﻿HEBREKƲƐ.
8.
Dɛ gbagbʋ ‑mʋ', 'n ‑hʋɛ ꞊bʋ lee nɛ 'a mʋ, ɛ nɔ‑ ‑bʋ: ‑Tɩ ‑bʋ, 'n hla wɛn, ɛ tʋɛ nɛ 'a mɔ꞊ɔ nɩ, ‑tɛ ‑mʋ', ‑aan ‑cɔhlʋnpinyɔ gbagbʋ ‑Yusu nɩ 'mʋ. Ɛ nɔ‑ yɩ ‑a mʋ ‑hɛɛ ‑nɩ. Nyɩsʋa ‑mʋ', ‑ɛ kɔɔ nɛ 'a ‑nɛ ꞊dedede win kɩ, ɛ nɔ‑ kɔ diidɛkɩbɩa kɩ ‑Yusu nɩ 'ʋ bʋ, 'kɩ 'lɩ yakɔ 'kwli. 
‑A yi꞊e nɩ, ‑ɛ mɔ, ‑cɔhlʋnpinyʋ a pɛpɛ, ‑ʋ nɩ 'nɛ‑ ‑tʋtʋ kɩ, 'waa ‑kʋan, nɔ‑ mɔ bʋ nu 'wlugba‑tɛblɩ, bʋ pi Nyɩsʋa a ‑cɔhlʋn*, ɛ kɔ, bʋ ‑nyi Nyɩsʋa ‑nyinyi‑tɛblɩ ‑bɩ. 'Bʋ yɩ ‑cɔhlʋn a 'mʋ pi mɔ nɩ mi, 'kɩ ʋ pʋɛ 'lɩ Nyɩsʋa a 'kayu ‑mʋ', ‑tonyibli ‑pʋ bʋ. ‑Yusu ‑mɔ ‑bɩ, ɛ 'nɩ ‑nu꞊o lɩ 'a ‑nɛ ‑cɔhlʋnpi‑kʋan, 'kɩ 'lɩ Nyɩsʋa a 'kayu ‑mʋ', ‑tonyibli ‑pʋ bʋ. Kɛɛ, 'kɩ ɛ ni 'lɩ꞊ɩ Nyɩsʋa a ꞊haan'kayu ‑mʋ' bʋ, ‑ɛ nɩ 'lɩ yakɔ 'kwli, ‑ɛ mɔ 'kayu ‑mʋ', Nyɩsʋa a ꞊gbɛtʋ, ɛ ‑pʋ. ‑Ɛ ‑bɩ 'kɩ, ‑tɛ ‑Yusu mɔ ‑aan ‑cɔhlʋnpinyɔ, ɛ ni Nyɩsʋa a ‑cɔhlʋnpi‑kʋan. 
Kɛɛ, ɛ 'nɩ nu꞊o ‑kʋan a 'mʋ, 'kɩ 'nɛ‑ 'klɔ ‑bʋ kɩ, ‑ɛ nu꞊o, ɛ kɔ ‑cɔhlʋnpinyʋ, 'ʋ nɩ 'nɛ‑ 'klɔ ‑bʋ kɩ, 'ʋ ni ‑cɔhlʋnpi‑kʋan, ꞊wɩ yɩ, ‑tɛ Moise a tete ni 'a hɩhla. 
Nyɩsʋa a 'kayu ‑mʋ', ‑ɛ kɔ bʋ ʋ ni 'lɩ ‑kʋan, ti ‑mʋ', ‑ɛ kɔ 'yri Moise mi la꞊a pʋ mɔ, kɛ‑ Nyɩsʋa pʋ la꞊a yɩ, ‑ɛ mɔ: «꞊Tu꞊o 'yie ‑tɛɛ, ‑ɛ di꞊e nu, ‑tɛ 'n nu꞊o ‑na tɔɔlɛ, 'kɩ 'nɛ‑ dʋgba ‑bʋ 'lu, ꞊mʋ 'a pʋpʋʋ lɛ nu.» Kɛ‑ Nyɩsʋa a win pʋ la. Dɛ a 'mʋ, ɛ ꞊hɛn 'nyrɛ, ‑ɛ mɔ, Nyɩsʋa a 'kayu ‑mʋ', Moise pʋ la, ɛ kɔ ‑cɔhlʋnpi‑kʋan 'hʋɛn‑, ‑ʋ kɔ ‑tɩ Moise a tete hlɛ, ʋ mɔ ‑tɛblɩ ‑mʋ', ‑ɛ nɩ 'lɩ yakɔ 'kwli a yɩ'wɩdɛ ꞊nɩɔ. Kɛɛ, ‑tɛblɩ ‑mʋ', ‑ɛ nɩ 'lɩ yakɔ 'kwli, ɛ nɔ‑ mɔ ꞊haan‑tɛblɩ. 
'A ‑tɩ, ‑a yɩ꞊ɩ 'nɩ 'ye, ‑ɛ mɔ, ‑Yusu a ‑cɔhlʋnpi‑kʋan, ɛ ni, 'kɩ 'lɩ yakɔ 'kwli, ɛ ‑hi 'ʋ ‑Juukʋɛ* a ‑cɔhlʋnpi‑kʋan nɩ. 'Kɩ ‑Yusu nɩ 'ʋ Nyɩsʋa kɔ ‑tonyibli 'hʋɛn‑ a ‑gbati, Nyɩsʋa 'ɛ ꞊tu 'yrɩ yrayrɩ, ɛ kɔ ‑tonyibli 'hʋɛn‑. 'Yrɩ yrayrɩ a 'mʋ, ɛ ‑hi 'ʋ yɩ‑hɛyrɩ nɩ, ‑kɔtɩ 'kɩ 'lɩ 'yrɩ yrayrɩ a 'mʋ 'kwli, ‑tɛblɩ ‑mʋ', Nyɩsʋa pʋ la lɛ, ɛ di la nu, ɛ nɔ yɩ, 'ɛ ‑hi 'ʋ ‑tɛblɩ ‑mʋ', ɛ nu la ti ‑hi la a ti 'yri. 
'Bʋ mɔ, yɩ‑hɛyrɩ ‑mʋ', Nyɩsʋa ꞊tu la, ɛ kɔ nyibli 'hʋɛn‑, 'bʋ ꞊cɛ la, ɛ 'yɩ wɛn 'lɩ꞊ɩ 'lɩ ‑wɛ, bʋ ꞊tu wɛn 'yrɩ yrayrɩ, ɛ kɔ ‑tonyibli 'hʋɛn‑. 
Kɛɛ, ‑a yɩ 'kɩ꞊ɩ 'nɩ 'ye, ‑ɛ mɔ, yɩ‑hɛyrɩ a 'mʋ, ʋ 'yɩ la ꞊cɛ. Ɛ nɔ‑ nu꞊o, Kʋkɔnyɔ Nyɩsʋa 'ɛ yɩ la nyibli ‑tɩ ‑yɛɛ ‑nɩ, 'kɩ 'ʋ 'waa dɛ 'kuku a ‑ta'. Kɛ‑ ɛ pɩ la ꞊nʋ yɩ, ‑ɛ mɔ: «Ɛ di kɔ ti, ‑ɛ kɔ 'yri 'n di 'ʋ 'yrɩ yrayrɩ ꞊tu, 'n kɔ Judakʋɛ a ꞊tugba kɔ Yisraɛkʋɛ a ꞊tugbi a pɛpɛ 'hʋɛn‑. 
Ti ‑hi la a ti 'yri, ‑tɛ 'n pʋ la 'waa 'baɩnʋ dabʋ yɩ bʋ, 'nɩ ‑ha la 'lɩ ꞊nʋ ꞊kodɛ 'nyɩ, 'kɩ 'lɩ Esipʋblʋgba 'kwli, ti a 'mʋ 'yri, 'n ꞊tu la 'yrɩ, 'n kɔ ꞊nʋ 'hʋɛn‑. Kɛɛ, 'yrɩ yrayrɩ ‑bʋ, 'n di ꞊tu, 'n kɔ ꞊nʋ 'hʋɛn‑, ɛ di nɩ 'dɔ. 'Yrɩ ‑mʋ', 'n ꞊tu la, 'n kɔ ꞊nʋ 'hʋɛn‑, ʋ 'yɩ 'ʋ꞊ʋ 'ʋ ꞊tuu ‑nɩ. Ɛ nɔ‑ nu꞊o, 'nɩ hie 'ʋ ꞊nʋ bʋ. 'Mɔ ‑bʋ, ‑ɛ mɔ 'waa Kʋkɔnyɔ, 'mɔ ‑ni 'lɩ 'waa ‑mɔhleelɛ lɛ. 
'Yrɩ yrayrɩ ‑mʋ', 'n di ꞊tu, 'n kɔ Yisraɛkʋɛ 'hʋɛn‑, ‑tɛ ɛ di 'mʋ nɩ, ɛ nɔ‑ ‑bʋ: 'N di꞊e 'nɩ nu, ʋ 'mʋ 'na tete yi, 'mʋ꞊ʋ 'crɩ, 'kɩ 'lɩ 'waa ꞊wlɩ kɩ. 'N di mɔ 'waa Nyɩsʋa, ʋ 'mʋ 'na dakɔ pa. 
Ɛ 'yɩ 'kɩ 'lɩ꞊ɩ 'lɩ ‑wɛ, bʋ kɔ nyiblo ꞊dʋ, ‑bʋ di 'a 'bɩhɩan kɔ 'a 'dɩayɩ 'hʋɛn‑ ‑tɔɔ ‑nɩ, 'kɩ bʋ yi Nyɩsʋa, ‑ɛ nu꞊o, kʋɛ 'ʋ 'yu kɩ bʋ, ‑bʋ yɛ kukunyɔ kɩ, 'waa pɛpɛ a 'mʋ, ʋ di 'mʋ 'nɩ yi. 
'N di 'waa dɛ 'kuku 'nɩ 'wʋwla ‑nɩ, ɛ kɔ, 'mʋ 'waa dɛ 'kuku a 'mʋ 'a ‑tɩ ‑mɔ ‑hru.» 
Kɛ‑ Nyɩsʋa nu la 'yrɩ yrayrɩ a ‑tɩ a hɩhla. Ɛ ꞊hɛn 'nyrɛ, ‑ɛ mɔ, yɩ‑hɛyrɩ ‑mʋ', ɛ 'yɩ 'kɩ 'klɩ ‑kɔ. ‑A yi 'kɩ꞊ɩ nɩ, ‑ɛ mɔ, dɛ ‑mʋ', ‑ɛ 'yɩ 'kɩ 'klɩ ‑kɔ, ɛ kɔ, ‑ɛ 'yɛ nɩ ‑hɛɛ nyiblo, ɛ 'tɩɛ ‑wɛ bʋ nɩ. 
