﻿Leetal ya eepoñee ya Pihiburu pa.
1.
Ta infiyye, Pútuun pa mpúkupkup niŋ símaama unaa pínapii ti piyaamakoola etempo; mpíhinhin fo tan óo tan ti pákupal peemeeŋe niŋ pawenal peemeeŋe. 
Pale ti kunoom ka kikelan enke, púkupaakup niŋ unaa pínapii ti Añii etempo. Teyoo Pútuun pa mpínapii pipiliil púlunta pa, akina lompo mpimamale kati atoon waah óo waah. 
Akina ayem ecaaŋ ya eti hamake ha hiti Pútuun pa. Akina ayem anakool a pánipani ya ati Pútuun pa, naayekan waah óo waah ti sempe sa siti hilimoo. Ta naapaye ta kaakuulan umuuyen wa uti pakan paka, naayeno look alacana ti epees yáali ya eti Pútuun pa, peemaka pa. 
Fiyuu naahaŋe meemak pumaleekoo pa, samat nii fa Pútuun pa mpuwufanoo fa caacaw ceehaŋe citi pumaleekoo pa meemak. 
Pánipani, Pútuun pa pitaapala pusok yoonool ti pumaleekoo etempo: “Awe yem Añiinam, písik fíyooy inci yem faafi.” Niŋ eehe lompo: “Inci fayeno Paapaa ateyoo, akina naayeno Añiinam.” 
Pale ta mpúpoñii ta Añii etempo áyaañ a ti púlunta pa, mpusok: “Pumaleekoo pa púlooŋ piti Pútuun pa, píkilipo hátikinoo.” 
Eehe Pútuun pa mpusoke kiti pumaleekoo etempo, pusok: “Píhinaahin pumaleekoo etempo samat nii eyam; mpíhin píhina etempo samat nii kaaleew seemak.” 
Pale Añii ya mpusok: “Awe Pútuun, cáwii ca citii cisiiŋanee-siiŋan fo cancowiyaaw, cáwii ca citii ceecoonoole. 
Aálafilafi heecoonoole, innat heenaput. Ekina ewune Pútuun pa, peeyem pa Pútuun pa pitii, pucokuucok pihaŋ pákawiyi mpunuci niŋ munucu emma éfimucoopii pásuuma.” 
Pútuun pa nene pusok: “Ateeteyo, ti púcook pa, awe liile etaam ya, awe memanoole lompo patiila niŋ sipeesi. 
Waah ewwe púlooŋ éfuucim, pale awe aafatowo fo cancowiyaaw. Efuulop samat nii wañ weemaamane. 
Aafapoon wo samat nii fa hísool napoonee, ínfaliŋ wo samat nii fa wañ náfaliŋee. Pale awe yesiyantoo, eloŋi etetaak pikelan.” 
Pútuun pa pitaapala pusok maleekoo: “Kéy yeniyam epees yáali, fo ta inci fatah ta pikamooli ti wooti, ayyeno amansa ya ateyii.” 
Ooto weyme uyem pumaleekoo? Pikina púlooŋ kunuu lamma, píhina Pútuun pa. Púpoñiyoopoñ po pípikey pipiyankanan payenka efikafakanee ka. 
