﻿Revelation.
18.
Taqa zita-te, no enzol ezoqa nøme no-omét. Yan-té gendovís. Ndego bazaføgakh kandambá neka waev bæbæs-qapé. Ta waev ndøgo, manqei-qape, sùgumu-gutavát. 
Yaq ndego kandambaqapé møndæ-akhá. Āv gene-akhá nqǽgo, “Mø̀ndøbøí. Bebilon taon kandambaqape, mø̀ndøbøí. Gevøgev nekā nqova soqøsoqa, mø̀ndømø-tiqá-khóev. Gekha pipisi neka søvakha gigiāp ndigu, Mbumbukiam-qa bøi-te soqain ndigu, ndego ndesanqaza, ndǿgo tiyagé. 
Zapa ndǿgo, Bebilon taon, ndøgo ande sævam me nduigu, bawabawan ate ndægo, tuqa mambe matev waen ndø-izumám, kawa vøzø̄-okɨvam. Até manqei-qape kawakawa-zá-ya, tu namba mambe matev vø̄egoam. Neka bisnis ezoqam, manqei-qape-te ngiyage, tu zapaya, gèmø-moni-kopoav-ezoqam-éz. Zapa ndǿgo, ndugu gigiap møqǽ.” 
Yaq no manqat nøme nø-ewág. Yan-té qando-fakhán. Āv qande-eín nqǽgo, “Nogi ezoqam! Mòzotøndo-fakház. Vø̀ndo-fakház, zo Bebilon taon mokho-te ndozotu꞉gu. Soqaín ndøgo, zo tu namba manqa-zapa gone-te tozo-khokhombupat. Neka soqaín ndøgo, tu namba yaq-fia nqosøgeap sa tozotumu-upøgim. 
Tuqa manqa-zapazapa, khàpumu-kapuiám, yan vømø̄khanaz. Mbumbukiam tuqa matev soqøsoqa, manqa mate navøepøteáv. 
Zo yaq āv tømbøe-matønømém, av zo guzømbe-matønumam. Zo tu-te yaq-fia menás sozó-taném, av matev guimatønumam. Waen føgakh soqaqape guzø-etoam, yaq menás sozombó-etøomém. 
Av ndugu gui-khambuvupam neka gigiap kopoav-qape qambøegoam, yaq zo nqosøgeap neka mbøni vaev matev, āv tozombøé-etøomém. Ndugu mokho-mba, āv guni-manqaté nqǽgo, ‘No kawa sævam noqomát. No ngæmám mbá. No ambá av nqǣgo, anganeam genønanīm. Matev soqain genǿ-fakhanák. No mbøni genǿvayák.’ 
Geté ndugu av nduikhambuvap, ta zapaya ndøgo, matev soqøsoqa vinivinimba, khøuwa kopo-té segembøé-fakhanám, løvøte neka mbøni vaev neka ifin matev. Yaq ndugu gøinám guní-lonqotøvém. Zapa ndǿgo, Evezøza Mbumbukiam, ndugu yaq-fia nqosøgeap ndembo-etoam, ndego bazaføgakh-qapé.” 
Yaq manqei-qape kawakawa-za, tu namba mambe matev gi꞉goam neka tuqa gigiap kopoav qazøgoupam, ndigu gé-eivám, mbøni vøzǿ-nqosøgīm, khøifa tiqeivim, tutuavet. 
Ndigu qambaqapé segendó-waniapét. Gó꞉khouwaném, matev soqaqape tiqeivim, tu-te tøfakhan. Yaq āv giní-ugufømém nqǽgo, “Hao, ú꞉-ā꞉! O Bebilon taon kandambaqape, bazaføgakh-qape. Qoqa manqa-zapa-qa yaq-fia, nakhamas-té qanøqa-fakhán.” 
Neka bisnis ezoqam, manqei-qape-te, gé-eivám neka tu zapaya mbøni vøzǿvā. Zapa ndǿgo, ezoqa nøme mbaín, tiqa gigiap tiwiat. 
Ezoqa tiqa gigiap sekemba géwiák, kopømba ande av gol neka silva neka nandi qaniqanimav-qape neka aqeing agiwa-qasis, neka ndabua mbomømboma køkø-køkouk neka khagi vinivinimba, neka tae vinivinimba fia kandakanda, neka gigiap ndøgo, søvakha gigiap-gi khayam khakheitap, neka tae ndis fia kandakanda, neka gigiap ndøgo, auli neka nandi khakheitap. 
Neka ezoqa nøme mbaín, tiqa gigiap tiwiat, kopømba ande av lou mokhov eqeieqei nonqo, neka gigiap sisip mbomømboma, toqo-mboqotumat, neka nøme ndøgo, kha-te toqo-gɨ꞉mat, neka waen neka oliv oil, neka flawa, neka wit, neka kao, neka sip, neka hos, neka manqei khagua, neka até ezoqam-aním-a. 
Ndigu bisnis ezoqam, āv giní-einím nqǽgo, “Bébilon. Gigiap ate ndægo, qo møqæ qaqagoam, qo mø̀ndø-qøuváq. Qoqa gigiap qaniqanim neka fia kandakanda mø̀ndøqa-navøém. Qo nango geqá-fakhanák.” 
Ndigu bisnis ezoqam, tu mokho-te gimø-gigiap-kopoav-ezoqam-ez, ndigu qambaqapé segendó-waniapét. Gó꞉khouwaném, matev soqaqape tiqeivim, tu-te tøfakhan. Ndigu gé-eivám neka mbøni vøzǿ-nqosogīm. 
Yaq āv giní-ugufømém nqǽgo, “Hao, ú꞉-ā꞉! O taon kandambaqape, bazaføgakh-qape, qo ndabua mbomømboma papaqa-papaqa neka køkø-køkouk neka kiki-kikis qoqo-uzumam neka qoqa kha, gol neka nandi mbomømboma neka aqeing agiwa-qasis voqotē-khakheinumam, 
qoqa gigiap mbomømboma, ate qaqambe-goam, nakhamas-té qanøqa-soqøsoqøám.” Palai khagua nøzøgim ezoqam ate ti꞉goat neka ezoqa ewaqape, khagua-te, manqei nøme-te tiguvimat, neka ezoqa ewaqape, khagua-te tisasaetat neka gekha ezoqām ndigu, ndaola-te yage tindapat, ndigu qambaqapé segendó-waniapét. 
Yaq khøifa tiqeivim, ndugu tutuavet, yaq āv giní-akhaemém nqǽgo, “Gê, taon kandambaqape nøme tǿgo, av nqanek taon qægoam? Mbaín.” 
Yaq ndigu gè-akhaemém, neka gè-eivám. Neka tiqa mbøni nqosøgeap-te, ekeza kawa-te, pakhakh ndønqagimám. Yaq āv gini-einím nqǽgo, “Hao, ú꞉-ā꞉! Taon kandambaqape. Tu mokho-te, palai khagua evøndipakha ate ndi꞉gu, ndaola-te gibøetam, ndigu mø̀ndømø-moni-kopoav-ezoqam-eztám, tiqa gigiap guwiam. Geté ndugu nakhamas-té gunø-soqoév.” 
“Geté zo yan-te ndozoyage, neka zo Mbumbukiam-gi ezoqam, Keliso-gi u-anim neka Mbumbukiam-gi manqa vevezam ezoqam namba, zo khanakhanakh bezøgó, tu zapaya. Zapa ndǿgo, matev soqøsoqa, zo guzø-matønumam, Mbumbukiam Bebilon-te, yaq-fia me꞉tá.” 
Yaq enzol ezoqam bazaføgakh-qape, nandi kandambaqape ndøndapáz. Kandambá tintív. Tiqa khouwezat, andé wit mivitøzat nonqó. Yaq ndaola-té genø-ogezó, gendo-ein, “Taon kandambaqape, Bebilon, āv tøné-ogí. Bazaføgakh-ús. Yaq ezoqa nango géqeivimák. 
Qo mokho-te, gita khaneam ezoqam-qa khaneam neka ouv qaqayam ezoqam-qa wag neka ndigu pøinda o kipi gikhambøematun, taqa wag, ezoqa nango géyogemák. Neka qo mokho-te, sasae vinivinimba zøtezat ezoqam, nango gégoák. Neka ndigu wit nandi gi꞉mivisumatun, ezoqa taqa u, nango géyogemák. 
Neka qo mokho-te, lampa waev nango gékhayák. Neka qo mokho-te, sakheis neka angana, ndigu tinøkem, tiqa khanakhanakh manqat, ezoqa nango géyogemák. Matev āv taqambé-fakhán. Zapa ndǿgo, qogi bisnis ezoqam, manqei-qape-te ate nqægo, āv gini-khambuvupám nqǽgo, ‘Ni bisnis ezoqam kandakandá.’ Neka qoqa manqa-sisi matev, qo bawabawan ate ndægo qote-tubumám. 
Mbumbukiam-gi manqa vevezam ezoqam neka Mbumbukiam-gi ezoqam ate ndi꞉gu, tiqa kouk, Bebilon taon-té giqeivím. Ndøgo tuqá manqa-zapá, ndigu gizitagat, vø̄pakhaetat, ezoqa ewaqape nøme namba, manqei-qape-te gizitagat.” 
