disaepole dupwame baa lamaiyuo, Wambu malu emba rambuki nyinyi pyambuo epami kandale. Mendakilipi lao apimi nambana komau minyandalamo lepe? leyami.
MAR 5:32 Leyaminyipape apimi minyandalamo lao kandalya kandana piya.
MAR 5:33 Dokopa enda doko namba apa pyuonde pilyamo lao sepala pako walu walu lao laeyo epeya. Epapala banya lenge kambu dokona pangu sepala pii peparae dopa pilyamo lao polo lamaiya.
MAR 5:34 Lamaiyamo dokopa Yesumi baa lamaiyuo. Wanake, emba namba kapa pyuo nyakare lao suu pyapi dokome mee ingyalamo. Embena mona kyuu lao sinya, anga pyapyamo doko mee ingyalu ingyuo ingilyamo mee puu, leya.
MAR 5:35 Yesu pii dopa lapeyamo dokopa rapu akali dokona anda palenge lapo pii mende lao epeyami. Embena wanenge kumapelyamo. Apa pinya lao Mana Lenge baa dee epena lare. Baa kaena, lao epeyami.
MAR 5:36 Dokopa Yesumi pii doko aopa soo kaepala sinakoke rapu akali lamaiyuo, Emba paka kae. Mee namba kapa pyuo nyere lao suu pyaa, leya.
MAR 5:37 Lapala Pita Jemesa Jonepa anelapo yangongepa dolapo pipya yapalyapala, Monale akali menge dupwa epa kaena, leya.
MAR 5:38 Dopa lapala pao sinakoke rapu akalinya anda kando nyepala wambu ee lao kumaralerale nyuo kareyaminyi kandeya. Koko paleya dupwa simbi neya.
MAR 5:39 Dokopa baa kolando papala, Apa pipyasa nakama ee lao kumaralerale nyilyaminyi? Wanake doko kuma napya. Mee luu palyuo sipyamo pilyamo, leya.
MAR 5:40 Dopa leyamo dokopa nakamame baa kando giili leyami. Giili leyaminyipape nakama peparae kamanda ralinyi nembapala wanakena endangi rakange akali role pyao epeyami dusipa opetaepe nyepala wanake palyuo siyamo dokona lanyuo peya.
MAR 5:41 Papala wanakena kingi minyapala, Talita kumi, leya. Pii doko, Wanake, emba sipura langilyu, dopale.
MAR 5:42 Dopa leyamo dokopa wanake doko aopa roya karapala kata peya. (Wanake doko ee kana akalisa ipisu lama peteya.) Dopa piyamo dokopa nakama mona nembo ralo kareyami.
MAR 5:43 Dokopa nakama wambu mende lamai nana lamaiyuokondali piya. Pipala, Wanake doko nenge mende mainya, leya.
MAR 6:1 Yuu doko yaki nyepala banya disaepole dupwa peyamuli pyuo peyaminyipa banya yuu range dokona peya.
MAR 6:2 Papala koro petenge yuu gii dokopa baa sinakoke anda dokona mana lamaiya. Mana lamaiyamo dokopa wambu malu soo peteyaminyi dupwa yako lapala, Pii letamo doko anjarae nyiya? Pii yapasi doko Anatu maipyasa letase? Baa yulu porai dupwa isa wambumi pii nange dupwa yulu apa pyuonde pyuo karenge? lao peteyami.
MAR 6:3 Baa kamonda yulu pingi akalipi Mariana ikinyingi ingyuowape baa Jemesa Josese Jutasa Saimone dusipana yangonge ingyuowape daa lyasili? Banya pemalenge dusipa namwa role pyao pisa nalyamisili? leyami. Dopa lapala banya pii angingyuo soo nyii nayami.
MAR 6:4 Dokopa Yesu dopa lamaiya. Wambu peparae poropeta akali dupwa ketae pyambungi. Ketae pyambwaraminyipa wambu banya yuu range dupwape banya yangonge rakangepe banya anda role pyao palenge dupwapeme banya pii soo ketae pyambwa nange, leya.
MAR 6:5 Banya pii soo nyii nayami dokona Yesu yulu andake dupwa kapa pira ingya naya. Wambu mendasipa iki anga piyamopa banya kingimi minyandapapu pyuo elya pyuo nyiya.
MAR 6:6 Dokopa wambu yuu range dupwa baa kapa pira lao suu pyaa nayaminyisa Yesu yamarangyuo kareya. Baame yuu anda karenge dupwana kata papyuo boo pyao lamaiyuo peya.
MAR 6:7 Dokopa baame akali akalisa ipisu lama dusipa epena lapala lamasa lao pakarapu pyuo pena leya. Baame imambu koo raka lanyi nembarami porai renge doko maiya.
MAR 6:8 Nenge minya nao nyuukwuanyi manja nao kana mendelama marapu dokona manja nao pangali dokopa role pyapeta parami pena, leya.
MAR 6:9 Kimbu suu pee pipala walyapake lama pakao pee pii nalapape.
MAR 6:10 Nakama anda mende pao kando nyeraminyipa dokona yako leyami kande dokonako palirami. Mendasa panya dokopa anda doko yaki nyepala parami.
MAR 6:11 Yuu mendena range dupwame yako lao nyii napala nakamana pii soo nayami kande doko nakamana kimbu dokona yuu parara doko pyarendanyi reto lao kongwalu ingyuo lasaka pyuo pupwape, lao pena leya.
MAR 6:12 Dopa leyamopa nakama papala wambu mona kapu kyinya lao boo pyao lao peyami.
MAR 6:13 Dokopa imambu koo malu raka lanyi nembapa nembapa nyuo wambu anga piyamo malu dupwa ayemba mamba kulimbuo pyuo elya pyuo nyepa nyepa piyami.
MAR 6:14 Wambu malu mee Yesu dopa pyuo karamo lao sepala Kiŋi Erote lamaiyaminyipa Yesu dopa pingilyamo lao siya. Wambu lapome Jone bapitisimo nyakamaingi doko lopo epapala yulu porai rengende baa keta maralyipyasa pyuo karalyamo, leyami.
MAR 6:15 Dopa leyaminyipape lapome, Baa poropeta akali Ilainjalamo, leyami. Lapome, Baa poropeta rora ambasupi wamba kareyami dopakalelamo, leyami.
MAR 6:16 Erote baa sepala, Doko Jone nambame mange doko pyao pukunyi nembeyo kande dokolyamo. Baa komba pyapyalyamo, lao kareya.
MAR 6:17 Wamba dokopa Eroteme banya yanda singi dupwa Jone nyepala puu maiyuo karapusi anda palyinya, lao piya. Erote baa yangonge Pilipa dokona enda Eroteyase lenge doko mango nyiyamosa Joneme Erote kando, Embena yangongena enda mango nyilinyi doko kapa pii nalyamo, lao rolo kareya. (Dopa pyuo leyamosa Erote sepala Jone karapusi piya.)
MAR 6:19 Enda Eroteyase doko Jone kando imbumi kumuo pisipala pyakamili lao suu pyao peteya. Dopa lao suu piyamopape pyakamirami ingya naya.
MAR 6:20 Erote baame Jone akali rolae poo pyasi ingilyamo lao suu pyapala pako kareya. Karapala pyarami ingya nalyamo daa leya. Jonena pii doko Erote dokona mona piyamopape Eroteme Jonena pii doko sipuli lao suu pyao peteya.
MAR 6:21 Erote baa mandeyaminyi gii doko pyaka siyamo dokopa pati andake leya. Dokopa, Gapomane rapu pingi mupwa akali dupwape yanda singi mupwa dupwape yuu Galili range kamongo dupwape role pyao nenge narama epena, leya.
MAR 6:22 Epapala role pyao peteyaminyi dokona Eroteyasena wanenge mapwae doko epapala mali lyiya. Mali lyiyamo dokopa Erote banya role pyao peteyaminyi dupwa kando rae maiyami. Rae maipala Eroteme wanake kando dopa leya. Bange mende embame nyelana aumi kumuo karo lare ramo doko jero, leya.
MAR 6:23 Doloma peparae nambanako silyamo emba nyipuli lao suu pyao karo lare ramo doko jero. Nambana yuu kanya dokona lili pipala rombo pyao jii lare ramo kapa jero, lao kingi ketae nembo leya.
MAR 6:24 Dopa leyamo dokopa baa anda lake karasi donge mendena papala banya endangi lamaiyuo, Aki jinya laowane? leya. Dokopa endangi isingi lamaiya. Jone bapitisimo nyakamingi dokona ayemba jinya lamairi, leya.
MAR 6:25 Pii doko sepala enda mapwae waiya lao kiŋi peteyamo dokona papala, Jone bapitisimo nyakamingi dokona ayemba doko pukunyi retapala dakepa namba jii, leya.
MAR 6:26 Dopa leyamo dokopa kiŋi doko kondo mona randaya. Mona randapalape kingi ketae nembapunu akali role pyao pisimwa dupwa simi kandapi lao suu pyapala dokona enda minyakongole laa naro, leya.
MAR 6:27 Lapala banya yanda singi akali mende aopa papala Jonena ayemba puku minyuo epena leya. Yanda singi akali dokome karapusi anda dokona papala ayemba puku nyiya.
MAR 6:28 Nyepala piri andake mendena retapala minyuo epo enda mapwae doko maiya. Maiyasa nyepala banya endangi maiya.
MAR 6:29 Dokopa Jonena disaepole dupwame lasi pii doko sepala banya yanenge kakapange doko nyela epapala nyuo manjo pao malu piyami.
MAR 6:30 Yesu kareyamo dokona akali banya pii minyuo pena leyamo dupwa epo sukusa sukusa piyami. Pipala papiyaminyili pyuo pii peparae dopa pimwa lao dopa pyuo mana lamwa lao Yesu lamaiyami.
MAR 6:31 Lao oteyaminyi dokopa Yesumi nakama lamaiya. Wambu yaki nyepala namwa range yuu muiyane mendena mata sikinyi nembo koo soo monale, leya. Nakama kui lao nenge nao pisirami ingya naya dokona Yesu, Monale, leya.
MAR 6:32 Dopa leyamo dokopa nakama iki yapalyuo bote dokona piso yuu muiyane dokona peyami.
MAR 6:33 Peyaminyipape wambu dupwame nakama yaki nyuo peyami kata doko kandeyami. Wambu malu Yesu lao kandapala yuu range dupwa yaki nyepala mata kongwapu pyao makandapala Yesu eparamo dusa wambarala pao malu palyuo kareyami.
MAR 6:34 Dokopa bote yaki nyepala yuu dokona pyaka sowale pyuo karo wambu malu kareyaminyi kandeya. Kandapala nakama kondaya. Nakama mena sipisipi dopakale mena isingi akali mende yangyapala ralo karaminyi lao suu pyapala kondaya. Kondapala pii renge malu lamaiyuo kareya.
MAR 6:35 Yuu kwuayamo dokopa banya disaepole dupwa baa kareyamo dokona epapala dopa lamaiyami. Yuu dake muiyane kandape. Epapu yuu kwuapyamo pilyamo.
MAR 6:36 Wambu dupwa yuu andape dapwanale nenge ropo pyala pena lapengelyamo. Nenge mende dae narami ingya nalyamo, leyami.
MAR 6:37 Dopa leyaminyipape, Yesumi, Nakama range nenge lapo mailapape, leya. Dopa leyamo dokopa, Namwa kana akalisa akalisa dokona akalisa lama (200) dokome nenge dupwana ropo pyao nyakamyuo papala nena lao maimili lao letepe? leyami.
MAR 6:38 Dokopa Yesumi, Nakamana borete akipare ingyuo silyamo lao kandalapa, leya. Nakamame yaka lao kandapala, Kingi paki, oma lama opetae silyamo, leyami.
MAR 6:39 Dokopa Yesumi, Wambu peparae rambi kyakarae dokona malu palyara malu palyara pyuo isa petena, leya.
MAR 6:40 Leyamopa wambu dupwa rambi dokona liti pyuo peteyami. Panda dupwa liti pyuo 100 ingyuo, lapona wambu 50 ingyuo larapu peteyami.
MAR 6:41 Dokopa Yesumi borete kingi paki dusipa oma lama dolapo nyiya. Nyepala yake dulu kandapala nenge dokona ange lao ateŋa leya. Lapala borete minyuo kau lao wambu dupwana lenge kambu siyamo dokona retena lao maipa pyuo kareya. Baame oma opetae nyuo nakama mokwa soo maipa piya.
MAR 6:42 Dokopa peparae neyaminyi dokopa kapa neyami.
MAR 6:43 Borete omape kau lasi kakana siyamo doko mungyuo nyuo pisiki minyasi akalisa ipisu lama dusipana paki pyuo simbuyami.
MAR 6:44 Wambu nenge neyami nakama akalisa kingi paki daako ama malu wakasa (5,000) peteyami.
MAR 6:45 Nenge nao oteyaminyi dokopa Yesumi banya disaepole bote dokona aopa papala yuu Betesaita dorena wambo pena leya. Peyaminyi dokopa baa wambu dupwa pena leya.
MAR 6:46 Pena lapala yuu kyau dokona baa ateŋa lala peya.
MAR 6:47 Yuu alemanji dokopa Yesu yuu dokona yeelyo kareyamo dokopa bote doko ipwa pete nanesale ingyuo peyamo kandeya.
MAR 6:48 Panya piyami kata dorena porambaiye minyuo lalyuo peyamosa nakama suu lenge isa dokome ipwa doko pyao kupinyi lalyuo palyuo lano pengenyili pyuo panya randa nao lekeleke rao peyami. Yesu doko kandapala ene endenge siyamo dokopa nakama lisa pyuo paleyami dokona ipwa dokona baa yana yana peya. Papala nakama wambala pele leya.
MAR 6:49 Dokopa baa semongo mendelamo lao masapala aa lao ipwakuku nyiyami.
MAR 6:50 Nakama peparae baa kando pakame kumapala dopa piyami. Dokopa baame nakama aopa lamaiya. Nakama mona nemba nalapape, Dake namba ipunu pilyamo. Paka nalapape, leya.
MAR 6:51 Lapala bote dokona nakama peteyami dokona baa pao pyakambwapala role pyao peteya. Pao peteyamo dokopa poraiya doko mee ingyuo rali piya. Dokopa mona nembeyami.
MAR 6:52 Yesu borete dokona yulu andake pyuo kau lao maiya yulu doko piyamo renge doko soo gisa nao kareyami dokome mona nembeyami.
MAR 6:53 Ipwa dumuwangu papala yuu Genesarete pao kando nyiyami. Kando nyepala maronge repeta bote bwakayami.
MAR 6:54 Bwakapala bote yaki nyiyami dokopa wambu dupwa Yesulamo lao aopa soo gisiyami.
MAR 6:55 Kandapala wambu yuu range dupwa yuu wangu dupwana lao makando paoyoko leyami. Paoyoko lapala wambu anga piyamo siyami dupwa isana palu pyambwapala soo kata luna dupwana wakale wakale epo Yesu dusa pelyamo leyami dokopa dokona soo peyami.
MAR 6:56 Yuu anda yaka lengele karenge pandape yuu anda malu karenge pandape yuu anda kuki lama karenge dupwana peteyamo dokope anga pingi wambu dupwa kamapi dokona soo retapala lamaiyuokondali piyami. Embena komaunya pinjingi doko anga pingi wambu dupwa mee minyandenase. Embame kapa lapili yaka, lao lamaiyami. Dokopa wambu dupwame baa minyandapa piyami dokopa mee ingiya.
MAR 7:1 Parisi akali lapope Sekeraepo akali Jerusaleme range lapo dupwape Yesu kareyamo dokona malu palyuo epeyami.
MAR 7:2 Banya disaepole dupwame kingi wate pyuo poo pyanyi nemba napala nenge nao peteyami doko epapala kandeyami.
MAR 7:3 (Parisi dupwape Juu wambu dupwa peparaepe kingi kandokondali pyuo wate pii napala ramo dokopa nenge naa nange. Kingi kandokondali pyuo wate pipala dokopa nenge kapa nenge. Kauwange rakangepe wamba kareyami dupwame dopa piyami doko mana nyuo pyuo karenge.
MAR 7:4 Nenge bangepe ropo pingi anda dokona nyepala ramo nenge doko wate pyuo poo pyanyi nemba napala ramo doko napa nange. Nakama yulu wakale wakale dopale opetaeko mana nyepala pyuo minyuo karaminyi. Pee lomasipi sanapepe kapa disipi dopale wate pyuo poo nyakamipala karaminyi.)
MAR 7:5 Parisi Sekeraepo dupwapeme disaepole dupwa kingi wate pyuo poo pyanyi nemba napala nenge nao peteyami doko kandapala Yesu piso siyami. Akipamo embena disaepole dupwa namwana rakangena yulu mana nyuo pyuo kara nalyamisi? Akipamo nakama kingi wate pyuo poo pyanyi nemba napala nenge nao pisaminyi? leyami.
MAR 7:6 Dopa leyaminyi dokopa baa dopa lamaiya. Kinyi, nakama pii lama lenge dokona poropeta Aisayame nakamasa kando Anatunya pii dopa lao pepa piya. Wambu dapwa mee kambunya lao namba ketae pyambuo pisipala, nakamana mona anda dokona suu pingi wakale wakale palyuo petaminyi.
MAR 7:7 Nakama yanengena mamba kiso ateŋa lao petaminyi. Anatunya lowa dupwa kaeyapala isa akalinya mawa pii mana lao karaminyi.
MAR 7:8 Doko suu pyao nakama Anatunya mawa pii sili see nale lao yaki nyepala karo isa wambunya yulu mana nyepala yaki nyii nao karaminyi, leya Yesumi.
MAR 7:9 Lapala mende leya. Kinyi, nakama Anatunya mawa pii dupwa minya napala kendapuli ingyuo karo awali lao pao nakamana yulu wamba pingi doko suu pyao pyuo karaminyi.
MAR 7:10 Dokona ingyuo pii mende makande pyuo larowale. Mosese dopa leya. Nakamana endangi rakangepa angingyuo karamibinyi lao kingi ketae pyambuo karalapape. Nakamana endangi rakangepana panda endangi kilya kando lara ramo baa pyao kumakalu pirami, leya.
MAR 7:11 Dopa pyuo leyamopape nakama mana pii mende palyuo lao karaminyi doko bange ayara ramo dokome rakange endangipi nyisapengele ingilyamo doko kaepala aki laro lao Anatunya ingyuo retapunu silyamo lapala mai narami ramo doko yulu rolae letaminyi.
MAR 7:13 Dokona ingyuo nakamame Anatunya pii kamba lapala wambu mana kopetame lao karaminyi. Nakamana yulu malu dopale dopaleko pyuo karengepya leya Yesumi.
MAR 7:14 Wambu dupwa baa kareyamo dokona dee kamba epena lapala dopa lamaiya. Nakama peparae nambana pii soo nyelapape.
MAR 7:15 Bange mende nakamana nenge kata paramopa dokome nakama kwao parami ingya nalyamo. Nenge katana pii potemo epenge dokome imambu kwaenge.
MAR 7:16 Nakama kale kata singi ramo dokome pii dake selapape, leya.
MAR 7:17 Lapala wambu yaki nyuo andakare peyamo dokopa banya disaepole dupwa apa pyuonde lalene lao kongwalu pii lapala leyamo dokona piso siyami.
MAR 7:18 Dokopa, Nakama opetae soo gisa nalyamipi? leya. Bange mende akali mendena nenge kata papala,
MAR 7:19 mona anda dokona paa nara. Mee ingi dokona pao seramopa enakana ii ranyi nembenge. Banya mona kwaera ingya nange doko soo gisa nalyamipi? leya. (Baame dopa lao dokopa nenge peparae elyape kapa narami lao leyasa piya.)
MAR 7:20 Lapala dopa leya. Suu pingi mona anda seramopa potemo neta epenge dokome mona kwaera ingingi.
MAR 7:21 Dokona lao bange mona anda koko dokona sepala neta epenge dopale. Suu pingi koo dupwape kepo pingi yulupi waa nyingipi wambu pingipi enda likyakamingi,
MAR 7:22 mendena bange nyipuli lao suu pingipi yulu koo pingipi panga singi yulupi yuu yuu pyuo pundamu kumungipi kanda lyanolyano pingipi mata kando kyambo lengepe yanengena ando minyingipi moŋokyaŋe singipi,
MAR 7:23 koo dupwa peparae mona anda seramopa suu pingi pyuo kwaera ingingi, leya.
MAR 7:24 Yesu baa sipuro yuu doko yaki nyepala yuu Taya yuu Saitone pinjingi dokona peya. Papala baa anda mendena kolando papala wambu kanda naraminyi pisipuli lao suu piya. Suu pyapala andakare peyamopape yalu pyuo pisira ingya naya.
MAR 7:25 Dokopa enda mende banya wanenge kopyali imambu koo dokome soo pyale leyamo peteyamo dokome Yesu pyuo nyuo epelyamo lamaiyami doko sepala epo banya kimbu kareyamo dokona pangu siya.
MAR 7:26 Enda doko baa enda wakale yuu Siria dokona yuu Pinisia range. Baame Yesu lamaiyuo banya wanenge imambu koo raka lanyi nembakapyali lao piso sokondali pyuo leya.
MAR 7:27 Dokopa Yesumi baa lamaiya. Wambo wane wanakepe nenge nena lao maingi kandapi. Wane wanakepena nenge pyarepasu lao nyepala suwa ikyane dupwa pyao pyambuo mairi doko kapa daa, leya.
MAR 7:28 Dopa leyamopape enda isingi lamaiya. Kinyi Kamongo, dopa piramopape suwa ikyane duwpa taepo isarena pisipala wane wanakepena nenge kau lao pelyamo dupwa kapa nao petenge, leya.
MAR 7:29 Pii doko sepala Yesumi baa lamaiyuo, Emba dopa lalyane dokona embena kata kando nyepala paale. Imambu koo embena wanene keta sipyamo doko raka laralyamo, leya.
MAR 7:30 Leyamo dokopa baa anda papala banya wanake doko imambu koo raka leyamopa luu palenge dokona mee peteyamo kandeya.
MAR 7:31 Dokopako Yesu yuu Taya kipwa kipwa doko yaki nyepala yuu Saitone yalo pao Dekapolisa doko nyuo yaki nyepala Galili pete dokona peya.
MAR 7:32 Dokopa akali mende kale poenge kekenge pii lao ambeambe lenge doko Yesu kareyamo dokona lanyuo epeyami. Epapala Yesumi baa minyandakamipyali yaka lao piso sokondali piyami.
MAR 7:33 Dokopa Yesumi akali doko lanyuo wambu malu kareyami dokona yaki nyepala iki siyamo dokona peya. Papala kingi pambu dokome banya kale doko suu laro karo kingi paki kepakali kyasinyi pisapala akalinya kekenge dokona kingimi minyanyi piya.
MAR 7:34 Pipala yake dulu kandapala ŋee sinyi pyale leya. Lapala baa lamaiyuo, Ipata, leya. (Doko Ipuru pii kale lumbwa pii dopale leya.)
MAR 7:35 Leyamo dokopa banya kale dokona kata siyamopa pii angi lengenyili pyuo lao kareya.
MAR 7:36 Dokopa, Dopa piyamo lao nakama mendali lamaiyaka narami, lao lamaiyuokondali piya. Piyamopape nakama mendali lamaipa piyami. Yesu kaena leyamo dokopa see nao pao lamaipako pyuo kareyami.
MAR 7:37 Dokopa wambu dupwa kando ayaka lao mona nembeyami. Dopa pipala, Baa yulu peparae keyange pyuo karapyalyamo lao baa kale poenge dupwa pyuo kale lumbuo nyilyamopa, pii laa nange dupwa pii lena lao karamo, leyami.
MAR 8:1 Yuu gii kuki lama epo epeyamopa wambu ama malu dee kamba epo sukusa sukusa piyami. Nakama nenge naa nao peteyaminyipa Yesu banya disaepole dupwa epena lapala dopa lamaiya.
MAR 8:2 Wambu dupwa nakama namba role pyao pisiminyi yuu rema ingyapyamopa epapu nakamana nenge see napyamo petaminyi dokona namba kondo pilyamo, leya.
MAR 8:3 Namba nakama anda lopo pena laro ramo nakama katasa pao lopome kumarami ingilyamo. Wambu lapo kata londe epeyami kande, leya.
MAR 8:4 Dopa leyamo dokopa banya disaepole dupwa isingi lamaiyami. Yuu muiyane dakena nenge anjarae seramo nyepala wambu malu dupwa kapa narami? leyami.
MAR 8:5 Dokopa baame nakama piso soo, Nakamana borete akipare silyase? leya. Yanda ipingi nyero leyami.
MAR 8:6 Dokopa wambu sukusa sukusa pyuo kareyaminyi dupwa yuu dokona isa petena. Lapala borete yanda ipingi nyero dusipa nyepala ateŋa lao ange leya. Lapala kau lao wambu dupwana lenge kambu silyamo dokona retena lao banya disaepole dupwa maiya. Dokopa nakama wambu sukusa sukusa pyuo peteyami dupwana lenge kambu dokona reto papiyami.
MAR 8:7 Nakamana oma kuki mendasipa opetae siyande. Dusipa opetae nyuo ateŋa lapala wambunya lenge kambu silyamo dokona minyuo papyuo retena leya.
MAR 8:8 Dupwa nao peteyaminyipa sikya piya. Dokopa kau lasi kakana siyamo doko yapo nyuo pisiki minyasi yanda ipingi nyero paka pyuo simbuyami.
MAR 8:9 Akalisa kisima yeelyo daako wambu ama malu wakasa (4,000) peteyami.
MAR 8:10 Yesu wambu dupwa pena lapala baa banya disaepole dupwa pipya aopa bote dokona pisipala pao yuu Dalamanuta dokona peya.
MAR 8:11 Yuu dokona Parisi akali dupwame epapala Yesu baa makande pyuo apa pilyape lao kandalana baa apiyanda pyuo kareyami. Embame yake panda dokona yulu renge palenge mende namwa pyuo lasaka pirinyi namwa kandamanale, lao epeyami.
MAR 8:12 Dopa leyaminyi dokopa baa mona dokona ŋee siya. Akipamo wambu epapu isa ando karaminyi dupwame yulu doko kandalana pii letaminyi? Kinyi langilyu, wambu epapu ando karaminyi dupwa yulu doko kandalapa lao lakara pii naro, daa leya.
MAR 8:13 Dopa lapala nakama kanjakala bote dokona pyakambuo papala yaki nyuo ipwa maronge dumuwangu peya.
MAR 8:14 Dokopa disaepole dupwa nakama borete kame sepala minya nayaminde. Borete mendaki iki bote dokona minyuo epeyami.
MAR 8:15 Dokopa baame nakama lamaiyuo, Parisinya isi Erotena isi dolapo waso poraiyuo suu pyao karalapape, leya.
MAR 8:16 Dopa leyamo dokopa nakama yango sukusa lao namwana borete see napyasa letase leyami.
MAR 8:17 Leyami pii doko sepala Yesumi nakama lamaiya. Akipamo borete see napyamo lao letaminyi? Nakama epapu kando sepa nalyamipi? Nakamana mona kana pokwapala see nalyamipi?
MAR 8:18 Nakamana lenge sipyamopa kanda nalyamipi? Nakama kale kata sipyamopa pii see nalyamipi? Wamba piyu kande yulu dolapo nakama suu pyaa nalyamipi? leya.
MAR 8:19 Namba borete kingi paki kau lao enda akali akalisa kingi paki yeelyo daako ama malu wakasa (5,000) dupwa mokwa soo maiyunu dokopa kau lasi kakana siyamo yapo nyuo pisiki minyasi akipare simbuyase? leya. Nakamame baa lamaiyuo, Akalisa ipisu lama, leyami.
MAR 8:20 Dee kambako borete yanda ipingi kau lao enda akali akalisa kisima yeelyo daako ama malu wakasa (4,000) dupwa mokwa soo maiyunu dokopa kau lasi kakana siyamo yapo nyuo pisiki minyasi akipare paka pyuo simbuyami? leya. Leyamo dokopa nakamame baa lamaiyuo, Pisiki yanda ipingi, leyami.
MAR 8:21 Leyaminyi dokopa, Dopa pipunupa nakama epapu soo gisa nalyamipi? leya.
MAR 8:22 Lapala enakana yuu Betesaita dokona epeyami. Epeyaminyi dokopa wambu lapome akali lenge kwaenge mende lanyuo Yesu baa kareyamo dokona epapala minyandakamipyali lao piso siyami.
MAR 8:23 Piso siyami dokopa baa akali lenge kwaenge dokona kingi nyepala kii minyuo anda karenge dokona kareyami doko yaki nyuo peyambi. Papala Yesu akali lenge kwaenge dokona kepakali kyasinyi pisakamipala kingi dokome minyandapala baa piso siya. Lapo kandelepe? leya.
MAR 8:24 Leyamo dokopa baa kandapala dopa leya. Akali lapo kandapu doko isa karele laro karo kata papili letaminyi leya.
MAR 8:25 Leyamo dokopa dee kamba banya lenge dokona minyanyi pyakamiya. Pyakamiyamo dokopa baa poraiyuo kandapala dokopa lenge elya pyuo reya. Rapala bange peparae angi rolae kandeya.
MAR 8:26 Kandeyamo dokopa Yesumi banya anda pena lamaiyuo dokopa, Emba anda repe repe pyuo karenge dokona sukusa paa napipi, leya.
MAR 8:27 Lapala banya disaepole dupwa pipya dee kata nyuo yuu Sisaria Pilipai dokona anda repe repe pyuo malu karenge dokona peyami. Dokopa kata dokona pao dokopa banya disaepole dupwa piso siya. Wambu dupwame namba kando apinyi lao apa lami kandapisi? leya.
MAR 8:28 Leyamo dokopa nakamame baa lamaiyuo, Wambu lapome emba Jone bapitisimo nyakamaingi doko lenge, leyami, Lapome emba Ilainja lenge, lapome emba poropeta kareyami dokona mende letaminyi, leyami.
MAR 8:29 Dopa leyaminyi dokopa baame nakama piso siya. Dopa lao lalyaminyi doko nakama rangeme namba apinyi lao suu pilyamisi? leya. Pitame isingi lamaiyuo, Emba Koraisa doko, leya.
MAR 8:30 Dokopa, Dopa pyuondeŋe lao baame wambu mende lamai nalapape, laokondali pyuo nakama lamaiya.
MAR 8:31 Lamaipala baame kanda soo nakama dopa pyuo mana lamaiya. Ikinyingi Akali yanengena randa malu epara ingilyamo. Kamongo dupwape purisi akali mupwa dupwape Sekeraepo akali dupwape nakamame baa raka lanyi nembarami. Dokopa baa pyao kumakarami. Pyao kumakaraminyipa yuu remasa paliramopa baa dee sipurao epara, leya.
MAR 8:32 Baa renge doko ama rolo lamaiya. Dokopa Pitame baa pii mende lamairu lapala Yesu kando pyalana pyuo lamaiya.
MAR 8:33 Lamaiyamopape Yesu baa kapu kyepala banya disaepole dupwa kandapala Pita dokona isingi pyalana pyuo dopa pyuo lamaiya. Satane, emba nambana lenge kambu silyamo dorena kata kaepala matarena puu. Emba Anatunya akali daa, emba isa wambunya pii lengenyili pyuo lene, leya.
MAR 8:34 Wambu malu banya disaepole dupwa pipwa kareyaminyipa Yesumi dae epena lapala nakama lamaiyuo, Akali mende namba paronuli pyuo eparo lao suu pyara ramo doko baa range kame soo kaepala banya isa mamando minyalyuo nyepala namba paronuli pyuo soo epara, leya.
MAR 8:35 Mendeme banya yanenge range lete wai pyao nyero lao suu pyara ramo doko baa rangeme banya imambu doko pyuo kokwa serasa pira. Mendeme nambana lao waili pii keyange dokona reke lao kumara ramo doko banya imambu lete wai pyao nyerasa pira, leya.
MAR 8:36 Akali mendeme yuu muu dupwana peparae nyuo reto karara ramo dokopa banya imambu uki minyuo pira ramo doko baa aki mendena elya pyuo parase?
MAR 8:37 Banya imambu pyuo uki minyuo karara ramo doko lete para dokona baa aki mendeme range yano pyao nyerase? leya.
MAR 8:38 Wambu malu Anatu suu pyaa nao koo pyuo karaminyi doko kandapala mendeme elyapala nambana kingi laa nao karara ramo doko namba Ikinyingi Akali karo dokome Anatunya yanga paupau lenge renge nyepala aŋala poo pyasi pipya role pyao eparono yuu gii dokopa akali doko kando elyapala banya kingi laa naroko.
MAR 9:1 Lapala nakama dopa lamaiya. Kinyi langilyu, dae karaminyi dupwana lapo wambo kumapa naraminyi dokopa Anatunya isingi yulu porai ingyuo eparamo doko kandarami, leya.
MAR 9:2 Dokopa yuu pakinyamange epo papeyamopa Yesumi Pitamoo Jemesamoo Jonemoo epena lapala yuu kyau londe mendena nakama yeelyo lanyuo peya. Peyaminyi dokopa nakamana lenge kambu siyamo dorena karapala Yesu baa wamba yongo karenge doko kaepala yongo wakale maralyiya.
MAR 9:3 Dokopa banya komau ama kyewa lao mama nyepala lepo lepo piya. Isa akali dupwame komau kyewa lena lao dokopa ipwa menderekende komau dokona retenge doko suu pyao Yesunya komau kyewa leyamo doko suu pyao manda manjo pii nange.
MAR 9:4 Dokopa Ilainja Mosesepa epapala nakamba Yesumoo pipya pii lao kareyami doko disaepole dusipa kandeyami.
MAR 9:5 Dokopa Pitame Yesu lamaiya. Rapu Pingi, namwa dae kapa karamano. Anda paka rema yukumanale. Mende embena pyakao mende Mosesena pyakamyuo, mende Ilainja pyakamyuo pimana, leya.
MAR 9:6 Disaepole dusipa nakamame pakame kumapala aki pii mende laowane lao saka napala Pitame pii doko leya.
MAR 9:7 Leyamo dokopa kopa mende epo nakama peteyami dokona yambe piya. Yambe piyamo dokopa kopa dokona piso pii mende lao epeya. Akali dake nambana Ikinyingi nambame mona reto karenge doko. Banya pii soo karalapape, leya.
MAR 9:8 Pii lao otapeyamo dokopa disaepole dusipa aopa kapu kyepala Ilainja Mosesepa wamba kareyambinyi doko enakana kara nayambisa kandeyami Yesu baa iki nakama role pyao kareya.
MAR 9:9 Yuu kyau doko yaki nyepala epeyaminyi dokopa Yesu, Nakama kandalami kandapi doko dopa pipyaŋa lao wambu mendali lamai nalapape, lao lamaiyuokondali piya. Rengya Ikinyingi Akali kumuo palyuo sipuro epara dokopa dopa piyaŋa lao kapa lamairami, leya.
MAR 9:10 Lamai nalapape leyamo dokona nakama pii doko soo kalyamo kareyami. Doko baa kumuo palyuo sipuro epara lapya doko aki pii lapya lao nakama yango sukusa suu pyale pyale kareyami.
MAR 9:11 Dokopa nakamame baa piso siyami. Akipamo Ilainja baa komba pyao wambo eparaŋa lao Sekeraepo dupwa lao karaminyi? leyami.
MAR 9:12 Leyaminyi dokopa baame nakama lamaiya. Kinyi, Ilainja baa wambo epapala peparae mondo lao rapa rapa pira ingilyamo. Dokona ingyuo buku Baepolena pii mende Ikinyingi Akali dokonasa lao baa randa bange malu naramopa minya kongwalya kongwana piraminyi karara, pii doko apa pipyasa palamo?
MAR 9:13 Ilainja baa wambo epapeyaŋa dokona langilyu. Baepole leyamuli pyuo wambu dupwame baa mee maso randa maso randa koo maiyuo piyami.
MAR 9:14 Disaepole dupwape Sekeraepo dupwape apiyanda pyuo pii lao kareyaminyipa wambu malu nemba nemba dokona kako pyao kando kareyami. Kareyaminyi dokona Yesumoo Pita Jemesa Jonemoo dusipa epo kandeyami.
MAR 9:15 Yesu baa epeyamo dokopa wambu peparaeme baa aopa kandapala walu leyami. Walu lapala baa kareyamo dokona makando papala yako lao nyiyami.
MAR 9:16 Dokopa Yesumi nakama piso siya. Nakama akinde apiyanda pyuo lao karamisi? leya.
MAR 9:17 Leyamo dokopa wambu malu kareyaminyi dokona mendeme baa isingi lamaiya. Mana Lenge, nambana ikinyingi lanyuo emba kotala ipu. Baa imambu pii laa nange dokome soo pyale letamo karenge.
MAR 9:18 Imambu koo dokome monarena soo pyale letamo dokopa dokona lukunduo silyamopa kambu apupu lyuo, nenge ginyi ganyi lao kingi kimbupi yongo dupwa peparae enokwala enokwala papala kii nasi sepa pilyamo, leya. Baa lanyuo epapala embena disaepole dupwa nakama imambu koo doko rekya lanyi nembakamainya lao piso sipu. Piso sipunu dokopa nakama kapa rekya lanyi nembakamainya saka nao yakara pimi, leya.
MAR 9:19 Yesumi pii doko sepala nakama isingi lamaiya. Nakama wambu epapu ando karaminyi dupwa Anatumi kapa pyuo elya pyuo nyera lao nakama suu pyaa nalyaminyi, leya. Yuu akipare namba nakama pipya role pyao kararamase? Yuu akipare nakama ukiaki minyuo kararaminyipa nambame nakama mata kui lao mana langyuo kararose? Namba karo dakena wane doko lanyuo ipupwa, leya.
MAR 9:20 Leyamo dokopa baa kareyamo dokona lanyuo epeyami. Imambu koo doko Yesu kandapala wane doko walu walu leya. Leyamo dokopa wane doko yuu dokona lunguro pao palipala yuunya soo dokopa belembele papiyamo dokopa kambu apupu lyuo piya.
MAR 9:21 Dokopa Yesumi rakange piso soo leya. Yuu akipare baa kopyali minyapa pingisi? leya. Baa wane nyaŋasa kanda soo dokopa piya, leya.
MAR 9:22 Imambu koo dokome wane baa kokwa sinyi nembakalana yuu malu mee isare ipwape dupwana suu lanyi palyuo karenge, leya. Embame mende kapa piri ingyara ramo nambwa kando sakame kumuo pyuo nyepe, leya.
MAR 9:23 Leyamo dokopa Yesumi baa dopa lamaiya. Mende kapa piri ingyara ramo letese? Mendeme Anatu kapa pira lao suu pyara ramo doko yulu peparae kapa pirasa pira, leya.
MAR 9:24 Dopa leyamo dokopa wanena rakange baa aopa pii eneko lao namba Anatumi kapa pyuo nyakara lao suu pyapunupape mende kapa suu pyaa napunu dokona embame nyisapili lao suu pilyu, leya
MAR 9:25 Dokopa wambu malu makando epo sukusa sukusa pyuo epeyami doko kandapala Yesumi imambu koo pyalana pyuo lamaiya. Imambu pii laa nao kale poenge dake, emba wane dake yaki nyuo kanjakala ipu leto, Dee kamba maralya napipi, daa leya.
MAR 9:26 Leyamo dokopa imambu kopyali dokome ala lapala wane doko nyuo poraiyuo walu walu lapala yaki nyuo kanjakala epeya. Epeyamo dokopa wane doko kumasi sili lao siya. Kumasi sili lao siyamo dokopa wambu peparaeme kandalapa, Baa kumapyalyamo, lao kareyami.
MAR 9:27 Dopa lao kareyaminyipape Yesumi wane dokona kingi nyepala minyalyuo nyiya. Dokopa wane mee roya kareya.
MAR 9:28 Yesu baa andakare papala iki kareyamopa banya disaepole dupwa baa piso siyami. Imambu koo doko raka lanyi nembalana saka namwa doko apa pipyasa pipya? lao leyami.
MAR 9:29 Leyaminyi dokopa Yesu nakama lamaiya. Imambu koo dokore raka lanyi nembalana kareyami kande yulu mendeme pii narami. Ateŋa iki dokome kapa raka lanyi nembenge, leya.
MAR 9:30 Yuu panda kareyami doko yaki nyepala mee mende peyami. Pao yuu Galili sukusa paa napala wambu baa anja karamo lao mendeme see nana lao awali pyuo peya.
MAR 9:31 Baa banya disaepole dupwa mana lamaiyuo, Ikinyingi Akali doko nyepala akali lapo keta minya sakamiraminyipa pyao kumakarami, leya. Pyao kumakaraminyipa yuu rema epo paramopa baa sipuro epara, leya.
MAR 9:32 Dopa leyamopa doko apa letamo lao saka napalape piso selana pakayami.
MAR 9:33 Dokopa nakama yuu Kapaneame dokona epeyami. Epapala anda mendena peteyaminyipa nakama piso siya. Nakama kata iminyi dokopa aki mendena apiyanda pyuo lalaminyi? leya.
MAR 9:34 Leyamo dokopa nakama romo napyuo peteyami. Mendali mupwa mendali mupwa lao epeyami kandapi dokona elyapala romo napyuo peteyami.
MAR 9:35 Dokopa baa isa pisipala akali akalisa ipisu lama kareyami dusipa epena leya. Lapala nakama dopa lamaiya. Mendeme namba mupwa karapuli lao suu pyara ramo doko namba akali kamame kuki ingyuo karo lao suu pyao koo epengepe peparaena kendemande ingyuo karape, leya.
MAR 9:36 Lapala wane mende nyepala nakama peteyaminyi sukusa dokona pisiya. Pisapala kingi dolapome kupyuo nyiya. Kupyuo nyepala nakama dopa lamaiya.
MAR 9:37 Nakama wane dapale nambana kingi lao nyerami ramo doko namba yako lao nyeramisa pira. Namba yako lao nyerami ramo doko Anatu namba dae puu leyamo doko baa opetae yako lao nyeramisa pira, leya.
MAR 9:38 Joneme baa dopa lamaiya. Mana Lenge, akali mende embena kingi lao imambu koo dupwa raka lanyi nembo karapyamo kandamwa. Kandapala baa namwa pipya role pyapeta papya nange dokome kaena lamwa, leya.
MAR 9:39 Dopa leyamo dokopa Yesu dopa leya. Mendeme nambana kingi lao yulu andake wambu pii nange mende pira ramo doko baa enakana nambana kingi isa nemba nara.
MAR 9:40 Doko akali mendeme namwa kando sisi nyuo kara nara ramo doko namwa mendeke ingyuo kararasa pira.
MAR 9:41 Kinyi langilyu, mendeme nakama Koraisana akali ingyuo karaminyi dokona lao pee kapo ipwa paliramopa nalapa lao jera ramo doko baa opetae yole keyange nyera.
MAR 9:42 Mendeme wambu kuki namba suu pyao petaminyi dokona mende suu longwanyi neta pyambwara ramo doko baapa reke lao akali pyambwara dokona pendoko dokona kana reeko mende yukwapala baa ipwa kota dokona pyao pyambwamili doko kapa ingyapyali.
MAR 9:43 Emba rangena kingi doko emba suu longwanyi neta koo keta pyambwara ramo emba pyakepanyi nembape. Emba kingi paki molo molo pisi kareta lete karenge arapu dokona parene dokome kapa pira. Emba kingi laparae kareta isare uliyapu nyuo rao karalu karenge panda pare ramo dokome kapa pii nara.
MAR 9:44 Dokona kimakapa rembe naa nange, isare kunja nange.
MAR 9:45 Embena kimbu dokome emba suu longwanyi koo keta pyambwara ramo doko emba dokoko pyao pyakepanyi nembare. Emba kimbu paki molo molo pisi karenge doko karo lete karenge arapu dokona parene doko kapa pira. Emba kimbu laparae karo isare panda nyuo pyambwarami ramo dokome kapa pii nara.
MAR 9:46 Dokona kimakapa rembe naa nange isare kunja nange.
MAR 9:47 Embena lenge dokome emba suu longwanyi koo keta pyambwara ramo emba lukunyi nembape. Emba lenge paki iki rao seramo Anatunya isingi yulu sukusa parene doko kapa ingyara. Emba lenge laparae rao seramo isare panda nyuo pyambwarami ramo dokome kapa ingya nara.
MAR 9:48 Dokona kimakapa rembe naa nange, isare kunja nange.
MAR 9:49 Wambu peparae apa pilyamipi lao kandalana isare dokome makande pira.
MAR 9:50 Kota doko keyange ingilyamo. Keyange ingilyamo doŋo kota kemara ramo doko apa pyuo dee keke pinya larama? Nakamana monarena kota keke pili lao sinya lao karo yango sukusa yalya kando pisipwape, leya.
MAR 10:1 Yuu doko yaki nyepala yuu Jutia dokona peya. Papala ipwa Jotane doko pyakambuo dumwarena peya. Peyamo dokopa wambu malu dee kamba baa kareyamo dokona epo sukusa sukusa piyami. Piyaminyi dokopa baa mana lamaingi doko suu pyao dee kamba mana lamaiyuo kareya.
MAR 10:2 Dokopa Parisi akali lapo baa kareyamo dokona epapala baa apa letape lao selana baa piso siyami. Akali mendeme banya enda kapa ramanyi nembarape mee? lao makande pyuo piso siyami.
MAR 10:3 Dokopa baa isingi lamaiya. Moseseme nakama apa pipwape leyape? leya.
MAR 10:4 Moseseme akali mendeme enda ramanyi nembalana karo pepa pase mende pyara ramo dokopa kapa ramanyi nembara leya, leyami.
MAR 10:5 Dopa leyaminyi dokopa Yesu nakama lamaiya. Nakama mona kana pokwapala karaminyi dokona Moseseme dopa pipwape lao buku dokona pyao palyiya.
MAR 10:6 Dopa lao pyao palyiyamopape yuu wamba Anatu bange peparae kanda soo pyuo wasiya dokopa inya kalipa pyuo wasiya.
MAR 10:7 Dokona akali mende banya endangi rakangepe yaki nyuo banya enda dokopa pako pisirambi.
MAR 10:8 Pako pisirambinyi doko wamba nakamba wakale wakale ingyuo pisirambi doko enakana mendakinya ingyuo pisirambi. Dopa pyuo dee kamba nakamba wakale wakale ingyuo pisa nao mendakinyako ingyuo pisirambi.
MAR 10:9 Dokona Anatumi pakaramo doko akali mendeme rakya lara ingya nalyamo, leya.
MAR 10:10 Enakana andakare peteyaminyi dokopa Yesu baa leyamo pii dokona lao disaepole dupwame baa piso siyami.
MAR 10:11 Dokopa baa nakama dopa lao lamaiya. Mendeme banya enda ramanyi nembapala enda wakale nyera ramo doko baa enda wambo nyeramo doko matarena isa kalya pili lao pyuo enda enakana nyera doko kepo pili lao nyerasa pira.
MAR 10:12 Endame banya akali ramanyi yaki nyepala akali mende nyera ramo doko mee kepo pili lao nyerasa pira, leya.
MAR 10:13 Wambu lapome baa kareyamo dokona nakamana wane wanakepe baa kingimi minyandena lao lanyuo epeyami. Dokopa disaepole dupwame nakama pyalana pyuo leyami.
MAR 10:14 Dopa pyuo leyaminyi dokopa Yesu kandapala imbwuaya. Imbwuapala nakama lamaiya. Wane wanakepe dupwa namba karo dokona epena. Epa kaena laa nalapape, leya. Anatunya isingi yulu doko wane wanake dopalena ingilyamo, leya.
MAR 10:15 Namba kinyi langilyu, mendeme Anatunya isingi yulu doko wane kuki mona palenge dopale palyuo yako yako lao kara nara ramo doko Anatunya isingi yulu dokona sukusa paa nara, leya.
MAR 10:16 Lapala nakama kupyuo nyepala banya kingimi minyando dokopa, elyape keta pena, leya.
MAR 10:17 Yesu panya kata nyiyamopa akali mende makando epapala. Yesu peyamo dokona wapambu pii pyaro piso baa piso soo leya. Mana Lenge elyape, apa pipala namba lete kulisa renge nyerose? leya.
MAR 10:18 Leyamo dokopa Yesu baame akali doko isingi lamaiya. Akipamo namba elyape lene? Anatu baa yeelyo elyape, mendali elyape daa.
MAR 10:19 Mawa pii lenge dupwa emba singi kandale. Wambu pyaa nalapape. Endame akali wakale kepo pyakami nao akali mendeme enda wakale kepo pyakami nao pipwape. Waa nyakami nalapape. Kyambo laa nalapape. Panga soo nyakami nalapape. Endangi rakangepa rape rape lao karalapape, leya Yesumi.
MAR 10:20 Leyamo dokopa wanyane akali dokome baa dopa lamaiya. Mana Lenge, yulu doo lalyane dusipa namba wane karo dokopa suu pyao pingi lyakande leya.
MAR 10:21 Dokopa Yesumi akali doko kando mona reteya. Retapala dopa leya. Emba yulu mendaki iki kapa pii nangelyamo. Embena bange dupwa ropo pyao kana nyepala wambu muiyane dupwa mokwa soo mairi. Mairi ramo dokopa embena yole malu yake panda dokona sera. Maipala namba paronuli pyuo ipupi, leya.
MAR 10:22 Leyamo dokopa pii doko sepala wanyane akali banya lenge kambu yukwa naro sepala kondaya. Baa akali bange malu retenge dokona suu pyao kondapala rekya lao peya.
MAR 10:23 Dokopa Yesu kapu kyepala banya disaepole dupwa kando lamaiya. Akali bange malu retenge dupwame Anatunya isingi yulu dokona sukusa panya suu pyarami ramo doko randa nao kando nyerami, leya.
MAR 10:24 Dopa leyamo dokopa disaepole dupwa banya pii sepala mona nembo kareyami. Mona nembo kareyaminyipape Yesumi dee kamba mana lamaiya. Nambana wane kambu, Anatunya isingi yulu sukusa parami ramo doko randa nao kando nyerami.
MAR 10:25 Wamyale dalyarena rumbisi kata dokona kamele kolala kapa paa nange doko kolala pupyali doko awa awa pyuowale pupyali doko suu pyao akali bange malu retenge baa Anatunya isingi yulu dokona sukusa parowale lara ramo dokopa randa nao parali, leya.
MAR 10:26 Dokopa nakama mona nembo ralo pisipala baa lamaiyuo, Dokona ingyuo api lete wai pyao kapa parase? leyami.
MAR 10:27 Dokopa Yesumi nakama kando dopa lamaiya. Isa akali dupwame kapa pirami ingya nalyamo. Ingya napyamopape Anatu baame kapa pira. Anatumi yulu peparae kapa pira ingilyamo, leya.
MAR 10:28 Dokopa Pitame baa lamaiyuo, Namwa bange dupwa peparae yaki nyuo kaeyo emba peenyili pyuo epeyama kande, leya.
MAR 10:29 Dopa leyamo dokopa Yesu dopa leya. Kinyi langilyu, mendeme andape panda yangonge dupwape panda pemalenge dupwape panda endangi rakangepa panda wane wanake dupwape panda yuu dupwape nambape dee waili pii keyange dokonape reke lao yaki nyuo peya ramo doko
MAR 10:30 baa yuu gii dakepa banya anda dupwape yangonge dupwape pemalenge dupwape endangi dupwape wane wanake dupwape yuu dupwape baa akalisa akalisa pao nyera, banya rara wambo yaki nyuo peyamo dokona suu pyao wambu malu enakana nyera. Dopa piramopape nambana kingi dokona reke lao kararamopa wambu lapome baa lekeleke rena lao pirami. Dopa piraminyipa yuu gii enenge pyaka seramo dokopa kulisa ingyuo lete karalu karara.
MAR 10:31 Wambu malu epapu mupwa ingyuo karaminyi dupwa rengya kamame kuki ingyuo kararami. Wambu malu epapu kamame kuki ingyuo karaminyi dupwa rengya mupwa ingyuo kararami, leya.
MAR 10:32 Nakama yuu Jerusaleme dokona pena lalyuo peyaminyi dokopa Yesu baa wambo peyamopa nakama mona nembapala baa peyamuli pyuo pao pakao peyami. Dokopa baame akali akalisa ipisu lama dusipa dee kamba epena lao nyepala, Namba rengya yulu pirami doko nakama langirowale, leya.
MAR 10:33 Lapala, Jerusaleme dokona pena palyamano kande. Dokona lapome Ikinyingi Akali nyepala purisi mupwa dupwape Sekeraepo dupwape mairami. Mairaminyi dokopa nakamame baa nyuo kambuyanda pipala kumunya larami. Lapala nakamame Juu daa rara wakale wambu dupwa keta mairami.
MAR 10:34 Mairaminyipa baa kilya kando lao kepakali kyasinyi piso pyaroko pyapala pyao kumakarami. Pyao kumakaraminyipa yuu rema epo paramopa baa sipuro epara, leya.
MAR 10:35 Dokopa Jemesa Jonepa Sepetena ikinyingi dolapome Yesu peteyamo dokona repeta epapala baa dopa lamaiyambi. Mana Lenge, nambwame emba mende pyakalase lao larambanuli pyuo pipili yaka lao epelyambano, lamaiyambi.
MAR 10:36 Lamaiyambinyi dokopa baame nakama lamaiyuo, Nambame nakamba larambinyili pyuo apa pyakawase? leya.
MAR 10:37 Dokopa nakambame baa dopa lamaiyambi. Emba neta renge ingyuo kararene dokopa mendali kingi rolaerena mendali kingi kyairena nyuo pisaro lapili yaka, leyambi.
MAR 10:38 Leyambinyi dokopa Yesu nakamba lamaiyuo, Piso silyambinyi renge doko nakamba range see nalyambinyi. Namba pee lomasinya nao karo dokona kapa nakamba narambipi mee? Namba bapitisimo nyuo karo dopako pyuo nakamba kapa nyerambipi mee? leya.
MAR 10:39 Dopa leyamo dokopa nakambame baa isingi lamaiyuo, Emba lene dupwa nambwa kapa piramba, leyambi. Leyambinyi dokopa baame namkamba lamaiyuo, Namba pee lomasinya nao karo dokona nakamba narambi. Bapitisimo nyuo karo dopako pyuo nakamba nyerambiko.
MAR 10:40 Dopa pirambinyipape doŋo nambana kingi rolaerename, panda kingi kyairename dokona pisirambi namba range laro doko kapa ingya nalyamo. Anatumi rombo palyiyamuli pyuo range maira doko namba rangeme nakamba nyuo jero doko kapa pii nalyamo, leya.
MAR 10:41 Dokopa disaepole menge akalisa dusipame Jemesa Jonepa dolapona pii sepala nakamba kando imbwuayami.
MAR 10:42 Imbwuayaminyi dokopa Yesu nakama epena lapala dopa lamaiya. Juu daa rara wakale dupwana kamongo akali dupwa mee wambu dupwa kando isare rao iso karaminyi doko kandelyaminyi.
MAR 10:43 Dopa pyuo pingi doko suu pyao nakama dopa pii nalapape. Nakama mendeme andake ingyuo karapuli lao suu pyare ramo doko dolomana kendemande ingyuo pyuo karare.
MAR 10:44 Nakama mendeme mupwa ingyuo karapuli lao suu pyare ramo nakama peparaena yulu pingi akali ingyuo karare.
MAR 10:45 Ikinyingi Akalimi wambu dupwame baa isaro pyuo karena lao epa naya. Baame wambu dupwa isaro pyuo karala epeya. Isaro pyuo karo dokopa wambu malu dupwana reke lao kumara dokome wambu malu dupwa kiiramo nyera, ingilyamo leya.
MAR 10:46 Pii doko lao pao karo nakama yuu Jereko epeyami. Epapala baa yuu Jereko dee yaki nyuo panya dokopa banya disaepole dupwa wambu menge ama malu dupwa pipya role pyao peyaminyipa akali lenge kwaenge mende kata nemba nemba dokona peteya. Bange jinya lao kee lao peteyamo akali doko banya kingi Batimiasa akali Timiasana ikinyingi doko.
MAR 10:47 Baame Yesu Nasarete range epelyamo doko sepala kee lao dopa leya. Yesu Dapitinya ikinyingi doko, namba kando sakame kumuo pyuo nyepe, leya.
MAR 10:48 Dokopa wambu malu dupwame baa romo napyuo petena lao pyalana pyuo lamaiyami. Lamaiyaminyipape baa deeko poraiyuo kyakale lao, Yesu Dapitinya ikinyingi doko, namba kando sakame kumuo pyuo nyepe, leya.
MAR 10:49 Leyamo dokopa Yesu baa sepala epena, leya. Leyamo dokopa nakama akali lenge kwaenge doko, Mona sinya lao roya karo epena lao emba ipu letamo, leyami.
MAR 10:50 Dopa leyaminyi dokopa komau rokwanyi retapala waiya lao sipurapala Yesu kareyamo dokona epeya.
MAR 10:51 Epeyamo dokopa Yesumi baa lamaiya. Nambame emba apa pyakalase lao letene, leya. Dokopa akali lenge kwaenge dokome baa lamaiya. Nambana Rapu Akali embame nambana lenge doko rena lakapili lao leto, leya.
MAR 10:52 Dokopa Yesumi baa lamaiyuo, Kata nyuo puu. Emba Anatumi kapa pyuo nyakaraŋa lao suu pyao pisipinyi dokona embena lenge epapu kapa relyamo, leya. Leyamo dokopa banya lenge dokome aopa rolae kandeya. Kandapala Yesu kata peyamo dokona peyamuli pyuo peya.
MAR 11:1 Enakana nakama Jerusaleme repeta epapala yuu Olipi Kyau dokona yuu Betepasi yuu Betani dolapo singi dokona epeyami. Dokopa Yesu disaepole akali lama pena lao,
MAR 11:2 Yuu damasa papala donge kumambonande wambu dokona wambo pisi nange doko anda kambusa anjaro palira doko kando nyerambi. Doko polo nyepala minyuo ipupwape.
MAR 11:3 Akali mendeme apa pipyasa nyilyambinyi leya kande dokopa, Kamongo doko piso parowale lapyasa nyepala epelyambano lamairi. Range waiya lao dakena lanyakao pena lalopyamo, isingi larambi, lao pena leya.
MAR 11:4 Leyamo dokopa pao donge kumambona katasa anda kambu mendena anjaro paleya doko kando nyiyambi. Kando nyepala poleyambi.
MAR 11:5 Poleyambinyi dokopa akali lapo repeta kareyami dupwame, Apa pinya lao donge kumambona doko polo nyilyambinyi, lao piso soo leyami.
MAR 11:6 Dopa leyaminyi dokopa Yesu lena leyamuli pyuo isingi lamaiyambi. Dokopa kapa minyuo pena leyami.
MAR 11:7 Minyuo epo Yesu maiyambi dokopa nakamana komau dusipa donge mata dokona reteyaminyi dokopa baa dokona peteya.
MAR 11:8 Dokopa wambu malu nakamana komau kata dokona kwuayami, lapome isoko dupwana isa yoko dupwa roo pyao nyuo katasa kwuayamiko.
MAR 11:9 Dokopa wambu dupwa wamboko enako pao pipala pii porakaiyuo kaeyo lao, Anatu lakandamana. Kamongona kingi lao epelyamo doko Anatumi elyape keta pena.
MAR 11:10 Namwana akali kyawa Dapitinya kiŋi yulu dee epapu kamba pyaka silyamo dokona Anatumi keyange pyakamyuo nyiso karena. Anatu ketae pyambwamana leyami.
MAR 11:11 Dopa leyaminyipa yuu Jerusaleme sukusa peya. Papala tembole anda dokona papala bange wakale wakale dupwa kando kareya. Kando kareyamo dokopa yuu kwuayamosa akali akalisa ipisu lama kareyami dusipa pipya yuu Betani dokona lambuo peyami.
MAR 11:12 Yangama dokopa baa yuu Betani yaki nyepala laeyo lopo epeya.
MAR 11:13 Lopo epapala isa piki lenge mende yoko piyamosa nanesa dumbisale kandapala jingi lyilyape lao kandala peya. Kandala peyamo dokopa jingi lyii napala kalu kalu paeyo yoko iki pyuo kareyamo kandeya. Kana dokopa jingi lyii nange dokopa yoko iki pyuo kareyamo kandeya.
MAR 11:14 Dokopa baame isa doko kando pii mende lamaiya. Rengya emba jingi lyuo pii narenepa wambu dupwame dee kamba jingi lyuo nao pii nana, leya. Pii doo leyamo doko banya disaepole dupwa soo kareyami.
MAR 11:15 Enakana nakama Jerusaleme dokona epeyami. Epapala baa tembole anda kolando papala wambu bange ropo pyao lambuo maiyuo laeyo nyuo kareyami dupwa ralinyi nembeya. Nembapala dokopa akali kana mone yango isingi maingi dusipana rate dusipape akali yaka wayamu ropo pyao maingi dusipana isa petenge dusipape mee minyalyapala pyale leya.
MAR 11:16 Lapala wambu tembole andakare dokona bange dupwa soo paa nana daa leya.
MAR 11:17 Lapala wambu dupwa dopa lao mana lamaiyuo kareya. Anatunya pii mende buku Baepolena pyasi palamo. Doko nambana anda dake wambu peparaena ateŋa lenge anda ingyara letamo. Nakama waa nyingi wambunya anda inginyi pyambwalyaminyi leya.
MAR 11:18 Leyamo pii doko sepala purisi mupwa Sekeraepo dupwa pipya wato leyami. Apa pyuo baa pyao kumarama? lao leyami. Mee wambu malu dupwa peparae banya mana pii soo ayaka lao peteyamisa nakama kando pakapala leyami.
MAR 11:19 Enakana kwualepalepa dokopa anda ama malu karenge yuu doko yaki nyuo kaepala peyami.
MAR 11:20 Dee yangama dokopa nakama isa piki kareyamo dokona kata kandama kandama epo peyami. Peyaminyi dokopa isa piki doko yando napala kareyamo kandeyami.
MAR 11:21 Kandapala Pitame kwuaka Yesumi isa doko kando mende lapya kandapi lao suu pyapala baa lamaiya. Rapu Pingi, kanda. Isa piki doko jingi lyii nao koo keta penale lapi kandapi doko yando napala karapyalyamo, leya.
MAR 11:22 Dokopa Yesumi nakama isingi lamaiya. Kinyi langilyu, mendeme Anatu kapa ingingi lao suu pyao karo dokopa
MAR 11:23 yuu kyau doko kando, yuu kyau emba purukwapala ipwa kota pete dokona paale lara ramo doko mona anda dokona pii lamana palyuo suu pyaa nao kinyi pira lao suu pyara ramo dokome kapa pira ingilyamo leya.
MAR 11:24 Dokona dopa langilyu, Anatumi mende jinya lao ateŋa larami ramo dokopa Anatumi jera ingyalamolamo lao suu pyarami ramo dokopa Anatumi mee jera, leya.
MAR 11:25 Yuu peparae nakama ateŋa lao karo dokopa nakamame wambu mende kando imbu singi manjo kararami ramo doko nakamana yulu koo piyami dokona ateŋa pyao nyuo kame sakamipwape. Dopa pyuo pirami ramo doko Rakane yake panda karenge dokome nakamana koo dupwa nyuo kame sakara.
MAR 11:26 Dee dopa pyuo pii narami ramo Anatumi nakamana koo dupwa nyuo kame sakami narako.
MAR 11:27 Lapala Jerusaleme dokona dee peyami. Epapala baa tembole anda dokona kata peyamo dokopa purisi mupwa dupwape Sekeraepo dupwape kamongo dupwape baa kareyamo dokona epeyami.
MAR 11:28 Epapala nakamame baa dopa lamaiyami. Yulu pyuo karene dupwa apimi pyakalase lao porainya renge jipyase? Kingi apinyase lao pyuo karepe? leyami.
MAR 11:29 Dopa leyaminyi dokopa Yesu nakama lamaiya. Nambame mende nakama piso sero. Nakama isingi langiraminyi dokopa apimi namba renge palyuo yulu dupwa pinya leyamo doko nakama polo langiru, leya.
MAR 11:30 Lapala, Jone bapitisimo nyakamyuo kareya yulu doko yake dokona piso renge kuiyamo piya panda isa akali dupwame renge kuiyaminyipa piyase? Dokona isingi langipwape leya.
MAR 11:31 Dopa leyamo dokopa nakama sukusa dopa lao leyami. Namwame yake dokona piso renge kuiyamo piya larama ramo doko baa akipamo nakamame Joneme pii kinyi lapyalyamo lao suu pyaa nayami lara.
MAR 11:32 Dee Jonena yulu doko mee isa akalinya yulu larama ramo doko mee wambu dupwa peparaeme Jone baa poropeta akali angingyuo kareya lao suu pyao karaminyi dokome namwa laramiŋi lapala pakapala,
MAR 11:33 nakamame Yesu baa lamaiyuo, Namwa see nalyamano, leyami. Dopa leyaminyi dokopa Yesumi nakama lamaiya. Nakama nambame piso sipu doko isingi langi nalaminyi dokona namba renge palenge yulu dupwa anja sipyamo nyepala lao karo lao isingi langi naroko, leya.
MAR 12:1 Dokopa baame nakama kongwalu pii lapo lamaiyuo kareya. Lamaiyuo karo dokopa dopa leya. Akali mendeme isa girapo waingi lapo wara piya. Wara pipala dokopa kame piya. Girapo jinginya ipwange kingyaramopa pao sera lao kana mendena pete mende kyasiya. Dee kana anda londe ee rapu pyuo kando karenge mende piya. Pipala ee doko akali lapo ee mare dokona palyuo kando karena lapala yuu mendasa wakale peya.
MAR 12:2 Papala jingi lyuo nyingi yuu gii dokopa ee range akali dokome banya yulu pingi akali mende lamaiyuo, Embame papala nambana ee rapu pyuo karaminyi dupwa jingi lapo jinya lapala nyuo minyakao ipupi, leya.
MAR 12:3 Leyamo dokopa yulu pingi akali peyamo dokopa ee rapu akali dupwame baa nyuo kupyuo nyepala pyao mee anda kanjakala pena leyami.
MAR 12:4 Dopa piyami dokopa ee range akali baa yulu pingi akali mendeko pena leya. Peyamo dokopa nakama kusapeme pyao kyawa poro lapala baa kilya kando pii leyami.
MAR 12:5 Dopa piyaminyi dokopa mendeko pena leya. Pena leyamo doko angi pyao kumakayami. Dokopa ee range akali wambu malu pena leyamopape lapo pyao lapo pyao kumakao piyami.
MAR 12:6 Dopa pyuo piyaminyipa yulu akali oteyamosa mendaki iki kareya. Doko banya ikinyingi mona reto karenge doko kareya. Enakana nakamame doko nambana ikinyingi lao suu pyapala banya pii seramiŋi lao suu pyapala pena leya.
MAR 12:7 Peyamo dokopa akali ee kando karenge dupwame lao, Kandalapa. Ee rangena ikinyingi doko epelyamo. Baa rakangena moyange enakana nyera ingilyamo doko. Baa pyapala ee dake range nyimanale kae, leyami.
MAR 12:8 Lapala baa nyepala pyao kumakayami. Pyao kumakapala ee nemba nemba dole banya yanenge kakapange nembeyami.
MAR 12:9 Dopa piraminyipa ee range akali dokome apa pira? Baa epapala ee rapu pyuo karenge akali dupwa pyao kumakapala ee doko nyuo akali lapo maira.
MAR 12:10 Anatunya pii pyasi dopa lao palamo kande, Doko akali anda pyuo kareyami dupwame kana mende nyuo nembeyami. Kana doko enakana anda donge dokona mupwa ingyuo epo siya.
MAR 12:11 Yulu doko mee akalimi pii nayami. Kamongo dokome piya. Piyamo doko namwa mona nembo kandelyamano.
MAR 12:12 Dopa leyamo dokopa baa kongwalu pii lapyamo doko namwasa lapyalyamo lao sepala puu maimana lao papiyaminyi dokopa wambu malu kareyaminyi dupwa pakapala baa yaki nyepala peyami.
MAR 12:13 Papala Parisi lapope Erotena akali lapope baa kareyamo dokona baa kyambo mende lapenale lao makande pyuo piso sela pena, leyami.
MAR 12:14 Epapala nakamame baa dopa lamaiyami. Mana Lenge, emba kinyi angingyuo lao karene. Isa akali dupwame emba larami lao suu pyaa napala mee rangeme suu pilinyili pyuo lao karenge doko namwa kandelyamano. Emba akali kamongo dupwa paka napala pii rolae mee lenge. Emba Anatunya pii dokona kinyi lao karene, leyami. Lapala, Takisi mone namwame akali mupwa Sisa lenge maingi doko kande dokona namwana Mawa Pii mende palase panda pali nalyase?
MAR 12:15 Namwa mairama panda mai narama? leyami. Dopa leyaminyi dokopa baame nakama kyambo panga soo lalyaminyi lao sepala nakama dopa lamaiya. Akipamo nakamame namba apa letepe lao minyoko pyuo letamipi? Kana mende minyuo jela ipupwa, kandarowale, leya.
MAR 12:16 Leyamo dokopa mende minyuo epo maiyami. Dokopa baa nyepala nakama lamaiya. Kana dokona wambu ayemba pukusi petamo dokonape, kingi pyasi mende palamo dokope apinya? leya. Dokopa nakamame dolapo Sisana, leyami.
MAR 12:17 Yesumi nakama lamaiya. Sisana bange dupwa baa range mairami. Anatunya bange dupwa baa range mailapape, leya. Dopa leyamo dokopa Yesu baa yulu doko kando singilyamo lao suu pyapala mona nembo kareyami.
MAR 12:18 Dokopa Satyusi akali wambu kumuo palipala lopo epa nange lao karenge dupwame baa kareyamo dokona epapala pii mende piso siyami.
MAR 12:19 Mana Lenge, Moseseme mawa pii mende pyao retakaya. Akali mendeme enda nyepala wane manja nao karo kumaramo dokopa banya yangonge wane manjaronopa doko yangonge karenge apo dokona karara lapala enda waiya doko yokoya pyao nyera. Mosese dopa lao pyao retakaya, leyami.
MAR 12:20 Dokona ingyuo mende leyami. Yangonge yanda ipingi kareyami, lami. Dokopa yangonge mupwa dokome enda mende nyiya. Nyepala wane manja nao karo kumuya.
MAR 12:21 Dokopa enda waiya doko yangonge enakana doko nyiya. Nyepala baa wane manja nao karo kumuya.
MAR 12:22 Kumuyamo dokopa yangonge doloma dopako pyuo nakama wane manja nao kumapa piyami pao enakana yangonge yanda ipingi dokome enda waiya doko nyiya. Nyepala baa wane manja nao karo kumuyako. Enakana enda baa opetae kumuya.
MAR 12:23 Wambu lopo parami yuu gii dokopa yangonge yanda ipingi nyero dusipame peparae enda doko nyiyami dokona enda doko yangonge anjukunya etenge ingyarase? leyami.
MAR 12:24 Yesumi nakama lamaiya. Akipamo nakama pii kopetame letaminyi? Nakama Anatunya pii pyasi palamo dupwape Anatunya yulu porai dokope soo gisa naminyi dokona kopetame letaminyi.
MAR 12:25 Kumuo palyuo lopo paraminyi dokopa enda nyii nange. Enda nyii napala aŋala yake panda dokona karaminyi doko suu pyao kararami, leya.
MAR 12:26 Dokona ingyuo mende leya. Kumuo palirami dokopa Anatumi minyalyuo nyerape mee lao Mosesena buku dokona pii mende palamo kanda nalyamisi? Mosese baa isa pusinainya isare reyamo dokona repeta kareyamo dokopa Anatumi baa dopa lamaiya. Namba Aporakame Aisake Jekope palu dusipana Anatu ingyuo karo, leya.
MAR 12:27 Akali dusipa kumuo yuunya mee sulu siyami doko Anatumi dopa lao laa nayali. Nakama yake panda dokona lete karalu karaminyi dokona Anatu dopa leya. Doko nakama kapa kanda nami dokome kopetame letaminyi, leya Yesumi.
MAR 12:28 Dokopa Sekeraepo mendeme nakama lao apiyanda pyuo kareyami dokona mende pii doko sepala Yesu baame isingi pii keyange dupwa lao kareyamo kandeya. Kandapala baame Yesu mende piso siya. Mawa pii peparae dokona suu pyao mawa pii mupwa doko anjukusi? leya.
MAR 12:29 Leyamo dokopa Yesu isingi leya. Mawa pii dupwana mawa pii mupwa dake, Isaraele wambu dupwa selapa letamo. Namwana Kamongo Anatu baa yeelyo angingyuo karamo.
MAR 12:30 Nakama Kamongo Anatu dokona ama wakasa mona maiyuo, suu pingi dokope rangena imambu dokomepe ama kaeya nao angingyuo mona reto karalapape.
MAR 12:31 Mawa pii lapo pyuo doko dopa letamo. Nakama range mona reto karaminyi doko suu pyao wambu yango mona reto karalapape. Mawa pii dolomame mawa pii dalapo nyuo enaka narami ingilyamo, leya.
MAR 12:32 Dokopa Sekeraepo dokome baa lamaiya. Mana Lenge, emba kinyi lene. Anatu baa iki Kamongo ingyuo karamo, mendali kara nalyamo dokona kinyi letene.
MAR 12:33 Namwa isa wambu dupwame mona anda dokomepe suu pingi dokomepe rangena imambu dokomepe ama porayapala, Anatu dokona mona reto karapenge ingilyamo. Dokonako ingyuo wambu yango opetae mona reto kararama ingilyamo. Namwa wamba Anatu lao mena pyao kana pyare dupwana kiso maiyuo kareyami doko epapu lowa andake dolapo angiŋi minyapenge ingilyamo leya.
MAR 12:34 Dopa leyamo dokopa akali doko soo gisapala isingi keyange langyalyamo lao sepala Yesumi baa dopa lamaiya. Emba Anatunya isingi yulu dokona repetale ingyuo karene, leya. Dopa leyamo dokopa nakama peparae baa dee kamba piso selana pakayami.
MAR 12:35 Dokopa tembole anda dokona mana lao karo dokopa Yesu dopa leya. Sekeraepo dupwame Koraisa doko Dapitinya rara dokona mende ingyaraŋa doko apa pipyasa letamisi?
MAR 12:36 Dapiti Imambu Poo Pyasi pii pyongo pyao mona dokona lamaiyamopa baa rangeme dopa lao pyao reteya. Kamongo dokome nambana Kamongo lamaiyuo, Nambana kingi rolaerename pisa ipupi. Embena yanda pimwai karenge dupwa nambame kui lanyi pyambwaronopa embame nakama isa palyuo kimbu yukuna dokome kalyare ingilyamo, leya.
MAR 12:37 Dapiti baa rangeme baasa kando, Nambana Kamongo leya. Dokona ingyuo apa pipala Koraisa doko Dapitinya rara dokona mende ingyarase? leya Yesumi. Dokopa wambu ama malu kareyami dupwame banya pii rae maiyuo soo kareyami.
MAR 12:38 Dokopa baa mana lao karo dokopa wambu dupwa dopa lamaiya. Sekeraepo akali dupwa pyarepanyi pyambuo waso karalapape. Sekeraepo akali nakama kata pena dokopa komau londe wapungi. Makete anda dupwana papyuo dokopa wambu dupwame nakama keta pyambuo lamili lao penge.
MAR 12:39 Sinakoke anda dupwanape wambu nenge andake nao petenge dokope isa petenge dupwa nyepala nakama mupwa ingyuo pisimwali yaka lao suu pyapala petenge.
MAR 12:40 Enda waiya dupwa petelyamopa ralinyi nembapala nakamana anda dupwa range nyingi. Nakama panga soo ateŋa londe dupwa mee pingi. Anatu kote laramo dokopa kamame kwao parami ingilyamo.
MAR 12:41 Enakana tembole anda dokona Anatunya kana retenge bokote mendena kana retala epenge doko suu pyao wambu malumi retala epeyaminyipa Yesu dusa piso kando peteya. Kando peteyamo dokopa wambu bange malu retenge dupwame kana malu minyuo epo pyambuyami.
MAR 12:42 Malu pyambuyaminyi dokopa enda waiya muiyane mendeme banya kana koole momo nasi lama minyuo epo reteya. (Kana koo momo nasi dokore konda pyuo retapala kana angi nyingi kandapi.)
MAR 12:43 Reteyamo dokopa Yesumi banya disaepole dupwa epena lapala nakama dopa lamaiya. Kinyi langilyu, enda waiya muiyane dokome banya kana koole lama dolapo minyuo epo retelyamo dokome wambu dupwa kana mone malu epo retelyaminyi dupwana mone kuki ingyuo pupyasa banya doko malu ingyuo pelyamo.
MAR 12:44 Nakama kana malu sipyamo dokona pingyu nyepala epo retelyaminyi. Enda muiyane banya kana aya napyamopa kana koo dolapo iki sipyamopa laparae minyuo epo dakena retelyamo, leya.
MAR 13:1 Lapala tembole anda yaki nyuo potemo peyamo dokopa banya disaepole mendeme baa dopa lamaiya. Mana Lenge, kana dupwa ama keyange, anda dusipa ama keyange emba kanda, leya.
MAR 13:2 Dopa leyamo dokopa Yesumi baa lamaiya. Anda kameya dusipa kandelese? Lalyuo bolombalo lao nembarami ingilyamo. Nembaraminyi dokopa kana mendakindeme yango ketae dokona kalyuo see nara, leya.
MAR 13:3 Lapala yuu Olipi Kyau dokona papala tembole anda dulu kareyamo Yesu kandaro peteya. Dokopa Pitamoo Jemesa Jone Endurumoo nakamame baa iki peteyamo kandapala piso soo leyami.
MAR 13:4 Emba lalene kandapi anjokorape pira? Wambo aki mende lyakai piramo kandaramanopa emba lalene kandapi yulu dupwa pyaka serase? Embame namwa langipi, leyami.
MAR 13:5 Dopa leyaminyi dokopa Yesumi nakama lamaiya. Akali lapome panga soo suu longo nyelana epeyami kande dokopa pyare pyanyi pyambuo waso karalapape.
MAR 13:6 Akali malu nambana kingi lao namba Koraisa ingyuo epelyo kande lao eparami. Nakamame dopa lao epapala wambu malu panga soo suu longo nyerami.
MAR 13:7 Yuu repetalepe nanesale dupwanape wambu sipurapala yanda pyuo kararaminyi doko siyami kande dokopa nakama paka nao ambeambe karalapape. Dopa pyuo para ingyaramopape lumwa piramo yuu gii doko pyaka sepa nara.
MAR 13:8 Yuu mendena range wambu dupwame yuu mendena range wambu dupwa pyala parami. Kiŋi rara mendeme kiŋi rara mende pyala para. Dokopa yuu wakale wakale dupwana yuu sili andake minyaramopa wambu dupwa lopo andake seramo kararami. Randa doko enda wane mata pingi dokona mendeke ingyuo para.
MAR 13:9 Nakama lenge nyuo karalapape. Nakamana wato lenge akali dupwame nakama kote lao sinya lao nyuo lanyuo parami. Sinakoke anda dupwana nakama pyaroko pyarami. Nakama gapomane akali andake dupwana lenge kambupi kiŋi pisiraminyi lenge kambu dupwana karo kote laraminyipa namba reke lao nambana waili pii keyange doko lao kararami.
MAR 13:10 Yuu wakale wakale peparae dupwana waili pii keyange wambo lamaiyuo parami ingilyamo. Yuu gii lumwa piramo doko enakana pyaka sera.
MAR 13:11 Akali lapome nakama nyepala kambuyanda pinya lao lanyuo peyami kande dokopa wambo apa laparama lao suu pyaa nao ambeambe pyuo karalapape. Doko nakama Anatumi lalapa lao langiramo pii dupwa nyepala lalapape. Dokopa nakama range suu pilyamano ote lao laa naraminyipa Imambu Poo Pyasi langiramopa laraminyi leto leya.
MAR 13:12 Yuu gii dopa piraminyi dokopa yuu dupwana yangonge lama kararambi ramo dokona mendeme mende nyepala pyao kumakana lao maira. Akali lapome nakamana wane wanakepe dupwa pinya lao nyuo mairami. Ikinyingi wanengepe dupwame nakamana endangi rakangepe dolapo pyamanale lapala pyao kumakarami.
MAR 13:13 Dokopa namba reke lao wambu dupwa peparaeme nakama awa narami. Randa koo napala kaeya nao pyuo karalu kararami dupwa Anatumi lete wai pyao nyera, leya.
MAR 13:14 Bange koo myuku petenge doko Anatunya lenge kambu dokona kokwa soo reteyami kande dokopa yuu Jutia kararaminyi wambu dupwa yuu kyau dupwana bolombalo lao ralo pupwape. (Bange koo letamo doko kongwalu palipyasa renge angi soo nyelapape.)
MAR 13:15 Akali mende andeyange dokona pisira ramo doko banya bange andakare singi dupwa nyepala paparowale lao suu pyapalape andakare nyela paa nao baa mee kanjakala ralo penale.
MAR 13:16 Akali mende banya ee dokona karara ramo doko dee anda pao banya komau nyii nana.
MAR 13:17 Yuu gii dusipana enda wane rombo anda palenge dupwape wane anjo kareta singi enda dupwape apa pipala paparamye.
MAR 13:18 Yulu dusipa kupwa pingi yuu gii dokopa pyaka sepa nana lao ateŋa lalapape.
MAR 13:19 Randa ama koo wambumi wamba kanda nange dopale epara. Anatumi yuu wasiyamo yuu gii dokona piso epo mange dakepape, dee yuu rakyamepe randa koo dopale pali nange doko pyaka sera.
MAR 13:20 Dokona lao Kamongo dokome yuu dusipa rokondanyi nembaro lao suu pyaa napyali doko isa wambu mendaki iki kapa lete pisa napyali. Wamba baame nyuo rombo palyiyamo dupwana lao yuu gii dusipa rokondanyi nembaro lao suu pyapala karamo.
MAR 13:21 Yuu gii dusipana akali mende nakama langyuo, Kandalapa, Koraisa baa dae karamo leya kande. Panda Koraisa dalyasa karamo leya kande. Doko kinyi lalyamo lao suu pyaa nalapape.
MAR 13:22 Akali lapome namba Koraisaŋa lao kyambo lao epo lapome namba poropeta akaliŋi lao kyambo lao eparami. Nakama yulu andake pipala yulu andake wakale wakale pyuo Anatunya wambu rombo palyisi dupwa angi doko anjuku lao saka nana lao pyuo kararami.
MAR 13:23 Doko nakama kandokondali pyuo kararami. Rengya piramo dokona nakama wambo polo langilyu.
MAR 13:24 Doko yuu gii randa andake nao kararami doko otaramopa neta doko raa napala yuu iminjaramopa kana raa naramopa
MAR 13:25 bui dupwa yake dokona piso kondo isa epo kararamopa yake bange porai dupwa romo romo pira.
MAR 13:26 Dokopa Ikinyingi Akali kopa role pyapeta baa porai andakyapala neta renge ingyuo eparamo kandarami.
MAR 13:27 Epapala baame banya aŋala dupwa pena laramo dokopa nakama porambaiye piso minyingi kata dupwana peparae papala baa rombo palyiyamo wambu dupwa mendena mendena pyuo nyuo malu palyarami. Yuu nemba nemba dupwana yake nemba nemba dupwana pao mendena mendena pyuo nyuo malu palyarami, leya.
MAR 13:28 Isa pikinya yulu doko suu pyao mana mende nyelapape. Doko isa wangya piso andenge dokona byalu lapala yoko karo penge yuu gii dokopa ee kana musi doko pyaka selana pyamolamo lao kandarami.
MAR 13:29 Doko suu pyao doo lalono kandapi dusipa pyaka seramo dokopa Ikinyingi Akali baa repeta epopyamolyamo lao serami.
MAR 13:30 Kinyi langilyu, isa wambu ando karaminyi dupwa wambo ota narami. Doo lalono kandapi dusipa wambo pyaka separamopa isa wambu epapu ando karaminyi dupwa enakana otarami.
MAR 13:31 Yake yuupa otara ingilyamo. Nambana pii dupwa ota nara ingilyamo.
MAR 13:32 Yuu gii lumwa piramo doko wambu peparae soo gisa nalyaminyi. Aŋala yake panda dokona karenge dupwame soo gisa nalyaminyiko. Ikinyingi baa opetaeko soo gisa nalyamo. Rakange baa iki soo karamo.
MAR 13:33 Nakama gii doko pyaka seramo doko soo gisa nalyaminyi dokona epapelyape lao suu pyao kando karalapape.
MAR 13:34 Dokona ingyuo pii mende makande pyuo palamo doko akali mendeme yuu mendasa panya banya yulu pingi akali dusipa kamongo banya bange dupwa rapu pyuo karakana lapala yulu dupwa mokwa soo maiyuo pipala anda kambu rapu pingi akali doko baa epapelyape lao iso karena lapala baa peya.
MAR 13:35 Doko suu pyao alemanji dokopape panda andasukulya dokopape panda yaka kola kyambo pyaramo dokopape panda yuu yango rali piramo dokopape kamongo anda range anjokorape epara yuu gii doko soo gisa nalyaminyi.
MAR 13:36 Dokona nakama luu paliraminyi dokopa baa waiya lao eparamopa nakama kandapa naramaŋa lao iso karalapape.
MAR 13:37 Pii nakama kando langilyu, doko wambu peparae sinyale. Lenge rao kando karalapape leto, leya.
MAR 14:1 Pasopa nenge nenge dokope borete isi reta nange nenge dokopana gii jimwa pyaka seraŋa lao karo dokopa purisi mupwa dupwa Sekeraepo dupwa, Baa mendasa apa pyuo puu maiyuo nyepala pyao kumakarama lao suu pyao kareyami.
MAR 14:2 Wambu dupwa imbwuapala minyuo kilyipu kilyipu kara nana lao nenge nao pisirami gii dokopa pyaa narama, lao suu pyao kareyami.
MAR 14:3 Dokopa baa yuu Betani Saimone rete rapa nenge akali dokona anda dokona peteya. Yesu baa raepo repeta dokona peteyamo dokopa enda mendeme mamba rendamu pingi pee mende minyuo epeya. Mamba dokore kana malumi ropo pingi doko bange nate lenge dokome wasingi. Epapala pee doko pyao poro lapala Yesunya kyawa dokona kulimbwakamiya.
MAR 14:4 Dopa pyuo kulimbuyamo dokopa lapome doko kando mumu leyami. Mamba doko apa pinya lapyasa kokwa soo kulimbwakamilya kandese?
MAR 14:5 Mamba doko namwa jipyali namwame nyepala akali mendali maipala kana mone akalisako pao akalisa rema (300) nyimwali. Nyepala akali pendewa dupwa mokwa soo maimwali lao suu pyapala enda doko lao nembo peteyami.
MAR 14:6 Lao nembo peteyaminyipape Yesu dopa leya. Enda doko mee petena. Akipamo baa mona nembena lao letaminyi? Baa yulu elyape pyakapyasa pilyamo.
MAR 14:7 Pendewa wambu dupwame nakama pipya karalu karaminyi, dokome mee maso nyisapenge ingilyamo. Namba nakama role pyao karalu kara naro.
MAR 14:8 Aki mende nambana lenge kambu dokona piwane lao wakale mende pinya lisa pipala banya mamba keyange nambana kyawa dokona kulimbwakalyamo. Namba pyao malu piraminyipa baame pinginyili pyuo mamba doko wambo rapa rapa pyuo kisakalyamo.
MAR 14:9 Doko kinyi langilyu, waili pii keyange boo pyao minyuo yuu muu dupwana lao kararaminyipa enda yulu keyange pipyamo doko suu pyao larami ingilyamo leya.
MAR 14:10 Dokopa Jutasa Isakeriote baa akalisa ipisu lama kareyami dokona mendeme, purisi mupwa dupwa kareyami dokona pao Yesu nyuo mainya mata kando lao peya.
MAR 14:11 Peyamo dokopa banya pii sepala nakama rae maiyami. Rae maipala baa nyisaramo dokona kana mone jerama doko kinyi langilyamano, leyami. Dokopa baame yuu gii anjokorape dokopa Yesu mata kando lapala nyuo mairu lao iso kareya.
MAR 14:12 Borete isi reta nange nenge nenge yuu gii dokopa Juu wambu dupwame nenge Pasopa dokona suu pyao sipisipi yakane dupwa rapa rapa pyuo piyami. Yuu gii dokopa disaepole dupwa Yesu piso siyami. Emba Pasopa nenge narene doko namwa anja rapa rapa pyakala pamisi lao suu pilipi? leyami.
MAR 14:13 Dokopa banya disaepole lama pena lao nakamba lamaiya. Anda ama malu pyasumako karenge dokona pao kararambinyipa akali mende pee mende ipwa paleta nakamba kararambi dokona soo eparamo kando nyerambi baa peya kande dokona enakana pupwape.
MAR 14:14 Dokopa baa anda mendasa kolando para mare dokona anda range akali lamaiyuo, Mana Lenge mende lapyamo epelyambano. Upunili pisipa pingi panda dokona namba Pasopa nenge doko disaepole role pyao piso narama doko panda anja silyamo lao kandala pupwa, lapyasa epelyambano, lalapape.
MAR 14:15 Larambinyi dokopa baa range nakamba lanyuo pao anda kanya koe andake nenge reto nenge ratepe isa petenge dupwape seramo dokona lakara pira. Dokona namwa nenge narama lao rapa rapa pyuo pisipwape, leya Yesumi.
MAR 14:16 Leyamo dokopa disaepole dolapo potemo peyambi. Pao anda ama malu pyasumako karenge dokona peyambinyi dokopa Yesu leyamuli pyuo kando nyiyami. Dokopa Pasopa naraminyi dokona rapa rapa pyuo kareyambi.
MAR 14:17 Enakana kwualepalepa dokopa baa akali akalisa ipisu lama kareyami dupwa pipya epeyami.
MAR 14:18 Epapala nakama raepo repeta piso nenge neyami dokopa Yesu leya. Kinyi langilyu, nakama petaminyi dokona akali mendeme rengya namba mata kando lara. Namba dae role pyao nenge nao pisipyamo petamano, mende leya.
MAR 14:19 Doko nakama mona randapala mendaki mendaki lao baa piso soo leyami. Emba nambasa lalyane lao suu pyaa napusande lalyane leyami.
MAR 14:20 Dokopa Yesumi dopa leya. Nakama akali akalisa ipisu lama karenge dokona mendasa leto. Pee warake ipwange lapo peteta sipyamopa namba dokona borete ipwange palyapala narono dokopa mende role pyao dopako pyuo pira akali dokonasa leto.
MAR 14:21 Anatunya pii pyasi palamo doko Ikinyingi Akali baa paraŋa lao leyamuli pyuo para ingilyamo. Para ingyapyamopape akali mendeme Ikinyingi Akali mata kando lao nyuo maira doko randa andake nara. Baa randa koo nalopyamolamo lao endangi manja nayali yaka lao suu pyao karara leya.
MAR 14:22 Enakana nakama nenge nao peteyaminyi dokopa baa borete nyepala ange lao ateŋa leya. Lapala borete kau lapala mokwa soo maiyuo dopa leya. Nyuo nalapape. Dake nambana yongo, leya.
MAR 14:23 Lapala pee lomasi waene ipwange peteta doko nyepala ange lao ateŋa lapala nakama maiya. Maiyamo dokopa nakama peparae mendeme napa napa pyuo neyami.
MAR 14:24 Dokopa baame nakama dopa lamaiya. Dake nambana ranjama wambu peparaena lao kulimbuo isa para. Nambana ranjama dokome Anatunya lalu lao lenge pii enenge doko kapa wai wara pira leya.
MAR 14:25 Kinyi langilyu, epapu girapo jinginya ipwange napala rengya dee naa naro. Anatunya isingi yulu paliramopa dokona iki dee naro, leya.
MAR 14:26 Dokopa nakama kenane pyapala yuu Olipi Kyau dokona peyami.
MAR 14:27 Dokopa Yesu nakama lamaiyuo dopa leya. Nakama peparae namba yaki nyerami lyakande. Dokona lao Anatunya pii dopa lao pyasi palamo. Sipisipinya rapu pingi akali pyao kumakaro dokopa sipisipi dupwa onasu ingyuo bolombalo lao parami, lao pyasi palamo leya.
MAR 14:28 Bolombalo laraminyipape namba lete minyalyuo nyeramopa nakama yuu Galili eparaminyipa namba wambo paro, leya.
MAR 14:29 Dopa leyamo dokopa Pitame baa lamaiya. Wambu peparaeme emba yaki nyerami ramo namba dopa pyuo pii naro, daa leya.
MAR 14:30 Dokopa Yesumi baa lamaiya. Kinyi langilyu, epapu kukwa kola kali pii lapo pyuo lapa naramopa emba yuu rema namba mata joo lare, leya.
MAR 14:31 Dopa leyamo dokopa Pita dopa laokondali pyuo leya. Embapa nambapa kumuo paramba ingyara ramo doko nambame emba mata jii naro, leya. Dokopa nakama peparae dopa lao pao suu leyami.
MAR 14:32 Lapala yuu mende kingi Gesemani lenge dokona peyami. Papala baame disaepole dupwa lamaiyuo, Namba ateŋa larono dokopa dakena pisipwape, leya.
MAR 14:33 Lapala Pitamoo Jemesa Jonemoo lanyo peya. Papala baa monarename pulunongo piyamo rando kareya.
MAR 14:34 Dokopa nakama lamaiyuo, Nambana mona anda dokona kondome kumulyu. Nakama dakena kandaro pisipwape, leya.
MAR 14:35 Dopa lapala mee mende papala yuu dokona isa soo ateŋa leya. Banya randa andake naramo yuu gii repeta epena piyamo doko kaepala epa nanale lao Anatu dokona piso soo ateŋa leya.
MAR 14:36 Rakane emba nambana Ata doko, emba yulu peparae mee kapa pingi. Dokona ingyuo pee lomasi randa paleta epelyamo doko naa narowale dokona embame kaepala pena lakape. Doko emba rangeme kapa piru lao suu pyare ramo dokopa nyisape. Nambana pii mende pali nalyamo, leya.
MAR 14:37 Lapala epo nakama luu paleyami doko kandapala baame Pita lamaiyuo, Saimone, emba luu palepe? Emba yuu gii mendaki lenge rao kandaro pisinya saka napisi?
MAR 14:38 Nakama peparae Sataneme uki palya nana lao kandaro ateŋa lao pisipwape. Emba kapa mee lenge rao pisirunu lao suu pyapinyipape yanenge dokome yame yame letamo, leya.
MAR 14:39 Lapala dee kamba lano papala ateŋa lao wambo leyamuli pyuo dee kamba leya.
MAR 14:40 Lapala dee laeyo epo kandeyamo dokopa disaepole dupwa lenge kenda kenda piyamosa dee kamba luu paleyami. Dokopa nakama elyapala pii mende isingi lamainya saka nayami.
MAR 14:41 Yuu repo dokopa epapala baame nakama lamaiyuo, Luu palimi doko suu pyao dee kamba luu palo silyamisi? doko yaka. Gii dakepa mendeme Ikinyingi Akali mata kando lapala akali koo dupwame puu mainyale lao lanyuo epelyamo kande.
MAR 14:42 Sipuro mwua. Namba mata kando lalopyamo akali doko repeta epelyamo kandalapa, leya.
MAR 14:43 Baa dopa lao kareyamo dokopa banya akali akalisa ipisu lama dokona mende Jutasa baa aopa epeya. Purisi akali mupwa dupwape Sekeraepo dupwape kamongo dupwape nakamame akali dusipa Yesu nyela pena leyaminyipa lyingi lyangi kuiyuo epo wua gelape kusapepe minyuo Jutasa role pyao epeyami.
MAR 14:44 Mata kando leyamo akali Jutasa dokome nakama lamaiyuo wambu pyuo dopa leya. Namba papala akali nyinyi pyuo lasaka pirosa pira. Akali doko minya minya pao puu maiyapala kandokondali pyuo lanyuo pupwape, leya.
MAR 14:45 Lapala epo Yesu kareya dokona rolae papala, Rapu Pingi, lapala nyinyi piya.
MAR 14:46 Nyinyi piyamo dokopa nakamame baa minyara minyara pipala poraiyuo minyaro kareyami.
MAR 14:47 Dokopa Yesu role pyao kareyaminyi dokona mendeme banya gela kolo nyepala purisi akali mupwana kendemande akalinya kale doko pyao kunjinyi nembeya.
MAR 14:48 Dopa piyamo dokopa Yesumi nakama dopa lamaiya. Namba akali enakonge dokona nakama wua gela kusapepe nyepala namba nyela epamipi?
MAR 14:49 Namba yangama alemanji tembole anda dupwana nakama pipya role pyao karo mana lao kareyo kande. Pano kareyonopape nakamame namba wambo puu maiyuo nyii nayami kande. Nakama Anatunya pii pyasi palamuli pyuo pilyaminyiŋi dokona kapa pipwa, leya.
MAR 14:50 Dokopa disaepole dupwame baa yaki nyepala ralo peyami.
MAR 14:51 Dokopa akali parange mendeme Yesu peyamo dokona lee minyuo pao komau yapasinde iki banya yanengena bole bale pyuo wapuo peya. Dokopa baa minyareyaminyipa
MAR 14:52 baa komau rokwanyi peyarala papara ralo peya.
MAR 14:53 Dokopa purisi mupwa wakasa kareyamo dokona lanyuo peyami. Anda dokona purisi akali mupwa dupwape kamongo dupwape Sekeraepo akali dupwape pipya epo sukusa sukusa pyuo peteyami.
MAR 14:54 Dokopa Pitame baa lee minyuo epo purisi mupwana anda kamapi dokona epeyamopa kando isaro pyuo karenge wambu lapo role pyao isare soo peteyami.
MAR 14:55 Dokopa purisi akali mupwa dupwape wato andake lenge akali dupwa peparaepe Yesu pyamwali lao suu pyao Yesu baa yulu koo pipya simwali yaka lao piso siyami. Piso sepala wambu pisiyami dusipa pii angi rolae laa nayaminyipa yulu koo piyamo dupwa soo saka nayami.
MAR 14:56 Akali malu mee baasa kando kyambo piipi pii wakale wakale leyamisa pii mendakinya lao palya nayami.
MAR 14:57 Akali lapo roya karapala baasa kando kyambo lao,
MAR 14:58 Baame tembole anda doko isa wambumi piyami doko lalyinyi nembapala yuu remasa paparamopa tembole mende isa wambumi pii nange dokore range piru leya doko siyama, leyami.
MAR 14:59 Dopa pyuo pii wakale wakale leyaminyisa mendakinya pali naya.
MAR 14:60 Mendakinya pali nayasa doko purisi akali mupwa baa sukusa roya karapala Yesu piso siya. Emba isingi mende warapo laa narese? Nakamame embasa kando aki rengendena lalamipi? leya.
MAR 14:61 Leyamo dokopa baa isingi mende laa nao romo napyuo kareya. Dokopa dee mende piso siya. Emba Koraisa Anatu elyape keta karenge dokona Ikinyingi ingyuo karepe mee? leya.
MAR 14:62 Dopa leyamo dokopa Yesu, Namba lene doko, leya. Ikinyingi Akali doko baa Anatu Porai Wakasa karenge dokona kingi rolae dokona pisaramopa kopa dokopa role pyao lupyuo epara doko nakama kandarami, leya.
MAR 14:63 Dopa leyamo dokopa purisi mupwa doko banya range komau pee pingi doko nyepala pilyiya. Akipamo dee kamba piso seramase? leya.
MAR 14:64 Baame Anatunya lenge kambu dokona kokwa soo lalamo doko nakama selaminyi. Apa lao suu pilyamipi? leya. Dopa leyamo dokopa nakama dupwa peparaeme mendakinya palyuo, Baa koo pipyamopa kapa kumunya, leyami.
MAR 14:65 Lapala akali lapome banya lenge kambu dokona kepakali kyasinyi nembo kingi rangeme pyao, Emba Anatunya pii nolako lape, lao kareyami. Dokopa kando iso karenge akali dupwame baa pyao randa maiyuo kareyamiko.
MAR 14:66 Dokopa Pita baa anda kamapi lungwa lungwa dokona kareyamopa purisi akali mupwana kendemande enda mende laeyo epapala
MAR 14:67 Pita isare soo kareya doko rolae kandapala, Emba Nasarete akali Yesu dokopa role pyao kareyambipya, leya.
MAR 14:68 Leyamo dokopa, Pitame emba lene doko namba soo saka nalyo. Emba aki pii lao petene? leya. Lapala kakota lumbungi dokona repeta peya. Dokopa kola kali mende pii leya.
MAR 14:69 Enakana kendemande enda dokome baa dee kandapala akali lapo dusa kareyami dupwa lamaiyuo, Akali doko baa dokore, leya.
MAR 14:70 Dopa leyamo dokopa baa dee kamba daako leya. Dee enakana usale dokopa akali doo kareyami dupwame Pita lamaiyuo, kinyi emba dokore. Embena pii lapinyi dokome emba Galili akali lao panelyamo, leyami.
MAR 14:71 Dopa leyaminyi dokopa baa, Akali letaminyi doko namba kanda nange. Namba kyambo laro ramo Anatumi namba pinyale, dopa lao enamba minyuo pii koo leya.
MAR 14:72 Dokopa kola kali aopa pii lapo pyuo leya. Leyamo dokopa Pitame Yesu, Wambo kola kali ene lapo pyuo pii laramo dokopa emba yuu reposa namba mata mairi, leyamo doko suu piya. Doko suu pyapala Pita baa nenga nenga pyao ee leya.
MAR 15:1 Yuu wamba yangama yangama wambena mumwa dokopa purisi mupwa dupwame kamongo dupwape Sekeraepo dupwape wato andake lenge akali dupwa peparaepe role pyao piso wato leyami. Wato lapala Yesu puu maipala lanyuo pao Pailate maiyami.
MAR 15:2 Maiyaminyi dokopa Pailateme baa piso siya. Emba Juu wambunya Kiŋisi? leya. Dokopa Yesu isingi, Emba lene doko, lamaiya.
MAR 15:3 Dopa leyamo dokopa purisi mupwa dupwame pii wakale wakale dupwa pyasara pyasara pyuo baasa kando baa koo pingi lao kareyami.
MAR 15:4 Dokopa Pailateme baa dee kamba piso soo, Emba isingi mende warapo lare ingya nalyase? Nakamame pii wakale wakale dupwa embasa kando emba koo pingi lalaminyi kandapi, leya.
MAR 15:5 Dokopa Yesu isingi mende warapo laa nao kareya dokome Pailate ayaka lao suu pyao kareya.
MAR 15:6 Pasopa nenge nenge yuu gii peparae dokopa Pailateme karapusi anda palenge dokona akali mendaki wambunya pii sepala mokwapa pingi.
MAR 15:7 Akali malu gapomane pyao ralinyi nembalana piyami dupwa karapusi anda dokona paleyami. Akali dokona mende kingi Barapasa lenge baa opetaeme akali mende pyao kumakayamosa paleya.
MAR 15:8 Dokopa wambu malu Pailate kareyamo dokona papala akali mendaki mokonge doko suu pyao mokona lao piso sela peyami.
MAR 15:9 Dokopa Pailate isingi lamaiyuo, Juu wambunya Kiŋi doko nambame mokwakapili yaka lao suu pilyamipi? leya.
MAR 15:10 Baame purisi mupwa dupwa Yesu yango palyapala minyuo epeyami doko sepala dokona piso siya.
MAR 15:11 Dokopa purisi mupwa dupwame mee wambu dupwa kalena palyuo kala kala lapala, Doko kaena, Barapasa mokona lao dokonako palyuo lalapape lao kareyami.
MAR 15:12 Dokopa dee kamba Pailateme nakama piso siya. Nakamame akali Juu wambunya Kiŋi lenge doko namba apa pyuowase? leya.
MAR 15:13 Dopa leyamo dokopa nakama poraiyuo lapala, Isa mamandona pyao palya, leyami.
MAR 15:14 Dokopa Pailate isingi lamaiyuo, Akipamo letaminyi? Aki koo pipyandena? leya. Dopa leyamo dokopa nakama ama pii porakaiyuo lapala, Isa mamandona pyao palya, leyami.
MAR 15:15 Dokopa Pailateme wambu dupwame baa mona maiyuo karamili yaka lao suu pyapala Barapasa mokwakamiya. Mokwakamipala Yesu pyarako pyapala isa mamandona pyao palyinya, lao maiya.
MAR 15:16 Yanda singi maiyamo dusipame baa kyapo mupwana anda kamapi sukusa lanyuo peyami. Papala yanda singi dupwa peparae epena leyami.
MAR 15:17 Epapala nakamame baa komau kala maa komeya dopale mende andu pyakamipala nepereke lapome minyuo kamenyongwapala lengapu pipala kyawa dokona pee pyakamiyami.
MAR 15:18 Pyakamipala Juu wambunya Kiŋi, emba karalenelyamo lao yako lele lao leyami.
MAR 15:19 Dokopa kusape mendeme kyawa doko pyao kepakali kyasinyi piso karapala baa nyuo ketae pyambuli lao wapambu kararo piso leyami.
MAR 15:20 Dopa lao baa kilya kandalya kandana pyuo lapala komau kala maa komeya dopale doko rokwanyi nembapala banya komau range pee pyakamiyami. Pyakamipala baa isa mamandona pyao palyalana lanyuo peyami.
MAR 15:21 Dokopa akali Saimone yuu Sairini range Alekesanda Urupasa rakange doko nanesa karo epo kareyamopa doko nyepala banya isa mamando doko soo pena lao pyalana pyuo leyami.
MAR 15:22 Yesu yuu Golokota lenge (pii doko yuu kyawa kuli dopale) dokona lanyuo peyami.
MAR 15:23 Papala nakamame waene mwua ipwange konda pisi doko mainya piyami. Mainya piyaminyi dokopa baa naa naya.
MAR 15:24 Dokopa isa mamandona pyao palyapala banya komau dusipa api embone piso nyerape lao kandalana nakama lake piyami. Komau dupwa mende embone peteyamo dokome nyepa piyami, dopa pyuo mokwa soo nyiyami.
MAR 15:25 Yangama mena moko rali pingi nane keloke dokopa baa isa mamandona pyao palyiyami.
MAR 15:26 Kotena pii renge doko pyasi paleya doko, Juu wambunya Kiŋi, lao piyami.
MAR 15:27 Dokopa akali waa nao kendepo nenge lama opetae, mende banya kingi rolaerename, mende kingi kyairename, isa mamandona pyao palyiyami.
MAR 15:28 Doko suu pyao Anatunya buku pyasi dokona, Baa akali yulu koo pingi dopale lao suu piyami, pii doko wambo lao reteyami dokona paleya.
MAR 15:29 Wambu lapome kata dokona epo pao baa kando kilya kandalya kandana pyuo ayemba yande lao, Yee, emba Anatunya anda andake lalyinyi nembapala yuu rema dokopa dee piro lee kande doko suu pyao
MAR 15:30 emba isa mamando yaki nyepala range lete wai pyao ipu leyami.
MAR 15:31 Purisi mupwa dupwape Sekeraepo akali dupwape nakama lao giyalya giyana pyuo lao karo, range sukusa lao, Baame wambu lapo lete nyiya kande doko suu pyao baa range lete nyelana saka nalyamo, kandalapape leyami.
MAR 15:32 Emba Koraisa Isaraele wambunya Kiŋiŋi lenge doko namwa kinyilamo lao suu pyaramano dokona lao isa mamando yaki nyepala lupyuo epena, leyami. Akali isa mamandona baa role pyao kumuo paleyami dolapo opetae baa kilya kandalya kandana pyuo leyambi.
MAR 15:33 Enakana andawai korakama towalo keloke dokopa yuu dupwa iminjiya. Kwuarao karo karo pao seri keloke dokopa yuu yangeya.
MAR 15:34 Dokopa neta damasa peyamo seri keloke dokopa Yesu pii porakaiyuo lapala, Eloe, Eloe, lama sapakesani, leya. (Pii doko Nambana Anatu, nambana Anatu, akipamo embame namba yake nyilinyi? dopale leya.)
MAR 15:35 Dopa leyamo dokopa akali dusa kareyami dupwa pii doko sepala, Baame Ilainja kyakale lalamolamo, leyami.
MAR 15:36 Lapala akali mende makandapala isa lumbi nyepala waene kau pingi dokona palyuo nyepala isa mende suku pipala Yesu nena lao maiya. Ilainja dokome baa nyiso nyela eparape lao kando iso karamana, lao maiya.
MAR 15:37 Dokopa Yesu pii porakaiyuo lapala kumuya.
MAR 15:38 Kumuyamo dokopa tembole anda dokona komau yukwaro kareya doko mee dulunya piso kangwao epo donena kareya.
MAR 15:39 Dokopa yanda singi mupwa mendeme Yesu rolae kando karo baa dopa pyuo kumuya doko kandapala, Kinyi, akali dake Anatunya ikinyingilamo, leya.
MAR 15:40 Dokona enda lapo Salomi dokope, Maria yuu Makatala rangepe dee enda Maria lengeko Jemesa enakana mandeyami yangonge Josesepena endangi dokope role pyao nanesale piso kandeyami.
MAR 15:41 Enda dusipa Yesu baa yuu Galili dokona papiyamuli pyuo baa isaro pyuo papiyami. Enda malu lapo baa Jerusaleme epeyamo dokopa role pyao epeyami dupwa opetae kareyami.
MAR 15:42 Kwualepalepa ingiyamo dokopa Josepe yuu Arimatia range doko epeya.
MAR 15:43 Akali doko Juu wambunya wato lenge akali mona palengende baa Anatunya isingi yulu doko kandapuli yaka lao iso kareya. (Juu wambu dupwame Satate kuki dokopa yulu pii nao misi lenge dokona suu pyao wambo alemanji dokopa yulu pyuo lumwa pingi kandale.) Dokona ingyuo Josepe baa paka napala Pailate kareyamo dokona papala Yesunya yanenge kakapange jinya lao piso siya.
MAR 15:44 Dokopa Pailateme baa waiya lao kumalamolamo yako lapala piya. Yanda singi mupwa doko epena lapala, Baa angingyuo kumulyape mee? lao piso siya.
MAR 15:45 Dokopa yanda singi mupwa doko. Pyalenge nyepalamo, leyamo sepala Pailateme Josepeme yanenge kakapange doko kapa nyela pena leya.
MAR 15:46 Dokopa Josepeme komau lapo ambo pyao malu pingi dokome yanenge doko kondo nyepala yama piya. Yama pipala kana anda yanyanda mendena minyuo pao reteya. Retapala kana mende kao pele pele lao minyuo papala kambu upi leya.
MAR 15:47 Makatala Maria dokopa Maria Josesena endangipa baa malu pyuo reteyaminyi doko kandeyambi.
MAR 16:1 Koro petenge yuu doko otapeyamopa Makatala Maria dee Maria mende Jemesana endangi doko enda Salomimoo nakama rendamu pingi mamba lapo baa kisakaminya lao minyuo peyami.
MAR 16:2 Yuu gii mupwa wamba yangama neta koo pyakayamo dokopa malu piyami mare dokona peyami.
MAR 16:3 Nakama keta pao dokopa, Kana anda malu piyaminyi kambu dokona kana upi laro karamo doko apimi minyuo kao pele pele lao kakondakarase? lao leyami.
MAR 16:4 Papala dokopa kana doko kakondasi siyamo kandeyami. Kana doko ama kameya ingiya.
MAR 16:5 Kandapala malu andakare kolando papala akali parange mende panda rolaerename dokona komau kakepame wapwaro peteyamo kandeyami. Kandapala mona nembeyami.
MAR 16:6 Dokopa baa nakama lamaiya. Nakama mona nemba nalapape. Yesu Nasarete range doko isa mamandona pyao palyiyami doko nakama koto kandamwali lao epaminyilyamo kandelyo. Baa kumuo palyuo lopo peya doko kandape. Baa dae pali nalyamo kandalapa.
MAR 16:7 Nakama papala banya disaepole dupwape Pitamoo pii dake lamaiyakamilapape. Doko nakama yuu Galili parami dokona baa wambo pelyamo. Baa leyamuli pyuo dokona kandarami lao lamaiyakamilapape, leya.
MAR 16:8 Dokopa nakama pungwa pungwa pyao karo mona nembo kana anda malu piyaminyi doko yaki nyuo potemo ralo peyami. Pao dokopa nakama pakapala mendali lamaiya nao peyami.
MAR 16:9 Yulu mupwa wamba yangama dokoko Yesu kumuo palyuo lopo epapala Makatala Maria baa yuu wamba dokopa imambu koo yanda ipingi rekya lao nembakamiya kande, enda doko peteyamo dokona Yesu pano epeya.
MAR 16:10 Enda doko kandapala Yesu role pyao karenge wambu dupwa nakama mona rando ee lao peteyami dokona pao lamaiya.
MAR 16:11 Dokopa Yesu lete karapyamo kandapu lao lamaiyamo dokopa nakama pii doko sepala baa kinyi lalyamo lao suu pyaa nayami.
MAR 16:12 Dopa pyuo piyamopape wambu dokona lama neta anda dokona lano peyambinyi dokopa Yesu baa yanenge wakale maro lao epo nolakaya.
MAR 16:13 Nolakayamo kandapala lalyuo pao menge dupwa lamaiyambi. Lamaiyambinyipa kinyilyamo lao suu pyaa nayami.
MAR 16:14 Enakana disaepole akali akalisa ipisu mendaki kareyami dupwa nakama range taepo repeta piso nenge nao peteyami dokopa Yesu nolako epeya. Epapala wambu lapo baa lopo epeyamo kandapala leyaminyi pii doko kinyilyamo lao suu pyaa nao mona kana pokwapala kareyami dokona pyalana pyuo lamaiya.
MAR 16:15 Pyalana pyuo lamaipala dopa leya. Nakama yuu muu dupwana pao wambu Anatumi pyuo wasiyamopa petaminyi dupwa peparae waili pii keyange doko boo pyao lamaiyuo pupwape, leya.
MAR 16:16 Pii doko kinyilyamo lao suu pyapala bapitisimo nyerami dupwa lete wai pyao parami. Mendeme pii doko kinyilyamo lao suu pyaa nao karara ramo doko baa keta kote pii paliramopa kwao para leya.
MAR 16:17 Doko pii kinyilyamo lao suu pyarami dupwa keta yulu andake palira. Nakamame nambana kingi lao imambu koo dupwa rekya lanyi nembakamirami. Pii enenge wakale wakale larami.
MAR 16:18 Nakama kau nyuo minyaraminyi nara ramo, panda mauli narami ramo, dokopa nakama kumuo paa narami ingilyamo. Nakama anga pyaramo wambu dupwa nakamana kingi dokome minyandaraminyipa mee ingyara, lao lamaiya.
MAR 16:19 Pii dopa lao nakama lamaipala yake dulunya minyalyuo nyiyamopa Yesu pulyuo papala Anatunya kingi rolaerename isa peteya.
MAR 16:20 Dopa piyamopa nakama wakale wakale dupwana rali pyuo papala yuu muu dupwana boo pyao leyami. Dopa pyuo kareyaminyi dokopa Kamongo role pyapeta pyuo kareya. Nakama wai pii boo pyao lao kareyami pii doko pii kinyinde lalyaminyi lao wambu sinya lapala Kamongome nakama keta yulu andake renge palyuo maiya. Kinyi.
LUK 1:1 Namwa kareyama sukusa dokona Yesumi yulu andake piyamo dupwana lao akali malu mee pepa pyao reteyami.
LUK 1:2 Wambu lapome baa yulu piyamo dupwa peparae lengeme kandapala boo pyao lao kareyami dupwana pii langiyaminyipa pepana piyami.
LUK 1:3 Namba yulu dusipa suu pyaokondali pyuo karapala pepa dokona pyao rolaro lao suu piyu. Tiopilasa emba akali andake dokona lao emba suu pyao pepana pyao jeronopa pii langiyami dupwa kinyi ingyuo pelyamo lao soo gisarenepa mende isa pakami nara.
LUK 1:5 Erote yuu Jutia dokona kiŋi yulu pyuo kareyamo gii dokopako purisi mende Sakaraya lenge kareya. Baa purisi akali Apaisa dokona akalyanda lili pyuo karenge. Baa enda kingi Ilisapeta lenge Erone rara dokona nyiya.
LUK 1:6 Nakamba laparae Anatunya lenge kambu dokona Kamongona mawa pii andake kukipi ama kaeya nao minyuo kareyambi.
LUK 1:7 Ilisapeta enda pote peteyamopa nakamba wane manji nao pisipala emeyambi.
LUK 1:8 Banya purisinya akalyanda liti pyuo kareyami dupwame tembole anda dokona yulu pyuo kareyami gii dokopa baa opetae Anatunya lenge kambu dokona pyuo kareya.
LUK 1:9 Dokopa purisi pinginyili pyuo api Kamongona tembole andakare rendamu pingi bange kisala para lao semanale lao nakamana kingi pepa pyao komondo retapala mende kamenge kanda nao nyiyaminyi dokopa Sakarayana kingi rakana paleyasa baa kisala peya.
LUK 1:10 Dokopa rendamu pingi bange kisingi gii dokopa wambu malu mee kareyami dupwa peparae kamanda ateŋa lao kareyami.
LUK 1:11 Dokopa baa kareyamo dokona epo Kamongona aŋala mende rendamu pingi bange kisingi rate kingi rolaerena dokona pano epo kareyamo kandeya.
LUK 1:12 Baa kando pakapala monarename pulunongo piya.
LUK 1:13 Piyamopape aŋala dokome baa dopa lamaiya. Sakaraya, emba paka kae. Emba ateŋa lao karene doko Anatumi soo karamo. Embena etene Ilisapeta baame wane mende manjakara. Banya kingi Jone lare.
LUK 1:14 Dokopa emba raeko maiyuo mona pyakalyuo pyao kararenepa wambu malu mee manjipilyamo lao rae mairamiko.
LUK 1:15 Baa Anatunya lenge kambu dokona andake ingyuo karara. Baa waene ipwange dokope ipwange porai dupwape dokona mende naa nara. Endangimi baa manjo nyeramo gii dokopa Imambu Poo Pyasi baa keta palyuo simbwaramo karara.
LUK 1:16 Baame Isaraele wambu malu nakamana Kamongo Anatu dokona dee lanyuo epara.
LUK 1:17 Wamba Ilainja porai ingyuo kareyamo imambu porai doko baa keta paliramopa Kamongona lenge kambu dokona pyuo karara. Rakange dupwame nakamana wane wanakepe dupwa mona reto karena lao simbinali pingi wambu dupwame wambu rolae pingi dupwana pii soo nyinya lara. Kamongo baa epara lao wambu dupwa rapa rapa pyuo karena lara, leya aŋalame.
LUK 1:18 Leyamo dokopa Sakaraya baame aŋala kando dopa pyuo piso siya. Emba letene doko apa pyuo angingyuo kandarose? Namba alemo karo dee nambana etenge baa endemo ingyuo petamo, leya.
LUK 1:19 Dopa leyamo dokopa aŋala dokome isingi baa lamaiya. Namba Geperiele lenge dokome Anatunya lenge kambu dokona karenge. Waili pii keyange lalono doko emba langyala puu lapyasa epelyo, leya.
LUK 1:20 Namba dopa pira lalono doko pii kinyi lao suu pyaa nalene dokona emba pii laa nao pii lalana saka nao karare lyakande. Namba lapunuli pyuo pyaka separamo dokopa emba kapa pii lare, leya.
LUK 1:21 Dokopa wambu kamanda kareyami dupwame Sakaraya epelyape mee lao isaro karo baa tembole andakare mee karalu kareyamo dokona apa pipyasa baa epa nalyamo lao saka nao kareyami.
LUK 1:22 Dokopa baa kamanda epapala nakama pii lamainya saka naya. Dokopa baa pii repa repa pipyamo mende kandapyalyamo lao kando siyami. Dokopa baa pii lalana saka napala kingi sikisa pyambuo lasaka piya.
LUK 1:23 Pipala banya purisinya yulu pingi yuu gii dusipa epo otapeyamopa baa anda peya.
LUK 1:24 Yuu gii dusipa epo papeyamopa banya etenge Ilisapeta baa rombanda wane ingiya. Wane ingiyamopa baa elyapala kana kingi paki yalu pyuo peteya.
LUK 1:25 Namba ane mende manja nao elyuo peteyo dokona ingyuo Anatumi namba nyisapyamo dokona rae maiyuo pisiru leya.
LUK 1:26 Kana kingi paki wane rombanda paleyamopa Anatumi aŋala Geperiele yuu Galili dokona yuu taone Nasarete lenge dokona pena leya.
LUK 1:27 Akali mende banya kingi Josepe lenge baa Dapitinya para pyasinya mende karo baame enda mapwae mende kingi Maria lenge mokoriya piya. Enda doko peteyamo dokona Geperiele pena leya Anatumi.
LUK 1:28 Baa peteyamo dokona epapala dopa lamaiya. Emba pisipilyamo yako. Kamongome emba yapo nyepala emba elyape keta pisilyamo.
LUK 1:29 Dopa leyamo dokopa baa pulunongo piyamopa baa yako lalamo pii doko aki pii lao suu pyanyi pyano peteya.
LUK 1:30 Dokopa aŋala dokome baa dopa lamaiya. Maria, emba paka kae. Anatumi emba rae maiyuo karamo.
LUK 1:31 Embena rombanda wane ingyaramopa manjiri lyakande. Manjipala banya kingi Yesu lare, leya.
LUK 1:32 Baa andake ingyuo kararamopa baa Ama Ketae Karamo dokona Ikinyingi larami. Dokopa Kamongo Anatumi baa banya rakange kyawa Dapiti dokona kiŋi yulu nyuo maira.
LUK 1:33 Mairamopa yuu peparae baa Jekopena rara doko kamongo wakasa ingyapala rapu pyuo karalu karo karara. Dokopa banya isingi yulu doko ota nara, leya.
LUK 1:34 Lao oteyamo dokopa Mariame aŋala lamaiyuo, Namba akali nyii nange doko apa pyuo emba lapinyili pyuo pira? leya.
LUK 1:35 Leyamo dokopa aŋala dokome baa lamaiyuo dopa leya. Imambu Poo Pyasi emba keta maralyara. Ama ketae karamo dokona renge porai doko emba sembara. Dopa piramo dokona wane manjiri doko Poo Pyasi Anatunya Ikinyingi larami, leya.
LUK 1:36 Lapala, Embena ree palu enda Ilisapeta lenge doko endemosa wane ingiyamopa kana mange pyakambwaro paleyamopa peteya lyakande. Wamba baa wane manji nao pote petamo leyami dokoko epapu wane paleta petamo.
LUK 1:37 Anatu mende pinya saka naa nange dokome piya, leya.
LUK 1:38 Dopa leyamo dokopa Maria dopa leya. Namba Kamongona yulu pingi enda peto kande. Emba letenyili pyuo pinya, leya. Leyamo dokopa aŋala dokome baa yaki nyepala peya.
LUK 1:39 Enakana dokopa Maria baa sipurapala yuu kyau pyalya pyana pingi dokona yuu Jutia dokona sukusa anda repe repe pyuo karenge mendena waiya lao peya.
LUK 1:40 Papala Sakarayana anda kolando pao Ilisapeta yako leya.
LUK 1:41 Yako leyamo pii doko Ilisapetame siyamo dokopa banya rombanda dokona wane paleyamo doko pyuku leya. Dokopa Ilisapeta Imambu Poo Pyasi dokome baa palyuo simbuyamopa
LUK 1:42 baa pii ketae palyuo dopa leya. Mee enda dupwa pisiminyi dokona Anatumi emba yapo elyape keta pisilyamo, embena rombanda wane palamo dokona Anatumi elyape keta pisarako.
LUK 1:43 Kamongona endangi doko namba ketae pyambuo yako lao epelyamo doko apa pipyasa pilyamo?
LUK 1:44 Dokona lao embame namba yako lalene pii doko selono dokopa wane nambana romba dokona palamo baa rae maiyuo pyuku lalamo lyakande.
LUK 1:45 Kamongome leyamuli pyuo pira lao suu pyapinyi dokona raeko maiyuo pare ingilyamo.
LUK 1:46 Dokopa Maria dopa leya. Mona anda dokona Kamongo doko ketae pyambulyu.
LUK 1:47 Nambana Lete Wai Pyao Nyingi Anatu dokona suu pyao rae maiyuo peto.
LUK 1:48 Namba banya yulu enda mee koole ingyuo pisipunupape baame namba suu pyaro karamo. Rengya manjirami dupwa peparaeme nambasa kando Anatumi namba elyape keta pisiyapya larami.
LUK 1:49 Porai Wakasa Karamo dokome namba nyiso yulu andake pyakapyalyamo. Banya kingi doko yapasi ingyuo palamo.
LUK 1:50 Wambu baa kando pako wambo kareyami dupwape enakana kararami dupwape baa sakame kumuo nyiso karenge.
LUK 1:51 Banya kingi porai dokome wambu range wakasa ingyuo karamano lao suu pingi dupwa pyao ralinyi nembeya.
LUK 1:52 Kiŋi kareyami dupwa pyao mee inginyi pyambwapala inyimungu petenge dupwa nyuo ketae pyambuya.
LUK 1:53 Wambu lopo karaminyi dupwa baame sikya pinya lao nenge keyange maingi. Dopa pyuo bange malu retenge dupwa kaepala pendewa inginyi nembo pena lenge.
LUK 1:54 Kondo sakao pyakaro leya kande doko suu pyao karo banya yulu pingi Isaraele wambu dupwa nyiso karenge.
LUK 1:55 Baame namwana rakange kyawa Aporakame kandowa, banya ree palu wai kiso nyera ingilyamo dupwa kandowape yuu rakyame kaeya nao nyiso kararo lao, lalu lao leyamuli pyuo pingi, leya Mariame.
LUK 1:56 Lapala Maria Ilisapetapa kana remale role pyao peteyambi. Enakana kaepala anda peya.
LUK 1:57 Ilisapetame wane manjira ingiyamo yuu gii doko pyaka siyamopa wane mende mandeya.
LUK 1:58 Dokopa wambu repeta palenge dupwape banya palu dupwape Kamongo dokome enda baa kando kondapala yulu andake pyakamipyalyamo lao sepala baa role pyao rae maiyuo kareyami.
LUK 1:59 Yuu mange lama karo epo papeyamopa wane doko yongo yanenge awali lao pyakepanyi nembala epeyami. Epapala rakange kingi Sakaraya lenge dokona wane dopako kingi Sakaraya lalana piyami.
LUK 1:60 Lalana piyaminyipape endangimi daa lapala, Kingi Jone larama, leya.
LUK 1:61 Dopa leyamo dokopa, Embena palu dokona mende kingi dopa laa nange kandale, leyami.
LUK 1:62 Dokopa wanena rakange dokona wane doko kingi api larama lao suu pilipi? lao piso siyami.
LUK 1:63 Dokopa pepa pingi bange doko minyuo epena lao lamaiya. Dokopa, Baa kingi Jone larama, lao pepa pyao reteya. Dopa lao pyao reteyamo dokopa nakama peparae ayaka leyami.
LUK 1:64 Dokopa Sakaraya dokona aopa banya kambu dee lumbuyamosa pii lao Anatu lakando kareya.
LUK 1:65 Dokopa nakama repeta paleyami wambu dupwa peparae pako kareyami. Dokopa yuu Jutia kyau pyalya pyana pingi dupwa peparaena wambu kareyami dupwame yulu dokona dopa pipya dopa pipya lao kareyami.
LUK 1:66 Dokopa pii doko siyami dupwa peparaeme monarename dopa pipya dopa pipya lao suu pyanyi pyano pyuo, Wane doko apiyakale karara, leyami. Kamongome wane doko nyiso karara doko soo gisiyami.
LUK 1:67 Dokopa banya rakange Sakaraya Imambu Poo Pyasi dokome palyuo simbuyamopa baa pii polo lamaiyuo dopa leya.
LUK 1:68 Kamongo Anatu Isaraele wambu dupwame suu pyao karaminyi doko lakandamana. Baame epo banya wambu dupwa nyiso kiiramo nyipyalyamo.
LUK 1:69 Dokona lao banya yulu pingi akali Dapiti dokona palu dokona Lete Wai Pyao Nyingi akali porai mende karena lao renge kuipyamopa karamo.
LUK 1:70 Dokonako ingyuo yuu wamba dokopa banya poropeta akali poo pyasi dupwa keta pii mende leya.
LUK 1:71 Doko, Namwana yanda pimwai dupwa nembakao namwa nyisara, namwa kando awa nao karaminyi dupwa peparaeme namwa pyaa nana lao kyawa minyaro leya.
LUK 1:72 Namwana rora ambasupi kando lamaiyuo kaeyamuli pyuo, pii yapasi doko kame see napala kondo nyiso karara.
LUK 1:73 Baame namwana rakange kyawa Aporakame lamaiyuo pii mende lalu lao leya kande.
LUK 1:74 Doko namwana yanda pimwai dupwana kingi raka lanyi nembaramopa namwa koo soo kararama leya.
LUK 1:75 Dokome namwa banya lenge kambu dokona karo, yulu yapasi rolae dupwa pyuo karalu kararama lao lalu lao leya.
LUK 1:76 Anyi emba Anatu Wakasa Karamo dokona poropeta akali larami. Dokona lao Kamongo enakana eparamo dokona emba wambo pao banya kata wapwakamyuo pare,
LUK 1:77 banya wambu dupwana koo dupwa kame sakasi seramopa lete wai pyao parami lao pii doko boo pyao lamairi.
LUK 1:78 Namwana Anatu anjiki pipala namwa kondo sakao nyisaramopa, neta renge akali namwa kiiramo nyera doko epena lara.
LUK 1:79 Wambu kumasi ingyuo iminjingi panda dokona pisirami dupwa keta yanga paupau lakamira, mona seramo pupwase lao kata lasaka pira, leya Sakarayame.
LUK 1:80 Dokopa wane doko mona angi palyuo ando peya. Baa neta eparamopa Isaraele wambu dupwame baa kapa kandarami yuu gii pyaka sepa naya dokopa yuu muiyane dokona palyuo kareya.
LUK 2:1 Yuu gii dusipana Okosatasa yuu muu dupwana wambu dupwa peparae kingi pepa pinya lao pii wai nembeya.
LUK 2:2 Wamba kingi pepana see nange doko dokopa kanda soo pyao reteyami. Yuu gii dokopa akali Kuiniyusi yuu Siria dokona kyapo mupwa ingyuo kareya.
LUK 2:3 Dokopa wambu peparae kingi pepa pinya lao nakamana yuu range anda malu repe repe pyuo pyuo karenge wakale wakale dupwana peyami.
LUK 2:4 Yuu Galili dokona yuu Nasarete anda malu repe repe pyuo karenge doko yaki nyepala Josepe yuu Jutia dokona lalyuo pao Dapiti wamba kareya dokona ree palu dokona mendeme baa mandeya dokome baa Dapitinya yuu dokona yuu taone Beteleme lenge dokona peya.
LUK 2:5 Yuu dokona Maria mokoriya piyamo doko wane paleyamo dokopa baapa kingi pepa pinya lao peyambi.
LUK 2:6 Papala yuu dokona kareyambinyi dokopa wane manjo nyera gii pyaka siya.
LUK 2:7 Dokopa baame wane mupwa doko mandeya. Manjo nyepala baa komau dokome yaki pipala anda angi upunili wambu palenge dokona palirambi ingya nayamosa bokote bulamakao nenge reto maingi dokona reteya.
LUK 2:8 Dokopa yuu dokona sipisipi rapu pingi akali lapome pau mendena nakamana sipisipi dupwa kukwa dokopa iso peteyami.
LUK 2:9 Piso kandeyaminyipa aŋala mende pano epeya. Dokopa Kamongona yanga paupau lenge doko nakama kareyaminyi dokona kako pao yanga paupau leya. Dokopa nakama pakame kumuyami.
LUK 2:10 Dokopa aŋala dokome nakama lamaiyuo, Paka nalapape. Wambu dupwa peparae keta mende piramopa raeko maiyuo kararami lao waili pii keyange doko minyuo epelya kande.
LUK 2:11 Dokona lao epapu Dapitinya yuu taone dokona wane mende manjakami. Baa Kamongo Koraisa dokome nakama lete wai pyao nyera.
LUK 2:12 Nyaŋa mende komau dokome yaki pisi nenge reto maingi dokona seramo doko kando nyepala dokolamo lao kandarami, leya.
LUK 2:13 Dopa leyamo dokopa aŋala dokomoo yake panda karenge ama malu dupwa pipya aopa role pyao karapala Anatu lakando lao,
LUK 2:14 Anatu ama ketae karamo doko wambu dupwame lakando karena, baa kyanyi kandelyamo dupwa koo soo kararami.
LUK 2:15 Lapala aŋala dupwa nakama yaki nyepala yake panda dokona peyaminyi dokopa sipisipi rapu pingi akali dusipa dopa leyami. Mende pipyamo doko Kamongo dokome namwa nolako langilyamo doko yuu Beteleme dumbinya kandala mwua, leyami.
LUK 2:16 Lapala waiya lao papala Mariamoo Josepemoo nyaŋa bulamakao nenge reto maingi dokona siyamo dokomoo kando nyiyami.
LUK 2:17 Kando nyepala aŋalame wane dokona lao pii lamaiyamo dupwa polo leyami.
LUK 2:18 Dokopa wambu siyami dupwa peparae sipisipi rapu pingi akali dusipame lamaiyami pii doko sepala yako leyami.
LUK 2:19 Yako leyaminyipa Maria pii dupwa peparae yaki nyii nao suu pyanyi pyano peteya.
LUK 2:20 Dokopa sipisipi rapu pingi akali dupwame aŋalame leyamuli pyuo piyamo kandapala kapu kyuo anda pao dokopa Anatu ketae pyambuo lakando peyami.
LUK 2:21 Yuu mange lama karo epo papeyamopa banya yongo yanenge pyakepanyi nembeyami. Baa ene rombanda palipa nayamopa aŋala kingi Yesu leyamo dokoko leyami.
LUK 2:22 Moseseme wane manjipala mende pirami lao Mawa Pii paleyamuli pyuo nakamba pipala elyape karambana lao Jerusaleme dokona lalyuo pao Yesu baa Kamongo dokona maiyalana peyambi.
LUK 2:23 Dokona ingyuo Kamongona mawa pii dopa lao pyasi palamo. Doko wane mupwa manjiraminyipa wane doko Anatunya dokona maiyalapape letamo.
LUK 2:24 Kamongona mawa pii leyamuli pyuo yaka wayamu lama panda yaka pumwa ikyane lama kiso mairami doko maiyala peyambi.
LUK 2:25 Dokopa akali mende kingi Simione lenge doko Jerusaleme kareya. Baa yulu rolae pyuo Anatu suu pyao karo Anatumi Isaraele wambu dupwa nyisala epelyape lao iso kareyamopa Imambu Poo Pyasi baa keta paleya.
LUK 2:26 Dokopa Imambu Poo Pyasimi lao nolako lamaiyuo, Wambo kumapa narenepa Kamongona Koraisa doko angi kandare, leya.
LUK 2:27 Akali doko Imambumi pyongo piyamopa tembole anda dokona epeya. Dokopa rakange endangipa dolapome wane Yesu Mawa Pii palengenyili pyuo baa pinya lao lanyuo epeyambinyipa
LUK 2:28 akali dokome baa kupyuo nyepala Anatu lakando dopa leya.
LUK 2:29 Kamongo, emba leenyili pyuo pipinyi doko kando karo dokona embena kendemande akali mona kyuu lao seramo pena lape.
LUK 2:30 Embena lete wai pyao nyingi doko
LUK 2:31 wambu dupwa lenge kambu dokona emba rapa rapa pii doko namba baa lengeme kandalono.
LUK 2:32 Yanga paupau laramo dokome see nange wambu dupwa embena kata kando nyerami dee Isaraele rara doko yanga paupau laramo dokome rara neta renge ingyuo para leya.
LUK 2:33 Dokopa baame wane doko kando leyamo pii doko sepala banya endangi rakangepa yako leyambi.
LUK 2:34 Dokopa Simione baame nakamba elya pyuo penale lao endangi Maria kando dopa lamaiya. Wane dakeme renge kuiramopa Isaraele wambu malu isa paraminyipa maluko ketae pao kararami ingilya kande. Baa Anatu dokona lyakai pyuo kararamo kandapala yanda pimwaiyuo lao kararami.
LUK 2:35 Dokopa nakamana suu pingi monarena silyamo dupwa panara. Dee wua gelame wambunya mona dokona arekyu pilyamosa randa pingi doko suu pyao embena mona anda randa wakasa nao karare leya.
LUK 2:36 Yuu gii dokopa Anatunya poropeta enda Ana lenge Panyuelena wanenge rara kingi Asa lenge doko endemo ingyuo peteya. Baa akali nyiyamopa enakana ee kana yanda ipingi nyero banya akalingipa paleyambi.
LUK 2:37 Akalingi kumuyamopa baa enda waiya ingyuo ee kana akalisa mange lama karo ipisu kisima (84) peteya. Baa tembole anda doko yaki nyii nao kukwa korakamape nenge wasaka pyuo ateŋa lao Anatu ketae pyambuo yako lao peteya.
LUK 2:38 Josepe Mariapa tembole anda Anatu mona maiyuo kingi lao peteyambinyi gii dokopako Ana baa epapala Anatu kando ange lapala Anatumi Jerusaleme kiiramo nyela epelyape lao kando kareyami dupwa peparae wane dokosa lao kando lamaiya.
LUK 2:39 Dokopa Kamongona mawa pii palengenyili pyuo yulu dusipa peparae pyuo otapala kapu kyuo yuu Galili pao nakambana yuu taone Nasarete dokona peyambi.
LUK 2:40 Peyambinyipa wane doko ando porai ingyuo ama mona paleyamopa kareya. Dokopa Anatunya renge keyange doko baa keta paleya.
LUK 2:41 Banya endangi rakangepa ee kana peparae Jerusaleme dokona Pasopa nenge nenge gii dokopa papa piyambipya.
LUK 2:42 Papa piyambinyi dokopa baa ee kana akalisa ipisu lama kareyamopa pengenyili pyuo nakama lalyuo peyami.
LUK 2:43 Papala nenge Pasopa nao otapala nakamba kapu kyuo anda peyambinyi dokopa wane Yesu Jerusaleme dokona karo kaeya. Baa Jerusaleme kareyamo doko rakange endangipa see nayambi.
LUK 2:44 Puu wambu wambo pao enakana epo pilyaminyi dupwana rukuraka pyuo epo pelyamo lao masapala yuu mendaki nyuo nembo kata peyambi. Papala nakambana palu dupwape puu minyingi dupwape kareyami dupwana baa koto peyambi.
LUK 2:45 Koto karo baa kando nyii napala dee Jerusaleme kapu kyuo baa kotala peyambi.
LUK 2:46 Papala yuu rema epo papeyamopa tembole anda dokona peteyamo kando nyiyambi. Baa mana lenge dupwa peteyaminyi dokona role pyao piso nakamana pii sepapu piso soo peteya.
LUK 2:47 Dokopa baame pii leyamo soo peteyami dupwa peparaeme baa soo gisapyalyamo lao baame isingi pii lamaiyuo peteyamo doko soo yako lao peteyami.
LUK 2:48 Dokopa nakambame baa kando nyepala dokopa yako lao mona nembeyambi. Mona nembapala banya endangi dokome baa lamaiyuo, Anyi, akipamo embame nambwa kando dopa pipi? Rakane nambapa emba koto mona yanyi pyapyamo papyuo karambwa lyakande, leya.
LUK 2:49 Dokopa baame nakamba lamaiyuo, Akipamo namba koto papimbi? Namba Rakanena anda karare ingilyamo lao see nambisi?
LUK 2:50 Dokopa pii dopa lamaiyamo renge doko see nayambi.
LUK 2:51 Dokopa baa nakamba role pyao lano papala yuu Nasarete dokona epeyami. Epapala nakambame leyambinyili pyuo pyuo kareya. Dopa pyuo kareyamopa banya endangi dokome yulu dupwa peparaena monarena suu pyanyi pyano peteya.
LUK 2:52 Dokopa Yesu konda konda pyuo soo giso karo pao ando kaeya. Dokopa Anatumoo mee akali opetaeme baa kando ama rae maiyuo kareyami.
LUK 3:1 Taipiriasa Sisa baa ee kana akalisa ipisu kingi paki kiŋi mupwa wakasa ingyuo kareyamopa Pondiasa Pailate yuu Jutia kyapo muwpa ingyuo kareya. Eroteme yuu Galili rapu pyuo karo yangonge Pilipa baame yuu Ituriape yuu Rekonaitasape dolapo rapu pyuo karo Laisaniasame yuu Apilini rapu pyuo karo pyuo piyami.
LUK 3:2 Yuu gii dokopa Anasa Kayapasapa purisi mupwa ingyuo pyuo kareyambi. Dokopa Jone Sakarayana ikinyingi doko yuu muiyane dokona kareyamopa Anatumi baa pii mende lamaiyamo siya.
LUK 3:3 Dokopa baame ipwa Jotane repeta yuu dupwana pao mona enenge palyapala Anatumi koo dupwa nyuo kame sakana lao bapitisimo nyelapape, lao boo pyao papyuo kareya.
LUK 3:4 Baa dopa pyuo piyamo doko suu pyao Anatunya poropeta akali Aisaya dokome pii wambo pyao reteya. Doko yuu muiyane dokona pii mende dopa lao kyakale lao karara. Kamongona kata mondo lao retalapa banya kata dupwa wapuo rolae pyuo karalapa.
LUK 3:5 Dokopa yuu oko dupwa peparae pyuo rolarami. Yuu kyau andakepe kukipi dupwa peparae pyao panda lama lama inginya. Kata kyai dupwa pyao rolalapape dokome kata koo kyau pyalya pyana pingi dupwa rambi kwuasi sera.
LUK 3:6 Dokopa wambu peparaeme Anatu lete wai pyao nyeramo kandarami, letamo.
LUK 3:7 Dokopa wambu malu mee baa bapitisimo nyakana lao kareyamo dokona epeyaminyi kando baame dopa lamaiya. Nakama kau ikyane ingyuo kaparao karaminyi. Kote andake palisara ralo pupwa lao apimi repe repe langipyasa epelyamisi?
LUK 3:8 Nakama mona enenge palyapala rolae yulu pinginyili pyuo pyuo karalapape. Dopa pyuo karo Aporakame namwana rakange kyawa ingiyamopa karamano lao suu pyaa nalapape. Dokona lao dopa langilyu. Anatumi mee kana dapwa nyuo Aporakamena wane wanakepe ingyuo kapa wasara ingilyamo.
LUK 3:9 Ene dakepa isa dupwana rengeta wua rumbiwame pokwalana pyuo maliki maliki lao karamo. Dokona isa jingi keyange lyii nange dupwa peparae pokwapapu isare dokona pambwapa pira ingilyamo, leya.
LUK 3:10 Dokopa wambu malu mee kareyami dupwame baa piso soo, Dokona ingyo namwa apa pirama? leyami.
LUK 3:11 Dokopa baame nakama isingi lamaiyuo, Mende komau pee pingi lama seramo doko mende mokwa soo aeya naramo karara doko maipwape. Doko suu pyao mende nenge sera doko dopako pipwape leya.
LUK 3:12 Takisi nyingi akali lapo nakama opetae baa bapitisimo nyakana lao epeyami. Epapala baa kando lamaiyuo, Mana Lenge, namwa apa pirama? leyami.
LUK 3:13 Dokopa baame dopa leya. Kana rombo piyaminyili pyuo dusipa iki nyelapape, leya.
LUK 3:14 Yanda singi lapo opetaeme baa piso soo, Namwa apa pirama? leyami. Dokopa baame nakama lamaiyuo, Akali mende pyalana pyuo kana jinya laope panda mende koo pilyamo lao kyambo lapala banya kana waa nyakami nalapape. Rangena yulu pingi kana doko kapalyamo lao suu pyao karalapape leya.
LUK 3:15 Wambu dupwame Koraisa epelyape lao iso karo peparaeme Jone kando baa Koraisa panda daa lao monarena suu pyao kareyami.
LUK 3:16 Dokona Joneme nakama peparae isingi lamaiya. Nambame nakama ipwa dokona mee bapitisimo nyakao karo. Ipwa dokona mee bapitisimo nyakao karapunupape Porakai mende nambapa kapa pii narande epelyamo dokona kimbu suu lyolo doko polarono namba kwaeyamo dokome kapa ingya nalyamo. Baame Imambu Poo Pyasi dokopa isarepana nakama bapitisimo nyakara.
LUK 3:17 Baa witi jingi lukungi saporo andake doko minyaro karamo. Baa witi peparae yapo nyepala jingi angi dupwa anda retowa, imbu dupwa isare rao sulu singi dokona kisanyi nembara leya.
LUK 3:18 Dokopa waipi malu lao wambu dupwa lamaiyuo waili pii keyange doko boo pyao lao kareya.
LUK 3:19 Dopa lao kareyamopa akali rema kiŋi yulu mokwa soo nyiyami dokona mende kingi Erote dokome banya yangongena enda Eroteyase lenge doko mango nyuo karo dee yulu koo wakale wakale pyuo kareyamosa Joneme baa lao nembo rolo lamaiya.
LUK 3:20 Dokopa Erote baame yulu koo wakale wakale pyuo kareyamo dokonako palyuo Jone nyepala karapusi anda palyiya.
LUK 3:21 Wambu peparae bapitisimo nyuo oteyaminyipa Yesu baa opetae bapitisimo nyepala ateŋa lao kareyamo dokopa yake kata lumbwapala
LUK 3:22 Imambu Poo Pyasi yaka wayamu dopale ingyapala baa kareyamo dokona isa lupyuo epeya. Dokopa yake dokona pii mende lao epeya. Emba nambana Ikinyingi mona retelyo doko. Nambame emba raeko maiyuo karo, leya.
LUK 3:23 Yesu ee kana akalisa rema epo papeyamopa banya yulu doko kanda soo piya. Wambu peparae baa Josepena ikinyingi lao suu piyami. Josepe baa Ilainya ikinyingi,
LUK 3:24 Ilai baa Matatena ikinyingi, Matate Lipaena ikinyingi, Lipae Melekainya, Melekai Janainya ikinyingi, Janai Josepena,
LUK 3:25 Josepe Matatayasana ikinyingi, Matatayasa Emosana, Emosa Neamena ikinyingi, Neame Esalainya, Esalai Nakainya ikinyingi,
LUK 3:26 Nakai Meatana, Meata Matatayasana ikinyingi, Matatayasa Semenena, Semene Josekena ikinyingi, Joseke Jotana,
LUK 3:27 Jota Joananena ikinyingi, Joanane Oresana, Oresa Serapapelena ikinyingi, Serapapele Siatielena, Siatiele Nerainya ikinyingi,
LUK 3:28 Nerai Melekainya, Melekai Atainya ikinyingi, Atai Kosamena, Kosame Elemetamena ikinyingi, Elemetame Eana ikinyingi,
LUK 3:29 Ea Josuana ikinyingi, Josua Eliasena, Eliase Joriminya ikinyingi, Jorimi Matatena, Matate Lipaena ikinyingi,
LUK 3:30 Lipae Simionena, Simione Jutana ikinyingi, Juta Josepena, Josepe Jonamena ikinyingi, Joname Elayakiminya,
LUK 3:31 Elayakimi Meliana ikinyingi, Melia Menana, Mena Matatana ikinyingi, Matata Netanena, Netane Dapitinya ikinyingi,
LUK 3:32 Dapiti Jesena, Jese Opetana ikinyingi, Opeta Boasana, Boasa Salmanena ikinyingi, Salomane Nasonena,
LUK 3:33 Nasone Aminatapena ikinyingi, Aminatape Ataminana, Atamina Aninya ikinyingi, Ani Esoronena, Esorone Peresana, Peresa Jutana ikinyingi,
LUK 3:34 Juta Jekopena, Jekope Aisakena ikinyingi, Aisake Aporakamena, Aporakame Terana ikinyingi, Tera Neona,
LUK 3:35 Neo Serakana ikinyingi, Seraka Oriunya, Oriu Pelekena ikinyingi, Peleke Ipana, Ipa Selana ikinyingi,
LUK 3:36 Sela Kenanana, Kenana Apasatana ikinyingi, Apasata Semana, Sema Noana ikinyingi, Noa Lemekena,
LUK 3:37 Lemeke Metusalana ikinyingi, Metusala Inokona, Inoko Jaretana ikinyingi, Jareta Malalilinya, Malalili Kenanana ikinyingi,
LUK 3:38 Kenana Inosona, Inoso Setena ikinyingi, Sete baa Atamena, Atame baa Anatunya ikinyingi.
LUK 4:1 Yesu ipwa Jotane yaki nyepala Imambu Poo Pyasi palyuo simbuo baa lanyiyamopa yuu muiyane dokona epeya.
LUK 4:2 Baa yuu akalisa pao kisima yuu muiyane dokona Satane dokome apa pilyape lao kandalana makande pyuo kareyamo kareya. Dokopa yuu gii dusipana nenge naa nao karapala baa lopaya.
LUK 4:3 Satane dokome baa lamaiyuo, Emba Anatunya Ikinyingi ramo doko kana dake borete inginya laa, leya.
LUK 4:4 Dokopa Yesumi isingi lao, Buku Baepolena dopa lao pyasi palamo. Akali borete iki nao kulisa ingyuo lete kara nara ingilyamo leya.
LUK 4:5 Dokopa Satane dokome baa lanyuo papala isa yuu muu wakale wakale kiŋi akali rapu pyuo kareyami dupwa peparae aopa lasaka piya.
LUK 4:6 Lasaka pipala baa dopa lamaiya. Nakamana porainya rengepe neta renge rengepe peparae emba jero. Dusipa peparae nambana silyamo doko wambu mende mairu laronyili pyuo kapa mairu.
LUK 4:7 Dokona embame namba ketae pyambuo kingi lao karare ramo doko dupwa peparae embena ingyara leya.
LUK 4:8 Dokopa Yesumi baa isingi lamaiyuo, Dopa lao pyasi palamo. Kamongo Anatu yapo ketae pyambuo kingi lao, banya yulu iki pyuo karalapape letamo.
LUK 4:9 Dokopa Sataneme Jerusaleme dokona baa lanyuo pao tembole anda ketae dokona kareya. Karapala dopa lamaiya. Emba Anatunya Ikinyingi ingyuo karare ramo doko emba dokona karo isa pyaka.
LUK 4:10 Dokona lao pii dopa lao pyasi palamo. Banya aŋala dupwa emba iso karena lao jera letamo.
LUK 4:11 Deeko palyuo embena kimbu doko kaname pyaa nana lao kingi kapena ketae reto minyalyuo nyerami lao palamo, leya.
LUK 4:12 Dokopa Yesumi baa isingi lamaiyuo, Pii dopa lao lasi palamo. Kamongo Anatu mende pirape lao kandalana pyuo kara nalapape lao palamo, leya.
LUK 4:13 Dokopa Satane dokome baa yulu wakale wakale palyuo makande pyuo otapala kaeya. Kaeyapala baa dee makande pyuo kandala eparo lao suu pyapala peya.
LUK 4:14 Dokopa Yesu kapu kyepala Imambunya renge porai paleyamopa yuu Galili dokona peya. Peyamopa baasa kando dopa pilyamo lao yuu kipwa kipwa dupwana lao raeyami.
LUK 4:15 Dokopa sinakoke anda dupwana mana lao kareyamopa wambu dupwa peparaeme baa lakandeyami.
LUK 4:16 Dokopa yuu Nasarete baa andeyamo yuu dokona range epeya. Epapala baa pengenyili pyuo yuu koro petenge dokopa sinakoke anda dokona peya. Dokopa baa buku yaka lena leyaminyisa roya kareya.
LUK 4:17 Dokopa Anatunya poropeta akali Aisayame pepa piya buku doko baa maiyami. Baame buku doko lopapala pii dopa lao paleyamo doko koto kando nyiya.
LUK 4:18 Kamongona Imambu doko namba maralyipyamopa karo, dokona lao wambu pendewa dupwa waili pii keyange doko boo pyao lamaiyuo karape lao rombo palyapya. Puu maisi karaminyi dupwa mokwarami laope lenge kwaelyamo dupwa lenge rao kararami lao boo pyao lamaiyala pupi lapyasa epelyo. Wambu isare rao iso karaminyi dupwa mokwala pupi lao
LUK 4:19 Kamongome banya wambu lete wai pyao nyera ee kana pyaka seramo yuu gii doko boo pyala pupi lapyasa epelyo leya.
LUK 4:20 Lapala buku doko rongo pipala ree maingi akali maipala isa peteya. Peteyamo dokopa wambu sinakoke anda dokona peteyaminyi dupwa peparaeme lengeme baa kandaro siyami.
LUK 4:21 Dokopa baame nakama lamaiyuo, Anatunya pii pyasi palamo soo pisimi doko epapu angingyuo pelyamo leya.
LUK 4:22 Dokopa wambu peparaeme baasa kando baame pii ama keyange kambunya lao kareyamo doko soo yako lao, Doko Josepena ikinyingi daase? leyami.
LUK 4:23 Dokopa baame nakama lamaiyuo, Nakamame Juu wambunya pii lalaminyili pyuo namba kando, Dokota akali embame range pyuo pyuo nyepe, yuu Kapaneame dokona yulu pyuo kareene siyama dupwa embena yuu range dakena dopako pyuo karape, larami ingilyamo, leya.
LUK 4:24 Lapala dopa leya. Nakama kinyi langilyu, Anatunya poropeta akali banya yuu range dokona kararamo dokopa banya wambu baa kando yako lao awa nange.
LUK 4:25 Dokona suu pyao nakama kinyi langilyu, Ilainja kareyamopa ee kana rema dee kana pakinyamange opetae yake doko upi laro kareyamopa yuu dupwana lopo andake siyamo yuu gii dokopa enda waiya malu Isaraele yuu dokona peteyami.
LUK 4:26 Enda waiya malu peteyaminyipape Anatumi Ilainja wakale dupwa nyisala pena laa napala enda waiya mende Sarepata lenge yuu Saitone peteyamo dokona pena leya.
LUK 4:27 Dokona ingyuo Anatunya poropeta akali Ilaisa doko kareyamo yuu gii dokopa Isaraele dokona rapa nenge akali malu kareyami. Malu kareyaminyipape nakama peparae elya pyuo nyii naya. Nemane yuu Siria range doko iki elya pyuo nyiya, leya Yesumi.
LUK 4:28 Yesu dopa leyamo sepala dokopa sinakoke anda peteyami dupwa peparae imbumi kumuyami.
LUK 4:29 Imbumi kumapala sipurapala anda malu palyuo kareya doko yaki nyuo neta pena lao suu lanyi nembeyami. Nembapala yuu kyau anda malu palyuo karenge dokona nemba nemba rondo repeta lanyuo pao rondo dokona suu lanyi malyalana piyami.
LUK 4:30 Dopa piyaminyipape nakama kareyaminyi dokona sukusa kata epo kanjakala peya.
LUK 4:31 Papala yuu taone Kapaneame lenge yuu Galili siyamo dokona lano peya. Papala yuu koro petenge gii dokopa nakama mana lamaiyuo kareya.
LUK 4:32 Dokopa baa renge palyuo pii lao kareyamosa nakamame banya mana pii soo ayaka leyami.
LUK 4:33 Dokopa sinakoke anda dokona akali mende kopyali imambu koo dokome soo pyale leyamo peteya. Pisipala baa pii porakaiyuo kaeyo leya.
LUK 4:34 Aa, Yesu Nasarete range embame namwa apa pinya lao pilinyi? Embame namwa kokwa sela epase? Emba apipi lao namba silyu. Emba Anatunya Poo Pyasi Akali, leya.
LUK 4:35 Dopa leyamopa Yesumi baa pyalana pyuo lamaiyuo, Emba pii laa kae. Akali doko raka lanyi yaki nyinya, leya. Leyamopa imambu koo dokome wambu peteyaminyi sukusa dokona akali doko suu lanyi palyapala baa uki minya nao mee yaki nyuo peya.
LUK 4:36 Dokopa nakama peparae mona nembapala dopa leyami. Pii doko aki pii? Baa renge palyuo porai ingyuo letamosa imambu koo dupwa letamuli pyuo raka lanyi yaki nyingi leyami.
LUK 4:37 Dokopa Yesumi dopande pilyamo lao yuu kipwa kipwa dolapona lao maiyuo kapa kapa piyami.
LUK 4:38 Baa sipuro sinakoke anda yaki nyepala Saimonena anda kolando peya. Dokopa Saimonena enda imwange yanenge isare andake rao anga piyamo siyandena Yesu lamaiyami.
LUK 4:39 Dokopa enda doko siyamo dokona karo yanenge isare rao anga piyamo doko yaki nyuo manda rao pena leya. Leyamopa baa mee ingiyamopa enda dokome aopa sipurapala nakama nenge pyuo isaro pyuo kareya.
LUK 4:40 Enakana neta anda pao kone pupuri piyamo gii dokopa wambu anga wakale wakale piyamo dupwa baa kareyamo dokona soo epeyami. Dokopa banya kingi dolapome nakama dupwa peparae ketae retapapu elya pipa piya.
LUK 4:41 Dokopa wambu malu imambu koo dupwa raka lanyi yaki nyepapu pii porakaiyuo lao, Emba Anatunya Ikinyingilamo, lapa piyami. Dopa lapa piyaminyipa nakama baa Koraisa ingyuo karamo lao siyaminyisa dokome baame nakama pyalana pyuo laa kaena lapa piya.
LUK 4:42 Dokopa yuu yangeyamo dokopa baa kanjakala pao yuu iki siyamo dokona peya. Peyamo dokopa wambu dupwa baa koto papyuo baa peteyamo dokona epapala, Emba namwa yaki nyuo paa napili yaka, lao lamaiyami.
LUK 4:43 Dopa lamaiyaminyipa baame nakama dopa lamaiya. Anatunya isingi yulu dokona lao waili pii keyange doko boo pyao yuu anda malu repe repe pyuo karenge lapo dupwana opetae papyuo kararo ingilyamo. Anatumi dopa pyuo karala puu leyasa epeyo leya.
LUK 4:44 Lapala yuu Jutia dupwana sinikoke anda dupwana papala boo pyao lao papyuo kareya.
LUK 5:1 Yesu baa ipwa pete Genesarete lenge marenge dokona kareyamopa wambu dupwame Anatunya pii selana epo baa kete pyanyi pyambuyami.
LUK 5:2 Dokopa baame bote lama ipwa pete nembange dokona siyambinyi kandeya. Oma nyingi akali dusipame bote dolapo yaki nyepala nakamana oma nyingi nyuu dolapo wate pyuo kareyami.
LUK 5:3 Bote siyamo dokona mende Saimonena dokona baa pyakambwapala yuu doko yaki nyepala mee mende ipwa pete sukusale suu lanyi pyambunya leya. Lapala isa pisipala bote dokona piso wambu dupwa mana lamaiya.
LUK 5:4 Lamaiyuo otapala baame Saimone kando dopa lamaiya. Ipwa pete sukusa kyuwa dokona botena piso papala oma nyingi nyuu pyao pyanapala oma nyepe leya.
LUK 5:5 Dokopa Saimone isingi lamaiya. Rapu Pingi, kukwa dokopa oma nyelana yulu pyuo karamwanopa piso yuu yangapya dokopa oma mende nyii namwa. Nyii namwanopape emba letene dokona namba oma nyingi nyuu dolapo ipwana pyao pyanaro, leya.
LUK 5:6 Pyaniyamopa oma ama malu siyamo dokona nyuu doko kako pyao sukusa pyambwapala nyuu doko oma paleta ipyuo nyiyami. Dokopa nakamana oma nyingi nyuu dolapo kete piyasa rokwalana piya.
LUK 5:7 Dokopa bote mende dokona oma nyingi akali lama peteyambi dolapo nakamba nyisala epena lao kiyango piyami. Piyaminyi dokopa nakamba epapala oma nyuu bote dolapona paki piyaminyipa bote dolapo laparae simbuya. Simbwapala ipwana yalyalana piya.
LUK 5:8 Dopa piyamo doko kandapala Saimone Pita Yesunya wapambu siyamo dokona pangu sepala dopa leya. Kamongo namba akali koo ingyuo karono dokona embame namba yaki nyuo puu leya.
LUK 5:9 Baamoo akali role pyao kareyami dusipa pipya oma nyiyami doko kando yamarangwapala baame dopa leya.
LUK 5:10 Jemesa Jonepa Sepetena ikinyingi Saimonena role pyao oma nyingi akali dolapo opetae yamaranguyami. Dokopa Yesumi Saimone lamaiya. Emba paka kae. Epapu oma kaepala akali dupwa nyuo karare, leya.
LUK 5:11 Dokopa bote dolapo minyuo epo ipwa kee dokona retapala bange peparae yaki nyepala baa peyamuli pyuo peyami.
LUK 5:12 Anda malu repe repe pyuo karenge dokona mendena kareyamo dokopa akali mende rapa andake neyamo epeya. Epapala baa Yesu kandapala banya lenge kambu doko yuu dokona pangu sepala baa piso sokondali piya. Kamongo, embame namba elya pyuo nyero lare ramo namba kapa elya pyuo nyere, doko silyu leya.
LUK 5:13 Dopa leyamo dokopa baame banya kingi pyasinju lapala baa minyandapala lamaiyuo, Piroŋo emba elyape karape, leya. Leyamo dokopa rapa aopa loo leya.
LUK 5:14 Dokopa baame akali doko lamaiyuo, Wambu mende dopa pipyaŋa lao lamai napipi, laokondali pyuo leya. Lamai napala emba purisi akali karamo dokona papala yanenge lasaka piri. Moseseme rete rapa loo laramo dokopa mende Anatu kiso mairami leya dokoko embame maiyala puu. Embena rete rapa kene loo lapyamo karapilyamo lao wambu dupwame emba kando sinyale lao mairi, leya.
LUK 5:15 Mendali lamai nana leyamopape dopa pipya dopa pipya lao lasi pii doko lao raeyami. Dokopa wambu ama malu mee banya pii sela epo anga piyamo dupwa wakale wakale pyuo nyakana lao sukusa sukusa piyami.
LUK 5:16 Dopa piyaminyipape baa nyokonyuo yuu iki siyamo dokona ateŋa lalena papa piya.
LUK 5:17 Yuu gii mendepa Parisi akali lapope Mawa Pii mana lenge akali lapope yuu Galilipi yuu Jutiape dolapona anda malu repe repe pyuo pyuo karenge yuu dupwa peparaena karo yuu Jerusaleme karo epeyami dupwape baa mana lamaiyuo kareyamopa repeta dusa peteyami. Dokopa Kamongona pyuo nyingi renge raa lasi doko baa keta paleyamopa wambu pyuo nyepa pyuo kareya.
LUK 5:18 Dokopa akali lapome akali papae rambungi mende palu isa paleta soo epeyamipya. Soo epapala Yesunya lenge kambu dokona retamwali lao andakare dokona apa pyuo parama lao kareyami.
LUK 5:19 Wambu malu anda kambu doko kete piyamosa akali doko soo andakare panya saka napala andeyangi dokona papala kana para dupwame anda yangi kaoyami lapo nyuo kakondapala wambu kareyaminyi dokona sukusa Yesunya lenge kambu dokona akali doko palu isa paleta isa malyiyami.
LUK 5:20 Dokopa akali dusipame baa kapa lete nyakara ingilyamo lao suu pyapala soo epeyaminyi doko kandapala Yesumi dopa leya. Puu minyingi embena koo dupwa kame sakao kaeyasi silyamo leya.
LUK 5:21 Leyamo dokopa Mawa Pii mana lamaiyuo karenge akali dupwape Parisi akali dupwape monarena suu pyanyi pyano lao piso, Anatunya lenge kambu dokona kokwa soo letamo doko apisi? Apimi koo dupwa kapa nyuo kame soo kaeyakamira ingilyase? Anatu baa iki kapa kame soo kaeyakamingi, suu pyao peteyami.
LUK 5:22 Nakamana monarename dopa lao suu pyanyi pyano peteyaminyi doko Yesumi kando sepala nakama lamaiyuo dopa leya. Akipamo nakama monarena dopa lao suu pyanyi pyano petaminyi?
LUK 5:23 Yulu anjuku doko awa awa pyuo pingisi? Nambame banya koo dupwa kame sakamyuo kaeyasi silyamo lapu doko awa awa pyuo pingi panda sipurapala pena laro doko awa awa pyuo pingisi?
LUK 5:24 Doko Ikinyingi Akali renge palyuo koo dupwa isa yuu dakena kapa nyuo kame soo kaeyakamira nakama selapa lao akali dake pyuo nyilyu, leya. Lapala akali papae rambungi lamaiyuo, Emba sipurapala embena palu isa doko nyuo soo anda puu, leya.
LUK 5:25 Dopa leyamo dokopa nakama kandaro peteyaminyipa akali doko aopa sipurapala luu palenge doko nyuo soo Anatu lakando anda peya.
LUK 5:26 Dopa piyamo dokopa nakama peparae ama mona nembapala Anatu lakando pakame kumuo, renge andakende pipyamo kando yamarangulyamano, leyami.
LUK 5:27 Dopa piyamo dokopa enakana baa kama papala takisi nyingi akali mende kingi Lipae lenge doko takisi nyingi anda dokona peteyamo kandeya. Kandapala, Namba paronuli pyuo ipu, lamaiya.
LUK 5:28 Dopa leyamo dokopa Lipae sipurapala banya bange peparae yaki nyuo peyamuli pyuo peya.
LUK 5:29 Dokopa Lipaeme Yesu nenge andake piya. Piyamopa takisi nyingi akali yango lapope wambu wakale lapope epena lapala banya anda dokona role pyao nao peteyami.
LUK 5:30 Nao peteyami dokopa Parisi akali dupwape dee nakamana Mawa Pii mana lao karenge akali dupwape nakamame banya disaepole dupwa kando mumu lao dopa leyami. Akipamo nakama takisi nyingi akali dupwape yulu koo pingi akali dupwape role pyao nengepe waene ipwangepe nao petaminyi? leyami.
LUK 5:31 Dokopa Yesumi nakama isingi lamaiya. Wambu mee karenge dupwa dokotame pyuo elya pyakana laa nange. Anga pingi dupwa iki dokotame pyuo nyinya lao penge.
LUK 5:32 Dokona ingyuo namba rolae pingi wambu dupwa mona enenge palyuo karena lala epeyonde daa. Yulu koo pingi dupwa nakama mona enenge palyuo karalapape lao epelyo leya.
LUK 5:33 Dokopa nakamame baa dopa lamaiyami. Jonena disaepole dupwa Parisinya disaepole dupwa opetae yuu lapo nenge naa nao ateŋa lao petenge doko suu pyao akipamo embena disaepole dupwame doko pii napala nengepe waene ipwangepe nao petengese? leyami.
LUK 5:34 Dokopa Yesumi nakama lamaiya. Akali mende enda nyeramo dokopa wambu nenge nala epapala yalya kando pisirami doko akali enda nyeramo dokona puu minyingi dupwa nenge wasaka pirami ingilyase?
LUK 5:35 Yuu gii mende pyaka seramo dokopa enda nyeramo akali doko nakama yaki nyepala para. Paramo yuu gii dusipana nenge naa nao pisirami, kongwalu palyuo leya.
LUK 5:36 Lapala kongwalu pii mende opetae nakama lamaiya. Doko wambu mendeme komau enenge mende nyuo dokopa kangu lama nyepala komau wambarae rokwasi dokona palyapala kii pii nange kandale. Dopa pyuo pira ramo doko komau enenge palyaramo doko komau wambaraepa kapa kapa ingya naramopa mee kwaera. Komau enenge dokona roko nyiyamo doko mee ukiaki minyarasa pira.
LUK 5:37 Dee, wambu mendeme kipwa pee mena yanenge wasisinde wambarae dokona waene ipwange enenge kyano pii nange. Dopa pira ramo dokopa waene ipwange enenge dokome kipwa pee wambarae dokona paliramopa pee doko enakana poro lara. Dokopa waene ipwange doko isa paramopa kipwa pee mee poro lasi sera.
LUK 5:38 Doko waene ipwange enenge doko kipwa pee enenge dokona kyano pipingi.
LUK 5:39 Dee, wambu mendeme waene ipwange wambarae napala dokopa enakana enenge kyakange napuli lao suu pyaa nara. Dokona lao wambarae doko ama keyange lara leya.
LUK 6:1 Koro petenge mendepa witi jingi ee dupwana sukusa kata dokona peyamo dokopa banya disaepole dupwame witi jingi lyepala imbu doko minjuku minyuo nembapala angi neyami.
LUK 6:2 Dopa piyaminyi dokopa Parisi akali lapome, Akipamo nakamame koro petenge dokopa yulu kapa pii nange pilyaminyi? leyami.
LUK 6:3 Dokopa Yesumi dopa isingi leya. Dapiti lopo piyamo dokopa banya akali dupwa pipya mende piyami pii doko pyasi palamo doko nakamame kando yaka laa nangese?
LUK 6:4 Baame Anatunya anda kolando papala borete Anatunya lao retenge doko purisi akali dokome iki kapa nenge, mee akali kapa naa nange, dokona lapo nyuo nao akali baa role pyao kareyami dupwa opetae mokwa soo maiya leya.
LUK 6:5 Lapala nakama dopa lamaiya. Ikinyingi Akali baa koro petenge dokona Kamongo karamo, leya.
LUK 6:6 Koro petenge dee mendena sinakoke anda kolandapala mana lao kareyamo dokopa akali mende banya kingi anjikipwa nenge peteya.
LUK 6:7 Dokopa Mawa Pii mana lenge akalipi Parisi akalipi lapo peteyaminyi dupwame baame akali doko koro petenge dokopa pyuo elya pyuo nyakamirape lao kambuyanda pimana lao kando peteyami.
LUK 6:8 Dopa lao kando peteyaminyipa baame nakama dopa lao suu pyao pisaminyilyamo lao soo gisiya. Soo gisapala akali kingi anjikipwa nenge doko lamaiyuo, Dae karala ipu leya. Dokopa baa sipurapala dokona pao kareya.
LUK 6:9 Dokopa Yesumi nakama dopa lamaiya. Nakama mende piso silyu. Koro petenge gii dokopa wambu pyuo mondo lao nyingi panda kokwa singipi? Nyiso lete nyingi panda pyao kumakangepe, anjuku doko kapa pingi? leya.
LUK 6:10 Lapala baame nakama peparae kandayoyo lapala akali doko kando, Embena kingi pyasinju lena, leya. Dopa leyamo dokopa pyasinju leyamopa banya kingi mee ingiya.
LUK 6:11 Mee ingiyamopa nakamame imbumi kumapala range sukusa lao Yesu dokona apa pirama lao wato leyami.
LUK 6:12 Yuu gii dusipana yuu kyau pyalya pyana piyamo dokona ateŋa lala peya. Papala kukwa Anatu kando ateŋa lao piso yuu doko yango nyiya.
LUK 6:13 Yuu yangeyamo dokopa banya disaepole dupwa epena lalapa akalisa ipisu lama rombo palyapala nakama kingi aposele leya.
LUK 6:14 Saimone baame kingi mende Pita leya dokomoo banya yangonge Endurumoo Jemesamoo Jonemoo Pilipamoo Batolomyumoo
LUK 6:15 Matyumoo Tomasamoo Jemesa Aopiasana ikinyingi dokomoo Saimone kingi mende Selote lenge dokomoo Jutasa Jemesana ikinyingi dokomoo Jutasa Isakeriote Yesu mata kando leya dokomoo pipa Yesumi rombo palyiya.
LUK 6:17 Dokopa baamoo nakama pipya role pyao lupyuo epo yuu lama kanya koe mendena kareyami. Dokopa banya disaepole malu mee dupwape wambu yuu Jutia peparaena karenge dupwape yuu Jerusaleme range dupwape ipwa kota pete nemba nemba yuu Tayape yuu Saitonepe range dupwape ama malu yuu lama dokona malu palyiyami.
LUK 6:18 Nakamame banya pii soo anga renge wakale wakale dupwa baa nembakapyali lao epo kareyami. Dokopa wambu imambu koo dupwame randa maiyuo kareyamo kareyami dupwa baame pyuo nyiya.
LUK 6:19 Renge porai doko baa keta palyuo epapala nakama peparae pyuo nyepa piyasa wambu malu mee kareyami dupwa peparaeme baa minyandalana lao kareyami.
LUK 6:20 Dokopa baame lenge pendekae lapala banya disaepole dupwa kando dopa leya. Nakama wambu pendewa dupwa Anatunya isingi panda doko nakamana ingyara dokona lao rae maiyuo parami.
LUK 6:21 Epapu lopo pipyamopa karaminyi dupwa sikya piramo kararami dokona nakama raeko maiyuo parami. Epapu ee lao petaminyi dupwa nakama giyuo pisirami ingilyamo dokona nakama raeko maiyuo parami.
LUK 6:22 Ikinyingi Akali dokona reke lao karaminyi lapala wambu lapome nakama kando yulu koo pilyaminyi lao nakama awa nao mata joo kilya kando larami dokopa rae maiyuo parami.
LUK 6:23 Dopa piramo yuu gii dokopa rae maiyuo mona anda pyakalyuo pyao karalapape leto. Yake panda dokona bange angi kulisa nyerami lyakande. Nakamana rakange kyawa dupwame Anatunya poropeta akali dupwa dopako randa maipa pyuo pyuo kareyami.
LUK 6:24 Bange malu reto karaminyi dupwa nakama bange yangya napyasa dokona yuu gii mendasipa iki mona sipyamopa karaminyi enakana kwao parami.
LUK 6:25 Epapu sikya pipyamo karaminyi dupwa nakama lopo piramopa randa nao kararami ingilyamo. Epapu giyuo karaminyi dupwa nakama kondo ee lao randa nao kararami ingilyamo.
LUK 6:26 Nakamana rakange kyawa dupwame poropeta angi daa kyambo lenge dupwa kando lakandeyami. Dokona suu pyao akali dupwa peparaeme nakambasa kando lakandarami ramo doko nakamba randa nao kararami ingilyamo.
LUK 6:27 Dopa lapunupape nambana pii soo petaminyi dupwa kando dopa langilyu. Nakamana nyisu angae karenge wambu dupwa mona reto karo, wambumi nakama awa nao karaminyi dupwa yulu pyakamyuo karalapape.
LUK 6:28 Wambumi nakama keta koo palena letaminyi dupwa nakama keta keyange palena lakamyuo karo, wambumi nakama kando mokwalipi larami dupwa kando ateŋa lakamyuo pyuo karalapape.
LUK 6:29 Mendeme wakena paki pyapeya kande dokopa baame dee pakirena pinya kapu kyelapape. Komau ketae pee pingi doko waa nyiya kande dokopa dee isa pee pingi doko daa laa nalapape.
LUK 6:30 Wambu peparae bange jimili lao kee leyami kande dokopa maiyalapape. Mendeme nakamana bange nyepeya kande dokope dee range jinya lao laa nalapape.
LUK 6:31 Wambu dupwame emba nyiso pimili lao suu pilyaminyili pyuo pyuo nyiso karalapape.
LUK 6:32 Wambumi nakama kando mona reto karaminyi dupwa iki kando mona reto kararami ramo doko apa pyuo kata kando kararamisi? Dokona ingyuo wambu yulu koo pingi dupwa opetaeme wambu nakama mona reto karaminyi dupwa kando isingi monako reto karenge kandale.
LUK 6:33 Dee, wambu dupwame nakamana yulu pyakao karaminyi dupwana yulu iki isingi pyakamyuo kararami ramo doko apa pyuo kata kando kararamisi? Wambu koo pingi dupwa opetaeme dopako pyuo pyakamingi kandale.
LUK 6:34 Dokona suu pyao wambu bange retenge dupwame kee laraminyi, isingi nyero lao mairami ramo, doko apa pyuo kata kando kararamisi? Wambu koo pingi dupwa nakama opetaeme wambu koo pingi yango dupwa bange maiyuo dokopa dopakale isingi nyero lao maingi kandale.
LUK 6:35 Dopa pilyaminyipape nakamana nyisu angae karo karaminyi dupwa mona reto yulu pyakamyuo bange isingi nyero lao suu pyaa nao mee maiyuo karalapape. Dopa piraminyi dokopa yole kulisa nyerami. Dokopa Ama Ketae Karamo dokona ikinyingi ingyuo kararamisa pita. Baame wambu ange laa nao mee nyingi dupwape yulu koo pingi dupwape kando keyange pyakamyuo karenge.
LUK 6:36 Nakamana Rakane dokome kondo nyiso karenge doko suu pyao nakamame dopako pyuo kondo nyiso karalapape.
LUK 6:37 Wambu dupwa kando yapalya yapana pyuo suu pyao kara nalapape. Dopa pii narami ramo dokopa Anatumi nakama kando yapalya yapana pyuo suu pyao kara nara. Wambu yango mende kando koo karamo lao kara nalapape. Dopa pii narami ramo dokopa Anatumi nakama koo karaminyi lao kara nara. Wambu yango dupwana koo dupwa kame sakamyuo karalapape. Dopa pirami ramo dokopa Anatumi nakamana koo dupwa nyuo kame sakao kaeyara.
LUK 6:38 Wambu yango nyiso maiyalapape. Anatumi bange kuki pyuo isingi jii nara. Baa konda pyuo jeramopa nakamana nyuu dokona kulimbuo simbwaramopa lapo mee bolombalo lao isa para. Nakama wambu yango nyiso mairaminyi doko suu pyao Anatumi isingi manda manjo kingi kisara.
LUK 6:39 Kongwalu pii mende lamaiyuo dopa leya. Akali lenge koo mendeme lenge koo yango mende nyiso kapa lanyuo parase? Nakamba laparae suu mendena rukyala pao pali narambisi?
LUK 6:40 Disaepole mendeme banya mana lenge doko kando mupwa ingyuo kara nara. Enakana baa mana lamairaminyipa yulu dupwa peparae soo gisapala dokopa banya mana lenge dopaleko ingyuo karara.
LUK 6:41 Akipamo sinjimu kuki yango mendena lenge dokona palamo dokona kando lalana karo isa lomasi emba rangena lengena palamo doko see nalese?
LUK 6:42 Embena lenge dokona isa andake silyamo doko kanda napala doko apa pipala embena yangone lamaiyuo, Yangone, sinjimu kuki mende embena lenge dokona silyamo doko namba nyuo nembakaro larese? Emba yanengena mamba kiso lao karenge doko, wambo embena lenge dokona isa kameya silyamo doko range nyuo nembapala enakana embena yangonena lenge dokona sinjimu kuki silyamo doko kapa rolae kando nyuo nembakamiri.
LUK 6:43 Dokona suu pyao isa keyange dokome jingi koo lyii nange. Isa mende koo dokome jingi keyange lyii nangeko.
LUK 6:44 Isa dupwa peparaena jingi dupwa kando dokopa isa doko keyangelamo lao isa doko koolamo lao namwa soo gisingi. Doko suu pyao nepereke dokona piki jingi lyii nange. Girapo isa mende ikyaikya dokona lyii nangeko.
LUK 6:45 Wambu mona palenge dupwa mona anda keyange paliramuli pyuo eparamo karara. Wambu koo dupwana monarena koo paliramuli pyuo eparamo kararako. Dokona ingyuo wambu monarena palyuo simbwaro seramuli pyuo nyuo larasa pira.
LUK 6:46 Akipamo embame namba kando, Kamongo, Kamongo, lapala nambame dopa pyuo karape dopa pyuo karape letonuli pyuo pyuo kara nalene?
LUK 6:47 Wambu mende namba karo dokona epapala dokopa nambana pii soo nyepala warombo soo kararami dupwa apiyakale lao pano langiru. Baa akali anda piyamo dopale makande minyuo leto.
LUK 6:48 Akali mendeme anda pinya dokopa yuwale andake kyasipala kana koko pisu petenge mende kando nyepala dokona kana anda isarename retenge dupwa retapala anda doko ketae piya. Apu andake epo ipwa kama pyapala anda doko lalyuo soo panya piyamopa anda mondo lao piyamo dokome poraiya.
LUK 6:49 Dee wambu nambana pii sepala dokopa warombo see narami dupwa nakama akali mendeme anda pinya dokopa kana isarename retenge dupwa reta napala mee yuunya anda piyamo dopale. Anda doko ipwa dokome pyao lalyuo selana piyamo dokopa aopa lalyiya. Dokopa anda doko koo keta palyuo pyao lalyiyaŋa leya.
LUK 7:1 Wambu soo peteyaminyipa baa pii malu dupwa peparae lamaiyuo otapala yuu Kapaneame dokona sukusa peya.
LUK 7:2 Dokopa yanda singi mupwa mendena kendemande akali mona reto karengende doko anga piyamopa kumalana siya.
LUK 7:3 Baame Yesu wambu pyuo nyingi doko sepala Juu wambu dupwana rapu pingi akali lapo Yesumi banya kendemande akali doko pyuo nyakala epena lao baa kareyamo dokona nakama piso sela pena leya.
LUK 7:4 Dokopa Yesu kareyamo dokona epapala baa piso sokondali pyuo dopa lamaiyami. Baa akali keyange dokona emba kapa nyisapenge ingilyamo leyami.
LUK 7:5 Baame namwana rara dupwa mona reto karo baame namwana sinakoke anda pyakaya akali doko lyakande, leyami.
LUK 7:6 Dokopa Yesu nakama role pyao peyami. Pao baa anda repeta peyamo dokopa yanda singi mupwa dokome puu minyingi lapo baa kareyamo dokona pena lao dopa lamaiyakao lena leya. Emba makare, epa kae. Namba kwao karo dokona nambana anda andakare dokona eparene doko kapa ingya nalyamo.
LUK 7:7 Dokona namba opetae emba karene dokona kapa epa naroko lao suu pyapala epa napu. Doko embame mee pii lao dokopa, nambana kendemande akali mee inginya lakape.
LUK 7:8 Dokona ingyuo yanda singi mupwa lapome namba rapu pyuo karaminyipa nambame mee yanda singi dupwa rapu pyuo karo. Rapu pyuo karo dokopa mendali lamaiyuo, Emba puu lenge dokopa baa penge. Mendali lamaiyuo, Emba ipu lenge dokopa baa epenge. Nambana kendemande akali lamaiyuo, Emba dopa pii lenge dokopa baa dopa pyuo pingi, leya.
LUK 7:9 Dopa leyamo pii doko sepala Yesumi baa kando yako leya. Yako lapala kapu kyepala wambu matarename rukuraka pyuo epeyami dupwa lamaiyuo, Nakama dopa langilyu, baa Anatu kapa ingingi lao wakasa suu pilyamo doko Isaraele akali mendeme suu pingi dopale baapa kapa kapa pyuo manja nange doko soo gisilyu leya.
LUK 7:10 Dokopa akali epeyami dusipa kapu kyuo anda papala kendemande akali baa mee ingiyamo siyamo kandeyami.
LUK 7:11 Yuu gii kuki lama epo papeyamopa yuu taone mende Nena lenge dokona peya. Peyamo dokopa banya disaepole dupwa pipya wambu ama malu role pyao peyami.
LUK 7:12 Anda malu palyuo karenge dokona anda dupwa nyuo sukusa pyambuo kana kame piyami dokona kambu repeta epeyamo dokopa akali mende kumuyasa soo neta epeyami. Akali dokona endangi baa iki mandeyamopa akalingi kumuyasa baa enda waiya peteya. Epeyami dokopa anda malu palyuo karenge dokona palenge wambu malu mee dupwa enda doko role pyao epeyami.
LUK 7:13 Dokopa Kamongo dokome enda doko kandapala baa kondaya. Kondapala baa lamaiyuo, Ee laa kae, leya.
LUK 7:14 Lapala palu isa epo minyandeya. Minyandeyamo dokopa soo epeyaminyi dupwa sakaro kareyami. Dokopa baame dopa leya. Wanyane akali, nambame emba sipurape langilyu, leya.
LUK 7:15 Dokopa akali kumasi siyamo doko roya pisipala pii lao peteya. Dokopa Yesumi baa endangi dokona range maiya.
LUK 7:16 Dokopa wambu peparae pakame kumuyami. Pakame kumapala Anatu lakando dopa leyami. Anatunya poropeta akali kameya mende namwa petamano dakena sukusa sipurapyalyamo, Anatumi banya wambu dupwa epo nyisapyalyamo leyami.
LUK 7:17 Baasa kando lasi pii doko yuu Jutia peparae dupwanape yuu kipwa kipwa peparae dupwanape lao kapakapa piyami.
LUK 7:18 Dokopa Jonena disaepole dupwame Yesu baa dopa pilyamo dopa pilyamo lao pii peparae Jone lamaiyami.
LUK 7:19 Dokopa Joneme banya disaepole kareyami dupwana lama epena lapala Kamongo kareyamo dokona pena lao dopa lamainya leya. Mendali epara ingilyamo lao karo doko emba panda wakale mendali epelyape lao koto kandaramase? leya.
LUK 7:20 Dokopa akali dolapo baa kareyamo dokona papala dopa leyambi. Jone bapitisimo nyakamaingi dokona pii manjakamyuo epelyambano. Doko mendali epara ingilyamo lao karamo doko emba panda wakale mendali epelyape lao koto kandaramase? lao lamaiyala pupwa lapyasa epelyambano leyambi.
LUK 7:21 Yuu gii dokopa anga piyamo dupwape yanengena randa neyami dupwape imambu koo palenge dupwape renge wakale wakale malu dupwa baame pyuo nyepa piya. Dokopa wambu lenge kwaeyalu kwaeyo kwaenge malu dupwa lenge rena lao pyuo nyepa piyako.
LUK 7:22 Dokopa baame nakamba isingi lamaiyuo, Kando simbinyi dupwa Jone lamaiye pupwape. Lenge kwaeyalu kwaeyo kwaenge dupwa kapa kandelyaminyi, kimbu koo dupwa kata papilyaminyi, rapa nenge dupwa rapa loo lapyamopa mee karaminyi, akali kale poenge dupwa pii silyaminyi, kumasi simi dupwa lete karaminyi, wambu pendewa dupwa waili pii keyange boo pyamwanopa soo karaminyi.
LUK 7:23 Mendeme suu pingi lamana manjo kara naramo doko baa rae maiyuo karena.
LUK 7:24 Lapala Jonena waili akali dolapo papeyambinyipa baame wambu malu kareyami dupwa kando Jonesa lao dopa leya. Nakamame yuu muiyane dokona aki mende kandala peyamisi? Poraiya minyiyamopa kungunali puu romo romo pilyamo doko kandala peyamisi?
LUK 7:25 Renge anjukusi kandala neta peyamisi? Akali komau keyange wapunginde kandala peyamisi? Wambu komau keyange au pyuo kalya pisi wapuo karo nengepe bangepe ama malu sipyamopa karaminyi dupa kiŋinya anda dupwana karenge kandale.
LUK 7:26 Doko aki kandala neta peyamisi? Anatunya poropeta akali mende kandala peyamisi? Kinyi langilyu, baa Anatumi poropeta yulu dokonako iki pinginde daa. Baa yulu mende opetae pyuo karenge.
LUK 7:27 Anatunya pii pyasi mende Jone dokona suu pyao dopa letamo. Embena lenge kambu silyamo dokona nambana waili akali wambo pena leto kande. Baa wamo embena kata mondo lao para, lao palamo.
LUK 7:28 Dopa langilyu, endame wane mandenge dokona mendeme Jone dokopa wakasa ingyuo kara nange. Kara nalyaminyuoko doŋo Anatunya isingi yulu palamo dokona sukusa papala wambu kama kuki ingyuo karaminyi dupwame Jone kando wakasa ingyuo karaminyi.
LUK 7:29 Joneme pii lao kareyamo doko sepala mee wambu dupwa peparaepe takisi nyingi akali dupwape Anatu suu piyamuli pyuo Jone kareyamo dokona peyaminyipa baame nakama bapitisimo nyakamiya.
LUK 7:30 Dopa leyaminyipape Parisi akali dupwape Mawa Pii soo gisingi akali dupwape Anatumi nakama pyakamipuli lao suu pyao kareyamo doko kaepala Jone keta bapitisimo nyii napala daa leyami.
LUK 7:31 Epapu karaminyi wambu dupwa aki mendena pyuo pirose? Nakama apiyakale?
LUK 7:32 Nakama wane wanakepe mali lyingi kamapi dokona male lao karaminyi dopale ingilyamo. Nakama mendeme mende kando dopa pyuo lamaiyuo namwa lakuli pyakao karamwano dokopa nakama mali lyii nami, namwa ee lao kumaralerale nyuo pisimwano dokopa nakama ee laa nami, letaminyi.
LUK 7:33 Dokona lao Jone bapitisimo nyakamaingi doko epapala nenge wasaka pyuo waene ipwange naa nao karenge dokome baa kopyali minyilyamo lao karaminyi.
LUK 7:34 Ikinyingi Akali epapala nenge nao waene ipwange nao karenge dokome baa nenge nyura nao waene ipwange malu nao karapyamo kyawa sisingi bolombalo lapyamo takisi nyingi akalipi yulu koo pingi wambupi dupwana puu minyingi kandale dokoŋo kandalapa letaminyi.
LUK 7:35 Dopa laminyipape suu pingi rolae karengena wane wanakepe dupwa peparaeme renge doko angi kinyilyamo doko soo nyilyaminyi leya.
LUK 7:36 Parisi akali mendeme baa nenge nambanale leyasa Yesu akali dokona anda papala taepo repeta peteya.
LUK 7:37 Dokopa yuu taone dokona enda pamakae yulu koo pingi mende peteyamo doko baa Parisinya anda dokona taepo repeta pisipyalyamo lao sepala pee mende rendamu pingi mamba lapo paleta minyuo epeya.
LUK 7:38 Epo matarena Yesunya kimbu siyamo dorena ee lao kareyara banya ee ipwange Yesunya kimbu dokona lyuo peteya. Dokopa enda dokome banya kyawasi dokome ee ipwange pyao nembo banya kimbu nyinyi pyuo mamba kisakamyuo peteya.
LUK 7:39 Dopa piyamo dokopa Parisi akali baa nenge nambana epena leyamo dokome dopa pilyamo lao kandapala mona anda dorena, Baa Anatunya poropeta akali ingyuo karapyali doko enda baa minyandelyamo doko yulu koo pingi ingilyamo dokona baa api lao baa apa pyuonde lao kando soo giso karapyali suu pyao peteya.
LUK 7:40 Dokopa Yesumi baa lamaiyuo dopa leya. Saimone, nambame emba mende langiru leya. Dokopa, Mana Lenge, apa langiri? leya.
LUK 7:41 Dokopa Yesumi dopa leya. Akali lamame akali mende dokona kana lapo kee lao nyiyambi. Mende kina malu (500) kee lao nyuo mende kina 50 nyuo piyambi.
LUK 7:42 Nakambame baa isingi maiyalana saka nayami dokopa baame nakamba isingi jii narambi lao kaepala kaeya. Dokona suu pyao akali anjukusi baa wakasa mona reto kararase? leya.
LUK 7:43 Dokopa Saimone isingi lao, Mendeme kana malu nyepala range jii nana leyamopa koo soo peya akali doko rapisi? leya. Dokopa baame baa dopa lamaiyuo, Emba angi leene leya.
LUK 7:44 Lapala enda kareyamo dorena kapu kyepala baame Saimone dopa lamaiya, Enda dake kandelese? Namba embena anda ipunu dokopa kimbu wate pyaase lao ipwa jii napi kandapi. Jii napinyipape enda dokome nambana kimbu ee ipwange dokome wate pyakapala banya kyawasi dokome pyao nembakapya.
LUK 7:45 Embame namba nyinyi pyaka napi kandapi. Pyaka napinyipa namba wamba kolando ipu gii dokopa baame nambana kimbu nyinyi pyuo kaeya nao pyuo petamo.
LUK 7:46 Kyawa mamba lapo kisare lao jii napi kandapi. Jii napinyipape baame nambana kimbu mamba kyaa keyange pingi dokome kisakapya.
LUK 7:47 Dokona lao langilyu, Enda doko banya yulu koo malu piyamo dupwa kame sakamisi sipyamosa namba mona wakasa reto karo yulu andake pipyalyamo leya. Pipyamopa mendeme yulu koo kuki lama pirami dupwa kame sakamisi sera ramo doko kuki pyuo mona retarami, leya.
LUK 7:48 Lapala baame enda doko lamaiyuo, Embena koo dupwa kame sakasi silyamo leya.
LUK 7:49 Dopa leyamo dokopa wambu baa role pyao taepo repeta peteyaminyi dupwame nakama lao, Koo dupwa kame sakamyuoko karamo doko apisi? leyami.
LUK 7:50 Dokopa baame enda lamaiyuo, Embame Anatu kapa ingingi lao suu pyapi dokona lete wai pyao nyisi mona seramopa pupi, leya.
LUK 8:1 Enakana yuu kuki lama epo papeyamopa Yesu yuu taone lapope anda kuki lama karengepe dupwana papyuo Anatunya isingi yulu dokona lao waili pii keyange doko minyuo boo pyao lao papiya. Dokopa akali akalisa ipisu lama kareyami dupwa baa role pyao papiyami.
LUK 8:2 Enda lapo imambu koo paleyamopa anga piyamopa peteyaminyi baame pyuo nyiya dusipa opetae baa role pyao papiyami. Maria yuu Makatala range baa imambu koo yanda ipingi nyero palipala yaki nyuo peya dokomoo
LUK 8:3 akali Susa Erotena yulu rapu pyakamyuo kareya dokona etenge Joana lenge dokomoo Susanamoo enda lapo opetaepeme nakamana kana siyamo dokona pingyu nyuo nakamame baa kapa karena lao nenge piyami.
LUK 8:4 Dokopa wambu malu mee sukusa sukusa pipala dee wambu taone wakale dupwa palenge range baa kareyamo dokona epo kareyaminyipa baame kongwalu pii lao dopa leya.
LUK 8:5 Akali mendeme banya ee waingi randa lala peyapya. Baame ee waingi pyao pyale pyale lao randa leyamo dokopa waingi lapo kata dokona peyasa kimbumi kalyuo peyaminyipa yaka dupwa epo napeyami.
LUK 8:6 Dee waingi lapo kana dupwana peya. Papala ipwa see nayasa kene pyapala yando neya.
LUK 8:7 Dee waingi lapo ikyaikya siyamo dokona pao siya. Soo andeyamo dokopa ikyaikya role pyao andapala lungwa lungwapala pyao neya.
LUK 8:8 Dokopa waingi lapo yuu keyange dokona peya. Papala andapala jingi akalisa akalisa pao akalisa lyiya, leya. Lapala pii poraiyuo lao, Kale kata singi ramo dokome pii dake selapape leya.
LUK 8:9 Enakana disaepole dupwame kongwalu pii leyamo doko renge akipi lao piso siyami dokopa baame dopa leya.
LUK 8:10 Anatunya isingi yulu dokona lao pii renge yalu pyuo singi dupwa nakama kapa serami. Wambu menge doloma kongwalu pii doko iki serami dokome kandapala angingyuo kandapa narami, kalena ketae sepala angi soo gisa narami.
LUK 8:11 Kongwalu pii dokona renge polo langirowale. Waingi doko Anatunya pii dopale.
LUK 8:12 Waingi katasa pao siya doko suu pyao wambu lapo pii doko sepala karaminyi dokopa Satane dokome Anatu suu pyaa naraminyisa lete pyuo nyii napyali lao epo pii monarena silyamo doko raka lanyi nembenge.
LUK 8:13 Waingi lapo kana dupwana ketae peya doko suu pyao wambu lapo pii doko soo dokopa mona pyakalyuo pyao singi. Enakana yuu kuki lama epo pelyamopa pii doko nakamana mona anda pingi pyaa nalyamosa enakana pyakuingi.
LUK 8:14 Waingi ikyaikya dokona peya dupwa wambu lapo nambana pii soo nyingi doko makande minyuo letamo. Pii doko sepala piso palyuo pyuo karenge dokopa isa yuunya suu pingipi isa bange dupwa mona nyuo karengepe yanengena rae maingi yulu dupwana poraiyuo suu pyao karengepe dupwame monarena isa pyakuiyuo nyilyamopa nakama keta yulu angi doko ando nyimbwa nange.
LUK 8:15 Waingi lapo yuu keyange dokona pao sepala jingi keyange anda lyiya doko suu pyao wambu lapo pii doko sepala mona dokona karalunji nembo gii lao minyuo karo yulu angi rape rape lao pyuo karenge doko jingi keyange lyingi dopale.
LUK 8:16 Wambu mendeme lambe kaipala dokopa pee mende nyepala nee pyuo sera nange. Dopa pyuo luu palenge rate lungwa lungwa dokona reto pii napala wambu lapo andakare eparaminyi dupwa kapa kandarami lao lambe singi rate dokona retenge.
LUK 8:17 Yalu pyuo singi dupwa peparae kapa kandarami. Nee pyuo silyamo dupwa kando nyeparaminyi panasi sera.
LUK 8:18 Dokona nakama wangu lakapala selapape. Dokona lao mendeme Anatunya pii dokona nyiya lao wangu lakapala sera ramo doko Anatumi maiyuo konda pira. Wangu lakapala sepa nara ramo doko kuki lama kapa sepelyo lao suu pyaramopape Anatumi baa soo nyiya dolapo range nyera, leya.
LUK 8:19 Dokopa banya endangimoo yangonge dupwa pipya baa kareyamo dokona epapala wambu malu mee baa nyuo sukusa pyambuyamisa baa angi kandala sukusa panya saka nayami.
LUK 8:20 Dokopa baa lamaiyuo, Embena endakinyi yangonepe emba koto epo kama karaminyi leyami.
LUK 8:21 Dokopa baame nakama dopa lamaiya. Anatumi letamuli pyuo karaminyi dupwa nambana endangi yangongepe lyakande leya.
LUK 8:22 Yuu mendepa baa banya disaepole dupwa pipya bote mendena pyakambwapala piso baame nakama lamaiyuo, Ipwa pete dumurena mwua leya. Dopa leyamo dokopa nakama panya peyami.
LUK 8:23 Peyami dokopa baa lenge luu piyasa luu paleya. Dokopa raiyapambake yuu kyau dokona piso ipwa dokona minyuo epeyamopa ipwa dokome botena simbwapala nakama ipwa dokona yalyalana piyami.
LUK 8:24 Dopa piyamo dokopa nakamame baa pyalerapala, Rapu Pingi, Rapu Pingi, namwa kumulyamano leyami. Dokopa baa lenge rapala porambaiye dokope ipwa ama ranjo pulyuo epapa piya dokope kando kaena leya. Leyamo dokopa pyai nao rali pipala koo pyuku pyuku peya.
LUK 8:25 Dokopa baame nakama lamaiyuo, Nakamana Anatu kapa nyisara lao suu pingi doko isa nembamipi? leya. Dokopa nakama pakao piso yango sukusa lao, Porambaiye ipwapa banya pii letamuli pyuo sakamingilyamo. Baa aki akali? lao mona nembo peteyami.
LUK 8:26 Gekesa akalinya yuu dokona yuu Galili dumwangurena siyamo dokona epo pyaka siyami.
LUK 8:27 Dokopa baa yuu dokona pyakambuyamo dokopa akali mende anda taone dokona kopyali imambu koome soo pyale leyamo karenge doko Yesu baa kareyamo dokona epeya. Baa yuu wambana papara karo andana pali nao yanyanda dupwana palyuo karenge.
LUK 8:28 Baame Yesu kandapala ala lao banya lenge kambu dokona pao isa sepala pii poraiyuo lao dopa leya. Yesu ketae dulu Anatunya Ikinyingi doko embame namba kando apa piri. Namba randa jii napili yaka lao piso sokondali pilyu? leya.
LUK 8:29 Yesu baame imambu koo doko akali dokona rekya lanyi yaki nyepala pena leyasa dokopa pii doko leya. Wamba yuu malu imambu koo dokome akali doko epo maralyapa piya. Wambu dupwame baa puu sanepe anakapopeme puu maipa piyaminyipa rokwanyi peyarapu imambu koo dokome baa kyakanyi nembeyamopa yuu muiyane dokona ralo papa piya.
LUK 8:30 Yesumi baa kando, Emba kingi api lengese? leya. Dokopa, Namba Yuwalyu lenge, leya. Imambu koo malu mee baa keta maralyiyamo dokona kingi doko leya.
LUK 8:31 Dokopa imambu dupwame dee yuu koko dorena kala pupwa laa napyali yaka lao lamaiyuokondali piyami.
LUK 8:32 Dokopa yuu kyau kanya koe dokona mena malu kambu nao kareyami. Dokopa imambu koo dupwame mena karaminyi dupwana kapa maralyalapa lapyali yaka lao lamaiyuokondali piyami. Dopa leyami dokopa Yesumi kapa leya.
LUK 8:33 Dokopa imambu koo dupwa akali doko yaki nyepala mena dupwana pao maralyiyaminyipa mena dupwa makandapala rondo dokona alayuwa lapala ipwa pete dokona pao yalyapala kumuyami.
LUK 8:34 Dokopa mena rapu pingi akali dupwame dopa piyamo kandapala bolombalo lao pao taone dokonape dee mee yuu dupwanape papala wambu peparae lamaiyuo piyami.
LUK 8:35 Dopa piyamisa wambu dupwa kandala epeyami. Epo Yesu kareya dokona epapala akali imambu koo dupwa rekya lao peyamo doko Yesunya kimbu siyamo dokona komau wapuo banya suu pingi doko rolae paleyamopa peteyamo kandeyami. Kandapala pakayami.
LUK 8:36 Dokopa angi kandeyami dupwame nakama lamaiyuo akali imambu koo maralyipyamo karapya doko dopa pyuo dopa pyuo pyuo nyipya lao rolo lamaiyami.
LUK 8:37 Dokopa yuu Gekesa kipwa kipwa dupwana range dupwa peparaeme pakame kumapala baa kaepala pupyali yaka lao lamaiyuokondali piyami. Dokopa bote dokona pyakambwapala kapu kyuo peya.
LUK 8:38 Akali imambu koo dupwa yaki nyiyami dokome baa poraiyuo lamaiyuo, Emba role pyao pumbwali yaka leya. Leyamopape baa pena lao,
LUK 8:39 Emba anda range papala Anatumi dopa pyakapyamopa epelyo lao lamaiyuo puu, leya. Dopa leyamo dokopa baa anda repe repe pyuo kareyamo dupwa peparaena papyuo, Yesumi dopa pyakapyamo epelyo, lao boo pyao lamaiyuo kareya.
LUK 8:40 Yesu kapu kyepala dee laeyo epeyamo dokopa wambu malu rukuraka pyuo karo baa yako lao nyiyami. Baa epelyape lao dokona iso kareyami.
LUK 8:41 Dokopa akali mende kingi Jairasa lenge sinakoke anda rapu pyuo karenge doko epeya. Epapala Yesunya kimbu siyamo dokona pangu sepala banya anda dokona emba ipili yaka lao kongo pyuo lamaiya.
LUK 8:42 Renge dokona banya wanenge mendaki mandeya doko ee kana akalisa ipisu lama ingyuowale peteya doko kumasi siya. Yesu katasa peyamo dokopa wambu dupwa rambuki nyinyi pyambuo kako pyao peyamuli pyuo peyami.
LUK 8:43 Dokopa enda mende ee kana akalisa ipisu lama endana doko ipwa ingyuo guu lao kareyamopa peteya. Wakale dupwame baa mee inginya lao pyuo nyelana saka nayami.
LUK 8:44 Enda dokome Yesu matarena epapala banya komau pinjingi doko minyandeya. Dokopa endana doko sokwalepo piya.
LUK 8:45 Dokopa Yesumi, Apimi namba minyandalamo? leya. Wambu peparaeme minyanda nalamano leyaminyi dokopa Pitamoo akali baa role pyao kareyami dupwapeme lao, Rapu Pingi, wambu malu mee rukuraka pyuo emba kako pyao rambuki nyinyi pyambuo epami kandapi leyami.
LUK 8:46 Dopa leyaminyipa Yesumi lao, Wambu mendeme namba minyandalamo. Nambana porainya renge lapo neta paamolyamo doko silyu leya.
LUK 8:47 Dokopa enda baa kapa yalu pyuo kara naro doko kandapala walu walu lao epapala banya lenge kambu dokona pangu sepala wambu peparae soo kareyaminyipa, baa minyandeya renge dokona polo lamaipala anga mee ingyalamo lao pano leya.
LUK 8:48 Dokopa Yesumi baa lamaiyuo, Rakane, embame namba kapa pyuo nyakare lao suu pyapi dokome mee ingyalamo. Mona seramopa pupi, leya.
LUK 8:49 Baa ene lao kareyamo dokopa rapu pingi Jairasa dokona anda palenge akali mende epapala, Embena wanake baa lenge kunjalamoŋo. Mana Lenge doko dae epena laa napipi leya.
LUK 8:50 Dopa leyamopa Yesumi pii doko sepala baa dopa lamaiya. Emba paka kae. Kapa pira ingilyamo lao suu pyao karape. Wanake baa mee ingyara, leya.
LUK 8:51 Lapala anda doko kando nyepala Pitamoo Jone Jemesa wanakena endangi rakange dolapomoo dusipa iki andakare monaleŋe wambu menge dupwa epa kaena leya.
LUK 8:52 Wambu dupwa peparae wanake dokona lao ee lao kumaralerale nyuo kareyami. Dopa pyuo kareyaminyipape baame lao, Ee laa kaeyalapa. Baa kuma napya. Mee luu palyuo sipyamo pilyamo, leya.
LUK 8:53 Dopa leyamo dokopa nakamame wanake doko kumapyalyamo lao soo gisapala baa kando giili giili leyami.
LUK 8:54 Dopa piyaminyipape wanakena kingi minyapala, Wanake, emba sipurape lao kee leya.
LUK 8:55 Dokopa wanake dokome imambu doko dee epo paleyasa baa aopa sipureya. Dokopa Yesumi baa nenge mende mainya leya.
LUK 8:56 Dokopa banya endangi rakangepa mona nembo kareyambi. Mona nembo kareyambinyipape dopa pipya lao mendali lamaiya nana lao lamaiyuokondali piya.
LUK 9:1 Yesumi akali akalisa ipisu lama dusipa baa kareyamo dokona epena lapala nakama renge palyuo karo imambu koo dupwa peparae raka lanyi nembo anga pingi wakale wakale dupwa pyuo nyuo kararami lao renge porai doko nakama keta palena lao maiya.
LUK 9:2 Maipala Anatunya isingi yulu dokona boo pyao, anga pingi dupwa pyuo nyuo papyuo karena leya.
LUK 9:3 Papyuo karena lao nakama dopa lamaiya. Pangali minya nao, nyuukwuanyi manja nao, nenge minya nao, kana manja nao, komau apetapala manja nao mee pupwape, leya.
LUK 9:4 Mee papala anda mendena kolandarami ramo dokonako palyuo karalapape. Enakana yuu mendasa panya kande dokopa anda dokonako palyuo kaepala pupwape.
LUK 9:5 Dokopa yuu lapona range wambu dupwame nakama yako lao nyii nayami kande doko taone doko yaki nyuo dokopa sinjimu lapo nakamana kimbu dokona pisira doko pyarendo retama pupwape. Kwao karaminyi lao suu pilyamano lao kongwalu palyuo pipwape, leya.
LUK 9:6 Dokopa nakama papala anda malu repe repe pyuo karenge yuu muu dupwana papyuo, waili pii keyange doko boo pyao lamaiyuo, anga pingi dupwa pyuo nyuo pyuo kareyami.
LUK 9:7 Kiŋi akali Erote baa dokona mupwa ingyuo kareya Yesu dopa pyuo karamo dopa pyuo karamo leyaminyi lasi pii siya. Wambu lapome, Jone kumuo palipala lopo epo karamo leyami dokona Eroteme doko kinyi panda kyambo lao saka nao kareya.
LUK 9:8 Wambu lapome, Ilainja pano ipyalyamo leyami. Lapome, Anatunya poropeta akali dokona mende kumuo palyuo lopo epapala pyuo karapyalyamo, leyami.
LUK 9:9 Eroteme lao, Jonena ayemba nambame pukunyi nembeyo kande dokonako doŋo dopa pilyamo dopa pilyamo laminyi sipu akali doko apisi? leya. Lapala apa pipala baa kandowane lao suu pyao kareya.
LUK 9:10 Aposele dupwa kapu kyuo epapala dopa pimwa dopa pimwa lao Yesu lamaiyami. Dokopa baame banya disaepole dusipa lanyuo yuu taone Betesaita lenge dokona nakama iki yapalyuo kakondo peyami.
LUK 9:11 Wambu rukuraka pyuo kareyami dupwa baa dokona pamolyamo lao sepala baa peyamo dokona moko minyuo peyami. Dokopa baame nakama yako lapala Anatunya isingi yulu dokona lao nakama mana lamaiyuo anga pingi wambu nyisapenge dupwa pyuo nyepa piya.
LUK 9:12 Yuu kwuaya dokopa akali akalisa ipisu lama dusipa baa kareyamo dokona epapala dopa lamaiyami. Namwa yuu muiyane dakena karamano dokona wambu malu rukuraka pyuo karaminyi dupwa yuu andape dupwanale nenge nyuo nao luu pali pena lape, leyami.
LUK 9:13 Dopa leyaminyipape baame nakama lamaiyuo, Nakama rangeme nenge lapo maiyalapape, leya. Nakamame lao, Namwana borete kingi pakipi oma lamape dolapo iki silyamo. Wambu dapwa peparaena nenge ropo pyala pena lepe.
LUK 9:14 (Akali malu mee wakasa (5,000) kareyami dokona suu pyao leyami.) Dokopa baame banya disaepole dusipa lamaiyuo. Wambu dupwa akalisa kingi paki larapu malu palyara malu palyara pyuo petena lalapape, leya.
LUK 9:15 Dokopa nakamame wambu dopa pyuo peparae isa petena leyami.
LUK 9:16 Dokopa borete kingi pakipi oma lamape dolapo nyepala yake dulu kandalyo kandapala ateŋa lao ange leya. Lapala nenge minyuo kau lapala wambu malu peteyami dupwana lenge kambu siyamo dupwana retena lao banya disaepole dupwa maipa piya.
LUK 9:17 Reteyaminyisa wambu malumi neyaminyipa sikya piya. Enakana nenge kau lasi kakana siyamo dupwa yapo nyuo pisiki minyasi akalisa ipisu lama dusipana paki pyuo simbuyami.
LUK 9:18 Yuu mendepa Yesu baa iki ateŋa lao peteyamo dokopa banya disaepole dusipa role pyao peteyami. Dokopa baame nakama piso soo, Wambu dupwame namba kando apiŋi lao apa lami kandapisi? leya.
LUK 9:19 Dokopa nakamame isingi lao, Wambu lapome emba Jone bapitisimo nyakamaingi doko lenge. Lapome emba Ilainja lenge, lapome yuu wamba akali Anatumi pyongo piyamopa nolako lao kareyami dokona mende kumuo palyuo lopo ipyalyamo lenge, leyami.
LUK 9:20 Dokopa baame nakama lamaiyuo, Dopa lao lalyaminyiko doŋo nakama rangeme namba apiŋi lao suu pilyamisi? leya. Dokopa Pitame lao, Emba Anatunya Koraisa doko leya.
LUK 9:21 Dokopa, dopa pyuondeŋe lao wambu mende lamai nalapape, lamaiyuokondali pyuo leya.
LUK 9:22 Ikinyingi Akali yaso koo naramopa Kamongo dupwamoo purisi akali mupwa dupwape Mawa Pii mana lenge akali dupwapeme banya pii soo nyii narami. Nakama baa pyao kumakarami. Pyao kumakaraminyipa kumuo palyuo yuu rema epo paparamopa baa dee sipuro epara ingilyamo, leya.
LUK 9:23 Lapala wambu peteyami dupwa peparae lamaiyuo dopa leya. Akali mendeme namba paronoli pyuo eparo lao suu pyara ramo doko baa range kame soo kaepala yuu yangaramo yaka lao banya isa mamando minyalyuo nyepala soo namba paronuli pyuo epara.
LUK 9:24 Dokona lao mendeme banya yanenge range lete wai pyao nyero lao suu pyara ramo doko kyakana renge doko isa nembarasa pira. Mendeme baa namba reke lao kumara ramo doko kyakana renge kando nyepala lete wai pyao parasa pira.
LUK 9:25 Dokona akali mendeme bange yuu muu dupwana peparae silyamo dupwa nyuo reto karara ramo dokopa koo keta paramo doko bange dupwame baa nyisarape?
LUK 9:26 Mendeme nambana pii dokonape nambana kingi dokope elya nyuo karara ramo doko, Rakangemoo aŋala poo pyasi dupwa pipya yanga paupau andake lao eparaminyi dokopa Ikinyingi Akali dokome yanga paupau andake lao epapala wambu nakama kando elya nyerako.
LUK 9:27 Dopa piramopape wambu dae karaminyi dupwana lapo ene kuma napala Anatunya isingi yulu doko kandarami, doko kinyi langilyu leya.
LUK 9:28 Pii dupwa dopa lapala yuu mange lama nyero ingyuowale epo papeyamopa Yesumi Pitamoo Jemesa Jonemoo lanyuo yuu kyau ketae dokona ateŋa lala peyami.
LUK 9:29 Papala baa ateŋa lao kareyamo dokopa banya lenge kambu doko wakale maro leya. Dokopa banya komau ama kyewa lao mama nyepala lepo lepo piya.
LUK 9:30 Dokopa akali Mosesepa Ilainjapa nakamba baamoo pii lao kareyamipya.
LUK 9:31 Akali dolapo yanga paupau lao pano epapala Yesu Jerusaleme dokona Anatu laramuli pyuo kumara dokona lao kareyami.
LUK 9:32 Pitamoo akali baa role pyao kareyami dolapo pipya lenge kenda kenda piyamopape luu pali napala baa yanga paupau leyamo dokope akali baa role pyao kareyami dolapope angi kandeyami.
LUK 9:33 Kandapala akali dolapo Yesu yaki nyuo panya piyambinyi dokopa Pitame Yesu lamaiyuo, Rapu Pingi, namwa dae kapa karamano. Anda paka rema yukumanale. Mende embena pyakao, mende Mosesena pyakamyuo, mende Ilainjana pyakamyuo pimanale leya. (Baa yamarangyuo karo pii angi suu pyaa naenae kambumi mee leya.)
LUK 9:34 Lao kareyamo dokopa kopa doko epo nakama peteyami dokona yambe piya. Yambe piyasa pakao peteyami.
LUK 9:35 Dokopa kopa dokona piso pii mende leya. Akali dake nambana Ikinyingi nambame rombo palyuo kaeyono karamo banya pii selapape leya.
LUK 9:36 Pii lao otapeyamo dokopa Yesu baa iki kareyamo kandeyami. Dokopa yuu gii dusipana dopa piyamo kandeyama lao mendali lamai nao kalyamo kareyami.
LUK 9:37 Dokona yangama dokopa yuu kyau doko yaki nyuo epeyami dokopa wambu malu mee rukuraka pyuo baa kando nyela epeyami.
LUK 9:38 Dokopa wambu malu kareyami dokona akali mendeme pii ketae palyuo dopa leya. Mana Lenge, nambana ikinyingi doko embame kandakala ipili yaka lao langilyu. Baa nambana wane mendaki baako ikiŋi leya.
LUK 9:39 Imambu mendeme baa minyarelyamopa baa aopa ala lenge. Dopa pilyamopa pungwa pungwa pyao karo kambu apupu epo pilyamopa waiya lao paa napala baa uki palyingi.
LUK 9:40 Nambame embena disaepole dusipa raka lanyi nembakana lapunu doko nembalana saka nami leya.
LUK 9:41 Yesumi isingi lao dopa leya. Nakama wambu epapu isa anda karaminyi dupwa, Anatu kapa ingingi lao suu pyaa napala simbi simbi pyuo karaminyi. Yuu akipare namba nakama pipya role pyao kararamase? Yuu akipare nakama ukiaki minyuo kararaminyipa nambame nakama mata kui lao mana langyuo kararose? Namba karo dakena embena wane doko lanyuo ipu, leya.
LUK 9:42 Wane baa ene epeyamo dokopa imambu koo dokome nyuo mangalo kyaso reteyamosa pungwa pungwa pyao siya. Dopa piyamopape Yesumi imambu koo doko pyalana pyuo lamaipala wane doko pyuo elya pyuo nyiya. Pyuo nyepala banya rakange doko range maiya.
LUK 9:43 Dokopa wambu peparae, Anatu baa ama porai wakasa karamo, lao mona nembeyami. Baame yulu wakale wakale pyuo kareyamo dupwa kandapala wambu peparaeme yako lao kareyaminyipa baame banya disaepole dupwa kando dopa lamaiyuo leya.
LUK 9:44 Pii mende langiru doko nakamana kale kata dokona epo palu palyuo palena. Doko akali lapome Ikinyingi Akali doko puu maiyapala wambu pinya lao mairami, leya.
LUK 9:45 Dopa leyamopape banya pii doko soo gisa nayami. Pii renge doko kyanga pyaro kareyasa nakamame soo nyepa napala baa pii dokona renge piso selana pakayami.
LUK 9:46 Yuu mendepa disaepole akali yango sukusa api angi mupwa lao apiyanda pyuo kareyami.
LUK 9:47 Yesumi nakama monarena suu pyao kareyaminyi doko kando sepala wane mende nyepala banya paralisa pisiya.
LUK 9:48 Pisapala baame nakama dopa lamaiya. Mendeme nambana kingi lao wane dake yako lao nyerami ramo doko namba yako lao nyeramisa pira. Namba yako lao nyerami ramo doko namba mapanyi peeyamo doko yako lao nyeramisa pira. Nakama peparae karaminyi dokona api mende kamame kuki ingyuo karamo doko baa mupwa ingyuo karapyamosa pilyamo, leya.
LUK 9:49 Dopa leyamo dokopa Joneme lao dopa leya. Rapu Pingi, akali mendeme embena kingi lao imambu koo raka lanyi nembo karapyamo kandapala baame namwa role pyao kara nange dokona kaena lamwa, leya.
LUK 9:50 Dopa leyamopape Yesumi baa lamaiyuo, Baa kaena laa nalapape. Mendeme nakama kando sisu nyuo kara nalyaminyi baa nakama nyiso kararasa pira leya.
LUK 9:51 Anatumi Yesu ketae minyalyuo nyera yuu gii doko repeta epeyamo dokopa baa Jerusaleme dorena panya suu pyapala kata nyiya.
LUK 9:52 Dokopa nakama yuu Samaria dokona palirama lao akali lapo rapa rapa pyuo karala pena leya. Leyamopa nakama peyami.
LUK 9:53 Peyaminyi dokopa banya lenge kambu Jerusaleme dorena pambwaro karo panya lao epeyamo dokoko kandapala Samaria wambu dupwame baa yako lao nyii nayami.
LUK 9:54 Dopa piyaminyi doko kandapala banya disaepole Jemesa Jonepa dolapome Yesu kando dopa lamaiyambi. Kamongo, isare yake panda piso lupyuo epapala nakama rao otena lambape, leyambi.
LUK 9:55 Dopa pyuo leyambinyi dokopa baa kapu kyepala nakamba kaena lao pyalana pyuo lamaiya.
LUK 9:56 Dokopa nakama anda kuki lama repe repe pyuo karenge wakale mendena peyami.
LUK 9:57 Nakama kata peyaminyi dokopa akali mendeme Yesu kando lamaiyuo, Emba parenyili pyuo kaeya nao paro, leya.
LUK 9:58 Dokopa Yesumi baa dopa lamaiya. Yana suwa kararope dupwa yuu rumbyapala palyuope yaka bii lao papingi dupwa anda pipala palyuo pilyaminyipa Ikinyingi Akali doko luu palinya mendasa ayemba retowape pira ingya nange leya.
LUK 9:59 Lapala Yesumi akali mende lamaiyuo, Namba paronuli pyuo ipu leya. Leyamo dokopa baa dopa leya. Kamongo, nambana rakange wambo malu pela paparole leya.
LUK 9:60 Dopa leyamopape baame baa dopa lamaiya. Kumasi dupwame nakama rangena kumasi yango dupwa malu pinya. Embame Anatunya isingi yulu dokona lao boo pyao pupi, leya.
LUK 9:61 Akali mendalimi dopa leya. Kamongo, namba emba parenyili pyuo eparoko doŋo nambana ree palu anda karaminyi dupwa yako lao nakama wambo karena lapapuli yaka leya.
LUK 9:62 Dokopa Yesumi baa dopa lamaiya. Mendeme yuu apu renge masene doko minyaro karo kapu kyilyapala matarena kandara doko Anatunya isingi yulu dokona sukusa kapa karara ingya nalyamo leya.
LUK 10:1 Dopa lapala enakana Kamongo dokome wambu akalisa yanda ipingi dee ipisu lamape rombo palyapala lama lao pakarapu yuu taone dupwana baa enakana para ingiyamo dupwana wambo pena leya.
LUK 10:2 Pena lao dopa lamaiya. Nenge malu wambu pipyamopa manjo nyerami dupwa kuki lama karaminyi. Dokona ee rangena kamongo dokome yulu pingi akali lapo opetae ee doko manja pena lapyali yaka lao ateŋa lalapape.
LUK 10:3 Nakama kata nyuo pupwa. Nakama sipisipi ikyanena mendeke karaminyipa suwa reeko wambu nalana pyuo karaminyi sukusa dokona pupwa lao letoŋo.
LUK 10:4 Pakeya minya nao nyuu byake manja nao kimbu suu mende manja naoko papala katasa wambu mende yako laa nalapapeko.
LUK 10:5 Anda mendena kolando parami ramo dokopa, Anda dakena mona sipyamopa karamili yaka lao wambo lalapape.
LUK 10:6 Dokopa akali mende mona seramopa kareya kande doko nakamana mona kyuu lao singi renge doko baa keta palira. Akali mona seramopa kara nara ramo dokopa renge doko nakama range keta epo palira.
LUK 10:7 Anda nakama yako lao nyerami dokonako iki palipwape. Yulu pingi akali yole nyingi doko suu pyao nakama nengepe ipwangepe joo kararami dupwa mee nao palipwape. Anda kambu yaka laa nalapape.
LUK 10:8 Nakama taone mendena parami dokopa dokona nakama yako lao nyerami ramo doko nenge jerami doko yakaŋa lao nalapape.
LUK 10:9 Nakamana anga pingi wambu dupwa pyuo nyepala nakama lamaiyuo, Anatunya isingi yulu doko nakama repeta ipya lyakande, lao lamaipape.
LUK 10:10 Anda malu palyuo karenge mendena sukusa paraminyi yuu range wambu dupwame nakama yako lao nyii narami ramo dokopa nakamana anda kambu dokona karo dopa lalapape.
LUK 10:11 Nakamana anda taone dakena yuu sinjimu dokome nambwana kimbu dokona parepeta sipyamo dokoko nakama kwao karaminyi lao lasaka pyuo pyarendanyi nembakalyambanoŋo. Anatunya isingi yulu doko nakama repeta ipwa doko kame see nalapape, lao lamaipwape.
LUK 10:12 Nambame nakama dopa langilyu, Yuu gii angi pyaka seramo dokopa yuu malu palyuo karenge dokona range dupwa yuu Sotoma range dupwa randa nao kareyaminyipape nakama kamame wakasa narami lyakande.
LUK 10:13 Nakamana yuu Korasina wambu dupwa nakama keta randa narami. Betesaita wambu dupwa nakama keta randa naramiko. Nakamana yuu dolapona yulu andake pyuo kareyo dupwa yuu Taya Saitonepa dolapona pyuo kareyoli doko nakama yuu wamba mona enenge palyuo karapala ee lenge komau dupwa wapuo karo isare pee pyapala peteyamili.
LUK 10:14 Dokona suu pyao Anatumi kote laramo dokopa nakama randa andake naraminyipa Taya Saitonepa range kuki pyuo narami.
LUK 10:15 Dee, yuu Kapaneame range wambu dupwa nakama rangeme yake panda dokona range minyalyuo nyeramipi? Ama daa, nakama panda koo dokona isa malyaramisa pira.
LUK 10:16 Mendeme nakamana pii sera ramo doko nambana pii serasa pira. Mendeme nakama rekya lanyi nembara ramo doko namba rekya lanyi nembarasako pira. Mendeme namba rekya lanyi nembara ramo doko namba mapanyi peeyamo doko kando rekya lanyi nembarasa pira ingilyamo leya.
LUK 10:17 Wambu akalisa yanda ipingi ipisu lama wambo pena leyamo dupwa mona pyakalyuo pyao laeyo epapala lao, Kamongo embena kingi lao karamwanopa imambu koo dupwa namwana pii warombo sepala pilyaminyiko leyami.
LUK 10:18 Dokopa Yesumi nakama dopa lamaiya. Satane baa yuu pele pili lapala yake dorena karo isa ipyamo kando karapu.
LUK 10:19 Nakama kaupi popokyalyape meme pyuo yanda pimwai dupwana porai doko nyuo anamanyi nembo karamiŋi lao porai renge doko joo kaelyo kande leya. Dokona mendeme nakama ukiaki minya nara.
LUK 10:20 Dokoko doŋo imambu dupwa nakamana pii warombo soo pilyaminyi dokona mona pyakalyuo pyao kara nalapape. Nakamana kingi yake panda dokona pyasi palamo dokona mona pyakalyuo pyao karalapape, leya.
LUK 10:21 Yuu gii dokopa Imambu Poo Pyasi Yesu keta paleyamosa mona pyakalyuo pyao karo dopa leya. Rakane yake pandape isa pandape dolapona Kamongo karene doko, embame wambu singi dupwame see nana lao pii dusipa yalu pisala wane nyaŋa dupwa pano lamaipi dokona nambame emba ange leto. Kinyi Rakane, emba range rae maipala pinya lao suu pyapala pipilyamo.
LUK 10:22 Rakane dokome peparae dupwa namba keta sinya lao jiya. Dokona suu pyao wambu mendeme Ikinyingi doko apiyakalende karamo lao see nalyaminyi. Rakane baa iki soo karamo. Dee isa wambu mendeme Rakane baa apiyakalende karamo lao see nalyaminyiko. Ikinyingi baa iki sepala wambu baa suu pyaramuli pyuo polo lamairamo dupwa opetae silyaminyi leya.
LUK 10:23 Lapala disaepole dupwa peteyami dokona kapu kyepala nakama iki siyaminyipa dopa lamaiya. Nakamame yulu dusipa emboneme kandamilyamo.
LUK 10:24 Dokona lao nakama dopa langilyu, Anatunya poropeta akalipi kiŋi akali malu dupwapeme nakama kandelyaminyi doko kandamwali yaka lao suu piyami doko kanda nayami. Pii nakama simi doko simwali yaka lao suu piyaminyipape see nayami leya.
LUK 10:25 Dokopa Mawa Pii soo gisingi akali mendeme roya karapala baa makande pyuo dopa leya. Mana Lenge, namba apa pyuo kyakana renge palu palenge doko nyerose? leya.
LUK 10:26 Dokopa Yesumi baa kando dopa lamaiya. Buku Baepole pyasi palamo dupwa apa letase? Emba kandee dupwa apa lao polo langilisi? leya.
LUK 10:27 Dokopa baame isingi lamaiyuo, Kamongo doko embena Anatuŋu doko mona reto dokopa embena mona dokope imambu dokope pupi lao yulu pingi porai dokope suu pingi dokope dusipa peparae baa maiyare. Maipala rangena yongo mona nyuo karene doko suu pyao parali maki palenge wambu dupwa mona reto karape leya.
LUK 10:28 Dopa leyamo dokopa Yesumi isingi dopa lamaiya. Emba rolae lalyane. Dopa pyuo karare ramo doko lete karalu karare leya.
LUK 10:29 Lowana mana lenge baame Yesunya pii sepala range elyape lapuli lao suu pyapala lao, Nambana maki palyuo penge dupwa apimoo lyasilisi? leya.
LUK 10:30 Dokopa Yesumi dopa isingi lao, Akali mende Jerusaleme karo lambuo pao Jereko panya peya. Peyamo dokopa akali kendepo nenge lapome baa nyepala komau rokwanyi nembo pyao reteyami. Baa repeta kumara ingiyamo dokopa yaki nyuo peyami.
LUK 10:31 Peyaminyipa purisi akali mende kata dokona lambuo peyapya. Pao akali siyamo doko kandapala pakiki palyama peya.
LUK 10:32 Peyamopa Lipae akali mendeme epo kandapala dopako pyuo pakiki palyama kanjakalo peyako.
LUK 10:33 Pakiki palyama peyamopape Samaria akali mendeme kata epo baa siyamo mare dokona epeya. Epo kandapala baa kondaya.
LUK 10:34 Kondapala baa siyamo dokona papala piyami dupwa mamba welepe waene ipwangepe kulimbwapala komau dokome yama pyakamiya. Pyakamipala banya mena ose mata dokona minyalyuo nyuo retapale lanyuo pao upunili wambu palima papingi anda dokona retapala baa isaru pyuo kareya.
LUK 10:35 Dokona yangama dokopa baame kana lama nyepala upunili wambu palima papingi anda range akali maipala dopa leya. Embame baa isaru pyuo karakape. Pyuo kararene dokopa kana lapo isa paramo doko nambame dee kamba laeyo epapala emba ropo pyaro leya.
LUK 10:36 Akali kendepo nenge dupwame nyuo piyaminyi akali doko akali rema dusipana mendali apimi baa maki palenge ingilyase? Apa lao suu pilipi? leya.
LUK 10:37 Dokopa baame lao, Akali baa kondapala nyisiyamo dokoko, leya. Dokopa Yesumi baa dopa lamaiya. Emba papala baame piyamuli pyuo pyuo karape leya.
LUK 10:38 Yesu banya disaepole dupwa pipa kata pao taone mendena sukusa peyaminyipa enda mende kingi Mata lenge dokome banya anda dokona baa yako lao nyiya.
LUK 10:39 Banya kakingi mende kingi Maria lenge peteya. Dokome Kamongo dokona kimbu siyamo dokona pisipala banya mana pii soo peteya.
LUK 10:40 Soo peteyamopa Mata baame nenge kiso isaru pyuo kareyamopa yulu malu palipala baa minyuo lyakalyaka paeyasa saka naya. Saka napala Yesu lamaiyuo, Kamongo, nambana kakingi baame kaeyapyasa nambame iki nenge mondo lao karo doko kanda nalese? Dokona baame namba ree jela pena lao lamai leya.
LUK 10:41 Dopa leyamo dokopa Kamongo dokome baa isingi lamaiyuo, Mata, Mata, bange malu dupwana suu pyao emba lyakalyaka papipyamosa mona yanyi pyapyamo karene.
LUK 10:42 Dokona yulu mendaki pipingele leya. Maria baame yulu rolae mendaki kando nyilyamo dokona kaena lao laa naro leya Yesumi.
LUK 11:1 Yuu mendepa Yesu yuu mendasa ateŋa lao peteya. Lao otapeyamo dokopa banya disaepole mende baa piso soo, Kamongo Joneme banya disaepole dupwa ateŋa lenge dokona mana lamaiyamo doko suu pyao embame namwa mana langipi leya.
LUK 11:2 Dokopa baame nakama dopa lamaiya. Nakama ateŋa lalana dokopa dopa lao lalapape. Rakane, embena kingi doko poo pyasi ingyuo palenale. Embena isingi yulu doko epo palenale.
LUK 11:3 Yuu peparae namwa nenge napengele dupwa joo karape.
LUK 11:4 Wambu namwa kando koo pyakange dupwa namwa nyuo kame sakamipala kaenge doko suu pyao namwame koo pyakao karenge dupwa embame nyuo kame sakao karape. Embame namwa makande pirali dupwana lanyuo paa napipi.
LUK 11:5 Lapala Yesumi nakama dopa lamaiya. Nakama petaminyi dokona mendeme kukwa andasukulya dokopa nakamana puu minyingi dokona anda dokona papala baa dopa lamamiyuo, Yangone, borete rema jelase.
LUK 11:6 Nambana puu minyingi mende kata papyuo ipyamo dokome nenge daapyasa saka nalyo larami ramo dokopa baame andakare palyuo isingi lao, Embame angalyi pyuo laa napipi. Kambu upi laro karamo. Nambana wane wanakepe dupwa role pyao luu palamano. Namba sipurapala bange mende emba kapa jii naro laramo dokopa apa pirami?
LUK 11:8 Dokona ingyuo pii mende langilyu, Baa embena puu minyingi dokome sipurapala jii nara ramo doko emba elya nao piso sepa sepa pyuo kararene dokona lao sipurapala kapa jera ingilyamo.
LUK 11:9 Dokona suu pyao dopa langilyu, Piso selapape. Dokopa nakama jera. Kotarami dokopa kando nyerami. Kambu dowa dokona kapa kapa pipwape. Dokome kambu lumbwakara.
LUK 11:10 Piso serami dupwa peparaeme kapa nyerami. Kotarami dupwame kando nyerami. Kambu dowa dokona kapa kapa pirami dupwana lao kambu lumbwakamira.
LUK 11:11 Nakama wane mandenge dupwame ikinyingimi oma mende jinya lara ramo dokopa oma kaepala mee kau koo mairamipi?
LUK 11:12 Panda kola kapa jinya lara ramo dokopa kau popokyalya mairamipi?
LUK 11:13 Dokona suu pyao nakama koo ingyuo petaminyi dupwame nakamana wane wanakepe dupwa bange keyange maingi doko suu pyao Rakane yake panda dokona keyange wakasa karamo dokome wambu Imambu Poo Pyasi jinya lao piso serami dupwa eŋa nembapala mai narase? leya.
LUK 11:14 Baame yuu mendepa imambu koo pii laa nange mende raka lanyi nembo kareya. Imambu koo doko yaki nyuo peyamo dokopa akali pii laa nange dokome pii leyasa wambu dupwame ayaka lao mona nembeyami.
LUK 11:15 Mona nembeyaminyipape nakama kareyami dupwana lapome dopa leyami. Belesapulu imambu koo dupwana kamongo dokome baa minyapyamo dokome imambu koo dupwa raka lanyi nembo karamo leyami.
LUK 11:16 Dopa lao kareyaminyi dokopa lapome Yesu baa makande pyuo, Yake panda dokona yulu renge palenge mende namwa pyuo lasaka pipili yaka leyami.
LUK 11:17 Dopa leyaminyipape baame nakama suu pyao kareyami doko soo gisapala dopa lamaiya. Rara mendakindeme liti pipala yango sukusa yanda pirami ramo doko rara doko waiya lao otarasa pira. Dee akalyanda liti mendeme paka lakyuo yango palyuo pira ramo doko waiya lao isa para.
LUK 11:18 Dokona suu pyao Sataneme baa range paka lakyuo karara ramo doko banya isingi yulu doko apa pyuo palu palyuo parase? Dokona lao nakamame namba kando, Belesapulumi nyisapyamopa imambu koo dupwa raka lanyi nembo karene, letaminyi.
LUK 11:19 Belesapulu namba nyisapyamosa imambu koo dupwa raka lanyi nembo kararo ramo doko nakamana wambu dupwa apimi nyisilyamopa imambu koo dupwa raka lanyi nembo karengese? Dokona suu pyao pii lalaminyi kandapi doko kinyi panda kyambo lao nakamana wambu dupwa kando makande pyuo selapape.
LUK 11:20 Doko Anatunya porainya renge dokome minyapyamopa nambame imambu koo dupwa raka lanyi nembo karenge dokona Anatunya isingi yulu doko nakama keta ipyasa pilyamo.
LUK 11:21 Akali porai mendeme yanda walakape minyuo banya anda rapu pyuo karara dokopa banya bange keyange dupwa kapa mee sera.
LUK 11:22 Kapa seramopape akali kama porai mendeme epo baa pyao isa palyapala dokopa banya yanda kaku konambepe retaro kararamo dupwa nyepala banya pinjale bange nyuo wambu yango mokwa soo maira.
LUK 11:23 Mendeme nambana nyiso piso karo pii nara ramo doko nambapa sisu nyuo kararasa pira. Mendeme nambapa role pyao kara napala wambu sukusa nyuo kara nara ramo doko baa wambu bolombalo lao pena lao kararasa pira.
LUK 11:24 Imambu koo mende akali mende yaki nyuo papala dokopa yuu lapo ipwa epa nange dupwana anja paliru lao koto papira. Papyuo panda kando nyii napala, Nambana anda yaki nyepala ipu dokona kapu kyuo dee parole lara.
LUK 11:25 Lapala epo anda doko burumi manjisi bange dupwa rolae soo piramo kandara.
LUK 11:26 Dokopa papala imambu yanda ipingi nyero baa dopale daa, ama koo wakasa dusipa lanyuo dokona kolando pao palirami. Dokopa akali doko wambo koo ingyuo kareyamo dopale ingyuo kara nara, enakana ama koo wakasa ingyuo karara leya.
LUK 11:27 Pii dopa lao kareyamo dokopa enda mende wambu rukuraka pyuo peteyami dokona sukusa peteyandeme pii ketae palyuo lao dopa leya. Endame emba manjo nyuo anju joo peteyamo dokona elyape keta pisamo leya.
LUK 11:28 Leyamopape baa dopa lamaiya. Pii letene doko rolae daa. Wambu Anatunya pii warombo soo pisipala pyuo karaminyi dupwa keta renge keyange palamo leya.
LUK 11:29 Wambu malu rukuraka pyuo peteyami dokona lapo kondo konda pyuo epo buu minyiyami dokopa baame dopa lamaiya. Wambu epapu karaminyi dupwa koo ingyuo karaminyi. Namba kando Anatunya yulu pilipi lao wambumi pii nange yulu mende pii lao makande pyuo letaminyi. Doko pii naronopape Jonana yulu piyamo dokona mana nyelapape.
LUK 11:30 Anatumi Jona keta kongwalu piyamopa Ninepa wambu dupwa mana nyiyami doko suu pyao wambu epapu isa ando karaminyi dupwa namba Ikinyingi Akali keta Anatu mende piramo soo nyerami.
LUK 11:31 Kote pii andake paliramo yuu gii dokopa Kuini donorena range baame wambu epapu isa ando karaminyi dupwa kando isipyara ingilyamo. Kuini enda doko banya yuu range nanesa doko yaki nyepala yuu kipwa kipwa dupwana kata londeta epo Solomena pii keyange doko sela epeya. Epapu mendeme Solomonepa manda manji napyamo doko kamame wakasa ingilyamo doko dae kata kande.
LUK 11:32 Kote pii andake paliramo gii dokopa Ninepa akali dupwame sipurapala dae wambu dupwa kando koo piyami lao kote larami ingilyamo. Dokona lao Joname boo pyao lao kareyamo dokopa Ninepa wambu dupwame banya pii sepala mona enenge palyuo kareyami. Doko mende Jona dokona suu pyao kamame wakasa ingilyamo doko dae kata kande leya.
LUK 11:33 Mendeme lambe kaipala anda isarena iminjingi panda dokona reta naope dee penge dokome nee pyuo pisa naope pingi. Dopa pyuo yalu pii napala rate dokona ketae retenge dokopa wambu andakare eparami dupwame isare doko kapa kando epenale lao pingi.
LUK 11:34 Embena lenge doko rangena yongona lambe dopale rao karamo. Dokona embena lenge doko mondo lao rao karara ramo doko yongo peparae yangaramopa piso karo piri. Lenge doko kwaeyara ramo doko yanenge peparae iminjaramopa karare.
LUK 11:35 Dokona yangapyamo karene doko monarena iminja nana lao waso karape.
LUK 11:36 Embena yongo peparae yanga paupau laramopa dokome kuki lamape iminja nara ramo doko lambe keyange rao dokopa yanenge peparaena yanganyi peenge dopale ingyuo paresa pira leya.
LUK 11:37 Yesu pii lao kareyamo dokopa Parisi akali mendeme baa nenge role pyao nambanale epena leya. Leyamopa andakare pao peteyambi.
LUK 11:38 Parisi akali dokome Yesu nenge nalana dokopa kingi wate pii napyalyamo lao kandapala mona nembeya.
LUK 11:39 Dokopa Kamongo dokome baa dopa lamaiya. Nakama Parisi dupwame kapope disipi dupwa netarename iki wate pingi. Nakamana monarename panga soope waa nyingipi yulu koo pingipi dupwa palyuo simbulyamo.
LUK 11:40 Nakama kopyali karaminyi. Nakamana yanenge pyuo wasiyamo dokome mona doko opetae wasa nayase?
LUK 11:41 Dokona ingyuo monana koko palenge dupwa wambu dupwa maiyuo karalapape. Dopa pirami ramo dokopa bange peparae elyape sakara lyakande.
LUK 11:42 Parisi dupwa nakama randa narami ingilyamo. Dokona lao mokwame yokope kyalya yokope nenge nenge yoko wakale wakale dupwa peparaena akalisa silyamo dokona mendaki larapu Anatu pingyu maingi. Mailyaminyi doŋo yulu rolaepe Anatu mona retengepe kaelyaminyi. Yulu doloma kae napala yulu keyange doko opetae pyuo kararaminde pimi.
LUK 11:43 Parisi akali dupwa nakama randa narami ingilyamo. Dokona lao sinakoke anda dupwana isa petenge mupwa dupwana pisimwali yaka lao suu pyao karaminyi. Nenge ropo pingi kamapi dupwana karo wambu dupwame nakama yako lamili lao suu pyao karaminyi.
LUK 11:44 Nakama randa narami ingilyamo. Dokona lao yanyanda nee pyuo silyamopa akali lapome yanyandalyamo lao suu pyao nao kamenge ketae dokona kata penge nakama Parisi dupwa dopale ingilyamo leya.
LUK 11:45 Mawa Pii singi akali dokona mendeme baa dopa lao lamaiya. Mana Lenge, embame dopa lalene doko namwa opetae lao nembapisa pipya leya.
LUK 11:46 Leyamo Yesumi, Mawa Pii singi akali dupwa nakama opetae randa narami ingilyamoko. Akali bange kenda maiminyi randa nao soo puminyipape nakamame kingi pambu dokomepe nyiso minya nalyaminyi.
LUK 11:47 Nakama randa narami ingilyamo. Dokona lao nakamana rakange kyawa dupwame Anatunya pyongo piyamopa nolako lao kareyami akali dupwa nyuo pyao kumakayami dupwana malu anda nakamame mondo lao pyakamingi.
LUK 11:48 Rakange kyawa dupwame pyao kumakayaminyipa nakamana malu anda mondo pilyaminyi dokome nakamana rakange kyawa dupwame kopetame pyuo kareyami doko lyakai pilyamo.
LUK 11:49 Dokona lao Anatunya pii rolae dopa leya. Nambame poropeta akali lapope aposele akali lapope nakama kararaminyi dokona pena lakamironopa nakama dokona lapo pyao kumakao randa maiyuo pyuo kararami.
LUK 11:50 Dokona isa panda wasiyamo gii dokona piso epo poropeta akali dupwa peparaena ranjama kulimbwapa piyami dokona epapu isa ando karaminyi dupwa keta kote pii palira.
LUK 11:51 Akali Epolo piyamo dokona piso epo kama enakana Sakarayame Anatu bange kiso maingi rara singi pakirena tembole anda angi singi kanya dokona piyaminyipa kumuya dokona ranjama dupwa peparaena epapu isa ando karaminyi dupwa keta kote sera lao nakama kinyi langilyu.
LUK 11:52 Nakama Mawa Pii singi akali dupwa randa epara ingilyamo. Singinya renge anda dokona kii ikyane doko retaro karaminyi. Nakama kolando paa napala wambu kolando panya lao kareyami dupwa kaena lao daa lao kareyami, leya.
LUK 11:53 Yesu baa yuu doko yaki nyuo panya piyamo dokopa Mawa Pii mana lenge akali dupwape Parisi dupwapeme baa piso sokondali pyuo pii malu lapyali lao angalye piyami.
LUK 11:54 Baa pii koo kote laramali mende larape lao lyakaro iso kareyami.
LUK 12:1 Dopa pyuo kareyaminyi dokopa wambu ama malu wakasa paka pyuo karapala wambu yango dupwa kete pyao kalyuo kareyaminyipa baame banya disaepole dupwa kanda soo lao dopa lamaiya. Parisinya isi doko waso karalapape. Nakamana pii lama lao yanengena mamba kiso lao karenge yulu dopalesa leto.
LUK 12:2 Dakepa nee pyuo silyamo dupwa peparae panara. Yalu piyami dupwa peparae kando nyerami.
LUK 12:3 Kukwama pii yalu pyuo wato larami dupwa korakama dokopa wai nembo larami. Panda dongena pii iso laminyi dupwa peparae andeyangi ketae dokona karo porakaiyuo kaeyo lao boo pyao larami.
LUK 12:4 Nambana puu minyingi dupwa selapape. Wambu yongo pyao kumakapala dokopa imambu kokwa selana saka nange dupwa kando paka nalapape.
LUK 12:5 Mende kando pakarami dokoŋo lao nakama repe repe langyuo leto. Doko Anatumi pyao kumakapala koo panda dokona kapa nembara doko kando pako karalapape. Kinyi langilyu, Anatu baa kando pakalapape.
LUK 12:6 Yaka pimbinangae kingi paki dusipa kumasi kana lamame iki ropo pyao nyii nangese? Dopa pilyaminyipape Anatumi yaka dokona mendepe kame see nange.
LUK 12:7 Anatu baame nakamana kyawasi malu dokona yaka lao otasi karamo dokona nakama pako kara nalapape. Anatumi nakama rungi rungi pyao karapyasa yaka pimbinangae ama malu dupwa pipa nakamapa kapa ingya nalyamo doko see nalyamisi?
LUK 12:8 Dee dopa langilyu, wambu peparaeme isa wambu yango dupwana lenge kambu dokona nambana lao polo larami ramo doko Ikinyingi Akali dokome nakamana lao Anatunya aŋala dupwana lenge kambu dokona polo larako.
LUK 12:9 Laramopape mendeme isa akali dupwana lenge kambu dokona pako karo namba mata joo nambana kingi laa narami ramo doko Akalinya Ikinyingimi Anatunya aŋala dupwana lenge kambu dokona baa mata maiyuo banya kingi laa narako.
LUK 12:10 Mendeme Ikinyingi Akali kando kokwa soo laramo doko Anatumi doko kapa nyuo kame sakamira. Sakamiramopape mendeme Imambu Poo Pyasi kando kokwa soo pii mende lara ramo dokopa kame sakami nara.
LUK 12:11 Nakama sinakoke anda dokonape kote singi akalinya lenge kambu dokonape dee mupwa dupwana lenge kambu dokonape lanyuo peyami kande dokopa apa pyuo isingi laro laope aki pii lamairo laope mona yanyi pyaramopa kara nalapape.
LUK 12:12 Gii dokopa Imambu Poo Pyasimi pii lapengele ingyaramo dupwa emba mana langiramopa lao karare.
LUK 12:13 Dokopa Yesu baa role pyao kareyami dupwana mendeme baa lamaiyuo dopa leya. Mana lenge rakane kumapyasa nambana yangonge dokome moyange bange dupwana lapo namba mokwa soo jinya lamaiyapili lao langilyu leya.
LUK 12:14 Dokopa baa isingi dopa lamaiya. Yangone, apimi namba rombo palyuo embena kote pii lao rolapala moyange dupwa mokwa soo nakamba jereŋe lapyase?
LUK 12:15 Lapala nakama lamaiya. Bange malu nyuowane lao suu pingi, doko waso karalapape. Isa bange malu nyepala kamongo penge dokona renge kulisa mende pali nalyamo leya.
LUK 12:16 Lapala baame kongwalu pii mende nakama lamaiyuo leya. Yuu mendepa akali bange ama malu singi mendeme banya yuu dokona ee nengepe malu siya.
LUK 12:17 Siyamopa baa rangeme retarono panda doko see nalyamo dokona aki mende pirose lao suu piya.
LUK 12:18 Dokopa monarename baa range dopa lao suu piya. Nambana nengena anda dupwa kete pilyamo dokona lalyapala kamame reeko lapo piru. Elya pipala dokopa nambana nengepe bange dupwape kapa sera.
LUK 12:19 Ama embone petamo. Bange malu dupwame ee kana malu mee sera. Dokona ingyuo namba mee male male lao karo nenge ipwangepe nao rae maiyuo kararo ingilyamo.
LUK 12:20 Dopa lao suu piyamopape Anatumi baa dopa lamaiya. Emba kopyali, kukwa dakepa embena imambu rekya lao para ingilyamo. Paramopa bange dupwa rapa rapa pyuo retapi dupwa apinya ingyarase?
LUK 12:21 Dokona ingyuo akali mendeme bange malu reto rungi rungi pyuo karapala Anatu kando mona reta nara dopale ingyara leya.
LUK 12:22 Lapala banya disaepole dupwa dopa lamaiya. Renge dokona lao, aki nenge napala kapa kararo laope yanenge dokona aki komau pee piro laope suu pyao mona yanyi pyaramo kara nalapape.
LUK 12:23 Dokona lao nenge dokome iki wambu kapa ingyarase? Yongo doko komau wapusi dokome elyape keta parase? Pii mende daase?
LUK 12:24 Yaka simbairapinyi dupwa suu pyalapape. Dupwame ee wara pipala jingi lyii nange, bange retenge andape nenge retenge andape pipala kara nangeko. Anatumi nenge maiyuo karenge kandale. Dokona ingyuo yaka dupwa andake ingyapala nakama mee kuki ingyuo kandelyande daa.
LUK 12:25 Nakama waiya lao kuma namwali yaka lao suu pyao mona yanyi pyaramopa kararami ramo dokome ee kana mendasipa opetae lete kararamisi?
LUK 12:26 Nakama yulu dopale kapa pii narami ingilyamo dokona akipamo doloma suu pyao mona yanyi pyapyamopa karaminyi?
LUK 12:27 Isa jingipi isoko dupwanape apa pyuo andenge doko suu pyalapape. Dupwame yulu pii nao, puu wale pyaa nao ando karenge. Dopa pyuo karelyaminyipa Solomone baa ama neta rao au piyamopape isa jingi dupwa kama wakasa rao kuikui lao au pingi.
LUK 12:28 Dokona suu pyao isoko epapu keyange andelyamo dupwa rakya dokopa nyuo isare dokona kisingi doko Anatumi au pyuo kandalapape lao yanenge keyange maingi doko suu pyao nakama dopako pyuo komau wapwaka narase? Nakama Anatu kapa pirape lao suu pingi lama manjo karaminyi.
LUK 12:29 Dokona suu pyao aki nengepe waene ipwangepe naro lao koto papyuo mona yanyi pyaramopa kara nalapape.
LUK 12:30 (Dokona lao wambu Anatu suu pyaa nange yuu mure lao karaminyi dupwame bange dopale iki koto karenge.) Koto karaminyipa nakamana Rakane dokome nakama nenge naa napala nano kararami doko silyamo.
LUK 12:31 Bange dupwa koto karaminyi doko kaepala banya isingi yulu doko kando nyimwali lao koto karalapape. Dokopa baame bange dupwa opetae nakama jera.
LUK 12:32 Nakama nambana mena mondo ingyuo karaminyi dokona paka nalapape. Rakane dokome banya isingi yulu doko rae maiyuo jera.
LUK 12:33 Nakamana bange retenge dupwame ropo pyao kana nyepala wambu mende aeya napyamo karaminyi dupwa mokwa soo maipwape. Pakeya momo naa nara mende koto nyelapape. Nakamana bange kulisa yake panda dokona reto karalapape. Panda keyange dokona seramo dokopa lisiwame dupwame naa naope waa nyingi akali dupwame anda doko lalyapala waa nyii naoko pirami.
LUK 12:34 Embena bange silyamo mare dokonako embena mona doko pao yukwaro kararasa pira.
LUK 12:35 Nakama komau wapwaro karo nakamana lambe kisapala minyuo karalapape.
LUK 12:36 Kendemande wambu dupwame nakamana kamongo baa enda nyilyaminyi dokona nenge andake napala anda epelyape lao isaro kareyami dokona mende makande pyuo leto. Doko baa epo kambu dokona kapa kapa pilyamopa waiya lao kambu lumbungi doko suu pyao nakama dopako pyuo rapa rapa pyuo karalapape.
LUK 12:37 Kamongo epapala kendemande wambu lenge rao pisiraminyi kandaramopa nakama keta renge keyange maira. Kinyi langilyu, baame komau wapupala nakama taepo dokona petena lapala nakama nenge maira.
LUK 12:38 Andasukulya panda yangalana piramopape nakama mee dopako pyuo isaro pisiraminyi epapala kandara ramo akali kamongo doko kendemande dupwa kando rae maira.
LUK 12:39 Pii dake kame see nalapape. Anda range akali doko waa nyingi akali yuu gii anjokorape epara lao soo gisapyali doko lenge rao pisipala anda pyasu pyao epa nana lapyali.
LUK 12:40 Ikinyingi Akali doko nakama kamenge kararami dokopa eparaŋa dokona rapa rapa pipala karalapape leya.
LUK 12:41 Pitame lao, Kamongo, kongwalu pii doko namwasa letepe panda wambu dupwa peparaesa letepe? leya.
LUK 12:42 Dokopa Kamongo dokome dopa leya. Kendemande akali apiyakalende mupwa ingyuo parase? Doko akali mende mona palenge dokome yulu kaeya nao pyuo kararamopa banya kamongo dokome baa yapo nyepala doloma rapu pyuo nenge mokwa soo maipa pyuo karena lara doko.
LUK 12:43 Kamongo dee kapu kyuo epo kendemande akali yulu rolae pyuo kararamo kandaramo dokopa kendemande akali doko baa rae maiyuo para.
LUK 12:44 Kinyi langilyu, kamongo baame banya bange peparae rapu pyuo karena lao rombo palyara.
LUK 12:45 Dopa piramopape yulu pingi akali baa kopyali ingyapala, Nambana kamongo waiya lao epa nalyamo lao suu pyapala yulu pingi enda akalipi yango pyarako pyao baamoo wambu yango role pyao nenge nao waene ipwange malu nao pipala kyawa sisingi bolombalo laramo pisirami.
LUK 12:46 Dopa pyuo piso kamongo doko waiya lao epa nara lao suu pyao kamenge pisiramo yuu gii dokopa banya kamongo epara. Epapala baa pyakepanyi nembo kaepala wambu yanengena mamba kiso lao kararami dupwa koo keta kararami dokonako pyambwara.
LUK 12:47 Dokona suu pyao kendemande akali mendeme banya kamongome yulu dopalende pipilinya suu pyalyamo lao sepala pinya wangu laka nara ramo doko banya kamongo dokome baa poraiyuowale pyara ingilyamo.
LUK 12:48 Dopa piraminyipape kendemande akali mendeme kamenge karo koo mende pira ramo doko banya kamongo akali kuki pyuo pyaroko pyara. Namwa keta yulu paliramuli pyuo pirama. Dokona suu pyao yulu andake mende namwa kete paliramo dokopa yulu andake pirama. Dee yulu kama andake palira ramo doko namwa yulu kama andakeoko pirama ingilyamo.
LUK 12:49 Isa yuu dakena isare pyao pyale lala epeyo doko epapu anji nyepapyali yaka lao suu pilyu.
LUK 12:50 Namba bapitisimo mende nyero ingilyamo doko pyaka sepapyali yaka lao monarena reke lao karalu karapyamopa karo.
LUK 12:51 Namba isa yuu dakena nakama kui lao karalapa lao epelyamo lao suu pilyamisi? Doko daa lyakande. Liti pyuo kararami lao epeyo.
LUK 12:52 Dokona suu pyao anda mendaki dokona wambu kingi paki palirami dupwa paka lakyuo lamame rema dusipa kando yango palyuo kararami. Dee rema dusipame lama dolapo kando sisi nyuo kararamioko.
LUK 12:53 Nakama sisi nyuo karo rakange dokome ikinyingipa sisi nyerambinyi, wanenge dokome endangipa sisi nyerambi. Akali mendena endangipa ayangepa sisi nyerambi, akalinya etenge dokome banya ayangepa sisi nyerambioko leya.
LUK 12:54 Wambu malu mee kareyami dupwa kando pii mende konda pyuo lamaiya. Doko neta anda penge kata dorena kopa mende silyamo doko kandapala apunda eparalyamo lao suu pingi. Apu dokona rae doko epenge kandale.
LUK 12:55 Donorena piso raiya minyuo epelyamo kandapala isasa piralyamo lenge. Dokopa dopa pingi.
LUK 12:56 Nakama panga soo yanengena mamba kiso lao karenge dupwa kando mende leto. Isa pandape yakerenamepe mende rengya piralyamo lao panapyamo dokona renge doko kapa kando silyaminyi. Silyaminyipape yuu gii dakepale yulu andake mende piralyamo doko akipamo sepa nalyamipi?
LUK 12:57 Dee, anjuku yulu rolae lao pakana palyuo range suu pyaa nalyamipi?
LUK 12:58 Akali mendeme emba kando kote lalana leya kande dokopa baame emba jasi akalinya lenge kambu dokona ipyuo lanyuo paramo dokopa jasi dokome emba yanda singi maipala karapusi anda dokona palyasaraŋa lao ene kote lala katasa pao dokopa rolenge kandale.
LUK 12:59 Dopa pyuo pii nare ramo emba nyuo karapusi andana pyambwaraminyi dokopa bange peparae beta pyapala kumasi kana maiyuo lyolo pirinyi gii dokopako mokwara leya.
LUK 13:1 Yuu gii dokopa akali lapo epapala Pailateme Galili range akali bange kiso Anatu maiyuo kareyami dokopa Pailateme pyao ranjama kulimbuo rukuraka piya pii dokona lao baa lamaiyami.
LUK 13:2 Dokopa Yesu nakama isingi lamaiyuo dopa leya. Galili akali dusipa kamame koo piyaminyisa randa neyami lao suu pilyamipi?
LUK 13:3 Daa langilyu. Nakama dae karaminyi dupwa mona enenge palyuo kara narami ramo doko nakama opetae dopa pyuo kwao parami.
LUK 13:4 Dee, yuu Silome dokona anda ama ketae londe mende kareya doko boo lapala akali akalisa ipisu mange lama piya kande doko akali dupwa Jerusaleme range wambu dupwa peparaena ama koo ingyuo kareyamisa piya lao suu pilyamipi?
LUK 13:5 Daa langilyu. Nakama dae karaminyi dupwa mona enenge palyuo kara narami ramo doko nakama opetae dopa pyuo kwao parami leya.
LUK 13:6 Lapala baa kongwalu pii mende dopa lao leya. Akali mendena girapo ee sukusa dokona isa piki mende ando kareya. Piki doko jingi lyilyape lao kandala epapala mende lyiyamo kando nyii naya.
LUK 13:7 Kando nyii napala akali ee rapu pyuo pyakamaingi doko lamaiyuo namba ee kana remasa pyuo isa dake jingi lyilyape lao kandala epapa pingi doko angi lyilyamo kando nyii nalyo lyakande. Kepanyi nembakambanaleŋe akipamo mee yuu minyarambuo nyuo karara? leya.
LUK 13:8 Dopa leyamo dokopa akali doko isingi lamaiyuo, Kamongo, ee kana dakena opetaeko mee karena kaembana. Namba range isa kako pyao yuu pyao kapu kyepala dokona mena ii lapo retaro.
LUK 13:9 Dokopa jingi lyera ramo doko kapa. Lyii nara ramo dokopa enakana kapa keparamba, leya. Yesumi kongwalu doko lamaiya.
LUK 13:10 Yuu gii koro petenge dokopa baa sinakoke anda mendena mana lao kareya.
LUK 13:11 Dokopa enda mende dokona peteya. Imambu koo mendeme renge kuiyasa baa ee kana akalisa ipisu mange lama mapi piyamo peteya. Baa mata ponga lyiyamopa pyasinju lapalana saka naya.
LUK 13:12 Dokopa Yesumi baa kando epena lapala baa lamaiyuo, Enda, embena anga doko mee ingilyamo leya.
LUK 13:13 Lapala banya kingi doko enda dokona ketae reteya. Dokopa baa aopa pyasinju leya. Lapala Anatu lakando peteya.
LUK 13:14 Dokopa sinakoke rapu pingi akali dokome Yesumi yuu koro petenge gii dokopa pyuo nyiya dokona imbwuapala wambu peteyami dupwa lamaiyuo, Yuu mange pyakambwaro akali yulu kapa pingi. Dusipana mendepa mee inginya lao ipupwape. Yuu koro petenge dokopa mee inginya lao epa nalapape leya.
LUK 13:15 Dokopa Kamongo dokome dopa lao isingi lamaiya. Nakama panga soo yanengena mamba kiso lao karenge dupwa, nakama peparaeme yuu koro petenge dokopa nakamana bulamakaope dongepe polanyi kamanda pyakamapala ipwa dokona lanyuo papa pii nangese?
LUK 13:16 Doko suu pyao enda dake Aporakamena wanake doko ee kana akalisa ipisu mange lama Saraneme minyapyamopa pisipyamo doko yuu koro petenge dokopa kapa rekya lakami naramase? leya.
LUK 13:17 Baa dopa pyuo leyamopa yango palyuo kareyami dupwa elyuo peyami. Dokopa mee wambu dupwa peparaeme baa yulu ama keyange pyuo kareyamo dupwa kando raeko maiyuo kareyami.
LUK 13:18 Dokopa baa dopa leya. Anatunya isingi yulu doko apiyakale? Aki mendena makande minyuo laro?
LUK 13:19 Doko isa masatana waingi dopale. Akali mendeme doko nyepala banya ee dokona wara piya. Wara piyamo kene pyapala ando isa andake ingyuo peya. Dokopa yaka ketae papingi dupwa epo wangya dupwana anda pyuo paleyami leya.
LUK 13:20 Lapala dee dopa leya. Anatunya isingi yulu doko aki dopaleŋe larose?
LUK 13:21 Doko isi dopale. Enda mendeme penge sosepyane dokome nenge nenge palawa lenge doko yuu remasa ingyuo nyepala mendakinya reto isi lapo koko reteyamo dokopa isi dokome borete doko ando kameya ingyuo nyilyiya leya.
LUK 13:22 Dokopa baa Jerusaleme taonepe, dee anda kuki lama malu palyuo karengepe dupwana mana lamaipa pyuo peya.
LUK 13:23 Dokopa wambu mendeme baa lamaiyuo, Kamongo, Anatumi wambu mendasipa iki nyiso pyuo nyerape? leya. Leyamo dokopa baame nakama dopa lamaiya.
LUK 13:24 Kambu rambu rambu sukusa dokona panya lao soo poraiyuo pupwape. Dokona lao nakama dopa langilyu, Wambu malu sukusa dokona panya laraminyi doko kapa papa narami.
LUK 13:25 Anda range akali sipurapala kambu upi laramopa enakana nakama epo karo kambu dokona kapa kapa pyuo lao, Kamongo, kambu lumbwakape, laraminyi dokopa baame dopa lao isingi langira. Nakama anjarae lao see nalyo, lara.
LUK 13:26 Dokopa nakamame isingi lao, Namwa embapa nengepe waene ipwangepe nao peteyamanopa emba namwana kata dupwana mana lao karee kande larami.
LUK 13:27 Laraminyipape baame lao, Dopa langilyu, nakama anjarae lao see nalyo. Yulu koo pingi dupwa peparae nakamame namba yaki nyepala pupwa, lara.
LUK 13:28 Dokopa Aporakamemoo Aisakemoo Jekopemoo Anatunya poropeta akali dupwa pipya nakama Anatunya isingi panda dokona pisiraminyipa nakama range nyiso kando karo ee lao nenge ginyi ganyi lao kararami.
LUK 13:29 Dokopa akali dorena rangepe dumurena rangepe donorena rangepe dulurena rangepe akali dupwame epo Anatunya isingi panda dokona epo taepo dokona nao pisirami.
LUK 13:30 Dokona suu pyao wambu lapo epapu kamame kuki ingyuo karaminyi dupwa rengya nakama mupwa ingyuo kararami. Lapo epapu mupwa ingyuo karaminyi dupwa nakama kamame kuki ingyuo kararami lyakande, leya.
LUK 13:31 Yuu gii dokopako Parisi akali lapo epapala baa lamaiyuo, Emba dae yaki nyepala puu. Eroteme emba pyao kumakalana suu pyaro karamo leyami.
LUK 13:32 Dokopa baame nakama lamaiyuo, Yana suwa kararope doko dopa lamaiye pupwa. Epapupi rakyape imambu koo raka lanyi nembapapu anga pingi dupwa pyuo nyepa pyuo karo. Yuu repo pyuo dokopa nambana yulu pyuo otaro.
LUK 13:33 Pyuo otaronopape epapupi rakyape jimwape nambana kata palenge dokona papyuo kararo ingilyamo. Dokona lao Anatunya poropeta akali mende Jerusaleme kara napala panda wakale mendena kumara doko kapa ingya nalyamo.
LUK 13:34 O Jerusaleme, Jerusaleme, Anatunya poropeta akali dupwa pyao kumwakao baa wambu nakama karaminyi dokona mapanyi peenge dupwa nyuo kaname pyao karenge. Kola endangimi ikyane dupwa papakeme nee pyuo arapunya palyingi doko suu pyao nambame yuu malu mee embena wane wanakepe dupwa nyuo arapunya sukusa palyapuli yaka lao suu pyapa piyu. Suu pyapa piyunupa daa lee.
LUK 13:35 Embena anda yuupi doko apa sera. Dokona suu pyao emba dopa langilyu. Kamongona kingi lao epelyamo doko baa keyange keta palena lao ene lapa narenepa namba dee kanda nare leya.
LUK 14:1 Koro petenge mendepa Yesu Parisi mende Parisi yango dupwana kyawa nyuo kareyamo dokona anda dokona nenge nala peya. Dokopa baa apa pilyape lao lee minyuo kando kareyami.
LUK 14:2 Dokopa akali mende ono ipwape peteyamopa Yesunya lenge kambu siyamo dokona kareya.
LUK 14:3 Dokopa Yesumi Mawa Pii singi akali dupwape Parisi akali dupwape lamaiyuo dopa leya. Koro petenge dokopa anga pingi dupwa kapa pyuo nyingi lao Mawa Pii mende palase? leya.
LUK 14:4 Leyamopa nakama romo napyuo kareyami. Dokopa baame akali doko pyuo nyepala pena leya.
LUK 14:5 Lapala baame nakama dopa lamaiya. Nakama petaminyi dokona mendena mena donge panda bulamakao doko ipwa kamuo nyingi yuwale dokona yalyaramo dokopa koro petenge gii dokopa aopa nyii naramisi? leya.
LUK 14:6 Dokopa nakama kapa isingi larami ingya naya.
LUK 14:7 Nenge nao peteyaminyi dokopa wambu lapo akali Kamongo dupwa pisipapu pingi dokona epo pisinya peteyaminyi doko kandapala baame nakama kando kongwalu pii mende lamaiya.
LUK 14:8 Enda yapo nyerami dokopa nenge andake piraminyi ipu leyami kande dokopa akali Kamongo pisirami panda dokona waiya lao papala pisa nalapape. Akali kama andake mende nenge nala eparaŋa kandena.
LUK 14:9 Akali nenge piramo doko kandapala embena panda baa maiyasara. Emba elyuo pao wambu kamame kuki petenge dokona pao pisasare.
LUK 14:10 Dopa pii napala nenge andake piyami kande dokopa wambu kamame kuki petenge dokona pisa pupi. Dopa pirinyi dokopa nenge nala ipu laramo akali dokome epo emba langyuo, Yangone, emba dulupinya akali kamongo petenge dokona pupi, lara. Dokopa emba role pyao taepo repeta pisirami dupwa peparaena lenge kambu dokona emba ketae pyambwarasa pira.
LUK 14:11 Dokonako ingyuo wambu range mupwa ingyuo karo larami dupwa peparae kuki ingyaramopa kararami. Mendeme range kuki ingyuo karo laramo doko mupwa ingyaramopa karara leya.
LUK 14:12 Lapala baame nenge nala epena leyamo akali doko dopa lamaiya. Nenge andake pirinyi dokopa embena puu minyingipi yangongepe ree palupi parali maki palenge bange malu retengepe dupwa nenge nala ipu laa nare. Nakama enakana emba isingi nenge nala ipupi larami kande.
LUK 14:13 Dupwa kaepala dee nenge andake pirinyi dokopa wambu pendewa dupwape wambu mapi pingi dupwape lenge koo dupwape nala epena lare.
LUK 14:14 Nakamame emba isingi nenge nala ipu laa narami ingilyamo dokona emba keyange keta paliri. Yulu rolae pingi wambu dupwa lopo minyalyuo nyeramo gii dokopa Anatu keta isingi nyere leya.
LUK 14:15 Taepo repeta peteyaminyi dokona mendeme baa pii dopa leyamo doko sepala dopa lamaiya. Anatunya isingi panda dokona sukusa wambu nenge nao pisirami dupwa keta rae mairamilyamoŋo wambo leya.
LUK 14:16 Leyamo dokopa baame baa dopa lamaiya. Yuu mendepa akali mendeme nenge andake kuiyapala dokopa wambu malu nala epenale leya.
LUK 14:17 Lapala nenge narami gii epeyamo dokopa banya yulu pyakamingi akali mende wambu nenge nala epenale leyamo dupwa lamaiyuo, Dakepa peparae elya pisi silyamo ipupwa, lala pena leya.
LUK 14:18 Leyamopape nakama peparae mendakinya palyuo yulu mende kingi minyapyasa epa naro lao lapa lapa piyami. Akali wambo leyamo dokome dopa lamaiya. Namba yuu mende ropo pyapu doko namba kandala paro ingilyamo. Ipu lapi kandapi doko namba yaki nyuo kaeyape lao langilyu, leya.
LUK 14:19 Leyamopa mendeme lao, Namba yulu bulamakao lama maki pyuo karenge kingi paki larapu ropo pyapu dupwa yulu keyange pingipi lao kandalana makande pyala pelyo. Ipu lapi kandapi doko namba yaki nyuo kaeyape lao langilyu leya.
LUK 14:20 Leyamopa mendeme lao, Namba enda mende nyipu dokona kapa epa naro ingilyamo leya.
LUK 14:21 Dopa leyami dokopa yulu pyakamaingi akali doko epo banya kamongo dokona pii lamaiyaminyi dupwa lao pakana palyuo lamaiya. Dokopa akali kamongo doko imbwuapala banya yulu pyakamaingi akali doko lamaiyuo, Anda taone dokona kata barete dupwanape mee kata dupwanape waiya lao papala wambu pendewape mapi pingipi lenge koope kimbu kwaenge dupwape nyepala lanyuo epare leya.
LUK 14:22 Enakana yulu pyakamaingi akali dokome lao Kamongo, emba pii lapinyi doko pyuo otapu. Pipunupape panda lapo iki silyamo leya.
LUK 14:23 Dokopa kamongo dokome yulu pyakamaingi akali dokome dopa lamaiya. Anda kuki pyuo karengepe doko kata barete soo pelyamo dupwanape kata kuki silyamo dupwanape papala wambu kareyami kande dupwa puu maiyuo lanyuo eparenepa nambana anda kete pinyale leya.
LUK 14:24 Akali wambo nenge nala epena lapu dupwana mendeme nambame nenge malu kuipu doko kuki lamape nakanjo see narami leto leya.
LUK 14:25 Wambu ama malu mee baa role pyao papyuo peyami. Dokopa baame kapu kyepala nakama dopa lamaiya.
LUK 14:26 Wambu mendeme namba role pyao karalana lao suu pyapala dokopa banya rakangepe endangipi etengepe wane wanakepe yangonge pemalengepe dee baa range opetaepe awa nao kara nara ramo doko nambana disaepole kapa kara nara.
LUK 14:27 Mendeme banya isa mamando doko soo namba paronuli pyuo epa nara ramo doko nambana disaepole ingyuo kapa kara nara.
LUK 14:28 Dokona lao nakama karaminyi dokona mendeme anda ketae anda londe mende pipuli yaka lao suu piyami kande dokopa kapa pyuo otarope mee lao yulu bange dupwa wambo yaka lao kando suu pyaa nangese?
LUK 14:29 Dopa pii narami ramo doko kana isarename retenge dupwa retapala anda piramo bange dupwa daara dokopa wambu kandarami dupwa peparae giyalya giyana pyuo,
LUK 14:30 Akali dake anda kanda soo pipyamo doko kapa pyuo ota nalyamo larami.
LUK 14:31 Panda, kiŋi akali mendeme kiŋi yanda pyala panya lao kararamo dokopa wambo wato lao pisipala banya akali akalisa mendaki daako akalisa ama malu (10,000) dupwa kararaminyipa kiŋi mende yanda pyala epelyamo doko akali akalisa lama daako ama malu wakasa (20,000) role pyao epelyaminyi dupwa kapa pyaramape mee lao suu pyara.
LUK 14:32 Kapa pyaa narama lao suu pyara ramo ene nanesa eparaminyipa baame akali lapome wai minyuo, Aki bangende jimili lao suu pyapala yanda pii narama, lao piso sinya lao pena lara.
LUK 14:33 Doko suu pyao nakama karaminyi dokona mendeme banya bange peparae matarena nemba nara ramo doko nambana disaepole ingyuo kapa kara narami leya.
LUK 14:34 Kota doko keyange ingilyamo. Ingyapyamopa kota kema ramo dokopa apa pyuo dee keke pinya larama.
LUK 14:35 Dokome yuu dokona kapa yuu kuma maiya nangeoko. Akali dupwame mee neta nembarami. Kale kata singi ramo doko selapape leya.
LUK 15:1 Takisi nyingi akali dupwape yulu koo pingi wambu dupwape nakama peparae banya pii simwali yaka lao repeta epeyami.
LUK 15:2 Dokopa Parisi akali dupwape Mawa Pii mana lenge akali dupwape mumu lao, Akali dokome wambu koo pingi dupwa yako lao nyuo nenge role pyao nao pyuo karenge leyami.
LUK 15:3 Dopa leyaminyi dokopa baame kongwalu pii dopa lamaiyuo leya.
LUK 15:4 Nakama karaminyi dokona akali mendena sipisipi akalisa pao akalisa kararami dokona mende pana naya kande dokopa akalisa pao akalisa mange mendaki karo dee ipisu mange mendaki dupwa mee karena lapala sipisipi pana naramo doko koto nyipuli lao paa narase?
LUK 15:5 Kando nyepala baame rae maiyuo langena nyuo sera.
LUK 15:6 dopa pyuo anda soo epo banya puu minyingi dupwape parali maki palenge dupwape sukusa sukusa pyuo epena lapala, Nambana sipisipi pana napyamo doko kando nyepala epelyo dokona rae maiyakamana lamaira.
LUK 15:7 Doko suu pyao dopa langilyu. Wambu 99 yulu rolae pingi dokome yulu koo yaki nyepala mona enenge palyuo kararami ingya naramo dupwa yake panda karenge dupwame kando rae maiyuo kararaminyipape wambu koo pingi mendakindeme yulu koo yaki nyepala mona enenge palyuo kararamo dokopa yake panda karenge dupwame kando ama kama rae andake maiyuo kararami leya.
LUK 15:8 Dee pii mende, enda mende banya kana akalisa seramo dokona mende pana nara ramo dokopa lambe kisapala anda panda polanyi nembapala kando nyipuli yaka lao poraiyuo kota narase?
LUK 15:9 Kando nyepala baame puu minyingi dupwape parali maki palenge dupwape sukusa sukusa pinya lapala, Kana pana napyamo doko kando nyepalono. Namba role pyao rae maiyuo pisimana, lara.
LUK 15:10 Doko suu pyao dopa langilyu. Wambu yulu koo pingi mendakindeme koo dupwa yaki nyepala mona enenge palyuo kararamo dokopa Anatunya aŋala dupwame kando mona pyakalyuo pyao kararami leya.
LUK 15:11 Lapala dopa leya. Akali mende banya ikinyingi lama mandeya.
LUK 15:12 Dokopa enakana mandeyamo dokome banya rakange doko dopa lamaiya. Rakane, moyange bange nyeroli dupwa dakepa jii leya. Dokopa banya bange dupwa nakamba mokwa soo maiya.
LUK 15:13 Yuu gii mendasipa epo papeyamopa ikinyingi enakana mandeyamo dokome banya pinji peparae nyepala kata nyuo pao yuu nanesa mendena peya. Papala yulu kopetame pyuo banya bange dupwa ukiaki minyiya.
LUK 15:14 Bange peparae oteyamo dokopa yuu dokona lopo andake sepala nenge pyambe neya.
LUK 15:15 Pyambe neyamo dokopa yuu range akali mende kareyamo dokona role pyao palyuo karala peyamopa baame banya yuu pau dokona mena kareyamo dupwa nenge pyakala pena leya.
LUK 15:16 Dokopa mena dupwame isa jingi nao kareyami dokona lapo nyuo napuli lao suu pyao kareya. Dokopa mendeme nenge mende maiya nayami.
LUK 15:17 Maiya nayaminyipape baa mona epo paleyamo dokopa dopa lao suu piya. Nambana rakangena yulu pingi akali nenge kapa naminyipa mee kakana sipyamo karalyaminyi. Doko doŋo namba lopo pipyasa kumalyanoŋo.
LUK 15:18 Kala rakane karamo dokona papala dokopa dopa lamairu. Rakane nambame yake panda kandope dee embena lenge kambu dokonape yulu koo piyu.
LUK 15:19 Namba kwao karo dokona namba embena ikinyingi angi larami doko kapa ingya nalyamo. Namba embena yulu pingi akali dopale inginyi pyambwape laro leya.
LUK 15:20 Lapala sipurapala banya rakange kareyamo dokona epeya. Epo dokopa donosa epeyamo dokopa banya rakange dokome baa kandeya. Kandapala kondaya. Kondapala makando pao kupyuo nyuo nyinyi piya.
LUK 15:21 Dokopa ikinyingi dokome baa lamaiyuo, Rakane, nambame yake panda kandope embena lenge kambu dokonape yulu koo piyu. Namba kwao karo dokona namba embena ikinyingi angi larami doko kapa inya nara leya.
LUK 15:22 Dopa leyamopa rakange dokome banya kendemande dusipa lamaiyuo, Komau keyange wakasa waiya lao minyuo epo pee pyakamipwape. Pyakamipala kinginya pisingi bange uriŋi mende banya kingi dokona pisakamyuo kimbu suu pee pyakamyuo pipwape.
LUK 15:23 Dopa pipala bulamakao ikyane rondo lasi mende pyalapae. Pyaraminyipa nenge nao male lao yalya yalya kando karamanale.
LUK 15:24 Dokona lao nambana ikinyingi dake kumuyape lao suu pyao karapu baa lete karapyalyamo. Puu pao peyaŋa lao suu pyapunu doko kando nyilyamano leya. Dokopa nakama male lao yalya yalya kando kareyami.
LUK 15:25 Dokopa banya ikinyingi wambo mandeya doko ee dokona yulu pyuo kareya. Karo anda maretale epo dokona lakuli pii lao mali lyuo kareyaminyi siya.
LUK 15:26 Sepala kendemande mende kando, Apa pipyamosa pilyaminyi lao piso siya.
LUK 15:27 Dokopa baame baa dopa lamaiya. Embena yangonge anda kapa ipyamopa rakaneme yako lao nyuo bulamakao ikyane rondo lasi pyakamyuo pilyamo leya.
LUK 15:28 Dopa leyamo dokopa baa imbwuapala, Andakare paa naro leya. Dokopa banya rakange kamanda epo baa andakare epena lao kongo pyuo lamaiya.
LUK 15:29 Kongo pyuo lamaiyamopape baame banya rakange isingi dopa lamaiya. Emba see, Nambame ee kana malunya nembo embena yulu pyuo embena pii kamba laa nao pyuo kareyo. Pyuo kareyonopape embame nambana puu minyingi dupwa pipya yalya kanda lapale lao mena memena ikyane mendepe jii nae kande.
LUK 15:30 Jii naenepape embena ikinyingi doko embena bange dupwa enda pamakae keta kokwa sinyi nembapala papyuo karo ipyamo dokopa bulamakao ikyane rondo lasi pyakamipilyamo, leya.
LUK 15:31 Leyamo dokopa rakange baa dopa lamaiya. Rakane, yuu peparae embapa nambapa role pyao karambwanopa nambana bange peparae embena ingyuo silyamo.
LUK 15:32 Epapu male lao yalya kando rae maiyuo karamano doko kapa rolae pilyamano. Embena yangonge kumuya lao suu pyao kareyoŋo epapu lete epo karamo. Baa puu pao peya lao suu piyuŋu epapu kando nyilyamano, leyaŋa, leya Yesumi.
LUK 16:1 Baame dee pii mende disaepole dupwa lamaiyuo dopa leya. Bange malu retenge akali mende kareyamo dokopa akali mendeme banya bangepe yulupi rapu pyuo kareya. Yuu mendepa akali kamongo doko banya yulu akali doko banya bange dupwa ukiaki minyiya doko lasi pii siya.
LUK 16:2 Sepala dokopa baa epena lapala dopa lamaiya. Pii mende langyalaminyi solono doko emba apa pipindena letaminyi. Embame nambana bange dupwa akipare silyamo lao rolo langipala kaepala neta puu leya.
LUK 16:3 Dokopa bange rapu pingi akali doko monarena dopa lao suu piya. Nambana kamongo dokome nambana rapu pingi yulu kaepala puu letamo dokona apa pirose? Namba andapae ingyuo karo dokome yuwale kyasuwape yulu andakepe pinya saka napala nenge mee jinya lao kee lao kararo dokopa elyaro.
LUK 16:4 Namba bange rapu pyuo karo yulu doko kae lao nembaramo dokopa wambu dupwame nakamana anda dokona namba kando yako lao nyerami dokona kata mende wapwakaro lao suu piya.
LUK 16:5 Lao suu pyapala wambu banya kamongo bange mairamili dupwa mendaki mendaki lao epena leya. Lapala wambo epeyamo doko lamaiyuo, Nambana kamongo doko bange akipare yano pyakamairi ingilyase? leya.
LUK 16:6 Baame lao, Olipi jingi ipwange makando pingi pee yaka lao akalisa pao akalisa (100) mairu, leya. Dokopa baame baa lamaiyuo, Embena pepa dake ola. Emba pisipala akalisa kingi paki nyero dusipa iki pepana pyaa, leya.
LUK 16:7 Lapala baame wambu mende lamaiyuo, Embame bange akipare yano pyakamairi ingilyase? leya. Baame lao, Witi jingi makando pingi nyuu byake yaka lao ama malu (1,000) mairu, ingilyamo leya. Baame baa lamaiyuo, Embena pepa nyuo lapo iki (800) pyaa, leya.
LUK 16:8 Kamongo dokome bange rapu pyuo kareyamo akali panga singi doko kando, Baa akali kendepulilyamo, lao suu pyapala lakandeya. Dokona lao isa yuunya wambu dupwa kendepuli ingyuo isa yulu pyuo karenge dupwa soo gisilyaminyipa yanga paupau lengena ikinyingi dupwa poraiyuo soo gisa nange.
LUK 16:9 Dokona ingyuo pii mende langilyu. Kana mone doko mee isa bange doŋo dokona lapo nyepala dokopa wambu yango mairaminyipa emba yako lao puu minyarami ingilyamo. Dokome kana mone dee minyanda nare gii dokopa nakamame emba yake panda dokona yako lao sukusa nyerami leya.
LUK 16:10 Mendeme yulu kuki dupwa rolae pyuo pira ramo doko baa yulu andake dupwa opetaeko rolae pyuo pyuo kararasa pira. Dee mendeme bange kuki dupwa waa nyuo karara ramo doko baa enakana bange andake lapo waa nyuo nyerasa pira.
LUK 16:11 Dokona ingyuo isa bange dupwa ukiaki minyuo karare ramo imambunya bange angi dupwa emba keta kapa serase?
LUK 16:12 Dee yanengena bange dupwa kapa rapu pyuo pyakami nare ramo doko apimi imambunya renge kulisa renge dupwa emba keta jerase?
LUK 16:13 Kendemande akali mendeme kamongo lamana yulu kapa pyakamyuo kara nara. Dokona lao baame mende awa nao, mende mona reto karara panda mendepa angingyuo puu minyuo karo, mende awa napala pyuo karara. Dopako pyuo Anatu kana monepa dolapo laparae nakamana mupwa ingyuo kapa pyuo kara narami ingilyamo leya.
LUK 16:14 Dopa leyamo dokopa Parisi akali nakama kana mone mona reto karenge dupwame baa kilya kandalya kandana pyuo lao kareyami.
LUK 16:15 Dopa lao kareyaminyipa baame nakama lamaiyuo dopa leya. Nakama yanengena yulu ketae dupwa rolae pyuo wambu nakamana kingi ketae pyambuo karamili lao suu pyao karaminyi. Dopa pilyaminyipape Anatumi nakamana mona anda kandenge. Dokona suu pyao isa wambu dupwame aumi kumuo kandenge dupwa Anatumi kando ipyange.
LUK 16:16 Mosesena Lowa dupwape poropeta akali dupwana pii pyasi palamo dupwape wambu peparaeme warombo soo peteyami. Enakana Jone baa lao epeyamo dokopa kaeyami ingiya. Gii dokopa Anatunya isingi yulu dokona lao waili pii keyange boo pyao leyaminyisa wambu malu mee kuli palyuo sukusa epana pyuo karaminyi.
LUK 16:17 Yake yuupi mee awa awa pyuo otaramopape Mawa Pii palamo dokona kuki mendepe isa pasi see nara.
LUK 16:18 Akali mendeme banya enda ramanyi nembapala enda wakale nyera ramo doko enda enakana nyera doko kepo pili lao nyerasa pira. Akali mendeme enda ramanyi nembasi pisiramo mende nyera ramo doko kepo pili lao nyerasa pira.
LUK 16:19 Akali bange malu retenge mende kareya dokopa komau konepe komau keyange wakasape pee pyuo yuu peparae nenge keyange malu nao pyuo kareya.
LUK 16:20 Banya kame kambu dokona akali pendewa mende kingi Lasarasa lenge rete pyuo buu minyiyamo doko palyuo siya.
LUK 16:21 Baame akali bange malu retenge taepo dokona nenge pinjingi isa epeyamo dupwa nyuo napuli lao suu pyao palyuo siya. Dokopa suwa dupwame epo banya rete dupwa kekenge pendo kareyami.
LUK 16:22 Akali pendewa doko kumuyamopa aŋala dupwame baa nyuo Aporakamena arapu dokona palyiyami. Akali bange malu retenge doko opetae kumuyamopa malu piyami.
LUK 16:23 Malu piyaminyipa baa panda Atisi lenge dokona randa nao piso, lenge pendakae lapala Aporakame nanesale paleyamopa Lasarasa banya arapu dokona paleyamo kandeya.
LUK 16:24 Kandapala kyakale lao dopa leya. Rakane Aporakame namba kando kondapala Lasarasame ipwa dokona kingi mumuna warendapala minyuo epo nambana kekenge doko mandarena lao warendakana lakape. Isare ulingi dakena namba randa andake nao peto leya.
LUK 16:25 Dopa leyamo dokopa Aporakame dopa leya. Rakane, emba lete karo dokopa embena bange keyange dupwa nyuo kareene doko suu pyao Lasarasa koo dupwa nyuo kareya kande. Dopa piyambinyipa epapu alowa pipala baa dakena mona minyarambwamwanopa petamo, emba randa andake nao petene.
LUK 16:26 Dee mende pipyamo doko kandape. Emba dumurena petene nambwa darena petambano suku dokona rapu wakasa palu palyuo palamo. Daerena karo emba petene dolorena epanya pirami doko saka narami. Dolorena karo namwa petamano daerena epanya pirami doko saka naramiko ingilyamo leya.
LUK 16:27 Dopa leyamo dokopa baame dopa leya. Rakane wamba lapu doko kaepala, nambana rakangena anda dokona Lasarasa pena lakape.
LUK 16:28 Nambana yangonge kingi paki karenge dusipa yuu randa nenge dakena epa namili yaka lao repe repe lamaiyakala pena lape, leya.
LUK 16:29 Dokopa Aporakame dokome dopa leya. Mosesena piipi Anatunya poropeta akali dupwana piipi pyasi palamo. Pii dupwana soo karena leya.
LUK 16:30 Dokopa baame dopa leya. Rakane Aporakame, doko kapa daa lao suu pilyu see narami ingilyamo. Kumuo palenge mende sipurapala nakama karaminyi dokona para ramo dokopa nakama sepala mona enenge palyuo kararami leya.
LUK 16:31 Dokopa Aporakame baame dopa lamaiya. Mosesena pii dokope Anatunya poropeta dupwana pii dokope see narami ramo doko kumuo palenge mende lopo epara ramo dokopa pii doko kinyilyamo lao suu pyaa naramiko, leya Yesumi.
LUK 17:1 Dokopa baame banya disaepole dupwa dopa lamaiya. Kinyi kinyi, isa wambumi yulu koo pirami ingilyamo. Pirami ingyapyamopa mendeme renge kuiyuo wambu yango yulu koo dokona suu longwanyi pyambwara ramo doko baa randa andake nara.
LUK 17:2 Mendeme wambu kuki karaminyi dakena mende yulu koo pinya lao renge kuiyuo lara ramo doko baa keta renge kuiyuo randa andake nara. Dokona baasa reke lao dopa pisasaraŋa lao banya pendeko dokona kana reko mende yukwapala baa ipwa kota dokona pyambwapyali doko randa andake naa napyali.
LUK 17:3 Nakama rangena yulu kando waso karalapape. Nakamana yangone yulu koo pira ramo doko pyalana pyuo mana lamaiyalapape. Dokopa baa range kondapala mona enenge palyuo karara ramo dokopa banya yulu koo doko nyuo kame sakamipwape.
LUK 17:4 Baame nakama kando yuu mendaki dokopa yulu koo yanda ipingi nyero pipalape nakama langyuo, Kondapala mona enenge palyuo karapuli lao yanda ipingi nyero polo lapa pira ramo doko mee kame sakamipa pipapeko, leya.
LUK 17:5 Aposele dupwame Kamongo Yesu lamaiyuo, Namwame Anatu kapa ingingi lao suu pyamwa doko kapa ingya nalyamo, embame namwa porainyi pyambwape leyami.
LUK 17:6 Dokopa Kamongo Yesumi dopa leya. Anatu kapa ingingi lao suu pingi doko nakamana suu pingi isa masata waingi koo dopale ingyapyali doko nakamame isa sikamoo dake lamaiyuo, Emba rakyala ipwa kota pete dokona pao sere, lao laraminyili pyuo pipyali, leya.
LUK 17:7 Nakama karaminyi dokona mendeme banya kendemande akali yuu apu rao karo panda sipisipi iso karo panda kamanda yulu piparamopa andakare eparamo dokopa baa lamaiyuo, Aopa taepo repeta piso nenge nala ipu, laramisi?
LUK 17:8 Dopa pyuo laa nange kandale. Baa kando, Nambana nenge nenge rapa rapa pyakape. Pyuo otapala komau pee pipala namba nengepe waene ipwangepe ene napa narono dokopa namba isaru pyuo karape. Nao otaparono dokopa enakana emba nengepe ipwape nare, lao dopa lao laa naramisi?
LUK 17:9 Kendemande akali mende pinya laraminyili pyuo piramo dokopa lakandaramipi?
LUK 17:10 Doko suu pyao Anatumi dopa pyuo karalapape laramuli pyuo pyuo karalapape. Namwa mee kendemande ingyuo karamano. Namwana yulu pipingi doko iki pimwa lao suu pyalapape, leya Yesumi.
LUK 17:11 Jerusaleme panya pao yuu Samariapa yuu Galilipa liti dokona kanya peya.
LUK 17:12 Pao anda repe repe pyuo kareya mendena sukusa peyamo dokopa akali rapa nenge akalisa lapome baa katasa kandamae nyiyami. Dupwame nanesale karo
LUK 17:13 pii ketae palyuo lapala, Yesu Rapu Pingi, namwa kando kondapala pyuo nyepe leyami.
LUK 17:14 Baame nakama kandapala dokopa dopa lamaiya. Purisi akali dupwa nakama kandena lao lasaka pela pupwa leya. Dokopa nakama katasa ene peyaminyipa rapa neyamo doko mee ingiya.
LUK 17:15 Dokopa nakama kareyami dokona akali mende mee ingyapyalyamo lao kandapala kapu kyepala pii poraiyuo lao Anatu lakando pao
LUK 17:16 Yesu kareyamo dokona baa mupwa lao pongwa nao kareya doko Samaria akali.
LUK 17:17 Dokopa Yesumi lao, Akali akalisa elyape ingya napyase? Mange mendaki karo dusipa anja karamisi?
LUK 17:18 Akali rara wakale nanesa range dokome iki kapu kyepala Anatu lakandala epase? Mendali epa naramisi? leya.
LUK 17:19 Lapala baa dopa lamaiya. Sipurapala kata nyuo pupi. Anatumi kapa pyuo nyakara lao suu pyapi dokome emba mee ingyalamo leya.
LUK 17:20 Parisi akali dupwame, Anatunya isingi yulu doko anjokorape epara, lao baa piso siyami dokopa baame isingi lao dopa lamaiya. Anatunya isingi yulu doko lengeme kandarami ingyuo panembena epelyande daa.
LUK 17:21 Wambu lapo lengeme kandalapa, dae silyamo, panda dokona silyamo lao, laa narami. Dokona lao Anatunya isingi yulu doko nakama dae karaminyi sukusa keta silyamo, leya.
LUK 17:22 Lapala baame disaepole dupwa dopa lamaiya. Yuu mendepa nakama Ikinyingi Akali yuu gii dasipana mende eparamo kandamwali yaka lao suu pyaraminyipa angi nolakaramo kanda narami.
LUK 17:23 Dokopa lapome nakama langyuo, Dokona karamo, dakena karamo, larami. Laraminyipape nakama laraminyili pyuo kotala paa nalapape.
LUK 17:24 Dokona lao yuu pele piramopa yake pinjingi dolapona yanga paupau lao kapa kapa pingi doko suu pyao Ikinyingi Akali banya yuu gii dokopa dopa pyuo epara.
LUK 17:25 Dopa pyuo eparamo doŋo baa wambo randa malu naramopa isa wambu dupwame baa mata mairami ingilyamo.
LUK 17:26 Yuu gii Ikinyingi Akali eparamo dokopa yuu gii akali Noa lenge kareyamo pyuo kareyami dokona palyuo pyuo kararaminyi epara.
LUK 17:27 Wambu nenge nao, waene ipwange nao, enda yapo nyuo pyuo yulu dupwa kaeya nao kamenge pyuo kareyami. Dokopa Noa baa sipu andakare dokona kolandapala peteyamo dokopa apu andake epo ipwa dokome nakama peparae pyao kuma soo oteya.
LUK 17:28 Dokonako ingyuo akali Lote kareyamo yuu gii dokopa dopako pyuo kareyami. Nenge nao waene ipwange nao bange ropo pyao nyuo dee maiyuo kana nyuo, ee wara pyuo anda pyuo kamenge pyuo kareyami.
LUK 17:29 Kareyaminyipa Lote baame yuu Sotoma yaki nyepala peyamo dokopa isarepe loo lao kanape yake dokona piso bolombalo lao epapala nakama peparae rao kokwa sulu soo siya.
LUK 17:30 Dokona palyuo yuu gii Ikinyingi Akali doko panembena eparamo dokopa dopako pyuo kararami ingilyamo.
LUK 17:31 Yuu gii dokopa akali mende banya pinjale dupwa andakare seramopa andeyangi dokona pisira ramo dokopa bange minyuo paparowale lao andakare nyela epa nana. Dokoko suu pyao akali mende ee dokona karara ramo baa dee kapu kyuo anda epa nana.
LUK 17:32 Akali Lotena etenge piyamo dokona suu pyaro karalapape.
LUK 17:33 Mendeme banya yanenge range lete wai pyao nyelana lao karara ramo doko baa rangena imambu doko rekya lao nembarasa pira. Mendeme rangena yulu kame soo kumara ramo doko banya imambu doko lete wai pyao nyerasa pira.
LUK 17:34 Dopa langilyu, yuu gii kukwa dokopa akali lama luu palenge rate mendaki dokona palirambinyipa mende nyera mende kaera.
LUK 17:35 Enda lama role pyao jingi pyao rambetaku pyao pisirambinyipa mende nyera mende kaera.
LUK 17:36 Akali lama ee dokona kararambinyipa mende nyera mende kaera leya.
LUK 17:37 Dokopa nakamame baa lamaiyuo, Kamongo doko anja pira? leyami. Baa nakama lamaiyuo, Yanenge kaoma seramo dokonako yaka ulisapumi kandapala epo kaparami leya.
LUK 18:1 Yesumi nakama monarename maka nao yuu peparae ateŋa laoko kararami ingilyamo lao kongwalu pii mende lamaiyuo dopa leya.
LUK 18:2 Taone mendena kote singi akali mende Anatu paka naope akali yango dupwa kando suu pyaa naope pyuo kareya.
LUK 18:3 Dokopa anda malu palyuo karenge dokona enda waiyande peteya. Baame kote singi akali kareyamo dokona epapapu, Mendeme namba moŋo jipyaŋa nambana kote pii lao rolakape, lapa piya.
LUK 18:4 Akali dokome yuu malu mee daa lao kareya. Daa lao karapala enakana dopa lao suu piya. Nambame Anatu andake lao paka nao, akali dupwa kando suu pyaa nao
LUK 18:5 pyuo karapunupa enda dokome namba angalyi pyuo karamo dokona nambame lao rolakamiru ingilyamo. Dopa pii naro ramo doko baa yuu peparae epapa pyuo karo namba maka joo matakara nembasara, leyaŋa, leya Yesumi.
LUK 18:6 Lapala Kamongo dokome dopa leya. Kote soo rolae pii nange akali piyamo dokona mana nyelapa.
LUK 18:7 Dokona suu pyao Anatumi banya wambu rombo palyiyamo yangala kwuara pilyamopa baa piso soo karenge dupwa kando lao rolakami narase? Nakama kando iliki maliki lapala nyisa nao kaeyarase?
LUK 18:8 Dopa langilyu, nakama kando waiya lao lao rolakamira. Rolakamiramopa Ikinyingi Akali eparamo dokopa isa yuu dokona wambu lapome Anatu kapa ingingi lao suu pyao pisiraminyi kandarase? leya.
LUK 18:9 Wambu namba range rolae pyuo karo menge dupwa angi daa lao suu pyao kareyami dupwa kando baame kongwalu pii mende opetae lamaiyuo leya.
LUK 18:10 Akali lama, mende Parisi akali, mende takisi nyingi akali, tembole anda dokona ateŋa lala lalyuo peyambi.
LUK 18:11 Parisi akali karapala baa rangena yulu suu pyao ateŋa dopa leya. Anatu namba wambu menge dupwa akali panga soo nyingipi yulu rolae pii nangepe enda kepo pingipi panda takisi akali dakepe namba dopale daa dokona emba ange lao langilyu.
LUK 18:12 Koro peparaena namba yuu lamasa lao emba suu pyao nenge wasaka pyuo karapa pingi. Namba bange nyingi dupwana peparaena akalisa lapapu mendaki pingyu nyepala emba jingi kandale leya.
LUK 18:13 Dopa leyamopa takisi nyingi akali baa dumbisale karo yake panda kandapuli lao suu pyaa napala kandalyuo kanda nao banya kyangali kingi dokome kapa kapa pyuo, Anatu, namba koo doko namba kandapala nyiso karape, lao kareya.
LUK 18:14 Dopa langilyu, akali doko Anatumi kando rolae leyamopa anda peya. Parisi akali doko rolae ingyuo paa nayamopa anda peya. Dokona lao akali peparae range ketae pyambuo kararami dupwa rengya kuki ingyara. Akali namba koo karo lao suu pyarami dupwa rengya ketae pyambwaramopa kararami, leya.
LUK 18:15 Baa kareyamo dokona wane nyaŋa lapo lanyuo baa minyandapyali yaka lao epeyami. Dokopa disaepole dupwame kandapala nakama pyalana pyuo pena leyami.
LUK 18:16 Leyaminyipape Yesumi wane wanakepe epena lapala, Wane wanakepe dupwa namba karo dokona epena. Kaena lao pena laa nalapape, leya. Anatunya isingi yulu doko nakamana ingyara.
LUK 18:17 Mendeme wane nyaŋana mona palyuo Anatunya isingi yulu doko yako yako lao kara nara ramo doko Anatunya isingi yulu dokona sukusa paa nara, leya.
LUK 18:18 Leyamopa kamongo mendeme baa piso soo, Mana Lenge elyape, apa pipala namba letena renge kulisa palu palenge doko nyerose? leya.
LUK 18:19 Dokopa Yesumi baa dopa lamaiya. Akipamo namba elyape leene? Mendali elyape daa.
LUK 18:20 Mawa pii lenge dupwa emba singi kandale. Kepo pyakami nalapape. Wambu pyao kumaka nalapape. Waa nyakami nalapape. Kyambo laa nalapape. Endangi rakangepa rape rape lao karalapape leya.
LUK 18:21 Dopa leyamo dokopa baame, Yulu doo lalyane dusipa namba wane karo dokopa suu pyao pingi lyakande leya.
LUK 18:22 Pii doko sepala Yesumi baa dopa lamaiya. Emba yulu mendaki kapa pii nangelyamo. Embena bange dupwa peparae kana ropo pyao nyepe. Nyepala wambu pendewa dupwa mokwa soo maipi. Mairi dokona embena yake bange kulisa yake panda dokona sakara. Bange maipala dokopa namba paronuli pyuo ipupi, leya.
LUK 18:23 Dopa leyamo sepala banya bange malu mee siyamo dokona kondaya.
LUK 18:24 Dokopa Yesumi banya lenge kambu kandapala dopa leya. Akali bange malu retenge dupwame Anatunya isingi yulu dokona sukusa panya randa nao parami kandapi.
LUK 18:25 Dokona suu pyao wamyale dalyarena rumbisi kata dokona mena kamele mende kolala pupyali doko randa nawale pupyali leya. Dokako suu pyao akali bange malu retenge mende Anatunya isingi yulu dokona sukusa parowale lara ramo dokopa randa nawale parali, leya.
LUK 18:26 Pii doko siyami dupwame, Dopa leene dokona apimoo lete wai pyao paramisi? leyami.
LUK 18:27 Dokopa baame lao, Isa akali dupwame kapa pirami ingya nalyamo doko Anatu baame kapa pira, leya.
LUK 18:28 Dokopa Pitame lao, Namwame anda yaki nyepala emba peenyili pyuo epeyama kande, leya.
LUK 18:29 Dokopa baame nakama lamaiyuo, Kinyi nakama langilyu. Mendeme andape panda etengepe panda yangonge lapope panda endangi rakangepa panda wane wanakepe Anatunya isingi panda dokona reke lao yaki nyiyami ramo doko yuu gii dakepa nakamana bange yaki nyuo peyami dokona suu pyao bange ama malu wakasa nyerami. Nyepala yuu gii ene pyaka sera ingilyamo dokopa kyakana renge kulisa palu palenge doko nyerami leya.
LUK 18:31 Akali akalisa ipisu lama kareyami dupwa nyepala baame dopa lamaiya. Namwa Jerusaleme dokona pelyama kande. Parama dokopa Anatunya poropeta akali dupwame Ikinyingi Akali dokona lao pepa pyao reteyaminyili pyuo pii peparae pyaka sera lyakande.
LUK 18:32 Dokona suu pyao baa nyuo wambu rara wakale dupwa mairaminyipa nakamame baa kando giyalya giyana pyuo kanda sikya sikyu lao kepakali kyasinyi piso kararami.
LUK 18:33 Nakamame baa pyaroko pyapala pyao kumakarami. Pyao kumakaraminyi yuu repo dokopa baa sipurara leya.
LUK 18:34 Dopa leyamopape pii leyamo doko ama see nayami. Pii renge doko kyanga pyaro kareyamopa soo nyepa nayami.
LUK 18:35 Baa yuu Jereko dokona repeta epeyamo dokopa akali lenge kwaenge mende kata nemba nemba dokona kana jinya lao kee lao petengende peteyamo kandeya.
LUK 18:36 Dokopa baame wambu malu mee epo peyaminyi doko sepala, Apa pipyandena pilyaminyi? lao wambu dupwa piso siya.
LUK 18:37 Nakamame baa lamaiyuo, Yesu Nasarete range doko epo pelyamo leyami.
LUK 18:38 Dokopa baame kee lao, Yesu Dapitinya Ikinyingi doko, namba kando sakao pyuo nyepe leya.
LUK 18:39 Dokopa wambu banya lenge kamburena kareyami dupwame baa pyalana pyuo pii laa nana leyami. Leyaminyipape baa deeko kee lao, Dapitinya Ikinyingi, namba kando sakao pyuo nyepe leya.
LUK 18:40 Dokopa Yesu baa mee karapala, Akali doko baa kii minyuo ipupwape leya. Lapala akali doko repeta epeyamo dokopa baa piso soo,
LUK 18:41 Nambame emba apa pyakalase lao larene? leya. Baame lao, Kamongo, nambana lenge kwaelyamo doko pyuo nyipyali yaka, leya.
LUK 18:42 Dokopa Yesumi baa lamaiyuo, Lenge raa. Anatumi kapa pyuo nyakaraŋa lao suu pyao pisipinyi dokona embena lenge kapa mee relene leya.
LUK 18:43 Dopa leyamo dokopa banya lengeme aopa rolae kandeya. Kandapala Yesu kata peyamo dokona role pyao Anatu ange lao ketae pyambuo peya. Dokopa wambu peparaeme kandapala Anatu lakandeyami.
LUK 19:1 Yesu yuu Jereko dokona suku suku peya.
LUK 19:2 Peyamo dokopa akali mende kingi Sakiasa lenge kareya. Baa akali takisi nyingi mupwa ingyuo bange malu reto kareya.
LUK 19:3 Baa Yesu baa apipi lao kandalana piyamopa wambu malu kareyaminyi dokona baa akali muu dokome kandalana saka naya.
LUK 19:4 Dokona baa wambo makando papala isa sikamoo lengende kareyamo dokona Yesu repeta epo para ingiyasa kandaro lapala pulyuo peya.
LUK 19:5 Peyamopa Yesu yuu dokona epapala dokopa kandalyuo kandapala baa dopa lamaiya. Sakiasa, waiya lao lupyuo ipu. Epapu embena anda dokona namba paliramba ingilyamo, leya.
LUK 19:6 Dopa leyamo dokopa baa waiya lao isa lupyuo epapala baa mona pyakalyuo pyao yako lao nyiya.
LUK 19:7 Dokopa wambu dupwa kandapala mumu lao, Baa akali yulu koo pingi dokona anda yalya kando pisa pambinyilamo, leyami.
LUK 19:8 Enakana Sakiasa sipurapala baame Kamongo dopa lamaiya. Kamongo, nambana bange dupwa liti pipala pakirena wambu pendewa dupwa mairu lyakande. Wamba bange lapo panga soo waa nyero ramo dokona nambame bange kisima larapu isingi mairole, leya.
LUK 19:9 Dopa leyamo dokopa Yesumi baa dopa lamaiya. Epapu anda dakena Anatunya lete wai pyao nyingi yulu doko epo palamo leya. Lapala dopa leya. Baa opetae Aporakamena para pyasi ingyuo karamo.
LUK 19:10 Dokona suu pyao Ikinyingi Akalimi wambu panda koo paramili dupwa koto nyiso pyuo nyela epeya, leya.
LUK 19:11 Pii doko soo peteyaminyipa Yesu baa Jerusaleme repeta kareyamo dokome Anatunya isingi yulu aopa pano epara rapisi lao suu piyaminyi dokona baame kongwalu pii mende lamairu lao suu piya.
LUK 19:12 Suu pyapala dopa leya. Kamongo mende yuu nanesa mendena emba kiŋi ingyuo rombo palyarama leyaminyisa renge doko nyela papala kapu kyuo eparo lao peya.
LUK 19:13 Banya yulu pyakamingi akali akalisa dupwa epena lapala nakama peparae kana golo mendaki mendaki lao mokwa soo maiyuo, Namba ene kapu kyuo epapa naronopa dapwame bange lapo ropo pyao nyepapu dee kana nyuo maipapu pyuo karo kana lapo apeto konda pyuo nyuo pyuo karalapape leya.
LUK 19:14 Dokopa banya wambu dupwame baa ipyao kareyami dokome baa peyamo kata dokona akali lapo enakana wai minyuo akali doko namwana kiŋi ingyuo rapu pyuo kara napyali lao suu pilyamano lala pena leyami.
LUK 19:15 Baa kiŋi ingyuo rombo palyiyami dokopa baa kapu kyuo epapala banya kendemande akali kana maiyamo dupwa kana dokome bange ropo pyao nyepapu dee lapo maipapu dokopa aki kana apeto nyakami lao selana langyala epena leya.
LUK 19:16 Akali wambo banya lenge kambu dokona epeyamo dokome, Kamongo, emba golo kana jii doko suu pyao akalisa apeto nyakapu, leya.
LUK 19:17 Dopa leyamo dokopa baame baa lamaiyuo dopa leya. Emba kendemande keyange, kapa pipilyamo. Emba yulu ama kuki yaki nyii nao namba leyonuli pyuo pyuo karapi dokona taone akalisa mende emba mupwa ingyuo rapu pyuo karare leya.
LUK 19:18 Akali lapo pyuo peyamo dokome, Kamongo embena kana doko kingi paki apeto nyakapu, leya.
LUK 19:19 Dokopa baame baa lamaiyuo, Dopa pipinyi dokona emba taone kingi paki renge palyuo rapu pyuo karare leya.
LUK 19:20 Dokopa mende epapala dopa leya. Kamongo, embena kana doko dae minyakao epelyo. Wanyasisipu dokome yama pipala reto karapu.
LUK 19:21 Emba akali eneko karo bange reta nange dupwa mee nyuo, waingi wara pii nange dokona mee lyuo pingi dokona emba kando pakapala mee retakao kareyo leya.
LUK 19:22 Dokopa baame baa dopa lamaiya. Emba kendemande koo doko. Pii embena kambu dokona potemo ipyamo dupwa nyepala emba kando kote laro ingilyamo. Namba akali eneko karo bange reta nange dupwa mee nyingi, waingi wara pii nange dokona mee lyingi doko sii kande.
LUK 19:23 Dokona akipamo nambana mone byange dokona reta naese? Dopa piili doko namba epapala nambana range dokope wakale konda pyuo seramo dokope namba nyipuli, lamaiya.
LUK 19:24 Lamaipala akali doo kareyami dusipa lamaiyuo, Kana minyuo karamo doko nyepala akali kana akalisa minyuo karamo doko maiyalapape leya.
LUK 19:25 Dokopa nakamame baa lamaiyuo, Kamongo, banya kana akalisa silyamo kande leyami.
LUK 19:26 Baame lao, Dopa langilyu, wambu bange minyuo karaminyi dupwa peparae konda pyuo mairu. Wambu mendeme bange angi ingyuo minya napala kuki minyuo karaminyi dupwa range nyeroko leya.
LUK 19:27 Akali namba yango palyuo karo namba nakama rapu pyuo kara napili yaka lao suu piyami dupwa dae lanyuo epapala nambana lenge kambu dokona pyalapape leyaŋa, leya Yesumi.
LUK 19:28 Dopa lapala Yesu baa nakama yaki nyepala Jerusaleme lalyuo wambo peya.
LUK 19:29 Yuu Olipi Kyau dokona yuu Betepasi yuu Betani dolapo singi dokona repeta epapala dokopa disaepole akali lama pena lao,
LUK 19:30 Yuu damasa anda malu palyuo karenge dokona pupwa. Pao sukusa papala donge kumambonande wambu dokona wambo pisi nange doko anjaro paliramo mende kando nyerambi. Doko polo nyepala dae minyuo ipupwa.
LUK 19:31 Wambu mendeme, Apa pinya lao polo nyilyambinyi, leya kande dokopa, Kamongo doko piso parowale lapyasa nyepala pelyambano, isingi larambi leya.
LUK 19:32 Dokopa akali pena leyamo dolapo pao baa lamaiyamuli pyuo kando nyiyambi.
LUK 19:33 Kando nyepala donge kumambona doko polo kareyambinyi dokopa range dusipame nakamba kando, Apa pinya donge kumambona doko polo nyilyambinyi? leyami.
LUK 19:34 Dokopa nakambame lao, Kamongo doko piso parowale lapyasa nyilyambano leyambi.
LUK 19:35 Lapala Yesu kareyamo dokona minyuo epeyambinyi dokopa nakamana komau dusipa donge kumambonana mata dokona retapala Yesu dokona pisiyami.
LUK 19:36 Baa piso peyamo dokopa nakamana komau dupwa kata dokona kwuayami.
LUK 19:37 Baa repeta epo yuu Olipi Kyau manda dokona epeyamo dokopa disaepole ama malu kareyami dupwa peparae kanda soo mona pyakalyuo pyao pii porakaiyuo kaeyo lao yulu andake wakasa malu kandeyaminyi dokona Anatu lakando kareyami.
LUK 19:38 Kiŋi akali mende Kamongo dokona kingi lao epelyamo doko keyange keta palena. Yake panda dokona koo soo kararaminyipa Anatu neta renge wakasa ingyuo karena leyami.
LUK 19:39 Dokopa wambu ama malu rukuraka pyuo kareyami dokona Parisi akali lapo kareyami dupwame baa lamaiyuo, Mana Lenge, embena disaepole dupwa pyalana pyuo kaena laa, leyami.
LUK 19:40 Baame isingi dopa leya. Dopa langilyu, kalai dupwa romo napyuo karamili doko mee kana dupwame pii lao kyakale lamili, leya.
LUK 19:41 Lapala repeta epo anda malu repe repe pyuo karenge doko kandapala
LUK 19:42 ee lao dopa leya. Nakama koo soo kararami renge doko epapu mana nyimili yaka lao suu pilyu. Suu pyapunupape renge doko yambe pyaro karapyamosa kando sepa nalyaminyi.
LUK 19:43 Dokona lao yuu gii mende pyaka seramo dokopa nakamana yanda pimwai dupwame nakama pipa karo awali lapala nakama parami kata dorena upi lao otapala kamame repe repe pyuo kata wakale wakale pyala eparami.
LUK 19:44 Epapala nakama pyao lalyinyi nembo nakamana wane wanakepe dokona pisirami dupwa pyao kokwa seramioko. Kana mendena kana yango kamba ketae sinya lao kaeya narami. Anatumi nyisala epamolamo lao soo gisa nayami dokona pira, leya.
LUK 19:45 Lapala pao tembole anda kolando papala wambu bange ropo pyao maiyuo kareyami dupwa ralinyi nembeya.
LUK 19:46 Nambana anda ateŋa lenge anda ingyuo karara lao Buku Baepole dokona pii pyasi palipyamopape nakamame waa nyingi dupwana anda ingyuo pena leyamilyamo leya.
LUK 19:47 Dokopa yuu yangeyamo yaka lao baame tembole anda dokona mana lao kareya. Purisi akali mupwa dupwape Mawa Pii mana lenge dupwape mee wambu dupwana kamongo dupwapeme, Apa pyuo baa kumapena lapamane leyami.
LUK 19:48 Lapala mee wambu dupwa peparaeme banya pii doko simwali lao rae maiyuo soo peteyamisa mende pinya saka nayami.
LUK 20:1 Yuu mendepa tembole anda dokona baame wambu dupwa mana lamaiyuo waili pii keyange doko boo pyao lamaiyuo kareyamo dokopa purisi akali mupwa dupwape Mawa Pii mana lenge dupwape kamongo dupwa pipya baa kareyamo dokona epapala
LUK 20:2 dopa lamaiyami. Pyuo karene yulu dupwa apimi pii lapyamopa pyuo karene? Apimi emba rombo palyapyamopa pyuo karepe? leyami.
LUK 20:3 Yesumi nakama isingi lamaiyuo, Nambame nakama mende piso seroko. Dokona isingi langipwape.
LUK 20:4 Joneme bapitisimo nyakamyuo kareya banya yulu doko yake panda dokona piso renge kuiyamopa piya panda isa akali dupwame renge kuiyaminyipa piyase? leya.
LUK 20:5 Dokopa nakamame yango sukusa lao dopa leyami. Yake panda dokona piso renge kuiyamo piya larama ramo doko baame namwa langyuo, Akipamo Joneme kinyi lalyamo lao suu pyaa nayamisi? laramo lapala,
LUK 20:6 Jonena yulu doko mee isa akalinya yulu piya larama ramo doko mee wambu dupwame Anatumi Jone pyongo piyamo nolako lao kareya lao suu pyao karaminyi dokona nakamame imbwuapala namwa kaname pyasarami leyami.
LUK 20:7 Dopa lapala nakamame Yesu isingi lamaiyuo, Anja piso renge kuiyape lao namwa see nalyamano, leyami.
LUK 20:8 Dokopa Yesumi nakama lamaiyuo, Dopa letaminyi dokoko suu pyao namba keta palamo yulu dupwa anja sipyamo nyepala pyuo karo lao nakama isingi langya naro leya.
LUK 20:9 Lapala mee wambu dupwa lamaiyuo kongwalu pii lao dopa leya. Akali mendeme girapo isa waingi lapo wara piya. Wara pipala ee doko akali lapo ee mareta palyuo rapu pyuo karena lapala baa yuu mendasa papala kana malu nembo dokona kareya.
LUK 20:10 Karapala ee manjo nyingi yuu gii pyaka siyamo dokopa akali ee rapu pyuo kareyami dokona baame kendemande akali mende pena lao waene jingi lapo jinya leya. Dokopa ee rapu pingi akali dusipame baa pyaroko pyapala angi mai napala kanjakala mee pena leyami.
LUK 20:11 Dopa piyaminyi dokopa kendemande akali mende pena leya. Doko baa opetae pyaroko pyao kando sikya sikyapala mai nao mee pena leyami.
LUK 20:12 Dokopa akali repo pyuo dee penako leyamopa akali doko koo keta palyuo pyapala neta nembeyami.
LUK 20:13 Dokopa ee range akali dokome dopa leya. Nambame apa pirose? Nambana ikinyingi mona retelyo doko pena laro ramo dokopa, baa kando rape rape lao pirami rapisi, leya.
LUK 20:14 Dopa lao suu piyamopape ee rapu pingi akali dusipame wane doko kandapala dopa leyami. Akali doko baame moyange bange dupwa nyera ingilyamo. Dokona baa pyao kumakapala ee range nyimanale leyami.
LUK 20:15 Lapala baa pyao kumakayami dopa pipala ee neta dorena nembeyami. Dopa pyuo piyaminyipa, ee range akali dokome nakama kando apa pira?
LUK 20:16 Baame epapala ee rapu akali dusipa pyao kokwa sepala waene ee doko nyuo akali wakale maira leya. Dopa leyamo sepala, Anatumi dopa pii nana lapyali yaka, leyami.
LUK 20:17 Leyaminyipa baame nakama kandapala dopa leya. Anatunya pii pyasi mende palamo. Akali anda pyuo kareyami dupwame kanande nembeyami dokoko enakana anda donge dokona mupwa ingyuo epo siya, pii doko aki rengendena lao letase? leya.
LUK 20:18 Wambu kana dokona mangala nao serami dupwa pyao inji ranji pira. Dee kana dokome wambu mende pisiramo dokona lakao epapala dokopa pyuo minjuku minyinyi nembara leya.
LUK 20:19 Yuu gii dokopako Mawa Pii mana lenge dupwape purisi akali mupwa dupwapeme baa puu maiyalana pyuo karo mee wambu dupwa kando pakao kareyami. Baame nakamasa kando kongwalu pii doko lapyalyamo lao sepala baa puu maiyalana piyami.
LUK 20:20 Dokona nakamame baa kandanyi lyakao karo akali lapo lee minyuo karala pena leyaminyipa nakamame pii karalunja nembo lao karaminyi lao suu pinya lao nupi soo kareyami. Baame pii mende kopetame laramo dokopa baa kyapo mupwa keta pyarapanyi peeyo baame kote lena larama lapala dopa piyami.
LUK 20:21 Nakamame baa piso soo dopa leyami. Mana Lenge, embame pii angi kinyi lao mana lao karo wambu dupwa dapwa lao suu pyaa nao Anatunya yulu dokona rolae mana lao pyuo karenge doko namwa silyamano, leyami.
LUK 20:22 Lapala, Takisi mone namwame Sisa maingi dokona Mawa Pii namwana palase? leyami.
LUK 20:23 Dopa leyaminyi dokopa baame nakama kyambo panga soo lalyaminyi lao sepala nakama dopa lamaiya.
LUK 20:24 Kana mone mende namba lasaka pipwape. Kana dokona wambu ayemba pukusi petamo, pii pyasi opetae palamo dolapo apinya? leya. Nakamame lao Sisana leyami.
LUK 20:25 Baame nakama lamaiyuo, Dokona Sisana bange dupwa baa range mairami. Anatunya bange dupwa baa range mairamiko leya.
LUK 20:26 Dokopa nakamame mee wambu dupwa kando kareyaminyipa baa pii kopetame mende lenale lalana saka nayami. Saka napala baa isingi leyamo pii dupwa soo mona nembapala romo napyuo kareyami.
LUK 20:27 Dokopa Satyusi akali namwa kumuo palipala lopo epa narama ingilyamo lao karenge dupwa baa kareyamo dokona epapala
LUK 20:28 mende piso siyami. Mana Lenge, Moseseme mawa pii mende pyao retakaya. Doko akali mende enda nyepala wane manja nao karo kumaramo dokopa banya yangonge wane manjaronopa doko yangonge karenge apo dokona karara lapala enda waiya doko yokoya pyao nyera, lao Moseseme dopa lao pyao retakaya leyami.
LUK 20:29 Lapala dopa leyami. Yangonge yanda ipingi kareyamipya. Yangonge mupwa dokome enda mende nyiya. Nyepala wane manja nao karo kumuya.
LUK 20:30 Dokopa enda doko yangonge lapo pyuo dokome nyiya.
LUK 20:31 Enakana yangonge repo dokome nyiya. Dopa pyuo nyuo pao yanda ipingi nyero dusipa peparae wane manja nao kumapa piyami.
LUK 20:32 Enakana enda doko opetae kumuya.
LUK 20:33 Dokona suu yao yangonge yanda ipingi dusipa peparaeme enda doko nyiyami dokona Anatumi minyalyuo nyeparamopa enda doko yangonge anjukumi nyerase? leya.
LUK 20:34 Dokopa Yesumi nakama lamaiyuo dopa leya. Isa wambu dupwame enda yapo nyuoko karenge.
LUK 20:35 Nyingi doŋo Anatumi wambu yulu keyange pingi minyalyuo nyerali dupwa nyuo yake panda pisaramo dokopa enda nyii narami.
LUK 20:36 Nakama aŋala ingyuo papala dee kuma narami. Anatumi nakama lete minyalyuo nyeramo dokopa banya wane wanake ingyuo parami.
LUK 20:37 Moseseme isa pusinainya rao kareyamo doko kandapala pii lapo pepana piya. Doko Kamongo kando baa rakange kyawa Aporakame, Aisake, Jekopena Anatu doko karamo leya. Akali dusipana imambu lete karenge kandale.
LUK 20:38 Doko suu pyao Anatumi wambu kumuo silyaminyi dupwana Kamongo ingyuo paa nalyamo. Baame wambu lete karenge dupwana Anatu ingyuo karenge.
LUK 20:39 Dokopa Mawa Pii mana lenge akali lapome lao, Mana Lenge, emba elya pyuo lalyane leyami.
LUK 20:40 Dee kamba baa pii mende piso selana pakapala kaeyami.
LUK 20:41 Dokopa baame nakama dopa lamaiya. Koraisa doko Dapitinya ikinyingi letaminyi doko apa pipyasa letamisi?
LUK 20:42 Dapiti baame kenane pii pyasi palamo buku dokona dopa letamo. Kamongo dokome nambana Kamongo lamaiyuo, nambana kingi rolaerename pisa ipu.
LUK 20:43 Embena yanda pimwai dupwa nambame nyuo embena kimbu yukuna dokona rambuki nyinyi pyambwakaro, letamo.
LUK 20:44 Dapitimi baa Koraisa baasa kando Kamongo leyamo doko suu pyao Koraisa apa pyuo banya enakana para pyao nyeramo dokona mende ingyuo sipurarase? leya Yesumi.
LUK 20:45 Lapala mee wambu peparae soo kareyaminyipa baame banya disaepole dupwa dopa lamaiya.
LUK 20:46 Mawa Pii mana lenge akali dupwa pyarepanyi pyambuo waso karalapape. Akali dupwame kata pao dokopa komau londe rae maiyuo wapuo penge. Makete anda dupwana wambu dupwame nakama mupwa lao yako lamili lao suu pyao karenge. Sinakoke anda dupwanape nenge andake kuilyaminyi dokopape wambu mupwa petenge panda dokona pisimwali yaka lao suu pyapala petenge.
LUK 20:47 Akali kumungi dokona anda enda waiya doko petelyamopa doko ralinyi nembapala anda doko nakamana ingyuo pyaso nyingi. Nakama panga soo ateŋa londe dupwa pingi. Nakama dopa pyuo karaminyi dokona Anatumi kote andake lara leya.
LUK 21:1 Baa lenge pendakae lapala wambu bange malu singi dupwame Anatu mone maiyuo retenge bokote dokona mone reto kareyaminyi kandeya.
LUK 21:2 Kandeyamo dokopa enda waiya pendewa mendeme kumasi kana lama reteyamo kandeya.
LUK 21:3 Kandapala dopa leya. Kinyi langilyu, wambu dupwa peparaeme mone kuki ingyuo retaminyipa enda waiya pendewa dokome banya kana mone malu ingyuo minyuo epo retalamo.
LUK 21:4 Dokona lao nakamame kana mone malu sipyamo dokona pingyu nyepala epo retaminyipa baame banya kana aeya napyamopa kana kuki lama iki sipyamo dolapo laparae minyuo epo retalamo leya.
LUK 21:5 Enakana wambu lapome lao, Tembole anda doko mondo lao kana keyange dupwame anda piyaminyipa bange Anatu maiyuo kalya pyuo reteyami kande leyaminyisa baame dopa leya.
LUK 21:6 Bange kandelyaminyi dupwa yuu gii mende pyaka seramo dokopa lalyuo bolombalo lao nembaraminyisa kana mendeme yango ketae dokona see nara leya.
LUK 21:7 Dokopa nakama baa dopa lao piso siyami. Mana Lenge, emba leene doko anjokorape pira? Wambo aki mende piramo kandaramanopa emba leene doko pyaka serase? leyami.
LUK 21:8 Dokopa baame lao, Akali lapome nakama suu longo nyii nana lao pyarepyanyi pyambuo waso karalapape. Wambu malu epapala yuu gii pyaka sipyamopa namba Koraisa epelyo kandalapape larami. Nakama moko minyuo paa nalapape.
LUK 21:9 Dee, yanda pyuo kilyipu kilyipu karo pilyaminyi leyaminyi siyami kande doko pakame kuma nalapape. Dopa pyuo piraminyipa yuu gii lumwa piramo doko ene pyaka sepa nara.
LUK 21:10 Lapala baame nakama dopa lamaiya. Yuu mendena range wambu dupwame yuu mendena range wambu dupwa pyala parami. Kiŋi rara mendeme kiŋi rara mende pyala para.
LUK 21:11 Dokopa yuusili andake minyapa minyapa pyuo yuu wakale wakale dupwana lopo andake soo kumaro epo pira. Dokopa yake dokona piso kando yamarangungi yulu dopale lapome lyakai pira.
LUK 21:12 Ene dopa pipa naramopa nakama puu maipala randa jerami. Joo sinakoke anda dupwana panda karapusi anda dupwana pyambuo kiŋi pisirami lenge kambu dupwanape kyapo pisirami lenge kambu dupwanape nakama nambana kingi lenge dokona lapala lanyuo parami.
LUK 21:13 Yuu gii dokopa nakamame nambana lao larami ingilyamo.
LUK 21:14 Aki mende isingi laparama lao wambo suu pyanyi pyano kara nalapape.
LUK 21:15 Nambame nakama nyisaronopa suu pingi keyange paleta pii mora piso lao kararaminyipa nakama kando letaminyi dupwa apiyanda pyuo lisa pirami.
LUK 21:16 Mee wambu dupwame iki daa, nakamana rakange endangipi yangonge dee nakamana rara wambu dee nakamana puu minyingi dupwapeme nakama nyuo mata kando nakamana yanda pimwai dupwa keta minya serami. Dokopa nakama karaminyi dupwana lapo pyao kumaserami.
LUK 21:17 Wambu dupwa peparaeme nakama nambana kingi lao kararaminyi dokona nakama kando awa nao kararami.
LUK 21:18 Dopa piraminyipa nakamana kyawa yamanji mende kokwa see nalu nao nara.
LUK 21:19 Nakamame randa nao karo dokopa porai ingyuo rape rape lao kararami dokome nakama lete wai pyao paramisa pira.
LUK 21:20 Yanda singi dupwame Jerusaleme nyuo kako pyao sukusa pyambuyaminyi kandeyami kande dokopa Jerusaleme repetale ukiaki minyasi solo pyamolamo lao kando selapape.
LUK 21:21 Yuu gii dokopa wambu Jutia dokona kararami dupwa yuu kyau pyalya pyana pingi dupwana ralo pao, wambu anda repe repe pyuo karenge dupwana sukusa kararami dupwa yaki nyepala pao, wambu ee wandepa dupwana kararami dupwa anda repe repe pyuo karenge dokona sukusa paa nao pipwape.
LUK 21:22 Buku Baepole leyamuli pyuo randa andake narami leyamo kata dokonako palyuo pyaka sera.
LUK 21:23 Yuu gii dusipana enda wane rombanda palenge wane anjo kareta singipi enda dupwa randande naramilyamo. Dokona lao isa yuu dokona randa andake seramopa Juu wambu dupwa Anatunya imbu singi nyakamyuo karaminyi doko angi epara.
LUK 21:24 Nakama wua gela nenge dokona nyinyi piso pyaraminyipa, rara wakale wakale dupwame nakama puu maipala lanyuo parami. Dokopa wambu rara wakale dupwame Anatu kaena lara yuu gii doko ene epapa naramopa Jerusaleme doko nyuo kalyuo kararami.
LUK 21:25 Dokopa netape kanape bui dupwapena mende pyuo piramopa isa yuu dokona ipwa kota doko pyakalya pyakana pyuo gulu galu lao seramo doko kando rara wakale wakale wambu dupwa mona rando pulunongo pyaramo kararami.
LUK 21:26 Akali dupwa ama pakao malawai laramopa karo isa yuu dokona apa pira lao kando yamarangurami. Dokona lao yake bange porai dupwa romo romo pira.
LUK 21:27 Dokopa Ikinyingi Akali kopa role pyapeta baa porai ingyuo yanga paupau lenge andake lao eparamo kandarami.
LUK 21:28 Yulu dusipa pyaka selana piya kande dokopa nakama repeta nyiso kiiramo nyera dokona eŋa nembo karalapape, leya Yesumi.
LUK 21:29 Lapala baame nakama kongwalu pii mende lamaiya. Isa piki dokope isa peparaepe kandalapape leya.
LUK 21:30 Byalu letamo dokopa nakamame kandapala ee kana musi doko pyaka selana pipyalyamo lao soo gisingi.
LUK 21:31 Doko suu pyao doo lalono kandapi dusipa pyaka seramo dokopa Anatunya isingi yulu repeta epo pipyalyamo lao serami.
LUK 21:32 Kinyi langilyu, epapu isa wambu ando karaminyi dupwa wambo otapa naraminyipa namba doo lalono kandapi dusipa peparae pyaka sera.
LUK 21:33 Yake yuupi otaramopa nambana pii doko ota nara.
LUK 21:34 Nakamame moŋokyaŋe soo waene ipwange naraminyipa kyawa sisingi bolombalo laramopa karo isa bange dupwana suu pyaokondali pyuo kara nao waso karalapape. Waso kara narami ramo doko kone makange dokona wii waiya lao lyulu pingi doko suu pyao wambu yuu mure lao kamenge pisiraminyipa walu lao pyaka sisara.
LUK 21:36 Moŋo andake nakama keta eparaŋa dokona kaeya nao ateŋa lao lenge rao pisipwape. Nakama mona kuki palyuo karo Ikinyingi Akali enakana eparamo dokopa banya lenge kambu dokona kapa kararama lao ateŋa lalapa.
LUK 21:37 Yesumi dopa lao yuu peparae baa tembole anda dokona mana lao karapapu kukwa dokopa neta pao yuu Olipi Kyau dokona palipa piya.
LUK 21:38 Dokopa wamba kukwa baa tembole anda dokona wambu peparae banya pii sela epapa piyami.
LUK 22:1 Borete isi reta nange nenge Pasopa lenge doko repeta pyaka siya.
LUK 22:2 Dokopa purisi akali mupwa dupwape Mawa Pii mana lenge akali dupwapeme baa pyao kumakalana lao suu pyao karo mee wambu dupwa kando pakapala baa apa pyuo kapa pyarama lao suu pyao kareyami.
LUK 22:3 Dokopa Jutasa kingi Isakeriote lenge disaepole akali akalisa ipisu lama kareyami dokona mende ingyuo kareya doko keta Satane epo maralyiya.
LUK 22:4 Dokopa baa pao purisi akali mupwa dupwape yanda singi mupwa dupwape kareyami dokona baa role pyao wato lao piso, Baa mata kando laro doko apa pyuo nakama lasaka piru, lao peteya.
LUK 22:5 Dokopa nakama rae maipala, Kana jerama, leyami.
LUK 22:6 Doko kapa lapala baa mee wambu malu karenge dupwa kara naraminyipa baa nakama lasaka piru lao suu pyao gii doko pyaka silyape lao kando iso kareya.
LUK 22:7 Dokopa borete isi reta nange nenge Pasopa sipisipi ikyane Anatu pyao maingi gii doko epeyamosa
LUK 22:8 Yesumi Pita Jonepa lamaiyuo, Pasopa nenge narama lao rapa rapa pila pupwape leya.
LUK 22:9 Nakambame baa lamaiyuo, Nambwa anja rapa rapa pirambi lao suu pilipi? leyambi.
LUK 22:10 Baame nakamba lamaiyuo, Anda repe repe pyuo karenge dokona sukusa pao kararambinyipa akali mende pee ipwa peteta soo eparamo nakamba kando nyerami. Akali doko anda kolando peya kande dokonako kolando papala
LUK 22:11 anda range akali kando, Mana Lenge dokome namba Pasopa nenge doko disaepole role pyao piso narama dokona panda anja silyamo? lapyasa epelyambano, lamailapape.
LUK 22:12 Dokopa baame nakamba lanyuo pao anda kanya koe andake nenge reto nenge ratepe isa petengepe dupwa seramo doko lasaka pira. Dokona rapa rapa pipwape leya.
LUK 22:13 Dokopa nakamba papala baa leyamuli pyuo siyamo kandeyambi. Kandapala Pasopa nenge rapa rapa piyambi.
LUK 22:14 Yuu gii pyaka siyamo dokopa baamoo disaepole dupwa pipya taepo repeta peteyami.
LUK 22:15 Pisipala baame nakama dopa lamaiya. Namba ene randa napa nao karo Pasopa nenge dake nakama role pyao napuli lao suu pyaokondali pipu.
LUK 22:16 Doko dakepa naroko doŋo Anatunya isingi panda dokona angingyuo narama gii doko ene pyaka sepa naramopa dee naa naro leya.
LUK 22:17 Lapala pee kapo mende nyepala ange lao ateŋa lapala dopa leya. Dake nyepala mokwa soo nalapa.
LUK 22:18 Dopa langilyu, Anatunya isingi yulu doko ene epapa naramopa waene ipwange doko dee kamba naa naro leya.
LUK 22:19 Lapala borete nyepala ange lao ateŋa lapala kau lao mokwa soo maiyuo, Dake nambana yongo (nakama reke lao kumuo jisi sera. Namba suu pyao dopa pyuo nao kararami leya.
LUK 22:20 Nakama nenge nao oteyaminyi dokopa baa dopako pyuo pee lomasi doko nyepala dopa leya. Nambana ranjama Anatunya pii enenge lalu lao lenge doko isa paa nana lao pingi pyara doko suu pyao pee dake makande pyuo minyilyu. Nambana ranjama doko nakama reke lao kulimbwakalyo doko.)
LUK 22:21 Dopa piramopape namba mata kando lara taepo dakena nambapa petamo.
LUK 22:22 Dokona lao Ikinyingi Akali baa para ingilyamuli pyuo range parako. Parako doŋo akali mendeme baa mata kando lara doko keta randa andake epara ingilyamo.
LUK 22:23 Dokopa nakamame nakama lao lao, Namwa karamano dokona anjuku mendeme yulu koo dopa pyuo pirape? lao yango sukusa lao peteyami.
LUK 22:24 Yuu mendepa disaepole dupwame, Namwa karamano dokona apimi mupwa wakasa karase? lao apiyanda pyuo lao peteyami.
LUK 22:25 Dokopa Yesu baame nakama lamaiyuo, Rara wakale wakale dupwana kiŋi dupwame mupwa ingyuo karo mee wambu dupwa iso karaminyi. Dokopa akali mupwa rapu pyuo karenge dupwa kando nyisingi akali lenge.
LUK 22:26 Dopa pingi doko suu pyao nakama dopa pii nalapape. Nakama karaminyi dokona mupwa wakasa kararamo baa mee wane kuki ingyuo karena rapu pingi mupwa doko baa isaru pyuo karenge akali ingyuo pyuo karara.
LUK 22:27 Akali anjukusi mupwa ingyarase? Taepo dokona nenge nao pisira dokope panda akali isaru pyuo karara dokope? Taepo repeta nenge nao pisira doko mupwa daase? Doko doŋo nakama karaminyi dokona nambame isaru pyuo karo leya.
LUK 22:28 Namba keta randa wakale epeyamopape nakamame namba yaki nyii nayami.
LUK 22:29 Nambana Rakangeme namba isingi yulu dokona rombo palyiyamo doko suu pyao nambame nakama isingi yulu minyarami lao rombo palyilyu.
LUK 22:30 Nambana isingi yulu paliramo dokona nambana taepo dokona nengepe waene ipwangepe nao piso Isaraele rara akalisa ipisu lama dupwa kando kote lao kararami lao rombo palyilyu.
LUK 22:31 Saimone, Saimone, Sataname witi jingi imbu dupwa isa kopo kapo lao pelyamopa angi yapo nyingi doko suu pyao emba dopa pyuo makande pipuli lao nyelana lao karapya lyakande.
LUK 22:32 Karapyamopape embena Anatu kapa ingingi lao suu pilini suu pingi doko kwaeya nana lao nambame embena lao ateŋa lakapu. Embame dee mona kapu kyepala dokopa embena yangone dupwa porainyi pyambwape leya.
LUK 22:33 Dokopa baame baa lamaiyuo, Kamongo, emba karapusi anda dokona palyarami ramo nambwa laparae kapa paramba. Emba kumare ramo nambwa laparae kapa kumaramba lao suu pilyu leya.
LUK 22:34 Leyamopa Yesu baame Pita kando dopa leya. Epapu kola kali pii lapa naramo dokopa embame yuu repo pyuo namba kanda nange lapa piri leya.
LUK 22:35 Lapala baame nakama lamaiyuo, Nyuukwuanyi emba manja nao nyuu manja nao kimbu suu lapo manja nao pupwape leyo kande dokopa mende aeyape mee? leya. Nakamame lao, Mende aeya naya leyami.
LUK 22:36 Baame nakama dopa lamaiya. Dopa piyami doko epapu mendali banya nyuukwuanyi siya kande doko nyuo embalapape. Dokako pyuo nyuu dupwa manjipwape. Akali mendali banya wua gela see naya kande doko komau dokome ropo pyao maiyuo mende nyelapape.
LUK 22:37 Dokona lao langilyu, Anatunya pii pyasi dokona, Baa akali yulu koo pingi dopale lao suu piyami, pii dokona palyuo namba keta palira. Nambasa kando lao pyasi palamo pii dupwa peparae pyaka sera ingilyamo leya.
LUK 22:38 Dokopa nakamame, Kamongo kanda, wua gela lama silyamo leyami. Dokopa baame nakama lamaiyuo, Dolapo kapa leya.
LUK 22:39 Dokopa baa anda repe repe pyuo karenge dokona sukusa kareyamo doko kaepala yaki nyuo pao yuu Olipi Kyau dokona papapu pinginyili pyuo peya. Dokopa baa peyamo dokona disaepole dupwa peyami.
LUK 22:40 Dokopa yuu dokona epapala baame nakama lamaiyuo, Mendeme pii naramopa karamwali lao ateŋa lao pisipape leya.
LUK 22:41 Lapala kana pyao nembelyaminyipa pao singi dopalena nakama yaki nyuo mee mende peya. Papala wapambu pii pyaro pisipala ateŋa leya.
LUK 22:42 Rakane, emba kapa lao suu pyare ramo pee lomasi dake namba kaepala pena lapili yaka. Dopa lapili doŋo embame suu pyarenyili pyuo piri nambana pii mende pali nalyamo leya.
LUK 22:43 (Dokopa aŋala yake pandaraeme baa peteyamo dokona epo pano baa porainyi pyambuya.
LUK 22:44 Dokopa banya monarena randa andake nao karo ateŋa poraiyuo laokondali pyuo peteya. Dokopa banya pusi epeyamo doko ranjama rauli dupwa kondo yuunya epeya.)
LUK 22:45 Dopa piyamopa ateŋa lapala sipuro disaepole dupwa peteyami dokona epo nakama luu paleyaminyi kandeya.
LUK 22:46 Kandapala baame nakama lamaiyuo, Akipamo luu palaminyi? Sipurapala mende makande pii nana lao ateŋa lao pisipape, leya.
LUK 22:47 Baa dopa lao kareyamo dokopa akali akalisa ipisu lama kareyami dokona mende Jutasa dokome lanyuo epeyamopa wambu lyingi lyangi kuiyuo epeyami. Baame Yesu nyinyi pela repeta epeya.
LUK 22:48 Dokopa Yesumi baa lamaiyuo, Jutasa, embame nyinyi pyuo Ikinyingi Akali doko mata kando lao lasaka piru lao suu pilisi? leya.
LUK 22:49 Dokopa disaepole akali baa role pyao kareyami dupwame mende piraŋa lao kando sepala, Kamongo wua gela dokome pyaramase? leyami.
LUK 22:50 Lapala mendeme purisi mupwana kendemande akali dokona kale kingi rolaerena pyao lara pyanyi nembeya.
LUK 22:51 Dokopa Yesumi, Dopa pyuo dee mende pii nalapape, lapala banya kale doko minyarambwakamyuo elya piya.
LUK 22:52 Elya pipala Yesumi purisi mupwa dupwape tembole anda iso karenge yanda singi dupwana rapu pingi akali dupwape kamongo dupwape baa nyela epeyami dupwa lamaiyuo, Wua gela kusapepe minyuo karapenge akali nyela penge dokoŋo lao namba nyela epamipi?
LUK 22:53 Yuu yangeyamo yaka lao tembole anda dokona namba nakama pipya role pyao karapunu dokopape nakamame namba minyara nami kandapi. Dopa pii naminyipape nakamame iminjingi dokopa porai renge neta epenge dokopa namba nyela epelyaminyi leya.
LUK 22:54 Dokopa nakamame baa puu maipala lanyuo pao purisi akali mupwa dokona anda dokona peyami. Pita baa nanesale kando enakana epeya.
LUK 22:55 Epapala anda kamapi sukusa dokona isare kisapala role pyao peteyaminyipa baa nakama peteyaminyi raka dokona peteya.
LUK 22:56 Dokopa kendemande enda mendeme Pita isare dokona repeta peteyamo dokopa ele pyao kandapala, Akali dake Yesu role pyao karami dokona mendelamo leya.
LUK 22:57 Dokopa baa daa lao, Enda, nambame baa kando see nange leya.
LUK 22:58 Enakana usale dokopa wambu mendeme baa kandapala, Emba karami dokona mendelamo leya. Dokopa Pitame, Akali, namba daa leya.
LUK 22:59 Leyamopa mee nee kuki sepeyamopa akali wakale mendeme, Angi lalu lao leto lao, akali dake baa Galili akali dokona kinyi kinyi baapa role pyao karambilyamo leya.
LUK 22:60 Dokopa Pitame lao, Akali, emba pii letene doko aki rengendena letene lao namba see nalyo leya. Baa ene pii lao kareyamopa kola kali aopa pii leya.
LUK 22:61 Dokopa Kamongo dokome kapu kyepala Pita kandeya. Dokopa Pitame Kamongona pii, Epapu kola kali pii lapa naramopa embame repo pyuo namba mata joo lare, lapya kandapi lao suu piya.
LUK 22:62 Dokopa baa neta papala nengya nengya pyao ee leya.
LUK 22:63 Akali Yesu puu maiyami dupwame baa kando giyalya giyana pyuo pyao rakyuo kareyami.
LUK 22:64 Dopa pyuo lenge kambu komau dokome yambe pyapala, Apimi emba pyalamo lao nolakapala langipi? leyami.
LUK 22:65 Dokopa nakamame baasa kando pii malu lao kilya kandalya kandana piyami.
LUK 22:66 Yuu yangeyamo dokopa purisi akali mupwa dupwape Mawa Pii mana lenge akali dupwape mee wambu dupwana kamongo dupwape epo sukusa suksua piyami. Pipala nakamame wato andake lenge panda dokona minyuo pao,
LUK 22:67 Emba Koraisa ramo namwa langipi leyami. Dokopa baame nakama lamaiyuo, Nambame nakama langiru ramo nakama kinyilyamo lao suu pyaa narami. Nambame nakama piso sero ramo nakama isingi laa narami.
LUK 22:68 Isingi laa naraminyipape Ikinyingi Akali Anatu Porai dokona kingi rolaerena pisu piso pisira leya.
LUK 22:70 Dokopa nakama peparaeme, Dopa letene doko emba Anatunya Ikinyingisi? leyami. Dokopa baame nakama lamaiyuo, Nakama letaminyi doko leya.
LUK 22:71 Dokopa nakamame, Akipamo kote pii malu dupwa konda pyuo seramase? Baa rangeme kambunya lapyamo silyamano leyami.
LUK 23:1 Lapala role pyao peteyami dupwa peparae sipurapala Pailatena lenge kambu dokona baa lanyuo peyami.
LUK 23:2 Papala baasa kando koo pipyaŋa lao, Akali dakeme namwana rara wambu dupwana suu pingi ukiaki minyuo Sisa takisi bange mai nalapape lao namba kiŋi akali Koraisa dokoŋo lao karapyamo kandamwa leyami.
LUK 23:3 Dokopa Pailateme baa piso soo, Emba Juu wambunya kiŋisi? leya. Dokopa isingi, Emba leene doko lamaiya.
LUK 23:4 Dokopa Pailateme purisi akali mupwa dupwape mee wambu malu mee rukuraka pyuo kareyami dupwape lamaiyuo, Namba kote sepala baa yulu koo pii napya lao suu pilyu leya.
LUK 23:5 Dopa leyamopa nakamame yukusa nao lamaiyuo, Baame mee wambu dupwa nembo nembo pyuo yuu Galili dupwana karowape epo yuu dakena karowape yuu Jutia dupwa peparaena mana lao karenge leyami.
LUK 23:6 Pii doko sepala Pailateme, Akali doko Galili rangese? lao piso siya.
LUK 23:7 Piso sepala dokona Erote baa yuu Galili dokona rapu pyuo karenge lao sepala Erote yuu gii dokopa Jerusaleme epo kareyamopa dokona baa lanyuo pena leya.
LUK 23:8 Eroteme yuu wamba dokopa Yesunya kingi sepala baa kandapuli lamaiya. Yesu yulu andake wambumi pii nange dopale piramo kandapuli yaka lao suu piya.
LUK 23:9 Rae maipala baame baa pisapa pisapa pyuo kareya. Dopa pyuo kareyamopa Yesu baame isingi lamai naya.
LUK 23:10 Purisi akali mupwa dupwape Mawa Pii mana lenge akali dupwapeme dusa karo baa akali koo pingi lao pii poraiyuo lao kareyami.
LUK 23:11 Dokopa Erotemoo banya yanda singi dupwa pipyame baa kilya kando giyalya giyana pyuo kareyami. Dopa pyuo karapala komau keyange au pingi mende baa pee pyakamipala Pailate kareyamo dokona kapu kyuo lanyuo pena leya.
LUK 23:12 Wamba dokopa Erote Pailatepa puu minya nao kareyambinyi doko yuu gii dokopako nakamba kanda soo puu miyuo kareyambi.
LUK 23:13 Dokopa Pailateme purisi akali mupwa dupwape mee wambunya kamongo dupwape mee wambu dupwape sukusa sukusa pyuo epena lapala
LUK 23:14 dopa lamaiya. Nakamame akali dake mee wambu dupwana suu pingi doko ukiaki minyapya lao lanyuo imi. Dokopa nambame nakamana lenge kambu dokona baa piso sepala nakamame dopa pipya dopa pipya laminyipape baa keta renge mende pali nalyamo lao suu pilyu.
LUK 23:15 Erote baa opetae dopa lao suu pyapala namwa karamano dokona baa kapu kyuo pena lapyalyamo. Baa kumaramo yulu mende dopale pii napya lyakande.
LUK 23:16 Dokona nambame baa randa maipala mokwaro, leya.
LUK 23:17 (Pasopa nenge nenge yuu gii dokopa baame akali mende mokwara ingiyamosa leya.)
LUK 23:18 Dokopa nakamame kapa kapa pyuo pii poraiyuo lapala, Akali doko pinya, Barapasa mokwape leyami.
LUK 23:19 (Barapasa baa anda repe repe pyuo karenge dokona renge kuiyuo lao kareyamopa gapomane pyao ralinyi nembalana pipala akali mende pyao kumakaya dokona baa karapusi anda dokona pambuyaminyipa paleya.)
LUK 23:20 Pailateme Yesu mokwapuli lao nakama dee kamba lamaiya.
LUK 23:21 Lamaiyamopa nakamame pii porakaiyuo kaeyo lapala, Baa isa mamando dokona pyao palya, isa mamando dokona pyao palya leyami.
LUK 23:22 Pailateme repo pyuo nakama lamaiyuo, Akipamo, aki yulu koo ipyase? Baa kumara yulu dopale renge mende pali nalyamo lao masapu. Dokona baa randa maipala mokwaro ingilyamo leya.
LUK 23:23 Dopa leyamopa nakama pii porakaiyuo kaeyo lao, isa mamandona pyao palyinya, lao yukusa nayami. Dopa lao banya pii nyuo kalyasi minyiyami.
LUK 23:24 Dokopa Pailateme nakamame pinya pinya laoko kareyaminyi dokonako palyuo pipwape lao lalu lao leya.
LUK 23:25 Barapasame gapomane pyao ralinyi nembalana lao karo akali mende pyao kumakao piyamo doko mokwakana leyaminyi dokopa baame mokoya. Mokwapala nakama leyaminyili pyuo Yesu pyakaminya leya.
LUK 23:26 Dokopa baa lanyuo pao akali mende Saimone lenge yuu Sairini range yuu nanesa karo katasa epeyamo doko minyarapala isa mamando doko nyuo lange dokona retakamipala Yesu wambo paramopa baa enakana soo Pena leyami.
LUK 23:27 Dokopa Yesu wambo peyamopa wambu ama malu enakana epeyaminyipa enda malu baa kando kumaralerale nyuo maa waa lao peyami.
LUK 23:28 Dopa pyuo peyaminyipa Yesu kapu kyepala nakama dopa lamaiya. Jerusaleme range wanenge dupwa, namba kando ee laa nalapape. Nakama rangesape nakamana wane wanake dupwanape kando ee lalapape.
LUK 23:29 Dokona lao yuu gii mende eparamo dokopa nakamame enda potepe rombanda wane pali nangepe anju waneme naa nangepe dupwa embone karo pelyaminyi larami.
LUK 23:30 Dokopa nakamame randa napala, yuu kyau andake dupwa boo lapala namwa pyape, yuu kyau kuki dupwa boo lao namwa yambe pyape, larami.
LUK 23:31 Epapu isa kyaka ingilyamo dokopa dopa pyuo karaminyi dokona suu pyao yanda naramo dokopa apa piramisi? leya.
LUK 23:32 Akali lama kendepo nao karenge opetae baa role pyao kumakarama lao lanyuo peyami.
LUK 23:33 Pao yuu Kyawa Kuli lenge dokona epapala baa isa mamandona pyao palyuo akali kendepo nenge dolapo opetae paki paki pyao palyiyami.
LUK 23:34 Dokopa Yesumi lao, Rakane, nakamame epapu pilyaminyi dokona renge soo gisa nalyaminyi dokona embame nyuo kame sakamipi leya. Dokopa banya komau dusipa api embone piso nyerape lao kando yulu mende lake dopale pipapu mokwa soo nyepa piyami.
LUK 23:35 Dokopa mee wambu dupwa dumbisa karo kando kareyami. Kando kareyaminyipa akali mupwa dupwame baa kilya kandalya kandana pyuo, Baame wambu lapo lete pyuo nyakamiya doko suu pyao baa Anatunya Koraisa rombo palyisi ingyuo karara ramo baa range lete wai pyao nyinya, leyami.
LUK 23:36 Yanda singi dupwa opetaeme baa giyalya giyana pyuo karo baa paleya dokona epo waene kau pingi doko nena lao maiyuo,
LUK 23:37 Emba Juu wambu dupwana Kiŋi ramo doko emba range lete wai pyao nyii, leyami.
LUK 23:38 Isa mamando ketaerena pii pyasi, Dake Juu wambunya Kiŋi, lao pyao palyiyami.
LUK 23:39 Akali kendepo nenge pyao yukuyami dokona mendeme baa isi pili lao lao, Emba Koraisa daase? Embamoo nambwape opetae lete pyuo nyelase, leya.
LUK 23:40 Dopa leyamopape mende dokome baa pyalana pyuo dopa laa kaena lamaiyuo, Emba baapa mendaki ingyuo kumarambi ingilyamo. Anatu paka nalepe?
LUK 23:41 Nambwame randa kapa nelyambano. Yulu koo piyamba doko suu pyao nambwa kapa randa nelyambano. Dopa pimbwanopape akali dake koo mende pii nange leya.
LUK 23:42 Lapala, Yesu, embame kiŋi ingyuo epare dokopa namba suu pyape leya.
LUK 23:43 Dokopa baame baa dopa lamaiya. Kinyi langilyu, epapu embapa Anatunya isingi panda dokona kararamba ingilyamo leya.
LUK 23:44 Yuu gii dokopa andawai korakama towalo keloke piso yuu dupwana iminjiya. Neta damasa penge sere keloke ene pyaka sepa nayamopa
LUK 23:45 neta doko kumbwa naro siya. Dokopa tembole anda dokona komau yukwaro kareya doko kanguo rali piya.
LUK 23:46 Dokopa Yesu pii poraiyuo lapala, Rakane nambana imambu doko emba keta pyamalyilyu, leya. Dopa lapala lumwa pyuo ŋee siya.
LUK 23:47 Dopa piyamo doko kandapala yanda singi mupwa dokome Anatu lakandapala, Kinyi akali dake keta kote renge mende pali napya leya.
LUK 23:48 Dokopa wambu malu mee kumaraminyi kandalana epo malu palyuo kareyaminyi dupwame dopa piyamo kandapala nakama kondapala kyangali pyao pyao pyuo kapu kyuo anda peyami.
LUK 23:49 Wambu baa kandenge dupwape enda Galili range baa moko minyuo epeyaminyi dupwape nanesale karo dopa piyamo dupwa peparae kandaro siyami.
LUK 23:50 Akali mende Josepe lenge Juu wambunya yuu anda repe repe pyuo karenge Arimatia range doko kareya. Baa wato andake lenge dokona akali keyangende yulu rolae pyuo kareya.
LUK 23:51 Wato lenge yango dupwame Yesu pinya leyami doko kapa daa leya akali baa Anatunya isingi yulu epelyape lao iso kareya.
LUK 23:52 Akali dokome Pailate kareyamo dokona papala Yesunya yanenge kaoma jinya lao piso siya.
LUK 23:53 Piso sepala isa kondo nyepala ambo pyao malu pingi komau dokome yama piya. Yama pipala malu pyuo kana rumbyasi mendena wambu mende wamba malu pii nangendena minyuo pao reteya.
LUK 23:54 Doko Poraende alemanji Juu wambu dupwa nakamana misi lenge koto dokona suu pyao rapa rapa piyami.
LUK 23:55 Enda baa Galili karo epeyamo role pyao epeyami dupwa enakana malu anda dokona papala yanenge kaoma dopa pyuo retelyamo lao kandapala
LUK 23:56 kapu kyuo papala luli lenge bangepe rendamu pingi mambape rapa rapa piyami. Koro petenge gii dokopa Mawa Pii palengenyili pyuo koro peteyami.
LUK 24:1 Dopa piyaminyipa Sande wamba yangama yuu yango rali piyamo dokopa rendamu pingi bange rapa rapa pyuo reteyaminyi dusipa nyepala malu anda dokona peyami.
LUK 24:2 Papala anda malu piyami kambu dokona kana upi laro kareyamo doko kao pele pele lao minyuo kakondasi siyamo kandeyami.
LUK 24:3 Kandapala andakare pao yanenge kaoma doko siyamo kanda nayami.
LUK 24:4 Kanda napala anja pamo lao saka nao kareyami dokopa akali lama komau ama kyewa lenge pee pipala dusa aopa kareyambi.
LUK 24:5 Dokopa pakame kumapala lenge kambu yuu dokona pongwa neyaminyi dokopa akali dolapome nakama dopa lamaiyambi. Akipamo malu anda dakena lete karamo doko kotelyambinyi?
LUK 24:6 Baa dae see nalyamo. Lopo epo nyisa karamo. Baa yuu Galili doko ene yaki nyepa nao karo dokopa nakama dopa langiya kande.
LUK 24:7 Doko Ikinyingi Akali doko akali koo pingi dupwa keta mairaminyipa isa mamandona pyao palyaraminyipa yuu repo dokopa lopo epara ingilyamo leya kande dokona suu pyalapape leyambi.
LUK 24:8 Dokopa nakama baa dopa leya kande doko kinyilyamo lao suu piyami.
LUK 24:9 Suu pyapala malu anda yaki nyepala kapu kyuo pao akali akalisa ipisu mendaki menge dupwa opetae kareyami dokona dopa pyamo dopa pyamo lao pii peparae lamaiyami.
LUK 24:10 Maria yuu Makatala rangemoo, Joanamoo, Maria Jemesana endangimoo, enda lapo role pyao kareyami dupwapeme aposele dupwa lamaiyami.
LUK 24:11 Lamaiyaminyi dokopa nakamame kopyali pii lalyaminyi lao suu pyapala pii kinyi daalyamo lao masiyami.
LUK 24:12 Dopa lao masiyaminyipape Pita malu anda dokona makando papala pongwa nao andakare kandapala komau dolapo singinyili pyuo wakale wakale siyambinyipa kandeya. Kandapala dopande pyamo lapala dokona suu pyanyi pyano pao anda peya.
LUK 24:13 Yuu mange dokopako akali lama yuu anda lapo karenge Emeasa lenge dokona panya katasa peyambi. Jerusaleme karo Emeasa penge kata doko kata makande pingi lili kilomita lenge akalisa ipisu mendaki dopale.
LUK 24:14 Kata dokona pao nakamba nakamba lao dopa pimi dopa pimi kandapi lao lao peyambi.
LUK 24:15 Nakamba lao lao peyambinyi dokopa Yesu enakana mata rapetano epapala role pyao peyami.
LUK 24:16 Dokopa nakambana lenge dokona mende piyasa baalyamo lao soo gisa nayambi.
LUK 24:17 Dokopa baame nakamba lamaiyuo, Pii anjukunya nakamba lao lao pelyambinyi? leya. Dokopa nakamba mee mona nembo lenge kambu yukupala kareyambi.
LUK 24:18 Karapala mende Kiliopasa lenge dokome lao, Jerusaleme dokona upunili karaminyi dokona emba iki yuu gii dasipana mende pipyamo doko see napisi? isingi lamaiya.
LUK 24:19 Dokopa baame nakamba lamaiyuo, Apa pipya? leya. Dokopa nakambame baa dopa lamaiyambi. Yesu Nasarete range doko suu pyao, baa Anatunya lenge kambu dokonape mee wambu dupwana lenge kambu dokonape Anatunya pii nolako lao yulu pyuo porai ingyuo kareya doko.
LUK 24:20 Akali doko purisi mupwa dupwape kamongo dupwapeme baa kote lao kapa kumunya lapala, isa mamandona pyao palyinyale lao minya siyami.
LUK 24:21 Baame Isaraele wambu dupwa kiiramo nyera lao suu piyama. Dopa lao suu piyamanopa dopa piyami doko yuu rema kote yuu sipya.
LUK 24:22 Sipyamopa namwa karamano dusipana enda lapome mona nembakao pii lami. Wamba kukwa malu anda dokona papala
LUK 24:23 banya yanenge kakapange doko koto lisa pimi. Lisa pipala kapu kyuo epapala aŋala lamame Yesu lete karamo lambi dolapo endame kandamwa langyala imi.
LUK 24:24 Dokopa namwa karamano dokona akali lapo malu anda papala endame kinyi lami doko kandami. Kandami doko baa angi kanda nami, leyambi.
LUK 24:25 Dopa leyambinyi dokopa baame nakamba dopa lamaiya. Nakamba akali kopyali Anatunya poropeta akali dupwana pii dupwa monarename kinyilyamo lao waiya lao suu pyaa nalyaminyi.
LUK 24:26 Koraisa dokome dopa pyuo randa nao karapala banya yanga paupau lenge panda dokona pao karara ingya napyase? leya.
LUK 24:27 Lapala Mosesena pii dupwa minyuo lao Anatunya poropeta akali dupwa peparaena pii doko opetaena lao Anatunya pii pyasi dupwa peparae baa rangesa lao paleyamo dupwana nakamba renge dupwa polo lamaiya.
LUK 24:28 Dopa lao pao anda lapo karenge dokona panya peyambi dokona pao repeta peyami. Papala baa mee mende pele leya.
LUK 24:29 Dokopa baa piso sokondali pyuo lamaiyuo, Emba nambwa pipya palimanale, yuu kwualyamo leyambi. Dokopa baa nakamba pipya role pyao palya kolando peyami.
LUK 24:30 Dokopa baa nakamba pipya taepo dokona nenge nao piso dokopa baa borete nyiya. Nyepala dokopa ateŋa lapala minyuo kau lao maiya.
LUK 24:31 Baa dopa piyamo dokopa nakambana lenge doko pendakae lapala baalyamo lao kando gisiyambi. Dokopa baa pyuo pana naya.
LUK 24:32 Dokopa nakamba lao, Namwa kata dokona imwa dokopa baame nambwa Anatunya pii pyasi doko polo langyapyasa soo monarena epe soo epa nambwase? leyambi.
LUK 24:33 Lapala yuu gii dokopako sipurapala Jerusaleme dokona dee kapu kyuo papala akali akalisa ipisu mendaki kareyami dupwape wambu lapo role pyao kareyami dupwa pipya mendakinya peteyaminyi doko kandeyambi.
LUK 24:34 Nakamame, Kamongo doko kinyi kinyi sipuro ipyapya. Epapala Saimone karapyamo dokona pano ipya, lao nakamba lamaiyami.
LUK 24:35 Dokopa nakambame, Katasa pumbwa dokopa Yesu role pyao epapala enakana baame borete kau lapyamo dokopa baalamo lao kando gisambwa, lao lamaiyambi.
LUK 24:36 Dopa lao kareyambi dokopa Yesu baa nakama kareyami dokona sukusa pano kareya. Karapala, Nakama mona kyuu lao seramo pisipwape leya.
LUK 24:37 Dokopa baa semangolyamo lao suu pyapala walu lao pakayami.
LUK 24:38 Dokopa baame nakama dopa lamaiya. Akipamo mona nembo lamana suu pyao karamisi?
LUK 24:39 Nambana kingipi kimbupi kandalapa. Namba kulipi minjupi paleta karo doko minyando selapape. Semango dupwa kulipi minjupi paleta kara nange kandale leya.
LUK 24:40 Dopa lapala banya kingipi kimbupi lasaka piya.
LUK 24:41 Dokopa nakama kandelyamano doko angingyuo pelyape mee lao soo sakapa nao rae maiyuo kareyami. Dokopa baame nakama lamaiyuo, Nenge mende narowale silyape mee? leya.
LUK 24:42 Nakamame oma musi pyao kisasi maiyaminyipa
LUK 24:43 baame nyepala nakama kando kareyaminyipa nao kareya.
LUK 24:44 Napala baame nakama dopa lamaiya. Namba nakama role pyao kareyamano dokopa nambame pii dopa langiyu kande, Mosesena Mawa Pii dokonape Anatunya poropeta akali dupwana pii dokonape kenane pii pyasi palamo pii dokonape nambasa kando lao palamuli pyuo pyaka sera ingilyamo langiyu kande, leya.
LUK 24:45 Lapala Anatunya pii pyasi dupwana renge dupwa polo lamaiyamosa soo nyiyaminyipa lao kareya.
LUK 24:46 Lao karo nakama dopa lamaiya. Pii mende pyasi palamo. Doko Koraisa doko randa napala yuu gii repo kumuo palyuo sipuro epo para ingilyamo.
LUK 24:47 Sipuraramopa banya kingi lao yuu Jerusaleme dokona kanda soo karo rara wambu dupwa peparae lamaiyuo, koo dupwa kondapala mona enenge palyuo kararaminyi dokopa Anatumi koo dupwa kame sakara, lao boo pyao papirami ingilyamo, lao pyasi palamo leya.
LUK 24:48 Nakamame pii pyasi palamuli pyuo angi ingyuo kandelyaminyili pyuo polo lamairami.
LUK 24:49 Doko nambana Rakaneme mende jero lalu lao leya kande doko nakama jero ingilyamo. Renge porai doko nakama ene maralyapa naramopa anda repe repe pyuo karenge dakena yaki nyii napala mee karalapape leya.
LUK 24:50 Lapala baame nakama taone dokona neta lanyuo pao yuu Betani dokona karapala kingi dolapo ketae pyambwapala nakama elya pyuo karalapape leya.
LUK 24:51 Dopa lao karo nakama yaki nyiyamopa yake panda dokona peya.
LUK 24:52 Dokopa nakama raeko maiyuo Jerusaleme dokona kapu kyuo peyami.
LUK 24:53 Papala tembole anda dokona Anatu lakando karalu kareyami.
JOH 1:1 Ene busapa nayamopa Pii doko kareya. Pii doko Anatupa kareyambi. Pii doko Anatu dokonako angingyuo kareya.
JOH 1:2 Ene busapa nayamopa baa Anatupa kareyambi.
JOH 1:3 Anatumi keta bange peparae wasiya. Bange mendepe baa keta wasa nayamopa pulyiyande daa.
JOH 1:4 Baa letena renge doko renge kuiyuo kareya. Letena renge doko isa wambu keta yanga paupau lanyi peeyakamiya.
JOH 1:5 Iminjingi panda dokona yanga paupau lakamilyamopa iminjingi doko yanga paupau lenge doko kapa kunja nange.
JOH 1:6 Anatumi akali mende kingi Jone lenge doko pena leyamopa epeya.
JOH 1:7 Baa yanga paupau lenge dokona waili pii lao akali peparaeme pii doko kinyilyamo lao suu pyapala mona mainyale lao karala epeya.
JOH 1:8 Baa range yanga paupau lenge doko angingyuo kareyande daa. Baa yanga paupau lenge dokona lao waili pii minyuo epeyasa piya.
JOH 1:9 Yanga paupau lenge angi wambu peparaena suu pingi dokona yanga paupau lanyi peenge doko isa yuu dakena epo kareya.
JOH 1:10 Baame isa yuu dake wamba wasiyamo dokona epo kareyamopape isa wambu dupwame baalamo lao kando soo nyii nayami.
JOH 1:11 Banya yuu range dokona epeyamopape banya wambu dupwame baa yako lao nyii nayami.
JOH 1:12 Yako lao nyii nayaminyipape wambu baa yako lao nyepala banya kingi doko kapa ingingi lao suu pyapala mona maipa piyami dupwa Anatunya wane wanake ingyuo karena lapa piya.
JOH 1:13 Isa akalimi ranjama rongo pilyamo yanengena yulu palyuo manjo nyero lao suu pyapala manjo nyingi dopa pyuo manjo nyiyaminde daa. Anatumi nakama manjo nyiya.
JOH 1:14 Pii doko baa isa wambunya yongo nyepala namwa pipya role pyao kareya. Kinyinya rengepe mona keyange palyuo ipingi rengepe baa keta palyuo simbuyamopa ama yanga paupau lao kareyamo kandeyama. Baa Ikinyingi mendaki dokona Rakangeme yanga paupau lao karenge renge doko baa keta pyamalyiyamo kareya.
JOH 1:15 Joneme baasa kando dopa lao pii ketae palyuo leya. Mendende enakana eparamo doko baa wambowana karenge dokona namba baapa manda manjo kapa kara nalyo leyo kande doko akali dakeŋe leya.
JOH 1:16 Mona keyange palyuo ipingi renge baa keta palyuo simbulyamopa imambunya renge keyange dupwa namwa peparae konda pyuole jepa pingi.
JOH 1:17 Mawa Pii doko Mosese keta jiya. Enakana dokopa mona keyange palyuo ipingi rengepe pii angi kinyinya renge dokope Yesu Koraisa baa keta paleyamopa epeya.
JOH 1:18 Mendeme Anatu kanda nange. Ikinyingi mendaki iki doko Rakangena mona enge dokona karenge dokome baa apiyakalende lao rolo leya.
JOH 1:19 Juu wambumi purisi lapope Lipae rara dokona lapope Jerusaleme karo Jone baa apa pyuondepe lao piso sela pena leyami.
JOH 1:20 Dokopa Joneme kalyama napala dopa lao polo leya. Namba Koraisa daa, leya.
JOH 1:21 Dokopa nakamame piso soo, Dokonako suu pyao emba Ilainjape? leyami. Baame, Namba daa lyakande, leya. Anatunya pii nolako lao epara leyami emba akali dokope? leyami. Baa isingi lao, Daa leya.
JOH 1:22 Dokopa emba apipi lao rolo langipi. Piso sela pupwape lami dapwa nakama pii mende isingi lamairama ingilyamo. Emba rangesa suu pyao apiyakalende karene lao rolo langipi leyami.
JOH 1:23 Dokopa baa dopa leya. Anatunya poropeta akali Aisayame. Yuu muiyane dokona pii mende, Kamongona kata doko rolo pipwape, Lao karara leyamo doko namba, leya.
JOH 1:24 Dokopa Parisi akali dupwame pena leyamisa epo kareyami akali dupwa dee kamba piso siyami. Emba Koraisa ingya naope Ilainja ingya naope Anatunya poropeta akali pii nolako lao karara leyami doko ingya naope pyuo karare ramo doko akipamo embame bapitisimo nyakamyuo karene? leyami.
JOH 1:26 Joneme nakama isingi dopa lamaiya. Namba ipwana bapitisimo nyakamyuo karo. Nyakamyuo karapunupape nakama karaminyi raka dokona mendali karamo doko nakama kando see nalyaminyi.
JOH 1:27 Namba wambole ipunupa enakana epelyamo dokosa leto. Banya kimbu suu lyolo doko namba kwaenge dokome kapa polaro ingya nalyamo leya.
JOH 1:28 Yuu Betani ipwa Jotane dumarena singi Jone bapitisimo nyakamyuo kareya yuu dokona dopa lao kareyami.
JOH 1:29 Dokopa yangama dokopa baa kareyamo dokona Yesu epeyamo kandeya. Kandapala, Anatunya Sipisipi Ikyane isa wambu dupwana koo dupwa nyuo lanyakao para doko kandalapa.
JOH 1:30 Akalinde enakana eparamopa baa wambowana karenge dokona namba baapa manda manjo kara nalyo leyo kande doko lyakande.
JOH 1:31 Baa apisi lao soo gisa nayonopape Isaraele wambu baa soo nyinyale lao ipwa dokome bapitisimo nyakamyuo epeyo leya.
JOH 1:32 Lapala Jone dopa lao lao roleya. Imambu doko yaka wayamu dopale ingyuo yake panda piso lupyuo epo baa keta kareyamo kandeyo.
JOH 1:33 Nambame baa apa pyuonde lao soo gisa nayo. Soo gisa nayonopape namba ipwa dokona bapitisimo nyakamila puu leya dokome namba dopa langiya. Imambu doko lupyuo epo akali mende keta kareya kande dokomeko wambu dupwa Imambu Poo Pyasi dokome bapitisimo nyakamyuo karara langiya.
JOH 1:34 Dokonako ingyuo baa Anatunya Ikinyingi doko kandapala rolo leto, leya Joneme.
JOH 1:35 Dokona yangama dokopa Jonemoo banya disaepole lamape role pyao kareyami.
JOH 1:36 Dokopa Yesu kata epo peyamo kandapala, Anatunya Sipisipi Yakane doko karamo kandalapa leya.
JOH 1:37 Leyamopa disaepole akali dolapo pii doko sepala Yesu peyamo dokona enakana peyambi.
JOH 1:38 Yesu kapu kyuo nakamba enakana epeyambi doko kandapala nakamba lamaiyuo, Aki kotala epelyambinyi? leya. Dokopa nakambame baa lamaiyuo, Rapae (pii doko Mana Lenge dopakale), emba anja palenge? leyambi.
JOH 1:39 Baame nakamba lamaiyuo, Kandala mwua leya. Baa Paleya doko kandala papala poo keloke yuu kwuayamo dokopa baamoo role pyao peteyami.
JOH 1:40 Akali lama Jonena pii sepala Yesu peyamuli pyuo peyambi dokona mende Enduru lenge Saimone Pitana yangonge doko.
JOH 1:41 Baa aopa yangonge Saimone koto kando nyepala dopa lamaiya. Nambwa Mesaya doko kando nyelambano, leya. (Mesaya doko Koraisa dopale.)
JOH 1:42 Baame Yesu kareyamo dokona Pita lanyuo peya. Yesumi baa kandapala dopa leya. Emba Saimone Jonena ikinyingi lyasili. Emba kingi Sipasa larama leya. (Kingi Sipasa doko wambu kingi kana dopale.)
JOH 1:43 Dokona yangama dokopa Yesu Galili dokona paro lao suu pyapala Pilipa koto kando nyepala namba paronuli pyuo ipupi, lamaiya.
JOH 1:44 Pilipa baa yuu Betesaita range Enduru Pitapana yuu anda repe repe pyuo karenge dokonako palenge.
JOH 1:45 Pilipame Nataniele koto kando nyepala baa dopa lamaiya. Moseseme Lowa buku dokonape dee Anatunya poropeta akali dupwapeme pepa pyao akali mende epara leyami kande doko Yesu Nasarete range Josepena ikinyingi doko kando nyelamano leya.
JOH 1:46 Natanieleme baa lamaiyuo, Yuu Nasarete dokona aki renge keyange mende pulyingisi? leya. Pilipa baa lamaiyuo, Kandambana bwua leya.
JOH 1:47 Yesumi Nataniele epeyamo kandapala baasa kando lao, Doko Isaraele akali angiŋi panga see nange lyakande leya.
JOH 1:48 Natanieleme baa lamaiyuo, Apa pipyasa embame namba letepe? leya. Yesumi isingi lamaiyuo, Pilipame emba ene kee lapa napyamopa isa piki rengesa isarena pisipinyi dokona emba kandapu leya.
JOH 1:49 Natanieleme baa lamaiyuo, Rapu Pingi emba Anatunya Ikinyingilyamo emba Isaraele wambu dupwana Kiŋilyamo leya.
JOH 1:50 Yesumi baa dopa lamaiyuo, Namba emba isa piki lungwalungwa pisipinyi kandapu, lapunu pii dokona dopa lao suu pilipi? Dake kandapala letenyakao doŋo rengya yulu wakasa lapo kando sere leya.
JOH 1:51 Lapala baame dopa lamaiya. Kinyi kinyi langilyu, yake kata lumbwaramopa Ikinyingi Akali kararamo mare dokona Anatunya aŋala dupwa lupyuo epo pulyuo pao pyuo kararami kandare leya.
JOH 2:1 Yuu lama epo papeyamopa yuu Kena yuu Galili dokona singi dokona enda mende yapo nyiyami. Dokopa Yesunya endangi dokona role pyao peteya.
JOH 2:2 Dokopa Yesumoo banya disaepole pipya enda akalipa nyilyambinyi dokona kandala epena leyami.
JOH 2:3 Dopa piyambinyipa waene ipwange nao oteyamisa Yesunya endangi dokome baa lamaiyuo, Nakamana waene ipwange daalyamo leya.
JOH 2:4 Dokopa Yesumi baa dopa lamaiyuo, Embame namba aki mende pinya lao suu pilisi? Nambana yuu gii ene pyaka sepa nalyamo leya.
JOH 2:5 Leyamopape banya endangi dokome yulu pingi wambu dupwa dopa lamaiya. Baame nakama mende pipwa leya kande dokona palyuo pipwape leya.
JOH 2:6 Juu wambu dupwa nakamana yulu palengenyili pyuo yanenge wate pingi dokona lao kipwa pee kameya pakinyamange pyakambwaro kaname wasisi dusipa reteyaminyi siya.
JOH 2:7 Doko kandapala Yesumi lao, Pee dusipa ipwa kyano pyuo simbwalapape leya. Leyamo dokopa pee kambu dokona kyano pyuo simbuyami.
JOH 2:8 Dokopa, Epapu lama kamuo nyepala nenge nao petaminyi akali rapu pyuo petamo dokona minyuo pupwa leya. Dokopa minyuo peyami.
JOH 2:9 Dokopa nenge nao peteyami akali rapu pyuo peteyamo doko mee ipwa doko pao waene ipwange ingiyamo doko nakanju siya. Baa anjarae sipyamo nyimi lao soo gisa naya. (Soo gisa nayamopape yulu pingi wambu kamuyami dusipame soo gisiyami.) Baame soo gisa nayamo dokome enda yapo nyiyamo akali doko epena lapala
JOH 2:10 dopa lamaiya. Wambu peparaeme nakamana waene ipwange keyange doko wambo mokwa soo maingi. Mailyaminyipa wambu dupwame malu napelyaminyi dokopa enakana waene ipwange aeyange dupwa mokwa soo maingi kandale. Dopa pilyaminyipape embame dakepale waene keyange doko wambo mokwa soo mai napala ene dakepa mailinyi leya.
JOH 2:11 Yuu Kena yuu Galili siyamo dokona Yesumi yulu andake doko kanda soo lasaka piya. Dokome banya yanga paupau lenge yulu doko nolakaya. Dokopa banya disaepole dupwame baa kapa ingingilyamo lao suu pyapala mona maiyami.
JOH 2:12 Enakana baamoo endangimoo banya yangonge dupwape disaepole dupwa pipya yuu Kapaneame dokona lano peyami. Papala yuu dokona yuu lapo kareyami.
JOH 2:13 Dokopa Juu wambunya Pasopa nenge nenge gii doko pyaka siyamopa Yesu Jerusaleme dokona lalyuo peya.
JOH 2:14 Papala tembole anda dokona bulamakaope sipisipipi, yaka wayamupi ropo pingi akali dupwa dee kana yango alowa pingi akali dupwape pyuo peteyaminyipa kando nyiya.
JOH 2:15 Kando nyepala puu walenge lapo minyuo kambwa pyapala dupwa peparae sipisipipi bulamakaope tembole anda dokona kara nana lao pyaroko pyao ralinyi nembeya. Nembapala kana alowa pingi akali dupwana kana kulimbwanyi nembapala rate dupwa minyalyapala pyale lapa piya.
JOH 2:16 Pyale lapala yaka wayamu ropo pyao maingi akali dupwa kando dopa lamaiya. Bange dapwa minyuo pupwa. Nambana Rakanena anda dake bisinase anda ingyuo karaka nana leya.
JOH 2:17 Dokopa banya disaepole dupwame pii pyasi palenge dokona, Embena anda suu pyao yulu andake isare rao pyuo kararo, pii pyasi palenge doko suu piyami.
JOH 2:18 Baa dopa piyamo dokopa Juu wambu dupwame baa lamaiyuo, Renge andakende emba keta palipyamo pilyuŋu lao yulu andake mende pyuo lasaka pyaale leyami.
JOH 2:19 Yesumi isingi dopa lamaiya. Tembole anda dake pyao lalinyi nembarami ramo dokopa namba yuu remasa dee piru.
JOH 2:20 Dokopa Juu wambu dupwame dopa leyami. Tembole anda dake ee kana akalisa pao kisima ipisu pakinyamange pyakambwaro piyami kande doko kaepala embame yuu rema piru letepe? leyami.
JOH 2:21 Dopa leyaminyipape Yesumi banya yanenge doko suu pyao tembole anda doko makande minyuo leyasa piya.
JOH 2:22 Dokona suu pyao baa enakana kumuo paleyamopa minyalyuo nyepeyamo dokopa banya disaepole dupwame dopa leya kande lao suu piyami. Lao suu pyapala pii pyasi palenge dokope Yesu leyamo pii dokope pii kinyilyamo lao suu piyami.
JOH 2:23 Pasopa nenge nenge gii dokopa Jerusaleme karo yulu andake pipa pyuo kareyamo dupwa kandapala wambu malu dupwame banya kingi dokona kapa ingingi lao suu piyami.
JOH 2:24 Lao suu piyaminyipape Yesu nakamana mona anda kandenge dokome baa nakama pipa mona mendakinya palyapa nao kareya.
JOH 2:25 Baame isa wambunya monarena soo gisingi dokome mendeme isa akali dopa pyuo pingiŋi lao baa lamairami ingya naya.
JOH 3:1 Parisi akali mende Nikotimasa lengende kareya. Baa Juu wambunya akali mupwa ingyuo kareya.
JOH 3:2 Kukwa mendepa akali doko Yesu kareyamo dokona epapala dopa lamaiya. Rapu Pingi Anatumi emba puu leyasa mana lao epee doko namwa silyamano. Dokona lao embame yulu andake lasaka pyuo karene dupwa akali mendeme pyuo kararo laramopa Anatumi nyiso kara nara ramo baa pinya saka nara ingilyamo leya.
JOH 3:3 Yesumi baa lamaiyuo, Kinyi kinyi langilyu, mendalipi kyaka ingyuo manjo nyii nara ramo dokome Anatunya isingi yulu doko kando nyii nara leya.
JOH 3:4 Nikotimasame baa dopa lamaiya. Apa pyuo andapae doko dee manjo nyingi? Endanginya ingi anda dokona kamba pao paliramo kapa manjo nyingisi? leya.
JOH 3:5 Yesumi dopa lao isingi lamaiya. Kinyi kinyi langilyu, mendali ipwana palyuo nyuope Imambu dokomepe manjo nyii nara ramo dokome baa Anatunya isingi yulu dokona sukusa parande daa.
JOH 3:6 Yanenge karengendeme mandenge dokona yanengeko pyaka lyingi. Imambu dokome manjo nyingi dokopa imambu ingingi.
JOH 3:7 Emba kyaka ingyuo manjapenge ingilyamo lao karo dokona mona nemba napipi.
JOH 3:8 Porambaiye doko mee maso epenge. Emba poo lao epelyamo mee singi. Doko anja piso epapala lao anjarena pelyamo lao see nange. Doko suu pyao Imambumi manjo nyingi wambu dupwa peparae kata mendaki dokonako ingyuo penge leya.
JOH 3:9 Nikotimasame lao, Doko apa pyuo pingi? leya.
JOH 3:10 Yesumi dopa lao isingi lamaiya. Emba Isaraele wambunya mana lenge ingyuo karene kande dokome pii doko soo nyii nalepe?
JOH 3:11 Kinyi kinyi langilyu, namwa soo gisilyamano dokona polo laope, angi kandenge doko rolo laoko pyuo karelyamanopape nakamame namwana pii doko soo nyepa nange.
JOH 3:12 Nambame isa yuunya yulu palengenyili pyuo langyalono dokopa pii doko kinyilyamo lao suu pyaa nalene dokona yake pandana yulu palenge dokona langirunu dokopa apa pyuo kinyilyamo lao suu pyarese?
JOH 3:13 Akali mende yake panda sukusa dokona pulyuo paa nange. Ikinyingi Akali yake panda dokona karo lupyuo epeya dokoko iki penge.
JOH 3:14 Dee, Moseseme yuu muiyane dokona kau doko ketae minyalyiya doko suu pyao Ikinyingi Akali ketae minyalyarami ingilyamo.
JOH 3:15 Dokome wambu baa kapa ingingi lao suu pyapala mona mairami dupwa kyaka palenge renge kulisa doko kapa nyerami ingilyamo leya.
JOH 3:16 Anatumi isa wambu dupwa ama mona retapala banya Ikinyingi mendaki dokoko jiya. Dokona baa kapa ingingi lao suu pyarami dupwa kwalu kwao kwaa napala kyakana renge palu palenge doko nyerami.
JOH 3:17 Dokonako ingyuo Anatumi Ikinyingi dokome isa wambu dupwa yapalya yapana pyuo lao koo keta palyala pena leyande daa. Baame isa wambu dupwa lete wai pyao nyera lao pena leya.
JOH 3:18 Baa kapa ingingi lao suu pyapala mona mairami dupwa kambuyanda pyuo lao koo keta palyaramo kara narami. Mendeme baa kapa ingya nange lao suu pyapala mona mai nalyaminyi dupwa epapu kambuyanda pyuo koo keta palyapyamo karaminyi. Anatunya Ikinyingi mendaki dokona kingi doko kapa ingya nange lao suu pyapala karaminyi dokona kote pii palamo.
JOH 3:19 Yanga paupau lenge doko isa panda epeyamopape isa wambu dupwame baa mona mai napala yulu koo pingi dokome iminjingi yulu dupwa mona mailyaminyi renge dokona kote pii palamo.
JOH 3:20 Wambu yulu koo pingi dupwa peparaeme yanga paupau lenge doko awa napala nakamana yulu koo dupwa nolako see nana lao yanga paupau lenge dokona epa nange.
JOH 3:21 Dopa pilyaminyipape yulu angi rolae pyuo karenge dupwame yanga paupau lenge panda dokona pyuo karenge dokome wambu peparae nakama Anatunya yulu rolae pyuo karaminyi doko kandarami.
JOH 3:22 Enakana Yesumoo disaepole dupwa pipya yuu Jutia dokona peyami. Dokona baa nakama role pyao karo bapitisimo nyakamyuo kareyami.
JOH 3:23 Jone baame opetae bapitisimo nyakamyuo kareya. Doko yuu Ainone yuu Selima repeta ipwa malu siyamosa dokome yuu dokona bapitisimo nyakamyuo kareya. Dokopa wambu dupwa epo bapitisimo nyiyami.
JOH 3:24 (Jone karapusi anda dokona ene palipa nayamopa piya.)
JOH 3:25 Dokopa Jonena disaepole dupwape Juu akali mendemoo Juu wambumi misi yulunya yanenge wate pingi dokona lao apiyanda piyami.
JOH 3:26 Dokona lao Jone kareyamo dokona epapala baa dopa lamaiyami. Rapu Pingi, emba akali ipwa Jotane dumurena kareyambi dokosa kando lao rolee kande dokome dae karo bapitisimo nyakamyuo karapyamopa wambu peparae baa karapyamo dokona papa pyuo karaminyi kande, leyami.
JOH 3:27 Joneme isingi lao dopa leya. Yake panda rae dokome mende mai nara ramo doko wambu mendeme kapa nyera ingya nara.
JOH 3:28 Namba Koraisa daa. Banya lenge kambu dokona puu lapyasa epelyo leyo kande dokona lao nakama rangeme soo lalaminyi kandapi.
JOH 3:29 Akali enda nyera ingilyamo doko nyera. Dokopa banya andare dokome banya pii soo raerae minyuo karenge doko suu pyao namba epapu raeme kumuo karo.
JOH 3:30 Banya yulu doko ando nyimbu paramopa nambana yulu doko kukyu para ingilyamo leya.
JOH 3:31 Yake panda rae epelyamo doko peparaena ketae ingyuo karamo. Mee isa akali dupwa isa wambumi manjo nyisinde karenge dokome banya pii doko isa yuunya pii lao karenge. Yake panda rae epeya doko peparaena ketae ingyuo karamo.
JOH 3:32 Baa kandeyamo dupwa lao rolo karapyamopape mendeme banya pii doko yako lao sepa nalyaminyi.
JOH 3:33 Mendeme banya pii doko yako lao separa ramo dokome baa Anatu kinyi angilyamo lao soo giso parasa pira.
JOH 3:34 Dokona lao Anatumi mapanyi peeyamo epeyamo dokome Anatunyako pii lao karamo. Anatumi Imambu doko pingyapala mainginde daa.
JOH 3:35 Rakange dokome Ikinyingi doko mona retenge, dee, baame bange yulupi peparae banya kingi kape dokona reteya.
JOH 3:36 Ikinyingi baa kapa ingingi lao suu pyapala mona maiyuo karaminyi dupwa kyakana renge kulisa palu palenge doko nyerami. Mendeme Ikinyingi doko laramuli pyuo pyuo kara naramo doko kyakana palenge renge doko kando nyii nara ingyaramopa Anatunya imbu singi doko baa keta palira.
JOH 4:1 Parisi dupwame Joneme wambu mendasipa iki bapitisimo nyakamipyamopa Yesu baame andare nyakamilyamo lao soo manjo nyiyami.
JOH 4:2 (Yesu baa rangeme bapitisimo nyakamyuo kara naya. Banya disaepole dupwame nyakamiyami.)
JOH 4:3 Parisi dupwa soo karaminyi lao soo gisapala Kamongo dokome yuu Jutia yaki nyepala yuu Galili dokona peya.
JOH 4:4 Baa yuu Samaria yalo para ingiyasa.
JOH 4:5 Yuu Samaria dokona Jekopeme ikinyingi Josepe yuu mende maiya dusa ingyuo yuu anda malu palyuo karenge mende kingi Saika lenge dokona epeya.
JOH 4:6 Jekopena ipwa kamuo nyingi yuwale dokona siyasa Yesu kata pao makapala yuwale repeta dokona peteya. Andawai korakama ingiyamopa peteya.
JOH 4:7 Dokopa Samaria enda mende ipwa kamwala epeya. Yesumi baa lamaiyuo, Ipwa narole jii leya.
JOH 4:8 (Banya disaepole dupwa wambo anda malu palyuo karenge dokona nenge ropo pyala papeyami.)
JOH 4:9 Dokopa Samaria enda dokome baa dopa lamaiya. Akipamo emba Juu akali dokome namba Samaria enda doŋo ipwa naro jii leene? leya. Juu wambu dupwa Samaria wambu dupwa pipya role pyao kara nange kandale leya.
JOH 4:10 Yesumi isingi dopa lamaiya. Emba Anatumi renge keyange jingi dupwa soo giso apimi ipwa jii letamo lao sipili doko embame baa piso serenepa baame ipwa letena renge palenge lapo jipyali, leya.
JOH 4:11 Enda dokome baa lamaiyuo, Aeya, embena pee kamuri doko see nao ipwa kamungi yuwale doko ama kyuwa ingyuo pilya kande dokopa ipwa kyakange doko embame anjarae nyingisi?
JOH 4:12 Namwana rakange kyawa Jekopeme ipwa kamungi yuwale doko kyasiya dokome baa range ipwa kamuo neyamopa banya ikinyingi dupwame nao dee banya bulamakaope opetaeko nao kareyami akali dokopa emba wakasa ingyuo karepe? leya.
JOH 4:13 Yesumi baa dopa lamaiya. Ipwa dakena narami dokopa yango nano nano pira.
JOH 4:14 Ipwa namba mairunu mendeme narami dupwa yango nano ama pii naramopa mona dokona guu lao endangi palyuo karara. Dokome kyakana renge palu palenge dokome baa keta ranjo neta epara leya.
JOH 4:15 Enda dokome baa lamaiya. Aeya, namba ipwa yango nano pii naramopa dee dae kamwala epa nare lao ipwa doko jepe leya.
JOH 4:16 Yesumi baa dopa lamaiya. Emba papala akalinyi kee lapala dee dae epale puu leya.
JOH 4:17 Enda dokome isingi lamaiyuo, Namba akali kara nange leya. Yesumi baa lamaiya. Embame namba akali kara nange lalyane doko kinyi leene.
JOH 4:18 Emba wamba akali kingi paki nyepa pyuo petee, epapu nyuoko petene doko embena akalingi angi daa doko kinyi lalene kandapi, leya.
JOH 4:19 Enda dokome baa dopa lamaiya. Aeya, emba Anatunya poropeta akalilyamo lao soo manji nyilyu.
JOH 4:20 Namwana rakange kyawa dupwa yuu kyau dakena Anatu ketae pyambuo yako lao kareyami. Kareyaminyipape Juu nakambame lao dokopa Jerusaleme dokona akali dupwa Anatu ketae pyambuo yako lao karapenge ingilyamo letaminyi, leya.
JOH 4:21 Yesumi baa lamaiya. Enda, namba kinyi letene lao suu pyaa, yuu gii mende pyaka seramo dokopa yuu kyau dakenape Jerusalemepe dolaponako Rakange doko ketae pyambuo yako lao kararaminde daa.
JOH 4:22 Nakama Samaria wambu dupwame api mende ketae pyambuo yako lao karaminyi doko angi sepala pilyaminde daa. Lete wai pyao nyingi yulu doko namwa Juu wambu dupwa keta epelyamo dokona soo gisapala Anatu ketae pyambuo angingyuo lao karamano.
JOH 4:23 Dopa pyuo karamwanopape yuu gii mende pyaka sera ingyapyamo doko epapu pyaka silyamo dakepa wambu Anatu dokona angi rolae ketae pyambuo yako larami dupwame Rakange doko imambunya kulisa palyuo ketae pyambuo yako larami ingilyamo. Dokonako ingyuo Rakange dokome wambu dopale baa ketae pyambuo kingi lao karamili lao koto karamo.
JOH 4:24 Anatu baa imambuŋu dokome wambu baa ketae pyambuo yako lao karaminyi dupwame imambunya kulisa palyuo ketae pyambuo kingi larami ingilyamo leya.
JOH 4:25 Enda dokome baa dopa lamaiya. Mesaya (Koraisa lenge doko) epara ingilyamo doko namba silyu. Baa epapala dokopa yulu peparae pano laralyamo leya.
JOH 4:26 Yesumi baa lamaiyuo, Embame baa epara lao karene doko epapala pii langyuo karamo leya.
JOH 4:27 Gii dokopako banya disaepole dupwa aopa epeyami. Baa enda mendepa pii lao pisambinyilamo lao mona nembeyami. Mona nembeyaminyipape mendeme, Aki nyipuli lao dopa pilinyi? laope, Baapa pii akinya lao petambinyi? laope laa nayami.
JOH 4:28 Dokopa enda doko ipwa pee doko yaki nyepala pao anda malu palyuo karenge dokona papala wambu dupwa dopa lamaiya.
JOH 4:29 Akalindeme nambana yulu pyuo karenge dupwana peparae polo lalamo doko kandala ipupwa. Baa Koraisape? leya.
JOH 4:30 Leyamopa anda malu palyuo karenge dokona wambu peparae anda yaki nyepala baa kareyamo dokona panya peyami.
JOH 4:31 Dokopa disaepole dupwame baa piso soo, Rapu Pingi, emba nenge lapo nalase leyami.
JOH 4:32 Leyaminyi dokopa baame nakama lamaiyuo, Namba nenge naro dalapo aeyapyamo peto doko nakama see nalyaminyi leya.
JOH 4:33 Dopa leyamo dokopa disaepole dupwa nakama lao, Mendeme baa nengende minyakamyuo imipi? leyami.
JOH 4:34 Yesumi nakama lamaiya. Namba mapanyi peeyamo doko laramuli pyuo pyuo karo banya yulu pyuo kondanyi nembaro doko nambana nenge.
JOH 4:35 Nakama, Kana kisima epo paparamopa ee jingi lyerama lenge kandale. Ee dupwa epapu dakepa jingi minyingi kondapapyasa lyerama ingilyamo doko lenge pendakae lapala kandalapa.
JOH 4:36 Ee range akali nyiso jingi lyakamyuo karamo akali doko epapu yole nyilyamo. Baa jingi lyuo kyakana renge kulisa palu palenge sukusa dokona malu palyuo retelyamo. Dokopa waingi randa lenge akali dokope jingi lyuo karara dokope role pyao raerae maiyuo kararambi ingilyamo.
JOH 4:37 Nakamame, Mendeme waingi randa lenge, wakale mendeme jingi lyingi lao karenge kandale.
JOH 4:38 Dokoŋo nakama renge pyuo piyaminde daa dokona jingi lyela pupwa leyo. Wambu wakale lapome renge pyuo wara pyuo kareyaminyi apo dokona epapu nakamame lyuo karaminyi leya.
JOH 4:39 Enda dokome, Baame namba yulu pyuo karenge dupwana peparae namba kando polo lalamo, leyamosa Samaria wambu malu anda repe repe pyuo karenge range dupwame baa kapa ingingi lao suu pyapala mona maiyami.
JOH 4:40 Dokopa Samaria wambu dupwame baa kareyamo dokona epapala role pyao karamanale lao baa piso siyaminyisa yuu dokona baa yuu lama kareya.
JOH 4:41 Dokopa banya pii doko sepala wambu konda pyuowale baa kapa ingingi lao suu pyapala mona maiyami.
JOH 4:42 Dupwame enda doko dopa lamaiyami. Epapu embena piiko minyuo baa kapa ingingi lao suu pyao karamande daa. Namwa rangeme banya pii soo nyelamano dokona baa angi isa wambu dupwana Lete Wai Pyao Nyingi akali angi ingyuo karamo doko soo gisilyamano, leyami.
JOH 4:43 Yuu lama epo papeyamopa yuu doko yaki nyepala baa yuu Galili dokona peya.
JOH 4:44 Dokona suu pyao Yesumi lao, Anatunya poropeta akali banya yuu range dokona wambu dupwame banya pii doko rape rape lao see nange leya.
JOH 4:45 Samaria yaki nyepala Galili epeyamo dokopa Galili wambu dupwame yako lao nyiyami. Wamba Jerusaleme dokona nenge nala pao kareyaminyi dokopa baame yulu pyuo kareyamo dupwa peparae kandeyaminyi dokome baa yako lao nyiyami.
JOH 4:46 Dokopa Yesumi yuu Kena yuu Galili silyamo dokona wambo ipwa doko nyuo waene ingiya dokona dee epeya. Dokopa yuu Kapaneame dokona gapomane akali mende kareya dokona ikinyingi doko anga piya.
JOH 4:47 Yesu Jutia karo Galili dokona ipyalyamo lao sepala akali doko banya wane kwaeyamo siyasa baa kareyamo dokona papala pyuo nyakala lano ipili yaka lao piso sokondali piya.
JOH 4:48 Dokopa Yesumi baa lamaiyuo, Embame yulu angi andake nolakaenge lapo kanda nare ramo doko Anatu kapa ingingi lao suu pyaa nange leya.
JOH 4:49 Gapomane akali dokome baa lamaiyuo, Yangone, nambana wane kumapa nana lao lano ipu leya.
JOH 4:50 Yesumi baa lamaiyuo, Emba paale embena wane lete karara leya. Akali dokome Yesu pii kinyi langyalamo lao suu pyama kata nyuo peya.
JOH 4:51 Baa lano peyamo dokopa banya yulu pingi akali dusipa kandamae nyepala, Embena wane doko kyakapyamo karamo, lamaiyami.
JOH 4:52 Dokopa baame, Anjokorape ingyuo baa kyakalana pyase? lao nakama piso siya. Piso siyamo dokopa, Epapu neta dalyasa pakiki palipyamopa wane keloke dokopa yanenge isasa doko pyai napya leyami.
JOH 4:53 Rakange dokome gii dokopako Yesumi embena wane doko kyakara lapya kandapi lao soo manji nyiya. Dokopa baa rangemoo banya role paleyami dupwa pipya nakama peparae baa kapa ingingi lao suu pyapala mona maiyami.
JOH 4:54 Yesumi Jutia yaki nyepala Galili epo karo dokopa yulu doko lapo ingyuo pyuo lasaka piya.
JOH 5:1 Enakana Juu wambu dupwana nenge nenge yuu gii mende pyaka siyamopa Yesu Jerusaleme dokona lalyuo peya.
JOH 5:2 Jerusaleme dokona sipisipi potemo konanda pyuo papingi kambu repeta dokona ipwa pete mende siya. Doko Ipuru pii lao Betesaita lenge. Dokona anda kauwa kingi paki karenge.
JOH 5:3 Dusipana wambu anga pyao karalu karengepe lenge koope kimbu kwaengepe papae rambungipi ama malu ipwa doko mole mole minyilyape lao kando iso siyami.
JOH 5:4 Dokona lao Kamongona aŋala mendeme yuu gii lapona lupyuo pao ipwa pete doko kalumuli pipa piya. Ipwa doko kalumuli pipa piyamo dokona enakana wambu wambo lambwapa piyami dupwa anga rara wakale wakale piyamo dupwa peparae mee ingyapa piya.
JOH 5:5 Akali mende ee kana akalisa pao akalisa rema ipisu mange lama anga pyao kareyamopa siya.
JOH 5:6 Yesumi baa kandapala ee kana malu dokona siyamo doko soo gisapala baa lamaiyuo, Emba mee ingyapyamopa karapuli yaka lao suu pilisi? leya.
JOH 5:7 Anga pingi akali dokome isingi lamaiya. Yangone, ipwa kalumuli pipa pingi dokopa mendeme namba pete dokona lanyuo parami ingya nange. Ene lambuo pao karelyono dokopa mendali wambo pao pyaka napa pingi leya.
JOH 5:8 Yesumi baa lamaiyuo, Sipurapala embena luu palenge bange doko nyoko minyalu pena, leya.
JOH 5:9 Leyamo dokopa akali doko aopa mee ingiyamo dokopa banya luu palenge bange doko nyoko minyalu peya. Yulu doko koro petenge gii dokopa.
JOH 5:10 Juu wambu dupwame akali mee ingiyamo doko dopa lamaiyami. Epapu yuu koro petenge dokopa embena luu palenge bange doko kapa soo paa nare leyami.
JOH 5:11 Dopa leyaminyipape baame nakama dopa lamaiya. Akali namba pyuo nyipya dokome namba langyuo embena luu palenge bange doko nyoko minyalu puu lapyasa soo pelyo leya.
JOH 5:12 Nakamame baa piso soo, Embena luu palenge bange doko nyoko minyalu puu lapya akali doko apisi? leyami.
JOH 5:13 Yuu dokona wambu malu kareyamisa Yesu kolala puu pao peyamo dokona akali mee ingiyamo dokome apimi pyuo nyakapyape lao soo gisa naya.
JOH 5:14 Enakana dokopa baa tembole anda dokona kareyamopa Yesumi baa kando nyepala dopa lamaiya. Emba mee ingyapyamopa karene kande. Koo andake mende emba keta dee epa nana lao yulu koo dee kamba pyuo kara napipi leya.
JOH 5:15 Akali dokome pao Juu wambu dupwa lamaiyuo, Namba pyuo nyipya doko kingi Yesu, leya.
JOH 5:16 Dokopa Yesumi koro petenge dokopa yulu dopa piya dokona Juu wambu dupwame baa randa maiyuo kareyami.
JOH 5:17 Dopa piyaminyipape Yesumi nakama lamaiyuo, Nambana Rakangeme kaeya napala yulu pyuoko karapyamopa namba yulu pyuo karo leya.
JOH 5:18 Leyamopa baa koro petengena mawa pii doko kokwa siyamo dokona iki baa pyamwali lao suu pyao kareyaminde daa. Baa Anatu doko nambana Rakange leyamo dokopa baapa Anatupa mendarele leyasa piya dokona baa ama pyama lao, lao suu pyao kareyami.
JOH 5:19 Yesumi nakama dopa lamaiya. Kinyi kinyi langilyu, Ikinyingi baame yeelyo sisu lao mende pii nange. Rakangeme pyuo karenge kandelyamo yulu doko iki kapa pingi. Dokonako ingyuo Rakange pilyamuli pyuo Ikinyingi dokome pyuoko karenge.
JOH 5:20 Dokona lao Rakange baame Ikinyingi doko mona reto karapala baame pyuo karenge yulu dupwa peparae lasaka pingi. Enakana dokopa yulu kamame wakasa dupwa lasaka pyuo kararamopa nakama kando yamarangyuo parami.
JOH 5:21 Dokona suu pyao Rakange dokome wambu kumuo palenge dupwa lete minyalyuo nyingi doko suu pyao Ikinyingi opetaeme lapo letena renge mairu lao suu pilyamuli pyuo maingi.
JOH 5:22 Rakange baame akali mende kando yapalya yapana pyuo laa nange. Baame wambu yapalya yapana pyuo lenge yulu doko Ikinyingi maiya.
JOH 5:23 Wambu peparaeme Rakange kando ketae pyambuo karaminyi dopako pyuo Ikinyingi ketae pyambuo karena lao maiya. Mendeme Ikinyingi kando ketae pyambuo kara narami dupwame Rakange mapanyi peeyamo doko ketae pyambuo kara naramisa pira.
JOH 5:24 Kinyi kinyi langilyu, mendeme nambana pii soo nyepala namba mapanyi peeyamo doko kapa ingingi lao suu pyao karaminyi dupwa keta kyakana renge kulisa doko palira. Kumungi renge doko yalo epo lete renge dokona karamo dokona baa keta kote pali nara ingilyamo.
JOH 5:25 Kinyi kinyi langilyu, yuu gii mende pyaka sera doko pyaka soo kaepyamopa wambu kumuo palaminyi dupwa Anatunya Ikinyingi pii laramo doko sepala lete parami.
JOH 5:26 Rakange letena renge renge kuiyuo karamuli pyuo Ikinyingi keta pyamalyiya.
JOH 5:27 Baa Ikinyingi Akali ingilyamo dokona lao kote kapa lara inginyi pyambuya.
JOH 5:28 Pii dake sepala mona nemba nalapape. Yuu gii mende pyaka seramo dokopa wambu malu anda palaminyi dupwa peparae banya kambu dokona pii neta eparamo doko sepala lopo neta eparami. Wambu yulu keyange pingi dupwa lete karalu karalana lopo epo, wambu koo pingi dupwa kwao parami dokona lao lopo eparami.
JOH 5:30 Namba range sipurapala mende pii nange. Anatu baa namba langinginyili pyuo pakana palyuo kote lao rolenge dokome rolae ingyuo penge. Namba range suu pyao mende pii napala namba mapanyi peeyamo dokona pii sepala pinya lao suu pyao karo.
JOH 5:31 Namba rangesa lao laro ramo nambana pii doko bulumbulu mee pyara.
JOH 5:32 Mendalimi nambasa lao lao karenge doko banya pii doko pii kinyi lao soo gisilyu.
JOH 5:33 Jone kareyamo dokona lapo piso sela pena leyaminyipa baame pii kinyi dokona rolo leya.
JOH 5:34 Rolo leyamopape isa akalimi namba nyiso pii mende lamilinya suu pyaa nalyo. Pii doko nakama lete wai pyao paramiŋi lao karo.
JOH 5:35 Jone baa isareŋe rao sinyi piyamosa nakama dokona karalana rae maiyuo kareyami.
JOH 5:36 Dopa piyamopa nambame pii lao karenge dokome Jonena pii doko anale palamo. Dokona lao Rakange dokome yulu pyuo lumwa pipi lao jiyamo nambame pyuo karo dupwameko Rakange dokona namba mapanyi peeyaŋa lao lasaka pilyamo.
JOH 5:37 Doko Rakange namba mapanyi peeyamo dokome nambana lao lakaya. Banya pii lumbuo epenge doko nakamame see nange. Banya apiyakale lao nakamame angi kanda nange.
JOH 5:38 Baame mapanyi peeyamo dokona pii doko soo nyii nalyaminyi renge dokona banya pii nakamame monarena pali napyasa karaminyi.
JOH 5:39 Buku Baepole dokona letena renge kulisa kando nyerama lao suu pyapala nakama yaka letaminyi. Pii pyasi palipyamo yaka letaminyi doko nambasa suu pyao lenge.
JOH 5:40 Yaka letaminyipape letena renge doko karo namba piso sela epa nalyaminyi.
JOH 5:41 Isa akali dupwame namba lakandamili yaka lao suu pyao kara nalyo.
JOH 5:42 Doko nakamana monarena Anatunya mona retenge renge doko pali nalyamo doko soo gisilyu.
JOH 5:43 Nambana Rakangena kingi lao ipunupa namba yako lao nyii nalyaminyi. Mendeme banya rangena kingi lao epara ramo doko baa yako lao nyerami ingilyamo.
JOH 5:44 Yango nakamana kingi wambu yangome ketae pyambuo karamili yaka lao suu pyao karaminyipape Anatu mendaki karenge dokome nakamana kingi ketae pyambuo karapyali lao suu pyao kara nalyaminyi. Dokona lao nambana pii dupwa soo nyii narami ingilyamo.
JOH 5:45 Nambame nakama rakangena lenge kambu dokona karo kote lare lao suu pyaa nalapape. Mosese nakamame suu pyao karaminyi dokona baame nakama kando kote palyuo karara ingilyamo.
JOH 5:46 Mosesena pii piyamo doko kinyi lao siyamili doko baame nambana lao piyara piyaŋa dokona namba kinyiŋi lao soo nyimili.
JOH 5:47 Dokona suu pyao banya pii pyasi palenge dupwa kinyilyamo lao suu pyaa narami ramo dokopa apa pyuo nambana pii dupwa kinyilyamo lao suu pyaramisi? leya.
JOH 6:1 Dopa lapala Yesu ipwa Galili pete kingi Taipiriasa lenge dokona dumuwangu peya.
JOH 6:2 Dokopa anga pingi wambu dupwa keta yulu andake pyuo lasaka pipa pyuo kareyamo kandapala wambu ama malu baa peyamo dokona enakana peyami.
JOH 6:3 Yesu yuu kyau pyala pyana pyuo karenge dokona pulyuo pao banya disaepole dupwa pipya peteyami.
JOH 6:4 Juu wambunya nenge nenge Pasopa doko repetale pyaka siya.
JOH 6:5 Dokopa lenge pendekae lapala baa peteyamo dokona wambu ama malu dupwa epeyaminyi kandapala Yesumi Pilipa lamaiyuo, Wambu dupwa nenge narami lao borete apa pyuo ropo pyaramase? leya.
JOH 6:6 Yesumi mende piru lao suu pyapala Pilipa baame mee apa letape lao selena makande pyuo leya.
JOH 6:7 Pilipame baa isingi lamaiya. Kana 200 nyepala borete ropo pyao nyeramanopape wambu mendemepe kolekole pyuo nao pao suu larami ingya nalyamo, leya.
JOH 6:8 Banya disaepole kareyami dokona mende Enduru Saimone Pitana yangonge dokome baa lamaiya.
JOH 6:9 Wane mende dae karamo borete bali jingi dokome wasisi kingi pakipi oma lamape minyilyamo. Wambu ama malu karaminyi doko suu pyao dusipa iki apa pyuo kau lao mairamase? leya.
JOH 6:10 Leyamopa Yesumi, Wambu dupwa isa petena lalapape leya. (Yuu dokona rambi malu paleya.) Dokona akali akalisa pao kingi paki daako ama malu wakasa (5,000) ingyuo isa peteyami.
JOH 6:11 Dokopa Yesumi borete dusipa nyepala ange lao ateŋa lapala isa peteyami dupwa mokwa soo maiya. Dopako pyuo oma opetae naraminyili pyuo maiya.
JOH 6:12 Maiyamopa nao sikya piyamo dokopa baame banya disaepole dupwa dopa lamaiya. Mee raeyo see nana lao nao malasi silyamo dupwa yapo nyelapape leya.
JOH 6:13 Dokopa borete bali jingi dokome wasisi kingi paki dusipa nao malapala nembeyami dupwa yapo nyuo pisiki minyasi akalisa ipisu lama dusipana paki pyuo simbuo pyoko pyoko leyami.
JOH 6:14 Yulu andake dopa pyuo lasaka piyamo kandapala dokopa wambu dupwame Anatunya poropeta akali isa yuu dakena epara ingilyamo doko akali dakelamo leyami.
JOH 6:15 Banya isingi yulu pyuo karalase lao puu maiyala epanya piyaminyi kandapala yuu kyau pyalya pyana piyamo dokona baa yeelyo nyokonyuo peya.
JOH 6:16 Yuu kwualepalepa dokopa banya disaepole dupwa ipwa muiyane pete siyamo dokona lupyuo peyami.
JOH 6:17 Papala bote dokona pyakambuo pao pisipala yuu Kapaneame dokona panya ipwa pete suku suku peyami. Dokopa iminjareyamopa nakama peyami dokona Yesu ene epapa naya.
JOH 6:18 Dokopa porambaiye andake minyapala ipwa doko pyakalya pyakana piya.
JOH 6:19 Nakamana bote doko yulu pyuo kilomita pakinyamange ingyuo peyaminyi dokopa Yesu ipwa dokona yana yana epo bote repeta epeyamo kandeyami. Kandapala pakayami.
JOH 6:20 Dokopa baame nakama lamaiyuo, Dake namba ipunu pilyamo. Paka nalapape leya.
JOH 6:21 Dokopa nakamame rae maiyuo baa bote dokona yako lao nyiyami. Dokopa nakama yuu panya epeyami dokona bote doko aopa epo pyaka siya.
JOH 6:22 Dokona yangama dokopa ipwa muiyane pete dorena wambu mee kareyami dupwame bote mendaki iki sipyamopa Yesu banya disaepole dupwa role pyao bote dokona paa napyamopa banya disaepole dupwa yeelyo kanjakala pumilyamo lao suu piyami.
JOH 6:23 Dee bote Taipitiasa range lapo epo Kamongo dokome ateŋa leyamopa borete nao peteyaminyi mare dokona repeta epo siyami.
JOH 6:24 Dokopa wambu dupwame Yesu banya disaepole dupwa pipya kara nayami doko kandapala bote dusipana nakama pyakambuo pao pisapala Kapaneame dokona Yesu kotala peyami.
JOH 6:25 Enakana Yesu pete dumuwangu kareyamo kando nyepala baa lamaiyuo, Rapu Pingi, anjokorape dae ipisi? leyami.
JOH 6:26 Yesumi nakama isingi lamaiyuo, Kinyi kinyi langilyu, yulu andake lasaka pipunu kandami dokona namba koto epa nalaminyi, Nakamame borete nao sikya pyuo puminyi renge dokona namba koto epelyaminyi.
JOH 6:27 Nenge rumbyara ingilyamo dupwa nyelana yulu pii nalapape. Nenge oo korokoro sulu soo sera doko nyelana yulu pipwape. Nenge doko Ikinyingi Akali dokome nakama jera. Dokona lao Rakane Anatumi baa rombo palyiya leya.
JOH 6:28 Leyamopa nakamame, Namwa Anatunya yulu dokona apa pipala piramase? leyami.
JOH 6:29 Yesumi nakama isingi lamaiyuo, Anatumi mapanyi peeyamo doko kapa ingingi lao suu pyapala mona mairami yulu dokoko Anatumi pimili lao suu pilyamo leya.
JOH 6:30 Dokopa nakamame baa lamaiyuo, Dopa lalyane dokona suu pyao aki yulu andake mende namwa pii kinyi lalyane lao suu pyalapape lao lasaka pirisi? Embame aki yulu pingisi?
JOH 6:31 Namwana rakange kyawa dupwame yuu muiyane dokona nenge kingi myana lenge doko nao kareyami. Dokona suu pyao pii dopa lao pyasi palamo. Borete yake panda rae nena lao maiya leyami.
JOH 6:32 Dokopa Yesumi nakama dopa lamaiya. Kinyi kinyi langilyu, Moseseme borete yake panda rae doko nakama angi ingyuo jiyande daa. Nambana Rakangeme borete angi yake panda rae angi ingyuo joo karenge.
JOH 6:33 Dokona suu pyao Anatunya borete yake panda rae isa panda epeya dokome isa wambu kyakana renge doko joo karamo leya.
JOH 6:34 Nakamame baa lamaiyuo, Kamongo, embame borete doko yuu peparae joo karape leyami.
JOH 6:35 Yesumi nakama dopa lamaiya. Borete letena renge palenge doko namba karo. Mende namba karo dokona eparamo dokopa dee lopa nara. Mende namba kapa ingingi lao suu pyara dokome dee ipwa nano pii naramo karara.
JOH 6:36 Nakamame namba lengeme kandapala kando kaeyo kinyi lalyane lao suu pyaa nalyaminyi langyalono kandapi.
JOH 6:37 Rakaneme wambu namba jeramo dupwa peparae namba kararo dokona eparami. Dokopa mende namba kararo dokona epara ramo doko nambame ramanyi nemba naro.
JOH 6:38 Dokona lao namba yake panda karapala isa epo dokopa range suu piyunuli pyuo pila epeyonde daa. Namba mapanyi peeyamo dokome laramuli pyuo pyuo karala epeyo.
JOH 6:39 Namba mapanyi peeyamo dokome baame namba jeramo dupwana mende pyakuiyaka naramopa yuu gii otaramo dokopa minyalyuo nyere lao manjo karamo.
JOH 6:40 Dokona lao nambana Rakange dokome wambumi Ikinyingi doko kandapala baa kapa ingingi lao suu pyapala mona mairami dupwa peparae keta letena renge kulisa palu palenge doko palira lao suu pyao manjo karamo. Yuu gii otaramo dokopa nambame nakama minyalyuo nyero, dokoŋo leya.
JOH 6:41 Baame, Namba borete yake panda rae lupyuo epeyo leyamo dokona Juu akali dupwame baa kando mumu leyami.
JOH 6:42 Baa Josepena ikinyingi Yesu lenge banya rakange endangipa dolapo namwame kando soo gisingi doko daande lyasilisi? Dokona epapu apa pisala namba yake panda karo lupyuo epeyo letase? leyami.
JOH 6:43 Yesumi nakama isingi lamaiya. Nakama mumu laa nalapa.
JOH 6:44 Rakange namba mapanyi peeyamo dokome kiyango pii nara ramo doko wambu mende namba karo dokona epanya saka nara. Epara ramo doko yuu gii otaramo dokopa nambame baa minyalyuo nyero.
JOH 6:45 Anatunya poropeta akali dupwame pepana pii mende pyao reteyami. Doko wambu peparae Anatunya mana nyerami ingilyamo, lao palamo. Rakange dokome mana lamailyamosa singi wambu dupwa peparae namba karo dokona epenge.
JOH 6:46 Wambu lapome Anatu kandenge dokonasa lao kara nalyo. Anatu mapanyi peeyamo doko iki baa kandenge.
JOH 6:47 Kinyi kinyi langilyu, wambu namba kapa ingingi lao soo karenge dupwa keta letena range palu palenge.
JOH 6:48 Namba lete palenge dokona nenge angi doko karapunu pilyamo.
JOH 6:49 Nakamana rakange kyawa dupwame yuu muiyane dokona nenge myana lenge doko nao karo pao kumuyami.
JOH 6:50 Borete dake yake panda rae epelyamo doko akali mendeme naramo dokome kuma nara.
JOH 6:51 Namba borete letena renge palenge yake panda rae karo. Wambu mendeme borete dake nara ramo doko baa karalu karara. Nambame isa wambu dupwa lete karalu karamili lao suu pyapala nenge borete makande pyuo nambana yongo mairu leya.
JOH 6:52 Dokopa Juu wambu dupwame nakama lao apiyanda pyuo karo, Akali dake apa pyuo banya yongo doko nalapape lao jerase? leyami.
JOH 6:53 Dokopa Yesumi nakama dopa lamaiya. Kinyi kinyi langilyu, Ikinyingi Akali dokona yongo dokope ranjama dokope naa narami ramo doko nakama keta letena renge pali nara.
JOH 6:54 Wambu nambana yongo dokope ranjama dokope nelyaminyi dupwa keta letena renge palu palenge. Yuu gii otaramo dokopa nambame baa minyalyuo nyero.
JOH 6:55 Dokona lao nambana yongo dokope nambana ranjama dokope nenge kulisa ingyuo pelyamo.
JOH 6:56 Wambu mendeme nambana yongo dokope nambana ranjama dokope narami ramo dupwa nambana arapu dokona kararaminyipa nambame nakama keta maralyuo kararo.
JOH 6:57 Lete karenge Rakange dokome namba mapanyi peeyapala dokome lete karo. Dopako pyuo wambu namba narami dupwa namba keta lete kararami leya.
JOH 6:58 Borete dake yake panda rae epeya doko. Rakange kyawa dupwame napala kumuyami dopale daa. Wambu mendeme borete dake narami dupwa lete karalu kararami leya.
JOH 6:59 Baa Kapaneame dokona mana lao karo dokopa sinakoke anda dokona karo leya.
JOH 6:60 Banya disaepole wambu kareyami dupwana malumi pii doko sepala, Pii doko kapa ingya nalyamo. Apimi kapa soo pisirase? leyami.
JOH 6:61 Dopa leyaminyipape Yesumi disaepole dupwame pii dokona mumu lalyaminyi lao monarena soo manjipala nakama dopa lamaiya. Pii doko awa nalyamipi?
JOH 6:62 Doko Ikinyingi Akali wamba kareyamo panda dokona dee pulyuo paramo doko kandarami ramo doko apa lao suu pyaramipi?
JOH 6:63 Wambumi imambu paliramopa lete karenge. Yanenge yeelyo dokona renge mende pali nalyamo. Pii langyalono dupwa imambunya pii ingilyamo dokome soo nyepala lete parami.
JOH 6:64 Nakama karaminyi dupwana lapo kinyi lalenelyamo lao suu pyaa nao karaminyi leya. Wambu angi suu pyaa nao kareyami dupwape baa matarena isakalya pira ingiyamo akali dokope wamba kanda soo dokopa soo kaeyo kareyamo dokome leya.
JOH 6:65 Lapala baame dopa leya. Renge dokona lao Rakange dokome kapa laa nara ramo doko mende namba karo dokona epanya saka nara lalono leya.
JOH 6:66 Dopa leyamopa enakana banya disaepole kareyami dupwana malu nyokonyuo kaepala dee kamba baa role pyao papa nayami.
JOH 6:67 Yesumi akali akalisa ipisu lama kareyami dupwa lamaiyuo, Nakama opetae nyokonyuo kaepala paramisi? leya.
JOH 6:68 Saimone Pitame baa isingi lamaiya. Kamongo, api karara dokona paramase? Embame letena renge kulisa palu palenge dokona pii lao karapinyipa,
JOH 6:69 namwame emba kapa ingingi lao suu pyapala emba Anatunya Poo Pyasi dokolyamo lao soo nyepala karamano leya.
JOH 6:70 Yesumi nakama isingi lamaiya. Nakama akali akalisa ipisu lama karaminyi dupwa nambame yapalyuo nyiyunu dokona mende imambu koo daande lyasilisi? leya.
JOH 6:71 Jutasa, Saimone Isakeriote ikinyingi dokome baa matarena isakalya pira ingiyamo dokonasa leya.
JOH 7:1 Enakana Yesu yuu Galili dokona papyuo kareya. Jutia wambu dupwame baa pyao kumakalana pyuo kareyami dokona baa yuu Jutia dokona papyuo kara naro lao suu piya.
JOH 7:2 Juu wambu dupwame komaume kauwa anda pipala palyuo nenge nenge gii doko pyaka selana piya.
JOH 7:3 Dokopa banya yangonge dupwame baa lamaiyuo, Embena disaepole dupwame embena yulu pyuo karene dupwa kapa kandarami lao dae yaki nyepala Jutia dokona pupi.
JOH 7:4 Dokona lao akali mendeme banya kingi londena lao suu pyara ramo doko baa yalu pyuo pyuo kara nara. Yulu dupwa pyuo karare ramo isa wambu dupwame kandena lao pyuo neta pyape leyami.
JOH 7:5 Banya yangonge dupwame opetaeko baa kapa ingingi lao suu pyaa nayami.
JOH 7:6 Yesumi nakama lamaiyuo, Nakamana yuu gii malu sipyamopa nambana yuu gii doko pyaka sepa nalyamo.
JOH 7:7 Isa wambu dupwame nakama kando awa naa narami. Nambame isa wambu dupwame yulu koo pyuo karenge lao karo dokona namba awa nao karaminyi.
JOH 7:8 Nakama range nenge narami dokona pupwape. Nambana yuu gii pyaka sepa nalyamo dokona nenge narami dokona namba epapu paa naro leya.
JOH 7:9 Lapala yuu Galili dokona mee kareya.
JOH 7:10 Mee karapala banya yangonge dupwa nenge narami dokona lalyuo papeyaminyipa baa opetae kata mendena kolalyuo peya.
JOH 7:11 Nenge nao kareyami dokona Juu wambu dupwame baa anja karamo lao koto kareyami.
JOH 7:12 Dokopa mee wambu dupwame baasa kando mumu mamu lao lapome, Baa akali keyange, leyaminyipa lapome, Daa baame mee wambu dupwa suu longo nyuo karamo, leyami.
JOH 7:13 Leyaminyipa Juu wambu dupwa kando pakapala pii pyakamo laa nayami.
JOH 7:14 Nenge nao suku suku paleyami dokopa Yesu tembole anda dokona lalyuo pao mana lao kareya.
JOH 7:15 Juu wambu dupwame dopa pyuo kareyamo kando ayaka lao dopa leyami. Akali dake sukuli laa nange dokona apa pyuo soo gisilyase? leyami.
JOH 7:16 Dokopa Yesumi nakama isingi lamaiyuo dopa leya. Namba mana lao karo pii doko nambana daa. Doko namba mapanyi peeyamo dokona.
JOH 7:17 Akali mende baa laramuli pyuo pyuo karapuli lao suu pyara ramo doko mana pii doko Anatunya panda nambame iki sisu lao letepe lao soo gisara.
JOH 7:18 Mendeme sisu lao pii lara ramo doko baa range lakandamili lao suu pyao larasa pira. Dopa piramopape akali mendeme mapanyi peeyamo akali doko kando lakandamili lao suu pyao karara ramo doko akali angingyuo kararamopa baa keta panga singi yulu doko pali narasa pira.
JOH 7:19 Moseseme Mawa Pii doko nakama jii nayase? Jiyamopape nakama karaminyi dupwana mendeme Mawa Pii doko minya nange. Akipamo nakamame namba pyao kumakalana lao suu pyao karamisi? leya.
JOH 7:20 Wambu dupwame isingi lamaiyuo, Emba keta imambu koo mende palamo. Apimi emba pyao kumakalana lao suu pyao karamisi?
JOH 7:21 Yesumi nakama isingi dopa lamaiya. Nambame yulu mendaki pipunusa mona nembo karaminyi.
JOH 7:22 Moseseme yanenge awali lao pyakepanyi nembenge yulu doko jiya kande. (Doko Mosese baame angi jii nayamopa rakange kyawa dupwame jiyami.) Jiyaminyipa nakamame koro petenge dokopa wanena yanenge awali lao pyakepanyi nembenge.
JOH 7:23 Koro petenge gii dokopa Mosesena Mawa Pii doko kokwa see nao akalinya yanenge doko awali lao pyakepanyi nembarami ramo doko nambame koro petenge dokopa akali mendena yanenge peparae elya pipu doko kando akipamo namba keta imbuo karamisi?
JOH 7:24 Yanengena ketae yulu doko kando yapalya yapana pyuo suu pyao kara napala renge angi rolae yapo nyuo suu pyao karalapape leya.
JOH 7:25 Dopa lao kareyamo dokopa Jerusaleme range wambu lapome dopa leyami. Akali pyalana lao lomo karaminyi baa doko daase?
JOH 7:26 Dopa pilyaminyi doko baa dae pii lao panembena karapyamopa nakamame baasa kando pii mende laa nalyaminyi. Akali mupwa dupwame baa Koraisa angingyuo karamo lao soo gisapala kaelyamipi?
JOH 7:27 Dopa pipyamopape akali dake anja karo epeya lao soo gisilyamanopape Koraisa angi doko panaramo dokopa wambu mendeme baa anja karo epara lao see narama leyami.
JOH 7:28 Dopa leyami dokopa Yesu tembole anda dokona mana lao karo dokopa pii ketae palyuo dopa leya. Nakamame namba kando anja karo epee lao soo gisilyamisi? Dopa pyaaminyiko doŋo nambame sisu lao epeyonde daa. Namba mapanyi peeyapala angingyuo karamo doko nakamame kando see nalyaminyi.
JOH 7:29 Baame namba mapanyi peeyamo dokona karo epeyo dokome nambame baa kandenge leya.
JOH 7:30 Dokopa nakamame baa puu maiyalana suu pyao lao kareyaminyipa banya yuu gii doko ene pyaka sepa nayamo dokome wambu mendeme baa minyara nayami.
JOH 7:31 Minyara nayaminyipa wambu malu meeme baa angiŋi lao suu piyami. Akali dake yulu andake malu lasaka pyuo karamo doko Koraisa eparamo dokopa yulu kamame wakasa lasaka pyuo kararase? leyami.
JOH 7:32 Wambu malu mee pii dopale yalu pyuo lao kareyaminyi doko sepala Parisi akali dupwame purisi akali mupwape nakamana yanda singi lapo Yesu puu maipala nyela pena leyami.
JOH 7:33 Dokopa Yesu dopa leya. Yuu mendasipa iki dee nakama pipya kararama. Karapala namba mapanyi peeyamo karamo dokona paro.
JOH 7:34 Nakamame namba koto karapala kando nyii narami. Namba kararo dokona nakama epana saka narami leya.
JOH 7:35 Juu wambu dupwa yango sukusa dopa leyami. Namwame baa kando nyii narami lao anja paro lao suu pyao letase? Yuu kipwa kipwa Giriki wambu karenge dupwana Juu wambu lapo bolombalo lao papala karaminyi dupwana pao Giriki wambu dupwa mana lamairu lao panya karape?
JOH 7:36 Baame, Namba kotapala kando nyii narami lapala kararo dokona epana saka narami, lalamoko kandapi doko aki rengendena lalape? leyami.
JOH 7:37 Nenge nao kareyami yuu dusipana lumwa pingi yuu gii wakasa dokopa Yesu sipurapala pii ketae palyuo dopa leya. Wambu mendeme ipwa nano pyuo karara ramo doko namba karo dokona ipupwape.
JOH 7:38 Mendeme namba kapa ingingi lao suu pyaramo doko pii pyasi palengenyili pyuo banya monarena kyakana renge palenge ipwa guu lao pyasumakao karara leya.
JOH 7:39 Dopa lao wambu baa kapa ingingi lao suu pyao kareyami dupwame Imambu ene nyerami dokonako palyuo kongwalu pii leya. Anatumi Yesu ene yanga paupau lanyi pyambwapa nayamosa Imambu doko maipa naya.
JOH 7:40 Pii leyamo doko sepala wambu lapome, Akali dake Anatunya pii nolako lenge akali angi ingilyamo leyami.
JOH 7:41 Lapome, Dake Koraisalamo leyami. Leyaminyipa lapome, Koraisa baa yuu Galili rae epara ingilyase?
JOH 7:42 Koraisa Dapitinya para pyasi ingyuo yuu Beteleme taone Dapiti paleya dokona rae epara ingilyamo lao pii pyasi dokona pali nalyase? leyami.
JOH 7:43 Mee wambu dupwa dopa lao baa kando wakale wakale suu pyao kareyami.
JOH 7:44 Lapome baa puu maimwali yaka lao suu pyao kareyaminyipa mendeme baa minyara nayami.
JOH 7:45 Yanda singi dupwa purisi mupwa Parisi dupwape kareyami dokona laeyo epeyaminyipa nakamame, Akipamo baa lanyuo epa nalamisi? lamaiyami.
JOH 7:46 Yanda singi dupwame isingi lao, Baa letamo akali mendeme dopakale ingyuo laa nange leyami.
JOH 7:47 Parisi akali dupwame nakama lamaiyuo, Nakama opetaeko kyambo langalase?
JOH 7:48 Akali angi dupwape Parisi akali dupwape karaminyi dokona mendeme baa kapa ingingi lao suu pyao karamisi?
JOH 7:49 Doko wambu nakama lyingi lyangi kuiyuo karaminyi dupwame Mawa Pii see nao karaminyi dokome nakama keta koo palira ingilyamo leyami.
JOH 7:50 Leyaminyipape nakama dokona akali mende Nikotimasa lenge baa wambo Yesu kandala peya akali dokome sipurapala dopa leya.
JOH 7:51 Namwana Mawa Pii palamo dokona, Namwame akali mende koo pipyalyamo lapala mee langa kote laa nange. Dopa pipyalyamo lao piso soo otapala kote lenge.
JOH 7:52 Nakamame, Emba opetae Galili rangekose? leyami. Pii pyasi dupwa poraiyuo mana nyuo kandarenepa Galili range poropeta mende sipura nara ingilyamo lao kandare leyami.
JOH 8:1 Wambu peparae anda peyaminyi dokopa Yesu yuu Olipi Kyau dokona peya.
JOH 8:2 Wamba yangama dokopa tembole anda dokona dee kamba epeya. Wambu peparae baa kareyamo dokona epeyaminyipa baame isa pisipala mana lamaiya.
JOH 8:3 Dokopa enda mende akali kepo pyuo palipyamopa kando nyiyami doko Mawa Pii mana lengepe Parisi dupwapeme baa nyepala lanyuo epeyami. Lanyuo epo wambu peteyami dokona enda doko sukusa roya kareyami.
JOH 8:4 Dopa pipala Yesu dopa lamaiyami. Mana Lenge, enda dake akali kepo pyuo palipyamopa kando nyelaminyi lyakande.
JOH 8:5 Moseseme Mawa Pii pyao reto, Dopale pingi dupwa kaname pyao kumakalapape leya kande. Embame baasa kando apa lare? leyami.
JOH 8:6 Yesu koo mende larape lao kote lamwali yaka lao suu pyapala baa apa letape lao selana makande pyuo leyami. Dokopa Yesu pongwa napala kingi kyawa dokome yuu dokona kiki pyuo peteya.
JOH 8:7 Dokopa nakamame baa piso soo lao sulu siyami dokopa baame roya karapala nakama lamaiyuo, Nakama karaminyi dokona mende koo pali naya kande doko wambo sipurapala enda baa kaname pyalase leya.
JOH 8:8 Lapala dee kamba pongwa napala yuu dokona kingi kyawa dokome deeyako kiki pyuo peteya.
JOH 8:9 Dokopa pii leyamo doko sepala nakama mendaki mendaki lao andapae dupwa wambo peyaminyipa pao karo ote leyami. Dopa piyaminyi dokopa Yesu enda dokopa yeelyo kareyambi.
JOH 8:10 Yesu baame kandalyuo kandapala, Enda, wambu lao karalaminyi kandapi dupwa anjukunya kata pamipi? Nakama mendeme emba kote laa naramipi? leya.
JOH 8:11 Baa, Kamongo lapala, Mendeme laa naramilyamo leya. Dokopa Yesumi lao, Namba opetaeme emba koo pingiŋi laronde daa. Papala deeko kamba koo pyuo pisa napipi leya.
JOH 8:12 Yesumi nakama dee mende lamaiyuo dopa leya. Namba isa yuunya yanga paupau lenge renge karoŋo. Mendeme namba paronuli pyuo eparamo doko baa iminjinginya moko palyuo papi napala baa keta letena yanga paupau lenge renge doko palira leya.
JOH 8:13 Dokopa Parisi dupwame baa lamaiyuo, Emba rangeme namba dopa pyuondeŋe leene pii doko kinyi daa, leyami.
JOH 8:14 Yesumi isingi dopa leya. Namba rangena yulu suu pyao lapunupape nambana pii kinyi ingyuo pelyamo. Namba anja karo epeyo lao anja paro lao soo gisapala lao karo. Soo gisapunupape nakamame namba anja karo epee lao anja pare lao soo walengena palya nalyaminyi.
JOH 8:15 Nakamame yanengena ketae kando koo epengepe yapalya yapana pyuo lenge. Namba wambu koo epengepe yapalya yapana pyuo lao kara nalyo.
JOH 8:16 Lao kara nalyoŋo doko namba koo epengepe yapalya yapana pyuo lao kararo ramo doko namba iki laa nao karo namba mapanyi peeyamo dokopa laramba dokome rolae laro.
JOH 8:17 Nakamana Lowa dokona akali lamame mendakinya palyuo lao kararambi ramo doko pii kinyilyamo lao suu pyarami lao pyasi palamo kande.
JOH 8:18 Namba rangeme dopa pyuondeŋe lao karonopa Rakange dokome namba dopa pyuondeŋe lao karengeko leya.
JOH 8:19 Dopa leyamo dokopa nakamame baa lamaiyuo, Embena rakane anja karamo? leyami. Yesumi isingi lao, Namba kando soo rola naminyi doko suu pyao Rakange baa soo rola nalyaminyiko. Namba soo rolamili doko nambana Rakange baa opetae simili, leya.
JOH 8:20 Baame tembole anda dokona mana lamaiyuo karo dokopa kana mone retapa pingi anda dokona karo pii dasipa lao kareya. Lao kareyamopape banya yuu gii ene pyaka sepa nayasa mendeme baa puu mai nayami.
JOH 8:21 Yesumi dee pii mende lamaiyuo, Namba mendasa paronopa nakamame namba koto karo nakamana koo dupwa paleta kumarami. Namba parono dokona kapa epa narami leya.
JOH 8:22 Dokopa Juu wambu dupwame lao, Baa paro dokona kapa epa narama letamo doko rangeme pyapala kumuo parape? leyami.
JOH 8:23 Baame nakama dopa lamaiya. Nakama isa panda rae, namba ketae panda rae, nakama isa yuu dakena range, namba isa yuu dakena rangende daa.
JOH 8:24 Nakamame namba Baaŋa lao suu pyaa narami ramo doko yulu koo pyuo karaminyi dopako pyuo karo kumarami ingilyamo. Dokona lao nakama koo paleta kumarami langyalono kandapi leya.
JOH 8:25 Nakamame baa lamaiyuo, Emba apisi? leyami. Yesumi nakama lamaiya. Wamba kanda soo piso langyuo kareyo kande dokoko.
JOH 8:26 Nakamasa lao koo koo lao pii malu laro ingilyamo. Ingyapyamopape namba mapanyi peeyamo doko kinyi angi lao karapyamopa baame namba pii langiyamo siyunuli pyuo isa wambu dupwa polo langyuo karo leya.
JOH 8:27 Baame Rakangesa lalyamo lao soo gisa nayami.
JOH 8:28 Dokopa Yesu dopa leya. Ikinyingi Akali minyalyuo nyerami dokopa namba Baaŋa lao soo manji nyerami. Namba range sisu lao mende pii nao Rakange dokome mana langiyamuli pyuo lao karee lao soo gisarami.
JOH 8:29 Namba mapanyi peeyamo doko nambapa karambano. Yuu peparae nambame baa rae mairali yulu dupwa pingi dokome namba yaki nyii nao karamo leya.
JOH 8:30 Dopa lao kareyamo dokopa wambu malumi baa kapa ingingi lao suu pyapala mona maiyami.
JOH 8:31 Dokopa Yesumi Juu wambu baa kapa ingingi lao suu pyao kareyami dupwa dopa lamaiya. Nakamame nambana pii kare kare soo soo kararami ramo doko nambana disaepole angingyuo kararamisa pira.
JOH 8:32 Dokopa pii angi kinyi doko soo gisaraminyisa pii kinyi dokome nakama kiiramo neta nyera leya.
JOH 8:33 Nakamame baa lamaiyuo, Namwa Aporakamena para pyasi ingyuo karamano. Yuu wamba akali mendeme puu maiyamopa kara nayama. Kiiramo neta nyera lalene kandapi doko apa piyandena lalese? leyami.
JOH 8:34 Yesumi isingi dopa lamaiya. Kinyi kinyi langilyu, wambu yulu koo pyuo karenge dupwa peparae koona kendemande ingyuo karaminyi.
JOH 8:35 Kendemande akali mendeme mende nyiso karara ramo doko banya ree palu ingyuo puu pao paa nara. Ikinyingi dokome angingyuo karalu karara.
JOH 8:36 Dokona Ikinyingi dokome nakama kiiramo nyera ramo doko nakama kinyi kinyi moko nyisi kararami.
JOH 8:37 Nakama Aporakamena para pyasi ingyuo karaminyi doko silyu. Silyuko doŋo nambana pii doko soo nyii nalyaminyi dokona nakamame namba apa pyuo pyamane lao karaminyi.
JOH 8:38 Nambana Rakangena lenge kambu dokona kandeyonuli pyuo lao karo, nakamame nakamana rakange langilyamo nyili pyuo pyuo karenge leya.
JOH 8:39 Dokopa nakamame baa lamaiyuo, Aporakame baa namwana rakange kandale leyami. Yesumi nakama dopa lamaiya. Nakama Aporakamena wane pili doko baa pyuo kareyamo doko suu pyao pyuo karamili.
JOH 8:40 Dokonako ingyuo Anatumi pii kinyi langiyamo doko nakama langipunupa nakamame namba apa pisala pyapamape lao karaminyi. Yulu dopale Aporakame pii naya kande.
JOH 8:41 Nakamana rakange pyuo kareyamuli pyuo nakamame pyuo karaminyi leya. Nakamame baa lamaiyuo, Namwa Anatu kaeyapala kura ipwa likya likya ingyuo kara nalyamano. Namwana Rakange mendaki angi doko Anatuko karenge leyami.
JOH 8:42 Yesumi nakama lamaiyuo, Anatu nakamana Rakange ingyapyali dokome namba mona retamili. Dokona lao Anatunya arokwa dokona karo epeyo. Namba rangeme sisu lao epeyonde daa. Baame namba mapanyi peeyamosa epeyo.
JOH 8:43 Namba lao karo doko akipamo soo gisa nalyamisi? Nakamame nambana pii doko selana epe nasingi dokona soo manja nalyaminyi.
JOH 8:44 Nakamana Rakange Satane dokona rango doko napala pyuo karamwali lao karaminyi. Baame ene busiyamo dokona piso epo wambu pyao kumakao kareyamoko karenge. Baa keta pii kinyi doko pali nalyamosa baame pii kinyi dokona mende suu pyao lara ingya nange. Baa renge kuiyuo kyambo lenge dokome kyambo lengena rakange kyawa ingyuo karamo.
JOH 8:45 Dopa pipyamopape nambame nakama pii kinyi langilyu dokona pii kinyilyamo lao suu pyaa nalyaminyi.
JOH 8:46 Nakama karaminyi dokona api mendeme namba kando koo piinyi kandeyo lao kapa neta pyaramisi? Namba pii kinyi laro ramo doko akipamo nambana pii kinyilyamo lao suu pyaa nalyamisi?
JOH 8:47 Anatunya ingyuo karaminyi dupwame Anatunya pii dupwa soo karenge. Nakama Anatunya ingyuo kara nalyaminyi dokona namba soo kara nalyaminyi leya.
JOH 8:48 Juu akali dupwame baa lamaiyuo, Emba Samaria akali ingyuo imambu koo mendeme maralyipyamo karene lalamano doko kapa laa nalyamase? leyami.
JOH 8:49 Yesumi isingi lao dopa leya. Namba imambu koo maralyapyamo karonde daa. Nambame Rakanena kingi ketae nembo karo. Nakamame nambana kingi isa nembelyaminyi.
JOH 8:50 Dopa pilyaminyiko doŋo namba range ketae ululi karapuli lao suu pyao kara nalyo. Mendeme namba ululi karapili lao suu pyao karamo dokome lao rolara.
JOH 8:51 Kinyi kinyi langilyu, mendeme nambana pii lengenyili pyuo pyuo kararami ramo doko kumungi renge doko kanda nara.
JOH 8:52 Juu wambu dupwame baa lamaiyuo, Epapu emba imambu koo maralyapyamo karene doko soo kaelyamano. Aporakame kumuya. Anatunya poropeta akali dupwa kumuyamiko doŋo embame lao dokopa mendeme nambana pii lengenyili pyuo pyuo karara ramo doko kumungi renge doko nakanju see nara lalene kandapi.
JOH 8:53 Namwana rakange Aporakame kumuya dokona suu pyao emba mupwa kamame wakasandelyamo. Anatunya akali dupwako kumuyami kande. Emba range apiyakalende suu pyapala lao karese? leyami.
JOH 8:54 Yesumi isingi lao dopa leya. Namba range lao ketae pyambwapuli nambana pii doko kulisa ingya napyali. Nambana Rakange nakamame Anatu lenge dokomeko namba ketae pyambuo karamo.
JOH 8:55 Nakamame baa soo nyepa nange. Nambame baa soo nyingi. Nambame baa soo nyepa nange lapuli doko nakama kyambo lao karenge dokonako mendeke ingyuo karapuli. Dopa pipyamopape nambame baa angi soo nyepala banya pii lengenyili pyuo pyuo lao karenge.
JOH 8:56 Nakamana rakange Aporakame dokome namba yuu gii eparo doko kandaro lao sepala monanda pyakalyuo pyao kareya. Enakana angi kandapala mona paleyamopa kareya leya.
JOH 8:57 Dokopa Juu akali dupwame baa dopa lamaiyami. Emba ee kana akalisa pao akalisa kingi paki ene karapa nalene kande doko embame Aporakame kandengese? leyami.
JOH 8:58 Yesumi nakama lamaiyuo, Kinyi kinyi langilyu, Aporakame ene karapa nayamopa namba kareyono doko erotonge mee karalu karenge.
JOH 8:59 Dopa leyamo dokopa nakamame baa kaname pyamanale lao lapo nyiyaminyipa Yesu yalu pipala tembole anda dokona potemo peya.
JOH 9:1 Baa katasa paole pyuo karo dokopa akali mende lenge kwaesi manjinyi peeyami doko kandeya.
JOH 9:2 Dokopa banya disaepole dupwame baa piso soo, Rapu Pingi, akali doko baa rangeme koo piyasa panda endangi rakangepame mende koo piyambisa baa lenge kwaesi manjo nyiyamisi? leyami.
JOH 9:3 Yesumi isingi lao Akali dokome koo mende pyuope endangi rakangepame koo mende piyambisa baa lenge kwaesi manjo nyiyaminde daa. Anatunya yulu andake baa keta maro lara ingiyasa lenge kwaesi manjo nyiyami.
JOH 9:4 Yuu yango karamo dakepa namba mapanyi peeyamo dokona yulu doko pyuo kararama ingilyamo. Iminjaramo dokopa mendeme yulu kapa kando pii nange yuu gii doko oo epopyamo.
JOH 9:5 Namba isa yuu dakena kararono yuu gii dusipa isa wambu dupwana lao yanga paupau lakamyuo kararo leya.
JOH 9:6 Pii dopa lapala baa yuunya kepakali kyaso retapala awai kukuli lasi rukuraka pyuo pyakerena lao piya. Pipala awai dokome akali dokona lenge doko kisakamiya.
JOH 9:7 Kisakamipala baa lamaiyuo, Ipwa pete Silome lenge dokona poeyanyi nembala puu, leya. (Silome doko namwana pii Mapanyi Peenge dopale.) Pao ipwa poeyanyi nembapala kapu kyuo kata kapa kando epeya.
JOH 9:8 Dokopa anda maki palyuo penge wambu dupwame baa wamba bange jinya jinya lao peteyamo kandeyami dupwapeme lao, Akali wamba bange jinya jinya lao pisipya kandapi doko daase? leyami.
JOH 9:9 Lapome, Doko baalamo leyami. Lapome, Daako doŋo mee banya lenge kambu nyilyamo leyami. Baame, Namba lyakande, leya.
JOH 9:10 Nakamame baa lamaiyuo, Apa pipala lenge rapi? leyami.
JOH 9:11 Baame isingi lao, Akali Yesu lenge dokome awai pyakerena lapala nambana lenge doko kisakapala namba ipwa Silome dokona poeyanyi nembapala puu langipyasa namba pao poeyanyi nembapala lenge mee ingyapyamo kandapu leya.
JOH 9:12 Nakamame baa lamaiyuo, Baa anja karamo? leyami. Baame, Namba soo gisa nalyo, leya.
JOH 9:13 Akali wamba lenge kwaeyamo kareya doko Parisi akali dupwa kareyami dokona lanyuo epeyami.
JOH 9:14 Yesumi awai pyakerena lapala akali banya lenge doko yuu gii koro petenge dokopa pyuo elya pyakamiyapya.
JOH 9:15 Parisi dupwame, Apa pisala embena lenge rapi? lao baa dee kamba piso siyami. Dokopa baame nakama lamaiyuo, Baame nambana lenge dokona awai kisakapyamopa ipwa poeyanyi nembapala kapa kando karo, leya.
JOH 9:16 Parisi lapome, Akali dokome koro petenge mawa pii yalo pelyamo dokona Anatumi baa rombo palyiyande daalamo, leyami. Dopa leyaminyipa lapome, Akali koo pyuo karenge dokome apa pyuo yulu andake dopale lasaka pyuo kararase? leyami. Dopa lao nakama apiyanda piyami.
JOH 9:17 Dokopa nakamame akali lenge kwaeyamo doko kambako piso siyami. Emba baame lenge elya pyakapyamo doko baasa kando embame apa lao suu pilisi? leyami. Baa Anatunya poropeta akali, leya.
JOH 9:18 Akali doko wamba lenge kwaeyamopa kapa kandeya doko Juu wambu dupwame kinyi dopa pipyalyamo lao suu pyaa nayami. Suu pyaa napala akali lenge elya pyakamiya dokona endangi rakangepa dolapo epena lapala
JOH 9:19 piso soo, Nakambana ikinyingi lenge kwaesi manjo nyiyamba letambinyi doko dakese? Epapu baa apa pipala kapa kandelyase? lao piso siyami.
JOH 9:20 Banya endangi rakangepame isingi lamaiyuo, Akali dake nambwana ikinyingi lenge kwaesi manjo nyiyamba doko soo karambano.
JOH 9:21 Soo karambwanopape epapu apa pipala baa kandelyamo lao apimi banya lenge elya pyakamipyape lao nambwa see nalyambanoko. Baa piso selapape. Baa andapae dokome rangeme lara, leyambi.
JOH 9:22 Banya endangi rakangepame Juu wambu dupwa pakapala dopa leyambi. Juu wambu dupwame wambo mendakinya palyuo, Mendeme Yesu baa Koraisa, lara ramo doko baa sinakoke anda epa nana lao ralinyi nembarama leyami.
JOH 9:23 Leyamisa endangi rakangepame dokona pakapala lao, Baa andapae karamo dokona range piso selapape leyambi.
JOH 9:24 Dokopa dee kamba akali doko epena lapala baa lamaiyuo, Anatunya kingi lao pii rolae laroŋo lao kingi ketae nembo rolo lape. Akali doko yulu koo pingi doko silyamano leyami.
JOH 9:25 Dokopa baame lamaiyuo, Baa yulu koo pingipi mee lao see nalyo. Namba mendaki iki soo karo doko, nambana lenge kwaelyamopa karenge doko epapu kapa karo leya.
JOH 9:26 Nakamame baa lamaiyuo, Baame emba apa pyakapyase? Apa pisala embena lenge doko elya pyakapyase? leyami.
JOH 9:27 Baame nakama isingi dopa lamaiya. Wamba langyuo kaeyalono kandapi doko nakama nambana pii soo nyakayami. Akipamo nakamame dee kamba semana letamisi? Nakama opetae banya disaepole ingyuo karamwali lao suu pilyamisi? leya.
JOH 9:28 Dokopa nakamame baa kilya kandalya kandana pyuo lamaiyuo, Emba banya disaepole, namwa Mosesena disaepole ingyuo karamano.
JOH 9:29 Anatumi Mosese pii lamaiya doko soo gisilyamano. Soo gisamwanopape akali dae lao karamo doko anja karo epeya lao see nalyamano leyami.
JOH 9:30 Akali dokome dopa lao isingi lamaiya. Pii nangende pyaka selamolyamo. Baa dokome dopa lao isingi lamaiya. Pii nangende pyaka selamolyamo. Baa anja karo epeya lao see namiko doŋo baame nambana lenge elya pyakapya.
JOH 9:31 Anatumi yulu koo pingi wambu dupwana pii sakami nange. Sakami nalyamopape wambu mendeme Anatu ketae pyambuo yako lao karo baa letamuli pyuo pyuo karara ramo doko Anatumi dokonako pii sakamyuo karenge doko silyamano.
JOH 9:32 Isa yuu doko kanda soo ingiyamo dokopa piso epo wambu mendeme akali lenge kwaesi manjo nyiyaminyi mendena lenge elya pyakamiyami leyaminyi see nange.
JOH 9:33 Akali doko Anatumi rombo palyiyamopa epa nayali doko baame mende kapa pii napyali leya.
JOH 9:34 Nakamame baa kando lao, Koo andake pipala emba manjo nyiyami doko embame namwa mana langirisi? leyami. Lapala baa neta nembeyami.
JOH 9:35 Baa ramanyi nembeyaminyi doko Yesumi sepala koto kando nyepala baa lamaiyuo, Embame Ikinyingi Akali kapa ingingi lao suu pyao karepe? leya.
JOH 9:36 Dokopa baa isingi lao, Rapu Pingi baa apisi lao rolo langyarene dokopa nambame baa kapa ingingi lao suu pyao kararo, leya.
JOH 9:37 Yesumi baa lamaiyuo, Embame baa kando karapinyi emba pii langyuo karamo doko leya.
JOH 9:38 Baame isingi lao, Kamongo, nambame kapa ingingi lao suu pyao karo, lapala baame Yesu mupwa lao pongwa naro peteya.
JOH 9:39 Dokopa Yesumi dopa leya. Isa yuu dakena kote lao rolala epeyo dokome wambu lenge raa nao kareyami dupwame kando soo kararaminyipa lenge rao kareyami dupwa lenge kwaeramo parami leya.
JOH 9:40 Parisi lapo baa kareyamo dokona repeta kareyami dusipame baa lamaiyuo, Namwa opetae lenge koonde karamase? leyami.
JOH 9:41 Yesumi nakama lamaiyuo, Nakama lenge kwao karo kata rolae kanda namili doko pii mende pali napyali. Nakamame range kando karamano letaminyi dokona yulu rolae kando kaeyo yalo karamisa pilyamo.
JOH 10:1 Yesumi dopa leya. Kinyi kinyi langilyu, mendalimi mena sipisipinya kakopasa kambu rolae dokona epa napala kata wakale mendena yalala epara ramo doko waa nao kendepo nengendeme pirasa pira.
JOH 10:2 Dopa piramopape mendali kata kolando penge dokona epara ramo doko sipisipinya rapu pinginde eparasa pira.
JOH 10:3 Baa epelyamosa kambu rapu pingi akali dokome kambu lumbwakamaingi. Sipisipi dupwame banya pii doko sakamilyaminyipa baame banya rangena sipisipi kingi lao gee lao penge.
JOH 10:4 Banya sipisipi kando gee lapala wambo pelyamopa banya sipisipi dupwa banya pii sepala baa pelyamuli pyuo pao karenge.
JOH 10:5 Nakama akali kanda nange dupwana pii see nange dokome akali kanda nange mende paramuli pyuo paa napala baa yaki nyepala ralo parami leya.
JOH 10:6 Yesumi dopa lao makande pyuo lamaiyamopa renge angi leyamo doko soo gisa nayami.
JOH 10:7 Soo gisa nayami dokona Yesumi dee lamaiyuo, Kinyi kinyi langilyu, namba sipisipinya kakota lumbungi kambu dowa dopale karo.
JOH 10:8 Namba epapa nayonopa wambo epeyami dupwame waa nao kendepo nao dopale epeyamisa piya. Dopa piyaminyipa sipisipi dupwame nakamana pii doko sakami nayami.
JOH 10:9 Namba kambu dowa doko. Mendeme namba keta epara ramo dokopa lete wai pyao papala baa potemo konando pyuo karo dokopa pama nenge nenge doko kando nao karara.
JOH 10:10 Waa nyingi akali dokome mee waa nyuo kokwa soo nembala epenge. Epelyaminyipape nambame nakama keta kyakana renge doko maiyuokondali pyaa epeyo.
JOH 10:11 Namba sipisipi dupwana rapu pingi angingyuo karo. Rapu pingi angi keyange doko sipisipi dupwana lao kumuo maira, kumakamingi.
JOH 10:12 Akali sipisipi range daa mee kanana rae maiyuo rapu pyuo karenge dokome yana suwa kararope andake nalana pingi doko epelyamo kandapala sipisipi dupwa yaki nyepala ralo penge. Dokopa yana suwa kararope andake dokome sipisipi dupwa nao rokwapala bolombalo lanyi nembo pyuo karenge.
JOH 10:13 Akali doko baa kana iki suu pyao pyuo karo sipisipi dupwa suu pyaa nange dokome ralo penge.
JOH 10:14 Namba sipisipi angi keyange rapu pyuo karenge. Rakange dokome namba soo gisilyamopa nambame Rakange doko soo gisingi doko suu pyao nambame nambana range dupwa soo gisilyunupa nambana range dupwame namba soo gisingi. Dopa pilyamo dokopa nambame nambana sipisipi dupwa reke lao kapa kumakamairu ingilyamo.
JOH 10:16 Nambana sipisipi wakale lapo karaminyi dupwa kakopasa dakena kara nalyaminyi. Nakama dupwa opetae lanyuo eparo ingilyamo. Dokopa nambana pii sakarami. Dokopa rapu pingi mendakindeme rapu pyuo kararamopa rara mendaki ingyuo role pyao kararami.
JOH 10:17 Namba kapa kumakamairu dokona nambana Rakange dokome namba mona reto karamo. Letena renge dee kamba nyero lapala kapa kumakamairu.
JOH 10:18 Namba daa laronopa mendeme namba pyao kumakaraminde daa. Namba range maso kumuo mairu renge dokope dee kamba lete paro renge dokope namba range keta palamo. Nambana Rakangeme dopako piri langiyamuli pyuo piro leya.
JOH 10:19 Dopa leyamo dokopa Juu wambu dupwame lamasa lao paka lakyuo pii wakale wakale lao lao kareyami.
JOH 10:20 Lapome, Baa imambu koo mende palipyasa kopyali minyapala lao karamo. Akipamo banya pii sakamairamase? leyami.
JOH 10:21 Lapome, Akali imambu koo palelyasa lao karenge banya pii dopale ingya nalyamo. Imambu koo dokome wambu lenge kwaenge doko kapa elya pyakamaingisi? leyami.
JOH 10:22 Anatu dokona suu pyao Jerusaleme dokona tembole anda elya pingi nenge nenge mange doko pyaka siya. Doko kupwa pingi kana dokopa
JOH 10:23 Yesumi tembole anda kambu kolandowame kingi Solomonena lenge dokona kata peya.
JOH 10:24 Dokopa Juu wambu dupwa baa kareyamo dokona karo awali lapala, Yuu akipare embame apa letepe lao walu lao papa lao kararamopa angi polo langya narese? Emba Koraisa ramo doko angi langipi, leyami.
JOH 10:25 Yesumi nakama isingi dopa lamaiya. Namba langipu doko kinyi lalyane lao suu pyaa nalyaminyi. Nambana Rakanena kingi lao yulu pyuo karenge yulu dupwa kandapala namba dopa pyuondelyamo lao soo gisarami ingyapya.
JOH 10:26 Nakama nambana sipisipi angi ingyuo kara nalyaminyi dokome kinyi lalyane lao suu pyaa nalyaminyi.
JOH 10:27 Nambana sipisipi dupwame nambana pii silyaminyipa nambame nakama kandenge dokome nakama namba moko minyuo epenge.
JOH 10:28 Dokopa nambame nakama letena renge kulisa palu palenge doko mailyunusa nakama kumalu kumuo kuma naraminyipa nambame minyaro kararonopa mendeme kingi raka lao nyii narami ingilyamo.
JOH 10:29 Nambana Rakaneme nakama namba jiyamo doko wakasa ingyuo karamo dokona mendeme banya kingi raka lao nyii narami ingilyamo.
JOH 10:30 Namba Rakanepa mendaki ingyuo karambano leya.
JOH 10:31 Leyamopa Juu wambu dupwame baa pyalana lao kana dee kamba nyiyami.
JOH 10:32 Dokopa Yesumi pii mende dopa lamaiya. Rakaneme renge kuipyamosa yulu keyange malu lasaka pipa pyuo karapu dupwana mende anjukunya lao namba pyalana pilyamipi? leya.
JOH 10:33 Juu wambu dupwame baa isingi lamaiyuo, Yulu keyange dupwana emba kaname pyalana pilyamande daa. Embame Anatunya lenge kambu dokona kokwa soo lao karo emba mee akali kinyi kinyi dokome, Namba Anatu dopakale lao karene dokona emba kaname pyalana pilyamano leyami.
JOH 10:34 Anatumi wambu banya pii soo kareyami dupwa Anatu ingyuo karaminyiŋi leyamo pii doko nakamana Lowa buku dokona pyasi palamo. Baepolena pii mende isa paa nange kande leya Yesumi.
JOH 10:36 Doko suu pyao Rakaneme rombo palyapala isa yuu dakena namba mapanyi peeyamo dokome namba Anatunya Ikinyingi lapunupa nakamana akipamo Anatunya lenge kambu dokona kokwa soo lapinyisa pipya letamisi?
JOH 10:37 Nambana Rakanena yulu dupwa pyuo kara naro ramo doko kinyi lalyane lao suu pyaa nalapape.
JOH 10:38 Dee yulu dupwa angi pyuo kararo ramo doko namba kando angilamo lao suu pyaa nayami kande doko yulu pyuo karo dupwa kando kinyilamo lao suu pyalapape. Dokome Rakane namba keta palipyamopa namba Rakanena dokona karene lao soo gisarami leya.
JOH 10:39 Dokopa dee kamba baa puu mainya lareyami dokopa baa kolala peya.
JOH 10:40 Papala dee ipwa Jotane yalo pao Jone wamba kanda soo wambu bapitisimo nyakamyuo kareya dokona pao kareya.
JOH 10:41 Dokopa wambu malu baa kareyamo dokona epapala, Jone yulu mende andake pyuo lasaka pii nayamopape baa akali dakesa pii leyamo dupwa peparae kinyi ingyuo pelyamo, leyami.
JOH 10:42 Dokopa yuu dokona wambu malumi baa kapa ingingi lao suu pyapala mona maiyami.
JOH 11:1 Akali mende Lasarasa lenge yuu Betani range doko anga piya. Yuu Betani doko Maria kakingi Mata dokopana yuu anda kuki lama malu palyuo karenge.
JOH 11:2 (Maria dokome Kamongo dokona mamba rendamu pingi mende kisakamipala banya kyawasi dokome kimbu pyao nembakamiya enda dokona pemalenge Lasarasa lenge doko anga piya.)
JOH 11:3 Anga piyamo dokona wana kakingipa dolapome wai nembo, Kamongo embame mona retenge doko anga pyapyamo silyamo, lao lamaiyambi.
JOH 11:4 Dokopa lamaiyambinyi pii doko sepala Yesumi dopa leya. Anga dokome kumarande daa. Anga doko mee ingyarasa wambumi Anatu lakandarami ingilyamo. Lakandarami dokopa banya Ikinyingi doko opetae ketae pyambusi kararamosa pira.
JOH 11:5 Yesumi Matamoo banya kakingipi dee Lasarasamoo dusipa mona reteya.
JOH 11:6 Dopa pyuo kareyamopape Lasarasa anga andake pilyamo lao sepala yuu dokona yuu lama mee kareya.
JOH 11:7 Enakana disaepole dupwa lamaiyuo, Yuu Jutia dokona dee kamba paramano leya.
JOH 11:8 Disaepole dupwame baa lamaiyuo, Rapu Pingi, Juu wambu dupwame emba ene alembole kaname pyao kumakalana piyami kande dokona dee kamba yuu dokona panya letese? leyami.
JOH 11:9 Yesumi isingi lamaiyuo, Yuu yangenge dokopa keloke gii akalisa ipisu lama nyero pali nangese? Yuu yango karelyamo dokopa mendali kata para ramo doko yuu dakena yango karenge dokona lukumo see nange.
JOH 11:10 Dopa piramopape mendali kukwamana kata para ramo doko baa keta yango kara nalyamo dokona lukumo singi leya.
JOH 11:11 Dopa lapala nakama pii mende lamaiya. Namwana puu minyingi Lasarasa doko luu palyuo silyamo doko baa lenge rena lao pyaletala pelyo leya.
JOH 11:12 Disaepole dupwame baa lamaiyuo, Kamongo baa luu palira ramo doko mee ingyara leyami.
JOH 11:13 Yesumi Lasarasa kumuya dokona kongwalu palyuo leyamopape nakamame baa luu palamo lalyamo lao suu pyapala leyami.
JOH 11:14 Dokopa Yesumi nakama rolo lamaiyuo, Lasarasa baa kumasi silyamo.
JOH 11:15 Kumasi silyamo doŋo yuu mange dusipa namba baapa role pyao kara napusa nakama yulu andake mende kandarami dokona rae mailyu. Kandapala namba kapa ingingi lao suu pyarami ingilyamo. Baa silyamo dokona mwua, leya.
JOH 11:16 Tomasa kingi mende Reme Paka lenge dokome disaepole yango dupwa lamaiyuo, Namwa opetae baa pale pale kumarama mwua leya.
JOH 11:17 Yesu epapala dokopa Lasarasa yuu kisima malu anda dokona sipyalyamo lao siya.
JOH 11:18 Yuu Betani doko yuu Jerusaleme kata makande pingi kilomita rema ingyuo repeta siya.
JOH 11:19 Dokopa Juu wambu malumi Mata Mariapa peteyambi dokona pemalenge kumuyamo dokona mona minyarambu pisa epeyami.
JOH 11:20 Dokopa Matame Yesu epeyamo doko sepala Maria anda mee peteyamopa baa katasa yako lao nyela peya.
JOH 11:21 Matame Yesu lamaiyuo, Kamongo, emba dae kareeli doko nambana pemalenge doko kuma napyali.
JOH 11:22 Doko epapu dakepa opetaeko embame Anatu mende pyakana lakare ramo doko Anatumi kapa pyakara doko silyu leya.
JOH 11:23 Yesumi baa lamaiyuo, Embena pemalenge dee sipurao epara leya.
JOH 11:24 Matame baa lamaiyuo, Rengya yuu lumwa piramo dokopa wambu sipurao eparami mange dokopa sipurao epara doko silyu, leya.
JOH 11:25 Yesumi baa dopa lamaiya. Sipurao epengepe lete karengepe renge dolapona namba renge kuiyuo karo. Akali mendeme namba kapa ingingi lao suu pyao mona jera ramo doko baa kumapalape mende lete karara.
JOH 11:26 Doko mendeme kumapa nao karo namba kapa ingingi lao suu pyao mona jera ramo doko baa kumalu kumuo kuma nara. Emba doko kinyi lalyane lao suu pyapelepe? leya.
JOH 11:27 Kinyi Kamongo, Koraisa Anatunya Ikinyingi isa yuu dakena epara ingiyamo doko embalyamo lao suu pyapelyo leya.
JOH 11:28 Pii dopa lapala pao kakingi Maria elya kalo kee lao dopa lamaiya. Mana Lenge dae epo karapala emba ipu letamo leya.
JOH 11:29 Dokopa pii doko sepala Maria waiya lao sipurapala Yesu kareyamo dokona peya.
JOH 11:30 Yesu anda lapo malu palyuo kareya dokona epapa napala Matame baa kando nyiya katasa dokona mee kareya.
JOH 11:31 Juu wambu Maria mona minyarambu andakare role pyao peteyami dupwame Maria baa sipurapala kamanda peyamosa kandapala baa malu anda dokona ee lala pwuamo lao sepala baa peyamuli pyuo peyami.
JOH 11:32 Dokopa Maria Yesu kareyamo dokona epapala baa lamaiyuo, Kamongo, emba dae kareeli doko nambana pemalenge kumapa nayali leya.
JOH 11:33 Maria baa ee lao mee wambu role pyao epeyami dupwa eeko leyamisa Yesumi kaepala banya monarena lulaka peyasa banya monarena pulunongo piyamo kareya.
JOH 11:34 Dokopa, Baa anja malu piyami? leya. Nakamame baa lamaiyuo, Kamongo, kandalase ipu, leyami.
JOH 11:35 Yesu ee leya.
JOH 11:36 Dokona Juu wambu dupwame, Baame baa apa pyuo mona reto karengepe lao kandalapa, leyami.
JOH 11:37 Dopa leyaminyipape lapome, Akali lenge kwaenge elya pyuo nyiya dokomeko akali dake kumapa nana kapa lara ingya nayase? leyami.
JOH 11:38 Dopa leyami dokopa Yesu kamba lulaka koo peyamopa malu anda peya. Malu pingi kananda dokona kana mendeme upi laro kareya.
JOH 11:39 Yesumi, Kana nyuo kakondalapape, leya. Mata akali kumuyamo dokona pemalenge dokome baa lamaiyuo, Kamongo yuu kisima baa kumuo palipya dokome rumbyuo ai pyao pilyamo leya.
JOH 11:40 Yesumi baa lamaiyuo, Emba kapa ingingi lao suu pyare ramo dokopa Anatunya yanga paupau lenge doko kandare lao langi napusi? leya.
JOH 11:41 Dopa leyasa kana doko nyuo kakondeyami. Dokopa Yesumi kandalyuo kandapala dopa leya. Rakane embame nambana pii soo karalenelyamo lao ange leto.
JOH 11:42 Yuu peparae embame nambana pii soo karenge doko namba silyu. Sipunupape wambu dae karaminyi dupwa embame namba mapanyi peelyamo lao sinyale lapala ateŋa dake lalono, leya.
JOH 11:43 Dopa lapala pii porakaiyuo lao, Lasarasa, neta ipu leya.
JOH 11:44 Dokopa akali kumasi doko neta epeya. Banya kingi kimbupi komaumi yaki pyuo dee lenge kambu komau mendeme yaki pyuo pisala sereyami doko palepeta epeya. Yesumi nakama lamaiyuo, Baa anda pena lao komau doko polakamipape leya.
JOH 11:45 Dopa piyamo dokopa Juu wambu malu Maria role pyapeta epeyami dupwame baa piyamo doko kandapala baa kapa ingingi lao suu piyami.
JOH 11:46 Suu piyaminyipape lapome Parisi dupwa kareyami dokona pao Yesu dopa pipyaŋa lao lamaiyami.
JOH 11:47 Dokopa purisi akali mupwa dupwape Parisi dupwapeme wato andake lenge akali dupwa sukusa sukusa pyuo epena lapala, Namwa apa pirama? Akali dokome yulu andake malu lasaka pyuo karamo.
JOH 11:48 Baa pilyamo doko pyuo karalu karena larama ramo doko wambu dupwa peparaeme baako suu pyao kararami dokopa Orome akali dupwame epo namwana anda poo pyasi dokope namwana rara dupwape kokwa sinyi nembarami leyami.
JOH 11:49 Dopa leyaminyipa nakama peteyami dokona mende Kayapasa lenge baa ee kana dokona purisi mupwa wakasa ingyuo kareya dokome nakama dopa lamaiya. Nakamame mendekepe see nalyaminyi.
JOH 11:50 Namwa rara dupwa lemboke nyii nana laramanopa akali mendaki mende wambu dupwana lao kumara dokopa namwa keta kapa ingyuo palira doko soo gisa nalyaminyi leya.
JOH 11:51 (Baa range maso pii dake laa naya. Baa ee kana dokona purisi muwpa wakasa ingyuo karapala Yesu Juu rara dupwana lao kumara lao Anatumi pyongo piyamopa polo leya.
JOH 11:52 Juu wambu dupwanako iki daa Anatunya wane wanake raeyo petaminyi dupwa nyuo mendakinya ingyuo petena lao kumara renge dokona leya.)
JOH 11:53 Baa dopa pyuo polo lareyamo gii dokopa kanda soo nakama kaeya nao wato lao apa pyuo pyao kumakarama lao kareyami.
JOH 11:54 Dokopa Juu wambu kareyami panda dokona Yesu dee panembena papyuo kareyande daa. Kara napala yuu doko yaki nyepala yuu nemba nemba yuu muiyane repeta siyamo doko anda malu palyuo kareyamo yuu Eporaime lenge dokona peyamopa disaepole dupwa role pyao kareyami.
JOH 11:55 Dokopa Juu wambunya Pasopa nenge nenge gii doko pyaka selana piyasa wambu malu yuu nemba nemba karo Jerusaleme dokona lalyuo Pasopa nenge napa nayaminyi dokopa range poo pyalana lao peyami.
JOH 11:56 Dupwame Yesu anja karamo lao koto karo tembole anda dokona karapala nakama lao, Apa lao suu pilipi? Baa nenge nala eparape mee? lao kareyami.
JOH 11:57 Purisi akali mupwa dupwape Parisi dupwapeme lamaiyuo, Mendalimi baa mendasa karara ramo kandeyami kande dokopa namwa langya ipupwape lao puu maiyalana leyami.
JOH 12:1 Yuu gii pakinyamange epo paparamopa Pasopa nenge narami ingiyamopa Yesu baame yuu Betani Lasarasa lopo nyiyamo dokona peya.
JOH 12:2 Yesunya nenge rapa rapa pyakamiyaminyi dokopa Matame mokwa soo kareyamo Lasarasa taepo repeta Yesupa role pyao peteya.
JOH 12:3 Dokopa Mariame mamba luli lenge kana malumi ropo pingi dokona maki mendaki nyepala Yesunya kimbu dokona kulimbwakamipala banya kyawasi dokome kimbu dolapo pyao nembakamiya. Dokopa anda doko mambame kyaa pyuo simbuya.
JOH 12:4 Dopa piyamopape banya disaepole kareyami dokona mende Jutasa Isakeriote lenge baa mata kando lara ingiyamo dokome dopa leya.
JOH 12:5 Akipamo mamba dakeme ropo pyao kana malu (300) nyepala pendewa wambu dupwa mokwa soo mai napyase? leya.
JOH 12:6 Baame pendewa wambu dupwa suu pyao leyande daa. Baa mone singi bokote minyuo kareyamo dokome bokote dokona kana retapa pingi dupwa baa waa nyipulinya suu pyao leya.
JOH 12:7 Yesumi dopa leya. Enda baa pyuo petena, kando laa kaeyalapape. Namba malu pirami dokona lao silyamo dupwa mee retaro pisakana.
JOH 12:8 Pendewa wambu dupwa nakama pipya yuu peparae role pyapeta karenge. Nambamoo nakama pipya rakyame role pyapeta kararamande daa leya.
JOH 12:9 Juu wambu ama malu dupwame baa karamo leyaminyi doko sepala kandala epeyami. Baako yeelyo kandala epeyaminde daa, Lasarasa kumuo paleyamo minyalyuo nyiya doko opetae kandala epeyami.
JOH 12:10 Dokona purisi akali mupwa dupwame Lasarasa opetae pyao kumakarama lao wato leyami.
JOH 12:11 Baa lete kareyamo dokome Juu wambu malu nakama yaki nyepala Yesu kapa ingingi lao suu pyao kareyamisa dokona imbwuapala dopa pyuo wato leyami,
JOH 12:12 Dokona yangama dokopa wambu ama malu Pasopa nenge nenge dokona nala epeyami dupwame Yesu Jerusaleme epelyamo lao sepala,
JOH 12:13 isa bona dupwana yokonge nyepala baa epeyamo dokona kando nyela pao pii ketae palyuo dopa leyami. Anatu lakandamana. Kamongona kingi lao epelyamo Isaraelena Kiŋi doko keta renge keyange epakaminya leyami.
JOH 12:14 Dokopa Yesu donge kumambonande kando nyepala dokona peteya. Doko suu pyao pii pyasi mende palamo.
JOH 12:15 Doko yuu Sayone wanenge doko emba paka napipi. Embena Kiŋi doko donge kumambonandena piso epelyamo kande.
JOH 12:16 Pii doko banya disaepole dupwame renge soo gisapa nayami. Soo gisapa nayaminyipape enakana Yesu yake panda peyamo dokopa pii doko Baepolena pyasi paleyamuli pyuo piyamilyamo lao soo manjo nyiyami.
JOH 12:17 Lasarasa malu anda dokona kumuo paleyamo neta epena lao minyalyuo nyiya dokopa wambu malu role pyao kareyami dupwame banya yulu doko lao raeyami.
JOH 12:18 Yulu andake doko pyuo lasaka piya leyaminyi sepala dokona wambu malu baa epeyamo doko kandapala dopa pyuo lakandeyami.
JOH 12:19 Dokopa Parisi dupwame nakama lao lao, Mende piri ingya nalyamo kandelese? Wambu peparaeme baa rungi rungi pyao pelyaminyi leyami.
JOH 12:20 Wambu Pasopa nenge nenge yuu gii dokopa Anatunya kingi Jerusaleme lala lalyuo peyami dokona role pyao Giriki wambu lapo peyamioko.
JOH 12:21 Dupwame Pilipa yuu Galili dokona yuu Betesaita range doko kareyamo dokona pao lamaiyuo, Yangone namwa Yesu kandalana lao suu pilyamano leyami.
JOH 12:22 Dokopa Pilipa baame pao Enduru lamaiyamopa Enduru Pilipapa pakapala pao Yesu lamaiyambi.
JOH 12:23 Dokopa Yesumi pii mende nakama dopa lamaiya. Yuu gii Ikinyingi Akali yanga paupau lara doko pyaka silyamo.
JOH 12:24 Kinyi kinyi langilyu, witi jingi mende yuunya pao kuma nara ramo doko baa etorenge sulu sera. Dopa piramopape endangi yuunya palyuo kene pyapala rumbingi dokopa jingi malu lyingi.
JOH 12:25 Mendeme range karamo dokona mona nyepala kyawa minyuo karalana suu pyara ramo doko letena renge dokona pyakuirasa pira. Mendeme rangena yulu dokona mona mai napala kame soo kaera ramo doko baa letena renge nyepala karalu karara ingilyamo.
JOH 12:26 Mendali nambana yulu pyuo karara doko namba paronuli pyuo epara ingilyamo. Dokome namba karare dokona nambana yulu pingi akali dokopa role pyao kararamba. Mendali nambana yulu pyuo kararamo doko Rakaneme baa ketae pyambwaramo karara.
JOH 12:27 Epapu namba monarena pulunongo pyapyamopa karo. Dokona apa larose? Rakane, yuu gii dakepa yulu palamo dokona namba keta pali nanale lao namba nyisape, larose? Daa, gii dakepana yulu palamo dokona palira lao epeyo.
JOH 12:28 Rakane, embena kingi ketae pyambuo karape leya. Dokopa yake panda dokona piso pii mende lao, Wamba dokopa nambana kingi doko ketae pyambuo kareyo. Deeko lao ketae pyambuo kararo leya.
JOH 12:29 Wambu malu doo kareyami dupwame pii doko sepala, Yuu gala lalyamo leyami. Wambu lapome, Aŋala mendeme baa lamailyamo, leyami.
JOH 12:30 Yesumi pii mende lao dopa leya. Pii doko namba reke lao lao epande daa. Nakamana lao lao epamo leya.
JOH 12:31 Epapu gii dakepa isa wambu dupwa lao yapalya yapana pira ingilyamo. Epapu isa wambu dupwana kamongo doko nyuo ralinyi nembara.
JOH 12:32 Namba nyuo ketae minyalyuo palyarami gii dokopa wambu peparae namba palirunu dokona sukusa sukusa pira leya.
JOH 12:33 (Baa apa pyuo kumuo yaso nao paro lao pii doko wambo leya.)
JOH 12:34 Dopa leyamo dokopa wambu malu kareyami dupwame baa dopa lamaiyami. Mawa Pii dokona Koraisa baa karalu karara lao palelyamopa namwa singi. Dokona apa pyuo Ikinyingi Akali doko minyalyarami ingilyamo lalese? Ikinyingi Akali doko baa apisi? leyami.
JOH 12:35 Yesumi nakama dopa lamaiya. Yuu gii mee lama nakama pipya yanga paupau lao karalopyamo. Iminjasara lapala yango karamo dokopa kata nyuo puu pao parami. Mendali iminjilyamo dokopa kata penge doko anja pelyo lao see nao penge.
JOH 12:36 Yanga paupau lao karenge doko baa nakama sukusa karamo gii dusipana baa kinyi lao suu pyao karalapape. Dokome nakama yanga paupau lengena wane wanake ingyuo parami leya. Dopa lapala kanjakala pao nakama baa kanda nana lao yalu pyuo kareya.
JOH 12:37 Nakama kando kareyaminyipa baame yulu andake malu lasaka pyuo kareyamopape nakamame baa kapa ingingi lao suu pyao kara nayami.
JOH 12:38 Dopa piyaminyi doko Anatunya poropeta akali Aisaya lenge dokome pii mende leyamo dokona suu pyao piyamisa piya. Pii doko dapa lao palamo. Kamongo, namwa lalamano doko api mendeme kinyilyamo lao suu pyalamisi? Kamongona porainya renge doko apimoo keta paneyamo kandeyamisi? lao palamo.
JOH 12:39 Renge dokona lao baa kapa ingingi lao suu pyaa nayami. Dokona lao Aisayame pii mende dopa leya.
JOH 12:40 Anatumi nakamana lenge koo inginyi pyambuo, mona kana pokwanyi pyambuo piyalyamo. Nakamana lengeme kando monarena soo giso pipala namba kararo dokona kapu kyepala pyuo elya pyuo nyakape lasarami lapala dopa piyalyamo, leya.
JOH 12:41 Aisaya baame Yesu yanga paupau laramo doko wambo kandapala baasa lao leyalyamo.
JOH 12:42 Dopa leyamopape Juu rapu pingi akali mupwa lapo dupwapeme baa kapa ingilyamo lao suu piyami. Lao suu pyapala sinakoke sukusa karamano doko ramanyi neta nembaraminyi lao nakamame Parisi akali dupwa kando pakapala dopa lao suu pilyamano lao polo laa nayami.
JOH 12:43 Anatumi nakama lakandara dokona poraiyuo mona nyuo kara napala isa akali dupwame nakama lakandarami dokona suu pyao kareyami.
JOH 12:44 Dokopa Yesumi pii ketae palyuo lao dopa leya. Mendalimi namba kapa ingingi lao suu pyara dokome nambako iki suu pyaa narasa pira. Namba mapanyi peeyamo doko suu pyao kararasa pira.
JOH 12:45 Doko suu pyao mendeme namba kandara dokome namba mapanyi peeyamo doo kandarasa pira.
JOH 12:46 Mendalimi namba kapa ingingi lao suu pyao karara doko iminjingi dokona pisu piso pisa nana lapala namba yanga paupau lao isa yuu dakena epeyo.
JOH 12:47 Wambu mendeme nambana pii dupwa sepala minya nao karara ramo dokopa nambame baa kando kote laa naro. Dokona ingyuo isa wambu dupwa kando yapalya yapana pyuo lala epeyonde daa. Nambame isa wambu dupwa nyiso pyuo nyela epeyo.
JOH 12:48 Mendalimi namba kando waso waso pii napala soo nembo pyuo karara ramo doko yuu gii lumwa pira dokopa pii lapunu dokomeko baa kando lara ingilyamo.
JOH 12:49 Dokona lao nambame sisu lao lapunde daa. Rakane namba mapanyi peeyamo dokomeko namba pii laro dupwa langipyamosa pilyamo.
JOH 12:50 Dokona suu pyao baame lalu lao leyamo pii doko kyakana renge kulisa doko sulu singi doko soo gisilyu. Dokona pii lao karo doko Rakaneme dopa lape lao lapyamuli pyuo leto leya.
JOH 13:1 Pasopa nenge repeta pyaka siyamo dokopa Yesumi isa yuu dakena yaki nyepala rakange keta paponolyamo lao soo manjo nyiya. Baame banya wamba mona reto kareya dopako pyuo mona reto karo kumuya.
JOH 13:2 Alemanji nenge napa nayaminyi Satane dokome Jutasa Isakeriote Saimonena ikinyingi dokona monarena kunji pyao Yesu mata kando lena leya.
JOH 13:3 Dokopa Yesu Rakaneme yulu peparae kingi rakana palyakayamopa karo epapala dee Anatu karamo dokonako parolyamo lao soo gisiya.
JOH 13:4 Soo gisapala nenge nao peteyaminyi dokona roya karapala banya komau sakisi doko koko retapala saole mende nyepala wapuya.
JOH 13:5 Wapupala disi mendena ipwa kulimbuo retapala disaepole dupwana kimbu dupwa wate pipapu saole wapuyamo dokome pyao nembapa pyakamiya.
JOH 13:6 Dopa pyuo karo Saimone Pita peteyamo dokona epeya. Dokopa Pitame baa lamaiyuo, Kamongo, embame nambana kimbu wate pyakarese? leya.
JOH 13:7 Yesumi baa isingi lamaiyuo, Pilyunu doko dakepa soo gisa nalene. Rengya sere leya.
JOH 13:8 Pitame baa lamaiyuo, Embame nambana kimbu wate pyaka nalu nao nare leya. Yesumi baa isingi lamaiyuo, Nambame emba wate pyaka naro ramo doko emba nambana mana nyii nare leya.
JOH 13:9 Saimone Pita baame baa dopa lamaiya. Kamongo, nambana kimbu yeelyo daa. Nambana kingipi ayembape opetaeko pyakape leya.
JOH 13:10 Yesumi baa lamaiyuo, Mendali wate pyuokondali piramo doko dee wate pira ingya nara. Kimbu iki dee wate pira ingyara. Dokopa banya yanenge peparae elyape sera. Sipyamopa nakama elyape karaminyipa mendaki iki karo pisipyamopa karamo leya.
JOH 13:11 (Akali dokome mata kando lara lao soo gisapala lao nakama peparae elyape daa leya.)
JOH 13:12 Nakamana kimbu wate pyakamipala banya komau dusipa nyepala wambo peteyamo dokona pisipala nakama lamaiyuo, Namba mende pyakalono doko nakama soo gisilyamisi?
JOH 13:13 Nakamame namba kando, Namwana Mana Lenge, Kamongo lenge kandale. Namba dopale ingyuo karo dokona kapa rolae letaminyi.
JOH 13:14 Nakamana Kamongo, Mana Lenge dokome nakamana kimbu wate pyakapu ramo dokona nakama rangeme mendeme mendena kimbu wate pyakamirami ingilyamo.
JOH 13:15 Nakama pipunyili pyuo pyuo kararami lao yulu doko lasaka pyano.
JOH 13:16 Kinyi kinyi langilyu, kendemande akali dokome wakasa ingyapala banya kamongo doko kando ulu pili londele lao kara nange. Dee mendeme akali mende wai pii minyuo pena laramo doko suu pyao minyuo paramo akali doko mapanyi peeyamo dokona kando ulu pili londele lao kara nangeko.
JOH 13:17 Pii doko soo gisapala kararami ramo doko nakama keyange keta palirami.
JOH 13:18 Nakama peparaesa kando laa nalyo. Nambame akali rombo palyiyu dupwa soo kaeyo karo. Pii pyasi palamo mende, Nambana nenge nao pisipyamo akali doko kapu kyepala kimbu yukaname namba kalyalana pira leyamo doko leyamuli pyuo pira.
JOH 13:19 Angi pyaka seramo dokopa namba baalyamo lao soo nyerami lapala ene pyaka sepa nalyamo dakepa dopa piraŋa lao langilyu.
JOH 13:20 Kinyi kinyi langilyu, mendeme namba pena laro doko yako lao nyeramo dokome namba yako lao nyerasa pira. Mendeme namba yako lao nyeramo dokome namba mapanyi peeyamo doko yako lao nyerasa pira, leya.
JOH 13:21 Yesu pii dopa lapala baa monarena randa piyamopa karapala dopa lao polo leya. Kinyi kinyi langilyu, nakama petaminyi dokona mendeme namba mata kando lara, leya.
JOH 13:22 Disaepole dupwame mendeme mendali kanda kanda pipala apisa letamo lao saka nayami.
JOH 13:23 Banya disaepole dokona mende Yesu mona reteya doko Yesunya paralisa peteya.
JOH 13:24 Akali doko Saimone Pitame gyaakai pipala, Baa apisa letase lao piso sepe leya.
JOH 13:25 Dokopa akali doko Yesunya kyangali dokona lalyuo sili lapala dopa pyuo piso, Kamongo, emba lalene doko apisi? leya.
JOH 13:26 Yesumi isingi lao, Borete kunjasi dake poeyapala mairunu akali doko leya. Lapala borete doko poeyapala Jutasa Saimone Isakeriotena ikinyingi doko maiya.
JOH 13:27 Borete doko maiyapeyamopa Satane Jutasa baa keta epo maralyiya. Yesumi baa lamaiyuo, Emba mende piri ingilyamo doko waiya lao pipi leya.
JOH 13:28 Dopa pyuo leyamopa nenge nao peteyaminyi dupwame baa pii lamaiyamo dokona renge angi doko soo gisa nayami.
JOH 13:29 Lapome Jutasa kana mone bokote minyuo kareya dokome Yesumi Pasopa nenge narama ingilyamo dokona ropo pinyale lalyamo panda pendewa wambu dupwa kana lapo mainyale lalyamo lao suu piyami.
JOH 13:30 Jutasame borete nyepala aopa kamanda peya doko kukwama.
JOH 13:31 Baa kamanda papeyamopa Yesu dopa leya. Epapu Ikinyingi Akalinya kingi ketae pyambusi silyamo. Dee baa keta Anatunya kingi doko ketae pelyamoko.
JOH 13:32 Dee dopako pyuo Ikinyingi Akali doko enakana Anatu baa keta kingi ketae pyambusi karara. Doko aopa pira ingilyamo.
JOH 13:33 Nambana wane dupwa namba yuu gii malu ingyuowale nakama pipya role pyapeta kara narama. Nakamame namba kotarami. Dokona suu pyao Juu wambu lamaipu dokoko epapu nakama langilyu, Namba panya karo dokona kapa epa narami.
JOH 13:34 Mawa pii enenge mende jilyu. Nakama yango mendali mona reto karalapape. Nambame nakama mona reto karenge dopako pyuo nakama yango mendali mona reto karalapape.
JOH 13:35 Nakama dopa pyuo yango mendali mona reto kararami ramo doko wambu peparaeme nakama nambana disaepolelamo lao kando serami leya.
JOH 13:36 Saimone Pitame baa lamaiyuo, Kamongo, emba anja parese? leya. Yesumi isingi lao, Namba paro dokona epapu moko minyuo eparami ingya nalyamo. Ingya napyamopape rakyame dokopa nakama eparami ingilyamo leya.
JOH 13:37 Pitame baa lamaiyuo, Kamongo akipamo emba pare dokona epapu kapa eparo ingya nalyase? Namba emba kumuo jero leya.
JOH 13:38 Yesumi baa isingi lamaiyuo, Embame namba kumuo jerese? Kinyi kinyi langilyu, kola kali pii lapa naramopa embame namba yuu remasa mata joo lare leya.
JOH 14:1 Nakama mona rando karo nalapape. Anatu kapa ingingi lao suu pyao namba opetaeko suu pyao karalapape.
JOH 14:2 Nambana Rakanena anda dokona panda malu silyamo. See napyali doko nakama kararami panda doko rapa rapa pyakala pelyo lapulisi?
JOH 14:3 Dokona suu pyao nakama kararami panda doko pao rapa rapa pyakapala namba kararo dokona nakama opetae kararama lapala dee kamba epo dokopa nakama nyuo nambana arapunya karako leya.
JOH 14:4 Dokona suu pyao nakamame namba anja paro kata doko singi kandale.
JOH 14:5 Tomasame baa lamaiyuo, Kamongo, emba anja pare lao see nalyamano dokona kata angi doko apa pyuo kando nyeparamase? leya.
JOH 14:6 Yesumi baa lamaiyuo, Namba kata angi dokope kinyinya renge dokope letena renge dokope karo. Mendali namba keta epa nara ramo doko Anatu karamo dokona kando nyii nara.
JOH 14:7 Namba soo gisamili doko nambana Rakane doko opetae soo gisamiliko. Doko namba kandapala dokome baa opetae kando soo gisilyaminyi.
JOH 14:8 Pilipame baa lamaiyuo, Kamongo, Rakange doko namwa lasaka pipi. Dokopa namwa mona seramopa kararama, leya.
JOH 14:9 Yesumi baa lamaiyuo, Pilipa namba nakama pipya yuu andarele karenge doŋo nakamame namba apisi lao soo gisa nalyamisi? leya. Mendalimi namba kandapala dokome baa opetae kando soo gisilyaminyi. Doko suu pyao namwa Rakange lasaka pipi letene doko akipamo letese?
JOH 14:10 Namba Rakanena arapunya karapunupa Rakane doko nambana keta karamo doko kinyilyamo lao suu pyaa nalyamisi? Pii langyuo karo doko namba rangeme sisu lao langyuo karonde daa. Rakane namba keta karapala banya yulu range pyuo karamo.
JOH 14:11 Namba Rakanena arapunya karapunupa Rakane nambana arapunya karamo langyalono doko kinyilyamo lao suu pyaa narami ramo doko dee nambana yulu andake dupwa kandapala kinyilyamo lao suu pyalapape leya.
JOH 14:12 Kinyi kinyi langilyu, namba kapa ingingi lao suu pyao kararami dupwame namba pyuo karo yulu dopale pyuo kararami. Nambame Rakane karamo dokona parono dokona yulu kamame wakasako ingyuo pyuo kararami.
JOH 14:13 Nambana kingi lao mende piso serami ramo doko namba pyakaro. Rakanena kingi doko namba keta ketae paramo karara.
JOH 14:14 Nambana kingi lao mende piso serami ramo doko namba pyakaro.
JOH 14:15 Nakamame namba kando mona reto kararami ramo doko nambana mawa pii dupwa elya pyuo minyuo kararamisa pira.
JOH 14:16 Dokopa nambame Rakane kando ateŋa lakao kararonopa baame Nyisingi wakale akali Kinyi lenge Imambu doko julu joo jera.
JOH 14:17 Isa wambu dupwame kanda napala see nao karaminyi dokome kapa nyerami ingya nalyamo. Nakama range baa soo gisilyaminyi dokona lao baa nakama pipya karaminyi. Kararaminyipa baa nakamana mona anda dokona epapala palira.
JOH 14:18 Nakama range iki karalapa lao yaki nyuo kaeyalu kaeyo kaeronde daa. Nakama kararami dokona epapala kaeyaro.
JOH 14:19 Rengya usale dokona isa wambu menge dupwame namba dee kanda nalominyi. Dopa piraminyipape nakamame namba kandarami. Namba angi lete karo dokona nakama opetae lete kararami.
JOH 14:20 Namba Rakanena arapu dokona karelyonopa nakama nambana arapunya karaminyipa namba nakama pipya karo pilyu doko yuu gii mende pyaseramo dokopa nakamame soo gisarami.
JOH 14:21 Mendeme nambana mawa pii soo nyepala suu pyao karamo dokome namba mona retapyamosa pilyamo. Dokona suu pyao mendeme namba mona retaramo doko nambana Rakane dokome baa mona reto kararamopa nambame baa mona reto nolakarono dokopa namba kandara leya.
JOH 14:22 Jutasa (Isakeriote doko daa) baame lamaiyuo, Kamongo, apa pyuo namwa yeelyo kando nolakapala isa wambu dupwa kando nolaka narese? leya.
JOH 14:23 Yesumi baa isingi lamaiyuo, Akali mendeme namba kando mona retara ramo doko nambana pii warombo soo karara. Dokopa nambana Rakangeme baa mona retaramopa baa karara dokona nambwa epo baamoo pipya role pyao palu palirama.
JOH 14:24 Mendeme namba mona reto kara nange doko nambana pii warombo soo kara napyasa pilyamo. Dokona suu pyao pii nakama silyaminyi doko nambanande daa. Rakane namba mapanyi peeyamo dokona pii.
JOH 14:25 Namba nakama pipya role pyao karamano dokopa pii dusipa langingi kandale.
JOH 14:26 Dopa pirunupape Nyisingi Imambu Poo Pyasi Rakaneme nambana kingi lao mapanyi peeyaramo doko pii peparae mana langyuo pii langilyu dupwa peparae nakama suu pyanyi pyambwakara.
JOH 14:27 Mona kyuu lao singi renge doko nakama keta palena lapala jilyu. Namba rangena mona kyuu lao singi renge doko nakama jilyu. Isa wambu dupwame mainginyili pyuo jilyunde daa. Nakama mona nemba napala paka nao karalapape.
JOH 14:28 Namba pao kaepala dee nakama kararami dokona eparo lapunu doko selaminyi kandapi. Namba angi mona retamili doko Rakane karamo dokona pelene lao rae maiyuo karamili. Namba Rakanepa manda manjo kara nalyo.
JOH 14:29 Kinyi leelyamo lao suu pyarami lapala ene pipa napyamopa dopa pira lao langyilyu.
JOH 14:30 Isa wambu dupwana kamongo doko epelyamo dokona nambame pii malu dee langyuo kararo ingya nalyamo. Baame namba kando koo mende kapa pii nange.
JOH 14:31 Pii nalyamopa nambame Rakane dokona mona reto karo doko isa wambu dupwa sinya lao nambame Rakane dopa piri lao lengenyili pyuo pyuo karo. Mona sipuralapa, leya.
JOH 15:1 Namba isa girapo marange angingyuo karelyonopa Rakange doko wangya dupwa pyakepanyi nembo elya pingi ingyuo karenge.
JOH 15:2 Nambana wangya jingi angi lyii nange dupwa peparae baame pyakepanyi nembalu nembo nembenge. Wangya jingi angi lyingi dupwa peparae jingi lyulu lyuo karena lapala baame elya pyuo pyakepenge.
JOH 15:3 Nambame pii langipu dokome nakama elya pisi karaminyi.
JOH 15:4 Nambapa karo paka lakyuo paa nalapape. Dokopa namba nakama keta kararo. Wangya mende marangena sisingi dokona piso ando kara nara ramo doko rangeme sisu lao jingi lyii nara doko suu pyao nakama nambapa pako kara narami ramo doko nakama elyape keta kara narami.
JOH 15:5 Namba girapo isa marange ingyuo karelyonopa nakama wangya ingyuo karaminyi. Akali nambana kararamopa namba banya mona anda palironopa jingi malu lyerasa pira. Dokona lao nakamame namba lakipa nyepala kararami ramo dokopa nakama mendepe pinya saka narami.
JOH 15:6 Akali mende wangya ingyuo namba marangena sisingi dokona piso ando kara nara ramo doko baa nembaraminyipa kyapwara. Wangya kyapulyamo dupwa yapo nyepala isare dokona pyambuo yangarami ingilyamo.
JOH 15:7 Nakama nambana kingi kapena kararaminyipa nambana pii dupwa nakama keta palira ramo doko mende pipuli yaka lao suu pyaraminyili pyuo piso selapape. Dokopa dokonako palyuo pyakao karara.
JOH 15:8 Jingi malu lyuo karo nambana disaepole ingyuo kararaminyi dokome nambana Rakangena kingi ketae pyambwaramisa pira.
JOH 15:9 Rakaneme namba mona reto karapyamo doko suu pyao nambame nakama mona retoko karapu. Nambana mona kulisa retenge renge dokona sukusa karalu karo karalapape.
JOH 15:10 Nambame Rakanena pii lengenyili pyuo warombo soo karo dokopa baapa mona reto karambano doko suu pyao nakamame nambana pii warombo soo kararaminyipa nambapa mona reto kararamasa pira.
JOH 15:11 Nambana rae maingi renge doko nakama keta palyuo simbwaramopa parami dokona lao pii renge dusipa polo langyalono.
JOH 15:12 Nambame mawa palyuo dopa leto. Nambame nakama kando mona reto karapu doko suu pyao nakamame yango mendali mona retaro karalapape.
JOH 15:13 Mendeme banya puu minyingi dupwa ama wakasa mona retapala dokome nakama nyiso kumuo maira ingilyamo.
JOH 15:14 Nambame nakama pipya lao laronuli pyuo kararami ramo doko nambana puu minyingi ingyuo kararamisa pira.
JOH 15:15 Kendemande akali dupwame nakamana kamongo dupwa apa pilyaminyi lao soo gisa nange renge dokona nambame nakama kando kendemande ingyuo karaminyi lao laa nalyo. Laa napunupape nambana Rakane pii namba langiyamopa soo nyiya dupwa peparae nakama polo langyuo karapu dokona nakama nambana puu minyingi lalono kandapi.
JOH 15:16 Nakamame namba yapalyapa nayaminyipa nambame nakama yapalyuo nakama wangya ingyuo jingi lyuo karala paraminyipa jingi dupwa lyuo karalu karena lao rombo palyiyu. Dopa pyuo kararami dokopa Rakaneme mende pyakana lao piso seraminyili pyuo pyakao karara.
JOH 15:17 Mendeme mendali mona reto karalapape lao dokona mawa pii langilyu.
JOH 15:18 Isa enda akalipimi nakama awa nayami kande dokopa, namba wambo awa nayaminyili pyuowako awa nalyaminyi lao soo nyelapape.
JOH 15:19 Nakama isa wambunya yongo nyuo karamili dokopa isa wambu dupwame nakama namwana rangelyamo lapala mona reto karamili. Doko doŋo nambame nakama yapo nyiyunupa nakama mee sisi panda ingyuo karaminyipa isa wambu yango dupwa nakama kando awa nalyaminyi.
JOH 15:20 Wambo pii mende langyalono kandapi doko suu pyalapape Kendemande akali banya kamongo kando wakasa ingya nange langyalono. Doko suu pyao namba randa joo kareyami ramo doko nakama randa jooko kararami. Nambana pii minyuo kareyamili ramo doko nakamana pii minyuo pyuoko kararamili.
JOH 15:21 Nakama randa jerami dokopa namba mapanyi peeyamo doko soo gisa napala nakama namba reke lao randa joo kararami.
JOH 15:22 Namba epa napala koo keyangepe pakana palyuo mana lamai napuli doko nakama yulu koo kamenge pimisa pii mende pali napyali. Dakepa nambana pii see napala koo piyama larami ingya nalyamo.
JOH 15:23 Mendeme namba kando awa nara ramo doko nambana Rakange opetaeko awa narasa pira.
JOH 15:24 Nambame nakama pipya karo wambu mendeme yulu pii nange dopale pyuo kara nayoli doko nakama koo keta paa nayamili. Doko nakama nambana yulu andake dupwa kando kaepala nambapa nambana Rakangepa kando awa naoko karaminyi.
JOH 15:25 Namba kandakinyuo awa nayami, dopa lao Mawa Pii pyasi doko palamo pii dokona pyaka silyaminyi.
JOH 15:26 Kinyinya Renge Palenge Nyisingi Imambu doko Rakane keta karenge doko epara. Baa Rakane role pyao karenge doŋo nambame baa dae pena laronopa baame nambaŋa lao rolo langira.
JOH 15:27 Nakama wambo kanda soo nambamoo pipya kareyama dokona ingyuo nakama dopako pyuo nambana lao polo lao kararami.
JOH 16:1 Nakama suu longo paa nalapape lao pii dusipa peparae langyalono.
JOH 16:2 Kinyi kinyi langilyu, yuu gii epara ingilyamo dokopa nakama sinakoke anda dupwana neta nembarami. Mendeme nakama pyao kumakapala dokopa Anatunya yulu dokona pipusa pilyamo lao suu pyarami.
JOH 16:3 Rakangemoo nambamoo soo gisa napala dokona dopa pirami.
JOH 16:4 Dopa pirami doko nambwa Rakanepa soo gisa napala nakama pyarami yuu gii pyaka seramo dokopa dopa langii kande lao suu pyarami dokona langyalono. Wamba role pyao kareyama dokopa pii dapwa langya nayo.
JOH 16:5 Doko dakepa namba mapanyi peeyamo doko karamo dokona range pelyo. Paronopape nakama mendalimi anja pelene lao piso see nalyaminyi.
JOH 16:6 Epapu rolo langyalono dokona nakama monarena kondome kumulyaminyi.
JOH 16:7 Kondalyaminyako doŋo nakama kinyi langilyu, namba kanjakala parono dokopa nakama elyape keta palirami. Namba kanjakala paa naro ramo doko Nyisingi doko nakama keta epa nara. Paro ramo doko nambame baa nakama keta mapanyi peeyakaro.
JOH 16:8 Baa epapala dokopa isa wambumi yulu koo dokonape yulu rolae dokonape Anatunya kote pii dokona kyai pyuo suu pyaro karaminyi doko pananyi pyambwara.
JOH 16:9 Isa wambu dupwame namba kapa ingingi lao suu pyaa nalyaminyi dokona palyuo baame nakamana koo doko nolakakamira.
JOH 16:10 Namba Rakange karamo dokona paronopa nakamame namba dee kando narami dokona lao baame yulu rolae angi doko lasaka pira.
JOH 16:11 Anatumi isa wambu dupwana Kamongo doko kando kote lapyaŋa lao doko lyakai pyuo panaramo serami.
JOH 16:12 Nambame nakama pii malu langiru ingyapyamopape nakama kapa soo nyii narami ingilyamo.
JOH 16:13 Kinyi lengena Imambu doko epapala dokopa baame nakama pii kinyi peparae mana langira. Dokona lao baame range sisu lao larande daa. Baa renge seramuli pyuo polo langyuo karara. Baame ene pipa nalyamo dupwa wambo nolakao lao karara.
JOH 16:14 Baame nambana dupwa nyepala mana langyuo dokome namba keta pyambwarasa pira.
JOH 16:15 Rakangena kingi rakapana silyamo dupwa peparae nambanaŋa. Dokona lao Imambumi renge lamairunu dupwa nyepala nakama langira ingilyamo langyalono kandapi.
JOH 16:16 Rengya usale nakamame namba dee kanda narami. Dee mee mende usale dokopa namba kandarami, leya.
JOH 16:17 Leyamopa banya disaepole dupwana lapo nakama lao dopa leyami. Baame namwa langilyamo doko aki pii langilyase? Usale nakamame namba kanda narami, dee mee mende usale namba kandarami. Rakange karamo dokona paro ingilyamo dokona kanda narami langyalamo kandapi, leyami. Kandarami letamo doko akinde letase lao see nalyamano leyami.
JOH 16:18 Baame, Usale dokopa kandarami lalamo doko apa pyuondena lalamo kandapisi? Apa pyuondena lalamo lao saka nalyamano, leyami.
JOH 16:19 Yesumi baa piso selana leyami doko. Sepala baame nakama dopa lamaiya. Usale namba kanda narami, dee mee mende usale namba kandarami lalono dokona apa pyuondena lalepe lao nakama range sukusa piso silyamisi?
JOH 16:20 Kinyi kinyi langilyu, nakama ee lao ipwakuku nyeraminyipa neta wambu dupwame rae maiyuo kararami. Nakama kondo kararaminyipape enakana raeko maiyuo kararami.
JOH 16:21 Enda mende wane mata pilyamo dokopa rangena yuu gii doko pyaka sipyalyamo lapala mona randange. Dopa pilyamopape wane doko manjo nyepala dokopa raeko maipala baa randa neyamo dupwa nyuo kame singi.
JOH 16:22 Doko suu pyao epapu nakama kondome kumuo karaminyi. Dopa pilyaminyipape nambame nakama dee epo kandarono dokopa nakama monarena pyakalyuo pyaramo kararami. Dokopa mendalimi nakama monarena pyakalyuo pyaramo renge doko rekya lao nyeraminde daa.
JOH 16:23 Yuu gii dokopa nakamame namba mende piso see narami. Kinyi kinyi langilyu, Rakange doko kando mende piso serami ramo doko baame nambana kingi reke lao kapa jera.
JOH 16:24 Wamba nambana kingi dokona lao piso see nayami. Monarena pyakalyuo pingi renge dokome simbuo pyoko pyoko lena lapala piso selapape. Dokopa kando nyerami ingilyamo.
JOH 16:25 Nambame kongwalu lalya lana pyuo langyalono. Yuu gii mendepa nambame kongwalu pii dupwa kaepala Rakange dokona rolae lao langiru.
JOH 16:26 Yuu gii dokopa nambana kingi lapala piso serami. Dokopa nambame nakamana lao ateŋa lakaro laa nalyo.
JOH 16:27 Nakamame namba mona reto Rakane karamo dokona karo epee lao suu pyao karaminyi dokona Rakane baa rangeme nakama mona reto karamo.
JOH 16:28 Rakane karamo dokona karo epapala isa yuu dakena epeyo. Dopa pipala isa yuu dake yaki nyuo Rakane karamo dokonako pelyo, leya.
JOH 16:29 Banya disaepole dupwame, Yuu gii dakepa emba kongwalu pii dokona kaepala rolae lalenelyamo doko kandelyamano.
JOH 16:30 Embame peparae soo gisingilyamo lao mendeme embena pii doko kinyi lyasilisi lao piso sepenge ingyapa nalyamo lao epapu namwa soo kaelyamano. Dokome emba kinyi Anatu karamo dokona karo epeelyamo lao suu pilyamano leyami.
JOH 16:31 Dokopa Yesumi nakama lamaiyuo, Epapu nakama kinyilyamo lao suu pilyamisi?
JOH 16:32 Yuu gii mende eparamo dokopa nakama bolombalo lao anda palengenyili pyuo paraminyipa namba iki kararo. Kinyi kinyi, yuu gii doko epapu pyaka silyamo. Namba iki kararoko doŋo Rakane nambapa kararamba dokome iki ingya nara.
JOH 16:33 Nambana arapu dokona kararami dokome nakama mona kui lao sinya lapala pii doko langyalono. Yuu dakena karo randa narami. Nambame isa yuu dake anamasi minyuo karo doko kandapala mona kuki palyuo karalapape, leya.
JOH 17:1 Yesumi pii dupwa lapala yake doko kandalyuo kandapala dopa leya. Rakane, yuu gii doko pyaka sipyalyamo. Embame embena Ikinyi ketae pyambwarenepa baame emba ketae pyambwara ingilyamo.
JOH 17:2 Dokona lao embame wambu baa maiinyi dupwa peparae baame kyakana renge kulisa palu palenge doko maira lapala embame baa isa wambu dupwa peparae iso karena lee.
JOH 17:3 Isa wambumi emba Anatu angi karenge dokome Yesu Koraisa mapanyi pee doko kando serami doko kyakana renge kulisa doko nakama keta palira.
JOH 17:4 Isa yuu dakena karo yulu jiinyi doko nambame pyuo otapunupa dokome emba ketae pyambwasi karamo.
JOH 17:5 Rakane, isa yuu doko ene wasa nange siyamo dokopa embapa nambapa yanga paupau lao kareyamba dokona suu pyao embena lenge kambu seramo dokona kararonopa embame namba yanga paupau lanyi pyambwape.
JOH 17:6 Embame isa wambu lapo yapo nyepala namba jiinyi dupwa embena kingi lamaiyunupa soo nyiyami. Dupwa embena ingyuo kareyaminyipa embame namba jiinyipa embena pii doko warombo soo karaminyi.
JOH 17:7 Yulu jiinyi dupwa peparae embena ingilyamo doko soo kaelyaminyi.
JOH 17:8 Dokona lao nambame pii jiinyi dupwa nakama lamaiyunupa nakamame soo nyepala kinyi kinyi emba karenge dokona namba karo epeelyamo lao sepala embame namba mapanyi pee lao suu pyao karaminyi.
JOH 17:9 Nambame nakamana lao ateŋa lakamilyu. Mee isa wambu dupwana lao ateŋa lakami nalyo. Wambu embame jiinyi dupwa embena ingyuo karaminyi dokona nakama suu pyao ateŋa lakamilyu.
JOH 17:10 Nambana ingyuo karaminyi dupwa peparae embena. Dee embena ingyuo karaminyi dupwa peparae nambana. Dopa pyuo karo nakamame namba ketae pyambuo karaminyi.
JOH 17:11 Epapu isa yuu dakena angi ingyuo kara nalopono. Kara napala emba karene dokona eparo ingyapyamopa nakama isa yuu dakena karaminyi. Rakane poo pyasi embena kingi porai renge paleta lasi namba keta jiinyi dokome nakama kyawa minyuo karape. Minyuo kararenepa nambwa mendaki ingyuo karambano doko suu pyao nakama opetae mendaki ingyuo karenale.
JOH 17:12 Nakama pipya role pyao karamwano mange dokopa embena kingi yaki nyii nana lao embena arapu dokona karenale lao iso karapu. Nambame nakama rapu pyuo karapunupa nakama karaminyi dokona mende kwao pupyande daa. Akali mendakindeme kwao para ingingi doko Baepolena leyamuli pyuo isa peya.
JOH 17:13 Dopa pipyamopape epapu emba karene dokona epelyo. Doko nambana mona pyakalyuo pingi renge doko nakama keta palena lapala pii dapwa isa yuu dakena lao karo.
JOH 17:14 Nambame embena pii doko nakama lamaiyu. Namba dae yuu range ingya nao karo doko suu pyao nakama opetae mee sisi panda ingyuo karaminyi dokona isa wambu yango dupwame nakama epekanda nao karaminyi.
JOH 17:15 Nakama isa yuu dokona karaminyi dokona rekya lao nyakape lao ateŋa lao letonde daa. Koo dokome rambu lasara lao kyawa minyuo karape lao ateŋa leto.
JOH 17:16 Namba dae range ingya nao karo doko suu pyao nakama dae range ingya napyamoko karaminyi.
JOH 17:17 Embena pii kinyinya renge dokome nakama yapo nyerenepa embena ingyuo pena.
JOH 17:18 Embame namba isa yuu dakena mapanyi peene doko suu pyao nambame nakama isa yuu dupwana mapanyi pyambuyu.
JOH 17:19 Nakama embena wambu yapasi angingyuo pena lao namba range kame soo kaepala embena iki karo.
JOH 17:20 Akali dasipana iki ateŋa lakamilyunde daa. Nakamame pii lamairaminyi sepala namba kapa ingingi lao suu pyapala mona jerami dupwana opetaeko lakamilyu.
JOH 17:21 Nakama peparae mendaki ingyuo karamili lapala ateŋa lakamilyu. Isa wambu dupwa emba namba mapanyi peelyamo lao suu pinya lapala Rakane emba namba keta karapinyipa dee namba emba keta karo doko suu pyao nakama opetae nambwa keta karamili lao suu pyao leto.
JOH 17:22 Nambwa mendaki ingyuo karambano doko suu pyao nakama mendaki ingyuo karamili lapala embame namba yanga paupau lenge renge jiinyi doko nambame nakama maiyu.
JOH 17:23 Nakama mendaki ingyuo karamili lapala emba namba keta kararenepa namba nakama keta kararo. Dokopa isa wambu dupwame embame namba mapanyi peeyapala namba mona retenge doko suu pyao nakama mona reto kareneko lao soo gisarami.
JOH 17:24 Rakane, wambu namba jiinyi dusipa namba kararo dokona nakama opetae role pyao karamwali lao leto. Karo dokopa isa yuu ene pyuo wasapa naenepa embame namba mona retapala yanga paupau lenge renge jii doko nakama kandarami.
JOH 17:25 O Rakane rolae pingi doko, isa wambu dupwame emba soo nyepa naminyipa nambame emba soo nyuo kaepunupa wambu lapome iki embame namba mapanyi peelyamo lao soo gisilyaminyi.
JOH 17:26 Embena kingi doko namba lamaiyuo doko dee lamaiyuo karalu kararoko ingilyamo. Dokome embame namba mona reto karene doko nakamana ingyara. Ingyaramopa nambame nakamana mona anda kararo.
JOH 18:1 Yesu pii doko lapala banya disaepole dupwa pipya netarena pao yuu pota Kitone lenge doko nyuo yalo ee mendena pao sukusa peyami.
JOH 18:2 Yesu banya disaepole dupwa pipya yuu gii malu yuu dokona malu palyuo pisipa piyami dokona Jutasa baa mata kando leyamo doko opetae yuu doko kando soo kareya.
JOH 18:3 Soo karapala baame purisi akali mupwa dupwape Parisi dupwapeme yanda singi lapope yanda singi mupwa mendasipape nyepala lambepe kendapulipi kakupi wua gelape lapo nyuo minyuo pao yuu dokona peyami.
JOH 18:4 Dokopa Yesu baa keta piramo yulu dupwa peparae soo gisapala lenge kambu siyamo dokona epapala nakama lamaiyuo, Api kotelyaminyi? leya.
JOH 18:5 Nakamame isingi lao, Yesu Nasarete range doko, leyami. Yesumi nakama lamaiyuo, Doko namba, leya. Jutasa baa mata kando leyamo doko nakama role pyapeta kareyami.
JOH 18:6 Doko namba, lamaiyamo dokopa nakamame matanono papala yuunya paro siyami.
JOH 18:7 Baame dee piso soo, Api kotelyaminyi? leya. Dokopa, Yesu Nasarete range, dokoŋo leyami.
JOH 18:8 Yesumi isingi lamaiyuo, Doko nambaŋa langyalono lao kandapi doko namba kotarami ramo doko akali dasipa mee neta pena kaeyalapape leya.
JOH 18:9 Baa wambo Anatu kando wambu jiinyi dusipana mendali kwao pakapyande daa, leyamo dokona palyuo leya.
JOH 18:10 Dokopa Saimone Pitame banya wua gela mandeyamo doko kolo nyepala purisi mupwa dokona kendemande akali dokona kale rolaerename doko pyao rekya lanyi nembeya. Kendemande akali dokona kingi Malakasa lenge.
JOH 18:11 Yesumi Pita lamaiyuo, Embena wua gela doko palenge dokona palyape. Rakaneme pee kapo namba jipyamo dokona naa narose? leya.
JOH 18:12 Dokopa yanda singi malu epeyaminyi dusipa dusipana mupwa dokomoo Juu wambunya yanda singi dusipapeme Yesu minyarapala puu maiyami.
JOH 18:13 Puu maipala Anasa kareyamo dokona lanyuo peyami. Anasa baa Kayapasana imwange ingyuo kareyamopa Kayapasa baame ee kana dokona purisi mupwa ingyuo kareyamo dokona Anasa dokona wambo lanyuo peyami.
JOH 18:14 Akali mendaki wambu dupwana lao kumara dokopa nakama kapa ingyuo palira leyamo pii doko Kayapasa ingyuo leya.
JOH 18:15 Saimone Pita disaepole mendepa Yesu peyamo dokona mata pyao peyambi. Disaepole mende doko purisi mupwa wakasa dokome kandenge dokona baa purisi mupwa dokona anda kamapi sukusa kapa peya.
JOH 18:16 Dokopa Pita baa kakota lumbungisa kareya. Dokopa disaepole mende doko purisi mupwa dokome kandenge doko netarena papala kendemande enda kakota lumbungi iso kareya doko lamaipala Pita sukusa epena leya.
JOH 18:17 Kendemande enda kakota lumbungi isa kareya dokome Pita lamaiyuo, Emba akali dokona disaepole mende daase? leya. Pita baa, Namba daa, leya.
JOH 18:18 Kendemande wambu dusipape yanda singi dusipape kupwa piyasa isare lengya rena lapala soo kareyami. Pita baa opetae nakama pipya karo isare soo kareya.
JOH 18:19 Dokopa purisi akali mupwa dokome Yesu banya disaepole dusipanape banya mana pii dokonape baa piso sepa piya.
JOH 18:20 Yesumi baa isingi lamaiyuo, Nambame isa wambu dupwa panembena karo lamaingi, sinakoke anda dupwanape tembole dokonape Juu wambu peparae elyambu pingi panda dusipanape namba mana lamaiyuo karo pii mende yalu pyuo lengende daa.
JOH 18:21 Akipamo namba piso silisi? Nambana pii siyami wambu dupwa nambame apa lenge lao piso sepe. Nambame lao karenge doko nakama soo kaenge, leya.
JOH 18:22 Dopa leyamo dokopa yanda singi kareyaminyi dokona mendeme kingi kapeme Yesu rakyuo pyapala, Embame dopa lao purisi mupwa doko isingi lamaingisi? leya.
JOH 18:23 Yesumi baa isingi lamaiyuo, Nambame kopetame lapu ramo doko pii kwaelyamo doko polo lalase. Rolae nembo lapu ramo doko akipamo namba rakyuo pyalese? leya.
JOH 18:24 Dokopa Anasame, Kayapasa purisi mupwa wakasa karamo dokona Yesu baa puu maisi piso karena lapala lanyuo pupwape, leya.
JOH 18:25 Saimone Pita baa isare soo kareya. Dokopa role pyao kareyami dupwame baa lamaiyuo, Emba doko banya disaepole dokona mende daase? leyami. Dokopa baame, Ama daa leya.
JOH 18:26 Purisi akali mupwa dokona kendemande mende Pitame kale pyao rekya lanyi nembakamiya dokona ree palu mendeme baa piso soo, Emba ee dokona baa role pyao karambinyi kandapu doko daase? leya.
JOH 18:27 Pitame dee Daako, leya. Aopa dokopa kola kali pii leya.
JOH 18:28 Dokopa wamba kukwa Kayapasana anda doko kaepala Yesu lanyuo kyapona kote singi anda dokona peyami. Nakama rangeme Juu wambunya yulu suu pyao namwa elyape ingya naramosa Pasopa nenge kapa naa nasarama lapala kyapona kote singi andakare dokona paa nayami.
JOH 18:29 Paa nayamisa Pailate nakama kareyami dokona kamanda papala, Akali dake kando aki yulu koo pipyaŋa lao epelyaminyi? leya.
JOH 18:30 Nakamame baa isingi lamaiyuo, Akali dakeme yulu koo mende pii nange pyali doko embena panda peeya namwali leyami.
JOH 18:31 Pailateme nakama lamaiyuo, Nakama range baa nyepala nakamana mawa pii dupwana lao range kambuyanda pipwape leya. Leyamopa nakamame namwa Juu akali dupwame akali mende pyao kumakarama ingyuo mawa pii dokona pali nalyamo leyami.
JOH 18:32 (Yesu wamba namba dopa pyuo isa dokona pyarami lao reteyamo dokona palyuo leyamisa piya.)
JOH 18:33 Pailateme kyapona kote singi anda dokona dee papala Yesu epena lapala, Emba Juu wambunya Kiŋisi? lamaiya.
JOH 18:34 Yesu isingi lao, Embame range maso letepe panda lapome namba lao langiminyi letese? leya.
JOH 18:35 Pailate isingi lao, Namba Juusi? Embena wambu dupwamepe purisi mupwa dusipamepe emba namba keta peeyalaminyi kandapi. Emba aki mende pipisi? leya.
JOH 18:36 Yesumi isingi lao, Nambana isingi yulu doko dae isa panda pali nalyamo. Nambana isingi yulu doko isa pandana yulu ingyuo pupyali doko nambana yulu pingi akali dupwame Juu wambu keta namba nyuo peeya nana lapala pyakando pimili. Nambana isingi yulu doko isa wambunya yulu dopale ingyuo paa nalyamo leya.
JOH 18:37 Leyamo sepala Pailateme Emba kiŋi lyasilisi? leya. Yesumi isingi lao, Embame namba kiŋi lalene kandapi. Kinyi lengena renge polo lao kararo renge mendaki dokonako isa panda dakena namba manjo nyiyami. Wambu kinyi lengena renge wambu keta karaminyi dupwa peparaeme nambana pii soo karenge, leya.
JOH 18:38 Pailateme, Kinyi lengena renge doko apiyakalese? leya. Dopa pyuo leyamopa Pailateme Juu wambu kareyami dokona neta papala, Akali doko yulu koo mende pipya lao soo kanda nalyo.
JOH 18:39 Dokoko doŋo nakamana yulu mende singi kandale doko nenge Pasopa nenge gii dokopa akali mendaki namba mokwakapa pingi. Doko suu pyao Juu wambunya Kiŋi doko mokwakapili lao suu pilyamisi? leya.
JOH 18:40 Dopa leyamo dokopa nakamame poraiyuo kaeyo lapala, Akali dake daa, Barapasa mokape, leyami. Barapasa baa kendepo nenge akali ingyuo kareya.
JOH 19:1 Dokopa Pailateme Yesu nyuo pyaroko pinya leya.
JOH 19:2 Dokopa yanda singi dupwame nepereke lapome minyuo kamenyongwapala lengyapu pipala banya kyawa dokona pee pyakamipala baa komau konele mende bolembale lakamiyami.
JOH 19:3 Lakamipala baa kareya dokona epapala, Emba Juu wambunya Kiŋi doko karalenelyamo, lapala baa kingi kapeme piyami.
JOH 19:4 Juu wambu kareyami dokona Pailateme kamanda dee papala, Baa koo mende pii napyaŋa lao soo kandapilyamo lao selapase, lapala, Nakama karaminyi dokona baa potemo lanyuo epelyo kande, leya.
JOH 19:5 Dokopa Yesu nepereke lengyapu pisi pee piro karo komau konele bolembale laro karo piyamopa kamanda epeya. Pailateme nakama lamaiyuo, Akali laminyi doko dake, leya.
JOH 19:6 Purisi akali mupwa dupwape yanda singi dupwapeme wangonali pyuo lapala, Baa isa mamandona pyao palya, baa isa mamandona pyao palya, leyami. Pailateme nakama lamaiyuo, Nambame baa koo mende pii napyaŋa lao soo kandapunupape nakama rangeme baa nyepala isa mamandona pyao palyalapape, leya.
JOH 19:7 Juu akali dupwame baa lamaiyuo, Baa Anatunya Ikinyingi ingyuo karo lapyamosa dokona namwana mawa pii mende palamo dokome baa kumara ingilyamo leyami.
JOH 19:8 Dopa leyaminyi sepala Pailate dee pakaya.
JOH 19:9 Pakapala kote singi anda dee kolando papala Yesu lamaiyuo, Emba anja karo epee? leya. Dopa leyamopa Yesumi isingi mende laa naya.
JOH 19:10 Dokona Pailateme baa lamaiyuo, Namba pii mende langiri ingya nalyase? Emba mokwaro dokope isa mamandona pyao palyaro dokope range doko namba keta palamo lao emba see nalese? leya.
JOH 19:11 Yesumi baa isingi lamaiyuo, Embame namba kando mende suu pilyu ote lao kapa piro lao karene renge porai doko Ketaerena dokome emba jii napyali doko embame mende piri ingya napyali. Dokona namba nyuo emba jipyamo akali doko koo wakasa pipya ingilyamo.
JOH 19:12 Dopa leyamo dokopa Pailateme baa mokwalana piya. Dopa piyamopape Juu wambu dupwame pii porakaiyuo kaeyo lapala, Akali doko embame mokware ramo doko embame Sisa puu minya naresa pira. Akali mendemepe namba kiŋi ingyuo karo larami dupwa Sisa kando sisu nyuo kararasa pira leyami.
JOH 19:13 Dopa leyaminyi sepala dokopa Pailate Yesu kamanda lanyuo papala panda mende Kaname Rambi Kwaasi lenge dokona pao peteya. (Panda doko Ipuru pii lao Gapara lenge.)
JOH 19:14 Pasopa nenge narama lao rapa rapa pingi andawai korokama towalo keloke ingyuowale gii doko pyaka siya. Baame Juu wambu dupwa lamaiyuo, Dake nakamana kiŋi akali, leya.
JOH 19:15 Nakamame wangonapi pyuo lao, Baa pyao nemba, pyao nemba, isa mamandona pyao palya leyami. Pailateme nakama lamaiyuo, Nakamana kiŋi doko isa mamandona pyao palyakarolyase? leya. Purisi mupwa dupwame isingi lamaiyuo, Sisa baa iki namwana kiŋi ingyuo karapyamopa mende kara nalyamo leyami.
JOH 19:16 Dokopa baa kapa isa mamandona pyao palyarami doko kapa lao nakama maiya.
JOH 19:17 Dokopa Yesu nyiyaminyipa baa range banya isa mamando doko soo netarena pao yuu kingi Kyawa Kuli lenge (Ipuru pii lao Golokota lenge) dokona peya.
JOH 19:18 Dokona baa isa mamandona pyao palyiyami. Akali lama opetae Yesu kanya dokona paleyamopa dolapo parali dolapona pyao palyiyami.
JOH 19:19 Pailate baame pii renge dokona pepa pyapala isa mamando doko pyanyi palyiya. Yesu Nasarete range Juu wambunya Kiŋi lao pyasi paleya.
JOH 19:20 Yesu isa mamandona pyao palyiyami yuu doko anda malu palyuo karenge dokona repeta siyamo dokome Juu wambu malumi pii doko kando yaka leyami. Pii doko Ipuru pii Orome pii Giriki piipi dusipana lao pyasi paleya.
JOH 19:21 Dokopa purisi mupwa dupwame Pailate lamaiyuo, Juu wambunya Kiŋi, lao palyapi doko kaepala, Akali dakeme namba Juu wambunya Kiŋi lapya, lao pyape leyami.
JOH 19:22 Pailateme lao, Pii pyapu doko pyalu pyao pyapu, leya.
JOH 19:23 Yanda singi dusipame Yesu isa mamandona pyao palyapala banya komau dusipa nyepala nakama akali kisima suu pyao bange kisimasa lao malu palyuo sereyami. Dopa piyaminyipape banya pee pingi londe doko kii pyuo wapwa napala mee wapwalu wapuo wapuyami doko kando dopa leyami.
JOH 19:24 Pilya namane, lapala apimi embone piso nyera lao yulu mende pyuo piyami. Pii pyasi doko, Nambana komau pingi dupwa mokwa soo nyiyami. Nyepala nambana komau doko apimi embone piso nyera lao mende pyuo piyami, paleya. Pii pyasi paleyamuli pyuo yanda singi dusipame piyami.
JOH 19:25 Dopa piyaminyipape Yesunya isa mamando repeta dokona banya endangimoo endanginya kakingi dokomoo Maria Kiliopasana etenge dokomoo Maria Makatala range dokomoo kareyami.
JOH 19:26 Yesumi banya endangipa disaepole mende baame mona reteya dokopa repeta kareyambinyi kandapala endangi lamaiyuo, Enda, embena ikinyi kandape leya.
JOH 19:27 Lapala disaepole doko lamaiyuo, Embena endakinyi dolo karamo kandape leya. Dokopa disaepole dokome enda doko banya anda dokona lanyuo pao piso karo piyambi.
JOH 19:28 Enakana Yesumi banya yulu peparae dupwana lumwa pyaamo lao soo gisapala pii pyasi paleyamuli pyuo dopa leya. Namba nano pilyamo leya.
JOH 19:29 Pere warake mendena waene ipwange kau pingi simbuo peteyamopa dusa siya. Siyamo dokona isa lumbi mende waene dokona poeyo nyepala isa kingi isope lenge dokona bwuakiki pipala banya kambu dokona suu leyami.
JOH 19:30 Yesumi waene kau pingi doko napala baame lao, Pyuo otalyano leya. Lapala ayemba pongwa napala kumuyamopa imambu rekya lao peya.
JOH 19:31 Yuu gii rapa rapa pingi angi doko pyaka siyasa koro petenge pyaka selana piyamo yanenge kaoma dusipa yuu gii koro petenge dokopa isa mamandona palyuo kara nami lapala Juu akali dupwame Pailate piso soo, Nakamana kimbu pyao roo pyapala yanenge kaoma dusipa nyuo neta kakondenale leyami.
JOH 19:32 Dopa leyaminyi dokona yanda singi dusipame epapala akali dalya kaepeta paleyamo dokona kimbu wambo pyao roo pyapala akali mende baa role pyao isa mamandona pyao palyiyami dokona kimbu opetae minyuo roo piyami.
JOH 19:33 Roo pyapala, Yesu paleyamo dokona epapala baa kumapapyalyamo lao kandapala banya kimbu pyao roo pyaa nayami.
JOH 19:34 Roo pyaa nayaminyipape yanda singi dokona mendeme banya mamanda doko kakumi arikiya. Dokopa ipwange ranjamape pale pale epeya.
JOH 19:35 Dopa pyuo piyaminyi kandeya akali dokome nakama opetae kinyi leelyamo lao suu pyalapape lao rolo leya. Banya rolo lenge pii doko kinyi keta karelyamopa kinyi letono lao soo gisingi.
JOH 19:36 Kuli roo pyao pii nayami doko, Banya kuli mendepe roo pyao pii nara, lao Baepolena paleyamuli pyuo piyami.
JOH 19:37 Dee, pii pyasi mende dopa lao palamo, Akali mende arikyarami doko kando kararami.
JOH 19:38 Enakana dokopa Josepe Arimatia range doko Yesunya disaepole doŋo Juu wambu dupwa kando pakapala wakale mende ingyuo dupwana kareya dokome Pailate piso soo, Yesunya yanenge kaoma nyuo minyuo kakondarowale leya. Dokopa Pailate, Kapa leya. Dopa leyamo dokopa baame epapala banya yanenge kaoma doko nyuo minyuo peya.
JOH 19:39 Nikotimasa wamba Yesu kareyamo dokona kukwa mendepa epeya doko baame rendamu pingi bange mwua lenge dokopa luli lenge isa mendepa alose lenge dolapo minyuo kiminjasi ama kenda malu doko minyuo epeya.
JOH 19:40 Nakabame Juu wambunya wambu malu pinginyili pyuo Yesunya yanenge kaoma doko nyuo luli lenge bange palyuo komau keyange dokome yama piyami.
JOH 19:41 Baa isa mamandona pyao palyiyami yuu doko ee repeta. Ee dokona malu anda mende wambu mendali malu pipa nangende siya.
JOH 19:42 Juu wambu dupwame dee yangama dokopa koro andake pyaka sera lao rapa rapa pingi yuu gii doko pyaka siyasa malu anda doko repeta siyamosa Yesu dokona palyiyami.
JOH 20:1 Koro andake dokopa wamba kukwa yuu ene iminjo yango piyamo dokopa Maria yuu Makatala range doko malu piyami anda dokona epapala malu anda kambu dokona kana upi leyami doko nyuo kakondasi siyamo kandeya.
JOH 20:2 Kandapala makando Saimone Pita disaepole mende Yesu mona reteyamo dokopa kareyambinyi dokona peya. Papala nakamba lamaiyuo, Kamongo doko malu anda dokona neta nyimilyamo. Doko anja retami lao namwa see nalyamano leya.
JOH 20:3 Pii doko sepala Pita disaepole mende doko opetae potemo epapala malu piyami anda dokona peyambi.
JOH 20:4 Pao nakamba laparae makando papalape disaepole mende dokome Pita nyuo enakapala malu piyami anda dokona wambo epeya.
JOH 20:5 Epapala koko kandalana pangu sepala komau keyange dolapo siyamo kandeya. Kandapalape andakare paa naya.
JOH 20:6 Dokopa Saimone Pita baa enakana epapala malu anda andakare peya. Pao komau keyange angi yaki piyami doko kandeya.
JOH 20:7 Kandeyamopa komau kyawa yaki piyami dokopa komau wakale mende dokopa mendakinya see napala wakale dumbisale kyasala pao siyamo kandeya.
JOH 20:8 Dokopa disaepole mende doko malu anda dokona wambo epeyamo doko opetae kolando peya. Pao kandapala kinyi baa lopo pupyalyamo lao suu piya.
JOH 20:9 Baa kumuo palipala sipuro epara ingyara, lao pyasi palenge kandale pii doko yuu dokopa ene sepa nao kareyambi.
JOH 20:10 Disaepole dolapo doko kandapala dee kapu kyuo anda peyambi.
JOH 20:11 Maria malu anda dokona kama karo ee lao kareya. Ee lao karo malu anda dokona koko kandeya.
JOH 20:12 Dokopa aŋala kakepame lama wamba Yesunya yanenge siyamo dokona peteyambi kandeya. Mende kyawa siyamo dokona piso mende kimbu siyamo dokona piso piyambinyi kandeya.
JOH 20:13 Nakambame baa lamaiyuo, Enda apa pipyasa ee lao karene? leyambi. Dokopa baame nakamba lamaiyuo, Nambana Kamongo nyepala pumisa anja retami lao saka napala ee lao karo leya.
JOH 20:14 Dopa lapala kapu kyepala Yesu kareyamo kandeya. Kandapala Yesu baa lao see naya.
JOH 20:15 Yesumi baa lamaiyuo, Enda, emba apa pipyasa ee letene? Api kotelene? leya. Baame ee rapu pingi akalilyamo lao masapala doko lamaiyuo, Aeya, embame baa soo pare ramo doko dusa retapu lao namba langipi. Langirinyipa nyepala lanyuo paro leya.
JOH 20:16 Yesumi baa kando, Maria leya. Leyamopa Maria kapu kyepala Yesu baa kando Ipuru pii lao, Oraponai leya (pii doko Mana Lenge dopale.)
JOH 20:17 Yesumi baa lamaiyuo, Embame namba minya kae. Namba Rakane karamo dokona ene pulyuo papa nalyo. Nambanape nakamanape Rakange Anatu karamo dokona namba pulyuo pelyamo lao emba nambana yangonge dupwa lamaiyala puu leya.
JOH 20:18 Maria yuu Makatala range doko pao disaepole dupwa lamaiyuo, Nambame Kamongo doko kandalono, leya. Lapala, Baa pii lamaiyamo dupwa nakama lamaiya.
JOH 20:19 Koro andake alemanji dokopa disaepole dupwa Juu wambu dupwa kando pakapala kambu dowa dolapo pyao gii lapala peteyaminyipa Yesu epapala peteyaminyi raka dokona sukusa karapala nakama lamaiyuo, Mona kyuu lao singinya renge doko nakama keta palena, leya.
JOH 20:20 Dopa lapala baame banya kingi kapepe parali dokopape nakama lasaka piya. Dokopa disaepole dupwame Kamongo doko kandapala raeme kumuyami.
JOH 20:21 Yesumi nakama dee kamba lamaiyuo, Mona kyuu lao singinya renge doko nakama keta palena. Rakaneme namba mapanyi peeyamo doko suu pyao nambame nakama pupwa leto leya.
JOH 20:22 Baa dopa lapala nakama kando ŋee sepala dopa lamaiya. Imambu Poo Pyasi nyelapape.
JOH 20:23 Nakamame wambu mendena koo dupwa nyuo kame sakamirami ramo doko kame sakamisi sera. Mendena koo dupwa mee range keta palena kae larami ramo doko mee palu palira leya.
JOH 20:24 Akali akalisa ipisu lama kareyami dokona mende Tomasa lenge kingi mende Reme Paka lenge doko Yesu epeyamo dokopa baa nakama pipya kara naya.
JOH 20:25 Kara nayamo dokona disaepole menge dupwame baa lamaiyuo, Kamongo doko kandalamano lyakande, leyami. Lao karalu kareyaminyipape baa dopa leya. Banya kingi kapena nyili peteyamo mumbwange doko kandapala nambana kingi pambu dokome nyili peteyamo mumbwange dokona suu lao nambana kingi banya parali dokona minyando soo pii naro ramo doko anginde lalyaminyi lao suu pyaa naro, leya.
JOH 20:26 Yuu gii yanda ipingi nyero papeyamopa banya disaepole dupwa Tomasamoo pipya anda dokona dee kamba kareyami. Kambu dowa dolapo pyao gii lasi siyamopape Yesu epapala nakama kareyami sukusa dokona karapala, Mona kyuu lao singinya renge doko nakama keta palena leya.
JOH 20:27 Lapala Tomasa kando lamaiyuo, Embena kingi pambu doko dakena suu lapala, nambana kingi dolapo kandape. Kandapala embena kingi pyasinju lapala nambana parali doko minyando sepe. Soo neta nemba napala kinyi kinyi angiŋi lao suu pyao karape leya.
JOH 20:28 Tomasa baame sepala soo neta nemba nao isingi lamaiyuo, Emba nambana Kamongo, nambana Anatuŋu leya.
JOH 20:29 Yesumi baa dopa lamaiya. Embame namba kandapala kinyi angiŋi lao suu pilisi? Dokoko doŋo wambu namba kanda napala mee angiŋi lao suu pyao karenge dupwa elyape keta penge leya.
JOH 20:30 Yesumi disaepole dupwana lenge kambu dokona yulu andake malu piyami dupwa buku pyasi dakena pali nalyamo.
JOH 20:31 Pali napyamopape yulu lapona pyasi palamo dupwame nakama Yesu baa Koraisa Anatunya Ikinyingi lao suu pyaraminyipa banya kingi yaki nyii nalyaminyi dokona lao nakama keta kyakana renge palipyali lapala pepa pyao retelyo.
JOH 21:1 Enakana ipwa muiyane pete Taipiriasa lenge maronge dokona disaepole dupwa baa kandena lao dee maro leya. Baame dopa pyuo maro leya.
JOH 21:2 Saimone Pitamoo Tomasa kingi Reme Paka lenge dokomoo Nataniele yuu Kena yuu Galili silyamo dokona range dokomoo Sepetena ikinyingi dolapomoo banya disaepole lama mendalapo pipya role pyao kareyami.
JOH 21:3 Saimone Pitame nakama lamaiyuo, Namba oma nyela pelyo leya. Leyamo dokopa, Namwa embamoo monale leyami. Potemo papala bote dokona pyakambuyami. Dopa piyamopape kukwa dokopa oma nyii nayami.
JOH 21:4 Yuu rombalo piyamo dokopa Yesu maronge dokona kareya. Dokopa disaepole dupwa baa Yesu lao soo rola nayami.
JOH 21:5 Dokopa Yesumi nakama lamaiyuo, Anemasipa, oma lapo nyilyamipi mee? leya. Nakama isingi lamaiyuo, Daa leyami.
JOH 21:6 Dokopa baame nakama dopa lamaiya. Nakamana oma nyuu doko kingi rolae dorename pyambwapala dokopa kapa nyerami leya. Dopa leyamo dokopa oma nyuu pyambwapala oma ama malu nyuu dokona kete pyaro kareyasa minyalyuo nyelana saka nayami.
JOH 21:7 Disaepole Yesumi mona reteya dokome Pita lamaiyuo, Baa Kamongo doko karalamolamo, leya. Dopa leyamo dokopa Saimone Pita baa Kamongo dokolyamo lao sepala banya komau doko waiya lao pee piya. (Baa yulu pyuo karalana komau kolo reteyamo doko.) Pipala ipwa dokona pyakala peya.
JOH 21:8 Dopa piyamo dokopa disaepole lapo dusipa nanesale kara napala bote dokona piso oma nyuu doko oma paleta ipyuo epeyami.
JOH 21:9 Nakama yuunya pyakala epo dokopa dokona isare rao ranga yuu lao siyamo oma rao soo borete opetae soo piyamo kandeyami.
JOH 21:10 Yesumi nakama lamaiya. Oma nyelaminyi dokona lapo minyuo ipupwape, leya.
JOH 21:11 Dokopa Saimone Pita bote dokona pyakalyarapala oma nyuu doko oma andake malumi kete pyao paleyamopa ipyuo epeya. Oma akalisa pao akalisa, dee akalisa kingi paki ipisu rema (153) nyuunya keta pyaro kareya. Nyuu doko rokoyali doko rokwa naya.
JOH 21:12 Yesu baame, Nakama nenge nala ipupwape leya. Baa Kamongo dokolyamo lao sepala apipi lao piso serama ingya nalyamo lao elyapala kaeyami.
JOH 21:13 Dokopa papala Yesumi borete lapo nyepala nakama mokwa soo maiya. Borete maipala dopako pyuo oma maiyako.
JOH 21:14 Yesu kumuo palyuo lopo epapala range disaepole dupwa kandena lao yuu repo maro leya.
JOH 21:15 Nenge nao otapala Yesumi Saimone Pita lamaiya. Saimone, Jonena ikinyingi doko, akali dusipame namba mona retaminyipa embame namba wakasa mona reto karepe mee? leya. Dopa leyamo dokopa, Kinyi, Kamongo, nambame emba puu minyuo karo doko emba silinyi leya. Yesumi baa lamaiyuo, Nambana sipisipi ikyane dupwa mondo pyuo nenge maiyakao karape leya.
JOH 21:16 Lapala dee lapo pyuo piso siya. Saimone Jonena ikinyingi, emba namba mona reto karepe mee? leya. Leyamo dokopa, Kinyi, Kamongo nambame emba puu minyuo karo doko emba silinyi leya. Yesumi baa lamaiyuo, Nambana sipisipi dupwa rapu pyakao karape leya.
JOH 21:17 Lapala dee kamba repo pyuo piso siya. Saimone, Jonena ikinyingi, embame namba puu minyuo karese? leya. Baame repo pyuo, Embame namba puu minyuo karese? lamaiyamo dokopa Pita mona randaya. Randapala, Kamongo, emba peparae soo gisingi leya. Nambame emba puu minyuo karo doko emba kando silinyi lao kande, leya. Yesumi baa lamaiyuo, Nambana sipisipi nenge pyako karape, leya.
JOH 21:18 Kinyi kinyi langilyu, emba wanyanesa komau range wapuo kata pareli dupwana mee maso pingi. Dopa piinyipape emba emarene dokopa embena kingi pyasinju larenepa mendalimi emba komau wapwakapala paa naro lao suu pyarene mendasa emba soo parami leya.
JOH 21:19 Dopa leyamo dokopa, Yesumi Pita apa pyuo kumaramo dokopa baa Anatu ketae pyambuo para, doko wambo nolakao leyasa piya. Enakana baame baa lamaiyuo, Namba paronuli pyuo ipupi leya.
JOH 21:20 Pita kapu kyepala disaepole yango Yesumi mona reto kareya doko kandeya. Akali doko wambu nenge nao peteyami dokopa Yesunya kyangalisa pisipala baa lamaiyuo, Kamongo, emba mata kando lara doko apipi? leya.
JOH 21:21 Pita baa kandapala Yesu lamaiyuo, Kamongo, akali dake keta apa pira? leya.
JOH 21:22 Yesumi baa isingi lamaiyuo, Namba dee kapu kyuo eparono gii dokona lao lete iso karena laro ramo doko embena yulu daa. Embame namba paronuli pyuo epare leya.
JOH 21:23 Yesumi dopa pyuo leyasa wambu dupwame sepala disaepole doko kuma naralyamo lao kopetame suu pyao lapelape lalyalana pyuo lao kareyami. Lao kareyaminyipape Yesumi baa kuma nara leyande daa. Baame, Namba kapu kyuo eparono gii dokona lao lete iso karena laro ramo doko embena yulu daa, lao pii dokona lao leyasa piya.
JOH 21:24 Yesumi disaepole akali doko kando pii doloma leyamo doko baame pepa dake pyapala pii peparae dupwa mende kyambo leyande daa. Doko baa yulu peparae kandeyamuli pyuo rolae ingyuo pepa piya doko soo gisilyamano.
JOH 21:25 Yulu dusipa pepana pyao reteyamopape Yesumi yulu malu lapo opetae pyuo kareya dupwa peparaena bukunya piyali doko isa yuu dake bukumi kete pyao aopa lapyali lao suu pilyu.
ACT 1:1 Yako Tiopilasa, Pepa wambo pyao jiyu dokona Yesu baame kanda soo yulu pyuo mana lamaiyuo kareyamo dokona palyuo pyao pao
ACT 1:2 baa yake panda pulyuo peyamo liti dokona pii lumwa pyuo pyao oteyo. Imambu Poo Pyasimi Yesu nyisiyamopa banya disaepole yapo nyiyamo dupwa mana lamaipala yake panda peya gii dokonasa leto.
ACT 1:3 Wamba pyao kumakayaminyipape baa lete epapala yuu malu maro lapapu Anatunya isingi yulu dokona mana lamaipa piya. Dokome banya disaepole dupwame baa kinyi lete kareyamo doko soo gisiyami.
ACT 1:4 Baame nakama pipya role pyao karo dokopa dopa lamaiya. Nakama Jerusaleme yaki nyuo paa nalapape. Rakane mende jerona lao kaeyamuli pyuo langiyunu siyami kande pii dokona isaro pisipwape.
ACT 1:5 Dokona lao Joneme ipwame iki bapitisimo nyakamiya. Dopa pyuo nyakamiyamopape yuu mendasipa epo paparamopa Anatumi Imambu Poo Pyasi dokome nakama bapitisimo nyakara, leya Yesumi.
ACT 1:6 Aposele dupwa nakama epo elyambu pipala baa mende piso siyami. Kamongo, embena isingi yulu wamba Isaraele wambu keta paleyamo dokona dee yuu gii dakepa range palena larepe mee? leyami.
ACT 1:7 Dopa leyaminyi dokopa baame nakama dopa lamaiya. Yulu andake dupwa anjokorape pira lao Rakane baa renge palyuo leyamo dokona yuu gii doko nakama kapa see narami.
ACT 1:8 Kapa see naraminyipape Imambu Poo Pyasi nakama keta epo maralyiya kande dokopa porainya renge nyerami. Nyepala nambana yulu dokona lao yuu Jerusaleme dokonape Jutia peparae dupwanape Samaria dupwanape isa yuu pinjingi dupwanape lamaiyakao kapa kapa pirami leya.
ACT 1:9 Baa dopa leyamopa nakama kando kareyaminyi baa pyakalyara pyakalyara pyuo pulyuo peyamo dokopa kopa rau dokome nyuo lanyuo pao koe piyamopa nakama kandalana saka nayami.
ACT 1:10 Baa papeyamo dokopa yake dulunya kandaro siyami. Dokopa akali komau kakepame wapungi dalama nakama kareyami dokona epo kareyambi.
ACT 1:11 Karapala dopa leyambi. Galili range akali dupwa, akipamo nakama yake dokona kandaro karaminyi? Yesumi nakama yaki nyepala yake panda dokona pulyuo pamo kandalaminyi doko dopako pyuo range dee lupyuo epara ingilyamo leyambi.
ACT 1:12 Leyambinyi dokopa nakama isa Olipi Kyau lenge, yuu doko yaki nyepala Jerusaleme peyami. Kata doko Juu wambu dupwame misi lenge gii dokopa kata muu dopale kapa penge dopale.
ACT 1:13 Pao andakare papala anda ketae koe luu palenge dokona pulyuo peyami. Pitamoo Jone Jemesa Enduru Pilipa Tomasa Batolomyu Matyu Jemesa Aopiasana ikinyingi doko, Saimone Selote akali doko, Jutasa Jemesana ikinyingi dokomoo role pyao pulyuo peyami.
ACT 1:14 Papala nakama enda lapo opetae dupwamoo Maria Yesunya endangipi banya yangonge dusipamoo role pyapeta suu pingi mendakinya palyuo piso ateŋa lapa pyuo peteyami.
ACT 1:15 Dopa pyuo peteyami dokopa wambu malu akalisa lama opetae (120) ingyuowale elyambu pyuo peteyami. Dokopa Pita dokona sukusa roya karapala banya Kurisene yango dupwa kando dopa leya.
ACT 1:16 Yangonemoo, Imambu Poo Pyasimi akali Dapiti keta pii leyamo doko buku Baepolena pyasi palamo. Doko akali Jutasa baa wambu lanyiyamopa Yesu puu maiyami akali dokonasa leya. Dapiti leyamuli pyuo piya doko kandelyamano.
ACT 1:17 Jutasa baame namwa role pyao karo namwa mendeke ingyuo kareya kande.
ACT 1:18 (Jutasa doko banya yulu koo piyamo dokome kana lapo nyiya. Nyepala kana dokome yuu mende ropo piya. Ropo pyapala banya yuu dokona pulyuo papala isa pyakaya. Pyakayamo dokopa ingi dokona lyepala kanya dokona poro lao rali pyuo ingi kalumbuo neta epeya.
ACT 1:19 Dopa pyuo kareyamo yulu doko Jerusaleme wambu dupwa peparaeme dopa pyaamo lao siyami. Sepala nakamame Jutasa dopa pyuo kumuyamo dokona lao yuu doko kingi Akeletama larama leyami. Pii doko Yuu Ranjamareta dopale.)
ACT 1:20 Dokona lao Dapitinya kenane pingi buku dokona pii dopa lao pyasi palamo. Banya yuu andape apa sera, wambu mende dokona pali nana. Pii mende opetae palamo, Banya rapu pingi yulu baa range kaepala mendali nyinya.
ACT 1:21 Pii dopa lao palipyasa dokona namwame akali mende alo pyuo nyerama ingilyamo. Yesu lopo lete epeyamo waili pii lao karamano doko baa role pyao lao karara. Mee akali mende langa rombo palya namanale Joneme bapitisimo nyelapape lao kareyamopa Yesu kanda soo role pyao kareyama gii dokopa piso epo baa namwa yaki nyuo pulyuo peyamo dokopa api mende namwa kaeya nao role pyao karalu karo kareyaminyi dokona mende yapo nyimana, leya.
ACT 1:23 Dokopa nakama kingi lama suu pyao peteyami. Akali mende baa Josepe lenge banya kingi mende Basapasa, kingi mende Jasatasa lenge doko. Akali mende baa Matayasa lenge.
ACT 1:24 Akali dolapona suu pyao ateŋa lao dopa leyami. Kamongo emba akali dupwa peparaena monarena soo gisingi. Emba akali dolapona mende rombo palyii kande doko embame namba lasaka pii.
ACT 1:25 Jutasa baame banya yuu range dokona pupya dokona akali mendeme banya panda nyepala yulu pyuo karo aposele akali ingyuo karenale, leyami.
ACT 1:26 Lapala akali dolapona kingi lao isukuli lama isa retapala dokona mende kamenge kanda nao nyiyami. Wambo isukuli mende nyepeyami dokopa Matayasa lao reteyami doko kingi rakana paleyasa baa rombo palyiyami. Dokopa aposele akalisa ipisu mendaki karenge kandale dokona nakama yanenge nyuo karamo lao suu piyami.
ACT 2:1 Yuu Pendekosa pyaka siyamo dokopa nakama peparae yuu mendakinya role pyao peteyami.
ACT 2:2 Dokopa pii mende porambaiye dopale poo lao yake dokona piso epeyamo siyami. Epo andakare peteyaminyi dokona lao buu minyiya.
ACT 2:3 Dokopa isare kekenge dopale lapo dupwa pano epo nakama peparaena yanenge keta wakale wakale rao siya.
ACT 2:4 Dokopa nakama peparae Imambu Poo Pyasi palyuo simbuya. Simbwapala Imambu dokome renge kuiyuo leyamuli pyuo pii rara wakale leyami.
ACT 2:5 Gii dokopa Juu wambu Anatu suu pyao karenge yuu wakale wakale range dupwa Jerusaleme dokona kata londe epapala kareyami.
ACT 2:6 Kareyami dupwame aposele dupwa pii wakale wakale leyami doko sepala epo buu minyiyami. Dokopa pii wakale wakale lao kimbu siyamisa wambu dupwa pii range lenge dokome dopa lalyamo lao kapa siyami. Sepala apa pipala pilyamo lao saka nayami.
ACT 2:7 Dokopa mona nembo ayaka lao karo dopa leyami. Pii dopa lao karaminyi dupwa nakama peparae yuu Galili range daase?
ACT 2:8 Apa pipala namwa range pii lenge dokona palyuo wakale laminyi silyamano kandese? leyami.
ACT 2:9 Yuu Patia range akalipi Mitia akalipi Ilama akalipi karamano. Yuu Mesopotemiape yuu Jutia yuu Kapatosia yuu Pondasa yuu Esia
ACT 2:10 yuu Pitisia yuu Pambilia yuu Isipi yuu Lipia pakirena Sairini lao singipi yuu dupwana palenge wambu dupwa karamano leyami. Yuu Orome dokona palenge Juu wambu angi dupwape dee Juu rara daa Juu wambunya misi pii soo nyingi dupwa opetae Jerusaleme dokona epapala upunili ingyuo karamano.
ACT 2:11 Kiriti akalipi Arapia akalipi dupwa karamano. Namwa yuu muu wakale wakale range dupwa nakama Anatunya yulu andake dupwana lao pii namwana lenge dopale ingyuo wakale wakale lamisa silyamano leyami.
ACT 2:12 Dopa lao karo dokopa nakama peparae mona nembo apa pipala pilyamo lao saka napala nakama lao yulu doko aki rengedeme pilyamo? leyami.
ACT 2:13 Dopa leyaminyipape lapo dupwa giyalya giyana pyuo pii doko soo nembo kareyami. Waene ipwange enenge nao pyoko pyoko lapala kyawa sisingi bolombalo lapyasa letaminyi leyami.
ACT 2:14 Dopa leyaminyipape Pitamoo aposele akali akalisa ipisu mendaki kareyami dupwamoo sipureyaminyipa Pita baa pii ketae palyuo wambu dupwa boo pyao lamaiya. Yangonemoo nakama Juu akali dupwape dee Jerusaleme palenge peparaepe namba pii larono dupwa kale yukupala selapa leya.
ACT 2:15 Akali dapwa waene ipwange naminyi kyawa sisingi bolombalo lalamo lao suu pyalaminyi doko daa. Wamba yangama dokopa dopa pii nange kandale.
ACT 2:16 Pii nalyamopape Anatumi poropeta akali Joele leyamuli pyuo epapu pyaka silya kande. Joele dopa leya.
ACT 2:17 Anatu dopa letamo. Yuu gii lumwa piramo dokopa nambana Imambu wambu dupwa peparaena maralyinya lao mokwa soo mairu. Dokopa nakamana wanenge ikinyingipi dupwame nambana pii nolako larami. Nakamana wanyane akali dupwa pii repa repa pyuo kandarami. Nakamana alemo dupwa kombeya pirami.
ACT 2:18 Kinyi, dopa piramo yuu gii dusipana nambana kendemande enda akalipi keta nambana Imambu maralyinya lao mokwa soo mairu. Dokopa nakama nambana pii nolakao lao kararami.
ACT 2:19 Dokopa yake dulu yulu andake wambu dupwame kando yamarangwarami dopale pyuo, isa yuu dokona wambu kandena lao yulu andake lapo lasaka pyuo piru. Ranjamape isarepe sukwa puupae lara dokope dusipa kandena lao lasaka piru.
ACT 2:20 Neta doko iminjo rali pira. Kana doko ranjama ingyara. Wambo dopa piramopa enakana Kamongona yuu gii doko pyaka sera.
ACT 2:21 Dokopa mendeme Kamongona kingi lapala baa lete wai pyao nyakapili lao lara ramo doko, baa nyiso pyuo nyera. Pii dopa leya Joeleme.
ACT 2:22 Nakama Isaraele akali dupwa pii dake selapape. Anatumi Yesu Nasarete range doko angi rombo palyiyalyamo lao selapape lao yulu andake lapo wambu dupwame kando yamarangwarami dopale kandalapape lao renge kuiyuo lasaka piyamopa Yesu keta nakama peteyami dokona sukusa piyamopa range silyaminyi.
ACT 2:23 Anatumi wambo suu piyamuli pyuo nakama Yesu pyao kumakalapape lao jiya. Nakamame baa nyepala lowa see nange wambu dupwa maiyaminyipa nakamame isa mamandona pyao palyiyami.
ACT 2:24 Dopa piyaminyipape Yesu baa mee kumuo pali nara ingiyamopa Anatumi kumunginya randa dupwa ramanyi yaki nyepala baa minyalyuo nyiya.
ACT 2:25 Dokona lao Dapitimi baa suu pyao dopa leya. Kamongo doko nambana lenge kambu dokona karalu kareyamopa kandeyo. Namba monarena yamarangwa napipi lao Anatu baa nambana kingi rolaerename karakalyamo.
ACT 2:26 Dokona namba mona anda pyakalyuo pyao kambu dokome rae maingi pii dupwa lao kareyo. Namba isa akali kumuo penge doŋo embame nambana imambu doko kyawa minyuo kararenepa
ACT 2:27 wambu kumasi palenge dokona nambana imambu doko paka nara dokona mona kare kare karo, embena akali poo pyasi doko rumbya napipi lare ingilyamo.
ACT 2:28 Embame lete penge kata doko lasaka pii kande embame namba repeta karakarenepa raeme kumaro leya.
ACT 2:29 Yangonemoo namwana rakange kyawa Dapiti baa kumuyamopa malu piyami doko namwa soo gisilyamano. Banya malu anda doko dae silyamo dokona pii mende pali nalyamo.
ACT 2:30 Baa poropeta akali pii nolako lenge dokome Anatumi baa kando, Embena ree palu dokona mende embena kiŋi yulu pyuo karena lao rombo palyaro lao langyuo kaelyo, lamaiyamo pii doko soo gisapala
ACT 2:31 Anatumi Koraisa nyisapala dopa pira lao wambo sepala baa pii doloma rangesa lao laa naya. Koraisa baa lopo neta para doko sepala baasa kando pii mende leya. Wambu kumasi palenge dokona kumasi palena lapala kaeya naya. Banya yanenge kakapange mee rumbya naya leya.
ACT 2:32 Yesu doko Anatumi lopo nyiya doko namwa peparaeme kandapala lao karamano.
ACT 2:33 Baa lopo epapala Anatunya kingi rolaerename nyiyamo dokopa Rakangeme Imambu Poo Pyasi nyera lao kaeyamo doko nyiya. Nyepala namwa keta mokwa soo jipyamopa poo lao ipyamosa pilyamo doko kandelyaminyi.
ACT 2:34 Dapiti yake dokona range pulyuo paa naya. Baa rangesa lao dopa leya. Kamongo dokome nambana Kamongo lamaiyuo, Nambana kingi rolaerename pisipi.
ACT 2:35 Pisirinyipa emba kando nekyambuli ingyuo karaminyi dupwa embena kimbu dokome kalyare lao nyuo isa palyakaro, leya.
ACT 2:36 Nakamame Yesu isa mamandona pyao palyiyami dokoko Anatumi baa Kamongo Koraisa ingyuo karena lao rombo palyiya doko nakama Isaraele wambu dupwa peparae soo gisalapape.
ACT 2:37 Pitame dopa pyuo leyamo dokopa banya pii doko nakamana mona anda piya. Nakama elyapala kondome kumuo kareyami. Dokopa nakamame Pitamoo aposele menge dupwa opetae piso soo, Yangonemoo namwa apa pirama? leyami.
ACT 2:38 Dokopa Pitame nakama lamaiyuo dopa leya. Nakamame mona enenge palyapala Yesu Koraisana kingi dokona lao nakamana koo dupwa Anatumi nyuo kame sakapyali lao suu pyapala bapitisimo nyelapape. Dokopa nakama Imambu Poo Pyasi jeramo nyerami leya.
ACT 2:39 Dokona lao Anatumi Imambu Poo Pyasi doko jero lao kaeyapya pii doko nakamasa kando laowako nakamana wane wanakepe wambu menge nanesa karaminyi dupwa opetaesa lao wambu baame sukusa ipupwape laramo dupwa peparaena palyuo leyaŋa, leya Pitame.
ACT 2:40 Pitame pii londe lao pii renge wakale wakale dupwana kata wapuo lamaiyuo, Nakama dae wambu yulu koo pyuo karaminyi dupwa yaki nyepala lete wai pyao ipupwape leya.
ACT 2:41 Leyamopa yuu gii dokopa wambu akalisa rema daako ama malu wakasa (3,000) banya pii soo nyepala bapitisimo nyuo sukusa epeyami.
ACT 2:42 Dokopa nakamame aposele dupwana mana pii sokondali pyuo nenge yalya kando nao ateŋa lao pyuo peteyami.
ACT 2:43 Dokopa Anatumi siki nyiyamopa aposele dupwame yulu malu wambu dupwame kando yamarangwarami dopale pyuo lasaka pyuo kareyami dokopa wambu peparae monarena pakayami.
ACT 2:44 Dokopa Yesu kapa ingingi lao suu pyao mona maiyuo kareyami wambu dupwame elyambu pyuo pisipala nakama rangena bange dupwa peparae wambu peparaena lao reteyami.
ACT 2:45 Dopa pyuo yuu andape bange reteyami dupwa ropo pyao kana nyepala wambu aeya nayamo kareyaminyili pyuo mokwa soo maiyami.
ACT 2:46 Nakama yuu peparae kaeya nao tembole anda dokona role pyapeta pao nakamana anda dupwana borete nyuo kau lao nao mona karo anjiki pyuo kareyami.
ACT 2:47 Nakamame Anatu lakando mee wambu dupwame nakama kando rae maiyaminyipa kareyami. Dokopa yuu yangeyamo yaka lao Kamongome suu piyamuli pyuo wambu lapo lete wai pyao nyepapu piyamopa nakama kareyami dokona konda pipa piya.
ACT 3:1 Yuu mendepa ateŋa lenge gii dokopa neta damasa papeyamo sere keloke dokopa Pita Jonepa tembole anda dokona pulyuo peyambi.
ACT 3:2 Dokopa akali ene mandeyami dokopa kimbu kwaeyande siyande soo epeyami. Wamba dokopa yuu yangeyamo yaka lao akali doko tembole anda dowa mendena kingi Keyange lenge dokona wambu dupwa tembole andakare epo papa piyami dupwa kando kana mee jinya lao petena lao banya puu wambumi soo epo retapa piyami.
ACT 3:3 Baame Pita Jonepa epo tembole andakare pena piyambi dokopa kana jinya lao kee leya.
ACT 3:4 Kee leyamo dokopa Pita Jonepa dolapome kapu kyepala baa kandeyambi. Kandapala Pitame, Nambwa kandape, leya.
ACT 3:5 Leyamo dokopa akali dokome kana mende jerambi lao suu pyao nakamba kandaro siya.
ACT 3:6 Dopa lao suu pyao kandeyamopape Pita dopa leya. Nambana kana golope kana rao kuikui lasipi see nalyamo. See napyamopa mende wakale silyamo doko jilyu. Yesu Koraisa Nasarete range dokona kingi lao emba kata nyuo puu leto, leya.
ACT 3:7 Lapala Pitame banya kingi nyepala minyuo roya kareya. Dokopa banya kimbu kapepe kimbu lengepe aopa mee ingiya.
ACT 3:8 Dokopa wamyalyepala angi rolae roya karalu karo karapala kata pao tembole andakare nakamba role pyao kolando peyami. Pao baa pyakalyuo pyao Anatu lakando peya.
ACT 3:9 Dokopa baa kata pao Anatu lakando peyamo doko wambu dupwa peparaeme kandeyami.
ACT 3:10 Kandapala baa tembole anda kambu Keyange lenge dokona repeta pisipala bange kee lao petenge kandale dokolamo lao kando siyami. Kando sepala baa keta yulu piyamo doko kando mona nembo ayaka leyami.
ACT 3:11 Dokopa baame Pita Jonepa dolapo minyalamo pundapunda pyuo kareyamopa nakama anda kambu pyuo nyoko nyingi Solomonena lenge dokona kareyami dokona wambu dupwa peparae makando epo sukusa sukusa pyuo yako lao raleyami.
ACT 3:12 Dopa piyami doko kandapala Pitame wambu dupwa nakama boo pyao pii mende lamaiyuo dopa leya. Isaraele akali dupwa, nakamame mona nembapala nambwa kandaro soo karaminyi doko nakamame akipamo nambwa range porayapala renge dokomepe panda range poo pyasi ingyuo karambinyi renge dokomepe baa kata nyuo pena lalambinyi lao suu pyapala mona nembapala nambwa kandaro soo karamisi?
ACT 3:13 Aporakamemoo Aisake Jekope namwana rakange kyawa dupwamoo nakamana Anatu dokomeko banya Yulu Pingi akali Yesu doko yanga paupau lanyi pyambuya. Nakamame Yesu nyepala Pailate maiyaminyipa baame Yesu mokwaro lao suu piyamopape nakamame Pailatena lenge kambu dokona mata maiyami kande.
ACT 3:14 Anatumi baa yanga paupau lanyi pyambuyamopa wambo poo pyasi rolae pingi doko nakamame mata maipala akali koo mende wambu yango pyao kumakange doko peyakana leyami.
ACT 3:15 Lapala letena renge renge kuiyuo karenge doko pyao kumakayami. Pyao kumakayaminyipa kumuo paleyamopa Anatumi lete minyalyuo nyiya. Dopa piyamo doko namwame kandapala pii doko selapape lao langyuo rolelyamano.
ACT 3:16 Yesu banya kingi lao porainya renge dokome akali dake porainyi pyambalamo. Pyambwapyamo kandalyaminyi doko baa Yesu kapa ingingi lao suu pyapyasa pyaamo. Yesu kapa ingingi lao suu pyalamo dokome nakamana lenge kambu dokona lete papala karamo leya.
ACT 3:17 Yangonemoo, nakama nakamana rapu pingi akali dupwa opetae kamenge see nao piyami doko namba silyu.
ACT 3:18 Kamenge see nao piyaminyipa Anatumi banya poropeta akali dupwa peparae nambana Koraisa randa nara ingilyamo lao wambo pyongo piyamo leyami. Baa pyongo piyamo leyaminyili pyuo enakana piya.
ACT 3:19 Nakamana yulu koo dupwa kondapala Anatu dokona mona kapu kyerami dokopa baame nakamana koo dupwa kwuanyi nembaramopa isa para.
ACT 3:20 Dokome Kamongo baame nakama Anatunya Imambunya yulu dokona poraiyuo pyambwaramopa baame Koraisa doko rombo palyiyamuli pyuo pena lara. Doko baa Yesu dokonasa lao leto.
ACT 3:21 Anatunya poropeta akali yapasi dupwame wambo nolako leyamuli pyuo baa yake panda dokona Anatumi bange peparae alowa pyuo enenge ingyuo wasaramo gii dokopa isaro karara ingilyamo.
ACT 3:22 Moseseme pii dopa leya. Kamongo Anatumi namba nyuo rombo palyiya kande doko suu pyao nakamana yangonge karaminyi dokona mende yapo nyuo banya poropeta akali ingyuo rombo palyara. Baame nakama lamairamo pii peparae warombo serami.
ACT 3:23 Dokopa wambu kararami dokona mendeme Anatunya poropeta akali dokona pii see nara ramo doko see naramo akali doko kokwa soo nembarami leya.
ACT 3:24 Poropeta akali peparaepe poropeta Samyuelemoo dee enakana nolako lao kareyami dupwapeme yulu andake palira lao yuu gii dusipana suu pyao lao kareyami.
ACT 3:25 Anatumi Aporakame kando embena para pyao nyerene dupwa keta wambu peparae elya pyuo parami leya. Dokona ingyuo Anatumi poropeta akali keta lao kaeyamo dupwa nakama mokwa soo nyerami. Anatumi nakamana akali kyawa dupwa kando lalu lao leyamo dupwana pingyu nyeramioko.
ACT 3:26 Nakamame nakamana koo dupwa yaki nyepala elya pyuo parami dokona lao Anatumi banya Yulu Pyakamaingi Doko rombo palyapala nakama wambo jiya. Pitame dopa leya.
ACT 4:1 Pita Jonepame pii ene lao kareyambinyi dokopa purisi akali dupwape tembole anda yanda singi mupwa rapu pyuo kareyamo dokope Satyusi akali dupwape nakamba kareyambinyi dokona epapala,
ACT 4:2 nakambame wambu dupwa mana lamaiyuo Yesu lopo epeya dokona wambu lopo eparama ingilyamo lao kareyambi doko sepala imbwuayami.
ACT 4:3 Imbwuapala nakamba puu maiyapala lanyuo pao yuu kwuayasa rakya kambuyanda pyuo larama lao karapusi anda dokona mee pyambuyami.
ACT 4:4 Dopa piyaminyipape wambu malu pii soo kareyaminyi dokona kinyilyamo lao sepala Yesu mona maiyami. Dokona wamba kareyami dokona enakana sukusa pao konda pyuo peteyami akali peparae akalisa pao kingi paki daako ama malu wakasa (5,000) ingiya.
ACT 4:5 Dokona yangama dokopa nakamana rapu pingi akali dupwape kamongo dupwape, Mawa Pii mana lenge dupwape Jerusaleme dokona epo sukusa sukusa pyuo,
ACT 4:6 Purisi akali mupwa Anasa lenge dokomoo Kayapasa Jone Alekesandamoo purisi mupwana ree palu dupwa peparae opetae epo role pyao peteyami.
ACT 4:7 Pisipala nakamame akali dolapo sukusa pisiyami. Pisipala, Apinya porai renge raa lasi dokome panda apinya kingi lapala dopa pimbi? lao piso siyami.
ACT 4:8 Dokopa Pita banya monarena Imambu Poo Pyasi palyuo simbuyamopa dopa lao lamaiya. Wambunya rapu pingi dupwamoo Isaraele kamongo dupwamoo,
ACT 4:9 akali kimbu kwaenge doko baa elya pisi karamo dokona lao aki rengendeme baa mee karase lao epapu nambwa kando kambuyanda pyuo letamipi?
ACT 4:10 Renge dokona lao nakama peparaepe Isaraele wambu peparae dupwape selapa lao langilyu. Yesu Koraisa Nasarete range dokona kingi dokome baa mee ingyapyasa pilyamo. Yesu nakamame isa mamandona pyao palyiyaminyipa baa kumuo paleyamopa Anatumi lete minyalyuo nyiyamopa baame akali dake nakamana lenge kambu dokona karamo doko pyuo nyipyamosa mee ingilyamo.
ACT 4:11 Buku Baepolena pii lao dokopa, Akali kana anda pyuo kareyami dupwame kana mende koo ingilyamo lao suu pyapala nembeyami. Enakana kana doko anda donge dokona mupwa ingyuo epo siya doko suu pyao nakamame Yesu ramanyi nembeyami doko baa epapu mupwa ingyuo karamo.
ACT 4:12 Banya kingi dokomeoko iki isa wambumi lete wai pyao parami. Kingi wakale wakale dupwa laminyipape namwa Yesunya kingi dokome iki letena renge kando nyerama leyambi.
ACT 4:13 Dokopa Pita Jonepa sukuli yulu soo gisa napala nakamba mee akali karo eŋa nembo leyambi doko kandapala nakama ayaka leyami. Lapala nakamba Yesu role pyao karengendelyamo lao kandeyami.
ACT 4:14 Dopa lao kandeyaminyipape akali kimbu kwaeyamo elya pisi doko nakamba role pyao kareyami doko kandapala akema larami ingya naya.
ACT 4:15 Ingya nayamopa akali dusipa wato lao peteyami anda doko yaki nyuo kamanda pena lapala nakama range sukusa wato lao, Akali dolapo apa pimane? leyami.
ACT 4:16 Lapala, Nakamba keta renge palipyamo yulu andake lasaka pyuo pimbi doko panembena sipyamopa Jerusaleme wambu peparae kandelyaminyi dokona namwa dopa pii nambi larama ingya nalyamo.
ACT 4:17 Ingya napyamopape pii doko kama neta raeya nana lao akali dolapo Yesunya kingi lao wambu mendali dee kamba lamaiya nana lao lamanale leyami.
ACT 4:18 Dopa lapala nakamba epena lapala Yesunya kingi laope dee kamba pii lao mana laa nalu nao nana laope lamaiyuokondali piyami.
ACT 4:19 Dopa leyaminyipape Pita Jonepa dopa lao isingi leyambi. Anatunya lenge kambu dokona nambwame banya pii kaepala nakamana pii seramba ramo doko rolae panda daa lao nakama rangeme suu pyalapape.
ACT 4:20 Dokona lao nambwame angi kando siyamba dokona laa naramba ingya nalyamo leyambi.
ACT 4:21 Dokopa nakamame nakamba kaena lao dee kamba pyalana pipala aki rengendena nakamba puu mairama lao pii angi larami ingya naya. Mee wambu dupwa imbwuarami lao suu pyapala nakamba kanjakala mee pena leyami. Wambu dupwa peparaeme Anatu akali pyuo nyipyaŋa lao baa lakando kareyaminyisa saka nayami.
ACT 4:22 Akali kimbu kwaeyamo doko baa akali andapaende ee kana akalisa pao akalisa kisima kareyamopa mee ingiya.
ACT 4:23 Nakamba mokoyami dokopa nakamba nakambana puu minyingi peteyami dokona papala purisi akali mupwa dusipamoo kamongo dupwamoo nakamba kando lamaiyami pii doko lamaiyuo pakana palyuo lao kareyami.
ACT 4:24 Lamaiyuo pakana palyiyami pii doko sepala nakamame mona mendaki palyapala pii ketae palyuo Anatu kando dopa pyuo lamaiyami. Kamongo Mupwa, embame yake yuupi ipwa kotape dee bange peparae dupwa opetaepe pyuo wasiipya.
ACT 4:25 Emba Imambu Poo Pyasi dokome namwana rakange Dapiti embena yulu pingi akali doko pyongo pyao lamainyipa dopa leya. Wambu rara wakale dupwa akipamo nakama imbumi kumapala yanda pii kopyali dupwa lao kareyamisi?
ACT 4:26 Yuunya kamongo akali dupwame wato nengyango lapala Kamongo dokonape dee Koraisa dokopa kando yanda pyala peyami.
ACT 4:27 Doko suu pyao embena Yulu Pingi akali poo pyasi Yesu emba rombo palyii doko yuu dakena wambu dupwame malu palyuo nengyango lao kareyami. Erotemoo Pondiasa Pailatemoo wambu rara wakale dupwape Isaraele wambu dupwape nakama mendakinya palyuo,
ACT 4:28 embame porai wakasa karenge dokome yulu pirami dupwa wambo suu piinyili pyuo kata dokonako palyuo mee kamenge wato leyami.
ACT 4:29 Dopa pyuo karapala epapu namwa pyalana pyuo karami doko Kamongo emba kandape. Kandapala embame namwa embena yulu pingi akali dupwa porainyi pyambwarenepa eŋa pyapala lamaimanale.
ACT 4:30 Embena Yulu Pyakamaingi akali poo pyasi Yesu dokona kingi larama dokopa emba kingi pyasinju lapala wambu pyuo nyuo yulu andake wambumi kanda nange dupwa kongwalu palyuo pyuo karakape.
ACT 4:31 Nakama dopa lao ateŋa lao oteyaminyi dokopa elyambu pyuo peteyaminyi dokona yuusili minyiya. Dokopa Imambu Poo Pyasi nakama keta palyuo simbuyamosa nakama peparae eŋa pyapala Anatunya pii lao kareyami.
ACT 4:32 Wambu dupwa Yesu kapa ingingi lao suu pyao mona maipala peteyami dupwame suu pingi mendaki palyuo yalya kando peteyami. Nakamana bange dupwa nambana iki lao suu pyaa nayami. Bange dupwa pyasapala wambu peparaena ingyuo silyamo lao suu piyami.
ACT 4:33 Dokopa aposele dupwame Kamongo Yesu lopo epeyamo kandeyama lao porayapala leyami. Dokopa nakama peparae ama elyape mee keyange ingyuo kareyami.
ACT 4:34 Dokopa nakamana yuu panda dupwape anda dupwape ropo pyao kana nyepala minyuo aposele dupwana kimbu siyamo dokona reteyami. Reteyaminyi dokopa nakama wambu lapo aeya nayamo kareyaminyili pyuo mokwa soo maiyami. Dokona mendali aeya nayamo kara naya.
ACT 4:36 Dopa pyuo piyaminyipa akali Josepe baa Lipae rara yuu Saiporasa range doko (aposele dupwame baa kando Banapasa leyami. Kingi doko ambeambe kiso lengena ikinyingi suu pyao leyami.)
ACT 4:37 Akali dokome banya yuu doko ropo pyapala kana nyepala minyuo aposele dupwana kimbu siyamo dokona pao reteya.
ACT 5:1 Dopa piyamopape akali mende banya kingi Ananayasa lenge doko banya etenge Sapaira lenge dokopa nakambana yuu mende ropo pyao kana nyepala
ACT 5:2 Ananayasa baame banya etenge soo peteyamopa kana lapo yalu pyuo retapala lapo iki minyuo aposele dupwana kimbu siyamo dokona pao reteya.
ACT 5:3 Dopa pyuo reteyamo dokona Pitame dopa leya. Ananayasa, Akipamo Sataneme embena monarena palyuo simbwapyamopa embame Imambu Poo Pyasi kando kyambo lao embena yuu ropo pyao kana nyipinyi dupwana lapo yalu pyuo retapi?
ACT 5:4 Yuu doko emba rangena siya kande. Yuu doko ropo pyao kana nyepala kana doko dopa pirupi dapa piru lao emba rangena yulu daase? Emba monarename apa piru lao suu pyapala minyoko pyuo pipisi? Emba isa akali dupwa kando kyambo lapisa pii nalyamo. Emba Anatu kando kyambo lapisa pilyamo leya.
ACT 5:5 Pita pii dopa lamaiyamo dokopa Ananayasa pii doko sepala baa aopa lunguru sepala kumuya. Dokopa baa kumapyalyamo lao siyami dupwa nakama pakame kumuyami.
ACT 5:6 Dokopa wanyane akali dupwa sipurapala baa nyuo komau dokome yama pipala soo pao malu piyami.
ACT 5:7 Enakana yuu kuki lama kote yuu sepeyamopa banya etenge doko dopa pyuo piyamo doko see napala kamenge andakare dokona kolando epeya.
ACT 5:8 Epeyamo dokopa Pitame baa lamaiya. Yuu ropo pyao kana nyimbi dopaleko panda daase? namba langipi leya. Dokopa enda dokome dopa lao, Kinyi emba letene doko leya.
ACT 5:9 Dopa leyamo dokopa Pitame baa lamaiya. Nakamba apa piramba lao Kamongona Imambu doko makande pyuo mendakinya palyuo kyambo lambisi? Emba see. Akali dupwame wambo embena akalinya malu pyaaminyi dupwa malu pipala dakepa anda kambu dokona yuu kisakasi lao ipwuaminyi. Akalinyi soo puminyi doko suu pyao emba dopako pyuo dee soo potomo poominyi lyakande leya.
ACT 5:10 Dokopa enda doko banya kimbu siyamo dokona aopa lunguru sepala kumuya. Dokopa wanyane akali dupwa andakare epapala enda doko kumasi siyamo doko kando nyepala nyuo soo potomo papala banya akalingi malu piyami dokona maki pyuo malu piyami.
ACT 5:11 Dopa pyuo piyamo sepala Elyambu Pingi wambu dupwa peparaepe mee wambu dupwa peparaepe pakame kumuyami.
ACT 5:12 Aposele dupwame wambumi pii nange yulu kando yamarangwarami dopale dupwa pyuo kareyami. Dopa pyuo nakama peparae Solomonena tembole anda kambu pyuo nyoko nyiyami dokona malu palyuo kareyami.
ACT 5:13 Dokona menge dupwa aposele dupwa pipya role pyao karalana pakayami. Pakayaminyipape mee wambu dupwame aposele dupwa nyuo ketae pyambuyami.
ACT 5:14 Enda akalipi ama malu wakasa Kamongo doko kapa ingingi lao suu pyapala mona maiyaminyipa sukusa epapala konda pyuo kareyami.
ACT 5:15 Dopa pyuo kareyami dokopa wambu dupwa kata dokona soo pao luu palenge ratepe warakyaro palengepe dupwana reteyami. Pita kata epo paramo dokopa banya imambu dokome anga pingi wambu lapo sembapyali lao suu pyapala dopa piyami.
ACT 5:16 Dokopa Jerusaleme sukusa siyamopa taone wakale dupwana palenge wambu dupwa Jerusaleme dokona sukusa epo nakamana anga piyamo wambu dupwape imambu kopyali soo pyale leyamo dupwape soo epeyami. Soo epeyaminyi dokopa Anatumi nakama peparae pyuo elya pyuo nyepa piya.
ACT 5:17 Nyepa piyamo dokopa purisi akali mupwa dokomoo akali baa role pyao karo suu pingi mendakinya palyapala Satyusi lenge dokona ree palu ingyuo kareyami dupwa peparaepe sipurapala ama yango palyuo karo
ACT 5:18 aposele dupwa puu maipala karapusi anda mee wambu pyambungi dokona pyambuyami.
ACT 5:19 Pyambuyaminyipape kukwa dokopa Kamongona aŋala mendeme karapusi anda kambu dusipa lumbwapala neta nyuo nembeya. Nembapala dopa lamaiya.
ACT 5:20 Wambu dupwa enenge ingyuo lete kararami lao tembole anda dokona boo pyao lamaiyuo karala pupwape leya.
ACT 5:21 Pii doko sepala nakama neta musi musi gii pyakaeyamo dokopa tembole anda dokona kolando papala mana lamaiyuo kareyami. Yangama dokopa purisi akali mupwa dokomoo baa role pyao karo suu pingi mendakinya palyuo kareyami dupwape nakama sukusa sukusa pipala Juu akali wato lenge duwpa peparae wato lamana lao epena leyami. Lapala aposele dupwa karapusi anda dokona kararami lao suu pyapala nyela pena leyami.
ACT 5:22 Leyaminyi dokopa yanda singi dupwa papala karapusi anda dokona aposele dupwa pana nayaminyipa kandeyami. Kandapala lambuo papala dopa leyami.
ACT 5:23 Karapusi anda dokona kii porai mende palipyamopa yanda singi anda kambu repeta rapu pyuo karenge dusipa mee rapu pyuo karaminyipa anda kambu doko kii upi laro karapyamopa doko lumbwapala kandamwano dokopa nakama pisi naminyi kandamwa, leyami.
ACT 5:24 Dokopa yanda singi tembole anda rapu pyuo karenge dupwana mupwa dokomoo purisi akali mupwa dusipape pii doko sepala aposele dupwa apa pipala pumi lao saka napala yulu doko rengya apa pirandena pipya leyami.
ACT 5:25 Dokopa akali mendeme epapala nakama dopa lamaiya. Wamba karapusi anda dokona pyambwami akali dupwa epapu dakepa tembole anda dokona wambu dupwa mana lamaiyuo karaminyi, leya.
ACT 5:26 Dopa leyamo dokopa yanda singi mupwa doko yanda singi lapo dupwa opetae role pyao papala aposele dupwa nyepala lanyuo epeyami. Nyepala dokopa namwa mee wambu dupwame kana dokome pyasaraminyi lao pakapala yanda singi dupwame aposele dupwa pyaa nao elya kalo lanyuo epeyami.
ACT 5:27 Lanyuo epapala wato andake lenge akali dupwana lenge kambu siyamo dokona pisiyami. Pisiyaminyi dokopa purisi akali mupwa wakasa baame nakama piso soo dopa lamaiya.
ACT 5:28 Namwame nakama Yesunya kingi lao mana laa nalapape langyuokondali piyama kande. Piyamanopape nakama nakamana mana pii doko Jerusaleme dokona lao kapa kapa pipala akali dokona ranjama doko namwa keta sinya lao karaminyi leya.
ACT 5:29 Dopa leyamo dokopa Pitape aposele dupwa opetaepeme isingi dopa pyuo leyami. Isa akalinya pii dupwa see napala Anatu laramuli pyuo kararama ingilyamo.
ACT 5:30 Nakamame isa mamando dokona Yesu pyao palyiyami doko namwana rakange kyawa dupwame suu pyao kareyami Anatu dokomeko baa minyalyuo nyiya lyakande.
ACT 5:31 Minyalyuo nyepala Anatumi banya kingi rolaerename baa mupwa ingyuo karena lapala Isaraele wambu dupwa nakama mona enenge palyalapa, koo dupwa nyuo kame sakasi sera lao karo busu pyuo baa Lete Wai Pyao Nyingi ingyuo karena leya Anatumi.
ACT 5:32 Yulu doko namwa kandapala epapu lao rolelyamano. Namwa iki laa nalyamano. Anatumi wambu dupwa baa letamuli pyuo karenge dupwa Imambu Poo Pyasi maingi dokome opetaeko yulu dokona lao rolenge, leyami aposele dupwame.
ACT 5:33 Dopa leyaminyi pii doko sepala nakamame aposele dupwa kando imbumi kumapala pyamwali lao suu pyao peteyami.
ACT 5:34 Dopa lao peteyaminyipa Parisi akali wato lao peteyami dokona mende banya kingi Gamaliele lengende Mawa Pii mana lenge akali wambu dupwa peparaeme baa lakanda minya minya pyuo kareyami dokome roya karapala disaepole dusipa kamanda karenale lao lanyuo pena leya.
ACT 5:35 Lapala akali peteyami dupwa lamaiyuo dopa pyuo leya. Isaraele akali dupwa, akali dusipa apa pirama lao suu pyaokondali pyuo piso kando pipwape.
ACT 5:36 Wamba dokopa akali Tiutasa lenge baa sipurapala wambu dupwa sinya lao namba akali mupwa lao kareya. Dokopa akali ama malu (400) banya pii sepala baa kareyamo dokona role pyapeta kareyami. Kareyaminyipape wambu menge lapome baa pyao kumakayami. Pyao kumakayaminyi dokopa akali role pyapeta kareyami dupwa bolombalo lao peyami dokopa akali dokona yulu pyakuiya.
ACT 5:37 Pyakuiyamopa enakana wambu dupwana kingi pepa piyami yuu gii dokopa akali mende Jutasa lenge yuu Galili range dokome sipurapala wambu lapo banya yulu piyamuli pyuo pimana epena lao suu longo nyiya. Baa opetae piyaminyi kumuya. Kumuyamo dokopa wambu banya yulu nyuo piyaminyi dupwa peparae bolombalo lao rali piyami.
ACT 5:38 Dokona suu pyao akali dusipa mee karena lao kandanyi lyakao karo yulu mende pii nalapape. Akali dusipa dopa pirama dopa pirama lao karaminyi renge doko mee isa akalinya yulu ramo doko mee pyakuiyaro palira.
ACT 5:39 Doko Anatunya yulu ramo doko nakama meme pinya nembo saka narami ingilyamo. Doko Anatunya yulu ramo doko nakama dae petaminyi dupwa Anatupa lao sisi nyuo kararamisa pira, leya Gamalieleme.
ACT 5:40 Dopa leyamo dokopa nakama banya pii soo rape rape lao karo aposele dupwa epena lapala pyaroko pyapala Yesunya kingi doko laa nana lao lamaiyuokondali piyami. Dopa pipala mokoyami.
ACT 5:41 Dokopa aposele dupwa wato lenge anda doko yaki nyepala pao dokopa Yesunya kingi dokona reke lao moŋo nyimwasa pilyamo lao suu pyapala ama rae maiyuo anda peyami.
ACT 5:42 Papala tembole anda dokonape mee anda dupwanape Yesu baa Koraisa ingyuo karamo lao mana lao boo pyao kareyami. Yulu doko yuu mende yaki nyuo kaeya napala yuu peparae lamaiyuoko kareyami.
ACT 6:1 Yuu gii dusipana disaepole dupwa konda konda pyuo kareyaminyi dokopa Giriki pii lenge Juu wambu dupwame mee Ipuru pii lenge wambu dupwa kando mumu leyami. Aposele dupwame wambu nenge see nayamo peteyami dupwa nyiso yuu yangara kwuara piyamo dokopa nenge mokwa soo maipa piyami dokopa Giriki pii lenge enda waiya dupwa kame sepala yuu lapo nenge maiya nayami dokona Giriki pii lenge wambu dupwa mumu leyami.
ACT 6:2 Dopa lao kareyami dokopa aposele akali akalisa ipisu lama kareyami dupwame disaepole dupwa peparae epo sukusa sukusa pinya leyami. Nakama epeyaminyi dokopa dopa lamaiyami. Namwa Anatunya pii boo pyao letamano yulu doko kaepala taepo dupwana nenge reto mokwa soo maiyuo isaro pyuo kararama ramo doko rolae ingya nalyamo.
ACT 6:3 Yangonemoo, akali lapo yulu doko pinya lao rombo palyamana. Namwa role pyao petaminyi dokona akali yanda ipingi nyero yapalyuo nyelapape. Mona palenge akali nakamana monarename Imambu doko simbuo palipyamopa soo rolo karaminyi dopakale nenge mokwa singi yulu doko pinyale lao yapalyuo nyelapape.
ACT 6:4 Dokopa namwa ateŋa lao mana pii boo pyao lao karo yulu dolapona iki suu pyao pyuo kararama leyami.
ACT 6:5 Leyaminyi dokopa wambu malu mee kareyami dupwa peparaeme pii doko soo rae maipala akali dupwa rombo palyiyami. Sitipena baa Anatu kapa ingingi lao suu piyamo suu pingi doko Imambu doko banya monarena palyuo simbuya baamoo Pilipa Porokorasa Naikena Taimone Pamenasa Nikolasa baa Juu daa rara wakale dokome Juu wambunya misi pii singi yuu Andioko range dokomoo akali dusipa rombo palyiyami.
ACT 6:6 Rombo palyapala akali dusipa aposele dupwana lenge kambu siyamo dokona karena leyaminyi dokopa aposele dupwame nakamana kingi nakama ketae reto ateŋa lakamiyami.
ACT 6:7 Dopa pyuo piyami dokopa Anatunya pii doko waiya lao raeyo peya. Dokopa wambu malu disaepole ingyapala Jerusaleme misi dokona konda pipala ama malu kareyami. Dokopa purisi akali malu Yesunya yulu pete pete lao pyuo kareyami.
ACT 6:8 Dokopa Sitipena banya monarena anjiki pingi rengepe porainya rengepe palyuo simbuyamopa mee wambu dupwa kareyami dokona karo yulu andake pyuo wambu dupwame kando yamarangwarami dopale pipa pyuo kareya.
ACT 6:9 Dokopa Sairini wambu Alekesandia wambu yuu Silisia wambu yuu Esia wambu dupwape nakamana sinakoke anda doko Kiiramo Pasi Wambunya Misi Lengeŋe lenge dupwana lapo sipurapala Sitipena kando apiyanda piyami.
ACT 6:10 Apiyanda pipala baa Imambu dokome pyongo piyamopa pii rolae leyamo dokopa nakamame baa nyuo kalyuo lalana saka nayaminyipa nakamana pii doko bulumbulu piya.
ACT 6:11 Nakama kyambo lenge akali lapo lanyuo epeyaminyipa nakamame Sitipena baame Mosese dokonape Anatu dokonape kokwa soo lapyamo simwa leyami.
ACT 6:12 Dopa lao nakamame dopa pyuo mee wambu dupwape kamongo dupwape Mawa Pii mana lenge akali dupwape nembo nembo pyuo kalena palyuo lamaiyami. Lamaiyaminyi pii doko sepala Sitipena nyepala wato andake lenge dokona baa lanyuo peyami.
ACT 6:13 Lanyuo pao karapala kote lao akali lapome baasa kando kyambo lena leyami. Dokopa akali dusipa dopa lao kyambo leyami. Akali dakeme namwana tembole anda yapasi dokonape Mosesena Lowa dokonape yuu peparae kokwa soo lenge leyami.
ACT 6:14 Sitipena baame Yesu Nasarete range dokome tembole anda doko lalyinyi nembapala Moseseme yulu keyange lasaka piyamo dupwa kaepala wakale enenge lapo jero leyamuli pyuo lapyamo simwa leyami.
ACT 6:15 Dokopa akali wato andake lenge dokona peteyami dupwa peparaeme Sitipena kandaro piso banya lenge kambu aŋalana lenge kambu dopakale ingiyamo kandeyami.
ACT 7:1 Dokopa purisi akali mupwa baa, Pii lami kandapi doko kinyisi? leya.
ACT 7:2 Leyamo dokopa Sitipena dopa leya. Yangonemoo rakanemoo nambana pii dake selapape. Namwana rakange kyawa Aporakame yuu Arane ene papa nao yuu Mesopotemia paleyamo dokopa Anatu yanga paupau lao karenge doko baa keta paneyamo kandeya.
ACT 7:3 Dokopa Anatumi baa dopa lamaiya. Embena yuupi embena wambu ree palupi yaki nyepala yuu mende nambame lasaka piru dokona pupi leya.
ACT 7:4 Leyamo dokopa baa yuu Kalitiya doko yaki nyepala yuu Arane dokona pisa peya. Dokopa banya rakange kumapeyamo enakana yuu doko yaki nyepala baa yuku epo namwa epapu palamano yuu dakena epeya.
ACT 7:5 Epeyamopape Anatumi baa yuu lapo banya ingyuo sera alo aopa mai naya. Kimbu makande pipalape kuki lama dokore mai nayako. Mai napala, Rakyame emba joo embena ree palu maiyakao piru lao lalu lao leya. Aporakame wane wanakepe ene manjapa nayamopape Anatumi dopa leya.
ACT 7:6 Lapala mende leya. Ee kana malu mee (400) akali mengena yuu dokona embena ree palu dupwa upunili ingyuo kararami. Dokopa yuu range akali dupwame nakama puu maiyuo yulu nyuo maiyuo lekeleke rena lao pyuo kararami.
ACT 7:7 Dokopa wambu nakama puu maiyuo yulu nyuo maiyuo kararaminyi dupwa nambame kote lao nakamana yanengena randa pinya lao piru, leya Anatumi. Enakana embena ree palu dupwame yuu doko yaki nyepala yuu dakena epapala nambana kingi lao pisirami leya.
ACT 7:8 Lapala, Nambapa embena wambu ree palu dupwa pipya mona mendaki palyuo kararama. Namba dopa pyuo lalu lao leto doko kame see nalapape lao nakamana yanenge kongwalu palyuo kalomalapape, leya Anatumi. Enakana Aporakame baame Aisake mandeya. Manjipala yuu akalisa mange lama karo epo peyamopa banya yanenge doko kalomeya. Dopako pyuo Aisake baame Jekopena yanenge kalomeya. Enakana akali rara kyawa akalisa ipisu lama dusipana yanenge awali pyuo kalomeyako.
ACT 7:9 Enakana akali kyawa dusipame yangonge Josepe yango palyiyami. Yango palyapala baa nyuo Isipi wambu dupwana kendemande inginya lao maipala kana mone nyiyami. Dopa piyaminyipape Anatumi baa nyiso kareya.
ACT 7:10 Nyiso karo Josepe baa keta randa epeya dupwa ramanyi nembakamyuo kareya. Isipi wambunya kiŋi Perao banya lenge kambu dokona Anatumi Josepe elyape inginyi pyambuo singi renge maiya. Dopa piyamo dokopa Perao baame Josepeme Isipi wambunya gapomane mupwa ingyuo karo banya anda yuupi iso karena leya.
ACT 7:11 Enakana yuu Isipi dokope yuu Kenane dokope yuu dolapona peparae lopo andake mende siya. Dokopa yuu range wambu dupwa randa andake nao kareyami. Dokopa namwana rakange kyawa dupwame nenge anjarae nyerama lao koto saka nayami.
ACT 7:12 Saka nayaminyipape yuu Isipi dokona kenapa malu silyamo leyami pii doko sepala Jekope baame namwana rakange kyawa dupwa kanda soo dokona pena leya.
ACT 7:13 Nakama pao epapala enakana dee kamba peyaminyi dokopa Josepeme banya kingi rolo lamaiya. Lamaipala nakama lanyuo pao Perao kandena lao lakara piyamo dokopa Peraome nakama Josepena ree palulyamo lao soo gisiya.
ACT 7:14 Dokopa Josepeme banya rakange Jekopemoo banya rara dupwa nakama wambu akalisa yanda ipingi nyero dee ipisu kingi paki dupwa peparaepe baa kareyamo dokona epena leya.
ACT 7:15 Dokopa Jekope yuu Isipi dokona lano peya. Yuu dokonako palyuo karo namwana akali kyawa dupwa kumuyami.
ACT 7:16 Dokopa yuu Sikeme dokona wamba Aporakame baame yuu Sikeme range akali Amona ikinyingi dusipa kana lapo maipala kana anda mende ropo pyao nyiya dokona Jekope baape dee rakange kyawa dupwa soo papapu andakare dokona malu pipa piyami.
ACT 7:17 Enakana Anatumi wamba Aporakame kando yulu mende pirunya lamaiyuo kaeyamuli pyuo yuu gii repeta pyaka siyamo dokopa namwana wambu dupwa yuu Isipi dokona konda konda pyuo wai kiso ando nyimbuyami.
ACT 7:18 Ando nyimbuo kareyami dokopa Isipi wambu dupwana kiŋi mende wakale ingyuo sipuro ando kareyamo dokome Josepena kingi see naya.
ACT 7:19 Baame namwana wambu dupwa kando panga soo pyuo karo namwana rora ambasupi dupwana wane nyaŋa dupwa lete pisi nanale lao neta nembo kaena lao pyalana pyuo kareya.
ACT 7:20 Dopa pyuo lao kareyami gii dokopa Mosese mandeyami. Baa Anatunya lenge kambu dokona keyange ingyuo siya. Dokopa banya rakangena anda dokona kana remana yalu pyuo retaro peteyami.
ACT 7:21 Anda yaki nyuo kama reteyami dokopa Peraona wanenge dokome baa nyepala mondo pyuo banya ikinyingiŋi lao banya anda retaro peteya.
ACT 7:22 Dokopa Isipi wambu dupwame nakamana yulu palengenyili pyuo Mosese mana lamaiyuo kareyami. Lamaiyuo kareyaminyi dupwa sepala baa pii palenge akali ingyuo ando pao yulu renge dupwa soo gisapala pyuo kareya.
ACT 7:23 Mosese baa ee kana akalisa kisima karapala yuu mendepa Isaraele wambu yango yako lala peya.
ACT 7:24 Papala Isipi akali mendeme Juu akali mende piyamo kandeya. Kandapala akali piyamo doko nyiso Isipi akali doko isingi pyao kumakaya.
ACT 7:25 (Pyapala banya yangonge dupwame Anatu baame nakama nyisala puu leyamopa epapala karo doko soo manjo nyerami lao suu piya. Dopa lao suu piyamopape nakama Anatumi baa keta nakama nyiso kiiramo lanyuo paramo doko see nayami.)
ACT 7:26 See nayaminyipa dokona yangama Isaraele akali lama yango sukusa pyakando pyuo kareyambi dokopa baa epeya. Epapala baa kanya karo puu minyuo karambili yaka lao suu pyapala, Anelapo, nakamba ane yangonge dokona akipamo nakamba kopetame pyakando pyaambinyi? leya.
ACT 7:27 Leyamo dokopa akali banya yango kopetame pyao kareyamo dokome Mosese suu lanyi nembapala dopa leya. Apimi emba namwana rapu pyuo kote singi akali ingyuo karape leyase?
ACT 7:28 Embame kwuaka Isipi akali doko pyao kumakapi kandapi doko suu pyao namba pyao kumakapuli lao pilisi? leya.
ACT 7:29 Pii dopa leyamo dokopa Mosese ralo yuu Mitiane dokona yuku papala peteya. Yuu dokona karo dokopa wane lama mandeya.
ACT 7:30 Ee kana akalisa kisima epo papeyamo dokopa yuu kyau Sainai lenge dokona yuu muiyane mendena Mosese kareyamopa aŋala mende dokona pano epo isa reke karenge pusinai mendena isare ulingi nyuo rao kareyasa dokona sukusa aŋala doko epo panembena kareyamo kandeya.
ACT 7:31 Dokopa Moseseme kandapala yamarangyuo mona nembeya. Enakana repetale kandala peyamo dokopa Kamongome pii mende leya.
ACT 7:32 Namba Anatu embena rakange kyawa dupwa Aporakamemoo Aisakemoo Jekopemoo suu pyao kareyami dokoko karo leya. Leyamo dokopa Mosese walu walu lapala kandalana pakame kumuya.
ACT 7:33 Dokopa Kamongo dokome baa dopa lamaiya. Emba karene yuu dolo yapasi ingilyamo dokona kimbu suu neta nyinya leya.
ACT 7:34 Lapala, Kinyi, nambana wambu dupwa yuu Isipi dokona lekeleke rao karena lao pyuo karaminyipa ee lao yasoko nao karaminyi doko kando sepala nakama nyisalana epelyo. Dakepa emba yuu Isipi dokona puu lalana epano leya.
ACT 7:35 Sitipename nakama kando, Nakamba Isaraele wambu dupwame wamba dokopa Mosese kando, Apimi emba namwana rapu pyuo kote singi akali ingyuo karape leyape? lao kilya kando leyami. Leyaminyipape akali mendaki Mosese dokoko aŋala mende isa palunya isare rao kareyamo dokona sukusa kareyamo kandeyamopa Anatu baame nakama Isaraele wambu dupwa rapu pyuo karo kiiramo nyuo lanyuo pena leyapya.
ACT 7:36 Akali dokomeoko Ipuru wambu dupwa Isipi kareyami yuu doko nakama nyuo neta lanyuo peya. Baame yuu Isipi dokonape ipwa kota Kone lenge dokonape yuu muiyane ee kana akalisa kisima kareyami dokonape yulu andake wambu dupwame kando yamarangwarami dopale pyuo lasaka pyuo kareya.
ACT 7:37 Mosese baameko Isaraele wambu dupwa dopa lamaiya. Anatumi namba nyuo rombo palyiya kande doko suu pyao nakamana rara dokona akali mende banya pii nolako lao karena lao enakana rombo palyakara, leya.
ACT 7:38 Baako Isaraele wambu dupwa yuu muiyane dokona elyambu pyuo peteyami dokopa namwana rakange kyawa role pyao pisipala yuu kyau Sainai lenge dokona aŋala mendeme baa kando pii mende lamaiyamopa kareya. Baame pii kyakana renge palenge dupwa Anatumi namwa langinya lao lamaiyamopa siya.
ACT 7:39 Lamaiyamo siyamopape namwana rakange kyawa dupwame sili see nale lao banya pii soo nembapala yuu Isipi dokona kapu kyepala dee pumwali yaka lao suu piyami.
ACT 7:40 Nakamame akali Erone kando lamaiyuo, Mee bange lapo namwana anatu ingyuo pyuo wasakape. Bange dupwa wambo paramopa namwa enakana kapa parama. Mosese yuu Isipi yaki nyepala namwa lanyuo epeya doko epapu anja karase lao namwa soo saka nalyamano, leyami.
ACT 7:41 Lapala bulamakao ikyane mende dopale pyuo wasiyami. Pyuo wasapala doko anatu ingilyamo lapala mena pyao kiso kingi lao kareyami. Rangena kingimi pyuo wasiyaminyipape bange doko kyanyi kando ketae pyambuyami.
ACT 7:42 Dokopa lao Anatumi nakama yaki nyuo kaeyamosa nakama yakena bui kanape dupwa kingi lao mona kando kareyami. Dokona lao poropeta akalinya pii mende palamo. Doko nakama Isaraele rara dupwa nakama yuu muiyane dokona ee kana akalisa kisima karo mena pyao kiso maiyami doko daa nambasa lao jiyaminde daa.
ACT 7:43 Nakama Molokona kingi lao banya tembole anda komaumi wasiyami doko minyuo papyuo kareyami. Dee bui mende kingi Orepane doko makande minyuo bange mende wasiyami doko kingi lao kareyamioko. Nakama Anatu kaeyapala bange dusipa wasapala kingi lao kareyami dokona nakama yuu Bapilone dumurena nembaro ingilyamo leya.
ACT 7:44 Anatumi Mosese dopa pyuo pinya lao tembole anda lasaka piyamo dokonako palyuo pinya leyamuli pyuo piyami. Anatu karenge tembole anda komaumi wasisi doko yuu muiyane dokona lanyuo papiyami.
ACT 7:45 Anatumi rara menge dupwa pyao ralinyi nembeyamo dokopa namwana rakange dupwa Josua pale pale komau anda doko lanyuo rara menge dupwana yuu dupwa nyiyami. Enakana dokopa Dapitimi komau anda doko nyiya.
ACT 7:46 Anatumi Dapiti kyanyi kandeyamopa Dapitimi tembole anda mende pinya lao rakange kyawa Jekopena Anatu dokonako piso siya.
ACT 7:47 Piso siyamopape baa angingyuo pii naya. Ikinyingi Solomone dokome angi doko piya.
ACT 7:48 Piyamopape Anatu Ama Ketae Karenge dokome mee akalinya kingimi anda pingi mendena angingyuo pali nange. Dokona suu pyao Antunya poropeta akalinya pii dopa lao palamo.
ACT 7:49 Yake doko nambana kiŋinya isa petenge rate silyamo isa yuu doko nambana kimbu kararo petenge. Anda apiyakale mende pyakarami? letamo Kamongome. Yuu anjukundena palirusi?
ACT 7:50 Nambame rangena kingi dokome bange peparae pyuo wasa nayose?
ACT 7:51 Sitipename lao, Dopa lao palipyamopa nakama wambu mata enokwaro piso monarena simbi simbi pyuo kalena palyuo see narama lao Imambu Poo Pyasi dokopa sisi nyuo karaminyi leya. Nakamana rora ambusipi pyuo kareyaminyili pyuo karaminyi.
ACT 7:52 Anatunya poropeta akali dupwa kareyami dokona anjukunya mende nakamana rakange dupwame lekeleke rena lao laa nayamisi? Yulu rolae pingi akali doko epara lao wambo wai nembo kareyami dupwa nakamana rakange dupwame pyao kumakapa piyami. Enakana yulu rolae pingi doko epara leyami doko epeyamo dokopa nakamame mata kando lapala pyao kumakayamipya kande.
ACT 7:53 Anatunya lowa keyange aŋala dupwa keta epeyamo sepala dupwa nakama rangeme warombo see nayami, leya Sitipename.
ACT 7:54 Dopa leyamo pii doko sepala nakama imbumi kumapala baa kando nenge ginyi ganyi leyami.
ACT 7:55 Dopa piyaminyipa baame monarena Imambu Poo Pyasi palyuo simbuyamopa yake dulu kandaro sepala Anatunya yanga paupau lenge dokope Yesu Anatunya kingi rolaerena kareyamo dokope kandeya.
ACT 7:56 Kandalapa, Epapu dakepa yake dulu lumbwapyamopa Ikinyingi Akali Anatunya kingi rolaerena karapyamo kandelyo leya.
ACT 7:57 Dopa leyamopape nakama pii porakaiyuo lapala nakamana kale dupwa upi lapala kapa kapa pyuo makandapala baa minyareyami.
ACT 7:58 Minyarapala taone dokona kame netarena dokona suu lanyi neta pyambwapala kana dupwame pyao kumakayami. Dokopa wamba kambuyanda piyami dokopa akali lapo baasa kando leyami dusipame nakamana pee pingi komau dusipa wanyane akali mende kingi Sole lenge dokona kimbu siyamo dokona reteyami.
ACT 7:59 Retapala Sitipena kana dupwame pyao kumakao kareyami dokopa baa, Kamongo Yesu, nambana imambu nyakape, lao ateŋa leya.
ACT 7:60 Lapala wapambu kararo pisipala pii poraiyuo lao, Kamongo, yulu koo pyuo karaminyi dake emba suu pyaa nao nyuo kame sakamyuo kaeyape, leya. Dopa lapala kumuya.
ACT 8:1 Dokopa Soleme baa kumulyamo doko kandapala keyange lao suu piya. Yuu gii dokopa Jerusaleme dokona Elyambu Pingi wambu dupwa lekeleke andake rena lao kanda soo randa maiyami. Dokopa Kurisene dupwa nakama peparae yuu Jutia kipwa kipwape yuu Samaria kipwa kipwape dupwana bolombalo lao ralo peyaminyipa aposele dupwa iki paa nayami.
ACT 8:2 Anatu suu pingi akali lapome Sitipena malu pyuo ee lao kumaralerale nyuo kareyami.
ACT 8:3 Dokopa Sole dokome Elyambu Pingi wambu dupwa uki palyiya. Uki palyuo anda kambu dupwa peparaena papapu enda akalipi dupwa ipyuo lanyuo pao karapusi anda dokona pyambwapa pyuo kareya.
ACT 8:4 Pyambuyamopape wambu bolombalo lao ralo peyaminyi dupwame yuu muu dupwana pao pii boo pyao lao peyami.
ACT 8:5 Dokopa Pilipa Samaria anda malu palyuo kareyamo dokona papala Koraisa dokona lao mana lamaiyuo kareya.
ACT 8:6 Dokopa wambu dupwa peparaeme Pilipana pii sepala baa wambumi yulu pii nange dupwa pyuo kareyamo dupwa kandapala mona mendaki palyuo banya pii sokondali pyuo kareyami.
ACT 8:7 Kopyali imambu koo wambu lapo soo pyale leyamo dupwa raka lao pena leyamopa dupwa yaki nyuo pii porakaiyuo kaeyo leyami. Wambu malu papae rambungi mapi minyingipi dupwa pyuo nyiyamopa mee ingiya.
ACT 8:8 Dopa piyamo dokopa anda malu palyuo kareya dokona palenge wambu dupwa ama rae maiyuo peteyami.
ACT 8:9 Taone dokona akali mende Saimone lenge dokona kareya. Wamba anda malu palyuo kareyamo dokona baa pipu lao karo namba akali kameya lao kareyamopa Samaria wambu dupwa ayaka lao mona nembeyami.
ACT 8:10 Akali numipi akali kukipi dupwame banya pii sokondali pyuo karo, Akali dake Anatunya Porai Renge Kameya lenge doko nyepala pyuo karamo, leyami.
ACT 8:11 Ee kana malu baa pipu lao kareyamopa nakama ayaka lao mona nembo kareyami dokome banya pii sokondali pyuo kareyami.
ACT 8:12 Dopa pyuo karapalape Pilipa Anatunya isingi yulupi Yesu Koraisana kingipi dolapona waili pii keyange boo pyao lao kareyamo dokopa doko pii kinyilyamo lao suu pyapala nakama enda akalipi dupwa bapitisimo nyiyami.
ACT 8:13 Dokopa Saimone opetae doko pii kinyilyamo lao suu piya. Suu pyapala bapitisimo nyepala Pilipa role pyao kareyambi. Karo dokopa Pilipa baame yulu porai wakasa pyuo lasaka pyuo kareyamo dupwa kandapala ayaka lao mona nembeya.
ACT 8:14 Dopa piyamo dokopa aposele Jerusaleme kareyami dupwame Samaria wambu dupwa Anatunya pii yako lao soo peteyaminyi pii doko sepala Pita Jonepa yuu Samaria dokona pena leyami.
ACT 8:15 Leyaminyi dokopa Samaria papala Pita Jonepa dolapome yuu range wambu dupwa suu pyao Anatu banya Imambu Poo Pyasi nakama maipyali lao ateŋa lakayambi.
ACT 8:16 Nakama wamba Yesu Koraisa dokona kingi lao bapitisimo nyakamiyami. Imambu Poo Pyasi nyii nao kareyami dokona nakama Imambu Poo Pyasi nyimili lao ateŋa lakamiyambi.
ACT 8:17 Dokopa wambu dupwa nakambana kingi ketae reteyambinyi dokopa nakama Imambu Poo Pyasi doko nyiyami.
ACT 8:18 Dokopa aposele dolapo nakambana kingi ketae retapa piyambi dokopa Anatumi Imambu Poo Pyasi wambu maipa piyamo doko kandapala Saimone baame aposele dolapo kana mone lapo lasaka piya.
ACT 8:19 Namba opetaeko nambana kingi wambu mendepe ketae retarono dokopa Imambu Poo Pyasi kapa nyerami lao renge porai doko namba jipwape, leya.
ACT 8:20 Leyamo dokopa Pitame baa lamaiyuo, Anatumi mee maingi doko kana mone dokome ropo pyaro lao suu pyapi dokona emba kwao pare doko suu pyao embena kana opetaeko kwaelu kwaeyo kwaena leya.
ACT 8:21 Anatunya lenge kambu dokona embena mona rolae ingya napyamopa renge doko emba keta palira ingya nara kandelyo.
ACT 8:22 Dokona embena koo doko kondapala yaki nyuo suu pingi enenge palyapala monarena koo piru lao suu pyapinyi doko Kamongo dokome nyuo kame sakapyali lao ateŋa laa.
ACT 8:23 Emba imambusa paleta napindeme kauwapala renge koo dokome monarena puu maipyamopa karene doko kandelyo leya.
ACT 8:24 Dopa leyamo dokopa Saimone baame isingi lamaiyuo, Emba leene doko namba keta pali nana lao namba nyiso Kamongo lamaiyuo ateŋa lakape leya.
ACT 8:25 Enakana nakambame Kamongona pii lao karo Yesu piyamo dupwa lao panapala Jerusaleme dokona lambuo pao dokopa yuu Samaria dokona anda kuki lama malu palyara malu palyara pyuo kareyami dupwana waili pii keyange boo pyao lamaipa pyuo peyambi.
ACT 8:26 Yuu mendepa Kamongona aŋala mendeme Pilipa lamaiyuo, Emba sipurapala donorena pao kata yuu Jerusaleme piso yuu Gasa soo penge dokona pare leya. Kata doko yuu muiyane dokona singi.
ACT 8:27 Leyamo dokopa baa sipurapala peya. Papala katasa epeyamopa Itiopia akali etombo mende baa enda kingi Kandesi lenge Itiopia wambu dupwana enda kuini dokona yulu andake pyakamyuo banya kana bange rapu pyuo karenge akali doko Jerusaleme dokona Anatu ketae pyambuo kingi lala papala
ACT 8:28 enakana yuu range lambuo pao kareyamo Pilipa baame kandeya. Baa mena oseme ipyuo penge uliuli dokona piso pao Anatunya poropeta akali Aisayana buku kando yaka lao peteya.
ACT 8:29 Dokopa Imambu dokome Pilipa lamaiyuo, Repeta papala uliuli dokopa role pyapeta puu leya.
ACT 8:30 Dopa leyamo dokopa Pilipame akali doo piso peyamo dokona papala role pyao pawali pyuo karo akali doko Anatunya poropeta akali Aisayana buku kando yaka lao peteyamo kandapala baa piso soo, Emba yaka lao petene pii doko silipi mee? leya.
ACT 8:31 Dokopa baame dopa leya. Mendeme namba mana langya narami ramo dokona apa pyuo sero? lapala, Role pyao pisimbana. Pilipa pulyuo epena leya.
ACT 8:32 Anatunya pii pyasi palenge baa kando yaka lao peya doko dopa letamo. Mena sipisipi pyalana lanyuo penge dokopa kae laa nao penge, panda sipisipinya ikyane mendena emanji pyake pilyaminyipa ikyane doko kae laa nao karenge doko suu pyao baa pii mende laa nao kareya.
ACT 8:33 Baa kilya kando lapala kote pii rolae laa nayami. Dokona lao baa isa yuu dakena lete kara nana lao pyao kumakalu piyaminyi dokona baa para pyao nyii nalyamo dokona banya rarana kingi mende pali nara.
ACT 8:34 Pii dokona lao Itiopia akalimi Pilipa lamaiyuo piso siya. Anatunya poropeta akali pii dopa lao pyao dokopa apisa lao piya? Baa rangesa lao piyape panda akali wakalesa lao piya? leya.
ACT 8:35 Dopa leyamo dokopa Pilipame pii pyasi palenge yaka leyamo dokonako piso kambu roma lumbuo lao Yesunya waili pii keyange doko baa polo lamaiya.
ACT 8:36 Dokopa kata pao karo ipwa pete mende siyamo kandeyambi. Dokopa etembo dokome, Kanda, ipwa sipyalyamo. Aki mende ingya narasa namba bapitisimo kapa nyii narose? leya.
ACT 8:37 Leyamo dokopa, Emba mona anda suu pingi lama pali napala pii doko kinyilyamo lao suu pyaokondali pyuo karare ramo doko kapa bapitisimo nyere leya. Dokopa baa isingi lao, Yesu Koraisa baa Anatunya Ikinyingi namba suu pyao kaelyo leya.
ACT 8:38 Lapala uliuli mee karena lapala Pilipa akali etembo dokopa nakamba ipwa mare dokona lupyuo peyambi. Papala baame baa bapitisimo nyakamiya.
ACT 8:39 Nyakamipala ipwa doko nakamba yaki nyepala pulyuo peyambinyi dokopa Kamongona Imambu dokome Pilipa nyepala lanyuo peya. Peyamopa akali etembo dokome baa dee kamba kanda naya. Kanda napala banya kata nyuo rae maiyuo peya.
ACT 8:40 Peyamopa Pilipa yuu Asarote dokona pano kareya. Karapala anda malu palyara malu palyara pyuo kareyami dupwa peparaena waili pii keyange doko boo pyao lamaiyuo papala enakana yuu Sisaria dokona pyaka sepala kareya.
ACT 9:1 Dopa piyamo dokopa Soleme Kamongona disaepole dupwa kando nenge koo manjo pyalana lao kareyamo doko kaeya napala dokoko suu pyao pyuo karo purisi akali mupwa kareyamo dokona papala
ACT 9:2 yuu Damasakesa dokona sinakoke anda lapo karenge dupwana rapu akali dupwa lasaka piru lao pepa pase lapo pyao jinya leya. Wambu lapo, enda panda akali Yesunya kata papyuo kararaminyi kando nyero ramo dupwa kapa puu maipala Jerusaleme dakena lanyuo eparo, lao pepa pyao jinya leya.
ACT 9:3 Enakana baa kata pao yuu Damasakesa repeta peyamo dokopa yake dokona piso yanga paupau lenge doko kopo kapo lapala baa nyuo sukusa palyiya.
ACT 9:4 Dokopa baa yuu dokona pao paleya. Palipala pii mende, Sole Sole apa pipyasa embame namba lekeleke ralasi lao pilinyi? leyamo siya.
ACT 9:5 Sepala Kamongo, emba api? leya. Leyamo dokopa, Namba Yesu embame lekeleke ralasi lao pilinyi namba doko, leya.
ACT 9:6 Dopa pyuo pipinyipape emba sipurapala anda malu palyuo karamo dokona puu. Parene dokopa emba dopa piri dopa piri lao langirami leya.
ACT 9:7 Akali lapo baa role pyao kata peyami dupwa pii leyamo doko sepala angi doko kanda napala pii lalana saka nayami.
ACT 9:8 Dokopa Sole baa yuu siyamo dokona roya karapala lenge rao mee dupwana kandalana saka naya. Saka nayamo dokopa baa kii minyuo Damasakesa dokona lanyuo peyami.
ACT 9:9 Peyaminyipa yuu rema lenge kwaeyamosa nenge ipwape naa nao siya.
ACT 9:10 Disaepole akali mende Ananayasa lenge yuu Damasakesa dokona kareya. Baa Kamongo dokome monarena pii repa repa pyuo lamaiyuo, Ananayasa leya. Dokopa, Kamongo namba dae karo leya.
ACT 9:11 Dokopa Kamongo dokome baa lamaiya. Emba roya karapala kata kingi rolae lenge dokona papala akali mende Jutasa lenge banya anda dokona akali mende Sole lenge doko petape mee lao kotala puu leya. Baa ateŋa lao peta kande.
ACT 9:12 Baa kombeya piyamo doko akali Ananayasa lenge mende epapala banya lenge mee inginya lao banya kingi baa ketae retara doko kando pyaamo, leya.
ACT 9:13 Dopa leyamopape Ananayasa isingi lamaiya. Kamongo, wambu malu mee namba langyuo akali dokosa kando baame embena yapasi wambu Jerusaleme karenge dupwa uki minyakamyuo karamo lami sipu.
ACT 9:14 Dopa pyuo karapala purisi akali mupwa dusipame baa pena leyaminyipa dae epapala baame wambu embena kingi lao ateŋa lenge dupwa peparae puu maipa pyuo karara leya.
ACT 9:15 Leyamopape Kamongo dokome baa dopa lamaiya. Emba puu. Nambana yulu pyuo karara lao rombo palyapu doko baame Juu wambu daa rara wakale dupwape kiŋi dupwape Isaraele akali dupwape nambana kingi lao pii minyuo papyuo nakamana lenge kambu dokona lao karara.
ACT 9:16 Dokopa baa nambana kinginya reke lao randa nyeramo dupwa wambo lasaka piru leya.
ACT 9:17 Dopa leyamo dokopa Ananayasa Sole siyamo anda dokona papala andakare kolando peya. Papala banya kingi baa ketae retapala, Yangone Sole leya. Emba kata epo dokopa Kamongo Yesu pano epeyamo kandee dokomeyoko namba embena lenge mee inginya lao Imambu Poo Pyasi embena monarena palyuo simbunya lao puu lapyasa epelyo leya.
ACT 9:18 Dokopa banya lenge doko meelendeme yambe pyalya pyana piyamo doko rekya lalepo pipala isa peyamo dokopa banya lenge mee ingiya. Mee ingiyamo dokopa baa sipurapala bapitisimo nyiya.
ACT 9:19 Nyepala nenge napala kapa poraiyuo peteya. Baame yuu mendasipa disaepole yuu Damasakesa karenge dupwa pipya role pyao kareyami.
ACT 9:20 Dopa pyuo karo dokopa aopa sinakoke anda dupwana papala Yesu dokona lao baa Anatunya Ikinyingi karenge doko boo pyao lao kareya.
ACT 9:21 Lao kareyamo dokopa banya pii siyami wambu dupwa peparae mona nembeyami. Mona nembapala, Yesunya kingi lao ateŋa lenge wambu Jerusaleme petenge dupwa ukiaki minyuo kareya akali doko baa daase? Baa ukiaki minyuo karapala dae epeyamopa Yesunya wambu puu maipala purisi mupwa dusipana lenge kambu dokona lanyala epeya kande leyami.
ACT 9:22 Leyaminyipape Soleme ama porayapala misi pii soo gisapala lao kareya. Soo gisapala baamoo Juu wambu Damasakesa kareyami dupwa pipya apiyanda pyuo, Yesu baa Koraisa angingyuo karenge, lao kareyamosa doko angi ingiyasa nakamana pii doko bulumbulu piya.
ACT 9:23 Enakana yuu malu epo papeyamopa Juu wambu dupwame yalu pyuo pisipala pii mendakinya palyapala baa pyao kumakarama leyami.
ACT 9:24 Leyaminyipa dopa letaminyi lao akali lapome baa lamaiyaminyi soo kareya. Dokopa anda malu palyuo kareya nemba nemba dokona kana dupwame kame porai pipala kambu lumbuo reteyaminyi dokona Sole epelyape lao kambu dupwana Juu wambu dupwa pyalana isaro siyami.
ACT 9:25 Dopa piyaminyipape kukwa dokopa banya disaepole dupwame baa lanyuo pao kame kana dupwame piyami ketae dokona papala pisiki minyasi dokona petena lapala netarena malyiyami.
ACT 9:26 Dokopa baa Jerusaleme dokona disaepole dupwa pipya role pyao kararama lao suu pyao peya. Dokopa disaepole dupwame baa Kurisene ingyuo kara nalyamo lao suu pyapala baa kando pakayami.
ACT 9:27 Pakayaminyipa Banapasa dokome aposele dupwa kareyami dokona Sole lanyuo epapala angi lamaiyuo pakana palyiya. Baame Soleme Damasakesa kata pao dokopa Kamongo dokome baa pii lamaiyamo kandeya. Kandapala Damasakesa dokona Yesunya kingi lao eŋa nembapala boo pyao kareya. Kareyamo dokopa Banapasame aposele dupwa pakana palyuo lamaiya.
ACT 9:28 Dopa lamaiyamo dokopa Jerusaleme kareyami dupwa pipya role pyao karo Yesunya kingi lao kata dupwana epapapu papa piya.
ACT 9:29 Juu wambu Giriki pii lenge dupwa baamoo apiyanda pyuo lao kareyami. Dokopa nakamame baa apa pipala pyarama lao kando kareyami.
ACT 9:30 Pyalana pyuo kareyami doko sepala yangonge dupwame baa yuu Sisaria lanyuo papala yuu Tasasa dokona pena leyami.
ACT 9:31 Dokopa yuu Jutiape yuu Galilipi yuu Samariapena Elyambu Pingi wambu dupwa mona kyuu lao siyamopa kareyami. Nakama monarena Kamongo doko pakao karo Imambu Poo Pyasi dokome nakama nyisiyamopa kareyami. Dokopa wambu malu Elyambu Pingi sukusa dokona konda konda pipala ama malu ingiya.
ACT 9:32 Dokopa Pitame Elyambu Pingi wambu panda wakale wakale kareyami dupwa nyiso papyuo karo enakana Anatunya wambu yuu Lita kareyami dokona kandala peya.
ACT 9:33 Dokona akali mende kingi Ainasa lenge baa papae rambuyamopa ee kana mange lama karo banya luu palenge rate dokona mee siyamopa Pitame epapala kando nyiya.
ACT 9:34 Kando nyepala Pitame baa lamaiya. Ainasa, Yesu Koraisa dokome emba pyuo nyilyamo. Sipurapala embena luu palenge rate rulipi kyaso mondo lao retape leya. Leyamo dokopa baa aopa sipureya.
ACT 9:35 Dokopa wambu yuu Litapa yuu Seronepa palenge dupwa peparaeme akali doko kandapala Kamongo dokona mona kapu kyiyami.
ACT 9:36 Dokopa yuu Jopa dokona enda disaepole mende peteya. Baa kingi Tapita lenge (pii doko Giriki pii lao Dokasa lenge.) Baa yulu keyange wakale wakale dupwa pyuo piso wambu kondapala ama nyiso pyuokondali pyuo peteya.
ACT 9:37 Yuu gii dusipana baa anga pyapala kumuya. Dokopa baa wate pipala anda kanya koe mendena minyuo pulyuo pao reteyami.
ACT 9:38 Dokopa yuu Lita doko yuu Jopa repeta siyamosa disaepole dupwa Pita baa yuu Lita karapyalyamo lao sepala akali lama baa waiya lao epena lao pena leyami.
ACT 9:39 Dokopa Pita sipurapala nakamba pipya role pyao peyami. Pao anda kambusa peyamo dokopa baa lanyuo anda kanya koe dokona pulyuo peyami. Dokona enda waiya peparae dupwa Pita kareyamo repeta dokona ee lao karo walyapaki dupwape komau dupwape Dokasa baa nakama pipya lete peteyamo dokopa pyuo waso maiyamo dupwa baa kandena lao lasaka piyami.
ACT 9:40 Dopa piyaminyipape Pitame peparae kamanda pena lapala wapambu kararo pisipala ateŋa leya. Ateŋa lapala yanenge kaoma siyamo doko kandapala dopa lamaiyuo, Tapita, emba sipura, leya. Leyamo dokopa baa lenge reya. Lenge rapala Pita kandapala roya peteya.
ACT 9:41 Dokopa baa kii minyuo nyiya. Nyepala wambu yapasi dupwape enda waiya dupwape epena lapala baa lete kareyamopa maiya.
ACT 9:42 Dopa pilyamo lao Jopa dokona kapa kapa pyuo siyami. Dokopa wambu malu mee Kamongo baa kapa ingingi lao suu pyao mona maiyami.
ACT 9:43 Dokopa Pita yuu malu Jopa dokona karo akali mende Saimone lenge baa mena yanenge elya pyuo mamba kiso pyuo kareyamo dokona anda paleya.
ACT 10:1 Yuu Sisaria dokona akali mende Koniliasa lenge kareya. Baame yanda singi yuu Itali range liti pyuo kareyami dupwa rapu pyuo kareya.
ACT 10:2 Baape banya anda range wambu dupwa peparepe Anatu suu pyaokondali pyuo kareyami. Baa ipyapala wambu muiyane dupwa kana mone dupwa mee mokwa soo maimai pyuo, yuu peparae Anatu kando ateŋa lao kareya.
ACT 10:3 Alemanji neta dambisa penge sere keloke dokopale pii repa repa piyamopa aŋala mende epapala, Koniliasa lao lamaiyamo rolae kandeya.
ACT 10:4 Dokopa baame aŋala dokona pakame kumapala kandaro siya. Kandaro sepala baa lamaiyuo, Kamongo, apa pinya lao epelene? leya. Leyamo dokopa aŋalame, Emba ateŋa lao kana mone dupwa mokwa soo maiyuo karene doko Anatumi kandapala emba suu pyao karamo leya.
ACT 10:5 Embena yulu akali lapome yuu Jopa dokona akali mende Saimone lenge banya kingi mende Pita lenge doko nyela pena leya.
ACT 10:6 Akali mende Saimone lenge doko baa mena yanenge elya pingi dokona anda ipwa maronge dokona karamo dokona upunili ingyuo palamo leya.
ACT 10:7 Aŋala doko baa dopa pyuo lamaipala papeyamo dokopa banya kendemande akali lamape dee yanda singi Koniliasa isaro pyuo kareyami dokona Anatu suu pyaokondali pyuo kareyamo mendepe epena lapala
ACT 10:8 pakana palyuo dopa pipya dopa pipya lao pii peparae lamaipala yuu Jopa dokona pena leya.
ACT 10:9 Yangama dokopa nakama kata pao anda malu palyuo kareyamo dokona repeta epeyaminyipa andawai korakama dokopa Pita baa andeyangi dokona ateŋa lala pulyuo peya.
ACT 10:10 Papala lopapala nenge naowane lao suu pyao peteya. Dopa pyuo pisipala nenge rapa rapa pyuo kareyaminyi isaro karo dokopa baa pii repa repa piyasa lemongwasi lao peteya.
ACT 10:11 Dokopa bange mende komau andake dopale pinjingi kisima dusipa minyili laro karo isa yuu dokona isa epeyamo kandeya.
ACT 10:12 Mena suwa wakale wakale dupwape kau wakale wakale dupwape yaka wakale wakale dupwape komau dokona paleta malyiya.
ACT 10:13 Dokopa pii mendeme baa lamaiya. Pita, roya karapala bange dupwa pyapala naa leya.
ACT 10:14 Dopa leyamopape Pitame, Kamongo naa naro leya. Namba Juu akali dokome bange koo dokore wasapala yuu wamba naa nange leya.
ACT 10:15 Dokopa pii dokome dee kamba baa lamaiya. Anatumi poo pyasi ingyuo wasiyamo dupwa kooŋo laa napipi leya.
ACT 10:16 Lapala pii doko dee kamba yuu repo pyuo leyamopa enakana komau bange paleta doko yake dokona pulyuo peya.
ACT 10:17 Pulyo papeyamo dokopa Pita pii repa repa pipyamo kandalono doko aki rengendena pyaano lao suu pyanyi pyano peteyamo dokopa akali Koniliasame dokona pena leyamo dusipa Saimonena anda anja karamo lao wambu piso sepala epo kambu dokona kareyami.
ACT 10:18 Karo, Saimone kingi mende Pita lenge baa dana andakare petape mee? lao kee leyami.
ACT 10:19 Pita baa pii repa repa piyamo dokona monarena suu pyanyi pyano peteyamo dokopa Imambu dokome baa lamaiyuo, Akali rema dusipame emba koto epaminyi lyakande.
ACT 10:20 Emba roya karapala lupyuo puu. Nambame nakama dae pena lapunupa epaminyi dokona paro panda kaewane lao lamana palyuo suu pyaa napala emba nakama pipya role pyao pupwape leya.
ACT 10:21 Dokopa akali dusipa kareyami dokona papala, Nakama kotala imi doko namba dae karo. Apa pipyasa epamipi? leya.
ACT 10:22 Dokopa nakamame lao, Akali mende Koniliasa lenge yanda singi yango rapu pingi akali andakende baa yulu rolae pyuo Anatu pakao karamo. Juu wambu dupwa peparaeme baa kando akali keyange letaminyi doko aŋala poo pyasi mendeme baa lamaiyuo, Embame pii lapo lamairi lao emba nyela papala banya anda lanyuo ipupwape lena leyapya, leyami.
ACT 10:23 Dopa leyaminyi dokopa role pyao palimana lao andakare epena leya. Yangama dokopa sipurapala nakamape Pitape dee banya Kurisene yangonge yuu Jopa karenge lapo dusipa minyuo pyaso peyami.
ACT 10:24 Dokona yangama dokopa nakama yuu Sisaria sukusa epeyami. Dokopa Koniliasa banya ree palu dupwape banya mona reto puu minyingi dupwape sukusa sukusa pyuo epena lapala Pitamoo banya akali dusipape epelyamipi lao isaro kareya.
ACT 10:25 Dokopa Pita kolando epeyamo dokopa dokona papala baa mupwa lao banya kimbu siyamo dokona pangu siya.
ACT 10:26 Pangu siyamopape Pitame baa minyalyuo nyuo, Emba roya karape. Namba mee akaliŋi emba dopale, leya.
ACT 10:27 Lapala nakamba pii lao andakare papala wambu malu sukusa sukusa pyuo kareyaminyi kandeya.
ACT 10:28 Kandapala baame nakama lamaiyuo, Juu akali dupwame rara wakalena anda papala role pyao kara nange doko nakamana yulu pinginyili pyuo mawa pii mende palamo doko nakama range silyaminyi leya. Dopa lao mawa pii palipyamopape Anatumi Juu daa rara wakale dupwa elyape daa laa napipi lao namba lasaka piya.
ACT 10:29 Namba lasaka piyamo dokona namba lanyala pena leyami dokopa namba daa laa napala mee ipu. Akipamo namba lanyala epena leyamisi? lao piso silyu, leya.
ACT 10:30 Dokopa Koniliasa dopa leya. Jukumane wamba yuu gii dakepa neta dambisa karenge sere keloke dokopa namba andakare ateŋa lao peteyo. Lao peteyono dokopa akali komau lepolepo pingi wapunginde epapala nambana lenge kambu siyamo dokona kareyapya.
ACT 10:31 Karapala dopa leya. Koniliasa, emba ateŋa lao karenge kandale doko Anatumi sepala, emba kana mone wambu muiyane maipa pingi doko Anatumi suu pyao karenge.
ACT 10:32 Dokona akali Saimone lenge banya kingi mende Pita lenge baa Jopa dokona kotala pena laa. Baa akali mende Saimone lenge mena yanenge elya pingi akali dokona anda ipwa maronge repeta karamo dokona upunili ingyuo palamo leya.
ACT 10:33 Leyamo dokona aopa emba nyela pena leyonopa emba anjiki pipala ipilyamo. Epapu namwa Anatunya lenge kambu dakena Kamongome pii lalale lao langipyamo dupwa larene semana lao petamano leya.
ACT 10:34 Dopa leyamo dokopa Pitame sipurapala dopa leya. Kinyi Anatumi wambu lapo iki angi angi lao kara nange, doko epapu soo gisilyu.
ACT 10:35 Wambu rara wakale wakale Anatu andake lao pako karo yulu rolae pyuo karaminyi dupwa peparae baame nakama kando rae maiyuo karamo.
ACT 10:36 Anatumi banya pii doko Isaraele wambu lamaiya doko silyaminyi. Baa Yesu Koraisa wambu peparaena Kamongo doko keta baame nakama mona anda kyuu lao seramopa kararaminŋi lao waili pii keyange doko lamaiya.
ACT 10:37 Joneme bapitisimo nyelapape lao wambo boo pyao kareyamopa enakana Yesu baame yuu Galili dokona kanda soo lapala enakana yuu Jutia kipwa kipwa dupwana pao kapa kapa pipape leya.
ACT 10:38 Yesu Nasarete range doko Anatumi Imambu Poo Pyasipi renge porai dokope maiya. Maiyapala Anatu baa role pyapeta kareyamopa baa yuu dupwana papyuo yulu keyange pyuo imambu koo dupwa raka lanyi nembo wambu pyuo nyepa piya.
ACT 10:39 Baa Juu wambunya yuu dupwanape Jerusaleme dokonape yulu pyuo kareyamo dupwa peparae namwame kandapala epapu lao rolo karamano. Baa pyapala isa mamando dokona yukuyami.
ACT 10:40 Yukuyaminyipa yuu gii repo dokopa Anatumi baa minyalyuo nyepala nolako karena leya.
ACT 10:41 Baa sipurao epapala kareyamo doko wambu peparae kanda nayami. Anatumi wambo dokopa namwa yapo nyiyamopa namwa banya yulu dupwana lao kararama dupwa iki kandeyama. Anatumi baa lopo nyiyamopa lete kareyamo dokopa namwa baapa nenge nao yalya kando peteyama.
ACT 10:42 Baame namwa kando waili pii doko wambu lamaiyalapape leya. Anatumi baa rombo palyiyamopa wambu wambo kumuyami dupwape lete kararami dupwapena yulu dokona kote lao rolo karara.
ACT 10:43 Baa eparamopa wambu baa kapa ingingi lao suu pyarami dupwa banya kingi keyange dokona lao nakamana koo dupwa kame sakasi seraŋa lao poropeta akali peparaeme wambo nolako leyami.
ACT 10:44 Pita pii dopa lao kareyamo dokopa wambu peparae banya pii soo kareyami dupwa Imambu Poo Pyasi doko nakama peparae maralyiya.
ACT 10:45 Dokopa Juu rara dokona Kurisene akali lapo Pitamoo epeyaminyi dusipame Imambu Poo Pyasi Juu daa wambu rara wakale dupwa opetae keta maralyiyasa kando ayaka lao mona nembeyami.
ACT 10:46 Nakamame nakama pii rara mendereke lao karo Anatu lakando kareyaminyi doko sepala mona nembeyami. Dokopa Pita dopa leya.
ACT 10:47 Namwa Imambu Poo Pyasi nyiyama kande dokonako wambu dapwa nyelaminyi dokome akali mendeme nakama bapitisimo nyerami dokona daa larami ingya nalyamo leya.
ACT 10:48 Lapala Yesu Koraisana kingi lao bapitisimo nyakamainya leya. Enakana yuu malu baa nakama role pyao karamana lao piso siyami.
ACT 11:1 Aposele dupwape Kurisene yangonge dupwape yuu Jutia kareyami dupwapeme wambu Juu daa rara wakale dupwa opetae Anatunya pii soo yako lamilyamo lao siyami.
ACT 11:2 Dokopa Pita baa Jerusaleme dokona lalyuo peyamo dokopa Juu wambu lapome rara peparae yanenge kalomarami doko mawa pii lao kareyami dupwame baa lao nembo dopa leyami.
ACT 11:3 Yanenge kaloma nange akali lapona anda dokona papala emba nakama role pyao nenge nao peteyami doko akipamo piyami? leyami.
ACT 11:4 Dokopa Pitame yulu peparae kandeyamo dupwa polo lamaiya.
ACT 11:5 Nambame Yuu Jopa anda malu palyuo karenge dokona ateŋa lao peteyo, leya. Piso dokopa namba lemongwasi leyamo peteyonopa pii repa repa mende piyamo kandeyo. Doko bange mende komau andake dopale pinjingi kisima dusipa minyiyaminyipa yake dokona piso isa malyiyamopa namba peteyono dokona dusa kanda kanda epeya.
ACT 11:6 Namba bange doko poraiyuo kandapala mena suwa wakale wakale dupwape rae lenge bange dupwape kau dupwape yaka dupwape paleyamo kandeyo.
ACT 11:7 Dokopa pii mende namba langiyamo siyu. Pita, emba roya karapala bange dupwa pyapala naa, leya.
ACT 11:8 Dopa leyamo dokopa, Kamongo naa naro leyo. Mee bange elyape daa bange dopale dupwa yuu wamba wasapala naa nange daa leyo.
ACT 11:9 Leyono dokopa pii mende yake panda dokona piso dee kamba lapo pyuo isingi leya. Anatumi elya piyamo dupwa embame kooŋo laa napipi leya.
ACT 11:10 Doko yuu remasa dopa piyamopa bange doko yake dokona ipyuo pulyuo peya.
ACT 11:11 Yuu gii dokopako akali rema dusipa yuu Sisaria karo akali dokome namba kareyo dokona pena leyamopa anda peteyamano dokona epeyami.
ACT 11:12 Dokopa Imambu dokome namba nakama role pyao paowape panda kaewane lao lamana palyuo suu pyaa napala mee nakama pipya pupwa langiya. Kurisene yangonge akali pakinyamange dasipa pipya namba role pyao peyama. Papala akali dokona andakare kolando peyama.
ACT 11:13 Peyamano dokopa akali dokome namwa langyuo, Aŋala mende nambana anda epo kareyamo kandeyo, leya. Epo karapala namba dopa langiya. Akali mende Saimone lenge kingi mende Pita lenge yuu Jopa dokona akali lapome baa lanyala pena lape.
ACT 11:14 Pita baame waili pii mende emba langiramo doko seraminyi dokopa embamoo embena anda palenge wambu dupwa peparae Anatumi nyiso pyuo nyakara leya. Dopa langiyamo kandeyo lao baame namwa langiya.
ACT 11:15 Namba sipurapala pii lao kareyono dokopa Imambu Poo Pyasi wamba kanda soo namwa keta maralyiya kande doko suu pyao nakama keta maralyiya.
ACT 11:16 Dokopa Kamongo dokome pii mende leyamo doko suu piyu. Baa akali Jone ipwa dokona bapitisimo nyakamyuo kareyamopape Anatumi nakama Imambu Poo Pyasi dokome bapitisimo nyakara, leya doko.
ACT 11:17 Namwame Kamongo Yesu Koraisa kapa ingingi lao suu piyamanopa Anatumi mende jiya kande dokoko nakama keta maiya. Doko kandapala namba apiyakalendeme Anatunya kata rokwapala daa larose lao suu piyu leya.
ACT 11:18 Pii doko sepala isingi mende lalana saka nayami. Saka napala Anatu lakandao ketae pyambwapala Juu daa wambu rara wakale dupwa opetae keta Anatumi mona enenge palyapala kyakana renge doko nakama keta palena leyalyamo, leyami.
ACT 11:19 Wambo Sitipena pyao kumakapala Kurisene wambu dupwa koto pyao peyami mange dokopa Kurisene wambu malu ralo bolombalo lao peyami dupwa sele sele pyuo pao lapo nanesa pao yuu Pinisia yuu Saiporasa yuu Andioko dusipana karo palyuo piyami. Dokopa Juu wambu dupwa yeelyo pii doko sinya lao lamaiyami.
ACT 11:20 Juu wambu iki lamaiyuo kareyaminyipape akali lapo Saiporasa rangepe Sairini rangepe dupwame Andioko epapala Giriki wambu opetae Kamongo Yesu dokona lao pii boo pyao lamaiyami.
ACT 11:21 Dokopa Kamongo dokome nakama porainyi pyambuyamopa Kamongo baa kapa ingingi lao suu pyapala wambu malu mee mona kapu kyiyami.
ACT 11:22 Jerusaleme Elyambu Pingi wambu dupwa doko sepala Banapasa baa yuu Andioko dokona pena leyami.
ACT 11:23 Baa papala dokopa Anatumi nakama pyuo elyape keta piso nyisiya doko kandapala rae maiya. Nakamame Kamongo doko yaki nyii nao baa mona reto karalu kararama lao poraiyuo suu pyaokondali pipala pyuo karalapape, lao waipi lao nakama lamaiyuo kareya.
ACT 11:24 Banapasa baa akali keyange ingyapala Anatu kapa ingingi lao poraiyuo suu pyao Imambu Poo Pyasi banya monarena simbuo paleyamopa wambu malu Kamongopa pakao pisinya suu pyapala mona kapu kyiyami.
ACT 11:25 Dokona Banapasame Sole yuu Tasasa kareyamopa dokona kotala peya.
ACT 11:26 Baa kando nyepala Andioko dokona role pyao laeyo epeyambi. Epapala yuu dokona ee kana mendaki Elyambu Pingi wambu dupwa pipya nakamba role pyao kareyami. Karo wambu malu nakambame mana lamaiyuo kareyambi. Yuu Andioko dokona mee wambu dupwame disaepole dupwa kando kingi Kurisene doko kanda soo dokona leyami.
ACT 11:27 Yuu gii dusipana Anatunya poropeta akali lapo Jerusaleme yaki nyepala Andioko dokona lano epeyami.
ACT 11:28 Epeyaminyi dokona mende kingi Akapasa lenge dokome roya karapala Imambu dokome baa pyongo piyamopa, yuu muu dupwana ene lopo andake mende sera leya. (Baa leyamo pii doko enakana akali Kolotiasa kiŋi yulu pyuo kareyamo yuu gii dusipana pyaka siya.)
ACT 11:29 Dokopa Kurisene yango yuu Jutia karaminyi dupwa lopa nao kapa karena lao kana mendemepe mendemepe kapa mairama ingyaramuli pyuo mairama lao suu pyapala akali lama minyuo maiyala pena larama leyami.
ACT 11:30 Lapala leyaminyili pyuo Banapasa Solepame kana nyiyami dupwa minyuo pao rapu akali dupwa maiyala pena leyami.
ACT 12:1 Yuu gii dokopale ingyuo Erote kiŋi akali dokome Elyambu Pingi wambu kareyami dupwana lapo eneko palyapala kokwa soo kareya.
ACT 12:2 Dopa pyuo karo baame Jemesa Jonena yangonge doko wua gela dokome pyao kumakaya.
ACT 12:3 Dopa piyamo doko Juu wambu dupwame kando rae maiyamisa kandapala Pita opetae puu mairu lao suu pyapala puu maiya. (Borete isi reta nange nenge gii dusipana puu maiya.)
ACT 12:4 Puu maiyuo nyepala karapusi anda dokona palyapala yanda singi akalisa ipisu pakinyamangeme Pita epo paramo lapala kisima larapu kando karapa pinya leya. Pasopa nenge nao otapala mee wambu dupwa kararami dokona kambuyanda pimana lao lanyuo paro lapala leya.
ACT 12:5 Dopa leyamopa Pita karapusi anda dokona palyaro kareyami. Palyaro kareyaminyipa Elyambu Pingi wambu dupwame Anatu lao ateŋa lakamyuokondali pyuo kareyami.
ACT 12:6 Erote baame rakya lanyuo paro lao paleyamo kukwa dokpa Pitana parali dolapona yanda singi lama dolapo Pitamoo role pyao puu sane dokome anjapala peteyambinyipa palyuo siya. Dokopa yanda singi lama karapusi anda kambu dokona kando isaro kareyambi.
ACT 12:7 Dokopa Kamongona aŋala mende epeya. Epeyamo dokopa anda panda dokona yanga paupau leya. Dokopa Pitana parali doko kapa kapa pipala pyalereya. Pyalerapala, Emba waiya lao roya kara leya. Leyamo dokopa puu sane dolapo banya kingi dokona bwuakayami dolapo mokwala isa peya.
ACT 12:8 Dokopa aŋala dokome baa lamaiyuo, Embena komau wapuo kimbu suu pee pyuo pinya leya. Leyamo dokopa dopa piya. Piyamo dokopa aŋala dokome baa lamaiya. Embena komau romende doko wapupala namba paronuli pyuo enakana ipu leya.
ACT 12:9 Dokopa kamanda pao baa peyamuli pyuo enakana peya. Pao dokopa pii repa repa pyuo kandelyo lao masapala angi pilyamo lao see naya.
ACT 12:10 Nakamba pao yanda singi mende isaro kareyamo dokona pakiki palyama epo mende isaro kareyamo doko dopako pyuo pakiki palyama epo kambu dowa kapa wasisinde kambu upi lanyi palyiyami doko anda malu karenge dokona pao pyaka singi kambu dokona epeyambinyi dokopa mee lumbwasi siyamopa neta peyambi. Papala kata nyuo peyambi. Papala aŋala dokome Pita yaki nyepala peya.
ACT 12:11 Peyamopa Pita banya mona doko epo paleya. Epo paleyamopa, Eroteme namba karapusi anda palyiyamopa Juu wambu dupwa peparaeme namba mende pipyali lao suu pyao karami dokona Kamongo dokome banya aŋala dokome namba kiiramo nyela pena lapyalyamo lao dakepa rolo silyano lao suu piya.
ACT 12:12 Dopa lao suu pyapala Maria, Jone banya kingi mende Make lenge banya endangi dokona anda dokona wambu malu elyambu pipala ateŋa lao peteyami dokona peya.
ACT 12:13 Papala kambu dowa dokona kapa kapa piyamopa wanake mende kingi Orota lenge dokome apimi pilyamo lao kandala epeya.
ACT 12:14 Epapala Pita pii mende leyamo doko sepala Pitame karo pipyalyamo lao ama rae maiya. Rae maipala kambu dowa doko lumbwa napala andakare makando papala, Pita kambu dokona karapyalyamo, lao lamaiya.
ACT 12:15 Nakamame baa lamaiyuo, Emba kopyali, leyami. Dopa leyaminyipape baa, Kinyi karamo, lao poraiyuo kaeyo leya. Dokopa, Aŋala baa rapu pyuo karenge doko epapala karo pilyamo, leyami.
ACT 12:16 Lao kareyami dokopa Pitame kamba kambu dokona kapa kapa pyuo kareya. Dopa pyuo kareyamo dokopa nakama pao kambu lumbwapala baa kandapala mona nembeyami.
ACT 12:17 Dokopa nakama pii laa kaena lao kingi dokome pyao palyiya. Palyapala karapusi anda peteyamopa Kamongo dokome moko lanyuo epeya dokona lao nakama rolo lamaiya. Lamaipala, Jemesamoo yangonge dupwa pipya lamaipwape, leya. Lapala nakama yaki nyepala yuu wakale mendasa peya.
ACT 12:18 Yuu yangeyamo dokopa yanda singi dupwa Pita anja pamo lapala nakama kilyipu kilyipu karo kareyami.
ACT 12:19 Eroteme baa kotala pena leyamopa koto saka nayaminyisa yanda singi Pita rapu pyuo kareyaminyi dusipa kambuyanda piya. Pipala nakama pyao kumakana leya. Yuu gii dokopa Erote yuu Jutia yaki nyepala yuu Sisaria dokona lano pao kareya.
ACT 12:20 Dopa pyuo karo dokopa Eroteme Taya wambu dupwape Saitone wambu dupwape kando imbuo kareya. Dokopa nakama kiŋi banya yuu dokona nenge renge kuiyuo manjo nyuo nao karamano lao suu pyapala baa kareyamo dokona papala akali mende Balasatasa lenge baa Erotena yulu pingi wambu dupwa rapu pyuo kareyamo doko nakamame kongo pyuo lamaipala baa kambu minyuo dopa lamaiyakana leyami. Erote anjiki pyuo kararamopa namwa yanenge maiyuo karamwali yaka lamaiyakana, leyami.
ACT 12:21 Yuu gii mende rombo palyiya doko pyaka siyamo dokopa baa banya kiŋinya komau keyange dupwa pee pipala kiŋinya isa petenge dokona peteya. Pisipala nakama pii lapo lamaiya.
ACT 12:22 Lamaiyamo dokopa mee wambu dupwame pii porakaiyuo kaeyo lao, Baa Anatu dopale ingyuo lalyamo. Mee akali daalyamo, leyami.
ACT 12:23 Dokopa baa Anatu lakanda napala rangena kingi londena lao suu piyamopa Kamongona aŋala mendeme baa aopa piya. Dokopa baa kimwakapame neyamopa kumuya.
ACT 12:24 Dokopa Anatunya pii doko ando nyimbu puu peya.
ACT 12:25 Dokopa Banapasa Solepa nakambana yulu pyuo otapala akali Jone kingi mende Make lenge doko lanyuo pao Jerusaleme yaki nyepala kapu kyuo anda lanyuo peyambi.
ACT 13:1 Yuu Andioko Elyambu Pingi dokona mana lengepe dee poropeta akalipi kareyami. Banapasamoo Simione kingi mende Naisa lenge doko, Lusiasa yuu Sairini rangepe Maneyene kiŋi Erotena ree palu dokope dee Solemoo kareyami.
ACT 13:2 Yuu mendepa nakama Kamongo dokona ateŋa lao nenge wasaka pyuo kareyami dokopa Imambu Poo Pyasi dokome nakama lamaiyuo, Banapasapa Solepa yulu mende pirambi lao rombo palyiyu yulu doko nakamba pinyale lao nyuo maipwape leya.
ACT 13:3 Dopa leyamo dokopa nenge naa napala karo ateŋa lao dokopa nakamana kingi nakamba ketae reto elya pyuo pena leyami.
ACT 13:4 Dokopa Imambu Poo Pyasi dokome nakamba pena leyamopa yuu Selusia dokona lano papala sipu dokona piso yuu Saiporasa dokona peyambi.
ACT 13:5 Papala yuu Salamisa dokona pyaka sepala Anatunya pii doko Juu wambunya sinakoke anda dusipana baa pyao leyambi. Dokopa Jone kingi mende Make lenge baa nakamba role pyao ree maiyuo pyuo papiya.
ACT 13:6 Yuu mumbirenge doko yalo pao yuu Peposa dokona epapala pipu lao karenge Juu akali mende baa Anatunya poropeta akali karo lao panga soo pyuo karenge doko kando nyiyami. Banya kingi Ba-Jisasa lenge.
ACT 13:7 Baa kyapo mupwa Sesiasa Polusi lenge dokopa role pyao kareyambi. Kyapo baa akali mondo lao suu pingi dokome Banapasapa Solepa epena lapala Anatunya pii sipuli yaka leya.
ACT 13:8 Leyamopa pipuli akali doko Elimasa lenge (yuu range wambu dupwame kingi dopa leyami) baame kyapo mupwa doko Yesunya pii see nana lao nakamba kando sisi nyiya.
ACT 13:9 Dokopa Sole banya kingi mende Pole lenge Imambu Poo Pyasi dokome baa palyuo simbuyamopa akali doko lenge koo rao kandapala
ACT 13:10 dopa leya. Emba Satanena ikinyingi dake, emba yulu rolae dupwa peparaena sisi nyuo pyuo karo panga sokondali pyuo kendepo kendepo nao karene. Embame Kamongona kata rolae dupwa kyaimai pyuo karene doko kae narese?
ACT 13:11 Epapu Kamongona kingi dokome emba mende pyakalya kande. Embena lenge kwaeramopa yuu lapo emba neta kandalana lisa piri leya. Leyamo dokopa aopa banya lenge dokona kopa peteyasa baa wambu mendeme kii minyuo pumili yaka lao piso soo paeya.
ACT 13:12 Dokopa kyapo mupwa doko dopa pyaamo lao kandapala Kamongona mana pii soo ayaka lapala doko pii kinyilyamo lao suu piya.
ACT 13:13 Enakana Pole banya akali role pyao kareyami dolapo opetae yuu Peposa yaki nyepala sipu dokona piso pao yuu Pambilia yuu kuki lama Peka dokona epeyami. Dokopa Jone baa nakamba yaki nyepala Jerusaleme dokona kapu kyuo peya.
ACT 13:14 Peyamopa nakamba yuu Peka yaki nyepala yuu Andioko yuu Pisitia dokona siyamo dokona epeyambi. Epapala yuu koro petenge dokopa sinakoke anda dokona kolando papala isa peteyambi.
ACT 13:15 Dokopa Mawa Pii dokonape Anatunya poropeta akali dupwana pii dokonape yaka lao otapala sinakoke anda rapu akali dusipame Pole Banapasapa peteyambi dokona akali mende dopa pyuo lamaiyala pena leyami. Anelapo nakamba wambu dupwa wai pii lamairambi ramo doko lamaipwapeko leyami.
ACT 13:16 Dokopa Pole roya karapala banya kingi minya yapala dopa leya. Isaraele akali dupwape Anatu kando pakao petaminyi dupwape nakama selapape.
ACT 13:17 Isaraele wambu dupwana Anatu baame namwana rakange kyawa dupwa nyuo rombo palyiya. Rombo palyapala nakama yuu Isipi dokona mee karala paenge ingyuo kareyami dokopa rara andake karena lao wai kisiya. Enakana baa porayapala nakama Isipi dokona neta lanyuo peya.
ACT 13:18 Lanyuo papala nakama ee kana akalisa kisima ingyuowale yuu muiyane dokona kareyaminyipa baame nakama sakao sakao pyuo minyuo kareya.
ACT 13:19 Dopa pyuo karapala rara wakale yanda ipingi yuu Kenane dokona kareyami dusipa baame pyao ralipala yuu nakamana dusipa Isaraele wambu dupwa nyulu nyuo nyinya lao maiya.
ACT 13:20 Maiyamopa ee kana akalisa kisima daako akalisa malu mee wakasa (450) kareyami. Enakana akali lapo rombo palyapala nakamana jasi akali ingyuo rapu pyuo karena lapo pyakamiya.
ACT 13:21 Enakana doko nakama kiŋi akali mende rombo palyakana leyaminyi dokopa Anatumi Sole baa Kisana ikinyingi Benjamenena rara akali doko rombo palyakamiya. Baa ee kana akalisa kisima kiŋi ingyuo pyuo kareya.
ACT 13:22 Kareyamopa Anatumi baa pyakuiyuo nembapala Dapiti baa kiŋi yulu pyuo karena lao rombo palyiya. Palyiyamo dokopa baasa kando dopa leya. Dapiti Jesena ikinyingi baa nambapa mona mendaki palyapyasa kyanyi kandelyo. Namba laro dokonako palyuo pyuo karara leya.
ACT 13:23 Enakana akali dokona para pyasi kareyami dokona mende Yesu lenge baame Isaraelena Lete Wai Pyao Nyingi akali karena lao baa rombo palyakaro leyamuli pyuo rombo palyakaya.
ACT 13:24 Yesu baa epapa nayamopa Jone baa Isaraele wambu dupwa peparae suu pingi enenge palyapala bapitisimo nyelapape, lao boo pyao lamaiyuo kareya.
ACT 13:25 Jone banya yulu lumwa pyuo karo dokopa dopa leya. Namba apiyakale lao apa lao suu pilyamipi? Namba Koraisa daa. Mende enakana epelyamo doko nambame koo ingyuo karo dokome banya kimbu suu lyolo doko polarono kapa ingya nalyamo leya.
ACT 13:26 Yangonemoo, Aporakamena para pyasi dupwana ikinyingi dupwape wambu menge Anatu kando pakao petaminyi dupwape selapa. Namwa lete wai pyao parami lao Anatumi waili pii doko jilyamo leya.
ACT 13:27 Jerusaleme wambu dupwape nakamana rapu pingi dupwa pipya nakamame baa dopa pyuondelyamo lao soo rola napala Anatunya poropeta akali dupwana pii pyasi palamo doko koro petenge dupwana peparae yaka lapa pingi pii doko soo gisa napalape pii doko leyamuli pyuo piyami.
ACT 13:28 Dokopa renge mendena baa kumara ingya nayamopa nakamame Pailate baame pyao kumakana lapyali yaka lao piso siyami.
ACT 13:29 Dokopa baasa kando dopa pyuo palira dopa pyuo pirami lao Anatunya pii pyasi paleyamuli pyuo nakamame pyuo otapala isa mamando baa yukwaro paleyamo dokona baa neta nyepala malu andana palyiyami.
ACT 13:30 Palyiyaminyipape baa kumuo paleyamopa Anatumi lete nyiya.
ACT 13:31 Lete nyiyamopa wamba wambu yuu Galili karo baa role pyao pao Jerusaleme dokona epeyami dupwa baame range kandena lao maro lapa piya. Baa kandeyami dupwame epapu Isaraele wambu dupwa kando baa piyamo dupwa lamaiyuo rolo karaminyi.
ACT 13:32 Dokona suu pyao nambwame waili pii keyange doko nakama langyala epelyambano. Doko Anatumi namwana rakange kyawa dupwa lamaiyuo dopa piru lalu lao leyapya.
ACT 13:33 Yesu minyalyuo nyiyamo dokome namwa nakamana para pyasi dupwa elyape keta palamo. Dokona suu pyao Dapitinya kenane pii lapo dopa lao palamo. Emba nambana Ikinyingi, namba epapu embena Rakange ingyuo karo.
ACT 13:34 Dee baa dee kumuo rumbya nana lao minyalyuo nyiya dokona lao dopa leya. Dapiti kando yulu yapasi kulisa baa keta pyakaro lamaiyuo, yulu doko emba keta palira leya.
ACT 13:35 Dokona suu pyao kenane wakale mendena dopa letamo. Embame embena poo pyasi akali doko kumuo rumbya nana lao nyere letamo.
ACT 13:36 Dokonako ingyuo Dapiti baame Anatumi suu piyamuli pyuo yulu pyuo kareyamopa kumuya dokopa banya rakange malu piyami dokona maki pyuo baa malu piyami. Banya yanenge doko rumbiya kande.
ACT 13:37 Baa rumbiyamopape mende Anatumi minyalyuo nyiyamo doko baa rumbya naya.
ACT 13:38 Yangonemoo selapape. Namwana koo dupwa nyuo kame sakalyamo doko akali dokona renge palyiyamosa pii doko epapu nakama boo pyao langyuo karambano.
ACT 13:39 Dokona suu pyao Mosesena Mawa Pii dokome namwana koo dupwa ramanyi nembara ingya nayamosa wambu dupwa peparaeme baa kapa ingingi lao suu pyapala mona mairami dupwame nakamana koo dupwa kame sakasi seramo parami.
ACT 13:40 Dokona lao Anatunya akali pii nolako lao kareyami dupwana pii palamuli pyuo nakama keta pali nana lao kandokondali pyuo waso karalapape.
ACT 13:41 Doko pii soo nembo isa minyuo karaminyi dupwa mona nembapala kumaramilyamo. Nakama kararami gii dusipana yulu mende piru doko mendeme langyuo rolara ramo doko nakama kinyilyamo lao suu pyaa narami ingilya kande. Doko ote leya Poleme.
ACT 13:42 Leyamopa potemo pao dokopa wambu dupwame koro petenge dumbinya misi larama dokopa pii leyamo doko baame dee langipyali yaka lao baa piso sokondali piyami.
ACT 13:43 Pipala elyambu pyuo peteyami wambu dupwa anda peyaminyipa Juu wambu lapope dee menge wambu Anatu suu pyao kareyami lapope Pole Banapasapa peyambinyi dokona peyami. Nakambame nakama lamaiyuo, Anatunya mona keyange palyapala ipyuo pyuo karamo yulu dokona sukusa karalu karo karalapape lao waipi lao kareyambi.
ACT 13:44 Koro petenge mendena wambu anda malu palyuo karenge dupwa peparae ingyuowale Anatunya pii sukusa sukusa pyuo sela epeyami.
ACT 13:45 Dokopa wambu malu mee epeyami dupwa Juu wambu dupwame kando ama yango palyapala Pole pii leyamo doko sisu nyuo baa kilya kandalya kandana pyuo leyami.
ACT 13:46 Dopa pyuo leyaminyi dokopa Pole Banapasapa eŋa pyapala, Anatunya pii doko nakama wambo langiramba ingyapya leyambi. Ingyapyamopape nakama pii doko soo matarena nembami dokona kyakana renge palu palenge doko nyerama ingya nalyamo lao suu pyamisa nakama yaki nyuo wambu rara wakale dupwa kando lamairamba ingilyamo.
ACT 13:47 Kamongo dokome namwa dopa pipwape lao langiyamo dokopa pii mende leya. Nakama Juu daa rara wakale dupwana lambe ingyuo kararami ingilyamo. Yuu muu peparaena wambunya lete penge kata doko lasaka pirami ingilyamo, leyaŋa leyambi Pole Banapasapame.
ACT 13:48 Wambu rara wakale dupwa pii doko sepala rae maipala Kamongona pii doko lakandeyami. Dokopa Anatu lete karalu karo kararami lao rombo palyiyamo dupwameko doko pii kinyilyamo lao suu pyapala peyami.
ACT 13:49 Dokopa Kamongona pii doko yuu kipwa kipwa dupwana lamaiyuo raeyami.
ACT 13:50 Dokopa Juu wambu anda repe repe pyuo karenge dokona kareyami dupwame enda mupwa lapo Anatu suu pyao petenge dupwape dee akali kamongo dupwape nembo nembo pyuo lamaiyaminyipa Pole Banapasapa randa nena lao renge kuiyuo karo nakamba yuu dokona kata kaena lao ralinyi nembeyami.
ACT 13:51 Dokopa nakamba kimbu dokona yuu pareyamo dupwa yuu range akali dupwasa kando pyarendanyi yaki nyepakamipala yuu Aikoniuma dokona peyambi.
ACT 13:52 Peyambinyipa disaepole dupwa Imambu Poo Pyasi palyuo simbuyamopa raeko maiyuo kareyami.
ACT 14:1 Aikoniuma dokona Juu wambunya sinakoke anda dokona nakamba kolando papala pii lao kareyambi. Nakamba pii keyange leyambi dokopa wambu malu Juu wambupi Giriki wambupi pii doko soo nyiyami.
ACT 14:2 Dopa piyaminyipape Juu wambu pii kinyi lao suu pyaa nayaminyi dupwame wambu rara wakale dupwa kando mona koo palyinya lao akali dolapo kando nembo nembo piyami.
ACT 14:3 Piyaminyipape nakamba yuu malu eŋa nembapala Kamongo dokona lao baa mona elyape palyapala ipyuo karenge dokona lao lao kareyambi. Pii doko kinyi ingilyamo kandena lao Anatumi nakamba nyisiyamopa nakambame yulu andake wambu kandapala yamarangwarami dopale nakambana kingimi piyambi.
ACT 14:4 Dopa piyambinyipape anda repe repe pyuo karenge paleyami wambu dupwa liti pipala lapome Juu wambu nyiso lapome aposele dolapo nyiso kareyami.
ACT 14:5 Wambu rara wakale dupwame Juu wambu dupwape nakamana rapu pingi dupwa pipya nakamba randa maipala kaname pyala epeyami.
ACT 14:6 Doko sepala nakamba ralo pao yuu Laikonia dokona anda repe repe pyuo karenge yuu Lisara yuu Depi lenge dolapona pao yuu kipwa kipwa dupwana papyuo kareyambi.
ACT 14:7 Nakamba yuu dupwana waili pii keyange boo pyao lao papiyambi.
ACT 14:8 Dopa pyuo papiyambinyi dokopa yuu Lisara dokona akali mende banya kimbu kwaeyamosa kata papinya saka nange doko peteya. Wamba manjinyi peyareyami dokopa papae rambuyamosa kata paa naya.
ACT 14:9 Baa Pole pii lao kareyamo doko soo peteya. Dokopa Pole baame baa kandokondali piya. Pipala Anatumi kapa pyuo nyakara ingilyamo lao kandapala
ACT 14:10 pii porakaiyuo kaeyo lao, Emba kimbu dokome rolae roya karape leya. Dokopa baa wamyalyapala kata nyuo peya.
ACT 14:11 Poleme dopa piyamo kandapala wambu malu kareyami dupwame pii rekyae lalya lana pyuo rangena Laikonia pii lao, Imambu lapo isa akali ingyuo epambinyilamo leyami.
ACT 14:12 Banapasa doko banya kingi Siyasa lengelyamo leyami. Pole baa pii malu leyamosa banya kingi Emesa lengelyamo leyami.
ACT 14:13 Lao kareyami dokona repeta taonena kame netarena dokona imambu Siyasa lengena tembole anda mende kareya. Dokopa Siyasana yulu pingi purisi akali baa mena bulamakao mendepe isa jingi malawai lao suku pyuo kalya pingi lapope minyuo pao wambu dupwa role pyapeta epo nakamba kando Siyasa dokona bulamakao pyao kiso mairama lapala kame kambu dokona epeya.
ACT 14:14 Dokopa Banapasa Polepa dolapo dopa pilyaminyi leyaminyipa sepala nakambana komau minyuo pilyapala wambu netarena malu palyuo kareyami dokona sukusa puupae lao pao kee palyuo dopa leyambi.
ACT 14:15 Nakama akali dupwa apa pipyasa dopa pilyaminyi? Nambwa mee akali nakama dopale. Nakama mee bange kingi lao karaminyi dupwa yaki nyepala Anatu lete karalu karenge dokome baa yake doko pyuo waso yuu doko pyuo waso ipwa kotape dee dokona palenge dupwa pyuo waso piya. Wasiyamo dokoko mona kapu kyuo suu pyao karalapape lao waili pii keyange doko nakama langya epelyambano.
ACT 14:16 Baame wamba rara wakale wakale dupwa kareyami dupwa nakamana yulu pinginyili pyuo pingi dupwa kaena laa naya.
ACT 14:17 Laa napalape namba kara nalyo lapala mende lasaka pii nayande daa. Baa kinyi karamo lao yulu keyange pyuo apunda yake dokona piso epena lao ee nengepe ee kana dupwape nakama mee joo piya. Jiyamo dokome nenge dupwa nao mona anda pyakalyuo pyao karaminyi leyambi.
ACT 14:18 Pii keyange dopa lao kareyambinyipa nakamba imambuŋu lao bulamakao pyao kiso mainya kareyaminyisa nakamba pyuo lekeleke rao kaena leyambi.
ACT 14:19 Dopa piyaminyipa Juu wambu lapo yuu Andioko yuu Aikoniuma range dupwa dokona epapala yuu range wambu dupwa nembo nembo piyaminyisa nakama kinyi lalyaminyi lao suu pyapala nakama Pole kaname piyami. Pyapala baa kumapapyalyamo lao suu pyapala anda malu palyuo kareya dokona kame netarena ipyuo nyuo nembeyami.
ACT 14:20 Nembeyaminyipape disaepole dupwa baa siyamo dokona epo karo awali leyaminyi dokopa baa sipurapala anda malu palyuo kareya dokona sukusa peya. Peyamopa dokona yangama baapa Banapasapa yuu Depi dokona peyambi.
ACT 14:21 Papala dokona anda malu palyuo kareya dokona waili pii keyange doko boo pyao leyambinyisa sepala wambu malu disaepole ingyuo kararama leyami. Nakamba enakana yuu Lisara yuu Aikoniuma yuu Andioko dusipana kapu kyuo lambuo peyambi.
ACT 14:22 Lambuo pao yuu dusipana disaepole dupwa kaeya nao Yesu mona maiyuo karalu karalapape lao, Randa bange malu nao Anatunya isingi panda dokona sukusa parama ingilyamo lao, monarena lao porainyi pyambwapa pyuo papiyambi.
ACT 14:23 Dokopa Elyambu Pingi wakale wakale dupwana nakamba nenge wasaka pyuo ateŋa lao pisipala akali lapo rapu pingi inyuo karena lao rombo palyapa piyambi. Rombo palyapala Kamongo kapa ingingi lao suu pyao mona maiyuo kareyami dokome baa range nakama iso karakaminya lapa piyambi.
ACT 14:24 Dopa pyuo karapala yuu Pisitia dokona sukusa papala yuu Pambilia dokona epeyambi.
ACT 14:25 Dokopa yuu kuki lama Peka dokona pii doko lamaiyuo karapala yuu Atelia dokona lano peyambi.
ACT 14:26 Papala yuu doko yaki nyepala yuu Andioko epeyami. Epapala wambo dokopa nakambame yulu pirambinyi Anatu nyiso karena lao ateŋa lakamiyaminyipa kata nyuo awali lao papyuo yulu doko pyuo otapala dee sipu mendena palyuo anda paleyami yuu dokonako epeyami.
ACT 14:27 Epo kando nyepala Elyambu Pingi wambu dupwa epo sukusa sukusa pinya lapala Anatumi nakamba keta yulu piyamo dupwa polo lamaiyami. Dopa pyuo Anatu baame Juu daa rara wakale dupwa opetaeme pii soo nyerami lao kata wapwakamiya doko lasaka piyamiko.
ACT 14:28 Lamaipala nakamba disaepole dupwa pipya role pyao yuu malu kareyami.
ACT 15:1 Dokopa akali lapo Jutia karo lano epapala Kurisene yangonge dupwa mana lamaiyuo kareyami. Mosese dopa pyuo karalapape lao reteyamo pii doko suu pyao yanenge kalomanyi nemba narami ramo doko Anatumi kapa lete wai pyao nyii nara lao kareyami.
ACT 15:2 Dokopa Pole Banapasapa nakamba nakama pipya renge dokona apiyanda pyuo kareyami. Dokopa Elyambu Pingi wambu dupwame Pole Banapasapa pipya Andioko akali dolomana lapo pipya rombo palyapala aposele dupwape rapu akalipi Jerusaleme karaminyi dupwa pii doko pakana palyuo sinyale lao lala pena leyami.
ACT 15:3 Dokopa Elyambu Pingi wambu dupwame nakama pena lao mapeyaminyipa yuu Pinisiape yuu Samariape yuu dolapona sukusa pao dokopa, Juu iki daa wambu wakale dupwa Anatu dokona mona kapu kyepala karaminyi, lao pakana palyuo lamaiyambinyipa yangonge dupwa peparae raeko maiyuo siyami.
ACT 15:4 Enakana Jerusaleme dokona epeyaminyipa Elyambu Pingi wambu dupwape aposele dupwape rapu akali dupwape yako lao nyiyami. Yako lao nyiyaminyipa nakambame Anatu renge kuiyamopa dopa pyuo karapala epelyambano lao lamaiyambi.
ACT 15:5 Lamaiyambinyipape Parisi akali Yesu suu pyao kareyami lapo sipurapala, Nakama yanenge kalomanyi nembena lapala Mosesena Mawa Pii dupwa suu pyao pyuo karena lamaiyuokondali pirama ingyilyamo leyami.
ACT 15:6 Leyaminyipa aposele dupwa rapu akali dupwape pii renge dokona wato lamana lapala malu palyuo peteyami.
ACT 15:7 Dokopa apiyanda pyuo pii malu leyaminyipa Pita sipurapala nakama lamaiyuo dopa leya. Yangonemoo yuu wamba dokopa Anatumi Juu daa rara wakale dupwa waili pii keyange soo nyerami lao namba yulu dokona yapo nyiya.
ACT 15:8 Anatu wambunya mona anda kandenge doko baame rara wakale dupwa opetae kando rae maipala Imambu Poo Pyasi namwa keta jiyamo doko suu pyao nakama keta maiyako.
ACT 15:9 Baame namwa kamame mendepale inginyi pyambuo suu pyao nakama mee mende ingyuo suu pyao piyande daa. Nakamame Yesu kapa ingingi lao suu piyamisa monarena koo dupwa pyuo poo pyao nyakamiya.
ACT 15:10 Dokona ingyuo nakama apa pipyasa Anatu makande pyuo kandele lao Kurisene yango dupwa kenda renge doko sinya lao mainya pilyamisi? Kenda pingi nakama keta maiyalana pilyaminyi dupwa namwape namwana rora ambasupi dupwame mata punjiyamosa selana saka nayama.
ACT 15:11 Dopa pyuo letaminyi doko kapa ingya nalyamo. Kamongo Yesu ipyapala nakamape namwape nyisiyamopa lete wai pyao parama ingilyamo leya.
ACT 15:12 Pole Banapasapa nakamba Juu daa rara wakale role pyao karapala Anatumi nakamba keta wambumi kando yamarangungi yulu dupwa renge kuiyuo yulu andake piyamo dupwa polo lamaiyuo kareyambi dokopa wambu peparae koo pyuku pyuku pao soo peteyami.
ACT 15:13 Nakambame pii lapeyambinyi dokopa Jemesa enakana leya. Yangonemoo, nambana pii selapape.
ACT 15:14 Saimoneme lao dokopa Anatumi kanda soo Juu daa rara wakale dupwa kame see napala nakama keta epo banya ingyuo nyilyamo lao polo langyalamo kandapi.
ACT 15:15 Lalamo pii dokonako Anatunya poropeta akali dupwame wamba leyami. Leyaminyi dokona Anatunya pii pyasi doko dopa letamo.
ACT 15:16 Namba enakana kapu kyuo epapala Dapitinya anda lalyiyamo doko namba dee piru. Kwao silyamo dupwa dee nyuo minyarambuo pipala anda doko rolo piru.
ACT 15:17 Rara wakale wambu dupwame namba koto kararami ingilyamo. Dupwa Juu daa rara wakale nambame nambana wambu ingyarami lao rombo palyiyu dupwasa leto.
ACT 15:18 Kamongome pii doko yuu wamba lao paneya kande.
ACT 15:19 Dokona Juu daa rara wakale dupwa Anatu mona kapu kyuo karaminyi dupwa lekeleke rena lao laa narama, lao suu pilyu.
ACT 15:20 Laa naramanopape imambu suu pyao mena pyao kiso maingi dokopa kepo pingi yulupi dee mena saape mange minyuo kondelyaminyipa kumungi dupwape ranjama doko waso karena lao pepa pase pyao lamairama.
ACT 15:21 Doko Mosesena Lowa dupwa yuu wamba paleyamopa misi lenge gii dokopa sinakoke anda dupwana yaka lao kareyaminyipa taone dupwana peparae lapome mana lamaiyuo karamiko leya Jemesame.
ACT 15:22 Dopa leyamo dokopa aposele dupwape rapu akali dupwape Elyambu Pingi wambu dupwa peparaepeme namwa karamano dupwana akali lapo Pole Banapasapa role pyao yuu Andioko dokona pena lao rombo palyaramano dokopa kapa ingyara lao suu pyao leyami. Lapala akali Jutasa kingi mende Basapasa lenge dokopa Sailasapa nakamba dupwana akali mupwa ingyuo kareyambi dolapo rombo palyapala role pyao pena lao nembeyami.
ACT 15:23 Pepa pase mende minyuo pena lapala dopa lao piyami. Yangonemoo, nakamana Kurisene yango aposele dupwape rapu akali dupwapeme nakama rara wakale namwana yangonge dupwa yuu Andiokope Siria Silisia karaminyi dupwa yako letamano.
ACT 15:24 Namwa karamano akali lapome pii wakale palyuo nakama mona randalapape lao pyuo kareyaminyipa nakama mona pulunongo pyapyamopa karalyaminyi lao simwa. Namwa pena laa nayama.
ACT 15:25 Doko sepala namwa wato lapala dokopa Banapasa Polepa akali mona retelyamano dolapope dee akali lapo nakamba role pyao pena lao rombo palyilyamano dolapope nakama karaminyi dokona parami doko kapa ingyara lamwa.
ACT 15:26 Banapasa Polepa nakambame Kamongo Yesu Koraisa dokona yulu pyuo kumarambinyi dupwa suu pyaa nao langa pyuo papiyambi.
ACT 15:27 Akali lapo nakamba role pyao pena lao Jutasa Sailasapa pena letamano. Dolapome pii pepa pyao retelyamano dokonako palyuo kambunya langirambi.
ACT 15:28 Dokona lao Imambu Poo Pyasimoo namwa pipya mawa pii kapa minyarami dusipa iki nakama keta paliramo doko kapa ingyara lao suu pilyamano.
ACT 15:29 Imambu dupwa suu pyao mena pyao kiso maingi dupwa naa nalapape. Ranjama naa nalapape. Mena saape mange minyuo kondelyaminyipa kumungi dupwa naa nalapape. Enda kepo pii nalapape. Yulu dusipa kandokondali pyuo waso kararami ramo doko nakama elya pyuo kararami. Pii oteŋe karalapape.
ACT 15:30 Akali dusipa pena leyaminyipa kata nyepala yuu Andioko dokona lano peyami. Papala Elyambu Pingi wambu dupwa epena lao nyuo elyambu pipala pepa pase doko maiyami.
ACT 15:31 Maiyaminyipa kando yaka lapala wai pii pyasi paleya doko kando ama mona pyakalyuo pyao kareyami.
ACT 15:32 Dokopa Jutasa Sailasapa Anatunya poropeta akali dolapo pii malu lao waipi lamaiyuo nakama porainyi pyambuyami.
ACT 15:33 Yuu lapo kareyaminyipa yangonge dupwame puu minyuo karamana lao nakama mapanyi peeyaminyipa nakama kapu kyuo anda peyami.
ACT 15:34 Peyaminyipa Sailasa dokona kareya.
ACT 15:35 Dokopa Pole Banapasapa yuu Andioko dokona akali malu dupwa role pyao karo Kamongona pii boo pyao mana lamaiyuo kareyami.
ACT 15:36 Yuu lapo epo papeyamopa Poleme Banapasa lamaiyuo, Yuu anda malu repe repe pyuo karenge dupwana Kamongona pii doko boo pyao lamaiyuo papiyamba dupwana Kurisene yangonge dupwa apa pyuo karaminyi lao yuu dupwa peparaena dee bonale, leya.
ACT 15:37 Dokopa Banapasame akali Jone kingi mende Make lenge doko baa role pyao lanyuo pumwali yaka leya.
ACT 15:38 Banapasame dopa leyamopape Poleme dopa lao suu piya. Yuu Pambilia dokona karo yulu ene paleyamopape role pyao paa narama lapala Make nambwa yaki nyepala ralo epeya kande. Akali doko dee role pyao parama ramo doko kapa ingya nara lao suu piya.
ACT 15:39 Dokopa apiyanda andakende piyambi. Pipala yuu wakale wakale papala Banapasame Make lanyuo sipu mendena piso yuu Saiporasa dokona peya.
ACT 15:40 Peyamopa Poleme Sailasa nyepala peya. Panya dokopa Kurisene yangonge dupwame Kamongo dokome ipyapala nakama rapu karena lao loma sakamiyami.
ACT 15:41 Papala yuu Siriape yuu Silisiape dolapona sukusa pao Elyambu Pingi dusipa porainyi pyambwama peya.
ACT 16:1 Pole yuu Depi epapala yuu Lisara epeya. Yuu dokona disaepole mende Timoti lenge kareya. Banya endangi doko Juu endandeme Yesu suu pyao peteya. Banya rakange doko Giriki akali.
ACT 16:2 Kurisene yangonge yuu Lisarape yuu Aikoniumape kareyami dupwame baa kando lakanda minya minya pyuo kareyami.
ACT 16:3 Poleme baa role pyao lanyuo parama lao suu pyapala Juu akali yuu dupwana kareyami dupwame banya rakange Giriki akali doko soo gisiyami dokona imbwuaraminyi lapala baa nyepala yanenge kalomanyi nembeya.
ACT 16:4 Nembapala pao yuu anda malu repe repe pyuo karenge dupwana pao dokopa yuu range wambu dupwa mana lamaipa pyuo peyami. Aposele dupwape rapu pingi dupwape yuu Jerusaleme dokona wato lao mawa pii palyiyami dupwa minyarami lao mana lamaipa pyuo peyami.
ACT 16:5 Mana lamaipa pyuo peyaminyisa Elyambu Pingi wambu dupwa mana keyange nyepala poraiyami. Dokopa yuu yangeyamo yaka lao akali lapo sukusa epeyaminyipa konda pyuo peteyami.
ACT 16:6 Imambu Poo Pyasimi nakama yuu Esia dokona pii doko lala paa nana leyasa nakama yuu Pirisiape yuu Galasiape sukusa peyami.
ACT 16:7 Papala yuu Misia doko kanda kanda epapala yuu Bitinia dokona panya suu piyami. Suu piyaminyipape Yesunya Imambu dokome dokona paa nana leya.
ACT 16:8 Dopa leyasa nakama yuu Misia kandanyi pyambana pao yuu Toasa dokona luypyuo peyami.
ACT 16:9 Papala kukwa dokopa Poleme pii repa repa mende piyamopa kandeya. Dokopa Masetonia akali mendeme Pole kando kongo pyuo, Embame yuu Masetonia dakena namwa nyisala laeyo ipupi, leyamo siya.
ACT 16:10 Pii repa repa piyamo doko baa kandeyamopa namwa aopa yuu Masetonia dokona panya lao kareyama. Anatumi yuu dokona range waili pii keyange doko lamaiyala ipupwape lapyalyamo lao suu piyama.
ACT 16:11 Dokopa sipu mendena piso yuu Toasa yaki nyepala pao yuu Samotesa dokona kanda kanda rolae pao kando nyiyama. Dokona yangama yuu Niapolisa dokona epeyama.
ACT 16:12 Papala yuu Pilipai dokona peyama. Yuu Masetonia dokona Pilipai taone doko mupwa ingyuo singi. Yuu dokona Orome yanda singi akali malu kareyami. Namwa yuu lamasa taone dokona kareyama.
ACT 16:13 Yuu koro petenge dokopa namwa taone dokona neta papala Juu wambu ateŋa lenge panda dokona parama lao suu pyapala ipwa pona nemba nembandena peyama. Papala isa pisipala enda elyambu pyuo peteyami dupwa pii lamaiyuo peteyama.
ACT 16:14 Enda mende namwana pii soo peteya doko banya kingi Litia lenge. Baa anda malu repe repe pyuo karenge yuu Tayataira lengendena bisinase enda ingyuo piso komau maa komeya kapa dopale dalapome kana pyao nyepa pyuo kareya. Baa enda Anatu suu pyao peteya. Kamongo dokome banya mona roma lumbwakamiyasa Polena pii doko warombo soo peteya.
ACT 16:15 Baa banya anda range wambu dupwa opetae bapitisimo nyepala baame namwa piso sokondali pyuo dopa leya. Namba Kamongo dokona angingyuo mona kapu kyilinyi lao suu pyarami ramo doko nambana anda dokona palirama ipupwape leya. Dopa lao poraiyuo leyamosa kapa leyama.
ACT 16:16 Ateŋa lenge yuu dokona panya peyamanopa katasa kendemande wanake mende kando nyiyama. Imambu koo mendeme baa maralyiyamopa enakana pira dupwa wambo nolako lao peteya. Baa dopako pyuo kana malu nyepala epo maipa piyami dokopa akali wanake rapu pyuo kareyami dusipame kana malu dupwa nyepa piyami.
ACT 16:17 Baa Pole namwa pipya peyamanuli pyuo enakana epo pii poraiyuo lao dopa leya. Akali dasipa Anatu Ama Ketae Karamo dokona yulu pingi akali karapala Anatumi lete wai pyao nyingi yulu dokona nakama boo pyao langyuo karaminyi leya.
ACT 16:18 Dopa pyuo yuu malu lapa piya. Dopa piyamopape Poleme kando mona kendapala imambu koo doko dopa lamaiya. Yesu Koraisana kingi lao emba baa kaepala neta ipu leto leya. Leyamo yuu gii dokopako imambu doko kaepala neta epeya.
ACT 16:19 Dokopa akali wanake range dusipa dee kana nyii naramalyamo lao kandapala Pole Sailasapa minyarapala kote pii lenge kamapi dokona ipyuo minyuo kamongo peteyambinyi dolapona lenge kambu dokona minyuo pao kareyami.
ACT 16:20 Kote singi akali dolapo peteyambi dokona minyuo epapala dopa leyami. Juu akali dolapome namwa taone dakena range uki palyinyi retelyambinyi.
ACT 16:21 Namwa Orome akali yulu pii nange mawa pii palamo dupwana lapo nyuo pipa lao karambinyi leyami.
ACT 16:22 Dopa leyaminyi dokopa mee wambu buu minyuo kareyaminyipa nakama opetaeme nakamba pyalana pyuo kareyami. Dokopa kote singi akali dolapome Pole Sailasapana komau minyapala pyalu nyiyambi. Nyepala pangali isa lapome pinya leyami.
ACT 16:23 Randame kumunya lao yuu malu pyapala karapusi anda dokona pyambwapala karapusi rapu pingi akali dokome nakamba neta pasarambi kandokondali pyuo rapu pyuo karena leyami.
ACT 16:24 Dopa lao lamaiyuokondali piyami pii doko sepala nakamba karapusi anda sukusandena palyapala kimbu dolapo isandeme rambukinyinyi palyiya.
ACT 16:25 Dopa pyuo palyiyamopape kukwa andasukulya dokopa Pole Sailasapa Anatu lamaiyuo ateŋa lao kenane pyao peteyambinyipa karapusi akali lapo paleyaminyi dupwame soo peteyami.
ACT 16:26 Dokopa aopa yuusili andake mende minyiya. Minyapala kana lapo anda dokona kimbu pee isa ingyaro isarena kareyami dupwa minyuo romo romo piya. Romo romo pipala kambu dupwa peparae lumbuya. Lumbwapala akali peparaena puu maiyaminyi bange dupwa mee kako lao isa peya.
ACT 16:27 Karapusi akali rapu pingi doko lenge rapala karapusi anda kambu dupwa lumbwasi siyamo kandapala wua gela banya doko ipyuo nyepala karapusi akali dupwa mokwala paminyilamo lao suu pyapala range nyepala kumalana lao kareya.
ACT 16:28 Dopa lao kareyamopa Poleme pii porakaiyuo lapala dopa leya. Emba range pyaa kaeyape. Namwa peparae dae petamano leya.
ACT 16:29 Dopa leyamo dokopa baa isare lapo minyuo epena lapala andakare waiya lao epapala pakame kumapala pungwa pungwa pyao Pole Sailasapana lenge kambu dokona isa siya.
ACT 16:30 Dopa pyuo pipala nakamba kamanda lanyuo papala, Akali anelapo, namba apa pirusa Anatumi namba lete wai pyao nyera? lao piso siya.
ACT 16:31 Piso siyamo dokopa nakambame lao, Kamongo Yesu kapa ingingi lao suu pyapala mona maipi. Dokopa Anantumi embape embena anda range dupwa opetaepe lete wai pyao nyera leyambi.
ACT 16:32 Lapala baamoo banya anda paleyami dupwa peparaepe Kamongona pii doko mana lamaiyambi.
ACT 16:33 Kukwa yuu gii dokopako baame nakamba nyepala yanenge kusapeme piyaminyisa poro leyamo dupwa ipwa poeyanyi nembakamiya. Nembakamipala baa banya ree palu dupwa pipya peparae aopa bapitisimo nyiyami.
ACT 16:34 Nyepala baame nakamba banya anda lanyuo papala nenge lapo nyepala nakamba nenge piya. Dokopa baa banya anda range palenge dupwa pipya peparae Anatu kapa ingingi lao mona maiyuo karamano lao raeko maiyuo kareyami.
ACT 16:35 Yuu yangeyamo dokopa kote singi akali dolapome yanda singi dupwa akali dolapo mokona lamaiyala pena leyambi.
ACT 16:36 Dokopa karapusi rapu pingi akali dokome Pole lamaiyuo, Kote singi akali dolapome nakamba mokwalale langyala pena lalambinyilamo. Kamanda epapala mona seramopa pupwape, lalambinyiŋi leya.
ACT 16:37 Dopa leyamopape Poleme nakama lamaiya. Nambwa Orome akalinde karambwanopa kote lao rolo koo mende pimbiŋi lao laa napala nambwa pyaroko pyapala karapusi anda dakena mee pyanami kandapi. Dopa pipala dakepa nambwa mee yalu pyuo neta nembamana lao letamisi? Akali andake dupwa nakamba rangeme nambwa moko nyela epena lala pupwa, leya.
ACT 16:38 Leyamo pii doko yanda singi dupwame kote singi akali dolapo lamaiyamisa nakamba Orome akali ingyuo karenge dalama pyamwalamo lao masapala pakayami.
ACT 16:39 Pako epo nakamba kando yulu kopetame pimwalyamo lapala kondalyamano lamaiyami. Lamaipala kamanda lanyuo papala taone doko yaki nyuo pumbili lapala lamaiyami.
ACT 16:40 Lamaiyaminyisa nakamba karapusi anda doko yaki nyepala enda Litiana anda peyambi. Papala Kurisene yangonge dupwa kandapala waipi lamaipala enakana nakamba kanjakala peyambi.
ACT 17:1 Yuu Amapipolisape yuu Apoloniape sukusa papala yuu Tesalonaika Juu wambunya sinakoke anda mende kareyamo dokona epeyambi.
ACT 17:2 Epapala Pole pengenyili pyuo andakare papala pii pyasi paleya dokona lao nakamame pii kinyi letene lao suu pyamili lapala pii renge mendena nyepa mendena nyepa pyuo lamaiyuokondali pyuo koro rema karapa piya.
ACT 17:3 Buku Baepolena leyamuli pyuo Koraisa randa napala kumuo palipala lopo epara ingiyamo doko mana lamaiyuo panalu pano paneya. Dopa lao karo Yesu mendaki dokoko baa Koraisa ingyuo karamo lao kareya.
ACT 17:4 Dokopa nakama peteyaminyi dupwana lapome pii doko kinyilyamo lao suu pyapala nakama Pole Sailasamoo pipya pao role pyao kareyami. Dopako pyuo Giriki akali Anatu suu pyao kareyami ama malu lapo pipya enda kamongo mee mendele malu lapo pipya nakama opetae Pole Sailasamoo pipya role pyao kareyami.
ACT 17:5 Dokopa Juu akali dupwame yango palyiyami. Yango palyapala akali yulu koo pyuo kendepo kendepo nao kareyami dupwana lapo yapalyuo nyepala mee wambu malu dupwa opetaeko sukusa sukusa pyuo epena lapala taone dokona palenge wambu dupwa kookae lapala kaiya karena lao nyuo peyami. Dokopa Jesonena anda andakare piso pilyambinyi lao suu pyapala mee wambu dupwa karaminyi dokona nyuo lanyuo parama lapala anda kambu dokona andambupi nao peyambi.
ACT 17:6 Papala nakamba kando nyii napala Jesonemoo Kurisene akali lapo pipya ipyuo nyuo wato lenge anda akali kamongo kareyami dokona peyami. Papala pii porakaiyuo lapala dopa leyami. Isa yulu pingi doko kapu kyepala mende pilapape lao papyuo karambinyi pipa dakena imbi.
ACT 17:7 Imbinyipa Jesoneme yako lao nyipyamopa nakama peparae Sisame mawa pii lenge dupwa kamba lapala yulu wakale pyuo kiŋi wakale Yesu lenge mende karamo letaminyi leyami.
ACT 17:8 Dopa leyaminyi dokopa mee wambu dupwape taone akali kamongo dusipape pii doko sepala pii porakaiyuo lao buu minyiyami.
ACT 17:9 Dokopa nakama Jesonemoo menge dusipapeme kana lapo jinya lapala mokoyami.
ACT 17:10 Dokopa Kurisene yangonge dupwame Pole Sailasapa kukwa dokopa yuu Beria dokona aopa pena leyami. Papala yuu doko kando nyepala Juu wambunya sinakoke anda dokona kolando peyambi.
ACT 17:11 Juu wambu dokona kareyami dupwa suu pingi mondo lao suu pyao kareyami. Nakama Tesalonaika Juu akali dupwame mondo lao suu pyao kara nayami dopale ingya naya. Dokona lao nakama pii lamaiyamo doko simwali yaka lao karapala baa kinyi letape lao Anatunya pii pyasi palamo doko yangama alemanji lao poraiyuo kandaro peteyami.
ACT 17:12 Dopa pyuo karapala wambu malu pii kinyi lalyamo lao suu piyami. Giriki akali lapope Giriki enda kamongo lapo andapyuwaleme kinyi lalyamo lao suu piyami.
ACT 17:13 Lao suu piyaminyipape Juu wambu yuu Tesalonaika range dupwame Poleme Anatunya pii doko yuu Beria dokona opetae lao kareyamo lasi pii doko sepala nakama dokona epapala mee wambu dupwa nembo nembo pipala pyala pena lao kunji piyami.
ACT 17:14 Kunji piyaminyi dokopa Kurisene yangonge dupwame aopa Pole ipwa kota nemba nemba dokona pena leyami. Leyaminyipa Sailasa Timotipa dokona mee kareyambi.
ACT 17:15 Dokopa akali lapome Pole lanyuo yuu Atenesa dokona mapala peyami. Papala Poleme Sailasa Timotipa waiya lao epena leyamosa nakama kapu kyepala yuu range Beria dokona pii doko lamaiyala peyambi.
ACT 17:16 Dokopa Pole nakamba epelyambipi lao Atenesa dokona isaro karo taone dokona bange Anatu kaepala kingi kareyami dupwa kaiya karo siyamo kandapako pyuo peya. Dokopa baa monarena yako lao suu piya.
ACT 17:17 Suu pyapala yuu yangeyamo yaka lao sinakoke anda dokona papala Juu wambupi rara wakale Anatu suu pyao kareyami dupwape pipya pii lao kareya. Dee yuu lapo nenge ropo pingi kamapi dokona papala wambu epo kareyami dupwa pii kinyi lalyamo lao sinya lao poraiyuo lamaipa piya.
ACT 17:18 Dokopa akali anjuku pii kinyi lao yuu peparae poraiyuo suu pyanyi pyano kareyami dupwana lapo kingi Epikuriana Setoikipi lenge dupwame baa kareyamo dokona epeyami. Epapala banya pii sepala lapome, Akali pii lao papingi doko apa letamo? leyami. Lapome, Imambu wakale nanesa karenge lapona boo pyao lao karalalyamo, leyami. Baame Yesunya kingi laope baame lopo epeya leyamosa pii doko leyami.
ACT 17:19 Lapala baa nyepala lanyuo pao kote soo wato lao karenge akali Areopakasa lenge dupwa kareyami dokona papala, Emba mana pii enenge letene doko aki pii lao simwali yaka, leyami.
ACT 17:20 Emba pii namwa see nangende minyuo epo namwana kale dokona palyakapisa dokome pii renge doko akinde letene lao simwali yaka, leyami.
ACT 17:21 (Yuu Atenesa range dupwape nanesa wambu dokona palenge dupwape nakama peparae pii enenge wakale wakale rae maiyuo koto pyuo kareyami.)
ACT 17:22 Dopa pyuo kareyaminyipa Pole Areopakasa akali peteyaminyi sukusa dokona karapala dopa leya. Atenesa akali dupwa, nakama imambunya yulu dokona poraiyuo suu pyaokondali pyuo karaminyi lao kandelyo.
ACT 17:23 Dokona lao kata epo dokopa bange wakale wakale ketae pyambuo yako lao karaminyi dupwa kando papipunupa imambu mupwa mende karo pilyamo lao kana ratendena bange reto mainginde dokona pepa pyasi palipyamo kandapu. Doko imambu mupwa mende kingi see nalyamano dokona suu pyao dake pilyamano lao pyao reteyaminyi kandapu. Dokona suu pyao kando see napala ketae pyambuo yako lao karamipyasa dokoko nambame nakama kingi polo langilyu.
ACT 17:24 Anatu baa isa yuu dokope bange dokona silyamo dupwa peparaepe pyuo wasiyamo dokoko yake panda dokonape isa yuu dapwanape Kamongo ingyuo karamo dokome imambu anda akalimi piyami dupwana kara nange.
ACT 17:25 Dopa pyuo karamo dokona lao baa mende aeya napyande isa wambu dupwame kingimi baa isaro pyuo kararami ingya nalyamo. Dokona suu pyao baa rangeme akali peparae lee karenge rengepe ŋeeŋae singi rengepe bange peparaepe joo karenge.
ACT 17:26 Akali rara yuu muu dupwana karaminyi dupwa peparae baame rara mendakindena paka lakyapala liti pinyi peyarapu karena leya. Baameoko nakama ee kana akipare kararami laope yuu liti anjukunya kararami laope rangeme rombo palyingi.
ACT 17:27 Isa wambumi baa koto kando soo gisamwali yaka lapala angi kando nyerami lao rombo palyapa piya. Dokona ingyuo baame namwa nanesale karelyande daa.
ACT 17:28 Dokona lao, Baame kyawa minyapyamopa namwa romo romo pyuo papyuo, mona palipyamopa lete karamano. Nakamana kenane pingi akali lapome dopa leyami, Namwa banya para pyasi ingyuo karamano.
ACT 17:29 Namwa Anatunya para pyao nyisi karamano dokona suu pyao akalimi kana golo dee kulingi kanape kana wakalepe nyepala kingi suu pingipi mora petenge dokome Anatu yale ingyuo wasiyamilyamo lao suu pyaa namanale.
ACT 17:30 Namwa kamenge see nao kareyama gii dupwana Anatumi mata joo kae napala akali yuu muu peparaena karaminyi dupwa kondo kandapala nakamana koo dupwa yaki nyuo suu pingi enenge suu pyao karalapape lao karamo.
ACT 17:31 Dokonako ingyuo akali mende rombo palyiyamo doko renge paliramopa yulu rolae pinginya renge dokome isa wambunya yulu dupwana lao rolara yuu gii baa dopa pira doko rombo palyapeya. Wambu peparaeme dopa piralyamo lao soo gisinya lao akali doko kumuo paleyamopa minyalyuo nyiya leya.
ACT 17:32 Dokopa mendali lopo epeya leyamo doko sepala lapome giyalya giyana piyami. Lapome giyalya giyana piyaminyipape lapome pii dokona dee kamba simwali yaka, leyami.
ACT 17:33 Dopa pyuo piyasa Pole baa dokona kaepala peya.
ACT 17:34 Kaepala peyamopape lapome baa role pyao karapala pii kinyi lalyamo lao suu pyapala mona maiyami. Kote singi akali Dayonisiasapa enda mende kingi Damarisa lenge dolapo pipa pii doko soo nyiyami.
ACT 18:1 Enakana Poleme yuu Atenesa yaki nyepala yuu Korina dokona peya.
ACT 18:2 Dokona Juu akali mende Akuila lenge doko yuu Pondasa range doko kando nyiya. Gapomane akali mupwa Kolotiasa baame Juu wambu yuu Orome doko kaepala pena lao mawa pii palyiyamosa Akuila banya etenge Pirisila lenge dokopa yuu Itali yaki nyepala ene doo epapala kareyambi. Dokopa baame nakamba kandala peya.
ACT 18:3 Polena yulu pingi dopako pyuo komau anda pingi dokorekeko wapungindeyasa dokona baa opetae nakamba pipya palyuo pyuo kareyami.
ACT 18:4 Dopa pyuo karo dokopa koro petenge gii dupwana pii pakana palyuo lamaipa pyuo kareyasa Juu wambupi Giriki wambu lapopeme kinyi lalyamo lao suu piyami.
ACT 18:5 Poleme pii boo pyao karo Juu wambu lamaiyuo pii kinyi leto lao Yesu baa Koraisa ingyuo karamo lao kareyamopa Sailasapa Timotipa yuu Masetonia karapala epo yuu doko kando nyiyambi.
ACT 18:6 Dokopa Juu wambu dupwame baa kando sisu nyepala kilya kando leyami. Kilya kando leyaminyisa baame banya komau dolapona sinjumi dupwa pyarandanyi nembeya. Nembapala lao, Nakama neta kararami ramo doko nakamana ranjama dupwa nakama range keta palena, namba keta pali nalyamo. Epapu nakama kaepala Juu daa rara wakale dupwa lamairu leya.
ACT 18:7 Lapala kareyamo yuu doko yaki nyepala akali mende baa kingi Taitesa Jasatasa lenge dokome Anatu ketae pyambuo yako lao kareya dokona anda peya. Banya anda doko sinakoke anda kambu dokopa maki pyuo kareyambi.
ACT 18:8 Sinakoke anda rapu pingi akali doko Kirisapasa lenge dokomoo banya anda range palenge wambu dupwa pipya Kamongo baa kapa ingingi lao suu pyapala mona maiyami. Dokopa yuu Korina wambu lapo Polena pii sepala Yesu kapa ingingi lao suu pyapala mona maipala bapitisimo nyiyami.
ACT 18:9 Dokopa kukwa mendepa Pole pii repa repa pipala Kamongo dokome baa lamaiyuo, Emba paka napipi. Paka napala pii doko kaeya napala mee laoko karape, leya.
ACT 18:10 Dokona lao namba embapa role pyao karambano. Dokopa akali mendeme emba randa jii nara. Anda malu repe repe pyuo karenge dakena nambana wambu malu karaminyi leya.
ACT 18:11 Dokopa ee kana mendaki kana pakinyamange opetaepe Anatunya pii mana lamaiyuo nakama kareyami dokona kareya.
ACT 18:12 Lao kareyamopape Galio yuu Akaya dokona kyapo mupwa ingyuo rombo palyiyami gii dokopa Juu wambu dupwame mendakinya palyuo lapala Pole pyalana pyuo nyepala lanyuo kote lenge anda dokona peyami.
ACT 18:13 Papala, Namwame Anatu ketae pyambuo misi lengenyili pyuo pingi dokona akali dakeme alowa pipala suu pingi enengendena palyuo pipwa lao karamo leyami.
ACT 18:14 Dokopa Poleme pii mende lalana suu pyao kareyamopa Galiome Juu wambu dupwa kando dopa lamaiya. Kote pii renge doko kendepo nao yulu koo mende pipyandena pili doko nambame nakama Juu wambu dupwa rape rape lao sakapuli.
ACT 18:15 Kote pii renge doko mee pii lapope kingi lapope nakama rangena mawa pii dokope dupwana aki kyai aki rolae lao imilyamo, dokona nakama range lao rolalapape. Namba range pii dasipana lao rolaro ingya nalyamo leya.
ACT 18:16 Lapala kote singi dokona karo kaepala pena lao ralinyi nembeya.
ACT 18:17 Nembeyamopa akali Sosatenisa lenge sinakoke anda rapu pyuo karenge doko mee wambu dupwa peparaeme minyarapala nyepala kote lenge mare dokona pyao kareyami. Piyaminyipa Galiome kandele kanda nale leya.
ACT 18:18 Dopa piyamo dokopa Pole yuu malu dokona karapala Kurisene yangonge dupwa role pyapeta kareya. Enakana sipurapala yuu Siria dokona baamoo Pirisila Akuila pipya sipu dokona piso peyami. Ene panya karo dokopa yuu Senekoria dokona baame mende pironya lalu lao lao banya kyawasi doko pyakepo muu piya.
ACT 18:19 Enakana yuu Epesasa dokona epeyami. Epapala nakamba yaki nyepala Pole baa range sinakoke anda dokona papala Juu wambu lamaiyuo pii renge doko dokonandelyamo dokonandelyamo lao suu pinya lapala mana lamaiyuo kareya.
ACT 18:20 Dokopa nakamame baa yuu lapo dee kambu soo karamana leyamisa baa daa leya.
ACT 18:21 Daa leyamopa nakama karena lao karo dokopa, Anatumi kapa lara ramo doko nakama karaminyi dakena dee kapu kyuo eparo leya. Lapala sipu dokona piso yuu Epesasa yaki nyepala peya.
ACT 18:22 Pao sipu yaki nyepala yuu Sisaria dokona pyakambuya. Pyakambwapala lalyuo pao Elyambu Pingi wambu dupwa yako lapala lano pao yuu Andioko dokona peya.
ACT 18:23 Yuu dokona yuu gii lapo karapala dee yuu doko yaki nyuo pao yuu Galasiapa yuu Pirisiapana nemba nemba dupwana papyuo disaepole dupwa peparae mana lamaiyuo porainyi pyambwapa pyuo papiya.
ACT 18:24 Dokopa Juu akali mende kingi Apolosa lenge doko yuu Alekesandia range doko yuu Epesasa dokona epeya. Baa akali pii mondo lao karengendena Anatunya pii pyasi palenge doko soo gisapala lao karenge.
ACT 18:25 Baa wamba Kamongona yulu dokona mana lamaiyaminyipa sepala karo baa Joneme bapitisimo nyakamaingi yulu doko iki kando pyuo kareyamopa Yesu dokona pii lenge dupwana rolo mana lao rae maiyuo kareya.
ACT 18:26 Baa epapala dokopa sinakoke anda dokona eŋa nembapala kanda soo leya. Leyamopa Pirisila Akuilapame banya pii leyamo doko sepala baa nyuo mana lamaiyuo roleyambi.
ACT 18:27 Roleyambinyipa baa yuu Akaya dokona oko soo panya pyuo kareyamo dokopa Kurisene yangonge Epesasa karenge dupwame baa kapa pena lapala disaepole dupwame baa yako lao nyinya lao pepa pase pyao maiyami. Maiyaminyipa baa yuu dokona kando nyepala Anatumi mona elyape palyapala, wambu ipyuo nyisiyamopa Kurisene ingiyami dupwa ama nyisiya.
ACT 18:28 Dokona lao mee wambu soo peteyaminyipa Anatunya pii pyasi palenge doko nyepala Yesu baa Koraisa dokoŋo lao mana lamaipala Juu wambumi mende wakale lao kareyaminyi dupwana pii doko anamapala bulumbulu piya.
ACT 19:1 Apolosa baa yuu Korina dokona kareyamopa Pole yuu Epesasa dokona sukusa papyuo kareya. Dokona disaepole lapo kareyaminyi kando nyiya.
ACT 19:2 Kando nyepala baame nakama dopa lamaiya. Nakama Yesu kapa ingingi lao suu pyao mona maipala dokopa Imambu Poo Pyasi nyiyamipi mee? leya. Leyamo dokopa nakamame lao, Daa, Imambu Poo Pyasinya kingi doko namwame see nange leyami.
ACT 19:3 Dopa leyaminyi dokopa baame, Bapitisimo nyiyami kande doko renge doko akindena lao nyiyamisi? leya. Dokopa nakamame, Joneme bapitisimo nyakamingi dokona nyiyama, leyami.
ACT 19:4 Dokopa Poleme dopa leya. Joneme bapitisimo nyakamiya dokopa mona enenge palyapala bapitisimo nyelapa lao kareya. Lao karo akali mende Yesu lenge enakana epara doko kapa ingingi lao suu pyapala mona maipala lao wambu dupwa lamaiyuo kareyaŋa leya.
ACT 19:5 Pii doko sepala Kamongo Yesunya kingi dokona lao bapitisimo nyiyami.
ACT 19:6 Poleme banya kingi doko nakamana kyawa dupwana ketae retapa piyamo dokopa Imambu Poo Pyasi nakama keta maralyapa piya. Dokopa pii wambumi laa nange rara wakale lapala Anatunya pii nolako lao kareyami.
ACT 19:7 Dopa pyuo kareyami wambu dupwa nakama peparae akalisa ipisu lama dopale ingyuo lao kareyami.
ACT 19:8 Dokopa Poleme sinakoke anda dokona kolando papala kana rema kumanyi nembo eŋa nembapala lamaiyuo kareya. Karo dokopa Anatunya isingi yulu dokona lao kinyi lao suu pyalapape lao pii renge dokona lamaiyuokondali pipa piya.
ACT 19:9 Dokopa lapome simbi simbi pipala baa kinyi letamo lao suu pyaa nayami. Suu pyaa napala elyambu pyuo peteyaminyi wambu dupwana lenge kambu dokona karo Yesu kata lasaka piyamo doko koolamo leyaminyisa baame nakama yaki nyepala disaepole wambu dusipa nyuo lanyuo papala yuu yangeyamo yaka lao Tiranasana sukuli anda dokona pii renge dokonandelyamo dokonandelyamo lao suu pyapalapape lao lamaiyuo kareya.
ACT 19:10 Ee kana lamana dopa pyuo kareya. Pyuo kareyamosa yuu Esia dokona Juu wambu dupwape rara wakale dupwape Kamongona pii doko siyami.
ACT 19:11 Dokopa Anatumi renge kuiyamopa Poleme kingi dokome yulu kanda nange dupwa piya.
ACT 19:12 Dopa pyuo kareyamo dokopa angesipu lenge lapope panda komau mendereke lapope banya yongo dokona warendapapu minyuo pao anga pingi wambu siyami dokona peeyaminyisa anga wakale wakale piyamo dupwa mee ingyuo imambu koo dupwa nakama yaki nyepala pao piyami.
ACT 19:13 Dopa pyuo kareyamo dokopa Juu akali imambu koo rekya lanyi nembo papyuo karenge lapome wambu imambu koo maralyiyamopa kareyami dupwasa kando Kamongo Yesunya kingi larama lapala dopa lapa pyuo kareyami. Lao dokopa Poleme Yesunya kingi boo pyao lao karenge dokona lao emba neta ipu langyalu langyuo langilyu leyami.
ACT 19:14 Juu akali purisi mupwa kingi Sipa lenge dokona ikinyingi yanda ipingi nyerome dopa pyuo kareyami.
ACT 19:15 Dopa pyuo kareyaminyipape imambu koo dokome nakama isingi lamaiya. Yesu namba soo, Pole namba soo pilyuŋu, nakama apimoowase? leya.
ACT 19:16 Leyamo dokopa imambu koo maralyiyamo akali dokome nakama kareyami dokona mangala papala nakama peparae kalyanaro kareya. Kareyasa nakama ralo papara karo yanenge dupwa poro leyasa anda kanjakala peyami.
ACT 19:17 Dopa pilyaminyi leyami doko Epesasa range Juu wambupi Giriki wambupi peparaeme siyami. Sepala nakama peparae pakame kumuyami. Dokopa Kamongo Yesunya kingi doko lakando kareyami.
ACT 19:18 Dokopa ene doo Yesu suu pyao kareyaminyi dupwana malu epapala dopa pyuo karamano dapa pyuo karamano lao pano polo leyami.
ACT 19:19 Lao kareyaminyi dokopa wambu pipu wakale wakale lenge malu dupwame nakamana buku lapo pipu yulu dokona mana nyingi dupwa minyuo pao malu palyuo retapala wambu peparae kando kareyaminyipa isare kainyi palyiyami. Dokopa buku dupwa kana akipare ropo pingi lao suu pyao yaka lapala kana kina ama malu wakasame (50,000) ropo pingi dupwa kisiyami.
ACT 19:20 Dopa piyaminyi dokopa Kamongona pii doko soo ando londalu londo londeya.
ACT 19:21 Dopa pipeyamopa Pole Imambu dokome renge kuiyamopa yuu Masetonia yuu Akayape dolapona sukusa pao yuu Jersaleme paro lao suu pyalu pyao piya. Yuu dokona papala enakana yuu Orome doko opetae kandaro ingilyamo leya.
ACT 19:22 Dopa lapala baa nyiso kareyami akali dokona Timoti Isasatasapa dolapo yuu Masetonia dokona pena lapala baa range yuu Esia dokona kareya.
ACT 19:23 Dopa pyuo kareya yuu gii dokopale Yesunya yulu dokona Epesasa wambumi kilyipu kilyipu karo lao kareyami.
ACT 19:24 Dokona lao akali mende Dimitiasa lenge doko kana kyewa lenge nyepala dokome bange pyuo waso karenge akali dokome enda imambu kingi Atemisa lenge dokona tembole anda doko makande pyuo kana kyewa lenge dokome pyuo wasiya. Akali dokome akali lapome mondo lao wasiyami dupwa yulu malu nyuo maipa pyuo kareyasa kana malu nyepa pyuo kareyami.
ACT 19:25 Akali yulu dokore pingi dupwa nyuo sukusa sukusa pipala dopa leya. Yangonemoo, namwame yulu dopa pyuo karamano dokome kana nyilyamano doko nakama silyaminyi.
ACT 19:26 Epapu yuu Epesasa dokona iki daa, yuu Esia kapa kapa ingyuowale Pole dokome wambu malu mende pyuo mana lamailyamo. Baame bange kingimi pyuo wasingi dupwa imambu angi daa lao karenge doko nakama pii doko soo nyilyaminyi.
ACT 19:27 Dokona namwa rangena yulu doko kando yulu angi daaŋa lasarami. Dokoko iki daa. Atemisa enda imambu andake dokona tembole anda doko mee bange ingyasara. Ingyapala Esia wambu dupwa peparaepe isa yuunya karenge wambu dupwa peparaepeme baa ama yapasi ingyuo karamo dokona ketae pyambuo yako lao karaminyi doko kaepala pyakuiyasara, leya.
ACT 19:28 Dopa leyamo pii doko sepala nakama imbumi kumuyami. Imbumi kumapala poraiyuo kaeyo lao, Atemisa Epesasa range wambu dupwame suu pyao karaminyi doko wakasa ingyuo karamo leyami.
ACT 19:29 Dopa lao kareyaminyi dokopa taone dokona wambu dupwa minyuo romo romo pipala kilyipu kilyipu kareya. Dokopa nakama puu lao pao kamapi mango mango pisindena sukusa sukusa piyami. Gayasapa Aritakasapa yuu Masetonia range Pole role pyao papingi akali dolapo ipyuo nyepala lanyuo peyami.
ACT 19:30 Dokopa wambu rukuraka pyuo kareyami dokona Pole dokona sukusa pupuli yaka lao suu piyamopa disaepole dupwame paa kaena leyami.
ACT 19:31 Dokopa akali kamongo banya puu minyingi lapo opetaeme baa kamapi mango mango pisi dokona sukusa epa kaena lao lamaiyuokondali piyami.
ACT 19:32 Dokopa malu palyuo peteyaminyipa kilyipu kilyipu kareyamopa wambu andapyuwale apa pipyasa sukusa sukusa pyuo dakena epelyamano lao soo gisa napala lapome mendena palyuo lao lapome mendena palyuo lao pyuo kareyami.
ACT 19:33 Dokopa Juu wambu dupwame wambu kareyami dokona lenge kambu siyamo dokona Alekesanda baa suu lao pii lala pena leyaminyipa wambu rukuraka pyuo kareyami dupwana lapome lena lao kareyaminyi dokopa Alekesanda baame wambu pyai nao petena lao kingimi pyao palyiya.
ACT 19:34 Pyao palyiyamopape baa Juu akalilamo lao kandapala andare karo pii mendakinya palyuo, Epesasa wambunya enda imambu Atemisa baa ama mupwa lao kareyami.
ACT 19:35 Lao kareyaminyi dokopa yuu rangena pepa pingi akali dokome wambu rukuraka pyuo kareyami dupwa pii laa kaena leyasa koo pyuku pyuku peyamo dokopa baa dopa leya. Nakama Epesasa akali dupwa selapa. Tembole anda Atemisa kameya karamo dokonape kemali pingi kana yake dokona piso isa epeyamo dokonape namwa Epesasa wambu dupwame rapu pyuo karamano doko wambu pepare soo karaminyi.
ACT 19:36 Dokona ingyuo mendeme akema lara ingya nalyamo dokona nakama pau lao karapala yulu mende ŋeeŋae lao pii napenge ingilyamo.
ACT 19:37 Akali nakamana lanyuo imipya dolapome namwana enda imambu wakasa doko kokwa soo isa minyuo kara nambipya.
ACT 19:38 Dokona ingyuo Dimitiasamoo bange yulu mondo lao karenge akali dupwa paleta nakamame mende kando larami ramo doko kote soo karapa pyuo kyapo karoko pilyaminyi dokona nakama range lenge kambu pongo pyao lao karena.
ACT 19:39 Nakama dee kamba simwali yaka lao suu pyarami ramo doko wato andake elyambu pyuo lapa pingi dokona larami.
ACT 19:40 Dokona lao epapu renge mende pipyandena kilyipu kilyipu karamwano dokona kapa pisaraminyi isingi larama ingya nalyamo dokona namwa andambupi nao karaminyi lao namwa kando kote lao kararami ingyasi silyamo leya.
ACT 19:41 Dopa lapala wambu malu palyuo kareyami dupwa pena leya.
ACT 20:1 Kilyipu kilyipu karo leyami doko oteyamopa Poleme disaepole dupwa epena lapala waipi lamaipala nakama karena lapala yuu Masetonia dokona peya.
ACT 20:2 Papala yuu dupwana sukusa pao wambu kareyami dupwa lamaiyuo poraiyepapu pao yuu Girisi dokona epo kando nyiya.
ACT 20:3 Dokona kana rema kumanyi nembo kareya. Karapala baame yuu Siria dokona sipunya piso panya suu pyao kareyamopa Juu akali dupwame baa pyalana piyami doko sepala kapu kyuo yuu Masetonia kata dokona dee paro lao suu piya.
ACT 20:4 Suu pyapala Sopata yuu Beria range Pirusinya ikinyingi doko baapa role pyao peyambi. Dokopa yuu Tesalonaika range Aritakasa Sekandasapa, yuu Depi range Gayasapa, Timoti dee yuu Esia range Tikikasa Topimasapa
ACT 20:5 akali dusipa wambo pao yuu Toasa dokona namwa isaro kareyami.
ACT 20:6 Kareyaminyipa borete isi reta nange nenge yuu gii dusipa nyuo nembo karapala yuu Pilipai doko yaki nyuo sipu dokona piso yuu kingi paki mee kata epo Toasa nakama kareyami dokona kando nyiyama. Dokona yuu gii yanda ipingi nyero kareyama.
ACT 20:7 Satate alemanji dokopa namwa borete kau lao yalya kando narama lapala elaymbu pyuo peteyamanopa Poleme rakya kanjakala paro lapala nakama pii lamaiyuo kareyamopa pao andasukulya ingiya.
ACT 20:8 Dokopa anda kanya koe dokona elyambu pyuo peteyamano dokona lambe malu rao kareya.
ACT 20:9 Dokopa akali parangende kingi Yutikasa lenge doko windowa dokona ketae peteya. Pisipala Poleme pii londe dupwa mee lao kareyamosa roya piso lenge luwapala luu paleya. Luu dokome nyuo palyiyasa pao palipala anda ketae repo pyuo dokona peteyamopa pyao isa malyiyasa kumuyamopa kando nyiyami.
ACT 20:10 Kumuyamopa kando nyiyaminyipape Pole lupyuo epapala pongwa napala baa kupyuo nyiya. Kupyuo nyepala dopa leya. Mona pulunongo pyaramopa kara nalapape. Baa lete silyamo leya.
ACT 20:11 Dopa lapala pulyuo papala borete kau lao napala andare nakama pii lamaiyuo kareyamopa yuu yangeya. Dokopa baame nakama yaki nyepala peya.
ACT 20:12 Peyamopa nakama wane parange doko lete kareyamopa nyuo lanyuo pao mona siyamopa kareyami.
ACT 20:13 Pole baame yuu Asosa dokona isa kata eparo namwa sipu nyepala wambo dokona piso pupwa leyamopa peyama.
ACT 20:14 Papala yuu Asosa dokona baame namwa kando nyiyamopa namwame baa role pyao sipu dokona epena lapala yuu Mitilini dokona peyama.
ACT 20:15 Yuu doko yaki nyepala sipu dokona piso dokona yangama dokopa yuu Kayosa doko kandanyi pyambwama epeyama. Epo dokona yangama dokopa yuu Semosa dokona karama epeyama. Dee yangama dokopa yuu Mailitasa dokona epo kando nyiyama.
ACT 20:16 Pole baame nenge Pendekosa doko yuu Jerusaleme dokona narama lao waiya lao panya suu piya. Dokona Esia dokona yuu malu kara narama lao suu pyapala namwa Epesasa yalo peyama.
ACT 20:17 Yuu Mailitasa dokona kando nyepala yuu Epesasa dokona Elyambu Pinginya rapu pingi wambu kareyami dupwa epena lao wai nembeya.
ACT 20:18 Nembeyamopa epeyaminyi dokopa nakama lamaiyuo pii dopa leya. Namba Esia kanda soo epapala dokopa nakama yaki nyii nao role pyao kareyo dokome yulu piyu dupwa nakama kando soo gisiyami.
ACT 20:19 Kamongo dokona kendemande yulu pyuo karo range pendewa karalyano lao suu pyao ee lao Juu wambu dupwame namba pyalana pyuo wato lao karapu piyamisa namba lekeleke rao kareyo.
ACT 20:20 Pii mende langirunupa nakama sepala rolae pyuo kararami ingiya dupwa langyalana paka nao peparae pano langyuo kareyo. Yuu peparae misi anda dokonape nakamana anda dupwanape kaeya nao mana langyuo kareyo.
ACT 20:21 Nakama Juu wambupi rara wakale dupwape Anatu dokona mona kapu kyepala Kamongo Yesu Koraisa kapa ingingi lao suu pyao karalapape lao poraiyuo leyo.
ACT 20:22 Epapu Imambu dokome namba puu maiyuo yuu Jerusaleme dokona puu lapyasa panya pilyu. Yuu dokona namba apa pira lao see napala mee kamenge panya karo kande.
ACT 20:23 Apa pira lao see nao panya pipunupape taone dupwa peparaena lao Imambu Poo Pyasi dokome namba rolo langyuo, Yuu dokona karapusi pyaraminyipa randa nao karareŋe leya.
ACT 20:24 Namba range dokona kyawa minyuo karalana suu pyaa nao karapala Kamongo Yesu baame yulu namba keta jiyamo doko iki pyuo otalana suu pyao karo. Doko Anatu baa mona keyange palyuo ipyuo karenge waili pii keyange doko lao karalu karare langiya.
ACT 20:25 Namba nakamana yuu panda peparaena Anatunya isingi yulu dokona lao papyuo kareyonopa siyami dupwa nambana lenge kambu doko dee kandaraminde daa doko soo karo.
ACT 20:26 Namba paka napala Anatunya yulu palengenyili pyuo kaeya nao rolo langiyunu dokome nakama dokona mendeme koo keta parami ramo doko pii mende namba keta pali nara lao kingi ketae nembelyo.
ACT 20:28 Nakama range yulu koo pisasarama lao kandokondali pyuo waso karo Imambu Poo Pyasimi sipisipi rapu pyuo kararami lao jiyamo dupwa mondo koo lao rapu pyuo karalapape leto. Anatunya Elyambu Pingi doko mondo lao rapu pyuo karalapape. Baame banya Ikinyinginya ranjama dokome kiiramo nyiya kande.
ACT 20:29 Namba paparono dokopa yana suwa kararope ama nalana pingi lapome nakama kararaminyi sukusa dokona epapala wambu nakamame rapu pyuo kararami dupwa kokwa serami doko soo gisilyu.
ACT 20:30 Dokopa nakama kararaminyi dokona akali lapo sipurapala disaepole dupwa suu longo nyelana lao pii kyai pyuo lamairami.
ACT 20:31 Dokona suu pyao nakama lenge rao piso nambame ee kana rema kukwa korakamape kaeya nao ee lao waipi lao langyuo karee kande lao suu pyaro karalapape.
ACT 20:32 Anatu nakama nyisapyali lao ateŋa lakalyo. Banya mona keyange palyuo ipingi pii dokome nakama ando nyimbwarami. Ando nyimbwaraminyi dokopa Anatunya wambu banya keyange jerali dupwa kapa nyerami.
ACT 20:33 Nambame wambu mendena kana kyewa lengepe panda kana rao kuikui lengepe panda komaupi dupwa nyipuli nyipuli lao suu pyaa nayo.
ACT 20:34 Dopa pyuo nengepe komaupi bange dupwa nambanape namba role pyao kareyami dupwanape namba rangeme kingi dolapome yulu pyuo nyepa pyuo kareyo doko nakama silyaminyi.
ACT 20:35 Wambu yulu kapa pii nange dupwa nyisarama lao namba yulu andake pyuo kareyono dokome kata keyange doko lasaka pyuo kareyo. Kamongo Yesu baame dopa lao pii leya. Bange maiyuo kararama ramo dokopa renge keyange wakasa doko namwa keta palira ingilyamo. Bange nyuo kararama ramo doko renge keyange wakasa doko namwa keta pali nara ingilyamo. Pii doko nakama suu pyaro karalapape lao pyuo kareyosa piya, leya Poleme.
ACT 20:36 Dopa lapala baa wapambu pii pyaro pisipala nakama pipya role pyao ateŋa leyami.
ACT 20:37 Ateŋa lapala nakama peparaeme ee lao baa kupyuo nyuo nyinyi piyami.
ACT 20:38 Dopa pyuo karo baame, Nambana lenge kambu dee kanda naramilyamo leya. Dopa leyamo dokona nakama kondome kumuyami. Dokopa nakama baa sipu dokona lanyuo peyami.
ACT 21:1 Lanyuo peyaminyipa nakama kareyami doko yaki nyepala sipu dokona piso pao yuu Kosa doko kanda kanda rolae epapala dokona yangama dokopa yuu Orosi dokona epapala dokona piso yuu Patara dokona epeyama.
ACT 21:2 Dokona sipu mende yuu Pinisia dokona panya piya doko kando nyepala dokona pyakambwapala piso peyama.
ACT 21:3 Pao yuu Saiporasa doko kandapala kingi kyai dorena kandanyi pyambwama pao yuu Siria kanda kanda pao yuu Taya dokona neta pyakambuyama. Papala sipu dokome bange manjo epeya dupwa dokona neta peeyo sera ingiyasa namwa neta pyakambuyama.
ACT 21:4 Neta pyakambwapala Kurisene yango lapo kando nyepala dokona yuu yanda ipingi kareyama. Dokopa Imambu dokome nakama pyongo piyamosa Pole Jerusaleme dokona paa nana leyami.
ACT 21:5 Leyaminyipa namwa peteyama yuu gii doko oteyamopa namwa yuu doko yaki nyepala kata nyiyama. Dokopa nakama peparae nakamana etengepe wane wanakepe dupwa pipya namwa kata parama dokona mee mende lanyuo epo taone dokona netarena epo kareyama. Dokopa ipwa maronge dokona wapambu pii pyaro piso ateŋa lapala pupwape leyami.
ACT 21:6 Leyaminyipa namwame nakama karena lapala sipu dokona pyakambuyamanopa nakama anda peyami.
ACT 21:7 Yuu Taya piso pao yuu Tolemesa doko epo kando nyepeyama. Kando nyepala Kurisene yangonge dupwa kando nyepala yuu mendaki role pyao doo kareyama.
ACT 21:8 Dokona yangama dokopa yuu doko yaki nyepala yuu Sisaria dokona epeyama. Epapala akali Pilipa waili pii keyange lao karenge doko wamba baa akali yanda ipingi kareyami dokona ingyuo kareya akali dokona anda kolando papala baamoo role pyao kareyama.
ACT 21:9 Banya wanenge kisima dusipa akali warenda nao Anatunya pii polo lamaiyuo peteyami.
ACT 21:10 Dokona yuu lapo kareyama dokopa pii nolako lenge akali Akapasa lenge doko yuu Jutia karo lano epeya.
ACT 21:11 Namwa kareyama dokona epapala Polena marapu doko rolo nyepala banya kingi kimbupi puu pyapala dopa leya. Imambu Poo Pyasi dokome dopa letamo. Juu wambu yuu Jerusaleme karaminyi dupwame marapu range akali doko doo pilyu dopa pyuo puu pyapala rara wakale dupwa nyuo mairami leya.
ACT 21:12 Leyamo pii doko sepala namwa wambu dokona kareyami dupwa pipya baa Jerusaleme dokona paa kaena lao lamaiyuokondali piyama.
ACT 21:13 Dokopa Poleme isingi langyuo dopa leya. Nakama ee lao namba mona randalase lao letaminyi doko akipamo letaminyi? Yuu Jerusaleme dokona namba karapusi pyarami ramo panda pyao kumakarami ramo doko Kamongo Yesunya kingi reke lao kapa lao suu pilyu leya.
ACT 21:14 Dokopa kongo piyamanopa kando kaeyo leyasa namwa kaepala Kamongo dokome pinya letamuli pyuo pinya leyama.
ACT 21:15 Yuu gii dusipa epo papeyamopa namwa rapa rapa pipala Jerusaleme dokona lalyuo peyama.
ACT 21:16 Dokopa yuu Sisaria disaepole dupwana lapo namwa pipya role pyao peyamanopa yuu Saiporasa range akali Nesone lenge dokona anda palirama mwua lao namwa dokona lanyuo epeyami. Nesone baa ama yuu wamba kanda soo dokopa Kurisene ingyuo kareya.
ACT 21:17 Jerusaleme dokona epeyamano dokopa Kurisene yangonge dupwame namwa rae maiyuo yako lao nyiyami.
ACT 21:18 Dokona yangama dokopa Pole namwa pipya role pyao Jemesa kareyamo dokona peyama. Rapu akali dupwa peparae dokona kareyamipya.
ACT 21:19 Dokopa Poleme nakama yako lapala Anatumi renge kuiyuo karo baa keta Juu daa rara wakale dupwa nyiso yulu andake piyamo dupwana pakana palyuo lamaiya.
ACT 21:20 Lamaiyamo pii doko sepala nakamame Anatu lakandeyami. Lakandapala nakamame baa dopa lamaiyami. Juu wambu karaminyi dupwana ama malu Yesu suu pyao karaminyi kande. Nakama peparaeme Mawa Pii dupwa kandokondali pyuo minyuo karenge.
ACT 21:21 Emba yulu piinyi dupwa lasi pii simi. Juu wambu lapo dae yaki nyepala rara wakale dupwana rukuraka pyuo karaminyi dupwa kando embame Mosesena Lowa yaki nyepala nakamana wane dupwana yanenge awali lao pyakepanyi nemba nana lao mana lamainyi doko simi.
ACT 21:22 Dokona ingyuo apa pimane? Emba ipilyamo lao seramilyamo.
ACT 21:23 Dokona namwame emba langiramanuli pyuo pilase. Namwana akali kisima dusipame mende pirama lao mawa palyapala karaminyi.
ACT 21:24 Embame nakama pipa Juu wambunya yulu dokona pinginyili pyuo piri. Doko akali kisima dusipa kyawasi roko poo pyao parama lao mena malu pyao kiso maiyuo kana andake nembarami dokona emba nyiso role pyao pipala kana andake nembakamaiyalase. Dokome wambu peparaeme emba dopa pyuo karene lao sepala mee kanya piso lamilyamo lao sepala emba range Mawa Pii palengenyili pyuo pyuo karengelamo lao soo gisarami.
ACT 21:25 Soo gisaraminyipape Juu daa rara wakale Yesu kapa ingingi lao suu pyapala mona maipala karaminyi dupwa kando pepa pase mende maiyama dokona dopa lao suu pyalu pyao pilyamano lao pyao maiyama. Imambu suu pyao mena pyao kiso maingi minju dupwape ranjamape bange pendoko minyuo kondelyaminyipa kumungi nengepe kepo pingipi yulu dusipa kaeyalu kaeyo kaena lao pepa pyao maiyama, leyami.
ACT 21:26 Dokopa Poleme akali dupwa nyepala yangama dokopa baa dupwa pipa role pyao Juu wambunya yulu dokona poo pyasi ingyuo karalana pinginde yulu dokona kanda soo piya. Pipala tembole anda pao Poleme purisi lamaiyuo yuu lapo epo paramopa yulu poo pingi dokona pyuo otaramano yuu gii dokopa namwana lao mendaki mendaki lao mena pyao kiso Anatu maiyakarami leya.
ACT 21:27 Leyaminyi doko suu pyao yuu yanda ipingi repeta epo peyamo dokopa Juu wambu yuu Esia range lapome Pole tembole anda dokona kareyamo kandapala wambu rukuraka pyuo kareyami dupwa nembo nembo pipala baa minyareyami.
ACT 21:28 Minyaro karo kyakale palyuo dopa leyami. Isaraele akali dupwa, nyisala ipupwa. Juu wambu dupwape Mawa Pii dokope tembole anda dakepe kando sisu nyuo wambu peparae mana lamaiyuo karenge akali doko dae karapyalyamo. Dopako pyuo baame yulu koo mende konda pyuo karo, tembole anda dakena Giriki akali lapo lanyuo epo anda poo pyasi dake uki palyalamolamo leyami.
ACT 21:29 Wamba dokopa taone dokona Topimasa Epesasa akali doko baapa kareyambinyi kandapala Poleme akali doko tembole anda lanyuo ipyalamo lao suu pyapala leyami.
ACT 21:30 Dokopa taone dokona wambu dupwa peparae romo romo pilya pyana pipala makando epo sukusa sukusa piyami. Pipala Pole minyarapala minyuo tembole anda potemo peyami. Peyaminyi dokopa kambu dupwa aopa upi leyami.
ACT 21:31 Dopa pyuo nakamame baa pyao kumakalana pyuo kareyaminyi dokopa yanda singi mupwa Orome yanda singi yango rapu pyuo karenge doko Jerusaleme yuu peparae kilyipu kilyipu karo karaminyi lao lamaiyaminyi siya.
ACT 21:32 Sepala baame mee yanda singi lapope yanda singi yango dupwa rapu pyuo karenge lapope nyepala aopa lanyuo pao wambu dupwa kareyami dokona peyami. Peyaminyi dokopa yanda singi dupwa epeyamisa kandapala akali Pole pyao kareyami dupwame baa yaki nyepala kaeyami.
ACT 21:33 Dokopa akali dokome repeta epapala Pole puu maipala puu sane lamame puu pinya leya. Lapala baa akali dake api lao apa pipya lao piso siya.
ACT 21:34 Dokopa wambu malu kareyami dupwame pii rekyae lao lapala lapome mende lao lapome mende lao piyami. Dokopa doondae lao kareyamisa apa pipyandena pimi lao selana saka napala baa yanda singi palenge anda dokona lanyuo pena leya.
ACT 21:35 Enakana andana pulyuo penge roko kata dokona epeyamo dokopa wambu buu minyuo kareyami dupwame muu lapala baa pyalana piyamisa yanda singi dupwame baa minyalyapala soo peyami.
ACT 21:36 Dokona lao wambu malu buu minyuo kareyami dupwame lanyuo peyaminyili pyuo papala, baa pyao kumakalapape lao pii poraiyuo lao peta peyami.
ACT 21:37 Dokopa Pole karapusi anda kambu dokona lanyuo peyaminyipa baame pawali pyuo karo dokopa yanda singi mupwa doko lamaiyuo, Emba pii lapo langyuowape mee? leya. Dokopa, Emba Giriki pii lengelyamo.
ACT 21:38 Isipi akalinde alembole wambu dupwa kamba lao karena lao nembo nembo pipala kendepo kendepo nenge akali ama malu wakasa (4,000) yuu muiyane dokona nyuo lanyuo peya kande doko emba daalamo leya.
ACT 21:39 Poleme isingi leya, Namba Juu akali yuu Silisia dokona yuu kuki Tasasa dokona range. Namba taone andake dokona yuu range. Wambu dupwa pii mende lamaipuli yaka leya.
ACT 21:40 Dokopa kapa leyamo dokopa Poleme pulyuo penge roko dokona ketae karo wambu dupwa sinya lao banya kingi doko pyasinju leya. Dokopa pyai nao rali piyaminyi dokopa Ipuru pii lao nakama lamaiyuo dopa leya.
ACT 22:1 Yangonemoo, Rakanemoo, nakamana lenge kambu silyamo dakena karo yulu koo pii napuŋu lao langyuo rolarowale pii doko selapape leya.
ACT 22:2 Baame Ipuru pii lao nakama lamaiyamo doko sepala nakama ama pyai nao rali pipala kareyami. Dokopa dopa leya.
ACT 22:3 Namba Juu akali yuu Silisia dokona Tasasa yuu range. Dokona mandeyaminyipape anda malu repe repe pyuo karenge dakena mana lenge andake Gamaliele dokona mana pii soo peteyo. Namwana rakange kyawa dupwana Mawa Pii dupwa kandokondali pyuo karenge yulu dokonako palyuo pyuo karape lao poraiyuo mana langiyamopa epapu nakama peparaeme Anatu waa waa karo suu pyao karaminyi doko suu pyao namba dopako pyuo kareyo.
ACT 22:4 Yesunya yulu pyuo kareyami dupwa pyao kumakao randa maiyuo karo enda akalipi puu pyapala karapusi anda dokona palyuo kareyo.
ACT 22:5 Namba kinyi lao karo lao purisi akali mupwa dokomoo kamongo malu palyuo piso wato andake lenge dupwa pipyame doko lao rolarami. Nakamame pepa pase lapo Juu yango dupwa mairi lao jiyaminyipa nyepala minyuo pao yuu Damasakesa dokona Kurisene lapo kareyami dupwa puu maipala Jerusaleme dakena randa mairama lapala nyela peyo.
ACT 22:6 Kata nyuo pao Damasakesa dokona repeta dokona korakama dokopa yake dokona piso yanga paupau andake mende lao epapala aopa namba nyuo kako piya.
ACT 22:7 Dokopa yuu dokona pangu siyunupa pii mende, Sole, Sole, akipamo namba randa joo karene? leyamo siyu.
ACT 22:8 Sepala isingi lamaiyuo, Kamongo, emba apisi? leyo. Dokopa baame namba langyuo, Namba Yesu Nasarete range embame randa joo karene doko leya.
ACT 22:9 Dokopa wambu namba role pyao kareyami dupwame yanga paupau leya doko kandeyami. Kandeyaminyipape pii namba langiyamo doko see nayami.
ACT 22:10 Dokopa, Kamongo, apa pirose? leyo. Dokopa Kamongome namba dopa langiya. Sipurapala Damasakesa dokona puu. Dokona parene dokopa nambame emba yulu pyuo karape lao rombo palyapunu dupwana peparae langirami leya.
ACT 22:11 Dokopa ama yanga paupau lapala lenge doko aumuya dokome kandalana saka nayosa akali namba role pyao kareyami dupwame namba kii minyuo peyaminyipa Damasakesa epeyo.
ACT 22:12 Dokopa akali mende Ananayasa lenge Anatunya Imambunya yulu suu pyao Lowa letamuli pyuo kareyamosa Juu wambu yuu dokona palenge dupwa peparaeme baa lakanda minya minya pyuo kareyami.
ACT 22:13 Akali doko namba peteyono dokona repeta epo karapala namba langyuo, Yangone Sole, lenge raa, leya. Leyamo yuu gii dokopa nambana lenge pendakae leyasa baa kandeyo.
ACT 22:14 Dokopa baa dopa leya. Namwana rakange kyawa dupwame Anatu suu pyao kareyami doko banya suu pingi doko sepala Rolae Karenge doko kando banya pii kambunya laramo doko sereŋe lao emba rombo palyiya.
ACT 22:15 Doko emba waipi minyingi akali dokome banya yulu kandapinyi dupwa wambu peparae boo pyao lamairi.
ACT 22:16 Dokoŋo epapu emba akipamo mee isaro petene? Sipurapala bapitisimo nyii. Dokopa banya kingi lao embena koo dupwa wate pinyi nemba leya.
ACT 22:17 Enakana kapu kyuo Jerusaleme dokona papala tembole anda dokona ateŋa lao karo lemongwasi laro peteyonopa pii repa repa mende pipala
ACT 22:18 baame namba dopa langyuo kareyamopa kandeyo. Nambana lao lamaiyuo rolo karene pii doko yako lao see narami dokona waiya lao yuu Jerusaleme yaki nyepala makando puu leya.
ACT 22:19 Dopa leyamo dokopa nambame dopa leyo. Kamongo, sinakoke anda dupwa peparaena emba kapa ingingi lao suu pyapala mona joo kareyami dupwa nambame karapusi anda dokona nyuo palyuo pyaroko pyao pyuo kareyo doko nakama range silyaminyi.
ACT 22:20 Dee Sitipena embena yulu dokona lao lamaiyuo rolo kareya akali dokona ranjama kulimbuyami dokopa namba dusa karapala kapa pilyaminyi lao wambu baa pyao kareyami dupwana komau dupwa rapu pyakamyuo kareyoko leyo.
ACT 22:21 Dokopa baame, Kanjakala puu. Juu daa rara wakale dupwa nanesa karaminyi dokona puu laro, leya.
ACT 22:22 Poleme pii wambo dupwa lao kareyamo dokopa soo kareyami. Dee pii doko nyokonyuo lapala lao otapeyamo dokopa nakama pii ketae palyuo lapala, Akali dake angi daandelamo, isa yuu dakena kara nanale, pyao nembalapape. Baa lete kara napenge ingilyamo leyami.
ACT 22:23 Nakama pii poraiyuo lao nakamana komau dupwa minyuo romo romo pyuo sinjimu dupwa lombo nyepala ketae pyalyuo piyami.
ACT 22:24 Dokopa yanda singi mupwa dokome Pole baa yanda singi anda dokona lanyuo andakare pena lapala, Apa pipyasa emba kando Juu wambu dupwame pii porakaiyuo letamipi? lao baa pyaroko pyapala piso sinya leya.
ACT 22:25 Dopa leyamopape baa pyaroko pyarami dokona lao puu pyanyi palyapeyaminyi dokopa Poleme yanda singi yango rapu pyuo karenge mende dusa kareya doko lamaiyuo, Yulu koo pilyaminyi renge doko kote see nao karo Orome ingyuo karenge akali mende kapa pyaroko pyarami lao mawa pii see nalyase? leya.
ACT 22:26 Dopa leyamo pii doko sepala yanda singi akali dokome yanda singi mupwa kareyamo dokona papala baa dopa lamaiya. Emba apa pinya pyaane? Akali doko baa Orome akali ingyuo karengendelamo doko see nalese? leya.
ACT 22:27 Dokopa yanda singi mupwa doko epapala baa lamaiyuo, Emba Orome akali ingyuo karengepe? namba langipi leya. Dokopa baa, Waa leya.
ACT 22:28 Dokopa yanda singi mupwa mende dokome, Namba kana malu mee nembapala dokome Orome akali ingyuo karenge, leya. Dokopa Poleme lao, Emba dopa piinyipape namba Orome akali angi ingyuo mandeyami leya.
ACT 22:29 Dokopa akali baa piso selana lao kareyami dupwa kaepala kakondo kareyami. Dokopa yanda singi mupwa doko Pole baa Orome akali ingyuo karengende puu maipulyamo lapala baa opetae pakaya.
ACT 22:30 Dopa piyamo dokopa dokona yangama apa piyandena Juu wambu dupwame baa kando letaminyi doko rolo sero lapala baa moko nyepala purisi akali mupwa dupwape wato andake lenge akali dupwa pipya sukusa sukusa pyuo petena lapala Pole nyuo nakamana lenge kambu dokona kareya.
ACT 23:1 Dokopa wato andake lenge akali peteyami dupwa kando Poleme dopa lao, Yangonemoo, namba koo mende pii nao karo epo epapu dae karo dakeŋe lao soo manji nyilyu doko Anatu silyamo leya.
ACT 23:2 Dopa leyamo dokopa purisi akali mupwa Ananayasa lenge dokome Pole baa repeta kareyaminyi dupwame banya kambu pyao rakinya leya.
ACT 23:3 Dopa piyami dokopa Poleme baa dopa lamaiya. Emba anda andopai koondena mamba kakepame dokome ketae mee au pyuo kisingi dopale dake emba Anatumi pyara ingilyamo. Mawa Pii palamo doko kaepala namba pinya letene doko Mawa Pii palengenyili pyuo kote lapisa pilyase? leya.
ACT 23:4 Repeta kareyami dusipame baa lamaiyuo, Anatunya purisi akali mupwa doko kilya kando lalese? leyami.
ACT 23:5 Dokopa Poleme dopa leya. Yangonemoo, baa purisi akali mupwa lao soo gisa nalono. Dokona lao buku Baepole dokona pii mende dopa lao pyasi palamo. Akali wambu rapu pyuo karaminyi dokona mende kando pii koo laa nalapape, lao palamo leya.
ACT 23:6 Kote lao peteyaminyi dupwana lapo Satyusi akali ingyuo peteyami, lapo Parisi akali ingyuo peteyami doko kandapala Poleme pii poraiyuo lao dopa leya. Yangonemoo, namba Parisi akali, dee namba Parisi akali dupwana ikinyingi ingyuo karo. Namwa kumapala lopo eparama lao suu pingi pii dokona epapu namba kote letaminyi leya.
ACT 23:7 Dopa leyamo dokopa Parisi akali dupwa Satyusi akali dupwa pipya elyambu pyuo peteyami dokona liti pipala apiyanda piyami.
ACT 23:8 (Dokona lao Satyusi akali dupwame lopo epa narama lao aŋalape imambupi dupwa kara nange lenge. Dee Parisi akali dupwame lopo eparama lao aŋalape imambupi dupwa karaminyi lenge.)
ACT 23:9 Dopa pyuo pii liti pyuo lapala dokopa kilyipu kilyipu kareyami. Dokopa Parisi akali singi lapo roya karapala akema lao akali dake keta yulu koo mende pali napyalyamo lao suu pilyamano leyami. Imambu mendeme panda aŋala mendeme baa pii lamaipyape? leyami.
ACT 23:10 Dokopa apiyanda marakai mende piyaminyisa yanda singi mupwa dokome nakamame Pole minyuo ipyaramisa pilyaramo lao pakapala, yanda singi dupwa baa sukusa kareyamo dokona pyasekoe lao papala baa nyuo lanyuo nakamana anda dokona pena leya.
ACT 23:11 Kukwa dokopa Kamongo dokome Pole peteya dokona epo maki piro karapala dopa leya. Monarena porayapala pisipi. Nambana lao embame yuu Jerusaleme dokona lao rolo karapinyi doko suu pyao yuu Orome dokona opetae lao rolo karare ingilyamo leya.
ACT 23:12 Yuu yangeyamo dokopa Juu wambu dupwame wato mendakinya palyuo dopa leyami. Namwa Pole ene pyapa naramanopa ipwa nengepe dupwa wasapala naa narama leyami.
ACT 23:13 Akali akalisa kisima dee lapo opetaeko baa pyalana lao mendakinya palyuo mawa palyuo leyami.
ACT 23:14 Lapala purisi akali mupwa dupwape rapu pingi akali dupwape kareyami dokona papala dopa leyami. Namwa Pole ene pyao kumakapa narama yuu gii dusipana nenge ipwape naa nao waso kararama lao mawa nyilyamano leyami.
ACT 23:15 Dokona ingyuo nakama wato andake lenge akali dupwa pipya epapu yanda singi mupwa doko lamaiyuo Polena kote pii lao rolamana letaminyi lao lanyuo epena lena. Dokopa baa ene repeta lanyuo eparami dokopa pyao kumakarama leyami.
ACT 23:16 Pole pyalana isaro kararama leyami doko banya pemalengena ikinyingi dokome siyandeme yanda singi anda dokona kolando papala Pole lamaiya.
ACT 23:17 Dokopa Poleme yanda singinya rapu pingi akali mende epena lapala dopa lamaiya. Akali parange dakeme yanda singi mupwa doko pii mende lamaiyalana letamo dokona baa karamo dokona lanyuo pupi leya.
ACT 23:18 Dopa lamaiyamo dokopa baame baa nyuo lanyuo yanda singi mupwa kareyamo dokona papala dopa leya. Karapusi akali Pole dokome namba ipu lapala akali parange dake emba lapo langinya letamo dokona lanyuo parepe lao namba piso sipya leya.
ACT 23:19 Yanda singi mupwa dokome akali parange dokona kingi doko nyepala lanyuo kakondo papala yalu pyuo piso soo, Embame namba aki mende langiri? leya.
ACT 23:20 Dokopa dopa leya. Juu wambu dupwame Pole kando kote dee kamba serama lapala embame langyuo eparepe lao piso soo larama lao mendakinya palyuo lami.
ACT 23:21 Dopa pyuo leyami kande dokopa embame nakama laraminyili pyuo pii napipi. Dokona lao nakamana akali karaminyi dupwa akalisa kisima dee lapo opetaeme baa pyalana yalu pyuo petaminyi. Nakama Pole ene pyapa naraminyipa nengepe ipwape naa nao waso kararama lao mawa pii ingyuo lamipyaŋa. Dakepa rapa rapa pipala emba apa letepe lao isaro silyaminyi leya.
ACT 23:22 Dopa leyamo dokopa yanda singi mupwa dokome akali parange doko pena lao dokopa dopa pyuo lami lao mendali lamaiya napipi lao lamaiyuokondali piya.
ACT 23:23 Yanda singi mupwa dokome yanda singi yango lapo rapu pingi akali lama epena lapala dopa leya. Kukwa nane keloke dokopa mee yanda singi malupi (200), mena ose akali malupi (70), kaku pingi akali malupi (200) Sisaria dokona parama lao rapa rapa pyuo otapala karalapape.
ACT 23:24 Dopako pyuo Pole mena ose mendena piso para lao lapo rapa rapa pyakamipala kyapo mupwa Pilikisa karamo dokona mondo lao lanyuo pupwa leya.
ACT 23:25 Lapala dopa lao pepa pase piya.
ACT 23:26 O Pilikisa akali wakasa kyapo mupwa doko namba Kolotiasa Lisiasa dokome emba yako lao pepa pyao jilyu.
ACT 23:27 Akali dake Juu wambu dupwame minyarapala pyao kumakalana pyuo karaminyi dokopa namba nambana yanda singi dupwa pipya karami dokona epapala baa Orome akali ingyuo karapyalyamo lao sepala lete nyipu.
ACT 23:28 Nyepala nakamame baa kando aki rengendena lami lao selana nakamana wato andake lenge dokona lanyuo pupu.
ACT 23:29 Papala nakamana mawa pii dupwana baa kando kote letaminyi lao yulu koo pyao kumakao karapusi anda palyuo pingi renge dopale mende baa keta pali nalyamo lao soo rolapu.
ACT 23:30 Soo rolapala baa pyarama lao yalu pyuo kararami lao lapome yalu pyuo langimi dokopa aopa emba karene dokona baa lanyuo pena lapu. Dopako pyuo baa kando kote lami dupwame embena lenge kambu dokona baa kando kote renge doko langyala pena lapu, lao pepa pyao jilyu.
ACT 23:31 Kukwa dokopako yanda singi dupwame kyapo mupwa leyamuli pyuo Pole lanyuo yuu Andipatisa dokona peyami.
ACT 23:32 Dokona yangama dokopa mee yanda singi dupwa kapu kyuo yanda singi anda dokona epeyaminyipa mena ose akali dupwa baa role pyao lanyuo peyami.
ACT 23:33 Epo yuu Sisaria epapala kyapo mupwa doko pepa pase maipala banya lenge kambu dokona Pole lanyuo peyami.
ACT 23:34 Pepa pase kandapala banya yuu range doko anjuku lao piso siya. Piso sepala baa yuu Silisia range lao sepala
ACT 23:35 dopa leya. Akali emba kando kote lami dupwa eparaminyipa embena pii sero leya. Lapala Erotena anda mupwa pisi kareya dokona petena lapala iso karena leya.
ACT 24:1 Yuu gii kingi paki epo papeyamopa purisi akali mupwa Ananayasa dokomoo rapu pingi akali lapo pipya pii lenge akali kingi Tetalasa lenge dokomoo epeyami. Epapala nakamame Pole kando kote larami renge dupwa kyapo mupwa doko lamaiyami.
ACT 24:2 Dokopa Pole epena leyamopa Tetalasame Pole kando kote pii kando soo dopa pyuo leya. O Pilikisa emba akali andake doko. Embame yuu wambana piso namwa iso karapinyi dokome namwa koo soo karo lowa keyange dupwa mana nyimwanosa namwana yuu ama keyange ingyuo pelyamo.
ACT 24:3 Yulu keyange dopa pyuo pipinyipa namwa Juu wambu peparae ama raeko mailyamano.
ACT 24:4 Dopa pyuo emba pii soo maka nalase lao namwa pii muu laramanopa embame rape rape lao soo pisipili yaka leto.
ACT 24:5 Akali dake kunji kanji minyuo yuu muu dupwana Juu wambu karaminyi dupwa peparaena papyuo nembo nembo pyuo Nasarete akalinya wambu rekya lapala yulu wakale pyuo karaminyi dupwana mupwa inyuo karapyalyamo lao kando simwa.
ACT 24:6 Dopako pyuo tembole anda doko uki palyalana pipyamopa namwame minyarapala nyiyama. Nyepala namwana Mawa Pii paleyamuli pyuo baa kote lamana lao piyama.
ACT 24:7 Lamana lao piyamanopa yanda singi mupwa Lisiasa dokome epapala pyasokoe lao kingi rekya lao nyepala papala,
ACT 24:8 baa kando kote letaminyi akali dupwa embena lenge kambu dokona pupwa leya. Embame baa apa letape lao piso sepala baame pii laramo dupwa sepala baa kando kote lamwano renge doko soo rolare leya.
ACT 24:9 Juu akali peyami dupwana lapo opetae kote pii dokonako palyuo lapala, Pii lalamo dusipa peparae kinyi kinyi lalamo leyami.
ACT 24:10 Dokopa kyapo mupwa dokome kingi sikisa pyambwapala Pole lena leyamo dokopa baa dopa leya. Ee kana malu embame kote soo akali rara dae range dupwa rapu pyuo kareeŋe dokona lao embame kote pii dake soo rolare dokona rae maiyuo karo.
ACT 24:11 Namba Jerusaleme dokona Anatunya kingi lala peyo doko kama yuu wamba daa, yuu gii akalisa ipisu lama iki epo pelyamo. Doko emba kapa soo rolare.
ACT 24:12 Peyono dokopa namba akali mendepa apiyanda pyuo wambu rukuraka pyuo kareyaminyipa nembo nembo pyuo tembole anda dokonape panda sinakoke dupwanape panda anda malu palyuo karenge dokonape dopa pyuo mende piyunu nakamame kandapala laa nayami.
ACT 24:13 Dokona suu pyao namba kando letaminyi pii doko kinyi letamano lao soo rolalase lao kapa langyuo rola narami.
ACT 24:14 Mosesena Lowa pii pyasi palamo dupwape poropeta dupwana pii bukunya pyasi palamo dupwape kinyi lao suu pyao karo. Doko namwana akali kyawana Anatu dokona namba kopetame suu pyao kata kyai mendena papyuo karene letaminyi kata doko polo langilyu.
ACT 24:15 Dopako pyuo wambu yulu rolae pyuo karenge dupwape yulu rolae pyuo kara nange dupwape laparae Anatumi lopo nyera lao suu pyapala mona kare kare karo. Nakama dopako lao suu pyao karaminyi.
ACT 24:16 Anatunya lenge kambu dokonape wambunya lenge kambu dupwanape yulu koo pipiŋi laraminyi lao yuu peparae kandokondali pyuo pyuo karo.
ACT 24:17 Namba dae yuu wamba kara napala ene alembole dokopa kana mone lapo dae wambu dupwa maiyalana epo, Anatu dokona mena pyao kiso maiyalana ipunusa pipya.
ACT 24:18 Epapala dopa pyuo kareyo dokopa wambu langa bome pyuo kara nayaminyipa mee koo siyamo kareyono kandeyami. Juu wambunya yulu dokona poo pyasi ingyuo karalana pipala kareyo.
ACT 24:19 Yuu Esia range Juu akali lapo kando kareyami. Dupwame namba kando pii mende larami ramo doko embena lenge kambu dakena karo kote pii lapenge ingilyamo.
ACT 24:20 Epa narami ramo doko akali dapwa rangeme namba kando kote leyami dokopa yulu koo mende piyunu siyami ramo doko dopa piiŋi lao lenale.
ACT 24:21 Namba pii mendaki iki leyo doko nakama peteyaminyi dokona roya karo pii poraiyuo lao dopa leyo. Namwa kumaramanopa Aantu lopo nyera pii dokona lao epapu namba keta kote palamo leyo, leya Poleme.
ACT 24:22 Dopa leyamopa Pilikisa baame Kurisene wambunya yulu dokona dopa pyuondeŋe lao soo manjo kareya. Karapala, Epapu laa naro. Lisiasa yanda singi mupwa doko lano eparamo dokopa nakamana kote doko dee sero leya.
ACT 24:23 Lapala baame yanda singi yango rapu pyuo karenge doko lamaiyuo dopa leya. Baa puu angingyuo mai napala yanda singi dupwame mee rapu pyuo karena leya. Banya puu minyingi mendeme bange mainya piyami kande doko kaena laa nalapape leya.
ACT 24:24 Yuu lapo epo papeyamopa Pilikisa baapa etenge Juu enda Durusila lenge dokopa nakamba epeyambi. Epapala Pole lanyuo epena lapala baa Koraisa Yesu kapa ingingi lao suu pingi dokona mana langinya lapala soo peteyambi.
ACT 24:25 Dokopa Pole baa yulu rolae dokonape dee papa lapala langa pii nange yulu dokonape Anatumi kote lara dokonape lao rolo lao kareyamo dokopa Pilikisa pakapala dopa leya. Epapu kaepala puu. Yulu mende kingi minya naramo dokopa emba dee ipu laro.
ACT 24:26 Dopa lamaiyuo dokopa Pole kana lapo jipyali lao suu pyao leya. Dokona yuu malu mee baa epena lapapu pii lao pisipa piyambi.
ACT 24:27 Dopa pyuo kareyambinyipa ee kana lama epo papeyamopa Pilikisana yulu pyuo kareya doko Posiasa Pesatasa lenge dokome alowa pyuo nyiya. Dokopa Juu wambu dupwa rae mainya lao mende pyakamipuli lapala Pilikisa baame Pole karapusi anda dokona mee palena leya.
ACT 25:1 Pesatasa banya rapu pyuo karenge yulu nyiyamo doo pyuo karo enakana yuu rema epo papeyamopa yuu Sisaria karo yuu Jerusaleme dokona lalyuo peya.
ACT 25:2 Dokopa purisi akali mupwa dupwape Juu wambu kareyami dupwana mupwa dupwapeme Pole keta koo pipya lao baa lamaiyami.
ACT 25:3 Dopa lamaiyuo, Baa Jerusaleme dokona lanyuo epena lakapyali lao piso sokondali piyami. Baa epelyape lao katasa karanyimbwaro pisipala baa pyao kumakarama lao suu pyapala piso siyami.
ACT 25:4 Pesatasame isingi dopa leya. Pole Sisaria dokona retaro karaminyipa karamo. Namba range dokona usale parowale.
ACT 25:5 Dokona nakamana kote pii renge mende paleya kande doko nakamana akali angi dupwana lapo namba role pyao lano monale leya. Akali doko koo mende palira ramo doko nakamame dokona kote larami leya.
ACT 25:6 Pesatasa baame nakama kareyami dokona yuu mange lama panda yuu akalisa mendaki iki karapala yuu Sisaria dokona lano peya. Papala dokona yangama dokopa kote soo petenge dokona pisipala Pole lanyuo epena leya.
ACT 25:7 Baa epeyamo dokopa Juu wambu Jerusaleme karo lano peyami dupwame baa nyuo kako pao karapala baa kando kote pii andake malu lao kareyaminyipape nakamana pii malu angingyuo paa naya.
ACT 25:8 Pole koo pii nayoŋo lao dopa lao kareya. Juu wambu dupwana Mawa Pii dokonape tembole anda dokonape dee Sisa kandowape namba koo mende ama pii nange, leya.
ACT 25:9 Leyamopape Pesatasame Juu wambu dupwana mende pyakamipuli lao suu pyapala baame Pole dopa lamaiya. Jerusaleme dokona papala yuu dokona kote pii letaminyi dupwana nambana lenge kambu dokona lamwali lao suu pilipi? leya.
ACT 25:10 Dopa leyamopape Pole dopa leya. Sisame kote pii doko dakena karo larami lao rombo pyao nyiya. Dakena lapengele ingilyamo. Nambame Juu wambu dupwa kando koo mende pii nayo doko emba soo gisilinyi.
ACT 25:11 Namba lowa doko yalo papala yulu koope pyao kumakaenge dopale mende piyuli doko range lete nyelana laa napuli. Nakamame namba kando kote letaminyi doko renge angi mendena laa narami ramo doko akali mendeme namba nakama mai nara ingilyamo. Sisa baa rangeme nambana kote doko sipyali yaka leya.
ACT 25:12 Dopa leyamo dokopa Pesatasa baame banya wato lenge akali dupwa pipya wato lapala isingi lamaiyuo dopa leya. Sisa baa rangeme embena kote doko sipyali yaka lapi kandapi doko Sisa karamo dokona pare ingilyamo leya.
ACT 25:13 Yuu gii lapo epo papeyamopa kiŋi akali Akoripa etenge Banaisapame Pesatasa yako lalana epapeyambi.
ACT 25:14 Epapala yuu lapo yuu dokona kareyambi dokopa Pesatasa baame Pole keta piyamo dupwa kiŋi akali doko polo lamaiyuo dopa leya. Akali mende Pilikisame puu maipala dae yaki nyuo peyamopa mee karamo.
ACT 25:15 Akali doko namba Jerusaleme dokona kareyonopa Juu wambunya purisi akali mupwa dupwape kamongo dupwapeme baa namba pakana palyuo langyuo, Baa kote lao rolapala randa maiyase, leyami.
ACT 25:16 Namwa Orome akali dupwa kote pii rolo see napala akali mende mee langa jerama ingya nalyamo. Nakamba baa kando kote pii renge dupwa laraminyipa baa dokona ingyuo isingi lapenge ingilyamo leyo.
ACT 25:17 Dokona nakama dae sukusa sukusa pyuo epeyami doko kandapala namba mee kara napala dokona yangama dokopa kote singi petenge dokona pisipala akali doko lanyuo epena leyo.
ACT 25:18 Baa kando kote leyaminyi dupwa roya karapala yulu koo dopa piya larami rapisa lao suu piyu dupwana laa nayami.
ACT 25:19 Laa nayaminyipape nakama Juu wambunya misi pii dokonape akali mende Yesu lenge kumuyamo dokonape suu pyao kote leyami. Poleme akali Yesu lenge doko lete karamo, lao kareya.
ACT 25:20 Dokopa nakama pii dupwana leyaminyi doko apa pyuo soo rolaro lao saka napala Jerusaleme dokona pii dupwana kote lao rolarami dokona kapa parepe lao baa piso siyu.
ACT 25:21 Dokopa Poleme puu mairaminyipa kararonopa gapomane akali mupwa wakasa dokome kote pii rolapyali yaka leyamo dokopa Sisa karamo dokona baa lanyuo pena kapa laro dokona iso karo baa puu maipala karena leyo, leya Pesatasame.
ACT 25:22 Dopa leyamo dokopa Akoripa Pesatasa dopa lamaiya. Akali dokona pii doko namba range sipuli lao suu pilyu leya. Leyamopa, Rakya embame banya pii doko kapa sere leya.
ACT 25:23 Leyamo doko suu pyao dokona yangama dokopa Akoripa enda Banaisapa kalya pipala dengenola kananola pyuo epapala yanda pingi mupwa dupwape anda malu palyuo karenge dokona akali mupwa dupwa paleta pii soo petenge anda dokona kolando epeyami. Dokopa Pesatasame Pole lanyuo epena leyasa Pole andakare lanyuo epeyami.
ACT 25:24 Dokopa Pesatasa dopa leya. Kiŋi Akoripamoo namwa dae role pyao karamano dupwape selapape. Akali dake kandalapa. Juu wambu dupwa peparaeme Jerusalemepe daepe baa kando letaminyi. Baa lete kara napengende pilyamo lao poraiyuo letaminyi.
ACT 25:25 Dopa laminyipape baa kumara yulu dopale mende pii naya doko soo kaeyo. Dokopa banya kote doko gapomane mupwa wakasa doko sipyali yaka lao suu pilyu leyasa dokona namba pena laro lao suu piyu.
ACT 25:26 Suu piyunupape baa kando pii angi mende pepa pyao retapala nambana kamongo doko mairunu see nalyamo. Dokona nakamana lenge kambupi kiŋi Akoripa emba mupwa dokona lenge kambu dokonape baa lanyuo epena lalono. Namwame baa apa letape lao piso seramanopa pii renge mende palipyamopa doko namba pepana pyaro ingilyamo.
ACT 25:27 Dokona lao kote pii renge dokona pepana pyao mai naro ramo doko baa Orome dokona kapa pena laa naro lao suu pilyu, leya.
ACT 26:1 Akoripa Pole lamaiyuo, Emba range kapa lare leya. Dokopa Poleme banya kingi doko pyasinju lapala namba koo mende pii nayoŋo lao lao roleya.
ACT 26:2 Juu akali dupwame namba kando leyami pii dupwa peparaena, kiŋi Akoripa, embena lenge kambu dokona koo mende pii nayoŋo lao lao rolalana emba pisipipyasa embone petamo lao suu pilyu.
ACT 26:3 Dokona lao Juu wambu dupwame yulu wakale wakale dupwa pyuo apiyanda pyuo lao karenge dupwa peparae embame ama soo gisingi. Dokona embame nambana pii doko rape rape lao soo pisapili yaka lao leto.
ACT 26:4 Namba yuu wamba wane nyaŋasa dokopa nambana yuu range wambu dupwa pipya role pyao Jerusaleme dokona ando kareyo. Dokopa namba wane kukisa karo yulu pyuo kareyonopape andapala pyuo kareyonopape dupwa Juu wambu dupwa peparaeme soo gisingi.
ACT 26:5 Namwa Anatu suu pyao kareyama dupwana lapo Parisi akali kareyami dupwame liti pipala Mawa Pii paleyamuli pyuo ama kandokondali pyuo pyuo kareyami dokonako namba pyuo kareyo doko nakama yuu wamba soo gisingi. Nakamame lao rolarami ramo doko dokonako palyuo larami ingilyamo.
ACT 26:6 Anatumi namwana rakange kyawa dupwa kando lalu lao leyamuli pyuo palipyali yaka lao nambame suu pyao karenge dokona namba keta kote palipyamopa karo.
ACT 26:7 Namwana rara akalisa ipisu lama dupwame kukwa korakamape Anatu ketae pyambuo kingi lao karo baame pii lalu lao leyamo doko nakama keta palipyali lao suu pyao karaminyi. O Kiŋi, Anatu leyamuli pyuo pira renge dokona suu pyao karo dokona ingyuo Juu wambu dupwa namba kando letaminyi.
ACT 26:8 Nakama Juu dupwa akipamo Anatumi wambu kumungi dupwa kapa minyalyuo nyii nange lao suu pilyamipi?
ACT 26:9 Namba wamba Yesu Nasarete range dokona kingi dokona yulu malu pyuo sisu nyuo karapengele ingilyamo doko keyange lao suu piyu.
ACT 26:10 Suu piyunuli pyuo namba Jerusaleme dokona dopako pyuo kareyo. Purisi akali mupwa dupwame namba kapa dopa piri leyamisa namba Anatunya wambu ama malu nyepala puu anda dokona pyambuyu. Dokopa kote lapala pyao kumakamape apa pimane leyami dokopa nambame pyao kumukamana lapa piyu.
ACT 26:11 Yuu malu sinakoke anda dupwa peparaena nakama randa maiyuo Yesunya kingi yaki nyinya lao pyalana pyuo kareyo. Dopa pyuo karo dokopa namba nakama kando imbumi kumuo sii leyamo karapala yuu wakale dupwana taone dupwana randa maiyuo papiyu.
ACT 26:12 Purisi akali mupwa dupwame renge palyuo pila puu leyamisa Damasakesa dokona panya katasa peyo.
ACT 26:13 O Kiŋi, peyono dokopa yake panda dokona piso yanga paupau mende lao epeyamo kandeyo. Doko neta doko yanga paupau lengeko doko dolo baa wakasako yanga paupau lao epapala nambamoo role pyao peyama dupwa paleta nyuo kako piya.
ACT 26:14 Dokopa namwa peparae lukundo siyamano dokopa Ipuru pii mende langiyamo siyu. Sole, Sole, embame akipamo namba randa joo karene? Embame isukuli nanga lyisi lapona kimbu doko pyao pisapala randange doko suu pyao pilinyi leya.
ACT 26:15 Dokopa nambame, Kamongo, emba apipi? leyo. Dokopa Kamongo dokome, Namba Yesu, embame namba randa joo karene doko leya.
ACT 26:16 Randa joo kareneŋe embena kimbu dokona roya kara. Emba rombo palyalana emba kandalase lao pano epelyo. Namba epapu yulu lasaka pyuo pilyu dupwape rengya lapo namba lasaka pirono kandare dupwapena wambu dupwa sinya lao rolo lamaiyuo karare.
ACT 26:17 Juu wambu dupwape wambu Juu daa raa wakale dupwapeme emba pyalana pyuope mende pirami ramo dokopa nambame emba mokwanyi nembapa piru. Nakama karaminyi dokona lamaiyala puu laro.
ACT 26:18 Nakama lenge rapala iminjapya dorena karaminyi doko kapu kyepala yangara dorena kando karo Sataneme porai ingyapala puu maipyamo pyuo karaminyi doko kaepala Anatu suu pyao karena lao lamaiya pare. Dokome nakama kapa ingingi lao suu pyaraminyi dokopa Anatumi nakamana koo dupwa kame sakamairamopa nakama banya wambu yapasi ingyuo sukusa epapala kararami.
ACT 26:19 O kiŋi Akoripa, dopa leyamo dokopa yake panda piso pii repa repa piyamo doko kandapala kamba laa nayo.
ACT 26:20 Kamba laa napala wambo Damasakesa range dupwa boo pyao lamaiyu. Lamaipala enakana Jerusaleme dokonape yuu Jutia kipwa kipwa dupwa peparaena rangepe wambu rara wakale dupwa opetae polo lamaiyuo, Nakama mona kapu kyepala Anatu suu pyao karalapape. Karapala mona kapu kyingi wambu yulu rolae pingi dupwa iki pyuo karalapape, lao kareyo.
ACT 26:21 Renge dokona namba tembole anda dokona kareyonopa Juu wambu dupwame namba minyarapala pyao kumakalana piyami.
ACT 26:22 Anatumi yuu peparae namba nyiso kareya. Dee dakepa nyiso karamoko dokome namba nakama wambu kuki andakepe kando banya pii dupwa polo lao karo. Mende piraŋa lao poropeta akali dupwape Mosesemoopeme wambo nolakao leyaminyi dokonako iki palyuo lao karo.
ACT 26:23 Doko Koraisa randa napala kumapala wambo kanda soo lopo epara dokona Juu wambu dupwape wambu rara wakale dupwape kata yanganyi peenge pii doko polo lamaira ingilyamo leyami dokonako iki palyuo lao karara, leya Poleme.
ACT 26:24 Poleme banya pii lao kareyamo dokopa Pesatasame pii poraiyuo lapala dopa leya. Pole emba kopyali. Sukuli yulu dupwa soo gisapala lao karenge dokome epapu kyawa sisingi bolombalo lapyasa pilyamo leya.
ACT 26:25 Dopa leyamo dokopa Pole dopa leya. O keyange Pesatasa, namba kopyali daa. Namba mona palipyamopa karo pii doko kinyi leto.
ACT 26:26 Kiŋi akali baame pii dupwa silyamo dokona mona yaepapala baa lamailyu. Dokona lao panda dongepe yulu dupwa yuu yalu mendena pyuo kareyaminyisa baa kanda nayande daa lao suu pilyu.
ACT 26:27 Kiŋi Akoripa, Anatunya poropeta akali dupwame pii leyami doko kinyiŋi lao suu pilipi? Embame kinyiŋi lao suu pyapinyi silyu, leya.
ACT 26:28 Dokopa Akoripame Pole lamaiyuo, Yuu gii mendaki dokome namba Kurisene akali ingyuo karalase laro lao suu pilipi? leya.
ACT 26:29 Dokopa Poleme dopa leya. Yuu gii kuki lama epo paparamopape malu epo paparamopape embasa iki laa nalyo. Epapu wambu nambana pii soo karaminyi dupwa peparae namba yale karamili lao suu pilyu. Suu pyapunupape puu jiminyi doko iki nakama keta pali napyali leya.
ACT 26:30 Dokopa kiŋi akali dokomoo kyapo mupwa dokomoo enda Banaisamoo role pyao peteyami dusipa pipya sipureyami.
ACT 26:31 Sipurapala dulusa papala nakama range sukusa dopa leyami. Akali dakeme kumaramopape karapusi anda dokona paliramopape yulu dopale mende pali nalyamo leyami.
ACT 26:32 Dokopa Akoripame Pesatasa lamaiyuo, Akali dake banya kote doko Sisa sakapyali laa nayali doko kapa mokwamwali, leya.
ACT 27:1 Namwa yuu Itali dokona sipu dokona piso parama lao suu pyapala karapusi akali wakale lapo Polepa yanda singi akali andake kingi Juliasa doko rapu pyuo karena leyami. Baame yanda singi liti pyuo karenge dokona kingi Okosatasana lenge dokona mupwa ingyuo kareya.
ACT 27:2 Dokopa sipu mende yuu Aramitiama range doko yuu Esia ipwa maronge sipu epo sepa pingi dupwana sepapu panya leyasa sipu dokona pisipala Atitakasa Masetonia akali yuu Tesalonaika range doko role pyao ipwa sukusa dokona piso peyama.
ACT 27:3 Dokona yangama dokopa namwa yuu Saitone dokona kando nyiyama. Dokopa Juliasame Pole kando anjiki pipala banya puu minyingi dupwa kareyami dokona kapa paramopa baa retaro palirami leya.
ACT 27:4 Dee ipwa sukusa piso papala porambaiye dokome sipu doko suu lanyi lano peyalena piyasa namwa yuu Saiporasa pakirena kandanyi pyalyama piso peyama.
ACT 27:5 Pao ipwa yuu Silisiapa yuu Pambiliapa dolapona repeta siyamo dokona oko soo yalo pao yuu Lisia dokona yuu mende Maira siyamo dokona epeyama.
ACT 27:6 Yuu dokona yanda singi mupwa dokome sipu mende yuu Alekesandia dokona epapala mende yuu Itali dokona panya siyasa kandapala namwa dokona pisipwa leya.
ACT 27:7 Yuu gii lapo nyuo nembo mona palyuo piso pao lekeleke rao epo yuu Naitasa dokona pyaka siya. Pyaka siyamanopa poo raiya dokome kata panya peyama dokona kapa minya nayasa namwa yuu Kirita dokona pakirena kandanyi pyalyama Salomoni repeta epo oko siyama.
ACT 27:8 Lekeleke rao oko soo epo yuu mende kingi Oko Mairo Singi Keyange lenge anda repe repe pyuo karenge yuu Lasia doko repeta siyamopa dokona epo pyaka siyama.
ACT 27:9 Mona palyuo yuu gii malu nyuo nembo peyamasa nenge naa nange gii doko epo papeyasa namwa sipu dokona dee piso parama ramo doko namwa koo keta palira ingiya kandeyama. Doko kandapala Poleme lao,
ACT 27:10 Anemasipa kwaeyapyamopa parama ingya nalyamo. Parama ramo doko sipu bangepe kwaeramopa namwa kumarama ingilyamo leya.
ACT 27:11 Leyamopape yanda singi mupwa dokome Polena pii kaepala sipu rapu pingi akali dokopa sipu range akali dokopana pii doko siya.
ACT 27:12 Dokopa raiyepambake pyaka seramo dokopa sipu yuu dokona kapa see nara ingiyasa akali andapyuwaleme, Yuu doko yaki nyepala ipwa sukusa dokona monale leyami. Yuu Kirita dokona yuu mende Pinisia lenge dokona oko mailyamopa sipu epo sepa pingi mare dokona parama dokopa raiyepambake eparamo dokopa mende pii nara leyami. Dokona pao pyaka simwape lao kandarama mwua, leyami.
ACT 27:13 Dokopa poo raiya doko elyakao lalyuo minyiyasa nakama panya suu pyapala dokopa sipu paa nana lapala kenda pingi bangendeme minyaro sinya lao ipwana pyaneyaminyi doko neta nyepala sipunya reteyami. Retapala yuu Kirita repeta nemba nemba dokona lalyuo peyami.
ACT 27:14 Dokona peyamanopa usale poo raiya ama kameya mende kingi Dumurena Poo raiya lenge doko yuu dokona piso lano minyuo epeya.
ACT 27:15 Dokopa poo raiya minyuo epo sipu doko kando nyiya dokopa pana peyama dokona pana saka napala kaepala kapu kyepala porambaiye peyamuli pyuo peyama.
ACT 27:16 Pao yuu kuki mende kingi Kota lenge dokona pakirena kandanyi palyama pao dokopa sipu kuki ipyuo nyingi doko lekeleke rao ipyuo nyuo palyiyami.
ACT 27:17 Sipu angi doko porai inginya lao puu dokome yama piyami. Ipwa Suritisi kee dokona pasarama lapala komau andake doko kondo nyiyaminyipa poo raiya dokome sipu doko mee soo peya.
ACT 27:18 Poo raiya apundape kameya epapala ipwa doko kasakole minyuo epapapu sipu doko pyapa piyasa mango ketae pao isa epo piya. Dopa piyamosa dokona yangama dokopa sipunya bange dupwana lapo neta nembeyami.
ACT 27:19 Dee dokona yangama dokopa sipunya bange angi karalu karenge dupwa neta nembeyami.
ACT 27:20 Nembeyaminyipa yuu malu mee netape buipi dupwa panope pii nayasa namwa peyamano dokona poo raiya andake kaeya nao minyiyasa lete paa naramalyamo lao suu pyapala mona nembeyama,
ACT 27:21 Akali dupwa yuu malu nenge naa nao peteyaminyi dokopa Pole nakama kareyami dokona papala dopa lamaiya. Namwa yuu Kirita yake nyii narama daa leyo kande doko nambana pii siyamili doko epapu sipu dokonape bange singi dupwape uki pali napyali.
ACT 27:22 Epapu nakama mona poraiyalapale leto. Nakama karaminyi dokona mendali kuma naramilyamo. Sipu dokoko iki kwaeyaralyamo.
ACT 27:23 Namba Anatunya akali ingyuo karo banya kingi lao karenge dokome kukwa dokona aŋala mende namba palipunu dokona repeta ipya.
ACT 27:24 Epapala dopa langipya. Pole paka napipi. Emba Sisana lenge kambu dokona karare ingilyamo. Dokona ingyuo sipu dokona role pyao petaminyi dupwa peparae emba reke lao Anatumi lete nyera ingilyamo langipya.
ACT 27:25 Dopa pyuo langipyamo dokona nakama akali dupwa mona poraiyalapape. Anatumi langipyamuli pyuo pira doko soo gisilyu.
ACT 27:26 Sipu doko yuu kuki mende ipwa sukusa silyamo dokona mendena pyakambwapala sera, leya Poleme.
ACT 27:27 Yuu akalisa ipisu kisima nyuo nembapeyamanopa kukwa dokopa ipwa Metitaraniane lenge dokona sukusa poo raiya peyumuli pyuo oko soo peyamano dokopa andasukulya dokopa sipu yulu pingi akali dupwame yuu mendena repeta epelyamano rapisi leyami.
ACT 27:28 Dokona puu mendeme bange mende anjapala makande pimana lapala koko pyaneyami. Dokopa kokole ingiyamo kandeyami. Kandapala mee mende dumbisa papala dee makande pinya pyaneyami dokopa mee mende ketaele ingiyamo kandeyami.
ACT 27:29 Dokopa sipu kana dupwana porambaiyeme minyuo soo paramo suu lasaramano lapala nakama sipu dokona matarena dusa puu kisimame bange kendange anjisi siyande malyiyami. Malyapala yuu waiya lao yangapyali lao ateŋa lao peteyami.
ACT 27:30 Dokopa sipu yulu pingi akali dupwame namwa sipu yaki nyepala monale lapala sipu wangurena dokona bange kendange lapo malyala pelyamano lao kyambo lapala sipu kuki doko ipwa dokona nyuo pyambuyami.
ACT 27:31 Dokopa Poleme yanda singi yango rapu pingi akali dokope yanda singi dupwape lamaiyuo, Akali dusipa sipu dakena yaki nyuo parami ramo doko nakama menge dupwa lete paa narami leya.
ACT 27:32 Dokopa yanda singi dupwame sipu kuki dokona puu dolapo pyao pyakepeyamisa sipu kuki doko nembeyami.
ACT 27:33 Yuu yangalana piyamo dokopa Poleme nakama peparae nenge lapo nena lao dopa lamaiya. Nakama isaro karo nenge mende naa nao kareyaminyipa yuu akalisa ipisu kisima epo pelyamo.
ACT 27:34 Dokona nakama nenge nyuo nalapape. Dokopa nakama poraiyara. Nakama peparaena kyawasi dokona mende isa paa nara lao mee keyange ingyuo kararami leya.
ACT 27:35 Dopa lapala borete mende nyepala nakama peparae kando kareyaminyipa Anatu ange lapala kau lapala nao peteya.
ACT 27:36 Dokopa nakama peparaeme mona poraiyapala nenge lapo neyami.
ACT 27:37 Namwa peparae wambu malu (276) ingyuo sipu dokona peteyama.
ACT 27:38 Dokopa nenge kapa napala sipu doko yaepena lapala witi jingi dupwa ipwa dokona neta nembeyami.
ACT 27:39 Yuu yangeyamo dokopa yuu doko apinyase lao see nayami. See nayaminyipa yuu pinjingi dusa oko mendena yuu kee siyamo kandeyami. Kandapala kapa ingyara ramo yuu dokona sipu dokona minyuo para lao suu piyami.
ACT 27:40 Dopa lao suu pyapala sipu minya nana lapala isa malyingi bange dusipa ipwa dokona mee sinya lao puu minyiyamo dupwa kunjiyami. Dokopa sipu minyuo kapu kyingi isa puu piyami dupwa puu dolapo opetae poleyami. Polapala poo raiya minyapala sipu doko soo pena laramo dokona komau andarena yukwapala yuu kee dokona panya peyami.
ACT 27:41 Papala ipwa epo ketembara pipala kee malu minyuo epo retapa piyamo dokona sipu doko pao siya. Dokopa sipu andarena kee pyarerasi dokome rambu leyasa dee panya saka nayami. Dokopa ipwa kasakole minyuo epeya dokome sipu matarena pyapa pyuo karo lalyiya.
ACT 27:42 Yanda singi dupwame karapusi akali lapo ipwa dokona bana soo kingi yulu pyuo neta mokwala pasarami lapala pyao kumakamana leyami.
ACT 27:43 Dopa leyaminyipape yanda singi mupwa dokome Pole lete nyipuli lao suu pyapala nakama kaena leya. Lapala wambu ipwa singi dusipa wambo ipwa dokona pyako papala yuu dokona pena peyami.
ACT 27:44 Menge ipwa yakara pingi dupwa isa polaŋepe sipu lalyisipi dupwana lapo minyuo pena leyami. Namwa dopa pyuo yuu dokona peparae lete epeyama.
ACT 28:1 Namwa lete epapala yuu kuki ipwa kota sukusa siyamo doko kingi Molota lenge doko siyama.
ACT 28:2 Dokopa yuu range akali dupwame namwa kando anjiki wakasa piyami. Apunda epo kupwa piyasa isare kisakao namwa peparae yako lao nyuo piyami.
ACT 28:3 Poleme isa kerali lapo nyepala isare reyamo dokona pyambuya dokopa isasa piyasa kau mende paleyande neta epapala banya kingi doko nao kapu siya.
ACT 28:4 Kau doko banya kingi dokona yukwaro kareyasa kandapala yuu range akali dupwame lao, Akali dake kinyi kinyi akali yango mende pyao kumakayandelamo. Baa ipwa dokona lete epapapyamopa dee lete kara nara ingilyamo leyami.
ACT 28:5 Dopa leyaminyipape baame kau doko isare dokona rena lao minyuo pyarenda leyamopa baa keta randa epa naya.
ACT 28:6 Baa rondo letape panda aopa pongwala pao sepala kumulyape lao isaro kando kareyami. Dokopa yuu andare isaro karapala baa randa epa nalamolamo doko kandapala suu pingi doko alowa pyuo baa imambundelamo lao suu piyami.
ACT 28:7 Yuu dokona nakamana akali mupwa kingi Papiliasa lenge doko kareya. Banya yuu repeta ingiyasa baame namwa yako lao yuu remasa banya anda paleyamanopa namwa nenge piya.
ACT 28:8 Dopa pyuo kareyamo dokopa Papiliasana rakange doko yanenge isasa pyuo inginya palyuo anga piyamopa siya. Dokopa Poleme baa siyamo dokona papala ateŋa lao baa dokona kingi ketae reto pyuo nyiya.
ACT 28:9 Dopa piyamo dokopa wambu menge yuu dokona anga piyamo siyami dupwa epeyaminyipa pyuo nyepa piya.
ACT 28:10 Nakamame namwa bange malu mee jiyami. Jepala namwa sipu mendena piso panya piyama dokopa namwa bange aeya nayamo dupwa minyuo epo sipu dokona retakayami.
ACT 28:11 Namwa yuu Molota dokona kana rema kumanyi nembo kareyama. Enakana sipu mende kingi mee imambu Reme Paka Petenge lenge yuu Alekesandia piso pao raiyepambake minyiyamo dokopa Molota epo siyamo dokona pao peteyama.
ACT 28:12 Pao yuu Sirakusa doko kando nyepala dokona yuu rema kareyama.
ACT 28:13 Karapala yuu doko yaki nyepala kyaimai pyuo pao yuu Orekiama dokona pyaka siyama. Pyaka siyamanopa yuu mendaki epo papeyamopa poo raiya mende panya peyama kata dorena lalyuo epeya. Dokona yangama dokopa namwa yuu Pyutiolai dokona epeyama.
ACT 28:14 Yuu dokona Kurisene yangonge lapo kareyaminyi kando nyiyama. Dokopa role pyao karamwali yaka leyamisa yuu yanda ipingi nyero karapala dee pao yuu Orome dokona epeyama.
ACT 28:15 Yuu dokona range Kurisene yangonge dupwa namwa epelyaminyi leyaminyi sepala Yuu Apiasana Makete dokonape yuu kingi Upunilinya Anda Palenge Rema lenge dokonape namwa kandamae nyela epeyami. Nakama kandapala Pole Anatu ange lao mona poo raiya.
ACT 28:16 Dokopa yuu Orome dokona epeyamano dokopa yanda singi mendeme Pole iso karena leyami dokopa baa range anda mende kotapala dokona mee paleya.
ACT 28:17 Yuu rema epo papeyamopa yuu range Juu wambu dupwana rapu akali dupwa sukusa sukusa epena lapala nakama sukusa sukusa pyuo epeyaminyi dokopa baame nakama dopa lamaiya. Yangonemoo, nambame wambu dupwa kando koo mende pyuope namwana rakange kyawa dupwame piyaminyili pyuo pingi yulu dupwana mende uki palyuope pii nayonopape Jerusaleme dokona kareyonopa namba puu maipala Orome akali dupwa nyuo maiyami.
ACT 28:18 Nakamame namba apa letepe lao kote pii lapala kumaro ingya nayasa mokwamwali lao suu piyami.
ACT 28:19 Dopa lao suu piyaminyipape Juu wambu dupwa doko kapa daa lao mumu leyaminyisa Sisa baa range nambana kote pii sinya leyo. Namba Juu wambu dupwa kando kote laro lao suu pyaa nayo.
ACT 28:20 Renge dokona lao nakama epena lapala pii lapo lamaiya. Doko Isaraele wambu dupwame mende pyuo pyaka sipyali lao suu pilyaminyi dokona namba anakapo dolapome puu maiminyipa peto leya.
ACT 28:21 Dokopa nakamame baa dopa lamaiyami. Yuu Jutia wambu dupwame emba kando pepa pase lapo pyao jii naminyipa yangonge lapo dae epapa pimi dupwana mendeme emba koo piiŋi laope laa nami.
ACT 28:22 Laa naminyipape embame suu pilinyili pyuo langirinyipa simwali yaka. Nakama kata wakale palyuo lao karaminyi doko wambu peparaeme kapa ingya nalyamo letaminyi doko range silyamano.
ACT 28:23 Sela eparama leyaminyi yuu gii dokonako wambu malu mee banya anda dokona epeyami. Dokopa Pole yangama alemanji lao Anatunya isingi yulu dokona rolo lamaiyuo Mosesena Mawa Pii dupwape Anatunya poropeta akali dupwana pii dupwape nyepala Yesu dokona lao kinyi lao suu pinya lao pii lamaiyuo kareya.
ACT 28:24 Dokopa wambu lapome pii kinyinde lalyamo lao suu piyaminyipa wambu lapome pii doko soo nyii nayami.
ACT 28:25 Dokopa nakama nakama range lao apiyanda pipala kanjakala peyami. Ene panya pyuo kareyami dokopa Pole pii mende dopa leya. Imambu Poo Pyasi dokome nakamana rakange kyawa duwpa lamainya lao Aisaya keta dopa lamaiyamo pii doko kinyi leya.
ACT 28:26 Embame wambu dusipa dopa pyuo lamainya leya. Nakama kalena ketae soo kararaminyipape angingyuo soo rola narami. Lengeme kandaro separaminyipape angingyuo kanda naramiko.
ACT 28:27 Nakamana mona anda kinjilyamo kale kata upi lapala karaminyi lenge iminjaro karaminyi. Nakama kandakinyuo dopa pyuo karaminyi. Pii namili doko lengeme kandowape kaleme sowape suu pinginya soo manji nyepala namba kando mona kapu kyimili dokome pyuo nyipuli, letamo Anatumi.
ACT 28:28 Pii doko lapala Poleme nakama kando, Anatunya waili pii keyange wambu lete wai pyao nyingi doko Juu daa rara wakale keta maiyaŋa sepala dokopa soo nyerami ingilyamo leya.
ACT 28:29 Pii dopa leyamo dokopa Juu wambu dupwa nakama range apiyanda pyuo kanjakala peyami.
ACT 28:30 Dokopa baa anda mendena palipala anda range akali dokona kana ropo pyapapu palyuo karo pyuo karo ee kana lama nyuo nembeya. Dokopa baa peteyamo dokona wambu epeyaminyili pyuo yako lao nyiya.
ACT 28:31 Anatunya isingi yulu dokona boo pyao lao karo Kamongo Yesu Koraisa dokona lao eŋa nembo mana lamaiyuo kareyamopa mendeme daa laa nayami.
ROM 1:1 Namba Pole Yesu Koraisana kendemande ingyuo Anatunya waili pii keyange doko lare lao rombo palyuo nembeyamo dokome pepa dake pyao jilyu.
ROM 1:2 Anatumi waili pii keyange dake nyerami lao lalu lao lapala banya poropeta akali dupwa lamaipala, buku Baepole poo pyasi dokona pyao retena leya.
ROM 1:3 Waili pii doko banya Ikinyingi namwana Kamongo Yesu Koraisa doko baa mee isa wane ingyuo kiŋi Dapitinya rora ambasupi ree palu dokona manjo nyiyami dokonasa letamo.
ROM 1:4 Anatu porayapala Yesu lete minyalyuo nyiyamo dokome Yesu baa Anatunya Ikinyingi isa komba pyao poo pyasi karenge doko paneyamo silyamano.
ROM 1:5 Dokona lao Anatumi Yesu keta namba Pole doko aposele inginyi pyambuya. Koraisana reke lao yuu muu dupwana wambu rara peparae baa kapa ingingi lao suu pyapala warombo soo kararami lao mana pii lamailyu.
ROM 1:6 Dopa piyamo doko nakama yuu Orome range dupwa opetaeko Yesu Koraisana ingyarami lao Anatumi kee lao sukusa nyiya.
ROM 1:7 Anatumi nakama yuu Orome range banya wambu angingyuo kyakale lao nyiyamopa baa mona reto karaminyi dupwa nakama pepa pase dake pyao jilyu. Namwana Rakane Anatu Kamongo Yesu Koraisapana mona keyange palyuo ipingi rengepe mona kyuu lao singi rengepe nakama keta jinya leto.
ROM 1:8 Nakama Yesu kapa ingingi lao suu pyao karaminyi doko yuu muu dupwana lao raeyaminyisa silyaminyi dokona nakama peparaena lao Yesu Koraisa keta Anatu sangyu lao karo.
ROM 1:9 Namba Anatu iki lao suu pyao karapala banya Ikinyingi dokona lao waili pii keyange kaeya nao lao karo. Namba kinyi kinyi yuu peparae nakama suu pyao ateŋa lakao karo doko Anatumi soo karamo.
ROM 1:10 Anatumi kapa lao suu pyapala nambana kata wapwakara ramo doko namba nakama waiya lao kandala eparo lao suu pyapala ateŋa lao karo.
ROM 1:11 Nambame nakama dakepa kandowane lao suu pilyu. Epapala imambunya yulu dokona renge keyange lapo polo langirunupa nakama Kurisene yulu dokona porainyi pyambwara.
ROM 1:12 Pii suu pyao leto doko dakesa laro. Anatu nambame kapa ingingi lao silyunuli pyuo nakamba langirunu dee nakambame silyaminyili pyuo namba langirami. Dokopa nambame laro dokome nakama nyiso, nakamame larami dokome namba nyiso pira.
ROM 1:13 Yangonemoo namba yuu malu epana mali soo karapunupa kata rokwapa pilyamoŋo lao langilyu. Namba waili pii keyange polo lamaiyunupa Juu daa rara wakale dupwame mona Anatu maiyaminyi doko suu pyao nakama opetaeko kata dokonako pumili lao suu pilyu.
ROM 1:14 Wambu peparae gapomane lowa singi see nangepe sukuli yulu singi see nangepe mana lamairunu doko nambana yulu palamo.
ROM 1:15 Dokona lao Anatunya waili pii keyange dokona nakama yuu Orome range dupwa opetaeko langyalana suu pyao karo.
ROM 1:16 Yesu Koraisana waili pii keyange dokona namba lalana elya nalyo. Banya waili pii keyange dokona porainya renge dokome Anatumi wambu baa mona mairami dupwa pyuo nyepa pingi. Juu dupwa wambo nyepala Juu daa rara wakale dupwa opetaeko pyuo nyera ingilyamo.
ROM 1:17 Anatumi waili pii keyange dokome namwa apa pyuo banya lenge kambu dokona rolo kararami lao lasaka pyuo karamo. Doko wambu Anatu kapa ingingi lao suu pingi kata dokome iki rolae ingyuo parami. Kata wakale mendeme rolae ingyuo paa narami. Anatunya buku Baepole lao, Mendali kapa ingingi lao suu pyara dokome Anatupa rolae ingyuo paramo dokopa baa letena renge nyera letamo.
ROM 1:18 Anatunya imbu singi yake panda piso neta epelyamo yulu koo dokonape isa wambu koo pyuo banya pii kinyi dupwa kalyamo karaminyi dupwa ketape pano epo palamo lao kandelyamano.
ROM 1:19 Anatu apiyakale lao nakama silyaminyi. Baame lasaka piyamopa soo nyiyami dokona yulu koo pimisa randa maiyuo karamo.
ROM 1:20 Namwa Anatu lengeme kanda nayamanopa baa yuu wasiyamo dokona piso epo dakepape neta renge ingyuo porai wakasa karalu karenge ingilyamo doko panelyamo. Baa bange peparae wasiyamo dokome baa angi apiyakale doko panelyamo. Dokona ingyuo namwa baa see nayama larama dokona kata mende pali nalyamo.
ROM 1:21 Nakama Anatu kando sepalape baa angi lakando lapengele doko kaepala sangyu lao kara nalyaminyi. Dopa piraminyiŋi doko suu pyao nakambana suu pingi dupwa kopyali ingyalu ingyuo ingyapyamopa nakamba suu pingi doko kwaeyo eŋa paa napyamopa petaminyi.
ROM 1:22 Nakambame range kando mona palenge lao suu pyaminyipape nakamba mee kopyali ingyuo pelyaminyi.
ROM 1:23 Anatu karalu karenge doko ketae pyambuo lakandarami doko kaepala nakamba mee bange lapo isa wambupi mena yaka kaupi dopale lapo wasapala dupwa ketae pyambuo kingi letaminyi.
ROM 1:24 Akali dupwa kopyali ingyuo pyuo karamisa suu pinginya koo andake pimwalimi kumami dokona Anatumi kapa pinya lapala yaki nyuo kaelyamo. Nakama akali yango sukusa yulu koo pii naramili elya pingi dupwa pyuoko karaminyi.
ROM 1:25 Anatu lao pii kinyi doko alowa pyuo kyambo inginyi pyambwapala karo Anatu dokona iki lakandapenge doko kaeyapala baa bange wasiyamo dupwana lapo nyepala karo mona kando kingi letaminyi. Doko kaeyapala bange angi wasiyamo doko baa iki lakando karalu karamana kinyi.
ROM 1:26 Wambu dopa pilyaminyisa Anatumi yulu koo dupwa maso pundapala pyuo karena lao yaki nyuo kaenge. Enda dupwa opetaeko akalipa paenge doko suu pyao enda yango sukusa yulu pii nange kata dokona palyuo koo pingi.
ROM 1:27 Dopako pyuo akali dupwame endapa role pingi doko kaepala mona rakusi relyamosa akali yango pipya kepo pyalana pingi. Yulu koo yango sukusa pilyaminyi dokona bakimi pyuo koo renge dokome nakama keta randa nyuo karaminyi.
ROM 1:28 Akali dupwame Anatu dokona lao suu pyaa nalyamisa Anatu baame nakamana suu pingi doko kwaena lao kaeya. Dokona lao nakama lao nakama yulu pii naramili dupwako pingi.
ROM 1:29 Nakama yulu kamame koo pyuo nyipuli nyipuli lao suu pyao mendali kando koo piminyi dupwame palyuo pyoko pyoko lapyamo karaminyi. Yango koo palyuo wambu pyao kumakao pyakando pyuo panga sepala soo wambu mendali langa pyalana suu pyao karenge yulu dupwame palyuo simbwapyamoko pyuo karaminyi.
ROM 1:30 Nakama mendali kando koo pipya lao lapona kingi dupwa koo keta palyuo lao papyuo karenge. Nakama Anatunya yanda pimwai ingyuo karo kyawa sisingi pali napala moŋokyaŋe soo rangena kingi ketae pyambuo lao karaminyi. Apa pyuo koo pirama lao kata dupwanako koto nyuo endangi rakangepena pii kamba lao pyuo karenge.
ROM 1:31 Nakama kepo pingi yulu pyuo, pii lao kana minyingi pii dupwana kapa moko minyuo pii nange. Nakama mendali kando sakawape dee anjiki pingi yulupi pii nangeko.
ROM 1:32 Anatunya mawa pii dokome lao dokopa wambu yulu dopa pyuo pingi dupwa kumarami ingilyamo letamo doko silyaminyi. Sepalako karo kata koo dupwanako pyulu pyuo pilyaminyi. Dee wambu lapo koo pilyaminyi dokona mee kyanyi kando karaminyi.
ROM 2:1 Yangonemoo nakamba wambu wakale dupwa kando koo pilyaminyi lao pakana palyuo letamipi? Dopa pyuo pirami ramo nakamba kando kote larami dokopa pii larami kata mende see nara. Nakamba wakale dupwa kando koo pilyaminyi lapala karo rangeme yulu koo dokonako pyuo karaminyi dokona kote doko nakama keta laeyo epelyamo.
ROM 2:2 Anatumi wambu yulu koo dopale pingi dupwa keta kote rolo lenge dokopa rolae pyuo karamo lao silyamano.
ROM 2:3 Yangonemoo wambu wakale dupwana koo pilyaminyi lao kote lalana karaminyipape nakama range koo dopaleko pyuo karaminyi. Anatu nakama kando kote laa nara lao masilyamipi?
ROM 2:4 Anatunya yulu keyange anjiki pyuo waiya lao randa jii nao pilyamo doko mee kuki lapala pilyamipi? Yulu elyape dokome Anatu nakama mona kapu kyuo karalale lao pilyamo doko soo kanda nalyamipi?
ROM 2:5 Dopa pipyamopape nakamana mona kana pokwapala soo nyii nalyaminyi dokona Anatu koo dupwa epe nasepala rolo laramo yuu gii dokopa nakamame kamame koo ingyuo randa nyerami kata doko range wapuo karamisa pilyamo.
ROM 2:6 Dokona lao Anatumi isa wambu yulu koo panda keyange pilyaminyili pyuo manda manjo kingi kisara.
ROM 2:7 Wambu lapo kyakana renge sulu singi yulu dokona kingi ketae paramopa neta renge ingyuo karalana dokona yulu keyange pyulu pyuo pyuo karaminyi.
ROM 2:8 Dee akali lapo dupwame Satanena kata dokona papyuo Anatunya pii dupwa kando kamba letaminyi dupwa Anatunya imbu singi doko nakama keta palira.
ROM 2:9 Wambu yulu koo pilyaminyi dupwa randa nao karo koo keta parami. Wambo Juu keta randa epapala enakana Juu daa rara menge dupwa keta palira.
ROM 2:10 Wambo Juupi dee Juu daa rara menge dupwa opetaepe Anatu baa warombo soo pirami dupwa keta banya mona kyuu lao singi rengepe banya yanga paupau lenge rengepe ketae pyambungi yulupi dusipa nakama keta palira.
ROM 2:11 Anatunya lenge kambu dokona yuu mure lao akali rara peparae mee mendaki dokoreko ingyuo pelyaminyi.
ROM 2:12 Juu daa rara wakale dupwa Mosesena Lowa see napala koo piraminyipa koo keta parami ingilyamo. Dee Juu wambu Lowa sepala dokopa koo pirami dupwa koo keta paramioko.
ROM 2:13 Wambu Lowa doko kaleme ketae sepala Anatupa rolae ingyuo paraminde daa. Lowa letamuli pyuo pirami dupwa rolae ingyuo parami.
ROM 2:14 Juu daa rara menge dupwame Mosesena Lowa see nao kamenge karaminyi. See nao karaminyipape mona dokona range suu pyapala yulu keyange moko minyuo pyuo kararami ramo doko Lowako lao minyaramisa pira.
ROM 2:15 Nakama yulu rolae pilyaminyi dokome Lowa doko nakamana mona anda pyasi palamo doko panelyamo. Juu koo panda keyange pilyamape lao monarena pyapi pyuo soo kaeyapala karaminyi.
ROM 2:16 Yuu gii pyaka seramo dokopa Anatumi Yesu Koraisa keta wambunya monarena yalu pyuo suu pingi dupwana minyuo kote lara ingilyamo. Waili pii keyange polo leto dokona dopa letamo.
ROM 2:17 Rangena yulu suu pyao karape. Namba Juu akaliŋi lapala Lowa dokona alya minyuo Anatunya lao lakandalyano lapala kimbu pyao piso karene.
ROM 2:18 Rangeme Lowa dokona yulu rolae mana nyepala Anatumi pipuli lao suu pilyamo dupwa soo gisapala karo lao suu pilinyi.
ROM 2:19 Embame wambu lenge kwaepyamo dupwana kata lasaka pipala iminjingi panda petaminyi dupwana kata yanganyi peenge lao suu pyao karene.
ROM 2:20 Wambu kopyalipi wane wanake dupwapena mana lenge akali ingyuo karo lao suu pyao karene. Emba Lowa minyapi dokome singinya rengepe kinyinya rengepe soo giso karo lao suu pilinyi.
ROM 2:21 Kinyi embame wambu dupwa mana lamailinyi dokona akipamo range mana nyii nalese? Wakale dupwa waa naa nana lao karapala akipamo range waa nao karene?
ROM 2:22 Embameko kepo pii nalapape lapala range pilisi? Bange Anatuŋu lao karaminyi epekanda napinyapape wambu yulu dopale pinginya tembole andana lalyapala bange dopale waa nyilisi?
ROM 2:23 Anatunya lowa singiŋi lao kimbu pyao piso lao karene. Dopa pyuo karo lapinyipape Anatunya lowa ukiaki minyapala baa elyanyi nembelese?
ROM 2:24 Baepole dokona dopa lao, Rara wakale dupwame nakama Juu dupwa kandapala Anatunya kingi pendewa nembo larami ingilyamoo lao palamo.
ROM 2:25 Lowana angi suu pyapili doko embena kalomenge yulu doko mupwa ingyapyali. Lowana kamba lare ramo dokome embena kalomenge yulu doko mee ingyuo para.
ROM 2:26 Juu daa menge dupwame Anatunya Lowa letamuli pyuo pirami ramo doko Anatumi nakama kalomenge dopale ingyuo pelyamo lao kandara.
ROM 2:27 Dee Juu daa rara wakale dupwana Lowa moko minyingi kata dokome Juu wambu nakamana koo dupwa lasaka piramopa elyo wambu nakamana koo dupwa lasaka piramopa elyo parami. Juu nakama yanenge kalomalyamano lao Lowana pyasi palengenyili pyuo pilyaminyi. Piminyipape Lowa mee yalo karaminyi. Dopa pilyaminyi dokome Juu daa rara wakale yanenge kaloma naminyipape Lowa minyuo karaminyi.
ROM 2:28 Api yanenge kalomapala Juu angi ingyuo karape? Mee yanengena Juu karo larami doko Juu angi daa. Yanenge kalomenge yulu dokome Juu angi inginyi pyambwa nange.
ROM 2:29 Doko daa. Juu angi doko banya mona kapu kyingi dokosa lenge. Doko Anatunya Imambu dokona yulu ingilyamo. Lowa pyasi palamo dokona ingyuo paa nalyamo. Isa wambumi akali dopale doko lakandengende daa. Anatumi baa lakandenge.
ROM 3:1 Renge anjukunyame rara wakale dupwa kaepala Juu wambu dupwa yanenge kalomenge yulu dokona nakama embone piso peyaminyipa nyisiyape?
ROM 3:2 Renge angi lapo palamoko. Wambo ingyuo Anatumi banya waili pii keyange doko Juu dupwa minyuo karena leya.
ROM 3:3 Juu wambu lapome yulu pirama lao lalu lao leyaminyili pyuo pii nayami dokona Anatumi banya pii lalu lao leyamo dupwa kaerape?
ROM 3:4 Dopa pyuo pii nara lyakande. Akali peparae kyambo lao karelyaminyipape Anatu baa alowa pii nange. Baepole pii pyasi dokona lao dokopa, Isa wambu lapome emba kando kote lao kararaminyipape emba rolo pare. Emba pii kinyi lenge doko wambu peparae serami.
ROM 3:5 Namwa isa wambu koo pingi dokona Anatu baa iki rolae doko panara. Dokopa aki pii laramase? Anatumi namwa randa jingi doko baa koo pilyamo laramase? (Pii doko mee wambunya pii lenge doko makande pyuo lapusa pilyamo.)
ROM 3:6 Dopa pyuo laramande daa. Anatu baa rolae pii nange pili dokome baa apa pyuo wambunya kote pii lapyalisi?
ROM 3:7 Anatunya yanga paupau lenge yulu dokome nambana kyambo laro doko kyamboŋo lao nyuo panara ramo dokopa baa kinyi yanga paupau lasiŋi lao panarasa pira. Wambu dupwame akipamo namba koo pingi laramisi?
ROM 3:8 Dopa larami ramo doko akipamo kooko pyulu pyuo pii narose? Dokopa keyange doko epara lao suu pilyamano. Wambu lapome namba dopa leeŋe lao giyalya giyana pyuo karaminyi. Dokona nakama keta kote palira ingilyamo. Doko angi kapa lao suu pilyu.
ROM 3:9 Doko namwa Juu wambu dupwame menge dupwa isa nembowale karamano lao suu pilyamase? Doko daa. Koo dokome namwa Juupi Juu daa rara wakalepe kata mendakinya palyuo peteyama, doko rolo langyalono.
ROM 3:10 Baepole dopa letamo. Akali mendaki mendepe rolae pii nange.
ROM 3:11 Akali soo gisingi mende kara nangeko. Dopako pyuo mendeme Anatu sipuli lao koto karengende daa.
ROM 3:12 Akali peparaeme Anatu mata maipala kata koo dokonako peyami. Akali mendaki mendeme keyange pyuo kara nange. Ama mendaki mendemepe daako.
ROM 3:13 Nakamana pendeko rakae pingi doko yuwale kambu lumbwasi dopale ingyuo silyamo. Kyambo lenge koo dupwa pee kambasinya ipwa lyuo epele lenge. Nakamana kambunya pii koo lenge dokome kau kyalende nenge katana mauli palenge dopale epelyamo.
ROM 3:14 Nakamana piimi wambu kando lami dokona isare paleta epelyamo.
ROM 3:15 Waiyako lao randa maiyuo wambu pyao kumakalana suu pilyaminyi.
ROM 3:16 Wambu yango randa maiyuo kokwa soo papyuo karaminyi.
ROM 3:17 Nakama mona kyuu lao see nange kata dokona ralo karaminyi.
ROM 3:18 Anatu kamame wakasa lao mona nembo kara nalyaminyi.
ROM 3:19 Pii Lowana pyasi palamo dupwa wambu Lowa soo kareyami dupwa keta palamo, doko silyamano. Dokome see nange larami ingya narasa lao Anatumi yuu mure lao peparae nyuo kote lara.
ROM 3:20 Akali mendeme Lowana iki minyapala Anatunya lenge kambu dokona rolae ingyuo kara nara. Baa Lowa singi dokome yulu koo pipulyamo lao baa range sera.
ROM 3:21 Lowana piipi poropeta akalinya piipi dolapome apa pyuo Anatumi wambu nyuo rolenge kata dokona lao kareyamipya. Dakepa apa pyuo Anatumi wambu nyuo rolenge doko nolakayapya. Dokona Lowa kata doko wakale ingyasi silyamo.
ROM 3:22 Anatumi wambu Yesu Koraisa kapa ingingi lao suu pingi dokopa baapa rolo penge. Dopa pyuo yulu doko Kurisene wambu peparae keta pingi. Kurisene yango lapo dupwa mendepale ingyuo paa nalyamo.
ROM 3:23 Dokona lao isa wambu peparaeme koowako pipala Anatunya yanga paupau lenge doko yaki nyuo neta epeyami.
ROM 3:24 Dopa piyaminyipape Anatu mona keyange palyapala mee jingi dokome Yesu Koraisa keta baame nakama nyuo rolenge. Doko Koraisame kiiramo nyipyasa pilyamo.
ROM 3:25 Anatumi Yesu namwana koo dupwana lao kumala pena leyamo dokome wambu Yesu kapa ingingi lao suu pyarami dokona nakama koo dupwa nyuo kame sakamira ingilyamo. Anatumi dopa pyuo Yesu kumala penale leyamo dokome namwa baapa rolo parama kata doko panasi sipyamopa kandelyamano. Anatu ipyapala wambo dokopa wambunya koo dupwa mee kame sakaya.
ROM 3:26 Yuu mange dakepa banya yulu doko rolaeŋe lao akali keta panelyamo. Dokona lao Anatu baa rolae dokome wambu Yesu kapa ingingi lao suu pingi doko Yesu dokona rolae inginyi pyambungiŋi lao panelyamo.
ROM 3:27 Aki bange mendeme minyuo mupwa ingyalyamano lao suu pyaramape? Bange mendena dopa pirama ingya nara. Lowa minyilyamo dokona lao range lakandarape? Dokona daa. Renge angi doko Yesu mona maiyamo dokona range lakando karara ingilyamo.
ROM 3:28 Pii letamano dokona angi palamo doko, akali Yesu kapa ingingi lao suu pyara doko iki Anatupa rolae ingyara. Lowa minyara dokome rolae ingyarande daa.
ROM 3:29 Anatu baa Juu wambunya ikisi? Baa rara menge dupwana opetaena daase? Kinyi menge dupwa opetaena ingilyamo.
ROM 3:30 Anatu baa mendaki. Juu dupwa Yesu mona mairaminyi dokome Anatupa rolo para. Dopako pyuo Juu daa rara menge dupwa yanenge kaloma napalape Yesu kapa ingingi lao suu pyaraminyi dokona nakama opetae Anatupa rolae ingyuo paramiko.
ROM 3:31 Dopa letamo doko Yesu kapa ingingi lao suu pyarama dokome Lowa doko nyuo isa palyaramasa pirase? Ama daa. Namwame Lowa kata dokona paka pyao soo pinya karamano.
ROM 4:1 Aporakame namwana rakange kyawa doko kando apa laramape? Baa keta aki renge mende palyuo peyase?
ROM 4:2 Aporakamena yanengena yulu piyamo dokona ingyuo Anatupa rolo peyali renge dokona range lakandeyali. Doko kaepala Anatunya lenge kambu dokona range lakandara ingyuo paa naya.
ROM 4:3 Anatunya pii pyasi dokona lao dokopa, Aporakame Anatu kapa ingingi lao mona maiyamo dokome Anatumi baa rolaeŋe lao kando nyiya letamo.
ROM 4:4 Akali yulu pingi dokona yole nyingi kandale. Dokona lao yole kana doko mee jiminyi nyilyuŋu laa nange. Kana doko yulu pingi dokona ingyuo nyingi kandale.
ROM 4:5 Akali mendeme Lowana yulu minya napala Anatu wambu koo nyuo rolaeŋe lenge doko kando kapa ingingi lao suu pyara renge doko Anatumi nyepala baa rolae karamo lao kandara.
ROM 4:6 Dapitimi lao Anatumi akali mendena Lowa yulu dokona lao suu pyaa napala mee rolae ingyuo peya dokona rae maingi rengende leyamo doko pii leto dokona kata pelyamo.
ROM 4:7 Anatumi wambu nakamana koo dupwa nyuo yambe pyao kame sakaya dupwa raeme kumulyaminyi.
ROM 4:8 Akali mendena koo dupwa Kamongo Anatumi nyuo yaka lao reta nao kame soo kaekamira doko raeme kumuo karara ingilyamo.
ROM 4:9 Dapitimi yanenge kalomeyami dupwa yapo rae maiyuo parami leyape? Ama daa. Kaloma nange dupwa opetaena leya. Doko Aporakame Anatu kapa ingingi lao mona maiyamo dokome Anatumi baa rolaeŋe lao kando nyiya lao buku Baepole pii dokona wambo dalyarena pyasi palamo.
ROM 4:10 Anjokorape Anatumi Aporakame baa rolaeŋe lao kando nyiyase? Yanenge kalomapeyamopape panda mona maipala enakana kalomeyase? Wambo rolaeŋe lao kandeya. Enakana daa.
ROM 4:11 Baa enakana kalomeyami. Doko Aporakame Anatu kapa ingingi lao suu pyao kareyamo dokona yanenge kalomapa nayamopa Anatumi baa rolaeŋe lao kando nyiyaŋa, lao panelyamo. Dokona lao yanenge kaloma nange wambu dupwa Anatu kapa ingingi lao suu pilyaminyi dokona Anatumi nakama rolaeŋe lenge. Wambu dupwa Aporakame baa kyawa nyero karamo.
ROM 4:12 Aporakame baa yanenge kalomenge dupwana rakange. Doko yanenge kalomenge yulu dokona iki suu pyao kyawa nyuo kara nalyamo. Aporakame baa yanenge ene kaloma nao karapala Anatu kapa ingingi lao suu piya. Juu wambu opetaeme Anatu kapa ingingi lao suu pilyaminyi dokona Aporakame nakama Kurisene rakange ingyuo pelyamo.
ROM 4:13 Anatumi Aporakame banya para pyaramo dupwana lao lao kana minyiyamo doko yuu muu peparae banya kulisa ingyara leyasa piya. Lalu lao leyamo doko Aporakame Lowa minyilyamo lapala leyande daa. Baa Anatu kapa ingingi lao mona maiyamosa baa rolaeŋe lao kando nyepala leyapya.
ROM 4:14 Anatunya kana minyuo lenge pii doko Lowa minyingi dupwa iki keta siyali doko wambu Yesu kapa ingingi lao suu pingi doko mee ketae papala Anatunya kana minyuo lenge doko angi ingya nayali.
ROM 4:15 Lowa dokome Anatunya imbu singi nyakamilyamopape Lowa see nalyamo dusa Lowa kamba larami kata mende see nangeko.
ROM 4:16 Anatu kapa ingingi lao suu pingi renge dokona ingyuo Anatumi lalu lao lenge pii doko leya. Renge doko Aporakamena para pyaramo peparae keta Anatunya lalu lao lenge pii doko mee nyerami lao laokondali piya. Doko Lowa minyingi wambunya ikinde daa. Aporakame kapa ingingi lao suu piyamuli pyuo pilyaminyi dupwa keta opetae palamoko. Aporakame baa namwa Yesu kapa ingingi lao suu pingi dupwa peparaena wambo rakange kyawa ingyuo kareya.
ROM 4:17 Doko suu pyao Anatunya pii pyasi dokona lao, Emba yuu muu peparaena rara dupwana rakange ingyuo rombo palyiyu lasi silyamo. Dokona lao Anatunya pii lao kana minyingi doko range alowa pinya rae mai nange. Anatu Aporakameme mona maiyamo Anatu dokome kumasi dupwa letena renge maipala banya pii dokome bange wamba see nayamo dupwa mee poro lena lenge.
ROM 4:18 Dupwame mende pii nara lao suu piyami dokopa Aporakameme mende piraŋa lao suu pyao kaeya nao kareya. Dokome lapala baa rara malunya rakange ingyuo peya. Anatunya pii pyasi dokona lao dokopa, Embena para pyaramo dupwa malu ingyuo para lyakande leya.
ROM 4:19 Aporakame baa ee kana 100 dopale nembo alemo ingyuo kareya. Karapala banya yanenge emo oteyamopa dee etenge Sera wane manjira gii dorena oto kaeyamo dolapona lao suu pyapalape Anatu mende piraŋa lao suu pingi doko minyalu minyuo minyiya.
ROM 4:20 Anatu kapa ingingi lao suu pingi doko baa keta palu paleyamopa Anatunya lalu lao lamaiyamo pii dorena mee ingyuo pwuamo lao suu pyaa naya. Banya kapa ingingi lao suu pingi dokome baa porainyi pyambuyamopa Anatu lao lakando kareya.
ROM 4:21 Anatumi lalu lao leyamo dokona pira lyakande lao angi soo otapala kareya.
ROM 4:22 Dopa piyamo dokona lao Aporakame Anatu mona maiyamo dokona Anatumi baa rolaeŋe leya.
ROM 4:23 Pii Anatumi baa rolaeŋe lao pyasi palamo doko Aporakame banya kipungi pyasi paliyande daa.
ROM 4:24 Pii doko Anatumi rolaeŋe lao kando nyera dupwa opetaena lao pyasi paliyasa piya. Dee namwana Kamongo Yesu lete minyalyuo nyiya Anatu doko baa kapa ingingi lao suu pilyamano dupwa keta pii doko palamoko.
ROM 4:25 Namwana koo dupwana lao kumuo palyuo lopo lete epapala Anatupa namwa nyuo roleya.
ROM 5:1 Anatu kapa ingingi lao suu piyamano dokona baame namwa rolaeŋe lao kando nyiyamo dokopa namwana Kamongo Yesu Koraisa keta namwa Anatupa yalya kando petamano.
ROM 5:2 Anatumi ipyapala mona keyange palyuo namwa baa kapa ingingi lao suu piyama dokona sukusa karamano. Namwa rengya Anatunya yanga paupau lenge dokona kararama lao suu pilyamano dokona lao rae andake mailyamano.
ROM 5:3 Dokona suu pyao randa andake eparamo dokopa mee rae andake mairama. Randa dokome namwa porainyi pyambwaramo dokopa kaeya narama ingilyamo.
ROM 5:4 Kaeya narama ramo dokome Anatu namwa mona nyera. Baa namwa mona nyeramo dokona piso mende pira lao suu pingi doko ando epara.
ROM 5:5 Anatumi banya Imambu Poo Pyasi jiyamo doko keta banya mona retenge renge doko namwana monarena kulimbuo retakaya. Dokona lao Yesu epapala keyange pira lao suu pyaramano kata doko mona kendanyi pyambuo pii nara.
ROM 5:6 Namwa saka nao peteyamanopa Koraisa wambu koo dupwana lao Anatumi yuu gii angi rombo palyuo reteyamo dokona kumakaya.
ROM 5:7 Mendeme akali rolae pingi dokona lao kumakamira ramo dokopa randa napala kumuo maira. Dopa piramopape akali mendeme akali keyangena lao kumara rapisi.
ROM 5:8 Namwa koo paleta peteyamanopape Koraisa namwana lao kumakayamo dokona Anatumi namwa angingyuo mona reto karo lao doko lasaka piya lao silyamano.
ROM 5:9 Baa ranjama kulimbuo kumuyamo dokome namwa Anatupa rolae inginyi pyambuya. Dokonako ingyuo Yesu baame kamame nyisaramo dokome Anatunya imbu singi doko kwuanyi nembakara.
ROM 5:10 Namwa Anatunya nyisu petenge ingyuo kareyama. Dopa piyamanopape banya Ikinyingi isa mamandona kumuyamo dokome Anatu baame namwa banya puu minyingi inginyi pyambuya. Epapu Anatunya puu minyingi ingyuo karamano dokona Yesu lete karamo dokome namwa dee kamame ingyuo nyisara.
ROM 5:11 Doko iki daa. Namwana Kamongo Yesu Koraisame Anatupa namwa nyuo puu minyinyi pyambuya dokona Yesu keta Anatu kando raeme kumuo lakandelyamano.
ROM 5:12 Koo renge doko akali mendaki keta isa yuu dakena epeya. Banya koo piyamo dokome kumungi renge minyuo epeya. Wambu peparae koo pingi dokona kumungi renge doko nakama peparae keta minyuo epo raeya.
ROM 5:13 Lowa epapa nayamo dokopa koo doko isa yuu dakena wambo ingyuo siya. Dopa piyamopape wambu dupwa lowa doko see napala kamenge kareyami dokona Anatu nakamana koo dupwa mee kame sakamiya.
ROM 5:14 Atame kareyamo dokona piso epo Mosese kareyamo yuu gii dusipana kumungi renge doko wambu peparae keta paleya. Wambu dusipame Atame Anatunya pii kamba leyamo dopako pyuo laa nayami. Laa nayaminyipape kumungi renge nakama keta paleyako. Atame baa akali mende enakana eparaŋa lao dokona makande minyuo kareya.
ROM 5:15 Dopa piyamopape lama dolapo mendare dopalekonde daa. Anatunya mee ipyapala jiyamo doko Atamena koo nyiyamo dopale daa. Kinyi doko akali mendakimi koo nyiya dokome wambu malu kumuyami. Dopa pyuo piyamopape Anatunya mona keyange palyuo ipyuo karapala Yesu Koraisa yulu andake piyamo dokona pyuo nyingi renge doko wambu malu keta palena letamo.
ROM 5:16 Anatumi ipyapala renge keyange jiyamo dokopa dee akali mendaki yulu koo piyamopa kumungi renge epeyamo dokope ama wakale ingilyamo. Akali mendaki keta koo epeyamo dokona enakana Anatumi wambu peparae koo paleta karena leya. Dopa leyamopape koo raeyo sepeyamopa Anatumi mona keyange palyuo ipyapala emba koo paleta kara nare lao mee jilyu leya.
ROM 5:17 Doko kinyi akali mendakinya koo dokome kumungi renge epo paleya. Dopa piyamopape akali mendaki Yesu Koraisame piyamo dokona lao kamame andake ingyuo namwa nyisilyamo. Wambu peparae Anatunya mona keyange palyuo ipingi doko iki daa, kamame wakasa ipingipi dee banya rolaena rengepe mee jiyamo dolapo nyerami dupwa Koraisa keta namwa poraiyuo ingyuo kararama.
ROM 5:18 Dokona lao koo mendaki dokome akali peparae nyuo koo keta palyiya. Dee dopako pyuo keyange mendaki dokome akali peparae kiiramo nyepala lete renge nakama maingi.
ROM 5:19 Akali mendakimi kamba leyamo dokona koo epo akali peparae keta paleya. Dopako pyuo akali mendakimi rolae rape rape lao piyamo dokome akali malu Anatu keta nyuo rolanyi pyambwara ingilyamo.
ROM 5:20 Enakana Lowa opetae epeyamo dokopa koona renge yulu doko andeya. Koo renge dopa pyuo ando peyamopape Anatunya mona keyange palyuo ipingi renge doko kamame andakyapala koo doko anamasi minyiya.
ROM 5:21 Dokona ingyuo koo dokona kumungi renge doko palipala wambu dupwa isili laro kareya. Dopako pyuo Anatunya mona keyange palyuo ipingi renge dokome rolaena renge palipala wambu dupwa nyuo kalyaro karamo. Dokome Kamongo Yesu Koraisa keta letena renge dokona nyuo kararamo kararama.
ROM 6:1 Dokona namwa apa laramase? Anatunya mona keyange palyuo ipingi renge doko ando penale lapala koo pyulu pyuo piramase?
ROM 6:2 Doko kapa daa. Namwa koo dupwa paleta kumuo kaeyasi karamano dokome apa pyuo koo pyuo karalu kararamase?
ROM 6:3 Namwa Yesu Koraisapa role pyao bapitisimo nyepala baa role pyao malu anda kumasi paleyama lao soo karaminyi.
ROM 6:4 Dokona lao bapitisimo nyiyamano doko baa kumuyamuli pyuo kumuo palipala Koraisa banya Rakangena porainya renge wakasa dokome lopo nyiya. Doko suu pyao namwa wakale enenge ingyuo lete kararama.
ROM 6:5 Dopa pyao namwa baapa mendaki ingyapala kumuyamuli pyuo kumuyamande ramo doko baa piyamuli pyuoko lopo epapala mendare kararama.
ROM 6:6 Namwa wamba palyuo karo pingi doko Koraisapa role pyao isa mamandona kumuo paleya doko silyamano. Dopa piyamano dokome koona porainya renge doko pyao kokwa sinyi nembeya dokome namwa koona kendemande ingyuo kara narama ingilyamo.
ROM 6:7 Wambu kumungi dokopa koona porainya renge doko ramanyi yaki nyingi kandale.
ROM 6:8 Koraisapa kumuyamande ramo doko baapa role pyaoko kararama lao soo nyilyamano.
ROM 6:9 Doko Koraisa kumuo palyuo lopo epapala dee kuma nara. Kumungi renge dokome baa dee nyuo kumuo anamasi minya nara.
ROM 6:10 Baa kumuyamo doko koo dupwana lao yuu mendaki iki kumakaya. Dokona dakepa lete karamo doko Anatu role pyao lete karapyasa pilyamo.
ROM 6:11 Dokona lapala Yesu Koraisapa role pyao koo dupwana kumapala Anatu keta lete kararami ingilyamo lao soo nyelapape.
ROM 6:12 Dopa pyuo soo nyerami dokona yanengena yulu koo dokona laramuli pyuo pii narami ramo doko koo dokome nakamana yongo dokona anamasi minya nara ingilyamo.
ROM 6:13 Dopako pyuo yanenge rapu pyuo kara napala koo pundao paramuli pyuo pinya suu pyaa nalapape. Doko kaepala Anatu keta pyamalyuo karalapape. Nakama wambo kumasi ingyuo kareyaminyi dokopa Anatu pyuo nyiya doko suu pyao yulu rolae pinya wangu lakapala Anatu dokona pyamalyuo karalapape.
ROM 6:14 Koo dokome nakamana kiŋi ingyuo kara nana. Nakama lowame rapu pyuo kara napyamopape Anatunya mona keyange palyuo ipingi dokome isapyamo karaminyi.
ROM 6:15 Namwame aki mende piramase? Namwa lowame rapu pyuo kara napyamopa Anatu mona keyange palyuo ipingi dokome isapyamo karamano lapala namwa koo piramase? Ama daa.
ROM 6:16 Nakama range kendemande yulu pyuo yulu pyakamaingi akali letamuli pyuo pingi doko soo karaminyi. Koona kendemande ingyuo kararami ramo dokopa kumungi renge doko nakama keta epara. Dee Anatunya pii laramuli pyuo pirami ramo dokome baapa rolae ingyuo parami.
ROM 6:17 Wamba nakama koona, kendemande ingyuo kareyami. Epapu doko kaepala, nakama pii kinyi langiyaminyi mona dokona poraiyuo soo nyilyaminyi dokona Anatu lakandalapa.
ROM 6:18 Nakama koo dupwana kiiramo epapala yulu rolaena kendemande ingyuo kareyami.
ROM 6:19 Nakamana yulu mee pinginyili pyuo pyuo karamisa dokona mee isa wambunya pii dupwana palyuo leto. Wamba nakama kokwa singipi koo rengepena kendemande yulu dokona pinya mona kumuo maiyuo oteyami. Renge doko Satane yulu doko iki pinya piyami. Doo piyami doko suu pyaoko dakepa yulu rolaena kendemande yulu dokona pinya dokopa mona kumuo mailapape. Renge doko Anatunya Imambunya yulu dokona iki pinya suu pyapala pipape.
ROM 6:20 Wambo koona kendemande yulu pyuo kareyaminyi dokopa yulu rolae pinya suu pyaa nayami.
ROM 6:21 Nakama suu pyalapape. Yulu koo dokore dakepa pipala elyange dokona wamba piyami dokopa aki keyange mende epeyase? Kumunginya renge doko epeya.
ROM 6:22 Dopa piyamopape dakepa nakama koo dokona kiiramo epapala Anatunya kendemande ingyuo karaminyi. Dokona lao nakama Anatunya angingyuo pelyaminyi dokona yuu gii lumwa piramo dokopa letena renge nyerami.
ROM 6:23 Koona yole nyilyamano lao dokopa kumungi renge nyerami. Dopa piraminyipape Anatumi Kamongo Yesu Koraisa keta letena renge mee jera.
ROM 7:1 Yangonemoo, nakama lowa dokona singi dokome pii langiru doko serami ingilyamo. Lowa dokome akali lete karelyamo yuu gii dokopa baa keta palenge.
ROM 7:2 Enda akali nyingi dokona makande pyuo pii mende leto. Doko akalingi doko lete karelyamo dokopa baa anjisi petenge lao lowana letamo. Akali kumaramo dokopa baa kapa para.
ROM 7:3 Enda mende akalingi lete kararamopa akali mendepa role pyara ramo dokona baa pamuku enda ingilyamo larami. Dee banya akalingi kumaparamo akali mende nyera ramo doko baa kepo pirasa pii nara. Lowa doko baa enda waiya dokome akali wakale kapa nyera letamo.
ROM 7:4 Yangonemoo, pii doko nakama keta palamo. Nakama Yesu Koraisana yanenge dokona pingyasi karaminyi dokona lao Lowa dokome nakama minyaro sulu see nalyamo. Yesu kumapala lopo epeya doko baapa pakao karo Anatunya yulu rolae dupwa piramasa pira.
ROM 7:5 Namwa mee yanengena yulu pyuo kareyamano dokopa yulu koo pinya suu pingi dupwa koo renge dokome Lowa minyapala namwana yanenge dupwana kata papyuo kareya. Dokome kumungi renge andanyi pyambuya.
ROM 7:6 Lowame namwa puu maiyamo kareyamanopape epapu moko nyisi karamano. Dokona lao lowa letamuli pyuo kararamande daa. Imambunya kata enenge dokona pyuo kararama.
ROM 7:7 Dokona lao apa laramase? Lowa angi doko kooŋo laramase? Ama daa. Lowa dokome koo dokoŋo lao lasaka piya. Lowame wambu yangona bange awuapala nyipuli nyipuli yaka lao suu pyaa napipi laa nayali doko nyipuli nyipuli yaka lao suu pingi kata dokona lao soo pakana palya nayoli.
ROM 7:8 Dopa piyamopape yulu doo dokome lowa palengena kata doko kando nyiya. Dokona piso nyipuli nyipuli lao suu pingi wakale wakale dupwa nambana monarena epenge. Lowa see nayali doko koo doko kumuo isa peyali.
ROM 7:9 Lowa namba keta pali nayamo dokopa namba lete ingyuo kareyo. Enakana Lowa pii pyasi palamo doko epapeyamo dokopa koo doko ando nyimbuya. Dopa pyuo koo doko ando sipureyamo dokopa namba kumuyu.
ROM 7:10 Lowana pii pyasi palamo doko lete parami laminyipape namba keta kumungi renge jiya.
ROM 7:11 Koona renge dokome lowana kata kando nyepala namba keta panga soo epo lowana pii dokome namba pyao kumakaya.
ROM 7:12 Lowa angi doko poo pyasi. Dee pii lowa dokona pyasi palamo doko poo pyasioko doko rolae keyangepe ingyuo silyamo.
ROM 7:13 Pii doko apa lao letase? Keyange dokome namba pyao kumakayase? Ama daa. Koona renge dokome lowana alya minyuo namba pyao kumakaya. Pyao kumakapala dokopa koona renge angi doko paneya. Dokona lao koo renge dokome lowana pyasi palamo doko nyepala koo wakasa ingyuo andalu ando andelyamo.
ROM 7:14 Lowa doko Imambunya ingyuo silyamo lao silyamano. Dopa pipyamopape namba mee isa akali karo dokona koo dokome namba karapusi pipyamopa karo.
ROM 7:15 Apa pyuo pilyu lao see napunupa mee pyuoko pelyo. Nambame keyange pinya suu pyapunu kata dokona papu pilyu. Papu pipala pii nalana suu pyapunu dupwanako pyuo pelyo.
ROM 7:16 Pii nalana lao suu pyapu doko pyuo karo dokopa Lowa kata doko rolaeŋe lao lasaka pilyamo lao silyu.
ROM 7:17 Yulu koo dupwa namba rangeme sisu lao pilyunde daa. Koona renge namba keta palipala dokome pilyamo lao silyu.
ROM 7:18 Namba isa akali dokome namba keta keyange mende pali nalyamo lao silyu. Nambame keyange doko pipuli pipuli lao sipunupape pinya saka nalyo.
ROM 7:19 Namba keyange piru lao suu pyapu doko papu pilyu. Papu pipala yulu koo pii nalana suu pyapu dokona pipa pilyu.
ROM 7:20 Pii nalana suu pilyu dokona piru ramo doko nambame sisu lao pilyunde daa. Koonde namba keta palamo dokome pipyasa pilyamo lao silyu.
ROM 7:21 Namba keta koo renge palamo doko soo gisilyu. Doko yulu keyange pinya lao suu pyapunupape yulu koo dokona namba sinyi palyapa pilyamo.
ROM 7:22 Kinyi nambana mona andarena Anatunya lowa doko mona retelyo.
ROM 7:23 Dopa pipunupape lowa wakale mendeme nambana yanenge dokona keta palamo lao silyu. Lowa wakalendeme lowa namba mona retelyamo doko yanda pimwai ingilyamo. Dakepa lowa koo dokome yanengena yulu pilyamo silyu dokome namba puu maipyamo karo.
ROM 7:24 Namba rae mai nalyo. Doko aki akalinde karose? Nambana yanenge kumara doko namba puu jilyamo. Apimi namba kiiramo nyerase?
ROM 7:25 Anatumi namwana Kamongo Yesu Koraisa keta kiiramo nyiyamosa dokona baa kando sangyu leto. Namba dopale ingyuo karo lao langiru. Nambame Anatunya lowa doko suu pingi dokome iki mee ketae pilyu. Dopa pyuo pipala yanengena yulu dokome koona renge kata dokona pelyo.
ROM 8:1 Wambu Yesu Koraisa keta pyamalyuo petaminyi dupwana lao koo dokona kote pii larami dokopa nakama keta pali nalyamo.
ROM 8:2 Namwa Yesu Koraisapa pakao karenge wambu keta Imambu letena renge palenge baame porayapala koo renge namwa rambu leyamo doko rekya lapala namwa moko nyiyasa piya.
ROM 8:3 Yanenge dokome poraiyuo Lowa kata dokona pira ingya nayamo dokona Anatumi piya. Baame banya Ikinyingi yeelyo pena leyamopa namwana koo yanengena palamo doko nyuo nembeya. Dopa pyuo pena leyamopa Ikinyingi doko mee isa wambu koo dopale ingyuo koo doko nembaroŋo lao epeya.
ROM 8:4 Namwa yongona yulu kaepala Anatunya Imambunya yulu pinya lao suu pyao karamano wambu dupwa nyiso Anatumi Lowana kata keyange papyuo kararama lao Yesu jiya.
ROM 8:5 Suu pingi wambaraena pyuo karaminyi dupwa yongo dokome letamuli pyuo pyuo karaminyi. Dopa pipyamopape Imambunya yulu pyuo karaminyi dupwa Imambumi letamuli pyuo pyuo karaminyi.
ROM 8:6 Suu pingi wambarae dokome laramuli pyuo pirami wambu dupwa kumarami ingilyamo. Dopa pipyamopape Anatunya Imambu dokome laramuli pyuo pirami wambu dupwa mona seramopa lete kararami.
ROM 8:7 Suu pingi wambarae dokome akalinya yulu pilana suu pingi dupwa baa Anatunya nyisu petenge ingyuo karara. Wambu dopale Anatunya lowa dokona kamba larami dokome dee minyalana yakara pirami.
ROM 8:8 Wambu yanengena letamuli pyuo pingi dupwa Anatu rae mainyi pyambwa narami.
ROM 8:9 Anatunya Imambu nakamana monarena palipyali doko yanengena yulu dupwa moko minyuo pii napala Imambunya yulu pyuo karamili. Yesu Koraisana Imambu doko nakama keta pali naramo kararami ramo doko nakama Koraisana ingya nara.
ROM 8:10 Dopa piramopape Koraisa baa nakama keta palyuo kararande ramo doko koo dokome nakamana yanenge doko kumaramopape Anatumi nakama rolaeŋe lao kando nyiyamo dokona embena imambu doko lete karara.
ROM 8:11 Anatunya Imambu nakama keta palirande ramo baa Koraisa Yesu lete minyalyuo nyiya doko suu pyao nakamana yongo doko minyalyuo nyerako.
ROM 8:12 Yangonemoo dokona lao namwa yulu dokona pyulu pyuo piramanopape yanengena yulu wambarae pimili lao suu pilyamo dokona waso karamana.
ROM 8:13 Yulu wambarae pimili lao suu pilyamo dokona waso kara narami ramo doko kumarami. Kumaraminyipape nakamana yanengena yulu koo dupwa Imambu dokome anamasi minyaramo kararami ramo doko mee lete kararami.
ROM 8:14 Anatunya Imambumi pii letamo dokona pyuo karenge dupwa Anatunya wane wanakepe ingyuo pelyaminyi.
ROM 8:15 Anatumi Imambu jiyamo doko baa nakama puu maipala pako kararami lao epeyande daa. Baa nakama keta maralyapala banya wane angingyuo pyambuyamopa nakama Anatu kando Rakane, nambana Rakane lao karaminyi.
ROM 8:16 Anatunya Imambu epo namwana imambu dokopa pakapala karapyamo dokome namwa Anatunya wane ingyuo pelyamano lao pano letamo.
ROM 8:17 Namwa banya wane ingilyamano dokona keyange renge dupwa banya wambu nyerami lao retakamingi dupwa namwa keta palira. Dee Koraisa keyange renge nyera lao Anatu retakamingi dupwa namwa keta opetae palira. Koraisa randa nyiyamuli pyuo nyerama ramo dokona namwa Koraisana yanga paupau lenge doko namwana opetae ingyara.
ROM 8:18 Yanga paupau lenge epo panara dokome dakepa randa nyilyamano dupwa mee ingyara lao sepala leto.
ROM 8:19 Anatunya bange wasiyamo dupwa peparaeme Anatunya ikinyingi para pyao nyiyamo dupwa pano epo nolakarami dokona kandalana kata kando isaro karaminyi.
ROM 8:20 Bange wasiyamo dupwa peparae mee koo ingyuo pelyamo leya. Anatunya wasisi dupwa mee koo ingyuo pupuli lao paa naya. Anatumi dopa pyuo koo ingyuo sinya leyamo silyamo. Dopa pyuo leyamopape angi nembalu nembo nemba nayamo dokona Anatumi mende pira ingyasi silyamo.
ROM 8:21 Doko Anatunya wasisi bange dupwa yuu gii mendepa mee anjisi rumbyuo see nana lao kiiramo nyera. Dokopa bange peparae mee mondo lao sepala Anatunya wane wanake dupwa pipya yanga paupau lenge dokona kiiramo nyisi kararami.
ROM 8:22 Anatunya bange peparae wasiyamo dupwame wamba kanda soo dokona piso pao dakepape enda wane mata pilyamo kae lao isa nanyi nembo karenge dopale ingyuo silyamo.
ROM 8:23 Dopa pipyamopape bange dupwame iki randa nao silyaminde daa. Namwa Anatunya Imambu wambo jiyamo nyiyamano dupwa opetae dopako pyuo pelyamano. Anatumi namwa wane wanakepe inginyi pyambwapala namwa angi kiiramo nyakara lao isaro karamanoko.
ROM 8:24 Yesu mende pira lao siyamano dokopa lete wai pyao nyiya. Yuu gii andake ene pyaka seramo doko wamba mende kandeyamali doko mende angi pii nara lao suu pyamwali. Mende kando kaenge pili dokona akipamo ene pira lao mali simwalisi?
ROM 8:25 Namwa kanda napalape kinyi piraŋa lao suu pyapala renge dokona maka nao waa waa lao iso karamano.
ROM 8:26 Namwa poraiya nalyamo karelyamanopape Imambu dokome kapa epo nyisingi. Namwa ateŋa dokona apa pyuo larama lao sepa nange. Dokopa Imambu baame Anatu kando namwana lao poraiyuo lakao karenge. Pii poraiyuo laokondali pyuo lamaiyakao karenge.
ROM 8:27 Anatu akali mona kandenge dokome Imambunya suu pingi dupwa soo otenge. Dokona Imambu baame wambu dupwana reke lao Anatu baa suu pilyamo kata dokona palyuo lamaiyuokondali pyuo karenge.
ROM 8:28 Yuu peparae Anatu baa mona retenge wambu dupwa pipya yulu dupwana peparae keyange inginyi pyambuo pingi doko silyamano. Nakama banya yulu pirami lao kyakale leyamo wambu dupwa pipya dopa pyuo pingi.
ROM 8:29 Anatumi wambo rombo palyiya wambu dupwa nakama banya Ikinyingi yale isa komba pyao parami lapala yapalyuo nyiya. Yapalyuo nyiyamo dokome banya Ikinyingi doko yangonge dolomana baame siki nyuo karara ingilyamo.
ROM 8:30 Dokona lao Anatumi wambu yapalyuo nyiyamo dupwa kyakale leya. Baame kyakale iki lapala kaeyande daa. Baa keta nakama rolae inginyi pyambuo nyiya. Baame keta rolae inginyi pyambuo nyiyamo doko iki daa. Banya yanga paupau lenge doko nakama keta palena lao nyiya.
ROM 8:31 Dopa pyuo silyamo dokona apa laramase? Anatumi namwa tee lapala karara ramo api mendeme namwa randa jerase?
ROM 8:32 Banya Ikinyingi yeelyo mandeyamo doko range retaro kara napala namwana lao kumala penale leya. Rangena Ikinyingi doko jiya kande. Dokome dee bange wakale dupwa peparae mee jii narase?
ROM 8:33 Api mendeme Anatunya yapo nyisi wambu dupwa nyuo kote larase? Anatu baa rangeme nakama keta koo pali nalyamo lao kando karamo.
ROM 8:34 Dokona mendeme nakama kando lara ingilyase? Yesu Koraisa baa kumapala lete lopo epo papala Anatunya kingi rolaerena karamo. Baame namwana lao Anatu lamaiyuokondali pyako karamo.
ROM 8:35 Apimi namwa Yesu Koraisana mona retenge renge dokona rekya lao nembarase? Randa epara dokome panda mona kenda pira dokome panda randa nyerama dokome panda lopo pira dokome panda pendewa para dokome panda nyisu petenge randa jelana pirami dokome panda kumungi renge dokomepe dusipame Yesunya mona retenge renge doko kapa rekya lao nembakarase?
ROM 8:36 Anatunya pii pyasi dokona lao dokopa, Embena reke lao namwa yuu peparae pyao kumakaramili dokona papyuo karamano. Namwa mena sipisipi pyao kumarami dopale ingilyamo.
ROM 8:37 Dupwana mona nemba namanale. Dupwa peparae Yesu namwa mona reteyamo doko keta nyuo anamasi minyuo kaeyama.
ROM 8:38 Mendeme baame namwa mona retenge renge doko rekya lao nemba nara doko soo gisilyu. Kumungi renge lete rengepe dolapome nyuo nembarambinde daa. Aŋalape yake panda porai wakale wakalepe dusipame nyuo nembara ingya nara. Dakepape panda rakyamepe bange mendeme nyuo namwa wakale wakale pira ingya nalyamo.
ROM 8:39 Yake ketae dulurena palengendemepe dee isa yuu donorena palengendemepe nyuo wakale wakale pii nara. Pyuo wasiyamo dokona ama mendaki mendemepe Anatunya mona retenge namwana Kamongo Yesu Koraisa keta silyamo doko mendeme rekya lao nemba nara ingilyamo.
ROM 9:1 Namba Koraisana ingilyamo dokome kyambo laa nalyo. Pii dake ama kinyi leto. Imambu Poo Pyasimi nambana monarena suu pingi dokona iso karamo. Dokona namba kinyi rolae leto doko soo gisilyu.
ROM 9:2 Namba rangena wambu ranjama mendaki dokome nakamana lao monarena randa pyuo karalu karamo. Dopako pyuo kondona renge doko andelyamo.
ROM 9:3 Dokona nakamana reke lao Anatunya randa namba keta sinya lao Koraisa yaki nyera dokome nakama nyisaro pili doko rae maipala dopa pyuo pipuli.
ROM 9:4 Nakama Isaraele wambu dupwa Anatunya yapo nyisi karaminyi. Anatumi nakama banya wambu inginyi pyambwapala banya yanga paupau lenge dokona nyuo pisiya. Baame mende piru lao lalu lao lapala nakama pipya kana minyiya. Minyapala banya Lowa doko nakama keta reto apa pyuo Anatu lakandarami lao kata dokona mana lamaiya. Lamaiyamopa nakama Anatunya lalu lao lenge doko kando nyiyami.
ROM 9:5 Anatunya akali andake lapo nakamana rakange kyawa ingyuo kareyami. Koraisa akali ingyuo nakamana rara dokona epeya. Anatu baame wambu dupwa iso karalu karenge dokome banya kingi lakando karalu karena, doko kinyi.
ROM 9:6 Anatunya lalu lao lenge pii doko isa pengendena lao laa nalyo. Dokona lao Isaraele wambu dupwa peparae Anatunya yapo nyisi wambu ingyuo karaminde daa.
ROM 9:7 Dopako pyuo Aporakamena para pyasi dupwana lapo iki Anatunya wane wanakepe ingilyamo. Dokona Anatumi Aporakame lamaiyuo, Aisakena wambu para pyaramo dupwa iki embena ingyarami.
ROM 9:8 Pii doko wane mee wambumi mandengenyili pyuo manjirami dupwa Anatunya wane wanakepe ingya nara. Ingya naramopape Anatunya lalu lao lenge pii soo nyiyaminyi dupwana wane dupwa yapo Aporakamena para pao peyami lao suu pilyu.
ROM 9:9 Anatumi pii dasipana minyuo lao kana minyiya. Yuu gii angi dokopa namba dee eparanopa Serame wane mende manjira leya.
ROM 9:10 Pii dasipa iki laa nalyo. Enda Orepekana wane lama dolapo namwana rakange kyawa Aisakeme mandeya.
ROM 9:11 Wane lama ene manjaraŋa lao dokopa Anatumi mende mupwa ingyara lao doko wambo rombo palyiya. Anatu rangeme rombo palyuo, Wane wambo dokome enakana dokona yulu pyakamira lao Orepeka lamaiya. Lamaiyamopa nakamba yulu koope panda keyange mendena wambo pipa nayambinyi dopa lao rombo palyinyi reteya. Reteyamuli pyuo Anatunya rombo palyiya doko nakambana yulu piyambi dokona daa. Banya leyamo kata dokona ingyuo peya.
ROM 9:13 Anatunya pii pyasi dokona lao dokopa, Nambame Jekope mona retapala Iso epekanda nayo lao palamo.
ROM 9:14 Dokona namwa apa larama? Anatu baa rolae daaŋa laramase? Ama daa.
ROM 9:15 Anatumi Mosese kando, Namba rangeme mendali sakao nyiso nyuo kararo laro ramo doko sakao nyiso nyuo kararo. Dee wambu lapo kondo nyisaro laro ramo doko kondo nyisaroko leya.
ROM 9:16 Doko akalimi keyange pirami dokona lao pii nara. Dee akalinya pinya lao suu pyarami dokona palyuo pyakamirande daa. Anatunya sakao nyiso karenge renge dokome range pira.
ROM 9:17 Anatunya pii pyasi dokona kiŋi Perao lamaiyuo, Renge dokona lao emba kiŋi rombo palyiyu letamo. Dopa pyuo emba keta nambana porainya renge doko lasaka pyuo nambana kingi doko yuu muu dupwana sinya lao piyu leya.
ROM 9:18 Dokona lao Anatumi mendali kando sakame kumapuli lao suu pilyamuli pyuo sakame kumuo dee mendalinya mona kana pokanyi pyambwalana suu pilyamuli pyuo mona kana pokakamingi.
ROM 9:19 Nakama mendalimi namba langyuo, Pii lapinyi doko rolae ingyapyali doko apa pyuo Anatumi akali koo paleta karamo lao kando nyipyalisi? Api mendeme Anatunya pinya suu pingi doko nyuo isa palyarase?
ROM 9:20 Emba apiyakalendeme karapala dokopa Anatu kando kamba larese? Kapo yuumi wasisi dokome, Emba akipamo namba dopa pyuo wasipi lao piso see nange kandale.
ROM 9:21 Kapo wasingi akali dokome yuu doko nyepala baa range maso pira. Baame yuu lapo nyepala koo keyangepe wasalana suu pyaramuli pyuo wasingi.
ROM 9:22 Anatumi wambu pinya dopako pyuo piya. Baame banya imbu singi lasaka pyuo banya porainya renge doko nolakalana suu pyao kareya. Wambu baame imbu singi mandeyamo dupwa keta oo randa nyerami ingiyamopape waiya lao randa mailana suu pyaa naya.
ROM 9:23 Baame yanga paupau lenge andake doko opetae namwa keta lasaka pinya suu pyapala banya sakao nyiso karenge renge paleyamo dokona doko namwa keta kulimbuo jiya. Anatumi banya yanga paupau lenge nyerami lao rapa rapa piyamo dupwa keta panalana suu piya.
ROM 9:24 Dokona lao baame namwa kyakale leyamo wambu dupwa. Juu wambu yango sukusa ikisa kando laa naya. Rara wakale dupwa opetaesa leyamo piya.
ROM 9:25 Dokona lao baame pii mende buku Osia lenge dokona lao piya. Wambu neta dupwa nambana wambuŋu laro lao rara namba wambo mona nyii nange doko nambana mona retenge rara laro leya.
ROM 9:26 Nakama Anatunya wambu daaŋa leyaminyi panda dokona, nakama Anatu lete karengena wambu larami leya.
ROM 9:27 Aisayame Isaraele wambu dupwana lao pano lao kareya. Isaraele wambu dupwa ipwa pota kee kana ingyuo paramopape mendasipa iki sukusa epena laro leya.
ROM 9:28 Doko Kamongome wambu yuu muu peparaena kote doko muu pinya palyapala waiya lao lao koo piyami dupwana bakimi pyuo pira leya.
ROM 9:29 Pii doko Aisaya leyamo kata dokonako pelyamo. Kamongo Anatu Porai dokome namwana rakange kyawa dupwa para pyao jii nayali doko namwa yuu Sotoma Gomorapana piyamo dopale ingyuo pupyali.
ROM 9:30 Dokona lao namwa apa laramase? pii laro dake. Rara menge dupwa rangeme wambo Anatupa rolae karamwali lao suu pyaa nayami. Nakama kapa ingingi lao suu piyami dokome Anatupa rolae ingyuo peya.
ROM 9:31 Dopa piyaminyipape Anatunya rombo palyisi wambu dupwa nakama lowa dokome Anatupa rolae karamwali lao piyaminyipape angi rolae koto nyelana saka nayami.
ROM 9:32 Akipamo saka nayamipi? Renge doko Anatu kapa ingingi lao suu pyaa nayami. Mee yulu dokona minyuo rolae karalana suu piyami. Nakama lukumungi kana dokona lukumuyami.
ROM 9:33 Lukumungi kana dokona lukumuyami doko Anatuya pii poo pyasi dokona lao, Kandalapape, nambame yuu Sayone wambu lukumarami lao kana reteyo. Kana dokona pyalyaminyapala pao palirami. Dopa piramopape mendali baa mona mairamo dokome baa elya nyii nara.
ROM 10:1 Yangonemoo, nambana monarena angingyuo Anatu kando namba rangena wambu dupwa sukusa nyipyali lao suu pyao ateŋa lakao karo.
ROM 10:2 Nakamana yulu doko sepala pano lao karo. Nakama kinyi Anatunya yulu dokona poraiyuo pilyaminyi. Dopa piminyipape angi poraiyuo see nao pilyaminyi.
ROM 10:3 Anatu range keta nyuo rolae pisiya kata doko see nayami. See napala nakama kata mende rangeme wapuo pinya lao suu pyao kareyami. Dopa pyuo Anatunya wambu nyuo rolae pisiyamo kata dokona papyuo kara nalyaminyi.
ROM 10:4 Koraisame Lowa doko otanyi nembeya. Dokona lao mendeme baa mona mairami dupwa Anatupa rolae inginyi pyambulyamo.
ROM 10:5 Pii dokona lao Moseseme apa pyuo Lowame namwa Anatupa nyuo rolara lao pyao reto dokopa, Lowame laramuli pyuo pipala Anatupa rolae ingyuo kararami leyapya.
ROM 10:6 Leyamopape apa pyuo namwa Anatu kapa ingingi lao suu pingi dokome namwa Anatupa nyuo rolara lao pyasi palamo. Dokona lao nakama rangeme lao dokopa, Api mendeme yake panda parape? laa nalapape. Pii renge doko api Koraisa nyepala lanyuo eparape? lao laramisa pira.
ROM 10:7 Dopako pyuo, Api isa yuu dunurena parape? laa nalapape. Pii renge doko api Koraisa nyepala pulyuo parape? lao laramisa pira.
ROM 10:8 Dokona ingyuo pii mende pyasi palamo doko. Anatu baa kapa ingingi lao suu pilyamano waili pii doko nakamana mona anda palipyamopa polo larami ingilyamo.
ROM 10:9 Nakamana kambu dokome lao, Yesu baa Kamongo doko Anatumi baa lopo nyiya lao soo nyerami ramo dokome nakama lete wai pyao nyeramisa pira.
ROM 10:10 Namwana monarena Yesu kapa ingingi lao suu piyamasa Anatupa rolo pelyamo. Namwana kambu dokome pii doko eŋa nembo leyamasa lete wai pyao nyisi karamano.
ROM 10:11 Anatunya pii pyasi dokome dopa letamo. Mendeme Anatu mona maira ramo doko elya nyii nara.
ROM 10:12 Baame nyisinya lao kee larami dupwa nyuo elyapi keta pisara. Juu wambupi rara mengepe mendarele ingyuo paa naraminyipape pii doko wambu peparae keta palamo. Anatu baa peparaena Kamongo karamo.
ROM 10:13 Buku Baepole lao dokopa, Kamongona kinginya lao nyisinya larami wambu dupwa mende neta paa nana lao lete wai pyao nyera letamo.
ROM 10:14 Nakama baa kapa ingingi lao suu pyaa namili dokome baa apa pyuo baa nyisala epena lao kyakale lamilisi? Baa see namili dokome apa pyuo baa kapa ingingi lao suu pyamilipi? Dee waili pii polo lenge akali kara namili dokome apa pyuo similisi?
ROM 10:15 Pii minyuo papingi akali mapanyi nemba namili doko apa pyuo waili pii doko polo lamaimilisi? Buku Baepole dokona dopa lao, Waili pii minyuo papingi wambu pii keyange minyuo eparaminyipa wambu raeme kumuo serami ingilyamo.
ROM 10:16 Siyaminyipape nakama peparaeme waili pii doko soo nyilyaminde daa. Akali Aisaya baa rangeme lao, Kamongo apimoo namwana waili pii soo nyiyamipi? leya.
ROM 10:17 Kapa ingingi lao suu pingi doko waili pii singi dokona epenge. Dee waili pii doko Koraisana lao lenge dokona silyamisa pingi.
ROM 10:18 Dopa pyuo pupyamopape nakama piso serowale. Juu wambu waili pii see nayami doko kinyisi? Doko ama kinyi siyami. Pii pyasi dokona lao dokopa, Pii minyuo papingi akalinya pii lasi doko yuu mure lao pao kapa pyuo nakamana pii doko yake yuupa rambungi dolapona peya letamo.
ROM 10:19 Dokona nambame lao dokopa, Isaraele wambu dupwa see nayamisi? lao piso sero ramo doko Mosese baa wambo angi lao kareyamo doko soo kaelyamano. Pii angi doko dopa leya. Nambame wambu dupwa rara angi ingyuo paa nalyamo dupwa pipya yango palyalapa lao piru. Nambame Juu wambu nakama keta rara kopyali dupwa pipya imbu singi manjo karalapale lao piru leya.
ROM 10:20 Dopa lapala pii doko Aisayame paka nao lao kareya. Wambu namba suu pyaa nayami dupwame namba koto nyiyami. Dopako pyuo wambu namba kee lao kota nayami dupwa keta namba epo paneyo leya.
ROM 10:21 Aisayame Isaraele wambu dupwa kando, Wambu kamba lao kopetame pyuo karenge dupwa yuu peparae nakama yongo maiyuo kareyo leya.
ROM 11:1 Dokona lao mende piso serowale, Anatu baa rangena wambu dupwa mata maiyase? Ama mai naya. Namba range doko Isaraeleko Aporakamena para piyamo dokonande. Benjamenena rara angi dokona ingyuo karo doko nakama silyaminyi.
ROM 11:2 Anatumi banya wambu wambo kanda soo busiyamo dokopana rombo palyiyamo dupwa mata mai nange. Ilainjame Isaraele dupwa kando lao nembo kote lalana Anatupa ateŋa leyamo doko Baepolena pii mende pyasi palamo doko silyaminyi.
ROM 11:3 Kamongo, nakamame embena poropeta dupwa pyao kumakao tembole andana kiso maingi kana pyare lasi lalyinyi nembeyami. Namba yeelyo karapunupa pyao kumakamwali lao suu pilyaminyi.
ROM 11:4 Anatumi Ilainja apa lao isingi lamaiya? Akali malu (7,000) yaki nii napala isa bange kingi Bealo lengende lakanda nayami dupwa namba range akali dupwa nambame retaro karo.
ROM 11:5 Yuu gii dakepa dopaleko ingyuo pelyamo. Anatumi banya sakao nyiso karenge dokome lao wambu lapo iki rombo palyuo nyiya.
ROM 11:6 Akali dupwa yulu keyange piyamindena rombo palyuo nyiyande daa. Banya sakao nyiso karenge dokome renge kuiyuo sukusa nyiyasa piya. Akali dupwana keyange piyamindena Anatumi rombo palyuo nyiyali doko banya sakao nyiso karenge renge doko mee male male laoŋo lamwali.
ROM 11:7 Dopa pyuo pelyamo dokona apa laramase? Isaraele wambu dupwame koteyami doko angi kando nyii nayami. Wambu mendasipa iki Anatumi rombo palyiya dusipame kando nyiyami. Menge dupwa Anatumi kee leyamo dokopa mee kumasi ingyuo peteyami.
ROM 11:8 Anatunya pii pyasi dokona lao dokopa, Anatumi nakamana suu pingi ukiaki minyuo nakamana mona doko nyuo kame kame soo karenge wambu inginyi pyambuya. Yuu gii dokona piso epo dakepa opetae nakama lenge kopa pisipyamo kale poeyo karaminyi.
ROM 11:9 Dokona lao Dapitimi dopa pyuo leya. Nakama nenge nenge yuu gii dokona kone makarami dokona mangena minyinya. Nakama randa nyuo karo isa puu pao penale.
ROM 11:10 Nakamana lenge ramburamopa kapa kanda nana. Nakama pongalya pongana pyuo karo randa andake nyuo karena.
ROM 11:11 Nambame piso silyu. Juu dupwa nakama lukumapala dokopa yuu dupwana pao palipala kwaeyamisi? Ama daa. Nakama koo piyamisa lete wai pyao nyingi renge doko menge dupwa keta paleya. Doko kandapala Juu dupwame rara menge dupwana lao yango palyarami.
ROM 11:12 Juu dupwame renge koo piyaminyi dokona lao renge keyange andake Juu daa rara wakale dupwa keta paleyamopa Juu dupwa imambunya pendewa peyamopa menge dupwa keta renge keyange andake nyiyami. Juu wambu peparae sukusa eparami dokopa renge keyange andake wakasa doko andara.
ROM 11:13 Dakepa nambame nakama rara menge dupwa kando larowale. Namba rara menge dupwana aposele akali ingyuo yulu doko mondo lao pyulu pyuo piru.
ROM 11:14 Juu wambu dupwame namba nakamba keta Anatunya Imambunya yulu keyange mana langirunu auwo kando yango palyapala dokona imilinya suu pyao piruwale.
ROM 11:15 Anatumi nakama mata maiyamo dokopa menge dupwa Anatumi baapa nyuo minyinyi pyambuya. Nakama sukusa dee eparaminyi dokopa apa pyuo paramisi? Nakama malu anda palenge dopakale karapala Anatu keta lopo eparamisa pira.
ROM 11:16 Juu wambunya rora ambasupi Anatunya ingyuo kareyami dokona para pyao nyiyami dupwa opetae banya ingyuo parami. Rakange kyawa Aporakame baa Anatunya ingyuo kareyamosa banya rara doko Anatunya ingyarasa pira. Isana pingi dupwa Anatu mairami ramo doko yoko peparae banyako ingyara.
ROM 11:17 Olipi isa angi dokona wangya lapo lakyuo peyamopa olipi aeyange lapo epo dokona kimbu soo andeya. Nakamba rara menge dupwa olipi isa aeyange dopakale ingyuo karenge. Doko epapu lete karengepe porainya rengepe Juu keta palamo dokona epo kimbu sepala karaminyi.
ROM 11:18 Dokona lao rara paka lakyuo pasi dupwana kando giyalya giyana pii narami ingilyamo. Apa pyuo nakama kingi lakandaramipi? Nakama mee isa wangya pangepe. Nakamame pingi doko porainyi pyambwa nalyaminyi. Pingi dokome nakama minyaro karamo.
ROM 11:19 Dopa piramopape nakamame isingi langyuo, Pii letene doko angi ingyapyamopape namba panda jelana wangya dupwa lakyuo isa peyami kanda lare.
ROM 11:20 Doko kinyi. Juu dupwa soo nyii nayami dokome lakyuo isa peyami. Dopa piyaminyipape nakama soo nyilyaminyi dokome neta lakyuo parami ingya nalyamo. Dokona lao rangena kingi lakandsaramano lao kando waso karalapape.
ROM 11:21 Anatu baame Juu wambu wangya angi dopale dupwa karena kaeya napala lakinyi nembeya. Baame nakama mee karalu karalamisi lao kaerase?
ROM 11:22 Anatu banya yulu lama palamo. Dokona mende anjiki pingi rengepe kata pao karengepe yulu dolapona kandelyamano. Isa pasi dupwa baame poraiyuo kaepala nembo kaenge. Dopa pilyamopape emba mona maingi dokona baame banya anjiki pingi renge doko emba keta palena lara ramo dokona lao baame emba kando anjiki pyuo karalu karara. Dee embame banya anjiki pingi renge dokona kara nare ramo doko emba opetaeko neta paresa pira.
ROM 11:23 Juu dupwa Yesu kapa ingingi lao suu pyaa nange kata dokona puu pao paa narami ramo doko wambo kareyami dokona range epena lara. Doko Anatu baame dopa pyuo pinya saka naa nange.
ROM 11:24 Nakama rara menge dupwa isa olipi aeyange dokona wangya lakyuo papala wamba karengenyili pyuo kara napala olipi angi keyange dokona rambu lapala andenge dopakale. Juu rara dupwa isa angi keyange dopakale. Dokona Anatumi isa wangya lakyuo epeyamo dokonako awa awa pyuo nyuo range kimbu sakamira.
ROM 11:25 Yangonemoo kinyinya renge yalu pyuo siyamo doko nambame nakama simili lao suu pilyu. Dokome nakama kendepuli mupwaŋa lao suu pyaa nalapa lao nyisara. Pii dopale ingyuo palamo. Isaraele wambu dupwa kamba lao karaminyipape rakyame dopako pyuo kamba lao karalu kararami ingya nalyamo. Enakana Isaraele daa rara wakale andarele sukusa epaparaminyi dokopa Isaraele wambu dupwa nakamana kamba lenge yulu dupwa yaki nyerami ingilyamo.
ROM 11:26 Dopa piramo doko Anatumi Isaraele wambu dupwa lete wai pyao nyero leyamo doko pii mende pyasi palamo doko semana. Lete Wai Pyao Nyingi Akali yuu Sayone piso epara. Baa epo Jekopena para piyamo dupwana yulu koo dupwa neta nembara letamo.
ROM 11:27 Nambame nakamana koo dupwa nyuo nembakamipala nakama pipya lao kana minyaro leya.
ROM 11:28 Yesunya waili pii doko mata mailyaminyi dokona lao Juu dupwa Anatunya yanda pimwai ingyara. Doko rara menge dupwa sukusa eparami dopale ingyuo para. Dopa piramopape Anatunya rombo palyuo nyisi dokomepe dee rakange kyawa Aporakame Aisake Jekopemoo dusipana reke lao nakama banya puu minyingi ingyuo karaminyi.
ROM 11:29 Dokona lao Anatumi banya rombo palyuo elyape keta pisiyamo dupwa pipya reke lao banya suu pingi alowa pii nange.
ROM 11:30 Nakama rara menge dupwa wambowana Anatu kamba lao kareyamipya. Kareyaminyipape Juu wambu kamba leyaminyi dokome Anatunya sakao nyiso karenge renge nakama keta palamo.
ROM 11:31 Kata mendaki dokonako palyuo Anatunya sakao nyiso karenge renge doko rara menge keta paleya. Doko nakama Juu dupwame nyimwali lao suu pyami dokome Anatupa kamba lao karaminyi.
ROM 11:32 Wambu peparae yulu koo piyami dokona Anatumi nakamana koo dokome nakama anjaro karena leya. Dopa pyuo kareyaminyipa Anatumi nakama sakapala pyuo nyera doko kandapala rae mairami.
ROM 11:33 Anatu baa yuu muu dupwa peparaena Kamongo. Banya singinya rengepe soo gisingi rengepe ama andake wakasa ingyuo silyamo. Api mendeme baa suu pyao karamo dupwa sepala polo larape? Api mendeme baa dopa pyuonde karenge lao soo nyerase?
ROM 11:34 Dokona pii pyasi mende palamo doko, Kamongona suu pingi dorena apimi silyase? Apimi baa dopa pipingili lao mana lamairase?
ROM 11:35 Api mendeme baa bange mailyamindena baame yano pyakamira ingingipi?
ROM 11:36 Anatu baame bange peparae pyuo wasiya. Wasapala bange peparae banya kingi kapena pyuo wasisi dupwa banya ingyuo silyamo. Anatu baa neta renge ingyuo karalu karenale, doko kinyi.
ROM 12:1 Yangonemoo Anatumi banya sakame kumungi doko namwana lao andakyuo peyamo dokona lao nakamame poraiyuo simili lao langilyu. Nakama range lete karo dokopa Anatu kumuo maipala karalapape. Dopa pipala dokopa Anatu keta iki pyamalyuo karo baa rae mainyi pyambuo pyuo karalapape. Dopa pyuo pirami ramo kata doko Anatu angi kinyi kumuo maiyuo lao kararamisa pira.
ROM 12:2 Mee wambu dupwame rae mairami kata dokona pasarami daa. Anatumi nakamana mona andarena alowa pyuo suu pingi doko kapu kyakana. Kapu kyakaramo dokopa Anatumi emba apa pipili lao suu pilyamo lao sere. Dokopa keyange doko anjuku lao soo nyuo Anatu apa pirusa rae maira lao dokona soo nyuo yulu anjuku yapasi lao dusipana soo kararami ingilyamo.
ROM 12:3 Anatunya mona keyange palyuo ipingi namba keta jiya doko nakama peparae langyuo leto. Emba range kamame wakasalende karo lao suu pyaa napipi. Emba mee akali ingyuo karo lao karape. Rangena suu pingi dokona inyimungu karape. Nakama range mendaki mendaki lao kapa ingingi lao suu pingi Anatumi palyakayamo dokona piso emba aki akalinde karo lao pyapi pyuo soo karape.
ROM 12:4 Namwa mendaki doko yanenge peparae kingi wakale wakale letamano. Wakale wakale dupwame yulu mendaki dokonako pii nange.
ROM 12:5 Kata mendaki dokona ingyuo namwa wambu malu ingipyamopape Koraisa keta mendakyamwa dokopa mee mendaki ingilyamo. Namwa mendaki doko yanenge dupwa kingi wakale wakale lenge. Dopale ingyuo namwa yango suksa kimbu silya sana pisi karamano.
ROM 12:6 Dokona lao Anatunya mona keyange palyuo ipingi jiyamo dokona piso yulu wakale wakale apa pyuonde pirami lao jiyamo dupwana range pimana. Anatunya waili pii lamaingi yulu pirami lao jiya ramo doko kapa ingingi lao suu pilyamano dokona palyuo range pimana.
ROM 12:7 Banya kendemande yulu pirami lao jiya ramo doko range pimana. Dee mana lenge yulu jiya ramo doko dokona pimana.
ROM 12:8 Dee yango mendali nyiso porainyi pyambwarami lao jiyande ramo doko dokonako pimana. Mendeme akali mendali bange mee mokwa soo maira ramo dokona mee rae maiyuo mainya. Akali mendaki kapa palyuo karara ramo doko baa yulu poraiyuoko pyuo karena. Mendeme wambu dupwa kando anjiki pyuo karara ramo dokome baa mumu lenge akali ingyuo kara nana.
ROM 12:9 Mona retarami ramo dokopa mee mona retele lao kara napala angi mona retalapape. Yulu koo dupwa epekanda nao karalapape. Keyange dokona pinya rungi rungi pyao pipape.
ROM 12:10 Nakama Koraisa keta yangonge ingilyamo dokona yango mendali dokona poraiyuo mona retalapape. Yango mendena kingi ketae pyambwalana wangu lakapala pyuo karalapape.
ROM 12:11 Maka suku suku naa napala yulu poraiyuo pipape. Kamongo dokona yulu pinya mona kare kare karo pipape.
ROM 12:12 Yesu epara lao silyaminyi dokona raeme kumuo karalapape. Randa nyerami dokopa mona sinya lao elya kalo karo yuu peparae ateŋa pyao karalapape.
ROM 12:13 Wambu yango lapo bange aeya nara ramo dokopa embena bange sera ramo dokona lapo nyiso mairi. Embena anda dokona kanda nange mende ramo dupwa yako yako lao nyere.
ROM 12:14 Emba randa jerami dupwa Anatumi nyisinya lao ateŋa lakamyuo karare. Doko kinyi, nakama kokwa soo pumili lao ateŋa laa napala Anatunya keyange renge nakama keta palipyali lao lakamyuo karare.
ROM 12:15 Rae mairami dupwa role pyao rae maiyuo, kondo pisirami dupwa role pyao kondoko karape.
ROM 12:16 Wambu mendaki kando keyange pipala lapo kando mendena palyuo pii napipi. Moŋokyaŋe see napala mee yulu sera dupwana nyuo pyuo karare. Emba kendepuli wakasande karo lao suu pyaa napipi.
ROM 12:17 Mendeme emba kando koo pira ramo dokopa isingi koomeko pyuo yano nyii napipi. Wambumi yulu mende keyange lao suu pyarami dokona kapa piri.
ROM 12:18 Emba range keta mondo lao pirili yulu paliramo dokona akali peparae keta mona kyuu lao sinyale lao pyuo karape.
ROM 12:19 O yangonemoo nakama kando koo piyami kande dokopa isingi pii nalapape. Nakamame pirami doko suu pyao Anatunya imbu singi nakama keta palenale. Pii poo pyasi dokona lao dokopa, Nambame isingi pyakaro, nambame bakeme pyuo isingi pyakaro lao Kamongome letamo lao pyasi palamo.
ROM 12:20 Baepole dokona dopa letamo. Embena nyisu petenge akali lopo pira ramo doko baa nenge nena lao mairi. Ipwa naa nara ramo dokopa ipwa mairi. Dopa piri ramo dokopa baa range elyame kumara.
ROM 12:21 Yulu koo dokome emba nyuo anamasi minya nanale. Embena yulu keyange dokome yulu koo nyuo isa palyuo karape.
ROM 13:1 Wambu peparae gapomanena lowa minyuo kararami ingilyamo. Gapomane yulu doko mee epa naya. Anatumi nakama karena lapala gapomane inginyi pyambungi.
ROM 13:2 Mendeme gapomane nembalana lara ramo doko Anatunya lowa pii kamba larasa pira. Dopa piraminyi wambu dupwa keta kote doko range keta nyinyi pisarasa pira.
ROM 13:3 Pundu nyuo koo pingi wambumi iki gapomane kando pakarami. Yulu keyange pingi wambu dupwame gapomane pakaraminde daa. Emba gapomane paka nalana suu pyare ramo doko keyange dupwa anjuku lao koto nyuo pyuo karare. Dopa pyuo karare ramo dokopa gapomaneme emba lakandara.
ROM 13:4 Gapomane doko Anatunya kendemande ingyuo nakama kapa serami dokona yulu pyakalyamo. Yulu koo piri ramo dokopa gapomane kinyi pakare. Dokopa baame male lao nakama randa jerande daa. Angingyuo randa jera porai doko baa keta silyamo. Baa Anatunya kendemande ingyuo dokome yulu koo pingi dupwa keta Anatunya imbu singi doko gapomane keta nakama randa mainya epenge.
ROM 13:5 Renge dokona lao nakama gapomanena pii minyarami ingilyamo. Anatunya imbu singi nyeramano lapala gapomane yulu minyaraminde daa. Nakamana monana suu pingimi opetae langyuo karamo dokona sepala minyuo kararami.
ROM 13:6 Takisi kana doko renge dokona lao maiyuo karaminyi. Gapomane baa yulu dopale dokona mondo lao pingi doko Anatu pyakamilyasa pingi.
ROM 13:7 Dokona lao takisi kana doko kapa pyalapape. Nakama rangena lao takisi pyao dee takisi kana kata wakale mendena kee lara ramo dokona pyaoko pipape. Dopa pyuo gapomane dokonape dee yulu wakale mendenape piyaminyi kandeyami kande, dolapona nakamame kingi ketae pyambuo lakando kararami ingilyamo.
ROM 13:8 Bange dupwa pakiki nyuo retakamyuo kara nalapape. Mendali mona retarami doko yano dopale ingyuo nakama keta pakiki sinya. Mendeme yango mona retaramo doko Lowa dokona minyuo kaelyo lao piyasa piya.
ROM 13:9 Pii lowana pyasi palamo dokona lao dokopa, Kepo pii nalapape. Pyao kumasa nalapape. Waa nyii nalapape. Nyipuli nyipuli suu pyaa nalapape, dopa lao palamo. Dusipape menge lapo opetaepe pyasi palamo. Dupwa peparae lowa pii mendakimi simu pyao minyaro karamo. Doko dopa letamo. Wambu yango dupwa emba range mona nyilini doko suu pyaoko mona reto karape, letamo.
ROM 13:10 Yango mona retara ramo dokome doko kando koo pinya yakara pira. Yango mona retare ramo dokome Lowa pii peparae minyaresa pira.
ROM 13:11 Embame yuu gii doko anjokorape lao silini dokome pii lamwa dokona palyuo pyuo karape. Doko lenge rao karalapape lao gii doko epo kaelyamo. Namwa wamba mona maipala Kurisene ingiyama dokopa Koraisana lete wai pyao nyera doko nanesale siya. Doko epapu repetale epo kaelyamo.
ROM 13:12 Iminjingi doko isa pao kaepyamopa yuu gii angi doko repeta epelyamo. Iminjingi yulu dokona pii namanale. Yanga paupau lenge kaku walakyape dupwame minyuo yanda pirama doko nyuo minyaro karamana.
ROM 13:13 Namwame biya napalako karele lao kyawa sisingi bolombalo laramo kara napala pamuku yulupi yulu karo petenge dupwa suu pyaope pyakandenge yulupi dee yango palyingipi yulu dupwa yaki nyelapape. Epapu yangelyamo kandanyi nembo karenge dopale ingyuo mondo lao pyuo karamana.
ROM 13:14 Kamongo Yesu Koraisana yanda pingi bange dupwa nyepala nakamana yanengena nyakamipuli lao suu pingi dokona pii sakami nalapape.
ROM 14:1 Akali mende Kurisene porai ingyuo kara naya kande doko nyuo arapunya manjo karalapape. Dopa pyuo baa kanda sikya sikyuo lao apiyanda pyo laa nalapape.
ROM 14:2 Akali mendeme poraiyuo kapa ingingi lao suu pyalu pyao pyaramo dokome nenge peparae langa nara. Naramopape Kurisene porai ingyuo kara nara dokome kyaka nenge nenge dupwa iki nara.
ROM 14:3 Akali nenge peparae nenge dokome akali nenge lapo yapo naramo doko kando giyalya giyana pyuo pii nana. Dokona lao akali kyaka nenge nara dokome mende doko kando laa nanako. Renge doko Anatu baame mata maiyuo kareyande daa.
ROM 14:4 Kendemande akali mendena doko kando dopa pingi dapa pingi lao leene doko emba angi apisi? Pii doko yulu pyakamaingi akali range dokome baa isa pelyamo laope dee kapa mondo lao pilyamo lao kandapala lara, Kamongo dokome baa mondo lao pinya laramosa angi mondo lao pira lyakande.
ROM 14:5 Akali mendena suu pingi dokome yuu gii mende doko mupwa lao suu pyao karenge. Dee mendeme yuu gii dupwa mee dopaleko lao suu pingi. Akali mendaki mendaki lao nakama rangena suu pingi dokona dopa pyuo suu pyao penge.
ROM 14:6 Akali mendaki mendeme suu pingi dokona Kamongo dokona reke lalana dokome yuu gii mendaki mupwaŋa lao suu pyao karara. Akali nenge lapo yapo naa nange doko Anatu kingi dokona lao nenge. Doko nao karo dokopa baa kando sangyu lao narasa pira. Akali nenge lapo iki yapo nenge doko Anatu kingi dokona lao nenge. Doko nao karo dokopa baa kando sangyuko lao narasa pira.
ROM 14:7 Dokona lao namwa mendeme range dokona sisu lao kara nange. Dopako pyuo mendeme range dokona sisu lao kumarama ingya nange. Lete kararama ramo doko Kamongona yulu sera.
ROM 14:8 Dee kumarama ramo doko banyako yulu sera. Lete kararama ramo panda kumarama ramo doko namwa Kamongona.
ROM 14:9 Koraisa baa kumuo palipala lopo lete epeya. Doko kumunginyape lete karengenape dolapona Kamongo ingyuo karalana lopo epeya.
ROM 14:10 Yulu dopale silyamo dokona akipamo embame yangone kando kooŋo lao karese? Dee dokonako akipamo yangone kando giyalya giyana pyuo karese? Namwa peparae Anatunya lenge kambu dokona kararamano dokopa baame kote lara ingilyamo.
ROM 14:11 Anatunya pii poo pyasi dokona letamo. Nambana pii kinyi lao karo dokona wambu peparae epo wapambu pii pyaro pisirami ingilyamo. Dee wambu peparaeme namba Anatuŋu lao panembena lao kararami ingilyamo lao Kamongo baame letamo.
ROM 14:12 Namwa range wakale wakale apa pyuo kareyama lao Anatu keta lamairama ingilyamo.
ROM 14:13 Dokona lao nakama yango sukusa mendali koo pingi pingi lao laa namanale. Embena yangone lukuma nana lao pirinyipa koona arapu dokona paa nana.
ROM 14:14 Kamongo Yesupa role pyao karamano dokona bange dupwana mende karo pisa nalyamo lao soo gisilyu. Akali mendeme bange mende koo ingilyamo lao suu pyara ramo doko suu pingi doko banya suu pingi dokona iki palira ingilyamo.
ROM 14:15 Embame narene dokome yangone randa mairi ramo doko mona retenge kata dokona reto karalu kara naresa pira. Embena nenge narene dokome akali dokona lao Koraisa kumakamiya doko isa pakami nana.
ROM 14:16 Embame mende keyange lao suu pyare ramo bange dokona wambu lapome kandapala ketae nembo laa nana.
ROM 14:17 Pii doko Anatunya isingi yulu doko nenge nao ipwa nao pirami dopale daa. Isingi yulu doko rolae pingi yulupi mona kyuu lao singipi rae maingi rengepe dusipa Imambu Poo Pyasimi jingi.
ROM 14:18 Yulu dusipana minyuo Koraisana yulu pira ramo doko Anatumi baa epekando kararamopa akali dupwame baako ketae pyambwarami.
ROM 14:19 Dokona lao mona kyuu lao sera kata dokona koto pimana. Dopa pyuo pipala akali yango dupwa porainyi pyambwamanale.
ROM 14:20 Mee nenge dokona lao Anatumi yulu keyange piyamo doko kokwa sinyi nembo nare. Nenge peparae narama ramo doko mee kapa ingyara. Dopa pyuo naramanopape yango mendali kandapala koo keta palira nengende narama ramo doko rolae daa.
ROM 14:21 Minju naope ipwa waene naope panda dee yulu wakale laponape yango mendali koo keta para ingyara ramo dusipana waso kararama ingilyamo. Dopa pirama ramo doko rolae ingyuo para.
ROM 14:22 Embena suu pinginya anjukunya mende rolae lao serene doko Anatupa iki wato larambi. Akali mendeme baapa pii pali nara lao range sepala pyuo karamo dokona rae maiyuo karara ingilyamo.
ROM 14:23 Dopa piramopape nenge naramo dokona mendakinya palyuo suu pyapala naa naramo dokona Anatumi baa kooŋo lara. Dopako pyuo mendakinya palyuo suu pyapala naa nara ramo doko Satane kata dokona ingilyamo.
ROM 15:1 Namwa Yesu poraiyuo mona maingi dupwame Kurisene porai ingya nalyaminyi dupwa mona reto nakamana kenda dupwa nyuo sakamyuo karamana. Namwa range dokona ketae pyambuo yulu pii narama.
ROM 15:2 Namwame yangonge dupwa mona seramo karena lao lakando karamana. Dopa pirama dokopa banya Yesu kapa ingingi lao soo nyiyamo doko poraiyuo andara.
ROM 15:3 Koraisa range lakando kareyande daa. Pii poo pyasi dokona lao dokopa, Pii kopyali minyinyi nembo leyaminyi dupwa namba keta soo punjiya letamo.
ROM 15:4 Anatunya pii poo pyasi dupwa mee pali nalyamo. Namwa mana langira dokona pyasi palamo. Dokome namwa Yesu keta mende pira lao suu pyaope dee namwana langa mee waiya lao pii nao isaro petengepe dee namwana porainyi pyambungipi dolapome pii poo pyasi dokona pyao reto jiya.
ROM 15:5 Anatu namwa langa mee pii nao isaro petengepe porainyi pyambungipi dolapo jiya dokome nakama nyiso nakama range sukusa Yesu Koraisa piyamuli pyuo pirami lao lasaka pira.
ROM 15:6 Dopa pira ramo dokopa nakama peparae pii mendakinya palyuo namwana Kamongo Yesu Koraisana Rakange Anatu dokona lakando kararami ingilyamo.
ROM 15:7 Yango sukusa nakama kando nyilya nana pyuo karalapape. Doko Anatunya neta renge yulu dokona Koraisame nakama kando nyiyapya dokona dopa pyuo karalapape.
ROM 15:8 Koraisana baa Juu dupwana kendemande akali ingyuo epeyamo doko Anatumi yaki nyii nao karalu karamo lao lasaka pyuo kareya. Doko Anatumi Aporakame, Aisake, Jekopemoo pipya lao kana minyiyamo doko angi ingyuo peya.
ROM 15:9 Dopako pyuo Juu daa rara wakale dupwame Antunya sakao pyuo nyingi dokona lao lakandarami dokona Yesu baa kendemande akali ingyuo epeya. Baepole pii dokona dopa letamo. Dokona lao nambame rara menge pipya karo emba lakandaro. Nambame embena kingi dokona lao kenane pyao lakando kararo.
ROM 15:10 Dokonako palyuo dee kamba letamo. Nakama rara menge dupwa Anatunya rombo palyuo nyisi wambu dupwa piya raeme kumuo karalapape.
ROM 15:11 Dokona lao, Rara menge dupwa nakama Kamongo Anatunya kingi lakando karalapape. Wambu peparae baa poraiyuo lakando karalapape.
ROM 15:12 Dokona Aisayame dopa leya. Jesena para pyaramo dokona mende epara. Baa epo rara menge dupwa iso karara. Nakamame baa keta mende pira lao soo nyerami leya.
ROM 15:13 Anatumi mende pira lao suu pingi jiya dokome nakamana kapa ingingi lao suu pingi dokona piso rae maingi rengepe mona kyuu lao singi rengepe nakama keta palyuo simbuo epena lao jera. Dopa piyamo dokona piso nakama Yesu mende pira lao suu pingi doko Imambu Poo Pyasinya porainya renge dokona piso ando karena.
ROM 15:14 Yangonemoo, nakama keta keyangena rengepe singinya renge peparaepe pali simbwapyasa yango sukusa kapa mana larami ingilyamo doko angi soo gisilyu.
ROM 15:15 Pii nakama langipu dupwana lapo poraiyuwale langipunupape namba pepa dake pyalana dokopa mona kendapunde daa. Nakama dee suu pyamili yaka suu pyapu dokona pilyu.
ROM 15:16 Anatumi rara menge dupwana lao Yesu Koraisana kendemande yulu jiyamo dokome paka napala pepa dake pyao jilyu. Nambame Anatunya waili pii keyange doko polo lamaiyuo purisi yulu dokona pyuo karapusa pilyamo. Nambame dopa pyuo pilyu dokona rara menge dupwa epo Anatu kumuo mairami ramo dokopa Anatumi nakama nyera ingilyamo. Nyeparamopa Imambu Poo Pyasi dokome nakama nyuo Anatu keta pyamalyara.
ROM 15:17 Yesu Koraisapa role pyao yulu pyuo karo. Dokona lao Anatunya yulu dokona mona pyakalyuo pyapyamo karo.
ROM 15:18 Nambame mendena kata palyuo lao kara naro. Rara menge dupwana suu pyao Koraisame namba keta yulu pyamalyiyamo Anatunya kata lasaka piyu dokona paka nao laro ingilyamo. Pii leyonopape yulu piyunupape dolapome yulu doko pyakamiyu.
ROM 15:19 Yulu wambumi pii nange yulupi wambu lengeme kando seramili yulupi dolapona banya porai renge dokome pyakare leya. Anatunya Imambunya porainya renge dokome renge palyiyamopa rara menge dupwana lao pyakamiyu. Dokona lao Jerusaleme piso lao pao Ilirikame yuu dokona pyaka sepala Koraisana waili pii keyange dokona laokondaliko pyuo lao papyuo kareyo.
ROM 15:20 Nambame Koraisana kingi see nayami yuu dupwana lao lamaipuli yaka lao suu pyao kareyo. Doko namba mendalena rapa rapa pisi dokona pela paa napuli lao suu piyu.
ROM 15:21 Anatunya pii pyasi dopa letamo. Wambu nakamame lamai nayami dupwame epo kandarami, dee see nange dupwame epo kando soo nyeramiko letamo.
ROM 15:22 Dopa pyuo kareyonopape yulu dokona yuu malu mee kata tokwapa piya.
ROM 15:23 Dopa pyuo peyamopape yuu darena yulu kapa pyuo otelyo. Namba ee kana malu meena nakama kandala ipuli lao suu pyao kareyo.
ROM 15:24 Dopa pyuo karapala, dakepa nakama keta epena suu pilyu. Namba yuu Sepene panya eparo dokopa nakamame namba nyisaraminyipa paro lao suu pilyu. Ene Sepene panya epo dokopa nakama pipya yalya kando karo pupuli lao suu pilyu.
ROM 15:25 Dopa lao suu pyapunupape gii epapu dakepa Jerusaleme Kurisene wambu dupwa nyiso pila pelyo.
ROM 15:26 Yuu Masetonia Giriki Elyambu Pingi wambu dupwame Jerusaleme Elyambu Pingi pendewa wambu dupwa mee rae maiyuo kana mainya lao mairamilyamo.
ROM 15:27 Nakama rangeme dopa pinya suu pyapala pirami ingyapya. Dopa piramiko doŋo kata doko nakamana yulu angi pendewa wambu dupwana lao pirami ingyuo pelyamo. Juu dupwame Anatunya Imambunya yulu dokona rara menge dupwa pipya mokwa soo maiyami. Dokona lao rara menge dupwame yanengena bange dupwa isingi Juu dupwa mokwa soo mairami ingilyamo.
ROM 15:28 Kana mone peparae nakama nyepala mairi lao jiyaminyi minyilyu doko Jerusaleme pao maiyakamipala Sepene panya epo dokopa nakama kandama paro.
ROM 15:29 Namba nakama keta eparono doko Koraisana Imambunya yulu angi doko namba keta palyuo simbwaramo eparo lao silyu.
ROM 15:30 Kamongo Yesu Koraisana kingi lao dee Imambu dokome mona retenge namwa joo karamo dokona lao yangonemoo nambame nakama poraiyuo piso serowale. Ateŋa leto dokonako ingyuo nakamame namba Anatumi nyisapyali lao monarename poraiyuo ateŋa pyakarama ingilyamo.
ROM 15:31 Yuu Jutia dokona Anatu mona reta nange wambu dupwame namba pyapa nana lao ateŋa pyakalapape. Dopako pyuo Jerusaleme dokona pii laro dokopa Anatunya wambu dokona palenge dupwame soo nyinya lao ateŋa pyakalapapeko.
ROM 15:32 Anatumi kapa pare larande ramo doko namba nakama keta raeme kumuo eparo. Eparonopa nakama pipya role pyao imambu soo dokopa rae maiyuo yalya andake kandarama.
ROM 15:33 Anatumi mona kyuu lao singi renge jingi doko nakama pipya karena lao leto doko kinyi.
ROM 16:1 Enda Pipi baame yuu Senekoria Elyambu Pingi dokona yulu pilyamo. Enda doko baa Kurisene enda keyange dokona langilyu.
ROM 16:2 Anatunya wambumi yulu pipingi ingilyamo dokona palyuo Kamongona kingi lao enda Pipi baa yako lao nyelapape. Randa mende epara ramo dokopa baa nyiso pipape. Enda baa rangeme wambu dupwa keta nambamoope kando yulu keyange pyakao petenge.
ROM 16:3 Pirisila Akuilapa nambamoo pipya Yesu Koraisana kendemande yulu pingi dolapo yako leto.
ROM 16:4 Nakambame namba nyiso kumarambi dokona suu pyao yulu piyambi. Namba iki sangyu laa nalyo. Juu daa rara wakale Elyambu Pingi dupwame opetae sangyu lami dokonako leto.
ROM 16:5 Nakambana anda dokona Elyambu Pingi wambu misi lala epenge dupwa opetae yako leto. Nambana puu minyingi angi Epinitasa yuu Esia dokona baa iki wambo Yesu mona maiyamo doko yako leto.
ROM 16:6 Enda Maria nakamana yulu poraiyuo pyakange doko opetae yako leto.
ROM 16:7 Endonikosa Juniasapa Juu yango karapusi anda role pyao peteyama dolapo yakoko leto. Aposele akali dupwame nakama soo otelyaminyi. Namba Kurisene ingyapa nayonopa nakamba wambo ingiyambipya.
ROM 16:8 Nambana puu minyingi Ambilatasa Kamongona yulu dokona karamo doko yako lao,
ROM 16:9 dee Epanasa namwana Kurisene yulu pingi akali dokope dee Setekisa nambana puu minyingi dokope nakama yako leto.
ROM 16:10 Apelesa Koraisana yulu pyuo kareya lao silyaminyi doko yako leto. Dee Aritopyulasana ree palu wambu nakama yako letoko.
ROM 16:11 Juu yango Erotionape dee Nasisasana ree palu dokona Kurisene yango lapo palenge dupwa opetae yako leto.
ROM 16:12 Taipina Taiposapa Kamongona yulu dokona pingi dolapo yako lao dee nambana puu minyingi Pesisa Kamongona yulu malu piya doko yako lao pilyu.
ROM 16:13 Urupasa Kamongona akali andake ingyuo karamo doko yako lao dokopa banya endangi namba banya ikinyingi angi dopale ingyuo rapu pyuo peteya doko opetae yako leto.
ROM 16:14 Asingoritasa Pilikone Emesa Patopasa Emasamoo dee Kurisene yango peparae nakama pipya role pyao karaminyi dupwa yako letoko.
ROM 16:15 Pilolokasa Julia Neriasa dee banya pemalenge dokomoo dee Olipasamoo dee Anatunya wambu lapo opetae role pyao karaminyi dupwa pipya opetae yako leto.
ROM 16:16 Kurisene dupwa nakama range sukusa yako lao kingi nyuo karalapape. Koraisana Elyambu Pingi dupwa peparaeme nakama yako letaminyiko.
ROM 16:17 Yangonemoo, pii dakeme poraiyuo piso larowale. Wambumi nakamana Anatu kapa ingingi lao suu pingi dokona kokwa soope dee rekya lao nyuope pisirami kando lao waso karalapape. Nakamana mana pii soo nyiyami dokona opetae waso minyuo karalapape.
ROM 16:18 Wambu dopa pilyaminyi dupwa namwana Kamongo Koraisana yulu pii nao nakama range iki dokona lao suu pilyaminyi. Nakamana pii elyape ingyuo lengepe girisi pii lengepe dolapome wambu nakamana yulu kando gisapa nange dokona panga soo lengenyili pyuo lao karaminyi.
ROM 16:19 Wambu peparaeme nakama Yesunya waili pii keyange minyilyaminyi lao siminyi dokona namba soo rae mailyu. Yulu koo dokona see napala keyange dokona iki soo karamili lao leto.
ROM 16:20 Anatumi mona kyuu lao singi renge jingi dokome Satane nyepala nakamana kimbu yukuna dokona kalyuo anamasi minyakara. Namwana Kamongo Yesunya mona keyange palyuo ipingi doko nakama keta palena.
ROM 16:21 Nambana yulu pilyu dokona pingi Timoti baame nakama yako letamo. Dopako pyuo Lusiasa Jesone Sosipatamoo namwana Juu yango dusipame opetae yako letaminyiko.
ROM 16:22 Namba Tetiasa lenge dokome Polena kambunya pii ipyamo doko nyepala pepa pase dake pyakamilyu. Namba dokome Kamongona kingi dokona lao nakama yako leto.
ROM 16:23 Akali Gayasa namba nenge joo rapu pyuo dee banya anda dokona wambu misi lala penge dokome opetae nakama yako letamo. Irasatasa yuu anda malu karenge dakena gapomanena kusi kusi dokopa namwana yangonge Kuatasapame opetaeko yako letambinyi.
ROM 16:24 Namwana Kamongo Yesu Koraisana mona keyange palyuo ipingi doko nakama peparae keta palena. Kinyi.
ROM 16:25 Anatu lakandamanale. Baame waili pii keyange Yesu Koraisana dokona lao nambame polo lenge dokona piso kapa ingingi lao suu piyami dokona baame nakama poraiyuo kapa karalapa lao pyuo karamo. Pii kinyi angi wambana yalu pisi siyamo paneya dokona piso nakamana kapa ingingi lao suu pingi doko isa paa nana lao poraiyuo karamili lao karamo.
ROM 16:26 Dopa pyuo karapyamopape pii kinyi angi dupwa poropeta akali dupwame pyao reto kareyami doko dakepa panasi silyamo. Anatu lete karalu karenge dokona pii leyamo dokome pii kinyi angi doko yuu muu peparaena sinya lao pilyamo. Dopa pilyamo dokona nakama peparae mona kapu kyuo laramuli pyuo pirami ingilyamo.
ROM 16:27 Anatu baa iki karenge dokome singinya renge peparae baa keta simu pyao silyamo. Baa dokona lao neta renge yulu doko Yesu Koraisa keta Anatu baa lakando palu palena, doko kinyi.
1CO 1:1 Namba Yesu Koraisana aposele akali Pole Anatumi pipili lao suu piyamuli pyuo kee lao rombo palyiyamopa dee namwana yangonge kingi Sosatenisa baapa role pyao letambano.
1CO 1:2 Anatunya Elyambu Pingi wambu yuu Korina palenge dupwa Anatumi banya wambu ingyarami lao kee lao rombo palyiya. Rombo palyiya wambu dupwa Anatu Yesu Koraisapana ingyuo nakambana arapu dokona pakao karo wambu yuu muu dupwana peparae nakamanape namwanape Kamongo Yesu Koraisana kingi lenge dupwa kando letambano.
1CO 1:3 Namwana Rakane Anatu dee Kamongo Yesu Koraisapana mona keyange palyuo ipingi rengepe mona kyuu lao singi rengepe joo karena lao yako letambano.
1CO 1:4 Anatumi nakama Yesu Koraisa keta mona keyange palyuo ipingi doko jiyamosa yuu peparae nakamana lao Anatu ange lakao karo.
1CO 1:5 Yesu Koraisapa yalya kando karenge dokome pii angipi soo gisingipi renge keyange dupwa nakama keta palamo.
1CO 1:6 Koraisa nakama keta panala epara lao iso karo banya elyape renge nakama keta paleta karaminyi.
1CO 1:7 Doko Kamongo Yesu Koraisana lao pii lenge dokome angi nakamana ingyaro karamo.
1CO 1:8 Dee yuu gii lumwa piramopa kyawa minyara dokome Kamongo Yesu Koraisana yuu gii dokopa nakama mondo lao pisirami.
1CO 1:9 Anatumi banya Ikinyingi Yesu Koraisa namwana Kamongo dokona lao yalya kando nyuo rombo palyiya doko baa rolae ingingi lao silyamano.
1CO 1:10 Yangonemoo namwana Kamongo Yesu Koraisana porainya renge dokome langyuokondali pyuo leto. Sisi nyuo laa narami dokona lao nakamame pii mendakinya palyuo kata mendakinya pao angingyuo yalya kando karalu kararami.
1CO 1:11 Yangonemoo, enda Kolowi lengena ree palu lapome nakama apiyanda pyuo letaminyi lao rolo langiyaminyi siyu.
1CO 1:12 Dokona dopa pyuo leto. Nakama range pii mendakinya laa nalyaminyi. Mendeme lao dokopa namba Polena, mendeme namba Apolosana, mendeme namba Pitana, dee mendeme namba Koraisana ingyuo karo lao pilyaminyi.
1CO 1:13 Koraisa baa mendaki daase? Pole isa mamandona kumakayase? Polena kingi lao bapitisimo nyiyamisi?
1CO 1:14 Namba akali Kirisapasa dee Gayasapa iki bapitisimo nyakamiyu dokona Anatu ange lao karo. Wakale dupwa bapitisimo nyakami nayo.
1CO 1:15 Mendeme Polena kingi lao bapitisimo nyiyama lao kapa laa narami.
1CO 1:16 (Yea, nambame Setepanasa dee banya ree palu bapitisimo nyakamiyulyamo. Dopa piyunupape nambame dee mendali bapitisimo nyakamiyu lao suu pyaa nalyo.)
1CO 1:17 Koraisame namba bapitisimo dokona nyakamiri puu laa naya. Baame namba waili pii enenge dokona lao lamaila puu leya. Dee wambunya singi renge dokona pii dupwame nyuo laa nare langiya. Namba dopa leyoli dokopa Koraisa baa isa mamandona kumuyamo dokona porainya renge palamo doko isa nembeyoli.
1CO 1:18 Koraisa isa mamando dokona kumakayamo waili pii doko wambu baa mona mai nange dupwame mee bange inginyi pyambulyaminyi. Dee namwa mona maingi wambu dupwame waili pii doko Anatunya porainya renge dokoŋo lao soo nyilyamano.
1CO 1:19 Dokona Anatunya pii poo pyasi dopa letamo. Wambu kendepuli ingyuo singi dupwana singinya renge doko kokwa sinyi nembakamyuo wambu soo gisinginya singi renge dupwa mee inginyi nembakamyuo piru, letamo.
1CO 1:20 Dopa piramo dokopa wambu kendepuli ingyuo singi dupwape dee wambu soo gisingi dupwape wambu pii mondo lao lenge dupwape apa piramisi? Wambu yuu muu dupwana peparae karenge dupwana singinya renge doko kopyali ingilyamo lao Anatumi lasaka piya.
1CO 1:21 Wambumi nakamana singinya renge dokome Anatunya lao see nange. Dopa lao Anatu banya singinya renge dokome lao piya. Namwana waili pii lao karamano wambumi kopyali lao suu pilyaminyi dakeme Anatu baa mona maingi wambu lete wai pyao nyero lao suu piya.
1CO 1:22 Juu wambu dupwame yulu Anatumi iki pilyamopa wambumi kapa pii nange dopale piramo kandalana isaro karenge. Giriki wambu dupwame singinya renge dokona selana isaro karenge.
1CO 1:23 Dopa pinya lapala namwame Koraisa isa mamandona paleyamo dokona lao polo letamano. Dopa lao letamano dokona Juu dupwame sepala mona rando imbwuange. Imbwualyaminyipa Giriki wambu dupwame pii letamano doko sepala kopyali ingilyamo lao suu pingi.
1CO 1:24 Dopa lao suu pyao karaminyipape Juu wambu dee Juu daa rara wakalepe dolapo laparae Anatu rombo palyuo kyakale leyamo dupwame waili pii doko Koraisa baaŋa lao letaminyi. Koraisa baa Anatunya porainya rengepe singinya rengepe doko.
1CO 1:25 Anatunya pii doko wambumi kopyali lao suu pilyaminyipape akalinya singinya renge dokopa Anatunya pii dokopa kapa manda manjira ingya nange. Anatunya yulu doko wambumi pyuku lasi lao suu pilyaminyipape akalinya porainya renge dokopa Anatunya yulu dokopa kapa manda manjira ingya nangeko.
1CO 1:26 Yangonemoo, Anatumi nakama kanda soo rombo palyuo kee leyamo dokopa apa piyama lao suu pyalapape. Mange dokopa wambumi nakama mendasipa iki kendepuli ingyuo karo dee mendasipako iki mupwa ingyuo karo pilyaminyi lao siyami. Dopa pyuo soo dokopa nakama mendasipa iki kamongo ingyuo karaminyi lao kandeyami.
1CO 1:27 Wambu dupwame pii doko kopyali ingilyamo letaminyi doko Anatumi minyuo kendepuli lao suu pingi wambu dupwa elyanyi pyambungi. Dee Anatumi yulu pyuku lasi lao masingi dokome minyuo akali poraingi dupwa elyanyi nembenge.
1CO 1:28 Baame mee wambumi kando nembo mupwa daaŋa lapala koo ingilyamo laope dee kwao silyamopa lao suu pingi dupwa Anatu rombo palyuo nyingi. Dopa pyuo dokopa baame mee wambumi mupwa lao suu pingi dupwa nyuo kokwa singi.
1CO 1:29 Dokona lao wambu mendeme Anatunya lenge kambu dokona namba range mupwa lao lakandara ingya nange.
1CO 1:30 Anatumi nakama nyuo Yesu Koraisa keta pyamalyiya. Dopa pyuo dokopa Anatumi Koraisa baa namwana singinya renge inginyi pyambuya. Koraisapa lapolapo lao Anatumi namwa nyuo baapa rolae inginyi pyambuya. Dopa pyuo namwa kiiramo nyepala Anatu rangena wambu inginyi pyambuya.
1CO 1:31 Dokona lao Anatunya pii poo pyasi letamuli pyuo mendeme lakandalana suu pyara ramo doko Kamongome yulu piyamo dokoko lakandapenge ingilyamo.
1CO 2:1 Yangonemoo namba Anatunya waili pii angi polo langyalana epeyo yuu gii dokopa namba pii londe singinya renge dokomepe langyalana epa nayo.
1CO 2:2 Dopa piyunupape namba Yesu Koraisa isa mamandona kumuyamo dokona angingyuo lalana bange peparae mata maiyuo kaeyo nakama keta epeyo.
1CO 2:3 Dopa pyuo kanda soo epeyono dokopa poraiyapa nao pakapala walu walu lao elya piya.
1CO 2:4 Elya piyamopape nambame waili pii leyono dokona wambunya singinya renge pii kendepuli dokome wasapala laa nayo. Dopa piyunu dokopa Anatunya Imambu porainya renge dokome minyuo namba angi leyono doko ando paneya.
1CO 2:5 Nakamana Anatu kapa ingingi lao suu pingi doko anjarae nyiyamisi? Wambunya singinya renge dokona soo nyii nao Anatunya porainya renge dokona soo nyiyami.
1CO 2:6 Nambame Anatunya pii rolae kulisa Kurisene porai dupwa lamaipunu pilyamo. Dopa pyuo lamaipunu doko isa wambunya singinya rengeme lamai nalyo. Dee akali kamongo koo rapu pyuo karaminyi dupwana singinya renge isa pelyamo doko nakama lamai nalyoko.
1CO 2:7 Anatunya pii kulisa yalu pisi doko isa wambu wambo see nayami dokonasa polo lao karo. Isa yuu dake wasapa nao dokopa Anatunya pii kulisa letamano doko namwana yanga paupau lakara lao pyuo rombo palyiya.
1CO 2:8 Akali kamongo koo dupwa yuu dake rapu pyuo karelyaminyi dupwana mendeme singinya renge serami ingya naya. Nakama Anatunya pii kulisa siyamili doko Kamongona yulu yanga paupau lenge ingilyamo doko isa mamandona pyao palya nayamili.
1CO 2:9 Anatunya pii poo pyasi dokome dopa letamo. Akalimi see naope kanda naope dee mende pira lao suu pyaa nao pingi angi dokona Anatumi wambu baa mona retenge dupwana lao rapa rapa pyakamyuo kareya.
1CO 2:10 Dopa pyuo dokopa Anatumi banya Imambu dokome banya pii kulisa yalu pisi doko namwa lasaka piya. Imambu dokome baa range peparae yalu pisi singi dupwape soo Anatunya suu pyao pingi dupwape soo kando eŋa nembenge.
1CO 2:11 Akalinya imambu dokome baa rangena lao singi. Doko suu pyao Anatunya Imambu dokome Anatu rangeko singi.
1CO 2:12 Namwa isa yuu dakena imambu koo doko kando nyii nayama. Nyii napala dokopa keyange renge Anatu namwa jiya dokona lao namwa serami lao Anatumi Imambu pena leya doko kando nyiyama.
1CO 2:13 Namwame Anatunya pii angi doko wambu Anatunya Imambu kando nyiyami dupwana lao apa pyuo mana lamaingipi? Pii rakange endangipi mana langiyami dokome lamai nao pii Anatunya Imambu mana langiya dokome lamailyamano.
1CO 2:14 Akali Anatunya Imambu monarena nyii nange doko Anatu keta Imambu keyange epelyamo dupwa baa nyii nalyamo. Baa angi soo nyii nalu nao napyamopa keyange dokona lao kwao pelyamo lao suu pilyamo. Dokona lao imambu ingyapala karamo dokome imambunya soo nyerasa pira.
1CO 2:15 Akali Imambu nyepala karamo doko koo panda rolae lao soo pakana palyaramopa mee akali mendeme baa keta koo larami ingya nalyamo.
1CO 2:16 Anatunya pii poo pyasi dopa letamo. Apimi Kamongona suu pingi dokona silyase? Dee api mendeme baa doko keyangeŋe pinya lao lamaira ingilyase? Namwa Imambunyako karamano dupwa Koraisana suu pingi dokona palyuo suu pilyamano.
1CO 3:1 Yangonemoo nambame Imambu wambu nakama keta palamo dokona ingyuo lamaingi doko suu pyao nakama langyalana saka nayo. Saka nao nambame nakama isa wambu ingyuo Anatu kapa ingingi lao suu pingi wane wanake dupwa kareyaminyi dokona dopa langiyu.
1CO 3:2 Nakama ando ota nayaminyi dokona nambame nakama nenge porai jii nao susu iki jiyu.
1CO 3:3 Nakama isa wambunya yulu yaki nyii nalyaminyi dokome dakepa opetae andapa nalyaminyioko. Nakama range imbu singi manjipala yango palyuo letaminyi dokona mee akali yulu pilyaminyi doko suu pyao nakama pii nalyamanoko lao suu pyao letamisi?
1CO 3:4 Nakamame mendeme namba Polena dee mendeme namba Apolosana letaminyi dokona mee akalimi pilyaminyi dokona karako pyuo paa namindeme letamisi?
1CO 3:5 Dokolyamo doko Apolosa baa apisi? Pole baa apisi? Nambwa mee Anatunya kendemande akali dolapo baa nakama soo nyeramiŋi lao lala pupwa langiya. Kamongome nambwa range yulu wakale pirambi lao jiya.
1CO 3:6 Dokona lao namba Poleme waingi wara piyunupa Apolosame kene piyamo dupwa ipwa kulimbuya. Dopa pyuo kulimbuyamopa Anatumi kene piyamo dupwa andanyi pyambungi.
1CO 3:7 Wara pingi akali ipwa pingipi dolapo mende daa. Anatu baa mupwa dokome minyuo andanyi pyambungi.
1CO 3:8 Wara pingi ipwa pingi akalipi dolapo mee mendarele dopaleoko. Anatumi nakama aki yulu piyami lao dokona palyuo kingi kisara.
1CO 3:9 Dokona namwa ree lao karo Anatunya yulu role pyao pyuo karamano. Dee nakama Anatunya yuu doko. Nakama Anatunya anda opetaeko ingilyamo.
1CO 3:10 Singinya renge Anatu jiya dokona kamonda anginya yulu pyuo kana porai wara piyunu dokopa akali mendeme dokona anda pilyamo. Dopa pilyamo dokona namwa rangena apa pyuo piru lao kandokondali pyuo pirama ingilyamo.
1CO 3:11 Dokona lao Anatumi Yesu Koraisa doko kana porai angi mendaki iki ingyuo wara piya. Kana porai wakale mendeme wara pipala pinya saka nange.
1CO 3:12 Lapome pinya dokopa kana golo dokome pyuo dee lapome kana kulingi pyuo dee lapome pinya dokopa kana elyape angi dokome kana porai dokona pingi. Wakale dupwame isape yangipi dee isokope dupwame pingi.
1CO 3:13 Aki yulunde piyape lao Koraisana yuu gii eparamo dokopa panembena sera. Yuu gii dokopa isare dokome akali peparaena yulu makande pyuo kando yulu renge angi yapanyi nembo lasaka pira.
1CO 3:14 Akalimi kana porai angi nyuo koŋondapala piyamo dokona isare raramo dokopa endenge sera ramo dokome keyange keta palira.
1CO 3:15 Dopa piramopape akalinya yulu rao otara ramo dokopa doko banya yulu isa parasa pira. Baa range kiiramo nyepae dokona lao isare wanjara.
1CO 3:16 Nakama doko Anatunya anda. Dokona yongo Anatunya Imambu palenge doko soo karaminyi.
1CO 3:17 Dokona lao mendeme Anatunya anda pyao kokwa sera ramo dokopa Anatumi baa kokwa sera. Anatunya anda doko yapasi. Dokona nakama range banya anda doko.
1CO 3:18 Dokona lao poraiyuo selapape. Mendeme isa bange dupwana baa range soo gisingi karo lao suu pyao karapalape dee yulu doko yaki nyuo kaeramopa kwaeyo pelyamo lao suu pyarami mange dokopa angi keyange mona palenge ingyuo parasa pira.
1CO 3:19 Isa wambunya singinya renge dupwa Anatumi angi ingya nalyamo lao suu pyao karamo. Dokona Anatunya pii poo pyasi dokome letamo. Anatumi isa wambunya singinya renge dokome nyepala range randa maiyuo mangena minyingi.
1CO 3:20 Dee Anatunya pii dokonako mende lao dokona, Kamongome wambunya singinya renge dupwa kando keta nembelyamo.
1CO 3:21 Dokona lao mendeme akalinya yulu dupwana lakandapenge ingya nalyamo. Dopa pipyamo dokona bange nakama keta palamo dupwako angi ingilyamo.
1CO 3:22 Pole Apolosa Pitape dusipa nakama sukusa wambu dupwana ingilyamo. Yuu dake nakamanako. Dakepape dee rengyape kumuope karo piramano dusipape opetae nakamana ingyaro karamo.
1CO 3:23 Dee Koraisa Anatunya ingyapyamopa nakama Koraisana ingyaro karaminyi.
1CO 4:1 Namwa Koraisana kendemande akali Anatunya pii kulisa jiyamo dupwana isa pakamiramo lapala rapu pyuo karamano lao soo karalapape.
1CO 4:2 Yulu maingi akali dokona yulu doko dopale palenge. Banya yulu dorena kandokondali pyuo iso karara ingingi.
1CO 4:3 Isa wambu dupwame namba kando larami ramo doko mona kenda naro. Namba rangena yulu kapa ingilyape panda kapa ingya nalyape lao range yapa naro.
1CO 4:4 Namba rangena suu pingi silyuŋu leto doko namba range rolaeŋe lao lapusa pii nalyamo. Kamongo baame yeelyo namba yapo lara ingilyamo.
1CO 4:5 Dokona lao nakamame mendali keta kote lao koo epenge laa napala yuu gii angi pyaka seramo dokona Kamongome epo laramo dokona isaro karalapape. Kamongome iminjingi dokona yalu pyuo seramo duwpa yanganyi nembo epapala akalinya monana yalu piru kararamo dupwa pananyi nembara. Yuu gii doo akalinya yulu peparae kandapala dokopa Anatumi nakama koo panda keyange piyamilyamo lao kando lakandara.
1CO 4:6 Yangonemoo nakamana reke lao lao otalana karo pii lenge dokona Apolosapa nambapana lao polo langilono. Doko lowa pii angi porai pirami dupwa apa letase lao dokona mana nyerami lao nambwa range dokona makande pyuo lalono. Nakama mendali kando iki lakanda lakanda pyuo karapala lapo dupwa epekanda nao kara nalapape.
1CO 4:7 Apimi emba wambu menge dupwana lao mupwa ingyuo kareyase? Anatumi bange emba aelyamo dupwa jii nayase? Banya jiyamo dokona apa pipyamosa range lakando lapisi?
1CO 4:8 Bange nakama nyimwali yaka lao suu pilyaminyi dupwa nakama keta soo kaelyamo. Nakama kamongo kaelyaminyi. Namwa kiŋi ingya namwano dokopa nakama kiŋi ingyuo karaminyi. Nambame nakama kiŋi angi ingyamili lao suu pilyu dokona namwa role pyao kiŋiyoko ingyuo kararama.
1CO 4:9 Nambame suu pyapu dokopa Anatumi namwa aposele akali dupwa kamame isale inginyi pyambuo kareya lao silyu. Namwa wambu kendepo nao koo pingi akali pyao kumarami dopale ingyuo kararamanopa aŋalape isa wambupi peparaena lenge kambu dokona kandarami lao suu pilyu.
1CO 4:10 Koraisana reke lamwa dokona namwa kopyali pakana palamo. Dopa pipyamopape nakama Koraisa keta mona angi palenge ingyuo karaminyi. Namwa pyuku lao pupyamopa nakama porai ingilyamo. Namwa epekanda napala nakama ketae pyambwarami ingilyamo.
1CO 4:11 Yuu gii peparae dae karamano dusipana lopo ipwa nano pilyamo. Namwa komau asingi wapuo pyuo karamano. Karo dokopa namwa yuu mendena nyipyara nyipyara pyuo papyuo karamano.
1CO 4:12 Namwa rangeme yuu poraiyuo pimwa dokome range nyisilyamano. Namwa kando lao koo keta palyami dokopa nakama elyape pinyi pyambwalyamano. Namwa randa jiminyi dokopa mumu laa nao mee randa nyilyamano.
1CO 4:13 Namwa kando pii koo laminyi dokopa nakama kando yongo joo anjiki pii letamano. Namwa isa wambunya nenge pinjingi kwaepyamo nembelyaminyi dopale ingyuo karo yuu gii peparae dae karamano dusipana nenge sinjimu lombo palenge dopale ingyuo pipyamo karamano.
1CO 4:14 Pepa doo pyapunu dokome nakama elyanyi nembalana pyapunde daa. Nambame dopa pyuo pyao dokopa nakama nambana wane angi dupwa mana langyalana pyapu.
1CO 4:15 Dopa pilyamo dokona nakama Koraisapa karaminyi dokopa mana lenge ama malu wakasa karaminyipape rakane mendaki ingilyamo. Doko Yesu Koraisa keta karaminyipa nambame waili pii keyange dokona langingi dokona namba doko nakamana rakange ingyuo pelyamo.
1CO 4:16 Nakama namba piyunuli pyuo pimili yaka lao leto.
1CO 4:17 Dokona lao nambame Timoti nakama keta pena lao leto. Baa nambana wane mona palenge dokome Kamongona yulu mondo lao pingi. Baame renge pii wambo leyonoli pyuo dupwanako dee langira. Doko Yesu Koraisa dokona kata enenge kando nyiyama lao misi anda peparaena ingyuo polo langyuo lao karo doko Timotimi epo langira.
1CO 4:18 Nakama lapo moŋokyaŋe soo suu pyao namba nakama kandala epa nare lao suu piyami.
1CO 4:19 Lao suu piyaminyipape Kamongome puu lara ramo dokopa repele nakama apa pilyamipi lao kandala eparo. Dokopa moŋokyaŋe singi dupwana pii iki see nao apa pilyamipi lao angi kandaro.
1CO 4:20 Anatunya isingi yulu doko mee pii doko ikinde daa. Dokona porainya renge kuiyuo palenge.
1CO 4:21 Nambame pyalana pyuo eparo panda nakama mona reto anjiki pyuo eparose? Anjuku nakama mupwa lao suu pilyamisi?
1CO 5:1 Nakamana akali mendeme kepo pyuo karamo lao sipu. Yulu pilyamo doko ama koo wakasa ingyuo Yesu see nange wambu dupwame dopale pii nalyaminyi doko pilyamo. Akali doko baa rangena endangi kumuyamo dokopa banya rakangena etenge enenge dokopa kepo pyuo karambinyi dopa pilyamo lao langimisa leto.
1CO 5:2 Nakama moname nyinyi nembo kondayamili doko kapa ingyuo pupyali. Nakamana Kurisene akali dokome yulu dopale piyamo dokona nyuo neta karapenge ingilyamo.
1CO 5:3 Namba nakama pipya kara namwanopape nambana suu pingi dokome nakama keta silyamo. Nakama pipya karapuli doko Kamongo Yesunya kingi dokona lao akali yulu ama koo piya doko baa keta kote lamana leyoli. Nanesa karapala nakamana yulu suu pyao leto.
1CO 5:4 Nakama wato lao pisiminyipa namba dae karo nakama dokona lao suu pyapunu dokopa namwana Kamongo Yesu pipya karamano dokona banya porai renge dokome akali doko Satane yuu dorena ralinyi pyambwarama. Dokopa Sataneme akali yanengeme kokwa sera ramo doko Kamongona yuu gii pyaka seramo dokopa banya imambu kiiramo neta nyera.
1CO 5:6 Dopa pira ingilyamo dokona lao nakamame kyaŋe serami dokopa kapa ingya nara. Nenge kuki isi lenge doko porambaiye palyuo borete ando silyiki lenge pii doko nakama silyaminyi.
1CO 5:7 Isi doko namwana koo dopale. Isi koo doko nembarami ramo dokopa nakama poo pyasi ingyuo kararami. Dopa pyuo kararami dokopa nakama borete isi paleta see nange dopale ingyuo kararami. Doko dakepa angi ingilyamo lao soo leto. Dakepa Koraisa namwana Pasopana sipisipi ikyane ingyuo pyao yangeyami dokona namwana nenge Pasopa nenge doko repeta epelyamo.
1CO 5:8 Borete isi wambarae silyamo nenge nenge dokona naa namanale. Isi wambarae doko koope kepo pingi dopale. Borete isi wambarae see nange nenge nenge dokona namanale. Borete doko yapasi angipi dopale.
1CO 5:9 Nakamame kepo pingi wambu dupwa role pyao kara narami lao pepa pase pyao jiyu.
1CO 5:10 Anatu mona mai nange wambu kepo pingipi nyipuli nyipuli lao suu pingipi lowana kamba lengepe mee kamongo wakale wakale dupwa lakandengepe dupwana lao lapusa pii nalyamo namba Poleme leto. Nakamame koo pingi wambu dupwa role pyao kara narama lao suu pyarami ramo doko isa yuu yaki nyuo kaeyaramisi?
1CO 5:11 Namba leto doko dokona lapunu pilyamo. Akali mendeme namba Kurisene ingyuo karo laramopape kepo pyuope nyipuli nyipuli lao suu pyaope mee kamongo wakale wakale lakandaope randa maiyuo laope biya nao kyawa sisingi bolombalo laope lowana kamba lenge akali ingyuo karara dokopa role pyao pisa narami. Nenge dupwana opetaeyoko role pyao nao yalya kanda nalapape.
1CO 5:12 Kurisene angi daa dupwa nambame apa pyuo koteme larose? Anatu banya kote dokona nakama kando lara. Dopa piramopape nakama range Elyambu Pingi wambu dupwana lapo koo pirami ramo dokopa nakamame kote pii laa naramisi? Anatu pii poo pyasi dokona lao dokopa, Akali yulu kopetame pingi doko nakamana Elyambu Pingi doko kala pena lao neta nembarami letamo.
1CO 6:1 Akali mendeme Kurisene yango dokopa kote lalana ramo doko dee akipamo mee akali mendeme lakana larase? Anatunya wambu rangeme lao rolarami ingilyamo.
1CO 6:2 Anatunya wambu dupwame yuu muu dupwana peparae iso karalu kararami lao see nalyamisi? Dokona lao nakama yuu muu dupwana peparae iso karalu kararami ramo dokona apa pyuo nakama kuki pyuo dupwa range lalana saka nalyamipi?
1CO 6:3 Nakamame aŋala dupwa iso kararama lao see nalyamipi? Dopa pyuo kararama lao pili doko yuu dakena yulu dokona lao wambo mana nyuo pyuo kando karamwali.
1CO 6:4 Yulu dopale pyaka siya kande dokopa akali Kurisene laa nange mendeme lao rolakana laramisi?
1CO 6:5 Nakama range elyame kumarami. Nakamana Elyambu Pingi dokona akali mona angi palenge mendeme mee kote kapa singi lao suu pilyu. Kurisene yango dolapo kote pii lalana ramo akali mona angi palenge dokona larambi ingilyamo.
1CO 6:6 Ingilyamoko doŋo Kurisene yango mendeme mende kote lalana dokopa mee akalimi pii doko lakana letaminyi.
1CO 6:7 Nakama Kurisene yango sukusa sisi nyuo kote letaminyi dokome Imambunya yulu isa pele letamo. Nakama keta koo pinya laoko yongo maiyuo kararami ingya nalyase? Akipamo Kurisene yango doko nakamana bange mee mainyi nembapala kaeya naramisi?
1CO 6:8 Nakama dopa pirami doko kaepala nakama Kurisene yango koo pyuo yango sukusa yangonge angi pinya bange nyimwali lao suu pyapala kote lao letaminyi.
1CO 6:9 Dopa pyuo koo pingi dupwa Anatuya isingi yuu dokona paa narami doko nakama soo karaminyi. Dopa pyuo pii nalapape. Wambu kepo pingipi mee kamongo wakale wakale lakandengepe likyakamingipi akali yango sukusa kepo pingipi dusipana mendepe nakamame Anatunya isingi yuu dokona paa narami.
1CO 6:10 Dee wambu waa nyingipi nyipuli nyipuli lao suu pingipi biya napala kyawa sisingi bolombalo lengepe randa maiyuo lengepe lowa kamba lengepe dusipa opetaeyoko Anatunya isingi yuu dokona paa narami.
1CO 6:11 Nakama lapome dopale ingyuo kareyami. Dopa piyaminyipape nakamana koo dupwa nyuo kame sakasi siya. Anatumi nakama poo pyao nyuo kaeya. Kamongo Yesu Koraisana kingi dokona lao namwana Anatunya Imambu dokome nakama Anatu keta rolae karaminyi lao kandeya.
1CO 6:12 Mendeme lao dokopa, Namba pinya lao suu piyunuli pyuo pirulyamo lara. Kinyiyoko doŋo dupwa peparae mee keyangekonde daa. Nambame dopako pyuo pirako lapuli doko dee bange koo peparaena namba kendemande akali ingya sero.
1CO 6:13 Mendeme lao dokopa, nenge doko inginya dee ingi doko nengena lara. Kinyioko doŋo. Anatumi laparae mee inginyi nembara. Akalinya yongo kepo pingi yulu kaepala Kamongona yulu dokome pira. Dokopa Kamongo Yesu baa keta dokona palira.
1CO 6:14 Anatumi banya porainya renge dokome Kamongo Yesu lopo nyiya. Dopale ingyuo namwa lopo nyerako.
1CO 6:15 Nakamana yongo doko Koraisana yongo dokona doko range silyaminyi. Nambana yongo Koraisana yongo ingilyamo doko kaepala nyuo kepo pinya lao enda pamuku doko mairusi? Doko kapa ingyuo paa nalyamo.
1CO 6:16 Akali mendeme pamuku enda nyeramo yuu gii dokopa nakamba mee mendaki ingyuo parambi lao see nalyamisi? Wambu lama dolapo yongo mendaki ingyuo kararambi lao Anatunya pii poo pyasi dokome angi langilyamo.
1CO 6:17 Akali mendeme Kamongopa role pyao karara ramo doko imambunya mendaki ingyuo kararasa pira.
1CO 6:18 Kepo pii nalapape. Akali yulu koo wakale wakale pira ramo dokome banya yongo doko mende pii nara. Pii naramopape akali doko pamuku enda likyaramo dokopa rangena yongo kokwa serasa pira.
1CO 6:19 Nakamana yongo doko Anatunya anda ingyuo karamo. Dokona Anatumi Imambu Poo Pyasi jiyamo dokona palyuo karamo lao see nalyamisi? Nakama nakama rangena daa,
1CO 6:20 Anatumi nakama kiiramo nyuo kaeya dokona nakama banya. Dokona lao nakamana yongo dupwame Anatunya kingi ketae pena lao pipwape.
1CO 7:1 Pii pyao jiyami dokona lao isingi pyao langiru. Akali enda nyii napala dokopa mondo lao pyuo karara.
1CO 7:2 Mee kararamopape wambu malu mee keta kepo pingi yulu doko silyamo dokona lao akali dupwa peparae enda rangena wakale nyepenge ingilyamo. Enda dupwa dopako pirami.
1CO 7:3 Akalimi banya dokona lao suu pyao yulu kapa piramopa endame dopako pyuo piramopa laparaeme role pyao nyuo palipala nakamba range rae mairambi ingilyamo.
1CO 7:4 Akalingi banya endana yongo dokona mupwa ingyuo iso karara. Enda baa range mupwa ingyuo iso kara nara. Doko suu pyao akali keta yulu dopaleoko palira.
1CO 7:5 Nakamba rangeme mendali daa lao mata mai nalapape leto. Lapunupape nakamba rangeme mona yaepapala yuu kuki lama Anatu role pyao ateŋa lao piso nambwa range pali nambanale larambi ramo doko kapa ingyara. Dopa pipala dokopa nakamba Satane makande piramopa porai ingya naramo dokona isa nemba nanale lapala palengenyili pyuo dee kamba palirambi.
1CO 7:6 Lowa waso laa nalyo. Mee kapa dopa pyuo pipwape leto.
1CO 7:7 Namba angi enda nyii nao karo doko suu pyao karamili lao suu pilyu. Dopa lao suu pyapunupape yulu range pilyamano dupwa Anatumi jiya. Joo akali mende yulu mendako maiyuo mende lapo wakaleko maiya.
1CO 7:8 Enda akali nyii nange dee waiyape dupwana kando leto. Mee petaminyili pyuo pisirami ramo doko namba pilyunu doko suu pyao kapa ingyara.
1CO 7:9 Kapa ingyarako doŋo, emba range poraiyuo mee karare ingyapa nara ramo doko enda nyepala karare ingilyamo. Enda mapwae waiyape dolapo dokonako palyuo suu pyalapape. Randa nao enda dupwa kanda lyanolyano pyuo papilyaminyi doko yaki nyuo kaepala angi mende rangena nyerami doko kapa.
1CO 7:10 Enda akalipi nyingi dupwa keta mawa pii mende palamo. Doko namba rangena daa. Kamongona pii letamo. Doko enda banya akalingi rekya lao pisa nana letamo.
1CO 7:11 Doko kaepala rekya lele lao pisira ramo dokopa akali wakale mende kanda nao pisira panda akalingi keta dee range role pyala epara. Dee akalingimi etenge ramanyi nemba nana letamo.
1CO 7:12 Dee lapo dupwa Kamongome daa namba rangeme larowale. Kurisene akali dokome mee enda nyiyande ramo enda dokome baa mona nyuo palira ramo doko nemba nara.
1CO 7:13 Kurisene enda dokome mee akali nyepala dopako pira lyakande.
1CO 7:14 Anatu dopa letamo. Akali Kurisene daa dokome Kurisene enda nyeramopa enda Kurisene dokona lapolapo lao nakamba rolae pisirambi. Dokonako palyuo enda Kurisene daa doko Kurisene akali nyeramopa doko dopako pyuo para. Dopa pii nayali doko nakambana wane dupwa mee wambunya wane ingyuo peyali. Doko kaepala dakepa Anatunya wane ingyuo pelyamo.
1CO 7:15 Dopa piramopape akali Kurisene angili daa dokome Kurisene enda yaki nyero lara ramo doko pii mende daa. Dokona lao enda doko mee kapa para. Dee Kurisene akalinde mee endande nyera ramo dokome rekya laro lara ramo doko pii mende daa. Akali doko kapa karara. Anatumi nakama mona kyuu lao seramo pisirambi lao rombo palyiya.
1CO 7:16 Emba Kurisene enda doko embena akalingi nyiso pisa naro lao range silini doko apa pyuo silisi? Dee Kurisene akali embame etene nyiso kara naro lao range silini doko apa pyuo silisi?
1CO 7:17 Rangeme mendaki lao Kamongome yulu jiyamo dupwana kingi lao pyuo wamba Anatu kando nyinyi dopako pyuo karare ingilyamo. Pii dake misi anda peparae lao mana leto.
1CO 7:18 Yanenge kalomasi akali Anatunya pii soo nyepala dokopa yanenge wakale palyuo umbwa pyuo nyii nara. Dopako pyuo akali kaloma nange doko Anatunya pii soo nyepala dokopa baa yanenge kaloma nara.
1CO 7:19 Kalomeyami panda kaloma nayami dokona pii mende daa. Anatunya lowa pii laramuli pyuo pirami dokona angi mende pira.
1CO 7:20 Anatumi namwa kyakale leyamo dokopa soo kareyama dakepa dopako pyuo karamanale.
1CO 7:21 Anatumi emba karapusi karene dokona kyakale leyase? Doko kapa ingilyamo. Ingyapyamopape nakamame karapusi yaki nyere larami ramo dokopa yaki nyuo pare.
1CO 7:22 Koraisana pii soo nyisi akali doko karapusi palamo doko Kamongona kiiramo nyisi karamo. Dokonako ingyuo karapusi pali nao karenge Koraisa kee leyamo dupwa Kamongona anjasi karaminyi.
1CO 7:23 Anatunya yole andake dokome nakama ropo pyao nyisi karaminyi dokona mee akali dupwana karapusi ingyuo kara nalapape.
1CO 7:24 Yangonemoo rangeme mendaki lao Anatumi kee leyamopa yalya kando kareyami dopako pyuo baapa yalya kando mee karalapape.
1CO 7:25 Dakepa akali nyii nange dokona larama. Namba Kamongona mawa pii mende minyuo laa nalyo. Laa napunupape Kamongona sakao nyiso karenge namba siyunu dokona soo nyerami ramo doko rolae ingyara.
1CO 7:26 Randa epo karamo dokona lao embena yulu alowa pii nao karalana lao soo karape.
1CO 7:27 Emba enda nyingi ramo dokome baa neta nemba napipi. Emba enda nyii nange ramo dokome enda nyipulinya suu pyao kara napipi.
1CO 7:28 Dopa pirinyipape enda nyiinde ramo doko yulu koonde daa. Dopako pyuo enda mee dokome akali nyera ramo doko yulu koo daako. Namba dopa pyuo langilyu doko enda akalipi randa nyuo piso palyuo pilyaminyi dokona leto.
1CO 7:29 Yangonemoo pii dake renge dokona leto lao langirowale. Yuu gii andarele see nara. Dokona lao akalingi nakama mee wamba kareyaminyili pyuo karalapape.
1CO 7:30 Nakama kondo letaminyi dupwa pano ee laa nalapape. Giyalana suu pilyaminyi dupwa pano gii nalapape. Nakamana bange ropo piyami dupwa pano reta nalapape.
1CO 7:31 Nakama bisinase yulu pirami dupwame wambu kandamili lao pii nalapape. Dakepa yuu muunya yulu dakepa silyamo dupwa rengya pana nara.
1CO 7:32 Nakama dupwanako mona nembo kara narami ramo doko namba rae mairu. Akali enda nyii nange doko Kamongo rae mainyi pyambuo banya yulu pyuo karenge.
1CO 7:33 Dee enda nyingi akalimi etenge rae mainya lao suu pyapala yuunya yulu pyuoko karara.
1CO 7:34 Dokona lao yulu lama dolapome ipyuo lambuo nyuo laeyo nyuo pira. Enda akali nyii nange dee mapwaepeme Anatunya yulu dokona yanenge imambupi kumuo maipala Kamongona yulu iki pyuo karenge. Dee akali nyingi enda dokome akalingi rae mainya lao suu pyapala yuunya yulu pyuoko pisira.
1CO 7:35 Namba doo leto dokome emba nyisapuli lao leto. Nambame lao dokopa randa jelana letonde daa. Dopa pii napala nambame emba anjukunya kapa rolae ingyuo pao emba range Kamongona yulu dokona mailu maiyuo maipili yaka lao leto.
1CO 7:36 Dakepa enda akalipi make pipala angi nyii namwale lao petaminyi dokona lao larama. Enda make pipala iso kararamopape baa angi nyipuli lao suu pyao karara ramo doko angi pano kapa nyepala kaena. Dokona koo mende pali nalyamo.
1CO 7:37 Dopa piramopape akali dokome maso nyii napuli lao poraiyuo suu pyapala yanenge range rapu pyuo banya rangena suu pingi dokome apa piru lao sepala enda nyii nara ramo doko kapa ingyara.
1CO 7:38 Dopa pyuo akali enda nyeramo doko kapa ingyaramopape enda nyii naramo doko keyange wakasa ingyara.
1CO 7:39 Enda akali nyingi doko akalingi kararamopa baa range suu pilyu ote lao pisa nara. Dee enakana akalingi kumara ramo dokopa mee kapa akali nyera. Dopa pyuo nyeramo doko Kurisene yangonde nyera ingilyamo.
1CO 7:40 Dee akali nyii nao waiya pisira ramo doko mona seramo pisira. Namba Pole dokome nambana suu pingi dokona palyuo leto. Doko Anatunya Imambu dokome leto lao suu pilyu.
1CO 8:1 Kingimi wasisi dupwana suu pyao mena kiso maingi dokona lao langiru. Doko kinyi kinyi, Namwa peparae singinya renge silyamano letaminyi. Dopa pyuo letaminyiko doŋo singinya renge dokome akali moŋokyaŋe sinyi nembelyamopape mona retenge renge dokome kapa palyuo karara.
1CO 8:2 Akali mendeme yulu peparae silyu lao masilyamo doko angi see naramosa pira dokona dee mana nyinya.
1CO 8:3 Dopa pilyamo dokona mendeme Anatu mona retelyamo doko Anatu baa silyamo.
1CO 8:4 Dokona lao kingimi wasisi dupwana suu pyao nenge kiso maingi dokona lao langilyu. Dokona angi renge mende pali nalyamo lao silyamano. Namwa silyamano doko Anatu mendaki karamo.
1CO 8:5 Dopa pyuo wambumi Anatu malu meepe imambu kamongo malu meepe isa ketaepena karaminyi letaminyi.
1CO 8:6 Laraminyipape namwana Anatu mendaki doko iki Rakange. Baame bange peparae wasapala namwa pyuo ingiya. Dee namwana Kamongo mendaki doko iki Yesu Koraisa. Baame bange peparae wasapala namwa pyuo ingiya.
1CO 8:7 Wambu lapome iki renge pii dake singi. Yuu gii dakepa wambu lapo dalapo kingimi wasisi dupwanako dokona lao suu pyao mena dalapo nao kingimi wasisi dupwana lao suu pilyaminyi. Nakamana monana pii soo randa kuki iki nyepala namwa kwao pelyamano lao masilyaminyi.
1CO 8:8 Nenge dokome namwa Anatu keta repeta lanyuo paa nara. Nenge naope naa naope pira, dokome mende pii nara.
1CO 8:9 Nakama sepala mee narami ingilyamo. Ingyapyamopape nakamana Kurisene lapo kapa ingingi dokona porai ingya nalyaminyi dupwa nakamana yulu enenge kandapala koo keta pasarami lao elya kalo waso karape.
1CO 8:10 Akalimi banya monana pii soo randa kuki iki nyingi doko nakama soo otenge dupwa yanyandana mena imambunya lao kuingi doko narami dokona baa kandara ramo doko kingimi wasisi dupwana suu pyao nenge kiso mai narase?
1CO 8:11 Dokome nakamana yangonge pyuku lasi dokona Koraisa kumakamiya doko nakamana singinya renge dokome kwaenyi nembara.
1CO 8:12 Nakamana yangonge kando dopa pyuo koo pyuo nakamana monana pii soo randa nyingi doko kwaerami ramo dokopa Koraisa keta koo piramisa pira.
1CO 8:13 Nenge dokona nambana yangonge koo keta palira ramo doko dee naa nao nambana yangonge isa paa napyali lao kararo.
1CO 9:1 Namba kiiramo nyisi akali daase? Namba aposele akali daase? Nambame namwana Kamongo Yesu kanda nayose? Nambame Kamongona yulu piyu dokona nakama anda nayamisi?
1CO 9:2 Lapo dupwame namba aposele lao see nayaminyipa nakama angi silyaminyi lao kandape. Nakama range Kamongona ingilyaminyi dokome namba aposele akali angingyuo pelyamo lao kandelyaminyi.
1CO 9:3 Wambu nambana lao nembo nembo pii minyuo lenge dokopa namba range lao kyawa minyilyu lao langiru.
1CO 9:4 Nambana yulu dokona ipwa nengepe nakama keta kapa nyuo naa narose?
1CO 9:5 Aposele akali dupwape Kamongo Yesunya yangongepe Pitamoope nakamana etenge Kurisene ingiyami dupwa role pyao lanyuo papiyami doko suu pyao nambwa dopako pyuo kapa pii narambase?
1CO 9:6 Namba Banapasapame iki Anatunya yulu pyuo kana yulu opetae pirambase?
1CO 9:7 Ami yanda singi akali anjukumi banya bange peparae ami mupwame maingi doko kaepala rangeme ropo piyamo siyamisi? Pama akali anjukumi baa girapo jingi wara pipala range lyuo naa nalyase? Mena sipisipi isingi akali anjukumi baa rangena sipisipinya susu naa nayamo siyamisi?
1CO 9:8 Wambunya yulu lalono kandapi dusipa iki daa. Anatunya Lowa dokome dopako letamo.
1CO 9:9 Mosesena Lowa dokona lao yulu pingi bulamakao (okese lenge), witi jingi dokona kalyuo kambalya kambana pingi dokopa jingi naa nana lao suu pyao banya kambu dokona puu pyaa nare leyamo doko silyamano. Dokona ingyuo Anatumi mena okese dupwana iki kando letase?
1CO 9:10 Panda namwa suu pyao letase? Kinyi pii doko namwana lao pyasi palamo. Akali ee wara pingipi dee jingi lyingipi dolapo nakama rangena yulu pyuo jingi lyuo naramba lao suu pilyambinyi.
1CO 9:11 Nambwame Anatunya Imambunya waingi doko nakama keta wara piyamba. Wara piyambano dokona mee isa bange dupwa nakama keta isingi lyuo jerami kapa ingya nalyase?
1CO 9:12 Wambu lapo dupwame isa bange nakama keta nyelana isamili doko nambwa kamame andake nyelana kapa isa nambwalipi? Nenge mee jerami ingiya doko jinya lao piso see nayamba. Nakama makapala Koraisana waili pii keyange see narami lao suu pyapala nambwa randa nao rangena nenge koteyamba.
1CO 9:13 Akali tembole anda yulu pyuo karenge dupwame nenge silyamo dokona lapo nyuo nenge. Dee akali lapo kana ratena mena pyao kiso maiyuo karapala lapo nakama nyuo nao karaminyi dolapo nakama silyaminyi.
1CO 9:14 Dokona ingyuo Kamongo dokome lao akali Koraisana waili pii lao karaminyi dupwa Kurisene akali yangome nyisapenge ingilyamo.
1CO 9:15 Nambame pii lao dokopa rangeme yulu pyuo nenge koto karo renge dokona rae maiyuo karo. Lopome kumuo paro doko kapa lao silyu. Nyisarami ingya nalyamo.
1CO 9:16 Koraisana waili pii keyange lao karo lapala range lakandaro ramo doko kapa ingya nara. Anatumi yulu doko jiya. Namba waili pii polo laa nayoli doko ipi piyali.
1CO 9:17 Namba rangena sisu lao piyuli doko nakama keta lapo nyelana lao suu pyapuli. Dopa pipyamopape nambame Anatumi yulu jiyamo pilyu dokona namba rangeme yulu wakale piru ingya nange.
1CO 9:18 Aki yole nyerose? Nambana yole nyero doko suu pyao waili pii keyange lamaingi. Namba waili pii keyange doko wambu dupwa keta mee lamaingi. Yole jinya lao laa nange.
1CO 9:19 Namba akali lapona kendemande kararo ingya napyamopape nambame wambu andarele sukusa nyipuli lapala namba wambu peparaena kendemande ingilyu.
1CO 9:20 Namba Juu pipya role pyao karo dokopa Juu sukusa nyero lapala Juu wambunya yulu pinginyili pyuo pingi. Namba Mosesena Lowa minyuo kara nalyonopape Juu wambu pipya mee role pyao karapala nakama lowa pii minyuo karelyaminyi dokona mendeko ingyuo karo. Akipamo namba dopa pingisi? Nakama sukusa nyipulinya suu pyao pingi.
1CO 9:21 Dee dopako pyuo Juu wambu daa rara wakale dupwa pipya karenge dokopa nakama palyuo karo pinginyili pyuo karenge. Dopa pyuo karo namba Juu wambunya Lowa dupwana neta pao karapala Juu wambu daa rara wakale dupwa sukusa nyelana pyuo karenge. Namba Anatunya lowa see napala karapenge akali ingyuo kara nalyo. Koraisana lowa rolae dupwa suu pyao karo.
1CO 9:22 Wambu Yesu kapa ingingi lao poraiyuo suu pyaa nange dupwa pipya karo dokopa dopaleyoko igyapala nakama dupwa sukusa nyeroŋo lao pyuo karenge. Wambu peparaena yulu pyuo palyuo karenge dokonako mendare ingyuo karapala nakama sukusa nyero dokona suu pyao pyuo karenge.
1CO 9:23 Waili pii keyange dokona reke lao wambu sukusa nyelana rae mailyu lao dopa pyuo pingi.
1CO 9:24 Makandenge dokopa makandalana karenge dupwame peparae makandenge. Makandelyaminyipape mendaki iki wini lao bange nyingi doko silyaminyi. Dokona emba opetae bange nyelana poraiyuo makandare.
1CO 9:25 Makandenge akali dupwame makandalana range sukunde ingyuo kiso rolo rapa rapa pyuo karenge. Dopa pyuo makandapala mee bange nyera. Dopa piramopape namwame bange kulisa sulu singi dokona nyelana pingi.
1CO 9:26 Dokona lao namba makando pao make angi dokona kando nyingi. Kakumi pyalana dokopa mee langa pyaa nange.
1CO 9:27 Namwame yanda pimana lao siki nyepala range papu pisarono lao range sukunde ingyuo kiso rolo rapa rapa pyuo karo.
1CO 10:1 Yangonemoo namwana rora ambasupi Mosese leyamuli pyuo apa pyuo piyami lao suu pyao karalapape. Anatumi nakama nyiso kopa soo nee pyuo arapunya palyuo lanyuo peyamopa Pete Kone dokona kapa yalo peyami.
1CO 10:2 Mosese leyamuli pyuo papala kopa ipwape dolapona bapitisimo nyuo peyami.
1CO 10:3 Nakama peparae Anatu nenge maiyamo neyami.
1CO 10:4 Dopako pyuo Anatunya kana nakama role pyao peyamo dokona kana dokona ipwa doko naoko peyami. Kana doko Koraisa baa range.
1CO 10:5 Dopa pyuo piyamopape Anatumi nakama andarele rae mai nayamosa nakamana yanenge kakapange yuu muiyane dokona bolombalo lao siya.
1CO 10:6 Nakama bange koo nyelana suu piyami dokona sepala namwa dopako pyuo pisaraminyi lapala dopa pira lao repe repe langilyamo.
1CO 10:7 Nakama yulu koo pyuo mee bange kingimi wasisi dupwa kingi lao mona mai narama lao repe repe langilyamo. Anatunya pii pyasi dokome lao dokopa, Wambu dupwame ipwape nengepe napala piso sipurapala mali lyiyami.
1CO 10:8 Namwa lapome kepo pingi yulu piyaminyili pyuo dokona palyuo pii narama ingilyamo. Nakama dopako pyuo pipala yuu gii mendaki dokopa wambu malu (23,000) kumuo rembe neyami.
1CO 10:9 Nakama Kamongome larape lao yulu koo doko pyuo kareyamisa kau malumi nakama neyamo kumuyami. Doko kandapala namwa dopako pyuo pii namanale.
1CO 10:10 Nakama lapo mumu leyamisa Kumunginya Aŋala dokome nakama pyao kokwa siyapya. Dee namwame dopako pyuo mumu laa namanale.
1CO 10:11 Nakama keta dopa piyalyamo lao wakale dupwa sinya lao piyami. Dokona lao pyao retapala namwa repe repe langingi. Namwa yuu gii lumwa doko repeta pyaka selena pipyamo dokona karamano.
1CO 10:12 Akali mendeme namba kapa karo lao suu pyaramo dokopa koo keta pali sera kando karena.
1CO 10:13 Makande pingi kyaka mendeme emba pii nara. Anatumi nyisiyamoko nyisingi dokome emba makande pingi wakale wakale eparamo dokopa koo keta pali nao porayapala wanji pili lao kyawa minyara.
1CO 10:14 Nambana mona retenge dupwa, mee bange kingimi wasisi dupwa mona maingi kata waso karalapape.
1CO 10:15 Nambame nakama mona palenge wambu dupwa kando langilyu. Namba leto dokona nakama range suu pyalapape.
1CO 10:16 Nenge kamyunyane nalana dokopa pee lomasi dokona suu pyao ateŋa lapala nenge kandale doko Koraisana ranjama dokona pako sukusa yalya kando pisa nalyamisi? Dee borete pongenge dokopa Koraisana yongo dokona pako sukusa yalya kando pisa nalyamisi?
1CO 10:17 Borete mendaki doko suu pyao namwa peparae nyuo pyaso mendaki ingyuo pelyamo. Dokona lao namwa peparae borete mendaki nenge.
1CO 10:18 Ipuru wambu dupwana lao suu pyalapape. Nakama kana pyare lapala Anatu kiso maingi dokopa nakama mendakinya epo pako nao pisa nangese?
1CO 10:19 Doko akinde letose? Mee bange kingimi wasisi dupwa mupwape? Panda nenge kiso mailyaminyi doko mupwaŋa lao letose?
1CO 10:20 Doko daa. Nakama Anatu kaepala imambu koo dupwa suu pyao mena kiso mailyaminyi leto. Nakama imambu koo dupwa puu minyarami doko kapa daa lao suu pilyu.
1CO 10:21 Nakamame Kamongona pee lomasi naoko dee imambu koo wasisi dupwana pee lomasinya ipwange doko role pyao naa narami. Kamongona borete narami ramo dokona imambu koo dupwa suu pyao maingi nenge doko naa narami.
1CO 10:22 Namwame Kamongo Yesu yango palyapyali lapala pilyamape? Kamongo baa kaepala namwa ama porai lao suu pilyamase?
1CO 10:23 Lapome, Yulu peparae mee namwa kapa pirama ingilyamo letaminyi. Kapa pirami doŋo yulu peparae keyangeko daa. Yulu peparae mee namwa pirama ingyapyamopape yulu dupwa peparaeme namwa nyisa nara.
1CO 10:24 Mendeme baa rangena dokona yeelyo suu pyaa napala wakale dupwana lao poraiyuo suu pyara ingilyamo.
1CO 10:25 Nakama makete yuu dokona mena minju anjarae lao piso see nao moname pyapi pyuo soo ropo pyarami ramo kapa ingyara.
1CO 10:26 Anatunya pii pyasi dokome lao dokopa, Yuu peparae dee bange dokona silyamo dupwape Kamongona letamo.
1CO 10:27 Mee akali nenge nambanale ipu lao nenge retaramopa embena moname pyapi pyuo sepala piso see nao mee nare.
1CO 10:28 Dee mendeme nenge doko semango kingi lao maiyama lara ramo doko waso kaepala naa nare. Emba rangena mona anda langiramo dokona mena minju doko waso kaere lao laa nalyo. Langiramo akali baa mana keyange nyinya lao waso karare dokona lapusa pilyamo.
1CO 10:29 Embena mona andarena suu pyarene dokona lao laa nalyo. Akali mena jeramo dokona monana apa pira lao suu pyarene dokona leto. Akali mende dopa lao piso sera. Akipamo akali mendeme nambana yulu dupwana dopale dapale lao suu pyao pisirase?
1CO 10:30 Nambame nenge nyepala Anatu sangyu laro ramo doko akipamo nengena lao sangyu leyo dokona lao namba koo pilinyi lao kando leyali?
1CO 10:31 Nakama yulu wakale wakale pyuope ipwa nenge naope dokopa Anatunya kingi dokona lakando pipwape.
1CO 10:32 Dopa pyuo karo Juu wambu dupwa Juu daa rara wakale dupwa dee Anatunya Elyambu Pingi wambu dupwa pipape randa mai nao pyuo karalapape.
1CO 10:33 Namba pilyu dopa pyuo moko minyuo pipwape. Nambame rangena yulu dupwa suu pyaa nao wambu peparae keta elya pinyi pyambuo pilyu. Dokona nakama lete wai pyao parami ingilyamo.
1CO 11:1 Namba Koraisa letamuli pyuo pingi dokona namba pilyunuli pyuo pipwape.
1CO 11:2 Yuu peparae nakama namba suu pyao mana pii langiyunuli pyuo karaminyi dokona nakamana kingi lakandelyo.
1CO 11:3 Dee Koraisame wambu peparaena mupwa karenge. Dee akalimi etenge isili lao karaminyipa Anatumi Koraisa isili laro karamo doko selapa lao langilyu.
1CO 11:4 Akali mendeme misi andana kyawana pee pingi piru karo ateŋa lao Anatunya pii lao pira ramo doko baame Koraisana kingi doko kokwa soo pirasa pira.
1CO 11:5 Dee enda mendeme misi andana kyawa rokwapala epo ateŋa lao Anatunya pii lao pira ramo dokome akalingi elyanyi pyambwarasa pira. Enda kyawa rokwa nange doko mee enda kyawasi pyakepingi dopaleoko.
1CO 11:6 Enda kyawa rarange pii nao misi pii lao karara doko yulu koo pipala kyawa yamanji akusi petenge dopale ingilyamo. Enda mende kyawasi roko kapa kapa pira ramo dokopa elyara dokona banya kyawa komau andu pira ingilyamo.
1CO 11:7 Anatu kamame mupwa wakasa dokome akali dupwa baa yale makande pyuo wasiya. Dee enda wasiyamo dokopa akali dopale makande pyuo wasiya.
1CO 11:8 Akali doko enda keta nyuo wasiyande daa. Enda baa akali dokona pingyu nyepala wasiya Anatumi.
1CO 11:9 Akali doko endako reke lao wasakami napala enda doko akalinya reke lao wasakamiya.
1CO 11:10 Aŋalana doko rapu pingi akali dokona suu pyao letamo. Aŋalana lenge kambu dokona kokwa see narama lao suu pyapala, enda dupwame kyawana komau andu pipala lao pisirami. Enda dupwa akalinginya ingyuo au pyuo pisirami.
1CO 11:11 Namwa Anatu keta yulu pyuo karamano dokopa enda akalipa rekya lao pii napenge ingilyamo.
1CO 11:12 Enda baa akali keta wasiyamo dopakale ingyuo endame akali mandenge. Dopako pyuo Anatumi bange peparae keyange wasiya kande.
1CO 11:13 Nakama range anjuku rolae lao pyasaka pyuo selapape. Enda kyawana komau pii nao misi anda piso Anatu lao ateŋa lara ramo doko kapase?
1CO 11:14 Akali mende kyawa wanyama mandeyali doko elyayali lao namwa silyamano.
1CO 11:15 Dee endame kyawa wanyama mandeyali doko wambumi kando auwayamili. Anatumi kyawasi londe doko endana kyawa doko yambe pyao karara lapala maiya.
1CO 11:16 Dopa pyuo piyamo dokona wambu lapo dokona palyuo apiyanda pyuo larami ramo doko see namanale. Doko namwape panda Anatunya Elyambu Pingi wambu dupwape kata wakale mendena Anatu lakandarami ingya nalyamo.
1CO 11:17 Nakama yulu lapo pilyaminyi dokona lao sepala nakamana kingi lakanda nalyo. Nakamana Elyambu Pingi dokona koo andarele pilyaminyi.
1CO 11:18 Pii dake wambo larowale. Nakamana Elyambu Pingi sukusa dokona sisi nyuo lao karaminyi doko langiyami. Pii lapo langilyaminyi dupwa kinyi letaminyi doko silyu.
1CO 11:19 (Nakama sisi nyuo letaminyi dokona lapo rolo letaminyi dupwa panasi kararami.)
1CO 11:20 Nakama yalya kando petaminyi dokopa Kamongona nenge Kamyunyane narama lao suu pyao epa napala
1CO 11:21 rangena nenge manjo epo kyami pyuo nao petenge. Dokopa lapome waene napala kyawa sisingi bolombalo lao karelyaminyipa lapome mee lopo karenge.
1CO 11:22 Nakama rangena anda dokona ipwa nao nenge nao pirama doko rolae suu pyaa nalyamisi? Nakamana andana nenge naa napala Anatunya Elyambu Pingi doko mee inginyi pyambuo wambu nenge keyange manjo epa nange dupwa elyanyi pyambwaramisi? Nambame nakama kando apa lapili lao suu pilyamisi? Nakamana kingi lakandaowape? Lakandaro ramo doko kapa ingya nalyamo.
1CO 11:23 Kamongona pii soo nyepala langiyunili pyuoko langilyu. Doko kukwa mendepa Kamongo Yesu mata kando leyamo yuu gii dokopa baame nenge borete nyiya.
1CO 11:24 Nyepala minyaro karo Anatu ange lapala kau leya. Kau lapala, Dake nambana yanenge poro lao nakama keta jilyu leya. Namba lao suu pyao nao pisipwape leya.
1CO 11:25 Nenge nao otapala dopako pyuo, baa pee lomasi nyuo minyaro kareya. Dake nambana ranjama dokome Anatupa lao kando nyuo pakara yulu enenge pyaka silyamo. Yuu gii nao pisirami dokopa dopa pyuoko namba lao suu pyao narami leya.
1CO 11:26 Lapala dokopa borete nao pee lomasinya ipwange nao pisirami doko Kamongo kumuyamo dokona makande minyuo napa pipwape. Dopako pyuo nao paraminyipa baa kapu kyuo epara.
1CO 11:27 Wambu mendeme boretepe Kamongona pee lomasi dokonape kamenge lao mee nao pisirami ramo doko Kamongona yongope ranjamape mee inginyi pyambwaramisa pira.
1CO 11:28 Dokona lao nakama mona kando suu pyao pisipwape. Suu pyapala enakana nenge boretepe pee lomasinya ipwape nyuo narami leya.
1CO 11:29 Mendeme Yesunya yongo doko suu pyaa nao nenge dolapo mee narami ramo doko nakama keta randa epara ingilyamo.
1CO 11:30 Dopa pyuo piyami dokona nakama lapo yanenge yame yame lao, anga pyao, kumuo pelyaminyi.
1CO 11:31 Koo mende palase lao wambo monarena pyapi pyuo sepala narama ramo doko Kamongopa namwa keta pii pali nara.
1CO 11:32 Kamongome dakepa namwa kando kote lao randa jilyamo dokome isa wambu peparae enakana kote paliramo dokopa namwa kaki rambi rambi pali nara.
1CO 11:33 Yangonemoo selapape. Nakama Kamongona nenge nala epo dokopa wambu yango ene epelyamipi lao isaro kararami.
1CO 11:34 Nakama mendeme lopo pira ramo dokopa anda nenge wambo napengele. Dopa pyuo pii nara ramo doko Anatumi baa kando kote lara. Dee pii lapo dupwana namba epapala dokopa lao rolaro.
1CO 12:1 Yangonemoo Imambu Poo Pyasimi namwa mora pisinyi pyambwara dokona pii lapo palamo. Dokona kamenge pisirami doko kapa ingya nalyamo.
1CO 12:2 Nakama Kurisene ingyapa nao kareyami dokopa semango dupwame nakama yuu peparae rapu pyuo karo kata koona ralinyi nembalana piya.
1CO 12:3 Dokonako palyuo wambu Anatunya Imambu Poo Pyasimi rapu pyuo karalu karenge mendeme, Yesu koo keta palyuo laa nao waso karenge. Dee Imambu Poo Pyasimi rapu pilyamo kara nange dokome, Yesu baa Kamongo angi laa nange.
1CO 12:4 Imambu mendaki dokomeko namwa imambunya yulu wakale wakale pirami lao mora pisinyi pyambungi.
1CO 12:5 Pyakamimwanopape Kamongo mendaki dokonako lao pimasa pilyamo.
1CO 12:6 Wambu dupwa yulu wakale wakale piminyipape Anatu mendaki dokome wambu peparae yulu dupwana pinya lao maingi.
1CO 12:7 Imambu Poo Pyasi namwa mendaki mendaki lao nyisilyamo dokome namwa wambu peparae nyiso pyuo karenge.
1CO 12:8 Imambu dokome akali mende pii soo manjo lara lao maingi. Dee Imambu dokomeko wambu lapo pii dokona singi renge maingi.
1CO 12:9 Imambu dokome wambu lapo Imambunya yulu dokona pii soo manjo larami dokona nyisingi. Dee wambu lapo nyisilyamopa nakama renge angi dupwa soo nyepala lao karenge.
1CO 12:10 Imambumiko akali mende porai renge maipala yulu isa wambumi pii nange dopale pinya lenge. Dee mende Anatunya pii polo lara lao maingi. Dee dopako pyuo mendeme yulu wakale wakale Imambumi mailyamope panda meeŋe lao dolapona lao pakana palyara lao maingi. Dee akali mendeme wambunya pii daa pii menderende see nao mee lara lao maingi. Dee akali mendeme pii doko sepala polo laraŋa lao Imambumi nyisingi.
1CO 12:11 Dopa pilyamopape Imambu baa angi mendaki dokomeko dupwa pingi. Baame yulu wakale wakale akali mendaki mendaki lao mainya suu pilyamuli pyuo maingi.
1CO 12:12 Koraisa baa yongo mendaki dopale. Dokona kingi yongope wakale wakale silyamo. Kingi yongope wakale wakale ingilyamo dupwa yongo mendaki dokonako piso ingingi.
1CO 12:13 Dopako pyuo namwa peparae Juupi dee Juu daa rara wakalepe karapusi akalipi dee kiiramo nyisi akalipi Imambu mendakimi Koraisana yongo mendaki dokonako bapitisimo nyakaya.
1CO 12:14 Yongo mendaki dokonako kingi kimbupi peparaeme mendakinya kimbu sepala wakale wakale ingya nao yongo mendaki ingyuo pelyamo.
1CO 12:15 Kimbumi lao dokopa, Namba kingi daa dokona yongo mendaki ingyuo paa naro lapala rekya lao wakale ingyarase?
1CO 12:16 Kaleme lao dokopa, Namba lenge daa dokona yongo mendaki dokona ingyuo paa naro lara ramo baa yongo mendaki dokona daase?
1CO 12:17 Dee yongo peparae lengeko ingiyali doko apa pyuo pii siyamilisi? Dee yongo doko kaleko iki siyali doko apa pyuo kyaa siyamilisi?
1CO 12:18 Dokona lao Anatumi wasiyamo dokopa dusa doko palyara lao suu piyamuli pyuo piya.
1CO 12:19 Yongo dupwa kingi iki dokoko ingiyali doko wambu lenge kambu nyii nayali.
1CO 12:20 Dokona lao yongo mendaki dokona kingi kimbupi kingi wakale wakale lao palamo.
1CO 12:21 Dopa pipyamo dokona lenge dokome kingi kando, Nambwa wakale ingyuo pelyamo lara ingya nalyamo. Ayembame kimbu kando, Nambwa wakale ingyuo pelyamo lara ingya nalyamoko.
1CO 12:22 Dopa pyuo pii napala yongona lapo angi daaŋa lao suu pyapala nembapala kaerama ingya nalyamo.
1CO 12:23 Yongona elya pingi kooŋo lao karaminyi dupwa angi ingilyamo. Dee yongona wambunya lenge kambunya elya pingi dupwa mondo lao iso karamano.
1CO 12:24 Namwana yongo dee elyape ingilyamo dupwa rapu pyuo piramande daa. Anatumi baa rangeme namwana yongo doko kimbu soo piya. Dokona lao yongo dokona mende kapa ingya nalyamo dupwa namwame kandokondali pyuo elya kalo rapu pyuo karamano.
1CO 12:25 Dopa pyuo pelyamo dokona yongo dokona lapo paka lakyuo parami ingya nalyamo. Yongona yulu dokona mendeme mende nyiso karo parami ingilyamo.
1CO 12:26 Dokona lao yongo dokona mende randa nyera ramo dokopa yongo peparae randara. Yongo dokona mende mondo laro karara ramo dokopa yongo peparae mondo lao sera.
1CO 12:27 Nakama peparae Koraisana yongo. Dokona kimbu silya sana pisi karaminyi.
1CO 12:28 Anatumi Elyambu Pingi doko dopa pyuo inginyi pyambuya. Wambo aposele akali karo, lapo pyuo Anatunya pii polo lakamaingi akali, dee repo pyuo mana lenge inginyi pyambuo piya. Dee enakana isa wambumi pii nange yulu pirami dokope anga pingi akali pyuo nyingipi akali yango nyisingipi yulu wakale wakale isaramipi dee mendeme wambunya pii daa mee menderende see nao lara laope rombo palyuo piya.
1CO 12:29 Nakama peparae aposelepe panda Anatunya pii polo lakamaingipi dee mana lenge dupwako iki kara nalyaminyi. Nakama peparae porainya renge nyepala wambumi pii nange yulu piraminde daa.
1CO 12:30 Dee peparaemeko anga pingi wambu pyuo nyii naope dee peparae wambunya pii daa mee menderende see nao lara laa naope dee peparaemeko pii laa nange dokona polo laa narami ingilyamo.
1CO 12:31 Anatumi yulu mupwa jiya dupwana poraiyuo suu pyalapape. Dokona lao dakepa kata angi anjukusi lao pii mende langirowale.
1CO 13:1 Nambame pii rara wakale wakale sepala laope dee aŋalana pii sepala lao pirunupape wambu yango mona reta naro ramo dokome nambana pii laro doko sanapenge pii andake lenge dopale yeelyo panda kana byara jaa koo lenge dopale mee kambunya ketae pii laronosa pira.
1CO 13:2 Anatunya pii pyongo pyaramo lao karo dee pii yalu pyuo suu pingi dupwa soo giso Anatu kapa ingingi lao suu pyaronopape yuu kyau mende nyuo yuu mendasa retapalape wambu yango mona reta naro ramo doko nambana pii mee ketae ingyarasa pira.
1CO 13:3 Namba ipyapala bange aeyaramo dupwa mokwa soo maiyuo otaronapape panda nambana yongo kumuo mairono kisaraminyipape mona reta naro dokome nambana yulu doko mee ingyuo para.
1CO 13:4 Wambu mona retenge dokome maka nao waa lao karo elya pyuo pingi. Mona retenge dokomeko yango palya napala range mupwa lao suu pyaa nao moŋokyaŋe see nao pingi.
1CO 13:5 Wambu mona retenge dokome mena marakai ingya nao rangena yeelyo suu pyaa nao gyaa see nao karenge.
1CO 13:6 Mona retenge dokome yulu keyange pilyamo dupwa mee inginyi nembapala koo pilyamo dupwanako suu pyao kara nange.
1CO 13:7 Wambu mona retenge dokome mee waiya lao yaki nyuo kae napala baame Anatu kapa ingingi lao suu pyaope dee Yesu eparamo doko soo manji nyuope maka nao waa lao kararamopa renge dusipame yaki nyii nara.
1CO 13:8 Mona retenge renge doko ota nara. Anatumi wambu keta pyongo pingi doko otara. Anatunya pii lenge akali dupwana pii letaminyi dupwa isa para. Dee singi renge doko mee otara.
1CO 13:9 Epapu dakepa namwa soo gisapa napala pii pyongo pyao lao soo otapa nalyamanoko.
1CO 13:10 Suu pingi angi rolae yapasi doko andaramo dokopa lapo angi ingya nalyamo dupwa isa nembara.
1CO 13:11 Nyaŋa ingyuo kareyono dokopa nyaŋana pii lengenyili pyuo ando pao suu pyaope piyu dusipa nyaŋana pingi dopaleoko. Dakepa namba anda akali ingyuo karo dokopa dee nyaŋako ingya nalyo.
1CO 13:12 Yuu gii dakepa namwa ketapa kai nyisinya kandenge dopale. Rengya angi Anatunya lenge kambu kandapala dokopa kando rolarama. Epapu dakepa namba soo gisapa nalyo. Anatu nambana mona anda soo gisingi doko suu pyao gii pyaka seramo dokopa nambame baa kando soo gisaro.
1CO 13:13 Mee dupwa otaramopa renge rema sulu sera. Dusipa Anatu kapa ingingi lao suu pingi dokope Yesu epara lao soo manjo karenge renge dokope dee wambu Anatupa lao mona retenge renge dokope. Renge rema dusipa sulu sera doŋo dee namwa Anatupa mona retenge doko mupwa wakasa ingyuo silyamo.
1CO 14:1 Mona retenge kata dokona karamwali lao poraiyuo suu pyao karalapape. Imambumi yulu wakale wakale jingi dupwa nyelana lao poraiyuo suu pyao karalapape. Anatunya pii lakarami lao nyisara dokona wambako suu pyalapape.
1CO 14:2 Mendeme wambunya pii daa mee menderende see nao laramo doko wambu yango lamainginde daa. Doko Anatu iki lamaingi. Baame Imambunya porainya renge dokome pii angi yalu pyuo lamailyamo.
1CO 14:3 Anatunya pii polo lakamaingi akali doko baa wambu porainyi pyambuo mona minyarambu lao nyiso karenge.
1CO 14:4 Akali pii rara wakale laramo doko baa range iki nyisingi. Dee mendeme Anatunya pii lao karenge dokome Elyambu Pingi peparae nyisingi.
1CO 14:5 Nakama peparaeme wambunya pii daa mee menderende see nao lamili yaka lao suu pyapunupape nakama Anatunya pii polo lakamairami ramo doko angi mupwa ingyara lyakande. Akali wambunya pii daa mee menderende see nao lenge dokopa wakale mendeme renge polo laa nara ramo doko Elyambu Pingi wambu soo porai ingya narami. Dokona Anatunya pii polo lakamaingi yulu dokome wambunya pii daa mee menderende see nao lenge doko nyuo isa palyilyamo.
1CO 14:6 Yangonemoo namba epo wambunya pii daa mee menderende see nao langiru ramo dokome nakama nyisarase? Nambame Anatunya pii mende polo langya napala singinya renge lapope panda misi pii polo pii mana lamaingi dokope langya naro ramo doko nambana pii dokome nakama nyisa nara ingilyamo.
1CO 14:7 Kurulu rambyalope rombo pali nao mee laramo dokopa kenane renge doko angi ingyuo see nange kandale.
1CO 14:8 Akali yanda pyala panya kyakale eŋa nembo laa nara ramo doko apa pyuo sepala rapa rapa pyuo yanda pyala paramisi?
1CO 14:9 Dopako pyuo wambunya pii daa mee menderende see nao larene dokopa pii dokona renge apa pyuo seramisi? Embena pii doko mee ketae lao nembare.
1CO 14:10 Yuu muu peparaena pii rara wakale wakale letaminyi. Dokona mende mee kekenge pii laa nalyaminyi.
1CO 14:11 Akali mendena pii laramo namba see naro ramo dokopa nambapa baapa rara wakale ingyuo para.
1CO 14:12 Imambumi yulu wakale wakale mora pisinyi pyambungi dusipa soo nyimwali yaka lao suu pyao karaminyi dupwa nakama yulu wakale wakale Elyambu Pingi nyisara dusipanako angi ingyuo pipwape.
1CO 14:13 Akalimi wambunya pii daa mee menderende see nao laramo dokopa baa Anatumi pii renge doko polo langinya lao ateŋa lenale.
1CO 14:14 Namba dokona palyuo pii angi mende laa nao ateŋa laro ramo doko nambana imambu dokome angingyuo ateŋa laramopape nambana suu pingi dokona ende see nara.
1CO 14:15 Dokona lao apa pirusi? Nambana imambupi suu pingipi dolapo laparaeme ateŋa laope kenane pyaope pyuo kararo.
1CO 14:16 Imambumi iki Anatu angi lakandarami ramo doko wambu petaminyi dupwa see nao pisaraminyi dokome apa pyuo embena ateŋa lare dokona kinyi laramase?
1CO 14:17 Anatu ange lao lakando keyange ingyuo ateŋa larene doko keyange ingyaramopape akali mende doko kapa nyisa nalu nao nara.
1CO 14:18 Imambumi pyongo pyapyamopa namba wambunya pii daa pii rara wakale lao nambame nakama nyuo enako lenge dokona Anatu ange lao karo.
1CO 14:19 Namba wambunya pii daa mendereke pii malu mee lao kararonopa wambu see narami dokome pii doko kapa ingya nara. Dokona lao pii kingi paki kapa seramili dupwa lamairu ramo doko kapa ingyara.
1CO 14:20 Yangonemoo wane nyaŋana suu pingi dopale ingyuo suu pyao kara nalapape. Kara napala wane nyaŋa koo pii nao kamenge karenge dopale karalapape. Dopa pyuo karapala nakamana suu pingi dokona mona angi palenge ingyuo karalapape.
1CO 14:21 Baepole dokona pii dake pyasi palamo. Kamongome lao, Nanesa wambu pii wakale lenge lapo pena laronopa nambana wambu dupwa nambana pii lamairami. Lamairaminyipape nambana wambu dupwa see narami letamo.
1CO 14:22 Dokona ingyuo wambunya pii daa mee menderende see nao laraminyi sepala neta wambu lapo sukusa epana suu pyao kararaminyipape pii dopale dokome Kurisene wambu dupwa nyisa narako. Lapome Anatunya pii angi lao kararami dokome Kurisene wambu dupwa nyiso parasa pira.
1CO 14:23 Elyambu Pingi wambu peparae misi pii lao piso nakama peparae pii angi daa mee menderende see nao larami ramo dokopa Yesu mona mai nange lapo dupwa epapala nakama kopyali minyilyaminyi laa naramisi?
1CO 14:24 Dopa piraminyipape nakama peparae Anatunya pii angi larami dokopa mee wambu lapo eparami ramo dupwame pii soo manji nyepala rangena koo dupwana lao pii doko angilyamo lao soo nyerami. Soo nyerami dokome nakamana mona pyara.
1CO 14:25 Nakama mona andarena yalu pisi singi dupwa polasi seramopa mona kando piso Anatu lakando lao, Kinyi kinyi Anatu nakama pipya role pyao karamo larami.
1CO 14:26 Yangonemoo apa lao letose? Nakama misi sela epenge dokopa akali mendeme kenane pyao mendeme pii polo lao mendali keta Anatunya pii epo pano pyongo pyaramo lao pirami. Dee mendeme wambunya pii daa mee menderende see nao laramopa mendalimi pii doko polo lara. Dusipame Elyambu Pingi nyisa nara ramo doko kaemanale.
1CO 14:27 Wambunya pii daa mee menderende see nao lalana lao suu pyarami ramo mendeme wambo laparamopa dee akali mendaki panda lama iki opetae konda pyuo lenale. Akali mendeme larami doko polo lara.
1CO 14:28 Mendeme pii kapu kyera ingya nara ramo dokopa misi anda dokona kambu pyarambwapala baa range suu pyao Anatupa lamaira.
1CO 14:29 Lama panda remape mendeme Anatunya pii pyongo pyao nyepala laraminyipa lapo dupwame apa pyuo letaminyi lao makande pyuo kandena.
1CO 14:30 Dopa pyuo laraminyipape mendeme misi andana mee pisiramo dokopa pii Anatu keta mende epara ramo doko pii lao karenge doko kaeyapenge ingilyamo.
1CO 14:31 Nakama bome pyuo lalana suu pilyaminyi doko kaepala mendaki mendaki lao Anatunya pii sipurao larami ramo doko nakama peparae mona seramopa mana keyange nyerami.
1CO 14:32 Anatunya pii polo lenge akali doko baa range langa laa nao kando lena.
1CO 14:33 Anatumi namwa pii lao ukiaki minyuo pisirami lao rombo palyiyande daa. Mona kyuu lao seramo elya kalo soo pisirami lao langiya.
1CO 14:34 Juu wambunya Lowa palengenyili pyuo misi anda peparaena enda dupwa pii laa nao inyimungu petena letamo.
1CO 14:35 Nakama piso singi pii mende palira ramo doko anda epapala dokopa akalinyi piso sepengele. Enda mendeme roya karapala lao karara doko kapa ingya nalyamo.
1CO 14:36 Anatu pii renge palenge doko kaepala nakama keta palyuo epengese? Panda nakama iki renge palyuo siyamisi?
1CO 14:37 Mendeme namba Anatunya pii lenge akali karo lao suu pyaope Imambumi angingyuo nyisilyamo lao suu pyaope pira ramo doko pii dee pilyu dake Kamongona lowa pii dokoŋo sinyale.
1CO 14:38 Pii dake kaepala wangu lako see nara ramo doko banya pii sakami nalapape.
1CO 14:39 Yangonemoo dokona lao Anatunya pii lamaingi yulu doko mupwa ingyuo wambako pirami. Piraminyipape wambunya pii daa mee menderende see nao larami ramo doko mee lenako.
1CO 14:40 Anatunya yulu langa pirami ramo doko kapa ingya nara. Dokona lao rolae kandokondali pyuo pirami.
1CO 15:1 Yangonemoo waili pii keyange nakama langiyunu doko soo nyiyami. Soo nyepala Anatu kapa ingingi lao suu piyami dokome porainyi pyambuyamo kareyami. Doko kame see nalapape.
1CO 15:2 Pii langiyu doko waili pii keyange doko mee langa soo nyii nayami. Dokona lao nakama yaki nyii napala suu pyale pyale parami doko nakama lete wai pyao paramisa pira.
1CO 15:3 Namba renge pii mupwa soo nyiyu doko nakama langiyu. Doko Koraisa namwana koo dokona lao kumakaya pii dokona lao Baepolena pyasi palamo.
1CO 15:4 Baa malu piyaminyipa yuu repo epo papeyamopa lopo epeya dokona lao Baepole pyasi palamo.
1CO 15:5 Epo Pita keta panapala dee dolo aposele akali akalisa ipisu lama peparae nakama keta epo maro leya.
1CO 15:6 Dopa pyuo baa banya wambu malu (500) iki daa lapo opetae keta epo maro leyamopa kandeyami. Wambu kandeyami dupwana lapo lete karaminyi. Dee lapo kumuo piyami.
1CO 15:7 Dopa pyuo Yesu Jemesa keta pano aposele dupwa peparae keta dopako pyuo piya.
1CO 15:8 Namba imwakainya manjisi dopale ingiyamopape Yesu namba keta enakana maro leya.
1CO 15:9 Namba aposele dolomana enakana ingyuo karo. Anatunya Elyambu Pingi doko randa maiyuo dokome namba aposele angiŋi larami ingya nalyamo.
1CO 15:10 Dopa pipyamopape Anatumi mona keyange palyuo ipingi renge dokome namba dakepa aposele angingyuo karo. Baa anjiki pyuo yulu andake pyuo nyisiyamo doko mee isa paa naya. Isa paa nayamopa namba yulu andake pyuo aposele doloma nyuo enakayo. Dopa pyuo piyu doko namba rangeme pii nayo. Anatumi anjiki pipala nyisiyamo dokopa kapa piyu.
1CO 15:11 Dokona lao nambame waili pii keyange langiyu panda doloma leyaminyipa siyami dokona pii mende daa. Namwa peparaeme langingi pii doko kinyi lao suu pyao karaminyi.
1CO 15:12 Koraisa lopo epeya dokona lamwanopape apa pyuo nakama lapome kumungi doko lopo epa nange letamisi?
1CO 15:13 Kinyi lamili doko Koraisa mee kumuo paleya ingilyamo.
1CO 15:14 Koraisa lopo epa nayali doko namwa pii letamano doko mee ingyuo pupyamopa nakama Anatu kapa ingingi lao suu pilyaminyi doko kapa ingya napyali.
1CO 15:15 Dopako pyuo wambu kumasi dupwa lopo epa narami pili doko Anatumi Koraisa lopo nyii nayali dokona namwa kyambo lenge dopale ingyuo pupyali.
1CO 15:16 Kumungi dupwa lopo paa nange pili doko Koraisa opetae lopo epa nayali.
1CO 15:17 Koraisa lopo epa nayali doko nakama Yesu kapa ingingi lao suu pingi doko mee ingyuo pupyamopa nakama koona arapu dokona mee karalu karamili.
1CO 15:18 Koraisa lopo epa nayali doko wambu Yesu kapa ingingi lao suu pyao kumuyamo dupwa peparae mee kumuo pasi karamili.
1CO 15:19 Namwa mee isa yuu dakena Yesu kapa ingingi lao suu pyao karo kumuo mee rumbyuo parama ingyapyali doko namwa lao kareyami kande doko kondo pyuo lao kareyamilyamoŋo lamili.
1CO 15:20 Dopa pipyamopape Anatumi Koraisa kinyi lopo nyakaya dokona kumasi palaminyi dupwa opetae lopo nyerako doko ama kinyi kinyi silyamano.
1CO 15:21 Akali mendaki keta kumungi renge isa epeyamopa dee akali mende keta lete sipuro epenge renge epeya.
1CO 15:22 Isa wambu peparae Atame keta kumuo pelyaminyi. Dee Koraisa keta wambu peparae lete kararami.
1CO 15:23 Namwa mendaki mendaki lao range wakale wakale yuu gii pyaka seramo dokopa lopo eparama. Lopo penge kata doko Koraisame wambo wapwakaya. Dee lapo pyuo doko Koraisa baa eparamo dokopa namwa banya dupwa lopo parama.
1CO 15:24 Yuu lumwa piramo dokopa baame kamongo dupwape mupwa dupwape porai dupwape kui lanyi palyapala peparae Rakange Anatunya kingi rakana palyara.
1CO 15:25 Baa mupwa ingyuo pyuo karapala nyisu petenge wambu peparae baame nyuo anamasi minyuo kalyuo isa palyara. Enakana baame kumungi renge doko otena lara.
1CO 15:26 Baepole dokona, Anatumi bange peparae Koraisana kimbu yukuna dokona nyuo kalyunya lao maiya letamo. Dopa pyuo piyamo dokome Anatu baame baa range isarena kalyinya palya nara doko panelyamo.
1CO 15:28 Anatumi Yesu nyisaramo dokopa bange peparae nyuo kalyuo rapu pyuo karara. Koraisa Anatunya punji punji ingyuo kararamopa Anatu kamame ulupisale ingyuo karara.
1CO 15:29 Wambu kumuyami dupwana lao suu pyao lapome bapitisimo nyakamimwali yaka letaminyi dupwa apa pyuo nyisaramisi? Dee akali kumuyami dokona mende kinyi lopo epa nara ramo dokolyamo doŋo akipamo nakama bapitisimo nyuo kumuyami dupwa nyisalana lao suu pilyamisi?
1CO 15:30 Dee namwa opetae akipamo yuu peparae randa nyuo kararamase?
1CO 15:31 Yangonemoo yuu gii peparae namba kumaro ingyapyamo pyuo karo. Namba nakamape namwana Kamongo Yesu Koraisa lete karenge dokona pyamalyasi karamano dokona nambame rae maipala dopa pyuo langilyu.
1CO 15:32 Namba range semongwanyi nembo Epesasa dakena mena rae lenge pyala peyoli dokona aki keyangende nyiyulisi? Wambu kumuyami dupwa lete epa nange pili doko, rakya kumarama dokona nenge nao ipwa nao pimana lao pii lenge dokona palyuo lao karamwali.
1CO 15:33 Kopetame suu pyaa nalapape. Embena puu minyingi koo dupwame emba nyuo isa nembarami ingilyamo.
1CO 15:34 Yulu kopetame pilyaminyi doko yaki nyuo rolo suu pyalapape. Nakama lapo Anatu see nao karaminyi dokona nambame elyanyi pyambuo leto.
1CO 15:35 Akali mendeme lao, Apa pyuo kumasi wambu dupwa lopo eparami? Nakama yanenge apiyakale nyeramipi lao piso sera.
1CO 15:36 Doko kopyali ingyuo larasa pira. Embame ee waingi yuunya wara pingi dokopa wambo doko kumapala enenge kene pyara.
1CO 15:37 Jingi wara pingi doko suu pyao mee kenapa panda witi jingi yando nasi nyepala wara pingi kandale. Angi andasi yanenge kareta mende nyepala wara pii nange.
1CO 15:38 Anatumi waingi dokona yanenge apiyakale mainya suu pilyamuli pyuo maingi. Baame mendaki mendaki lao rangena yanenge dokoko maingi.
1CO 15:39 Yuu muu dupwana lete renge bange piso pelyaminyi dupwa yanenge mendareko daa. Wambunya yanenge mendereke nyuo mena rara dupwa wakale nyuo yaka dopako pyuo oma yanenge wakale nyuoko pingi.
1CO 15:40 Dokona yake panda yongope isa yuunya yongope dolapo silyamo. Dopako pyuo yake pandana yongo au pingi doko suu pyao isa yuunya yongo wakale au pingi.
1CO 15:41 Netape kanape buipi wakale wakale rao au pingi. Dopa pyuo bui range yango sukusape au wakaleko pingi.
1CO 15:42 Kumasi dupwa sipuro eparaminyi piramo dopale ingyuo para. Yanenge doko malu pingi dokopa mee rumbyara ingilyamo. Dee angi sipuro epenge dokopa letena karalu karara ingyuo epenge.
1CO 15:43 Malu pingi dokopa pyuku lao rumbyuo pyalusi pyasi singi. Dee sipuro epo dokopa porai au pinginde epenge.
1CO 15:44 Malu pingi dokopa mee isa yanenge ingyuo pao dee sipuro dokopa imambunya yanenge nyuo pingi. Dopa pyuo yuunya yanenge silyamo dokoko suu pyao imambunya yanenge sipyamo pilyamo.
1CO 15:45 Baepole dopa pyuo letamo. Wambo epeyamo Atame doko mee isa akali ingyuo epeya. Enakana epeyamo Atame doko baa Imambu lete karengena maingi ingyuo epeya letamo.
1CO 15:46 Doko wambo dokopa mee isa wambunya yongo nyuo kareyaminyipape enakana imambu lete karengena yongo nyerami ingilyamo.
1CO 15:47 Atame wambo epeyamo doko yuu sinjimu dokome wasiyapya. Atame lapo pyuo epeyamo doko yake dokona piso epeya.
1CO 15:48 Wambu isa yuunya range dupwa akali wambo yuu dokome wasiya dopaleko. Dee yake panda range dupwa yakena piso epeyamo dopaleoko.
1CO 15:49 Namwa dakepa akali Atame wambo yuu dokome wasisi kareya dopale karamano. Enakana dokopa akali yake panda piso epeya dopale isa komba pyao parama.
1CO 15:50 Yangonemoo mende pyuo leto. Wambunya yongo doko Anatunya panda sukusa paa nara. Rumbingi dupwa sulu see nange kandale.
1CO 15:51 Selapape, pii koko palenge mende polo langiru. Wambu lapo dupwa kumapa naraminyipape wambu peparae wakale ingyuo alowa pirama.
1CO 15:52 Lenge waiya lao lembake pingi doko makande pyuo byara andake pyaramopa kumuyami dupwa komba pyapala karalu kararami. Namwa peparae alowa piramopa kararama.
1CO 15:53 Isa wambu kumuo rumbyuo penge dupwa kyaka ingyapala karalu kararami.
1CO 15:54 Dokona lao rumbingi dupwa alowa pipala rumbya nao sulu seramopa dee wambu kumungi doko kaepala lete karalu kararami. Yuu gii doko pyaka separamopa, buku Baepole letamuli pyuo kuma nange renge dokome kumungi renge doko nyuo isa palyara lao pyasi palamo doko gii pyaka soo eparasa pira.
1CO 15:55 Dokona lao kumungi renge doko embena porai renge doko anja palipyandeme namwa randa jerase? Embena anamasi minyare renge doko anja silyase?
1CO 15:56 Yulu koo paleta dokome kumungi dokopa randa nao karenge. Koo baa Lowame paka pyao silyamopa poraingi.
1CO 15:57 Dopa piramopape Anatumi namwana Kamongo Yesu Koraisa keta namwame kumungi renge nyuo anamasi minyarami lao porainya renge jilyamo dokona Anatu ange lao karamana.
1CO 15:58 Yangonemoo dokona lao nakamame kaeya napala poraiyuo karalapape. Kamongona yulu pilyaminyi doko mee pyuo nemba narami dokome yuu peparae Kamongona yulu imambu see nao pyulu pyuo pyuo karalapape.
1CO 16:1 Anatunya wambu yuu Jutia range dupwa kana nyuo nyiso mairama dokona ingyuo pii mende palamo. Nambame yuu Galasia Elyambu Pingi dupwa lamaipunu pilyaminyi doko suu pyao pirami ingilyamo.
1CO 16:2 Sande peparaena nakama rangena kana nyeraminyili pyuo dokona lapo maso mokwa soo retapa pirami. Dopa pirami ramo namba eparo dokopa nakama kana mone yapo nyii narami ingilyamo.
1CO 16:3 Nakama kana doko akali lapo rombo palyapala mairami. Namba epapala dokopa pepa pase mende nambana kingi palyapala Jerusaleme dokona kana doko nyuo manjo pena laro.
1CO 16:4 Dee namba panya suu pyaro ramo doko nakama role pyao parama.
1CO 16:5 Namba wambo yuu Masetonia paro papala epo nakama karaminyi dokona eparo.
1CO 16:6 Nambame yuu gii mendasipa nakama pipa kararama ingilyamo. Doko yuu kupwa pingi mange dokopa yalya kando kararama rapisa. Dee namba yuu mendasa parono dokopa nakamame namba kapa pare lao mapo nyisarami.
1CO 16:7 Namba nakamana yuu epapala angingyuo kara nao waiya lao paro ramo doko kapa ingya nara. Kamongome namba nakama role pyao karamili lao suu pyara ramo doko yuu malu mee karamwali lao suu pilyu.
1CO 16:8 Dopa pipyamopape namba yuu Epesasa dakena karapala yuu gii Pendekosa otaramo dokopa yaki nyero lao suu pilyu.
1CO 16:9 Nyisu petenge malu mee karaminyipape dokona nambana kata wapwakapyamopa yulu angi andakende dakena silyamo.
1CO 16:10 Namba Kamongona yulu pilyu doko suu pyaoko Timoti pyuo karamo. Doko nakamana anda epeya kande doko baa nakama keta baa angi yako lao nyerami.
1CO 16:11 Baa kilya kanda nalapape. Nakamame baa mona seramopa namba keta waiya lao epena lao nyisalapape. Akali yango eparami dokona role pyao epara lao suu pyao karo.
1CO 16:12 Namwana yangonge Apolosa dokona pii mende langirowale. Nambame yuu malu mee baa porainyi pyambuo Kurisene yango dupwa role pyao paeyo nakama kandala pena lamaiyu. Dopa lamaiyunupape baa rolae dakepa parope mee lao saka nao karamo. Dee kandaramo yuu gii mende sera ramo dokopa epara.
1CO 16:13 Kando karo Yesu kapa ingingi lao suu piyami dokona poraiyuo minyuo porayapala paka nao karalapape.
1CO 16:14 Nakamana yulu peparae rae maiyuo mona reto pyuo kararami.
1CO 16:15 Setepanasa banya ree palupi dokona nakama silyaminyi. Nakama yuu Girisi dokona wambo kanda soo Kurisene ingiyami. Nakama Anatunya wambu dupwana nyiso pinya lao kumuo maipala banya yulu pyuo karaminyi.
1CO 16:16 Yangonemoo nakamape dee wambu lapo nakama pipya role pyao karaminyi dupwapeme nakambana pii warombo soo nyiso pyuo karalapape lao poraiyuo langilyu.
1CO 16:17 Setepanasa Poryunetasa Akaikasamoo iminyi dokona rae mailyu. Nakama Korina wambu dupwa epa naminyipape doloma imi dokome kapa ingilyamo.
1CO 16:18 Dolomame namba nakamape keta rae mainyi pyambuyami dokona nakamana kingi lakandamanale.
1CO 16:19 Elyambu Pingi wambu yuu Esia karaminyi dupwame nakama kando yako letaminyi. Akuila dee Pirisila dee nakambana anda elyambu pyuo misi lenge dupwame angingyuo Kurisene yako lengenyili pyuo langilyaminyi.
1CO 16:20 Kurisene yangonge dae karaminyi dupwame yako lao petaminyiko. Nakama Anatu dokona lao suu pyao Kurisene yango sukusa mona reto yako lao karalapape.
1CO 16:21 Namba rangena kingimi pepa dake pilyu. Namba Poleme yako leto.
1CO 16:22 Mendeme Kamongo doko mona reta nange dokona baa keta kwao pena. Namwana Kamongo emba ipupi.
1CO 16:23 Kamongo Yesunya mona keyange palyuo ipingi renge nakama keta palena.
1CO 16:24 Yesu Koraisana kingi lao nambame nakama mona reto karo.
2CO 1:1 Namba Pole Anatumi rombo palyiyamo dokona Koraisa Yesunya aposele akali ingyuo karo. Namba Timotipa pepa dake pyao jilyambano. Nambwa pepa dake pyao Anatunya Elyambu Pingi yuu Korina dokonape dee Anatunya wambu peparae yuu Girisi karenge peparaepe pyao jilyambanoko.
2CO 1:2 Namwana Rakane Anatu Kamongo Yesu Koraisapame mona keyange palyuo ipingi renge mona kyuu lao singi rengepe jinyale lao letambano.
2CO 1:3 Namwana Kamongo Yesu Koraisana Rakange Anatu doko baame namwa sakame kumapala mona minyarambu karenge dokona namwa banya kingi lakandamana.
2CO 1:4 Namwa keta randa epenge dokopa baame namwa nyiso porainyi pyambungi dokome wambu yango randa nao karaminyi dupwa kondo mona minyarambu pyuo karamano.
2CO 1:5 Koraisa randa wakale wakale nyiyamo doko suu pyao namwa baa role pyao randa nyilyamano. Dopako pyuo Koraisa wambu nyiso karamano doko suu pyao baame namwa nyiso karamo.
2CO 1:6 Dokona ingyuo nakama koo soo karapala lete wai pyao parami lao nakamana reke lao randa nelyambano. Dee Anatumi nambwa mona minyarambu karamo doko kandapala nakama randa dopale nyerami dokopa mona kuki palyuo kararami ingilyamo.
2CO 1:7 Nakama isa paa nao porai ingyuo kararami lao suu pyalu pyao pilyamano. Namwa randa nyilyamano dokonako nakamame randa nyuo karaminyi. Dokona Anatu baame namwa nyisilyamo doko suu pyao nakama nyisara doko silyamano.
2CO 1:8 Yangonemoo, namwa yuu Esia dokona randa andake nyiyama dokona rolo langilyu. Randa namwa keta epeyamo dupwa ama andake ingyuo kenda kenda pipyamo namwa lete paa naramanopa kumulyamano lao suu piyama.
2CO 1:9 Kumungi renge namwa keta palamo lao suu piyama. Dopa piyamopape namwa range porai lao suu pyaa napala Anatu wambu kumungi lete nyingi dokona kapa nyisara renge doko mana nyiyama.
2CO 1:10 Namwa randa nyuo repeta kumalana kareyamano dokopa Anatu baame namwa lete nyiyamo dokomeko dee kapa lete nyera ingilyamo. Namwame baa kapa nyiso pyuo lete nyera lao poraiyuo suu pilyamano.
2CO 1:11 Dokonako palyuo nakamame ateŋa pyakao karapala namwa nyisinyi pyambulyaminyi. Anatumi ateŋa malu pilyaminyi doko isingi yano pyao namwa baame keyange renge palyuo nyisara. Nyisaramo dokopa wambu malu mee namwana yulu kando sangyu lao ateŋa larami.
2CO 1:12 Isa yuu dakena palyuo karo piyamano dokopa yuu peparae panga see nao Anatu dokona lao suu pyao pii rolae iki langiyama. Akipamo namba rae maiyuo pyakalyuo pilyunu dokona langirowale. Namwame mee wambunya soo gisingi dokome langya nao Anatunya mona keyange palyuo ipingi dokona porainya renge dokome lao langiyama.
2CO 1:13 Namwame kongwalu laa napala yaka lao soo nyuo nyerami pii dupwa iki pyao jilyamano.
2CO 1:14 Nakama epapu dakepa kuki silyaminyi dokome enakana soo otalu oto otamili leto. Renge doko Kamongo Yesu eparamo yuu gii pyaka seramo dokopa namwa nakama kando rae maiyuo pyakalyuo pyao kararama. Doko suu pyao nakama namwa kando rae maiyuo pyakalyuo pyao kararami.
2CO 1:15 Mendeme kata rokwa nara lao soo kaepala yuu lamasa lao epapala mana langyuo nyisaro lao suu piyu.
2CO 1:16 Namba yuu Masetonia panya pao karowape dee anda lano epo karowape dokopa nakama pipya yalya kando pisirama lao mondo lao suu piyu. Dopa pyuo dee lalyuo epo dokopa nakamame nyisaraminyipa Jutia epo paro dokona lao suu piyu.
2CO 1:17 Kata dopa pyuo parona lao lao kaeyono doko male lao leeŋe lao suu pilyamisi? Namba range suu piyunuli pyuo rapa rapa pyuo dokopa suu pingi lamana palyuo eparo lapala enakana daa lao mee kambu ketae lee lao suu pilyamipi?
2CO 1:18 Anatu kyambo laa nange doko suu pyao nambana pii doko kinyiko leto. Namba kana minyuo pii lenge doko waa laope daa laope laparae yuu gii mendakipa laa nange.
2CO 1:19 Sailasamoo Timoti nambamoo Anatunya Ikinyingi Yesu Koraisa dokona lao polo leyama doko Koraisa baa kapa laope daa laope laa nange. Doko ama daa. Anatu kapa piruna leyamo doko Yesu karamo.
2CO 1:20 Anatumi kana minyuo leya doko Yesu keta kapa pingi. Renge dokona lao Anatu kando namwa Yesu Koraisa karamo dokona alya minyuo namwa doko kinyi lao Anatu lakandenge.
2CO 1:21 Anatu baa rangeme namwa nakamamoo pipya Koraisana arapu dokona sukusa karamano lao sinyi pyambulyamo. Anatu baa rangeme namwa yapalyuo nyepala kame wakale dokona kareya.
2CO 1:22 Namba banyaŋa lao rombo palyuo banya Imambu Poo Pyasi monarena karena leya. Dopa pyuo dokopa keyangena renge nyerami lao lalu lao leya.
2CO 1:23 Anatu baa nambana wusinisi ingyuo karamo. Baa nambana mona kandelyamo doko sepala karo nakama randa jii naroŋo lao yuu Korina dokona epa nayo leto.
2CO 1:24 Namwame nakama dopa pyuo suu pyalapa lao kunji kunji pyao laa nalyamano. Nakama range porai ingyuo karo Anatunya kapa ingingi lao suu pingi doko yaki nyii nalyaminyi. Namwa nakama rae mainyi pyambuo role pyao pyuo karamano.
2CO 2:1 Namba dee kamba epo nakama mona kendanyi pyambwa naro lao suu pyao otapu.
2CO 2:2 Nambame nakama mona kendanyi pyambwaro ramo dokopa apimoome namba rae mainyi pyambwaramisi? Wambu nambame mona kendanyi pyambuyunu dusipa iki neta pisirami.
2CO 2:3 Wambu namba rae mainyi pyambwaraminyi dupwame namba mona kendanyi pyambwa nana lao epa naro lao suu pyapala pepa doko pyao jiyu. Namba rae mairu ramo dokopa nakama opetaeko rae mairami doko namba soo otelyo.
2CO 2:4 Mona randame kumuo ee andake lao randa nao pepa pase doko piyu. Nambame nakama mona randanyi pyambuo pepa pyao jii nayo. Nakama peparae apa pyuo mona retelyono doko soo nyimili lao pyao jiyu.
2CO 2:5 Akali mendeme wambu yango mona kendanyi pyambuyali doko namba kando pii nao nakama kando pirasa pira. Nakama peparae mona kendanyi pyambuyaŋa lao lao kyawa sisingi bolombalo lanyi nembo laa narowale.
2CO 2:6 Nakama lapome akali koo piya doko kando randa maiyami doko kapa ingilyamo. Dee kamba mai nalapape.
2CO 2:7 Epapu dopa piramopape baa nyuo kame sepakamipala mona porainyi pyambwarami ingilyamo. Dokopa baa mona kendange dokome kyangayamasi pyaa nana.
2CO 2:8 Baa mona retelyaminyi dokona dopa pyuo mona retelyaminyi lao sinya lamaipape lao poraiyuo langilyu.
2CO 2:9 Renge dokona lao pase mende wambo pyao jiyu. Nambana mana pii laramuli pyuo warombo seramipi daa lao makande pyuo sipuli lao suu piyu.
2CO 2:10 Nakamame akali mendena yulu koo doko nyuo kame sakamiramo doko namba nyuo kame sakamiruko. Namba koo doko nyuo kame sakamiru ramo doko nakamana reke lao Yesu Koraisana lenge kambu dokona piru.
2CO 2:11 Sataneme yulu koo pinya karamo doko namwa silyamano. Dokona baame nyuo anamasi minya nana lao pirusa pira.
2CO 2:12 Namba yuu Toasa dokona Yesu Koraisana waili pii keyange kanda soo polo lamaila epeyono dokopa Kamongo dokome banya yulu pirami lao wamba kata wapwakayamo doko kandeyo.
2CO 2:13 Kandeyonopape namwana yangonge Taitesa pana nayasa namba mona nembo kareyo. Dokona nambame wambu dupwa karena lao yaki nyepala yuu Masetonia peyo.
2CO 2:14 Anatu kando sangyu lao karamanale. Namwa Koraisapa pako karo Anatumi namwa kata laminyipya Koraisame nyuo anamasi minyiyamo dokona namwame anamasi minyilyako lao karamwasa pilyamo. Kyaa keyange neta raeyo penge doko suu pyao Anatumi Koraisa dokona lao wambu peparae serami lapala namwa keta banya pii raeyo lamailyamo.
2CO 2:15 Namwa rendamu pingi Koraisame Anatu kiso maingi dopale ingyuo karamano. Rendamu pingi doko neta raeyo pao sukusa wambupi neta wambupi laparae keta pelyamo.
2CO 2:16 Neta wambu dupwa ai soo dokopa ai koo pilyamosa kumuo penge ingilyamo. Sukusa wambu dupwa kyaa keyange sepala dokome lete kararami. Apimi yulu andake dopale kapa ingyuo pirase?
2CO 2:17 Wambu Anatunya waili pii mupwa ingya nalyamo lao suu pyapala male lao karaminyi namwa dopale kara nalyamano. Kara namwanopape Anatumi namwa mapanyi nembeyamo dokona Koraisana kendemande ingyuo Anatunya lenge kambu dokona panga see nao pii angi rolae lao karamano.
2CO 3:1 Pii dakeme namwa rangeme dee lakandelyamano ingyuo pelyase? Wambu lapo pepa pase minyuo paeyo karaminyi doko wai soo namwa pepa pyao nakama jeramase? Panda nakamame namwa pyao jeramiyokose?
2CO 3:2 Nakamame namwa mona retelyaminyi dokona akipamo mee pepa pase minyuo papyuo kararamase? Wambu nakamana yulu kandapala namwana lao kapa serami.
2CO 3:3 Koraisa baa range pepa dake pyapala namwa keta minyuo pupwa leya doko silyamano. Pyanjilyi ipwange dokome Mosese kana dolapo nyiya dokona makande minyuo pyasi pali nalyamo. Anatu lete karengena Imambu dokome isa wambunya mona anda dokona pyao reteya.
2CO 3:4 Yesu Koraisa keta namwa Anatu kapa ingingi lao poraiyuo suu pyapala pii doo letamano.
2CO 3:5 Namwa yulu doko mora pisipyamopa range pirama ingya nalyamo. Yulu pilyamano porai renge doko Anatumi jilyamo.
2CO 3:6 Anatu baame iki namwa kana minyuo lenge enenge kapa pyuo inginyi pyambuya. Kana minyuo lenge enenge doko pepana pyasi lowa daa. Imambu dokome pingi. Lowa pyasi palamo dokome kumungi renge sipuro epenge. Ipyamopape Imambu dokome lete renge minyuo epenge.
2CO 3:7 Anatumi Lowa doko kana dolapona pyao retapala Mosese maiyamo dokopa banya yanga paupau lenge renge doko Mosesena lenge kambu dokona yanganyi peeya. Dokome lenge aumiyasa Mosesena lenge kambu kandalana saka nayami. Enakana dokopa Mosesena lenge kambu mee ingiya. Lowana yulumi kumungi renge minyuo epeya doko yanga paupau lengende epeyali
2CO 3:8 Imambunya yulu doko kamame yanga paupau lengende epeyali.
2CO 3:9 Mosesena Lowa dokome wambu koo piyami dokona kata lasaka piya. Imambu dokome wambu rolae pilyaminyi dupwa yanganyi nembelyamo. Banya yanga paupau lenge doko ama wakasa andake.
2CO 3:10 Epapu dakepa yanga paupau andake letamo yanga paupau wambo lao kareyamo doko nyuo yambe pyapyamo pana nalyamo doko kandelyamano.
2CO 3:11 Lowa doko ee kana mendasipa iki paleyamopape yanga paupau lao epeya. Doko suu pyao Imambunya karalu karara doko ama yanga paupau wakasa ingyuo lapyali.
2CO 3:12 Namwame doko angi pira lao suu pyapala dokome paka nalyamano.
2CO 3:13 Namwa Mosese dopale daa. Moseseme Isaraele wambumi yanga paupau lenge kakondelyamo lao kanda nana lao lenge kambu yambe piya.
2CO 3:14 Isaraele wambu dupwana suu pingi pali naya. Nakamame yuu gii dokona piso epo epapu dakepa kana minyuo pii leyamo buku wambarae yaka lenge dokopa nakamana suu pingi doko yambe pilyamosa angingyuo sepa nange. Wambu mendeme Yesu kando nyingi dokopa iki wambu dokona suu pingi doko yambe pyakami nange.
2CO 3:15 Epapu Mosesena Lowa yaka laminyipa nakamana suu pingi yambe pilyamo.
2CO 3:16 Anatunya pii poo pyasi dokona lao, Moseseme Kamongo mona kapu kyuo maiyamopa banya lenge pendakae leya.
2CO 3:17 Kamongo lapu doko Imambu dokona lapusa pilyamo. Kamongona Imambu doko wambu keta eparamopa manda rao kararama.
2CO 3:18 Dokona lao namwana lenge kambu dupwana mende yambe pyaa napyamopa karamano dokome Kamongona yanga paupau lenge doko nyepala namwa yanga paupau lao baa yale manda manjinyi pyambulyamo. Yanga paupau lenge jilyamo Kamongo doko baa Imambu.
2CO 4:1 Anatu baa sakame kumungi dokome yulu pilyamano dake jiya. Dokona lao namwa mona kenda pii nalyamo.
2CO 4:2 Yulu koo elyangepe yalu pyuo pingipi peparae yaki nyilyamano. Yaki nyepala namwa panga sepala Anatunya pii angi dokona alowa pii nalyamano. Banya lenge kambu dokona pii rolae yanganyi nembo letamano. Doko wambu peparae pii doko angiŋi lao suu pyaraminyi dokona pyuo karamano.
2CO 4:3 Namwa waili pii keyange letamano doko yalu pyuo sipyali doko neta wambu dupwa pipa yalu pyuo sipyali.
2CO 4:4 Isa yuu dakena imambu koo dokome nakamana suu pingi iminjanyi pyambuyamo dokona Yesu kapa ingingi lao suu pyaa nalyaminyi. Koraisa baa Anatu dokona isa komba pyao karo yanga paupau lao karamo waili pii keyange doko nakamana kata doko yanganyi pee nana lao imambu koo doko nee pilyamo.
2CO 4:5 Namwa rangena lao polo laa nalyamano. Yesu Koraisa baa Kamongo karenge dokona reke lao namwa kendemande ingyuo karamano renge doko polo letamano.
2CO 4:6 Anatumi pii dake lao dokopa, Iminjingi dokona yango rale pira lao Anatu mendaki dokome banya yanga paupau lenge namwana monarena dokona rao karena leya. Dopa pyuo rao karena leyamo dokopa Anatunya yanga paupau lenge Koraisana lenge kambunya nyiya doko soo gisarama lao namwa keta langyuo jiya.
2CO 4:7 Jiyamopape namwa Anatunya renge keyange doko soo nyepala karamano dupwa mee pere awaimi wasisi dopale ingyuo karamano. Dokona lao porainya renge wakasa doko Anatu baa keta iki palenge doko panelyamo. Namwa keta pali nange.
2CO 4:8 Namwa yuu malu randa nyimwanopape kwao puu pao paa nalyamano. Apa pirama lao sakapa nalapape kamame isa puu pao paa nalyamanoko.
2CO 4:9 Nyisu petenge malu karaminyipape yuu peparae puu minyingi mende karamo. Yuu lapo randa andake nyimwanopape kwaelu kwaeyo kwaeyo ota nalayamano.
2CO 4:10 Yuu peparae namwana yanenge dokona Yesunya kumungi renge namwa keta palipyamo manjo paelyamano. Dokona lao banya lete renge namwa keta palamo doko wambu peparae dupwa kandenale.
2CO 4:11 Yesu baa namwa isa wambu yulu koo pingi dupwa keta karamo doko panaramo kandena lao namwa yuu peparae randa nyuo kumarama ingyapyamo karamano.
2CO 4:12 Kumungi renge namwa keta palipyamopape lete renge nakama keta palira ingilyamo.
2CO 4:13 Baepolena pii lao dokopa, Namba kinyi lao suu pyapala sipurapala lao kareyo letamo. Doko suu pyao namwa pii soo nyepala kinyi lao suu pyao leto lao lao karamanoko.
2CO 4:14 Anatumi Kamongo Yesu lete sipuro nyiyamo dokome namwa opetae Yesu role pyao minyalyuo nyera. Nyepala dokopa namwape nakamape role pyao banya lenge kambu seramo dokona lanyuo epara, doko silyamano.
2CO 4:15 Anatunya renge keyange dupwa nakama nyisara ingilyamo. Dee Anatumi mona keyange palyuo banya pii doko wambu malu sinya laramo dokopa nakama opetae ateŋa lao Anatu dokona lakando ange larami.
2CO 4:16 Dokona lao namwana mona kenda pii nalu nao nalyamo. Namwana isa yanenge lano andelyamopape yuu peparae namwana imambu doko kyaka ingyuo pelyamo.
2CO 4:17 Epapu dakepa namwa randa kuki waiya lao pao otaramo doko nyimwano dokona rengya yanga paupau lenge renge andake wakasa rao karalu karara doko nyerama. Yanga paupau lenge renge nyeramano doko ama andake ingyaramo dokopa randa wambo nyiyama doko kuki ingyuo peya lao kandarama.
2CO 4:18 Bange kandenge dupwana suu pyaa nao kanda nange dupwana iki poraiyuo suu pyao karamano. Bange kandenge dupwa waiya lao otara. Bange kanda nange dupwa soo otalu oto otara.
2CO 5:1 Namwa isa petamano yanengena anda lalyaramo dokopa Anatu baa rangeme anda yake pandana piyamo karalu karo karara dokona namwa dokona palipa Anatumi lara.
2CO 5:2 Namwa dae karo dokopa ee lao karamano. Namwana anda yake panda karamo doko komau pee pipala karenge doko suu pyao namwa koko kararama lao letamano.
2CO 5:3 Anda yake panda karamo doko namwa yambe pyara ramo doko namwana yanenge dopale ingyuo para.
2CO 5:4 Isa yuunya yongo doko paleta dokopa mona kendo ee lao karamano. Dopa pimwanopape isa yuunya yongo doko nembalana laa nalyamano. Laa namwanopape namwa yake panda dokona yongo doko nyelana lao suu pilyamano. Dopa pira ramo dokopa lete renge sulu seramo dokome kumungi renge doko anamasi minyara.
2CO 5:5 Anatumi alowa piramiŋi lao namwana rapa rapa pyakaya. Banya keyange renge doko nakama jero lao mumbwa palyili lao banya Imambu wambo jiya.
2CO 5:6 Dokona lao namwa paka napala poraiyuo karamano. Isa yanenge nyuo karamano dokopa Kamongona panda kara nalyamano doko silyamano.
2CO 5:7 Namwa Anatu lengeme kanda napalape baa iki kapa ingingi lao poraiyuo suu pilyamano.
2CO 5:8 Porayapala karo isa yanenge nyuo karamano dake yaki nyepala Yesunya panda dokona karamwali yaka letamano.
2CO 5:9 Isa yanenge nyuo karowape Anatunya panda dokona karowape pii mende daa. Anatu baa rae mainyi pyambwarama doko iki mupwa lao suu pilyamano.
2CO 5:10 Namwa peparae Koraisa kote lao karara dokona paramano dokopa baame namwa apa pyuo yulu piyami lao yapalyuo sera. Yuu gii dokopa namwa isa yuu karo yulu keyange pyuope panda yulu koo pyuope dokona namwana yulu piyamuli pyuo mendaki mendaki lao yole yano nyerama.
2CO 5:11 Anatu andake dokona kando pakapala wambu dupwa Kurisene inginyi pyambuo karamwanosa pilyamo. Anatumi namwana mona anda soo gisingi. Nakamame namba dopa pyuo soo giso otamili yaka.
2CO 5:12 Namwa akali keyange karamano lao range lakandao laa nalyamano. Nakamame namwa kando rae maiyuo mona anda pyakalyuo pyapyali yaka lao letamano. Dokona wambu lapome mona anda kanda napala mee yanenge ketae kandapala wambu yango lakandenge dupwa kando pii keyange isingi mana lamairami ingilyamo.
2CO 5:13 Namwa kopyali minyarama ramo doko Anatu dokona reke lao kopyali minyilyamano. Dee namwa mona palira ramo dokopa nakamana reke lao kararamasa pira.
2CO 5:14 Koraisame isa wambu peparaena lao kumuyamo dokona ingyuo namwa peparae baa role pyao kumuyamasa piya. Renge keyange doko separamanopa banya mona retenge renge dokome namwa kame pyuo minyilyamo.
2CO 5:15 Yesumi wambu peparaena lao kumuyamo dokona nakama range yeelyo kara narami ingilyamo. Yesu kumapala nakamana lao lopo epeya dokona banya iki karo yulu pyakamyuo kararami ingilyamo.
2CO 5:16 Epapu dakepa namwa rangeme wambu dupwa koo pingi panda keyange pingi lao yapalya nalyamano. Wambo Koraisa baa isa akali lao suu piyamo doŋo epapu baa mee isa akali ingya nalyamo doko kandelyamano.
2CO 5:17 Wambu mendali Yesu Koraisapa pakarambi ramo doko baa kyaka ingyuo para. Wambarae doko isa paramopa enenge doko sipuro eparasa pira.
2CO 5:18 Anatu rangeme yulu andake doko pyuo karamo. Namwa banya nyisu petenge ingyuo kareyamanopape Anatumi Koriasa keta namwa nyuo alowa pipala banya puu minyingi inginyi pyambuya. Pyambuo dokopa baame wambu menge opetae banya puu minyingi inginyi pyambwalapape lao yulu doko namwa jiya.
2CO 5:19 Anatumi Koraisa keta wambu peparae banya puu minyingi inginyi pyambuya dokona waili pii doko polo letamano. Doko nakamana yulu koo piyami dupwa yaka lao suu pyakami naya. Suu pyakami nayamopape apa pyuo nakama banya puu minyingi inginyi pyambulyu lao waili pii doko langyuo jiya.
2CO 5:20 Namwa dae karo Koraisana pii lakamilyamano. Mendaki dopale ingyuo Anatumi namwa keta nakama poraiyuo piso soo karamo. Koraisana reke lao nakama piso sokondali pyuo letamano. Anatumi nakama nyisu petenge dupwa alowa pipala puu minyingi inginyi pyambwanale.
2CO 5:21 Koraisa baa koo mende pii nange. Koo pii nayamopape Anatumi namwana koo dupwa Koraisa keta palena leya. Dopa piyamo dokona namwa baapa pako karo Anatunya rolae pingi renge namwa keta palamo.
2CO 6:1 Namwana yulu Anatumoo role pyao pyuo karamano dokona nakama piso sokondali pyuo lao, nakama Anatunya mona keyange palyuo ipingi renge doko nyepala dokopa kokwa see nalapape letamano.
2CO 6:2 Anatunya pii letamo doko selapa. Yuu gii keyange pyaka siyamopa nakamana pii siyu. Lete wai pyao nyingi yuu gii dokona nakama nyiso kareyo letamo. Selapa. Epapu dakepa Anatu nyisinya lapenge ingilyamo. Epapu dakepa Anatunya lete wai pyao nyingi yuu gii doko pyaka sepelyamo.
2CO 6:3 Namwa kopetame pyuo karaminyi lasaraminyi kandena lapala namwa yulu rolae pyuo wambu kata keyange dokona papala lukumaraminyi yulu mende pii namanale lao suu pilyamano.
2CO 6:4 Dopa pyuo namwa yulu peparae pyuo namwa Anatunya kendemande akali karaminyi lao kandelyaminyi. Namwa randa andake nyuo kenda kenda pipyamo maka napala yaki nyii nao karamano.
2CO 6:5 Imbwuapala pyalana pyuo karapusi pyuo randa joo laiya lao kareyami. Namwana yulu andake soo kaeyo siyamopa nenge naa nao lopome kumuo luu pali nao pyuo kareyama.
2CO 6:6 Wambu dupwame namwana yulu yapasipi soo gisingipi yulu makao yaki nyii nangepe anjiki pingipi dusipa namwa keta kandapala namwa Anatunya kendemande lao soo kando gisilyaminyi. Imambu Poo Pyasi namwana monarena karapyamopape namwa wambu yango mona retenge doko kandapala namwa Anatunya kendemande akali karamano doko wambu dupwa soo gisilyaminyi.
2CO 6:7 Anatu banya pii angi kinyi letamano dokope Anatunya porainya renge namwa keta palamo dokope kando soo gisilyaminyiko. Namwame rolae pinginya renge dokome nyuo alya ingyuo karapala pyao pingi.
2CO 6:8 Wambu lapome namwana kingi lakandenge dee lapome epekanda napala kingi nyuo isa palyingi. Lapome namwa kilya kandalya kandana lengepe dee lapome namwana lao pii keyange lakange. Namwa pii kyambo letaminyi laminyipape pii rolae iki lao karamano.
2CO 6:9 Nakamame namwa kando see nalyamano laminyipape nakama namwa soo kaeyo karaminyi. Namwa kumasi silyaminyi laminyipape lete karamano doko nakama Korina wambu silyaminyi. Randa joo piyaminyipape namwa kuma napala lete karamano doko kandelyaminyi.
2CO 6:10 Mona kendanyi pyambuyaminyipape namwa yuu peparae rae maiyuo karamano. Namwa akali pendewa lao suu pyaminyipape wambu malu kamonganyi pyambulyamano. Namwame mende daa lao suu pyaminyipape aepyamo karamano.
2CO 6:11 O nambana puu minyingi yuu Korina range dupwa. Panga see nao pii rolae iki neta pyakamyuo lao kareyama doko nakama range kapa silyaminyi.
2CO 6:12 Namwa nakama pipya suu pingi mendaki palyamana lao suu piyamanopape nakama dopa lao suu pyaa nayami.
2CO 6:13 Rakangeme ikinyingi dupwa pii lamainginyili pyuo dakepa nakama pii langilyu. Namwame nakama lao suu pilyamano doko suu pyao nakamame namwa mona retowako karalapape. Dopa pyuo namwa mata jii nao kando nyelapape.
2CO 6:14 Nakamame Kurisene ingya nange dupwa kando mona mendare palamo lao suu pyapala yulu mendare role pyao pirami doko kapa ingyuo paa nara. Apa pyuo rolae pinginya rengepe koo pinginya rengepe role pyao pakarambisi? Apa pyuo iminjingipi yangengepe role pyao pakarambisi?
2CO 6:15 Apa pyuo Yesu Koraisapa Satanepa pii mendakinya palyarambisi? Wambu Yesu mona kapu kyuo maingi dokope mona kapu kyuo mai nange dokope suu pingi mendaki palyuo kararambi ingya nalyamo.
2CO 6:16 Apa pyuo Anatunya Elyambu Pingi dupwape Satanena wambu dupwape role pyao kararamisi? Namwa Anatu lete karengena tembole anda dopale karamano suu pyalapape. Anatu baa range dopa pyuo leya. Namba nakama pipya yalya kando role pyao kararo. Namba nakamana Anatu ingyaronopa nakama nambana wambu ingyarami.
2CO 6:17 Dokona lao Kamongo dopa letamo. Nakamame wambu menge dupwa rekya lao kaepala liti pyuo karalapape. Wambu koo pingi dupwa yalya kando pisa narami ramo dokopa nakama yako laro.
2CO 6:18 Namba nakamana rakange ingyaronopa nakama nambana wane wanake ingyarami lao Kamongo andake wakasa doko letamo.
2CO 7:1 Yangonemoo Anatumi kinyi lalu lao leyamo renge keyange dupwa peparae namwa keta palamo. Dokona yulu mendeme namwana yongope imambupi karo pisinyi pyambungi doko rekya lao liti pimana. Yulu poo pyasi iki moko minyuo pyuo karo Anatu pako karo baa yeelyo poraiyuo suu pyao karamanale.
2CO 7:2 Namwa mata joo kara nalapape. Namwa mendali kando koo pii nao kokwa see nao minyoko pii nao pyuo karenge.
2CO 7:3 Nakama koo piyami lao lapusa pii nalyamo. Wambo langiyunuli pyuo dee kamba langilyu. Namwame nakama mona retenge dokome lete kararamanopape kumaramanopape nakama pipya role pyao kararama.
2CO 7:4 Nakama mondo lao pyuo karaminyi doko sepala rae maiyuo mona anda pyakalyuo pyao karo. Randa peparae nyimwanopape paka nao raeme kumuo karo.
2CO 7:5 Kinyi yuu Masetonia pao karapala dokopa koo soo kara nayama. Randa dupwa yuu muu dupwana soo kapa piya. Wambu menge dupwa kando laiya lao paka renge neta epo piya.
2CO 7:6 Paka renge neta epeyamopape Anatumi wambu mona nembenge dupwa mona minyarambu pingi doko baame Taitesa jepala namba mona porainyi pyambuya.
2CO 7:7 Baa epeyamo dokome iki namwa porainyi pyambwa naya. Nakamame banya mona porainyi pyambuyaminyi doko langiyamo sepala namwa rae maiyama. Nakama namba Pole kandamwali yaka letaminyi lao langiya. Langiyamopa nakama kondome kumapala nambana reke lao lakao karaminyi langiya. Dokona dakepa namba rae andake mailyu.
2CO 7:8 Pepa pyao jiyu dokome nakama mona kendanyi pyambuyamopape namba mende suu pyaa nayo. Angi kandeyoli dokopa kondayoliŋi dakepa konda nalyo.
2CO 7:9 Nakama mona kendanyi pyambuyu dokona lao rae mailyu laa nalyo. Nakama mona kendayami renge dokome suu pingi alowa piyami dokona lao dakepa namba rae mailyu. Nakamana mona kendo kareyami dokome Anatumi nakamana suu pingi alowa piya. Dokona lao namwa nakama randa julu joo jii nayama kande.
2CO 7:10 Namwa mona kendo kararama dokopa Anatu nyisaramopa mona kapu kyepala lete penge kata dokona rae maiyuo parama. Dopa piramanopape wambunya mona kendange renge dokome kumungi renge minyuo epenge.
2CO 7:11 Anatumi nakamana mona kendayami dokona nyepala apa piya lao kandalapape. Dakepa nakama mona angi palyuokondali pilyamo. Koo pii nalyamano lao poraiyuo simili yaka lao letaminyi. Nakama koo pilyaminyi larami ramo doko imbwuarami. Imbwuapala koo pilyaminyi laka nanale. Dake mupwa wakasa lao poraiyuo suu pyapala namba kando mona andake retelyaminyi. Wambu menge dupwa koo pirami ramo dokopa waiya lao pyalana letaminyi. Yulu dake piminyi dokome nakama kopetame pii nayami lao pano nolakaya.
2CO 7:12 Pepa jiyunu doko akali koo piyamo dokona reke lao pyaa nayo. Dee akali baa keta koo pyuo pisiyamo dokona lao pyaa nayoko. Nakama Anatunya lenge kambu dokona karo apa pyuo namwa mona retelyaminyi lao lasaka pelana pepa piyu.
2CO 7:13 Renge dokona namwa porainyi pyambulyamo. Renge mende palamo doko nakama peparaeme Taitesa baa rae mainyi pyambuyaminyisa baa rae maiyuo karamo doko kandapala rae mailyamano.
2CO 7:14 Namba wambo nakama yulu keyange pingi lao Taitesa lamaiyu. Nakama enakana namba elyanyi pyambwa nayami. Yuu peparae pii rolae angi lao langyuo kareyama doko suu pyao enakana nakama yulu keyange piyami Taitesa kandeya dokome namwa pii kinyi ingyuo peya.
2CO 7:15 Baa epeyamo dokopa nakama banya pii warombo sepala lakanda minya minya pyuo yako lao sukusa nyiyami doko suu pyaro karamo. Dopa pyuo piyamisa baa nakama angingyuo mona jilyamo.
2CO 7:16 Namba nakama arapu dokona renge renge soo karapunu dokona namba rae andake maiyuo karo.
2CO 8:1 Yangonemoo Anatu mona keyange palyuo ipyuo Masetonia Elyambu Pingi wambu nyisiyamopa yulu andake piyami doko selapale lao langirowale.
2CO 8:2 Nakama randa koo nao kareyaminyipape rae maiyuo kareyami. Pendewa ingyuo karapalape nakama ipyuo wambu yango nyisamwali lao suu piyami dokome kana andake jiyami.
2CO 8:3 Rangeme sipurapala kana siyamo dupwa pyambwapala enakana dee kamameko koto nyepala konda pyuo reteyami doko kinyi langilyu.
2CO 8:4 Nakama kana doko retapala nakama suu piyaminyili pyuo wambu Jutia palenge dupwa nyiso maiyakalapape lao namwa poraiyuo piso siyami.
2CO 8:5 Nakama dopa pyuo yulu andake pirami lao suu pyaa nayama. Nakama wambo mona Kamongo doko maiyuo oteyami. Enakana Anatunya suu pingi doko moko minyapala nakamame namwa mona joo oteyamiko.
2CO 8:6 Taitesa dopako pyuo nakama keta epapala yulu kanda soo piyamo doko pyulu pyuo pinya lao poraiyuo lamaiyama. Dopa piramo dokopa nakama Anatu mona reto yulu andake pilyaminyi doko baame nyisaramopa pyuo otalu oto otarami.
2CO 8:7 Nakama Imambunya kamongapala nakamana Anatu kapa ingingi lao poraiyuo suu pingi. Dokome Anatunya pii kapa polo letaminyi. Nakamame renge dupwa peparae soo giso otenge. Nakama namwa rae maiyuo nyisalana namwa mona andake retelyaminyi. Dokona lao Anatu mona retenge yulu doko mumu laa nao rae maiyuo pipape letamano.
2CO 8:8 Nambame nakama lowa waso joo laa nalyo. Laa napunupape wambu menge wakale lapome pendewa wambu rae maiyuo nyisalana letaminyi dokona nakama pano langyapala nakamana mona retenge renge doko angipi mee lao koto kandalana pyapi pyuo silyu.
2CO 8:9 Kamongo Yesu Koraisa baa mona keyange palyuo ipingi doko nakama silyaminyi. Baa kamongo ingyuo kareyamopape nakamana reke lao baa pendewa ingyuo peya. Dopa pyuo baa pendewa ingyuo peyamo dokome nakama kamonganyi pyambuya.
2CO 8:10 Namba dake lao suu pilyu. Ee kana wambo kanda soo piyaminyi yulu doko dakepa pyuo otalapape. Nakama wambo kanda soo pii nalana suu piyaminde daa. Nakama rae maiyuo pimwailinyi iki suu piyami.
2CO 8:11 Yulu doko pyuo otalapape leto. Nakama rae maiyuo pinya suu pyao rapa rapa piyaminyi doko suu pyao rae maiyuoko pyuo otalapape. Nakama range aelyamo dupwame nyuo pipape.
2CO 8:12 Nakama rae maiyuo mailana suu pyarami ramo dokopa bange seramuli pyuo mairaminyi doko Anatu kapa lao suu pyara. Bange daa ramo doko mende laa nara.
2CO 8:13 Nambame nakama iki randa nyuo karaminyipa menge dupwa mee manda rao karenale laa nalyo. Laa napunupa epapu dakepa nakama bange malu reto karaminyi dokona wambu pendewa dupwa nyisarami ramo doko kapa rolae ingyuo pelyamo. Enakana nakamana bange see naramo dokopa doloma bange seramo kararaminyi dokome nakama nyisarami. Dopa piramo dokopa nakamba laparaena mendare ingyuo para.
2CO 8:15 Baepoleme lao dokopa, Akalimi malu mee yapo nyiyamo doko kamame andakya naya. Akalimi kuki lama yapo nyiyamo doko kamame kukya naya letamo.
2CO 8:16 Namwame nakama rae maiyuo nyisalana suu pilyamano doko suu pyao Anatumi Taitesa opetae nakama rae maiyuo nyisinya lao kareya. Dokona lao Anatu kando sangyu letamano.
2CO 8:17 Taitesa nakama nyisarepe mee lao piso siyamanopa baa mende laa nao warombo soo piru leya. Mee piimi ŋee leyande daa. Baa nakama nyisapuli yaka lao suu piyamuli pyuo nakama keta epeya.
2CO 8:18 Akali yango mende Anatunya waili pii keyange polo letamo doko Elyambu Pingi peparaeme banya pii epe singi doko baa opetae Taitesa role pyao pena letamano.
2CO 8:19 Akali doko, Elyambu Pingi wambu dupwame baa rombo palyapala namwa Anatu mona retenge yulu dokona pyuo kamongona kingi lakandalana baa role pyao papyuo kararama leyami. Yulu mendena baa namwamoo pipya nyisamwali lao suu pilyamano.
2CO 8:20 Namwa keta kana malu pyamalyiyaminyi doko ukiaki minyaramanopa wambu dupwa mumu lasaraminyi lapala waso karamano.
2CO 8:21 Kamongo Anatunya lenge kambu dokonape wambu dupwana lenge kambu dokonape yulu rolae pimwali lao suu pilyamano.
2CO 8:22 Dokona namwana yangonge akali mende opetae role pyao pena lao peelyamano. Namwa yuu malu mee banya yulu apiyakale lao makande piyamano dokopa baa rae maiyuo waa waa karo nyisalana piya. Epapu dakepa nakama mondo lao karaminyi doko sepala rae mailyamo dokona nakama lama opetae mona karo nyisapuli lao suu pyao karamo.
2CO 8:23 Dee Taitesa baa nambana yulu role pyao pingi dokome nakama pyuo nyisilyambano. Dee akali menge role pyao paraminyi dupwa nakama Elyambu Pinginya rombo palyisi akali ingyuo dupwa Koraisana kingi ketae pyambuo lakando pelyaminyi.
2CO 8:24 Nakama mona retelyaminyi dokona lasaka pyuo pipape. Dokopa nakamana yulu keyange doko namwame lakandaramano kandapala namwame kapa letaminyi lao kandarami.
2CO 9:1 Nakama lapome Anatunya wambu Jutia palenge dupwa nyiso kaelyaminyi dokona aki letoŋo lao dee pepa pyao jerose?
2CO 9:2 Nakama waa waa karo nyisalana karaminyi doko silyu. Nyisalana karaminyi doko sepala nakamana lao yuu Masetonia wambu rae maiyuo mona anda pyakalyuo pyao lamaiyuo kareyo. Ee kana wambo dokona piso pao epapu dakepa nakama Korina Kurisene yuu Girisi karaminyi dupwame nyisalana karaminyi, dokona lao lamaiyakayo. Nakamame mona nyepala nyisalana piyaminyi dokome wambu malunya monarena piya.
2CO 9:3 Nambame nakamana lao rae maiyuo mona anda pyakalyuo pyao leyono doko mee ingyuo paa nanale lao dakepa yangonge dapwa pena leto. Doko nakama epeyaminyi kande dokopa wamba langiyunu dokona kata palyuo nyisarami lao silyu.
2CO 9:4 Dokona Masetonia wambu namba role pyao eparama dupwame nakama nyisalana rapa rapa pii nao mee kararami ramo doko kandapala elyaramanopa nakama Korina range dupwa opetaeko elya nyerami ingilyamo.
2CO 9:5 Dokona lao nambame akali wambo nembelyo dusipame kana lasaka pyuo jerama leyaminyi doko nyepala rapa rapa pirami. Namba eparono dokopa wambo elya pisi seramo kandaro. Nakama Anatu mainya mumu lao karo mai nalyaminyi. Nakama rangeme mainya suu pyaminyili pyuo mailyaminyi doko panara.
2CO 9:6 Akali mende ee kuki wara pira ramo dokopa ee jingi kukiko manjo nara. Akali mende ee malu wara pira ramo dokopa ee makande pyuo manjo nara doko suu pyalapape.
2CO 9:7 Akali rae maiyuo kana maingi doko kando Anatumi mona retelyamo. Dokona lao akali mendaki mendaki lao banya suu pilyamuli pyuo simbi simbi pii nao rangena suu pyaa napala kana mainya rae maipala mainya.
2CO 9:8 Dopa pyuo pirami ramo doko Anatumi isingi bange kuki lama jii nara ingilyamo. Nyepengele dupwa kapa seramopa dee wambu lapo nyisalana suu pyarami ramo kakana pyuo seramo dokona pingyu nyepala kapa konda pyuo mairamioko.
2CO 9:9 Baepole lao dokopa, Anatu baame ipyapala pendewa wambu dupwa mee maingi. Banya anjiki pingi yulu doko mee sulu singi.
2CO 9:10 Anatumi ee wara pirami lao ee wai jepala nenge nenge dokona nyisingi kandale. Doko suu pyao nakamana bange konda napala mokwa soo maiyami dokona baame waingi keyange jeramo doko andena lapala nakama keta banya yulu andanyi pyambwara.
2CO 9:11 Anatu nakama nyiso kamonganyi nembaramopa nakama mee maso bange mokwa soo maipa pyuo kararami. Dokome kana namwa keta jeraminyipa mairama wambu malu dupwame Anatu kando sangyu larami ingilyamo.
2CO 9:12 Laraminyipa yulu keyange pilyaminyi dokona renge lama palamo. Anatunya wambu nyisaraminyipa wambu malumi Anatu kando ange lapala lakandarami ingilyamo.
2CO 9:13 Nakama ipyapala bange mokwa soo mairaminyi kandapala wambu malumi nakama Koraisana waili pii keyange lao karaminyi doko yaki nyii nao rolae pyuo karaminyi lao suu pyapala Anatu ketae pyambwarami ingilyamo.
2CO 9:14 Anatumi banya mona keyange palyuo ipingi renge keyange nakama jiyamosa dokona nakama kando mona andake reto ateŋa lakarami.
2CO 9:15 Anatunya renge ama mupwa wakasa mende jiyamo dokona lao sangyu lamanale.
2CO 10:1 Namba Poleme nakama piso sokondali pyuo leto. Namba nakama pipya karo dokopa pau lao anjiki pyuo karene lao letaminyi. Lapala namba nakama pipya kara napunu dokopa nakamana lao namba poraiyuo kaelene letaminyiko. Dokona Koraisana kondange rengepe anjiki pingi rengepe dolapona lao piso sokondali piruwale.
2CO 10:2 Namba eparonopa poraiyalase lao pupi lao laa nalapape. Namwa rangena kingi lakandalana karaminyi letaminyi wambu dupwa kando pii porai kapa pupi lao laro.
2CO 10:3 Doko kinyi kinyi namwa isa yuu dakena karamano. Karamanopape isa yuunya lao pimwaiyuo kara nalyamano.
2CO 10:4 Yanda pingi bange dusipame minyuo yanda pyuo karamano dupwa mee isa bange daa. Anatunya yanda pingi bange porai panda koo dupwa kokwa singi dusipame minyuo yanda pyuo karamano. Pii kyambo letaminyi dupwa namwa kokwa silyamano.
2CO 10:5 Wambu lapo Anatunya pii selana suu pyaminyipape suu pingi wakale dupwame nakamana kata doko rokolyaminyi. Doko pyao kokwa silyamano. Namwa suu pingi peparae nyuo malu palyapala Koraisa keta ralinyi pyambulyamano.
2CO 10:6 Nakamame namwana pii laramanuli pyuo mondo lao piraminyi dokopa nakamana yulu keyange doko kandapala wambu kamba lao karaminyi dupwa randa mairama.
2CO 10:7 Nakamame neta yanenge ketaena maro lapyamo doko iki kandelyaminyi. Akali mendeme namba Yesu Koraisana akali karo lao suu pilyase? Dopa pira ramo baa rangena mona anda kandenale. Baa Koraisana akali ingyuo karamo dopako pyuo namwa opetaeko Koraisana akali ingyuo karamano.
2CO 10:8 Kamongome yulu andake namwa jiyamo dokona lao yuu malu mee rae maiyuo enokwanyi nembo leyonopape namba elya nalyo. Yulu andake jiyamo dokome nakama kwaenyi pyambwa napala pyuo andanyi pyambulyamo.
2CO 10:9 Nambame pepa pase pyao joo pakanyi pyambulinyi lao suu pyaa nalapape.
2CO 10:10 Akali mendeme dopa lao dokopa, Polena pepa pase pyao imbuo pii poraiyuo lengeŋe, dee namwa pipya karelyamo dokopa pii kata pao laa nangeŋe dopa pyuo lara.
2CO 10:11 Dopa larako doŋo baa akali doko dopa lao suu pinyale. Yuu nanesa karo pepa pyao jowape nakama pipya role pyao karowape pii larono dupwa wakale ingyuo paa nalyamo.
2CO 10:12 Wambu nakama range lakando mupwa ingyuo karamano letaminyi dupwa pipya namwa makande pirama ingya nalyamo. Nakama kyawa sisingi bolombalo lasi dupwa lao karaminyi. Kyawa sisingi bolombalo lasi dupwa yango sukusa apiyakale lao mendeme mende makande pyuo mendeme mende makande pyuo range karo palyuo piminyili pyuo lao karaminyi.
2CO 10:13 Namwa mee langa range lakanda narama. Anatumi yulu makande pyuo jiyamo liti doko yalo paa nalyamano liti jiyamo dokona sukusa nakama karaminyi.
2CO 10:14 Liti doko yalo paa napala nakama kando nyepala Koraisana waili pii keyange boo pyao langiyama.
2CO 10:15 Akali lapo panda wakale dupwana yulu andake piyami dokona range lakanda narama. Anatunya make yalo paa napala nakama baa kapa ingingi lao angingyuo suu pyaraminyi yulu andake pyakarama lao suu pilyamano.
2CO 10:16 Enakana nakama palaminyi matarena waili pii keyange raeyo paa nalyamo dokona kapa polo lamairama. Polo lamairama ramo dokopa akali mendeme yulu piyamo dokona lao rae maiyuo pyakalyuo pyao lao kara narama ingilyamo.
2CO 10:17 Baepole lao dokopa, Akali mendeme sipurapala lakandalana suu pyara ramo doko Kamongome yulu piyamo dupwa iki lakandena letamo.
2CO 10:18 Mendeme keyange pilyu lao suu pyapala ketae pyambusi kara nara ingilyamo. Kamongome keyange lao suu pyaramo doko ketae pyambusi kararama ingilyamo.
2CO 11:1 Kopyali pii kuki mende laro ramo dokopa mata joo kaeya namili lao leto.
2CO 11:2 Anatumi nakama poraiyuo suu pyapyamuli pyuo nambame dopako pyuo suu pyao karo. Nakama enda mapwae pepo kareta, akali role pyaa nange akali mendaki nyelana rombo palyisi petenge doko dopale ingyuo karaminyi. Nakama akali nyerami doko Koraisa.
2CO 11:3 Nakamana kyawa sisingi kwaepala Koraisana yulu mondo lao poraiyuo pilyaminyi doko yaki nyesaraminyi lao mona kendalyo. Kaumi enda Ipi panga soo lamaiyuo makande piyamo doko suu pyao nakama makande pira lyakande lao suu pilyu.
2CO 11:4 Akali mende epapala dokopa Yesunya lao pii namwa lenge doko yaki nyepala Yesunya lao pii wakale palyuo lenge ramo doko nakama mee rae maiyuo soo nyilyaminyi. Imambunya piipi waili pii keyange langiyamanopape pii dolapo kame sepala dakepa kyaka wakale imambunya piipi waili pii wakalepe koto nyilyaminyi.
2CO 11:5 Nakamana aposele akali mupwa ingyuo karaminyipa namba isa palya nalyaminyi lao suu pilyu.
2CO 11:6 Namba sipurapala pii mora piso laa nange doŋo pii renge dupwa angingyuo silyu. Doko yuu malu mee rolo langiyama.
2CO 11:7 Anatunya waili pii keyange nakama polo langyuo dokopa namba nakamana yole nyii nayo. Nakama ketae pyambwalana range isa nembo kareyo. Dopa pyuo dokopa kopetame piyusi?
2CO 11:8 Namba nakama pipya role pyao yulu piyunu dokopa Elyambu Pingi wambu wakale dupwame namba yole jiyami. Dupwana yole waa nyepala nakama nyisiyu. Pii doko mee kongwalu leto.
2CO 11:9 Dee nakama pipya role pyao karo kana mone oteyamo dokopa nakama keta kee laa nayo. Kurisene wambu yango yuu Masetonia piso epeyaminyi dupwa bange nyelana suu piyunu dusipa minyakao epeyami. Wamba namba nakama mona kendanyi pyambwa nayo kande doko rengya opetae nakama mona kendanyi pyambwa naro.
2CO 11:10 Koraisana pii kinyi namba keta palamo dokome pii dake elya nao leto. Pii doko yuu Girisi peparae dokona range pyapeta seramopa mee serami lao lalu lao leto.
2CO 11:11 Aki rengendena namba pii dake letose? Nakama mona reta napunu dokona lao letose? Ama daa. Mona angingyuo reto karo doko Anatu baa soo karamo.
2CO 11:12 Aposele menge dusipana yulu pilyaminyi dokona range lakandapala namwa pilyaminyi dokoko pilyamano laa nana lao namba yulu pilyu dakeko mee pela paro ingilyamo.
2CO 11:13 Akali dusipa aposele angi daa. Nakama Anatunya pii rolae laa nange. Namwa Koraisana aposele akali karamano kandalapape lao mee kyambo ingyuo lao karaminyi.
2CO 11:14 Yulu dopale doko silyamano. Sataneme alowa pipala aŋala yanga paupau lenge dopale ingyuo makande pyuo karenge.
2CO 11:15 Dokona lao Satane banya kendemande wambu alowa pipala rolae pingi rengena kendemande dopale ingyuo makande pyuo kararami ramo dokopa namwa mona nembo yamarangwa narama. Lumwa piramo yuu gii dokopa yulu piraminyili pyuo yole nyerami.
2CO 11:16 Pii lapunu doko dee kamba larowale. Mendeme namba kopyali minyuo letene lao suu pyaa nana. Dopa lao suu pyarami ramo doko namba kopyaliyoko lao kando nyerami. Nyeraminyi dokopa nambana yulu dokona lao suu pyao karo kuki range lakando kararo.
2CO 11:17 Namba epapu letono pii doko Kamongome lamaiyalase lapyamo laa nalyo. Namba range lakando kararo ramo doko namba kopyali minyarosa pira.
2CO 11:18 Wambu malu mee isa bangena suu pyapala nakama rangena kingi lakandelyaminyi dokona namba dopako pyuo pelana leto.
2CO 11:19 Nakama kendepuli ingyuo soo giso karaminyi dokona kopyali minyingi akali kando rae mailyaminyi.
2CO 11:20 Akali mendeme nakama iso nembo kararamopa panga soo minyako piramope dereke piramope randa joo elyanyi pyambwaramope doko baa mee kando nyerami ingilyamo.
2CO 11:21 Namwa dupwa inyimungu kareyamano dokome dopale ingyuo paa nayama. Dokona lapu dokopa elya pilyamo. Akali mendeme baa rangena lao lakandalana lara ramo doko namba opetae range poraiyuo lakandaro. Dokona ingyuo namba kopyali pii leto.
2CO 11:22 Aposele angi daa dupwa, Ipuru rara ramo doko namba opetaeko Ipuru rara. Nakama Isaraele rara ramo doko namba opetae dokoreko. Nakama Aporakamena para pyasisi? Namba opetaeko.
2CO 11:23 Nakama Koraisana kendemandese? Namba doko kopyalindelyamo lao seraminyipape namba kendemande mupwa ingyuo karapunupa doloma mee dolapo karaminyi. Doko namba yulu andake pyuo kareyo kande. Yuu malu karapusi palyuope yuu malu kusape nyuope dee namba andarele ingyuo repeta kumaro ingiyamopa nakama randa dopale nyii nayami.
2CO 11:24 Juu wambu dupwame wambu pyalana dokopa marapu dokome pyao karelyaminyipa yuu akalisa rema ipisu mange mendaki karo pingi doko suu pyao namba yuu kingi paki piyami.
2CO 11:25 Orome wambu dupwame yuu rema marapu dokome namba piyami. Dee yuu mendepa kana dupwame piyami. Yuu rema namba ipwa sipunya pao kareyono sipu kapu kyiya. Yuu lama kapu kyiyamopa namba waiya lao nyiyaminyipape repo ingyuo kapu kyiyamo dokopa kukwa yuu gii mendaki korakama yuu gii mendaki doko peparae ipwa dokona palyuo siyu.
2CO 11:26 Namba yuu malu kata papyuo kareyono dokopa ipwa dupwa palipalape waa nyingi akali dupwame Juu wambu yangope Juu daa rara wakale wambu dupwamepe pyalana piyami. Yuu taone dokonape imwana peyo dokopape ipwa sipu dupwanape randa epeyamopa puu angi minya nange dupwame opetaemeko randa jelana pyuo piyaminyi kareyo.
2CO 11:27 Dopa pyuo nambana yulu andake wakasa siya. Yuu malu luu pali nayo. Dee nenge ipwape nanome kumuo kareyo. Yuu malu mee nenge aeya nao anda kara nao komau see nao piyamo kareyo.
2CO 11:28 Yuu malu mee Elyambu Pingi doko randa nyilyaminyi dokome nambana mona yanyi pilyamo. Dee randa wakale lapo epelyamoko.
2CO 11:29 Elyambu Pingi wambu mendeme poraiya nara ramo doko namba dopako piru. Dee mendeme yulu koo pira ramo doko namba mona nembo kararoko.
2CO 11:30 Namba rae maiyuo pyakalyuo pyao laro ramo doko namba angi daaŋa lao dokona ingyuo laro.
2CO 11:31 Namwana Kamongo Yesunya Rakane Anatu, kyambo laa nalene lao silyamo. Banya kingi poo pyasi ingyuo sulu soo sinya.
2CO 11:32 Namba yuu Damasakesa kareyonopa Kiŋi Aretasana gapomane akali dokome akali lapome namba anjirami lao taonena kambu repeta kandaro karena leya.
2CO 11:33 Taonena kana kame malawai lasi dokona windowa mende siyamo dokona namba pisiki minyasi kameya dokona palyapala neta nembeyaminyipa neta puu pao peyo.
2CO 12:1 Rae maiyuo kingi lakandenge yulu dokome mendali nyisa nalyamo. Nyisa napyamopape kata wakale mende see nalyamo dokona mende larowale. Kamongome kombeyame dupwanape pii repa repa pyuo langiyamo dupwape polo langirowale.
2CO 12:2 Kurisene akali mende yake panda ketae dulurena lanyuo peyamo doko silyu. Yuu wamba ee kana akalisa ipisu kisima dokopa piya. (Doko kinyi angi piyase panda kombeyame ingyuo pii repa repa piyase lao see nalyo. Anatu baa iki soo gisilyamo.)
2CO 12:3 Dee kamba leto. Akali doko waiya lao panda ama elyape peya doko silyu. (Dee kambako leto. Doko kinyi angi piyase panda kombeyame ingyuo pii repa repa piyase lao see nalyo. Anatu baa iki soo gisilyamo.)
2CO 12:4 Baa yake panda karo dokopa pii lapo isa wambu dupwame kapa laa naramili dupwa soo nyiya.
2CO 12:5 Dokona lao akali dokona rae maiyuo lakandaro. Namba range lakanda naronopape namba angi daaŋa lao dokona iki laro ingilyamo.
2CO 12:6 Namba rangena kingi lakandalana lao suu pyaro ramo doko pii doko kinyi ingyaramo dokona namba kopyali ingya nara. Wambu dupwame nambana yulu kando pii dokona pyapi pyuo soo pirami dokona iki suu pinyale. Dokona nambana lao suu pyaraminyi doko rolae ingyuo para. Namba rangena kingi lakandaro ramo doko angi ingya nara.
2CO 12:7 Bange keyange wakasa dupwa kandeyono dokome namba moŋokyaŋe see nare lao randa pyuo anga yakane kisiya. Doko Satanena kendemande ingyapyamo dokona namba pyapala moŋokyaŋe see nareŋe lao lasaka pilyamo.
2CO 12:8 Yuu remasa lao Kamongo kando ateŋa lao anga yakane doko neta nyuo nembakare lao piso siyu.
2CO 12:9 Dokopa Yesu baame dopa pyuo yano pyao langyuo, Nambana mona keyange palyuo ipingi renge dokome iki emba kapa pyakara. Emba koo ingyuo papala pinya saka nange dokopa nambame porainya renge dokome emba minyalyingi, leya. Koraisana porainya renge namba keta palira lao namba yakara pipyamopa rae maiyuo pyakalyuo pyao karo.
2CO 12:10 Namba porai napunupape Koraisana reke lao dokome rae maiyuo karo. Koraisana reke lao wambu namba kando giyalya giyana piyaminyipape randa andake wakale wakale nyiyunupape rae maiyuo kararoko. Namba poraiya nange dokopa Kamongona porainya renge dokome paka pyao singi.
2CO 12:11 Nakama kopetame piyaminyisa namba kopyali pii lao karo. Nakama nambana kingi lakandarami ramo doko kapa ingilyamo. Namba mende daa ingyapuli doko nakamana aposele akali wakale dupwa kamame isa pumili.
2CO 12:12 Namba nakama pipya yulu mondo lao pyuo kareyono dupwa kandapala namba aposele akali angi doko range siyami. Yuu gii dokopa yulu mupwa Anatumi namba keta piya dupwa wambu kandapala yamaranguyami. Doko wambumi yulu pii nangende piyamosa yamarangyuo kareyamiko.
2CO 12:13 Elyambu Pingi menge dupwa nyisapala nakama range kame siyusi? Elyambu Pingi wakale dupwame nyisinya leyono dokopa nakama kando laronde kaeyo. Yuu gii dokopako Elyambu Pingi wakale dupwa pinginyili pyuo pii napala nakama iki nyuo kame siyupya. Dopa piiŋi lao suu pyaa nalapape.
2CO 12:14 Dake yuu repo ingyuo nakama kandala epana karo. Eparono dokopa nakamana bange mende nyelana pupi lao kee laa naro. Nakamana kana mone nyipulinya masa nalyo. Nakama namba mona nyilyu. Dokona ingyuo wane wanakepeme endangi rakangepe bange maiyuo rapu pinginde daa. Endangi rakangepena yulu singi.
2CO 12:15 Namba nakama nyisalana rae maiyuo nambana bangepe dee namba range opetae nakama joo otarowale. Nambame nakama mona wakasa ingyuo retelyono dokona nakamame namba mona kuki ingyuo retaramisi?
2CO 12:16 Namba epeyono dokopa randa jii nayoŋo doko silyaminyi. Siminyipape akali mendeme kyambo panga soo minyako piiŋi leya doko akipamo leyase?
2CO 12:17 Aki mendena minyako piyusi? Nambame wai minyingi akali pena leyono dokopa panga soo leyopyase?
2CO 12:18 Nambame Taitesa pisokondali pyuo lao dee Kurisene yango mende role pyao pena leyo. Taitesame nakama minyako piya letamisi? Taitesa nambapa suu pingi mendaki palyuo yulu mendare pyuo pii nangese?
2CO 12:19 Yuu peparae wambu dupwame pii nambwa keta yanda pimwaiyuo lakalyaminyi dokopa nambwa range kyawa minyuo letambinyi lao suu pilyamisi? Dopa pii nalyambano. Anatunya lenge kambunya karo Koraisame pii lalapape lapyamuli pyuo letambano. Yangonemoo nambwa yulu peparae pilyambano dokome nakama nyisalana pilyambano.
2CO 12:20 Namba eparono dokopa nakama kapu kyepala wakale ingyuo kararaminyi lao pakalyo. Dee nakamame namba karareli lao suu pyaraminyi doko kaepala wakale ingyuo karasarono lapala dokona mona kendalyoko. Nakama yango sukusa laiya lao yango palyuo imbwuapala rango nao wambu yango lao nembo pyuo kararami ingilyamo. Nakama kopetame pyuo mata kando lao moŋokyaŋe soo kararami ingilyamo dupwana mona kendo karo.
2CO 12:21 Dee eparono dokopa Anatumi nakamana lenge kambu dokona namba elyanyi pyambwara dokona pakalyo. Dopa suu pyao wambu malumi yulu koo pyuo kepo enda kando lyanolyano pipala mona kapu kyii nayami dupwa nakama kando ee laro, lao suu pilyu.
2CO 13:1 Dake yuu repo pyuo namba kandala eparo ingilyamo. Buku Baepole pii dokona lao dokopa. Akali mendeme mendali kando randa maiyuo lara ramo dokopa wusinisi akali lamape remapeme baa nyiso larami ramo dokopa baa kapa kote lara letamo.
2CO 13:2 Nakama wambo yulu koo piyaminyipape dee menge lapo koo piyaminyi dupwape opetae nambana pii selapape. Pii larono doko wambo yuu gii lapo pyuo epeyono dokopa leyono pii doko nanesa karo dee kamba laro. Namba dee kamba eparono dokopa mendali pyarepala paa nana lao randa mairu.
2CO 13:3 Koraisame namba keta pii lenge dokona dokopa nakama soo gisarami. Soo gisaraminyi doko Koraisame nakama kando angangi kararande daa. Dopa pyuo banya porainya renge lasaka pira.
2CO 13:4 Baa pau lasi ingyuo kareyamopa isa mamandona pyao palyiyaminyipape Anatunya porainya renge dokome Koraisa lete karamo. Baamoo pipya pakao karenge dokome namwa opetaeko pau lasi ingyuo karenge. Anatunya porainya renge namwa keta paliramopa namwa Yesupa role pyao karo nakama rapu pyuo kararama.
2CO 13:5 Nakama Kurisene panda Kurisene angi daa lao range makande pyuo kandalapape. Koraisa Yesu nakamana mona anda palamo doko soo gisilyaminyi. Soo gisa naminde pili doko nakamana Kurisene yulu doko mee ketae pupyali.
2CO 13:6 Namwa isa puu pao paa nalyamano doko nakama soo gisamili.
2CO 13:7 Nakama yulu koo mende pii namili lao Anatu kando ateŋa lakalyamano. Ateŋa lao dokopa namwana yulu mupwa ingyuo pelyamo lao laa nalyamano. Namwa isa puu pao pelyaminyi lao suu pyaminyipape nakama yulu rolae iki pirami dokona reke lao dopa pyuo ateŋa lakalyamano.
2CO 13:8 Namwa Anatunya pii kinyi dokona isa palyalana saka nange. Yulu pilyamano doko Anatunya pii kinyi dokona nyiso pingi.
2CO 13:9 Nakama porai ingyuo karelyaminyipa namwa mee karapala rae maingi. Nakama koo mende pii naraminyipa yapasi ingyuo pisirami lao ateŋa pyakalyamano.
2CO 13:10 Renge dokona lao namba nanesale karo pepa dake pyao jilyu. Dokona namba eparonopa Kamongome namba rapu pyuo iso karare leyamopape poraiyuo pyalana pyuo kara naro. Kamongome namba rapu pyuo iso karare leyamo dokopa kwaenyi pyambwa napala pyuo andanyi pyambwalase langiya.
2CO 13:11 Yangonemoo karalapape. Koo mende pii nao mondo lao karalapape. Nambana pii dake warombo selapa. Nakama mona mendare palyuo dokopa suu pingi mendaki palyuo lambo lao karalapape. Dopa piraminyi dokopa Anatu mona retengepe mona kyuu lao singipi doko baa nakama pipya role pyao karara.
2CO 13:12 Wambu yango dupwa yako lao kingi nyuo karalapape. Anatunya wambu dae karaminyi peparaeme nakama yako letaminyiko.
2CO 13:13 Kamongo Yesu Koraisana mona keyange palyuo ipingi rengepe Anatunya mona retenge rengepe Imambu Poo Pyasinya yalya kando petenge rengepe nakama keta palenale.
GAL 1:1 Namba Pole. Isa akali mendeme namba rombo palyapala nembowape panda akali ketako Anatumi namba aposele ingyuo rombo palyiyande daa. Yesu Koraisapa Rakane Anatu Yesu lopo nyiyamo dolapome rolae namba rombo palyiyambi.
GAL 1:2 Nambamoo akali yango dae role pyao karamano dupwa pipyame pepa dake Galasia Elyambu Pingi dupwana pyao jilyamano.
GAL 1:3 Namwana Rakane Anatupa Kamongo Yesu Koraisapana mona kyuu lao singi rengepe mona keyange palyuo ipingi rengepe nakama keta palena.
GAL 1:4 Koraisa namwana koo dupwana lao Rakane Anatunya suu pingi doko moko minyuo range kumuo palipala yulu koo dakepa silyamo dupwana lao namwa kiiramo nyiya.
GAL 1:5 Dokona lao Anatunya kingi doko lakando palu palena, doko kinyi.
GAL 1:6 Nakamba Koraisana mona keyange palyuo ipingi dokome kyakale leyamo doo waiyako lao yaki nyepala waili pii wakale mendenako pumisa namba kando yamarangulyu.
GAL 1:7 Waili pii doko lamande daa. Dokona akali lapome Koraisana waili pii doko alowa pelana pii mendena wakale kyawa sisingi bolombalo lanyi nembamisa dokona leto.
GAL 1:8 Namwa rangemepe panda aŋala yake panda karenge dupwamepe waili pii wambo mana langiyama doko yaki nyepala waili pii wakale polo langirama ramo doko baa Satanena panda dokona para ingilyamo.
GAL 1:9 Namwa wamba lao kaenge dokona kamba leto. Nakama wambo waili pii soo nyiyami doko kaepala wakale mendeko langiramo akali doko Satanena panda para ingilyamo.
GAL 1:10 Pii dae lapu doko akali dupwame namba lakandena lao lapusi? Doko daa. Anatu rae mainyi pyambuo leto. Wambu peparae nambana kingi lena lao pilyusi? Dopa pinya lao lao karapuli doko Koraisana kendemande angi ingya napuli.
GAL 1:11 Yangonemoo pii dake langirowale selapa. Waili pii lao karo doko akalimi wasa nayami.
GAL 1:12 Akali mendali keta soo nyuope dee mendeme namba mana langyuo pii naya. Pii nayamopape Yesu Koraisa baa rangeme waili pii namba nolakao langyuo jiya.
GAL 1:13 Namba wambo Juu wambunya misi yulu dokona sukusa karo yulu kopetame piyu dokona langiyaminyi siyami. Doko anjiki pii nao Anatunya Elyambu Pinginya wambu randa maiyuo kokwa selana suu pyao piyu.
GAL 1:14 Namba Kurisene ingyapa nayonopa tembole anda yulu mana nyuo dokopa Juu wane yango andarele dupwa nyuo isa nembowale mana nyuo kareyo. Namwana rora ambasupinya yulu palenge dupwana suu pyale pyale kareyo.
GAL 1:15 Kareyonopape Anatu mona keyange palyuo ipyapala namba ene manjipa nayami dokopa baame namba rombo palyuo banya yulu dokona pyakare lao kyakale lao kaeyapya.
GAL 1:16 Baame banya Ikinyingi namba keta panaronopa waili pii keyange doko Juu daa rara wakale dupwa lamairi lao suu piyapya dokona nambame wambu mendali keta apa pyuo piru lao piso sela paa nayo.
GAL 1:17 Dopa pyuo paa naoko dee wambo aposele ingiyami dupwa Jerusaleme kareyami dokona kandala paa nayoko. Kaepala yuu Arapia waiya lao papala yuu Damasakesa dokona dee lalyuo epeyo.
GAL 1:18 Enakana kana rema epo papeyamo dokopa Jerusaleme Pita kareyamo dokona papala lapo piso siyu. Siyunupa koro lama role pyao kareyamba.
GAL 1:19 Dokopa namba Kamongona yangonge Jemesa iki kandeyonopape aposele menge dupwa kanda nayo.
GAL 1:20 Pii pyao retelyo dake kinyi. Kyambo laa nalyo doko Anatu soo karamo.
GAL 1:21 Enakana yuu Siria Silisiapana liti dolapona peyo.
GAL 1:22 Yuu gii dusipana Jutia Kurisene wambu dupwame namba soo pakana palyapa nayami.
GAL 1:23 Wakale dupwame nambana yulu dupwa polo lamaiyaminyi lasi pii siyami. Nakamame lao dokopa, Akalinde namwa randa jiya kande dokome epapu waili pii wambo kokwa selana piyamo dokoko minyuo lao karamo leyami.
GAL 1:24 Leyaminyi sepala nambana yulu dokona kando Anatu lakando kareyami.
GAL 2:1 Enakana ee kana akalisa dee ipisu kisima epo papeyamopa Jerusaleme Banapasapa role pyao lambuo peyamba. Dokopa nambame Taitesa opetae lanyuo peyo.
GAL 2:2 Namba dokona mee peyonde daa. Anatumi pupili lao langiyasa peyo. Doko namba Elyambu Pinginya mupwa dupwamoo pipya wato leyami dokona nambame waili pii Juu daa rara wakale dupwa polo lamaiyuŋu lao lamaiyu. Nambana yulu dakepape dee wambo piyunupape dupwana mee ingyuo paa nana lao suu pyao peyo.
GAL 2:3 Nambana akali yango Taitesa baa Giriki rara ingiyamopape yanenge awali lao pyakepinya lao laa nayami.
GAL 2:4 Laa nayaminyipape akali lapo namwana wato lenge dokona panga soo mee yangonge ingyuo kolalyuo epeyami dupwame baa yanenge pyakepakaminya leyami. Akali dupwame namwa pipya karo Yesu Koraisana arapunya namwa karenge dokome apa pyuo lao lowana kiiramo pasi karamano dokona maa palyuo kandala epeyami. Nakamame namwa lowa malu dupwana dee puu maiyuo bwuakarami lao suu piyami.
GAL 2:5 Nakama Kurisene dupwana lao suu pyapala waili pii dokona renge keyange dupwa isa pakami nana lao nakambana pii doko ama see nayama.
GAL 2:6 Wato lao kareyama dokona akali mupwa dupwame namba waili pii lao kareyo dokona suu pingi enenge mende langya nayami. (Nakama kingi londapala lao kareyaminyipape namba dokona mende suu pyaa nayo. Anatumi wambu kuki andakepe lao mende suu pyaa nange kandale.)
GAL 2:7 Nakama Anatumi Pita Juu wambu dupwa keta waili pii lamaira lao mapanyi pyambuyamo doko suu pyao namba Juu daa rara wakale dupwa lamairi lao mapanyi peyalyamo lao kandeyami.
GAL 2:8 Anatunya porainya renge dokome Pita Juu wambu pipya yulu pinya lao aposele inginyi pyambuyamo dopako pyuo namba Juu daa rara wakale dupwana lao aposele inginyi pyambuya.
GAL 2:9 Jemesa Pita Jonemoo Elyambu Pinginya akali andake dusipame Anatumi yulu mupwa dake namba keta jiyalyamo lao siyami. Sepala namba Banapasapa yako lao kingi nyiyami. Namwa peparae yulu mendakinya pyuo nakama doloma Juu wambu pii lamairaminyipa nambwa rara wakale dupwa lamairama dupwana sepala kapa lao kaeyama.
GAL 2:10 Yulu mendaki iki jiyami doko wambu pendewa dupwa nyiso karalapape lao leyami. Dopa leyamioko doŋo namba dokonako suu pyao yulu poraiyuo kaeyo pyuo kareyo.
GAL 2:11 Pita yuu Andioko epeyamo dokopa nambame wambu kareyami dokona baa kyai pyuo piyamo dokona pyalana pyuo rolo lamaiyu.
GAL 2:12 Akali lapo Jemesame pena leya dusipa epapa nayaminyi dokopa Pita baa akali wakale yanenge kaloma nange dupwa pipya nenge nao peteya. Dee akali yanenge pyakepenge mawa pii dokona porai minyingi dupwa epapeyaminyi dokopa Pita pakapala rara wakale pipya yaki nyuo kaeyo nenge role pyao naa nao peteya.
GAL 2:13 Dokopa Juu yango lapo opetaeko pakapala Pita peyamo kata dokonako peyami. Dopa pyuo yambe pyao piyami kata dokona Banapasa opetae kaki rambe rambe palyuo panya piya.
GAL 2:14 Dopa piyamo dokona nambame kandapala waili pii rolae dokona kata angi paa nayami dokona lao wambunya lenge kambu dokona Pita kando dopa lao, Emba Juu angi kandape. Juu ingyuo kareeneko doŋo palyuo karo pipinyi dupwame Juu ingya napala rara wakale karo palyuo pilyaminyi dokonako mende ingilyamo. Dokome apa pyuo menge akali dupwa Juu inginya lao letese? lamaiyu.
GAL 2:15 Kinyi namwa Juu rara dokona mandeyaminyi karamano. Rara menge dupwa yulu koo paleta mandeyami dopale ingyuo kara nalyamano.
GAL 2:16 Akali Yesu Koraisa kapa ingingi lao suu pingi dupwa Anatupa rolae ingyuo penge doko silyamano. Lowana moko minyingi ramo dokome rolae ingyuo paa nange. Namwa opetae Yesu Koraisa mona reto baa kapa ingingi lao suu piyamanopa dokome namwa Anatupa rolae ingyuo peyama. Lowa iki moko minyiyamali dokopa Anatupa rolae ingyuo paa nayamali. Mendeme Lowa letamuli pyuo doko iki moko minyuo pira ramo doko Anatupa rolae ingyuo paa nara.
GAL 2:17 Namwa rara menge yulu koo pingi dopale pipala Anatu namwana yulu koo dupwa kame sakana lao Koraisa dokona repeta eparama ramo doko Koraisame namwana koo dupwa kando rae maiyuo kararasa pirase? Ama daa.
GAL 2:18 Namba Lowa wambarae kaeyapenge leyo dupwa deeko nyepala pyuo karo laro ramo doko nambame Lowa kokwa sinyi nembelene lao panara.
GAL 2:19 Lowa dokome namba mata rukyu piyamo kumasi ingyuo kareyo. Lowa rangeme dopa pyuo namba pyao kumuyamopa epapu Anatunya lete dokona karalu kararo. Koraisapa isa mamandona kumasi paleyo dokona epapu namba range angi kara nalyo. Koraisa banya lete renge doko namba keta palamo. Epapu yulu pyuo karo dupwa Anatunya Ikinyingi namba mona retapala kumuyamo doko baa kapa ingingi lao suu pyao pyuo karapusa pilyamoko. Anatunya mona keyange palyuo ipingi doko mata maiyuo nemba nalyo. Akali dupwa Lowa dokome Anatupa rolae ingyuo peyamili doko Koraisa baa mee kumuo paleyali.
GAL 3:1 Nakamba Galasia wambu kopyali ingyuo pelyaminyi. Apimi nakama panga soo langipyasa ralo karamipi? Yesu Koraisa isa mamandona kumuyamo dokona lao rolo langiyama renge dupwa kandapa nayamisi?
GAL 3:2 Nakama pii mendakindena isingi langilapape. Nakama Anatunya Imambu nyiyami kande doko apa pipala nyiyamipi? Lowa kata dokona minyapala nyiyamipi panda nakama waili pii doko soo kapa ingingi lao manjo nyepala dokona Imambu nyiyamipi?
GAL 3:3 Apa pipala nakama kopyali ingyalu ingyuo ingilyamipi? Nakama Anatunya Imambunya yulu dokona kanda soo piyami kande doko, epapu nakama rangeme yanengena yulu wambarae dokome ayemba palyuo pyuo otalana pilyamisi?
GAL 3:4 Imambunya yulu andake kandeyami dupwa mee ingyuo pelyase? Apa pyuo isa parase?
GAL 3:5 Anatumi Imambu jepala wambumi yulu pii nange dupwa nakama keta piya doko Lowana yulu minyuo karaminyi lapala dokona piyase? Panda waili pii kinyi lao soo nyiyami dokona Anatumi Imambu joo yulu andake piyase?
GAL 3:6 Buku Baepole lao dokopa, Akali Aporakame Anatu kapa ingingi lao suu piyamosa Anatumi baa akali rolae lao kandeyapya.
GAL 3:7 Dokona ingyuo akali dupwa Anatu kapa ingingi lao suu pyaraminyi dupwa Aporakamena wai pyao nyisi ingyuo paramisa pira.
GAL 3:8 Juu daa rara wakale dupwa Anatu mona maipa nayami dokopa nakama Anatu kapa ingingi lao suu pyapala rolo parami. Doko Anatumi Aporakame keta wambo ingyuo waili pii keyange lamaipala lao, Embapa lapolapo lao wambu yuu muu peparae elyape keta pisirami Baepole leya.
GAL 3:9 Aporakame Anatu kapa ingingi lao suu piyamosa elyape keta peya. Dokonako ingyuo mendeme Anatu kapa ingingi lao suu pyao kararami dupwa baa piyamo dopako pyuo elyape ketako palyuo parami.
GAL 3:10 Mosesena Lowa dupwa kapa minyarama lao suu pilyaminyi dupwa koo keta karamisa pilyamo. Dokona ingyuo Baepolena pii mende pyasi palamo. Doko mawa pii malu Lowa buku dokona pyasi palamo dupwa peparae kapa minya narami dupwa koo keta parami letamo.
GAL 3:11 Wambu mende Lowa dokome Anatuya lenge kambu dokona rolo paa nara doko angi silyamano. Baepolena lao dokopa, Mendali Anatu baa kapa ingingi lao suu pyara dokome Anatupa rolae ingyuo karara dokome baa lete para ingilyamo letamo.
GAL 3:12 Lowa minyingi akalimi Anatu kapa ingingi lao suu pingi dokona palyuo suu pyaa nange Dokona ingyuo buku Baepole dokona lao, Akalimi Lowa palamuli pyuo karara doko Lowa dokona yeelyo sisu lao karara ingilyamo letamo.
GAL 3:13 Koraisame namwana lao randa nyakapala Lowa namwa randa jingi dokona kiiramo nyiya. Buku Baepole dokona dopa lao letamo. Akali isa mamandona kumuo penge doko kumungi renge baa keta palamo letamo.
GAL 3:14 Anatumi Aporakame dokona pii lalu lao lamaiyamo renge keyange dupwa Juu daa rara wakale dupwa opetaena palenale lao, Koraisa Yesumi koo keta palyuo isa mamandona kumuo peya. Dokome namwa Anatu kapa ingingi lao suu pilyamano dupwa Imambu Poo Pyasi kando nyerama ingilyamo.
GAL 3:15 Yangonemoo namwana yulu palenge dupwana makande minyuo langirowale. Doko akali lamame yulu mende pirambaŋa lao lao kana minyarambinyi dokopa mendeme alowa pyuope dee konda pyuo lakamyuope pii nara ingilyamo.
GAL 3:16 Anatumi Aporakame banya wane dokopa elyape keta pyambwaro lao kana minyuo leya. Doko para pyao nyeramo dupwa peparae suu pyao laa naya. Banya wane mendaki leyamo doko Koraisa dokona suu pyao leyasa piya.
GAL 3:17 Pii dokona renge polo langirowale. Anatumi kana minyapala lalu lao leto lao lao oteya. Enakana ee kana malu 430 epo papeyamopa Lowa pyaka siya. Pyaka siyamo dokome Anatu pirunya lao lao kana minyuo leyamo doko Lowa dokome isa nembara ingya nange.
GAL 3:18 Lowa dokome moyange bange doko kapa nyingi pili doko pii lao kana minyingi kata dokona moyange bange nyii napengele. Dopa pyuo nyingiko doŋo Anatumi banya moyange bange Aporakame mairu lao lalu lao leya.
GAL 3:19 Akipamo Lowa doko wasiyase? Koo dupwa dokoŋo lao lasaka pyuo seramopa pao Aporakamena para pyasinde eparaŋa lao lalu lao leyamo dokona liti piraŋa lao maiya. Lowa doko aŋalana kambu dupwana epapala kanya akali ingyuo kareyamo doko baa ketape Anatumi maiya.
GAL 3:20 Dopa pipyamopape wambu mendaki iki karara ramo dokona kanya karo akali mendeme yulu pira ingya nalyamo. Dokona ingyuo Anatu baako iki yeelyo karenge.
GAL 3:21 Pii doko Anatunya lalu lao lenge pii dokona Lowa dokome yanda pimwailyamo lao letape? Doko daa. Wambu lete maingi lowa wasiyali doko Anatumi lowa dokome wambu rolae inginya leyali.
GAL 3:22 Baepole dokona lao yuu muu dupwana peparae koo renge dokome anda imwa minyuo siya letamo. Dopa piyamo dokona lao Yesu Koraisa kapa ingingi lao suu pyarami wambu keta Anatunya moyange bange nyerami lao kinyi lalu lao leya. Doko kapa ingingi lao suu pyarami renge dokona nyerami.
GAL 3:23 Namwa Yesu kapa ingingi lao suu pyapa nayama dokopa Lowa dokome namwa peparae anjinyi palyiya. Yesu epapala baa kapa ingingi lao suu piyama gii dokopa moko peyama doko paneya.
GAL 3:24 Lowa dokome namwa reto rapu pyuo mana lenge ingyuo kareyamopa Koraisa epeyamo dokopana Anatu kapa ingingi lao siyama dokopa Anatupa namwa rolae ingyuo rali piya.
GAL 3:25 Epapu Yesu kapa ingingi lao suu pingi yuu gii pyaka sipyamopa Lowame isapyamo kara nalyamano.
GAL 3:26 Yesu kapa ingingi lao suu pingi dokome nakama peparae Anatunya ikinyingi ingyuo Koraisa Yesunya arapunya karaminyi.
GAL 3:27 Nakamame bapitisimo nyepala Yesunya arapunya karo Koraisa lete karenge doko nakama keta nyuo maralyiyami kande.
GAL 3:28 Dokona lao Juu rara panda Giriki rara, karapusi karenge akalipi panda kiiramo pasi wambupi dee enda panda akali dupwa mendepali daa. Koraisa Yesu dokona nakama peparae mendare ingyuo pelyamo.
GAL 3:29 Nakama Koraisana ramo doko Anatumi Aporakameme para pyaramo dupwa nyeramiŋi lao lalu lao leyamo dokona nyerami ingilyamo.
GAL 4:1 Pii mende palamo doko, wane dokome rakangena moyange dupwa nyera doko bange peparae banya ingyuo singi. Silyamopape andapa nalyamo dokome baa rakangena kendemande akali dopale ingyuo pyuo karenge.
GAL 4:2 Wane andapa nalyamo dokopa kendemande akali lapome baa rapu pyuo banya yulu isakamyuo karenge. Rakangeme baa ando kaelyamo lao suu pyapala dokopa kendemande akali dusipa kaena lenge.
GAL 4:3 Pii doko namwa dopale lao kongwalu palamo. Namwa Anatunya yulu dokona soo gisapa nao kareyama dokopa imambu koo dupwana karapusi akali ingyuo kareyama.
GAL 4:4 Dopa piyamanopape yuu gii angi rolae epeya dokopa Anatumi banya Ikinyingi doko epena leya. Baa isa wane ingyuo Juu wambunya Lowa doko moko minyuo pyuo kareya.
GAL 4:5 Baa Lowame puu maisi peteyami dupwa moko nyepala namwa Anatunya wane angingyuo parami lao epeya.
GAL 4:6 Epapu nakama banya Ikinyingi ingilyamo dokona lao Anatumi banya Ikinyinginya Imambu, Rakane nambana rakane lenge doko nakamana mona dokona palena leya.
GAL 4:7 Dokona lao emba mee yulu akali ingilyande daa. Emba banya ikinyingi ingyuo pelyamo. Anatumi emba banya wane ingyuo manjo nyisi dokona lao banya bange wane maingi dokore dupwa emba keta palira ingilyamo.
GAL 4:8 Wambo nakama Anatu soo gisa napala anatu angi daa mee imambu wakale dupwana karapusi wambu ingyuo pyuo kareyamipya.
GAL 4:9 Epapu nakama Anatu soo gisilyaminyi. Dee Anatumi nakama soo gisilyamoko larowale. Dopa pilyamo dokona akipamo nakama dee isa yuunya imambu koo mee nakama karapusi piyamo kareyami dupwa deeko koto pelyamisi? Akipamo nakama imambu koona dee karapusi ingyalana letamisi?
GAL 4:10 Nakama yuu gii lapope kana enenge lapope dee ee kana enenge dokonape imambu koona yulu dokona suu pyao lao karaminyi.
GAL 4:11 Dokona namba yulu andake pyuo pii langiyunu dupwa mee ingyuo pasaramo lao pakalyo.
GAL 4:12 O yangonemoo nakama namba dopale ingyuo pilyunuli pyuo pyuo karalapape. Namba nakama dokona mendeke ingyuo karo. Nakamame namba keta koo mende piyaminde daa.
GAL 4:13 Nakama waili pii wambo nambame langiyu kande suu pyao karalapape. Anga piyamosa nakamana yuu dokona mee karo dokopa waili pii keyange wambo langiyu kande.
GAL 4:14 Kinyi nambana yongona poraiya nayamo dokome nakama mata kata nembope nakama namba kata pao mata joo maka nayami. Dopa pipala nakamame namba Anatunya aŋala ingyuo karope dee Koraisa Yesu kando yako lele laope kando nyiyami.
GAL 4:15 Nakama wamba raeme kumuyami kande. Doko apa pipyase? Nakama rae koo maipala rangena lenge dupwa namba lukuo jerami mona paleya kande.
GAL 4:16 Dopa pyuo piyami kandeyo doko dakepa pii kinyi rolae dupwa lao karo dokona namba nakama pipya yanda pimwai ingyuo karope?
GAL 4:17 Wambu lapo dupwame nakama mona maiyuo nyiso karalana lao karaminyipape yulu koo dupwana nakama makande pyuo nyelana pilyaminyi. Nakamba nambamoo pipya role pyao kara nalapale lao nyuo rekya lanyi nembamisa pilyaminyi. Nakamba mona serami dokona suu pyao nakama mona seramili lao pilyaminyi.
GAL 4:18 Wambu dupwame nyisalana lao suu pyao nakama keta yulu keyange pimwali lao suu pyarami ramo doko keyange. Yuu peparaena dopaleko ingyuo para doko keyange ingyara.
GAL 4:19 Namba role pyao karo dokopa iki dopale pirami ramo doko kapa inya nara. Nambame nakama nambana wane ingyuo mona retenge. Nambame nakamana lao endame wane manjinya mata pingi dopale ingyuo randa nyuo Koraisa karenge doko isa komba pyao nakama dokona maralyaramo dokona kaero.
GAL 4:20 Nakamana lao kata wakale wapuo suu pyaro lapala nakama karaminyi dokona role pyao karapuli yaka. Nakamana lao suu pyao mona kenda andake pilyamo.
GAL 4:21 Wambu Lowa moko minyalana pilyaminyi dupwa keta pii mende piso serowale. Lowa letamo doko rolo see nalyamipi?
GAL 4:22 Lowa buku dokona Aporakamena wane lama kareyambi letamo. Wane mende kendemande endame manjo mende mee enda angi manjo piya.
GAL 4:23 Karapusi enda dokona wane baa mee mandengenyili pyuo mandeya. Dopa pyuo mandeyamopa enda angi dokome wane doko Anatunya lao kana minyingi pii dokona kapa wai pyao mandeyo.
GAL 4:24 Doko kongwalu ingyuo mana leya doko silyamano. Enda dolapo nakamba kana minyuo lenge pii lama dopale ingilyamo lao kongwalu palamo. Dokona mende Eka lenge doko yuu kyau Sainai dopalende rangena wane karapusi ingyuo pelyaminyi.
GAL 4:25 Yuu kyau Sainai yuu Arapia dokona silyamo doko anda repe repe pyuo karenge Jerusaleme lenge dopale ingyuo siya. Yuu Jerusaleme dee wambu dokona palengepe lowana karapusi ingyuo palaminyi.
GAL 4:26 Dokona yake panda Jerusaleme doko mee karapusi pali napala namwana endangi angingyuo pelyamo.
GAL 4:27 Baepole dokona lao. Ingi poraingi enda dupwa rae maiyalapape. Wane mata pilyamo kanda nange dupwa mona seramopa yau pyanyi minyao lao rae maiyalapape. Enda akalingimi yaki nyuo peyamopa baa wane malu manjiramopa akali role pingi dokome wane mendasipa iki manjira.
GAL 4:28 Yangonemoo Anatumi pii kinyi lalu lao leyamo dokome Aisake baa banya wane ingyuo kareya doko suu pyao Anatunya pii dokome nakama opetae banya wane angingyuo pelyaminyi.
GAL 4:29 Yuu gii dokopa mee wane mandengenyili pyuo mandeyami dokome wane Anatunya Imambunya yulu palyuo manjo nyinya leyamo doko randa maiya. Dakepa yulu doko silyamo.
GAL 4:30 Dokona ingyuo buku Baepole dokona apa letase? Kendemande enda doko ikinyingipa neta nembape letamo. Kendemande endana wane dupwame rakangena moyange bange dupwa enda angi dokona wane dokome dolo role pyao mokwa soo nyii narambi letamo.
GAL 4:31 Yangonemoo dokona lao namwa kendemande endana wane karamande daa. Namwa enda angi dokona wane ingyuo karamano.
GAL 5:1 Koraisa nyisipyamopa namwa kiiramo nyisi karamano dokopa kiiramo nyisi ingyuo karo dee kambako Satanena kendemande anjisi ingyuo kara nalapape.
GAL 5:2 Namba Poleme pii dake selapa lao langilyu. Nakama yanenge pyakepenge yulu dokona mee pirama lao suu pyarami ramo dokome Koraisa mee inginyi nembaramisa pira.
GAL 5:3 Pii langyalono dokona dee lakonda pyuo lapuna pilyamo. Mendeme yanenge kalomo piramo dokome Lowa peparae minyilyu lao pirasa pira.
GAL 5:4 Nakama Lowa minyapala Anatupa rolae karamwali lao suu pilyaminyi dupwa Koraisana arapu dokona kara narami. Anatunya mona keyange palyuo ipingi renge doko nakama keta pali nara.
GAL 5:5 Namwa baa kapa ingingi lao suu pilyamano kata dokona Anatunya Imambu doko porayapala namwa nyuo Anatupa rolaraŋa dokona lao mona kare kare iso karamano.
GAL 5:6 Namwa Koraisa Yesupa pako kararama doko yanenge kalomengepe kaloma nangepe dokona pii mende pali nalyamo. Doko Yesu kapa ingingi lao suu pyapala wambu yango mona reto nyisarama yulu doko iki angi ingyuo pelyamo.
GAL 5:7 Wamba nakama rolae piyami kande doko dee apimi nakama kinyi doko moko minyuo pii nalapa lao ralinyi nembeyape? Apa pyuo baame nakama anamasi minyiyase?
GAL 5:8 Anatumi nakama kyakale lao karenge dokome dopa pyuo piyande daa.
GAL 5:9 Nenge isi kuki paliramopa borete malu dupwa andanyi pyambungi pii doko lenge kandale.
GAL 5:10 Pii doko kongwalu ingyuo lapunupape nakama peparae kwao parami ingilyamo lao suu pyaa nalyo. Nakama nambamoo pipya Kamongopa pako karamano doko sepala kata wakale mendena kando nyuo paa narami lao silyu. Dokona akali mendeme nakama sukusa karo randa jilyamo doko Anatu keta baa randa nyeramo lao silyuko.
GAL 5:11 Yangonemoo yanenge kalomanyi nembalapape lao karapuli doko namba randa jilyaminyi doko kaeya namili. Namba yanenge kalomenge yulu doko kapa pirami ingilyamo lenge pili doko Koraisana isa mamandona waili pii doko mee lalale lao randa jii nao kaemili.
GAL 5:12 Akali nakama kyawa sisingi bolombalo lanyi nembakalana yanenge iki kalomo lao karaminyi. Dupwa nakamana lakapa angi doko rombanyi nembapala kaeya nana pilyaminyi.
GAL 5:13 Yangonemoo nakama kiiramo nyisi kararami lao kyakale leya. Dokome nakama kiiramo nyisi karamano lao suu pyapala yanengena pundange yulu dupwa mee pirama lao suu pyaa nalapape. Suu pingi dopale yaki nyepala wambu yango mona retenge kata dokome yango sukusa nyiso pyuo kararami.
GAL 5:14 Dokona lao Lowa doloma peparaena mendakimi pinginya ingyuo minyaro karamo. Doko emba range mona reto karene doko suu pyao wambu yango mona reto karape letamo.
GAL 5:15 Doko kaepala mena rae lenge ingyo yango mendali randa maiyuo kareyami kande doko range yango sukusa kokwa seramisa pira lyakande. Yulu dokore doko waso karalapape.
GAL 5:16 Pii renge dakenasa leto. Nakamana yanengena yulu doko kaepala Imambunya kata dokona papyuo karalapape.
GAL 5:17 Suu pingi wambarae dokome Imambunya yulu nyuo isa palyuo pinya pipyamopa Imambunya yulu dokome isingi dopako pipyamo sisi nyuo pilyambinyi.
GAL 5:18 Imambumi nakama kata lasaka pira ramo doko Lowana kendemande yulu pii naramisa pira.
GAL 5:19 Isa wambunya yulu palenge dupwa mee pano silyamo. Kepo pingipi pii koo lengepe kanda lyanolyano pyuo karengepe dopale ingyuo pelyamo.
GAL 5:20 Pipu lao dee mee bange dupwa kando kingi lengepe wambu yanda pimwai inginyi pyambuo yango pyalana pyuo yango palyuo karaminyi. Mendena wakale dupwa kanda lyanolyano pyakamyuo karenge. Rara lili pilya pyana pyuo karo pilyaminyi.
GAL 5:21 Sisu nyuo suu pingi kwaelyamopa biya nao kyawa sisingi bolombalo lapala kepo pyuo kenane koo pyao yulu koo dopale dupwanako palyuo pingi. Dupwana lao nambame nakama wamba langiyunuli pyuoko langilyu. Dokona wambu yulu dopale pirami dupwame Anatunya isingi panda dorena kando nyii narami.
GAL 5:22 Dopa pipyamopape Anatunya Imambu yulu keyange paleta epenge. Mona retengepe rae maingipi mona kyuu lao singipi mee elya kalo karengepe anjiki pingipi keyange renge palengepe mondo lao pyuo karengepe dusipa baa keta ando epenge.
GAL 5:23 Dee range inyimungu suu pingi range kame pyuo minyuo pirami dopale ando epengeko. Yulu dusipana lowa mende see nalyamo.
GAL 5:24 Koraisa Yesunya wambu dupwame pundange yulupi yanengena yulu wambarae dupwa peparaepe yaki nyuo kaeramisa pira.
GAL 5:25 Imambumi namwa lete karenge renge jiyamosa namwa banya yulu palengenyili pyuo pyuo kararama.
GAL 5:26 Namwa rangena kingi ketae pyambwa napala wambu yango kata panyi sera nao yango palyuo sisu nyuo kara nalapape.
GAL 6:1 Yangonemoo nakama Imambunya yulu rolae pyuo karaminyi dupwame mendali koo pira ramo doko nyiso lao rolarami. Dopa pyuo lao dokopa anjiki pyuo lao rolarami. Nakama range opetae isa pasarami kando lao karalapape.
GAL 6:2 Yango mendena kendange dupwa nakamame nyuo sakamyuo karalapape. Dopa pyuo piraminyi dokomeko Koraisana lowa andake doko minyaramisa pira.
GAL 6:3 Akali kuki mendeme baa range wakasa ingyuonde karo lao masara ramo doko range kopyali minyinyi nembarasa pira.
GAL 6:4 Nakama rangena yulu dokona apa pyuo pilyusi lao range kando pyuo karalapape. Rolae ingyuo pelyamo lao kandapala doko keyange lao sepala baa rae maira. Akali mendena yulu koo doko kandapala yulu rolae suu pyapala range ketae nembo kara nalapape.
GAL 6:5 Nakama rangeme rangena kenda wakale wakale dupwa soo pupwape.
GAL 6:6 Akali Anatunya pii mana nyingi dokome banya nengepe bange keyangepe dupwa pii lamaira akali doko baa nyiso mainya.
GAL 6:7 Rangeme range kando panga soo kyambo laa nalapape. Mendeme Anatu kando panga soo kyambo laraminyi doko Anatu baa sera ingya nange. Nenge rara mendaki wara pingi ramo doko rara dokoreko lyingi kandale.
GAL 6:8 Yanengena nyipuli lao suu pingi dupwa jingi ingyuo wara pyuo kararamo doko imambunya kumungi renge doko manjo nyepala para. Imambunya yuu dokona suu pyao wara pira ramo dokopa letena renge palenge jingi doko lyuo nyera.
GAL 6:9 Dokona lao yulu keyange dupwa pinya maka namanale. Kaeya nao pyuoko kararama ramo doko yuu gii eparamo dokopa nenge angi lyuo narama.
GAL 6:10 Dokona lao namwana yulu keyange piramali dupwa seramo kandarama dokopa pimanale. Kurisene yango dupwa pipya angingyuo dopa pyuo kaeya nao pimanaleko.
GAL 6:11 Nambana kingi dokome apa pyuo pepa pyao pingi andake pyao retapipi lao kandalapape.
GAL 6:12 Doko wambumi isa bange yanengena pelanyi nembo ketae pyambuo wambu menge dupwa kandena lao pingi dupwame nakama yanenge kalomo pimili lao letaminyi. Koraisana isa mamandona reke lao randa namanale lao kalomenge yulu dokona pimili lao lamisa pilyamo.
GAL 6:13 Dopa pipyamopape kalomenge yulu pimi dupwameko Lowa dokona range minya nalyaminyi. Nakama kalomo pirami ramo doko nakamame namwana pii kamba laa nao kalomenge yulu dokona epakalyaminyi lao mangalyarami.
GAL 6:14 Nambame namwana Kamongo Yesu Koraisana isa mamandona iki lao enokwanyi nembo laro ingilyamo. Yesunya isa mamando dokome isa yuunya suu pingi nambana mona dokona siyamo doko kumasinyi nembeya. Wambunya lenge kambu dokona yuunya yulu dupwa namba keta lenge rao see nalyamo.
GAL 6:15 Yanenge dokona kalomasipi panda mee karenge dolapo mupwa daa. Namwa enenge ingyuo kararama dokoko angingyuo pelyamo.
GAL 6:16 Wambu lete penge kata dokona kando nyilyaminyi dupwa keta mona kyuu lao singi rengepe sakao nyiso karenge rengepe nakama keta palena. Nakama keta palyuope Anatunya wambu doloma pipya opetaeko keta palena leto.
GAL 6:17 Mendeme dee kamba namba randa jii nana. Nambana yongo dokona mumbwa palamo dupwa kandarami dokome namba Yesunya kendemande karo doko panelyamo.
GAL 6:18 Nambana yangonemoo namwana Kamongo Yesu Koraisana mona keyange palyuo ipingi renge doko nakama keta palena, doko kinyi.
EPH 1:1 Anatumi masiyamuli pyuo namba Pole Koraisa Yesunya aposele ingyuo karo. Anatunya yapasi wambu Koraisa Yesunya lao suu pyao minyuo Epesasa karaminyi dupwa keta pepa dake pyao peyakalyo.
EPH 1:2 Namwana Rakane Anatu Kamongo Yesu Koraisapana mona keyange palyuo ipingi rengepe mona kyuu lao singi rengepe nakama keta sinya lao leto.
EPH 1:3 Kamongo Yesu Koraisana Rakange Anatu ketae pyambuo karena. Baame namwa yake panda dorena imambunya yulu keyange wakasa palenge dupwa Koraisa keta namwa jiya.
EPH 1:4 Anatumi yuu muu dupwa ene wasapa nao karo dokopa Koraisa role pyao kararama lao namwa rombo palyiya. Dokome namwa koo mende pali nao yapasi inginyi pyambwara ingilyamo. Anatumi renge kuiyuo mona reto karapala
EPH 1:5 Yesu Koraisa keta namwa banya rangena ikinyingi ingyuo manjo nyeroŋo lao mona nyepala suu pyao kaeyapya.
EPH 1:6 Anatumi mona keyange palyapala banya Ikinyingi mona retenge doko namwa mee jiya dokona lao banya kingi lakandamana.
EPH 1:7 Koraisana ranjama kulimbuo peyamo dokome namwa kiiramo nyisi karamano. Karamwanopa baa keta namwana koo dupwa kame sakapa pingi. Banya mona keyange palyuo ipingi doko andeyamosa namwa keta kakana pyuo jiya.
EPH 1:9 Baa singi dokome sepala soo giso pyuo karenge dokome Koraisa keta mende piru lao masiyamuli pyuo renge yalu pisi doko nyuo namwa keta nolako piya.
EPH 1:10 Yuu gii pyaka separamo dokopa Anatumi banya wasisi peparae yake pandape isa pandape nyuo mendakyapala dokona Koraisa baa kyawa ingyuo kararaŋa lao suu piyamuli pyuo pira.
EPH 1:11 Anatumi mende piru lao masapala yulu peparae kaeya nao pingi. Dokome baa kanda soo dokopa suu piyamuli pyuo namwa Koraisapa pako banya wambu ingyuo kararama lao rombo palyiya dokona ingyuo pelyamo.
EPH 1:12 Koraisame namba keta mende pyakara doko wambo soo nyepeyama dupwame Anatunya yanga paupau lenge renge doko ketae pyambuo karapengele ingilyamo.
EPH 1:13 Dokona palyuo nakama opetae pii angi waili pii keyange doko soo manjipala Koraisa kapa ingingi lao suu piyami dokona pyuo nyisi karaminyi. Dokopa Anatumi nakama banyaŋa lao Imambu Poo Pyasi dokome mumbwa palyili lao jeronya leyamuli pyuo nakama keta maralyiya.
EPH 1:14 Anatumi leyamuli pyuo kaeya nao banya wambu dupwa renge keyange nyerami dokona Imambu Poo Pyasi roo ingyuo wambo jiya. Dokona ingyuo namwa kiiramo nyisi kararama doko soo gisapala Anatunya yanga paupau lenge renge doko lakandamanale.
EPH 1:15 Nakama Kamongo Yesu kapa ingingi lao suu pyapala Anatunya wambu yapasi yango mona reto karaminyi doko sepala
EPH 1:16 nambame ateŋa lao dokopa kaeya nao ange lao karo.
EPH 1:17 Namwana Kamongo Yesu Koraisana Rakane Anatu neta renge ingyuo karenge dokome Imambu Poo Pyasi jakana lao ateŋa lakalyo. Imambu Poo Pyasi nakama keta jeramo dokome nakama mona paliramopa Anatu dokona angingyuo soo nyerami.
EPH 1:18 Nambame ateŋa lao dokopa imambunya lenge pendakae lapala Anatunya yanga paupau lasi dupwa kandamili lao lakalyo. Baame banya wambu keta keyange pyakarono renge dupwa kandarami lao kee lao sukusa ipupwape leya.
EPH 1:19 Banya porainya renge yapasi doko namwa Anatu kapa ingingi lao suu pyao karenge dupwa keta palena lao ateŋa lakalyo. Porainya renge wakasa pyuo kareyamo dokomeyoko
EPH 1:20 Koraisa kumasi siyamo dokopa minyalyuo lete nyepala yake panda dokona banya kingi rolaerename pisiya.
EPH 1:21 Dokopa mupwa dupwape ketae karamo dupwape poraingi dupwape kamongonge dupwape kingi ketae palenge dupwa peparaena Koraisa baa mupwa ingyuo petena lao piya. Yuu gii dusipana iki daako, yuu gii ene eparamo doko opetaenako.
EPH 1:22 Baa karamo dokona lungwa lungwarename peparae karena lao, dee Elyambu Pinginya kyawa ingyuo karena leya.
EPH 1:23 Elyambu Pingi doko Koraisa banya yongo dopale. Baa dokona renge kuiyuo piso nyimbu penge. Dopako pyuo peparae keta kapa kapa pyuo palenge.
EPH 2:1 Nakama wamba yulu koo wakale wakale dupwa pyuo kareyaminyisa kumasi ingyuo kareyami.
EPH 2:2 Nakama isa wambunya yulu koo pinginyili pyuo imambu koo dupwana kamongo doko warombo soo kareyami. Kamongo doko wambu Anatu kando kamba lenge dupwana monarename yulu koo pyuo karamo doko.
EPH 2:3 Namwa opetae dopako pyuo karo yanengena pyuwaneme kumuo karapala namwana suu pingipi yongo dokomepe koo dokona pyao ralinyi pyambuyamopa dolapona rape rape lao pyuo kareyama. Namwape doloma peparaepe mendakinya peyara Anatumi lara ingiya.
EPH 2:4 Lara ingingi doko namwa yulu koo pipala dokopa kumasi ingyuo kareyamanopape Anatumi namwa ama sakapala mona reto kareyamo dokome namwa Koraisa keta lete wai pyao nyiya. Anatumi mona keyange palyuo ipyuo karenge dokome lete wai pyao nyiyapya.
EPH 2:6 Baame namwa Koraisapa role pyao minyalyuo nyepala yake panda dorena Koraisa Yesunya arapu dokona baapa pisiya.
EPH 2:7 Dokopa yuu ene eparamo gii dupwana baa anjiki pipala banya mona keyange palyuo ipingi renge kamame wakasa doko Koraisa Yesu keta panara.
EPH 2:8 Anatunya mona keyange palyuo ipingi renge dokome nakama baa kapa ingingi lao suu piyami dokome pyuo nyisi karaminyi. Nakama rangena yulunde daa. Anatumi emboneme pyuo nyiya.
EPH 2:9 Wambunya yulu pimi dokome epelyande daako. Dopa pilyamo dokona mendeme range lakandapengele ingya nalyamo.
EPH 2:10 Anatu range namwa wasiya. Namwa Koraisa Yesupa pako yulu keyange pirami lao wasiya. Namwa kata rolae dupwana papyuo kararama dupwa Anatumi wamba rapa rapa piya.
EPH 2:11 Nakamana yanenge ketae dokome Juu daa rara wakale ingyuo kareyami. Yanenge awali lao kalomenge dupwame nakama yanenge awali lao kaloma nange lenge kandale. (Yulu doko kingimi iki yanenge dokona kalomenge.) Nakama wambo apiyakale ingyuo kareyami doko kame see nalapape.
EPH 2:12 Wamba dokopa nakama Koraisapa liti pyuo karo, Isaraele rara dokopa wakale ingyuo kareyami. Anatumi Isaraele keta keyange mairunya lao pii lanyi sereyamo dokona nakama kamenge ambe ambe kareyami. Isa panda dokona Anatu soo nyii napala dokopa mende pyakarandelyamo lao mona kare kare kara nayami.
EPH 2:13 Dopa pyuo nanesa kareyaminyipape epapu nakama Koraisa Yesu keta banya ranjama isa peyamo dokome nakama banya arapunya karaminyi.
EPH 2:14 Baa namwana manda rao nyingi ingyuo karamo dokona banya rangena yongo dokome namwa Juu rara dee nakama rara wakale dupwape nyuo pakapala imbu singi kame lili piru kareyamo doko nyuo lalyinyi isa nembeya.
EPH 2:15 Juu wambunya Lowa dupwape mawa pii dupwape waso karenge dupwape peparae mee inginyi nembeya. Nembapala rara paka lakisi siyamo doko kaepala baa keta nyuo komondapala rara enenge mendakinya ingyuo manda rao karena lao piya.
EPH 2:16 Koraisame isa mamandona kumuyamo dokome yanda pii lao rambu nyepala namwa nyuo mendakyapala Anatu kareyamo dokona dee lanyiya.
EPH 2:17 Baame Anatupa Juu wambupi Juu daa rara wakalepe koto nyepala mona mendare palyingi waili pii keyange doko boo pyao lamaiya.
EPH 2:18 Koraisa yulu andake piyamo dokona namwa rara laparae Imambu Poo Pyasi keta Rakange Anatu dokona repeta eparama.
EPH 2:19 Dokona lao nakama epapu menge upunyili ingyuo kara napala Anatunya wambu yapasi dupwa pipya mendare ingyapyamopa Anatunya ree palu ingyuo karaminyi.
EPH 2:20 Anda doko aposele akalipi poropeta akalipi dupwa andana renge kuingi isa dupwa ingyuo karaminyipa pisi karamo. Koraisa Yesu baame anda pinginya ingyaro karamo.
EPH 2:21 Anda kimbu soo pisi dokona baame simuisa ingyuo minyaro karamo. Doko Kamongopa pako karo misi anda yapasi ingyuo andelyamo.
EPH 2:22 Nakama opetae Koraisa keta kimbu silya sana pyuo pisi karaminyi. Anda pisi doko Anatu Imambu dokopa paleta karenge.
EPH 3:1 Dokona lao namba Pole nakama Juu daa rara wakale dupwana lao Koraisa Yesunya anjisi akali ingyuo karo.
EPH 3:2 Anatu mona keyange palyuo ipyapala nambame nakama nyisareŋe lao yulu andake namba keta jiyamo doko siyami lao suu pilyu.
EPH 3:3 Yalu pyuo palenge renge andake doko namba keta paneyamo siyu doko, (wambo pepana muu pyuo piyu kande.
EPH 3:4 Pii pyasi doko yaka laparaminyi dokopa namba Koraisana yalu pingi renge doko kokorename kandeelyamo lao separami.)
EPH 3:5 Doko wambu kyawa ingyuo kareyami dupwame soo kara nayami doko epapuli aposele yapasi dupwape poropeta akali dupwape banya Imambumi lamaiyuo panapyamo simi.
EPH 3:6 Yalu pisi renge epapu panelyamo doko, Juu daa rara wakale dupwa waili pii keyange sepala Anatunya keyange dupwa Juu wambu pipya kapa kapa pyuo nyerami. Nakama namwapa yongo mendaki ingyapala Anatumi Koraisa Yesu keta keyange jeroŋo leyamo dupwa mokwa soo nyerami.
EPH 3:7 Anatu mona keyange palyuo ipyapala banya porai renge namba mee jiyamo dokopa namba waili pii minyingi akali ingiya.
EPH 3:8 Anatunya wambu yapasi menge dupwa peparaena namba kamame isale ingyuo karapunupape Koraisana kamongonge bange kapa pyuo soo nyii naramili dupwa namba keta epeya. Doko Juu daa rara wakale dupwa mana lamaiyuo karapenge dokona lao jiya.
EPH 3:9 Anatu baa bange peparae wasiya dokome ama kai wamba mende piru lao suu pyapala yambe piya doko namba lao panaronopa wambu peparae serami.
EPH 3:10 Dokona ingyuo Anatunya soo gisinginya renge peparae Elyambu Pingi keta lasaka piramopa yake dorena poraipi mupwa dupwapeme soo nyerami.
EPH 3:11 Anatumi wambo mende pironya lao suu pyao karengenyili pyuo namwana Kamongo Koraisa Yesu keta pipiya.
EPH 3:12 Yesu kapa ingingi lao suu pyao baa keta pyamalyisi karo dokopa Anatu karamo dokona eŋa nembo mee kapa parama doko silyamano.
EPH 3:13 Dokona ingyo nambame nakamana lao randa nao karo dokona mona nemba nalapape. Nakama kapa palirami dokona lao randa koo nao karo.
EPH 3:14 Dokona ingyuo Rakange lao mona kando kingi lao karo.
EPH 3:15 Baa keta piso yake panda isa pandape ree palu peparaena kingi lasi dupwa epeya.
EPH 3:16 Kamongo Anatunya yanga paupau lenge renge jingi ingyuo lyuo karamo doko Imambu keta epo nakama maralyapala mona andarena porainyi pyambunya lao ateŋa lakalyo.
EPH 3:17 Anatu kapa ingingi lao suu piyami dokona Koraisa nakamana monarena palyuo yuuli andale lena. Nakamame mona retenge renge dokona pingi pyapala porai ingyaramo kararami.
EPH 3:18 Koraisana mona rentengena makande doko kamame andake dokome, Yuu nanesa pao oto ruŋu paŋu lamo laope yuu ulu pao lepo pyuo lamo laope yuu ono komba ayanda pao lamo laope nakama Anatunya wambu peparae dupwamoo pipya, kando simili yaka lao ateŋa lakalyo.
EPH 3:19 Kinyi Yesunya mona retenge renge wakasa isa wambumi soo ota paa nange doko soo nyeraminyi dokopa Anatu dokona mona retenge renge palyuo simbuo pelyamo doko makande minyuo nakama keta palyuo simbwara.
EPH 3:20 Anatumi banya porai renge namwa keta silyamo dokome suu pyarama dupwape jinya larama dupwape kama konda pyuo yamarangunyi nembo jingi.
EPH 3:21 Wambu wambowanape enakana dupwamepe Elyambu Pingi ketape Koraisa Yesu ketape Anatunya kingi doko ketae pyambuo puu parami.
EPH 4:1 Namba Kamongona kingi reke lao puu maisi akali ingyuo karo dokome Anatu nakama kee leyamo dokona suu pyao keyange pyuo karalapape lao poraiyuo leto.
EPH 4:2 Nakama pau lao anjiki pyuo wambu yango kando waiya lao imbu singi nyii napala kenda jerami dupwa nyuo sakamyuo mona reto karalapa.
EPH 4:3 Imambumi nakama mona mendare palyingi dokome nakama mendakinya ingyuo anjala anjala paramopa yalya kando kararama lao poraiyuo suu pyao karalapape.
EPH 4:4 Yongo mendaki dokako iki. Dee Imambu mendaki dokako. Anatumi nakama kyakale leyamo dokona keyange mende pyakara lao mona kare kare karaminyi doko renge mendakiko.
EPH 4:5 Kamongo mendakiko, Anatu kapa ingingi lao suu pingi renge mendakiko, bapitisimo mendakiko.
EPH 4:6 Namwa peparaena Rakange Anatu mendakiko, baa peparaena nyilyingi ingyuo karenge. Peparaena kapa kapa pyuo pingi dee namwa peparae keta palengeko.
EPH 4:7 Koraisa keta elyape dupwa epeyamopa Anatumi manda manjo nyeramanuli pyuo mokwa soo jiya.
EPH 4:8 Dokona lao pii mende pyasi palamo. Baa pulyuo pao dokopa anamasi minyuo waiku nyiyamo dupwa lanyuo papala wambu keta mora petenge renge lapo mee maiya.
EPH 4:9 Baa pulyuo peyaŋa lao pii palamo doko apa letase? Baa lupyuo yuu donorename opetaeko peyaŋa letamo.
EPH 4:10 Baa lupyuo peyamo dokoko pao yake ketae ama dulurename peparaena pawiyalana peya.
EPH 4:11 Baa mora petenge renge joo karenge dokome, lapo aposele inginyi pyambuo, lapo poropeta ingyuo, lapo waili pii minyingi ingyuo, lapo rapu pingi ingyuo, dee lapo mana lenge ingyuo pyambuo piya.
EPH 4:12 Dokome Anatunya yapasi wambu dupwa mondo lanyi pyambuo dokopa Kurisene yulu pirami dokome Koraisana yongo dokona andanyi nembaraŋa lao piya.
EPH 4:13 Yulu dokomeoko pao namwa baa kapa ingingi lao suu pingi dupwa mendarele ingyuo parama. Dee Anatunya Ikinyingi dokona soo nyerami dokopa, Koraisa baa akali angingyuo karenge dokona manda manjo namwa andanyi nembarasa pira.
EPH 4:14 Dopa pyuo pirama ramo namwa wane kuki ingyuo wambu lapo yulu koona kendapuli ingyuo suu pingi kyai dokome namwa ukiaki minyilyasa panga soo nyilya nyana pyuo kararaminyipape namwa kao pele pele lao karenge dokona ingya naramasa pira.
EPH 4:15 Dopale ingya napala namwa wambu yango mona maipala pii rolae lao kararama dokome namwana akali kyawa Koraisa dopale ingyuo andamanale.
EPH 4:16 Baa kyawa dokona namwa banya kingi kimbu lengepe rangena panda dokona pyakuiyalya pyakuiyana piro kara napala kapa pela penge. Dokona namwa yongo mendaki ingilyamo dokome mende nyisalya nyisana pyuo poraiyuo piramano dokome yongo peparae mona retenge renge dokona simuisa ingyuo ando para ingilyamo.
EPH 4:17 Kamongona kingi lao pii dake pyalana pyuo leto. Juu daa rara wakale see nao karenge dupwame kopetame suu pyao pyuo karaminyi dokona yulu dopale pii nalapape.
EPH 4:18 Nakamba suu pingi iminjiyamo karo, kamenge see nao pisipala mona kana pokwapala Anatupa rekya lao karaminyi.
EPH 4:19 Langa papyuo kanda lyanolyano pyuo yulu koo yeelyo pinya wangu lakapala pingi.
EPH 4:20 Yulu dopale doko Koraisa keta siyamo kando nyii nayami kande.
EPH 4:21 Nakama mana nyuo dokopa Yesu dokona kinyinya renge baa keta renge kuiyuo palenge doko siyami.
EPH 4:22 Yulu wambarae pinginyili pyuo, pyuo papyuo karo kanda lyanolyano pinya wangu lakao piyaminyisa nakama kokwa sinyi nembeya doko ramanyi nembalapape.
EPH 4:23 Nakama mona suu pingipi alowa pyuo enenge ingyuo karalapape.
EPH 4:24 Kyakana renge Anatu makande minyuo rolae pyuo yapasi palamo dokona nyuo maralyalapape.
EPH 4:25 Dokona lao kyambo pii dupwa nembo Kurisene yango kando pii angi lao karamanale. Namwa yongo mendaki ingyuo pelyamo kande.
EPH 4:26 Imbu singi epeya kande dokopa koo angi doko ketae nyii nao dee imbu singi paleta piso yuu kwuasinyi reta nao pipape.
EPH 4:27 Satane baa panda mai nalapape.
EPH 4:28 Waali dupwa deeko waa nyii nana. Waa nyii nao rangena kingi dolapome yulu andake pyuo rolae pyuo karena. Yulu andake pipala kakana seramo dokona nyuo wambu bange aeyange dupwa maiyuo karara.
EPH 4:29 Pii koo dupwa nakamana kambunya neta nyii nao pii keyange yapo, pii keyange dupwa lao wambu yango nyisaraminyi dokopa serami dupwa elya pisi ingyuo parami.
EPH 4:30 Anatunya Imambu Poo Pyasi lekeleke koo rena lao pii nalapape. Anatumi yuu gii lumwa piramo dokopa nakama kiiramo nyeronya lao kongwalu palyuo Imambu Poo Pyasi maralyinyi pyambuya.
EPH 4:31 Nakama ingi koo palyuo, imbu singi manjo, imbumi kumuo, pii porakai lao, mendali koo koo lengepe yulu dupwa rekya lao nembalapape.
EPH 4:32 Mendeme mende kando anjiki pyuo karo mona pau lao, Anatumi Koraisa keta nakamana koo dupwa kame sakaya dokona suu pyao nakamame yango mendena koo dupwana suu pyanyi pyano kara nalapape.
EPH 5:1 Nakama Anatunya mona nyingi wane wanakepe ingyuo karaminyi dokona banya yulu pinginyili pyuo pyuo karalapape.
EPH 5:2 Koraisa namwa mona reteyamo doko suu pyao yango mona reto karalapape. Baame mona retapala namwana lao kumuo maiyamopa rendamu kyaa keyange nyingi dopale Anatu nyiya.
EPH 5:3 Nakama kanda lyanolyano pyuo enda bangepe nyipuli nyipuli lao pii dopale Anatunya wambu yapasimi lao kararami ingilyande daa.
EPH 5:4 Mora pii koralepe kopyali piipi mee ketae giyalya giyana pyuope kapa laa napenge ingingi dupwana laa kaepala Anatu dokona sangyu lao karapengele ingilyamo.
EPH 5:5 Pii dake kinyi lao suu pyalapape. Wambu kando lyanolyano pingipi suu pingi karo petengepe yanengena bange nyerami dokona iki wangu lakapala suu pyao karengepe (doko Anatu kaepala bange wakale dupwa Anatu ingyuo panda maimisa pilyamo) dupwame nakama Koraisa Anatupana iso karenge panda dokona moyange nyii narami ingilyamo.
EPH 5:6 Lapome epapala mee kambumi pii nupi soo larami dupwana waso karalapape. Koo dopale pyuo karo kamba letaminyi dupwa keta Anatumi kote lara ingilyamo.
EPH 5:7 Dokona ingyuo nakamame nakamba role pyao kara nalapape.
EPH 5:8 Nakama wamba iminjiyamo dokona isa sulu sulu paeyo kareyaminyipape epapu Kurisene ingyapala Kamongona yanga paupau lenge dokona karaminyi. Dokona yanga paupau lengena wane wanakepe ingyuo karalapape.
EPH 5:9 Yanga paupau lenge dokome yulu keyangepe yulu rolaepe yulu angipi nyuo andanyi pyambwarasa pira.
EPH 5:10 Kamongome epe kandarali dupwa mana nyepala pyuo karalapape.
EPH 5:11 Iminjinginya yulu kalu kalu paeyo silyamo dupwana rekya lao karapala koo pilyaminyi dupwa nyuo pano serakamipape.
EPH 5:12 (Nakamba yulu koo yalu pyuo pilyaminyi dupwa polo lakalana dokopa elya nyerama ingilyamo.)
EPH 5:13 Bange peparae yanga paupau lenge panda seramo dokopa dopalendelamo lao angi panara.
EPH 5:14 Panasi dupwa yanga paupau lasi dokona ingyuo para. Dokona lao pii dopa lao pyasi palamo. Kumasi ingyuo luu palaminyi dupwa lenge rao sipuralapape dokopa Koraisame nakama keta neta ranyi pisinyale.
EPH 5:15 Dokona nakama apa pyuo kararama lao kandokondali pyuo karalapape. Kopyali ingya napala wambu angi ingyuo paeyo karalapape.
EPH 5:16 Epapu yuu gii koo epelyamo dokona mee kara napala yulu keyange pepenge dupwa pyuoko karalapape.
EPH 5:17 Kopyali ingyuo kara nalapape. Kamongome nakama pimili lao suu pilyamo dupwana sepala pyuo karalapape.
EPH 5:18 Waene ipwange langa andare nao kyawa sisingi bolombalo lanyi nembasasara naa nalapape. Naa napala Imambu Poo Pyasi nyepala palyuo simbwaramopa karalapape.
EPH 5:19 Nakama yango sukusa misi kenane dupwape Imambunya kenane dupwape pyao, Kamongo keta kenane dokome monarename piso nyuo ipwa kyukunaiye maiyuo pena lao pyao karalapape.
EPH 5:20 Namwana Kamongo Yesu Koraisana kingi lao Rakane Anatu dokona kaeya nao bange yulupi peparaena suu pyao sangyu lao karalapape.
EPH 5:21 Koraisa wakasa dokona mona nembo wambu yango dolomana lungwa lungwarename ingyuo karalapape.
EPH 5:22 Nakamba enda dupwa Kamongo baa mupwa lao suu pyapala banya pii dupwa warombo soo petenge dokonako palyuo akalingi kando pipwape.
EPH 5:23 Koraisa baa Elyambu Pinginya mupwa ingyuo karamo doko suu pyao akali dupwa nakamana etenge dokona mupwa ingyuo karenge. Koraisa baa banya yango Elyambu Pingi doko Lete Wai Pyao Nyingi ingyaro karamo.
EPH 5:24 Elyambu Pingi doko Koraisana pii rape rape lao soo petenge doko suu pyao enda dupwa nakamana akalinginya yulu peparaena rape rape lao soo pyuo pisipape.
EPH 5:25 Yesu Koraisame Elyambu Pingi doko mona reto karapala reke lao kumuo paleya. Dokona ingyuo akali nakamana enda mona reto karalapape.
EPH 5:26 Koraisame Elyambu Pingi doko, banya pii keyangepe ipwapeme wate pyuo mondo lapala banya iki lao yapo nyiya.
EPH 5:27 Dopa pyuo Elyambu Pingi doko banya lenge kambu dorena rao kui kui lanyi pyambuo, nyisi yaku nayape pisi nao, pepo kareta kiminju palyuo bwualyambwuana pyuo paa naramopa range nyero lao piya.
EPH 5:28 Nakama akali dupwa rangena yongo mona reto karaminyi dokonako ingyuo nakamana enda mona reto karalapape. Dokona lao mendeme enda mona reto karara ramo doko baa range mona retarasa pira.
EPH 5:29 (Akali mendeme rangena yanenge awa naa nange. Rangena yanenge mondo lao elya pyuo karenge kandale. Namwa Koraisana yongo mendaki dokonakonde karamano dokona Koraisame Elyambu Pingi mondo lanyi pyambungi.)
EPH 5:31 Dokona lao Anatunya pii pyasi doko, Akali dupwame nakamana endangi rakangepe yaki nyeraminyipa enda dokopa pakao pisirambinyipa nakamba mendaki ingyuo para letamo.
EPH 5:32 Pii andake yambe pyasi palamo doko Koraisapa dee Elyambu Pingi dokopana letamo lao suu pilyu.
EPH 5:33 Pii doko namwa wambu peparaeta keta lao palamo. Doko nakama akali peparae range mona reto karaminyi dokonako ingyuo nakamana enda mona reto karalapape. Dee enda dupwa nakama akalingi ketae pyambuo pisipape.
EPH 6:1 Nakama wane wanake dupwape Kamongo dokona lao endangi rakangepa laraminyili pyuo warombo soo pipape. Dopa pyuo pingi doko yulu rolae.
EPH 6:2 Anatunya mawa pii lasi dupwana mende doko, Endangi rakangepa dolapo angingyuo karambinyi lao suu pyaro karalapape leya. Pii doko andake ingyuo mende pyakaramo dokona lao kaeyo leyasa piya.
EPH 6:3 Dokona moko minyuo pirami ramo kapa palyuo isa yuunya gii andarele karare ingilyamo lao makande pyuo pyasi palamo.
EPH 6:4 Endangi rakangepe dupwa nakamana wane wanakepe imbu singi nyakami nalapape. Mondo koo lao mana lamaiyuo Kamongona kingi lao ando pena larami.
EPH 6:5 Kendemande akali dupwa nakamana yulu pyakamaingi akali dokona mona mendare palyuo inyimungu mona nembo Koraisana kingi dokona lao pyuo karalapape.
EPH 6:6 Nakamame nakama kando kararami mange dokopa iki rae maimili lao pii nao, yulu pyuo dokopa Koraisana kendemande ingyuo Anatu pimili lao suu pilyamo doko monana manjo pipwape.
EPH 6:7 Mee akalinya yanenge dokona pilyu lao suu pyao piraminde daa. Kamongo dokona lao yulu andanyi nembo pipape.
EPH 6:8 Kendemande akali mee akalimipi yulu keyange pirami dokona Kamongo baame isingi manda manjo yano pyao kingi kiso jera lao suu pyao pipape.
EPH 6:9 Nakama numi dupwame, nakamana kendemande dupwa kando mona mendaki dokona palyuo pipape. Pii porakai pyalana pyuo laa nalapape. Nakama nakambanape Kamongo yake panda karenge dokome koo epengepe dokona suu pyaa nao karenge doko suu pyalapape.
EPH 6:10 Pii dake lao lumwa pyuo leto. Kamongopa pako karo banya porainya renge doko nyepala kulisa palyuo karalapape.
EPH 6:11 Anatunya yanda pingi bange dupwa nyuo maralyaro karalapape. Dokome imambu koo doko panga seramo dokopa porai ingyapala mee kararami.
EPH 6:12 Namwa wambu yango sukusa dokona yanda pilyamande daa. Imambu koo malu yakena palenge dupwape mupwa dupwape iminjingi pandana numi dupwape pipya yanda pilyamano.
EPH 6:13 Dokona lao Anatunya yanda pingi peparae nyuo maralyapala yuu gii kwaeyaramo dokopa porayapala pyao pyalowa pyuo karo pao nenge rekya lapala kararami.
EPH 6:14 Dokona ingyuo rapa rapa pipape. Marapu wapungi dokona kinyi kinyinya renge doko wapuo karo, romba kyangalipi dorena yulu rolae doko puu saneme komau wapusi porai pee pyuo karo.
EPH 6:15 Manda rao nyingi waili pii keyange doko kimbu dokona pee piro karalapape.
EPH 6:16 Anatu kapa ingingi lao suu pingi konambe doko nyepala ketaele alya minyuo koo pinginya walaka isare paleta dupwa kunjinyi nembo karare.
EPH 6:17 Kyawa rarange kapame wasisi pyuo lete nyingi doko andu pipala, Imambunya wua gela Anatunya pii doko wakyaro karalapape.
EPH 6:18 Imambumi renge kuiyuo yuu peparae kaeya nao ateŋa lalapape. Anatu dokona ateŋa peparae sokondali pyuo karalapape. Dokona lao lenge rao karo, Anatunya wambu yapasi peparae dokona kaeya nao ateŋa lakamailapape.
EPH 6:19 Nakamame namba opetaeko ateŋa lakaraminyipa dokome namba waili pii keyange koko palenge dupwa pyongo pyaramopa kambu yaepapala eŋa nembo lao kararo.
EPH 6:20 Dokonako ingyuo namba waili pii lenge akali dokona puu maiminyi karo. Nakama ateŋa lakarami dokopa namba eŋa nembo mona kumapala lao karapili lao lalapape.
EPH 6:21 Namba apa pyuo karo akinde pyuo karene lao Tikikasa namwana yangonge mona retenge Kamongona yulu rolae pingi akali dokomeoko peparae rolo langira.
EPH 6:22 Dokonako lao baa nakama karaminyi dokona pena leto. Namwa apa pyuo karaminyi dokona langyuo mona minyarambwako karara.
EPH 6:23 Yangonemoo Rakane Anatu Kamongo Yesu Koraisapana mona kyuu lao singi rengepe dee mona reto karo Anatu kapa ingingi lao suu pingi rengepe nakama keta palena leto.
EPH 6:24 Namwana Kamongo Yesu Koraisa dokona yaki nyii nao mona reto karaminyi wambu keta Anatunya mona palyuo ipingi renge doko palenale lao leto.
PHI 1:1 Anatunya wambu peparae yuu Pilipai palenge Yesu Koraisa kapa ingingi lao suu pingi dupwape dee rapu pingipi nyisingi opetaepe nambwa Pole Timotipame Yesu Koraisana yulu pyakamingi akali dolapo nakama yako letambano.
PHI 1:2 Namwana Rakange Anatu Kamongo Yesu Koraisapame mona keyange palyuo ipingi rengepe mona kyuu lao singi rengepe nakama keta palena lao letambano.
PHI 1:3 Yuu peparae nakama lao suu pyapala nambana Anatu kando sangyu lao karo.
PHI 1:4 Yuu peparae Anatumi nakama nyisakana lao ateŋa lao rae maiyuo karo.
PHI 1:5 Wambape dakepape nakamame waili pii boo pyao lao namba nyisokondali pyuo karami dokona rae mailyu.
PHI 1:6 Anatumi kanda soo nakama keta yulu keyange piyamo doko kare kare soo pyuo pao Yesu Koraisana yuu gii pyaka seramo dokopa pyuo otara doko namba silyu.
PHI 1:7 Nambame yuu peparae nakamana lao suu pyale pyuo karo. Dokona lao rolae ingyuo nakama kondalyo. Waili pii keyange dokona lao kote leyaminyipape nambame pii keyange doko raeyo penale lao roleyo gii dokonape dee dakepa puu jiminyi karowape nakamame namba yaki nyii napala Anatumi yulu jiya dokona namba role pyao piyamioko.
PHI 1:8 Yesunya kondange renge dokome namba pyapyamopa nakama kandowane lao suu pyao kinyi kondo karapala letene lao Anatu baa kandapyamo leto.
PHI 1:9 Nakama suu pyao ateŋa lakalyo. Ateŋa lao dokopa nakamana mona retenge doko kamame ando pulyuo paramopa nakama soo gisapala suu pingi keyange palyuo pyuo kararami lao lakalyo.
PHI 1:10 Dopa pyuo dokona nakama range keyange doko anjuku lao yapalyuo nyerami. Enakana Yesu Koraisa dee eparamo dokopa nakama keta koo wakale wakale dupwa peparae pali nara.
PHI 1:11 Renge rolae keyange dupwa Yesu Koraisa keta iki sipurao epenge dupwa peparae nakama keta palyuo simbwanale leto. Nakama keta palira ramo doko Anatunya kingi ketae pyambuo lakando palirasa pira.
PHI 1:12 Yangonemoo nakama selapa lao leto. Namba randa jiminyi renge dokona lao waili pii keyange doko raeyo pelyamo.
PHI 1:13 Doko yanda singi peparae kiŋinya anda rapu pyuo karenge dupwape dee menge dupwa peparaeme namba Yesu Koraisana kendemande akali karapusi anda palyuo karo doko nakama silyaminyi.
PHI 1:14 Namba karapusi kareyono dokome nambana Kurisene yango malu dupwa Kamongo dokona lao mona porainyi pyambuya. Mona porainyi pyambuyamo dokome paka napala Anatunya pii lao karaminyi.
PHI 1:15 Lapome nambana kingi londe sipyamo dokona yango palyapala namba nyuo isa palyalana dokona Yesu Koraisana pii lao karaminyi doko silyu. Dee lapome suu pingi keyange palyuo renge keyange dupwana lao karaminyi.
PHI 1:16 Dupwa namba mona retapala waili pii dokona iki lao karamisa pilyamo. Waili pii keyange isa paa nana lao Anatumi namba keta yulu andake doko retelyamo.
PHI 1:17 Wambu menge dupwa Yesu Koraisana waili pii keyange kyambo lele lao nakama rangena kingi andapyali lao letaminyi. Doko namba karapusi dokona moŋo andake jimwali lao lamisa pilyamo.
PHI 1:18 Kwao letaminyi dokona pii mende pali nara. Doko larami panda keyange ingyuo larami doko Koraisana pii polo lamanale. Yesu Koraisana lao pii wakale wakale letaminyi doko namba rae mailyu.
PHI 1:19 Nakama ateŋa lakao karaminyisa Yesu Koraisana Imambu namba nyisaramopa kiiramo pasi kararo doko range silyu. Renge dokona lao rae maiyuo kararoko.
PHI 1:20 Namba Yesunya yulu pyakamingi dokona yake nyii nao poraiyuo karapuli lao suu pilyu. Suu pyao dokopa yuu peparaepe dee angi yuu gii dakepape namba poraingi renge palyuo pyoko pyoko laramo karapuli yaka. Namba range Yesu keta pyamalyuo kararonopa lete kararope kumuowape dokona pii mende daa. Koraisana kingi ketae palipyali lao dokona iki suu pyao karo.
PHI 1:21 Dokona lete parono renge doko akisi? Namba lete kararo ramo doko Yesu Koraisana arapu dokona kararo dee namba kumaro ramo doko renge keyange mende kando nyero ingilyamo.
PHI 1:22 Dopako pyuo namba isa yuu dakena yulu keyange pyuo lete karalu kararo ramo doko anjuku doko mupwa lao see nalyo. Dokona lao suu pingi lama palamo.
PHI 1:23 Laparaena keyange ingyuo pelyamo lao suu pyao karo. Isa panda dakena yaki nyepala Koraisapa role pyao kararo doko mupwa lao suu pilyu.
PHI 1:24 Doko keyange lao suu pilyu doŋo kuma napala nakamana reke lao pyuo kararo dokona renge andake mende palamo.
PHI 1:25 Renge andake dokona suu pyao kumungi kata dokona waiya lao paa naro. Nakama role pyao karo nakamana Kurisene yulu dokona andanyi pyambuo nakama rae maiyuo pupwale lao yulu pyuo kararo doko range silyu.
PHI 1:26 Namba dee kamba nakama keta range eparono dokopa nakama namba kando rae maiyuo nyepala Yesu Koraisana kingi ketae pyambuo lakando piramilyamo.
PHI 1:27 Koraisana waili pii keyange letamuli pyuo dokoko iki pyuo karalapape. Namba kandala eparonopape epa naronopape nakama mona mendaki palyuo suu pingi mendaki suu pyao waili pii doko kapa andena lao poraiyuo pirami doko langyaraminyi sero.
PHI 1:28 Nakamana nyisu petenge dupwa kando paka napala mona kuki palyuo karalapape. Nakambame nakama kandapala nakama anamasi minya napala koo keta parami doko soo manji nyerami. Anatumi nakama nyisaramopa nyisu petenge dupwa pyuo anamasi minyarami ingilyamo.
PHI 1:29 Anatu baa mona keyange palyuo ipingi dokome Yesu Koraisana yulu pyakarami lao yulu jiya. Joo dokopa Yesu baa kapa ingingi lao suu pyarami doko iki daa. Baa reke lao randa nyeramiko.
PHI 1:30 Namba waili pii dokona reke lao yanda pyuo karo dokona nakama opetae yandako pirama. Namba wamba yanda pyuo kareyo doko dake mendaki dokoreko. Dee mendaki dokonako epapu dakepa pyuo karo doko nakama silyaminyi.
PHI 2:1 Nakama Yesu Koraisana arapu dokona karami dokome porainyi pyambulyase? Banya mona retenge dokome nakamana mona poraikalyase? Nakama Imambupa role pyao yalya kando karamisi? Nakama mendali mendali anjiki pyuo mona reto pyuo karamisi?
PHI 2:2 Dopa pyuo piyande kande doko suu pingi mendakinya suu pyao mona mendaki palyuo rale rale pii nao nambana rae maingi renge doko andanyi pyambwarami lao poraiyuo langilyu.
PHI 2:3 Rango nao range namba keta palipyali lao dee suu pingi koo suu pyao range ketae pyambuo lakando pii narami. Namba range wakasa lao masa nao wambu wakale dupwa mupwa lao suu pyao inyimungu karo mendali kondo kondo lao kararami.
PHI 2:4 Nakama rangena ikinya lao suu pyaa nao mendeme mendena kando nyiso pirami.
PHI 2:5 Yesu Koraisa suu piyamuli pyuo suu pyaro karalapape langilyu.
PHI 2:6 Yesu baa Anatu angiko ingyuo karenge. Baa rangeme sisu lao Anatu yale ingyuo karapuli lao suu pyaa naya.
PHI 2:7 Baa range banya peparae yaki nyuo kaepala kendemande akali ingyuo karapala mee isa wambu dokore isa komba pyao epeya. Epapala baa mee isa akali ingyuo ando kareya.
PHI 2:8 Yesu baa akali kukiŋi lao inyimungu karo Anatu dokona warombo sepala baa leyamuli pyuo kumuya. Kinyi baa isa mamandona kumuo paleya.
PHI 2:9 Renge dokona lao Anatumi baa minyalyuo nyiya. Anatumi minyalyuo nyepala baa kingi andake maiyamo doko kingi doloma nyuo isa palyiyasa piya.
PHI 2:10 Yesunya kingi dokona lao wambu peparaepe imambupi yake pandape isa yuu dakenape dee isa yuu dorena palenge dupwapeme wapambu pii pyaro piso banya kingi lakandarami.
PHI 2:11 Lakando dokopa wambu peparaeme Yesu Koraisa doko baa Kamongo doko lao kararami. Dopa pyuo lakandarami dokome Rakange Anatunya kingi ketae pyambuo parasa pira.
PHI 2:12 Nambana puu minyingi dupwa yuu peparae namba nakama pipya role pyao kareyonopa nakama warombo siyami kande. Doko suu pyao epapu dakepa namba nakama pipya kara nalyamano doŋo nambana pii warombo serami ramo doko ama keyange wakasa ingyara. Neta pasaramaŋa lao pakame kumuo walu walu lao Anatunya Imambunya yulu dokona pyuoko karalapape.
PHI 2:13 Anatumi nakama keta yuu peparae waa waa karanyi pyambuo dee banya renge dupwana warombo serami lao pingi.
PHI 2:14 Yuu peparae mumu lao laiya lao pii napala rae maiyuo karalapape.
PHI 2:15 Dopa pirami ramo doko nakama koo pii nao poo pyasi ingyuo kararami. Nakama Anatunya wane wanakepe koo isa palya nange dupwa yuu dakena wambu koo pyuo rango nao karenge dokona role pyao palirami ingilyamo. Nakamame bui yake dokona rao karenge dopale ingyapala,
PHI 2:16 waili pii wambu lete wai pyao nyingi doko lamaiyuo karalapape. Dopa pyuo pirami ramo doko Koraisa epara yuu gii dokopa nakamana lao suu pyao rae maipala lakandaro. Dokome nambame yulu andake pyakayono doko mee ingyuo paa naya lao pano lasaka pira.
PHI 2:17 Nakamana Anatu kapa ingingi lao suu pingi doko rendamu pingi kiso Anatu maingi dopale ingyuo pelyamo. Doko nambana ranjama kulimbwaraminyipa nakama suu pingi keyange pale pale Anatu dokona para ingilyamo. Dopa pira ramo doko namba rae mairu dokona nakama opetae rae maiyuo karalapape.
PHI 2:18 Mendaki dopaleko ingyuo nakama opetae rae mairaminyi dee namba opetae nakama pipya rae mairamako.
PHI 2:19 Kamongo Yesumi nyisaramopa nakama karaminyi dokona Timoti pena laro ingilyamo. Timoti baame nakamana yulu dokona lao langyuo jeramo dokopa nambana mona porainyi pyambwara.
PHI 2:20 Namba nakama mona retapala suu pyaro karo doko suu pyao baako mendeke ingyuo pelyamo.
PHI 2:21 Wambu menge dupwa nakama rangena iki suu pyao Yesu Koraisana yulu dokona rae mai nao karaminyi.
PHI 2:22 Nakama Timotinya yulu wambo kandapala baa akali keyange dokona nakama range soo gisilyaminyi. Timotipa nambapa ikinyingi rakangepa dopale karambano dokome waili pii dokona reke lao yulu mendare role pyao pingi doko soo gisilyaminyiko.
PHI 2:23 Dokona lao namba keta apa pira lao soo nyepala aopa nakama karaminyi dokona pena larolyamo lao suu pyao karo.
PHI 2:24 Kamongome nyisaramopa namba range rengya usale eparolyamo lao silyu.
PHI 2:25 Namwana yangonge Ipaporaitasa nambapa role pyao yulu andake pyuo waili piinya lao kareyamba. Doko nakamame namba nyiso Ipaporaitasa jiyaminyipa nakamana wai pii minyuo papyuo kareya. Doko baa nakama keta pena laro lao suu piyu.
PHI 2:26 Baa nakama peparae kandapuli yaka lao letamo. Nakama baa anga pyalyamo lao siyami. Siyaminyi dokona baa mona randalyamo.
PHI 2:27 Kinyi baa anga andake piyamo repeta kumuyamopape Anatumi baa kondapala nyisiya. Baa dokona iki sakao kondayande daa. Baa namba opetaeko kondapala namba kyawa minyiya.
PHI 2:28 Dokona lao nakama rae wakasa mairami lao baa nakama kandala ipyali lao leto. Kandala eparamo dokopa namba mona kenda pii nara.
PHI 2:29 Baa Kurisene akali yango dokona lao rae maiyuo yako lao kando nyelapape. Akali baa yale dupwa opetaeko yako lao lakandalapape.
PHI 2:30 Nakama rangeme nanesale karapala namba nyisalana saka nayaminyi dokona baame nyiso pyakaya. Doko Yesu Koraisana yulu dokona reke lao baa kumara repe ingiya.
PHI 3:1 Nambana Kurisene yango dupwa Kamongo dokome rae maingi renge nakama keta jinya leto. Pii wambo pyao reteyo doko dee kamba pyao jero ramo dokopa kapa ingyara. Dee kambako serami ramo doko nakama porainyi pyambwara ingilyamo.
PHI 3:2 Doko wambu koo pingi dupwa waso karalapape. Akali nakama yanenge kunjo kalomo karaminyi dupwa nakama koo suwa ingyuo kopetame pilyaminyi.
PHI 3:3 Anatunya Imambu namwa nyisilyamopa Anatu dokona mona kando kingi lenge. Namwa Koraisa Yesunya arapu dokona karapala rae mailyamano. Dokona lao yanenge kolomasi angingyuo peyama. Doko nakama daa. Namwa yanengena yulu ketae iki suu pyaa nalyamano.
PHI 3:4 Yanengena ketae yulu dokome kiiramo nyingi pili namba wambo kiiramo nyisi karapuli doko silyu.
PHI 3:5 Dokona ingyuo namba mandeyaminyi koro mendaki epo papeyamopa namba yanenge pyakepanyi nembakayami. Namba Isaraele akali Benjamene rara dokona ingyuo karo. Namba Ipuru akali angi doko. Namba Parisi akali ingyapala Juu wambunya Mawa Pii dokona moko minyuo kareyo.
PHI 3:6 Dopa pyuo Juu wambunya Mawa Pii mona reto rae maiyuo karapala Kurisene wambu dupwa randa maiyuo kareyo. Namwa Mawa Pii dupwa moko minyuo warombo soo karo rolae ingyuo karenge pili doko namba keta koo pali napyali.
PHI 3:7 Wamba isa bange ama keyange nyelana suu piyu dusipa Yesu Koraisana kingi reke lao dakepa mee kilya kandanyi nembelyo.
PHI 3:8 Bange dusipa iki daa. Bange peparae mee ingyuo pelyamo lao soo nyepala mende mupwa wakasa keyange ingyuo pelyamo dokona lao poraiyuo suu pilyu. Mende keyange mupwa wakasa doko nambana Kamongo Koraisa Yesunya soo gisilyu renge doko. Banya reke lao bange peparae neta nembo oteyo. Yesu Koraisana arapu dokona karapuli yaka lao isa bange peparae isa pena leto.
PHI 3:9 Dopa piru ramo dokopa namba Yesu Koraisapa pakalu pakao pakarosa pira. Namba range sipurapala Mawa Pii dupwa warombo sepala dokome rolae ingyuo paa nayo doko kandelyo. Dakepa Yesu Koraisa kapa ingingi lao suu pyapala rolae ingyuo karo. Rolae pingi renge doko Yesu kapa ingingi lao suu pingi dokona Anatumi joo karamo.
PHI 3:10 Doloma kaepala namba Yesu Koraisa iki suu pyao karapuli yaka. Baa sipurao peyamo dokome porainya renge neta epeya doko namba keta palipyali yaka lao leto. Baa randa nyiyamo doko suu pyao namba opetae randa nyuo baa kumuyamo doko suu pyao namba opetae kumalana leto.
PHI 3:11 Dopa pirunu dokopa namba lete sipurao paro doko soo gisilyu.
PHI 3:12 Nambame Yesu Koraisana yulu rolae angingyuo pyuo karo laa nalyo. Dee koo mende namba keta pali nalyamo laronde daa. Koraisa Yesumi namba banya ingyuo nyiyamo dokona lete paro doko nyipuli lao kyawame suu lao pilyu.
PHI 3:13 Yangonemoo namba Yesunya make dokona kando nyepeyo lao poraiyuo suu pyaa nalyo. Namba suu pingi mendaki lao suu pilyu doko yulu wamba dupwa kame soo kaepala namba range poraiyaro dokome rengyana yulu nyerono dokona kando pyuo parowale.
PHI 3:14 Bange keyange wini pyuo nyingi doko nyelana namba make dokona rolae kanda kanda makando pelyo. Anatumi Yesu keta yake panda dorena ipupwape lao kee leya bange keyange dokonasa leto.
PHI 3:15 Namwa peparae Kurisene porai dupwame suu pingi mendaki palyamanale. Nakama lapo suu pingi wakale palira ramo doko Anatumi monarena lao rolakaya.
PHI 3:16 Dopa pyuo pira ramo namwa yulu rolae wambo palenge dokona moko minyiyama doko suu pyao epapu dopako pyuo moko minyarama ingilyamo.
PHI 3:17 Yangonemoo namba yulu piyu dupwa kaeya nao makande minyuo pyuo karalapape. Yulu rolae lasaka piyama dokona moko minyuo pelyaminyi dupwa kando mana nyuo pipwape.
PHI 3:18 Yuu wamba namba yuu malu mee nakama mana langingi kandale doko dee epapu dakepa kamba ee ipwange nyuo lao langilyu. Wambu malu mee yulu koo pilyaminyi dokome Yesu Koraisa isa mamandona kumuo paleya dokona nakama yanda pimwai ingyuo pelyaminyi.
PHI 3:19 Anatu kaepala nengepe yanengena bange dupwape mupwa lao suu pilyaminyi. Dokona lao nakama Satanena panda parami. Nakama elyange yulu wakale wakale dupwana iki poraiyuo suu pyao karenge.
PHI 3:20 Kamongo Yesu Koraisa namwana Lete Wai Pyao Nyingi doko yake panda piso namwa isa nyela eparamo dokona mona kare kare isaro petamano. Namwana yuu muru yake panda silyamo.
PHI 3:21 Anatumi namwana isa wambunya yongo kwaelyamo dupwa kaepala banya yongo yanga paupau lenge dokona makande minyuo alowa pyuo jera. Banya porainya renge isa bange peparae nyuo isa palyingi dokome kapa pira.
PHI 4:1 Nambana Kurisene yango dupwa. Nakama porai ingyuo Kamongona arapu dokona dapale ingyuo karalapape lao langilyu. Namba nakama mona reto kondalyo. Namba keta yulu keyange pyuo pisaminyi dokona rae wakasa maiyuo nakama lakandelyo.
PHI 4:2 Enda Yotiapa Sindikipa nakamba Kamongona arapu dokona Kurisene kakingi ingyuo karalapape lao poraiyuo langilyu.
PHI 4:3 Dokona ingyuo nambana yulu role pyao pingi akali embame enda lama dolapo nyisakare. Enda dolapo porayapala namba role pyao yulu andake waili pii dokona raeyo lao kareyama. Kelemene dee nambana yulu mendare pingi akali lapo Anatunya letena renge buku dokona kingi pyasi palamo dupwa opetae waili pii raeyo lao kareyamako.
PHI 4:4 Kamongona arapu dokona karo yuu peparae rae maiyuo karalapape. Rae wakasa maiyuo karo pipwape lao dee kamba leto.
PHI 4:5 Nakama wambu yango dupwa kando rambi rambi lao kararami. Kamongo baa repeta usale epara ingilyamo.
PHI 4:6 Mona nembo kara nalapape. Nakama yano piramo kararami dokona nakamana ateŋa dokome Anatu piso selapape. Dopa pyuo baa piso soo dokopa mona kare kare sangyu lao pipape.
PHI 4:7 Koraisa Yesupa pako kararami dokopa Anatunya mona kyuu lao singi renge mee wambu dupwa soo gisa nange dokome nakamana mona andape suu pingi dokonape kame pyuo minyara.
PHI 4:8 Pii renge dakeme lao oto leto. Yulu keyange wambu kando epe singi dupwana iki suu pyao karalapape. Angi dupwape, suu pingi rolaepe yulu rolaepe koo pali nange dupwape au pisi dupwape mona palenge yulu dusipa iki suu pyale pyale pyuo karalapape.
PHI 4:9 Yulupi piipi namba keta mana nyiyami dupwa iki pyuo karalapape. Anatu mona kyuu lao singi renge jingi dokome nakama pipya role pyao karara.
PHI 4:10 Namba Kamongopa pako karo renge dokona rae andake mailyu. Nambame nakama yuu wamba rekya lapala epeyo kande doko suu pyao ene alembole bange lapo nyiso jimi. Nakama namba kame soo kaeyami lao laa nalyo. Nakama nanesale karapala bange lapo jerami kata mende pali naya.
PHI 4:11 Namba pendewa ingyuo karapunu dokona pii mende daa. Bange mendasipa iki silyamosa namba mee rae maiyuo karenge.
PHI 4:12 Namba wamba yuu lapo lopo karo, yuu lapo bange malu siyasa kareyo dokona renge mende mana nyiyu. Doko lopo karowape sikya piramopa karowape bange sera panda bange see naramopa namba mee rae maiyuo kararo ingilyamo.
PHI 4:13 Koraisa baame namba porainyi pyambuyasa yulu peparaena lao mona kuki palyuo karenge.
PHI 4:14 Namba randa nao kareyo dokona nakama nyiso yulu ama keyange wakasa piyami leto.
PHI 4:15 Yuu wamba kanda soo waili pii lamaiyuo karo dokopa yuu Masetonia karapala mendasa peyo. Dokopa nakama Elyambu Pingi wambu Pilipai karenge dupwame iki namba nyisiyami doko range silyaminyi. Namba kapa kareyonopape randa nyiyunupape nakamame iki namba nyiso kareyami.
PHI 4:16 Namba Tesalonaika kareyo yuu gii dokopa yuu mendaki iki nyisapala kaeya nayami. Dee kambako nyisiyami.
PHI 4:17 Nakama bange jilyaminyi renge dokona iki rae mai nalyo. Nakamana yulu keyange wambo yake panda para lyasili. Bange malu konda pyuo jiminyi dokona kapa karo.
PHI 4:18 Bange malu kamame konda pyuo jiminyi dokona kapa karapala sangyu lao pepa dake isingi pyao jilyu. Ipaporaitasa baame nakamana bange jiminyi dupwa peparae namba nyipunu dokome epapu mende namba yangya nara ingilyamo. Anatu kyaa pyuo rendamu pingi mailyaminyipa kando nyuo rae maiyuo pingi doko.
PHI 4:19 Nambana Anatumi baa bange malu retenge dokome nakama bange yangyaramo dupwa peparae Koraisa Yesu keta isingi jera.
PHI 4:20 Namwana Rakange Anatu dokona lao kingi ketae pyambuo lakando karalu kararama. Doko kinyi.
PHI 4:21 Anatunya wambu Koraisa Yesu keta karenge dupwa peparae yako lao leto. Kurisene yango lapo nambamoo pipya role pyao karamwano dupwame opetae yako letaminyiko.
PHI 4:22 Anatunya wambu dae petenge dupwa peparaemoome dee kiŋi akalinya yulu pyakamyuo karenge dupwamoome yako letaminyi.
PHI 4:23 Kamongo Yesu Koraisana mona keyange palyuo ipingi renge nakama peparae keta palena lao leto.
COL 1:1 Anatumi masiyamuli pyuo namba Pole Koraisa Yesunya aposele inginyi pyambuyamopa namba namwana yangonge Timotipame
COL 1:2 nakama Kolosi dokona Anatunya wambu namwana yangonemoo ingyuo Koraisa keta baa maso minyuo karaminyi dokona pepa peyakalyambano. Namwana Rakane Anatumi nakama keta mona keyange palyuo ipingi rengepe mona kyuu lao singi rengepe retakana lao yako letambano.
COL 1:3 Nakama Koraisa Yesu kapa ingingi lao suu pyapala Anatunya wambu yango mona maiyuo karaminyi doko soo karamano. Renge dokona namwana Kamongo Yesu Koraisana Rakane Anatu dokona kaeya nao ateŋa letamano.
COL 1:5 Anatunya waili pii keyange rolae doko kanda soo sepeyaminyipa keyange keta palirami doko soo gisiyami. Yake pandana bange keyange sakalyamo dokona mona kare kare karapala Anatu kapa ingingi lao suu pyapala wambu yango mona reto karaminyi.
COL 1:6 Waili pii keyange nakama siyami dokoko epapu yuu muu dupwana raeyo pelyamo. Anatumi mona keyange palyuo ipingi renge doko angi soo nyepeyaminyi mange dokopa piso epo pii doko nakama keta andapala jingi ingyuo lyingi. Nakama keta jingi lyiya dopako pyuo wambu peparae keta epapu jingi lyilyamo.
COL 1:7 Akali Ipaporasa namwa role pyao Koraisana yulu doko namwa nyiso pyuokondali pyuo karamo. Baa wamba nakama mana lamaiyuo karapala epeya.
COL 1:8 Imambu nakama nyisiyamopa wambu yango mona retelyaminyi doko namwa langiya.
COL 1:9 Renge dokona sepala dokopa piso epo yuu peparae kaeya nao ateŋa lakalyamano. Nakama mona angi palipala imambunya yulu dupwa soo gisapala dokome
COL 1:10 Anatu nakama pimili lao suu pilyamo dupwa kando nyeparami dokona loma sakao petamano. Kando nyepala dokopa Kamongome nakama yulu pimili lao rae mairali dupwa pyuo kararami. Nakama Anatunya yulu dupwa soo nyepala yulu keyange doko jingi keyange lyingi dopale pyuo kararami.
COL 1:11 Dokonako ingyuo banya porainya renge wakasa dokome nakama porainyi pyambwaramopa randa malu eparamo dokopa mona kuki palyuo rae maiyuo kararami.
COL 1:12 Anatumi banya wambu dupwame nyerami lao banya sii pingi panda dorena bange keyange retakaya. Nakama banya wambu ingyuo petaminyi dupwa role pyao mokwa soo nyerami lao kata wapwakaya. Dokona Rakane kando sangyu lao karalapape.
COL 1:13 Baame namwa iminjinginya kareyama dokona neta nyepala banya Ikinyingi mona retenge doko keta namwa banya isingi panda dorena kareya.
COL 1:14 Baako keta namwa kiiramo nyepala namwana koo dupwa nyuo kame sakaya.
COL 1:15 Namwa Anatu kapa kanda nange dokona Koraisa baa Anatu yale isa komba pyao karamo baame wasiyamo dupwa peparaena mupwa ingyuo karamo.
COL 1:16 Baa ketako yake bange dee isa bange dupwapeko wasisi silyamo. Bange kandenge dee mendeme kanda nangepe Imambu dupwape kiŋi dupwape kamongo dupwape gapomane dupwape baa ketako pyuo ingiyamopa banyako silyamo.
COL 1:17 Bange peparae ene wasapa nayamopa baa wambo ingyuo karalu karenge. Dee baameko bange peparae serali panda dupwana reto simuo pyao minyaro karamo.
COL 1:18 Elyambu Pingi doko banya yongo ingingi. Baa dokona akali kyawa ingyuo karamo. Banya yongo dokoko baa dokona piso renge kuiyuo epeya. Kumapala sipurao lete parami dupwana baa kanda soo lete epeya. Epo baa peparaena mupwa ingyapala karamo.
COL 1:19 Anatumi suu piyamuli pyuo banya Ikinyingi Yesu baa range ingyuo karengenyili pyuo baa keta maralyiyamopa isa komba pyao nyiya.
COL 1:20 Anatumi yuu muu peparaena rekya lasi siyamo doko banya Ikinyingi keta dee nyuo mendakiya. Yesumi isa mamandona ranjama kulimbuo kumuo paleya dokome Anatumi yake yuupi peparae baa keta sukusa nyiya.
COL 1:21 Nakama suu pingi kwaenge dokome ene alembole yulu koo pyuo kareyaminyipa Anatupa yanda pimwaiyuo rekya lao wakale ingyuo kareyami.
COL 1:22 Kareyaminyipape Koraisame isa wambunya yanenge nyepala kumuo jiyasa Anatumi nakama pipya kando nyiya. Kando nyiyamo dokome nakama banya lenge kambu dorena koo keta pali nao yapasi keyange ingyuo kararami.
COL 1:23 Dokona lao nakamana kapa ingingi lao suu pingi doko yake nyii napala poraiyuo karalapape. Yesu epapala keyange pyakara lao waili pii keyange doko yake nyii nao mona kare kare karalapape. Pii doko wambu yuu muu dupwana peparae silyaminyi. Doko namba Poleme pii dokonako kendemande ingyuo lao karo.
COL 1:24 Namba nakama nyisapusa randa nyilyu dokome rae maiyuo nyilyu. Elyambu Pingi doko Koraisana yongo ingilyamo dokona lao baa randa nyiya. Randa nyiyamo pinjingi koko pyasi doko namba nyilyu.
COL 1:25 Anatumi banya pii peparae langirono dokona lao namba Elyambu Pinginya isingi akali lao rombo palyiya.
COL 1:26 Pii doko kai wamba yalu pisi singi doko epapunya banya wambu dupwa keta panasi silyamo.
COL 1:27 Anatumi banya suu pingi neta renge yalu pisi doko, banya wambupi Juu daa rara wakale dupwape keta nyuo panara lao suu piya. Pii wambo yalu piyamopa see nayami doko Koraisa nakama keta palamo. Dokome Anatunya yanga paupau lenge panda nyerami.
COL 1:28 Dokona namwa wambu peparae Koraisana kingi boo pyao lao singi renge wakale wakale dupwa mana lamailyamano. Dokome nakama mendaki mendaki lao mona palenge wambu ingyuo Yesupa pakao Anatunya lenge kambu dorena kararami.
COL 1:29 Yulu doo iki pinya lao suu pyapala Koraisana porainya renge dokome namba paka pyao sipyamo yulu andake doko randa nao pyuo karo.
COL 2:1 Nambame nakamape Leotosia rangepe dee wambu lapo namba kanda nange yuu wakalena petengepe dupwana lao yulu andake pyakamyuo karo leto.
COL 2:2 Nakama mona palipala mona retenge dokome nyuo mendakyaramo kararami lao yulu andake pilyu. Anatunya singinya renge dokope suu pingi dupwape Koraisa keta wua nanga boro kumuo yalu pili laro karamo. Nakama pyuo karo dokopa renge dupwa soo nyuo mona kumapala kararami.
COL 2:4 Wambu lapome epo pii keyange ingili lao nupi soo langiraminyi dupwana waso karalapape lao wambo langilyu.
COL 2:5 Namba nakama pipya angingyuo kara nalyo doŋo imambunya yulu dokona ingyuo nambana mona dorena dolo nakama pipa karo. Nakama Koraisa kapa ingingi lao suu pyapala mee kana para para ingyaro karaminyi doko kandapala namba rae mailyu.
COL 2:6 Nakama Koraisa Yesu nakamana Kamongo lao kando nyiyami dokona baapa role pyao karalapape.
COL 2:7 Namwa Kurisene yulu mana langiyama dokona minyuo pingi pyapala ando karo mona yaepapala Anatu lakando karalapape.
COL 2:8 Nakama isa akalinya pii rambaye dokona kyambo laraminyi sisaramano lao waso karalapape. Akali dopale dokome Koraisana mana nyii napala isa imambu koo dupwana mana nyepala pyuo karaminyi.
COL 2:9 Koraisa Yesumi wambunya yongo maralyuo karo, Anatu angi karengenyili pyuo kareya.
COL 2:10 Nakama baapa pakao Anatunya wambu angi ingyapala karaminyi. Baa porai dokome yake panda isa pandarena simuo pyao minyaro karamo.
COL 2:11 Isa wambunya yanenge kalomengenyili pyuo kalomapala karaminde daa. Koraisame nakamana yongome koona wangu lakao karamo dokona rekya lao nyiyamosa karaminyi. Nakama baa keta yongo kalomanyi nembenge dopale karaminyi pilyamo.
COL 2:12 Nakama bapitisimo nyiyami kande doko Koraisapa role pyao malu pisi siyami. Dee Anatumi Yesu kumasi siyamo dokona lete minyalyuo nyiya doko baa porai kapa ingingi lao suu piyami dokome nakama bapitisimo nyiyami dokopa Koraisapa role pyao minyalyuo nyiyasa piya.
COL 2:13 Nakama yulu koo pyuo karo mona anda awali lao kalomo rekya lanyi nembapa nayami dokome nakama kumasi ingyuo kareyami. Kumasi ingyuo kareyaminyipape Anatumi namwana koo dupwa nyuo kame sakapala nakama Yesupa role pyao lete minyalyuo nyiya.
COL 2:14 Juu wambunya mawa pii malu pyasi paleyamo dupwame namwa kimbwalya kimbwana piyamo kareyama. Dokona Anatumi mawa piro kareyamo dusipa nyepala isa mamando dokona pirimi pyao mee inginyi nembeya.
COL 2:15 Koraisame isa mamando dokona mupwa dupwape imambu dupwape anamasi minyuo puu maipala yuu aupa lao anda lanyuo epeyamopa wambu peparae kandeyami.
COL 2:16 Dokona ingyuo mawa pii malu waso retarami ingya nalyamo. Nenge ipwape nao dokonape Kurisimase lyuope nenge andake yangowape Koro Petenge yuu giipi dusipana lao mawa pii mende palya narami ingilyamo.
COL 2:17 Dupwa angi mende daa. Imambu mee ipwa jimi jiminya kandenge dopale. Angi doko kulisa palyuo kandarami doko Koraisa karamo.
COL 2:18 Wambu lapome kombeyame kandaramo dupwana arome pyao nakamba wangu lakapala aŋala dupwana kingi lao, isa wambunya suu pingi dokome range ketae nembapala karenge dupwame nakama nyuo isa palya nanale.
COL 2:19 Wambu dopale doko Koraisa keta role pyao mendakinya ingyuo kara nange. Koraisa baa kyawa ingilyamopa yongo peparae minyala minyala pao karenge. Dokome Anatu suu pyaramuli pyuo andara.
COL 2:20 Nakama Koraisapa role pyao kumuyami dokopa imambu koo nakama rambu lasi kareyami dupwana kingi rekya leya. Dokona akipamo mee isa wambu pinginyili pyuo pyuo karamisi?
COL 2:21 Kingimi minyanda nao, angi naa nao, dee warenda nao waso karalapape lao karaminyi dokona nakama akipamo warombo sepala waso karamisi?
COL 2:22 Mana nyilyaminyi doko mee isa wambu dupwana mana nyepala pyuo karaminyi. Waso karaminyi bange dupwa isa bangeŋe isa para ingilyamo.
COL 2:23 Wambu lapome yulu dopale keyange suu piyaminyipape aŋalana kingi laope rangena yongo randa maiyuope inyimungu karo pyuo karaminyi yulu dupwame yangengena yulu koo pundange dupwa nyuo anamasi minya nara ingilyamo.
COL 3:1 Emba Koraisapa lopo epasi dokome Koraisa baa Anatunya kingi rolaerena nyuo kareyamopa karamo dorena kandaro karape.
COL 3:2 Isa bange dupwa mona reta napala yake bange dupwa suu pyao karape.
COL 3:3 Emba kumiinyisa embena imambu doko Koraisapa Anatu dokona yalu pisi karamo.
COL 3:4 Koraisa baame namwana angi letena renge ingyuo karamo. Rengya baa panembena epara dokopa nakama opetae Kamongona neta renge yulu dokona role pyao ingyuo para.
COL 3:5 Pamuku yulupi suu pingi koope yongona yulupi pundao yuu pingipi bange nyipuli nyipuli lao suu pingipi nakamana yongo pundapala pilyamo dupwa anamasi minyalapape. Bange nyipuli nyipuli lao suu pingi wambu dupwa Anatu kaepala dusipa mupwa lao maso minyuo kararami ingilyamo.
COL 3:6 Koo dopale pyuo karo kamba letaminyi dupwa keta Anatumi kote lara ingilyamo.
COL 3:7 Nakama wamba wambu yulu koo pingi dupwa role pyao paleyami dokopa koo dopale pinya wangu lakapala pyuo kareyamipya.
COL 3:8 Imbwuangepe ingi pungipi nengepe kanda sikya sikyu lengepe ingi koo manjo laiya lengepe mokwalipi lengepe dupwa nembo kaeyalapape.
COL 3:9 Nakama yulu wambarae kaeya nao pingi dupwa nembapala enenge ingyuo karaminyi dokona yango sukusa kyambo lao kara nalapape.
COL 3:10 Anatumi nakama wambu enenge ingyuo wasiya. Wasiyamopa nakama baa yale enenge ingyuo kisokwanyi pyambwalana pyuo karamo dokome banya dupwa soo giso parami.
COL 3:11 Yulu enenge dokome Juu Girikipi ingyuo kingi see nara. Yanenge kalomengepe kaloma nangepe rara wakale wakalepe kingi mende see nalyamo. Dee kendemandepe mee karengepe ingya nara. Koraisa baa keta peparaena keta karengeoko dokome wakale mende yangya nara.
COL 3:12 Nakama Anatu rangena rombo palyuo kaeyasi wambu karaminyi. Baame nakama mona retapala rangena lao rombo palyiya. Dokona lao nakama wambu yango kando sakapala anjiki pyuo karo range inyimungu kararami. Mee pau lao maka nao pyuo karalapape.
COL 3:13 Nakama yango sukusa mendali nyiso nyiso pyuo dee yango sukusa pii paleya kande dokopa nyuo kame sakamyuo karalapape. Kamongome nakamana koo dupwa kame sakaya dokona suu pyao yango mendali keta dopako pipwape.
COL 3:14 Yulu keyange dupwa nyuo pee pipala mona retenge renge dokome ketae nenge nyuo wapurami dokopa keyange ingyuo para.
COL 3:15 Koraisana mona kyuu lao singi renge nyerami lao Anatumi nakama yongo mendaki dokona nyuo kiminjiya. Dokona mona anda kyuu lao see nara ramo doko koo pipulyamo lao soo pakana palyuo kararami. Dokona lao yuu peparae rae maiyuo karalapape.
COL 3:16 Koraisana pii nakamana mona anda dokona palyuo ando nyimbunya. Nakamana mona anda dokona Anatu sangyu lao misi kenane dupwape imambunya kenane dupwape ipwa kyukunaiye maiyuo pena lao pyao karalapape.
COL 3:17 Nakama yulu pyuope pii laope Kamongo Yesunya kingi dokona suu pyao pyuo karalapape. Pyuo karo dokopa Koraisa keta Rakane Anatu sangyu larami.
COL 3:18 Etenge dupwa akalinyinya pii minyuo laraminyili pyuo soo pisipwape. Dokopa Kamongona lenge kambu dokona rolae ingyuo sera.
COL 3:19 Akalingi dupwa nakamana etene kondo karapala pau lao rapu pyuo karalapape.
COL 3:20 Wanenge ikinyingipi dupwa nakama yuu peparae rakane endakinyipinya kambu moko minyuo pipape. Dokome Anatu rae mainyi pyambwara.
COL 3:21 Nakama endangi rakangepeme nakamana wane wanakepe imbu singi manjinyi pyambwa nalapape. Pyambwarami ramo dokopa nakamana mona kendo inyimungu kararami.
COL 3:22 Kendemande dupwa nakamana yulu pyakamingi akali dokona pii laramuli pyuo pipape. Lengeme kandamili lao panga soo yulu pii nalapape. Kamongo dokona pakapala monarena rolo sero yulu rolae nembo pipape.
COL 3:23 Yulu mende piyami kande dokona mona nyepala mee akalinya daa Kamongo dokona pyakamipusa pyaamo lao suu pyao poraiyuo pipape.
COL 3:24 Embame yulu doko Kamongo Koraisana pipisa pilyamo. Dokona lao Kamongo keta yole nyerama lao selapape.
COL 3:25 Dee yulu koo pilyaminyi dupwa yole kooko nyerami. Anatumi mee langa wambu yapalya yapana pyuo kara nange.
COL 4:1 Akali andake dupwa nakamana Rapu Pingi yake panda karamo doko suu pyapala nakamana kendemande akali dupwa kando rolae nembo pipwape.
COL 4:2 Ateŋa kaeya nao lao lenge rakaro karo Anatu kando sangyu lalapape.
COL 4:3 Koraisana yalu pisi singi dupwa kapa boo pyao larami lao Anatumi kata wapwakanale lao ateŋa lakarami. Namba pii dokoko lao kareyonosa karapusi palyuo karo.
COL 4:4 Pii yambe pyasi palamo doko mondo lao lalana lao suu pilyu dokona loma selapape.
COL 4:5 Mee wambu pipa pii lao yulu pyuope dokona kandokondali pyuo yulu nakama keta silyamo dupwana mondo koo lao pyuo karalapape.
COL 4:6 Kurisene ingya nange dupwa kando pii keyange ingyuo rende pyuo lamairami dokopa epe soo parami. Wambu mendaki mendaki kando aki piinde keyange lamairu lao suu pyao karalapape.
COL 4:7 Namwana mona retenge yangone Tikikasa baame Kamongona yulu role pyao pyuo karamo. Baa eparamo dokopa namba apa pyuo karene lao langira.
COL 4:8 Baame namwa apa pyuo karamano lao dokona langyuo nakama mona porainyi pyambwaraŋa lao mapanyi peelyo.
COL 4:9 Nambana mona retenge Onisimasa nakamana ralape dokonande yulu wangu lakao pingi doko role pyao epara. Anelapome nakama dae apande pilyamo lao langirambi.
COL 4:10 Aritakasa nambapa karapusi anda palamo dokome yako letamoko. Wane mende Make baa akali Banapasana kingi baa opetae yako letamo. Banya yulu dupwa wambo langiyu kande doko baa nakambana anda kata epeya kande doko yako lao nyelapape.
COL 4:11 Josua kingi mende Jasatasa lenge dokome opetae yako letamo. Mona kapu kyingi Juu akali rema dusipa iki nambamoo pipya Anatunya isingi yulu dokona suu pyao pyuo karaminyi. Nakama namba mona minyarambu nyiso pyuo karaminyi.
COL 4:12 Koraisa Yesunya yulu pyakamaingi akali Ipaporasa baa nakamana ralape dokonandeme nakama yako letamo. Baame nakama porayapala suu pingi lama suu pyaa nao Anatu suu pyaramuli pyuo karo eŋa nembo karamili yaka lao yuu peparae Anatu kando loma sokonda koo pyako karamo.
COL 4:13 Baame yulu andake pyuo nakamape dee Leotosia Irapolisa wambupi dolapona nyiso pyakalyamo doko range kando karo.
COL 4:14 Namwana mona retenge dokota Luku Dimasapa nakambame yako letambinyiko.
COL 4:15 Yuu Leotosia sukusa wambu dupwa yako lakalapape. Enda Nipape dee wambu banya anda misi lao elyambu pyuo petenge dupwape opetaeko yako lakalapape.
COL 4:16 Pepa pase dake yaka lapala Leotosia Elyambu Pingi wambu dokona yaka lena lao maipwape. Dee Leotosia dokona pepa pase mende reto karaminyi doko nakama kame see nao nyepala range kandalapape.
COL 4:17 Kamongome yulu jiyamo doko waso minyuo kando pyakamilyu lao soo piri lao akali Akipasa pii dake lamaiyakamipape.
COL 4:18 Nambana kingi dake Pole lao pyanjilyimi pyanyi palyilyu. Namba puu maiyamisa kiimbasi peto kande. Anatumi mona keyange palyuo ipingi renge nakama keta palena lao yako leto.
1TH 1:1 Rakane Anatu, Kamongo Yesu Koraisapana Elyambu Pingi yuu Tesalonaika petenge wambu dupwa pepa dake namwa Polemoo Sailasa Timotimoo pyao jilyamano. Mona keyange palyuo ipingi rengepe mona kyuu lao singi rengepe nakama keta palena.
1TH 1:2 Namwame yuu peparae Anatu dokona sangyu lao karo nakama suu pyao kaeya nao ateŋa lakao petamano.
1TH 1:3 Namwana Rakane Anatu kando ateŋa lao dokopa nakamame Anatu kapa ingingi lao soo nyiyaminyi dokome yulu keyange piyami doko kame see nalyamano. Nakama Anatu mona reteyami dokona yulu porai piyami. Dopako pyuo namwana Kamongo Yesu Koraisa dee epara doko soo gisapala mona kare kare karaminyi. Dopa pyuo keyange pilyaminyi doko kame see napala ateŋa lakalyamano.
1TH 1:4 Yangonemoo, Anatumi nakama mona reto baa rangena ingyuo rombo palyiya doko soo kaelyamano.
1TH 1:5 Namwa waili pii keyange lao epeyama doko pii yeelyo minyuo epeyamande daa. Porainya renge paletape Imambu Poo Pyasi opetaepe nakamana monarena yulu porai piramopa kapa ingingi lao suu pyarami doko minyuo epeyamasa piya. Nakama kapa serami dokona lao namwa apa pyuo pyuo karaminyi lao kandeyami.
1TH 1:6 Nakamame Kamongona yulu dokonape namwa piyama dokonape kimbu moko minyuo pyuo kareyami. Randa andake nyuo dokopa waili pii keyange soo nyiyami. Dokona Imambu Poo Pyasimi nyisiyamopa rae maiyuo kareyami.
1TH 1:7 Nakama yulu keyange piyami dokona Kurisene wambu yuu Masetonia rangepe yuu Girisi range dupwape nakamana yulu kandapala piyaminyili pyuo pyuo kareyami.
1TH 1:8 Kamongona waili pii nakama keta raeyo peya doko yuu Masetonia Girisipana iki daa. Nakama Anatu kapa ingingi lao suu piyami doko yuu muu peparaena lao peya. Dokona namwa aki mende konda pyuo laramase?
1TH 1:9 Namwa nakamana yuu dokona kanda soo epeyama dokopa nakamame yako lapala yulu andake piyami doko wambu peparae lao karaminyi. Dokona lao nakamame bange wakale anatu yaleoko kingimi waso kareyami dupwa yaki nyepala Anatu angi lete karenge dokona dokoko wambu peparae lao karaminyi.
1TH 1:10 Banya Ikinyingi baame lopo nyiyamo doko yake panda piso lupyuo eparamo doko isaro karaminyi. Yesu eparamo dokopa Anatunya kote andake palira dokona namwa nyiso kiiramo nyera.
1TH 2:1 Yangonemoo namwa epeyamano dokopa mee ingyuo paa naya nakama silyaminyi.
1TH 2:2 Namwa yuu Tesalonaika ene epeyamanopa yuu Pilipai dokona randa jepala kilya kando leyaminyipa kareyama doko silyaminyi. Randa andake jiyaminyipape Anatumi namwa porainyi pyambuyasa banya waili pii keyange eŋa nembo lao langyuo kareyama.
1TH 2:3 Namwa waili pii keyange lawa pyuo laa napala suu pingi koo wakale suu pyaa nao dee mendali minyoko pii nao lao karamano.
1TH 2:4 Anatumi namwa kando kapa lao suu pyapala waili pii keyange boo pyao lao kararama lao namwa keta jiyamosa baa namwa lamili yaka lao suu pilyamo dupwa iki lao karamano. Namwame isa wambu rae mainyi pyambwa nao Anatu iki rae mainyi pyambwalyamano. Baame namwana mona anda kandenge.
1TH 2:5 Pii isa isa panga panga paeyo lao dee pii wakale lao nyipuli nyipuli lao epa nayama. Nakama angi silyaminyi. Anatumi pii letamano doko soo karamo.
1TH 2:6 Namwame nakama range panda wambu menge dupwame lakandamili lao pyuo kara nayama.
1TH 2:7 Lao kara nayamanopape Koraisana aposele akali ingyuo karamano dokome namwa ketae pyambwalapape leyamali doko mee kapa ingiyali. Namwa nakama pipya karo anjiki pyuo endangimi wane rapu pingi doko suu pyao pyuo kareyama.
1TH 2:8 Namwame nakama mona reteyamano dokona Anatunya waili pii keyange doko langiyama. Doko iki langiyamande daa. Namwame nakama mona reto kareyamano dokome nakama kumuo jelana suu pyao kareyama.
1TH 2:9 Yangonemoo namwame yulu poraiyuo pyulu pyuo piyama doko kinyi silyaminyi. Bange lapo kee laa narama lao yuu peparae kukwamape korakamape Anatunya waili pii keyange polo langyuo yulu pyuoko kareyama.
1TH 2:10 Yulu piyama doko nakamape Anatupi soo kandeyami. Nakama Kurisene wambu dupwa keta kopetame pii napala yulu rolae dupwa piyama dokopa mende larami ingya naya doko silyaminyi.
1TH 2:11 Namwame nakama rakangeme ikinyingi kando pinginyili pyuo pyuo kareyama.
1TH 2:12 Namwame Anatunya isingi panda neta renge yulu dokona pena kee lao nyuo karamana leyamo dokona karalamisi lao nakama nyiso porainyi pyambuo Anatu rae mainya lao yulu keyange pirami dupwa mana langiyama.
1TH 2:13 Renge mendena opetae yuu peparae Anatu sangyu letamano. Namwame Anatunya waili pii minyuo epeyamano doko soo nyiyami. Pii leyama doko mee wambunya pii lao masa nao Anatunya piilyamo lao soo nyiyami. Pii soo nyiyami doko Anatumi angiko. Anatumi nakama Kurisene wambu sukusa dokona yulu pyuo porainyi pyambuo karamo.
1TH 2:14 Yangonemoo Anatunya Elyambu Pingi wambu Koraisa Yesunya arupunya karo yuu Jutia karenge dupwa Juu wambumi randa maiyami. Doko suu pyao nakama Tesalonaika range dupwa nakamana rara dupwa keta randa nyuoko petaminyi.
1TH 2:15 Juu dupwame Kamongo Yesupi poropeta akali dupwape pyao kumakapala namwa randa jiyami. Randa jiyamisa Anatumi nakama kando epekanda nalyamo. Nakamame wambu peparae yanda pimwaiyuo karaminyi.
1TH 2:16 Juu wambu dupwame rara wakale dupwa waili pii keyange lamairama doko sepala lete wai pyao nyingi kando nyerami doko kata pyakepelyaminyi. Nakama yulu koo dokore kaeya nalyaminyi dokona andalu ando andapala Anatunya lenge kambu dokona kote pii palamo.
1TH 2:17 Yangonemoo namwame nakama rekya lao kaepala yuu wakale yuu gii mendasipa iki peteyamanopape nakama kondapala lenge kambu kandalana lao suu piyama. Yuu gii dokopa nakama kame soo kaeya nao yongome iki yaki nyuo kaeyama.
1TH 2:18 Namwa dee kapu kyuo epana suu piyama. Namba Pole yuu lamasa makande pyuo epana piyu. Epana piyunupape Sataneme kata pyakepeya.
1TH 2:19 Kamongo Yesu dee epo kararamopa namwa banya lenge kambu dokona karo yulu andake pipala nakama sukusa nyiyama doko suu pyao rae maiyuo lao kararama.
1TH 2:20 Kinyi nakamana kingi lakanda lakanda pyuo rae maiyuo minyuo petamano.
1TH 3:1 Enakana mona kendapala namwa yuu Atenesa dokona isaro karo dokopa
1TH 3:2 namwana yangonge Timoti pena leyama. Timoti baa namwa role pyao Anatunya yulu pyuo Koraisana lao waili pii boo pyao lamaiyuo kareya.
1TH 3:3 Nakama randa andake nyepala neta pasarami lao baa nakama porainyi pyambuo nakamana Anatu kapa ingingi lao suu pingi doko nyisinya lao pena lamaiyama. Kurisene wambu nakama randa nyinginyili pyuo Anatunya suu piyamuli pyuo nyilyaminyi doko.
1TH 3:4 Namwa nakama role pyao kareyama dokopa randa epara langiyama kande dokona leyamanuli pyuo pilyamo.
1TH 3:5 Dokona lao nambame Timoti pena lamaiyu. Isaro karo mona kendapala nakama porayapala kapa karamipi lao kandala pena leyo. Sataneme nakama makande pyuo neta nyeramopa yulu andake piyama doko mee ingyuo para doko kapa daa lao suu piyama.
1TH 3:6 Timoti nakama role pyao karapala namwa karamwano dakena dee ipya. Ipyamopa nakama Anatu kapa ingingi lao suu pyapala mona reto karaminyi langipyasa rae maiyuo karamano. Baame langyuo dokopa nakama namwa mona retelyaminyi lapya. Namwa nakama kandamwali yaka lamwanopa nakamame dopako pyuo letaminyi langipya.
1TH 3:7 Yangonemoo namwa randa andake nao karamwanopape nakama yulu keyange piminyi pii doko soo nyepala mona minyarambu pipyamo karamano.
1TH 3:8 Nakama kaeya nao Yesu kapa ingingi lao suu pingi doko yaki nyii nalyaminyi langipyamo pii dokome namwa mata kyakao nyilyamo.
1TH 3:9 Pii doko sepala dakepa nakama keta Anatu kando sangyu letamano. Namwame Anatunya lenge kambunya karo nakamana yulu rae maipala sangyu letamanoko.
1TH 3:10 Kukwa korakamape nakama kandamwali yaka lao Anatu dokona piso silyamano. Kandapala dokopa nakama Anatu kapa ingingi lao suu pyao karaminyi dokona mende mwuara ramo nyisarama ingilyamo.
1TH 3:11 Rakane Anatu, Kamongo Yesupame namwa eparama kata doko wapwakana lao suu pilyamano.
1TH 3:12 Namwame mona retenge yulu doko nakama keta palyuo pyoko pyoko laramopa nakama yango sukusape wakale dupwa ketape Kamongo dokome nyisaramopa reto karamili yaka lao suu pilyamano.
1TH 3:13 Dopa pyuo kararami dokome baame nakamana monarena porainyi pyambwakaramopa Kamongo Yesu banya sukusa wambu pipya eparamo dokopa namwa Rakane Anatunya lenge kambu dorena koo keta pali nao yapasi ingyuo kararama.
1TH 4:1 Yangonemoo lumwa pyuo langilyu doko apa pyuo piramanosa Anatu rae maiyuo para lao mana langiyama kande. Dokonako palyuo nakamame pyuo karaminyi doko silyamano. Dee Kamongo Yesunya kingi lao yulu keyange konda pyuo pirami lao poraiyuo langyuokondali pyuo letamano.
1TH 4:2 Kamongo Yesunya kingi lao pii mana langiyama dupwa soo karaminyi.
1TH 4:3 Anatumi nakama enda mende mee kepo pyakami napala yapasi ingyuo karamili yaka lao suu pilyamo.
1TH 4:4 Akali nakama mendaki lao rangena enda au pyuo suu pyao nyerami lao yapasi ingyuo apa pyuo reto palyuo ketae nembo pirami ingilyamo.
1TH 4:5 Anatu see nange akali dupwame etenge dupwa mona reta nao mee nyipuli lao nyilyaminyi dopako pyuo pii nalapape.
1TH 4:6 Dopako pyuo akali mendeme banya yango mende mata rukyuo pyao etengepa role pyao palyakami nara ingilyamo. Namwa wambo nakama repe repe langyuo Kamongome wambu yulu koo dopale pingi dupwa randa maira langiyama.
1TH 4:7 Anatumi namwa rombo palyuo dokopa waa kepo pingi yulu dokona kararami lao kee leyande daa. Poo pyasi ingyuo kararamiŋi lao kee lao nyiya kande.
1TH 4:8 Dopa pyuo mendeme Anatunya pii dake yake nyera ramo doko mee isa akali mata mai nao Anatumi Imambu Poo Pyasi jingi doko baa mata mairasa pira.
1TH 4:9 Nakamana sukusa wambu yango mona retami mana langirunde daa. Anatumi nakama range dopa pyuo mona retarami lao rolae mana langiya.
1TH 4:10 Mana langiyamopa nakama yuu Masetonia peparae dokona sukusa wambu yango dupwa peparaena lao mona reteyami. Yangonemoo yulu mondo lao piyami doko suu pyao epapu andarele pipwape lao laokondali pyuo letamano.
1TH 4:11 Wambo langiyamuli pyuo nakama au pyuo manda rao karope wambu wakalena yulu suu pyaa nao nakama rangena yulu suu pyapala rangena kingimi yulu pipwape.
1TH 4:12 Dopa pyuo piraminyi doko Kurisene laa nange dupwame nakama yulu keyange pilyaminyi dupwa kandapala lakandarami. Nakama dopako pyuo yulu pyuo nenge bangepe nyepengele dupwa range nyerami ramo doko wambu menge dupwa keta kee lao kara narami.
1TH 4:13 Yangonemoo wambu wamba kumuyami dupwana lao rolo simili yaka lao suu pilyamano. Yesu see nange wambu dupwame nakamana wambu yango kumaminyi dokopa mona nembelyaminyi. Nakamame wambu kumuo penge kata dokona rolo serami dokona mona nemba narami.
1TH 4:14 Yesu kumapala dee lopo neta epo peya doko kinyi lao suu pilyamano. Dee kapu kyuo eparamo dokopa Anatumi wambu mona kapu kyingi kumuyami dupwa Yesupa role pyao lanyuo epara doko kinyi lao suu pilyamanoko.
1TH 4:15 Pii dake Kamongona mana piiŋi doko nakama langilyamano. Yuu gii Kamongo eparamopa wambu kumuyami dupwa wamba karaminyipa namwa enakarama.
1TH 4:16 Yuu gii dokopa Kamongo Yesu baa range yakena piso isa eparamo dokopa pii poraiyuo wakasa mende laramopa aŋala mupwa pii laramo dokopa Anatunya pii ketae lakuli pii ingyuo lao epara. Dokopa wambu Koraisa mona kapu kyuo maipala kumuyami dupwa wambo lete sipuro parami.
1TH 4:17 Dokopa namwa kararama dupwape wambo kumapala sipurarami dupwa peparaepe nyuo pyaso kopa dokona kata pao Kamongo yakena kararamo doko kando nyerama. Kando nyepala dokona namwa Kamongo Yesumoo role pyao yuu peparae karalu kararama.
1TH 4:18 Dokona pii dapwa minyuo lao mendeme mende mona minyarambu karalapape.
1TH 5:1 Yangonemoo Yesu anjokorape epara yuu gii dokopape ee kana dupwanape lao namba pepa pyao jepenge ingya nalyamo.
1TH 5:2 Yuu gii Kamongo Yesu eparamo doko waa nyingi akali kamenge walu lao kukwama epenge dopale ingyuo epara doko nakama angi soo gisilyaminyi.
1TH 5:3 Wambumi lao, Namwa koo soo au pyuo petamano laraminyi gii dokopa aopa randa andake dokome nakama kokwa sinyi nembara. Randa andake eparamo doko enda wane mata pilyamopa yanga mangau lao randa nyingi dopale ingyaramopa randa doko wanja narami.
1TH 5:4 Dopa piramopape yangonemoo nakama iminjingi dorenako mee petaminde daa. Yuu yangara doko waa nala epenge dopale ingyuo pyaka sera ingya nanale.
1TH 5:5 Nakama neta rao karapyamo dokonape yangapyamo dorenape karaminyi. Namwa kukwa isa sulu sulu papyuo kara nalyamano.
1TH 5:6 Dokona lao wambu menge dupwa kamenge luu palenge dopale ingyuo pali narama ingilyamo. Namwa lenge rao suu pingi rolae palyuo kando kararama ingilyamo.
1TH 5:7 Wambu luu palenge doko kukwama dokopa palyuo dee biya napala kyakange doko kukwamako kyakao pao pingi.
1TH 5:8 Namwa dopale ingyuo dopale karamande daa. Yuu yango kaepyamo biya waso kararama ingilyamo. Namwa Yesu kapa ingingi lao suu pingipi mona retengepe dolapo konambe dopale ingyuo minyaro kararama. Yesu epapala namwa lete wai pyao nyera dokona mona kare kare karamano renge doko kapame wasisi kyawana pee pingi dopale pee piru karamwasa pilyamo.
1TH 5:9 Anatumi namwa keta kote andake palira lao rombo palya naya. Baame Kamongo Yesu Koraisa keta letena renge nyerami lao rombo palyiya.
1TH 5:10 Namwa ene lete karowape kumapalape Yesu eparamo dokopa namwa baamoo pipya role pyao karalu kararama lao kumakaya.
1TH 5:11 Renge dokona lao wambu yango porainyi pyambuo mendeme mende nyuo mona minyarambu karalapape. Epapu dakepa pilyaminyi dopako pyuo kararami.
1TH 5:12 Yangonemoo poraiyuo langyuokondali pyuo letamano. Nakamame wambu nakamana yulu role pyao pyuo karo Kamongo Yesu nakama kata keyange lasaka pinya lao mana nyerami lao rombo palyiya dupwa wambu lao suu pyao ketae pyambuo karalapape.
1TH 5:13 Yulu pilyaminyi dokona nakama mondo lao rapu pyuo mona reto pirami. Dopa pyuo nakama range sukusa mona seramo karalapape.
1TH 5:14 Yangonemoo pii dake poraiyawale letamano. Makange wambu dupwa yulu pinya lalapape. Wambu pako petaminyi dupwa porainyi pyambwalapape. Wambu pyuku lasi dupwa nyisalapape. Wambu peparae dupwa pyalana pii nao mondo lao karalapape.
1TH 5:15 Mendeme baa kando koo piya kande koo yangome yano pyaa nana lamailapape. Yuu peparae keyange dokome nyuo rolo nakama yango dupwape wambu menge dupwape kondo kondo lao karalapape.
1TH 5:16 Yuu peparae rae maipala karo ateŋa lao karalapape.
1TH 5:18 Yulu peparaena lao Anatu kando sangyu lamaiyalapape. Nakama Koraisa Yesupana arapu dokona lete karaminyi dokona Anatumi nakama yulu keyange dopakale pyuo karamili lao suu pilyamo.
1TH 5:19 Imambu Poo Pyasi nyuo ango naa narami.
1TH 5:20 Anatunya pii pyongo pyao eparamo doko male male laa nalapape.
1TH 5:21 Yulu peparae nakanjo sepala renge keyange dupwa iki minyuo kararami.
1TH 5:22 Koo wakale wakale dupwa peparae yaki nyuo kaerami.
1TH 5:23 Anatu mona kyuu lao singi renge jingi dokome nakama banya angingyuo poo pyao nyakanale lao suu pilyu. Anatumi nakamana imambupi suu pingi yongope nyisu pisi naramopa pao Kamongo Yesu Koraisa eparamo dokona inginya lao iso karenale.
1TH 5:24 Dopa pyuo nakama kee letamo doko baa kaeya napala letamuli pyuo pira.
1TH 5:25 Yangonemoo nakama namwa opetae suu pyao ateŋa pyakalapape.
1TH 5:26 Nakamana wambu yango dupwa yako lao mona reto karalapape.
1TH 5:27 Kamongo Yesunya kingi lao Kurisene wambu peparae pepa pase dake yaka lao lamairami lao poraiyuo langilyu.
1TH 5:28 Kamongo Yesu Koraisana mona keyange palyuo ipingi renge nakama keta palena.
2TH 1:1 Rakane Anatu Kamongo Yesu Koraisapana Elyambu Pingi wambu yuu Tesalonaika karenge dokona namwa Pole Sailasa Timotimoome pepa pyao jilyamano.
2TH 1:2 Rakane Anatupa Kamongo Yesu Koraisapana mona keyange palyuo ipingi renge dokope mona kyuu lao singi renge dokope nakama keta palena.
2TH 1:3 Yangonemoo yuu peparae nakamana lao Anatu sangyu lapenge ingilyamo. Nakamana Yesu kapa ingingi lao suu pingi doko ando andakyapala nakamana wambu yango kando mona retaminyi renge doko ando pelyamoko. Ando pupyamosa namwa Anatu kando kapa sangyu letamano.
2TH 1:4 Dokona lao Anatunya Elyambu Pingi dokona nakamana yulu piminyi dupwana lakandelyamano. Wambu lapome nakama kando randa wakale wakale jiminyipape nakama kaeya nao Anatu kapa ingingi lao suu pyao karaminyi dokome namwa nakama kando rae maiyuo lakandelyamanoko.
2TH 1:5 Anatunya isingi panda dorena reke lao randa andake nyuo kata wapulyaminyi. Nakama dokona sukusa parami dokopa Anatu rolae pyuo kote lenge doko panara.
2TH 1:6 Anatu baame rolae ingyuo nakama randa jilyaminyi wambu dupwa randa maira.
2TH 1:7 Nakama randa nyilyaminyi dokona Anatumi mandaranyi pyambwara. Kamongo Yesumoo banya aŋala porai dupwamoo yake dokona piso pano eparaminyi dokopa namwa opetae koo soo pisarama.
2TH 1:8 Wambu Anatu see nangepe Kamongo Yesunya waili pii keyange warombo soo pisa nange dupwape Yesu banya aŋala porai dupwa pipya isare kekenge dokome randa maiyala eparami.
2TH 1:9 Anatu see nange wambu dupwa Kamongopa pakao kara narami. Yuu gii pyaka seramo dokopa baa porai wakasa neta renge ingyuo epapala dokopa nakama rekya lanyi nembalu nembo nembara.
2TH 1:10 Baa eparamo dokopa banya wambu baa kapa ingingi lao suu pyao karenge dupwame banya kingi ketae pyambuo lakandarami. Dokopa nakama waili pii langiyama doko soo nyiyami dokona nakama opetae role pyao kararami.
2TH 1:11 Namwana Anatu baame nakama kee lao rombo palyiyamuli pyuo nakama kapa karamili lao yuu peparae ateŋa lakao karamano. Anatu banya porainya renge dokome nakama pyuo au pyuo nyeramopa nakamana kapa ingingi lao suu pingi doko ando kameya inginya lao ateŋa letamano.
2TH 1:12 Dokopa namwana Kamongo Yesunya kingi doko nakama dokona mange karanyi pyambwaraminyipa nakama baame dopako pira. Dokopa namwana Anatu Kamongo Yesu Koraisapana mona keyange palyuo ipyuo pingi dokona ingyuo para.
2TH 2:1 Namwana Kamongo Yesu Koraisa eparamo dokopa namwa Yesumoo role pyao pisirama dokona lao langirowale.
2TH 2:2 Yangonemoo wambu lapome Kamongo Yesunya yuu gii doko wambo pyaka soo kaeya lao letaminyi dokona nakama walu lapala kyawa sisingi bolombalo lanyi nembo mona rando pisa nalapape, lao poraiyuo langilyu. Pii kyai doo leyami dokona lao akali mendeme banya suu pingi dokona pyongo piyamo leya panda mendeme misi pii ingyuo leya lao see nalyo. Panda namwa Yesunya yuu gii epapeyamo dokona pepa pase pyao reteyamaŋa dolo kyambo leyami rapisa.
2TH 2:3 Dopa pyuo panga seraminyi pii doko soo nyii nalapape. Akali koo karapenge doko wambo epara dokopa yanda pii andake sipuraramopa enakana yuu gii doko pyaka sera. Akali koo karapenge doko panda koo dokona papala karalu karara.
2TH 2:4 Koo karapenge akalimi Anatunyape dee Anatunya yulu peparaepe yanda pimwainyi pyambwara. Pyambwapala baa wakasa dulusale ingyuo suu pyao Anatunya tembole anda pao piso namba anatuŋu lao karara.
2TH 2:5 Nakama kame simisi? Namba nakama pipya karo dokopa pii dake langiyu kande.
2TH 2:6 Langiyunupape bange mendeme akali koo karapenge doko epa nana lao minya minya silyamo. Nakama doko aki lao silyaminyi. Yuu gii angi pyaka seramopa koo karapenge akali doko baa panara.
2TH 2:7 Akali karapenge doko dakepale banya minji nanji pyuo yulu pingi doko yalu pyuo pyuo karamo. Pyuo karapyamopape baa yulu angi piramo doko ene pii nalyamo doko mendeme banya kata pyakepelyamo. Banya kata pyakepelyamo doko isa paramopa baa panara.
2TH 2:8 Panaramo dokopa Kamongo Yesumi banya porainya renge dokome akali koo karapenge doko pyao kumakao baa neta renge ingyuo yanga paupau lao eparamo dokopa akali karapenge doko isa puu pao para.
2TH 2:9 Akali koo doko Satanena porainya renge paleta epapala yulu pii nange wakale wakale dupwa pyuope yamarangungi yulu dupwa pyuoko pira.
2TH 2:10 Pipala dokopa wambu yulu koo pyuo koo keta parami dupwa kando makande wakale wakale pira. Piramo dokopa koo pingi wambu Anatunya pii angi soo nyii nao mona reta nayami dupwa kumuo otarami. Pii angi doko mona reteyamili doko nakama lete wai pyao pumili.
2TH 2:11 Dokona lao kyambo pii soo nyerami lao Anatumi nakamana kyawa sisingi ukiaki minyuo kwaenyi nembara.
2TH 2:12 Dopa piramo dokopa wambu Anatunya pii soo nyii napala koo dupwana rae maiyami dupwa koo keta parami.
2TH 2:13 Yangonemoo Kamongo Yesumi nakama mona retenge dokona lao namwame nakama suu pyao yuu peparae Anatu kando sangyu larama ingilyamo. Nakama Anatunya pii angi doko kapa ingingi lao suu pilyaminyi dokona Anatumi nakama banya wambu angi ingyara lao Imambu porainya renge dokome nakama wambo pyuo nyeroŋa lao kee lao rombo palyiya.
2TH 2:14 Waili pii keyange polo langiyamano dokome Anatu nakama kee lao nyiya. Nyiyamo dokona namwana Kamongo Yesu Koraisana neta renge doko nakama keta palira.
2TH 2:15 Yangonemoo dokona lao paka nao poraiyuo suu pyao karo Anatunya pii angi langiyama dupwa minyaro karalapape. Anatunya pii angi polo langyuo pepa pase pyao joo kareyama dusipa minyaro karalapape.
2TH 2:16 Namwana Kamongo Yesu Koraisa baapa dee namwana Rakange Anatupame nakama porai inginyi pyambwarambi. Namwana Rakange Anatu baame namwa mona retapala mona keyange palyuo ipyuo karenge dokome namwa porainyi pyambwalu pyambuo pyambuya. Pyambuyamosa Yesu dee epara lao mona kare kare karamano.
2TH 2:17 Nakama yulu keyange pyuope pii keyange laope mondo lao karalapa lao baame nakama porai inginyi pyambwara.
2TH 3:1 Yangonemoo epapu pii lumwa pyuo leto. Doko nakama Kamongo Yesunya waili pii keyange waiya lao sepala Anatu lakandeyami. Doko suu pyao yuu muu wakale dupwana wambu peparae waiya lao soo nyepala Anatu lakandarami dokona ateŋa lakalapape.
2TH 3:2 Akali koo kopyali kopetame pingi dupwame namwa koo keta pyambwa nana lao Anatu baame namwa pyuo nyinya lao dokona opetae ateŋa lakalapapae. Renge doko wambu lapo Anatunya waili pii soo nyii nange kandale.
2TH 3:3 Kamongo Yesu baa kapa ingingi dokome nakama porainyi pyambuo Sataneme nakama keta koo mende pii nana lao kyawa minyuo karara.
2TH 3:4 Namwame nakama Kamongo Yesu keta pyamalyinyi pyambuyama dokome namwa pii langiyama dupwa moko minyuo karapala pyuoko kararami doko soo gisilyamano.
2TH 3:5 Kamongome nyisaramopa nakama Anatu dokona mona maiyapala Koraisame yulu kaeya nao piyamo dokona mana nyepala dopako pyuo karamili yaka leto.
2TH 3:6 Yangonemoo Kamongo Yesu Koraisana kingi lao Kurisene wambu yango lapome namwana pii dupwa soo nyii napala yulu pelana makapala mee karaminyi dupwa role pyao kara napala yaki nyuo kaelapape.
2TH 3:7 Namwa nakama role pyao karo yulu andake piyama doko soo gisilyaminyi. Nakama sipurapala dopako pyuo yulu andake pirami doko rolaeŋe lao range silyaminyi.
2TH 3:8 Nakamana nenge nenge dupwa mee langa naa nayama. Yuu peparae range ropo pyao nyuo neyama kande. Nakamana nenge nao apa nanyi nembasarama lao suu pyapala namwa kaeya nao kukwa korakamape yulu andake pyuo kareyama.
2TH 3:9 Nakama nenge mee jinya lao kapa leyamali doŋo doko laa napala range yulu pyuo nyiyama kandapala nakama dokonako palyuo parami lao suu piyama.
2TH 3:10 Namwame wamba nakama role pyao karapala dokopa dopa pyuo langiyama kande. Mendalimi yulu pii nara ramo doko nenge anja seramo nyuo narase? Lopara ingilyamo.
2TH 3:11 Wambu yango lapo nakama role pyao piso karo pilyaminyi dupwa nakama maka suku suku nao yulu pii nao karaminyi doko sepala letamano. Nakama range yulu pii napalape wambu yango dupwa kando mora pii lao kanda lyanolyano pyuo karaminyi.
2TH 3:12 Dokopa Kamongo Yesu Koraisana kingi doko nakama mondo lao karo yulu au pyuo poraiyuo pyuo rangena yole nyerami lao laokondali pyuo letamano.
2TH 3:13 Yangonemoo yulu keyange doko maka nao pyuo karalapape.
2TH 3:14 Nakama role pyao karaminyi wambu dokona mendeme pii pepa pase dakena palamo dupwa warombo see nara ramo doko lengeme iki makande pyuo kandapala baa keta mende pii nalapape. Dopa pirami ramo dokopa baa elya nyera.
2TH 3:15 Baapa nyisu petenge ingyuo yanda pimwainyi pyambwa nalapape. Pyambwa nao baapa Kurisene yango ingyuo yulu poraiyuo pinya lao baa kando anjiki pyuo nyisalapape.
2TH 3:16 Kamongo Yesu baa range mona kyuu lao singi renge renge kuiyuo karenge dokome baame randa wakale wakale eparamopape panda rae maingi renge eparamopape yuu peparae nakama mona kyuu lao singi renge jinya. Kamongo Yesu nakama pipya role pyao karena.
2TH 3:17 Nambana rangena kingimi yako lao lenge pii dake namba rangena kingi pilyu. Pepa pase yuu wakale peparaena pyao maingi dokopa nambame dopa pyuo pingi. Namba Pole yako leto.
2TH 3:18 Kamongo Yesu Koraisana mona keyange palyuo ipingi renge doko nakama peparae keta palena leto.
1TI 1:1 Namba Pole Koraisa Yesunya aposele akali Anatu namwana Lete Wai Pyao Nyingi dokope Koraisa Yesu namwa keta dee epara dokope leyambinyili pyuo aposele akali ingyuo karo.
1TI 1:2 O Timoti nambana Kurisene wane angi doko emba pepa dake pyao jilyu. Rakane Anatu namwana Kamongo Koraisa Yesupame mona keyange palyuo ipingi renge dokopa sakao nyiso karenge renge dokope mona kyuu lao singi rengepe emba keta palena lao leto.
1TI 1:3 Wambo namba yuu Masetonia panya karo dokopa emba yuu Epesasa dokona karare lao langiyunu doko suu pyao epapu dee kamba emba Epesasa dokona karareko langilyu. Emba doo karapala akali lapo Anatunya pii dokona kyambo letaminyi dupwa kando kaena lamairi.
1TI 1:4 Nakama sinju pii dupwape rora ambasupinya kingi dupwape ketae pyambuo lao kara nana lamairi. Pii dopale lao kararami ramo doko wambu dupwana kyawa sisingi bolombalo larasa angi doko anjuku lao saka naramisa pira. Pii kyai dokome Anatunya yulu dupwa moko minyuo paa nalyamo. Anatu kapa ingingi lao suu pingi wambu dupwame iki Anatunya yulu rolae kandenge.
1TI 1:5 Nakama mona mendaki palyuo Anatu kapa ingingi lao kulisa palyuo suu pyapala koo mende nakama keta pali nalyamo doko monarena pyapi pyuo soo otapala kararaminyi dokopa mona retenge renge doko ando nyimbwaraŋa lao mana pii dake langilyamano.
1TI 1:6 Wambu lapome kata angi doko yaki nyepala mee kambu pii lao papyuo karaminyi.
1TI 1:7 Wambu dusipa nakama Anatunya mawa pii mana lenge akali karamwali lao karelyaminyipape pii poraiyuo letaminyi dokona angi doko aki lao soo gisa nalyaminyi.
1TI 1:8 Namwame Anatu suu piyamuli pyuo Mosesena Lowa doko moko minyuo parama ramo dokopa Lowa doko keyange lao kandarama.
1TI 1:9 Anatumi lowa dupwa akali keyange dupwana lao wasa naya. Wambu lapome lowa dokona kokwa singipi karapusi palengepe wambu Anatu suu pyaa nangepe koo pingipi misi anda paa nangepe wambu Anatunya Imambunya yulu dokona see nangepe wambu lapo nakamana endangi rakangepa pyao kumakangepe dee wambu yango pyao kumakangepe peparaena serami lao wasiya Anatumi.
1TI 1:10 Dopako pyuo wambu pundange yulu pingipi wambu kepo pingipi wane wanake nyaŋa waa nyingipi wambu kyambo lengepe wambu pii kyarepa pingipi wambu angi rolae pii nangepe Anatumi nakamana lao suu pyao lowa pii dupwa wasiya.
1TI 1:11 Nakamame Anatunya waili pii keyange wakasa namba keta epelyamo doko yalo pelyaminyi dokona Anatu neta rengepe elyape keta karengepe baa lowa pii dupwa wasiya.
1TI 1:12 Namwana Kamongo Koraisa Yesumi namwa porainyi pyambuo banya yulu piri lao rombo palyiya dokona rae maiyuo sangyu leto.
1TI 1:13 Namba wambo Anatu kando pii koo lapala lekeleke rena lao baa kilya kando leyonopape namba baa soo gisa napala mee kamenge lao kareyonopa baame namba kando kondo sakao karapala sukusa nyiya.
1TI 1:14 Kamongome banya mona keyange palyuo ipingi renge doko namba keta maralyiya. Dee kapa ingingi lao suu pingi rengepe mona retengepe dolapo Anatumi jiya. Namwa Koraisa Yesumoo pipya yalya kando role pyao karenge dokona Anatumi dusipa jingi.
1TI 1:15 Pii langilyu dake ama kinyi kinyi palamo. Soo nyepala minyalapape. Koraisa Yesu baa namwana yuu dakena epapala wambu koo pingi dupwana lao lete wai pyao nyeroŋo lao epeya. Wambu doloma yulu koo pyuo kareyaminyipape namba kamame koo ingyuo kareyo.
1TI 1:16 Dopa pyuo yulu koona mupwa ingyuo piyunu dokona lapala Anatumi sakao pyuo nyuo nyisiya. Anatu baa rape rape lao karenge doko namba akali koo wakasa pingi doko keta lasaka piya. Wambu enakana Yesu kapa ingingi lao suu pyao kyakana renge kulisa palu palenge nyerami dupwame serami lao namba keta lasaka piyasa piya.
1TI 1:17 Kuma napala karalu karenge Kiŋi doko baa wambumi kapa kanda nange Anatu mendaki doko kando wambu peparaeme lakandapala kingi ketae nembo karalu kararami doko kinyi.
1TI 1:18 O nambana wane Timoti mawa pii dake emba langilyuŋu sepe. Yuu wamba poropeta akali dupwame emba keta nolakayami dokona suu pyao karo. Pii poropeta dupwame leyami dusipa lao minyuo nyisu petenge wambu anamasi minyare.
1TI 1:19 Minyapala embena kapa ingingi lao suu pilini renge dokome minyuo embena suu pingi renge doko poo pyasi ingyuo palena lao yaki nyii nao karare. Wambu lapome yulu rolae dupwa sepala karo kando kaeyo koo pyuo kareyaminyipa nakamana Anatu kapa ingingi lao suu pingi doko isa peya.
1TI 1:20 Akali lama nakambana kingi Aimeniasa Alekesandapa lenge dolapome dopako piyambi. Piyambinyisa nambame Anatunya kando pii koo laa nana lapala Satanena arapu dorena karena lamaiyu.
1TI 2:1 Wambu peparaena lao piso singipi ateŋa lengepe kee lengepe sangyu lengepe lao pii dusipa mupwa ingyuo Anatu kando lamaiyalapape lao poraiyuo langilyu.
1TI 2:2 Namwa mona kyuu lao seramopa elya kalo Anatunya Imambunya yulu pyuo yulu rolae dupwa suu pyao karamwali lao Anatumi kiŋipi gapomanepe dupwa nyiso karena lao ateŋa lakamyuo karamana.
1TI 2:3 Yulu keyange dopale dokome namwana Lete Wai Pyao Nyingi Anatu doko rae mainyi pyambungi.
1TI 2:4 Anatumi wambu peparae lete wai pyao nyelana banya pii angi soo nyimili lao suu pyao karamo.
1TI 2:5 Anatu baa mendaki iki karo, dee kanya akali mendaki doko Anatu akalipa nyuo pakao pingi doko Koraisa Yesuko karo pingi.
1TI 2:6 Akali peparae kiiramo nyelana baa range kumuo maiya. Dokome Anatumi akali peparae pyuo nyelana suu piya, yuu gii rolae doko pyaka sera dokopa panara.
1TI 2:7 Renge dokona lao namba Juu daa rara wakale dupwana aposele akali ingyuo nakama mana lao karare lao waili pii angipi Anatu kapa ingingi lao suu pingipi dokona lao Anatumi namba mapanyi nembeya. Doko nambame kyambo letonde daa. Kinyi leto.
1TI 2:8 Anatu iki suu pingi dupwa imbuo apiyanda pyuo lao kara napala yuu muu dupwana peparae ateŋa lao karamili lao suu pilyu.
1TI 2:9 Pii mende doko enda dupwa nakama inyimungu mona palenge ingyuo piso nakama range komau kapa pira dupwa mondo lao wapunya. Dopako pyuo wambu kandamili kandamili lao kyawasi kalya pyuo kupinyi dorena palya dakena palya nalapape. Moŋokyaŋe soo mola wakale wakale dupwame kalya pii nao kana malu penge komaupi wapuo pii napenge. Dee kalya wakale wakale lapo opetae pii kaena.
1TI 2:10 Yulu keyange dupwa nyuo komau ingyuo wapurami. Dopa pirami doko Imambunya kata ingyuo paramisa pira.
1TI 2:11 Misi anda dupwana nakama range inyimungu pii laa nao mee petena.
1TI 2:12 Endame mana pii lao nakamame akali rapu pili lasarami kaena leto. Nakama mee elya kalo petena.
1TI 2:13 Doko Anatumi Atame baa wambo ingyuo wasapala Ipi enakana wasiya.
1TI 2:14 Dee Sataneme akali keta wambo panga soo maralya naya. Enda doko dokona rambu lapala keta panga soo maralyamopa enda dokome Anatunya lowa pii dokona kamba leya.
1TI 2:15 Dopa piyamopape enda dupwa Yesu kapa ingingi lao suu pyao mona nembo Anatunya Imambunya yulu pyuo inyimungu pisarami ramo dokopa wane mandenge yuu gii pyaka sera ramo Yesumi iso karara.
1TI 3:1 Pii dake kinyi palamo. Akali mendeme Elyambu Pinginya yulu pinya mona nyera ramo doko yulu keyange dokona pinya pirasa pira.
1TI 3:2 Dopa pyuo palamo dokona Elyambu Pinginya akali mupwa dupwa pii pali naramo kararami ingilyamo. Baa enda mendaki ikinya akalingi ingyuo karena. Moŋokyaŋe see nao rangena suu pingi kame pyuo minyuo karo yulu rolae pyuo karena. Wambu upunili dupwa banya anda yako lao nyuo nenge pyuo pyuo karena. Baa mana lenge yulu dokona wanonguli ingyuo mana lao karapenge ingilyamo.
1TI 3:3 Dopako pyuo Elyambu Pinginya rapu pingi doko biya wasinyi nembo waiya lao imbwualana wangu lakao pyakandenge akali ingyuo kara nara. Baa mona kyuu lao seramopa elya kalo karo kana monena mona nyingi ingyuo karara ingya nalyamo.
1TI 3:4 Baa rangena enda wanepe mondo lao rapu pyuo karo banya wane wanakepeme baa kando kamba laa napala banya kingi ketae nembo petena lao karara ingilyamo.
1TI 3:5 Rapu pingi baame banya enda wanepe mondo lao rapu pii narande ramo dokome apa pyuo Anatunya ree palu doko mondo lao rapu pyakamyuo kararase?
1TI 3:6 Dokonako ingyuo ene alembole Anatu mona maiya ramo dokome baa Elyambu Pinginya rapu akali ingya nana. Dopa pyuo pira ramo dokopa Sataneme piyamuli pyuo kyaŋe singi renge dokome ipwa ingyuo palyuo pyoko pyoko larasa pira. Satane koo keta paleyamo doko suu pyao akali dopale doko koo keta palira.
1TI 3:7 Neta wambu dupwame baako kando pisirami. Moŋokyaŋe see nara ramo dokopa kando pisarami dokome Satanena kone makara dokona lyii nara.
1TI 3:8 Elyambu Pinginya nyisingi akali dupwa mona palyuo pii lamana laa nao karapenge ingilyamo. Ipwa waene malu mee naa nao bange nyipuli nyipuli lao suu pyao karara ingya nalyamo.
1TI 3:9 Anatumi pii kinyi doko pano lasaka piyamo doko kapa ingingi lao suu pyao mona dokona pyapi pyuo soo minyarami.
1TI 3:10 Nakamana yulu dupwa wambo makande pyuo kandapala kapa pirami lao suu pyarami ramo dokopa nyisinginya yulu dokona rombo palyarami.
1TI 3:11 Nakambana enda opetae mona angi palenge ingyuo wambu mata kando dopale dapale, lao lao pisa narami. Nakama biya naa nao yulu rolae pyuo petena.
1TI 3:12 Elyambu Pinginya nyisingi baa enda mendaki ikinya akalingi ingyuo karara. Baame banya enda wanepe mondo lao rapu pyuo karara ingilyamo.
1TI 3:13 Wambu Anatunya yulu keyange pingi dupwana kingi wambu peparaeme ketae nembo pisirami. Nakamame Koraisa Yesunya wambu ingyuo banya waili pii keyange kapa poraiyuo lamaiyuo pisirami.
1TI 3:14 Pepa dake wambo pyao jepala rengya repetaleko emba kandala eparo lao suu pilyu.
1TI 3:15 Namba waiya lao epa naro ramo dokopa emba pepa pyao jilyu dake kando yaka lapala namwa apa pyuo Anatunya Elyambu Pingi ree palu wambu dupwa kapa rolae pinginyili pyuo pirama lao sere. Elyambu Pingi doko lete palenge Anatu dokona ingyaro karapyamopa dokome kinyinya renge dokome paka pyao sakao karamo.
1TI 3:16 Elyambu Pingi doko anda pinginya ingyaro Anatunya Imambunya yulu dokona renge yalu pyuo siyamopa kando nyiyama doko mendeme mupwa daa lao matarena pii larami ingya nalyamo. Wambu wai pyapala akali lenge kambu nyuo paneyamopa, Imambumi baa rolae wakasaŋa lao lao paneyapya. Aŋala dupwame baa kandeyamiko. Rara wakale dupwana baa dokona lao lamaiyuo peyami. Yuu muu dupwana baa kapa ingingi lao suu pyao mona maiyami. Baa lopo epapala yake panda peya.
1TI 4:1 Imambumi rakyame akali lapo Anatunya kata yaki nyerami doko wambo nolakao letamo. Nakamame imambu mee kyambo lenge dokona pii minyuo imambu koona mana pii larami dupwana soo parami ingilyamo.
1TI 4:2 Akali pii kyai pyuo lenge dupwame panga soo lao mana pii kyambo letaminyi. Akali dusipana monarena kerange pyao otapyasa koo keyangepe anjuku lao soo saka nalyaminyi.
1TI 4:3 Akali mana koo larami dupwame lao nakama enda nyii nao nenge lapo wasaka pyuo karo pipwape larami. Nenge waso karalapape letaminyi dusipa Anatumi narami lao jiya. Wambu Anatu kapa ingingi lao suu pyao pii kinyi doko soo nyingi dupwame ange lapala narami dokona jiya.
1TI 4:4 Bange Anatumi wasiyamo dupwana mende koo daa. Dokona mende yaki nyuo nembarama ingya nalyamo. Nenge dupwana lao Anatu kando sangyu lao nao kararama.
1TI 4:5 Anatunya pii dokope dee ateŋa dokomepe banya lenge kambu dokona nenge dupwa poo pyasi ingyuo pelyamo.
1TI 4:6 Embame pii dake Kurisene yango dupwa lamairi ramo dokome emba Koraisa Yesunya kendemande keyange ingyuo karare. Yuu gii dokopa Anatunya imambunya nenge nao pirisa pira. Imambunya nenge angi doko nakama Anatunya pii soo nyuo banya yulu poraiyuo minyuo angi pyuope dolapo angi ingilyamo.
1TI 4:7 Arome pii kwaeyarali Anatu rae mai narali dupwa wasapala Imambunya yulu dokona rangeme range sukunde ingyuo kiso rolare.
1TI 4:8 Mee yulu andake piri dokome yanenge poraiyaramo dokopa yanengena yulu kapa pira. Dopaleko ingyuo imambu dokona porainyi pyambwarami ramo dokona isa pandape yake pandape laparaena kapa ingyuo pare.
1TI 4:9 Pii dake ama kinyi kinyi dokome wambu peparae soo nyepala kinyi lao suu pyarami.
1TI 4:10 Anatu lete karenge dokome baa kapa ingingi lao suu pilyamano dokona lao yulu andake randa nao pyuo karamano. Baame wambu peparae lete wai pyao kapa nyera ingyapyamopape baa mona angingyuo maingi wambu dupwa kaeya nao lete nyera ingilyamo.
1TI 4:11 Pii dapwa enda akalipi keta mana lamaiyuo letamanuli pyuo pinya lare.
1TI 4:12 Emba wanyane akali lapala wambu lapome emba pirinyi dupwa kando epekanda nasarami kando lao yulu auwo kandaramili dupwa iki yapo piri. Pii laope wambu yango mona retope Anatu kapa ingingi lao suu pyao karo emba kando laa naramili dupwana palyuo rolae pyuo karape.
1TI 4:13 Wambu peparae elyambu pyuo pisiraminyipa buku Baepole pii yaka lao misi pii lao mana lamairi. Lamaipala namba iso karowale pyuo karo dokopa yulu rema dasipanako kare kare soo piri.
1TI 4:14 Poropeta akali dupwa misi andake lao kareyaminyipa Elyambu Pinginya mupwa dupwame emba elya pyuo pyambuo nakamana kingi dupwa embena kyawana reteyami dokopa Imambumi emba keta mora petenge jiyamo doko mee kaka soo nemba napipi.
1TI 4:15 Yulu dokonako emba kumuo maipala mana nyuo piri. Pirinyi dokopa yulu doko ando paramopa wambumi kandenale.
1TI 4:16 Emba rangena yulu pyuope mana pii laope dolapona kando pyuo karape. Dopa pyuo puu pare ramo dokome emba rangepe dee wambu embena pii serami dupwape kyawa minyara ingilyamo.
1TI 5:1 Alemo dupwa kando pyalana pyuo laa nao pii elya kalo lao rakane kando lamainginyili pyuo lao rolo karare. Dopako pyuo wanyane akali dupwa embena yangone kando lamainginyili pyuo lao rolo karare.
1TI 5:2 Dee endemo dupwa endakinyi kando leto lao maso lao rolo dee mapwae dupwa kando dokopa pemalene angi lamaingi dokona kata palyuo lao rolo mende suu pyao lao kara napipi.
1TI 5:3 Enda waiya dupwa saka nalya nana pyuo pisirami ramo dokopa ketae pyambuo nyiso karare.
1TI 5:4 Baa wane mandenge ramo panda apusingi karenge ramo nakambana Kurisene yulu mupwa doko endangi rakangepame wamba rapu piyambi dokona isingi rapu pyuo karena. Dopa pyuo pirami doko Anatu baa epe soo karara.
1TI 5:5 Enda waiya doko baa mendali range palya nangende ramo doko baame Anatumi mende pyakara lao suu pyao kukwa korakamape yuu peparae kaeya nao ateŋa lao petena.
1TI 5:6 Enda akalingi kumasi doko kopyali ingyuo yanengena laramuli pyuo pisira ramo doko mee peto lao lete pisiramopape kumuo kaeyo pisirasa pira.
1TI 5:7 Enda waiya dupwa keta pii doko kyawa ingyuo lamairinyi soo nyerami dokona mendeme enda dupwa kando larami ingya nalyamo.
1TI 5:8 Mendeme banya ranjama mendare dee yangonge rakangepe dupwa mondo lao suu pyao rapu pii nara ramo dokome banya Kurisene yulu suu pyaa narasa pira. Mee Kurisene ingya nange akali dopale daako. Baa ama koo wakasa ingyarasa pira.
1TI 5:9 Enda waiya doko wamba akali mendaki iki nyiyande ramo doko Elyambu Pinginya nyisingi enda ingyuo yulu pinya lara ramo doko kapa rombo palyuo kingi retarami. Endemo dupwa iki rombo palyarami.
1TI 5:10 Endemo yulu rolae pingi letaminyi dupwa iki rombo palyarami. Banya wane mondo lao rapu pyuo andanyi pyambuo wambu nenge pyuo Kurisene yango pipya kendemande yulu pyuo wambu randa nyerami dokopa pyuo nyiso yuu peparae yulu keyange dopale dusipa pyuo petengende ramo doko banya kingi pepana sinya.
1TI 5:11 Enda angi lapo waiya ingyuo pisirami dupwa rombo palya nalapape. Nakama sipurapala akali nyelana suu pyaraminyi dokopa Yesu Koraisana yulu doko yaki nyepala parami.
1TI 5:12 Dopa pyuo pisirami enda dupwame Koraisa kando wambo lalu lao leyami pii dokona yalapala koo piramisa pira.
1TI 5:13 Enda dopale doko mora pisi napala anda kambu yaka lao papyuo pii wakale mendena laminyi dupwa palya nao lao pii laa narali dupwa kata raena lao lele lao lao pisinyi pyambuo papyuo karaminyi. Dopako pyuo pii kapa laa naramili dupwana lao yulu koo dopale dupwa mana nyilyaminyi.
1TI 5:14 Dokona enda waiya dupwa akali kapa nyuo wane kando nyepala anda rapu pyuo pisipenge. Dokopa namwana yanda pimwai dupwame pii koo lao giyalya giyana pii nanale.
1TI 5:15 Dokonako enda waiya lapome Anatunya kata doko yaki nyepala Satane kata dokona papelyaminyi.
1TI 5:16 Enda mende waiya ingyuo peteya kande doko banya ree palu dokona Kurisene enda dupwame rapu pyuo pisirami. Doko kaepala Elyambu Pingi wambu wakale dupwame rapu pyuo karena laa narami. Elyambu Pingi doko enda waiya saka nao petaminyi dupwa nyisarami yulu doko palamo.
1TI 5:17 Elyambu Pinginya akali rapu pingi lapome Anatunya yulu doko mondo lao rapu pilyaminyi dupwa nakama yole kana konda pyuo mairami ramo doko kapa ingyara. Misi yulu dokona angingyuo pilyaminyi dupwasa leto.
1TI 5:18 Baepoleme lao dokopa, Mena bulamakaome witi jingi kambena lao kalyiya kande dokopa kambu doko puu pyakami napipi dee, Yulu pingi akalimi yole kana kapa nyepenge lao silyamano doko letamo.
1TI 5:19 Akali mendeme Elyambu Pinginya akali mupwa doko kando kyai pyuo pilyamo leya kande doko baame iki laramo dokopa pii minyakami nalapape. Dee wambu rema lamapena pii larami dokopa kote kapa larami.
1TI 5:20 Koo piyami kande dokopa wambu menge dupwana lenge kambu dokona pano pyalana pyuo lape dopa pyuo larene kandapala dokopa lapo dupwa pako kararami.
1TI 5:21 Anatu dokonape Koraisa Yesu dokonape aŋala poo pyasi dupwanape lenge kambu doko pii dake emba poraiyuo langilyu. Emba wambu dupwa kando yapalya yapana pyuo lapo nyiso lapo nyisa nao pyuo kara napipi.
1TI 5:22 Kamongona yulu dokona mendali langa waiya lao rombo palya napipi. Mendena koo piramo dokona mee isa lakao palele lapala pii nao range waso kandanyi nembo karare.
1TI 5:23 Yuu malu mee emba anga pingi dokona mee ipwa nao karalu kara napala embena inginya anga nyerene dokona lao waene mee kuki nare ramo doko kapa nyisara.
1TI 5:24 Wambu lapona yulu koo panelyamo dupwa kote laramo dokopa yake panda wambo pao panda koo sera. Dee wambu lapona yulu koo yalu pyuo silyamo dupwa yuu gii angi pyaka separamopa panara.
1TI 5:25 Dopako pyuo lapona yulu keyange dupwa kandelyamano. Yulu keyange yalu pyuo pilyaminyi dupwana yulu doko enakana panara silyamanoko.
1TI 6:1 Yulu pingi akali dupwame nakamana yulu pyakamaingi akali doko keyange ingyuo karamo lao suu pyao karo banya kingi ketae pyambuo pyuo kararami. Dopa pyuo kararami ramo dokopa Anatunya kingi dokonape dee Kurisene yulupi dolapona kwaelyamo laa narami.
1TI 6:2 Yulu pingi akali dupwame nakamana yulu pyakamaingi akali doko Kurisene ramo dokona baa nambana yangonge angi ingilyamo lao suu pyapala banya pii doko kamba larami ramo doko kapa ingya nara. Nakamana yulu pyakamaingi akali doko Kurisene ingyuo karenge ramo doko banya yulu ama poraiyuo mondo lao pyakamirami. Dopa pirami ramo dokopa Kurisene wambu yango dupwa nyisaramisa pira. Pii langilyu dusipa mana lamaiyuo polo lao kara.
1TI 6:3 Lapome Kamongo Yesu Koraisana pii angipi namwana misi pii rolaepe yaki nyepala pii wakale lao eparaminyi dupwa mee moŋokyaŋe sepala renge angi see nao kararami ingilyamo. Pii wakale wakale dupwana lao apiyanda pyuo karalana laiya lao karaminyi. Nakama yango palyuo sisi nyuo giyalya giyana pyuope mee nambana yulu lakao pilyaminyi lao suu pyao pingi yulu dopale pilyaminyi.
1TI 6:5 Dokona nakama akali kyawa sisingi mondo lao pali naope dee Anatunya pii kinyi angi doko nakama keta pali nangepe mee yuu peparae apiyanda pyuo karaminyi. Wambu dopale dupwame Anatunya yulu pingi dokome nakama kamongarama lao suu pilyaminyi.
1TI 6:6 Akali mendeme Anatunya yulu rae maiyuo pyuo sikya pira ramo doko baa keta renge keyange palira.
1TI 6:7 Namwa endangimi mandeyamo dokopa bange mende minyuo epa nayama. Dee yuu dake yaki nyerama dokopa bange dokona mende minyuo paa naramako.
1TI 6:8 Dokona lao namwa epapunya ingyuo nenge komaupi kapa sera ramo dusipa kapaŋa lao suu pyao karamana.
1TI 6:9 Akali bange andake nyuo retalana suu pilyaminyi dupwa isa parami ingilyamo. Kopyali minyuo bange nyelanako suu pyarami kata dokona randa opetaeko nyerami. Randa nyeraminyipa dokome nakama nyuo sinjimu paro kokwa sinyi nembara.
1TI 6:10 Kana mone mona nyingi dokome koo dokona mona anda pingi pyarasa pira. Lapome mone dokona rungi rungi pyapala Anatunya Imambunya yulu kame silyaminyi. Dopa pipala nakamana mona dokona randa nyuo kondo mona rumbungi karaminyi.
1TI 6:11 Emba Anatunya wambu dokome yulu koo doko waso karare. Yulu rolae dokonape Anatunya Imambunya yulu angipi kapa ingingi lao suu pingipi mona retenge rengepe Anatunya yulu yaki nyuo kaeya naope anjiki pyuope yulu dopale dupwa pyuo gii lao minyaro karare.
1TI 6:12 Wambu Anatu kapa ingingi lao suu pyapala kyakana renge nyingi doko akali bange nyelana makandenge dopale. Anatumi letena renge nyepala pyuo karare lao rombo palyiyamopa wambu malu mee kando kareyaminyipa emba sipurapala Yesunya kingi lao ketae lakandee kande.
1TI 6:13 Anatumi lete karenge renge maingi dokopa dee Koraisa Yesumi akali Pondiasa Pailate lenge kambunya karo dopa pyuoŋo lao polo leya dokope dolapona lenge kambu dokona karo epapu nambame emba dopa pyuo piri lao langilyu.
1TI 6:14 Emba mawa pii doko kokwa see nao yapasi ingyuo sinya lao poraiyuo minyarenepa Kamongo Yesu Koraisa eparamo dokona iki liti pira.
1TI 6:15 Anatu baa kamongona Kamongo dee kiŋinyako Kiŋi mupwa ingyuo karenge. Baa iki wambu peparaena Rapu Pingi ama elyape ingyuo karamo. Baako Yesu eparamo gii doko pyaka seramo kandapala epena lara.
1TI 6:16 Anatu baa iki kumungi renge doko pali nange. Baa rao yanga paupau lao karelyamo dokona mendali repeta paa nange. Baa mendemepe kanda nange dee mendeme kapa kandarami ingya nangeko. Banya kingi ketae pyambuo paliramopa wambu peparae iso karalu karena, doko kinyi.
1TI 6:17 Wambu isa bange malu mee retenge dupwa moŋokyaŋe see nana lao poraiyuo lamairi. Bange peparae mee ingyuo isa para dupwana lao andanyi nembo mona nyii napala Anatumi bange monarena rae maiyuo kamongarami lao jiyamo dupwana rae maiyuo mona nyuo karena lare.
1TI 6:18 Nakama bangena kamongo dupwame rango naa napala mee mokwa soo mainya suu pyapala maiyuo yulu keyange pyuo kamongo karena lamaipi.
1TI 6:19 Nakama dopa pyuo pirami ramo doko rengya kapa palyuo parami dupwa nyuo nakamana rangena kulisa ingyuo seramisa pira. Dokona lao nakama lete kararami angi doko nyuo kalyuo minyaramisa pira.
1TI 6:20 O Timoti emba keta Anatumi yulu jiyamo dokona waso minyuo pyuo karape. Wambu lapome soo gisapala lao karamano laminyipape pii doko Anatunya pii daa mee isa wambunya kopyali pii letaminyi dupwa waso karape. Mee pii lapo Anatunya kata dokona ingya nange dopale dupwa mata maiyuo karape. Pii dopale dupwa kyambona ingyuo singiŋi lao larami lyakande.
1TI 6:21 Wambu lapome namwa soo gisingiŋi lao karaminyi dupwa nakamame Anatu kapa ingingi lao suu pingi doko papu pyuo lamisa pilyamo. Anatunya mona keyange palyuo ipingi renge doko nakama peparae keta palena leto.
2TI 1:1 Namba Pole Koraisa Yesunya aposele akali Anatu pipili lao suu piyamuli pyuo mapanyi nembeyamopa Anatumi lete karenge nyerami lalu lao leyamo dokona Koraisa Yesumoo nyuo pakao karamano.
2TI 1:2 Nambana mona retenge wane Timoti emba keta pepa dake pyao jilyu. Rakane Anatu namwana Kamongo Koraisa Yesupana mona keyange palyuo ipingipi sakao nyiso karenge mona kyuu lao singipi emba keta palena lao leto.
2TI 1:3 Nambana rora ambasupimi Anatu lakando mona suu pinginya pyapi pyuo soo lenge dokona namba opetaeko piyaminyili pyuo pipala eŋa pupyamopa Anatu sangyu lao karo. Yuu peparae kukwa korakamape ateŋa lao dokopa embena lao suu pyao Anatu sangyu lao lapa pilyu.
2TI 1:4 Namba embena ee leene dupwa suu pyapala kandapulimi kumulyu dokona epo emba kandapala dokopa raeme kumaro.
2TI 1:5 Namba embame Anatu kapa ingingi lao suu pyao mandeene doko angi ingilyamo lao kame see nalyo. Anatu kapa ingingi lao suu pingi dokore embena apusingi Loisa endakinyi Yunisapame opetae suu pyao peteyambipya. Doko suu pyao embena doko mendare ingyuo pelyamo lao silyu.
2TI 1:6 Dokona lao misi andake dokona nambame emba kingi nyuo rombo palyiyunupa Anatumi banya yulu emba keta jiyamo doko isasa pinyi pyambuo karape lao langilyu.
2TI 1:7 Anatumi Imambu jiyamo dokome pakange renge doko jinginde daa. Pakange renge jilyuŋi lao dokopa porainya rengepe mona retengepe range rapu pyuo karengepe dupwa Imambumi joo simbungi.
2TI 1:8 Namwana Kamongo dokona pii polo lalana elya nao dee namba banya ingyuo karapusi palo dokona lapala elya nyii napipiyoko. Dopa pyuo Anatu emba porainyi pyambwaramopa waili pii keyange dokona lao randa emba keta eparamo epena rao laoko karape.
2TI 1:9 Baame namwa lete wai pyao nyepala banya ingyarami lao kyakale leya. Doko namwame range yulu keyange piyamande daa. Baa rangena suu piyamuli pyuo mona keyange palyuo ipyapala kyakale lao rombo palyiya. Yuu ene wasaroŋo lao karo dokopa Koraisa Yesu keta mona keyange palyuo ipingi doko joo kaeya.
2TI 1:10 Namwana Lete Wai Pyao Nyingi akali Koraisa Yesu baa epo panapala Anatunya mona keyange palyuo ipingi doko baa keta paneya. Koraisame kumunginya rengena porainya renge namwa keta palenge doko nyuo anameya. Anamo waili pii keyange dokome kuma nange renge doko nyuo nolakaya.
2TI 1:11 Anatumi namba aposele yulupi mana lenge yulupi dolapona waili pii keyange polo lare lao rombo palyiya.
2TI 1:12 Renge dokona lao namba keta randa nyilyu. Randa nyipunupape namba dokona lao elya nalyo. Nambame akali kapa ingingi lao suu pyao karo doko range silyu. Yuu gii mupwa ene pyaka sepa naramopa yulu piri lao rombo palyakaya dokona minyuo pyuo kararo dokopa kyawa minyuo karara.
2TI 1:13 Pii langiyunuli pyuo piri lao pii angi langiyu dupwa minyuo karape. Koraisa Yesupa pakaro karaminyi dokona Anatu kapa ingingi lao suu pingipi mona retengepe dolapo poraiyuo minyuo pyuo karalu karare.
2TI 1:14 Imambu Poo Pyasi namwa maralyiyamo dokome emba nyisaramopa renge keyange emba keta palamo doko sakao sakao pyuo minyuo karape.
2TI 1:15 Yuu Esia wambu peparaeme namba yaki nyiyami dokopa Piselasa Emosenisapa opetaemeko yaki nyiyambi doko emba silinyi.
2TI 1:16 Onisimasa namba yuu malu mee rae mainyi pyambuyamo dokona Kamongome banya ree palu sakao pyuo nyinya. Baame namba karapusi kareyo dokona elyapala kaeya naya.
2TI 1:17 Dopa pyuo karo baa yuu Orome epapala dokopa namba kaeya nao karapala kando nyiya.
2TI 1:18 Yuu gii mupwa pyaka seramopa Kamongo dokome Onisimasa baa sakao nyiso karena lao suu pilyu. Embame nambana lao yuu Epesasa dokona Onisimasame yulu andake pyakaya doko ama soo gisasi karene.
2TI 2:1 Nambana wane Timoti emba Koraisa Yesupa pakao karo baa mona keyange palyapala ipyuo kararamopa porayapala karape.
2TI 2:2 Wambu malu soo kareyaminyipa lao kareyo pii dupwa emba soo gisii kande dupwa embame wambu mona palenge dupwa lamairinyipa nakama soo nyepala wambu wakale lamairami dokona mana lamaiyuo karape.
2TI 2:3 Koraisa Yesunya yanda pyakamaingi akali ingyuo yasoko nao karare ingilyamo.
2TI 2:4 Akali aminya yulu pingi dupwa yulu wakalena minyuo komonda nange. Baa aminya yulu dokona yeelyo ami rapu pingi akali mupwa doko rae mainyi pyambuo pingi.
2TI 2:5 Akali bange nyelana makandenge baame makandengena lowa dupwa minya napala dokome bange nyuo kapa wini larande daa.
2TI 2:6 Ee wara pingi akalimi randa nao yulu poraiyuo piramo dokome ee mupwasa doko manjo nara ingilyamo.
2TI 2:7 Namba pii langilyu dupwa apa pyuonde lao suu pyao pisirinyipa Kamongome epapala nyisaramo dokopa kapa rolo sere.
2TI 2:8 Yesu Koraisa Dapitinya para pyasi baa kumuo palyuo lopo epeyamo dokona waili pii keyange nambame lao karo doko suu pyaoko karape.
2TI 2:9 Namba waili pii keyange lapunu dokona lao randa nyipunupa wambu pingi akali dopale ingyuo puu saneme kiimbwaminyi karo. Dopa piminyipape Anatunya pii doko puu maiyuo retarami ingya nalyamo.
2TI 2:10 Dokona lao Anatunya rombo palyisi wambunya reke lao randa peparae nyuo karapusa pilyamo. Doko Koraisa Yesumi nakama opetae lete nyakaramopa yanga paupau lenge panda dokona karalu kararami lao randa nao karo.
2TI 2:11 Pii dake angingyuo letamo lao soo nyimana. Namwa Yesu kumuyamo dokona kumuyamande ramo doko baa lete karamuli pyuo karamwasa pilyamo.
2TI 2:12 Namwa Anatunya yulu reto kaeya nao pyuo kararama ramo doko baapa role pyao iso kararamasa pira. Banya kingi reto kaeyarama ramo doko baame namwana kingi reto kaeyarako.
2TI 2:13 Namwame banya yulu au pyuo rape rape lao pii nao karamanopape baame namwa yaki nyii nara. Baa rolae dupwa renge kuiyuo pyuo karenge dokome alowa pipala kopetame pira ingya nalyamo.
2TI 2:14 Pii dakeme embena wambu dupwa dee kamba mana lamairi. Dopa pyuo Anatunya kingi lao nakama pii wakale wakaleme minyuo yanda pii nana lao lamaipi. Pii dopale dokome wambu nyisa napala, serami wambu dupwa kokwa serasa pingi.
2TI 2:15 Emba yulu poraiyuo pipala Anatunya lenge kambu dorena angi yulu pingi wambuŋu lao kandaraminyi karape. Yulu akali angimi rangena yulu dupwana elya nyii nange. Dopale ingyuo Anatunya waili pii doko rolae mana lamairi.
2TI 2:16 Anatunya daa mee kopyali pii larami dokome Anatunya kata dupwana rekya lao paramili dopale dupwana wanjo karape.
2TI 2:17 Nakamame mana lamairami doko rete andake minjunya pipala ipwange nao isa ingyuo kulimbungi dopale. Aimeniasa Pailitasapa dolapo dokona mana lao karambinyi.
2TI 2:18 Nakama pii kinyi angi rolae lenge kata doko yaki nyepala wambu wambo kumuyami dupwa lopo neta epapeyami lao kyambo lao karaminyi. Nakambana pii dopale dokome akali lapona Anatu kapa ingingi lao suu pingi doko ipwa palyinyi nembo lamisa pilyamo.
2TI 2:19 Dopa laminyipape Kurisene yulu doko Anatumi kanda soo piyamo doko ama porai wakasa ingyaro karamo dokome isa paa nara. Dokona pii dasipa pyasi palamo. Kamongo baame apimoo banya lao soo karamo. Mendeme, Namba Kamongona karo lara ramo doko baa koo dupwana rekya lanyi nembo kararasa pira.
2TI 2:20 Anda andake dokona pete sanapengepe rara wakale wakale dupwa singi. Dokona lapo golope kana kulingipimi wasisi dee lapo isape yuupimi wasisi dupwa singi. Lapo ama yapasi ingilyamosa mee langa nyuo yulu pii nange. Lapome meeŋe lapala dokome andakarena yulu pingi.
2TI 2:21 Dokona suu pyao mendeme range waso poo pyasi ingyuo karara ramo doko baa yulu yapasi dupwana pira. Kamongo Anatumi baa rombo palyapala banya yulu mupwa lapo dupwa opetaeko pyakana lara ingilyamo. Dokona lao yulu keyange peparaena kapa pira ingilyamo.
2TI 2:22 Wanyane wambu keta suu pingi koo palamo doko wanjo yulu rolae doko anjuku lao pyuo Anatu kapa ingingi lao suu pingipi mona retengepe mona kyuu lao singipi dusipana ingyuo pyuo karape. Doko wambu mona yapasi paliramo Kamongo nyisinya lao ateŋa lenge dupwamoo pipya karo. Dopako pyuo kararami ramo doko kapa ingyara.
2TI 2:23 Angi see nange kopyali dupwame laiya lapala apiyanda pyuo pyakandarami ingilyamo doko silinyi. Emba dopaleko ingya napipi.
2TI 2:24 Kamongona kendemande akali dupwame pyakandarami ingya nara. Baame wambu pipya anjiki pyuo mana lenge akali keyange ingyuo elya kalo pyuo karena.
2TI 2:25 Baa akali kamba lao karenge dupwa kando anjiki koo pyuo nakamana yulu kyai pilyaminyi dupwa lao rolakamirasa pira. Baame kamba lenge dupwa kando anjiki pyuo lara ramo dokopa Anatumi kata wapwakamiramopa nakama mona kapu kyuo pii angi doko serami ingyara.
2TI 2:26 Dokopa Sataneme nakama rambu lapala banya kame dokona karapusi kareyamo dupwa kingi rekya lapala kapu kyuo eparamisa pira.
2TI 3:1 Yuu gii lumwa pinya piramo dokopa randa wakale wakale dupwa epara ingilyamo doko soo karape.
2TI 3:2 Akali peparae rango nao bange nyipuli nyipuli lao suu pyao rangena kingi lakando moŋokyaŋe soo pii koo keta palyuo lao endangi rakangepena pii see nao sangyu laa nao Anatunya kingi kokwa sili lao kararami.
2TI 3:3 Wambu yango kilya kando karo yango mendali saka nao yango mata kando yulu koona wangu lako karo pyakando pyuo pyao yulu keyange dupwa isa nembo kararami.
2TI 3:4 Nakamana puu minyingi dupwa nyuo yanda pimwai keta mairami. Mondo lao range wasa nao mee langa karapala moŋokyaŋena renge dokome palyuo pyoko pyoko laramo kararami. Yanengena rae maingi dupwa mona nyepala Anatu mona reta narami lyakande.
2TI 3:5 Anatunya kata angi dokona mee pele lao yongona mamba kiso karapala banya porainya renge doko mata mairami. Wambu dopale dupwa waso karape.
2TI 3:6 Akali dupwana lapome enda mona pali nange dupwana andana papala kyambo lengenyili pyuo lao enda dupwa anamasi minyingi. Enda dopale dupwana koona renge palipyamo dupwame nyaa nyaa pupyasa punduo petaminyi.
2TI 3:7 Enda dupwa yuu peparae mana rolae nyelana piminyipape angi pii kinyi doko see nalyaminyi.
2TI 3:8 Akali Janisa dee Jambarisapame Mosesena pii sepala kamba leyambinyili pyuo akali dupwame pii angi doko sepala kamba lao karaminyi. Nakambana suu pingi rolo see nalyamosa kapa ingingi lao suu pingi doko isa penge.
2TI 3:9 Janisa Jambarisapa kopyali ingyuo kareyambinyi wambu peparaeme siyami doko suu pyao akali yulu koo doko pyuo karaminyi dupwana yulu repetale isa para ingilyamo.
2TI 3:10 Embame nambana yulu rolae pyuo karo dupwa soo nyepala moko minyuo pilinyi. Namba Anatu kapa ingingi lao suu pyao maka napala mana lao karo wambu yango mona reto pyuo kareyonopa
2TI 3:11 randa andake nyiyu dupwa kandee. Namba yuu Andioko Aikoniuma Lisatape randa andake wakasa nyepala au palyuo kara nayo doko emba siiyako. Dopa pyuo randa nyiyunupape Kamongome namba kiiramo nyiya.
2TI 3:12 Wambu peparae Koraisa Yesunya arapu dokona Anatunya Imambunya yulu pinya mona nyilyaminyi dupwa randa nyerami lyakande.
2TI 3:13 Satane akali Anatunya yulu pii lao mee karenge akali dupwame yulu koo pyuo pao kamame koo wakasa dokona pirami. Wambu mendali kando dereke pii lami dokona nakama range keta lao nyuo lamisa pilyamo.
2TI 3:14 Pii emba mana langiyaminyi soo nyiinyi dupwa minyuo karare. Doko apimoome mana langiyami lao range soo karene.
2TI 3:15 Emba wamba wane dokopa buku Baepole pii poo pyasi doko mana nyii kande. Pii dokome emba singinya renge joo Koraisa Yesu kapa ingingi lao suu pyarenepa lete wai pyao nyera.
2TI 3:16 Buku Baepole pii peparae Anatu keta epenge. Dokome pii kinyi dokona mora pisinyi pyambuo pii kyai dupwana lasaka pyuo pingi. Yulu kopetame dupwana lao nyuo rolapala apa pyuo rolae pyuo kararama lao mana lenge.
2TI 3:17 Dopa pyuo Anatunya yulu pyakamaingi wambu dupwame mana nyepala yulu keyange dupwana mora piso pyulu pyuo pirami.
2TI 4:1 Koraisa Yesumi wambu kumasi dee lete karaminyi dupwa peparae kote lara dokope dee Anatunya lenge kambu dokonape nambame emba poraiyuo dopa pyuo langilyu. Yesu Koraisa baa pano epapala Kiŋi ingyuo karalu kararamo dokona banya waili pii doko wambu dupwa polo lamaipi. Yuu gii rolae doko pyaka serape panda see nara doko mupwa daaŋa lao emba lamaiyuoko karape. Yesunya pii dokona kinyi letene lao suu pinya lao pyalana pyuo lamaiyuo wambu porainyi pyambuo nakamana koo dupwa pano lamaiyuo pyuo karalu karare.
2TI 4:3 Renge pii kinyi doko kale yukupala see narami lyakande. Nakama pii angi kinyi doko soo nyii napala rangena suu pingi dokona moko minyuo mana lenge akali rangeme rombo palyapala pii wakale wakale dupwa mana langinya lao kararami.
2TI 4:4 Nakama pii angi doko yaki nyepala sinju pii wakale wakale dupwa kale yukupala lao soo kararami.
2TI 4:5 Dopa piraminyipape emba yuu peparae rangeme kame pyuo minyuo karare. Randa eparamopa mee pyuoko karo waili pii keyange dokona mondo lao lenge akali ingyuo Anatunya kendemande akali ingyuo karo embena yulu peparaena elya pyuo pyuo karare.
2TI 4:6 Emba pyuo karare doŋo nambana yuu gii otara doko repetale pyaka sepelyamo. Namba Anatunya yulu dokona reke lao kumuo mairulyamo.
2TI 4:7 Namba range porayapala makandalana suu piyunu yuu dokona kaeya nao pao otapu. Imambunya yulu keyange dupwa nyelana lao suu pyao makando puu pao pupu.
2TI 4:8 Dopa pyuo pupunu dokona pyuo wini lapala yole nyero ingyaro silyamo. Yole rolaena kyawa rarange doko Kamongo kote pii rolae singi dokome yuu gii mupwa eparamo dokopa jera. Nambako iki jerande daa. Wakale lapo opetae baa epelyape lao mona reto iso karaminyi dupwana opetae ingyara.
2TI 4:9 Emba range porayapala waiya lao namba kandala epare.
2TI 4:10 Akali Dimasa baa isa yuunya bange rae maipala namba yaki nyepala yuu Tesalonaika dokona peya. Akali Kurisene doko baa yuu Galasia peya. Dee Taitesa baa yuu Dalamesia dokona peya.
2TI 4:11 Luku iki dae karamo. Embame Make nyepala dae lanyuo epare. Eparambinyipa Makeme Anatunya yulu pyuo namba kapa nyisara.
2TI 4:12 Akali Tikikasa yuu Epesasa pena leyo.
2TI 4:13 Emba dae epana dokopa nambana komau pee pingi andake yuu Toasa range Kapasana andana yaki nyiyunu doko minyakao ipupi. Dopa pyuo epo dokopa nambana buku dupwa opetae minyakao epo dokopa buku kuki namba rangena pii pyao palyingi dusipa kame see napipi.
2TI 4:14 Ane kapa wasingi akali Alekesanda dokome namba randa andake jiya. Baa apa pyuo piya lao Kamongome yano pyara.
2TI 4:15 Baa waili pii lao kareyama dokona imbu singi mandeya dokona emba range baapa kandokondali pyuo karape.
2TI 4:16 Namba kanda soo kote leyami dokopa mendeme nambana lao nyisapa nayami. Mee peparaeme namba yaki nyuo kaeyami. Anatumi nakamana koo piyami dokona suu pyao kaeyakaminya leto.
2TI 4:17 Dopa piyaminyipa Yesumi namba role pyao karapala banya porainya renge jiya. Jiyamo dokona waili pii angi doko lamaiyunupa Juu daa rara wakale dupwa peparae kapa siyami. Mende doko namba mena laenena nenge kata dokona Anatu baame nenge raka lao nyiya.
2TI 4:18 Kamongome namba yulu koo dupwana kingi raka lanyi nembo banya yake panda iso karenge dorena mondo lao lanyuo para. Dokona lao banya kingi doko neta renge ingyuo sulu sinya, doko kinyi.
2TI 4:19 Pirisila Akuilapa yako lao dokopa Onesiporasana ree palu opetae yako leto.
2TI 4:20 Irasatasa yuu Korina dokona karo kaeyamopa, Topimasa baa anga piyamosa yuu Mailitasa dokona yaki nyiyu.
2TI 4:21 Emba kupwa pingi pyaka sepa naramo dokopa wambo ipulinya suu pyao karape. Yupyulasamoo, Pyutenesa, Lainasa, Kolotiamoo dee lapo dupwa opetaeme yako letaminyi.
2TI 4:22 Kamongome nakama pipya role pyao kararamopa Anatunya mona keyange palyuo ipingi doko nakama keta palena.
TIT 1:1 Namba Pole Anatunya kendemande akali ingyuo karo Yesu Koraisana aposele akali dokome pepa pase pyao jilyu. Anatunya rombo palyisi wambunya kapa ingingi lao suu pingi doko andanyi pyambwapala pii angi namwana misi pii lenge doko nolakare lao Anatumi emba kyakale lao mapanyi peelyo pare langiya. Ene busiyamo dokopa Anatu kyambo laa nange dokome nakama lete karalu kararami lao kinyi lalu lao leya.
TIT 1:3 Banya yuu gii rolae dokopa waili pii dokona namwa nolako langiya. Langyapala dokopa waili pii doko namba keta jepala polo lamaikare lao namwana Lete Wai Pyao Nyingi Anatu dokome letonuli pyuo piri leya.
TIT 1:4 Nambana Kurisene wane angi Taitesa emba pepa dake pyao jilyu. Rakane Anatu Koraisa Yesu namwana Lete Wai Pyao Nyingi dokopana mona keyange palyuo ipingipi mona kyuu lao singipi emba keta palena.
TIT 1:5 Nambame yuu Kirita dokona karo yulu lapo pyuo maleyono silyamo dupwana pyuo otakareŋe lapala yuu dokona karape leyo. Dopa pyuo taone dupwana yaka lao Elyambu Pinginya akali mupwa lapo rombo palyare lao leyo kande. Pii dusipa kame see napipi.
TIT 1:6 Elyambu Pinginya akali mupwa doko baa pii pali naramopa enda mendaki ikinya akalingi ingyuo karena. Banya wane wanake dupwa Kurisene inginya lao kando karo kingi lakami naraminyipa mena rae lenge ingyuo kamba laa nao ando pena lao rapu pyuo karena.
TIT 1:7 Elyambu Pinginya akali mupwa doko Anatunya yulu rapu pyuo karenge dokona yuu peparae rolae pyuo karena. Baa mena marakai ingya naope imbwualana wangu lakapala imbwua naope biya naa naope waiya lao langa pyakanda naope bange nyipuli lao suu pyaa nao karena.
TIT 1:8 Wambu eparami dokopa yako yako lao nenge pyuope yulu rolae dupwana mona retena. Baa range rapu pyuo karope rolae pyuope poo pyasi karope rangeme mondo lao rapu pyuo karena.
TIT 1:9 Waili pii angi Anatunya mana pii lengenyili pyuo pingi doko baa poraiyuo minyuo karena. Dopako pira ramo doko pii rolae lamaiyuo wambu serami dupwa andanyi nembo pirasa pira. Dopa pyuo pira dokome wambu pii rolae rae mai nange dupwana pii kyai ingilyamo lao lasaka pyuo nolakara.
TIT 1:10 Wambu malumi mee pii kopetame lapala pii angi doko nembo wakale dupwa kando panga soo lao karenge. Juu yanenge kalomasi dee Kurisene ingiyami dupwa panga sooko karaminyi.
TIT 1:11 Akali dopaleme kana mone nyimwali lapala yulu ama koo pyuo pii kopetame mana lamaiyuo ree palu wambu dupwana suu pingi bolombalo lanyi nembo randa mailyaminyi doko kaena lamairi.
TIT 1:12 Kirita wambu rangena poropeta akali mende dopa leya. Kirita wambu yuu peparae kyambo lao mena rae lenge dopale ingyuo maka suku suku napala nenge nyura nao pyuo karenge leya kande.
TIT 1:13 Pii doko kinyi leya. Dokona lao nakamana Anatu kapa ingingi lao suu pingi doko kapa andaramo dokona pii poraiyuo lao pyalana pyuo lamaiyuo karape.
TIT 1:14 Juu wambunya sinju pii dupwape dee isa wambu lapo pii angi yaki nyiyami dupwana mawa pii dupwape minyuo kara nana.
TIT 1:15 Wambu mona rolae singi doko kata yulupi dupwa peparae rolae ingyuoko penge. Wambu mona karo petenge Yesu mona mai nangena mona anda dee yulupi dupwa koo ingyuo singi dokona yulu peparae rolae ingyuo paa nange.
TIT 1:16 Nakama kambu dokome Anatunya wambuŋu lao yulu piminyi dupwame banya ingyuo paa nalyamo. Nakama kamba lao yango mende kando awa epekanda napala yulu koo pingi dokome yulu keyange pinya saka nalyaminyi.
TIT 2:1 Pii lare dupwa Anatunya mana pii palamo dupwana iki moko minyuo lapengele.
TIT 2:2 Alemo dupwa biya malu nao enokwanyi nemba nao mona palenge ingyuo rangena suu pingi kame pyuo minyuo karena lamairi. Dokona ingyuo nakama Anatu kapa ingingi lao suu pingipi mona retenge yulupi dolapo pyuo karo randa eparamo dokopa porayapala karena lao mana lamaipi.
TIT 2:3 Endemo nakama Imambu Poo Pyasinya yulu pingi endana yulu dopale pyuo petena lamairi. Mendali koo keta palyuo kingi isa nembalana suu pyao kyambo laa nao biya malu nao pisarami ingya nana lamairi. Yulu keyange dupwa mana lamaiyuo petena.
TIT 2:4 Doko enda angi dupwame nakamana akalingi ikinyingipi rapu pyuo mona retarami dokona mana lamainya lamairi.
TIT 2:5 Nakama suu pingi rangeme kame pyuo minyuo mondo lao piso anda dokona yulu au pyuo pyuo nakamana akalinginya pii soo petena. Dopa pirami ramo dokopa lapome Kurisene yulu kooŋo lao laa narami.
TIT 2:6 Pii dokonako ingyuo akali parange dupwa suu pingi rangeme kame pyuo minyinya lao poraiyuo mana lamairi.
TIT 2:7 Embame range yulu keyange dokona nyiso pyuo wambu yango dupwa lasaka pingi ingyuo karare. Pii angi dupwa suu pyao mana lamaipala mee langa male lalya lana pyuo laa napipi.
TIT 2:8 Pii angi dokonako larenepa akali dupwame pii dokona koo mende koto nyii nana lao karape. Dopa pirinyipa embena nyisu petenge dupwame namwa keta koo lao lalana saka napala elyuo karenale.
TIT 2:9 Yulu pingi akali dupwame nakamana yulu pyakamingi akali dupwana pii minyuo nakama rae mainyi pyambuo karena. Nakamame kamba pii laope waa mende nyakamiwape pii nana. Dopa pilyamano lao dokopa nakama mondo lao keyange pyuo karalu karena. Dopa pyuo pirami ramo dokopa nakamana yulu peparaeme namwana Lete Wai Pyao Nyingi Anatunya mana pii dokona ketae pyambuo piramisa pira.
TIT 2:11 Anatu banya mona keyange palyuo ipingi wakasa dokome akali peparae lete wai pyao nyelana piya doko nyuo paneya.
TIT 2:12 Banya mona keyange palyuo ipingi dokome dopa lao mana langingi. Nakama dae karo Satanena kata yaki nyepala yulu koo dupwana mona andanyi nemba nao suu pingi rangeme kame pyuo minyuo rolae pyuo Imambunya kata dupwana karalapape lao langingi.
TIT 2:13 Namwa yuu gii elyape keta pisarami lao namwana Anatu kamame wakasa dee Lete Wai Pyao Nyingi Yesu Koraisapa neta renge ingyuo panarambi doko iso karamano.
TIT 2:14 Koraisame baa namwana koo dupwana kumuo jepala namwa baa rangena wambu kipungi poo pyasi inginyi pyambuo kiiramo nyiya dokome yulu keyange dupwa angingyuo pinya suu pyao pimana.
TIT 2:15 Pii lasi dusipa nyuo mana lamaipi. Wambu embena pii serami dupwa porainya renge dokome paleta mona porainyi pyambuo pyalana pyuo lare. Mendeme emba kando ketae nemba nana.
TIT 3:1 Embena wambu yango dupwa kando gapomanepe kanjilipinya pii rape rape lao soo pisirami doko kame see nana lamairi. Gapomanepe kanjilipi yulu keyange lapo mairami ramo dokopa embena wambu dupwame mumu laa napala pinya lamairi.
TIT 3:2 Nakamame akali peparae kando mona seramopa yako lao anjiki pyuo karo mendali kando pii koo laa nana lao lamairi.
TIT 3:3 Wambo namwa range kopyali ingyuo kamba lao kopetame pyuo kareyama. Namwa yulu koo dupwana mona andanyi pyambuo kopyali yulu wakale wakale dupwa pipala dokona kendemande ingyuo kareyamako. Mendali koo keta palyalana kanda lyanolyano pipala wambu dupwa kando awa epekanda nayamano dokopa nakamame namwa kando awa epekanda nayamiyoko.
TIT 3:4 Namwana Lete Wai Pyao Nyingi Anatu anjiki pingipi mona retenge rengepe paneyamo doko baame namwa lete wai pyao nyiyasa piya. Doko namwame yulu keyange piyamandena lete wai pyao nyiyande daa. Anatu rangena sakao nyiso karenge renge dokona banya Imambu Poo Pyasinya manjo nyingi enengepe lete karenge enengepe dolapo jiyamo dokome namwa poo pyao lete wai pyao nyiya.
TIT 3:6 Namwana Lete Wai Pyao Nyingi akali Yesu Koraisa keta Anatumi banya Imambu Poo Pyasi peparae namwa pipya kulimbuo jiya.
TIT 3:7 Banya mona keyange palyuo ipingi dokome Anatu namwana koo dupwa nyuo kame sakao roleyamo dokona namwa lete karenge dokona lao nyimwali yaka lao suu pilyamano doko kapa nyerama.
TIT 3:8 Pii dake kinyi palamo. Anatu mona maingi wambu dupwame wambu yango nyiso embame yulu keyange dupwa yapo pyuo petena lao poraiyuo mana lamaiyuo karape. Yulu dopale keyange ingyapala wambu nyisingi.
TIT 3:9 Kopyali ingyuo apiyanda pyuo laa nao mumbwange kauwange kamongo dupwana kingi lasi londe dupwa minyuo dopale kandale lao pyuo lao karare doko kapa ingyuo paa nalyamo. Laiya laa nao Lowa pii dokona lao suu pyao sisi nyuo kara napipi. Dusipame mendali nyisa nao mee ingyuo pelyamo.
TIT 3:10 Wambu lapome Elyambu Pinginya yulu kwaenyi nembalana nembo nembo minyuo larami ramo yuu lama rolo lamairinyi see narami ramo dokopa role pyao yalya kando pisa nalapape.
TIT 3:11 Akali dopale baa Anatunya Imambunya yulu suu pyaa nao kumasi kyukurenge karo banya koo dupwame baa akali kyai lao lasaka pingi doko emba silinyi.
TIT 3:12 Nambame Atemasa panda Tikikasapa nakama keta pena laro dokopa namba kupwa pingi yuu gii dokopa yuu Nikopolisa karalana dokona emba opetae Nikopolisa ipili lao suu pilyu dokona waiya lao ipupi.
TIT 3:13 Lowa minyingi akali Sinasa Apolosapa ene epena pirambinyi dokopa emba nyiso bange peparae nakamba yangyarali dupwa mairinyi eparambi.
TIT 3:14 Namwana wambu dupwa yulu keyange pyuo nakamana wambu yango nyiso yangyarali dupwa maingiŋi lao mana lamaipi.
TIT 3:15 Wambu dae yalya kando pisimwa dupwa peparaeme nakama kando yako letaminyiko. Yako lenge pii doko namwana Kurisene yango dupwa lamaiyakape. Anatunya mona keyange palyuo ipingi doko nakama peparae keta palena.
PHM 1:1 Namba Pole Koraisa Yesunya namba reke lao karapusi akali karo dokome pepa pyao jilyu. Nambapa namwana yangonge Timoti dokopa emba namwana puu minyingi keyange yulu mendakinya pingi dokona yako letambano.
PHM 1:2 Dokona nambame pepa pase pyao namwana pemalenge Apia dee namwana yanda singi yango Akapasapa pyao mailyu. Doko Elyambu Pingi wambu embena anda dokona Anatu lakandenge dupwa yako lao pepa dake jilyu.
PHM 1:3 Namwana Rakane Anatu dee Kamongo Koraisa Yesupa nakambame mona keyange palyuo ipingipi mona kyuu lao singi rengepe nakama keta jinya leto.
PHM 1:4 Yangone Pilimone sepe. Nambame ateŋa lao dokopa emba suu pyapala embena kingi lakao Anatu kando sangyu lao pingi.
PHM 1:5 Kamongo Yesu kapa ingingi lao suu pyao Anatunya wambu dupwa mona reto pyuo karene laminyi soo karo dokona ateŋa lakapa pilyu.
PHM 1:6 Namwa nakama pipya yalya kando Kurisene ingyuo petenge dokona lao nambame ateŋa lakao karo. Dokona Anatumi namwa Koraisana arapunya karenge dokona renge keyange nyingi dupwa peparaena lao soo gisalase lao lasaka pira.
PHM 1:7 O yangone, embena mona retenge dokome namba nyuo rae maiyuo porainyi pyambuya. Dopa pyuo emba Anatunya Elyambu Pingi wambu dupwa peparaena monarena rae mainyi pyambwakamiyoko.
PHM 1:8 Renge dokona lao namba Kurisene yangonge ingilyamo dokona dopa pyuo piri lao eŋa nembapala langiru ramo doko kapa ingyara.
PHM 1:9 Ingyaramopape emba mona retenge dokome namba pyapyamo dokona lao mee manda rao pisilyu. Namba dopa pilyu doko namba Pole Koraisa Yesunya pii lakala puu lao peeyamo dokome banya reke lao epapu lao karapusi pilyamo.
PHM 1:10 Nambame emba piso soo nambana ikinyingi Onisimasa doko poraiyuo suu pyakape leto. Baa nambana ikinyingi angi Yesunya arapunya karenge. Namba karapusi dokona karo dokopa banya Kurisene rakange ingyuo kareyo.
PHM 1:11 Wamba baa yulu kopetame pyuo emba nyisa naya. Nyisa nayamopape epapu baa yulu keyange pyuo nyiso embapa nambapana mupwa ingyuo pelyamo.
PHM 1:12 Baa keta nambana mona doko yukwaro karapyamopa role pyapeta epapu baa emba range keta mapanyi peeyakalyo.
PHM 1:13 Namba waili pii dokona reke lao karapusinya karo dokopa emba dae kara napala namba nyisalana saka nalene dokona Onisimasa doko role pyao karambwali lao leto.
PHM 1:14 Emba nyisa lao poraiyuo laa nalyo. Embena masinginya maso suu pilinyili pyuo pipi. Nambame mende maso pii napala embame suu pyarene doko piru.
PHM 1:15 Emba Onisimasapa yuu peparae role pyao kararamba lao baa yuu kuki lama neta peya rapisa.
PHM 1:16 Epapu baa mee kendemandeko ingyuo karande daa. Kendemande pingi doko suu pyao baa yangonge angingyuo Yesunya arapu dokona opetae karamo. Doko baa angi mona retelyoko. Dee kamba epapala baa kendemande akali ingyuo dee Kurisene angingyuo kararamo dokopa emba baa mona wakasa retare lao silyu.
PHM 1:17 Namba emba pipya role pyao Yesunya yulu pingi lao suu pii kande doko namba yako lenge kandale doko suu pyao Onisimasa baa yako lare.
PHM 1:18 Baame emba keta koo mende pyuo pisiya kandepe panda bange mende mee yano reto nyiya kandepe doko banya kingi kwuapala nambana kingi doko dokona retare.
PHM 1:19 Namba Pole rangena kingi dokome pepa dake pilyu. Namba rangeme yano doko pyaro. (Emba kapa serene lete kata doko nambame lasaka piyunupape emba keta yano ingyuo silyamo dokona jipili doko angingyuo laa nalyo.)
PHM 1:20 Kinyi yangone Kamongona reke lao embame namba rae mainyi pyambwape. Embapa nambapa Koraisana akali karambano. Renge dokona embame namba mona keyange palinyi pyambwape.
PHM 1:21 Nambame pepa dake pyao piso dokopa nambana pii lapu dokona wara minyuo piri doko silyuko. Dee lama opetae kamame wakasa ingyuo pirilyamo lao silyu.
PHM 1:22 Pii mende doko, nambana panda mende rapa rapa pyakare. Anatumi nakamana ateŋa larami doko sera lao silyu. Sepala baame namba nakama keta dee range jera.
PHM 1:23 Koraisa Yesunya reke lao Ipaporasa baa namba role pyao karapusi karambano. Baame emba yako lao letamo.
PHM 1:24 Nambana yulu role pyao pingi akali Make Aritakasa Dimasa dee Lukumoo nakamame opetaeko yako letaminyi.
PHM 1:25 Kamongo Yesu Koraisana mona keyange palyuo ipingi renge doko nakama keta palena.
HEB 1:1 Wambo dokopa Anatumi namwana akali kyawa dupwa banya poropeta akali dupwa keta pii lamaipa piya.
HEB 1:2 Epapu yuu gii repetale lumwa pira ingyapyamopa banya Ikinyingi keta pii langiya. Anatumi Ikinyingi keta yake yuupi wasapala karo dupwa peparae banyaŋa lapala baa maira ingilyamoko.
HEB 1:3 Ikinyingi doko Anatu peparae isa komba pyapala Rakangena yanga paupau lenge doko neta ranyi peenge. Banya pii porainya renge paleta dokome yuu muu dupwa peparae renge kuiyuo minyaro karenge. Baa isa wambunya koo dupwana pyuo elya pyuo nyepala yake pandana mupwa Anatu dokona kingi rolaerename pao peteya.
HEB 1:4 Ikinyingi akali doko aŋala dupwa pipya baa ketae ingyuo rombo palyiyamopa banya kingi maiyamo doko dolomana kingi dupwa pipya manda manja naya.
HEB 1:5 Anatumi aŋala anjukusi kando, Emba nambana ikinyingiŋi epapu dakepa nambame embena Rakange ingyuo karoŋo, lamaiyase? Dee Anatumi aŋala dupwana mende kando, Aŋala dokona namba Rakange ingyuo kararo baa nambana ikinyingi ingyuo pelyamo, leyase?
HEB 1:6 Anatu baame banya Ikinyingi mupwa doko isa panda repetale mapanyi peeyalana karo dokopa dopa pyuo leya. Nambana aŋala peparaeme banya kingi lao mona kando pisarami.
HEB 1:7 Baa aŋala dupwa suu pyao dopa leya. Nambana aŋala dupwa porambaiye dopale ingyuo pena lao kendemande dupwa yulu poo rele lao pinya lao mairu, leya.
HEB 1:8 Dopa pyuo leyamopape Ikinyingi kando dopa leya. Emba Anatuŋu, peparae isa karalu karare lyakande rolaena renge palyuo embena wambu dupwa rolae dokome iso karenge.
HEB 1:9 Emba yulu rolae dupwa rae maipala koo dupwa epekanda nao karene. Dopa pyuo pipinyipa embena Anatu baame emba mamba wele kiso kiŋi inginyi pyambuyamopa rae maiyuo iso karalu karare. Doloma embapa manda manja nara.
HEB 1:10 Dee pii mende konda pyuo leya doko, Kamongo embame kanda soo dokopa yuu muu dupwa peparae wasii. Rangena kingi dokome yake doko wasiipya.
HEB 1:11 Wasiinyi dupwa mee ingyuo rali piramopape emba yapo karalu karare. Komau wambarae dupwa kwao penge doko suu pyao bange peparae kwaoko para.
HEB 1:12 Komau kwaelyamo dokopa nembapala enenge nyingi doko suu pyao yake yuupi embame alowa pyuo enenge ingyare. Dopa pyuo pirinyipape embako ema napala mee karalu karare.
HEB 1:13 Anatumi aŋala anjukusi kando, Emba epapala nambana kingi rolaerename pisarinyipa nambame embena nyisu petenge dupwa Anamasi minyapala emba keta jeronopa mee kalya naro karare, lamaiyase?
HEB 1:14 Yulu dokore aŋala dupwa keta mai naya. Nakama Anatunya kendemande imambu karaminyi dokona baame wambu yake panda parami dupwa nyisala pena lao mapanyi peenge.
HEB 2:1 Dokona lao pii siyama dupwa kaka soo yaki nyii nao poraiyuo minyuo pimanale.
HEB 2:2 Anatumi wamba aŋala dupwa keta pii lamaiyamo dupwa mee kulisa ingyuo peya. Dokona lapome kamba leyami dupwana manda manjo randa nyiyami.
HEB 2:3 Anatumi yulu andake pyuo namwa kyawa lete nyiyamo doko soo nyii narama ramo doko apa pyuo koo panda wanjaramase? Kamongome wambowana karo namwa kyawa lete nyeronyaŋa lao leyamopa soo nyiyami dupwa keta kinyiŋi lao pakana palamo.
HEB 2:4 Anatumi dopako pyuo kyawa minyara pii doko porainyi pyambuli lao yulu wambumi pii nangepe yulu wakale wakale porai dupwape pyuo lasaka pyuo baame Imambu Poo Pyasi maiyuo yulu dupwana mora pisinyi pyambuyamopa pyuo peteyami.
HEB 2:5 Yuu enenge ingyuo wasaraŋa letamano dokona Anatumi aŋala dupwame iso karena leyande daa.
HEB 2:6 Anatunya buku dokona lao dokopa O Anatu, wambu dupwa akinde dokona embame baa suu pyale pyale karese? Dee wambu dupwa apimawaŋa lao embame ketae pyambuo karese? leya.
HEB 2:7 Embame wambo baa aŋala dupwana punji punji ingyuo karena lao karapi kandape doko dakepa embame baa neta renge ingyuo ketae pyambulinyi.
HEB 2:8 Dopa lapala baame bange dupwa peparae iso karena lee. Baepoleme lao dokopa, Anatumi akalimi bange dupwa iso karena leya letamo. Doko bange peparaena lapyasa pilyamo. Dopa pipyamopape wambumi epapu bange peparae angingyuo rapu pyuo karaminyi doko kanda nalyamano.
HEB 2:9 Yesumi angingyuo rapu pyuo karamo doko kandelyamano. Baa isa panda kareyamo yuu gii dusipana iki aŋala dupwana isarena ingyuo kareya. Dokona karo wambu peparae lao kumuo maiyamo dokome epapu Anatunya yanga paupau lenge panda dorena Kiŋi ingyuo petamo. Anatumi ipyapala mona keyange palyuo Yesu isa wambu dupwana lao kumala pena leya.
HEB 2:10 Anatu bange peparaena simuisa ingyuo karenge dokome Yesumi wambu malu sukusa lanyuo eparaŋa lao suu pyapala baa randa mainyi pyambuo sukunde ingyuo kiso rolo yulu keyange wakasa piya.
HEB 2:11 Baame nakama poo pyao nyiyamopa baape nakama poo pyao nyisi dupwapena Rakange mendakioko ingilyamo. Dokona baame nakama kando eŋa nembo banya yangoneŋe lao karamo.
HEB 2:12 Yesu baame Anatu kando dopa pyuo leya. Embena kingi doko nambana rara lamaiyuo. Misi lao pisaraminyi dokopa kenane Embena lao ranaisa poko pyaro leya.
HEB 2:13 Dopa lapala dokonako lao, Anatu kapa ingingi lao suu pyao baa keta pyamalyaro kararo leya. Deeko kamba lao, Anatumi wambu yango jiyamo dupwa pipa dakena karo leya.
HEB 2:14 Banya rara doko mee isa enda akali kareyaminyi dokona Yesu baa dokona mendali ingyuo isa komba pyao kareya. Dopa pyuo karo baame Satane kumungi renge minyaro karenge doko kokwa sinyi nembaro lao kumuya.
HEB 2:15 Isa wambumi kumasaro yako lao pakalyamisa suu pingi dokome nakama kiimbwasi petenge doko Yesumi moko nyiya.
HEB 2:16 Yesumi aŋala dupwana lao nyisalana piyande daa. Baa Aporakamena para pyasi dupwana lao nyiso piya.
HEB 2:17 Yesu baame Anatunya Purisi Mupwana yulu mondo lao pyuo kararo lao suu pyapala isa wambu mendako ingyuo isa komba pyao epeya. Baa dopa pyuo epo pipala namwa kondo nyiso namwana koo dupwa nyuo yaepanyi nembako kumuya.
HEB 2:18 Namwa makande piramo dokopa Yesumi randa nao makande piyamo kareyo kande doko pyaamo lao soo manji nyepala namwa kapa nyisara.
HEB 3:1 Yangonemoo Anatumi nakama kee leyamopa sukusa karaminyi dokona Yesu namwana Purisi Mupwa kanya akali ingyuo karamo doko suu pyale pyale karalapape.
HEB 3:2 Mosese baa Anatunya yulu kaeya nao pyuo kareyamo doko suu pyao Anatumi Yesu yulu maiyamo dokona Anatu baapa pyuokondali koo pyakamyuo piya.
HEB 3:3 Akalimi anda keyange pilyaminyipape andana kingi doko ketae paa napala akalinya kingi ketae penge. Dokonako ingyuo Mosese kaepala Yesu neta renge ingyuo karamo.
HEB 3:4 Dokona lao anda dupwa wambumi piminyi pisi karamo doko suu pyao Anatumi bange peparae wasiyamo silyamo.
HEB 3:5 Mosese Anatunya kendemande dokome Anatunya wambu keta yulu kulisa palyuo piya. Dopa pyuo Anatunya yulu rengya nyera dupwana lao lao pano kareya.
HEB 3:6 Dopa piyamopape Koraisa baa Anatunya wambu dupwana kyawa nyuo iso kareya. Namwa kaeya napala Yesu epara lao mona kare kare kararama ramo doko Anatunya ree palu ingyuo kararama lyakande.
HEB 3:7 Imambu Poo Pyasimi lao dokopa, Epapu Anatunya pii serami ramo dokopa
HEB 3:8 yuu muiyane dokona mona kana pokapala Anatupa male male lao kamba lao kareyami kande dokonako palyuo pii nalapape.
HEB 3:9 Anatu lao dokopa nakamana kauwane dupwame ee kana akalisa kisima (40). nambana yulu kando karapalape namba alyungu mambu ingyuo minyuo kui leyami leya.
HEB 3:10 Dopa pyuo peyaminyi dokome namba imbu singi nyakayami. Nambame enda akalipi yuu peparae kopetame suu pyao karenge leyo. Nambame nenge rambo lao piso karo pingi doko mana nyii nalu nao nayami.
HEB 3:11 Namba imbu singi nyepala mawa pii leyoŋo nambamoo pipya koo sela epa narami leya.
HEB 3:12 Yangonemoo nakama lapome mona koo palyuo lete karenge Anatu baa kapa ingya nange lao suu pyapala neta pasasarami lao waso karalapape.
HEB 3:13 Yangonemoo epapu nee silyamo dolapokoŋo yulu koo dokome kunji pyao mona kana poko nyii nana lao yango sukusa piimi lao porainyi pyambwalapape.
HEB 3:14 Namwa kanda soo Kurisene ingyapala dokopa waa waa karo piyama dokona palyuo pyuo puu parama ramo doko Koraisana dupwa namwa opetaenako ingyuo para.
HEB 3:15 Pii dake Baepole dokona letamo. Epapu Anatunya pii serami ramo dokopa yuu muiyane dokona mona kana pokapala Anatupa male male lao kamba lao kareyami kande dokonako palyuo pii nalapape.
HEB 3:16 Apimoo Anatunya pii lamaiyamo doko see napala kamba lao kareyamisi? Enda akalipi yuu Isipi yaki nyuo Mosese nakambana rapu pingi dokome lanyuo peyamo dupwasa letamo.
HEB 3:17 Apimoo kando ee kana 40 dusipana Anatumi imbu singi neta nyiyase? Wambu yulu koo pipala yuu muiyane dokona kumuyami dupwako kando imbu singi nyiya.
HEB 3:18 Anatumi mawa nyuo lao dokopa, Nakama nambapa koo soo pisa epa naramiŋi lao leya. Pii doko apimoo kando leyase? Kamba leyami dupwa kando leyasa piya.
HEB 3:19 Anatu leyamuli pyuo mendakinya palyuo suu pyaa nayami dokome yuu angi dokona sukusa paa nayami.
HEB 4:1 Anatumi mawa pii mende namwa pipya ingyuo retapyamopa doko namwa baapa koo soo pisa parama ingilyamo. Nakama lapo dokona sukusa paa nasaramiŋi yako lao suu pyao karamana.
HEB 4:2 Waili pii Isaraele wambumi siyami doko epapu namwa keta silyamano. Dokona lao siyaminyipape mona kapu kyaa nao kaleme iki siyamisa pii doko nakama nyisa naya.
HEB 4:3 Namwa Anatupa mona kapu kyuo karamano dupwa baa keta pao mona sipyamopa karamano. Anatumi doloma kando dopa leya. Namba imbu singi nyepala mawa pii leyoŋo nambamoo pipya koo sela epa narami, leya. Baame yuu muu kanda soo waso karo rapa rapa pyuo kaeyamopape epa naramioko leya.
HEB 4:4 Dokona lao Baepole dokona pii mende, Yuu gii yanda ipingi dokona suu pyao lao Anatumi yuu yanda ipingi doko yulu piyamo dupwana imambu soo peteyaŋa letamo.
HEB 4:5 Lapyamo mendaki dokonako dee paki ayemba pyao lao kaeyo lao nambapa koo sela epa narami leya.
HEB 4:6 Waili pii keyange wambo siyami dupwame kalena iki siyamisa Anatupa koo serami dokona paa nayami. Enakana siyami dupwame Anatupa koo soo karala parami ingiya.
HEB 4:7 Dokona lao Anatumi yuu gii mende wakale dee kamba rombo palyiya. Baa Dapiti keta buku Baepole dokona dopa pyuo leya. Epapu Anatunya pii serami ramo dokopa mona anda kana pokapala paa nalapape.
HEB 4:8 Josuame nakama Anatupa koo serami mare dokona angingyuo lanyuo peyali doko Anatumi yuu gii rengya mendena letamo dokona lao malo sera nayali.
HEB 4:9 Anatu yuu gii yanda ipingi dokopa koo soo kareyamo dokona palyuo banya wambu dupwa koo soo kararami ingilyamo.
HEB 4:10 Mendeme Anatupa koo sela para doko Anatu baa yulu pyuo kaepala koo soo peteyamo dopale ingyuo koo sela parasa pira.
HEB 4:11 Namwa porayapala Anatupa koo soo karala monale. Wambu kamba leyami dopale ingyuo lapala papu pii namanale.
HEB 4:12 Anatunya pii doko kumasi daa. Doko pelyamo dokopa papae kareta pele lenge. Wua wakale mende paki pakipi nenge karenge dopale manda manjo ingya nalyamo. Wambunya monarena pelyamo dokopa nenge wakasa karengendeme nyiso puumi bilima nao pusili lenge. Ama koko papala wambunya suu pingi dokona koo keyangepe kando kendali minyinyi nembenge.
HEB 4:13 Anatumi bange peparae wasiyamo dupwana mende baapa nee pyuo sera ingya nalyamo. Bange peparae Anatunya lenge kambunya panembena sera. Baa ketako mendali neta paa napala namwa peparae rangena yulu dupwa polo lamairama.
HEB 4:14 Anatunya Ikinyingi Yesu baa karamo mare angi dokona namwa nyisalana purisi mupwa ingyuo karamo. Dokona lao baa mona maingi yulu dokona sero kaeya namana.
HEB 4:15 Namwana purisi mupwa dokome namwa monarena randa nyilyamano dokopa konda nao mona kana ingyapyamo karande daa. Baa koo dupwame namwa pilyamuli pyuo makande piyamo nakanjo siyamopape baa ketako koo angi pali nange.
HEB 4:16 Dokona lao Anatu mona keyange palyuo ipyuo karamo mare dokona eŋa paramopa monale. Baa ipyapala mona keyange palyuo karamo dokome koo keta palyuo kararama gii dupwana kondo nyisapa nyisapa pyuo karara.
HEB 5:1 Purisi akali mupwa dupwame wambu dupwana lao Anatunya yulu pyakamyuo karenge. Nakama rombo palyisi dokome wambunya yulu koo dupwana lao Anatu dokona mena kiso maiyakamyuo pyuo karenge.
HEB 5:2 Purisi doko baa range mee isa akali yulu koo pingi dokome wambu yango kamenge karo yulu koo piraminyi dokopa anjiki pyuo nyisingi.
HEB 5:3 Baa isa akali koo pingi dokome wambu wakalemana koo dupwa iki suu pyao mena kiso mai nange. Baa rangena koo dupwa opetae suu pyao kiso maira ingilyamo.
HEB 5:4 Mendeme range sisu lao purisi mupwa karalana laa nange. Anatumi Erone yulu pinya lao kee leyamo doko suu pyao Anatu baame purisi dupwa range rombo palyingi.
HEB 5:5 Dokonako palyuo Koraisa baa range sisu lao purisi mupwa karalana laa naya. Anatumi baa kando dopa leya. Emba nambana Ikinyingi dokona namba epapu embena rakange karo kande leya.
HEB 5:6 Lapala deeko lao, Purisi akali Melekiseteke pyuo kareyamo doko suu pyao emba purisi dopale mee karalu karare.
HEB 5:7 Wamba Yesu isa akali kareyamo dokopa Anatumi lopo lete nyipyalinya suu pyao ateŋa pyao ee andake lao piso siya. Yesu baa Anatupa lao suu pyapala range kuki ingyuo pyuo karenge dokona lao banya ateŋa doko Anatu siya.
HEB 5:8 Yesu baa Anatunya Ikinyingi angi ingiyamopape randa dupwa baa keta nyuo siyamo dokome Anatupa rape rape lara ingiya.
HEB 5:9 Baa dopa pyuo mana nyepala angingyuo peyamopa lete karalu karengena renge doko wambu baa warombo siyami dupwa keta maiya.
HEB 5:10 Anatumi Yesu baa Melekisetekena purisi mupwa karalu karenge rara dokona mendako ingyuo penale leya.
HEB 5:11 Dokonako palyuo pii malu palipyamopape nakamba sili see nale lao petaminyi dokona apa pyuo lao rolarose?
HEB 5:12 Nakama dakepa soo gisapala mana lenge ingyuo pumili doŋo doko kaepala dakepa Anatunya pii dokona epe epe laowale dupwa mana langiraminyi serami ingilyamo. Nakama andapaena nenge angi dupwa naa napala nyaŋana nenge pyuku lasi dupwa iki nao karaminyi.
HEB 5:13 Anju ipwange iki nao karenge dupwa andapae daa kandale dokona Anatunya pii angi porai dupwa soo manji nyii narami ingilyamo.
HEB 5:14 Wambu angimi koo keyangepe pakana palyuo soo karenge dupwa nenge angi porai kapa nenge kandale.
HEB 6:1 Dokona lao Kurisene yulu dokona pii kanda sowale soo nyiyama dupwako yeelyo minyaro kara namanale. Namwa anda pinya dokopa pinginyame iki karo pyuo puu paa nange kandale. Renge mende pali napyamo mee pyuo karaminyi yulu dupwa kaeyapala mona kapu kyuo Anatu kapa lao suu pingi dokope dee koo dupwa ipwame poo pyao nyingi yulu dupwanape misi lao wambunya ayemba minyinyi piso karo rombo palyingipi wambu lopo eparami dokonape dee lapo koo dokona karalu kararami.
HEB 6:3 Pii dusipanako awali larapu lapa lapa pyuo kara namanale. Kamongome kapaŋa lao suu pyara ramo pii wakale dupwana mana nyerama.
HEB 6:4 Wambu neta peyami dupwa apa pyuo mona kapu kyepala sukusa eparami? Nakama Anatunya yanga paupau lasi panda dokona epo keyange dupwa nakanjo soo Imambu Poo Pyasi nyiyamipya.
HEB 6:5 Nakama Anatunya pii doko ama keyange lao kando sepala yuu gii andake pyaka seramo dokona porainya renge wambo nakanjo siyamisa piya.
HEB 6:6 Nakama kandakinyuo koo pyuo Anatunya Ikinyingi doko dee kamba isa mamandona pyao palyilyamano lao pimisa pilyamo dokona enakana mona dee kapu kyerami ingya nalyamo.
HEB 6:7 Akali mendena ee doko apunda napala andaramopa ee kauwange baame manjipala manjo paramo doko kandapala Anatumi manjo nyera yuu doko elyape inginyi pyambwara.
HEB 6:8 Dee ee mendena nenge anda napala pisi api pyara ramo doko kandapala Anatumi yuu doko kwao pena larali ingilyamo. Kwaeyaramosa isarena kisinyi nembarami ingilyamo.
HEB 6:9 Yangonemoo pii dopale dokome pyao bee baa lanyi nembo lapunupape nakama keta pali nalyamo. Nakama keyange karapala panda keyange kando nyerami doko silyamano.
HEB 6:10 Anatumi kopetame pii nange. Nakamame Anatu mona reto karapala dokome Kurisene wambu yango nyiso pyuo karaminyi doko baa kame see nara. Nakama dopako pyuo puu pao pumili yaka lao suu pilyamano.
HEB 6:11 Nakama yulu doko kaeya napala waa waa lao pyuo karo keyange nyeramili dupwa nyimili yaka lao suu pilyamano.
HEB 6:12 Nakama makapala kaeyarami doko kapa daa. Anatu baa kapa ingingi lao suu pyao wangu lakapala mee iso kararami dupwa keta pii lao kaeyamo dokona kapa wai wara pira letamo. Nakama dokona mendako ingyuo pumili yaka.
HEB 6:13 Anatumi Aporakame kando mende piru lao lalu lao leya. Pii doko wambu mendena kingi lapala lara ingya nayasa baa mupwa dokome rangena kingi dokona lapala kingi ketae nembeya.
HEB 6:14 Anatumi Aporakame kando, Namba emba elyape keta pisaronopa embena rara andakyaraŋa lao lao kana minyuo leya.
HEB 6:15 Aporakame maka nao waa waa lao pyuo kareyasa Anatumi leyamuli pyuo kando nyiya.
HEB 6:16 Juu wambu dupwame mende piru lao lalu lao lenge dokopa kingi andake mendena minyuo lao kana minyuo lenge kandale. Dopa pyuo lao pao mendena kingi minyuo lao ayemba pilyamo dokopa lao otalyamo lapala kaenge.
HEB 6:17 Anatumi wambo nakama koo soo karenge panda nyerami leyamo dokona pii doko alowa pii nalyoŋo kandamili lao pii lalu lao leyamo kata dokona kamameko apoki lao lao kulisa palyuo reteya.
HEB 6:18 Anatu alowa pipala mende pyuo laa nange dokome yuu lamasa lao kingi ketae nembo leyamo dolapona suu pyao alowa pii nara. Renge dolapome namwa Anatu keta pao pyama lyiyama dupwa porainyi pyambwaramopa kyawa lete nyeraŋa lao mona kare kare karamano.
HEB 6:19 Renge dolapome Anatunya Imambunya yulu dokona paa isa ingyaro karo paka pyao soo Anatu karamo yake panda nee pingi dorena puu pao pelyamo.
HEB 6:20 Yesu baa panda dokona wambo sukusa papala Melekiseteke piyamo apo dokona namwana purisi mupwa ingyuo karalu karara.
HEB 7:1 Melekiseteke baa yuu Seleme dokona kiŋi ingyuo karo Anatu wakasa karenge dokona purisi ingyuo kareya. Aporakameme yanda pyuo kiŋi dupwa pyao wini lapala epeyamopa Melekiseteke baa kando nyepala Anatunya kingi lao elyape keta pena leya.
HEB 7:2 Aporakame yanda pyapala apa nao nyiyamo bange akalisa dupwana mendaki yapo nyepa nyepa pyuo karo Melekiseteke maiya. (Melekiseteke kingi wambo doko rolae pinginya kiŋi leyami. Yuu Seleme doko Ipuru pii lao mona kyuu lao singi dopale dokonako palyuo Melekiseteke baa yuu dokopa kiŋi yulu piyasa mona kyuu lao singinya kiŋi karamo leyamiko.)
HEB 7:3 Baa endangi rakangepe apimi mandeya lao banya wambu dokona mendepe pakana palyuo see nayami. Baa kyakala peyami dokope kumuya dokope see nayamioko. Baa Anatunya Ikinyingi dopale purisi akali ingyuo puu pao para ingiya.
HEB 7:4 Akali kyawa mendaki Aporakame banya apa nao bange nyiyamo dokona akalisa doko pingyu nyuo maipa piyamo dokome Melekiseteke baa andake wakasa kareya doko panelyamo.
HEB 7:5 Lipaena rara purisi ingyuo karenge dupwa suu pyao Lowame lao dokopa wambu peparae bange akalisa dupwana pingyu nyepa nyepa pyuo karo maipa pirami ingingi leya. Doko nakama peparae Juu rara ranjama mendaki Aporakamena para pyasi ingiyamopape Lipaena rara doko bange kapa pingyu mairami ingiya.
HEB 7:6 Melekiseteke baa Lipaena rara dokona angi ingya nayamopape Anatunya akali andake Aporakamena bange akalisa dokona mendena mendena pyuo pingyu nyiya. Nyepala Anatumi Aporakame elyape keta karena lao lalu lao lasi dokoko Melekisetekeme banya pii dokome opetae elyape karenako leya.
HEB 7:7 Elyape keta palena lao pii lenge akali baa ketae ingyuo karelyamopa pii soo nyingi doko isa ingyuo karenge doko soo gisilyamano.
HEB 7:8 Namwa Anatu lao bange akalisa dokona mendaki larapu purisi mee kumuo parami dupwa maiyuo karenge kandale. Melekiseteke dokona lao lete mee karamo laminyi silyamano.
HEB 7:9 Aporakame Melekiseteke katasa kandapala bange maiya. Yuu gii dokopa Lipae baa rakange kyawa Aporakamena imbwange dokona baame opetae Aporakame keta Melekiseteke maiyasa piya.
HEB 7:10 Dopa letamo dokome Melekisetekeme Lipaena bange lapo opetae nyiya ingilyamo.
HEB 7:11 Lipaena rara purisi ingyuo kareyami dupwame Lowa doko nyepala minyuo lao kareyami. Dokona lao Lipaena purisi yulu dokome enda akalipi elyape keta peteyamili doko purisi mende Erone yale daande Melekisetekepa mandande epeyalisi?
HEB 7:12 Purisi alowa pirami doko lowa kare kare alowa pira ingyuo silyamo.
HEB 7:13 Purisi enenge doko namwana Kamongo dokonasa letamo. Doko baa Lipaena rara ingya naya. Banya rara dokona mendeme bange Anatu kiso maingi kana pyare dokona wamba yulu pyuo kara nange.
HEB 7:14 Baa Jutana rara dokona mandeyami dokona Moseseme Juta baa purisi ingyuo karara laope laa nayapya doko silyamano.
HEB 7:15 Dopa pyuo leyamo doko randa nao soo nyeraminde daa. Renge doko purisi mende wakale Melekiseteke dopale epeya.
HEB 7:16 Lipaena rarame pinginyili pyuo wambunya yulu palyuo Yesu purisi ingyuo rombo palyuo kareyaminde daa. Baa lete karalu karara renge porai dokome purisi ingyuo peya.
HEB 7:17 Baepolena lao dokopa, Embame Melekiseteke apo dokona ingyuo purisi akali karalu karare letamo.
HEB 7:18 Lowa wamba dokome yulu angi ingyuo pira ingya nayamosa Anatumi alowa pyuo wakale palyiya.
HEB 7:19 Mosesena Lowa dokome wambu mendali rolae inginyi pyambwa naya. Pyambwa nayamopape Koraisa keta kapa paramo doko soo nyepala Anatupa repe repe pyuo epo karamano.
HEB 7:20 Anatumi Koraisa denge palyuo lao, Purisi ingyuo karalu kararaŋa baame mee epe epe lao yakane ingyuo leyande daa. Kana yuwale pyuo lao reteya, leya. Purisi menge dupwana pii dopale lao reta nangepya.
HEB 7:22 Dokona ingyuo Anatumi dopa pyuo Yesu purisi karalu karare lao lalu lao leyamo doko enenge kamame keyange enenge ingyuo para.
HEB 7:23 Purisi doloma yulu doko pyuo puu pao paa narami ingiyasa kumuyaminyipa malu mee karapa piyami.
HEB 7:24 Yesu baa lete karo banya purisi yulu doko mee pyuo kararamoko karara.
HEB 7:25 Isa wambumi Anatu karamo dokona eparami dokona Yesu baame lamaiyakamingi akali ingyuo karalu karenge. Dokona lao baa kukingisa karenge akali ingyuo Anatu keta eparami dupwa pyuo nyulu nyuo nyera.
HEB 7:26 Yesu baa purisi mupwa keyange dokome randa epelyamo dupwa kunjinyi nembakao angi kapa pyala paramopa nyisara. Baa yulu koo mende pii napala poo pyasi ingyuo karamo. Baa isa wambu koo pingi dokona yapo nyisinde yake panda dokona karamo.
HEB 7:27 Baa purisi menge dopale daa. Doloma nakama rangena koo dupwana wambo Anatu dokona lao mena pyao kiso maipala enakana wambu menge dupwana lao kiso maiyakamingi. Baa dopa pyuo pii napala yuu mendaki dokonako baa range Anatu dokona namwana lao kumuo maiya.
HEB 7:28 Mosesena Lowana yulu paleyamo dokopa mee isa akali koo palenge dupwa purisi ingyuo kareyami. Enakana Anatumi banya pii lao kana minyiyamo dokome banya Ikinyingi baa yapasi ingyuo purisi yulu pyuo karalu karara leya.
HEB 8:1 Pii angi leto dupwana renge simuisa doko dakeŋe. Namwana purisi mupwa doko Anatu wakasa dokona kingi rolaerename yake panda dorena petamo.
HEB 8:2 Baa panda poo pyasi dokona purisinya yulu pyuo karamo. Tembole anda doko isa wambumi pii nayaminyipa Kamongome anda angi doko rangeme pyuo wasiya.
HEB 8:3 Purisi mupwa peparaeme Anatu bange maingi dupwa minyuo epo mena pyao kiso maiyuo pyuo karenge. Dopa pilyamo dokona lao namwana purisi mupwa opetaeko mende kiso mairamo doko kapa ingyuo para.
HEB 8:4 Baa isa panda pyuo karapyali doko purisi angingyuo rombo palya nayamili. Mee purisi dupwame Juu wambunya Lowa minyuo mena kiso Anatu maingi kandale.
HEB 8:5 Doko nakama kulisa palyuo pii nao yake pandana yulu angi dupwa mee makande pyuo pyuo karenge. Mosesena yulu mendaki dopale ingyuo peya kande. Doko baame Anatunya tembole anda komaume wasisi pinya pyuo kareyamo dokopa Anatumi lao, Yuu kyaunya kareenepa lasaka piyu kande doko suu pyao kopetame pisarono kando lao angi rolae makande pyuo piri lao laokondali pyuo leto lamaiya.
HEB 8:6 Doko Koraisana purisi yulu dokome purisi dolomana yulu isa palyiya. Doko suu pyao Yesu kanya akali ingyuo kareyamo dokome Anatupa namwa pipa enakana lalu lao leyamo doko renge kamame keyange nyerami dupwa suusa isa ingiyamosa wambo lalu lao leyamo doko pyalya pyalya paleya
HEB 8:7 Wambo doko kapa paleyali doko kana minyuo lenge pii enenge doko epa nayali.
HEB 8:8 Anatumi banya wambu dupwa rae mai napala dopa leya. Yuu mendepa nambana kana minyuo lalu lao lenge pii doko Isaraele dee Juta rara pipape laronyaŋa leya.
HEB 8:9 Kana minyingi pii dake nambame nakamana kauwanemoo pipa Isipi dokona neta nyiyu dokopa kii minyuo papala lao reteyo dopale daa. Lalu lao leyo pii doko yalo kareyamisa nakamba mata maiyuo kaeyo letamo Kamongome.
HEB 8:10 Dokona lao lalu lao lenge pii enenge mende Isaraele wambu pipa laro letamo. Doko nambana lowa dupwa nakamana suu pingi dorena retaro. Nakamana mona anda dokona nambana lowa dupwa pepana ingyuo pyao retaro. Nambame nakamana Anatu angingyuo kararonopa nakama nambana wambu angingyuo parami.
HEB 8:11 Nakamana andare dokona yango sukusa dopa pinya dopa pinya lao kara naramioko. Yangonge dupwa kandowape emba Kamongo doko soo nyinya lao laa naramioko. Yuu gii dokopa wambu kuki andakepe peparae namba soo nyerami.
HEB 8:12 Nakama koo pirami dokopa nambame sakame kumuo karapala nakamana koo dupwa nyuo kame silya sana pyuo kaeyaro leya.
HEB 8:13 Anatumi lalu lao lenge pii enenge retelyo leya doko wambarae doko isa pelyamo lao leyasa piya. Bange wambarae momo nelyamo dokopa mee isa penge kandale.
HEB 9:1 Wambo Anatumi wambu pipa lalu lao leyamo dokona pii lapo kingi wapambupi lakao misi larami dokona lao reteya. Misi leyami anda doko mee isa panda dakena piyamipya.
HEB 9:2 Tembole anda komaumi wasisi dokona panda kamarena doko panda kingi poo pyasi leyami. Anda dokona lambe mendepe dee raepope dee borete Anatu kingi lao maingi dokope reteyami.
HEB 9:3 Tembole anda dokona nakama komau mendeme sukusa dokona apya ingyuo liti pyuo urumu mende wasiyami. Panda lapo pyuo doko kingi Kamame Poo Pyasi leyami.
HEB 9:4 Urumu dokona rendamu pingi kiso maingi kana pyare golome wasisi dokope dee Anatunya Kana Minyuo Lalu Lao Lenge Pii Palenge Bokote, yanenge ketae dokona golome rambu lao wasisi dokope reteyami. Bokote dokona penge mende golome wasisi dokona nenge myana lenge pyanapala reteyaminyi siya. Dokona Eronena pangali isa dokona isa imbu piya dokopa dee kana lamana mawa pii pyao maiyamo dolapo paleta reto kareyami.
HEB 9:5 Bokote singi ketaerename aŋala serapeme lenge dolapome koo dupwana nyuo kame sakamaingi pyuo nyingi rate dorena papake dolapome sinyinyi pyambwaro kareyambi. Dokona lao pii malu palipyamopape dakepa renge dupwa pyaa nalyo.
HEB 9:6 Bange peparae rapa rapa pipala dokopa panda mupwa dokona yulu paleyamo dokopa purisi dupwa rangena yulu pelana mee maso kolandeyami.
HEB 9:7 Tembole anda urumu lapo pyuo dokona purisi mupwame iki papala ee kana mendena larapu karapa pingi. Banya koo dupwanape dee wambu kamenge koo piyami dupwanape lao ranjama minyuo kisala kolando papa piya.
HEB 9:8 Panda mupwa dokome panda poo pyasi doko nee piro silyamosa namwa dokona sukusa parama ingya nange doko Imambu Poo Pyasi dokome lasaka pilyamo.
HEB 9:9 Pii wamba lao ranaisa poko sereyami doko yuu mange dakepana manda manjo palamo. Lowa wambarae dokona bange mee maingi dee kiso maingipi yulu dupwa paleya. Dopa piyaminyipape mena kiso maiyaminyi dupwana monarena koo dupwa angi kwuanyi nembakamiyande daa.
HEB 9:10 Lowa wambarae dupwana nengepe ipwape dee Juu wambunya wate pingi yulu dupwanape lao waso kareyami dupwa yanengena lowa iki ingiya. Lowa wambarae doko mee kingi wai lete lao minyaro kareyaminyipape enakana angi doko epara ingiya.
HEB 9:11 Yulu enenge epelyamo dupwana Koraisa baa purisi mupwa ingyaro karamo. Tembole anda wakasa wambunya kingi mono palyuo isa panda pyuo wasiyamande daa baame dokonako pyuo karenge.
HEB 9:12 Yesu Koraisa mena meme bulamakaopena rajama doko minyuo andakare paa naya. Rangena ranjama yuu mendaki dokonako kumuo maiya dokome namwa ropo pyao nyulu nyuo nyiyasa piya.
HEB 9:13 Lowa wambarae dokome akali mende koo pilyamo dokopa purisi mupwa dokome memepe panda bulamakao kalyuwape dee bulamakao inyape kisinyi nembenge dokopa rao pee ingyuo penge doko nyepala akali koo pisi dupwa keta pyarendanyi pyambuo kisakamaingi. Dopa pipala Anatunya lenge kambu dokona nakamana koo dupwa nyuo kame sakasi silyamo lenge.
HEB 9:14 Dopa pyuo kareyamiko doŋo Koraisana ranjama dokona yulu dupwana manda manji naya. Koraisa koo mende pali nange doko baame Imambu lete karalu karenge doko keta Anatu dokona namwana koo dupwana lao kumuo maiya. Banya ranjama dokome namwana yulu angi kapa pali nange dupwa poo pyanyi nembaramopa Anatu lete karenge dokona yulu minyarama.
HEB 9:15 Anatumi sukusa ipupwape lao kyakale leyamo dupwa keta lete renge mairunya leyamo doko nyepala karalu kararami lao Koraisa baa Anatunya lalu lao lenge pii enenge dokona kanya akali ingyuo kareya. Nakama ropo pyao nyili lao baa kumapala mawa pii wambarae siyamopa koo pyuo kareyami doko nembakamiya.
HEB 9:16 Juu wambunya yulu pinginyili pyuo akali mendeme kumalana karo dokopa wambo moyange dupwa dopa pyuo mokwa soo nyerami lao pepana pyao retenge. Baa ene kumapa naramo dokopa bange mokwa soo nyii nange.
HEB 9:17 Baa lete kararamo dokopa bange dokona pii mende pali nara. Kumaramo dokopa pii leyamo doko angingyuo para.
HEB 9:18 Yulu dopale palenge dopako pyuo lalu lao lenge mawa pii wambarae doko ranjama iki dokome elyape ingyuo siya.
HEB 9:19 Doko Moseseme Mawa Pii wambu dupwa polo lamaipala dokopa enakana mena bulamakao memepena ranjama doko ipwa pipa wanya puu wale kone dee yoko lapopeme poeyuo nyuo buku lowa palenge dokonape dee wambu ketape raiye raiye minyuo pyarendanyi piso piya.
HEB 9:20 Pyuo dokopa Moseseme lao Anatumi pimana lao lalu lao leyamo doko ranjama dakeme kiso pii kapa wai wara pisi silyamo leya.
HEB 9:21 Dopako pyuo Moseseme tembole andape dee petenge isa akipare siyamo dupwa opetaeko ranjama piya.
HEB 9:22 Lowame leyamuli pyuo ranjama dokome bange peparae wate pyuo poo pyao nyepa pingi. Dopako pyuo ranjama isa para ramo dokome koo dupwa nyuo kame sera ingyasi siya.
HEB 9:23 Yake pandana bange angi singi dupwana makande minyuo bange lapo nakamana tembole andana reteyami dupwa dopako pyuo menana ranjama dokome poo pyao reteyaminyipape yake pandana bange angi dupwa bange angindeme kiso mairamo mona palira ingiya.
HEB 9:24 Isa wambumi yake pandana tembole poo pyasi doko suu pyao panda dakena makande pyuo wasiyami anda dokona Koraisa kolando peyande daa. Baa yake pandana angi dorena papala doko dakepa wambu dupwana lao Anatunya lenge kambu dorena karamo.
HEB 9:25 Juu wambunya purisi mupwa dupwana ee kana yaka lao mena ranjama minyuo tembole andana urumu poo pyasi dokona penge. Dopa pyuo piyaminyipape Koraisa baa ee kana peparaena kumapa kumapa pyuo kareyande daa.
HEB 9:26 Baa ee kana yaka lao kumuo maiyuo peyali doko Anatumi yuu wasiyamo dokona piso yuu malu randako pyuo ipu epeyali. Doko kaepala yuu gii repeta lumwa pira ingiyamopa Koraisa isa epo namwana koo dupwa rekya lao nyelana suu pyapala yuu mendakisa kumuo maiya.
HEB 9:27 Wambu peparae yuu gii mendakiko iki kumungi kandale dokona enakana doko Anatumi kote sera.
HEB 9:28 Koraisa baa wambo yuu mendaki iki wambunya koo dupwana lao Anatupa kumuo maiyuo kaeya. Dee eparamo doko koo dupwanako kumala eparande daa. Baa epelyape lao iso pisarami dupwa nyeramo dokona suu pyale pyale epara.
HEB 10:1 Juu wambunya Lowa doko lowa kulisa angi dokona mee kongwalu palyuo sipyasa pilyamo. Angi eparamo doko dopaleŋe lao mee makande pyuo piyasa piya. Ee kana epo pao piyamo yaka lao Anatu lao mena pyao kiso maingi yulu doko mee minyaro petenge. Dopa pyuo epo mena pyao kiso piyaminyipape nakama rolo paa nayami.
HEB 10:2 Dopa pyuo paa nayamosa nakama ee kana yaka lao koo dupwana mee aiya lao mena pyao kiso pyuoko kareyami. Mena pyao kiso maiyami dokopa koo dupwa angi isa pelyamo lao siyamili doko deeko pyao kisapa kisapa piyami doko kaeyamili.
HEB 10:4 Doko mena bulamakao kalyuwa dee memepena ranjama dokome wambunya koo dupwa isa paa nange.
HEB 10:5 Doko kandapala Koraisa baa isa panda oo epena piso dokopa Anatu kando, Emba menana rendamu nyelana rae mai napala namba yanenge wai pyapala kumuo jelase lao rapa rapa pyaane leya.
HEB 10:6 Nakamana koo dupwa kame sakalase lao mena pyao kiso jilyaminyi doko rae maiyuo nyii nalene kandelyo.
HEB 10:7 Kandapala nambame buku kao pele pele lasi dokona leyamuli pyuo dae karo. Emba suu pyarenyili pyuo piri leya.
HEB 10:8 Yesumi Anatu kando wambo dopa leya. Yulu koo palamo dokona suu pyao Lowa letamuli pyuo mena kiso jiminyi dupwana rae mailyinde daa. Dee rendamu pingi kana pyare doko emba epekanda nalenyako.
HEB 10:9 Pii doko lapala pii mende konda pyuo lao, Namba dae karo doko doŋo. Emba pinya lao suu pyarenyili pyuo piru leya. Anatumi yulu wambarae doko nembapala Koraisana kumuo maingi yulu enenge dokome alowa pyuo panda nyiya.
HEB 10:10 Yesu Koraisame Anatu leyamuli pyuo baa rangena yongo doko Anatu suu pyao mendakisa iki kumuo maiya dokome namwana koo dupwana elya pinyi nembo nyiya.
HEB 10:11 Juu wambunya purisi dupwame yuu peparae tembole andana yulu pyuo mena kiso maipa maipa pyuo karenge. Dopa pilyaminyipape koo dupwa nyuo angi nembakamira ingya nange.
HEB 10:12 Koraisa baa yuu mendakinya kumuo maiyuo dokome mena kiso maingi yulu doko kyawa pyalu pyao piyamopa Anatunya kingi rolaerename dokona peya.
HEB 10:13 Pao pisipala Anatumi Yesu banya nyisu petenge dupwa banya kimbu yukuna isarena nyuo kalyinya laramo mange doko isaro karamo.
HEB 10:14 Baa yuu mendakisa iki range kumuo maiya dokome Kurisene ingiyami dupwa elya pyuo nyulu nyuo nyiya.
HEB 10:15 Dokona ingyuo Imambu Poo Pyasinya pii mende palipyamo wambo ingyuo letamo.
HEB 10:16 Kamongome lao dokopa, yuu gii doko pyaka separamopa lalu lao lenge pii dake nakama pipya laro nambana lowa dupwa nakamana mona anda retapala suu pingi dokona pyao palyakaro letamoko.
HEB 10:17 Pii leyamo dokona ayemba nembele lao lao, Nakamana yulu koo kopeta kapeta pyuo kareyami dupwana deeko suu pyale pyale kara naro letamo.
HEB 10:18 Dokona ingyuo koo dupwa kame sakasi seramo dokona apa pyuo dee kamba mena kiso maiyuo piramisi?
HEB 10:19 Yangonemoo Yesunya ranjama namwana lao kulimbuo jiyamo dokona lao urumu kamame poo pyasi dokona mendeme kata rokwa naramopa kapa parama.
HEB 10:20 Komaumi nee piro kareyamopape Yesumi lete nyingi kata enenge doko rangena yongo dokome wapwakaya.
HEB 10:21 Epapu namwana purisi ama keyange doko Anatunya wambu rapu pyuo karamo.
HEB 10:22 Dokona lao suu pingi lamana palya nao Anatu baame namwa kapa nyera doko soo gisapala karo mona anda yapasi dokome koo mende range keta pali nalyamo doko monarena pyapi pyuo soo kaepala ipwa yapasi dokome yongo wate pipala Anatu dokona repe repe pyuo monale.
HEB 10:23 Yesu epapala elyape keta palyara lao karamano suu pingi doko manjo karamana. Anatu lao kaeyamo dokona dee alowa pii nara doko soo gisilyamano.
HEB 10:24 Namwa yango sukusa dokona apa pyuo wambu dupwa mona maiyuo yulu keyange pyakamirama lao kata dokona suu pyao pyuo karamanale.
HEB 10:25 Wambu yango lapo misi anda paa nalyaminyi dopale ingyuo kara napala Kamongona yuu gii repetale pyaka seralyamo dokona misi anda imili lao pyuo karalapape.
HEB 10:26 Yesunya pii angi sepalape kandakinyuo yulu koo pirama ramo doko pyao kiso maingi yulu wakale mendeme koo doko kwua nara ingilyamo.
HEB 10:27 Doko Anatu banya yanda pimwai kando kote lapala isare renge panda dokona kopeta kapeta pena laralyamo lao suu pyao mona nembo kararama ingilyamo.
HEB 10:28 Juu wambu mendeme Mosesena Lowa yalaramo dokopa wambu lama panda remame baa kando leyami kande doko akali dokona lao sakao kara napala pyao kumarami yulu singi kandale.
HEB 10:29 Doko suu pyao mendeme Anatunya Ikinyingi dokona kandanyi nembapala Anatunya lalu lao leyami pii kapa wai wara pyuo piyamo ranjama wamba poo pyao nyiya doko meeŋe lao suu pyao, mona keyange palyapala ipingi Imambu doko kilya kando lara ramo doko baa keta apa pirase? Baa randa dokona kuki ingyuo paralya silisi?
HEB 10:30 Koo pirami dokona namba range isingi pyakaro. Nambame bakeme pyuo isingi pyakaro leya doko apimi leya namwa silyamano. Dee pii mende, Kamongome banya wambu peparae kando kote pii laro leya.
HEB 10:31 Dokona ingyuo Anatu lete karenge dokome mende koo keta pena lara ramo doko baa randa nao lepo soo para.
HEB 10:32 Nakama wamba Kurisene yulu dokona reke lao randa nyuo kareyami kande doko suu pyalapape. Yulu enenge epo eŋa peyamo dokona lapome nakama randa andake jiyami dokona maka napala mee pyuoko kareyami.
HEB 10:33 Yuu lapo nakama wambunya lenge kambu dokona nyuo karapala kilya kando mona kendanyi pyambuo lao kareyami. Dee yuu lapo wambu dopa pyuo randa nyiyami dupwa yaki nyii napala nyiso role pyao kareyami.
HEB 10:34 Wambu lapo puu anda paleyami dupwa kando kondo karo dee nakama rangena bange nyakamiyami dokopa mona yaepo kareyami. Nakamame bange kulisa sulu singi doko nyerama lao soo kapa kareyami.
HEB 10:35 Nakama mona porayapala paka nalapape. Yole keyange nyerami ingilyamo.
HEB 10:36 Anatu laramuli pyuo maka nao waa waa lao pyuo kararami ramo doko baa yole jeroŋo laa lasaka piyamo dupwa nyerami ingilyamo.
HEB 10:37 Dokona ingyuo Baepolena pii mende pyasi palamo doko. Mende epopyamo doko baa kaeya napala oo repetale epena pyuo karamo.
HEB 10:38 Baame nambana wambu rolo pasi dupwa namba kapa ingingi lao suu pyarami ramo doko lete parami. Dee lapome mata jerami dupwa nambame epekanda naroŋo, letamo.
HEB 10:39 Doko suu pyao namwa wambu kapu kyepala isa pelyaminyi dopale ingya nalyamano doŋo. Namwame Anatu kapa ingingi lao suu pyao karo letena kata pelyamano.
HEB 11:1 Namwa yake pandana bange minyando kanda nalyamano dupwa Anatu kapa ingingi lao suu pingi dokome angi minyando kandarama doko soo giso karamano.
HEB 11:2 Rora ambusupi wambu dupwame Anatu kapa ingingi lao soo manjo kareyamisa Anatumi nakamana yulu kando yako leya.
HEB 11:3 Anatu kapa ingingi lao suu pilyamano kata dokona Anatumi banya pii dokome yuu muu dupwa wasiya doko silyamano. Doko wambo dokopa mende see nayamopa enakana maro leya.
HEB 11:4 Epolome Anatu kapa ingingi lao suu piyamo dokome banya mena kiso maiyamo doko Anatu yakaŋa lao nyiyamopa Kenena kiso maiyamo doko mee ingyuo peyapya. Epolome Anatu kapa ingingi lao suu piyamo renge doko minyuo Anatumi baa rolaeŋe leya. Epolo kumuo peyamopape banya pii lasi doko mee silyamo.
HEB 11:5 Akali Inoko baa opetae Anatu kapa ingingi lao suu pyao kareyamosa kuma naya. Lete kareyamopa Anatumi baa aopa pulyuo nyiyamosa pana naya. Anatumi banya yulu dorena kando epe siyamo dokona minyalyuo nyiya.
HEB 11:6 Mendeme Anatu kapa ingingi lao suu pyaa nao karara ramo doko Anatumi banya yulu dolomana kando kyanyi kanda nara. Anatu keta epana suu pyarami ramo doko baa angi karamo lao suu pyao karo koto kararami dupwa yole keyange maira lao suu pyapala ipu penge ingilyamo.
HEB 11:7 Noa baa Anatu kapa ingingi lao suu piyamo renge dokome mende pira dokona Anatumi baa repe repe pii lamaiyamo doko soo nyiya. Sepala baame sipu anda wasiyamopa banya ree palu pipa lete wai pyao peyami. Yuu muu peparae koo keta pasi siyamo kandapala baa Anatu kapa ingingi lao suu piyamo dokona rolaena renge imu epeyamo kando nyiya.
HEB 11:8 Anatumi Aporakame dokona yuu maironya lao kaeyamo dokona pena leyamo dokona rape rape lao peya. Rangena rara yuupi yaki nyuo anja panya pelyo lao soo pakana palyapa nao Anatu kapa ingingi lao suu pyapala peya.
HEB 11:9 Baa yuu mengemana dokona papala upunili ingyuo kareya. Anatumi yuu lasaka piyamo doko akali Jekope Aisakepa keta seraŋa leyamopa nakama role pyao komau anda dupwana palyuo kareyami.
HEB 11:10 Anatumi taone kulisa mende apa pyuo piru lao suu pyao konda pyuo pipala piya doko Aporakame kando nyeronya lao suu pyao isaro kareya.
HEB 11:11 Anatu leyamuli pyuo pira lao suu piyasa enda Sera emo kaeyasi doko keta wane ingiya.
HEB 11:12 Aporakame emo kaepala kumalana kimbu malyaro kareyamo baa akali mendaki doko keta wambu ama rara andake ingyuo yakena bui dee ipwa kota kee kanape ingyuo peeyara mendeme yaka lao kandarami ingya naya.
HEB 11:13 Enda akalipi dusipa Anatumi bangende nyerami leyamo dupwa nyepa nao nanesale karo mee kyanyi kandapala, Namwa dae mee sisi panda ingyuo epo karamwano pilyamo lao kareyami. Dopa pyuo nakama Anatu kapa ingingi lao suu pyao karo kumuyami.
HEB 11:14 Nakamana pii dopale nenge kata epeyamo dokome yuu murunya range panda leyami dulu panelyamo.
HEB 11:15 Yuu anda seramo kareyaminde ramo doko dee kapu kyepala range parami ingiya.
HEB 11:16 Panda doko yaki nyuo kaeyapala nakamana yuu muru yake panda dokona karala panya maso kareyami. Anatu baa namwanaŋa leyami dokona elya nyuo kareyande daa. Baa rae maipala taone keyangende rapa rapa pyakamiya.
HEB 11:17 Anatumi Aporakame apa pira lao kandalana makande piyamo dokopa Aporakame Anatu kapa ingingi lao suu pyapala baa leyamuli pyuo banya ikinyingi pyao kiso mainya piya. Anatu wambo wane Aisake doko keta embena rara andake ingyaraŋa lalu lao leyamopape baa wane mende daa mendaki iki dokoko pyao kiso mainya piya.
HEB 11:19 Aisake kumara ramo doko Anatumi kapa lopo nyolopyamoŋo kae lao suu piya. Doko suu pyao Aisake kumungi panda pyambuo kaeyasi siyamopape Aporakame baame dee yako lao nyiya.
HEB 11:20 Aisakeme Anatu kapa ingingi lao suu pyapala banya ikinyingi Jekope Isopa dolapo elyape keta karena leya.
HEB 11:21 Jekope Anatu kapa ingingi lao suu pyao karapala kumalana karo dokopa Josepena wane dolapo laparae ketae pyambuo leya. Banya pangali isa dokona paa pyaro karo Anatu lao mona kando kingi lao kareya.
HEB 11:22 Josepe baa Anatu kapa ingingi lao suu pyapala Isaraele wambu dupwa Isipi dokona rekya lao eparami dokona wambo nolokao leya. Baa oo repetale kumara ingiyasa banya yanenge kakapange dokona apa pyuo malu pirami lao lao reteya.
HEB 11:23 Mosesena endangi rakangepame Anatu kapa ingingi lao suu pyapala wane Mosese manjipala kana remasa yalu pinyi palyiyambi. Wane dokona lenge kambu kando awuapala Kiŋi Peraona pii minya nayambi.
HEB 11:24 Mosese ando kaeyapala dokopa baa Anatu kapa ingingi lao suu pyapala Peraona wanengena ikinyingi laa namili lao suu piya.
HEB 11:25 Baa yulu koo dokona yuu mendasipa iki rae maira dokona paa napala Anatunya wambu pipa randa nyelana suu pyao peya.
HEB 11:26 Koraisa dokona lao randa nyero lao suu pyapala banya yole keyange doko iki nyeronya lao Isipinya bange kamongonge dupwa mata maiyuo yaki nyiya.
HEB 11:27 Baame Anatu kapa ingingi lao suu piyamo dokome Kiŋi Perao imbu singi manjira dokona paka napala yuu Isipi doko yaki nyuo peya. Baa Anatu karamo doko mane mane piyamopa mee kyawame suu lao puu pao peya.
HEB 11:28 Anatu baa leyamuli pyuo kinyi pira lao suu pyapala aŋalame wambu pyalana eparamo doko Isaraele wane kyawa dupwa pyaa nana lao Pasopa yulu doko waso reto menana ranjamame mawa pili lao anda kambu dupwana kisiya.
HEB 11:29 Isaraele dupwa Anatu kapa ingingi lao suu pyapala pete kone dokona nee keyange siyamopa oko siyami. Isipi wambu dupwa doko kandapala peteta dokona peyami dokopa ipwa epo pyarambwapala neya.
HEB 11:30 Isaraele dupwame Anatu kapa ingingi lao suu pyapala Jereko kame kana dokona yuu gii yanda ipingi nyuo awali lao peyamisa lakao isa paleya.
HEB 11:31 Pamuku enda Oreapa lenge doko baa Anatu kapa ingyara lao suu pyapala kata kandala epeyambinyi akali dolapo nyisiya. Doko baa mona kapu kyaa nange koo keta paleyami dokona kaki rambe rambe pali naya.
HEB 11:32 Namba ii palimwa epenge dokona dee mende aki laowape? Akali Gitione, Bereke, Samasone, Jepeta, Dapiti, Samyuele dee poropeta dupwapena yulu moko minyuo dee lao parono yuu kwuanyi sera saro kaelyoŋo.
HEB 11:33 Anatu kapa ingingi lao suu piyami dokome rara wakale pyao isa palyuo nakama rolo pinya lao iso karo, dee mena laene nyuo meme pinyi nembo Anatumi lalu lao leyamo panda doko kando nyiyami.
HEB 11:34 Nakama porayapala isare andake rao kareyamo dupwa kunjapala wua gelame pyalana pyuo epeyami dupwa anameyami. Wambo pau lao kareyami doko enakana kuli palyuo yandana ketae palipala yanda pimwai dupwa pyao anamo piyami.
HEB 11:35 Akali lapo pyao kumakayami dupwana etenge dupwa Anatu kapa ingingi lao suu pyao peteyaminyisa akalingi dupwa lopo epeyaminyi range kando nyiyami. Lapo Anatu mata maiyapala moko paro doko kapa daaŋa lapala lete karalu kararo lao suu piyami dokome randa andake nao kumuo peyami.
HEB 11:36 Nakama nyepala kilya kando lao pyarako pyao kiimbwapala karapusi anda pyambuyami.
HEB 11:37 Nakama kaname pyapala dokopa wua gela dupwame pyao piyamisa kumuyami. Nakama pendewa ingyuo papala sipisipi memepena yanenge nyuo wapuo kareyaminyipa randa koo maiyuo kopetame piyami.
HEB 11:38 Isa yuu doko nakama pipa kapa ingya nayasa yuu muiyane dee kyau dupwanape ralo pao kana anda dee yuu rumbisipi dupwana palyuo paeyami.
HEB 11:39 Enda akalipi wamba Anatu kapa ingingi lao suu pyao yulu andake piyaminyi kingi ketae paleyamopape Anatu mende lao lalu lao leyamo doko nakama keta wambo palipa naya.
HEB 11:40 Doko Anatu yulu keyange mende lao reteya dokona nakama namwa pipya angi poo pyasi ingyuo role pyao parama suu piya.
HEB 12:1 Wambu malu Anatunya pii wambo lao paneyami dupwame walya papalu pipala namwa kandaro silyaminyi. Dokona lao kenda pyuo minyaro silyamo dupwape dee koo dalapome namwa minyilyamo dupwape yaki nyuo kaepala kata keyange dokona Anatunya make dokona maka nao puu pao monale.
HEB 12:2 Yesumi namwana Kurisene kata doko wapwakapala namwa dokonako lanyuo puu para doko baa kandaro soo monale. Baame isa mamando nyerolyamo lapala kaeyande daa. Enakana rae maiyuo kararo lao suu pyapala baa elya napala isa mamando dokona mona kuki palyuo peya. Dopa pyuo piyamopa Anatumi baa nyuo ketae pyambwapala banya kingi rolae dorena pisapyamopa epapu petamo.
HEB 12:3 Baa keta apa piya lao semana. Akali koo paleta dupwame baa awa nao randa maiyaminyi kareya. Dokona lao nakama maka suku suku napala yaki nyuo kaeya nalapape.
HEB 12:4 Nakama koopa yanda pyuo pao angi kumarami dokona ene pyaka sepa nalyaminyi.
HEB 12:5 Anatunya pii dokome nakama banya waneŋe lao porainyi pyambuo leyamo pii pyasi palamo dake kame silyamipi? Doko nambana wane lao emba sukunde ingyuo kiso rolo randa jiyu kande dokopa meeŋe lao suu pyaa napipi letamo. Baame wambu mona retelyamo dupwa baa pyalana koo pyuo leya kande dokopa monarena yamarangwa nalapape.
HEB 12:7 Kamongome emba yaso nelene doko Anatumi banya wane ingilyamo dokona mana langilyuŋu lao sukunde ingyuo kiso rolapyasa pilyamo. Wane mende rakangeme mana laa nalyamo mee karengese?
HEB 12:8 Banya wane wanake peparae randa nyingi dokona emba randa nyii nare ramo doko emba wane aeyange ingyuo parasa pira.
HEB 12:9 Namwana mee rakange dupwame pyalana pyuo mana lenge dokopa nakama rakangeŋe lao soo kando karenge kandale. Dokona ingyuo Imambunya Rakane banya laramo dupwa kamame andarele sepenge ingilyamo. Dokome lete renge nyerama.
HEB 12:10 Namwana rakange dupwame range suu pilyaminyili pyuo ee kana mendasipa iki pyalana pyuo mana lenge kandale. Anatumi mana lao dokopa namwa range kapa palirama dokona lao randa jilyamopa baapa poo pyasi ingyuo kararama ingingi.
HEB 12:11 Namwa mana nyuo randa nyingi mange dokopa rae maiyalale lao pilyande daalyamoŋo randa nelyo lao suu pyao karenge. Dopa pilyamopape enakana randa nyingi dokome mona kyuu lao singi yole rolaena renge palyuo karenge doko nyingi.
HEB 12:12 Dokona lao kingi kimbupi lyokokerapala kara nao yulu pyuo karalapape.
HEB 12:13 Nakama yulu kenda pyuo paraminyi dokopa kyokole yukwala epasaraŋa kimbu karo parami kata doko mondo lao wapwalapape.
HEB 12:14 Wambu yango keta manda rao karapulinya suu pyaope dee poo pyasi wambu ingyuo karapulinya suu pyaope karalapape. Dopale ingyuo piso karo pii napala ramo wambu dokome Anatu yake dokona kando nyii narami.
HEB 12:15 Anatunya mona keyange palyuo ipingi renge doko mata maisarama lao kando karalapape. Doko imambusa paleta napala lele lao yango mende kokwa seramano lao waso karamanale.
HEB 12:16 Wane Iso kopetame piyamo doko waso karalapape. Baame Anatunya Imambunya yulu suu pyaa nao wane mupwa ingyuo kareyamopape renge keyange baa keta palirali dupwa epekanda napala wane enakana dokona ropo pyao maiya.
HEB 12:17 Enakana wane Iso baa lengena ee pipa rakangeme ketae pyambuo karapyali lao leyamopape wamba male male leyamo dokona dee nyera kata mende see nayasa kanjakala peya.
HEB 12:18 Isaraele wambu yuu kyau Sainai kando kareyami dokopa yuu iminjo kotoro lao, yuu gono lao apu andake epo isare koomange nao reyamo kandeyami.
HEB 12:19 Bikuli pii andake leyamopa mendeme pii romendende leyasa enda akalipi pii doko soo pakapala karo dee kamba see naramaŋa daa leyami.
HEB 12:20 Anatunya pii nakama keta epeyamo doko soo pakame kumuyami. Pii dokona lao, Mena wambupi mende yuu kyau doko warendara ramo doko aopa baa nyepala kaname pyao kumakalu pirami leya.
HEB 12:21 Matarena kupwa sisu karo suwa yamanji karo kareyaminyipa Mosese baa opetae pako walu walu lao kareya.
HEB 12:22 Nakama epapu yuu kyau mendeme kingimi minyandaraminde kandala epa nalyaminyi. Anatu lete karenge dokona yuu yake pandana Jerusaleme kyau Sayone lenge dokona epasi karaminyi. Yuu doko aŋala soo kaeyo raeme kumuo karaminyipa mendeme yaka lao sukusa parami ingya nange.
HEB 12:23 Nakama peparae wane kyawa ingyuo Elyambu Pingi dokona sukusa imisa nakamana kingi doko yake pandana buku dokona pyasi palamo. Nakama Wambunya Kote Singi Mupwa Anatu dokona epapala Kurisene angi dupwana imambu angi elyape ingingi raka dokona imisa pilyamo.
HEB 12:24 Anatunya pii enenge lao kana minyuo retelyamo dokona Yesu kanya akali ingyuo karamo. Dokona banya ranjama doko akali Epolona ranjama yango yano pyuo siyamo dopale ingyuo paa napala wambu sakao silyamo.
HEB 12:25 Anatumi yuu kyau Sainai dokona epo repe repe pii lamaiyamopa ayemba suu pipala kareyami dupwa kata koo wanjarami ingya nayami. Doko suu pyao namwa pii yake panda rae dupwa ayemba suu pipala see narama ramo doko kata mende sipyandena paramande daa lyakande. Doko doŋo ayemba suu pipala see nasaramano yako lao suu pyao karalapape.
HEB 12:26 Wambo dokopa banya pii dokome yuu doko ponende minyiya. Minyiyamopape baame dee kamba lara dokopa isa pandako ikinde daaŋa yake yuupa laparae pyuku laraŋa lao mawa pii ingyuo letamo.
HEB 12:27 Anatumi deeko laronya letamo pii dokona lao, Wambo dokopa wasiyamo dupwa pyuku pyuku lao bolombalo laramopa kapa pyuku laa narali dupwa mee poraiyuo sulu seraŋa letamo.
HEB 12:28 Namwana Anatu baa isare uliyapumi mende yaparenge nyii nange dopale ingyuo karenge. Doko suu pyapala baapa mona nyerali dupwa pyuo karo mona kando pako karamanale.
HEB 13:1 Nakama yango sukusa ane yangongepa ingyuo mona reto karalapape.
HEB 13:2 Kanda nange wambu nakamana anda epena lao yako lao nenge pipwape. Lapome mee wambupi lapala aŋala lapo nakamana anda yako lao epena leyamipya.
HEB 13:3 Lapo karapusi palaminyi dupwana nakama dokona mendako ingyuo karo, dee randa ipyamo yaso nelyaminyi dupwana mendako karo lao suu pyao pisipwape.
HEB 13:4 Enda yapo nyingi doko mee male male lao nyingi ingya nalyamo dokona ingyuo enda akalipi nyisi dupwame wakale kepo pii nalapape. Anatumi kepo pingi dupwa kote lara ingilyamo.
HEB 13:5 Kana mone mona nyisarono kando lao waso bange emba keta silyamo dusipa yakaŋa lao suu pyao karape. Anatumi lao dokopa, Emba yaki nyuo kaeya naro letamo.
HEB 13:6 Dokona lao mona porayapala, Kamongo doko nambana nyisingi karamo. Wambumi mende piraminyi lao pako kararo doko kapa daa, lamanale.
HEB 13:7 Nakamana isingi akali dupwame wambu Anatunya pii doko langiyami doko suu pyalapape. Nakama apa pyuo karo kumuo peyami lao wambo dorena lambuo suu pyao Anatu kapa ingingi lao suu piyami kata dokonako pupwape.
HEB 13:8 Yesu Koraisa baa wamba kareya doko suu pyao epapu alowa pipyande daa. Rakyamepe mee dopaleko karalu karara.
HEB 13:9 Mana wakale mendeme emba rekya lao nyuo paa nanale. Anatunya Imambunya yulu dokona lao nenge wasingi yulu lapo minyuo waso kareyami dokome mende pii naya. Anatunya mona keyange palyuo ipingi renge dokome namwana mona anda doko porainyi pyambungiŋi.
HEB 13:10 Juu wambunya tembole andana kana pyare dokona bange kiso maingi dupwame namwana kiso maingi kana pyare dokona naraminyi kapa ingya nara.
HEB 13:11 Juu wambunya purisi mupwa dupwame mena ranjama doko minyuo tembole andana liti kamame poo pyasi dokona papala koo dupwana lao kiso maingi.
HEB 13:12 Menana yanenge dupwa taone kame netarena mee kisinyi nembenge doko suu pyao Yesu baa taone netarena dokona banya ranjama angi doko wambunya koo dupwa wate pinyi nembaro lao yaso koo nao kulimbuo maiya.
HEB 13:13 Dokona lao taone netarena baa karamo mare dokona papala baa elya nyiyamuli pyuo nyuo karamanale.
HEB 13:14 Isa yuu dakena namwana taone panda mende kulisa sulu serande silyande daaŋa. Taone anginde silyamo doko koto karamwasa pilyamo.
HEB 13:15 Anatu keta kyaa piramo karena lao namwana kambumi kaeya nao lakandamana. Dopa pyuo pirama ramo doko Yesu keta Anatunya kingi doko kulisa palyuo laramanosa pira.
HEB 13:16 Yulu keyange pyuo yango mendali nyisalana maka nalapape. Yulu doko Anatu rae mainyi pyambuo kumuo maiyuo karenge dopale ingilyamo.
HEB 13:17 Nakamana rapu pinginya pii warombo soo pipwape. Nakamana rapu pingi yulu doko apa pyuo pyuo kareyami lao panaramo dokona nakamana Imambunya yulu dupwana isakao karamisa pilyamo. Kurisene dupwame waa waa karo pirama ramo doko rapu pingi dupwa namwa nyiso mona kare kare pyuo kararami.
HEB 13:18 Kaeya nao ateŋa pyakao karalapape. Koo mende namwa keta pali nalyamo doko monarena pyapi pyuo soo kaeyapala karamano. Namwa yuu peparae rolo pyuo karalana suu pilyamano.
HEB 13:19 Nakambame namba Anatumi range repele nakama karaminyi dokona laeyo lanyuo ipyalinya suu pyao ateŋa lakamili lao kongo pyuo leto.
HEB 13:20 Yesu kumuo ranjama isa peyamo dokome Anatunya lalu lao leyamo pii doko kapa wai wara pisi silyamo. Namwana Kamongo Yesu baa kumuyamopa Anatu baa lopo nyiya. Nyiyamopa namwana sipisipi rapu pingi mupwa ingyuo peya.
HEB 13:21 Anatu mona kyuu lao singi renge maingi doko baa nakama mora pisinyi pyambwaramopa Yesu Koraisa keta namwa yulu baa pipili lao suu pilyamo dupwa pimwali yaka. Koraisa baa neta renge ingyuo karalu karara, doko kinyi.
HEB 13:22 Yangonemoo namba pepa pilyu dake londa nalyamo. Pii dake nakama porainyi pyambwara dokona mata kui lapala soo nyelapape.
HEB 13:23 Namwana yangonge Timoti karapusi anda paleyamo nembami dokona nakama selapase lao langilyu. Baa repele epara ramo doko kapa nambapa role pyao karapala epo nakama kandaramba.
HEB 13:24 Namwana yako lenge pii doko embena isingi akalipi dee Anatunya wambu dupwape lamaiyakape. Yangonge yuu Itali karaminyi dupwame yako letaminyako.
HEB 13:25 Anatunya mona keyange palyuo ipingi renge doko nakama keta palena leto.
JAM 1:1 Namba Jemesa Anatu Kamongo Yesu Koraisapana kendemande ingyuo karo. Nakama rara akalisa mendaki dee ipisu lama bolombalo lao yuu wakale wakale dupwana peyaminyi dokona lao yako lao pyao jilyu.
JAM 1:2 Yangonemoo, nakama keta makande pingi wakale wakale dupwame epo randa jiya kande dokopa rae maingi renge epelyamo lao suu pyalapape.
JAM 1:3 Nakamana Anatu kapa ingingi lao suu pingi dokona mendeme makande piramo dokome nakama poraiyuo andanyi pyambwarasa pira doko silyaminyi.
JAM 1:4 Nakama kaeya napala pyuoko kararami dokopa rolae angi ingyuo karapala mendena nakama yangyaramo kara narami.
JAM 1:5 Mendeme singinya renge doko mwuara ramo doko baa Anatu piso seramo dokopa maira. Anatumi wambu peparae kando daa laa nao mona keyange palyapala mee maiyamoko maingi.
JAM 1:6 Mendeme jinya lao piso soo dokopa baa kapa ingyara lao suu pyapala, suu pingi lamana manjo piso see nana. Suu pingi lama palyuo karenge dupwa ipwa pete poo letamo dokopa kapu kyilya kapu kyana pyuo karenge dopale ingilyamo.
JAM 1:7 Akali dopale Kamongome mende mairamo nyero lao suu pyaa nana.
JAM 1:8 Baa suu pingi lamana palyuo kyakao paenge akali dopale ingyuo karamo.
JAM 1:9 Anatumi akali kuki dupwa nyuo ketae pyambwaramo dokopa rae wakasa maiyuo karenale.
JAM 1:10 Dee akali kamongo dupwa Anatumi kuki inginyi pyambwaramo dokopa rae maiyuo karenale. Paunya isoko jingi loo lao isa penge doko makande minyuo akali kamongona yulu dupwa mee isa pasi sera.
JAM 1:11 Neta andake rao yando naramo dokopa jingi rao rakusi rapala loo lao isa paramopa banya au pyuo rao singi doko mee isa pasi sera. Dopako pyuo akali kamongonge dupwa anda kanya dokona mee kumaramisa nakamana bange dupwa mee kulimbwaro karara.
JAM 1:12 Mendeme randa eparamopa mee kalyinyi pyambuo kararamo doko baa rae maiyuo para. Baa keta makande pingi wakale wakale eparamopa mee kalyinyi pyambuo karara dokopa Anatumi baa mona retenge wambu dupwa keta kyakana renge mairu lalu lao leya doko nyera.
JAM 1:13 Mendali keta makande pingi dupwa eparamo dokopa Anatumi namba makande pipyamo karo lao laa nana. Koo dupwame Anatu kapa makande pyuo pii nange. Dee Anatumi wambu mendali keta koo dupwame alya minyuo makande pyuo pii nangeoko.
JAM 1:14 Namwa rangena koo wangu lakao suu pingi dokome namwa epe epe pyuo nyilyamo.
JAM 1:15 Namwa koo mende pinya suu pilyamanosa doko wambo ene wai lyepala enakana yulu koo ando penge. Ando kaelyo lao dokopa namwa kumasinyi nembara.
JAM 1:16 Yangonemoo rangeme range minyakongo lao kara nalapape.
JAM 1:17 Bange ama keyange yapasi namwa keta epenge dupwa yake panda dokonako piso epenge. Yakena neta kanape rao karamo dupwana Rakane baameoko keyange dupwa joo karenge. Baame yuu peparae mee yanga paupau lao karo neta kapu kyepala anda pao dokopa yuu kone pupuripi pingi dopale ingyuope alowa pii nange.
JAM 1:18 Baa range suu piyamuli pyuo waili pii angi kulisa dokome namwa waso nyiya. Wasiyamo lapo dupwana namwako isa jingi mupwasa kanda soo lyingi dopale lao wasiya.
JAM 1:19 Yangone Rakanemoo nakama pii dake kame see nalapape. Nakama peparae pii dupwa kale yukupala soo karalapa. Doko nakama mee sipurapala pii waiya lao laa nao, dee imbwualana wangu lakapala waiya lao imbwuako pii nalapape.
JAM 1:20 Imbu singi dokome Anatunya yulu rolae dokona nyisarasa pii nara.
JAM 1:21 Dokona lao yulu kwaengepe dee yulu koo waiya lao andelyamo dupwa nembo kaeyalapape. Anatu laramuli pyuo warombo soo pisipala, banya pii nakama lete nyeramo doko baame mona anda palyakayamo doko soo manjo nyelapapae.
JAM 1:22 Banya pii doko nakama range dokona mee ketae sepala rangeme range kando kyambo lao kara nalapape. Dopa pyuo pii napala banya yulu angingyuo pyuo karalapape.
JAM 1:23 Banya pii doko mee kalena ketae sepala angingyuo pii nange wambu dupwame akali mende banya lenge kambu ketapa dokona range kandenge dopale ingyuo pelyaminyi.
JAM 1:24 Ketapa kandapala enakana nyuo ope api pokolyasa apiyakalende kandapu lao suu pyaa nange.
JAM 1:25 Akali mendeme lowa keyange yapasi wambu kiiramo nyingi dokona poraiyuo sepala karo mee kalena ketae angi sepa nae naepe, waiya lao kame soo kara nangende ramo doko Anatumi nyisaramopa raeme kumuo para.
JAM 1:26 Api mendeme range dokona namba sukusa akali anginde karalyamo kae lao masilyase? Wambu dopale doko kambunya pii dupwa range yama pyuo minya nara ramo doko range minya kongole lao lao kararasa pira. Dokome banya sukusa yulu dupwa isa para.
JAM 1:27 Rakange Anatumi Kurisene yulu angi yapasi lao suu pyao karamo dusipa dopale. Wane wanake muiyane dee enda waiya dupwana randa eparamo dokopa nyisarami. Dee yongona yulu dupwa andanyi nembapala kokwa sisara lao waso karalapape letamo.
JAM 2:1 Yangonemoo, nakama Kurisene ingyapala Kamongo Yesu Koraisa neta renge doko kapa ingingi lao suu pyao karaminyi dokome wambu yango mee yongo ketae kandapala lapo nyiso lapo epekanda nao kararami doko kapa ingya nalyamo.
JAM 2:2 Dokona makande minyuo akali mende komau elyape pinginde kinginya golo peteta misi anda eparamo mende dee komau nama nange koosale wapuo pisira.
JAM 2:3 Nakamame komau keyange wapuramo doko kando elya pyuo lamaiyuo, Rate keyange dakena pisiri lao dee akali koosale dokona lamaiyuo, Emba dambisa mee roya karare panda kimbu silyamo dole mee isa pisiri lamairami ramo
JAM 2:4 dokome nakama rangeme koo keyangepe kopetame yapalya yapana pyuo karaminyi doko see nalyamisi?
JAM 2:5 Yangonemoo selapape. Anatumi isa yuunya pendewa dupwa yapo nyepala baa kapa ingingi lao suu pingi yulu doko nakama keta andanyi pyambwakamira. Banya isingi panda doko mona jerami dupwana ingyara lao kaeya dokona nyerami ingilyamo nakamana ingyara.
JAM 2:6 Nakambame pendewa dupwa kilya kandelyaminyi. Dopa pyuo pilyaminyoko doŋo kamongo dupwame nakama keta mangena minyuo randa joo kote laa nalyamisi?
JAM 2:7 Yesunya kingi keyange nakamba keta palamo doko akali kamongo dupwame kilya kando lao kara nalyamisi?
JAM 2:8 Anatunya lowa mupwa buku Baepole pyasi palamo dokona, Nakama range kando mona retenge doko makande minyuo wambu yango dupwa mona reto karalapape letamo. Dokona palyuo pirami ramo doko rolae ingyara.
JAM 2:9 Dee doko kaepala nakama wambu dupwa kando yongona bange iki suu pyapala yapalya yapana pyuo kararami ramo doko nakama Lowa yalapala kamba lenge dopale ingyuo parami.
JAM 2:10 Dokona lao akali mendeme Lowa doloma minyilyu lao minyaramopape Lowa mendaki iki yalara ramo doko baa Lowa peparae yalo kaerasa pira.
JAM 2:11 Anatu mendaki dokomeko pii lamana palyuo, Enda kepo pii nalapape lao karo, Wambu yango pyao kumaka nalapapeko leyapya. Dokona kepo pisarono lao waso karo dee wambu yango pyao kumakare ramo doko mawa pii yalenge akali ingyuo karare.
JAM 2:12 Yulu pyuope pii laope karo dokopa kiiramo neta nyingi lowa dokona pii palisara lao suu pyao karalapape.
JAM 2:13 Akali mendeme wambu yango sakao nyiso kara nara ramo doko Anatumi baa kote laramo dokona baa kando sakao nyisa nara ingilyamo. Dee akali mendeme yango dupwa sakao nyiso karara ramo dokona kote laramo dokopa baa keta mende pali nara.
JAM 2:14 Yangonemoo akali mendeme lao, Namba Anatu kapa ingingi lao suu pyao karo lapalape yulu pyuo wambu yango nyisa nara ramo dokona banya Anatu kapa ingingi lao suu pingi doko mee ingyuo para. Baa dopa pyuo kapa ingingi lao suu pingi dopaleme baa kyawa minyarase?
JAM 2:15 Isa wambu yango lapo komau rokwasi pyuo nenge aya naramo,
JAM 2:16 pisiraminyi dokopa angi yano piramo dupwa maiya napala, Mee Anatu nyisaramopa emba komau wapuo nenge keyange nao mondo lao pupwape larami doko pii dokome iki nakama nyisarape?
JAM 2:17 Dokonako palyuo namwa Anatu kapa ingingi lao suu pyao karapala wambu yango nyisa nao kararama ramo doko suu pingi keyange doko mee kumasi ingyuo pelyamo.
JAM 2:18 Mendeme nambana pii doko sepala dokopa, Namba Anatu kapa ingingi lao suu pyao karo dee embame yulu pyuo wambu yango nyisingi lalyane larami ramo namba dopa pyuo isingi laro. Embame wambu yango nyisa nao mee Anatu kapa ingingi lao suu pyao karare ramo namba yulu pyuoko wambu yango nyisarono dokome namba Anatu kapa ingingi lao suu pyao karo doko panara.
JAM 2:19 Anatu baa yeelyo karamo doko kapa suu pyao karaminyi doŋo imambu koo dupwame dopako pyuo suu pyao pako walu walu lao karaminyi.
JAM 2:20 Emba suu pinginya kopyali minyilyinyi. Mee Anatu kapa ingingi lao suu pyapala dokopa yulu angi pii nao kararami doko kwaelyamo dokona lasaka pyuowape?
JAM 2:21 Namwana rakange kyawa Aporakame aki mende piyasa Anatunya lenge kambu dokona rolae ingyuo peyase? Baa yulu andake pyuo banya ikinyingi Aisake Anatu dokona lao pyao kiso maiyalana piyamo dokome kapa rolo paa nayase?
JAM 2:22 Renge doko kando sepa nalyamipi? Aporakame baa Anatu kapa ingingi lao suu pyaope dee yulu rolae piyamopape dolapome kapa ingyuo peya. Banya yulu dokome Anatu kapa ingingi lao suu piyamo renge doko andanyi pyambuya.
JAM 2:23 Buku Baepole dokona Aporakame keta pii mende paleya. Doko Aporakame Anatu kapa pira lao suu pyao kareyamosa Anatunya lenge kambu dokona rolae ingyuo peya. Dopa pyuo kareyasa, Aporakame baa Anatunya puu minyingi lenge.
JAM 2:24 Dokona wambu dupwa yulu keyange pyuope dee Anatu kapa ingingi lao suu pyaraminyi dokome rolo parami doko silyamano.
JAM 2:25 Dee pamuku enda kingi Oreapa lenge baame pii minyuo penge akali dolapo lete wai pyao nyuo kata wakalena nyuo nembeyasa enda baa rolo peya.
JAM 2:26 Wambunya yongo dokona imambu rekya lao penge dokopa kumungi kandale doko suu pyao Anatu kapa ingingi lao suu pyapala dokopa yulu keyange pii narami ramo doko suu pingi keyange doko kumasi ingyuo parasa pira.
JAM 3:1 Yangonemoo nakama wambu malu mee rapu pingi ingyuo paa napengele. Rapu pingi dupwa keta kote pii kama andakele ingyuo palira doko soo karaminyi.
JAM 3:2 Namwa peparae kopeta kapeta pingi. Dokona akali mende pii koo kambumi laa nangende kareya kande doko banya yulu peparae angi rolae pyuo parasa pira.
JAM 3:3 Doko makande minyuo namwa mena osena kambu dokona kapa bange porai palyilyamano dokopa baame namwa warombo singi. Kapa porai doko ipyuo nyingi dokopa ose baame namwa laramanuli pyuo kata penge.
JAM 3:4 Dee ipwa sipu yulu pilyaminyi dokona suu pyalapape. Sipu reeko dupwa porambaiye andake minyuo lanyuo para. Lanyuo paramopape bange kukinde kingi orata lenge doko minyuo yulu pingi akali dokome panya lao suu pilyamo dorena mee penge.
JAM 3:5 Dokona ingyuo namwana kekenge doko kuki ingyapyamopape pii malu lenge. Poo andake mende isare koo kuki dokona anji nyepala rao otenge kandale.
JAM 3:6 Wambunya kekenge doko isare dopale ingilyamo. Doko baa koo dokona anda kamape ingilyamo dokona piso namwana yongo dokona lemongwaro sepala yulu koo nyuo rayapala namwa kwuanyi nembenge.
JAM 3:7 Wambu dupwame mena rara wakale wakalepe yaka rara wakale wakale dupwape dee kau dupwape oma rara peparaepe nyuo mondo pyuo anjiki pinyi pyambungi kandale.
JAM 3:8 Doko suu pyao wambu mendeme banya kekenge doko anjiki pyuo rau lanyi pyambwara ingya nalyamo. Kekenge baa kata koo dupwanako rali lao kumungi mauli paleta papyuo karenge.
JAM 3:9 Kekenge mendaki dokomeoko Kamongo Rakane Anatu dokona ketae pyambuo ange lao karo dee wambu yango Anatu range yale wasiyamo dupwa kando pii koo lakamyuo karaminyi.
JAM 3:10 Kinyi kambu mendakindeme pii koo keyangepe pale pale neta nyuo karaminyi. Yangonemoo doko kapa ingya nalyamo.
JAM 3:11 Ipwa mendaki dokonako ipwa keke pingipi mee rende pingipi pakao epengepe?
JAM 3:12 Piki isa dokona olipi jingi kapa lyingipi? Dee girapo isame piki jingi alowa pyuo lyingipi? Ipwa api pete dokona papala mee ipwa rende piramo naralya silipi?
JAM 3:13 Akali mende angi mona palenge kareya kande doko baa pau lao mona palenge ingyuo yulu keyange pira. Piramo dokome wambu dupwa baa mona palengelamo lao soo gisarami.
JAM 3:14 Rangena mona andarena pelanyi nembo range dokona kamongo karalana lao suu pyapala yango koo palyuo karare ramo doko keyange ingyuo karo lao kyambo laa nalapape.
JAM 3:15 Suu pingi koo dopale dupwa yake panda rae daa. Mee isa wambunya yanengena yulu doko imambu koo dupwa keta piso epenge.
JAM 3:16 Panda mendena wambu dupwame yango palyapala nyilyingili ingyuo karalana suu pyarami dokona piso koo pipala yulu dupwa kwao para.
JAM 3:17 Anatu keta suu pingi epelyamo doko keyange yapasi. Doko soo nyerami dupwame yango dupwa mona mendare palyapala mendali kando anjiki pyuo yako lao mendali sakao karo yulu keyange pyuo kararami. Yanengena suu pyao yapalya yapana pyuo mee kambunya ketae Kurisene ingili lao kara narami.
JAM 3:18 Namwame mona mendare palyuo kararama ramo doko ee jingi yapasi eena wara pirama dopale. Waingi doko nenge keyange ando epenge doko suu pyao yulu rolae doko ando epara.
JAM 4:1 Nakama aki rengendena laiya lao pyakando pyuo karamisi? Yanengena yulu wangu lakapala pinya lao suu pilyaminyi dokona ingyuo moŋo doko nyilyaminyi.
JAM 4:2 Mende aumi kumapala nyelana suu pyami doko nyii nalyamano akisa lapala range dokonako yanda pinya pilyaminyi. Dee kamonganyi panya lao suu pyapala mendeme kata pyakeparamo dokopa pyakando pilyaminyi. Nakama Anatu kando nyelana ateŋa lao piso see nayaminyisa keyange dupwa nakama keta pali nalyamo.
JAM 4:3 Nakama yuu lapo awualyaminyi dupwa rae maiyuo nyelana suu pyapala lawa pyuo piso simi dokopa Anatumi nakama keta sinya laa nalyamo.
JAM 4:4 Nakama Anatu dokona waiya lao rekya lao pelyaminyi. Lapome isa bangena mona mairami dupwa Anatu yanda pimwai ingyuo rekya lao kararami doko see nalyamisi? Yanengena bange dupwa mona nyuo pisarami ramo doko Anatunya nyisu petenge ingyuo parami.
JAM 4:5 Buku Baepole dokona lao dokopa, Anatumi isa wambu keta imambu pyamalyiyamo doko yaki nyii naro lao suu pyapala poraiyuo rapu pyuo karamo mana pii doko mee letamo lao suu pyaa nalapape.
JAM 4:6 Anatumi mona keyange palyuo ipyapala namwa nyisilyamo dokona ingyuo buku Baepole pii mende, Anatumi inyimungu karenge dupwa nyuo ketae pyambwapala dee rangeme ketae pyambuo lakandenge dupwa nyuo isa palyingi lao palamo.
JAM 4:7 Nakama mee inyimungu Anatunya arapu dorena karo Satane yango palyuo kararami dokopa Satane pako ralo para.
JAM 4:8 Anatu karamo dokona repetale ipupwape. Dokopa baa nakama keta repetale epara. Nakama akali koo pingi dupwa nakamana kingi dupwa wate pipape. Nakama suu pingi lama mandenge dupwa monarena pyuo poo pyalapape.
JAM 4:9 Nakama kwaeyo karaminyi dokona mona kendapala ee andake lao karalapape. Dakepa giyuo karaminyi dupwa alowa pipala ee lao karalapape. Nakama rae maiyuo giyuo karaminyi dokona alowa pipala mona kendo karalapape.
JAM 4:10 Range dokona koo nono ingyuo karalapape. Dopa pirami dokopa Anatumi nakama nyuo ketae pyambwara.
JAM 4:11 Yangonemoo nakama yango sukusa dokona mata kando laa nalapape. Mendeme banya yangonge kando koo keyange lao pakana palyuo karara ramo doko Lowa mupwa dokona ingyuo kamba lapala mee isa nembarasa pira. Lowa dupwana koo keyange lao yapalya yapana pyuo lao karare ramo dokona Anatunya Lowa dupwa minya napala mee koo keyange lao yapalya yapana pyuo lenge akali ingyuo paresa pira.
JAM 4:12 Anatu baame yeelyo lowa dupwa waso reto koo keyange lao yapalya yapana pyuo kararali. Baameko lapo lete nyuope lapo kokwa sinyi nembope yapara. Dokona ingyuo emba apiyakalendeme wambu yango dupwa kando koo keyange lao pakana palyuo larese?
JAM 4:13 Nakama dupwana ee kana mendakinya bisinase yulu pela papala kana wakasa nyerama lao karaminyi dokona nambana pii dake kale yukupala selapape.
JAM 4:14 Rakya jimwanape emba keta apa piramo doko see nao kamenge karaminyi. Kopa yuunya isa isa singi doko kuki lama seramopa dee aopa mee ingingi dopale karaminyi.
JAM 4:15 Kamongome rakya namba mee lete karape lara ramo doko Kamongona yulu silyamo. Baa kapa laramo dokopa dopa pyuo dapa pyuope pinya masilyamano dupwa kapa pirama lapenge.
JAM 4:16 Epapuli dokonako palyuo laa nao poraiyuo kaepala rangeme ketae pyambuo lakandamisa doko koo pilyaminyi.
JAM 4:17 Dokona lao mendeme rangena yulu rolae pyuo karapengele dupwa kandapala enakana kando kaeyo pii nara ramo doko baa yulu koo pirasa pira.
JAM 5:1 Epapu kamongo dupwa kando pii mende laro doko selapa. Nakama moŋo andake nyepala kwao parami dokona ee lao ipwakuku nyelapape.
JAM 5:2 Nakamana kamongonge bange dupwa rumbilyamo. Nakamana komau dupwa lisiwame anda pilyamo.
JAM 5:3 Nakamana kana dupwa lulya relyamo. Lulya rasi dokome nakama kando pii lasara. Dopako pyuo lulya rasi dokome sipurapala isareme ingyuo nakama rasara. Yanengena bange malu palyuo reto karaminyipape yuu gii repetale lumwa pilyamo.
JAM 5:4 Nakamana yulu akali ee pyakao karaminyi dupwana yole angi ingyuo mai napala pingyakamiyami dokona nakama kando lasara. Ee dupwana nenge manjakao pyuo karaminyi dupwame mumu letaminyi doko Anatu Kamongo Porai dokona kale katana palyuo karamo.
JAM 5:5 Nakama yuu peparae rae maipala yuunya amenge kapape nao karo nakama kumuo epelyamo. Ipyamopa pyasi serami dokona range susu lao nao karaminyi.
JAM 5:6 Nakama dopa pyuo karo rolae pingi wambu dupwa kando kote lapala pyao kumakayami. Nakamame isingi mende laa nange.
JAM 5:7 Nambana yangonemoo Kamongo repeta eparalyamo doko suu pyapala maka nao pyuo karalapape. Ee wara pingi akali dupwa waingi wara pipala keyange dokonako manjo naro lapala panyi kanape apunda kanape maka nao iso kando karenge dokona suu pyalapape.
JAM 5:8 Suu pyapala maka nao pyuo karalapape. Kamongo repetale eparamopa keyange keta palyara doko suu pyapala mona anda porayapala kaeya nao pyuo karalapape.
JAM 5:9 Randa nyepala dokopa wambu yango dupwa mata kando laa nalapape. Larami ramo range keta Anatumi kote palira. Kandalapa. Kote Soo Lenge akali anda kambu minyala epelyamo.
JAM 5:10 Yangonemoo Kamongona kingi lenge poropeta akali dupwame yulu piyami dokona suu pyalapape. Nakama maka nao pyuo kareyami dokona makande minyuo pyuo karalapape.
JAM 5:11 Akali mona kumapala pyuo kareyami dupwa enakana rae maipala pengeŋe lenge kandale. Akali Jopo baa maka napalako pyuo kareya doko nakama peparae silyaminyi. Kamongo baame kondapala wambu sakame kumuo karenge dokome Jopo keta enakana mondo lanyi pyambuo maiya.
JAM 5:12 Yangonemoo lowa doloma nyuo isa palyuo andake mende palamo. Doko embame kinyi lalyane lao simili lapala yake pandape dee bange mendenape kingi dokona nyuo alya minyuo kinyi leto lao lalu lao lenge pii ingyuo laa nalapape. Pii rolae lapala kinyi ramo doko kinyiko lao daa ramo doko angiko rolo lao pipwape. Dopa pyuo rolae nembo pirami dokopa Anatunya kote pii nakama keta pali nara.
JAM 5:13 Nakama dupwana mendeme randa nyiyami kande doko baa ateŋa lenale. Mendeme rae maiya kande doko baa misi kenane keyange dupwa pyao karenale.
JAM 5:14 Dee nakama sukusa dokona mende anga pyara ramo baa Elyambu Pinginya akali andake dupwa epena lara. Nakama epapala mamba lapo Kamongona kingi lao baa keta kulimbuo ateŋa lakamirami.
JAM 5:15 Nakama Anatu kapa ingingi lao suu pyao ateŋa lakamirami ramo doko Kamongome akali anga pingi doko pyuo nyera. Baa koo mende piyande kande doko Kamongome banya koo dupwa kame sakamiramopa para.
JAM 5:16 Dokona ingyuo nakama mendeme mende kando nakamana koo dupwa polo lamaipala ateŋa lakamyuo kararaminyi dokopa nakamana anga dupwa mee ingyara. Akali rolae pingi dupwana ateŋa larami dokome yulu andake pyuo angi kandara.
JAM 5:17 Akali Ilainja baa namwa yale mee isa akaliko dokome ateŋa poraiyuo leyamosa ee kana rema dee mendena pingyu apu koo mende isa epa naya.
JAM 5:18 Dee enakana ateŋa kamba leyamopa yakena apunda maiyasa nenge nenge keyange dupwa andeya.
JAM 5:19 Yangonemoo mendeme Anatunya pii kinyi lenge dupwa yake nyuo neta paramopa yango mendeme baa nyiso dee sukusa lanyuo epeya kande doko baa keta pii anginde palamo.
JAM 5:20 Doko mendeme koo pipala kata kyai nyeramo dokopa mendeme dee sukusa lanyuo eparamo dokona banya imambu lete wai pyao nyakamirasa yulu dopaleme koo malu nee pinyi nembarasa pira doko kame see nalapape.
1PE 1:1 Namba Pita Yesu Koraisana aposele akali pepa pase dake nakama Anatunya wambu yapasi ralo papala yuu Pondasape Galasiape Kapatosiape Esiape Bitiniape petaminyi dupwa keta pyao jilyu.
1PE 1:2 Rakane Anatumi suu piyamuli pyuo rombo palyiyamopa banya Imambu Poo Pyasi dokome nakama poo pyao nyiya. Yesu Koraisana ranjama kulimbuo isa peyamo dokome nakama wate pisi karaminyi dokona banya pii dupwa warombo soo pisipwape. Anatunya mona keyange palyuo ipingi rengepe mona kyuu lao singi rengepe baa nakama keta jokondali pipyali yaka lao leto.
1PE 1:3 Kamongo Yesu Koraisana Rakange Anatu kando sangyu lao lakando karamana. Baa mona keyange palyapala ipyuo karenge dokome Yesu Koraisa lete minyalyuo nyiyasa namwame kyakana renge nyepala lete parama dokona enenge ingyuo manjo nyisi karamano.
1PE 1:4 Dokona lao Anatumi banya wambu dupwana lao renge keyange reto karamo dokona sepala mona kare kare karamano. Baame namwana keyange dupwa yake panda serakalyamo dupwa momo naope momonda raope mende pii nange.
1PE 1:5 Lumwa pingi yuu gii pyaka seramopa Anatu namwa lete wai pyao nyero lao reteyamo doko kandalana iso karaminyi. Baa kapa ingingi lao suu pilyaminyi dokona baa banya porai renge dokome nakama kyawa minyaro karamo.
1PE 1:6 Makande pingi yulu wakale wakale ipyasa dakepale randa napala mona nembo karaminyipape Anatu kyawa minyaro karamo doko suu pyapala rae maiyuo angingyuo karalapape.
1PE 1:7 Randa epelyamo dupwame nakama Kurisene angingyuo karamipi lao makande pilyamo. Kana golo poraipi mee lao kandalana isareme kiso kandenge kandale doko suu pyao makande pingi wakale eparamopa nakama porayapala Anatu kapa ingingi lao suu pyao manjo kararami ramo suu pingi keyange doko golo doko mee kuki inginyi pyambwara. Dopa pyuo kararami ramo Yesu Koraisa pano eparamo mange dokopa nakama neta renge ingyuo kingi londapala ketae pyambusi kararami.
1PE 1:8 Nakama Anatu kanda nayaminyipape mona reto karaminyi. Baa dakepa nee pipyamopa karamo doŋo baa kapa ingingi lao suu pilyaminyi. Nakama dopa pyuo karo monarena rae maingi dokome palyuo pyokondepa pyaramopa dokona kambunya piimi kapa lapa narami.
1PE 1:9 Nakama Anatu kapa ingingi lao suu pyao karaminyi dokome jingi lyilyamo doko nakamana imambu lete wai pyao nyera doko yole ingili lao nyeramisa pira.
1PE 1:10 Poropeta akali dupwame Anatu yuu mendepa namwana imambu lete wai pyao nyera renge doko wangu lakao karo kareyami.
1PE 1:11 Nakama yulu keyange doko yuu gii doko anjokorapena epo, apa pyuo pyaka sera lao dokona koto kareyami. Aŋala nakama opetaeme kandamwalinya suu pyaoko kareyami. Doko Koraisana Imambu nakama keta maralyapala Koraisa baa apa pyuo yaso napala yanga paupau lenge neta renge nyera doko wambo nolakao lamaiya. Nakama wambo nolakao lao kareyami pii doko Imambu Poo Pyasi yake panda rae dokome epapu waili pii keyange lao epelyaminyi dupwa nyisapyamopa langimi. Nakama range dokona reke lao leyaminde daa.
1PE 1:13 Suu pinginya luu pali napala isaro karalapape. Yesu Koraisa pano eparamopa renge keyange nakama keta paliramo dupwa suu pyale pyale pupwape.
1PE 1:14 Nakama wambo kamenge karo yulu wambarae pyuo kareyami dupwa moko minyuo paa napala Anatu dokona suu pyao warombo soo karalapape.
1PE 1:15 Yulu wambarae dupwa kaeyapala Anatu nakama sukusa ipupwape leyamo doko baa poo pyasi ingyuo karenge dokona suu pyao nakamana yulu dupwa poo pyasi ingyuo sinya lao pyuo karalapape.
1PE 1:16 Buku Baepolena lao dokopa, Namba poo pyasi karo dokona lao nakama poo pyasi karalapa letamo.
1PE 1:17 Nakama ateŋa lao dokopa Anatu kando namwana Rakane lao lenge ramo doko baame rolae pyuo wambu yulu pinginyili pyuo pakana palyuo kote lenge dokona isa panda dakena kararaminyi mange dusipa peparaenape yuu gii peparaepe baapa lao pako karalapape.
1PE 1:18 Nakamana kauwanemoome kata angi daaŋa lasaka piyaminyipa papyuo kareyami dokona aki mende nakama kiiramo nyiya lao doko suu pyalapape. Mee isa pandana kana golo kulingipi isa penge dokore daa.
1PE 1:19 Koraisa baa sipisipi ikyane usa mende nyisa pisa nange dopale ingyapala nakamana lao kumuo maiyamopa kiiramo epasi karaminyi.
1PE 1:20 Yuu muu dupwa ene wasapa nayamopa Anatumi Yesu rombo palyiyamopa baa yuu gii repetale lumwa piramo mange dokopa nakamana lao epo paneya.
1PE 1:21 Baa epeyamo dokona Anatu kapa ingingi lao suu pilyminyi. Anatumi baa lete minyalyuo nyepala neta renge ingyuo karena leyamopa nakama Yesu keta Anatu kapa ingingi lao suu pyapala mona kare kare karaminyi.
1PE 1:22 Nakama pii kinyi doko moko minyuo papala yulu koo dupwa kaeyapala Anatunya Imambunya yulu rolae pilyaminyi dokona Kurisene yango dupwa mona angi reto karalapape.
1PE 1:23 Nakama isa wambunya para pyao nyisi ingyuo paa nalyaminyi. Anatunya letena palenge pii sulu singi dokome nakama banya wane wanake karalu karenge ingyuo manjo nyilyamo.
1PE 1:24 Baepolena lao dokopa, Wambu peparae makwa ingyuo kuku pyaraminde daa letamo. Jingi bui renge dupwa yuu gii mendasipa iki au pipala loo lenge kandale. Doko suu pyao wambu dupwa mee dokona mendeke ingyuo karaminyi pilyamo.
1PE 1:25 Kamongona pii doko mee sulu sera letamo. Doko waili pii keyange epapu nakama keta langyuo epelyaminyi doko lyakande.
1PE 2:1 Yulu koo kyambo lengepe pii lamana palyuo lengepe yango palyuo lengepe kilya kando lengepe dupwa rekya lao yaki nyelapape.
1PE 2:2 Wane nyaŋame yangama alemanji lao anju ipwange nano pingi doko suu pyao nakama Imambunya nenge angi doko wangu lakao koto karalapape. Nao andapala lete parami ingilyamo.
1PE 2:3 Baepolena lao dokopa, Kamongome embapa elya kalo mondo lao karamo doko nakanjo sepala karaminyi letamo.
1PE 2:4 Lete palengena kana doko isa wambumi meeŋe lapala nembeyaminyipape Anatumi nyuo rombo palyapala mupwa wakasa lao suu pyao karamo. Kana angi doko repeta epo pisipwape.
1PE 2:5 Nakama opetae lete palengena kana pote isa ingyuo paraminyipa Anatumi Imambunya andaŋa lao nakama wasalana suu pilyamo. Nakama purisinya rara poo pyasi dokona yulu pyuo kararami ingilyamo. Pyuo karo Anatu rae mairali dupwa Imambunya yulu dokona suu pyao Yesu Koraisa keta rendamu pyuo kiso maiyuo karalapape.
1PE 2:6 Buku Baepolena pii mende pyasi palamo doko, Kana keyange mende yapo nyepala yuu Sayone dokona mupwa ingyuo pisilyu letamo. Mendeme kana dokona mona maira ramo doko baa kanjakala parami ingya nalyamo letamo.
1PE 2:7 Nakama mona kapu kyingi wambu dupwa kana doko ama keyange lao suu pyarami. Mona kapu kyaa nange dupwame, Kana doko kupyuo nembeyami doko enakana mupwa ingyuo siyamo kandeyami.
1PE 2:8 Baepolena pii mendasa lao dokopa, Wambu dupwa kana dokona pyalya minyapala lukumwarami. Lukumapala angi isa parami lyakande. Nakama Anatunya pii doko soo nyii nayamisa baa leyamuli pyuo lukumayami.
1PE 2:9 Nakama Anatunya wambu rara yapasi ingyapala rakange pongo poo pyasi ingyuo karaminyi. Iminjinginya peteyaminyipa Anatumi yangaenge dorena kee lao sukusa nyepala nakama Kiŋinya purisi akali inginyi pyambuyamosa banya yulu andake dupwa pano larami lyakande.
1PE 2:10 Nakamba wambo wakale ingyuo peteyamiyipa epapu Anatunya wambu karaminyi. Anatunya sakao nyiso karenge renge dokona kamenge see nao kareyami doko epapu nakama kete palamo.
1PE 2:11 Nambana puu minyingimoo. Nakama isa panda dakena yanda paenge akali mee sisipanda epo karaminyi pilyamo. Dokona yongonya yulu koo dupwame imambunya suu pingi mare angi dokona isare mailyamoŋo ama wanjo karalapase lao langilyu.
1PE 2:12 Kurisene daa pipa karo dokopa emba dopalepe dapale lao kandarami doko suu pyao kandokondali pyuo wasinyi nembo piso karo piri. Dokopa Yesu kapu kyuo eparamo gii dokopa nakamana yulu keyange dupwa panaramopa kandarami Anatu kando lakandarami ingilyamo.
1PE 2:13 Kamongo dokona reke lao gapomane kando kui lao pisipwape. Dopako pyuo gapomane akali mupwa doko warombo soo karalapape. Baa akali andake dokome lapo wambu rapu pyuo karena lao pena leyamopa nakama koo pingi wambu dupwa randa maiyuo, elyape pingi dupwa lakando pyuo pingi dokona nakama warombo soo karalapape.
1PE 2:15 Wambu kopyali dupwame nakama kando kyaŋe soo lao karenge dupwa nakamana yulu keyange pirami dupwa kandapala dokopa mende larami ingya nalyamo yulu rolae dopale Anatumi nakama pimili lao suu pilyamo.
1PE 2:16 Nakama kiiramo pasi ingyuo karalapape. Lowa malu pali nalyamo lapala yulu koo lapo kapa piru lao suu pyaa nalapape. Dopa pii napala Anatunya kendemande wambu ingyuo karalapape.
1PE 2:17 Wambu peparae lakanda minya minya pyuo karalapape. Anatu kando pako Kurisene yango dupwa mona maiyuo karalapape. Gapomane akali mupwa doko ketae pyambuo karalapape.
1PE 2:18 Yulu akali dupwame nakamana yulu pyakamaingi akali doko lakanda minya minya pyuo karalapape. Anjiki pingi dupwasa iki laa nalyo. Pyalana pyuo yulu jingi dupwa opetae kando lakanda minya minya pyuo karalapape.
1PE 2:19 Yulu rolae pirinyi randa jeraminyipa Anatunya kingi reke lao kui lao pisiri ramo doko Anatumi renge keyange jera.
1PE 2:20 Yulu koo pirinyipa pyarami dokopa mende laa nao kararami ramo doko mee kapa rolae ingyuo para. Doko mee kapa rolae ingyuo paramopape koo mende pii napala kopetame pyarami dokopa mende laa narami ramo doko Anatumi emba elyape keta pisara.
1PE 2:21 Anatumi yulu keyange dopale pirami lao nakama sukusa nyiya. Koraisa nakamana lao randa nyiyamo doko kandapala yaso neyamo pinjingi dokona narami ingilyamo.
1PE 2:22 Koraisa baame yulu koo mende pipala kyambo pii mende leyamo siyaminde daa.
1PE 2:23 Baa kando kilya kando leyaminyipape baame isingi pii koo dopale laa naya. Piyami dokopa isingi pyalana pii nayako. Anatu baa kote pii rolae lenge dokona suu pyapala mona kare kare kareya.
1PE 2:24 Namwa yulu koo dupwa yaki nyuo kaeyapala rolae pirami dokona lao Yesumi isa mamando dokona namwana koo dupwa paleta siya. Baa piyami dokome nakama pyuo nyisi karaminyi kande.
1PE 2:25 Nakama wambo mena sipisipi isako dupwana ralo penge ingyuo kareyami. Dakepa Anatunya Imambunya yulu rapu pyuo karenge akali andake dokona repeta epapala moko minyuo pelyaminyi.
1PE 3:1 Dopako pyuo nakama enda dupwa akalinya dokona isarena pisipwape. Dopa pirami dokome baa Anatunya pii dokona sili see nale lao karenge ramo doko nakamana yulu rolae dupwa kyanyi kandapala mona kapu kyera. Nakamame piimi lao sukusa nyeraminde daa.
1PE 3:2 Mee nakama baa lakanda minya minya pyuo yulu yapasi ingyuo pyuo pisirami doko kando serami.
1PE 3:3 Nakama mee yongo ketae doko iki kalya pyuo komau keyange wapuo mola soo kyawasi kalya pyuo au pyuo paraminde daa.
1PE 3:4 Anatumi epe soo kandara dupwa mona andarena kalya pisi sinya lao elya kalo anjiki pyuo piso karo pipape.
1PE 3:5 Wamba dokopa Anatunya enda yapasi lapo baapa lao mona kare kare peteyami dupwame akalingi epe soo karenale lao nakamana pii warombo palyuo peteyami.
1PE 3:6 Enda Sera baa dopako pyuo Aporakamena pii warombo sepala baa, Nambana kamongo lao suu pyao peteya. Nakama dopale ingyuo yulu rolae pyuo pakange renge mende sukusa nyii nao pisirami ramo doko nakama enda Serana wanenge ingyuo pisiramisa pira.
1PE 3:7 Dee nakama akalingi dupwame etenge dupwa porai daa dokona kata mai nao nyuo arapunya palyuo rapu pyuo karalapape. Anatumi letena renge jeramo dokona nakamba opetae nakama pipya mendare ingyuo nyerami. Dopa pyuo pirami ramo dokome nakamana ateŋa doko kapa ingyuo para.
1PE 3:8 Epapu lumwa pyuo leto. Doko nakama Kurisene yango dupwa kondo suu pingi mendakinya palyuo mona maiyuo yalya kando pisipwape. Range mupwa lao suu pyaa napala anjiki pyuo pisipwape.
1PE 3:9 Mendeme koo piya kande doko koo dokomeko isingi pyuope dee kilya kando laramo doko isingi kilya kando laope pii nalapape. Nakama mee rae maiyuo pena lao piri. Anatumi namwa sukusa nyuo dokopa keyange keta pyakaro leya.
1PE 3:10 Dokona ingyuo Baepolena pii mende palamo doko, Mendeme raeme kumuo mona seramo karalana suu pyara ramo doko baa kyambo piipi mata kando lengepe dupwa yaki nyuo kaeyapenge ingilyamo.
1PE 3:11 Baa yulu koo dupwa mata maipala mona kyuu lao singinya kata koto nyepala wailyaro soo pirasa pira.
1PE 3:12 Kamongome yulu rolae pingi dupwa kyanyi kandapala nakamana ateŋa dupwa epe soo petenge. Koo pingi dupwa kando epe nasepala mata maingi.
1PE 3:13 Yulu rolae dupwana wangu lakapala pinya pirami ramo doko api mendeme moŋo jerase?
1PE 3:14 Yulu rolaena reke lao yaso narenepape rae maiyuoko kareneŋe. Wambu yango kando mona nembo paka nalapape.
1PE 3:15 Nakamana mona anda dokona Koraisa baa mupwa lao suu pyapala baa Kamongo dokona lao ketae pyambwalapape. Mendeme nakamana keyange pira lao mona kare kare karaminyi renge dokona piso seraminyi kandena. Pisarami dokopa pii keyange polo lamairuŋu lapala wambo rapa rapa pyuo karalapape.
1PE 3:16 Polo lamaiyuo dokopa pyalana pii nao anjiki pyuo mana lamairi. Yulu koo mende pii nare dokome lapo nakama mata kando lao kararami ramo dupwa enakana embena Kurisene yulu keyange kandapala kandakinyuo lapulyamo lao suu pyapala elyuo parami.
1PE 3:17 Anatumi emba keta randa kapa epena lara ramo doko yulu koo mende pipunusa pyaamo lao suu pyaa napala keyange reke dokona lao nyipusa pilyamo lao suu pyao karare.
1PE 3:18 Koraisa baa range yulu koo mende pii napalape namwa koo pingi wambu dupwa Anatu dokona lanyaro lao suu pyapala dokona lao kumakaya. Baa pyuo kumakayaminyipape banya imambu dokona lete peya.
1PE 3:19 Baa imambu ingyapala imambu lapo karapusi paleyami dokona lamaiyala peya.
1PE 3:20 Yuu wamba dokopa akali Noa baa sipu mende wasapala banya wambu yanda ipingi nyero nyuo peya. Sipu doko ipwa dokome soo ketae pyambuyamopa nakama lete peyami. Anatumi doloma kando waiya lao pyaa napala isaro kareyamopape wambu lapo simbi simbi pyuo karapala koo keta paleyami dupwana imambu dokonasa letamo.
1PE 3:21 Ipwa andake doko bapitisimo yulu dokona ingyuo wambo kongwalu piya. Bapitisimo nyilyamano doko mee yongona karo petenge dupwa wate pyuo lete pelyamasa pii nange. Bapitisimo nyuo dokopa nakama pii mende lalu lao lenge doko moko minyuo kaeya naro lao suu pyapala lete dokona pelyamasa pingi. Yesu Koraisa baa sipurao lete peyamo dokona ingyuo lete paramasa pira.
1PE 3:22 Baa yake panda papala Anatunya kingi rolae dokona piso aŋala dupwape imambu mupwa, dee kamongo dupwa iso karamo.
1PE 4:1 Koraisa yanengena randa andake neyamo doko nakama keta sela epara lyakande doko doŋo mona kuki palyuo karalapape. Api mendeme yanenge dokona randa nyera ramo doko Satane kata rekya lao epo kararasa pira.
1PE 4:2 Wamba yulu koo wangu lakapala pyulu pyuo pyuo kareyami dupwa epapu kapa kaepala Anatunya pii laramuli pyuo pipape.
1PE 4:3 See nange wambu dupwame pundame kumapala, enda kepo pyuo, biya nao kyakapala, pati andake dupwana piso yuu kwuapala nenge renge nao ipwa koo porai dupwa napala Anatu dokona kaeyapala bange kingimi wasisi dupwa kingi lao karaminyi yulu dopale pyuo kareyami.
1PE 4:4 Nakama opetae wambo dokopa mee langa dopa pyuo male male lao kareyaminyisa Kurisene ingya nange dupwa akipamo epapu namwa role pyao pii nalyamisi lao see napala kilya kando letaminyi.
1PE 4:5 Anatumi wambu kumasi letepe kote lara dokopa nakama apa pyuo kareyama lao renge polo lamairami ingilyamo.
1PE 4:6 Dopa pilyamo dokona waili pii keyange doko kumasi wambu dupwa polo lamaiyapya. Nakama isa yuunya karo dokopa yulu koo piyaminyisa Anatumi nakama kando kote leya. Doko nakama waili pii keyange sepala enakana imambu ingyuo Anatu yale kararami dokonasa polo lamaiya.
1PE 4:7 Yuu lumwa pira doko repe ingilyamo dokona emba range kame pyuo minyuo mona paliramopa karo ateŋa lalapape.
1PE 4:8 Yulu mupwa minyarami doko wambu yango mona reto karalapape. Mona retarami renge keyange dokome nakamana yulu koo dupwa yambe pyakara ingilyamo.
1PE 4:9 Nakama mumu laa nao yango sukusa anda epena lao nenge pyuo pisipwape.
1PE 4:10 Anatumi nakama range wakale wakale keta mora petenge renge jiyamo dupwa mendali keta pisa pisa pyuo maiyalapape. Dokome Anatunya renge keyange dupwa isa pakami nara.
1PE 4:11 Mendeme misi lara ramo doko baa Anatunya pii doko lena. Mendeme mende nyisara ramo doko Anatumi porai renge maiyamo doko nyepala nyiso pyuo karenale. Yesu Koraisa neta renge ingyuo karalu karenge doko keta yulu peparae pirami ramo Anatunya kingi ketae pyambwaramisa pira.
1PE 4:12 Nambana puu minyingimoo. Randa wakale wakale nakama keta epelyamo dupwa nakama apiyakale lao mee makande pyuo ipyamosa pilyamo dokona mona nembo yamarangwa nalapape.
1PE 4:13 Nakama Koraisana randa nyiyamo dokona mendeke ingyuo nyimwasa pilyamoŋo lao rae maiyuo karalapape. Banya neta renge yulu doko neta epo panaramo dokopa raeme kumuo kararami lyakande.
1PE 4:14 Nakama Koraisana kimbu moko minyingi dokona reke lao randa nao karamano lao suu pyapala rae maiyuo pupwape. Dopa pyuo pwuamo doko Anatunya Imambu neta renge dokome nakama keta epo paleyasa piya.
1PE 4:15 Nakama mendeme wambu yango pyao kumakaope waa naope mata kando laope yulu koo dokore pipala randa nyerami doko kapa ingya nalyamo.
1PE 4:16 Kurisene ingilyaminyi dokona lao randa narami ramo doko elya napala Koraisana lao nyilyuŋu lao Anatu ange lamailapape.
1PE 4:17 Kote andake laramo yuu gii repetale pyaka sepelyamo dokopa Anatu banya wambu dupwa kando wambowana ingyuo kote lara ingilyamo dokona waili pii keyange doko kinyi lao suu pyaa nange wambu dupwa apa pyuo parami?
1PE 4:18 Dokona ingyuo buku Baepole dokona pii mende palamo. Doko Anatumi rolae pingi dupwa randa nawali lete wai pyao nyera ramo doko, wambu kamba lenge koo pingipi dupwa Anatu apa pyuo pyuo nyerase?
1PE 4:19 Randa jerami ramo doko Anatu letamuli pyuo nyilyuŋu lao suu pyapala yulu keyange dupwa kaeya nao pyuo karalapape. Yuu muu dupwa wasiyamo Anatu doko pii lamana palya nange dokona range pyamalyuo karalapape.
1PE 5:1 Elyambu Pinginya akali kyawa dupwana pii mende palamo doko epapu langilyu. Namba range Elyambu Pinginya kyawako ingyuo karo. Koraisa baa randa neyamo doko kandeyoko. Dokona namba opetae baa neta renge ingyuo pano eparamo dokopa baapa mendeke ingyuo paro.
1PE 5:2 Anatunya sipisipi nakama keta pyamalyisi dupwa mondo lao isakamyuo karalapape leto. Anatumi emba keta sipisipi lapo rapu pyakare lao pyamalyiya dokona maka sukusuku naa nao pyuo karape. Kanana yulu pilyu lao suu pyaa napala wambu nyisalana doko iki suu pyao pyuo karalapape.
1PE 5:3 Anatunya wambu emba keta pyamalyisi dupwa kando nyuo isa palyili lao kara napala sipisipi peparaena kauwange ingyuo karare.
1PE 5:4 Dokome Sipisipinya Rapu Pingi akali angi doko eparamo dokopa kyawa rarange ama keyange yanga paupau lao sulu singi mende emba nyere.
1PE 5:5 Nakama wane akali dupwame akali andapae dupwana arapunya karapala range mee kuki ingyuo karo lao suu pyapala wakale dupwana kendemande ingyuo karalapape. Baepolena lao dokopa, Anatumi inyimungu karenge dupwa nyuo ketae pyambwapala dee rangeme mupwa lao suu pingi dupwa nyuo isa palyingi letamo.
1PE 5:6 Anatunya kingi kape porai dokona isarena range kuki ingyuo karare dokona baa range suu pyaramo mange keyange dokopa emba minyalyuo nyera.
1PE 5:7 Baame emba iso karamo dokona embena mona kenda dupwa baa keta pyamalyapala kaeyare.
1PE 5:8 Suu pingi karalunja nembapala lenge rao karalapape. Satane baa mena laene rae lenge dopale dokome nakama pyao nalana lee minyilyamo.
1PE 5:9 Kurisene yulu dokona pyuku laa napala Satane nyuo meme pinyi nembo karalapape. Randa epelyamo dupwa embako iki nelende daaŋa. Kurisene yango yuu muu wakale dupwa mendare ingilyamo.
1PE 5:10 Nakama yuu gii mendasipa iki yaso nao kararaminyipa Anatu mona keyange palyuo ipingi renge renge kuiyuo karenge doko nyisara. Nakama Koraisapa pako karo banya yanga paupau lenge panda sulu singi dokona ipupwape leyamo doko baame nakama sukunde ingyuo kiso rolapala nakama porainyi pyambwapala paka isa ingyaro kararami.
1PE 5:11 Porai renge dupwa banya ingyuo sulu silyamo, doko kinyi.
1PE 5:12 Nambana yangone mona retenge akali Silipenasa baame pepa pase dake pyakapya. Anatumi mona keyange palyuo namwa nyisingi yulu dupwa pepa dakena pyao palyapuŋu dupwa yaki nyii nalapape lao pyao jilyu.
1PE 5:13 Anatumi wambu yapo nyiyamopa Bapilone dokona Elyambu Pingi yango ingyuo mendare petaminyi dupwa yako letaminyi. Nambana wane Make baame opetae yako lenge pii letamo.
1PE 5:14 Nakama Kurisene yango sukusa Anatu suu pyao yako lao kingi maiyuo pyuo karalapape. Nakama Koraisana wambu dupwame mona kyuu lao seramo karamili yaka lao leto.
2PE 1:1 Namba Saimone Pita Yesu Koraisana aposele akali dokome banya kendemande yulu pyuo karo. Anatu Lete Wai Pyao Nyingi Yesu Koraisapa rolae pingi dolapome Kurisene suu pingi keyange maiyamo yango dupwa keta pepa dake pyao jilyu.
2PE 1:2 Nakamame Anatu dee namwana Kamongo Yesupa soo nyilyaminyi dokona mona kyuu lao singi rengepe mona keyange palyuo ipingi rengepe nakama jokondali pinya lao leto.
2PE 1:3 Yesu baame wakasa keyange neta renge ingyuo karamo dokome role pyao kararami lao ipupwape letamo. Anatumi Yesu keta banya yake pandana porai renge dokome imambunya renge keyange angingyuo nyisarali dupwa jiya. Baame keyange dusipa
2PE 1:4 jeroŋo lao wambo lasaka pilyamo. Ene angi nyerami dokopa isa pandana suu pingi koo wambu kokwa singi dupwa wanjo karapala baa yale ingyuo kararami.
2PE 1:5 Anatunya keyange wakasa dupwa kandalana lao suu pyarami ramo doko Anatu baa kapa ingingi doko iki suu pyao kara nao yulu keyange dupwa pyuoko kararami.
2PE 1:6 Dee doko iki daa. Anatu soo nyepala rangena yulu dokona kame pyuo pyuo karalapape. Banya yulu pyuo kaeya napala Anatunya Imambunya yulu iki suu pyao kararami.
2PE 1:7 Wambu yango dupwa mona retapala Anatu dokona mona maiyuoko karalapape.
2PE 1:8 Yulu rolae dupwana wangu lakao pyuo kararami ramo doko Kamongo Yesu Koraisa soo nyepala banya yulu rolae pyuo kararami ingilyamo.
2PE 1:9 Yulu rolae dusipa pii nange wambu dupwame nakamana koo doko kwuanyi nembakaya kande doko kame sepala nakamana lenge kwaelyamo dokome angingyuo kandapa nalyaminyi.
2PE 1:10 Yangonemoo Anatumi nakama kee lao sukusa nyiyamo dokona rolae pyuo karalapape. Dopa pyuo pirami ramo nakamana Kurisene yulu isa paa nara.
2PE 1:11 Isa paa naramopa namwana Kamongo Lete Wai Pyao Nyingi Yesu Koraisana isingi panda keyange doko nyerami.
2PE 1:12 Dokona lao nakama renge keyange dusipa soo pingi pyapala kareyaminyipape nambame kaeya nao langyuoko kararo.
2PE 1:13 Yulu rolae dusipa pipwape lao kaeya nao laoko karo doko kumarono dokopa lili pira doko keyange lao suu pilyu.
2PE 1:14 Nambana yongo kakapange oo repetale yaki nyerolyamo dokona lao Kamongo Yesu Koraisame pii repa repa pyuo langipya.
2PE 1:15 Dokona ingyuo namba wambo nakamana kata wapwapala enakana kumuo paronopa nambana pii dupwa soo manjo kararami ingilyamo.
2PE 1:16 Namwana Kamongo Yesu Koraisa porai wakasa doko kapu kyuo epara lao karamano doko mee sinju pii ingyuo laa nalyamano. Baa yanga paupau lao kareyamo doko rangena lengeme kandeyama.
2PE 1:17 Rakane Anatu yake panda dokona yanga paupau lao karapala banya kingi ketae nembo lao, Dake nambana Ikinyingi mona retelyo doko, namba banya yulu kyanyi kandelyo leyamo doko soo kareyama.
2PE 1:18 Namwa baapa yuu kyau yapasi dokona role pyao kareyama doko pii yake panda rae epeyamo doko range rolae siyama.
2PE 1:19 Dokona ingyuo poropeta akalimi pii leyami doko kinyi ingyuo pelyamo kandelyamano. Nakamame pii doko lambe ingyuo minyuo panda iminjiyamo dokona yanganyi retenge. Dokona leyami dupwa suu pyale pyale pupwape. Pii doko rao pelyamo dokome yuu yangapala nakamana mona anda dorena yanganyi peeyara.
2PE 1:20 Pii mende kyawa ingyuo leto dake kame see nalapape. Doko pii nolakayaminyi Baepolena pyasi palamo dupwa akali mendeme dokona kandapala range suu pyao kapa polo laa nara ingilyamo.
2PE 1:21 Doko isa wambumi sipurapala lao kareyaminde daa. Imambu Poo Pyasimi wambu maralyiyamopa Anatunya pii doko nolakayamisa piya.
2PE 2:1 Wambo dokopa akali lapo poropeta akali angi daa kyambo lenge dupwa lao epeyami doko suu pyao dokore lapo dee kamba eparami ingilyamo. Nakama Lete Wai Pyao Nyiyamo Kamongo doko mata maipala nakamana kyambo pii dokome Elyambu Pingi wambu ukiaki minyarami. Yulu koo doko nakama keta lalyuo ingyuo eparamopa nakama waiya lao kokwa sera ingilyamo.
2PE 2:2 Wambu malu mee nakamana mana nyepala yulu kopetame piraminyisa Anatunya Imambunya kata angi doko kwaeyakamisara.
2PE 2:3 Nakama kana mone nyelana pii wakale wakale palyuo nakama minyuoko pirami. Dopa pyuo pirami doŋo Kote Pii Lenge doko rapa rapa pipala oo epena pilyamo. Nakama Kokwa Sera Doko luu palipa nalyamo.
2PE 2:4 Aŋala lapo yulu koo piyamisa Anatu baame konda napala puu maipala panda kwaenge dokona pyambwapala kote lenge yuu gii dokona isaro karena leya.
2PE 2:5 Dopako pyuo baa yuu wamba dokopa wambu konda napala ipwa andake dokome nena leyapya. Pii rolae lenge akali Noa banya wambu yanda ipingi iki pipya lete nyiya.
2PE 2:6 Yuu mendepa baame yuu Sotoma Gomorapa kando epe nasepala isare dokome rao ranga sinya leyapya. Wambu enakana dupwana lapo Anatunya kingi isa nembasarami lao kandaro laoko pyao kokwa siyapya.
2PE 2:7 Akali Lote baa nakamba role pyao karapala nakamana yulu koo dupwa kando mona randayamosa Anatumi baa kyawa lete nyiya.
2PE 2:8 Nakamba yangama alemanji lao koo piyamisa kando epe nasepala mona nembo kareya.
2PE 2:9 Kamongome dopa pyuo pingi dokona banya wambu yaso narami dokopa kapa moko nyera. Dee yulu koo pingi dupwa puu maipala Kote Lenge Yuu Gii dokona iso karena lara.
2PE 2:10 Rangena suu pingi koo moko minyuo paenge wambu dupwa keta kote pii andake palira. Nakama Anatu kando kamba lapala lamya ingyalya ingyana pyuo yake pandana aŋala keyange dupwa kando kilya kando lenge.
2PE 2:11 Kilya kando laminyipape yakena aŋala kamame porai wakasa dupwame Kamongona lenge kambu dokona nakamana koo pii soo kararamopa isingi kilya kando laa nange.
2PE 2:12 Nakama mena rae lenge suu pingi pali nange dopale kone makaro karamo dokona kyawa suu lao papala kumarami ingilyamo. Mona pali nange dokome imambunya yulu sili see nale lao karaminyi.
2PE 2:13 Wambu yango moŋo mailyaminyi dokona nakama range keta moŋo doko sela epara. Nakama yangama alemanji lao yongona pundamu kumuo pyuowaneme suu piyami dupwa pano pilyaminyi. Nakamba nakama pipya nenge nao yalya kando pisiminyipape nakamana panga singi yulu dupwa pyuoko karaminyi.
2PE 2:14 Nakama enda nyipuli nyipuli lao lenge nyuo karalu karapala koto karaminyi. Nakama Kurisene porai ingya nange dupwa kando nyepala yulu koona kata dokona andanyi pyambulyaminyi. Nakama kaeya nao nyipuli nyipuli lao suu pilyaminyi dokona Anatumi nakama moŋo andake maira.
2PE 2:15 Kata rolae dupwa yaki nyepala mee ralo karaminyi. Akali Beona ikinyingi Belame baa yulu koo doko pyuo kana malu nyiya kata dokonako pelyaminyi.
2PE 2:16 Baa poropeta angi daandeme yulu koo pyuo kareyamo dokopa mena donge mende wambunya pii lele lao baasa kando leya.
2PE 2:17 Wambu dopale doko ipwa guu lenge sokasi singi dopale karaminyi. Kopa rakapana porambaiye dopale mee nyepo nyuo paeyo karaminyi. Anatumi nakama iminjingi panda dorena nembara ingilyamo.
2PE 2:18 Nakama sipurapala yongona pii andake lapala wambu mona kapu kyasi poraiyapa nalyaminyi dupwa nyepala yongona pundange renge dupwa mana lamaiyuo neta nyilyaminyi.
2PE 2:19 Yulu koo dupwame nakama anamasi minyiyamopa puu maisi karaminyi. Puu maisi karaminyipape wambu yango kiiramo nyerama letaminyi.
2PE 2:20 Wambu lapome Lete Wai Pyao Nyingi Kamongo Yesu Koraisa kando nyepala yulu wambarae dupwa rekya lanyi nembapala karo enakana koo dokona dee sukusa parami ramo dokona ama kwao parami.
2PE 2:21 Anatunya pii poo pyasi doko soo manjo nyepala enakana kata rolae doko yaki nyerami ramo doko kamame kwao parami ingilyamo.
2PE 2:22 Dokona ingyuo namwa pii mende lenge doko, Suwame nyema pyao miku kasipala range nalamuli pyuo pingi. Dee mena yanenge keyange doko dee manduwanya rongo rongo soo karengenyili pyuo pilyaminyi lenge kandale dokona ingyuo pelyamo.
2PE 3:1 Nambana puu minyingimoo, pepa pase mende wambo joo kaeyo kande dokona dake lapo pyuo pyao jilyu. Pase dolapona Anatunya pii keyange dokona poraiyuo suu pyalapape lao pii dokona andarele langilyu.
2PE 3:2 Yuu wamba dokopa Anatunya poropeta akali dupwame pii leyami dokope Lete Wai Pyao Nyingi Kamongona lowa doko aposele akali keta siyami dolaponape poraiyuo suu pyalapape lao pepa jilyu.
2PE 3:3 Yuu repetale lumwa piramo gii dokopa akali lapo rangena suu pingi koo dokona minyuo londo epapala nakama kando giyalya giyana pyuo lao,
2PE 3:4 Kamongome dee eparo laa naya lyasilisi? Baa anja karase? Akali andapae dupwa baa kanda napala mee kumuo pelyaminyi. Yuu wasiyamo dokopa piso epo mee siyamuli pyuoko silyamo larami.
2PE 3:5 Doko Anatunya pii neta epeyamo dokome yake yuupi ingyuo peyamo doko suu pyaa napala mee pii doko kandakinyuo lao kararami ingilyamo. Ipwa iki wambo siyamo dokona Anatumi leyamuli pyuo yuu doko pulyuo epeya.
2PE 3:6 Deeko leyamuli pyuo yuu mendepa ipwa andake dokome yuu kokwa siya.
2PE 3:7 Pii mendaki dokomeyoko yake yuupi isareme raraŋa lao retasi silyamo. Doko akali yulu koo pingi dupwa keta kote pii paliramopa yuu pale pale isareme rao kokwa soo parami.
2PE 3:8 Nambana puu minyingimoo, pii dake kame see nalapape. Anatumi ee kana ama malu (1,000) doko yuu gii mee mendaki dopaleko lao suu pyaro karapyamo pilyamo.
2PE 3:9 Dokona ingyuo lapome baa mende piro lalu lao leyamo doko kame sepala pii nalyamo lao suu pilyaminyi. Doko renge angi see napala mee lao karamisa pilyamo. Anatumi koo keta pasarami lapala mona kapu kyamili lao isaro karapyamo pilyamo.
2PE 3:10 Kamongona yuu gii doko waa nala epenge akali yuu gii anjokorape epara lao see nalyaminyi epenge dopale ingyara. Yuu gii pyaka seramopa yake doko kele kalo lao rali piramo dokopa bui dupwa isareme rapala kondo isa para. Dee yuu muu dupwa mee ope ape pyuo rali pipala pana nara.
2PE 3:11 Dopa pyuo kokwa soo paramo dokona nakamana range yulu dokona kandokondali pyuo karalapape. Anatu dokona iki suu pyao karalapape.
2PE 3:12 Anatunya yuu gii doko dakepa waiya lao pyaka sipyali lao suu pyapala yulu rolae pyuo karalapape. Yake doko rao mee inginyi nembo, bui dupwa isareme raramopa mee ipwa ingyuo para.
2PE 3:13 Dopa pyuo paramopa Anatumi yake yuupi enenge ingyuo wasaro lao lalu lao leyamopa namwa yulu rolae pingi panda doko isaro karamano.
2PE 3:14 Yangonemoo isaro karaminyi mange dusipana yulu koo mende pii napala nyiso yakunaiyape pisa naramopa baapa mona kyuu lao sinya lao karalapape.
2PE 3:15 Anatumi Pole nyisiyamopa baame pii keyange lao Anatumi nakama mona kapu kyamili lao maka napala iso karamo leya dokonako palyuo leto.
2PE 3:16 Baa pepa pyao dokopa pii dokore lenge kandale. Banya pepa pase piyamo dupwana renge lapo randa nao serami paleyasa wambu kopyali see nange lapome lawa pyuo polo letaminyi. Nakama Baepole pii doloma opetae ukiaki minyuo lenge dokome koo keta pelyaminyi.
2PE 3:17 Yangonemoo mende piraŋa doko wambo langilyu. Doko akali kamba lenge lapo epapala pii kopetame langiraminyipa soo nyepala isa pasarami dokona waso karalapape.
2PE 3:18 Nakama Lete Wai Pyao Nyingi Kamongo Yesu Koraisa soo ando paraminyipa banya mona keyange palyuo ipingi renge doko nakama keta jokondali pinya lao leto. Mange epapu piso pao rengyanape banya kingi doko ketae palyuo puu penale, doko kinyi.
1JO 1:1 Yuu wamba kanda soo dokopa mende paleyamo doko namwa siyama lenge dokome kandeyama kandapala kingi dokome minyandeyama doko letena renge pii angi dokona lao pepa pyao retelyamano.
1JO 1:2 Letena renge pii nolakaya. Nolakayamo dokopa namwa kandeyama. Kandapala namwa angi kandeyama lao nakama boo pyao langilyamano. Letena renge kulisa palu palenge Rakane karamo dokona paleya doko namwa kandalapase lao pano nolakaya.
1JO 1:3 Nakama opetae namwa yalya kando pisimwali lao namwa kandeyama dee siyama renge dokona nakama selapape lao boo pyao langilyamano. Namwa Rakane banya Ikinyingi Yesu Koraisapa role pyao yalya kando karamano dokona lao nakama yalya kando pisimwali lao langilyamano.
1JO 1:4 Yalya kando pisirama ramo dokopa namwa raeme kumuo pisirama lao pepana pyao reto jilyamano.
1JO 1:5 Ikinyingi dokome waili pii namwa langiyamopa soo nyepala nakama langilyamano. Anatu baa yanga paupau lao karenge. Iminjingi doko baa keta pali nange.
1JO 1:6 Namwa iminjaramo dokona isa sulusulu karo dokopa namwa baapa yalya kando karamwano pilyamo larama ramo doko kyambo lao karo kinyi angi dokona palyuo lao kara naramasa pira.
1JO 1:7 Baa yanga paupau lasi dokona karenge doko suu pyao namwa yanga paupau lasi dokona kararama ramo dokopa namwa lao yalya kando pisiramano banya Ikinyingi Yesunya ranjama dokome namwana koo dupwa peparae kwuanyi nembapa pyakara.
1JO 1:8 Namwa koo pali nange larama ramo doko monarena kinyinya renge doko pali naramopa namwa ukiaki minyuo suu pyapala laramasa pira.
1JO 1:9 Namwana koo dupwa Anatu keta polo lamairama ramo dokopa baame namwa yaki nyii nao kyawa minyuo yulu rolo pyuo karenge dokome namwana koo dupwa nyuo kame sakao ukiaki minyingi dupwa pyuo elya pyuo nyakara.
1JO 1:10 Namwa yulu koo pii nange larama ramo doko namwa Anatu kyambo leya laramasa pira. Dokome banya pii namwana monarename see narasa pira.
1JO 2:1 Nambana Kurisene wanenge ikinyingipi dupwa, nakama yulu koo pyuo kara nalapape lao langilyu. Dopa lao langirunupape mendeme yulu koo pira ramo dokopa Yesu Koraisa rolae karenge doko namwana koo dupwana lao Rakane kambu minyuo lamaiyakara lyakande.
1JO 2:2 Yesu kumuyamo dokome namwana koo dupwa nyuo yambe pyasi siya. Namwana koo dupwako iki daa. Wambu yuu mure lao peparae dupwana kumuyasa piya.
1JO 2:3 Banya lowa dupwa leyamuli pyuo pyuo kararama ramo dokome baa soo nyilyu lao soo pakana palyuo seramasa pira.
1JO 2:4 Mendeme, Nambame Anatu soo karo lapala banya lowa dupwa sili see nale lao karara ramo doko banya monarena kinyi renge pali naramopa baa kyambo lao kararasa pira.
1JO 2:5 Dokona mendeme Anatunya pii warombo soo pyuo karara ramo doko banya monarena Anatunya mona retenge renge doko namwana mona anda palyuo kete pyaramo kararasa pira. Dopa pira ramo dokome namwa banya arapu dokona karalyamano lao soo gisaramasa pira.
1JO 2:6 Mendeme Yesunya arapu dokona karo lara ramo doko Yesu pyuo kareyamuli pyuo karapenge ingilyamo.
1JO 2:7 Nambana puu minyingi dupwa lowa enenge mendena pyao langya nalyo. Lowa wambarae nakama yuu wamba singi kandale dokonandeko langilyu.
1JO 2:8 Lowa doko wambarae ingyapyamopape enenge ingyuo silyamo doko pyao langilyu. Pii renge kinyi doko Yesu keta maralyuo siya. Mendaki dokoko dakepa nakama keta silyamo. Dokonako ingyuo iminjingi doko pyai nala nala pupyamopa epapu yanga paupau lenge angi doko panelyamo.
1JO 2:9 Mendeme, Monarena yanga paupau lao sipyamo karo lapala yangonge mende awa nao karara ramo doko banya mona dorena iminjingi dokona kararasa pira.
1JO 2:10 Mendeme yangonge mona reto karara ramo akali dokona monarena yanga paupau lao seramopa kararasa pira. Yulu dokome pyalya minyapala mendali lukumuo palya nara.
1JO 2:11 Mendeme yangonge mende awa nao karara ramo doko yanga naramopa isa sulusulu karo banya lenge doko yambe pyalya pyana piramopa kata anja pelyo lao see narasa pira.
1JO 2:12 Nambana Kurisene wanenge ikinyingipi dupwa, Yesu Koraisana kingi lao nakamana koo dupwa Anatumi nyuo kame sakayamo dokona epapu nakama pepa pyao jilyu.
1JO 2:13 Rakanemoo nakamame wambo kanda soo kareyamo doko baa soo nyepala karaminyisa dokona pepa pyao jilyu. Wanyane dupwa nakama imambu koo doko nyuo anamapala karaminyi dokona epapu pepa pyao jilyuko.
1JO 2:14 Wane wanakepe dupwa nakamame Rakane soo nyepala karaminyi dokona pepa pyao retapupya kandapi. Rakanemoo, wambo kanda soo kareyamo baa soo nyepala karaminyi dokona pepa pyao retapupya kandapi. Wanyane dupwa nakama porai ingyuo karaminyipa Anatunya pii doko nakama keta soo nakamame Satane nyuo anamapala karaminyi lao sepala dokona epapu pepa pyao retapupya kandapi.
1JO 2:15 Isa yulupi yuunya bangepe mona reto kara nalapape. Mendeme isa yulu mona reto karara ramo doko Rakanena mona retenge renge doko banya monarename pali narasa pira.
1JO 2:16 Isa yulu peparae yanengena nyuowaneme kumuo pyuo karengepe namba wakasa laraminyi karapuli lao suu pingipi yulu peparae dusipa Rakanena yulu ingyuo daa mee isa yuunya yulu silyamo.
1JO 2:17 Isa yuunya yulu dokope isa yuunya yulu nyuowaneme kumungi dokope pyai nara ingyuo silyamo. Sipyamopape mendeme Anatu mende laramo dokona rape rape lao karara ramo doko kulisa ingyuo karalu karara.
1JO 2:18 Kurisene wanenge ikinyingipi dupwa yuu gii lumwa doko repetale pyaka sepelyamo. Mendeme Koraisapa sisu nyuo karara ingilyamo pii dokona nakama siyami kande. Siyaminyili pyuo epapu wambu malu Koraisapa sisu nyuo karaminyi. Dokome epapu yuu gii lumwa doko angi pyaka silyamo lao soo gisilyamano.
1JO 2:19 Namwa role pyapeta sukusa karenge dokona karapala neta peyami. Nakama namwa role pyapeta kareyaminyipape namwana pongwae ingyuo kara nayami. Nakama namwana pongwae ingyuo kareyamili doko nakama namwa role pyapeta karalu karamwali. Nakama namwa yaki nyuo peyami doko namwana pongwae ingyuo kara nayamindeme dokopa paneya.
1JO 2:20 Dopa piyamopape Imambu Poo Pyasinya renge raa lasi Yesu Koraisa keta jiyamosa dokome nakama peparae rolo silyaminyi.
1JO 2:21 Nakama pii kinyi doko see namindena pepa pyao jiyunde daa. Nakama pii kinyi soo karo kyambo pii soo nembo karaminyi dokona pepa pyao jilyu.
1JO 2:22 Akali api kyambo angingyuo lenge karase? Yesu baa Koraisa ingyuo karamo lenge pii doko soo nembapala lao karara ramo baa kyambo angingyuo lenge ingyarasa pira. Mendeme Ikinyingi Rakangepa karambinyi lenge pii doko soo nembapala lao karara ramo baa Koraisapa sisu nyuo karenge ingyarasa pira.
1JO 2:23 Mendeme Ikinyingi karamo pii doko soo nembapala lao karara ramo doko Rakange soo nyii nao larasa pira. Mendeme Ikinyingi karamo pii dokona palyuo lara ramo baa Rakange opetae soo nyepala larasa pira.
1JO 2:24 Pii wamba kanda soo nakama siyami doko nakamana monarena palu palena. Pii doko nakama keta palu palira ramo dokopa Ikinyingi Rakangepana arapu dokona yuu peparae nakama karalu kararami ingyara.
1JO 2:25 Dokonako ingyuo namwa baame langyuo lalu lao leya. Nambame nakama kyakana renge kulisa palu palenge doko jeroŋo leya.
1JO 2:26 Wambu lapome kyambo lao nakama panga soo suu longo nyimwali lao karaminyi dupwana lao pepa pyao jilyu.
1JO 2:27 Jipunupape Imambu renge raa lasi Yesu jiyamo nyiyami doko nakama keta singi dokona akali mendeme nakama mana langira ingyuo yangya nalyamo. Banya Imambu renge raa lasi dokome kyambo laa napala angi palipyamuli pyuo bange peparae dupwana mana langyuo karamo. Dokomeko Yesunya arapu dokona karalu karalapape lao mana langiyamo dokonako suu pyao pyuo karalu karalapape.
1JO 2:28 Kurisene wanenge ikinyingipi dupwa baa pano eparamo dokopa namwa eŋa nembo karo banya lenge kambu dokona inyimungu elya nao karapuli yaka lao epapu banya arapu dokona pisipwape.
1JO 2:29 Anatu baa angi rolae ingyuo karamo doko nakama silyaminyi. Dokonako wambu yulu angi rolae pyuo kareyami kande doko nakama Anatumi manjo nyiyandelyamo lao soo gisarami ingilyamo.
1JO 3:1 Rakange Anatu namwa renge kuiyuo mona reteyamo dokome namwa banya wane wanakepe leya dokona suu pyaokondali pipwape. Namwa mee dopa rapisa lao wane wanakepe laa nange. Namwa banya wane wanakepe angingyuo karamano. Dokona isa yuunya suu pingi wambu dupwame Anatu apa pyuondeme pyuo karamo lao soo pakana palya nayami doko suu pyao namwa apa pyuondeme pyuo karaminyi lao soo pakana palya nalyaminyiko.
1JO 3:2 Nambana puu minyingi dupwa epapu namwa Anatunya wane wanakepe ingyuo petamano. Namwa yake panda dokona apiyakale ingyarama lao nolaka napyamopa kando sepa nalyamano. Dopa piramopape Yesu pano eparamo dokopa namwa baa angi rolae kandarama dokome baa yale ingyarama.
1JO 3:3 Wambu mendeme Yesu kandapuli lao suu pyara ramo suu pingi doko monarename range pyuo poo pyarasa pira. Yesu poo pyasi karenge doko suu pyao poo pyasi kararasa pira.
1JO 3:4 Wambu koo pyuo karaminyi dupwa peparae Anatunya mawa pii kamba laminyisa pilyamo. Yulu koo pyuo karenge doko mawa pii kamba lenge dopale.
1JO 3:5 Yesu baame namwana koo dupwa ramanyi nembala pano epeya lao soo gisilyaminyi kande. Baa koo mende pali nange.
1JO 3:6 Mendeme Yesunya arapu dokona karara ramo doko koo pyuo kara narasa pira. Mendeme koo pyuo karara ramo doko baame Yesu kando sepa nangendeme pira.
1JO 3:7 Nambana wanenge ikinyingipi dupwa, mendeme kyambo lao nakama panga soo suu longo nyii nana. Mendeme yulu rolae pyuo karara ramo doko Yesunya monarena rolae silyamo doko suu pyao banya monarena rolae serasa pira.
1JO 3:8 Satane dokome ene lokoyamo dokopa piso yulu koo pyuo karenge dokonako ingyuo mendeme yulu koo pyuo karara ramo baa Satanena ingyarasa pira. Anatunya Ikinyingi epeyamo renge doko Satanena yulu dupwa ukiaki minyala pano epeya.
1JO 3:9 Anatunya mende manjo nyera ramo baa yulu koo pyuo kara narasa pira. Anatunya pyuo karenge renge isa komba pyao nyepala kata dokome yulu koo pii nao karara. Anatumi manjo nyeramo dokome yulu koo pyuo karara ingya nalyamo.
1JO 3:10 Mendeme yulu rolae pyuo kara nara ramope baame banya yangonge mona reto kara nara ramope doko baa Anatunya ingyuo daa. Dokome api Anatunya wane wanakepe api Satanena wane wanakepe lao kando gisarama.
1JO 3:11 Waili pii nakama wamba kanda soo siyaminyi dakena dopa lao palamo. Namwa lao mona reto karapenge ingilyamo.
1JO 3:12 Wamba akali Kene lenge imambu koo dokona ingyuo kareyandeme banya yangonge pyao kumakaya kande renge doko namwa mana nyii napengele ingilyamo. Renge apa pyuondena lapala baame yangonge pyao kumakayapya kandese? Banya yulu dupwa koo ingiyamosa yangongena yulu dupwa angi rolae ingilyamo lao kandapala yangonge pyao kumakaya.
1JO 3:13 Yangonemoo dokona suu pyao isa yuunya suu pingi wambu dupwame nakama awa nao karaminyi dokona mona nemba nalapape.
1JO 3:14 Namwame yangonge dupwa mona reto karamano dokona kando namwa mona doko kumasi ingyuo kareyama doko pyakuiyuo nembapala mona kyaka palipyamo karamano lao soo gisilyamano. Mendeme mona reto kara nara ramo doko mona doko kumasi ingyuo kararamosa pira.
1JO 3:15 Mendeme banya yangonge kando awa nao karara ramo baa pyao kumakale lao pyuo kararasa pira. Dokona lao mende pyao kumakaenge ingyuo karara ramo doko banya monarena kyakana renge kulisa palu palenge doko pali naramosa pira lao soo gisilyaminyi.
1JO 3:16 Yesu baa namwana lao kumuo jiyamo dokome mona retenge kata angi doko lao soo manji nyisi karamano. Dokona lao namwame yangonge dupwana lao kumuo maiyuo karapenge ingilyamo.
1JO 3:17 Mendeme isa bange malu reto kararamo dokome yangonge mende aeya naramo kararamo kandapala baa mona kendapala maiya naro lao suu pyara ramo doko baa apa pyuo banya monarename Anatunya mona retenge renge palipyamopa karo larase?
1JO 3:18 Nambana wane wanakepe dupwa kambunya iki pii lao mona reta namana. Yulu pyuo angi kinyi kinyi mona reto karamana.
1JO 3:19 Dopa pyuo kararama ramo dokome namwa kinyi palengena palyuo ingyuo karalyamano lao range serama. Sepala Anatunya lenge kambunya mona kyuu lao seramo kararama.
1JO 3:20 Namwa range koonde karo lao suu pyanyi pyano karo kande dokopa Anatunya lenge kambu dokona namwana mona doko kyuu lao seramo kararama. Namwa isa wambunya suu pingi kapa ingya nalyamosa Anatu wakasa dokome soo giso karenge renge dokona namwa mona kyuu lao seramo kararama.
1JO 3:21 Nambana puu minyingi dupwa namwa range koonde karo lao suu pyanyi pyano kararama ramo doko Anatunya lenge kambu dokona eŋa nembo kararamasa pira.
1JO 3:22 Dokopa namwame banya lowa dupwa leyamuli pyuo karo baa rae mailyamuli pyuo pyuo karenge dokome baa kando mende pyakapyali lao piso silyamanuli pyuo baame pyakange.
1JO 3:23 Dokona lao banya lowa dopa lao palamo. Banya Ikinyingi Yesu Koraisana kingi lao baa kapa lete wai pyao nyingi lao suu pyao baa mona maipala nakama lao mona reto karalapape lao baame namwa langiyamo dokona palyuo pirama.
1JO 3:24 Wambu peparae banya lowa leyamuli pyuo pirami ramo dupwa banya arapu dokona kararamisa pira. Dokopa baa nakama keta kararasa pira. Imambu namwa jiyamo dokome baa namwa keta karalyamo lao soo gisilyamano.
1JO 4:1 Nambana puu minyingi dupwa nakama suu pingi wakale wakale dupwa peparae mee kinyokolyamo lao suu pyaa napala suu pingi Anatunya ramo doko apa letape lao selena wambo makande pyuo kandalapape. Poropeta kyambo lenge akali malu yuu dupwana papyuo karaminyi dokona imambu doko Anatunyape lao makande pyuo kandalapape.
1JO 4:2 Mendeme Yesu Koraisa baa mee yanenge nyuo epeya dopa lao suu pyapala laramo dokome nakamame baa Anatunya Imambumi minyapyamo karapyalyamo lao serami.
1JO 4:3 Dee mendeme Yesu dopa pyuo epa naya lao suu pyapala laramo dokome Anatunya daalyamo lao serami. Imambu doko Koraisa kando sisu nyuo karowane lao suu pingi dopale. Imambu enakana epara lao siyami kande doko epapu isa yuu dakena epo pala kande.
1JO 4:4 Nambana wane wanakepe dupwa nakama Anatunya ingyuo karaminyi dokome nakamame imambu koo doloma nyuo anamo karaminyipa pilyamo. Nakamana imambu monarena karamo doko porai wakasa ingyapala mee isa wambunya imambu monarena karamo doko kandanyi palyapyamo pilyamo dokome nakamame doloma nyuo anamo karaminyipa pilyamo.
1JO 4:5 Doloma dupwa isa yuunya ingyuo karaminyi dokonako nakamana pii letaminyi doko isa akalinya pii ingilyamo. Dopa pipyasa yuunya suu pingi wambu dupwame pii dokoko warombo soo karaminyi.
1JO 4:6 Namwa Anatunya ingyuo karamano. Dokona lao wambu Anatu soo karaminyi dupwame namwana pii warombo singi. Wambu Anatu soo nyepa nange dupwame namwana pii warombo see nange. Dokome anjuku imambu kinyi doko dee anjuku imambu kyambo lenge doko lao angi doko soo gisilyamano.
1JO 4:7 Nambana puu minyingi dupwa mona retenge renge doko Anatunya ingyuo silyamo. Wambu mona reto karaminyi dupwa nakama Anatumi manjo nyiyamopa soo karamisa pilyamo dokonako namwame namwa lao mona retamana.
1JO 4:8 Anatu baa renge kuiyuo mona retenge dokona mona reto kara nalyaminyi dupwa Anatu see namisa pilyamo.
1JO 4:9 Anatumi banya Ikinyingi mendaki iki dokoko isa yuu dakena baa renge kuiyuo pyuo nyeramopa namwa lete karalu kararami lao pena leya doko Anatumi namwa mona retelyo dokona pilyu lao namwa kandalapape lao lasaka piya.
1JO 4:10 Namwame mee Anatu mona retowane lao reta nalyamano. Baa renge kuiyuo namwa range mona retapunu pilyamo lao banya Ikinyingi namwana koo dupwa yambe pyaraŋa pena leya dokona namwame Anatu range mona retelyamano.
1JO 4:11 Puu minyingi dupwa namwa Anatumi dopa pyuo mona reteya dokona namwame namwa lao mona reto karapenge ingilya kande.
1JO 4:12 Wambu dupwa peparaeme yuu mendepape Anatu kanda nalu nao nange. Namwame namwa lao mona reto kararama ramo doko Anatu namwa keta epo maralyapala mona retenge angi doko namwa ando nyimbunya lao joo kararandeme pira.
1JO 4:13 Baa range Imambu jiyamo dokome namwa banya arapu dokona karamwanopa banya Imambu namwa keta epo maralyalyamo lao soo gisilyamano.
1JO 4:14 Rakangeme banya Ikinyingi isa wambu dupwa lete wai pyao nyela pena leyamo epeya dokona kandapala angi kandeyama lao letamano.
1JO 4:15 Mendeme Yesu baa Anatunya Ikinyingi lao sepala lara ramo doko Anatu baa keta epo maralyaramo baa Anatunya arapu dokona kararasa pira.
1JO 4:16 Dopa pyuo Anatumi namwa mona reto karamo lao soo gisapala kulisa palyuo mona retelyamo lao suu pilyamano. Anatu baa mona retenge dokona mendeme mona reto karara ramo doko baa Anatunya arapu dokona kararamopa Anatu baa keta epo maralyarasa pira.
1JO 4:17 Mona retenge renge doko namwa monarename ando nyimbulyamo dokome namwa Yesu pyuo kareyamo doko suu pyao pyuo karamano dokopa Anatumi kote laramo yuu gii dokopa eŋa nembapala kararama.
1JO 4:18 Mona reto karenge dokome paka nange. Mona retenge renge doko palyuo nyimbwara dokome pakange renge nyuo nembapa pira. Dokonako ingyuo yulu koo pipala randa nyipu dokona randa isingi laeyo eparalyamo lao pakange mendeme pakao karara ramo doko mona retenge renge doko palyuo nyimbwa naramo kararasa pira.
1JO 4:19 Baame namwa wambo mona reteyamo dokona lao namwame baa mona reto karamano.
1JO 4:20 Mendeme, nambame Anatu mona reto karo lapala yangonge awa nao karara ramo baa kyambo larasa pira. Banya yangonge kandenge doko mona reto kara nara ramo doko baa Anatu kanda nange dokona apa pyuo mona retarase?
1JO 4:21 Lowa Yesu namwa langiyamo dokona dopa letamo. Mendeme Anatu mona reto karara ramo doko banya yangonge opetae mona retoko karapenge ingilyamo.
1JO 5:1 Wambu Yesu baa Koraisa angi karamo lao suu pilyaminyi dupwa peparae Anatunya wane wanakepe ingyuo karaminyi. Wambu Rakange Anatu mona mairami ramo doko banya wane wanakepe ingilyamo dupwa opetae mona mairamisa pira.
1JO 5:2 Namwame Anatu baa mona retapala banya lowa dupwa palengenyili pyuo pyuo kararama ramo dokome banya wane wanakepe dupwa mona retamwalyamo lao soo gisarama.
1JO 5:3 Dokonako ingyuo namwa Anatu mona reto kararama doko banya lowa dupwa palengenyili pyuo pyuo kararamasa pira. Banya lowa dupwame randa jii nange.
1JO 5:4 Anatumi manjo nyisi dupwame isa yuunya yulu doko anamarama. Namwame isa yuunya yulu anamasi minyuo karamano doko Anatu kapa ingingi lao suu pyapala anamasi minyuo karamwasa pilyamo.
1JO 5:5 Api mendeme isa yuunya yulu anamasi minyuo karara? Mendeme Yesu baa Anatunya Ikinyingi lao kulisa palyuo suu pyara dokome anamasi minyuo karara.
1JO 5:6 Yesu Koraisa epeyamo dokopa baa ipwana pao bapitisimo nyiya. Nyepala ranjama kulimbwako kumuya. Ipwana bapitisimo nyiya doko iki suu pyao piyande daa. Baa ipwana papala banya ranjama opetae kulimbwako kumuya. Imambu dokona pii kinyi renge palenge dokome namwa selapa lao pano langyuo rolenge.
1JO 5:7 Pano langyuo rolenge yulu rema namwa selapa lao lasaka pingi.
1JO 5:8 Imambu dokope Yesu ipwa bapitisimo nyiya dokope dee baa ranjama kulimbwako kumuya dokope dusipa peparae nyuo mendaki palyuo namwa selapa lao pano langyuo rolenge.
1JO 5:9 Mee akalinya pii namwa langyuo rolelyamo doko kinyi lao suu pingi kandale. Doko suu pyao Anatunya pii namwa langyuo rolelyamo doko ama kinyi ingilyamo. Dokona lao Anatunya pii namwa langyuo rolenge dopale banya Ikinyingi dokona kando lao namwa langyuo rolenge.
1JO 5:10 Mendeme Anatunya Ikinyingi baa kapa ingingi lao suu pyapala mona maiyuo karara ramo doko Anatunya rolo lamaingi pii doko monarename lamaiyuo rolarasa pira. Mendeme Anatunya pii kinyi lalyamo lao suu pyaa nara ramo doko Anatu baa kyambo lenge lao suu pyarasa pira. Anatumi banya Ikinyingi dokona lao leyamo pii doko pii kinyi lao suu pyaa naramo dokome Anatu kyambo lao karamo lao suu pingi dopale palirasa pira.
1JO 5:11 Pii doko Anatumi namwa kyakana renge palu palenge doko jero lao leyasa piya. Kyakana renge palu palenge doko banya Ikinyingi keta namwa jiya.
1JO 5:12 Mendeme Ikinyingi baapa role pyao karara ramo doko kyakana renge palu palenge doko baa keta palirasa pira. Baa Ikinyingipa role pyao kara nara ramo doko kyakana renge doko baa keta pali narasa pira.
1JO 5:13 Nakama Anatunya Ikinyinginya kingi doko kapa ingingi lao suu pyao karaminyi dupwa kyakana renge kulisa palu palenge doko nakama pipwa palamo lao soo gisalapape lao pepa dake pyao jilyu.
1JO 5:14 Baa kapa piru lao suu pyaramo kata dokona palyuo mende pyakana lao piso serama ramo dokona kaeya nao pira doko kinyi lao silyamano.
1JO 5:15 Dokona lao baa mende pipyali lao piso serama ramo baa ateŋa soo karenge dokome wambo kapaŋa lao suu pyapyamo dokona apoki lele lao lamaimwaŋa lao silyamano.
1JO 5:16 Akali mendeme yulu koo piramopa Kurisene yangonge mendeme Anatu piso sakamira ramo dokona Anatumi imambunya kata doko daa laa nara. Dopa piramopape daaŋa lao kumalu kumuo kumungi koo dokore pira ramo nyuo kame sakamiramo kata mende see nara. Dokona suu pyao ateŋa lalamisi lao laa nalyo.
1JO 5:17 Yulu kopetame pingi dupwa peparae Anatunya lenge kambu dokona koo ingyuo pelyamo. Dopa pipyamopape yulu koo lapo dokome namwa panda koo dakena paramande daa.
1JO 5:18 Anatumi wambu mende kyaka ingyuo manjo nyera ramo doko baame yulu koo pyuo karalu kara narasa pira doko silyamano. Dokona lao Anatumi mende manjo nyiyamo Yesu dokome wambu doko nyiso kararamopa imambu koo dokome wambu doko keta rambu lalana saka nara.
1JO 5:19 Namwa Anatunya wambu ingyuo karamano. Dokopa wambu isa yulu suu pyao karaminyi dupwa peparae imambu koo dokome minya luku luku lapyamo puu maisi karaminyi doko silyamano.
1JO 5:20 Anatu kinyinya renge renge kuiyuo lao karamo doko apa pyuo namwame serama lao saka nayamano dokona Anatunya Ikinyingi epapala mana langiyamo dokona epapu silyamano. Dokona lao kinyi renge kuiyuo lao karamo doko baapa banya Ikinyingi Yesu Koraisa dokopana arapu dokona petamano. Anatu doko kinyi karenge. Kyakana renge kulisa palu palenge doko kinyi.
1JO 5:21 Nambana wane wanakepe dupwa, mee isa bange kingimi wasisi anatuŋu lao kingi lenge dupwa kando pyarepanyi pyambuo waso karalapape.
2JO 1:1 Namba nyisingi andake dokome emba enda mendakinde Anatumi rombo palyuo nyiyamo doko embena Kurisene ree palu pipya pepa pyao jilyu. Namwa pii kinyinya renge palenge dokona pakao karamano kata dokona nambame emba mona retelyo. Nambame iki kando letonde daa. Kinyinya renge kando nyiyami dupwa opetaena role pyao ingyuo lapusa pilyamo.
2JO 1:2 Kinyinya renge namwa keta palu paliramo dokona lapolapo lao mona retelyamano doko.
2JO 1:3 Namwa kinyinya renge yaki nyii nao wambu yango mona reto kararamanopa Rakane Anatu banya Ikinyingi Yesu Koraisapana mona keyange palyuo ipingi rengepe sakao nyiso karenge rengepe mona kyuu lao singi rengepe namwa keta palira ingilyamo.
2JO 1:4 Embena wane wanakepe lapo Rakane leyamuli pyuo kinyinya renge doko yaki nyii napala moko minyuo pelyaminyi doko kandapala rae wakasa maipu.
2JO 1:5 Dokona ingyuo mona reto pyuo karamanale lao emba enda mendaki dokona keta langyuokondali pyuo leto. Dokona lao mawa pii enenge mendena pyao langya nalyo. Mawa pii doko kanda soo dokopa siyama kande.
2JO 1:6 Mona retarama doko Anatunya mawa pii laramuli pyuo pirama dokona letamo. Mona retenge kata dokona palyuo pyuo karalapape lao mawa pii andake doko yuu wamba singi kandale.
2JO 1:7 Panga singi wambu malu yuu dupwana papyuo karaminyi. Nakama Yesu Koraisa mee isa wambu ingyuo epa naya daa lao karaminyi. Wambu dopale dupwa nakama panga soo Koraisapa yanda pimwai ingyuo karaminyi.
2JO 1:8 Yulu andake piyami doko mee isa paramopa nyeramili dupwa papu pisasarami dokona waso karalapape.
2JO 1:9 Mendeme Koraisana pii dupwa yalo parami dupwa Anatupa pakao kapa kara narami. Yesunya pii minyarami dupwa iki Rakange Ikinyingipa pakao kararami.
2JO 1:10 Dokona ingyuo wambu lapome Yesunya pii kaepala mana pii wakale nakamana anda lao eparami ramo doko nakama yako laope andakare epena lao nyii nalapape. Epaminilyamo laa nalapape.
2JO 1:11 Yako lao role pyao karare ramo dokopa banya yulu koo doko emba keta palira.
2JO 1:12 Nambana pii malu palamo doŋo nambame mee pepana pyapala jii narowale. Nakamana anda epapala yalya kando pii langipuli lao suu pyao karo. Dopa pyuo pirama dokopa rae maingi renge dokome palyuo simbwaramo pisarama.
2JO 1:13 Embena enda kakingi mendakinde Anatu rombo palyiya dokona wane wanakepe dupwame emba kando yako letaminyi.
3JO 1:1 Namba nyisingi andake dokome Gayasa nambana puu minyingi angi doko emba pepa pyao jilyu.
3JO 1:2 Emba keta koo mende pali nana lao mee kapa karapili lao ateŋa lakao karo. Embena imambunya yulu doko keyange ingyuo pelyamo doko silyu.
3JO 1:3 Namwana yangonge lapo emba role pyao karapala emba rolae pyuo kinyinya renge doko yaki nyii napala moko minyuo pilinyi langimi dokona sepala ama rae maipu.
3JO 1:4 Nambana wane wanake dupwame kinyinya renge kata doko yaki nyii napala letamuli pyuo pyakao karenge doko namba sepala dokopa raeme kumuo penge.
3JO 1:5 Nambana yangonge mona retenge doko embame Kurisene wambu yango kandenge kanda nangepe dupwa mee kaeya nao nyiso pyuo karenge.
3JO 1:6 Embame nyisinyi wambu dupwana lapo epapala Elyambu Pingi wambu dae petenge dupwa kando rolo lamaimi. Nakama dee sipurapala parami dokopa emba kando nyepala Anatumi rae mairali yulu dupwa pyakamyuo karo nyiso mondo lao karape.
3JO 1:7 Nakama panda wakale dupwana papyuo see nange wambu dupwame nyisamili lao suu pyaa napala Koraisana yulu maso pyuo kareyami.
3JO 1:8 Akali doo nakama kinyinya renge dokona pyuo karaminyi dokona lao namwa Kurisene wambu dupwame nakama nyiso role pyao pirama ingilyamo.
3JO 1:9 Embena Elyambu Pingi keta pepa kuki mende wambo pyao jiyu. Pyao jiyunupape akali Dayorepisa nakamana rapu pingi karalana suu pyao karenge akali doko nambana pii yako lao nyii naya.
3JO 1:10 Namba eparono dokopa banya yulu koo dupwana lao pananyi nembaro. Baa namwana lao kyambo pii lapyamo dupwa kopetame ingyuo pupya. Koo dolapo yeelyo pipya ingya nalyamo. Dopa pyuo namwana akali yango lapo banya anda iminyi dokopa yako lao sukusa nyii nalyamo. Dee wambu lapo nakamana anda epena lao yako lao nyiminyi dupwa nakama misi anda yaki nyuo pena lao kingi kwao nembo karamo.
3JO 1:11 Yangone, koo dupwana moko minyuo pyuo kara napala keyange dupwana iki pyuo karape. Mendeme yulu rolae pira ramo doko baa Anatunya. Dee mendeme yulu koo pira ramo doko baa Anatunya kanda nangendeme pira.
3JO 1:12 Wambu peparae akali Dimiriasa dokona kingi ketae nembelyaminyi. Dee dokonako palyuo Anatunya kinyinya renge dokome baa paka pyao silyamoko. Namwa opetaeme baa akali keyange letamano. Namwana pii kinyi dokona iki palyuo lenge doko silyaminyi.
3JO 1:13 Nambana pii soo kaeyo langiru ingyapyamopa pepana pyao jii narowale.
3JO 1:14 Nambame emba repeta kando nyepala pii lapo langipili lao suu pilyu.
3JO 1:15 Emba mona seramo karape lao puu wambu dae petaminyi dupwame yako letaminyoko. Namwana puu wambu dolo petaminyi dupwa mendaki mendaki lao namwana yako lenge pii doko lamaiyakape.
JUD 1:1 Namba Juti Yesu Koraisana kendemande akali Jemesana yangonge doko. Nakama enda akalipi Anatumi kee lao rombo palyiyamo dupwa pepa dake pyao jilyu. Rakange Anatunya mona retenge renge nakama keta palipyamopa Yesu Koraisame nakama nyiso minyuo karamo.
JUD 1:2 Sakao nyiso karenge rengepe mona kyuu lao singi rengepe mona retenge rengepe nakama keta andake ingyuo ando penale.
JUD 1:3 Nambana puu minyingi angi dupwa, pepa pase dakena Anatumi nyiso lete wai pyao nyiyamo renge doko mana langyuo pyao jelana pipu. Dopa pyuo pipunupape nakama mona minyarambu porainyi pyambuo Anatu kapa ingingi lao suu pingi renge banya wambu joo kaeyamo doko isa paa nana lao renge doko pepa pase dakena pyao jilyu.
JUD 1:4 Mana lenge angi daa lapome kolalyuo epapala namwana Elyambu Pingi wambu role pyao karaminyi. Nakama sukusa karo Anatunya mona keyange palyuo ipingi renge pii doko kaepala alowa pipala rangena kepo pingi yulu kapa pilyamano lao suu pilyaminyi. Nakamba Yesu Koraisa namwana Kamongo mupwa mendaki doko rekya lapala yaki nyilyaminyi. Yuu wamba dokopa buku Baepole dokona wambakao lao dokopa randa andake doko nakamba keta palira doko pyasi paleya.
JUD 1:5 Anatumi Isaraele wambu dupwa Isipi dokona neta nyuo lete wai pyao lanyuo peya. Lete wai pyao lanyuo peyamopape lapo baa kapa ingingi lao suu pyaa nayami dupwa enakana kokwa siya. Dopa pyuo piyamo doko nakama soo gisilyaminyi dokona kame see nalapa lao dee kamba langilyu.
JUD 1:6 Aŋala lapome Anatu yulu maiyamo doko yaki nyepala kaeyami dupwa baame puu sane sulu singindeme puu maipala iminjingi panda koo dokona pyambuyamo doko kame see nalapape. Nakama yake pandana kote andake paliramo dokona puu maisi silyaminyi.
JUD 1:7 Yuu Sotomape yuu Gomorape dee wambu wakale dokona repeta karenge dupwame aŋala yulu kopetame piyami doko suu pyao kepo pingi yulupi akali yango sukusa nyuope pyuo kareyami. Wambu peparae awa awa pyuo kapa serami lao nakama isare rao karalu karenge dokona randa nyuo karaminyi.
JUD 1:8 Dokonako ingyuo akali dusipame kombeyame kopetame pilyamosa nakama rangena yango dokona kokwa soo pyuo karenge. Karapala nakama Anatunya pii lengenyili pyuo laa nao baa mupwa daaŋa lao suu pyao karaminyi. Dopako pyuo nakamame yake pandana kamongo dupwa kando kilya kando lao karaminyiko.
JUD 1:9 Aŋala Maikele baame aŋala mupwa ingyuo kareyamopape dopa pyuo pii naya. Baapa Satanepa apimi Mosesena yongo nyera lao apiyanda piyambinyi dokopa Maikeleme Satane kando kilya kando laa nao mee Kamongome emba kando lara doko iki leya.
JUD 1:10 Leyamopape akali dusipame yulu see nalyaminyi dokona lao giyalya giyana pyuo karaminyi. Mena rae lenge mana keyange nyii nao mee kamenge karenge kata dokona moko minyuo kokwa soo nakama isa pelyaminyi.
JUD 1:11 Anemapwae nakama randa andake nyerami. Akali Kene piyamuli pyuo moko minyuo piyami. Belameme kana monena reke lao yulu koo piyamo dopaleko pyuo karaminyi. Pyuo dokopa akali Korame sipuro kamba leyamo doko suu pyao nakama dopako piyami dokona nakama kwao peyami.
JUD 1:12 Nakama Elyambu Pinginya wambu yalya kando nenge nenge dokopa nakama ala lao rale male lao moŋokyaŋe soo karenge dokopa nakamana yalya kandenge renge doko kokwa sinyi nembenge. Nakama rangena iki lao suu pingi. Dopa pingi dokome nakama kopa porambaiyeme suu lao lanyuo paelyamopa apu angi epa nange dopale ingyuo pyuo karenge. Nakama isa jingi lyii nange dopale ingyuo apu epenge yuu gii pyaka silyamopape nakama isa pingya rakilyaminyipa repeta yando nao otenge dopale ingingi.
JUD 1:13 Nakamana yulu koo wakasa piminyi dokome ipwa kota jingi kasokole minyingi make make manjo epenge dopale ingyuo panelyamo. Bui mee yakena paeyo karenge dupwa Anatumi iminjingi panda koko karalu kararami lao nembara dopale ingyuo karaminyi.
JUD 1:14 Yuu wamba dokopa Inoko baa Atamena para piyamo dokona pao yanda ipingi ingyuo kareya dokome akali yulu koo pilyaminyi dusipana lao nolako lao dopa leya. Selapape. Kamongome banya aŋala poo pyasi ama malu (1,000) role pyapeta lanyuo epara.
JUD 1:15 Wambu Anatu suu pyaa nao koo pyuo kamba letaminyi dupwa keta Kamongome nakamana koo dokona kote lara. Lapala dokopa akali dusipa Anatu dokona lao pii koo andake leyaminyi dokona randa maiyuo larako, Inokome leya.
JUD 1:16 Akali dusipame yuu peparae wambu yango palyuo mumu lao karaminyi. Nakama rangena kingi ketae pyambuo mupwa karamwali lao suu pyao karaminyi dokona nakamame wambu menge dupwa kando panga soo lao karaminyi.
JUD 1:17 Nambana puu minyingi dupwa, nakama pii laro dake suu pyalapape. Namwana Kamongo Yesu Koraisana aposele akali dupwame wamba langiyami dupwa suu pyalapapeko.
JUD 1:18 Nakamame nakama langyuo, Yuu gii lumwa piramo dokopa akali lapo nakama kando giyalya giyana pyuo lao eparami. Lao eparami akali dupwa nakama rangena suu pingi koo suu pyaraminyili pyuo pyuo kararami.
JUD 1:19 Akali dupwame Elyambu Pingi doko kando lili pinyi pyambuo pyuo karaminyi. Nakama Imambu Poo Pyasinya kata moko minya nao nakama rangena suu pinginya iki suu pyao moko minyarami lyakande.
JUD 1:20 Dopa piraminyipape nakamba nambana puu minyingi dupwa nakamana Kurisene yulu yapasi doko kaeya nao Imambunya nenge nao ando karalapape. Imambu Poo Pyasinya porainya renge nyepala ateŋa lalapape.
JUD 1:21 Namwana Kamongo Yesu Koraisa banya sakao nyiso karenge renge dokome lete karalu karenge renge jera dokona isaro karo Anatunya mona retenge renge sukusa dokona rekya lao neta paa napala karalapape.
JUD 1:22 Wambu lapo Kurisene yulu dokona suu pingi lamana palyuo kareyami kande doko nakama kondo sakao anjiki pyuo nyiso karalapape.
JUD 1:23 Isare panda pasarami dokona wambo paa nana lao wambo lete pyuo nyelapape. Anatu poraiyuo lao suu pyao pakapala menge dupwa kondo sakao anjiki pyuo karalapape. Nakamana kepo pingi yulu pilyaminyi dokome nakamana komau karo piso kwao pelyamo. Yulu doko yanda pimwaiyuo karalapape.
JUD 1:24 Anatumi nakama koo keta pali nalapale lao kyawa minyara. Banya neta renge yulu dokona nakama nyuo karapala neta ranyi piso rae mainyi pyambwara. Dokona lao baa lakandamanale.
JUD 1:25 Namwana Anatu mendaki baa lete wai pyao nyingi doko baa kiŋi ingyapala yanga paupau lenge rengepe kai wambowape dakepape dee yuu rakyamepe renge keyange dusipa Kamongo Yesu Koraisa keta sulu sinya, doko kinyi.
REV 1:1 Anatumi Yesu Koraisa dokona pii polo lamaiyamo doko dakena pyasi palamo. Yulu oo repeta pyaka selana pilyamo dupwa Koraisa banya yulu pyakamaingi wambu wambo lasaka pinyale lao Anatumi baa lamaiya. Koraisame banya yulu akali Jone soo karena lao banya aŋala mende lamaiyala pena leya.
REV 1:2 Namba Joneme Anatunya pii repa repa dokonape dee Yesu Koraisana pii renge kinyi rolae palamo dokonape kandapala pyao reteyo.
REV 1:3 Yuu gii pyaka seramo doko repe ingilyamo dokona pii pyasi buku dakena yaka larami dupwa rae mairami. Pii polo lenge dusipa sepala warombo serami dupwa rae mairamiko.
REV 1:4 Namba Jone, Elyambu Pingi yanda ipingi nyepo yuu Esia dokona pepa pyao jilyu. Anatu baa epapu karamo doko wambo kareyako enakana kararako dokope dee imambu yanda ipingi nyepo banya petenge isa repeta dokona karaminyi dupwape dee Yesu Koraisa pii rolae lao karenge doko baa kumungi dupwana kanda soo lete epapala, isa akali kamongo dupwa rapu pyuo karenge dokope dusipana mona keyange palyuo ipingi rengepe mona kyuu lao singi rengepe nakama keta paliramopa karamili yaka lao suu pilyu. Yesu namwa mona reteyamo dokona ranjama kulimbuo joo kumuyamo dokome, namwana koo dupwa rekya lanyi nembakaya. Banya isingi pandana namwa rapu pingi inginyi pyambuo Rakange Anatu lakandalapa langiya. Baa iki mupwa ingyaramopa neta renge yulu doko baa keta palu palena, doko kinyi.
REV 1:7 Kandalapape, Baa kopa dokona role pyapeta epelyamo. Enda akalipi peparae baa kandarami. Wambu baa arekyuo piyami dupwame kandaramiyoko. Wambu peparae baa suu pyao ee lao kondarami. Dopako pyuo pira, doko kinyi.
REV 1:8 Kamongo Anatumi Wakasa, Namba yuu ingya ingya ingyuo karo pao lumwa pingi ingyuo kararo letamo. Baa wakasa ingyapala wamba kareya, epapu karamo rengya kararako.
REV 1:9 Namba Jone. Yesupa pakao karo dokome nakamana yangonge ingyuo karo. Namba nakama pipya Anatunya isingi yulu dokona karo randa nyepalape maka nao pyuo karamano. Anatunya pii dupwa polo lamaiyuo, dee Yesunya kingi lao kareyosa dokona yuu kingi Patamosa lenge ipwa kotana sukusa singi dokona nembeyami.
REV 1:10 Namba dokona karo Kamongona yuu gii sande andake dokopa Imambu dokome namba keta maralyiya. Maralyiyamo dokopa mata siyamo dorena pii andake bikuli pii lele lao leyamo siyu dokona
REV 1:11 dopa pyuo langiya. Emba kandarene dupwa pepana pyapala Elyambu Pingi yanda ipingi nyepo dusipana mairi. Mende yuu Epesasa lenge, mende Semena, mende Pekamama, mende Tayataira, mende Satisa, mende Pilatepia, mende Leotosia lenge yuu dusipana mairi leya.
REV 1:12 Leyamo doko sepala nambame apimi lao karape lao kandalana kapu kyiyu. Kapu kyepala bange kendapuli minyingi golome wasisi yanda ipingi nyepo kareyamo kandeyo.
REV 1:13 Sukusa dokona akalinya ikinyingi yalende ingyuo kareyamopa komau londendeme kimbu dokona sinjimu polo karena lao wapupala, dee banya puingi rengeta dokona golo marapu mende puu pisaro kareya.
REV 1:14 Banya kyawasi ama kyewa lapala maa bilima kapa ingiya. Banya lenge dolapo isare bui kakai pyuo renge dopale rao kareya.
REV 1:15 Banya kimbu dolapo kapa lepolepo wakasa pingi dopale ingiya. Banya pii leyamo dokopa ipwa jeraeŋe pyao peya.
REV 1:16 Banya kingi rolae dokome bui yanda ipingi nyepo minyapala kambu dokona wua gela paki pakipi nenge karenge doko minyaro kareya. Banya lenge kambu doko andowai korakamana neta andake renge dopale ingyuo peya.
REV 1:17 Nambame baa kandeyo dokopa banya kimbu dokona pao palipala kumasi ingyuo siyu. Dokopa baame banya kingi rolae dokome namba keta retapala langiya. Emba paka napipi. Namba wambowana karapala pao lumwa pingi ingyuo karo.
REV 1:18 Namba lete karenge akali ingyuo karo. Kanda. Namba kumuya kande doko nambame mee lete karo puu paro ingilyamo. Wambu kumaraminyipape Satane panda paraminyipape dolapona kii namba keta palamo.
REV 1:19 Kandalene dupwape dakepale kando karene dupwape rengya pyaka seramo dupwape pepana pyao retape.
REV 1:20 Nambame kingi rolae dokome bui yanda ipingi nyepo minyaro karo dokonape dee kendapuli minyingi bange golome wasisi yanda ipingi nyepo dokonape renge andake yalu pisi silyamo dokona ingyuo polo langiru. Doko bui yanda ipingi dusipa Elyambu Pingi yanda ipingi nyepowana aŋala rapu pyuo karenge dokona makande pyuo minyapusa pilyamo. Dee kendapuli minyingi bange yanda ipingi dupwa Elyambu Pingi yanda ipingi nyepo dokona makande pyuo pilyamo.
REV 2:1 Aŋala Epesasa Elyambu Pingi rapu pyuo karamo dokona larono dupwa pepa pyao maipi doko, Mendeme bui yanda ipingi nyepo kingi rolaerena minyaro karo, kendapuli minyingi bange golo wasisi yanda ipingi nyepo rao singi sukusa dupwana papyuo karamo dokome dopa letamo.
REV 2:2 Nakamame yulu andake pyuo karapala maka nao waa waa lao pyuo karaminyi doko nambame kandelyo. Nakama wambu koo pyuo karaminyi dupwa kando epe nasepala lapome nakama poropeta akali ingyuo karamano leyami dupwa kambuyanda pyuo kando siyami. Kambuyanda pyuo sepala nakamba kyambo lenge dopale ingiyasa kaeyami kande doko namba silyu.
REV 2:3 Nambana kingi dokona lao randa nyepala waa waa lao maka nao pyuo karaminyi doko namba silyu. Dopa pyuo karaminyipape nakama keta pii mende palamo doko wamba kanda soo mona reteyaminyi doko kaeyapala epapu mende suu pyao karaminyi silyu. Yulu doo wakasa palyuo pyuo kareyami doko epapu isa pelyamo dokona poraiyuo masalapape. Kondapala mona kapu kyuo wamba yulu piyaminyili pyuo dee sipurao pyuo karalapape. Dopa pyuo pii narami ramo namba waiya lao epapala nakamana kendapuli minyingi bange doko nyuo nembaro ingilyamo.
REV 2:6 Dee nakamana yulu mende kapa palamo doko Nikolatiya wambu namba rae mai nalyo dupwa nakamame rae mai nalyaminyiko.
REV 2:7 Imambu dokome Elyambu Pingi wambu dupwana pii lamailyamo dupwa nakama kale kata singi ramo dokome selapa. Anamasi minyarami dupwa letena renge palenge isa doko Anatunya ee sukusa karamo dokona nao karena laro letamo. Ote.
REV 2:8 Aŋala yuu Semena Elyambu Pingi rapu pyuo karamo dokona dopa pyuo pepa pyao maipi. Wambowana karapala pao dee lumwa pira dokopa kararako baa kumapala dee lopo epeyamo dokome dopa letamo.
REV 2:9 Nakama randa nao isa bange minya napala pendewa ingyuo karaminyipape mendena kamongo ingyapyamo karaminyi doko namba silyu. Wambu lapo Juu wambu karamano letaminyi dupwame nakamana kingi isa palyako lao karaminyi dupwa Juu wambu angi daa, dalapo Satane ralape ingyuo petaminyi.
REV 2:10 Randa eparamo dupwana paka nalapape. Imambu koo baame nakama makande pyuo karapusi anda dokona nyuo pyambwaramopa yuu gii akalisa randa nao palirami. Nakama kapa kumarama lao suu pyapala mona kumapala kaeya nao pyuoko kararami ramo nambame kyawa rarange letena renge palenge doko nakama keta rombo palyuo jero.
REV 2:11 Imambu dokome Elyambu Pingi wambu dupwana pii lamailyamo dupwa nakama kale kata singi ramo dokome kale yukupala selapape. Anamasi minyarami dupwa kumungi renge lapo pyuo dokona nakama keta mende pii nara. Ote.
REV 2:12 Aŋala Pekamama Elyambu Pingi wambu rapu pyuo karamo dokona pii larono dupwa pepa pyao maipi doko, Mendeme wua gela paki pakipi nenge karenge minyaro karamo baa dopa letamo.
REV 2:13 Nakama Satane baa angi karenge panda dokona palaminyi doko namba silyu. Dopa pipyamo karaminyipape nambana kingi yaki nyii nalyaminyi. Dee nambana waili pii rolae minyuo karenge akali Andipasa lenge nyepala Satane karenge panda dokona pyao kumakayaminyi kandapala yuu gii dusipana namba mona reto yaki nyii nayamiko.
REV 2:14 Dopa pyuo karaminyipape pii kuki nakama keta palamo. Doko nakama lapome akali Belame lenge dokona pii minyaro karaminyi. Belame baame akali mende Beleke lenge doko kando semango loma soo mena kuiyuo maingi minju narami dokope pamuku yulu dokope Isaraele wambu dupwa lasaka pinya lao mana lamaiya akali dokosa leto.
REV 2:15 Dee nakama lapo karaminyi dupwa Nikolatiya wambunya mana wakale dupwa minyaro karaminyi.
REV 2:16 Mona kapu kyelapape. Dopa pyuo pii narami ramo doko nambana kambu dokome wua gelaŋa minyuo nakamba waiya lao pyala eparo.
REV 2:17 Kale kata singi ramo dokome Imambumi Elyambu Pingi dokona pii dake lamailyamo doko selapa. Anamasi minyarami dupwa keta nenge myana lengende yalu pyuo silyamo dokona lapo maiyuo dee kana neta kapa yalende kingi alowa pyuo enenge pyasi paliramo mendepe mairu. Kingi pyasi paliramo doko menge dupwa see naraminyipa akali range nyeramo dokome iki soo gisara. Ote.
REV 2:18 Aŋala Tayataira Elyambu Pingi wambu rapu pyuo karamo dokona dopa pyuo pepa pyao maipi. Anatunya Ikinyingi dokona lenge dolapo isare kekenge dopale rao karo, dee kimbu dolapo kapa lepolepo pingi dopale ingyuo karamo baa dopa letamo.
REV 2:19 Nakamana yulu dupwa soo karo. Nakama mona retao yulu kaeya nao, maka nao waa waa lao pyuo karaminyi. Wamba yulu keyange ingyuo pyuo kareyami dokoko suu pyao kamame konda pyuo pyuo karaminyi.
REV 2:20 Dopa pyuo pyuo kareyaminyipape pii mende nakama keta palamo. Doko nakama enda Jesapele lenge doko baa namba poropeta enda ingyuo peto letamo doko baa keta mende laa nalyaminyi. Enda baame nambana wambu dupwa pamuku yulu dupwape dee mena loma soo kuiyuo maingi dupwa nena lao kunji kunji pyao lamaiyuo petamo.
REV 2:21 Nambame baa mona kapu kyerape lao isaro kareyonopa enda baame banya pamuku yulu mona kenda napala pyuoko petamo.
REV 2:22 Dokona lao baapa banya kepo pyuo nyingi akali dupwape pipa mona kapu kyaa narami ramo doko pyuo pisirami mare dokona randa andake mairu.
REV 2:23 Enda banya wane wanakepe pyao kumakaro dokopa Elyambu Pingi wambu peparae nambame wambunya suu pingi mona anda dupwa kando soo giso karo doko serami. Sepala nambame isa wambu yulu piraminyili pyuo manda manjo kingi kisaro doko serami.
REV 2:24 Dopa pyuo pironopa nakama Tayataira wambu lapo dupwa Satanena yulu koo yalu pisi silyamo dupwa mana nyii nayamisa nakama keta randa mende jii nara.
REV 2:25 Yulu wambo kando nyiyami dupwa kaeya nao pyuo karo pao namba eparono dokona ingyara.
REV 2:26 Lapo koo dupwa kalya nyuo anamasi minyapala laronyili pyuo pyuo pao yuu gii lumwa piramopa kararami dupwa rara wakale dupwa nakambame rapu pyuo karena laro. Nambana Rakane porainya renge andake namba keta jiyamo dupwa nyepala nakama maironopa
REV 2:27 ane kusape porai nyepala pee warame wasisi dupwa pyao inji ranji penge dokona palyuo nakama rara wakale dupwa iso karena laro.
REV 2:28 Yuu yangama yangama yakena bui andake yoyo lenge nakama keta mairu. Bui yoyo lenge doko bui doloma nyuo enakaenge doko suu pyao nakama mupwa wakasa ingyuo parami dokonasa letamo.
REV 2:29 Kale kata singi ramo dokome Imambumi Elyambu Pingi dupwana pii lamailyamo dupwa kale yukupala selapape. Ote.
REV 3:1 Aŋala yuu Satisa Elyambu Pingi wambu rapu pyuo karamo dokona dopa pyuo pepa pyao maipi. Mendeme Anatunya Imambu yanda ipingi nyepo dee bui yanda ipingi nyepo minyaro karamo dokome baa dopa letamo. Nambame nakamba pyuo karaminyi dupwa soo gisilyu. Nakama lete karamanoŋo lao karaminyipape mee kumasi dalapo romo romo pyuo karamisa pilyamo leto.
REV 3:2 Lenge rao kandao karalapa. Nakamana yulu repetale kumuo pelyamo dupwa rangeme minyalyuo lete nyelapape. Nakamana yulu dupwa Anatunya lenge kambu dokona kapa ingyuo paa napyamo kandelyo.
REV 3:3 Dokona lao mona kapu kyepala yulu mana langiyami kande dusipa yaki nyii nao minyaro karalapape. Lenge rao kara narami ramo dokopa namba waa nenge akali dopale ingyuo elya kalo eparono yuu gii doko see nao kararami lyakande.
REV 3:4 Dopa pyuo lapunupape yuu Satisa dokona wambu lapona komau karo pisa napyamosa nakamana kingi doko isa paa nalyamo. Dupwa kapa ingyapyamopa nambamoo pipya komau kakepame dupwa wapwaro kararami.
REV 3:5 Doko anamasi minyarami dupwa dopa pyuo komau kakepame wapwaro kararami dokopa nambame nakamana kingi lete palenge buku dokona sinya lapala kwuanyi nemba naro. Rakanemoo banya aŋala dupwapena lenge kambu dokona nambanaŋa lao nakamana kingi doko pano laro.
REV 3:6 Kale kata singi ramo dokome Imambumi pii Elyambu Pingi dupwana lamailyamo dupwa kale yukupala selapape. Ote.
REV 3:7 Aŋala Pilatepia Elyambu Pingi wambu rapu pyuo karamo dokona dopa pyuo pepa pyao maipi. Mende poo pyasi rolae pyuo karenge baame Dapitinya kii ikyane minyaro karo dokome lumbwaramo dokopa mendeme upi laa nao dee upi laramo dokopa mendeme lumbwa naoko pirami dopa letamo.
REV 3:8 Nakamana yulu pyuo karenge dupwa namba kandelyo. Kandalapa. Nakamana kambu dowa lumbwakapu doko mendeme upi larami ingya nalyamo. Nakama kamame porai ingyuo kara nayaminyiko doŋo nambana pii leyonuli pyuo pyuo karapala nambana kingi doko yaki nyii nalyaminyi.
REV 3:9 Lapome kyambo lao Juu wambuŋu letaminyi dupwa nakamba Juu wambu angi ingya napala Satanena wambu ingyuo petaminyi. Kandalapa. Nakamba nakamana kimbu yukuna dorena pongwa naro petena laronopa nakama nambana arapu dokona karaminyi doko soo gisarami.
REV 3:10 Nambana pii dupwa waa waa lao maka nao minyaro karaminyi dokona randa andake yuu muu dupwana wambu peparae makande pyaa epara gii doko pyaka seramo dokopa nakama keta mende ingya nara.
REV 3:11 Namba waiya lao eparo ingilyamo dokona lao nakama renge keyange kando nyiyami dupwa poraiyuo minyaro karalapape. Dokopa nakama keta keyangena renge palamo dupwa isa pakara ingya nalyamo.
REV 3:12 Anamasi minyarami dupwa Anatunya tembole andana isa pinginya ingili lao karalu karalapa laro. Nakama dopa pyuo kararami dokopa namba Anatunya kingi nakama keta pyao palyaro. Dee Anatunya panda dokona yuu kingi Jerusaleme panda enenge yake panda dulunya rae Anatu baa lupyuo jeramo dokope dee nambana kingi enenge doko alowa pyuo pyao palyuo piru leto.
REV 3:13 Kale kata singi ramo dokome Imambumi pii Elyambu Pingi dupwana lamailyamo dupwa kale yukupala selapape. Ote.
REV 3:14 Aŋala Leotosia Elyambu Pingi wambu rapu pyuo karamo dokona dopa pyuo pepa pyao maipi. Mendeme Kinyinya Rengepe Anatunya pii rolae nembo lao kinyi doko iki lengepe Antunya wasiyamo dupwana renge kuiyuo kanda siyamo dokope baa dopa letamo.
REV 3:15 Nambame nakamana yulu dupwa kando silyu. Nakambana yulu usa kanya kanya manda raa nao isasa pii nao pyuo pelyaminyi. Yulu poraiyuo pyuo kararami ramo doko pyuo karo, dee kaeyarami ramo doko yaki nyepala kaeyamili lao suu pilyu.
REV 3:16 Nakama yulu mee anda kanya pyuo karaminyi dokona nambame nakama kando ipyuo miku kasarolyamo.
REV 3:17 Nakamame, Namwa kamongo ingyuo bange malu retapala aeya napyamo karamano, laminyipape nakama koorale ingyuo, koo keta palyuo pendewa pupyamo karaminyi. Lenge raa nao komau asingi wapuo karamano lao see nalyamisi?
REV 3:18 Dokona lao kana golo yapasipi lao kandalana isarena yango makande pyuo kandasi namba reto karo dupwana lapo ropo pyao nyelapape. Dopa pyuo nyeraminyi dokopana angi kamongo ingyuo parami. Dee nakama komau kakepame lapo nyepala nakamana elyuo papara karaminyi dokona wapurami. Dopako pyuo mamba lapo ropo pyao jeronopa lenge pono lao rao kararami dokona lao kisalapape.
REV 3:19 Namba wamba mona retenge dupwa pyalana pyuo mana lamaingi doko suu pyao nakama mona kapu kyepala sinyi pyuo karalapape.
REV 3:20 Selapape. Nambame nakamana anda kambu dowa dokona kapakapa pyuo karo. Wambu mendeme sepala kambu dowa lumbwaramo dokopa namba andakare kolando eparonopa nakama pipya yalya kando nenge nao pisarama.
REV 3:21 Nambame anamasi minyapala Rakanepa role pyao banya petenge isa andakena peto dokona ingyuo nakama anamasi minyarami dupwame nambapa petenge andake dokona role pyao petena laro ingilyamo.
REV 3:22 Kale kata singi ramo dokome Imambumi Elyambu Pingi dupwana pii lamailyamo dupwa kale yukupala selapape. Ote.
REV 4:1 Dokopa pii repa repa wakale mende piyamo kandeyo. Yake panda dorena kambu dowa mende lumbwaro kareyamo kandeyo. Kandeyo dokona pii romende bikuli pii ingiyamo wamba siyu doko dee kambako epo, Emba pulyuo ipu. Eparenepa yulu enakana pirami dupwa lasaka piruwale leya.
REV 4:2 Leyamopa aopa Imambumi namba porainyi pyambuya. Dopa piya dokopa yake pandana kiŋinya petenge isa andake dokona mendali peteyamo kandeyo.
REV 4:3 Banya lenge kambu kana rara wakale wakale pyasalya pyasana pisi kone keyange yalende yanga paupau lasi ingiya. Banya petenge dokona kau puiya rolepo ralepo rengende makeya pyuo siya.
REV 4:4 Kiŋinya petenge isa andake dokona awali lao petenge wakale akalisa lama dee ipisu kisima (24) nyuo kako piyami. Petenge isa dupwana akali wambake 24 peteyamiko. Nakamana komau dupwa kyewa lengeme wapuwa kyawa rarange dupwa kana golo wasisimi pyuo piyami.
REV 4:5 Petenge isa andake dokona piso yuu pele pipala yuu gala lao rali piya. Dee kendapuli yanda ipingi nyepo mendasipa Anatunya imambu yanda ipingi nyepoko dokona makande pyuo rao siya.
REV 4:6 Petenge isa andake siyamo dae wangu ipwa pete ketapa yale kyakapae mende siya. Dee petenge dokona awali lao lee renge bange kisima mende nakamana kyawa dupwana lenge malu rao buu minyiya.
REV 4:7 Lee renge bange mende doko mena laene yalende kareya. Lapo pyuo doko bulamakao ikyane yalende kareya. Repo doko wambunya lenge kambu isa komba pyao kareya. Kisima doko yaka kambende bii lao pele leya.
REV 4:8 Lee renge bange kisima dupwa papake yanda ipingi nyepo kareta matarena andarenape dokona lenge yuu sero kareya. Nakama kukwa korakamape imambu sepa nao kenane dopa pyuo pyao karalu karenge. Poo pyasi, poo pyasi, poo pyasi Porai Wakasa Kamongo Anatu baa wamba kareya epapu karamo rengya kararako.
REV 4:9 Isa petenge andake dokona petelyamopa kando lee renge bange kisima dupwame baa karalu karenge dokona lao kenane keyange dupwa lakandao pingi.
REV 4:10 Pyao karenge dokopa akali wambake 24 dupwame baa petenge dokona petelyamopa lenge kambu dorena pao palipala baa karalu karenge dokona lao baa ketae pyambuo lakandao karenge. Ruli kwua pisingi doko suu pyao nakamana kyawa rarange keyange dupwa nyepala banya lenge kambu silyamo dokona retenge. Retapala kenane dopa pyuo pingi.
REV 4:11 Namwana Kamongo Anatu, nyilyingi yulu dupwa emba keta kapa nyerenepa embame bange peparae wasingi. Dokona namwa emba ketae pyambuo kapa lakandapenge ingilyamo. Embame bange peparae pyuo wasii. Emba rangeko suu piinyili pyuo pyuo ingyapala minyaro karene.
REV 5:1 Nambame mendali kingi rolaerename pepa rongo pisi reto peteyamo kandeyo. Dokona paki pakipi laparaena pepa pyasi dokona bange porai isa roo dopale yanda ipingi nyepowame nyuo upi lao rambu lao pisiya.
REV 5:2 Namba kandeyono dokopa aŋala ama poraindeme pii romende lapala, Akali api keyangendeme isa roo yanda ipingi nyepowame pepa rongo pisi upi leyami dupwa kapa pyao lumbanyi nembarase? leya.
REV 5:3 Doko yake dokona mendemepe isa yuunya akali mendemepe yuu isa donorena akali mendemepe angi doko lumbwapala kandarami ingya naya.
REV 5:4 Dokopa nambame pepa rongo pisi doko mendeme kapa pyuo lumbuo kando yaka lao pii narami doko sepala ee andake lao peteyo.
REV 5:5 Ee lao peteyonosa akali wambake mendeme namba kando, Ee laa kae. Dapitinya rora ambusipi dokona pinginya kene pyao epeya Jutana rara dokona laene dokome anamasi minyapala isa roo pyakero upi leyami dupwa nyuo lumbunyi nembapala epeya kapa kandare leya.
REV 5:6 Dopa leyamo dokopa Sipisipi Ikyane pyasi yalende, petenge isa andake suku dokona kareyamopa lee renge kisimape dee wambake dupwapeme nyuo kako pyao kareyami. Anatunya imambu yanda ipingi nyepo yuu muu dupwana mapanyi peeyamo dokona makande minyuo Sipisipi dokona kyawana nenge potemenge yanda ipingi nyepo karara, dee lenge yanda ipingi nyepoko rao siya.
REV 5:7 Dokopa Sipisipi Ikyane dokome papala pepa rongo pisi akali dokome petenge isa andake dokona kingi rolaerename minyaro peteyamo doko nyiya.
REV 5:8 Buku nyiyamo dokopa lee renge bange kisima dusipape dee akali wambake 24 dupwape Sipisipi Ikyane kando wapambu pii pyaro peteyami. Peteyami dokopa akali wambake dupwa mendaki mendaki lao rambyalu minyaro piso dee pere warake golome wasisi Kurisene wambunya ateŋa lenge dopale makande minyuo kyaa keyange piyamo minyaro peteyami piso
REV 5:9 kenane enenge mende dopa lao piyami. Embame iki kapa ingyapyamopa buku rongo pisi doko nyepala bange porai upi laro palenge dupwa kapa rokwanyi nembare ingilyamo. Emba pyao kumakayamisa embena ranjama dokome wambu dupwa Anatunya lao ropo pyao nyepala kinyi rara wakale wakalepe pii wakale ingyuo lengepe dee wambu rara peparae Anatunya arapunya nyuo palyii.
REV 5:10 Embame doloma Anatunya yulu pyakamirami lao rapu pinginya rara inginyi pyambuinyipa nakama dupwame yuunya iso kararami.
REV 5:11 Nambame dee kamba lenge nyuo kandeyono dokopa aŋala yanda kambunde kapa yaka laa narami ingya nayamopa kenane pyao kareyaminyi siyu. Petenge dokona lee renge kisimape wambake lapo pipa karo walya papalu pyuo
REV 5:12 kenane rekyae lao piyami pyao, Sipisipi Ikyane piyami doko angingyuo karamo. Baa keta porainya rengepe singinya rengepe kamongonge dupwape dee porakai renge palengepe ketae pyambuo yanga paupau lao pingi dupwape silyamo dokona lao lakandapenge ingilyamo.
REV 5:13 Dokopa nambame siyunupa bange wasisi yakena yuunyape dee yuu dokona isa donorena dee ipwa kotana singipi peparaeme kenane pyao dopa pyuo leyami. Kiŋinya petenge isa andake petamo dokona dee Sipisipi Ikyane dokonape yuu peparae lakandao kingi ketae pyambwaraminyi kararambi ingilyamo. Nakamba keta yanga paupau lao porainya rengepe sulu sinya.
REV 5:14 Dokopa lee renge bange kisima dupwa kinyi kapa leyami. Dokopa akali wambake dupwa wapambu pii pyapala mona kando peteyami.
REV 6:1 Nambame Sipisipi Ikyane dokome pepa rongo pisi dokona isa roome upi lao rambu lasi mupwa doko rekya leyamo doko kandeyo. Kandeyono dokopa lee renge bange kisima dokona mendeme banya pii doko yuu gala lele lapala lao, Emba ipu leya.
REV 6:2 Dokopa mena ose kakepame mendena akalinde yanda isa minyaro peteyamo kandeyo. Doko kyawa rarange keyange yanda pyuo wambu anamasi minyilyamosa maingi dopalende piya. Baame wambu malu anamasi minyuo puu pao para ingiya.
REV 6:3 Dee Sipisipi Ikyane dokome isa roome lapo pyuo upi lao rambu lasi doko nyuo rekya lanyi nembeya. Nembeyamo siyunu dokopa lee renge bange lapo pyuo dokome ingyuo, Emba ipu leya.
REV 6:4 Leyamopa mena ose kone mende potemo epeyamo kandeyo. Akali osena peteyamo dokome isa yuunya akali nyuo mapinyi sero yango sukusa pyalya pyana pyuo pyuo kararami renge doko baa keta paleya. Dokopa baa wua gela reekonde minyaro kareya.
REV 6:5 Dee enakana Sipisipi Ikyane dokome pepa upi leyami bange repome doko rekya leyamo dokopa nambame siyunupa lee renge bange repo dokome lao, Emba ipu leya. Kandeyono dokopa ose pupuri mende kareya. Dokona peteyamo akali dokome sikyali pingi doko minyaro peteya.
REV 6:6 Bange lee renge kisima kareyami dokona mendakindeme ingyuo pii dopa pyuo leya. Yuu gii mendaki dokona yulu pirami dokona lao mee nenge yando kenapa jingi sanapee mendaki yole ingyuo mokwa soo mairi. Dee yuu lapo bale jingi doko sanapee rema mokwa soo mairi. Nenge keyangepe waene ipwangepe wele ipwangepe kokwa see nalapape leya.
REV 6:7 Dee Sipisipi Ikyane dokome isa roo kisimame upi lao rambu lasi doko rekya lanyi nembeya. Dokopa lee renge bange kisima dokome, Ipu leya.
REV 6:8 Namba kandeyono dokopa ose kangama nasindena akali peteyamo dokona kingi kumasi lengende piso epeya. Dokopa akali mende Satane panda lengendeme peteta epeya. Nakamba yuu muu peparae doko kunjo kisima pipala liti mendaki dokona iso kararambi ingiya. Yuu liti dokona wambu dupwa wua gelame pyao, lopo maiyuo, anga ikyane kiso maiyuo, mena rakaiyeme pyao nena lao pirami renge dopale nakama keta paleya.
REV 6:9 Sipisipi Ikyane dokome isa roome upi lao rambu lasi kingi paki doko rekya lanyi nembeya. Dokopa wambu lapo Anatunya pii dokona kaeya nao poraiyuo leyamisa letaminyi lapala pyao kumasiyami dupwana imambu dupwa Anatu rendamu pingi kiso maingi kana pyare isarena siyaminyi kandeyo.
REV 6:10 Nakama pii kyakale rekyae koo lao lapala dopa leyami. Rolo Pingi Porakai Poo Pyasi Kamongo, embame yuu gii akipare epo paparamopa wambu namwa pyao kumakayami dupwa kote lao randa mairiŋi lao iso kararese? leyami.
REV 6:11 Dokopa nakama mendaki mendaki lao komau kakepame maipala dopa pyuo lamaiya. Nakama pyao kumakayami kande doko dopako pyuo nakamana yangonge dee nakama role pyao yulu mendare pingi dupwa pyaramiko ingisi silyamo dokona pyapena lao iso karalapape leya.
REV 6:12 Sipisipi Ikyane dokome isa roome pepa upi lasi pakinyamange doko nyuo lumbuya. Dokona dee kandeyono dokopa yuusili andake minyiya. Dokopa neta doko alowa pyuo nyuu byake rokwasi wambarae pupuri dopale ingiya. Dee kana doko kone pyuo ranjama dopale ingiya.
REV 6:13 Bui malu dupwa onya jingi puu napa nalyamo porambaiye minyuo kondanyi isa peenge dopale ingyuo peya.
REV 6:14 Yake doko pepa yoko dopale ingyuo kao pele pele lao peyamo dokopa yuu kyau, dee yuu aelende ipwa kota sukusa singi dupwape mee ingyuo rali piya.
REV 6:15 Dokopa yuunya kiŋi dee kingi ketae penge dupwape akali yanda singi aminya rapu pingipi kamongope dee akali poraipi karapusi akali meepe dupwa kana andape dee yuu kyaunya kana waingi dupwanape yalu piyami.
REV 6:16 Pipala nakamame yuu kyau dee kana dupwape kando lamaiyuo, Nakambame lakao epo Anatu banya Kiŋinya petenge andake dokona pisipyamopa dee mena Sipisipi Ikyane kote lao randa jelana pilyamo dolapona yambe pyao nee pyakalapape leyami.
REV 6:17 Imbu singi neta nyingi yuu gii doko pyaka soo kaelyamo dokopa api mendeme kapa poraiyuo kararase? leyaminyi siyu.
REV 7:1 Dopa pepeyamopa aŋala kisima yuu pinjingi kisimana roya kareyaminyi kandeyo. Isa yuu ipwa kota isape dupwana poo lao paa nana lapala porambaiye dokona pyapi lao kareyami.
REV 7:2 Dokopa dee neta pyakaenge dorena aŋala mende Anatumi banya lao kamu kepeyamo epeya. Epo aŋala kisima yuupi ipwa kotape kwuanyi nembarami lao porainya renge maiyamo dupwa kando dopa lao kyakale poraiyuo kaeyo lao epeya.
REV 7:3 Isa ipwa kota yuupi kokwa sepa nao pao Anatunya yulu pyakamaingi wambu dupwana enamba dupwana banya lao kamu keparamopa dokona ingyuo penale leya.
REV 7:4 Doko nambame Isaraelena rara liti pyuo make nyiyami dupwa wambu ama malu doko 144,000 ingiyamo siyu.
REV 7:5 Jutana rara make nyisi dokona 12,000 ingiya. Dee Urupenana rara make nyisi dokona 12,000 ingiya. Dee Gatena dokona 12,000 ingyuo peya.
REV 7:6 Asana rara dokona 12,000 ingiya. Napatalainya rara dokona 12,000 ingyuo peya. Manasana dokona 12,000.
REV 7:7 Simionena rara dokona 12,000 ingiya. Lipaena doko dopaleko ingiya. Dee Isakana rara 12,000.
REV 7:8 Dee Sepyulanena dokona dopaleko. Josepena doko 12,000. Dee Benjamenena 12,000 make nyisi ingyuo peya.
REV 7:9 Dopa pyuo kandapeyono dokopa wambu ama soo kaeyo, mendeme kapa yaka lao sukusa paa narami dopale kandeyo. Yuu muu peparaenape pii rara wakale wakalepe yanenge rara wakale wakalepe wambu rara wakale wakalepe kiŋinya petenge isa andake siyamo Sipisipi Ikyanena lenge kambu dorena komau kakepame pipala isa bona yoko dupwa lakao eta eta palyuo minyuo kareyami.
REV 7:10 Minyuo karo nakama pii ketae lao, Anatu baa petenge isa andakena petamo dokonape dee Sipisipi Ikyane dokonape nakamba keta namwa lete wai pyao nyingi renge doko palamo leyami.
REV 7:11 Dokopa aŋala peparae, dee lee renge bange kisima dusipape wambake akali dupwape petenge isa andake dokona nyuo sukusa pyambuo roya karapala Anatunya lenge kambu siyamo dokona baapa lao mona kando pangu sepala dopa pyuo leyami.
REV 7:12 Kinyi Anatu lakando ange lao banya kingi ketae pyambwarama ingilyamo. Baa soo gisingi dokome kamame porai renge baa keta palipyamopa neta renge ingyuo pelyamo, doko kinyi.
REV 7:13 Dokopa akali wambake dokona mendeme namba kando, Wambu komau kakepame wapungi dupwa nakama anja rangepe dee nakama apimoose lao piso siya.
REV 7:14 Nambame isingi lao, Kamongo namba see nalyo, embame silinyi leyo. Dokopa baame langyuo, Kurisene wambu randa andake nyiyami. Randa andake nyepala karo Sipisipi Ikyanena ranjama dokome nakamana komau wate pyuo kyewa lapala nyiyamo karaminyi dupwaŋa leya.
REV 7:15 Dopa pyuo peyamo dokona lao nakama kukwa korakamape yaka lao Anatunya petenge isa dokona repeta karo yulu pyakamaingi petenge andakena piso karenge dokome banya arapunya nakama nyuo palyingi.
REV 7:16 Lopangepe ipwa nano pingipi dupwa nakama keta dee pali nara. Dopako pyuo porambaiye pyuo netapeme rakusi rao pii nara.
REV 7:17 Sipisipi Ikyane petenge isa andake dokona karapala baa nakamana rapu pingi ingyuo pelyamo. Baame ipwa guu lete palenge dokona nakama reto karara. Doko Anatumi nakamana ee kwuakamirasa pira leya.
REV 8:1 Sipisipi Ikyane dokome pepa rongo pisi dokona isa roome upi lao rambu lasi yanda ipingi doko rekya lanyi nembeya. Nembeyamo dokopa yake dorena mendasa lyapu laope pii napala koo pyuku pyuku pao yuu mee lama mee siya.
REV 8:2 Enakana kandeyono dokopa aŋala yanda ipingi Anatunya lenge kambu dorena bikuli lenge yanda ipingi maiyaminyi minyaro kareyami.
REV 8:3 Dokopa aŋala mende pee golome wasisi rendamu pingi retenge pere mende lanyuo epapala rendamu pingi bange malupi dee Kurisene wambunya ateŋa lengepe nyuo pyasapala kiso maingi kana pyare doko kiŋinya petenge isa andake repeta siya dokona Anatu kiso maira ingiya.
REV 8:4 Rendamu paleta isare sukwa doko Kurisene wambunya ateŋa dokopa rolae pyapeta aŋala dokome minyaro kareyamopa yake panda Anatunya lenge kambu siya dokona peya.
REV 8:5 Dokopa aŋala doko kiso maingi pyare dokona isare lapo nyepala rendamu pingi penge dokona kisinyi palyiya. Palyapala isa yuunya pyao peeyara aopa yuu gala andake lao yuu pele pipala yuu dupwa yuusili minyiya.
REV 8:6 Dokopa aŋala yanda ipingimi nakama bikuli dupwa nyepala lalana rapa rapa piru kareyami.
REV 8:7 Aŋala mupwa baa banya bikuli leyamo dokopa randake kapa isarepe ranjama pale pale yuu dupwana kulimbuo epeya. Dokopa yuu muu dupwa remasa ingiyamopa liti mende rao oteya. Dee dokona isa kareyamo dupwa reyako. Dee isareme isoko dupwa rao pyalingi nyiya.
REV 8:8 Dokopa aŋala lapo pyuo dokome bikuli leyamopa isareme yuu kyaunya renge dopale ingyalya ingyana pipala ipwa kota sukusa dokona pyao nembeya. Dokopa ipwa kota doko remasa ingiyamopa liti mendaki dokona ranjama ingiyamopa
REV 8:9 lee renge bange dokona siyamo dupwa kumuo oteya. Dee sipu dokona papyuo kareyamo dupwa kokwa sisi siya.
REV 8:10 Aŋala repo pyuo dokome banya bikuli doko leya. Dokopa bui mende kendapuli rele lao yake dokona piso isa pyakao epeya. Epeyamo dokopa ipwa epo penge dupwa liti pyuo remasa ingiyamopa dokona liti mendenape dee ipwa guu dupwanape pyakala papala rao kokwa siya.
REV 8:11 Bui doko imambusa ingyuo (kingi Kau Pingi lenge) dokome ipwana pao paleyamosa ipwa liti pyuo rema dokona mende kau pyuo siya. Kau pyuo kwaese dokona neyami dokopa wambu ama soo kaeyo kumuyami.
REV 8:12 Aŋala kisima doko bikuli leyamo dokopa neta kana dokonape dee bui dupwanape kanya remasa lao rombo pyao liti piyamopa liti mendaki dokona larapu iminjapa piya. Dopako pyuo kukwa doko remasa lao liti piyamopa dokona liti mende iminjo, dee korakama doko dopako piyamopa dokona liti mende iminjo piya.
REV 8:13 Enakana nambame kandeyono dokopa yaka kambe yake dokona bii lao karo pii ama ketae lao, Kwao para, kwao para, isa yuunya palaminyi dupwa randa andake nyerami. Aŋala rema bikuli lapa nami dupwa oo lalana petaminyi dokona kama kwao parami ingyalopyamo leya.
REV 9:1 Aŋala kingi paki ingyuo dokome banya bikuli doko leyamo dokopa bui yakena piso yuunya kondala epeyamo doko kandeyo. Doko baa yuwale mendasa lumwa pii nao soo dono puu pao peya dokona lao kii ikyane retaro kareya.
REV 9:2 Bui baame yuwale kata soo puu penge doko kambu lumbuyamo dokopa dokona piso isare kyau andake kekenge koo kana lokwasu lao rapala pingi dopale epapala dokopa yuwalena sukwa dokome neta kata nyuo yambe pyalu pyao piya.
REV 9:3 Dokopa goemba malu sukwa dokona lupyuo epo popokyalyame pilyamo randa pingi renge porai dopale pale pale epo yuu dupwana siya.
REV 9:4 Baame isa rambipi dee bange wara piso karenge dupwa kokwa see nana leya. Lapala akali nakamana enambana Anatunya make pali nange dupwa iki randa mainya leya.
REV 9:5 Nakamame wambu dusipa pyao kuma see nao kana kingi paki mee randa maiyuo karena leya. Randa doko popokyalyame pilyamo popo pingi dopale ingyuo pinya leya.
REV 9:6 Kana kingi paki dusipana akalimi kumalana kame kungi pyao kararaminyipa kumarami kata mende see nara ingiya.
REV 9:7 Goemba dupwa mena oseme yanda pinya nyuo rapa rapa pipala karelyaminyi karenge dopale ingyuo kareyami. Nakamana ayemba dupwa kana golome kyawa rarange pingi dopale ingiyamopa nakama wambu lenge kambu nyiya.
REV 9:8 Nakamana kyawa dupwa endana kyawasi ingyuo nenge dupwa mena laenena nenge ingyuo piya.
REV 9:9 Nakama kapame wasisi bange dopale kyangalinya pee pipala nakamana papake mena oseme uliuli ipyuo nyilyamopa kili kali koo lao yanda pyalana penge dopale mane mane piya.
REV 9:10 Nakamana konali doko popokyalyana konali dopale ingyuo papala ipwange popo koo pingi paleta dokome kana kingi paki dusipana wambu randa mairami ingiya.
REV 9:11 Aŋala koonde yuwale kata soo puu penge dokona yuu range doko nakamana kiŋi ingyuo karapala nakama iso karara ingiya. Banya kingi doko Ipuru pii lao Apatone leyami dee Giriki pii dokona Apolyone leyami. Kingi doko wambu pyao kokwa sera dopale.
REV 9:12 Randa mendaki doko epo papeyamopape dee lama ene epara ingiya.
REV 9:13 Dokopa aŋala pakinyamange dokome banya bikuli doko leya dokopa Anatunya lenge kambu siyamo kana golome wasisi kiso maingi pyarena pinjingi dusipana anda kanya dokona piso pii lao epeya.
REV 9:14 Pii doko aŋala pakinyamangeme bikuli minyaro kareya doko kando lamaiyuo, Aŋala kisima ipwa andake Yuporisa lenge dokona puu maisi karaminyi kandapi doko mokonya leya.
REV 9:15 Wambu yuu muu peparaena dupwa nyuo liti rema ingyapala dokona liti mendaki pyao kumakarami lao aŋala kisima moko nembeya. Aŋala dusipame kana yuu giipi ee kanape dee keloke giipi wambu pyao kumakaraminyi doko dokopana lao rapa rapa pisi reteyami.
REV 9:16 Nakamana yanda singi rara dokona akipare karaminyi lao siyu dokopa ama soo kaeya 200 milyane ose dupwana peteyaminyi siyu.
REV 9:17 Nambana kombeya dokona akali dupwa nakama ose dokona peteyami. Nakamana pee pingi porai kapa yale doko kone kala isare uliyapu yale role rao kaa rao piyapya. Osena ayemba dusipa mena laene ayemba dopale ingiya. Nakamana nenge kata dokona isare rolepo ralepo rao uliyapu nyuo kyau lao epeya.
REV 9:18 Isare rao kyau lao lulya kaso epeyamo renge koo rema dusipame mena osena nenge kata potemo epapala wambu peparae liti pyuo rema ingiyamo dokona liti mende pyao rembe neya.
REV 9:19 Mena ose dupwana porainya renge doko nakamana nenge kata konalipi dolapona paleta karo konali dupwa kau ingyuo papala kaunya ayemba dokome wambu randa maiyuo piyami.
REV 9:20 Randa maiyuo piyaminyipape wambu lapo pyarepala peyamo dupwa rangena kingimi wasiyami dupwana paka paa nayami. Nakamame imambu koope dee bange golo dee kana kulingi kone kana pingi mee kanape dee isame wasisi lenge rao kando, pii soo kata papi nao pingi dupwa kando, kingi lao karalu kareyami.
REV 9:21 Nakamana wambu pyao kana mauli minyuo, kepo pyuo, dee waa nyingipi dupwa yaki nyii nayami.
REV 10:1 Enakana aŋala porai wakasa mende yake dokona piso isa epeyamo kandeyo. Kopa dokome komau ingyuo wapupala banya ayemba dorena kau puiya dokome nyuo bokembake pyuo piya. Banya lenge kambu dorena neta rele leyamopa kimbu dolapo isare kekenge dopale ingiya.
REV 10:2 Banya kingi dokome buku kao pele pele lasi doko pyasinju leyamo kandeyo dokopa aŋala dokona kimbu rolaerena ipwa kota dokona karapala kyairena yuunya kareyamo kandeyo.
REV 10:3 Dokopa mena laene gala lele lao kyakale leyamo dokopa yuu gala ama reeko yanda ipingi nyepo lapala isingi lamaiya.
REV 10:4 Lapeyamo dokopa aopa pepana pyalana pipiyu dokopa, yake dokona piso pii mende lao, Apa lalaminyi lao mee soo manjipala pepana pyao reta napipi leya.
REV 10:5 Dokopa aŋala yuu ipwa kotape dolapona kimbu kararo kareyamo kandeyo dokome banya kingi rolae dokome yake dorena minyalyiya.
REV 10:6 Baame Anatu yake dorena bange silyamo dupwape yuu dokona bange paleta silyamo dupwape dee ipwa kota dokona silyamo dupwape wasapala kareyamoko karenge dokona kingi lao pii angi ingyuo lalu lao lao dopa lamaiyuo, Yuu gii dakepa otara ingilyamo, Anatumi dee isaro kara nara.
REV 10:7 Dopa piramo dokona aŋala yanda ipingi dokome bikuli lara dokopa Anatunya pironya lao poropeta akali dupwa lamaiyamo doko angi pyaka silyamo leya.
REV 10:8 Dokopa yake dokona piso piinde leyamo siyunu dokome dee kamba langyuo, Aŋalande ipwa kota yuupi dolapona kimbu karapala pepa kao pele pele lasi pyasinju lasi doko kingi rakana palyaro karamo doko nyela puu leya.
REV 10:9 Dokopa aŋala kareya dokona pepa jinya lala peyo. Dokopa nyepala naa leya. Narenepa ingi anda soo keke piramopape embena kambu dokona lyaa ipwange ingyaramo rendeme kumare leya.
REV 10:10 Dokopa banya kinginya pepa minyiya doko nyepala neyo dokopa nambana kambu dokona lyaa pala rende piya. Dopa piyamopape goe lao oteyono dokopa ingi dorena keke koo piya.
REV 10:11 Enakana namba langyuo, Dee kambako embame Anatunya pii doko wambu malupi yuu rara liti peparaepe pii wakale lengepe dee kiŋipi dupwana lao pano lare leya.
REV 11:1 Lapala makande pingi isa londe mende joo karo dokopa dopa langiya. Sipurapala Anatunya tembole anda dee kiso maingi kana pyarepe dolapo makande pyuo, dee tembole anda dokona Anatunya kingi lakando karaminyi wambu dupwa yaka lao kanda leya.
REV 11:2 Dopa pirinyipape tembole anda dokona netarename kame piro karamo Juu daa rara menge dupwa maiyuo kaeyasi doko makande pyuo kanda napipi leya. Nakamame Jerusaleme Taone Yapasi doko kana akalisa kisima ipisu lamana apa nao kunji kanji minyuo kararami.
REV 11:3 Dokopa nambana pii minyingi akali lama kumanda petenge komau wapuo pisirambinyipa pena lao nembaro. Nakamba yuu gii malu (1,260) dusipana Anatunya pii polo lao kararambi leya.
REV 11:4 Pii minyingi dolapo olipi isa lamape dee kendapuli minyingi lamape yuu muu peparaena Kamongo simuisa dokona lenge kambu silyamo dokona karenge.
REV 11:5 Mendeme dolapo randa mainya pirami ramo dokopa pii minyingi dolapona nenge kata dokona isare potemapala nakama pyao kokwa sinyi nembara leya. Dopa pyuo para ingilyamo dokona akali mendeme dolapo randa maipuli lao piramo doko baa kapa lete kararande daa.
REV 11:6 Nakambame porai renge palyuo yake kata upi larambinyipa Anatunya pii larambi gii dusipana apu epa nara. Dopako pyuo nakambame porainya renge palyuo ipwa dupwa ranjama inginyi pyambuope dee pinya suu pyarambinyili pyuo yuu dupwa anga ikyane koo kiso mairambi ingiya.
REV 11:7 Nakamba Anatunya pii polo lao otaparambinyi dokopa bange rae lenge koo yuwale kata soo puu penge dokona palenge doko potemo epapala nakamba kando yanda pimwaiyuo pyalana pipala baame nakamba nyuo anamasi minyapala pyao kumakara ingiya.
REV 11:8 Dokopa taone andake Kamongo Yesu isa mamandona pyao palyiyami dusa ingyuo barete mendena nakambana yanenge mee sera ingiya. Taone doko kongwalu pii palyili lao kingi Sotoma kingi mende Isipi lenge.
REV 11:9 Wambu yongo wakale wakale nyingi dupwana mendena mendena pyuo, dee pii wakale wakale lengepe rara peparaepe dupwame nakambana yanenge kakapange dolapo yuu gii rema dee mendena apo ingyuo dokopa malu pii nana lapala mee kandaro serami ingiya.
REV 11:10 Kumuyambi dokona isa wambu rae maipala mali lyuo puu minyingi dupwa pipya bange mee maiyuo kararami. Poropeta akali dolapome isa wambu peparae mona kendanyi pyambuo kareyambi dolapo kumuyambi dokopa rae mairami ingiya.
REV 11:11 Yuu rema dee apo ingyuo kote yuu sepeyamo dokopa poporambaiye lete palenge doko Anatu keta piso epapala nakamba keta maralyiyamopa sipurao epeyambi. Doko kandeyami dupwa mona nembo pakayami.
REV 11:12 Enakana poropeta akali dolapo kando yake dokona piso yuu ketae nakamba kando kyakale lao, Dae ipupwa leya. Dokopa yanda pimwai dupwame apa pilyape lao kando kareyaminyipa yake panda kopa rakapana dokona pulyuo peyambi.
REV 11:13 Dokopa aopa yuusili andake minyuo dee anda kamba kamba karenge dokona anda lapo lalyuo ranapala wambu ama malu (7,000) pyao kumakaya. Dokona pyarepala peyamo dupwa mona nembo pakapala Anatu yake panda karenge dokona kingi doko ketae pyambuo kararami ingiya.
REV 11:14 Randa lapo doko epo papeyamo dokopa repo doko repetale epana piro siya.
REV 11:15 Enakana aŋala yanda ipingi nyepo dokona bikuli leyamo dokopa yake dokona piso pii rekyae lao lapala, Namwana Kamongo kandale dee banya Koraisapa yuu muu dupwana kiŋi ingyuo kaelyambinyiŋi. Dokome iso karalu karara lyakande leyami.
REV 11:16 Enakana wambake akalisa lama ipisu kisima Anatunya lenge kambu siyamo dokona nakamana petenge isa dupwana pisipala mona kando isa pao palipala Anatu lakandao dopa leyami.
REV 11:17 O Kamongo Anatu Porai doko namwa emba kando ange letamano. Emba wamba karapala piso epo epapu kareneoko. Embame embena porai renge dokome minyuo wambu peparae rapu pyuo karene. Emba wambu kote lare gii pyaka sepeyamopa
REV 11:18 Anatu suu pyaa nange wambu dupwa nenge sisi pyapala lao kareyami. Wambu kumuyami dupwa kando kote lapala embame embena yulu akali poropeta dupwape wambu yapasi dupwape dee wambu koo epengepe embena kingi ketae nembenge dupwape yole keyange mairi ingilyamo. Dee yuu gii dokopana wamba yuu dupwa kokwa siyami dokona embame kokwa sereoko leyami.
REV 11:19 Dokopa yake panda dokona tembole anda kambu doko lumbuyamopa Anatunya Kana Minyuo Lalu Lao Leyamo Pii Pyasi Paleyamo Bokote doko paneya. Paneyamopa yuu pele pyuo gala andake lapala yuusili minyuo randake kapa epo piyamo kandeyo.
REV 12:1 Enakana yake dokona kongwalu andakende piya. Doko endande banya komau doko neta dokome wapuo, kimbu kape dokona kana yapa singi dokome pee pyuo, kyawa rarange dorena bui akalisa ipisu lama paletandeme pyuo piya.
REV 12:2 Enda baa repeta wane manjinya piyamopa mata piyamo dokome randa nyepala ee leya.
REV 12:3 Dee yake dokona kongwalu mende piya. Doko kau pambeya kone mende nenge kyai akalisa epengende banya ayemba yanda ipingi nyepo kareta ayemba dusipana wakale wakale kiŋinya kyawa rarange wakale wakale piso kareyamoko piya.
REV 12:4 Banya konali dokome yakena bui dokona pakirena pyao pingyanyi isa yuu dokona malyiya. Malyapala enda wane repeta manjira ingiyamo lenge kambu siyamo dokona wane manji paramo dokopa nalana suu pyao epo kareya.
REV 12:5 Enakana wane ane porainde ane pangali nyepala wambu rara peparae iso karara doko mandeya. Dokopa wane doko waiya lao nyepala Anatunya petenge isa dokona Anatu keta kupinyi pyambuyami.
REV 12:6 Endangi doko Anatumi yuu pandape rapa rapa pyakamiyamo yuu muiyane dokona ralo peya. Baa yuu gii malu (1,260) Anatumi rapu pyuo kararamo pisira.
REV 12:7 Dokopa yake dokona yanda andake sipureya. Aŋala mupwa Maikele lenge dokome banya aŋala lapo dupwa pipa kau andake dokopa yanda pimwaiyami. Dokopa dee kaupi banya aŋala dupwapeme isingi yanda pimwaiyami.
REV 12:8 Dopa piyamopape kau doko banya aŋala pipa pyao anamasi minyapala yake panda kara narami lao ralinyi nembeyami.
REV 12:9 Kau kameya doko kingi Satane kingi mende Depele lenge doko isa kupinyi peeyami. Baa yuu muu peparaena wambu panga soo karenge doko baape banya aŋala dupwa pipa pyao ralinyi isa peyami.
REV 12:10 Enakana yake dokona piso pii andake dopa pyuo leyamo siyu. Koo mendeme Anatunya lenge kambu siyamo dokona kukwa korakamape karo namwana yangonge dupwa kando koo keta palyuo kote lao kareyamo doko neta nembelyaminyi. Anatumi porayapala kote palenge doko anamasi minyuo wambu iso karara yuu gii doko pyaka sepelyamo. Dokopa Koraisa banya isingi panda angi doko range nyilyamo, leya.
REV 12:11 Namwana yangonge dupwame Sipisipi Ikyane kumuyamopa ranjama isa peyamo dokome Satane nyuo anamasi minyiyami. Nakama range kame soo kaepala kapa kumuo mainya suu pyao, dee pii keyange angi polo leyami dokome anamasi minyiyami.
REV 12:12 Dokona lao yake dokona karaminyi dupwa peparae raeko maiyalapape. Dopa piramopape nakama isa yuupi ipwa kotape koo keta palirami ingilyamo. Satane dokome banya yuu gii otala ipyasa ingi koo palyuo isa panda dokona randa maiyalana epo karamo leya.
REV 12:13 Kau dokome baa isa yuunya kupyuo nembeyami doko kando sepala enda wane mandeyamo doko moko minyuo peteta peya.
REV 12:14 Peyamopape enda doko yaka kambena papake lama maiyaminyi nyuo karapala bii lao yuu muiyane dokona peya. Yuu dokona ee kana rema dee apo ingyuo kau dokome pyasaramo lapala waso pisira ingiya.
REV 12:15 Enakana kau dokona kambu dokome ipwa kasinyi peeyara ipwa kama pyao epeyamo dokome enda baa soo kaki pira ingiya.
REV 12:16 Dopa piyamopape yuu dokome enda doko nyisalana pyuo banya nenge kata angapu lakipala kau nenge katana ipwa kama pyao epeya doko nao sokwara ingiya.
REV 12:17 Dokopa kau dokome imbwuapala pao enda dokona para piyamo dupwa Anatunya mawa pii letamuli pyuo dee Yesunya pii rolae dupwape yaki nyii nao minyingi dupwa keta randa maiyapala peya.
REV 12:18 Kau doko pao ipwa kota kee kama dokona isaro kareya.
REV 13:1 Enakana kandeyono dokopa ipwa kota dokona mena kanda nangende pulyuo epeya. Banya ayemba yanda ipingi dokona nenge akalisa kareta epeya. Dusipana wakale wakale bange kyawana rarange akalisako piso kareyamopa dokona Anatu kando pii koo pyasi paleya.
REV 13:2 Mena koo doko mena lepete dopale ingyapala banya kimbu dolapo mena beyana kimbu nyuo lenge kambu doko mena laenena ingyuo piya. Kau pambeya doko banya porai rengepe kiŋinya petengepe dee kiŋi banya isingi panda andake doko maiyamopa mena doko baa epo kareya.
REV 13:3 Mena ayemba dokona wuame pokwasi dokona kumuo kaeyali ingiyamopape pokwasi kata doko umbwua piyapya. Dokopa yuu muu peparae yamarangyuo mena dokoko kandaro soo puu peyami.
REV 13:4 Wambu peparaeme kau pambeya doko banya porainya renge doko mena laene yale doko maiyamo dokona lao kau baa lakando kareyami. Dee mena dokona kingi lao dokopa dopa lao, Api mendeme mena doko yale ingyarape? Apimi nenge poko yanda pirape?
REV 13:5 Mena doko ee kana rema dee mee kana pakinyamangepe dokopa Anatu kando pii koo lao baa mupwa ingyuo kareyamopa Anatumi mende laa naya.
REV 13:6 Dokopa mena baame Anatunya kingi dokonape Anatu karenge andape wambu banya arapunya karenge dupwape dokona lao mokwalipi leya.
REV 13:7 Baa Anatunya wambu yanda pimwaiyuo anamasi minyapala wambu peparaepe pii wakale wakale lengepe rara peparaepe dee wambu yuu wakale wakalepe rapu pyuo karara yulu doko baa nyiya.
REV 13:8 Dokopa isa enda akali dupwa nakamana kingi doko Anatumi yuu panda wasapa nayamo dokopa letena renge palenge buku dokona kingi pali nange dupwame mena bange koo dokona kingi lao kararami. Buku doko mena Sipisipi Ikyane wambu pyao kumakayami dokona ingyuo siya. Kale kata singi ramo soo pisipwape.
REV 13:9 Karapusi anda palira ingingi dupwa pao palenge kandale. Dee mendeme yanda pipala pyara ramo doko baa yanda pipalako pyarami ingingi kandale. Randa koo dopa pyuo epeya kande dokopa Anatunya wambu baa kapa ingingi lao suu pyao karo kaeya nao pyuo karapengele.
REV 13:11 Dokopa mena bange koo lapo pyuo yuu dokona potemo epeyamo kandeyo. Dokona banya nenge dolapo sipisipi ikyane nenge dopale kareta baa pii leyamo doko kau pambeyame lele leyamo siyu.
REV 13:12 Bange mena koo lapo pyuo doko bange mena koo mupwa wuame piyami umbwua piyamo dokopa role pyao karo banya porai renge nyepala isa wambu peparae bange mena koo doko mona maiyuo lakandena leya.
REV 13:13 Dee baame yulu malu wambumi pii nange dupwa pyuope dee wambu kando kareyaminyipa isare lapo yake dokona piso rao isa epena laope piya.
REV 13:14 Bange mena koo wuame pokoyaminyi lete peyamo dokome baa kapa pinya leyamopa mena baame wambumi pii nange yulu dupwa pyuo isa wambu minyoko piyamosa nakama kau dokona kingi ketae pyambuyami isa kanape dupwame kau baa yale bange mende wasapala kingi lao kareyami.
REV 13:15 Dokopa mena dokome bange wasiyamo doko lete renge maiyamopa dokome baa pii lapala wambu baa mona maiyuo lakanda nayami dupwa pyao kumakana leya.
REV 13:16 Mena lapo pyuo dokome akali koo epengepe kamongo pendewape karapusi palenge pali nangepe nakamana kingi rolaerena dee enambape dolapona make palyinya lao poraiyuo leya.
REV 13:17 Lapome mena koona kingi nakamana enamba dokona namba ingyuo pyasi pali nara dupwame bange ropo pyaope dee nakamana bange dupwa kana nyuope pii narami leya.
REV 13:18 Dokona kongwalu mende palamo poraiyuo suu pyamana. Mendeme mondo lao sera ramo namba doko apiyakalende lao kandara. Namba 666 pyasi palipyamopape angi doko akalinya kingi ingilyamo.
REV 14:1 Nambame kandeyono dokopa mena Sipisipi Ikyanende yuu kyau Sayone dokona roya kareya. Wambu 144,000 Sipisipi Ikyanena kingi dee banya Rakangena kingi nakamana enamba dupwana pyasi paleyamo kareyami.
REV 14:2 Dee yake dokona pii andake ipwa jerae pyao pele lao dee yuu gala lele leyamo siyu. Doko akalimi rambyalu lenge dopale ingyuo leyami.
REV 14:3 Anatunya petenge isa dorena lee renge bange kisimape dee wambake dupwa kareyaminyipa kenane enenge mende pyao kareyami. Kenane doko mee wambu dupwa soo nyii naramilinde Anatumi kiiramo nyiyamo wambu 144,000 dusipame mana nyerami ingiya.
REV 14:4 Akali dusipame enda warenda nao waso karenge. Nakama Sipisipi Ikyane doko yaki nyii nao pelyamuli pyuo papingi. Nakama isa jingi mupwasa ingili lao isa wambu dupwana kanda soo kiiramo nyisi karaminyi.
REV 14:5 Nakamba kyambo koo mende laa nao nyisu yakunayape pisi nalyamo karenge.
REV 14:6 Enakana aŋala mende yake dokona ama ketae bii lao pao dokopa isa wambupi yuu muu wakale dupwana rarape pii wakale wakale lengepe dupwa keta waili pii keyange sulu singi doko lamaiyala peya.
REV 14:7 Baame Anatu epapu kote letamo dokona baa kando pakao lakandao karalapa leya. Yuu yakepe ipwa kotape dee ipwa guu lao pyakamenge dupwa wasiyamo doko baa kando ketae nembo mona kando pisipwape lao kyakale palyuo peya.
REV 14:8 Aŋala wambo doko lapeyamo dokopa enakana mendeme lao. Baa isa pwuamo. Kingi andake Bapilone lenge doko isa pwuamo doko baa wambu rara peparae waene ipwange porai enda banya pasende yulu pingi doko paleta napala pundana lao maiyamopa dokona lao taone andake doko baa isa pwuamo leya. (Yuu taone Orome dokona kongwalu palyuo leya.)
REV 14:9 Dee aŋala epo dokome kata dokonako palyuo pii ketae poraiyuo lapala, Mendeme mena bange koo dokonape mena baa yale kingi wasiyamo dokope kingi lao karapala banya kingi panda enamba dokona make doko palyuo pira ramo
REV 14:10 doko baa Anatunya imbu singi nyingi waene ipwange doko nara leya. Anatumi mee ipwa pipa minyuo pyasalya pyasana pyuo pii nara. Anatu banya imbu singi doko pee kapo dokona kulimbwanyi palyapala dokopa nena lara. Aŋala poo pyasipi dee Sipisipi Ikyanena lenge kambu dolaponape karo ipwange doo isareme rao lulyakasisi randa andake pingi dopale naminyipa nakamana randa nyingi doko isare kyau ingili lao pao karalu karara.
REV 14:11 Nakamana bange mena koo dokope dee mena baa yale bange kingimi wasiyami dokope kingi lapala banya make enambana nyiyami dupwa kukwa korakamape imambu see nao kae lao kararami.
REV 14:12 Dopa pyuo pyaka seramo dokopa Anatunya enda akalipi Yesu kapa ingingi lao suu pyapala banya mawa pii dupwa yaki nyii nao karapengele leya.
REV 14:13 Enakana dokopa yake dokona mende leyamo siyu doko, Pii dake pepana pyaa. Kamongona arapunya karo kumarami dupwa rae maiyuoko parami. Imambu Poo Pyasimi isingi dopa letamo. Nakama yulu keyange piyami doko mee isa paa nao nakama role pyapeta parami. Nakama mata sisiki nembo rae maiyuo karalu kararami letamo leya.
REV 14:14 Enakana nambame kandeyono dokopa yake dokona kopa kyewa lenge mende siya. Kopa dokona wambu kameyande peteya. Doko banya kyawa dokona golome bange kyawa rarange pyuo kingi dokona naipu enge kyai nee nengendeme ee manjo nyingi dokore minyaro peteya.
REV 14:15 Dokopa aŋala mende tembole andana panda poo pyasi dokona karo epapala kopa dokona peteyamo doko kando kyakale poraiyuo lao, Isa yuunya nenge nenge wambu pilyamo. Manjo nyingi kana doko pyaka silyamo dokona embena naipu nyepala pyakepo manjo nyii leya.
REV 14:16 Leyamopa kopana peteyamo dokome sipurapala isa yuu dokona jingi dupwa naipumi pyakepo manjo nyiya.
REV 14:17 Dokopa aŋala mende tembole andana panda poo pyasi doko yaki nyepala naipu nenge karenge dokore minyuo epeya.
REV 14:18 Dee aŋala mende kiso maingi kana pyare rapu pyuo karenge doko yaki nyepala naipu nao mama nyingi manjaro kareyamo doko kando kyakale lao dopa pyuo leya. Isa yuunya isa girapo dupwa poo relyamo dokona embena naipu nenge karenge dokome nyepala pyakepo lyepe leya.
REV 14:19 Dokopa aŋala dokome banya naipu nenge karenge dokome nyepala girapo jingi peparae lyiya. Lyepala nyuo masene andake girapo pyao rakyuo kingingi dokona pyao pyambuya. Masene doko Anatunya imbumi kumungi dopale doko.
REV 14:20 Waene pyao rakyuo kingingi panda doko anda taone kame netarena dokona ingyuo siya. Dokona girapo dupwa kingiyami dokopa ranjama epo pete siyamo makande pyuo wambu roya kararaminyipa nyuo mwuapala mange koe minyara dopale ingyuo dee epo pyasinju lao peyamo doko 300 kilomita dopale ingyuo londeya.
REV 15:1 Enakana yake dokona kongwalu andake wambu mona nembarami dopalende piyamo kandeyo. Aŋala yanda ipingi nyepowa isa yuu koo keta palyuo paramo bange yanda ipingi nyepowako minyaro kareyami. Bange koo kulimbwanyi palyaraminyipa Anatunya imbu singi doko pyai naramosa baa dee kamba kote laa nara ingiya.
REV 15:2 Dee kandeyono dokopa ipwa kotande isare pipa minyuo rukuraka pisi ingyapala siya. Siyamo pete nemba nembasa dokona wambu wambo mena bange koo dee bange mena baa dopale isame wasiyami dokopa yanda pimwaiyuo pyao nyuo anamasi minyiyamisa menana namba kingi palenge doko isa peyamo kareyaminyi kandeyo. Nakama Anatu rambyalu maiyamo dupwa minyaro kareyami.
REV 15:3 Nakamame Anatunya kendemande akali Mosesena kenane doko pyao dee Sipisipi Ikyanena kenane doko pyao dopa pyuo leyami. O Kamongo Anatu Ama Porai doko, embena yulu dupwa peparae ama wakasa ingyapala elyape rolae ingyuo singi. Emba yuu muu peparaena kiŋi ingyuo karene.
REV 15:4 Api mendeme Kamongo emba kando paka napala embena kingi doko ketae minyalya narase? Emba iki poo pyasi karene. Embena yulu rolae dupwa panasi silyamo dokome wambu yuu muu peparae epapala emba suu pyao mona kando pisarami.
REV 15:5 Enakana nambame kandeyono dokopa yake panda dokona Anatunya pii kinyi polo lao karenge komau anda dokona panda poo pyasi doko lumbuyamo kandeyo.
REV 15:6 Dokopa aŋala yanda ipingi nyepo tembole anda dokona karo wambu kokwa seraminyi bange koo dupwa minyuo neta epeyami. Nakama komau karo pisi nange kyewa lasimi pipala golo puu dokome romba kyangalipi dokona puu pyapala epeyaminyi kandeyo.
REV 15:7 Enakana lee renge bange kisima dokona mendeme aŋala yanda ipingi dusipa pere golome wasisi mendasipana Anatu mee kareyamoko karenge dokona imbu singi doko reto simbwapala maiya.
REV 15:8 Enakana tembole anda dokona isare kyau lao Anatunya porai rengepe yanga paupau lengepe dupwame lyingi lyangi kuiya. Dokona mendali tembole anda dokona kolando parami ingya naya. Dopa piyamopape aŋala yanda ipingi dusipana anga ikyane otaramo mange dokopa tembole anda dee kapa parami ingiya.
REV 16:1 Enakana pii mendeme tembole anda panda poo pyasi dokona piso aŋala yanda ipingi dusipa kando kyakale rekyae lao leyamo siyu. Dokona lao, Pere warake yanda ipingi dusipana Anatunya imbu singi silyamo doko isa yuunya kulimbwanyi palyala pupwa leya.
REV 16:2 Dokopa aŋala mupwa ingyuo dokome Anatunya imbu singi perena siyamo dupwa kulimbwanyi palyiya. Dokopa wambu bange mena koona make palyuo bange mena koo dopale kingimi wasapala kingi lao karenge dupwana yanenge dokona rete andake poro lao piya.
REV 16:3 Enakana dee aŋala lapo pyuo dokona banya perena siyamo doko ipwa kota dokona kulimbuya. Dokopa ipwa kota doko akali kumasinya ranjama dopale ingiya. Dokopa ipwa kota dokona lee renge bange peparae kumuo oteya.
REV 16:4 Dee aŋala repo dokome dopako pyuo banya perena siyamo doko ipwape dee ipwa guupi dupwana malyiyasa ranjamako ingiya.
REV 16:5 Nambame siyu dokopa ipwana aŋala dokome dopa leya. Emba wambape dakepape mee kareneko karenge. Emba ama rolae poo pyasi ingingi dokome nakamba kando kote kapa rolae lapala randa mailyinyi leya.
REV 16:6 Nakambame Anatunya wambupi dee poropetape dupwana ranjama dupwa kulimbwakamiyami. Dokona lao embame nakama ranjama dupwanako nena lao kapa mailinyi.
REV 16:7 Dee enakana rendamu pingi kiso maingi kana pyare dokona piso pii mende leyamo siyu doko, Kamongo Anatu Ama Porai ingyuo karene doko embena kote pii dupwa rolae lenge leya.
REV 16:8 Aŋala kisima dokona banya perena siyamo dupwa neta dokona kulimbwanyi palyiyamo dokopa Anatumi akali dupwa kyawa yaki nyuo kaeyamopa neta dokome akali dupwa reya.
REV 16:9 Neta isare ingyuo rao alyasi dokome akali dupwa rao raukusi reya. Rao raukusi rapalape Anatu baa randa koo dopale wambu keta mee kapa mairali doko kando kilya kando leyami. Lapala nakamba mona kapu kyuo banya kingi dokona lakandao lao pii nayami.
REV 16:10 Aŋala kingi paki dokona Anatunya imbu singi banya perena siyamo doko kulimbwanyi bange mena koona petenge isa dokona palyiya. Dokopa bange mena koona isingi panda dorena iminjiya dokopa akali banya arapunya karenge dupwa sii leyasa kambu nakepanyi nembo siyami.
REV 16:11 Nakambana yulu koo piyami dupwa konda napala rete pyuo sii lao piyamo dupwana lao Anatu yake panda karenge doko baa kando kooŋo lao lao nembeyami.
REV 16:12 Enakana aŋala pakinyamange dokona perena siyamo doko ipwa andake kingi Yuporisa lenge dokona kulimbwanyi palyiya. Dokopa ipwa doko soko rali piyamo dokona kiŋi neta pyakaenge dorena karenge dupwa epena lao kata wapwakamira ingiya.
REV 16:13 Enakana kandeyono dokopa imambu koo rema mungi dopaleronende kau pambeyana nenge kata dokonape dee mena koo nenge kata dokonape dee kyambo lenge poropetana kambupi dusipana neta epeyami.
REV 16:14 Nakama imambu koo ingyapala wambumi pii nange yulu dupwa kemali pyuo pyuo papiyami. Imambu koo rema dupwame yuu muu peparaena papyuo kiŋi akali peparae Anatu Porai dokona yuu gii andake pyaka seramo dokopa yanda pirami dokona suu pyao kyakale lao nyuo sukusa sukusa pyuo epena leyami.
REV 16:15 Pii dake selapa. Namba waa nala penge dopale ingyuo eparo. Dokona nakama komau wapuo karo lenge rao karalapape. Dokome wambunya lenge kambu dokona papara paa nao rae maiyuo elya napala kararami.
REV 16:16 Enakana imambu koo dupwame kiŋi dupwa lanyuo yuu mende Ipuru pii lao kingi Amaketono lenge dokona peyami.
REV 16:17 Dokopa aŋala yanda ipingi dokome banya perena siyamo doko porambaiye dokona kulimbwanyi pyambuya. Dokopa tembole anda petenge isa dokona piso pii rekyae lao epo, Yulu doko pyuo kaelyamo leya.
REV 16:18 Dokopa yuu pele pyuo rali pipala yuu gono lao yuusili kopetame minyiya. Anatumi yuu wambupi kanda soo ingiyamo yuu gii dokona piso yuusili dopale mende minya nange doko minyiya.
REV 16:19 Taone andake doko remasa lao liti pyuo rali piya. Dee yuu mure lao rara wakale dupwana taone dupwa boo leya. Dokopa Anatumi yuu andake Bapilone lenge doko kame see napala banya kapona waene imbu singi renge paleta siyamo doko nao goe lena leya.
REV 16:20 Leyamopa panda dokona yuu kyau dupwape dee panda lapo ipwa sukusa siyamo dupwape mee ingyuo rali piya.
REV 16:21 Apu andake randake kapa reeko lasi kope byake dopale paleta isa epeyamo dokopa wambu dupwa piya. Dopa pyuo piyasa randake kapa dokome randa koo napala Anatu kando kilya kando leyami. (Anatu yaki nyepala imambu wakale wakale suu pyaro kareyasa dokona enda pamuku leya.)
REV 17:1 Aŋala yanda ipingimi pere yanda ipingyako minyaro kareyami dokona mendeme epapala dopa pyuo langiya. Anda taone ipwa malu repeta dupwa enda pamuku yulu pyuo petamo doko baa randa nyera dokona lasaka pirole repeta ipu leya.
REV 17:2 Yuunya kiŋi akali dupwame enda pamuku yulu andake piyamo dokopa kando nyepala pamuku yulu wakasa pyuo kareyami. Dee isa akali peparaeme enda dokopa pamuku yulu piyami. Pipala akali biya napala kyawa sisingi bolombalo letamo karenge dopale ingyuo peyamiŋi leya.
REV 17:3 Imambu dokome namba nyuo kako piyamopa aŋala mendeme namba nyuo soo yuu muiyane dokona peya. Dokona endande mena kone yanenge peparaena pii koo dupwa pyasi paleyamo mata dokona peteyamo kandeyo. Mena doko ayemba yanda ipingi nyepo dusipana nenge akalisa epengepya.
REV 17:4 Enda doko baa komau kone rara lama piya. Komau doko kana golo wakale wakale kana kalya pisi mola kareta dokona kana malu penge dopale wasiyaminde wapwaro peteya. Banya kingi raka dokona kana golo kapo dokona banya yulu koo karo petenge dupwame simbwaro siyamopa minyaro peteya.
REV 17:5 Banya kingi mende kongwalu pii ingyuo yuu andake Bapilone doko baa pasende enda peparaena endangi kyawa ingyapala dee isa yuunya ama yulu koo peparaena endangi ingyuo petamo lao banya enamba dokona pyasi paleya.
REV 17:6 Enda dokome Anatunya wambu Yesu yaki nyii nao baa reke lao kumuyami dupwana ranjama napala kyakao peteyamo kandeyo. Kandapala nambame yamaranguyu.
REV 17:7 Yamarangyuo peteyo dokopa aŋala mendeme epapala, Akipamo emba yamarangyuo karepe? Nambame mena koo banya ayemba yanda ipingi dusipana nenge akalisa epenge mata dokona enda baa petamo dokona renge yalu pyuo palamo dupwa polo langirowale leya.
REV 17:8 Mena kandelene doko lete kareyamoko doŋo epapu kara nalyamo. Baa yuwale kata soo puu penge dokona pisipala dee pulyuo eparamo dokopa pyao kokwa sinyi nembarami. Isa wambu lapo Anatumi ene kanda soo yuu wasapa nayamo dokopa nakamana kingi letena renge palenge buku dokona pyasi pali nalyamo dupwa mena doko kandarami dokopa mona nembarami lyakande leya. Mena doko karapala dee pana naya doko dee enakana maro lara leya.
REV 17:9 Akali mondo lao suu pingi dupwame renge dupwa kapa ingyuo soo nyerami. Ayemba yanda ipingi dusipa yuu kyau yanda ipingi dusipana enda petenge doko lyakande. Dee ayemba yanda ipingi dusipa kiŋi yanda ipingyako karaminyi doko. (Kiŋi akali Orome rapu pyuo kareyami dokonasa letamo.)
REV 17:10 Kiŋi yanda ipingi dokona kingi paki wambo oteya. Mende doko epapu kiŋi ingyuo pyuo karamo. Mende ene epara doko baa kiŋinya yulu yuu gii mendasipa iki pyuo karara.
REV 17:11 Mena bange koo wambo karapala epapu kara nalyamo doko baa kiŋi yanda ipingi nyepo karaminyi dusipana mange lama ingyuo karenge. Doko kokwa serami ingilyamo.
REV 17:12 Menana nenge akalisa kandelene dusipa kiŋi akalisa dopale rombo palyaraminyipa nakama keloke gii awa mendaki iki mena role pyao kiŋi yulu pirami lyakande leya.
REV 17:13 Kiŋi dusipa suu pingi doko mendakinyako palyuo suu pyarami. Nakamana pawape porainya rengepe dolapo mena baa keta mairami.
REV 17:14 Nakama mena Sipisipi Ikyane dokopa pyakandaraminyipa Sipisipi banya wambu baa yaki nyii nange rombo palyuo yapo nyiyamo dupwa pipame mena koo doko nyuo isa palyarami. Doko baa kamongonyako Kamongo ingyuo karo dee kiŋinyako Kiŋi ingyuo karenge dokome nyuo anamara leya.
REV 17:15 Dee aŋala doko kamba langyuo, Ipwa malu dupwana enda baa repeta pisipyamo kandelene doko wambu ama malupi yuu wakale wakalepena rarape pii rara wakale wakalepe dupwa lyakande leya.
REV 17:16 Nenge wanga akalisa kandelene dupwape dee mena koo dokomepe renga usale pamuku enda doko kando epe naserami. Epe nasepala banya komau dupwa pyao rokwanyi nembapala baa mee papara karena larami. Dopa pyuo pipala banya yanenge napala mee seramo dupwa isarena pyambwarami.
REV 17:17 Anatumi suu piyamuli pyuo piramiŋi lapala nakama kiŋi dupwa suu pingi mendaki palyapala nakamana kiŋinya porai renge dupwa mena keta maiyaminyipa baa Anatu laramuli pyuo gii dupwana wambu iso karara ingiya.
REV 17:18 Enda kandapi doko mee taone andake doko makande minyuo pipyasa pilyamo. Taone doko baa kamame ketaele ingyuo karapala kiŋi doloma nyuo isa palyuowale karamo leya.
REV 18:1 Dopa pipeyamo dokopa aŋala mende yakena piso epeyamo kandeyo. Baa porai renge paleta banya yanga paupau lenge dokome isa yuu peparaena yanganyi peeyo epeya.
REV 18:2 Baame pii rekyae koo lapala, Yuu andake Bapilone pamuku enda ingingi doko isa pwuamo leya. Taone andake doko lalyuo burumbara pupyamopa imambu ama koo dupwa epapala palaminyiko. Dee yaka ama koo karo petenge dupwa palaminyiko.
REV 18:3 Doko wambu rara peparaeme baa role pyao pasendiya yulu piyami doko banya waene porai dopakale neyamisa piya. Dee kiŋi akali dupwame baa kando nyepala role papyuo nyuo kareyami. Dee bisinase akali dupwame banya yulu koo kyaŋe singi dokona mana nyepala pyuo karo isa bangena kamongo kareyamipya.
REV 18:4 Enakana yake dokona piso kyakale mende dee lao epeyamo siyunu dokome, Nambana enda akali dupwa yulu koo dokona role pyao pisarami. Pipala dokona yole koo doko nyisaramiŋi dokona lao mata maiyuo rekya lao pupwape.
REV 18:5 Banya yulu koo pyuoko peteyamo dupwa kyau pyao ama yuu dulu yake dokona pupyamopa Anatu baame enda baa kame see napala suu pyaro karamo.
REV 18:6 Baa wambu malu kwaenyi nembeyamo dokona makande minyuo baa ama kamba soo kaeyo kwaoko penale. Baame waene porai dupwa kapona keyano pilya kande dokona nakamame porai doko minyuo komondo kata palyapala baa kaumi kumuo nena lao mairaminyi nara leya.
REV 18:7 Enda banya kingi range ketae nembo kalya malyape piyamo dokona manda manjo mona anda randa koo nao ee lao penale. Baa mona anda dorena lao namba kiŋinya etenge dokome kuini endana rate wambu iso petenge dokona peto kande. Namba mee waiya petonde daa. Mona kenda pingi yulu paliramopa ee lao pisirunde daa lao petamo.
REV 18:8 Dopa pyuo laramosa koo wakale wakale dupwa enda baa keta yuu gii mendaki dokonako mee komondo kata palyuo epara. Epara dokome yuu andake doko anga ikyane kiso maiyuo lopo andake soo mona rando papala rao muku sera. Doko Kamongo Anatu Porai dokome baa kote laramosa pira leya.
REV 18:9 Isa kiŋi akali enda baapa pasendiya yulu pyuo rae rae maiyuo kareyami dupwa anda taone doko rao kyau lao eparamo kandapala ee dokome kata kanda narami.
REV 18:10 Nakama baa randa nyeramo doko kando pakapala ama nanesa karo kando karo lao, Yuu anda malu karenge Bapilone kandale doko kopyali ingyuo mee waiya lao koo keta palyuo pwuamo, wamao lao kararami.
REV 18:11 Bisinase akali dupwa opetae enda banya lao dee bisinase pyuope ropo pyao pii naramalyamo lapala ee lao yamarangyuo kararami.
REV 18:12 Nakamana kana golo dee kulingipi kana malu penge mola kare kare bange keyange wakasape dupwa, dee ropo pyaramande daalyamo leyami. Komau keyange rara wakale wakale dupwape isa keyangepe kapa kyarasi mee kapape mena elepande nenge dupwape kana keyangepe dupwame nyepala bange keyange wasiyami dupwape
REV 18:13 nenge kyaa pilyamo, kopo nenge dupwape rendamu pingipi mamba kyaa pingipi waene ipwange mamba wele polawape kenapa dee bulamakao sipisipi mena osepe nakamana uliuli ipyuo nyingi dupwape dee kendemande akali ropo pyao nyiyami dupwa peparaepe mee pyalingi nyuo pwuamo lapala mona nembo kararami.
REV 18:14 Bisinase yulu pyuo karenge akali dupwa baa kando lao, Isa bange keyange embena mona nyiyamo dupwa isa puu pao paramosa dee kando nyii nare lao kararami.
REV 18:15 Akali lapo taone andake dokona karo bisinase pyuo kamongoyami dupwa randa nyisarama lapala mee nanesale karo ee lao ipwakuku nyuo kararami.
REV 18:16 Nakamame lao, Taone andake doko randa koo nyilyamo kanda nalyamisi? Baa komau keyange rara wakale dupwa wapuo kana golope kulingipi dee mola kana mone malu pengepe pee pipala peteya kanda.
REV 18:17 Doko baa yuu gii mendaki dokona pendewa inginyi nembo isa pelyamolamo larami.
REV 18:18 Namba kandeyono dokopa ipwa sipu dupwana akali mupwape dee sipunya mee papyuo karenge wambu dupwape sipunya yulu pingi akali dupwape dee ipwa kotana bisinase yulu pingi akali dupwape nanesale karo taone doko isare rao kyau leyamo kandapala pii rekyae lao, Taone andake doko manda manjo mendasa dopale kara nange leyami.
REV 18:19 Lapala nakama pee awaipi pyao ee lao, Taone andake kandale doko kopyali ingyuo mee waiya lao koo keta palyuo pwuamo leyami. Taone andake dokonako sipu yulu minyingi akali dupwa bange manjo epo kamongo peyami. Doko baa yuu gii mendaki mee pyalingi nyuo pelyamo lao kareyami.
REV 18:20 Enda baa koo keta palu palyuo para dokona lao yake doko emba rae maipi. Dopako pyuo Anatunya wambupi dee aposele poropeta akalipi peparae enda baame nakama kando koo pyuo karapya dokona Anatumi baa kando pyao kokwa silyamo dokona rae maiyalapape leya.
REV 18:21 Enakana aŋala porai mendeme kana ama reeko mende nyuo ipwa kota dokona pyao nembo karo lao, Taone andake yuu Bapilone kandale doko dopa pyuo pyao kokwa sinyi nembelyamo doko dee kandaraminde daalyamo leya.
REV 18:22 Dopa pilyamo dokona yuu Bapilone niliyanda rambyalu kurulupi dee bikuli dokome akali singi dupwame kenane pyaraminyi dee seraminde daa lyakande. Kaname witi jingi pyao rakyingi dokona kelakalo laramo dee see naramiyoko.
REV 18:23 Emba keta isare mende dee sinyi pyuo raa nara. Enda yapo lapo pyao nyuo pii naraminyipa yuu apa sera lyakande. Embena bisinase akali dupwa wambo dokopa ama kamongapala mee dupwa isa palyuo kareyami. Embame wambu peparae isokome pyao nyuo kareyamiko.
REV 18:24 Poropeta akali dupwanape dee Anatunya wambu dupwana ranjama dupwape taone andake doko keta palamo. Dee wambu peparae pyao nakamana ranjama kulimbuyaminyi ranjama doko nakama keta kwualyamoko.
REV 19:1 Enakana yake dokona piso pii ketae lao wambu ama malumi pii larami dopale leyaminyi siyu doko, Lete wai pyao nyingi yulupi yanga paupau lenge dokope porainya rengepe namwana Anatu baa keta palenge. Dokona banya kingi lakandalapape leya.
REV 19:2 Pasendiya enda baa yuu muu dupwana papyuo kwuanyi nembeyamo dokona baa kote ama rolae lenge dokome randa andake kapa mailyamo. Enda baa randa mailyamo doko Anatunya kendemande akali dupwa pyao kumakaya dokona yano nyilyamo.
REV 19:3 Dee kamba pii porakai lapala, Anatunya kingi doko lakandamana. Yuu taone ama andake doko rapyamo dokona sukwa doko pyuo pao karalu karara leya.
REV 19:4 Dokopa alemo akalisa lama ipisu kisimape dee lee renge bange kisimape Anatu banya kiŋinya petenge isa dokona peteyamo dokona mona kando banya kingi ketae pyambuo lao, Kinyi banya kingi lakandamana leyami.
REV 19:5 Kiŋinya petenge isa dokona piso pii mende lao epeya. Banya kendemande akali koo epengepe Anatu angi lao suu pyao karaminyi dupwame banya kingi lakandalapape leya.
REV 19:6 Enakana pii mende wambu malu wakasame ipwa jerae pyao malyili laope dee yuu gala lao rali pili lao lao epeyamo siyunu dokona lao, Namwana Kamongo Anatu Porai Wakasa doko baa kiŋi ingyuo karamo dokona lakando karamana leya.
REV 19:7 Namwa mona seramopa raeme kumuo karamanale. Baa ama andake ingyuo karamo dokona lakandamana. Sipisipi Ikyanena enda nyuo pakaramo gii doko pyaka sepelyamo. (Sipisipi Ikyanena enda doko Elyambu Pingi dokonasa letamo.)
REV 19:8 Enda baa komau karo pisi nange kyewao lasi Anatu maiyamopa wapwaro petamo. (Komau doko Anatunya wambu yulu rolae pingi dupwana makande pyuo pupyasa pilyamo leya.)
REV 19:9 Dokopa aŋala dokome namba langyuo, Pii dake pepa pyao retape leya. Sipisipi Ikyane enda nyeramo dokopa nenge andake narami dokona epena lara dupwa rae maiyuo parami leya. Lapala aŋala dokome pii konda pyuo lao, Pii dusipa Anatunya kambunya potemo epelyamo leya.
REV 19:10 Leyamopa namba banya kimbu siyamo dokona pao palipala baa lakandalana piyunu dokopa, Dopa pii napipi kae leya. Namba embape dee embena yangonge dupwapeme Yesunya lao karaminyi kendemande dopaleko karoŋo. Emba Anatu iki lakandape leya. Yesumi pii renge kinyi rolae lenge doko poropeta dupwame lenge apo dokonako lao epeya.
REV 19:11 Enakana yake kata lumbuyamo kandeyono dokopa mena ose kakepamende kareya. Mena dokona mendeme banya kingi doko Kaeya Nao Rolae Pyuo Karalu Karenge lengende peteya. Baame kote lalanape dee yanda pinyape dokopa rolae dokona palyuo pyuo karenge leyami.
REV 19:12 Banya lenge doko isare uliyapu nyili lao rengende banya kyawa dokona kiŋinya kyawa rarange malu dupwa piya. Banya kingi pyasi paleyamopape mendeme yaka lao kandarami ingya nayamopa baa iki siya.
REV 19:13 Komau londe baa piso kareyamo doko ranjama yuu siyapya. Banya kingi doko Anatunya Piiŋi lenge.
REV 19:14 Yake pandana ami dupwa komau kyewao lenge dupwa pipala ose kakepame dupwana piso baa peyamuli pyuo peyami.
REV 19:15 Wua gela nao mama nyingi londende akali banya kambu dokona epeya dokome rara peparae pyao nyuo isa palyara ingiya. Baame kapa ane pangali porai mende nyepala dokome rara dupwa iso karara ingiya. Baa Anatu Ama Porai dokona imbu singi doko makande minyuo waene kalyuo pyarakwuaramo dokopa waene ipwange poro lao neta epara.
REV 19:16 Banya komau londepe dee kimbupi dolapona pepa pyasi paleyamo doko, Baa kiŋinyako Kiŋi mupwa dee kamongonako Kamongo mupwa doko lao paleya.
REV 19:17 Enakana kandeyono dokopa aŋalande neta reyamo dokona roya kareya. Dokome yaka peparae ketae bii lao kareyami dupwa lamaiyuo kyakale poraiyuo lao, Nakama Anatunya nenge andake rapa rapa pilyamo dokona epo kapalapape leya.
REV 19:18 Wambu pyasi seramopa kiŋipi yanda singi mupwa mee yanda singipi mena ose dee akali piso paenge dupwape koo epengepe puu maisi dee mee karengepe wambu dupwana yanenge dupwa nala ipupwape leya.
REV 19:19 Enakana kandeyono dokopa mena koo dokope isa wambunya kiŋi dupwape nakamana yanda singi dupwa nyuo mendakyapala akalinde osena peteyamo doko banya ami pipa kando yanda pimwaiyami.
REV 19:20 Dopa pipala mena koo doko banya poropeta angi daandepa pipu lao kemali pyuo role pyao papingi dolapo nyuo puu maiyami. (Poropeta dokomeyoko wamba yulu andake pyuo wambu malu minyoko piyamo kata dokona ingyuo mena koona make nakamana enamba dokona paleyamopa bange mena koo baa dopale kingimi wasapala kingi lao kareyami.) Nakamba kando yanda pimwaiyuo pipala mena koo doko banya kyambo lenge poropeta akali dokope isare rao lulya kaso karenge andake dokona kupinyi pyambuyami.
REV 19:21 Akali osena peteya dokona banya nenge katana wua gela epeya dokome nakambana ami pyao pyalingi nyiya. Dokopa yaka peparaeme epo nakamana minju dupwa napala sikya piyamopa peyami.
REV 20:1 Enakana nambame aŋala mende yake dokona piso epeyamo kandeyono dokopa baa yuwale kata soo puu penge dokona kii dokope dee puu sane londe mendepe kingi rakana palyaro kareya.
REV 20:2 Baame kau wambarae Satane doko kupyuo nyepala ee kana 1,000 puu mainyi palyiya.
REV 20:3 Aŋala dokome baa yuwale kata soo puu penge dokona Satane pyao pyano kii palyapala ee kana 1,000 dusipana isa wambu dupwa dee kunji pyao kara nana lapala bange pyakerasindeme upi lanyi palyiya. Enakana dee yuu gii kuki lama neta epapala papyuo karara ingiya.
REV 20:4 Enakana Anatumi rombo palyiyamuli pyuo wambu keta kote larami dupwa nakamana kote pii lao petenge isa dupwana peteyaminyi kandeyo. Dee wambu malu Yesunya yulu minyuo Anatunya pii boo pyao leyamisa ayemba puku piyami dupwana imambu kandeyo. Dee nakama role pyao kareyami dupwa mena koo dokona dee baa dopale isa bange wasiyami dokona kingi laa nao menana make nakamana enamba kingipi dupwana pyasi pali nayamopa kareyami. Nakama Koraisapa role pyao isa yuu ee kana 1,000 ingyuo iso kararami ingiya.
REV 20:5 Dupwa isa wambu kanda soo lopo eparami ingiyamo kandeyo. Menge kumuyami dupwa lenge raa nao pao ee kana 1,000 epo para ingiya.
REV 20:6 Kanda soo lopo eparami dusipa raeme kumuo parami. Kumungi renge mende doko nakama keta pali nara. Nakama Anatu Koraisapana purisi akali ingyapala nakamba role pyao ee kana 1,000 isa yuunya wambu iso kararami.
REV 20:7 Ee kana 1,000 epo paparamo dokopa Satane kata lumbuo yaki nyeramo neta epara.
REV 20:8 Epapala Satane baame yuu Goko Mekokopa dolapona wambu Anatunya kingi epe nasingi yuu muu peparaena pisirami dupwape kando nupi sepala nakama nyuo kiminjapala yanda pinya lao mapinyi retara ingiya. Dokopa dokona akali kareyami dupwa ipwa pota kee kana mendeme yaka lao kanda nara dopale ingyuo kareyami kandeyo.
REV 20:9 Dokopa nakama raeyapala Anatunya wambu palyuo karenge pandape dee anda taone Anatu mona retenge dolapope nyuo sukusa palyaro kararaminyipa yake dokona piso isare rao epo nakama rao otara ingiya.
REV 20:10 Dokopa Satane wambu dupwa pipa panga soo kareyamo doko Anatumi nyuo isare rao lulya kaso karenge andake dokona pyao nembara ingiya. Baape mena koo dee poropeta kyambo lenge dokope isare dokona rao karalu kararami ingiya.
REV 20:11 Enakana kiŋinya petenge isa reeko kakepamendena mendali peteyamo kandeyo. Banya lenge kambu dokona yake yuupa dolapo mee ingyuo rali piyambinyipa dee kanda narami ingiya.
REV 20:12 Dokopa wambu kumasi koo epengepe peparae kiŋinya petenge isa siyamo dokona roya kareyaminyi kandeyo. Dokopa buku lapo kumuyami dupwa aki mende pyuo kareyami lao buku dupwana pyasi paleyamopa kando kote larami buku dusipa lumbuyami. Dee mende letena palenge buku doko lumbuyaminyi kandeyo. Dokopa kareyaminyi dupwa buku leyamuli pyuo kote lao roleyami.
REV 20:13 Enakana ipwa kotana kumuo peyami dupwa neta epeyami. Dee yuunya kumasi dupwape imambu kumuo penge panda dokona peyami dupwape neta epeyamiyoko. Epapala aki yulu mende piyami lao dupwana minyuo kote lao roleyami.
REV 20:14 Dokopa kumungi renge dokope dee Satane panda karenge dupwape isare andake dokona pyambuyami. (Isare andake rao singi dokona parami dupwa dee kamba kumarami.)
REV 20:15 Wambu letena renge palenge buku dokona kingi pali nayamo dupwa isarena pyao nembeyami.
REV 21:1 Enakana yake yuupa dolapo wakale enenge ingyuo alowa piyamo kandeyo. Yake yuupa wamba singi dolapo nyuo alowa piyamopa kota pete doko mee ingyuo rali piya.
REV 21:2 Dokopa Jerusaleme taone yapasi doko enenge ingyuo alowa pipala yake dokona piso enda mapwae rapa rapa pyuo kalya pipala akali anda epenge dopale mane mane pyuo epeyamo kandeyo.
REV 21:3 Dokopa kiŋinya petenge isa dokona piso pii rekyae lao, Kandalapa epapu Anatu baame wambunya raka dokona sukusa palamo. Baa nakama pipa palyuo karo piramopa nakama banya wambu ingyuo parami.
REV 21:4 Anatumi isa wambu mona minyarambu nakamana lengena ee kwuakamira. Nakama dee kuma naope sakame kumuo mona rando ee lao kara nao pirami. Yulu wambo singi dupwa pyalingi nyilyamo leya.
REV 21:5 Kiŋinya petenge isa dokona peteyamo dokome, Nambame epapu bange dupwa peparae komba pyao enenge ingyuo nyilyu leya. Pii dake ama rolae angi ingilyamo dokona pepana pyao retape leya.
REV 21:6 Baame namba kando dee kamba langyuo, Yulu doko pyuo kaeyalono. Namba yuu ingya ingya ingyuo karo pao lumwa pingi ingyuo karo. Mendalimi ipwa nara ramo doko baa lete palenge ipwa guu lao epenge dokona mee pakiki nena lao mairu leya.
REV 21:7 Mendeme koo dupwa nyuo anamasi minyaramo dokona nambame baa elyape keta piso banya Anatu ingyuo paronopa baa nambana wane angi ingyara leya.
REV 21:8 Dopa piramopape pakapala iki iki lao parami dupwape panga soo lenge dupwape yulu koona wangu lakapala pingipi wambu yango pyao kumakaengepe kepo pyuo pamuku yulu pingipi wambu yango mauli minyuo pingipi Anatu kaepala mee bange dupwana mona andengepe pii kyarepa pyuo kyambo pii lengepe dupwa nakamana yuu doko yuu kyuwande isare rao lulya kaso karenge dokona parami. Dokona papala dee kambako lapo pyuo kumarami leya.
REV 21:9 Aŋala yanda ipingi nyepowame bange koo isa wambu kwuanyi nembenge nakamana pere yanda ipingyako dupwana siyamopa minyaro kareyami dokona mendeme epapala lao Sipisipi Ikyanena enda nyelana pilyamo doko lasaka pirowale ipu langiya.
REV 21:10 Dokopa imambu doko epo namba keta maralyiyamopa aŋala mendeme namba soo yuu kyau ama ketaendena peya. Papala dokona karo yuu taone Jerusaleme enenge poo pyasinde Anatu keta yake dokona piso epeyamo doko lasaka piya.
REV 21:11 Kandeyono dokopa taone doko Anatunya yanga paupau lenge dokome neta ranyi nembeya. Lepolepo neta epenge doko kana kyakapaende mone malu maiyuo ropo pyao nyingi dopalende ketapa ingyuo lepolepo pyuo kareya.
REV 21:12 Dokona kame ama yuu ketae piro kareyamopa dokona kakota lumbungi akalisa ipisu lama dupwana aŋala mendaki mendaki lao rapu pyuo kareyami. Kakota lumbungi dupwana Isaraele rara akalisa ipisu lamako dupwana kingi pyaro kareya.
REV 21:13 Taone dokona kame kisima dupwana kambu rema larapu piro kareya. Kame dulurena kambu remape dumurena remape dambirena remape donorena rema larapu piro kareya.
REV 21:14 Taonena kame andake dokona kana susa akalisa ipisu lama dokona Sipisipi Ikyanena aposele akali akalisa ipisu lamana kingi pyasi paleya.
REV 21:15 Aŋalame namba pii angi langiyamo doko baa kana golo pangalinde anda taone dokonape kame dee kambupi dupwa makande pinginde minyaro kareya.
REV 21:16 Taone andake dokona kame pinjingi dusipana paki pakipi ama kapa kapa pyuo make mendakinya palyuo kalomala peyapya. Dokopa aŋala banya makande pingi pangali dokome taone makande piyamo dokopa make londe 2,000 kilomita ingyuo peya. Dee ketae dorena mendare dopaleko ingyuo peya.
REV 21:17 Aŋala dokome kame ketae pulyuo dorena piyamo dokopa make mita 67 dopale ingiya. Makande doko aŋalame mee wambu pinginyili pyuoko piya.
REV 21:18 Kame andake doko kana kyakapae keyangendeme waso dee taone angi doko golo yapasi ketapa ingyuo lepolepo pyuo karengendeme wasisi siya.
REV 21:19 Taone dokona kana kame susa dupwa mone andake penge kana dupwame piya. Kana susa wambo doko wua gamya yongo nyingindeme piyapya lapo pyuo reteya doko bulu dee repo pyuo sereya doko kala wakale wakale kisima doko kyakapae ingyuo siya.
REV 21:20 Kingi paki doko kone pyuo kokwa silya sana pingi. Pakinyamange doko kone yanda ipingi doko lulya renge mange lama doko kana rara wakale kyakangende. Mange mendaki doko lulya renge rara wakalendepya. Akalisa doko kyakapala lulya raoko piya. Akalisa ipisu mendaki doko role renge bulundepya. Akalisa ipisu lama doko kone mendere wakalendepya.
REV 21:21 Kambu dowa akalisa ipisu lama siya dusipa mola akalisa ipisu lama kana malu penge dalapome wasiyamipya. Dowa akalisa mendaki ipisu lama dokona mola mendaki larapu wasiyamipya. Taone dokona kata peparae dupwa golome iki wasisinde ketapa ingyuo lepolepo pyuo siya.
REV 21:22 Anda taone dokona tembole anda mende kareyamo kanda nayo. Kamongo Anatu Ama Porai dokope Sipisipi Ikyane dokope nakamba iki tembole anda ingyaro kareyambi.
REV 21:23 Taone dokona neta kanape dolapo rao karara kata mende see naya. Anatunya yanga paupau lenge dokome neta rao dee Sipisipi Ikyane dokome lambe ingyuo rao kareyamo kandeyo.
REV 21:24 Isa wambu dupwa banya yanganyi pyambwara dokona kararami. Dokopa yuunya kiŋi akali dupwa nakamana kiŋi yulu lakandeyami dupwa paleta eparaminyi taone doko au pyuo para.
REV 21:25 Taone andake dokona kambu dupwa yangama alemanji lao lumbasi mee sulu seramopa yuu iminja naramo dokona lao kambu doko upi larami renge mende pali nara.
REV 21:26 Wamubunya rara dupwana ketae pyambungi yulupi dee akali anginya lakandenge yulupi dupwa paleta taone andake dokona eparaminyipa dokonako sera.
REV 21:27 Dopa pyuo eparaminyipape yulu kwao karengepe dee elya nao koo pingipi kyambo lao karengepe dupwa taone dokona epa narami. Sipisipi Ikyanena lete palenge buku dokopa nakamana kingi silyamo dupwa iki taone dokona eparami.
REV 22:1 Enakana aŋala dokome ipwa letena renge palenge doko namba lasaka piya. Ipwa doko Anatu dee Sipisipi Ikyanepe dolapona petenge isana piso guu lapala ketapa ingyuo lepolepo pyuo epo peyamo kandeyo.
REV 22:2 Ipwa doko kata barete rolae dokona epo peya. Ipwa kee kama paki pakipi dolapona letena renge palenge isa doko kareya. Isa dokome kana kumuo yapa soo piramo dupwana yaka lao jingi lyuo karo ee kana mendaki dokopa yuu gii akalisa ipisu lama larapu jingi lyepa piya.
REV 22:3 Anatumi epekanda nange yulu dopale mende anda taone dokona see naya. Anatunyape dee Sipisipi Ikyane dokonape petenge isa doko taone dokona seramopa banya kendemande dupwame dokona karo mona kando banya kingi lao kararami.
REV 22:4 Nakambame Anatunya lenge kambu kandarami dokopa nakamana enamba dokona banya kingi doko pyasi palira.
REV 22:5 Taone doko dee iminja naramopa Kamongo Anatumi yanga paupau lanyi pyambwaramo dokopa lambe netape dolapona yulu mende pali nara. Wambu kararami dupwa kiŋi ingyuo iso karalu kararami.
REV 22:6 Enakana aŋala dokome namba kando lao, Pii pepana pyapinyi dupwa angingyuo para lyakande leya. Dokona lao Kamongo Anatu baame poropeta akali dupwa banya Imambu maingi dokome repeta apa pira lao aŋala mendeme banya kendemande dupwa lasaka piraŋa pena leya.
REV 22:7 Yesumi, Selapape letamo. Namba repeta eparowale. Buku dakena pii pyasi palamo dupwa moko minyuo pirami dupwa raeme kumarami.
REV 22:8 Nambana kingi Jone lenge. Pii repa repa piyamo kando ote pipala dokopa aŋala lasaka piyamo kimbu siyamo dokona pao palipala mona kando banya kingi lalana piyu.
REV 22:9 Dopa piyunupape baame langyuo, Dopa pii kae leya. Namba mee embape dee embena akali yango poropeta dupwamepe buku dakena pyasi palamuli pyuo pirami dupwanako mendaki ingyuo karoŋo. Anatu dokona mona kando kingi lapengeŋe leya.
REV 22:10 Dopa lapala baame kamba langyuo, Buku dakena pyasi palamo yulu rengya nyeramo dupwa kalyamo kara napipi. Angi piramo yuu gii doko repeta palira ingilyamo.
REV 22:11 Akali yulu koo pirami ramo doko kata dokonako pipape. Dee kwao kararami doko dopako pyuo karalapape. Keyange pirami dupwa dokonako pyuo karo. Dee poo pyasi yulu pyuo kareyami kande dupwa dokona pyuo karo pipape.
REV 22:12 Yesumi, Selapa, repeta usale eparo letamo. Nambame aki yulu piyami lao dupwana manda manjo kingi kisaro ingilyamo.
REV 22:13 Namba yuu ingya ingya ingyuo karo pao lumwa pingi ingyuo karo wambo dokona piso karo pao enakana dokona kararoko.
REV 22:14 Wambu komau wate pyuo poo pingi dupwa rae mairami. Nakama letena isa jingi doko napala anda taonena kambu dowa dokona sukusa parami lyakande.
REV 22:15 Kame netarename karaminyi dupwa pasendiya yulu pingipi mauli pee minyingipi wambu kepo pingipi wambu yango pingipi kyambo lalana wangu lakangepe mata kando pii lenge dupwa rae maingipi Anatu kaepala mee wakale dupwa mona nyingi dupwana pyuo karaminyi.
REV 22:16 Yesumi, Nambana aŋala mende pii dusipa Elyambu Pingi wambu keta sinya lao lamaiyala pena lapu letamo. Namba Dapitinya para pyao peyamo dokona ingyuo mandeyami. Namba yangama bui yoyowande renge dopale ingyuo karo.
REV 22:17 Imambu Poo Pyasi dee Sipisipi Ikyanena enda dokopame kee lao sukusa ipupwape letambinyi. Dokona mendeme seramo dokome kee lao epena lena. Ipwa namwali lao suu pyarami dupwa epo ipwa lete palenge doko ropo pyaa nao mee narami leya.
REV 22:18 Namba Jone, mende piraŋa lao pii pyasi palamo dupwa serami wambu dupwa keta langyuo wambu pyuo leto kande. Doko mendeme pii dakena konda pyuo pyao pira ramo doko Anatumi yulu koo buku dakena pyasi palamo dupwa baa keta karala pena lara.
REV 22:19 Dee mendeme Anatunya pii buku dakena pyasi palamo dokona mende kwuanyi nembara ramo doko Anatumi letena renge palenge isa jingi akali baa narali dupwa mai nara. Dee baa yuu taone poo pyasi dokona sukusa paa narako. Buku dakena keyange nyerami lao pyasi palamo dupwa baa angi nyerande daako.
REV 22:20 Mendeme pii pyasi dusipa angingyuo paraŋa letamo doko baa, Olo epena kimbu malyaro karo letamo. Doko kapaŋa Kamongo Yesu emba waiya lao ipu.
REV 22:21 Kamongo Yesunya mona keyange palyuo ipingi renge doko nakama keta palena.
