GEN 1:1 Nyukurnikaparri Mamalu-pulanya yalkiri kamu parna palyarnu.
GEN 1:2 Nyukurni katji parna wiya yuti ngarangu wurrakili. Tjitja kalyu tjarluminyirri parnangka kankarrawana ngarrirra parrayurrima. Munga tjarlulu tjutunma. Mamakurnu kurrurnpa kankarrawana kalyungka parrayurrima mayarnyuru.
GEN 1:3 Tjiitjanu Mamalu watjarnu, “Tilirriwa.” Mularrpalpi tilirringu.
GEN 1:4 Katji palurulu nyangu watjarnu, “Yuwayi, palyaminyirri ngarinpa.” Mamalu tili tjiitja yini yungu-ra “Karrpu.” Tjiitjanu partukanu-pulanya karrpu kamu munga partumparra ngarakuwa. Mamalu munga yini watjarnu “Munga.” Yulyultjarrarringu kamu karrpu kutjungkalpi wiyarringu.
GEN 1:6 Kalyulu parna tjuturnu kanyinma. Mamalu watjarnu, “Kurtungka yalkiri tjarlurri miku kalyu partungka-partungka ngarakuwa.” Mularrpakili ngarangu.
GEN 1:7 Kalyu kalkinpa pakarnu kankarra ngarama. Kamu kalyu kalkinpa parna kutjuwarrawana ngarrima. Mamalu watjarnu tjilanyatuka partumparra ngaramalpa.
GEN 1:8 Tjiitjanu yungu-ra yini “Yalkiri.” Yulyultjarrarringu kamu karrpu kutjarrangkalpi wiyarringu.
GEN 1:9 Mamalu watjarnu kalyu kaninytjarra yankuwa miku parna yutilpi ngaramalpa. Parna mularrpalpi yutirringu.
GEN 1:10 Kamu Mamalu yini yungu-ra “Parna.”Tjiitjanu Mamalu kalyuku yinilpi yungu-ra “Kalyu tjarluminyirri”. Palurulu parra nyangu ngurrkurringu.
GEN 1:11 Mamalu watjarnu mangkalpa kutjuwara lukararrakurlu pakalkuwa, kamu warta kalkinpa mangarrikurlu pakalkuwa.
GEN 1:12 Mularrpalpi pakarnu ngarama-ya. Mamalu parra nyangu ngurrkurringu watjarnu, “Palya.”
GEN 1:13 Yulyultjarrarringu kamu karrpu marnkurrtalpi wiyarringu.
GEN 1:14 Mamalu watjarnu tjirntu yakanpa kamu wilpa yutirrikuwa. Mularrpakili yutirringu ngarama-ya. Mamalu watjarnu tjirntu pakalku raayanku maa tjarrpaku mungarriku. Yakanpalpi mungangka raayanku maa tjarrpaku. Miku puntulu laltulu tjirntu yakanpa kamu wilpa nyangamalpa-ya. Tjiitjanu nintilu tjungarnilu watjanmalpa yaltapuru mayarnpuru yalipuru.
GEN 1:16 Mamalu-pulanya tili tjarlu kutjarra palyarnu, tjirntu kamu yakanpa. Wilpa lurrtju palyarnu wantingu. Tjirntu tjunu karrpungka raayanku maa tjarrpaku mungarrikulpi. Yakanpalpi tjunu mungangka raayanku. Mamalu parra nyangu watjarnu, “Yuwayi tjilanyartuka palya ngarinpa.”
GEN 1:19 Yulyultjarrarringu kamu karrpu muntungkalpi wiyarringu.
GEN 1:20 Mamalu watjarnu yawu kutjuwarra kalyungka yutirrikuwa miku-ya parra lalturrikuwa kalyungka. Tjiitjanu Mamalu watjarnu turru kutjuwarralpi yalkiringka yutirrikuwa parra paarrpakanmalpa-ya, tjarlu-tjarlu kamu tjukurn-tjukurnpa. Mularrpakili yutirringu yalkiriwana parra-ya paarrpakanma.
GEN 1:21 Tjilanyartuka yawu kutjuwarra tjarlu-tjarlu kamu tjukurn-tjukurnpa lurrtju palyarnu. Tjiitjanu turru kutjuwarra palyarnu yalkiriwana parra-ya paarrpakanmalpa. Tjiitjanu palurulu parra nyangu ngurrkurringu watjarnu, “Palyaminyirri.”
GEN 1:22 Tjiitjanu palurulu-tjananya yawuku kamu turruku wangka palyaminyirri watjarnu. Palurulu watjarnu-tjananya, “Wulu nyurra laltumanamalpa.” Mularrpakili-ya wulu maa lalturrima.
GEN 1:23 Yulyultjarrarringu karrpu rakangkalpi wiyarringu.
GEN 1:24 Mamalu watjarnu yanumalpa kutjuwarra parnangka-ya yutirrikuwa. Mularrpalpi yutilpi-ya ngarangu. Kalkinpa kuka, kalkinpa kuka wiya, kalkinpa parra-ya wayinma parnawana. Mamalu yanumalpa kutjuwarra palyarnu. Mularrpalpi palurulu parra nyangu watjarnu, “Palyaminyirri.”
GEN 1:26 Mamalu watjarnu, “Kuwarri ngayantula puntu palyalku ngayanyuru. Miku-tjananyaya kutjuwarra ngampurrtu kanyinmalpa, yawu turru kamu yanumalpa kutjuwarra kuka kamu kalkinpa-ya kuka wiya kamu parra wayinmalpa parnawana.”
GEN 1:27 Tjiitjanu Mamalu-pulanya yarnangu palyarnu puntu kamu tutju. Yuwayi mularrpakili palyarnu-pulanya paluruyuru.
GEN 1:28 Tjiitjanu palurulu-pulanya wangka palya watjarnu, “Nyuntu kutjarralu nyupararalu wulu-tjananyan tjitji maa laltumanamalpa ngawitji, kamu kumpurru nyinakuwa-ya parnangka. Miku-tjananyaya yawu, turru yanumalpa lurrtju ngampurrmanamalpa.”
GEN 1:29 Mama wangkangu, “Kulila, ngayulurna nyurrampa mangkalpa lurrkarrarakulu kutjuwarra warta kutjuwarra mangarrikulu tjunu miku nyurra ngalamalpa.
GEN 1:30 Kamu-rna mangkalpa kamu warta yukirikulu tjunu yanumalpa-ya kutjuwarralu kamu turrulu mangarri ngalamalpa.” Yuwayi nyamu. Mama wangkangu tjilanyartuka ngaramalpa.
GEN 1:31 Mamalu kutjuwarra parra nyangu watjarnulpi, “Yuwayi kutjuwarra palyatuka ngarinpa.” Yulyultjarrarringu kamu karrpu kalyungkalpi wiyarringu.
GEN 2:1 Mamalu parna kamu yalkiri-pulanya palyarnu wiyarnu. Kamu kutjuwarra parnangka kamu yalkiringka-tjananya palyarnu wiyarnu.
GEN 2:2 Karrpu wilkingkalpi paluru warakparni nyinama.
GEN 2:3 Tjiitjanu wangkangu karrpu kutjungka tarruku wulu warakparni ngaramalpa. Puntu laltulpi warakparnilpi nyinamalpa Mama-ya kulinmalpa. Palurulumarntu kutjuwarra palyarnu wiyarnu karrpungka wilkingkalpi warakparni nyinama, tjilanyartuka.
GEN 2:4 Ngaatja tjukurrpa Mamalu yalkiri kamu parna-pulanya palyarnu. Mamalu parna kamu yalkiri palyarnu wantingu.
GEN 2:5 Mangkalpa mangarrikulu kamu warta tjukuny-tjukunypa wiya-ya pakarnu wurrakili. Mamalu wiya kalyu kankaratjanulu yiyarnu tjilanyartuka. Puntu kutjupa wiya nyinama parna tjawalkuwa.
GEN 2:6 Kalyu parnatjanu pakanma. Kamu parna kalyukulu ngarrima.
GEN 2:7 Ngaatja Mamalu parna manulpi puntu palyarnu ngarritjunu. Tjiitjanu puntungka-lu mulyawana puyurnu. Puntu kanarringulpi nyinama.
GEN 2:8 Mamalu kaatanpa palyarnu kakarrawaku ngurra yini Yiitinta. Palurulu puntu nyinatjunu wantingu.
GEN 2:9 Palurulu-tjananya warta palyaminyirri laltu mangarrikulu kutjuwarra pakaltjunu. Ngatja warta kutjarra-pula kurtungkaminyirri ngarama. Warta kutjupa ngarama katji puntulu kutjupalu ngalaku kana wulu nyinamalpa. Tjiitja warta kutjupa ngarama katji puntu kutjupalu ngalaku yirrulpa tirrinyanku nintipuka nyinamalpa.
GEN 2:10 Tjiingka ngurra Yiitintjanu kalyu tjarlu parntinyanu warta kamu yukiri kanalpi-tjananya kanyinma. Tjiitjanu kiliki kutjutjanu lipirringu munturringu ngarama.
GEN 2:11 Kiliki kutju yini Piitjanpa maa parntinyanu ngurra yini Yapilalawana.
GEN 2:12 Ngurra tjiingka pamarrpa kawurlkurlu manama-ya. Tjiingka warta lurrtju parnti-parntikulu palya ngarama.
GEN 2:13 Kiliki kutjupa yini Kiyanpa maa parntinyanu ngurra kutjupawana yini Kuutjulawana.
GEN 2:14 Kiliki kutjupa yini Tayikuri maa parntinyanu ngurra Yatjiriyala kakarrawana. Kiliki kutjupa yini Purayiti.
GEN 2:15 Mamalu puntu paluru katingu kaatanta nyinatjunu watjarnu ngampurrtu kanyilkuwa. Kamu parna tjawanmalpa mangarri parltjaku pakaltjunkuwa.
GEN 2:16 Mamalu watjarnu, “Yuwayi, palyan warta mangarrikulu kutjuwarra ngalamalpa.
GEN 2:17 Warta kutjupa ngarinpa katjin ngalaku yirrulpan tirrinyanku nintipukan nyinamalpa. Warta tjiitja tarrukuminyirri ngarinpa. Wiyan ngalaku. Katjin ngalaku mirrirrikun.”
GEN 2:18 Mamalu watjarnu, “Kulu puntu ngatja kutju marlpaparni nyinamalpa? Wiya, ngayulurnara marlpa palyalku puntutjunkuwa.”
GEN 2:19 Mamalu parna manulpi kuka-tjananya kamu turru laltu palyarnu. Mamalu-tjananya puntukutu katingu ngaratjunu miku-tjananya yini yungkuwa. Puntulu yini-tjananya kutjupa-kutjupa yungu. Palurulu purtu kulirnu, “Marlpa wiya-tjuya ngaanpa.”
GEN 2:21 Mamalu puntu nyalitjunu. Nyali tjarlulpi ngarrima. Tjiitjanu Mamalu kantilypa-lu kutju manulpi kamu yawarralpi marlakulu tjuturnu.
GEN 2:22 Tjiitjanu palurulu kantilypa manu tutjulpi palyarnu. Mamalu tutjulpi ngalya katingu-lu puntukutu.
GEN 2:23 Katji puntulu tutju nyangulpi palurulu watjarnu, “Yuwayi, ngayuyuru palyarnu, Kitji kamu puyatju ngayukurnutjanu manu tutjulpi palyarnu. Kamu-rna yinilpi yungku tutju.”
GEN 2:24 Yuwayi, tjiitjanu puntulungku mama kamu yipi wantirra yanku nyupakutu. Kutjungkarriku-pula nyinamalpa. Kutjarratjanu-pula kutjungkalpi nyinamalpa.
GEN 2:25 Puntu kamu tutju-pula wirti nyinama tjantuparni. Wiya-pula kurntarringu.
GEN 3:1 Mamalu kuka laltu palyarnu. Lingkakutju nintipuka kuka laltungka-tjananya wayinta nyinangu. Paluru warinykatingu-lu tutjungka kamu tjapirnu, “Kulu Mamaluntapula watjarnu wiya-pulan mangarri warta kutjuwarratjanu ngalaku wantiku-pulan?”
GEN 3:2 Tutjulu watjarnu, “Wiya, nyamu-litju mangarri warta kutjuwarratjanu ngalamalpa.
GEN 3:3 Kurtungka warta kutju tarruku tjarlu ngarinpa. Mamalu watjarnu, ‘Wiya-pulan mangarri warta tjiitjanu ngalaku. Wiya-pulan pampulku. Wanti-pula mirringkamarra.’”
GEN 3:4 Lingkalu watjarnu, “Wiya-pulan mirrirriku.
GEN 3:5 Mama-ra ninti ngalaku-pulan nintiminyirri Mamayuru nyinamalpa.”
GEN 3:6 Tutjulu warta nyangu kamu kulirnu, “Yuwayi mularrpa mangarri palyaminyirri ngarinpa. Tjinguru-rna ngalaku nintipuka-rna nyinamalpa.” Mularrpakili tutjulu mangarri manu ngalangu. Tjiitjanu yungulpi-ra palurukurnu nyupaku. Mularrpakili puntulu manu ngalangu.
GEN 3:7 Tjiitjanu-pula yiirulpalpi tirrinyanu kamu nyangungku-pula wirtilpi ngarama. Nyarlpi-pula wartatjanu manu kamu nyakangku-pula palyarnu wakarnu. Karrpirnungku-pula tjuturnu nyinama.
GEN 3:8 Tjiitjanu tjirntu kaninytjarrarringu. Palurulu-pula kulirnu Mama katji kaatanwana parra yanama. Ngurlurringu-pula taputjunu wartangka yaka yanu nyinama.
GEN 3:9 Mamalu puntu tjapirnu, “Tjartupan yanu?”
GEN 3:10 Puntulu tjangkupungu, “Wiya, kulirnu-rnanta tjiitjaltan kaatanwana parra yaninpa. Ngurlu-rna yaka yaninpa. Ngayu-rna wirtilpi nyininpa.”
GEN 3:11 Mamalu tjapirnu, “Nganalunta watjarnu tjiitjaltan wirti nyininpa? Kulun nyuntulun ngalangu mangarri warta tarrukutjanu?”
GEN 3:12 Wangkangu paluru, “Wiya, tutju-rnin nyuntulumarntu yungu, palurulu-rni manu yungu. Mularrpakili-rna ngalangu.”
GEN 3:13 Mamalu tutjulpi tjapirnu, “Nganatjanun tjilanyarringu?” Paluru wangkangu, “Wiya, lingkalu-rni tirrutjunu. Mularrpakili-rna ngalangu.”
GEN 3:14 Mama wangkangu lingkangka, “Yuwayi, nyuntu-rnanta purtalku tutjun nyuntulu tirrutjunu. Tjiitjanu nyuntukungku ngawu wulukili ngaramalpa. Palya-tjanampa kuka kalkinku ngaramalpa. Tjiitjanu nyuntun tjuningka parra wayinmalpa kamu parnan ngalamalpa.
GEN 3:15 Nyuntu kamu tutju-pulan wulu mingarrtji nyinamalpa. Nyuntukurnu kilaki kamu tutjukurnu kilaki mingarrtji wulu nyinamalpa. Tjiitjanu kutjulu katanta nyuntukurnu kantulku. Nyuntulun palurukurnu tjina tarrkan patjalku. ”
GEN 3:16 Mamalu tutjulpi watjarnu, “Nyuntun munta nyinaku marnmarlpan tjarlu kanyilku. Tjitjin yutilkitja marnmarlpan tjarlu kanyilku. Nyuntu-ran nyupaku mikunytju nyinamalpa. Nyuntukurnu nyupalunta wulu tjarlulu kanyinmalpa.”
GEN 3:17 Mama puntungkalpi wangkangu-lu, “Nyuntulun nyupangkun kulirnu mangarri tjiitjaltan tarrukun ngalangu. Tjiitjanungka parna-rnanku marrkamanku kamu ngawulku. Tjilka-tjilka laltu pakalmanpa-ya. Tjiitjanu nyuntulun warakpa tjarlu palyanmalpa mangarrilpin parltjaku pakaltjunku ngalkuwanpan.
GEN 3:19 Kanalukaparrin warakpa tjarlu palyanmalpa kamu palti-paltirrikun mangarri parltjaku ngalamalpa. Tjiitja-rnanta ngayulu parnatjanu palyarnu. Katjin mirrirriku marlakun parnarriku.”
GEN 3:20 Yatamtu palurukurnu nyupaku yini-ra yungu Yiipi, tjiitja paluru kutjuwarraku kaparli nyinaku.
GEN 3:21 Mamalu kukakurnu puya manu tjantu-pulampa palyarnu yungu. Kamu yirrpirnungku-pula kanyinma.
GEN 3:22 Mama wangkangu, “Ngayuyururringu-pula yiirulpa tirrinypalpi nintipuka nyininpa. Yiyalku-rnapulanya miku wiya-pula warta kutjupatjanu ngalaku kana-pula wulu nyinatjakumarra.”
GEN 3:23 Mularrpakili-pulanya yiyarnu kaatanpa yini Yiitantjanu. Pakarnu-pula yanu. Puntulu parna tjawanmalpa mangarri pakaltjunkuwa. Mamalu nyukurnikaparri puntu parnatjanu palyarnu. Puntulu parna tjawanmalpa mangarriku.
GEN 3:24 Mamalu pinkilykulu laltu-tjananya tjunu Yiitanta kakarrarawaku kaatanpa-ya yangatjunkuwa-ya. Mamalu tjula tawarra warukulu murrutjunu parra yurri-yurrirra yangatjunkuwa marlaku-pula tjarrpatjakumarra. Mularrpakili yangatjunu-ya warta kana kanyilpayi-pula pampultjakumarra.
GEN 4:1 Yatampa kamu nyupararra-pula ngarringu. Kamu tutjulpi muntarringu katja kutjulpi kanyirnu. Paluru wangkangu, “Mamalu-rni puntutjunu katjalpi-rna kanyirnu.” Yinilpi-ra yungu Kayinpa.
GEN 4:2 Tjiitjanu nyinangu katja kutjupalpi kanyirnu yini yungu-ra Yayipulpa. Paluru tjarlurringu kukunytja-tjananya ngampurrtu kanyinma. Kamu Kayintu parna tjawanma mangarri pakaltjunkuwa.
GEN 4:3 Palurulu mangarri manu katingu inytjanu-ra Mamaku yungu.
GEN 4:4 Kamu kutjupalu Yayipultu kukunytja kulyarri kurranyutjanu manu pungu kuka karnpikulu inytjanu-ra Mamaku yungu. Mama-ra Yayipulku ngurrkurringu.
GEN 4:5 Katji Mamalu Kayinkura mangarri nyangu wiya-ra ngurrkurringu mingarrtjunu. Kayinpa wirrilyirringu kamu mirrparrpa kutjuparringu.
GEN 4:6 Mamalu tjapirnu, “Kayin, pantan nganatjanun wirrilyirringu? Nganatjanun mirrparrpa kutjuparringu?
GEN 4:7 Katjin palya palyanmara nyuntun ngurrku nyinamara. Nyuntulun ngawu palyarnu. Kutjupalu kukurryurulunta nyanginpa. Katjinta warinykatiku muunpungkunta ngawulkuwa. Wiya-lun kulilku.”
GEN 4:8 Kayintu palurukurnu marlanypaku yarltingu-ra kamu wangkangu, “Wurnali yarra puutjakarti.” Mularrpa-pula wurnarringu. Kamu tjiingkalpi Kayintu Yayipulpa pungu mirrirntanu.
GEN 4:9 Mamalu Kayinpa tjapirnu, “Tjartungku marlanypa?” Palurulu watjarnu, “Wiya, ngurrpa-rnara! Kurlu-rna ngayulu ngampurrmanku?”
GEN 4:10 Mama wangkangu, “Nyuntun ngawurringu. Marlanypangkun pungu mirrirntanu. Palurukurnu yirlku parnangka yulinpa-rni ngayu-rni tjapirninpa ngaparrtjilu-rnanta pungkuwa.
GEN 4:11 Ngayulu-rnanta putalku. Kamun parna tjawalku purtun mangarri parltjaku pakaltjunku. Nyuntulungkun marlanypa pungu mirrirntanu paluruku-ra yirlku parnangka ngarrinpa. Tjiitjanulpi parnalpi-rnangku putalku
GEN 4:12 Purtun parna palya kanyinmalpa. Mangarri purtungku pakalku. Wulun ngurraparni parran yanamalpa.”
GEN 4:13 Kayinpa wangkangu, “Wiya, marrka-tjun watjarninpa. Purtu-rna kulirninpa. Nyuntulurnin yiyarnin wantikuwa-rnanta wurna-rna parra yankuwa, ngurraparni wulu parra yankuwa. Puntu kutjupalu ngayu nyaku-rni mirri pungku.”
GEN 4:15 Tjiitjanu Mama wangkangu, “Wiya, katjintaya pungku ngayulu-rnatjananya ngaparrtjilu puntu wilki pungku.” Mamalu murrutjunu-lu Kayinta ngalyangka puntulu nyaku-ya mirri pungkutjakumarra.
GEN 4:16 Mularrpakili Kayintu Mama wantirralpi wurna yanu kakarra nyinama ngurra kutjupangka yini Nodtangka.
MAR 14:1 Yangka kintirringulpi ngarama ngurra kutjarratjanu turlkungka-ya nyinama kamu mangarri lalypa-ya ngalkunma. Tjiitjangkalpi-ya wumurrima kulinma-ya nyukurnitjanu ngarangu ngurra Egypta. Yangka pinkirrkululu Jew laltuku ngurra wantitjunu-tjananya katja kurranyutjanu wiya pampurnu. Yirna-yirna tjarlulu-ya kamu turlku nintipukalu-ya wangkama kulinma Tjiitju-ya yakalu ngalulku pungkuwaku mirri.
MAR 14:2 Wangkangulpi-ya, “Wurra-la wanti! Katji-ya puntu laltu-ya turlkuku wumurriku nyinamalpa. Tjinguru-lanyaya pamarrtu yungkaltjaku.”
MAR 14:3 Katji Tjiitju nyinama Jayimankurnungka ngurrangka kutjupa ngurrangka yini Bethanyngka. Nyukurni Jayimanpa mintirrwayitju nyinama. Tjiitjanungka Tjiitju nyinama mangarri ngalkunma. Tjilanyapuru tutjulpi-tjananya tjarrpangu Jayimankurnu ngurrangka warinykatingu-lu Tjiitjukutu. Paluru mulukunpa parntirr-parntirrkulu katingu. Pamarrpa laltukulu manu. Tutjulu yangkirrpungu yintirnu-lu wiyarnu Tjiitjukurnungka katangka.
MAR 14:4 Katji-ya puntulu kalkintu nyangu tutjulu-lu Tjiitjungka parntirr-parntirrpa yintirnu wiyarnu. Tutjungka-luya wirrilirringu wangkangu-ya, “Nganaku tutjulu parntirr-parntirrpa yintirnu-lu Tjiitjungka?
MAR 14:5 Tutjulu-tjananya parntirr-parntirrpa yungkumara pamarrpa laltu mankumara yungkuwa-tjanampa yapunta-yapuntaku.” Tjiitjanu-ya tutjulpi lanymalu warrkinma.
MAR 14:6 Tjiitjanu Tjiitjulpi-tjananya wangkangu, “Yawi-ya wanti! Nganaku-yan warrkirninpa? Ngayungka-rni palya parntirr-parntirrpa katangka yintirnu.
MAR 14:7 Yapunta-yapunta-ya wulu nyinamalpa. Yungamalpa-tjananyaya pamarr yawiku karrpu kutjupa karrpu kutjupa. Ngayu-rnantaya wiya wulu nyinamalpa.
MAR 14:8 Tutjulu ngaalu-rni palya yintirnu ngulampa-rniya mirri pirnkingka tjarrpatjunku.
MAR 14:9 Kulila-rniya ngayu. Ngulampa katji-ya ngurra kutjuwarralu kulilku wangka palya ngayukurnu, tjukurrpa tutju ngaakulu kulira-ya wangkamalpa.
MAR 14:10 Ngulampa, wanalpayi kutju yini-ra Judas Ikariya yanu-tjananya yirna-yirna tjarlu-tjarlukutu. Wangkangu-tjananya ngulampa Tjiitju-tjanampa nintitjunku miku-ya ngalulkuwa.
MAR 14:11 Katji-ya kulirnu ngurrkurringu-ya. Tjiitjanulpi tjangkupungu-luya pamarr laltu. Tjiitjanu Judaspa marlaku yanu yumuyurulpi-tjananya wanalpayi kalkinta wumurringu, tjiingkalpi yaka nyinama kulinma ngulampa-tjananya Tjiitju nintijunku miku-ya ngalulkuwa.
MAR 14:12 Jewspa-ya laltu wumurringu-ya turlku tjarluku miku-ya Mangarri Lalypa ngalkuwanpa. Puntu laltu-ya ngurra kutjungka wumurringku kukunytja manku pungku paalku kunta-kuntalku-ya ngalkuwanpa-ya mungangka. Wanalpayilu tjapirnu-ya Tjiitjungka, “Tjartungka-latju mangarri kamu kuka paalku ngalkuwa-la turlkuku kulintjaku?”
MAR 14:13 Tjiitjulu-pulanya wanalpayi kutjarra yiyarnu, “Yarra-pula Jerusalemkutu. Katji-pulan tjarrpaku tjiingka nyaku-pulan puntu tjarlitjarra kalyukulu ngalya yanamalpa. Kamu-pulan wanalku ngurrakutu.
MAR 14:14 Katji maa tjarrpaku kaninytjarra. Puntu ngurra walytja-pulan tjapilku, ‘Nintipukalu-lanyatju yiyarnu. Tjartungka-latju mangarri kamu kuka kutjalku ngalkuwa-la Tulkuku kulintjaku?’
MAR 14:15 Kamu palurungkalpi roompalpi-pulanya kankarra tjamunpalpi nintitjunku. Paalku-pulan kuka kamu mangarri miku-la laltulu ngalkuwanpa.”
MAR 14:16 Mularrpakili-pula wanalpayi kutjarra yanu Jerusalemkutu. Nyangu-pula yumuyurukili katji Tjiitju wangkangu. Kutjarralu-pula kuka turlkuku paarnu manu wantitjunu.
MAR 14:17 Mungangkalpi Tjiitju kamu palurukurnu wanalpayi-ya Bethanytjanu yanu Jerusalemkutu.
MAR 14:18 Yanu-ya ngurra palunyangka warinykatingu maa tjarrpangu. Katji-ya ngalkunma Tjiitju wangkangu-tjananya, “Mularrpa kutjulu-rni tirrulu yungku tjitjantanku pungkuwa-rniya mirri, ngaatja lurrtjulu-la kuwarri mangarri ngalkuninpa.”
MAR 14:19 Katji-ya palurukurnu wanalpayilu kulirnu palunpa-ya karratarringu. Parrangku-ya tjapinma, “Kulu ngayu?”
MAR 14:20 Tjiitju wangkangu, “Kutjungka-litju mangarri tupultjuninpa.
MAR 14:21 Ngayu-rna Katja punturringulpi-rna. Kamu ngayu-rna mirrikitja nyininpa yumuyurukili-rni wakarnu tjunu mirli-mirlingka. Puntulu-rni tirrulu yungku. Ngawu minyirri-ra puntu tjiiku ngaraku. Tjinguru wiya lamparnpa yutirringkumara, palya nyinama-ra.”
MAR 14:22 Ngulampa katji-ya wulu mangarri ngalkunma. Tjiitjulu mangarri manu wangkangu-lu Mamangka yatimanu. Kamu yangkirrpungu yungu-tjananya palurukurnu wanalpayiku. Wituka wangkangu, “Ngaatja mangarri ngayukutju yarnangu. Marra-ya kutjuwarralu ngala.”
MAR 14:23 Katji kartak wayinkulu manu kamu wituka Mama yatimanu. Tjiitjanu yungu-tjananya. Kutjun-kutjuntu-ya tjikinma.
MAR 14:24 Palurulu-tjananya watjarnu, “Wayinpa ngaatja ngayukutju yirlku. Ngayulu mirrikitjalu-rnatju ngayukurnu yirlku yintilku puntu laltuku. Tjukurrpa kuwarritjanungka Mamalu watjarnu wulu ngaramalpa ngayulu-rnatju yirlku yintilku tjiitjanungka.
MAR 14:25 Ngayulu-rnantaya mularrtu watjarninpa, ‘Wiya-rna wituka wayinpa tjikilku. Ngulampa-rna ngayu yanku Mama Tjarlu minyirrikutu tjungarningkalpi nyinaku. Tjiingkalpi-rna wituka wayinpa tjikilku.’ “
MAR 14:26 Turlkulpi-raya Mamaku yinkangu. Pakarnu-ya yanu pamarrkutu yini warta olivekutu.
MAR 14:27 Tjiitju-tjanampa wangkangu “Laltulu-rniyan wantitjunku taputjunku. Yangka nyukurni puntulu kutjulu mirli-mirlingka wangka kutjupa wakarnu ngaaltji tjunu: ‘Puntulu kukunytja-tjananya ngampurrtu kanyinma, Katji-rna ngayulu-rna pungku mirri. Tjiingkalpi-ya kukunytja parra taputjunku.’
MAR 14:28 Katji-rna mirritjanu-rna kana pakalku kurranyu-rna yanku Kalalikutu. Tjiingkalpi-rniyan marlakatiwanalu wanalku nyaku wumurringkulpi-la.”
MAR 14:29 Kamu Peterlu watjarnu, “Wiya-rnanta ngayulu wantitjunku. Tjingurunta-ya wanalpayi kalkintu wantitjunku. Ngayulu-rnanta wiya wantitjunku.”
MAR 14:30 Tjiitjulu watjarnu, “Peter, kulila-rni. Mungangka kuwarri ngayukutjun marnkurrta ngurrparriku-tjun. Tjiingkalpin kulilku tjuk-tjukpa kutjarrangka paarlmanku.”
MAR 14:31 Peter marrkaminyirri wangkangu wiyatjunu, “Wiya-rna tjilanya wangkaku. Tjingurulpi-li lurrtju mirrirriku. Wiya-rnanta ngurrparriku.” Kamu wanalpayi-ya laltu tjilanyartuka wangkangu.
MAR 14:32 Tjiitju kamu palurukurnu wanalpayi-ya warrinykatingu ngurra yini Gethsamanengka. Palurulu-tjananya watjarnu, “Ngaangka-ya nyina kulyakanyila-rnitjuya. Katji-rnalu yanku Mamangka wangkaku.”
MAR 14:33 Palurulu-tjananya Peter James kamu John yarltingu katingu. Paluruku-ra tjuni ngawurringu.
MAR 14:34 Wangkangu-tjananya, “Ngayukutju tjuni ngawuminyirri. Ngayulu-rnatju luyurrminyirri kulirninpa mirrikitjalpi. Kana-ya nyina ngaangka. Katji-rna yanku tjiikutu”
MAR 14:35 Tjiitju pakarnu yanu maa wartungarangu warirrkingka. Paluru wangkangu-lu Mamangka, “Nyuntulurnin watjarnu marnmalpa tjarlukululpi-rna mirrirriku. Mama, kutjupamanku-tjun kulu miku wiya-rna marnmalpa tjarlu kanyilku? Mama, nyaaltji-tjun nyuntu wangkinpa?”
MAR 14:37 Tjiitju pakarnu marlakurringu nyangulpi-tjananya wanalpayi-ya marnkurrpa kutunpa ngarrima. Wangkangu-lu Peterngka, “Simon kanarriwa. Wayu-tjun ngayuku kana nyininpa?”
MAR 14:38 Tjiitjanu watjarnu-tjananya, “Kanamarta-ya nyina. Mamangka-luya wangka. Wiya nyurra kutunpa wulu ngarrimalpa. Nyuntunpa nyurra ngarru Mamangka wangkakuwa. Panta nyurra nyalikitjarrinpa punkaninpa yumpalypa.
MAR 14:39 Tjiitjulu-tjananya palurukurnu wanalpayi wituka wantitjunu marlakulpi yanu witukalpi tjapinma Mama.
MAR 14:40 Marlakurringu-tjananya palurukurnu wanalpayikutu. Palurunpa-ya yumpalypa wulu nyinama nyali-nyali. Tjiinpa-ya wiya kana nyinangu wulu-ya kutunpa ngarrima. Katji-ya pakarnu palurunpa-ya kurntarringu-ya. Purtu-raya kulirnu nyaalpa-ya wangkaku Tjiitjungka.
MAR 14:41 Tjiitju marlaku yanu wituka wangkangulu Mamangka wituka marlakurringu palurukurnu wanalpayikutu. Wangkangu-tjananya, “Kulu nyurra wulu kutunpa? Nyawa! Wiya nyurra kutunpa wulu ngarrimalpa. Ngayu-rna Mamakurnu Katja puntulpi-rna. Puntulu-rniya ngawulu manku winyulku katiku. Yuwayi, kuwarrikili pakala-ya wuna-la yankuwa. Nyawa. Ngaatjatuka-ya puntu ngawu warrinykatingu warrmarla laltukulu ngayu-rniya mankuwa katikuwa.”
MAR 14:43 Tjiitju wulu-tjananya wangkama. Tjiitjanu Judaspa warrinykatingu-lu. Judaspa-ra Tjiitjuku wanalpayi nyinama. Tjiintu-ya tjarlu-tjarlu turlku nintipukalu kamu yirna-yirna tjarlulu yungu-raya puntu laltu Judasku miku-ya wanalkuwa. Tjiintu-ya kanyinma tjurla tawarra kamu kuturru lanymaku.
MAR 14:44 Nyukurni Judastju-tjananya watjarnu, “ Puntu katji-rna ngayulu nyanytjulku ngalula-ya maa kati.”
MAR 14:45 Katji-ya warrmarla-ya warrinykatingu. Judaspa-lu kintirringu ngarangu Tjiitjungka. Judaspa-lu wangkangu Tjiitjungka, “Nintipuka.” Kamu nyanytjurnu nintitjunu-tjananya puntu laltungka.
MAR 14:46 Manu-ya ngalurnu.
MAR 14:47 Tjiitjukurnu wanalpayi kutju ngarama. Palurulu tjurla yilarnupatarnu puntu kutjuku langa kurntarnu punkatjunu. Puntu tjitja warakmayin Jewsku tjarlu-tjarluku yirna-yirnaku.
MAR 14:48 Tjiitju wangkangu-tjananya, “Nganaku nyurra yanama tjurlakulu kamu kuturrukulu mankuwa-rniyan ngayu ngalulkuwa? Wiya, ngayu-rna wiya lanymapayi.
MAR 14:49 Yungun kutjupa yungun kutjupangka-rnantaya yuti nyinama churchtja tjarlungka. Wulu-rnantaya Mamakurnu wangka watjanma. Tjiitjangkalpi-rniyan wiya ngalurnu. Yumukamu-rniya ngalula kati. Nyukurni-ya puntulu mirli-mirlingka wakarnu tjunu tjiingkalpi-rniya puntulu laltulu ngayu ngalulku katiku.”
MAR 14:50 Tjiitjukurnu wanalpayi laltu-ya ngurlu tarrputjunu.
MAR 14:51 Kulyari kutjulu marlakartiwanalu Tjiitjungka wananma. Palurulungku pulpultjunu warntukulu. Warrmarlalu-ya purtu ngalulkitjalu warntuwiyatjulpi-ya ngalurnu. Ka maa tarrputjunu wirtilpi.
MAR 14:53 Warrmarlalu-ya Tjiitju katingu turlku tjarluminyirrikurnu ngurrakutu. Tjiingkalpi-ya tjarlu-tjarlu kamu yirna-yirna laltu-ya kamu turlku nintipuka laltu-ya kutjungkarringu-ya nyinama wangkakitja.
MAR 14:54 Peterlu marlakartiwanalu wananma. Ka maa tjarrpangu ngurra tjarlukutu yardkutu. Paluru kutjungkarringu-tjananya warrmarlangka kamu warukinti nyinatingulpi ngarntjira nyinama.
MAR 14:55 Tjiintu tjarlu-tjarlulu parra-ya nyangama, “Nganalu-lampa watjalku wangka ngawupaka. Miku-la Tjiitju pungkuwa.” Puntulu laltulu-ya tirrulu watjanma. Wiya-ya wangka kutjumarta watjanma.
MAR 14:57 Puntu kalkinpa-ya ngarangu tirruwana-ya wangkangu, “Ngaatja-latju puntu kulirnu wangkangu palurulu churchpa tjarlu yangkirrpungku kamu kutjupa palyalku karrpungka marnkurrta.” Nyukurni-ya puntu laltulu-ya churchpa ngaatja palyarnu. Nyarni palurulu kutjulu marlaku palyalku. Wiya, purtu.
MAR 14:59 Puntu laltu-ya parrra watjapungama wangkama. Wiya-ya kutjumarta wangkama.
MAR 14:60 Tjarlu yirna pakarnu ngarangu wangkangu-lu Tjiitjungka, “Puntu ngaantunta-ya watjarninpa nyuntulun ngawu watjarnu. Nyuntulu-tjananyan kulirnu? Nyaalpan nyuntu wangkaku?”
MAR 14:61 Tjiitju yaka ngarama wiya wangkangu. Tjiitjanu tjarlulu yirnalu tjapirnu, “Yuwa, watjala-lanyatju. Kulun nyuntu Mama Tjarlukuran katja? Kulun Mamalu nyukurni watjarnu ngalya yiyalkitja?”
MAR 14:62 Tjiitjulu watjarnu, “Yuwayi, ngulampa-rniyan nyaku ngayu Mamakurnu Katja puntulpi-rna nyinamalpa Mama tjarlungka kinti. Nyaku-rniyan ngayu ngangkalingka warinykatiku-rna.”
MAR 14:63 Tjiitjanu tjarlu yirna wirrilyirringu tjantungku yangkirrpungu kamu wangkangu-tjananya, “Ngaatja nyurra kulirnu? Palurulungku watjarnu Mamayuru! Nganalpi puntu-la kutjupa katimalpa wangkakuwa. Nyamu-la laltulu kulirnu. Nyaalpa-yan kulirninpa? Kulu-lampa mularrtu tjukurrpa palurulu ngawurnu?” Laltulu-ya watjarnu, “Palurulu-lampa tjukurrpa tjarluminyirri ngawurnu. Palurumarntu mirrirriku.”
MAR 14:65 Puntu kalkintu-ya Tjiitjungka-luya miparrta tjalatjunu. Tjiitjanu-ya paniya karrpirnu miku wiya nyakuwa. Tjiitjanu laltulu-ya marumpulu Tjiitju pungama. Kamu-luya wangkama, “Watjala-lanyatju. Nganalunta pungu?” Katji-ya warrmarlalu Tjiitju ngalurnulpi ngaparrku marumpulu pungama.
MAR 14:66 Katji Peter warukinti ngantjinma yardta kaninytjarra turlku tjarluminyirrikurnungka ngurrangka wulu nyinama. Tutjulu kutjulu warakmantu warrinykatingu-lu.
MAR 14:67 Kamu Peter nyangu nyinama. Tjiingkalpi tutjulu kintilpi nyangu wangkangu, “Yuwa, nyangu-rnanta nyuntu Tjiitjungkan Nazarethtjanungka lurrtju ngarama.”
MAR 14:68 Peterlu wiyatjunu, “Ngurrpa-rnara paluruku. Nganakuran wangkinpa?” Katji Peter pakarnu yanu gatekutu ngarangulpi. Katji tjuk-tjukpalpi paarlmanu.
MAR 14:69 Tjiitja tutjulu warakmantu wituka nyangu Peter gateta ngarama. Kamu watjarnu-tjananya puntu laltungka, “Paluru mularrpa Tjiitjuku wanalpayi.”
MAR 14:70 Peterlu wituka wiyatjunu. Ngulampalpi katji-ya puntu laltu ngarama wangkangulu-ya Peterngka, “Wiya, nyuntun mularrpa wanalpayi. Tjiitjamarntun Kalalitjanu.”
MAR 14:71 Kamu Peterlu watjarnu, “Puntu tjiitjan watjarninpa, ngurrpa-rnara paluruku. Mularrtu-rnanta watjarninpa. Mamalu-rni mirrirntanku katji-rna wangka mayutjunu.”
MAR 14:72 Katji tjuk-tjukpa mayaminyirri paarlmanu. Kamu Peterlu kulirnu Tjiitjulu kurranyulpi watjarnu, “Marnkurrku-tjun ngurrparriku.” Katji Peterlu Tjiitjuku wangkalpi kulirnu kurntarringulpi kamu mayalpi yulama.
MAR 15:1 Raakarra yirna-yirna wamumpu-ya wangkama Tjiitju-ya Payilitkutu katikuwa. Palurunpa-ya turlku tjarlu-tjarlu laltu kamu nintipuka laltu kamu yirna-yirna laltu nyinama. Tjiitjanu Tjiitjuku-raya marumpu karrpirnu katingu Payilitku yungu-raya.
MAR 15:2 Payilitu tjapirnu, “Kulun nyuntu Tjarluminyirri Tjuwuku-tjanampa?” Tjiitju wangkangu, “Nyuntunku ngaatja wangka.”
MAR 15:3 Yirnalu laltulu-ya Payilita tjakultjunama palurulu kutjuwarra ngawunma. Tjiitjulu-tjananya yakalu ngarala kulinma.
MAR 15:4 Payilitpa wangkangu, “Kulun wulu yaka ngaramalpa? Ngaatjanta-ya laltulu watjarnin nyuntulun kutjuwarra ngawunma.”
MAR 15:5 Tjiitju wulu yaka wangkaparni ngarama. Katji Payilitpa karrartarringu wululpi kulinma.
MAR 15:6 Year kutjupangka year kutjupangka Payilitu wulu watjanma puntu kutju pirtitjanu pakara yankuwa. Turlku tjarlungka wumurringama Payilitu-tjananya tjapinma, “Puntu ngana-rna watjalku pirtitjanu pakara yankuwa?”
MAR 15:7 Nyukurnitjanu puntu yini Parapatja kamu puntu laltu-ya kapamanku-tjanampaya wirrilirringu. Kamu lanymarringulpi-ya puntu kutju mirri-ya pungu. Katji-tjananyaya pirtingka tjarrpatjunu lanymatjanu.
MAR 15:8 Puntu laltu-ya kutjungkarringu yanu Payilitpa-ya tjapirnu puntu kutju pakaltjunkuwa yiyalkuwa. Payilitu-tjananya tjapirnu, “Kulu ngaatja nyuntunku Tjuwuku Tjarluminyirri pakaltjunku-rnangkuya?”
MAR 15:10 Paluru-tjanampa nintikili nyinama turlku tjarlu-tjarlulu-ya matjulu Tjiitju nyalura katingu.
MAR 15:11 Turlku tjarlu-tjarlulu laltulu puntu-tjananyaya parra watjapungama Parapatja tjapilkuwa. Laltulu-ya watjanma, “Parapatja pakaltjurra-lampatju.”
MAR 15:12 Payilitu-tjananya tjapirnu, “Nyaaltjinku-rna ngaatja nyuntunkurnu Tjarluminyirri?”
MAR 15:13 Katji-ya laltu paarlmanama watjanma-ya, “Tjurra-ya wartangka!”
MAR 15:14 Payilitu tjapirnu, “Nyaaltjirnu ngawu ngaalu?” Wulu-ya paarlmanama, “Tjurra-ya wartangka!”
MAR 15:15 Payilitu Parapatja pakaltjunu yiyarnu. Kamu watjarnu-tjananya warrmarlalu Tjiitju-ya tjanawana wilypirnpungkuwa katiku wartangka tjunkuwa.
MAR 15:16 Tjiitjanu warrmarlalu laltulu Tjiitju manulpi-ya katingu tjarrpatjunu Payilitkurnu yaata kaninytjarra. Yarltingu-tjananyaya warrmarla kalkinpa yankuwa-ya.
MAR 15:17 Tjiitjanu tjarntu tjarlura-ya tjina-tjinayuru purplewanpa tjunu-luya Tjiitjungka. Tjiitjanu manulpi-ya tjilka-tjilka kamu karrpirnu mukartiyuru tjunu-luya Tjiitjukurnungka katangka.
MAR 15:18 Kamu warrmarla-ya laltuminyirri parra ngarama ngarlpulu paarlmanama, “Yuwa, Tjuwuku-tjanampan Tjarluminyirri.”
MAR 15:19 Tjiitjanulpi pungu-ya wartakululu katawana kamu tjalatjunama. Katji-ya ngarlpukarra-ya pupatima.
MAR 15:20 Katji-ya ngarlpurringu wiyarringu. Kamu tjarntu tjina-tjinayuru purplewanpa yurulypungu-luya. Kamu marlaku-luya tjarntu walytja tjunu. Tjiitjanu Tjiitju katingulpi-ya wartangkalpi tjunkuwa.
MAR 15:21 Puntu kutju katji yanama puutjatjanu. Palurukura yini Simonpa. Paluru ngurra kutjupatjanu yini Tjarinitjanu. Katja kutjarra kanyinma Alexander kamu Rufuspa. Warrmarlalu-ya muunpungu Simonpa warta-ra katikuwanpa.
MAR 15:22 Warinykatingu-ya ngurra yini Kalkatjakutu nganayi kata kitjikulu.
MAR 15:23 Warrmarlalu wama mirritjinikulu Tjiitjuku purtu-raya yungama.
MAR 15:24 Katji-ya Tjiitju wartangkalpi kankarra yutitjunu. Tjiingkalpiya warrmarla laltu ngarlpurrima nganalu winimankuwa Tjiitjuku tjarntu kutjupa-kutjupa mankuwa-ya.
MAR 15:25 Tjirntungka-ya kankarrangkalpi Tjiitju-ya wartangkalpi yutitjunu.
MAR 15:26 Ngaatja-ya mirli-mirlingka wakarnu tjunu, “Tjuwuku-tjanampa Tjarluminyirri”. Tjiitjanu murrutjunu-luya palurungkalpi kankarra.
MAR 15:27 Warrmarlalu puntu ngawu kutjarra yitingka-pulanyaya Tjiitjungka tjunu.
MAR 15:28 Nyukurnitjanu puntulu Mamaku tjukurrpa wakarnu tjunu. Wangka ngaatja, “Puntungka ngawungka mirrirringu.” Tjiitja yutirringulpi.
MAR 15:29 Puntu laltu-ya wayintara yanama. Nyangu-ya mantarrima watjanma, “Yuwayi. Nyuntulun watjanma churchpan Tjarlu punkatjunku kamu ngurra kutjarratjanulu walytjalulpi marlakun palyalkuwa.
MAR 15:30 Yuwayi, walytjalulpi kanalangku tjawutilpi wartatjanu.”
MAR 15:31 Turlku tjarlu-tjarlu laltu kamu nintipuka laltu-ya lurrtju mantarrima watjanma, “Ngaalu-tjananya puntu laltu kananma. Wiyangku walytjalulpi kananinpa.
MAR 15:32 Kulu palurukutju Mamalu yiyarnu Tjarlu-lampa ngayanku? Nyawa-la wartatjanu tjawutikuwa tjiitja-la nyaku kulilkulpi.” Puntu ngawu kutjarralu lurrtju-pula Tjiitjungka yitingka mantarrima kalkinyurulu watjanma.
MAR 15:33 Karrpungka ngurra laltuwana mungarringu ngarama. Yulyulytjarralpi tjirntu marlaku yutirringu.
MAR 15:34 Tjiitjanu Tjiitju paarlmanu watjarnu, “Yilayi, Yilayi lama tjapatjani?” Tjitja watjarnin, “Mama, Mama, nganatjanu-rnin ngayu wantitjunu?”
MAR 15:35 Puntu kalkinpa-ya parra ngarama kulirnulpi-ya paluru katji wangkama. Watjarnu-ya “Kulila. Yarltinpa-ra Elijaku.”
MAR 15:36 Puntu kutju taputjunu tjarntu lamparnpa manu kamu wamangka tupurltjunu. Kamu puntu palurulu warta lampantalu karrpirnu yititjunu-lu Tjiitjungka tjikilkuwa. Puntu palurulu watjarnu, “Yuwayi, wurra-lara kulyakanyilku katji Elija marlakurriku mankuwa wartatjanu walatjunkuwa.”
MAR 15:37 Tjiitju wituka paarlmanu kamu mirrirringulpi.
MAR 15:38 Tjiingka churchtja Tjarlungka tjarntu tjarlu kankarratjanulpi yankirryanu parnakutu.
MAR 15:39 Warrmarla tjarlulu kutjulu nyangu Tjiitju mirrirringulpi. Kamu wangkangulpi, “Puntu ngaatja mularrpa Mamakurnu katja.”
MAR 15:40 Tutjulu laltulu-ya tiwatjanulu nyangama. Tutju yini Mary Magdalan, kamu Tjalumi, kamu tutju kutjupa yini Mary, Jamesku marlatjanuku kamu Josephku-pulampa yipi.
MAR 15:41 Tutjulu tjiintu wulu Kalalitjanulu Tjiitju-ya parra wananma. Kamu wulu-ya mangarri parra kutjanma ngurra kutjupa ngurra kutjupangka. Kamu tutjulu-ya kalkintu Kalilitjanulu Tjiitju wanarnu. Tjiintu-ya Tjiitju wartangka tiwatjanulu nyangama.
MAR 15:42 Tjiitju mirrirringulpi Rapungka. Karrpu tjiingkalpi tjamunpa-ya palyanma yungunpalpi-ya miirl-miirlpa tjarukupuru warakparni nyinamalpa.
MAR 15:43 Tjirntu tjarrpakitja puntu kutju warrinkatingu-lu Payilatkutu. Puntu yini Josephpa ngurra Arimatheatjanu. Puntu palyaminyirri councilpa nyinama. Palurulu wulu kulinma Mama-lampa puntuku kutjuwarraku tjarluminyirri wulu nyinamalpa. Josephtu marrkaluminyirri Payilatpa tjapirnu Tjiijuku mirri mankuwa katikuwa.
MAR 15:44 Payilatu purtu-ra kulinma tjiitjanta Tjiitju wala mirrirringu. Payilatu warrmarla kutju yarltingu tjapirnu, “Kulu mularrpa paluru mirri?”
MAR 15:45 Watjarnu, “Yuwayi.” Tjiitjanu Payilatu watjarnu Josephpa Tjiitju mirrilpi manku katikuwa.
MAR 15:46 Josephtu tjarntu manu katingu wartakutu. Manulpi mirri karrpirnu tjunu tjarntungka. Katingu tjarrpatjunu pirnkingka. Nyukurnitjanu-ya pirnki tjiitja pamarrpa tjarlungka tjawarnu-ya wantitjunu. Josephtu pamarr tjarlu manu maa yurnturnu pirnki yangatjunu.
MAR 15:47 Tutju kutjarralu-pula Mary Magdalantu kamu Mary kutjupalu Josephkurnu yipilu nyangu-pula pirnkingka tjarrpatjunu.
MAR 16:1 Karrputjarra Tjatiti miil-miilpa ngarangu. Katji-ya warakparni nyinama tjirntu-ya maa tjarrpatjunu. Tjiingkalpi Mary Matalan kamu Tjalumi kamu Mary Jamesku yipi pakara-ya yanu parnti-parnti palyaminyirri manu miku-ya Tjiitju mirri nyitilkuwa.
MAR 16:2 Tjiinpa ngarringu-ya Tjantingka raakarralpi pakara-ya yanu pirnkikutu.
MAR 16:3 Katji-ya maa yanama wangkama-ya, “Nganalu-lampa pamarrpa tjarlu pirnkitjanu yurntulku?” (Pamarrpamarntu tjarluminyirri.)
MAR 16:4 Tjiintu tutjulu maa nyangu-ya pamarrpa nyukurnikili yurnturnu wantijunu ngarama.
MAR 16:5 Katji-ya maa tjarrpangu nyangu-ya karratarringu puntu kulyarri tjarntu tjina-tjinayurrukulu kuru-kurukulu tjungarnikati nyinama.
MAR 16:6 Puntu kulyarri wangkangu-tjananya, “Wiya nyurra ngurlurrimalpa. Milyapunginpa-rnantaya tjiitjalta-ran Tjiitjuku Natjuratjanuku nyanginpa, yangka-ya wartangka waralytjunu. Wiya paluru ngaangka. Paluru mirritjanu kanarringulpi pakara yanu. Nyawa-ya ngaangkatuka-ya ngarritjunu.
MAR 16:7 Marlaku-ya yarra watjala-tjananyaya palurukurnu wanalpayingka laltungka kamu Piitangka. Tjiitju kurranyurriku Kalalikutu. Tjiingkalpi-ya nyaku-ya. Palurulu nyukurnikili wangka watjarnu wantitjunu.”
MAR 16:8 Tjiinpa tutju pirnkitjanu pakara-ya marlaku tarrputjunu karrata tiltirryanama-ya. Tjiitjanulpi wiya-tjananyaya watjarnu. Ngurlu wangkaparni nyinama-ya.
MAR 16:9 Tutju Mary Matalan nyukurni kukurrkulu wilkikulu nyinama. Tjiitjulu kukurrpa laltu-tjananya yiyarnu. Ngulampa Tjiitju Tjantingkalpi raakarra mirritjanu pakarnu. Paluru kurranyu yutirringu-lu tutju palurungka.
MAR 16:10 Tutju paluru yanu kutjungkarringu-tjananya palurukurnu wanalpayi laltungka. Tjuni-ya luyurrminyirri nyinama kamu yulama.
MAR 16:11 Marylu watjarnu-tjananya, “Kulila-rniya! Nyangu-rna Tjiitju mirritjanu pakarnu kanalpi ngarama.” Wiya-luya kulirnu.
MAR 16:12 Tjiitjanu Tjiitju-pulanya puntu kutjupayuru yutirringu wanalpayi kutjarrangka tjiitja-pula ngurra kutjupakutu maa yanama.
MAR 16:13 Puntu kutjarralu-pula ngulampalpi milyapungu. Marlaku-pula yanu watjarnu-tjananyaya wanalpayingka kalkinta. Wiya-pulanyaya kulirnu.
MAR 16:14 Ngulampa Tjiitju-tjananya yutirringu palurukurnu wanalpayingka 11ta nyinama-ya mangarri ngalkunma. Palurulu-tjananya watjarnu kurntatjunu, “Nganaku wiya-tjananyayan kulirnu tjitjalta-ya watjarnu ngayu-rniya nyangu mirritjanu pakarnu-rna?”
MAR 16:15 Palurulu-tjananya watjarnu, “Yarra-ya ngurra kutjupakutu ngurra kutjupakutu kamu tjukurrpa palya ngayukurnu parra-tjananyaya watjanmalpa puntu laltungka.
MAR 16:16 Puntulu nganalu-rni ngayu mularrtuminyirri kulilku. Tjiitjalta-tjananyaya kalyungka tupurltjunamalpa. Mamalulpi wulu kana kanyilku. Katji puntulu nganalu-rni wiya kulilku Mamalulpi warukutu yiyalku.
MAR 16:17 Katji puntulu nganalu-rni mularrtu kuliku ngayukurnu maya-rnatjanampa yungku miku-ya ngayukurnu yiningka kukurrpa puntungka-tjananyaya yiyalku. Kamu wangka kutjupalpi-ya wangkamalpa.
MAR 16:18 Katji-ya lingka ngurrpalu manku. Wiya-ya mirrirriku tjiitjanu. Katji-ya kalyu kara tjikilku. Wiya-ya mirrirriku tjiitjanu. Katji-tjanayaya marumpulu nyurnu pampulku, tjiitjanulpi-ya puntu nyurnutjanu palyarringku.”
MAR 16:19 Tjarlu Tjiitju-tjananya wangkangu wiyarringulpi Mamalu kankarramanu katingulpi yalkirikutu. Kamu paluru Mamangkalpi-lu tjungarnikarti nyinatingu.
MAR 16:20 Tjiitjanu palurukurnu wanalpayi-ya yanu parra-tjananyaya tjukurrpa watjanma. Tjarlu Tjiitjulu-tjananya marrkarrmanu palurukurnu warakpa-ya palyanma. Puntu laltulu-ya nyangu kulirnu, “Yuwayi, ngaantu-ya tjungarnilu watjarninpa.”
LUK 2:1 Yangka yirna Tjarlu yini Augustuspa nyinama ngurra tjarlungka Rometa. Paluru-tjananya tjarlu nyinama ngurra kutjupa-kutjupaku. Palurulu-tjananya watjarnu yiningku-ya wakalkuwa.
LUK 2:2 
LUK 2:3 Tjarlu Augustustju-tjananya puntu kutjuwarra watjarnu yankuwa-ya ngurra walytjakutu yiningkuya wakalkuwa. Mularrpakili-ya pakarnu yanu yiningku-ya wakalkuwa.
LUK 2:4 Josephtu ngurra Galileetjanu pakara yanu ngurra Judeakutu. Ngurra Nazarethtjanu pakara yanu Bethlehemkutu. Kurrarlka Josephkurnu tjamu yini Davidpa tjitji yutirringu ngurrangka tjiingka.
LUK 2:5 Joseph Mary nyupararra-pula lurrtju yanu. Katji-pula warinykatingu Bethlehemta. Mary tjamunpa tjitji kanyilkuwa nyinama.
LUK 2:7 Kamu tjitjilpi yutirringu, palurukurnu katja kurranyulpi. Marylulpi warntu manu tjitji karrpirnu ngarritjunu pulukikurnungka mangkalta. Tjiingkalta yarnangu-ya laltulpi-ya ngurrangka nyinama.
LUK 2:8 Ngurrangka tjiingka kintikili puntu-ya nyinama kukunytja ngampurrtu-tjananya kanyinma.
LUK 2:9 Pinkirrkulu kutju-tjananya yutirringu ngarama. Tili tjarluminyirri Mamakurnu yutirringu-tjananya. Kamu ngurlurringu-ya.
LUK 2:10 Pinkirrkulu wangkangu-tjananya, “Wiya nyurran ngurluriku. Kulila-rniya. Ngayu-rnangkuya warinykatingu wangkakulu palyakulu. Katji-ya ngatja yarnangu kutjuwarralu kulilku ngurrkurriku-ya.
LUK 2:11 Kuwarri Davidkurnu ngurrangka tjitji yutirringu ngalkinpangkuya nyuntunku laltuku. Paluru tjarluminyirri Mamakurnu.
LUK 2:12 Ngayulu-rnantaya watjalku miku nyurran walytjalu nyakuwa. Nyaku nyurran tjitji pulukikurnungka mangkalta ngarrima, yipilu warntungka karrpirnu ngarritjunu.”
LUK 2:13 Tjiingkalpi-ya pinkirrkulu-ya laltu yalkuritjanu yutirringu ngurrkulu-ya Mama yinkarra marninypungama.
LUK 2:14 “Mama palyaminyirri yalkuringka kankarra nyininpa. Mama ngurrku nyininpa puntu laltuku miku-ya kurrurnpa palya nyinamalpa parnangka”
LUK 2:15 Katji-ya pinkirrkulu marlaku yanu yalkurikutu. Kamu kukunytja ngampurrpayilungkuya watjarnu, “Yanku-la Bethlehemkutu nyakuwa-la Mamalu-lanya watjarnu.”
LUK 2:16 Mularrpakili-ya wala yanu nyakuwa-ya. Katji-ya warinykatingu-ya Bethlehemta parra-ya nyangama. Kamu-ya nyangu-ya Mary kamu-pulanya Josephpa nyinama. Kamu tjitji ngarrima pulukikurnungka mangkalta.
LUK 2:17 Katji-ya kukunytja ngampurrpayilu tjitji paluru nyangu. Yanu-tjananya puntu laltu parra watjanma tjakulpa pinkirrkululu watjarnu.
LUK 2:18 Katji-ya laltulu tjukurrpa tjiitja kulirnu karratarringu-ya.
LUK 2:19 Marylungku wulu kulinma pinkirrkululu wangkanytjatjanu.
LUK 2:20 Kukunytja ngampurrpayi-ya marlaku yanu kukunytjakutu. Katji-ya yanu turlku-ya maa yinkalkatima-ya Mama marninypungama, kulirnu-ya nyangu tjiilanyatuka. Palunpa-ya wangkangu, “Mularrpakili pinkirrkululu-lanya mularrtu watjarnu.”
