MAT 1:1 Ya꞉su Kelisoko ba꞉ Da꞉ibidikono eyono gudula, ba꞉gala Da꞉ibidiko ba꞉ A꞉ibalahamakono galane dawala, ba꞉bene ba꞉moe ba꞉ Ya꞉sukunu mabu tawakalubino mahiloeno komola.
MAT 1:2 A꞉ibalahamako tetene tupuimiti Da꞉ibidiko teta꞉mo puluhuku, Ya꞉sukunu mabu tawakalubino komo ba꞉ma ka꞉nala — A꞉ibalahamakono gudu Aisa꞉ketela. Aisa꞉kekono gudu Ya꞉ikobotela. Ya꞉ikobokono gudu Yudatela, huiyatiya Yudako kapiya kododiya꞉ha꞉, ebeno komo nani ekaki eba꞉go nemedenama꞉.
MAT 1:3 Yudakono gugudi netewa ba꞉ Peleseko ba꞉gala Silako, ibino menoko ba꞉ Ta꞉imatela. Pelesekono gudu Hesalonatela. Hesalonakono gudu Lamatela.
MAT 1:4 Lamakono gudu Aminadabatela. Aminadabakono gudu Nasonatela. Nasonakono gudu Samonotela.
MAT 1:5 Samonokono gudu Bowasetela, ba꞉be guduino menoko ba꞉ La꞉iha꞉batela. Bowasekono gudu Obedatela, ba꞉be guduino menoko ba꞉ Lutitila. Obedakono gudu Yesitila.
MAT 1:6 Yesikono gudu Da꞉ibiditila, ebete Isalaela hopoeno Ko Gawadubuma꞉ eda꞉nami. Ba꞉bene Da꞉ibidiko tetene tupuimiti Yekonayako teta꞉mo puluhuku, Ya꞉sukunu mabu tawakalubi ba꞉ ba꞉moi ba꞉bi Yunapi Koko Gawadubula, ibino mahiloeno komo ba꞉ma ka꞉nala — Da꞉ibidikono gudu Solomonotela, ba꞉be guduino menokote dopamo Ulayakono kamenama꞉ eda꞉nami.
MAT 1:7 Solomonokono gudu Lihobaumatela. Lihobaumakono gudu Abayatela. Abayakono gudu A꞉isatela.
MAT 1:8 A꞉isakono gudu Yehosapatatela. Yehosapatakono gudu Yolamatela. Yolamakono gudu Usayatela.
MAT 1:9 Usayakono gudu Yautamatela. Yautamakono gudu A꞉ihasatela. A꞉ihasakono gudu Hesekayatela.
MAT 1:10 Hesekayakono gudu Ma꞉na꞉satela. Ma꞉na꞉sakono gudu A꞉monatela. A꞉monakono gudu Yausayatela.
MAT 1:11 Yausayakono gudu Yekonayatela, huiyatiya ebe kapiya kododiya꞉ha꞉, ebeno komo ekaki eba꞉go nemedenama꞉. Yekonayako tetelo Ba꞉baloni alaholohopa꞉te pelamete Isalaela hoponapi heloamo puwatete ibino Ba꞉baloni hoponomamo ba꞉bo magataliya꞉.
MAT 1:12 Ba꞉bene alaholohopa꞉te ibi Ba꞉baloni hopamo da꞉magataliya꞉, ba꞉ba tetene tupuimiti Yausepeko teta꞉mo puluhuku, Ya꞉sukunu mabu tawakalubino komo ba꞉ma ka꞉nala — Yekonayakono gudu Siyatiyelatela. Siyatiyelakono gudu Selababelatela.
MAT 1:13 Selababelakono gudu Abiyudatela. Abiyudakono gudu Elayakimitila. Elayakimikono gudu A꞉isotela.
MAT 1:14 A꞉isokono gudu Sa꞉idokatela. Sa꞉idokakono gudu A꞉ikimitila. A꞉ikimikono gudu Eliyudatela.
MAT 1:15 Eliyudakono gudu Eliyesatela. Eliyesakono gudu Ma꞉ta꞉natela. Ma꞉ta꞉nakono gudu Ya꞉ikobotela.
MAT 1:16 Ya꞉ikobokono gudu Yausepetela. Yausepeko ba꞉ Ma꞉likono awila ba꞉gala Ma꞉liti Ya꞉suku balahimiya꞉, ba꞉be gudu tawakaluba꞉te Godokono Oemedawa Kelisoma꞉ ka꞉minaka.
MAT 1:17 Ba꞉bema꞉ Ya꞉sukunu mabu tawakalubino komo ba꞉ma ka꞉nala. A꞉ibalahamako tetene tupuimiti Da꞉ibidiko teta꞉mo puluhuku 14 tawakalubila, ba꞉gala Da꞉ibidiko tetene tupuimiti alaholohopa꞉te tawakalubi Ba꞉baloni hopamo da꞉magataliya꞉ ba꞉ba teta꞉mo puluhuku 14 tawakalubila, ba꞉gala Ba꞉baloni tetene tupuimiti Kelisoko teta꞉mo puluhuku 14 tawakalubila.
MAT 1:18 Ba꞉bene Ya꞉su Kelisote keba ka꞉na ka꞉hawakaluya꞉, ba꞉moe ba꞉be komola. Ebeno menoko Ma꞉liko Yausepetamo na꞉galuimiya꞉, ba꞉bene iba꞉te kapiyama꞉ eda꞉heno, Ma꞉liti dopamo iya꞉tawuya꞉ ebete Godokono Gobogobamo lamituma꞉ eda꞉te gudu kalahimima꞉ne.
MAT 1:19 Ebeno awi Yausepeko ba꞉ hido tuputupudawanomola. Ba꞉bema꞉ ebete Ma꞉likoba꞉ kapiyama꞉ eda꞉heno ebete ebeno lamituma꞉ eda꞉ komo diya꞉tawuya꞉, ba꞉ba tetelo ebe ubila Ma꞉liko gelebadia꞉go ibuki, mabu ebe ubihinola tawakalubino holoholo hapulu ebetamo hilopo ikame.
MAT 1:20 Huiyatiya ebete ba꞉moe komo ba emalagidolo Kodawa Godokono nopodawate hiyo gabodo ebetamo uluhukunate na꞉goeniya꞉, “Da꞉ibidikono hogo Yausepe, ama꞉le Ma꞉liko amia꞉no kamenama꞉ eda꞉ma꞉ akatoletola꞉la꞉, mabu ebeno tepo ipuwalo demedena ba꞉be gudu Godokono Hido-talona Gobogobote ebetamo ikami.
MAT 1:21 Iyo, ebete dubu gudu kalahimima꞉ne ba꞉bene ama꞉ ebeno mahilo Ya꞉suma꞉ na꞉ka꞉miya꞉, mabu ebete ebeno tawakalubi ibino hiya꞉hiya꞉ kuba ododili ipuwane uwatete ibino ka꞉ka꞉ komula꞉lelamema꞉ne.”
MAT 1:22 Ba꞉bene ba꞉moi hiliyonomo komate ikulihuya꞉, Kodawa Godote ebeno ukui hawakalimidawa ipuwado da꞉goiya꞉ ba꞉be tabote hibima꞉ keda꞉ma꞉, iyo, ya꞉lo tetelo ebete tabo ba꞉ma ka꞉na goiya꞉,
MAT 1:23 “Bohelete lamituma꞉ eda꞉te dubu gudu kalahimima꞉ne, ba꞉bene iba꞉te ebeno mahilo Ima꞉nuwelama꞉ koka꞉mima꞉na꞉.” Buka ka꞉lamiholedawa, wadiyala ama꞉ niya꞉tawa ba꞉moe Ima꞉nuwela mahiloeno ipuwa nitana ‘Godote ago bemedena.’
MAT 1:24 Ba꞉bema꞉ Yausepete u wata bahini mahiganate Godokono nopodawate ebe bada tabo ka꞉goemeniya꞉, ebete ba꞉be tabamo papamiwatate Ma꞉liko ebeno kamenama꞉ ba꞉bo lawiya꞉.
MAT 1:25 Huiyatiya Ma꞉liti gudu Ya꞉suku alahimihino Yausepete dopamo eba꞉go kapiyama꞉ kediya꞉ha꞉, ba꞉bene Ma꞉liti Godokono gudu dalahimiya꞉ ba꞉ba tetelo Yausepete ebe Ya꞉suma꞉ ba꞉bo ka꞉miya꞉.
MAT 2:1 Heloditi Yudiya hopolo Ko Gawadubuma꞉ ba eda꞉na, eta dulu Ya꞉suti ba꞉be hopoeno Beteleheme habalo ba꞉bo hawakalaniya꞉. Ba꞉bene komo hegelate da꞉petohuya꞉, ba꞉ba tetelo mululu oloki ka꞉lamiholepi dubate hegelate da꞉puluhukunako ba꞉ba hapuni muhulu hopone pelamiya꞉ Yudiya hopoeno ko haba Yelusalemamo.
MAT 2:2 Iba꞉te ba꞉ma ka꞉na pega꞉luya꞉, “Keka꞉ Yu tawakalubino Ko Gawadubuma꞉ eda꞉ma꞉ da꞉hawakalui ba꞉be gudu? Ale ebeno oloki aeno muhulu hopolo umiti ebe adikumima꞉ pelamema꞉.”
MAT 2:3 Ba꞉bema꞉ Ko Gawadubu Heloditi ba꞉moe komo duliya꞉ ebeno tepo ipuwalo ukui bilibilinomoma꞉ ediya꞉, ba꞉gala Yelusalema ko habalo demedehonama꞉ ibi hiliyonomate atumu ukui bilibili komo ba꞉bo kalawiya꞉.
MAT 2:4 Ba꞉bene Godotamo hawa꞉goeno ikamehopino hununomo watowatopi ba꞉gala Godokono Tutumu iya꞉tulamepi, Heloditi ibi hiliyonomo ebetamo ka꞉lamiti nalateda꞉liya꞉, “La꞉eno ukui kebanala꞉ka꞉? La꞉ Yu tawakalubino Ko Gawadubu Kelisote kebe habalo na꞉ka꞉hawakalamene?”
MAT 2:5 Iba꞉te ebetamo na꞉huiyuya꞉, “Ebete Yudiya hopoeno Beteleheme habalo kohawakalama꞉ne, mabu Godokono ukui hawakalimidawate Godokono Bukamo tabo ba꞉ma ka꞉na miya꞉tiya꞉,
MAT 2:6 ‘Beteleheme haba Yudiya hopolo ditana, Yudiya hopoeno koko gawadubu ipuwalo ama꞉ deha꞉potoha꞉, mabu ama꞉ ipuwane tawakalubino watodawate kuluhukuma꞉ne, naeno Isalaela tawakalubi ebete bulamenamene.’”
MAT 2:7 Ba꞉bene gapogapo tetelo Ko Gawadubu Heloditi oloki ka꞉lamiholepi diya gabodo ebetamo ba꞉bo ka꞉laminiya꞉, mabu ebe ubila olokiti keba tetelo kuluhukuniya꞉le iba꞉godone ba꞉be tete kiya꞉tawanama꞉.
MAT 2:8 Ebete ba꞉be komo lawenate ibi ba oelamena na꞉goelameniya꞉, “La꞉ tolamete Beteleheme habalo gudu hidonomamo nohowaditi da꞉numima, wadiyala la꞉ gala kapelamete na na꞉pikiyanamiya꞉la꞉, ba꞉bene nale atumu katote ebe kakanadikumima꞉nemo.”
MAT 2:9 Ba꞉bema꞉ oloki ka꞉lamiholepa꞉te Helodikono tabo ulinate ba꞉ dito tolameniya꞉. Ba꞉bene iba꞉te ba tolamena, hegelate da꞉puluhukunako ba꞉be muhulu hopolo dopamo duminiya꞉, ba꞉be atu oloki gala na꞉kanuminiya꞉. Ba꞉ba tetelo iba꞉te oloki da꞉kanuminiya꞉ kalakala ba꞉bo nelaweniya꞉, o kalakala bada konomola꞉ka꞉, ba꞉bene ba꞉be olokiti ibi dopalamenate ba tona, guduti kebolo ka꞉kapitanuya꞉ olokiti ba꞉be tetenomamo dito nutiniya꞉.
MAT 2:11 Ba꞉bema꞉ iba꞉te ba꞉be genama guamo nogomonate gudu ba꞉gala ebeno menoko Ma꞉liko ba꞉bo nulameniya꞉. Ba꞉ba tetelo iba꞉te ibino pupamo ba ahidina gudutamo papamila꞉nate ebe ba꞉bo adikuminiya꞉, ba꞉bene iba꞉te dopamo mani kokonomamo duwatehuya꞉ ba꞉bi malemale ilina uluhukulatelenate gudutamo ba꞉bo ikamehoniya꞉, ba꞉ma ka꞉na golodo mani, ape abutimino hido nibo ilina, ba꞉gala eta hido nibo ihi ilina.
MAT 2:12 Ba꞉be dulu Godote hiyolo ibi na꞉goelameniya꞉, “La꞉ Ko Gawadubu Heloditamo gala akatolama꞉la꞉,” ba꞉bema꞉ eta hegelalo iba꞉te tupuimiti eta gabodo ibino hoponomamo ba꞉bo tolamiya꞉.
MAT 2:13 Ba꞉bene eta dulu Kodawa Godokono nopodawate Yausepetamo hiyolo puluhukunate ebe na꞉pegoemeniya꞉, “Wadiyala ama꞉ tiyonomo mahigate, gudu ba꞉gala ebeno menoko uwatete Isipiti hopamo nalahuta꞉la꞉. La꞉ ba꞉bolo ba nemedena, keba tetelo nale la꞉ da꞉kakiyalamema la꞉ ba꞉mamo gala ba꞉bo kakapema꞉nemata, mabu tete tatalila Heloditi gudu anakapumima꞉ Beteleheme habalo kopohowadima꞉ne.”
MAT 2:14 Ba꞉ba tetelo Yausepete mahiganate gudu ba꞉gala ebeno menoko uwatenate Isipiti hopamo to gabodo ba꞉bo toniya꞉.
MAT 2:15 Ba꞉bema꞉ iba꞉te Isipiti hopamo nikuliti ba꞉bolo nemediya꞉ Ko Gawadubu Helodikono hoe teta꞉mo. Ba꞉moe komote ba꞉ ba꞉ma ka꞉na uluhukuya꞉ Kodawa Godote ebeno ukui hawakalimidawa ipuwado da꞉goiya꞉ ba꞉be tabote hibima꞉ keda꞉ma꞉, iyo, ya꞉lo tetelo ebete tabo ba꞉ma ka꞉na goiya꞉, “Naeno guduti Isipiti hopone kopema꞉ nale ebe koka꞉mima꞉nemo.”
MAT 2:16 Ba꞉bene oloki ka꞉lamiholepi dubate Helodiko ha꞉da damihomiya꞉, ebete ba꞉moe komo iya꞉tawate konomamo maubuya꞉. Ebe ubi konomola gudu Kelisoko anakapumi, ba꞉bema꞉ ebete Beteleheme haba ba꞉gala tamelo demedenama꞉ ba꞉bi tawakaluba꞉tamo alaholohopi dubu boelamiya꞉, iba꞉te tolamete netewa gogo tete dubu gugudi ba꞉gala a꞉lia꞉li gugudi hiliyonomo konanakapulamema꞉. Ebete ba꞉ma ka꞉na ododiya꞉ mabu oloki ka꞉lamiholepi dubate ebe a꞉kiyamiya꞉ ko olokiti ya꞉lo netewa gogo tetelo dopamo uluhukuniya꞉.
MAT 2:17 Ba꞉moe komote ba꞉ ba꞉ma ka꞉na uluhukuya꞉ Kodawa Godote ebeno ukui hawakalimidawa Yelemayako ipuwado da꞉goiya꞉ ba꞉be tabote hibima꞉ keda꞉ma꞉, iyo, ya꞉lo tetelo ebete tabo ba꞉ma ka꞉na goiya꞉,
MAT 2:18 “La꞉ima habanapa꞉godone ihimi konomote uluhuku, mabu Lesula꞉te ebeno gugudi bela꞉lamena! Iyo, ebete howela꞉go dihina kekelamenaha꞉, mabu ebeno gugudi hiliyonomate ba꞉ a꞉ha꞉laha.”
MAT 2:19 Galane tetelo Heloditi da꞉hoiya꞉, Yausepete Isipiti hopolo ba emedena Godokono nopodawate hiyo gabodo ebetamo ba꞉bo uluhukuniya꞉.
MAT 2:20 Nopodawate ebe na꞉goemeniya꞉, “Ama꞉ gudu ba꞉gala ebeno menoko uwatete, la꞉ Isalaela hopamo na꞉kawilala꞉la꞉, mabu gudu anakapumima꞉ dewagelenama꞉ iba꞉te a꞉ha꞉lahuya꞉.”
MAT 2:21 Ba꞉bene Yausepete mahigate gudu ba꞉gala ebeno menoko uwatete Isalaela hopoeno pe gabodo gala na꞉kapiya꞉.
MAT 2:22 Huiyatiya Yausepete eta komo ba꞉ma ka꞉na uliya꞉, ka꞉lo Helodikono gudu Akeleyasiko ebete ebeno nabiwino haba lawete Yudiya hopolo Ko Gawadubuma꞉ edi. Ba꞉bema꞉ Yausepete Yudiya hopolo nemedema꞉ da꞉toletoliya꞉, ba꞉ba tetelo Godote hiyo gabodo eta tabo ba꞉ma ka꞉na poemiya꞉ ebete Ga꞉lili hopamo kotoma꞉.
MAT 2:23 Ba꞉bene iba꞉te Ga꞉lili hopoeno Nasalete habamo nikuliti ba꞉bo nemediya꞉, mabu ya꞉lo tetelo Godokono ukui hawakalimipa꞉te na꞉ga꞉luya꞉, “Tawakaluba꞉te Kelisoko Nasaletenapima꞉ koka꞉mima꞉na꞉,” ba꞉bema꞉ ba꞉moe komote ba꞉ ba꞉ma ka꞉na uluhukuya꞉ Kodawa Godokono tabote hibima꞉ keda꞉ma꞉.
MAT 3:1 Ba꞉bene komo gogo da꞉petolamiya꞉, ba꞉ba tetelo Yoneko tawakalubi beyamo wadulateledawate pete Yudiya hopoeno dito hopolo Godokono tabo ba꞉ma ka꞉na polamagiya꞉,
MAT 3:2 “La꞉eno kubane nohobila꞉la꞉, mabu Godote Ko Gawadubuma꞉ deda꞉na ba꞉be komote ba꞉ na꞉pe!”
MAT 3:3 Ba꞉ hibila, Godokono ukui hawakalimidawa Aisayate dopamo Yonekono pe komoma꞉ tabo ba꞉ma ka꞉na goiya꞉, “Lumagiti dito hopolo tabo ba꞉ma ka꞉na ibulu kopegoema꞉ne, ‘Kodawoeno gabo na꞉hiduima꞉la꞉, ebeno gabo na꞉tuputupuima꞉la꞉!’”
MAT 3:4 Ba꞉ba tetelo Yonekono emede komo komopino emede komo huiyaha꞉, mabu ebete ka꞉molo-goe ipo kuba kaliko kau-goe tama kamaka꞉go pulinakui, ba꞉gala ebeno baa꞉ wawaka ba꞉gala molo benahanakui.
MAT 3:5 Ba꞉bema꞉ Yelusalema ko habanapi ba꞉gala komo Yudiya hoponapi ba꞉gala Yodane Tuli hapulu demedehonama꞉, ibi hiliyonomate Yonetamo tolamiya꞉ ebeno tabo ulihoma꞉,
MAT 3:6 ba꞉bene iba꞉te ibino kuba da꞉nehawakalilameholiya꞉, ebete ibi Yodane Tulilo beyamo ba꞉bo wadulateliya꞉.
MAT 3:7 Ba꞉ba tetelo Pa꞉lisi kapiyuimipi ba꞉gala Sa꞉diyusi kapiyuimipi, komo ibi hiliyonomate Yonetamo tolamiya꞉ ebete ibi beyamo kowadulatelema꞉, huiyatiya Yonete ibi ulamete iba꞉tamo na꞉goiya꞉, “La꞉ bu kalulata! La꞉ pote ka꞉goelamiti beyamo wadulatelema꞉ da꞉pelamema, aba꞉, Godokono konomo mauba komote la꞉tamo a꞉kapa꞉mene? Ao, kopema꞉ne!
MAT 3:8 La꞉eno tepo ipuwa hiya꞉ma꞉ da꞉midilima, wadiyala la꞉ la꞉eno hibi komo hawakalimima꞉ hidohido komo nododila꞉la꞉.
MAT 3:9 La꞉ ha꞉kiya la꞉eno ukuilo ba꞉ma ka꞉na akaga꞉lanakala꞉, ‘A modobola mabu A꞉ibalahamako ba꞉ aeno iniwa nabiwila.’ Ao, la꞉ a꞉kamodobamata! Na la꞉tamo hibi tabo begoemo, Godogodolo helo bitana ebete ba꞉moi nakolamo A꞉ibalahamakono gugudi kododilimima꞉!
MAT 3:10 Ba꞉bema꞉ ka꞉lo Godote ebeno kabi adi, hiliyonomo nolohoha꞉ gao keha ebete luhuti koa꞉mo kiya꞉hekema꞉ne.
MAT 3:11 “Komo la꞉ la꞉eno kubane dohobila꞉huima, nale ba꞉be komo kohawakalimima꞉ la꞉ beyamo wadulatelemata. Huiyatiya eta lumagino helo konomote naeno helo na꞉gogolona, ba꞉bema꞉ na hidoenoha꞉ ebeno nato ukulaleno beya agatamema꞉. Ebete naeno gala hapuni ba꞉pena, ba꞉bene ebete la꞉ Godokono Gobogobamo ba꞉gala ebeno koa꞉mo kopewadulatelema꞉na꞉ta.
MAT 3:12 Iyo, ebete witi-laisoeno nonoka tama꞉mo miya꞉teno ilina a꞉lawi, ba꞉bene ebete witi-laisa nahoeno ebeno genama guamo ba miya꞉te nonoka koa꞉mo ba꞉bo kiya꞉hekema꞉ne, ba꞉be koete itana tetelo na꞉woena, a꞉kaha꞉gale.”
MAT 3:13 Ba꞉bene Ya꞉suti Ga꞉lili hopone Yodane Tula꞉mo Yonetamo piya꞉, ebete ebe beyamo kadutima꞉.
MAT 3:14 Ba꞉ba tetelo Yonete na꞉goiya꞉, “Ama꞉le na beyamo adunatene modobola, huiyatiya mabu keka꞉ ama꞉ ba꞉be komo nagodone lawema꞉ da꞉pa꞉? Modoboha꞉!”
MAT 3:15 Huiyatiya Ya꞉suti ebetamo na꞉goiya꞉, “Modobola a kododima꞉nema꞉, mabu Godokono tuputupu gabodo tolame ipuwalo ebete a hiliyonomo komo ododilima꞉ da꞉kiyaa꞉menakomene, ale ubiha꞉ma꞉ a꞉keda꞉hanakama꞉.” Ba꞉ba tetelo Yonete Ya꞉sukunu tabamo papamiwatate ba꞉bo ododiya꞉.
MAT 3:16 Ba꞉bene Ya꞉suti beyane ba podolo, ba꞉ba tetenomolo Godote ebeno Hunu Haba a꞉hiya꞉midutalo ba꞉bo umiya꞉, ba꞉gala ebete eta komo ba꞉ma ka꞉na kumiya꞉, Godokono Gobogobo gimai hola keba ka꞉nala꞉ka꞉ ba꞉ba ka꞉na pihitigate ebetamo dito pemediya꞉.
MAT 3:17 Ba꞉ba tetelo tabote Hunu Habane ba꞉ma ka꞉na pihitiguya꞉, “Ba꞉moe ba꞉ naeno kapiya Gudunomola. Na ebetamo na꞉kalakalutamo.”
MAT 4:1 Ba꞉bene Godokono Gobogobote Ya꞉suku dito hopamo na꞉magatuya꞉, mabu ebe ubila Saitanatamo tete ba꞉bolo nikamete, ebete Ya꞉suku kuba gabamo kemogabuimima꞉.
MAT 4:2 Ba꞉bene Ya꞉suti dito hopolo 40 hegela ba nemede, ba꞉be tete ga꞉ga꞉nomolo baa꞉ kananakuiha꞉, ba꞉bema꞉ ebete baa꞉ma꞉ kape komo ba꞉bo iya꞉tawuya꞉.
MAT 4:3 Ba꞉bene Saitanate ebetamo uluhukuti ebe na꞉goemiya꞉, “Ama꞉ Godokono hibi Guduma꞉ deda꞉na, ba꞉moi nakola baa꞉ma꞉ na꞉midila꞉.”
MAT 4:4 Ya꞉suti ebeno tabo ba huiya na꞉goiya꞉, “Godokono Bukalo tabo ba꞉ma ka꞉na itana, ‘Lumagiti ba꞉moe hopoeno baa꞉ kapiyalo a꞉kaka꞉ka꞉namene, huiyatiya ebete Godokono hiliyonomo tabo komo da꞉nahamene hibinomolo ba꞉ka꞉ka꞉namene.’”
MAT 4:5 Ba꞉bene Saitanate Ya꞉suku Godokono hido-talona haba Yelusalemamo magatate Godoko Adikumino Hiya꞉ Genamoeno uba hunamo nadipiti
MAT 4:6 ebe ba꞉bo negoemiya꞉, “Ama꞉ Godokono hibi Guduma꞉ deda꞉na, ama꞉ ha꞉kiya hakamo na꞉nepatega, mabu Godokono Bukalo tabo ba꞉ma ka꞉na itana, ‘Godote ebeno nopopi amia꞉no komoma꞉ kopoelamema꞉ne, iyo, iba꞉te ibino kokotamo ama꞉ kopelawema꞉na꞉ta, ba꞉bema꞉ ama꞉le nakolalo nato a꞉kanukamidamena꞉ta.’”
MAT 4:7 Huiyatiya Ya꞉suti na꞉goiya꞉, “Ao, nale ba꞉be kuba komo a꞉kododa꞉mo, mabu Godokono Bukalo eta tabo ba꞉ma ka꞉na itana, ‘Hopo lumagiti Kodawa Godoko pawima꞉ akewagela꞉la꞉.’ Iyo, ba꞉be mabuma꞉ hopo haba lumagiti ebeno daedae ukuia꞉mo eta komo dododimini, ebete akemalagidolala꞉ Godote ebeno ka꞉ka꞉ dito kopemula꞉mema꞉.”
MAT 4:8 Ba꞉bene Saitanate Ya꞉suku eta hununomo hakamo magatate ba꞉moe hopo konomoeno hiya꞉hiya꞉ koko hopo ba niya꞉tumiho, iba꞉te ba꞉bi hiliyonomo hopo ba꞉gala koko ilina bulameholiya꞉.
MAT 4:9 Saitanate ebetamo na꞉goiya꞉, “Ama꞉ pupamo emedete na nadikunama꞉, ba꞉bene nale ba꞉moi hiliyonomo komokomo ama꞉tamo kikamehoma꞉nemata.”
MAT 4:10 Huiyatiya Ya꞉suti ebetamo na꞉goiya꞉, “Saitana, ama꞉ nagodone na꞉toa! Godokono Bukalo tabo ba꞉ma ka꞉na itana, ‘Ama꞉ amia꞉no Kodawa Godoko adikumilo ebe kapiyatamo na꞉papamiwatanakuya꞉!’”
MAT 4:11 Ba꞉bene Saitanate Ya꞉suku miya꞉pate, huiyatiya Godokono nopopa꞉te pelamete ebe ba꞉bo pebuiya꞉minuya꞉.
MAT 4:12 Ba꞉bene gabomana꞉te Yoneko du genamamo dihatiya꞉, Ya꞉suti ba꞉be komo uliti ebete Ga꞉lili hopamo ba꞉ dito tuya꞉.
MAT 4:13 Ebete Nasalete haba miya꞉pate Kapeniyama habalo nemedenami, Kapeniyama haba ba꞉ Ga꞉lili Bobo dodolo itanami, ba꞉moe bobo Sebulana ba꞉gala Na꞉patali ba꞉moi netewa gu tawakalubino hopo tamelo itanami.
MAT 4:14 Ba꞉moe komote uluhukuya꞉ Godokono ukui hawakalimidawa Aisayate kebe tabo kolamagiya꞉ ba꞉be tabote hibima꞉ keda꞉ma꞉, iyo, ebete ya꞉lo tetelo ba꞉ma ka꞉na olamagiya꞉,
MAT 4:15 “Sebulana hoponapi ba꞉gala Na꞉patali hoponapi, Ga꞉lili Bobamo tolame gabo tamelo demedehonama, la꞉ ba꞉bi tawakalubilata. Iyo, la꞉ ba꞉ Yodane Tuli hapuwagutilo da꞉pola꞉nama ba꞉bi tawakalubilata, la꞉eno hopoeno mahilo ba꞉ Yuha꞉ tawakalubino Ga꞉lilila.
MAT 4:16 Puya꞉te du ipuwalo demedehona, iba꞉te alo konomo kumima꞉na꞉, iyo, puya꞉te hoe ipuwalo demedehona, huiyatiya ka꞉ka꞉ alote ibi ka꞉la꞉minalema꞉ne.”
MAT 4:17 Ba꞉ba tetelo Ya꞉suti Godokono tabo olamagi ba tupuimi na꞉goiya꞉, “La꞉eno kubane ohobila꞉te ukui hiya꞉ma꞉ na꞉midila꞉la꞉, mabu Godokono Ko Gawadubuma꞉ eda꞉ tete tatalila.”
MAT 4:18 Ba꞉bene Ya꞉suti Ga꞉lili Bobo dododo ba peto dubu netewa ba꞉bo nulamiya꞉, Saimonoko ebeno eta mahilo Pitatela ba꞉gala ebeno ekawi A꞉nduluku, ibi netewapi daha uwateholepila, iba꞉te daha kamahamo na꞉hutiya꞉.
MAT 4:19 Ba꞉bene Ya꞉suti iba꞉tamo na꞉goiya꞉, “La꞉ na na꞉ta꞉mahena꞉la꞉, ba꞉bene nale la꞉ tawakalubi uwatepima꞉ komidilima꞉nemata.”
MAT 4:20 Ba꞉ba tetenomolo iba꞉te ibino kamahu miya꞉palete Ya꞉suku ba꞉bo ta꞉matuya꞉.
MAT 4:21 Ba꞉bene Ya꞉suti nanekela꞉mo gala katote Sebedikono gudu Ya꞉imesiko ba꞉gala ebeno ekawi Yoneko ba꞉bo kanulamiya꞉, iba꞉te ibino nabiwa꞉go bogelo ahiditi kamahu bihiduilamitiya꞉. Ba꞉bene Ya꞉suti ibi netewapi da꞉ka꞉lamiya꞉,
MAT 4:22 ba꞉ba tetenomolo iba꞉te ibino boge ba꞉gala nabiwi miya꞉palete Ya꞉suku ba꞉bo ta꞉matuya꞉.
MAT 4:23 Ba꞉bene Ya꞉suti Ga꞉lili hopo konomodo da꞉petonakui, ba꞉ba tetelo ebete Yu tawakalubino hiya꞉hiya꞉ baidi ibubulamehole genamalo ibi ba iya꞉tulame, Godote Ko Gawadubuma꞉ deda꞉na ebete ba꞉be komoeno Hido Tabo iba꞉tamo ba꞉bo olamaginakui, ba꞉gala tawakalubi ipuwalo puya꞉te hiya꞉hiya꞉ temetema꞉go demedehonama꞉ ebete ibi hiliyonomo atumu akahiduilamenakui.
MAT 4:24 Ba꞉bene ba꞉ba tetelo Siliya hoponapi hiliyonomate atumu Ya꞉sukunu komo kulihote, iba꞉te ibino hiya꞉hiya꞉ temetema꞉gopi ebetamo ba꞉bo magahelenakuya꞉. Ba꞉ma ka꞉na kuba gobogobagopi, ala꞉ temetema꞉gopi, ape kodakoda temetema꞉gopi, ba꞉gala komo hiya꞉hiya꞉ tawetawa꞉gopi hiliyonomate Ya꞉sutamo da꞉pelamenakui, ebete ibi ba꞉bo hiduilamenakui.
MAT 4:25 Ba꞉ hibila, ba꞉ba tetelo tawakalubi hiliyonomate Ya꞉sutamo hiya꞉hiya꞉ hopone pelamiya꞉, iyo, iba꞉te Ga꞉lili hopone, Ta꞉ni Habahaboeno hopone, Yelusalema ko habane, Yudiya hopone, ba꞉gala Yodane Tuli hapuni hiya꞉hiya꞉ pelameholete Ya꞉suku ba꞉bo ta꞉matuya꞉.
MAT 5:1 Ba꞉bene ba꞉bi tawakalubi hiliyonomate Ya꞉sutamo da꞉pelamiya꞉, ebete ibi ulamete haka hunamo nodolote dito nemediya꞉. Ba꞉bema꞉ ebe ta꞉matapi dubate pelamete ebe da꞉panataguma꞉diguya꞉,
MAT 5:2 ebete ibi iya꞉tulame ba꞉bo tupuimiya꞉.
MAT 5:3 Ya꞉suti iba꞉tamo na꞉goiya꞉, “Puya꞉te ibi ha꞉kiya ibi hegehegema꞉ ga꞉lalo Godoko ibino Kodawama꞉ da꞉ga꞉lanaka, wadiyala iba꞉te na꞉kalakalahanamena꞉, mabu Godote Ko Gawadubuma꞉ deda꞉na, ba꞉be hido haboeno komo ibinola!
MAT 5:4 “Ba꞉gala puya꞉te ba꞉ma tetelo temetema꞉go dihimina, wadiyala iba꞉te na꞉kalakalahanamena꞉, mabu Godote iba꞉tamo gelebadi kikalamema꞉ne!
MAT 5:5 “Ba꞉gala puya꞉te awagahaha꞉pima꞉ deda꞉hana, wadiyala iba꞉te na꞉kalakalahanamena꞉, mabu Godote ba꞉moe hopo konomo iba꞉tamo kikalamema꞉ne!
MAT 5:6 “Ba꞉gala puya꞉te tuputupu emede komoma꞉ da꞉kapimina, wadiyala iba꞉te na꞉kalakalahanamena꞉, mabu Godote ibino kape komo komodobuilamema꞉ne!
MAT 5:7 “Ba꞉gala puya꞉te malemale da꞉hawakalilamena, wadiyala iba꞉te na꞉kalakalahanamena꞉, mabu Godote iba꞉tamo ebeno malemale kohawakalimima꞉ne!
MAT 5:8 “Ba꞉gala puya꞉te ibino tepo ipuwa hidamo dukulalena, wadiyala iba꞉te na꞉kalakalahanamena꞉, mabu iba꞉te Godokono holoholo kumima꞉na꞉!
MAT 5:9 “Ba꞉gala puya꞉te maubahapa꞉tamo gelebadi dikalamena, wadiyala iba꞉te na꞉kalakalahanamena꞉, mabu Godote ibi ebeno gugudima꞉ kogoema꞉ne!
MAT 5:10 “Ba꞉gala puya꞉te tuputupu gabodo ba wapata꞉lamena ba꞉be mabuma꞉ temeteme duwatenaka, wadiyala iba꞉te na꞉kalakalahanamena꞉, mabu Godote Ko Gawadubuma꞉ deda꞉na, ba꞉be hido haboeno komo ibinola!
MAT 5:11 “Ba꞉gala tawakaluba꞉te na mabuma꞉ la꞉ iduduputilamelo koko temeteme ba ikalame la꞉ kubapima꞉ da꞉ga꞉lana, la꞉ atumu na꞉kakalakalahala꞉!
MAT 5:12 Iyo, la꞉ konomamo na꞉kalakalahala꞉, mabu galane tetelo la꞉le Godokono Hunu Habalo la꞉eno huiya kokonomo konuwatema꞉nemata. Numa꞉la꞉, dopamo tetelo demedenama꞉ ba꞉bi kubapa꞉te atumu Godokono ukui hawakalimipa꞉tamo koko temeteme ba꞉ba ka꞉na kikalamenama꞉.”
MAT 5:13 Ba꞉bene Ya꞉suti gala na꞉kagoiya꞉, “La꞉ ba꞉ ba꞉moe hopoeno solo golalata, huiyatiya la꞉eno solo golate dalatidimini, eta lumagiti gala soloma꞉ a꞉kamida꞉mene. Ba꞉be solo ba꞉ kubanomoma꞉ eda꞉, ba꞉bema꞉ tawakaluba꞉te gobogobamo hola꞉minalete natamo komikimoelema꞉na꞉.
MAT 5:14 “Ba꞉gala eta komo, la꞉ ba꞉ ba꞉moe hopo konomoeno alolata, mabu hibila, haka hunulu ditana tawakaluba꞉te ba꞉be haba hidonomamo buminamena꞉.
MAT 5:15 Iyo, lumagiti ebeno wuiki alo pa꞉titi bagolo ipuwamo a꞉kihata꞉mene, huiyatiya ebete hawakala baha꞉mo kihatema꞉ne, ba꞉bene ba꞉be alote genama gulu demedena ba꞉bi tawakalubi hiliyonomo ka꞉la꞉minalema꞉ne.
MAT 5:16 Ba꞉bema꞉ wadiyala la꞉eno alote ba꞉be atu gabodo komo tawakalubi na꞉la꞉minala꞉mene, iba꞉te la꞉eno hidohido ododili komoma꞉ la꞉eno Hunu Haboeno Nabiwi komilimihoma꞉.”
MAT 5:17 Ba꞉bene Ya꞉suti gala na꞉kagoiya꞉, “La꞉ hidamo nemalagidolala꞉, Godote Moseseko ipuwado tawakaluba꞉tamo dikalamiya꞉ ba꞉gala ebeno ukui hawakalimipa꞉te ebeno Bukamo da꞉miya꞉tiya꞉, nale ba꞉bi hidohido Tutumu Tabo gobogobamo miya꞉tema꞉ kapiya꞉ha꞉. Ao, eba ka꞉naha꞉. Nale huiyatiya ba꞉bi Tutumu Taboeno hibi komo hawakalimima꞉ piya꞉mo.
MAT 5:18 Na la꞉tamo hibi tabo begoemo. Ba꞉moe hopo ba꞉gala alomo ibino ilinate tete ga꞉ga꞉nomolo ba pola꞉na Godokono Tutumu Tabote atumu ba꞉kapola꞉namena꞉, ibi hiliyonomo ipuwalo eta deha꞉potonomo tabote a꞉kalatida꞉mene. Iyo, Godote kebe tabo komokomo ebeno Bukamo da꞉miya꞉tiya꞉, ba꞉bi komate tawakalubi biya꞉tulamenakomena꞉ ebeno oko hiliyonomo upula꞉le kuitita꞉mo!
MAT 5:19 Ba꞉bema꞉ Godokono Tutumu Tabo hiliyonomo ipuwalo kebe lumagiti eta deha꞉potonomo tabo ubiha꞉ma꞉ eda꞉te, ba꞉bene ebete komopi papamila꞉haha꞉ komo diya꞉tulamemene, galane tetelo ebete Godokono Hunu Habalo deha꞉potonomoma꞉ koneda꞉ma꞉ne. Huiyatiya kebe lumagiti Godokono Tutumu Tabo hiliyonomamo ba papamiwata komo tawakalubi atu komo ododilima꞉ diya꞉tulamemene, ebete Godokono Hunu Habalo koma꞉ koneda꞉ma꞉ne.
MAT 5:20 Ba꞉bema꞉ nale la꞉ begoelamemata, wadiyala la꞉le Godokono Tutumu iya꞉tulamepi ba꞉gala Pa꞉lisi kapiyuimipi ibino komo nemalagidolala꞉. Tawakaluba꞉te ibi tuputupupima꞉ ga꞉lana, huiyatiya la꞉eno tuputupu emede komote ibino emede komo gogoloheno la꞉ Godokono Hunu Habamo a꞉kana꞉pa꞉la꞉hamata.”
MAT 5:21 Ba꞉bene Ya꞉suti gala na꞉kagoiya꞉, “Dopamo tetelo tawakaluba꞉te Godokono eta tutumu ba꞉ma ka꞉na diya꞉tulamenakui, la꞉ uliya꞉mata. ‘Lumagi akanakapuma꞉la꞉. Pote eta lumagi danakapumimini, tawakalubino tabo anagilamelelamedawate ebetamo kuba huiya kikamema꞉ne.’
MAT 5:22 Huiyatiya ba꞉ma tetelo nale eta tabo bekagoemo. Kebe lumagiti ebeno ekawitamo da꞉maubamene, tabo anagiya꞉midadawate ebetamo kuba huiya kikamema꞉ne, ba꞉gala kebe lumagiti ebeno ekawi diduduputimimini, Ka꞉nisolo dubate ebetamo kuba huiya kikamema꞉na꞉, ba꞉gala kebe lumagiti ebeno ekawi watohenoma꞉ da꞉goemene, ba꞉be kuba mabuma꞉ Godote ebe Koe Habamo konoemema꞉ne.
MAT 5:23 Ba꞉bema꞉ ama꞉ Godoko owatidoloenoma꞉ hawa꞉goeno ilina patapatamo ba adahe ama꞉ ukui hidamo ba꞉ma ka꞉na da꞉nelawemena꞉, ‘A꞉iye! Naeno ekawiti natamo na꞉maubana!’
MAT 5:24 wadiyala ba꞉ba tetelo ama꞉ amia꞉no malemale ilina ba꞉bamo na꞉miya꞉patepuya꞉. Ama꞉ dopamo tote amia꞉no ekawi negelebadimiti, ba꞉bene ama꞉ gala kapete ba꞉be malemale ilina Godotamo ba꞉bo na꞉pikamiya꞉.
MAT 5:25 “Ama꞉tamo da꞉maubana ba꞉be lumagiti ama꞉ gabomani ko dubutamo da꞉magatamena꞉, la꞉ ebetamo nuluhukuhino wadiyala ama꞉ dopamo eba꞉go na꞉negelebadiya꞉la꞉. Ama꞉ ebe gelebadimihino, hibila, ebete ama꞉ ko dubuino kokotamo konihatema꞉na꞉ta, ba꞉bene ko dubuti amia꞉no kuba anagiya꞉midamete ama꞉ polisi dubutamo ba noeme, ama꞉ du genamamo ba꞉bo kotoma꞉na꞉ta.
MAT 5:26 Na ama꞉tamo hibi tabo begoemo, ama꞉ du genama gulu ba nemede, gabomani dubuti kebako tete emedema꞉ ama꞉ da꞉kiyamemena꞉, ama꞉le ba꞉bako kuba huiya modobotenomo modobotete habamo gala kakapema꞉na꞉ta, huiyatiya ama꞉le ba꞉be huiya modoboteheno a꞉kuluhukamena꞉ta.”
MAT 5:27 Ba꞉bene Ya꞉suti gala na꞉kagoiya꞉, “Tawakaluba꞉te Godokono eta tutumu ba꞉ma ka꞉na diya꞉tulamenakui, la꞉ uliya꞉mata. ‘Eta lumagino kamena pilolo akalawa꞉la꞉.’
MAT 5:28 Huiyatiya ba꞉ma tetelo nale eta tabo bekagoemo. Kebe dubuti eta kamena umiti ubi ebetamo dihatemene, Godokono umi ipuwalo ebete ebeno tepo ipuwalo ba꞉be kuba ya꞉lo ododi.
MAT 5:29 Ba꞉bema꞉ amia꞉no tu hapu baiditi ama꞉ kuba gabamo demogabuimina, ama꞉ magubutiti gobogobamo na꞉da꞉na! Wadiyala amia꞉no baiditi ba꞉ma tetelo alatidi, huiyatiya galane tetelo Godote amia꞉no ape konomo Koe Habamo a꞉da꞉na modoboha꞉!
MAT 5:30 Ba꞉gala amia꞉no tu hapu kokotote ama꞉ kuba gabamo demogabuimina, ama꞉ itamidate gobogobamo na꞉da꞉na. Wadiyala amia꞉no kokotote ba꞉ma tetelo alatidi, modoboha꞉ galane tetelo ama꞉le ape konomago Koe Habamo to!”
MAT 5:31 Ba꞉bene Ya꞉suti gala na꞉kagoiya꞉, “Ba꞉gala tawakaluba꞉te Godokono eta tutumu ba꞉ma ka꞉na iya꞉tulamenakuya꞉, ‘Kebe dubuti ebeno ubiha꞉ tetelo kamena dibukimini, kubaha꞉. Ebete ebe ibuki tabo pepamo miya꞉tete ebetamo ikamelo ba꞉bo konoemema꞉ne.’
MAT 5:32 Huiyatiya ba꞉ma tetelo nale eta tabo bekagoemo. Eta dubuino kamenate eta dubago kuba ododihino, ba꞉bene ebeno awiti ebe ubiha꞉ma꞉ eda꞉te dito dibukimini, ba꞉be dubuti ko kuba kododima꞉ne, ba꞉bene ebete Godogodone kuba huiya hibilo kolawema꞉ne. Mabu ebeno kuba ododi komodo ebeno kamenate ba to eta dubu da꞉nelawemene, Godokono umi ipuwalo ibi netewapino ododi komote ba꞉ pilo komoma꞉ keda꞉ma꞉ne.”
MAT 5:33 Ba꞉bene Ya꞉suti gala na꞉kagoiya꞉, “Dopamo tetelo tawakaluba꞉te Godokono eta tutumu ba꞉ma ka꞉na diya꞉tulamenakui, la꞉ uliya꞉mata. ‘Ama꞉le Godokono mahilamo kebe tabo dolamagihomena꞉ ba꞉bi tabo hiliyonomo hibinomolo nododiliya꞉.’
MAT 5:34 Huiyatiya ba꞉ma tetelo nale eta tabo bekagoemo. Ama꞉le komopa꞉tamo hibinomo tabo goema꞉ dewagelemena꞉, iba꞉te amia꞉no tabo hibima꞉ komidima꞉ ama꞉le Godokono Hunu Haboeno mahilo akaka꞉ma꞉la꞉, mabu ba꞉be Haba talonama꞉ eda꞉na, ba꞉ Godokono emede bahila.
MAT 5:35 Ba꞉gala ba꞉moe hopo haboeno mahilo akaka꞉ma꞉la꞉, mabu ba꞉moe hopo atumu talonama꞉ eda꞉na, ba꞉ Godokono nato a꞉puti bahila. Ba꞉gala atumu Yelusalema ko haboeno mahilo akaka꞉ma꞉la꞉, mabu ebe ba꞉ aeno Ko Gawadubu Godokono habala.
MAT 5:36 Ba꞉gala amia꞉no tabo ulidawate amia꞉no tabo hibima꞉ komidima꞉, ama꞉le amia꞉no mahilo akaka꞉ma꞉la꞉ mabu ama꞉ kodawaha꞉, iyo, ama꞉godolo helo kitanaha꞉ amia꞉no kapiya kilikili hinibo keyakeyama꞉ midi.
MAT 5:37 Ba꞉bema꞉ wadiyala ama꞉ huiyatiya amia꞉no tabo olamagi ipuwalo eta ilinoeno mahilo ka꞉mihino tabo hibilo ba꞉ma ka꞉na na꞉goiya꞉, ‘Iyo, na kododima꞉nemo,’ ba꞉gala keba tetelo ama꞉ eta komo ododi modoboha꞉ma꞉ deda꞉mena꞉, wadiyala ama꞉ eta hibi tabo ba꞉ma ka꞉na na꞉goiya꞉, ‘Ao, na a꞉kododa꞉mo.’ A꞉iye! Komopa꞉te amia꞉no tabo hibima꞉ komidima꞉ ama꞉le amia꞉no tabo heluimima꞉ eta tabo akagaa꞉la꞉, mabu ba꞉bako tabo olamagi komote Saitanagodone kopema꞉ne.”
MAT 5:38 Ba꞉bene Ya꞉suti gala na꞉kagoiya꞉, “Tawakaluba꞉te Godokono eta tutumu ba꞉ma ka꞉na diya꞉tulamenakui, la꞉ uliya꞉mata. ‘Eta lumagiti amia꞉no baidi da꞉kubahimimini, ama꞉ huiyatiya ebeno baidi kokubahimimima꞉na꞉ta. Ba꞉gala eta lumagiti amia꞉no lalo da꞉wakaa꞉midalemene ama꞉ atumu ebeno lalo kowakaa꞉midalemema꞉na꞉ta.’
MAT 5:39 Huiyatiya ba꞉ma tetelo nale eta tabo bekagoemo. Pote ama꞉tamo kuba dododinako ebe akaduhima꞉la꞉, ba꞉ma ka꞉na ebete ama꞉ tu hapu tatakolo danagalimimina꞉, wadiyala ama꞉ pele hapu ebetamo na꞉kikamiya꞉.
MAT 5:40 Ba꞉gala kebe lumagiti amia꞉no atuino ilina lawema꞉ ubi ihatelo ama꞉ tabo anagiya꞉mida habamo magatama꞉ da꞉goemene, wadiyala ebetamo dito nikamiya꞉ ba꞉gala ba꞉be atu tetelo amia꞉no sete ilina akamawada꞉la꞉, ama꞉le ebetamo malemalelo dito na꞉kikamiya꞉.
MAT 5:41 Ba꞉gala eta gabomani dubuti ebeno ilina kapiya kilomita tatalidopamo agatamema꞉ ama꞉ da꞉goememena꞉, wadiyala ama꞉ kalakalago ebeno ilina netewa kilomita muhuludopamo aguti eba꞉go dito na꞉tuya꞉.
MAT 5:42 Ba꞉gala kebe lumagiti amia꞉no eta ilinama꞉ ama꞉ da꞉toemehomena꞉, wadiyala ama꞉ ebetamo malemalelo nikamiya꞉. Iyo, etate eta tetelo ama꞉godone ilina lawete gala ama꞉tamo ikamema꞉ da꞉kagoemene, wadiyala ama꞉le ebe dito nowalubiya꞉.”
MAT 5:43 Ba꞉bene Ya꞉suti gala na꞉kagoiya꞉, “Tawakaluba꞉te ba꞉ma ka꞉na diya꞉tulamenakui, la꞉ uliya꞉mata. ‘Ama꞉ amia꞉no mabulubi malemalelo nemalagidolona, huiyatiya pote ama꞉go dalaholona ama꞉le ba꞉bako lumagitamo mauba kubaha꞉.’
MAT 5:44 Huiyatiya ba꞉ma tetelo nale eta tabo bekagoemo. La꞉tamo dalaholohona, wadiyala la꞉ ibi malemalelo nemalagidolenala꞉, ba꞉gala la꞉tamo temeteme dikalamena ibi Godotamo na꞉wadiya꞉paa꞉latelenakuya꞉la꞉ ebete ibi hidamo kowalubilinama꞉.
MAT 5:45 Ba꞉mako ododi komodo la꞉ Hunu Haboeno Nabiwino gugudima꞉ beda꞉hanamata, mabu ebete ebeno hegeloeno alo ba꞉gala ebeno wegoloeno a꞉la꞉li kuba tawakalubi ba꞉gala tuputupu tawakalubi iba꞉tamo kapimilo pikalamenako.
MAT 5:46 Puya꞉te la꞉ malemalelo demalagidolena, la꞉ ba꞉bi tawakalubi kapiya demalagidolenama la꞉eno ukui keba ka꞉nala꞉ka꞉? Ba꞉be mabuma꞉ Godote la꞉tamo hido huiya ba꞉kikalametamena꞉? Ao, mabu mani pilolo uwatepa꞉te atumu ibino mabulubi kapiya emalagidolenaka!
MAT 5:47 Ba꞉gala la꞉ la꞉eno tawakalubi kapiyatamo hidohido komo dododilinama la꞉eno ukui keba ka꞉nala꞉ka꞉? La꞉ ba꞉bi hidohido ododili ipuwado komo tawakalubi ba꞉ka꞉gogoleoma? Ao, mabu hibima꞉ midiha꞉pa꞉te atumu ibino tawakalubi kapiyatamo hidohido komo ododilinaka!
MAT 5:48 Ba꞉bema꞉ la꞉eno ododili ipuwalo hidonomamo nemedeniya꞉la꞉, la꞉eno Hunu Haboeno Nabiwi keba ka꞉nala꞉ka꞉ ba꞉ba ka꞉na, mabu ebegodolo eta kapiya kuba kitanaha꞉.”
MAT 6:1 Ba꞉bene Ya꞉suti gala na꞉kagoiya꞉, “La꞉ hidamo, hidohido komo ododili tetelo komopa꞉te la꞉eno hido komo umima꞉ ibino holoholo hapulu akododila꞉la꞉. La꞉ eba ka꞉na dewagelema la꞉eno Hunu Haboeno Nabiwiti la꞉tamo hido huiya a꞉kikalama꞉mena꞉ta.
MAT 6:2 Ba꞉bema꞉ malemale ilina awaepa꞉tamo ikalame tetelo komopa꞉te la꞉eno hido ododi komo umima꞉ hawakala akododa꞉la꞉. Numa꞉la꞉, ma꞉lapila netewa tawakaluba꞉te baidi ibubulamehole genamalo ba꞉gala tawakalubino holoholo hapulu ibino malemale ilina diyamo konomago ikalamenaka komopa꞉te ibi komililameholema꞉. Ba꞉bema꞉ na la꞉tamo hibi tabo begoemo, iba꞉te tawakalubino mililamehole ipuwalo ibino ko huiya ba꞉ a꞉lawa꞉, Godogodone gala a꞉kuwata꞉mena꞉.
MAT 6:3 Huiyatiya la꞉eno malemale ilina ikalame tetelo wadiyala la꞉le diya gabodo nododiya꞉la꞉, ba꞉ma ka꞉na la꞉eno eta hido mabulubiti akiya꞉tawala꞉, Godoko kapiyate niya꞉tawamene.
MAT 6:4 Iyo, la꞉ malemale ilina diya gabodo nikalamenakuya꞉la꞉, ba꞉bene la꞉eno Nabiwi Godote la꞉eno diya ododi komo umiti ebete ha꞉kiya la꞉tamo hido huiya bikalamenakomena꞉ta.”
MAT 6:5 Ba꞉bene Ya꞉suti gala na꞉kagoiya꞉, “La꞉le Godokoba꞉ tabo ga꞉la tetelo ma꞉lapila netewa tawakalubima꞉ akeda꞉hala꞉. Iba꞉te baidi ibubulamehole genamalo ba꞉gala tawakalubino holoholo hapulu utitatate tabo madodo hunamo wadiya꞉paa꞉latelelo Godotamo ba꞉bo ga꞉lanaka, mabu ibi ubila tawakaluba꞉te ibino ga꞉la komo kulilatelema꞉. Ba꞉bema꞉ na la꞉tamo hibi tabo begoemo, iba꞉te tawakalubino mililamehole ipuwalo ibino ko huiya ba꞉ a꞉lawa꞉, Godogodone gala a꞉kuwata꞉mena꞉.
MAT 6:6 Huiyatiya ama꞉le Godokoba꞉ tabo da꞉ga꞉lama, wadiyala ama꞉ genamamo nodolote gigiho na꞉pekalapiluya꞉. Ba꞉bene ama꞉le amia꞉no Nabiwa꞉go diya gabodo tabo ba ga꞉la, ama꞉le ebe a꞉kuma꞉mena꞉ta, huiyatiya ebete amia꞉no diya ododi komo umiti ama꞉tamo hido huiya ba꞉bo kikamema꞉na꞉ta.
MAT 6:7 “Ba꞉bema꞉ ama꞉le Godokoba꞉ tabo ga꞉la tetelo, ama꞉ Godoko iya꞉tawaha꞉ lumagima꞉ akeda꞉la꞉. Numa꞉la꞉, ba꞉bako lumagiti Godoko toemeho tetelo ba꞉ma ka꞉na emalagidolonako, ‘Nale atu toetoe tabo hiliyo teta꞉mo dolamaginakomo, ba꞉bema꞉ Godote naeno tabo hibinomolo kulima꞉ne.’
MAT 6:8 Huiyatiya la꞉ ba꞉bako lumagima꞉ akeda꞉hala꞉, mabu la꞉le la꞉eno modoboha꞉ komokomoma꞉ Godoko ga꞉lameheno ebete ya꞉lo iya꞉tawanako.
MAT 6:9 Ba꞉bema꞉ la꞉ Godotamo toetoe tabo ba꞉ma ka꞉na na꞉ga꞉lanakuya꞉la꞉, ‘Aeno Hunu Haboeno Nabiwi, wadiyala amia꞉no talona mahilo tawakaluba꞉te nadipata꞉mena꞉,
MAT 6:10 ba꞉gala wadiyala ama꞉le Ko Gawadubuma꞉ deda꞉na ba꞉be komote na꞉hawakalamene. Hibila, ama꞉le amia꞉no ubi keba ka꞉na ka꞉miya꞉teona Hunu Habalo ba꞉ba ka꞉na bododilinakomena꞉ta, ba꞉bema꞉ wadiyala ama꞉ hopo habalo amia꞉no ubi komokomo atumu na꞉kododilinakuya꞉.
MAT 6:11 ‘Ba꞉gala wadiyala ama꞉ ba꞉moe kapiya hegeloeno baa꞉ atamo modobolo nikaa꞉ma꞉.
MAT 6:12 Ba꞉gala komopa꞉te atamo kuba dododilina, ale ba꞉bi kuba egebolelamete kadodoholelamema꞉nema꞉, ba꞉bema꞉ wadiyala ama꞉ atumu aeno kuba egebolea꞉mete nadodoholea꞉ma꞉.
MAT 6:13 ‘Ba꞉gala Saitanakono kuba gabamo emogabuimi ipuwalo ama꞉le huiyatiya a ba owalubi amia꞉no hido gabodo na꞉magatoenakuya꞉, iyo, ebeno kuba ododi ipuwane aeno ka꞉ka꞉ na꞉mula꞉lea꞉ma꞉, mabu amia꞉no Ko Gawadubu komo, ba꞉gala helo konomo, ba꞉gala awagaha komo emedena emedena tetelo ama꞉godolo ba꞉pola꞉namena꞉. Ba꞉ba꞉la.’”
MAT 6:14 Ya꞉suti tabo moga꞉melo gala na꞉kagoiya꞉, “Komopa꞉te kuba la꞉tamo dododili, la꞉le ibino kuba dadodoholelamema la꞉eno Hunu Haboeno Nabiwiti atumu la꞉eno kuba egebolelamete kadodoholelamema꞉na꞉ta,
MAT 6:15 huiyatiya la꞉le komopino kuba adodolelameheno, la꞉eno Hunu Haboeno Nabiwiti atumu la꞉eno kuba egebolelamete a꞉kadodoholelama꞉mena꞉ta.”
MAT 6:16 Ba꞉bene Ya꞉suti gala na꞉kagoiya꞉, “La꞉le Godokono oko owatima꞉ baa꞉ nahaheno da꞉pola꞉nama, ma꞉lapila netewa tawakalubima꞉ akeda꞉hala꞉. Iba꞉te baa꞉ nahaheno pola꞉na tetelo ibino dopo menemenema꞉ eda꞉halamenaka, mabu ibi ubila tawakaluba꞉te ibino baa꞉ nahaha꞉ komo kumilamema꞉. Ba꞉bema꞉ na la꞉tamo hibi tabo begoemo, iba꞉te tawakalubino mililamehole ipuwalo ibino ko huiya ba꞉ a꞉lawa꞉, Godogodone gala a꞉kuwata꞉mena꞉.
MAT 6:17 Huiyatiya amia꞉no baa꞉ naheno luta tetelo wadiyala ama꞉ ba꞉be komo diya gabodo nododinakuya꞉. Ba꞉bema꞉ ama꞉ baa꞉ kapete umihino, ama꞉le kalakalago demedena ama꞉ ba꞉ ba꞉ba ka꞉na na꞉lutiya꞉, ama꞉le amia꞉no hinibo ahigiwadolete amia꞉no holoholo hidamo kukulama꞉na꞉ta.
MAT 6:18 Ba꞉bene tawakaluba꞉te a꞉kiya꞉tawahamena꞉ ama꞉le baa꞉ naheno da꞉luta, Nabiwi Godoko kapiyate kiya꞉tawama꞉ne. Ama꞉le ebe a꞉kuma꞉mena꞉ta, huiyatiya ebete amia꞉no diya ododi komo umiti ama꞉tamo hido huiya ba꞉bo kikamema꞉na꞉ta.”
MAT 6:19 Ba꞉bene Ya꞉suti gala na꞉kagoiya꞉, “La꞉ ba꞉moe hopolo ilina akadogodoguilamenala꞉, mabu ba꞉moe hopolo hidohido kaliko unawa꞉te a꞉kubahilamenaka ba꞉gala auli ilina hakate atumu a꞉kakubahilamenaka. Iyo, ba꞉ hibila, pilo tawakaluba꞉te genama guamo pogomote la꞉eno komo ilina dito kopekubahilamema꞉na꞉.
MAT 6:20 Ba꞉bema꞉ wadiyala la꞉ Godokono Hunu Habalo la꞉eno ilina na꞉dogodoguilamenala꞉, mabu ba꞉bolo unawa꞉te ilina a꞉kanala꞉la꞉, ba꞉gala hakate ilina a꞉kakubahilama꞉le, ba꞉gala pilo tawakaluba꞉te genama guamo ogomote la꞉eno ilina a꞉kuwata꞉mena꞉.
MAT 6:21 La꞉ hidamo! La꞉eno ilinate kebolo da꞉pola꞉namena꞉ la꞉eno tepo ipuwoeno ukui atumu ba꞉bolo konepola꞉nama꞉na꞉.”
MAT 6:22 Ba꞉bene Ya꞉suti gala na꞉kagoiya꞉, “Lumagino apeno alo ba꞉ ebeno baidila. Ba꞉bema꞉ amia꞉no baiditi hidamo da꞉la꞉minalemene amia꞉no tepo ipuwoeno alote atumu hidonomamo kaka꞉la꞉minama꞉ne,
MAT 6:23 huiyatiya baiditi hidamo a꞉la꞉minaleheno amia꞉no apete du ipuwalo kitanama꞉ne. Ba꞉bema꞉ ama꞉ hidamo, amia꞉no tepo ipuwoeno alote da꞉dumini, ba꞉be du komo bada konomola꞉ka꞉!”
MAT 6:24 “Ba꞉gala ba꞉moe ba꞉ eta komola, lumagiti netewa gawadubatamo okodawama꞉ eda꞉ modoboha꞉. Ebete ba꞉ba ka꞉na dewagelemene etatamo ba maubana eta malemalelo bemalagidolonamene, ba꞉gala ebe etatamo ba utina eta ubiha꞉ma꞉ beda꞉namene. Ba꞉bema꞉ ama꞉ ba꞉ atumu, Godotamo ba꞉gala manitamo kapiya tetelo papamiwata modoboha꞉.”
MAT 6:25 Ba꞉bene Ya꞉suti gala na꞉kagoiya꞉, “Nale la꞉ begoelamemata, la꞉eno emedeho komokomoma꞉ aka-ukuibilibilihonala꞉, iyo, la꞉le naha ilina, niho ilina, ba꞉gala pupulino ilina uwatema꞉ koamo akemalagidola꞉la꞉, mabu naha ilina ba꞉gala pupulino ilina iba꞉te kokoma꞉ keda꞉hanaha꞉. Naha ilinate lumagitamo hibi ka꞉ka꞉ ba꞉kikamemene? Ao, a꞉kikama꞉mene, ba꞉gala pupulino ilinate atumu ebeno ape emedena tetelo a꞉kowalubinamene.
MAT 6:26 Ba꞉bema꞉ la꞉ holaholoeno komo nemalagidolala꞉, iba꞉te pali ilina a꞉kamihala꞉ ba꞉gala iba꞉te pelamete nahoeno kikipo a꞉kapetapihala꞉, iyo, ibino pali ilina miya꞉teno genama puliyala, huiyatiya la꞉eno Hunu Haboeno Nabiwiti iba꞉tamo baa꞉ modobolo ikalamenako. Numa꞉la꞉, Godokono malemale hibilo bitana holaholatamo, huiyatiya la꞉tamo keba ka꞉na kitana? Ba꞉ hibila, ebeno malemale la꞉tamo konomoma꞉ eda꞉te emedena emedena tetelo bitanamene!
MAT 6:27 Ba꞉bema꞉ la꞉ ukui bilibilima꞉ akeda꞉hala꞉. Lumagiti ebe ha꞉kiya ebeno hoe tete eta hegelamo keba ka꞉na na꞉kihatemene, ba꞉gala ebete ebeno ka꞉ka꞉ keba ka꞉na na꞉ka꞉ga꞉gima꞉tepamene? Gabo puliyala, kitanaha꞉.
MAT 6:28 “Ba꞉bema꞉ mabu keka꞉ la꞉ pupulino ilinama꞉ ukui bilibilima꞉ deda꞉hanama? La꞉ hopoeno haiyaino komo nemalagidolala꞉, iba꞉te oko a꞉kowata꞉la꞉ ba꞉gala pupulino ilina a꞉kododila꞉la꞉.
MAT 6:29 Nale la꞉ begoelamemata, Ko Gawadubu Solomonote dogodogodawanomoma꞉ eda꞉nami, huiyatiya ebete hidohido tita꞉goeno ilina da꞉pupulinakui, ba꞉bi kalikoeno titi ba꞉moe hopoeno haiyaino hido komote na꞉gogolena.
MAT 6:30 Numa꞉la꞉, ba꞉moe hopoeno hemate ka꞉lo napepehuta, dumutu tawakaluba꞉te koa꞉mo kiya꞉hekema꞉na꞉, huiyatiya Godote ba꞉bi nonoka ilina tita꞉goenoma꞉ midilina, ba꞉bema꞉ ebete atumu la꞉tamo pupulino ilina modobolo bikalamenakomena꞉ta. La꞉ ba꞉moe komo hidamo iya꞉tawahaheno la꞉eno hibima꞉ midi komo Godotamo kokoha꞉!
MAT 6:31 “Ba꞉bema꞉ la꞉le ukui bilibilima꞉ eda꞉halo ba꞉ma ka꞉na akaga꞉lanakala꞉, ‘A bada na꞉ka꞉nahama꞉, ba꞉gala a bada na꞉ka꞉nihoma꞉, ba꞉gala a bada na꞉ka꞉pupulima꞉?’
MAT 6:32 Hibima꞉ midiha꞉pa꞉te ba꞉moi ilina ukui bilibila꞉go oholena, la꞉ huiyatiya eba ka꞉na akewagelenala꞉, mabu ba꞉bi ilina la꞉godolo modobolo pola꞉naheno la꞉eno Hunu Haboeno Nabiwiti ya꞉lo iya꞉tawanako.
MAT 6:33 Ba꞉bema꞉ la꞉ la꞉eno Ko Gawadubu Godotamo papamila꞉lo ebeno tuputupu emede komo dopamo nohowada꞉la꞉, ba꞉bene la꞉eno modoboha꞉ tetelo ebete la꞉eno komokomo ulamelelamete la꞉tamo modobolo bikalameholenakomena꞉ta.
MAT 6:34 Ba꞉bema꞉ la꞉ dumutu hegeloeno komoma꞉ ukui bilibilima꞉ akeda꞉hala꞉ mabu ba꞉be hegeloeno komote ha꞉kiya kopuluhukuma꞉ne. Ka꞉lo hegelalo da꞉pola꞉na ba꞉bi hiya꞉hiya꞉ komo nemalagidola꞉la꞉, huiyatiya eta hegeloeno kuba komate pikulihino dopamo tole komote la꞉tamo akapa꞉la꞉.”
MAT 7:1 Ba꞉bene Ya꞉suti gala na꞉kagoiya꞉, “Komo tawakalubino kuba ododili komoma꞉ la꞉le ibi kubapima꞉ tiyolo akaka꞉lama꞉la꞉, ba꞉bene Godote la꞉ kubapima꞉ a꞉kaka꞉lama꞉mena꞉ta,
MAT 7:2 mabu la꞉le tawakalubino komo keba ka꞉na danagilamelelamema, Godote ba꞉ ba꞉ba ka꞉na la꞉eno komo kanagilamelelamema꞉na꞉ta, ba꞉gala la꞉ komopa꞉tamo keba ka꞉na dododilinakoma, ba꞉ba ka꞉na Godote la꞉tamo atumu ba꞉ka-ododilinakomene.
MAT 7:3 Keka꞉ mabu ama꞉le ekawino baidilo puhulu deha꞉poto umilo huiyatiya amia꞉no baidilo ditana ba꞉be ko keha tete kuminaha꞉?
MAT 7:4 Ba꞉gala bada mabuma꞉ amia꞉no ekawitamo ba꞉ma ka꞉na da꞉goita, ‘Wadiyala amia꞉no baidilo ditana ba꞉be puhulu deha꞉poto nale kolawemema꞉nemata,’ huiyatiya amia꞉no baidilo ditana ba꞉be ko keha tete ama꞉ kalawenaha꞉?
MAT 7:5 A꞉iye! Ama꞉ ma꞉lapila netewa lumagilata! Wadiyala ama꞉ dopamo amia꞉no baidilo ditana ba꞉be keha lawete, ama꞉le galane hidamo gahimiti amia꞉no ekawino baidilo ditana ba꞉be puhulu deha꞉poto ba꞉bo kolawemema꞉na꞉ta.
MAT 7:6 “Ba꞉gala ba꞉moe ba꞉ eta komola, la꞉le Godokono talona ilina gahagahatamo akikalama꞉la꞉. La꞉ ba꞉ba ka꞉na dewagelema, diyala, iba꞉te la꞉tamo ohobila꞉te la꞉ kubanomamo da꞉ aloholetamena꞉, ba꞉gala la꞉eno hidohido mani goegoa꞉tamo akikalama꞉la꞉, iba꞉te ba꞉bi ilina natamo mikimoelete dito miya꞉paledemena꞉.”
MAT 7:7 Ba꞉bene Ya꞉suti gala na꞉kagoiya꞉, “La꞉ Godoko na꞉toemehala꞉, ebete la꞉tamo kikalamema꞉na꞉ta. Iyo, la꞉ ebeno hido komo nohowada꞉la꞉, la꞉le kumima꞉nemata, ba꞉gala gigiho nanakama꞉la꞉, ebete la꞉tamo ka꞉hiya꞉midama꞉ne.
MAT 7:8 Numa꞉la꞉, puya꞉te Godoko da꞉toemehonaka, iba꞉te ebegodone kolawema꞉na꞉, ba꞉gala puya꞉te ebeno hido komo dohowadinaka iba꞉te kumima꞉na꞉, ba꞉gala puya꞉te gigiho danakaminaka ebete iba꞉tamo ka꞉hiya꞉midama꞉ne.
MAT 7:9 La꞉ ipuwalo kebe dubu ebeno guduti ebe baa꞉ma꞉ da꞉toemehomene, huiyatiya ebetamo nakola ba꞉kikamemene?
MAT 7:10 Ba꞉gala amia꞉no guduti ama꞉ dahama꞉ da꞉toemehomena꞉, ama꞉ huiyatiya ebetamo bu kalu ba꞉kikameomena꞉?
MAT 7:11 Numa꞉la꞉, la꞉ hidohido tawakalubiha꞉ huiyatiya la꞉ iya꞉tawahala la꞉eno guguda꞉tamo hidohido baa꞉ ikalamema꞉, ba꞉bema꞉ la꞉eno Hunu Haboeno Nabiwiti atumu iya꞉tawanomola hidohido komo tawakaluba꞉tamo ikalamema꞉, puya꞉te ebe da꞉toemehonaka iba꞉tamo kikalamema꞉ne.
MAT 7:12 “Ba꞉bema꞉ tawakaluba꞉te la꞉tamo bada komo ododima꞉ la꞉le ubi dihatenakoma, la꞉ komopa꞉tamo ba꞉ ba꞉ba ka꞉na nododinakuya꞉la꞉, mabu Godote ebeno Tutumu Tabo Moseseko ipuwado tawakaluba꞉tamo dikalamiya꞉ ba꞉gala ebeno ukui hawakalimipa꞉te ebeno Bukamo da꞉miya꞉tiya꞉, ba꞉bi koko taboeno ipuwa kapiya ba꞉ ba꞉ma ka꞉nala, la꞉ komopa꞉tamo malemale komo na꞉hawakaliminakuya꞉la꞉.”
MAT 7:13 Ba꞉bene Ya꞉suti gala na꞉kagoiya꞉, “La꞉ tutuwa gigihodo na꞉pa꞉la꞉hala꞉, mabu Koe Habamo da꞉na꞉pa꞉la꞉hanaka ba꞉be gigiho konomola, gabo kodakodaha꞉. Tawakalubi hiliyonomate ba꞉bana na꞉pa꞉la꞉hate ba꞉be gabodo tolamena.
MAT 7:14 Huiyatiya Godokono Ka꞉ka꞉ Habamo da꞉na꞉pa꞉la꞉hanaka ba꞉be gigiho tutuwanomola, gabo kodakodala. Tawakalubi kapiyakapiyate ba꞉be gigiho numiti ba꞉bana tolamena.”
MAT 7:15 Ba꞉bene Ya꞉suti gala na꞉kagoiya꞉, “La꞉le Godokono mahilamo ha꞉da tabo olamagimipi hidamo nulama꞉la꞉. Iba꞉te gelebadihole sipi-goegoeno tama pupuliti la꞉tamo ba꞉bo pelamenaka, huiyatiya ibino tepo ipuwalo ibi helohelo gahagaha keba ka꞉nala꞉ka꞉ ba꞉ba ka꞉nala.
MAT 7:16 La꞉ ibino ododili komokomo hidamo nulamelelamiya꞉la꞉. Lumagiti hidohido gala꞉ipi gao olagoeno kehalo a꞉kanulama꞉mene, ba꞉gala ebete olagoeno kehamo tote anahu kehoeno gao a꞉kanetapihamene.
MAT 7:17 Numa꞉la꞉, hidohido kehalo hidohido gaote konolohoma꞉na꞉, ba꞉gala kuba kehalo ba꞉ kuba gaote konolohoma꞉na꞉.
MAT 7:18 Iyo, hido kehalo kuba gaote a꞉kanolohamena꞉, ba꞉gala kuba kehalo hidohido gaote a꞉kanolohamena꞉,
MAT 7:19 ba꞉bema꞉ hibila, hidohido gao nolohoha꞉ keha tawakaluba꞉te luhuti koa꞉mo kiya꞉hekema꞉na꞉.
MAT 7:20 Ba꞉bema꞉ la꞉ ha꞉da tabo olamagimipino ododili komokomo ba ulame la꞉le ibino noloho komamo ibino hibi komo ba꞉bo kiya꞉tawahama꞉nemata.
MAT 7:21 “Numa꞉la꞉, puya꞉te na Kodawama꞉ dito da꞉ka꞉naminaka huiyatiya hibi komo puliyala, ba꞉bi tawakaluba꞉te Godokono Hunu Habamo a꞉kana꞉pa꞉la꞉hamena꞉. Huiyatiya puya꞉te naeno Nabiwino ubi komamo da꞉papamila꞉halena, ibi kapiyate ebeno Hunu Habamo kona꞉pa꞉la꞉hama꞉na꞉.
MAT 7:22 Ba꞉bema꞉ Godokono Ko Hegelalo komopa꞉te natamo ba꞉ma ka꞉na koga꞉lama꞉na꞉, ‘Kodawa, Kodawa! Ale amia꞉no mahilamo Godokono tabo olamagiminakuima꞉, ba꞉gala amia꞉no mahilamo kuba gobogobo oelamenakuima꞉, ba꞉gala atumu ale komo hanohano komo ododilinakuima꞉.’
MAT 7:23 Huiyatiya nale iba꞉tamo kogoema꞉nemo, ‘Na iya꞉tawaha꞉ la꞉eno komo. La꞉ kuba ododilipilata, nagodone na꞉tolama꞉la꞉!’”
MAT 7:24 Ba꞉bene Ya꞉suti gala na꞉kagoiya꞉, “Kebe lumagiti naeno tabo ulihote ba꞉bi komokomo dododilimini, ebe hido mulu ukui lumagila. Ebete ebeno genama kodakoda haka hunamo detiya꞉, ba꞉be dubu keba ka꞉nala꞉ka꞉ ba꞉ba ka꞉nala.
MAT 7:25 Ba꞉ba tetelo wegolate duya꞉ beyate ba꞉bo odoluya꞉, ba꞉bene konomo gogote pete genama da꞉pemida꞉miya꞉ genamate kakaguya꞉ha꞉ mabu ebete hido hakamo etiya꞉.
MAT 7:26 Huiyatiya kebe lumagiti naeno tabo ulihote ododilihino, ebe ba꞉ daedae ukui lumagila. Ebete ebeno genama kulili hakamo detiya꞉ ba꞉be dubu huiyala.
MAT 7:27 Ba꞉ba tetelo wegolate duya꞉ beyate ba꞉bo odoluya꞉, ba꞉bene konomo gogote pete genama da꞉pemida꞉miya꞉ genamate kagate kubanomoma꞉ ba꞉bo ediya꞉. O olalati bada konomola꞉ka꞉!”
MAT 7:28 Ba꞉bene Ya꞉suti ba꞉moi komokomo olamagi da꞉wibuya꞉ ebeno tabo ulihopi hiliyonomate na꞉hanohanohutiya꞉,
MAT 7:29 mabu ebete Godokono heloamo iya꞉tulamitiya꞉, huiyatiya ebe ibino Godokono Tutumu iya꞉tulamepi huiyaha꞉.
MAT 8:1 Ba꞉ba tetelo Ya꞉suti haka hununi da꞉pihitiguya꞉ komo tawakalubi hiliyonomate ebe anataguma꞉talo ba꞉bo tolamiya꞉.
MAT 8:2 Ba꞉bene kuitikuita꞉goeno dubuti ebetamo pete ebeno pupamo pemedete na꞉pegoiya꞉, “Kodawa, amia꞉no ubi ditama꞉na, ama꞉le na kohiduinamema꞉na꞉ta.”
MAT 8:3 Ya꞉suti ebeno kokoto hogaminate ebe ba ologi ebetamo na꞉goiya꞉, “Na ubila, ama꞉ na꞉hida!” ba꞉bema꞉ ba꞉ba tetenomolo kuitikuiti temetemete ebegodone da꞉wibuya꞉ ebete ba꞉bo hiduya꞉.
MAT 8:4 Ba꞉bene Ya꞉suti ebetamo eta tabo ba꞉ma ka꞉na kagoiya꞉, “Ama꞉ naeno komoma꞉ tawakalubi akanikiyalama꞉la꞉. Wadiyala ama꞉ huiyatiya ba꞉moe tetenomolo tote amia꞉no ape Godotamo hawa꞉goeno ikamehodawatamo na꞉nemutuimiya꞉, ba꞉bene hawa꞉goeno malemale ilina Godotamo akona꞉nikamiya꞉, Mosesete dolamagiya꞉ ba꞉ba ka꞉na. Ba꞉be komote tawakalubi kiya꞉tulamema꞉ne amia꞉no temetemete a꞉wibui.”
MAT 8:5 Ba꞉bene Ya꞉suti Kapeniyama habamo da꞉tuya꞉ Lomanapino eta alaholohodawa gawadubuti ebetamo pete ebe petoemeholo na꞉pegoemiya꞉,
MAT 8:6 “Kodawa, naeno okodawa genamalo ko tawetawa꞉go watita, ebe ape kodakoda temetemete umita.”
MAT 8:7 Ba꞉bene Ya꞉suti ebetamo na꞉goiya꞉, “Wadiyala, na pete ebe kopihiduimima꞉nemo.”
MAT 8:8 Alaholohodawa gawadubuti tabo ba huiya na꞉goiya꞉, “Ao, Kodawa, eba ka꞉naha꞉. Na hido lumagiha꞉ ama꞉le naeno genamamo pa꞉pa꞉gama꞉. Huiyatiya na niya꞉tawutamo, ama꞉le genamamo peheno tabo dito da꞉goemena꞉, naeno okodawate hibinomolo kohidoma꞉ne.
MAT 8:9 Mabu na atumu alaholohopino koko gawadubuino hopodawama꞉ ba eda꞉na ibino tabamo a꞉papamiwatanakomo, ba꞉gala atu tetelo naeno alaholohopa꞉te naeno umi ipuwalo pola꞉na. Ibi ipuwalo nale eta da꞉kiyamemo, ‘Ama꞉ na꞉toa!’ ebete ba꞉bo kotoma꞉ne. Ba꞉gala eta da꞉kakiyamemo, ‘Ama꞉ na꞉pa꞉!’ ebete ba꞉bo kopema꞉ne. Atumu nale naeno huiyaha꞉ okodawa da꞉kiyamemo, ‘Ama꞉ ba꞉moe komo nododa꞉!’ ebete ba꞉be komo kododima꞉ne. Ba꞉bema꞉ Kodawa, wadiyala ama꞉ tabote na꞉gaa꞉ naeno okodawate kohidoma꞉.”
MAT 8:10 Ya꞉suti ba꞉be tabo duliya꞉ ebete na꞉la꞉wiya꞉, ba꞉bema꞉ ebe da꞉ta꞉matutiya꞉ ba꞉bi tawakaluba꞉tamo na꞉goiya꞉, “Na la꞉tamo hibinomolo goemo, na Isalaela tawakalubi hiliyonomo ipuwalo ba꞉mako lumagino hibima꞉ midi komo a꞉kuma꞉lemo!
MAT 8:11 Nale la꞉ begoelamemata, hiliyonomo tawakaluba꞉te ba꞉moe hopo konomoeno hapuhapuni pelameholete, iba꞉te A꞉ibalahamako, Aisa꞉keko, ba꞉gala Ya꞉ikoboko iba꞉go kapimilo Ko Gawadubu Godokono poko habalo kopepola꞉nama꞉na꞉.
MAT 8:12 Huiyatiya komo la꞉ Yu tawakalubi Godote la꞉ du ipuwamo kopiya꞉hekema꞉na꞉ta, ba꞉be du ipuwalo la꞉ lalo ba ikilame konomamo kihimima꞉nemata.”
MAT 8:13 Ba꞉bene Ya꞉suti alaholohodawa gawadubutamo na꞉goiya꞉, “Mabu ama꞉le na hibima꞉ a꞉midina꞉ta, ba꞉bema꞉ ama꞉ tote amia꞉no okodawa na꞉numiya꞉, ebete a꞉hido.” Ba꞉ hibila, ba꞉ba tetenomolo Ya꞉suti ba꞉be tabo ba goita okodawate ba꞉bo hiduya꞉.
MAT 8:14 Ba꞉ba tetelo Ya꞉suti Pitakono genama guamo nodolote ebeno moto kakidubu ba꞉bo numiya꞉, ebete ape koe tawetawa꞉go watitiya꞉.
MAT 8:15 Ba꞉bene Ya꞉suti ba꞉be kamenoeno kokoto dologimiya꞉, tawetawete ebegodone ba uluhuku ebete mahigate Ya꞉suku mabuma꞉ baa꞉ okalimi oko ba꞉bo tupuimiya꞉.
MAT 8:16 Ba gapogapohona habaluba꞉te hiliyonomo kuba gobogobagopi Ya꞉sutamo ba꞉bo magaheleniya꞉, ba꞉bene ebete tabo olamagi kapiyamo kuba gobogobo iba꞉godone ba oelamena komo temetema꞉gopi hiliyonomo atumu ba꞉bo kahiduilameniya꞉.
MAT 8:17 Ba꞉ hibila, Ya꞉suti ba꞉makomako hidohido komo tawakaluba꞉tamo ododilinakui, Godokono ukui hawakalimidawa Aisayate da꞉goiya꞉ ba꞉be tabote hibima꞉ keda꞉ma꞉, iyo, ba꞉be dawate ya꞉lo tetelo tabo ba꞉ma ka꞉na goiya꞉, “Ebete aeno temeteme ba꞉gala tawetawe kuwatea꞉mema꞉ne.”
MAT 8:18 Eta hegelalo komo tawakalubi hiliyonomate Ya꞉suku danataguma꞉diguya꞉, ebete ba꞉be komo umiti ebe ta꞉matapi na꞉goelamiya꞉, “A bobo hapuamo kona꞉hiwaliya꞉.”
MAT 8:19 Ba꞉ba tetelo Godokono Tutumu iya꞉tulamedawa etate pete ebetamo na꞉pegoiya꞉, “Iya꞉tulamedawa, ama꞉ kebamo da꞉tomena꞉, nale ama꞉ ba꞉bamo kota꞉matama꞉nemata.”
MAT 8:20 Huiyatiya Ya꞉suti ebeno tabo uliti na꞉goiya꞉, “Hiya꞉, ama꞉ dopamo ba꞉moe eta komo hidamo nemalagidola. Tumu gahagahoeno laha bahi haka gugu ba꞉pola꞉lama꞉na ba꞉gala holaholate ibino genama etemotehonaka, huiyatiya na Tawakalubino Naniwi naeno wata bahi puliyala.”
MAT 8:21 Ba꞉bene eta ta꞉matadawate na꞉goiya꞉, “Kodawa, wadiyala na dopamo tote, naeno kadele nabiwiti da꞉hoemene, nale ebe bobamo nihatete na galane ama꞉ kota꞉mahema꞉nemata.”
MAT 8:22 Ya꞉suti ebetamo na꞉huiyuya꞉, “Ao, ama꞉ ka꞉lonomo na na꞉ta꞉mahena꞉, huiyatiya wadiyala ha꞉laha tawakaluba꞉te ibi ha꞉kiya ibino ha꞉lahapi bobamo na꞉miya꞉ta꞉mena꞉.”
MAT 8:23 Ba꞉bene gapogapo tete ba tatalina Ya꞉suti boga꞉mo da꞉nihitiganiya꞉ ebe ta꞉matapa꞉te eba꞉go kapimilo nepalaganiya꞉.
MAT 8:24 Iba꞉te boga꞉mo ololonate da꞉tolameniya꞉ ba꞉ba tetelo ko gogonomote ba pena koko gawiyate mahila꞉halenate boge guamo beya ba꞉bo pehaminahaniya꞉, huiyatiya Ya꞉suti boge gulu u bewataniya꞉.
MAT 8:25 Ba꞉bema꞉ ta꞉matapa꞉te ebetamo pelamenate ebe ba pemodoetena ba꞉bo pega꞉lameniya꞉, “Kodawa, aeno ka꞉ka꞉ na꞉mula꞉lea꞉ma꞉! A ba꞉ koha꞉lahama꞉nema꞉!”
MAT 8:26 Ya꞉suti huiyatiya na꞉goeniya꞉, “La꞉ badama꞉ ka꞉toletolehonama? La꞉eno hibima꞉ midi komo hegehegenomola!” Ba꞉ba tetelo ebete mahiganate huhu ba꞉gala gawiya na꞉kiyahalameniya꞉, “La꞉ na꞉tatabahala꞉!” ba꞉bene bobote tatabanomoma꞉ ba꞉ dito eda꞉niya꞉.
MAT 8:27 Ba꞉ba tetelo ibi hiliyonomate ba hanohanohona na꞉ga꞉laniya꞉, “Moe kebako dubula꞉ka꞉? Huhu ba꞉gala gawiya iba꞉te ebeno tabo uliti a꞉papamila꞉!”
MAT 8:28 Ba꞉bene eta hegelalo Ya꞉suti bobo hapuamo na꞉hiwate Gadala haboeno hopamo nuluhukuti, hakamo ba nodolo kuba gobogobagoeno dubu netewapa꞉te eba꞉go ba꞉bo paluguya꞉. Ba꞉bi dubu netewapa꞉te ha꞉laha tawakalubino bobo habalo emedenama꞉ ba꞉gala ibi helohelonomola, ba꞉bema꞉ tawakaluba꞉te ba꞉be gabodo wapata꞉lame koamo toletolehonama꞉. Ba꞉ hibila, ba꞉be hopo tawakalubino komo ba꞉ma ka꞉nala, iba꞉te iya꞉ha꞉midale nakola haka ba aligili hiya꞉hiya꞉ bobo ba꞉bo ododilinakuya꞉ iba꞉te ibino ha꞉laha tawakalubi miya꞉tenoma꞉.
MAT 8:29 Ba꞉moi dubu netewapa꞉te Ya꞉suku dumiya꞉ ba꞉ba tetenomolo iba꞉te ga꞉ga꞉lo na꞉ga꞉luya꞉, “Ama꞉ Godokono Gudulata! Ama꞉ atamo bada komo na꞉kododiomena꞉? Godokono kuba huiya ikalame tete peheno, ama꞉ dopamo a alukuima꞉ ka꞉pa꞉wa?”
MAT 8:30 Ba꞉ba tetelo ibi tamelo dabihole goegoe hiliyonomate nala꞉go wapata꞉lamitiya꞉,
MAT 8:31 ba꞉bema꞉ kuba gobogobagopi dubate Ya꞉suku toemeholo na꞉ga꞉luya꞉, “Ama꞉ a ba꞉moi dubagodone oea꞉mema꞉ ubi dihatita, wadiyala ama꞉le a goegoa꞉tamo noea꞉ma꞉.”
MAT 8:32 Ya꞉suti iba꞉tamo na꞉goiya꞉, “Na꞉tolama꞉la꞉!” Ba꞉ba tetelo iba꞉te dubagodone ikuliti goegoa꞉tamo ba꞉bo nogomuya꞉, ba꞉bema꞉ ba꞉bi goegoa꞉te haka hununi pulila꞉hate iya꞉ha꞉midale hakane da꞉negudiya꞉, beyamo nululuhuliti ibi hiliyonomate ba꞉ dito neha꞉lahuya꞉.
MAT 8:33 Ba꞉ba tetelo Ya꞉suti kuba gobogobagopi keba ka꞉na ka꞉hiduilamiya꞉, goegoe ulamepi dubate ba꞉be komo umiti ibino habamo pulila꞉hate tawakalubi hiliyonomo ba꞉bo nikiyalamiya꞉.
MAT 8:34 Ba꞉bene habalubi hiliyonomate Ya꞉sutamo pelamete, iba꞉te ebe da꞉pumiya꞉ ebe na꞉pega꞉lamiya꞉ ebete ibino hopo miya꞉pate kotoma꞉.
MAT 9:1 Ba꞉bene Ya꞉suti boga꞉mo ololote bobo hapuamo na꞉hiwate ebeno emede haba Kapeniyamamo dito nuluhukuya꞉.
MAT 9:2 Ba꞉ba tetelo tawakaluba꞉te ape kodakoda temetema꞉goeno dubu talatalago agatuya꞉, ba꞉bene Ya꞉suti ibino hibima꞉ midi komo umilamete ebetamo na꞉goiya꞉, “Naeno mabulubi, ama꞉ na꞉kalakala! Godote amia꞉no kuba egebolemete adodoholema꞉ta.”
MAT 9:3 Huiyatiya komo Godokono Tutumu iya꞉tulamepa꞉te ba꞉be tabo uliti ibi ipuwalo tabo ba꞉ma ka꞉na ga꞉lutiya꞉, “Ba꞉moe dubuti awagalo kuba tabo begoe Godokono holoholo hapulu!”
MAT 9:4 Iba꞉te ibino tepo ipuwalo da꞉ga꞉luya꞉, Ya꞉suti iya꞉tawate iba꞉tamo na꞉goiya꞉, “Mabu keka꞉ la꞉eno tepo ipuwalo ba꞉moi kuba komo demalagidolitama?
MAT 9:5 Ba꞉moe tabo kodakodala꞉ka꞉ nale goema꞉, ‘Godote amia꞉no kuba egebolemete adodoholema꞉ta?’ O ba꞉moe eta tabo goema꞉ kodakodala꞉ka꞉, ‘Ama꞉ mahigate na꞉toa?’
MAT 9:6 Ba꞉bema꞉ nale la꞉ kiya꞉tulamema꞉nemata na Tawakalubino Naniwigodolo helo bitana ba꞉moe hopo konomolo tawakalubino kuba egebolelamete kadodoholelamema꞉.” Ba꞉bene Ya꞉suti temetema꞉goeno dubutamo na꞉goiya꞉, “Ama꞉ mahigate, tilo mokopa꞉midate genamamo na꞉toa.”
MAT 9:7 Ba꞉bema꞉ ba꞉be dubuti mahigate ebeno genamamo dito tuya꞉.
MAT 9:8 Ba꞉ hibila, tawakalubi hiliyonomate ba꞉be komo umiti ba hanohanohuta Godokono mahilo hunamo ba꞉bo adipatiya꞉, mabu ibino holoholo hapulu ebete Ya꞉suku ipuwado ebeno helo konomo a꞉hawakalimiya꞉.
MAT 9:9 Ya꞉suti ba꞉be genamane uluhukuti ba petonato eta dubu ba꞉bo numiya꞉, ebeno mahilo Ma꞉tiyutila, ebe ta꞉kese uwatedawala, ebete ebeno oko habalo lutiya꞉. Ba꞉ba tetelo Ya꞉suti ebetamo na꞉goiya꞉, “Ama꞉ na na꞉ta꞉mahena꞉,” ba꞉bene ebete mahigate Ya꞉suku na꞉ta꞉matuya꞉.
MAT 9:10 Ba꞉bene Ya꞉suti ebe ta꞉matapa꞉go Ma꞉tiyukunu genamalo baa꞉ ba nahuta, komo hiliyonomo ta꞉kese uwatepi ba꞉gala Godokono Tutumu Tabo uwateha꞉pi iba꞉te pelamete iba꞉go pepola꞉nuya꞉.
MAT 9:11 Ba꞉ba tetelo komo Pa꞉lisi kapiyuimipi dubate ba꞉be komo umiti ebe ta꞉matapa꞉tamo na꞉ga꞉luya꞉, “La꞉eno iya꞉tulamedawate ta꞉kese mani ha꞉da amiholo uwatepi ba꞉gala Godokono Tutumu Tabo uwateha꞉pa꞉go baa꞉ badama꞉ ka꞉nanako?”
MAT 9:12 Ya꞉suti ba꞉be tabo uliti na꞉goiya꞉, “Hidohido tawakaluba꞉te dogetatamo a꞉katolama꞉mena꞉, huiyatiya tawetawa꞉gopa꞉te kotolamema꞉na꞉.
MAT 9:13 Iyo, puya꞉te ha꞉kiya da꞉ga꞉lana, ‘A hidohido tawakalubila,’ na ba꞉bakobako tawakalubi uwatema꞉ kapiya꞉ha꞉. Na huiyatiya kubakuba tawakalubi kapiya uwatema꞉ piya꞉mo, iba꞉te na kota꞉mahenema꞉. Ba꞉bema꞉ wadiyala la꞉ ba꞉moe Godokono Buka taboeno ipuwa na꞉nohowada꞉la꞉, ‘La꞉ natamo hawa꞉goeno ilina dito akapikanama꞉la꞉, na ubihinola. Huiyatiya na ubila la꞉eno tepo ipuwalo malemale komo umi.’”
MAT 9:14 Ba꞉bene komo Yonekono ta꞉matapa꞉te Ya꞉sutamo pelamete ebe na꞉palatediya꞉, “Mabu keka꞉ a ba꞉gala Pa꞉lisi kapiyuimipi a hiliyonomate hiya꞉hiya꞉ tetelo baa꞉ nahaheno da꞉pola꞉nanakoma꞉ Godokono oko owatima꞉, huiyatiya ama꞉ ta꞉matapa꞉te baa꞉ nahaheno a꞉kapola꞉nala꞉?”
MAT 9:15 Ya꞉suti iba꞉tamo na꞉goiya꞉, “Dubuti kamena da꞉lawemene, ba꞉ba tetelo ebeno mabuluba꞉te poko habalo tepo menemena꞉go dito ba꞉ka꞉pola꞉namena꞉? Ao, wadiyaha꞉! Iba꞉te eba꞉go poko baa꞉ kapimilo konahama꞉na꞉. Huiyatiya kamena uli lawe dubuti ebeno kamena eta habamo magata tete ba꞉ na꞉pe, hibila, ba꞉ba tetelo ebeno mabuluba꞉te ibino tepo temeteme komoma꞉ baa꞉ nahaheno kopola꞉nama꞉na꞉. Ba꞉bema꞉ numa꞉la꞉, ka꞉lo ba꞉ la꞉eno kalakalago baa꞉ naha tetela mabu nale la꞉go bemedenamo.”
MAT 9:16 Ba꞉bene Ya꞉suti tabo moga꞉melo gala na꞉kagoiya꞉, “Lumagiti uli kaliko hapu pakala kalikoeno bolagala꞉mo a꞉kakohomehamene, mabu kaliko ukula tetelo ba꞉be uli kaliko haputi pakala kaliko kanagiya꞉midalema꞉ne, ba꞉bene bolagalete konomoma꞉ keda꞉ma꞉ne.
MAT 9:17 Ba꞉gala atu gabodo eta lumagiti pakala gautu-goe tama kalila꞉mo uli gao beya a꞉kahaminamene, mabu uli gao beyate pakala gautu-goe tama kalili ka꞉na꞉ta꞉pumima꞉ne, ba꞉bene gao beyate hakamo ka꞉ka꞉la꞉te gao beya ba꞉gala kalili ibi netewate kapiya tetelo kokubakubahama꞉na꞉. Ba꞉moe mabuma꞉ iya꞉tawadawate uli gao beya uliuli tama kalili kapiyamo na꞉haminahanakamene, gao beya ba꞉gala kalili iba꞉te tete ga꞉ga꞉lo hidamo kopola꞉nama꞉.”
MAT 9:18 Ya꞉suti ba꞉moe tabo iba꞉tamo ba olamagita, Yu watodawa dubuti ebetamo pete pupamo pemedete na꞉pegoiya꞉, “Naeno bohele ka꞉ma꞉nomo hoe, huiyatiya ama꞉ pete amia꞉no kokoto ebetamo da꞉pemowatilamemena꞉ ebete hoene gala kakamahigama꞉ne.”
MAT 9:19 Ba꞉bema꞉ Ya꞉suti mahigate ebe ta꞉matapa꞉go ba꞉be ko dubu ba꞉bo ta꞉matuya꞉.
MAT 9:20 Ba꞉ba tetelo eta kamena 12 gogo tetelo hawi ka꞉ka꞉la꞉ temetemete duminami, ebete Ya꞉sukunu gala hapuni pete ebeno kaliko ba꞉bo pologiya꞉,
MAT 9:21 mabu ebete nemalagidoluya꞉, “Nale ebeno kaliko dologimo, nale kohidoma꞉nemo.”
MAT 9:22 Ya꞉suti ohobigate ebe dumiya꞉ ebetamo na꞉goiya꞉, “Kamena, ama꞉ na꞉kalakala! Amia꞉no hibima꞉ midi komote ama꞉ a꞉hiduima꞉ta.” Ba꞉ba tetenomolo ba꞉be kamenoeno temetemete ba꞉bo wibomiya꞉.
MAT 9:23 Ba꞉bene Ya꞉suti Yu watodawa dubuino genamamo pete hoe bohele la꞉mema꞉ pa꞉lola꞉ da꞉moleholitiya꞉ ba꞉bi dubu ba꞉gala tawakalubi hiliyonomo ba꞉bo pulamiya꞉, iba꞉te howele konomago pola꞉nuya꞉.
MAT 9:24 Ba꞉bema꞉ ebete ibi na꞉goelamiya꞉, “La꞉ hiliyonomo genama guni nikula꞉la꞉. Bohele deha꞉poto kahaa꞉kaha꞉, ebete u bewatita.” Huiyatiya ibi hiliyonomate ebe na꞉walitiya꞉.
MAT 9:25 Ba꞉ba tetelo Ya꞉suti tawakalubi genamane poelamete bohelete da꞉kapitanuya꞉ ba꞉be habamo na꞉pa꞉gate ebeno kokoto da꞉nelawemiya꞉ ebete ba꞉bo mahiguya꞉.
MAT 9:26 Ba꞉bene ba꞉be hanohano komoeno tabote ba꞉be hopo konomamo ba꞉ dito tuya꞉.
MAT 9:27 Ya꞉suti ba꞉be haba miya꞉pate ba tonato, baidi tamiholame dubu netewapa꞉te ebe ba ta꞉matanato ibulunomamo ba꞉bo nega꞉lapatiya꞉, “Da꞉ibidikono Hogo! Ama꞉ a na꞉malemalea꞉tea꞉!”
MAT 9:28 Ba꞉bene Ya꞉suti eta genama guamo nodolote ba꞉bi baidi tamiholame dubate atu genamamo da꞉kanodoluya꞉ Ya꞉suti ibi nalateda꞉liya꞉, “La꞉ hibima꞉ na꞉ka꞉midiutama, nagodolo helo bitana la꞉ kohiduilamema꞉?” Iba꞉te tabo ba huiya na꞉ga꞉luya꞉, “Iyo, Kodawa, ama꞉godolo helo bitana.”
MAT 9:29 Ba꞉ba tetelo Ya꞉suti ibino baida꞉mo ebeno kokoto ba emowatilame iba꞉tamo na꞉goiya꞉, “Mabu la꞉le na hibima꞉ a꞉midinimata, ba꞉be mabuma꞉ nale la꞉eno baidi kohiduilamema꞉nemo.”
MAT 9:30 Ba꞉bene ibino baiditi da꞉hidohidoholamiya꞉, Ya꞉suti ibi koamo kiyahalamelo iba꞉tamo na꞉goiya꞉, “La꞉ ba꞉moe komoma꞉ komo tawakalubi akakiyalama꞉la꞉!”
MAT 9:31 huiyatiya iba꞉te tote ba꞉be hopo konomamo Ya꞉sukunu komo ba꞉bo nikiyahuya꞉.
MAT 9:32 Ba꞉bene ba꞉bi dubu netewapa꞉te ba tuta komo tawakaluba꞉te eta dubu Ya꞉sutamo ba꞉bo magatuya꞉, mabu ebe tabo olamagiha꞉ kuba gobogobagoenola.
MAT 9:33 Ba꞉ba tetelo Ya꞉suti ebegodone kuba gobogobo doemiya꞉ ebete tabo olamagi ba꞉bo tupuimiya꞉, ba꞉bema꞉ hiliyonomo tawakaluba꞉te ba꞉moe komo umiti hanohanoholo na꞉ga꞉luya꞉, “A Isalaela hopolo ba꞉mako komo kuminakuiha꞉!”
MAT 9:34 huiyatiya Pa꞉lisi kapiyuimipa꞉te na꞉ga꞉luya꞉, “Ebete kuba gobogoboeno Kodawoeno heloamo oelamenako, Godokono heloamoha꞉!”
MAT 9:35 Ya꞉suti Yunapino koko ba꞉gala hegehege habahabado da꞉petonakui, ba꞉ba tetelo ebete ibino hiya꞉hiya꞉ baidi ibubulamehole genamalo ibi ba iya꞉tulame ebete Godokono Ko Gawadubu komoeno Hido Tabo iba꞉tamo ba꞉bo olamaginakui, ba꞉gala ebete ibino hiya꞉hiya꞉ temetema꞉gopi akahiduilamenakui.
MAT 9:36 Ba꞉bene eta hegelalo ebete hiliyonomo tawakalubi ulamete ebeno tepo ipuwalo konomamo malemalelatelitiya꞉, mabu iba꞉te ukui bilibilima꞉ ba꞉gala heloha꞉ma꞉ eda꞉hutiya꞉, sipi-goegoa꞉te ulamedawaheno keba ka꞉na kemedena ba꞉ba ka꞉na.
MAT 9:37 Ba꞉bene Ya꞉suti ebe ta꞉matapa꞉tamo na꞉goiya꞉, “Godokono pali ipuwalo kona hiliyonomo ba꞉ a꞉kodakodahui, huiyatiya wakalami okopi hiliyoha꞉,
MAT 9:38 ba꞉bema꞉ la꞉ pali namutudawatamo toetoe tabo na꞉ga꞉lala꞉, ebete komo okopi pali ipuwamo kopoelamema꞉ne hidohido kona nahoeno kopewakalamiholema꞉.”
MAT 10:1 Ba꞉ba tetelo Ya꞉suti ebeno 12 ta꞉matapi dubu ebetamo ka꞉lamiti iba꞉tamo helo ba꞉bo ikalamiya꞉, iba꞉te tawakaluba꞉godone kuba gobogobo konoelamema꞉ ba꞉gala hiya꞉hiya꞉ temetema꞉gopi konihiduilamema꞉.
MAT 10:2 Ba꞉moi ba꞉ Ya꞉sukunu 12 oelamepi dubuino mahilola. Dopo dubu ba꞉ Saimonotela, ebeno eta mahilo Pitate, ba꞉gala ebeno ekawi A꞉ndulutila. Sebedikono gugudi Ya꞉imesiko ba꞉gala ebeno ekawi Yoneko.
MAT 10:3 Pilipiko, Batolomuku, Tomasiko, ba꞉gala Ma꞉tiyuku, ebe ta꞉kese uwatedawala. A꞉lapiyasikono gudu Ya꞉imesiko, Ta꞉diyasiko,
MAT 10:4 ba꞉gala Saimonoko. Ba꞉moe eta Saimonoko ubila kapela Loma gabomani tawakaluba꞉go ba alaholo iba꞉te ebeno Ka꞉inane hopo ba꞉bo komiya꞉pama꞉. Ba꞉gala kuititidawa ba꞉ Keliyotanapi Yudasitila, ebete galane tetelo Ya꞉suku anakapumipi bowalubiliya꞉.
MAT 10:5 Ya꞉suti ba꞉moi 12 dubu ba oelame ibi na꞉goelamiya꞉, “La꞉ Yuha꞉pa꞉tamo akatolama꞉la꞉, ba꞉gala Samaliya hoponapa꞉tamo akanikula꞉la꞉.
MAT 10:6 Huiyatiya la꞉ Isalaela hopolo demedehona ba꞉bi Yu tawakalubi kapiyatamo na꞉tolamiya꞉la꞉, iba꞉te tumamo dalatidiholiya꞉ ba꞉bi sipi-goegoe keba ka꞉nala꞉ka꞉ ba꞉ba ka꞉na bemedena.
MAT 10:7 Ba꞉bene la꞉ ba tolame ba꞉moe tabo kapiyate nolamagiminatuya꞉la꞉, ‘Godokono Ko Gawadubuma꞉ eda꞉ tete tatalila.’
MAT 10:8 Ba꞉gala la꞉ ba꞉bolo tawetawete dulamena ba꞉bi tawakalubi na꞉nihiduilamenakuya꞉la꞉, kuitikuita꞉gopi ibi atumu. Ba꞉be atu tetelo ha꞉lahapi hoe ipuwane na꞉wadiya꞉paa꞉latelenakuya꞉la꞉ ba꞉gala kuba gobogobo tawakaluba꞉godone noelamenakuya꞉la꞉. “Ba꞉ hibila, hiliyonomo tetelo Godote ebeno hidohido komo la꞉tamo malemalelo dito ikalamenakata, ba꞉bema꞉ wadiyala la꞉ komopi atu malemale komago nowalubilinakuya꞉la꞉.
MAT 10:9 Ba꞉bema꞉ la꞉ ba tolame koko mani kuiha ipuwamo akamiya꞉ta꞉la꞉, ba꞉gala hegehege mani atumu akawatala꞉.
MAT 10:10 Gabo tetelo la꞉ kapiyakapiya ilina na꞉pupuliya꞉la꞉, komo akuwata꞉la꞉. Ba꞉gala la꞉ ilina miya꞉teno hika, nato ilina, ba꞉gala kuku atumu akuwata꞉la꞉, mabu habaluba꞉te hido okodawoeno modoboha꞉ komokomo ba꞉bolo na꞉modobuilamelemenakamena꞉.
MAT 10:11 “La꞉ eta habamo nikuliti hido emede lumagi nohowaditi da꞉numima, ebeno genamamo nalehawaminate ebegodolo nemeda꞉tepate galane ebeno genamane eta hopamo kakatolamema꞉nemata, iyo, la꞉ eta genamane eta genamamo eba ka꞉na akanewagela꞉la꞉.
MAT 10:12 Ba꞉gala la꞉ kebe genamamo da꞉nalehawaminama, wadiyala la꞉ ba꞉be genamanapa꞉tamo nolata tabo ba꞉ma ka꞉na na꞉nega꞉luya꞉la꞉, ‘Godokono kalakalate la꞉godolo nitanamene.’
MAT 10:13 Ba꞉bema꞉ ba꞉be genamanapa꞉te la꞉ kalakalago uwatete la꞉eno tabo dulimina꞉, Godokono kalakalate iba꞉godolo hibilo kitanama꞉ne, huiyatiya iba꞉te la꞉ uwateheno, la꞉ nolata tabo da꞉ga꞉lama ba꞉be taboeno hibi komote ba꞉bolo a꞉kitanamene.
MAT 10:14 Ba꞉bene kebe tawakaluba꞉te la꞉ kalakalago uwateheno, la꞉ ba꞉be genamane o habane ba tolame la꞉eno natoeno puhulu na꞉moda꞉midatepaliya꞉la꞉. Ba꞉moe komote ibi kiya꞉tulamema꞉ne, Godokono tete ba꞉ na꞉pe ebete ibino komo kopanagilamelelamema꞉ne.
MAT 10:15 Na la꞉tamo hibi tabo begoemo, Godote tawakalubino komo danagilamelelamemene, ba꞉be Ko Hegelalo ebete ba꞉moi habaluba꞉tamo kuba huiya konomo kikalamema꞉ne. Ba꞉ba tetelo ebete Sodomo ba꞉gala Gomola habaluba꞉tamo kuba huiya ba ikalame malemale nanekela꞉mo kohawakalimima꞉ne, huiyatiya hibila, ebete malemale a꞉kihata꞉mene la꞉ uwateha꞉pa꞉tamo.”
MAT 10:16 Ba꞉bene Ya꞉suti gala na꞉kagoiya꞉, “La꞉ nulia꞉la꞉! La꞉ sipi-goegoe keba ka꞉nala꞉ka꞉ ba꞉ba ka꞉nala, nale la꞉ helohelo gahagahoeno kapiyuimi ipuwamo oelamemata. Ba꞉bema꞉ puya꞉te la꞉go alaholohopima꞉ deda꞉hana, la꞉le iba꞉go ba nepola꞉na wadiyala la꞉ mulunomo ukuia꞉go nemalagidoleniya꞉la꞉, ba꞉gala atu tetelo tatabanomoma꞉ ba eda꞉ha temeteme eta lumagitamo akikamenakala꞉.
MAT 10:17 La꞉ hidamo, mabu kubapa꞉te la꞉ heloamo uwatete tabo anagiya꞉mida habamo komagatalema꞉na꞉ta, ba꞉gala Yunapino baidi ibubulamehole genama gulu iba꞉te la꞉ giya꞉pa꞉pa꞉mo ka꞉na꞉miga꞉latilima꞉na꞉ta.
MAT 10:18 Iba꞉te la꞉ na mabuma꞉ hiya꞉hiya꞉ koko gawadubuino holoholo hapuamo heloago da꞉magatalemena꞉, ba꞉ba tetelo la꞉ naeno Hido Tabo iba꞉tamo ba꞉gala Yuha꞉pa꞉tamo kolamagimima꞉nemata.
MAT 10:19 Ba꞉gala iba꞉te la꞉ tabo anagiya꞉mida habamo da꞉magatalemena꞉, ba꞉ba tetelo la꞉eno ga꞉la komoma꞉ aka-ukuibilibilihala꞉, ba꞉ma ka꞉na, ‘Na bada tabo na꞉ka꞉goemo? Ba꞉gala na tabo keba ka꞉na na꞉kolamagimo?’ Tete da꞉pemene Godote ebeno tabo komokomamo la꞉ kowalubilima꞉na꞉ta,
MAT 10:20 mabu la꞉ ha꞉kiya a꞉kolamagima꞉mata, la꞉eno Nabiwi Godokono Gobogobote la꞉ ipuwado kolamagima꞉ne.
MAT 10:21 “Ba꞉ba tetelo naniwiti ekawi hoea꞉mo koemema꞉ne, ba꞉gala atu gabodo ekawiti naniwi kanakapumima꞉ne. Iyo, dubuti ebeno gudu ba꞉ atumu kakamitima꞉ne, ba꞉gala guguda꞉te maubahalete ibino menokobi nabi hoea꞉mo koelamema꞉na꞉.
MAT 10:22 Ba꞉bene na mabuma꞉ tawakalubi hiliyonomate la꞉tamo komaubahalema꞉na꞉, huiyatiya kebe lumagiti temeteme ipuwalo kodakodalo utiti kuitita꞉mo da꞉nuluhukumini, Godote ebeno ka꞉ka꞉ komula꞉mema꞉ne.
MAT 10:23 Ba꞉bema꞉ iba꞉te la꞉tamo temeteme dikalamemena꞉, ba꞉ba tetelo la꞉ huiyatiya eta habamo nalahutihuya꞉la꞉. Na la꞉tamo hibi tabo begoemo, la꞉ Isalaela hopoeno haba hiliyonomolo oko ba nowatiho ba꞉bi oko upula꞉leheno Tawakalubino Naniwiti ba꞉bo kopuluhukuma꞉ne.
MAT 10:24 “Numa꞉la꞉, tawakalubino umi ipuwalo sikulu guduino iya꞉tawa komote ebeno iya꞉tulamedawoeno iya꞉tawa kagogolonaha꞉, ba꞉gala okodawoeno helote ebeno oko namutudawoeno helo a꞉kagogolale.
MAT 10:25 Ba꞉bema꞉ wadiyala sikulu guduti ebeno iya꞉tawa ipuwalo ebeno iya꞉tulamedawa keba ka꞉nala꞉ka꞉ ba꞉bakoma꞉ na꞉keda꞉mene, ba꞉gala okodawate ebeno oko ipuwalo ebeno namutudawa keba ka꞉nala꞉ka꞉ ba꞉bakoma꞉ na꞉keda꞉mene. La꞉ nulia꞉la꞉! Iba꞉te na genama namutudawa kuba gobogobo Biyesibulu mahilamo a꞉ka꞉namiya꞉, ba꞉bema꞉ galane iba꞉te atumu la꞉ naeno ekaki kuba mahilamo koka꞉lamima꞉na꞉ta!”
MAT 10:26 Ba꞉bene Ya꞉suti gala na꞉kagoiya꞉, “Ba꞉bema꞉ ba꞉bi helohelo dubu akatolelama꞉la꞉. Kebe ihilatehole komate da꞉pola꞉na galane tetelo Godote kohawakalilamema꞉ne, ba꞉gala awalelahale komate da꞉pola꞉na galane tawakaluba꞉te kulameholema꞉na꞉.
MAT 10:27 Ba꞉bema꞉ nale du tetelo la꞉ da꞉kiyalamenakoma, la꞉le huiyatiya alo tetelo nolamagiminakuya꞉la꞉, ba꞉gala la꞉ nagodone ganalo dulihonakoma, ba꞉bi komokomoma꞉ la꞉eno tabo madodo ba adipate tawakalubi hiliyonomatamo na꞉hawakalilamenakuya꞉la꞉.
MAT 10:28 La꞉ ape anakapulame iya꞉tawahapi akatolelama꞉la꞉. Iba꞉godolo helo puliyala tawakalubino gobogobo anakapulamete Koe Habamo iya꞉hekema꞉. Huiyatiya la꞉ Godoko kapiya na꞉tolemenala꞉, mabu ebegodolo helo bitana tawakalubino ape ba꞉gala gobogobo Koe Habamo kapimilo iya꞉hekema꞉.
MAT 10:29 Numa꞉la꞉, tawakaluba꞉te netewa de holahola kapiya toea mana꞉mo uwatema꞉ ga꞉lanaka, ba꞉bi holaholoeno ka꞉ka꞉ kokoha꞉, huiyatiya la꞉eno Nabiwi Godote ba꞉bako hegehege holahola ba emalagidolena, ebete modobo tabo goeheno ibi ipuwalo eta kapiyate a꞉kahaa꞉mene.
MAT 10:30 Ba꞉gala hibila, la꞉eno watoeno hinibo hiliyonomo Godote ya꞉lo tetelo a꞉ka꞉lamiholiya꞉, iyo, la꞉eno hiya꞉hiya꞉ komo ebete iya꞉tawanomola.
MAT 10:31 Ba꞉bema꞉ la꞉ ukui bilibilima꞉ akeda꞉hala꞉. Ebeno malemale holaholatamo hibilo bitana, huiyatiya ebeno malemale la꞉tamo konomoma꞉ eda꞉te emedena tetelo bitanamene!”
MAT 10:32 Ba꞉bene Ya꞉suti gala na꞉kagoiya꞉, “Kebe lumagiti hawakala da꞉goemene, ‘Na Ya꞉suku ta꞉matadawala,’ na ba꞉ atumu Nabiwi Godokono holoholo hapulu kogoema꞉nemo, ‘Ba꞉moe lumagi ba꞉ naeno ekawila.’
MAT 10:33 Huiyatiya kebe lumagiti na iya꞉tawaha꞉ma꞉ da꞉goemene, na ba꞉ atumu Godotamo ebe iya꞉tawaha꞉ma꞉ kakagoema꞉nemo.”
MAT 10:34 Ba꞉bene Ya꞉suti gala na꞉kagoiya꞉, “La꞉ na꞉kemalagidolutama nale ba꞉moe hopamo gelebadi adahema꞉ pe? Ao, na tawakaluba꞉tamo gelebadi ikalamema꞉ kapiya꞉ha꞉, na alaholo gili ikalamema꞉ piya꞉mo.
MAT 10:35 Numa꞉la꞉, naeno tabo komokomoma꞉ anagiya꞉mida komote tawakalubi ipuwalo kuluhukuma꞉ne. Ba꞉ ba꞉ma ka꞉na anagiya꞉mida komote dubu ba꞉gala ebeno nabiwi ibi ipuwalo kitanama꞉ne, ba꞉gala bohele ebeno menokago ibi ipuwalo kitanama꞉ne, ba꞉gala kamena ebeno awino menokago ibi ipuwalo kitanama꞉ne. Iyo, na anagiya꞉mida komo tawakaluba꞉tamo ikalamema꞉ piya꞉mo,
MAT 10:36 ba꞉bema꞉ hibila, na mabuma꞉ dubuino genamanapa꞉te eba꞉go kalaholohoma꞉na꞉.
MAT 10:37 “Ba꞉bema꞉ kebe lumagiti ebeno nabiwi ba꞉gala menoko konomamo ba emalagidole na nanekela꞉mo demalagidolonena, ba꞉be lumagiti naeno oko owatima꞉ a꞉kamodobamene. Ba꞉gala kebe lumagiti ebeno gugudi konomamo ba emalagidolena na nanekela꞉mo demalagidolonena, ba꞉be lumagiti naeno oko owatima꞉ a꞉kamodobamene.
MAT 10:38 Ba꞉gala kebe lumagiti ebeno keha pihiga aguti na ta꞉maheneheno, ebete atumu naeno oko owatima꞉ a꞉kamodobamene.
MAT 10:39 Ba꞉bema꞉ kebe lumagiti ebeno kateneno ubi gabodo ba to ebeno ka꞉ka꞉ natamo damawada꞉mene, ebeno ka꞉ka꞉te kalatidima꞉ne, huiyatiya kebe lumagiti ebeno ka꞉ka꞉ na mabuma꞉ datutimini, ebete hibi ka꞉ka꞉ kolawema꞉ne.”
MAT 10:40 Ba꞉bene Ya꞉suti gala na꞉kagoiya꞉, “Kebe lumagiti ama꞉ kalakalago dowalubina ebete na bowalubinina, ba꞉gala kebe lumagiti na dowalubinina ebete na kapiya kowalubininaha꞉, ebete na Oenamedawa Godoko atumu na꞉ka-owalubina.
MAT 10:41 Ba꞉bema꞉ kebe lumagiti Godokono ukui hawakalimidawa kalakalago dowalubina ebete galane Godogodone ebeno ukui hawakalimidawoeno huiya konelawema꞉ne, ba꞉gala kebe lumagiti tuputupudawa kalakalago dowalubina ebete ba꞉ atumu tuputupudawoeno huiya konelawema꞉ne.
MAT 10:42 Na la꞉tamo hibi tabo begoemo, ba꞉moi hegehegepi ipuwalo kebe lumagiti na ta꞉mahenedawama꞉ deda꞉na, ba꞉be mabuma꞉ etate gibagiba beya ebetamo dikamemene, ebete Godogodone da꞉lawemene ba꞉be hido huiyate a꞉kalatida꞉mene.”
MAT 11:1 Ba꞉bene Ya꞉suti ebeno 12 ta꞉matapi iya꞉tulame da꞉wibuya꞉, ebete ba꞉be haba miya꞉pate Yu tawakalubino komo habahabalo ibi iya꞉tulama꞉go ba to Godokono tabo ba꞉bo kiyahanatuya꞉.
MAT 11:2 Ba꞉ba tetelo Yoneko tawakalubi beyamo wadulateledawate du genamalo ba emedena, Kelisote hidohido komo dododilinami ebete ba꞉bi komo ulihote ebe ta꞉matapi ebetamo ba꞉bo oelamiya꞉.
MAT 11:3 Ba꞉bene ibi netewapa꞉te Ya꞉sutamo da꞉puluhukuya꞉ iba꞉te ebe ba꞉ma ka꞉na pega꞉lamiya꞉, “Ama꞉ ba꞉ Yonete pema꞉ da꞉goi ba꞉be lumagila꞉ka꞉, o ale eta lumagi beka꞉latiminama꞉?”
MAT 11:4 Ba꞉bene Ya꞉suti huiya tabo iba꞉tamo na꞉goiya꞉, “La꞉ tote la꞉le kebe tabo kulihutama ba꞉gala kebe komo kulamiutama, ba꞉bi komokomo Yoneko na꞉nega꞉lama꞉la꞉.
MAT 11:5 Baidi tamihopa꞉te a꞉la꞉minahala꞉ ba꞉gala nato a꞉ta꞉buta꞉midalelamepa꞉te ba꞉ na꞉wapata꞉lama꞉! Kuitikuita꞉gopa꞉te a꞉hidohidoha ba꞉gala galo duhulamepa꞉te ba꞉ nuliha! Ha꞉lahapa꞉te hoene gala a꞉kamahila꞉hala꞉ ba꞉gala awae tawakaluba꞉tamo Godokono Hido Tabote a꞉pe!
MAT 11:6 Ba꞉bema꞉ kebe lumagiti na hibima꞉ ba midini ukui netewama꞉ eda꞉heno, ebegodolo Godokono kalakala komote bitanamene!”
MAT 11:7 Ba꞉bene Yonete da꞉poelamiya꞉ ba꞉bi dubate ba to, Ya꞉suti Yonekono komoma꞉ tawakaluba꞉tamo ba꞉bo olamagiya꞉. Ebete na꞉goiya꞉, “La꞉ Yonekono komo ulihote dito hopamo da꞉nikulima, bada komo umima꞉ ka꞉tolamiuima? Pudu kapiya huhuti dito dagegetiti, ba꞉be umima꞉ ka꞉tolamiuima?
MAT 11:8 O la꞉ hidohido kaliko pupuli dubu umima꞉ ka꞉tolamiuima? Ao, la꞉ iya꞉tawahala hidohido kaliko pupulihopa꞉te dito hopolo kemedehonaha꞉, huiyatiya iba꞉te koko gawadubuino genamalo ibino kateneno ubilo emedehona!
MAT 11:9 Ba꞉bema꞉ la꞉ na niya꞉tunama꞉la꞉, la꞉ badama꞉ ka꞉tolamiuima? Godokono ukui hawakalimidawa umima꞉la꞉ka꞉? Iyo, na la꞉tamo hibi tabo begoemo, Yonete Godokono ukui hawakalimipi hiliyonomo a꞉gogoli.
MAT 11:10 Ba꞉ hibila, Yoneko mabuma꞉ Godote ebeno Bukalo tabo ba꞉ma ka꞉na goiya꞉, ‘Nale Kelisokono dopo hapuamo naeno tabo atadawa kopoemema꞉nemo, ebete ebe dopamete ebeno gabo kohiduimima꞉.’”
MAT 11:11 Ya꞉suti gala na꞉kagoiya꞉, “Nale la꞉tamo hibi tabo begoemo, tupuimi mabuni ba꞉ma teta꞉mo puluhuku ba꞉moe hopo konomolo da꞉hawakalahaliya꞉, ba꞉bi tawakalubi hiliyonomo ipuwalo Yoneko kodawanomoma꞉ eda꞉na. Huiyatiya ba꞉ma tetene tupuimiti Godote Ko Gawadubuma꞉ deda꞉na, ba꞉be habalo kebe lumagiti deha꞉potonomoma꞉ deda꞉mene ebete Yoneko hibilo kogogoloma꞉ne.
MAT 11:12 Ba꞉moe ba꞉ eta komola. Yoneko tetene tupuimiti ba꞉ma teta꞉mo puluhuku, helohelo dubate ubila Godokono Hido Haba ibi ha꞉kiya ibino heloamo lawete ba꞉bamo kona꞉pa꞉la꞉hama꞉, huiyatiya iba꞉te a꞉kamodobamena꞉.
MAT 11:13 La꞉ nulia꞉la꞉. Godokono ukui hawakalimipa꞉te ebeno Bukamo da꞉miya꞉tiya꞉ ba꞉gala ebete ebeno Tutumu Tabo Moseseko ipuwado tawakaluba꞉tamo dikalamiya꞉, ba꞉be hido taboeno komote ya꞉lo tetelo uluhukuti, penatete Yoneko teta꞉mo ba꞉bo puluhukui.
MAT 11:14 Ba꞉ hibila, Godote dopamo tabo ba꞉ma ka꞉na olamagiya꞉, ebeno ukui hawakalimidawa Elayako kopema꞉ne, iyo, Yoneko ba꞉moe ba꞉be lumagila, ba꞉bema꞉ wadiyala la꞉ ba꞉moe komo hibima꞉ na꞉mida꞉la꞉.
MAT 11:15 Galagodawa, ama꞉ hidamo nulia꞉!”
MAT 11:16 Ba꞉bene Ya꞉suti na꞉goiya꞉, “Na ba꞉ma tete tawakalubino komo kebe go tabamo na꞉ka꞉hawakalimimo? Ibi ba꞉ kolowami habalo diya꞉da꞉mita ba꞉bi gugudi hegehege huiyala. Komo guguda꞉te komopa꞉tamo kaga꞉la, komopa꞉te komopa꞉tamo kaga꞉la, iba꞉te olowabeletihuilo ba꞉ma ka꞉na ewagelena,
MAT 11:17 ‘Ale poko ba ododi pa꞉lola꞉ da꞉moleholema꞉ huiyatiya la꞉ ago kamoeha꞉, ba꞉gala a hoe lumagi bobamo ihatema꞉ dewagelitama꞉ huiyatiya la꞉ ebe kala꞉mitaha꞉!’ Iyo, ba꞉ma tete tawakalubi ba꞉ ba꞉ba ka꞉na ewagelena, iba꞉te Godokono okopa꞉tamo ubiha꞉ tabo bega꞉lanaka.
MAT 11:18 Numa꞉la꞉, Yonete da꞉puluhukui ba꞉ba tetelo ebete helo gao beya kaninakuiha꞉ ba꞉gala komo tetelo ebete baa꞉ naheno lutanakui Godokono oko kowatima꞉, ba꞉bema꞉ tawakaluba꞉te na꞉ga꞉luya꞉, ‘Ebe kuba gobogobagoenola!’
MAT 11:19 Huiyatiya Tawakalubino Naniwiti da꞉puluhukui, ebeno komo hiya꞉la. Ebete baa꞉ a꞉nanako ba꞉gala helo gao beya a꞉ninako, ba꞉bema꞉ iba꞉te ba꞉ma ka꞉na ga꞉lanaka, ‘Ebeno kuba numa꞉la꞉! Ebe tumu goema꞉ eda꞉te baa꞉ konomamo nanako, ebe helo gao beya ni kodawala! Ebe ta꞉kese mani ha꞉da amiholo uwatepi ba꞉gala komo Godokono Tutumu Tabo uwateha꞉pi ibino mabulubila!’” Ba꞉bene kuititinomolo Ya꞉suti iba꞉tamo na꞉goiya꞉, “Godokono hido mulu komo da꞉ta꞉matana, ba꞉bi tawakaluba꞉te ibino ododili ipuwalo ba꞉be mulu hibinomolo ba꞉hawakaliminakomena꞉.”
MAT 11:20 Ya꞉suti kebe habahabalo hanohano komo hiliyonomo dododilinakui, ba꞉bi haba tawakaluba꞉te ibino kuba ukui hiya꞉ma꞉ midiliti Godotamo kohobiliya꞉ha꞉. Ba꞉be mabuma꞉ Ya꞉suti ibi koamo ba꞉ma ka꞉na kiyahalamiya꞉,
MAT 11:21 “Kolasini haba, ama꞉ kuba huiya konomo kolawema꞉na꞉ta! Betasaida haba, ama꞉ ba꞉ atumu! Mabu nale la꞉godolo hanohano komo dododilimo, nale ba꞉bakobako oko Taya habalo ba꞉gala Saidono habalo dopamo nododiliya꞉tale, ba꞉bi Yuha꞉ tawakaluba꞉te ibino kubakuba ukui hiya꞉ma꞉ ba꞉midiliya꞉na꞉. Iyo, iba꞉te ibino kuba ododili mabuma꞉ tepo temetemema꞉ eda꞉hate ba꞉be temeteme kohawakalimima꞉ kubakuba kaliko pupuliti hoeno puhulamo dito ba꞉gagahidiya꞉na꞉.
MAT 11:22 Ba꞉bema꞉ na la꞉tamo na꞉goemo, Godote tawakalubino komo danagilamelelamemene, ba꞉be Ko Hegelalo ebete Taya habanapa꞉tamo ba꞉gala Saidono habanapa꞉tamo kuba huiya ba ikalame malemale nanekela꞉mo kohawakalimima꞉ne, huiyatiya hibila, Kolasini haba ba꞉gala Betasaida haba, ebete la꞉tamo malemale a꞉kihata꞉mene!
MAT 11:23 Ba꞉gala Kapeniyama haba, amia꞉no komo ba꞉ma ka꞉nala. Ama꞉ ubila ama꞉ ha꞉kiya ama꞉ Godokono Hunu Habamo kadipatema꞉, huiyatiya Godote ama꞉ Koe Habamo ka꞉da꞉nama꞉na꞉ta! Mabu nale ama꞉godolo hanohano komo dododilimo, nale ba꞉bakobako oko Sodomo habalo nododiliya꞉tale, ba꞉bi Yuha꞉ tawakaluba꞉te ibino kubane ohobila꞉hate Godote ibi ba꞉kanakapulamiya꞉na꞉.
MAT 11:24 Ba꞉bema꞉ na ama꞉tamo na꞉goemo, Godote tawakalubino komo danagilamelelamemene, ba꞉be Ko Hegelalo ebete Sodomo habaluba꞉tamo kuba huiya ba ikalame malemale nanekela꞉mo kohawakalimima꞉ne, huiyatiya Kapeniyama haba, ebete ama꞉tamo malemale a꞉kihata꞉mene!”
MAT 11:25 Ba꞉ba tetelo Ya꞉suti Godotamo na꞉goiya꞉, “Nabiwi, ama꞉ ba꞉moe hopo konomo ba꞉gala Hunu Haba Namutudawama꞉ eda꞉nata! Na ama꞉tamo kalakala tabo begoemo, mabu ama꞉ ba꞉moe hopoeno koko iya꞉tawahapi dubatamo amia꞉no mulu ukui ba awaminale, iya꞉tawaha꞉ tawakaluba꞉tamo hawakalilamia꞉ta.
MAT 11:26 Nabiwi, ba꞉ hibila, ba꞉moe komote amia꞉no ubilo puluhukui.”
MAT 11:27 Ba꞉bene Ya꞉suti tawakaluba꞉tamo na꞉goiya꞉, “Naeno Nabiwi Godote hiliyonomo komokomo naeno kokotamo a꞉miya꞉tiya꞉ nale kulamenama꞉, ba꞉bema꞉ ebete ha꞉kiya iya꞉tawala na ebeno Guduino komo, eta lumagiti iya꞉tawaha꞉. Ba꞉gala Nabiwino komo atumu, eta lumagiti iya꞉tawaha꞉ huiyatiya na ebeno Guduti ha꞉kiya iya꞉tawala, ba꞉gala nale puya꞉tamo Nabiwino komo hawakalimima꞉ ubi dihatemo, ibinomate atumu Nabiwino komo kakiya꞉tawahama꞉na꞉.
MAT 11:28 “Ba꞉bema꞉ la꞉ puya꞉te menemene ipuwalo demedenama, la꞉ natamo da꞉pelamema nale tutulu emede komo la꞉tamo kikalamema꞉nemata.
MAT 11:29 Numa꞉la꞉, netewa kau-goegoa꞉te oko ba owatita, namutudawate ibino abau hunamo keha pihiga ihatelamete iba꞉te kapimilo ba꞉bo kotoma꞉na꞉, ba꞉bema꞉ ama꞉ ba꞉ atumu, ama꞉ ba꞉gala na, ale badi ba꞉tonakoma꞉ oko kowatinama꞉. Ba꞉be komo ipuwalo ama꞉ naeno komo hidamo ba꞉ma ka꞉na kiya꞉tawama꞉na꞉ta, nale mulu ba꞉gala tatabadawama꞉ deda꞉namo. Ba꞉gala ama꞉ nagodone tutulu emede komo kolawema꞉na꞉ta,
MAT 11:30 ba꞉bema꞉ nale amia꞉no abau teta꞉mo dihatemema, ama꞉ ba꞉be keha pihiga menemenenomoma꞉ a꞉kagaa꞉mena꞉ta, ba꞉gala nale ilina wagatama꞉ dikamema ama꞉ tutuma꞉ kogoema꞉na꞉ta.”
MAT 12:1 Yu tawakalubino eta okoha꞉ talona hegelalo Ya꞉suti ebe ta꞉matapa꞉go kona pali ipuwado petolamiya꞉, ba꞉bene baa꞉ kape komote ebe ta꞉matapa꞉tamo da꞉piya꞉, iba꞉te kona nahama꞉ kapiyakapiya kubakubadopo ba꞉bo newakalamiya꞉.
MAT 12:2 Komo Pa꞉lisi kapiyuimipa꞉te ba꞉be komo umiti Ya꞉sutamo na꞉ga꞉luya꞉, “Numa꞉, amia꞉no ta꞉matapa꞉te okoha꞉ talona hegela badikanalita.”
MAT 12:3 Ba꞉bene Ya꞉suti tabo ba huiya na꞉goiya꞉, “Wadiyala Godote ebeno Bukamo da꞉miya꞉tiya꞉, la꞉ ba꞉be komo nemalagidolala꞉. Da꞉ibiditamo kuba tete da꞉piya꞉, ebete ebeno wapata꞉lamepa꞉go baa꞉ma꞉ da꞉kapemitiya꞉, ba꞉bene ebete bada komo kododiya꞉?
MAT 12:4 Ebete Godokono Genamamo nodolote, ba꞉be Genamoeno okopa꞉te Godotamo da꞉miya꞉tenakui ba꞉be talona baa꞉ ebete ebeno wapata꞉lamepa꞉go a꞉nenahuya꞉. Ba꞉be komo ipuwalo iba꞉te aeno tutumu tabo adikanaliya꞉, mabu tutumu tabote a biya꞉tua꞉mena a hiliyonomate ba꞉be baa꞉ naha talonala, Godotamo hawa꞉goeno ikamehopa꞉te ha꞉kiya nahanaka. Huiyatiya numa꞉la꞉, Da꞉ibidia꞉te da꞉nahuya꞉ Godote ba꞉be komo kubama꞉ kagoiya꞉ha꞉.
MAT 12:5 Ba꞉gala Godote ebeno Bukamo Moseseko ipuwado da꞉miya꞉tiya꞉, ba꞉moe eta komo nemalagidolala꞉. Puya꞉te ebetamo hawa꞉goeno ikamehopima꞉ deda꞉hana, iba꞉te okoha꞉ talona hegelalo ebe adikumino genamalo oko dowatihonaka, ba꞉ba tetelo iba꞉te ba꞉be talona hegela dadikanalenaka huiyatiya Godote ba꞉be komo modoboma꞉ goena.
MAT 12:6 “Ba꞉bema꞉ nale la꞉tamo goemo, Godoko Adikumino Genamoeno talona hibilo bitana, huiyatiya nagodolo ditana ba꞉be talonoeno helote komo hiya꞉hiya꞉ talonoeno helo na꞉gogolena.
MAT 12:7 Godote ebeno Bukalo na꞉goena, ‘La꞉ natamo hawa꞉goeno ilina dito akapikanama꞉la꞉, na ubihinola, huiyatiya na ubila la꞉eno tepo ipuwalo malemale komo umi.’ La꞉ Pa꞉lisi kapiyuimipa꞉te ba꞉moe taboeno ipuwa niya꞉tawahotale, na ta꞉mahenepa꞉te tuputupu komo ba ododi la꞉ ibi kubapima꞉ ba꞉ka꞉ga꞉lana꞉,
MAT 12:8 mabu hibila, na Tawakalubino Naniwiti okoha꞉ talona hegela namutudawama꞉ eda꞉namo.”
MAT 12:9 Ba꞉bene Ya꞉suti ibi miya꞉palete ibino baidi ibubulamehole genamamo da꞉nodoluya꞉,
MAT 12:10 kokoto hapu hoeme dubuti ba꞉bolo na꞉lutiya꞉. Komo Pa꞉lisi kapiyuimipa꞉te ba꞉bolo da꞉pola꞉nuya꞉, ibi ubila Ya꞉suku kubadawama꞉ koga꞉lama꞉, ba꞉bema꞉ iba꞉te ebe nalatediya꞉, “Okoha꞉ talona hegelalo temetema꞉godawa hiduimima꞉ talona ba꞉kitana?”
MAT 12:11 Ba꞉bene Ya꞉suti iba꞉tamo na꞉goiya꞉, “Amia꞉no sipi-goete talona hegelalo haka gugamo da꞉negamene, ama꞉ tiyolo ebe nowalubiti konuluhukutima꞉na꞉ta, aba꞉ hibila꞉ka꞉?
MAT 12:12 La꞉ ba꞉moe komo iya꞉tawahala, sipi-goeno ka꞉ka꞉ komote koma꞉ keda꞉naha꞉ huiyatiya lumagino ka꞉ka꞉ ba꞉ ko komonomola. Ba꞉bema꞉ aeno tutumu tabote talona kihatea꞉menaha꞉ okoha꞉ talona hegelalo hidohido komo ododilima꞉.”
MAT 12:13 Ba꞉ba tetelo Ya꞉suti kokoto hapu hoeme dubutamo na꞉goiya꞉, “Amia꞉no kokoto na꞉hogamina,” ba꞉bene ebete kokoto da꞉hogaminuya꞉ ebeno kokotote ba꞉bo hiduya꞉, hapulu hidoeno ditama꞉nuya꞉ ba꞉ba ka꞉na.
MAT 12:14 Ba꞉be mabuma꞉ Pa꞉lisi kapiyuimipa꞉te maubahago tolamete tabo ba꞉bo nega꞉luya꞉ Ya꞉suku kanakapumima꞉.
MAT 12:15 Ba꞉ba tetelo Ya꞉suti Pa꞉lisi kapiyuimipino kuba nopo iya꞉tawate ebete ba꞉be haba miya꞉pate ba꞉ dito tuya꞉, ba꞉bene tawakalubi hiliyonomate ebeno komo umiti ebe ba꞉bo ta꞉matuya꞉. Ibi ipuwalo puya꞉te temetema꞉go da꞉pola꞉nuya꞉ Ya꞉suti ibi hiliyonomo hiduilamete,
MAT 12:16 ibi ba꞉ma ka꞉na kiyahalamiya꞉, “La꞉ naeno komoma꞉ tawakalubi akakiyalama꞉la꞉!”
MAT 12:17 Ba꞉bema꞉ Ya꞉sukunu ododi ipuwalo Godokono ukui hawakalimidawa Aisayate da꞉goiya꞉, ba꞉be taboeno hibi komote uluhukuya꞉. Ya꞉lo tetelo ebeno tabo olamagi ipuwalo Godote ba꞉ma ka꞉na goiya꞉,
MAT 12:18 “Ba꞉moe ba꞉ naeno hido Okodawala, nale ebe dopamo a꞉ka꞉miya꞉mo. Nale ebe malemalelo ba emalagidolona ebetamo koamo na꞉kalakalanamo, ba꞉bema꞉ nale naeno Hido-talona Gobogobo ebe hunamo noemete, ba꞉bene ebete hiya꞉hiya꞉ hopo tawakaluba꞉tamo ibino ka꞉ka꞉ mula꞉lelame komoma꞉ tabo kolamagima꞉ne.
MAT 12:19 “Ba꞉moe Okodawate olowabeletihui komo a꞉kiya꞉tawale, ebete naeno tabo ba olamagi a꞉kagaa꞉tepahamene, ba꞉gala tawakalubino holoholo hapulu ebete tabo madodo hunamo a꞉kadipata꞉mene.
MAT 12:20 Puya꞉te heloha꞉ma꞉ deda꞉hana ebete iba꞉tamo malemala꞉go kotoma꞉ne, ba꞉ba ka꞉na ebete balibali pudu dito a꞉kadikanala꞉mene, ba꞉gala wuiki aloeno powa deha꞉potoma꞉ deda꞉na ebete dito a꞉kaha꞉guma꞉mene. “Ba꞉ hibila, naeno Okodawate hidohido komo ba ododili Tuputupu Emede komote Kuboeno wato kikipo kolawema꞉ne,
MAT 12:21 ba꞉bema꞉ hopo hiliyonomoeno tawakaluba꞉te ba꞉moe naeno Okodawoeno pe komo belatimina.”
MAT 12:22 Ba꞉ba tetelo komo tawakaluba꞉te eta dubu Ya꞉sutamo magatuya꞉, ba꞉be dubuti tabo kolamaginakuiha꞉ ba꞉gala ebe baidi tamihomela, mabu ebe kuba gobogobagoenola. Ba꞉bene Ya꞉suti ebe da꞉hiduimiya꞉, ebete tabo olamagi tupuimiti baidi ba꞉bo a꞉la꞉minaliya꞉.
MAT 12:23 Ba꞉bema꞉ hiliyonomo tawakaluba꞉te ba hanohanohuta na꞉ga꞉lutiya꞉, “Diyala, ba꞉moe dubu Ya꞉suku da꞉ Da꞉ibidikono hogo Kelisotela꞉!”
MAT 12:24 Huiyatiya Pa꞉lisi kapiyuimipa꞉te ibino tabo uliti na꞉ga꞉luya꞉, “Ao, ebete kubakuba gobogoboeno Kodawa Biyesibulukunu heloamo oelamenako, Godokono heloamoha꞉!”
MAT 12:25 Ba꞉bema꞉ Ya꞉suti ibino kuba ukui iya꞉tawate iba꞉tamo na꞉goiya꞉, “Numa꞉la꞉, haba kapiya tawakaluba꞉te tetedo dadikanalemena꞉ ba꞉be habate kokubama꞉ne, ba꞉gala genama kapiya tawakaluba꞉te tetedo dadikanalemena꞉ ba꞉be genamanapa꞉te a꞉kemedenamena꞉, ibino genamate ba꞉ atumu kakakubama꞉ne.
MAT 12:26 Ba꞉bema꞉ Saitanakono ukui ba꞉ma ka꞉nala, ebete ebeno kubakuba gobogobo tawakaluba꞉godone a꞉koelama꞉le, mabu ebete ba꞉ba ka꞉na dewagelemene ebeno oko owati helote kowiboma꞉ne.
MAT 12:27 La꞉le naeno komoma꞉ na꞉ga꞉lamata, ‘Ebete kubakuba gobogobo Biyesibulukunu heloamo oelamenako.’ Ba꞉be tabo da꞉ga꞉lama hibila꞉ka꞉? Ao, hibiha꞉. La꞉eno kapiyuimipa꞉te kubakuba gobogobo doelamenaka, ba꞉be helo iba꞉tamo pote kikalamenako? Ba꞉ Godotela, Saitanateha꞉! Ba꞉bema꞉ la꞉eno kapiyuimipino hido ododi komote la꞉eno kuba ukui behawakalimina.
MAT 12:28 Ba꞉moe komo ba꞉ hibila, nale kubakuba gobogobo Godokono Gobogoboeno heloamo oelamenakomo, ba꞉bema꞉ wadiyala la꞉ ba꞉moe komone kiya꞉tawahama꞉nemata, Godokono Ko Gawadubu tetete la꞉tamo ba꞉ a꞉pe.
MAT 12:29 “Numa꞉la꞉, Saitanako ba꞉ eta helo dubu keba ka꞉nala꞉ka꞉ ba꞉ba ka꞉nala, ba꞉gala ebete pilolo duwatiya꞉ ba꞉bi tawakalubi ba꞉ ebeno genamoeno ilinala. Ba꞉bema꞉ tawakaluba꞉te ba꞉mako helo dubuino genamamo ogomote ebeno ilina uwatemema꞉ ubi dihatemena꞉, iba꞉te dopamo ebe hala꞉mo matuhumihote ba꞉bene ebeno ilina ba꞉bo kuwatemema꞉na꞉.
MAT 12:30 “Ba꞉ hibila, kebe lumagiti na owalubinihino ebete naeno alaholodawama꞉ eda꞉na, ba꞉ma ka꞉na ebete tawakalubi kapiya baha꞉mo magahelema꞉ nago oko owatihino huiyatiya ibi hiya꞉hiya꞉ oelamenako.
MAT 12:31 Ba꞉bema꞉ nale la꞉ begoelamemata, tawakalubino hiya꞉hiya꞉ hiliyonomo kuba komo Godote egebolelamete adodohole iya꞉tawala, ba꞉gala kebe lumagiti Godoko ubiha꞉ma꞉ da꞉goemene, ba꞉be kuba tabo komo Godote egebolemete kadodomema꞉ne. Huiyatiya kebe lumagiti Godokono Gobogoboeno ododi komoma꞉ kubama꞉ da꞉goemene, Godote ba꞉be kuba egebolemete a꞉kadodoma꞉mene.
MAT 12:32 Ba꞉bema꞉ kebe lumagiti Tawakalubino Naniwino komoma꞉ duhimi tabo dolamagimini, Godote ebeno kuba egeboleme iya꞉tawala, huiyatiya kebe lumagiti Godokono Gobogoboeno oko owati komoma꞉ duhimi tabo dolamagimini, Godote ba꞉be kuba egebolemete a꞉kadodomenamene, emedena emedena tetelo ebeno kubate bitanamene.”
MAT 12:33 Ya꞉suti tabo moga꞉melo gala na꞉kagoiya꞉, “Naeno gao keba ka꞉nala꞉ka꞉? La꞉ keha hidoma꞉ da꞉ga꞉lanakoma ba꞉be kehoeno gao ba꞉ hidohidoenola, huiyatiya la꞉ eta keha kubama꞉ da꞉ga꞉lanakoma ba꞉be kehoeno gao ba꞉ kubakubala. Iyo, ba꞉ hibila, la꞉ hiya꞉hiya꞉ kehoeno gao ibino holoholamo dulamema la꞉ ba꞉bo kiya꞉tawahama꞉nemata ibi ipuwalo kebe gaote nahama꞉ hidohidoma꞉ keda꞉hana.
MAT 12:34 Pa꞉lisi kapiyuimipa꞉la꞉, la꞉ ba꞉ bu kalulata! La꞉eno tepo ipuwa kubanomoma꞉ ba eda꞉hana hido tabo keba ka꞉na na꞉ka꞉ga꞉loma? Gabohenola! Mabu lumagino tepo ipuwalo kebe komate ka꞉pola꞉na, ba꞉ ba꞉bi komate ebeno tabo olamagi komodo kopikulima꞉na꞉.
MAT 12:35 Ba꞉bema꞉ hido lumagiti ebeno tepo ipuwane hidohido komo buluhukulatelenakomene, huiyatiya kuba lumagino tepo ipuwalo kuba komate pola꞉na, ba꞉bema꞉ ebegodone kuba komate ba꞉pikulinakomena꞉.
MAT 12:36 “Na la꞉tamo na꞉goemo, tawakaluba꞉te ibino hiya꞉hiya꞉ kuba tabo dolamagiminaka, ba꞉bi kuba tabo mabuma꞉ iba꞉te Godokono Ko Hegelalo ebeno dopo hapuamo konikulima꞉na꞉, ba꞉bene ebete ibino hiliyonomo komo ba anagilamelelame iba꞉tamo huiya dikalamemene, ibi ipuwalo eta lumagiti ebe duhimima꞉ eta tabo a꞉kagaa꞉mene.
MAT 12:37 Ba꞉bema꞉ ama꞉ hidamo! Ama꞉le kebe hiya꞉hiya꞉ tabo dolamaginaka, galane tetelo Godote ba꞉bi hiliyonomo tabo ba anagilameleme, ebete ama꞉ tuputupudawama꞉ da꞉ goemene o ama꞉ kubadawama꞉ da꞉ ka꞉mimitamena꞉.”
MAT 12:38 Ba꞉bene komo Pa꞉lisi kapiyuimipi ba꞉gala Godokono Tutumu iya꞉tulamepi iba꞉te Ya꞉suku na꞉ga꞉lamiya꞉, “Iya꞉tulamedawa, a ubila ama꞉godolo eta hanohano komo umima꞉.”
MAT 12:39 Ya꞉suti tabo ba huiya iba꞉tamo na꞉goiya꞉, “Kuba ododilipi ba꞉gala hibima꞉ midiha꞉pi, iba꞉te ubi konomola Godokono helo hawakalimino hanohano komo kumima꞉, huiyatiya Godote eta komo a꞉kahawakalima꞉mene. Ba꞉ hibila, ebete ebeno ukui hawakalimidawa Yaonako ipuwado da꞉hawakalimiya꞉, ba꞉be hanohano komo kapiya la꞉tamo ikalamiya꞉ta.
MAT 12:40 Numa꞉la꞉, Yaonate hegela netewa-kapiya ba꞉gala du netewa-kapiya ko dahoeno tepo ipuwalo lutiya꞉, ba꞉bema꞉ ba꞉be atu gabodo Tawakalubino Naniwiti hegela netewa-kapiya ba꞉gala du netewa-kapiya bobo ipuwalo kolutama꞉ne.
MAT 12:41 Ba꞉gala eta komo. Godote tawakalubino komo danagilamelelamemene, ba꞉be Ko Hegelalo Niniba habanapa꞉te mahila꞉halete la꞉ Yu tawakalubi kubapima꞉ koka꞉lamima꞉na꞉ta, mabu ba꞉bi Yuha꞉ tawakaluba꞉te Yaonakono tabo duliya꞉ iba꞉te ibino kubane Godotamo ohobiliya꞉. Ba꞉ba tetelo ibi ubila Godokono tabo Yaonagodone lawe, huiyatiya la꞉ tetelo Godote Tawakalubino Naniwino komo la꞉tamo ba hawakalimina, la꞉ ba꞉be komo ubihinola. La꞉ numa꞉la꞉, Tawakalubino Naniwino helote Yaonakono helo na꞉gogolona!
MAT 12:42 “Ba꞉gala Godokono Ko Hegelalo Siba hoponapi Ko Gawa Kamenate mahigate la꞉ atumu kubapima꞉ koka꞉lamima꞉na꞉ta, mabu ba꞉be Yuha꞉ kamenate muhulu hoponomone piya꞉ Isalaela hopamo Ko Gawadubu Solomonokono mulu tabo kopulihoma꞉. Ba꞉ba tetelo ebe ubila Godokono mulu Solomonogodone lawe, huiyatiya la꞉ tetelo Godote Tawakalubino Naniwino komo la꞉tamo ba hawakalimina, la꞉ ba꞉be komo ubihinola. Ba꞉ hibila, Tawakalubino Naniwino muluti Solomonokono mulu na꞉gogolona!”
MAT 12:43 Ba꞉bene Ya꞉suti na꞉goiya꞉, “Kuba gobogobote eta lumagigodone duluhukumini, ba꞉ba tetelo ebete gagale hopamo tote eta emede bahi kohowadinatoma꞉ne. Huiyatiya ebete hido emede bahi numihino
MAT 12:44 ebe ha꞉kiya ebetamo kogoema꞉ne, ‘Nale da꞉miya꞉puimo ba꞉be atu emede baha꞉mo gala kakatoma꞉nemo.’ Ebete gala kapete ba꞉be emede genamalo etate emedenaheno, hidamo moda꞉midala ba꞉gala ilina hidamo miya꞉tela, ebete ba꞉be genama ba꞉ba ka꞉na kakapumima꞉ne.
MAT 12:45 Ba꞉bene ebete gala katote komo sa꞉ba꞉ni kuba gobogobo kanadabuiliti kakamagahelema꞉ne, iba꞉te ba꞉be genamamo a꞉pa꞉la꞉hate ba꞉bolo kemedehonama꞉. Numa꞉la꞉, galane da꞉pelamemena꞉ ba꞉bi kuba gobogobate koko kuba ba꞉pododilinakomena꞉, dopamo demedenami ba꞉be kapiya kuba gobogoboeno emede huiyaha꞉. O ba꞉be lumagi niliya! Ebe dopamo nanekela꞉mo kubadopola, huiyatiya ba꞉ma tetelo ebete ba꞉ kubanomoma꞉ eda꞉. Ba꞉bema꞉ ba꞉ma teteno kubakuba tawakaluba꞉la꞉, la꞉ hidamo, mabu la꞉ ba꞉ ba꞉ma ka꞉na kewagelema꞉nemata!”
MAT 12:46 Ya꞉suti tawakaluba꞉tamo tabo ba olamagita, ebeno menoko ba꞉gala ekaki iba꞉te pelamete genama tamelo pela꞉mota꞉hanuya꞉ eba꞉go tabo kopega꞉lama꞉.
MAT 12:47 Ba꞉bema꞉ tawakalubi ipuwalo etate Ya꞉suku na꞉kiyamiya꞉, “Numa꞉, amia꞉no menoko ba꞉gala ekaki iba꞉te genama tamelo ba꞉pela꞉mota꞉hana. Ibi ubila ama꞉go tabo koga꞉lama꞉.”
MAT 12:48 Ya꞉suti ba꞉be lumagitamo na꞉huiyuya꞉, “Naeno menoko potela꞉ka꞉, ba꞉gala naeno ekaki puya꞉tela꞉ka꞉?”
MAT 12:49 Ba꞉bene Ya꞉suti ebe ta꞉matapi ebeno kokotamo mida꞉lamelo na꞉goiya꞉, “Ba꞉moi ba꞉ naeno menokobila ba꞉gala naeno ekakila,
MAT 12:50 mabu pote naeno Hunu Haboeno Nabiwino ubi komo dododimini, ba꞉be lumagi naeno menokola ba꞉gala naeno ekawila.”
MAT 13:1 Ba꞉be atu hegelalo Ya꞉suti genama guni uluhukuti, ebete tawakalubi iya꞉tulamema꞉ Ga꞉lili Bobo dodolo nilutiya꞉,
MAT 13:2 ba꞉bene tawakalubi hiliyonomate ebetamo da꞉pelamiya꞉, ebete boga꞉mo ololote dito emediya꞉ huiyatiya tawakaluba꞉te haka dodolo pela꞉mota꞉hanuya꞉.
MAT 13:3 Ba꞉bene ebete iba꞉tamo komo hiliyonomo komokomo iya꞉tulame uwa꞉mo ba hawakalilame eta tabo ba꞉ma ka꞉na goiya꞉, “Eta lumagiti haka da꞉hiduimi kona kikipo haminahala꞉go ba꞉bo tui.
MAT 13:4 Ebete haminahala꞉go ba tonato komo kikipo iba꞉te gabamo gudiya꞉, ba꞉bema꞉ holaholate pelamete ba꞉bo penaliya꞉.
MAT 13:5 Komo kikipo iba꞉te nakola hakamo gudiya꞉, ba꞉bolo haka koha꞉. Ba꞉bema꞉ iba꞉te tiyonomo ikulihuya꞉ mabu haka dobodoboha꞉,
MAT 13:6 ba꞉bene hegelate da꞉podolui iba꞉te na꞉waiwaihuya꞉ mabu ibino haha ipuwamo katolameha꞉, iyo, iba꞉te ba꞉bema꞉ tiyonomo ha꞉lahuya꞉.
MAT 13:7 Komo kikipo iba꞉te olagopi hemo hakamo gudiya꞉, ba꞉bema꞉ ba꞉bi hemate dapepehui kona ba꞉bo alukuliya꞉.
MAT 13:8 Huiyatiya komo kikipo iba꞉te hido hakamo gudiya꞉, ba꞉bema꞉ ba꞉ba꞉te apepehote ba꞉bo nolohuya꞉, komo 100 teta꞉mo, komo 60 teta꞉mo, komo 30 teta꞉mo hiliyonomoma꞉ eda꞉huya꞉.”
MAT 13:9 Ya꞉suti gala na꞉kagoiya꞉, “Galagodawa, ama꞉ hidamo nulia꞉!”
MAT 13:10 Ba꞉ba tetelo Ya꞉suku ta꞉matapa꞉te ebetamo pelamete na꞉pega꞉luya꞉, “Bada mabuma꞉ ama꞉ uwa꞉mo tawakalubi diya꞉tulamenaka?”
MAT 13:11 Ya꞉suti tabo ba huiya iba꞉tamo na꞉goiya꞉, “Godote Ko Gawadubuma꞉ deda꞉na, ba꞉be komoeno ipuwa kolawema꞉ nale helo la꞉tamo ikalamimata, iyo, ba꞉be komoeno awaminale komokomo la꞉ ba꞉ iya꞉tawahuimata. Huiyatiya nale ba꞉be iya꞉tawa komo komopa꞉tamo kikalameha꞉.
MAT 13:12 Ba꞉ hibila, Godokono tabo ulihoma꞉ lumagigodolo hidohido ukui da꞉pola꞉na, Godote ebetamo hiliyonomo hidohido komo ikamehote ebeno tepo ipuwa kotabuimima꞉ne. Huiyatiya lumagigodolo hidohido ukui pola꞉naheno, ebegodolo kebe kapiyakapiya komate da꞉pola꞉na Godote ebegodone gala kakuwatemema꞉ne.
MAT 13:13 Ba꞉be mabuma꞉ nale tawakalubi uwa꞉mo iya꞉tulamenakomo, mabu iba꞉te naeno taboeno ipuwa ohowaditi a꞉kuma꞉la꞉, iyo, iba꞉te uliti atumu a꞉kiya꞉tawahala꞉.
MAT 13:14 Ba꞉bema꞉ Godokono ukui hawakalimidawa Aisayate ibino komoma꞉ da꞉goiya꞉ ba꞉be tabote ba꞉ hibima꞉ eda꞉. Ebete ya꞉lo tetelo ba꞉ma ka꞉na goiya꞉, ‘La꞉ tabo bulinakomata huiyatiya a꞉kiya꞉tawahanakamata, iyo, la꞉ ipuwa bohowadinakomata huiyatiya a꞉kuminakamata.
MAT 13:15 Mabu ba꞉moe tawakalubino ukui hegabema꞉ eda꞉halamiya꞉, ibi hibi komo uli ubihinola, ba꞉bema꞉ iba꞉te galo a꞉muhilameholiya꞉, ba꞉gala ibino baidi atumu a꞉mula꞉haliya꞉. Ba꞉bema꞉ iba꞉te ibino baidi mula꞉haleha꞉ma꞉ neda꞉hatale, ibino baiditi naeno hido komo bulamena꞉, ba꞉gala ibino galote nulihotale, iba꞉te ibino tepo ipuwoeno ukui hidamo emalagidolete natamo bohobila꞉na꞉, ba꞉bema꞉ na modobola ibi hiduilamema꞉.’”
MAT 13:16 Ba꞉bene Ya꞉suti ebe ta꞉matapa꞉tamo na꞉goiya꞉, “Godokono kalakala konomo la꞉godolo bitana, mabu la꞉ la꞉eno baida꞉mo ebeno komokomo hidamo nulamenamata! Iyo, la꞉le la꞉eno galamo Godokono hibi komo hidamo nulihonamata!
MAT 13:17 Nale la꞉tamo hibi tabo begoemo, dopamo tetelo Godokono ukui hawakalimipi ba꞉gala komo tuputupu emede tawakalubi, iba꞉te ubi konomo bihatenama꞉ la꞉le dulamenama ba꞉bi koko komo ulamema꞉, huiyatiya iba꞉te kamodobuya꞉ha꞉, ba꞉gala ibi ubila la꞉le dulihonama ba꞉bi komo kulihoma꞉, huiyatiya iba꞉te kamodobuya꞉ha꞉.”
MAT 13:18 “Ba꞉bema꞉ la꞉ kona kikipo haminahala꞉go da꞉tui ba꞉be lumagino uwino ipuwa nulia꞉la꞉.
MAT 13:19 Godote Ko Gawadubuma꞉ deda꞉na, tawakaluba꞉te ba꞉be komoeno tabo uliti ipuwa hidamo iya꞉tawahaheno, ba꞉ba tetelo Saitanate pete ibino tepo ipuwane ba꞉be tabo gala kakapuwatema꞉ne. Ba꞉mako tawakalubi gabamo da꞉gudi, ibi ba꞉bi kona kikipo keba ka꞉nala꞉ka꞉ ba꞉ba ka꞉nala.
MAT 13:20 Ba꞉gala komo tawakalubi nakola hakamo da꞉gudi ibi ba꞉ ba꞉bi kikipola, iba꞉te Godokono tabo dulimina꞉, ba꞉ba tetenomolo kalakalago kolawema꞉na꞉,
MAT 13:21 huiyatiya ibino tepo ipuwalo haha puliyala. Ba꞉bema꞉ iba꞉te Godokono oko ipuwalo nanekela꞉mo emeda꞉tepate, ba꞉bene Godokono taboma꞉ temeteme komate iba꞉tamo da꞉pikulimina꞉ ba꞉gala tawakaluba꞉te ibino komoma꞉ da꞉ga꞉lamena꞉, iba꞉te tiyonomo kalahutihoma꞉na꞉.
MAT 13:22 Komo tawakalubi iba꞉te olagopi hemo hakamo da꞉gudi ba꞉bi kikipola. Iba꞉te Godokono tabo kulima꞉na꞉, huiyatiya iba꞉te ilina konomamo emalagidolena ba꞉gala ibino emede komoma꞉ ukui bilibilima꞉ eda꞉hana. Ba꞉bema꞉ ibino tepo ipuwalo ba꞉bakobako ukui hiliyonomo ba꞉pola꞉na, ba꞉moi ukui komate hido tabo ba anakapumi, ba꞉bene iba꞉te a꞉kanolohamena꞉.
MAT 13:23 Huiyatiya komo tawakalubi iba꞉te hido hakamo da꞉gudi ba꞉bi kikipola. Iba꞉te Godokono tabo uliti hido iya꞉tawa lawete hibinomolo konolohoma꞉na꞉, komo 100 teta꞉mo, komo 60 teta꞉mo, komo 30 teta꞉mo konolohoma꞉na꞉.”
MAT 13:24 Ba꞉bene Ya꞉suti eta uwi tawakalubi ba iya꞉tulame na꞉kagoiya꞉, “Godote Ko Gawadubuma꞉ deda꞉na, ba꞉be komo ba꞉ eta dubuti ebeno pali haka hiduimiti hido kona kikipo da꞉haminahali ba꞉ba ka꞉nala.
MAT 13:25 Eta dulu tawakalubi hiliyonomate da꞉lahani, eba꞉go alaholodawama꞉ deda꞉nami ba꞉be dubuti penate kuba hemo kikipo pali ipuwamo pamihonate ba꞉ dito toni.
MAT 13:26 Galane tetelo konate apepehote da꞉nolohui, kuba hemate ikuliti konoeno haha ba꞉bo a꞉wiholiya꞉,
MAT 13:27 ba꞉bene pali namutudawoeno okopa꞉te ebetamo pelamete ebe na꞉pega꞉lamiya꞉, ‘Ama꞉ pali ipuwamo hidohido kikipo bamihuia꞉ta, huiyatiya ba꞉moi kuba hemate kebene kikulihui?’
MAT 13:28 “Ebete tabo ba huiya na꞉goi, ‘Eta ago dalaholona, ba꞉bete amihui.’ “Ba꞉bene okopa꞉te ebe nalatediya꞉, ‘Wadiyala꞉ka꞉ a ba꞉bi kuba hemo komagobelema꞉nema꞉?’
MAT 13:29 “Namutudawate huiyatiya na꞉goi, ‘Ao, la꞉le da꞉magobelema, diyala, la꞉ atu tetelo komo hidohido kona magobeledemata.
MAT 13:30 Ba꞉bema꞉ wadiyala iba꞉te kapimilo napepehamena꞉, huiyatiya galane naha kona uwate tetelo nale okopi kokiyalamema꞉nemo iba꞉te dopamo kuba hemo magobelete koa꞉mo kiya꞉hekema꞉, ba꞉bene iba꞉te hidohido naha kona uwatete naeno pali ilina miya꞉teno genamamo kopemiya꞉tema꞉na꞉.’”
MAT 13:31 Ba꞉bene Ya꞉suti eta uwi ibi ba iya꞉tulame na꞉kagoiya꞉, “Godote Ko Gawadubuma꞉ deda꞉na ba꞉be komo ba꞉ mastada kikipo huiyala, iyo, eta tetelo dubuti ba꞉moe kikipo lawete ebeno pali ipuwamo dito ami.
MAT 13:32 Hibila, ba꞉moe hopo konomolo keha kikipo kokonomo ba꞉pola꞉na huiyatiya mastada kikipo ba꞉ deha꞉potonomola. Huiyatiya numa꞉la꞉, lumagiti damimini ba꞉be deha꞉poto kikipote apete komo hiliyonomo keha kogogolema꞉ne, ba꞉bene holaholate pelamete ba꞉be keha gedawalo ba꞉pemedehonamena꞉.”
MAT 13:33 Ba꞉bene Ya꞉suti eta uwi ibi ba iya꞉tulame na꞉kagoiya꞉, “Godote Ko Gawadubuma꞉ deda꞉na ba꞉be komo ba꞉ palawa baa꞉ huhuimino puhulu ilina huiyala. Eta kamenate modobo palawa lawete huhuimino ilina nanekele hola꞉minalete ba꞉bo a꞉ba꞉gui, ba꞉bene huhuimino ilinate palawa lawenomo ba lawe palawa baa꞉te hunamo ba꞉bo mahigui.”
MAT 13:34 Ya꞉suti ba꞉moi komokomo tawakalubi hiliyonomatamo iya꞉tulame uwa꞉mo kiyahanakui, ba꞉ma ka꞉na ebete eta komo iba꞉tamo iya꞉tulame uwihino kakiyahanakuiha꞉.
MAT 13:35 Ba꞉be komote uluhukuya꞉ Godote ebeno ukui hawakalimidawa ipuwado da꞉goiya꞉, ba꞉be tabote hibima꞉ keda꞉ma꞉. Ebete ya꞉lo tetelo tabo ba꞉ma ka꞉na goiya꞉, “Na Godote tawakaluba꞉tamo tabo olamagi tetelo iya꞉tulame uwa꞉mo bolamaginakomo. Iyo, nale ba꞉moe hopo dododiya꞉mo ba꞉ba tetene tupuimiti ba꞉ma teta꞉mo puluhuku, kebe komate awaminale ipuwalo da꞉pola꞉nama꞉, na ba꞉bi komo ba꞉ma ka꞉na kohawakalilamema꞉nemo.”
MAT 13:36 Ba꞉bene Ya꞉suti tawakalubi hiliyonomo miya꞉palete genama guamo dito nodoluya꞉. Ba꞉ba tetelo ebe ta꞉matapa꞉te ebetamo pelamete na꞉pega꞉luya꞉, “Kona pali ipuwalo dapepehui ba꞉bi kuba hemoeno ipuwa keba ka꞉nala꞉ka꞉? Ama꞉ a niya꞉tua꞉ma꞉.”
MAT 13:37 Ya꞉suti ibino tabo ba huiya na꞉goiya꞉, “Hido kona kikipo kebe dubuti ka꞉haminahali, ebe ba꞉ Tawakalubino Naniwila.
MAT 13:38 Ba꞉bema꞉ ebeno pali ba꞉ ba꞉moe hopo konomola, hidohido kona kikipo ibi ba꞉ Godokono Hunu Haboeno gugudila, ba꞉gala kuba hemo ibi ba꞉ Saitanakono gugudila.
MAT 13:39 Kuba hemo damihui ba꞉ Saitanatela, ba꞉gala naha kona uwate tete ba꞉ ba꞉moe hopoeno kuititila, ba꞉gala naha kona uwatepi ba꞉ Godokono nopopila.
MAT 13:40 Ba꞉bema꞉ okopa꞉te kuba hemo magobelete koa꞉mo diya꞉heki, ba꞉moe hopoeno kuititi ba꞉ba ka꞉na kitanama꞉ne.
MAT 13:41 Ba꞉ba tetelo Tawakalubino Naniwiti ebeno nopopi kopoelamema꞉ne. Ba꞉bema꞉ puya꞉te ebeno tawakaluba꞉go ba emedena kuba dododilinaka, nopopa꞉te ibi hiliyonomo puwatete
MAT 13:42 konomo koete da꞉woena ba꞉be baha꞉mo ba꞉ dito koniya꞉hekema꞉na꞉, ba꞉bene iba꞉te ba꞉bolo lalo ba ikilame konomamo ba꞉bo kihimima꞉na꞉.
MAT 13:43 Huiyatiya Godokono tuputupu emede guguda꞉godolo ebeno alote konomamo ka꞉la꞉minama꞉ne, ibino Nabiwino Hunu Habalo da꞉la꞉minana ba꞉ba ka꞉na. Galagodawa, ama꞉ hidamo nulia꞉!”
MAT 13:44 “Godote Ko Gawadubuma꞉ deda꞉na, ba꞉be komo ba꞉ lumagiti ko mani ba꞉gala hidohido ilina ya꞉lo tetenomolo hakamo dawaminaliya꞉ ba꞉ba ka꞉nala. Galane tetelo ebete ba꞉bo hoiya꞉, ba꞉bene gogo hiliyonomo da꞉petohuya꞉ eta lumagiti haka aligi oko ba owati ba꞉bi hidohido ilina ba꞉bo ulamiya꞉. Ba꞉ba tetelo ebete kalakalago gala kihilatelete, ba꞉bene ebeno genamamo tote ebeno ilina hiliyonomo kolowamima꞉ nimidiliti modobo mani ba꞉bo nelawiya꞉. Ba꞉bene ba꞉be mana꞉mo ebete ba꞉be haka lawete, ba꞉be haka ipuwalo ugumuililo da꞉pola꞉nuya꞉ ba꞉bi hidohido ilinate ebenoma꞉ ba꞉bo eda꞉huya꞉.”
MAT 13:45 “Ba꞉gala Godote Ko Gawadubuma꞉ deda꞉na, ba꞉be komo ba꞉ kolowami lumagiti hidohido nehe ilina ohola꞉go da꞉pata꞉na ba꞉ba ka꞉nala.
MAT 13:46 Eta hegelalo ebete kapiya hidonomo nehe dumi, ba꞉ba tetelo ebeno ilina hiliyonomo kolowamima꞉ nimidiliti modobo mani nelawete, ba꞉bene ba꞉be mana꞉mo ebete ba꞉be hido nehe lawete ebenoma꞉ ba꞉bo midi.”
MAT 13:47 “Ba꞉gala Godote Ko Gawadubuma꞉ deda꞉na, ba꞉be komo ba꞉ lumagiti daha hiliyonomo uwateholema꞉ kamahu tula꞉mo dahubi ba꞉ba ka꞉nala.
MAT 13:48 Ba꞉bene daha hiliyonomate da꞉tahui ba꞉ba tetelo okopa꞉te kamahu tuli dodamo adimuya꞉midate hidohido daha bagolamo ba miya꞉te kubakuba daha dito iya꞉hekiya꞉.
MAT 13:49 Ba꞉bema꞉ ba꞉moe hopoeno kuititi ba꞉ba ka꞉na kitanama꞉ne. Ba꞉ba tetelo Godokono nopopa꞉te pelamete kuba ododilipi tuputupu emede tawakaluba꞉godone powatiya꞉midalete
MAT 13:50 konomo koete da꞉woena ba꞉be baha꞉mo ba꞉ dito koniya꞉hekema꞉na꞉, ba꞉bene iba꞉te ba꞉bolo lalo ba ikilame konomamo ba꞉bo kihimima꞉na꞉.”
MAT 13:51 Ba꞉bema꞉ Ya꞉suti ebe ta꞉matapa꞉tamo na꞉goiya꞉, “La꞉ ba꞉moi hiliyonomo komo hidamo na꞉kiya꞉tawahonama?” Iba꞉te tabo ba huiya na꞉ga꞉luya꞉, “Iyo, a modobola.”
MAT 13:52 Ba꞉bene Ya꞉suti iba꞉tamo gala na꞉kagoiya꞉, “Godokono Tutumu iya꞉tulamepi ipuwalo, pote Godokono Ko Gawadubu komoeno ipuwa lawenomo da꞉lawi, ba꞉be lumagi ba꞉ ko genama namutudawa huiyala. Ba꞉be mulu dubuino genamalo koko hidohido ilinate ba꞉pola꞉na, ba꞉ma ka꞉na pakalapakala ilina ba꞉gala uliuli ilina kapimilo ba꞉pola꞉ma꞉na, ba꞉bema꞉ ebete ebeno ubilo ba꞉bi hiya꞉hiya꞉ ilina tawakaluba꞉tamo buluhukulatelenakomene ibi hidonomamo kowalubilinama꞉.”
MAT 13:53 Ba꞉bene Ya꞉suti ba꞉bi iya꞉tulame uwi olamagi da꞉wibuya꞉, ebete ba꞉be habane tote
MAT 13:54 ebeno emede haba Nasaleta꞉mo gala na꞉katuya꞉. Ebete tawakalubino baidi ibubulamehole genamalo ibi ba iya꞉tulamita iba꞉te hanohanoholo na꞉ga꞉lutiya꞉, “Moe dubuino mulu iya꞉tulame ukui ebete kebolo kiya꞉tawui? Ba꞉gala ebete hanohano komo pokono heloamo kododilina?
MAT 13:55 Ebe kapeneta dubuino gudula, ebeno menoko ba꞉ Ma꞉litila. A iya꞉tawahala ebeno ekaki Ya꞉imesiko, Yausepeko, Saimonoko, ba꞉gala Yudasiko,
MAT 13:56 iyo, ebeno ekaki bohelemele hiliyonomate ago bemedena. Ba꞉bema꞉ ba꞉moe dubuti ebeno helo ba꞉gala mulu kebolo kuwati?”
MAT 13:57 Ba꞉bene iba꞉te ebe ubiha꞉ma꞉ ba eda꞉huta Ya꞉suti ibi na꞉kiyalamiya꞉, “Godokono ukui hawakalimidawa tawakaluba꞉te ebe hunamo kadipatema꞉na꞉, huiyatiya ebeno habanapi ba꞉gala ebeno genamanapi iba꞉te ebe ubiha꞉ma꞉ beda꞉hanakomena꞉.”
MAT 13:58 Ba꞉bema꞉ Nasaletenapino hibima꞉ midiha꞉ mabuma꞉ Ya꞉suti ibino habalo hiliyonomo hanohano komo kododiliya꞉ha꞉, ebete ibi ipuwalo kapiyakapiyanomo bododiliya꞉.
MAT 14:1 Ba꞉ba tetelo Ga꞉lili hopoeno Ko Gawadubu Heloditi Ya꞉sukunu ododili komokomo ulihote,
MAT 14:2 ebete ebeno hopopa꞉tamo na꞉goiya꞉, “Ba꞉moe Ya꞉suku ba꞉ Yonete, tawakalubi beyamo wadulateledawala. Ebete hoe ipuwane a꞉mahigui, ba꞉bema꞉ ba꞉moi hanohano komate ebegodone pikulinaka.”
MAT 14:3 Ba꞉moe komo ba꞉ Yonete keba ka꞉na ka꞉hoiya꞉ ba꞉be komola. Yonete dopamo ba emedena Heloditi ebeno ekawi Pilipikono kamena pilolo lawiya꞉, ba꞉be kamenoeno mahilo ba꞉ Helodiyasitila. Ba꞉moe mabuma꞉ Yonete Helodiko ba kiyahame na꞉goemiya꞉, “Ama꞉le ba꞉be kamena lawe wadiyaha꞉, ko kubanomola!” Ba꞉bema꞉ Heloditi ebeno alaholohopi da꞉kiyalamiya꞉, iba꞉te Yoneko nelawete du genama guamo dito pa꞉da꞉nuya꞉, mabu ebete ebeno ubi bihatiya꞉ ba꞉be ododi komodo ebete Helodiyasiko kokalakaluimima꞉.
MAT 14:5 Ba꞉ba tetelo Heloditi ebe anakapumima꞉ ubi nihatitiya꞉ huiyatiya ebete Yu tawakalubi tolelamelo dito miya꞉puya꞉, mabu iba꞉te Yoneko Godokono ukui hawakalimidawama꞉ ga꞉lanakuya꞉.
MAT 14:6 Ba꞉bene Heloditi da꞉hawakaluya꞉, ba꞉be hegela emalagidololo ebeno mabuluba꞉te eba꞉go poko baa꞉ benahutiya꞉. Ba꞉ba tetelo Helodiyasikono bohelete ibi hiliyonomoeno holoholo hapuamo pete ba pemoita, Heloditi ebetamo koamo kalakalutiya꞉,
MAT 14:7 ba꞉bema꞉ ebete boheletamo na꞉goiya꞉, “Nale Godokono mahilamo goemo, ama꞉le bada komoma꞉ ubi dihatemena꞉ nale ama꞉tamo hibinomolo kikamema꞉nemata!”
MAT 14:8 Ba꞉bene boheleno menokote ebe da꞉kiyamiya꞉, ebete Heloditamo ba꞉ma ka꞉na huiyuya꞉, “Na ubila Yoneko tawakalubi beyamo wadulateledawoeno wato kikipo kapeyago. Ka꞉lonomo natamo nikanama꞉!”
MAT 14:9 Ba꞉ba tetelo Ko Gawadubu Heloditi ebeno tepo ipuwalo menemenema꞉ ediya꞉, huiyatiya ebete dopamo da꞉goiya꞉ ba꞉be tabo ebete Godokono mahilamo goiya꞉ poko tawakalubino holoholo hapulu. Ba꞉bema꞉ ebete ebeno eta alaholodawa da꞉kiyamiya꞉,
MAT 14:10 ba꞉be dubuti du genamamo tote Yonekono wato ba꞉bo nitamidamiya꞉.
MAT 14:11 Ba꞉bene ebete wato kikipo kapeyago adahete boheletamo da꞉pikamiya꞉, huiyatiya ebete ebeno menokotamo dito atuya꞉.
MAT 14:12 Ba꞉ba tetelo Yoneko ta꞉matapa꞉te ebeno ape pelawete bobo ipuwamo dito nihatiya꞉, ba꞉bene iba꞉te tolamete ba꞉be komo Ya꞉suku ba꞉bo nikiyamiya꞉.
MAT 14:13 Ya꞉suti ba꞉be komo uliti ebe ta꞉matapa꞉go boge lawete dito tolamiya꞉, ebete ha꞉kiya tataba hopamo konuluhukuma꞉. Huiyatiya tawakalubi hiliyonomate ebeno to komo duliya꞉, iba꞉te ibino habahabane ikuliti Ya꞉sukuba꞉ konalugama꞉ haka gabuya dito tolamiya꞉.
MAT 14:14 Ba꞉bene Ya꞉suti boga꞉go da꞉nuluhukuya꞉, tawakalubi hiliyonomo nulamete ibi konomamo nemalemalelateliya꞉, ba꞉bema꞉ ebete hakamo nodolote ibino temetema꞉gopi ba꞉bo nihiduilamiya꞉.
MAT 14:15 Ba gapogapohona ebe ta꞉matapa꞉te ebetamo pelamenate ebe na꞉pega꞉lameniya꞉, “Moe tawakalubiha꞉ bahila. Tete ba꞉ a꞉wibo, tiyo kuduma꞉ne, ba꞉bema꞉ ama꞉ ibi noelama꞉, iba꞉te habahabamo tolameholete ibi ha꞉kiya ibino baa꞉ konuwatehoma꞉.”
MAT 14:16 Ya꞉suti ibi na꞉goelameniya꞉, “Ao, iba꞉te tolameheno la꞉le iba꞉tamo naha ilina dopamo nikalamehola꞉la꞉.”
MAT 14:17 Iba꞉te na꞉huiyaniya꞉, “Agodolo paibo baa꞉ ba꞉gala daha netewa ba꞉binomate pola꞉na.”
MAT 14:18 Ya꞉suti iba꞉tamo na꞉goeniya꞉, “Ba꞉be baa꞉ ba꞉gala daha natamo na꞉wadaha꞉la꞉.”
MAT 14:19 Ba꞉bene ebete tawakalubi hemolo ahidima꞉ da꞉kiyalameniya꞉, ba꞉ba tetelo ebete paibo baa꞉ ba꞉gala daha netewa uwatenate, Hunu Habamo gahimilo Godotamo kalakala tabo ba꞉bo goeniya꞉. Ba꞉bene ebete ba꞉bi baa꞉ wakalamiholenate ebe ta꞉matapa꞉tamo ikalamenate, iba꞉te tawakalubi hiliyonomatamo dito ikalameholeniya꞉.
MAT 14:20 Ba꞉ba tetelo ibi hiliyonomate baa꞉ da꞉nahaniya꞉ ibino kape komo ba꞉bo wiboholameniya꞉, ba꞉bene Ya꞉suku ta꞉matapa꞉te da꞉luhiliniya꞉ ba꞉bi baa꞉ komokomamo 12 bagolo betabuilameniya꞉.
MAT 14:21 Ba꞉ hibila, ba꞉be baa꞉ 5,000 dubate nahaniya꞉ ibino kamenakamena guguda꞉go.
MAT 14:22 Ba꞉bene ba꞉ba tetenomolo Ya꞉suti tawakalubi ba oelamena ebe ta꞉matapa꞉tamo na꞉goeniya꞉, “Boge lawete Ga꞉lili Bobo hapuamo na꞉na꞉hiwala꞉la꞉.”
MAT 14:23 Ba꞉bene ebete tawakalubi hiliyonomo oelamenate ebete haka hunamo dito nodoloniya꞉ Godokoba꞉ tabo konega꞉lanama꞉. Ba꞉bene da꞉duniya꞉ Ya꞉suti ha꞉kiya ba꞉bolo lutiya꞉.
MAT 14:24 Ba꞉ba tetelo ta꞉matapa꞉te boga꞉go bobo tuli tetenomodo ba tolamena, gawiyate boge hapuamo ola꞉la꞉midanakui, hapuamo ola꞉la꞉midanakui, ba꞉ba ka꞉na ewageleniya꞉ mabu huhuti ibi na꞉duhilameniya꞉.
MAT 14:25 Ba꞉bema꞉ du tetelo hegela owaloho tatalima꞉ ba eda꞉na, Ya꞉suti beya hunudu iba꞉tamo ba꞉bo toniya꞉.
MAT 14:26 Huiyatiya ebete beya hunudu ba tonato, iba꞉te ebe uminate ba toletolehona na꞉ga꞉laniya꞉, “Gubaliti pe!” ba꞉bema꞉ iba꞉te tole konomago ba꞉bo ga꞉ga꞉niya꞉.
MAT 14:27 Ba꞉ba tetenomolo Ya꞉suti ibi na꞉goelameniya꞉, “Na Ya꞉sutila, la꞉ katoletolehonala꞉!”
MAT 14:28 Ba꞉bene Pitate huiyatiya ebetamo na꞉goeniya꞉, “Kodawa, ama꞉lela꞉ka꞉? Ama꞉ na na꞉kiyanama꞉, nale beya hunudu ama꞉tamo kopema꞉.”
MAT 14:29 Ya꞉suti ebeno tabo ba huiyana na꞉goeniya꞉, “Na꞉pa꞉!” ba꞉bene Pitate boge miya꞉panate beyamo a꞉putinate beya hunudu ebetamo ba꞉bo toniya꞉.
MAT 14:30 Huiyatiya ebete ko huhuino gawiya ulamenate ba꞉bo toletoleniya꞉, ba꞉bene ebete beyamo ba ululuna Ya꞉sutamo ibulunomolo na꞉goeniya꞉, “Kodawa, ama꞉ naeno ka꞉ka꞉ na꞉mula꞉nama꞉!”
MAT 14:31 Ba꞉ba tetenomolo Ya꞉suti kokoto hogaminanate Pitako lawenate na꞉goemeniya꞉, “Amia꞉no hibima꞉ midi komo koha꞉, nanekelela. Mabu keka꞉ ama꞉le ukui netewama꞉ deda꞉?”
MAT 14:32 ba꞉bene iba꞉te gala boga꞉mo da꞉kololoniya꞉ huhuti ba꞉bo wiboniya꞉.
MAT 14:33 Ba꞉ba tetelo Ya꞉suku ta꞉matapa꞉te ebe ba adikumina na꞉ga꞉laniya꞉, “Hibila, ama꞉ ba꞉ Godokono Gudulata!”
MAT 14:34 Ba꞉bene iba꞉te duiduiya tetelo bobo hapuamo na꞉hiwalete Genasalete hopamo dito nikuliya꞉.
MAT 14:35 Ba꞉ba tetelo tawakaluba꞉te Ya꞉sukunu komo iya꞉tawahate ba꞉be hopoeno hiliyonomo habahabamo tabo na꞉noemiya꞉, iba꞉te temetema꞉gopi ebetamo komagahelema꞉.
MAT 14:36 Ba꞉bema꞉ Ya꞉suti ba꞉bolo ba nemedena, temetema꞉gopa꞉te da꞉pelamenakui ebe na꞉petoemehonakuya꞉ iba꞉te ebeno kaliko kologihoma꞉, ba꞉bene puya꞉te ebeno kaliko dologihonakui ba꞉ba꞉te ba꞉bo hidohidohonakuya꞉.
MAT 15:1 Ba꞉ba tetelo komo Pa꞉lisi kapiyuimipi ba꞉gala Godokono Tutumu iya꞉tulamepi, iba꞉te Yelusalema ko habane pelamete Ya꞉sutamo na꞉pega꞉luya꞉,
MAT 15:2 “Mabu keka꞉ ama꞉ ta꞉matapa꞉te aeno iniwala꞉te diya꞉tulamenakui ba꞉bi tutumu tabo da꞉wakalaminaka? Numa꞉, iba꞉te kokoto ukulaleheno baa꞉ ba꞉bo nahanaka!”
MAT 15:3 Ya꞉suti huiyatiya iba꞉tamo na꞉goiya꞉, “La꞉ bada mabuma꞉ iniwala꞉te da꞉ga꞉lanakui ba꞉bi tutumu tabo ba emalagidolena, huiyatiya Godokono Tutumu Tabo bewakalaminamata?
MAT 15:4 Numa꞉la꞉, Godote ebeno Bukalo na꞉goiya꞉, ‘La꞉eno menokobi nabi nowalubila꞉la꞉,’ ba꞉gala ebete na꞉kagoiya꞉, ‘Kebe lumagiti ebeno menoko o nabiwino komoma꞉ kuba tabo dolamagimini, la꞉le ebe nanakapumiya꞉la꞉.’
MAT 15:5 Huiyatiya la꞉ ba꞉moe Godokono tabo tama꞉mo miya꞉palo na꞉ga꞉lanamata, ‘Lumagigodolo da꞉pola꞉na menoko nabiwi owalubilima꞉, ebete iba꞉tamo ikalamema꞉ ubiha꞉ma꞉ deda꞉mene, kubahenola. Ebete dito kogoema꞉ne, ‘Ba꞉moi ilina talonala, nale Godotamo ikamehote ba꞉moi ilinamo naeno menoko nabiwi a꞉kowalubila꞉mo.’ ’
MAT 15:6 Ba꞉ ba꞉ma ka꞉na la꞉ ipuwalo kuba ukui lumagiti ebeno nabiwi a꞉kowaluba꞉le, mabu la꞉ Godokono hibi tabo tama꞉mo miya꞉telo huiyatiya la꞉eno iniwala꞉te da꞉ga꞉lanakui la꞉ ba꞉bi komo kapiya bododilinakomata.
MAT 15:7 La꞉ ma꞉lapila netewa tawakalubilata! Godokono ukui hawakalimidawa Aisayate la꞉eno komoma꞉ dopamo hibinomolo ba꞉ma ka꞉na goiya꞉,
MAT 15:8 ‘Ba꞉moi tawakaluba꞉te na tabamo adikunamena, huiyatiya ibino tepo ipuwoeno ukui na tamelo kapola꞉naha꞉, muhulunomolo ba꞉nepola꞉na.
MAT 15:9 Iba꞉te naeno mahilo hunamo nadipatena, huiyatiya hibi komo puliyala, iyo, iba꞉te hopo habanapino tutumu Godokono hibi Tutumuma꞉ midiliti ba꞉bo iya꞉tulamenaka.’”
MAT 15:10 Ba꞉bene Ya꞉suti tawakalubi hiliyonomo ebetamo ka꞉lamiti iba꞉tamo na꞉goiya꞉, “La꞉ ba꞉moe tabo uliti la꞉eno ukui hidamo na꞉tuputupuilama꞉la꞉.
MAT 15:11 Naha ilinate lumagino tepo ipuwamo dopegamene ba꞉be ilinate ebe a꞉kakubahima꞉mene, huiyatiya lumagino tabone dikulimina꞉ ba꞉bi komate ebe kokubahimima꞉na꞉.”
MAT 15:12 Ba꞉bene Ya꞉suku ta꞉matapa꞉te ebetamo pelamete na꞉pega꞉luya꞉, “Ama꞉ iya꞉tawala꞉ka꞉, Pa꞉lisi kapiyuimipa꞉te ama꞉le da꞉gaa꞉ ba꞉be taboma꞉ na꞉maubaha?”
MAT 15:13 Ya꞉suti huiyatiya na꞉goiya꞉, “Naeno Nabiwiti Hunu Habalo demedena, ebeno pali ipuwamo tawakaluba꞉te ha꞉kiya ibino heloamo damihonaka, ba꞉bi keha hiliyonomo ebete hahago kopemagobelema꞉ne, huiyatiya ebete ha꞉kiya kebe keha kamihona, ba꞉binomate ba꞉la꞉mota꞉hanamena꞉.
MAT 15:14 Ba꞉bema꞉ la꞉le Pa꞉lisi kapiyuimipino tabo akulia꞉la꞉, na꞉miya꞉paliya꞉la꞉ mabu ibi ba꞉ baidi tamihopila, iba꞉te tawakalubi kubamo iya꞉tulamenaka. Numa꞉la꞉, baidi tamiho dubuti eta baidi tamiho dubu gabodo da꞉magatamene iba꞉te haka gugamo badi konegudima꞉na꞉.”
MAT 15:15 Ba꞉bene Pitate ebe na꞉goemiya꞉, “Ama꞉ ba꞉moe komoeno ipuwa a niya꞉tua꞉ma꞉.”
MAT 15:16 Ya꞉suti tabo ba huiya na꞉goiya꞉, “Komopa꞉te ukui hidamo katuputupuilamenaha꞉, la꞉ ba꞉ atumu.
MAT 15:17 La꞉ iya꞉tawahala꞉ka꞉? Naha ilinate lumagi ipuwamo opegate wapamo tote ba꞉bene nea꞉go kopenuluhukuma꞉ne,
MAT 15:18 huiyatiya lumagiti ebeno tabamo dolamagimini, ba꞉bi tabo ba꞉ ebeno tepo ipuwoeno ukui mabuni kopikulima꞉na꞉, ba꞉bi tabote ebe ba꞉bo kokubahimima꞉na꞉.
MAT 15:19 Numa꞉la꞉, lumagino tepo ipuwane hiya꞉hiya꞉ kuba ukui komate pikulinaka, ba꞉bene ba꞉bi kuba ukuia꞉godone ba꞉moi koko kubate kapikulinaka — lumagi anakapumi komo ba꞉gala ilina pilo komo, bohele pilo komo ba꞉gala eta lumagino kamena pilo komo, ha꞉da tabo olamagi komo ba꞉gala eta lumagino mahilo kubahimi komo.
MAT 15:20 Iyo, ba꞉ hibila! Ba꞉moi kubate pikuliti lumagi ba꞉bo kokubahimima꞉na꞉, huiyatiya lumagiti kokoto ukulahaheno baa꞉ da꞉namene ba꞉be komote ebeno ukui mabu a꞉kakubahima꞉mene.”
MAT 15:21 Ba꞉bene Ya꞉suti ba꞉be hopo miya꞉pate Taya ba꞉gala Saidono koko haboeno hopamo dito tuya꞉.
MAT 15:22 Ba꞉be Ka꞉inane hopolo demedenami, eta kamena ebe Yuha꞉ lumagila, ebete Ya꞉sutamo gaa꞉tepahago pete na꞉pegoiya꞉, “Da꞉ibidikono Hogo, na na꞉malemalenatena꞉! Naeno gudu bohele kuba gobogobagoenola, ba꞉bema꞉ ebete ko temeteme biya꞉tawana!”
MAT 15:23 Huiyatiya Ya꞉suti ba꞉be kamenoeno tabo kahuiyuya꞉ha꞉, ba꞉bema꞉ ebe ta꞉matapa꞉te ebetamo pelamete na꞉pega꞉luya꞉, “Ama꞉ ba꞉moe kamena gobogobamo noema꞉, mabu ebe ago da꞉patita howele konomo bododita.”
MAT 15:24 Ba꞉bema꞉ Ya꞉suti ibino tabo ba huiya na꞉goiya꞉, “Isalaela tawakalubi ipuwalo dalatidiholiya꞉, Godote na ba꞉bi sipi-goegoe kapiya oholema꞉ poenamiya꞉, komo hopo tawakaluba꞉tamoha꞉.”
MAT 15:25 Ba꞉bene ba꞉be Yuha꞉ kamenate ebeno tabo uliti ebetamo gala kapete ebeno nato mabamo pepapamiwatalo na꞉pegoiya꞉, “Kodawa, ama꞉ na nowalubina꞉.”
MAT 15:26 Ba꞉bema꞉ Ya꞉suti ebeno tabo ba huiya na꞉goiya꞉, “Mabu keka꞉ nale ama꞉ owalubima꞉ da꞉goita? Wadiyaha꞉ tawakaluba꞉te gugudino baa꞉ komopa꞉tamo dito ikalame, mabu ba꞉be ododi komo ba꞉ gahagahatamo ikalame komo huiyala.”
MAT 15:27 Kamenate Ya꞉sutamo na꞉goiya꞉, “Iyo, ama꞉le da꞉gaa꞉ ba꞉ hibila, huiyatiya eta ko dubuino baa꞉ naha habane hopamo da꞉penigudinaka, ba꞉bi baa꞉ hapuhapu gahagahate naha wadiyala!”
MAT 15:28 Ba꞉bene Ya꞉suti ebetamo na꞉goiya꞉, “Kamena, ama꞉godolo hibima꞉ midi komo konomo bitana, ba꞉bema꞉ ama꞉le ubi dihatita, na ba꞉be komo hibilo kododima꞉nemo.” Ba꞉ hibila, ba꞉ba tetenomolo ba꞉be kamenoeno bohelete ba꞉bo hiduya꞉.
MAT 15:29 Ba꞉bene Ya꞉suti ba꞉be hopo miya꞉pate Ga꞉lili Bobo dododo petote haka hunamo nodolote dito nemediya꞉.
MAT 15:30 Ba꞉ba tetelo tawakalubi hiliyonomate Ya꞉sutamo ba pelame iba꞉te ibino temetema꞉gopi ebetamo ba꞉bo magaheliya꞉, ba꞉ma ka꞉na iba꞉te nato kubakubapi, baidi tamihopi, tabo olamagimiha꞉pi, ba꞉gala komo hiliyonomo hiya꞉hiya꞉ tawetawa꞉gopi Ya꞉sutamo magahelete ebeno nato mabamo da꞉pewadila꞉lateliya꞉, ebete ibi ba꞉bo hiduilamiya꞉.
MAT 15:31 Ba꞉bene tawakaluba꞉te konomamo hanohanohuya꞉ mabu iba꞉te ibino baida꞉mo ba꞉moi komokomo ulamiya꞉, tabo olamagimiha꞉pa꞉te tabo olamagimiya꞉, nato kubakubapa꞉te a꞉wapata꞉lamiya꞉, ba꞉gala baidi tamihopa꞉te a꞉la꞉minahaliya꞉. Ba꞉bema꞉ ba꞉ba tetelo Godote Isalaela tawakalubi dowalubilinako, iba꞉te ebeno mahilo hunamo ba꞉bo adipatiya꞉.
MAT 15:32 Ba꞉bene Ya꞉suti ebe ta꞉matapi ebetamo ka꞉lamiti ibi na꞉goelamiya꞉, “Na ba꞉moi tawakalubi na꞉malemalelatilitamo, mabu iba꞉te nago netewa-kapiya hegela demedenati ibino baa꞉ a꞉wiboholami. Na ubihinola ibi baa꞉heno ibino habahabamo dito oelame. Diyala, iba꞉te gabo tetelo heloha꞉ma꞉ da꞉ neda꞉hamena꞉.”
MAT 15:33 Ebe ta꞉matapa꞉te ebetamo na꞉ga꞉luya꞉, “Moe baa꞉ha꞉ hopola. Ale ba꞉moi tawakalubi hiliyonomatamo baa꞉ ikalamehole modoboha꞉.”
MAT 15:34 Ba꞉bene Ya꞉suti ibi nalateda꞉liya꞉, “La꞉godolo kebaleta baa꞉te ka꞉pola꞉na?” Iba꞉te na꞉ga꞉luya꞉, “Sa꞉ba꞉ni baa꞉ ba꞉gala daha hegehege kapiyakapiyate pola꞉na.”
MAT 15:35 Ba꞉bene Ya꞉suti tawakalubi hakamo kahidima꞉ da꞉goelamiya꞉,
MAT 15:36 ba꞉ba tetelo ebete ba꞉bi sa꞉ba꞉ni baa꞉ komokomo ba꞉gala daha uwatete Godotamo kalakala tabo ba꞉bo goiya꞉, ba꞉bene ebete wakalamiholete ebe ta꞉matapa꞉tamo dito ikalamiya꞉ iba꞉te tawakaluba꞉tamo kikalameholema꞉.
MAT 15:37 Ba꞉ba tetelo puya꞉te ba꞉be baa꞉ da꞉nahuya꞉ ibino kape komo ba꞉ dito wiboholamiya꞉. Ba꞉ hibila, ba꞉be baa꞉ 4,000 dubate nahuya꞉ ibino kamenakamena guguda꞉go, ba꞉bene da꞉luhiliya꞉ ba꞉bi baa꞉ komokomamo Ya꞉suku ta꞉matapa꞉te sa꞉ba꞉ni bagolo betabuilamiya꞉.
MAT 15:39 Ba꞉bene Ya꞉suti ba꞉bi tawakalubi ibino habahabamo doelamiya꞉, ba꞉ba tetelo ebete boga꞉mo ololote Magadana hopamo ba꞉ dito tuya꞉.
MAT 16:1 Ba꞉bene komo Pa꞉lisi kapiyuimipi ba꞉gala Sa꞉diyusi kapiyuimipi iba꞉te ubi bihatiya꞉ Ya꞉sutamo pelamete ebe kuba gabamo kopemogabuimima꞉. Iba꞉te ebe ba꞉ma ka꞉na pega꞉lamiya꞉, “Ama꞉godolo Godokono helo ditana, ba꞉be komo hawakalimima꞉ eta hanohano komo atamo nododa꞉.”
MAT 16:2 Ya꞉suti tabo ba huiya iba꞉tamo na꞉goiya꞉, “Hegelate ba nihitiga hegela hunu hawihawima꞉ da꞉neda꞉mene, la꞉ ba꞉be komo umiti koga꞉lama꞉nemata, ‘Dumutu hegela hidamo kopowalohoma꞉ne.’
MAT 16:3 Ba꞉gala eta tetelo hegelate ba owalohuta la꞉ wegola bubu dulamema la꞉ koga꞉lama꞉nemata, ‘Ba꞉moe hegelate kokubama꞉ne.’ Iyo, la꞉ alomoeno komokomo ulame iya꞉tawahala, huiyatiya ba꞉ma tetelo Godote la꞉ ipuwalo dododilina ba꞉bi komoeno ipuwa la꞉ hidamo kiya꞉tawahanaha꞉.
MAT 16:4 Kuba ododilipi ba꞉gala hibima꞉ midiha꞉pi, ibi ubi konomola Godokono helo hawakalimino hanohano komo kumima꞉, huiyatiya Godote eta komo iba꞉tamo a꞉kahawakalima꞉mene. Ba꞉ hibila, ebete Yaonako ipuwado da꞉hawakalimiya꞉ ba꞉be hanohano komo kapiya la꞉tamo ikalamiya꞉ta.” Ba꞉ba tetelo Ya꞉suti ibi miya꞉palete ba꞉ dito tuya꞉.
MAT 16:5 Ba꞉bene Ya꞉suti ebe ta꞉matapa꞉go Ga꞉lili Bobo hapuamo da꞉na꞉hiwaliya꞉, ba꞉ba tetelo iba꞉te baa꞉ uwate komo nadoduya꞉.
MAT 16:6 Ya꞉suti iba꞉tamo na꞉goiya꞉, “La꞉ hidamo nulia꞉la꞉. Palawa baa꞉te ha꞉kiya hunamo da꞉mahiga, Pa꞉lisi kapiyuimipi ba꞉gala Sa꞉diyusi kapiyuimipi ibino awagaha komo ba꞉ba ka꞉nala. A꞉iye, ba꞉mako komote la꞉tamo akuluhukala꞉!”
MAT 16:7 Ba꞉bema꞉ iba꞉te ibi ipuwalo tabo ba꞉ma ka꞉na ga꞉luya꞉, “Ebete atamo ba꞉moe tabo begoe mabu ale baa꞉ kawadaheha꞉.”
MAT 16:8 Huiyatiya iba꞉te tabo da꞉ga꞉lutiya꞉ Ya꞉suti iya꞉tawate na꞉goiya꞉, “La꞉eno hibima꞉ midi komo kokoha꞉. La꞉le baa꞉heno pola꞉na tabo badama꞉ ka꞉ga꞉lutama?
MAT 16:9 Keka꞉ mabu la꞉le naeno hibi komo hidamo kuminaha꞉? Nale eta gapogapolo paibo baa꞉ 5,000 dubatamo da꞉wakalamiholenimo, ba꞉moe komoma꞉ la꞉godolo ukui ba꞉kitana? Ba꞉ba tetelo la꞉ kebaleta bagolo ka꞉tabuilameonima?
MAT 16:10 Ba꞉gala eta hegelalo nale sa꞉ba꞉ni baa꞉ 4,000 dubatamo da꞉kawakalamiholimo, ba꞉ba tetelo la꞉ kebaleta bagolo ka꞉tabuilamiuima?
MAT 16:11 La꞉ bada mabuma꞉ naeno komo hidamo kemalagidolonaha꞉? Nale la꞉eno baa꞉ naha komoma꞉ kagoeha꞉. La꞉ hidamo, Pa꞉lisi kapiyuimipi ba꞉gala Sa꞉diyusi kapiyuimipi ibino awagaha komote la꞉tamo akuluhukala꞉!”
MAT 16:12 Ba꞉bene Ya꞉suku ta꞉matapa꞉te ebeno tabo ipuwa hidamo ba꞉ma ka꞉na lawiya꞉, Ya꞉suti palawa baa꞉ hunamo mahiga tabo da꞉kiyalamiya꞉, ebete Pa꞉lisi kapiyuimipino awagaha iya꞉tulame komoma꞉ goiya꞉. Ebe ubihinola ba꞉be kubate ebe ta꞉matapa꞉tamo uluhuku.
MAT 16:13 Ba꞉bene Ya꞉suti Sisaliya-Pilipai hopamo da꞉nuluhukuya꞉ ebete ebeno ta꞉matapi ba꞉bo nalateda꞉liya꞉, “Na Tawakalubino Naniwi iba꞉te pokomo ka꞉ga꞉lanaka?”
MAT 16:14 Iba꞉te na꞉ga꞉luya꞉, “Komopa꞉te ama꞉ Yoneko beyamo wadulateledawama꞉ ga꞉lanaka, komopa꞉te ama꞉ Elayama꞉ ga꞉lanaka, komopa꞉te ama꞉ Yelemayama꞉ ga꞉lanaka, ba꞉gala komopa꞉te ama꞉ Godokono ukui hawakalimidawa etama꞉ ga꞉lanaka.”
MAT 16:15 Ba꞉bene Ya꞉suti ibi nalateda꞉liya꞉, “Huiyatiya la꞉le na pokomo ka꞉midinionama?”
MAT 16:16 Saimono Pitate tabo ba huiya na꞉goiya꞉, “Ama꞉ ba꞉ Kelisotela, iyo, ama꞉ ba꞉ Ka꞉ka꞉ Godoeno Gudulata!”
MAT 16:17 Ba꞉bene Ya꞉suti ebetamo na꞉huiyuya꞉, “Saimono, Yonekono gudu, ama꞉ koamo na꞉kalakala! Mabu ba꞉moe hibi komo eta lumagiti ama꞉ kiya꞉tumiha꞉, ama꞉ naeno Hunu Haboeno Nabiwiti iya꞉tumia꞉ta.
MAT 16:18 Na ama꞉tamo ba꞉ma ka꞉na goemo, ‘Ama꞉ ba꞉ Pitate, naeno nakolalata. Ba꞉ hibila, nale ba꞉moe nakola hunamo naeno sose ketema꞉nemo, ba꞉bema꞉ Saitanakono hoe komote ba꞉be sose kubahimima꞉ a꞉kamodobamene.
MAT 16:19 Numa꞉, nale Ko Gawadubu Godokono hiya꞉hiya꞉ ki ama꞉tamo kikamehoma꞉nemata. Ba꞉bema꞉ ama꞉le Saitanako koduhimima꞉ ba꞉moe hopolo kebe gigiho ba꞉moi kia꞉mo da꞉kalapilamena꞉ Godokono Hunu Habalo atu kalapila komote konitanama꞉ne, ba꞉gala ama꞉le lumagino ka꞉ka꞉ komula꞉mema꞉ ba꞉moe hopolo kebe gigiho ba꞉moi kia꞉mo da꞉hiya꞉midamena꞉, Hunu Habalo atu a꞉hiya꞉mida komote konitanama꞉ne.’”
MAT 16:20 Ba꞉bene Ya꞉suti ebeno ta꞉matapi koamo ba꞉ma ka꞉na kiyahalamiya꞉, “Nale Kelisoma꞉ hibilo deda꞉namo, la꞉le ba꞉moe komo komopi akakiyalama꞉la꞉!”
MAT 16:21 Ba꞉ba tetelo Ya꞉suti ebe ta꞉matapi iya꞉tulame ba꞉ma ka꞉na tupuimiya꞉, “Nale Yelusalema ko habamo tote tawakaluba꞉godone koko temeteme ba꞉bo konuwatema꞉nemo, Godokono ubila. Ba꞉bene Godotamo hawa꞉goeno ikamehopino watowatopi, ba꞉gala Godokono Tutumu iya꞉tulamepi, ba꞉gala komo koko dubu iba꞉te na kanakapunamema꞉na꞉, huiyatiya netewa-kapiya hegelalo Godote na hoene kadipanatenema꞉ne.”
MAT 16:22 Ba꞉bene Pitate Ya꞉suku komo ta꞉matapa꞉godone nanekela꞉mo magatate ebe koamo ba꞉ma ka꞉na kiyamiya꞉, “Kodawa, ba꞉moe kubate ama꞉tamo akuluhukala꞉, wadiyala Godote na꞉duhima꞉mene!”
MAT 16:23 Ba꞉bene Ya꞉suti ohobigate Pitatamo na꞉goiya꞉, “Pita, ama꞉ Saitanako huiyala! Na na꞉miya꞉pana꞉! Ama꞉le naeno nato ukamidadawama꞉ editata mabu amia꞉no ukui Godotamo kihatitaha꞉, ama꞉ tawakalubino ukuilo emedenata!”
MAT 16:24 Ba꞉ba tetelo Ya꞉suti ebe ta꞉matapi na꞉goelamiya꞉, “Kebe lumagiti na ta꞉mahenema꞉ ubi dihatemene, dopamo ebete ebeno komo adodolete ebeno keha pihiga aguti na ba꞉bo na꞉ta꞉mahena꞉mene.
MAT 16:25 Ba꞉ hibila, kebe lumagiti ebeno ka꞉ka꞉ natamo damawada꞉mene ebeno ka꞉ka꞉te kalatidima꞉ne, huiyatiya kebe lumagiti ebeno ka꞉ka꞉ na mabuma꞉ datutimini, ebete hibi ka꞉ka꞉ ebo konumima꞉ne.
MAT 16:26 Ba꞉bema꞉ lumagiti hopoeno ilina hiliyonomo uwatenomo ba uwate, ebeno ka꞉ka꞉ datutimini ba꞉be lumagino huiya keka꞉? Ebete ebeno ka꞉ka꞉ gala kakalawema꞉ bada ilina na꞉kikamemene? Gabo puliyala, kitanaha꞉.
MAT 16:27 Ba꞉ hibila, Tawakalubino Naniwiti ebeno hido-talona nopopa꞉go ba꞉gala Nabiwi Godokono helonomo alago kopema꞉ne. Ba꞉ba tetelo ebete tawakalubino komo ba anagilamelelame ibino modobo oko huiya hibilo kikalamema꞉ne.
MAT 16:28 Na la꞉tamo hibi tabo begoemo, ba꞉ma tetelo demedehona komo iba꞉te Tawakalubino Naniwi ebeno Ko Gawadubu heloago da꞉pemene, ba꞉be ko komo dopamo umiti galane ba꞉bo koha꞉lahama꞉na꞉.”
MAT 17:1 Ba꞉bene sikisi hegela da꞉wibuya꞉ Ya꞉suti Pitako, Ya꞉imesiko, ba꞉gala ebeno ekawi Yoneko, ibinomo bemagataliya꞉ eta hununomo hakamo.
MAT 17:2 Ba꞉ba tetelo ebe ta꞉matapino dopo hapulu Ya꞉sukunu apete hiya꞉ma꞉ ediya꞉, ba꞉bene ebeno holoholote hegeloeno a꞉la꞉mina keba ka꞉nala꞉ka꞉ ba꞉bakoma꞉ ba eda꞉, ebeno pupulino ilinate atumu keyakeyanomoma꞉ eda꞉hamiya꞉.
MAT 17:3 Ba꞉bene ta꞉matapino holoholo hapuamo Moseseko ba꞉gala Elayako iba꞉te puluhukuti Ya꞉sukuba꞉ tabo ba꞉bo ga꞉lutiya꞉.
MAT 17:4 Ba꞉ba tetelo Pitate Ya꞉sutamo na꞉goiya꞉, “Kodawa, ale ba꞉malo da꞉pola꞉nama꞉, kalakala konomola. Ama꞉ ubi dihatemena꞉, nale mimiya netewa-kapiya ketemotema꞉nemo, eta amia꞉nola, eta Mosesekonola, eta Elayakonola.”
MAT 17:5 Pitate ba꞉be tabo ba olamagita, ba꞉ba tetenomolo hiya꞉nomo a꞉la꞉mina hawaiti pete ibi dito patulateliya꞉, ba꞉bene hawai ipuwane tabote ba꞉ma ka꞉na piya꞉, “Ba꞉moe naeno kapiya Gudunomola, na ebetamo na꞉kalakalutamo. La꞉ ebeno tabo nulia꞉la꞉.”
MAT 17:6 Ba꞉bene Ya꞉suku ta꞉matapa꞉te ba꞉be tabo uliti konomamo ba toletoleho hakamo ba꞉bo gudiya꞉,
MAT 17:7 huiyatiya Ya꞉suti pete ibi ba pologihole na꞉pegoiya꞉, “Na꞉mahila꞉hala꞉, akatoletolehala꞉!”
MAT 17:8 Ba꞉ba tetelo iba꞉te baidi da꞉gahilameholiya꞉ eta lumagi kumiya꞉ha꞉, Ya꞉suku kapiyate ba꞉bolo la꞉nuya꞉.
MAT 17:9 Iba꞉te haka hununi ba pepalaga Ya꞉suti ibi na꞉pikiyalamiya꞉, “La꞉le kebe hanohano komo dumima, ba꞉be komo ba꞉ma tetelo komopi akakiyalama꞉la꞉, huiyatiya Godote na Tawakalubino Naniwi hoene gala da꞉kadipanatenemene tawakalubi ba꞉bo kokiyalamema꞉nemata.”
MAT 17:10 Ba꞉bene Ya꞉suku ta꞉matapa꞉te ebe nalatediya꞉, “Mabu keka꞉ Godokono Tutumu iya꞉tulamepa꞉te da꞉ga꞉lanaka, Elayate dopamo pete, ebeno gala hapuni Kelisote kopema꞉ne?”
MAT 17:11 Ebete tabo ba huiya na꞉goiya꞉, “Hibila, Elayako dopamo pete hiliyonomo komokomo kopetuputupuilamema꞉ne.
MAT 17:12 Na la꞉tamo na꞉goemo, Elayako tawakaluba꞉tamo ya꞉lo a꞉pi huiyatiya iba꞉te ebeno komo kiya꞉tawahaha꞉, ba꞉bene iba꞉te ibino ubilo koko kuba ebetamo ododilinakuya꞉. Ba꞉bema꞉ la꞉ niya꞉tawahala꞉, Tawakalubino Naniwiti atumu iba꞉godone koko temeteme hibilo kuwatema꞉ne.”
MAT 17:13 Ba꞉bene ebe ta꞉matapa꞉te ba꞉be taboeno ipuwa hidamo ba꞉ma ka꞉na lawiya꞉, Ya꞉suti Yoneko beyamo wadulateledawoeno komoma꞉ goe.
MAT 17:14 Ba꞉ba tetelo iba꞉te komo tawakaluba꞉tamo da꞉pikuliya꞉, eta dubuti Ya꞉sutamo pete pupamo pemedete
MAT 17:15 na꞉pegoiya꞉, “Kodawa, ama꞉ naeno kuhi na꞉malemaleta꞉! Mabu ebe ala꞉ komote lawenako, ba꞉bema꞉ komo tetelo ebe koa꞉mo ba꞉ga, beyamo ba꞉ga, ba꞉ba ka꞉na ewagelena.
MAT 17:16 Nale ebe ama꞉ ta꞉matapa꞉tamo da꞉magaha꞉kamo, huiyatiya iba꞉godolo helo puliyala ebe hiduimima꞉.”
MAT 17:17 Ya꞉suti huiyatiya iba꞉tamo na꞉goiya꞉, “A꞉iye, la꞉ hibima꞉ midiha꞉ kuba tawakalubilata! La꞉le natamo menemene bikanamenamata, ba꞉bema꞉ na ubihinola tete ga꞉ga꞉lo la꞉go emedena! La꞉ kuhi natamo na꞉magaha꞉la꞉!”
MAT 17:18 Ba꞉bene Ya꞉suti kuba gobogobo da꞉kiyahamiya꞉ ebete kuhi ipuwane dito uluhukuya꞉, ba꞉ba tetenomolo kuhiti ba꞉bo hiduya꞉.
MAT 17:19 Ba꞉bene komo tawakaluba꞉te pola꞉naha꞉ tetelo Ya꞉suku ta꞉matapa꞉te ebetamo pelamete na꞉pega꞉luya꞉, “Mabu keka꞉ ale kuba gobogobo oemema꞉ kamodobakaha꞉?”
MAT 17:20 Ebete iba꞉tamo na꞉goiya꞉, “Ba꞉be mabu ba꞉ma ka꞉na bitana, la꞉eno hibima꞉ midi komote hegehegema꞉ eda꞉hana. Na la꞉tamo hibi tabo begoemo, mastada kikipo koha꞉, deha꞉potonomola. Huiyatiya la꞉eno hibima꞉ midi komote ba꞉makoma꞉ deda꞉mene, la꞉eno helote modoboma꞉ ba eda꞉ ba꞉moe hakatamo koga꞉lama꞉nemata, ‘Ama꞉ ba꞉moene ebamo na꞉toatepa!’ ba꞉bene hakate la꞉eno tabamo kopapamiwatama꞉ne. Ba꞉moe tabo ba꞉ hibila, la꞉godolo hibima꞉ midi komo ba itana eta ododiha꞉ komote a꞉kitanamene, iyo, kodakoda komote modobonomoma꞉ keda꞉ma꞉ne.
MAT 17:21 Ba꞉bema꞉ la꞉le la꞉eno emede ipuwalo komo tetelo baa꞉ nahaheno ba pola꞉na Godokoba꞉ tabo da꞉ga꞉lanakoma, la꞉le helo ba꞉bo kolawema꞉nemata ba꞉mako kuba gobogobo oemema꞉.”
MAT 17:22 Eta tetelo Ya꞉suku ta꞉matapa꞉te Ga꞉lili hopolo gala da꞉kakapiyuya꞉, ebete iba꞉tamo na꞉goiya꞉, “Godote Tawakalubino Naniwi kuba tawakalubino kokotamo kihatema꞉ne,
MAT 17:23 ba꞉bene iba꞉te ebe kanakapumima꞉na꞉, huiyatiya netewa-kapiya hegelalo Godote ebe hoene gala kakadipatema꞉ne.” Ba꞉bema꞉ Ya꞉suku ta꞉matapa꞉te ebeno tabo uliti tepo temeteme konomo ba꞉bo lawiya꞉.
MAT 17:24 Ya꞉suku ta꞉matapa꞉te Kapeniyama habamo da꞉pelamiya꞉, ba꞉ba tetelo komo dubate Pitatamo pikuliya꞉ Godoko Adikumino Hiya꞉ Genamoeno ka꞉pita꞉isin huiya uwatema꞉. Iba꞉te tabo ba꞉ma ka꞉na pega꞉luya꞉, “La꞉eno iya꞉tulamedawate Godokono Genamoeno ta꞉kese mani a꞉kihatenako?”
MAT 17:25 Pitate na꞉goiya꞉, “Iyo, ihatenako.” Ba꞉bene Pitate genamamo da꞉nodoluya꞉ ebete tabo goeheno dopamo Ya꞉suti ebe na꞉goemiya꞉, “Saimono, amia꞉no ukui keba ka꞉nala꞉ka꞉? Ba꞉moe hopoeno koko gawadubatamo ta꞉kese mani puya꞉te ka꞉miya꞉tenaka? Atu hopo tawakaluba꞉tela꞉ka꞉ o kapela tawakaluba꞉tela꞉ka꞉?”
MAT 17:26 Pitate ebeno tabo ba huiya na꞉goiya꞉, “Kapela tawakaluba꞉te ha꞉kiya miya꞉tenaka.” Ya꞉suti na꞉goiya꞉, “Iyo, ba꞉ hibila, atu hopo tawakaluba꞉te gabomana꞉tamo ta꞉kese mani a꞉kamiya꞉ta꞉la꞉. Numa꞉la꞉, a Yu tawakalubi ba꞉moe Isalaela hopoeno gugudila, ba꞉bema꞉ mabu keka꞉ ale Godokono Genamoeno okopa꞉tamo ka꞉pita꞉isin mani dikalamenakoma꞉? Mabu kitanaha꞉.
MAT 17:27 Huiyatiya na iba꞉tamo temeteme ikalame ubihinola, ba꞉bema꞉ ama꞉ Ga꞉lili bobamo tote kimai na꞉notalama꞉. Dopamo da꞉ta꞉mugamene ba꞉be daha lawete ebeno tabo alalaa꞉midamete kapiya siliba mani ba꞉bo numiya꞉, ba꞉bene ama꞉ ba꞉be mani lawete Godokono Genamoeno okopa꞉tamo na꞉nikalamiya꞉, amia꞉no ba꞉gala naeno ka꞉pita꞉isin huiya komoma꞉.”
MAT 18:1 Ba꞉ba tetelo Ya꞉suku ta꞉matapa꞉te pelamete ebe na꞉pega꞉lamiya꞉, “Godote Ko Gawadubuma꞉ deda꞉na, ba꞉be habalo kodawama꞉ pote na꞉keda꞉mene?”
MAT 18:2 Ba꞉bene ebete gudu deha꞉poto ebetamo ka꞉miti ibi tetenomamo adipiti
MAT 18:3 na꞉goiya꞉, “Na la꞉tamo hibi tabo begoemo, la꞉le la꞉eno awagaha ukui hiya꞉ma꞉ midiliti gugudi hegehege keba ka꞉nala꞉ka꞉ ba꞉bakoma꞉ neda꞉huya꞉la꞉, mabu la꞉ ba꞉ba ka꞉na ewageleheno Godokono Ko Gawadubu habamo a꞉kana꞉pa꞉la꞉hamata.
MAT 18:4 Ba꞉ hibila, kebe lumagiti ba꞉mako gudu deha꞉potomo ebe ha꞉kiya ebe hopamo dihatemene, ebete Godokono Ko Gawadubu habalo kodawama꞉ koneda꞉ma꞉ne,
MAT 18:5 ba꞉gala kebe lumagiti naeno mahilamo ba꞉mako gudu deha꞉poto kalakalago dowalubina ebete na atumu na꞉kowalubinina.”
MAT 18:6 Ba꞉bene Ya꞉suti gala na꞉kagoiya꞉, “Ba꞉bema꞉ deha꞉poto guduti na hibima꞉ ba midinina, kebe lumagiti ebe kuba gabamo demogabuimina, wadiyala tawakaluba꞉te ebe lawete ebeno kokoba꞉mo konomo nakola ma꞉homete kehaha꞉ kolomamo na꞉da꞉namena꞉ ebete kulukulu beyamo kululuma꞉.
MAT 18:7 La꞉ nulia꞉la꞉, ba꞉moe hopo habate kubanomo kokubama꞉ne! Hibila, Saitanakono kuba gabamo emogabuimi komate tawakaluba꞉tamo kikulihoma꞉na꞉, huiyatiya kebe lumagigodone ba꞉mako kuba komote duluhukumini, Godote ebetamo kuba huiya konomo kikamema꞉ne!
MAT 18:8 “Ba꞉gala amia꞉no kokotote o natote ama꞉ kuba gabamo demogabuimina, wadiyala ama꞉ itamidate gobogobamo na꞉da꞉na! Wadiyala ama꞉le kapiya kokotago o kapiya natago Godokono Ka꞉ka꞉ Habamo nopega, kubala kokoto netewago ba꞉gala nato netewago Godote ama꞉ Koe Habamo na꞉da꞉na. Ba꞉ hibila, ba꞉be habalo koete itana tetelo na꞉woena.
MAT 18:9 Ba꞉gala amia꞉no baiditi ama꞉ kuba gabamo demogabuimina, wadiyala ama꞉ magubutiti gobogobamo na꞉da꞉na. Wadiyala ama꞉le kapiya baida꞉go Godokono Ka꞉ka꞉ Habamo nopega, kubala baidi netewago Godote ama꞉ Koe Habamo na꞉da꞉na.”
MAT 18:10 Ba꞉bene Ya꞉suti gala na꞉kagoiya꞉, “Nale la꞉tamo na꞉goemo, Godote hegehege gugudi konomamo ba emalagidole ebete ebeno nopopi iba꞉tamo poelamenako ibi kopebuiya꞉minalema꞉. Ba꞉bema꞉ la꞉ hidamo, la꞉ ba꞉mako gudu deha꞉poto ubiha꞉ma꞉ eda꞉hate la꞉eno tabamo ebe akakubahima꞉la꞉.
MAT 18:11 Ba꞉gala eta komo. Puya꞉te kuba ododili ipuwalo dalatidiholena, na Tawakalubino Naniwiti ba꞉bi tawakalubino ka꞉ka꞉ mula꞉lelamema꞉ piya꞉mo.
MAT 18:12 “Ba꞉bema꞉ la꞉ ba꞉moe komo keba ka꞉na na꞉kemalagidoloma? Eta dubu ebeno 100 sipi-goegoa꞉te da꞉pola꞉ma꞉na, ba꞉bene kapiyate dalatidimini ebete bada komo na꞉kododimini? Iyo, ebete 99 sipi-goegoe hido hemo hopolo miya꞉palete, ebete hunuhunu hakamo gala kanodolote dalatidi ba꞉be sipi-goe konohowadima꞉ne.
MAT 18:13 Nale la꞉tamo hibi tabo begoemo, ba꞉be dubuino kalakalate bitana komo alatidiholeha꞉ 99 sipi-goegoa꞉tamo, huiyatiya ebete dalatidi ba꞉be sipi-goe da꞉numimini ebeno kalakalate konomoma꞉ keda꞉ma꞉ne. Ba꞉ hibila, kalakala bada konomola꞉ka꞉!
MAT 18:14 Ba꞉bema꞉ la꞉eno Hunu Haboeno Nabiwiti atumu ubihinola ba꞉mako gudu deha꞉poto kapiyate alatidi.”
MAT 18:15 Ba꞉bene Ya꞉suti gala na꞉kagoiya꞉, “Amia꞉no naniwiti ama꞉tamo kuba komo dododimini, ama꞉ diya gabodo tote ebeno kuba komo ebe na꞉niya꞉tuma꞉. Ba꞉bene ebete amia꞉no tabo hibinomolo dulimini, wadiyala ama꞉ eba꞉go gala mabulubima꞉ na꞉kediya꞉la꞉.
MAT 18:16 Huiyatiya ebete amia꞉no tabo uliha꞉ma꞉ deda꞉mene, ba꞉ba tetelo ama꞉ owalubima꞉ ama꞉le komo tawakalubi kapiya o netewa na꞉nuwatiya꞉, ba꞉bene la꞉ naniwitamo pawa tolamete atu tabo da꞉nikiyahamema, ebete ba꞉ba tetelo la꞉eno tabo hibima꞉ komidima꞉ne.
MAT 18:17 Huiyatiya ebete la꞉eno tabo uliha꞉ma꞉ gala da꞉keda꞉mene, la꞉le ebeno komo sose tawakaluba꞉tamo na꞉nehawakalimiya꞉la꞉, ba꞉bene ebete sose tawakalubi hiliyonomoeno tabo uliha꞉ma꞉ deda꞉mene, wadiyala, nitanamene. Ba꞉ba tetelo la꞉le ebe hibima꞉ midiha꞉dawa keba ka꞉nala꞉ka꞉ ba꞉gala mani pilo dubu keba ka꞉nala꞉ka꞉ ba꞉bako lumagima꞉ miditi eba꞉go gala akakapiyala꞉.”
MAT 18:18 Ba꞉bene Ya꞉suti gala na꞉kagoiya꞉, “Na la꞉tamo hibi tabo begoemo, la꞉ Saitanakono komo koduhimima꞉ ebe keba ka꞉na da꞉matuhumihoma, ba꞉be matuhumiho komote Godokono Hunu Habalo ba꞉ba ka꞉na konitanama꞉ne, ba꞉gala lumagino ka꞉ka꞉ komula꞉mema꞉ la꞉ kebe komo ba꞉moe hopolo da꞉pahamima, ba꞉be atu komote Hunu Habalo pahami ba꞉ba ka꞉na konitanama꞉ne.
MAT 18:19 Ba꞉bema꞉ nale la꞉tamo eta komo bekagoemo, la꞉ hibima꞉ midipi netewapa꞉te ukui kapiyama꞉ eda꞉hate naeno Hunu Haboeno Nabiwi toemeholo ebete eta komo matuhumima꞉ da꞉kiyamema, hibila, ebete la꞉eno tabo uliti ba꞉ ba꞉ba ka꞉na kododima꞉ne.
MAT 18:20 Mabu netewa o netewa-kapiya hibima꞉ midipa꞉te ukui kapiyalo ba pola꞉na, iba꞉te naeno mahilo da꞉ka꞉mimina꞉ nale ba꞉bolo iba꞉go hibilo kolutama꞉nemo.”
MAT 18:21 Ba꞉ba tetelo Pitate Ya꞉sutamo pete na꞉pegoiya꞉, “Kodawa, naeno ekawi natamo kuba dododilinako na ebeno kuba kebako teta꞉mo na꞉kadodolememo? Sa꞉ba꞉ni teta꞉mo wadiyala꞉ka꞉?”
MAT 18:22 Ya꞉suti ebetamo na꞉huiyuya꞉, “Na ama꞉tamo na꞉goemo, sa꞉ba꞉ni teta꞉moha꞉. Ao, wadiyala ama꞉le amia꞉no emedena tetelo ba꞉ma ka꞉na 77 teta꞉mo ebeno kuba egebolemete nadodolemenakuya꞉.”
MAT 18:23 Ba꞉bene ebete tabo moga꞉melo na꞉goiya꞉, “La꞉ numa꞉la꞉, Godote Ko Gawadubuma꞉ deda꞉na, ba꞉be komo ba꞉moe uwino ipuwa keba ka꞉nala꞉ka꞉ ba꞉ ba꞉ba ka꞉nala. Eta hopoeno Ko Gawadubuti ebeno koko mani ba ka꞉lamihole ebeno ukui nitama꞉nui ebeno okopino hibi komo kopulamelelamema꞉. Ba꞉bene ebete ebeno ukui ba꞉ma ka꞉na ihati, okopi ipuwalo puya꞉te ebegodone owalubi mani dito duwata꞉digahui ibino komo kotuputupuilamema꞉.
MAT 18:24 Ba꞉bene ebete mani ka꞉lamihole da꞉tupuimi, ba꞉ba tetelo komopa꞉te ebetamo dopo okodawa bemagahiya꞉, ba꞉be dubuti ta꞉ni taosene koko mani ebegodone dopamo dito uwata꞉digui.
MAT 18:25 Mabu ebete ba꞉be mani huiyama꞉ ebegodolo gabote kitanuiha꞉, ba꞉bema꞉ Ko Gawadubuti ebeno hopopa꞉tamo tabo ba꞉ma ka꞉na goi, ‘La꞉ ba꞉moe dubu, ebeno kamena ebeno gugudi eba꞉go, ibi hiliyonomo uwatete komo koko dubatamo kolowamilo nikalama꞉la꞉, iba꞉te emedena tetelo ibino huiyaha꞉ okopima꞉ keda꞉hanama꞉. Na ba꞉be gabodo ba꞉moe dubuino kuba huiya ebetamo kikamema꞉nemo.’
MAT 18:26 “Ba꞉ba tetelo huiyaha꞉ dubuti hopamo gate ebeno pupamo emedete Ko Gawadubutamo toetoelo na꞉goi, ‘Hiya꞉, ama꞉ nuta꞉tepa. Na gabo numiti ba꞉bako ko huiya hibilo kopehuiyama꞉nemo!’
MAT 18:27 “Ko Gawadubuti huiyatiya ebe malemaletelo na꞉goemi, ‘Amia꞉no huiyaha꞉ komo nale egebolemete adodolememata. Ama꞉ kalakalago na꞉toa!’
MAT 18:28 “Huiyatiya ba꞉be huiyaha꞉ okodawate Ko Gawadubugodone uluhukuti ba to ebeno eta mabulubi ba꞉bo numi, ba꞉be mabulubiti ebegodone dopamo 100 hegehege mani duwati, gala ebetamo kahuiyaha꞉. Ba꞉ba tetelo ebete ebe kokobene lawete ba idadanaa꞉midaha na꞉goemi, ‘Ama꞉ naeno mani natamo tiyonomo na꞉huiya!’
MAT 18:29 “Ba꞉bene ebeno mabulubiti hopamo gate ebetamo toetoelo na꞉goi, ‘Hiya꞉, ama꞉ nuta꞉tepa. Na gabo numiti hibilo kopehuiyama꞉nemo!’
MAT 18:30 “Huiyatiya ebete ebeno mabulubi malemaleteheno du genamamo ba꞉ dito magatui, ebete ba꞉bolo ba emedena ebeno tawakaluba꞉te pehuiyate ebe ba꞉bo kopuluhukutima꞉.
MAT 18:31 Ba꞉ba tetelo komo okopa꞉te ba꞉be komo umiti tepo temetemema꞉ ba eda꞉ha, iba꞉te tolamete ibino Ko Gawadubutamo ba꞉be komo ba꞉bo nehawakalimiya꞉.
MAT 18:32 “Ba꞉bene Ko Gawadubuti ba꞉be okodawa ka꞉miti koamo ba kiyahame na꞉goemi, ‘Ama꞉ kubanomo okodawalata! Ama꞉le ka꞉lo duiduiyalo na da꞉toenamehona꞉ka, nale amia꞉no konomo huiyaha꞉ komo dito egebolema꞉kamata.
MAT 18:33 Ba꞉bema꞉ mabu keka꞉ ama꞉le naeno eta okodawa kamalemaleta꞉kaha꞉, nale ama꞉ da꞉malamaleta꞉kama ba꞉ba ka꞉na?’
MAT 18:34 Ba꞉ba tetelo Ko Gawadubuti ebetamo koamo maubate du genamamo dito noemi, ebete ba꞉bolo ko temetema꞉go ba emedena ta꞉ni taosene koko mani huiyate ba꞉bo kopuluhukuma꞉.”
MAT 18:35 Ba꞉bene Ya꞉suti kuititi tabo ulihopa꞉tamo na꞉goiya꞉, “La꞉ numa꞉la꞉! La꞉le la꞉eno tepo ipuwoeno malemale hawakalilameheno ba꞉gala komo tawakalubino kuba egebolelameheno, ba꞉ba tetelo naeno Hunu Haboeno Nabiwiti la꞉tamo atumu ba꞉ba ka꞉na ododiti la꞉ ko temeteme habamo konoelamema꞉na꞉ta.”
MAT 19:1 Ba꞉bene Ya꞉sukunu tabo olamagi komote da꞉wibomiya꞉, ebete Ga꞉lili hopo miya꞉pate Yudiya hopodo petote Yodane Tuli hapuamo dito nuluhukuya꞉.
MAT 19:2 Ba꞉ba tetelo tawakalubi hiliyonomate ba꞉be hopamo ebe da꞉ta꞉matuya꞉, ebete ibino temetema꞉gopi ba꞉bo nihiduilamiya꞉.
MAT 19:3 Ba꞉bene komo Pa꞉lisi kapiyuimipa꞉te Ya꞉suku kuba gabamo kemogabuimima꞉ ebetamo pelamete ebe na꞉palatediya꞉, “Kamenate ebeno awitamo bada ko kuba ododiti ebo na꞉kibukimini? O ba꞉ba tetelo awiti ebe dibukimini Godokono Tutumu Tabo ba꞉kadikanalemene?”
MAT 19:4 Ya꞉suti tabo ba huiya na꞉goiya꞉, “Wadiyala la꞉ Godokono Bukoeno eta tabo hidamo nemalagidolala꞉. Ba꞉be tabote ba꞉ma ka꞉na itana, Godote ba꞉moe hopoeno tupuimi mabuni dubu kamena bododiliya꞉,
MAT 19:5 ba꞉bene ebete na꞉goiya꞉, ‘Ba꞉moe mabuma꞉ dubuti ebeno nabiwi ba꞉gala menoko miya꞉palete, ebeno kamenago kapiya bahilo kemedema꞉na꞉, ba꞉bene ibi netewapa꞉te kapiyama꞉ eda꞉te gala hiya꞉ma꞉ a꞉keda꞉mena꞉.
MAT 19:6 Iyo, ibi ba꞉ kapiyanomola.’ Numa꞉la꞉, Godote ibi netewapi kapiyama꞉ a꞉midiliya꞉, ba꞉bema꞉ lumagiti ibi hiya꞉ma꞉ midili modoboha꞉.”
MAT 19:7 Ba꞉bene Pa꞉lisi kapiyuimipi dubate Ya꞉sutamo na꞉ga꞉luya꞉, “Ama꞉ da꞉gaa꞉ ba꞉be tabote hibima꞉ deda꞉mene, keka꞉ mabu Mosesete tutumu tabo ba꞉ma ka꞉na dihatiya꞉, dubuti ebeno kamena ibukima꞉ kamena ibuki pepa ododiti ebetamo kikamema꞉ne?”
MAT 19:8 Ya꞉suti iba꞉tamo na꞉goiya꞉, “Mabu la꞉eno tepo ipuwa kodakoda hibinomola Mosesete ba꞉moe tutumu la꞉tamo ba꞉bema꞉ ikalamiya꞉ta, huiyatiya ba꞉moe hopoeno tupuimi mabuni Moseseko teta꞉mo puluhuku ba꞉be komote ba꞉ba ka꞉na kitanamiha꞉.
MAT 19:9 Ba꞉bema꞉ nale la꞉tamo goemo, kamenate eta dubago kuba ododihino, ba꞉ba tetelo ebeno awiti ebe ibukiti eta kamena da꞉lawemene, ebete Godokono holoholo hapulu ba꞉be kamena pilolo kolawema꞉ne.”
MAT 19:10 Ba꞉bene Ya꞉suku ta꞉matapa꞉te ebetamo na꞉ga꞉luya꞉, “Dubuti kamena lawe ipuwalo ba꞉mako kodakoda komote ditanamene, modobola dubate kamenakamena a꞉kuwatehola꞉mena꞉.”
MAT 19:11 Ba꞉ba tetelo Ya꞉suti huiyatiya na꞉goiya꞉, “Nale la꞉ diya꞉tulamema ba꞉be taboeno ipuwa kodakoda hibila. Godote puya꞉tamo mulu dikalamemene ibinomate ibino ukuilo ba꞉moe taboeno ipuwa lawe komodoboma꞉na꞉.
MAT 19:12 Komo dubate kamenakamena uwateholema꞉ kamodobohonaha꞉, mabu komo ibino apete menokobino tepo ipuwalo kubakubadopoma꞉ eda꞉tepahalamiya꞉. Ba꞉gala komo dubate kamenakamena uwateholema꞉ kamodobohonaha꞉, mabu alaholo ipuwalo komopa꞉te ibi ba꞉ba ka꞉na amilatiliya꞉. Ba꞉gala komo dubate kamenakamena uwateholema꞉ kamodobohonaha꞉, mabu ibi ha꞉kiya ibi ba꞉ba ka꞉na midilina Ko Gawadubu Godokono oko kowatihonama꞉. Ba꞉bema꞉ kebe lumagiti ba꞉moe taboeno ipuwa lawe da꞉modobomene, wadiyala ebete na꞉lawa꞉mene.”
MAT 19:13 Ba꞉bene tawakaluba꞉te gugudi Ya꞉sutamo na꞉magataliya꞉ ebete iba꞉tamo kokoto ba emowatilame Godoko kogoemema꞉ ebete ibi hidamo kowalubilinama꞉. Huiyatiya ebe ta꞉matapa꞉te tawakalubi ba kiyahalame ibi da꞉duhilamiya꞉,
MAT 19:14 Ya꞉suti ibino ododi komo umiti na꞉goiya꞉, “Gugudi natamo pelame wadiyala. Akaduhilama꞉la꞉ mabu ba꞉mako tawakaluba꞉te Godote Ko Gawadubuma꞉ deda꞉na ba꞉be habamo kona꞉pa꞉la꞉hama꞉na꞉.”
MAT 19:15 Ba꞉bene ba꞉bi gugudi kowalubilima꞉ ebete ebeno kokoto iba꞉tamo emowatilamete, ibi ba miya꞉pale ebeno to gabodo ba꞉ dito tuya꞉.
MAT 19:16 Ba꞉ba tetelo eta dubuti Ya꞉sutamo pete na꞉pegoiya꞉, “Iya꞉tulamedawa, na bada hido komo ododiti wiboha꞉ ka꞉ka꞉ ebo na꞉ka꞉lawemo?”
MAT 19:17 Ya꞉suti ebetamo na꞉goiya꞉, “Ama꞉le hido komo ododima꞉ na badama꞉ ka꞉kiyanama꞉wa? Godoko kapiyate hidodawala, ba꞉bema꞉ ama꞉ ubi dihatemena꞉ ebeno Ka꞉ka꞉ Habamo na꞉pa꞉gama꞉, wadiyala ama꞉le ebeno Tutumu Tabamo na꞉papamiwatanakuya꞉.”
MAT 19:18 Dubuti ebetamo na꞉huiyuya꞉, “Kebe tutumu taboma꞉ ka꞉gaa꞉wa?” Ya꞉suti ebeno tabo ba huiya na꞉goiya꞉, “Ama꞉ lumagi akanakapuma꞉la꞉, eta lumagino kamena pilolo akalawa꞉la꞉, ilina pilolo akuwata꞉la꞉, eta lumagino komoma꞉ ha꞉da tabo akolamaga꞉la꞉,
MAT 19:19 ba꞉gala amia꞉no nabiwi menoko ibino tabamo na꞉papamiwatanakuya꞉. Ba꞉gala eta tutumu tabote ba꞉ma ka꞉na bitana, ama꞉ ha꞉kiya ama꞉ demalagidolona, wadiyala ama꞉le ba꞉ba ka꞉na ama꞉ tamelo demedena ba꞉be lumagi malemalelo nemalagidolona.”
MAT 19:20 Ba꞉bene ba꞉be uli ape dubuti Ya꞉sutamo na꞉goiya꞉, “Na ba꞉moi hiliyonomo tutumu kodakodalo uwatete eta kapiya kadikanaliya꞉ha꞉. Ba꞉bema꞉ na bada eta komo na꞉kododimo?”
MAT 19:21 Ya꞉suti tabo ba huiya na꞉goiya꞉, “Ama꞉le hidonomo lumagima꞉ keda꞉ma꞉ ubi hibilo dihatemena꞉, wadiyala ama꞉ tote komopa꞉te amia꞉no ilina mana꞉mo uwatehomete, ama꞉le ba꞉bi mani awaepa꞉tamo dito na꞉nikalamehola꞉. Ba꞉ba tetelo ama꞉ gala kapete na na꞉ta꞉maheniya꞉, ba꞉bene amia꞉no ilina hiliyonomate Godokono Hunu Habalo konepola꞉nama꞉na꞉.”
MAT 19:22 Ba꞉be uli ape dubuti ba꞉be tabo uliti tepo menemena꞉go dito tuya꞉, mabu ebe ilina dogodogodawanomola.
MAT 19:23 Ba꞉bema꞉ Ya꞉suti ebe ta꞉matapi na꞉goelamiya꞉, “Na la꞉tamo hibi tabo begoemo, Godote Ko Gawadubuma꞉ deda꞉na, ilina hiliyonomagodawate ba꞉be habamo na꞉pa꞉gama꞉ kodakodanomola!
MAT 19:24 Nale la꞉tamo eta komo bekagoemo, ka꞉molo-goete kaliko akohomehoeno ola gugudu nilupiga kodakodama꞉ eda꞉na, gabohenola. Ba꞉ atumu ilina hiliyonomagodawate Godokono Ko Gawadubu habamo na꞉pa꞉ga kodakodanomola, gabote hibinomolo a꞉kitanamene.”
MAT 19:25 Ya꞉suku ta꞉matapa꞉te ba꞉be tabo uliti konomamo la꞉wa꞉hate ebetamo na꞉ga꞉luya꞉, “Ama꞉ da꞉gaa꞉ ba꞉be tabote hibima꞉ deda꞉na, puya꞉te modobola꞉ka꞉ Godote ibino ka꞉ka꞉ mula꞉lelamema꞉?”
MAT 19:26 Huiyatiya Ya꞉suti ibi ulamenate na꞉goiya꞉, “Tawakaluba꞉te ha꞉kiya ibino ka꞉ka꞉ mula꞉le modoboha꞉, huiyatiya Godoko kapiyate modobola mabu ebegodolo helo bitana hiliyonomo komokomo ododilima꞉.”
MAT 19:27 Ba꞉bene Pitate Ya꞉sutamo ba huiya na꞉goiya꞉, “Ama꞉ numa꞉, a ilina hiliyonomo miya꞉palete ama꞉ na꞉ta꞉mahenata. Ba꞉bema꞉ Godote atamo bada huiya na꞉kikaa꞉memene?”
MAT 19:28 Ya꞉suti iba꞉tamo na꞉goiya꞉, “Na la꞉tamo hibi tabo begoemo, Godote ba꞉moe hopoeno hiliyonomo hiya꞉hiya꞉ ilina ulinoma꞉ da꞉midilimini, ba꞉ba tetelo na Tawakalubino Naniwiti naeno Ko Gawadubu emede bahilo konomo alago kolutama꞉nemo. Ba꞉bene atu tetelo la꞉le na da꞉ta꞉mahenenama, la꞉ koko gawadubuino gagahidi bahilo gagahiditi Isalaela 12 gu tawakalubino komokomo anagilamelelamepima꞉ keda꞉hama꞉nemata.
MAT 19:29 Hibila, kebe lumagiti ebeno genama, o ebeno nani nanikokubi ekaki, o ebeno nabi menokobi gugudi ba꞉gala ebeno hopo, ebete na mabuma꞉ ba꞉bi komokomo da꞉miya꞉palemene, ebete ba꞉bi atu komokomo hiliyonomo gala kakuwatema꞉ne, ba꞉gala galane nale ebetamo wiboha꞉ ka꞉ka꞉ kikamema꞉nemo.
MAT 19:30 Iyo, ka꞉lo dopopi hiliyonomo da꞉pola꞉na iba꞉te galane galapima꞉ keda꞉hama꞉na꞉, ba꞉gala ka꞉lo galapi da꞉pola꞉na iba꞉te galane dopopima꞉ keda꞉hama꞉na꞉.”
MAT 20:1 Ba꞉be atu tetelo Ya꞉suti na꞉kagoiya꞉, “Godote Ko Gawadubuma꞉ deda꞉na, ba꞉be komo ba꞉ ba꞉ma ka꞉nala. Eta ko dubuti duiduiyanomolo mahigate ebeno genamane uluhukuti ba꞉bo tui ebeno gao pali okopi konuwatema꞉.
MAT 20:2 Ba꞉bene ebete komo dubu nulamete iba꞉tamo kapiya hegeloeno oko huiya ikalamema꞉ negoelami. Iba꞉te ebeno tabo uliti modoboma꞉ da꞉ga꞉lui, ebete ibi ba꞉bo oelami ebeno pali oko konetupuimima꞉.
MAT 20:3 “Ba꞉bene hegelate nanekela꞉mo da꞉podolatepui, ebete gala katote komo dubu kolowami habalo dito la꞉mota꞉hanalo da꞉nulami,
MAT 20:4 ebete iba꞉tamo na꞉goi, ‘Wadiyala la꞉ atumu naeno pali okamo na꞉katolama꞉la꞉, ba꞉bene nale oko huiya la꞉tamo modobolo kikalamema꞉nemata.’
MAT 20:5 Ba꞉ba tetelo iba꞉te atu pali okamo dito katolamiya꞉. “Ba꞉bene hegela tuli tetelo ba꞉gala hegelate dewegelegui, ba꞉bi netewa teta꞉mo ebete gala katote komo okopi atumu kanulamete okamo ba꞉bo kanoelami.
MAT 20:6 Ba꞉bene hegelate gala da꞉katoatepui, ebete gala katote komo dubu kolowami habalo dito la꞉mota꞉hanalo nulamete na꞉negoelami, ‘Bada mabuma꞉ la꞉ ka꞉lo hegelalo okoheno dito da꞉pola꞉nama?’
MAT 20:7 “Iba꞉te ebetamo na꞉huiyuya꞉, ‘Mabu etate atamo oko kikaa꞉ma꞉kaha꞉.’ “Ba꞉bene ko dubuti iba꞉tamo na꞉goi, ‘Wadiyala la꞉ atumu naeno pali okamo na꞉katolama꞉la꞉.’
MAT 20:8 “Da꞉gapogapohoni ba꞉be pali namutudawate penate ebeno oko umidawatamo na꞉pegoeni, ‘Ama꞉ okopi hiliyonomo ka꞉lamiti huiya nikalamehola꞉. Galanenomolo oko da꞉petupuima꞉ka ba꞉bi dubagodone tupuimiti, huiyatiya duiduiyanomolo oko da꞉petupuima꞉ka ama꞉le ibi kuititilo nowalubiliya꞉.’
MAT 20:9 “Ba꞉bene galanenomolo oko da꞉tupuimi ba꞉bi dubate dopamo pelamenate, ebete iba꞉tamo kapiya hegeloeno modobo oko huiya ba꞉ba ka꞉na ikalameni.
MAT 20:10 Ba꞉bene duiduiyanomolo oko da꞉tupuimi ba꞉bi dubate pelamenate kodopamo na꞉puwatenamo pemalagidoloniya꞉, huiyatiya ebete iba꞉tamo ba꞉ atu huiyanomo beka-ikalameholeni.
MAT 20:11 Ba꞉ba tetelo iba꞉te huiya uwatenate pali namutudawatamo ubiha꞉ tabo ba ga꞉lana,
MAT 20:12 ibi ipuwalo etate penate na꞉pegoeni, ‘Galane da꞉tupuima꞉ka iba꞉te tete nanekela꞉mo powatiti huiyatiya ba꞉be oko huiya ago modobolo badama꞉ kuwata꞉, mabu a hegela konomolo oko ko kolohago owatitakama꞉?’
MAT 20:13 “Ba꞉ba tetelo ebete na꞉huiyani, ‘Naeno mabulubi, na eta kuba komo ama꞉tamo kododiha꞉. Duiduiyalo ama꞉la, nala, ale hibi tabonomo bega꞉lakama꞉ ama꞉ kapiya hegeloeno modobo oko huiya kolawema꞉, nale ama꞉tamo ba꞉ma ka꞉na ba꞉bema꞉ ikamemata.
MAT 20:14 Ba꞉bema꞉ amia꞉no huiya lawete kalakalago na꞉toa. Ama꞉le oko huiya da꞉lawa꞉, nale ba꞉be atu modobo mani galane da꞉tupuima꞉ka iba꞉tamo ubi dihatemo, nale ba꞉ ba꞉ba ka꞉na kikalamema꞉nemo.
MAT 20:15 Ba꞉moe oko huiya mani ba꞉ naeno manila, ba꞉bema꞉ nale ha꞉kiya naeno ubilo dododimo ba꞉be komo ba꞉ naeno komola. Mabu keka꞉ ama꞉le naeno malemale komoma꞉ da꞉maubana?’”
MAT 20:16 Ba꞉bema꞉ Ya꞉suti kuititi tabo ba꞉ma ka꞉na goiya꞉, “Hibila, ka꞉lo galapi hiliyonomo da꞉pola꞉na iba꞉te galane dopopima꞉ keda꞉hama꞉na꞉, ba꞉gala ka꞉lo dopopi da꞉pola꞉na iba꞉te galane galapima꞉ keda꞉hama꞉na꞉.”
MAT 20:17 Ba꞉bene Ya꞉suti Yelusalema ko habamo ba tuta, gabo tetelo ebete ebeno 12 ta꞉matapinomo uwatete tabo diya na꞉goelamiya꞉,
MAT 20:18 “La꞉ nulia꞉la꞉, a Yelusalemamo tolamitama꞉. Ba꞉bolo Godote Tawakalubino Naniwi tawakaluba꞉tamo kikalamema꞉ne, ba꞉bene Godotamo hawa꞉goeno ikamehopino watowatopi ba꞉gala Godokono Tutumu iya꞉tulamepi, iba꞉te ebe anakapumima꞉ ga꞉late
MAT 20:19 Yuha꞉pa꞉tamo ba꞉bo kikalamema꞉na꞉. Ba꞉ba꞉te ebe iya꞉da꞉tete giya꞉pa꞉pa꞉mo a꞉na꞉miga꞉titi ebe ba꞉bo kanakapumima꞉na꞉, huiyatiya netewa-kapiya hegelalo Godote ebe hoene kadipatema꞉ne.”
MAT 20:20 Ba꞉bene Sebedikono gugudino menokote ebeno guguda꞉go Ya꞉sutamo pete ebeno pupamo pemedete, ebete ebe kowalubima꞉ na꞉pegoemiya꞉.
MAT 20:21 Ya꞉suti ebetamo na꞉goiya꞉, “Ama꞉ bada ubi kihatiuta nale ama꞉tamo ododima꞉?” Ebete tabo ba huiya na꞉goiya꞉, “Ba꞉moi naeno gugudi netewa na꞉kulamiuta? Ama꞉le Ko Gawadubuma꞉ deda꞉mena꞉, na ubila ama꞉le da꞉goemena꞉ etate amia꞉no tu hapulu ba꞉gala etate pele hapulu amia꞉no Ko Gawadubu helo ipuwalo kolumutitama꞉.”
MAT 20:22 Huiyatiya Ya꞉suti iba꞉tamo na꞉goiya꞉, “La꞉le na hido ukuia꞉mo kaga꞉lanamitaha꞉. La꞉ modobola꞉ka꞉ nale da꞉nimo ba꞉be temeteme kalila꞉mo niho?” Iba꞉te na꞉ga꞉luya꞉, “A modobola.”
MAT 20:23 Ya꞉suti iba꞉tamo na꞉goiya꞉, “Ba꞉moe komo ba꞉ hibila, nale da꞉nimo la꞉ ba꞉be kalila꞉mo nihote temeteme bulihonakomata. Huiyatiya naeno tu hapuamo ba꞉gala pele hapuamo ahidi komoma꞉ nale a꞉kagaa꞉mo. Nabiwi Godote puya꞉tamo da꞉hiduilamiya꞉ ba꞉binomate ba꞉bolo kopola꞉nama꞉na꞉, iyo, ba꞉moe komoma꞉ ebete ha꞉kiya kogoema꞉ne.”
MAT 20:24 Ba꞉bene komo ta꞉ni ta꞉matapa꞉te ba꞉be komo uliti ba꞉bi dubu netewapa꞉tamo na꞉maubahalitiya꞉,
MAT 20:25 huiyatiya Ya꞉suti ibi hiliyonomo ebetamo ka꞉lamiti na꞉goiya꞉, “La꞉ iya꞉tawahala, Godoko hibima꞉ midiha꞉pino koko dubate ibi ha꞉kiya ibi ba wadiya꞉paa꞉latele komo tawakalubi heloamo kiyahalamenaka, iba꞉te ibino ubi komamo kopapamila꞉halenama꞉.
MAT 20:26 Huiyatiya la꞉ ba꞉bakopima꞉ a꞉keda꞉hamata. Kebe lumagiti la꞉eno koma꞉ eda꞉ ubi dihatemene, ebete la꞉eno huiyaha꞉ okodawama꞉ neda꞉mene,
MAT 20:27 ba꞉gala kebe lumagiti dopoma꞉ eda꞉ ubi dihatemene, ebete la꞉eno du genamoeno okodawama꞉ neda꞉mene, iyo, ebe ha꞉kiya ebe hoponomamo ihatenomo nihata꞉mene.
MAT 20:28 Ba꞉ma ka꞉na Tawakalubino Naniwiti da꞉piya꞉, ebe ubihinola ba꞉moe hopo tawakaluba꞉te ebetamo huiyaha꞉ okopima꞉ eda꞉ha, huiyatiya ebete na꞉piya꞉ tawakaluba꞉tamo huiyaha꞉ okodawama꞉ kopeda꞉ma꞉, ba꞉gala ebeno ka꞉ka꞉ gobogobamo ihatete ebeno hoe huiyate komo hiliyonomo tawakalubi Saitanakono du genamane dito kuluhukulatelema꞉.”
MAT 20:29 Ya꞉suti ebe ta꞉matapa꞉go Yeliko ko habane da꞉nikuliya꞉, ba꞉ba tetelo tawakalubi hiliyonomate ebe beta꞉matuya꞉.
MAT 20:30 Ba꞉bene dubu netewa baidi tamiholamela, iba꞉te gabo tamelo ba lumutita Ya꞉sukunu pe komo uliti ibulunomamo na꞉ga꞉luya꞉, “Da꞉ibidikono Hogo! Ama꞉ a na꞉malemalea꞉tea꞉!”
MAT 20:31 Ba꞉bema꞉ hiliyonomo tawakaluba꞉te ibi kiyahalamelo na꞉duhilamiya꞉ iba꞉te tatabalo kolumutitama꞉, huiyatiya iba꞉te gala ibulunomamo na꞉kaga꞉luya꞉, “Kodawa Ya꞉su, Da꞉ibidikono Hogo! Ama꞉ a na꞉malemalea꞉tea꞉!”
MAT 20:32 Ba꞉bene Ya꞉suti ba꞉bamo utiti ibi ka꞉lamiti iba꞉tamo na꞉goiya꞉, “La꞉ bada ubi kihatiutama nale la꞉tamo kododima꞉?”
MAT 20:33 Baidi tamihopa꞉te na꞉ga꞉luya꞉, “Kodawa, aeno baidi na꞉hiduilamelea꞉ma꞉.”
MAT 20:34 Ba꞉bene Ya꞉suti ibi malemalelatelelo ibino baida꞉mo ebeno kokoto demowatilamiya꞉, ba꞉ba tetenomolo ibino baiditi hidohidohote iba꞉te Ya꞉suku ba꞉bo ta꞉matuya꞉.
MAT 21:1 Ba꞉bene iba꞉te Yelusalema ko haba tama꞉mo ba pelame, Betapa꞉gi haba tamedo tolamete Olibi Kehakeha Hunu Hakamo ba꞉bo nikuliya꞉. Ba꞉ba tetelo Ya꞉suti ebe ta꞉matapi netewa dopamo ba noelame
MAT 21:2 iba꞉tamo na꞉goiya꞉, “La꞉ ba꞉be tatali habamo tote, ba꞉be habamo da꞉nuluhukuma donoki-goe hala꞉mo ma꞉home ebeno gudago konulama꞉digalema꞉nemata. Wadiyala la꞉ hale pahamiti ebeno gudago na꞉magaheliya꞉la꞉.
MAT 21:3 Etate la꞉ duhilame tabo da꞉goemene la꞉ huiyatiya ba꞉ma ka꞉na koga꞉lama꞉nemata, ‘Kodawate ba꞉moi donoki-goegoe ubila, ebete gala tiyonomo kakapoelamema꞉ne.’”
MAT 21:4 Ba꞉bene ba꞉moe komote uluhukuya꞉, Godokono ukui hawakalimidawate da꞉goiya꞉ ba꞉be tabote hibima꞉ keda꞉ma꞉. Ya꞉lo tetelo ebete tabo ba꞉ma ka꞉na goiya꞉,
MAT 21:5 “La꞉ Yelusalemanapa꞉tamo na꞉nega꞉luya꞉la꞉, ‘Numa꞉la꞉, la꞉eno Ko Gawadubuti la꞉tamo pita. Ebete donoki-goe hunamo emedete gelebadia꞉go pita, iyo, la꞉ numa꞉la꞉, ebete donoki deha꞉potago ba꞉pe.’”
MAT 21:6 Ba꞉bene Ya꞉suku ta꞉matapi netewapa꞉te tote, ebete keba ka꞉na ka꞉goiya꞉ iba꞉te ba꞉ ba꞉ba ka꞉na nododiya꞉.
MAT 21:7 Iba꞉te donoki-goe ba꞉gala ebeno gudu Ya꞉sutamo magahelete, ibino watuino kaliko ibi hunamo miya꞉telamete, Ya꞉suti ba꞉bi kaliko hunamo ba꞉bo emediya꞉.
MAT 21:8 Ba꞉ba tetelo komo tawakalubi hiliyonomate ibino ga꞉ga꞉ga꞉ kaliko pipikulamete gabamo apohohago tolamiya꞉, ba꞉gala komopa꞉te ele iya꞉hiliti gabamo atumu kamiya꞉teholenatuya꞉.
MAT 21:9 Ba꞉bene puya꞉te da꞉dopuya꞉ ba꞉gala Ya꞉sukunu gala hapuni da꞉pelamitiya꞉, iba꞉te kapimilo ibulunomamo ba꞉ma ka꞉na ga꞉lutiya꞉, “Da꞉ibidikono hogo nadipata꞉la꞉! Godo, amia꞉no mahilago da꞉pita, wadiyala ama꞉ ba꞉be lumagi na꞉koimiya꞉! O tawakaluba꞉la꞉, la꞉ Godoko milimiholo hunamo nadipata꞉la꞉!”
MAT 21:10 Ba꞉bema꞉ Ya꞉suti Yelusalema ko habamo da꞉na꞉pa꞉guya꞉, ba꞉moe haba tawakalubi hiliyonomate ebe umima꞉ pikuliti na꞉pega꞉luya꞉, “Ba꞉moe lumagi potela꞉ka꞉?”
MAT 21:11 Ba꞉ba tetelo Ya꞉sukuba꞉ da꞉tolamitiya꞉ ibi hiliyonomate habalubino tabo ba huiya na꞉ga꞉luya꞉, “Ba꞉moe ba꞉ Godokono ukui hawakalimidawa Ya꞉sutila, ebete Ga꞉lili hopoeno Nasalete habane pe.”
MAT 21:12 Ba꞉ba tetelo Ya꞉suti Godoko Adikumino Hiya꞉ Genamamo tote, ba꞉be genamalo ebete ilina kolowamipi nulamete ibi hiliyonomo helonomamo neta꞉malateliya꞉, ba꞉gala ebete mani oweheta꞉midahalepino patapata gimai kolowamipino ahidi patapatago ba꞉bo nohoba꞉midahalelamiya꞉.
MAT 21:13 Ba꞉bene ebete iba꞉tamo na꞉goiya꞉, “Godokono Bukalo tabo ba꞉ma ka꞉na bitana, ‘Naeno Genama tawakaluba꞉te Godoko Adikumi Genamama꞉ koga꞉lama꞉na꞉, la꞉le huiyatiya pilo tawakalubino genamama꞉ a꞉midimata.’”
MAT 21:14 Ba꞉ba tetelo baidi tamiholamepi ba꞉gala nato a꞉ta꞉buta꞉midalelamepi, iba꞉te Godoko Adikumino Hiya꞉ Genamamo da꞉pelamiya꞉ Ya꞉suti ibi ba꞉bo hiduilamiya꞉.
MAT 21:15 Huiyatiya Godotamo hawa꞉goeno ikamehopino watowatopi ba꞉gala Godokono Tutumu iya꞉tulamepi, iba꞉te Ya꞉sukunu hido hanohano komo dulamitiya꞉ iba꞉te ebetamo na꞉maubahalitiya꞉. Ba꞉gala ba꞉be atu tetelo iba꞉te eta komoma꞉ kamaubahalitiya꞉ ba꞉ma ka꞉na, komo guguda꞉te ba ga꞉gita da꞉ga꞉lutiya꞉, “Da꞉ibidikono hogo nadipata꞉la꞉!” Ba꞉be mabuma꞉ iba꞉te
MAT 21:16 Ya꞉suku na꞉ga꞉lamiya꞉, “Ama꞉ guguda꞉te tabo kubamo da꞉ga꞉luta na꞉kuliuta?” Huiyatiya Ya꞉suti iba꞉tamo na꞉goiya꞉, “Iyo, na nulitamo. Wadiyala la꞉ ba꞉moe Godokono Buka tabo hidamo nemalagidolala꞉, ‘O aeno Kodawa Godo, gugudi hegehege ba꞉gala nono da꞉nihona, ama꞉le ibino tabo ipuwane hidohido tabo olamaginakata ama꞉ ha꞉kiya ama꞉ komilimihonama꞉.’”
MAT 21:17 Ba꞉bene da꞉gapogapohoniya꞉ Ya꞉suti ibi miya꞉palenate ko haba ipuwane uluhukunate Betani habamo tonate ba꞉bo newataniya꞉.
MAT 21:18 Eta duiduiyalo Ya꞉suti ko habamo gala da꞉kawiluya꞉, gabo tetelo ebe baa꞉ kapete umitiya꞉,
MAT 21:19 ba꞉bene ebete anahu keha gabo tamelo pumiti gao oholema꞉ ba꞉bamo da꞉tuya꞉ huiyatiya pahanomuya nulamiya꞉. Ba꞉bema꞉ ebete anahu kehatamo na꞉goiya꞉, “Emedena tetelo gaote ama꞉godone a꞉kanolonakamene!” Ba꞉ba tetenomolo ba꞉be gao kehate kaloloma꞉ ba꞉bo ediya꞉.
MAT 21:20 Ya꞉suku ta꞉matapa꞉te ba꞉be komo umiti koamo hanohanohote na꞉ga꞉luya꞉, “Anahu kehate kaloloma꞉ tiyonomolo badama꞉ keda꞉?”
MAT 21:21 Ya꞉suti ibino tabo ba huiya na꞉goiya꞉, “Na la꞉tamo hibi tabo begoemo, la꞉ hiliyonomo tetelo Godoko hibima꞉ ba midina la꞉eno tepo ipuwalo ukui netewama꞉ eda꞉haheno, nale anahu kehatamo keba ka꞉na kododimo, la꞉le ba꞉be atu komo ododima꞉ komodoboma꞉nemata. Ba꞉gala la꞉ hibima꞉ midilo ba꞉moe hakatamo ba꞉ma ka꞉na da꞉ga꞉lama, ‘Ama꞉ kehaha꞉ kolomamo na꞉toatepa!’ la꞉le ba꞉be komo hibilo kumima꞉nemata.
MAT 21:22 Iyo, ba꞉ hibila, la꞉ Godoko hibima꞉ ba midina bada komoma꞉ ebe da꞉toemehoma, ba꞉ba tetelo la꞉le ba꞉be komo kolawema꞉nemata.”
MAT 21:23 Ba꞉bene Ya꞉suti Godoko Adikumino Hiya꞉ Genamamo tote tawakalubi ba niya꞉tulamita, ba꞉ba tetelo Godotamo hawa꞉goeno ikamehopino watowatopi ba꞉gala Yu tawakalubino komo koko dubu, iba꞉te ebe duhimima꞉ pelamete ebe ba꞉ma ka꞉na palatediya꞉, “Ama꞉ ba꞉moi komo pokono heloamo kododiliona? Ba꞉gala ba꞉moe helo ama꞉tamo pote kikameti?”
MAT 21:24 Ya꞉suti iba꞉tamo na꞉huiyuya꞉, “Nale la꞉ dopamo kapiya komoma꞉ kalateda꞉lema꞉nemata. La꞉le na huiya tabo hidamo da꞉ga꞉lanamema, ba꞉bene nale ba꞉moi komo pokono heloamo kododilinamo, ba꞉be komo nale la꞉ ba꞉bo kokiyalamema꞉nemata.
MAT 21:25 Naeno alateda꞉ tabo la꞉tamo ma kumu bitana, Yonete tawakalubi beyamo da꞉wadulatelenakui, ebete ebeno helo pogodone ka꞉lawi, Godogodonela꞉ka꞉ o eta lumagigodonela꞉ka꞉?” Ba꞉bema꞉ ibi ha꞉kiya ibi ipuwalo olowabeletihuilo na꞉ga꞉luya꞉, “Ale da꞉ga꞉lama꞉ Godote Yonetamo helo ikami, ebete kogoema꞉ne, ‘Mabu keka꞉ la꞉le ebeno tabo hibima꞉ kamidiha꞉?’
MAT 21:26 Ba꞉gala a modoboha꞉ ebe ba꞉ma ka꞉na ga꞉lame, hopo lumagiti Yonetamo helo ikami, mabu ale ba꞉moi tawakalubino mauba komo betolemitama꞉. Ibi hiliyonomate na꞉ga꞉lana Yoneko Godokono ukui hawakalimidawala.”
MAT 21:27 Ba꞉bema꞉ iba꞉te ibino tepo ipuwoeno ukui ugumuililo Ya꞉sutamo na꞉ga꞉luya꞉, “Yonekono helo mabu a iya꞉tawaha꞉.” Ba꞉bema꞉ Ya꞉suti iba꞉tamo na꞉goiya꞉, “Nale la꞉ atumu a꞉kakiyalama꞉mata nale ba꞉moi komo pokono heloamo dododilinamo.”
MAT 21:28 Ba꞉bene Ya꞉suti ba꞉bi Yu watowatopa꞉tamo na꞉goiya꞉, “Na la꞉tamo eta uwi kokiyama꞉nemo. La꞉ ba꞉be uwi hidamo uliti ebeno ipuwa natamo na꞉hawakalimiya꞉la꞉. Kapiya dubuti nemedenami, ebeno kuhi netewala. Eta hegelalo ebete ebeno dopo kuhitamo pete na꞉pegoi, ‘Ama꞉ tote naeno pali ipuwalo oko na꞉nowata꞉.’
MAT 21:29 Ebeno guduti na꞉huiyui, ‘Ao, na ubihinola,’ huiyatiya galane tetelo ebete ukui hiya꞉ma꞉ miditi okamo dito tui.
MAT 21:30 Ba꞉bene ba꞉be dubuti ekawitamo kapete atu tabo da꞉kapegoi, ba꞉be guduti na꞉huiyui, ‘Iyo, Nabiwi, na kotoma꞉nemo,’ huiyatiya ebete katoha꞉.”
MAT 21:31 Ba꞉bene Ya꞉suti ebeno tabo ulihopa꞉tamo na꞉goiya꞉, “La꞉eno ukui keba ka꞉nala꞉ka꞉? Gugudi netewa ipuwalo ebeno nabiwi pote ka꞉kalakaluimi?” Iba꞉te na꞉ga꞉luya꞉, “Dopo gudutila.” Ba꞉bema꞉ Ya꞉suti iba꞉tamo na꞉goiya꞉, “Na la꞉tamo hibi tabo begoemo, ta꞉kese mani ha꞉da amiholo uwatepi dubu ba꞉gala dubu bilibili kamenakamena, iba꞉te la꞉eno haba uwatelamete Godokono Ko Gawadubu habamo kona꞉pa꞉la꞉hama꞉na꞉.
MAT 21:32 Mabu Yoneko tawakalubi beyamo wadulateledawate Godokono tuputupu gabodo da꞉pi, la꞉le ebeno tabo hibima꞉ kamidiha꞉, huiyatiya mani pilolo uwatepi dubu ba꞉gala dubu bilibili kamenakamena iba꞉te ebe hibima꞉ miditi ibino tepo ipuwa Godotamo ohoba꞉midaliya꞉. Ba꞉ hibila, ba꞉ba tetelo la꞉le ibino komo dulamelelamima, huiyatiya la꞉eno kubakuba ukui hiya꞉ma꞉ midilihino Yonekono tabo kalaweha꞉.”
MAT 21:33 Ba꞉bene Ya꞉suti gala na꞉kagoiya꞉, “Wadiyala la꞉le naeno eta iya꞉tulame uwi nulia꞉la꞉. Eta ko dubuti pali ododiti tupina gao keha ba꞉bo amihui, ba꞉be gaoeno mahilo ba꞉ gala꞉ipi gaola. Amiho komote da꞉wibui, ebete kala imiti gao ihi adilutihoeno nakola bobo aligiti, pali lawamepino hunu mimiya ba꞉bo eti. Ba꞉ba tetelo ba꞉be dubuti ebeno pali komo lawamepi dubatamo dito miya꞉pui, iba꞉te ba꞉bolo oko ba owatina ba꞉be pali hidamo umilo ebeno gao kuwateholemenakoma꞉, ba꞉bene ebete muhulu hopamo ba꞉ dito tui.
MAT 21:34 “Ba꞉bene gao tapiho tete da꞉pi ebete pali lawamepa꞉tamo komo huiyaha꞉ okopi na꞉poelami, iba꞉te iba꞉godone ebeno gao kopuwatema꞉.
MAT 21:35 Huiyatiya pali lawamepa꞉te ibi uwatete eta kukamo anagalimihuya꞉, ba꞉gala eta dito anakapumiya꞉, ba꞉gala eta nakolamo mapemiya꞉.
MAT 21:36 Dopamo pali namutudawate kapiyakapiya huiyaha꞉ okopi bepoelami, ba꞉bene ebete gala komo hiliyonomo da꞉kapoelami pali lawamepa꞉te iba꞉tamo ba꞉ atu kuba komokomo beka-ododiliya꞉.
MAT 21:37 Galanomone ebete ebeno gudu ba poeme ebeno ukuilo na꞉goi, ‘Hibila, iba꞉te naeno gudutamo kopapamila꞉halema꞉na꞉.’
MAT 21:38 “Huiyatiya ba꞉bi pali lawamepi dubate ba꞉be gudu pitalo dumi iba꞉te ibi ipuwalo na꞉ga꞉luya꞉, ‘Numa꞉la꞉, ba꞉moe guduti nabiwino ilina namutudawama꞉ deda꞉mene, ba꞉be guduti ba꞉ na꞉pe. Ba꞉bema꞉ wadiyala ale ebe anakapumiti ebeno pali kolawema꞉nema꞉,’
MAT 21:39 ba꞉bene iba꞉te ebe lawete palino kala ipuwane na꞉da꞉nate ba꞉ dito nanakapumiya꞉.”
MAT 21:40 Ba꞉bema꞉ Ya꞉suti ulihopa꞉tamo na꞉goiya꞉, “La꞉eno ukui keba ka꞉nala꞉ka꞉? Pali namutudawate muhulu hopone da꞉pemene, ebete bada komo na꞉ka꞉pododimini pali lawamepa꞉tamo?”
MAT 21:41 Yu watowatopa꞉te ebeno tabo ba huiya na꞉ga꞉luya꞉, “Hibila, ebete ba꞉bi kuba okopi kubanomamo palukuliti kopanakapulamema꞉ne. Ba꞉ba tetelo ebete ebeno pali komo lawamepi dubatamo kopikalamema꞉ne, gao noloho tetelo iba꞉te ebeno pali ilina ebetamo hidamo kikamehonakoma꞉.”
MAT 21:42 Ya꞉suti iba꞉tamo na꞉goiya꞉, “La꞉ dopamo Godokono Bukalo ba꞉moe tabo hibilo a꞉ka꞉lamiholia꞉mata, ‘Genama etepa꞉te tama꞉mo dihati, ba꞉be hototote huiyatiya genamoeno helo mabuma꞉ eda꞉na. Ba꞉moe komo ba꞉ Godote ododi, ba꞉bema꞉ aeno ukuilo na꞉hanohanohutama꞉!’
MAT 21:43 “Ba꞉bema꞉ nale la꞉tamo na꞉goemo, Godote Ko Gawadubuma꞉ deda꞉na, ba꞉be komo ebete la꞉godone puwatete puya꞉godolo hidohido noloho gao da꞉pola꞉na ba꞉bako tawakaluba꞉tamo dito kikalamema꞉ne.
MAT 21:44 Numa꞉la꞉, nale hototoeno komoma꞉ da꞉goemo, ebeno kodakoda ba꞉ nakola huiyala. Iyo, ba꞉moe nakola hunamo da꞉gamene ba꞉be lumagiti kota꞉ta꞉pula꞉tihoma꞉ne, ba꞉gala ba꞉moe nakolate lumagi dihita꞉timini kotakotakuimima꞉ne.”
MAT 21:45 Ba꞉bene Godotamo hawa꞉goeno ikamehopino watowatopi ba꞉gala komo Pa꞉lisi kapiyuimipi iba꞉te Ya꞉sukunu uwi dulihuya꞉, iba꞉te ba꞉bo iya꞉tawahuya꞉ Ya꞉suti ibino komoma꞉ olamagiya꞉.
MAT 21:46 Ba꞉bema꞉ iba꞉te ebe lawema꞉ ubi bihatitiya꞉, huiyatiya iba꞉te tawakalubi betolelamitiya꞉ mabu ibi hiliyonomate Ya꞉suku Godokono ukui hawakalimidawama꞉ ga꞉lanakuya꞉.
MAT 22:1 Ba꞉bene Ya꞉suti eta iya꞉tulame uwi tawakaluba꞉tamo olamagilo na꞉goiya꞉,
MAT 22:2 “Godote Ko Gawadubuma꞉ deda꞉na, ba꞉be komo ba꞉ma ka꞉na itana. Eta Ko Gawadubuti ebeno kuhino kamena laweno poko ododiti
MAT 22:3 ebeno okopi ba꞉bo oelami, ebete dopamo da꞉ka꞉lami ba꞉bi tawakalubi nuwatete poko habamo komagahelema꞉. Huiyatiya iba꞉te pelamema꞉ ubiha꞉ma꞉ eda꞉huya꞉,
MAT 22:4 ba꞉bene ebete gala komo okopi ba kanoelame na꞉kagoi, ‘Na dopamo da꞉ka꞉lamimo, la꞉le ba꞉bi tawakalubi ba꞉ma ka꞉na gala na꞉kanikiyalama꞉la꞉, ‘Na poko ilina a꞉hiduilama꞉kamo, kau-goegoe gadigadinomo alukula꞉kamo, poko ilina hiliyonomo hiduilame a꞉wibo. Wadiyala la꞉ pelamete na꞉penahala꞉.’ ’
MAT 22:5 “Huiyatiya iba꞉te ba꞉be tabo ubiha꞉ma꞉ eda꞉hate ibino hiya꞉hiya꞉ okamo dito tolamiya꞉, ba꞉ma ka꞉na etate ebeno pali okamo tui ba꞉gala etate kolowami habamo tui,
MAT 22:6 ba꞉bene komopa꞉te Ko Gawadubuino okopi uwatete ba iduduputilame ibi ba꞉bo anakapulamiya꞉.
MAT 22:7 Ba꞉ba tetelo Ko Gawadubuti konomamo maubalo ebeno alaholohopi ba꞉bo noelami, ba꞉bene puya꞉te ebeno okopi danakapulami, alaholohopa꞉te ibi kubamo alukuliti ibino haba koa꞉mo dito emadomelamiya꞉.
MAT 22:8 “Ba꞉ba tetelo ebete ebeno okopa꞉tamo na꞉goi, ‘Naeno kuhino kamena lawe pokoeno ilina hiliyonomo a꞉hiduilama꞉kamo, huiyatiya nale dopamo da꞉ka꞉lamimo ba꞉bi tawakalubi hidohidoenoha꞉, iba꞉te pelamema꞉ na ubihinola.
MAT 22:9 Ba꞉bema꞉ wadiyala la꞉ koko gabo gagagaga teta꞉mo tolamete la꞉le da꞉nulamema, ba꞉bi tawakalubi hiliyonomo na꞉nikiyalama꞉la꞉ iba꞉te naeno poko baa꞉ kopenahama꞉.’
MAT 22:10 Ba꞉ba tetelo okopa꞉te tolamete gabo gagagaga tetelo tawakalubi hiliyonomo ba꞉bo nuwatiya꞉, ba꞉ma ka꞉na awaepi ba꞉gala dogodogopi, ba꞉bi tawakalubi hiliyonomate kapimilo poko habamo pelameholete, iba꞉te baa꞉ kebe genamalo ka꞉nahuti ba꞉be ko genama gu ba꞉ dito tabui.
MAT 22:11 “Ba꞉ba tetelo Ko Gawadubuti tawakalubino kokoto uwateholamema꞉ poko genamamo da꞉pi, ebete kapiya dubu bepumi ebete hidonomo poko kaliko pulihino podolui.
MAT 22:12 Ko Gawadubuti ebetamo na꞉goi, ‘Mabulubi, mabu keka꞉ ama꞉ hido kaliko pulihino da꞉podola?’ “Ba꞉ba tetelo ebete ebeno tabo uliti kahuiyaha꞉,
MAT 22:13 ba꞉bema꞉ Ko Gawadubuti ebeno hopopa꞉tamo na꞉goi, ‘Wadiyala la꞉ ebeno kokoto nato hala꞉mo matuhulamelemete du ipuwamo a꞉da꞉nate ba꞉bo na꞉nimiya꞉puya꞉la꞉. Ebete ba꞉bolo lalo ba ikilame konomamo kihima꞉ne.’”
MAT 22:14 Ba꞉bema꞉ Ya꞉suti kuititi tabo ba꞉ma ka꞉na goiya꞉, “Hibila, Godote hiliyonomo tawakalubi beka꞉lamina, huiyatiya ibi ipuwalo kapiyakapiyanomo buwatenako.”
MAT 22:15 Ba꞉ba tetelo Pa꞉lisi kapiyuimipa꞉te tolamete Ya꞉sukunu komoma꞉ ibi ipuwalo tabo da꞉nega꞉luya꞉ ibino ubi ba꞉bo nihatiya꞉, iba꞉te ebe kuba gabamo ba nemogabuimi ebete kebako tabo goelo ebe ba꞉bo kolawema꞉.
MAT 22:16 Ba꞉bene iba꞉te komo ibino ta꞉matalepi ba꞉gala Ko Gawadubu Helodikono kapiyuimipi atu tetelo Ya꞉sutamo oelamiya꞉. Ba꞉ba꞉te ebetamo pelamete ha꞉da amiho gabodo na꞉pega꞉luya꞉, “Iya꞉tulamedawa, a iya꞉tawahala ama꞉ hibi lumagilata, iyo, ama꞉ tawakalubi Godokono gabo hidamo iya꞉tulamenata. Hibila, ama꞉ komopino dito ga꞉la komamo a꞉kapapamiwatala꞉ta, ba꞉gala ama꞉ tawakalubi hunu nikapa꞉mo kulamenaha꞉, ba꞉ma ka꞉na eta lumagi miya꞉palo eta lumagi ebo a꞉kalawa꞉la꞉ta.
MAT 22:17 Ba꞉bema꞉ amia꞉no ukui hawakalimiti a na꞉kiyaa꞉ma꞉, Loma tawakalubino Konomo Gawadubu Sisatamo ta꞉kese mani ikameho hidola꞉ka꞉ o kubala꞉ka꞉? A ebetamo ba꞉kikamehoma꞉ o a꞉kikamehama꞉?”
MAT 22:18 Ya꞉suti ibino ha꞉da amiho komo iya꞉tawate na꞉goiya꞉, “La꞉ ma꞉lapila netewa tawakalubilata! Mabu keka꞉ la꞉le na ha꞉da amihonamema꞉ dewagelitama?
MAT 22:19 La꞉ mani kapiya natamo nikanama꞉la꞉.” Ba꞉bene iba꞉te kapiya mani ebetamo dikamiya꞉,
MAT 22:20 ebete ibi nalateda꞉liya꞉, “Ba꞉moe manilo da꞉pola꞉na, mahilo ba꞉gala holoholo pokonola꞉ka꞉?”
MAT 22:21 Iba꞉te na꞉ga꞉luya꞉, “Konomo Gawadubu Sisakonola.” Ba꞉bene Ya꞉suti iba꞉tamo na꞉goiya꞉, “Sisakono ilina Sisatamo nikamehala꞉, huiyatiya Godokono ilina Godotamo nikamehala꞉.”
MAT 22:22 Ba꞉bema꞉ iba꞉te Ya꞉sukunu tabo uliti ba hanohanoho ebe miya꞉pate ba꞉ dito tolamiya꞉.
MAT 22:23 Hoe ipuwane mahila꞉haleha꞉ma꞉ da꞉ga꞉lana, ba꞉bi tawakalubi ba꞉ Sa꞉diyusi kapiyuimipila. Ba꞉be atu hegelalo komo iba꞉te Ya꞉sutamo pelamete
MAT 22:24 tabo ba꞉ma ka꞉na pega꞉luya꞉, “Iya꞉tulamedawa, Mosesete Godokono tabo ba꞉ma ka꞉na goiya꞉, ‘Dubuti hoete kamena gugudihino da꞉miya꞉pamene, ebeno ekawiti ba꞉be hamole lawete ebeno naniwi mabuma꞉ gugudi nododilima꞉mene.’
MAT 22:25 Aeno tawakalubi ipuwalo kapiya dubuino sa꞉ba꞉ni kuhia꞉te nemedenama꞉. Dopo guduti kamena lawete gugudi ulameheno hoiya꞉, ba꞉bene ebeno ekawiti ebeno hamole dito kalawiya꞉.
MAT 22:26 Ba꞉ba tetelo ebe ba꞉ atumu gugudi ulameheno dito kahoiya꞉, ba꞉gala eta tetedawate ba꞉ba ka꞉na ka-ewageliya꞉. Ba꞉bene ba꞉bi sa꞉ba꞉ni badininipala hiliyonomate ba꞉ba ka꞉na ha꞉lahuya꞉,
MAT 22:27 huiyatiya kamenate galane dito hoiya꞉.
MAT 22:28 Ba꞉bema꞉ iba꞉te hoe ipuwane ka꞉ka꞉mo da꞉mahila꞉halemena꞉, ba꞉be Ko Hegelalo ba꞉be kamenate sa꞉ba꞉ni dubu ipuwalo pokono kamenama꞉ na꞉keda꞉mene, mabu ebe ibi hiliyonomate a꞉lawa꞉tepahuya꞉?”
MAT 22:29 Ba꞉bene Ya꞉suti iba꞉tamo na꞉huiyuya꞉, “La꞉ Sa꞉diyusi kapiyuimipa꞉te la꞉eno ukuilo tawakalubino ha꞉la komoma꞉ kubamo ga꞉lanakomata, mabu la꞉ Godokono Buka tabo ba꞉gala ebeno helo iya꞉tawaha꞉.
MAT 22:30 Ba꞉moe komo ba꞉ hibila, tawakaluba꞉te hoe ipuwane mahila꞉hale tetelo iba꞉te gala kamenakamena a꞉kapuwatehola꞉mena꞉ ba꞉gala dubu a꞉kapuwatehola꞉mena꞉, iyo, iba꞉te Godokono Hunu Haboeno nopopimo bemedehonamena꞉.
MAT 22:31 Ba꞉be mabuma꞉ Godokono Bukate a biya꞉tua꞉mena ha꞉lahapa꞉te hoe ipuwane mahila꞉halema꞉, iyo, ebete ebeno Bukalo la꞉tamo ya꞉lo da꞉goiya꞉ ba꞉be tabo la꞉ hibilo a꞉ka꞉lamiholia꞉mata. Ba꞉be tabote ba꞉ma ka꞉na itana,
MAT 22:32 ‘Na ba꞉ Godotela. A꞉ibalahamako, Aisa꞉keko, ba꞉gala Ya꞉ikoboko, iba꞉te emedena tetelo poko kadikumina na ba꞉ ba꞉betela.’ Ba꞉bema꞉ la꞉ Sa꞉diyusi kapiyuimipi, la꞉eno ukuilo na꞉kemalagidolonama ba꞉bi iniwalino ka꞉ka꞉te a꞉wibuya꞉? Ao, kawibuya꞉ha꞉, mabu ha꞉lahapa꞉te Godoko a꞉kadikuma꞉la꞉, huiyatiya puya꞉te da꞉ka꞉ka꞉halena ba꞉bi tawakalubinomate ebe badikumina.”
MAT 22:33 Ba꞉ba tetelo hiliyonomo tawakaluba꞉te Ya꞉sukunu tabo uliti ebeno tabamo hanohanoholo na꞉kalakalahutiya꞉.
MAT 22:34 Ya꞉sukunu tabote Sa꞉diyusi kapiyuimipino tabo dalukulilamiya꞉, ba꞉be komo Pa꞉lisi kapiyuimipa꞉te uliti iba꞉te kapimilo ebetamo pelamiya꞉.
MAT 22:35 Ba꞉bene ibi ipuwalo eta dubu ebe Godokono Tutumu Tabo iya꞉tawanomola, ebete Ya꞉suku kuba gabamo emogabuimima꞉ ebe palateda꞉lo na꞉pegoiya꞉,
MAT 22:36 “Iya꞉tulamedawa, Godokono Tutumu Tabo hiliyonomo ipuwalo kebe tutumuti konomoma꞉ keda꞉na?”
MAT 22:37 Ya꞉suti ebeno tabo ba huiya na꞉goiya꞉, “Godokono Tutumu Tabo hiliyonomo ipuwalo ba꞉moe tabote ba꞉ konomoma꞉ eda꞉na, ‘Ama꞉ amia꞉no Kodawa Godoko malemalelo nemalagidolona, amia꞉no tepo ipuwanomamo, ba꞉gala amia꞉no gobogoboeno heloamo, ba꞉gala amia꞉no ukui konomamo.’
MAT 22:39 Ba꞉gala ba꞉moe eta konomo tutumu atumu ba꞉ka-itana, ‘Ama꞉ ha꞉kiya ama꞉ demalagidolona, wadiyala ama꞉le ba꞉ ba꞉ba ka꞉na ama꞉ tamelo demedena ba꞉be lumagi malemalelo nemalagidolona.’
MAT 22:40 Hibila, Godote tawakaluba꞉tamo Moseseko ipuwado dikalamiya꞉ ba꞉gala ebeno ukui hawakalimipa꞉te ebeno Bukamo da꞉miya꞉tiya꞉, ba꞉bi hiliyonomo Tutumu Taboeno ipuwa ba꞉ kapiyala, ba꞉moi koko tutumu netewa ipuwalo ba꞉pola꞉na.”
MAT 22:41 Ba꞉bene Pa꞉lisi dubate ibino kapiyuimi ipuwalo ba pola꞉na Ya꞉suti ibi nalateda꞉liya꞉,
MAT 22:42 “La꞉ Kelisokono komoma꞉ keba ka꞉na kemalagidolonama? Ebe pokono hogola꞉ka꞉?” Iba꞉te ebetamo na꞉huiyuya꞉, “Da꞉ibidikono hogola, ebeno eyoni gugudi ipuwane komahigama꞉ne.”
MAT 22:43 Ya꞉suti iba꞉tamo na꞉goiya꞉, “La꞉eno tabo ba꞉ hibila, ba꞉bema꞉ mabu keka꞉ Da꞉ibiditi Kelisoko ebeno Kodawama꞉ da꞉ka꞉miya꞉? Iyo, ebete Godokono Gobogoboeno heloamo tabo ba꞉ma ka꞉na olamagiya꞉,
MAT 22:44 ‘Kodawa Godote naeno Kodawa Kelisotamo na꞉goe, ‘Ama꞉ naeno tu hapuamo na꞉pemeda꞉, ba꞉bene ama꞉go alaholohopi ama꞉le naeno heloamo ibi komikimoelema꞉na꞉ta.’ ’”
MAT 22:45 Ba꞉bene Ya꞉suti tabo moga꞉melo gala na꞉kagoiya꞉, “La꞉ ba꞉moe tabo ba emalagidolo na na꞉kiyanama꞉la꞉, Da꞉ibiditi ebeno hogo Kelisoko ebeno Kodawama꞉ ka꞉milo ebete Godokono tu hapuamo emedema꞉ goiya꞉, ba꞉bema꞉ ba꞉be komote keba ka꞉na na꞉kuluhukumini?”
MAT 22:46 Ba꞉ba tetelo ibi ipuwalo eta lumagiti Ya꞉sutamo huiya tabo goema꞉ kamodobuya꞉ha꞉, ba꞉bema꞉ ba꞉ba tetene tupuimiti tawakaluba꞉te ebe eta tabo alateda꞉ma꞉ na꞉toletolehutiya꞉.
MAT 23:1 Ba꞉bene Ya꞉suti tawakalubi hiliyonomo ba꞉gala ebeno ta꞉matapa꞉tamo tabo ba olamagi na꞉goiya꞉,
MAT 23:2 “Godokono Tutumu iya꞉tulamepi ba꞉gala Pa꞉lisi kapiyuimipi, Godote iba꞉tamo Mosesekono oko haba ikalamiya꞉, ba꞉ma ka꞉na Mosesete Bukamo da꞉miya꞉tiya꞉ iba꞉te ba꞉bi Tutumu Tabo hidamo niya꞉tulamenakamena꞉.
MAT 23:3 Ba꞉bema꞉ iba꞉te la꞉ Godokono tabamo papamila꞉ma꞉ da꞉kiyalamenakomena꞉, wadiyala la꞉ na꞉papamila꞉nakuya꞉la꞉, huiyatiya la꞉le ibino emede komokomo dulamema la꞉ ibi akibamilatela꞉la꞉, mabu iba꞉te komopi koamo kiyahalamenaka hidohido komo kododilima꞉, huiyatiya hibi komo puliyala, iba꞉te ba꞉bi atu hidohido komo a꞉kododila꞉la꞉.
MAT 23:4 Numa꞉la꞉, iba꞉te ibino tutumu tabamo tawakaluba꞉tamo menemene komokomo bikalamenaka, iyo, ibino tutumu tabo ba꞉ tawakaluba꞉te menemene ilina okamo da꞉wagalatelena ba꞉ba ka꞉nala. Ba꞉bema꞉ iba꞉te tawakalubino menemene dulamemena꞉ eta owalubi deha꞉potonomo a꞉kihata꞉la꞉, kokoto makupuhuliti dito la꞉mota꞉hananaka.
MAT 23:5 Ba꞉gala ibi ubi konomola tawakaluba꞉te ibino hunu tama ba ulamelelame ibi hidohidopima꞉ koga꞉lama꞉. Ba꞉bema꞉ Godokono Buka tabo komokomo iba꞉te hegehege pepamo miya꞉teholete ibino wato kala꞉mo ba꞉bo matuhulameholenaka, ba꞉gala ibino watuino kaliko komokomo iba꞉te boelamo a꞉dehote ba꞉bo ododilinaka.
MAT 23:6 Ibi ubi konomola poko ododi tetelo koko habalo ahiditi kopola꞉nama꞉, ba꞉gala ibi ubila a Yunapino baidi ibubulamehole genama gulu koko dubuino habalo kogagahidima꞉.
MAT 23:7 Iyo, ibi ubila kolowami habalo tawakaluba꞉te ibi ulamete ba꞉bo kawagaminalema꞉, ba꞉gala ibi ubila tawakaluba꞉te ibi iya꞉tulamepima꞉ koka꞉lamima꞉.”
MAT 23:8 Ba꞉bene Ya꞉suti ebe ta꞉matapa꞉tamo gala na꞉kagoiya꞉, “Wadiyaha꞉ komo tawakaluba꞉te la꞉tamo iya꞉tulamepima꞉ ga꞉la, mabu hibila, la꞉ hiliyonomo ba꞉ kapiya badininipalalata ba꞉gala na ba꞉ la꞉eno kapiya Iya꞉tulamedawanomola.
MAT 23:9 Ba꞉gala ba꞉moe hopolo la꞉ eta lumagi la꞉eno nabiwima꞉ akamida꞉la꞉, mabu la꞉eno kapiya Nabiwinomo Hunu Habalo bemedena.
MAT 23:10 Ba꞉gala modoboha꞉ komo tawakaluba꞉te la꞉tamo watowatopima꞉ ga꞉la, mabu na Kelisote ba꞉ la꞉eno kapiya Watodawanomola.
MAT 23:11 Ba꞉bema꞉ kebe lumagiti koma꞉ eda꞉ma꞉ ubi dihatemene, wadiyala ebete la꞉eno huiyaha꞉ okodawama꞉ neda꞉mene,
MAT 23:12 mabu kebe lumagiti ebe ha꞉kiya ebe koma꞉ da꞉midimini Godote ebe deha꞉potoma꞉ komidima꞉ne, ba꞉gala kebe lumagiti ebe ha꞉kiya deha꞉potoma꞉ da꞉midimini Godote huiyatiya ebe koma꞉ komidima꞉ne.”
MAT 23:13 Ba꞉bene Ya꞉suti gala na꞉kagoiya꞉, “Godokono Tutumu iya꞉tulamepi ba꞉gala Pa꞉lisi kapiyuimipi, la꞉ galane kuba huiya konomo kolawema꞉nemata, mabu la꞉ ma꞉lapila netewa tawakalubilata! Tawakaluba꞉te Godokono Ko Gawadubu habamo a꞉pa꞉la꞉hama꞉ da꞉pelamenaka, la꞉le huiyatiya ibino gabo bekalapilalamenamata. La꞉ ha꞉kiya a꞉pa꞉la꞉hama꞉ ubihinola, ba꞉bema꞉ la꞉ ibi atumu na꞉kaduhilamenamata!
MAT 23:14 “Ba꞉ hibila, Godokono Tutumu iya꞉tulamepi ba꞉gala Pa꞉lisi kapiyuimipi, la꞉ ma꞉lapila netewa tawakalubilata! “La꞉le hamolehamoleno ilina ha꞉da amiho komodo ba uwate ba꞉bo wibuilamelelamenakomata, ba꞉bene la꞉le ba꞉be komo kubaha꞉ma꞉ ga꞉lalo tolamete Godotamo baidi ba nibubulamehole ga꞉ga꞉ga꞉ toetoe tabo ba꞉bo nega꞉lanakomata, mabu la꞉ ubila tawakaluba꞉te la꞉eno komo umilo la꞉ hidohidopima꞉ koga꞉lama꞉. Ba꞉bema꞉ hibila, la꞉le kuba huiya konomo kolawema꞉nemata!
MAT 23:15 “Ba꞉ hibila, la꞉ Godokono Tutumu iya꞉tulamepi ba꞉gala Pa꞉lisi kapiyuimipi, la꞉ kuba huiya konomo kolawema꞉nemata, mabu la꞉ ma꞉lapila netewa tawakalubilata! “La꞉ kehaha꞉ kolomolo ba꞉gala hopo konomolo awagahago wapata꞉lamenamata eta kapiya lumagi lawete la꞉eno kapiyuimidawama꞉ komidima꞉, ba꞉bene ba꞉be uli lumagiti la꞉ ba ibamilatele atu kuba komokomo ododiliti huiyatiya ebeno kubate la꞉ hiliyonomoeno kuba kogogolema꞉ne. Ba꞉bema꞉ hibila, la꞉ hiliyonomate kapimilo Koe Habamo konepalagama꞉nemata!
MAT 23:16 “A꞉iye, la꞉ puya꞉te kuba gabo diya꞉tulamenama, la꞉ ba꞉ ba꞉bi baidi tamihopi dubulata! “La꞉ kuba huiya konomo kolawema꞉nemata, mabu la꞉ ba꞉ma ka꞉na ga꞉lanakomata, ‘Pote Godoko Adikumino Genamoeno mahilamo olamagiti, ebete ba꞉be tabo gala da꞉kadikamidalemene, ba꞉be komo kubaha꞉. Huiyatiya ebete atu tabo Godokono Genamoeno golodo ilinoeno mahilamo dolamagimini, ebete ebeno tabo kodakodama꞉ miditi gala a꞉kadikamidala꞉mene.’
MAT 23:17 Hibila, la꞉ ba꞉ baidi tamiholamepi dubula ba꞉gala la꞉ daedae ukuipilata! Godoko Adikumino Genamoeno talona konomola, huiyatiya genama gulu ditana ba꞉be golodo ilinoeno talona koha꞉!
MAT 23:18 “Ba꞉gala la꞉ eta komo ba꞉ma ka꞉na ga꞉lanakomata, ‘Pote Godoko owatidoloeno patapatoeno mahilamo olamagiti, ebete ba꞉be tabo gala da꞉kadikamidalemene, ba꞉be komo kubaha꞉. Huiyatiya ebete ba꞉be patapata hunulu ditana ba꞉be hawa꞉goeno ilinoeno mahilamo atu tabo dolamagimini, ebete ebeno tabo kodakodama꞉ miditi gala a꞉kadikamidala꞉mene.’
MAT 23:19 “Hibila, la꞉ ba꞉ baidi tamiholamepi dubulata! Godoko owatidoloeno patapatoeno talona konomola, huiyatiya ebe hunulu ditana ba꞉be hawa꞉goeno ilinoeno talona koha꞉!
MAT 23:20 La꞉ nulia꞉la꞉, ba꞉be patapatate Godoko owatidoloenoma꞉ itana, ba꞉gala tawakaluba꞉te patapata hunamo da꞉miya꞉tenaka ba꞉bi hawa꞉goeno ilinate atumu Godoko owatidoloenoma꞉ kapola꞉na. Ba꞉bema꞉ lumagiti talona patapatoeno mahilamo dolamagimini ebete ebeno tabo gala a꞉kadikamidala꞉mene, ba꞉gala etate talona hawa꞉goeno ilinoeno mahilamo dolamagimini ebete atumu ebeno tabo gala a꞉kadikamidala꞉mene.
MAT 23:21 Ba꞉ hibila, aeno Ko Talona Godote ebeno Adikumino Genamalo bemedena, ba꞉bema꞉ lumagiti Godokono talona mahilamo dolamagimini ebete ebeno tabo gala a꞉kadikamidala꞉mene, ba꞉gala etate Godokono Genamoeno mahilamo dolamagimini ebete atumu ebeno tabo gala a꞉kadikamidala꞉mene.
MAT 23:22 Ba꞉gala eta komo, Godokono Hunu Habalo ebete ebeno Ko Gawadubuino luta bahilo bemedena. Ba꞉bema꞉ lumagiti Hunu Haboeno mahilamo dolamagimini ebete ebeno tabo gala a꞉kadikamidala꞉mene, ba꞉gala etate Ko Gawadubu Godokono mahilamo dolamagimini ebete atumu ebeno tabo gala a꞉kadikamidala꞉mene.
MAT 23:23 “Ba꞉ hibila, Godokono Tutumu iya꞉tulamepi ba꞉gala Pa꞉lisi kapiyuimipi, la꞉ kuba huiya konomo kolawema꞉nemata, mabu la꞉ ma꞉lapila netewa tawakalubilata! “La꞉ la꞉eno pali ilina hiliyonomo ipuwalo ta꞉ni komokomo ba anagilamehole Godotamo ebeno komo hidamo ikamehonakomata. Ba꞉be komo ipuwalo la꞉ kapiya deha꞉potonomo komo a꞉kotalemata, huiyatiya Godokono kokonomo tutumu ododilima꞉ la꞉ hidamo kemalagidolenaha꞉. Ba꞉ma ka꞉na la꞉ tawakaluba꞉godolo tuputupulu kemedenaha꞉, ba꞉gala la꞉le ibi malemalelo kemalagidolenaha꞉, ba꞉gala la꞉eno ododili komodo Godokono hibi komo kahawakaliminaha꞉. Ba꞉bema꞉ wadiyala la꞉ ba꞉bi koko komo nododilinala꞉ ba꞉gala atu tetelo hegehege komo ododili akadodohola꞉la꞉.
MAT 23:24 A꞉iye, la꞉ puya꞉te gabo kubamo diya꞉tulamenama, la꞉ ba꞉ ba꞉bi baidi tamihopi dubulata! Ba꞉bema꞉ la꞉eno ododi komo ba꞉ ba꞉ma ka꞉nala, la꞉ beya niho tetelo la꞉ dopamo beya ba hola꞉minahale hegehege ilina humagago tama꞉mo miya꞉tenakomata, huiyatiya la꞉eno kalili ipuwalo da꞉pola꞉na ba꞉bi koko ababale ilina ulameheno beyago dito nihonakomata!
MAT 23:25 “Ba꞉ hibila, Godokono Tutumu iya꞉tulamepi ba꞉gala Pa꞉lisi kapiyuimipi, la꞉ kuba huiya konomo kolawema꞉nemata, mabu la꞉ ma꞉lapila netewa tawakalubilata! La꞉le la꞉eno kalili ba꞉gala meleke hunu hapu bukulalenakomata, huiyatiya la꞉eno tepo ipuwalo da꞉pola꞉na ba꞉bi komokomo a꞉kukulala꞉lemata, ba꞉bema꞉ la꞉le pilo gabodo ba꞉gala kateneno ubi gabodo dododilinakoma, ba꞉bi koko kuba tabotabohonomola.
MAT 23:26 Ba꞉bema꞉ Pa꞉lisi baidi tamihodawa, wadiyala ama꞉ kalili ipuwa dopamo ukulate ba꞉bene tame atumu na꞉kukuluya꞉! Ba꞉be gabo kapiyado amia꞉no dalowa꞉te kowiboma꞉ne.
MAT 23:27 “Ba꞉ hibila, Godokono Tutumu iya꞉tulamepi ba꞉gala Pa꞉lisi kapiyuimipi, la꞉ kuba huiya konomo kolawema꞉nemata, mabu la꞉ ma꞉lapila netewa tawakalubilata! “Iyo, ha꞉lahapino bobo bahino piki tawakaluba꞉te hidohido tita꞉goenoma꞉ da꞉midilinaka, la꞉ ba꞉ ba꞉ba ka꞉nala mabu hunuti hidamo pola꞉na huiyatiya piki mabulu tawakalubino goha ababale tabotabohote pola꞉na!
MAT 23:28 Hibila, ba꞉ ba꞉ba ka꞉na tawakaluba꞉te la꞉eno hunu tama ba ulamelelamena la꞉ tuputupupima꞉ ka꞉laminata, huiyatiya la꞉eno tepo ipuwalo ma꞉lapila netewa komo ba꞉gala kuba ododili komate la꞉godolo tabotabohote pola꞉na.”
MAT 23:29 Ya꞉suti tabo moga꞉melo gala na꞉kagoiya꞉, “Godokono Tutumu iya꞉tulamepi ba꞉gala Pa꞉lisi kapiyuimipi, la꞉ kuba huiya konomo kolawema꞉nemata, mabu la꞉ ma꞉lapila netewa tawakalubilata! “Numa꞉la꞉, la꞉eno iniwala꞉te Godokono ukui hawakalimipi danakapulamenakui, la꞉ ba꞉ma tetelo ba꞉bi Godokono tuputupu okopi hunamo ba wadiya꞉paa꞉latele ibino bobo bahi hidonomamo ododiliti haiyai ba꞉bo amihonakomata.
MAT 23:30 Ba꞉gala atu tetelo la꞉ na꞉kaga꞉lanakomata, ‘Aeno iniwala꞉te demedenama꞉, a ba꞉ba tetelo iba꞉go nemedenatale, ale Godokono ukui hawakalimipa꞉tamo owalubi ba ihate aeno hidohido ododili komodo ibino ka꞉ka꞉ ba꞉mula꞉lelamiya꞉na꞉.’
MAT 23:31 Ao, la꞉le ba꞉ atumu ibi banakapulamiuya꞉na꞉! Numa꞉la꞉, la꞉ ha꞉kiya la꞉eno tabamo la꞉eno kuba ukui behawakalilamenakomata, iyo, la꞉ ba꞉ iniwalino gugudilata!
MAT 23:32 Ba꞉bema꞉ la꞉eno iniwala꞉te da꞉tupuimiya꞉, modobola la꞉ ibino kuba konomo upula꞉te la꞉eno kuba huiya Godogodone na꞉lawiya꞉la꞉!
MAT 23:33 “A꞉iye, la꞉ kaluino gugudilata, iyo, la꞉ ba꞉ bu kalulata, ba꞉bema꞉ la꞉ Koe Haboeno huiya komone keba ka꞉na na꞉kalahutihoma?
MAT 23:34 “Nale la꞉ hibinomolo goelamemata, nale Godokono ukui hawakalimipi ba꞉gala ebeno mulupi dubu ba꞉gala ebeno hibi Tutumu iya꞉tulamepi la꞉tamo kopoelamema꞉nemo. Huiyatiya la꞉le komopi kehamo ba pihomolatele kanakapulamema꞉nemata, ba꞉gala la꞉le komo la꞉eno baidi ibubulamehole genamalo giya꞉pa꞉pa꞉mo ka꞉na꞉miga꞉latilima꞉nemata, ba꞉bene naeno okopa꞉te la꞉eno temeteme ikalame ipuwane eta habamo da꞉nawalelahalemena꞉, la꞉le ba꞉bamo nikuliti ibi gala eta habamo kakaneta꞉malatelema꞉nemata.
MAT 23:35 Ba꞉bema꞉ la꞉le kuba huiya kolawema꞉nemata, mabu ba꞉moe hopoeno tupuimi mabuni la꞉le Godokono ukui hawakalimipi anakapulamenakuimata. Tuputupudawa A꞉ibolokono hawiti hakamo da꞉ka꞉ka꞉liya꞉, ba꞉be komo ba꞉ tupuimi mabula. Ba꞉bene la꞉le komo tuputupu okopi hiliyonomo anakapulamete, kuititi tetelo Godoko Adikumino Genamalo la꞉le Balakayakono gudu Sekalayako ba꞉bo kanakapumiya꞉mata, iyo, ebete ba꞉be Genamoeno Talona Haba ba꞉gala Godotamo hawa꞉goeno ikameho bahi tetenomolo ba la꞉na, la꞉le ebe kubanomamo anagalimiya꞉mata.
MAT 23:36 “Ba꞉bema꞉ na la꞉tamo hibi tabonomo begoemo, ba꞉ma tete tawakaluba꞉tamo ba꞉bi hiliyonomoeno kuba huiyate hibilo kopema꞉ne.”
MAT 23:37 Ba꞉bene Ya꞉suti gala na꞉kagoiya꞉, “O Yelusalema, Yelusalema! Ama꞉le Godokono ukui hawakalimipi anakapulamenakata, ba꞉gala ebete ama꞉ kowalubima꞉ da꞉poelamenako, ama꞉le ibi nakolamo mapelamelo akanakapulamenakata. Tete ga꞉ga꞉nomolo na ubi nihatenamimo amia꞉no tawakalubi naeno ekatamo kitagua꞉midalema꞉, kakabate ebeno gugudi ditagua꞉midalenako ba꞉ba ka꞉na, huiyatiya ama꞉ ubiha꞉ma꞉ eda꞉nama꞉ta!
MAT 23:38 Ba꞉bema꞉ mu numitota꞉, amia꞉no habate kubanomo kokubama꞉ne.
MAT 23:39 Nale ama꞉tamo na꞉goemo, amia꞉no tawakaluba꞉te na tete ga꞉ga꞉nomolo a꞉kunama꞉mena꞉, huiyatiya amia꞉no galanepa꞉te Godotamo ba꞉ma ka꞉na da꞉ga꞉lamena꞉, ‘Amia꞉no mahilago da꞉pita, ale ebe hunamo kadipatema꞉nema꞉!’ ba꞉ba tetelo nale gala da꞉kapemo iba꞉te na ba꞉bo kunamema꞉na꞉.”
MAT 24:1 Ba꞉bene Ya꞉suti Godoko Adikumino Hiya꞉ Genama miya꞉pate ba to, ebe ta꞉matapa꞉te ebetamo pelamete ba꞉bi koko genamoeno komokomoma꞉ ba꞉bo pega꞉lamiya꞉.
MAT 24:2 Ya꞉suti huiyatiya iba꞉tamo na꞉goiya꞉, “La꞉ ba꞉moi ilina hiliyonomo bekulamiutama? Na la꞉tamo hibi tabo begoemo, galane ba꞉moi genamoeno komoma꞉ eta nakolate eta hunulu a꞉kapola꞉namena꞉, mabu alaholohopa꞉te nakola hiliyonomo mapitahalete hopamo iya꞉hekenomo kopiya꞉hekema꞉na꞉.”
MAT 24:3 Ba꞉bene Ya꞉suti Olibi Kehakeha Hunu Hakalo ba luta, ebe ta꞉matapi ha꞉kiya ebetamo pelamete na꞉pega꞉luya꞉, “Ama꞉ a na꞉kiyaa꞉ma꞉, Godokono Genama kubahimi komote keba tetelo na꞉kuluhukumini? Ama꞉le ba꞉moe hopamo gala da꞉kapemena꞉, ba꞉be komo ba꞉gala hopo haboeno kuititi komoeno tetema꞉ a bada hanohano komote na꞉kiya꞉tua꞉memene?”
MAT 24:4 Ya꞉suti huiyatiya iba꞉tamo na꞉goiya꞉, “La꞉ hidamo. Eta lumagiti la꞉ ha꞉da damiholamemena꞉, la꞉ ebeno tabo akulia꞉la꞉,
MAT 24:5 mabu komo hiliyonomo dubate naeno mahilamo pelamete kopega꞉lama꞉na꞉, ‘Na ba꞉ Kelisotela!’ ba꞉bene iba꞉te hiliyonomo tawakalubi ha꞉da ba꞉ma ka꞉na ba pamiholame hiya꞉ gabamo ba꞉bo komagatalema꞉na꞉.
MAT 24:6 Ba꞉gala la꞉le hiya꞉hiya꞉ hopo tawakalubino alaholoho komo ba꞉gala ibino alaholohoma꞉ nopo tamote komo kulihoma꞉nemata. Ba꞉ba tetelo la꞉le la꞉eno ukui kodakoduilamete akatoletolehala꞉, mabu ba꞉moi komate hibilo kopikulima꞉na꞉ huiyatiya ba꞉be tete ebe kuititi teteha꞉.
MAT 24:7 Ba꞉ hibila, komo hopo tawakaluba꞉te komo hopo tawakaluba꞉go kalaholohoma꞉na꞉, iyo, eta hopote etatamo alaholo komo kododima꞉ne, ba꞉bene komo habahabalo tawakaluba꞉te baa꞉heno kemedehoma꞉na꞉ ba꞉gala wima꞉la꞉te hiya꞉hiya꞉ hopo hiliyonomatamo kopelamema꞉na꞉.
MAT 24:8 Numa꞉la꞉, ba꞉moi hiliyonomo komo ba꞉ kamenate gudu lawema꞉ temeteme da꞉tupuimi ba꞉ba ka꞉nala.
MAT 24:9 “Ba꞉ba tetelo iba꞉te la꞉tamo koko temeteme ba ikalame la꞉ heloamo uwatete anakapulamema꞉ komagatalema꞉na꞉ta, ba꞉gala na mabuma꞉ hiliyonomo hopoeno tawakaluba꞉te la꞉tamo komaubahama꞉na꞉.
MAT 24:10 Ba꞉bene komo hiliyonomo tawakaluba꞉te ibino hibima꞉ midi ipuwalo nato ba ukamidahale, iba꞉te ibino mabuluba꞉tamo maubahalete diya gabodo ibino mahilo ibi anakapulamepa꞉tamo kowatama꞉na꞉.
MAT 24:11 Ba꞉gala Godokono mahilamo ha꞉da tabo olamagimipa꞉te kikulima꞉na꞉ komo hiliyonomo tawakalubi kuba gabamo komagatalema꞉.
MAT 24:12 Ba꞉ba tetelo kuba ododili komote konomoma꞉ keda꞉ma꞉ne, ba꞉bema꞉ tawakalubino tepo ipuwalo malemale emalagidolo komote gibagiba hibima꞉ keda꞉hama꞉ne,
MAT 24:13 huiyatiya numa꞉la꞉, kebe lumagiti kodakodalo utiti kuitita꞉mo da꞉nuluhukumini, Godote ebeno ka꞉ka꞉ komula꞉mema꞉ne.
MAT 24:14 Ba꞉bema꞉ Godote Ko Gawadubuma꞉ deda꞉na, ba꞉be komoeno Hido Tabo ebeno okopa꞉te dopamo ba꞉moe hopo konomolo kolamagimima꞉na꞉ hiya꞉hiya꞉ hopoeno tawakalubi hiliyonomate kulihoma꞉, ba꞉bene ba꞉moe hopoeno kuititi ba꞉bo kuluhukuma꞉ne.”
MAT 24:15 Na Ma꞉tiyuti buka ka꞉lamiholedawatamo na꞉goemo, ama꞉ ba꞉moe tabo Ya꞉suti da꞉goiya꞉ hidamo niya꞉tawa. Ya꞉suti tabo moga꞉melo gala na꞉kagoiya꞉, “Godokono ukui hawakalimidawa Da꞉niyolote dopamo da꞉goiya꞉ ba꞉be komote hibilo kuluhukuma꞉ne, ba꞉bema꞉ Godokono Genama kubahimidawate ba꞉be talona habalo la꞉nalo la꞉le ebe dumima,
MAT 24:16 ba꞉ba tetelo wadiyala Yudiya hoponapa꞉te hunuhunu hakamo nalahutihamena꞉.
MAT 24:17 Iyo, genama panalo da꞉lutamene, ba꞉be lumagiti genama guamo a꞉kana꞉pa꞉gamene ebeno ilina uwatema꞉,
MAT 24:18 ba꞉gala tumulu oko dowatitamene, ba꞉be lumagiti gala genamamo a꞉katoamene ebeno atuino kaliko lawema꞉.
MAT 24:19 “Numa꞉la꞉, lamitulamitu ba꞉gala nono dikalamena ba꞉bi kamenakamenatamo ba꞉be hegelate kubanomoma꞉ keda꞉ma꞉ne!
MAT 24:20 Ba꞉bema꞉ wadiyala la꞉ toetoeholo Godoko na꞉toemehuya꞉la꞉, la꞉eno alahutiho komote gibagiba tetelo o okoha꞉ talona hegela tetelo akuluhukala꞉,
MAT 24:21 mabu ba꞉ba tetelo kokonomo temetema꞉te hibilo kopikulima꞉na꞉. Numa꞉la꞉, ba꞉moe hopo tupuimi mabuni tupuimiti ka꞉lo ba꞉ma teta꞉mo puluhuku, ba꞉bakobako temetema꞉te dopamo kapikuliya꞉ha꞉, ba꞉gala galane tetelo ba꞉bakobako temetema꞉te gala a꞉kapelama꞉mena꞉, iyo, iba꞉te kapiya tetenomolo kopikulima꞉na꞉.
MAT 24:22 Ba꞉moe komo ba꞉ hibila, Godote ba꞉be tete gopowahimihino eta lumagiti ba꞉moe hopolo a꞉kemedenamene, huiyatiya ebete da꞉ka꞉lamiholiya꞉ ba꞉bi tawakalubi malemalelatelelo tete kogopowahimima꞉ne.
MAT 24:23 “Ba꞉ba tetelo eta lumagiti la꞉tamo ba꞉ma ka꞉na da꞉goemene, ‘Numa꞉la꞉, Godokono Oemedawa Kelisote ba꞉malo bemedena!’ o, ‘Ebete ba꞉bolo bemedena!’ la꞉ hibima꞉ akamida꞉la꞉,
MAT 24:24 mabu ha꞉da Kelisoma꞉ eda꞉hapi ba꞉gala naeno mahilamo ha꞉da tabo olamagimipi, iba꞉te ikulihote hiya꞉hiya꞉ hanohano komo kokonomo kododilima꞉na꞉. Iyo, ibi ubila ba꞉bi ododili komamo Godote da꞉ka꞉lamiholiya꞉ ba꞉bi tawakalubi hiya꞉ gabamo komagatalema꞉.
MAT 24:25 Numa꞉la꞉, ba꞉moi komate pikulihino nale la꞉ dopamo kiyalamemata.
MAT 24:26 “Ba꞉bema꞉ iba꞉te la꞉tamo ba꞉ma ka꞉na da꞉ga꞉lamena꞉, ‘Numa꞉la꞉, Kelisote dito hopolo bemedena!’ la꞉ ebamo akatolama꞉la꞉. Ba꞉gala iba꞉te da꞉kaga꞉lamena꞉, ‘Numa꞉la꞉, ebete eta lumagino genamalo awalelate ba꞉luta!’ la꞉ hibima꞉ akamida꞉la꞉.
MAT 24:27 Hibila, hegelate da꞉la꞉wa꞉hiyamene ba꞉ba tetelo hegelate alomo hunu konomo ba a꞉la꞉mina alote hapuni tupuimiti hapuamo dito kopetoma꞉ne, ba꞉bema꞉ na Tawakalubino Naniwiti gala da꞉kapemo naeno pe komote ba꞉ ba꞉ba ka꞉na kitanama꞉ne, iyo, hopo habanapi hiliyonomate naeno pe komo kumima꞉na꞉.
MAT 24:28 “Ba꞉moe komo ba꞉ hibila, abale ilinate kebolo ditana, wala꞉te alehola꞉go ba꞉bamo koguditama꞉na꞉.”
MAT 24:29 “Ba꞉be ko temeteme tetete da꞉wibomene, ba꞉ba tetenomolo hegelate kuduma꞉ne ba꞉gala manomete a꞉ka꞉la꞉minamene, iyo, oloka꞉te alomone hopamo kopigudima꞉na꞉ ba꞉gala alomoeno helohelo ilinate komidiwiholema꞉na꞉.
MAT 24:30 Ba꞉ba tetelo Tawakalubino Naniwino helo hawakalimino hanohano komote alomolo kuluhukuma꞉ne, ba꞉bene ba꞉moe hopoeno hiliyonomo hiya꞉hiya꞉ tawakaluba꞉te ko tola꞉go kihimima꞉na꞉, mabu Tawakalubino Naniwiti alomo hununi ba pihitiga iba꞉te ebe ba꞉bo kumima꞉na꞉, ebete ebeno heloago ba꞉gala alo konomago kopema꞉ne.
MAT 24:31 Ba꞉bene ebeno nopodawate gebole ibulu ba mole, ebete Hunu Haboeno komo nopopi hiya꞉hiya꞉ hopo hiliyonomamo kopoelamema꞉ne, Godote da꞉ka꞉lamiholiya꞉ ba꞉bi tawakalubi ba꞉moe hopo hapuhapuni kopuwatema꞉.”
MAT 24:32 “La꞉ anahu kehoeno komone ba꞉moe eta komo hidamo niya꞉tawahala꞉. Gedawoeno huha꞉te pikuliti uliuli paha da꞉mogolamemena꞉, ba꞉be komote la꞉ kiya꞉tulamema꞉na꞉ta gogoeno tete ba꞉ na꞉tatali,
MAT 24:33 ba꞉bema꞉ la꞉le ba꞉moi temeteme komo hiliyonomo dulamema, la꞉ kiya꞉tawahama꞉nemata Tawakalubino Naniwino pe tete tatalila, ebe ba꞉ gigihodo a꞉pa꞉gama꞉ pe.
MAT 24:34 Na la꞉tamo hibi tabo begoemo, ba꞉moi hiliyonomo komate dopamo kopikulihoma꞉na꞉, galane ba꞉ma tete tawakaluba꞉te ba꞉bo koha꞉lahama꞉na꞉,
MAT 24:35 iyo, ba꞉moe hopo ba꞉gala alomo iba꞉te kowiboma꞉na꞉, huiyatiya naeno tabote a꞉kawibamene, itana tetelo bitanamene.”
MAT 24:36 “Numa꞉la꞉, tawakaluba꞉te ba꞉be Ko Hegeloeno tete iya꞉tawahaha꞉, Hunu Haboeno nopopi ba꞉gala Godokono Gudu iba꞉te iya꞉tawahaha꞉, Nabiwi Godote ha꞉kiya iya꞉tawala.
MAT 24:37 Nowako tetelo kebako komote kuluhukuya꞉, Tawakalubino Naniwiti gala da꞉kapemene ba꞉ba tetelo atu komote kakuluhukuma꞉ne.
MAT 24:38 Mabu beyate peheno iba꞉te ba꞉ba tetelo baa꞉ nahata ba꞉gala helo gao beya koamo nihota, dubate kamenakamena uwateholeta ba꞉gala kamenakamenate dubu uwateholeta, iba꞉te ba꞉ba ka꞉na ba ewagelena Nowate ko boga꞉mo ba꞉bo opeguya꞉.
MAT 24:39 Ba꞉ba tetelo iba꞉te kiya꞉tawahanamiha꞉ beya konomote odolote ibi hiliyonomo danakapulamemene, ba꞉bema꞉ Tawakalubino Naniwiti gala da꞉kapemene ba꞉be tetete ba꞉ ba꞉ba ka꞉na kitanama꞉ne.
MAT 24:40 Ba꞉ba tetelo dubu netewate tumulu da꞉wapatitamena꞉, Tawakalubino Naniwiti pete eta ba pelawe eta ba꞉bo komiya꞉pama꞉ne,
MAT 24:41 ba꞉gala kamenakamena netewate baa꞉ da꞉lapahutamena꞉, ebete pete eta ba pelawe eta ba꞉bo komiya꞉pama꞉ne.
MAT 24:42 Ba꞉bema꞉ la꞉ uliholo nemedeniya꞉la꞉, mabu la꞉ iya꞉tawaha꞉ la꞉eno Kodawoeno pe tete.
MAT 24:43 Ba꞉gala ba꞉moe eta komo na꞉kemalagidolala꞉. Genama namutudawate pilo lumagino pe tete diya꞉tawamene ebete ba꞉be du konomolo ba꞉ba teta꞉mo kulihonama꞉ne, mabu ebe ubihinola pilo dawate ebeno genamamo popegama꞉.
MAT 24:44 Ba꞉bema꞉ la꞉ atumu na꞉hidala꞉, mabu diyala, la꞉ ulihoheno ba emedena Tawakalubino Naniwiti ba꞉bo da꞉ pemene.”
MAT 24:45 Ba꞉bene Ya꞉suti gala na꞉kagoiya꞉, “Namutudawatamo da꞉papamiwatanako ba꞉be mulu okodawoeno komo keba ka꞉nala꞉ka꞉? Ba꞉ hibila, namutudawate ebe lawete komo okopi ulamedawama꞉ kihatema꞉ne, ba꞉ma ka꞉na ebete ibino baa꞉ naha tetelo iba꞉tamo baa꞉ kikalameholema꞉ne.
MAT 24:46 Ba꞉bene ba꞉be muludawate oko hidamo ba owatina, ebeno namutudawate pete ebeno komo da꞉pumimini, ba꞉be okodawate koamo kokalakalama꞉ne.
MAT 24:47 Na la꞉tamo hibi tabo begoemo, namutudawate ba꞉be mulu okodawoeno komoma꞉ ba pekalakala, ebete ebe ebeno ilina hiliyonomo ulamedawama꞉ kihatema꞉ne.
MAT 24:48 “Huiyatiya ba꞉be okodawate kuba ukui lawete ebeno tepo ipuwalo ba꞉ma ka꞉na da꞉goemene, ‘Naeno namutudawate tete ga꞉ga꞉dopolo nemedena, tiyolo kapenaha꞉,’
MAT 24:49 ba꞉ba tetelo ebete oko owatihino komo kuba ododilipa꞉go ebeno namutudawoeno baa꞉ koamo nahate helo gao beya ba꞉bo konihoma꞉na꞉, ba꞉bema꞉ ebete daedaema꞉ eda꞉te komo okopi alukuli ba꞉bo kotupuimima꞉ne.
MAT 24:50 Ba꞉bene ba꞉be daedae okodawate ulihoheno ba emedena ebeno namutudawoeno pe komo a꞉kiya꞉tawamene. Ba꞉ba tetelo namutudawate pete
MAT 24:51 daedae okodawa koamo panagalimihote ma꞉lapila netewa tawakaluba꞉go konoemema꞉ne ebeno kuba huiya konelawema꞉, ba꞉be temeteme habalo iba꞉te lalo ba nikilame konomamo kihimima꞉na꞉.”
MAT 25:1 Ba꞉bene Ya꞉suti gala na꞉kagoiya꞉, “Ba꞉be hegelalo Godote Ko Gawadubuma꞉ deda꞉na, ba꞉be komote ba꞉ma ka꞉na kitanama꞉ne. Eta dubuti uli kamena da꞉lawi, ba꞉ba tetelo ta꞉ni bohelemela꞉te ibino wuiki alo uwatete genamane nikuliti eba꞉go poko habamo tolamema꞉ nelatimitiya꞉,
MAT 25:2 ibi ipuwalo paibo bohelemela꞉te daedaema꞉ eda꞉huya꞉, huiyatiya komo paibate hido ukuia꞉go tolamiya꞉.
MAT 25:3 Ba꞉ma ka꞉na daedae bohelemela꞉te ibino wuiki da꞉watui iba꞉te modobo beyago kawataha꞉,
MAT 25:4 huiyatiya hido ukuia꞉go da꞉tolami ba꞉bi bohelemela꞉te modobo beya iyapohote ibino wuiki ba꞉gala beya ba꞉bo watuya꞉.
MAT 25:5 “Da꞉duni dubuti poko habamo tiyolo kapuluhukuniha꞉, ba꞉bema꞉ bohelemela꞉te tete ga꞉ga꞉lo nipo da꞉latimini iba꞉te ba꞉ dito lahaniya꞉.
MAT 25:6 Iwa tetenomolo eta lumagiti ba꞉ma ka꞉na goewatani, ‘Dubuti ba꞉ na꞉pe! La꞉ hiliyonomate eba꞉go alugama꞉ na꞉pelama꞉la꞉!’
MAT 25:7 “Ba꞉ba tetelo ba꞉bi bohelemela꞉te mahila꞉halenate ibino wuiki pa꞉tihoma꞉ ba ewagelena,
MAT 25:8 ba꞉bene paibo daedae bohelemela꞉te ibino hido ukui mabuluba꞉tamo na꞉ga꞉laniya꞉, ‘Wadiyala꞉ka꞉ la꞉eno wuiki beya tata atamo ikaa꞉mehoe? Aeno wuikiti tatalila koha꞉lahama꞉na꞉.’
MAT 25:9 “Huiyatiya hido ukui bohelemela꞉te iba꞉tamo na꞉ga꞉laniya꞉, ‘Ao, ale la꞉tamo dikalamemena꞉, a hiliyonomate modoboha꞉ma꞉ keda꞉hama꞉nema꞉. Wadiyala la꞉ tolamete kolowami genamalo beya na꞉niyapohala꞉.’
MAT 25:10 Ba꞉bene daedae bohelemela꞉te beya oholema꞉ da꞉tolameni, dubuti poko habamo ba꞉bo puluhukuni. Ba꞉ba tetelo paibo bohelemela꞉te dopamo hido ukuia꞉go da꞉latimini, iba꞉te eba꞉go poko genamamo nalehawaminanate genama namutudawate gigiho ba꞉ dito pekalapilani.
MAT 25:11 “Ba꞉bene komo paibo daedae bohelemela꞉te galane da꞉pelameni, iba꞉te gigiho tama꞉mo putitatanate genama namutudawa ba꞉ma ka꞉na pega꞉lameniya꞉, ‘Aeno Kodawa! Gigiho na꞉pa꞉hiya꞉midaa꞉ma꞉!’
MAT 25:12 Huiyatiya ebete na꞉goeni, ‘Ao, na la꞉eno komo iya꞉tawaha꞉.’”
MAT 25:13 Ba꞉bene Ya꞉suti kuititi tabo ba꞉ma ka꞉na goiya꞉, “La꞉ uliholo nemedeniya꞉la꞉, mabu Tawakalubino Naniwino hegela ba꞉gala tete la꞉ kiya꞉tawahanaha꞉.”
MAT 25:14 Ba꞉bene Ya꞉suti gala na꞉kagoiya꞉, “Godote Ko Gawadubuma꞉ deda꞉na, ba꞉be komote ba꞉ma ka꞉na kitanama꞉ne. Eta ko dubuti muhulu hopamo ba to ebeno okopi ebetamo ka꞉lamiti, iba꞉te ebeno ilina ba꞉gala mani hidamo kulamelemenama꞉ hiya꞉hiya꞉ ikalameholete ba꞉bo tuya꞉.
MAT 25:15 Ba꞉ba tetelo ebete etatamo 5,000 mani bikamiya꞉, ba꞉gala etatamo 2,000 mani, ba꞉gala etatamo 1,000 mani, ibino ukuia꞉go modobolo ba꞉ba ka꞉na ba ikalamehole, ebete ibi ba꞉ dito miya꞉paliya꞉.
MAT 25:16 Ba꞉bene 5,000 mani da꞉lawiya꞉ ba꞉be dubuti tonomo tote eta bisnisi oko ba nowati eta 5,000 mani ba꞉bo nododiya꞉,
MAT 25:17 ba꞉gala 2,000 mani da꞉lawiya꞉ ba꞉be dubuti atumu ba kanewagele eta 2,000 mani benododiya꞉,
MAT 25:18 huiyatiya 1,000 mani da꞉lawiya꞉ ba꞉be dubuti tote haka naligiti ebeno namutudawoeno mani dito nawaminuya꞉.
MAT 25:19 “Komo gogo da꞉petohuya꞉ ba꞉bi okopino namutudawate gala kapete iba꞉go kapimilo ibino mani kuititi ba꞉bo peka꞉lamiholelamiya꞉.
MAT 25:20 Ba꞉bene 5,000 mani da꞉lawiya꞉ ba꞉be dubuti pete 10,000 mani ba pehawakalimi na꞉pegoiya꞉, ‘Namutudawa, numa꞉. Ama꞉ 5,000 mani natamo ikanamiya꞉ta, huiyatiya naeno oko ipuwalo eta 5,000 mani gala da꞉kododimo, mola.’
MAT 25:21 Ebeno namutudawate ebetamo na꞉goiya꞉, ‘Ehe! Ama꞉ ba꞉ hido okodawalata ba꞉gala hido tuputupudawalata! Ama꞉ deha꞉poto komo hidamo ododia꞉ta, ba꞉bema꞉ na huiyatiya ama꞉ naeno komo koko komokomo ulamedawama꞉ komidima꞉nemata. Ama꞉ naeno kalakala poko habamo na꞉pa꞉pa꞉ga.’
MAT 25:22 “Ba꞉bene 2,000 mani da꞉lawiya꞉ ba꞉be dubuti pete na꞉pegoiya꞉, ‘Namutudawa, numa꞉. Ama꞉ 2,000 mani natamo ikanamiya꞉ta, huiyatiya naeno oko ipuwalo eta 2,000 mani gala da꞉kododimo, mola.’
MAT 25:23 Ebeno namutudawate ebetamo na꞉goiya꞉, ‘Ehe! Ama꞉ ba꞉ atumu hido okodawalata ba꞉gala hido tuputupudawalata! Ama꞉ deha꞉poto komo hidamo ododia꞉ta, ba꞉bema꞉ na huiyatiya ama꞉ naeno komo koko komokomo ulamedawama꞉ komidima꞉nemata. Ama꞉ naeno kalakala poko habamo na꞉pa꞉pa꞉ga.’
MAT 25:24 “Ba꞉bene kuititidawate 1,000 mani da꞉lawiya꞉, ebete pete na꞉pegoiya꞉, ‘Namutudawa, na iya꞉tawala ama꞉ tabo helonomo dubulata. Komopa꞉te ilina damihonaka ama꞉ ba꞉bi ilina dito ba꞉petapihonakomena꞉ta, ba꞉gala iba꞉te kikipo ibino pala꞉mo da꞉haminahalenaka ama꞉ noloho tetelo dito ba꞉puwatenakomena꞉ta ama꞉le ha꞉kiya konahama꞉.
MAT 25:25 Ba꞉bema꞉ ama꞉ da꞉tuiya꞉la, nale ama꞉ tolemelo amia꞉no 1,000 mani haka ipuwamo dito nugumuiya꞉mo. Mola, ba꞉moe ba꞉bela. Amia꞉no ilina na꞉kalawa꞉.’
MAT 25:26 “Ebeno namutudawate huiyatiya ebetamo na꞉goiya꞉, ‘Ama꞉ kubanomo buhama okodawalata! Ama꞉ tabo ba꞉ma ka꞉na a꞉gaa꞉ta, komopa꞉te damihonaka nale ba꞉bi ilina dito ba꞉petapihonakomo, ba꞉gala iba꞉te kikipo da꞉haminahalenaka nale noloho tetelo dito ba꞉puwatenakomo.
MAT 25:27 Ba꞉bema꞉ mabu keka꞉ ama꞉ naeno mani baneka okopa꞉tamo kanikalamiya꞉ha꞉? Iba꞉te mani uwatete eta oko nowatitale kodopoma꞉ beda꞉na꞉, ba꞉bene nale pete ama꞉le natamo atu mani huiyatiya nanekela꞉mo hunudopamo gala ba꞉ka-ikanameona꞉.’
MAT 25:28 “Ba꞉bene ko dubuti ebeno hopopa꞉tamo na꞉goiya꞉, ‘La꞉ ebeno 1,000 mani lawemete 10,000 mana꞉goeno dubutamo nikama꞉la꞉.
MAT 25:29 Mabu kebe lumagigodolo hidohido ukui da꞉pola꞉na, etate ebetamo hiliyonomo hidohido komo ikamehote ebeno tepo ipuwa kotabuimima꞉ne, huiyatiya kebe lumagigodolo hidohido ukui pola꞉naheno, ebegodolo kebe kapiyakapiya komate da꞉pola꞉na etate ebegodone gala kakuwatemema꞉ne.
MAT 25:30 Ba꞉bema꞉ ba꞉moe buhama okodawa du ipuwamo dito na꞉na꞉da꞉nala꞉, ba꞉bolo ebete komopa꞉go lalo ba nikilame konomamo kihimima꞉na꞉.’”
MAT 25:31 Ba꞉bene Ya꞉suti gala na꞉kagoiya꞉, “Tawakalubino Naniwiti ebeno alo konomago ba꞉gala Hunu Haboeno nopopa꞉go da꞉pemene, ba꞉ba tetelo ebete ebeno Ko Gawadubu emede bahilo kopilutama꞉ne tawakalubino komo kopanagilamelelamema꞉.
MAT 25:32 Ba꞉bene hiya꞉hiya꞉ hopo tawakalubi hiliyonomate ebetamo da꞉pekapiyuimimina꞉, ba꞉ba tetelo ebete ibi hiliyonomo hiya꞉hiya꞉ komiya꞉tema꞉ne, sipi-goegoe ulamedawate sipi ba꞉gala gautu hiya꞉hiya꞉ keba ka꞉na ka꞉miya꞉tenako ba꞉ba ka꞉na,
MAT 25:33 ba꞉bene ebete sipi-goegoe ebeno tu hapuamo miya꞉tete gautu-goegoe ebeno pele hapuamo komiya꞉tema꞉ne.
MAT 25:34 “Ba꞉ba tetelo Ko Gawadubuti tu hapu tawakaluba꞉tamo ba꞉ma ka꞉na kogoema꞉ne, ‘Naeno Nabiwiti hidohidopima꞉ da꞉goena, la꞉ ebeno Ko Gawadubu habamo na꞉pa꞉la꞉hala꞉ hidohido komokomo ba꞉bolo kopuwatema꞉. Iyo, ebete hopo haba ododi tetelo la꞉tamo da꞉hiduimiya꞉, la꞉ ba꞉moe uli haba na꞉pelawa꞉la꞉.
MAT 25:35 Mabu na baa꞉ kapete dunamenakui ba꞉ba tetelo la꞉le baa꞉ natamo ikanamehonenakuimata, ba꞉gala na beya kapete dunamenakui la꞉le na beyamo owalubininakuimata. Nale kapeladawamo la꞉tamo duluhukunakuimo ba꞉ba tetelo la꞉le na kalakalago a꞉lawenenakuimata,
MAT 25:36 ba꞉gala pupulino ilinaha꞉ tetelo dito da꞉lutanakuimo la꞉le kaliko a꞉pulinamenakuimata. Tawetawete dunamenakui ba꞉ba tetelo la꞉le na hidamo buiya꞉menanenakuimata, ba꞉gala komo kubapa꞉te na du genamamo dihatenenakui la꞉le na unamema꞉ ba꞉bamo a꞉pelamenakuimata.’
MAT 25:37 “Ba꞉ba tetelo tuputupupa꞉te huiya tabo Ko Gawadubutamo koga꞉lama꞉na꞉, ‘Kodawa, keba tetelo ama꞉ baa꞉ kapete dumitiya꞉la, ale ama꞉ umiti baa꞉ ba꞉bo kikametiya꞉la? Ba꞉gala ale beya kebolo kikametiya꞉la?
MAT 25:38 Keba tetelo ama꞉ kapeladawamo da꞉puluhukuya꞉la, ale ama꞉ umiti kalakalago ba꞉bo ka꞉lawitiya꞉la? Ba꞉gala ale hido kaliko kebolo ka꞉pulimitiya꞉la?
MAT 25:39 Keba tetelo ama꞉ tawetawete dumitiya꞉la ale owalubi ba꞉bo ka꞉pihatiya꞉ma꞉? Ba꞉gala komopa꞉te ama꞉ du genamamo dihatitiya꞉la ale keba tetelo ama꞉ umima꞉ ba꞉bamo ka꞉pelamiya꞉ma꞉?’
MAT 25:40 “Ba꞉bene Ko Gawadubuti iba꞉tamo kohuiyama꞉ne, ‘Ba꞉moi naeno ta꞉matapi nulama꞉la꞉. Na la꞉tamo hibi tabo begoemo, la꞉le ibi ipuwalo deha꞉potonomo lumagitamo ba꞉mako hido komo dododinamima, la꞉ natamo ododinamimata.’
MAT 25:41 “Ba꞉bene ebete ohobigate pele hapupa꞉tamo ba꞉ma ka꞉na kogoema꞉ne, ‘Godote la꞉tamo kuba huiya ikalamema꞉ goena, ba꞉bema꞉ la꞉ naeno holoholo hapuni na꞉tolama꞉la꞉! Ebete Saitanako ba꞉gala ebeno nopopi mabuma꞉ ha꞉gaha꞉ koe ya꞉lo demaduya꞉, la꞉ ba꞉be koe ipuwamo na꞉tolama꞉la꞉!
MAT 25:42 Mabu na baa꞉ kapete dunamenakui la꞉le baa꞉ natamo kikanamenakuiha꞉, ba꞉gala na beya kapete dunamenakui la꞉le beyamo kowalubininakuiha꞉.
MAT 25:43 Na kapeladawamo duluhukunakuimo, la꞉le na kalakalago kalawenenakuiha꞉, ba꞉gala na pupulino ilinaha꞉ tetelo dito da꞉lutanakuimo la꞉le kaliko kapulinamenakuiha꞉. Tawetawete na dunamenakui ba꞉gala komo kubapa꞉te na du genamamo dihatenenakui, la꞉le na kapowalubininakuiha꞉.’
MAT 25:44 “Ba꞉ba tetelo iba꞉te huiya tabo ebetamo koga꞉lama꞉na꞉, ‘Kodawa, ama꞉ baa꞉ kapete o beya kapete keba tetelo kumititiya꞉la? Ba꞉gala ama꞉ kapeladawamo o ilinaha꞉dawamo atamo keba tetelo ka꞉puluhukuya꞉la? Ba꞉gala ama꞉ tawetawete dumitiya꞉la o komopa꞉te ama꞉ du genamamo dihatitiya꞉la keba tetelola꞉ka꞉? Ale ama꞉ ba꞉ba ka꞉na ewagelitalo kuminakuiha꞉!’
MAT 25:45 “Ebete huiyatiya iba꞉tamo kogoema꞉ne, ‘Na la꞉tamo hibi tabo begoemo, la꞉le naeno deha꞉potonomo lumagitamo ba꞉mako hido komo ododihino demedenamima, la꞉le natamo kododinamiha꞉.’”
MAT 25:46 Ba꞉bema꞉ Ya꞉suti kuititi tabo ba꞉ma ka꞉na goiya꞉, “Ba꞉ hibila, ba꞉bi kubapa꞉te wiboha꞉ Temeteme Habamo ba tolame, huiyatiya tuputupupa꞉te wiboha꞉ Ka꞉ka꞉ Habamo kotolamema꞉na꞉.”
MAT 26:1 Ba꞉bene Ya꞉suti ba꞉moi tabo hiliyonomo olamagi da꞉wibuya꞉, ebete ebe ta꞉matapa꞉tamo na꞉goiya꞉,
MAT 26:2 “La꞉ iya꞉tawahala Adaguila꞉ Poko tupuimima꞉ netewa hegelate ba꞉nepola꞉na. Ba꞉ba tetelo Godote Tawakalubino Naniwi tawakalubino kokotamo kihatema꞉ne, ba꞉bene iba꞉te ebe kehamo pihomotete ba꞉bo kanakapumima꞉na꞉.”
MAT 26:3 Ba꞉be gogolo Kayapasiti Godotamo hawa꞉goeno ikamehopino Hununomo Watodawama꞉ eda꞉nami. Ba꞉bema꞉ ba꞉be ko dubu ba꞉gala ebeno hopopi ba꞉gala Yu tawakalubino komo koko dubu, iba꞉te ebeno genamamo pekapiyuimiti
MAT 26:4 tabo ba꞉bo ihatiya꞉ Ya꞉suku kanakapumima꞉. Ba꞉bema꞉ iba꞉te ebe diya lawema꞉ gabo ba ohowadita
MAT 26:5 komopa꞉te huiyatiya na꞉ga꞉luya꞉, “A Poko tetelo ebe a꞉kalawa꞉ma꞉, mabu tawakaluba꞉te atamo maubahalete ago alaholohodemena꞉.”
MAT 26:6 Ba꞉bene Ya꞉suti Betani habalo eta dubu Saimonokono genamalo lutiya꞉, ba꞉be dubu dopamo kuitikuita꞉goenola.
MAT 26:7 Ya꞉suti baa꞉ ba nuta ba꞉ba tetelo kapiya kamenate pete, hido nibo ihi nakola kalila꞉mo tabuimi adahete Ya꞉sukunu watamo ba꞉bo pehaminamiya꞉, ba꞉be ihi ilinoeno huiya konomola.
MAT 26:8 Ya꞉suku ta꞉matapa꞉te ba꞉be komo dumiya꞉ iba꞉te maubahalete na꞉ga꞉luya꞉, “Mabu keka꞉ ebete huiya ko ilina gigilepalama꞉ da꞉midi?
MAT 26:9 A ba꞉moe ihi kolowamima꞉ na꞉nimiditale mani konomo buwatena꞉, ba꞉bene ba꞉bi mani awaepa꞉tamo dito bikalameholena꞉!”
MAT 26:10 Ya꞉suti ibino tabo ga꞉la iya꞉tawate huiyatiya iba꞉tamo na꞉goiya꞉, “La꞉le ba꞉moe kamena badama꞉ ka꞉kiyahamiutama? Ebete natamo hidonomo komo bododi.
MAT 26:11 La꞉ numa꞉la꞉, awaepa꞉te tete ga꞉ga꞉nomolo la꞉go bemedehonamena꞉, la꞉eno ubi tetelo ibi nowalubilinakuya꞉la꞉, huiyatiya na emedena tetelo la꞉go a꞉kemedenamo, tete tatalila nale la꞉ komiya꞉palema꞉nemata.
MAT 26:12 Ba꞉bema꞉ nale hoeha꞉ tetelo ba꞉moe kamenate hido nibo ihi naeno apa꞉mo da꞉hamina, ba꞉be komodo ebete gabo bihiduimi naeno ape bobamo ihatema꞉.
MAT 26:13 Na la꞉tamo hibi tabo begoemo, tawakaluba꞉te hiya꞉hiya꞉ hiliyonomo hopamo Godokono Hido Tabo datanakomena꞉, iba꞉te ba꞉moe kamenate dododi ba꞉be komo emalagidololo ba꞉nolamagiminakomena꞉.”
MAT 26:14 Ba꞉bene Ya꞉sukunu 12 ta꞉matapi ipuwalo Keliyotanapi Yudasiti Godotamo hawa꞉goeno ikamehopino watowatopa꞉tamo tote,
MAT 26:15 na꞉negoiya꞉, “Nale Ya꞉suku la꞉eno kokotamo dihatemo, la꞉le natamo bada huiya na꞉kikanameoma?” Ba꞉ba tetelo iba꞉te 30 siliba mani ba꞉bo ikamiya꞉,
MAT 26:16 ba꞉bene ba꞉ba tetene tupuimiti ebete gabo bohowadiya꞉ Ya꞉suku ibino kokotamo kihatema꞉.
MAT 26:17 Ba꞉bene tawakaluba꞉te Hunamo Mahigaha꞉ Palawa Baa꞉ Poko naha da꞉tupuimiya꞉, ba꞉be hegelalo Ya꞉suku ta꞉matapa꞉te ebetamo pelamete na꞉pega꞉luya꞉, “Ale Adaguila꞉ Pokoeno naha ilina kebolo na꞉ka꞉hiduilamema꞉, ale ama꞉go kapimilo konahama꞉?”
MAT 26:18 Ya꞉suti iba꞉tamo na꞉huiyuya꞉, “La꞉ netewapi ko habamo tote aeno eta mabulubi da꞉numima, ba꞉be dubutamo ba꞉ma ka꞉na na꞉nega꞉luya꞉la꞉, ‘Iya꞉tulamedawate goe, naeno olalati komoeno uluhuku tete tatalila, Godokono ubila. Ba꞉bema꞉ na ubila amia꞉no genamalo nale naeno ta꞉matapa꞉go Adaguila꞉ Poko baa꞉ kopenama꞉.’”
MAT 26:19 Ba꞉bene Ya꞉suti ibi keba ka꞉na ka꞉kiyalamiya꞉, ebe ta꞉matapa꞉te ba꞉ba ka꞉na nododiti Adaguila꞉ Poko ilina ba꞉bo nihiduilamiya꞉.
MAT 26:20 Ba꞉bene ba꞉be dulu Ya꞉suti ebeno 12 ta꞉matapa꞉go baa꞉ nahama꞉ da꞉gagahidiniya꞉,
MAT 26:21 ba꞉ba tetelo Ya꞉suti iba꞉tamo na꞉goeniya꞉, “Na la꞉tamo hibi tabo begoemo, la꞉ ipuwalo etate na anakapunamepi kowalubilima꞉ne na lawenema꞉.”
MAT 26:22 Iba꞉te tepo menemenenomoma꞉ ba eda꞉hana Ya꞉sutamo etate goenakui, etate goenakui, “Kodawa, nalela꞉ka꞉?”
MAT 26:23 Ebete iba꞉tamo na꞉huiyaniya꞉, “Baa꞉ kalila꞉mo pote nago kokoto ka꞉ma꞉ daduti, ba꞉be ba꞉be lumagila. Ebete na anakapunamepino kokotamo kihatenema꞉ne.
MAT 26:24 Iyo, ba꞉ hibila, Tawakalubino Naniwiti hoea꞉mo ba꞉ na꞉to, Godokono Bukalo tabo ba꞉ma ka꞉na itana, huiyatiya kebe lumagiti ebe anakapumipa꞉tamo dikalamemene, ba꞉be lumagiti kuba huiya konomo kolawema꞉ne. Ba꞉moe ba꞉be mabuma꞉ ba꞉be dubu ebeno menokote ebe alahimiha꞉ma꞉ eda꞉ ba꞉ wadiyala!”
MAT 26:25 Ba꞉bene Yudasiko, ebete dopamo Yu watowatopa꞉go nopo da꞉tamotiya꞉ Ya꞉suku lawema꞉, ebete na꞉goeniya꞉, “Iya꞉tulamedawa, nalela꞉ka꞉?” Ya꞉suti na꞉huiyaniya꞉, “Ama꞉ ba꞉ a꞉gaa꞉ta.”
MAT 26:26 Ba꞉bene iba꞉te baa꞉ ba nahana, Ya꞉suti baa꞉ lawenate Godotamo kalakala tabo goenate ba꞉bo wakamihoniya꞉, ba꞉bema꞉ ebete ebe ta꞉matapa꞉tamo ba ikalamena na꞉goeniya꞉, “La꞉ uwatete na꞉nahala꞉, ba꞉moe ba꞉ naeno apela.”
MAT 26:27 Ba꞉bene ebete kalili kalawenate, Godotamo kalakala tabo goenate iba꞉tamo ba ikalamena na꞉goeniya꞉, “La꞉ hiliyonomo na꞉nihala꞉,
MAT 26:28 mabu Godote tawakaluba꞉go komiloma꞉ nopo da꞉tamotiya꞉, ba꞉moe naeno hawiti ba꞉be nopo bekodakoduimina, iyo, ba꞉moe hawiti komo hiliyonomo tawakalubino kuba egebolelamema꞉ koka꞉ka꞉la꞉ma꞉ne.
MAT 26:29 Nale la꞉ begoelamemata, na ba꞉ma tetelo ba꞉moe gao beya gala a꞉kana꞉mo, huiyatiya naeno Nabiwiti Ko Gawadubuma꞉ deda꞉na, ba꞉be habalo na uli gao beya galane tetelo la꞉go koninihoma꞉nema꞉.”
MAT 26:30 Ba꞉bene iba꞉te Godoko adikumino ohale alapihonate, Olibi Kehakeha Hunu Hakamo kotolamenama꞉ genamane ba꞉ dito ikuliniya꞉.
MAT 26:31 Ba꞉ba tetelo Ya꞉suti iba꞉tamo na꞉goeniya꞉, “Ka꞉lo dulu la꞉ hiliyonomate na komiya꞉panema꞉nemata, mabu Godokono Bukalo tabo ba꞉ma ka꞉na itana, ‘Godote sipi-goegoe ulamedawa danakapumimini, ba꞉ba tetelo ebeno kapiyuimi sipi-goegoa꞉te hiya꞉hiya꞉ kalahutihoma꞉na꞉.’
MAT 26:32 Huiyatiya Godote na hoene gala da꞉kadipanatenemene, na Ga꞉lili hopamo dopamo kotoma꞉nemo. La꞉le na ba꞉bolo kopunamema꞉nemata.”
MAT 26:33 Ba꞉bene Pitate Ya꞉sutamo na꞉goeniya꞉, “Ibi hiliyonomate hoe tolemelo ama꞉ miya꞉pate dalahutihomena꞉, huiyatiya nale ama꞉ a꞉kamiya꞉pamata!”
MAT 26:34 Ya꞉suti ebeno tabo ba huiyana na꞉goeniya꞉, “Na ama꞉tamo hibi tabo begoemo, ka꞉lo dulu kakabate goehoheno, ama꞉ netewa-kapiya teta꞉mo na iya꞉tawaha꞉ma꞉ kogoema꞉na꞉ta.”
MAT 26:35 Pitate ebetamo gala na꞉kagoeniya꞉, “Na ama꞉go da꞉nehoemo, nale ama꞉ iya꞉tawaha꞉ma꞉ a꞉kagaa꞉mo!” Ba꞉ba tetelo Ya꞉suku ta꞉matapi hiliyonomate ba꞉ atu tabo bekaga꞉laniya꞉.
MAT 26:36 Ba꞉bene Ya꞉suku ba꞉gala ebe ta꞉matapi iba꞉te ko habane ikulinate eta tatali hopamo tolameniya꞉, ba꞉be hopoeno mahilo Getasemanila. Ya꞉suti ba꞉bolo iba꞉tamo na꞉negoeniya꞉, “La꞉ ba꞉malo na꞉pola꞉nala꞉. Na ba꞉moe tatalia꞉mo tomo Godotamo toetoe tabo konolamagima꞉.”
MAT 26:37 Ba꞉ba tetelo ebete Sebedikono gugudi Ya꞉imesiko ba꞉gala Yoneko, ibi netewapi ba꞉gala Pitako baleta toetoe tabo ga꞉la baha꞉mo magatalenate, ba꞉bene tepo menemene komo ba꞉gala ukui temeteme komo ebetamo konomamo ba꞉bo pelameniya꞉.
MAT 26:38 Ba꞉bema꞉ Ya꞉suti iba꞉tamo na꞉goeniya꞉, “Na tepo temeteme konomamo iya꞉tawanamo, ba꞉mako tepo temeteme na anakapuname huiyala. La꞉ ba꞉malo nago uliholo na꞉pola꞉nala꞉.”
MAT 26:39 Ba꞉bene ebete nanekela꞉mo tonate, ebeno holoholo hakamo nihatenate Godotamo ba꞉ma ka꞉na netoetoeniya꞉, “Naeno Nabiwi, ama꞉ modoboma꞉ da꞉goemena꞉, ba꞉moe temeteme kalili nagodone na꞉lawa꞉. Huiyatiya naeno ubiha꞉, ama꞉ ha꞉kiya amia꞉no ubila nododa꞉.”
MAT 26:40 Ba꞉bene ebete ta꞉matapa꞉tamo da꞉peniya꞉ lahanalo pulamenate Pitatamo na꞉pegoeniya꞉, “Mabu keka꞉ la꞉le nago tete nanekelelo uliho modoboha꞉ma꞉ deda꞉hanama?”
MAT 26:41 Ba꞉ba tetelo Ya꞉suti ibi na꞉goelameniya꞉, “Godotamo uliholo na꞉toetoehonala꞉, mabu la꞉le Saitanakono kuba gabamo emogabuimi komamo gudidimata. La꞉eno tepo ipuwalo hido komo ododima꞉ ubila, huiyatiya la꞉godolo ododi helo puliyala.”
MAT 26:42 Ya꞉suti eta tetelo gala katonate Godotamo ba꞉ma ka꞉na kanetoetoeniya꞉, “Naeno Nabiwi, ba꞉moe temeteme kalili ama꞉ nagodone lawema꞉ gabote itanaheno wadiyala, amia꞉no ubi ditanamene na konima꞉nemo.”
MAT 26:43 Ba꞉bene ebete ebe ta꞉matapa꞉tamo da꞉kapeniya꞉ lahanalo kapulameniya꞉, mabu ibino baiditi menemenema꞉ eda꞉halameniya꞉.
MAT 26:44 Ba꞉bene Ya꞉suti netewa-kapiya tetelo ibi gala kamiya꞉palenate, dopamo ebete toetoe tabo keba ka꞉na ka꞉nolamaginiya꞉ ebete Godotamo ba꞉ atumu kanolamaginiya꞉.
MAT 26:45 Ba꞉ba tetelo ebete ebe ta꞉matapa꞉tamo da꞉kapeniya꞉ iba꞉tamo na꞉pegoeniya꞉, “La꞉ hawela amiholo gala badama꞉ ka꞉kalahonama? Numa꞉la꞉, tete ba꞉ a꞉pe, kubapa꞉te Tawakalubino Naniwi ibino kokotamo ba꞉ na꞉lawa꞉.
MAT 26:46 Iyo, la꞉ na꞉pakaminala꞉, a ba꞉ na꞉tolamema꞉. Numa꞉la꞉, na anakapunamepino kokotamo ihatenedawate ba꞉ na꞉pe!”
MAT 26:47 Ya꞉suti ba꞉be tabo ba goena Yudasiti ba꞉bo peniya꞉, Ya꞉sukunu 12 ta꞉matapi ipuwalo ebe ba꞉ etala. Ba꞉bene eba꞉go komo dubu hiliyonomate ibino alaholoho gili ba꞉gala kukago pelameniya꞉, ba꞉bi dubu ba꞉ Godotamo hawa꞉goeno ikamehopino watowatopi ba꞉gala Yunapino komo koko dubu, iba꞉te da꞉poelameniya꞉ ba꞉bi dubula.
MAT 26:48 Ba꞉ hibila, Yudasiti ibi ya꞉lo ba꞉ma ka꞉na goelameniya꞉, “Nale daboetehomo, ba꞉be ba꞉be lumagila. La꞉ ebe tiyonomo na꞉lawiya꞉la꞉.”
MAT 26:49 Ba꞉bene Yudasiti penate, Ya꞉sutamo tonomo tonate ebe na꞉negoemeniya꞉, “Iya꞉tulamedawa, nolata!” Ba꞉ba tetenomolo ebete ebe ba꞉bo aboetehoniya꞉.
MAT 26:50 Ya꞉suti ebetamo na꞉goeniya꞉, “Mabulubi, ama꞉ bada komo ododima꞉ da꞉pa꞉, nododa꞉,” ba꞉bene komo dubate Ya꞉sutamo pelamenate ibino kokotamo ebe kodakodanomolo ba꞉bo laweniya꞉.
MAT 26:51 Ba꞉bene Ya꞉suku ta꞉matapi ipuwalo eta dubuti ebeno alaholo gili magubutinate, Godotamo hawa꞉goeno ikamehopino Hununomo Watodawoeno genama okodawa anagaliminate galo hapu ba꞉bo mapitamidameniya꞉.
MAT 26:52 Huiyatiya Ya꞉suti ebetamo na꞉goeniya꞉, “Amia꞉no gili gala na꞉kahula꞉, mabu gila꞉mo dalaholohona galane komopa꞉te ibi atumu gila꞉mo kanakapulamema꞉na꞉.
MAT 26:53 Ama꞉ iya꞉tawala꞉ka꞉, nale ubi ihatete Godoko da꞉kiyamemo, ba꞉ba tetelo na kowalubinima꞉ ebete ebeno 12 taosene alaholoho nopopi kopoelamema꞉ne?
MAT 26:54 Huiyatiya nale ba꞉ba ka꞉na dewagelemo, Godote dopamo ebeno Bukamo da꞉miya꞉tiya꞉ ba꞉bi hibi komate keba ka꞉na na꞉kikulimina꞉? Buka tabote hibilo goena ba꞉moi komate natamo nikula꞉mena꞉!”
MAT 26:55 Ba꞉ba tetelo Ya꞉suti komo dubu hiliyonomatamo na꞉goeniya꞉, “Na pilo lumagila꞉ka꞉, o na alaholodawala꞉ka꞉? Mabu keka꞉ la꞉le alaholoho gila꞉go ba꞉gala kukago na lawenema꞉ da꞉pelamema? Na komo hegelalo Godoko Adikumino Hiya꞉ Genamalo ba luta tawakalubi diya꞉tulamenatimo, la꞉le na ba꞉bolo kalaweneha꞉,
MAT 26:56 huiyatiya ba꞉moi hiliyonomo komate ba꞉ ikuliha, Godokono ukui hawakalimipa꞉te ebeno Bukamo dopamo da꞉miya꞉tiya꞉ ba꞉bi tabo komate hibima꞉ keda꞉hama꞉.” Ba꞉ba tetelo ebe ta꞉matapi hiliyonomate ebe miya꞉panate dito alahutihoniya꞉.
MAT 26:57 Ba꞉ba tetelo Ya꞉suku da꞉laweniya꞉ ba꞉bi dubate ebe Kayapasikono genamamo magataniya꞉, Kayapasiko ba꞉ Godotamo hawa꞉goeno ikamehopino Hununomo Watodawala. Iba꞉te Ya꞉suku ba꞉be genamamo magatanaheno dopamo Godokono Tutumu iya꞉tulamepi ba꞉gala komo koko dubu iba꞉te pelamenate ba꞉bo pekapiyaniya꞉.
MAT 26:58 Ba꞉ba tetelo Pitate Ya꞉suku muhuludopone ba ta꞉matana, ebete Hununomo Watodawoeno genama kala ipuwamo na꞉pa꞉ganate lawamepa꞉go ba꞉bo nilutiya꞉. Ebe ubila kebe komote Ya꞉sutamo duluhukumini ba꞉be komo ebeno baida꞉mo kuminama꞉.
MAT 26:59 Ba꞉bene Godotamo hawa꞉goeno ikamehopino watowatopi ba꞉gala komo Ka꞉nisolo dubu hiliyonomate ha꞉da tabo ga꞉lapi boholeniya꞉, Ya꞉sukunu kuba oholemenate ebe kanakapumima꞉.
MAT 26:60 Ba꞉bema꞉ hiliyonomo tabo ga꞉lapa꞉te ebeno komoma꞉ ha꞉da bamihohoniya꞉ huiyatiya ibino tabo ga꞉la ipuwalo Ka꞉nisolo dubate Ya꞉sukunu hoe mabuma꞉ eta kuba kuminiya꞉ha꞉. Ba꞉bene kuititi hapuamo netewapa꞉te badi puluhukunate
MAT 26:61 ulihopa꞉tamo na꞉pega꞉laniya꞉, “Ba꞉moe dubuti ba꞉ma ka꞉na goi, ‘Naeno helo modobola Godoko Adikumino Genama anabulimiti netewa-kapiya hegelalo gala kaketema꞉nemo.’”
MAT 26:62 Ba꞉bene Godotamo hawa꞉goeno ikamehopino Hununomo Watodawate mahiganate Ya꞉sutamo na꞉goeniya꞉, “Ama꞉ tabo goeha꞉ma꞉ badama꞉ kedeona? Ba꞉moi dubate ama꞉ mabuma꞉ da꞉ga꞉lana keba ka꞉nala꞉ka꞉?”
MAT 26:63 Ya꞉suti tabo goeheno Hununomo Watodawate ebetamo gala na꞉kagoeniya꞉, “Nale ama꞉ Ka꞉ka꞉ Godokono mahilamo na꞉goememata, ama꞉ a na꞉kiyaa꞉ma꞉, ama꞉ ba꞉ Godokono Gudu Kelisotela꞉ka꞉?”
MAT 26:64 Ya꞉suti ebetamo na꞉huiyaniya꞉, “Ama꞉ ba꞉ a꞉gaa꞉ta. Nale la꞉ begoelamemata, hibila, la꞉le na Tawakalubino Naniwi aeno Helodawa Godokono tu hapulu lutalo kunamema꞉nemata, iyo, galane na Hunu Habane hawai ipuwado kopehawakalama꞉nemo!”
MAT 26:65 Ba꞉bema꞉ Hununomo Watodawate ba꞉be tabo ulinate, ebeno konomo mauba komo kohawakaliminama꞉ ebete da꞉puliniya꞉ ba꞉be atuino ga꞉ga꞉ kaliko anagiya꞉midalenate na꞉goeniya꞉, “A ba꞉moe dubuino kuba kiya꞉tawahama꞉ eta tabo goedawa a ubihinola! Ebete ha꞉kiya kubanomo tabo da꞉goe la꞉ ba꞉ ulihomata, mabu ebete na꞉goe, ‘Na ba꞉gala Godoko, a ba꞉ kapiyala!’
MAT 26:66 Ba꞉bema꞉ la꞉eno ubi keba ka꞉nala꞉ka꞉ ebeno komoma꞉?” Ka꞉nisolo dubate huiya tabo na꞉ga꞉laniya꞉, “Wadiyala ebete na꞉haa꞉mene!”
MAT 26:67 Ba꞉bene komo iba꞉te kowe ebeno holoholamo mehoholenate, ba꞉gala komopa꞉te kokotamo ebe tatakolo ba anagalimihona
MAT 26:68 na꞉ga꞉laniya꞉, “Ama꞉ Godokono ukui hawakalimidawa Kelisoma꞉ hibilo deda꞉na, a na꞉kiyaa꞉ma꞉ ama꞉ puya꞉te kanagalimihotana!”
MAT 26:69 Ba꞉ba tetelo Pitate ba꞉be genamoeno kala ipuwalo ba luta, oko bohelete ebetamo penate ebe na꞉pikiyameniya꞉, “Ama꞉ ba꞉ atumu ba꞉moe Ga꞉lili hoponapi Ya꞉sukuba꞉ pata꞉nama꞉ta!”
MAT 26:70 Pitate ibi hiliyonomoeno holoholo hapulu na꞉goeniya꞉, “Ao, ama꞉le da꞉goena ba꞉be tabo na iya꞉tawaha꞉.”
MAT 26:71 Ba꞉bene ebete kala imi gigihamo da꞉toniya꞉, ba꞉ba tetelo eta oko bohelete ebe uminate, ba꞉bolo da꞉pola꞉nuya꞉ ba꞉bi tawakalubi na꞉kapekiyalameniya꞉, “Ba꞉moe dubuti Nasaletenapi Ya꞉sukuba꞉ pata꞉nami!”
MAT 26:72 Huiyatiya Pitate ba꞉ atu tabo ba꞉ma ka꞉na kagoeniya꞉, “Na Godokono mahilamo goemo, na ba꞉be dubu iya꞉tawaha꞉!”
MAT 26:73 Ba꞉bene ba꞉bolo da꞉pola꞉nuya꞉ iba꞉te tete nanekelelo pola꞉natepanate Pitatamo pelamenate ebe gala na꞉kapikiyameniya꞉, “Hibila! Ama꞉ ba꞉ Ya꞉sukunu eta lumagilata, mabu amia꞉no tabo olamagi komote ba꞉moe komo behawakalimina, ama꞉ ba꞉ Ga꞉lili hopodawa etama꞉ eda꞉nata.”
MAT 26:74 Huiyatiya Pitate na꞉goeniya꞉, “Godokono dopo hapulu utiti na꞉goemo, nale hibi tabo goeheno ebete na kanagalinamema꞉ne! Nale ba꞉be dubu iya꞉tawaha꞉!” Ba꞉bene ba꞉ba tetenomolo kakabate da꞉goehoniya꞉,
MAT 26:75 Ya꞉suti ebetamo dopamo kebe tabo ka꞉goeniya꞉, Pitate ba꞉be tabo ba꞉bo emalagidoloniya꞉, “Kakabate goehoheno ama꞉le netewa-kapiya teta꞉mo na iya꞉tawaha꞉ma꞉ kogoema꞉na꞉ta.” Ba꞉bene Pitate gobogobamo tonate konomo tepo temetema꞉go ibulunomo ba꞉bo nihiniya꞉.
MAT 27:1 Hegelate da꞉powalohuya꞉ Godotamo hawa꞉goeno ikamehopino watowatopi ba꞉gala komo kokopi, ibi hiliyonomate Ya꞉suku anakapumima꞉ tabo bega꞉lutiya꞉.
MAT 27:2 Ba꞉bene iba꞉te Ya꞉suku hala꞉mo matuhumihote Paeletetamo ba꞉bo magatuya꞉, ebe ba꞉ Lomanapa꞉te Yudiya hopamo da꞉poemiya꞉ ba꞉be kapela Ko Gawadubula.
MAT 27:3 Ba꞉ba tetelo Yu watowatopa꞉te Ya꞉suku anakapumima꞉ nopo hibinomolo da꞉tamotiya꞉, Yudasiti ba꞉be komo uliya꞉, ebe ba꞉ Ya꞉suku ibino kokotamo dihatiya꞉ ba꞉be lumagila. Ba꞉bema꞉ ebete du tetelo kebe kuba komo kododiniya꞉ ba꞉be mabuma꞉ tepo temeteme konomoma꞉ eda꞉lo, ebete 30 siliba mani Yu watowatopa꞉tamo kawadahete na꞉pegoiya꞉,
MAT 27:4 “Na kuba ododinimo. Na tuputupunomo lumagi la꞉eno kokotamo ihatenimo.” Ba꞉bene watowatopa꞉te ebeno tabo ba huiya na꞉ga꞉luya꞉, “Ebe aeno komoha꞉, ama꞉ ha꞉kiya amia꞉no komola.”
MAT 27:5 Ba꞉ba tetelo Yudasiti ba꞉bi mani Godoko Adikumino Hiya꞉ Genama guamo ba꞉bo nemela꞉midaliya꞉, ba꞉bene ebete tote ebeno kokoba꞉mo hale nema꞉homete ebe ha꞉kiya ebe ba꞉bo nanakapumiya꞉.
MAT 27:6 Ba꞉bema꞉ Yu watowatopa꞉te ba꞉bi mani ba uwatehole ba꞉ma ka꞉na ga꞉luya꞉, “Tutumu tabote talona bihatea꞉mena ale ba꞉moe mani Godokono mana꞉go kapiyuimima꞉, mabu ba꞉moe mani ba꞉ lumagi anakapumi manila.”
MAT 27:7 Ba꞉bene iba꞉te tabo ba꞉ma ka꞉na ihatiya꞉, “Wadiyala a ba꞉moe mana꞉mo Kalili Ododili-dawoeno Haka kolawema꞉nema꞉, ba꞉bene kapela tawakaluba꞉te Yelusalema ko habalo da꞉peha꞉lanakomena꞉, ale ibi ba꞉moe hakamo ba꞉miya꞉tenakoma꞉.”
MAT 27:8 Ba꞉bema꞉ ba꞉ba tetene tupuimiti ba꞉ma teta꞉mo puluhuku tawakaluba꞉te ba꞉be haka Hawi Huiya Hakama꞉ ka꞉mina, mabu dopamo iba꞉te ba꞉be mana꞉mo lumagi anakapumiti ebeno hawi hakamo ba꞉bo ka꞉ka꞉liya꞉.
MAT 27:9 Ya꞉lo tetelo Godokono ukui hawakalimidawa Yelemayate tabo ba꞉ma ka꞉na goiya꞉, “Isalaela tawakaluba꞉te 30 siliba mani uwatete na꞉ga꞉luya꞉, ‘Ba꞉moe ba꞉ Godokono okodawoeno huiyala.’ Ba꞉bema꞉ Kodawa Godote na Yelemayako keba ka꞉na ka꞉kiyanami, tawakaluba꞉te ba꞉bi mana꞉mo kebe komo na꞉kododimina꞉, iba꞉te hibilo ba꞉ ba꞉ba ka꞉na ododiya꞉, iyo, iba꞉te ba꞉be mana꞉mo Kalili Ododilidawoeno Haka belawiya꞉.” Ba꞉bema꞉ ba꞉moe komo ba꞉ hibila, Ya꞉suku tetelo Yu watowatopa꞉te ba꞉be haka mana꞉mo da꞉lawiya꞉, ba꞉ba tetelo Godote Yelemayako ipuwado dopamo da꞉goiya꞉ ba꞉be tabote hibinomoma꞉ ba꞉bo ediya꞉.
MAT 27:11 Ba꞉bene Ya꞉suti kapela Ko Gawadubu Paeletekono holoholo hapulu ba la꞉na, ebete ebe ba꞉bo alatediya꞉, “Ama꞉ Yu tawakalubino Ko Gawadubula꞉ka꞉?” Ya꞉suti na꞉goiya꞉, “Ama꞉ ba꞉ a꞉gaa꞉ta.”
MAT 27:12 Ba꞉bene Godotamo hawa꞉goeno ikamehopino watowatopi ba꞉gala komo koko dubu, iba꞉te Ya꞉sukunu komoma꞉ na꞉ga꞉lutiya꞉ ebete hiya꞉hiya꞉ kuba bododilinami. Ba꞉ba tetelo Ya꞉suti huiyatiya tabo kagoiya꞉ha꞉.
MAT 27:13 Ba꞉bene Paeletete ebetamo na꞉goiya꞉, “Iba꞉te na꞉ga꞉lita ama꞉ hiliyonomo koko kuba bododilia꞉ta. Ibino tabo ga꞉la na꞉kuliuta?”
MAT 27:14 Huiyatiya Ya꞉suti eta tabo deha꞉poto kapiya kagoiya꞉ha꞉, ba꞉bema꞉ kapela Ko Gawadubuti konomamo hanohanuya꞉.
MAT 27:15 Ba꞉ba tete tawakalubino ododi komo ba꞉ma ka꞉nala, hiliyonomo gogo ipuwalo Yunapino Adaguila꞉ Poko tetelo ibi hiliyonomate du genamalo kapiya lumagi mahilamo da꞉ka꞉minakui, kapela Ko Gawadubu Paeletete ba꞉be lumagi ebeno kuba huiyane dito oemenakui.
MAT 27:16 Ba꞉ba tetelo eta lumagiti du genamalo nemedenami, ebeno mahilo Balabasitila ba꞉gala ebete kebe koko kuba dododiliya꞉ tawakaluba꞉te iya꞉tawahala.
MAT 27:17 Ba꞉bema꞉ tawakaluba꞉te Paeletetamo da꞉pekapiyuya꞉ ebete ibi na꞉goelamiya꞉, “La꞉ ubila꞉ka꞉ nale Balabasiko ebeno kuba huiyane dito oeme? O la꞉ ubila꞉ka꞉ Ya꞉suku, komopa꞉te ebe Kelisoma꞉ da꞉ka꞉mina?”
MAT 27:18 Paeletete ba꞉moe tabo begoiya꞉ mabu ebete iya꞉tawuya꞉ Yunapi hiliyonomate Ya꞉sutamo na꞉kalakalahutiya꞉, huiyatiya ibino watowatopa꞉te ba꞉be mabuma꞉ maubahate ebe dito magahiya꞉, iyo, iba꞉godolo hibi komo puliyala, kitanuya꞉ha꞉.
MAT 27:19 Ba꞉ba tetelo Paeletete tabo anagiya꞉mida habalo ba luta, ebeno kamenate ebetamo tabo ba poeme na꞉pegoiya꞉, “Ama꞉ ba꞉moe tuputupunomo dubutamo eta komo akododa꞉la꞉, mabu na ka꞉lo dulu ebe mabuma꞉ hiyolo temeteme konomo a꞉lawenakamo.”
MAT 27:20 Huiyatiya Godotamo hawa꞉goeno ikamehopino watowatopi ba꞉gala komo koko dubu, iba꞉te tabo ga꞉la ipuwalo komo hiliyonomo tawakaluba꞉tamo helo bikalamiya꞉, iba꞉te Paeleteko koga꞉lamema꞉ ebete Balabasiko ka꞉ka꞉mo dito oemete huiyatiya Ya꞉suku kanakapumima꞉.
MAT 27:21 Ba꞉bene kapela Ko Gawadubuti iba꞉tamo gala na꞉kagoiya꞉, “Ba꞉moi netewapi ipuwalo nale poko dito na꞉koememo?” Iba꞉te ebetamo na꞉huiyuya꞉, “Balabasiko dito noema꞉!”
MAT 27:22 Paeletete iba꞉tamo na꞉goiya꞉, “Ba꞉moe Ya꞉su komopa꞉te ebe Kelisoma꞉ da꞉ga꞉lana, nale ebe keba ka꞉na na꞉kamitimo?” Ibi hiliyonomate na꞉ga꞉luya꞉, “Keha pihigamo pihomotete, ikoko nalukulima꞉!”
MAT 27:23 Ba꞉bene Paeletete na꞉goiya꞉, “Bada mabuma꞉? Ebete bada kuba kododi?” Huiyatiya iba꞉te konomamo ga꞉ga꞉lo gala na꞉kaga꞉luya꞉, “Keha pihigamo na꞉pihomota꞉!”
MAT 27:24 Ba꞉ba tetelo Paeletete iya꞉tawuya꞉ iba꞉te ebeno tabo kalawitiya꞉ha꞉ huiyatiya alaholoho komote uluhukutiya꞉. Ba꞉be mabuma꞉ ebete beya lawete hiliyonomo tawakalubino holoholo hapulu kokoto ba ukulaha na꞉goiya꞉, “Ba꞉moe tuputupudawoeno hawi ka꞉ka꞉la꞉ komote naeno kubama꞉ a꞉keda꞉mene, ba꞉ la꞉eno kubala!”
MAT 27:25 Hiliyonomo tawakaluba꞉te huiyatiya na꞉ga꞉luya꞉, “Wadiyala! Ebeno hawi ka꞉ka꞉la꞉ mabuma꞉, a ba꞉gala aeno guguda꞉go ba꞉be kuba huiya kolawema꞉nema꞉!”
MAT 27:26 Ba꞉bema꞉ Paeletete Balabasiko du genamane ba꞉ dito oemiya꞉, ba꞉gala ebete alaholohopi na꞉goelamiya꞉ iba꞉te Ya꞉suku giya꞉pa꞉pa꞉mo ka꞉na꞉miga꞉tima꞉. Ba꞉bene ba꞉be komo da꞉wibuya꞉ ebete Ya꞉suku alaholohopa꞉tamo dito ikalamiya꞉, iba꞉te ebe keha pihigamo pihomotete ikoko kalukulimima꞉.
MAT 27:27 Ba꞉ba tetelo Paeletekono alaholohopi dubate Ya꞉suku Loma gabomanino ko genama guamo magatate ibino alaholohopino kapiyuimi dubu hiliyonomate iba꞉go ba꞉bo nekapiyuya꞉.
MAT 27:28 Iba꞉te Ya꞉suku ba waliti ebeno kalikonomo pekanamete huiyatiya huiya konomo hawihawi kaliko ebetamo ba꞉bo pulimiya꞉.
MAT 27:29 Ba꞉bene iba꞉te olagoeno tupina nelawete anagogobeya꞉midahalo a꞉dete Ya꞉sukunu watamo dito pulimiya꞉, ba꞉gala iba꞉te kuku ebeno tu hapu kokotamo ihatemiya꞉, ko gawadubuino helo hawakalimino kuku keba ka꞉nala꞉ka꞉ ba꞉ba ka꞉na. Ba꞉ba tetelo iba꞉te ebe iya꞉da꞉telo ibino pupamo ahiditi ebetamo ba papamila꞉ha na꞉ga꞉luya꞉, “A꞉iye! Yu tawakalubino Ko Gawadubu, ama꞉ nolata!”
MAT 27:30 ba꞉bene iba꞉te ebetamo kowe mehoholete, ebeno kuku lawemete watolo ba꞉bo anagalimihuya꞉.
MAT 27:31 Iba꞉te ebe waliti da꞉wibuya꞉, hawihawi kaliko ebeno apene pekanamete ebeno kalikonomo gala dito kapulimiya꞉, ba꞉bene iba꞉te ebe hoe habamo na꞉magatuya꞉ keha pihigamo ebe konepihomotema꞉.
MAT 27:32 Iba꞉te ko habane ba tolamita alaholohopa꞉te eta Sailiniya habanapi dubu Saimonoko numiti ba꞉bo nelawiya꞉ Ya꞉sukunu keha pihiga kagatamema꞉.
MAT 27:33 Ba꞉bene iba꞉te Gologota hakamo nikuliya꞉, ba꞉be hakoeno mahilo ipuwa ba꞉ ‘Wato Gohala.’
MAT 27:34 Ba꞉bolo iba꞉te helo gao beya ba꞉gala temeteme uliha꞉ kaka mulamula kapiyuilamete Ya꞉sutamo dikamiya꞉, ebete nanekela꞉mo totoma꞉namidate ba꞉ dito miya꞉puya꞉.
MAT 27:35 Ba꞉ba tetelo alaholohopa꞉te ebe kehamo pihomotete ikoko ba꞉bo alukulimiya꞉, ba꞉bene iba꞉te ebeno kaliko hiya꞉hiya꞉ alabahamema꞉ nakola hegehege iya꞉hekeholo iya꞉da꞉mi komo ododiti,
MAT 27:36 hakalo gagahiditi ebe ba꞉bo umitiya꞉.
MAT 27:37 Ba꞉ba tetelo iba꞉te Ya꞉sukunu wato hunu hapuamo ebeno hoe mabu hawakalimima꞉ tabo ba꞉ma ka꞉na miya꞉tiya꞉, “Ba꞉moe Ya꞉suku ba꞉ Yu tawakalubino Ko Gawadubula,”
MAT 27:38 ba꞉gala iba꞉te pilo dubu netewa Ya꞉sukuba꞉ hiya꞉hiya꞉ kehamo a꞉kapihomolateliya꞉, eta tu hapuamo, eta pele hapuamo.
MAT 27:39 Ba꞉bene puya꞉te ba꞉be gabodo da꞉petolamitiya꞉ iba꞉te Ya꞉suku iduduputimilo niya꞉da꞉titiya꞉, iyo, iba꞉te ibino wato wagegelatelelo
MAT 27:40 na꞉ga꞉lutiya꞉, “A꞉iye! Ama꞉ Godokono Genama anabulimiti netewa-kapiya hegelalo gala etema꞉ da꞉goi, ama꞉ ba꞉be lumagilata! Ama꞉ ha꞉kiya amia꞉no ka꞉ka꞉ na꞉mula꞉! Ama꞉ Godokono hibi Guduma꞉ deda꞉na, ama꞉ keha pihiga hununi na꞉pihitiga!”
MAT 27:41 Ba꞉ba tetelo Godotamo hawa꞉goeno ikamehopino watowatopi, ba꞉gala Godokono Tutumu iya꞉tulamepi, ba꞉gala komo koko dubu, iba꞉te Ya꞉suku atumu iya꞉da꞉telo na꞉kaga꞉lutiya꞉,
MAT 27:42 “Ya꞉suti komo tawakalubino olalati komo bemula꞉lelamenakui, huiyatiya ebe ha꞉kiya ebeno ka꞉ka꞉ mula꞉ wadiyaha꞉! Ebete Isalaela tawakalubino hibi Ko Gawadubuma꞉ deda꞉na, wadiyala ebete keha pihiga hununi hopamo na꞉pihitigana, iyo, ale ba꞉be komo umiti ebe hibima꞉ ba꞉bo komidima꞉nema꞉!
MAT 27:43 Ebete na꞉goenako, ‘Na Godoko hibima꞉ na꞉midinamo, ba꞉gala na ba꞉ ebeno Gudula,’ ba꞉bema꞉ Godote ebetamo na꞉kalakalatale, ebete ebeno ka꞉ka꞉ ba꞉mula꞉mena꞉!”
MAT 27:44 Ba꞉ba tetelo eba꞉go da꞉pihomolateliya꞉, ba꞉bi pilo dubu netewapa꞉te atumu Ya꞉suku iduduputimilo kuba tabo bekaga꞉lutiya꞉.
MAT 27:45 Ba꞉bene hegelate tuli teta꞉mo dutiya꞉ hopo konomote ba꞉bo duya꞉. Ba꞉ba tetelo du komote hegeloeno alo ba mula꞉, hegelate a꞉hiwate nanekela꞉mo a꞉nihitigatepaniya꞉, hegela tuli tetene tupuimiti 3 koloko teta꞉mo.
MAT 27:46 Ba꞉bene Ya꞉suti Yu tawakalubino tabamo ibulunomamo na꞉goeniya꞉, “Elai, Elai, lama sabakatani?” ba꞉moe taboeno ipuwa ba꞉ma ka꞉na itana, “Naeno Godo, naeno Godo, na ama꞉le badama꞉ ka꞉miya꞉pana꞉wa?”
MAT 27:47 Komo ba꞉bolo da꞉pola꞉nuya꞉ iba꞉te ebeno tabo ulinate na꞉ga꞉laniya꞉, “Ba꞉moe dubuti Elayako beka꞉mina!”
MAT 27:48 Ba꞉ba tetenomolo ibi ipuwalo kapiya dubuti nipuliganate, humago kaka gao beyamo nadutinate pudamo negalapata꞉midanate Ya꞉sutamo ba꞉bo nikameniya꞉.
MAT 27:49 Huiyatiya komopa꞉te na꞉ga꞉laniya꞉, “Hiya꞉, a kumitotiya꞉! Elayate pete ebeno ka꞉ka꞉ da꞉pemula꞉memene.”
MAT 27:50 Ba꞉ba tetelo Ya꞉suti ibulunomo gala kagoewatanate hoenomo ba꞉bo hoeniya꞉.
MAT 27:51 Ba꞉bene Godoko Adikumino Hiya꞉ Genamoeno kaliko ubiliti tulituliya bolagale hununi tupuiminate hopamo ba꞉bo pihitiganiya꞉, ba꞉gala wima꞉la꞉te da꞉peniya꞉ iya꞉ha꞉midale nakola hakate ba bola꞉la꞉halena,
MAT 27:52 komo tawakalubino ha꞉laha bobote ha꞉kiya ba꞉bo ka꞉kehola꞉haniya꞉. Ba꞉bema꞉ hibila, Ya꞉suti hoe ipuwane da꞉kamahiguya꞉, ba꞉be atu tetelo kebe tuputupupa꞉te dopamo da꞉ha꞉lahuya꞉ Godote komo ibi hoe ipuwane atumu ba kawadia꞉paa꞉latele, iba꞉te ibino hiya꞉hiya꞉ nakola bobo ipuwane ibino apa꞉go ba꞉bo pikuliya꞉, iyo, iba꞉te Yelusalema ko habamo nikuliti ibi ha꞉kiya ibino komokomo tawakaluba꞉tamo ba꞉bo nehawakalilamiya꞉.
MAT 27:54 Ba꞉bene alaholohopino gawadubuti ba꞉gala ebeno hopopi ipuwalo puya꞉te Ya꞉sukunu hoe komo duminiya꞉, iba꞉te wima꞉la꞉ ba꞉gala komo hanohano komo ba ulamena konomo tole komago na꞉ga꞉laniya꞉, “Hibila, ba꞉moe ba꞉ Godokono Gudula!”
MAT 27:55 Ba꞉ba tetelo komo hiliyonomo kamenakamenate Ya꞉suku umima꞉ muhuluni putitataniya꞉, Ya꞉suti Ga꞉lili hopone Yelusalema ko habamo da꞉tuya꞉ ba꞉ba꞉te ebe ba ta꞉mata ebe hidonomamo owalubinatuya꞉.
MAT 27:56 Ba꞉bi kamenakamena ipuwalo Magadalanapi Ma꞉liko, ba꞉gala eta Ma꞉li ebeno gugudi netewa Ya꞉imesiko ba꞉gala Yausesiko, ba꞉gala Sebedikono kamena ebete ebeno gugudi netewa dalahilamiya꞉, ba꞉moi ba꞉te pola꞉nuya꞉.
MAT 27:57 Gapogapo tetelo eta ilina dogodogo dubuti na꞉peniya꞉, ebeno mahilo Yausepete A꞉limitiyanapila, ebe Ya꞉suku ta꞉matadawa etala.
MAT 27:58 Ba꞉ba tetelo ba꞉be dubuti Paeletetamo tonate Ya꞉sukunu ape lawenama꞉ ebe da꞉nikiyameniya꞉, Paeletete ebeno alaholohopi ba꞉bo goelameniya꞉ iba꞉te ebetamo kikamenama꞉.
MAT 27:59 Ba꞉bene ebete Ya꞉sukunu ape lawenate uli keyakeya kalikamo a꞉wa꞉tinate
MAT 27:60 bobo ipuwamo ba꞉bo nihateniya꞉, ba꞉be bobo ba꞉ uli bobola, tawakaluba꞉te iya꞉ha꞉midale nakola haka ba aligi Yausepekonoma꞉ ya꞉lo ododimiya꞉. Ba꞉ba tetelo Yausepete konomo nakola emokamidanate bobo gigiho netakuminate ba꞉ dito toniya꞉,
MAT 27:61 ba꞉bene Magadalanapi Ma꞉liko ba꞉gala eta Ma꞉li, iba꞉te nakola bobo hapulu ba lumutita Yausepekono ododili komokomo ba꞉bo ulamelemeniya꞉.
MAT 27:62 Eta hegela ba꞉ Yu tawakalubino okoha꞉ hegelala. Ba꞉ba tetelo komo Yu watowatopi ba꞉gala Pa꞉lisi kapiyuimipi iba꞉te Paeletetamo tolamete
MAT 27:63 ba꞉ma ka꞉na nega꞉luya꞉, “Kodawa, ba꞉be ha꞉da amiho dubu Ya꞉suku ebete hoeheno dopamo na꞉goi, ‘Netewa-kapiya hegelalo na hoene kakamahigama꞉nemo.’
MAT 27:64 A ba꞉moe komo ba emalagidolo, a ubila ama꞉ tabo na꞉gaa꞉ alaholohopa꞉te ba꞉be nakola bobo netewa-kapiya hegelalo hidamo kolawamema꞉, mabu diyala, ebeno ta꞉matapa꞉te ebeno ape pilolo da꞉ pelawemena꞉, ba꞉bene iba꞉te ba꞉ma ka꞉na koga꞉lama꞉na꞉, ebete hoene a꞉kamahigui. Numa꞉, dopo ha꞉da amiho tabote a temeteme ikaa꞉mi, huiyatiya keba tetelo tawakaluba꞉te ba꞉moe eta ha꞉da amiho tabo hibima꞉ da꞉midimina꞉, aeno temeteme komote konomoma꞉ keda꞉ma꞉ne.”
MAT 27:65 Paeletete iba꞉tamo na꞉goiya꞉, “Wadiyala, la꞉ bobo haba hidamo lawamema꞉ naeno komo alaholohopi nuwata꞉la꞉. Ba꞉bene la꞉ ha꞉kiya la꞉godolo hido ukui da꞉pola꞉namene, la꞉ ba꞉ba ka꞉na nododiya꞉la꞉.”
MAT 27:66 Ba꞉bema꞉ iba꞉te bobo habamo tolamete, bobo da꞉kalapiluya꞉ ba꞉be nakola hunamo kukala ba꞉bo nihatiya꞉ tawakaluba꞉te ologikapoma꞉, ba꞉bene iba꞉te bobo lawamema꞉ alaholohopi ba꞉bo miya꞉paliya꞉.
MAT 28:1 Ba꞉bene Yu tawakalubino okoha꞉ talona hegela da꞉wibuya꞉, Sande hegelate ba owalohuta, Ma꞉li Magadalanapi ba꞉gala eta Ma꞉li, iba꞉te komo kamenakamenago nakola bobo umima꞉ ba꞉bo tolamiya꞉.
MAT 28:2 Huiyatiya iba꞉te bobo habamo nuluhukuhino, dopamo konomo wima꞉la꞉te piya꞉, ba꞉bene Kodawa Godokono nopodawate Hunu Habane pihitigate, bobo da꞉takuminiya꞉ ba꞉be ko nakola tama꞉mo penemokamidate ba꞉be nakola hunulu lutiya꞉.
MAT 28:3 Ebeno holoholo hegelate da꞉la꞉wa꞉hiya keba ka꞉nala꞉ka꞉ ba꞉ba ka꞉nala, ba꞉gala ebeno pupulino ilinate keyakeyahibinomoma꞉ ba eda꞉hame ba꞉bo a꞉la꞉minahalemiya꞉.
MAT 28:4 Ba꞉be mabuma꞉ bobo haba lawamepi dubate toletoleholo ba lililahale hakamo guditi ha꞉lahapimo toda꞉la꞉mota꞉hanuya꞉.
MAT 28:5 Godokono nopodawate huiyatiya kamenakamenatamo na꞉goiya꞉, “La꞉ akatoletolehala꞉! Na iya꞉tawala, la꞉le Ya꞉suku tawakaluba꞉te ebe keha pihigamo da꞉pihomoti, ebe bohowaditamata.
MAT 28:6 Ebe malo puliyala mabu ebe a꞉mahigaka, ebete dopamo da꞉goi ba꞉ba ka꞉na! La꞉ pelamete ebete da꞉kapitanui ba꞉be haba na꞉puma꞉la꞉.
MAT 28:7 Ba꞉bene la꞉le ebeno ta꞉matapi tiyonomolo na꞉nikiyalama꞉la꞉, ‘Ya꞉suti hoe ipuwane a꞉mahigaka. La꞉ nulia꞉la꞉, ebete Ga꞉lili hopamo dopamo kotoma꞉ne, la꞉ tolamete ebe ba꞉bo konumima꞉nemata. Hibila, na Godokono nopodawate ba꞉moe komoma꞉ la꞉ dopamo kiyalamemata.’”
MAT 28:8 Ba꞉bema꞉ iba꞉te bobo haba tiyolo miya꞉pate, ko tole komo ba꞉gala kalakala komote ibi ba uwate, iba꞉te ba꞉ba ka꞉na pulila꞉huya꞉ Ya꞉sukunu ta꞉matapi konikiyalamema꞉.
MAT 28:9 Iba꞉te ba tolame ba꞉ba tetenomolo Ya꞉suti iba꞉go alugate iba꞉tamo na꞉goiya꞉, “Nonolata!” ba꞉bene iba꞉te ebeno dopo hapulu hakamo neguditi ebeno nato ba na꞉ga꞉da꞉midaleme ebe ba꞉bo nadikumiya꞉.
MAT 28:10 Ya꞉suti iba꞉tamo na꞉goiya꞉, “La꞉ akatoletolehala꞉. La꞉ tolamete, na da꞉ta꞉mahenena ba꞉bi naeno ekaki na꞉nikiyalama꞉la꞉ iba꞉te Ga꞉lili hopamo na꞉tolama꞉mena꞉. Iba꞉te na ba꞉bo konunamema꞉na꞉.”
MAT 28:11 Ba꞉bene kamenakamenate Ya꞉sugodone ba tolamita, nakola bobo lawamepi alaholohopa꞉te ko habamo tolamete Godotamo hawa꞉goeno ikamehopino watowatopi ba꞉bo nikiyalamiya꞉, bobo habalo dikuliya꞉ ba꞉bi hiliyonomo komokomo.
MAT 28:12 Ba꞉bene ba꞉bi watowatopa꞉te komo Yunapino koko dubago kapiyuimiti tabo ba꞉bo ihatiya꞉ alaholohopa꞉tamo koko mani kikalameholema꞉.
MAT 28:13 Iba꞉te ba ikalamehole na꞉ga꞉luya꞉, “La꞉ tawakalubi ha꞉da amiholamelo tabo ba꞉ma ka꞉na na꞉nega꞉luya꞉la꞉, ‘Du tetelo ale ba lahana Ya꞉suku ta꞉matapa꞉te pelamenate ebeno ape pilolo ba꞉bo pelawa꞉diganiya꞉.’
MAT 28:14 Ba꞉gala la꞉ aka-ukuibilibilihala꞉, mabu kapela Ko Gawadubu Paeleteko ba꞉moe u laha tabo dulimini, ale ebe konegelebadimima꞉nema꞉ ebete la꞉tamo kuba huiya ikalamekapoma꞉.”
MAT 28:15 Ba꞉bene alaholohopa꞉te ba꞉bi mani uwatete, Yu watowatopa꞉te keba ka꞉na ka꞉ga꞉luya꞉ iba꞉te ba꞉ ba꞉ba ka꞉na ododiya꞉, ba꞉be mabuma꞉ ba꞉be ha꞉da tabote Yu tawakalubino hiya꞉hiya꞉ habahabamo tuya꞉, ka꞉lo ba꞉be tabote iba꞉godolo bitana, kekelanaha꞉.
MAT 28:16 Ba꞉bene Ya꞉sukunu 11 ta꞉matapa꞉te Ga꞉lili hopamo dito tolamiya꞉, Ya꞉suti ibi dopamo da꞉kiyalamiya꞉ ba꞉be hununomo hakamo.
MAT 28:17 Iba꞉te ebe numiti ebe ba꞉bo nadikumiya꞉, huiyatiya ba꞉bolo da꞉pola꞉nuya꞉ komo iba꞉te ukui bilibilima꞉ ba eda꞉huta hibima꞉ kamiditiya꞉ha꞉.
MAT 28:18 Ba꞉bene Ya꞉suti iba꞉tamo pete ibi ba꞉ma ka꞉na pikiyalamiya꞉, “Godote ya꞉lo tetelo helo konomo natamo ikanamiya꞉, ebeno Hunu Habalo ba꞉gala hopo konomolo ebeno hiliyonomo ubi komokomo kododilinama꞉.
MAT 28:19 Ba꞉bema꞉ la꞉ hopo haboeno hiya꞉hiya꞉ tawakalubi hiliyonomatamo tolamete ibi na ta꞉mahenepima꞉ na꞉nimidiliya꞉la꞉. Ba꞉ma ka꞉na la꞉le ibi Nabiwi Godokono mahilamo, ba꞉gala ebeno Guduino mahilamo, ba꞉gala ebeno Talona Gobogoboeno mahilamo beyamo na꞉newadulateliya꞉la꞉,
MAT 28:20 ba꞉gala nale la꞉ diya꞉tulamima, ba꞉bi hiliyonomo komokomo la꞉le ibi na꞉niya꞉tulamiya꞉la꞉ iba꞉te naeno tabamo kopapamila꞉halema꞉. Mu numitota꞉la꞉! Na emedena tetelo la꞉go bemedenamo, ba꞉moe hopoeno kuititi tete da꞉nuluhukumini ba꞉ba teta꞉mo.”
MAR 1:1 Ya꞉su Kelisoko ba꞉ Godokono Oemedawala ba꞉gala ebeno Gudula, ba꞉bene Ya꞉sukunu Hido Tabo da꞉tupuimiya꞉ ba꞉moe ba꞉be mabula.
MAR 1:2 Ba꞉ hibila, Godote dopamo ebeno ukui hawakalimidawa Aisayako ipuwado Kelisokono pe komoma꞉ ebeno Bukamo tabo ba꞉ma ka꞉na miya꞉tiya꞉, “Nale Kelisokono dopo hapuamo naeno tabo atadawa kopoemema꞉nemo, ebete ebeno gabo kopihiduimima꞉.
MAR 1:3 Iyo, lumagiti dito hopolo tabo ba꞉ma ka꞉na ibulu kopegoema꞉ne, ‘Kodawoeno gabo na꞉hiduima꞉la꞉, ebeno gabo na꞉tuputupuima꞉la꞉!’”
MAR 1:4 Ba꞉be mabuma꞉ Yonete a꞉puluhukuya꞉. Ebete tawakalubi dito hopolo beyamo ba pewadulatele Godokono tabo ba꞉ma ka꞉na polamagiya꞉, “La꞉eno kubane ohobila꞉te beyamo aduti komo lawema꞉ na꞉pelama꞉la꞉, ba꞉bene Godote la꞉eno kuba egebolelamete kadodoholelamema꞉na꞉ta.”
MAR 1:5 Ba꞉bema꞉ tawakalubi hiliyonomate Yudiya hopone ba꞉gala Yelusalema ko habane tolamiya꞉ Yonekono tabo ulihoma꞉, ba꞉bene iba꞉te ibino kuba da꞉nehawakalilameholiya꞉, Yonete ibi Yodane Tulilo beyamo ba꞉bo wadulateliya꞉.
MAR 1:6 Ba꞉ba tetelo Yonekono emede komo komopino emede komo huiyaha꞉, mabu ebete ka꞉molo-goe ipo kuba kaliko kau-goe tama kamaka꞉go pulinakui, ba꞉gala ebeno baa꞉ wawaka ba꞉gala molo benahanakui.
MAR 1:7 Yonete Godokono tabo ba polamagi na꞉goiya꞉, “Eta lumagiti naeno gala hapuni ba꞉pena. Ebeno helo konomote naeno helo na꞉gogolona, ba꞉bema꞉ na hidoenoha꞉ nale hopamo tudiwatate ebeno nato ukulalemema꞉.
MAR 1:8 Nale la꞉ beyamo wadulatelemata, huiyatiya ebete Godokono Gobogobamo la꞉ kopewadulatelema꞉na꞉ta.”
MAR 1:9 Ba꞉ba tetelo Ya꞉suku Ga꞉lili hopoeno Nasalete habane pete, Yonete Yodane Tulilo ebe beyamo ba꞉bo adutiya꞉.
MAR 1:10 Ya꞉suti beyane ba podolo ba꞉ba tetenomolo Godote ebeno Hunu Haba a꞉hiya꞉midutalo ba꞉bo umiya꞉, ba꞉bene ebete Godokono Gobogobo bumiya꞉ ebetamo gimai holamo da꞉pihitigutiya꞉.
MAR 1:11 Ba꞉bene tabote Hunu Habane ba꞉ma ka꞉na pihitiguya꞉, “Ama꞉ naeno kapiya Gudunomolata. Na ama꞉tamo na꞉kalakalutamo.”
MAR 1:12 Ba꞉ba tetenomolo Godokono Gobogobote Ya꞉suku dito hopamo na꞉magatuya꞉,
MAR 1:13 ba꞉bene ebete dito hopolo 40 hegela ba nemede, Saitanate kuba gabamo kemogabuimima꞉ ebetamo ba꞉bo uluhukuya꞉. Ba꞉bolo hiya꞉hiya꞉ helohelo ilinate na꞉pola꞉nuya꞉, huiyatiya Godokono nopopa꞉te ebe na꞉buiya꞉minutiya꞉.
MAR 1:14 Ba꞉bene gabomana꞉te Yoneko du genamamo dihatiya꞉, ba꞉ba tetelo Ya꞉suti Ga꞉lili hopamo Godokono Hido Tabo olamaga꞉go ba꞉bo piya꞉.
MAR 1:15 Ebete na꞉pegoiya꞉, “Hido tete ba꞉ a꞉pe. Godokono Ko Gawadubuma꞉ eda꞉ tete tatalila, ba꞉bema꞉ la꞉eno kubane ohobila꞉te Hido Tabo hibima꞉ na꞉mida꞉la꞉.”
MAR 1:16 Ba꞉bene Ya꞉suku Ga꞉lili Bobo dododo ba tonato, ebete daha uwateholepi netewapi ba꞉bo nulamiya꞉, Saimonoko ba꞉gala ebeno ekawi A꞉nduluku iba꞉te daha kamahamo na꞉hutiya꞉.
MAR 1:17 Ya꞉suti iba꞉tamo na꞉goiya꞉, “La꞉ na na꞉ta꞉mahena꞉la꞉, ba꞉bene nale la꞉ tawakalubi uwatepima꞉ komidilima꞉nemata.”
MAR 1:18 Ba꞉ba tetenomolo iba꞉te ibino kamahu miya꞉palete Ya꞉suku ba꞉bo ta꞉matuya꞉.
MAR 1:19 Ba꞉bene Ya꞉suti nanekela꞉mo gala katote Sebedikono gudu Ya꞉imesiko ba꞉gala ebeno ekawi Yoneko ba꞉bo kanulamiya꞉, iba꞉te ibino bogelo emedehote kamahu bihiduilamitiya꞉.
MAR 1:20 Ya꞉suti ibi da꞉ka꞉lamiya꞉, ba꞉ba tetenomolo iba꞉te ibino nabiwi Sebediko miya꞉pate Ya꞉suku ba꞉bo ta꞉matuya꞉, huiyatiya ibino nabiwino mani oko dowatihonama꞉ ba꞉bi komo dubate eba꞉go bogelo pola꞉nuya꞉.
MAR 1:21 Ba꞉ba tetelo Ya꞉suti ebe ta꞉matapa꞉go Kapeniyama habamo tolamiya꞉. Ba꞉bene Yu tawakalubino okoha꞉ talona hegelalo ebete ibino baidi ibubulamehole genamamo tote ibi da꞉niya꞉tulamitiya꞉,
MAR 1:22 iba꞉te ebeno tabamo na꞉hanohanohutiya꞉, mabu ebete Godokono heloamo iya꞉tulamitiya꞉ huiyatiya ebe ibino Godokono Tutumu iya꞉tulamepi huiyaha꞉.
MAR 1:23 Ba꞉be atu tetelo kuba gobogobagoeno dubuti ibino baidi ibubulamehole genama gulu na꞉lutiya꞉,
MAR 1:24 ba꞉bene ebete gaa꞉tepahalo na꞉goiya꞉, “Ya꞉su Nasaletenapi, ama꞉ atamo bada komo na꞉kododiomena꞉? Ama꞉ a kubahia꞉mema꞉ ka꞉pa꞉wa? A꞉iye, na iya꞉tawala amia꞉no komo, ama꞉ ba꞉ Godokono Hido-talona Dawalata!”
MAR 1:25 Ya꞉suti huiyatiya ebe na꞉kiyahamiya꞉, “Ama꞉ kodakodate, ebegodone nuluhuka!”
MAR 1:26 Ba꞉bene kuba gobogobote gaa꞉tepahago ba꞉gala ewagelehago dubuino apene duluhukuya꞉,
MAR 1:27 tawakaluba꞉te ba꞉be komoma꞉ na꞉hanohanohutiya꞉. Etate eta goemenakui, etate eta goemenakui, “Moe badala꞉ka꞉? Moe eta hiya꞉ uli iya꞉tulame komola꞉ka꞉? Ba꞉moe dubuino helo konomola! Numa꞉la꞉, kubakuba gobogobate ebeno tabamo a꞉papamila꞉!”
MAR 1:28 Ba꞉bema꞉ hibila, ba꞉be atu hegelalo Ya꞉sukunu oko owati tabote ba꞉be Ga꞉lili hopo konomamo ba꞉ dito tuya꞉, iyo, puya꞉te ba꞉bolo demedehonama꞉ ibi hiliyonomate ebeno komoma꞉ tabo ba꞉bo nikiyahuya꞉.
MAR 1:29 Ba꞉bene Ya꞉imesiko Yoneko iba꞉te Ya꞉sukuba꞉ Yu tawakalubino baidi ibubulamehole genamane pikuliti, Saimonoko A꞉nduluku ibi netewapino genamamo tolamenomo tolamiya꞉.
MAR 1:30 Ba꞉bolo Saimonokono moto kakidubu ape koe tawetawa꞉go watitiya꞉, ba꞉bene tawakaluba꞉te ba꞉moe kamenoeno komoma꞉ Ya꞉suku ba꞉bo ga꞉lamiya꞉.
MAR 1:31 Ba꞉bema꞉ Ya꞉suti ebetamo pete ebe kokotamo da꞉padipatiya꞉ ebeno tawetawete na꞉wibuya꞉, ba꞉bene ba꞉be kamenate mahigate ibi mabuma꞉ baa꞉ okalimi oko ba꞉bo tupuimiya꞉.
MAR 1:32 Ba gapogapohona hegelate da꞉nihila꞉minaniya꞉, habaluba꞉te hiliyonomo temetema꞉gopi ba꞉gala kuba gobogobagopi Ya꞉sutamo ba꞉bo magaheleniya꞉,
MAR 1:33 ba꞉bene komo ibi hiliyonomate genama gigiho dopo hapulu pepola꞉nuya꞉.
MAR 1:34 Ba꞉ba tetelo Ya꞉suti ibi ipuwalo komo hiya꞉hiya꞉ temetema꞉gopi hiliyonomo hiduilamenate, ba꞉gala hiliyonomo kuba gobogobo komopa꞉godone ba꞉bo oelameniya꞉. Ba꞉bi kuba gobogobo iya꞉tawahala Ya꞉suku ba꞉ Godogodone piya꞉, ba꞉bema꞉ iba꞉te ebeno komo kohawakalimima꞉ ebete tabo ga꞉la talona bihatelameniya꞉.
MAR 1:35 Ba꞉be du tetenomolo owaloho hapuamo Ya꞉suti ebeno u wata bahini mahiganate, ebe ha꞉kiya tataba hopamo tonate Godokoba꞉ tabo ba꞉bo nega꞉laniya꞉.
MAR 1:36 Ba꞉bene duiduiyalo Saimonoko ba꞉gala ebeno mabulubi iba꞉te Ya꞉suku ohowadima꞉ da꞉tolamiya꞉,
MAR 1:37 iba꞉te ebe numiti na꞉nega꞉lamiya꞉, “Hiliyonomo tawakaluba꞉te ama꞉ bohowaditata.”
MAR 1:38 Ba꞉bema꞉ Ya꞉suti iba꞉tamo na꞉goiya꞉, “Kubaha꞉, a kotolamiya꞉. Nale komo habahabalo Godokono tabo konolamagima꞉nemo, mabu na ba꞉bema꞉ piya꞉mo.”
MAR 1:39 Ba꞉ba tetelo ebete Ga꞉lili hopoeno hiliyonomo habahabamo tonakui, ba꞉bene ebete Yu tawakalubino baidi ibubulamehole genama gulu Godokono tabo olamaginakui ba꞉gala ebete kuba gobogobo tawakaluba꞉godone akoelamenakui.
MAR 1:40 Ba꞉bene kuitikuita꞉goeno dubuti Ya꞉sutamo pete ebeno pupamo pemedete ebetamo koamo ba petoetoe na꞉pegoiya꞉, “Amia꞉no ubi ditama꞉na, ama꞉le na kohiduinamema꞉na꞉ta.”
MAR 1:41 Ya꞉suti ebe koamo malemaletelo ebeno kokoto hogaminate ebe ologilo na꞉goemiya꞉, “Na ubila, ama꞉ na꞉hida!”
MAR 1:42 ba꞉bema꞉ ba꞉ba tetenomolo kuitikuiti temetemete ebegodone wibote ebe ba꞉bo hiduya꞉.
MAR 1:43 Ba꞉bene Ya꞉suti ebe ba oeme koamo ba꞉ma ka꞉na kiyahamiya꞉,
MAR 1:44 “Ama꞉ naeno komoma꞉ tawakalubi akanikiyalama꞉la꞉. Wadiyala ama꞉ huiyatiya ba꞉moe tetenomolo tote amia꞉no ape Godotamo hawa꞉goeno ikamehodawatamo na꞉nemutuimiya꞉, ba꞉bene hawa꞉goeno malemale ilina Godotamo akona꞉nikamiya꞉, Mosesete dolamagiya꞉ ba꞉ba ka꞉na. Ba꞉be komote tawakalubi kiya꞉tulamema꞉ne amia꞉no temetemete a꞉wibui.”
MAR 1:45 Huiyatiya ba꞉be dubuti ba to tawakalubi hiliyonomo na꞉kiyahalamenatuya꞉, ba꞉bema꞉ Ya꞉suti komo habahabamo hawakala toma꞉ kamodobuya꞉ha꞉. Ba꞉ba tetene tupuimiti ebete huiyatiya dito hopolo emedenami, ba꞉bene hapuhapuni tawakaluba꞉te ebetamo pelamenakuya꞉.
MAR 2:1 Ba꞉bene komo hegela da꞉wibohuya꞉ Ya꞉suti Kapeniyama habamo gala na꞉kapiya꞉. Ebete ebeno genamalo da꞉lutiya꞉ tawakaluba꞉te ulihuya꞉,
MAR 2:2 ba꞉bema꞉ komo ibi hiliyonomate da꞉pelamiya꞉, genama gulu ba꞉gala gigiho dopo hapulu eta habate kitanuya꞉ha꞉. Ba꞉ba tetelo Ya꞉suti Godokono tabo iba꞉tamo ba olamagita,
MAR 2:3 netewa-netewa dubate ape kodakoda temetema꞉goeno dubu ebetamo ba꞉bo agatuya꞉.
MAR 2:4 Mabu tawakalubi hiliyonomate ba꞉bolo na꞉pola꞉nuya꞉, ba꞉bi dubate Ya꞉suku tama꞉mo tolamema꞉ gabohenola. Ba꞉bema꞉ iba꞉te genama hunamo nalehawaminate, Ya꞉suti kebo ka꞉la꞉nuya꞉ iba꞉te ba꞉be genamoeno hunu a꞉himiti temetema꞉goeno dubu tilago Ya꞉sutamo ba꞉bana nadutiya꞉.
MAR 2:5 Ya꞉suti ibino hibima꞉ midi komo umilamete temetema꞉goeno dubutamo na꞉goiya꞉, “Naeno mabulubi, Godote amia꞉no kuba egebolemete adodoholema꞉ta.”
MAR 2:6 Huiyatiya komo Godokono Tutumu iya꞉tulamepi ba꞉bo da꞉pola꞉nuya꞉, iba꞉te ba꞉be tabo uliti ibino tepo ipuwalo ba꞉ma ka꞉na emalagidolutiya꞉,
MAR 2:7 “Ba꞉moe dubu awagalo kuba tabo badama꞉ ka꞉goe Godokono holoholo hapulu? Kuba egeboledawa potela꞉ka꞉? Ba꞉ Godoko kapiyala!”
MAR 2:8 Ba꞉ba tetenomolo Ya꞉suti iya꞉tawuya꞉ iba꞉te bada komoma꞉ ukui da꞉miya꞉titiya꞉, ba꞉bema꞉ ebete iba꞉tamo na꞉goiya꞉, “Mabu keka꞉ la꞉eno tepo ipuwalo ba꞉moi komo demalagidolitama?
MAR 2:9 Ba꞉moe tabo kodakodala꞉ka꞉ nale ba꞉moe temetema꞉goeno dubutamo goema꞉, ‘Godote amia꞉no kuba egebolemete adodoholema꞉ta?’ O ba꞉moe eta tabo goema꞉ kodakodala꞉ka꞉, ‘Mahigate, amia꞉no tilo lawete na꞉toa?’
MAR 2:10 Ba꞉bema꞉ nale la꞉ kiya꞉tulamema꞉nemata, na Tawakalubino Naniwigodolo helo bitana ba꞉moe hopolo tawakalubino kuba egebolelamete kadodoholelamema꞉.” Ba꞉bene ebete ape kodakoda temetema꞉goeno dubutamo na꞉goiya꞉,
MAR 2:11 “Nale ama꞉ begoememata, na꞉mahiga! Amia꞉no tilo mokopa꞉midate genamamo na꞉toa.”
MAR 2:12 Ba꞉ba tetelo ibi hiliyonomate ebe ba umita, ba꞉be dubuti mahigate ebeno tilo lawete tiyonomolo ba꞉bo tuya꞉, ba꞉bema꞉ iba꞉te hibinomolo hanohanoholo na꞉ga꞉luya꞉, “Godoko hunamo nadipata꞉la꞉. A dopamo ba꞉mako komo kuminakuiha꞉!”
MAR 2:13 Ba꞉ba tetelo Ya꞉suti Ga꞉lili dodamo gala na꞉katuya꞉, ba꞉bene tawakalubi hiliyonomate ebetamo da꞉pelamiya꞉, ebete ibi ba꞉bo iya꞉tulamiya꞉.
MAR 2:14 Ba꞉bene ebete ba petonato A꞉lapiyasikono gudu Libaiko ba꞉bo numiya꞉, ebe ta꞉kese uwatedawala, ebete ebeno oko habalo lutiya꞉. Ba꞉ba tetelo Ya꞉suti ebetamo na꞉goiya꞉, “Na na꞉ta꞉mahena꞉,” ba꞉bene ebete mahigate Ya꞉suku na꞉ta꞉matuya꞉.
MAR 2:15 Ba꞉bene tete nanekele da꞉petuya꞉ Ya꞉suti ebe ta꞉matapa꞉go Libaikono genamalo ahiditi baa꞉ ba nahuta, komo ta꞉kese uwatepi ba꞉gala Godokono Tutumu uwateha꞉pi iba꞉go na꞉pola꞉nuya꞉, mabu hibila, ba꞉makomako tawakalubi hiliyonomate Ya꞉suku beta꞉matuya꞉.
MAR 2:16 Babema꞉ komo Pa꞉lisi kapiyuimipino tutumu iya꞉tulamepi iba꞉te ba꞉be komo dumiya꞉, iba꞉te Ya꞉suku ta꞉matapa꞉tamo na꞉ga꞉luya꞉, “Ebete ta꞉kese mani ha꞉da amiholo uwatepi ba꞉gala Godokono Tutumu uwateha꞉pa꞉go baa꞉ badama꞉ ka꞉nanako?”
MAR 2:17 Ya꞉suti ba꞉be tabo uliti iba꞉tamo na꞉goiya꞉, “Hidohido tawakaluba꞉te dogetatamo a꞉katolama꞉mena꞉, huiyatiya tawetawa꞉gopa꞉te kotolamema꞉na꞉. Iyo, puya꞉te ha꞉kiya da꞉ga꞉lana, ‘A hidohido tawakalubila,’ na ba꞉bakobako tawakalubi uwatema꞉ kapiya꞉ha꞉. Na huiyatiya kubakuba tawakalubi kapiya uwatema꞉ piya꞉mo, iba꞉te na kota꞉mahenema꞉.”
MAR 2:18 Eta tetelo Yoneko ta꞉matapi ba꞉gala Pa꞉lisi kapiyuimi watowatopino ta꞉matalepi iba꞉te baa꞉ nahaheno pola꞉nuya꞉. Ba꞉bene komo tawakaluba꞉te Ya꞉sutamo pelamete ebe na꞉palatediya꞉, “Keka꞉ mabu Yoneko ta꞉matapi ba꞉gala Pa꞉lisi kapiyuimipi iba꞉te hiya꞉hiya꞉ tetelo baa꞉ nahaheno da꞉pola꞉nanaka Godokono oko owatima꞉, huiyatiya ama꞉ ta꞉matapa꞉te baa꞉ nahaheno a꞉kapola꞉nala꞉?”
MAR 2:19 Ya꞉suti iba꞉tamo na꞉goiya꞉, “Dubuti kamena da꞉lawemene, ba꞉ba tetelo ebeno mabuluba꞉te poko habalo baa꞉heno dito ba꞉ka꞉pola꞉namena꞉? Ao, wadiyaha꞉! Ebete iba꞉go ba pola꞉na poko baa꞉ kapimilo konahama꞉na꞉.
MAR 2:20 Huiyatiya kamena uli lawe dubuti ebeno kamena eta habamo magata tete ba꞉ na꞉pe, hibila, ba꞉be hegelalo ebeno mabuluba꞉te ibino tepo temeteme komoma꞉ baa꞉ nahaheno kopola꞉nama꞉na꞉. Ba꞉bema꞉ numa꞉la꞉, ka꞉lo ba꞉ la꞉eno kalakalago baa꞉ naha tetela mabu nale la꞉go bemedenamo.”
MAR 2:21 Ba꞉bene Ya꞉suti tabo moga꞉melo gala na꞉kagoiya꞉, “Lumagiti uli kaliko hapu pakala kalikoeno bolagala꞉mo a꞉kakohomehamene. Ebete ba꞉ma ka꞉na dododimini, uli kaliko haputi pakala kaliko kanagiya꞉midalema꞉ne, ba꞉bene bolagalete konomoma꞉ keda꞉ma꞉ne.
MAR 2:22 Atu gabodo lumagiti pakala gautu-goe tama kalila꞉mo uli gao beya a꞉kahaminamene, mabu uli gao beyate pakala tama kalili ka꞉na꞉ta꞉pumima꞉ne, ba꞉bene gao beyate hakamo ka꞉ka꞉la꞉te gao beya ba꞉gala kalili ibi netewate kapiya tetelo kokubakubahama꞉na꞉. Ba꞉moe mabuma꞉ iya꞉tawadawate uli gao beya uliuli tama kalili kapiyamo ba꞉haminahanakomene.”
MAR 2:23 Yu tawakalubino eta okoha꞉ talona hegelalo Ya꞉suti ebe ta꞉matapa꞉go kona pali ipuwado ba petolamenato, ebe ta꞉matapa꞉te kona konahama꞉ kapiyakapiya kubakubadopo ba꞉bo newakalamiya꞉.
MAR 2:24 Ba꞉bene komo Pa꞉lisi kapiyuimipa꞉te Ya꞉sutamo na꞉ga꞉luya꞉, “Numa꞉, ama꞉ ta꞉matapa꞉te okoha꞉ talona hegela badama꞉ kadikanalita?”
MAR 2:25 Ya꞉suti iba꞉tamo na꞉goiya꞉, “Wadiyala Godote ebeno Bukamo da꞉miya꞉tiya꞉, la꞉ ba꞉be komo nemalagidolala꞉. Da꞉ibiditamo kuba tete da꞉piya꞉, ebete ebeno wapata꞉lamepa꞉go baa꞉ma꞉ da꞉kapemitiya꞉, ba꞉bene ebete bada komo kododiya꞉?
MAR 2:26 Ebete Godokono Genamamo nodolote, ba꞉be Genamoeno okopa꞉te Godotamo da꞉miya꞉tenakui ba꞉be talona baa꞉ ebete a꞉nenahuya꞉. Numa꞉la꞉, aeno tutumu tabote a biya꞉tua꞉mena Godotamo hawa꞉goeno ikamehopa꞉te ba꞉be baa꞉ ha꞉kiya nahanaka, komo tawakaluba꞉te naha talonala. Huiyatiya Da꞉ibiditi ba꞉be baa꞉ nahate eba꞉go wapata꞉lamepa꞉tamo dikalameholiya꞉, Godote ba꞉be komo kubama꞉ kagoiya꞉ha꞉. Ba꞉ hibila, ba꞉moe komote Abayatakono tetelo uluhukuya꞉, ebe Godotamo hawa꞉goeno ikamehopino Hununomo Watodawala.”
MAR 2:27 Ba꞉bene Ya꞉suti iba꞉tamo na꞉goiya꞉, “Numa꞉la꞉, Godote okoha꞉ talona hegela tawakalubi owalubilima꞉ ba ododi, ebete ubi kihatiya꞉ha꞉ okoha꞉ talona hegelamo ibino emede komo kokodakoduilamema꞉.
MAR 2:28 Ba꞉bema꞉ hibila, na Tawakalubino Naniwiti okoha꞉ talona hegela namutudawama꞉ eda꞉namo.”
MAR 3:1 Eta tetelo Yu tawakalubino baidi ibubulamehole genamamo Ya꞉suti gala da꞉kanodoluya꞉, kokoto hapu hoeme dubuti ba꞉bolo na꞉lutiya꞉.
MAR 3:2 Ba꞉bene ba꞉be haboeno Pa꞉lisi kapiyuimipa꞉te Ya꞉suku baidi kodakodalo umitiya꞉, ebete okoha꞉ talona hegelalo ba꞉be lumagi hiduimilo iba꞉te ebe kubadawama꞉ koga꞉lama꞉.
MAR 3:3 Ba꞉ba tetelo Ya꞉suti kokoto hapu hoeme dubutamo na꞉goiya꞉, “Ama꞉ mahigate, mamo na꞉pa꞉.”
MAR 3:4 Ba꞉bene Ya꞉suti ba꞉be napa꞉tamo na꞉goiya꞉, “Aeno tutumu tabote kebe talona komo kiya꞉tua꞉mena? Ale okoha꞉ hegelalo hido komo o kuba komo ba꞉kododima꞉? Tawakalubi ba꞉ka꞉hiduilamema꞉ o ba꞉ka꞉kubahilamema꞉?” Iba꞉te huiya tabo kaga꞉luya꞉ha꞉,
MAR 3:5 ba꞉bema꞉ Ya꞉suti maubate ibino wato kodakoda komo umilamete, ba꞉be mabuma꞉ ibi tepo menemena꞉go ba ulamehole ba꞉be dubutamo na꞉goiya꞉, “Amia꞉no kokoto na꞉hogamina,” ba꞉bene ebete kokoto da꞉hogaminuya꞉ ebeno kokotote ba꞉bo hiduya꞉.
MAR 3:6 Ba꞉be mabuma꞉ Pa꞉lisi kapiyuimipa꞉te maubahago tolamete, ba꞉ba tetenomolo iba꞉te Ko Gawadubu Helodikono kapiyuimipa꞉go tabo ba꞉bo nega꞉luya꞉ Ya꞉suku anakapumima꞉.
MAR 3:7 Ba꞉ba tetelo Ya꞉suti ebe ta꞉matapa꞉go Ga꞉lili Bobamo gala na꞉katuya꞉, ba꞉bene Yu tawakalubi hiliyonomate ba꞉be komo uliti iba꞉te Ga꞉lili hopone, Yudiya hopone, ba꞉gala Yelusalema ko habane pelameholete ebe ba꞉bo ta꞉matuya꞉. Ba꞉gala komo tawakalubi hiliyonomate hiya꞉hiya꞉ muhulu hopone atumu a꞉kapelameholiya꞉, ba꞉ba꞉te Idumiya hopone, Yodane Tuli hapuni, Taya ko habane, ba꞉gala Saidono ko habane pelameholiya꞉.
MAR 3:9 Ba꞉bene ibi ipuwalo Ya꞉suti temetema꞉gopi hiliyonomo da꞉hiduilamiya꞉, komo temetema꞉gopi hiliyonomate ba꞉be komo ba iya꞉tawaha ebe ologihoma꞉ emokatihuilo da꞉pelamiya꞉, ba꞉be mabuma꞉ Ya꞉suti ebe ta꞉matapi na꞉goelamiya꞉ iba꞉te boge kadahemema꞉, ba꞉bi tawakaluba꞉te ibino emokatihui komamo ebe kubahimikapoma꞉.
MAR 3:11 Ba꞉ba tetelo kuba gobogobagopa꞉te Ya꞉suku duminakui, iba꞉te ebeno nato mabamo da꞉pegudinakui ga꞉ga꞉lo na꞉ga꞉lanakuya꞉, “Ama꞉ ba꞉ Godokono Gudulata!”
MAR 3:12 huiyatiya Ya꞉suti ibi koamo kiyahalamenakui, mabu ebe ubihinola iba꞉te ebeno komo hawakalimi.
MAR 3:13 Ba꞉ba tetelo Ya꞉suti eta haka hunamo da꞉nodoluya꞉, ebete ebeno ubi tawakalubi ebetamo peka꞉lamiti, iba꞉te ebetamo ba꞉bo tolamiya꞉.
MAR 3:14 Ba꞉bene ebete ibi ipuwalo 12 dubu uwatete iba꞉tamo na꞉goiya꞉, “La꞉ ba꞉ naeno oelamepilata. Nale la꞉ buwatemata la꞉le nago kemedenama꞉, ba꞉bema꞉ nale la꞉ Godokono tabo olamagimima꞉ koelamema꞉nemata,
MAR 3:15 ba꞉gala na la꞉tamo helo kikalamema꞉nemata la꞉le kuba gobogobo tawakaluba꞉godone konoelamema꞉.”
MAR 3:16 Ya꞉suti 12 dubu duwatiya꞉, ba꞉moi ba꞉ ibino mahilola. Saimonoko, Ya꞉suti ebetamo eta Pita mahilo bikamiya꞉.
MAR 3:17 Sebedikono gudu Ya꞉imesiko ba꞉gala ebeno ekawi Yoneko, Ya꞉suti ibi netewapa꞉tamo Bowanagese mahilo bikalamiya꞉, ba꞉be mahiloeno ipuwa ba꞉ ‘Alomo Ga꞉lawata Dubula.’
MAR 3:18 A꞉nduluku ba꞉gala Pilipiko, Batolomuku ba꞉gala Ma꞉tiyuku, Tomasiko ba꞉gala A꞉lapiyasikono gudu Ya꞉imesiko. Ta꞉diyasiko ba꞉gala Saimonoko, ba꞉moe eta Saimono ebe ubila kapela Loma gabomani tawakaluba꞉go ba alaholo iba꞉te ebeno Ka꞉inane hopo ba꞉bo komiya꞉pama꞉.
MAR 3:19 Ba꞉gala Ya꞉suti Keliyotanapi Yudasiko atumu a꞉kalawiya꞉, ba꞉moe dubu ba꞉ galane tetelo Ya꞉suku anakapumipi dowalubiliya꞉ ba꞉be dawala.
MAR 3:20 Ba꞉bene Ya꞉suti genamamo da꞉tuya꞉ tawakalubi hiliyonomate ebetamo pelamete gala eba꞉go da꞉kapekapiyuya꞉, ba꞉bema꞉ Ya꞉suku ba꞉gala ebe ta꞉matapi baa꞉ nahama꞉ kamodobuya꞉ha꞉.
MAR 3:21 Ba꞉ba tetelo ebeno ekaka꞉te ba꞉be komo uliti ebe adabuima꞉ ba꞉bo tolamiya꞉, mabu tawakaluba꞉te iba꞉tamo ba꞉ma ka꞉na ga꞉luya꞉, “Ebe daedaela.”
MAR 3:22 Ba꞉bene Godokono Tutumu iya꞉tulamepi Yelusalema ko habane da꞉pelamiya꞉, ba꞉bi dubate na꞉pega꞉luya꞉, “Biyesibuluku ebegodolo bemedena, iyo, ebete kubakuba gobogoboeno Kodawoeno heloamo oelamenako, Godokono heloamoha꞉!”
MAR 3:23 Ba꞉bene Ya꞉suti tawakalubi ebetamo ka꞉lamiti komo uwi ba iya꞉tulame na꞉goiya꞉, “Saitanate ebeno kubakuba gobogobo lumagigodone ba꞉koelamemene? Ao, a꞉koelama꞉mene.
MAR 3:24 Numa꞉la꞉, haba kapiya tawakaluba꞉te tetedo dadikanalemena꞉ ba꞉be habate kokubama꞉ne,
MAR 3:25 ba꞉gala genama kapiya tawakaluba꞉te tetedo dadikanalemena꞉ ba꞉be genamanapa꞉te a꞉kemedenamena꞉, ibino genamate ba꞉ atumu kakakubama꞉ne.
MAR 3:26 Ba꞉bema꞉ Saitanakono ukui ba꞉ma ka꞉nala, ebete ebeno kubakuba gobogobo tawakaluba꞉godone a꞉koelama꞉le, mabu keba tetelo ebete ba꞉ba ka꞉na dewagelemene ebeno oko owati helote kowiboma꞉ne, iyo, ebeno kuititi bitana.
MAR 3:27 “Numa꞉la꞉, Saitanako ba꞉ eta helo dubu keba ka꞉nala꞉ka꞉ ba꞉ba ka꞉nala, ba꞉gala ebete pilolo duwatiya꞉ ba꞉bi tawakalubi ba꞉ ebeno genamoeno ilinala. Ba꞉bema꞉ tawakaluba꞉te ba꞉mako helo dubuino genamamo ogomote ebeno ilina uwatemema꞉ ubi dihatemena꞉, iba꞉te dopamo ebe hala꞉mo matuhumihote, ba꞉bene ebeno ilina ba꞉bo kuwatemema꞉na꞉.
MAR 3:28 “Na la꞉tamo hibi tabo begoemo, tawakalubino hiya꞉hiya꞉ hiliyonomo kuba komo Godote egebolelamete adodohole iya꞉tawala, ba꞉gala tawakaluba꞉te Godoko ubiha꞉ma꞉ da꞉ga꞉lamena꞉, ba꞉bi kuba tabo komokomo Godote egebolelamete kadodoholelamema꞉ne.
MAR 3:29 Huiyatiya kebe lumagiti Godokono Gobogoboeno ododi komoma꞉ kubama꞉ da꞉goemene, Godote ba꞉be lumagino kuba egebolemete a꞉kadodomenamene, ebete emedena tetelo ebe kubadawama꞉ ba꞉goenakomene.”
MAR 3:30 Ba꞉ hibila, ba꞉moe komo Ya꞉suti goiya꞉ mabu ba꞉bi tawakaluba꞉te ebeno komoma꞉ ba꞉ma ka꞉na ga꞉luya꞉, “Ebe kuba gobogobagoenola.”
MAR 3:31 Ba꞉bene Ya꞉sukunu menoko ba꞉gala ebeno ekaki iba꞉te ebe umima꞉ da꞉pelamiya꞉, iba꞉te genama tamelo ba pela꞉mota꞉hana, ebete iba꞉tamo pema꞉ tabo ba꞉bo noemiya꞉.
MAR 3:32 Ba꞉ba tetelo tawakalubi hiliyonomate Ya꞉suku tamelo na꞉pola꞉nuya꞉, ba꞉bene iba꞉te ebetamo na꞉ga꞉luya꞉, “Numa꞉, amia꞉no menoko ba꞉gala ekaki iba꞉te genama tamelo ba꞉pepola꞉na. Ibi ubila ama꞉.”
MAR 3:33 Ya꞉suti iba꞉tamo na꞉huiyuya꞉, “Naeno menoko potela꞉ka꞉, ba꞉gala naeno ekaki puya꞉tela꞉ka꞉?”
MAR 3:34 Ba꞉bene ebete tawakalubi ebe tamelo da꞉pola꞉nuya꞉ ulamete na꞉goiya꞉, “Ba꞉moi ba꞉ naeno menokobila ba꞉gala naeno ekakila.
MAR 3:35 Pote Godokono ubi komo dododimini, ba꞉be lumagi naeno menokola ba꞉gala naeno ekawila.”
MAR 4:1 Eta tetelo Ya꞉suti Ga꞉lili Bobo dodolo tawakalubi biya꞉tulamitiya꞉, ba꞉bene tawakalubi hiliyonomate ebetamo da꞉pelamiya꞉, ba꞉bema꞉ ebete boga꞉mo ololote boge dodone nanekela꞉mo nalima꞉tepate boga꞉mo dito emediya꞉, huiyatiya tawakaluba꞉te Ga꞉lili haka dodolo pepola꞉nuya꞉.
MAR 4:2 Ba꞉bene ebete komo hiliyonomo komokomo iya꞉tulame uwa꞉mo ba hawakalilame, eta iya꞉tulame tabo iba꞉tamo ba꞉ma ka꞉na goiya꞉,
MAR 4:3 “La꞉ nulia꞉la꞉. Eta lumagiti haka da꞉hiduimi kona kikipo haminahala꞉go ba꞉bo tui.
MAR 4:4 Ebete haminahala꞉go ba tonato, komo kikipo iba꞉te gabamo gudiya꞉, ba꞉bema꞉ holaholate pelamete ba꞉bo penaliya꞉.
MAR 4:5 Komo kikipo iba꞉te nakola hakamo gudiya꞉, ba꞉bolo haka koha꞉. Ba꞉bema꞉ iba꞉te tiyonomo ikulihuya꞉ mabu haka dobodoboha꞉,
MAR 4:6 ba꞉bene hegelate da꞉podolui iba꞉te na꞉waiwaihuya꞉ mabu ibino haha ipuwamo katolameha꞉, iyo, iba꞉te ba꞉bema꞉ tiyonomo ha꞉lahuya꞉.
MAR 4:7 Komo kikipo iba꞉te olagopi hemo hakamo gudiya꞉, ba꞉bema꞉ ba꞉bi hemate dapepehui kona ba꞉bo alukuliya꞉, ba꞉bene ba꞉ba꞉te kanolohoha꞉.
MAR 4:8 Huiyatiya komo kikipo iba꞉te hido hakamo gudiya꞉, ba꞉bema꞉ ba꞉ba꞉te apepehote ba꞉bo nolohuya꞉, komo 30 teta꞉mo, komo 60 teta꞉mo, komo 100 teta꞉mo hiliyonomoma꞉ eda꞉huya꞉.”
MAR 4:9 Ya꞉suti gala na꞉kagoiya꞉, “Galagodawa, ama꞉ hidamo nulia꞉!”
MAR 4:10 Ba꞉bene hiliyonomo tawakaluba꞉te Ya꞉suku da꞉miya꞉puya꞉, komo kapiyakapiya tawakaluba꞉te ebeno 12 ta꞉matapa꞉go ebetamo pelamete na꞉pega꞉luya꞉, “Amia꞉no iya꞉tulame uwino ipuwa keba ka꞉nala꞉ka꞉?”
MAR 4:11 Ya꞉suti iba꞉tamo na꞉goiya꞉, “Godote Ko Gawadubuma꞉ deda꞉na, ba꞉be komoeno ipuwa kolawema꞉ nale helo la꞉tamo ikalamimata, iyo, ba꞉be komoeno awamina komo la꞉ ba꞉ iya꞉tawahuimata. Huiyatiya komo tawakalubi eba ka꞉naha꞉, iba꞉te iya꞉tulame uwini hiliyonomo komokomo ulihote hidamo a꞉kiya꞉tawahamena꞉.
MAR 4:12 Ba꞉ hibila, ‘Iba꞉te bohowadinakomena꞉ huiyatiya a꞉kuminakamena꞉, ba꞉gala iba꞉te bulinakomena꞉ huiyatiya a꞉kiya꞉tawahanakamena꞉, ba꞉bema꞉ iba꞉te ibino kubane a꞉kohobila꞉hamena꞉, ba꞉gala Godote ibino kuba a꞉kegebolelama꞉mene.’”
MAR 4:13 Ba꞉bene Ya꞉suti ebe ta꞉matapa꞉tamo na꞉goiya꞉, “La꞉ ba꞉moe iya꞉tulame uwino ipuwa kiya꞉tawahutaha꞉, ba꞉bema꞉ la꞉ galane tetelo naeno komo iya꞉tulame uwino ipuwa keba ka꞉na na꞉kiya꞉tawahonama? Ba꞉moe uwino ipuwa ba꞉ma ka꞉nala,
MAR 4:14 kona kikipo haminahaledawa ebete Godokono tabo behaminahalena.
MAR 4:15 Ba꞉bene komo tawakalubi gabamo da꞉gudi ba꞉bi kona kikipo keba ka꞉nala꞉ka꞉ ba꞉ba ka꞉nala, iba꞉te tabo dulimina꞉ Saitanate pete ibino tepo ipuwane tiyonomo kopuwatema꞉ne.
MAR 4:16 Komo tawakalubi nakola hakamo da꞉gudi, ibi ba꞉ ba꞉bi kikipola, iba꞉te Godokono tabo dulimina꞉ kalakalago kolawema꞉na꞉,
MAR 4:17 huiyatiya ibino tepo ipuwalo haha puliyala. Ba꞉bema꞉ iba꞉te Godokono oko ipuwalo nanekela꞉mo emeda꞉tepate, ba꞉bene Godokono Taboma꞉ temeteme iba꞉tamo da꞉pikulimina꞉ ba꞉gala tawakaluba꞉te ibino komoma꞉ da꞉ga꞉lamena꞉, iba꞉te tiyonomo kalahutihoma꞉na꞉.
MAR 4:18 Komo tawakalubi iba꞉te olagopi hemo hakamo da꞉gudi ba꞉bi kikipola. Iba꞉te Godokono tabo kulima꞉na꞉,
MAR 4:19 huiyatiya iba꞉te ilina konomamo emalagidolena ba꞉gala ibino emede komoma꞉ ukui bilibilinomoma꞉ eda꞉hana, ba꞉bema꞉ ibino tepo ipuwalo ba꞉bakobako ukui hiliyonomo ba꞉pola꞉na, ba꞉moi ukui komate hido tabo ba anakapumi, ba꞉bene iba꞉te a꞉kanolohamena꞉.
MAR 4:20 Huiyatiya komo tawakalubi iba꞉te hido hakamo da꞉gudi ba꞉bi kikipola. Iba꞉te Godokono tabo uliti, hibinomolo lawete konolohoma꞉na꞉, komo 30 teta꞉mo, komo 60 teta꞉mo, komo 100 teta꞉mo konolohoma꞉na꞉.”
MAR 4:21 Ba꞉bene Ya꞉suti iba꞉tamo na꞉goiya꞉, “Lumagiti ebeno wuiki alo bagolo ipuwamo a꞉kihata꞉mene ba꞉gala ebeno wata bahi ipuwamo a꞉kihata꞉mene, huiyatiya ebete hawakala baha꞉mo kihatema꞉ne.
MAR 4:22 Kebe awalelahale komate da꞉pola꞉na galane tetelo Godote kohawakalilamema꞉ne, ba꞉gala kebe ugumuili komate da꞉pola꞉na galane tawakaluba꞉te alo tetelo kulameholema꞉na꞉.
MAR 4:23 Galagodawa, ama꞉ hidamo nulia꞉!”
MAR 4:24 Ba꞉gala Ya꞉suti iba꞉tamo na꞉kagoiya꞉, “La꞉le dulihonama ba꞉bi komo hidamo nulamenakuya꞉la꞉! La꞉le eta lumagitamo anagiya꞉mida komo keba ka꞉na dododima, Godote la꞉tamo ba꞉ ba꞉ba ka꞉na kopododima꞉ne, huiyatiya la꞉eno anagiya꞉mida huiyate konomamo kopema꞉ne.
MAR 4:25 Ba꞉ hibila, Godokono tabo ulihoma꞉ lumagigodolo hidohido ukui da꞉pola꞉na, Godote ebetamo hiliyonomo hidohido komo gala kakikamehoma꞉ne. Huiyatiya lumagigodolo hidohido ukui pola꞉naheno, ebegodolo kebe kapiyakapiya komate da꞉pola꞉na Godote ebegodone gala kakuwatemema꞉ne.”
MAR 4:26 Ba꞉bene Ya꞉suti gala na꞉kagoiya꞉, “Godote Ko Gawadubuma꞉ deda꞉na, ba꞉be komo ba꞉ma ka꞉nala. Dubuti ebeno ko pali hakamo kona kikipo da꞉haminahali,
MAR 4:27 ba꞉bene ebete kawata, kamahiga, ba꞉ba ka꞉na ba ewagelena, ba꞉bi kona huha꞉te ikulihote ba꞉bo apepehuya꞉. Huiyatiya kikipate haka ipuwalo ba pola꞉na, tete ga꞉ga꞉dopolo iba꞉te keba ka꞉na dapepehona, ba꞉be dubuti kiya꞉tawanaha꞉,
MAR 4:28 mabu hakate ilina ha꞉kiya noluilamena, dopamo paha ba꞉gala ugiugi, ba꞉bene naha kikipo.
MAR 4:29 Ba꞉bema꞉ hibila, naha kikipate da꞉kodakodahamena꞉, ba꞉be dubuti tiyonomo tote konewakalamima꞉ne mabu kona wakalami tete ba꞉ a꞉pe.”
MAR 4:30 Ba꞉bene Ya꞉suti gala na꞉kagoiya꞉, “Godote Ko Gawadubuma꞉ deda꞉na ba꞉be komo ale bada goamo na꞉ka꞉hawakalimima꞉, ba꞉gala ba꞉be komo ale kebako iya꞉tulame uwa꞉mo na꞉ka꞉tuputupuimima꞉?
MAR 4:31 Hibila, ba꞉moe hopo konomolo keha kikipo kokonomo ba꞉pola꞉na huiyatiya mastada kikipo ba꞉ deha꞉potonomola, ba꞉bema꞉ Godote Ko Gawadubuma꞉ deda꞉na ba꞉be komo ba꞉ mastada kikipo huiyala.
MAR 4:32 Dubuti damimini, ba꞉be deha꞉poto kikipote apete komo hiliyonomo keha gogolete koko gedawa komela꞉midahalema꞉ne, ba꞉bene holaholate pelamete keha gedawoeno dedelalo ba꞉pemedehonamena꞉.”
MAR 4:33 Ba꞉ hibila, tawakalubino iya꞉tawa komote da꞉modobuya꞉, Ya꞉suti ibi ba꞉mako hiliyonomo iya꞉tulame uwa꞉mo iya꞉tulamenakui.
MAR 4:34 Iyo, ebete Godokono tabo iya꞉tulame uwa꞉mo olamaginakui, huiyatiya komo hiliyonomo tawakaluba꞉te ibino habahabamo gala da꞉katolamenakui, ba꞉ba tetelo ebe ta꞉matapa꞉tamo hiliyonomo uwino ipuwa diya gabodo ba꞉bo hawakalilamenakui.
MAR 4:35 Ba꞉be hegelate da꞉duniya꞉ Ya꞉suti ebe ta꞉matapa꞉tamo na꞉goeniya꞉, “A bobo hapuamo kona꞉hiwaliya꞉.”
MAR 4:36 Ba꞉bene iba꞉te komo tawakalubi hiliyonomo miya꞉palenate, Ya꞉suti da꞉lutiya꞉ ebe ta꞉matapa꞉te ba꞉be boga꞉mo ololonate ba꞉ dito tolameniya꞉. Ba꞉ba tetelo komo boga꞉te atumu iba꞉go na꞉katolameniya꞉,
MAR 4:37 ba꞉bene ko gogonomote ba mahigana koko gawiyoeno beyate ta꞉matapino boga꞉mo da꞉pa꞉la꞉haniya꞉, boge gu beyate dito taboniya꞉.
MAR 4:38 Huiyatiya Ya꞉suku boge gala hapulu ebeno wato tenamo apatinate ba꞉bo wataniya꞉, ba꞉bema꞉ iba꞉te ebe modoetenate na꞉ga꞉lameniya꞉, “Iya꞉tulamedawa, ama꞉ a hidamo badama꞉ kua꞉menaha꞉? A ba꞉ koha꞉lahama꞉nema꞉!”
MAR 4:39 Ba꞉bene Ya꞉suti mahiganate huhu na꞉kiyahameniya꞉, “Na꞉tataba!” ba꞉gala gawiyatamo atu tabo bekagoeniya꞉, “Na꞉ka꞉la꞉liyahala꞉!” ba꞉bene huhuti wibonate bobote tatabanomoma꞉ ba꞉ dito eda꞉niya꞉.
MAR 4:40 Ba꞉bema꞉ Ya꞉suti iba꞉tamo na꞉goeniya꞉, “La꞉ badama꞉ ka꞉toletolehonama? La꞉eno hibima꞉ midi komo puliyala꞉ka꞉?”
MAR 4:41 Huiyatiya iba꞉te konomamo ba hanohanohona ibi ipuwalo na꞉ga꞉laniya꞉, “Moe lumagi potela꞉ka꞉? Huhu ba꞉gala gawiya iba꞉te ebeno tabo uliti a꞉papamila꞉!”
MAR 5:1 Ba꞉bene Ya꞉suku ba꞉gala ebe ta꞉matapi iba꞉te Ga꞉lili Bobo hapuamo na꞉hiwaliya꞉ Gelasa haboeno hopamo.
MAR 5:2 Ya꞉suti bogene hakamo ba nodolo kuba gobogobagoeno dubuti eba꞉go alugama꞉ ba꞉bo piya꞉. Ba꞉be hopo tawakalubino komo ba꞉ma ka꞉nala, iba꞉te iya꞉ha꞉midale nakola haka ba aligili hiya꞉hiya꞉ bobo ba꞉bo ododilinakuya꞉ iba꞉te ibino ha꞉laha tawakalubi miya꞉tenoma꞉. Ba꞉bema꞉ ba꞉moe dubuti ba꞉be ha꞉laha tawakalubino bobo habane piya꞉,
MAR 5:3 mabu ebete ba꞉bi nakola bobo ipuwalo emedenami. Tawakaluba꞉te ebe auli hala꞉mo da꞉matuhumihonakui ba꞉be hale kamodobonakuiha꞉,
MAR 5:4 iyo, hiliyonomo tetelo iba꞉te ebeno nato kokoto auli hala꞉mo da꞉matuhulameholemenakui, ebete kokotoeno hale iya꞉hilinakui ba꞉gala natoeno hale atumu akiya꞉hilinakui. Ba꞉ hibila, ebete helonomoma꞉ eda꞉nami, ba꞉bema꞉ lumagiti ebe duhimi modoboha꞉.
MAR 5:5 Ba꞉gala ebete hegela du hiliyonomolo nakola bobo habalo ba꞉gala haka hunulu ba gaa꞉tepaha, ebe ha꞉kiya ebeno ape nakolamo danagalimihonakui hawiti ba꞉bo pikulihomenakui.
MAR 5:6 Ba꞉bene ba꞉moe dubuti Ya꞉suku muhulamo numiti, ebetamo nipuligate ebeno nato mabamo da꞉nepapamiwatuya꞉,
MAR 5:7 Ya꞉suti ebetamo na꞉goiya꞉, “Kuba gobogobo, ama꞉ ba꞉moe dubugodone nuluhuka!” Ba꞉ba tetelo ebete gaa꞉tepahalo na꞉goiya꞉, “Ya꞉su! Ama꞉ Hununomo Godokono Gudulata! Ama꞉le natamo bada komo na꞉kododiomena꞉? Na ama꞉ Godokono mahilamo goememata, natamo kuba huiya akikanama꞉la꞉!”
MAR 5:9 Ba꞉bene Ya꞉suti ebe nalatediya꞉, “Amia꞉no mahilo potela꞉ka꞉?” Ebete na꞉huiyuya꞉, “Naeno mahilo Hiliyonomotela mabu a kuba gobogobo hiliyonomola!”
MAR 5:10 Ba꞉bene ba꞉be dubuti Ya꞉suku koamo ba toemeho ebe na꞉goemiya꞉, “Nagodolo demedehona ba꞉bi kubakuba gobogobo ba꞉moe hopone akoelama꞉la꞉!”
MAR 5:11 Ba꞉ba tetelo dabihole goegoe hiliyonomate haka hunulu nala꞉go ba꞉bolo na꞉wapata꞉lamitiya꞉,
MAR 5:12 ba꞉bema꞉ kuba gobogobate Ya꞉sutamo toetoeholo na꞉ga꞉luya꞉, “Ama꞉ a goegoa꞉tamo noea꞉ma꞉, ale iba꞉tamo konogomoma꞉.”
MAR 5:13 Ba꞉bene Ya꞉suti modobo tabo goete ibi ba꞉bo goelamiya꞉, “Na꞉tolama꞉la꞉!” Ba꞉ba tetelo kubakuba gobogobate dubugodone ikuliti goegoa꞉tamo ba꞉bo nogomuya꞉, ba꞉bema꞉ ba꞉bi 2,000 goegoa꞉te haka hununi pulila꞉hate iya꞉ha꞉midale hakane da꞉negudiya꞉, beyamo nululuhuliti ibi hiliyonomate ba꞉ dito neha꞉lahuya꞉.
MAR 5:14 Ba꞉ba tetelo goegoe ulamepi dubate ba꞉be komo umiti ibino habamo pulila꞉hate habalubi ba꞉gala tumu genamalo demedehonama꞉ da꞉nikiyahalamiya꞉, tawakalubi hiliyonomate ba꞉bo pelamiya꞉, Ya꞉suti dododiya꞉ ba꞉be komo umima꞉.
MAR 5:15 Iba꞉te ebetamo pikuliti, dopamo kubakuba gobogobo hiliyonomago demedenami ba꞉be dubu ba꞉bo pumiya꞉, ebete kaliko puliti ba꞉bolo lutiya꞉ mabu ebeno ukui a꞉tuputupumiya꞉. Ba꞉moe mabuma꞉ iba꞉te na꞉toletolehutiya꞉,
MAR 5:16 ba꞉bene Ya꞉suti kubakuba gobogobagoeno dubutamo ba꞉gala goegoa꞉tamo kebe komokomo kododiliya꞉, puya꞉te ba꞉bi komo dulamiya꞉ iba꞉te komo tawakalubi ba꞉bo kiyalamiya꞉.
MAR 5:17 Ba꞉ba tetelo ba꞉bi tawakaluba꞉te Ya꞉suku na꞉kiyahamiya꞉ ebete ibino hopo komiya꞉pama꞉,
MAR 5:18 ba꞉bene Ya꞉suti boga꞉mo ba ololo, dopamo kubakuba gobogobago demedenami ba꞉be dubuti ebe ba꞉bo toemehuya꞉, “Na niliyala, ama꞉go kopa꞉mo!”
MAR 5:19 Huiyatiya Ya꞉suti ebe ba duhimi na꞉goemiya꞉, “Ama꞉ genamamo na꞉toa. Godote ama꞉tamo keba ka꞉na kododila꞉ka ba꞉gala ama꞉ da꞉malemaleta꞉ka, ba꞉bi koko komonomo amia꞉no mabu tawakalubi na꞉nikiyalamiya꞉.”
MAR 5:20 Ba꞉bema꞉ ba꞉moe dubuti Ta꞉ni Habahaboeno hopo konomamo tote, Ya꞉suti ebetamo dododiliya꞉ ba꞉bi komo olamaga꞉go tuya꞉, ba꞉bene puya꞉te ba꞉bi komo dulihuya꞉ iba꞉te konomamo hanohanohuya꞉.
MAR 5:21 Ba꞉bene Ya꞉suti boga꞉go bobo hapuamo gala da꞉kana꞉hiwuya꞉, ebete ba꞉bolo ba niluta tawakalubi hiliyonomate ebetamo ba꞉bo pelamiya꞉.
MAR 5:22 Ba꞉ba tetelo Yu tawakalubino baidi ibubulamehole genama umidawa dubu, ebeno mahilo Ya꞉ilasitila, ebete Ya꞉sutamo pete ebeno nato mabamo pepapamiwatate,
MAR 5:23 konomamo ba petoetoe na꞉pegoiya꞉, “Naeno bohele deha꞉poto hoe tatalila. Ama꞉ pete amia꞉no kokoto ebetamo na꞉pemowatima꞉ ebete kohidoma꞉, ba꞉bene ebete a꞉kahaa꞉mene.”
MAR 5:24 Ba꞉bene Ya꞉suti ba꞉moe dubago to da꞉tupuimiya꞉, tawakalubi hiliyonomate ebe ba anataguma꞉tuta emokatihuia꞉go tolamitiya꞉.
MAR 5:25 Ibi ipuwalo eta kamena 12 gogo tetelo hawi ka꞉ka꞉la꞉ temetemete uminami,
MAR 5:26 komo dogeta tawakaluba꞉te ebetamo hiya꞉hiya꞉ menemene komo bikamenama꞉. Iba꞉te ebe kahiduimiya꞉ha꞉, huiyatiya ba꞉be kamenate ebeno mani iba꞉tamo ba ikalame dupula꞉liya꞉, ebeno temetemete kodopoma꞉ ediya꞉.
MAR 5:27 Ba꞉bema꞉ ebete Ya꞉sukunu komo duliya꞉ tawakalubi ipuwamo nopegate, ebeno gala hapuni pete ebeno kaliko ba꞉bo pologiya꞉,
MAR 5:28 mabu ebete nemalagidoluya꞉, “Nale ebeno kaliko dologimo na ba꞉bo kohidoma꞉nemo.”
MAR 5:29 Ba꞉bene ebete Ya꞉sukunu kaliko dologiya꞉, ba꞉ba tetenomolo ebeno hawi ka꞉ka꞉la꞉ komote da꞉wibuya꞉ ebete iya꞉tawuya꞉ ebeno ape ba꞉ a꞉hido.
MAR 5:30 Huiyatiya Ya꞉suti iya꞉tawuya꞉ helote ebegodone duluhukuya꞉, ba꞉bene ebete pohobigate tawakalubi na꞉palateda꞉liya꞉, “Naeno kaliko pote kologi?”
MAR 5:31 Huiyatiya ebe ta꞉matapa꞉te ebe na꞉ga꞉lamiya꞉, “Ba꞉moi tawakalubi hiliyonomate ama꞉tamo emokatihuia꞉go pelamita. Ama꞉ ibi ulamelo badama꞉ kolamagiuta ama꞉ pote dologita?”
MAR 5:32 Ya꞉suti ibino tabo kahuiyuya꞉ha꞉, huiyatiya ebete ba꞉moe lumagi kumima꞉ tawakalubi bulameholiya꞉.
MAR 5:33 Ba꞉ba tetelo ba꞉be kamenate iya꞉tawuya꞉ Ya꞉sukunu helote ebeno ape a꞉hiduimi, ba꞉bema꞉ ebete toletolelo lililago pete, Ya꞉sukunu nato mabamo pepapamiwatalo ebeno temetemeno komokomo ebetamo ba꞉bo pehawakalilamiya꞉.
MAR 5:34 Ba꞉bene Ya꞉suti ebetamo na꞉goiya꞉, “Kamena, amia꞉no hibima꞉ midi komote ama꞉ a꞉hiduima꞉ta. Ama꞉ kalakalago na꞉toa, mabu ama꞉ duminama꞉ ba꞉be temetemete ba꞉ a꞉wibo.”
MAR 5:35 Ya꞉suti ba꞉moe tabo ba olamagita, tabo adahepa꞉te Yu watodawa Ya꞉ilasikono genamane pelamete ebe na꞉pega꞉lamiya꞉, “Amia꞉no bohele a꞉hoe, ba꞉bema꞉ Iya꞉tulamedawa gala akagoema꞉la꞉ ebe kopihiduimima꞉.”
MAR 5:36 Ya꞉suti ibino tabo dito ulia꞉tepuya꞉, ba꞉bene ebete Ya꞉ilasiko na꞉goemiya꞉, “Ama꞉ akatoletola꞉la꞉, ama꞉ Godoko hibima꞉ na꞉mida꞉.”
MAR 5:37 Ba꞉ba tetelo ebete Pitako, Ya꞉imesiko, ba꞉gala ebeno ekawi Yoneko, ibi kapiya ba magatale komo tawakalubi na꞉duhilamiya꞉ iba꞉te iba꞉go tolamema꞉.
MAR 5:38 Ba꞉bene ibi ha꞉kiya Ya꞉ilasikono genamamo da꞉nikuliya꞉ Ya꞉suti tawakalubi hiliyonomo ba꞉bo nulamiya꞉, iba꞉te howela꞉go konomamo ihimitiya꞉.
MAR 5:39 Ya꞉suti genama guamo nodolote ibi na꞉negoelamiya꞉, “La꞉ hiliyonomo howela꞉go bada mabuma꞉ kihimiutama? Gudu bohele kahaa꞉kaha꞉, ebete u bewatita.”
MAR 5:40 Huiyatiya iba꞉te ebe na꞉walitiya꞉, ba꞉bema꞉ ebete ibi hiliyonomo genamane ba꞉ dito poelamiya꞉, ba꞉bene Ya꞉suti guduino menoko, nabiwi, ba꞉gala ebeno netewa-kapiya ta꞉matapi uwatete, guduti da꞉kapitanuya꞉ iba꞉te ba꞉be habamo dito na꞉pa꞉la꞉huya꞉.
MAR 5:41 Ba꞉ba tetelo ebete bohele kokotamo nelawete Yu tawakalubino tabamo na꞉goemiya꞉, “Talita kumi!” Ba꞉moe taboeno ipuwa nitana, “Bohele, nale ama꞉ begoememata, na꞉mahiga!”
MAR 5:42 Ba꞉bene ba꞉ba tetenomolo ba꞉be 12 gogo tete bohelete mahigate na꞉patiya꞉. Puya꞉te ba꞉moe komo dumiya꞉ iba꞉te koamo hanohanohuya꞉,
MAR 5:43 huiyatiya Ya꞉suti ibi konomamo kiyahalamiya꞉, “La꞉ ba꞉moe komoma꞉ komo tawakalubi akakiyalama꞉la꞉!” ba꞉gala ebete iba꞉tamo na꞉kagoiya꞉, “Boheletamo naha ilina nikamehala꞉.”
MAR 6:1 Ba꞉ba tetelo Ya꞉suti ba꞉be habane tote ebeno emede haba Nasaleta꞉mo gala da꞉katuya꞉, ebe ta꞉matapa꞉te ebe bana kapimilo katolamiya꞉.
MAR 6:2 Ba꞉bene Yu tawakalubino okoha꞉ talona hegelalo ebete baidi ibubulamehole genamalo tawakalubi ba iya꞉tulamita, komo ibi hiliyonomate ebeno tabo dulihutiya꞉ ba꞉bema꞉ hanohanohutiya꞉. Iba꞉te na꞉ga꞉luya꞉, “Moe dubuino iya꞉tulame komo mulunomola! Ebete ba꞉moi komo kebolo kiya꞉tawui? Ba꞉gala ebete hanohano komo dododilina bada kokonomola꞉ka꞉!
MAR 6:3 Ebe kapeneta dubunomola, Ma꞉likono gudula. A iya꞉tawahala ebeno ekaki Ya꞉imesiko, Yausesiko, Yudasiko, ba꞉gala Saimonoko, iyo, ebeno ekaki bohelemela꞉te ba꞉moe habalo ago bemedena.” Ba꞉bene iba꞉te ebe ubiha꞉ma꞉ ba eda꞉huta
MAR 6:4 Ya꞉suti iba꞉tamo na꞉goiya꞉, “Godokono ukui hawakalimidawa tawakaluba꞉te ebe hunamo kadipatema꞉na꞉, huiyatiya ebeno habanapi ba꞉gala ebeno genamanapi ba꞉gala ebeno hawi tawakalubi, iba꞉te ebe ubiha꞉ma꞉ beda꞉hanakomena꞉.”
MAR 6:5 Ba꞉ba tetelo Ya꞉suti Nasaletenapino hibima꞉ midiha꞉ komoma꞉ koamo la꞉wa꞉te, ebete ebeno kokoto temetema꞉gopi kapiyakapiyanomatamo demowatilamiya꞉ ibi ba꞉bo hiduilamiya꞉, huiyatiya ebete ibino habalo komo hanohano komo ododilima꞉ kamodobuya꞉ha꞉, ba꞉bema꞉ ebete ibi ba miya꞉pale huiyatiya komo hiya꞉hiya꞉ habahabalo iya꞉tulama꞉go pata꞉nami.
MAR 6:7 Ba꞉bene Ya꞉suti ebeno 12 ta꞉matapi ebetamo ka꞉lamiti, etapi netewa, etapi netewa, hiya꞉hiya꞉ habahabamo ba꞉bo oelamiya꞉, ba꞉gala ebete iba꞉tamo helo ikalamiya꞉ tawakaluba꞉godone kuba gobogobo konoelamema꞉.
MAR 6:8 Ebete ibi na꞉goelamiya꞉, “La꞉eno tolame tetelo kuku kapiya nuwatiya꞉la꞉, huiyatiya komo ilina akuwata꞉la꞉, iyo, la꞉ baa꞉heno, kuihaheno, ba꞉gala manihino na꞉tolamiya꞉la꞉.
MAR 6:9 Ba꞉gala wadiyala la꞉ nato ilina ba꞉gala kapiyakapiya kaliko pupuliti ba꞉bo na꞉tolamiya꞉la꞉, komo pupulino ilina akuwata꞉la꞉.
MAR 6:10 Ba꞉bene la꞉ eta habamo nikuliti kebe genamamo da꞉nalehawaminama, la꞉ ba꞉be genamalo nemeda꞉tepate galane ba꞉be genamane eta hopamo kakatolamema꞉nemata, iyo, la꞉ eta genamane eta genamamo eba ka꞉na akanewagela꞉la꞉.
MAR 6:11 Ba꞉gala kebe habaluba꞉te la꞉ kalakalago uwateheno ba꞉gala la꞉eno tabo ulihoheno, ba꞉be haba ba miya꞉pa la꞉le natoeno puhulu na꞉moda꞉midatepaliya꞉la꞉. Ba꞉moe komote ba꞉bi tawakalubi kiya꞉tulamema꞉ne, Godokono tete ba꞉ na꞉pe ebete ibino komo kopanagiya꞉midalamema꞉ne.”
MAR 6:12 Ba꞉bema꞉ Ya꞉suku ta꞉matapa꞉te tolamete Godokono tabo nolamagiminatuya꞉ tawakaluba꞉te ibino kubane kohobila꞉ma꞉.
MAR 6:13 Ba꞉bene iba꞉te tawakaluba꞉godone kuba gobogobo boelameholenakuya꞉, ba꞉gala iba꞉te komo temetema꞉gopi hiliyonomo olibi kikipoeno iha꞉mo ibino wato dabutilamelelamenakui, ibi ba꞉bo hiduilamenakuya꞉.
MAR 6:14 Ba꞉ba tetelo Ko Gawadubu Heloditi ba꞉bi hanohano komo ulihuya꞉, mabu hiliyonomo tawakaluba꞉te Ya꞉sukunu komo ba iya꞉tawaha ibi ipuwalo komopa꞉te tabo ba꞉ma ka꞉na ga꞉luya꞉, “Yoneko tawakalubi beyamo wadulateledawate hoe ipuwane a꞉mahigui, ba꞉bema꞉ ba꞉moi hanohano komate ebegodone pikulinaka.”
MAR 6:15 Ba꞉bene komopa꞉te na꞉ga꞉luya꞉, “Ebe Elayate, Godokono ukui hawakalimidawala,” huiyatiya komopa꞉te na꞉kaga꞉luya꞉, “Ao, ebe ba꞉ Godokono ukui hawakalimidawa etala, dopamo aeno iniwala꞉tamo da꞉pikuliya꞉ ba꞉bi huiyala.”
MAR 6:16 Huiyatiya Heloditi Ya꞉sukunu komo duliya꞉, ebete na꞉goiya꞉, “Ba꞉moe dubu ba꞉ Yonetela, nale ebeno wato ditamidamimo, huiyatiya ebete hoene gala a꞉kamahigui!”
MAR 6:17 Ba꞉moe komo ba꞉ Yonete keba ka꞉na ka꞉hoiya꞉ ba꞉be komola. Yonete dopamo ba emedena Ko Gawadubu Heloditi ebeno ekawi Pilipikono kamena pilolo lawiya꞉, ba꞉be kamenoeno mahilo ba꞉ Helodiyasitila. Ba꞉moe mabuma꞉ Yonete Helodiko ba kiyahame na꞉goemiya꞉, “Ama꞉le ba꞉be kamena lawe wadiyaha꞉, ko kubanomola!” Ba꞉bema꞉ Heloditi ebeno alaholohopi doelamiya꞉, iba꞉te Yoneko nelawete du genama guamo dito pa꞉da꞉nuya꞉, mabu ebete ebeno ubi bihatiya꞉ ba꞉be ododi komodo ebete Helodiyasiko kokalakaluimima꞉.
MAR 6:19 Ba꞉ba tetelo Helodiyasiti Yonetamo maubate ebe anakapumima꞉ ebeno ubi ba꞉bo ihatiya꞉, huiyatiya Heloditi ba꞉moe komo ododima꞉ ubihinola.
MAR 6:20 Ebete Yoneko na꞉tolemenami, mabu ebe iya꞉tawala Yonete tuputupudawama꞉ ba eda꞉na Godokono talona ipuwalo emedena. Ba꞉ hibila, ebete Yonekono tabo dopamo duliya꞉ ukui bilibilima꞉ ba꞉bo ediya꞉, huiyatiya ebete du genamalo ba emedena, Heloditi ebe hidamo ba umina komo hiya꞉hiya꞉ tetelo ebeno tabo kalakalago ulinakui.
MAR 6:21 Ba꞉bene Heloditi da꞉hawakaluya꞉, ba꞉be hegela emalagidololo ebete ko poko bododitiya꞉. Ba꞉bema꞉ ebeno gabomani dubu, alaholoho gawadubu, ba꞉gala Ga꞉lili hopoeno watowatopi, ibi hiliyonomate tolamiya꞉ poko habamo. Ba꞉ba tetelo Helodiyasiti hido tete bumiya꞉.
MAR 6:22 Ebete ebeno bohele noemete, ebete ibino holoholo hapulu da꞉pemoitiya꞉, Helodiko ba꞉gala eba꞉go da꞉pola꞉nuya꞉ iba꞉te ebetamo na꞉kalakalahutiya꞉. Ba꞉bene Heloditi boheletamo na꞉goiya꞉, “Ama꞉le kebe komoma꞉ na da꞉goenamemena꞉, nale ama꞉tamo kikamema꞉nemata.”
MAR 6:23 Heloditi ebetamo hibinomolo gala na꞉kagoiya꞉, “Ama꞉ bada komoma꞉ na da꞉goenamemena꞉, amia꞉no ubi dihatemena꞉ naeno komo ilina ba꞉gala naeno komo hopo, nale ama꞉tamo kikamehoma꞉nemata! Naeno tabo a꞉kadikanala꞉mo.”
MAR 6:24 Ba꞉bene ba꞉be bohelete ebeno menokotamo tote na꞉negoiya꞉, “Na bada komoma꞉ na꞉ka꞉negoemo?” Ebeno menokote na꞉goemiya꞉, “Ama꞉ Yoneko tawakalubi beyamo wadulateledawoeno watoma꞉ ebe na꞉negoemiya꞉.”
MAR 6:25 Ba꞉bene ba꞉be bohelete Ko Gawadubu Heloditamo gala tiyonomo kapete ebe na꞉pegoemiya꞉, “Na ubila Yoneko tawakalubi beyamo wadulateledawoeno wato kikipo kapeyago. Ka꞉lonomo natamo nikanama꞉!”
MAR 6:26 Ba꞉bema꞉ Heloditi ebeno tepo ipuwalo menemenenomoma꞉ ediya꞉, huiyatiya ebete boheletamo kebe tabo ka꞉goiya꞉, eba꞉go da꞉pola꞉nuya꞉ iba꞉te ba꞉be tabo uliya꞉, ba꞉be mabuma꞉ ebete amawada꞉ma꞉ kamodobuya꞉ha꞉.
MAR 6:27 Ba꞉ba tetenomolo Heloditi ebeno eta alaholohodawa dubu ba noeme, ebe na꞉goemiya꞉ ebete Yonekono wato konelawema꞉, ba꞉bene ebete du genama guamo tote Yonekono wato ba꞉bo nitamidamiya꞉.
MAR 6:28 Ba꞉bene ebete wato kapeyamo nihatete boheletamo dadahiya꞉, ebete lawete ebeno menokotamo ba꞉ dito nikamiya꞉.
MAR 6:29 Ba꞉ba tetelo Yoneko ta꞉matapa꞉te ba꞉be komo duliya꞉, iba꞉te ebeno ape pelawete nakola bobo ipuwamo dito nihatiya꞉.
MAR 6:30 Ba꞉bene Ya꞉suti doelamiya꞉ ba꞉bi ta꞉matapi dubate gala ebetamo kapelamete, iba꞉te kebe komokomo tawakaluba꞉godolo da꞉nododiliya꞉ ba꞉gala ibi keba ka꞉na ka꞉niya꞉tulamiya꞉, ba꞉bi hiliyonomo komokomoma꞉ iba꞉te ebe na꞉pikiyahamiya꞉.
MAR 6:31 Ba꞉ba tetelo tawakalubi hiliyonomate Ya꞉suku umima꞉ gogolatepahuilo wapata꞉lamitiya꞉, ba꞉bema꞉ Ya꞉suku ba꞉gala ebe ta꞉matapi baa꞉ nahama꞉ tete kumiya꞉ha꞉. Ba꞉be mabuma꞉ ebete ibi na꞉goelamiya꞉, “Wadiyala a ha꞉kiya tataba hopamo tolamete hawela konamihuya꞉,”
MAR 6:32 ba꞉bene iba꞉te ibino boga꞉go eta tataba hopamo tolame ba꞉bo tupuimiya꞉.
MAR 6:33 Huiyatiya iba꞉te ba tolamita, tawakalubi hiliyonomate ibi ulamete iya꞉tawahuya꞉ ibi puya꞉tela꞉ka꞉. Ba꞉bema꞉ Ya꞉suti kebamo ka꞉tutiya꞉, ba꞉bi hiliyonomo habahabanapa꞉te ba꞉be komo umiti, iba꞉te bobo dododo pulila꞉hate ba꞉be hopamo dopamo dito nikuliya꞉.
MAR 6:34 Ba꞉bene Ya꞉suti ba꞉bamo da꞉nuluhukuya꞉, tawakalubi hiliyonomo nulamete ebeno tepo ipuwalo ibi konomamo nemalemalelateliya꞉, mabu sipi-goegoa꞉te ulamedawaheno keba ka꞉na kemedena iba꞉te ba꞉ba ka꞉na pola꞉nuya꞉, ba꞉bema꞉ ebete ibi komo hiliyonomo komokomo ba iya꞉tulame,
MAR 6:35 iba꞉te gapogapo teta꞉mo ba꞉bo nikuliniya꞉. Ba꞉ba tetelo ebe ta꞉matapa꞉te ebetamo pelamenate ebe na꞉pega꞉lameniya꞉, “Moe tawakalubiha꞉ bahila, tiyo kuduma꞉ne.
MAR 6:36 Ba꞉bema꞉ ama꞉ ibi noelama꞉, iba꞉te habahabamo ba꞉gala tumu genamamo tolameholete baa꞉ konuwatehoma꞉.”
MAR 6:37 Ya꞉suti huiyatiya ibi na꞉goelameniya꞉, “Ao, la꞉le iba꞉tamo naha ilina nikalamehola꞉la꞉.” Ba꞉bene iba꞉te ebe nalateda꞉niya꞉, “A tolamete kapiya gogoeno oko huiya mana꞉mo baa꞉ uwatehote, iba꞉tamo ba꞉kikalameholema꞉? Ao, a modoboha꞉!”
MAR 6:38 Ba꞉bene Ya꞉suti ibi nalateda꞉leniya꞉, “La꞉godolo kebaleta baa꞉te ka꞉pola꞉na? La꞉ tolamete na꞉nulama꞉la꞉.” Iba꞉te ulamenate na꞉ga꞉laniya꞉, “Agodolo paibo baa꞉ ba꞉gala daha netewa ba꞉pola꞉na.”
MAR 6:39 Ba꞉bene ebete ebe ta꞉matapi na꞉goelameniya꞉, “Tawakalubi na꞉kiyalama꞉la꞉ hiya꞉hiya꞉ kapiyuilame ododiliti hido hemolo kahidima꞉.”
MAR 6:40 Ba꞉bema꞉ tawakaluba꞉te hiya꞉hiya꞉ kapiyuilame hiliyonomo ododilinate ba꞉bo pola꞉nuya꞉, eta kapiyuimi ipuwalo 100, eta kapiyuimi ipuwalo 50, ba꞉ba ka꞉na ahidihoniya꞉.
MAR 6:41 Ba꞉bene Ya꞉suti paibo baa꞉ ba꞉gala daha netewa uwatenate, Hunu Habamo gahimilo Godotamo kalakala tabo goenate baa꞉ wakalamiholenate ebe ta꞉matapa꞉tamo dito ikalameniya꞉ iba꞉te tawakaluba꞉tamo kikalameholenama꞉, ba꞉gala ebete atu gabodo daha netewa kuwatenate tawakalubi hiliyonomatamo ba꞉bo kikalameholeniya꞉.
MAR 6:42 Ba꞉ba tetelo ibi hiliyonomate baa꞉ da꞉nahaniya꞉ ibino kape komo ba꞉bo wiboholameniya꞉.
MAR 6:43 Ba꞉ hibila, ba꞉be baa꞉ 5,000 dubate nahaniya꞉, ba꞉bene da꞉luhiliniya꞉ ba꞉bi baa꞉ komokomamo ba꞉gala daha hapuhapamo Ya꞉suku ta꞉matapa꞉te 12 bagolo betabuilameniya꞉.
MAR 6:45 Ba꞉ba tetenomolo Ya꞉suti tawakalubi ba oelamena ebe ta꞉matapa꞉tamo na꞉goeniya꞉, “Boge lawete Ga꞉lili Bobo hapuamo na꞉na꞉hiwala꞉la꞉ Betasaida habamo,”
MAR 6:46 ba꞉bene ebete ibi hiliyonomo oelamenate, ebete haka hunamo dito nodoloniya꞉ Godokoba꞉ tabo koga꞉lanama꞉.
MAR 6:47 Da꞉duniya꞉ ta꞉matapa꞉te boga꞉go bobo tulinomodo ba tolamena, huiyatiya Ya꞉suti hakalo ha꞉kiya lutiya꞉.
MAR 6:48 Ebete ibi ulameniya꞉, iba꞉te boge helonomamo da꞉mabihoniya꞉ huiyatiya ibino helo kamodoboniya꞉ha꞉ mabu huhuti ibi na꞉duhilameniya꞉, ba꞉bema꞉ du tetelo hegela owaloho tatalima꞉ ba eda꞉na, ebete beya hunudu iba꞉tamo ba꞉bo toniya꞉ ibino holoholo hapudu kopenuluhukunama꞉.
MAR 6:49 Huiyatiya ebete beya hunudu ba tonato, iba꞉te ebe uminate gubalima꞉ ga꞉lanate ba꞉bo ga꞉ga꞉niya꞉
MAR 6:50 mabu ibi hiliyonomate kubanomamo toletolehoniya꞉. Ba꞉ba tetenomolo Ya꞉suti ibi na꞉goelameniya꞉, “Na Ya꞉sutila, la꞉ katoletolehonala꞉!”
MAR 6:51 ba꞉bene ebete penate ibino boga꞉mo da꞉pololoniya꞉ huhuti ba꞉ dito wiboniya꞉. Ba꞉ba tetelo ebe ta꞉matapa꞉te konomamo hanohanohoniya꞉,
MAR 6:52 mabu iba꞉te ibino tepo ipuwalo kodakodama꞉ eda꞉hanama꞉, iyo, ba꞉be mabuma꞉ Ya꞉suti hiliyonomo tawakaluba꞉tamo baa꞉ dikalameholeniya꞉, iba꞉te ba꞉be hanohano komoeno ipuwa ibino ukuia꞉mo nipo ohowadiniya꞉.
MAR 6:53 Ba꞉bene duiduiya tetelo iba꞉te bobo hapuamo da꞉na꞉hiwaliya꞉ Genasalete hopoeno boge utihole baha꞉mo boge dito nutiya꞉.
MAR 6:54 Iba꞉te bogene hakamo da꞉nalehawaminuya꞉, puya꞉te ba꞉bolo da꞉pola꞉nuya꞉ ba꞉bi tawakaluba꞉te Ya꞉sukunu komo tiyonomo iya꞉tawahate,
MAR 6:55 iba꞉te ba꞉be hopoeno habahabamo na꞉pulila꞉huya꞉ komo tawakalubi ebeno pe komo konikiyalamema꞉. Ba꞉ hibila, Ya꞉suti kebe habalo da꞉lutanakui, tawakaluba꞉te ba꞉be komo dulinakui temetema꞉gopi tilago ba꞉bo magatalenakuya꞉.
MAR 6:56 Iyo, Ya꞉suti kebe hiya꞉hiya꞉ hegehege ba꞉gala koko habahaba ba꞉gala tumu genamamo da꞉tonakui, tawakaluba꞉te ibino temetema꞉gopi ba꞉bamo da꞉magatalenakui, iba꞉te ba꞉bi habahaboeno ilina kolowami habamo ba newadila꞉latele ebe ba꞉bo netoemehonakuya꞉ temetema꞉gopa꞉te ebeno kaliko kologihoma꞉. Ba꞉bema꞉ hibila, puya꞉te ebeno kaliko dologihonakui, ba꞉ba꞉te ba꞉bo hidohidohonakuya꞉.
MAR 7:1 Ba꞉bene Pa꞉lisi kapiyuimipi ba꞉gala Godokono Tutumu iya꞉tulamepi ipuwalo puya꞉te Yelusalema ko habalo oko dowatihonama꞉, komo iba꞉te Ya꞉sutamo kapimilo da꞉pelamiya꞉,
MAR 7:2 iba꞉te ebeno komo ta꞉matapi bepulamiya꞉, iba꞉te kokoto ukulaleheno baa꞉ da꞉nahutiya꞉. Ba꞉moe gabodo iba꞉te Pa꞉lisi kapiyuimipino eta tutumu tabamo kapapamiliya꞉ha꞉.
MAR 7:3 Numa꞉la꞉, hiliyonomo Yu tawakalubino iniwala꞉te ibi diya꞉tulamenakui, ibi hiliyonomate ba꞉be atu ukuilo ba emedena ba꞉bo ododilinaka, ba꞉gala Pa꞉lisi kapiyuimipa꞉te ba꞉bi iniwalino tutumu tabamo atumu hidonomamo kapapamila꞉halena, kebako deha꞉potonomo tutumu iba꞉te a꞉kadikamidala꞉la꞉. Ba꞉moe mabuma꞉ ibino kokoto hidamo ukulaleheno iba꞉te baa꞉ a꞉kanahamena꞉,
MAR 7:4 ba꞉gala naha ilina kolowami habalo duwatehomena꞉ iba꞉te ba꞉bi ilina ukulaleheno a꞉kapenahamena꞉. Ba꞉ hibila, iba꞉godolo beya niho kalili ba꞉gala hiya꞉hiya꞉ oho kalili ukulale tutumate ba꞉kapola꞉na, iyo, ba꞉ma ka꞉na ibino iniwala꞉te iba꞉tamo dikalameholiya꞉, komo ba꞉bakobako tutumu hiliyonomo iba꞉godolo ba꞉pola꞉na.
MAR 7:5 Ba꞉bema꞉ Pa꞉lisi kapiyuimipa꞉te Godokono Tutumu iya꞉tulamepa꞉go Ya꞉suku nalatediya꞉, “Bada mabuma꞉ ama꞉ ta꞉matapa꞉te aeno iniwala꞉te da꞉ga꞉lanakui ba꞉bi tutumamo kapapamila꞉hanaha꞉, huiyatiya ibi ha꞉kiya ibi kubahilamete kokoto ukulaleheno baa꞉ ba꞉bo nahanaka?”
MAR 7:6 Ya꞉suti iba꞉tamo na꞉goiya꞉, “La꞉ ma꞉lapila netewa tawakalubilata! Godokono ukui hawakalimidawa Aisayate la꞉eno komoma꞉ dopamo hibi tabo dolamagiya꞉, Godokono Bukalo ba꞉be tabote ba꞉ma ka꞉na itana, ‘Ba꞉moi tawakaluba꞉te na tabamo adikunamena, huiyatiya ibino tepo ipuwoeno ukui na tamelo kapola꞉naha꞉, muhulunomolo ba꞉nepola꞉na.
MAR 7:7 Iba꞉te naeno mahilo hunamo nadipatena, huiyatiya hibi komo puliyala, iyo, iba꞉te hopo habanapino tutumu Godokono hibi Tutumuma꞉ midiliti ba꞉bo iya꞉tulamenaka.’”
MAR 7:8 Ba꞉bene Ya꞉suti gala na꞉kagoiya꞉, “Aisayakono tabo hibinomola, mabu la꞉ Godokono hibi Tutumu Tabo a꞉miya꞉paliya꞉mata, huiyatiya tawakaluba꞉te da꞉ga꞉lana ba꞉bi tutumamo papamila꞉hanamata.
MAR 7:9 “La꞉ hibi mulu tawakalubilata! Iyo, la꞉ Godokono hibi Tutumu Tabo tama꞉mo ba miya꞉te, huiyatiya la꞉eno iniwala꞉te da꞉ga꞉lanakui la꞉ ba꞉bi komo kapiya bododilinakomata.
MAR 7:10 Numa꞉la꞉, Godokono Bukalo Mosesete na꞉goiya꞉, ‘La꞉eno menokobi nabi nowalubila꞉la꞉,’ ba꞉gala ebete na꞉kagoiya꞉, ‘Kebe lumagiti ebeno menoko o nabiwino komoma꞉ kuba tabo dolamagimini, la꞉le ebe nanakapumiya꞉la꞉.’
MAR 7:11 Huiyatiya la꞉ ba꞉moe Godokono tabo tama꞉mo miya꞉palo na꞉ga꞉lanamata, ‘Lumagigodolo da꞉pola꞉na menoko nabiwi owalubilima꞉, ebete iba꞉tamo ikalamema꞉ ubiha꞉ma꞉ deda꞉mene, kubahenola. Ebete dito kogoema꞉ne, ‘Ba꞉moi ilina talonala, nale Godotamo ikamehote ba꞉moi ilinamo naeno menoko nabiwi a꞉kowalubila꞉mo.’ ’
MAR 7:12 Ba꞉bema꞉ la꞉ ba꞉bako kuba ukui lumagi nonaminanakomata, ebete ebeno menoko nabiwi a꞉kowalubila꞉le.
MAR 7:13 Iyo, ba꞉moe gabodo la꞉eno iya꞉tulame komate Godokono hibi tabo tama꞉mo miya꞉tena, ba꞉bene la꞉le ba꞉be atu kuba ukui gabodo komo hiya꞉hiya꞉ kuba komo hiliyonomo na꞉kododilinamata.”
MAR 7:14 Ba꞉bene Ya꞉suti tawakalubi ebetamo gala kaka꞉lamiti iba꞉tamo na꞉goiya꞉, “La꞉ hiliyonomo naeno tabo uliti, ukui hidamo na꞉tuputupuilama꞉la꞉.
MAR 7:15 Lumagi tamelo ditana ba꞉be ilinate ebe ipuwamo opegate ebe a꞉kakubahima꞉mene, huiyatiya lumagino tepo ipuwane dikulimina꞉ ba꞉bi komate ebe kokubahimima꞉na꞉.
MAR 7:16 Galagodawa, ama꞉ hidamo nulia꞉!”
MAR 7:17 Ba꞉bene Ya꞉suti tawakalubi miya꞉palete genama guamo da꞉nodoluya꞉, ebe ta꞉matapa꞉te ebete bada tabo ka꞉goiya꞉ ba꞉be taboeno ipuwama꞉ ebe nalatediya꞉.
MAR 7:18 Ebete iba꞉tamo na꞉goiya꞉, “Komopa꞉te ukui hidamo katuputupuilamenaha꞉, la꞉ ba꞉ atumu. La꞉ iya꞉tawahala꞉ka꞉? Naha ilinate lumagino tepo ipuwamo opegate ebe a꞉kakubahima꞉mene,
MAR 7:19 mabu naha ilinate lumagino ukui mabamo katutaha꞉, huiyatiya wapamo tuta ba꞉bene nea꞉go kopenuluhukuma꞉ne.” Ba꞉bema꞉ hibila, Ya꞉suti ba꞉moe tabamo hiliyonomo naha ilinoeno talona hiliyonomo tama꞉mo miya꞉tenomo a꞉miya꞉tiya꞉.
MAR 7:20 Ba꞉bene ebete gala na꞉kagoiya꞉, “Numa꞉la꞉, lumagino tepo ipuwane dikulimina꞉ ba꞉bi komo kapiyate ebe kokubahimima꞉na꞉,
MAR 7:21 mabu lumagino tepo ipuwane hiya꞉hiya꞉ kuba ukui komate pikulinaka, ba꞉bene ba꞉bi kuba ukuia꞉godone ba꞉moi koko kubate kapikulinaka — bohele pilo komo ba꞉gala eta lumagino kamena pilo komo, ilina pilo komo ba꞉gala eta lumagino ilina ubi komo, mauba komo ba꞉gala lumagi anakapumi komo, ha꞉da amiho komo ba꞉gala eta lumagino mahilo kubahimi komo, apa꞉mo kuba ododili komo ba꞉gala hiya꞉hiya꞉ kuba oholelo ododili komo, awagaha komo ba꞉gala daedae ukui komo.
MAR 7:23 Iyo, ba꞉ hibila! Ba꞉moi kuba hiliyonomate lumagino tepo ipuwane pikuliti lumagi ba꞉bo kokubahimima꞉na꞉.”
MAR 7:24 Ba꞉bene Ya꞉suti ba꞉be hopo miya꞉pate Taya ko haboeno hopamo dito tuya꞉. Ba꞉ba tetelo ebe ubihinola ebete kebe genamamo da꞉nodoluya꞉ tawakaluba꞉te iya꞉tawaha, huiyatiya iba꞉te ba꞉be genama tiyo iya꞉tawahuya꞉.
MAR 7:25 Ba꞉bema꞉ ba꞉be hoponapi kamena eta, ebeno bohele deha꞉poto kuba gobogobagoenola, ebete Ya꞉sukunu komo uliti ebetamo pete ebeno nato mabamo ba pepapamiwata ebe ba꞉bo petoemehuya꞉, ebete ebeno bohelegodone kuba gobogobo koemema꞉. Huiyatiya ba꞉be kamena Yu lumagiha꞉,
MAR 7:27 ba꞉bema꞉ Ya꞉suti ebetamo na꞉goiya꞉, “Mabu keka꞉ nale ama꞉ owalubima꞉ da꞉goita? Tawakaluba꞉te dopamo ibino guguda꞉tamo baa꞉ nikalama꞉mena꞉. Wadiyaha꞉ iba꞉te gugudino baa꞉ komopa꞉tamo dito ikalame, mabu ba꞉be ododi komo ba꞉ gahagahatamo ikalame komo huiyala.”
MAR 7:28 Ebete huiyatiya Ya꞉sutamo na꞉goiya꞉, “Kodawa, ama꞉le da꞉gaa꞉ ba꞉ hibila, huiyatiya guguda꞉te hopamo diya꞉hekenaka, ba꞉bi baa꞉ hapuhapu gahagahate naha wadiyala!”
MAR 7:29 Ba꞉bene Ya꞉suti ebetamo na꞉goiya꞉, “Mabu ama꞉ ba꞉ba ka꞉na a꞉gaa꞉ta, ama꞉ kalakalago genamamo na꞉toa. Kuba gobogobote amia꞉no bohelegodone uluhuku.”
MAR 7:30 Ba꞉bene ba꞉be kamenate genamamo tote ebeno bohele ba꞉bo numiya꞉, kuba gobogobote ebegodone ya꞉lo uluhukuti, ebete tilolo watitiya꞉.
MAR 7:31 Ba꞉bene Ya꞉suti Taya hopo miya꞉pate Saidono ko habamo tote, ebete Ta꞉ni Habahaboeno hopodo kapetote Ga꞉lili Bobamo gala dito kanuluhukuya꞉.
MAR 7:32 Ba꞉ba tetelo tawakaluba꞉te galo duhumi ba꞉gala tabo olamagiha꞉ dubu Ya꞉sutamo magahete ebe na꞉petoemehuya꞉ ebete ebeno kokoto ba꞉be dubutamo kemowatimima꞉.
MAR 7:33 Ba꞉bene Ya꞉suti ba꞉be dubu tawakaluba꞉godone nanekela꞉mo hiya꞉ baha꞉mo magatate, ebeno kokoto dubuino galo ipuwamo ba꞉bo newadulateliya꞉, ba꞉bene ebete ebeno kokotamo kowe mehamidate dubuino ma꞉lapila ba꞉bo ologimiya꞉.
MAR 7:34 Ba꞉ba tetelo Ya꞉suti Hunu Habamo gahimilo, hawela ama꞉midate Yu tawakalubino tabamo na꞉goiya꞉, “Epa꞉ta!” ba꞉moe taboeno ipuwa ba꞉ma ka꞉na itana, “Na꞉tutukula꞉hala꞉!”
MAR 7:35 Ba꞉bema꞉ ba꞉be dubuino galote tutukula꞉hate ba꞉gala ebeno ma꞉lapilate da꞉hiduya꞉, ebete tabo hidamo ba꞉bo olamagiya꞉.
MAR 7:36 Tawakaluba꞉te ba꞉be komo dumiya꞉ iba꞉te hanohanoholo konomamo ga꞉luya꞉, “Ya꞉suti hiliyonomo komo hidonomamo ododilinako. Numa꞉la꞉, ebete galo duhulamepi na꞉hiduilamena iba꞉te tabo kulihoma꞉, ba꞉gala tabo ga꞉laha꞉pi atumu na꞉kahiduilamena iba꞉te tabo koga꞉lama꞉!” Ba꞉bene Ya꞉suti ibi konomamo kiyahalamiya꞉, “La꞉le komo tawakaluba꞉tamo ba꞉moe komo akahawakalima꞉la꞉!” Ba꞉ hibila, komo hiya꞉hiya꞉ tetelo Ya꞉suti tawakalubi ba꞉ma ka꞉na kiyahalamenakui, huiyatiya iba꞉te ebeno tabamo papamila꞉haheno ebeno ododili komo ba꞉ dito nehawakalilamenakuya꞉.
MAR 8:1 Ba꞉ba tetelo tawakalubi hiliyonomate Ya꞉sutamo pelamete gala na꞉kapekapiyuya꞉. Ba꞉bene ibino baa꞉te da꞉wiboholamiya꞉ Ya꞉suti ebe ta꞉matapi ebetamo ka꞉lamiti ibi na꞉goelamiya꞉,
MAR 8:2 “Na ba꞉moi tawakalubi na꞉malemalelatilitamo, mabu iba꞉te nago netewa-kapiya hegela demedenati ibino baa꞉ a꞉wiboholami.
MAR 8:3 Na ibi baa꞉heno ibino habahabamo doelamemo, diyala, gabo tetelo heloha꞉ma꞉ da꞉ neda꞉hamena꞉, mabu komo iba꞉te muhulunomone pelamiya꞉.”
MAR 8:4 Huiyatiya ebe ta꞉matapa꞉te ebetamo na꞉ga꞉luya꞉, “Moe baa꞉ha꞉ hopola. Ale ba꞉moi tawakalubi hiliyonomatamo baa꞉ ikalameholema꞉ modoboha꞉.”
MAR 8:5 Ba꞉bene Ya꞉suti ibi nalateda꞉liya꞉, “La꞉godolo kebaleta baa꞉te ka꞉pola꞉na?” Iba꞉te na꞉ga꞉luya꞉, “Sa꞉ba꞉ni.”
MAR 8:6 Ba꞉bene Ya꞉suti tawakalubi hakamo kahidima꞉ da꞉goelamiya꞉, ba꞉ba tetelo ebete ba꞉bi sa꞉ba꞉ni baa꞉ komokomo uwatete Godotamo kalakala tabo ba꞉bo goiya꞉, ba꞉bene ebete wakalamiholete ebe ta꞉matapa꞉tamo dito ikalamiya꞉ iba꞉te tawakaluba꞉tamo kikalameholema꞉.
MAR 8:7 Ba꞉gala iba꞉godolo daha hegehege kapiyakapiya na꞉kapola꞉nuya꞉, ba꞉bene Ya꞉suti ba꞉bi dahama꞉ Godotamo kalakala tabo kagoete, ebe ta꞉matapi na꞉goelamiya꞉ iba꞉te tawakaluba꞉tamo kakikalameholema꞉.
MAR 8:8 Ba꞉ba tetelo puya꞉te ba꞉be baa꞉ da꞉nahuya꞉ ibino kape komo ba꞉ dito wiboholamiya꞉. Ba꞉ hibila, ba꞉be baa꞉ 4,000 tawakaluba꞉te nahuya꞉, ba꞉bene da꞉luhiliya꞉ ba꞉bi baa꞉ komokomamo Ya꞉suku ta꞉matapa꞉te sa꞉ba꞉ni bagolo betabuilamiya꞉. Ba꞉bene Ya꞉suti ba꞉bi tawakalubi ibino habahabamo doelamiya꞉,
MAR 8:10 ba꞉ba tetenomolo ebete ebe ta꞉matapa꞉go boga꞉mo ololote Da꞉lamanuta hopamo ba꞉ dito tolamiya꞉.
MAR 8:11 Ba꞉bene komo Pa꞉lisi kapiyuimipa꞉te Ya꞉sutamo pelamete ebe na꞉polowabeletiya꞉. Ibi ubila ebe kuba gabamo kemogabuimima꞉, ba꞉bema꞉ iba꞉te ebe na꞉ga꞉lamiya꞉, “Ama꞉godolo Godokono helo ditana, ba꞉be komo hawakalimima꞉ eta hanohano komo atamo nododa꞉.”
MAR 8:12 Ba꞉bene Ya꞉suti ebeno tepo ipuwalo hawela konomamo ama꞉midalo na꞉goiya꞉, “Mabu keka꞉ ba꞉ma tete tawakaluba꞉te hanohano komo dohowadina? Na la꞉tamo hibi tabo begoemo, Godote ebeno helo hawakalimima꞉ ba꞉ma tete tawakaluba꞉tamo hanohano komo a꞉kikalama꞉mene!”
MAR 8:13 Ba꞉bene ebete ibi ubiha꞉ma꞉ eda꞉lo boga꞉mo ololote bobo hapuamo gala na꞉kana꞉hiwuya꞉.
MAR 8:14 Ga꞉lili Bobo a꞉hiwale tupuimihino Ya꞉suku ta꞉matapa꞉te baa꞉ uwate komo nadoduya꞉, ba꞉bema꞉ iba꞉godolo kapiya baa꞉nomote itanuya꞉ boge gulu.
MAR 8:15 Ba꞉bene Ya꞉suti ibi koamo kiyahalamiya꞉, “La꞉ hidamo nulia꞉la꞉! Palawa baa꞉te ha꞉kiya hunamo da꞉mahiga, Pa꞉lisi kapiyuimipi ba꞉gala Helodiko ibino awagaha komo ba꞉ba ka꞉nala. A꞉iye, ba꞉mako awagaha komote la꞉tamo akuluhukala꞉!”
MAR 8:16 Ba꞉bema꞉ iba꞉te ibi ipuwalo tabo ba꞉ma ka꞉na ga꞉luya꞉, “Ebete atamo ba꞉moe tabo begoe mabu a baa꞉henola.”
MAR 8:17 Huiyatiya iba꞉te tabo da꞉ga꞉lutiya꞉ Ya꞉suti iya꞉tawate iba꞉tamo na꞉goiya꞉, “La꞉le baa꞉heno pola꞉na tabo badama꞉ ka꞉ga꞉lutama? La꞉le naeno hibi komo hidamo kuminaha꞉ ba꞉gala kiya꞉tawahanaha꞉. Mabu keka꞉ la꞉le la꞉eno tepo ipuwa badama꞉ da꞉kodakoduilamenama?
MAR 8:18 La꞉ baida꞉gopila huiyatiya la꞉ a꞉kuma꞉lemata, iyo, la꞉ galagopila huiyatiya la꞉ a꞉kulia꞉lemata. Nale eta gapogapolo paibo baa꞉ 5,000 dubatamo da꞉wakalamiholenimo, ba꞉moe komoma꞉ la꞉godolo ukui ba꞉kitana? Ba꞉ba tetelo la꞉ baa꞉ komokomamo kebaleta bagolo ka꞉tabuilameonima?” Iba꞉te ebetamo na꞉huiyuya꞉, “12 bagolola.”
MAR 8:20 “Ba꞉gala eta hegelalo nale sa꞉ba꞉ni baa꞉ 4,000 tawakaluba꞉tamo da꞉kawakalamiholimo, ba꞉ba tetelo la꞉ baa꞉ komokomamo kebaleta bagolo ka꞉tabuilamiuima?” Iba꞉te ebetamo na꞉huiyuya꞉, “Sa꞉ba꞉nila.”
MAR 8:21 Ba꞉bema꞉ Ya꞉suti iba꞉tamo gala na꞉kagoiya꞉, “Mabu keka꞉ la꞉le naeno komo hibilo kiya꞉tawahanaha꞉?”
MAR 8:22 Ba꞉bene iba꞉te Betasaida habamo da꞉nikuliya꞉, komo tawakaluba꞉te baidi tamiho dubu Ya꞉sutamo magahete, ebe ba꞉bo petoemehuya꞉ ebete ebe kologima꞉.
MAR 8:23 Ba꞉bene Ya꞉suti baidi tamiho dubu kokotamo lawete habane nanekela꞉mo magatate, ebete ebeno baida꞉mo kowe miya꞉temete ebeno kokoto emowatilamelo ebe nalatediya꞉, “Ama꞉ ilina na꞉kulamiuta?”
MAR 8:24 Ba꞉be dubuti gahimiti na꞉goiya꞉, “Na tawakalubi da꞉wapata꞉lamita nulamitamo, huiyatiya ibi kehamo la꞉mota꞉hana.”
MAR 8:25 Ba꞉bene Ya꞉suti ebeno kokoto ba꞉be dubuino baida꞉mo gala da꞉kemowatilamiya꞉, ebete ibulu a꞉la꞉minalete ebeno baiditi ba꞉bo hidohidohomiya꞉, iyo, ba꞉ba tetelo ebete ilina hiliyonomo hidamo ba꞉bo ulameholiya꞉.
MAR 8:26 Ba꞉bene Ya꞉suti ebe na꞉goemiya꞉, “Amia꞉no genamamo tonomo na꞉toa, ba꞉moe habamo gala akapa꞉la꞉.”
MAR 8:27 Ba꞉bene Ya꞉suti ebe ta꞉matapa꞉go Sisaliya-Pilipai hopoeno habahabamo ba tuta, gabo tetelo ebete ebeno ta꞉matapi na꞉nalateda꞉liya꞉, “Tawakaluba꞉te na pokomo ka꞉ga꞉lanaka?”
MAR 8:28 Iba꞉te na꞉ga꞉luya꞉, “Komopa꞉te ama꞉ Yoneko beyamo wadulateledawama꞉ ga꞉lanaka, komopa꞉te ama꞉ Elayako Godokono ukui hawakalimidawama꞉ ga꞉lanaka, ba꞉gala komopa꞉te ama꞉ Godokono ukui hawakalimidawa etama꞉ ga꞉lanaka.”
MAR 8:29 Ba꞉bene Ya꞉suti ibi nalateda꞉liya꞉, “Huiyatiya la꞉le na pokomo ka꞉midinionama?” Pitate ebetamo na꞉huiyuya꞉, “Ama꞉ ba꞉ Kelisotela, Godokono Oemedawalata!”
MAR 8:30 Ba꞉bene Ya꞉suti ebe ta꞉matapi na꞉kiyahalamiya꞉, “La꞉le naeno komoma꞉ komopi akakiyalama꞉la꞉.”
MAR 8:31 Ba꞉bene Ya꞉suti ebe ta꞉matapi ba iya꞉tulame na꞉goiya꞉, “Tawakalubino Naniwi tawakaluba꞉godone koko temeteme galane kuwatema꞉ne, Godokono ubila. Iyo, Godotamo hawa꞉goeno ikamehopino watowatopi, ba꞉gala Godokono Tutumu iya꞉tulamepi, ba꞉gala komo koko dubu iba꞉te ebe ubiha꞉ma꞉ keda꞉hama꞉na꞉, ba꞉bene tawakaluba꞉te ebe kanakapumima꞉na꞉ huiyatiya netewa-kapiya hegelalo ebete hoene gala kakamahigama꞉ne.”
MAR 8:32 Ebete ba꞉moe tabo iba꞉tamo da꞉goiya꞉, Pitate Ya꞉suku komo ta꞉matapa꞉godone nanekela꞉mo magatate ba꞉be tabo komoma꞉ ebe ba꞉bo nikiyahamiya꞉.
MAR 8:33 Ba꞉bene Ya꞉suti ohobigate, komo ta꞉matapi ulamete Pitako kiyahamelo na꞉goiya꞉, “Pita, ama꞉ Saitanako huiyala! Na na꞉miya꞉pana꞉ mabu amia꞉no ukui Godotamo kihatitaha꞉, ama꞉ tawakalubino ukuilo emedenata!”
MAR 8:34 Ba꞉bema꞉ Ya꞉suti tawakalubi hiliyonomo ebe ta꞉matapa꞉go ebetamo ka꞉lamiti ibi na꞉goelamiya꞉, “Kebe lumagiti na ta꞉mahenema꞉ ubi dihatemene, dopamo ebete ebeno komo adodolete ebeno keha pihiga aguti na ba꞉bo na꞉ta꞉mahena꞉mene.
MAR 8:35 Ba꞉ hibila, kebe lumagiti ebeno ka꞉ka꞉ natamo damawada꞉mene ebeno ka꞉ka꞉te kalatidima꞉ne, huiyatiya kebe lumagiti Godokono Hido Tabo olamagima꞉ ebeno ka꞉ka꞉ na mabuma꞉ datutimini, ebete hibi ka꞉ka꞉ kolawema꞉ne.
MAR 8:36 Ba꞉bema꞉ lumagiti hopoeno ilina hiliyonomo uwatenomo ba uwate, ebeno ka꞉ka꞉ datutimini ba꞉be lumagino huiya keka꞉?
MAR 8:37 Ebete ebeno ka꞉ka꞉ gala kakalawema꞉ bada ilina na꞉kikamemene? Gabo puliyala, kitanaha꞉.
MAR 8:38 Numa꞉la꞉, ba꞉ma tete tawakaluba꞉te kubakubanomoma꞉ eda꞉hate, iba꞉godolo Godoko hibima꞉ midi komo puliyala. Ba꞉bema꞉ kebe lumagiti natamo ba꞉gala naeno tabamo da꞉hilopomene, na Tawakalubino Naniwiti ba꞉ atumu ebetamo kohilopoma꞉nemo, iyo, nale naeno Nabiwino helonomo alago ba꞉gala ebeno hido-talona nopopa꞉go da꞉pemo, ba꞉ba tetelo ebe kopehilopuimima꞉nemo.”
MAR 9:1 Ba꞉bene Ya꞉suti iba꞉tamo gala na꞉kagoiya꞉, “Na la꞉tamo hibi tabo begoemo, ba꞉ma tetelo demedehona komo iba꞉te Godokono Ko Gawadubuino tetete heloago da꞉pemene, ba꞉be ko komo dopamo umiti galane ba꞉bo koha꞉lahama꞉na꞉.”
MAR 9:2 Ba꞉bene sikisi hegela da꞉wibuya꞉ Ya꞉suti Pitako, Ya꞉imesiko, ba꞉gala Yoneko eta hununomo hakamo magataliya꞉, iba꞉te ha꞉kiya ba꞉bolo konepola꞉nama꞉. Ba꞉ba tetelo ibino dopo hapulu Ya꞉sukunu apete hiya꞉ma꞉ ba edita,
MAR 9:3 ebeno pupulino ilinate a꞉la꞉minahamete hibilo keyakeyanomoma꞉ eda꞉hamitiya꞉, ba꞉moe hopo konomolo eta lumagiti kaliko ba꞉ma ka꞉na ukulalelo keyakeyanomoma꞉ midili wadiyaha꞉.
MAR 9:4 Ba꞉bene ta꞉matapino holoholo hapuamo Moseseko ba꞉gala Elayako iba꞉te puluhukuti Ya꞉sukuba꞉ tabo ba꞉bo ga꞉lutiya꞉.
MAR 9:5 Ba꞉ba tetelo Pitate Ya꞉sutamo na꞉goiya꞉, “Iya꞉tulamedawa, ale ba꞉malo da꞉pola꞉nama꞉, kalakala konomola. Wadiyala a mimiya netewa-kapiya ketemotema꞉nema꞉, eta amia꞉nola, eta Mosesekonola, eta Elayakonola.”
MAR 9:6 Ba꞉ hibila, ta꞉matapa꞉te konomamo toletolehutiya꞉, ba꞉bema꞉ Pitate ukui hidamo emalagidoloheno ba꞉be tabo ba꞉ dito goiya꞉.
MAR 9:7 Ba꞉bene hawaiti pete ibi da꞉patulateliya꞉, tabote hawai ipuwane ba꞉ma ka꞉na piya꞉, “Ba꞉moe naeno kapiya Gudunomola, na ebetamo na꞉kalakalutamo. La꞉ ebeno tabo nulia꞉la꞉!”
MAR 9:8 Huiyatiya ba꞉ba tetelo iba꞉te hopo tiyonomo umihote Moseseko Elayako ibi gala kulamiya꞉ha꞉, Ya꞉suku kapiyate iba꞉go ba꞉bolo la꞉nuya꞉.
MAR 9:9 Ba꞉bene iba꞉te haka hununi ba pepalaga Ya꞉suti ibi na꞉pegoelamiya꞉, “La꞉le kebe komo kumioma, ba꞉be komo ba꞉ma tetelo komopi akakiyalama꞉la꞉, huiyatiya na Tawakalubino Naniwiti hoene gala da꞉kamahigamo, la꞉ tawakalubi ba꞉bo kokiyalamema꞉nemata.”
MAR 9:10 Ba꞉bema꞉ iba꞉te ba꞉be komo tepo ipuwamo ihatiya꞉, huiyatiya hoene mahiga komoeno ipuwa ibi ipuwalo ga꞉lutiya꞉.
MAR 9:11 Ba꞉bene iba꞉te Ya꞉suku nalatediya꞉, “Bada mabuma꞉ Godokono Tutumu iya꞉tulamepa꞉te da꞉ga꞉lanaka, Elayate dopamo pete, ebeno gala hapuni Kelisote kopema꞉ne?”
MAR 9:12 Ya꞉suti iba꞉tamo na꞉goiya꞉, “Hibila, Elayako dopamo pete hiliyonomo komokomo kopetuputupuilamema꞉ne. Huiyatiya Godokono Bukalo eta tabo ba꞉ma ka꞉na ba꞉ka-itana, Tawakalubino Naniwi temeteme hiliyonomo kuwatema꞉ne ba꞉gala tawakaluba꞉te ebe ubiha꞉ma꞉ keda꞉hama꞉na꞉. Ba꞉moe taboeno ipuwama꞉ la꞉eno ukui keba ka꞉na ka꞉pola꞉na?
MAR 9:13 Na la꞉tamo na꞉goemo, Elayako tawakaluba꞉tamo ya꞉lo a꞉pi huiyatiya iba꞉te ibino ubilo koko kuba ebetamo ododilinakuya꞉, Godote ebeno Bukalo dopamo da꞉goiya꞉ ba꞉ba ka꞉na.”
MAR 9:14 Ba꞉bene iba꞉te komo ta꞉matapa꞉tamo pikuliti, tawakalubi hiliyonomate iba꞉go ba pola꞉na ba꞉bo pulamiya꞉. Ba꞉ba tetelo Godokono Tutumu iya꞉tulamepa꞉te Ya꞉suku ta꞉matapa꞉go ba olowabeletehuita,
MAR 9:15 huiyatiya tawakaluba꞉te Ya꞉suku dumiya꞉ iba꞉te konomamo la꞉wa꞉halo ebetamo pulila꞉hate nolata tabo ba꞉bo nega꞉luya꞉.
MAR 9:16 Ba꞉bene Ya꞉suti ebe ta꞉matapi nalateda꞉liya꞉, “Mabu keka꞉ la꞉ ba꞉moi dubago dolowabeletehuitama?”
MAR 9:17 Ba꞉ba tetelo tawakalubi hiliyonomo ipuwalo eta lumagiti Ya꞉sukunu tabo ba huiya na꞉goiya꞉, “Iya꞉tulamedawa, na naeno gudu ama꞉tamo a꞉magaha꞉kamo mabu ebe kuba gobogobote lawenako, ba꞉bema꞉ ebe tabo olamagi modoboha꞉.
MAR 9:18 Keba tetelo kuba gobogobote ebe gala da꞉kalawemene hopamo kopena꞉da꞉nama꞉ne, ba꞉bene ebete lalo ba ikilame paguti ebeno tabo ipuwane pikulimiti, ebeno apete kodakodanomoma꞉ ba꞉bo keda꞉ma꞉ne. Nale ama꞉ ta꞉matapi a꞉goelama꞉kamo iba꞉te kuba gobogobo koemema꞉, huiyatiya iba꞉godolo helo puliyala.”
MAR 9:19 Ba꞉bema꞉ Ya꞉suti iba꞉tamo na꞉goiya꞉, “A꞉iye, la꞉ hibima꞉ midiha꞉ tawakalubilata! La꞉le natamo menemene bikanamenamata, ba꞉bema꞉ na ubihinola tete ga꞉ga꞉lo la꞉go emedena! La꞉ kuhi natamo na꞉magaha꞉la꞉!”
MAR 9:20 Ba꞉bene iba꞉te ba꞉be kuhi Ya꞉sutamo da꞉magatuya꞉, kuba gobogobote Ya꞉suku umiti kuhi kubanomamo ba꞉bo lawiya꞉. Kuhiti hakamo gate ewageleholo ba miwa꞉digahuta ebeno tabone paguti pikulimitiya꞉.
MAR 9:21 Ba꞉ba tetelo Ya꞉suti kuhino nabiwi nalatediya꞉, “Ebe ba꞉moe komo kebako tetelo ka꞉tupuimi?” Ebete na꞉huiyuya꞉, “Gudu deha꞉poto tetelo tupuimi.
MAR 9:22 Hiliyonomo tetelo kuba gobogobote ebe koa꞉mo ba꞉da꞉na, ba꞉gala beyamo ba꞉da꞉na, ba꞉ba ka꞉na amitina ebe kanakapumima꞉. Ba꞉bema꞉ amia꞉no helo modobola꞉ka꞉ a kowalubima꞉? Helote modobolo ditama꞉na, a malemalea꞉telo ebe nowaluba꞉.”
MAR 9:23 Ya꞉suti ebetamo na꞉goiya꞉, “Mabu keka꞉ ama꞉le naeno helo komoma꞉ da꞉kiyanama꞉? Ba꞉moe komo naeno komoha꞉, ba꞉ amia꞉no komola! Wadiyala ama꞉ Godoko hibima꞉ na꞉mida꞉, ba꞉bene ama꞉godolo helo bitanamene hiliyonomo komokomo ododilima꞉.”
MAR 9:24 Ba꞉ba tetenomolo kuhino nabiwiti konomamo na꞉goiya꞉, “Na hibima꞉ na꞉miditamo huiyatiya naeno hibima꞉ midi komo deha꞉potola. Na꞉koiminama꞉!”
MAR 9:25 Ba꞉bene komo tawakalubi hiliyonomate ba pelamenape, Ya꞉suti ibi ulamete kuba gobogobo kiyahamelo na꞉goiya꞉, “Taboha꞉dawa ba꞉gala galo duhumi gobogobo, nale ama꞉ bikiyahamemata, ebegodone uluhukuti na꞉toa! Gala ebetamo akapopegala꞉!”
MAR 9:26 Ba꞉ba tetelo kuba gobogobote ibulu goewatalo kuhi hakamo a꞉da꞉nate, ba꞉bene kuhiti kubanomamo ewageleholo kuba gobogobote ebegodone duluhukuya꞉, ebete hoemo ba꞉bo kapitanuya꞉. Ba꞉be mabuma꞉ komopa꞉te na꞉ga꞉luya꞉, “Ebe a꞉hoe,”
MAR 9:27 huiyatiya Ya꞉suti ebe kokotamo lawete dadipatiya꞉ ebe ba꞉bo mahiguya꞉.
MAR 9:28 Ba꞉bene Ya꞉suti genama guamo da꞉na꞉pa꞉guya꞉, komo tawakaluba꞉te pola꞉naha꞉ tetelo ebe ta꞉matapa꞉te ebe nalatediya꞉, “Mabu keka꞉ ale kuba gobogobo oemema꞉ kamodobakaha꞉?”
MAR 9:29 Ebete ibino tabo ba huiya na꞉goiya꞉, “Pote ebeno emede ipuwalo Godokoba꞉ tabo da꞉ga꞉lanaka, ebe kapiyate ba꞉mako kuba gobogobo koemema꞉ne.”
MAR 9:30 Ba꞉bene iba꞉te ba꞉be haba miya꞉pate Ga꞉lili hopodo ba petolame, Ya꞉suku ubihinola ebete kebolo ka꞉lutiya꞉ tawakaluba꞉te iya꞉tawaha,
MAR 9:31 mabu ebete ebe ta꞉matapi komo hiya꞉hiya꞉ komokomo biya꞉tulamitiya꞉. Ebete ibi iya꞉tulamelo na꞉goiya꞉, “Godote Tawakalubino Naniwi kuba tawakalubino kokotamo kihatema꞉ne, ba꞉bene iba꞉te ebe kanakapumima꞉na꞉, huiyatiya ebete netewa-kapiya hegelalo hoene gala kakamahigama꞉ne.”
MAR 9:32 Huiyatiya Ya꞉suti da꞉goiya꞉ ebe ta꞉matapa꞉te ba꞉be taboeno ipuwa hidamo kemalagidolutiya꞉ha꞉, ba꞉bema꞉ iba꞉te ba꞉moe komoma꞉ Ya꞉suku alateda꞉ma꞉ na꞉toletolehutiya꞉.
MAR 9:33 Ba꞉bene iba꞉te Kapeniyama habamo da꞉pelamiya꞉, Ya꞉suti genama guamo nodolote ebe ta꞉matapi ba꞉bo nalateda꞉liya꞉, “Gabo tetelo la꞉ bada mabuma꞉ ka꞉ga꞉lutakama?”
MAR 9:34 Iba꞉te tabo kahuiyuya꞉ha꞉ mabu iba꞉te ibi ipuwalo pote koma꞉ eda꞉ma꞉ a꞉polowabeletehuiya꞉.
MAR 9:35 Ba꞉be mabuma꞉ Ya꞉suti emedete ebeno 12 ta꞉matapi ebetamo ka꞉lamiti iba꞉tamo na꞉goiya꞉, “Kebe lumagiti koma꞉ eda꞉ma꞉ ubi dihatemene, ebete ebe ha꞉kiya galanomoma꞉ miditi komopino huiyaha꞉ okodawama꞉ neda꞉mene.”
MAR 9:36 Ba꞉bene Ya꞉suti gudu deha꞉poto lawete ibi tetenomamo adipiti, ebe kokotamo ba a꞉ga꞉da꞉mida iba꞉tamo na꞉goiya꞉,
MAR 9:37 “Kebe lumagiti naeno mahilamo ba꞉mako gudu deha꞉poto kalakalago dowalubina ebete na bowalubinina, ba꞉gala kebe lumagiti na dowalubinina ebete na kapiya kowalubininaha꞉, ebete na Oenamedawa Godoko atumu na꞉kowalubina.”
MAR 9:38 Ba꞉bene Yonete Ya꞉sutamo na꞉goiya꞉, “Iya꞉tulamedawa, ale eta dubu umima꞉ ebete amia꞉no mahilamo kuba gobogobo doelamiti, huiyatiya ale ebe a꞉kiyahamima꞉ ba꞉be komo kekelamema꞉ mabu ebe aeno kapiyuimi lumagiha꞉.”
MAR 9:39 Huiyatiya Ya꞉suti iba꞉tamo na꞉goiya꞉, “La꞉le ebe akaduhima꞉la꞉. Kebe lumagiti naeno mahilamo hanohano komo dododimini, ba꞉be lumagiti tote naeno komoma꞉ kuba tabo a꞉kanolamaga꞉mene,
MAR 9:40 mabu hibila, kebe lumagiti ago alaholohoha꞉dawama꞉ deda꞉na, ebete ba꞉ a bowalubina.
MAR 9:41 Nale la꞉tamo hibi tabo begoemo, la꞉le na Kelisokono tawakalubima꞉ deda꞉hanama, ba꞉be mabuma꞉ etate beya la꞉tamo dikalamemena꞉, ebete Godogodone da꞉lawemene ba꞉be hido huiyate a꞉kalatida꞉mene.”
MAR 9:42 Ba꞉bene Ya꞉suti gala na꞉kagoiya꞉, “Deha꞉poto guduti na hibima꞉ ba midinina, kebe lumagiti ebe kuba gabamo demogabuimina, wadiyala tawakaluba꞉te ebe lawete ebeno kokoba꞉mo konomo nakola ma꞉homete kehaha꞉ kolomamo na꞉da꞉namena꞉, ebete atu kuba komo eta gudutamo ododikapoma꞉.
MAR 9:43 Ba꞉gala amia꞉no kokotote ama꞉ kuba gabamo demogabuimina, nitamida! Wadiyala ama꞉le kapiya kokotago Godokono Ka꞉ka꞉ Habamo na꞉pa꞉ga, kubala kokoto netewago Koe Habamo to. Ba꞉ hibila, ba꞉be habalo koete itana tetelo na꞉woena,
MAR 9:44 ba꞉bolo tawakalubino ha꞉laha ape da꞉nalenaka ba꞉bi la꞉ga꞉te a꞉kaha꞉lahala꞉, ba꞉gala koete a꞉kaha꞉gale.
MAR 9:45 Ba꞉gala amia꞉no natote ama꞉ kuba gabamo demogabuimina, nitamida! Wadiyala ama꞉le kapiya natago Godokono Ka꞉ka꞉ Habamo na꞉pa꞉ga, kubala nato netewago Godote ama꞉ Koe Habamo na꞉da꞉na.
MAR 9:46 Ba꞉bolo tawakalubino ha꞉laha ape da꞉nalenaka ba꞉bi la꞉ga꞉te a꞉kaha꞉lahala꞉, ba꞉gala koete a꞉kaha꞉gale.
MAR 9:47 Ba꞉gala amia꞉no baiditi ama꞉ kuba gabamo demogabuimina, na꞉magubuta꞉! Wadiyala ama꞉le kapiya baida꞉go Godote Ko Gawadubuma꞉ deda꞉na ba꞉be habamo na꞉pa꞉ga, kubala baidi netewago Godote ama꞉ Koe Habamo na꞉da꞉na.
MAR 9:48 Ba꞉bolo tawakalubino ha꞉laha ape da꞉nalenaka ba꞉bi la꞉ga꞉te ba꞉pola꞉na, a꞉kaha꞉lahala꞉, ba꞉gala koete a꞉kaha꞉gale.”
MAR 9:49 Ba꞉bene Ya꞉suti eta tabo ba꞉ma ka꞉na kagoiya꞉, “Tawakaluba꞉te solo baa꞉mo keba ka꞉na ka꞉miya꞉tenaka, Godote tawakalubi hiliyonomoeno emede komamo ebeno koe ba꞉ba ka꞉na kopemiya꞉telamema꞉ne.
MAR 9:50 “Solo hidonomola, huiyatiya eta lumagino solo golate dalatidimini, ama꞉le gala soloma꞉ a꞉kamida꞉mena꞉ta. Ba꞉bema꞉ Godokono solote la꞉eno kapiyuimi ipuwalo nitanamene, iyo, wadiyala etate eta malemaletelo ba꞉ba ka꞉na nemedeniya꞉la꞉.”
MAR 10:1 Ba꞉bene Ya꞉suti Ga꞉lili hopo miya꞉pate Yudiya hopodo petote Yodane Tuli hapuamo dito nuluhukuya꞉. Ba꞉ba tetelo tawakalubi hiliyonomate ebetamo gala da꞉kapelamiya꞉, ba꞉bene ebete ibi gala na꞉ka-iya꞉tulamiya꞉ mabu ebeno ododi komo ba꞉ ba꞉ma ka꞉nala.
MAR 10:2 Ba꞉bene komo Pa꞉lisi kapiyuimipa꞉te pelamete, Ya꞉suku kuba gabamo kopemogabuimima꞉ ebe na꞉palatediya꞉, “Dubuti ebeno kamena dibukimini, Godokono Tutumu Tabo ba꞉kadikamidalemene?”
MAR 10:3 Ya꞉suti huiyatiya iba꞉tamo na꞉goiya꞉, “Mosesete la꞉ bada tutumu tabo ka꞉goelamitiya꞉la?”
MAR 10:4 Iba꞉te na꞉ga꞉luya꞉, “Dubuti ebeno kamena ibukima꞉ Mosesete gabo atamo ba꞉ma ka꞉na hiduimiya꞉, dubuti ebeno ubi dihatemene, ebete kamena ibuki pepa ododiti ebetamo dito kikamema꞉ne.”
MAR 10:5 Ba꞉bene Ya꞉suti iba꞉tamo na꞉goiya꞉, “Mabu la꞉eno tepo ipuwa kodakoda hibinomola, Mosesete kamena ibuki tabo Godokono Bukamo ba꞉bema꞉ ihatiya꞉.
MAR 10:6 Huiyatiya numa꞉la꞉, dopamo Godote ba꞉moe hopo dododiya꞉, ba꞉ba tetelo ebete dubu kamena bododiliya꞉.
MAR 10:7 Ba꞉moe mabuma꞉ dubuti ebeno nabiwi ba꞉gala menoko miya꞉palete ebeno kamenago kapiya bahilo kemedema꞉na꞉,
MAR 10:8 ba꞉bene ibi netewapa꞉te kapiyama꞉ eda꞉te gala hiya꞉ma꞉ a꞉keda꞉mena꞉. Iyo, ibi ba꞉ kapiyanomola.
MAR 10:9 Numa꞉la꞉, Godote ibi netewapi kapiyama꞉ a꞉midiliya꞉, ba꞉bema꞉ lumagiti ibi hiya꞉ma꞉ midili modoboha꞉.”
MAR 10:10 Galane genama gulu Ya꞉suku ta꞉matapa꞉te ba꞉be taboeno ipuwama꞉ ebe da꞉nalatediya꞉,
MAR 10:11 ebete iba꞉tamo ba꞉ma ka꞉na goiya꞉, “Kebe lumagiti ebeno kamena ibukiti eta kamena da꞉lawemene, ebete Godokono holoholo hapulu ba꞉be kamena pilolo kolawema꞉ne,
MAR 10:12 ba꞉gala kebe kamenate ebeno dubu ibukiti eta dubu da꞉lawemene, ebete ba꞉be dubu atumu pilolo kolawema꞉ne.”
MAR 10:13 Ba꞉bene komo tawakaluba꞉te ibino gugudi Ya꞉sutamo na꞉magataliya꞉, ebete iba꞉tamo kokoto ba emowatilame Godoko kogoemema꞉ ebete ibi hidamo kowalubilinama꞉. Huiyatiya ebe ta꞉matapa꞉te ba꞉bi tawakalubi ba kiyahalame ibi da꞉duhilamiya꞉,
MAR 10:14 Ya꞉suti ibino ododi komo umiti iba꞉tamo maubalo na꞉goiya꞉, “Gugudi natamo pelame wadiyala. Akaduhilama꞉la꞉, mabu ba꞉mako tawakaluba꞉te Godote Ko Gawadubuma꞉ deda꞉na ba꞉be habamo kona꞉pa꞉la꞉hama꞉na꞉.
MAR 10:15 Na la꞉tamo hibi tabo begoemo, kebe lumagiti gudu deha꞉poto huiyamo aeno Ko Gawadubu Godoko laweheno, ba꞉be lumagiti ebeno Kalakala Habamo a꞉kana꞉pa꞉gamene.”
MAR 10:16 Ba꞉bene Ya꞉suti guguda꞉tamo kokoto ba emowatilame Godoko ba꞉bo goemiya꞉, ebete ibi hidamo kowalubilinama꞉.
MAR 10:17 Ba꞉bene Ya꞉suti mahigate gabodo ba tuta, eta dubuti ebetamo nipuligate pupamo nemedete ebe na꞉goemiya꞉, “Hido Iya꞉tulamedawa, na bada komo ododiti wiboha꞉ ka꞉ka꞉ ebo na꞉ka꞉lawemo?”
MAR 10:18 Ya꞉suti ebetamo na꞉goiya꞉, “Ama꞉le na hidodawama꞉ badama꞉ ka꞉ka꞉nama꞉wa? Eta hidodawa puliyala, Godoko kapiyate hidodawanomola.
MAR 10:19 Ama꞉ Godokono Tutumu Tabo iya꞉tawala. Lumagi akanakapuma꞉la꞉, eta lumagino kamena pilolo akalawa꞉la꞉, ilina pilolo akuwata꞉la꞉, eta lumagino komoma꞉ ha꞉da tabo akolamaga꞉la꞉, lumagino ilina ha꞉da gabodo akuwata꞉la꞉, ba꞉gala amia꞉no nabiwi menoko ibino tabamo na꞉papamiwatanakuya꞉.”
MAR 10:20 Huiyatiya ebete Ya꞉sutamo na꞉goiya꞉, “Iya꞉tulamedawa, na deha꞉poto tetene tupuimiti ba꞉moi hiliyonomo tutumu kodakodalo uwatete eta kapiya kadikanaliya꞉ha꞉.”
MAR 10:21 Ba꞉bene Ya꞉suti ebe uminate malemaletelo ebe na꞉goemiya꞉, “Kapiya komote ama꞉godolo kamodobonaha꞉. Wadiyala ama꞉ tote, komopa꞉te amia꞉no ilina hiliyonomo mana꞉mo uwatehomete, ama꞉le ba꞉bi mani awaepa꞉tamo dito na꞉nikalamehola꞉. Ba꞉ba tetelo ama꞉ gala kapete na na꞉ta꞉maheniya꞉, ba꞉bene amia꞉no ilina hiliyonomate Godokono Hunu Habalo konepola꞉nama꞉na꞉.”
MAR 10:22 Ebete ba꞉be taboma꞉ dopo menemenenomoma꞉ eda꞉te tepo menemena꞉go dito tuya꞉, mabu ebe ilina dogodogodawanomola.
MAR 10:23 Ba꞉bema꞉ Ya꞉suti ebe ta꞉matapi ulameholelo na꞉goelamiya꞉, “Godote Ko Gawadubuma꞉ deda꞉na, ilina hiliyonomagopa꞉te ba꞉be habamo na꞉pa꞉la꞉hama꞉ kodakodanomola!”
MAR 10:24 Ba꞉ba tetelo ebe ta꞉matapa꞉te ebeno taboma꞉ na꞉hanohanohutiya꞉, ba꞉bene Ya꞉suti iba꞉tamo gala na꞉kagoiya꞉, “Naeno ekaka꞉la꞉, Godote Ko Gawadubuma꞉ deda꞉na, tawakaluba꞉te ba꞉be habamo na꞉pa꞉la꞉hama꞉ kodakodanomola!
MAR 10:25 Numa꞉la꞉, ka꞉molo-goete kaliko akohomehoeno ola gugudu nilupiga kodakodama꞉ eda꞉na, gabohenola. Ba꞉ atumu ilina hiliyonomagodawate Godokono Ko Gawadubu habamo na꞉pa꞉ga kodakodanomola, gabote hibinomolo a꞉kitanamene.”
MAR 10:26 Ba꞉bene iba꞉te konomamo la꞉wa꞉hate ibi ha꞉kiya ibi ipuwalo na꞉ga꞉lutiya꞉, “Ya꞉suti da꞉goe ba꞉be tabote hibima꞉ deda꞉na, puya꞉te modobola꞉ka꞉ Godote ibino ka꞉ka꞉ mula꞉lelamema꞉?”
MAR 10:27 Ya꞉suti ibi ulamenate na꞉goiya꞉, “Tawakaluba꞉te ha꞉kiya ibino ka꞉ka꞉ mula꞉le modoboha꞉, huiyatiya Godoko kapiyate modobola mabu ebegodolo helo bitana hiliyonomo komokomo ododilima꞉.”
MAR 10:28 Ba꞉bene Pitate Ya꞉sutamo na꞉goiya꞉, “Ama꞉ numa꞉, a ilina hiliyonomo miya꞉palete ama꞉ na꞉ta꞉mahenata.”
MAR 10:29 Ya꞉suti iba꞉tamo gala na꞉kagoiya꞉, “Na la꞉tamo hibi tabo begoemo, kebe lumagiti ebeno genama, o ebeno nani nanikokubi ekaki, o ebeno menokobi nabi gugudi ba꞉gala ebeno hopo, ebete na mabuma꞉ ba꞉gala Godokono Hido Tabo olamagima꞉ ba꞉bi komo da꞉miya꞉palemene,
MAR 10:30 ebete ba꞉ma tetelo hiliyonomo genama, nani, nanikokubi, ekaki, menokobi, gugudi, ba꞉gala hopo konomo gala kakuwatema꞉ne. Ba꞉gala ba꞉be atu tetelo tawakaluba꞉te temeteme komo ebetamo kikamehoma꞉na꞉, huiyatiya galane nale ebetamo wiboha꞉ ka꞉ka꞉ kikamema꞉nemo.
MAR 10:31 Iyo, ba꞉ hibila, ka꞉lo dopopi hiliyonomo da꞉pola꞉na, iba꞉te galane galapima꞉ keda꞉hama꞉na꞉, ba꞉gala ka꞉lo galapi da꞉pola꞉na, iba꞉te galane dopopima꞉ keda꞉hama꞉na꞉.”
MAR 10:32 Ba꞉bene Ya꞉suti ebe ta꞉matapa꞉go Yelusalema ko habamo ba tolamita, ebete ibi dopalamete tutiya꞉. Ba꞉ba tetelo ebe ta꞉matapa꞉te ukui bilibilinomoma꞉ eda꞉hutiya꞉, ba꞉gala kebe tawakaluba꞉te ibino gala hapuni da꞉pelamitiya꞉ iba꞉te atumu na꞉katoletolehutiya꞉. Ba꞉bene Ya꞉suti ebeno 12 ta꞉matapi uwatete, ebetamo da꞉pikulimina꞉ ba꞉bi temeteme komoma꞉ ibi ba iya꞉tulame na꞉goiya꞉,
MAR 10:33 “La꞉ nulia꞉la꞉, a Yelusalemamo tolamitama꞉. Ba꞉bolo Godote Tawakalubino Naniwi tawakaluba꞉tamo kikalamema꞉ne, ba꞉bene Godotamo hawa꞉goeno ikamehopino watowatopi ba꞉gala Godokono Tutumu iya꞉tulamepi, iba꞉te ebe anakapumima꞉ ga꞉late Yuha꞉pa꞉tamo ba꞉bo kikalamema꞉na꞉.
MAR 10:34 Ba꞉bene ba꞉ba꞉te ebe iya꞉da꞉tete, ebetamo kowe mehoholete, giya꞉pa꞉pa꞉mo ebe a꞉na꞉miga꞉titi kanakapumima꞉na꞉, huiyatiya ebete netewa-kapiya hegelalo hoene gala kakamahigama꞉ne.”
MAR 10:35 Ba꞉bene Sebedikono gugudi Ya꞉imesiko ba꞉gala Yoneko iba꞉te pete Ya꞉sutamo na꞉pega꞉luya꞉, “Iya꞉tulamedawa, a ubila ale ama꞉ bada komoma꞉ da꞉ga꞉lamemena꞉, nikaa꞉miya꞉.”
MAR 10:36 Ya꞉suti ibi na꞉goelamiya꞉, “La꞉ bada komo ubila꞉ka꞉ nale la꞉tamo ikalamema꞉?”
MAR 10:37 Iba꞉te tabo ba huiya na꞉ga꞉luya꞉, “Ama꞉le Ko Gawadubuma꞉ deda꞉mena꞉, a ubila ama꞉le da꞉goemena꞉ etate amia꞉no tu hapulu ba꞉gala etate pele hapulu amia꞉no konomo alo ipuwalo kolumutitama꞉.”
MAR 10:38 Huiyatiya Ya꞉suti iba꞉tamo na꞉goiya꞉, “La꞉le na hido ukuia꞉mo kaga꞉lanamitaha꞉. La꞉ modobola꞉ka꞉ nale da꞉nimo ba꞉be temeteme kalila꞉mo niho? La꞉ modobola꞉ka꞉ Godote na hoe komamo dadunatenemene ba꞉be komamo la꞉ wadulatele?”
MAR 10:39 Iba꞉te na꞉ga꞉luya꞉, “A modobola.” Ya꞉suti iba꞉tamo na꞉goiya꞉, “Ba꞉moe komo ba꞉ hibila, nale da꞉nimo galane tetelo la꞉ ba꞉ atumu ba꞉be kalila꞉mo nihote temeteme bulihonakomata, ba꞉gala Godote na dadunatenemene ba꞉be hoe komamo la꞉ kowadulatelema꞉na꞉ta.
MAR 10:40 Huiyatiya naeno tu hapuamo ba꞉gala pele hapuamo ahidi komoma꞉ nale a꞉kagaa꞉mo. Godote puya꞉tamo da꞉hiduilamiya꞉ ba꞉binomate ba꞉bolo kopola꞉nama꞉na꞉, iyo, ba꞉moe komoma꞉ ebete ha꞉kiya kogoema꞉ne.”
MAR 10:41 Ba꞉bene komo ta꞉ni Ya꞉suku ta꞉matapa꞉te ba꞉be komo uliti, Ya꞉imesiko ba꞉gala Yoneko iba꞉tamo na꞉maubahalitiya꞉,
MAR 10:42 huiyatiya Ya꞉suti ibi hiliyonomo ebetamo ka꞉lamiti ibi na꞉goelamiya꞉, “La꞉ iya꞉tawahala, Godoko hibima꞉ midiha꞉pino koko dubate ibi ha꞉kiya ibi ba wadiya꞉paa꞉latele komo tawakalubi heloamo kiyahalamenaka, iba꞉te ibino ubi komamo kopapamila꞉halenama꞉.
MAR 10:43 Huiyatiya la꞉ ba꞉bakopima꞉ a꞉keda꞉hamata. Kebe lumagiti la꞉eno koma꞉ eda꞉ ubi dihatemene, ebete la꞉eno huiyaha꞉ okodawama꞉ neda꞉mene,
MAR 10:44 ba꞉gala kebe lumagiti dopoma꞉ eda꞉ ubi dihatemene, ebete la꞉ hiliyonomoeno du genamoeno okodawama꞉ neda꞉mene, iyo, ebe ha꞉kiya ebe hoponomamo ihatenomo nihata꞉mene.
MAR 10:45 Numa꞉la꞉, Tawakalubino Naniwiti da꞉piya꞉, ebe ubihinola ba꞉moe hopo tawakaluba꞉te ebetamo huiyaha꞉ okopima꞉ eda꞉ha, huiyatiya ebete na꞉piya꞉ tawakaluba꞉tamo huiyaha꞉ okodawama꞉ kopeda꞉ma꞉, ba꞉gala ebeno ka꞉ka꞉ gobogobamo ihatete ebeno hoe huiyate komo hiliyonomo tawakalubi Saitanakono du genamane dito kuluhukulatelema꞉.”
MAR 10:46 Ba꞉ba tetelo Ya꞉suti ebe ta꞉matapa꞉go Yeliko ko habamo pelamete, ba꞉bene iba꞉te komo tawakalubi hiliyonomago kapimilo ba꞉be habane ikuliti ba tolame, Timiyasikono gudu Batimiyasiko baidi tamiho dubula, ebete gabo tamelo ba luta komo tawakalubi manima꞉ ba꞉bo toelameholitiya꞉.
MAR 10:47 Ba꞉bene ebete Nasaletenapi Ya꞉sukunu pe komo uliti ibulunomamo na꞉goiya꞉, “Ya꞉su, Da꞉ibidikono Hogo! Ama꞉ na na꞉malemalenatena꞉!”
MAR 10:48 Ba꞉ba tetelo komo hiliyonomo tawakaluba꞉te ebe kiyahamelo na꞉duhimiya꞉ ebete tatabalo kolutama꞉, huiyatiya ebete gala ibulunomamo na꞉kagoiya꞉, “Da꞉ibidikono Hogo! Ama꞉ na na꞉malemalenatena꞉!”
MAR 10:49 Ba꞉bene Ya꞉suti ba꞉bamo utiti na꞉goiya꞉, “La꞉ ebe mamo na꞉ka꞉ma꞉la꞉.” Ba꞉bene iba꞉te ba꞉be baidi tamiho dubu ba ka꞉mi ebetamo na꞉ga꞉luya꞉, “Na꞉kalakala, ebete ama꞉ bepeka꞉mitata! Na꞉mahiga!”
MAR 10:50 Ba꞉ba tetelo ebete ebeno atuino kaliko tama꞉mo a꞉da꞉nate, tiyonomo mahigate Ya꞉sutamo ba꞉bo piya꞉.
MAR 10:51 Ba꞉bene Ya꞉suti ebe nalatediya꞉, “Ama꞉ bada ubi kihatiuta nale ama꞉tamo kododima꞉?” Baidi tamiho dubuti na꞉goiya꞉, “Iya꞉tulamedawa, na ubila ilina hidamo kulamema꞉.”
MAR 10:52 Ya꞉suti ebe na꞉goemiya꞉, “Ama꞉ na꞉toa. Amia꞉no hibima꞉ midi komote ama꞉ a꞉hiduima꞉ta,” ba꞉bema꞉ hibila, ba꞉ba tetenomolo ebeno baiditi da꞉hidohidohuya꞉, ebete ba꞉be gabodo Ya꞉suku ba꞉bo ta꞉matuya꞉.
MAR 11:1 Ba꞉bene iba꞉te Yelusalema ko haba tama꞉mo ba pelame, Betapa꞉gi haba ba꞉gala Betani haba tamedo tolamete Olibi Kehakeha Hunu Hakamo ba꞉bo nikuliya꞉. Ba꞉ba tetelo Ya꞉suti ebe ta꞉matapi netewa dopamo ba noelame
MAR 11:2 ibi na꞉goelamiya꞉, “La꞉ ba꞉be tatali habamo tote, ba꞉be habamo da꞉nuluhukuma donoki-goe deha꞉poto hala꞉mo ma꞉home konuma꞉digama꞉nemata, lumagiti dopamo ebe hunamo kemediya꞉ha꞉. Wadiyala la꞉le hale pahamiti na꞉magahiya꞉la꞉.
MAR 11:3 Etate la꞉tamo da꞉goemene, ‘La꞉ ba꞉moe komo badama꞉ kododiutama?’ la꞉ huiyatiya ba꞉ma ka꞉na na꞉ga꞉luya꞉la꞉, ‘Kodawate donoki-goe ubila, ebete gala tiyonomo kakapoemema꞉ne.’”
MAR 11:4 Ba꞉bene iba꞉te tote, gabolo donoki-goe deha꞉poto gigiho tamelo ma꞉home numiti hale ba꞉bo nepahamiya꞉.
MAR 11:5 Ba꞉bema꞉ puya꞉te ba꞉bolo da꞉pola꞉nuya꞉ iba꞉te ibi nalateda꞉liya꞉, “La꞉ hale bada mabuma꞉ ka꞉pahamiutama?”
MAR 11:6 Ba꞉bene Ya꞉suti ibi netewapa꞉tamo dopamo kebe tabo ka꞉goiya꞉, iba꞉te ba꞉be atu tabo ibi da꞉kiyalamiya꞉ ba꞉bi tawakaluba꞉te ibi dito miya꞉paliya꞉.
MAR 11:7 Ba꞉bene iba꞉te ba꞉be donoki-goe deha꞉poto Ya꞉sutamo magahete, ibino watuino kaliko donoki-goe hunamo miya꞉temete, Ya꞉suti ba꞉bi kaliko hunamo ba꞉bo emediya꞉.
MAR 11:8 Ba꞉ba tetelo komo hiliyonomo tawakaluba꞉te ibino ga꞉ga꞉ga꞉ kaliko pipikulamete gabamo apohohago tolamiya꞉, ba꞉gala komopa꞉te gabo tametamene ele iya꞉hiliti gabamo atumu kamiya꞉teholenatuya꞉.
MAR 11:9 Ba꞉bene puya꞉te da꞉dopuya꞉ ba꞉gala Ya꞉sukunu gala hapuni da꞉pelamitiya꞉, ibi hiliyonomate ibulunomamo ba꞉ma ka꞉na ga꞉lutiya꞉, “Godoko nadipata꞉la꞉! Godo, amia꞉no mahilago da꞉pita, wadiyala ama꞉ ba꞉be lumagi na꞉koimiya꞉!
MAR 11:10 Iyo, aeno iniwa nabiwi Da꞉ibidikono hogote Ko Gawadubuma꞉ deda꞉na, wadiyala ama꞉le ebe na꞉koimiya꞉! O tawakaluba꞉la꞉, la꞉ Godoko milimiholo hunamo nadipata꞉la꞉!”
MAR 11:11 Ba꞉ba tetelo Ya꞉suti Yelusalema ko habamo na꞉pa꞉gate, Godoko Adikumino Hiya꞉ Genamamo nodolote ilina hiliyonomo ulamehola꞉go ba꞉bo petuya꞉, ba꞉bene da꞉gapogapohoniya꞉ ebete Betani habamo gala na꞉katoniya꞉ ebeno 12 ta꞉matapa꞉go.
MAR 11:12 Eta hegelalo iba꞉te Betanini gala da꞉kapelamitiya꞉, gabo tetelo Ya꞉suku baa꞉ kape komo ba piya꞉tawa,
MAR 11:13 ebete anahu keha pahagoeno muhulamo pumiti, gao oholema꞉ ba꞉bamo dito tuya꞉. Huiyatiya ebete ba꞉bamo da꞉nuluhukuya꞉ pahanomuya nulamiya꞉, mabu ba꞉be tete anahu gao kehoeno noloho teteha꞉,
MAR 11:14 ba꞉bema꞉ ebete ba꞉be anahu kehatamo na꞉goiya꞉, “Emedena tetelo tawakaluba꞉te ama꞉godone gao a꞉kanahanakamena꞉!” Ba꞉be tabo ebe ta꞉matapa꞉te uliya꞉.
MAR 11:15 Ba꞉bene iba꞉te Yelusalemamo nikuliti Godoko Adikumino Hiya꞉ Genamamo tolamete, ba꞉be genamalo Ya꞉suti ilina kolowamipi nulamete helonomamo neta꞉malateliya꞉, ba꞉gala ebete mani oweheta꞉midahalepino patapata gimai kolowamipino ahidi patapatago ba꞉bo nohoba꞉midahalelamiya꞉.
MAR 11:16 Ba꞉gala Yelusalemanapa꞉te ibino ilina hapuhapuni da꞉wadahenakui, iba꞉te ba꞉bi ilinago Godokono Genamoeno kala ipuwado palehawaminanakui hapudu da꞉nikulinakui, Ya꞉suti ibi ba꞉be mabuma꞉ duhilamiya꞉.
MAR 11:17 Ba꞉ba tetelo ebete tawakalubi ba iya꞉tulame na꞉goiya꞉, “Ba꞉ hibila, Godokono Bukalo tabo ba꞉ma ka꞉na bitana, ‘Naeno Genama hiliyonomo hiya꞉hiya꞉ hopo tawakaluba꞉te Godoko Adikumi Genamama꞉ koga꞉lama꞉na꞉, la꞉le huiyatiya pilo tawakalubino genamama꞉ a꞉midimata!’”
MAR 11:18 Ba꞉bene Godotamo hawa꞉goeno ikamehopino watowatopi ba꞉gala Godokono Tutumu iya꞉tulamepi, iba꞉te ba꞉be tabo uliti Ya꞉suku anakapumima꞉ gabo bohowaditiya꞉, huiyatiya iba꞉te ebe na꞉tolemitiya꞉ mabu hiliyonomo tawakaluba꞉te ebeno iya꞉tulame komoma꞉ hanohanoholo na꞉kalakalahutiya꞉.
MAR 11:19 Ba꞉bene da꞉gapogapohoniya꞉ Ya꞉suku ba꞉gala ebe ta꞉matapi ba꞉be ko habane gala na꞉kikuliniya꞉.
MAR 11:20 Eta hegela duiduiyanomolo iba꞉te ko habamo gala ba kapelamita, anahu kehate hahane tupuimiti apa꞉mo puluhuku kaloloma꞉ eda꞉ ba꞉bo pumiya꞉.
MAR 11:21 Ba꞉bene Ya꞉suti dopamo bada tabo da꞉goi, Pitate ba꞉be komo emalagidolote Ya꞉sutamo na꞉goiya꞉, “Iya꞉tulamedawa, numa꞉! Ama꞉le da꞉kiyahami ba꞉be anahu kehate ba꞉ kaloloma꞉ edi!”
MAR 11:22 Ya꞉suti huiyatiya iba꞉tamo na꞉goiya꞉, “La꞉ Godoko hibima꞉ na꞉mida꞉la꞉.
MAR 11:23 Na la꞉tamo hibi tabo begoemo, kebe lumagiti hibima꞉ midilo ba꞉moe hakatamo ba꞉ma ka꞉na da꞉goemene, ‘Ama꞉ kehaha꞉ kolomamo na꞉toatepa!’ ba꞉bene ebete tepo ipuwalo ukui netewama꞉ eda꞉heno, ba꞉be komote uluhukuma꞉ hibima꞉ da꞉midimini, ebete ba꞉be komo hibilo kumima꞉ne.
MAR 11:24 Ba꞉bema꞉ nale la꞉ na꞉goelamemata, la꞉ bada komoma꞉ Godoko da꞉toemehoma, la꞉ ba꞉be komo ya꞉lo lawema꞉ ga꞉lalo hibima꞉ na꞉mida꞉la꞉, ba꞉bene la꞉ ba꞉be komo hibilo kolawema꞉nemata.
MAR 11:25 Ba꞉gala keba tetelo la꞉le mahila꞉hate Godotamo toetoe tabo dolamagimima, ba꞉bene eta lumagitamo mauba komote ditanamene, la꞉ ba꞉be lumagino kuba egebolemete nadodoholemiya꞉la꞉, ba꞉bene la꞉eno Hunu Haboeno Nabiwiti la꞉eno kuba egebolelamete atumu kakadodoholelamema꞉na꞉ta.
MAR 11:26 Huiyatiya la꞉ tawakalubino kuba egebolelamete adodoholelameheno, la꞉eno Hunu Haboeno Nabiwiti la꞉eno kuba egebolelamete a꞉kadodoholelama꞉mena꞉ta.”
MAR 11:27 Ba꞉ba tetelo Ya꞉suku ba꞉gala ebe ta꞉matapi Yelusalema ko habamo gala na꞉kapikuliya꞉. Ba꞉bene ebete Godoko Adikumino Hiya꞉ Genamalo ba nepata꞉, Godotamo hawa꞉goeno ikamehopino watowatopi, Godokono Tutumu iya꞉tulamepi, ba꞉gala komo koko dubu, iba꞉te ebetamo pelamete
MAR 11:28 ebe ba꞉ma ka꞉na palatediya꞉, “Ama꞉ ba꞉moi komo pokono heloamo kododiliona? Ba꞉gala ba꞉moe helo pote kikameti, ama꞉le ba꞉moi komo kododilinama꞉?”
MAR 11:29 Huiyatiya Ya꞉suti iba꞉tamo na꞉goiya꞉, “Nale kapiya komoma꞉ la꞉ kalateda꞉lema꞉nemata. La꞉le na huiya tabo hidamo da꞉ga꞉lanamema, ba꞉bene nale ba꞉moi komo pokono heloamo kododilinamo, ba꞉be komo nale la꞉ ba꞉bo kokiyalamema꞉nemata.
MAR 11:30 Naeno alateda꞉ tabo ma kumu bitana la꞉tamo, Yonete tawakalubi beyamo da꞉wadulatelenakui, ba꞉be helo ebetamo pote kikami, Godotela꞉ka꞉ o eta lumagitila꞉ka꞉?”
MAR 11:31 Ba꞉bema꞉ ibi ha꞉kiya ibi ipuwalo olowabeletihuilo na꞉ga꞉luya꞉, “Ale da꞉ga꞉lama꞉ Godote Yonetamo helo ikami, ebete kogoema꞉ne, ‘Mabu keka꞉ la꞉le ebeno tabo hibima꞉ kamidiha꞉?’
MAR 11:32 Ba꞉gala a modoboha꞉ ebe ba꞉ma ka꞉na ga꞉lame, hopo lumagiti Yonetamo helo ikami.” Iba꞉te tawakalubino mauba komoma꞉ toletoleholo tabo ba꞉ba ka꞉na ga꞉luya꞉, mabu ibi iya꞉tawahala tawakalubi hiliyonomate Yoneko Godokono hibi ukui hawakalimidawama꞉ ga꞉lana.
MAR 11:33 Ba꞉bema꞉ iba꞉te ibino tepo ipuwoeno ukui ugumuililo Ya꞉sutamo na꞉ga꞉luya꞉, “Yonekono helo mabu a iya꞉tawaha꞉.” Ba꞉ba tetelo Ya꞉suti iba꞉tamo na꞉goiya꞉, “Ba꞉bema꞉ nale la꞉ atumu a꞉kakiyalama꞉mata nale ba꞉moi komo pokono heloamo dododilinamo.”
MAR 12:1 Ba꞉bene Ya꞉suti eta uwi tabamo ibi ba꞉ma ka꞉na iya꞉tulamiya꞉, “Dubuti pali ododiti tupina gao keha ba꞉bo amihui, ba꞉be gaoeno mahilo ba꞉ gala꞉ipi gaola. Ba꞉bene amiho komote da꞉wibui, ebete kala imiti, gao ihi adilutihoeno nakola bobo aligiti, pali lawamepino hunu mimiya ba꞉bo eti. Ba꞉ba tetelo ba꞉be dubuti ebeno pali komo lawamepi dubatamo dito miya꞉pui, iba꞉te ba꞉bolo oko ba owatina ba꞉be pali hidamo umilo ebeno gao kuwateholemenakoma꞉, ba꞉bene ebete muhulu hopamo ba꞉ dito tui.
MAR 12:2 “Ba꞉bene gao tapiho tete da꞉pi ebete pali lawamepa꞉tamo huiyaha꞉ okodawa na꞉poemi, ebete iba꞉godone gaoeno mani ipuwane ebeno namutudawoeno komo kopelawema꞉,
MAR 12:3 huiyatiya iba꞉te ebe lawete kukamo anagalimihote ilinaheno dito noemiya꞉.
MAR 12:4 Ba꞉bene pali namutudawate eta huiyaha꞉ okodawa gala da꞉kapoemi, huiyatiya iba꞉te ebe watolo ba kanagalimiho ebe hilopo ikamete atumu dito koemiya꞉.
MAR 12:5 Ba꞉bene ebete gala eta huiyaha꞉ okodawa da꞉kapoemi iba꞉te ebe anakapumiya꞉. Ba꞉bene komo huiyaha꞉ okopi hiliyonomate da꞉pelami, iba꞉te ba꞉ atumu komo alukuliti dito oelamiya꞉, huiyatiya iba꞉te komo anakapulamiya꞉.
MAR 12:6 “Ba꞉bene namutudawagodolo eta kapiya nemedenami, ba꞉be gudu ebete konomamo emalagidolonami. Ba꞉bema꞉ galanomone ebete ba꞉be gudu ba poeme ebeno ukuilo na꞉goi, ‘Hibila, iba꞉te naeno gudutamo kopapamila꞉hama꞉na꞉.’
MAR 12:7 “Ba꞉bi pali lawamepi dubate huiyatiya ibi ipuwalo na꞉ga꞉luya꞉, ‘Numa꞉la꞉, ba꞉moe guduti nabiwino ilina namutudawama꞉ deda꞉mene, ba꞉be guduti ba꞉ na꞉pe. Ba꞉bema꞉ wadiyala ale ebe anakapumiti ebeno pali lawenomo kolawema꞉nema꞉,’
MAR 12:8 ba꞉bene iba꞉te ebe lawete anakapumiti palino kala ipuwane ba꞉ dito na꞉da꞉nuya꞉.”
MAR 12:9 Ba꞉bema꞉ Ya꞉suti ulihopa꞉tamo na꞉goiya꞉, “La꞉eno ukui keba ka꞉nala꞉ka꞉, pali namutudawate bada komo na꞉kododimini? Hibila, ebete pete pali lawamepi panakapulamete ebeno pali komopa꞉tamo kopikalamema꞉ne.
MAR 12:10 Iyo, la꞉ dopamo Godokono Bukalo ba꞉moe tabo hibilo a꞉ka꞉lamiholia꞉mata, ‘Genama etepa꞉te tama꞉mo dihati, ba꞉be hototote huiyatiya genamoeno helo mabuma꞉ eda꞉na.
MAR 12:11 Ba꞉moe komo ba꞉ Godote ododi, ba꞉bema꞉ aeno ukuilo na꞉hanohanohutama꞉!’”
MAR 12:12 Ba꞉bema꞉ Yu watowatopi dubate Ya꞉suku lawe ubila mabu ibi iya꞉tawahala ebete ba꞉be uwi ibino komoma꞉ olamagiya꞉, huiyatiya iba꞉te tawakalubi tolelamelo ebe miya꞉pate dito tolamiya꞉.
MAR 12:13 Ba꞉bene Yu watowatopa꞉te komo Pa꞉lisi kapiyuimipi ba꞉gala Ko Gawadubu Helodikono kapiyuimipi Ya꞉sutamo oelamiya꞉, iba꞉te ebe kuba gabamo ba nemogabuimi ebete kebako tabo goelo ebe ba꞉bo kolawema꞉.
MAR 12:14 Iba꞉te ebetamo pelamete ha꞉da amiho gabodo na꞉pega꞉luya꞉, “Iya꞉tulamedawa, a iya꞉tawahala ama꞉ hibi lumagilata. Ama꞉ komopino dito ga꞉la komamo a꞉kapapamiwatala꞉ta, ba꞉gala ama꞉ tawakalubi hunu nikapa꞉mo kulamenaha꞉, ba꞉ma ka꞉na eta lumagi miya꞉palo eta lumagi ebo a꞉kalawa꞉la꞉ta. Iyo, ama꞉ tawakalubi Godokono gabo hidamo iya꞉tulamenata, ba꞉bema꞉ a na꞉kiyaa꞉ma꞉, Loma tawakalubino Konomo Gawadubu Sisatamo ta꞉kese mani ikameho hidola꞉ka꞉ o kubala꞉ka꞉? A ebetamo ba꞉kikamehoma꞉ o a꞉kikamehama꞉?”
MAR 12:15 Huiyatiya Ya꞉suti ibino ma꞉lapila netewa komo iya꞉tawate iba꞉tamo na꞉goiya꞉, “Mabu keka꞉ la꞉le na ha꞉da amihonamema꞉ dewagelitama? La꞉ mani kapiya natamo nikanama꞉la꞉, nale kumima꞉nemo.”
MAR 12:16 Ba꞉bene iba꞉te mani kapiya ebetamo dikamiya꞉, ebete ibi nalateda꞉liya꞉, “Ba꞉moe manilo da꞉pola꞉na, mahilo ba꞉gala holoholo pokonola꞉ka꞉?” Iba꞉te na꞉ga꞉luya꞉, “Konomo Gawadubu Sisakonola.”
MAR 12:17 Ba꞉bene Ya꞉suti iba꞉tamo na꞉goiya꞉, “Sisakono ilina Sisatamo nikamehala꞉, huiyatiya Godokono ilina Godotamo nikamehala꞉.” Ba꞉bema꞉ iba꞉te ebeno taboma꞉ koamo hanohanohutiya꞉.
MAR 12:18 Hoe ipuwane mahila꞉haleha꞉ma꞉ da꞉ga꞉lana, ba꞉bi tawakalubi ba꞉ Sa꞉diyusi kapiyuimipila. Komo iba꞉te Ya꞉sutamo pelamete tabo ba꞉ma ka꞉na pega꞉luya꞉,
MAR 12:19 “Iya꞉tulamedawa, Godokono Bukamo Mosesete tabo ba꞉ma ka꞉na miya꞉tiya꞉, ‘Dubuti hoete kamena gugudihino da꞉miya꞉pamene, ebeno ekawiti ba꞉be hamole lawete ebeno naniwi mabuma꞉ gugudi nododilima꞉mene.’
MAR 12:20 Kapiya dubuino sa꞉ba꞉ni kuhia꞉te nemedenama꞉. Ibi ipuwalo dopo guduti kamena lawete gugudi ulameheno hoiya꞉,
MAR 12:21 ba꞉bene ebeno ekawiti atu kamena kalawete gugudi ulameheno dito kahoiya꞉, ba꞉gala eta tetedawate ba꞉ atumu kewageliya꞉.
MAR 12:22 Ba꞉bene ba꞉bi sa꞉ba꞉ni badininipalate gugudihino ba꞉ba ka꞉na ha꞉lahuya꞉, huiyatiya kamenate galane dito hoiya꞉.
MAR 12:23 Ba꞉bema꞉ iba꞉te hoe ipuwane ka꞉ka꞉mo da꞉mahila꞉halemena꞉, ba꞉be Ko Hegelalo ba꞉be kamenate pokono kamenama꞉ na꞉keda꞉mene, mabu ebe sa꞉ba꞉ni dubate a꞉lawa꞉tepahuya꞉?”
MAR 12:24 Ba꞉bene Ya꞉suti iba꞉tamo na꞉goiya꞉, “Mabu la꞉ Godokono Buka tabo ba꞉gala ebeno helo iya꞉tawaha꞉, ba꞉be mabuma꞉ la꞉eno ukuilo tawakalubino ha꞉laha komoma꞉ kubamo ga꞉lanakomata.
MAR 12:25 Numa꞉la꞉, tawakaluba꞉te hoe ipuwane ka꞉ka꞉mo da꞉mahila꞉halemena꞉, ba꞉ba tetelo iba꞉te gala kamenakamena a꞉kapuwatehola꞉mena꞉ ba꞉gala dubu a꞉kapuwatehola꞉mena꞉, huiyatiya iba꞉te Godokono Hunu Haboeno nopopimo bemedehonamena꞉.
MAR 12:26 Ba꞉be mabuma꞉ Godokono Bukate a biya꞉tua꞉mena ha꞉lahapa꞉te hoe ipuwane mahila꞉halema꞉. Iyo, Mosesete dihatiya꞉ ba꞉be tabo la꞉ hibilo a꞉ka꞉lamiholia꞉mata, ba꞉ma ka꞉na koete kehalo da꞉woitiya꞉ huiyatiya kehate ka꞉mutigutiya꞉ha꞉, ba꞉ba tetelo Godote Mosesetamo na꞉goiya꞉, ‘Na ba꞉ Godotela. A꞉ibalahamako, Aisa꞉keko, ba꞉gala Ya꞉ikoboko, iba꞉te emedena tetelo poko kadikumina, na ba꞉ ba꞉betela.’
MAR 12:27 Ba꞉bema꞉ la꞉ Sa꞉diyusi kapiyuimipi, la꞉eno ukuilo na꞉kemalagidolonama ba꞉bi iniwalino ka꞉ka꞉te a꞉wibuya꞉? Ao, kawibuya꞉ha꞉, mabu ha꞉lahapa꞉te Godoko a꞉kadikuma꞉la꞉ huiyatiya puya꞉te da꞉ka꞉ka꞉halena ba꞉bi tawakalubinomate ebe badikumina. Ba꞉moe ba꞉be mabuma꞉ la꞉ Sa꞉diyusi kapiyuimipa꞉te tawakalubino ha꞉laha komoma꞉ kubamo ga꞉lanakomata!”
MAR 12:28 Ba꞉bene eta Godokono Tutumu iya꞉tulamedawate pete, iba꞉te da꞉ga꞉lutiya꞉ ba꞉be tabo ba꞉bo puliya꞉. Ya꞉suti Sa꞉diyusi kapiyuimipa꞉tamo tabo hidamo dolamagiya꞉, ba꞉be komo umiti ebete Ya꞉suku nalatediya꞉, “Kebe tutumu tabote konomoma꞉ keda꞉na?”
MAR 12:29 Ya꞉suti na꞉goiya꞉, “Ba꞉moe ba꞉ konomo tutumula, ‘Isalaela tawakaluba꞉la꞉, la꞉ nulia꞉la꞉! Godoko aeno Kodawala, ebe ba꞉ kapiyanomola, eta puliyala.
MAR 12:30 Ama꞉ amia꞉no Kodawa Godoko malemalelo nemalagidolona, amia꞉no tepo ipuwanomamo ba꞉gala amia꞉no gobogoboeno heloamo, amia꞉no ukui konomamo ba꞉gala amia꞉no helo konomamo.’
MAR 12:31 Ba꞉gala ba꞉moe ba꞉ eta konomo tutumula. ‘Ama꞉ ha꞉kiya ama꞉ demalagidolona, wadiyala ama꞉le ba꞉ ba꞉ba ka꞉na ama꞉ tamelo demedena ba꞉be lumagi malemalelo nemalagidolona.’ Eta tutumu tabote ba꞉moi koko tutumu netewa a꞉kagogola꞉mene.”
MAR 12:32 Godokono Tutumu iya꞉tulamedawate Ya꞉sutamo na꞉goiya꞉, “Iya꞉tulamedawa, hibila, ama꞉ hidamo gaa꞉ta. Aeno Kodawa Godoko ba꞉ kapiyanomola, eta puliyala, kemedenaha꞉.
MAR 12:33 Lumagiti ebeno tepo ipuwanomamo ba꞉gala ebeno gobogoboeno heloamo, ebeno ukui konomamo ba꞉gala ebeno helo konomamo ebete Godoko malemalelo nemalagidolonamene. Ba꞉gala ebe ha꞉kiya ebe demalagidolona, ebete ba꞉ ba꞉ba ka꞉na ebe tamelo demedehona ba꞉bi tawakalubi malemalelo nemalagidolenamene. Ba꞉ hibila, ba꞉moi netewa tutumate kokonomoma꞉ eda꞉hana, huiyatiya Godotamo ikameho komate kokoma꞉ keda꞉hanaha꞉, iyo, tawakaluba꞉te koelo wamote sipi-goegoe ba꞉gala komo malemale ilina Godotamo dikamehonaka, ebete ba꞉bi hiliyonomo komo koko komoha꞉ma꞉ goena.”
MAR 12:34 Ebete tabo hidamo da꞉goiya꞉, Ya꞉suti uliti ebetamo na꞉goiya꞉, “Godote Ko Gawadubuma꞉ deda꞉na, ba꞉be habamo ama꞉ a꞉pa꞉gama꞉ ba꞉ tatalila.” Ba꞉ hibila, ba꞉ba tetene tupuimiti tawakaluba꞉te Ya꞉suku eta komoma꞉ alateda꞉ma꞉ na꞉toletolehutiya꞉.
MAR 12:35 Ba꞉bene Ya꞉suti Godoko Adikumino Hiya꞉ Genamalo tawakalubi ba iya꞉tulamita na꞉goiya꞉, “Godokono Tutumu iya꞉tulamepa꞉te na꞉ga꞉lana Godokono Oemedawa Kelisoko ba꞉ Da꞉ibidikono hogola, ebeno eyoni gugudi ipuwane komahigama꞉ne. Huiyatiya ba꞉moe komoeno ipuwa keba ka꞉nala꞉ka꞉?
MAR 12:36 Numa꞉la꞉, Da꞉ibiditi Godokono Gobogoboeno heloamo tabo ba꞉ma ka꞉na olamagiya꞉, ‘Kodawa Godote naeno Kodawa Kelisotamo na꞉goe, ‘Ama꞉ naeno tu hapuamo na꞉pemeda꞉, ba꞉bene ama꞉go alaholohopi ama꞉le naeno heloamo ibi komikimoelema꞉na꞉ta.’ ’”
MAR 12:37 Ba꞉bene Ya꞉suti tabo moga꞉melo gala na꞉kagoiya꞉, “La꞉ ba꞉moe tabo ba emalagidolo na na꞉kiyanama꞉la꞉, Da꞉ibiditi ebeno hogo Kelisoko ebeno Kodawama꞉ ka꞉milo ebete Godokono tu hapuamo emedema꞉ goiya꞉, ba꞉bema꞉ ba꞉be komote keba ka꞉na na꞉kuluhukumini?” Ba꞉ hibila, ba꞉ba tetelo hiliyonomo tawakaluba꞉te Ya꞉sukunu tabo kalakalago ulihutiya꞉.
MAR 12:38 Ba꞉bene Ya꞉suti tawakalubi ba iya꞉tulamita, ebete na꞉goiya꞉, “La꞉le Godokono Tutumu iya꞉tulamepi hidamo nulama꞉la꞉. Ibi ubila ga꞉ga꞉ga꞉ kaliko pupuliti kolowami habalo ba wapata꞉lame, tawakaluba꞉te ibi ba꞉bo kawagaminalema꞉.
MAR 12:39 Iyo, ibi ubila a Yunapino baidi ibubulamehole genama gulu koko dubuino habalo kogagahidima꞉, ba꞉gala ibi ubila poko ododi tetelo koko habalo ahiditi kopola꞉nama꞉.
MAR 12:40 Ba꞉gala iba꞉te hamolehamoleno ilina ha꞉da amihoho komodo ba uwate ba꞉bo wibuilamelelamenaka, ba꞉bene iba꞉te ba꞉be komo kubaha꞉ma꞉ ga꞉lalo tolamete Godotamo baidi ba nibubulamehole ga꞉ga꞉ga꞉ toetoe tabo ba꞉bo nega꞉lanaka, mabu ibi ubila tawakaluba꞉te ibino komo umilo ibi hidohidopima꞉ koga꞉lama꞉. Ba꞉be mabuma꞉, hibila, iba꞉te kuba huiya konomo kolawema꞉na꞉!”
MAR 12:41 Ba꞉bene Godoko Adikumino Hiya꞉ Genamalo tawakaluba꞉te mani ba miya꞉tita, Ya꞉suti ba꞉be haba tamelo emedete tawakalubino mani miya꞉te komo bulamitiya꞉. Komo ilina dogodogopa꞉te mani kokonomo bimiya꞉titiya꞉,
MAR 12:42 ba꞉bene eta ilinaha꞉ hamole kamenate pete mani hegehege netewa, kapiya toea huiyala, ebete ba꞉bo pimiya꞉tiya꞉.
MAR 12:43 Ya꞉suti ebe ta꞉matapi ebetamo ka꞉lamiti na꞉goiya꞉, “Na la꞉tamo hibi tabo begoemo, tawakaluba꞉te mani da꞉pemiya꞉ta꞉, ba꞉moe ilinaha꞉ hamole kamenate ibi hiliyonomo a꞉gogole,
MAR 12:44 mabu ilina dogodogopa꞉te ibino komo ilina da꞉luhililamenaka ba꞉bi ilina bepemiya꞉ta꞉, huiyatiya ba꞉moe hamole kamena ilinahenola. Ebete ebeno kuititi mani miya꞉tenomo a꞉pemiya꞉te, ba꞉ ebeno baa꞉ uwatehoeno manila.”
MAR 13:1 Ba꞉bene Ya꞉suti Godoko Adikumino Hiya꞉ Genamane ba pihitiguta, ebeno ta꞉matapi ipuwalo etate na꞉goiya꞉, “Iya꞉tulamedawa, ama꞉ nulama꞉. Ba꞉moi nakola genama hiya꞉hiya꞉nomola ba꞉gala hidohidonomola!”
MAR 13:2 Ya꞉suti huiyatiya ebetamo na꞉goiya꞉, “Ama꞉ ba꞉moi koko genama bekulamiuta? Ba꞉moi genamoeno komoma꞉ eta nakolate eta nakola hunulu a꞉kapola꞉namena꞉, mabu alaholohopa꞉te nakola hiliyonomo mapitahalete hopamo iya꞉hekenomo kopiya꞉hekema꞉na꞉.”
MAR 13:3 Ba꞉bene Ya꞉suti Olibi Kehakeha Hunu Hakalo ba luta, Godoko Adikumino Hiya꞉ Genama hapuamo umilo lutiya꞉. Ba꞉ba tetelo Pitako, Ya꞉imesiko, Yoneko, ba꞉gala A꞉nduluku, ibinomate ebetamo tolamete na꞉nega꞉luya꞉,
MAR 13:4 “Ama꞉ a na꞉kiyaa꞉ma꞉, Godokono Genama kubahimi komote keba tetelo na꞉kuluhukumini? A bada hanohano komote na꞉kiya꞉tua꞉memene, tete ba꞉ na꞉pe ba꞉moi hiliyonomo komate kopikulihoma꞉?”
MAR 13:5 Ba꞉bene Ya꞉suti iba꞉tamo na꞉goiya꞉, “La꞉ hidamo. Eta lumagiti la꞉ ha꞉da damiholamemena꞉, la꞉ ebeno tabo akulia꞉la꞉,
MAR 13:6 mabu komo hiliyonomo dubate naeno mahilamo pelamete kopega꞉lama꞉na꞉, ‘Na ba꞉ Kelisotela!’ ba꞉bene iba꞉te tawakalubi hiliyonomo ha꞉da ba꞉ma ka꞉na ba pamiholame hiya꞉ gabamo ba꞉bo komagatalema꞉na꞉.
MAR 13:7 Ba꞉gala la꞉le hiya꞉hiya꞉ hopo tawakalubino alaholoho komo ba꞉gala ibino alaholohoma꞉ nopo tamote komo dulihoma, ba꞉be mabuma꞉ la꞉ akatoletolehala꞉. Ba꞉moi komate hibilo kopikulima꞉na꞉, huiyatiya ba꞉be tete ebe kuititi teteha꞉.
MAR 13:8 Ba꞉ hibila, komo hopo tawakaluba꞉te komo hopo tawakaluba꞉go kalaholohoma꞉na꞉, iyo, eta hopote etatamo alaholo komo kododima꞉ne, ba꞉bene wima꞉la꞉te hiya꞉hiya꞉ hopo hiliyonomamo kopelamema꞉na꞉, ba꞉gala komo habahabalo tawakaluba꞉te baa꞉heno kemedehoma꞉na꞉. Numa꞉la꞉, ba꞉moe komo ba꞉ kamenate gudu lawema꞉ temeteme da꞉tupuimi ba꞉ba ka꞉nala.
MAR 13:9 “Ba꞉bema꞉ la꞉ la꞉eno komo hidamo nulamenala꞉, mabu kubapa꞉te la꞉ heloamo uwatete tabo anagiya꞉mida habamo komagatalema꞉na꞉ta, ba꞉gala iba꞉te Yunapino baidi ibubulamehole genama gulu la꞉ kukamo kalukulima꞉na꞉ta. Iba꞉te na mabuma꞉ la꞉eno komo danagilamelelamemena꞉, ba꞉ba tetelo la꞉ hiya꞉hiya꞉ koko gawadubuino holoholo hapulu utitatate naeno Hido Tabo iba꞉tamo ba꞉bo kolamagimima꞉nemata.
MAR 13:10 Iyo, kuititi tete peheno, Godoko ubila dopamo la꞉le ebeno Hido Tabo hiliyonomo hiya꞉hiya꞉ hopolo konolamagimima꞉.
MAR 13:11 Ba꞉bema꞉ tawakaluba꞉te tabo anagiya꞉mida habamo la꞉ da꞉magatalemena꞉, ba꞉be tetete uluhukuhino la꞉eno ga꞉la komoma꞉ aka-ukuibilibilihala꞉, ba꞉ma ka꞉na, ‘Na bada tabo na꞉ka꞉goemo?’ Tete da꞉pemene Godote kebe tabo komokomamo la꞉ dowalubilimina꞉, wadiyala la꞉le ba꞉bi tabo kapiya nolamagimiya꞉la꞉, mabu hibila, la꞉ ha꞉kiya a꞉kolamagima꞉mata, Godokono Gobogobote la꞉ ipuwado kolamagima꞉ne.
MAR 13:12 “Ba꞉ba tetelo naniwiti ekawi hoea꞉mo koemema꞉ne, ba꞉gala atu gabodo ekawiti naniwi kanakapumima꞉ne, iyo, dubuti ebeno gudu ba꞉ atumu kakamitima꞉ne, ba꞉gala guguda꞉te maubahalete ibino menokobi nabi hoea꞉mo koelamema꞉na꞉.
MAR 13:13 Ba꞉bene na mabuma꞉ tawakalubi hiliyonomate la꞉tamo komaubahama꞉na꞉, huiyatiya kebe lumagiti kodakodalo utiti kuitita꞉mo da꞉nuluhukumini, Godote ebeno ka꞉ka꞉ komula꞉mema꞉ne.”
MAR 13:14 Na Makate buka ka꞉lamiholedawatamo na꞉goemo, ama꞉ ba꞉moe tabo Ya꞉suti da꞉goiya꞉ hidamo niya꞉tawa. Ya꞉suti tabo moga꞉melo gala na꞉kagoiya꞉, “Godokono Genama kubahimidawate ba꞉be talona habalo la꞉nalo la꞉le ebe dumima, ba꞉ba tetelo wadiyala Yudiya hoponapa꞉te hunuhunu hakamo nalahutihamena꞉.
MAR 13:15 Iyo, genama panalo da꞉lutamene, ba꞉be lumagiti genama guamo gala a꞉kana꞉pa꞉gamene ebeno ilina uwatema꞉,
MAR 13:16 ba꞉gala tumulu oko dowatitamene, ba꞉be lumagiti gala genamamo a꞉katoamene ebeno atuino kaliko lawema꞉.
MAR 13:17 “Numa꞉la꞉, lamitulamitu ba꞉gala nono dikalamena ba꞉bi kamenakamenatamo ba꞉be hegelate kubanomoma꞉ keda꞉ma꞉ne!
MAR 13:18 Ba꞉bema꞉ wadiyala la꞉ Godoko na꞉toemehuya꞉la꞉ ba꞉moi komate gibagiba tetelo akapikulihala꞉,
MAR 13:19 mabu ba꞉ba tetelo kokonomo temetema꞉te kopikulima꞉na꞉. Numa꞉la꞉, Godote ba꞉moe hopo dododiya꞉ ba꞉ba tetene tupuimiti ka꞉lo ba꞉ma teta꞉mo puluhuku, ba꞉bakobako temetema꞉te dopamo kapikuliya꞉ha꞉, ba꞉gala galane tetelo ba꞉bakobako temetema꞉te gala a꞉kapelama꞉mena꞉, kapiya tetenomolo kopikulima꞉na꞉.
MAR 13:20 Ba꞉moe komo ba꞉ hibila, Kodawa Godote ba꞉be tete gopowahimihino eta lumagiti ba꞉moe hopolo a꞉kemedenamene, huiyatiya ebete pui ka꞉lamiti duwatiya꞉ ba꞉bi tawakalubi malemalelatelelo tete kogopowahimima꞉ne.
MAR 13:21 “Ba꞉ba tetelo eta lumagiti la꞉tamo ba꞉ma ka꞉na da꞉goemene, ‘Numa꞉la꞉, Godokono Oemedawa Kelisote ba꞉malo bemedena!’ o, ‘Numa꞉la꞉, ebete ba꞉bolo bemedena!’ la꞉ hibima꞉ akamida꞉la꞉,
MAR 13:22 mabu ha꞉da Kelisoma꞉ eda꞉hapi ba꞉gala naeno mahilamo ha꞉da tabo olamagimipi, iba꞉te ikulihote hiya꞉hiya꞉ hanohano komo kododilima꞉na꞉. Iyo, ibi ubila ba꞉bi ododili komamo Godote da꞉ka꞉lamiholiya꞉ ba꞉bi tawakalubi hiya꞉ gabamo komagatalema꞉.
MAR 13:23 Ba꞉bema꞉ la꞉ hidamo nulia꞉la꞉, ba꞉moi hiliyonomo komate pikulihino nale la꞉ dopamo kiyalamemata.”
MAR 13:24 “Ba꞉be ko temeteme tetete da꞉wibomene, ba꞉ba tetelo hegelate kuduma꞉ne ba꞉gala manomete a꞉ka꞉la꞉minamene,
MAR 13:25 iyo, oloka꞉te alomone hopamo kopigudima꞉na꞉, ba꞉gala alomoeno helohelo ilinate komidiwiholema꞉na꞉.
MAR 13:26 Ba꞉bene ba꞉ba tetelo Tawakalubino Naniwiti alomo hununi ba pihitiga, iba꞉te ebe ba꞉bo kumima꞉na꞉, ebete ebeno heloago ba꞉gala alo konomago kopema꞉ne.
MAR 13:27 Ba꞉bene ebete Hunu Haboeno nopopi hiya꞉hiya꞉ hopo hiliyonomamo kopoelamema꞉ne, Godote da꞉ka꞉lamiholiya꞉ ba꞉bi tawakalubi ba꞉moe hopo hapuhapuni kopuwatema꞉.”
MAR 13:28 “La꞉ anahu kehoeno komone ba꞉moe eta komo hidamo niya꞉tawahala꞉. Gedawoeno huha꞉te pikuliti uliuli paha da꞉mogolamemena꞉, ba꞉be komote la꞉ kiya꞉tulamema꞉na꞉ta gogoeno tete ba꞉ na꞉tatali,
MAR 13:29 ba꞉bema꞉ ba꞉moi temeteme komate ikuliholo dulamema, la꞉ kiya꞉tawahama꞉nemata Tawakalubino Naniwino pe tete tatalila, ebe ba꞉ gigihodo a꞉pa꞉gama꞉ pe.
MAR 13:30 Na la꞉tamo hibi tabo begoemo, ba꞉moi hiliyonomo komate dopamo kopikulihoma꞉na꞉, galane ba꞉ma tete tawakaluba꞉te ba꞉bo koha꞉lahama꞉na꞉,
MAR 13:31 iyo, ba꞉moe hopo ba꞉gala alomo iba꞉te kowiboma꞉na꞉, huiyatiya naeno tabote a꞉kawibamene, itana tetelo bitanamene.”
MAR 13:32 “Numa꞉la꞉, tawakaluba꞉te ba꞉be Ko Hegeloeno tete iya꞉tawahaha꞉, Hunu Haboeno nopopi ba꞉gala Godokono Gudu iba꞉te iya꞉tawahaha꞉, Nabiwi Godote ha꞉kiya iya꞉tawala.
MAR 13:33 Ba꞉bema꞉ la꞉ uliholo nemedeniya꞉la꞉, mabu ba꞉be tetete da꞉pemene la꞉ iya꞉tawaha꞉.
MAR 13:34 Ba꞉moe komote ba꞉ma ka꞉na kitanama꞉ne, eta ko dubuti eta muhulu hopolo konemeda꞉tepama꞉ ebeno genama huiyaha꞉ okopa꞉tamo komiya꞉pama꞉ne iba꞉te hidamo kuminama꞉. Ba꞉bene ebete iba꞉tamo oko hiya꞉hiya꞉ ikalameholete, gigiho umidawa kogoemema꞉ne, ‘Ama꞉ naeno pe teta꞉mo uliholo nemedeniya꞉.’
MAR 13:35 Ba꞉bema꞉ la꞉ uliholo nemedeniya꞉la꞉, mabu la꞉ iya꞉tawaha꞉ genama namutudawoeno pe tete, diyala, da꞉ gapogapo tetelola꞉ o du tetelola꞉, da꞉ owaloho hapuamola꞉ o duiduiya tetelola꞉.
MAR 13:36 Iyo, ebete tiyonomo da꞉pemene la꞉ lahanalo da꞉ pulametamena꞉,
MAR 13:37 ba꞉bema꞉ nale ba꞉moe tabo la꞉ kapiyatamo kagoeha꞉, hiliyonomo tawakaluba꞉tamo goemo, la꞉ uliholo nemedeniya꞉la꞉!”
MAR 14:1 Adaguila꞉ Poko ba꞉gala Hunamo Mahigaha꞉ Palawa Baa꞉ Poko, ibino komo tupuimima꞉ netewa hegelate ba nepola꞉na, ba꞉ba tetelo Godotamo hawa꞉goeno ikamehopino watowatopi ba꞉gala Godokono Tutumu iya꞉tulamepi, iba꞉te Ya꞉suku anakapumima꞉ tabo ba꞉bo ihatiya꞉, ba꞉bene iba꞉te ebe diya lawema꞉ gabo bohowaditiya꞉.
MAR 14:2 Iba꞉te na꞉ga꞉luya꞉, “A Poko tetelo ebe a꞉kalawa꞉ma꞉, mabu tawakaluba꞉te atamo maubahalete ago alaholohodemena꞉.”
MAR 14:3 Ba꞉bene Ya꞉suti Betani habalo eta dubu Saimonokono genamalo baa꞉ benutiya꞉, ba꞉be dubu dopamo kuitikuita꞉goenola. Ba꞉ba tetelo kapiya kamenate pete, hido nibo ihi nakola kalila꞉mo tabuimi adahete, ebete petokamidate Ya꞉sukunu watamo ba꞉bo pehaminamiya꞉, ba꞉be ihi ilinoeno mahilo ba꞉ nadala, ebeno huiya konomola.
MAR 14:4 Komo tawakalubi ba꞉bolo da꞉pola꞉nuya꞉, iba꞉te maubahalete ibi ha꞉kiya ibi ipuwalo tabo ba ga꞉la na꞉ga꞉luya꞉, “Mabu keka꞉ ebete ba꞉moe hido nibo ihi gigilepalama꞉ da꞉midi?
MAR 14:5 A ba꞉moe ihi kolowamima꞉ na꞉nimiditale kapiya gogoeno oko huiya mani buwatena꞉, ba꞉bene ba꞉bi mani awaepa꞉tamo dito bikalameholena꞉.” Ba꞉bema꞉ iba꞉te ba꞉be kamena ba꞉bo kiyahamiya꞉.
MAR 14:6 Huiyatiya Ya꞉suti iba꞉tamo na꞉goiya꞉, “La꞉ ebe na꞉miya꞉pala꞉! Badama꞉ ka꞉kiyahamiutama? Ebete natamo hidonomo komo bododi.
MAR 14:7 La꞉ numa꞉la꞉, awaepa꞉te tete ga꞉ga꞉nomolo la꞉go bemedehonamena꞉, la꞉eno ubi tetelo iba꞉tamo malemale ilina ba꞉bo nikalamenakuya꞉la꞉, huiyatiya na emedena tetelo la꞉go a꞉kemedenamo, tete tatalila nale la꞉ komiya꞉palema꞉nemata.
MAR 14:8 Ba꞉bema꞉ hibila, ba꞉moe kamenate natamo hido komo bododi, eta kuba kitanaha꞉. Nale hoeha꞉ tetelo ebete naeno ape bobamo ihatema꞉ gabo bihiduimi, iyo, ba꞉be komo ba emalagidolo ebete naeno apa꞉mo hido nibo ihi ba꞉bema꞉ hamina.
MAR 14:9 Na la꞉tamo hibi tabo begoemo, tawakaluba꞉te hiya꞉hiya꞉ hiliyonomo hopamo Godokono Hido Tabo datanakomena꞉, iba꞉te ba꞉moe kamenate dododi ba꞉be komo emalagidololo ba꞉nolamagiminakomena꞉.”
MAR 14:10 Ba꞉bene Ya꞉sukunu 12 ta꞉matapi ipuwalo Keliyotanapi Yudasiti Godotamo hawa꞉goeno ikamehopino watowatopa꞉tamo tote, nopo ba꞉bo netamotiya꞉ Ya꞉suku ibino kokotamo kihatema꞉.
MAR 14:11 Ba꞉ba tetelo iba꞉te ba꞉be komo uliti kalakalahalo tabo ba꞉bo ihatiya꞉ ebetamo mani kikamema꞉, ba꞉bema꞉ Yudasiti iba꞉godone tote gabo ba꞉bo nohowadiya꞉ Ya꞉suku ibino kokotamo kihatema꞉.
MAR 14:12 Yunapino ododi komo ba꞉ ba꞉ma ka꞉nala, iba꞉te hiliyonomo gogolo Hunamo Mahigaha꞉ Palawa Baa꞉ Poko naha da꞉tupuiminakui, ba꞉be dopo hegelalo Adaguila꞉ Pokoma꞉ iba꞉te sipi-goegoe hegehege balukulinakuya꞉. Ba꞉be komo ba emalagidolo Ya꞉suku ta꞉matapa꞉te ebetamo na꞉ga꞉luya꞉, “A tolamete Adaguila꞉ Pokoeno naha ilina kebolo na꞉ka꞉nihiduilamema꞉, ale ama꞉go kapimilo konahama꞉?”
MAR 14:13 Ba꞉bene ebete ebe ta꞉matapi netewa ba oelame iba꞉tamo na꞉goiya꞉, “La꞉ ko habamo na꞉toala꞉, ba꞉bene beya dagahita ba꞉be dubuti la꞉go da꞉palugamene, la꞉le ebe ba꞉bo na꞉ta꞉matuya꞉la꞉.
MAR 14:14 Ebete kebe genamamo da꞉nodolomene, la꞉ ba꞉be genama namutudawatamo ba꞉ma ka꞉na na꞉nega꞉luya꞉la꞉, ‘Iya꞉tulamedawate goe, genama keka꞉ nale naeno ta꞉matapa꞉go Adaguila꞉ Poko baa꞉ kopenama꞉?’
MAR 14:15 Ba꞉ba tetelo ebete genama guamo la꞉ komagatalema꞉na꞉ta, hunu genamalo haba ko bitana, ya꞉lo a꞉hiduima꞉ka. La꞉ ba꞉bolo aeno naha ilina na꞉nihiduilamiya꞉la꞉.”
MAR 14:16 Ba꞉bene Ya꞉suku ta꞉matapi netewapa꞉te ko habamo nuluhukuti, Ya꞉suti kebe komoma꞉ ka꞉kiyalamiya꞉, iba꞉te ba꞉bi komo nulamete Adaguila꞉ Poko ilina ba꞉bo nihiduilamiya꞉.
MAR 14:17 Ba꞉bema꞉ da꞉duniya꞉ Ya꞉suti ebeno 12 ta꞉matapa꞉go ba꞉be genamamo na꞉pelameniya꞉.
MAR 14:18 Iba꞉te ahidinate baa꞉ ba nahana, Ya꞉suti na꞉goeniya꞉, “Na la꞉tamo hibi tabo begoemo, la꞉ ipuwalo etate na anakapunamepi kowalubilima꞉ne na lawenema꞉.”
MAR 14:19 Ba꞉ba tetelo iba꞉te tepo menemenema꞉ ba eda꞉hana, Ya꞉sutamo etate goenakui, etate goenakui, “Nalela꞉ka꞉?”
MAR 14:20 Ya꞉suti iba꞉tamo na꞉goeniya꞉, “La꞉ 12 ta꞉matapi ipuwalo baa꞉ kalila꞉mo nago kokoto dadutimini, ba꞉be ba꞉be lumagila.
MAR 14:21 Iyo, ba꞉ hibila, Tawakalubino Naniwiti hoea꞉mo ba꞉ na꞉to, Godokono Bukalo tabo ba꞉ma ka꞉na bitana, huiyatiya kebe lumagiti ebe anakapumipa꞉tamo dikalamemene, ba꞉be lumagiti kuba huiya konomo kolawema꞉ne. Ba꞉moe ba꞉be mabuma꞉ ba꞉be dubu ebeno menokote ebe alahimiha꞉ma꞉ eda꞉ ba꞉ wadiyala!”
MAR 14:22 Ba꞉bene iba꞉te baa꞉ ba nahana, Ya꞉suti baa꞉ lawenate Godotamo kalakala tabo goenate ba꞉bo wakamihoniya꞉, ba꞉bema꞉ ebete iba꞉tamo ba ikalamena na꞉goeniya꞉, “La꞉ nuwata꞉la꞉, ba꞉moe ba꞉ naeno apela.”
MAR 14:23 Ba꞉bene ebete kalili kalawenate Godotamo kalakala tabo goenate iba꞉tamo ba ikalamena, ibi hiliyonomate ba꞉bo nihoniya꞉.
MAR 14:24 Ya꞉suti iba꞉tamo na꞉goeniya꞉, “Godote tawakaluba꞉go komiloma꞉ nopo da꞉tamotiya꞉, ba꞉moe naeno hawiti ba꞉be nopo bekodakoduimina, iyo, ba꞉moe hawiti komo hiliyonomo tawakalubi owalubilima꞉ koka꞉ka꞉la꞉ma꞉ne.
MAR 14:25 Na la꞉tamo hibi tabo begoemo, na ba꞉ma tetelo ba꞉moe gao beya gala a꞉kana꞉mo, huiyatiya Godote Ko Gawadubuma꞉ deda꞉na, ba꞉be habalo na uli gao beya galane tetelo ba꞉bo koninima꞉nemo.”
MAR 14:26 Ba꞉bene iba꞉te Godoko adikumino ohale kapiya alapihonate, Olibi Kehakeha Hunu Hakamo kotolamenama꞉ genamane ba꞉ dito ikuliniya꞉.
MAR 14:27 Ba꞉ba tetelo Ya꞉suti iba꞉tamo na꞉goeniya꞉, “La꞉ hiliyonomate na komiya꞉panema꞉nemata, mabu Godokono Bukalo tabo ba꞉ma ka꞉na bitana, ‘Godote sipi-goegoe ulamedawa danakapumimini, ba꞉ba tetelo sipi-goegoa꞉te hiya꞉hiya꞉ kalahutihoma꞉na꞉.’
MAR 14:28 Huiyatiya Godote na hoene gala da꞉kadipanatenemene, na Ga꞉lili hopamo dopamo kotoma꞉nemo. La꞉le na ba꞉bolo kopunamema꞉nemata.”
MAR 14:29 Ba꞉bene Pitate Ya꞉sutamo na꞉goeniya꞉, “Ibi hiliyonomate hoe tolemelo dalahutihomena꞉, huiyatiya nale ama꞉ a꞉kamiya꞉pamata!”
MAR 14:30 Ya꞉suti ebeno tabo ba huiyana na꞉goeniya꞉, “Na ama꞉tamo hibi tabo begoemo, ka꞉lo dulu kakabate netewa teta꞉mo goehoheno, ama꞉ netewa-kapiya teta꞉mo na iya꞉tawaha꞉ma꞉ kogoema꞉na꞉ta.”
MAR 14:31 Huiyatiya Pitate ibulunomolo gala na꞉kagoeniya꞉, “Na ama꞉go da꞉nehoemo, nale ama꞉ iya꞉tawaha꞉ma꞉ a꞉kagaa꞉mo!” Ba꞉ba tetelo ibi hiliyonomate ba꞉ atu tabo bekaga꞉laniya꞉.
MAR 14:32 Ba꞉bene Ya꞉suku ba꞉gala ebe ta꞉matapi iba꞉te ko habane ikulinate eta tatali hopamo tolameniya꞉, ba꞉be hopoeno mahilo Getasemanila. Ya꞉suti ba꞉bolo iba꞉tamo na꞉negoeniya꞉, “La꞉ ba꞉malo na꞉pola꞉nala꞉. Na ba꞉moe tatalia꞉mo tomo Godotamo toetoe tabo konolamagima꞉.”
MAR 14:33 Ba꞉ba tetelo ebete Pitako, Ya꞉imesiko, ba꞉gala Yoneko, ibi baleta toetoe tabo ga꞉la baha꞉mo magataleniya꞉, ba꞉bene tepo menemene komo ba꞉gala ukui temeteme komo ebetamo konomamo ba꞉bo pelameniya꞉.
MAR 14:34 Ba꞉bema꞉ Ya꞉suti iba꞉tamo na꞉goeniya꞉, “Na tepo temeteme konomamo iya꞉tawanamo, ba꞉mako tepo temeteme na anakapuname huiyala. La꞉le na mabuma꞉ ba꞉malo uliholo na꞉pola꞉nala꞉.”
MAR 14:35 Ba꞉bene ebete nanekela꞉mo tonate ebeno ape hakamo nihatenate Godotamo ba꞉bo netoetoeniya꞉, gabote da꞉modobomene ba꞉ba teteno temetemete ebe komiya꞉pama꞉.
MAR 14:36 Ebete na꞉goeniya꞉, “Iya꞉, Nabiwi! Hiliyonomo komokomo ododilima꞉ ama꞉godolo helo bitana, ba꞉bema꞉ ama꞉ ba꞉moe temeteme kalili nagodone na꞉lawa꞉. Huiyatiya naeno ubiha꞉, ama꞉ ha꞉kiya amia꞉no ubila nododa꞉.”
MAR 14:37 Ba꞉bene ebete ta꞉matapa꞉tamo da꞉peniya꞉ lahanalo pulamenate Pitatamo na꞉pegoeniya꞉, “Saimono, la꞉ badama꞉ ka꞉lahonama? Mabu keka꞉ la꞉le na mabuma꞉ tete nanekelelo uliho modoboha꞉ma꞉ deda꞉hanama.”
MAR 14:38 Ba꞉ba tetelo Ya꞉suti ibi na꞉goelameniya꞉, “Godotamo uliholo na꞉toetoehonala꞉, mabu la꞉le Saitanakono kuba gabamo emogabuimi komamo gudidimata. La꞉eno tepo ipuwalo hido komo ododima꞉ ubila, huiyatiya la꞉godolo ododi helo puliyala.”
MAR 14:39 Ba꞉bene Ya꞉suti gala katonate, ebete dopamo Godotamo toetoe tabo keba ka꞉na ka꞉nolamaginiya꞉, ebete ba꞉ atumu kanolamaginiya꞉,
MAR 14:40 ba꞉bene ebete ebe ta꞉matapa꞉tamo gala da꞉kapeniya꞉ lahanalo kapulameniya꞉. Ba꞉ba tetelo ibino baiditi menemenenomoma꞉ eda꞉halameniya꞉, ba꞉be mabuma꞉ iba꞉te hilopago ebetamo ga꞉la tabo nipo ohowadiniya꞉.
MAR 14:41 Ba꞉bene ebete gala katonate netewa-kapiya tetelo Godotamo netoetoenate da꞉kapeniya꞉ iba꞉tamo na꞉pegoeniya꞉, “La꞉ hawela amiholo gala badama꞉ ka꞉kalahonama? Ba꞉ba꞉la, tete ba꞉ a꞉pe, kubapa꞉te Tawakalubino Naniwi ibino kokotamo ba꞉ na꞉lawa꞉.
MAR 14:42 Iyo, la꞉ na꞉pakaminala꞉, a ba꞉ na꞉tolamema꞉. Numa꞉la꞉, na anakapunamepino kokotamo ihatenedawate ba꞉ na꞉pe!”
MAR 14:43 Ya꞉suti ba꞉be tabo ba goena ba꞉ba tetenomolo Yudasiti peniya꞉, Ya꞉sukunu 12 ta꞉matapi ipuwalo ebe ba꞉ etala. Ba꞉bene eba꞉go dubu hiliyonomate ibino alaholoho gili ba꞉gala kukago da꞉pelameniya꞉, ba꞉bi dubu ba꞉ Godotamo hawa꞉goeno ikamehopino watowatopi, Godokono Tutumu iya꞉tulamepi, ba꞉gala komo koko dubu, iba꞉te da꞉poelameniya꞉ ba꞉bi dubula.
MAR 14:44 Ba꞉ hibila, Yudasiti ibi ya꞉lo ba꞉ma ka꞉na goelameniya꞉, “Nale daboetehomo, ba꞉be ba꞉be lumagila. La꞉ ebe tiyonomo lawete hidamo na꞉magatuya꞉la꞉.”
MAR 14:45 Ba꞉bene Yudasiti penate Ya꞉sutamo tonomo tonate ebe na꞉negoemeniya꞉, “Iya꞉tulamedawa!” Ba꞉ba tetenomolo ebete ebe ba aboetehona,
MAR 14:46 komo dubate Ya꞉suku ibino kokotamo kodakodanomolo ba꞉bo laweniya꞉.
MAR 14:47 Ba꞉ba tetelo Ya꞉suku ta꞉matapi ipuwalo eta dubuti ebeno alaholo gili magubutinate, Godotamo hawa꞉goeno ikamehopino Hununomo Watodawoeno genama okodawa anagaliminate, galo hapu ba꞉bo mapitamidameniya꞉.
MAR 14:48 Ba꞉bene Ya꞉suti iba꞉tamo na꞉goeniya꞉, “Na pilo lumagila꞉ka꞉, o na alaholodawala꞉ka꞉? Mabu keka꞉ la꞉le alaholoho gila꞉go ba꞉gala kukago na lawenema꞉ da꞉pelamema?
MAR 14:49 Na komo hegelalo Godoko Adikumino Hiya꞉ Genamalo la꞉go ba luta tawakalubi diya꞉tulamenatimo, la꞉le na ba꞉bolo kalaweneha꞉, huiyatiya ba꞉moi komate ba꞉ ikuliha Godokono Buka tabo komate hibima꞉ keda꞉hama꞉.”
MAR 14:50 Ba꞉ba tetelo ebe ta꞉matapi hiliyonomate ebe miya꞉panate dito alahutihoniya꞉.
MAR 14:51 Ba꞉bolo eta uli ape dubuti na꞉la꞉nuya꞉, ebete dopamo hido keyakeya kalikonomo pulinate Ya꞉suku ta꞉matapa꞉go ba꞉bamo da꞉puluhukuniya꞉, ba꞉bema꞉ komo dubate ubila ebe kolawenama꞉,
MAR 14:52 huiyatiya ebete ebeno kaliko miya꞉panate kikipuiyanomo atumu dito kalahula꞉niya꞉.
MAR 14:53 Ba꞉bene iba꞉te Ya꞉suku Godotamo hawa꞉goeno ikamehopino Hununomo Watodawoeno genamamo ba꞉ dito magataniya꞉. Iba꞉te ebe ba꞉be genamamo magatanaheno dopamo Godotamo hawa꞉goeno ikamehopino komo watowatopi, ba꞉gala Godokono Tutumu iya꞉tulamepi, ba꞉gala komo koko dubu, ibi hiliyonomate pelamenate ba꞉bo pekapiyaniya꞉.
MAR 14:54 Ba꞉ba tetelo Pitate Ya꞉suku muhuludopone ba ta꞉matana, ebete Hununomo Watodawoeno genama kala ipuwamo na꞉pa꞉ganate ebete lawamepa꞉go koelo ba꞉bo nigiga꞉niya꞉.
MAR 14:55 Ba꞉bene Hununomo Watodawa ba꞉gala komo Ka꞉nisolo dubu hiliyonomate tabo ga꞉lapi boholeniya꞉, Ya꞉sukunu kuba oholemenate ebe kanakapumima꞉. Huiyatiya iba꞉te ebeno eta kuba kuminiya꞉ha꞉,
MAR 14:56 iyo, hiliyonomo tabo ga꞉lapa꞉te ebeno komoma꞉ ha꞉da ba amihohona, hiya꞉hiya꞉ tabo da꞉ga꞉laniya꞉ ibino tabote huiyatiya kapiyama꞉ keda꞉haniya꞉ha꞉.
MAR 14:57 Ba꞉bene komopa꞉te mahila꞉hanate Ya꞉sukunu komoma꞉ ha꞉da ba amihohona, iba꞉te ba꞉ma ka꞉na ga꞉laniya꞉,
MAR 14:58 “Ebete tabo da꞉goiti ale ba꞉ma ka꞉na ulitima꞉, ‘Ba꞉moe Godokono Genama tawakaluba꞉te kokotamo detiya꞉, nale anabulimiti netewa-kapiya hegelalo eta genama gala kaketema꞉nemo, ba꞉bako genama komo tawakaluba꞉te ete modoboha꞉.’”
MAR 14:59 Huiyatiya dopo ha꞉da amihopi keba ka꞉nala꞉ka꞉, ba꞉moi uli tabo ga꞉lapi ba꞉ ba꞉ba ka꞉nala, iba꞉te ibino tabo ga꞉la ipuwalo Ya꞉sukunu komoma꞉ ukui kapiyama꞉ keda꞉haniya꞉ha꞉.
MAR 14:60 Ba꞉bene Godotamo hawa꞉goeno ikamehopino Hununomo Watodawate ibi ipuwalo mahiganate Ya꞉suku nalateda꞉niya꞉, “Ama꞉ tabo goeha꞉ma꞉ badama꞉ kedeona? Ba꞉moi dubate ama꞉ mabuma꞉ da꞉ga꞉lana keba ka꞉nala꞉ka꞉?”
MAR 14:61 Ba꞉ba tetelo Ya꞉suti tabo goeheno dito la꞉nuya꞉, ba꞉bema꞉ Hununomo Watodawate ebe gala na꞉kalateda꞉niya꞉, “Godoko tawakaluba꞉te dadikumina, ama꞉ ba꞉ ebeno Gudu Kelisotela꞉ka꞉?”
MAR 14:62 Ya꞉suti na꞉huiyaniya꞉, “Na ba꞉ ba꞉betela. Ba꞉bene la꞉le na Tawakalubino Naniwi aeno Helodawa Godokono tu hapulu lutalo kunamema꞉nemata, iyo, galane na Hunu Habane hawai ipuwado kopehawakalama꞉nemo!”
MAR 14:63 Ba꞉bema꞉ Hununomo Watodawate ba꞉be tabo ulinate, ebeno konomo mauba komo kohawakaliminama꞉ ebete da꞉puliniya꞉ ba꞉be kaliko anagiya꞉midalenate na꞉goeniya꞉, “A ba꞉moe dubuino kuba kiya꞉tawahama꞉ eta tabo goedawa a ubihinola!
MAR 14:64 Ebete ha꞉kiya kubanomo tabo da꞉goe la꞉ ba꞉ ulihomata, mabu ebete na꞉goe, ‘Na ba꞉gala Godoko, a ba꞉ kapiyala!’ Ba꞉bema꞉ ebeno komoma꞉ la꞉eno ubi keba ka꞉nala꞉ka꞉?” Ba꞉bene ibi hiliyonomate Ya꞉sukunu komo ba anagiya꞉midamena ebe anakapumima꞉ ba꞉bo ga꞉laniya꞉.
MAR 14:65 Ba꞉ba tetelo komo iba꞉te Ya꞉sutamo kowe mehoholenate, ebeno holoholo mula꞉menate ba anagalimihona na꞉ga꞉laniya꞉, “Ama꞉ Godokono ukui hawakalimidawama꞉ hibilo deda꞉na, ama꞉ na꞉gaa꞉ puya꞉te kanagalimihotana!” ba꞉bene lawamepi dubate ebe lawenate kokotamo ba꞉bo anagalimihoniya꞉.
MAR 14:66 Ba꞉ba tetelo Pitate ba꞉be genamoeno kala ipuwalo ebeno apete kotanotanonama꞉ koelo lutiya꞉. Ba꞉bene Hununomo Watodawoeno oko bohelete penate, Pitako hidamo pumihonate ebe na꞉pikiyameniya꞉, “Ama꞉ ba꞉ atumu ba꞉moe Nasaletenapi Ya꞉sukuba꞉ pata꞉nama꞉ta!”
MAR 14:68 Huiyatiya Pitate na꞉goeniya꞉, “Ao, na ba꞉be dubu iya꞉tawaha꞉. Ama꞉le da꞉goena ba꞉be tabo na kemalagidolonaha꞉.” Ba꞉bene ebete kala imi gigihamo da꞉toniya꞉, ba꞉ba tetelo kakabate na꞉goehoniya꞉.
MAR 14:69 Ba꞉bene oko bohelete ebe uminate, ba꞉bolo da꞉pola꞉nuya꞉ ba꞉bi tawakalubi gala na꞉kakiyalameniya꞉, “Ba꞉moe ba꞉ Ya꞉sukunu eta lumagila!”
MAR 14:70 huiyatiya Pitate ba꞉ atu iya꞉tawaha꞉ tabo bekagoeniya꞉. Ba꞉bene ba꞉bolo da꞉pola꞉nuya꞉, iba꞉te tete nanekelelo pola꞉natepanate Pitako gala na꞉kakiyameniya꞉, “Hibila! Ama꞉ ba꞉ Ya꞉sukunu eta lumagilata, mabu ama꞉ Ga꞉lili hoponapilata.”
MAR 14:71 Huiyatiya Pitate na꞉goeniya꞉, “Godokono dopo hapulu utiti na꞉goemo, nale hibi tabo goeheno ebete na kanagalinamema꞉ne! La꞉le kebe lumagima꞉ da꞉ga꞉lanama, na ebe iya꞉tawaha꞉!”
MAR 14:72 Ba꞉bene ba꞉ba tetenomolo kakabate goeho netewa tetema꞉ deda꞉meniya꞉, Ya꞉suti ebetamo dopamo kebe tabo ka꞉goeniya꞉, Pitate ba꞉be tabo ba꞉bo emalagidoloniya꞉, “Kakabate netewa teta꞉mo goehoheno, ama꞉le netewa-kapiya teta꞉mo na iya꞉tawaha꞉ma꞉ kogoema꞉na꞉ta.” Ba꞉bene Pitate ibulunomo ba꞉bo ihiniya꞉.
MAR 15:1 Duiduiyanomolo Godotamo hawa꞉goeno ikamehopino watowatopi, ba꞉gala Godokono Tutumu iya꞉tulamepi, ba꞉gala komo koko dubu, ba꞉moi Ka꞉nisolo tawakalubi hiliyonomate nopo betamotiya꞉. Ba꞉bema꞉ iba꞉te Ya꞉suku hala꞉mo matuhumihote Paeletetamo da꞉magatuya꞉,
MAR 15:2 Paeletete ebe nalatediya꞉, “Ama꞉ Yu tawakalubino Ko Gawadubula꞉ka꞉?” Ya꞉suti ebetamo na꞉huiyuya꞉, “Ama꞉le ba꞉ a꞉gaa꞉ta.”
MAR 15:3 Ba꞉ba tetelo Godotamo hawa꞉goeno ikamehopino watowatopa꞉te Ya꞉sukunu komoma꞉ na꞉ga꞉lutiya꞉ ebete hiya꞉hiya꞉ kuba bododilinami,
MAR 15:4 ba꞉bene Paeletete ebe gala na꞉kalatediya꞉, “Ama꞉ ibino tabo ba꞉ka꞉huiyomena꞉? Iba꞉te na꞉ga꞉lita ama꞉ hiliyonomo koko kuba ododilidawalata!”
MAR 15:5 Huiyatiya Ya꞉suti eta tabo kagoiya꞉ha꞉, ba꞉bema꞉ Paeletete koamo hanohanuya꞉.
MAR 15:6 Ba꞉ba tete tawakalubino ododi komo ba꞉ma ka꞉nala, hiliyonomo gogo ipuwalo Yunapino Adaguila꞉ Poko tetelo iba꞉te du genamalo kapiya lumagi mahilamo da꞉ka꞉minakui, Paeletete ba꞉be lumagi ebeno kuba huiyane dito oemenakui.
MAR 15:7 Ba꞉ba tetelo kapiya dubu ebeno mahilo Balabasitila, ebete du genama gulu nemedenami, ebeno komo ba꞉ma ka꞉nala. Dopamo komo dubate Loma gabomana꞉go alaholohopima꞉ ba eda꞉ha, iba꞉te komo tawakalubi ba꞉bo anakapulamiya꞉, ba꞉be mabuma꞉ Loma gabomani watowatopa꞉te ibi Balabasiko bana uwatete du genamamo dito miya꞉tiya꞉.
MAR 15:8 Ba꞉bema꞉ Ya꞉suti Paeletekono holoholo hapulu ba la꞉na tawakalubi hiliyonomate ebetamo pelamete na꞉pega꞉lamiya꞉, ebete poko tetelo dopamo keba ka꞉na kododinakui ba꞉ba ka꞉na gala kakododima꞉.
MAR 15:9 Ba꞉bene Paeletete iba꞉tamo na꞉goiya꞉, “La꞉ ubila꞉ka꞉ nale la꞉ Yu tawakalubino Ko Gawadubu dito oeme?”
MAR 15:10 Ebete ba꞉moe tabo begoiya꞉ mabu ebete iya꞉tawuya꞉, Yunapi hiliyonomate Ya꞉sutamo na꞉kalakalahutiya꞉, huiyatiya ibino watowatopa꞉te ba꞉be mabuma꞉ maubahate ebe ba꞉ dito magahiya꞉, iyo, iba꞉godolo hibi komo puliyala, kitanuya꞉ha꞉.
MAR 15:11 Huiyatiya ba꞉ba tetelo Godotamo hawa꞉goeno ikamehopino watowatopa꞉te komo hiliyonomo tawakaluba꞉tamo helo bikalamiya꞉ iba꞉te Paeleteko koga꞉lamema꞉, ebete Balabasiko du genamane dito oemete huiyatiya Ya꞉sutamo kuba huiya kikamema꞉.
MAR 15:12 Ba꞉bene Paeletete iba꞉tamo gala na꞉kagoiya꞉, “Ba꞉moe dubu la꞉le Yu tawakalubino Ko Gawadubuma꞉ da꞉ga꞉lanama, nale ebe keba ka꞉na na꞉kamitimo?”
MAR 15:13 Iba꞉te ga꞉ga꞉lo na꞉ga꞉luya꞉, “Keha pihigamo pihomotete, ikoko nalukulima꞉!”
MAR 15:14 Ba꞉bene Paeletete na꞉goiya꞉, “Bada mabuma꞉? Ebete bada kuba kododi?” Huiyatiya iba꞉te konomamo ga꞉ga꞉lo gala na꞉kaga꞉luya꞉, “Keha pihigamo ebe na꞉pihomota꞉!”
MAR 15:15 Ba꞉bema꞉ Paeletete ba꞉bi tawakalubi kokalakaluilamema꞉ ubi ba ihate, ebete Balabasiko du genamane ba꞉ dito oemiya꞉, huiyatiya ebete ebeno alaholohopi na꞉goelamiya꞉ iba꞉te Ya꞉suku giya꞉pa꞉pa꞉mo ka꞉na꞉miga꞉tima꞉. Ba꞉bene ba꞉be komo da꞉wibuya꞉ ebete Ya꞉suku iba꞉tamo dito ikalamiya꞉, iba꞉te ebe keha pihigamo pihomotete ikoko kalukulimima꞉.
MAR 15:16 Ba꞉ba tetelo alaholohopi dubate Ya꞉suku na꞉magatuya꞉ Loma gabomanino ko genama guamo, ba꞉be genamoeno mahilo ba꞉ Pelatoliyamala, ba꞉bene iba꞉te ibino alaholohopino kapiyuimi dubu hiliyonomo ka꞉lamiti iba꞉go ba꞉bo nekapiyuya꞉.
MAR 15:17 Iba꞉te Ya꞉suku ba waliti huiya konomo hawihawi kaliko ebetamo ba꞉bo pulimiya꞉, ba꞉gala iba꞉te olagoeno tupina nelawete anagogobeya꞉midahalo a꞉dete ebeno watamo dito pulimiya꞉.
MAR 15:18 Ba꞉bene iba꞉te ebe iya꞉da꞉telo na꞉ga꞉luya꞉, “A꞉iye! Yu tawakalubino Ko Gawadubu, ama꞉ nolata!”
MAR 15:19 ba꞉gala iba꞉te ebe kukamo watolo anagalimihote ebetamo kowe mehoholete, iba꞉te ebe ba waliti ibino pupamo ahiditi ebetamo ba꞉bo papamila꞉huya꞉.
MAR 15:20 Iba꞉te ebe waliti da꞉wibuya꞉, hawihawi kaliko ebeno apene pekanamete ebeno kalikonomo gala dito kapulimiya꞉, ba꞉bene iba꞉te ebe na꞉magatuya꞉ keha pihigamo ebe konepihomotema꞉.
MAR 15:21 Ba꞉ba tetelo eta dubu Saimonoko ebe ba꞉ Sailiniya habanapila, ebe ba꞉ A꞉lesandako ba꞉gala Lupasiko ibino nabiwila, ebete gobogobone ko habamo ba꞉moe gabodo ba pita, alaholohopa꞉te ebe duhimiti ba꞉bo lawiya꞉ Ya꞉sukunu keha pihiga kagatamema꞉.
MAR 15:22 Ba꞉bene iba꞉te Ya꞉suku na꞉magatuya꞉ Gologota hakamo, ba꞉be hakoeno mahilo ipuwa ba꞉ ‘Wato Gohala.’
MAR 15:23 Ba꞉bolo iba꞉te helo gao beya ba꞉gala temeteme uliha꞉ kaka mulamula kapiyuilamete ebetamo dikamiya꞉ Ya꞉suti kaniya꞉ha꞉.
MAR 15:24 Ba꞉bene hegelate nanekela꞉mo da꞉podolatepuya꞉ 9 koloko tetelo, alaholohopa꞉te Ya꞉suku kehamo pihomotete ikoko ba꞉bo alukulimiya꞉, ba꞉gala iba꞉te nakola hegehege iya꞉hekeholo iya꞉da꞉mi komo ba ododi ebeno kaliko hiya꞉hiya꞉ uwatemete ba꞉bo alabahamiya꞉.
MAR 15:26 Ba꞉ba tetelo iba꞉te Ya꞉sukunu hoe mabu hawakalimima꞉ tabo hunamo ba꞉ma ka꞉na miya꞉tiya꞉, “Ba꞉moe dubu ba꞉ Yu tawakalubino Ko Gawadubula,”
MAR 15:27 ba꞉gala iba꞉te pilo dubu netewa Ya꞉sukuba꞉ hiya꞉hiya꞉ kehamo a꞉kapihomolateliya꞉, eta tu hapuamo, eta pele hapuamo.
MAR 15:28 Ba꞉be komote ba꞉ ba꞉ma ka꞉na uluhukuya꞉, Godote ebeno Bukamo dopamo da꞉miya꞉tiya꞉ ba꞉be tabote hibima꞉ keda꞉ma꞉, iyo, ebeno Bukalo tabote ba꞉ma ka꞉na itana, “Iba꞉te ebe kubapa꞉go kapiyama꞉ midiya꞉.”
MAR 15:29 Ba꞉bene puya꞉te ba꞉be gabodo da꞉petolamitiya꞉ iba꞉te Ya꞉suku iduduputimilo niya꞉da꞉titiya꞉, iyo, iba꞉te ibino wato wagegelatelelo na꞉ga꞉lutiya꞉, “A꞉iye! Ama꞉ Godokono Genama anabulimiti, netewa-kapiya hegelalo gala etema꞉ da꞉goi, ama꞉ ba꞉be lumagilata!
MAR 15:30 Wadiyala ama꞉ ha꞉kiya amia꞉no ka꞉ka꞉ mula꞉te keha pihiga hununi hopamo na꞉pihitiga!”
MAR 15:31 Ba꞉ba tetelo Godotamo hawa꞉goeno ikamehopino watowatopa꞉te Godokono Tutumu iya꞉tulamepa꞉go Ya꞉suku atumu na꞉ka-iya꞉da꞉titiya꞉, ba꞉ma ka꞉na etate etatamo goenakui, etate etatamo goenakui, ba꞉ba ka꞉na ewagelitiya꞉, “Ya꞉suti komo tawakalubino olalati komo bemula꞉lelamenakui, huiyatiya ebe ha꞉kiya ebeno ka꞉ka꞉ mula꞉ wadiyaha꞉!
MAR 15:32 Ebete Godokono Oemedawa ba꞉gala Isalaela tawakalubino hibi Ko Gawadubuma꞉ deda꞉na, wadiyala ebete keha pihiga hununi hopamo na꞉pihitigana, iyo, ale ba꞉be komo umiti ebe hibima꞉ ba꞉bo komidima꞉nema꞉!” Ba꞉ba tetelo eba꞉go da꞉pihomolateliya꞉, ba꞉bi dubu netewapa꞉te atumu Ya꞉suku iduduputimilo kuba tabo bekaga꞉lutiya꞉.
MAR 15:33 Ba꞉bene hegelate tuli teta꞉mo dutiya꞉ hopo konomote ba꞉bo duya꞉. Ba꞉ba tetelo du komote hegeloeno alo ba mula꞉, hegelate a꞉hiwate nanekela꞉mo a꞉nihitigatepaniya꞉, hegela tuli tetene tupuimiti 3 koloko teta꞉mo.
MAR 15:34 Ba꞉bene Ya꞉suti Yu tawakalubino tabamo ibulunomamo na꞉goeniya꞉, “Elai, Elai, lama sabakatani?” ba꞉moe taboeno ipuwa ba꞉ma ka꞉na itana, “Naeno Godo, naeno Godo, na ama꞉le badama꞉ ka꞉miya꞉pana꞉wa?”
MAR 15:35 Komo ba꞉bolo da꞉pola꞉nuya꞉ iba꞉te ebeno tabo ulinate na꞉ga꞉laniya꞉, “Numa꞉la꞉, ebe Elayako beka꞉mina!”
MAR 15:36 Ba꞉bene kapiya dubu nipuliganate, humago kaka gao beyamo nadutinate pudamo negalapata꞉midanate Ya꞉sutamo ba nikamena na꞉goeniya꞉, “Hiya꞉, a kumitotiya꞉! Elayate ebe pelawete hopamo da꞉padipotemene!”
MAR 15:37 Ba꞉ba tetelo Ya꞉suti ibulunomo goewatanate hoenomo ba꞉bo hoeniya꞉.
MAR 15:38 Ba꞉bene Godoko Adikumino Hiya꞉ Genamoeno kaliko ubiliti tulituliya bolagale hununi tupuiminate hopamo ba꞉bo pihitiganiya꞉.
MAR 15:39 Ba꞉gala Ya꞉sukunu holoholo hapulu da꞉la꞉nuya꞉, ba꞉be alaholohopino gawadubuti Ya꞉suti keba ka꞉na ka꞉hoeniya꞉ ba꞉be komo uminate na꞉goeniya꞉, “Hibila, ba꞉moe dubu ba꞉ Godokono Gudula!”
MAR 15:40 Ba꞉ba tetelo komo kamenakamenate Ya꞉suku umima꞉ muhuluni putitataniya꞉, ibi ba꞉ puya꞉te eba꞉go Yelusalemamo da꞉pelamiya꞉ ba꞉bi kamenakamenala, ba꞉gala ibi ipuwalo Salomiko, ba꞉gala Magadalanapi Ma꞉liko, ba꞉gala eta Ma꞉li ebeno gugudi netewa Yausesiko ba꞉gala Deha꞉potodawa Ya꞉imesiko, ba꞉moi ba꞉te pola꞉nuya꞉. Ba꞉ hibila, Ya꞉suti Ga꞉lili hopolo da꞉pata꞉nami ba꞉moi netewa-kapiya kamenakamenate ebe hidonomamo owalubinama꞉.
MAR 15:42 Gapogapo tetelo A꞉limitiya habanapi Yausepete na꞉peniya꞉, ebe Yunapi Ka꞉nisolo ipuwalo eta tuputupu lumagima꞉ eda꞉nami, iyo, ebete Godokono Ko Gawadubuma꞉ eda꞉ tete belatiminami. Ba꞉bene ebete ba꞉ma ka꞉na pemalagidoloniya꞉, ba꞉be hegela ba꞉ Yu tawakalubino okoha꞉ hegeloeno ilina hiduilame tetela mabu dumutu ba꞉ talona hegelala, ba꞉bema꞉ ebete tonate Paeleteko toleheno na꞉nikiyameniya꞉ Ya꞉sukunu ape lawenama꞉.
MAR 15:44 Paeletete ba꞉be tabo ulinate koamo la꞉wa꞉nate ukuilo na꞉goeniya꞉, “Ya꞉suku ya꞉lo a꞉ka꞉haa꞉ka?” ba꞉bema꞉ ebete alaholohopino gawadubu ebetamo ka꞉minate Ya꞉sukunu hibi hoe komoma꞉ ebe ba꞉bo alateda꞉niya꞉.
MAR 15:45 Ba꞉bene Paeletete alaholohodawa gawadubugodone Ya꞉sukunu hoe tete ulinate Yausepetamo modobo tabo ba꞉bo goeniya꞉ ebete Ya꞉sukunu ape lawenama꞉.
MAR 15:46 Ba꞉bene Yausepete hidonomo keyakeya kaliko mana꞉mo lawenate Ya꞉sukunu ape hopamo padipotenate, hido kalikamo a꞉wa꞉tinate nakola bobo ipuwamo ba꞉bo nihateniya꞉, ba꞉be bobo tawakaluba꞉te iya꞉ha꞉midale nakola haka ba aligi ya꞉lo ba꞉bo ododiya꞉. Ba꞉ba tetelo Yausepete ko nakola emokamidanate bobo gigiho ba꞉bo netakuminiya꞉,
MAR 15:47 ba꞉bene Magadalanapi Ma꞉liko ba꞉gala Yausesikono menoko Ma꞉liko, Yausepete Ya꞉sukunu ape dihateniya꞉ iba꞉te ba꞉be bobo haba uminiya꞉.
MAR 16:1 Ba꞉bene Yu tawakalubino okoha꞉ talona hegela tete da꞉wibuya꞉, Magadalanapi Ma꞉liko, Ya꞉imesikono menoko Ma꞉liko, ba꞉gala Salomiko, iba꞉te tolamenate hido nibo ilina mana꞉mo na꞉nuwatehoniya꞉ eta hegelalo Ya꞉sukunu apa꞉mo kopabutilamelemema꞉.
MAR 16:2 Ba꞉bene Sande hegela duiduiyanomolo hegela ba owalohuta, iba꞉te nakola bobo habamo da꞉tolamitiya꞉
MAR 16:3 na꞉nega꞉luya꞉, “Bobo gigiholo ditana ba꞉be ko nakola tama꞉mo pote na꞉ka꞉nemokamidaa꞉memene?” Iba꞉te ba꞉ma ka꞉na ga꞉lutiya꞉ mabu ba꞉be nakola menemenenomola, huiyatiya iba꞉te hidamo ba gahilamehole ba꞉be ko nakola tama꞉mo ya꞉lo emokamida ba itana ba꞉bo umiya꞉.
MAR 16:5 Ba꞉bene iba꞉te nakola bobo ipuwamo nogomote, uli ape dubu ga꞉ga꞉ keyakeya kaliko puliti tu hapulu da꞉lutiya꞉ numiti konomamo nehanohanohutiya꞉.
MAR 16:6 Ebete iba꞉tamo na꞉goiya꞉, “La꞉ akahanohanohala꞉! Nasaletenapi Ya꞉suku tawakaluba꞉te ebe keha pihigamo da꞉pihomoti, la꞉le ebe bohowaditamata. Ebe malo puliyala, ebe a꞉mahigaka! Iba꞉te ditidi gapogapolo ebe dihateni ba꞉be haba la꞉ numa꞉la꞉.
MAR 16:7 Ba꞉bema꞉ la꞉ tolamete Pitako ba꞉gala komo ebe ta꞉matapi na꞉nikiyalama꞉la꞉, ‘Ya꞉suti Ga꞉lili hopamo dopamo kotoma꞉ne. La꞉ tolamete ebe ba꞉bo konumima꞉nemata, ebete la꞉ dopamo keba ka꞉na ka꞉kiyalamiti ba꞉ba ka꞉na.’”
MAR 16:8 Ba꞉bene iba꞉te hanohanoholo lililahala꞉go nakola bobo ipuwane pikuliti ba꞉ dito pipulila꞉huya꞉, huiyatiya iba꞉te eta lumagi kanikiyamiya꞉ha꞉ mabu iba꞉te koamo toletolehutiya꞉.
MAR 16:9 Ba꞉be Sande hegela duiduiyanomolo Ya꞉suti hoe ipuwane mahigate Magadalanapi Ma꞉litamo dopamo nuluhukuya꞉, ba꞉be kamenagodone Ya꞉suti dopamo sa꞉ba꞉ni kuba gobogobo boelamiya꞉.
MAR 16:10 Ba꞉bema꞉ Ma꞉liti tote, puya꞉te dopamo Ya꞉sukuba꞉ da꞉wapata꞉lamenama꞉ ba꞉bi tawakaluba꞉te ba ihimita ibi ba꞉bo nikiyalamiya꞉,
MAR 16:11 huiyatiya iba꞉te Ya꞉sukunu ka꞉ka꞉mo mahiga komo ba꞉gala Ma꞉liti ebe dumiya꞉, iba꞉te ba꞉be tabo uliti hibima꞉ kamidiya꞉ha꞉.
MAR 16:12 Galane Ya꞉sukunu ta꞉matapi netewapa꞉te Yelusalema ko habane ba tuta, Ya꞉sukunu apete hiya꞉ma꞉ eda꞉mete ebete iba꞉tamo ba꞉bo nuluhukuya꞉.
MAR 16:13 Ba꞉bene ibi netewapa꞉te gala na꞉katuya꞉ komo ta꞉matapi konikiyalamema꞉, huiyatiya iba꞉te ba꞉be tabo uliti hibima꞉ kamidiya꞉ha꞉.
MAR 16:14 Galane Ya꞉sukunu 11 ta꞉matapa꞉te ahiditi baa꞉ ba nahuta Ya꞉suti iba꞉tamo ba꞉bo nuluhukuya꞉, ba꞉bema꞉ ebete ibi koamo kiyahalamiya꞉ mabu iba꞉te ibino tepo ipuwalo kodakodahibima꞉ ba eda꞉ha hibima꞉ kamidiya꞉ha꞉, iyo, komopa꞉te ebeno ka꞉ka꞉ komo umiti ibi da꞉pikiyalamiya꞉, iba꞉te ibino tabo uliti ebeno hoe ipuwane mahiga komo iba꞉te hibima꞉ kamidiya꞉ha꞉.
MAR 16:15 Ba꞉bene Ya꞉suti iba꞉tamo na꞉goiya꞉, “La꞉ hopo konomamo tolamete Godokono Hido Tabo hiliyonomo hiya꞉hiya꞉ tawakaluba꞉tamo na꞉nolamagiminakuya꞉la꞉.
MAR 16:16 Kebe lumagiti hibima꞉ miditi ba꞉bene beyamo aduti komo da꞉lawemene, Godote ebeno ka꞉ka꞉ komula꞉mema꞉ne, huiyatiya kebe lumagiti hibima꞉ midihino Godote ba꞉be lumagino komo anagiya꞉midamete ebetamo kuba huiya hibilo kikamema꞉ne.
MAR 16:17 Ba꞉ hibila, Godokono helo hawakalimima꞉ hanohano komate hibima꞉ midipa꞉godolo kopola꞉nama꞉na꞉. Iyo, iba꞉te naeno mahilamo tawakaluba꞉godone kuba gobogobo boelamenakomena꞉ ba꞉gala iba꞉te Hunu Haboeno nopopino hiya꞉hiya꞉ tabamo bolamagiminakomena꞉.
MAR 16:18 Ba꞉bene iba꞉te kalu kokotamo duwateholenakomena꞉ ba꞉gala iba꞉te hoe beya da꞉nihonakomena꞉, ba꞉bi komate ibi a꞉kakubahilamenakamena꞉, ba꞉gala iba꞉te temetema꞉gopa꞉tamo ibino kokoto demowatilamenakomena꞉, ba꞉ba tetelo ba꞉bi temetema꞉gopa꞉te ba꞉hidohidohonakomena꞉.”
MAR 16:19 Ba꞉bene Kodawa Ya꞉suti iba꞉tamo tabo olamagi da꞉wibuya꞉, Godote ebe pelawete Hunu Habamo ba꞉bo adipatiya꞉, ba꞉bolo ebete Godokono tu hapuamo ba꞉ dito nemediya꞉.
MAR 16:20 Ba꞉bene ta꞉matapa꞉te tolamete hiliyonomo hiya꞉hiya꞉ hopolo Godokono tabo ba nolamagimi, Kodawa Ya꞉suti iba꞉go kapimilo Godokono oko na꞉nowatinami, iyo, ba꞉ba tetelo ebete Godokono helo hawakalimino hanohano komokomo ipuwado ba꞉be Hido Tabo na꞉neheluiminami.
LUK 1:1 Naeno hido lumagi Tiyopolasi, nolata. A ipuwalo kebe komokomate ya꞉lo dikulihuya꞉, puya꞉te tupuimi mabuni ibino baidinomamo ba꞉bi komo dulameholiya꞉, komo iba꞉te Godokono Hido Tabo ba olamagimi ba꞉bi atu komokomo a ba꞉gala komo tawakalubi hiliyonomo ba꞉bo kiyahaa꞉miya꞉. Ba꞉ hibila, ba꞉ba tetene tupuimiti komopi hiliyonomate ba꞉bi komokomo pepamo hibinomolo miya꞉tehoma꞉ newagelenama꞉, huiyatiya ibi ipuwalo etate oko hidamo kupuliya꞉ha꞉.
LUK 1:3 Ba꞉bema꞉ naeno kodawa, nale ba꞉moi hiliyonomo komokomo ibino tupuilame mabuni hidonomamo ba emalagidolenape, naeno tepo ipuwoeno ukuilo ubi ba꞉bo ihatimo ama꞉tamo buka ododiti ba꞉moi komokomo kotuputupuilamema꞉,
LUK 1:4 iyo, komopa꞉te ama꞉ diya꞉tumihui, ama꞉le ba꞉bi hiliyonomo komokomo hibinomolo kiya꞉tawahama꞉, nale ba꞉moe komo ba꞉bema꞉ ododimo.
LUK 1:5 Ba꞉ba tetelo Heloditi Yudiya hopoeno Ko Gawadubuma꞉ ba eda꞉na, eta dubu ebeno mahilo Sekalayatela, ebete Abayakono kapiyuimidawama꞉ eda꞉nami, ebe ba꞉ Godotamo hawa꞉goeno ikamehodawa etala. Ebeno kamenoeno mahilo Elisabetitila, ba꞉be kamenoeno nabiwi atumu Godotamo hawa꞉goeno ikamehodawala.
LUK 1:6 Ba꞉bene ibi netewapino emede komote Godokono holoholo hapulu tuputupunomoma꞉ ba eda꞉na, iba꞉te ebeno hiliyonomo tutumu tabamo hibinomolo papamila꞉nama꞉.
LUK 1:7 Huiyatiya ibi niliya, iba꞉godolo gudu puliyanomola mabu Elisabetiko hogoha꞉ kamenama꞉ eda꞉nami, iyo, Sekalayako ba꞉gala Elisabetiko iba꞉te kadele kabelenomoma꞉ ba eda꞉ha gudu umi wadiyaha꞉.
LUK 1:8 Ba꞉bene eta manomelo Sekalayakono gu tawakalubino tetete uluhukuya꞉, iba꞉te Godoko Adikumino Hiya꞉ Genamalo hiya꞉hiya꞉ oko kopowatihoma꞉. Ba꞉bema꞉ eta hegelalo Sekalayate ba꞉bolo oko nowatitiya꞉,
LUK 1:9 mabu ba꞉be hegelalo ebeno tawakaluba꞉te Godokono ubi komamo papamila꞉halo ebe belawiya꞉, ebete Godoko Adikumino Genama guamo na꞉pa꞉gate, ba꞉bolo ebete hido nibo puhulu ilina patapata hunamo ba nehaminahale Godotamo konikamehoma꞉.
LUK 1:10 Ba꞉bene ba꞉bi ilinate koelo ba wamotita tawakalubi hiliyonomate Godoko Adikumino Genama tamelo ibino toetoe tabo Godotamo ba꞉bo nolamagimitiya꞉.
LUK 1:11 Ba꞉ba tetelo Godokono nopodawate hido nibo puhulu ilina wamoteno patapata tu hapudu ba pehawakala Sekalayako kapiyatamo ba꞉bo puluhukuya꞉,
LUK 1:12 ba꞉bene ebete ebe umiti ukui bilibilinomoma꞉ eda꞉lo konomamo toletoliya꞉.
LUK 1:13 Huiyatiya nopodawate ebetamo na꞉goiya꞉, “Sekalaya, ama꞉ akatoletola꞉la꞉. Godote amia꞉no toetoe tabo uli, ba꞉bema꞉ amia꞉no kamena Elisabetiti dubu gudu kalahimima꞉ne. Ama꞉ ebeno mahilo Yonema꞉ na꞉ka꞉miya꞉.
LUK 1:14 Ba꞉ hibila, ebete da꞉hawakalamene ama꞉ konomamo ba꞉bo kokalakalama꞉na꞉ta, ba꞉gala tawakalubi hiliyonomate ba꞉be mabuma꞉ atumu konomamo kakakalakalahama꞉na꞉.
LUK 1:15 Ebete menokoeno tepolo ba emedena Godokono Gobogobote ebe ya꞉lo kotabuimima꞉ne, ba꞉bema꞉ Godokono dopo hapulu ebete kodawama꞉ keda꞉ma꞉ne, ba꞉gala ebete helo gao beya a꞉kaninakamene.
LUK 1:16 “Ba꞉ hibila, ebete hiliyonomo Isalaela tawakalubi ibino Kodawa Godotamo gala kakamagahelema꞉ne,
LUK 1:17 iyo, ebete aeno Kodawa dopamete kotoma꞉ne ba꞉gala Hido-talona Gobogobote ebe hunamo ba emede ebete helonomoma꞉ keda꞉ma꞉ne, Godokono ukui hawakalimidawa Elayako keba ka꞉nala꞉ka꞉ ba꞉ba ka꞉na. Ba꞉bema꞉ ebete nabi ba꞉gala gugudi kapiyama꞉ gala kakamidilima꞉ne, iyo, ebete Godokono tabo ulihoha꞉pino ukui hiya꞉ma꞉ midililamete kotuputupuilamelelamema꞉ne, ba꞉gala ebete Kodawoeno tawakalubi kohiduilamema꞉ne ebeno pe komoma꞉.”
LUK 1:18 Sekalayate Godokono nopodawatamo na꞉goiya꞉, “Na ba꞉moe komo hibinomolo keba ka꞉na na꞉kiya꞉tawamo, mabu na kadelenomola ba꞉gala naeno kamena kabelenomola?”
LUK 1:19 Ba꞉bene Godokono nopodawate na꞉huiyuya꞉, “Na ba꞉ Ga꞉ibiliyolotela, Godokono holoholo hapulu la꞉nanakomo, iyo, na ebete poename ba꞉moe hido tabo ama꞉ kopikiyamema꞉.
LUK 1:20 Naeno tabote hibinomoma꞉ keda꞉ma꞉ne, huiyatiya ama꞉le ba꞉be tabo hibima꞉ kamidiha꞉, ba꞉bema꞉ ba꞉ma tetene tupuimiti ba꞉be hibi komote puluhuku teta꞉mo ama꞉ tabo olamagiha꞉ma꞉ keda꞉ma꞉na꞉ta.”
LUK 1:21 Ba꞉ba tetelo hiliyonomo tawakaluba꞉te Sekalayakono puluhuku komo ba latimita iba꞉te na꞉ga꞉litiya꞉, “Tete ga꞉ga꞉nomolo ebete Godoko Adikumino Genamalo badama꞉ ka꞉luta?”
LUK 1:22 Ba꞉bene ebete Godoko Adikumino Hiya꞉ Genamane da꞉puluhukuya꞉ tawakaluba꞉tamo tabo olamagima꞉ kapemodobuya꞉ha꞉. Huiyatiya ebete iba꞉tamo kokotamo da꞉polamagiya꞉, ba꞉be komodo iba꞉te ba꞉ma ka꞉na iya꞉tawahuya꞉, ebete Godokono Genamalo ba luta, Godokono nopodawate ebetamo duluhuku ebeno baidi hiya꞉ma꞉ ba꞉bo eda꞉hame.
LUK 1:23 Ba꞉bene Sekalayakono oko tetete Godoko Adikumino Genamalo da꞉wibuya꞉, ebete ebeno habamo ba꞉bo tuya꞉.
LUK 1:24 Ba꞉bene komo hegela da꞉petohuya꞉ ebeno kamena Elisabetiti lamituma꞉ dediya꞉, ebete ba꞉ba tetene tupuimiti paibo manome ipuwalo ebeno genamanomolo emediya꞉.
LUK 1:25 Ba꞉ba tetelo ebete ebeno tepo ipuwalo tabo ba꞉ma ka꞉na goiya꞉, “Ka꞉lo kuititi hegela tetenomolo Godote na a꞉malemalenateni, iyo, ebete gudu natamo ba ikaname naeno hilopo komo gobogobamo ihatenami.”
LUK 1:26 Ba꞉bene Elisabetiti lamituma꞉ eda꞉te, sikisi manome da꞉petohuya꞉ Godote ebeno nopodawa Ga꞉ibiliyoloko Ga꞉lili hopoeno Nasalete habamo ba꞉bo poemiya꞉.
LUK 1:27 Ebete bohele Ma꞉litamo Godokono nopo badahiya꞉, ba꞉be bohele dopamo Yausepetamo a꞉galuimiya꞉, ba꞉moe dubu Yausepeko ba꞉ Ko Gawadubu Da꞉ibidikono eyono gudu etala.
LUK 1:28 Ba꞉bene nopodawate Ma꞉liko na꞉pegoemiya꞉, “Ama꞉ nolata, Kodawa Godote ama꞉ malemalelo a꞉lawia꞉ta! Ebete ama꞉go bemedena!”
LUK 1:29 Ba꞉bema꞉ Ma꞉liti ba꞉be tabo duliya꞉ ukui bilibilinomoma꞉ eda꞉lo ebeno tepo ipuwalo na꞉goiya꞉, “Moe komo badala꞉ka꞉?”
LUK 1:30 Nopodawate ebetamo na꞉goiya꞉, “Ma꞉li, ama꞉ akatoletola꞉la꞉, mabu Godote ama꞉ ba꞉ma ka꞉na a꞉malemaleta꞉ta,
LUK 1:31 ama꞉le lamituma꞉ eda꞉te dubu gudu kalahimima꞉na꞉ta, ba꞉bene ama꞉ ebeno mahilo Ya꞉suma꞉ na꞉ka꞉miya꞉.
LUK 1:32 Ebete konomoma꞉ keda꞉ma꞉ne, tawakaluba꞉te ebe Hununomo Godokono Guduma꞉ ba꞉ka꞉minakomena꞉, iyo, Godote ebe Ko Gawadubuma꞉ komidima꞉ne, ebeno iniwa Da꞉ibidiko keba ka꞉na kemedenami ba꞉ba ka꞉na.
LUK 1:33 Ba꞉bema꞉ hibila, Ya꞉ikobokono eyoni gugudi ipuwalo ebete emedena emedena tetelo Ko Gawadubuma꞉ beda꞉namene, iyo, ebeno Ko Gawadubuma꞉ eda꞉ komote a꞉kawibonamene.”
LUK 1:34 Ma꞉liti huiyatiya nopodawatamo na꞉goiya꞉, “Na bohelenomola ba꞉gala na awihinola. Ba꞉moe komote natamo keba ka꞉na na꞉kuluhukumini?”
LUK 1:35 Nopodawate ebetamo na꞉huiyuya꞉, “Hido-talona Gobogobote ama꞉tamo kopema꞉ne, ba꞉gala Godokono helote ama꞉ hunamo kemedema꞉ne, ba꞉bema꞉ ama꞉le dalahimimina꞉ ba꞉be talona gudu tawakaluba꞉te Godokono Guduma꞉ ba꞉ka꞉minakomena꞉.
LUK 1:36 Ama꞉ amia꞉no menokoeno naniko Elisabetikono komo nemalagidola. Dopamo tawakaluba꞉te na꞉ga꞉lanakuya꞉ ebe hogoha꞉ kamenala, huiyatiya ebete kabele tetelo lamituma꞉ eda꞉te sikisi manome ba꞉ a꞉wibui.
LUK 1:37 Ba꞉ hibila, hiliyonomo komokomo ododilima꞉ Godogodolo helo bitana, eta ododiha꞉ komote ebegodolo kitanaha꞉.”
LUK 1:38 Ba꞉bema꞉ Ma꞉liti na꞉goiya꞉, “Na Kodawa Godokono huiyaha꞉ oko bohelela. Wadiyala ama꞉le da꞉gaa꞉, ba꞉be komote nuluhukamene,” ba꞉bene Godokono nopodawate ebegodone ba꞉ dito tuya꞉.
LUK 1:39 Ba꞉ba tetelo Ma꞉liti tiyonomo mahigate Yudiya hopoeno hunuhunu hakamo tote eta muhulu habamo dito nuluhukuya꞉.
LUK 1:40 Ba꞉bene ebete Sekalayakono genamamo nodolote Elisabetiko ba na꞉pa꞉watameho ebetamo nolata tabo ba꞉bo nolamagiya꞉.
LUK 1:41 Ba꞉bema꞉ Elisabetiti Ma꞉likono nolata tabo duliya꞉, ba꞉ba tetenomolo ebeno tepo ipuwalo guduti ko kalakala lawete ba꞉bo midiwihuya꞉. Ba꞉bene Godokono Gobogobote Elisabetikono tepo ipuwa da꞉tabuimiya꞉,
LUK 1:42 ebete tabo hunamo adipatelo Ma꞉litamo na꞉goiya꞉, “Hiliyonomo kamenakamena ipuwalo Godote ama꞉ hunamo adipatelo hidonomamo bowalubinamena꞉ta, ba꞉gala ama꞉le dalahimimina꞉ Godote ba꞉be Kodawa atumu emedena tetelo bowalubinamene.
LUK 1:43 Naeno Kodawoeno menoko, ama꞉le na unamema꞉ da꞉pa꞉ kalakala konomola, huiyatiya ba꞉moe hidonomo komote na kuba lumagitamo badama꞉ kuluhuku?
LUK 1:44 Ba꞉ hibila, nale amia꞉no tabo dulimo, ba꞉ba tetelo naeno tepo ipuwalo guduti ko kalakala lawete ba꞉bo midiwiho,
LUK 1:45 ba꞉bema꞉ ama꞉tamo kalakala bada konomola꞉ka꞉, mabu ama꞉le Godoko hibima꞉ a꞉midia꞉ta ebeno tabote ama꞉ ipuwado hibinomoma꞉ keda꞉ma꞉ne!”
LUK 1:46 Ba꞉bene Ma꞉liti na꞉goiya꞉, “Naeno emalagidolote Godoko nawagaminuta,
LUK 1:47 iyo, naeno tepo ipuwate naeno Ka꞉ka꞉ Mula꞉dawa Godotamo na꞉kalakaluta,
LUK 1:48 mabu ebete na emalagidolonelo kalakala komo ododi na ebeno deha꞉poto huiyaha꞉ oko boheletamo! Ba꞉bema꞉ ba꞉ma tetene tupuimiti emedena emedena tetelo tawakalubi hiliyonomate na kalakala lumagima꞉ ba꞉ka꞉naminakomena꞉,
LUK 1:49 mabu Helonomo Godote natamo koko hidohido komo ododili, iyo, ba꞉be Kodawoeno mahilo ba꞉ talonala!
LUK 1:50 “Ba꞉ hibila, puya꞉te ebe da꞉tolemena ebete iba꞉tamo malemale bihatenakomene, iyo, tawakaluba꞉te ba꞉moe hopolo tete ga꞉ga꞉nomolo ba emedehona, ebete iba꞉tamo ba꞉ ba꞉ma ka꞉na bewagelenakomene.
LUK 1:51 Ba꞉bema꞉ a tetelo ebete ebeno kokotamo koko komokomo ododili, ba꞉gala puya꞉te ibi ha꞉kiya awagahalo kokoma꞉ da꞉ga꞉lui, ebete ibino nopo kubahilamete ebeno heloamo ibi a꞉ta꞉malateli.
LUK 1:52 “Ba꞉gala ebete koko gawadubu ibino helo habane tama꞉mo a꞉miya꞉ti, huiyatiya ebete ba꞉be atu tetelo hegehege tawakalubi a꞉wadiya꞉paa꞉lateli.
LUK 1:53 Iyo, puya꞉te awaelo demedehonama꞉, ebete ibi hidohido ilinamo ba tabuilame, huiyatiya dogodogo ilinagopi ilinaheno dito oelami.
LUK 1:54 “Ba꞉bema꞉ hibila, ebete aeno iniwala꞉tamo hibinomolo da꞉goiya꞉, ba꞉be tabote a tetelo ba꞉ na꞉hawakala, iyo, tete tatalila ebeno owalubi komote kuluhukuma꞉ne ebeno huiyaha꞉ okodawa Isalaelatamo. Ba꞉moe ba꞉be mabuma꞉ Godote A꞉ibalahamatamo kebe malemale ka꞉hawakalimiya꞉, ba꞉be malemala꞉mo ebeno eyoni gugudi emedena tetelo bemalagidolenamene!”
LUK 1:56 Ma꞉liti ba꞉moi tabo komokomo olamagi da꞉wibuya꞉, ebete netewa-kapiya manome Elisabetikoba꞉ emedete, ba꞉bene ebete ebeno habanomamo gala dito katuya꞉.
LUK 1:57 Ba꞉bene Elisabetikono gudu alahimi tete da꞉piya꞉ ebete dubu gudu alahimiti,
LUK 1:58 ebe tamelo demedehonama꞉ ba꞉gala ebeno mabu tawakalubi, iba꞉te Godokono hido owalubi komo Elisabetigodolo umiti eba꞉go na꞉kalakalahuya꞉.
LUK 1:59 Ba꞉bene sa꞉ba꞉ni hegela da꞉petohuya꞉, a꞉iti hegela tetelo iba꞉te dubu guduino tama itamida kukala ododima꞉ ba꞉bo pelamiya꞉. Ba꞉ba tetelo komopa꞉te ubi bihatiya꞉ ba꞉be gudu ebeno nabiwi Sekalayakono mahilamo koka꞉mima꞉,
LUK 1:60 huiyatiya ebeno menokote na꞉goiya꞉, “Ao, la꞉ ebeno mahilo Yonema꞉ na꞉ka꞉ma꞉la꞉.”
LUK 1:61 Ba꞉bene iba꞉te la꞉wa꞉hate ebetamo na꞉ga꞉luya꞉, “Numa꞉, la꞉eno tawakaluba꞉godolo ba꞉moe mahilo kitanaha꞉!”
LUK 1:62 Ba꞉bema꞉ iba꞉te ebeno nabiwitamo kokotamo ba ga꞉la ebe nalatediya꞉, ebeno ubi keba ka꞉na kitana gudutamo mahilo kikamema꞉.
LUK 1:63 Ba꞉bene Sekalayate kokotamo olamagilo komopa꞉te tabo miya꞉teno ilina adahemema꞉ da꞉goelamiya꞉, ebete ba꞉be ilina lawete ba꞉ma ka꞉na miya꞉tiya꞉, “Ebeno mahilo Yonetela.” Ba꞉be mabuma꞉ iba꞉te konomamo hanohanohuya꞉,
LUK 1:64 ba꞉bene ba꞉ba tetenomolo Sekalayakono tabo olamagi komote da꞉kahidomiya꞉, ebete Godoko milimiho ba꞉bo tupuimiya꞉.
LUK 1:65 Ba꞉bema꞉ ebeno habanapa꞉te ba꞉bi hanohano komo dulamiya꞉ iba꞉te koamo toletolehuya꞉, ba꞉bene iba꞉te ba꞉bi komokomo tawakalubi da꞉nikiyahalamiya꞉, ba꞉be tabote Yudiya hopoeno hunuhunu hakoeno hiliyonomo habahabamo ba꞉bo tuya꞉.
LUK 1:66 Ba꞉gala puya꞉te ba꞉be tabo duliya꞉ iba꞉te ba emalagidolo na꞉ga꞉luya꞉, “Ba꞉moe gudu ebete kebako dawama꞉ na꞉keda꞉mene?” Iba꞉te ba꞉moe tabo bega꞉luya꞉ mabu ibino umi ipuwalo Godokono helote ba꞉be gudugodolo hibinomolo itanuya꞉.
LUK 1:67 Ba꞉bene Godokono Gobogobote Yonekono nabiwi Sekalayakono tepo ipuwa da꞉tabuya꞉, ebete Godokono ukui ba꞉ma ka꞉na hawakalilamiya꞉,
LUK 1:68 “Godote Isalaela tawakalubi hidonomamo dowalubilinako, ale ebe ba꞉bema꞉ komilimihoma꞉nema꞉, mabu ebete ebeno tawakalubi owalubilima꞉ ba꞉ na꞉pe, tete tatalila ebete ibino kuba ododili ipuwane ibi kopuluhukulatelema꞉ne!
LUK 1:69 Iyo, Godote a mabuma꞉ dadipati, ba꞉be Ko Ka꞉ka꞉ Mula꞉lea꞉medawate ba꞉ na꞉pe, ebe ba꞉ Godokono okodawa Da꞉ibidikono eyono gudu etala.
LUK 1:70 “Ba꞉ hibila, puya꞉te dopamo tetelo Godokono talona ipuwalo demedehonama꞉, ebete ba꞉bi okopi ipuwado ebeno ukui ba hawakalimi na꞉goiya꞉,
LUK 1:71 puya꞉te maubahalete atamo alaholoho komo dododinaka, ebete a ibino helo kokotone kuluhukua꞉tema꞉ne.
LUK 1:72 Iyo, ebete eta tabo ba꞉ma ka꞉na kagoiya꞉, ebete aeno iniwala꞉tamo ebeno malemale bihatenamene, ba꞉gala ebete iba꞉tamo kebe nopo hibinomolo da꞉tamotiya꞉, ba꞉be hido-talona tabo ba emalagidolona emedena tetelo ebete bododinakomene.
LUK 1:73 “Ba꞉gala ebete aeno iniwa A꞉ibalahamatamo hibinomolo na꞉kagoiya꞉,
LUK 1:74 puya꞉te ago dalaholohonaka, ebete a ibino kokoto ipuwane kuwatema꞉ne, ba꞉bene ale ibi tolelameheno ebe kapiyatamo oko bowatihonakoma꞉.
LUK 1:75 Iyo, ale ebeno holoholo hapulu talona tawakalubima꞉ ba eda꞉hana, ale emedena tetelo ebeno tuputupu gabodo ba꞉wapata꞉lamenama꞉.”
LUK 1:76 Ba꞉bene Sekalayate ebeno tabo moga꞉melo gala na꞉kagoiya꞉, “O naeno gudu Yone, tawakaluba꞉te ama꞉ Hununomo Godokono ukui hawakalimidawama꞉ ba꞉ka꞉minamena꞉ta, iyo, ebete da꞉poememene, ama꞉le ba꞉be Kodawoeno gabo dopamete ba tonato, ebeno gabo kohiduimima꞉na꞉ta.
LUK 1:77 Ba꞉gala ama꞉le Godokono tawakalubi ba꞉ma ka꞉na kiya꞉tulamema꞉na꞉ta, ebete ibino kuba ba egebolelame kadodoholelamema꞉ne, iyo, ebete ba꞉be gabodo ibino ka꞉ka꞉ komula꞉lelamema꞉ne.
LUK 1:78 “Ba꞉bema꞉ hibila, aeno Godote a konomamo ba malemalea꞉tena, ebeno ka꞉ka꞉ mula꞉leno alote atamo ba꞉bo kopuluhukuma꞉ne, hegelate tawakaluba꞉tamo da꞉puluhukunako ba꞉ba ka꞉na.
LUK 1:79 Ba꞉be alote ebeno Hunu Habane kopa꞉la꞉minama꞉ne, hoe ipuwalo ba꞉gala du ipuwalo demedehona ba꞉bi tawakaluba꞉tamo, ba꞉bema꞉ kalakala konomola, Godote ebeno tatabalo wapata꞉lame komoeno gabo a ba꞉bo kiya꞉tua꞉mema꞉ne.”
LUK 1:80 Ba꞉bema꞉ Sekalayakono guduti ba ape Godokono Gobogobote ebe ipuwalo helonomoma꞉ ediya꞉, ba꞉bene ebete dito hopamo tote ba꞉bo nemedenami, huiyatiya galane Godokono ubi tetelo ebete Isalaela tawakaluba꞉tamo ba꞉bo puluhukuya꞉.
LUK 2:1 Ba꞉ba tetelo Konomo Gawadubu Sisa Ogastasete hopo konomamo tabo bepoemiya꞉ hiliyonomo tawakaluba꞉te ibino mahilo gabomanino bukamo konemiya꞉tehoma꞉,
LUK 2:2 ba꞉be atu tetelo Kiliniyasete Siliya hopoeno Kapela Gawadubuma꞉ eda꞉nami. Buka ka꞉lamiholedawa, wadiyala ama꞉ niya꞉tawa, ba꞉moe ba꞉ dopo tetela hiliyonomo tawakaluba꞉te ibino mahilo gabomanino bukamo da꞉nemiya꞉tehuya꞉,
LUK 2:3 ba꞉bema꞉ hiliyonomo tawakaluba꞉te ba꞉be komo konododima꞉ ibino iniwalino hiya꞉hiya꞉ habahabamo na꞉tolameholiya꞉.
LUK 2:4 Ba꞉bene Yausepete Ga꞉lili hopoeno Nasalete habane Yudiya hopoeno Beteleheme habamo tuya꞉, mabu ebe ba꞉ Ko Gawadubu Da꞉ibidikono eyono gudu etala ba꞉gala Da꞉ibidiko Beteleheme habalo hawakaluya꞉.
LUK 2:5 Ba꞉ba tetelo Ma꞉liko ebetamo a꞉galuimiya꞉ ba꞉gala ebe lamitula, ba꞉bema꞉ ibi netewapa꞉te badi tuya꞉ iba꞉te ibino mahilo ba꞉bolo konemiya꞉tema꞉.
LUK 2:6 Ba꞉bene iba꞉te Betelehemelo ba nemede eta dulu Ma꞉likono gudu alahimi tete da꞉peniya꞉,
LUK 2:7 ebete ebeno dopo bahibahi gudu alahiminate ebe kalikamo a꞉wa꞉tinate kau-goegoeno hemo naha bokose ipuwamo dito adila꞉teniya꞉, mabu kapela tawakaluba꞉te da꞉lahanakui ba꞉be genamalo haba puliyala iba꞉te ba꞉bolo emedema꞉.
LUK 2:8 Ba꞉ba tetelo sipi-goegoe ulamepa꞉te Beteleheme haba tamelo hemohemo hopolo ibino sipi-goegoe ba ulamena,
LUK 2:9 Kodawa Godokono nopodawate iba꞉tamo pehawakalanate Godokono alo konomote ibi ba꞉bo pa꞉la꞉minaleniya꞉. Ba꞉bema꞉ iba꞉te konomamo toletolehoniya꞉,
LUK 2:10 huiyatiya nopodawate iba꞉tamo na꞉goeniya꞉, “La꞉ katoletolehonala꞉! Na la꞉tamo hido tabo badahemo, ba꞉be tabote tawakalubi hiliyonomatamo kalakala konomo kikalamema꞉ne,
LUK 2:11 mabu ka꞉lo dulu Da꞉ibidikono habalo la꞉eno Ka꞉ka꞉ Mula꞉lelamedawa a꞉hawakala, ebe ba꞉ Kodawa Kelisote, Godokono Oemedawala.
LUK 2:12 La꞉ tolamete ba꞉be gudu kalikamo a꞉wa꞉ti konumima꞉nemata, ba꞉gala ebe kau-goegoeno hemo naha bokose ipuwamo adila꞉tela, iyo, la꞉le ba꞉be hanohano komo numiti ba꞉bo kiya꞉tawahama꞉nemata naeno tabo ba꞉ hibinomola.”
LUK 2:13 Ba꞉ba tetenomolo ba꞉be nopodawago komo Godokono nopopi hiliyonomate ba꞉ dito pehawakalahaleniya꞉, ba꞉bene iba꞉te Godoko ba adipatena na꞉ga꞉laniya꞉,
LUK 2:14 “Godote ebeno Hununomo Habalo demedena, la꞉ ebe milimiholo nadipata꞉la꞉. Ba꞉moe hopolo ebete puya꞉tamo da꞉kalakalana, ebeno ka꞉ka꞉ mula꞉ komote iba꞉godolo nitanamene!”
LUK 2:15 Ba꞉bene Godokono nopopa꞉te Hunu Habamo gala da꞉kanalehawaminaniya꞉, ba꞉ba tetelo sipi-goegoe ulamepa꞉te na꞉ga꞉laniya꞉, “Kodawa Godote a da꞉goea꞉me Beteleheme habalo ka꞉lo dulu duluhuku, a ba꞉be komo umima꞉ kotolamiya꞉.”
LUK 2:16 Ba꞉bene iba꞉te tiyonomo tolamenate, Ma꞉liko, Yausepeko, ba꞉gala a꞉lia꞉li gudu kau-goegoeno hemo naha bokose ipuwamo adila꞉te, iba꞉te ibi ba꞉bo nulameniya꞉.
LUK 2:17 Ba꞉bene sipi-goegoe ulamepa꞉te gudu numinate, nopodawate ebeno komoma꞉ da꞉goeniya꞉, iba꞉te ba꞉be tabo Ma꞉liko Yausepeko ibi ba꞉bo nikiyalameniya꞉.
LUK 2:18 Ba꞉ hibila, ba꞉ba tetene tupuimiti puya꞉te sipi-goegoe ulamepino tabo dulihuya꞉ ibi hiliyonomate konomamo hanohanohuya꞉,
LUK 2:19 ba꞉gala Ma꞉liti ba꞉moi komokomo ebeno tepo ipuwamo miya꞉tenate tete hiliyonomolo koamo nemalagidolenami.
LUK 2:20 Ba꞉bene ba꞉be dulu sipi-goegoe ulamepa꞉te ba wilalena, Godoko adikuma꞉go ba꞉bo tolameniya꞉, mabu iba꞉te Godokono nopodawagodone kebe tabo kulihoniya꞉, iba꞉te ba꞉bi hiliyonomo komo hibinomolo a꞉nulameniya꞉.
LUK 2:21 Ba꞉bene wuiki kapiya wibote dubu guduino tama itamida kukala ododi tete da꞉piya꞉, Yausepeko Ma꞉liko iba꞉te ba꞉moe gudu Ya꞉suma꞉ ka꞉miya꞉, mabu ebeno menokote lamituma꞉ eda꞉heno Godokono nopodawate ba꞉moe mahilo ya꞉lo ikamiya꞉.
LUK 2:22 Ba꞉bene tete da꞉piya꞉ iba꞉te Ya꞉suku lawete Yelusalema ko habamo dito tolamiya꞉ menokola gudula ibino agima talona konupula꞉lema꞉, Godote Moseseko ipuwado tutumu tabo dihatiya꞉ ba꞉ba ka꞉na. Iyo, ba꞉be tutumu tabote Yunapi ba꞉ma ka꞉na iya꞉tulamena, agima talona upula꞉ tetelo menokote gimai hola netewa o badu hola netewa Godotamo nikamehamene, ba꞉bema꞉ Yausepeko Ma꞉liko iba꞉te ba꞉moe tutumamo papamila꞉te hawa꞉goeno ilina ebetamo ba꞉ ba꞉ba ka꞉na ikamehuya꞉. Ba꞉gala ba꞉be atu tetelo ibi ubila gudu Ya꞉suku Godotamo ikamema꞉, mabu Godokono eta tutumu tabote ba꞉ma ka꞉na kagoena, dopo dubu gugudi talonama꞉ midiliti Godotamo kikamehoma꞉.
LUK 2:25 Ba꞉ba tetelo eta dubu ebeno mahilo Simiyonotela, ebete Yelusalema ko habalo emedenami. Ebe tuputupudawanomola, iyo, ebete Godotamo na꞉papamiwatanami ba꞉gala ebete Isalaela tawakalubino ka꞉ka꞉ mula꞉le komoeno uluhuku tete belatiminami. Ba꞉bema꞉ Godokono Gobogobote eba꞉go ba emedena
LUK 2:26 ebe ya꞉lo a꞉goemiya꞉ ba꞉ma ka꞉na, ebete Godokono Oemedawa Kelisoko dopamo umiti ebe galane ba꞉bo kohoema꞉ne.
LUK 2:27 Ba꞉bene Ma꞉liko Yausepeko iba꞉te Godokono tutumamo papamila꞉lo ibino gudu Godoko Adikumino Hiya꞉ Genamamo da꞉magatuya꞉, ba꞉be komo Godokono Gobogobote Simiyonoko ba꞉bo iya꞉tumiya꞉. Ba꞉ba tetelo ebete Godokono Genamamo pete,
LUK 2:28 gudu Ya꞉suku pumiti ebeno kokotamo ebe pematopa꞉te Godotamo kalakala tabo ba꞉ma ka꞉na polamagiya꞉,
LUK 2:29 “Kodawa, ama꞉le dopamo hibinomolo da꞉goiya꞉la ba꞉be tabote a꞉hawakala, ba꞉bema꞉ na amia꞉no huiyaha꞉ okodawate gelebadia꞉go hoea꞉mo kotoma꞉nemo.
LUK 2:30 Hibila, ka꞉lo naeno baida꞉mo amia꞉no ka꞉ka꞉ mula꞉ komo ba꞉ umimo,
LUK 2:31 ba꞉be ka꞉ka꞉ mula꞉ komo ama꞉le a꞉hiduimiya꞉ta hiliyonomo hiya꞉hiya꞉ tawakalubino holoholo hapulu.
LUK 2:32 Iyo, amia꞉no ka꞉ka꞉ mula꞉ komo ba꞉ hido alola, ba꞉be alote Yuha꞉pa꞉tamo amia꞉no ubi gabo ba hawakalimina, amia꞉no Isalaela tawakaluba꞉tamo koamo ba꞉la꞉minanamene.”
LUK 2:33 Ba꞉bene Simiyonote gudu Ya꞉sukunu komoma꞉ kebe tabo kolamagiya꞉, Ma꞉liko Yausepeko iba꞉te ba꞉be tabo uliti konomamo hanohanohutiya꞉.
LUK 2:34 Ba꞉ba tetelo Simiyonote Godoko bikiyamiya꞉ ebete ibi hidamo kowalubilinama꞉, ba꞉gala ebete guduino menoko Ma꞉litamo na꞉goiya꞉, “Ba꞉moe gudu Ya꞉suku Godote ebe ya꞉lo ka꞉miti a꞉lawiya꞉, ba꞉bema꞉ ebete Isalaela tawakalubi ipuwalo ibino kubakuba komo ba꞉gala hidohido komo hiliyonomo kanagilamelelamema꞉ne. Iyo, ebeno emede komote hanohano komoma꞉ eda꞉te Godokono helo kohawakalimima꞉ne, ba꞉bema꞉ komo tawakaluba꞉te ba꞉be komo umiti ubiha꞉ tabo ga꞉late
LUK 2:35 ibino kubakuba ukui kohawakalilamema꞉na꞉. Ba꞉ba tetelo ko temetemete ama꞉tamo puluhukuti, alaholohoeno kiyokiyo gili keba ka꞉nala꞉ka꞉ ba꞉be temetemete amia꞉no tepo ipuwa ba꞉ba ka꞉na kalihamidama꞉ne.”
LUK 2:36 Ba꞉be atu tetelo eta Godokono ukui hawakalimidawa kamenate nemedenami, ebeno mahilo A꞉natela, ebeno nabiwi Pa꞉nuwelatela, ebe A꞉sa gu lumagila. Ba꞉moe kamena ba꞉ kabelenomola. Dopamo ebete dubu lawete sa꞉ba꞉ni gogo emedete
LUK 2:37 ebeno awiti ba꞉bo hoiya꞉, ba꞉bene ebete hamolema꞉ eda꞉te ba꞉ba tetene tupuimiti ebeno 84 gogo teta꞉mo puluhuku, ebete hegela ba꞉gala du hiliyonomolo Godoko Adikumino Hiya꞉ Genamalo ba emedena ba꞉be genama kamiya꞉panakuiha꞉. Ba꞉be tete ga꞉ga꞉nomolo ebete Godoko ba adikumina, komo tete hiliyonomolo baa꞉ nahaheno Godotamo toetoe tabo ba꞉bo olamaginakui.
LUK 2:38 Ba꞉bene Yausepeko Ma꞉liko iba꞉te Simiyonokoba꞉ tabo ba ga꞉luta, ba꞉be atu tetenomolo A꞉nate pete gudu Ya꞉suku pumiti kalakala tabo Godotamo ba꞉bo padipatiya꞉. Ba꞉bema꞉ ba꞉ba tetene tupuimiti, Yelusalemanapi ipuwalo puya꞉te ibino ka꞉ka꞉ mula꞉le komoeno uluhuku tete da꞉latiminama꞉, iba꞉te Godokono Genamamo da꞉pelamenakui A꞉nate ibi hiliyonomatamo Ya꞉sukunu komoma꞉ ba꞉bo olamaginakui.
LUK 2:39 Ba꞉bene Ma꞉liko ba꞉gala Yausepeko iba꞉te Godokono hiliyonomo tutumuino komokomo hidamo ododiliti, iba꞉te Ga꞉lili hopoeno Nasalete habamo gala na꞉katuya꞉ mabu ba꞉be ba꞉ ibino habanomola.
LUK 2:40 Ba꞉bolo gudu Ya꞉suti ba ape heloma꞉ ba꞉bo ediya꞉, ba꞉gala ebete ukui muludawama꞉ eda꞉lo Godote ebeno malemale komamo ebe nowalubinami.
LUK 2:41 Ya꞉sukunu menoko nabiwi ibino komo ba꞉ma ka꞉nala, gogo hiliyonomolo iba꞉te komo tawakaluba꞉go Yelusalema ko habamo tolamenakuya꞉ Yunapino Adaguila꞉ Poko konododima꞉,
LUK 2:42 ba꞉bene Ya꞉suti 12 gogo tetema꞉ ba eda꞉ iba꞉te ebe lawete gala na꞉katolamiya꞉ ba꞉be poko habamo.
LUK 2:43 Ba꞉bene Pokoeno hegelate da꞉wibohuya꞉ iba꞉te Nasalate habamo gala na꞉kapelamiya꞉, huiyatiya Ya꞉suti Yelusalemalo da꞉pekaguya꞉ ebeno menoko nabiwi iba꞉te kiya꞉tawahuya꞉ha꞉.
LUK 2:44 Iba꞉te Ya꞉suku tawakaluba꞉go habamo na꞉tomo ga꞉late, ba꞉be hegela kapiyalo tonomo tote, ba꞉bene gapogapolo iba꞉te ebe ibino tawakaluba꞉godolo ba꞉gala mabuluba꞉godolo nohowadinate
LUK 2:45 ebe kanuminiya꞉ha꞉. Ba꞉bema꞉ eta hegelalo iba꞉te ebe ohowada꞉go Yelusalema ko habamo gala katote,
LUK 2:46 ba꞉bene netewa-kapiya hegelalo iba꞉te ebe Godoko Adikumino Hiya꞉ Genamalo iya꞉tulamepi dubago ba luta ba꞉bo numiya꞉, ebete ibino tabo ba uliho ibino iya꞉tulame komokomoma꞉ ba꞉bo alateda꞉lenakui.
LUK 2:47 Ba꞉ba tetelo Ya꞉suti iba꞉go tabo ba ga꞉la ibi tuputupu tabamo da꞉huiyalamenakui, ba꞉bema꞉ puya꞉te ebeno tabo dulihutiya꞉ ibi hiliyonomate koamo hanohanohutiya꞉.
LUK 2:48 Ba꞉bema꞉ Ma꞉liko Yausepeko ibi netewapa꞉te ebe da꞉numiya꞉, koamo nela꞉wa꞉hate menokote ebe na꞉goemiya꞉, “Gudu, ama꞉ ba꞉moe komo atamo badama꞉ kododiui? Amia꞉no nabiwi ba꞉gala na, ale ama꞉ tepo temetema꞉go ohowadinata.”
LUK 2:49 Ya꞉suti huiyatiya iba꞉tamo na꞉goiya꞉, “Mabu keka꞉ la꞉le na ba꞉moe haboeno hiya꞉hiya꞉ genamalo dohowadinitakama? Wadiyala la꞉ niya꞉tawahala꞉ na naeno Nabiwino Genamalo ba꞉lutamo, na eta genamalo luta a꞉kamodobamo!”
LUK 2:50 Iba꞉te huiyatiya ba꞉be taboeno ipuwa hidamo kalawiya꞉ha꞉.
LUK 2:51 Ba꞉ba tetelo Ya꞉suti ebeno menoko nabiwi iba꞉go Nasalete habamo tote, ba꞉bolo ba nemedena ibino tabamo a꞉papamiwatanakui, ba꞉bene Ma꞉liti ba꞉moi komokomo ebeno tepo ipuwamo miya꞉tete hiliyonomo tetelo koamo nemalagidolenami.
LUK 2:52 Ba꞉bema꞉ ba꞉moe komo ba꞉ hibila, Ya꞉suti mulu emalagidolago ba ape, Godoko ba꞉gala tawakalubi ebetamo na꞉kalakalahanama꞉.
LUK 3:1 Ba꞉ba tetelo Sisa Taibiliyasiti 15 gogolo hopo konomoeno Konomo Gawadubuma꞉ ba eda꞉na, komo dubate ebeno hopopima꞉ ba꞉ma ka꞉na eda꞉hanama꞉, Poniyase Paeleteko Yudiya hopoeno Kapela Gawadubula. Helodiko Ga꞉lili hopoeno Ko Gawadubula. Ebeno ekawi Pilipiko Ituliya hopo ba꞉gala Ta꞉konaitasi hopoeno Ko Gawadubula. Ba꞉gala Laisaniyasiko A꞉bilini hopoeno Ko Gawadubula.
LUK 3:2 Ba꞉be atu tetelo A꞉nasiko ba꞉gala Kayapasiko ibi netewapa꞉te Godotamo hawa꞉goeno ikamehopino Hununomo Watowatopima꞉ eda꞉nama꞉, ba꞉bene Sekalayakono gudu Yoneko ebete dito hopolo ba nemedena Godokono tabote ebetamo ba꞉bo piya꞉.
LUK 3:3 Iyo, ebete Yodane Tulino hopo konomamo tote Godokono tabo ba꞉ma ka꞉na nolamagiya꞉, “La꞉eno kubane ohobila꞉te beyamo aduti komo lawema꞉ na꞉pelama꞉la꞉, ba꞉bene Godote la꞉eno kuba egebolelamete kadodoholelamema꞉na꞉ta.”
LUK 3:4 Ba꞉ hibila, Godote dopamo ebeno ukui hawakalimidawa Aisayagodone Yonekono pe komoma꞉ ebeno Bukamo tabo ba꞉ma ka꞉na miya꞉tiya꞉, “Lumagiti dito hopolo tabo ba꞉ma ka꞉na ibulu kopegoema꞉ne, ‘Kodawoeno gabo na꞉hiduima꞉la꞉, ebeno gabo na꞉tuputupuima꞉la꞉!
LUK 3:5 Godote ba꞉moe hopoeno haka bola꞉la꞉ha hiliyonomo ihilateholete, hunuhunu haka apotalamima꞉ komidilima꞉ne, iyo, ebete keka꞉keka꞉ gabo hibilo tuputupuilamete, gaboeno haka gugu ihilateholete kodilidililamema꞉ne.
LUK 3:6 Ba꞉ hibila, ebete tawakalubino ka꞉ka꞉ da꞉mula꞉lelamemene, ibi hiliyonomate ba꞉be komo ba꞉bo kumima꞉na꞉!’”
LUK 3:7 Ba꞉bene tawakalubi hiliyonomate Yonetamo na꞉pelamiya꞉ ebete ibi beyamo kowadulatelema꞉, huiyatiya ebete iba꞉tamo na꞉goiya꞉, “La꞉ bu kalulata! La꞉ pote ka꞉goelamiti beyamo wadulatelema꞉ da꞉pelamema, aba꞉, Godokono konomo mauba komote la꞉tamo a꞉kapa꞉mene? Ao, kopema꞉ne!
LUK 3:8 La꞉eno tepo ipuwa hiya꞉ma꞉ da꞉midilima, wadiyala la꞉ la꞉eno hibi komo hawakalimima꞉ hidohido komo nododila꞉la꞉. La꞉ ha꞉kiya la꞉tamo ba꞉mako tabo ga꞉la akatupuima꞉la꞉, ‘A modobola mabu A꞉ibalahamako ba꞉ aeno iniwa nabiwila.’ Ao, la꞉ a꞉kamodobamata! Na la꞉tamo hibi tabo begoemo, Godogodolo helo bitana ebete ba꞉moi nakolamo A꞉ibalahamakono gugudi kododilimima꞉!
LUK 3:9 Ba꞉bema꞉ ka꞉lo Godote ebeno kabi adi, hiliyonomo nolohoha꞉ gao keha ebete luhuti koa꞉mo kiya꞉hekema꞉ne.”
LUK 3:10 Tawakaluba꞉te ba꞉be komo uliti Yoneko nalatediya꞉, “A Godokono mauba duhimima꞉ bada komo na꞉kododima꞉?”
LUK 3:11 Ebete ba huiya na꞉goiya꞉, “Wadiyala kaliko netewagodawate eta kalikoha꞉dawa kowalubima꞉ne, ba꞉gala baa꞉godawate baa꞉ha꞉dawa kowalubima꞉ne.”
LUK 3:12 Ba꞉bene komo ta꞉kese mani ha꞉da amiholo uwatepi dubu iba꞉te beyamo wadulatelema꞉ da꞉pelamiya꞉, iba꞉te ebe na꞉palatediya꞉, “Iya꞉tulamedawa, a bada komo na꞉kododima꞉?”
LUK 3:13 Ebete ibi na꞉goelamiya꞉, “La꞉le ta꞉kese mani uwate tetelo ha꞉da gabodo konomamo akuwatenakala꞉ la꞉ ha꞉kiya la꞉ owalubilima꞉, huiyatiya gabomani dubate da꞉ga꞉lanaka ba꞉be modobolo nuwatenakuya꞉la꞉.”
LUK 3:14 Ba꞉bene komo alaholohopa꞉te Yoneko nalatediya꞉, “A keba ka꞉nala꞉ka꞉? A bada komo na꞉kododima꞉?” Ba꞉bene ebete iba꞉tamo na꞉goiya꞉, “La꞉le komo tawakalubino mani heloamo o ha꞉da gabodo akuwata꞉la꞉, ba꞉gala la꞉eno tabo ga꞉la ipuwalo komo tawakalubi akakubahilama꞉la꞉, ba꞉gala la꞉eno oko huiya da꞉lawenakoma ubiha꞉ tabo ga꞉laheno kalakalago nuwatenakuya꞉la꞉.”
LUK 3:15 Tawakaluba꞉te Yonekono komo ba emalagidolo, iba꞉te kalakalahalo nemalagidoluya꞉ Yoneko da꞉ Godokono Oemedawa Kelisotela꞉.
LUK 3:16 Ba꞉bene Yonete iba꞉tamo na꞉goiya꞉, “Nale la꞉ beyamo wadulatelemata, huiyatiya eta lumagiti naeno gala hapuni ba꞉pena. Ebeno helo konomote naeno helo na꞉gogolona, ba꞉bema꞉ na hidoenoha꞉ nale ebeno nato ukulalemema꞉. Hibila, ebete la꞉ Godokono Gobogobamo ba꞉gala ebeno koa꞉mo kopewadulatelema꞉na꞉ta,
LUK 3:17 iyo, ebete witi-laisoeno nonoka tama꞉mo miya꞉teno ilina a꞉lawi, ba꞉bene ebete witi-laisa nahoeno ebeno genama guamo ba miya꞉te nonoka koa꞉mo ba꞉bo kiya꞉hekema꞉ne, ba꞉be koete itana tetelo na꞉woena, a꞉kaha꞉gale.”
LUK 3:18 Ba꞉ hibila, Yonete Godokono Hido Tabo dolamaginakui, ebete hiliyonomo hiya꞉hiya꞉ komokomo biya꞉tulamenakui tawakaluba꞉te ibino ukui hiya꞉ma꞉ komidilima꞉.
LUK 3:19 Ba꞉bene eta hegelalo Yonete Ko Gawadubu Helodiko konomamo kiyahamiya꞉, mabu ebete ebeno ekawino kamena Helodiyasiko pilolo lawiya꞉ ba꞉gala ebete komo hiliyonomo kubakuba komo bododilinakui.
LUK 3:20 Ba꞉ba tetelo Heloditi eta konomo kuba komo ba꞉ma ka꞉na kododiya꞉, ebete Yoneko du genamamo dito ihatiya꞉.
LUK 3:21 Heloditi ebe du genamamo ihateheno, dopamo Yonete tawakalubi hiliyonomo beyamo a꞉wadulateliya꞉, Ya꞉suku baleta. Ba꞉bema꞉ Ya꞉suti beyamo aduti komo lawete, Godotamo kalakala tabo ba olamagita Godote ebeno Hunu Haba ba꞉bo a꞉hiya꞉miduya꞉.
LUK 3:22 Ba꞉bene Godokono Gobogobote gimai holamo ebe hunamo ba pihitiga, tabote Hunu Habane ba꞉ma ka꞉na pihitiguya꞉, “Ama꞉ naeno kapiya Gudunomolata. Na ama꞉tamo na꞉kalakalutamo.”
LUK 3:23 Ya꞉suti 30 gogoma꞉ ba eda꞉ ebete ebeno ko oko ba꞉bo tupuimiya꞉, ba꞉bene ebeno mabu tawakalubino mahiloeno komo ba꞉ ba꞉ma ka꞉nala. Tawakaluba꞉te ibino ukuilo ebe Yausepekono guduma꞉ ga꞉lanama꞉, ba꞉moe Yausepeko ba꞉ Hilaikono gudula.
LUK 3:24 Hilaiko Mata꞉takono gudula. Mata꞉tako Libaikono gudula. Libaiko Melekaikono gudula. Melekaiko Yanaikono gudula. Yanaiko Yausepekono gudula.
LUK 3:25 Yausepeko Mata꞉tayasikono gudula. Mata꞉tayasiko A꞉imosokono gudula. A꞉imosoko Na꞉ihumakono gudula. Na꞉ihumako Esalaikono gudula. Esalaiko Nagaikono gudula.
LUK 3:26 Nagaiko Maa꞉takono gudula. Maa꞉tako Mata꞉tayasikono gudula. Mata꞉tayasiko Sema꞉inikono gudula. Sema꞉iniko Yausekekono gudula. Yausekeko Yaudakono gudula.
LUK 3:27 Yaudako Yowananakono gudula. Yowananako Lisakono gudula. Lisako Selababelakono gudula. Selababelako Siyatiyelakono gudula. Siyatiyelako Nelaikono gudula.
LUK 3:28 Nelaiko Melekikono gudula. Melekiko Adaikono gudula. Adaiko Kosamakono gudula. Kosamako Elamadamakono gudula. Elamadamako Eyakono gudula.
LUK 3:29 Eyako Yosuwakono gudula. Yosuwako Eliyesakono gudula. Eliyesako Yolimikono gudula. Yolimiko Mata꞉takono gudula. Mata꞉tako Libaikono gudula.
LUK 3:30 Libaiko Simiyonokono gudula. Simiyonoko Yudakono gudula. Yudako Yausepekono gudula. Yausepeko Yaonamakono gudula. Yaonamako Elayakimikono gudula.
LUK 3:31 Elayakimiko Meleyakono gudula. Meleyako Menakono gudula. Menako Mata꞉taikono gudula. Mata꞉taiko Na꞉itanakono gudula. Na꞉itanako Da꞉ibidikono gudula.
LUK 3:32 Da꞉ibidiko Yesikono gudula. Yesiko Obedakono gudula. Obedako Bowasekono gudula. Bowaseko Samonokono gudula. Samonoko Nasonakono gudula.
LUK 3:33 Nasonako Aminadabakono gudula. Aminadabako Adaminakono gudula. Adaminako Anikono gudula. Aniko Hesalonakono gudula. Hesalonako Pelesekono gudula. Peleseko Yudakono gudula.
LUK 3:34 Yudako Ya꞉ikobokono gudula. Ya꞉ikoboko Aisa꞉kekono gudula. Aisa꞉keko A꞉ibalahamakono gudula. A꞉ibalahamako Telakono gudula. Telako Nehokono gudula.
LUK 3:35 Nehoko Selugukunu gudula. Seluguku Liyukunu gudula. Liyuku Pelegekono gudula. Pelegeko Ibakono gudula. Ibako Silakono gudula.
LUK 3:36 Silako Ka꞉inanekono gudula. Ka꞉inaneko Apasa꞉dakono gudula. Apasa꞉dako Semakono gudula. Semako Nowakono gudula. Nowako La꞉imekakono gudula.
LUK 3:37 La꞉imekako Metusalakono gudula. Metusalako Inokokono gudula. Inokoko Yeledikono gudula. Yelediko Mahalalelakono gudula. Mahalalelako Ka꞉inanekono gudula.
LUK 3:38 Ka꞉inaneko Inosokono gudula. Inosoko Setakono gudula. Setako A꞉da꞉mekono gudula. A꞉da꞉meko Godokono gudula. Ba꞉bema꞉ ba꞉moe ba꞉ Ya꞉sukunu mabu tawakalubino komoeno kuititila.
LUK 4:1 Ba꞉bene Godokono Gobogobote Ya꞉sukunu tepo ipuwa tabuimiti, Yodane Tulini ba magata ebete dito hopamo ba꞉ dito tuya꞉.
LUK 4:2 Ba꞉bene Ya꞉suti dito hopolo 40 hegela ba nemede Saitanate ebe kuba gabamo kemogabuimima꞉ ebetamo ba꞉bo uluhukuya꞉. Ba꞉be tete ga꞉ga꞉nomolo Ya꞉suti baa꞉ kananakuiha꞉, ba꞉bema꞉ ba꞉be tete da꞉wibuya꞉ ebete baa꞉ma꞉ kape komo ba꞉bo iya꞉tawuya꞉.
LUK 4:3 Ba꞉bene Saitanate ebe na꞉goemiya꞉, “Ama꞉ Godokono hibi Guduma꞉ deda꞉na, ba꞉moe nakola baa꞉ma꞉ na꞉mida꞉.”
LUK 4:4 Ya꞉suti ebeno tabo ba huiya na꞉goiya꞉, “Godokono Bukalo tabo ba꞉ma ka꞉na itana, ‘Lumagiti ba꞉moe hopoeno baa꞉ kapiyalo a꞉kaka꞉ka꞉namene.’”
LUK 4:5 Ba꞉bene Saitanate Ya꞉suku hunamo magatate ba꞉moe hopo konomoeno hiya꞉hiya꞉ koko hopo ba niya꞉tumiho, iba꞉te ba꞉ba tetenomolo ba꞉bi hiliyonomo ilina bulameholiya꞉.
LUK 4:6 Saitanate ebetamo na꞉goiya꞉, “Ba꞉moi hiliyonomo ilina ba꞉gala helo konomo nale ama꞉tamo kikamehoma꞉nemata. Ba꞉ hibila, hopo haboeno ilina hiliyonomo Godote natamo ikanamehoniya꞉, ba꞉be mabuma꞉ nale kebe lumagitamo ikamema꞉ ubi dihatemo nagodolo helo bitana ebetamo kikamehoma꞉.
LUK 4:7 Iyo, ama꞉le na nadikunama꞉, ba꞉bene ba꞉moi ilina hiliyonomo ama꞉le kuwatema꞉na꞉ta.”
LUK 4:8 Huiyatiya Ya꞉suti ebeno tabo ba huiya na꞉goiya꞉, “Godokono Bukalo tabo ba꞉ma ka꞉na itana, ‘Ama꞉ amia꞉no Kodawa Godoko adikumilo ebe kapiyatamo na꞉papamiwatanakuya꞉.’”
LUK 4:9 Ba꞉bene Saitanate ebe Yelusalema ko habamo magatate Godoko Adikumino Hiya꞉ Genamoeno uba hunamo nadipiti ebe ba꞉bo negoemiya꞉, “Ama꞉ Godokono hibi Guduma꞉ deda꞉na, ba꞉moene hakamo na꞉nepatega,
LUK 4:10 mabu Godokono Bukalo tabo ba꞉ma ka꞉na itana, ‘Godote ebeno nopopi kopoelamema꞉ne iba꞉te ama꞉ hidamo kopowalubima꞉,
LUK 4:11 iyo, iba꞉te ibino kokotamo ama꞉ kopelawema꞉na꞉ta, ba꞉bema꞉ ama꞉le nakolalo nato a꞉kanukamidamena꞉ta.’”
LUK 4:12 Huiyatiya Ya꞉suti ebetamo na꞉huiyuya꞉, “Ao, nale ba꞉be kuba komo a꞉kododa꞉mo, mabu Godokono Bukalo eta tabo ba꞉ma ka꞉na itana, ‘Hopo lumagiti Kodawa Godoko pawima꞉ akewagela꞉la꞉.’ Iyo, ba꞉be mabuma꞉ hopo haba lumagiti ebeno daedae ukuia꞉mo eta komo dododimini, ebete akemalagidolala꞉ Godote ebeno ka꞉ka꞉ dito kopemula꞉mema꞉.”
LUK 4:13 Ba꞉bene Saitanakono kuba gabamo emogabuimiho komokomo hiliyonomo da꞉wibohuya꞉, ebete Ya꞉suku tete nanekela꞉mo ba꞉bo miya꞉puya꞉.
LUK 4:14 Ba꞉ba tetelo Ya꞉suti Godokono Gobogoboeno heloago Ga꞉lili hopamo gala na꞉katuya꞉, ba꞉bene ba꞉be hopo konomolo demedehonama꞉ ba꞉bi tawakalubi hiliyonomate Ya꞉sukunu komoma꞉ tabo ba꞉bo nikiyahuya꞉.
LUK 4:15 Ebete ba꞉bi Yu tawakalubino baidi ibubulamehole genamalo ibi diya꞉tulamenakui, ba꞉be mabuma꞉ ibi hiliyonomate ebe konomamo milimihonakuya꞉.
LUK 4:16 Eta hegelalo Ya꞉suti ebeno emede haba Nasaleta꞉mo na꞉tuya꞉, ba꞉bene ebete Yu tawakalubino okoha꞉ talona hegelalo dopamo keba ka꞉na kododinakui, ebete ba꞉be hegelalo atu komo bekanododiya꞉, iyo, ebete tawakalubino baidi ibubulamehole genamamo nodolote Godokono Bukoeno tabo ka꞉lamiholema꞉ ba꞉bo mahiguya꞉.
LUK 4:17 Ba꞉bene iba꞉te Aisaya buka mokopi ebetamo ikamete, ebete pahaa꞉midate buka ka꞉lamihole ba꞉ma ka꞉na ba꞉bo tupuimiya꞉,
LUK 4:18 “Godokono Gobogobote nagodolo bemedena, mabu ebete na a꞉laweniya꞉, nale awaelo demedehona ba꞉bi tawakaluba꞉tamo Godokono Hido Tabo katama꞉. “Ebete na a꞉poenamiya꞉ du genamalo demedehona ba꞉bi tawakaluba꞉tamo, ba꞉bema꞉ nale ibi kokiyalamema꞉nemo, tete ba꞉ na꞉pe ibi du genamane kuluhukulatelema꞉, ba꞉gala na baidi tamiholame tawakalubi kokiyalamema꞉nemo, ibino baiditi ka꞉la꞉minahalelamema꞉. “Iyo, nale menemena꞉go da꞉wapata꞉lamena ba꞉bi tawakalubi tutunomoma꞉ komidilima꞉nemo,
LUK 4:19 ba꞉gala Kodawa Godote ibino ka꞉ka꞉ da꞉mula꞉lelamemene, nale ibi ba꞉moe tabo kokiyalamema꞉nemo, ba꞉be komote ba꞉ na꞉pe.”
LUK 4:20 Ba꞉bene buka ka꞉lamihole da꞉wibuya꞉ Ya꞉suti buka gala kamokopiti okodawatamo ikamete tawakalubi iya꞉tulamema꞉ ibino holoholo hapulu dito emediya꞉. Ba꞉ba tetelo baidi ibubulamehole genama gulu da꞉pola꞉nuya꞉ ba꞉bi tawakaluba꞉te Ya꞉suku hidonomamo umihutiya꞉,
LUK 4:21 ba꞉bema꞉ ebete iba꞉tamo na꞉goiya꞉, “Ka꞉lo nale ba꞉moe buka tabo da꞉ka꞉lamiholemo, ba꞉ba tetenomolo ebeno hibi komote la꞉tamo ba꞉ a꞉puluhuku.”
LUK 4:22 Ba꞉bene ebete Godokono tabo iba꞉tamo ba olamagita ibi hiliyonomate nemalagidolutiya꞉, “Ya꞉suku ba꞉ hidonomo lumagila,” ba꞉gala iba꞉te ebeno tabone kebe tabo kulihuya꞉ ba꞉bi hidohido taboma꞉ hanohanoholo na꞉ga꞉lutiya꞉, “Moe ba꞉ Yausepekono gudula, ebeno mulu keba ka꞉nala꞉ka꞉?”
LUK 4:23 Ba꞉bene ebete iba꞉tamo na꞉goiya꞉, “Na la꞉tamo hibi tabo begoemo. Tawakaluba꞉te muluma꞉ da꞉ga꞉lanaka, galane la꞉le ba꞉bako tabo natamo ba꞉ma ka꞉na koga꞉lama꞉nemata, ‘Ama꞉ hibi dogetama꞉ deda꞉na, wadiyala ama꞉ ha꞉kiya ama꞉ na꞉hiduima꞉.’ Ba꞉gala la꞉le na kokiyanamema꞉nemata, ‘Ama꞉le Kapeniyama habalo da꞉nododili ale ba꞉bi hanohano komo ulihuima꞉, ba꞉bema꞉ ka꞉lo huiyatiya amia꞉no habanomolo ba꞉bako komokomo na꞉kododila꞉.’”
LUK 4:24 Ya꞉suti iba꞉tamo gala na꞉kagoiya꞉, “Na la꞉tamo hibi tabo begoemo, Godokono ukui hawakalimidawa ebeno habaluba꞉te ebe ubiha꞉ma꞉ eda꞉hate a꞉kalawa꞉mena꞉.
LUK 4:25 Ba꞉bema꞉ la꞉ naeno hibi tabo nulia꞉la꞉. Elayate demedenami ba꞉ba tetelo gogo netewa-kapiyalo wegolate konakuiha꞉, hopo konomolo naha ilinate ba꞉bema꞉ wibohuya꞉. Ba꞉ba tetelo hamolehamole hiliyonomate Isalaela hopolo awaelo emedehonama꞉,
LUK 4:26 huiyatiya Godote Elayako ba꞉bi Yu tawakalubino hamolehamola꞉tamo kanoemiya꞉ha꞉. Ao, ebete ebe Saidono hopoeno Sa꞉lepata habamo noemiya꞉, ba꞉bolo demedenami ba꞉be hamole kapiyanomo konowalubima꞉. Ba꞉be kamena Yu lumagiha꞉!
LUK 4:27 Ba꞉gala ba꞉moe ba꞉ eta komola. Eta Godokono ukui hawakalimidawa Elaisakono tetelo Isalaela hopolo hiliyonomo kuitikuita꞉gopi dubate nemedehonama꞉, huiyatiya ibi ipuwalo Godote eta dubu kahiduimiya꞉ha꞉, eta Siliya hoponapi Na꞉imanako kapiya bihiduimiya꞉. Ba꞉be dubu Yu lumagiha꞉!”
LUK 4:28 Ba꞉bene Yu tawakalubino baidi ibubulamehole genamalo da꞉pola꞉nuya꞉, ibi hiliyonomate ba꞉be tabo duliya꞉ konomamo maubahaliya꞉.
LUK 4:29 Ba꞉bema꞉ iba꞉te mahila꞉halete Ya꞉suku lawete haba ipuwane heloamo ba꞉bo uluhukutiya꞉, mabu ibi ubila ebe eta haka hunamo magatate iya꞉ha꞉midale hakane kopenemokamidama꞉, iyo, ba꞉mako haka Nasalete haba tamelo itanami.
LUK 4:30 Ba꞉ba tetelo Ya꞉suti huiyatiya ba꞉bi hiliyonomo tawakalubi tetedo tote ebeno to gabodo ba꞉ dito tuya꞉.
LUK 4:31 Ba꞉bene Ya꞉suti Ga꞉lili hopoeno Kapeniyama habamo tote, Yu tawakalubino okoha꞉ talona hegelalo tawakalubi da꞉niya꞉tulamitiya꞉,
LUK 4:32 iba꞉te ebeno tabamo na꞉hanohanohutiya꞉ mabu ebete tabo Godokono heloamo olamagitiya꞉.
LUK 4:33 Ba꞉ba tetelo ibino baidi ibubulamehole genama gulu kuba gobogobagoeno dubuti ba꞉bolo na꞉lutiya꞉, ba꞉bene ebete gaa꞉tepahalo ibulunomamo na꞉goiya꞉,
LUK 4:34 “Iya꞉! Ya꞉su Nasaletenapi, ama꞉ atamo bada komo na꞉kododiomena꞉? Ama꞉ a kubahia꞉mema꞉ ka꞉pa꞉wa? A꞉iye, na iya꞉tawala amia꞉no komo, ama꞉ ba꞉ Godokono Hido-talona Dawalata!”
LUK 4:35 Ya꞉suti huiyatiya ebe na꞉kiyahamiya꞉, “Ama꞉ kodakodate, ebegodone nuluhuka!” Ba꞉bene kuba gobogobote tawakalubino holoholo hapulu ba꞉be dubu hopamo a꞉da꞉nate ebegodone ba꞉bo uluhukuya꞉, huiyatiya ebetamo eta kuba komo kododiya꞉ha꞉.
LUK 4:36 Ba꞉bema꞉ ba꞉bi tawakalubi hiliyonomate hanohanoholo etate etatamo goenakui, etate etatamo goenakui, ba꞉ma ka꞉na ewagelitiya꞉, “Ba꞉moe taboeno helo keba ka꞉nala꞉ka꞉? Ba꞉moe dubuino helo ba꞉gala ha꞉hi konomola! Numa꞉la꞉, kuba gobogobate ebeno tabo ulihote gobogobamo ba꞉ alahutiha!”
LUK 4:37 Ba꞉bene Ya꞉sukunu oko owati tabote ba꞉be hopo konomamo ba꞉ dito tuya꞉, iyo, puya꞉te ba꞉bolo demedehonama꞉ ibi hiliyonomate ebeno komoma꞉ tabo ba꞉bo nikiyahuya꞉.
LUK 4:38 Ba꞉bene Ya꞉suti Yu tawakalubino baidi ibubulamehole genamane puluhukuti Saimonokono genamamo dito tuya꞉. Ba꞉bolo Saimonokono moto kakidubu ape koenomo tawetawete umitiya꞉, ba꞉bene ebeno komoma꞉ tawakaluba꞉te Ya꞉suku ba꞉bo ga꞉lamiya꞉.
LUK 4:39 Ba꞉bema꞉ Ya꞉suti tote ebeno wata baha꞉mo nutiti ba꞉be tawetawete ebe komiya꞉pama꞉ da꞉kiyamiya꞉, ba꞉ba tetenomolo tawetawete ebegodone ba uluhuku ebete mahigate ibi mabuma꞉ baa꞉ okalimi oko ba꞉bo tupuimiya꞉.
LUK 4:40 Ba꞉ba tetelo hegelate da꞉nihila꞉minaniya꞉, puya꞉te ba꞉be habalo hiya꞉hiya꞉ temetema꞉go da꞉pola꞉nuya꞉ ibino mabuluba꞉te ibi hiliyonomo Ya꞉sutamo ba꞉bo magaheleniya꞉, ba꞉bene ebete ebeno kokoto iba꞉tamo emowatilamelo ibi hiliyonomo ba꞉bo hiduilameniya꞉.
LUK 4:41 Ba꞉gala ebete kuba gobogobo da꞉kiyahalameniya꞉, iba꞉te komo tawakalubi hiliyonomagodone ba ikulina ga꞉ga꞉go tabo ba꞉ma ka꞉na ga꞉laniya꞉, “Ya꞉su, ama꞉ ba꞉ Godokono Gudulata!” Ba꞉ hibila, ba꞉bi kuba gobogobo iya꞉tawahala Ya꞉suku ba꞉ Godokono Oemedawa Kelisotela, huiyatiya ebete ibi ba kiyahalamena tabo ga꞉la talona ba꞉bo ihatelameniya꞉ iba꞉te ebeno komo hawakalimima꞉.
LUK 4:42 Ba꞉bene hegelate ba owalohuta Ya꞉suti ba꞉be habane uluhukuti tataba hopamo na꞉tuya꞉, ba꞉bema꞉ tawakaluba꞉te ebe ohowada꞉go tolamete ba꞉bo numiya꞉, mabu ibi ubihinola Ya꞉suti ibi miya꞉pale.
LUK 4:43 Huiyatiya Ya꞉suti iba꞉tamo na꞉goiya꞉, “Wadiyala na komo habahabamo tote, Godote Ko Gawadubuma꞉ deda꞉na ba꞉be komoeno Hido Tabo konolamagima꞉nemo, mabu Godote na ba꞉bema꞉ poenamiya꞉.”
LUK 4:44 Ba꞉bene Ya꞉suti ba꞉be hopoeno hiliyonomo habahabamo tonakui Yu tawakalubino baidi ibubulamehole genama gulu Godokono tabo ba꞉bo nolamaginakui.
LUK 5:1 Eta tetelo Ya꞉suti Genasalete Bobo dodolo ba la꞉na tawakalubi hiliyonomate ebetamo emokatihuia꞉go tolamitiya꞉ Godokono tabo ulihoma꞉.
LUK 5:2 Ba꞉bene ebete boge netewa bobo dodolo pola꞉nalo ulamiya꞉, daha uwateholepi dubate ba꞉bi boge ya꞉lo miya꞉palete iba꞉te ibino kamahu bukulalitiya꞉.
LUK 5:3 Ba꞉bema꞉ ibi ipuwalo Ya꞉suti eta dubuino boga꞉mo ololuya꞉, ba꞉be dubuino mahilo ba꞉ Saimonotela. Ba꞉bene Ya꞉suti ebe da꞉goemiya꞉ ebete ebeno boge dodone nanekela꞉mo kalima꞉tepama꞉, ebete ba꞉be komo ododiti Ya꞉suti boga꞉mo emedete Godokono tabo tawakalubi ba꞉bo iya꞉tulamiya꞉.
LUK 5:4 Ba꞉bene ebete Godokono tabo olamagi da꞉wibuya꞉ Saimonoko ba꞉bo goemiya꞉, “Boge nanekela꞉mo kulukulu teta꞉mo gala kalima꞉tepate, ama꞉ ba꞉gala amia꞉no mabulubi la꞉eno kamahu beyamo na꞉wahuba꞉la꞉ daha kuwateholema꞉.”
LUK 5:5 Huiyatiya Saimonote ebetamo ba huiya na꞉goiya꞉, “Ko Iya꞉tulamedawa, a du ga꞉ga꞉nomolo nipo wahubihonakama꞉, eta daha kalawenakaha꞉. Huiyatiya kubaha꞉, mabu ama꞉le na da꞉kiyanama꞉, ba꞉bema꞉ nale amia꞉no tabamo papamiwatalo na kamahu beyamo kowahubitotema꞉nemo.”
LUK 5:6 Ba꞉bema꞉ ebete komo okopa꞉go ba꞉be komo dododiya꞉, dahadaha hiliyonomate tahate kamahu tatalila ta꞉teho,
LUK 5:7 ba꞉bene iba꞉te ibino komo mabulubi eta bogelo da꞉pola꞉nuya꞉ kokotamo na꞉midahalamiya꞉ iba꞉te ibi kopowalubilima꞉. Ba꞉bema꞉ iba꞉te pelamete ba꞉bi boge netewa dahamo da꞉petabuilamiya꞉, bogete tatalila beyamo ululuhu.
LUK 5:8 Ba꞉bene Saimonote ba꞉be komo umiti koamo da꞉hanohanuya꞉, ebete Ya꞉sukunu nato mabamo pete pupamo pemedete ba꞉bo pegoiya꞉, “Kodawa, ama꞉ na miya꞉panete na꞉toa, mabu na kuba lumagila!”
LUK 5:9 Huiyatiya Ya꞉suti ebetamo na꞉goiya꞉, “Akatoletola꞉la꞉, ama꞉ dopamo daha uwateholedawama꞉ eda꞉nama꞉ta, huiyatiya ba꞉ma tetene tupuimiti ama꞉ tawakalubi uwatedawalata.” Ba꞉ba tetelo Saimonokoba꞉ daha uwatehole mani oko dowatinama꞉, ba꞉bi dubu Ya꞉imesiko ba꞉gala Yoneko, ibi netewapi ba꞉ Sebedikono gugudila. Ba꞉bene ibi ba꞉gala komo okopi ba꞉bolo da꞉pola꞉nuya꞉, iba꞉te ba꞉bi daha hiliyonomo ulamete atumu na꞉kahanohanohutiya꞉.
LUK 5:11 Ba꞉be mabuma꞉ Saimonoko ba꞉gala ba꞉moi komo dubu netewapi iba꞉te ibino boge netewa putiholete ibino oko ilina hiliyonomo miya꞉palete Ya꞉suku ba꞉bo ta꞉matuya꞉.
LUK 5:12 Eta tetelo Ya꞉suti eta habalo lutiya꞉, ba꞉be habalo kubanomo kuitikuita꞉goeno dubuti nemedenami. Ba꞉bene ebete Ya꞉suku umiti ebetamo pete ebeno holoholo hakamo pihatete toetoe tabo na꞉pegoiya꞉, “Kodawa, amia꞉no ubi ditama꞉na, ama꞉le na kohiduinamema꞉na꞉ta.”
LUK 5:13 Ya꞉suti ebeno kokoto hogaminate ebe ba ologi ebetamo na꞉goiya꞉, “Na ubila, ama꞉ na꞉hida!” ba꞉bema꞉ ba꞉ba tetenomolo kuitikuiti temetemete ebegodone na꞉wibuya꞉.
LUK 5:14 Ba꞉bene Ya꞉suti ebe ba kiyahame na꞉goemiya꞉, “Ama꞉ naeno komoma꞉ tawakalubi akakiyalama꞉la꞉. Wadiyala ama꞉ huiyatiya ba꞉moe tetenomolo tote amia꞉no ape Godotamo hawa꞉goeno ikamehodawatamo na꞉nemutuimiya꞉, ba꞉bene hawa꞉goeno malemale ilina Godotamo akona꞉nikamiya꞉, Mosesete dolamagiya꞉ ba꞉ba ka꞉na. Ba꞉be komote tawakalubi kiya꞉tulamema꞉ne amia꞉no temetemete a꞉wibui.”
LUK 5:15 Huiyatiya Ya꞉suti kebe hido komokomo kododilinakui ba꞉be tabote ba꞉be hopo konomamo tuya꞉, ba꞉bema꞉ tawakalubi hiliyonomate ebetamo na꞉pekapiyuimiya꞉ ebeno tabo kulihoma꞉ ba꞉gala ebete ibino temetema꞉gopi kohiduilamema꞉.
LUK 5:16 Ebete huiyatiya ibi miya꞉palete dito hopamo ha꞉kiya ba꞉bo tuya꞉, ba꞉be tataba hopolo Godokoba꞉ tabo konega꞉lama꞉.
LUK 5:17 Eta hegelalo Ya꞉suti tawakalubi ba iya꞉tulamita, komo Pa꞉lisi kapiyuimipi ba꞉gala Godokono Tutumu iya꞉tulamepi iba꞉te Ga꞉lili hopoeno hiya꞉hiya꞉ habane pelameholiya꞉, ba꞉bene komopa꞉te atumu Yudiya hopone ba꞉gala Yelusalema ko habane pelameholete ba꞉bo pepola꞉nuya꞉. Ba꞉ba tetelo Kodawa Godokono helote Ya꞉sugodolo nitanuya꞉ ebete temetema꞉gopi kohiduilamema꞉,
LUK 5:18 ba꞉bene komo dubate ape kodakoda temetema꞉goeno dubu talatalago agahiya꞉. Iba꞉te genama guamo a꞉pa꞉la꞉ha gabo bohowaditiya꞉ ibino mabulubi Ya꞉sukunu nato mabamo konadila꞉tema꞉,
LUK 5:19 huiyatiya tawakalubi hiliyonomola ba꞉bema꞉ iba꞉te eta gabo kumiya꞉ha꞉. Ba꞉be mabuma꞉ iba꞉te genama hunamo nalehawaminate, Ya꞉suti kebo ka꞉la꞉nuya꞉ iba꞉te ba꞉be genamoeno hunu a꞉himiti ba꞉be dubu talatalago ba꞉bana nadutiya꞉ Ya꞉sutamo.
LUK 5:20 Ya꞉suti ibino hibima꞉ midi komo umilamete dubutamo na꞉goiya꞉, “Mabulubi, Godote amia꞉no kuba egebolema꞉ta.”
LUK 5:21 Huiyatiya Godokono Tutumu iya꞉tulamepi ba꞉gala Pa꞉lisi kapiyuimipi dubu iba꞉te ibino tepo ipuwalo ba꞉ma ka꞉na emalagidolutiya꞉, “Moe dubu awaga konomola, Godokono holoholo hapulu kuba tabo badama꞉ ka꞉goe? Kuba egeboledawa potela꞉ka꞉? Ba꞉ Godoko kapiyala!”
LUK 5:22 Iba꞉te ibino tepo ipuwalo da꞉ga꞉luya꞉ Ya꞉suti iya꞉tawate iba꞉tamo na꞉goiya꞉, “Mabu keka꞉ la꞉eno tepo ipuwalo ba꞉moi komo demalagidolitama?
LUK 5:23 Ba꞉moe tabo kodakodala꞉ka꞉ nale goema꞉, ‘Godote amia꞉no kuba egebolemete adodolema꞉ta?’ O ba꞉moe eta tabo goema꞉ kodakodala꞉ka꞉, ‘Ama꞉ mahigate, na꞉toa?’
LUK 5:24 Ba꞉bema꞉ nale la꞉ kiya꞉tulamema꞉nemata, na Tawakalubino Naniwigodo helo bitana ba꞉moe hopo konomolo tawakalubino kuba egebolelamete kadodoholelamema꞉.” Ba꞉bene ebete temetema꞉goeno dubutamo na꞉goiya꞉, “Nale ama꞉ begoememata, ama꞉ mahigate, amia꞉no tilo mokopa꞉midate genamamo na꞉toa!”
LUK 5:25 Ba꞉ba tetenomolo ba꞉be dubuti ibino holoholo hapulu mahigate ebeno tilo lawete Godokono mahilo hunamo ba adipate ebeno genamamo dito tuya꞉,
LUK 5:26 ba꞉bema꞉ ba꞉bi tawakalubi hiliyonomate konomamo hanohanohutiya꞉. Iba꞉te Godokono mahilo hunamo ba adipate toletolehago na꞉ga꞉luya꞉, “A ka꞉lo hegelalo hanohano komo hibinomolo ulamema꞉!”
LUK 5:27 Ba꞉moe komo da꞉wibuya꞉ Ya꞉suti genama guni nuluhukuti eta dubu Libaiko ba꞉bo numiya꞉, ebe ba꞉ ta꞉kese uwatedawala, ebete ebeno oko habalo lutiya꞉. Ba꞉ba tetelo Ya꞉suti ebetamo na꞉goiya꞉, “Ama꞉ na na꞉ta꞉mahena꞉,”
LUK 5:28 ba꞉bene ebete mahigate ebeno oko ilina hiliyonomo miya꞉palete Ya꞉suku ba꞉bo ta꞉matuya꞉.
LUK 5:29 Ba꞉bene tete nanekele da꞉petuya꞉ Libaiti ebeno genamalo Ya꞉suku mabuma꞉ konomo poko bododiya꞉. Ba꞉ba tetelo komo ta꞉kese uwatepi dubu ba꞉gala komo hiliyonomo tawakalubi iba꞉te Ya꞉sukuba꞉ poko baa꞉ benahutiya꞉.
LUK 5:30 Ba꞉bene komo Pa꞉lisi kapiyuimipi ba꞉gala ibino tutumu iya꞉tulamepi iba꞉te Ya꞉suku ta꞉matapi na꞉kiyahalamiya꞉, “Mabu keka꞉ la꞉le ta꞉kese mani ha꞉da amiholo uwatepi ba꞉gala Godokono Tutumu Tabo uwateha꞉pi tawakaluba꞉go gao beya nihote iba꞉go baa꞉ da꞉nahanakoma?”
LUK 5:31 Huiyatiya Ya꞉suti ba꞉be tabo uliti iba꞉tamo na꞉goiya꞉, “Hidohido tawakaluba꞉te dogetatamo a꞉katolama꞉mena꞉, tawetawa꞉gopa꞉te kotolamema꞉na꞉.
LUK 5:32 Iyo, puya꞉te ha꞉kiya da꞉ga꞉lana, ‘A hidohido tawakalubila,’ na ba꞉bakobako tawakalubi uwatema꞉ kapiya꞉ha꞉. Na huiyatiya kubakuba tawakalubi kapiya uwatema꞉ piya꞉mo, iba꞉te ibino kuba ododili komokomone kohobila꞉ma꞉.”
LUK 5:33 Ba꞉bene komo tawakaluba꞉te Ya꞉sutamo na꞉ga꞉luya꞉, “Yoneko ta꞉matapi ba꞉gala Pa꞉lisi kapiyuimipino ta꞉matalepi iba꞉te hiya꞉hiya꞉ tetelo baa꞉ nahaheno Godotamo toetoe tabo ba꞉bo ga꞉lanaka, huiyatiya ama꞉ ta꞉matapa꞉te ba꞉ma ka꞉na a꞉kapola꞉nala꞉. Iba꞉te hiliyonomo tetelo helo gao beya nihote baa꞉ ba꞉bo nahanaka.”
LUK 5:34 Ya꞉suti iba꞉tamo na꞉goiya꞉, “Dubuti kamena da꞉lawemene, ba꞉ba tetelo ebeno mabuluba꞉te poko habalo baa꞉heno dito ba꞉ka꞉pola꞉namena꞉? Ao, wadiyaha꞉! Iba꞉te eba꞉go poko baa꞉ kapimilo konahama꞉na꞉.
LUK 5:35 Huiyatiya kamena uli lawe dubuti ebeno kamena eta habamo magata tete ba꞉ na꞉pe, hibila, ba꞉be hegelalo ebeno mabuluba꞉te ibino tepo temeteme komoma꞉ baa꞉ nahaheno kopola꞉nama꞉na꞉. Ba꞉bema꞉ numa꞉la꞉, ka꞉lo ba꞉ la꞉eno kalakalago baa꞉ naha tetela mabu nale la꞉go bemedenamo.”
LUK 5:36 Ba꞉bene Ya꞉suti iba꞉tamo ba꞉moe iya꞉tulame uwi bikiyauya꞉, “Lumagiti uli kaliko itamidate pakala kalikoeno bolagala꞉mo a꞉kakohomehamene. Ebete ba꞉ma ka꞉na dododimini uli kalikote pakala kalikago a꞉kamodobamene, gala kakabolagalema꞉ne.
LUK 5:37 Atu gabodo lumagiti pakala gautu-goe tama kalila꞉mo uli gao beya a꞉kahaminamene, mabu uli gao beyate pakala gautu-goe tama kalili ka꞉na꞉ta꞉pumima꞉ne, ba꞉bene gao beyate hakamo ka꞉ka꞉la꞉te gao beya ba꞉gala kalili ibi netewate kapiya tetelo kokubakubahama꞉na꞉.
LUK 5:38 Ba꞉moe mabuma꞉ wadiyala iya꞉tawadawate uli gao beya uliuli tama kalili kapiyamo na꞉haminahanakamene.
LUK 5:39 Ba꞉gala ba꞉moe ba꞉ eta komola. Lumagiti pakala gao beya da꞉ninako ebete galane tetelo uli gao beya nima꞉ ubiha꞉ma꞉ keda꞉ma꞉ne mabu ebete ba꞉goenakomene, ‘Pakala gao beya golanomola,’ huiyatiya ba꞉bako lumagi iya꞉tawaha꞉ uli gao beyoeno hido gola komo.”
LUK 6:1 Yu tawakalubino eta okoha꞉ talona hegelalo Ya꞉suti ebe ta꞉matapa꞉go kona pali ipuwado ba petolamenato, ebe ta꞉matapa꞉te kona kapiyakapiya kubakubadopo newakalamiti iba꞉te konahama꞉ tama ba꞉bo wehohuya꞉.
LUK 6:2 Ba꞉bema꞉ komo Pa꞉lisi kapiyuimipa꞉te Ya꞉sutamo na꞉ga꞉luya꞉, “Numa꞉, ama꞉ ta꞉matapa꞉te aeno tutumu tabamo kapapamila꞉haha꞉. Iba꞉te okoha꞉ talona hegela badama꞉ kadikanalita?”
LUK 6:3 Ba꞉bene Ya꞉suti iba꞉tamo ba huiya na꞉goiya꞉, “Wadiyala Godote ebeno Bukamo da꞉miya꞉tiya꞉, la꞉ ba꞉be komo nemalagidolala꞉. Da꞉ibiditamo kuba tete da꞉piya꞉, ebete ebeno wapata꞉lamepa꞉go baa꞉ma꞉ da꞉kapemitiya꞉, ba꞉bene ebete bada komo kododiya꞉?
LUK 6:4 Ebete Godokono Genamamo nodolote, ba꞉be Genamoeno okopa꞉te Godotamo da꞉miya꞉tenakui ba꞉be talona baa꞉ ebete a꞉nenahuya꞉. Numa꞉la꞉, aeno tutumu tabote a biya꞉tua꞉mena Godotamo hawa꞉goeno ikamehopa꞉te ba꞉be baa꞉ ha꞉kiya nahanaka, komo tawakaluba꞉te naha talonala. Huiyatiya Da꞉ibiditi ba꞉be baa꞉ nahate eba꞉go wapata꞉lamepa꞉tamo dikalameholiya꞉, Godote ba꞉be komo kubama꞉ kagoiya꞉ha꞉.”
LUK 6:5 Ba꞉bema꞉ Ya꞉suti iba꞉tamo na꞉goiya꞉, “Ba꞉ hibila, na Tawakalubino Naniwiti okoha꞉ talona hegela namutudawama꞉ eda꞉namo.”
LUK 6:6 Eta okoha꞉ talona hegelalo Ya꞉suti Yu tawakalubino baidi ibubulamehole genama guamo nodolote tawakalubi ba niya꞉tulamita, kokoto tu hapu hoeme dubuti ba꞉bolo na꞉lutiya꞉.
LUK 6:7 Ba꞉bene komo Pa꞉lisi kapiyuimipi ba꞉gala Godokono Tutumu iya꞉tulamepi iba꞉te Ya꞉suku baidi kodakodalo umitiya꞉, ebete okoha꞉ talona hegelalo ba꞉be dubu da꞉hiduimimini, iyo, ibi ubila Ya꞉suti ba꞉be komo ba ododi kubama꞉ ba꞉bo koga꞉lama꞉.
LUK 6:8 Huiyatiya Ya꞉suti iya꞉tawuya꞉ iba꞉te ibino tepo ipuwalo bada komokomo kemalagidolitiya꞉, ba꞉bema꞉ ebete ba꞉be dubutamo na꞉goiya꞉, “Ama꞉ mahigate dopo hapuamo na꞉pa꞉,” ba꞉bene ba꞉be dubuti mahigate dopo hapuamo pete ba꞉ dito putiya꞉.
LUK 6:9 Ba꞉bene Ya꞉suti iba꞉tamo na꞉goiya꞉, “Nale la꞉ balateda꞉lemata, aeno tutumu tabote kebe talona komo kiya꞉tua꞉mena? Ale okoha꞉ talona hegelalo hido komo o kuba komo ba꞉kododima꞉? Tawakalubi ba꞉ka꞉hiduilamema꞉ o ba꞉ka꞉kubahilamema꞉?”
LUK 6:10 Ba꞉ba tetelo Ya꞉suti ibi hiliyonomo ba pulameholenato ba꞉be dubutamo na꞉goiya꞉, “Amia꞉no kokoto na꞉hogamina,” ba꞉bene ebete kokoto da꞉hogaminuya꞉ ebeno kokotote ba꞉bo hiduya꞉.
LUK 6:11 Ba꞉be mabuma꞉ Pa꞉lisi kapiyuimipa꞉te konomamo maubahalo ibi ipuwalo tabo ba꞉bo ga꞉luya꞉, “A ba꞉moe dubu Ya꞉suku keba ka꞉na na꞉kamitima꞉?”
LUK 6:12 Ba꞉be dulu Ya꞉suti Godokoba꞉ tabo ga꞉lanama꞉ eta haka hunamo nodoloniya꞉, ba꞉bema꞉ ebete du ga꞉ga꞉nomolo Godokoba꞉ tabo ba ga꞉lana hegelate ba꞉bo powalohuya꞉.
LUK 6:13 Ba꞉bene hegelate da꞉puluhukuya꞉ ebete ebeno ta꞉matapi ebetamo ka꞉lamiti, ibi ipuwalo 12 dubu ba uwate ibi na꞉goelamiya꞉, “La꞉ ba꞉ naeno oelamepilata.”
LUK 6:14 Ya꞉suti 12 dubu duwatiya꞉, ba꞉moi ba꞉ ibino mahilola. Saimonoko Ya꞉suti ebetamo eta Pita mahilo bikamiya꞉, ba꞉gala ebeno ekawi A꞉nduluku. Ya꞉imesiko ba꞉gala Yoneko, Pilipiko ba꞉gala Batolomuku.
LUK 6:15 Ma꞉tiyuku ba꞉gala Tomasiko, A꞉lapiyasikono gudu Ya꞉imesiko ba꞉gala Saimonoko. Ba꞉moe eta Saimono tawakaluba꞉te dopamo na꞉ga꞉lanakuya꞉, ebete kapela Loma gabomani tawakaluba꞉go alaholodawama꞉ eda꞉nami.
LUK 6:16 Ba꞉gala Ya꞉suti komo dubu netewa beka-uwatiya꞉, Ya꞉imesikono gudu Yudasiko ba꞉gala Keliyotanapi Yudasiko, galane tetelo ba꞉moe kuititi dubuti Ya꞉suku anakapumipi bowalubiliya꞉ ebe kolawema꞉.
LUK 6:17 Ba꞉bene Ya꞉suti ebe ta꞉matapa꞉go haka hununi eta apotami hopamo da꞉nepalaguya꞉, ba꞉ba tetelo komo ta꞉matapi ba꞉gala hiya꞉hiya꞉ tawakalubi hiliyonomate iba꞉go ba꞉bo paluguya꞉. Komo iba꞉te Yelusalema ko habane ba꞉gala Yudiya hopoeno komo habahabane pelamiya꞉, ba꞉gala komo iba꞉te kehaha꞉ kolomo dodo hapuni kapelamiya꞉, ibi ba꞉ Taya ko habalo ba꞉gala Saidono ko habalo demedehonama꞉ ba꞉bi tawakalubila.
LUK 6:18 Ba꞉ hibila, ba꞉bi tawakalubi hiliyonomate pelameholiya꞉ Ya꞉sukunu tabo ulihoma꞉ ba꞉gala ebete ibino temetema꞉gopi kohiduilamelelamema꞉, ba꞉gala kuba gobogobagopa꞉te ebetamo atumu a꞉kapelamiya꞉, ba꞉bene ebete ibi hiliyonomo ba꞉bo hiduilamiya꞉.
LUK 6:19 Ba꞉bema꞉ ba꞉bi tawakalubi hiliyonomate ubila Ya꞉suku kologihoma꞉, mabu iba꞉te iya꞉tawahuya꞉ Godokono helote ebe ipuwane da꞉puluhukunakui ba꞉ba tetelo ebete temetema꞉gopi ba꞉bo hiduilamenakui.
LUK 6:20 Ba꞉bene Ya꞉suti ebeno hiliyonomo ta꞉matapi ba ulamita na꞉goelamiya꞉, “La꞉ puya꞉te awaelo demedenama, wadiyala la꞉ na꞉kalakalahala꞉, mabu Godote Ko Gawadubuma꞉ deda꞉na, ba꞉be hido haboeno komo la꞉enola!
LUK 6:21 “Ba꞉gala ba꞉ma tetelo la꞉ baa꞉ kapete dulamena, wadiyala la꞉ na꞉kalakalahala꞉, mabu Godote la꞉eno kape komo komodobuilamema꞉ne! “Ba꞉gala ba꞉ma tetelo la꞉ puya꞉te temetema꞉go dihiminama, wadiyala la꞉ na꞉kalakalahala꞉, mabu galane la꞉ kiya꞉da꞉mima꞉nemata!
LUK 6:22 “Ba꞉gala Tawakalubino Naniwi mabuma꞉ komopa꞉te la꞉tamo maubahalo ubiha꞉ tabo ba ga꞉la la꞉ diduduputilamena, ba꞉gala iba꞉te la꞉eno mahilo da꞉kubahilamena, wadiyala la꞉ atumu na꞉kakalakalahala꞉!
LUK 6:23 Iyo, la꞉ kalakalahalo hunamo niya꞉patela꞉tepahaliya꞉la꞉, mabu galane tetelo la꞉le Godokono Hunu Habalo la꞉eno huiya kokonomo konuwatema꞉nemata. Numa꞉la꞉, dopamo ibino iniwala꞉te ba꞉ atu ubiha꞉ tabo bekaga꞉lanakuya꞉ Godokono ukui hawakalimipa꞉tamo.
LUK 6:24 “Huiyatiya ba꞉ma tetelo la꞉ puya꞉te dogodogopima꞉ deda꞉hanama, la꞉ ko tepo temeteme kiya꞉tawahama꞉nemata, mabu la꞉eno kalakala ba꞉ na꞉lawenamata, galane kowiboma꞉ne!
LUK 6:25 “Ba꞉gala ba꞉ma tetelo la꞉ puya꞉te baa꞉ma꞉ kakapiminaha꞉, la꞉ ko tepo temeteme kiya꞉tawahama꞉nemata, mabu galane la꞉ baa꞉ma꞉ kokapimima꞉nemata! “Ba꞉gala ba꞉ma tetelo la꞉ puya꞉te diya꞉da꞉minama, la꞉ ko tepo temeteme kiya꞉tawahama꞉nemata, mabu galane la꞉ howela꞉go kihimima꞉nemata!
LUK 6:26 “Ba꞉gala tawakalubi hiliyonomate la꞉ da꞉mililameholemena꞉, la꞉ hidamo, mabu galane tetelo la꞉ ko tepo temeteme kiya꞉tawahama꞉nemata! Numa꞉la꞉, dopamo ibino iniwala꞉te Godokono mahilamo ha꞉da amiho tabo olamagimipi atumu a꞉mililameholenakuya꞉.”
LUK 6:27 Ba꞉bene Ya꞉suti gala na꞉kagoiya꞉, “Ba꞉be mabuma꞉ na la꞉tamo na꞉goemo, puya꞉te la꞉go dalaholohona, wadiyala la꞉ ibi malemalelo nemalagidolenala꞉ ba꞉gala iba꞉tamo hidohido komo nododilinakuya꞉la꞉.
LUK 6:28 Ba꞉gala la꞉tamo mela tabo dolamagiminaka, ba꞉bi tawakalubino komoma꞉ Godotamo na꞉toetoehonakuya꞉la꞉ ebete ibi hidamo kowalubilinama꞉, iyo, puya꞉te la꞉tamo kuba komokomo dododilina la꞉ ibi Godotamo na꞉wadiya꞉paa꞉latelenakuya꞉la꞉.
LUK 6:29 Ba꞉gala pote ama꞉ tatakolo danagalimimina꞉, wadiyala hapu ebetamo na꞉kikamiya꞉. Ba꞉gala kebe lumagiti amia꞉no sete ilina heloamo da꞉lawememena꞉, ba꞉be atu tetelo amia꞉no atuino ilina akamawada꞉la꞉, ama꞉le ebetamo malemalelo dito na꞉kikamiya꞉.
LUK 6:30 Iyo, lumagiti amia꞉no eta ilinama꞉ ama꞉ da꞉toemehomena꞉, wadiyala ebetamo malemalelo nikamiya꞉, ba꞉gala kebe lumagiti amia꞉no ilina pilolo duwatemene, ama꞉ tote ba꞉bi ilina heloamo akanuwata꞉la꞉.
LUK 6:31 Ba꞉bema꞉ tawakaluba꞉te la꞉tamo bada komo ododima꞉ la꞉le ubi dihatenakoma, la꞉ komopa꞉tamo ba꞉ ba꞉ba ka꞉na nododinakuya꞉la꞉.
LUK 6:32 “Puya꞉te la꞉ malemalelo demalagidolena, la꞉ ba꞉bi tawakalubi kapiya demalagidolenama la꞉eno ukui keba ka꞉nala꞉ka꞉? Ba꞉be mabuma꞉ Godote la꞉tamo hido huiya ba꞉kikalametamena꞉? Ao, mabu kuba ododilipa꞉te atumu ibino mabulubi kapiya malemalelo emalagidolenaka!
LUK 6:33 Ba꞉gala puya꞉te la꞉tamo hidohido komo dododilina, la꞉ ba꞉bakobakopi kapiyatamo hidohido komo dododilinama la꞉eno ukui keba ka꞉nala꞉ka꞉? Ba꞉be mabuma꞉ Godote la꞉tamo hido huiya ba꞉kikalametamena꞉? Ao, mabu kuba ododilipa꞉te ibino mabulubi kapiyatamo atu hidohido komo beka-ododilinaka!
LUK 6:34 Ba꞉bema꞉ puya꞉te la꞉tamo gala da꞉kikalameholenaka, la꞉ ibi kapiyatamo mani dikalameholema la꞉eno ukui keba ka꞉nala꞉ka꞉? Ba꞉be mabuma꞉ Godote la꞉tamo hido huiya ba꞉kikalametamena꞉? Ao, kuba ododilipa꞉te atumu ibino mabulubi kapiyatamo mani ikalameholenaka mabu atu komo iba꞉godone gala kakuwatema꞉na꞉!
LUK 6:35 Huiyatiya wadiyala la꞉tamo alaholopima꞉ deda꞉hana, la꞉ ibi malemalelo nemalagidolenala꞉ ba꞉gala iba꞉tamo hidohido komo nododilinakuya꞉la꞉. Iba꞉te manima꞉ la꞉ da꞉kiyalamemena꞉, wadiyala la꞉ iba꞉tamo dito nikalamiya꞉la꞉, huiya komo akemalagidolala꞉. Ba꞉mako ododi komodo la꞉ Hununomo Godokono gugudima꞉ eda꞉hate galane tetelo huiya konomo kuwatema꞉nemata. Numa꞉la꞉, ebete kuba ododilipi ba꞉gala ebetamo kalakala tabo ga꞉laha꞉pi ba꞉bakobako tawakaluba꞉tamo malemale komo ododilinako.
LUK 6:36 Ba꞉bema꞉ la꞉ hiliyonomo tawakalubi malemalelo nemalagidolenala꞉, la꞉eno Nabiwiti ibi keba ka꞉na kemalagidolena ba꞉ba ka꞉na.”
LUK 6:37 Ba꞉bene Ya꞉suti gala na꞉kagoiya꞉, “La꞉le komo tawakalubino komokomo anagilamelelamelo ibi kubapima꞉ tiyolo akaka꞉lama꞉la꞉, ba꞉bene Godote la꞉eno komo anagilamelelamelo la꞉ kubapima꞉ a꞉kaka꞉lama꞉mena꞉ta. Ba꞉gala wadiyala la꞉ tawakalubino kuba egebolelamete nadodoholelamiya꞉la꞉, ba꞉bene Godote atumu la꞉eno kuba egebolelamete kadodoholelamema꞉na꞉ta.
LUK 6:38 Ba꞉gala wadiyala la꞉ komopa꞉tamo ilina malemalelo nikalamenakuya꞉la꞉, ba꞉bene Godote atumu la꞉tamo ba ikalame tete hiliyonomolo ebete la꞉ ilinamo ba꞉tabuilamenakomena꞉ta, iyo, la꞉ komopa꞉tamo kebako dikalamenakoma, Godote ba꞉ atumu la꞉tamo ba꞉bako ba꞉kikalamenakomena꞉ta.”
LUK 6:39 Ba꞉bene Ya꞉suti iya꞉tulame uwi ba olamagi na꞉goiya꞉, “Baidi tamiho dubuti eta baidi tamiho dubu gabodo hidamo a꞉kamagatamene. Ebete ba꞉ba ka꞉na dewagelemene ibi netewapi haka gugamo badi konegudima꞉na꞉, aba꞉ hibila꞉ka꞉?
LUK 6:40 Ba꞉bema꞉ ka꞉lo sikululu diya꞉tawana ba꞉be guduino iya꞉tawa komote iya꞉tulamedawoeno iya꞉tawa kagogolonaha꞉, huiyatiya galane ebeno sikulu da꞉wibomene ebeno iya꞉tawa komo ba꞉gala iya꞉tulamedawoeno komo atu tetelo kopola꞉nama꞉na꞉.
LUK 6:41 “Keka꞉ mabu amia꞉no ekawino baidilo puhulu deha꞉poto umilo huiyatiya amia꞉no baidilo ditana ba꞉be ko keha tete kuminaha꞉?
LUK 6:42 Ba꞉gala bada mabuma꞉ amia꞉no ekawitamo ba꞉ma ka꞉na da꞉goita, ‘Ekawi, wadiyala amia꞉no baidilo ditana ba꞉be puhulu deha꞉poto nale kolawemema꞉nemata,’ huiyatiya amia꞉no baidilo ditana ba꞉be ko keha tete ama꞉ kalawenaha꞉? A꞉iye! Ama꞉ ma꞉lapila netewa lumagilata! Wadiyala ama꞉ dopamo amia꞉no baidilo ditana ba꞉be keha lawete, ama꞉le galane hidamo gahimiti amia꞉no ekawino baidilo ditana ba꞉be puhulu deha꞉poto ba꞉bo kolawemema꞉na꞉ta.”
LUK 6:43 Ba꞉bene Ya꞉suti gala na꞉kagoiya꞉, “Hidohido kehalo kuba gaote a꞉kanolohamena꞉, ba꞉gala kuba kehalo hidohido gaote a꞉kanolohamena꞉.
LUK 6:44 Iyo, ba꞉ hibila, la꞉ hiya꞉hiya꞉ kehoeno gao ibino holoholamo dulamema la꞉ ba꞉bo kiya꞉tawahama꞉nemata, ibi ipuwalo kebe gaote nahama꞉ hidohidoma꞉ keda꞉hana. Ba꞉bema꞉ lumagiti olagoeno kehamo tote anahu kehoeno gao a꞉kanetapihamene, ba꞉gala ebete olagoeno kehalo hidohido gala꞉ipi gao a꞉kanulama꞉mene.
LUK 6:45 Ba꞉bema꞉ hido lumagiti ebeno tepo ipuwane hidohido komo buluhukulatelenakomene, huiyatiya kuba lumagino tepo ipuwalo kuba komate pola꞉na ba꞉bema꞉ ebegodone kuba komate ba꞉pikulinakomena꞉, mabu lumagino tepo ipuwalo kebe komate ka꞉pola꞉na, ba꞉ ba꞉bi komate ebeno tabo olamagi komodo kopikulima꞉na꞉.”
LUK 6:46 Ba꞉bene Ya꞉suti gala na꞉kagoiya꞉, “Keka꞉ mabu la꞉ na Kodawama꞉ dito da꞉ka꞉naminama, huiyatiya nale dolamaginakomo ba꞉bi komo la꞉le kododilinaha꞉?
LUK 6:47 Ba꞉bema꞉ kebe lumagiti natamo pete naeno tabo pulihote ba꞉bi komokomo dododilimini, ba꞉be lumagino komo keba ka꞉na kitana nale la꞉ hidamo kiya꞉tulamema꞉nemata.
LUK 6:48 Ba꞉be lumagi ba꞉ hido genama detiya꞉ ba꞉be dubu huiyala. Ebete haka ibulunomo aligiti kodakoda haka hunamo ebeno genama ba꞉bo etiya꞉, ba꞉bene hulama beyate ba odolo ba꞉be genama da꞉pemida꞉miya꞉, huiyatiya genamate kaleguya꞉ha꞉ mabu etedawate ebeno genama hidamo etiya꞉.
LUK 6:49 Huiyatiya kebe lumagiti naeno tabo ulihote ododilihino, ebe ba꞉ bula꞉i hakamo genama detiya꞉ ba꞉be dubu huiyala. Ba꞉be genamoeno mabu puliyala, kitanuya꞉ha꞉, ba꞉bema꞉ hulama beyate ba odolo ba꞉be genama da꞉pemida꞉miya꞉ hakamo dito kaguya꞉. O olalati bada konomola꞉ka꞉!”
LUK 7:1 Ya꞉suti tawakaluba꞉tamo ba꞉moi komokomo hiliyonomo olamagi da꞉wibuya꞉ ebete Kapeniyama habamo ba꞉ dito tuya꞉.
LUK 7:2 Lomanapino eta alaholohodawa gawadubuti ba꞉bolo nemedenami, ba꞉bene ebeno huiyaha꞉ okopi ipuwalo ebete kebe dubu konomamo demalagidolonami, ba꞉be dubu ko tawetawete umitiya꞉, ebe hoe tatalila.
LUK 7:3 Ba꞉bema꞉ ba꞉be gawadubuti Ya꞉sukunu komo uliti komo Yu watowatopi dubu ebetamo ba꞉bo ka꞉lamiya꞉, iba꞉te Ya꞉suku ba꞉ma ka꞉na konega꞉lamema꞉, ebete pete gawadubuino okodawa kopehiduimima꞉.
LUK 7:4 Ba꞉bene komo iba꞉te Ya꞉sutamo pelamete ebe toemeholo na꞉pega꞉lamiya꞉, “Ba꞉moe Lomanapi gawadubu hido lumagila. Wadiyala ama꞉ ebe na꞉nowaluba꞉,
LUK 7:5 mabu ebete a Yu tawakalubi koamo nemalagidoloena, ba꞉gala ebete ebeno mana꞉mo aeno baidi ibubulamehole genama etea꞉mi.”
LUK 7:6 Ba꞉bema꞉ Ya꞉suti iba꞉go na꞉tuya꞉. Ebete ba tonato genama tama꞉mo da꞉nuluhukuya꞉, ba꞉be gawadubuti ebeno mabulubi ba꞉bo oelamiya꞉ iba꞉te Ya꞉suku konega꞉lamema꞉, “Kodawa, eta kodakoda komo na mabuma꞉ akododa꞉la꞉. Na hido lumagiha꞉ ama꞉le naeno genamamo pa꞉pa꞉gama꞉.
LUK 7:7 Ba꞉gala na hidoenoha꞉ amia꞉no holoholo hapuamo pema꞉. Huiyatiya na niya꞉tawutamo, ama꞉le genamamo peheno tabo dito da꞉goemena꞉, naeno okodawate hibinomolo kohidoma꞉ne.
LUK 7:8 Mabu na atumu alaholohopino koko gawadubuino hopodawama꞉ ba eda꞉na ibino tabamo a꞉papamiwatanakomo, ba꞉gala atu tetelo naeno alaholohopa꞉te naeno umi ipuwalo pola꞉na. Ibi ipuwalo nale eta da꞉kiyamemo, ‘Ama꞉ na꞉toa!’ ebete ba꞉bo kotoma꞉ne. Ba꞉gala eta da꞉kakiyamemo, ‘Ama꞉ na꞉pa꞉!’ ebete ba꞉bo kopema꞉ne. Atumu nale naeno huiyaha꞉ okodawa da꞉kiyamemo, ‘Ama꞉ ba꞉moe komo nododa꞉!’ ebete ba꞉be komo kododima꞉ne. Ba꞉bema꞉ Kodawa, wadiyala ama꞉ tabote na꞉gaa꞉ naeno oko dubuti kohidoma꞉.”
LUK 7:9 Ya꞉suti ba꞉be tabo duliya꞉ ebete na꞉la꞉wiya꞉, ba꞉bema꞉ ebe da꞉ta꞉matutiya꞉ ebete ba꞉bi tawakalubi hiliyonomatamo ohobigate na꞉goiya꞉, “Na la꞉tamo hibinomolo goemo, na Isalaela tawakalubi hiliyonomo ipuwalo ba꞉mako hibima꞉ midi lumagi a꞉kuma꞉lemo!”
LUK 7:10 Ba꞉bene alaholohodawa gawadubuti doelamiya꞉ ba꞉bi dubate ebeno genamamo gala da꞉kapelamiya꞉, iba꞉te ba꞉be huiyaha꞉ okodawa hido bepumiya꞉.
LUK 7:11 Eta hegelalo Ya꞉suti eta habamo dito tuya꞉, ba꞉be haboeno mahilo ba꞉ Na꞉inila, ba꞉ba tetelo ebe ta꞉matapi ba꞉gala tawakalubi hiliyonomo eba꞉go kapimilo tolamitiya꞉.
LUK 7:12 Ba꞉bene ebete haboeno kala imi gigihamo da꞉nuluhukuya꞉, ba꞉ba tetelo hiliyonomo tawakaluba꞉te hoe dubu aguti habane pikulitiya꞉ ebe bobamo kopinihatema꞉, ba꞉be hoe dubuino menoko hamolela, ebeno gudu kapiyanomote hoiya꞉.
LUK 7:13 Ba꞉bema꞉ Kodawate ba꞉be kamena umiti malemaletelo ebetamo na꞉goiya꞉, “Ama꞉ akihitala꞉.”
LUK 7:14 Ba꞉bene Ya꞉suti tote hoe dubuti da꞉kapitanuya꞉ ba꞉be talatala da꞉nologiya꞉, ebe dagatutiya꞉ ba꞉bi dubate ba꞉bamo ba putitata, ebete hoe dubutamo na꞉goiya꞉, “Amoga, nale ama꞉ begoememata, na꞉mahiga!”
LUK 7:15 Ba꞉bene ba꞉be dubuti mahigate tabo olamagi da꞉tupuimiya꞉, Ya꞉suti ebeno menokotamo dito ikamiya꞉.
LUK 7:16 Ba꞉bema꞉ ibi hiliyonomate konomamo toletoleholo Godokono mahilo hunamo ba adipate na꞉ga꞉luya꞉, “Godokono ukui hawakalimidawa atamo ba꞉ a꞉puluhuku! Iyo, Godote ebeno tawakalubino ka꞉ka꞉ mula꞉lelamema꞉ pe!”
LUK 7:17 Ba꞉bema꞉ ba꞉be Na꞉ini haboeno hopo ba꞉gala komo hopo tametamelo demedehonama꞉, ba꞉bi tawakalubi hiliyonomate Ya꞉sukunu komoma꞉ tabo ba꞉bo nikiyahuya꞉.
LUK 7:18 Ba꞉ba tetelo Yoneko tawakalubi beyamo wadulateledawa, ebeno ta꞉matapa꞉te ba꞉moi hiliyonomo komokomo ebe ba꞉bo pikiyahamiya꞉. Ba꞉bene ibi ipuwalo Yonete netewa dubu ka꞉lamiti
LUK 7:19 Ya꞉sutamo ba꞉bo noelamiya꞉, iba꞉te ebe ba꞉ma ka꞉na konega꞉lamema꞉, “Ama꞉ ba꞉ Yonete pema꞉ da꞉goi ba꞉be lumagila꞉ka꞉, o ale eta lumagi beka꞉latiminama꞉?”
LUK 7:20 Ba꞉bene iba꞉te Ya꞉sutamo pelamete na꞉pega꞉luya꞉, “A Yonete poea꞉me ama꞉ ma kumu kopalateda꞉ma꞉, ‘Ama꞉ ba꞉ Yonete pema꞉ da꞉goi ba꞉be lumagila꞉ka꞉, o ale eta lumagi beka꞉latiminama꞉?’”
LUK 7:21 Ba꞉ba tetenomolo Ya꞉suti ibino holoholo hapulu hiliyonomo hiya꞉hiya꞉ temetema꞉gopi, ba꞉gala tawetawa꞉gopi, ba꞉gala kuba gobogobagopi bihiduilamiya꞉, ba꞉gala ebete baidi tamihopi atumu akahiduilamiya꞉.
LUK 7:22 Ba꞉bema꞉ ebete huiya tabo Yoneko ta꞉matapa꞉tamo na꞉goiya꞉, “La꞉ tote la꞉le kebe komo kulameoma ba꞉gala la꞉le kebe tabo kulihoma, ba꞉bi komokomo Yoneko na꞉nega꞉lama꞉la꞉. Baidi tamihopa꞉te a꞉la꞉minahala꞉ ba꞉gala nato a꞉ta꞉buta꞉midalelamepa꞉te ba꞉ na꞉wapata꞉lama꞉! Kuitikuita꞉gopa꞉te a꞉hidohidoha ba꞉gala galo duhulamepa꞉te ba꞉ nuliha! Ha꞉lahapa꞉te hoene gala a꞉kamahila꞉hala꞉ ba꞉gala awae tawakaluba꞉tamo Godokono Hido Tabote a꞉pe!
LUK 7:23 Ba꞉bema꞉ kebe lumagiti na hibima꞉ midinilo ukui netewama꞉ eda꞉heno, ebegodolo Godokono kalakalate bitanamene!”
LUK 7:24 Ba꞉bene Yonete da꞉poelamiya꞉ ba꞉bi dubu netewate da꞉tuya꞉, Ya꞉suti Yonekono komoma꞉ tawakaluba꞉tamo ba꞉bo olamagiya꞉. Ebete na꞉goiya꞉, “La꞉ Yonekono komo ulihote dito hopamo da꞉nikulima, bada komo umima꞉ ka꞉tolamiuima? Pudu kapiya huhuti dito dagegetiti, ba꞉be umima꞉ ka꞉tolamiuima?
LUK 7:25 O la꞉ hidohido kaliko pupuli dubu umima꞉ ka꞉tolamiuima? Ao, la꞉ iya꞉tawahala hidohido kaliko pupulihopa꞉te dito hopolo kemedehonaha꞉, huiyatiya iba꞉te koko gawadubuino genamalo emedehona!
LUK 7:26 Ba꞉bema꞉ na niya꞉tunama꞉la꞉, la꞉ badama꞉ ka꞉tolamiuima? Godokono ukui hawakalimidawa umima꞉la꞉ka꞉? Iyo, na la꞉tamo hibi tabo begoemo, Yonete Godokono komo ukui hawakalimipi hiliyonomo a꞉gogoli.
LUK 7:27 Ba꞉ hibila, Yoneko mabuma꞉ Godote ebeno Bukalo tabo ba꞉ma ka꞉na goiya꞉, ‘Nale Kelisokono dopo hapuamo naeno tabo atadawa kopoemema꞉nemo, ebete ebe dopamete ebeno gabo kohiduimima꞉.’”
LUK 7:28 Ya꞉suti gala na꞉kagoiya꞉, “Nale la꞉ begoelamemata, tupuimi mabuni ba꞉ma teta꞉mo puluhuku ba꞉moe hopo konomolo da꞉hawakalahaliya꞉, ba꞉bi tawakalubi hiliyonomo ipuwalo Yoneko kodawanomoma꞉ eda꞉na. Huiyatiya ba꞉ma tetene tupuimiti Godote Ko Gawadubuma꞉ deda꞉na, ba꞉be habalo kebe lumagiti deha꞉potonomoma꞉ deda꞉mene ebete Yoneko hibilo kogogoloma꞉ne.”
LUK 7:29 Ba꞉ba tetelo dopamo Yonete pui beyamo da꞉wadulateliya꞉, ba꞉bi ta꞉kese uwatepi ba꞉gala komo hiliyonomo tawakalubi iba꞉te Ya꞉sukunu tabo uliti Godokono gabo tuputupunomoma꞉ ga꞉late ba꞉bo kalakalahutiya꞉.
LUK 7:30 Huiyatiya Pa꞉lisi kapiyuimipi ba꞉gala Godokono Tutumu iya꞉tulamepi iba꞉te dopamo Yonetamo kanikuliya꞉ha꞉ ebete ibi beyamo wadulatelema꞉. Ba꞉be komo ipuwalo iba꞉te Godokono hido komo a꞉duhimiya꞉, ba꞉bema꞉ iba꞉te Ya꞉sukunu taboma꞉ kakalakalahutiya꞉ha꞉.
LUK 7:31 Ba꞉bema꞉ Ya꞉suti na꞉goiya꞉, “Na ba꞉ma tete tawakalubino komo kebe go tabamo na꞉ka꞉hawakalimimo? La꞉ kebako tawakalubila꞉ka꞉?
LUK 7:32 La꞉ ba꞉ kolowami habalo diya꞉da꞉mita ba꞉bi gugudi hegehege huiyala. Komo guguda꞉te komopa꞉tamo kaga꞉la, komopa꞉te komopa꞉tamo kaga꞉la, iba꞉te olowabeletihuilo ba꞉ma ka꞉na ewagelena, ‘Ale poko ba ododi pa꞉lola꞉ da꞉moleholema꞉ huiyatiya la꞉ ago kamoeha꞉, ba꞉gala a hoe lumagi bobamo ihatema꞉ dewagelitama꞉ la꞉ huiyatiya ago kihimitaha꞉!’ Iyo, ba꞉ma tete tawakaluba꞉la꞉, la꞉ ba꞉ ba꞉ba ka꞉na ewagelenamata, la꞉ Godokono okopa꞉tamo ubiha꞉ tabo bega꞉lanakomata.
LUK 7:33 Numa꞉la꞉, Yoneko tawakalubi beyamo wadulateledawate da꞉puluhukui, ba꞉ba tetelo ebete helo gao beya kaninakuiha꞉ ba꞉gala komo tetelo ebete baa꞉ naheno lutanakui Godokono oko kowatima꞉, ba꞉bema꞉ la꞉ na꞉ga꞉luimata, ‘Ebe kuba gobogobagoenola!’
LUK 7:34 Huiyatiya Tawakalubino Naniwiti da꞉puluhukui, ebeno komo hiya꞉la. Ebete baa꞉ a꞉nanako ba꞉gala helo gao beya a꞉ninako ba꞉bema꞉ la꞉ ba꞉ma ka꞉na ga꞉lanakomata, ‘Ebeno kuba numa꞉la꞉! Ebe tumu goema꞉ eda꞉te baa꞉ konomamo nanako, ebe helo gao beya ni kodawala! Ebe ba꞉ ta꞉kese mani ha꞉da amiholo uwatepi ba꞉gala komo Godokono Tutumu Tabo uwateha꞉pi ibino mabulubila!’”
LUK 7:35 Ba꞉bene kuititinomolo Ya꞉suti iba꞉tamo na꞉goiya꞉, “Godokono hido mulu komo da꞉ta꞉matana, ba꞉bi tawakaluba꞉te ibino emede ipuwalo ba꞉be mulu hibinomolo ba꞉hawakaliminakomena꞉.”
LUK 7:36 Ba꞉bene eta Pa꞉lisi kapiyuimidawa dubuti Ya꞉suku na꞉goemiya꞉ ebete ebegodolo baa꞉ konenama꞉, ba꞉bema꞉ Ya꞉suti ba꞉be dubuino genamamo nodolote baa꞉ nama꞉ dito nemediya꞉.
LUK 7:37 Ba꞉be habalo eta kuba kamena nemedenami, ba꞉bene Ya꞉suti Pa꞉lisi kapiyuimidawoeno genamalo baa꞉ da꞉nutiya꞉ ba꞉be kamenate ba꞉be komo uliti hido nibo ihi nakola kalila꞉mo tabuimi ba꞉bo adahiya꞉.
LUK 7:38 Ba꞉ba tetelo ebete Ya꞉sukunu gala hapuni pete ebeno nato mabamo putiti ebeno ihi baida꞉mo Ya꞉sukunu nato pukulalemete nato a꞉la꞉li ebeno hinibamo ba꞉bo meteteholemiya꞉, ba꞉bene ebete ebeno nato aboelateholemete ebete dadahiya꞉ ba꞉be hido nibo ihi ebeno natamo dito haminamiya꞉.
LUK 7:39 Ba꞉bene Ya꞉suku da꞉goemiya꞉ ebeno genamamo pema꞉, ba꞉be Pa꞉lisi kapiyuimidawate kamenoeno ododi komo umiti ebeno tepo ipuwalo ba꞉ma ka꞉na emalagidoluya꞉, “Ba꞉moe dubu ebe Godokono ukui hawakalimidawama꞉ neda꞉tale, ebete ba꞉be kamenoeno komo biya꞉tawana꞉, ebe dologi ba꞉be kamena ba꞉ dubu bilibili kamenala!”
LUK 7:40 Ba꞉bene Ya꞉suti Pa꞉lisi kapiyuimidawatamo na꞉goiya꞉, “Saimono, nagodolo tabo deha꞉poto bitana ama꞉ kiyamema꞉.” Ba꞉bene Saimonote na꞉goiya꞉, “Wadiyala, Iya꞉tulamedawa, na꞉gaa꞉.”
LUK 7:41 Ya꞉suti na꞉goiya꞉, “Eta ilina dogodogo dubu nemedenami, ba꞉bene dubu netewate ebegodone mani uwatete tete ga꞉ga꞉nomolo ebetamo gala kikamehuya꞉ha꞉, etate 500 mani, etate 50 mani.
LUK 7:42 Ibi netewapa꞉te ba꞉ba ka꞉na huiyahaleheno ba emedena, eta hegelalo ba꞉be ko dubuti ibi ebetamo ka꞉lamiti, ibi malemalelatelelo ibino huiyahaleha꞉ komokomo dito egebolelamiya꞉. Ba꞉bema꞉ amia꞉no ukui keba ka꞉nala꞉ka꞉, ibi netewapi ipuwalo ko kalakalago ebe pote kemalagidolonami?”
LUK 7:43 Saimonote tabo ba huiya na꞉goiya꞉, “Naeno ukui bitana, mani konomo duwatiya꞉ ba꞉be huiyaha꞉dawala.” Ba꞉bene Ya꞉suti na꞉goiya꞉, “Ama꞉ hibi tabo begaa꞉ta.”
LUK 7:44 Ba꞉ba tetelo Ya꞉suti kamenatamo ohobigate Saimonoko ba꞉bo alatediya꞉, “Ama꞉ ba꞉moe kamena na꞉kumiuta? Na amia꞉no genamamo da꞉podolomo, ba꞉ba tetelo ama꞉ natamo nato ukulaleno beya kikanameha꞉. Ebete huiyatiya ebeno ihi baida꞉mo naeno nato ukulalenamete, nato a꞉la꞉li ebeno hinibamo a꞉meteteholename.
LUK 7:45 Ba꞉gala ama꞉ na kaboenateneha꞉, huiyatiya nale genamamo da꞉podolomo ba꞉ba tetene tupuimiti ebete naeno nato aboelatehole kekelamitaha꞉.
LUK 7:46 Ba꞉gala ama꞉ hido olibi kikipoeno iha꞉mo naeno wato kabutimiha꞉, ebete huiyatiya naeno natamo huiya konomo hido nibo ihi behamina.
LUK 7:47 Ba꞉bema꞉ na ama꞉tamo na꞉goemo, ebete natamo malemale konomamo da꞉hawakalimi, ba꞉be ododi komote eta komo ba꞉ma ka꞉na kahawakalimi, Godote ebeno koko kuba hiliyonomo egebolemete adodoholeme. Huiyatiya numa꞉, Godote eta lumagino hegehege kuba dadodoholememene, diyala, ba꞉be lumagiti malemale komo Godotamo da꞉ a꞉kahawakalima꞉mene.”
LUK 7:48 Ba꞉bene Ya꞉suti ba꞉be kamenoeno tepo ipuwa ba iya꞉tawa ebetamo na꞉goiya꞉, “Godote amia꞉no kuba egebolemete adodoholema꞉ta.”
LUK 7:49 Ba꞉bema꞉ eba꞉go ahiditi baa꞉ da꞉nahutiya꞉ iba꞉te ibi ipuwalo na꞉ga꞉luya꞉, “Lumagino kuba egebolemema꞉ da꞉goe, moe kebe awagaha dubula꞉ka꞉?”
LUK 7:50 Ba꞉bene Ya꞉suti kamenatamo gala na꞉kagoiya꞉, “Amia꞉no hibima꞉ midi komote amia꞉no ka꞉ka꞉ a꞉mula꞉ma꞉ta. Kalakalago na꞉toa.”
LUK 8:1 Ba꞉bene komo hegela da꞉wibuya꞉ Ya꞉suti koko ba꞉gala hegehege habahabalo Godokono Hido Tabo olamaga꞉go ba pata꞉, Godote Ko Gawadubuma꞉ deda꞉na ebete ba꞉be komo benolamaginakui. Ba꞉ba tetelo ebeno 12 ta꞉matapi dubate eba꞉go tolamenakuya꞉,
LUK 8:2 ba꞉gala komo kamenakamenate eba꞉go atumu na꞉kawapata꞉lamenama꞉, dopamo tetelo ibi ipuwalo komopa꞉te kuba gobogobagopima꞉ eda꞉hanama꞉ ba꞉gala komopa꞉te hiya꞉hiya꞉ temetema꞉gopima꞉ eda꞉hanama꞉, huiyatiya Ya꞉suti ibi a꞉hiduilamiya꞉. Ba꞉bi kamenakamena ipuwalo Magadalanapi Ma꞉liko ba꞉ etala, dopamo Ya꞉suti ebegodone sa꞉ba꞉ni kuba gobogobo boelamiya꞉.
LUK 8:3 Ba꞉gala eta kamena ba꞉ Kusakono kamena Yowanatela, Kusako ba꞉ Ko Gawadubu Helodikono hopodawa etala. Ba꞉gala eta kamena ba꞉ Susa꞉natela. Ba꞉bi netewa-kapiya kamenakamena iba꞉te komo hiliyonomo kamenakamenago ibino mana꞉mo Ya꞉suku ba꞉gala ebeno 12 ta꞉matapi dubu bowalubilinakuya꞉.
LUK 8:4 Ba꞉bene tawakalubi hiliyonomate hiya꞉hiya꞉ habahabane pelameholete Ya꞉sukuba꞉ da꞉pekapiyuimiya꞉, Ya꞉suti iya꞉tulame uwi iba꞉tamo ba꞉ma ka꞉na olamagiya꞉,
LUK 8:5 “Eta lumagiti haka da꞉hiduimi, ba꞉ba tetelo ebete kona kikipo haminahala꞉go ba tonato komo kikipo iba꞉te gabamo ba꞉bo gudiya꞉, ba꞉bema꞉ tawakaluba꞉te natamo da꞉mikimoeli holaholate ba꞉ dito penaliya꞉.
LUK 8:6 Komo kikipo iba꞉te nakola hakamo gudiya꞉, ba꞉bema꞉ iba꞉te nanekela꞉mo apepehote ba꞉bo waiwaihuya꞉ mabu ba꞉be hakoeno a꞉la꞉li puliyala.
LUK 8:7 Komo kikipo iba꞉te olagopi hemo hakamo gudiya꞉, ba꞉bema꞉ iba꞉te kapimilo apepehote olagopi hemate kona ba꞉ dito alukuliya꞉.
LUK 8:8 Huiyatiya komo kikipo iba꞉te hido hakamo gudiya꞉, ba꞉bema꞉ ba꞉ba꞉te apepehote ba꞉ dito nolohuya꞉, eta konate 100 teta꞉mo, eta konate 100 teta꞉mo, iba꞉te ba꞉ ba꞉ba ka꞉na hiliyonomoma꞉ eda꞉huya꞉.” Ba꞉bema꞉ Ya꞉suti ibulunomamo na꞉goiya꞉, “Galagodawa, ama꞉ hidamo nulia꞉!”
LUK 8:9 Ba꞉bene Ya꞉suku ta꞉matapa꞉te ebe nalatediya꞉, “Ba꞉moe iya꞉tulame uwino ipuwa keba ka꞉nala꞉ka꞉?”
LUK 8:10 Ya꞉suti iba꞉tamo ba huiya na꞉goiya꞉, “Godote Ko Gawadubuma꞉ deda꞉na, ba꞉be komoeno ipuwa kolawema꞉ nale helo la꞉tamo ikalamimata, iyo, ba꞉be komoeno awaminale komokomo la꞉ ba꞉ iya꞉tawahuimata. Huiyatiya komo tawakalubi eba ka꞉naha꞉, iba꞉te ba꞉be komoeno iya꞉tulame uwi ulihote, iba꞉te ebeno ipuwa bohowadinakomena꞉ huiyatiya a꞉kuminakamena꞉, iyo, iba꞉te bulinakomena꞉ huiyatiya a꞉kiya꞉tawahanakamena꞉.”
LUK 8:11 Ba꞉bene Ya꞉suti gala na꞉kagoiya꞉, “Ba꞉moe iya꞉tulame uwino ipuwa ba꞉ma ka꞉nala, kona kikipo ba꞉ Godokono tabola.
LUK 8:12 Ba꞉bene komo tawakalubi gabamo da꞉gudi, ibi ba꞉bi kona kikipo keba ka꞉nala꞉ka꞉ ba꞉ba ka꞉nala. Iba꞉te Godokono tabo dulimina꞉, Saitanate pete ba꞉be tabo ibino tepo ipuwane kopuwatema꞉ne iba꞉te hibima꞉ miditi ka꞉ka꞉ mula꞉ komo lawekapoma꞉.
LUK 8:13 Komo tawakalubi nakola hakamo da꞉gudi, ibi ba꞉ ba꞉bi kikipola. Iba꞉te tabo dulimina꞉ kalakalago kolawema꞉na꞉, huiyatiya ibino tepo ipuwalo haha puliyala, ba꞉bema꞉ iba꞉te hibima꞉ midi ipuwalo nanekela꞉mo emeda꞉tepate temeteme komate iba꞉tamo da꞉pikulimina꞉ tiyonomo kogudima꞉na꞉.
LUK 8:14 Komo tawakalubi olagopi hemo hakamo da꞉gudi ba꞉bi kikipola. Iba꞉te tabo kulima꞉na꞉, huiyatiya iba꞉te ilina uwatema꞉ ba emalagidolena ukui bilibilima꞉ eda꞉hana, ba꞉bema꞉ ibino emede komoeno ubi komate ibino hibima꞉ midi komoeno ka꞉ka꞉ ba anakapumi iba꞉te hido naha konama꞉ a꞉keda꞉hamena꞉.
LUK 8:15 Ba꞉bene komo tawakalubi hido hakamo da꞉gudi ba꞉bi kikipola. Iba꞉te Godokono tabo dulimina꞉ hibinomolo kolawema꞉na꞉, ba꞉bene iba꞉te ibino tepo ipuwalo ba꞉be tabamo papamila꞉halete kodakodanomolo ba utitata hido naha kona ba꞉bo konolohoma꞉na꞉.”
LUK 8:16 Ba꞉bene Ya꞉suti gala na꞉kagoiya꞉, “Lumagiti ebeno wuiki alo pa꞉titi bagolo ipuwamo a꞉kihata꞉mene ba꞉gala ebeno wata bahi ipuwamo a꞉kihata꞉mene. Huiyatiya ebete wuiki hawakala baha꞉mo kihatema꞉ne, ba꞉bene tawakaluba꞉te ebeno genama guamo da꞉palehawaminamena꞉ iba꞉te ba꞉be alo kopumima꞉na꞉.
LUK 8:17 Numa꞉la꞉, kebe awalelahale komate da꞉pola꞉na galane tetelo Godote kohawakalilamema꞉ne, ba꞉gala kebe ugumuili komate da꞉pola꞉na galane tawakaluba꞉te alo tetelo kulameholema꞉na꞉.
LUK 8:18 Ba꞉bema꞉ ama꞉ hidamo nulia꞉. Godokono tabo ulihoma꞉ lumagigodolo hidohido ukui da꞉pola꞉na, Godote ebetamo hiliyonomo hidohido komo gala kakikamehoma꞉ne. Ba꞉gala lumagigodolo hidohido ukui pola꞉naheno huiyatiya ebete nemalagidolona, ‘Na hidoenola,’ ebegodolo kebe kapiyakapiya komate da꞉pola꞉na Godote ebegodone gala kakuwatemema꞉ne.”
LUK 8:19 Ba꞉bene Ya꞉sukunu menoko ba꞉gala ebeno ekaki ebetamo da꞉pelamiya꞉, iba꞉te ebe umima꞉ kamodobuya꞉ha꞉ mabu tawakalubi hiliyonomate ebe tamelo na꞉pola꞉nuya꞉.
LUK 8:20 Ba꞉bema꞉ eta lumagiti Ya꞉suku na꞉kiyamiya꞉, “Amia꞉no menoko ba꞉gala ekaki iba꞉te genama tamelo ba꞉pela꞉mota꞉hana. Ibi ubila ama꞉ kumima꞉.”
LUK 8:21 Ba꞉bene Ya꞉suti ibi hiliyonomatamo na꞉goiya꞉, “Pote Godokono tabo uliti ebetamo da꞉papamiwatamene, ba꞉be lumagi ba꞉ naeno menokola ba꞉gala ba꞉bako tawakalubi ba꞉ naeno ekakila.”
LUK 8:22 Eta gapogapolo Ya꞉suti ebe ta꞉matapa꞉go boga꞉mo ololonate ibi na꞉goelameniya꞉, “A bobo hapuamo kona꞉hiwaliya꞉,” ba꞉bema꞉ iba꞉te bobo a꞉hiwale ba꞉bo tupuiminiya꞉.
LUK 8:23 Iba꞉te ba na꞉hiwalena Ya꞉suti ba꞉be palai boge gulu ba꞉ dito newataniya꞉, ba꞉bene ko gogonomote ba mahigana koko gawiyoeno beyate boge guamo da꞉pa꞉la꞉haniya꞉ bogete tatalila ululuna.
LUK 8:24 Ba꞉bema꞉ iba꞉te Ya꞉sutamo pelamenate ebe ba pemodoetena ba꞉bo pega꞉lameniya꞉, “Iya꞉tulamedawa, a ba꞉ koha꞉lahama꞉nema꞉!” Ba꞉ba tetelo Ya꞉suti mahiganate huhu ba꞉gala koko gawiya na꞉kiyahalameniya꞉, “La꞉ na꞉tatabahala꞉!” ba꞉bene huhuti wibonate bobote tatabama꞉ ba꞉bo eda꞉niya꞉.
LUK 8:25 Ba꞉bema꞉ Ya꞉suti iba꞉tamo na꞉goeniya꞉, “La꞉eno hibima꞉ midi komo keka꞉?” Huiyatiya iba꞉te tola꞉go hanohanoholo ibi ipuwalo na꞉ga꞉laniya꞉, “Moe lumagi potela꞉ka꞉? Ebete huhu ba꞉gala gawiya da꞉kiyahalame, iba꞉te ebeno tabamo a꞉papamila꞉!”
LUK 8:26 Ba꞉bene Ya꞉suku ba꞉gala ebe ta꞉matapi iba꞉te Gelasa haboeno hopamo nikuliya꞉, ba꞉be hopote Ga꞉lili Bobo hapulu itanami.
LUK 8:27 Ya꞉suti hakamo ba nodolo Gelasa habanapi kuba gobogobagoeno dubuti eba꞉go paluguya꞉, ebete tete ga꞉ga꞉nomolo kalikoheno emedenami ba꞉gala ebe genamanomolo kemedenamiha꞉. Ba꞉ hibila, ba꞉be hopo tawakalubino komo ba꞉ma ka꞉nala, iba꞉te iya꞉ha꞉midale nakola haka ba aligili hiya꞉hiya꞉ bobo ba꞉bo ododilinakuya꞉ iba꞉te ibino ha꞉laha tawakalubi miya꞉tenoma꞉, ba꞉bene ba꞉be dubuti ba꞉bi nakola bobo ipuwalo emedenami.
LUK 8:28 Ebete Ya꞉suku umiti ibulunomo goewatate ebeno nato mabamo gate tabo madodo ba adipate na꞉goiya꞉, “Ya꞉su! Ama꞉ Hununomo Godokono Gudulata! Ama꞉le natamo bada komo na꞉kododiomena꞉? Nale ama꞉ betoemehomata, natamo kuba huiya akikanama꞉la꞉!”
LUK 8:29 Ebete tabo ba꞉ma ka꞉na goiya꞉ mabu Ya꞉suti kuba gobogobo a꞉kiyahamiya꞉ ebegodone kuluhukuma꞉. Ba꞉ hibila, dopamo komo hiliyonomo tetelo ba꞉be kuba gobogobote ba꞉be dubu ipuwalo helonomoma꞉ eda꞉nami, ba꞉bema꞉ tawakaluba꞉te ebeno nato kokoto auli hala꞉mo da꞉matuhulameholemenakui, ebete ba꞉bi hale iya꞉hilinakui kuba gobogoboeno heloamo dito hopamo ba꞉bo alahula꞉nakui.
LUK 8:30 Ba꞉bene Ya꞉suti ebe nalatediya꞉, “Amia꞉no mahilo potela꞉ka꞉?” Ebete na꞉huiyuya꞉, “Naeno mahilo Hiliyonomotela,” mabu ebe ipuwalo kubakuba gobogobo hiliyonomate emedenama꞉.
LUK 8:31 Ba꞉bene ba꞉bi kubakuba gobogobate Ya꞉suku na꞉toemehuya꞉, “Ama꞉ a Koe Habamo akanoea꞉ma꞉la꞉!”
LUK 8:32 Ba꞉ba tetelo dabihole goegoe hiliyonomate haka hunulu nala꞉go ba꞉bolo na꞉wapata꞉lamitiya꞉. Kubakuba gobogobate Ya꞉suku na꞉toemehuya꞉ iba꞉te goegoe ipuwamo konogomoma꞉, ba꞉bene Ya꞉suti modobo tabo goete ibi ba꞉bo goelamiya꞉, “Na꞉tolama꞉la꞉!”
LUK 8:33 Ba꞉bema꞉ kubakuba gobogobate dubugodone ikuliti goegoa꞉tamo da꞉nogomuya꞉, goegoe hiliyonomate haka hununi pulila꞉hate iya꞉ha꞉midale hakane da꞉negudiya꞉ beyamo nululuhuliti ba꞉ dito neha꞉lahuya꞉.
LUK 8:34 Ba꞉ba tetelo goegoe ulamepi dubate ba꞉be komo umiti ibino habamo pulila꞉hate, habalubi ba꞉gala tumu genamalo demedehonama꞉ da꞉nikiyahalamiya꞉,
LUK 8:35 tawakalubi hiliyonomate ba꞉bo pelamiya꞉ Ya꞉suti dododiya꞉ ba꞉be komo umima꞉. Iba꞉te ebetamo pikuliti kubakuba gobogobate da꞉miya꞉puya꞉ ba꞉be dubu ba꞉bo pumiya꞉, ebete kaliko puliti Ya꞉sukunu nato mabulu lutiya꞉ mabu ebeno ukui a꞉tuputupumiya꞉. Ba꞉moe mabuma꞉ iba꞉te na꞉toletolehutiya꞉.
LUK 8:36 Ba꞉bene puya꞉te ba꞉be komo dumiya꞉ ba꞉bi tawakaluba꞉te kubakuba gobogobagoeno dubuti keba ka꞉na ka꞉hiduya꞉, ba꞉be komoma꞉ komo tawakalubi ba꞉bo kiyalamiya꞉.
LUK 8:37 Ba꞉ba tetelo ba꞉bi Gelasa hoponapi hiliyonomate Ya꞉suku na꞉ga꞉lamiya꞉ ebete ibino hopo miya꞉pate kotoma꞉ mabu iba꞉te konomamo toletolehutiya꞉. Ba꞉bema꞉ Ya꞉suti boga꞉mo ololote ba to,
LUK 8:38 kubakuba gobogobate da꞉miya꞉puya꞉ ba꞉be dubuti ebe na꞉toemehuya꞉, “Na niliya, ama꞉go kopa꞉mo!” Huiyatiya Ya꞉suti ebe ba oeme na꞉goemiya꞉,
LUK 8:39 “Ama꞉ genamamo na꞉toa. Godote ama꞉tamo kebe komokomo kododila꞉ka, amia꞉no habalubi ba꞉bi komokomo na꞉nikiyalama꞉.” Ba꞉bene ba꞉moe dubuti ebeno habamo tote, Ya꞉suti ebetamo dododiliya꞉ ebete ba꞉bi komo hiliyonomo tawakaluba꞉tamo ba꞉bo nolamagiya꞉.
LUK 8:40 Ya꞉suti bobo hapuni gala da꞉kapa꞉hiwuya꞉, ba꞉ba tetelo tawakalubi hiliyonomate na꞉kalakalahuya꞉ mabu iba꞉te ebeno pe komo belatimitiya꞉.
LUK 8:41 Ba꞉bene Yu tawakalubino baidi ibubulamehole genama umidawa dubuti Ya꞉sutamo piya꞉, ebeno mahilo Ya꞉ilasitila. Ebete Ya꞉sukunu nato mabamo pepapamiwatate ebe ba꞉bo petoemehuya꞉ ebete ebeno genamamo kotoma꞉,
LUK 8:42 mabu ebeno kapiyanomo 12 gogo tete bohele ebete hoe tatalila. Ba꞉bene Ya꞉suti Ya꞉ilasikono genamamo to da꞉tupuimiya꞉, hiliyonomo tawakaluba꞉te ebe ba anataguma꞉tuta emokatihuia꞉go tolamitiya꞉.
LUK 8:43 Ibi ipuwalo eta kamena 12 gogo tetelo hawi ka꞉ka꞉la꞉ temetemete uminami, ebete ebeno mani hiliyonomo dogeta dubatamo ba ikalame ba꞉bo upula꞉liya꞉, huiyatiya iba꞉te ebe kahiduimiya꞉ha꞉.
LUK 8:44 Ba꞉bene ba꞉moe kamenate Ya꞉sukunu gala hapuni pete ebeno kaliko da꞉pologiya꞉, ba꞉ba tetenomolo ebeno hawi ka꞉ka꞉la꞉ temetemete ebegodone ba꞉ dito wibuya꞉.
LUK 8:45 Ba꞉bene Ya꞉suti na꞉goiya꞉, “Na pote kologini?” Tawakalubi hiliyonomate iya꞉tawaha꞉ma꞉ ba ga꞉la Pitate ebe na꞉kiyamiya꞉, “Hido Iya꞉tulamedawa, hiliyonomo tawakaluba꞉te ama꞉ ba anataguma꞉hita emokatihuia꞉go pelamita.”
LUK 8:46 Ya꞉suti na꞉goiya꞉, “Eta lumagiti na ologini mabu helote na ipuwane duluhuku, na ba꞉bo iya꞉tawamo.”
LUK 8:47 Ba꞉bene ba꞉be kamenate bada komo kododiya꞉ awamina gabo kumiya꞉ha꞉, ba꞉bema꞉ ebete lililago Ya꞉sukunu nato mabamo pepapamiwatate hiliyonomo tawakalubino holoholo hapulu ebeno komo ba꞉bo hawakalimiya꞉. Ebete Ya꞉suku bada mabuma꞉ ka꞉pologiya꞉ ba꞉gala temetemete ba꞉ba tetenomolo ebegodone da꞉wibuya꞉, ebete ba꞉bi komokomo hiliyonomo Ya꞉sutamo ba꞉bo kiyahuya꞉.
LUK 8:48 Ba꞉bene Ya꞉suti ebetamo na꞉goiya꞉, “Kamena, amia꞉no hibima꞉ midi komote ama꞉ a꞉hiduima꞉ta. Ama꞉ kalakalago na꞉toa.”
LUK 8:49 Ya꞉suti ba꞉moe tabo ba olamagita Yu watodawa Ya꞉ilasikono genamane eta tabo adahedawate pete Ya꞉ilasiko na꞉pegoemiya꞉, “Amia꞉no gudu bohele a꞉hoe. Iya꞉tulamedawa gala akagoema꞉la꞉ ebe kopihiduimima꞉.”
LUK 8:50 Huiyatiya Ya꞉suti ba꞉be tabo uliti Ya꞉ilasitamo na꞉goiya꞉, “Ama꞉ akatoletola꞉la꞉. Ama꞉ Godoko hibima꞉ na꞉mida꞉, ba꞉bene amia꞉no bohelete kohidoma꞉ne.”
LUK 8:51 Ba꞉bene Ya꞉suti Ya꞉ilasikono genamamo puluhukuti komo tawakaluba꞉te genama guamo a꞉pa꞉la꞉hama꞉ ibi na꞉duhilamiya꞉, huiyatiya Pitako, Yoneko, Ya꞉imesiko, ba꞉gala boheleno nabiwi menoko, eba꞉go ba꞉moi ba꞉te na꞉pa꞉la꞉huya꞉.
LUK 8:52 Ba꞉ba tetelo genama gulu da꞉pola꞉nuya꞉ ba꞉bi tawakalubi hiliyonomate bohele bela꞉mitiya꞉, ba꞉bema꞉ Ya꞉suti ibi na꞉goelamiya꞉, “La꞉ kihimitala꞉. Gudu bohele kahaa꞉kaha꞉, ebete u bewatita!”
LUK 8:53 Huiyatiya iba꞉te iya꞉tawahuya꞉ guduti hoenomo hoiya꞉, ba꞉bema꞉ iba꞉te Ya꞉suku na꞉walitiya꞉.
LUK 8:54 Ba꞉bene Ya꞉suti tote bohele kokotamo nelawete ebe ba ka꞉mi na꞉goiya꞉, “Gudu, ama꞉ na꞉mahiga!”
LUK 8:55 Ba꞉bema꞉ ebeno ka꞉ka꞉te ebetamo gala da꞉kapiya꞉ ba꞉ba tetenomolo ebete na꞉kamahiguya꞉, ba꞉bene Ya꞉suti ebeno menoko nabiwi na꞉goelamiya꞉ iba꞉te ebetamo baa꞉ kikamehoma꞉.
LUK 8:56 Ba꞉be mabuma꞉ iba꞉te na꞉hanohanohutiya꞉ huiyatiya Ya꞉suti ibi ba kiyalame na꞉goiya꞉, “La꞉ ba꞉moe komoma꞉ komo tawakalubi akakiyalama꞉la꞉.”
LUK 9:1 Ba꞉ba tetelo Ya꞉suti ebeno 12 ta꞉matapi dubu ebetamo ka꞉lamiti iba꞉tamo helo ba꞉bo ikalamiya꞉ tawakaluba꞉godone kuba gobogobo konoelamema꞉ ba꞉gala hiya꞉hiya꞉ temetema꞉gopi konihiduilamema꞉.
LUK 9:2 Ba꞉bene ebete ibi noelamiya꞉ Godote Ko Gawadubuma꞉ deda꞉na iba꞉te ba꞉be komo tawakaluba꞉tamo konolamagimima꞉ ba꞉gala iba꞉te temetema꞉gopi konihiduilamema꞉.
LUK 9:3 Ebete iba꞉tamo na꞉goiya꞉, “La꞉eno tolame tetelo la꞉le kuku, ba꞉gala mani miya꞉teno kuiha, ba꞉gala baa꞉, ba꞉gala mani, ba꞉moi ilina akuwata꞉la꞉. Ba꞉gala la꞉ kapiyakapiya ilina na꞉pupuliya꞉la꞉, komo akuwata꞉la꞉.
LUK 9:4 Ba꞉bene la꞉ eta habamo nikuliti kebe genamamo da꞉nalehawaminama, la꞉ ba꞉bolo nemeda꞉tepate galane ba꞉be genamane eta hopamo kakatolamema꞉nemata, iyo, la꞉ eta genamane eta genamamo eba ka꞉na akanewagela꞉la꞉.
LUK 9:5 Ba꞉gala kebe habaluba꞉te la꞉ uwateheno, ba꞉be haba ba miya꞉pa la꞉le natoeno puhulu na꞉moda꞉midatepaliya꞉la꞉. Ba꞉moe komote ba꞉bi tawakalubi kiya꞉tulamema꞉ne, Godokono tete ba꞉ na꞉pe ebete ibino komo kopanagiya꞉midalamema꞉ne.”
LUK 9:6 Ba꞉bema꞉ Ya꞉suku ta꞉matapa꞉te hiliyonomo habahabamo tolamete Godokono Hido Tabo tawakaluba꞉tamo ba nolamagimi hiya꞉hiya꞉ temetema꞉gopi ba꞉bo nihiduilamiya꞉.
LUK 9:7 Ba꞉ba tetelo Ga꞉lili hopolo Heloditi Ko Gawadubuma꞉ eda꞉nami. Ba꞉bene Ya꞉suti kebe hiliyonomo komo kododilinakui Heloditi ba꞉bi komokomo ulihote ukui bilibilima꞉ ba꞉bo ediya꞉, mabu komopa꞉te na꞉ga꞉luya꞉, “Yoneko tawakalubi beyamo wadulateledawate hoe ipuwane a꞉mahigui!”
LUK 9:8 Ba꞉bene komopa꞉te na꞉ga꞉luya꞉, “Ya꞉suku ba꞉ Elayate, Godokono ukui hawakalimidawala, ebete atamo gala a꞉kapuluhukui,” huiyatiya komopa꞉te na꞉kaga꞉luya꞉, “Ao, ebe ba꞉ eta Godokono ukui hawakalimidawala. Aeno iniwala꞉tamo dopamo da꞉pikuliya꞉, ibi ipuwalo etate hoe ipuwane a꞉mahigui.”
LUK 9:9 Ba꞉bene Heloditi na꞉goiya꞉, “Na Yonekono wato itamidamimo, huiyatiya moe dubu potela꞉ka꞉ nale ebeno ododili komokomo dulihonamo?” ba꞉bema꞉ tete ga꞉ga꞉lo ebe ubila Ya꞉suku kumima꞉.
LUK 9:10 Ya꞉suti doelamiya꞉ ba꞉bi ta꞉matapi dubate ebetamo gala kapelamete iba꞉te kebe hiliyonomo komokomo ka꞉nododiliya꞉ ebe ba꞉bo pikiyahamiya꞉, ba꞉bene ebete komo tawakalubi miya꞉palete ebe ta꞉matapinomo uwatete iba꞉te Betasaida habamo dito tolamiya꞉.
LUK 9:11 Ba꞉bema꞉ hiliyonomo tawakaluba꞉te Ya꞉sukunu to komo ulihote ebeno galane na꞉katolameholiya꞉, ba꞉bene ebete ibi kalakalago uwatete Godote Ko Gawadubuma꞉ deda꞉na ba꞉be komo ibi ba꞉bo iya꞉tulamiya꞉, ba꞉gala atu tetelo ebete ibino temetema꞉gopi ba꞉bo kahiduilamiya꞉.
LUK 9:12 Hegelate ba nihitigana Ya꞉sukunu 12 ta꞉matapa꞉te pelamenate ebe ba꞉bo pega꞉lameniya꞉, “Ama꞉ tawakalubi noelama꞉, iba꞉te habahabamo ba꞉gala tumu genamamo tolameholete baa꞉ ba꞉gala laha bahi konulamema꞉, mabu moe tawakalubiha꞉ bahila.”
LUK 9:13 Huiyatiya Ya꞉suti iba꞉tamo na꞉goeniya꞉, “Ao, la꞉le iba꞉tamo naha ilina nikalamehola꞉la꞉.” Iba꞉te na꞉huiyaniya꞉, “Agodolo paibo baa꞉ ba꞉gala daha netewa ba꞉binomate pola꞉na. Ba꞉bema꞉ ama꞉ ubila꞉ka꞉ ale tolamete aeno mana꞉mo ibino baa꞉ konuwateholamema꞉?”
LUK 9:14 Iba꞉te ba꞉ma ka꞉na ga꞉laniya꞉ mabu 5,000 dubate ba꞉bolo pola꞉nuya꞉. Ba꞉bene Ya꞉suti ebe ta꞉matapi na꞉goelameniya꞉, “La꞉le tawakalubi hiya꞉hiya꞉ kapiyuilame ododiliti hakamo ahidima꞉ na꞉kiyalama꞉la꞉, iba꞉te eta kapiyuimilo 50, eta kapiyuimilo 50, ba꞉ma ka꞉na nahidihamena꞉.”
LUK 9:15 Ya꞉suku ta꞉matapa꞉te ba꞉be tabo ulinate ba꞉ba ka꞉na ododiniya꞉, ba꞉bene tawakalubi hiliyonomate ibino kapiyuimilo hakamo dito gagahidiniya꞉.
LUK 9:16 Ba꞉bene Ya꞉suti paibo baa꞉ ba꞉gala daha netewa uwatenate, Hunu Habamo gahimilo Godotamo kalakala tabo goenate ba꞉bi baa꞉ dahago wakalamiholenate ebe ta꞉matapa꞉tamo dito ikalameniya꞉ iba꞉te tawakaluba꞉tamo kikalameholenama꞉.
LUK 9:17 Ba꞉ba tetelo tawakalubi hiliyonomate baa꞉ da꞉nahaniya꞉ ibino kape komo ba꞉bo wiboholameniya꞉, ba꞉bene Ya꞉suku ta꞉matapa꞉te da꞉luhiliniya꞉ ba꞉bi baa꞉ komokomamo 12 bagolo betabuilameniya꞉.
LUK 9:18 Eta hegelalo Ya꞉suku ha꞉kiya tataba hopolo Godokoba꞉ tabo ba ga꞉luta ebeno ta꞉matapa꞉te ebetamo ba꞉bo pikuliya꞉. Ba꞉bene ebete ibi nalateda꞉liya꞉, “Tawakaluba꞉te na pokomo ka꞉ga꞉lanaka?”
LUK 9:19 Iba꞉te na꞉ga꞉luya꞉, “Komopa꞉te ama꞉ Yoneko beyamo wadulateledawama꞉ ga꞉lanaka, komopa꞉te Elayako Godokono ukui hawakalimidawama꞉ ga꞉lanaka, ba꞉gala komopa꞉te ama꞉ Godokono ukui hawakalimipa꞉te dopamo aeno iniwala꞉tamo da꞉pikuliya꞉, ibi ipuwalo etate hoene na꞉mahigamo ga꞉lanaka.”
LUK 9:20 Ba꞉bene Ya꞉suti ibi nalateda꞉liya꞉, “Huiyatiya la꞉le na pokomo ka꞉midinionama?” Pitate ebetamo na꞉huiyuya꞉, “Ama꞉ ba꞉ Kelisotela, Godokono Oemedawalata!”
LUK 9:21 Ba꞉bene Ya꞉suti ibi kiyahalamelo na꞉goiya꞉, “La꞉le naeno komoma꞉ komopi akakiyalama꞉la꞉!”
LUK 9:22 Ba꞉bene ebete tabo moga꞉melo na꞉goiya꞉, “Tawakalubino Naniwi tawakaluba꞉godone koko temeteme galane kuwatema꞉ne, Godokono ubila. Iyo, Godotamo hawa꞉goeno ikamehopino watowatopi, ba꞉gala Godokono Tutumu iya꞉tulamepi, ba꞉gala komo koko dubu iba꞉te ebe ubiha꞉ma꞉ keda꞉hama꞉na꞉, ba꞉bene tawakaluba꞉te ebe kanakapumima꞉na꞉, huiyatiya netewa-kapiya hegelalo ebete hoene gala kakamahigama꞉ne.”
LUK 9:23 Ba꞉bene ebete ibi hiliyonomatamo na꞉goiya꞉, “Kebe lumagiti na ta꞉mahenema꞉ ubi dihatemene, dopamo ebete ebeno komo adodolete, ba꞉bene hiliyonomo hegelalo ebete ebeno keha pihiga aguti na ba꞉bo na꞉ta꞉mahenenamene.
LUK 9:24 Ba꞉ hibila, kebe lumagiti ebeno ka꞉ka꞉ natamo damawada꞉mene ebeno ka꞉ka꞉te kalatidima꞉ne, huiyatiya kebe lumagiti ebeno ka꞉ka꞉ na mabuma꞉ datutimini, ebete hibi ka꞉ka꞉ kolawema꞉ne.
LUK 9:25 Ba꞉bema꞉ lumagiti hopoeno ilina hiliyonomo uwatenomo ba uwate ebeno ka꞉ka꞉ datutimini ebeno huiya keka꞉? Godote lumagigodone ebeno ka꞉ka꞉ da꞉lawememene, ebegodolo bada hido komote na꞉kitanamene?
LUK 9:26 Ba꞉bema꞉ numa꞉la꞉, kebe lumagiti natamo ba꞉gala naeno tabamo da꞉hilopomene, na Tawakalubino Naniwiti ba꞉ atumu ebetamo kohilopoma꞉nemo, iyo, nale naeno alago da꞉pemo, ba꞉ba tetelo Nabiwi Godoko ba꞉gala ebeno hido-talona nopopi ibino helonomo alago pete ebe kopehilopuimima꞉nemo.
LUK 9:27 Na la꞉tamo hibi tabo begoemo, ba꞉ma tetelo demedehona komo iba꞉te Godote Ko Gawadubuma꞉ deda꞉na, ba꞉be ko komo dopamo umiti galane ba꞉bo koha꞉lahama꞉na꞉.”
LUK 9:28 Eta kapiya wuiki da꞉wibuya꞉ ba꞉ba tetelo Ya꞉suti Pitako, Ya꞉imesiko, ba꞉gala Yoneko uwatete eta haka hunamo magataliya꞉, ebete ba꞉bolo Godokoba꞉ tabo konega꞉lama꞉.
LUK 9:29 Ba꞉bene ebe ha꞉kiya Godokoba꞉ tabo ba ga꞉luta, ebeno holoholo hiya꞉ma꞉ ba꞉bo ediya꞉ ba꞉gala ebeno pupulino ilinate keyakeyahibinomoma꞉ ba eda꞉hame ba꞉bo a꞉laminahalemiya꞉.
LUK 9:30 Ba꞉ba tetenomolo dubu netewa Elayako ba꞉gala Moseseko, iba꞉te puluhukuti Ya꞉sukuba꞉ tabo bega꞉lutiya꞉.
LUK 9:31 Iyo, ibi netewapa꞉te Godokono Hunu Haboeno alago puluhukuti eba꞉go tabo ba꞉ma ka꞉na ga꞉lutiya꞉, Ya꞉suti Godokono nopo tawakaluba꞉tamo kohawakalimima꞉ ebete Yelusalema ko habalo kohoema꞉ne.
LUK 9:32 Pitako ba꞉gala ebeno mabulubi netewa iba꞉te u ba lahuta ba꞉moe hanohano komo ba꞉bo uluhukuya꞉, ba꞉bene iba꞉te ibino baidi a꞉la꞉minahalete Ya꞉sukunu alo ba꞉gala dubu netewa eba꞉go da꞉la꞉mota꞉nuya꞉ ba꞉bo ulamiya꞉.
LUK 9:33 Ba꞉bene dubu netewapa꞉te Ya꞉sugodone ba tuta, Pitate ebe na꞉goemiya꞉, “Hido Iya꞉tulamedawa, a ba꞉malo da꞉pola꞉nama꞉, kalakala konomola. Wadiyala, a mimiya netewa-kapiya ketemotema꞉nema꞉, eta amia꞉nola, eta Mosesekonola, eta Elayakonola.” Pitate ukuihino ba꞉moe tabo ba꞉bema꞉ goiya꞉.
LUK 9:34 Pitate tabo ba olamagita hawaiti pete ibi dito patulateliya꞉, ba꞉bema꞉ iba꞉te na꞉toletolehutiya꞉.
LUK 9:35 Ba꞉bene hawai ipuwane tabote ba꞉ma ka꞉na puluhukuya꞉, “Ba꞉moe ba꞉ naeno Gudula, nale ebe dopamo a꞉ka꞉miya꞉mo! La꞉ ebeno tabo nulia꞉la꞉!”
LUK 9:36 Ba꞉be tabote da꞉wibuya꞉ iba꞉te Ya꞉suku kapiya bumiya꞉, ba꞉bene tete ga꞉ga꞉dopolo ba꞉bi ta꞉matapa꞉te kebe komo kumiya꞉ iba꞉te komo tawakalubi kakiyalamiya꞉ha꞉.
LUK 9:37 Ba꞉be eta hegelalo iba꞉te haka hununi da꞉pepalaguya꞉ tawakalubi hiliyonomate pelamete Ya꞉sukuba꞉ dito paluguya꞉.
LUK 9:38 Ba꞉bene ibi ipuwalo kapiya dubuti ibulunomo ba꞉bo goepatiya꞉, “Iya꞉tulamedawa, naeno guduino komoma꞉ ama꞉ betoemehomata mabu ebe ba꞉ naeno kapiya gudunomola!
LUK 9:39 Kuba gobogobote gaa꞉tepahago ebe da꞉lawenako, guduti hakamo da꞉ganako ebeno apete kodakodanomoma꞉ eda꞉menako ba꞉bene ebeno tabone paguti pikuliminako, ba꞉gala ebe lawe tetelo kuba gobogobote naeno gudu tiyolo a꞉kamiya꞉pale!
LUK 9:40 Ba꞉bema꞉ nale ama꞉ ta꞉matapi a꞉toelamehola꞉kamo iba꞉te kuba gobogobo koemema꞉, huiyatiya iba꞉godolo helo puliyala.”
LUK 9:41 Ya꞉suti huiyatiya ibi hiliyonomatamo na꞉goiya꞉, “A꞉iye, la꞉ hibima꞉ midiha꞉ kuba tawakalubilata! La꞉ natamo menemene bikanamenamata, ba꞉bema꞉ na ubihinola tete ga꞉ga꞉lo la꞉go emedena!” Ba꞉bene ebete dubutamo na꞉goiya꞉, “Amia꞉no gudu mamo na꞉magaha꞉.”
LUK 9:42 Ba꞉ba tetelo kuhiti ba penape kuba gobogobote ebe lawete hakamo dito a꞉da꞉nuya꞉, ba꞉bene kuhiti kubanomamo ba꞉bo ewagelehuya꞉. Ba꞉bene Ya꞉suti kuba gobogobo da꞉kiyahamiya꞉, ba꞉ba tetelo kuhiti hidote Ya꞉suti ebe ebeno nabiwitamo dito ikamiya꞉,
LUK 9:43 ba꞉bema꞉ ba꞉be komo dumiya꞉ ba꞉bi tawakalubi hiliyonomate Godokono ko helo komoma꞉ na꞉hanohanohutiya꞉. Ba꞉bema꞉ tawakaluba꞉te Ya꞉sukunu hiliyonomo ododili komokomoma꞉ ba hanohanohuta, ba꞉ba tetelo Ya꞉suti ebe ta꞉matapa꞉tamo na꞉goiya꞉,
LUK 9:44 “Nale ba꞉ma tetelo la꞉tamo dolamagimo, ba꞉be tabo hidamo uliti akadodala꞉ — Godote Tawakalubino Naniwi kuba tawakalubino kokotamo kihatema꞉ne.”
LUK 9:45 Ba꞉ba tetelo iba꞉te ba꞉be taboeno ipuwa hidamo kemalagidoluya꞉ha꞉ mabu awamina ipuwalo itanami, huiyatiya iba꞉te iya꞉tawaha꞉ma꞉ ba eda꞉ha ba꞉moe taboeno ipuwa komoma꞉ Ya꞉suku kiyamema꞉ na꞉toletolehutiya꞉.
LUK 9:46 Ba꞉bene ta꞉matapa꞉te ibi ipuwalo pote koma꞉ eda꞉ma꞉ olowabeletehuitiya꞉.
LUK 9:47 Iba꞉te ibino tepo ipuwalo demalagidolutiya꞉ Ya꞉suti ba꞉be komo iya꞉tawuya꞉, ba꞉bema꞉ ebete gudu lawete ebe tama꞉mo ba adipi
LUK 9:48 iba꞉tamo na꞉goiya꞉, “Kebe lumagiti naeno mahilamo ba꞉mako gudu deha꞉poto kalakalago dowalubina ebete na bowalubinina, ba꞉gala kebe lumagiti na dowalubinina, ebete na kapiya kowalubininaha꞉, ebete na Oenamedawa Godoko atumu na꞉kowalubina. Ba꞉bema꞉ la꞉ ipuwalo pote deha꞉potodawanomoma꞉ deda꞉mene ba꞉be dawate konomoma꞉ keda꞉ma꞉ne.”
LUK 9:49 Ba꞉bene Yonete na꞉goiya꞉, “Hido Iya꞉tulamedawa, ale eta dubu umima꞉ ebete amia꞉no mahilamo kuba gobogobo doelamiti, huiyatiya ale ebe a꞉kiyahamima꞉ ba꞉be komo kekelamema꞉ mabu ebe aeno kapiyuimi lumagiha꞉.”
LUK 9:50 Huiyatiya Ya꞉suti iba꞉tamo na꞉goiya꞉, “La꞉le ebe akaduhima꞉la꞉, mabu kebe lumagiti la꞉go alaholohodawama꞉ deda꞉na, ebete ba꞉ la꞉ bowalubilinata.”
LUK 9:51 Ba꞉bene Ya꞉suti Godokono Hunu Habamo nodolo tete da꞉tataliya꞉, ebete ba꞉be komo iya꞉tawate ebeno ukui konomamo ba꞉bo ihatiya꞉ Yelusalema ko habamo kotoma꞉.
LUK 9:52 Ba꞉bene gabo tetelo ebete Samaliya hopoeno eta habamo nopo atapi dopamo oelamiya꞉, iba꞉te ba꞉bolo ebeno wata bahi ba꞉gala baa꞉ konihiduilamema꞉.
LUK 9:53 Huiyatiya ba꞉be habanapa꞉te iya꞉tawahuya꞉ Ya꞉suti Yelusalemamo tolame gabodo da꞉tutiya꞉, ba꞉bema꞉ iba꞉te ebetamo ubiha꞉ tabo bega꞉luya꞉.
LUK 9:54 Ba꞉bene Ya꞉imesiko ba꞉gala Yoneko, iba꞉te ba꞉moe komo umiti na꞉ga꞉luya꞉, “Kodawa, wadiyala꞉ka꞉ a Godoko kiyame ebete Hunu Habane koe poemete ibi kokubahilamema꞉?”
LUK 9:55 Huiyatiya Ya꞉suti ibi netewapa꞉tamo ohobigate ibi konomamo ba kiyahalame iba꞉tamo na꞉goiya꞉, “Mabu keka꞉ la꞉le na kuba ukuia꞉mo da꞉kiyanamema? Mabu la꞉eno tepo ipuwoeno ukui ba꞉gala naeno tepo ipuwoeno ukui hiya꞉hiya꞉ ba꞉pola꞉na!
LUK 9:56 Na Tawakalubino Naniwiti tawakalubi kubahilamema꞉ kapiya꞉ha꞉, huiyatiya nale ibino ka꞉ka꞉ mula꞉lelamema꞉ piya꞉mo.” Ebete ba꞉be tabo goete, iba꞉te eta habamo lahama꞉ ba꞉ dito tolamiya꞉.
LUK 9:57 Iba꞉te ba tolamita eta dubuti Ya꞉sutamo na꞉goiya꞉, “Ama꞉ keba hapuamo da꞉tomena꞉, nale ama꞉ ba꞉bamo kota꞉matama꞉nemata.”
LUK 9:58 Huiyatiya Ya꞉suti ebetamo na꞉goiya꞉, “Hiya꞉, ama꞉ dopamo ba꞉moe eta komo hidamo nemalagidola. Tumu gahagahoeno laha bahi haka gugu ba꞉pola꞉lama꞉na ba꞉gala holaholate ibino genama etemotehonaka, huiyatiya na Tawakalubino Naniwi, naeno wata bahi puliyala.”
LUK 9:59 Ba꞉bene Ya꞉suti eta dubutamo na꞉goiya꞉, “Ama꞉ na na꞉ta꞉mahena꞉.” Ebete huiyatiya Ya꞉sutamo na꞉goiya꞉, “Kodawa, wadiyala na dopamo tote, naeno kadele nabiwiti da꞉hoemene, nale ebe bobamo nihatete na galane ama꞉ kota꞉mahema꞉nemata.”
LUK 9:60 Ya꞉suti ebetamo na꞉huiyuya꞉, “Wadiyala, ha꞉laha tawakaluba꞉te ibi ha꞉kiya ibino ha꞉lahapi bobamo na꞉miya꞉ta꞉mena꞉, huiyatiya ama꞉ tote Godote Ko Gawadubuma꞉ deda꞉na ba꞉be komoeno tabo tawakaluba꞉tamo na꞉nolamaginakuya꞉.”
LUK 9:61 Ba꞉bene eta dubuti na꞉goiya꞉, “Kodawa, na ubila ama꞉ ta꞉mahe, huiyatiya wadiyala na dopamo tote naeno genamanapa꞉tamo yawo tabo konegoema꞉nemo.”
LUK 9:62 Huiyatiya Ya꞉suti ebetamo na꞉goiya꞉, “Kebe lumagiti haka aligilino ilinamo pali oko ba tupuimi, haboeno komokomo emalagidolete okone gala da꞉kohobigamene, ba꞉bako lumagiti Ko Gawadubu Godokono oko owatima꞉ a꞉kamodobamene.”
LUK 10:1 Ba꞉moe tabo da꞉wibuya꞉ ba꞉ba tetelo Kodawa Ya꞉suti komo 72 ta꞉matapi uwatete etapi netewa, etapi netewa, ba꞉ma ka꞉na dopamo oelamiya꞉, ebete da꞉tomene ba꞉bi hiliyonomo habahabamo.
LUK 10:2 Ebete iba꞉tamo na꞉goiya꞉, “Godokono pali ipuwalo kona hiliyonomo ba꞉ a꞉kodakodahui, huiyatiya wakalami okopi hiliyoha꞉, ba꞉bema꞉ la꞉ pali namutudawatamo toetoe tabo na꞉ga꞉lala꞉, ebete komo okopi pali ipuwamo kopoelamema꞉ne hidohido nahoeno kona kopewakalamima꞉.
LUK 10:3 Ba꞉bema꞉ la꞉ na꞉tolama꞉la꞉! La꞉ sipi-goegoe hegehege keba ka꞉nala꞉ka꞉ ba꞉ba ka꞉nala, nale la꞉ helohelo gahagahoeno kapiyuimi ipuwamo oelamemata.
LUK 10:4 La꞉ mani miya꞉teno kuiha akuwata꞉la꞉, ba꞉gala la꞉ baa꞉ miya꞉teno hika ba꞉gala nato ilina akuwata꞉la꞉. Ba꞉gala la꞉ gabo tetelo eta lumaga꞉go da꞉nalugama eba꞉go tabo ba nega꞉la la꞉eno oko tete akanikubahima꞉la꞉.
LUK 10:5 “Ba꞉bene la꞉ kebe genamamo da꞉nalehawaminama, wadiyala la꞉ ba꞉be genamanapa꞉tamo nolata tabo na꞉nega꞉luya꞉la꞉ ba꞉ma ka꞉na, ‘Godokono kalakalate la꞉eno genamalo nitanamene.’
LUK 10:6 Ba꞉bema꞉ Godokono gelebadi lumagiti ba꞉bolo demedena, Godokono kalakalate ebegodolo hibilo kitanama꞉ne, huiyatiya ba꞉bako lumagiti ba꞉be genamalo lutaheno, la꞉ nolata tabo da꞉ga꞉lama ba꞉be taboeno hibi komote ba꞉bolo a꞉kitanamene.
LUK 10:7 La꞉ ba꞉be genama kapiyalo na꞉nemediya꞉la꞉, ba꞉bene iba꞉te la꞉tamo dikalameholemena꞉ ba꞉bi baa꞉ nahate ibino beya atumu na꞉kanihuya꞉la꞉, mabu la꞉ okopa꞉te ba꞉bako huiya lawe wadiyala, ba꞉gala eta habamo tolame tete uluhukuhino la꞉ eta genamane eta genamamo eba ka꞉na akanewagela꞉la꞉.
LUK 10:8 Iyo, la꞉le eta habamo tolamete iba꞉te la꞉ kalakalago duwatemena꞉, ba꞉ba tetelo iba꞉te kebe naha ilina la꞉tamo dikalamemena꞉ kalakalago na꞉nahuya꞉la꞉.
LUK 10:9 Ba꞉gala ba꞉be habalo demedena la꞉ ba꞉bi temetema꞉gopi hiduilamete habalubi hiliyonomatamo ba꞉ma ka꞉na na꞉ga꞉luya꞉la꞉, ‘Godote Ko Gawadubuma꞉ deda꞉na ba꞉be komote la꞉tamo ba꞉ a꞉tatali.’
LUK 10:10 Huiyatiya la꞉ eta habamo nikuliti iba꞉te la꞉ kalakalago uwateheno, la꞉ ba꞉be haba tulinomolo ba la꞉mota꞉hana ibi hiliyonomatamo ba꞉ma ka꞉na na꞉ga꞉luya꞉la꞉,
LUK 10:11 ‘La꞉eno haboeno haka puhulu aeno natone na꞉moda꞉midatepalema꞉, mabu ba꞉moe komote la꞉ biya꞉tulamitata Godokono tete ba꞉ na꞉pe ebete la꞉eno komo kopanagilamelelamema꞉. Ba꞉bema꞉ ba꞉moe ko komo akadodala꞉, Godokono Ko Gawadubu tetete la꞉tamo ba꞉ a꞉tatali!’”
LUK 10:12 Ba꞉bene Ya꞉suti ebe ta꞉matapa꞉tamo na꞉goiya꞉, “Na la꞉tamo hibi tabo begoemo, Godote tawakalubino komo danagilamelelamemene, ba꞉be Ko Hegelalo ebete ba꞉moi habaluba꞉tamo kuba huiya konomamo kikalamema꞉ne. Ba꞉ba tetelo ebete Sodomo habaluba꞉tamo kuba huiya ba ikalame malemale nanekela꞉mo kohawakalimima꞉ne, huiyatiya hibila, ebete malemale a꞉kihata꞉mene ba꞉moi kuba tawakaluba꞉tamo!”
LUK 10:13 Ba꞉bene Ya꞉suti gala na꞉kagoiya꞉, “Kolasini haba, ama꞉ kuba huiya konomo kolawema꞉na꞉ta! Betasaida haba, ama꞉ ba꞉ atumu! Mabu nale la꞉godolo hanohano komo dododilimo, la꞉ ba꞉ba tetelo la꞉eno kubane kohobila꞉ha꞉. Huiyatiya nale ba꞉bakobako oko Taya habalo ba꞉gala Saidono habalo dopamo nododiliya꞉tale, ba꞉bi Yuha꞉ tawakaluba꞉te ibino kubakuba ukui hiya꞉ma꞉ ba꞉midiliya꞉na꞉. Iyo, iba꞉te ibino kuba ododili mabuma꞉ tepo temetemema꞉ eda꞉hate ba꞉be temeteme komo kohawakalimima꞉ iba꞉te kubakuba kaliko pupuliti hoeno puhulamo dito ba꞉gagahidiya꞉na꞉.
LUK 10:14 Ba꞉bema꞉ Godote tawakalubino komo danagilamelelamemene, ba꞉be Ko Hegelalo ebete Taya habanapa꞉tamo ba꞉gala Saidono habanapa꞉tamo kuba huiya ba ikalame malemale nanekela꞉mo kohawakalimima꞉ne, huiyatiya hibila, Kolasini haba ba꞉gala Betasaida haba, ebete la꞉tamo malemale a꞉kihata꞉mene!
LUK 10:15 Ba꞉gala Kapeniyama haba, amia꞉no komo ba꞉ma ka꞉nala. Ama꞉ ubila ama꞉ ha꞉kiya ama꞉ Godokono Hunu Habamo kadipatema꞉, huiyatiya Godote ama꞉ Koe Habamo ka꞉da꞉nama꞉na꞉ta!”
LUK 10:16 Ba꞉bene Ya꞉suti tabo moga꞉melo ebe ta꞉matapa꞉tamo na꞉goiya꞉, “Kebe lumagiti la꞉eno tabo dulimini ebete ba꞉be komo ipuwalo naeno tabo kulima꞉ne, huiyatiya kebe lumagiti la꞉ ubiha꞉ma꞉ deda꞉mene ebete ba꞉be komo ipuwalo na ubiha꞉ma꞉ keda꞉ma꞉ne, ba꞉gala kebe lumagiti na ubiha꞉ma꞉ deda꞉mene ebete na kapiya ubiha꞉ma꞉ a꞉keda꞉mene, ebete na Oenamedawa atumu ubiha꞉ma꞉ kakeda꞉ma꞉ne.”
LUK 10:17 Ba꞉bene Ya꞉suti doelamiya꞉ ba꞉bi 72 dubate tolamete hiya꞉hiya꞉ habahabalo oko nowatiti, iba꞉te da꞉kawilaliya꞉ ko kalakalanomago ebetamo na꞉pega꞉luya꞉, “Kodawa, ale kuba gobogobo amia꞉no mahilamo da꞉nikiyahalamima꞉ iba꞉te aeno tabamo papamila꞉halete tawakaluba꞉godone ikuliya꞉!”
LUK 10:18 Ya꞉suti iba꞉tamo ba huiya na꞉goiya꞉, “Hibila, Godote Saitanako heloha꞉ma꞉ miditi Hunu Habane da꞉pa꞉da꞉nui nale umimo, iyo, hegelate keba ka꞉na ka꞉la꞉wa꞉hiyanako ebete hopamo tiyonomo ba꞉ba ka꞉na pegui.
LUK 10:19 La꞉ hidamo nulia꞉la꞉! Na helo la꞉tamo ikalamimata la꞉le kalu ba꞉gala iwawa la꞉eno natamo komikimoelenakoma꞉, ba꞉be helote la꞉eno alaholodawa Saitanakono helo na꞉gogolona, ba꞉bema꞉ eta ilinate la꞉ a꞉kakubahilama꞉mena꞉ta.
LUK 10:20 Ba꞉gala ba꞉moe ba꞉ eta komola. Kuba gobogobate la꞉eno tabamo da꞉papamila꞉halenaka ba꞉be mabuma꞉ akakalakalahala꞉, huiyatiya Godote la꞉eno mahilo ebeno Hunu Haboeno Bukamo da꞉miya꞉telamiya꞉la la꞉ ba꞉be mabuma꞉ na꞉kalakalahala꞉.”
LUK 10:21 Ba꞉ba tetelo Godokono Gobogobote Ya꞉sukunu tepo ipuwalo da꞉tabuya꞉ ebete Godotamo kalakalago na꞉goiya꞉, “Nabiwi, ama꞉ ba꞉moe hopo konomo ba꞉gala Hunu Haba Namutudawama꞉ eda꞉nata! Na ama꞉tamo kalakala tabo begoemo, mabu ama꞉ ba꞉moe hopoeno koko iya꞉tawahapi dubatamo amia꞉no mulu ukui ba awaminale iya꞉tawaha꞉ tawakaluba꞉tamo hawakalilamia꞉ta. Nabiwi, ba꞉ hibila, ba꞉moe komote amia꞉no ubilo puluhukui.”
LUK 10:22 Ba꞉bene Ya꞉suti tawakaluba꞉tamo na꞉goiya꞉, “Naeno Nabiwi Godote hiliyonomo komokomo naeno kokotamo a꞉miya꞉tiya꞉ nale kulamenama꞉, ba꞉bema꞉ ebete ha꞉kiya iya꞉tawala na ebeno Guduino komo, eta lumagiti iya꞉tawaha꞉. Ba꞉gala Nabiwino komo atumu, eta lumagiti iya꞉tawaha꞉ huiyatiya na ebeno Guduti ha꞉kiya iya꞉tawala, ba꞉gala nale puya꞉tamo hawakalimima꞉ ubi dihatemo, ibinomate atumu Nabiwino komo kakiya꞉tawahama꞉na꞉.”
LUK 10:23 Ba꞉bene Ya꞉suti ebeno ta꞉matapa꞉tamo pohobigate tabo diya ba꞉bo goelamiya꞉, “Godokono kalakala konomo la꞉godolo bitana, mabu la꞉ la꞉eno baida꞉mo ebeno komokomo hidamo nulamenamata!
LUK 10:24 Ba꞉bema꞉ nale la꞉ begoelamemata, dopamo tetelo Godokono ukui hawakalimipi ba꞉gala koko gawadubu iba꞉te ubi konomo bihatenama꞉ la꞉le dulamenama ba꞉bi koko komo ulamema꞉, huiyatiya iba꞉te kamodobuya꞉ha꞉, ba꞉gala ibi ubila la꞉le dulihonama ba꞉bi komo kulihoma꞉, huiyatiya iba꞉te kamodobuya꞉ha꞉.”
LUK 10:25 Ba꞉bene eta Godokono Tutumu iya꞉tulamedawate ubila Ya꞉sukunu mulu komo kopumima꞉, da꞉ hibila꞉ o da꞉ hibiha꞉, ba꞉bema꞉ ebete pete ebetamo na꞉pegoiya꞉, “Iya꞉tulamedawa, na bada komo ododiti wiboha꞉ ka꞉ka꞉ ebo na꞉ka꞉lawemo?”
LUK 10:26 Ya꞉suti ebeno tabo ba huiya na꞉goiya꞉, “Godote Bukamo ebeno Tutumu Tabo da꞉miya꞉tiya꞉, ba꞉bi komate a keba ka꞉na kiya꞉tua꞉mena? Ba꞉bi komokomoeno ipuwa keba ka꞉nala꞉ka꞉?”
LUK 10:27 Ba꞉be dubuti na꞉huiyuya꞉, “Godokono Bukate ba꞉ma ka꞉na goena, ‘Ama꞉ amia꞉no Kodawa Godoko malemalelo nemalagidolona, amia꞉no tepo ipuwanomamo ba꞉gala amia꞉no gobogoboeno heloamo, amia꞉no helo konomamo ba꞉gala amia꞉no ukui konomamo,’ ba꞉gala eta tutumu tabo ma kumu bitana, ‘Ama꞉ ha꞉kiya ama꞉ demalagidolona, wadiyala ama꞉le ba꞉ ba꞉ba ka꞉na ama꞉ tamelo demedena ba꞉be lumagi malemalelo nemalagidolona.’”
LUK 10:28 Ba꞉bene Ya꞉suti ebetamo na꞉goiya꞉, “Ama꞉ hibi tabo begaa꞉ta. Ama꞉ ba꞉moe komo ododiti ba꞉bo ba꞉ka꞉ka꞉namena꞉ta.”
LUK 10:29 Ba꞉be dubuti Ya꞉sukunu taboma꞉ hilopote huiyatiya ebeno hilopo ugumuilo ba꞉ma ka꞉na goiya꞉, “Na tamelo demedena, ba꞉be lumagi potela꞉ka꞉? Na poko na꞉kowalubinamo?”
LUK 10:30 Ya꞉suti ebeno tabo ba huiya na꞉goiya꞉, “Eta dubuti Yelusalema ko habane Yeliko habamo ba nihitiguta pilo dubate ebe lawete ebeno pupulino ilina pipikulamelemete ebe ba꞉bo anagalimihuya꞉. Ba꞉bene ebeno helote da꞉wibui iba꞉te ebe ba꞉bamo miya꞉patepate ba꞉ dito tolamiya꞉.
LUK 10:31 Ba꞉ba tetelo Godotamo hawa꞉goeno ikamehodawate ba꞉be gabodo ba pita ebe pumiti tamedo dito negogolatepui.
LUK 10:32 Ba꞉bene Libai gudawate kapete ba꞉ atumu kapewageli. Dubuti da꞉kapitanui ebete ba꞉bamo puluhukuti ebe ba꞉bo pumi, huiyatiya ebete owalubi ebetamo kapihateha꞉, ba꞉ dito kanegogolatepui.
LUK 10:33 “Ba꞉bene ba꞉be gabodo da꞉piti, eta dubu ebe Yu lumagiha꞉, ebe Samaliya hoponapi dubula, ebete ba꞉bamo puluhukuti ba꞉be dubu da꞉pumi ebeno tepo ipuwalo malemale konomo bipihati.
LUK 10:34 Ebete ebetamo pete olibi kikipoeno ihi ba꞉gala hido mulamula ebeno bugumamo abutilamelemete kaliko hapuhapamo dito matuhulameholemi. Ba꞉bene ebete ba꞉be dubu ebeno donoki-goe hunamo adipiti eta habamo ba꞉bo magatui, ba꞉be habalo kapela tawakaluba꞉te da꞉lahanaka ebete ba꞉be genamalo ba꞉be dubu hidonomamo nowalubi.
LUK 10:35 Eta hegelalo Samaliya hoponapi dubuti netewa mani genama namutudawatamo ba ikame na꞉goi, ‘Ama꞉ ba꞉moe dubu hidonomamo nowalubinatiya꞉. Ba꞉moi maniti modoboheno, nale gala da꞉kapemo ama꞉tamo gala kakapehuiyama꞉nemo.’”
LUK 10:36 Ba꞉bene Ya꞉suti tabo moga꞉melo Godokono Tutumu iya꞉tulamedawatamo na꞉goiya꞉, “Amia꞉no ukui kebanala꞉ka꞉? Pilo dubate danagalimihui ba꞉be dubutamo netewa-kapiyate da꞉pelami, ibi ipuwalo pote ebe owalubidawama꞉ ka꞉pedi? Ba꞉gala ebe tamelo demedena ba꞉bako lumagimo pote ka꞉pedi ebetamo malemale kohawakalimima꞉?”
LUK 10:37 Ba꞉bene Godokono Tutumu iya꞉tulamedawate tabo ba huiya na꞉goiya꞉, “Ba꞉ Yuha꞉ lumagi kapiyate ebe koamo pemalemaleti.” Ba꞉bene Ya꞉suti na꞉goiya꞉, “Amia꞉no tabo ba꞉ hibila. Wadiyala, ama꞉ tote tawakaluba꞉tamo malemale ba꞉ma ka꞉na na꞉nehawakaliminakuya꞉.”
LUK 10:38 Ya꞉suti ebeno ta꞉matapa꞉go Yelusalema gabodo ba tolamita iba꞉te eta habamo da꞉nikuliya꞉, ba꞉ba tetelo eta kamena ebeno mahilo Matatela ebete Ya꞉suku kalakalago na꞉goemiya꞉ ebete ebeno genamalo baa꞉ kopenama꞉.
LUK 10:39 Matakono ekawino mahilo Ma꞉litila, ba꞉bene Ya꞉suti genamamo da꞉nodoluya꞉ Ma꞉liti ebeno nato mabamo pemedete Kodawa Ya꞉sukunu iya꞉tumi komo hidonomamo ulihutiya꞉.
LUK 10:40 Huiyatiya Matate ha꞉kiya baa꞉ hiduimi komo ba ododita ebe ubiha꞉ma꞉ eda꞉te Ya꞉suku ba꞉bo pegoemiya꞉, “Kodawa, ama꞉ na꞉kumiuta naeno ekawiti na kowalubinitaha꞉? Hiliyonomo komo na ha꞉kiya ododilitamo, ba꞉bema꞉ wadiyala ama꞉ ebe na꞉kiyama꞉, ebete pete na na꞉powalubinina!”
LUK 10:41 Kodawa Ya꞉suti ebeno tabo ba huiya na꞉goiya꞉, “Mata, Mata! Ama꞉ hiliyonomo hegehege komo ododilima꞉ ukui bilibilinomoma꞉ editata.
LUK 10:42 Huiyatiya kapiya komote konomoma꞉ deda꞉na, Ma꞉liti ba꞉be hido komo umiti ba꞉ a꞉lawe, tawakaluba꞉te galane ebegodone a꞉kalawa꞉mena꞉.”
LUK 11:1 Eta hegelalo Ya꞉suti tataba hopolo Godokoba꞉ tabo bega꞉lutiya꞉. Ba꞉be komote da꞉wibuya꞉ ebe ta꞉matapi ipuwalo etate ebe na꞉goemiya꞉, “Kodawa, Yonete ebe ta꞉matapi iya꞉tulami iba꞉te Godotamo keba ka꞉na da꞉toetoehonakomena꞉, ba꞉bema꞉ wadiyala ama꞉ a ba꞉be atu komo na꞉kiya꞉tua꞉ma꞉.”
LUK 11:2 Ba꞉bene Ya꞉suti iba꞉tamo na꞉goiya꞉, “La꞉ Godotamo toetoe tabo ba꞉ma ka꞉na na꞉ga꞉lanakuya꞉la꞉, ‘Aeno Nabiwi, wadiyala amia꞉no talona mahilo tawakaluba꞉te nadipata꞉mena꞉, ba꞉gala wadiyala ama꞉le Ko Gawadubuma꞉ deda꞉na ba꞉be komote na꞉hawakalamene.
LUK 11:3 ‘Ba꞉gala wadiyala ama꞉ ba꞉moe hegeloeno baa꞉ atamo modobolo nikaa꞉ma꞉.
LUK 11:4 Ba꞉gala komopa꞉te atamo kuba dododilina, ale ba꞉bi kuba egebolelamete kadodoholelamema꞉nema꞉, ba꞉bema꞉ wadiyala ama꞉ atumu aeno kuba egebolea꞉mete nadodoholea꞉ma꞉. ‘Ba꞉gala Saitanakono kuba gabamo emogabuimi ipuwalo ama꞉le huiyatiya a ba owalubi amia꞉no hido gabodo na꞉magatoenakuya꞉.’”
LUK 11:5 Ba꞉bene Ya꞉suti iba꞉tamo na꞉goiya꞉, “Diyala, la꞉ ipuwalo eta lumagiti iwa tetenomolo ebeno mabulubitamo tote ba꞉ma ka꞉na da꞉ negoemene, ‘Naeno mabulubi, wadiyala꞉ka꞉ ama꞉ na nowalubina꞉? Baa꞉ netewa-kapiya natamo nikanama꞉,
LUK 11:6 mabu naeno lumagiti muhulu hopone gala a꞉kawila, huiyatiya nagodolo baa꞉ puliyanomola nale ebetamo ikamema꞉!’
LUK 11:7 “Huiyatiya genama gulu da꞉luta, ebete tabo ba꞉ma ka꞉na kogoema꞉ne, ‘Ao, ama꞉ temeteme natamo akikanama꞉la꞉. Na gigiho a꞉kodakoduiminakamo, ba꞉gala na atumu guguda꞉go ba꞉ na꞉watanamo, ba꞉bema꞉ hidoha꞉ nale mahigate baa꞉ ama꞉tamo ikame.’
LUK 11:8 “Huiyatiya ama꞉le amia꞉no mabulubi toemeho komo ekelameheno, ama꞉tamo bada komote na꞉ka꞉puluhukumini? Iyo, ebete mahigate amia꞉no modoboha꞉ komokomo komodobuilamema꞉ne, huiyatiya ebete ama꞉tamo baa꞉ ba ikame ama꞉ ebeno mabulubima꞉ a꞉kagaa꞉mene, mabu ebegodolo kalakala puliyala. Ba꞉bema꞉ mabu keka꞉ ebete ama꞉tamo owalubi dihatemene? Mabu ama꞉ toetoedawagodolo hilopote kitanaha꞉, ebete ama꞉ ba꞉be mabu kapiyama꞉ kowalubima꞉na꞉ta.”
LUK 11:9 Ba꞉bene ba꞉be taboeno ipuwa ba hawakalimi Ya꞉suti na꞉goiya꞉, “Nale la꞉tamo goemo, la꞉ Godoko na꞉toemehala꞉, ebete la꞉tamo kikalamema꞉na꞉ta. Iyo, la꞉ ebeno hido komo nohowada꞉la꞉, la꞉le kumima꞉nemata, ba꞉gala la꞉ gigiho nanakama꞉la꞉, ebete la꞉tamo ka꞉hiya꞉midama꞉ne.
LUK 11:10 Numa꞉la꞉, puya꞉te Godoko da꞉toemehonaka iba꞉te ebegodone kolawema꞉na꞉, ba꞉gala puya꞉te ebeno hido komo dohowadinaka iba꞉te kumima꞉na꞉, ba꞉gala puya꞉te gigiho danakaminaka ebete iba꞉tamo ka꞉hiya꞉midama꞉ne.
LUK 11:11 La꞉ ipuwalo kebe dubu ebeno guduti ebe dahama꞉ da꞉toemehomene, huiyatiya ebetamo bu kalu ba꞉kikamemene?
LUK 11:12 Ba꞉gala amia꞉no guduti ama꞉ kakaba kikipoma꞉ da꞉toemehomena꞉, ama꞉ huiyatiya ebetamo iwawa ba꞉kikameomena꞉?
LUK 11:13 Numa꞉la꞉, la꞉ hidohido tawakalubiha꞉ huiyatiya la꞉ iya꞉tawahala la꞉eno guguda꞉tamo hidohido baa꞉ ikalamema꞉, ba꞉bema꞉ la꞉eno Hunu Haboeno Nabiwiti atumu iya꞉tawanomola ebeno Hido-talona Gobogobo tawakaluba꞉tamo ikalamema꞉, puya꞉te ebe da꞉toemehonaka iba꞉tamo kikalamema꞉ne.”
LUK 11:14 Ba꞉ba tetelo tabo olamagiha꞉ kuba gobogobagoeno dubuti ba꞉bolo na꞉lutiya꞉, ba꞉bene Ya꞉suti ebegodone kuba gobogobo doemiya꞉ ebete tabo olamagi ba꞉bo tupuimiya꞉. Ba꞉bema꞉ komo tawakalubi hiliyonomate Ya꞉sukunu komoma꞉ ba hanohanohuta,
LUK 11:15 huiyatiya komopa꞉te na꞉ga꞉lutiya꞉, “Biyesibulukunu helote ebegodolo bitana. Ebete kubakuba gobogoboeno Kodawoeno heloamo oelamenako, Godokono heloamoha꞉!”
LUK 11:16 Ba꞉ba tetelo komopa꞉te ubi bihatiya꞉ Ya꞉suku kuba gabamo emogabuimima꞉, ba꞉bema꞉ iba꞉te ebe na꞉ga꞉lamiya꞉, “Ama꞉godolo Godokono helo hibilo ditana, eta hanohano komo nododa꞉ ba꞉be komo atamo kohawakalimima꞉.”
LUK 11:17 Ba꞉bema꞉ Ya꞉suti ibino kuba ukui iya꞉tawate iba꞉tamo na꞉goiya꞉, “Numa꞉la꞉, haba kapiya tawakaluba꞉te tetedo dadikanalemena꞉ ba꞉be habate kokubama꞉ne, ba꞉gala genama kapiya tawakaluba꞉te tetedo dadikanalemena꞉ ibino genamate hopamo kokagama꞉ne.
LUK 11:18 Ba꞉bema꞉ Saitanakono ukui ba꞉ma ka꞉nala, ebete ebeno kubakuba gobogobo tawakaluba꞉godone a꞉koelama꞉le, mabu ebete ba꞉ba ka꞉na dewagelemene ebeno oko owati helote kowiboma꞉ne. La꞉le naeno komoma꞉ na꞉ga꞉lamata, ‘Ebete kubakuba gobogobo Biyesibulukunu heloamo oelamenako.’
LUK 11:19 Ba꞉be tabo da꞉ga꞉lama hibila꞉ka꞉? Ao, hibiha꞉. La꞉eno kapiyuimipa꞉te kubakuba gobogobo doelamenaka, ba꞉be helo iba꞉tamo pote kikalamenako? Ba꞉ Godotela, Saitanateha꞉! Ba꞉bema꞉ ba꞉bi la꞉eno kapiyuimipino hido ododi komote la꞉eno kuba ukui behawakalimina.
LUK 11:20 Ba꞉moe komo ba꞉ hibila, nale kubakuba gobogobo Godokono heloamo tawakaluba꞉godone oelamenakomo, ba꞉bema꞉ wadiyala la꞉ ba꞉moe komone kiya꞉tawahama꞉nemata, Godokono Ko Gawadubu tetete la꞉tamo ba꞉ a꞉pe.
LUK 11:21 “Numa꞉la꞉, Saitanako ba꞉ eta helo dubu keba ka꞉nala꞉ka꞉ ba꞉ba ka꞉nala, ba꞉gala ebete pilolo duwatiya꞉ ba꞉bi tawakalubi ba꞉ ebeno genamoeno ilinala. Ba꞉bema꞉ keba tetelo helo dubuti ebeno alaholohoeno ilina uwatete ebe ha꞉kiya ebeno genama hidamo da꞉lawamenamene, genamoeno ilinate hidamo kopola꞉nama꞉na꞉.
LUK 11:22 Huiyatiya eta dubu ebeno helote dopo dubuino helo da꞉gogolona, ba꞉be dubuti pete alaholo komo ba pododi dopo dubu kopanagalimihoma꞉ne. Ba꞉bene ebete ba꞉be dubuino alaholoho ilina ba꞉gala genamoeno ilina uwatemete ebeno mabuluba꞉tamo konalabahalamema꞉ne.
LUK 11:23 “Ba꞉ hibila, kebe lumagiti na owalubinihino ebete naeno alaholodawama꞉ eda꞉na, ba꞉ma ka꞉na ebete tawakalubi kapiya baha꞉mo magahelema꞉ nago oko owatihino huiyatiya ibi hiya꞉hiya꞉ oelamenako.”
LUK 11:24 Ba꞉bene Ya꞉suti na꞉goiya꞉, “Kuba gobogobote eta lumagigodone duluhukumini, ba꞉ba tetelo ebete gagale hopamo tote eta emede bahi kohowadinatoma꞉ne. Huiyatiya ebete hido emede bahi numihino ebe ha꞉kiya ebetamo kogoema꞉ne, ‘Nale da꞉miya꞉puimo ba꞉be atu emede baha꞉mo gala kakatoma꞉nemo.’
LUK 11:25 Ebete gala kapete ba꞉be emede genama hidamo moda꞉midala ba꞉gala ilina hidamo miya꞉tela, ebete ba꞉be genama ba꞉ba ka꞉na da꞉kapumimini,
LUK 11:26 ba꞉bene ebete gala katote komo sa꞉ba꞉ni kuba gobogobo kanadabuiliti kakamagahelema꞉ne, iba꞉te ba꞉be genamamo a꞉pa꞉la꞉hate ba꞉bolo kemedehonama꞉. Numa꞉la꞉, galane da꞉pelamemena꞉ ba꞉bi kuba gobogobate koko kuba ba꞉pododilinakomena꞉, dopamo demedenami ba꞉be kapiya kuba gobogoboeno emede huiyaha꞉. O ba꞉be lumagi niliya! Ebe dopamo nanekela꞉mo kubadopola, huiyatiya ba꞉ma tetelo ebete ba꞉ kubanomoma꞉ eda꞉.”
LUK 11:27 Ya꞉suti ba꞉moe tabo ba olamagita, tawakalubi ipuwalo eta kamenate ebetamo ibulunomo na꞉goiya꞉, “Ama꞉ dalahimiya꞉la ba꞉gala nono ama꞉tamo dikamiya꞉la, ba꞉be kamenoeno kalakala bada konomola꞉ka꞉!”
LUK 11:28 Huiyatiya Ya꞉suti na꞉goiya꞉, “Wadiyala ama꞉ eta hibi komo nemalagidola. Puya꞉te Godokono tabo uliti ebetamo da꞉papamila꞉hamena꞉, ebeno hibi kalakalate ba꞉bi tawakalubi kapiyagodolo bitanamene.”
LUK 11:29 Hiliyonomo tawakaluba꞉te Ya꞉suku a꞉ga꞉diya꞉midate ba la꞉mota꞉hana ebete iba꞉tamo na꞉goiya꞉, “Ba꞉ma tete tawakalubi kubakubanomola! Iba꞉te ubi konomola Godokono helo hawakalimino hanohano komo kumima꞉, huiyatiya Godote eta komo iba꞉tamo a꞉kahawakalima꞉mene. Ba꞉ hibila, ebete ebeno ukui hawakalimidawa Yaonako ipuwado da꞉hawakalimiya꞉, ba꞉be hanohano komo kapiya iba꞉tamo ikalamiya꞉.
LUK 11:30 Iyo, Godote Yaonakono emede komodo Niniba ko habanapa꞉tamo ebeno helo a꞉hawakalimiya꞉, ba꞉bene ebete atumu Tawakalubino Naniwi ipuwado ebeno helo gala kakahawakalimima꞉ne ba꞉ma tetelo demedehona ba꞉bi tawakaluba꞉tamo, huiyatiya eta hanohano komo iba꞉tamo a꞉kododa꞉mene.
LUK 11:31 “Ba꞉gala eta komo. Godote tawakalubino komo danagilamelelamemene, ba꞉be Ko Hegelalo Siba hoponapi Ko Gawa Kamenate mahigate la꞉ Yu tawakalubi kubapima꞉ koka꞉lamima꞉na꞉ta, mabu ba꞉be Yuha꞉ kamenate muhulu hoponomone piya꞉ Isalaela hopamo Ko Gawadubu Solomonokono mulu tabo kopulihoma꞉. Ba꞉ba tetelo ebe ubila Godokono mulu Solomonogodone lawe, huiyatiya la꞉ tetelo Godote Tawakalubino Naniwino komo la꞉tamo ba hawakalimina, la꞉ ba꞉be komo ubihinola. La꞉ numa꞉la꞉, Tawakalubino Naniwino muluti Solomonokono mulu na꞉gogolona!
LUK 11:32 Ba꞉gala Godokono Ko Hegelalo Niniba habanapa꞉te mahila꞉halete la꞉ atumu kubapima꞉ koka꞉lamima꞉na꞉ta, mabu ba꞉bi Yuha꞉ tawakaluba꞉te Yaonakono tabo duliya꞉ iba꞉te ibino kubane Godotamo ohobiliya꞉. Ba꞉ba tetelo ibi ubila Godokono tabo Yaonagodone lawe, huiyatiya la꞉ tetelo Godote Tawakalubino Naniwino komo la꞉tamo ba hawakalimina, la꞉ ba꞉be komo ubihinola. La꞉ numa꞉la꞉, Tawakalubino Naniwino helote Yaonakono helo na꞉gogolona!”
LUK 11:33 Ba꞉bene Ya꞉suti na꞉goiya꞉, “Lumagiti ebeno wuiki alo pa꞉titi awamina baha꞉mo a꞉kihata꞉mene, ba꞉gala ebete bagolo ipuwamo a꞉kihata꞉mene, huiyatiya ebete hawakala baha꞉mo kihatema꞉ne, ba꞉bene tawakaluba꞉te ebeno genama guamo da꞉nalehawaminamena꞉ iba꞉te ba꞉be hido alo ba꞉bo konumima꞉na꞉.
LUK 11:34 “Amia꞉no apeno alo ba꞉ amia꞉no baidila. Ba꞉bema꞉ amia꞉no baiditi hidamo da꞉la꞉minalemene amia꞉no tepo ipuwoeno alote atumu hidonomamo kaka꞉la꞉minama꞉ne, huiyatiya baiditi hidamo a꞉la꞉minaleheno amia꞉no ape konomote du ipuwalo kitanama꞉ne.
LUK 11:35 Ba꞉bema꞉ ama꞉ hidamo, amia꞉no tepo ipuwoeno alote duma꞉ akeda꞉la꞉!
LUK 11:36 Amia꞉no ape konomote alo ipuwalo ditanamene ba꞉gala amia꞉no ape hapu du ipuwalo itanaheno, ba꞉ba tetelo ama꞉ konomamo ka꞉la꞉minama꞉na꞉ta, hido wuiki alote ama꞉ da꞉la꞉minana ba꞉ba ka꞉na.”
LUK 11:37 Ya꞉sukunu tabo olamagi da꞉wibuya꞉ eta Pa꞉lisi kapiyuimi dubuti ebe na꞉goemiya꞉ ebete ebegodolo baa꞉ kopenama꞉, ba꞉bene Ya꞉suti ba꞉be dubuino genamamo nodolote baa꞉ nama꞉ dito nemediya꞉.
LUK 11:38 Huiyatiya Ya꞉suti ebeno kokoto ukulahaheno baa꞉ nama꞉ da꞉nemediya꞉, ba꞉bema꞉ ba꞉be Pa꞉lisi kapiyuimi dubuti koamo la꞉wiya꞉.
LUK 11:39 Ba꞉bene Ya꞉suti ebe na꞉goemiya꞉, “La꞉ Pa꞉lisi kapiyuimipi la꞉eno kalili ba꞉gala meleke hunu hapu bukulalenakomata, huiyatiya la꞉eno tepo ipuwalo da꞉pola꞉na ba꞉bi ilina a꞉kukulala꞉lemata, ba꞉bema꞉ la꞉le dododilinakoma ba꞉bi pilo komo ba꞉gala komo koko kuba ododili komokomo tabotabohonomola!
LUK 11:40 A꞉iye, la꞉ daedae tawakalubilata! Godote lumagino hunu tama ododiti ba꞉gala ipuwa aka-ododiya꞉,
LUK 11:41 ba꞉bema꞉ wadiyala la꞉eno melekelo ba꞉gala kalililo bada ilinate ka꞉pola꞉na, la꞉ ilinaha꞉pa꞉tamo dito nikalamehola꞉la꞉! Iyo, ba꞉be komo ipuwado la꞉le la꞉eno tepo ipuwoeno kuba kukulalema꞉nemata.
LUK 11:42 “Ba꞉ hibila, la꞉ Pa꞉lisi kapiyuimipi kuba huiya konomo kolawema꞉nemata! La꞉ la꞉eno pali ilina hiliyonomo ipuwalo ta꞉ni komokomo ba anagilamehole Godotamo ebeno komo hidamo ikamehonakomata. Ba꞉be komo ipuwalo la꞉ kapiya deha꞉potonomo komo a꞉kotalemata, huiyatiya komo kokonomo komo ododilima꞉ la꞉ hidamo kemalagidolenaha꞉, ba꞉ma ka꞉na la꞉ tawakaluba꞉godolo tuputupulu kemedenaha꞉ ba꞉gala Godokono malemale kahawakaliminaha꞉. Ba꞉bema꞉ wadiyala la꞉ ba꞉bi koko komo nododilinala꞉ ba꞉gala atu tetelo hegehege komo ododili akadodohola꞉la꞉!
LUK 11:43 “Ba꞉ hibila, la꞉ Pa꞉lisi kapiyuimipa꞉te kuba huiya konomo kolawema꞉nemata, mabu baidi ibubulamehole genama gulu la꞉ ubila koko dubuino habalo ahidi, ba꞉gala la꞉ ubila la꞉le ilina kolowami habalo ba wapata꞉lame tawakaluba꞉te la꞉ ulamete ba꞉bo kawagaminalema꞉!
LUK 11:44 Ba꞉ hibila, la꞉tamo da꞉puluhukumini ba꞉be kuba huiyate konomoma꞉ keda꞉ma꞉ne, mabu la꞉ tawakalubino ha꞉laha ape awaminale bobo huiyalata! Ba꞉ma ka꞉na tawakaluba꞉te iya꞉tawahaha꞉ ababale ilinate da꞉pola꞉na, ba꞉bema꞉ iba꞉te iya꞉tawahaheno ba꞉bana wapata꞉lamena.”
LUK 11:45 Ba꞉bene eta Godokono Tutumu iya꞉tulamedawate Ya꞉sutamo na꞉goiya꞉, “Iya꞉tulamedawa, ama꞉ Pa꞉lisi kapiyuimipi tabamo da꞉kubahilama꞉, ama꞉ ba꞉be tabamo a atumu a꞉ka-iduduputia꞉ma꞉ta!”
LUK 11:46 Ya꞉suti ba huiya na꞉goiya꞉, “Iyo, la꞉ Godokono Tutumu iya꞉tulamepi, la꞉ ba꞉ atumu kuba huiya konomo kolawema꞉nemata, mabu la꞉ la꞉eno tutumu tabamo tawakaluba꞉tamo menemene komokomo bikalamenakomata! Iyo, la꞉eno tutumu tabo ba꞉ tawakaluba꞉te menemene ilina okamo da꞉wagalatelena ba꞉ba ka꞉nala, ba꞉bema꞉ la꞉le ibino menemene dulamenakoma eta owalubi deha꞉potonomo a꞉kihata꞉lemata, kokoto makupuhuliti dito la꞉mota꞉hananakomata.
LUK 11:47 Ba꞉ hibila, la꞉tamo da꞉puluhukumini ba꞉be kuba huiyate konomoma꞉ keda꞉ma꞉ne, mabu la꞉eno iniwala꞉te Godokono ukui hawakalimipi hibilo anakapulamenakuya꞉, huiyatiya ka꞉lo la꞉ la꞉eno iniwalino ododili komokomo kubama꞉ ga꞉laheno ibi a꞉mililameholenakomata. A꞉iye! Ba꞉be mabuma꞉ ibino kubate la꞉ ipuwalo atumu ba꞉ka-itana, huiyatiya la꞉ ba꞉be kuba ugumuilo la꞉eno iniwala꞉te danakapulamenakui ba꞉bi tuputupupino bobo bahi hidonomamo ododilinakomata. Ba꞉bema꞉ numa꞉la꞉, ba꞉be komote la꞉eno ma꞉lapila netewa komo behawakalimina, mabu la꞉eno tepo ipuwalo atu kuba ododili ubi ba꞉kapola꞉na Godokono hibi okopa꞉tamo!
LUK 11:49 Ba꞉be mabuma꞉ Godokono Mulu Tabote ba꞉ma ka꞉na goena, ‘Nale tawakaluba꞉tamo naeno ukui hawakalimipi ba꞉gala naeno komo oelamepi konoelamema꞉nemo, huiyatiya iba꞉te ba꞉bi okopi ubihinola, ba꞉bene iba꞉te komo ibi ba anakapulame komopa꞉tamo temeteme bikalamenakomena꞉.’
LUK 11:50 Ba꞉bema꞉ ba꞉ma tete tawakaluba꞉te kuba huiya kolawema꞉na꞉, mabu ba꞉moe hopoeno tupuimi mabuni iba꞉te Godokono ukui hawakalimipi anakapulamenakuya꞉.
LUK 11:51 Iyo, A꞉ibolokono hawiti hakamo da꞉ka꞉ka꞉liya꞉, ba꞉be komo ba꞉ tupuimi mabula. Ba꞉bene iba꞉te komo tuputupu okopi hiliyonomo anakapulamete, kuititi tetelo Godoko Adikumino Genamalo Sekalayako ba꞉bo kanakapumiya꞉, iyo, ebete ba꞉be Genamoeno Talona Haba ba꞉gala Godotamo hawa꞉goeno ikameho bahi tetenomolo ba la꞉na, iba꞉te ebe danagalimiya꞉ ebete ba꞉ dito hoiya꞉. Ba꞉bema꞉ na la꞉tamo hibi tabonomo begoemo, ba꞉ma tete tawakaluba꞉te ba꞉bi hiliyonomo kuba mabuma꞉ huiya hibilo kolawema꞉na꞉!
LUK 11:52 “Ba꞉ hibila, la꞉ Godokono Tutumu iya꞉tulamepi, la꞉eno kuba huiyate konomoma꞉ keda꞉ma꞉ne, mabu la꞉le tawakalubino gabo bekalapilalamenamata iba꞉te Godogodone iya꞉tawa kolawema꞉! La꞉ ha꞉kiya ebeno hido komo lawe ubihinola, ba꞉bema꞉ puya꞉te ubi dihatena huiyatiya la꞉le ibi atumu na꞉kaduhilamenamata!”
LUK 11:53 Ba꞉bene Ya꞉suti ba꞉be genamane da꞉pihitiguya꞉, ba꞉ba tetelo Godokono Tutumu iya꞉tulamepi ba꞉gala Pa꞉lisi kapiyuimipi iba꞉te konomamo maubahate Ya꞉sukunu komoma꞉ tabo kubanomamo ga꞉la ba꞉bo tupuimiya꞉. Ba꞉gala ba꞉ba tetene tupuimiti iba꞉te Ya꞉sutamo da꞉pelamenakui hiya꞉hiya꞉ komo ba꞉bo pikiyahamenakuya꞉,
LUK 11:54 mabu ibi ubila ebe kuba gabamo ba emogabuimi ebete hiya꞉ tabo kubamo goelo ebe ba꞉bo kolawema꞉.
LUK 12:1 Eta tetelo tawakalubi hiliyonomate Ya꞉suku umima꞉ da꞉kapiyuimiya꞉ iba꞉te emokatihuia꞉go pelamitiya꞉, etate eta emokamidanakui, etate eta emokamidanakui, ba꞉ba ka꞉na ewagelitiya꞉. Ba꞉ba tetelo Ya꞉suti ebe ta꞉matapi na꞉goelamiya꞉, “La꞉ hidamo! Palawa baa꞉te ha꞉kiya hunamo da꞉mahiga, Pa꞉lisi kapiyuimipino awagaha komo ba꞉ba ka꞉nala. Ba꞉bema꞉ ba꞉mako awagaha komote la꞉tamo akuluhukala꞉, mabu ba꞉be awaga komo ba꞉ ibino ma꞉lapila netewa komola.
LUK 12:2 Numa꞉la꞉, kebe ihilatehole komate da꞉pola꞉na galane tetelo Godote kohawakalilamema꞉ne, ba꞉gala awalelahale komate da꞉pola꞉na galane tawakaluba꞉te kulameholema꞉na꞉.
LUK 12:3 Ba꞉bene la꞉le du tetelo dolamagiminakoma, tawakaluba꞉te huiyatiya alo tetelo kulihoma꞉na꞉, ba꞉gala genama gulu la꞉le ganalo da꞉ga꞉lanakoma, ba꞉bi komokomoma꞉ iba꞉te tabo madodo ba adipate tawakalubi hiliyonomatamo kohawakalilamema꞉na꞉.”
LUK 12:4 Ba꞉bene Ya꞉suti gala na꞉kagoiya꞉, “Naeno mabuluba꞉la꞉, nale la꞉tamo goemo, ape anakapulame iya꞉tawahapi akatolelama꞉la꞉. Iba꞉te la꞉ danakapulamemena꞉, iba꞉godolo eta helote a꞉kitanamene la꞉eno gobogoboeno ka꞉ka꞉ kubahilamema꞉.
LUK 12:5 Ba꞉bema꞉ la꞉ poko na꞉ka꞉tolemeonama? Ebe ba꞉ Godotela, la꞉ ebe kapiya na꞉tolemenala꞉, mabu ebegodolo helo bitana tawakalubi anakapulamete Koe Habamo iya꞉hekema꞉. Iyo, na hibi tabo begoemo, ebe kapiya na꞉tolemenala꞉!
LUK 12:6 “Numa꞉la꞉, tawakaluba꞉te paibo de holahola netewa toea mana꞉mo uwatema꞉ ga꞉lanaka, ba꞉bi holaholoeno ka꞉ka꞉ kokoha꞉, huiyatiya Godote ba꞉bako deha꞉poto hola kapiya a꞉kadodamene.
LUK 12:7 Ba꞉gala ba꞉moe komo ba꞉ hibila, la꞉eno watoeno hinibo hiliyonomo Godote ya꞉lo tetelo a꞉ka꞉lamiholiya꞉, iyo, la꞉eno hiya꞉hiya꞉ komo ebete iya꞉tawanomola. Ba꞉bema꞉ la꞉ ukui bilibilima꞉ akeda꞉hala꞉. Ebeno malemale holaholatamo hibilo bitana, huiyatiya ebeno malemale la꞉tamo konomoma꞉ eda꞉te emedena tetelo bitanamene!”
LUK 12:8 Ba꞉bene Ya꞉suti gala na꞉kagoiya꞉, “Nale la꞉ begoelamemata, kebe lumagiti hawakala da꞉goemene, ‘Na Ya꞉suku ta꞉matadawala,’ na Tawakalubino Naniwiti ba꞉ atumu Godokono nopopino holoholo hapulu kogoema꞉nemo, ‘Ba꞉moe lumagi ba꞉ naeno ekawila.’
LUK 12:9 Huiyatiya kebe lumagiti na iya꞉tawaha꞉ma꞉ da꞉goemene, na ba꞉ atumu Godokono nopopa꞉tamo ebe iya꞉tawaha꞉ma꞉ kakagoema꞉nemo.
LUK 12:10 “Ba꞉gala kebe lumagiti Tawakalubino Naniwino komoma꞉ duhimi tabo dolamagimini, Godote ebeno kuba egeboleme iya꞉tawala, huiyatiya kebe lumagiti Godokono Gobogoboeno ododi komoma꞉ kubama꞉ da꞉goemene, Godote ba꞉be kuba egebolemete a꞉kadodoma꞉mene.
LUK 12:11 “Ba꞉bema꞉ iba꞉te la꞉eno komo kanagilamelelamema꞉ Yu tawakalubino baidi ibubulamehole genamamo la꞉ da꞉magatalemena꞉, ba꞉ba tetelo la꞉le gabomani dubu ba꞉gala komo koko dubu iba꞉tamo kebako tabo ga꞉lama꞉ ukui bilibilima꞉ akeda꞉hala꞉, ba꞉ma ka꞉na, ‘Na kebe tabo na꞉ka꞉goemo? Ba꞉gala na iba꞉tamo tabo keba ka꞉na na꞉ka꞉huiyamo?’
LUK 12:12 Numa꞉la꞉, Godokono Gobogobote ba꞉ba tetenomolo la꞉le iba꞉tamo dolamagimima ba꞉be tabo la꞉ kiya꞉tulamema꞉na꞉ta.”
LUK 12:13 Ba꞉bene tawakalubi hiliyonomate Ya꞉sukuba꞉ da꞉pola꞉nuya꞉, eta lumagiti ibi ipuwalo ebetamo na꞉goiya꞉, “Iya꞉tulamedawa, naeno naniwi na꞉kiyama꞉, aeno nabiwiti atamo da꞉miya꞉palea꞉mi ba꞉bi dogodogo ilina ebete hidamo nalabala꞉mene.”
LUK 12:14 Ya꞉suti ebetamo na꞉huiyuya꞉, “Dubu, ama꞉ pote ka꞉kiyamiti nale la꞉eno komo anagiya꞉midadawama꞉ keda꞉ma꞉?”
LUK 12:15 Ba꞉bene ebete tawakalubi hiliyonomatamo na꞉goiya꞉, “La꞉ hidamo! Ilina uwate ubi komote la꞉tamo akuluhukala꞉, mabu lumagiti hiliyonomo ilina ba uwate hibi ka꞉ka꞉ ebo a꞉kuma꞉mene.”
LUK 12:16 Ba꞉bene Ya꞉suti eta iya꞉tulame uwi iba꞉tamo ba꞉ma ka꞉na olamagiya꞉, “Eta ilina dogodogodawate nemedenami, ebeno hakalo pali ilinate konomamo apepehonama꞉.
LUK 12:17 Ba꞉bene ebe ha꞉kiya ebeno ukuilo na꞉goi, ‘Naeno pali ilina miya꞉teno genama modobolo kapola꞉naha꞉, ba꞉bema꞉ na bada komo na꞉kododimo?
LUK 12:18 Ehe! Na ba꞉ma ka꞉na kododima꞉nemo. Nale naeno pali ilina miya꞉teno genama anabulilamete uliuli koko genama gala kaketemotema꞉nemo, ba꞉bene ba꞉bi genama ipuwamo naeno pali ilina ba꞉gala komo koko ilina komiya꞉tema꞉nemo.
LUK 12:19 Ba꞉ba tetelo nale naeno tepo ipuwalo kogoema꞉nemo, ‘Na konomo dubula! Na koko ilina hidonomamo a꞉miya꞉timo, ba꞉bema꞉ na komo hiliyonomo gogolo kodakoda oko owatihino, na baa꞉ kana, helo gao beya kani, ba꞉ba ka꞉na kalakalago dito bemedenamo!’ ’
LUK 12:20 Huiyatiya Godote ebetamo na꞉goi, ‘Ama꞉ daedae lumagilata! Ka꞉lo dulu nale amia꞉no ka꞉ka꞉ kolawemema꞉nemata, ba꞉bene ama꞉ ha꞉kiya amia꞉no komoma꞉ da꞉miya꞉tenama꞉ ba꞉bi ilina hiliyonomo pote na꞉kuwatemene?’”
LUK 12:21 Ba꞉bema꞉ Ya꞉suti ebeno kuititi tabo ba꞉ma ka꞉na goiya꞉, “Lumagi ha꞉kiya ebeno komoma꞉ ilina ba dogodoguilame huiyatiya ebeno tepo ipuwamo Godokono hidohido komo miya꞉teheno, ebe ba꞉ ba꞉bako daedae dawala.”
LUK 12:22 Ba꞉bene Ya꞉suti ebe ta꞉matapa꞉tamo na꞉goiya꞉, “Nale la꞉ begoelamemata, la꞉eno emedeho komokomoma꞉ aka-ukuibilibilihonala꞉, iyo, la꞉le naha ilina ba꞉gala pupulino ilina uwatema꞉ koamo akemalagidola꞉la꞉.
LUK 12:23 Numa꞉la꞉, naha ilina ba꞉gala pupulino ilina iba꞉te kokoma꞉ keda꞉hanaha꞉, mabu naha ilinate lumagitamo hibi ka꞉ka꞉ a꞉kikama꞉mene, ba꞉gala pupulino ilinate atumu ebeno ape emedena tetelo a꞉kowalubinamene.
LUK 12:24 Ba꞉bema꞉ la꞉ owa holaholoeno komo nemalagidolala꞉, iba꞉te pali ilina a꞉kamihala꞉ ba꞉gala iba꞉te pelamete nahoeno kikipo a꞉kapetapihala꞉, iyo, ibino pali ilina miya꞉teno genama puliyala, huiyatiya Godote iba꞉tamo baa꞉ modobolo ikalamenako. Numa꞉la꞉, Godokono malemale hibilo bitana holaholatamo, huiyatiya ebeno malemale la꞉tamo konomoma꞉ eda꞉te emedena emedena tetelo bitanamene.
LUK 12:25 Ba꞉bema꞉ la꞉ ukui bilibilima꞉ akeda꞉hala꞉. Lumagi ebe ha꞉kiya ebeno hoe tete eta hegelamo keba ka꞉na na꞉kihatemene, ba꞉gala ebete ebeno ka꞉ka꞉ keba ka꞉na na꞉ka꞉ga꞉gima꞉tepamene? Gabo puliyala, kitanaha꞉!
LUK 12:26 Numa꞉la꞉, la꞉ la꞉eno ka꞉ka꞉ tete nanekela꞉mo ga꞉gilama꞉tepale modoboha꞉, ba꞉bema꞉ mabu keka꞉ la꞉ komo komokomoma꞉ dukuibilibilihonama?
LUK 12:27 “La꞉ hopoeno haiyaino komo nemalagidolala꞉, iba꞉te oko a꞉kowata꞉la꞉ ba꞉gala pupulino ilina a꞉kododila꞉la꞉. Nale la꞉ begoelamemata, Ko Gawadubu Solomonote ilina dogodogodawanomoma꞉ eda꞉nami, huiyatiya ebete hidohido tita꞉goeno ilina da꞉pupulinakui, ba꞉bi kalikoeno titi ba꞉moe hopoeno haiyaino hido komote na꞉gogolena.
LUK 12:28 Numa꞉la꞉, ba꞉moe hopoeno hemate ka꞉lo napepehuta, dumutu tawakaluba꞉te koa꞉mo kiya꞉hekema꞉na꞉, huiyatiya Godote ba꞉bi nonoka ilina tita꞉goenoma꞉ midilina, ba꞉bema꞉ ebete atumu la꞉tamo pupulino ilina modobolo bikalamenakomena꞉ta. La꞉ ba꞉moe komo hidamo iya꞉tawahaheno la꞉eno hibima꞉ midi komo Godotamo kokoha꞉!
LUK 12:29 Ba꞉bema꞉ naha ilina ba꞉gala beya niho komo konomamo akemalagidolenala꞉, ba꞉gala ukui bilibilima꞉ akeda꞉hanala꞉.
LUK 12:30 Ba꞉moe hopo konomolo tawakaluba꞉te ba꞉moi ilina ukui bilibila꞉go oholena, la꞉ huiyatiya eba ka꞉na akewagelenala꞉, mabu ba꞉bi ilina la꞉godolo modobolo pola꞉naheno, la꞉eno Nabiwiti ya꞉lo iya꞉tawanako.
LUK 12:31 Ba꞉bema꞉ la꞉ Godote Ko Gawadubuma꞉ deda꞉na ba꞉be komo dopamo nohowada꞉la꞉, ba꞉bene la꞉eno modoboha꞉ tetelo ebete la꞉eno komokomo ulamelelamete la꞉tamo modobolo bikalameholenakomena꞉ta.”
LUK 12:32 Ba꞉bene Ya꞉suti gala na꞉kagoiya꞉, “La꞉ naeno sipi-goegoe kapiyuimi deha꞉potolata, ba꞉bema꞉ la꞉ akatoletolehala꞉! Godote Ko Gawadubuma꞉ deda꞉na ba꞉be hido komo la꞉eno Nabiwiti ubila la꞉tamo ikalame.
LUK 12:33 Ba꞉bema꞉ la꞉ tolamete la꞉eno ilina hiliyonomo nekolowamiholete awaepa꞉tamo mani na꞉nikalamehola꞉la꞉, iyo, la꞉ ba꞉be gabodo wiboha꞉ mani kuiha nododila꞉la꞉, ba꞉ma ka꞉na la꞉eno hidohido ilinate Godokono Hunu Habalo ba꞉nepola꞉lama꞉namena꞉ta. Ba꞉bi ilinate ba꞉bolo a꞉kawibohamena꞉, iyo, pilo tawakaluba꞉te a꞉kuwata꞉mena꞉ ba꞉gala unawa꞉te a꞉kanala꞉mena꞉.
LUK 12:34 La꞉ hidamo! La꞉eno ilinate kebolo da꞉pola꞉namena꞉ la꞉eno tepo ipuwoeno ukui atumu ba꞉bolo konepola꞉nama꞉na꞉.”
LUK 12:35 Ba꞉bene Ya꞉suti gala na꞉kagoiya꞉, “La꞉ hidamo! Diyala, eta komote la꞉tamo da꞉ pemene, ba꞉bema꞉ la꞉eno kaliko pupuliti na꞉hidala꞉ ba꞉gala alo na꞉pa꞉tihala꞉.
LUK 12:36 Iyo, ko dubuino okopa꞉te ebeno pe komo uliholo keba ka꞉na ka꞉latimina, wadiyala la꞉ ba꞉ ba꞉ba ka꞉na nemedeniya꞉la꞉. Numa꞉la꞉, ba꞉be ko dubuti uli kamenago kapiyama꞉ eda꞉te poko habane da꞉pemene, ebeno okopa꞉te ebeno pe komo dulimina꞉ gigiho kalakalago ebetamo dito ka꞉hiya꞉midamema꞉na꞉.
LUK 12:37 Ba꞉bene ko dubuti da꞉pemene ibino kalakala konomoma꞉ keda꞉ma꞉ne, mabu iba꞉te ebetamo uliholo ba emedena ebete ibi ba꞉bo pulame. Nale la꞉ begoelamemata, ebete ibino hido komo pulamelelamete ebete ebeno atuino kaliko pepekanate ebe ha꞉kiya iba꞉tamo huiyaha꞉ okodawama꞉ ba pimidi, okopa꞉te gagahiditi ebete iba꞉tamo hido baa꞉ ba꞉bo kopikalamema꞉ne.
LUK 12:38 Diyala, ko dubuti iwa tetelo da꞉ pemene o owaloho hapuamo da꞉ puluhukumini, ba꞉bema꞉ okopa꞉te ebetamo ba ulihona, ebete iba꞉tamo da꞉pemene iba꞉te koamo kokalakalahama꞉na꞉.
LUK 12:39 “Ba꞉gala ba꞉moe eta komo na꞉kemalagidolala꞉. Genama namutudawate pilo lumagino pe tete diya꞉tawamene ebete ba꞉ba teta꞉mo kulihonama꞉ne, mabu ebe ubihinola pilo dawate ebeno genamamo popegama꞉.
LUK 12:40 Ba꞉bema꞉ la꞉ atumu na꞉hidala꞉, mabu diyala, la꞉ ulihoheno ba emedena Tawakalubino Naniwiti ba꞉bo da꞉ pemene.”
LUK 12:41 Ba꞉bema꞉ Pitate Ya꞉sutamo na꞉goiya꞉, “Kodawa, ama꞉ ba꞉moe iya꞉tulame uwi a kapiyatamo ka꞉gaa꞉wa o hiliyonomo tawakaluba꞉tamola꞉ka꞉?”
LUK 12:42 Huiyatiya Kodawa Ya꞉suti na꞉goiya꞉, “Namutudawatamo da꞉papamiwatanako ba꞉be mulu okodawoeno komo keba ka꞉nala꞉ka꞉? Ba꞉ hibila, oko namutudawate ebe lawete komo okopi ulamedawama꞉ kihatema꞉ne, ba꞉ma ka꞉na ebete ibino baa꞉ naha tetelo iba꞉tamo modobolo kikalameholema꞉ne.
LUK 12:43 Ba꞉bene ba꞉be muludawate oko hidamo ba owatina, ebeno namutudawate pete ebeno komo da꞉pumimini, ba꞉be okodawate koamo kokalakalama꞉ne.
LUK 12:44 Na la꞉tamo hibi tabo begoemo, namutudawate ba꞉be mulu okodawoeno komoma꞉ ba pekalakala, ebete ebe ebeno ilina hiliyonomo ulamedawama꞉ kihatema꞉ne.
LUK 12:45 “Huiyatiya ba꞉be okodawate kuba ukui lawete ebeno tepo ipuwalo ba꞉ma ka꞉na da꞉goemene, ‘Naeno oko namutudawate tete ga꞉ga꞉dopolo nemedena, tiyolo kapenaha꞉,’ ba꞉ba tetelo ebete oko owatihino ebeno namutudawoeno baa꞉ koamo nate helo gao beya ba꞉bo konima꞉ne, ba꞉bema꞉ ebete daedaema꞉ eda꞉te komo okopi dubu ba꞉gala kamenakamena alukuli ba꞉bo kotupuimima꞉ne.
LUK 12:46 Ba꞉bene ba꞉be daedae okodawate ulihoheno ba emedena ebeno namutudawoeno pe komo a꞉kiya꞉tawamene. Ba꞉ba tetelo namutudawate pete daedae okodawa koamo panagalimihote komo kuba ododilipa꞉go konoemema꞉ne ebeno kuba huiya konelawema꞉.
LUK 12:47 “Ba꞉ hibila, kebe okodawate ebeno namutudawoeno ubi komo iya꞉tawate huiyatiya hido komo ododihino, namutudawate ebe kukamo kopanagalimihoma꞉ne.
LUK 12:48 Huiyatiya eta okodawate ebeno namutudawoeno ubi komo iya꞉tawaheno ebete eta kuba ebetamo dododimini, namutudawate ba꞉be kuba mabuma꞉ huiya kopikamema꞉ne huiyatiya koamo a꞉kapanagalimihamene. Numa꞉la꞉, tawakaluba꞉te eta lumagitamo hidohido ilina dikamehomena꞉ iba꞉te konomamo gala uwatemema꞉ kakaga꞉lama꞉na꞉. Ba꞉ ba꞉ba ka꞉na Godote kebe lumagitamo hidohido komo hiliyodopo dikamehomene, ebete ba꞉be lumagino emede ipuwalo atu hidohido komo ba꞉koholemenakomene.”
LUK 12:49 Ba꞉bene Ya꞉suti gala na꞉kagoiya꞉, “Na hopo habanapa꞉tamo Godokono koe badahiya꞉mo, iyo, ibino kuba huiya mabuma꞉ na ubila Godote ba꞉moe hopo tiyolo kemadomema꞉.
LUK 12:50 Huiyatiya numa꞉la꞉, Godoko ubila ebete na hoe ipuwamo kadunatenema꞉, ba꞉bema꞉ ba꞉be komote peheno nale dopamo hopo habanapino kuba mabuma꞉ eta huiya iba꞉tamo a꞉kikalama꞉mo.
LUK 12:51 La꞉ na꞉kemalagidolutama nale ba꞉moe hopamo gelebadi adahema꞉ pe? Ao, na tawakaluba꞉tamo gelebadi ikalamema꞉ kapiya꞉ha꞉, ibi anagiya꞉midalema꞉ piya꞉mo.
LUK 12:52 Numa꞉la꞉, naeno tabo komokomoma꞉ anagiya꞉mida komote tawakalubi ipuwalo kuluhukuma꞉ne. Ba꞉bema꞉ ba꞉ma tetene tupuimiti eta genamalo paibo badininipalate da꞉pola꞉namena꞉ ibi teta꞉mo anagiya꞉midalete, netewa-kapiyate netewatamo alaholopima꞉ keda꞉ma꞉na꞉ ba꞉gala netewate netewa-kapiyatamo atumu alaholopima꞉ kakeda꞉ma꞉na꞉.
LUK 12:53 Iyo, iba꞉te ba꞉ma ka꞉na kalaholohoma꞉na꞉, naba꞉te ibino kuhia꞉tamo ba꞉gala kuhia꞉te ibino naba꞉tamo, menokoba꞉te ibino bohelemela꞉tamo ba꞉gala bohelemela꞉te ibino menokoba꞉tamo, kamenakamenate ibino awino menokoba꞉tamo ba꞉gala ba꞉bi menokoba꞉te iba꞉tamo.”
LUK 12:54 Ba꞉bene Ya꞉suti hiliyonomo tawakaluba꞉tamo na꞉goiya꞉, “La꞉ hegelate da꞉nihitigana ba꞉ba hapulu bubu odolonalo dumima, la꞉ ba꞉ma ka꞉na koga꞉lama꞉nemata, ‘Wegolate koma꞉ne,’ ba꞉bene ba꞉be komote hibima꞉ keda꞉ma꞉ne.
LUK 12:55 Ba꞉gala eta komo. La꞉ huhu ba꞉gala gogo ibino mauba komo dumima ba꞉ma ka꞉na koga꞉lama꞉nemata, ‘Hegelate koenomoma꞉ keda꞉ma꞉ne,’ ba꞉bene ba꞉be komote hibima꞉ keda꞉ma꞉ne.
LUK 12:56 Iyo, la꞉ hopo haba ba꞉gala alomo ibino komokomo ulame iya꞉tawahala, huiyatiya ba꞉ma tetelo Godote la꞉ ipuwalo dododilina ba꞉bi komoeno ipuwa la꞉ hidamo badama꞉ kiya꞉tawahanaha꞉? Mabu la꞉ ba꞉ ma꞉lapila netewa tawakalubilata!”
LUK 12:57 Ba꞉bene Ya꞉suti ebeno tabo moga꞉melo gala na꞉kagoiya꞉, “Bada mabuma꞉ la꞉ ha꞉kiya la꞉eno komo hidamo kanagilamenaha꞉?
LUK 12:58 Ama꞉tamo da꞉maubana ba꞉be lumagiti ama꞉ gabomani ko dubutamo da꞉magatamena꞉, la꞉ ebetamo nuluhukuhino wadiyala ama꞉ dopamo alaholodawago gelebadima꞉ na꞉nediya꞉la꞉. Ama꞉ ebe gelebadimihino, hibila, ebete ama꞉ ko dubutamo komagatama꞉na꞉ta, ba꞉bene ko dubuti huiyatiya amia꞉no kuba anagiya꞉midamete ama꞉ polisi dubutamo ba noeme, ebete ama꞉ du genama guamo ba꞉bo konihatema꞉na꞉ta.
LUK 12:59 Na ama꞉tamo na꞉goemo, ama꞉ du genama gulu ba nemede, gabomani dubuti kebako tete huiyama꞉ ama꞉ da꞉kiyamemena꞉, ama꞉le ba꞉bako huiya modobotenomo modobotete habamo gala kakapema꞉na꞉ta, huiyatiya ama꞉le ba꞉be huiya modoboteheno a꞉kuluhukamena꞉ta.”
LUK 13:1 Ba꞉ba tetelo Ya꞉sukuba꞉ da꞉pola꞉nuya꞉ komo ba꞉bi tawakaluba꞉te ebe bega꞉lamiya꞉ Ga꞉lili hopo tawakalubino komoma꞉, iba꞉te sipi-goegoe alukuliti hawi Godotamo ba ikameho Paeletekono alaholohopa꞉te iba꞉tamo pikuliti ba꞉bo panakapulamiya꞉.
LUK 13:2 Ya꞉suti huiyatiya ba꞉bi tawakaluba꞉tamo na꞉goiya꞉, “La꞉eno ukui kebanala꞉ka꞉? Komo Ga꞉lili hoponapi kubakubadopola꞉ka꞉, huiyatiya Paeletete danakapulami ba꞉bi kapiya kubakubanomola꞉ka꞉? Godote ibi kapiyatamo maubate kuba huiya ba꞉bema꞉ kikalami?
LUK 13:3 Ao, eba ka꞉naha꞉! Na la꞉tamo na꞉goemo, la꞉ hiliyonomo la꞉eno kubane ohobila꞉heno la꞉ ba꞉ atumu kakaha꞉lahama꞉nemata.
LUK 13:4 Ba꞉gala ba꞉moe eta komo na꞉kemalagidolala꞉, Silomo hununomo genamate kagate 18 tawakalubi danakapulami, ibino komoma꞉ la꞉eno ukui keba ka꞉nala꞉ka꞉? Ba꞉bi da꞉ha꞉lahui ibi kapiyate kubakubanomola꞉ka꞉, huiyatiya komo Yelusalema habanapa꞉te hidohido tawakalubila꞉ka꞉?
LUK 13:5 Ao, eba ka꞉naha꞉! Na la꞉tamo na꞉goemo, la꞉ hiliyonomo la꞉eno kubane ohobila꞉heno la꞉ ba꞉ atumu kakaha꞉lahama꞉nemata.”
LUK 13:6 Ba꞉bene Ya꞉suti iba꞉tamo ba꞉moe iya꞉tulame uwi begoiya꞉, “Eta dubuti ebeno pali ipuwamo gao keha bami, ba꞉bene ebete galane gao tapihoma꞉ da꞉pi gao kapulameha꞉.
LUK 13:7 Ba꞉bema꞉ ebete pali okodawatamo na꞉goi, ‘Numa꞉, na netewa-kapiya gogolo ba꞉moe kehalo gao doholenamo huiyatiya a꞉kulama꞉lemo. Wadiyala ama꞉ na꞉ta꞉ma꞉, mabu ba꞉moe kehate pali bekubahimina.’
LUK 13:8 “Pali okodawate huiyatiya na꞉goi, ‘Kodawa, wadiyala꞉ka꞉ na ba꞉moe kapiya gogolo kuma꞉tepama꞉nemo. Na haka gala kohoba꞉midalete keha mabamo hido haka goegoeno nea꞉go kohaminahalenatema꞉nemo,
LUK 13:9 ba꞉bema꞉ diyala, eta gogolo kehate da꞉ nolomene. Wadiyala ale ba꞉ma tetelo komiya꞉pama꞉nema꞉, a꞉kata꞉ma꞉ma꞉, huiyatiya noloheno kota꞉mema꞉nemo.’”
LUK 13:10 Ba꞉bene eta Yu tawakalubino okoha꞉ talona hegelalo Ya꞉suti ibino baidi ibubulamehole genamalo tawakalubi biya꞉tulamitiya꞉.
LUK 13:11 Ibi ipuwalo eta kamena na꞉lutiya꞉, ebe 18 gogo ipuwalo kuba gobogobote ebetamo dikamiya꞉ ba꞉be temetemete uminami, ba꞉bema꞉ ebete papamiwatane pata꞉nami, buiga hogaminate hidamo uti modobonomoha꞉.
LUK 13:12 Ya꞉suti ebe umiti ebe ba ka꞉mi na꞉goiya꞉, “Kamena, ama꞉ duminama꞉ Godote ba꞉be temetemeno hale a꞉pahalamilima꞉ta!”
LUK 13:13 Ba꞉bene Ya꞉suti ebetamo kokoto demowatilamiya꞉, ba꞉ba tetenomolo ebete buiga hogaminate hidamo utiti Godotamo kalakala tabo ba꞉bo adipatiya꞉.
LUK 13:14 Huiyatiya baidi ibubulamehole genama namutudawate Ya꞉sutamo na꞉maubuya꞉ mabu ebete okoha꞉ talona hegelalo ba꞉be kamena a꞉hiduimiya꞉. Ba꞉bema꞉ ba꞉be dubuti tawakaluba꞉tamo na꞉goiya꞉, “Sikisi hegela ba꞉pola꞉na tawakaluba꞉te oko owatima꞉. La꞉ ba꞉bi sikisi hegelalo na꞉pelama꞉la꞉, ba꞉moe dubuti la꞉eno temeteme komoma꞉ la꞉ kowalubilima꞉, huiyatiya aeno talona hegelaloha꞉!”
LUK 13:15 Ya꞉suti huiyatiya ebetamo na꞉goiya꞉, “La꞉ ma꞉lapila netewa tawakalubilata! Okoha꞉ talona hegelalo la꞉ la꞉eno kau-goe o donoki-goe ibino hale pepahalamiti beya niho baha꞉mo a꞉magatalenakomata, aba꞉ hibila꞉ka꞉?
LUK 13:16 Huiyatiya ba꞉moe kamena ba꞉ A꞉ibalahamakono bohele etala. Saitanate ebe 18 gogolo hala꞉mo matuhumihuya꞉, ba꞉bema꞉ Godokono talona hegelalo ale ebe owalubiti ebeno hale da꞉pahalamilimima꞉ ba꞉ hido komola!”
LUK 13:17 Ya꞉suti ba꞉be tabo dolamagiya꞉ ba꞉ba tetelo ebe duhimipi hiliyonomate na꞉hilopohutiya꞉, huiyatiya komopi hiliyonomate na꞉kalakalahutiya꞉ mabu Ya꞉suti hiliyonomo komokomo hidonomamo ododilinami.
LUK 13:18 Ba꞉bene Ya꞉suti na꞉goiya꞉, “Godote Ko Gawadubuma꞉ deda꞉na, ba꞉be komo keba ka꞉nala꞉ka꞉? Na ba꞉be komo bada goamo na꞉ka꞉hawakalimimo?
LUK 13:19 Ba꞉be komo ba꞉ mastada kikipo huiyala. Dubuti amiti, ba꞉be deha꞉poto kikipote apete ko kehama꞉ deda꞉mene, ba꞉ba tetelo holaholate pelamete ba꞉be keha gedawalo ba꞉pemedehonamena꞉.”
LUK 13:20 Ba꞉bene Ya꞉suti gala na꞉kagoiya꞉, “Godote Ko Gawadubuma꞉ deda꞉na, nale ba꞉be komo bada goamo na꞉ka꞉hawakalimimo?
LUK 13:21 Ba꞉be komo ba꞉ ba꞉ma ka꞉nala. Eta kamenate modobo palawa lawete huhuimino puhulu ilina nanekele hola꞉minalete ba꞉bo a꞉ba꞉gui, ba꞉bene huhuimino ilinate palawa lawenomo ba lawe palawa baa꞉te hunamo ba꞉bo mahigui.”
LUK 13:22 Ba꞉bene Ya꞉suti Yelusalema ko habamo ba to ebete komo koko habahaba ba꞉gala hegehege habahabalo tawakalubi iya꞉tulama꞉go tuya꞉.
LUK 13:23 Ba꞉ba tetelo eta lumagiti ebetamo na꞉goiya꞉, “Kodawa, tawakalubi hiliyonomo ipuwalo kapiyakapiyanomate ka꞉ka꞉ mula꞉ komo ba꞉ka꞉lawemena꞉?” Ya꞉suti iba꞉tamo na꞉huiyuya꞉,
LUK 13:24 “La꞉ Godokono Hunu Haboeno tutuwa gigihodo a꞉pa꞉la꞉hama꞉ ukui konomamo nihatenala꞉, mabu nale la꞉tamo na꞉goemo, komo hiliyonomate ba꞉be gigihodo a꞉pa꞉la꞉hama꞉ dewagelemena꞉ huiyatiya iba꞉te a꞉kamodobamena꞉.
LUK 13:25 Numa꞉la꞉, genama namutudawate mahigate gigiho da꞉kalapilamene, ba꞉ba tetelo la꞉ tamelo putitatate gigiho ba panakami kopega꞉lama꞉nemata, ‘Kodawa, gigiho na꞉pa꞉hiya꞉midaa꞉ma꞉!’ huiyatiya ebete ba꞉ma ka꞉na kogoema꞉ne, ‘Na iya꞉tawaha꞉ la꞉eno komo. La꞉ kebe napila꞉ka꞉?’
LUK 13:26 Ba꞉ba tetelo la꞉ ba꞉ma ka꞉na koga꞉lama꞉nemata, ‘A ama꞉go baa꞉ nahate gao beya a꞉nihonakuima꞉, iyo, ama꞉ aeno habalo tawakalubi iya꞉tulamenakuya꞉ta!’
LUK 13:27 Ebete huiyatiya la꞉tamo gala kakagoema꞉ne, ‘Na iya꞉tawaha꞉ la꞉eno komo, la꞉ kebene ka꞉pelameoma? La꞉ kuba ododilipilata, nagodone na꞉tolama꞉la꞉!’
LUK 13:28 Ba꞉bema꞉ ba꞉ba tetelo la꞉ muhuludopolo nutitatate, la꞉ Godokono Hunu Haba ipuwalo A꞉ibalahamako, Aisa꞉keko, Ya꞉ikoboko, ba꞉gala Godokono ukui hawakalimipi hiliyonomo kulamema꞉nemata, huiyatiya Godote la꞉ gobogobamo diya꞉hekemena꞉, la꞉ lalo ba ikilame konomamo kihimima꞉nemata.
LUK 13:29 Numa꞉la꞉, ba꞉ba tetelo tawakalubi hiliyonomate ba꞉moe hopo konomoeno hapuhapuni pelameholete, Godote Ko Gawadubuma꞉ deda꞉na iba꞉te ba꞉be haboeno poko ipuwalo kopepola꞉nama꞉na꞉.
LUK 13:30 Ba꞉ hibila, ibi hiliyonomo ipuwalo galapa꞉te huiyatiya dopopima꞉ keda꞉hama꞉na꞉, ba꞉gala dopopa꞉te huiyatiya galapima꞉ keda꞉hama꞉na꞉.”
LUK 13:31 Ba꞉ba tetenomolo komo Pa꞉lisi kapiyuimi dubate pelamete Ya꞉sutamo na꞉pega꞉luya꞉, “Ama꞉ ba꞉moe habane gobogobamo nalahula꞉, mabu Ko Gawadubu Heloditi ama꞉ anakapumima꞉ ubi bihatena.”
LUK 13:32 Ya꞉suti huiyatiya iba꞉tamo na꞉goiya꞉, “La꞉ tolamete ba꞉be heloha꞉ tumu gahatamo ba꞉ma ka꞉na na꞉nega꞉lala꞉, ‘Ka꞉lo ba꞉gala dumutu na kuba gobogobo tawakaluba꞉godone oelamete temetema꞉gopi kohiduilamema꞉nemo, ba꞉bene na pino naeno oko kupula꞉ma꞉nemo.’”
LUK 13:33 Ba꞉bene Ya꞉suti gala na꞉kagoiya꞉, “Hibila, na ka꞉lo ba꞉moe habane na꞉tutamo. Ka꞉lo, dumutu, ba꞉gala pino nale ba꞉moe gabodo tote Yelusalemamo konuluhukuma꞉nemo. Mabu tawakaluba꞉te Yelusalemalo Godokono ukui hawakalimipi anakapulamenakuya꞉, ba꞉bema꞉ modoboha꞉ na eta habalo hoe, iyo, iba꞉te na atumu Yelusalemalo na꞉kanakapunama꞉mena꞉.
LUK 13:34 “O Yelusalema, Yelusalema! Ama꞉le Godokono ukui hawakalimipi anakapulamenakata, ba꞉gala ebete ama꞉ kowalubima꞉ da꞉poelamenako, ama꞉le ibi nakolamo mapelamelo akanakapulamenakata. Tete ga꞉ga꞉nomolo na ubi nihatenamimo amia꞉no tawakalubi naeno ekatamo kitagua꞉midalema꞉, kakabate ebeno gugudi ditagua꞉midalenako ba꞉ba ka꞉na, huiyatiya ama꞉ ubiha꞉ma꞉ eda꞉nama꞉ta!
LUK 13:35 Ba꞉bema꞉ mu numitota꞉, amia꞉no habate kubanomo kokubama꞉ne. Nale ama꞉tamo na꞉goemo, amia꞉no tawakaluba꞉te na tete ga꞉ga꞉nomolo a꞉kunama꞉mena꞉, huiyatiya amia꞉no galanepa꞉te Godotamo ba꞉ma ka꞉na da꞉ga꞉lamena꞉, ‘Amia꞉no mahilago da꞉pita, ale ebe hunamo kadipatema꞉nema꞉!’ ba꞉ba tetelo nale gala da꞉kapemo iba꞉te na ba꞉bo kunamema꞉na꞉.”
LUK 14:1 Ba꞉bene eta Yu tawakalubino okoha꞉ talona hegelalo Ya꞉suti baa꞉ nama꞉ eta Pa꞉lisi kapiyuimipino watodawoeno genamamo ba nodoluta, ba꞉bolo da꞉pola꞉nuya꞉ ba꞉bi tawakaluba꞉te ebe baidi kodakodalo umitiya꞉.
LUK 14:2 Ba꞉ba tetelo eta dubu ape alupoe temetemete duminami, ebete Ya꞉sukunu holoholo hapuamo da꞉piya꞉,
LUK 14:3 ba꞉bema꞉ Ya꞉suti Godokono Tutumu iya꞉tulamepi ba꞉gala Pa꞉lisi kapiyuimipi dubatamo na꞉goiya꞉, “Aeno tutumu tabote keba ka꞉na kiya꞉tua꞉mena? Okoha꞉ talona hegelalo lumagi hiduimi wadiyala꞉ka꞉ o kubala꞉ka꞉?”
LUK 14:4 Huiyatiya iba꞉te eta tabo kaga꞉luya꞉ha꞉, ba꞉bene Ya꞉suti ba꞉be dubu kokotamo lawete ebe hiduimiti ebe ba꞉bo noemiya꞉.
LUK 14:5 Ba꞉bene Ya꞉suti iba꞉tamo na꞉goiya꞉, “Amia꞉no guduti talona hegelalo haka gugamo da꞉negamene, ama꞉le ebe tiyolo konowalubima꞉na꞉ta, aba꞉ hibila꞉ka꞉? Iyo, ba꞉be atu hegelalo amia꞉no kau-goete beya ma꞉pea꞉mo da꞉negamene, ama꞉ atumu ebe tiyolo konuluhukutima꞉na꞉ta.”
LUK 14:6 Ba꞉bema꞉ iba꞉te hilopohote Ya꞉sutamo huiya tabo ga꞉lama꞉ kamodobuya꞉ha꞉.
LUK 14:7 Ba꞉bene eta tetelo Ya꞉suti baa꞉ na habalo ba luta, genama namutudawate dopamo da꞉ka꞉lamiya꞉ ebeno poko baa꞉ kopenahama꞉, ba꞉bi dubate da꞉pelamiya꞉ ibi ubila koko tawakalubino habalo pegagahidi. Ya꞉suti ba꞉be komo umiti iba꞉tamo eta iya꞉tulame uwi ba꞉ma ka꞉na kiyauya꞉,
LUK 14:8 “Eta dubuti uli kamena lawe poko tetelo ebete ama꞉ eba꞉go baa꞉ nama꞉ da꞉kiyamemena꞉, ba꞉ba tetelo ama꞉ ko habamo akanemeda꞉la꞉. Diyala, eta ko dubuti da꞉ pemene,
LUK 14:9 ba꞉bema꞉ poko namutudawate pete ama꞉tamo ba꞉ma ka꞉na kopegoema꞉ne, ‘Ama꞉ eba꞉, nelehega! Ba꞉moe ko haba ba꞉moe dubuti kopemedema꞉ne!’ Ba꞉ba tetelo ama꞉ ba hilopo deha꞉poto habanomo kolawema꞉na꞉ta.
LUK 14:10 Ba꞉bema꞉ wadiyala ama꞉ baa꞉ nama꞉ da꞉pemena꞉, ba꞉ba tetelo ama꞉ deha꞉poto habanomote na꞉pelawiya꞉, ba꞉bene poko namutudawate pete ama꞉tamo ba꞉ma ka꞉na kopegoema꞉ne, ‘Mabulubi, ba꞉moe deha꞉poto haba miya꞉pate, ko haba na꞉lawa꞉.’ Ba꞉bene baa꞉ da꞉nahuta ba꞉bi tawakalubi hiliyonomate ama꞉ ba umita, ebete ama꞉ ba꞉ba ka꞉na kokalakaluimima꞉na꞉ta,
LUK 14:11 mabu hibila, lumagiti ebe ha꞉kiya ebe koma꞉ da꞉midimini Godote ebe deha꞉potoma꞉ komidima꞉ne, ba꞉gala kebe lumagiti ebe ha꞉kiya ebe deha꞉potoma꞉ da꞉midimini Godote huiyatiya ebe koma꞉ komidima꞉ne.”
LUK 14:12 Ba꞉bene Ya꞉suti baa꞉ kebe genamalo ka꞉nutiya꞉, ebete ba꞉be genama namutudawatamo na꞉goiya꞉, “Ama꞉le poko dododimina꞉ ba꞉ba tetelo amia꞉no habanapi, ba꞉gala amia꞉no nani ekaki, ba꞉gala amia꞉no komo hawi tawakalubi, ba꞉gala amia꞉no hopolo demedehona ilina hiliyonomagopi akaka꞉lama꞉la꞉, mabu ba꞉bako tawakaluba꞉te ama꞉tamo gala kakahuiyama꞉na꞉.
LUK 14:13 Huiyatiya ama꞉ poko dododimina꞉, ba꞉ba tetelo ilinaha꞉pi, nato kubakubapi, ba꞉gala baidi tamiholamepi, ba꞉bakobako tawakalubi na꞉ka꞉lamiya꞉ poko habamo,
LUK 14:14 mabu iba꞉godolo ilina puliyala ama꞉tamo huiyama꞉. Ama꞉le ba꞉ba ka꞉na dododinakomena꞉, Godote ama꞉ hidamo bowalubinakomena꞉ta, ba꞉gala tuputupu tawakaluba꞉te hoe ipuwane da꞉mahila꞉hamena꞉ ba꞉ba tetelo ebete eta hido huiya ama꞉tamo gala kakikamema꞉na꞉ta.”
LUK 14:15 Ba꞉bene Ya꞉sukuba꞉ baa꞉ naha bahilo da꞉pola꞉nuya꞉, ibi ipuwalo eta lumagiti ebeno tabo uliti ebetamo na꞉goiya꞉, “Godote Ko Gawadubuma꞉ deda꞉na, ba꞉be habalo baa꞉ da꞉nahamena꞉ ba꞉bi tawakaluba꞉te kokalakalahama꞉na꞉, kalakala bada konomola꞉ka꞉!”
LUK 14:16 Ya꞉suti huiyatiya ebetamo na꞉goiya꞉, “Eta dubuti ko poko ododi nopo ba ihate tabo dopamo komo hiliyonomo tawakaluba꞉tamo noemi iba꞉te kopelamema꞉.
LUK 14:17 Ba꞉bene poko hegelate da꞉pi, ebete ebeno okodawa ba꞉bo oemi ba꞉bi atu tawakalubi kokiyahalamenatoma꞉. Ba꞉bene okodawate tote iba꞉tamo na꞉negoi, ‘La꞉ poko habamo na꞉pelama꞉la꞉, ilina hiliyonomo a꞉hiduilamema꞉,’
LUK 14:18 huiyatiya ibi hiliyonomate pelamema꞉ ubiha꞉ma꞉ eda꞉hate etate eta tabo goenakui, etate eta tabo goenakui, ba꞉ba ka꞉na ewagelitiya꞉. “Ibi ipuwalo etate ko dubuino okodawatamo na꞉goi, ‘Na pali haka mana꞉mo ka꞉lo a꞉lawa꞉kamo, ba꞉bema꞉ na umima꞉ tutamo. Nolata, na a꞉kapa꞉mo.’
LUK 14:19 Etate na꞉kagoi, ‘Na ta꞉ni kau-goegoe mana꞉mo ka꞉lo uwata꞉kamo, ba꞉bema꞉ na iba꞉godolo oko owatima꞉ tutamo. Nolata, na a꞉kapa꞉mo.’
LUK 14:20 Etate gala na꞉kagoi, ‘Na uli kamena a꞉lawa꞉kamo, ba꞉bema꞉ na pe modoboha꞉.’
LUK 14:21 “Ba꞉bene okodawate ebeno namutudawatamo kapete ba꞉bi tawakalubino ubiha꞉ komo ebe na꞉pikiyami. Ko dubuti ebeno tabo duli, ebete maubate okodawa ba꞉bo kiyami, ‘Ama꞉ tiyonomo gala na꞉katoa. Ama꞉ ko habamo nuluhukuti, ba꞉be haboeno koko ba꞉gala hegehege gabodo ba to, ilinaha꞉pi, ba꞉gala nato kubakubapi, ba꞉gala baidi tamiholamepi, ibi hiliyonomo ba꞉moe poko habamo na꞉magaheliya꞉.’
LUK 14:22 “Ba꞉bene okodawate gala da꞉kawilui, ba꞉ba tetelo ebete na꞉pegoi, ‘Kodawa, ama꞉le da꞉gaa꞉ka nale a꞉nododimo. Hiliyonomo tawakaluba꞉te a꞉pelama꞉, huiyatiya poko habalo haba kodopo bitana komopa꞉te kopelamema꞉.’
LUK 14:23 “Ba꞉bema꞉ ko dubuti ebetamo na꞉goi, ‘Ama꞉ gala katote tumulu demedehona ba꞉gala hiya꞉hiya꞉ gabolo da꞉wapata꞉lamita, ba꞉bi tawakalubi tiyo nowalolete ibi atumu na꞉kamagaheliya꞉ naeno poko genamate kotaboma꞉.’
LUK 14:24 Ba꞉bene ba꞉be ko dubuti ebeno genamanapa꞉tamo ohobigate na꞉kagoi, ‘Nale la꞉ hibinomolo goelamemata, nale dopamo da꞉ka꞉lamimo, ka꞉lo ba꞉bi tawakaluba꞉te ibino ubiha꞉ komo da꞉hawakalima꞉ka, ibi ipuwalo eta kapiya lumagiti naeno poko baa꞉ a꞉kanamene.’”
LUK 14:25 Ba꞉bene tawakalubi hiliyonomate Ya꞉sukuba꞉ da꞉tolamitiya꞉, ba꞉ba tetelo ebete pohobigate iba꞉tamo na꞉goiya꞉,
LUK 14:26 “Kebe lumagiti natamo pema꞉ ubi dihatemene, ebete ebeno nabiwi menoko, ba꞉gala ebeno kamena gugudi, ba꞉gala ebeno nani nanikokubi ba꞉gala ekaki, iyo, ebeno kateneno ka꞉ka꞉ atumu, ebete ba꞉bi hiliyonomo komokomo gunima꞉mo ihilateleheno, ebete na ta꞉mahenema꞉ a꞉kamodobamene.
LUK 14:27 Iyo, ba꞉ hibila, kebe lumagiti ebeno keha pihiga aguti na ta꞉maheneheno, ebete nago kapimilo toma꞉ a꞉kamodobamene.
LUK 14:28 “Numa꞉la꞉, la꞉ ipuwalo eta lumagiti hununomo genama etema꞉ ubi dihatemene, ebete dopamo emedete genama eteno mani kuititi hidamo emalagidolote, ebegodolo da꞉pola꞉na ba꞉bi mani ba꞉ma ka꞉na koka꞉lamiholema꞉ne, ba꞉be genama upula꞉ma꞉ mani modobola꞉ka꞉ o modoboha꞉.
LUK 14:29 Ebete ba꞉ma ka꞉na ewageleheno ebeno genamoeno hototo amihote, ba꞉ba tetelo mani upula꞉te oko da꞉miya꞉pamene, tawakaluba꞉te ba꞉be komo umimiti ebe ba waliti,
LUK 14:30 koga꞉lama꞉na꞉, ‘Genama etema꞉ da꞉tupuimi huiyatiya upula꞉ma꞉ helohenola, ba꞉moe ba꞉be dubula!’
LUK 14:31 “Ba꞉gala eta komo. Eta ko gawadubuti eta ko gawadubutamo alaholoma꞉ dewagelemene, ebete dopamo emedete ba꞉be komo hidamo ba emalagidoluta ba꞉ma ka꞉na kogoema꞉ne, ‘Naeno 10 taosene alaholohopi dubate eta gawadubuino 20 taosene dubago alaholo modobola꞉ka꞉?’
LUK 14:32 Ebete ebeno ukuilo modoboha꞉ma꞉ da꞉goemene, eta ko gawadubuti muhuludopone ba pita, ebete ebeno ubihale dubu dopamo konoelamema꞉ne. Ba꞉bene iba꞉te eta ko gawadubutamo nikuliti konega꞉lama꞉na꞉, ‘La꞉ bada ubi kihatiutama ale la꞉tamo kikalamema꞉? A ubila la꞉go komiloma꞉.’”
LUK 14:33 Ba꞉bema꞉ Ya꞉suti kuititi tabo ba꞉ma ka꞉na goiya꞉, “Naeno taboeno ko ipuwa ba꞉ma ka꞉nala, kebe lumagiti ebeno emede komokomo hiliyonomo gunima꞉mo ihilateleheno, ebete na ta꞉mahenema꞉ a꞉kamodobamene.”
LUK 14:34 Ba꞉bene Ya꞉suti gala na꞉kagoiya꞉, “Solo hidonomola, huiyatiya eta lumagino solo golate dalatidimini, ebete gala soloma꞉ a꞉kamida꞉mene.
LUK 14:35 Numa꞉la꞉, tawakaluba꞉te nene ba꞉gala goegoeno ne kubanomoma꞉ ga꞉lanaka huiyatiya ba꞉bako ilina pali hakamo diya꞉hekemena꞉, ilinate hidamo kapepehoma꞉na꞉. Huiyatiya lumagino tepo ipuwoeno solo eba ka꞉naha꞉. Ebeno solo golate dalatidimini, ebeno ka꞉ka꞉te kubanomoma꞉ ba eda꞉ hido oko gala a꞉kowatinakamene. Ba꞉bema꞉ ebete ebeno ka꞉ka꞉ gala hidoma꞉ keba ka꞉na na꞉ka꞉midimini? Gabo puliyala! Galagodawa, ama꞉ hidamo nulia꞉!”
LUK 15:1 Eta hegelalo ta꞉kese mani ha꞉da amiholo uwatepi ba꞉gala Godokono Tutumu Tabo uwateha꞉pi komo ibi hiliyonomate Ya꞉sutamo pelamiya꞉ ebeno tabo kopulihoma꞉.
LUK 15:2 Ba꞉bene Pa꞉lisi kapiyuimipi ba꞉gala Godokono Tutumu iya꞉tulamepa꞉te ba maubaha na꞉ga꞉luya꞉, “Numa꞉la꞉, ba꞉moe dubuti kuba tawakalubi kalakalago uwatete iba꞉go baa꞉ ba꞉bo nanako!”
LUK 15:3 Ba꞉bema꞉ Ya꞉suti ba꞉moe iya꞉tulame uwi iba꞉tamo ba꞉ma ka꞉na olamagiya꞉,
LUK 15:4 “La꞉ ipuwalo eta lumagi ebeno 100 sipi-goegoe da꞉pola꞉ma꞉na, ba꞉bene kapiyate dalatidimini ebete keba ka꞉na na꞉kewagelemene? Iyo, ebete komo 99 sipi-goegoe hido hemo naha bahilo miya꞉palete, eta dalatidi ba꞉be sipi-goe kapiya ohowadinatote konumima꞉ne.
LUK 15:5 Ebete da꞉numimini ba꞉ba tetelo ebete aguti kalakalago komagahema꞉ne.
LUK 15:6 Ba꞉bene ebete gala genamamo kapete ebeno mabulubi ba꞉gala ebe tamelo demedena, ba꞉bi tawakalubi peka꞉lamiti iba꞉tamo kopegoema꞉ne, ‘La꞉ nago kapimilo na꞉kalakalahala꞉, mabu naeno sipi-goe tumulu dalatidi nale gala a꞉kalawemo!’”
LUK 15:7 Ba꞉bema꞉ Ya꞉suti tabo ba꞉ma ka꞉na goiya꞉, “Nale la꞉ begoelamemata, kapiya lumagiti ebeno kubane ohobigate ukui hiya꞉ma꞉ da꞉midimini, ba꞉ba tetelo Godokono Hunu Habalo kalakala konomote kitanama꞉ne. Huiyatiya komo 99 tawakalubi iba꞉te ha꞉kiya ibi tuputupupima꞉ da꞉ga꞉lana, ibi mabuma꞉ Godokono kalakalate hibilo a꞉kitanamene.”
LUK 15:8 “Ba꞉gala eta komo ba꞉ma ka꞉nala. Eta kamenoeno ta꞉ni mani da꞉pola꞉ma꞉na, ba꞉bene kapiyate dalatidimini ebe keba ka꞉na na꞉kewagelemene? Ebete ebeno alo pa꞉titi ba꞉gala genama gu hidamo ba moda꞉mida mani ohowadinatote ba꞉bo konumima꞉ne.
LUK 15:9 Ba꞉bene ebete da꞉lawemene ba꞉ba tetelo ebeno mabulubi ba꞉gala ebe tamelo demedena, ebete ba꞉bi tawakalubi ka꞉lamiti iba꞉tamo kogoema꞉ne, ‘La꞉ nago kapimilo na꞉kalakalahala꞉, mabu dalatidi ba꞉be mani nale gala a꞉kalawemo!’”
LUK 15:10 Ba꞉bema꞉ Ya꞉suti tabo ba꞉ma ka꞉na goiya꞉, “Na la꞉ begoelamemata, kapiya lumagiti ebeno kubane ohobigate ukui hiya꞉ma꞉ da꞉midimini, Godokono Hunu Habalo ebeno nopopa꞉te atumu koamo kokalakalahama꞉na꞉.”
LUK 15:11 Ba꞉bene Ya꞉suti eta tabo gala na꞉kagoiya꞉, “Kuhi netewagoeno dubuti nemedenami,
LUK 15:12 ba꞉bene amogate ebeno nabiwitamo na꞉goi, ‘Ama꞉le hoe tetelo natamo ikanamema꞉ da꞉goi, ba꞉bi ilina ba꞉gala haka ka꞉lo natamo nikanama꞉.’ Ba꞉ba tetelo nabiwiti ebeno ilina ba꞉gala mani tulituliya anagiya꞉midalelamete ebeno gugudi netewatamo hiya꞉hiya꞉ ba꞉bo ikalameholi.
LUK 15:13 “Ba꞉bene amogate hiliyo hegela kalutiha꞉. Ebete nabiwigodone da꞉lawi ba꞉be haka konomo kolowamiti mani lawete muhulu hopamo ba꞉ dito tui, ba꞉bolo ebete daedae ukuilo kubakuba komo ba nododili ebeno mani ba꞉ dito nupula꞉li.
LUK 15:14 Ba꞉bene ba꞉be muhulu hopo konomolo baa꞉ wibo komote tawakaluba꞉tamo ba꞉bo uluhukui, ba꞉bema꞉ baa꞉ kape komote ebe konomamo lawi.
LUK 15:15 Ba꞉bema꞉ ebete tote ba꞉be hoponapino eta dubugodolo oko ba nelawe, ebete ebe tumamo dito oemi ebeno goegoe konulamenama꞉.
LUK 15:16 Ba꞉ba tetelo tawakaluba꞉te nena꞉mo da꞉miya꞉tenakui ba꞉bi baa꞉ goegoa꞉tamo da꞉pikalameholenakui, ebete hiliyonomo tetelo ba꞉bi baa꞉ nahama꞉ ubi nihatenami, huiyatiya eta lumagiti ebetamo naha ilina kikamenakuiha꞉.
LUK 15:17 “Ba꞉bene komo hegelate da꞉wibui ebete ebeno ukui hiya꞉ma꞉ miditi na꞉goi, ‘Naeno nabiwino okopa꞉godolo naha ilina konomo ba꞉pola꞉na, iba꞉te ha꞉kiya nahana modoboha꞉. Na huiyatiya ba꞉malo baa꞉ kapelo hoema꞉ ewagelenamo!
LUK 15:18 Wadiyala na tote naeno nabiwitamo ba꞉ma ka꞉na konegoema꞉nemo, ‘Nabiwi, na Godotamo ba꞉gala ama꞉tamo kuba komokomo a꞉nododilimo,
LUK 15:19 ba꞉bema꞉ na hidoenoha꞉ ama꞉le na amia꞉no guduma꞉ ka꞉nami. Wadiyala ama꞉ na huiyatiya amia꞉no eta okodawama꞉ na꞉midina꞉.’ ’
LUK 15:20 Ba꞉ba tetelo ebete mahigate ebeno nabiwitamo ba꞉bo tui. “Ba꞉bene ebete muhuluni ba pita, ebeno nabiwiti ebe numiti ebe konomamo malemaletelo ebetamo nipuligate ebe ba na꞉pa꞉watameho ba꞉bo naboetehui.
LUK 15:21 Ebeno guduti na꞉goi, ‘Nabiwi, na Godotamo ba꞉gala ama꞉tamo kuba komokomo a꞉nododilimo, ba꞉bema꞉ na hidoenoha꞉ ama꞉le na amia꞉no guduma꞉ ka꞉nami.’
LUK 15:22 “Huiyatiya ebeno nabiwiti eta okodawatamo na꞉goi, ‘Hidonomo kaliko tiyolo adahemete naeno kuhitamo na꞉pepulima꞉, ba꞉gala kakaeto ebeno kokotamo pipulimiti nato ilina akona꞉pupulimiya꞉.
LUK 15:23 Ba꞉bene ama꞉ tote uli ape kau-goe gadinomo nelawete na꞉nanagalimiya꞉. Ale poko baa꞉ ba nahana kokalakalahanama꞉nema꞉,
LUK 15:24 mabu ba꞉moe naeno gudu da꞉hoi ebete ka꞉lo gala na꞉kaka꞉ka꞉, ebete gobogobamo dalatidi huiyatiya nale ebe gala a꞉kalawemo.’ Ba꞉bene ba꞉ba tetelo iba꞉te kalakala ba꞉bo tupuimiya꞉.
LUK 15:25 “Huiyatiya ba꞉ba tetelo naniwiti nabiwino pali habalo oko benowatiti. Da꞉gapogapohoni ebete oko habane genama tatalia꞉mo ba puluhukuna moe diyamo ba꞉gala kalakala ohaleno diyamo ba꞉bo pulihoni,
LUK 15:26 ba꞉bema꞉ ebete eta okodawa ebetamo ka꞉minate nalateda꞉ni, ‘Moe komo keba ka꞉nala꞉ka꞉?’
LUK 15:27 “Okodawate ebetamo na꞉goeni, ‘Amia꞉no amoga a꞉pa꞉ka, ba꞉bema꞉ amia꞉no nabiwiti uli ape kau-goe gadinomo anagalima꞉ka. Kalakala konomote itana mabu ebete olalatihino a꞉kapuluhukaka!’
LUK 15:28 “Ba꞉be mabuma꞉ naniwiti maubanate genama guamo odolo ubiha꞉ma꞉ eda꞉ni, ba꞉bene ebeno nabiwiti puluhukunate ebe na꞉petoemehoni genamamo kopodolonama꞉.
LUK 15:29 Ebete huiyatiya ebeno nabiwitamo na꞉goeni, ‘Ama꞉ numa꞉, na gogo hiliyonomolo amia꞉no okodawama꞉ ba eda꞉na, ama꞉le da꞉goenamenakui nale ubiha꞉ma꞉ keda꞉nakuiha꞉. Ama꞉ huiyatiya natamo bada ilina kikanamiui? A꞉iye! Ama꞉ natamo deha꞉poto gautu-goe kikanameha꞉, nale naeno mabuluba꞉go ba naha kokalakalahama꞉!
LUK 15:30 Huiyatiya ba꞉moe amia꞉no eta guduti amia꞉no ilina uwatete, dubu bilibili kamenakamenago kuba ba nododili amia꞉no mani a꞉newatulateli. Ba꞉bene ba꞉be lumagiti da꞉pa꞉ka, ama꞉ ebe kokalakaluimima꞉ uli ape kau-goe ebetamo anagalimima꞉kata!’
LUK 15:31 “Ebeno nabiwiti ebetamo na꞉huiyani, ‘Naeno gudu, ama꞉ emedena tetelo nago emedenata, naeno ilina hiliyonomo ba꞉ amia꞉nola.
LUK 15:32 Huiyatiya ba꞉moe amia꞉no amogate da꞉hoi ebete ka꞉lo gala a꞉kaka꞉ka꞉, iyo, ebete gobogobamo dalatidi ale ebe gala a꞉kalawema꞉. Ba꞉bema꞉ wadiyala a baa꞉ kapimilo ba nahana kokalakalahanama꞉nema꞉.’”
LUK 16:1 Ba꞉bene Ya꞉suti ebe ta꞉matapa꞉tamo na꞉goiya꞉, “Eta ko dubuti eta dubu bihati ebeno ilina hiliyonomo hidamo kulamelemenama꞉. Ba꞉bene komo hegela hiliyonomo da꞉petohui, komo tawakaluba꞉te ba꞉be dogodogo dubu na꞉pega꞉lamiya꞉, ‘Numa꞉, ama꞉le dihati ba꞉be okodawate amia꞉no ilina pilo gabodo ba puwate ba꞉bo newatulatelenako.’
LUK 16:2 “Ba꞉ba tetelo ko dubuti ebeno okodawa ka꞉miti ebetamo na꞉goi, ‘Na ka꞉lo dulimo, ba꞉be komo kebanala꞉ka꞉? Ama꞉le naeno oko ba owatina kebako kuba dododilinama꞉, wadiyala ama꞉ ba꞉bi komokomo hiliyonomo amia꞉no oko bukalo hidamo netuputupuilamete ba꞉bo nadahiya꞉ nale kiya꞉tawama꞉. Mabu ama꞉ modoboha꞉ naeno ilina ulamedawama꞉ eda꞉, ba꞉bema꞉ ama꞉ ka꞉lo oko kekelamema꞉na꞉ta.’
LUK 16:3 “Ba꞉bene ba꞉be okodawate ebeno oko habamo ba to tepo ipuwalo na꞉negoi, ‘Ko dubuti naeno oko a꞉duhimi, ba꞉bema꞉ na keba ka꞉na na꞉kewagelemo? Na ubihinola siwi aligili oko owati, na helohenola. Ba꞉gala na tawakaluba꞉tamo manima꞉ da꞉toetoemo na kohilopoma꞉nemo.
LUK 16:4 Ehe, na iya꞉tawala! Naeno namutudawa ha꞉da ba amihome komo tawakalubi naeno mabulubima꞉ komidilima꞉nemo. Nale ba꞉ba ka꞉na dododimo, naeno okone uluhuku tetelo ba꞉bi mabuluba꞉te naeno modoboha꞉ komokomo ipuwalo kalakalago bowalubininakomena꞉.’
LUK 16:5 “Ba꞉bema꞉ ba꞉ba tetelo ebete ebeno namutudawa ha꞉da ba꞉ma ka꞉na amihomi. Puya꞉te ba꞉be ko dubutamo mani huiyahaleheno, ebete ibi hiliyonomo ka꞉lamiti dopodawatamo na꞉goi, ‘Ama꞉ naeno namutudawatamo kebako mani kahuiyaha꞉?’
LUK 16:6 “Ebete na꞉goi, ‘Nale 100 dolomo aloeno beya duwatimo, nale kahuiyaha꞉.’ “Ba꞉bene ko dubuino ilina ulamedawate ebetamo na꞉goi, ‘Mola, ama꞉le duwati ba꞉be pepa. Ama꞉le 100 kuititi egebolete huiyatiya 50 dolomo na꞉miya꞉ta꞉.’
LUK 16:7 “Ba꞉bene ebete eta tetedawatamo na꞉goi, ‘Ama꞉ kebako mani kahuiyaha꞉?’ “Ebete na꞉huiyui, ‘Nale 1,000 witi-laisa baika duwatimo, nale kahuiyaha꞉.’ “Ba꞉bene ko dubuino ilina ulamedawate ebetamo na꞉goi, ‘Mola, ama꞉le duwati ba꞉be pepa. Ama꞉le 1,000 kuititi egebolete huiyatiya 800 baika na꞉miya꞉ta꞉.’ Ba꞉bene ko dubuino ilina ulamedawate huiyahaleha꞉pi hiliyonomatamo ba꞉ma ka꞉na goenakui, iyo, ebete ba꞉moe ba꞉be gabodo ebeno namutudawa ha꞉da ba amihome komo hiliyonomo tawakalubi ebeno mabulubima꞉ ba꞉ dito midili.
LUK 16:8 “Galane ko dubuti ebeno ilina ulamedawoeno ododi komo iya꞉tawate na꞉goi, ‘Ehe, ebe bada mulu kodawala꞉ka꞉! Ebete na ba kubahiname ebe ha꞉kiya ebe bowalubi.’” Ba꞉bene Ya꞉suti ebeno iya꞉tulame uwino ipuwa ba꞉ma ka꞉na hawakalimiya꞉, “Ba꞉moe hopolo hibima꞉ midiha꞉ tawakaluba꞉te mulunomoma꞉ ba eda꞉hana ibino mana꞉mo hiya꞉hiya꞉ komokomo bododilinaka ibi kowalubilinama꞉. Huiyatiya alo ipuwalo demedehona ba꞉bi tawakaluba꞉te komo tetelo mulu ukui emalagidoloheno ibi ha꞉kiya ibino mana꞉mo ibi kowalubilinaha꞉.
LUK 16:9 Nale la꞉ begoelamemata, wadiyala la꞉ ba꞉moe hopoeno mana꞉mo tawakalubi la꞉eno mabulubima꞉ na꞉midilinala꞉, ba꞉bema꞉ la꞉eno ha꞉laha tetelo ba꞉moe hopoeno ilina da꞉wiboholamemena꞉, Godokono Hunu Habalo la꞉eno mabuluba꞉te la꞉ atumu kalakalago kuwatema꞉na꞉ta.
LUK 16:10 “Ba꞉ hibila, kebe lumagiti deha꞉poto komo hidamo dododimini, ebete ko komo atumu hidamo kakododima꞉ne, ba꞉gala ebete deha꞉poto komo ipuwalo ha꞉da damihomene, ebete ko komo ipuwalo atumu ha꞉da kakamihoma꞉ne.
LUK 16:11 Ba꞉bema꞉ la꞉ ba꞉moe hopolo la꞉eno ilina tuputupu gabodo ulamenaheno, Hunu Habalo da꞉pola꞉na ba꞉bi hidohido komo Godote la꞉tamo a꞉kikalamehola꞉mena꞉ta,
LUK 16:12 ba꞉gala la꞉le komopino ilina tuputupu gabodo ulamelelamenaheno, eta dawate la꞉eno ilinanomo la꞉tamo a꞉kikalamehola꞉mena꞉ta!
LUK 16:13 “Ba꞉gala ba꞉moe ba꞉ eta komola, lumagiti netewa gawadubatamo okodawama꞉ eda꞉ modoboha꞉. Ebete ba꞉ba ka꞉na dewagelemene etatamo ba maubana eta malemalelo bemalagidolonamene, ba꞉gala ebete etatamo ba utina eta ubiha꞉ma꞉ beda꞉namene. Ba꞉bema꞉ ama꞉ ba꞉ atumu, Godotamo ba꞉gala manitamo kapiya tetelo papamiwata modoboha꞉.”
LUK 16:14 Yu tawakalubi ipuwalo Pa꞉lisi kapiyuimipa꞉te mani konomamo emalagidolenama꞉, ba꞉bema꞉ komo iba꞉te Ya꞉sukunu tabo uliti ebe na꞉walititiya꞉.
LUK 16:15 Ba꞉bene Ya꞉suti iba꞉tamo na꞉goiya꞉, “La꞉ tawakalubino holoholo hapulu la꞉eno hunu tama bihiduilamenamata, huiyatiya Godote la꞉eno tepo ipuwa komo iya꞉tawala, mabu tawakaluba꞉te kebe komokomo hunamo ba wadiya꞉paa꞉latele hidohidoma꞉ da꞉ga꞉lana, huiyatiya Godote ba꞉bi komokomo kuba abale niboma꞉ goena.
LUK 16:16 “Godote ebeno Tutumu Tabo Moseseko ipuwado tawakaluba꞉tamo dikalamiya꞉ ba꞉gala ebeno ukui hawakalimipa꞉te Bukamo da꞉miya꞉tiya꞉, ba꞉be pakala komoeno tabote pete Yoneko teta꞉mo ba꞉bo puluhukui. Huiyatiya Yoneko tetene tupuimiti Godote Ko Gawadubuma꞉ deda꞉na ba꞉be uli komoeno tabote ba꞉ a꞉pe, ba꞉bene komopa꞉te ba꞉moe Hido Tabo ba olamagimina, komo tawakalubi hiliyonomate uliti ibi ubila Godokono Hido Habamo ibi ha꞉kiya ibino heloamo na꞉pa꞉la꞉ha.
LUK 16:17 Ba꞉moe komo ba꞉ hibila. Ba꞉moe hopo ba꞉gala alomo ibino ilinate tete ga꞉ga꞉nomolo ba pola꞉na galane ha꞉kiya kowibohoma꞉na꞉, huiyatiya Godokono Tutumu Tabo hiliyonomo ipuwalo eta madodo deha꞉potonomote a꞉kawibamene, ebeno tabote emedena emedena tetelo bitanamene.”
LUK 16:18 Ba꞉bene Ya꞉suti eta tabo bekagoiya꞉, “Kebe dubuti ebeno kamena ibukiti eta da꞉lawemene ebete Godokono holoholo hapulu pilo komo kododima꞉ne, ba꞉gala dubuti ebeno kamena ibukiti, etate ba꞉be kamena da꞉lawemene ebete pilo komo kododima꞉ne.”
LUK 16:19 Ba꞉bene Ya꞉suti ba꞉moe uwi bikiyahuya꞉, “Eta ilina dogodogo dubuti nemedenami, ebete huiya koko kaliko bepupulinakui ba꞉gala tete hiliyonomolo hidohido naha ilina benahanakui,
LUK 16:20 huiyatiya ebeno genama gigiho tetelo awae dubuti watitanakui, ebeno mahilo Lasalesitila, ebeno apelo kuma kokote pola꞉ma꞉nami.
LUK 16:21 Ebete ilina dogodogo dubuino baa꞉ naha habane hopamo da꞉peguditanakui, ba꞉be baa꞉ ugiugi nahama꞉ ubi nihatitanakui, huiyatiya gahagahate da꞉pelamenakui ebeno kuma ba꞉bo pa꞉loma꞉nalemenakuya꞉.
LUK 16:22 “Ba꞉bene eta hegelalo awae dubuti da꞉hoi, Godokono nopopa꞉te ebeno gobogobo pelawete Hunu Habamo A꞉ibalahamatamo dito magatuya꞉, huiyatiya ilina dogodogo dubuti da꞉hoi, tawakaluba꞉te ebeno ape pelawete bobamo dito nihatiya꞉.
LUK 16:23 Ba꞉bene ilina dogodogodawate Koe Habalo temeteme ipuwalo ba nemede, muhulunomone negahimite A꞉ibalahamako binumi, Lasalesikoba꞉ da꞉lumutiti.
LUK 16:24 Ba꞉ba tetelo ebete konomamo ba negoewata na꞉goi, ‘Nabiwi A꞉ibalahama! Ama꞉ na malemalenatenelo Lasalesiko na꞉poema꞉. Wadiyala ebete ebeno kokoto nege beyamo adutiti naeno ma꞉lapila na꞉pegibagibuimina, mabu na ba꞉moe Koe Habalo temeteme konomo a꞉pelawemo!’
LUK 16:25 “Huiyatiya A꞉ibalahamate na꞉goi, ‘Gudu, ama꞉ nemalagidola. Ama꞉le hopo habalo demedenama꞉ ba꞉ba tetelo ama꞉ hidohido ilina bewatenama꞉ta, huiyatiya Lasalesiko kubakuba ilina bewatenami. Ba꞉bema꞉ numa꞉, ka꞉lo ebete hido kalakalago piluta, ama꞉ huiyatiya ko temeteme ipuwalo pilutata.
LUK 16:26 Gudu, ba꞉moe ba꞉ eta komola. Aeno tetetetelo konomo bolagale bitana, ba꞉bema꞉ ale ba꞉moene la꞉tamo pa꞉hiwale gabo puliyala, ba꞉gala la꞉le atamo pa꞉hiwale gabo atumu kitanaha꞉.’
LUK 16:27 “Ba꞉bene ilina dogodogo dubuti na꞉goi, ‘Nabiwi A꞉ibalahama, nale ama꞉ betoemehomata, ama꞉ naeno nabiwino genamamo Lasalesiko na꞉noemiya꞉,
LUK 16:28 mabu naeno paibo ekaki ba꞉pola꞉na. Wadiyala ebete iba꞉tamo tote na꞉nikiyahalama꞉mene, iba꞉te ba꞉moe ko temeteme habamo pelamekapoma꞉.’
LUK 16:29 “A꞉ibalahamate huiyatiya na꞉goi, ‘Ao! Godokono tabote iba꞉godolo bitana, ebete Moseseko ipuwado tawakaluba꞉tamo dikalamiya꞉ ba꞉gala ebeno ukui hawakalimipa꞉te ebeno Bukamo da꞉miya꞉tiya꞉ ba꞉bi koko tabo. Wadiyala iba꞉te ba꞉bi komokomo ulihote Godokono ubi komamo na꞉papamila꞉mena꞉.’
LUK 16:30 “Ilina dogodogo dubuti na꞉goi, ‘Ao, Nabiwi A꞉ibalahama! Etate hoene ka꞉ka꞉mo mahigate iba꞉tamo da꞉tomene, iba꞉te ba꞉be hanohano komo umiti ibino kubane ohobila꞉te ukui hiya꞉ma꞉ ba꞉bo komidilima꞉na꞉.’
LUK 16:31 “A꞉ibalahamate tabo ba huiya na꞉goi, ‘Iba꞉te Moseseko ba꞉gala komo Godokono ukui hawakalimipi dubagodone tabo ulihoheno, eta lumagiti hoene iba꞉tamo da꞉nemahigamene, iba꞉te ba꞉be komo dumimina꞉ ba꞉be lumagino tabo atumu hibima꞉ a꞉kamida꞉mena꞉.’”
LUK 17:1 Ba꞉bene Ya꞉suti ebe ta꞉matapa꞉tamo na꞉goiya꞉, “Hibila, Saitanakono kuba gabamo emogabuimi komate tawakaluba꞉tamo kikulihoma꞉na꞉, huiyatiya kebe lumagigodone dikulihomena꞉ Godote ba꞉be lumagitamo kuba huiya konomo kikamema꞉ne!
LUK 17:2 Ba꞉bema꞉ wadiyala tawakaluba꞉te ebe lawete ebeno kokoba꞉mo konomo nakola ma꞉homete kehaha꞉ kolomamo na꞉da꞉namena꞉, eta deha꞉poto guduti ebeno kuba ipuwamo gakapoma꞉.
LUK 17:3 Ba꞉bema꞉ la꞉ ha꞉kiya la꞉eno komo hidamo nulamenala꞉! “Amia꞉no ekawiti ama꞉tamo kuba dododimini, ama꞉le ebe na꞉tutumutiya꞉, ba꞉bene ebete ebeno kubane ohobigate ebeno ukui hiya꞉ma꞉ da꞉midimini, ama꞉ ebeno kuba egebolemete nadodomiya꞉.
LUK 17:4 Iyo, ebete kapiya hegelalo ama꞉tamo sa꞉ba꞉ni kuba komokomo ododiliti, ba꞉bene ebete sa꞉ba꞉ni teta꞉mo gala kapete ba꞉ma ka꞉na da꞉kapegoememena꞉, ‘Naeno naniwi, nolata. Na gala ama꞉tamo kuba a꞉kododa꞉mo,’ wadiyala ama꞉le ebeno kuba egebolemete kadodolemema꞉na꞉ta.”
LUK 17:5 Ba꞉bene Kodawa Ya꞉suti dopamo doelamiya꞉ Godokono oko konowatima꞉, ba꞉bi oelamepi dubate ebetamo na꞉ga꞉luya꞉, “Aeno hibima꞉ midi komo na꞉kokoilamelea꞉ma꞉.”
LUK 17:6 Kodawa Ya꞉suti ba huiya na꞉goiya꞉, “Mastada kikipo koha꞉, deha꞉potonomola. Huiyatiya la꞉eno hibima꞉ midi komote ba꞉makoma꞉ deda꞉mene, la꞉eno helote modoboma꞉ ba eda꞉ la꞉le ba꞉moe kehatamo koga꞉lama꞉nemata, ‘Ama꞉ ha꞉kiya amia꞉no haha magobelete, kehaha꞉ kolomamo na꞉nuta꞉!’ ba꞉bene ba꞉moe kehate la꞉eno tabamo kopapamiwatama꞉ne.”
LUK 17:7 Ba꞉bene Ya꞉suti gala na꞉kagoiya꞉, “La꞉ ba꞉moe go tabo hidamo nemalagidolala꞉. Tawakalubi ipuwalo etate ko gawadubuma꞉ deda꞉na ba꞉bene ebegodolo komo huiyaha꞉ okopi hiliyonomo demedena, ebeno ododi komo keba ka꞉nala꞉ka꞉? Ko gawadubuino huiyaha꞉ okodawa etate pali haka aligili oko ba꞉gala sipi-goegoe ulame oko wibuilamete genamamo da꞉pemene, ba꞉ba tetelo ebeno kodawate ebetamo ba꞉ma ka꞉na ba꞉ka꞉goemene, ‘Ama꞉ niliya, amia꞉no komo dopamo na꞉numa꞉. Ama꞉ amia꞉no baa꞉ nate, galane naeno baa꞉ na꞉pokalimiya꞉’?
LUK 17:8 Ao, ko gawadubuti eba ka꞉na a꞉kewagela꞉mene, huiyatiya ebete ebeno okodawatamo ba꞉ma ka꞉na kogoema꞉ne, ‘Baa꞉ okalimino dalowa꞉ha꞉ kaliko puliti, naeno baa꞉ na꞉hiduima꞉, ba꞉bene nale baa꞉ na habamo ba emede, ama꞉ hidohido baa꞉ ba꞉gala gao beya natamo kowadahema꞉na꞉ta. Naeno baa꞉ na komo da꞉wibomene, ama꞉ galane amia꞉no beya niti amia꞉no baa꞉ ba꞉bo konama꞉na꞉ta.’
LUK 17:9 “Ba꞉moe komo ba꞉ hibila. Ko gawadubuti ebeno okodawa hiya꞉hiya꞉ oko owatihoma꞉ da꞉goememene, ba꞉ba tetelo okodawate ebetamo papamiwatalo ba꞉bi oko dupula꞉lemene, ebeno kodawate ebetamo ba kalakala huiyatiya koamo a꞉kamilimihamene mabu ebe ba꞉ ebeno okodawoeno watodawala.
LUK 17:10 Ba꞉bema꞉ la꞉ ulihopi ba꞉ atumu. Ko Gawadubu Godote la꞉ kebe hiya꞉hiya꞉ oko owatihoma꞉ da꞉goelamemena꞉, wadiyala la꞉ ba꞉bi hiliyonomo oko upula꞉lete ba꞉ma ka꞉na koga꞉lama꞉nemata, ‘A Godokono okopila. Ebete a bada komoma꞉ ka꞉goea꞉mi, ale ebeno heloamo kalakalago dito ododima꞉, ba꞉bema꞉ eta lumagiti a milia꞉mehoe modoboha꞉. Wadiyala tawakaluba꞉te aeno Ko Gawadubu Godoko kapiya na꞉milimihamena꞉!’”
LUK 17:11 Ba꞉bene Ya꞉suti Yelusalema ko habamo ba to, ebete Samaliya hopo ba꞉gala Ga꞉lili hopo tetenomodo tuya꞉.
LUK 17:12 Ebete eta haba deha꞉potoamo da꞉piya꞉ ta꞉ni kuitikuita꞉gopi dubate eba꞉go palugate muhuluni ebetamo ibulunomo na꞉pega꞉luya꞉,
LUK 17:13 “Ya꞉su, Hido Iya꞉tulamedawa, ama꞉ a na꞉malemalea꞉tea꞉!”
LUK 17:14 Ya꞉suti ibi muhulamo nulamete iba꞉tamo na꞉negoiya꞉, “La꞉ tolamete la꞉eno ape Godotamo hawa꞉goeno ikamehopa꞉tamo na꞉nemutuilamehola꞉la꞉.” Ba꞉bene iba꞉te ba tolame, gabo tetelo ibino apete ba꞉bo nihidohidohuya꞉.
LUK 17:15 Ibi ipuwalo eta kapiya ebeno apete da꞉hiduya꞉, ebete ba꞉be komo numiti ebeno tabo madodo hunamo adipatelo Godoko ba milimiho Ya꞉sutamo gala na꞉kapiya꞉,
LUK 17:16 ba꞉bene ebete Ya꞉sukunu nato mabamo pegate ebetamo kalakala tabo ba꞉bo polamagiya꞉. Ba꞉be dubu ba꞉ Samaliya hoponapila,
LUK 17:17 ba꞉bema꞉ Ya꞉suti ebeno komo umiti tawakaluba꞉tamo na꞉goiya꞉, “Numa꞉la꞉, Godokono helote ta꞉ni dubu a꞉hiduilame, huiyatiya komo naini iba꞉te kapelameha꞉.
LUK 17:18 Keka꞉ mabu ba꞉moe kapela dubu, ebe kapiyate kapete ebeno kalakala tabo Godotamo da꞉polamagi?”
LUK 17:19 Ba꞉bene Ya꞉suti ebetamo na꞉goiya꞉, “Ama꞉ mahigate na꞉toa. Amia꞉no hibima꞉ midi komote ama꞉ a꞉hiduima꞉ta.”
LUK 17:20 Ba꞉bene komo Pa꞉lisi kapiyuimi dubate Godote Ko Gawadubuma꞉ deda꞉na ba꞉be komoeno uluhuku tetema꞉ Ya꞉suku dalatediya꞉, ebete ibino tabo ba huiya na꞉goiya꞉, “Hanohano komate la꞉ a꞉kiya꞉tulama꞉mena꞉ta ba꞉ma ka꞉na, Godokono Ko Gawadubuino tete ba꞉ na꞉tatali.
LUK 17:21 Eta lumagiti ha꞉da amiho tabo ba꞉ma ka꞉na kogoema꞉ne, ‘Numa꞉la꞉, ba꞉be hido komote ba꞉ a꞉tupuimi, mola!’ ba꞉gala etate kakagoema꞉ne, ‘La꞉ ba꞉be komo ebamo na꞉numa꞉la꞉!’ Huiyatiya Godokono Ko Gawadubuma꞉ eda꞉ komo eba ka꞉naha꞉, mabu ba꞉be komo ba꞉ tepo ipuwoeno komola, iyo, la꞉tamo ya꞉lo a꞉puluhukuya꞉.”
LUK 17:22 Ba꞉bene ebete ebe ta꞉matapa꞉tamo na꞉goiya꞉, “Ba꞉ma tetelo Tawakalubino Naniwiti ba꞉moe hopolo ba emedena, hopo habanapa꞉te hanohano komo ebegodolo ulamenaka. Galane tetelo la꞉ ubi kihatema꞉nemata ba꞉mako hegela gala kakumima꞉, huiyatiya la꞉ a꞉kuma꞉mata.
LUK 17:23 Ba꞉ba tetelo komopa꞉te la꞉tamo ba꞉ma ka꞉na koga꞉lama꞉na꞉, ‘Mola, ba꞉moe hanohano komo na꞉puma꞉la꞉!’ o ‘Bela, ebamo na꞉numa꞉la꞉!’ huiyatiya la꞉ ibi akata꞉matala꞉la꞉.
LUK 17:24 Ba꞉ hibila, hegelate da꞉la꞉wa꞉hiyamene ba꞉ba tetelo hegelate alomo hunu konomo ka꞉la꞉minahama꞉ne, ba꞉bema꞉ na Tawakalubino Naniwiti gala da꞉kapemo naeno pe hegelate ba꞉ ba꞉ba ka꞉na kitanama꞉ne, iyo, hopo habanapi hiliyonomate naeno pe komo kumima꞉na꞉.
LUK 17:25 Huiyatiya hibila, ba꞉be komote puluhukuhino, dopamo ba꞉ma tete tawakaluba꞉te na ubiha꞉ma꞉ eda꞉hate natamo temeteme kokonomo kikanamehonema꞉na꞉.
LUK 17:26 “Ba꞉ hibila, Nowako tetelo kebako komote kuluhukuya꞉, Tawakalubino Naniwiti gala da꞉kapemene ba꞉ba tetelo ba꞉be atu komote kakuluhukuma꞉ne.
LUK 17:27 Ba꞉ba tetelo iba꞉te baa꞉ nahata ba꞉gala helo gao beya koamo nihota, dubate kamenakamena uwateholeta ba꞉gala kamenakamenate dubu uwateholeta, iba꞉te ba꞉ba ka꞉na ba ewagelena Nowate ko boga꞉mo ba꞉bo opeguya꞉. Ba꞉bene ba꞉ba tetelo beya konomote odolote tawakalubi hiliyonomo ba꞉bo anakapulamiya꞉.
LUK 17:28 Ba꞉gala Lotoko tetelo duluhukuya꞉, ba꞉be atu komote ba꞉ba ka꞉na kakuluhukuma꞉ne. Tawakaluba꞉te baa꞉ nahata ba꞉gala helo gao beya koamo nihota, ibino ilina kolowamiholita ba꞉gala mani koamo uwatehota, pali ilina amihota ba꞉gala genama etemotehota, iba꞉te ba꞉ba ka꞉na ba ewagelena
LUK 17:29 Lotote Sodomo habane uluhukuti ba꞉bo alahuliya꞉. Ba꞉bene ba꞉be hegelalo koete Godokono Hunu Habane hopamo pegate ibi hiliyonomate koelo dito ha꞉lahuya꞉.
LUK 17:30 Ba꞉bema꞉ Godote Tawakalubino Naniwino hibi komo da꞉hawakalimimini, ba꞉be tetete ba꞉ ba꞉ba ka꞉na kakitanama꞉ne.
LUK 17:31 “Ba꞉be Ko Hegelalo kebe lumagiti genama panalo da꞉lutamene, ebete genama guamo gala a꞉kana꞉pa꞉gamene ebeno ilina uwatema꞉, ba꞉gala tumulu oko dowatitamene ba꞉be lumagiti atumu ebeno genamamo gala a꞉katoamene.
LUK 17:32 Ba꞉bema꞉ la꞉ Lotokono kamenoeno komo nemalagidolala꞉!
LUK 17:33 Kebe lumagiti ebeno kateneno ubi gabodo ba to ebeno ka꞉ka꞉ Godotamo damawada꞉mene, ebeno ka꞉ka꞉te kalatidima꞉ne, huiyatiya kebe lumagiti ebeno ka꞉ka꞉ Godoko mabuma꞉ datutimini, ebete hibi ka꞉ka꞉ kolawema꞉ne.
LUK 17:34 Nale la꞉ begoelamemata, ba꞉be dulu dubu netewate kapiya tilolo da꞉lanamena꞉, Tawakalubino Naniwiti pete eta ba pelawe eta ba꞉bo komiya꞉pama꞉ne.
LUK 17:35 Ba꞉gala kamenakamena netewate baa꞉ da꞉lapahutamena꞉, ebete pete eta ba pelawe eta ba꞉bo komiya꞉pama꞉ne.
LUK 17:36 Ba꞉gala dubu netewate pali habalo da꞉wapatitamena꞉, ebete pete eta ba pelawe eta ba꞉bo komiya꞉pama꞉ne.”
LUK 17:37 Ba꞉bene Ya꞉suku ta꞉matapa꞉te ebe nalatediya꞉, “Kodawa, ba꞉moi komate kebolo na꞉kikulihomena꞉?” Ya꞉suti huiyatiya iba꞉tamo na꞉goiya꞉, “Abale ilinate kebolo ditana, wala꞉te alehola꞉go ba꞉bamo koguditama꞉na꞉.”
LUK 18:1 Ba꞉bene Ya꞉suti eta iya꞉tulame uwi ebe ta꞉matapa꞉tamo nolamagiya꞉, mabu ebe ubihinola iba꞉te hiliyonomo tetelo Godotamo toetoe tabo ga꞉la ipuwalo iba꞉te huiya tabo tiyolo laweheno heloha꞉ma꞉ eda꞉hakapoma꞉.
LUK 18:2 Ebete na꞉goiya꞉, “Eta habalo tabo anagilamedawa dubuti nemedenami, ebete Godotamo kapapamiwatanakuiha꞉ ba꞉gala ebete tawakalubi kamalemalelatelenakuiha꞉.
LUK 18:3 Ba꞉be atu habalo eta hamole kamenate na꞉kemedenami, ebete hiliyonomo tetelo tabo anagilamedawatamo penakui ba꞉ma ka꞉na pegoenakui, ‘Ama꞉le nago dalaholohona, ba꞉be lumagitamo kuba huiya nikama꞉!’
LUK 18:4 “Ba꞉bene tabo anagilamedawate tete ga꞉ga꞉dopolo ebeno tabo kulinakuiha꞉, huiyatiya galane ebete ebeno ukuilo ba꞉ma ka꞉na goi, ‘Na Godotamo a꞉kapapamiwatalemo ba꞉gala na tawakaluba꞉tamo malemale a꞉kihata꞉lemo,
LUK 18:5 huiyatiya ba꞉moe kamenate tete ga꞉ga꞉lo natamo ko temeteme bikanamena. Nale ebe owalubihino ba꞉moe temeteme komote a꞉kekelamene, ba꞉bema꞉ wadiyala nale ebeno ubi komamo papamiwatalo eba꞉go alaholohodawatamo kuba huiya kikamema꞉nemo!’”
LUK 18:6 Ba꞉bene Kodawa Ya꞉suti na꞉goiya꞉, “Ba꞉moe tabo anagilamedawa ebe ba꞉ kuba lumagila, huiyatiya ebete da꞉goi, wadiyala la꞉ ba꞉be tabo hidamo nemalagidolala꞉.
LUK 18:7 La꞉eno ukui keba ka꞉nala꞉ka꞉? Godokono tawakalubi ipuwalo puya꞉te du tetelo ba꞉gala hegela tetelo ebetamo toetoeholo dihimina, ebete iba꞉tamo huiya ikalameha꞉ma꞉ ba꞉keda꞉mene? Ba꞉gala ebete ibi owalubili ubiha꞉ma꞉ eda꞉lo tete ba꞉ka꞉ga꞉gima꞉tepamene?
LUK 18:8 Ao! Nale la꞉ begoelamemata, ebete ibi owalubililo iba꞉go dalaholohona ba꞉bi tawakaluba꞉tamo kuba huiya tiyonomo kopikalamema꞉ne, huiyatiya Tawakalubino Naniwiti da꞉pemene, ba꞉ba tetelo ebete hopo habanapa꞉godolo hibima꞉ midi komo ba꞉ka꞉pumimini?”
LUK 18:9 Ya꞉suti ba꞉moe eta iya꞉tulame uwi komo tawakaluba꞉tamo kolamagiya꞉, mabu ibi ha꞉kiya ibi tuputupupima꞉ ba ga꞉lana komopi tawakalubiha꞉ma꞉ ga꞉lanakuya꞉.
LUK 18:10 Ebete na꞉goiya꞉, “Dubu netewate Godoko Adikumino Hiya꞉ Genamamo nodoluya꞉ Godotamo toetoehoma꞉, eta Pa꞉lisi kapiyuimidawa dubula, eta ta꞉kese mani ha꞉da amiholo uwatedawala.
LUK 18:11 Ba꞉bene Pa꞉lisi dubuti ebe ha꞉kiya utiti ebeno komoma꞉ ba꞉ma ka꞉na goi, ‘Godo, na ama꞉tamo kalakala tabo bolamagimo, mabu na ba꞉moi komo tawakalubidopoha꞉. Ba꞉ma ka꞉na na ilina pilolo a꞉kuwata꞉lemo, ha꞉da gabodo a꞉kapata꞉lemo, ba꞉gala eta dubuino kamena pilolo kalaweha꞉. Ba꞉gala ba꞉moe ta꞉kese uwatedawate hiya꞉hiya꞉ kuba dododilina, na eba ka꞉naha꞉.
LUK 18:12 Na kapiya wuiki ipuwalo nale netewa hegelalo amia꞉no oko owatima꞉ baa꞉ naheno lutanakomo, ba꞉gala nale duwatenakomo ba꞉bi ilina hiliyonomo anagilameholete, komo ta꞉ni komokomo ipuwane eta kapiya kalawe, eta kapiya kalawe, amia꞉no komo ama꞉tamo hibinomolo ikamenakomata.’
LUK 18:13 “Huiyatiya ta꞉kese uwatedawate muhuludopone nutiti, ebeno wato hopamo toda꞉miduimiti ba la꞉na ebete hilopago bodolo anagalimilo na꞉goi, ‘Godo, na koko kuba ama꞉tamo ododilimo, huiyatiya nale ama꞉ betoemehomata, natamo kuba huiya ikanameheno na na꞉malemalenatena꞉!’”
LUK 18:14 Ba꞉bene Ya꞉suti na꞉goiya꞉, “Na la꞉tamo na꞉goemo, Godote ba꞉moe awagaha꞉ lumagino kuba egebolemete ebete ebeno genamamo ba꞉bo tui, huiyatiya Pa꞉lisi dubu eba ka꞉na kewageleha꞉. Godote ebeno komo katuputupuimimiha꞉, ebete ebeno kubago ba꞉ba ka꞉na tui. Mabu hibila, lumagiti ebe ha꞉kiya ebe koma꞉ da꞉midimini Godote ebe deha꞉potoma꞉ komidima꞉ne, ba꞉gala kebe lumagiti ebe ha꞉kiya ebe deha꞉potoma꞉ da꞉midimini Godote huiyatiya ebe koma꞉ komidima꞉ne.”
LUK 18:15 Ba꞉bene tawakaluba꞉te gugudi hegehege Ya꞉sutamo na꞉magaheliya꞉, ebete ebeno kokoto iba꞉tamo ba emowatilame Godoko kogoemema꞉ ebete ibi hidamo kowalubilinama꞉. Ba꞉ba tetelo ebe ta꞉matapa꞉te ba꞉be komo umiti tawakalubi kiyahalamelo gugudi na꞉duhilamiya꞉,
LUK 18:16 huiyatiya Ya꞉suti gugudi ebetamo ba ka꞉lami ebe ta꞉matapa꞉tamo na꞉goiya꞉, “Gugudi natamo pelame wadiyala. Akaduhilama꞉la꞉, mabu ba꞉mako tawakaluba꞉te Godote Ko Gawadubuma꞉ deda꞉na ba꞉be habamo kona꞉pa꞉la꞉hama꞉na꞉.
LUK 18:17 Na la꞉tamo hibi tabo begoemo, kebe lumagiti gudu deha꞉poto huiyamo aeno Ko Gawadubu Godoko laweheno, ba꞉be lumagiti ebeno Kalakala Habamo a꞉kana꞉pa꞉gamene.”
LUK 18:18 Ba꞉bene Yu tawakalubino eta watodawate Ya꞉suku ba alateda꞉ na꞉goemiya꞉, “Hido Iya꞉tulamedawa, na bada komo ododiti wiboha꞉ ka꞉ka꞉ ebo na꞉ka꞉lawemo?”
LUK 18:19 Ya꞉suti ebetamo na꞉goiya꞉, “Ama꞉le na hidodawama꞉ badama꞉ ka꞉ka꞉nama꞉wa? Eta hidodawa puliyala, Godoko kapiyate hidodawanomola.
LUK 18:20 Ama꞉ Godokono Tutumu Tabo iya꞉tawala. Eta lumagino kamena pilolo akalawa꞉la꞉, lumagi akanakapuma꞉la꞉, ilina pilolo akuwata꞉la꞉, eta lumagino komoma꞉ ha꞉da tabo akolamaga꞉la꞉, ba꞉gala amia꞉no nabiwi menoko ibino tabamo na꞉papamiwatanakuya꞉.”
LUK 18:21 Huiyatiya ebete Ya꞉sutamo na꞉goiya꞉, “Na deha꞉poto tetene tupuimiti ba꞉moi hiliyonomo tutumu kodakodalo uwatete eta kapiya kadikanaliya꞉ha꞉.”
LUK 18:22 Ya꞉suti ebeno tabo uliti ebetamo na꞉goiya꞉, “Ama꞉godolo kapiya komote kamodobonaha꞉. Wadiyala komopa꞉te amia꞉no hiliyonomo ilina mana꞉mo uwatehomete ama꞉le ba꞉bi mani komo awaepa꞉tamo na꞉nalabahalama꞉. Ba꞉ba tetelo ama꞉ gala kapete na na꞉ta꞉maheniya꞉, ba꞉bene amia꞉no ilina hiliyonomate Godokono Hunu Habalo konepola꞉nama꞉ne.”
LUK 18:23 Ebete ba꞉be tabo uliti ebeno tepo ipuwalo menemenenomoma꞉ ediya꞉ mabu ebe ilina dogodogodawanomola.
LUK 18:24 Ya꞉suti ebe umiti na꞉goiya꞉, “Godote Ko Gawadubuma꞉ deda꞉na, ilina hiliyonomagopa꞉te ba꞉be habamo na꞉pa꞉la꞉hama꞉ kodakodanomola!
LUK 18:25 Numa꞉la꞉, ka꞉molo-goete kaliko akohomehoeno ola gugudu nilupiga kodakodama꞉ eda꞉na, gabohenola. Ba꞉ atumu ilina hiliyonomagodawate Godokono Ko Gawadubu habamo na꞉pa꞉ga kodakodanomola, gabote hibinomolo a꞉kitanamene.”
LUK 18:26 Ba꞉bene Ya꞉sukunu tabo ulihopa꞉te ebetamo na꞉ga꞉luya꞉, “Ama꞉ da꞉gaa꞉ ba꞉be tabote hibima꞉ deda꞉na, puya꞉te modobola꞉ka꞉ Godote ibino ka꞉ka꞉ mula꞉lelamema꞉?”
LUK 18:27 Ya꞉suti iba꞉tamo ba huiya na꞉goiya꞉, “Tawakaluba꞉godolo da꞉kodakodahana ba꞉bi komokomo huiyatiya Godogodolo kodakoda hibiha꞉.”
LUK 18:28 Ba꞉bene Pitate Ya꞉sutamo na꞉goiya꞉, “Ama꞉ numa꞉, aeno genamoeno ilina hiliyonomo miya꞉palete ama꞉ na꞉ta꞉mahenata.”
LUK 18:29 Ya꞉suti iba꞉tamo gala na꞉kagoiya꞉, “Na la꞉tamo hibi tabo begoemo, kebe lumagiti ebeno genama, o ebeno kamena, o ebeno nani ekaki ba꞉gala ebeno menokobi nabi gugudi, ba꞉bi komokomo Ko Gawadubu Godoko mabuma꞉ da꞉miya꞉palemene,
LUK 18:30 ebete ba꞉ma tetelo huiyatiya Godogodone ba꞉bi atu hiliyonomo komokomo gala kakuwatema꞉ne, ba꞉gala galane ebete wiboha꞉ ka꞉ka꞉ kakalawema꞉ne.”
LUK 18:31 Ba꞉bene Ya꞉suti ebeno 12 ta꞉matapi dubu ebetamo ka꞉lamiti iba꞉tamo na꞉goiya꞉, “La꞉ nulia꞉la꞉, a Yelusalemamo tolamitama꞉. Ba꞉bolo Godokono ukui hawakalimipa꞉te Tawakalubino Naniwi mabuma꞉ Bukamo da꞉miya꞉tiya꞉ ba꞉bi hiliyonomo komate kopikulihoma꞉na꞉.
LUK 18:32 Iyo, Godote ebe Yuha꞉pa꞉tamo kikalamema꞉ne, ba꞉bene iba꞉te ebe iduduputimilo ba iya꞉da꞉te ebetamo kowe komehoholema꞉na꞉,
LUK 18:33 ba꞉gala iba꞉te giya꞉pa꞉pa꞉mo ebe a꞉na꞉miga꞉titi ba꞉bene ebe dito kanakapumima꞉na꞉, ebe huiyatiya netewa-kapiya hegelalo hoene gala kakamahigama꞉ne.”
LUK 18:34 Huiyatiya Ya꞉suti dolamagiya꞉, ebe ta꞉matapa꞉te ba꞉be taboeno ipuwa hidamo kalawiya꞉ha꞉. Ba꞉be komote awalelalo itanuya꞉ ba꞉bema꞉ iba꞉te hidamo kemalagidoluya꞉ha꞉.
LUK 18:35 Ba꞉bene Ya꞉suti Yeliko ko haba tama꞉mo ba penape, baidi tamihome dubuti gabo tamelo emedete manima꞉ tawakalubi betoelameholitiya꞉.
LUK 18:36 Ebete tawakalubi hiliyonomo gabodo da꞉petolamitiya꞉, ba꞉be komo uliti komopi ba꞉bo alateda꞉liya꞉, “Bada komote ka꞉pita?”
LUK 18:37 Iba꞉te na꞉huiyuya꞉, “Nasaletenapi dubu Ya꞉suti pita.”
LUK 18:38 Ba꞉bene ebete tabo konomamo goelo na꞉goiya꞉, “Ya꞉su, Da꞉ibidikono Hogo! Ama꞉ na na꞉malemalenatena꞉!”
LUK 18:39 Ba꞉ba tetelo dopamo da꞉petolamitiya꞉ ba꞉bi tawakaluba꞉te ebe kiyahamelo na꞉duhimiya꞉ ebete tatabalo kolutama꞉, huiyatiya ebete gala ibulunomamo na꞉kagoiya꞉, “Da꞉ibidikono Hogo! Ama꞉ na na꞉malemalenatena꞉!”
LUK 18:40 Ba꞉bene Ya꞉suti ba꞉bamo utiti baidi tamihome dubuino komoma꞉ na꞉goiya꞉, “Ebe na꞉magaha꞉la꞉.” Ebete tama꞉mo da꞉piya꞉, ba꞉ba tetelo Ya꞉suti ebe nalatediya꞉,
LUK 18:41 “Ama꞉ bada ubi kihatiuta nale ama꞉tamo kododima꞉?” Ebete na꞉goiya꞉, “Kodawa, na ubila ilina hidamo kulamema꞉.”
LUK 18:42 Ba꞉bene Ya꞉suti ebetamo na꞉goiya꞉, “Ama꞉ baidi na꞉gahima꞉! Amia꞉no hibima꞉ midi komote ama꞉ a꞉hiduima꞉ta.”
LUK 18:43 Ba꞉bema꞉ hibila, ba꞉ba tetenomolo ebeno baiditi da꞉hidohidohuya꞉, ebete Godoko ba milimiho Ya꞉suku ba꞉bo ta꞉matuya꞉, ba꞉bene hiliyonomo tawakaluba꞉te ba꞉be komo umiti iba꞉te atumu Godokono mahilo hunamo ba꞉bo adipatiya꞉.
LUK 19:1 Ba꞉ba tetelo Ya꞉suti Yeliko haba ipuwado petutiya꞉,
LUK 19:2 ba꞉be habalo Sa꞉kiyaseko nemedenami, ebe ta꞉kese uwatepino watodawala ba꞉gala ebe ilina dogodogodawala.
LUK 19:3 Ebete ebeno tepo ipuwalo na꞉goiya꞉, “Ya꞉suku kebako dawala꞉ka꞉?” ba꞉bene ebete ebe kumima꞉ ubi konomamo nihatitiya꞉, huiyatiya ebe gopowahi dubula ba꞉gala tawakalubi hiliyonomate Ya꞉suku anagogoba꞉miduya꞉, ba꞉be mabuma꞉ ebete Ya꞉suku umima꞉ modoboha꞉.
LUK 19:4 Ba꞉bema꞉ ebete tawakalubino dopo hapuamo puligate, anahu kehamo dito nodoluya꞉ Ya꞉suku kumima꞉, mabu Ya꞉suti ba꞉be gabodo pitiya꞉.
LUK 19:5 Ba꞉bene Ya꞉suti ba꞉bamo puluhukuti baidi hunamo da꞉pegahimiya꞉, ebe pumiti na꞉pegoemiya꞉, “Sa꞉kiyase, ama꞉ tiyo na꞉pihitiga! Na ka꞉lo hegelalo amia꞉no genamalo kolutama꞉nemo.”
LUK 19:6 Ba꞉ba tetelo Sa꞉kiyasete tiyo pihitigate, Ya꞉suku lawete ebeno genamamo kalakala konomago dito magatuya꞉,
LUK 19:7 ba꞉bene tawakalubi hiliyonomate ba꞉be komo umiti ubiha꞉ tabo ba꞉ma ka꞉na ga꞉luya꞉, “Ebete kuba lumagino genamamo a꞉to.”
LUK 19:8 Huiyatiya Sa꞉kiyasete ebeno genamalo tawakalubino dopo hapulu mahigate Ya꞉sutamo na꞉goiya꞉, “Kodawa, ama꞉ numa꞉! Ka꞉lo nale naeno ilina tulituliya anagiya꞉midalete, naeno komo ilina awaepa꞉tamo kikalameholema꞉nemo, ba꞉gala nale komopino mani ha꞉da amiho gabodo duwatenakuimo netewa-netewa teta꞉mo gala kakahuiyahalema꞉nemo.”
LUK 19:9 Ba꞉bene Ya꞉suti na꞉goiya꞉, “Ka꞉lo hegelalo Godokono ka꞉ka꞉ mula꞉ komote ba꞉moe genamamo a꞉pe, mabu ba꞉moe dubu atumu ba꞉ A꞉ibalahamakono eyono gudu etala.
LUK 19:10 Ba꞉ hibila, puya꞉te kuba ododili ipuwalo dalatidiholena, ba꞉bi tawakalubi uwatete ibino ka꞉ka꞉ komula꞉lelamema꞉ na Tawakalubino Naniwiti ba꞉bema꞉ piya꞉mo.”
LUK 19:11 Ba꞉be tabo dulihutiya꞉ ba꞉bi tawakaluba꞉te iya꞉tawahuya꞉ Ya꞉suti Yelusalema ko haba tama꞉mo a꞉puluhuku, ba꞉bema꞉ iba꞉te ibino ukuilo na꞉ga꞉luya꞉, “Diyala, ba꞉ma tetelo Godokono Ko Gawadubu komote atamo da꞉ uluhukumini.” Ya꞉suti ibino komo iya꞉tawate eta iya꞉tulame uwi iba꞉tamo ba꞉ma ka꞉na olamagiya꞉,
LUK 19:12 “Eta ko dubuti muhulu hopamo tuya꞉, ebe ubila ba꞉be muhulu hopolo Ko Gawadubu haba nelawete, ebete ebeno habamo ba꞉bo kakapema꞉.
LUK 19:13 Ebete toheno, dopamo ebeno ta꞉ni okopi ebetamo ka꞉lamiti etatamo 100 mani, etatamo 100 mani, ba꞉ba ka꞉na ba ikalamehole ibi na꞉goelamiya꞉, ‘La꞉ ba꞉moi mani na꞉kokoilamiya꞉la꞉ naeno pe kuitita꞉mo.’
LUK 19:14 “Ba꞉bene ebete muhulu hopolo ba nemede, komo ebeno hoponapa꞉te ebetamo maubahate ebeno gala hapuni tabo atapi ba꞉bo oelamiya꞉. Iba꞉te tolamete tabo ba꞉ma ka꞉na nega꞉luya꞉, ‘A ubihinola ba꞉moe dubuti aeno Ko Gawadubuma꞉ eda꞉, ebete aeno hopamo gala a꞉kapa꞉mene.’
LUK 19:15 “Huiyatiya ko dubuti muhulu hopolo ko gawadubu haba nelawete ebeno habanomamo gala na꞉kapiya꞉. Ba꞉ba tetenomolo ebete dopamo puya꞉tamo mani dikalameholiya꞉, ba꞉bi okopi ebetamo na꞉peka꞉lamiya꞉ ebeno mani kuititi iba꞉godone kiya꞉tawama꞉.
LUK 19:16 Dopodawa ebete pete ebetamo na꞉pegoiya꞉, ‘Kodawa, amia꞉no 100 mana꞉mo nale eta 1,000 mani bododimo.’
LUK 19:17 Ko dubuti ebetamo na꞉goiya꞉, ‘Ehe! Ama꞉ ba꞉ hido okodawalata! Ama꞉ deha꞉poto komo hidamo ododia꞉ta, ba꞉bema꞉ nale ama꞉ ta꞉ni habahaba ulamedawama꞉ komidima꞉nemata.’
LUK 19:18 “Ba꞉bene eta tetedawate pete ebetamo na꞉pegoiya꞉, ‘Kodawa, amia꞉no 100 mana꞉mo nale eta 500 mani bododimo,’
LUK 19:19 ba꞉bene ko dubuti ebetamo na꞉goiya꞉, ‘Nale ama꞉ paibo habahaba ulamedawama꞉ komidima꞉nemata.’
LUK 19:20 “Galane eta tetedawate pete ebetamo na꞉pegoiya꞉, ‘Kodawa, ba꞉moe ba꞉ amia꞉no 100 manila. Ama꞉ da꞉tuya꞉la, na ba꞉moe mani kalikamo hidamo matuhumihote tawakaluba꞉te umiha꞉ baha꞉mo ba꞉bo ihatiya꞉mo.
LUK 19:21 Na ama꞉ betolemenamata mabu ama꞉ tabo helonomo dubulata. Komopa꞉te da꞉miya꞉tenaka ama꞉ pete ba꞉bi ilina ba꞉puwatenakomena꞉ta, ba꞉gala iba꞉te damihonaka ama꞉ ba꞉bi ilina dito ba꞉petapihonakomena꞉ta ama꞉le ha꞉kiya konahama꞉.’
LUK 19:22 “Ba꞉bema꞉ ko dubuti ebetamo na꞉goiya꞉, ‘Ama꞉ kuba okodawalata! Ama꞉le da꞉gaa꞉, ba꞉be tabote amia꞉no kuba behawakalimi! Iyo, ama꞉ tabo ba꞉ma ka꞉na a꞉gaa꞉ta, na tabo helonomo dubula, ba꞉gala komopa꞉te da꞉miya꞉tenaka nale ba꞉bi ilina ba꞉puwatenakomo, ba꞉gala iba꞉te damihonaka nale ba꞉bi ilina dito ba꞉petapihonakomo.
LUK 19:23 Ba꞉bema꞉ mabu keka꞉ ama꞉le naeno mani baneka okopa꞉tamo kanikalamiya꞉ha꞉? Iba꞉te mani uwatete eta oko nowatitale kodopoma꞉ beda꞉na꞉, ba꞉bene nale pete ama꞉le natamo atu mani huiyatiya nanekela꞉mo hunudopamo gala ba꞉ka-ikanameona꞉.’
LUK 19:24 “Ba꞉bene ko dubuti ebeno hopopi na꞉kiyahalamiya꞉, ‘La꞉ ebeno 100 mani lawemete 1,000 mana꞉goeno dubutamo nikama꞉la꞉.’
LUK 19:25 “Iba꞉te huiyatiya ebetamo na꞉ga꞉luya꞉, ‘Kodawa, eba ka꞉naha꞉! Ba꞉be lumagiti 1,000 mani ya꞉lo uwati!’
LUK 19:26 “Ba꞉bene ko dubuti iba꞉tamo na꞉huiyuya꞉, ‘Na la꞉tamo na꞉goemo, kebe lumagigodolo hidohido ukui da꞉pola꞉na, etate ebetamo hiliyonomo hidohido komo kikamehoma꞉ne. Huiyatiya kebe lumagigodolo hidohido ukui pola꞉naheno, ebegodolo kebe kapiyakapiya komate da꞉pola꞉na etate ebegodone gala kakuwatemema꞉ne.
LUK 19:27 Ba꞉gala eta komo. Puya꞉te nago alaholohoma꞉ ba ewagelena ubiha꞉ma꞉ deda꞉hana nale ibino Ko Gawadubuma꞉ eda꞉ma꞉, la꞉ ibi magahelete naeno dopo hapulu alaholo gila꞉mo dito na꞉panakapulama꞉la꞉!’”
LUK 19:28 Ya꞉suti ba꞉moe tabo tawakaluba꞉tamo goete ibi dopalamete Yelusalema ko haba hapuamo ba꞉ dito tuya꞉.
LUK 19:29 Ba꞉ba tetelo ebete Betapa꞉gi haba ba꞉gala Betani haba tamedo tote Olibi Kehakeha Hunu Hakamo ba꞉bo nuluhukuya꞉, ba꞉bene ebete ebe ta꞉matapi netewa dopamo ba noelame
LUK 19:30 iba꞉tamo na꞉goiya꞉, “La꞉ ba꞉be tatali habamo tote, ba꞉be habamo da꞉nuluhukuma donoki-goe deha꞉poto hala꞉mo ma꞉home ba꞉bo konumima꞉nemata, lumagiti dopamo ebe hunamo kemediya꞉ha꞉. Wadiyala la꞉ hale pahamiti na꞉magahiya꞉la꞉.
LUK 19:31 Etate la꞉tamo da꞉goemene, ‘La꞉ ebe badama꞉ ka꞉pahamiutama?’ la꞉ huiyatiya ba꞉ma ka꞉na na꞉ga꞉luya꞉la꞉, ‘Kodawate donoki-goe ubila.’”
LUK 19:32 Ba꞉bene iba꞉te gabodo tote habamo ba nuluhuku Ya꞉suti ibi keba ka꞉na ka꞉kiyalamiya꞉, iba꞉te ba꞉bi komokomo ba꞉ba ka꞉na nulamiya꞉.
LUK 19:33 Iba꞉te donoki-goe deha꞉poto ba pahamita, namutuluba꞉te iba꞉tamo na꞉ga꞉luya꞉, “La꞉ ebe badama꞉ ka꞉pahamiutama?”
LUK 19:34 Iba꞉te tabo ba huiya na꞉ga꞉luya꞉, “Kodawate donoki-goe ubila.”
LUK 19:35 Ba꞉bene iba꞉te donoki-goe deha꞉poto Ya꞉sutamo magahete, ibino watuino kaliko donoki-goe hunamo miya꞉temete, iba꞉te Ya꞉suku ibino kokotamo adipatete ba꞉ dito adipiya꞉.
LUK 19:36 Ba꞉ba tetelo Ya꞉suti ba tuta tawakaluba꞉te ibino ga꞉ga꞉ga꞉ kaliko pipikulamete gabamo apohohote, ebete ba꞉be hunudu tuya꞉.
LUK 19:37 Ebete Olibi Kehakeha Hunu Hakane ba nihitiga Yelusalema ko haba tama꞉mo da꞉piya꞉, ba꞉ba tetelo ebe da꞉ta꞉matanakui ba꞉bi tawakalubi hiliyonomate Godotamo kalakala tabo kapimilo koamo wadiya꞉paa꞉latelelo ebe ba꞉bo milimihuya꞉, mabu iba꞉te koko hanohano komo hiliyonomo ulamiya꞉.
LUK 19:38 Iba꞉te tabo ba꞉ma ka꞉na ga꞉lutiya꞉, “Godo, amia꞉no mahilago da꞉pita, wadiyala ama꞉ ba꞉be Ko Gawadubu na꞉koimiya꞉! O tawakaluba꞉la꞉, la꞉ Godoko milimiholo hunamo nadipata꞉la꞉, ebe ba꞉ Hunu Haboeno kalakala komoeno mabula!”
LUK 19:39 Ba꞉bene tawakalubi ipuwalo da꞉pola꞉nuya꞉ ba꞉bi Pa꞉lisi kapiyuimi dubate Ya꞉suku na꞉kiyahamiya꞉, “Iya꞉tulamedawa, ama꞉ ta꞉matapi na꞉duhilama꞉!”
LUK 19:40 Ya꞉suti iba꞉tamo na꞉huiyuya꞉, “Nale la꞉tamo na꞉goemo, ba꞉moi tawakaluba꞉te na milinamehoneha꞉tale huiyatiya gaboeno nakolate na ba adipanatene koamo ba꞉ga꞉litana꞉.”
LUK 19:41 Ba꞉bene Ya꞉suti Yelusalema tama꞉mo pete haba da꞉pumiya꞉, ebete ihilo
LUK 19:42 na꞉goiya꞉, “Yelusalema, nale amia꞉no tataba mabuma꞉ deda꞉namo, ama꞉ ba꞉be komo niya꞉tawatale ama꞉ ba꞉be tataba ba꞉laweona꞉, huiyatiya ama꞉ naeno hibi komo umi modoboha꞉!
LUK 19:43 Ba꞉ hibila, tete ba꞉ na꞉pe ama꞉go alaholohopima꞉ deda꞉hana, iba꞉te pelamete ama꞉ kopetanamaminama꞉na꞉ta amia꞉no tawakalubi kanakapulamema꞉, ba꞉bene iba꞉te ama꞉ tametamelo kokonomo siwi ba aligili hunuhunu haka hiya꞉hiya꞉ kododilima꞉na꞉, amia꞉no tawakaluba꞉te ibino ka꞉ka꞉ komula꞉lema꞉ iba꞉te gobogobamo alahutihokapoma꞉.
LUK 19:44 Ba꞉bene puya꞉te amia꞉no kala imi ipuwalo demedehona, iba꞉te ba꞉bi tawakalubi alukuliti kohawaminadigalema꞉na꞉, ba꞉gala amia꞉no koko genama iya꞉hekete eta nakolate eta nakola hunulu a꞉kitanamene. Iba꞉te ba꞉ma ka꞉na kopododima꞉na꞉ mabu Godote ama꞉ owalubima꞉ da꞉pe, ama꞉ ba꞉be tete otate ebe kalaweha꞉!”
LUK 19:45 Ba꞉bene Ya꞉suti Godoko Adikumino Hiya꞉ Genamamo tote, ba꞉be genamalo ebete ilina kolowamipi nulamete helonomamo ba neta꞉malatele
LUK 19:46 iba꞉tamo na꞉goiya꞉, “Godokono Bukalo tabo ba꞉ma ka꞉na bitana, ‘Naeno Genama tawakaluba꞉te Godoko Adikumi Genamama꞉ koga꞉lama꞉na꞉,’ la꞉le huiyatiya pilo tawakalubino genamama꞉ a꞉midimata!”
LUK 19:47 Ba꞉bema꞉ Godotamo hawa꞉goeno ikamehopino watowatopi, ba꞉gala Godokono Tutumu iya꞉tulamepi, ba꞉gala Yunapino komo kokopi, iba꞉te Ya꞉suku anakapumima꞉ gabo bohowaditiya꞉. Huiyatiya komo hegelalo Ya꞉suti Godoko Adikumino Hiya꞉ Genamalo tawakalubi ba iya꞉tulamita,
LUK 19:48 iba꞉te gabo kumiya꞉ha꞉ mabu tawakalubi hiliyonomate Ya꞉sukunu tabo ulihoma꞉ ubi konomamo ihatelo iba꞉te eba꞉go ba꞉bo pola꞉nuya꞉.
LUK 20:1 Eta hegelalo Ya꞉suti Godoko Adikumino Hiya꞉ Genamalo tawakalubi ba iya꞉tulamita Godokono Hido Tabo dolamagitiya꞉, ba꞉ba tetelo Godotamo hawa꞉goeno ikamehopino watowatopi, Godokono Tutumu iya꞉tulamepi, ba꞉gala komo koko dubu, iba꞉te ebe duhimima꞉ ba꞉bo pelamiya꞉.
LUK 20:2 Iba꞉te ebe ba꞉ma ka꞉na palatediya꞉, “A na꞉kiyaa꞉ma꞉, ama꞉ ba꞉moi komo pokono heloamo kododiliona? Ba꞉gala ba꞉moe helo ama꞉tamo pote kikameti?”
LUK 20:3 Ya꞉suti huiyatiya iba꞉tamo na꞉goiya꞉, “Nale la꞉ dopamo kapiya komoma꞉ kalateda꞉lema꞉nemata. Wadiyala la꞉le na na꞉ga꞉lanamiya꞉la꞉,
LUK 20:4 Yonete tawakalubi beyamo da꞉wadulatelenakui, ba꞉be helo ebetamo pote kikami? Godotela꞉ka꞉ o eta lumagitila꞉ka꞉?”
LUK 20:5 Ba꞉bema꞉ ibi ha꞉kiya ibi ipuwalo na꞉ga꞉luya꞉, “Ale da꞉ga꞉lama꞉ Godote Yonetamo helo ikami, ebete kogoema꞉ne, ‘Bada mabuma꞉ la꞉le ebeno tabo hibima꞉ kamidiha꞉?’
LUK 20:6 Ba꞉gala a modoboha꞉ ebe ba꞉ma ka꞉na ga꞉lame, hopo lumagiti Yonetamo helo ikami. Tawakaluba꞉te ba꞉be tabo uliti a nakolamo mapea꞉mete kanakapua꞉mema꞉na꞉, mabu iba꞉te na꞉ga꞉lana Yoneko ba꞉ Godokono ukui hawakalimidawala.”
LUK 20:7 Ba꞉bema꞉ iba꞉te ibino tepo ipuwoeno ukui ugumuililo Ya꞉sutamo na꞉ga꞉luya꞉, “Yonekono helo mabu a iya꞉tawaha꞉.”
LUK 20:8 Ba꞉ba tetelo Ya꞉suti iba꞉tamo na꞉goiya꞉, “Ba꞉bema꞉ nale la꞉ atumu a꞉kakiyalama꞉mata nale ba꞉moi komo pokono heloamo dododilinamo.”
LUK 20:9 Ba꞉bene Ya꞉suti ba꞉moe iya꞉tulame uwi tawakaluba꞉tamo na꞉goiya꞉, “Dubuti pali ododiti tupina gao keha ba꞉bo amihui, ba꞉be gaoeno mahilo ba꞉ gala꞉ipi gaola. Ba꞉bene ebete ebeno pali komo lawamepi dubatamo dito miya꞉pui, iba꞉te ba꞉bolo oko ba owatina ba꞉be pali hidamo umilo ebeno gao kuwateholemenakoma꞉, ba꞉bene ebete muhulu hopamo tote tete ga꞉ga꞉dopo benemeda꞉tepui.
LUK 20:10 Gao tapiho tetelo ebete pali lawamepa꞉tamo huiyaha꞉ okodawa na꞉poemi, ebete iba꞉godone gaoeno mani ipuwane ebeno namutudawoeno komo kopelawema꞉, huiyatiya iba꞉te ba꞉be okodawa kukamo anagalimihote ilinaheno dito noemiya꞉.
LUK 20:11 Ba꞉bene ebete eta huiyaha꞉ okodawa gala da꞉kapoemi, iba꞉te ebe ba kanagalimiho ebe hilopo ikamete atumu dito koemiya꞉.
LUK 20:12 Ba꞉bene ebete gala eta da꞉kapoemi, ba꞉be ba꞉ netewa-kapiya tete dubula, huiyatiya iba꞉te ebe bugumu miya꞉temete pali ipuwane ebe ba꞉ dito na꞉da꞉nuya꞉.
LUK 20:13 Ba꞉ba tetelo pali namutudawate na꞉goi, ‘Na keba ka꞉na na꞉kewagelemo? Wadiyala nale koamo demalagidolonamo ba꞉be gudu konoemema꞉nemo. Diyala, iba꞉te ebetamo da꞉ papamila꞉halemena꞉.’
LUK 20:14 “Huiyatiya ba꞉be pali lawamepi dubate ba꞉be gudu pitalo dumi iba꞉te ibi ipuwalo na꞉ga꞉luya꞉, ‘Numa꞉la꞉, ba꞉moe guduti nabiwino ilina namutudawama꞉ deda꞉mene, ba꞉be guduti ba꞉ na꞉pe. Ba꞉bema꞉ wadiyala ale ebe anakapumiti ebeno pali lawenomo kolawema꞉nema꞉.’
LUK 20:15 Ba꞉ba tetelo iba꞉te ebe lawete palino kala ipuwane na꞉da꞉nate ba꞉ dito nanakapumiya꞉.” Ba꞉bema꞉ Ya꞉suti ulihopa꞉tamo na꞉goiya꞉, “La꞉eno ukui keba ka꞉nala꞉ka꞉? Pali namutudawate bada komo na꞉ka꞉pododimini lawamepi dubatamo?
LUK 20:16 Hibila, ebete pete ibi panakapulamete ebeno pali komopa꞉tamo kopikalamema꞉ne.” Tawakaluba꞉te ba꞉be tabo uliti na꞉ga꞉luya꞉, “Ao, ba꞉be kubate a꞉kuluhukamene!”
LUK 20:17 Ba꞉bema꞉ Ya꞉suti ibi ulamelo na꞉goiya꞉, “Godokono Bukalo ditana ba꞉moe taboeno ipuwa keba ka꞉nala꞉ka꞉? ‘Genama etepa꞉te tama꞉mo dihati ba꞉be hototote huiyatiya genamoeno helo mabuma꞉ eda꞉na.’
LUK 20:18 Numa꞉la꞉, ba꞉be hototoeno kodakoda ba꞉ nakola huiyala. Iyo, ba꞉moe nakola hunamo da꞉gamene ba꞉be lumagiti kota꞉ta꞉pula꞉tihoma꞉ne, ba꞉gala ba꞉moe nakolate lumagi dihita꞉timini kotakotakuimima꞉ne.”
LUK 20:19 Ba꞉bene Godokono Tutumu iya꞉tulamepi ba꞉gala Godotamo hawa꞉goeno ikamehopi gawadubu, iba꞉te iya꞉tawahuya꞉ Ya꞉suti ba꞉be uwi ibino komoma꞉ goiya꞉, ba꞉bema꞉ ibi ubila ba꞉ba tetenomolo ebe lawe, huiyatiya tawakalubi ba tolelame gala dito kekelalamiya꞉.
LUK 20:20 Ba꞉bene Yu watowatopa꞉te Ya꞉suku lawema꞉ gabo ba ohowadi komo dubatamo mani ba꞉bo ikalamiya꞉ iba꞉te Ya꞉sutamo tolamete ebe kuba gabamo konemogabuimima꞉. Ibi ubila ebegodolo hiya꞉ tabo uliti ba꞉be taboeno komoma꞉ Loma gabomanino kapela Ko Gawadubutamo magatate, ebete ebe ba꞉bolo kanakapumima꞉.
LUK 20:21 Ba꞉bema꞉ ba꞉bi dubate Ya꞉sutamo pelamete ha꞉da amiho gabodo ebe na꞉pega꞉lamiya꞉, “Iya꞉tulamedawa, a iya꞉tawahala ama꞉le dolamaginaka ba꞉bi komokomo ba꞉ hibila, ba꞉gala ama꞉ tawakalubi hunu nikapa꞉mo kulamenaha꞉, ba꞉ma ka꞉na eta lumagi miya꞉palo eta lumagi ebo a꞉kalawa꞉la꞉ta. Iyo, ama꞉ tawakalubi Godokono gabo hidamo iya꞉tulamenata,
LUK 20:22 ba꞉bema꞉ a na꞉kiyaa꞉ma꞉, Loma tawakalubino Konomo Gawadubu Sisatamo ta꞉kese mani ikameho hidola꞉ka꞉ o kubala꞉ka꞉? A ebetamo ba꞉kikamehoma꞉ o a꞉kikamehama꞉?”
LUK 20:23 Ya꞉suti ibino ma꞉lapila netewa komo iya꞉tawate iba꞉tamo na꞉goiya꞉,
LUK 20:24 “La꞉ mani kapiya natamo nadaha꞉la꞉. Ba꞉be manilo da꞉pola꞉na, mahilo ba꞉gala holoholo pokonola꞉ka꞉?” Iba꞉te ebeno tabo ba huiya na꞉ga꞉luya꞉, “Konomo Gawadubu Sisakonola.”
LUK 20:25 Ba꞉bene Ya꞉suti iba꞉tamo na꞉goiya꞉, “Sisakono ilina Sisatamo nikamehala꞉, huiyatiya Godokono ilina Godotamo nikamehala꞉.”
LUK 20:26 Ba꞉bene ba꞉bi dubate kamodobuya꞉ha꞉ tawakalubino holoholo hapulu Ya꞉suku kuba gabamo kemogabuimima꞉, ba꞉bema꞉ iba꞉te ba hanohanoho eta tabo kaga꞉luya꞉ha꞉.
LUK 20:27 Hoe ipuwane mahila꞉haleha꞉ma꞉ da꞉ga꞉lana, ba꞉bi tawakalubi ba꞉ Sa꞉diyusi kapiyuimipila. Komo iba꞉te Ya꞉sutamo pelamete tabo ba꞉ma ka꞉na pega꞉luya꞉,
LUK 20:28 “Iya꞉tulamedawa, Godokono Bukamo Mosesete tabo ba꞉ma ka꞉na miya꞉tiya꞉, ‘Dubuti hoete kamena gugudihino da꞉miya꞉pamene, ebeno ekawiti ba꞉be hamole lawete ebeno naniwi mabuma꞉ gugudi nododilima꞉mene.’
LUK 20:29 Dopamo tetelo kapiya dubuino sa꞉ba꞉ni kuhia꞉te nemedenama꞉. Ibi ipuwalo dopo guduti kamena lawete gugudi ulameheno hoiya꞉,
LUK 20:30 ba꞉bene ebeno ekawiti ebeno hamole kalawete ba꞉ba ka꞉na kewageliya꞉.
LUK 20:31 Ba꞉gala eta tetedawate ba꞉ atumu kewageliya꞉, ba꞉bene ba꞉bi sa꞉ba꞉ni badininipalate gugudihino ba꞉ba ka꞉na ha꞉lahuya꞉,
LUK 20:32 huiyatiya kamenate galane dito hoiya꞉.
LUK 20:33 Ba꞉bema꞉ iba꞉te hoe ipuwane ka꞉ka꞉mo da꞉mahila꞉halemena꞉, ba꞉be Ko Hegelalo ba꞉be kamenate pokono kamenama꞉ na꞉keda꞉mene, mabu ebe sa꞉ba꞉ni dubate a꞉lawa꞉tepahuya꞉?”
LUK 20:34 Ba꞉bene Ya꞉suti iba꞉tamo na꞉goiya꞉, “Numa꞉la꞉, ba꞉moe hopolo dubate kamenakamena uwateholete, ba꞉bene kamenakamenate atumu dubu akuwateholenaka,
LUK 20:35 huiyatiya Godokono Hunu Habalo eba ka꞉naha꞉. Ebete pui ebeno hidohido ga꞉limapi gugudima꞉ da꞉ka꞉lamimini, ba꞉ba꞉te hoe ipuwane hibinomolo ka꞉ka꞉mo komahila꞉halema꞉na꞉, ba꞉bene ba꞉ba tetelo iba꞉te gala kamenakamena a꞉kapuwatehola꞉mena꞉ ba꞉gala dubu a꞉kapuwatehola꞉mena꞉.
LUK 20:36 Ba꞉moe komo ba꞉ hibila, iba꞉te hoe ipuwane a꞉mahila꞉haliya꞉, ba꞉bema꞉ iba꞉te Godokono nopopimo ba emedena gala a꞉kaha꞉lahamena꞉, iyo, iba꞉te Godokono gugudima꞉ ba eda꞉ha wiboha꞉ ka꞉ka꞉go bemedehonamena꞉.
LUK 20:37 Numa꞉la꞉, tawakaluba꞉te hoe ipuwane da꞉mahila꞉halemena꞉, ba꞉be komo Mosesete a hidamo iya꞉tua꞉miya꞉. Iyo, ebete ba꞉moe komo Godokono Bukamo ihatiya꞉, ba꞉ma ka꞉na koete kehalo da꞉woitiya꞉ huiyatiya kehate ka꞉mutigutiya꞉ha꞉, ba꞉ba tetelo Mosesete Kodawa Godoko ka꞉milo na꞉goiya꞉, ‘A꞉ibalahamako, Aisa꞉keko, Ya꞉ikoboko iba꞉te emedena tetelo poko kadikumina, ama꞉ ba꞉be Godotela.’
LUK 20:38 Ba꞉bema꞉ la꞉ Sa꞉diyusi kapiyuimipi, la꞉eno ukuilo na꞉kemalagidolonama ba꞉bi iniwalino ka꞉ka꞉te a꞉wibuya꞉? Ao, kawibuya꞉ha꞉, mabu ha꞉lahapa꞉te Godoko a꞉kadikuma꞉la꞉ huiyatiya puya꞉te da꞉ka꞉ka꞉halena ba꞉bi tawakalubinomate ebe badikumina, iyo, a hiliyonomate ebeno wiboha꞉ ka꞉ka꞉go bemedenama꞉!”
LUK 20:39 Ba꞉ba tetelo komo Godokono Tutumu iya꞉tulamepa꞉te Ya꞉sutamo na꞉ga꞉luya꞉, “Iyo, Iya꞉tulamedawa, ama꞉ hidamo gaa꞉ta.”
LUK 20:40 Ba꞉ hibila, ba꞉ba tetene tupuimiti tawakaluba꞉te Ya꞉suku eta komoma꞉ alateda꞉ma꞉ na꞉toletolehutiya꞉.
LUK 20:41 Ba꞉bene Ya꞉suti iba꞉tamo na꞉goiya꞉, “Tawakaluba꞉te na꞉ga꞉lana Godokono Oemedawa Kelisoko ba꞉ Da꞉ibidikono hogola, ebeno eyoni gugudi ipuwane komahigama꞉ne. Huiyatiya ba꞉moe komoeno ipuwa keba ka꞉nala꞉ka꞉?
LUK 20:42 La꞉ numa꞉la꞉, Da꞉ibiditi Sam Ohale Bukamo tabo ba꞉ma ka꞉na miya꞉tiya꞉, ‘Kodawa Godote naeno Kodawa Kelisotamo na꞉goe, ‘Ama꞉ naeno tu hapuamo na꞉pemeda꞉,
LUK 20:43 ba꞉bene ama꞉go alaholohopi nale ibi amia꞉no nato a꞉puti bahima꞉ komidilima꞉nemo.’ ’”
LUK 20:44 Ba꞉bene Ya꞉suti tabo moga꞉melo gala na꞉kagoiya꞉, “Wadiyala, la꞉ ba꞉moe tabo ba emalagidolo na na꞉kiyanama꞉la꞉, Da꞉ibiditi ebeno hogo Kelisoko ebeno Kodawama꞉ ka꞉milo ebete Godokono tu hapuamo emedema꞉ goiya꞉, ba꞉bema꞉ ba꞉be komote keba ka꞉na na꞉kuluhukumini?”
LUK 20:45 Ba꞉bene hiliyonomo tawakaluba꞉te ebeno tabo ba ulihuta Ya꞉suti ebe ta꞉matapa꞉tamo na꞉goiya꞉,
LUK 20:46 “La꞉le Godokono Tutumu iya꞉tulamepi hidamo nulama꞉la꞉. Ibi ubila ga꞉ga꞉ga꞉ kaliko pupuliti kolowami habalo ba wapata꞉lame tawakaluba꞉te ibi ba꞉bo kawagaminalema꞉. Iyo, ibi ubila a Yunapino baidi ibubulamehole genama gulu koko dubuino habalo kogagahidima꞉, ba꞉gala ibi ubila poko ododi tetelo koko habalo ahiditi kopola꞉nama꞉.
LUK 20:47 Ba꞉gala iba꞉te hamolehamoleno ilina ha꞉da amihoho komodo ba uwate ba꞉bo wibuilamelelamenaka, ba꞉bene iba꞉te ba꞉be komo kubaha꞉ma꞉ ga꞉lalo tolamete Godotamo baidi ba nibubulamehole ga꞉ga꞉ga꞉ toetoe tabo ba꞉bo nega꞉lanaka, mabu ibi ubila tawakaluba꞉te ibino komo umilo ibi hidohidopima꞉ koga꞉lama꞉. Ba꞉bema꞉ hibila, iba꞉te kuba huiya konomo kolawema꞉na꞉!”
LUK 21:1 Ba꞉bene Ya꞉suti Godoko Adikumino Hiya꞉ Genamalo ba luta, ilina dogodogopa꞉te ibino malemale ilina Godotamo da꞉pemiya꞉titiya꞉, ebete ibino komo ba umita
LUK 21:2 eta ilinaha꞉ hamole kamena ba꞉bo kumiya꞉, ebete mani hegehege netewa da꞉pemiya꞉tiya꞉.
LUK 21:3 Ba꞉bema꞉ ebete na꞉goiya꞉, “Na la꞉tamo hibi tabo begoemo, tawakaluba꞉te mani da꞉pemiya꞉ta꞉ ba꞉moe ilinaha꞉ hamole kamenate ibi hiliyonomo a꞉gogole,
LUK 21:4 mabu ilina dogodogopa꞉te ibino komo ilina da꞉luhililamenaka ba꞉bi ilina bepemiya꞉ta꞉, huiyatiya ba꞉moe hamole kamena ilinahenola. Ebete ebeno baa꞉ uwatehoeno mani miya꞉tenomo a꞉pemiya꞉te.”
LUK 21:5 Ba꞉ba tetelo komo Ya꞉suku ta꞉matapa꞉te Godoko Adikumino Hiya꞉ Genamama꞉ ba꞉ma ka꞉na ga꞉litiya꞉, “Ba꞉moi koko nakola genama hidohidonomola! Ba꞉gala tawakaluba꞉te ba꞉malo Godotamo malemalelo dikamehonaka, ba꞉bi ilinate hidohidoma꞉ eda꞉hana!” Ba꞉bene Ya꞉suti iba꞉tamo na꞉goiya꞉,
LUK 21:6 “La꞉ ba꞉moi ilina dulameholitama, galane tetelo ibi hiliyonomate kokubakubahama꞉na꞉. Ba꞉ba tetelo ba꞉moi genamoeno komoma꞉ eta nakolate eta nakola hunulu a꞉kapola꞉namena꞉, mabu alaholohopa꞉te nakola hiliyonomo mapitahalete hopamo iya꞉hekenomo kopiya꞉hekema꞉na꞉.”
LUK 21:7 Ba꞉bene iba꞉te Ya꞉suku nalatediya꞉, “Iya꞉tulamedawa, Godokono Genama kubahimi komote keba tetelo na꞉kuluhukumini? A bada hanohano komate na꞉kiya꞉tua꞉memena꞉ tete ba꞉ na꞉pe ba꞉be komote kopuluhukuma꞉?”
LUK 21:8 Ba꞉bene Ya꞉suti iba꞉tamo na꞉goiya꞉, “La꞉ hidamo. Eta lumagiti la꞉ ha꞉da damiholamemena꞉, la꞉ ebeno tabo akulia꞉la꞉, mabu komo hiliyonomo dubate naeno mahilamo pelamete kopega꞉lama꞉na꞉, ‘Na ba꞉ Kelisotela! Tete ba꞉ na꞉pe!’ huiyatiya la꞉ ibi akata꞉matala꞉la꞉.
LUK 21:9 Ba꞉gala la꞉le hiya꞉hiya꞉ hopo tawakalubino alaholoho komo ba꞉gala ibino alaholohoma꞉ nopo tamote komo dulihoma, ba꞉be mabuma꞉ la꞉ koamo akatoletolehala꞉. Ba꞉moi komate hibilo kopikulima꞉na꞉, huiyatiya ba꞉be tete ebe kuititi teteha꞉.”
LUK 21:10 Ya꞉suti iba꞉tamo gala na꞉kagoiya꞉, “Ba꞉ hibila, komo hopo tawakaluba꞉te komo hopo tawakaluba꞉go kalaholohoma꞉na꞉, iyo, eta hopote etatamo alaholo komo kododima꞉ne.
LUK 21:11 Ba꞉bene koko wima꞉la꞉te hiya꞉hiya꞉ hopo hiliyonomamo kopelamema꞉na꞉, ba꞉gala koko tawetaweno temeteme komate ba꞉bi hiya꞉hiya꞉ tawakalubi kuwatema꞉na꞉, ba꞉gala komo habahabalo tawakaluba꞉te baa꞉heno kemedehoma꞉na꞉, ba꞉bene ba꞉be atu tetelo alomo hunulu hanohano komokomo ba꞉gala Godokono helo hawakalimino komate kopikulihoma꞉na꞉.
LUK 21:12 “Ba꞉moi komate ikulihino kubapa꞉te dopamo la꞉ heloamo uwatete temeteme ba꞉bo kikalamema꞉na꞉ta. Iyo, Yunapino baidi ibubulamehole genama gulu iba꞉te la꞉eno komo anagilamelelamete la꞉ du genamamo dito komiya꞉tema꞉na꞉ta, ba꞉gala na mabuma꞉ iba꞉te la꞉ hiya꞉hiya꞉ koko gawadubuino holoholo hapuamo magatalete, iba꞉te atumu la꞉eno komo kakanagilamelelamema꞉na꞉ta.
LUK 21:13 Ba꞉ba tetelo la꞉ huiyatiya iba꞉tamo naeno Hido Tabote nolamagimiya꞉la꞉.
LUK 21:14 Ba꞉bema꞉ la꞉le ibino holoholo hapulu ba la꞉mota꞉hana la꞉eno mahilo keba ka꞉na da꞉hiduilamema, ba꞉be tetete uluhukuhino la꞉eno ga꞉la komoma꞉ aka-ukuibilibilihala꞉,
LUK 21:15 mabu nale la꞉tamo mulu ukui ba꞉gala tabo ba ikalame, puya꞉te la꞉go alaholohopima꞉ deda꞉hana iba꞉te la꞉eno hibi tabo kubahilamema꞉ a꞉kamodobamena꞉.
LUK 21:16 “Ba꞉gala eta komo. La꞉eno nabi ba꞉gala menokobi, nani ba꞉gala ekaki, la꞉eno komo hawi tawakalubi ba꞉gala mabulubi, iba꞉te la꞉go dalaholohona ba꞉bi kubapino kokotamo la꞉ konemiya꞉tema꞉na꞉ta, iyo, komo la꞉ la꞉eno tawakaluba꞉te dito kanakapulamema꞉na꞉ta.
LUK 21:17 Ba꞉ hibila, na mabuma꞉ hiliyonomo tawakaluba꞉te la꞉tamo komaubahama꞉na꞉,
LUK 21:18 huiyatiya naeno umi ipuwalo la꞉eno watoeno hinibo eta kapiyate a꞉kalatida꞉mene.
LUK 21:19 Ba꞉bema꞉ la꞉eno kodakodalo utitata komodo la꞉le la꞉eno ka꞉ka꞉ ba꞉ ba꞉ma ka꞉na komula꞉lema꞉nemata.”
LUK 21:20 Ba꞉bene Ya꞉suti gala na꞉kagoiya꞉, “Hiya꞉hiya꞉ hopoeno alaholohopa꞉te pelamete Yelusalema da꞉petanamaminamena꞉, la꞉ ba꞉be komo dumima la꞉ kiya꞉tawahama꞉nemata ebeno olalati tete ba꞉ a꞉puluhuku.
LUK 21:21 Ba꞉bema꞉ alaholohopa꞉te pikulihoheno, wadiyala Yudiya hoponapa꞉te dopamo hunuhunu hakamo nalahutihamena꞉, ba꞉gala Yelusalemalo demedehona ibi atumu gobogobamo na꞉katolama꞉mena꞉. Numa꞉la꞉, ba꞉ba tetelo puya꞉te tumulu da꞉pola꞉namena꞉ iba꞉te ko haboeno kala imi ipuwamo na꞉pa꞉la꞉ha modoboha꞉, mabu iba꞉te ba꞉bolo hido awalela bahi a꞉kanuma꞉mena꞉.
LUK 21:22 Ba꞉ hibila, Godote dopamo ebeno Bukamo da꞉miya꞉tiya꞉ ba꞉bi komate hibinomolo kopikulima꞉na꞉, iyo, ba꞉be tete ba꞉ Yelusalema haboeno kuba huiya lawe hegelala.
LUK 21:23 Ba꞉bema꞉ numa꞉la꞉, lamitulamitu ba꞉gala nono dikalamena ba꞉bi kamenakamenatamo ba꞉be hegelate kubanomoma꞉ keda꞉ma꞉ne, mabu hibila, Godokono konomo mauba komote Yelusalemanapa꞉tamo ba itana, ibino hopolo koko tepo temetema꞉te kopikulihoma꞉na꞉!
LUK 21:24 Iyo, alaholohopa꞉te komo ibi alaholoho gila꞉mo kanakapulamema꞉na꞉, ba꞉gala komo ibi hala꞉mo matuhulameholete hiya꞉hiya꞉ muhulu hopamo komagatalema꞉na꞉, ba꞉bene hibima꞉ midiha꞉pa꞉te Yelusalema haba ibino natamo komikitama꞉na꞉, Godote iba꞉tamo dikalamemene ba꞉be tete kuitita꞉mo.”
LUK 21:25 “Ba꞉bene hegela, manome, ba꞉gala oloki, ibi ipuwalo koko hanohano komate dikulihomena꞉, ba꞉moe hopo konomolo tawakaluba꞉te ukui bilibilima꞉ ba eda꞉ha baidi kohoba꞉midalema꞉na꞉, iyo, ba꞉be atu tetelo kehaha꞉ kolomoeno koko gawiyate pakaminate haka dodo da꞉palukulimina꞉, iba꞉te ba꞉be beyoeno diyamo dulimina꞉ konomamo kotoletolehoma꞉na꞉.
LUK 21:26 Ba꞉gala ba꞉ba tetelo alomoeno helohelo ilinate komidiwiholema꞉na꞉, ba꞉bema꞉ tawakaluba꞉te ba꞉moe hopoeno ko olalati komo ba latimi, iba꞉te tole konomo lawete heloha꞉ma꞉ ba꞉bo keda꞉hama꞉na꞉.
LUK 21:27 Ba꞉bene ba꞉ba tetelo Tawakalubino Naniwiti alomo hununi ba pihitiga iba꞉te ebe ba꞉bo kumima꞉na꞉, ebete ebeno heloago ba꞉gala alo konomago kopema꞉ne.
LUK 21:28 Ba꞉bema꞉ ba꞉moi temeteme komate ikuli da꞉tupuimimina꞉, ba꞉ba tetelo la꞉ hunamo na꞉negahilameholiya꞉la꞉ mabu la꞉eno ka꞉ka꞉ mula꞉le tete ba꞉ na꞉tatali.”
LUK 21:29 Ba꞉bene Ya꞉suti go tabo iba꞉tamo ba꞉ma ka꞉na iya꞉tulamiya꞉, “La꞉ anahu keha ba꞉gala hiya꞉hiya꞉ kehoeno komo hidamo nemalagidola꞉la꞉.
LUK 21:30 La꞉le ibino paha mogolame dulamema, ba꞉be komote la꞉ kiya꞉tulamema꞉na꞉ta gogoeno tete ba꞉ na꞉tatali,
LUK 21:31 ba꞉bema꞉ ba꞉moi temeteme komate ikuliholo dulamema, la꞉ kiya꞉tawahama꞉nemata Godokono Ko Gawadubu tete ba꞉ na꞉pe.
LUK 21:32 Na la꞉tamo hibi tabo begoemo, ba꞉moi hiliyonomo komate dopamo kopikulihoma꞉na꞉, galane ba꞉ma tete tawakaluba꞉te ba꞉bo koha꞉lahama꞉na꞉,
LUK 21:33 iyo, ba꞉moe hopo ba꞉gala alomo iba꞉te kowiboma꞉na꞉, huiyatiya naeno tabote a꞉kawibamene, itana tetelo bitanamene.”
LUK 21:34 “La꞉ ha꞉kiya la꞉ hidamo nulamenala꞉! La꞉ baa꞉ naha komoma꞉, ba꞉gala helo gao beya niho komoma꞉, ba꞉gala ba꞉moe hopoeno ilina uwate komoma꞉ aka-ukuibilibilihala꞉. La꞉ hidamo, ba꞉be Ko Hegelate tiyonomolo da꞉puluhukumini la꞉ konomamo la꞉wa꞉hademata, ba꞉moe komo ba꞉ gubiti ilina danagalimi keba ka꞉nala꞉ka꞉ ba꞉ba ka꞉nala.
LUK 21:35 Iyo, ba꞉be Ko Hegelate ba꞉moe hopolo demedehona ba꞉bi tawakalubi hiliyonomatamo ba꞉ma ka꞉na kopema꞉ne,
LUK 21:36 ba꞉bema꞉ hiliyonomo tetelo la꞉ uliholo ba emedena Godotamo na꞉toetoehonala꞉. Ba꞉be komo ipuwalo la꞉le ebeno helo lawete, koko temetema꞉te da꞉pelamemena꞉ la꞉ ba꞉bi ipuwado nikuliti Tawakalubino Naniwino dopo hapulu konela꞉mota꞉hanama꞉nemata.”
LUK 21:37 Ba꞉bene komo hegelalo Ya꞉suti Yelusalemamo da꞉penakui, ebete Godoko Adikumino Hiya꞉ Genamalo tawakalubi piya꞉tulamenakui, huiyatiya da꞉dunakui ebete habane gala kuluhukunakui Olibi Kehakeha Hunu Hakalo ba꞉bo newatanakui.
LUK 21:38 Ba꞉ba tetelo tawakalubi hiliyonomate duiduiyanomolo Godoko Adikumino Genamamo pelamenakuya꞉ ebeno tabo kopulihoma꞉.
LUK 22:1 Hunamo Mahigaha꞉ Palawa Baa꞉ Poko ebeno eta mahilo ba꞉ Adaguila꞉ Pokola, ebeno ododi komo da꞉tataliya꞉,
LUK 22:2 ba꞉ba tetelo Godotamo hawa꞉goeno ikamehopino watowatopi ba꞉gala Godokono tutumu iya꞉tulamepi dubu, iba꞉te Ya꞉suku anakapumi gabo bohowaditiya꞉, huiyatiya iba꞉te tawakalubi tolelamelo hawakala kododitiya꞉ha꞉.
LUK 22:3 Ba꞉bene Saitanate Keliyotanapi Yudasikono tepo ipuwamo opeguya꞉, Ya꞉sukunu 12 ta꞉matapi ipuwalo ebe ba꞉ etala.
LUK 22:4 Ebete Godotamo hawa꞉goeno ikamehopino watowatopi ba꞉gala Godoko Adikumino Genama lawamepi dubu iba꞉tamo tote nopo ba꞉bo netamotiya꞉ Ya꞉suku ibino kokotamo kihatema꞉.
LUK 22:5 Ba꞉ba tetelo iba꞉te ba꞉be komo uliti kalakalahalo tabo ba꞉bo ihatiya꞉ ebetamo mani kikamema꞉,
LUK 22:6 ba꞉bema꞉ Yudasiti ibino tabamo papamiwatate, iba꞉godone tote gabo ba꞉bo nohowadiya꞉ tawakalubiha꞉ tetelo Ya꞉suku ibino kokotamo kihatema꞉.
LUK 22:7 Yunapino ododi komo ba꞉ma ka꞉nala, iba꞉te hiliyonomo gogolo Hunamo Mahigaha꞉ Palawa Baa꞉ Poko naha da꞉tupuiminakui, ba꞉be dopo hegelalo iba꞉te Adaguila꞉ Pokoeno sipi-goegoe hegehege balukulinakuya꞉.
LUK 22:8 Ba꞉bema꞉ Ya꞉suti Pitako Yoneko ibi netewapi ba noelame na꞉goiya꞉, “La꞉ tote Adaguila꞉ Pokoeno naha ilina na꞉nihiduilamiya꞉la꞉, ale kopenahama꞉.”
LUK 22:9 Iba꞉te ebetamo na꞉ga꞉luya꞉, “Ale kebolo na꞉ka꞉nihiduilamema꞉?”
LUK 22:10 Ebete iba꞉tamo na꞉huiyuya꞉, “La꞉ ko habamo na꞉toala꞉, ba꞉bene beya dagahita ba꞉be dubuti la꞉go da꞉palugamene, la꞉le ebe ba꞉bo na꞉ta꞉matuya꞉la꞉. Ebete kebe genamamo da꞉nodolomene,
LUK 22:11 la꞉ ba꞉be genama namutudawatamo ba꞉ma ka꞉na na꞉nega꞉luya꞉la꞉, ‘Iya꞉tulamedawate ama꞉tamo goe, genama keka꞉ nale naeno ta꞉mahenepa꞉go Adaguila꞉ Poko baa꞉ kopenama꞉?’
LUK 22:12 Ba꞉ba tetelo ebete la꞉ genama guamo komagatalema꞉na꞉ta, hunu genamalo haba ko bitana, ya꞉lo a꞉hiduima꞉ka. La꞉ ba꞉bolo naha ilina na꞉nihiduilamiya꞉la꞉.”
LUK 22:13 Ba꞉bene iba꞉te tote, Ya꞉suti kebe komoma꞉ ka꞉kiyalamiya꞉, iba꞉te ba꞉bi komo nulamete Adaguila꞉ Pokoeno ilina ba꞉bo nihiduilamiya꞉.
LUK 22:14 Tete da꞉peniya꞉ Ya꞉suti ebe oelamepi dubago baa꞉ nahama꞉ ahidiniya꞉,
LUK 22:15 ba꞉bene ebete iba꞉tamo na꞉goeniya꞉, “Na ubi konomamo nihatenatimo, nale hoeheno dopamo ba꞉moe Adaguila꞉ Poko la꞉go konama꞉.
LUK 22:16 Ba꞉bema꞉ nale la꞉tamo na꞉goemo, nale ba꞉moe poko baa꞉ ba꞉ma tetelo gala a꞉kanamo, huiyatiya Godokono Ko Gawadubu tete da꞉pemene, ba꞉ba tetelo ba꞉moe pokoeno ipuwate hibinomolo da꞉hawakalamene nale ba꞉bo konama꞉nemo.”
LUK 22:17 Ba꞉bene Ya꞉suti kalili lawenate Godotamo kalakala tabo olamaginate iba꞉tamo na꞉goeniya꞉, “La꞉ ba꞉moe kalili lawete, la꞉ ipuwalo etate etatamo kikame, etate etatamo kikame, ba꞉ma ka꞉na newagela꞉la꞉.
LUK 22:18 Nale la꞉tamo na꞉goemo, na ba꞉ma tetelo ba꞉moe helo gao beya gala a꞉kana꞉mo, huiyatiya Godokono Ko Gawadubu tete da꞉pemene, ba꞉ba tetelo nale ba꞉bo konima꞉nemo.”
LUK 22:19 Ba꞉ba tetelo ebete baa꞉ kalawenate Godotamo kalakala tabo olamaginate, wakamihonate iba꞉tamo ba ikalamena na꞉goeniya꞉, “Ba꞉moe ba꞉ naeno apela, la꞉ mabuma꞉ Godotamo ikamemo. La꞉le na emalagidolonelo ba꞉moe komo nododinakuya꞉la꞉.”
LUK 22:20 Ba꞉bene ibino baa꞉ naha komo da꞉wiboniya꞉, ebete kalili gala kalawenate na꞉goeniya꞉, “Ba꞉moe kalili ba꞉ Godote tawakaluba꞉go komiloma꞉ uli nopo da꞉tamotiya꞉ ba꞉moe ba꞉be komola. La꞉ mabuma꞉ da꞉ka꞉ka꞉la꞉mene, ba꞉moe naeno hawiti ba꞉be nopo bekodakoduimina.
LUK 22:21 “La꞉ numa꞉la꞉! Na anakapunamepa꞉tamo dikanamemene, ba꞉be lumagiti nago ba꞉moe baa꞉ naha habalo ba꞉luta!
LUK 22:22 Iyo, ba꞉ hibila, Tawakalubino Naniwiti hoea꞉mo ba꞉ na꞉to, Godote nopo dopamo da꞉tamotiya꞉ ba꞉ba ka꞉na, huiyatiya kebe lumagiti ebe anakapumipa꞉tamo dikalamemene, ba꞉be dubuti kuba huiya konomo kolawema꞉ne!”
LUK 22:23 Ba꞉bene ibi ha꞉kiya ibi ipuwalo etate eta goemenakui, etate eta goemenakui, ba꞉ba ka꞉na ba ewagelena na꞉ga꞉laniya꞉, “Ba꞉moe kuba pote na꞉kododimini?”
LUK 22:24 Ba꞉ba tetelo Ya꞉suku ta꞉matapi ipuwalo pote koma꞉ eda꞉ komoma꞉ olowabeletihui komote uluhukuniya꞉.
LUK 22:25 Ba꞉bene Ya꞉suti iba꞉tamo na꞉goeniya꞉, “Godoko hibima꞉ midiha꞉pino koko gawadubate ibi ha꞉kiya ibi ba wadiya꞉paa꞉latele komo tawakalubi bikiyahalamenaka iba꞉te ibino ubi komamo kopapamila꞉halenama꞉, ba꞉gala ba꞉bi kokopi ubila tawakaluba꞉te ibi owalubilipima꞉ ba ka꞉lami ibi ba꞉bo komililameholema꞉.
LUK 22:26 Huiyatiya la꞉eno komo eba ka꞉naha꞉. Wadiyala la꞉ ipuwalo kodawate uli ape lumagi kebanala꞉ka꞉ ba꞉bakoma꞉ neda꞉mene, ba꞉gala la꞉eno watodawate atumu ebe huiyaha꞉ okodawa kebanala꞉ka꞉ ba꞉bakoma꞉ na꞉keda꞉mene.
LUK 22:27 Numa꞉la꞉, hidohido baa꞉ naha habalo da꞉luta tawakaluba꞉te ba꞉bako lumagi kodawama꞉ ga꞉lanaka, huiyatiya kebe lumagiti ebetamo baa꞉ dadahemenako iba꞉te ebe huiyaha꞉ okodawama꞉ ga꞉lanaka. Ba꞉ hibila, na huiyaha꞉ okodawa kebanala꞉ka꞉, nale la꞉ ipuwalo ba꞉bako deha꞉potodawama꞉ eda꞉namo, ba꞉bema꞉ wadiyala la꞉ atumu ba꞉ba ka꞉na nemedeniya꞉la꞉.
LUK 22:28 “Hibila, naeno kodakoda komo ipuwalo da꞉lutanakuimo, la꞉le na kamiya꞉panenakuiha꞉,
LUK 22:29 ba꞉bema꞉ Nabiwiti na Ko Gawadubuma꞉ keba ka꞉na ka꞉midiniya꞉ nale la꞉ atumu ba꞉ba ka꞉na kakamidilima꞉nemata.
LUK 22:30 Ba꞉bene na Godokono Hunu Habalo Ko Gawadubuma꞉ ba neda꞉, la꞉ nago poko baa꞉ nahate gao beya ba꞉bo konihoma꞉nemata, ba꞉gala la꞉ koko gawadubuino gagahidi bahilo gagahiditi Isalaela 12 gu tawakalubino komokomo anagilamelelamepima꞉ keda꞉hama꞉nemata.”
LUK 22:31 Ba꞉bene Ya꞉suti na꞉goeniya꞉, “Saimono, Saimono, ama꞉ nulia꞉. Dubuti witi-laisoeno komo kumima꞉, da꞉ hidola꞉ o da꞉ hidoha꞉, ebete keba ka꞉na kanamogolenako, Saitanate ubila ama꞉ kuba gabamo ba꞉ba ka꞉na kemogabuimima꞉, ba꞉bema꞉ Godote ba꞉be komo iya꞉tawate ebetamo modoboma꞉ goe.
LUK 22:32 Ba꞉bema꞉ Saimono, nale ama꞉ mabuma꞉ Godoko a꞉toemehakamo, ebete ama꞉ ba owalubi amia꞉no hibima꞉ midi komote a꞉kalatida꞉mene. Ama꞉ natamo gala da꞉kohobigamena꞉, ba꞉ba tetelo amia꞉no ekaki na꞉heluilamiya꞉.”
LUK 22:33 Pitate ebetamo na꞉huiyaniya꞉, “Kodawa, nale ama꞉go du genamamo tote da꞉nehoemo, na ba꞉be komoma꞉ a꞉hidomo!”
LUK 22:34 Ya꞉suti huiyatiya na꞉goeniya꞉, “Pita, na ama꞉tamo na꞉goemo, ka꞉lo dulu kakabate goehoheno ama꞉ netewa-kapiya teta꞉mo na iya꞉tawaha꞉ma꞉ kogoema꞉na꞉ta.”
LUK 22:35 Ya꞉suti iba꞉tamo na꞉goeniya꞉, “Nale la꞉ dopamo da꞉noelamima, la꞉ ba꞉ma ka꞉na a꞉kiyahalamia꞉mata, ‘Manihino, hikaheno, ba꞉gala nato ilinaheno na꞉tolamiya꞉la꞉,’ ba꞉bema꞉ ba꞉ba tetelo la꞉ modoboha꞉ komo a꞉ka꞉niya꞉tawahuima?” Iba꞉te na꞉huiyaniya꞉, “Ao, eta awae komo kanumiha꞉.”
LUK 22:36 Ba꞉bene Ya꞉suti iba꞉tamo na꞉goeniya꞉, “Ka꞉lo huiyatiya na eta tabo ba꞉ma ka꞉na goemo, ale ba tolame la꞉godolo mani o baeno hika da꞉pola꞉lama꞉na nuwatiya꞉la꞉, ba꞉gala pogodolo alaholo gili itanaheno, wadiyala ebete ebeno atuino kaliko nekolowamiti huiyatiya helo giliti na꞉lawa꞉mene.
LUK 22:37 Mabu na la꞉tamo na꞉goemo, Godote naeno komoma꞉ ebeno Bukamo da꞉miya꞉tiya꞉, tete ba꞉ na꞉pe ba꞉be komote kuluhukuma꞉ne, iyo, buka tabote ba꞉ma ka꞉na goena, ‘Iba꞉te ebe kubapa꞉go kapiyama꞉ midiya꞉.’”
LUK 22:38 Ba꞉bene iba꞉te na꞉ga꞉laniya꞉, “Kodawa, ama꞉ numa꞉. Mola, alaholoho gili netewa ba꞉pola꞉na!” Ya꞉suti na꞉huiyaniya꞉, “A꞉iye! La꞉ naeno taboeno ipuwa hidamo kalawenaha꞉. Ba꞉ba꞉la, nitanana.”
LUK 22:39 Ba꞉bene Ya꞉suti Yelusalema habane uluhukunate ebete dopamo keba ka꞉na kododinakui, ba꞉ba ka꞉na ebete ebe ta꞉matapa꞉go Olibi Kehakeha Hunu Hakamo dito tolameniya꞉.
LUK 22:40 Ebete ba꞉be hakamo nuluhukunate ibi na꞉goelameniya꞉, “La꞉ ba꞉malo Godotamo na꞉toetoehonala꞉ mabu la꞉le Saitanakono kuba gabamo emogabuimi komamo gudidimata.”
LUK 22:41 Ba꞉bene ebete ibi miya꞉palenate nanekela꞉mo tonate, ba꞉ba tetelo ebete pupamo nemedenate Godotamo ba꞉bo netoetoeniya꞉.
LUK 22:42 Ebete na꞉goeniya꞉, “Nabiwi, ama꞉ ubi dihatemena꞉ ba꞉moe temeteme kalili nagodone na꞉lawa꞉. Huiyatiya naeno ubiha꞉, ama꞉ ha꞉kiya amia꞉no ubila nododa꞉.”
LUK 22:43 Ba꞉ba tetelo Godokono Hunu Habane nopodawate ebetamo puluhukunate ebe ba꞉bo peheluiminiya꞉,
LUK 22:44 ba꞉gala ebete tepo temeteme konomoma꞉ eda꞉nate helonomamo Godotamo ba toetoena, ebeno kolohate hawima꞉ eda꞉hamenate hakamo ba꞉bo ka꞉ka꞉la꞉hameniya꞉.
LUK 22:45 Ba꞉bene ebete toetoe tabo ga꞉la bahini mahiganate ebe ta꞉matapa꞉tamo da꞉peniya꞉ iba꞉te tepo temetema꞉go lahanalo pulameniya꞉.
LUK 22:46 Ebete iba꞉tamo na꞉goeniya꞉, “La꞉ bada mabuma꞉ ka꞉lahonama? La꞉ pakaminate Godotamo na꞉toetoehonala꞉, mabu la꞉le Saitanakono kuba gabamo emogabuimi komamo gudidimata.”
LUK 22:47 Ya꞉suti ba꞉be tabo ba goena, ebeno ta꞉matapi 12 ipuwalo eta dubu Yudasiti komo dubu hiliyonomo dopalamenate iba꞉te kapimilo ba꞉bo pelameniya꞉. Ba꞉bene ebete Ya꞉sutamo nolata tabo goenate ebe kopaboetehonama꞉ tama꞉mo da꞉peniya꞉,
LUK 22:48 Ya꞉suti ebetamo na꞉goeniya꞉, “Yudasi, ama꞉ Tawakalubino Naniwi ba paboeteho ebe anakapumipa꞉tamo ikalamema꞉ ka꞉pa꞉wa?”
LUK 22:49 Ba꞉bene Ya꞉suku lawe komote uluhukuma꞉ ba pena, ebe ta꞉matapi dubate ba꞉be komo uminate na꞉ga꞉laniya꞉, “Kodawa, ale ibi alaholo gila꞉mo ba꞉kalukulima꞉?”
LUK 22:50 Ba꞉bene ibi ipuwalo etate mahiganate Godotamo hawa꞉goeno ikamehopino Hununomo Watodawoeno genama okodawa anagaliminate ebeno tu hapu galo ba꞉bo mapitamidameniya꞉.
LUK 22:51 Ya꞉suti huiyatiya ibi na꞉kiyahalameniya꞉, “Ba꞉ba꞉la, nekelamenata!” ba꞉bene ebete ba꞉be dubuino galo dologiminiya꞉ ba꞉ba tetelo na꞉hidoniya꞉.
LUK 22:52 Ba꞉bene Godotamo hawa꞉goeno ikamehopino watowatopi, ba꞉gala Godoko Adikumino Genama lawamepi dubu, ba꞉gala komo koko dubu, iba꞉te Ya꞉suku lawema꞉ da꞉pelameniya꞉ ebete iba꞉tamo na꞉goeniya꞉, “Na pilo lumagila꞉ka꞉, o na alaholodawala꞉ka꞉? La꞉le na lawenema꞉ alaholoho gila꞉go ba꞉gala kukago badama꞉ ka꞉pelameoma?
LUK 22:53 Na komo hegelalo Godoko Adikumino Hiya꞉ Genamalo la꞉eno holoholo hapulu da꞉pelutanakuimo, ba꞉ba tetelo la꞉le na kalaweneha꞉. Huiyatiya ba꞉moe du la꞉eno tetela, iyo, du namutudawama꞉ deda꞉na ebeno helo tetete ba꞉ a꞉puluhuku.”
LUK 22:54 Ba꞉ba tetelo iba꞉te Ya꞉suku kokotamo kodakodanomolo lawenate, Godotamo hawa꞉goeno ikamehopino Hununomo Watodawoeno genamamo magataniya꞉, huiyatiya Pitate ibi muhuludopone ta꞉mataleniya꞉.
LUK 22:55 Ba꞉bene komopa꞉te genamoeno kala ipuwalo koe emadonate ba pola꞉na, Pitate kala imi ipuwamo na꞉pa꞉ganate iba꞉go ba꞉bo nilutiya꞉.
LUK 22:56 Ba꞉ba tetelo Pitate koeno alolo ba niluta, oko bohelete ebe hidamo uminate na꞉goeniya꞉, “Ba꞉moe dubu atumu Ya꞉sukuba꞉ pata꞉nami!”
LUK 22:57 Pitate huiyatiya na꞉goeniya꞉, “Kamena, na iya꞉tawaha꞉ ebe!”
LUK 22:58 Ba꞉bene iba꞉te tete nanekelelo pola꞉natepanate, eta dubuti ebe hidamo uminate gala na꞉kakiyameniya꞉, “Ama꞉ ba꞉ atumu ebe ta꞉matadawa etala!” Pitate huiyatiya na꞉goeniya꞉, “Dubu, na ebe iya꞉tawaha꞉!”
LUK 22:59 Tete nanekela꞉mo kodopo da꞉kapetoniya꞉, eta dubuti helodopamo na꞉kagoeniya꞉, “Hibila, ba꞉moe dubu Ya꞉sukuba꞉ pata꞉nami, mabu ebe Ga꞉lili hoponapila!”
LUK 22:60 Pitate huiyatiya na꞉goeniya꞉, “Dubu, ama꞉ da꞉goena ba꞉be taboeno komo na iya꞉tawaha꞉!” Ba꞉ba tetenomolo ebete ba꞉be tabo ba goena kakabate na꞉goehoniya꞉,
LUK 22:61 ba꞉bene Kodawa Ya꞉suti ohobiganate da꞉negahiminiya꞉ Pitako ba꞉bo numiniya꞉. Ba꞉ba tetelo Ya꞉suti ebetamo dopamo kebe tabo ka꞉goeniya꞉, Pitate ba꞉be tabo ba꞉bo emalagidoloniya꞉, “Ka꞉lo dulu kakabate goehoheno, ama꞉le netewa-kapiya teta꞉mo na iya꞉tawaha꞉ma꞉ kogoema꞉na꞉ta.”
LUK 22:62 Ba꞉bene Pitate gobogobamo tonate konomo tepo temetema꞉go ibulunomo ba꞉bo nihiniya꞉.
LUK 22:63 Ba꞉bene Godoko Adikumino Genama lawamepi dubate Ya꞉suku ba walitina ba꞉bo anagalimihoniya꞉.
LUK 22:64 Iba꞉te kalikamo ebeno holoholo mula꞉menate ebe anagalimiholo na꞉ga꞉laniya꞉, “Ama꞉ Godokono ukui hawakalimidawama꞉ hibilo deda꞉na, ama꞉ na꞉gaa꞉ puya꞉te kanagalimihotana!”
LUK 22:65 ba꞉gala iba꞉te ebe ba iduduputimina komo hiliyonomo kubakuba tabo ebetamo ba꞉bo olamagiminiya꞉.
LUK 22:66 Ba꞉bene hegela owaloho hapuamo Godotamo hawa꞉goeno ikamehopino watowatopi, ba꞉gala Godokono Tutumu iya꞉tulamepi, ba꞉gala Yunapino komo kokopi, iba꞉te kapiyuiminate komopa꞉te Ya꞉suku ibino dopo hapuamo magatanate na꞉ga꞉lameniya꞉,
LUK 22:67 “Ama꞉ a na꞉kiyaa꞉ma꞉, ama꞉ ba꞉ Godokono Oemedawa Kelisotela꞉ka꞉?” Ebete huiyatiya iba꞉tamo na꞉goeniya꞉, “Nale la꞉eno tabo hibinomolo da꞉huiyamo la꞉ hibima꞉ a꞉kamida꞉mata,
LUK 22:68 ba꞉gala nale la꞉ eta komoma꞉ dalateda꞉lema, ba꞉ba tetelo la꞉le natamo huiya tabo hidamo a꞉kaga꞉lamata.
LUK 22:69 Ba꞉ hibila, na Tawakalubino Naniwiti ba꞉ma tetene tupuimiti Helodawa Godokono tu hapulu konilutama꞉nemo!”
LUK 22:70 Ba꞉ba tetelo ibi hiliyonomate na꞉ga꞉laniya꞉, “Amia꞉no taboeno ipuwa keba ka꞉nala꞉ka꞉? Ama꞉ ba꞉ Godokono hibi Gudula꞉ka꞉?” Ebete iba꞉tamo na꞉huiyaniya꞉, “La꞉ ba꞉ a꞉ga꞉lamata.”
LUK 22:71 Ba꞉bema꞉ iba꞉te na꞉ga꞉laniya꞉, “A ba꞉moe dubuino kuba kiya꞉tawahama꞉ eta tabo goedawa a ubihinola, mabu a ha꞉kiya ebeno tabonomone ba꞉ ulima꞉!”
LUK 23:1 Ba꞉bene ibi hiliyonomate mahila꞉halete Ya꞉suku lawete Paeletetamo ba꞉ dito magatuya꞉.
LUK 23:2 Iba꞉te ebeno komo ba anagilameleme Paeletetamo na꞉ga꞉luya꞉, “A ba꞉moe dubu umima꞉ ebete aeno tawakalubi ba iya꞉tulamita da꞉kubahilamiti, ebete ibi ba꞉ma ka꞉na duhilami iba꞉te Konomo Gawadubu Sisatamo ta꞉kese mani ikamehoma꞉, ba꞉gala ebete iba꞉tamo na꞉goenako ebe ba꞉ Kelisotela, Ko Gawadubula.”
LUK 23:3 Ba꞉bema꞉ Paeletete ebe nalatediya꞉, “Ama꞉ Yu tawakalubino Ko Gawadubula꞉ka꞉?” Ya꞉suti ebetamo na꞉huiyuya꞉, “Ama꞉le ba꞉ a꞉gaa꞉ta.”
LUK 23:4 Ba꞉bene Paeletete Godotamo hawa꞉goeno ikamehopino watowatopi ba꞉gala tabo ulihoma꞉ da꞉pelamiya꞉ ba꞉bi tawakalubi hiliyonomatamo na꞉goiya꞉, “Na ba꞉moe dubuino eta kuba kumitaha꞉.”
LUK 23:5 Huiyatiya iba꞉te helonomamo gala na꞉kaga꞉luya꞉, “Ebete dopamo Ga꞉lili hopone tupuimiti ba꞉mamo puluhuku tawakalubi kubamo iya꞉tulamenakui, ba꞉ma ka꞉na Yudiya hopo konomolo ebete ibi na꞉kiyalamenako iba꞉te gabomana꞉tamo alaholoho komo kododima꞉.”
LUK 23:6 Paeletete ibino tabo uliti ebe ha꞉kiya ebetamo na꞉goiya꞉, “Ehe, ba꞉moe dubu ba꞉ Ga꞉lili hoponapila!”
LUK 23:7 Ba꞉ba tetelo Paeletete iya꞉tawuya꞉ Heloditi Yelusalema ko habalo emeda꞉tepama꞉ da꞉piya꞉, ba꞉bema꞉ ebete Ya꞉suku ebetamo ba꞉ dito noemiya꞉ mabu Helodiko Ga꞉lili hopoeno Ko Gawadubula ba꞉gala Ya꞉suku ba꞉be hopone piya꞉.
LUK 23:8 Ba꞉bene Heloditi Ya꞉suku umiti konomamo kalakaluya꞉, mabu ebete Ya꞉sukunu ododili komokomo ulihote tete ga꞉ga꞉nomolo ebe umima꞉ ubi ba ihatena ba꞉ma ka꞉na emalagidolonami, “Diyala, Ya꞉suti naeno holoholo hapulu eta hanohano komo da꞉ ododimini.”
LUK 23:9 Ba꞉be mabuma꞉ Heloditi Ya꞉suku hiliyonomo komokomoma꞉ nalateda꞉huya꞉, huiyatiya Ya꞉suti ebetamo eta tabo kapiya kagoiya꞉ha꞉.
LUK 23:10 Ba꞉bene Godotamo hawa꞉goeno ikamehopino watowatopi ba꞉gala Godokono Tutumu iya꞉tulamepi, iba꞉te mahila꞉halete Ya꞉sukunu komo ba anagilameleme ebe kuba lumagima꞉ ga꞉lalo helonomamo ga꞉luya꞉,
LUK 23:11 ba꞉gala ba꞉be atu tetelo Heloditi ebeno alaholohopa꞉go Ya꞉suku iduduputimilo niya꞉da꞉titiya꞉. Ba꞉be iya꞉da꞉ ipuwalo iba꞉te koko gawadubate da꞉pupulinaka ba꞉bako kaliko ebetamo pulimiti, ba꞉bene Heloditi ebe Paeletetamo gala ba꞉ba ka꞉na kanoemiya꞉.
LUK 23:12 Ba꞉gala ba꞉moe ba꞉ eta komola. Helodiko ba꞉gala Paeleteko ibi netewapa꞉te dopamo etate etatamo maubanakui ba꞉ba ka꞉na ewagelenama꞉, huiyatiya ba꞉moe hegelane tupuimiti iba꞉te mabulubima꞉ hibinomolo ediya꞉.
LUK 23:13 Ba꞉bene Paeletete Godotamo hawa꞉goeno ikamehopino watowatopi, ba꞉gala Yunapino komo koko dubu, ba꞉gala puya꞉te ibino tabo ulihoma꞉ da꞉pelamiya꞉, ibi hiliyonomo ebetamo ka꞉lamiti,
LUK 23:14 iba꞉tamo na꞉goiya꞉, “La꞉ ba꞉moe dubu natamo tawakalubi kubahilamedawamo magahemata, huiyatiya nale la꞉eno holoholo hapulu ebeno komokomo danagilamelememo ebegodolo eta kuba kumiha꞉.
LUK 23:15 Ba꞉gala Heloditi atumu ebegodolo eta kuba kumimiha꞉, ebete ebe atamo ba꞉bema꞉ kapoeme. Hibila, ebete eta ko kuba kododiha꞉ ebete ebema꞉ hoela.
LUK 23:16 Ba꞉bema꞉ wadiyala nale ebe giya꞉pa꞉pa꞉mo a꞉na꞉miga꞉titi dito koemema꞉nemo.”
LUK 23:17 Paeletete ba꞉moe tabo begoiya꞉ mabu ebeno ododi komo ba꞉ ba꞉ma ka꞉nala, hiliyonomo gogo ipuwalo Yunapino Adaguila꞉ Poko tetelo iba꞉te du genamalo kapiya lumagi mahilamo da꞉ka꞉minakui, Paeletete ba꞉be lumagi ebeno kuba huiyane ba꞉ dito oemenakui.
LUK 23:18 Huiyatiya tawakalubi hiliyonomate Paeletetamo ga꞉ga꞉lo na꞉ga꞉luya꞉, “Ao, Ya꞉suku nanakapuma꞉! A ubila ama꞉ Balabasiko dito noema꞉!”
LUK 23:19 Balabasikono komo ba꞉ma ka꞉nala. Dopamo ebete Loma gabomana꞉tamo alaholo komo ba ododi komo tawakalubi Yelusalemalo ba꞉bo anakapulamiya꞉, ba꞉bema꞉ iba꞉te ebe du genamamo dito a꞉da꞉nuya꞉.
LUK 23:20 Ba꞉ba tetelo Paeleteko ubila Ya꞉suku dito koemema꞉, ba꞉bema꞉ ebete ebeno tabo madodo adipatelo tawakalubi hiliyonomo gala na꞉kakiyalamiya꞉,
LUK 23:21 huiyatiya ibi hiliyonomate ibulunomo na꞉ga꞉luya꞉, “Keha pihigamo pihomotete, ikoko nalukulima꞉!”
LUK 23:22 Ba꞉bene netewa-kapiya teta꞉mo Paeletete gala na꞉kagoiya꞉, “Mabu keka꞉? Ebete bada kuba kododi? Na ebegodolo eta kuba kumitaha꞉, nale ebe hoea꞉mo ebema꞉ oemela! Wadiyala nale ebe giya꞉pa꞉pa꞉mo a꞉na꞉miga꞉titi dito koemema꞉nemo.”
LUK 23:23 Huiyatiya iba꞉te ekelalameheno konomamo na꞉ga꞉gitiya꞉ Ya꞉suku keha pihigamo kopihomotema꞉, ba꞉bene ibino ga꞉ga꞉ komote konomoma꞉ dediya꞉ Paeletete iba꞉tamo dito papamiwatuya꞉,
LUK 23:24 iyo, iba꞉te ebe keba ka꞉na ka꞉kiyahamiya꞉, Paeletete ba꞉ba ka꞉na ododiti Ya꞉suku hoea꞉mo oeme tabo ba꞉bo goiya꞉.
LUK 23:25 Ba꞉bene iba꞉te du genamalo lumagi mahilamo da꞉ka꞉miya꞉, ba꞉be dubu ba꞉ tawakalubi anakapulamedawa ba꞉gala gabomana꞉tamo alaholodawala, Paeletete ebe ebeno kuba huiyane dito oemiya꞉, huiyatiya ebete Ya꞉suku tawakaluba꞉tamo dito ikalamiya꞉ iba꞉te ibino ubi komo kododima꞉.
LUK 23:26 Alaholohopa꞉te Ya꞉suku hoe habamo ba magata, Saimonoko Sailiniya habanapi dubula, ebete gobogobone ko habamo ba꞉be gabodo pitiya꞉, ba꞉bene iba꞉te ebe heloamo lawete na꞉ga꞉lamiya꞉, Ya꞉suku dopamo ba tuta Saimonote ebeno keha pihiga kagatamema꞉.
LUK 23:27 Ba꞉bene tawakalubi hiliyonomate ebe ba ta꞉matuta, ibi ipuwalo komo kamenakamenate Ya꞉suku mabuma꞉ ihima꞉go tolamitiya꞉.
LUK 23:28 Ya꞉suti huiyatiya iba꞉tamo ohobigate na꞉goiya꞉, “Yelusalemanapi kamenakamenala꞉, la꞉ na mabuma꞉ kihimitala꞉, la꞉ ha꞉kiya la꞉ ba꞉gala la꞉eno gugudi mabuma꞉ nihimitala꞉!
LUK 23:29 Mabu kuba tete ba꞉ na꞉pe tawakaluba꞉te ba꞉ma ka꞉na koga꞉lama꞉na꞉, ‘Hogoha꞉ kamenakamena ba꞉gala lamituma꞉ eda꞉haha꞉ kamenakamena ba꞉gala guguda꞉tamo nono ikalameha꞉ kamenakamena, iba꞉te olalati tetelo modobodopoma꞉ keda꞉hama꞉na꞉, huiyatiya guguda꞉gopi konomo tepo temeteme kiya꞉tawahama꞉na꞉!’
LUK 23:30 Ba꞉ba tetelo tawakaluba꞉te temeteme ipuwalo hunuhunu hakatamo koga꞉lama꞉na꞉, ‘La꞉ a hunamo na꞉peguda꞉la꞉!’ ba꞉gala hegehege hakatamo koga꞉lama꞉na꞉, ‘La꞉ a na꞉pihia꞉tea꞉la꞉!’
LUK 23:31 Ba꞉bema꞉ kamenakamenala꞉, la꞉ ba꞉moe komo nemalagidolala꞉. Kehate kaloloma꞉ eda꞉haha꞉ tetelo kubapa꞉te natamo ba꞉mako ko kuba bododita, ba꞉bema꞉ galane tetelo kehate kaloloma꞉ deda꞉hamena꞉, la꞉ hidamo! Diyala, ba꞉ba tetelo ibino tepo ipuwoeno kubate konomoma꞉ eda꞉lamete la꞉tamo ba꞉gala la꞉eno guguda꞉tamo hiya꞉hiya꞉ kokonomo kuba da꞉ ododilimina꞉.”
LUK 23:32 Ba꞉ba tetelo iba꞉te kuba ododilipi dubu netewa Ya꞉sukuba꞉ magataliya꞉, iba꞉te ibi kapimilo hoea꞉mo konimiya꞉tema꞉.
LUK 23:33 Ba꞉bema꞉ iba꞉te eta haka hunamo nikuliya꞉, ba꞉be hakoeno mahilo ba꞉ Wato Gohala, ba꞉bene iba꞉te Ya꞉suku kehamo ba꞉bolo nipihomotete ikoko ba꞉bo nalukulimiya꞉, ba꞉gala kuba ododilipi dubu netewa atumu kuwatete, eta tu hapuamo, eta pele hapuamo, hiya꞉hiya꞉ keha pihigamo ba꞉ba ka꞉na kapihomolateliya꞉.
LUK 23:34 Ba꞉bene Ya꞉suti na꞉goiya꞉, “Nabiwi, ama꞉ ibino kuba egebolelamete nadodolelama꞉, mabu iba꞉te bada komo kododita ibi iya꞉tawaha꞉.” Ba꞉ba tetelo Ya꞉suku anakapumipa꞉te nakola hegehege iya꞉hekeholo iya꞉da꞉mi komo ba ododi ebeno kaliko hiya꞉hiya꞉ ba꞉bo alabahamiya꞉.
LUK 23:35 Ba꞉bene tawakaluba꞉te utitatate ebe ba umita, Yu watowatopi dubate ebe walitilo na꞉ga꞉luya꞉, “Ebete komo tawakalubino olalati komo bemula꞉lelamenakui, ba꞉bema꞉ ebete Godokono hibi Kelisoma꞉ deda꞉na, wadiyala ebe ha꞉kiya ebeno ka꞉ka꞉ na꞉mula꞉na!”
LUK 23:36 Ba꞉gala alaholohopa꞉te ebe atumu iya꞉da꞉telo na꞉kaga꞉lutiya꞉, “Ama꞉ Yu tawakalubino hibi Ko Gawadubuma꞉ deda꞉na, ama꞉ ha꞉kiya amia꞉no ka꞉ka꞉ na꞉mula꞉!” Ba꞉bene iba꞉te kaka gao beya ebetamo ba꞉bo ikamiya꞉ ebete konima꞉,
LUK 23:38 ba꞉gala iba꞉te Ya꞉suku da꞉pihomotiya꞉ ba꞉be keha hunamo tabo ba꞉ma ka꞉na miya꞉tiya꞉, “Ba꞉moe dubu ba꞉ Yu tawakalubino Ko Gawadubula.”
LUK 23:39 Ba꞉ba tetelo eba꞉go keha pihigamo da꞉pihomolateliya꞉, ibi netewapi ipuwalo eta dubuti ebe konomamo iduduputimilo ba꞉ma ka꞉na goiya꞉, “Aba꞉, ama꞉ ba꞉ Godokono Oemedawa Kelisotela꞉ka꞉? Ama꞉ ha꞉kiya amia꞉no ka꞉ka꞉ mula꞉te, aeno ka꞉ka꞉ atumu na꞉kamula꞉lea꞉ma꞉!”
LUK 23:40 Huiyatiya eta dubuti ebe ba duhimi na꞉goiya꞉, “A꞉iye! Ama꞉ Godoko tolemeha꞉ma꞉ kediuta? A netewa-kapiyate ba꞉ kapiya hoe huiya ba lawita,
LUK 23:41 alaholohopa꞉te atamo kuba huiya hidamo ikaa꞉mita mabu a kuba komokomo bododilinamima꞉, huiyatiya Ya꞉suti eta kuba kododiha꞉.”
LUK 23:42 Ba꞉bene ebete Ya꞉sutamo na꞉goiya꞉, “Ya꞉su, ama꞉ Ko Gawadubu heloago da꞉kapemena꞉, ba꞉ba tetelo na malemalelo na꞉pemalagidoloniya꞉!”
LUK 23:43 Ya꞉suti ebetamo na꞉huiyuya꞉, “Na ama꞉tamo hibi tabo begoemo, ka꞉lo hegelalo ama꞉ nago Kalakala Habalo kolutama꞉na꞉ta.”
LUK 23:44 Ba꞉bene hegelate tuli teta꞉mo dutiya꞉, hegeloeno a꞉la꞉mina komote ekelamete hopo konomote ba꞉bo duya꞉. Iyo, du komote hegeloeno alo ba mula꞉, hegelate a꞉hiwate nanekela꞉mo a꞉nihitigatepaniya꞉, hegela tuli tetene tupuimiti 3 koloko teta꞉mo, ba꞉bene Godoko Adikumino Hiya꞉ Genamoeno kaliko ubiliti tulituliya ba꞉bo bolagaleniya꞉.
LUK 23:46 Ba꞉ba tetelo Ya꞉suti konomamo goewatanate na꞉goeniya꞉, “Nabiwi! Nale naeno gobogobo amia꞉no kokotamo ihatemo!” Ebete ba꞉moe tabo goenate hoenomo ba꞉bo hoeniya꞉.
LUK 23:47 Ba꞉bene alaholohopino gawadubuti ba꞉be komo uminate ebete Godokono mahilo ba adipatena na꞉goeniya꞉, “Hibila, ba꞉moe dubu tuputupudawama꞉ ba eda꞉na eta kuba komo kododiha꞉!”
LUK 23:48 Ba꞉bene tawakalubi hiliyonomate Ya꞉sukunu hoe komo umima꞉ da꞉pelamiya꞉, kebe komate kikulihoniya꞉ iba꞉te ba꞉bi komo ulamenate ko tola꞉go bodolo alukula꞉go ibino genamamo ba꞉ dito tolameniya꞉,
LUK 23:49 huiyatiya Ya꞉sukunu mabulubi hiliyonomo ba꞉gala kebe kamenakamenate Ga꞉lili hopone ebe da꞉ta꞉mahiya꞉, iba꞉te muhuluni putitatanate ba꞉bi hiya꞉hiya꞉ komokomo ba꞉bene pulameniya꞉.
LUK 23:50 Ba꞉ba tetelo eta dubu nemedenami, ebeno mahilo Yausepetela, ebe Yudiya hopoeno A꞉limitiya habanapila, ba꞉gala ebe ba꞉ tuputupudawala, ebete Godokono Ko Gawadubuino pe tete belatiminami. Ebe Yunapi Ka꞉nisolo dubu etala, huiyatiya komo Ka꞉nisolo dubate Ya꞉suku anakapumi tabo da꞉ga꞉lutiya꞉, ebete iba꞉go ukui kapiyama꞉ keditiya꞉ha꞉,
LUK 23:52 ba꞉bene ba꞉be dubuti Paeletekono holoholo hapuamo tonate Ya꞉sukunu ape lawenama꞉ ebe ba꞉bo nikiyameniya꞉.
LUK 23:53 Ba꞉bene ebete Ya꞉sukunu ape hopamo padipotenate, hido keyakeya kalikamo a꞉wa꞉tinate nakola bobo ipuwamo dito nihateniya꞉, tawakaluba꞉te ba꞉be bobo iya꞉ha꞉midale nakola haka ya꞉lo aligiya꞉ huiyatiya eta hoe lumagi dopamo kihatiya꞉ha꞉.
LUK 23:54 Ba꞉ba tetelo kebe kamenakamenate Ya꞉sukuba꞉ Ga꞉lili hopone da꞉pelamiya꞉, iba꞉te Yausepeko bobo habamo ta꞉matanate, ba꞉be nakola bobo ba꞉gala Yausepete Ya꞉sukunu ape keba ka꞉na dihateniya꞉, iba꞉te ba꞉bi komokomo ba꞉bo nulamelemeniya꞉. Ba꞉be hegela ba꞉ Palaide hegelala, Yunapino talona hegeloeno ilina hiduilame tetela, mabu dumutu ba꞉ ibino okoha꞉ talona hegelala.
LUK 23:56 Ba꞉bema꞉ ba꞉bi kamenakamenate genamamo katolamenate hidohido nibo ilina ba꞉bo nihiduilameniya꞉ eta hegelalo Ya꞉sukunu apa꞉mo kopabutilamelemema꞉, huiyatiya iba꞉te Yunapino okoha꞉ hegelalo eta komo kododiya꞉ha꞉, mabu Godokono tutumu tabote talona ba꞉ma ka꞉na ihatelamenami.
LUK 24:1 Ba꞉bene kamenakamenate Palaide gapogapolo da꞉hiduilameniya꞉, iba꞉te ba꞉bi hidohido nibo ilina Sande hegela duiduiyanomolo bobo habamo dito watuya꞉.
LUK 24:2 Iba꞉te ba꞉bamo nikuliti, bobo da꞉takuminiya꞉ ba꞉be ko nakola tama꞉mo ya꞉lo emokamida ba itana ba꞉bo numiya꞉,
LUK 24:3 ba꞉bene iba꞉te nakola bobo ipuwamo nogomote huiyatiya Kodawa Ya꞉sukunu ape kanumiya꞉ha꞉.
LUK 24:4 Ba꞉ba tetelo iba꞉te ba꞉be komoma꞉ ukui bilibilima꞉ ba eda꞉huta, dubu netewa ibino kaliko a꞉la꞉minahalenomola, iba꞉te puluhukuti ibi tamelo pela꞉mota꞉nuya꞉.
LUK 24:5 Ba꞉bene kamenakamenate konomamo toletoleholo ibino holoholo hakamo ba miya꞉te dubu netewapa꞉te iba꞉tamo na꞉ga꞉luya꞉, “Keka꞉ mabu la꞉le ka꞉ka꞉ lumagi ha꞉laha tawakalubino bobo habalo da꞉pohowaditama?
LUK 24:6 Ebe malo puliyala, ebe a꞉mahigaka! Ebete Ga꞉lili hopolo la꞉ da꞉kiyalami, la꞉ ba꞉be tabo nemalagidolala꞉.
LUK 24:7 Iyo, ebete ba꞉ma ka꞉na goiya꞉, ‘Godote Tawakalubino Naniwi kubapino kokotamo ihatete, iba꞉te ebe keha pihigamo pihomotete ikoko kalukulimima꞉na꞉, huiyatiya ebete netewa-kapiya hegelalo hoene gala kakamahigama꞉ne.’”
LUK 24:8 Ba꞉ba tetelo ba꞉bi kamenakamenate Ya꞉suti iba꞉tamo dopamo kebe tabo kolamagiya꞉ ba꞉be tabo ba꞉bo emalagidoluya꞉,
LUK 24:9 ba꞉bene iba꞉te bobo habane habamo katolamete iba꞉te bobo habalo da꞉nulamiya꞉ ba꞉bi komokomo Ya꞉sukunu 11 ta꞉matapi ba꞉gala ebeno komo mabulubi hiliyonomo ba꞉bo nikiyahalamiya꞉.
LUK 24:10 Ba꞉ba tetelo Magadalanapi Ma꞉liko, Yowanako, Ya꞉imesikono menoko Ma꞉liko, ba꞉gala komo kamenakamena, ba꞉moi ba꞉tamo kebe komate bobo habalo kikulihuya꞉, iba꞉te ba꞉bi komokomo Ya꞉sukunu oelamepi dubatamo ba꞉bo nikiyahuya꞉,
LUK 24:11 huiyatiya iba꞉te ibino tabo dulihuya꞉, ba꞉be tabo daedae ukui komoma꞉ ga꞉late hibima꞉ kamidiya꞉ha꞉.
LUK 24:12 Ba꞉ba tetelo Pitate huiyatiya mahigate bobo habamo dito puliguya꞉. Ebete nakola bobamo da꞉nuluhukuya꞉, na꞉pa꞉gaheno papamiwatane Ya꞉sukunu ape da꞉wa꞉tiniya꞉ ba꞉bi kaliko tamelo ba pola꞉na ba꞉bo nulamiya꞉, huiyatiya eta komo kanumiya꞉ha꞉. Ba꞉be mabuma꞉ ebete ba꞉be komo ebeno ukuilo konomamo emalagidolago gala na꞉kapiya꞉.
LUK 24:13 Ba꞉be atu hegelalo Ya꞉suku ta꞉matapi netewapa꞉te Yelusalema ko habane Emeyasi habamo tutiya꞉, ba꞉be gaboeno ga꞉ga꞉ ba꞉ 10 kilomita keba ka꞉nala꞉ka꞉ ba꞉ba ka꞉nala,
LUK 24:14 ba꞉bene gabo tetelo iba꞉te Ya꞉sutamo dikulihuya꞉ ba꞉bi hiliyonomo komokomoma꞉ olamagima꞉go tutiya꞉.
LUK 24:15 Iba꞉te tabo ga꞉lago ba tuta, Ya꞉suti ibino gala hapuni pete iba꞉go da꞉tutiya꞉,
LUK 24:16 ba꞉ba tetelo iba꞉te ibino baida꞉mo Ya꞉suku umiya꞉, huiyatiya Godote ibino ukui ba atulatelelame iba꞉te kemalagidolutiya꞉ha꞉ ba꞉moe ba꞉ Ya꞉sutila.
LUK 24:17 Ba꞉bene Ya꞉suti ibi netewapi na꞉goelamiya꞉, “La꞉ gabo tetelo ba tuta bada tabo ka꞉ga꞉lutama?” Ba꞉bema꞉ ibino dopote menemenema꞉ eda꞉halamete ba꞉ dito la꞉mota꞉nuya꞉.
LUK 24:18 Ibi ipuwalo etoeno mahilo Kolopasitila, ebete Ya꞉suku kapela hopo dubumu midilo na꞉goiya꞉, “Aeno Yelusalema habalo demedehona, ba꞉bi kapela tawakalubi ipuwalo ama꞉ kapiyate iya꞉tawaha꞉ma꞉ kediuta ba꞉moi hegelalo atamo bada komate dikulihui?”
LUK 24:19 Ya꞉suti huiyatiya na꞉goiya꞉, “Bada komokomola꞉ka꞉?” Ba꞉bene iba꞉te na꞉huiyuya꞉, “Nasaletenapi Ya꞉sutamo dikulihui ba꞉bi komo. Ebete Godokono holoholo hapulu ebeno ukui hawakalimidawama꞉ ba eda꞉na tabo olamagi ipuwalo ba꞉gala ododili ipuwalo helonomoma꞉ eda꞉nami. Ba꞉moe komo tawakalubi hiliyonomate hibinomolo umiya꞉,
LUK 24:20 huiyatiya Godotamo hawa꞉goeno ikamehopino watowatopi ba꞉gala aeno komo koko dubu, iba꞉te ebe gabomanino kokotamo dito ihatiya꞉, iba꞉te ebeno komo ba anagilameleme hoea꞉mo koemema꞉, ba꞉bene iba꞉te ebe keha pihigamo pihomotete ikoko ba꞉bo alukulimiya꞉.
LUK 24:21 Dopamo a ba꞉ma ka꞉na emalagidolonamima꞉, ebe ba꞉ Isalaela tawakalubino ka꞉ka꞉ mula꞉lelamedawala, huiyatiya ebete da꞉hoi ba꞉be hegelane tupuimiti ba꞉mamo puluhuku ka꞉lo ba꞉ netewa-kapiya hegelama꞉ edita.
LUK 24:22 Ba꞉bene aeno kapiyuimi ipuwalo komo kamenakamenatamo ka꞉lo duiduiyanomolo duluhukaka, ba꞉be komote a na꞉hanohanuia꞉ma꞉ka.
LUK 24:23 Iba꞉te bobo habamo da꞉tolama꞉ka Ya꞉sukunu ape kanuma꞉kaha꞉, ba꞉bema꞉ iba꞉te atamo gala kapelamete na꞉pega꞉laka, ‘A Godokono nopopi a꞉nulamema꞉. Iba꞉te na꞉ga꞉la Ya꞉suku hoene a꞉mahigaka!’
LUK 24:24 Ba꞉bene aeno kapiyuimi ipuwalo komopa꞉te bobo habamo da꞉tolama꞉ka, ale kamenakamenagodone dulia꞉kama꞉ ba꞉bi komo iba꞉te ba꞉ ba꞉ba ka꞉na nulama꞉ka, huiyatiya Ya꞉suku kanuma꞉kaha꞉.”
LUK 24:25 Ba꞉bene Ya꞉suti ibi netewapa꞉tamo na꞉goiya꞉, “La꞉eno iya꞉tawa lawe komo hibiha꞉, daedae gugudi keba ka꞉nala꞉ka꞉ ba꞉ba ka꞉nala, mabu Godokono ukui hawakalimipa꞉te dopamo da꞉ga꞉lanakui, la꞉ ibino hiya꞉hiya꞉ tabo hibima꞉ kamidilinaha꞉!
LUK 24:26 Ba꞉moe konomo komo la꞉ iya꞉tawahala꞉ka꞉? Godokono ubi komodo ebeno Oemedawa Kelisote dopamo koko temeteme uwatete, ba꞉bene ebete ebeno A꞉la꞉minanomo Habamo kona꞉pa꞉gama꞉ne.”
LUK 24:27 Ba꞉bene Godokono Bukalo da꞉pola꞉na Kelisokono hibi komo hawakalimima꞉, Ya꞉suti ba꞉bi hiliyonomo komokomo ba꞉bo iya꞉tulamiya꞉, Mosesete Bukamo da꞉miya꞉tiya꞉ ba꞉ba tetene tupuimiti Godokono ukui hawakalimipa꞉te da꞉miya꞉tiya꞉ ba꞉bamo nuluhuku.
LUK 24:28 Ba꞉bene da꞉gapogapohoniya꞉ iba꞉te ibino habamo ikulima꞉ ba tolamena, Ya꞉suti eta habamo kotonama꞉ da꞉goeniya꞉,
LUK 24:29 huiyatiya iba꞉te ebe duhiminate na꞉ga꞉lameniya꞉, “Wadiyala ama꞉ ago na꞉pa꞉, mabu hegela ba꞉ na꞉nihitigana ba꞉gala tiyolo kuduma꞉ne.” Ba꞉bema꞉ Ya꞉suti ibino genamamo tonate dito nodoloniya꞉.
LUK 24:30 Iba꞉te kapimilo baa꞉ ba nahana Ya꞉suti baa꞉ lawenate kalakala tabo Godotamo goenate, ba꞉bene baa꞉ wakalaminate ibi netewapa꞉tamo dito ikalameniya꞉.
LUK 24:31 Ba꞉bema꞉ Godote ibino baidi pahaa꞉midalelamenate iba꞉te Ya꞉sukunu komo ba꞉bo iya꞉tawaniya꞉, huiyatiya ba꞉ba tetenomolo Ya꞉suti ibino holoholo hapuni ba꞉ dito alatidiniya꞉.
LUK 24:32 Ba꞉bene ibi netewapa꞉te tabo ba꞉ma ka꞉na ga꞉laniya꞉, “Hibila, gabo tetelo ebete ago tabo ba olamaginape Godokono Bukoeno komokomo atamo da꞉hawakalilama꞉ka, ba꞉ba tetelo aeno tepo ipuwalo Godokono koete wamotitaka!”
LUK 24:33 Ba꞉ba tetenomolo ibi netewapa꞉te Yelusalema ko habamo gala na꞉kawilaniya꞉, ba꞉bolo Ya꞉sukunu 11 ta꞉matapi ba꞉gala puya꞉te iba꞉go da꞉pola꞉nuya꞉, iba꞉te ibi hiliyonomo ba꞉bo nulameniya꞉.
LUK 24:34 Ba꞉bene Ya꞉suku ta꞉matapa꞉te ibi netewapa꞉tamo na꞉ga꞉laniya꞉, “Hibila, Kodawa Ya꞉suti hoene a꞉mahigaka! Ebete Saimonotamo hibilo uluhukaka!”
LUK 24:35 Ba꞉bene ibi netewapa꞉te gabo tetelo bada komo dumiya꞉ ba꞉gala Ya꞉suti iba꞉tamo baa꞉ ba wakalamina iba꞉te ebeno komo diya꞉tawaniya꞉, ba꞉bi komokomo iba꞉te komo ta꞉matapi ba꞉bo kiyahalameniya꞉.
LUK 24:36 Iba꞉te ba꞉be tabo ba꞉ma ka꞉na ba ga꞉lana Ya꞉suti iba꞉tamo puluhukunate ibino tetenomolo putinate ibi na꞉goelameniya꞉, “Godokono kalakalate la꞉godolo nitanana.”
LUK 24:37 Ba꞉bema꞉ iba꞉te la꞉wa꞉hanate konomamo toletolehoniya꞉ mabu iba꞉te nemalagidoloniya꞉ Ya꞉suku ba꞉ gubalila.
LUK 24:38 Ebete huiyatiya iba꞉tamo na꞉goeniya꞉, “Keka꞉ mabu la꞉le toletoleholo ukui bilibilima꞉ deda꞉hanama? Hibima꞉ midiha꞉ komote la꞉eno tepo ipuwane badama꞉ kuluhuku?
LUK 24:39 Wadiyala la꞉ naeno kokoto ba꞉gala nato nulama꞉la꞉. Na ba꞉ Ya꞉sutila. La꞉ na na꞉pologihona꞉la꞉, na gubaliha꞉, na lumagila. La꞉le na nunamenamata, na katena꞉goenola ba꞉gala gohagoenola.”
LUK 24:40 Ebete ba꞉be tabo goenate ebeno kokoto ba꞉gala nato iba꞉tamo ba꞉bo mutuilameniya꞉,
LUK 24:41 ba꞉bene iba꞉te konomamo kalakalahaniya꞉, huiyatiya ukui bilibilima꞉ ba eda꞉hana ibino hibima꞉ midiha꞉ komote kawiboholameniya꞉ha꞉. Ba꞉bema꞉ Ya꞉suti ibi na꞉goelameniya꞉, “La꞉godolo eta ilina ba꞉kitana nale konama꞉?”
LUK 24:42 ba꞉bene iba꞉te daha okalimi ebetamo ikamenate,
LUK 24:43 ebete lawenate ibino holoholo hapulu ba꞉ dito naniya꞉.
LUK 24:44 Ba꞉ba tetelo Ya꞉suti iba꞉tamo na꞉goeniya꞉, “Nale la꞉go ba emedena la꞉tamo dolamaginakuimo, ba꞉moe ba꞉be komola. Na dopamo ba꞉ma ka꞉na a꞉goimo, Godokono Bukate naeno komoma꞉ da꞉goena ba꞉bi hiliyonomo komate kikulihoma꞉na꞉, iyo, Mosesete Tutumu Tabo Bukamo da꞉miya꞉tiya꞉, ba꞉gala Da꞉ibiditi Sam Ohale Bukamo da꞉miya꞉tiya꞉, ba꞉gala komo Godokono ukui hawakalimipa꞉te da꞉miya꞉tiya꞉ ba꞉bi hiliyonomo tabo komate hibinomoma꞉ keda꞉hama꞉na꞉.”
LUK 24:45 Ba꞉bene iba꞉te Godokono Bukoeno hiliyonomo komo hidonomamo kemalagidolenama꞉ ebete ibino ukui ba tuputupuilamelelamena
LUK 24:46 ibi na꞉kiyalameniya꞉, “Godokono Bukalo tabo ba꞉ma ka꞉na itana, ebeno Oemedawa Kelisote koko temeteme uwatete ba꞉bo kohoema꞉ne, huiyatiya netewa-kapiya hegelalo hoene gala kakamahigama꞉ne.
LUK 24:47 Ba꞉gala ba꞉moe Hido Tabote Yelusalema habane tupuimiti ba꞉moe hopo konomamo ba꞉ma ka꞉na kotoma꞉ne, Godokono tabo olamagimipa꞉te naeno mahilamo tawakalubi konikiyahalamema꞉na꞉, iba꞉te ibino kubane dohobila꞉hamena꞉ Godote ibino kuba ba꞉bo kadodoholelamema꞉ne.
LUK 24:48 Ba꞉ hibila, la꞉le ba꞉moi komokomo hidonomamo ulameholimata, ba꞉bema꞉ la꞉ naeno tabo olamagimipima꞉ keda꞉hama꞉nemata.
LUK 24:49 Ba꞉gala eta komo. Naeno Nabiwiti hibinomolo da꞉goiya꞉ la꞉ ba꞉be komo kumima꞉nemata, nale ebeno helo la꞉tamo kopoemema꞉nemo, ba꞉bema꞉ wadiyala la꞉ Yelusalema ko habalo ba꞉be komo na꞉latimiya꞉la꞉, ba꞉bolo Godokono Helote Hunu Habane la꞉tamo kopihitigama꞉ne.”
LUK 24:50 Ba꞉ba tetelo Ya꞉suti ibi Yelusalema ko habane magatalete iba꞉te Betani haba tama꞉mo da꞉nikuliya꞉, ebete ebeno kokoto wadiya꞉paa꞉latelelo Godoko ba꞉bo kiyamiya꞉ ebete ibi hidonomamo kowalubilinama꞉.
LUK 24:51 Ebete ba꞉be tabo ba goita, Godote ebe pelawete Hunu Habamo ba꞉bo adipatiya꞉.
LUK 24:52 Ba꞉bema꞉ iba꞉te ba꞉bolo Ya꞉suku adikumiti, Yelusalema ko habamo ko kalakalago na꞉katolamiya꞉,
LUK 24:53 ba꞉bene iba꞉te ba꞉be habalo ba emedena komo hiliyonomo hegelalo Godoko Adikumino Hiya꞉ Genamamo da꞉nalehawaminanakui, iba꞉te Godokono mahilo hunamo ba꞉bo adipatenakuya꞉.
JOH 1:1 Godote ba꞉moe hopo ododihino dopamo Tabote emedenami, ebete Godokoba꞉ ba emedena ebe ba꞉gala Godoko ibi ba꞉ kapiyanomola,
JOH 1:2 ba꞉bema꞉ ba꞉moe hopo tupuimihino Tabote Godokoba꞉ kapimilo ba꞉ba ka꞉na emedenama꞉.
JOH 1:3 Ba꞉bene Godote ba꞉moe hopoeno ilina ba꞉gala alomoeno ilina, hiya꞉hiya꞉ gobogobo ba꞉gala tawakalubi, ebete ibi hiliyonomo Tabokono heloamo ododiliya꞉, ba꞉bema꞉ ibi hiliyonomo ipuwalo eta kapiya komote eta dawoeno heloamo kuluhukuya꞉ha꞉.
JOH 1:4 Ba꞉ba tetelo hibi ka꞉ka꞉te Tabogodolo itanami, ba꞉bene ba꞉moe ka꞉ka꞉te aloma꞉ eda꞉te hopo tawakalubi hiliyonomo ba꞉bo a꞉la꞉minaliya꞉.
JOH 1:5 Ba꞉be mabuma꞉ ba꞉moe alote du ipuwalo ba꞉la꞉minana, duino helote ha꞉gumi modoboha꞉.
JOH 1:6 Ba꞉bene Godokono oemedawa Yonete a꞉puluhukuya꞉,
JOH 1:7 ebete tawakalubi hiliyonomatamo ba꞉be aloeno komo ba pehawakalimi iba꞉te ebeno tabo uliti hibima꞉ ba꞉bo komidima꞉.
JOH 1:8 Yonete alo ba꞉moe hopamo kadahiya꞉ha꞉, huiyatiya ebete tawakaluba꞉tamo aloeno komo kopehawakalimima꞉ ba꞉bema꞉ piya꞉.
JOH 1:9 Yonete da꞉pehawakalimiya꞉ ba꞉be alo ba꞉ Godokono hibi alola, ba꞉be alote hopo habanapi hiliyonomo ba꞉la꞉minalena.
JOH 1:10 Ba꞉ hibila, Godote ba꞉moe hopo Tabokono heloamo ododiya꞉, huiyatiya Tabote pete ba꞉moe hopolo ba pemedena hopo tawakaluba꞉te ebeno komo kiya꞉tawahuya꞉ha꞉,
JOH 1:11 iyo, ebete ebeno hoponomamo piya꞉ huiyatiya ebeno tawakaluba꞉te ebe kalakalago kalawiya꞉ha꞉.
JOH 1:12 Huiyatiya numa꞉la꞉, kebe tawakaluba꞉te ebe hibinomolo da꞉lawiya꞉ ba꞉gala ebe hibima꞉ da꞉midiya꞉, ebete iba꞉tamo helo ikalamiya꞉ iba꞉te Godokono gugudima꞉ keda꞉hanama꞉.
JOH 1:13 Ba꞉moi guguda꞉te eta dubuino ubi komamo ba꞉gala kateneno heloamo kahawakalahaliya꞉ha꞉, huiyatiya iba꞉te Godokono helo kapiyamo hawakalahaliya꞉.
JOH 1:14 Ba꞉bene Tabote lumagino apa꞉mo pete ago ba pemedena ale ebeno alo konomo ba꞉bo umiya꞉ma꞉, ba꞉bako alo Nabiwi Godote ebeno kapiya Gudutamo ikamiya꞉. Ebeno aloeno a꞉la꞉mina ipuwalo ale ba꞉moe komo bumiya꞉ma꞉, ebe Godokono malemale komo ba꞉gala hibi komo tabonomola.
JOH 1:15 Ba꞉bene Yonete ebeno tabo madodo hunamo adipatelo Godokono Guduino komo ba꞉ma ka꞉na hawakalimiya꞉, “Nale dopamo kebe dawoeno komoma꞉ kolamagimo, ba꞉moe ba꞉betela. Nale ebeno komoma꞉ ba꞉ma ka꞉na goimo, ebete naeno gala hapuni ba꞉pena, ba꞉gala Godote ebetamo dikamiya꞉ ba꞉be helo konomote naeno helo na꞉gogolona, mabu nale ba꞉moe hopamo hawakalaheno ebete dopamo nemedenami.”
JOH 1:16 Ebe malemale tabonomola, ba꞉bema꞉ ebeno malemale komodo ebete a hiliyonomatamo ebeno hidohido komo gala ikaa꞉menakui, gala ikaa꞉menakui, ebete ba꞉ba ka꞉na ewagelenami.
JOH 1:17 Ba꞉ hibila, Godote ebeno Tutumu Tabo tawakaluba꞉tamo Moseseko ipuwado ikalamiya꞉, huiyatiya ebete ebeno malemale komo ba꞉gala hibi komo Ya꞉su Kelisogodone a꞉hawakalilamiya꞉.
JOH 1:18 Eta lumagiti Godokono holoholo dopamo kuminakuiha꞉, huiyatiya Godokono Gudu kapiyate ebeno Nabiwino komo tawakaluba꞉tamo a꞉pehawakalimiya꞉, mabu Nabiwi Gudu ibi ba꞉ kapiyanomola ba꞉gala Guduti Nabiwino holoholo hapulu bemedena.
JOH 1:19 Ba꞉ba tetelo Yelusalema ko habalo demedehonama꞉, ba꞉bi Yu watowatopa꞉te komo Godotamo hawa꞉goeno ikamehopi dubu ba꞉gala Libai gu dubu Yonetamo ba꞉bo noelamiya꞉ ebeno hibi komo konumima꞉. Ba꞉bene iba꞉te Yonetamo pelamete ebe na꞉palatediya꞉, “Ama꞉ potela꞉ka꞉? Amia꞉no hibi komo atamo na꞉hawakalima꞉.”
JOH 1:20 Yonete ibino tabo huiyama꞉ ubiha꞉ma꞉ kediya꞉ha꞉, huiyatiya ebete kalakalago ibi hawakala na꞉goelamiya꞉, “Na Godokono Oemedawa Kelisoteha꞉!”
JOH 1:21 Ba꞉bema꞉ iba꞉te ebe gala na꞉kalatediya꞉, “Ama꞉ potela꞉ka꞉? Ama꞉ Godokono ukui hawakalimidawa Elayatela꞉ka꞉, a hopo habanapa꞉tamo gala da꞉kapuluhukui?” Yonete ibino tabo ba huiya na꞉goiya꞉, “Ao, na ebeteha꞉.” Ba꞉bema꞉ iba꞉te ebe gala na꞉kalatediya꞉, “Mosesete eta lumagino pe komoma꞉ dolamagiya꞉, ama꞉ ba꞉be Godokono Ukui Hawakalimidawa etala꞉ka꞉?” Yonete na꞉huiyuya꞉, “Ao, na ebeteha꞉.”
JOH 1:22 Ba꞉bene iba꞉te ebetamo gala na꞉kaga꞉luya꞉, “A puya꞉te da꞉poea꞉ma꞉, ale iba꞉tamo huiya tabo katama꞉, wadiyala amia꞉no komo na꞉hawakalima꞉, ama꞉ potela꞉ka꞉?”
JOH 1:23 Yonete ibino tabo ba huiya na꞉goiya꞉, “Godokono ukui hawakalimidawa Aisayate naeno komo hawakalimima꞉ tabo ba꞉ma ka꞉na goiya꞉, ‘Lumagiti dito hopolo tabo ba꞉ma ka꞉na ibulu kopegoema꞉ne, ‘Kodawoeno gabo na꞉tuputupuima꞉la꞉.’ ’”
JOH 1:24 Ba꞉ba tetelo kebe Yu watowatopa꞉te ba꞉bi dubu Yonetamo da꞉poelamiya꞉, ibi ba꞉ Pa꞉lisi kapiyuimipila,
JOH 1:25 ba꞉bema꞉ ba꞉bi dubate ebe gala na꞉kaga꞉lamiya꞉, “Ama꞉le a꞉gaa꞉ta ama꞉ Kelisoteha꞉, ba꞉gala ama꞉ Elayateha꞉, ba꞉gala Mosesete Godokono eta okodawoeno pe komoma꞉ dolamagiya꞉ ama꞉ ebeteha꞉. Ba꞉bema꞉ mabu keka꞉ ama꞉le tawakalubi beyamo da꞉wadulatelenaka?”
JOH 1:26 Yonete ibino tabo ba huiya na꞉goiya꞉, “Hibila, nale tawakalubi beyamo a꞉wadulatelenakomo, huiyatiya la꞉ ipuwalo demedena ba꞉be eta lumagino komo la꞉ hibilo iya꞉tawaha꞉, ebe ba꞉ aeno Kodawala.
JOH 1:27 Ebete naeno gala hapuni ba꞉pena, huiyatiya na hidoenoha꞉ nale ebeno nato ukulalemema꞉.”
JOH 1:28 Yonete Yodane Tuli hapulu tawakalubi beyamo da꞉wadulatelenakui, ebete ba꞉be hopoeno Betani habalo ba emedena ba꞉moe komote ebetamo ba꞉bo uluhukuya꞉.
JOH 1:29 Ba꞉bene eta hegelalo Ya꞉suti ebetamo ba pita, Yonete ebe umiti komopa꞉tamo na꞉goiya꞉, “Numa꞉la꞉, Godokono Sipi-goe Deha꞉potote pita, ebete hopo tawakalubino kuba ododili huiya uwatelamete ebeno hawa꞉mo kegebolelamema꞉ne.
JOH 1:30 Nale dopamo la꞉tamo kebe dawoeno komoma꞉ kolamagimo, ba꞉moe ba꞉betela. Nale ebeno komoma꞉ ba꞉ma ka꞉na goimo, eta dubuti naeno gala hapuni ba꞉pena, huiyatiya ebeno helo konomola, ebete naeno helo na꞉gogolona mabu nale ba꞉moe hopamo hawakalaheno ebete dopamo nemedenami.
JOH 1:31 Iyo, nale ebe umihino dopamo ebeno hibi komo na iya꞉tawaha꞉, huiyatiya ebeno komo nale Isalaela tawakaluba꞉tamo hawakalimima꞉ piya꞉mo, ba꞉gala nale tawakalubi beyamo ba꞉bema꞉ wadulatelenakomo.”
JOH 1:32 Ba꞉bene Yonete Ya꞉sukunu komo hawakalimilo na꞉goiya꞉, “Nale ebeno komo ba꞉ma ka꞉na umimo, Godokono Gobogobote Hunu Habane ebetamo gimai holamo pihitigutalo umimo, ebete ebegodolo kopemedenama꞉.
JOH 1:33 Nale ba꞉be komo umihino dopamo Ya꞉sukunu hibi komo iya꞉tawaha꞉, huiyatiya na tawakalubi beyamo wadulatelema꞉ da꞉poenamiya꞉ ba꞉be Kodawate natamo na꞉goi, ‘Naeno Gobogobote pogodolo kopemedenama꞉ ebetamo da꞉pihitigamene, ama꞉le ba꞉be lumagi umiti kiya꞉tawama꞉na꞉ta, ebe ba꞉ naeno Gobogobamo tawakalubi wadulateledawala.’
JOH 1:34 Ba꞉ hibila, ba꞉be komo naeno baida꞉mo umimo, nale ebeno komo ba꞉bema꞉ hawakalimimo, ebe ba꞉ Godokono Gudula.”
JOH 1:35 Eta hegelalo Yonete ebe ta꞉matapi netewapa꞉go da꞉la꞉nuya꞉,
JOH 1:36 ba꞉ba tetelo Ya꞉suti ibi tamedo ba petonato, Yonete ebe umiti na꞉goiya꞉, “Numa꞉la꞉, ba꞉moe ba꞉ Godokono Sipi-goe Deha꞉potola, ebete tawakalubino kuba ododili huiya kuwatelamema꞉ne.”
JOH 1:37 Yoneko ta꞉matapi netewapa꞉te ba꞉be tabo duliya꞉ iba꞉te ebe miya꞉pate Ya꞉suku ba꞉bo ta꞉matuya꞉,
JOH 1:38 ba꞉bene Ya꞉suti ohobigate ibi ulamelo na꞉kiyalamiya꞉, “La꞉eno ubi badala꞉ka꞉?” Iba꞉te ebeno tabo ba huiya ebe na꞉kiyamiya꞉, “Iya꞉tulamedawa, ale ama꞉ La꞉baima꞉ ka꞉ma꞉ta, ba꞉bema꞉ ama꞉ kebolo kemedeona, a ubila ba꞉be haba umi.” Buka ka꞉lamiholedawa, wadiyala ama꞉ ba꞉moe komo niya꞉tawa, Yunapa꞉te ibino tabamo eta hido iya꞉tulamedawa La꞉baima꞉ ka꞉minaka.
JOH 1:39 Ba꞉bene Ya꞉suti iba꞉tamo na꞉huiyuya꞉, “Kubahenola, la꞉ pete na꞉puma꞉la꞉.” Ba꞉bene hegelate nanekela꞉mo da꞉nihitigatepaniya꞉, 4 koloko keba ka꞉nala꞉ka꞉ ba꞉bako tetelo ba꞉bi dubu netewapa꞉te Ya꞉sukuba꞉ tonate, ebeno emede haba numinate kapiya dulu eba꞉go ba꞉bo nelaniya꞉.
JOH 1:40 Ba꞉bi dubu netewapi ipuwalo etoeno mahilo A꞉ndulutila, ebe ba꞉ Saimono Pitakono ekawila.
JOH 1:41 Ba꞉bene duiduiyanomolo A꞉nduluti tote ebeno naniwi Saimonoko da꞉numiya꞉ ebe na꞉nikiyamiya꞉, “A Mesayako hibinomolo umima꞉!” Buka ka꞉lamiholedawa, wadiyala ama꞉ ba꞉moe komo niya꞉tawa, Yunapa꞉te Godokono Oemedawa Kelisoko ibino tabamo Mesayama꞉ ka꞉minaka.
JOH 1:42 Ba꞉bene A꞉nduluti ebeno naniwi Ya꞉sutamo da꞉magatuya꞉, Ya꞉suti ebe umiti ebetamo na꞉goiya꞉, “Amia꞉no mahilo ba꞉ Saimonotela, ama꞉ Yonekono gudulata, huiyatiya tawakaluba꞉te ama꞉ uli mahilo Kipasema꞉ koka꞉mima꞉na꞉ta.” Kipase mahiloeno ipuwa nitana ‘Nakolala,’ ba꞉gala Gulikinapino tabamo iba꞉te ba꞉be mahilo Pitama꞉ ka꞉minaka.
JOH 1:43 Ba꞉bene eta hegelalo Ya꞉suti Ga꞉lili hopamo kotoma꞉ ubi dihatiya꞉, ba꞉ba tetelo ebete Pilipiko umiti ebe na꞉kiyamiya꞉, “Wadiyala ama꞉ na na꞉ta꞉mahena꞉.”
JOH 1:44 Ba꞉be dubu Pilipiko ebe ba꞉ Betasaida habanapila, ba꞉gala A꞉nduluku Saimonokoba꞉ iba꞉te ba꞉be atu habalo emedenama꞉.
JOH 1:45 Ba꞉bene Pilipiti Nata꞉niyoloko numiti ebe na꞉nikiyamiya꞉, “Mosesete Godokono Tutumu Bukalo pokono komo ka꞉hawakalimiya꞉, ale ba꞉be Kodawa hibinomolo umima꞉. Iyo, Godokono komo ukui hawakalimipa꞉te ebeno Bukalo atu lumagino komoma꞉ tabo gala da꞉kahawakalimiya꞉, ba꞉moe ba꞉betela. Ebe ba꞉ Ya꞉suti Nasaletenapila, Yausepekono gudula.”
JOH 1:46 Nata꞉niyolote huiyatiya na꞉goiya꞉, “Nasalete haba hido habaha꞉, ba꞉bema꞉ ba꞉be habane bada hido komote na꞉kuluhukumini?” Pilipiti ebe na꞉kiyamiya꞉, “Wadiyala ama꞉ pete ebeno komo na꞉puma꞉.”
JOH 1:47 Ba꞉bene Nata꞉niyolote ebetamo da꞉puluhukuya꞉, Ya꞉suti ebe umiti ebeno komoma꞉ na꞉goiya꞉, “Ba꞉moe Isalaela hoponapi dubu ba꞉ hibi lumagila. Ebeno tepo ipuwalo eta ha꞉da amiho komo kitanaha꞉, puliyanomola.”
JOH 1:48 Nata꞉niyolote ebe nalatediya꞉, “Mabu keka꞉ ama꞉ naeno tepo ipuwoeno komo diya꞉tawuta?” Ba꞉bene Ya꞉suti na꞉huiyuya꞉, “Pilipiti ama꞉ mamo pema꞉ kiyameheno ba꞉gala nale ama꞉go alugaheno, ama꞉le gao kehoeno dedela ipuwalo da꞉lutaka, nale ama꞉ Godokono Gobogoboeno heloamo ya꞉lo uma꞉kamata.”
JOH 1:49 Ba꞉ba tetelo Nata꞉niyolote ebetamo na꞉goiya꞉, “Iya꞉tulamedawa, hibila ama꞉ ba꞉ Godokono Gudulata! Ama꞉ Isalaela tawakalubino Ko Gawadubulata!”
JOH 1:50 Ba꞉bene Ya꞉suti ebetamo na꞉goiya꞉, “Nale ama꞉ gao kehoeno dedelalo duma꞉kama, ba꞉be mabuma꞉ ama꞉le na hibima꞉ ka꞉midiniuta? Ba꞉ hibila, ba꞉moe komo ko komoha꞉, huiyatiya ama꞉ galane nagodolo kokonomo hanohano komo kulamema꞉na꞉ta.
JOH 1:51 Na ama꞉tamo hibi tabonomo begoemo, Godote ebeno Hunu Haba a꞉hiya꞉midutalo ama꞉ kumima꞉na꞉ta, iyo, Tawakalubino Naniwiti wakolama꞉ eda꞉te, Godokono nopopa꞉te ba꞉be wakolado Hunu Habamo kanalehawamina, kapepalaga, ba꞉ba ka꞉na ba ewagele, ama꞉le ibi ba꞉bo kulamema꞉na꞉ta.”
JOH 2:1 Komo netewa hegelate da꞉petohuya꞉, ba꞉ba tetelo Ga꞉lili hopoeno Ka꞉ina habalo eta dubuti uli kamena lawe poko bododitiya꞉. Ba꞉be poko ipuwalo Ya꞉sukunu menokote na꞉lutiya꞉,
JOH 2:2 ba꞉gala Ya꞉suti ebe ta꞉matapa꞉go atumu ba꞉bolo na꞉kapola꞉nuya꞉ mabu poko namutudawate ibi a꞉kiyalamiya꞉ iba꞉te komo tawakaluba꞉go baa꞉ kopenahama꞉.
JOH 2:3 Ba꞉bene poko ododi ipuwalo hido gao beyate da꞉wibuya꞉, ba꞉ba tetelo Ya꞉sukunu menokote ebe na꞉kiyamiya꞉, “Tawakaluba꞉te hido gao beya da꞉niha ba꞉ tiyonomo a꞉hawamina.”
JOH 2:4 Ba꞉bene Ya꞉suti ebeno menokotamo na꞉goiya꞉, “Adi, nale kebe komo ododima꞉ ama꞉le na akapikiyanama꞉la꞉, mabu naeno helo hawakalimi tete hibilo kapeha꞉, ba꞉be tetete uluhukuma꞉ Godote ha꞉kiya na kokiyanamema꞉ne.”
JOH 2:5 Ba꞉ba tetelo ebeno menokote ohobigate poko namutudawoeno genama okopa꞉tamo na꞉goiya꞉, “Ebete kebe komo ododima꞉ la꞉ da꞉goelamemena꞉, wadiyala la꞉ ba꞉be komo dito nododiya꞉la꞉.”
JOH 2:6 Ba꞉ba tetelo ba꞉be genamalo sikisi koko beya upate na꞉pola꞉nuya꞉, ba꞉moi upa tawakaluba꞉te nakolamo ododiliya꞉ ba꞉gala ibi ipuwalo komo 80 litala ba꞉gala komo 120 litala. Ba꞉moi upoeno komo ba꞉ma ka꞉na itanuya꞉, niho beyaha꞉ huiyatiya Yu tawakalubino ododili ipuwalo iba꞉te Godokono eta tutumamo kopapamila꞉halema꞉ ibino kokotoeno dalowa꞉ ba꞉makomako upoeno beyamo ukulalenakuya꞉, ibino iniwala꞉te ibi diya꞉tulamiya꞉ ba꞉ba ka꞉na.
JOH 2:7 Ba꞉bema꞉ Ya꞉suti genama okopi na꞉goelamiya꞉, “La꞉ ba꞉moi upa beyanomamo na꞉tabuilama꞉la꞉,” ba꞉bene iba꞉te hibinomolo da꞉tabuilamiya꞉,
JOH 2:8 Ya꞉suti ibi ba꞉bo goelamiya꞉ iba꞉te kalila꞉mo iyapote poko namutudawatamo konikamema꞉. Ba꞉bene iba꞉te tolamete poko namutudawatamo da꞉nikamiya꞉,
JOH 2:9 ba꞉ba tetelo ebete niti ebeno ukuilo golanomo gao beyama꞉ goiya꞉. Ba꞉be beyate hidonomo gao beyama꞉ keba ka꞉na kediya꞉ genama umi okopa꞉te iya꞉tawahuya꞉, huiyatiya poko namutudawate ba꞉be komo iya꞉tawaheno, ebete uli kamena da꞉lawitiya꞉ ba꞉be dubu ebetamo ka꞉miti
JOH 2:10 ebe na꞉goemiya꞉, “Numa꞉, aeno ododi komo ba꞉ma ka꞉nala, poko ododi tetelo ale tawakaluba꞉tamo hidonomo gola gao beya dopamo ikalamenakoma꞉, iyo, iba꞉te ba꞉be hido gola beya da꞉hawaminamena꞉, ba꞉bene galane ale golaha꞉dopo beya iba꞉tamo ba꞉bo kikalamema꞉nema꞉. Huiyatiya ama꞉ ba꞉ba ka꞉na kododiha꞉, ama꞉ poko kuititi tetelo ba꞉moe golanomo gao beya tawakaluba꞉tamo ikalamitata!”
JOH 2:11 Ba꞉bema꞉ Ga꞉lili hopoeno Ka꞉ina habalo Godokono helo hawakalimima꞉ Ya꞉suti ba꞉moe ebeno dopo hanohano komo bododiya꞉. Ba꞉ba tetelo ebeno ta꞉matapa꞉te ebeno konomo helo dumiya꞉, iba꞉te ebe hibima꞉ ba꞉bo midiya꞉.
JOH 2:12 Ba꞉bene ba꞉moe komo da꞉wibuya꞉ Ya꞉suku ba꞉gala ebeno ta꞉matapi, iba꞉te ebeno menokago ba꞉gala ekaka꞉go Kapeniyama habamo tolamete tete nanekele ba꞉bo nemediya꞉.
JOH 2:13 Mabu Yunapino Adaguila꞉ Poko ododi tete da꞉tatalinapiya꞉, ba꞉bema꞉ Ya꞉suti Yelusalema ko habamo dito tuya꞉.
JOH 2:14 Ba꞉bene ebete Godoko Adikumino Hiya꞉ Genamamo tote, ba꞉be genamalo tawakaluba꞉te kau-goegoe ba꞉gala sipi-goegoe ba꞉gala gimai holahola ba kolowamiholita ba꞉bo nulamiya꞉, ba꞉gala ba꞉be atu tetelo tawakaluba꞉te patapatalo ahiditi komopino mani doweheta꞉midahalitiya꞉ ebete ibi ba꞉bo kanulamiya꞉.
JOH 2:15 Ba꞉moe mabuma꞉ Ya꞉suti hale uwatete giya꞉pa꞉pa꞉ ododiti ebete ba꞉bi goegoe Godoko Adikumino Genamoeno kala ipuwane helonomamo ba꞉bo ta꞉malateliya꞉, ba꞉gala ebete mani oweheta꞉midahalepino patapata ohoba꞉midahalelamete tawakalubino mani ba penegudilame hiya꞉hiya꞉ ba꞉bo petohuya꞉.
JOH 2:16 Ba꞉bene ebete gimai holahola kolowamipi ba kiyahalame na꞉goiya꞉, “Ba꞉moi ilina ba꞉moe genamane nuluhukulatela꞉la꞉. Naeno Nabiwino Genama talonala, ba꞉bema꞉ la꞉le kolowami habama꞉ akamida꞉la꞉!”
JOH 2:17 Ya꞉suti ba꞉moe komo dododiya꞉ ebeno ta꞉matapa꞉te Godokono Bukoeno eta tabo ba꞉bo emalagidoluya꞉, ba꞉be tabote ba꞉ma ka꞉na itana, “Amia꞉no Talona Genama mabuma꞉ naeno tepo ipuwoeno helote koenomoma꞉ eda꞉na.”
JOH 2:18 Ba꞉ba tetelo komo Yu watowatopa꞉te Ya꞉suku na꞉ga꞉lamiya꞉, “Ama꞉ Godokono helo hawakalimima꞉ aeno holoholo hapulu hanohano komo nododa꞉, ba꞉bema꞉ a kiya꞉tawahama꞉nema꞉ ama꞉le Godokono Genamalo dododa꞉ ba꞉be komo amia꞉no heloamo kododiha꞉, huiyatiya Godokono heloamo ododa꞉ta.”
JOH 2:19 Ya꞉suti ibino tabo ba huiya na꞉goiya꞉, “Kubahenola, la꞉le ba꞉moe Godoko Adikumino Genama danabulimima, huiyatiya nale netewa-kapiya hegelalo gala kaketema꞉nemo.”
JOH 2:20 Yu watowatopa꞉te ebetamo na꞉ga꞉luya꞉, “Ama꞉ na꞉kemalagidoluta, amia꞉no helo modobola ba꞉moe konomo genama netewa-kapiya hegelalo ketema꞉? A꞉iye! Ba꞉moe genama aeno naba꞉te 46 gogo ipuwalo etenama꞉!”
JOH 2:21 Huiyatiya Ya꞉suti kebe tabo da꞉goiya꞉ ba꞉ ebeno apeno komoma꞉ goiya꞉.
JOH 2:22 Ba꞉bema꞉ galane tetelo ebete hoe ipuwane da꞉kamahiguya꞉, ebeno ta꞉matapa꞉te ba꞉moe tabo komo ba꞉bo emalagidoluya꞉, ba꞉bene Godote ebeno komoma꞉ ebeno Bukalo kebe komo ya꞉lo da꞉hawakalimiya꞉, iba꞉te ba꞉be komo hidamo lawete hibima꞉ ba midi Ya꞉sukunu tabo komo atumu hibima꞉ ba꞉bo kamidiya꞉.
JOH 2:23 Ba꞉bene Adaguila꞉ Poko tetelo Ya꞉suti Godokono helo hawakalimima꞉ kebe koko hanohano komo Yelusalema habalo dododiliya꞉, komo tawakalubi hiliyonomate ba꞉bi komo ulamete ebe hibima꞉ ba꞉bo midiya꞉.
JOH 2:24 Huiyatiya ibi ipuwalo Ya꞉suti ebeno hibi komo eta kapiya lumagitamo kahawakalimiya꞉ha꞉, mabu ebe iya꞉tawanomola tawakalubi hiliyonomoeno tepo ipuwalo kuba ha꞉da amiho komate ba꞉pola꞉lama꞉na.
JOH 2:25 Ba꞉gala ebete eta lumagi kakiyamenakuiha꞉ ebete ebeno tepo ipuwoeno komo hibinomolo kohawakalimima꞉, mabu ebete tawakalubi hiliyonomoeno tepo ipuwoeno komokomo ya꞉lo iya꞉tawuya꞉.
JOH 3:1 Ba꞉ba tetelo Yunapino eta watodawate nemedenami, ebeno mahilo Nikadimasitila, ebe ba꞉ Pa꞉lisi kapiyuimidawa etala.
JOH 3:2 Eta dulu ebete Ya꞉sutamo penate na꞉pegoeniya꞉, “Iya꞉tulamedawa, a komopa꞉te iya꞉tawahala ama꞉ ba꞉ Godote poemiya꞉ta a kopiya꞉tua꞉mema꞉, mabu Godote kebe lumagigodolo emedenaheno, ebete ama꞉le dododilinaka ba꞉bako hanohano komo ododilima꞉ a꞉kamodobamene.”
JOH 3:3 Ya꞉suti ebeno tabo ba huiyana na꞉goeniya꞉, “Na ama꞉tamo hibi tabonomo begoemo, lumagiti ulinoma꞉ eda꞉lo ba꞉be uli ka꞉ka꞉mo gala hawakalaheno, Godote Ko Gawadubuma꞉ deda꞉na ebete ba꞉be komoeno ipuwa a꞉kuma꞉mene.”
JOH 3:4 Ba꞉bema꞉ Nikadimasiti Ya꞉suku nalateda꞉niya꞉, “Lumagiti kadelema꞉ deda꞉na, ba꞉ba tetelo ebete ulinoma꞉ gala keba ka꞉na na꞉keda꞉mene? Gabohenola, mabu ebete ebeno menokoeno tepo ipuwamo opegate menokote ebe gala alahimi modoboha꞉!”
JOH 3:5 Ya꞉suti ebetamo na꞉huiyaniya꞉, “Nale ama꞉tamo hibi tabo begoemo, lumagiti beyamo ba꞉gala Godokono Gobogoboeno heloamo ulinoma꞉ eda꞉heno, Godote Ko Gawadubuma꞉ deda꞉na ebete ba꞉be habamo a꞉kana꞉pa꞉gamene.
JOH 3:6 Ba꞉moe hopo habalo lumagiti da꞉hawakaluya꞉ ba꞉ba tetelo ebeno ka꞉ka꞉te menoko nabiwi iba꞉godone puluhukuya꞉, huiyatiya ebeno gobogoboeno hibi ka꞉ka꞉te Godokono Gobogobogodone kopema꞉ne,
JOH 3:7 ba꞉bema꞉ tawakaluba꞉te ulinoma꞉ eda꞉hate gala hawakalahalema꞉ da꞉goemo, ba꞉be komoma꞉ ama꞉ akala꞉wa꞉la꞉.
JOH 3:8 Lumagiti Godokono Gobogoboeno heloamo ulinoma꞉ eda꞉lo ba꞉be uli ka꞉ka꞉go gala da꞉kahawakalamene ba꞉be komo ba꞉ ba꞉ma ka꞉nala. Ba꞉moe hopolo huhuti ha꞉kiya ebeno ubilo hiya꞉hiya꞉ hapuni da꞉pa꞉muta, ama꞉le ebeno diyamo kapiya bulitata huiyatiya huhuti kebene ka꞉petupuimita ba꞉gala keba hapulu ka꞉niwibuta ama꞉ iya꞉tawaha꞉.”
JOH 3:9 Nikadimasiti huiyatiya Ya꞉sutamo na꞉goeniya꞉, “Amia꞉no taboeno ipuwa na hidamo kalaweha꞉. Ba꞉moe komo keba ka꞉nala꞉ka꞉?”
JOH 3:10 Ba꞉bene Ya꞉suti ebeno tabo ba huiyana na꞉goeniya꞉, “Ama꞉ ba꞉ Isalaela tawakalubino iya꞉tulamedawa etalata, huiyatiya mabu keka꞉ ama꞉ ba꞉moe komoeno ipuwa kiya꞉tawanaha꞉?
JOH 3:11 Na ama꞉tamo hibi tabonomo begoemo, naeno kapiyuimipa꞉go ale diya꞉tawahanama꞉ ba꞉bi komo bega꞉lanakoma꞉, ba꞉gala ale ya꞉lo dulamiya꞉ma꞉ ba꞉bi komo bikiyahanakoma꞉, huiyatiya la꞉ komo Yunapa꞉te aeno tabo a꞉kulia꞉lemata.
JOH 3:12 Iyo, nale ba꞉ma tetelo la꞉ hopo haboeno komokomo da꞉kiyahalamenakoma, la꞉ huiyatiya hibima꞉ kamidilinaha꞉, ba꞉bema꞉ nale Godokono Hunu Haboeno komokomo la꞉ gala da꞉kakiyahalamema, diyala, la꞉ ba꞉ atumu hibima꞉ a꞉kamidila꞉mata.
JOH 3:13 Ba꞉ hibila, hopo habanapi ipuwalo eta lumagiti Godokono Hunu Habamo kanodoluya꞉ha꞉, huiyatiya Tawakalubino Naniwiti Hunu Habane ba꞉moe hopamo a꞉pihitiguya꞉, ba꞉bema꞉ ebe kapiyate iya꞉tawala Hunu Haboeno komokomo.
JOH 3:14 “Ba꞉gala eta komo, Mosesete dito hopolo eta kalu auli ilinamo ododiti kukamo keba ka꞉na kadipatiya꞉, wadiyala ama꞉ ba꞉be komo nemalagidola. Ba꞉ba tetelo bu kalate Isalaelanapi ipuwalo pui daloholiya꞉, ba꞉ba꞉te Mosesekono auli kalutamo da꞉gahilameholiya꞉, Godote ibino ka꞉ka꞉ ba꞉bo mula꞉lelamiya꞉. Ba꞉bema꞉ hibila, ba꞉ma tetelo Godote ba꞉ atu gabodo Tawakalubino Naniwi hunamo kadipatema꞉ne,
JOH 3:15 ba꞉bene puya꞉te ebe hibima꞉ da꞉midimina꞉ iba꞉te wiboha꞉ ka꞉ka꞉ ba꞉bo kolawema꞉na꞉.
JOH 3:16 Mabu Godote ba꞉moe hopo tawakalubi malemalelo konomamo ba emalagidole ebeno Gudu kapiyanomo ba꞉moe hopo habamo ba꞉bo poemiya꞉, ba꞉bema꞉ puya꞉te ebe hibima꞉ da꞉midimina꞉ ibino ka꞉ka꞉te a꞉kalatidihamena꞉ huiyatiya iba꞉te wiboha꞉ ka꞉ka꞉ kolawema꞉na꞉.
JOH 3:17 “Ba꞉ hibila, Godote ebeno Gudu da꞉poemiya꞉, ba꞉ba tetelo ebe ubi kihatiya꞉ha꞉ ebeno Guduti tawakalubino komo anagilamelelamete kuba huiya kikalamema꞉, ao, huiyatiya ebe ubila ebete ibino ka꞉ka꞉ kopemula꞉lelamema꞉.
JOH 3:18 Ba꞉bema꞉ puya꞉te Godokono Gudu hibima꞉ da꞉midina Godote iba꞉tamo kuba huiya a꞉kikalama꞉mene, huiyatiya puya꞉te ebe hibima꞉ midihino Godote ebeno ukui ya꞉lo ihatiya꞉ iba꞉tamo kuba huiya kikalamema꞉, mabu iba꞉te hibima꞉ midi ipuwalo ebeno Gudu kapiyanomo kalaweha꞉.
JOH 3:19 Numa꞉, Godokono alote ba꞉moe hopamo da꞉piya꞉ iba꞉te ubiha꞉ma꞉ eda꞉huya꞉, huiyatiya ibi ubila du ipuwalo kemedehonama꞉ mabu ibino ododili komokomo kubakubanomola. Iyo, kuba ododilipa꞉te hido alo ubiha꞉ma꞉ ba eda꞉ha alo ipuwamo a꞉kapelama꞉la꞉, mabu ibi ubihinola alote ibino kuba a꞉la꞉minalelame, ba꞉bema꞉ hibila, ibino kuba anagiya꞉mida komote iba꞉tamo kuluhukuma꞉ne.
JOH 3:21 Huiyatiya puya꞉te Godokono hibi gabodo da꞉tolamena iba꞉te alo ipuwamo kopelamema꞉na꞉, ba꞉bene iba꞉te hidohido komo Godokono heloamo ba ododili alote ibino hibi komo ba꞉bo kohawakalilamema꞉ne.”
JOH 3:22 Ba꞉be komo da꞉wibuya꞉ Ya꞉suti ebe ta꞉matapa꞉go Yudiya hopamo tolamete, iba꞉te ba꞉bolo tete ga꞉ga꞉dopolo ba nemede komo tawakaluba꞉te beyamo aduti komo lawema꞉ da꞉pelamenakui Ya꞉suti ibi ba꞉bo owalubilinakui.
JOH 3:23 Ba꞉gala atu tetelo komo tawakaluba꞉te Yonetamo da꞉pelamenakui, ebete ibi Inono haba tamelo atumu kawadulatelenakui mabu ba꞉bolo beya kodopola, ba꞉be Inono habate Salimi haba tatalilo itana.
JOH 3:24 Ba꞉ba tetelo gabomana꞉te Yoneko du genama guamo ihatehenola.
JOH 3:25 Ba꞉bene eta hegelalo Yoneko ta꞉matapa꞉te eta Yunapi dubago tawakalubino apeno dalowa꞉ ukulale komoma꞉ olowabeletihuiya꞉.
JOH 3:26 Ba꞉bema꞉ komo iba꞉te ba꞉be tabo ga꞉la ipuwane Yonetamo pelamete ebe na꞉pega꞉lamiya꞉, “Iya꞉tulamedawa, dopamo Yodane Tuli hapulu ama꞉tamo da꞉puluhukui ba꞉be dubuino komo ama꞉le atamo da꞉hawakalimi, ebete gala kapete tawakalubi beyamo ba꞉pewadulatelenate, ba꞉gala tawakalubi hiliyonomate a miya꞉poete ebetamo ba꞉ na꞉tolama꞉.”
JOH 3:27 Yonete ibino tabo ba huiya na꞉goiya꞉, “Lumagiti hido komo ha꞉kiya a꞉kalawa꞉mene, Godote ebetamo ikameheno ebete dito kolutama꞉ne.
JOH 3:28 Nale la꞉tamo da꞉goimo, la꞉ ba꞉be tabo hibilo ulihuimata. Iyo, na ba꞉ma ka꞉na goimo, ‘Na Godokono Oemedawa Kelisoteha꞉, huiyatiya Godote na na꞉poenamiya꞉ Kelisoko dopamete kotoma꞉.’
JOH 3:29 Eta dubuti uli kamena da꞉lawemene, ebete poko ododiti ba꞉be kamenate hibinomolo ebenoma꞉ keda꞉ma꞉ne. Ba꞉ba tetelo ba꞉be dubuino hido mabulubiti nanekela꞉mo ebe tama꞉mo nutiti, ebeno mabulubino tabo madodo uliti ebeno ko kalakala dumimini, ebete atumu kokalakalama꞉ne. Ba꞉ hibila, na ba꞉ ba꞉ba ka꞉nala, Kelisoko mabuma꞉ naeno tepo ipuwalo kalakala konomote a꞉tabui,
JOH 3:30 ba꞉bema꞉ wadiyala ebete koma꞉ neda꞉mene, na huiyatiya deha꞉potoma꞉ keda꞉ma꞉nemo.”
JOH 3:31 Godokono Hunu Habane da꞉pihitiguya꞉ ba꞉be Kodawate hopo tawakalubi hiliyonomo na꞉gogolena. Kebe lumagiti ba꞉moe hopolo demedena, ebe ba꞉ ba꞉moe hopoeno komoma꞉ olamaginako mabu ebe ba꞉ hopo lumagila, huiyatiya Hunu Habane da꞉piya꞉ ba꞉be dawa eba ka꞉naha꞉. Ebete ba꞉moe hopolo ha꞉kiya Kodawanomoma꞉ ba peda꞉na,
JOH 3:32 Hunu Habalo kebe komokomo kulamiya꞉ ba꞉gala kebe komokomo kulihuya꞉, ebete ba꞉bi komokomo hopo habanapa꞉tamo na꞉pehawakalilamena, huiyatiya ibi ipuwalo komo hiliyonomate ebeno tabo a꞉kalawa꞉la꞉.
JOH 3:33 Ba꞉be mabuma꞉ kebe lumagiti ebeno tabo hibinomolo da꞉lawemene, ebete ba꞉be komodo ba꞉moe eta komo kohawakalimima꞉ne, Godoko kapiya ba꞉ hibi komo hawakalimidawala.
JOH 3:34 Ba꞉ hibila, Godote da꞉poemiya꞉ ba꞉be Kodawate Godokono hibi tabo bolamaginako, mabu Godote ebeno Gobogoboeno helo konomo ebetamo ya꞉lo ikamiya꞉,
JOH 3:35 iyo, Nabiwi Godote ebeno Gudu malemalelo nemalagidolona, ba꞉bema꞉ ebete ebetamo helo ikamiya꞉ ebete hiliyonomo komokomo ododilima꞉.
JOH 3:36 Ba꞉be mabuma꞉ kebe lumagiti Godokono Gudu hibima꞉ da꞉midina, Godokono wiboha꞉ ka꞉ka꞉te ebegodolo bitana, ebete ya꞉lo a꞉lawi, huiyatiya kebe lumagiti Godokono Gudutamo papamiwataheno, Godokono konomo mauba komote ebetamo bitana ba꞉bema꞉ ebete hibi ka꞉ka꞉ a꞉kalawenamene.
JOH 4:1 Ba꞉bene Pa꞉lisi kapiyuimipa꞉te Ya꞉sukunu komo ba꞉ma ka꞉na ulihuya꞉, ebete hiliyonomo tawakalubi ebeno ta꞉matapima꞉ midiliti ibi beyamo ba꞉bo wadulatelenakui, huiyatiya Yonete hiliyo tawakalubi kawadulatelenakuiha꞉.
JOH 4:2 Ba꞉be teteno hibi komote huiyatiya ba꞉ma ka꞉na itanuya꞉, ba꞉bi tawakalubi ipuwalo Ya꞉suti eta lumagi beyamo kadutinakuiha꞉, ebeno ta꞉matapa꞉te ha꞉kiya wadulatelenakuya꞉,
JOH 4:3 ba꞉bene Ya꞉suti Pa꞉lisi kapiyuimipino tabo ga꞉la komo diya꞉tawuya꞉, ba꞉ba tetelo ebete Yudiya hopo miya꞉pate Ga꞉lili hopamo wilama꞉ emalagidoluya꞉.
JOH 4:4 Ba꞉bene ba꞉bamo konuluhukuma꞉ ebete duiduiyanomolo tupuimiti Godokono ubilo Samaliya hopodo tote
JOH 4:5 ba꞉be hopoeno Saika habamo dito nuluhukuya꞉. Iniwali tetelo Ya꞉ikobote ebeno gudu Yausepetamo dikamiya꞉ ba꞉moe Saika haba ba꞉be haka tamelo itana,
JOH 4:6 ba꞉gala Ya꞉ikobote daligiya꞉ ba꞉be beya ma꞉pete ba꞉bolo atumu ba꞉ka-itana. Ba꞉bene hegela tuli tetenomolo Ya꞉suti tete ga꞉ga꞉dopo pete ba꞉be beya ma꞉pe tamelo pemedete hawela bepamitiya꞉.
JOH 4:7 Ba꞉bene Ya꞉suku ta꞉matapa꞉te baa꞉ mana꞉mo uwatehoma꞉ habamo da꞉tolamiya꞉, ebe ha꞉kiya beya ma꞉pelo ba luta eta Samaliyanapi kamenate beya iyapoma꞉ habane ba꞉bo piya꞉, ba꞉bene Ya꞉suti ebe na꞉goemiya꞉, “Na beya kapete unamita. Nolata, na beya nikanama꞉.”
JOH 4:9 Ba꞉bene kamenate Ya꞉sukunu tabo ba huiya na꞉goiya꞉, “A꞉iye, ama꞉ Yunapi dubulata ba꞉gala na Samaliyanapi kamenala! Ama꞉ na beyama꞉ badama꞉ ka꞉goenama꞉wa?” Ebete ba꞉ma ka꞉na da꞉goiya꞉ mabu Yunapa꞉te Samaliyanapi dalowa꞉gopima꞉ ga꞉lalo atu kalila꞉mo beya nihoma꞉ talonama꞉ ga꞉lanaka.
JOH 4:10 Ba꞉bene Ya꞉suti na꞉goiya꞉, “Godote tawakaluba꞉tamo dito dikalamena ba꞉gala pote ama꞉ beyama꞉ da꞉toemeha, ama꞉le ba꞉bi netewa komo hibilo niya꞉tawotale, ama꞉le na ba꞉kiyanameona꞉ nale ama꞉tamo ka꞉ka꞉ beya kikamema꞉.”
JOH 4:11 Kamenate ebetamo na꞉goiya꞉, “Kodawa, ama꞉ ba꞉be ka꞉ka꞉ beya kebene na꞉ka꞉laweomena꞉? Ama꞉godolo beya iyapoeno ilina puliyala, ba꞉gala numa꞉, ba꞉moe beya ma꞉pe ba꞉ kulukulunomola.
JOH 4:12 Ama꞉ aeno iniwa Ya꞉ikoboko deha꞉potodawama꞉ goelo ama꞉ ha꞉kiya ama꞉ koma꞉ ka꞉midiuta? Ba꞉moe beya ma꞉pe ebete a ebeno eyoni gugudi mabuma꞉ aligiya꞉, ba꞉bene ebe ba꞉gala ebeno gugudi, ba꞉gala ebeno sipi-goegoe ba꞉gala kau-goegoe, ibi hiliyonomate ba꞉moe beya binihonama꞉.”
JOH 4:13 Ya꞉suti huiyatiya ebetamo na꞉goiya꞉, “Kebe lumagiti ba꞉moe beya da꞉nimini ebe beya kapete gala kakumima꞉ne,
JOH 4:14 huiyatiya nale kebe beya lumagitamo nima꞉ dikamemo ebe beya kapete gala a꞉kuminakamene. Ba꞉be ka꞉ka꞉ beyate lumagino emede ipuwane hiliyonomo tetelo ba꞉peka꞉ka꞉la꞉namene, ba꞉ma ka꞉na ebete wiboha꞉ ka꞉ka꞉ hibilo kolawema꞉ne.”
JOH 4:15 Ba꞉bene kamenate ebetamo na꞉goiya꞉, “Kodawa, nolata, ama꞉ ba꞉be beya natamo nikanama꞉. Nale da꞉nimo, na gala beya kapete a꞉kunamenakamene ba꞉gala nale ba꞉moe beya iyapoma꞉ gala a꞉kapenakamo.”
JOH 4:16 Ya꞉suti ebe na꞉goemiya꞉, “Ama꞉ habamo tote, amia꞉no awi nadabuiti mamo badi na꞉piya꞉la꞉.”
JOH 4:17 Ba꞉bene kamenate na꞉huiyuya꞉, “Na awihinola.” Ya꞉suti ebetamo na꞉goiya꞉, “Ama꞉ awiha꞉ma꞉ hibi tabo begaa꞉ta,
JOH 4:18 mabu ama꞉ dopamo paibo hiya꞉hiya꞉ dubate a꞉lawa꞉tepahuia꞉ta, ba꞉gala ka꞉lo ama꞉go demedena ba꞉be dubu amia꞉no hibi awiha꞉. Iyo, ama꞉ awiha꞉ma꞉ hibilo gaa꞉ta.”
JOH 4:19 Ba꞉bema꞉ kamenate ebetamo na꞉goiya꞉, “Kodawa, na niya꞉tawutamo, hibila, ama꞉ ba꞉ Godokono ukui hawakalimidawa etalata.
JOH 4:20 A Samaliyanapino iniwala꞉te Godoko ba꞉moe hununomo hakalo adikuminakuya꞉ ba꞉bema꞉ ale talonama꞉ ga꞉lanama꞉, huiyatiya la꞉ Yunapa꞉te na꞉ga꞉lanakomata tawakaluba꞉te Yelusalemalo Godoko nadikuminakamena꞉.”
JOH 4:21 Ya꞉suti ebetamo na꞉goiya꞉, “Kamena, nale da꞉goitamo, ama꞉ ba꞉moe tabo hibima꞉ na꞉mida꞉. Tete ba꞉ na꞉pe, puya꞉te Nabiwi Godoko dadikumina iba꞉te gala Yelusalemalo a꞉kadikuminakamena꞉ ba꞉gala ba꞉moe hununomo hakalo a꞉kadikuminakamena꞉.
JOH 4:22 La꞉ Samaliyanapa꞉te Godoko adikumi gabo hibilo iya꞉tawaha꞉, huiyatiya a Yunapa꞉te ba꞉moe komo iya꞉tawahala mabu Godokono ka꞉ka꞉ mula꞉ komote agodone hopo haba konomamo pena.
JOH 4:23 Ba꞉ hibila, tete kopema꞉ne, iyo, ba꞉ na꞉pe, puya꞉te Nabiwi Godoko hibilo dadikumina iba꞉te uli ukui uwatete ebeno Gobogoboeno heloamo ba꞉gala ebeno hibi komodo ebe badikuminakomena꞉, mabu Nabiwiti ba꞉bako tawakalubi boholena ebe kadikuminama꞉.
JOH 4:24 Godote lumagino holoholamo kemedenaha꞉, ebe ba꞉ gobogobonomola. Ba꞉bema꞉ puya꞉te ebe dadikumina, wadiyala iba꞉te ebeno Gobogoboeno heloamo ba꞉gala ebeno hibi komodo nadikuminakamena꞉.”
JOH 4:25 Ba꞉bene kamenate ebetamo na꞉goiya꞉, “Na iya꞉tawala Mesayate kopema꞉ne, ebeno eta mahilo Kelisotela. Ebete da꞉pemene Godokono hiliyonomo komokomo atamo kopehawakalilamema꞉ne.”
JOH 4:26 Ya꞉suti ebetamo na꞉huiyuya꞉, “Na ama꞉go tabo dolamagimitama꞉, na ba꞉ Kelisotela.”
JOH 4:27 Ba꞉ba tetenomolo Ya꞉sukunu ta꞉matapa꞉te haba ipuwane da꞉kapelamiya꞉, iba꞉te koamo pela꞉wa꞉huya꞉ mabu ebete ba꞉moe kamenago tabo ba olamagimita ba꞉bo pulamiya꞉. Huiyatiya ibi ipuwalo eta lumagiti ba꞉be kamena ba꞉ma ka꞉na kakiyamiya꞉ha꞉, “Ama꞉ bada komo ododima꞉ kewageliuta?” ba꞉gala eta lumagiti Ya꞉suku kakiyamiya꞉ha꞉, “Mabu keka꞉ ama꞉le eba꞉go tabo dolamagimita?”
JOH 4:28 Ba꞉bema꞉ ba꞉ba tetelo kamenate ebeno upa beya ma꞉pelo miya꞉pate habamo tote tawakalubi ba꞉ma ka꞉na nikiyalamiya꞉,
JOH 4:29 “Eta dubu na꞉puma꞉la꞉. Diyala, ebe da꞉ Kelisotela꞉, mabu nale dopamo kebe kuba komo diya gabodo dododilinamimo, ba꞉bi komokomo ebete natamo hibinomolo a꞉hawakalilame.”
JOH 4:30 Ba꞉bema꞉ habaluba꞉te kamenoeno tabamo papamila꞉halete Ya꞉suku umima꞉ ba꞉ dito tolamiya꞉.
JOH 4:31 Habaluba꞉te ba pelamita ba꞉be atu tetelo Ya꞉suku ta꞉matapa꞉te ebe na꞉kiyahamiya꞉, “Iya꞉tulamedawa, wadiyala ama꞉ baa꞉ na꞉na.”
JOH 4:32 Huiyatiya Ya꞉suti iba꞉tamo na꞉goiya꞉, “Ao, nale nama꞉ ditana ba꞉be baeno hibi komo la꞉ iya꞉tawaha꞉.”
JOH 4:33 Ba꞉bema꞉ Ya꞉sukunu ta꞉matapa꞉te ibi ipuwalo na꞉ga꞉luya꞉, “Diyala, eta lumagiti ebetamo baa꞉ kuda꞉ ikame.”
JOH 4:34 Ba꞉bene Ya꞉suti iba꞉tamo na꞉goiya꞉, “Na da꞉poenamiya꞉ nale ebeno ubi komamo papamiwatalo ebeno oko kuitita꞉mo da꞉nuluhukumu, nale ba꞉be gabodo helo hibinomolo a꞉lawenakomo, baa꞉ na komo keba ka꞉nala꞉ka꞉ ba꞉ba ka꞉nala.
JOH 4:35 Numa꞉la꞉, la꞉ pali ododili tetelo ba꞉ma ka꞉na ga꞉lanakomata, ‘Netewa-netewa manomete ba꞉nepola꞉na, pali ilina naha tete kopema꞉ne.’ Ba꞉bema꞉ nale la꞉ eta tabo begoelamemata, la꞉le Godokono pali ilina hidamo ulamete niya꞉tawahala꞉, naha ilina uwate tete ba꞉ a꞉pe.
JOH 4:36 Ba꞉gala eta komo, kona wakalami okodawate pali namutudawoeno wiboha꞉ ka꞉ka꞉ mabuma꞉ pali oko ipuwalo naha kona buwatenako. Ba꞉ hibila, namutudawate ebetamo huiya ikame ya꞉lo a꞉tupuimi, iyo, ba꞉moe gabodo kona kikipo amihodawa ba꞉gala kona wakalami okodawa, iba꞉te ibino huiya konomo kalakalago kapimilo kuwatema꞉na꞉.
JOH 4:37 Tawakaluba꞉te da꞉ga꞉lanaka ba꞉ hibila, ‘Eta lumagiti kona kikipo amihote huiyatiya ebeno ekawiti pali ilina uwate tetelo oko kowatima꞉ne, ba꞉bene ibi netewapa꞉te badi konahama꞉na꞉.’
JOH 4:38 Ba꞉bema꞉ nale la꞉ pali ilina uwatema꞉ ba꞉ ba꞉ba ka꞉na oelamemata, huiyatiya ba꞉bi pali ilina la꞉le kamihoha꞉. Iyo, komo okopa꞉te dopamo kodakoda oko owatiya꞉, huiyatiya ka꞉lo la꞉ ibino hido oko owati ipuwane hidohido naha ilina buwatenakomata.”
JOH 4:39 Ba꞉ba tetelo ba꞉be habalo demedenama꞉ ba꞉bi Samaliyanapi ipuwalo komo hiliyonomate Ya꞉suku hibima꞉ ba꞉bo midiya꞉, mabu kamenate ibi ba꞉ma ka꞉na kiyalamiya꞉, “Nale dopamo kebe kuba komo diya gabodo dododilinamimo, ba꞉bi komokomo ba꞉moe dubuti natamo hibinomolo a꞉hawakalilame.”
JOH 4:40 Ba꞉bene iba꞉te ibino habane Ya꞉sutamo da꞉nikuliya꞉, iba꞉te ebe betoemehuya꞉ ebete iba꞉godolo kemeda꞉tepama꞉, ba꞉bema꞉ ba꞉ba tetelo Ya꞉suti netewa hegela bekalutiya꞉.
JOH 4:41 Ba꞉ba tetelo komo habaluba꞉te Ya꞉sukunu tabo komokomo dulihuya꞉, ibi ipuwalo komo hiliyonomate ebe hibima꞉ miditi,
JOH 4:42 kamena ba꞉ma ka꞉na kiyamiya꞉, “Dopamo tetelo amia꞉no tabo kapiya dulima꞉ ale ba꞉moe Ya꞉suku hibima꞉ ba꞉bo midima꞉, huiyatiya ka꞉lo ale aeno hibila galamo ebeno tabo ulima꞉. Hibila, ebe ba꞉ hopo habanapino Ka꞉ka꞉ Mula꞉lelamedawala.”
JOH 4:43 Ya꞉suti hopo habalo demedenami ebete ebeno komoma꞉ hibinomolo ba꞉ma ka꞉na goenakui, “Godokono ukui hawakalimidawa ebeno habaluba꞉te ebe hunamo a꞉kadipata꞉mena꞉, huiyatiya iba꞉te ebe ubiha꞉ma꞉ beda꞉hanakomena꞉.” Ba꞉bema꞉ Ya꞉suti ba꞉be komo iya꞉tawate Samaliya hopolo netewa hegela lutate, ba꞉bene ba꞉be hopo miya꞉pate ebeno Ga꞉lili hopamo gala dito katuya꞉.
JOH 4:45 Ba꞉ba tetelo komo Ga꞉lili hoponapa꞉te ebe kalakalago lawiya꞉, mabu iba꞉te dopamo Adaguila꞉ Pokoma꞉ Yelusalema ko habamo da꞉tolamiya꞉ Ya꞉sukunu hiliyonomo ododili komokomo nulamete hidonomoma꞉ ba꞉bo nega꞉luya꞉.
JOH 4:46 Ba꞉bene Ya꞉suti Ga꞉lili hopoeno Ka꞉ina habamo gala dito katuya꞉, ba꞉be haba ba꞉ ebete dopamo Godokono helo hawakalimi komodo beyanomo hido gao beyama꞉ da꞉midiya꞉, ba꞉be habala. Ba꞉ba tetelo eta gabomani dubuti ba꞉bolo na꞉lutiya꞉, huiyatiya ebeno kuhiti Kapeniyama habalo ko tawetawa꞉go watitiya꞉.
JOH 4:47 Ba꞉bene ba꞉be gabomani dubuti Ya꞉suti Yudiya hopone pe komo duliya꞉, ba꞉bema꞉ ebete ebetamo tote ebe na꞉nikiyamiya꞉, “Wadiyala꞉ka꞉ ama꞉ Kapeniyama habamo pete naeno kuhi na꞉pihiduimiya꞉, mabu ebe hoe tatalila.”
JOH 4:48 Ya꞉suti huiyatiya ebetamo na꞉goiya꞉, “La꞉ tawakalubi hiliyonomoeno komo ba꞉ ba꞉ma ka꞉nala, nagodolo koko hanohano komo ulameheno la꞉le na hibima꞉ a꞉kamidina꞉lemata.”
JOH 4:49 Gabomani dubuti ebetamo gala na꞉kagoiya꞉, “Kodawa, nolata. Ama꞉ tiyolo nago na꞉pa꞉, naeno guduti hoedemene.”
JOH 4:50 Ba꞉bene Ya꞉suti ebetamo na꞉goiya꞉, “Ama꞉ kalakalago na꞉toa. Amia꞉no kuhino ka꞉ka꞉te a꞉kalatida꞉mene.” Ba꞉ba tetelo ba꞉be dubuti Ya꞉sukunu tabo hibima꞉ miditi ebeno Kapeniyama habamo to ba꞉bo tupuimiya꞉, huiyatiya ba꞉be atu hegelalo ebete habamo kanuluhukuya꞉ha꞉.
JOH 4:51 Ba꞉bene eta hegelalo komo ebeno genama okopa꞉te eba꞉go da꞉paluguya꞉, iba꞉te ebe na꞉pikiyamiya꞉, “Nolata, amia꞉no kuhiti dutu gala a꞉kaka꞉ki!”
JOH 4:52 Ebeno kuhiti kebako tetelo ka꞉hidui, ebete ba꞉be komo lawema꞉ ebeno okopi dalateda꞉liya꞉ iba꞉te na꞉huiyuya꞉, “Dutu hegela tuli tetelo, 1 koloko tete keba ka꞉nala꞉ka꞉, tawetawete ebe ba꞉bo miya꞉pui.”
JOH 4:53 Ba꞉bene nabiwiti ukuilo nemalagidoluya꞉, ba꞉be tete ba꞉ atu tetenomola Ya꞉suti ebe da꞉kiyami kuhino ka꞉ka꞉te a꞉kalatida꞉mene, ba꞉bema꞉ ebe ba꞉gala ebeno genamanapi, ibi hiliyonomate Ya꞉suku hibima꞉ ba꞉bo midiya꞉.
JOH 4:54 Ba꞉ hibila, Ya꞉suti Yudiya hopone Ga꞉lili hopamo pete netewa hanohano komo da꞉pododiliya꞉, ba꞉moe komo ba꞉ etala.
JOH 5:1 Ba꞉moe komo da꞉wibuya꞉ Ya꞉suti Yelusalema ko habamo tuya꞉ Yunapino eta poko konumima꞉.
JOH 5:2 Yelusalemoeno kala imi tetelo eta gigiho bitana, ebeno mahilo Sipi-goegoeno Gigihola, ba꞉gala ba꞉moe gigiho tamelo mala꞉ ikiloeno bobo ba꞉ka-itana, ebeno mahilo Yu tawakalubino tabamo ba꞉ Betesedala. Ba꞉be bobo hapuhapulu panagopi genama paibate la꞉mota꞉hanama꞉,
JOH 5:3 ba꞉bene hiya꞉hiya꞉ temetema꞉gopi hiliyonomate ba꞉bi genamoeno dedelalo pola꞉nanakuya꞉, ibi ipuwalo komo baidi tamihopila, ba꞉gala komo nato a꞉ta꞉buta꞉midalelamepila, ba꞉gala komo ape kodakoda temetema꞉gopila. Iba꞉te hegela hiliyonomolo beyoeno tete belatimitanakuya꞉,
JOH 5:4 mabu hiya꞉hiya꞉ kapiyakapiya tetelo Kodawa Godokono nopodawate boboeno beya da꞉pologinakui beyate gelewalemo ba꞉bo ikiya꞉midanakui. Ba꞉ba tetelo kebe temetema꞉godawate beya ipuwamo tiyolo da꞉nihitiganakui ebe kapiyate hido komo ba꞉bo lawenakui.
JOH 5:5 Ba꞉bene Ya꞉suti Beteseda bobamo da꞉nuluhukuya꞉ eta dubuti ba꞉bolo na꞉lutiya꞉, ebete 38 gogolo pata꞉ modoboha꞉ma꞉ eda꞉nami.
JOH 5:6 Ya꞉suti ebe ba luta da꞉numiya꞉, ebete niya꞉tawuya꞉ ba꞉be dubuti tete ga꞉ga꞉nomolo ba꞉ba ka꞉na emedenami. Ba꞉bema꞉ ebete ebe na꞉goemiya꞉, “Ama꞉ ubila꞉ka꞉ Godote ama꞉ hiduimi?”
JOH 5:7 Temetema꞉goeno dubuti ebetamo na꞉huiyuya꞉, “Kodawa, ba꞉moe beya Godote gelewalemo da꞉pikiya꞉midanako, ba꞉ba tetelo na owalubinidawa puliyala, ba꞉bema꞉ na beyamo ba nihitiguta huiyatiya eta lumagiti dopamo nihitiganako modobo komo konelawema꞉.”
JOH 5:8 Ya꞉suti ebetamo na꞉goiya꞉, “Ama꞉ mahigate, amia꞉no tilo mokopa꞉midate, na꞉toa.”
JOH 5:9 Ba꞉ba tetenomolo ba꞉be dubuti hidote, ebeno tilo lawete ba꞉bo tuya꞉. Ya꞉suti ba꞉be dubu da꞉hiduimiya꞉, ba꞉be hegela ba꞉ Yu tawakalubino okoha꞉ talona hegelala.
JOH 5:10 Ba꞉bema꞉ ba꞉be dubuti tilo ba agatuta komo Yu watowatopa꞉te ebe ba꞉ma ka꞉na kiyahamiya꞉, “A꞉iye! Ba꞉moe ba꞉ aeno okoha꞉ talona hegelala! Tilo agata ipuwalo ama꞉ aeno kukala badikamidala꞉ta!”
JOH 5:11 Ebete huiyatiya na꞉goiya꞉, “Na da꞉hiduiname ba꞉be dubuti ba꞉ma ka꞉na goename, ‘Amia꞉no tilo mokopa꞉midate na꞉toa.’”
JOH 5:12 Ba꞉bema꞉ iba꞉te ebe nalatediya꞉, “Kebe dubuti ka꞉goemeta, ama꞉ tilo aguti kotoma꞉? Ama꞉ a na꞉kiyaa꞉ma꞉, ba꞉be dubu potela꞉ka꞉?”
JOH 5:13 Huiyatiya ba꞉be dubuti Yu watowatopa꞉tamo huiya tabo goe kamodobuya꞉ha꞉, mabu ebete Ya꞉sukunu komo kiya꞉tawuya꞉ha꞉ ba꞉gala Ya꞉suti ebe hiduimiti ebete tawakalubi hiliyonomo ipuwamo ba꞉ dito nopeguya꞉.
JOH 5:14 Ba꞉bema꞉ galane Ya꞉suti Godoko Adikumino Hiya꞉ Genamalo ba꞉be dubu gala da꞉kumiya꞉ ba꞉bo goemiya꞉, “Numa꞉, amia꞉no apete a꞉hido, ba꞉bema꞉ ama꞉ eta kuba gala akododa꞉la꞉. Diyala, ko temetemete ama꞉tamo gala da꞉ kuluhukumini, ba꞉bema꞉ gala hapu temetemete konomoma꞉ eda꞉te, dopamo ama꞉ duminama꞉ ba꞉be temeteme kogogoloma꞉ne.”
JOH 5:15 Ba꞉ba tetelo ba꞉be dubuti tote Yu watowatopi ba꞉ma ka꞉na nikiyalamiya꞉, “Na da꞉hiduinama꞉ka ba꞉be dubu ba꞉ Ya꞉sutila.”
JOH 5:16 Mabu Ya꞉suti Yunapino okoha꞉ talona hegelalo komo temetema꞉gopi da꞉hiduilamenakui, ba꞉bema꞉ komo ibino watowatopa꞉te ebetamo maubahalete temeteme ikame ba꞉bo tupuimiya꞉.
JOH 5:17 Ba꞉ba tetelo Ya꞉suti iba꞉tamo na꞉goiya꞉, “Naeno Nabiwiti hegela hiliyonomolo oko bowatina, ba꞉bema꞉ na ebeno Guduti atumu oko beka-owatinamo, eta hegela dito a꞉kalutalemo.”
JOH 5:18 Yu watowatopa꞉te ba꞉be tabo duliya꞉ iba꞉te ubi konomamo ba꞉bo ihatiya꞉ ebe kanakapumima꞉, mabu hibila, dopamo Ya꞉suti ibino talona hegeloeno kukala badikamidaliya꞉, huiyatiya ba꞉ma tetelo ebete Godoko ebeno hibi Nabiwima꞉ goelo ebe ha꞉kiya ebeno helo Godokono heloago modoboma꞉ goe.
JOH 5:19 Ba꞉bema꞉ Ya꞉suti iba꞉tamo na꞉goiya꞉, “Na la꞉tamo hibi tabonomo begoemo, Godokono Guduti ha꞉kiya ebeno ubilo eta komo ododi modoboha꞉, huiyatiya Guduti ebeno Nabiwino ododi komo duminako ebete ba꞉be atu komo beka-ododinako.
JOH 5:20 Mabu Nabiwi Godote ebeno Gudu malemalelo ba emalagidolona ebeno hiliyonomo ododili komokomo Gudutamo hawakalilamena. Hibila, galane tetelo Nabiwiti ebeno Gudutamo komo kokonomo komokomo kohawakalilamema꞉ne ebete kododilima꞉, ba꞉bema꞉ la꞉ hiliyonomate ba꞉bi komo ulamete kohanohanohoma꞉nemata.
JOH 5:21 Nabiwiti hoe lumagi ka꞉ka꞉mo keba ka꞉na kadipatenako, Guduti atumu ba꞉ ba꞉ba ka꞉na kewagelena, ebete kebe lumagitamo ubi dihatemene ba꞉be lumagitamo hibi ka꞉ka꞉ kikamema꞉ne.
JOH 5:22 Ba꞉gala Nabiwi Godote ha꞉kiya eta lumagino komo a꞉kanagiya꞉midama꞉mene, huiyatiya ebete helo Gudutamo ikamiya꞉ ebete tawakalubino komokomo kanagilamelelamema꞉.
JOH 5:23 Ba꞉bema꞉ hiliyonomo tawakaluba꞉te Guduino mahilo hunamo kadipatema꞉na꞉, iba꞉te Nabiwino mahilo keba ka꞉na kadipatenaka ba꞉ba ka꞉na. Kebe lumagiti Gudutamo ubiha꞉ma꞉ deda꞉na, ebete atumu ubiha꞉ komo Nabiwi Godotamo na꞉kahawakalimina mabu ba꞉moe Gudu Nabiwiti hopo tawakaluba꞉tamo poemiya꞉.
JOH 5:24 “Na la꞉tamo hibi tabonomo begoemo, pote naeno tabo uliti ba꞉bene ebete na Oenamedawa hibima꞉ da꞉midina, ebegodolo wiboha꞉ ka꞉ka꞉ hibinomolo bitana, iyo, Godote ba꞉be lumagino komo a꞉kanagiya꞉midama꞉mene mabu ebete hoe ipuwane ka꞉ka꞉mo ya꞉lo uluhukui.
JOH 5:25 Ba꞉bema꞉ na gala la꞉tamo hibi tabonomo bekagoemo, tete kopema꞉ne, iyo, ba꞉ na꞉pe, ba꞉ba tetelo ha꞉laha tawakaluba꞉te Godokono Guduino tabo madodo dulimina꞉ iba꞉te wiboha꞉ ka꞉ka꞉mo komahila꞉halema꞉na꞉.
JOH 5:26 Ba꞉ hibila, Nabiwi Godoko kapiyagodolo wiboha꞉ ka꞉ka꞉ bitana, ba꞉bema꞉ ebete ebeno Gudutamo helo ya꞉lo ikamiya꞉ ebete atumu Ka꞉ka꞉ Mabudawama꞉ kakeda꞉nama꞉,
JOH 5:27 ba꞉gala Nabiwiti Gudutamo helo gala a꞉kikamiya꞉ ebete tawakalubino komokomo kanagilamelelamema꞉, mabu ba꞉moe Gudu ba꞉ Tawakalubino Naniwila.
JOH 5:28 “Ba꞉bema꞉ la꞉ ulihopi naeno olamagi taboma꞉ akala꞉wa꞉hala꞉, mabu tete ba꞉ na꞉pe, ha꞉laha tawakaluba꞉te ebeno tabo madodo uliti
JOH 5:29 bobo ipuwane ka꞉ka꞉mo komahila꞉halema꞉na꞉. Ba꞉bene ibi ipuwalo puya꞉te hopo habalo hidohido komo dododilinakui iba꞉te Ka꞉ka꞉ Habamo konalehawaminama꞉na꞉, huiyatiya puya꞉te kuba komokomo dododilinakui iba꞉te tabo anagiya꞉mida habalo ibino kuba huiya konuwatema꞉na꞉.”
JOH 5:30 Ya꞉suti gala na꞉kagoiya꞉, “Na ha꞉kiya naeno ubilo eta komo ododi modoboha꞉, huiyatiya naeno Nabiwiti na da꞉kiyanamenako nale ba꞉be gabo kapiyado tawakalubino komo ba꞉bo anagilamelelamenakomo. Ba꞉gala anagiya꞉mida ipuwalo nale tuputupunomolo ododinakomo, mabu na ubila na da꞉poenamiya꞉ ba꞉be Kodawa kapiya kokalakaluiminama꞉, na ha꞉kiya na a꞉kakalakaluima꞉mo.
JOH 5:31 “Na ha꞉kiya ba꞉ma ka꞉na da꞉goemo, ‘Na ipuwalo hibi komo bitana,’ tawakaluba꞉te ba꞉be taboeno hibi komo a꞉kalawa꞉mena꞉,
JOH 5:32 huiyatiya eta Kodawate bemedena, ebe ba꞉ Godotela, ebete naeno hibi komo behawakalimina. Na iya꞉tawala, ebete na mabuma꞉ kebe tabo kolamagina ba꞉be tabo ba꞉ hibinomola.
JOH 5:33 “Dopamo tetelo la꞉ Yu watowatopa꞉te komo dubu Yonetamo doelamima, ebete iba꞉tamo naeno hibi komo atumu a꞉kahawakalimi.
JOH 5:34 Numa꞉la꞉, hopo habanapa꞉te na mabuma꞉ dolamagimina nale ibino tabo a꞉kulia꞉lemo, huiyatiya Yonete dopamo dolamagi ba꞉be tabo ebeno ukui taboha꞉, ba꞉ Godokono tabola. Ba꞉be mabuma꞉ nale ba꞉be atu tabo la꞉ gala na꞉kagoelamemata, la꞉le hibima꞉ miditi Godote la꞉eno ka꞉ka꞉ komula꞉lelamema꞉.
JOH 5:35 Iyo, Yoneko ba꞉ hido alo keba ka꞉nala꞉ka꞉ ebe ba꞉ba ka꞉na a꞉la꞉minanami, ba꞉bene tete nanekelelo ba꞉be aloeno komoma꞉ la꞉le la꞉eno ubi miya꞉ta꞉tepalo gunima꞉mo gala na꞉kawilalimata.
JOH 5:36 “Ba꞉gala eta komo. Nabiwi Godote ya꞉lo tetelo natamo dikanamiya꞉, nale ba꞉be oko ba owatina naeno okote naeno hibi komo behawakalimina, na ba꞉ Godote poenamiya꞉. Ba꞉bema꞉ dopamo tetelo Yonete na mabuma꞉ hibi komo da꞉hawakalima꞉tepui, huiyatiya ba꞉ma tetelo naeno okote naeno hibi komo hidonomamo hawakalimina.
JOH 5:37 Ba꞉ hibila, na da꞉poenamiya꞉ ba꞉be Nabiwiti naeno hibi komo ba hawakalimina, huiyatiya la꞉le ebeno tabo madodo a꞉kulia꞉lemata ba꞉gala ebeno holoholo a꞉kuma꞉lemata.
JOH 5:38 Iyo, ebeno tabo la꞉eno tepo ipuwalo kitanaha꞉, mabu ebete na hopo habamo poenamiya꞉ huiyatiya la꞉le naeno tabo hibima꞉ kamidinaha꞉.
JOH 5:39 La꞉le Godokono Bukoeno tabo komokomo hidonomamo a꞉ka꞉lamiholenakomata, mabu la꞉ nemalagidolonamata ba꞉be gabodo la꞉le wiboha꞉ ka꞉ka꞉ kolawema꞉nemata. A꞉iye, numa꞉la꞉! Ba꞉moi Buka komokomo hiliyonomate naeno hibi komo behawakalimina, huiyatiya la꞉eno ka꞉lamihole ipuwalo ba꞉bi taboeno hibi ipuwa notanamata,
JOH 5:40 ba꞉bema꞉ la꞉ ubihinola natamo pelamete nagodone wiboha꞉ ka꞉ka꞉ kopelawema꞉.
JOH 5:41 “Na ubihinola hopo habanapa꞉te na milinamehone,
JOH 5:42 mabu na iya꞉tawala la꞉ kebako tawakalubila꞉ka꞉, la꞉eno tepo ipuwalo malemale emalagidolo komote Godotamo hibilo kitanaha꞉.
JOH 5:43 Ba꞉ hibila, nale naeno Nabiwino heloamo piya꞉mo huiyatiya la꞉le na kalawenenaha꞉, huiyatiya eta lumagiti ebe ha꞉kiya ebeno heloamo la꞉tamo da꞉pemene la꞉le ebe kalakalago kolawema꞉nemata,
JOH 5:44 iyo, la꞉ ubila la꞉ ipuwalo etate eta kamilimiho, etate eta kamilimiho, ba꞉ba ka꞉na kewagelenama꞉. La꞉ nulia꞉la꞉, la꞉le tuputupu komokomo aeno kapiya Godotamo ododilima꞉ dewagelema ba꞉ba tetelo ebete la꞉ komililameholema꞉na꞉ta, huiyatiya la꞉ ubihinola. Ba꞉moe mabuma꞉ la꞉le na hibima꞉ a꞉kamidina꞉mata, gabo puliyala!
JOH 5:45 “La꞉ ba꞉ma ka꞉na akemalagidolala꞉, na kapiyate Nabiwi Godotamo la꞉ kuba ododilipima꞉ koka꞉lamima꞉. Ao, Mosesete atumu la꞉ kubapima꞉ kakaka꞉lamima꞉na꞉ta, ebe ba꞉ la꞉le la꞉eno hido owalubidawama꞉ da꞉ga꞉lanakoma ba꞉be dawala!
JOH 5:46 Ba꞉gala la꞉le Mosesekono tabo hibima꞉ na꞉midionatale la꞉le na atumu hibima꞉ ba꞉kamidiniona꞉, mabu ebete Godokono Bukamo tabo komokomo da꞉miya꞉tiya꞉, ba꞉bi komate naeno hibi komo behawakalimina.
JOH 5:47 La꞉ huiyatiya ebete Bukamo da꞉miya꞉tiya꞉ ba꞉be tabo hibima꞉ kamidinaha꞉, ba꞉bema꞉ la꞉le naeno tabo hibima꞉ keba ka꞉na na꞉ka꞉midioma? Gabo a꞉kitanamene!”
JOH 6:1 Ba꞉bene ibino tabo olamagimi komo wibote, komo hegela da꞉petohuya꞉, eta tetelo Ya꞉suti Ga꞉lili Bobo hapuamo boga꞉go dito na꞉hiwuya꞉, ba꞉be boboeno eta mahilo ba꞉ Taibiliyasila.
JOH 6:2 Ba꞉bene tawakalubi hiliyonomate ebe ba꞉bamo ta꞉matuya꞉, mabu ebete temetema꞉gopa꞉tamo dododilinakui, iba꞉te ba꞉bi hanohano komo ulamiya꞉ ba꞉gala iba꞉te eta ko komo umima꞉ ubi bihatiya꞉.
JOH 6:3 Ba꞉bene Ya꞉suti haka hunamo nodolote ebe ta꞉matapa꞉go ba꞉bo nilutiya꞉,
JOH 6:4 ba꞉ba tetelo Yunapino Adaguila꞉ Poko tete ba꞉ tatalima꞉ na꞉ka-ediya꞉.
JOH 6:5 Ba꞉bene gapogapo hapulu komo hiliyonomo tawakaluba꞉te Ya꞉sutamo da꞉pekapiyuiminiya꞉, ebete ibi ulamenate Pilipiko na꞉goemeniya꞉, “A ba꞉moi hiliyonomo tawakalubi owalubilima꞉ baa꞉ kebolo na꞉kuwatelamema꞉?”
JOH 6:6 Ba꞉ba tetelo Ya꞉suti ya꞉lo iya꞉tawaniya꞉ ebete tawakaluba꞉tamo bada komo na꞉kododimini, ba꞉bema꞉ ebete Pilipiko ba꞉moe tabo begoemeniya꞉, mabu ebe ubila ebeno hibima꞉ midi komo kumiminama꞉, da꞉ hibila꞉ o da꞉ hibiha꞉.
JOH 6:7 Ba꞉bene Pilipiti ebetamo na꞉huiyaniya꞉, “Ba꞉moi tawakalubi hiliyonomate baa꞉ nanekele nahama꞉ kapiya gogoeno oko huiya maniti a꞉kamodobamene.”
JOH 6:8 Ba꞉ba tetelo Ya꞉suku ta꞉matadawa eta, ebeno mahilo A꞉ndulutila, ebe ba꞉ Saimono Pitakono amogala, ebete Ya꞉sutamo na꞉goeniya꞉,
JOH 6:9 “Kuhi kapiya mola, ebegodolo paibo palawa baa꞉ ba꞉gala daha netewa ba꞉pola꞉na, huiyatiya ba꞉bi baa꞉ bilibiliha꞉, ba꞉moi tawakalubi hiliyonomago a꞉kamodobamene.”
JOH 6:10 Ba꞉bene Ya꞉suti ba꞉be hopoeno hemo konomo uminate ebe ta꞉matapa꞉tamo na꞉goeniya꞉, “La꞉ tawakalubi na꞉kiyalama꞉la꞉ iba꞉te dito kogagahidima꞉.” Ba꞉bema꞉ tawakalubi hiliyonomate ba꞉bamo gagahidinate ba꞉bi tawakalubi da꞉ka꞉lamiholeniya꞉ ibino kuititi ba꞉ 5,000 dubuma꞉ eda꞉niya꞉.
JOH 6:11 Ba꞉bene Ya꞉suti ba꞉be baa꞉ uwatenate Godotamo kalakala tabo goenate, da꞉pola꞉nuya꞉ ba꞉bi tawakaluba꞉tamo dito ikalameholeniya꞉, ba꞉gala ebete daha kuwatenate ba꞉ba ka꞉na kewageleniya꞉ tawakalubino baa꞉ kape komote komodobolamenama꞉.
JOH 6:12 Ba꞉ba tetelo ba꞉bi baa꞉te ibi da꞉wigulameniya꞉ Ya꞉suti ebe ta꞉matapi na꞉kiyalameniya꞉, “La꞉ da꞉luhili ba꞉bi baa꞉ komokomo hidamo nuwata꞉la꞉, mabu ale ba꞉moi baa꞉ gigilepalama꞉ a꞉kamidila꞉ma꞉.”
JOH 6:13 Ba꞉bema꞉ iba꞉te tawakaluba꞉godolo da꞉luhiliniya꞉ ba꞉bi palawa baa꞉ komokomo duwateniya꞉, iba꞉te 12 bagolo betabuilameniya꞉.
JOH 6:14 Ya꞉suti ebeno helo tawakaluba꞉tamo kohawakaliminama꞉ ba꞉moe hanohano komo dododiniya꞉, iba꞉te uminate na꞉ga꞉laniya꞉, “Hibila, ba꞉moe dubu ba꞉ Godokono Hiya꞉nomo Ukui Hawakalimidawala, Godote hopo habamo poemema꞉ da꞉goiya꞉, ba꞉moe ba꞉be Kodawala!”
JOH 6:15 Ba꞉ba tetelo Ya꞉suti ibino ubi komo biya꞉tawaniya꞉, iba꞉te ebe lawenate ibino Ko Gawadubuma꞉ dito komidinama꞉. Huiyatiya ebe ubihinola, ba꞉bema꞉ ebete ibi miya꞉palenate ebe ha꞉kiya eta haka hunamo dito nodoloniya꞉.
JOH 6:16 Hegelate ba nihila꞉minana Ya꞉suku ta꞉matapa꞉te bobo dodamo nepalaganate,
JOH 6:17 huiyatiya hopote da꞉duniya꞉ ba꞉ba tetelo Ya꞉suti iba꞉tamo tiyolo kapeniya꞉ha꞉, ba꞉bema꞉ iba꞉te boga꞉mo nololonate bobo a꞉hiwale ba꞉bo tupuiminiya꞉ Kapeniyama haba hapuamo.
JOH 6:18 Ba꞉ba tetelo ko huhuti ba mahigana koko gawiyate ba꞉bo mahila꞉haleniya꞉.
JOH 6:19 Ba꞉bene iba꞉te paibo o sikisi kilomita ba꞉mako tete ga꞉ga꞉dopolo ba nemabihona, ba꞉ba tetelo Ya꞉suti ibino boge tama꞉mo beya hunudu da꞉toniya꞉, iba꞉te ebe uminate konomamo ba꞉bo toletolehoniya꞉,
JOH 6:20 huiyatiya ebete ibi na꞉goelameniya꞉, “Na Ya꞉sutila, la꞉ katoletolehonala꞉!”
JOH 6:21 Ba꞉bema꞉ iba꞉te Ya꞉suku boga꞉mo kalakalago da꞉natopiniya꞉, iba꞉te na꞉la꞉wa꞉haniya꞉ mabu iba꞉te kebamo tolamenama꞉ dewageleniya꞉, ba꞉ba tetenomolo iba꞉te ba꞉be boge utihole baha꞉mo boge ba꞉ dito nutiniya꞉.
JOH 6:22 Ba꞉bene Ya꞉suti Ga꞉lili Bobo hapulu da꞉nemiya꞉paleniya꞉, eta hegelalo ba꞉bi tawakalubi hiliyonomate ba꞉moe komo biya꞉tawahuya꞉, Ya꞉suti ebe ta꞉matapa꞉go kapiya boga꞉go iba꞉tamo da꞉pa꞉hiwaliya꞉, huiyatiya gapogapo tetelo ta꞉matapa꞉te gala ha꞉kiya da꞉kana꞉hiwaleniya꞉, Ya꞉suti iba꞉go katoniya꞉ha꞉.
JOH 6:23 Ba꞉be atu tetelo Taibiliyasi habanapa꞉te Kodawa Ya꞉sukunu hanohano ododi komoma꞉ tabo ba꞉ma ka꞉na uliya꞉, ebete Godotamo baa꞉ma꞉ kalakala tabo goenate tawakalubi hiliyonomatamo dikalameholeniya꞉, ba꞉bema꞉ komo ibi hiliyonomate ebe umima꞉ ibino boga꞉go ba꞉be atu hopamo ba꞉bo pelameholiya꞉.
JOH 6:24 Huiyatiya iba꞉te Ya꞉suku ba꞉gala ebe ta꞉matapi ba꞉bolo nipo da꞉poholiya꞉, iba꞉te boga꞉mo gala kololohote na꞉katolamiya꞉ Kapeniyama habamo, iba꞉te Ya꞉suku ba꞉bolo konohowadima꞉.
JOH 6:25 Ba꞉bene ba꞉bi tawakaluba꞉te Ya꞉suku Kapeniyama haba hapulu da꞉numiya꞉, iba꞉te ebe na꞉nega꞉lamiya꞉, “Iya꞉tulamedawa, ama꞉ ba꞉mamo kebako tetelo ka꞉puluhukawa?”
JOH 6:26 Ya꞉suti ibino tabo ba huiya na꞉goiya꞉, “Nale la꞉tamo hibi tabonomo begoemo, la꞉le nagodone baa꞉ uwatenate, ba꞉be baa꞉te la꞉ da꞉wigulameni la꞉le na unamema꞉ ba꞉bema꞉ pelamemata, huiyatiya naeno helo hawakalimino hanohano komoeno ipuwa la꞉le la꞉eno ukuia꞉mo kalaweha꞉.
JOH 6:27 La꞉le kateneno ubi baa꞉ nahama꞉ oko kowatihonala꞉ mabu ba꞉be baa꞉te tiyolo kababalehoma꞉ne, huiyatiya wadiyala la꞉le wiboha꞉ ka꞉ka꞉ baa꞉ lawema꞉ oko nowatihonala꞉. Ba꞉mako baa꞉ na Tawakalubino Naniwiti la꞉tamo kikalamema꞉nemata, mabu Nabiwi Godote ba꞉moe komo ya꞉lo a꞉hawakalimiya꞉, na ba꞉ ebeno hibidawama꞉ eda꞉namo.”
JOH 6:28 Ba꞉bene iba꞉te ebe na꞉ga꞉lamiya꞉, “Ale Godokono ubi komokomo kododilima꞉ bada oko na꞉kowatihoma꞉?”
JOH 6:29 Ya꞉suti iba꞉tamo na꞉huiyuya꞉, “Godote la꞉godolo kapiyanomo komo umi ubila, ebete hopo habamo da꞉poemiya꞉ la꞉ ba꞉be dawa hibima꞉ na꞉mida꞉la꞉.”
JOH 6:30 Ba꞉bema꞉ iba꞉te ebe gala na꞉kaga꞉lamiya꞉, “Ale ama꞉ hibima꞉ komidima꞉ ama꞉le atamo bada hanohano komo na꞉kododiomena꞉? Wadiyala ama꞉ amia꞉no helo atamo na꞉hawakalima꞉!
JOH 6:31 Numa꞉, aeno iniwala꞉te dito hopolo ba emedena, Godokono hanohano ododi komodo iba꞉te baa꞉ uwatenakuya꞉, ba꞉be baeno mahilo ba꞉ ma꞉nala. Iyo, Godokono Bukoeno tabote ba꞉ma ka꞉na itana, ‘Godote iba꞉tamo Hunu Haboeno baa꞉ bikalamenakui,’ ba꞉bema꞉ wadiyala ama꞉ ba꞉ atumu amia꞉no helo na꞉hawakalima꞉.”
JOH 6:32 Ya꞉suti na꞉goiya꞉, “Nale la꞉tamo hibi tabonomo begoemo, Mosesete la꞉eno iniwala꞉tamo dikalamenakui, ba꞉be baa꞉ Hunu Haboeno hibi baa꞉ha꞉, ba꞉moe hopoeno baa꞉la, huiyatiya ba꞉ma tetelo naeno Nabiwiti Hunu Haboeno hibi baa꞉ la꞉tamo nikalamenata,
JOH 6:33 mabu Godokono hibi baa꞉ ba꞉ Hunu Habane da꞉piya꞉ ba꞉be dawala, ebe kapiyate hopo habanapa꞉tamo hibi ka꞉ka꞉ bikalamena.”
JOH 6:34 Ba꞉bene iba꞉te ebe gala na꞉kaga꞉lamiya꞉, “Iya꞉tulamedawa, wadiyala ama꞉le ba꞉ma tetene tupuimiti ba꞉be baa꞉ atamo nikaa꞉menakuya꞉.”
JOH 6:35 Ba꞉bene Ya꞉suti na꞉goiya꞉, “Na ba꞉ ka꞉ka꞉ baa꞉la. Kebe lumagiti natamo da꞉pemene ebe baa꞉ kapete gala a꞉ka-uminakamene, ba꞉gala kebe lumagiti na hibima꞉ da꞉midinimini ebe beya kapete atumu a꞉kuminakamene.
JOH 6:36 “Ka꞉lo nale la꞉eno komo ba꞉ma ka꞉na hawakalimimo, la꞉le la꞉eno baidinomamo naeno helo umimata, huiyatiya la꞉le na hibima꞉ midinima꞉ ubihinola.
JOH 6:37 Naeno Nabiwiti natamo ikanamema꞉ dewagelena, ba꞉bi tawakalubi hiliyonomate natamo kopelamema꞉na꞉, ba꞉gala kebe dawate natamo da꞉pemene nale ebe gigiha꞉ baha꞉mo dito a꞉koema꞉mo.
JOH 6:38 Numa꞉la꞉, Hunu Habane na da꞉poenamiya꞉ nale ba꞉be Kodawoeno ubi komo ododima꞉ ba꞉moe hopamo piya꞉mo, na ha꞉kiya naeno ubi komo a꞉kododa꞉mo.
JOH 6:39 Ba꞉bema꞉ na da꞉poenamiya꞉ ba꞉be dawoeno ubi komo ba꞉ma ka꞉nala, ebete natamo kebe tawakalubi kikanamena ibi ipuwalo eta kapiyate a꞉kalatida꞉mene, ba꞉bene Kuititi Hegelalo nale ibi hiliyonomo hibi ka꞉ka꞉mo kowadiya꞉paa꞉latelema꞉nemo.
JOH 6:40 Iyo, naeno Nabiwiti ubila, kebe lumagiti ebeno Gudu umiti hibima꞉ da꞉midimini, ebete wiboha꞉ ka꞉ka꞉ kolawema꞉ne, ba꞉bema꞉ hibila, Kuititi Hegelalo nale ba꞉be lumagi hibi ka꞉ka꞉mo kadipatema꞉nemo.”
JOH 6:41 Ba꞉bene komo Yunapa꞉te Ya꞉sukunu komoma꞉ ubiha꞉ tabo bega꞉luya꞉, mabu ebete tabo ba꞉ma ka꞉na goiya꞉, “Na ba꞉ Hunu Habane da꞉piya꞉ ba꞉be ka꞉ka꞉ baa꞉la.”
JOH 6:42 Ba꞉bema꞉ iba꞉te na꞉ga꞉luya꞉, “Aba꞉ hibila꞉ka꞉, ba꞉moe Ya꞉suku ba꞉ Yausepekono gudula! A iya꞉tawahala ebeno menokola nabiwila! Mabu keka꞉ ebete Hunu Habane pema꞉ da꞉goe?”
JOH 6:43 Ya꞉suti ibino tabo iya꞉tawate iba꞉tamo na꞉huiyuya꞉, “La꞉ ipuwalo ubiha꞉ tabo kaga꞉lutala꞉.
JOH 6:44 Nabiwi Godote eta lumagi natamo magaheheno, ba꞉be dawate ebeno ubilo ha꞉kiya natamo pema꞉ a꞉kamodobamene, huiyatiya Nabiwiti kebe dawa natamo da꞉magahemene, nale ebe lawete Kuititi Hegelalo wiboha꞉ ka꞉ka꞉mo kadipatema꞉nemo.
JOH 6:45 Numa꞉la꞉, dopamo Godokono ukui hawakalimipa꞉te ebeno Bukamo tabo ba꞉ma ka꞉na miya꞉tiya꞉, ‘Tete ba꞉ na꞉pe, Godote ha꞉kiya hopo habanapi hiliyonomo ebeno gabo kiya꞉tulamema꞉ne.’ Ba꞉bema꞉ ba꞉moe komo ba꞉ hibila, pote Nabiwino tabo madodo uliti ebegodone hido iya꞉tawa komo da꞉lawenako, ba꞉be dawate natamo kopema꞉ne.
JOH 6:46 Naeno taboeno ipuwa kubamo akalawa꞉la꞉. Eta hopo haba lumagiti Nabiwino holoholo dopamo kumiya꞉ha꞉, huiyatiya pote Godogodone da꞉pihitiguya꞉ ebe kapiyate Nabiwino holoholo umiya꞉, ba꞉bema꞉ la꞉le ebe kapiyagodone Nabiwino tabo kulima꞉nemata.
JOH 6:47 “Iyo, nale la꞉tamo hibi tabonomo begoemo, kebe lumagiti na hibima꞉ da꞉midinina ebegodolo wiboha꞉ ka꞉ka꞉te bitanamene.
JOH 6:48 Na ba꞉ ka꞉ka꞉ baa꞉la.
JOH 6:49 “Numa꞉la꞉, la꞉eno iniwala꞉te ma꞉nama꞉ da꞉ka꞉minakui, iba꞉te dito hopolo ba꞉be baa꞉ benahanakuya꞉ ba꞉bene galane tetelo ibi hiliyonomate a꞉ha꞉lahuya꞉,
JOH 6:50 huiyatiya Hunu Habane da꞉piya꞉, ba꞉be baa꞉ lumagiti da꞉namene ebete a꞉kahaa꞉mene.
JOH 6:51 Na ba꞉ Hunu Habane da꞉piya꞉ ba꞉be ka꞉ka꞉ baa꞉la, ba꞉bema꞉ hibila, kebe lumagiti ba꞉moe baa꞉ da꞉namene ebete emedena tetelo hibi ka꞉ka꞉go bemedenamene. Nale ebetamo dikamenakomo ba꞉be baa꞉ ba꞉ naeno apeno katenela, mabu nale naeno ape hopo habanapa꞉tamo ikalamemo ibino ka꞉ka꞉ komula꞉lelamema꞉.”
JOH 6:52 Ba꞉bema꞉ Yunapino maubate duluhukuya꞉, iba꞉te ibi ipuwalo olowabeletihuilo na꞉ga꞉luya꞉, “Ale ba꞉moe dubuino katene konahama꞉, ebete atamo keba ka꞉na na꞉kikaa꞉memene?”
JOH 6:53 Ba꞉bene Ya꞉suti iba꞉tamo na꞉goiya꞉, “Nale la꞉tamo hibi tabonomo begoemo, la꞉le Tawakalubino Naniwino katene nahaheno ba꞉gala ebeno hawi nihoheno, hibi ka꞉ka꞉te la꞉godolo a꞉kitanamene.
JOH 6:54 Iyo, kebe lumagiti naeno katene da꞉nanako ba꞉gala naeno hawi da꞉ninako, ebegodolo wiboha꞉ ka꞉ka꞉te bitanamene, ba꞉gala nale Kuititi Hegelalo ebe hibi ka꞉ka꞉mo kadipatema꞉nemo,
JOH 6:55 mabu naeno katene ba꞉ hibi ka꞉ka꞉ baa꞉la, ba꞉gala naeno hawi ba꞉ hibi ka꞉ka꞉ beyala.
JOH 6:56 Ba꞉ hibila, kebe lumagiti naeno katene da꞉nanako ba꞉gala naeno hawi da꞉ninako, ebete na ipuwalo bemedena ba꞉gala nale ebe ipuwalo bemedenamo.
JOH 6:57 Na da꞉poenamiya꞉ ba꞉be Nabiwino hibi ka꞉ka꞉te nagodolo keba ka꞉na kitana, ba꞉ ba꞉ba ka꞉na kebe lumagiti naeno katene da꞉nanakomene, ebete naeno ka꞉ka꞉go bemedenamene.
JOH 6:58 Ba꞉bema꞉ numa꞉la꞉, naeno ape ba꞉ Hunu Habane da꞉piya꞉ ba꞉be ka꞉ka꞉ baa꞉la. Ba꞉moe baa꞉te lumagitamo hibi ka꞉ka꞉ bikamenakomene, huiyatiya la꞉eno iniwala꞉te da꞉nahanakui ba꞉be baa꞉te ka꞉ka꞉ iba꞉tamo hibilo kikalamenakuiha꞉, iyo, galane iba꞉te dito ha꞉lahuya꞉.”
JOH 6:59 Ya꞉suti Kapeniyama habalo Yu tawakalubino baidi ibubulamehole genamalo ibi diya꞉tulamitiya꞉, ba꞉ba tetelo ebete iba꞉tamo ba꞉moe tabo ga꞉ga꞉dopo bolamagiya꞉.
JOH 6:60 Ba꞉ba tetelo komo Ya꞉suku ta꞉matapi hiliyonomate ebeno iya꞉tulame tabo uliti na꞉ga꞉luya꞉, “Ba꞉moe taboeno ipuwa kodakodanomola, pote lawema꞉ na꞉ka꞉modobomene?”
JOH 6:61 Iba꞉te ebeno iya꞉tulame komoma꞉ kebe ubiha꞉ tabo da꞉ga꞉litiya꞉, Ya꞉suti iya꞉tawate na꞉goiya꞉, “Mabu keka꞉ naeno iya꞉tulame komote la꞉eno hibima꞉ midi komo da꞉kubahilamita?
JOH 6:62 Ba꞉ hibila, Tawakalubino Naniwiti dopamo demedenami ebete ba꞉be Kalakala Habamo gala kakanodoloma꞉ne, ba꞉bema꞉ la꞉le ba꞉be hanohano komo dumima la꞉ keba ka꞉na na꞉kewageleoma?
JOH 6:63 Numa꞉la꞉, Godokono Gobogobote tawakaluba꞉tamo hibi ka꞉ka꞉ bikalamena, huiyatiya kateneno helote iba꞉tamo ka꞉ka꞉ ikalamema꞉ a꞉kamodobale. Ba꞉bema꞉ hibila, nale la꞉tamo dolamagimo ba꞉be tabo ba꞉ ka꞉ka꞉la, iyo, ba꞉be tabote Godokono Gobogobogodone pe,
JOH 6:64 huiyatiya la꞉ komopa꞉te hibima꞉ kamidiha꞉.” Ya꞉suti ba꞉moe tabo bolamagiya꞉ mabu ebete ebeno oko tupuimi mabuni ya꞉lo iya꞉tawuya꞉, ebe ta꞉matapi ipuwalo puya꞉te ebe hibima꞉ midiha꞉pima꞉ deda꞉hanamena꞉ ba꞉gala pote ebe anakapumipino kokotamo dihatemene.
JOH 6:65 Ba꞉bene ebete tabo moga꞉melo gala na꞉kagoiya꞉, “La꞉eno hibima꞉ midiha꞉ komoma꞉ nale ya꞉lo ba꞉ma ka꞉na goemo, Nabiwiti helo lumagitamo ikameheno, ebete ha꞉kiya ebeno ubilo natamo a꞉kapa꞉mene.”
JOH 6:66 Ba꞉be mabuma꞉ komo Ya꞉suku ta꞉matapi hiliyonomate eba꞉go wapata꞉lame ubiha꞉ma꞉ eda꞉hate ibino hiya꞉hiya꞉ emede komamo gala dito kawilaliya꞉.
JOH 6:67 Ba꞉bene Ya꞉suti ebeno komo 12 ta꞉matapi nalateda꞉liya꞉, “La꞉ ba꞉ atumu, la꞉le na ba꞉ka꞉miya꞉paneoma?”
JOH 6:68 Saimono Pitate ebetamo na꞉huiyuya꞉, “Kodawa, a potamo na꞉ka꞉tolamema꞉ mabu ama꞉ kapiyagodolo hibi ka꞉ka꞉ tabonomo bitana?
JOH 6:69 A iya꞉tawahala ama꞉ ba꞉ Godokono Hido-talona Dawalata, ba꞉bema꞉ ale ama꞉ hibima꞉ na꞉midinata.”
JOH 6:70 Ya꞉suti huiyatiya iba꞉tamo na꞉goiya꞉, “Aba꞉ hibila꞉ka꞉, nale ha꞉kiya la꞉ 12 dubu buwatimata, huiyatiya la꞉ nulia꞉la꞉, la꞉ ipuwalo kapiyate Saitanakono okodawama꞉ eda꞉na!”
JOH 6:71 Ebete ba꞉moe tabo Yudasikono komoma꞉ goiya꞉, ba꞉be dubu ba꞉ Keliyotanapi Saimonokono gudula. Dopamo ba꞉moe dubuti 12 ta꞉matapi ipuwalo emedenami, huiyatiya galane tetelo ebete Ya꞉suku anakapumipino kokotamo ebe bihatiya꞉.
JOH 7:1 Ba꞉bene ibino tabo olamagimi komo da꞉wibuya꞉, ba꞉ba tetene tupuimiti Ya꞉suti Ga꞉lili hopo konomolo pata꞉nami, huiyatiya ebete Yudiya hopolo pata꞉ ubihinola mabu ba꞉be hopoeno Yu watowatopa꞉te ebe anakapumima꞉ ewagelenama꞉.
JOH 7:2 Ba꞉bene Yunapino Mimiya Etemotehoeno Poko da꞉tataliya꞉,
JOH 7:3 ba꞉ba tetelo Ya꞉sukunu ekaka꞉te ebe na꞉ga꞉lamiya꞉, “Wadiyala ama꞉ ba꞉moe Ga꞉lili hopo miya꞉pate Yudiya hopamo gala na꞉katoa. Diyala, ama꞉le komo ta꞉matapi ba꞉bolo da꞉ nulameomena꞉, ba꞉bene ama꞉le dododilinaka iba꞉te ba꞉bi hanohano komo hidamo kulamema꞉na꞉.
JOH 7:4 Numa꞉, lumagiti ubi dihatemene tawakalubi hiliyonomate ebe kota꞉matama꞉, wadiyala ebete ebeno komo akugumuia꞉la꞉. Ba꞉be mabuma꞉ ama꞉le ba꞉moi hanohano komo hibilo dododilinaka, wadiyala ama꞉ ba꞉ atumu amia꞉no komo hopo habanapi hiliyonomatamo na꞉hawakalimiya꞉!”
JOH 7:5 Ya꞉sukunu ekaka꞉te ebe iya꞉da꞉telo ba꞉moe tabo bolamagimiya꞉ mabu iba꞉te ebe hibima꞉ kamidiya꞉ha꞉, komo tawakalubi hiliyonomate hibima꞉ midiha꞉ma꞉ keba ka꞉na keda꞉haliya꞉ ba꞉ba ka꞉na.
JOH 7:6 Ba꞉bema꞉ Ya꞉suti ebeno ekakino tabo ba huiya na꞉goiya꞉, “La꞉ ha꞉kiya la꞉eno hiya꞉hiya꞉ ubi tetelo la꞉eno komo ba꞉bo ododilinakomata, huiyatiya naeno hibi tete Godogodone kapeha꞉.
JOH 7:7 Hopo habanapa꞉te la꞉tamo kamaubahalenaha꞉, huiyatiya iba꞉te natamo maubahalena mabu nale ibino kuba ododili komokomo a꞉hawakalilamenakomo.
JOH 7:8 Ba꞉bema꞉ la꞉ ha꞉kiya poko habamo na꞉tolama꞉la꞉, huiyatiya na ka꞉lo a꞉katoamo mabu Godokono hibi tete natamo kapeha꞉.”
JOH 7:9 Ya꞉suti ba꞉moe tabo goete Ga꞉lili hopolo ba꞉bo pekaguya꞉.
JOH 7:10 Ya꞉sukunu ekaka꞉te pokoma꞉ da꞉tolamiya꞉, ebete huiyatiya galane diya gabodo ta꞉mataliya꞉, hawakala katuya꞉ha꞉.
JOH 7:11 Ba꞉ba tetelo Yu watowatopa꞉te poko habalo ebe ba ohowadi na꞉ga꞉luya꞉, “Ba꞉moe dubu Ya꞉suku keka꞉?”
JOH 7:12 Ba꞉gala puya꞉te pokoma꞉ da꞉pelameholiya꞉ ba꞉bi Yu tawakalubi hiliyonomate Ya꞉sukunu komoma꞉ tabo ganalo konomamo olamagimitiya꞉. Komo iba꞉te na꞉ga꞉luya꞉, “Ebe hido lumagila,” huiyatiya komopa꞉te na꞉ga꞉luya꞉, “Ao, ebe tawakalubi bamihoholamena.”
JOH 7:13 Ba꞉ba tetelo iba꞉te Ya꞉sukunu komoma꞉ hawakala kaga꞉lutiya꞉ha꞉ mabu iba꞉te ibino watowatopino mauba komo betolemitiya꞉.
JOH 7:14 Ba꞉bene tawakaluba꞉te ibino poko ba ododinate eta hegelalo Ya꞉suti iba꞉tamo nehawakalate Godoko Adikumino Hiya꞉ Genamamo tote iya꞉tulame ba꞉bo netupuimiya꞉.
JOH 7:15 Ba꞉ba tetelo ebeno iya꞉tulame taboma꞉ Yu watowatopa꞉te ba hanohanohuta na꞉ga꞉luya꞉, “A꞉iye! Ba꞉moe dubuti kebako iya꞉tawa ka꞉lawi mabu ebete kasikuluya꞉ha꞉!”
JOH 7:16 Ya꞉suti huiyatiya iba꞉tamo na꞉goiya꞉, “Nale la꞉ diya꞉tulamenama, ba꞉be tabote na da꞉poenamiya꞉ ba꞉be Kodawagodone pena, na ha꞉kiya naeno ubi komodo kiya꞉tulamenaha꞉.
JOH 7:17 La꞉ ha꞉kiya la꞉ ipuwalo naeno komoma꞉ ba꞉ma ka꞉na ga꞉lanamata, ‘Ebeno iya꞉tulame komote Godogodone da꞉pena o da꞉ ebeno kateneno ukuini da꞉pena.’ Numa꞉la꞉, la꞉ ipuwalo pote Godokono ubi komo ododilima꞉ ubi dihatena, ebe modobola naeno iya꞉tulame komoeno mabu la꞉tamo olamagi.
JOH 7:18 Iyo, keba tetelo lumagiti ebeno kateneno ukui hapuni tabo dolamagina, ebe ha꞉kiya ebe bawagaminana, huiyatiya kebe lumagiti ubi dihatena ebe oemedawa kapiya kawagaminanama꞉, ba꞉be lumagi ba꞉ hibi komo hawakalimidawala, ebegodolo eta ha꞉da amiho komo kitanaha꞉.
JOH 7:19 Godote ebeno Tutumu Tabo Moseseko ipuwado la꞉tamo ikalamiya꞉ta huiyatiya la꞉ ipuwalo eta kapiyate ba꞉bi hiliyonomo tutumamo hibilo kapapamiwatanaha꞉, aba꞉ hibila꞉ka꞉? Huiyatiya na tuputupu lumagima꞉ ba eda꞉na, mabu keka꞉ la꞉le na anakapunamema꞉ dewagelenama?”
JOH 7:20 Ba꞉ba tetelo Ya꞉sukunu tabo dulihutiya꞉ ba꞉bi tawakalubi hiliyonomate ebetamo na꞉ga꞉luya꞉, “Ama꞉ kuba gobogobagoenolata! Pote ka꞉goita ama꞉ anakapumima꞉?”
JOH 7:21 Ya꞉suti huiyatiya iba꞉tamo na꞉goiya꞉, “Nale la꞉eno holoholo hapulu kapiya hanohano komo dododimo, la꞉ koamo ba꞉bo la꞉wa꞉huimata.
JOH 7:22 La꞉ numa꞉la꞉, Mosesete la꞉tamo eta kukala dikalamiya꞉la, ba꞉be kukala ba꞉ la꞉le bahibahi guguda꞉tamo tama itamida kukala komiya꞉telamenakoma꞉. Iyo, la꞉le ba꞉moe kukala miya꞉te komo Mosesegodone lawema꞉ ga꞉lanamata, huiyatiya ba꞉moe komo ebegodone hibilo kuluhukuya꞉ha꞉, la꞉eno komo iniwala꞉godone piya꞉. Ba꞉gala Mosesete talona hegeloeno kukala atumu la꞉tamo a꞉kikalamiya꞉ta, ba꞉bema꞉ ba꞉bi netewa kukala la꞉godolo ba pola꞉na eta guduino kukala ihateme tetete okoha꞉ talona hegelalo duluhukunako, la꞉le dito ododinakomata mabu Godote ba꞉ma ka꞉na kagoenaha꞉, tama itamida kukala ihate komote talona hegeloeno kukala kadikamidalema꞉ne.
JOH 7:23 Iyo, la꞉eno ododi ba꞉ ba꞉ma ka꞉nala, la꞉le Godokono ubi komamo kopapamila꞉halema꞉ Mosesekono hiliyonomo tutumu ipuwalo kapiya kodakodalo ba lawe okoha꞉ talona hegeloeno kukala ba꞉bo adikamidalenakomata. Ba꞉bema꞉ nale okoha꞉ talona hegelalo eta temetema꞉goeno dubu da꞉hiduimimo, huiyatiya mabu keka꞉ la꞉le natamo da꞉maubahalitama?
JOH 7:24 A꞉iye, la꞉ hunu gabodo naeno komo dito akanagiya꞉midanama꞉la꞉, wadiyala la꞉ huiyatiya Godokono tuputupu gabodo lumagino komo nanagiya꞉midama꞉la꞉!”
JOH 7:25 Ba꞉ba tetelo Yelusalema habalo demedehonama꞉ komo iba꞉te na꞉ga꞉luya꞉, “Aba꞉ hibila꞉ka꞉, ba꞉moe dubu ba꞉ komopa꞉te anakapumima꞉ dewagelena ba꞉be lumagila!
JOH 7:26 Numa꞉la꞉, ebete hilopoheno tabo hawakala bolamagita, huiyatiya aeno watowatopa꞉te ebe duhimima꞉ eta tabo kaga꞉lutaha꞉. Diyala, iba꞉te da꞉ iya꞉tawahala꞉, ba꞉moe dubuti Godokono Oemedawa Kelisoma꞉ deda꞉na.
JOH 7:27 A iya꞉tawahala ba꞉moe dubuino haba komo, huiyatiya Godokono Bukate a biya꞉tua꞉mena, hibi Kelisote da꞉puluhukumini, ba꞉ba tetelo tawakaluba꞉te a꞉kiya꞉tawahamena꞉ ebete kebene da꞉pemene.”
JOH 7:28 Ba꞉bema꞉ Ya꞉suti Godoko Adikumino Hiya꞉ Genamalo tawakalubi ba iya꞉tulamita ibulunomo na꞉goiya꞉, “La꞉ hibilo iya꞉tawahala꞉ka꞉ nale kebene da꞉piya꞉mo ba꞉be haboeno komo? Ba꞉gala naeno komoma꞉ la꞉godolo hibi iya꞉tawa ba꞉kitana? La꞉ nulia꞉la꞉, na ha꞉kiya naeno ubilo kapiya꞉ha꞉ la꞉tamo, na Kodawate poenamiya꞉. Ebe ba꞉ hibi komo hawakalimidawala, huiyatiya la꞉le ebeno komo kiya꞉tawahanaha꞉,
JOH 7:29 iyo, na ha꞉kiya ebeno komo iya꞉tawala, mabu nale ebegodone piya꞉mo ba꞉gala ebete na a꞉poenamiya꞉.”
JOH 7:30 Ba꞉be taboma꞉ komopa꞉te ubila Ya꞉suku du genamamo ihatema꞉, huiyatiya ibi ipuwalo etate ebe kalawiya꞉ha꞉ mabu ba꞉be komote hibilo uluhukuma꞉ Godogodone tete pehenola.
JOH 7:31 Huiyatiya ba꞉be atu tetelo komo tawakalubi hiliyonomate Ya꞉suku hibima꞉ midilo na꞉ga꞉luya꞉, “Ba꞉moe dubugodolo hanohano komo hiliyonomo ulamenakoma꞉, ba꞉bema꞉ ebe da꞉ Kelisotela꞉. Iyo, eta lumagiti Keliso mahilamo da꞉mahigamene, ebeno helote ba꞉moe dubuino helo a꞉kagogolamene!”
JOH 7:32 Hiliyonomo tawakaluba꞉te Ya꞉sukunu komoma꞉ tabo ganalo da꞉ga꞉litiya꞉, Pa꞉lisi kapiyuimipa꞉te uliti ba꞉bene ibi ba꞉gala Godotamo hawa꞉goeno ikamehopino watowatopi iba꞉te komo Godoko Adikumino Genama lawamepi dubu ba꞉bo noelamiya꞉, iba꞉te Ya꞉suku nelawete du genamamo kopihatema꞉.
JOH 7:33 Ba꞉be atu tetelo Ya꞉suti tawakaluba꞉tamo nolamagitiya꞉, “Na la꞉go nanekela꞉mo emedete, na da꞉poenamiya꞉ ba꞉be Kodawatamo gala kakatoma꞉nemo.
JOH 7:34 Ba꞉bene la꞉le na nipo kohowadinima꞉nemata, mabu nale kebe habamo da꞉tomo la꞉le ba꞉be habamo tolame modoboha꞉.”
JOH 7:35 Ba꞉bema꞉ Yu watowatopa꞉te ibi ipuwalo na꞉ga꞉luya꞉, “Ba꞉moe dubuti kebe habamo na꞉ka꞉tomene, ba꞉bene ale ebe umima꞉ a꞉kamodobama꞉? Diyala, aeno komo tawakaluba꞉te hiya꞉hiya꞉ Yuha꞉pino hopolo da꞉nemedehona, ebete iba꞉tamo da꞉ tomene iba꞉go konemedema꞉, ba꞉bene ebete ba꞉bi Yuha꞉pi Godokono tabo da꞉niya꞉tulamemene.
JOH 7:36 Ebete na꞉goe, ‘La꞉le na nipo kohowadinima꞉nemata,’ ba꞉gala ebete gala na꞉kagoe, ‘Nale kebe habamo da꞉tomo la꞉le ba꞉be habamo pelame modoboha꞉.’ A꞉iye! Ebeno taboeno ipuwa keba ka꞉nala꞉ka꞉?”
JOH 7:37 Yunapino Mimiya Etemotehoeno Poko ipuwalo kuititi hegela ba꞉ ko hegelanomoma꞉ eda꞉na. Ba꞉bene ba꞉be hegelate da꞉piya꞉ Ya꞉suti tawakalubi hiliyonomo ipuwalo mahigate ibulunomo na꞉goiya꞉, “Kebe lumagi beya kapete dumina, wadiyala ebete pete nagodolo beya na꞉pena꞉mene.
JOH 7:38 Ba꞉gala kebe lumagiti na hibima꞉ da꞉midinimini, ba꞉be lumagino tepo ipuwane wiboha꞉ ka꞉ka꞉ beyate ba꞉peka꞉ka꞉la꞉namene, mabu Godokono Bukate ba꞉ba ka꞉na goena.”
JOH 7:39 Buka ka꞉lamiholedawa, wadiyala ama꞉ niya꞉tawa Ya꞉suti ba꞉moe tabo Godokono Gobogoboeno komoma꞉ olamagitiya꞉. Iyo, dopamo tetelo Gobogoboeno helote Ya꞉suku hibima꞉ midipa꞉godolo kitanamiha꞉, huiyatiya Godote ebe hoe ipuwane dadipatiya꞉, ebete Hunu Habamo odolote ko alonomote ebe ba꞉bo na꞉la꞉minuya꞉. Ba꞉ba tetelo Ya꞉suku hibima꞉ midipa꞉te Gobogoboeno helo hibilo ba꞉bo lawiya꞉.
JOH 7:40 Ya꞉sukunu tabo dulihuya꞉ ba꞉bi tawakalubi ipuwalo komo hiliyonomate na꞉ga꞉luya꞉, “Ba꞉moe dubu ba꞉ Godokono Hiya꞉nomo Ukui Hawakalimidawala, Mosesete dopamo pema꞉ hibilo da꞉goiya꞉ ba꞉moe ba꞉bela.”
JOH 7:41 Huiyatiya komopa꞉te na꞉ga꞉luya꞉, “Ao, ebe ba꞉ Kelisotela, Godokono Oemedawala.” Ba꞉gala komopa꞉te na꞉kaga꞉luya꞉, “Ao, ba꞉moe dubu Ga꞉lili hoponapila. Modoboha꞉ Kelisote ba꞉bako kuba hopone pehawakala,
JOH 7:42 mabu Godokono Bukate a biya꞉tua꞉mena, Kelisote Da꞉ibidikono Beteleheme habalo ebeno eyoni guguda꞉godone kohawakalama꞉ne, Ga꞉lili hopoloha꞉.”
JOH 7:43 Ba꞉bema꞉ tawakalubi ipuwalo Ya꞉sukunu komoma꞉ anagiya꞉mida komote uluhukuya꞉,
JOH 7:44 ba꞉gala komopa꞉te ubila ebe du genamamo kihatema꞉, huiyatiya ba꞉ba tetelo ibi ipuwalo eta lumagiti ebetamo eta komo kododiya꞉ha꞉.
JOH 7:45 Ba꞉bene Pa꞉lisi kapiyuimipi ba꞉gala Godotamo hawa꞉goeno ikamehopino watowatopi, iba꞉te Ya꞉suku lawema꞉ kebe dubu dopamo da꞉noelamiya꞉, ba꞉bi dubate Ya꞉suku laweheno gala dito kapelamiya꞉. Ba꞉bema꞉ Yu watowatopa꞉te ibi na꞉kiyalamiya꞉, “Keka꞉ mabu la꞉le ba꞉be dubu atamo kamagaheha꞉?”
JOH 7:46 Ba꞉bi dubate ibino tabo ba huiya na꞉ga꞉luya꞉, “Ba꞉be dubuino tabo hidonomola, a dopamo ba꞉bako tabo kulinakuiha꞉!”
JOH 7:47 Ba꞉bene Yu watowatopa꞉te ibi ba kiyahalame na꞉ga꞉luya꞉, “A꞉iye! La꞉ ebeno ha꞉da amiho tabo uliti hibima꞉ a꞉ka꞉midioma?
JOH 7:48 Numa꞉la꞉, a Pa꞉lisi kapiyuimipi ba꞉gala komo watowatopi, a ipuwalo eta lumagiti ebeno tabo hibima꞉ kamidinaha꞉!
JOH 7:49 Ba꞉ hibila, kebe kuba dalowa꞉ tawakaluba꞉te ibino ubi komo ebetamo dihatena, iba꞉te Mosesekono tutumu tabo hidamo niya꞉tawahatale, iba꞉te atumu ebe hibima꞉ ba꞉ka꞉midina꞉. Huiyatiya ibi hiliyonomo ba꞉ daedaepila, ba꞉bema꞉ Godote ibi Koe Habamo kiya꞉hekema꞉ne!”
JOH 7:50 Ba꞉ba tetelo Nikadimasiti ba꞉bi watowatopino kapiyuimi ipuwalo na꞉lutiya꞉, ebe ba꞉ du tetelo Ya꞉sukuba꞉ tabo olamaginama꞉ dopamo da꞉toniya꞉ ba꞉be dubula. Ba꞉bene ebete komo watowatopa꞉tamo na꞉goiya꞉,
JOH 7:51 “La꞉ hidamo! Aeno eta tutumu tabote a biya꞉tua꞉mena, eta lumagino hibi komo lawema꞉ ebeno tabo ulihino ale ebe hunu gabodo kubama꞉ dito a꞉kaga꞉lama꞉.”
JOH 7:52 Ba꞉bene iba꞉te ebe ba kiyahame na꞉ga꞉luya꞉, “A꞉iye! Ama꞉ ba꞉ atumu Ga꞉lili hopoeno dalowa꞉ lumagi etala꞉ka꞉? Wadiyala ama꞉ Godokono Buka taboeno komokomo nulameholiya꞉, ba꞉bema꞉ ama꞉ kiya꞉tawama꞉na꞉ta Godokono ukui hawakalimipi hiliyonomo ipuwalo etate Ga꞉lili hopone dopamo kuluhukunakuiha꞉.”
JOH 7:53 Ba꞉bene da꞉gapogapohoniya꞉ ba꞉bi tawakalubi hiliyonomate ibino hiya꞉hiya꞉ genamamo ba꞉bo tolameholeniya꞉,
JOH 8:1 huiyatiya Ya꞉suti Olibi Kehakeha Hunu Hakamo ba꞉ dito toniya꞉.
JOH 8:2 Ba꞉bene eta hegelalo Ya꞉suti Godoko Adikumino Hiya꞉ Genamamo duiduiyanomolo gala kapete, tawakalubi hiliyonomate ebetamo da꞉pelamiya꞉, ebete emedete ibi iya꞉tulame ba꞉bo tupuimiya꞉.
JOH 8:3 Ba꞉ba tetelo komo Godokono tutumu iya꞉tulamepi ba꞉gala Pa꞉lisi kapiyuimipi, iba꞉te eta kamena lawete tawakalubino holoholo hapuamo ba꞉ dito magatuya꞉, mabu ba꞉moe kamenate eta kamenoeno awa꞉go konomo kuba ododitalo iba꞉te ba꞉bo ulamiya꞉.
JOH 8:4 Ba꞉bema꞉ iba꞉te Ya꞉suku na꞉kiyamiya꞉, “Iya꞉tulamedawa, ba꞉moe kamena eta kamenoeno awa꞉go konomo kuba ba ododita, ale ibi ulamete ba꞉moe kamena ba꞉bo lawema꞉.
JOH 8:5 Mosesekono tutumu tabote a biya꞉tua꞉mena, ba꞉mako kamenoeno kuba ododi mabuma꞉ wadiyala tawakaluba꞉te ebe nakolamo mapemete nanakapuma꞉mena꞉. Ba꞉bema꞉ amia꞉no ukui keba ka꞉nala꞉ka꞉? Ale ebetamo hoe huiya ba꞉kikamema꞉?”
JOH 8:6 Iba꞉te ba꞉moe tabo Ya꞉sutamo na꞉ga꞉litiya꞉, mabu ibi ubila tawakalubino holoholo hapulu Ya꞉sukunu komo ba꞉ma ka꞉na hawakalimi, ebete Mosesekono tutumu tabamo da꞉papamiwatamene o da꞉ a꞉kapapamiwatamene. Ebete papamiwataha꞉ma꞉ da꞉goemene, ba꞉ba tetelo iba꞉te ebe kubadawama꞉ koga꞉lama꞉na꞉. Ya꞉suti huiyatiya ibino tabo huiyaheno tudiwatate ebeno kokotamo hakamo hiya꞉hiya꞉ tabo bimiya꞉teholitiya꞉.
JOH 8:7 Ba꞉bema꞉ iba꞉te atu alateda꞉ tabo ebe kiyahame ekelalameheno, ba꞉ba tetelo Ya꞉suti mahigate na꞉goiya꞉, “Kubahenola, la꞉ ipuwalo pote kuba ododiha꞉dawama꞉ deda꞉na, wadiyala ba꞉bete dopo nakola lawete ebe na꞉mida꞉ma꞉mene, ba꞉bene la꞉ komopa꞉te gala hapuni ebe mapemete ba꞉bo nanakapumiya꞉la꞉.”
JOH 8:8 Ba꞉bene Ya꞉suti hakamo gala katudiwatate ebeno kokotamo komo hiya꞉hiya꞉ tabo bekamiya꞉teholitiya꞉.
JOH 8:9 Ba꞉bema꞉ puya꞉te Ya꞉sukunu tabo duliya꞉, iba꞉te ukui hiya꞉ma꞉ midiliti, ba꞉bene ibi ipuwalo eta kapiya tonakui, eta kapiya tonakui, ba꞉bi dubu hiliyonomate hiya꞉hiya꞉ ba꞉ma ka꞉na tolameholiya꞉ kadelekadela꞉godone tupuimiti uli ape dubatamo nuluhuku. Ba꞉ba tetelo Ya꞉suku kapiyate ba꞉bolo lutiya꞉, ba꞉gala ba꞉be kamenate ebeno holoholo hapulu na꞉la꞉nuya꞉.
JOH 8:10 Ba꞉bene Ya꞉suti ebeno wato adipatete kamenatamo na꞉goiya꞉, “Kamena, kuba huiya ama꞉tamo ikamema꞉ dewagelitaka, ba꞉bi tawakalubi keka꞉? Ama꞉ kuba dawama꞉ da꞉goita, eta ba꞉bako lumagi ba꞉ka꞉luta?”
JOH 8:11 Ebete huiyatiya na꞉goiya꞉, “Ao, Kodawa, natamo kuba huiya ikanamedawa puliyala.” Ba꞉bene Ya꞉suti ebetamo na꞉goiya꞉, “Na ba꞉ atumu ama꞉tamo kuba huiya a꞉kikama꞉mata. Wadiyala ama꞉ na꞉toa, galane tetelo ba꞉bako kuba gala akododa꞉la꞉.”
JOH 8:12 Eta tetelo Ya꞉suti Pa꞉lisi kapiyuimipa꞉tamo gala na꞉kolamagiya꞉, “Na ba꞉ ba꞉moe hopo konomoeno alola. Kebe lumagiti na da꞉ta꞉mahenena ebete du ipuwalo a꞉kapata꞉namene mabu ebegodolo hibi ka꞉ka꞉ alote bitanamene.”
JOH 8:13 Ba꞉bene Pa꞉lisi kapiyuimipa꞉te ebetamo na꞉ga꞉luya꞉, “Ama꞉ ha꞉kiya ama꞉ adipatelo da꞉gaa꞉, ba꞉bema꞉ tawakaluba꞉te amia꞉no tabo a꞉kalawa꞉mena꞉.”
JOH 8:14 Ya꞉suti ibino tabo ba huiya na꞉goiya꞉, “Ao, na ha꞉kiya na a꞉kadipata꞉lemo, huiyatiya naeno hibi komo na ha꞉kiya na꞉hawakalimitale, naeno hiya꞉hiya꞉ tabote hibinomoma꞉ beda꞉hana꞉, mabu na kapiyate iya꞉tawala nale kebene ka꞉piya꞉mo ba꞉gala nale gala kebamo da꞉katomo. La꞉le huiyatiya naeno komo kiya꞉tawahanaha꞉,
JOH 8:15 mabu la꞉ hopo habanapino ukui gabodo lumagino komo dito anagilamelemenakomata! Numa꞉la꞉, nale ba꞉moe hopolo ba emedena eta lumagino komo anagiya꞉midamete kuba huiya a꞉kikama꞉lemo,
JOH 8:16 huiyatiya keba tetelo nale eta lumagino komo nanagiya꞉midametale ebeno komo hibilo ba꞉hawakalimina꞉, mabu Nabiwiti na da꞉poenamiya꞉ ebete helo natamo ikanamiya꞉ ba꞉be komo kododima꞉. Ebeno ukui ba꞉gala naeno ukui ba꞉ kapiyala, ba꞉bema꞉ nale eta lumagino komo kubama꞉ da꞉goitamo na kapiyate kagoitaha꞉, ba꞉ba tetelo naeno Nabiwiti atu tabo bekagoita.
JOH 8:17 La꞉eno eta tutumu tabote ba꞉ma ka꞉na goena, tawakalubino anagiya꞉mida ipuwalo netewapa꞉te atu tabo da꞉ga꞉lamena꞉ tabo anagiya꞉midapa꞉te ba꞉be komo hibima꞉ koga꞉lama꞉na꞉.
JOH 8:18 Ba꞉bema꞉ numa꞉la꞉, nale naeno hibi komo ba hawakalimina, na da꞉poenamiya꞉ ba꞉be Nabiwiti atumu naeno hibi komo la꞉tamo na꞉kahawakalimina.”
JOH 8:19 Ba꞉ba tetelo iba꞉te ebe na꞉ga꞉lamiya꞉, “Amia꞉no nabiwi ale kumitaha꞉. Ebe keka꞉?” Ya꞉suti ibino tabo ba huiya na꞉goiya꞉, “Na ba꞉gala naeno Nabiwi, aeno komo la꞉ kiya꞉tawahanaha꞉. La꞉le naeno hibi komo niya꞉tawahotale, naeno Nabiwino komo atumu la꞉ biya꞉tawahona꞉.”
JOH 8:20 Ya꞉suti Godoko Adikumino Hiya꞉ Genamalo ba luta, ebete ba꞉be Genamoeno malemale mani miya꞉tehoeno habalo tawakalubi ba iya꞉tulamita ba꞉moi tabo komokomo Pa꞉lisi kapiyuimipa꞉tamo ba꞉bo olamagiya꞉. Ba꞉ba tetelo komopa꞉te ubila ebe du genamamo kihatema꞉, huiyatiya ibi ipuwalo etate ebe kalawiya꞉ha꞉ mabu ba꞉be komote hibilo uluhukuma꞉ Godogodone tete pehenola.
JOH 8:21 Ba꞉bema꞉ Ya꞉suti Pa꞉lisi kapiyuimipa꞉tamo gala na꞉kagoiya꞉, “Tete tatalila, nale la꞉ komiya꞉palema꞉nemata, ba꞉bene la꞉le na ba ohowadini la꞉ la꞉eno kuba ododili ipuwalo ba꞉ dito koha꞉lahama꞉nemata, mabu nale kebe habamo da꞉tomo la꞉ ba꞉be habamo nago tolame modoboha꞉.”
JOH 8:22 Ba꞉bema꞉ Yu watowatopa꞉te ibi ipuwalo na꞉ga꞉luya꞉, “Mabu keka꞉ ebete da꞉goe a eba꞉go tolame modoboha꞉? Ba꞉moe taboeno ipuwa ba꞉ma ka꞉nala꞉ka꞉, ebe ha꞉kiya ebe ba꞉kanakapumimini?”
JOH 8:23 Ba꞉bema꞉ Ya꞉suti ibino tabo ba huiya na꞉goiya꞉, “La꞉ ba꞉ ba꞉moe hopo tawakalubilata, huiyatiya na Hunu Habane piya꞉mo, na ba꞉moe hopo lumagiha꞉.
JOH 8:24 Ba꞉bema꞉ nale la꞉ hibinomolo ba꞉ma ka꞉na goelamemata, la꞉ la꞉eno kuba ododili ipuwalo koha꞉lahama꞉nemata, mabu na ba꞉ emedena tetelo demedenamo ba꞉be Kodawala. La꞉ ba꞉moe komo hibima꞉ midihino, ba꞉ hibila, la꞉ hiliyonomate la꞉eno kuba ododili ipuwalo koha꞉lahama꞉nemata.”
JOH 8:25 Ba꞉bene tabo ulihopa꞉te ebe na꞉ga꞉lamiya꞉, “Ama꞉ potela꞉ka꞉?” Huiyatiya Ya꞉suti iba꞉tamo na꞉goiya꞉, “Tupuimi mabuni nale la꞉ ba꞉ma ka꞉na a꞉goelamimata, na ba꞉ ba꞉be Kodawala.
JOH 8:26 Ba꞉bema꞉ nagodolo komo hiliyonomo tabo komokomo ba꞉pola꞉na, nale la꞉ mabuma꞉ ba olamagi la꞉eno komo ba꞉bo kanagilamelelamema꞉nemata. Huiyatiya numa꞉la꞉, ba꞉bi tabo komokomate nagodone kapelamenaha꞉, na Oenamedawagodone pelamena. Ba꞉be Kodawa ba꞉ hibi komo hawakalimidawala, ba꞉bema꞉ nale ya꞉lo tetelo ebegodone kebe tabo komokomo kulihuya꞉mo na la꞉tamo ba꞉bi atu tabonomo beka-olamaginakomo.”
JOH 8:27 Ba꞉ba tetelo iba꞉te hidamo kemalagidoluya꞉ha꞉, Ya꞉suti Nabiwi Godokono komoma꞉ dolamagiya꞉.
JOH 8:28 Ba꞉bema꞉ Ya꞉suti iba꞉tamo gala na꞉kagoiya꞉, “La꞉ hopo habanapa꞉te na Tawakalubino Naniwi keha pihiga hunamo dadipanatenema, la꞉ naeno komo ba꞉ma ka꞉na hibilo kiya꞉tawahama꞉nemata, na ba꞉ emedena tetelo demedenamo ba꞉be Kodawala, ba꞉gala nale kebe komokomo kododilinamo na ha꞉kiya naeno heloamo kododilinaha꞉, mabu na Oenamedawate na kebe tabo komokomo ka꞉kiyanamiya꞉ nale tawakaluba꞉tamo ba꞉bi atu tabonomo beka-olamaginakomo.
JOH 8:29 Ba꞉gala eta komo. Na da꞉poenamiya꞉ ba꞉be Kodawate hiliyonomo tetelo naeno ododili komoma꞉ natamo na꞉kalakalana, ba꞉bema꞉ ebete nago ba emedena na kamiya꞉panenaha꞉.”
JOH 8:30 Ba꞉ba tetelo komo tawakalubi hiliyonomate Ya꞉sukunu tabo dulihuya꞉, iba꞉te ebe hibima꞉ ba꞉bo midiya꞉.
JOH 8:31 Ba꞉bene Yu tawakalubi ipuwalo puya꞉te Ya꞉suku hibima꞉ da꞉midiya꞉, ebete iba꞉tamo na꞉goiya꞉, “La꞉ naeno iya꞉tulame ipuwalo demedenama, la꞉ ba꞉ naeno hibi ta꞉matapilata.
JOH 8:32 Ba꞉bene la꞉ Godokono hibi komo kiya꞉tawahama꞉nemata, iyo, ba꞉be hibi komote la꞉ huiyaha꞉ menemene oko ipuwane uluhukulatelete tutupima꞉ komidilima꞉na꞉ta, ba꞉gala eta kubadawoeno eta matuhumiho komote la꞉godolo a꞉kitanamene.”
JOH 8:33 Ba꞉ba tetelo iba꞉te tabo ba huiya na꞉ga꞉luya꞉, “A ba꞉ A꞉ibalahamakono eyoni gugudila. Iniwalino tetene tupuimiti ba꞉ma teta꞉mo puluhuku, a ipuwalo eta lumagiti eta kubadawoeno huiyaha꞉ okodawama꞉ keda꞉namiha꞉, ba꞉gala ale eta lumagino matuhumiho komo a꞉kiya꞉tawahalema꞉. Ba꞉bema꞉ mabu keka꞉ ama꞉ atamo da꞉gaa꞉, Godokono hibi komote a huiyaha꞉ oko ipuwane kuluhukua꞉tema꞉?”
JOH 8:34 Ba꞉bene Ya꞉suti iba꞉tamo gala na꞉kagoiya꞉, “Na la꞉tamo hibi tabonomo begoemo, puya꞉te kuba ododili ipuwalo demedehona, ibi ba꞉ kuboeno huiyaha꞉ okopima꞉ eda꞉hana.
JOH 8:35 Hibi gudunomote ebeno nabiwino genamanapi ipuwalo emedena tetelo kalakalago bemedenamene, huiyatiya huiyaha꞉ okodawoeno komo eba ka꞉naha꞉. Ebete ebeno oko namutudawoeno matuhumiho ipuwalo bemedena, ba꞉bema꞉ eta tetelo ba꞉be namutudawate ebe ubiha꞉ma꞉ deda꞉mene, ebete ebeno genamane ebe dito konoemema꞉ne.
JOH 8:36 Ba꞉bema꞉ la꞉ nulia꞉la꞉. Godokono Guduti la꞉ eta kubadawoeno matuhulame ipuwane uluhukulatelete ebeno tutu badininipala ekakima꞉ da꞉midilimina꞉, ba꞉ba tetelo la꞉ hibinomolo tutuma꞉ keda꞉hama꞉nemata.”
JOH 8:37 Ba꞉bene Ya꞉suti iba꞉tamo na꞉goiya꞉, “Na iya꞉tawala la꞉ ba꞉ A꞉ibalahamakono eyoni gugudila, huiyatiya la꞉ naeno iya꞉tulame komo kuwatenaha꞉ ba꞉bema꞉ la꞉ ubila na kanakapunamema꞉.
JOH 8:38 Numa꞉la꞉, naeno Nabiwiti ya꞉lo tetelo natamo da꞉hawakalilamiya꞉ na ba꞉bi atu komo la꞉tamo a꞉hawakalilamenakomo, ba꞉gala la꞉ ba꞉ atumu, la꞉eno ha꞉da amiho nabiwiti kebe komokomo kiya꞉tulametiya꞉la la꞉ ba꞉bi komo kapiya bododilinakomata.”
JOH 8:39 Ba꞉bene iba꞉te ebeno tabo ba huiya na꞉ga꞉luya꞉, “Aeno nabiwi ba꞉ A꞉ibalahamatela.” Ba꞉ba tetelo ebete ibi na꞉goelamiya꞉, “La꞉ A꞉ibalahamakono hibi gugudima꞉ neda꞉honatale, ebete dododilinakui la꞉ ba꞉bi atu hidohido komo bododilionakona꞉.
JOH 8:40 Numa꞉la꞉, nale Godogodone kebe hibi komokomo kulihuya꞉mo, na ba꞉bi atu komo la꞉tamo a꞉hawakalilamenakomo. Ba꞉bema꞉ la꞉ ubila na kanakapunamema꞉, huiyatiya la꞉eno iniwa nabiwi A꞉ibalahamate dopamo eta tuputupu lumagitamo maubate ebe anakapumima꞉ kewageliya꞉ha꞉.
JOH 8:41 Ba꞉ hibila, la꞉eno eta nabiwi bemedena, ba꞉be kubadawate kebe komokomo kododilinako la꞉ ba꞉bi atu kuba komo beka-ododilinakomata, la꞉le huiyatiya A꞉ibalahamakono hidohido komo kododilinaha꞉!” Ba꞉bene iba꞉te ebeno tabo ba huiya na꞉ga꞉luya꞉, “A pilo gabodo kahawakalahaliya꞉ha꞉, iyo, a nabiha꞉ gugudima꞉ keda꞉hanaha꞉. Ba꞉bema꞉ Godoko kapiya ba꞉ aeno Nabiwila, ba꞉gala a ba꞉ ebeno hibi gugudinomola.”
JOH 8:42 Ya꞉suti iba꞉tamo na꞉goiya꞉, “Godote la꞉eno hibi Nabiwima꞉ neda꞉natale, la꞉le na malemalelo bemalagidoloneonana꞉, mabu na ba꞉ Godogodone la꞉tamo piya꞉mo. Iyo, na ha꞉kiya naeno heloamo kapiya꞉ha꞉, na Godote poenamiya꞉.
JOH 8:43 Huiyatiya la꞉le ba꞉moe taboeno ipuwa hidamo kalaweha꞉, mabu la꞉le naeno iya꞉tulame komo ubiha꞉ma꞉ eda꞉hanamata.
JOH 8:44 Numa꞉la꞉, la꞉eno nabiwi ba꞉ Saitanatela, ba꞉bema꞉ la꞉le ebeno gugudima꞉ ba eda꞉hana ebeno ubi komamo papamila꞉hanakomata. Dopamo tupuimi mabuni ebe ba꞉ tuputupu lumagi anakapumidawala, ba꞉gala ebete Godokono hibi komo ubiha꞉ma꞉ eda꞉nami. A꞉iye, ebeno ododili ipuwado ebe ha꞉kiya ebeno komo ba꞉ma ka꞉na hawakaliminako, ebete ha꞉da tabo kapiya bolamaginako mabu ebegodolo eta hibi komo kitanaha꞉. Iyo, ebe ba꞉ ha꞉da amihopino nabiwima꞉ eda꞉na, mabu hiliyonomo ha꞉da amihoho komate ebegodone pikulina!
JOH 8:45 Na huiyatiya hibi tabo komokomo kapiya bolamaginakomo, ba꞉bema꞉ la꞉le la꞉eno ha꞉da amiho nabiwi huiyama꞉ ba eda꞉hana la꞉ na hibima꞉ kamidininaha꞉.
JOH 8:46 La꞉ iya꞉tawahala na hibi tabo olamagidawala, ba꞉gala la꞉ ipuwalo eta lumagi modoboha꞉ na kuba ododidawama꞉ ka꞉nami. Ba꞉bema꞉ mabu keka꞉ la꞉le na hibima꞉ kamidininaha꞉?
JOH 8:47 Ba꞉moe komo ba꞉ hibila, kebe tawakaluba꞉te Godokono hibi gugudima꞉ deda꞉hamena꞉ iba꞉te ebeno tabamo ba꞉papamila꞉hanakomena꞉, huiyatiya la꞉ eba ka꞉naha꞉, ba꞉bema꞉ la꞉ ebeno tabo a꞉kulia꞉lemata.”
JOH 8:48 Ba꞉ba tetelo komo Yunapa꞉te Ya꞉sutamo na꞉ga꞉luya꞉, “Ale amia꞉no komo hibinomolo ba꞉ma ka꞉na hawakalimima꞉, ama꞉ ba꞉ kuba Samaliya hoponapilata ba꞉gala ama꞉ ipuwalo kuba gobogobote bemedena.”
JOH 8:49 Ya꞉suti ibino tabo ba huiya na꞉goiya꞉, “Na ipuwalo kuba gobogobote kemedenaha꞉. Ao, naeno ododili komate naeno Nabiwino mahilo hunamo adipatenako, huiyatiya la꞉le naeno mahilo bekubahiminakomata.
JOH 8:50 Na ha꞉kiya na a꞉kawagaminalemo, mabu eta Kodawate naeno komo ba anagiya꞉midaname ebete na ba꞉bo kawagaminanema꞉ne.
JOH 8:51 Ba꞉bema꞉ nale la꞉tamo hibi tabonomo begoemo, kebe lumagiti naeno iya꞉tulame tabamo da꞉papamiwatamene ebete hoe a꞉kuma꞉mene.”
JOH 8:52 Ba꞉ba tetelo tabo ulihopa꞉te Ya꞉sutamo gala na꞉kaga꞉luya꞉, “Amia꞉no tabo olamagi komodo a hibilo iya꞉tawahama꞉ ama꞉ kuba gobogobagoenola. Mabu A꞉ibalahamako ba꞉gala komo Godokono ukui hawakalimipi ibi hiliyonomate a꞉ha꞉lahuya꞉, huiyatiya ama꞉le na꞉gaa꞉ta kebe lumagiti amia꞉no tabamo da꞉papamiwatamene ebete hoe a꞉kuma꞉mene! Ama꞉ na꞉kemalagidoluta amia꞉no helote A꞉ibalahamakono helo ba꞉gala komo Godokono okopino helo na꞉gogolena? A꞉iye, amia꞉no awagaha komo bada konomola꞉ka꞉!”
JOH 8:54 Ba꞉bene Ya꞉suti ibino tabo ba huiya na꞉goiya꞉, “Keba tetelo na ha꞉kiya na nawagaminatale, ba꞉be awagaha ipuwalo eta hibi komote ba꞉ka꞉-itanana꞉. Huiyatiya naeno Nabiwiti na nawagaminanena, naleha꞉. Ebe ba꞉ la꞉le hibi Godoma꞉ da꞉ka꞉minama, ba꞉betela.
JOH 8:55 La꞉ ebeno komo hibilo iya꞉tawaha꞉, huiyatiya na kapiyate ebeno komo iya꞉tawala. Numa꞉la꞉, nale la꞉tamo ba꞉ma ka꞉na na꞉goetale, ‘Na ebeno komo iya꞉tawaha꞉,’ na ha꞉da tabo ba꞉goena꞉, huiyatiya na la꞉ ha꞉da amihopi huiyaha꞉, ba꞉bema꞉ nale Nabiwino hibi komo iya꞉tawala ba꞉gala nale ebeno ubi komokomo kapiya bododilinakomo.
JOH 8:56 Ba꞉gala la꞉ ba꞉moe eta komo nemalagidolala꞉. La꞉eno iniwa nabiwi A꞉ibalahamate ebeno tepo ipuwalo naeno pe komo demalagidolonakui ko kalakala komo biya꞉tawanakui, iyo, ba꞉be hegelate pema꞉ ebete kalakalago latiminami.”
JOH 8:57 Ba꞉ba tetelo tabo ulihopa꞉te ebe na꞉ga꞉lamiya꞉, “A꞉iye! Ama꞉ aeno iniwa A꞉ibalahamako hibilo a꞉kumiuya꞉la? Ebete ya꞉lo tetenomolo a꞉hoiya꞉ ba꞉gala ama꞉ 50 gogo tete lumagiha꞉, ama꞉ ba꞉ uli ape dubulata!”
JOH 8:58 Ba꞉bene Ya꞉suti iba꞉tamo ba huiya na꞉goiya꞉, “Na la꞉tamo hibi tabonomo begoemo, na ba꞉ emedena tetelo demedenamo ba꞉be Kodawala. A꞉ibalahamate hawakalaha꞉ tetelo na dopamo Godokoba꞉ emedenamimo.”
JOH 8:59 Ba꞉ba tetelo iba꞉te ba꞉be tabo mabuma꞉ konomamo maubahalete nakola ba꞉bo uwatiya꞉ ebe mapemete kanakapumima꞉, huiyatiya Godote ebe ugumuilo Adikumino Hiya꞉ Genama miya꞉pate ba꞉ dito tuya꞉.
JOH 9:1 Eta hegelalo Ya꞉suti ba tonato baidi tamiho dubu ba꞉bo numiya꞉, ba꞉be dubuti ebeno menokoeno tepo ipuwane ba꞉ba ka꞉na pehawakaluya꞉.
JOH 9:2 Ba꞉bene Ya꞉suku ta꞉matapa꞉te ebe nalatediya꞉, “Iya꞉tulamedawa, ba꞉moe dubuti baidi tamiholo da꞉pehawakaluya꞉ pokono kubala꞉ka꞉? Ebenola꞉ka꞉ o ebeno menoko nabiwi ibino kubala꞉ka꞉?”
JOH 9:3 Ba꞉bene Ya꞉suti ibino tabo ba huiya na꞉goiya꞉, “Ba꞉moe dubuino kubaha꞉, ba꞉gala ebeno menoko nabiwi ibino kubaha꞉. Ba꞉moe dubuti ba꞉ma ka꞉na da꞉pehawakaluya꞉, ba꞉be mabu bitana Godote ya꞉lo tetelo ubi bihatiya꞉ ebeno okoeno ko helo ebegodolo kohawakalimima꞉.
JOH 9:4 La꞉ nulia꞉la꞉, a hegeloeno alo ipuwalo ba emedena, na da꞉poenamiya꞉ ale ba꞉be Kodawoeno oko bowatihonama꞉, huiyatiya du komote ba꞉ na꞉pe, ba꞉ba tetelo eta lumagiti oko a꞉kowata꞉mene.
JOH 9:5 Nale ba꞉moe hopolo ba emedena na ba꞉ hopo haboeno aloma꞉ eda꞉namo.”
JOH 9:6 Ba꞉ba tetelo Ya꞉suti ba꞉be tabo olamagiti, ebete kowe hakamo mehamidate ba꞉be kowa꞉mo bula꞉i ododiti dubuino baida꞉mo abutilamelemete
JOH 9:7 ebe na꞉goemiya꞉, “Ama꞉ Silomo mahilagoeno mala꞉ ikila baha꞉mo tote mala꞉ ba꞉bo na꞉neta.” Silomo mahiloeno ipuwa ba꞉ nitana ‘Oeme Komola.’ Ba꞉bene ba꞉be dubuti ba꞉be mala꞉ ikila bahilo mala꞉ da꞉netuya꞉, ebeno baiditi na꞉la꞉minalemete ebete hopo uma꞉go gala ba꞉bo kapiya꞉.
JOH 9:8 Ba꞉ba tetelo ebe tamelo demedehonama꞉ ba꞉gala puya꞉te dopamo ebe manima꞉ toetoelo duminakui, iba꞉te ebe umiti ba꞉bo ga꞉luya꞉, “Ba꞉moe dubu ba꞉ gabo tamelo emedete manima꞉ da꞉toetoitanakui, ba꞉moe ba꞉be dubula꞉ka꞉?”
JOH 9:9 Komopa꞉te ibino tabo ba huiya na꞉ga꞉luya꞉, “Iyo, ebe ba꞉ ba꞉betela,” huiyatiya komopa꞉te na꞉ga꞉luya꞉, “Ao, ebe ebeteha꞉, ebeno holoholo huiya lumagi etala.” Huiyatiya ba꞉be dubuti ha꞉kiya ebeno komo ba hawakalimi na꞉goiya꞉, “Na ba꞉ ba꞉be dubula.”
JOH 9:10 Ba꞉bene iba꞉te ebe na꞉ga꞉lamiya꞉, “Amia꞉no baidi keba ka꞉na ka꞉hidohidohometa?”
JOH 9:11 Ebete ibino tabo ba huiya na꞉goiya꞉, “Eta dubu ebeno mahilo ba꞉ Ya꞉sutila, ebete kowe hakamo mehamidate ba꞉be kowa꞉mo bula꞉i ododiti naeno baida꞉mo ba꞉bo miya꞉te. Ba꞉bene ebete na na꞉goename Silomo mala꞉ ikila bahilo mala꞉ konetama꞉. Nale ba꞉ba ka꞉na da꞉nododimo, naeno baiditi ba꞉bo a꞉la꞉minahale.”
JOH 9:12 Ba꞉bene iba꞉te ebe gala na꞉kaga꞉lamiya꞉, “Ama꞉ da꞉hiduima꞉, ba꞉be dubu keka꞉?” Ebete na꞉goiya꞉, “Na iya꞉tawaha꞉.”
JOH 9:13 Ya꞉suti baidi tamiho dubu kohiduimima꞉, ebete kebe hegelalo bula꞉i ododiti ebeno baida꞉mo da꞉miya꞉temiya꞉, ba꞉be hegela ba꞉ Yu tawakalubino okoha꞉ talona hegelala. Ba꞉bema꞉ komopa꞉te ba꞉be hido owalubi komo konehawakalimima꞉, iba꞉te ba꞉be dubu lawete Pa꞉lisi kapiyuimipa꞉tamo dito magatuya꞉.
JOH 9:15 Ba꞉ba tetelo Pa꞉lisi kapiyuimipa꞉te talona hegeloeno komo ba emalagidolo ebe na꞉ga꞉lamiya꞉, “Amia꞉no baidi kebako gabodo ka꞉hidohidohometa?” Ebete ibino tabo ba huiya na꞉goiya꞉, “Eta dubuti naeno baida꞉mo bula꞉i abutilamelenamete, nale mala꞉ da꞉netamo naeno baiditi ba꞉bo a꞉la꞉minahale.”
JOH 9:16 Ba꞉ba tetelo komo Pa꞉lisi kapiyuimipa꞉te na꞉ga꞉luya꞉, “Ba꞉moe dubuti okoha꞉ talona hegeloeno kukala adikamidale, ba꞉bema꞉ ebe Godokono hibi oemedawaha꞉.” Huiyatiya komopa꞉te na꞉ga꞉luya꞉, “Ao, ebe hido lumagila. Kubadawagodolo Godokono helote kitanaha꞉ ba꞉mako hanohano komokomo ododilima꞉.” Ba꞉bema꞉ ibi ipuwalo anagiya꞉mida komote ba꞉ dito uluhukuya꞉.
JOH 9:17 Ba꞉ba tetelo iba꞉te ba꞉be dubu gala na꞉kaga꞉lamiya꞉, “Amia꞉no baidi da꞉hiduilame, ba꞉be dubu ama꞉le poma꞉ ka꞉goiuta?” Ebete na꞉huiyuya꞉, “Nale ebe Godokono ukui hawakalimidawa etama꞉ goitamo.”
JOH 9:18 Ba꞉ba tetelo ba꞉be dubuti menokoeno tepone baidi tamiholo da꞉pehawakaluya꞉ ba꞉gala ebeno baiditi ka꞉ma꞉ da꞉hidohidohome, Yu watowatopa꞉te ba꞉bi netewa komokomo hibima꞉ kamidiliya꞉ha꞉. Ba꞉bema꞉ iba꞉te ba꞉be dubuino menoko ba꞉gala nabiwi iba꞉tamo tabo dito oemiya꞉ iba꞉te kopema꞉.
JOH 9:19 Iba꞉te da꞉piya꞉ Yu watowatopa꞉te iba꞉godone ibino guduino hibi komo lawete ibi na꞉goelamiya꞉, “La꞉ a꞉ga꞉lamata ba꞉moe dubu ba꞉ la꞉eno gudula, ba꞉gala la꞉ a꞉ga꞉lamata ebe menokoeno tepone baidi tamiholo pehawakaluya꞉. Ba꞉bema꞉ la꞉ ba꞉moe komo atamo na꞉hawakalima꞉la꞉, ebeno baiditi kebako gabodo ka꞉hidohidohome?”
JOH 9:20 Ba꞉bene ebeno menoko nabiwi iba꞉te ibino tabo ba huiya na꞉ga꞉luya꞉, “Hibila, ebe ba꞉ aeno gudula, ba꞉gala a iya꞉tawahala ebe menokoeno tepone baidi tamiholo pehawakaluya꞉.
JOH 9:21 Huiyatiya a iya꞉tawaha꞉ ebeno baiditi kebako gabodo ka꞉hidohidohome ba꞉gala ebeno baidi pote ka꞉hiduilame. Ebe dubu kola. Wadiyala la꞉ ebe na꞉ga꞉lama꞉la꞉, hibi komo ebete la꞉ kokiyalamema꞉na꞉ta.”
JOH 9:22 Ba꞉be dubuino menoko nabiwi iba꞉te tabo ba꞉ma ka꞉na da꞉ga꞉luya꞉ mabu iba꞉te Yu watowatopi betolelamiya꞉. Watowatopa꞉te ya꞉lo a꞉ga꞉luya꞉, kebe lumagiti Ya꞉suku Godokono Oemedawa Kelisoma꞉ da꞉goemene, iba꞉te ebetamo talona kihatemema꞉na꞉ ebete baidi ibubulamehole genama guamo komo tawakaluba꞉go podoloma꞉.
JOH 9:23 Ba꞉be mabuma꞉ ba꞉be dubuino menoko nabiwi iba꞉te na꞉ga꞉luya꞉, “Aeno gudu ba꞉ dubu kola, wadiyala la꞉ ebe na꞉ga꞉lama꞉la꞉.”
JOH 9:24 Ba꞉bene Yu watowatopa꞉te dopamo baidi tamiholo demedenami, ba꞉be dubu iba꞉tamo gala kaka꞉miti ebe na꞉kaga꞉lamiya꞉, “Ama꞉ Godokono holoholo hapulu ba la꞉na hibi komo atamo na꞉hawakalima꞉, ba꞉moe dubu Ya꞉suti ama꞉tamo bada komo kododi? A iya꞉tawahala ebe ba꞉ hiya꞉hiya꞉ kuba ododilidawala.”
JOH 9:25 Ba꞉ba tetelo ebete tabo ba huiya na꞉goiya꞉, “Na iya꞉tawaha꞉, ebe da꞉ hido lumagila꞉ o da꞉ hido lumagiha꞉. Huiyatiya na kapiya komo biya꞉tawutamo, na dopamo baidi tamihodawala, ka꞉lo naeno baiditi ba꞉ a꞉la꞉minahale.”
JOH 9:26 Ba꞉bene Yu watowatopa꞉te ebe gala na꞉kaga꞉lamiya꞉, “Ebete ama꞉tamo bada komo ododiti amia꞉no baidi ba꞉bo ka꞉hiduilame?”
JOH 9:27 Ebete na꞉goiya꞉, “Na hibi tabo la꞉ ya꞉lo a꞉goelamemata, huiyatiya diyala, la꞉ da꞉ hidamo kuliha꞉. Ba꞉bema꞉ la꞉ bada mabuma꞉ ulima꞉ gala da꞉kewagelitama? La꞉ ebeno komo ta꞉matapima꞉ eda꞉hama꞉la꞉ka꞉?”
JOH 9:28 Ba꞉bene iba꞉te huiyatiya ebe iduduputimilo ba kiyahame na꞉ga꞉luya꞉, “Ama꞉ ba꞉ ebeno ta꞉matadawa etalata, aha꞉! A Mosesekono ta꞉matapila!
JOH 9:29 Mabu a iya꞉tawahala Godote Moseseko ipuwado tabo olamaginakui, huiyatiya moe dubuino hibi komo a iya꞉tawaha꞉. Ebe eta kuba dalowa꞉ habalo ba꞉gala pilo gabodo kuda꞉ a꞉hawakaluya꞉!”
JOH 9:30 Ba꞉bene dubuti tabo ba huiya na꞉goiya꞉, “Moe bada kuba komola꞉ka꞉? Ba꞉moe dubuti naeno baidi hanohano gabodo a꞉hiduilame, huiyatiya la꞉ watowatopi iya꞉tawahaha꞉ ebete kebene ka꞉piya꞉!
JOH 9:31 A hiliyonomo iya꞉tawahala Godote kuba ododilipino tabo a꞉kulia꞉le, huiyatiya kebe lumagiti ebe Kodawama꞉ goelo ebetamo da꞉papamiwatamene, Godote ba꞉be lumagino tabo kulima꞉ne.
JOH 9:32 Hopo tupuimi mabuni ba꞉ma teta꞉mo puluhuku eta dawate baidi tamiho lumagi da꞉hiduimiya꞉, a hopo tawakaluba꞉te ba꞉be hanohano komo kuminakuiha꞉.
JOH 9:33 Ba꞉bema꞉ naeno ukui ba꞉ma ka꞉na itana, ba꞉moe dubu Godogodone peha꞉tale, ebete tawakalubi kowalubilima꞉ eta hido komo ododima꞉ ba꞉ka꞉modobona꞉!”
JOH 9:34 Ba꞉ba tetelo Yu watowatopa꞉te ebeno tabo ba huiya na꞉ga꞉luya꞉, “A꞉iye! Ama꞉ menokoeno kuba ododi komodo hawakaluya꞉ta! Mabu keka꞉ ama꞉ a iya꞉tua꞉mema꞉ dewagelita?” Ba꞉bene iba꞉te ko maubago ba꞉be dubutamo baidi ibubulamehole genama guamo pa꞉pa꞉ga talona ihatemete ba꞉ dito oemiya꞉.
JOH 9:35 Ba꞉bene Yu watowatopa꞉te ba꞉be dubu maubago doemiya꞉, Ya꞉suti ba꞉be komo uliti ebe ohowada꞉go da꞉piya꞉, ebete ba꞉be dubu pumiti ebe na꞉pegoemiya꞉, “Ama꞉ Tawakalubino Naniwi hibima꞉ na꞉ka꞉midiuta?”
JOH 9:36 Ba꞉bene ebete na꞉huiyuya꞉, “Kodawa, Tawakalubino Naniwi potela꞉ka꞉? Ama꞉le na diya꞉tunamemena꞉, nale ebe hibima꞉ ba꞉bo komidima꞉nemo.”
JOH 9:37 Ba꞉bene Ya꞉suti ebetamo na꞉goiya꞉, “Ama꞉le ebe numitata, mabu ka꞉lo ama꞉go ba꞉bete olamagita.”
JOH 9:38 Ba꞉be dubuti na꞉goiya꞉, “Hibila, Kodawa, na ka꞉lo ama꞉ ba꞉ hibima꞉ na꞉midimata,” ba꞉bene ebete pupamo emedete Ya꞉suku ba꞉bo adikumiya꞉.
JOH 9:39 Ba꞉bene Ya꞉suti na꞉goiya꞉, “Na hopo habanapino komokomo anagilamelelamema꞉ piya꞉mo. Ba꞉bema꞉ puya꞉te baidi tamiholo demedehona, na ibino baidi kopahalamililamema꞉nemo iba꞉te hiliyonomo komokomo hidamo kulamema꞉, ba꞉gala puya꞉te ha꞉kiya ibino awagaha ipuwalo da꞉ga꞉lana, ‘A baidi a꞉la꞉minahalepila,’ nale ibino baidi huiyatiya duhuma꞉ komidililamema꞉nemo.”
JOH 9:40 Ba꞉ba tetelo komo Pa꞉lisi kapiyuimipa꞉te Ya꞉suku tamelo da꞉la꞉mota꞉hanuya꞉, iba꞉te ebeno tabo uliti na꞉ga꞉luya꞉, “Ama꞉ na꞉ka꞉goiuta, a atumu baidi tamihopila?”
JOH 9:41 Ba꞉bene Ya꞉suti iba꞉tamo na꞉goiya꞉, “La꞉ Godokono tabo komokomo iya꞉tawaha꞉ma꞉ neda꞉hatale, ebete la꞉ hibi baidi tamihopima꞉ ka꞉lamihino la꞉eno kuba ododili mabuma꞉ huiya ikalamema꞉ ba꞉ka꞉goena꞉. Huiyatiya la꞉ na꞉ga꞉lanamata, ‘A Godokono tabo komokomo hiliyonomo modobolo ulamenama꞉,’ ba꞉bema꞉ la꞉eno kuba huiyate hibinomolo ba꞉ na꞉pe.”
JOH 10:1 Ba꞉bene Ya꞉suti gala na꞉kagoiya꞉, “Na la꞉tamo hibi tabonomo begoemo, kebe lumagiti sipi-goegoeno kala ipuwamo gigihodo pa꞉pa꞉gaheno huiyatiya dito tetedo da꞉popegamene, ebe ba꞉ pilo lumagila ba꞉gala ebe ba꞉ komopino ilina heloamo uwatelamedawala.
JOH 10:2 Huiyatiya kebe lumagiti gigihonomodo da꞉pa꞉pa꞉gamene, ebe ba꞉ sipi-goegoeno hibi ulamedawanomola.
JOH 10:3 Ba꞉be ulamedawate duiduiyanomolo kala ipuwane uluhukuma꞉ dewagelemene, gigiho umidawate gigiho ebetamo ka꞉hiya꞉midamema꞉ne. Ba꞉bene ebete ebenonomo sipi-goegoe ibino mahilamo da꞉ka꞉lamimini, iba꞉te ebeno tabo madodo uliti, ebete kala ipuwane ibi ba꞉bo kopuluhukulatelema꞉ne.
JOH 10:4 Ebete ebeno sipi-goegoe hiliyonomo puluhukulatelete, ibi dopalamete ba tonato iba꞉te ebe ba꞉bo kota꞉matama꞉na꞉ mabu iba꞉te iya꞉tawahala ibi ulamedawoeno tabo madodo.
JOH 10:5 Huiyatiya sipi-goegoa꞉te eta hiya꞉ lumagi a꞉kata꞉matamena꞉. Ba꞉bako lumagiti ibi da꞉ka꞉lamimini, iba꞉te ebe miya꞉pate gobogobamo dito kalahutihoma꞉na꞉ mabu iba꞉te ebeno tabo madodo iya꞉tawaha꞉.”
JOH 10:6 Ya꞉suti ba꞉moe iya꞉tulame uwa꞉mo tawakalubi diya꞉tulamiya꞉, iba꞉te ebeno ipuwa hidamo kalawiya꞉ha꞉, nipo emalagidoluya꞉.
JOH 10:7 Ba꞉bema꞉ Ya꞉suti iba꞉tamo gala na꞉kagoiya꞉, “Na la꞉tamo hibi tabonomo begoemo, na ba꞉ sipi-goegoeno kala gigihola.
JOH 10:8 Na peheno puya꞉te dopamo da꞉pelamenakui, ibi hiliyonomo ba꞉ pilo dubula ba꞉gala komopino ilina heloamo uwatelamepila, huiyatiya sipi-goegoa꞉te ibino tabo kulihonakuiha꞉
JOH 10:9 “Na ba꞉ gigihola. Kebe lumagiti na ipuwado da꞉pa꞉pa꞉gamene ebete ka꞉ka꞉ mula꞉ komo hibilo kopelawema꞉ne. Iyo, ba꞉bako sipi-goete gapo hapuamo naeno kala ipuwamo kapa꞉pa꞉ga, duiduiya tetelo hido hemo nalema꞉ kanuluhuku, ebete ba꞉ba ka꞉na ba ewagelena naha ilina modobolo bulamenakomene.
JOH 10:10 Numa꞉la꞉, pilo lumagi ba꞉gala na, aeno komo hiya꞉hiya꞉la. Ebete sipi-goegoe pilolo uwate o alukuli ukui kapiyado kopema꞉ne ibi kopekubahilamema꞉. Huiyatiya nale na꞉piya꞉mo hibi wiboha꞉ ka꞉ka꞉ iba꞉tamo ba ikalame iba꞉te emedena tetelo kokalakalahanama꞉, ba꞉bema꞉ ba꞉be ka꞉ka꞉ komote ibi ipuwalo tabonomoma꞉ ba eda꞉ lumagiti modobote modoboha꞉.
JOH 10:11 “Ba꞉bema꞉ na ba꞉ Hido Sipi-goegoe Ulamedawala. Naeno kalakala bitana, nale naeno ka꞉ka꞉ gobogobamo ba ihate ibino ka꞉ka꞉ komula꞉lelamema꞉.
JOH 10:12 “Huiyatiya kebe lumagiti sipi-goegoe ulame oko huiyamo dowatina, ebe ibino hibi ulamedawaha꞉. Keba tetelo ebete helo gaha penapelo dumimini, ebe ha꞉kiya ebeno ka꞉ka꞉ ba mula꞉ sipi-goegoe miya꞉palete gobogobamo dito kalahula꞉ma꞉ne, ba꞉bene helo gahate komo ibi ba palukuli, komo hiya꞉hiya꞉ ba꞉ dito kalahutihoma꞉na꞉.
JOH 10:13 Iyo, ba꞉mako dubuti sipi-goegoa꞉tamo olalati komote pelo dumimini, ebete tiyolo kalahula꞉ma꞉ne, mabu ebeno oko huiya ba꞉gala ebeno ka꞉ka꞉ ba꞉bi komo kapiya bemalagidolena, sipi-goegoeno komo hibilo kemalagidololenaha꞉.”
JOH 10:14 Ba꞉bene Ya꞉suti gala na꞉kagoiya꞉, “Na ba꞉ Hido Sipi-goegoe Ulamedawala. “Nale naeno sipi-goegoeno komo iya꞉tawala, ba꞉gala iba꞉te ba꞉ atumu naeno komo iya꞉tawahala, Nabiwi Godote naeno komo keba ka꞉na kiya꞉tawana ba꞉gala nale ebeno komo atumu keba ka꞉na kiya꞉tawanamo ba꞉ba ka꞉na. Ba꞉be mabuma꞉ naeno kalakala bitana, nale naeno ka꞉ka꞉ gobogobamo ba ihate ibino ka꞉ka꞉ komula꞉lelamema꞉.
JOH 10:16 Ba꞉gala naeno komo sipi-goegoe ba꞉pola꞉na, huiyatiya ba꞉ma tetelo iba꞉te ba꞉moe kala ipuwalo kemedehonaha꞉. Ba꞉ hibila, ba꞉ba꞉te naeno tabo dulimina꞉, nale ibi ba꞉bo komagahelema꞉nemo iba꞉te ba꞉moi dopo sipi-goegoa꞉go kapimilo kemedehonama꞉, ba꞉bene ibi hiliyonomate kapiya kalalo kapiyuimiti na ibino kapiya ulamedawate ibi hidamo ba꞉buiya꞉minalenamo.
JOH 10:17 “Numa꞉la꞉, naeno kalakala bitana naeno ka꞉ka꞉ gobogobamo ihatema꞉, ba꞉bema꞉ Nabiwiti malemalelo na nemalagidolonena. Ba꞉gala eta komo, nale naeno ka꞉ka꞉ gobogobamo dihatemo, nale hibilo gala kakalawema꞉nemo.
JOH 10:18 Eta lumagiti naeno ka꞉ka꞉ nagodone a꞉kalawa꞉mene. Ao, na ha꞉kiya naeno ka꞉ka꞉ gobogobamo kihatema꞉nemo mabu ba꞉moe komo ba꞉ naeno komola, ba꞉gala na ha꞉kiya gala kakalawema꞉nemo mabu helo nagodolo bitana. Naeno Nabiwiti na ya꞉lo a꞉goenamiya꞉ ba꞉moe komo kododima꞉, ba꞉bema꞉ nale hibilo kododima꞉nemo.”
JOH 10:19 Ba꞉ba tetelo Ya꞉suti dolamagiya꞉ ba꞉be tabo mabuma꞉ ulihopa꞉te ibi ha꞉kiya ibi ipuwalo ukui kapiyama꞉ kamidiliya꞉ha꞉, iba꞉te tulituliya dito kagaliya꞉.
JOH 10:20 Komo iba꞉te na꞉ga꞉luya꞉, “Ba꞉moe dubuino tabo la꞉le badama꞉ kulihutama? Ebe kuba gobogobagoenola, ba꞉bema꞉ ebe na꞉daedaita!”
JOH 10:21 Komopa꞉te ibino tabo ba huiya na꞉ga꞉luya꞉, “Ao, kuba gobogobote daedaema꞉ da꞉midi, ba꞉bako lumagiti Godokono iya꞉tulame tabo hidamo olamagi modoboha꞉, huiyatiya ba꞉moe dubuino tabo komokomo hidonomola. Ba꞉gala kuba gobogobagodawate modoboha꞉ baidi tamihodawoeno baidi hiduilameleme!”
JOH 10:22 Gogo kuititi tetelo giba komote Yu tawakalubino hopolo ba itana, ba꞉ba tetelo iba꞉te Yelusalema ko habalo Godoko Adikumi Genamoeno A꞉hiya꞉mida Poko bododitiya꞉ mabu ibino komo ba꞉ba ka꞉nala.
JOH 10:23 Ba꞉ba tetelo Godoko Adikumino Genamalo eta pana nitanami, tawakaluba꞉te ba꞉be pana Solomonokono mahilamo ka꞉minakuya꞉. Ba꞉bene Ya꞉suti ba꞉be panalo ba nepata꞉,
JOH 10:24 komo tawakaluba꞉te pelamete ebe panataguma꞉digalo ebetamo na꞉pega꞉luya꞉, “Amia꞉no hibi komo tete ga꞉ga꞉nomolo atamo kahawakaliminaha꞉. Ba꞉bema꞉ wadiyala ama꞉ a niya꞉tua꞉ma꞉, ama꞉ ba꞉ Godokono Oemedawa Kelisotela꞉ka꞉?”
JOH 10:25 Ya꞉suti ibino tabo ba huiya na꞉goiya꞉, “Nale ba꞉moe komoma꞉ la꞉ dopamo a꞉goelamimata huiyatiya la꞉le na hibima꞉ kamidiniha꞉. Ba꞉gala nale kebe hanohano komo naeno Nabiwino heloamo dododilinakomo, ba꞉bi komate naeno komo behawakalimina, na ba꞉ ba꞉betela.
JOH 10:26 Huiyatiya hibila, la꞉le ba꞉bi komokomo dulamenakoma na hibima꞉ a꞉kamidina꞉lemata, mabu la꞉ naeno sipi-goegoenomoha꞉.
JOH 10:27 Naeno sipi-goegoa꞉te naeno tabo madodo ulinaka, ba꞉bene na ibino komo iya꞉tawala ba꞉gala iba꞉te na na꞉ta꞉mahenena.
JOH 10:28 Ba꞉bema꞉ nale iba꞉tamo wiboha꞉ ka꞉ka꞉ dikalamemo iba꞉te a꞉kaha꞉lahamena꞉, iyo, nale ibi kodakodalo ba uwatele pilodawate naeno kokoto ipuwane eta kapiya a꞉kalawa꞉mene.
JOH 10:29 Ba꞉ hibila, naeno Nabiwiti ibi hiliyonomo natamo ya꞉lo ikanamehoniya꞉. Ebeno helo konomola, eta dawoeno helote ebeno helo a꞉kagogolale, ba꞉bema꞉ ebe atumu ba꞉bi sipi-goegoe kodakodalo ba uwatele pilodawate ebeno kokoto ipuwane eta kapiya lawe modoboha꞉.
JOH 10:30 Nabiwi Godoko ba꞉gala na, a ba꞉ kapiyanomola.”
JOH 10:31 Ba꞉ba tetelo tawakaluba꞉te ba꞉moe tabo duliya꞉, iba꞉te nakola ba꞉ dito uwatiya꞉ Ya꞉suku mapemete ebe ba꞉bo kanakapumima꞉.
JOH 10:32 Huiyatiya Ya꞉suti iba꞉tamo na꞉goiya꞉, “Naeno Nabiwiti natamo dikanamehoniya꞉, nale ba꞉bi hiliyonomo hidohido komo la꞉eno holoholo hapulu ododilinakomo. Ba꞉bema꞉ ba꞉bi hidohido ododili komo ipuwalo la꞉le natamo bada komoma꞉ ka꞉maubahaliutama? Mabu keka꞉ la꞉le na mapenamema꞉ dewagelitama?”
JOH 10:33 Iba꞉te na꞉huiyuya꞉, “Ale amia꞉no eta hido ododi mabuma꞉ ama꞉ mapemema꞉ kewagelitaha꞉. Ao, mabu bitana, ama꞉ hopo haba dubuma꞉ ba eda꞉na huiyatiya ama꞉le na꞉gaa꞉ta, ama꞉ ba꞉gala Godoko, la꞉ ba꞉ kapiyala! Godokono holoholo hapulu ba꞉mako tabo kubanomola!”
JOH 10:34 Ya꞉suti ibino tabo ba huiya na꞉goiya꞉, “Nale da꞉goemo ba꞉be tabo kubaha꞉. Ba꞉bema꞉ la꞉ ba꞉moe komo hidamo nemalagidolala꞉, Godote la꞉eno iniwala꞉tamo dikalamiya꞉ ba꞉be Tutumu Bukalo ebeno tabote ba꞉ma ka꞉na itana, ‘La꞉ hiliyonomo ba꞉ Godoko huiya tawakalubima꞉ eda꞉hanamata.’
JOH 10:35 Numa꞉la꞉, Godote ebeno Bukalo da꞉hawakalimina ba꞉be hibi taboeno helote wiboha꞉ tetelo bitanamene. Ba꞉bene iniwalino tetelo Godokono Buka tabote ibi Godoko huiyama꞉ ka꞉lamiya꞉,
JOH 10:36 huiyatiya la꞉ tetelo Godote na talonama꞉ midiniti hopo habamo ba꞉bo poenamiya꞉. Ba꞉bema꞉ na ha꞉kiya na Godokono Guduma꞉ da꞉goemo, nale kuba tabo kagoeha꞉. Mabu keka꞉ la꞉le kubama꞉ da꞉ga꞉lama?
JOH 10:37 “Ba꞉gala eta komo, Godote natamo kebe hidohido komo ododilima꞉ dikanamehonena, nale ba꞉bi komo ododilihino wadiyala la꞉ na hibima꞉ akamidina꞉la꞉.
JOH 10:38 Huiyatiya nale ba꞉bi hidohido komo la꞉ ipuwalo hibilo ododilinakomo, ba꞉bema꞉ wadiyala la꞉ ba꞉bi komo ba ulamena naeno hibi komo ba꞉bo niya꞉tawahanala꞉. Iyo, naeno hido ododili komate naeno komo behawakalimina ba꞉ma ka꞉na, na ba꞉gala naeno Nabiwi, a ba꞉ kapiyanomola. Huiyatiya la꞉ ubihinola ba꞉moe komo hibima꞉ midi!”
JOH 10:39 Ba꞉ba tetelo ibi ubila Ya꞉suku du genamamo ba꞉bo kihatema꞉, huiyatiya ebete ibi ipuwane gobogobamo ba꞉ dito tuya꞉ iba꞉te ebe lawekapoma꞉.
JOH 10:40 Ba꞉bene ebete gala katote Yodane Tuli hapuamo kana꞉hiwate, Yonete dopamo tawakalubi beyamo da꞉wadulatelenakui ba꞉bolo ba nemede
JOH 10:41 hiliyonomo tawakaluba꞉te ebetamo ba꞉bo pelameholiya꞉. Ba꞉ba tetelo iba꞉te na꞉ga꞉luya꞉, “Yonete Godokono heloamo hanohano komokomo kododilinakuiha꞉, huiyatiya ba꞉moe Ya꞉suti dododilina ba꞉bi hanohano komo ba꞉ kokonomola! Yonete ebeno komoma꞉ kebe tabo kolamagi, ba꞉be taboeno hiliyonomo komokomo ba꞉ hibinomola!”
JOH 10:42 Ba꞉bema꞉ ibi ipuwalo komo tawakalubi hiliyonomate Ya꞉suku hibima꞉ ba꞉bo midiya꞉.
JOH 11:1 Eta tetelo eta Betani habanapi dubu, ebeno mahilo Lasalesitila, ebe ko tawetawete umitiya꞉. Ba꞉moe Betani haba ba꞉ badininipala kamena netewa Ma꞉liko ba꞉gala Matako, iba꞉te kebolo kemedenama꞉ ba꞉be habala.
JOH 11:2 Ba꞉moe Ma꞉liti ba꞉ eta tetelo Kodawa Ya꞉sukunu natamo hido nibo ilina haminamete ebeno hinibamo a꞉la꞉li da꞉meteteholemiya꞉ ba꞉be dawala, ba꞉gala tawetawete dumitiya꞉ ba꞉moe dubu Lasalesiko ba꞉ ebeno amogala.
JOH 11:3 Ba꞉bene ba꞉ba tetelo Ma꞉liko ba꞉gala Matako iba꞉te eta lumagi ba꞉ dito oemiya꞉ Ya꞉suku ba꞉ma ka꞉na konikiyamema꞉, “Kodawa, ama꞉le konomamo demalagidolona, ba꞉be lumagi ko tawetawete umina.”
JOH 11:4 Ya꞉suti ba꞉moe tabo uliti ebeno ta꞉matapa꞉tamo na꞉goiya꞉, “Ba꞉moe tawetawete Lasalesikono hoe kuititima꞉ a꞉keda꞉mene. Tawetawete ebe dumina ba꞉be mabu ba꞉ma ka꞉nala, Godoko ubila ba꞉moe komodo ebeno mahilo ba꞉gala ebeno Guduino mahilo kokokoilamema꞉.”
JOH 11:5 Hibila, Ma꞉liko, Matako, ba꞉gala Lasalesiko ba꞉ Ya꞉sukunu hido mabulubila, ebete ibi koamo nemalagidolenami.
JOH 11:6 Huiyatiya Ya꞉suti Lasalesikono tawetawe komo duliya꞉, ebete ebe konowalubima꞉ Yudiya hopoeno Betani habamo tiyonomolo kanuluhukuya꞉ha꞉, ebete kebe habalo kemedenami ba꞉be habalo netewa hegela gala ba꞉bo kemediya꞉.
JOH 11:7 Ba꞉bene Ya꞉suti ebe ta꞉matapi na꞉goelamiya꞉, “Wadiyala a Yudiya hopamo gala kakatolamiya꞉.”
JOH 11:8 Iba꞉te ebeno tabo ba huiya na꞉ga꞉luya꞉, “Iya꞉tulamedawa, ale ba꞉be hopone mamo a꞉pelamima꞉ mabu ba꞉bi tawakaluba꞉te ama꞉ nakolamo mapemema꞉ ewagelitiya꞉. Ibi ubila ama꞉ kanakapumima꞉, ba꞉bema꞉ mabu keka꞉ ama꞉ ba꞉bamo gala tiyolo kakatoma꞉?”
JOH 11:9 Ya꞉suti ibino tabo ba huiya na꞉goiya꞉, “Kapiya hegela ipuwalo modobo alote itananako, aba꞉ hibila꞉ka꞉? Ba꞉bene lumagiti hegeloeno alo ipuwalo da꞉patitamene, ebete haka gugamo a꞉kanegamene mabu ba꞉moe hopoeno hibi alo ebete numita.
JOH 11:10 Huiyatiya ebete du tetelo da꞉pata꞉mene nato ukamida komo kiya꞉tawama꞉ne, mabu ebegodolo alo puliyala ebeno to gabo hidamo kumima꞉.”
JOH 11:11 Ba꞉ba tetelo Ya꞉suti tabo ba moga꞉me na꞉goiya꞉, “Aeno mabulubi Lasalesiko u bewatita, huiyatiya nale ebetamo tote ebe konemodoetema꞉nemo.”
JOH 11:12 Ba꞉bene Ya꞉suku ta꞉matapa꞉te ebetamo na꞉ga꞉luya꞉, “Kodawa, ebete u da꞉watita, hidonomola! Tawetawete ebegodone nuluhukuta.”
JOH 11:13 Ya꞉suku ta꞉matapa꞉te ba꞉ma ka꞉na ga꞉luya꞉, mabu ebete iba꞉tamo u wata tabo da꞉goiya꞉ ba꞉ Lasalesikono hoe komoma꞉ goiya꞉, huiyatiya iba꞉te ba꞉be taboeno ipuwa kalawiya꞉ha꞉, ba꞉bema꞉ iba꞉te hibi u wata komoma꞉ na꞉goemo emalagidoluya꞉.
JOH 11:14 Ba꞉bene Ya꞉suti ebeno taboeno ipuwa hawakalimilo ba꞉ma ka꞉na goiya꞉, “La꞉ nulia꞉la꞉, ditidi nale Lasalesikoba꞉ lutaha꞉ tetelo ebete hoenomo a꞉hoi. Huiyatiya nale ebe mabuma꞉ tepo ipuwalo menemene kiya꞉tawutaha꞉. La꞉ mabuma꞉ naeno kalakala bitana, mabu tete tatalila ebeno hoe komodo la꞉le naeno ko helo umiti na hibima꞉ ba꞉bo komidinima꞉nemata. Ba꞉bema꞉ wadiyala a ebetamo kotolamiya꞉.”
JOH 11:16 Ba꞉ba tetelo Tomasiko, ebeno eta mahilo Nedewale Gudula, ebete komo ta꞉matapa꞉tamo na꞉goiya꞉, “Kubahenola, a hiliyonomate Iya꞉tulamedawago ba꞉bamo tolamete eba꞉go koneha꞉lahuya꞉.”
JOH 11:17 Ba꞉bene Ya꞉suti Betani habamo da꞉nuluhukuya꞉, ebete Lasalesikono komo ba꞉ma ka꞉na nuliya꞉, ebete da꞉hoi netewa-netewa hegela bobo ipuwalo kapitanui.
JOH 11:18 Ba꞉be Betani haba Yelusalema ko haba tatalinomolo itana, ba꞉be ko habamo tolame gaboeno tete ba꞉ netewa-kapiya kilomita keba ka꞉nala꞉ka꞉ ba꞉ba ka꞉nala.
JOH 11:19 Ba꞉bema꞉ komo Yu tawakalubi hiliyonomate Lasalesikono hoe tabo uliti, iba꞉te ko habane a꞉pelameholiya꞉ ebeno nanikokubi Ma꞉liko ba꞉gala Matako ibi kopegelebadilamema꞉.
JOH 11:20 Ba꞉bene ba꞉ba tetelo Matate Ya꞉sukunu pe komo uliti eba꞉go alugama꞉ ba꞉ dito tuya꞉, huiyatiya Ma꞉liko katuya꞉ha꞉, ebete genamalo lutiya꞉.
JOH 11:21 Matate Ya꞉sukuba꞉ nalugate ebete ebe na꞉negoemiya꞉, “Kodawa, ama꞉ ba꞉malo nemedetale naeno amogate ba꞉ka꞉hoena꞉!
JOH 11:22 Huiyatiya na iya꞉tawala, ka꞉lo ama꞉le Godoko bada komoma꞉ da꞉kiyamemena꞉, ebete ama꞉tamo hibilo kikamema꞉na꞉ta.”
JOH 11:23 Ba꞉bene Ya꞉suti ebe na꞉goemiya꞉, “Amia꞉no amogate hoe ipuwane gala kakamahigama꞉ne.”
JOH 11:24 Matate ebeno tabo ba huiya na꞉goiya꞉, “Iyo, na iya꞉tawala Godote Kuititi Hegelalo hibima꞉ midipi hiliyonomo ka꞉ka꞉mo kakawadiya꞉paa꞉latelema꞉ne, Lasalesiko bana.”
JOH 11:25 Ba꞉bene Ya꞉suti ebetamo na꞉goiya꞉, “Na ba꞉ hoe ipuwane mahiga komoeno helo mabula, ba꞉gala na ba꞉ wiboha꞉ ka꞉ka꞉la, ba꞉bema꞉ kebe lumagiti na hibima꞉ da꞉midinimini, hoe ipuwado ebete wiboha꞉ ka꞉ka꞉ konelawema꞉ne.
JOH 11:26 Ba꞉ hibila, kebe lumagiti nagodolo ba emedena na hibima꞉ da꞉midinimini, ebete a꞉kahaa꞉mene. Ama꞉ ba꞉moe komo hibima꞉ na꞉ka꞉midiuta?”
JOH 11:27 Matate ebeno tabo ba huiya na꞉goiya꞉, “Iyo, Kodawa! Nale ama꞉ hibima꞉ na꞉miditamata, ama꞉ ba꞉ Kelisote, Godokono Gudulata. Ebete ya꞉lo tetelo ba꞉moe hopamo kopema꞉ da꞉goiya꞉, ama꞉ ba꞉be lumagilata.”
JOH 11:28 Ba꞉bene Matate ba꞉moe tabo olamagiti, ebete genamamo gala katote ebeno naniko Ma꞉litamo tabo diya gabodo ba꞉ma ka꞉na negoiya꞉, “Iya꞉tulamedawa a꞉pe, ebe ama꞉ umima꞉ ubi bihatita.”
JOH 11:29 Ba꞉bema꞉ Ma꞉liti ba꞉moe tabo duliya꞉ ebete tiyonomo mahigate Ya꞉sukuba꞉ alugama꞉ ba꞉ dito tuya꞉.
JOH 11:30 Ba꞉ba tetelo Ya꞉suti Betani haba tatalilo hawela bamitiya꞉, Matate dopamo eba꞉go kebolo ka꞉naluguya꞉ ba꞉be atu bahilo.
JOH 11:31 Ba꞉bene Ma꞉liti genamane tiyonomo duluhukuya꞉, ba꞉ba tetelo komopa꞉te ebe gelebadimima꞉ da꞉pelamiya꞉, ba꞉bi tawakaluba꞉te atumu genamane kikuliti ebe ba꞉bo ta꞉matuya꞉, mabu iba꞉te nemalagidoluya꞉ Ma꞉liti Lasalesikono bobo habalo ihima꞉ to.
JOH 11:32 Huiyatiya Ma꞉liti bobo habamo katuya꞉ha꞉, Ya꞉suti kebolo ka꞉lutiya꞉ ba꞉bamo tuya꞉. Ebete ebe numiti ebeno nato mabamo ba nega na꞉goiya꞉, “Kodawa, ama꞉ ba꞉malo nemedetale naeno amogate ba꞉ka꞉hoena꞉!”
JOH 11:33 Ba꞉ba tetelo Ya꞉suti Ma꞉liko ba꞉gala puya꞉te eba꞉go da꞉pelamiya꞉ ibi hiliyonomoeno ihimi komo umiti ebeno tepo ipuwalo ibi konomamo emalagidolete ebe atumu ihima꞉ kewageliya꞉.
JOH 11:34 Ba꞉bene ebete ibi na꞉goelamiya꞉, “La꞉le ebe bobamo keba teta꞉mo kihatiuima?” Iba꞉te ebeno tabo ba huiya na꞉ga꞉luya꞉, “Kodawa, ama꞉ ago pete ebeno bobo haba na꞉puma꞉.”
JOH 11:35 Ba꞉ba tetenomolo Ya꞉suti ba꞉bo ihiya꞉.
JOH 11:36 Ba꞉bene tawakaluba꞉te ebeno ihi komo uliti na꞉ga꞉luya꞉, “Numa꞉la꞉, ebeno mabulubi emalagidolo komo konomola.”
JOH 11:37 Huiyatiya komopa꞉te na꞉ga꞉luya꞉, “Ba꞉moe dubuti baidi tamiho dubu a꞉hiduimi, aba꞉ hibila꞉ka꞉? Ebete tiyolo na꞉petale, ebeno mabulubiti ba꞉ka꞉hoena꞉.”
JOH 11:38 Ba꞉ba tetelo Ya꞉suti ebeno tepo ipuwalo ihima꞉ gala ba kewagele bobo habamo ba꞉bo tuya꞉, ba꞉be bobote haka iya꞉ha꞉midale tetelo ba itana, tawakaluba꞉te Lasalesikono ape ihatete boboeno gigiho ko nakolamo ba꞉bo takumiya꞉.
JOH 11:39 Ba꞉bene Ya꞉suti ba꞉bolo da꞉pola꞉nuya꞉ ba꞉bi komo dubu na꞉goelamiya꞉, “La꞉ gigihoeno nakola tama꞉mo nemokamidala꞉.” Ba꞉ba tetelo huiyatiya hoe lumagino naniko Matate na꞉goiya꞉, “Kodawa, hiya꞉! Ka꞉lo ebeno apete netewa-netewa hegela tetelo itana, ba꞉bema꞉ ebeno abale nibote kubanomamo kopatema꞉ne.”
JOH 11:40 Ba꞉bene Ya꞉suti ebeno tabo ba huiya na꞉goiya꞉, “Nale ama꞉ dopamo ba꞉ma ka꞉na a꞉goememata, ama꞉ Godoko hibima꞉ da꞉midimina꞉ ebeno helo konomo kumima꞉na꞉ta.”
JOH 11:41 Ba꞉bene komo dubate bobo gigihoeno nakola tama꞉mo emokamidate, Ya꞉suti Godokono Hunu Habamo gahimilo na꞉goiya꞉, “Nabiwi, na ama꞉tamo kalakala tabo begoemo, mabu ama꞉ naeno toetoe tabo ulinakata.
JOH 11:42 Iyo, na iya꞉tawala ama꞉ hiliyonomo tetelo naeno tabo ulihonakata, huiyatiya nale ba꞉moe tabo ba꞉moi tawakalubino holoholo hapulu goemo, iba꞉te naeno hibi komo ba꞉ma ka꞉na kiya꞉tawahama꞉, ama꞉le ba꞉moe hopo habamo na a꞉poenamiya꞉ta.”
JOH 11:43 Ba꞉bene Ya꞉suti ba꞉moe kalakala tabo Godotamo olamagiti, ebete ebeno tabo madodo hunamo adipatete ibulunomamo na꞉goiya꞉, “Lasalesi, ama꞉ bobo ipuwane na꞉puluhuka!”
JOH 11:44 Ba꞉ba tetelo hoe dubuti Ya꞉sukunu tabo duliya꞉, ebete bobo ipuwane ba꞉bo puluhukuya꞉, huiyatiya ebeno nato, kokoto, ba꞉gala wato kalikamo a꞉wiholemela, Yunapa꞉te ibino ha꞉laha tawakalubi kalikamo keba ka꞉na ka꞉wiholenaka ba꞉ba ka꞉na. Ba꞉bene Ya꞉suti tawakalubi na꞉goelamiya꞉, “Wadiyala la꞉le ebe ba owalubi ebeno apene kaliko na꞉pahalamilima꞉la꞉.”
JOH 11:45 Ba꞉ba tetelo puya꞉te Ma꞉liko gelebadimima꞉ da꞉pelamiya꞉, Ya꞉suti Lasalesitamo bada komo kododiya꞉, iba꞉te ba꞉be hanohano komo umiti komo hiliyonomate hibima꞉ ba꞉bo midiya꞉,
JOH 11:46 huiyatiya komopa꞉te hibima꞉ midihino Pa꞉lisi kapiyuimipa꞉tamo tolamete ibi ba꞉ dito nikiyalamiya꞉.
JOH 11:47 Ba꞉be mabuma꞉ Pa꞉lisi kapiyuimipi ba꞉gala Godotamo hawa꞉goeno ikamehopino watowatopi, iba꞉te komo Ka꞉nisolo dubu ba꞉bo ka꞉lamiya꞉ iba꞉go tabo kapimilo koga꞉lama꞉. Ba꞉bene iba꞉te tabo ba꞉ma ka꞉na ga꞉luya꞉, “Ba꞉moe dubuti hiliyonomo hanohano komo bododilina, ba꞉bema꞉ a bada komo na꞉kododima꞉ ebe duhimima꞉?
JOH 11:48 Keba tetelo ale eta komo ododihino dito duma꞉tepama꞉, hiliyonomo tawakaluba꞉te ebe hibima꞉ miditi Ko Gawadubuma꞉ koga꞉lama꞉na꞉. Ba꞉ba tetelo Lomanapino alaholohopa꞉te pelamete aeno Godoko Adikumino Genama ba꞉gala aeno hopo konomo kopekubahilamema꞉na꞉!”
JOH 11:49 Ba꞉ba tetelo eta dubu ebeno mahilo Kayapasitila, ebete ba꞉be gogolo Godotamo hawa꞉goeno ikamehopino Hununomo Watodawama꞉ eda꞉nami, ba꞉bene ebete komo Ka꞉nisolo dubatamo na꞉goiya꞉, “A꞉iye, la꞉ daedaepima꞉ akeda꞉hala꞉! Mabu keka꞉ la꞉le ba꞉moe dubutamo ododima꞉ hibi gabo kumitaha꞉? Ale ebe dito kanakapumima꞉nema꞉!
JOH 11:50 Iyo, wadiyala hiliyonomo tawakalubi ipuwalo kapiyadawanomote na꞉haa꞉mene komopi mabuma꞉, ba꞉bema꞉ aeno hopote a꞉kakubamene, aba꞉ hibila꞉ka꞉?”
JOH 11:51 Ba꞉ba tetelo Kayapasiti Ya꞉sutamo maubalo ba꞉ma ka꞉na emalagidoluya꞉, ba꞉moe tabo ebe ha꞉kiya ebeno mulu ukuia꞉mo olamagi. Huiyatiya hibi komote ba꞉ma ka꞉na itanuya꞉, Godote ba꞉moe tabo ebe ipuwado olamagitiya꞉, mabu ba꞉be gogolo ebete Kayapasitamo haba ikamiya꞉ ebete hawa꞉goeno ikamehopino Hununomo Watodawama꞉ keda꞉nama꞉. Ba꞉bema꞉ Ya꞉suti hoeheno, dopamo Kayapasiti ba꞉moe taboeno ipuwa iya꞉tawaheno hibilo a꞉goiya꞉, Ya꞉suti ebeno Yu tawakalubi hiliyonomo mabuma꞉ kohoema꞉ne.
JOH 11:52 Huiyatiya Godote Kayapasiko ipuwado ba꞉moe tabo Yunapi kapiyatamo kagoiya꞉ha꞉, ao, ebete ba꞉ma ka꞉na goiya꞉, ba꞉moe hopo konomolo hiya꞉hiya꞉ demedehona ibi ipuwalo puya꞉te ebeno gugudima꞉ deda꞉hanamena꞉, Ya꞉suti ebeno hoe komodo ibi hiliyonomo gala kuwatete ibi kapiya badininipalama꞉ komidilima꞉ne.
JOH 11:53 Ba꞉bene Kayapasiti ba꞉moe tabo Ka꞉nisolo dubatamo dolamagitiya꞉, ba꞉ba tetene tupuimiti iba꞉te Ya꞉suku anakapumi gabo ba꞉bo ohowadiya꞉.
JOH 11:54 Ba꞉bema꞉ Ya꞉suti ibino komo iya꞉tawate tete nanekelelo Yudiya hopolo hawakala kapata꞉nakuiha꞉. Ebete huiyatiya ebe ta꞉matapa꞉go ba꞉be hopo miya꞉pate Ipala꞉ima habamo tolamete ba꞉bolo nemediya꞉, ba꞉be haba ba꞉ dito hopo tamelo itana.
JOH 11:55 Ba꞉bene Yunapino Adaguila꞉ Poko ododi tete tatalima꞉ dediya꞉, poko ododi tete peheno komo ibi hiliyonomate Yelusalema ko habamo dopamo tolameholiya꞉, mabu ibi ubila Godokono holoholo hapulu ibino ape ukulale komodo kuba dalowa꞉ komokomo dopamo wibuilamete galane ebeno poko kododima꞉.
JOH 11:56 Ba꞉ba tetelo komo iba꞉te Godoko Adikumino Hiya꞉ Genama ipuwalo nutitatate Ya꞉suku nohowadilo ibi ha꞉kiya ibi ipuwalo na꞉ga꞉luya꞉, “La꞉eno ukui keba ka꞉nala꞉ka꞉, Ya꞉suku poko habamo ba꞉ka꞉pemene?”
JOH 11:57 Iba꞉te tabo ba꞉ma ka꞉na da꞉ga꞉luya꞉ mabu Godotamo hawa꞉goeno ikamehopino watowatopi ba꞉gala Pa꞉lisi kapiyuimipi, iba꞉te tabo ya꞉lo ihatiya꞉, “Kebe lumagiti Ya꞉suku dumimini, wadiyala ebete tiyolo a na꞉pikiyaa꞉ma꞉mene, ba꞉bene ale tolamete ebe nelawete du genamamo dito kopihatema꞉nema꞉.”
JOH 12:1 Yu tawakaluba꞉te Adaguila꞉ Poko kododima꞉ sikisi hegelate ba nepola꞉na, Ya꞉suti Betani habamo gala ba꞉bo kapuluhukuya꞉, ba꞉be haba ba꞉ Ya꞉suti hoe ipuwane dadipatiya꞉ ba꞉be dubu Lasalesikono habala.
JOH 12:2 Ba꞉bene Lasalesikono naniko Matate komo owalubipa꞉go Ya꞉sukunu hido baa꞉ bododimitiya꞉, ba꞉bene dubu hiliyonomate baa꞉ da꞉nahutiya꞉, Lasalesiko ibi ipuwalo na꞉lutiya꞉.
JOH 12:3 Huiyatiya ebeno eta naniko Ma꞉liti huiya konomo hido nibo ihi ilina, ebeno mahilo ba꞉ nadala, ebete adahete Ya꞉sukunu natamo pehaminamete ebeno hinibamo nato a꞉la꞉li ba꞉bo meteteholemiya꞉. Ba꞉bene ba꞉be genama gu ba꞉be ilinoeno hido nibote tabonomo a꞉tabuya꞉.
JOH 12:4 Ba꞉ba tetelo Ya꞉sukunu eta ta꞉matadawate baa꞉ naha habalo na꞉lutiya꞉, ebeno mahilo ba꞉ Keliyotanapi Yudasitila, galane ebete Ya꞉suku anakapumipino kokotamo ebe kihatema꞉ne. Ebete Ma꞉likono ododi komoma꞉ na꞉goiya꞉,
JOH 12:5 “Mabu keka꞉ ebete ba꞉moe hido nibo ilina kolowamima꞉ kanimidiha꞉? Ebete ba꞉ba ka꞉na newageletale kapiya gogoeno oko huiya mani buwatena꞉, ba꞉bene ale awaepa꞉tamo bikalameholena꞉!”
JOH 12:6 Yudasiti ba꞉moe tabo da꞉goiya꞉ ebete ha꞉da amiho gabodo goiya꞉. Ebete ilinaha꞉ tawakalubino modoboha꞉ komokomo kemalagidolenakuiha꞉ huiyatiya ebe ubila ba꞉be ko mani ebete ha꞉kiya kuwatema꞉, mabu ebe Ya꞉suku kapiyuimipino mani umidawama꞉ ba eda꞉na komo tetelo ebete mani pilolo uwatenakui.
JOH 12:7 Ba꞉bema꞉ Ya꞉suti ebe ta꞉matapa꞉tamo na꞉goiya꞉, “La꞉ Ma꞉liko na꞉miya꞉pala꞉, ebe natamo hido komo bododi. Iyo, nale hoeha꞉ tetelo ebete naeno ape bobamo ihate komo emalagidololo ba꞉moe hido nibo ilina naeno apa꞉mo ba꞉bema꞉ hamina.
JOH 12:8 La꞉ numa꞉la꞉, awaepa꞉te tete ga꞉ga꞉nomolo la꞉go bemedehonamena꞉, la꞉eno ubi tetelo ibi nowalubilinakuya꞉la꞉, huiyatiya na emedena tetelo la꞉go a꞉kemedenamo, tete tatalila nale la꞉ komiya꞉palema꞉nemata.”
JOH 12:9 Ba꞉ba tetelo komo tawakalubi hiliyonomate Ya꞉suku Betani habalo emede komo duliya꞉ iba꞉te ebe umima꞉ ba꞉bamo ba꞉ dito tolamiya꞉. Huiyatiya iba꞉te Ya꞉suku kapiya umima꞉ katolamiya꞉ha꞉, ibi ubila Ya꞉suti hoe ipuwane dadipatiya꞉ ba꞉be dubu Lasalesiko atumu kakanumima꞉.
JOH 12:10 Ba꞉bene Yu watowatopi ba꞉be komo duliya꞉ iba꞉te nopo ba꞉bo tamotiya꞉ Lasalesiko Ya꞉sukuba꞉ kanakapulamema꞉,
JOH 12:11 mabu Lasalesikono komone hiliyonomo tawakaluba꞉te Ya꞉suku hibima꞉ a꞉midiya꞉.
JOH 12:12 Eta hegelalo puya꞉te Yelusalema ko habalo Adaguila꞉ Poko ododima꞉ da꞉pelamiya꞉, ibi hiliyonomate iya꞉tawahuya꞉ Ya꞉suti ba꞉be habamo da꞉pitiya꞉.
JOH 12:13 Ba꞉bema꞉ iba꞉te ele uwateholete eba꞉go alugama꞉ ba tolamita ibulunomamo na꞉ga꞉lutiya꞉, “Godoko nadipata꞉la꞉! Godo, amia꞉no mahilago da꞉pita, wadiyala ama꞉ ba꞉be lumagi na꞉koimiya꞉! Ebe ba꞉ a Isalaela tawakalubino Ko Gawadubula!”
JOH 12:14 Ba꞉bene Ya꞉suti uli ape donoki-goe umiti ba꞉be hunamo dito emediya꞉. Ebete ba꞉ba ka꞉na ododiya꞉ Godokono tabote hibima꞉ keda꞉ma꞉, mabu ebeno Bukalo eta tabote ba꞉ma ka꞉na bitana,
JOH 12:15 “Yelusalemanapa꞉la꞉, la꞉ akatoletolehala꞉. Numa꞉la꞉, la꞉eno Ko Gawadubuti ba꞉ na꞉pita, iyo, ebete donoki-goe deha꞉poto hunamo emedete pita.”
JOH 12:16 Ba꞉ba tetelo Ya꞉suku ta꞉matapa꞉te ba꞉moe Buka taboeno ipuwa hidamo kemalagidolutiya꞉ha꞉, huiyatiya galane Ya꞉suti Godokono helo alago hoe ipuwane da꞉mahiguya꞉, ba꞉ba tetelo ibino ukuiti tuputupuhulamete iba꞉te ba꞉bo ga꞉luya꞉, “Hibila, Ya꞉suti Yelusalemamo ba na꞉pa꞉ga, ale ebe da꞉milimihuima꞉, Godokono Buka tabote ebeno komoma꞉ hibinomoma꞉ ba꞉bo edi!”
JOH 12:17 Dopamo Ya꞉suti Lasalesiko bobo ipuwamo neka꞉miti hoe ipuwane dadipatiya꞉, ba꞉ba tetene tupuimiti puya꞉te ba꞉be hanohano komo dumiya꞉, iba꞉te hiya꞉hiya꞉ habahabamo tolameholete komo hiliyonomo tawakalubi ba꞉bo nikiyahalamiya꞉.
JOH 12:18 Ba꞉be mabuma꞉ Yelusalemanapi hiliyonomate ba꞉be komo iya꞉tawahate, iba꞉te Ya꞉suti ibino habamo pema꞉ duliya꞉ ebe umima꞉ ba꞉ dito pelamiya꞉.
JOH 12:19 Ba꞉bema꞉ Pa꞉lisi kapiyuimipa꞉te ubiha꞉ma꞉ ba eda꞉ha ibi ha꞉kiya ibi ipuwalo na꞉ga꞉luya꞉, “La꞉ numa꞉la꞉! A kahelohelohutaha꞉, hiliyonomo tawakaluba꞉te a miya꞉poete ebe ba꞉ na꞉ta꞉mata!”
JOH 12:20 Yunapino Adaguila꞉ Poko ododi tetelo komo Yuha꞉pa꞉te Yelusalema ko habamo Godoko adikumima꞉ da꞉tolamiya꞉, ibi atumu ba꞉be poko habalo na꞉nepola꞉nuya꞉.
JOH 12:21 Ba꞉bene Ya꞉sukunu ta꞉matadawa eta Pilipiko, ebe ba꞉ Betasaidanapila, komo iba꞉te ebetamo nikuliti ebe na꞉nega꞉lamiya꞉, “Mabulubi, a Ya꞉suku umima꞉ ewagelitama꞉.”
JOH 12:22 Ba꞉bema꞉ Pilipiti A꞉nduluku da꞉kiyamiya꞉, ibi netewapa꞉te badi tote Ya꞉suku ba꞉bo nega꞉lamiya꞉.
JOH 12:23 Ba꞉bene Ya꞉suti iba꞉tamo na꞉goiya꞉, “Tete ba꞉ a꞉pe, Godokono helo alote Tawakalubino Naniwi ba a꞉la꞉mina ebe dawagaminamene, tawakalubi hiliyonomate ebeno hibi komo ba꞉bo kumima꞉na꞉.
JOH 12:24 Ba꞉bema꞉ na la꞉tamo hibi tabonomo begoemo, kona kikipote haka ipuwamo ma꞉tigate da꞉nehoemene, ebeno ka꞉ka꞉te hibilo a꞉kawibamene mabu galane komo kona kikipate ba꞉be ipuwane kopikulima꞉na꞉.
JOH 12:25 Ba꞉gala kebe lumagiti ebeno ka꞉ka꞉ kapiya demalagidolona, ebeno ka꞉ka꞉te kalatidima꞉ne, huiyatiya kebe lumagiti ba꞉moe hopolo ebeno ka꞉ka꞉ emalagidoloheno, ebeno ka꞉ka꞉te Godokono Hunu Habalo itana itana tetelo bitanamene.
JOH 12:26 Ba꞉bema꞉ kebe lumagiti naeno huiyaha꞉ okodawama꞉ eda꞉ma꞉ ubi dihatemene, wadiyala ebete na na꞉ta꞉mahena꞉mene, ba꞉bene nale kebe habalo demedenamo ebete ba꞉be atu habalo nago bemedenamene. Ba꞉gala eta komo, kebe lumagiti naeno hibi okodawama꞉ deda꞉mene, naeno Nabiwiti ebe hunamo kadipatema꞉ne.”
JOH 12:27 Ba꞉bene Ya꞉suti Godotamo tabo ba olamagi na꞉goiya꞉, “Ka꞉lo na tepo ipuwalo menemenenomoma꞉ editamo, ba꞉bema꞉ Nabiwi, na ama꞉tamo bada tabote na꞉ka꞉goemo? Nale ba꞉ma ka꞉na ba꞉ka꞉goemo, ‘Nabiwi, modoboha꞉ ba꞉moe olalati tetete natamo pe’? Ao, nale ba꞉mako tabo a꞉kagaa꞉mo mabu na ba꞉moe temeteme lawema꞉ hopo habamo ba꞉bema꞉ piya꞉mo.
JOH 12:28 Ba꞉bema꞉ Nabiwi, ama꞉ ha꞉kiya amia꞉no helo alo ipuwado ama꞉ nawagaminuya꞉.” Ya꞉suti ba꞉moe tabo ba goita ba꞉ba tetenomolo Godokono Hunu Habane tabote ba꞉ma ka꞉na pihitiguya꞉, “Na ha꞉kiya na ya꞉lo awagaminuya꞉mo, ba꞉gala na ha꞉kiya gala kakawagaminama꞉nemo!”
JOH 12:29 Ba꞉ba tetelo puya꞉te Ya꞉suku tamelo da꞉la꞉mota꞉hanuya꞉, ba꞉bi tawakalubi hiliyonomate ba꞉be tabo madodo uliti na꞉ga꞉luya꞉, “Ba꞉moe ba꞉ alomote goewata,” huiyatiya komopa꞉te na꞉ga꞉luya꞉, “Ao, ebe ba꞉ Godokono nopodawate ebetamo polamagita.”
JOH 12:30 Ya꞉suti ibino tabo ga꞉la komo iya꞉tawate na꞉goiya꞉, “Ba꞉moe tabote na mabuma꞉ kapeha꞉, la꞉ mabuma꞉ pe.
JOH 12:31 Ba꞉ hibila, ka꞉lo hopo habanapa꞉te ibino kuba ododili mabuma꞉ huiya kuwatema꞉na꞉, ba꞉bene ba꞉moe hopoeno kuba gawadubu Saitanako Godote ebeno wato kikipo kitamidamema꞉ne.
JOH 12:32 Ba꞉gala Godote na hunamo dadipanatenemene, ba꞉be hoe komodo na huiyatiya hiliyonomo tawakalubi natamo komagahelema꞉nemo.”
JOH 12:33 Ya꞉suti ba꞉moe tabo dolamagiya꞉ ebeno ipuwa ba꞉ma ka꞉nala, ebe keha pihigalo keba ka꞉na da꞉hoemene, ebete ba꞉be komo behawakalimiya꞉.
JOH 12:34 Ba꞉bene tawakalubi hiliyonomate Ya꞉sukunu tabo ba huiya na꞉ga꞉luya꞉, “Godokono Tutumu Tabo Bukate a biya꞉tua꞉mena, ebeno Oemedawa Kelisote emedena tetelo bemedenamene. Ba꞉bema꞉ ama꞉ ba꞉ma ka꞉na badama꞉ ka꞉gaa꞉wa, Godote Tawakalubino Naniwino hoe komodo ebe hunamo kadipatema꞉ne? Tawakalubino Naniwi potela꞉ka꞉?”
JOH 12:35 Ba꞉bene Ya꞉suti gala na꞉kagoiya꞉, “Godokono alote la꞉ ipuwalo tete nanekela꞉mo ga꞉ga꞉dopo kitanama꞉ne, ba꞉bema꞉ wadiyala la꞉ ba꞉moe alo ipuwado na꞉wapata꞉lamenala꞉. La꞉ hidamo, du komote la꞉tamo akapa꞉la꞉, mabu du ipuwado da꞉pata꞉na ba꞉be lumagi iya꞉tawaha꞉ ebete kebe gabodo da꞉tona!
JOH 12:36 Ba꞉bema꞉ du komote peheno alote la꞉eno tolame gabo ba a꞉la꞉minana, wadiyala la꞉ hibima꞉ na꞉mida꞉la꞉, ba꞉bene la꞉le aloeno gugudima꞉ keda꞉hama꞉nemata.” Ba꞉moe tabo olamagi da꞉wibuya꞉, Ya꞉suti ba꞉bi tawakalubi hiliyonomo miya꞉palete diya gabodo eta baha꞉mo tote ba꞉bo nilutiya꞉.
JOH 12:37 Ba꞉ hibila, Ya꞉suti hopo habalo ba emedena Godokono helo kohawakalimima꞉ ebete tawakalubino holoholo hapulu hiliyonomo hanohano komokomo bododilinakui, huiyatiya puya꞉te ba꞉bi komo dulamenakui ibi ipuwalo komo Yu tawakaluba꞉te ebe hibima꞉ kamidiya꞉ha꞉.
JOH 12:38 Ba꞉bene ba꞉moe komote ba꞉ ba꞉ba ka꞉na uluhukuya꞉, Godokono ukui hawakalimidawa Aisayate da꞉goiya꞉, ba꞉be tabote hibima꞉ keda꞉ma꞉. Ya꞉lo tetelo ebete tabo ba꞉ma ka꞉na goiya꞉, “Kodawa, ama꞉ amia꞉no ko helo puya꞉tamo da꞉hawakaliminaka, ale amia꞉no tabo iba꞉tamo dolamagimima꞉, hibima꞉ pote ka꞉midi? Lumagi kalutaha꞉, puliyanomola.”
JOH 12:39 Ba꞉bema꞉ mabu keka꞉ tawakaluba꞉te Ya꞉suku hibima꞉ midi modoboha꞉ma꞉ deda꞉hana? Aisayate ba꞉be komo hawakalimima꞉ eta tabo ba꞉ma ka꞉na kagoiya꞉,
JOH 12:40 “Godote hibima꞉ midiha꞉pino baidi duhuma꞉ midililamete, ibino tepo ipuwoeno ukui akakodakoduilamelelamiya꞉. Ba꞉bema꞉ ebete ibi mabuma꞉ na꞉goena, ‘Iba꞉te baida꞉mo hibi komo umi modoboha꞉, iyo, ibino tepo ipuwalo naeno hido komo iya꞉tawa modoboha꞉. Iba꞉te ibino tepo ipuwoeno ukui hidamo nemalagidolotale natamo bohobila꞉na꞉, ba꞉bema꞉ na modobola ibi nale hiduilame.’”
JOH 12:41 Ba꞉ hibila, tawakaluba꞉te Ya꞉suku ubiha꞉ma꞉ deda꞉hamena꞉, Aisayate ba꞉be komoma꞉ ba꞉moe tabo ya꞉lo a꞉goiya꞉, mabu ebeno baiditi hiya꞉ma꞉ ba eda꞉hame ebete Ya꞉suku Godokono helo alote a꞉la꞉minutalo ba꞉bo umiya꞉.
JOH 12:42 Ba꞉bene komo tawakaluba꞉te Ya꞉suku ubiha꞉ma꞉ ba eda꞉ha, atu tetelo komo tawakalubi ba꞉gala komo ibino watowatopa꞉te ebe hibima꞉ ba꞉bo midiya꞉. Huiyatiya ba꞉ba꞉te Pa꞉lisi kapiyuimipi tolelamelo ibino hibima꞉ midi komo kahawakalimiya꞉ha꞉, Pa꞉lisi watowatopa꞉te mauba ipuwalo ibi hiya꞉hiya꞉ habahaboeno baidi ibubulamehole genamamo a꞉pa꞉la꞉ha talona ihatelamekapoma꞉.
JOH 12:43 Ba꞉ hibila, iba꞉te Ya꞉suku ta꞉mata ipuwalo kodakodalo kapola꞉nuya꞉ha꞉ mabu ibi ubila tawakaluba꞉te iba꞉tamo kokalakalahama꞉, huiyatiya Godote iba꞉tamo da꞉kalakalana iba꞉te ba꞉be komo koamo kemalagidolonamiha꞉.
JOH 12:44 Ba꞉bema꞉ Ya꞉suti ibulunomo ba goewata na꞉goiya꞉, “Kebe lumagiti na hibima꞉ da꞉midinina ebete na kapiya hibima꞉ kamidininaha꞉, ebete na da꞉poenamiya꞉ ba꞉be dawa atumu hibima꞉ na꞉kamidina,
JOH 12:45 ba꞉gala kebe lumagiti naeno komo dumina, ebete na da꞉poenamiya꞉ ba꞉be dawoeno komo na꞉ka-umina.
JOH 12:46 Ba꞉ hibila, na ba꞉moe hopo a꞉la꞉minama꞉ piya꞉mo, ba꞉bema꞉ kebe lumagiti na hibima꞉ da꞉midinina ebete du ipuwalo a꞉kemedenamene.
JOH 12:47 “Ba꞉gala ba꞉moe ba꞉ eta komola. Kebe lumagiti naeno tabo uliti papamiwataheno, nale ebeno komo a꞉kanagiya꞉midama꞉mo mabu na hopo habanapa꞉tamo kuba huiya ikalamema꞉ kapiya꞉ha꞉, huiyatiya na ibino ka꞉ka꞉ mula꞉lelamema꞉ piya꞉mo.
JOH 12:48 Numa꞉la꞉, kebe lumagiti na ubiha꞉ma꞉ eda꞉te naeno tabo komokomo uwateheno, ebeno komo anagiya꞉midamema꞉ eta Kodawate ba꞉luta. Iyo, Godote Kuititi Hegelalo naeno tabo komamo ba꞉be lumagino komo kanagilamelemema꞉ne,
JOH 12:49 mabu nale dolamaginamo ba꞉bi tabo komokomo na ha꞉kiya naeno ukuilo kolamaginaha꞉, huiyatiya Nabiwiti na da꞉poenamiya꞉ nale ebetamo papamiwatalo ebeno tabonomo bolamaginamo.
JOH 12:50 Na ba꞉moe komo iya꞉tawala, Nabiwino tutumu tabo ba꞉ wiboha꞉ ka꞉ka꞉la, ba꞉bema꞉ ebete na keba ka꞉na ka꞉goenamenako, na ba꞉ ba꞉ba ka꞉na olamaginakomo.”
JOH 13:1 Yu tawakalubino Adaguila꞉ Poko ododima꞉ kapiya hegelate ba nitana, Ya꞉suti ba꞉bo iya꞉tawuya꞉ ba꞉moe ba꞉ tetela, ebete tatalila ba꞉moe hopo miya꞉pate Nabiwi Godotamo kotoma꞉ne. Ba꞉ hibila, puya꞉te ba꞉moe hopolo ebenoma꞉ deda꞉hanama꞉, Ya꞉suti ibi malemalelatelelo konomamo emalagidolenami, ba꞉bema꞉ ibi ba꞉be malemala꞉go magatalete kuititinomamo ba꞉bo nuluhukuya꞉.
JOH 13:2 Ba꞉bene ba꞉be dulu Ya꞉suti ebe ta꞉matapa꞉go ahidinate baa꞉ benahaniya꞉. Ba꞉be du peheno Saitanate dopamo eta ta꞉matadawa Yudasikono tepo ipuwamo kuba ukui ba꞉ma ka꞉na ihatemiya꞉, ebete Ya꞉suku anakapumipino kokotamo ebe kihatema꞉, ba꞉moe Yudasiko ba꞉ Keliyotanapi Saimonokono gudula.
JOH 13:3 Hibila, Ya꞉suti ba꞉moi netewa-kapiya komo ya꞉lo iya꞉tawuya꞉, Nabiwi Godote ebetamo helo ikamiya꞉ hiliyonomo komokomo ododilima꞉, ba꞉gala ebe ba꞉ Godogodone piya꞉, ba꞉gala ebe ba꞉ Godotamo gala kakatoma꞉ne.
JOH 13:4 Ba꞉be mabuma꞉ ebete baa꞉ naha habane mahiganate, atuino kaliko pekananate huiyaha꞉ okodawamo a꞉la꞉li meteteholeno kaliko lawenate dito puliniya꞉.
JOH 13:5 Ba꞉bene ebete wahikalamo beya haminanate ebeno ta꞉matapino nato ukulalelame ba꞉bo tupuiminiya꞉, ba꞉gala ebete da꞉puliniya꞉ ba꞉be a꞉la꞉li meteteholeno kalikamo ebete ibino nato a꞉la꞉li ba꞉bo meteteholelameniya꞉.
JOH 13:6 Ba꞉bene ebete Saimono Pitatamo da꞉peniya꞉ Pitate ebetamo na꞉goeniya꞉, “Kodawa, ama꞉ naeno nato ba꞉kukulaleomena꞉?”
JOH 13:7 Ya꞉suti tabo ba huiyana ebe na꞉goemeniya꞉, “Ama꞉ iya꞉tawaha꞉ nale ama꞉tamo bada komo dododinamo, huiyatiya ama꞉ galane kiya꞉tawama꞉na꞉ta.”
JOH 13:8 Ba꞉bema꞉ Pitate na꞉goeniya꞉, “Ao, ba꞉be komo modoboha꞉! Ama꞉ naeno nato a꞉kukulala꞉mena꞉ta.” Ya꞉suti huiyatiya ebe na꞉goemeniya꞉, “Nale amia꞉no nato ukulaleheno ama꞉ nagodolo habahenola.”
JOH 13:9 Ba꞉bema꞉ Pitate ebetamo na꞉goeniya꞉, “Kodawa, kubaha꞉, ama꞉ naeno nato kapiya akukulala꞉la꞉. Wadiyala ama꞉ naeno kokoto ba꞉gala wato atumu na꞉kukulalenamiya꞉.”
JOH 13:10 Ba꞉bene Ya꞉suti na꞉goeniya꞉, “Kebe lumagiti mala꞉ ya꞉lo da꞉tui ebeno apeno dalowa꞉ puliyala, huiyatiya ebete ebeno nato kapiya nukulala꞉mene. Ba꞉moe komo ba꞉ hibila, la꞉ hiliyonomate uliulinoma꞉ eda꞉huimata, huiyatiya la꞉ ipuwalo kapiya dawate ulinoma꞉ keda꞉naha꞉.”
JOH 13:11 Ya꞉suti ba꞉moe tabo da꞉goeniya꞉ mabu ebete ya꞉lo iya꞉tawuya꞉, ta꞉matapi ipuwalo ebe pote anakapumipino kokotamo dihatemene.
JOH 13:12 Ba꞉ba tetelo ebete ebeno ta꞉matapino nato ukulalelame da꞉wiboniya꞉, ebete ebeno atuino kaliko gala kapulinate ba꞉ dito emedeniya꞉. Ba꞉bene ebete ibi na꞉goelameniya꞉, “La꞉ iya꞉tawahala꞉ka꞉, nale la꞉tamo dododimo ba꞉be komoeno ipuwa?
JOH 13:13 La꞉le na la꞉eno Iya꞉tulamedawama꞉ ga꞉lanakomata ba꞉gala Kodawama꞉ akaka꞉naminakomata. Ba꞉ hibila, na ba꞉ ba꞉betela.
JOH 13:14 Ba꞉bema꞉ galane la꞉le ba꞉moe naeno ododi komo ba꞉ma ka꞉na demalagidolonakoma, ‘Aeno Iya꞉tulamedawa ba꞉gala Kodawa, ebete aeno nato ukulalea꞉meni,’ wadiyala la꞉ ha꞉kiya la꞉ ipuwalo etate etoeno nato atumu nukulalemenakuya꞉la꞉.
JOH 13:15 Iyo, nale la꞉tamo ba꞉ go bododimo, galane tetelo la꞉le komopa꞉tamo ba꞉ma ka꞉na nododinakuya꞉la꞉.
JOH 13:16 Na la꞉tamo hibi tabonomo begoemo, eta okodawoeno helote ebeno oko namutudawoeno helo a꞉kagogolale, ba꞉gala tabo atadawoeno helote ebe da꞉poememene ba꞉be kodawoeno helo a꞉kagogolamene.
JOH 13:17 Ba꞉bema꞉ la꞉ ba꞉moi komokomo iya꞉tawahate, ba꞉ma ka꞉na etate etatamo, etate etatamo, huiyaha꞉ oko dowatinakoma, ba꞉bene la꞉godolo konomo kalakalate bitananakomene.”
JOH 13:18 Ba꞉bene Ya꞉suti ebe ta꞉matapa꞉tamo na꞉goeniya꞉, “Godokono Bukalo eta tabote ba꞉ma ka꞉na itana, ‘Nago baa꞉ da꞉nanako, ba꞉be lumagiti naeno alaholodawama꞉ keda꞉ma꞉ne,’ ba꞉bema꞉ ba꞉ma tetelo a ipuwalo ba꞉moe tabo komote hibima꞉ keda꞉ma꞉ne, Godokono ubila. Ba꞉ hibila, na la꞉eno komo iya꞉tawanomola, mabu la꞉le na ta꞉mahenema꞉ nale la꞉ uwatimata, ba꞉bema꞉ ba꞉moe tabo komote la꞉ hiliyonomoeno komoma꞉ kagoenaha꞉, kapiya lumagino komoma꞉ goena.
JOH 13:19 Ba꞉be lumagino komote uluhukuhino nale la꞉ dopamo goelamemata. Ba꞉bene ebeno komoma꞉ Buka taboeno komote hibilo duluhukumini, la꞉ hibima꞉ ba꞉bo komidima꞉nemata na ba꞉ emedena tetelo demedenamo ba꞉be dawala.
JOH 13:20 Na la꞉tamo hibi tabonomo begoemo, nale kebe okodawa doememo, pote ba꞉be okodawa kalakalago dowalubimini ebete na kowalubinima꞉ne, ba꞉gala pote na dowalubinimini ebete na kapiya a꞉kowalubina꞉mene, ebete na Oenamedawa Godoko atumu kakowalubima꞉ne.”
JOH 13:21 Ba꞉bene Ya꞉suti ba꞉moe tabo olamagi da꞉wiboniya꞉ ebete tepo ipuwalo menemenenomoma꞉ eda꞉nate ebe ta꞉matapa꞉tamo hawakala na꞉goeniya꞉, “Na la꞉tamo hibi tabonomo begoemo, la꞉ ipuwalo etate na anakapunamepi kowalubilima꞉ne na kolawenema꞉.”
JOH 13:22 Ba꞉bema꞉ ebe ta꞉matapa꞉te ibi ipuwalo ba uma꞉tepahuina nemalagidoloniya꞉, “Ba꞉moe kuba pote na꞉kododimini?” huiyatiya iba꞉te lumagi kuminiya꞉ha꞉.
JOH 13:23 Ba꞉ba tetelo Ya꞉suti ebe ta꞉matapi ipuwalo poko koamo demalagidolonami, ba꞉bete Ya꞉suku tamelo na꞉lutiya꞉,
JOH 13:24 ba꞉bene Saimono Pitate kokotamo ba goena ebe na꞉goemeniya꞉, “Ama꞉le Iya꞉tulamedawa na꞉kiyama꞉ ebete pokono komoma꞉ kolamagina.”
JOH 13:25 Ba꞉bene ba꞉be ta꞉matadawate Ya꞉suku tama꞉mo nemeda꞉tepanate ebe na꞉goemeniya꞉, “Kodawa, ba꞉be lumagi potela꞉ka꞉?”
JOH 13:26 Ya꞉suti ebeno tabo ba huiyana na꞉goeniya꞉, “Nale baa꞉ kalila꞉mo adutiti kebe lumagitamo dikamemo, ba꞉be ba꞉be lumagila.” Ba꞉ba tetelo ebete baa꞉ kalila꞉mo adutinate, Keliyotanapi Saimonokono gudu Yudasitamo ba꞉ dito ikameniya꞉.
JOH 13:27 Ba꞉bene Yudasiti ba꞉be baa꞉ da꞉laweniya꞉, ba꞉ba tetenomolo Saitanate ebeno tepo ipuwamo ba꞉ dito opeganiya꞉. Ba꞉bene Ya꞉suti ebetamo na꞉goeniya꞉, “Ama꞉le kebe komo ododima꞉ dewagelena, wadiyala tiyonomo nododa꞉.”
JOH 13:28 Ba꞉ba tetelo baa꞉ naha habalo da꞉pola꞉nuya꞉, ba꞉bi komo ta꞉matapi ipuwalo eta lumagiti Ya꞉sukunu taboeno ipuwa kalaweniya꞉ha꞉.
JOH 13:29 Yudasiti ibino kapiyuimipino mani umidawama꞉ eda꞉nami, ba꞉bema꞉ komopa꞉te nemalagidoloniya꞉ Ya꞉suti poko ododino komo baa꞉ konuwatehoma꞉ goena, ba꞉gala komopa꞉te nemalagidoloniya꞉ ebete awaepi mana꞉mo konowalubilima꞉ goena.
JOH 13:30 Ba꞉bene Yudasiti Ya꞉sugodone baa꞉ da꞉laweniya꞉, ba꞉ba tetenomolo ebete iba꞉godone mahiganate du ipuwamo ba꞉ dito nopeganiya꞉.
JOH 13:31 Yudasiti ibi da꞉miya꞉paliniya꞉ ba꞉ba tetelo Ya꞉suti komopa꞉tamo na꞉goeniya꞉, “Ba꞉ma tetelo Godokono helo alote Tawakalubino Naniwi ba a꞉la꞉mina ebe kawagaminama꞉ne, ba꞉gala Tawakalubino Naniwiti ebeno ododi komodo Godoko kawagaminama꞉ne.
JOH 13:32 Ba꞉bema꞉ Godote ebe ha꞉kiya ebe Tawakalubino Naniwi ipuwado dawagaminamene, ba꞉be atu tetelo ebete Tawakalubino Naniwi helo alamo ba a꞉la꞉mina ebe kawagaminama꞉ne. Ba꞉ hibila, ebete ba꞉be komo tiyonomo kododima꞉ne.”
JOH 13:33 Ba꞉bene Ya꞉suti eta tabo bekagoeniya꞉, “Naeno guguda꞉la꞉, na la꞉go tete nanekele emeda꞉tepate la꞉le na ba꞉bo kohowadinima꞉nemata. Iyo, nale kebe tabo Yu watowatopa꞉tamo dopamo da꞉goimo, ka꞉lo la꞉tamo ba꞉be atu tabo bekagoemo, nale kebe habamo da꞉tomo la꞉le ba꞉be habamo pelame modoboha꞉.
JOH 13:34 “Huiyatiya ka꞉lo dulu na la꞉tamo uli tutumu tabo bikalamemata la꞉ kowalubilima꞉. Wadiyala la꞉eno emede ipuwalo etate eta malemalelo nemalagidolonala꞉, nale la꞉ keba ka꞉na kemalagidoletanama ba꞉ba ka꞉na.
JOH 13:35 Keba tetelo la꞉ ipuwalo etate eta malemalelo kemalagidolo, etate eta malemalelo kemalagidolo, la꞉ ba꞉ba ka꞉na dewagelenama, ba꞉moe gabodo hiliyonomo tawakaluba꞉te kiya꞉tawahama꞉na꞉ la꞉ ba꞉ naeno ta꞉matapilata.”
JOH 13:36 Ba꞉bene Saimono Pitate Ya꞉sutamo na꞉goeniya꞉, “Kodawa, ama꞉ kebamo na꞉ka꞉tomena꞉?” Ya꞉suti tabo ba huiyana na꞉goeniya꞉, “Nale kebe habamo da꞉tomo, ba꞉ma tetelo la꞉le na ta꞉mahene modoboha꞉, huiyatiya hibila, la꞉le na galane kota꞉mahenema꞉nemata.”
JOH 13:37 Ba꞉bene Pitate ebe gala na꞉kagoemeniya꞉, “Kodawa, mabu keka꞉ nale ba꞉ma tetelo ama꞉ ta꞉maheha꞉ma꞉ da꞉gaa꞉? Na modobola naeno ka꞉ka꞉ ama꞉ mabuma꞉ gobogobamo kihatema꞉nemo.”
JOH 13:38 Ba꞉ba tetelo Ya꞉suti ebeno tabo ba huiyana na꞉goeniya꞉, “Amia꞉no ka꞉ka꞉ na mabuma꞉ hibilo ba꞉kihateomena꞉? Na ama꞉tamo hibi tabonomo begoemo, ka꞉lo dulu kakabate goehoheno ama꞉ netewa-kapiya teta꞉mo na iya꞉tawaha꞉ma꞉ kogoema꞉na꞉ta.”
JOH 14:1 Ba꞉bene Ya꞉suti tabo moga꞉melo ebe ta꞉matapa꞉tamo na꞉goeniya꞉, “La꞉ tepo menemenema꞉ ba꞉gala ukui bilibilima꞉ akeda꞉hala꞉. Wadiyala la꞉ Godoko hibima꞉ na꞉mida꞉la꞉, ba꞉gala la꞉ na atumu hibima꞉ na꞉midina꞉la꞉.
JOH 14:2 Ba꞉ hibila, naeno Nabiwino genama gulu la꞉eno emedeho haba hiliyonomo ba꞉pola꞉na. Ba꞉moe komo ha꞉dama꞉ neda꞉tale nale la꞉ ba꞉ka꞉goelametana꞉, iyo, na la꞉eno hibi habanomo hiduilamema꞉ kotoma꞉nemo.
JOH 14:3 Ba꞉bene na la꞉eno haba nihiduilamete gala kapete la꞉ ba꞉bo kopuwatema꞉nemata, ba꞉ba tetelo a hiliyonomate kapimilo naeno habalo ba꞉nemedenama꞉.
JOH 14:4 Ba꞉ hibila, nale kebe habamo da꞉tomo, la꞉ ba꞉be habamo tolame gabo iya꞉tawahala.”
JOH 14:5 Ba꞉bene Tomasiti Ya꞉sutamo na꞉goeniya꞉, “Kodawa, ama꞉le kebe habamo da꞉tomena꞉ a ba꞉be haba iya꞉tawaha꞉, ba꞉bema꞉ a gabo keba ka꞉na na꞉kiya꞉tawahama꞉?”
JOH 14:6 Ya꞉suti ebeno tabo ba huiyana na꞉goeniya꞉, “Na ba꞉ gabola, ba꞉gala na ba꞉ hibi komo hawakalimidawala, ba꞉gala na ba꞉ wiboha꞉ ka꞉ka꞉la. Lumagiti na ipuwado Nabiwi Godotamo kotoma꞉ne, eta gabodo a꞉katoamene.
JOH 14:7 Numa꞉la꞉, la꞉ naeno komo iya꞉tawahala, ba꞉bema꞉ ba꞉ma tetene tupuimiti la꞉ naeno Nabiwino komo atumu kakiya꞉tawahama꞉nemata. Ba꞉ hibila, la꞉ ebe ya꞉lo umia꞉mata.”
JOH 14:8 Ba꞉bene Pilipiti ebetamo na꞉goeniya꞉, “Kodawa, ama꞉ atamo Nabiwino komo da꞉hawakalimimina꞉, a komodoboma꞉nema꞉.”
JOH 14:9 Ya꞉suti tabo ba huiyana na꞉goeniya꞉, “Pilipi, nale tete ga꞉ga꞉nomolo la꞉go emedenamimo, ba꞉bema꞉ mabu keka꞉ ama꞉le naeno komo hibilo kiya꞉tawanaha꞉? Ama꞉le na dunami ba꞉be gabodo ama꞉le Nabiwi ba꞉ umia꞉ta, ba꞉bema꞉ keka꞉ mabu ama꞉le ba꞉ma ka꞉na da꞉gaa꞉, ‘Nabiwino komo atamo na꞉hawakalima꞉’?
JOH 14:10 Pilipi, ama꞉ ba꞉moe komo hibima꞉ na꞉ka꞉midiona, na Nabiwi ipuwalo bemedenamo ba꞉gala Nabiwiti na ipuwalo bemedena?” Ba꞉bene Ya꞉suti ebe ta꞉matapi hiliyonomatamo na꞉goeniya꞉, “Nale la꞉tamo kebe tabo kolamaginakuimo, ba꞉bi tabo komokomate nagodone kapelamenaha꞉, huiyatiya na ipuwalo demedena, ba꞉be Nabiwiti naeno hiya꞉hiya꞉ tabamo ebeno hido oko bowatina.
JOH 14:11 Ba꞉bema꞉ wadiyala la꞉ ba꞉moe komo hibima꞉ na꞉mida꞉la꞉, na Nabiwi ipuwalo bemedenamo ba꞉gala ebete na ipuwalo bemedena. Huiyatiya la꞉ la꞉eno ukuilo ba꞉moe komo kodakodama꞉ da꞉ga꞉lanama, ba꞉bema꞉ nale kebe hanohano komo la꞉ ipuwalo dododilinakuimo, wadiyala la꞉ ba꞉bi komoeno ipuwa ba emalagidolo na hibima꞉ na꞉midina꞉la꞉.
JOH 14:12 Ka꞉lo dulu na la꞉tamo hibi tabonomo begoemo, kebe lumagiti na hibima꞉ da꞉midinimini, nale dowatinamo ebete ba꞉be atu oko ba꞉ka-owatinamene. Ba꞉ hibila, ba꞉be lumagino oko owati helote naeno oko owati helo konegogoloma꞉ne mabu na ba꞉ Nabiwitamo kotoma꞉nemo.
JOH 14:13 Ba꞉bema꞉ la꞉le naeno mahilamo bada komoma꞉ na da꞉toenamehonema, nale la꞉tamo kikalamema꞉nemata mabu naeno ododi komodo Nabiwiti ha꞉kiya ebe kawagaminama꞉ne.
JOH 14:14 Iyo, la꞉ naeno mahilamo bada komoma꞉ na da꞉toenamehonema, na la꞉tamo dito kikalamema꞉nemata.”
JOH 14:15 Ba꞉bene Ya꞉suti ebe ta꞉matapa꞉tamo eta tabo bekagoeniya꞉, “La꞉ na malemalelo demalagidolonema la꞉ naeno tutumu tabamo kopapamila꞉hama꞉nemata.
JOH 14:16 Ba꞉bema꞉ nale naeno Nabiwi kogoemema꞉nemo, ebete eta Owalubidawa la꞉tamo kopoemema꞉, ba꞉bete emedena tetelo la꞉go bemedenamene.
JOH 14:17 Ebe ba꞉ Godokono Hido-talona Gobogobola, Godokono hibi komo da꞉hawakalimina ebe ba꞉be dawala. Hopo habanapa꞉te ebe a꞉kuma꞉la꞉, ba꞉gala ebeno komo a꞉kiya꞉tawahala꞉, ba꞉bema꞉ iba꞉te ibino tepo ipuwalo ebeno helo hibilo a꞉kalawa꞉mena꞉. Huiyatiya la꞉ hibima꞉ midipino komo eba ka꞉naha꞉ mabu la꞉ ebeno komo iya꞉tawahanomola, iyo, ebete emedena tetelo la꞉godolo bemedenamene.
JOH 14:18 Ba꞉bema꞉ nale la꞉ dito a꞉kamiya꞉pala꞉mata, ao, nale ba꞉moe Owalubidawa la꞉tamo hibilo kopoemema꞉nemo, ba꞉bene ebete la꞉godolo ba emedena galane na ha꞉kiya la꞉tamo gala kakapema꞉nemo.
JOH 14:19 “Tete nanekelelo hopo habanapa꞉te na a꞉kunama꞉mena꞉, huiyatiya la꞉le na kunamema꞉nemata, iyo, na wiboha꞉ ka꞉ka꞉go emedenamo, ba꞉bema꞉ la꞉ ba꞉ atumu ba꞉be ka꞉ka꞉go emedehonamata.
JOH 14:20 La꞉le na gala da꞉kunamema, ba꞉be hegelate da꞉puluhukumini, la꞉ ba꞉moe komo ba꞉bo kiya꞉tawahama꞉nemata, na naeno Nabiwi ipuwalo emedenamo ba꞉gala la꞉ na ipuwalo emedehonamata, ba꞉bene na atumu la꞉ ipuwalo bemedenamo.
JOH 14:21 Ba꞉bema꞉ puya꞉te naeno tutumu tabo hiliyonomo uwatete da꞉papamila꞉nakomena꞉, ba꞉ba꞉te na malemalelo emalagidolonena. Ba꞉ hibila, kebe tawakaluba꞉te na malemalelo demalagidolonena, naeno Nabiwiti ibi atumu malemalelo ba꞉kemalagidolena, ba꞉gala nale ibi atumu malemalelo ba kemalagidole na ha꞉kiya naeno komo iba꞉tamo ba꞉hawakaliminakomo.”
JOH 14:22 Ba꞉bene eta Yudasiti, Keliyotanapi Yudasitiha꞉, ebete Ya꞉suku nalateda꞉niya꞉, “Kodawa, hopo habanapa꞉te ama꞉ umihino, ba꞉ba tetelo a ha꞉kiya ama꞉ keba ka꞉na na꞉kumitamena꞉?”
JOH 14:23 Ya꞉suti tabo ba huiyana na꞉goeniya꞉, “Kebe lumagiti na malemalelo demalagidolonena, ebete naeno tutumu tabamo ba꞉papamiwatanakomene, ba꞉bene naeno Nabiwiti ebe malemalelo bemalagidolonamene, ba꞉gala ale ebetamo pete ebegodolo ba꞉pemedenama꞉.
JOH 14:24 Huiyatiya kebe lumagiti na malemalelo emalagidolonenaheno, ebete naeno tutumu tabamo a꞉kapapamiwatamene. Ba꞉moe komo ba꞉ hibila, la꞉ nagodolo dulihonakoma ba꞉bi tutumu tabo naenoha꞉, ba꞉bi tutumate na da꞉poenamiya꞉ ba꞉be Nabiwigodone pelamena.
JOH 14:25 “Nale la꞉ miya꞉paleheno ba꞉moi komokomo dopamo la꞉tamo ba꞉ olamagimo.
JOH 14:26 Ba꞉bene nale la꞉ da꞉miya꞉palema, Nabiwi Godote naeno mahilamo eta Owalubidawa la꞉tamo kopoemema꞉ne, ebe ba꞉ ebeno Hido-talona Gobogobola. Ba꞉ hibila, nale dopamo kebe hiliyonomo komo la꞉ diya꞉tulamenakuima, ebete pete ba꞉bi atu komokomo la꞉ gala ba kapiya꞉tulame la꞉eno ukui ba꞉bo ba꞉tuputupuilamenakomene.
JOH 14:27 Ba꞉gala ba꞉moe ba꞉ eta komola, nale la꞉tamo naeno tepo ipuwalo ditana ba꞉be hete bikalamemata. Ba꞉be hete ba꞉moe hopo haboenoha꞉, ba꞉bema꞉ la꞉ la꞉eno tepo ipuwalo ukui bilibila꞉go ba꞉gala tola꞉go akemedehala꞉.
JOH 14:28 “Nale la꞉tamo hibilo da꞉goemo la꞉ ulimata, na Nabiwi Godotamo tote ba꞉bene la꞉tamo gala kakapema꞉nemo. Numa꞉la꞉, la꞉le na hibilo malemalelo nemalagidolonenatale, naeno to komoma꞉ la꞉ ba꞉kalakalahona꞉, mabu ebeno helo konomola, naeno helo na꞉gogolona.
JOH 14:29 Ba꞉moe komote uluhukuhino na la꞉ dopamo goelamemata, ba꞉bema꞉ ba꞉moe komote hibilo duluhukumini, ba꞉ba tetelo la꞉ hibima꞉ komidima꞉nemata.
JOH 14:30 Huiyatiya ka꞉lo dulu na la꞉tamo tabo konomo a꞉kolamaga꞉mo, mabu hopo haba namutudawa ba꞉ na꞉pe. Ba꞉be kubadawoeno helote hibilo natamo kitanaha꞉ nale ebetamo kopapamiwatama꞉,
JOH 14:31 huiyatiya naeno Nabiwiti na kebe komokomo kododilima꞉ da꞉kiyanamenako, nale ba꞉bi komo ba ododili ebe kapiyatamo papamiwatanakomo. Iyo, ba꞉moe ba꞉be gabodo hopo habanapa꞉te naeno komo niya꞉tawahamena꞉, nale naeno Nabiwi malemalelo demalagidolonamo. “Ba꞉bema꞉ wadiyala la꞉ na꞉pakaminala꞉, a ba꞉moe genamane kotolamiya꞉.”
JOH 15:1 Ba꞉bene Ya꞉suti ebe ta꞉matapa꞉tamo eta tabo bekagoeniya꞉, “Na ba꞉ hibi gala꞉ipi tupina gao kehala, ba꞉gala naeno Nabiwiti ba꞉be gao keha umidawama꞉ eda꞉na.
JOH 15:2 “Ba꞉bema꞉ ba꞉moe kehoeno nolohoha꞉ gedawa hiliyonomo ebete mabunomamo iya꞉hiliti gobogobamo kiya꞉hekema꞉ne, huiyatiya da꞉nolohonaka ba꞉bi gedawa hiliyonomo hunu pahago ebete hunuya kiya꞉hilima꞉ne iba꞉te konomamo gala kakanolohoma꞉.
JOH 15:3 Ba꞉ hibila, nale la꞉tamo kebe tabo komokomo kolamaginakuimo ba꞉bi tabote la꞉ ukulalenomo dukulali, la꞉le uliulinoma꞉ ba꞉bo eda꞉huimata.
JOH 15:4 Ba꞉bema꞉ wadiyala la꞉le na hibi gao kehagodolo nemedehonala꞉, ba꞉bene na ba꞉ atumu la꞉ ipuwalo bemedenamo. Ba꞉moe komo hidamo nemalagidolala꞉, gao gedawate ebeno apa꞉mo moga꞉heno ebe ha꞉kiya a꞉kanolamene, ba꞉bema꞉ la꞉ na ipuwalo emedenaheno la꞉le hibilo a꞉kanolohamata.
JOH 15:5 “Na ba꞉ hibi gala꞉ipi tupina gao kehala, la꞉ gedawalata. Kebe lumagiti na ipuwalo demedenamene ba꞉gala na atumu ebe ipuwalo demedenamo, ebete konomamo konoloma꞉ne. Huiyatiya na la꞉eno tepo ipuwalo emedenaheno la꞉ ha꞉kiya eta hido komo a꞉kododa꞉mata.
JOH 15:6 Ba꞉bema꞉ kebe lumagiti na ipuwalo emedenaheno, ebe ba꞉ nolohoha꞉ gedawa keba ka꞉nala꞉ka꞉ ba꞉ba ka꞉nala. Pali namutudawate ebe gobogobamo da꞉da꞉namene kaloloma꞉ ba꞉bo koneda꞉ma꞉ne, ba꞉bene eta lumagiti pelawete koa꞉mo dito kopa꞉da꞉nama꞉ne.
JOH 15:7 Ba꞉ hibila, la꞉ na ipuwalo demedenama ba꞉gala naeno iya꞉tulame tabote la꞉eno tepo ipuwalo da꞉pola꞉namene, ba꞉ba tetelo la꞉ naeno hiya꞉hiya꞉ tabo hibilo ba ta꞉matale bada komoma꞉ naeno Nabiwi da꞉ga꞉lamema ebete ba꞉be komo la꞉tamo kikalamema꞉na꞉ta.
JOH 15:8 Mabu keba tetelo la꞉ naeno hibi gao keba ka꞉nala꞉ka꞉ ba꞉ba ka꞉na konomamo da꞉nolohoma, ba꞉ba tetelo la꞉ ba꞉moe komo hidamo kohawakalimima꞉nemata, la꞉ ba꞉ naeno hibi ta꞉matapilata. Ba꞉moe ba꞉be gabodo Nabiwi Godote ebe ha꞉kiya ebe kawagaminama꞉ne.
JOH 15:9 “Numa꞉la꞉, Nabiwiti na malemalelo keba ka꞉na kemalagidolonena, nale la꞉ ba꞉ba ka꞉na emalagidolenamata, ba꞉bema꞉ wadiyala la꞉ naeno malemale ipuwalo nemedeniya꞉la꞉.
JOH 15:10 Ba꞉ hibila, la꞉ naeno hiya꞉hiya꞉ tutumu tabamo hibilo da꞉papamila꞉hanama, ba꞉be gabodo la꞉le naeno malemale ipuwalo bemedenamata, nale naeno Nabiwino tutumu tabamo papamiwatalo ebeno malemale ipuwalo demedenamo ba꞉ba ka꞉na.
JOH 15:11 Ba꞉bema꞉ nale la꞉ ba꞉moe tabo begoelamemata, mabu na ubila naeno kalakalate la꞉eno tepo ipuwalo tabote ba꞉bolo kitanama꞉.
JOH 15:12 “Ba꞉moe ba꞉ naeno ko tutumu tabola la꞉tamo. Nale la꞉ malemalelo keba ka꞉na kemalagidoletanama, la꞉ ipuwalo etate eta ba꞉ba ka꞉na nemalagidolohuiniya꞉la꞉.
JOH 15:13 Numa꞉la꞉, eta lumagiti ebeno mabulubino ka꞉ka꞉ mula꞉lelamema꞉ ebeno ka꞉ka꞉ gobogobamo dito dihatemene, ba꞉ba ka꞉na ebegodolo hibi malemale komote konomamo kohawakalama꞉ne.
JOH 15:14 “Ba꞉gala eta komo, la꞉le naeno tutumu tabamo da꞉papamila꞉hama, ba꞉be gabodo la꞉ naeno mabulubima꞉ keda꞉hama꞉nemata.
JOH 15:15 Ba꞉bema꞉ ba꞉ma tetene tupuimiti nale la꞉ naeno huiyaha꞉ okopima꞉ gala a꞉kaka꞉lama꞉mata mabu huiyaha꞉ okopa꞉te ibino namutudawoeno tepo ipuwoeno ukui hibi a꞉kiya꞉tawahala꞉. Huiyatiya nale Nabiwigodone kebe komokomo kulihuya꞉mo, ba꞉bi hiliyonomo komo la꞉tamo a꞉hawakalilamimo, ba꞉bema꞉ la꞉ naeno hibi huiyaha꞉ okopiha꞉, ao, la꞉ ba꞉ naeno mabulubilata.
JOH 15:16 Ba꞉bema꞉ ba꞉moe ko komo akadodala꞉, la꞉le na laweneheno nale la꞉ dopamo uwatimata, la꞉le hopo haboeno hiya꞉hiya꞉ hopolo ba nemedehona hibi gaote la꞉ ipuwalo konolohonama꞉. Ba꞉bene la꞉eno gaote emedena tetelo ba pola꞉na, la꞉ bada komoma꞉ Nabiwi Godoko naeno mahilamo da꞉toemehonakoma, ebete ba꞉be komo la꞉tamo ba꞉bo bikalamenakomena꞉ta.
JOH 15:17 Ba꞉moe ba꞉ naeno ko tutumu tabola la꞉tamo, la꞉ ipuwalo etate eta malemalelo nemalagidolohuiniya꞉la꞉.”
JOH 15:18 Ba꞉bene Ya꞉suti eta tabo bekagoeniya꞉, “Hopo habanapa꞉te la꞉ naeno ta꞉matapa꞉tamo da꞉maubahamena꞉, ba꞉ba tetelo nemalagidoluya꞉la꞉ iba꞉te dopamo natamo a꞉maubahaliya꞉.
JOH 15:19 Ba꞉bema꞉ la꞉ hopo habanapima꞉ hibilo neda꞉honatale iba꞉te la꞉ kalakalago buwatetana꞉, huiyatiya nale la꞉ ibi ipuwane uwatimata, ba꞉bema꞉ iba꞉te la꞉ ubiha꞉ma꞉ eda꞉halo la꞉tamo ba꞉maubahanamena꞉ mabu la꞉ iba꞉go kapiyama꞉ keda꞉hanaha꞉.
JOH 15:20 Ba꞉gala nale la꞉ dopamo da꞉goelamima, la꞉le ba꞉moe tabo gala na꞉kemalagidolala꞉, okodawoeno helote ebeno oko namutudawoeno helo a꞉kagogolale. Ba꞉bema꞉ kebe tawakaluba꞉te natamo koko temeteme dikanamenakui, iba꞉te ba꞉ la꞉tamo atu temeteme ba꞉kikalamenakomena꞉ta, ba꞉gala kebe tawakaluba꞉te naeno iya꞉tulame tabamo da꞉papamila꞉hui, ba꞉ba꞉te la꞉eno iya꞉tulame tabamo atumu kakapapamila꞉hama꞉na꞉.
JOH 15:21 “Numa꞉la꞉, na da꞉poenamiya꞉ ba꞉be dawoeno komo hopo habanapa꞉te iya꞉tawahaha꞉, ba꞉bema꞉ iba꞉te na mabuma꞉ la꞉tamo kuba komokomo bododilinakomena꞉.
JOH 15:22 Nale iba꞉tamo pete Godokono hibi tabo polamagiha꞉tale, ebeno mauba komote ibino kuba ododili mabuma꞉ ba꞉ka꞉pena꞉, huiyatiya nale ba꞉moe hopo habamo da꞉piya꞉mo, ba꞉ba tetene tupuimiti ibino kuba ugumuili gabo kitanamiha꞉, ba꞉bema꞉ ibino kuba huiyate hibilo ba꞉ na꞉pe.
JOH 15:23 Numa꞉la꞉, ibi ipuwalo kebe lumagiti natamo da꞉maubana, ebete atumu naeno Nabiwitamo na꞉kamaubana.
JOH 15:24 Ba꞉bema꞉ nale hopo habanapi ipuwalo naeno Nabiwino koko hanohano komo pododiliha꞉tale, ebeno mauba komote ibino kuba ododili mabuma꞉ ba꞉ka꞉pena꞉. Huiyatiya na ibi ipuwalo ebeno helo konomamo a꞉hawakalimimo, eta hopo lumagiti ba꞉bako helo hawakalimi modoboha꞉, iyo, iba꞉te naeno helo hibinomolo umiya꞉, huiyatiya iba꞉te natamo ba꞉gala Nabiwitamo koamo maubahana.
JOH 15:25 Numa꞉la꞉, ibi ipuwalo ba꞉moe komote ba꞉ma ka꞉na uluhukui Godokono Buka tabote hibima꞉ keda꞉ma꞉, mabu ebete Yunapa꞉tamo dikalamiya꞉ ba꞉be Tutumu Bukalo tabote ba꞉ma ka꞉na itana, ‘Nale ibi mabuma꞉ hidohido komo ba ododilina, huiyatiya iba꞉te natamo a꞉maubahuya꞉.’
JOH 15:26 “Naeno ta꞉matapa꞉la꞉, na eta Owalubidawa la꞉tamo kopoemema꞉nemo, ebe ba꞉ Nabiwi Godogodone da꞉puluhukuna ba꞉be Hido-talona Gobogobola. Ebe ba꞉ Godokono hibi komo hawakalimidawala, ba꞉bema꞉ ebete hopo habanapa꞉tamo da꞉pemene naeno komo kopehawakalimima꞉ne,
JOH 15:27 ba꞉bene la꞉ ba꞉ atumu naeno komo na꞉kahawakalimiya꞉la꞉, mabu hibila, naeno oko tupuimi mabuni la꞉ ba꞉ nago emedenamimata.”
JOH 16:1 “Na ka꞉lo dulu ba꞉moi komokomo hiliyonomo la꞉tamo olamagimo, mabu na ubihinola la꞉le nato ukamidahale.
JOH 16:2 Tete ba꞉ na꞉pe, Yu tawakaluba꞉te la꞉tamo talona kihatelamema꞉na꞉ta la꞉ ibino hiya꞉hiya꞉ habahaboeno baidi ibubulamehole genama guamo a꞉pa꞉la꞉hama꞉, ba꞉gala ba꞉ba tetelo komopa꞉te la꞉ anakapulamema꞉ nopo ba tamote ba꞉bo kemalagidoloma꞉na꞉ iba꞉te Godokono oko bowatina.
JOH 16:3 Ba꞉ hibila, iba꞉te ba꞉ ba꞉ba ka꞉na la꞉tamo koko kuba ododilima꞉ kewagelema꞉na꞉, mabu iba꞉te naeno komo ba꞉gala naeno Nabiwino komo iya꞉tawahaha꞉.
JOH 16:4 Ba꞉bema꞉ numa꞉la꞉, na ba꞉moi komokomo la꞉tamo ba꞉ olamagimo, mabu na ubila ba꞉moe kuba tetete da꞉puluhukumini la꞉ ba꞉bo kemalagidoloma꞉nemata, ebete aeno temeteme komoma꞉ a ya꞉lo a꞉kiyaa꞉mi.” Ba꞉bene Ya꞉suti ebe ta꞉matapa꞉tamo eta tabo bekagoeniya꞉, “Na dopamo ba꞉moi komokomoma꞉ la꞉ kakiyahalameha꞉, mabu naeno oko tupuimi mabuni pete ba꞉ma teta꞉mo puluhuku, ba꞉be tete ga꞉ga꞉dopolo nale la꞉go emedenamimo.
JOH 16:5 Huiyatiya tete ba꞉ na꞉pe, na da꞉poenamiya꞉ ba꞉be dawatamo na gala kakatoma꞉nemo. La꞉ ba꞉be komoma꞉ ukui bilibilima꞉ ba eda꞉hana, huiyatiya etate na ba꞉ma ka꞉na kalateda꞉nenaha꞉, ‘Ama꞉ kebamo na꞉ka꞉tomena꞉?’
JOH 16:6 mabu la꞉ naeno to komo ba emalagidolona tepo ipuwalo menemenenomoma꞉ eda꞉hanamata.
JOH 16:7 Ba꞉bema꞉ nale la꞉ hibi tabo begoelamemata, nale la꞉ da꞉miya꞉palema ba꞉ hido komola, mabu na toheno la꞉eno eta Owalubidawa, ebe ba꞉ Godokono Gobogobola, ebete la꞉tamo a꞉kapa꞉mene. Iyo, na la꞉ ipuwane da꞉tomo, ba꞉ba tetelo na ba꞉be Hido Owalubidawa la꞉tamo hibilo kopoemema꞉nemo.
JOH 16:8 “Ebete hopo habanapa꞉tamo da꞉pemene, ba꞉ba tetelo ebete iba꞉tamo netewa-kapiya komokomo kopehawakalilamema꞉ne, ba꞉moi komokomo ba꞉ hopo haboeno kuba ododili komo, ba꞉gala Godokono tuputupu emede komo, ba꞉gala Godote tawakalubino kuba ododili mabuma꞉ iba꞉tamo huiya ikalame komo, ba꞉moi ba꞉bi komokomola.
JOH 16:9 Ba꞉ hibila, Godokono Gobogobote hopo habanapino kuba ododili komo kopehawakalilamema꞉ne mabu iba꞉te na hibima꞉ kamidininaha꞉.
JOH 16:10 Ba꞉gala ebete tuputupu emede komo kopehawakalimima꞉ne, mabu tete tatalila na Tuputupudawate ba꞉moe hopo miya꞉pate Nabiwi Godotamo gala kakatoma꞉nemo, ba꞉ba tetelo la꞉ la꞉eno baida꞉mo na gala a꞉kunama꞉mata.
JOH 16:11 Ba꞉gala Godote tawakalubino kuba ododili mabuma꞉ huiya iba꞉tamo dikalamemene, ebeno Gobogobote ba꞉be komo kopehawakalimima꞉ne, mabu Godote ba꞉moe hopoeno Kuba Gawadubu Saitanatamo kuba huiya hibilo kikamema꞉ne, iyo, ebete ba꞉be komo kododima꞉ tabo ya꞉lo ihatiya꞉.
JOH 16:12 “Ba꞉ hibila, nagodolo hiliyonomo komokomo ba꞉pola꞉na la꞉tamo olamagima꞉, huiyatiya ba꞉ma tetelo la꞉eno ukui modoboha꞉ ba꞉bi komo la꞉le kuwatema꞉.
JOH 16:13 Huiyatiya Godokono hibi komo Hawakalimidawate da꞉pemene, ba꞉be Hido-talona Gobogobote la꞉ ebeno hibi gabodo dopalamete, la꞉ ba magatale hiliyonomo komo ba꞉bo kiya꞉tawahama꞉nemata. Ba꞉ba tetelo ebete ha꞉kiya ebeno ukuilo a꞉kolamaga꞉mene, huiyatiya ebete kebe komokomo Nabiwigodone dulihonako ebete ba꞉bi komo kapiya la꞉tamo bolamaginakomene, ba꞉gala kebe komate hopo habamo da꞉pikulimina꞉, ba꞉bi komate pelameheno dopamo ebete la꞉tamo ya꞉lo ba꞉hawakalilamenakomene.
JOH 16:14 Iyo, ebete ba꞉moe gabodo na kopawagaminanema꞉ne, mabu ebete naeno tepo ipuwoeno komokomo uwatete la꞉tamo hibilo kopehawakalilamema꞉ne.
JOH 16:15 Numa꞉la꞉, Nabiwigodolo da꞉pola꞉na ba꞉bi hiliyonomo komokomo ba꞉ naenola, ba꞉bema꞉ ebeno Gobogobote modobola naeno tepo ipuwoeno komokomo la꞉tamo hawakalilame, nale la꞉ da꞉goelamema ba꞉ ba꞉ba ka꞉na.”
JOH 16:16 Ba꞉bene Ya꞉suti ebe ta꞉matapa꞉tamo eta tabo bekagoeniya꞉, “Tete tatalila la꞉le na la꞉eno baida꞉mo a꞉kunama꞉mata, ba꞉bene tete nanekele da꞉wibomene la꞉le na gala kakunamema꞉nemata.”
JOH 16:17 Ba꞉bene ebeno ta꞉matapi ipuwalo komopa꞉te komopa꞉tamo ga꞉lanakui, komopa꞉te komopa꞉tamo ga꞉lanakui, ba꞉ma ka꞉na ewageleniya꞉, “Ya꞉suti ba꞉moe tabo badama꞉ ka꞉goe, tete tatalila la꞉ na a꞉kunama꞉mata ba꞉bene tete nanekelelo la꞉ na gala kakunamema꞉nemata? Ba꞉gala ebete Nabiwitamo toma꞉ da꞉goe, ba꞉moe taboeno ipuwa keba ka꞉nala꞉ka꞉?
JOH 16:18 Ba꞉gala ale ba꞉moe eta komo iya꞉tawaha꞉, ebete 'tete nanekele' tabo da꞉goe, ba꞉be tete kebako tetela꞉ka꞉?”
JOH 16:19 Ba꞉ba tetelo iba꞉te ibi ipuwalo Ya꞉sukunu tabo ipuwoeno komoma꞉ kebe hiya꞉hiya꞉ alateda꞉ tabo da꞉ga꞉laniya꞉, Ya꞉suti iya꞉tawanate iba꞉tamo gala na꞉kagoeniya꞉, “Iyo, nale tabo ba꞉ma ka꞉na olamagimo, tete tatalila la꞉le na a꞉kunama꞉mata, ba꞉bene tete nanekelelo la꞉le na gala kakunamema꞉nemata. La꞉ ba꞉moe taboeno ipuwama꞉ ka꞉ga꞉lonama?
JOH 16:20 Na la꞉tamo hibi tabonomo begoemo, na la꞉ ipuwane da꞉tomo ba꞉ba tetelo hopo habanapa꞉te kokalakalahama꞉na꞉, huiyatiya la꞉le na ba la꞉name tepo menemene konomamo ba꞉bo kiya꞉tawahama꞉nemata. Huiyatiya numa꞉la꞉, tete nanekele da꞉petomene, la꞉eno tepo menemene komo wibote la꞉le na mabuma꞉ ko kalakala gala kakalawema꞉nemata.
JOH 16:21 Ba꞉bema꞉ ba꞉moe komo ba꞉ lamitu kamenate gudu alahimima꞉ temeteme dulita keba ka꞉nala꞉ka꞉ ba꞉ba ka꞉nala. Ebete gudu ba alahimi ko temeteme ba꞉bo kiya꞉tawama꞉ne, huiyatiya ebeno gudu da꞉hawakalamene ba꞉ba tetelo ebegodolo kalakala kapiyate kitanama꞉ne, mabu ebeno temeteme ba꞉ a꞉wibo ba꞉gala ebeno guduti ka꞉ka꞉go hawakala.
JOH 16:22 La꞉eno komo ba꞉ atumu, ba꞉ma tetelo la꞉le naeno to komoma꞉ tepo ipuwalo menemenenomoma꞉ eda꞉hanamata, huiyatiya nale tote la꞉tamo gala da꞉kapuluhukumu la꞉le ko kalakala gala ba꞉bo kakalawema꞉nemata, ba꞉be kalakala eta lumagiti kubahimi modoboha꞉.
JOH 16:23 “Na la꞉tamo hibi tabonomo begoemo, ba꞉be kalakala hegelate la꞉tamo duluhukumini, ba꞉ba tetelo la꞉ la꞉eno modoboha꞉ komoma꞉ na gala a꞉katoenamehona꞉mata. Ba꞉ba tetene tupuimiti la꞉ naeno mahilamo kebe komokomoma꞉ Nabiwi Godoko da꞉toemehonakoma, ebete ha꞉kiya ba꞉bi komo la꞉tamo bikalamenakomena꞉ta.
JOH 16:24 Dopamo tetelo la꞉le naeno mahilamo ebe katoemehonakuiha꞉, huiyatiya ba꞉ma tetelo nale la꞉ begoelamemata, wadiyala la꞉ ebe na꞉toemehonakuya꞉la꞉, ba꞉bene la꞉ ebegodone hido komo da꞉lawenakoma ba꞉be gabodo la꞉eno kalakala komote konomamo bitananakomene.”
JOH 16:25 Ba꞉bene Ya꞉suti eta tabo bekagoeniya꞉, “Nale iya꞉tulame uwa꞉mo ba꞉moi komokomo la꞉tamo ba꞉ a꞉hawakalilamemo, huiyatiya tete kopema꞉ne nale la꞉ uwa꞉mo gala a꞉kiya꞉tulama꞉mata, ba꞉ba tetelo na naeno Nabiwino komo la꞉tamo hawakalanomo kolamagima꞉nemo.
JOH 16:26 Ba꞉be hegelalo nale Nabiwitamo la꞉eno modoboha꞉ komoma꞉ gala a꞉katoetoa꞉mo, huiyatiya la꞉ ha꞉kiya naeno mahilamo ebe ba꞉toemehonakomata.
JOH 16:27 Numa꞉la꞉, Nabiwiti la꞉ malemalelo nemalagidolenata. Ebete ba꞉ma ka꞉na ewagelena mabu la꞉le na malemalelo ba emalagidolonena, nale ebegodone da꞉piya꞉mo ba꞉be komo la꞉ hibima꞉ na꞉midinamata.
JOH 16:28 Iyo, ba꞉ hibila, na Nabiwigodone ba꞉moe hopamo piya꞉mo, huiyatiya ba꞉moe ba꞉ tetela, nale hopo haba miya꞉pate Nabiwitamo gala kakatoma꞉nemo.”
JOH 16:29 Ba꞉bene Ya꞉suku ta꞉matapa꞉te ebetamo na꞉ga꞉laniya꞉, “Kalakala konomola, a ba꞉moe tabo modobolo lawema꞉ mabu ama꞉ atamo iya꞉tulame uwa꞉mo kolamaginaha꞉, hawakala olamaginata.
JOH 16:30 Iyo, ka꞉lo dulu a ba꞉ iya꞉tawahama꞉ ama꞉ hiliyonomo komokomo iya꞉tawanomola, ba꞉bema꞉ eta lumagiti eta komoma꞉ ama꞉ alateda꞉heno ama꞉ ebeno tepo ipuwoeno ukui ya꞉lo kiya꞉tawama꞉na꞉ta. A ba꞉moe komone hibima꞉ na꞉midinama꞉, ama꞉ ba꞉ Godogodone piya꞉ta!”
JOH 16:31 Ba꞉bene Ya꞉suti ibino tabo ba huiyana na꞉goeniya꞉, “Ka꞉lo dulu la꞉ na hibilo hibima꞉ na꞉ka꞉midinionama?
JOH 16:32 Tete kopema꞉ne, iyo, ba꞉ na꞉pe, la꞉ nagodone la꞉eno hiya꞉hiya꞉ genamamo alahutihote, ba꞉bene na ha꞉kiya kolutama꞉nemo. Ba꞉ba tetelo nago demedena ba꞉be Nabiwi ebe kapiyate na a꞉kamiya꞉pana꞉mene, ebete nago kolutama꞉ne.
JOH 16:33 “Ba꞉bema꞉ numa꞉la꞉, nale ba꞉moi komokomo la꞉tamo ba꞉ olamagimo, mabu na ubila la꞉le na ipuwalo ba emedena naeno hetete la꞉godolo kitanama꞉. Ba꞉ hibila, ba꞉moe hopolo la꞉ koko temeteme biya꞉tawahanakomata, huiyatiya na꞉kalakalahala꞉! La꞉ akatoletolehala꞉ mabu naeno helote ba꞉moe hopoeno helo ya꞉lo anakapumi.”
JOH 17:1 Ya꞉suti ba꞉moe tabo olamagi da꞉wiboniya꞉, ba꞉ba tetelo ebete Godokono Hunu Habamo ba gahimina toetoe tabo ba꞉ma ka꞉na olamaginiya꞉, “Nabiwi, tete ba꞉ a꞉pe. Wadiyala ama꞉le na amia꞉no gudu ba awagaminane naeno hido komo na꞉hawakalima꞉, ba꞉bema꞉ na atumu ama꞉ ba awagamina amia꞉no hido komo kohawakalimima꞉nemo.
JOH 17:2 Ba꞉ hibila, ya꞉lo tetelo ama꞉le ko helo amia꞉no Gudutamo ikamiya꞉ta, ba꞉bema꞉ hopo habanapi hiliyonomate ebetamo hibilo kopapamila꞉halema꞉na꞉, ba꞉gala ama꞉le ibi ipuwalo kebe tawakalubi ebetamo dikamihuya꞉la, ibinomate wiboha꞉ ka꞉ka꞉ ebegodone kolawema꞉na꞉.
JOH 17:3 Ba꞉be wiboha꞉ ka꞉keno komo ba꞉ ba꞉ma ka꞉nala. Tawakaluba꞉te ama꞉ hibi kapiya Godoma꞉ miditi amia꞉no komo ba꞉bo kiya꞉tawahama꞉na꞉, ba꞉gala atu tetelo iba꞉te na Ya꞉su Kelisokono komo kakiya꞉tawahama꞉na꞉, na ba꞉ ama꞉le da꞉poenamiya꞉la ba꞉be dawala.
JOH 17:4 Ba꞉bema꞉ nale ba꞉moe hopamo peheno ama꞉le ya꞉lo natamo kebe hiya꞉hiya꞉ oko kikanamehoniuya꞉la, nale ba꞉bi oko hiliyonomo upula꞉limo, iyo, ba꞉moe gabodo nale ama꞉ ba awagamina amia꞉no hido awagaha komo tawakaluba꞉tamo a꞉hawakalimimo.
JOH 17:5 O Nabiwi, ba꞉moe hopo ododiha꞉ tetelo nale ama꞉go ba emedena agodolo ditanami, wadiyala ama꞉le ba꞉be helo alamo na ba a꞉la꞉minane amia꞉no holoholo hapulu na nawagaminaniya꞉.”
JOH 17:6 Ba꞉bene Ya꞉suti ebeno toetoe tabo moga꞉melo gala na꞉kagoeniya꞉, “Nabiwi, ba꞉moe hopolo ama꞉le natamo dikanami ba꞉ba꞉te amia꞉noma꞉ eda꞉huya꞉, ba꞉bema꞉ nale amia꞉no komo iba꞉tamo da꞉hawakalimimo, iba꞉te amia꞉no tabamo a꞉papamila꞉huya꞉.
JOH 17:7 Ba꞉bema꞉ ka꞉lo ibi iya꞉tawahala, ama꞉le ya꞉lo natamo kebe hidohido komo kikanamehoniuya꞉la ba꞉bi hiliyonomo komate ba꞉ ama꞉godone pelamiya꞉.
JOH 17:8 Iyo, ama꞉le natamo dikanamehoniya꞉la ba꞉bi tabo komokomo nale iba꞉tamo ikalameholimo, ba꞉bene iba꞉te hibilo uwatete ba꞉bo iya꞉tawahuya꞉ nale ama꞉godone da꞉piya꞉mo ba꞉be komo, ba꞉gala ama꞉le na da꞉poenamiya꞉la iba꞉te ba꞉be komo hibima꞉ na꞉midina.
JOH 17:9 Ba꞉bema꞉ na ibi toetoe tabamo ama꞉tamo na꞉pewadiya꞉paa꞉latelenamo. Nale ama꞉ komo hopo habanapino komoma꞉ kapetoemehonaha꞉, huiyatiya ama꞉le ba꞉ma tetelo natamo kebe kapiyakapiya tawakalubi kikanamehoniui ibi kapiyoeno komoma꞉ toemehonamata, mabu ibi ba꞉ amia꞉nola.
JOH 17:10 Iyo, naeno hiliyonomo komokomo ba꞉ amia꞉nola ba꞉gala amia꞉no hiliyonomo komokomo ba꞉ naenola, ba꞉bema꞉ ba꞉moi ta꞉matapi ipuwado ama꞉le na hopo habalo awagaminania꞉ta.
JOH 17:11 “O naeno Hido-talona Nabiwi, tete tatalila na hopo haba komiya꞉pama꞉nemo, huiyatiya ba꞉moe hopo ba꞉ naeno ta꞉matapino emede habala. Ba꞉bema꞉ a netewapa꞉te kapiya ukuilo keba ka꞉na kemedenama꞉, iba꞉te ba꞉ ba꞉ba ka꞉na gelebadia꞉go kapimilo kemedenama꞉ wadiyala ama꞉ amia꞉no helo mahilamo ibi hidamo nulameniya꞉. Ba꞉be helo mahilo ama꞉le natamo ya꞉lo ikanamiya꞉ta, ba꞉gala nale dopamo iba꞉go ba emedena ba꞉be mahilamo ibi hidamo buiya꞉minalenamimo. Ba꞉ hibila, ibi naeno buiya꞉minale ipuwalo eta kapiyate kalatidiha꞉, huiyatiya amia꞉no Buka tabote hibima꞉ keda꞉ma꞉ kapiya dubunomote ba꞉bema꞉ kubui, ama꞉le Koe Habamo dopamo pote toma꞉ da꞉goiya꞉la, ba꞉moe ba꞉be dubula.
JOH 17:13 “Tete tatalila nale ama꞉tamo kopema꞉nemo, iyo, nale ba꞉moi hiya꞉hiya꞉ toetoe tabo ba꞉moe hopolo ba꞉bema꞉ olamaginamo, mabu na ubila naeno ko kalakalate naeno ta꞉matapino tepo ipuwalo na꞉tabotabohamene.
JOH 17:14 Hibila, nale amia꞉no hido tabo iba꞉tamo dikalamimo, ba꞉be mabuma꞉ hopo habanapa꞉te iba꞉tamo na꞉maubahalena. Dopamo tetelo iba꞉te hopo habanapa꞉go kapiyama꞉ eda꞉hanama꞉, huiyatiya iba꞉te uli ka꞉ka꞉ da꞉lawi iba꞉te hiya꞉ tawakalubima꞉ ba꞉bo eda꞉huya꞉, ba꞉bema꞉ ka꞉lo na keba ka꞉na kemedenamo ibi ba꞉ ba꞉ba ka꞉nala, ibi ba꞉gala na, a hopo habanapima꞉ hibilo keda꞉hanaha꞉.
JOH 17:15 “O Nabiwi, ama꞉le ibi ba꞉moe hopone dito uluhukulatelema꞉ katoemehonaha꞉, huiyatiya nale ama꞉ na꞉toemehonamata, iba꞉te ba꞉moe hopolo ba emedena ama꞉le ibi hidamo kobuiya꞉minalenama꞉ Saitanate ibi kubahilamekapoma꞉.
JOH 17:16 Ba꞉ hibila, na ba꞉moe hopo lumagiha꞉, ba꞉gala ibi ba꞉ atumu ba꞉moe hopo tawakalubima꞉ keda꞉hanaha꞉.
JOH 17:17 Na iya꞉tawala amia꞉no tabo komokomo ba꞉ hibinomola, ba꞉bema꞉ wadiyala ba꞉bi hibi tabamo ama꞉le ibi talonanomoma꞉ na꞉midiliya꞉ iba꞉te amia꞉no oko kowatinama꞉.
JOH 17:18 Ba꞉bene ama꞉le na ba꞉moe hopamo keba ka꞉na ka꞉poenamiuya꞉la, nale ibi atumu ba꞉ba ka꞉na hopo konomamo kakanoelamema꞉nemo.
JOH 17:19 Iyo, ba꞉ hibila, ibi mabuma꞉ na ha꞉kiya na talonama꞉ miditi naeno ape nihatenamo amia꞉no oko kapiya kowatinama꞉, mabu iba꞉te ba꞉ ba꞉ba ka꞉na atumu amia꞉no talona okopima꞉ kakeda꞉hama꞉na꞉.”
JOH 17:20 Ba꞉bene Ya꞉suti ebeno toetoe tabo moga꞉melo gala na꞉kagoeniya꞉, “Nabiwi, nale ama꞉ ba꞉moi ta꞉matapi kapiyama꞉ katoemehonaha꞉. Iba꞉te amia꞉no tabo hiya꞉hiya꞉ tawakaluba꞉tamo ba nolamagimi puya꞉te ba꞉be tabo uliti hibima꞉ da꞉midimina꞉, nale ibi mabuma꞉ atumu ba꞉bema꞉ kapetoemehonamata.
JOH 17:21 O Nabiwi, ama꞉le na ipuwalo keba ka꞉na kemedeona ba꞉gala nale ama꞉ ipuwalo keba ka꞉na kemedenamo, wadiyala ibi hiliyonomate ba꞉ ba꞉ba ka꞉na kapiyama꞉ ba eda꞉ha a ipuwalo nemedehonamena꞉. Ba꞉bene hopo habanapa꞉te ba꞉be komo dumimina꞉, iba꞉te hibima꞉ komidima꞉na꞉ ama꞉le na da꞉poenamiya꞉la ba꞉be komo.
JOH 17:22 Ba꞉ hibila, ama꞉le na awagaminanelo kebe helo alo ya꞉lo dikanamiya꞉la, ba꞉be alo nale iba꞉tamo ikalamimo, ba꞉bema꞉ iba꞉te tawakalubi kapiyama꞉ neda꞉hanamena꞉, ale kapiyanomoma꞉ keba ka꞉na keda꞉nama꞉ ba꞉ba ka꞉na.
JOH 17:23 Nale ibi ipuwalo bemedenamo ba꞉gala ama꞉le na ipuwalo bemedenata, ba꞉bema꞉ wadiyala ibi hiliyonomate ba꞉moe gabodo tawakalubi kapiyanomoma꞉ neda꞉hanamena꞉. Ba꞉bene hopo habanapa꞉te ibino kapiyama꞉ eda꞉ komo dumimina꞉, iba꞉te ba꞉moi netewa komo ba꞉bo kiya꞉tawahama꞉na꞉, ama꞉le na da꞉poenamiya꞉la ba꞉be komo, ba꞉gala ama꞉le na malemalelo keba ka꞉na kemalagidoloneona ibi atumu konomamo ba꞉ba ka꞉na ba꞉kemalagidolenamena꞉ta.
JOH 17:24 “O Nabiwi, ama꞉le ya꞉lo tetelo natamo kebe hiliyonomo hiya꞉hiya꞉ tawakalubi kikanamehoniuya꞉la, na ubila ba꞉ba꞉te nale demedenamo ba꞉be habalo nago kapimilo bemedehonamena꞉, ba꞉bene ama꞉le na awagaminanelo kebe helo alo dopamo dikanamiya꞉la, iba꞉te ba꞉be alo ba꞉bolo konumima꞉na꞉. Ba꞉ hibila, ba꞉moe hopo ododiha꞉ tetelo ama꞉le na dopamo malemalelo nemalagidolonenama꞉ta, ba꞉be mabuma꞉ ama꞉ na awagaminanelo amia꞉no helo alo natamo ikanamiya꞉ta.
JOH 17:25 “O Tuputupu Nabiwi, hopo habanapa꞉te amia꞉no komo kiya꞉tawahanaha꞉, huiyatiya nale amia꞉no komo iya꞉tawala, ba꞉gala naeno ta꞉matapi atumu iya꞉tawahala ama꞉le na da꞉poenamiya꞉la ba꞉be komo.
JOH 17:26 Iyo, nale amia꞉no komo ba꞉moi dopo ta꞉matapa꞉tamo a꞉hawakalimimo ba꞉gala ba꞉be atu komo emedena tetelo gala ba꞉kahawakaliminakomo, mabu ba꞉moe gabodo ama꞉le na malemalelo demalagidolonena ba꞉be komote ibi hiliyonomo ipuwalo bitanamene ba꞉gala nale iba꞉godolo bemedenamo. “O Nabiwi, naeno ta꞉matapi hiliyonomo mabuma꞉ ba꞉moe ba꞉ naeno toetoe tabo kuititila. Ba꞉ba꞉la.”
JOH 18:1 Ba꞉bene Ya꞉sukunu toetoe tabo Godotamo olamagi da꞉wiboniya꞉, ebete ebe ta꞉matapa꞉go tonate Kidolono bidolo na꞉hiwanate eta olibi kehakeha pali ipuwamo dito nopeganiya꞉.
JOH 18:2 Ya꞉suku anakapumipino kokotamo ihatedawa Yudasiko, ebete ba꞉be haba iya꞉tawala, mabu dopamo Ya꞉suti komo hiliyonomo tetelo ebeno ta꞉matapa꞉go ba꞉bamo da꞉tolamenakui ba꞉bo nekapiyuiminakuya꞉.
JOH 18:3 Ba꞉bema꞉ ba꞉be dulu Godotamo hawa꞉goeno ikamehopino hununomo watowatopi ba꞉gala Pa꞉lisi kapiyuimipi, iba꞉te Godokono Genama lawamepi ba꞉gala komo alaholohopi dubu boelameniya꞉. Ba꞉bene ba꞉bi dubate ibino alaholoho ilina ba꞉gala wuiki alo uwatenate, Yudasiti ibi ba꞉bo magataleniya꞉ Ya꞉suti dopamo da꞉toniya꞉ ba꞉be habamo.
JOH 18:4 Ba꞉ba tetelo Godokono ubi komodo kebe komate Ya꞉sutamo da꞉pikulimina꞉, ba꞉bi hiliyonomo komate pelameheno Ya꞉suti dopamo ba iya꞉tawana, ebete ba꞉bi alaholohopi dubatamo hawakala puluhukunate ibi na꞉pegoelameniya꞉, “La꞉ poko kohowadionama?”
JOH 18:5 Yudasiti ba꞉bi dubago ba la꞉na iba꞉te na꞉huiyaniya꞉, “A Ya꞉suku Nasaletenapi bohowadinama꞉.” Ba꞉bene Ya꞉suti iba꞉tamo na꞉goeniya꞉, “Na ba꞉ ba꞉betela,”
JOH 18:6 huiyatiya iba꞉te ebeno ‘na ba꞉ ba꞉betela’ tabo duliniya꞉, ba꞉ba tetelo ibi hiliyonomate gala hapuamo ba hilila꞉na hakamo ba꞉ dito gudiniya꞉.
JOH 18:7 Ba꞉bene Ya꞉suti ibi gala na꞉kalateda꞉leniya꞉, “La꞉ poko kohowadionama?” Iba꞉te na꞉huiyaniya꞉, “A Ya꞉suku Nasaletenapi bohowadinama꞉.”
JOH 18:8 Ya꞉suti iba꞉tamo gala huiya tabo na꞉kagoeniya꞉, “Nale la꞉ a꞉kiyalamemata, na ba꞉ ba꞉betela. La꞉le na hibilo dohowadininama wadiyala na na꞉lawena꞉la꞉, huiyatiya na ta꞉mahenepi na꞉miya꞉pala꞉la꞉ iba꞉te ibino hiya꞉hiya꞉ komamo dito kotolamema꞉.”
JOH 18:9 Ebete ba꞉moe tabo begoeniya꞉, ebete dopamo atu du tetelo Godotamo da꞉goeniya꞉ ba꞉be tabote hibima꞉ keda꞉ma꞉, mabu dopamo ebete toetoe tabo ba꞉ma ka꞉na goeniya꞉, “Nabiwi, ama꞉le natamo dikanami ba꞉bi tawakalubi hiliyonomo ipuwalo nale eta kapiya katutiha꞉.”
JOH 18:10 Ba꞉ba tetelo Saimono Pitate ebeno alaholo gili magubutinate eta dubuino galo hapu dito mapitamidameniya꞉, ba꞉be dubuino mahilo ba꞉ Malakasitila, ebe ba꞉ Godotamo hawa꞉goeno ikamehopino Hununomo Watodawoeno genama okodawa etala.
JOH 18:11 Ba꞉bene Ya꞉suti Pitatamo na꞉goeniya꞉, “A꞉iye, amia꞉no gili gala kamaka꞉mo na꞉kahula꞉! Naeno Nabiwiti natamo dikanami ba꞉be temeteme kalili na hibinomolo konima꞉nemo, ba꞉bema꞉ mabu keka꞉ ama꞉ na duhinamema꞉ dewagelena?”
JOH 18:12 Ba꞉bene puya꞉te pali habamo da꞉pelameniya꞉, ba꞉bi alaholohopi dubu ba꞉gala ibino watodawa ba꞉gala Yunapino komo koko dubu, iba꞉te Ya꞉suku lawenate hala꞉mo matuhumihonate
JOH 18:13 A꞉nasitamo dopamo magataniya꞉. A꞉nasiko ba꞉ Kayapasikono kakidubula, ba꞉gala Kayapasiti ba꞉be gogolo Godotamo hawa꞉goeno ikamehopino Hununomo Watodawama꞉ eda꞉nami.
JOH 18:14 Buka ka꞉lamiholedawa, wadiyala ama꞉ niya꞉tawa ba꞉moe dubu Kayapasiko ebete dopamo Ya꞉sukunu komoma꞉ Yunapi Ka꞉nisolo dubu ba꞉ma ka꞉na goelamiya꞉, “Wadiyala tawakalubi hiliyonomo ipuwalo kapiyadawanomote na꞉haa꞉mene komopi mabuma꞉.”
JOH 18:15 Tete nanekele da꞉petoniya꞉, Saimono Pitate Ya꞉sukunu eta ta꞉matadawago Kayapasikono genamamo ba꞉bo toniya꞉, alaholohopa꞉te Ya꞉suku dopamo da꞉magataniya꞉ ba꞉be atu genamamo. Ba꞉ba tetelo eta ta꞉matadawate Ya꞉suku kuminama꞉ genamoeno kala ipuwamo ba꞉ dito na꞉pa꞉ganiya꞉ mabu Kayapasiti ebeno komo iya꞉tawala,
JOH 18:16 huiyatiya Pitate na꞉pa꞉gaheno kaloeno gigiho tamelo la꞉nuya꞉. Ba꞉bene dopamo da꞉na꞉pa꞉ganiya꞉ ba꞉be ta꞉matadawate kaloeno gigiho teta꞉mo gala kapenate gigiho umidawa bohele da꞉pikiyameniya꞉, ebete gigiho Pitatamo ba꞉bo a꞉hiya꞉midaniya꞉ ebete kala ipuwamo atumu kopa꞉pa꞉ganama꞉.
JOH 18:17 Ba꞉ba tetelo ba꞉be bohelete Pitako na꞉kiyameniya꞉, “Aba꞉ hibila꞉ka꞉, ama꞉ ba꞉ Ya꞉sukunu ta꞉matadawa etalata!” Pitate huiyatiya na꞉goeniya꞉, “Ao, na ebeteha꞉!”
JOH 18:18 Ba꞉bene komo okopi ba꞉gala genama lawamepi dubu iba꞉te koe emadonate, ibino apete kotanotanohonama꞉ koelo la꞉mota꞉hanuya꞉ mabu ibi gibate ulameniya꞉. Ba꞉ba tetelo Pitate atumu iba꞉go koelo la꞉nuya꞉.
JOH 18:19 Ba꞉ba tetelo Godotamo hawa꞉goeno ikamehopino Hununomo Watodawate Ya꞉suku ta꞉matapino komoma꞉ ba꞉gala ebeno iya꞉tulame komoma꞉ ebe nalateda꞉niya꞉.
JOH 18:20 Ya꞉suti huiyatiya ebetamo na꞉goeniya꞉, “Aeno Yu tawakalubi hiliyonomate kebolo da꞉kapiyuiminakui nale iba꞉tamo tabo hawakala olamaginakuimo, ba꞉gala komo tete hiliyonomolo nale aeno baidi ibubulamehole hiya꞉hiya꞉ genamalo ba꞉gala Godoko Adikumino Hiya꞉ Genamalo akiya꞉tulamenakuimo. Iyo, hibila, na eta tabo diya gabodo kolamaginakuiha꞉.
JOH 18:21 Ba꞉bema꞉ mabu keka꞉ naeno tabo olamagi komoma꞉ ama꞉le na dalateda꞉na꞉? Puya꞉te naeno tabo dulihonakui, wadiyala ama꞉ ibi nalateda꞉la꞉. Iba꞉te iya꞉tawahala nale kebe tabo dolamaginakuimo.”
JOH 18:22 Ya꞉suti ba꞉moe tabo goenate, ebe tamelo da꞉la꞉nuya꞉ ba꞉be genama lawamedawate ebe tatakolo ba anagalimina na꞉goemeniya꞉, “Ama꞉ aeno Hununomo Watodawatamo ba꞉mako wato kodakoda tabo badama꞉ ka꞉gaa꞉wa?”
JOH 18:23 Ya꞉suti ebetamo na꞉huiyaniya꞉, “Na bada kuba tabo ka꞉goemo? Wadiyala ama꞉ ba꞉be kuba na꞉hawakalima꞉ ulihopa꞉tamo. Nale eta kuba ododihino hibi tabonomo da꞉goemo, huiyatiya ama꞉le na badama꞉ kanagalinama꞉wa?”
JOH 18:24 Ba꞉bene A꞉nasiti Ya꞉suku hala꞉mo matuhumiho pahalamilimihino ba꞉ba ka꞉na eta Hununomo Watodawa Kayapasitamo dito noemeniya꞉, ba꞉be dubu ba꞉ A꞉nasikono kakidubula, ibi netewapa꞉te ba꞉be atu genamalo emedenama꞉.
JOH 18:25 Ba꞉ba tetelo Saimono Pitate koelo utinate ebeno ape ba otanotanuimina, komopa꞉te ebe nalateda꞉niya꞉, “Aba꞉, ama꞉ ba꞉ Ya꞉suku ta꞉matadawa etala꞉ka꞉?” Pitate na꞉huiyaniya꞉, “Ao, na ebeteha꞉!”
JOH 18:26 Ba꞉bene Pitate ba꞉be dulu galo hapu da꞉mapitamidameniya꞉ ba꞉be dubuino eta mabulubi, ebe ba꞉ Hununomo Watodawoeno genama okodawa etala, ebete huiyatiya Pitako gala na꞉kalateda꞉niya꞉, “Ka꞉lo dulu ama꞉le Ya꞉sukuba꞉ pali habalo nale la꞉ kapimilo ulamemata, aba꞉ hibila꞉ka꞉?”
JOH 18:27 Huiyatiya Pitate gala Ya꞉suku iya꞉tawaha꞉ma꞉ ba kagoena kakabate ba꞉ba tetenomolo goehoniya꞉.
JOH 18:28 Ba꞉bene duiduiyanomolo Yu watowatopa꞉te Kayapasikono genama miya꞉pate Ya꞉suku Loma gabomanino tabo anagiya꞉mida ko genamamo ba꞉bo magatuya꞉. Huiyatiya iba꞉te ba꞉be genama guamo kanalehawaminuya꞉ha꞉, mabu iba꞉te ibino eta talona koamo emalagidoluya꞉, ba꞉be talonate ba꞉ma ka꞉na itana, iba꞉te Yuha꞉ lumagino genama guamo a꞉kana꞉pa꞉la꞉hamena꞉ ibino tepo ipuwate dalowa꞉ma꞉ eda꞉halamekapoma꞉. Ibi iya꞉tawahala iba꞉te ba꞉be kukala dito dadikamidalemena꞉, iba꞉te Adaguila꞉ Poko baa꞉ a꞉kanahamena꞉.
JOH 18:29 Ba꞉bema꞉ kapela Ko Gawadubu Paeletete iba꞉tamo puluhukuti na꞉pegoiya꞉, “La꞉le ba꞉moe dubu bada mabuma꞉ ka꞉magaheoma? Ebete bada kuba kododi?”
JOH 18:30 Iba꞉te ebetamo na꞉huiyuya꞉, “Ebete kuba ododiha꞉tale ale ebe ama꞉tamo ba꞉ka꞉magahena꞉!”
JOH 18:31 Paeletete iba꞉tamo na꞉goiya꞉, “La꞉le ebe magatate la꞉eno tutumu iya꞉tawa komamo ebeno komo nanagiya꞉midamete, la꞉le ha꞉kiya ebetamo kuba huiya ba꞉bo na꞉nikamiya꞉la꞉.” Yu watowatopa꞉te huiyatiya na꞉ga꞉luya꞉, “Ao, agodolo lumagi anakapumi helo kitanaha꞉, ama꞉tamo ba꞉be mabuma꞉ magahema꞉.”
JOH 18:32 Ba꞉moe komote ba꞉ma ka꞉na uluhukuya꞉, Ya꞉suti dopamo da꞉goiya꞉ ba꞉be tabote hibima꞉ keda꞉ma꞉, iyo, ebete ya꞉lo a꞉hawakalimiya꞉ ebete keha pihigalo keba ka꞉na da꞉hoemene.
JOH 18:33 Ba꞉ba tetelo Paeletete ebeno Loma gabomanino ko genamamo na꞉pa꞉gate Ya꞉suku ebetamo peka꞉miti ebe ba꞉bo alatediya꞉, “Ama꞉ ba꞉ Yu tawakalubino Ko Gawadubula꞉ka꞉?”
JOH 18:34 Ya꞉suti ebetamo na꞉huiyuya꞉, “Ama꞉ ha꞉kiya amia꞉no ukuilo ka꞉kiyanamiuta, o komopino ukui tabo beka꞉kiyanamiuta?”
JOH 18:35 Paeletete huiyatiya na꞉goiya꞉, “Ama꞉le na eta Yu lumagima꞉ ka꞉midiniuta? Amia꞉no tawakalubinomo ba꞉gala ibino hununomo watowatopa꞉te ama꞉ natamo magaha꞉ta. Ba꞉bema꞉ ama꞉le dododi, ba꞉be kuba na꞉hawakalima꞉!”
JOH 18:36 Ya꞉suti na꞉goiya꞉, “Naeno Ko Gawadubu komo hopo haboeno komoha꞉. Naeno Ko Gawadubu komo ba꞉moe hopoeno komoma꞉ neda꞉tale, naeno ta꞉matapa꞉te dito balaholona꞉ ba꞉bema꞉ Yu watowatopa꞉te na anakapunamema꞉ ba꞉ka꞉lawenena꞉, huiyatiya naeno Ko Gawadubuino helote eta habane piya꞉.”
JOH 18:37 Ba꞉bema꞉ Paeletete ebe nalatediya꞉, “Ama꞉ Ko Gawadubuma꞉ eda꞉ma꞉ hibilo ka꞉goiuta?” Ya꞉suti na꞉huiyuya꞉, “Ama꞉le ba꞉ a꞉gaa꞉ta. Na ba꞉moe hopo habamo ba꞉bema꞉ pehawakaluya꞉mo, ba꞉gala na ba꞉bema꞉ piya꞉mo Godokono hibi tabo kopehawakalimima꞉. Puya꞉te ebeno hibi komo ulima꞉ ubi dihatenaka, ba꞉bi tawakaluba꞉te natamo pelamenaka.”
JOH 18:38 Ba꞉bema꞉ Paeletete ebe ha꞉kiya ebetamo na꞉goiya꞉, “Hibi komo badala꞉ka꞉?” Ebete ba꞉moe tabo goete genama guni puluhukuti Yu tawakaluba꞉tamo gala na꞉kapegoiya꞉, “Na ba꞉moe dubuino eta kuba kumitaha꞉ ebe hoea꞉mo oemema꞉.
JOH 18:39 Huiyatiya hiliyonomo gogolo la꞉eno Adaguila꞉ Poko tetelo nale la꞉eno ubi komamo papamiwatalo eta lumagi du genamane ebeno kuba huiyane dito poemenakomo. Ba꞉bema꞉ la꞉ ubila꞉ka꞉ nale la꞉ Yunapino Ko Gawadubu dito poeme?”
JOH 18:40 Iba꞉te ba꞉be tabo duliya꞉ ga꞉ga꞉lo na꞉ga꞉luya꞉, “Ao, a ubihinola ba꞉moe dubu! A Balabasiko ubila!” Iba꞉te da꞉ka꞉miya꞉ ba꞉be dubu pilo komokomo ba ododili komo tawakalubi ba꞉bo anakapulamiya꞉.
JOH 19:1 Ba꞉bene Paeletete gala katote ebeno alaholohopi dubu na꞉negoelamiya꞉ iba꞉te Ya꞉suku giya꞉pa꞉pa꞉mo ka꞉na꞉miga꞉tima꞉.
JOH 19:2 Ba꞉be komote da꞉wibuya꞉ alaholohopa꞉te olagoeno tupina nelawete anagogobeya꞉midahalo a꞉dete Ya꞉sukunu watamo dito pulimiya꞉. Ba꞉gala iba꞉te ebe walitilo huiya konomo hawihawi kaliko kapulimiti
JOH 19:3 ibi ipuwalo komo hiliyonomate hiya꞉hiya꞉ pelamiya꞉ ebe tatakolo ba panagalimiho na꞉pega꞉luya꞉, “A꞉iye! Yu tawakalubino Ko Gawadubu, ama꞉ nolata!”
JOH 19:4 Ba꞉bene Paeletete tawakaluba꞉tamo gala kapuluhukuti na꞉kapegoelamiya꞉, “Hiya꞉, na Ya꞉suku la꞉tamo gala na꞉kamagahemo. Na ubila la꞉ niya꞉tawahala꞉, na ebegodolo eta kuba kumitaha꞉ nale ebe hoea꞉mo koemema꞉.”
JOH 19:5 Ba꞉bene Ya꞉suti olagoeno ilina ebeno watolo ba itana hawihawi kalikago genama guni da꞉puluhukuya꞉ Paeletete tawakaluba꞉tamo na꞉goiya꞉, “Numa꞉la꞉, ba꞉moe ba꞉be dubula!”
JOH 19:6 Ba꞉bema꞉ Godotamo hawa꞉goeno ikamehopino hununomo watowatopi ba꞉gala Godoko Adikumino Hiya꞉ Genama lawamepi dubu, iba꞉te Ya꞉suku umiti koamo ga꞉ga꞉lo na꞉ga꞉luya꞉, “Keha pihigamo pihomotete, ikoko nalukulima꞉!” Huiyatiya Paeletete na꞉goiya꞉, “Ao, nale a꞉kododa꞉mo. La꞉ ha꞉kiya la꞉eno ubilo ebe kehamo na꞉nepihomota꞉la꞉, mabu na ebegodolo eta kuba kumitaha꞉.”
JOH 19:7 Ba꞉bene Yu watowatopa꞉te na꞉ga꞉luya꞉, “Ebete aeno kukala adikanali mabu ebete ha꞉kiya na꞉goi ebe Godokono Gudula, ba꞉bema꞉ wadiyala ebete na꞉haa꞉mene.”
JOH 19:8 Paeletete ba꞉be komo duliya꞉ ebeno tole komote konomoma꞉ ba eda꞉,
JOH 19:9 Loma gabomanino ko genama guamo kana꞉pa꞉gate Ya꞉suku ba꞉bo nalatediya꞉, “Ama꞉ kebe napila꞉ka꞉?” Ba꞉ba tetelo Ya꞉suti eta tabo kahuiyuya꞉ha꞉.
JOH 19:10 Ba꞉bema꞉ Paeletete Ya꞉sutamo na꞉goiya꞉, “Ama꞉ huiya tabo goe ubiha꞉ma꞉ kediuta? Ama꞉ ba꞉moe komo hidamo nemalagidola, nagodolo helo bitana ama꞉ dito oeme, ba꞉gala na modobola keha pihigamo ama꞉ pihomotema꞉.”
JOH 19:11 Ya꞉suti ebeno tabo ba huiya na꞉goiya꞉, “Kebe helo ama꞉godolo ditana, ba꞉be helo ama꞉tamo ba꞉ Godote ikamia꞉ta. Ba꞉bema꞉ ba꞉ hibila, ama꞉ amia꞉no kuba huiya kolawema꞉na꞉ta, huiyatiya puya꞉te na amia꞉no kokotamo dihatena꞉ka, Godote iba꞉tamo kuba huiya konomamo kikalamema꞉ne.”
JOH 19:12 Paeletete ba꞉be tabo duliya꞉ ebete gabo bohowadiya꞉ Ya꞉suku dito oemema꞉, huiyatiya Yu watowatopa꞉te ga꞉ga꞉lo na꞉ga꞉luya꞉, “Ama꞉le Konomo Gawadubu Sisakono mabulubima꞉ deda꞉na, ama꞉ ba꞉moe dubu dito a꞉koema꞉mena꞉ta mabu ebete na꞉goi, ‘Na ba꞉ Ko Gawadubula!’ Ba꞉be tabo olamagi ipuwalo ebete Sisatamo alaholodawama꞉ eda꞉na!”
JOH 19:13 Paeletete ibino tabo ga꞉la uliti tabo anagiya꞉mida habamo ba꞉bo emediya꞉, ba꞉bene ebeno alaholohopa꞉te Ya꞉suku genama guni tawakalubino holoholo hapuamo ba꞉bo puluhukutiya꞉. Ba꞉be tabo anagiya꞉mida haboeno mahilo ba꞉ Nakola Hunulu Utitata Habala, Yu tawakalubino tabamo Gaba꞉tama꞉ ka꞉minaka.
JOH 19:14 Ba꞉be hegela ba꞉ Adaguila꞉ Pokoeno ilina hiduilame tetela, mabu dumutu ba꞉ Pokoeno ko hegelala. Ba꞉bene hegelate tula꞉mo utihino ba꞉ba tetelo Paeletete Yu tawakaluba꞉tamo na꞉goiya꞉, “Ba꞉moe dubu ba꞉ la꞉eno Ko Gawadubula!”
JOH 19:15 Huiyatiya iba꞉te ga꞉ga꞉lo na꞉ga꞉luya꞉, “Ebe hoea꞉mo noema꞉! Keha pihigamo na꞉nepihomota꞉!” Ba꞉bene Paeletete iba꞉tamo na꞉goiya꞉, “La꞉ hibi ubilo ka꞉ga꞉lutama, nale la꞉eno Ko Gawadubu keha pihigamo kopihomotema꞉?” Ba꞉bene Godotamo hawa꞉goeno ikamehopino hununomo watowatopa꞉te na꞉huiyuya꞉, “Aeno Ko Gawadubu ba꞉ Sisako kapiyala, eta puliyala!”
JOH 19:16 Ba꞉ba tetelo Paeletete Ya꞉suku iba꞉tamo ba꞉ dito ikalamiya꞉ iba꞉te ebe keha pihigamo kopihomotema꞉. Ba꞉bene alaholohopa꞉te Ya꞉suku ba꞉ dito lawiya꞉.
JOH 19:17 Ebete ebeno keha pihiga aguti iba꞉te ebe hoe habamo ba꞉bo magatuya꞉, ba꞉be hakoeno mahilo ba꞉ Wato Gohala, Yu tawakalubino tabamo Gologotama꞉ ka꞉minaka.
JOH 19:18 Ba꞉bene iba꞉te Ya꞉suku kehamo nipihomotete ikoko ba꞉bo nalukulimiya꞉, ba꞉gala iba꞉te dubu netewa hiya꞉hiya꞉ kehamo kapihomolatelete, Ya꞉suti ibino tetelo keha pihigalo ba꞉bo pihomotitanuya꞉.
JOH 19:19 Ba꞉ba tetelo Paeletete eta pepamo tabo ba꞉ma ka꞉na miya꞉tiya꞉, “Ba꞉moe Nasaletenapi dubu Ya꞉suku ba꞉ Yu tawakalubino Ko Gawadubula,” ba꞉bene alaholohopa꞉te ba꞉be pepa lawete Ya꞉sukunu keha pihiga hunu hapuamo ba꞉bo nemowatimiya꞉.
JOH 19:20 Ba꞉be tabote ba꞉moi netewa-kapiya hiya꞉hiya꞉ tabamo pola꞉nuya꞉, Yu tawakalubino tabamo, ba꞉gala Loma tawakalubino tabamo, ba꞉gala Guliki tawakalubino tabamo, ba꞉bema꞉ komo Yu tawakalubi hiliyonomate ba꞉be tabo beka꞉lamiholiya꞉ mabu Ya꞉sukunu hoe haba ibino Yelusalema ko haba tamelo itanuya꞉.
JOH 19:21 Ba꞉bene Yunapino hununomo watowatopa꞉te ba꞉be tabo umiti ubiha꞉ma꞉ eda꞉halo, komo iba꞉te Paeletetamo tolamete ebe na꞉nalatediya꞉, “Ama꞉ tabo ma kumu badama꞉ ka꞉miya꞉ta꞉wa, ba꞉moe dubu ba꞉ aeno Ko Gawadubula? A ubila ama꞉ huiyatiya ba꞉ma ka꞉na na꞉miya꞉ta꞉, ‘Ba꞉moe dubuti ha꞉kiya na꞉goi ebe ba꞉ Yu tawakalubino Ko Gawadubula!’”
JOH 19:22 Huiyatiya Paeletete iba꞉tamo na꞉goiya꞉, “Ao, nale kebe tabo ka꞉miya꞉temo, na ba꞉be tabo hiya꞉ma꞉ a꞉kamida꞉mo.”
JOH 19:23 Ba꞉ba tetelo alaholohopa꞉te Ya꞉suku ikoko alukulimi da꞉wibuya꞉, iba꞉te ebeno kaliko uwatemete netewa-netewa komo ododiliti iba꞉te ba꞉bo alabahuya꞉. Huiyatiya eta hidoeno kaliko kapiya moga꞉lamehole tete puliyala, ba꞉bema꞉ iba꞉te ba꞉be kaliko anagiya꞉midale ubiha꞉ma꞉ ba eda꞉ha,
JOH 19:24 ibi ipuwalo na꞉ga꞉luya꞉, “Ba꞉moe kaliko hidonomola, a꞉kanagiya꞉midala꞉ma꞉. Huiyatiya wadiyala a ba꞉moi hegehege nakola uwatete kiya꞉hekehuya꞉, a ipuwalo pote da꞉lawemene a ba꞉be komo kiya꞉tawahama꞉nema꞉.” Ba꞉bema꞉ alaholohopa꞉te ba꞉ba ka꞉na ododiya꞉. Buka ka꞉lamiholedawa, wadiyala ama꞉ niya꞉tawa, ba꞉moe komote alaholohopi ipuwado uluhukuya꞉ Godokono Buka tabote hibima꞉ keda꞉ma꞉, mabu ya꞉lo tetelo ebete Ya꞉sukunu komoma꞉ da꞉goiya꞉ ba꞉be tabote ba꞉ma ka꞉na itana, “Iba꞉te naeno kaliko ibi ipuwalo alabahuya꞉, ba꞉gala hegehege nakola iya꞉hekehuya꞉ naeno pulino ga꞉ga꞉ ilina kolawenamema꞉.”
JOH 19:25 Ba꞉ba tetelo Ya꞉sukunu keha pihiga tamelo ba꞉moi kamenakamenate la꞉mota꞉hanuya꞉, Ya꞉sukunu menoko, ebeno menokoeno naniko, Kolopasikono kamena Ma꞉liko, ba꞉gala eta Magadalanapi Ma꞉li.
JOH 19:26 Ba꞉bene eta Ya꞉sukunu ta꞉matadawa dubuti ba꞉bolo na꞉la꞉nuya꞉, ebe ba꞉ Ya꞉suti konomamo demalagidolonami ba꞉be dubula. Ba꞉bema꞉ Ya꞉suti ebe ba꞉gala ebeno menoko la꞉mota꞉nalo dulamiya꞉, ebete ebeno menokotamo na꞉goiya꞉, “Adi, ba꞉moe dubu ba꞉ amia꞉no gudula.”
JOH 19:27 Ba꞉bene ebete ta꞉matadawa dubutamo na꞉goiya꞉, “Ba꞉moe kamena ba꞉ amia꞉no menokola.” Ba꞉bema꞉ ba꞉be hegelalo ba꞉be ta꞉matadawate Ya꞉sukunu menoko lawete ebeno genamamo ba꞉ dito magatuya꞉ ebe hidamo konowalubinama꞉.
JOH 19:28 Ba꞉bene gapogapo tete da꞉peniya꞉, Godote dopamo Ya꞉sukunu komoma꞉ kebe hiliyonomo komo ebeno Bukamo da꞉miya꞉tiya꞉, Ya꞉suti ba꞉bo iya꞉tawaniya꞉ ba꞉bi komokomo ba꞉ a꞉wiboha. Ba꞉bema꞉ Godokono Bukoeno eta tabote hibima꞉ keda꞉ma꞉ Ya꞉suti ba꞉ma ka꞉na goeniya꞉, “Beya kapete unamena.”
JOH 19:29 Ba꞉ba tetelo eta ko kalili kaka gao beya tabonomo ba꞉bolo nitanuya꞉, ba꞉bene eta alaholohodawate ba꞉be beyamo humago adutinate Ya꞉suti koninama꞉ ebeno tabamo ba adipatena, ebete datuiminiya꞉ ba꞉bo goeniya꞉, “Ba꞉ba꞉la, nale hiliyonomo komokomo ba꞉ a꞉wibuilamemo!” Ba꞉ba tetelo ebete ebeno wato hopamo da꞉toda꞉miduiminiya꞉ hoenomo ba꞉bo hoeniya꞉.
JOH 19:31 Ba꞉be hegela ba꞉ Adaguila꞉ Pokoeno ilina hiduilame tetela, mabu dumutu ba꞉ Yu tawakalubino okoha꞉ talona hegelala ba꞉gala ibino Pokoeno ko hegelala, ba꞉bema꞉ iba꞉te ba꞉be hegela hiya꞉nomoma꞉ ba ga꞉lana, ibi ubihinola ha꞉laha apete ba꞉be hegelalo keha pihigalo pola꞉na. Ba꞉bema꞉ komo iba꞉te Paeleteko na꞉nikiyameniya꞉, ebete alaholohopi goelamenate keha pihigamo da꞉pihomolateliya꞉ ba꞉bi dubuino nato dito kowakalamililamenama꞉. Alaholohopa꞉te ba꞉ba ka꞉na dewagelemena꞉, ba꞉bi dubate tiyolo ha꞉lahate, ba꞉bene ibino ha꞉laha ape tawakaluba꞉te keha pihigane pewadipolatelete bobamo dito konimiya꞉tema꞉na꞉.
JOH 19:32 Ba꞉bema꞉ alaholohopa꞉te tolamenate dopo dubuino nato newakalamiliminate eta dubu ba꞉ atumu kamitiniya꞉, ba꞉bi dubu netewa Paeletete Ya꞉sukuba꞉ hoea꞉mo kapimilo oelamiya꞉.
JOH 19:33 Huiyatiya alaholohopa꞉te Ya꞉sutamo da꞉nikuliniya꞉ ebeno nato kanewakalamilimeniya꞉ha꞉ mabu iba꞉te ebe hoe binuminiya꞉.
JOH 19:34 Huiyatiya ba꞉ba tetelo eta kapiya alaholohodawate Ya꞉suku kibila꞉mo tabilo ba꞉ dito ahohamidaniya꞉, ba꞉bene hawiti beyago ebeno apene ba꞉bo peka꞉ka꞉la꞉halemeniya꞉.
JOH 19:35 Na buka ododidawate ama꞉ ka꞉lamiholedawa bikiyamemata, nale ba꞉moe komo naeno baida꞉mo hibilo uminiya꞉mo, iyo, na iya꞉tawala ba꞉moe tabo ba꞉ hibila, ba꞉bema꞉ wadiyala ama꞉ hibima꞉ na꞉mida꞉.
JOH 19:36 Ba꞉moe komote uluhukuniya꞉ Godokono Buka tabote hibima꞉ keda꞉ma꞉, mabu ya꞉lo tetelo ebete Ya꞉sukunu komoma꞉ da꞉goiya꞉ ba꞉be tabote ba꞉ma ka꞉na itana, “Iba꞉te ebeno eta goha kapiya a꞉kadikamidala꞉mena꞉.”
JOH 19:37 Ba꞉gala eta Buka tabote ba꞉ma ka꞉na goena, “Tawakaluba꞉te kibila꞉mo poko dahohamiduya꞉, iba꞉te ebe kumima꞉na꞉.”
JOH 19:38 Ba꞉ba tetelo eta dubuti nemedenami ebeno mahilo Yausepetela, ebe ba꞉ A꞉limitiyanapila ba꞉gala Ya꞉sukunu ta꞉matadawa etala, huiyatiya ebete ebeno komo nugumuinami mabu ebete Yu watowatopi betolelamenami. Ba꞉bene ba꞉moe dubuti Paeletetamo tonate Ya꞉sukunu ape lawenama꞉ ebe da꞉nikiyameniya꞉, Paeletete ebetamo modoboma꞉ goeniya꞉, ba꞉bema꞉ ebete tonate Ya꞉sukunu ape ba꞉ dito nelaweniya꞉.
JOH 19:39 Ba꞉ba tetelo eta dubu Nikadimasitila, ebete Yausepeko owalubinama꞉ ba꞉bo peniya꞉, ba꞉be dubu ba꞉ du tetelo Ya꞉sukuba꞉ tabo konolamaginama꞉ dopamo da꞉toniya꞉ ba꞉be dubula. Ebete Ya꞉sukunu apa꞉mo kikalumunama꞉ komo hiya꞉hiya꞉ hidohido nibo ilina bewadaheniya꞉, ba꞉bi ilinoeno menemene kodopola, ba꞉ 30 kilogalama huiyala.
JOH 19:40 Ba꞉bene ba꞉bi dubu netewapa꞉te hidohido nibo ilina Ya꞉sukunu apa꞉mo ikalumunate hidohido keyakeya kalikamo ba꞉bo a꞉wa꞉tiniya꞉, mabu Yu tawakaluba꞉te lumagino ape bobamo ihatema꞉ ba꞉ba ka꞉na ododinaka.
JOH 19:41 Alaholohopa꞉te Ya꞉suku kebolo kanakapuminiya꞉ ba꞉be haba tamelo eta pali nitanami, ba꞉gala ba꞉be pali ipuwalo nakola bobo atumu na꞉ka-itanami, tawakaluba꞉te ba꞉be bobo iya꞉ha꞉midale nakola haka ya꞉lo aligiya꞉ huiyatiya eta hoe lumagi dopamo ba꞉bamo kihatiya꞉ha꞉.
JOH 19:42 Ba꞉bema꞉ Yausepeko Nikadimasiko iba꞉te Ya꞉sukunu ape ba꞉bamo ba꞉ dito nihateniya꞉, mabu ba꞉be nakola bobo Ya꞉sukunu hoe haba tatalilo itanuya꞉, ba꞉gala ibi ba꞉ma ka꞉na emalagidoloniya꞉, ka꞉lo ba꞉ Palaide hegelala, Yunapino talona hegeloeno ilina hiduilame tetela, mabu dumutu ba꞉ ibino okoha꞉ talona hegelala.
JOH 20:1 Ba꞉bene Sande duiduiyanomolo hegelate ba owalohuta duti da꞉wibutiya꞉, ba꞉ba tetelo Magadalanapi Ma꞉liti Ya꞉sukunu bobo umima꞉ da꞉tuya꞉, ebete bobo da꞉takuminiya꞉ ba꞉be ko nakola tama꞉mo ya꞉lo emokamida ba itana ba꞉bo numiya꞉.
JOH 20:2 Ba꞉bene ebete gala kapepuligate Saimono Pitako ba꞉gala eta ta꞉matadawa Ya꞉suti konomamo demalagidolonami, ba꞉bi dubu netewa na꞉pikiyalamiya꞉, “Tawakaluba꞉te Ya꞉sukunu ape bobo ipuwane pilolo a꞉lawa꞉, a iya꞉tawaha꞉ iba꞉te kebamo dihata꞉!”
JOH 20:3 Ba꞉bema꞉ Pitako ba꞉gala eta ta꞉matadawa iba꞉te bobo umima꞉ ba꞉bo tuya꞉.
JOH 20:4 Ibi netewapa꞉te ba pulila꞉nato, eta ta꞉matadawate tiyonomo puligate bobo habamo dopamo dito nuluhukuya꞉.
JOH 20:5 Ba꞉ba tetelo ebete gigiho tamelo nutiti, bobo ipuwamo na꞉pa꞉gaheno papamiwatane da꞉negahimihuya꞉, Ya꞉sukunu ape da꞉wa꞉tiniya꞉ ba꞉bi hidohido keyakeya kalikonomuya nulamiya꞉.
JOH 20:6 Ba꞉bene Pitate galane bobamo nuluhukuti bobo ipuwamo nopegate da꞉negahimihuya꞉ ba꞉bi atu keyakeya kaliko bekanulamiya꞉,
JOH 20:7 ba꞉gala Ya꞉sukunu wato da꞉wa꞉timiniya꞉ ba꞉be eta kalikote mokopa꞉mida hiya꞉ bahilo ba itana ebete ba꞉bo numiya꞉.
JOH 20:8 Ba꞉ba tetelo bobamo dopamo da꞉nuluhukuya꞉ ba꞉be eta ta꞉matadawate bobo ipuwamo atumu kanopegate Ya꞉sukunu ape numihino ebeno hoe ipuwane mahiga komo hibima꞉ ba꞉bo nimidiya꞉.
JOH 20:9 Ba꞉ hibila, Godote ebeno Bukamo tabo dopamo a꞉miya꞉tiya꞉ Ya꞉suti hoe ipuwane gala kakamahigama꞉ne, huiyatiya ba꞉moi ta꞉matapi netewapa꞉te ba꞉be komoeno ipuwa hidamo kalawiya꞉ha꞉.
JOH 20:10 Ba꞉bene Ya꞉suku ta꞉matapi dubu netewapa꞉te genamamo dito katuya꞉,
JOH 20:11 huiyatiya Ma꞉liti ha꞉kiya bobo habalo lutiya꞉. Ebete boboeno gigiho tamelo ba ihita papamiwatane bobo ipuwamo ba꞉bo negahimihutiya꞉.
JOH 20:12 Ba꞉ba tetelo Godokono nopopi netewa keyakeya kaliko pupuliti, Ya꞉suti dopamo da꞉kapitanuya꞉ ba꞉be habalo ba lumutita Ma꞉liti ba꞉bo ulamiya꞉, eta wato hapulu, eta nato hapulu.
JOH 20:13 Iba꞉te ebe nalatediya꞉, “Kamena, ama꞉ badama꞉ kihiuta?” Ba꞉bene ebete tabo ba huiya na꞉goiya꞉, “Pilo tawakaluba꞉te naeno Kodawoeno ape kebamo data na iya꞉tawaha꞉.”
JOH 20:14 Ma꞉liti ba꞉moe tabo da꞉goiya꞉ ebete ohobigate Ya꞉suku la꞉nalo umiya꞉, huiyatiya ebete kiya꞉tawuya꞉ha꞉ ebe potela꞉ka꞉.
JOH 20:15 Ba꞉bene Ya꞉suti ebe nalatediya꞉, “Kamena, ama꞉ badama꞉ kihiuta, ba꞉gala poko kohowadiuta?” Ma꞉liti ba꞉be dubu pali namutudawamo emalagidololo na꞉goiya꞉, “Dubu, nolata, ama꞉le hoe lumagino ape eta habamo a꞉ka꞉nihata꞉wa? Wadiyala na na꞉kiyanama꞉, ba꞉bene nale ebeno ape konelawema꞉nemo.”
JOH 20:16 Ba꞉ba tetelo Ya꞉suti ebetamo na꞉goiya꞉, “Ma꞉li!” Ba꞉bene ebete Ya꞉sutamo ohobigadigate Yu tawakalubino tabamo ebetamo na꞉goiya꞉, “Laboni!” Buka ka꞉lamiholedawa, wadiyala ama꞉ ba꞉moe komo niya꞉tawa, ba꞉moe taboeno ipuwa ba꞉ “Iya꞉tulamedawa.”
JOH 20:17 Ya꞉suti ebetamo na꞉goiya꞉, “Na ibulu akalawenitala꞉ mabu na naeno Nabiwitamo odolohenola. Wadiyala ama꞉ tote naeno ekaki na꞉negoelama꞉, ‘Na Ya꞉suti goemo, naeno Nabiwi ba꞉ la꞉eno Nabiwila, iyo, naeno Godo ba꞉ la꞉eno Godola. Tete tatalila na ebetamo gala kakatoma꞉nemo.’”
JOH 20:18 Ba꞉bene Magadalanapi Ma꞉liti tote Ya꞉suku ta꞉matapi ba꞉be atu tabo ba negoelame iba꞉tamo na꞉negoiya꞉, “Na Kodawa Ya꞉suku umimo, ebete na a꞉kiyaname ba꞉moe tabo la꞉ kopikiyalamema꞉.”
JOH 20:19 Ba꞉be atu Sande hegela du tetelo Ya꞉suku ta꞉matapa꞉te kapiya genamalo ba pola꞉na genama gigiho a꞉kodakoduilameniya꞉ mabu iba꞉te Yu watowatopi betolelameniya꞉. Ba꞉ba tetelo Ya꞉suti iba꞉tamo puluhukunate ibino tetenomolo putinate ibi na꞉pegoelameniya꞉, “Godokono kalakalate la꞉godolo nitanamene.”
JOH 20:20 Ebete ba꞉be tabo goenate ebeno kokoto ba꞉gala tabino bugumu ibi ba꞉bo mutuilameniya꞉, ba꞉bene Ya꞉suku ta꞉matapa꞉te ebe uminate ibino tepo ipuwalo ko kalakala biya꞉tawahaniya꞉.
JOH 20:21 Ya꞉suti iba꞉tamo gala na꞉kagoeniya꞉, “Godokono kalakalate la꞉godolo nitanana. Nabiwi Godote na hopo habanapa꞉tamo keba ka꞉na ka꞉poenamiya꞉, ba꞉ma tetelo nale la꞉ ba꞉ba ka꞉na koelamema꞉nemata.”
JOH 20:22 Ba꞉ba tetelo ebete hawela iba꞉tamo ba ama꞉midana na꞉goeniya꞉, “Godokono Gobogobo na꞉lawa꞉la꞉.
JOH 20:23 Ba꞉bene la꞉le eta lumagitamo ba꞉ma ka꞉na da꞉ga꞉lama, ‘Godote amia꞉no kuba egebolemete adodolema꞉ta,’ Godote ba꞉ba ka꞉na kododima꞉ne, ba꞉gala eta tetelo eta lumagitamo da꞉kaga꞉lama, ‘Godote amia꞉no kuba egebolemete a꞉kadodolema꞉mena꞉ta,’ ba꞉be komote atumu ba꞉ ba꞉ba ka꞉na kakitanama꞉ne.”
JOH 20:24 Ya꞉sukunu 12 ta꞉matapi ipuwalo Tomasiko ba꞉ etala, komopa꞉te ebe Nedewale Guduma꞉ ka꞉minakuya꞉. Ya꞉suti komo ta꞉matapa꞉tamo duluhukuniya꞉ ba꞉moe dubuti ba꞉be dulu iba꞉go kalutiya꞉ha꞉,
JOH 20:25 ba꞉bema꞉ komopa꞉te ebe da꞉ga꞉lameniya꞉, “A Ya꞉suku umima꞉,” ebete ibino tabamo ba꞉ma ka꞉na huiyaniya꞉, “Ao! Nale ebeno kokotolo ikokoeno bugumu ulameheno, ba꞉gala nale ebeno bugumu naeno kokotamo ologilihino, ba꞉gala nale ebeno tabino bugumamo naeno kokoto udubukateheno nale ba꞉be komo hibima꞉ a꞉kamida꞉mo.”
JOH 20:26 Ba꞉bene kapiya wuiki da꞉petuya꞉, Ya꞉suku ta꞉matapa꞉te Tomasikoba꞉ kapiya genamamo pekapiyuiminate genama gigiho kodakoduilamenate ba꞉bo pola꞉nuya꞉. Ba꞉ba tetelo Ya꞉suti iba꞉tamo puluhukunate ibino tetenomolo putinate ibi na꞉goelameniya꞉, “Godokono kalakalate la꞉godolo nitanamene.”
JOH 20:27 Ba꞉bene ebete Tomasiko na꞉goemeniya꞉, “Naeno kokoto ulamete ikokoeno bugumu na꞉pologila꞉, ba꞉gala amia꞉no kokoto hogaminate naeno tabino bugumamo na꞉pudubukata꞉. Ama꞉ ukui netewama꞉ akeda꞉la꞉, na hibima꞉ na꞉midina꞉!”
JOH 20:28 Tomasiti ebeno tabo ba huiyana na꞉goeniya꞉, “Ama꞉ naeno Kodawalata! Ama꞉ ba꞉ naeno Godolata!”
JOH 20:29 Ba꞉bene Ya꞉suti ebe na꞉goemeniya꞉, “Ama꞉ na unamete hibima꞉ ba꞉bo midina꞉ta, huiyatiya puya꞉te na unameheno hibima꞉ da꞉midinimina꞉, Godote iba꞉tamo kalakala konomamo bikalamenakomene!”
JOH 20:30 Buka ka꞉lamiholedawa, wadiyala ama꞉ ba꞉moe komo hidamo niya꞉tawa. Ya꞉suti ebeno ta꞉matapino holoholo hapulu komo hiliyonomo hanohano komo dododilinakui, huiyatiya komo ba꞉bi hiliyonomo komokomo na ba꞉moe bukalo kahawakalilamitaha꞉.
JOH 20:31 Huiyatiya kebe komokomo nale da꞉miya꞉temo, ba꞉bi komate na꞉pola꞉namena꞉ ama꞉le Ya꞉sukunu hibi komo kiya꞉tawama꞉. Ebe ba꞉ Kelisote, Godokono Gudula, ba꞉gala ama꞉ ebe hibima꞉ da꞉midinamena꞉ ebeno mahilamo hibi ka꞉ka꞉ kolawema꞉na꞉ta.
JOH 21:1 Ba꞉moe komo wibote komo hegela da꞉petohuya꞉, Ya꞉suti Taibiliyasi Bobolo ebe ha꞉kiya ebeno sa꞉ba꞉ni ta꞉matapa꞉tamo ebeno komo gala na꞉kahawakalimiya꞉, ba꞉bene ba꞉be komote ba꞉ma ka꞉na uluhukuya꞉.
JOH 21:2 Saimono Pitako ba꞉gala Tomasiko, ebeno eta mahilo Nedewale Gudula, ba꞉gala Nata꞉niyoloko, ebe Ga꞉lili hopoeno Ka꞉ina habanapila, ba꞉gala Sebedikono gugudi netewa, ba꞉gala komo Ya꞉suku ta꞉matapi netewa, ba꞉moi ba꞉te kapimilo pola꞉nuya꞉.
JOH 21:3 Ba꞉bene ba gapogapohona Saimono Pitate komopa꞉tamo na꞉goeniya꞉, “Na dahama꞉ tomo.” Ba꞉ba tetelo ibi hiliyonomate na꞉ga꞉laniya꞉, “Wadiyala a ama꞉go kopelamema꞉nema꞉,” ba꞉bene iba꞉te tolamenate boga꞉mo ba꞉ dito nololoniya꞉, huiyatiya ba꞉be dulu iba꞉te daha kuwateholeniya꞉ha꞉, puliyanomola.
JOH 21:4 Ba꞉bene duiduiyalo hegelate ba owalohuta, Ya꞉suti Ga꞉lili Bobo dodolo ba꞉bo la꞉nuya꞉, huiyatiya ebeno ta꞉matapa꞉te kemalagidoluya꞉ha꞉ ebe ba꞉ Ya꞉sutila.
JOH 21:5 Ya꞉suti ebeno tabo madodo adipatelo iba꞉tamo na꞉goiya꞉, “Mabuluba꞉la꞉, la꞉ daha a꞉kuwateholeoma?” Iba꞉te na꞉huiyuya꞉, “Ao, puliyala.”
JOH 21:6 Ba꞉bema꞉ ebete ibi na꞉goelamiya꞉, “La꞉ boge tu hapuamo kamahu dahubima la꞉ daha kuwateholema꞉nemata.” Ba꞉bene iba꞉te ba꞉ma ka꞉na dewageliya꞉, iba꞉te kamahu adipatema꞉ kamodobuya꞉ha꞉ mabu kamahamo hiliyonomo dahadahate tahuya꞉.
JOH 21:7 Ba꞉ba tetelo Ya꞉suti ebeno ta꞉matapi ipuwalo koamo demalagidolonami ba꞉be dubuti Pitatamo na꞉goiya꞉, “Ba꞉moe ba꞉ Kodawala!” Ba꞉bene Pitate ba꞉be tabo uliti, ebete oko owatima꞉ kebe kaliko ka꞉pekananiya꞉ ba꞉be atuino kaliko lawete beyamo epategate hakamo ba꞉ dito niholuya꞉,
JOH 21:8 mabu ta꞉matapino bogete bobo dodo tatalidopolo itanuya꞉. Ba꞉ba tetelo komo ta꞉matapa꞉te ibi ha꞉kiya daha hiliyonomagoeno kamahu boga꞉go adimuya꞉tate hakamo ba꞉ dito nutiya꞉,
JOH 21:9 ba꞉bene iba꞉te hakamo ba nidimutita koe ba꞉bo numiya꞉, ba꞉be koelo baa꞉ ba꞉gala daha oho na꞉pola꞉nuya꞉.
JOH 21:10 Ba꞉bene Ya꞉suti iba꞉tamo na꞉goiya꞉, “La꞉le duwateholema komo daha mamo na꞉wadaha꞉la꞉.”
JOH 21:11 Ba꞉ba tetelo Pitate boga꞉mo gala kanololote dahagoeno kamahu hakamo ba꞉bo adimuya꞉miduya꞉, ba꞉be kamahamo 153 koko dahate tahuya꞉ huiyatiya kamahuti kata꞉galiya꞉ha꞉.
JOH 21:12 Ba꞉bene Ya꞉suti iba꞉tamo na꞉goiya꞉, “La꞉ pelamete baa꞉ na꞉penahala꞉.” Ibi hiliyonomate iya꞉tawahuya꞉ ba꞉moe dubu ba꞉ ibino Kodawala, ba꞉bema꞉ ibi ipuwalo etate Ya꞉suku ba꞉ma ka꞉na kalatediya꞉ha꞉, “Ama꞉ potela꞉ka꞉?”
JOH 21:13 Ba꞉ba tetelo Ya꞉suti baa꞉ ba꞉gala daha uwatete iba꞉tamo dito ikalameholiya꞉,
JOH 21:14 ba꞉bema꞉ hibila, ebete hoe ipuwane da꞉mahiguya꞉, ba꞉moe ba꞉ ebeno netewa-kapiya tetela ebeno ta꞉matapa꞉tamo duluhukuya꞉.
JOH 21:15 Ba꞉bene ibino baa꞉ naha komote da꞉wibuya꞉, Ya꞉suti Saimono Pitako nalatediya꞉, “Saimono, Yonekono gudu, ba꞉moi ta꞉matapa꞉te na malemalelo demalagidolonena, huiyatiya amia꞉no malemale komote ibino malemale komo hibilo na꞉ka꞉gogolena?” Ba꞉ba tetelo Pitate tabo ba huiya na꞉goiya꞉, “Iyo, Kodawa, ama꞉ iya꞉tawala na amia꞉no hido mabulubila.” Ba꞉bene Ya꞉suti ebetamo na꞉goiya꞉, “Naeno sipi-goegoe hegehege hidamo nulameniya꞉.”
JOH 21:16 Ba꞉bene Ya꞉suti Pitako gala na꞉kalatediya꞉, “Saimono, Yonekono gudu, ama꞉ na hibilo malemalelo na꞉kemalagidoloneona?” Ba꞉bene Pitate tabo ba huiya na꞉goiya꞉, “Iyo, Kodawa, ama꞉ iya꞉tawala na amia꞉no hido mabulubila.” Ba꞉bene Ya꞉suti ebetamo na꞉goiya꞉, “Naeno sipi-goegoe hidamo nulameniya꞉.”
JOH 21:17 Ba꞉bene Ya꞉suti netewa-kapiya tetelo Pitako gala na꞉kalatediya꞉, “Saimono, Yonekono gudu, ama꞉le da꞉gaa꞉ ba꞉moe tabo hibila꞉ka꞉? Ama꞉ naeno hibi mabulubima꞉ kedeona?” Ba꞉ba tetelo Ya꞉suti netewa-kapiya teta꞉mo Pitakono malemale komoma꞉ ebe dalatediya꞉, ba꞉bema꞉ ebete ukui bilibilima꞉ eda꞉lo na꞉huiyuya꞉, “Kodawa, ama꞉ hiliyonomo komokomo iya꞉tawanomola. Ba꞉ hibila, na amia꞉no hido mabulubila.” Ba꞉bene Ya꞉suti ebetamo na꞉goiya꞉, “Wadiyala, ama꞉ naeno sipi-goegoe hidamo nulameniya꞉.
JOH 21:18 Na ama꞉tamo hibi tabonomo begoemo, ama꞉ uli ape tetelo ama꞉ ha꞉kiya amia꞉no apeno ilina pupuliti amia꞉no ubilo pata꞉nama꞉ta, huiyatiya ama꞉ kadele teta꞉mo da꞉nuluhukumina꞉ amia꞉no komote ba꞉ba ka꞉na a꞉kitanamene. Ba꞉ba tetelo amia꞉no ubiti itanaheno eta lumagiti pete amia꞉no kokoto pehogaminalemete da꞉pematuhulameholememena꞉, ebete ama꞉ temeteme habamo ba꞉bo komagatama꞉na꞉ta.”
JOH 21:19 Pitate keba ka꞉na da꞉hoemene ba꞉gala ebeno hoe komote Godoko keba ka꞉na dawagaminamene, ba꞉bi komo kohawakalilamema꞉ Ya꞉suti Pitatamo ba꞉moe tabo ba꞉bema꞉ goiya꞉. Ba꞉bene ebete ebeno tabo moga꞉melo Pitatamo gala na꞉kagoiya꞉, “Wadiyala ama꞉ na na꞉ta꞉mahena꞉.”
JOH 21:20 Ba꞉ba tetelo eta ta꞉matadawa Ya꞉suti konomamo demalagidolonami ebete ibi netewapi ba ta꞉matalita, Pitate gala hapuamo pohobigate ebe ba꞉bo pumiya꞉. Ba꞉moe ta꞉matadawate dopamo Adaguila꞉ Poko baa꞉ naha tetelo Ya꞉suku tama꞉mo nemeda꞉tepanate ebetamo ba꞉ma ka꞉na goeniya꞉, “Kodawa, a ipuwalo pote ama꞉ anakapumipi na꞉kowalubilimini?”
JOH 21:21 Pitate ba꞉be dubu umiti Ya꞉suku na꞉kiyamiya꞉, “Kodawa, ba꞉moe dubu tawakaluba꞉te keba ka꞉na na꞉kamitimina꞉?”
JOH 21:22 Huiyatiya Ya꞉suti ebetamo na꞉goiya꞉, “Na ubi dihatemo ebete naeno pe teta꞉mo emedenama꞉, ba꞉moe ba꞉ naeno komola, amia꞉noha꞉. Wadiyala ama꞉ na ta꞉mahene komo kapiya nemalagidola.”
JOH 21:23 Galane tetelo komo Ya꞉suku ta꞉matapa꞉te ba꞉moe tabo duliya꞉ iba꞉te ba꞉ma ka꞉na ga꞉la ba꞉bo tupuimiya꞉, ba꞉moe ta꞉matadawate a꞉kahoenamene, huiyatiya Ya꞉suti Pitatamo ba꞉mako tabo kagoiya꞉ha꞉. Ebete na꞉goiya꞉, “Na ubi dihatemo ebete naeno pe teta꞉mo emedenama꞉, ba꞉moe ba꞉ naeno komola.”
JOH 21:24 Na ba꞉moe ta꞉matadawate ba꞉moe bukamo da꞉miya꞉temo, ba꞉moi tabo komokomo ipuwalo hibi komo behawakalimitamo, iyo, a hibima꞉ midipi hiliyonomo iya꞉tawahala, ba꞉moi hiya꞉hiya꞉ tabo ba꞉ hibinomola.
JOH 21:25 Ba꞉gala ba꞉moe ba꞉ eta komola. Ya꞉suti ba꞉moe hopolo komo hiliyonomo komokomo dododilinakui, nale ba꞉bi komo ba꞉moe buka kapiyalo hawakalilame modoboha꞉. Naeno ukui bitana, buka ododilipa꞉te Ya꞉sukunu hiliyonomo komokomo hawakalilamema꞉ dewagelemena꞉, iba꞉te kebe buka hiliyonomo dododilimina꞉, tawakaluba꞉te ba꞉bi buka miya꞉tema꞉ ba꞉moe hopo konomolo miya꞉te habate a꞉kamodobamene. Kalakala konomola, ba꞉moe ba꞉ naeno buka tabo kuititila.
ACT 1:1 Naeno hido lumagi Tiyopolasi, nolata. Ba꞉moe ba꞉ netewa tetema꞉ eda꞉ nale ama꞉tamo buka ododi. Hibila, Ya꞉suti ebeno oko da꞉tupuimiya꞉ ba꞉ba tetene pete ebete Hunu Habamo dodoluya꞉ ba꞉ba teta꞉mo puluhuku, ebete kebe komokomo kododilinakui ba꞉gala tawakalubi keba ka꞉na kiya꞉tulamenakui ba꞉bi komo hiliyonomo nale naeno dopo bukalo a꞉hawakalilamiya꞉mo. Ba꞉ hibila, Godote Ya꞉suku Hunu Habamo pelaweheno dopamo ebete ebeno oelamepi dubu Hido-talona Gobogoboeno heloamo tutumulateliya꞉, iyo, ba꞉bi dubu ebete ebeno oelamepima꞉ ya꞉lo a꞉ka꞉lamiya꞉.
ACT 1:3 Ba꞉bene Ya꞉sukunu koko temeteme da꞉wibomiya꞉, ba꞉ba tetelo ebete 40 hegela ipuwalo komo hiya꞉hiya꞉ tetelo iba꞉tamo ebeno holoholonomamo uluhukunakui iba꞉te ebeno ka꞉ka꞉mo mahiga komo umiti ebe hibima꞉ komidima꞉, ba꞉gala ba꞉bi atu tetelo ebete Godokono Ko Gawadubu komoma꞉ ibi ba꞉bo iya꞉tulamenakui.
ACT 1:4 Ba꞉bene eta tetelo ebete iba꞉go ba emede ibi ba꞉ma ka꞉na tutumulateliya꞉, “La꞉ Yelusalema ko habane muhino akatolama꞉la꞉, mabu naeno Nabiwiti la꞉tamo ikalamema꞉ hibilo da꞉goiya꞉ la꞉ ba꞉be komo na꞉latimiya꞉la꞉. Iyo, nale la꞉ dopamo da꞉kiyalamima, ba꞉be komo la꞉ ba꞉ma ka꞉na ulimata,
ACT 1:5 Yonete dopamo tetelo tawakalubi beyanomamo wadulatelenakui, huiyatiya la꞉ hegela kapiyakapiya pola꞉nate Godote ebeno Gobogobamo ba꞉bo kopewadulatelema꞉na꞉ta.”
ACT 1:6 Ba꞉ba tetelo Ya꞉suti ebeno oelamepi dubago kapiyuimi habalo ba pola꞉na, iba꞉te ebe alateda꞉lo na꞉ga꞉lamiya꞉, “Kodawa, ama꞉ ba꞉ma tetelo ba꞉moe hopo konomoeno namutulubima꞉ eda꞉ha komo amia꞉no Isalaela tawakaluba꞉tamo gala ba꞉kikalameomena꞉?”
ACT 1:7 Ya꞉suti ibino tabo ba huiya na꞉goiya꞉, “Hiya꞉hiya꞉ komoeno pelame tete naeno Nabiwiti ebeno heloamo ha꞉kiya kolamagima꞉ne. Ebe ubihinola la꞉le ba꞉bi komokomoeno tete iya꞉tawaha,
ACT 1:8 huiyatiya ebeno Gobogobote la꞉ hunamo da꞉pemedemene, ba꞉ba tetelo ebeno helo komote la꞉eno tepo ipuwa da꞉tabuilamemene, la꞉le naeno komo hawakalimima꞉ tabo atapima꞉ keda꞉hama꞉nemata. Ba꞉be mabuma꞉ ba꞉moe Yelusalemalo ba꞉gala Yudiya hopoeno komo habahabalo ba꞉gala Samaliya hopoeno habahabalo ba꞉gala ba꞉moe hopo konomoeno kuititi hapuhapulu la꞉le naeno tabo konolamagimima꞉nemata.”
ACT 1:9 Ba꞉bene Ya꞉suti ba꞉moe tabo olamagi da꞉wibuya꞉, iba꞉te ebe ba umita Godote hunamo ba꞉bo adipatiya꞉, iyo, ebete hawai ipuwamo da꞉nopeguya꞉ iba꞉te ebe gala kumiya꞉ha꞉.
ACT 1:10 Iba꞉te hunamo tala꞉te ba umita, dubu netewate keyakeya kaliko pupula꞉go iba꞉tamo uluhukuti ibi tamelo ba la꞉mota꞉na
ACT 1:11 iba꞉tamo na꞉ga꞉luya꞉, “La꞉ Ga꞉lilinapi dubala꞉, la꞉ bada mabuma꞉ hunamo tala꞉lo da꞉la꞉mota꞉hanama? Ba꞉moe Ya꞉suku la꞉le ba umita Godote ebe Hunu Habamo da꞉pelawe, ebete la꞉godone hunamo keba ka꞉na ka꞉nodolo, galane ebete ba꞉ ba꞉ba ka꞉na kakapema꞉ne.”
ACT 1:12 Ba꞉bema꞉ Ya꞉sukunu oelamepi dubate Olibi Kehakeha Hunu Hakane nepalagate Yelusalema ko habamo ba꞉bo tolamiya꞉, ba꞉be haka Yelusalema tamelo itana, ba꞉bamo tolame gabo muhuluha꞉, kapiya kilomita keba ka꞉nala꞉ka꞉ ba꞉ba ka꞉nala.
ACT 1:13 Ba꞉bene iba꞉te ko habamo nikuliti, iba꞉te demedenama꞉ ba꞉be hunu genamalo ditanami ba꞉be habamo dito nalehawaminuya꞉. Ba꞉ba tetelo ba꞉be genamalo ba꞉moi ba꞉bi oelamepi dubate pola꞉nuya꞉ — Pitako, Yoneko, Ya꞉imesiko, ba꞉gala A꞉nduluku, Pilipiko ba꞉gala Tomasiko, Batolomuku ba꞉gala Ma꞉tiyuku, ba꞉gala eta Ya꞉imesiko A꞉lapiyasikono gudu, ba꞉gala Saimonoko ebete dopamo Loma gabomani tawakaluba꞉go alaholohodawama꞉ eda꞉nami, ba꞉gala Yudasiko Ya꞉imesikono gudu.
ACT 1:14 Ba꞉bene ba꞉moi oelamepi dubago Ya꞉sukunu ekaki ba꞉gala ebeno menoko Ma꞉liko ba꞉gala komo kamenakamena, iba꞉te 40 hegela ipuwalo ba꞉be atu genamalo pekapiyanakui, ba꞉bene komo hiya꞉hiya꞉ tetelo iba꞉te Godotamo toetoe tabo ba꞉bo polamagiminakuya꞉.
ACT 1:15 Ba꞉bene komo hegela da꞉wibohuya꞉, ba꞉ba tetelo 120 hibima꞉ midipa꞉te gala da꞉kakapiyuya꞉, Pitate ibi ipuwalo mahigate iba꞉tamo ba꞉ma ka꞉na olamagiya꞉,
ACT 1:16 “Ekaka꞉la꞉, Godokono Gobogobote dopamo Da꞉ibidikono tabone Yudasikono komoma꞉ da꞉goiya꞉, ba꞉be Buka tabote hibima꞉ keda꞉ma꞉ olalati komote ebetamo ba꞉ba ka꞉na ba꞉bema꞉ uluhukui. La꞉ iya꞉tawahala Yudasiko ba꞉ aeno eta kapiyuimidawama꞉ eda꞉nami, iyo, Ya꞉suti ebe a꞉lawi ago kapimilo oko kowatinama꞉. Huiyatiya ba꞉moe dubuti eta dulu Ya꞉suku anakapumipi ba owalubilina, iba꞉te ebe ba꞉bo laweniya꞉.”
ACT 1:18 Ba꞉bema꞉ buka ka꞉lamiholedawa, wadiyala ama꞉ ba꞉moe komo niya꞉tawa, ba꞉moe dubu Yudasiti ebeno ko kuba ododi ipuwalo kebe mani kuwatiya꞉, ebete ba꞉be mana꞉mo eta dubuino pali haka benelawiya꞉, ba꞉bene ebete tote ba꞉be hakalo da꞉nehoiya꞉, ebeno apete hakamo ba pega tepo bolagalemete maladiti ba꞉bo pikulimiya꞉.
ACT 1:19 Ba꞉ba tetelo Yelusalema ko habalo da꞉pola꞉nuya꞉, ba꞉bi Yu tawakalubi hiliyonomate ebeno hoe komo uliti ba꞉be pali hakoeno mahilo ibino tabamo Akeledamama꞉ ka꞉miya꞉, ba꞉be mahiloeno ipuwa nitana ‘Hawa꞉goeno Pali Hakala.’
ACT 1:20 Ba꞉bene Pitate tabo moga꞉melo gala na꞉kagoiya꞉, “Da꞉ibiditi Sam Ohale Bukalo Godokono tabo ba꞉ma ka꞉na miya꞉tiya꞉, ‘Wadiyala kuba lumagino genamate dito nitanamene, iyo, ba꞉be genama gulu eta lumagiti gala a꞉kalutamene.’ Huiyatiya Da꞉ibiditi ba꞉be lumagino oko haboeno komoma꞉ eta tabo ba꞉ma ka꞉na kagoiya꞉, ‘Wadiyala kuba lumagino oko haba etate na꞉lawa꞉mene.’
ACT 1:21 Ba꞉bema꞉ eta lumagiti oko ipuwalo ago na꞉kapiyamene, Kodawa Ya꞉suti hoe ipuwane da꞉mahigui ba꞉be tabo konehawakaliminakoma꞉. Iyo, ago tete ga꞉ga꞉nomolo demedenami, wadiyala ba꞉bako lumagiti ago oko kotupuimima꞉ne, ba꞉ma ka꞉na Yonete tawakalubi beyamo wadulatelema꞉ tabo da꞉polamagi ba꞉ba tetene tupuimiti, Ya꞉suti Hunu Habamo da꞉nodolui ba꞉ba teta꞉mo nuluhuku, ba꞉be tete ga꞉ga꞉nomolo puya꞉te Ya꞉sukuba꞉ da꞉wapata꞉lamenama꞉ ibi ipuwalo a eta kapiya kolawema꞉nema꞉.”
ACT 1:23 Ba꞉bema꞉ iba꞉te dubu netewoeno mahilo beka꞉lamiya꞉, Yausepe Basabasiko ebeno eta mahilo Yasitasitila, ba꞉gala Matayasiko.
ACT 1:24 Ba꞉ba tetelo iba꞉te Godotamo ba toetoeho na꞉ga꞉luya꞉, “Kodawa, hiliyonomo tawakalubino tepo ipuwoeno komokomo ama꞉ iya꞉tawala, ba꞉bema꞉ aeno Kodawa, ba꞉moi netewa dubu ipuwalo ama꞉le ya꞉lo poko da꞉lawiya꞉la, wadiyala ama꞉ a niya꞉tua꞉ma꞉.
ACT 1:25 Ba꞉ma ka꞉na amia꞉no eta oemedawa Yudasiti da꞉miya꞉pui, ba꞉be oko haba amia꞉no eta uli lumagiti kolawema꞉ne, huiyatiya Yudasiti ebeno kuba huiya lawema꞉ Koe Habamo ya꞉lo a꞉tui, ba꞉be kuba haba eba꞉go na꞉nemodobona.”
ACT 1:26 Ibino toetoe tabo olamagimi komo da꞉wibuya꞉, ba꞉ba tetelo iba꞉te nakola anagogobeya꞉midale netewa uwatete, eta nakolamo etoeno mahilo ihatemete, eta nakolamo etoeno mahilo akihatemiya꞉. Ba꞉bene iba꞉te Godokono ubi komo kumima꞉ ba꞉bi nakola da꞉niya꞉hekiya꞉ Matayasikono mahilo ba꞉bo lawiya꞉, ba꞉bema꞉ ba꞉be gabodo ba꞉be dubuti Ya꞉sukunu komo 11 oelamepi dubago kapiyama꞉ ba꞉bo ediya꞉.
ACT 2:1 Ba꞉bene Pentekose Poko Hegela duluhukuya꞉, ba꞉ba tetelo Ya꞉suku hibima꞉ midipi hiliyonomate kapiya genamamo pekapiyuimiya꞉.
ACT 2:2 Ba꞉ba tetelo ko diyamonomote Hunu Habane iba꞉tamo puluhukuya꞉, konomo huhuti da꞉goenape ba꞉ba ka꞉na pete iba꞉te da꞉pola꞉nuya꞉ ba꞉be genama gu dito petabuya꞉.
ACT 2:3 Ba꞉bene koe powoeno ma꞉lapila keba ka꞉nala꞉ka꞉ ibi hiliyonomatamo ba nikuliho, hiya꞉hiya꞉ kaneka꞉kehote etatamo etatamo ibi hunamo ba꞉bo negagahidiya꞉.
ACT 2:4 Ba꞉ba tetelo Godokono Gobogobote ibi hiliyonomo da꞉tabuilamiya꞉, ebete ibi ba heluilame komo kapela tawakalubino hiya꞉hiya꞉ tabamo olamagimi ba꞉bo tupuimiya꞉.
ACT 2:5 Ba꞉bema꞉ buka ka꞉lamiholedawa, ama꞉ numa꞉, ba꞉be Pentekose Poko hegela peheno dopamo komo Yunapi ba꞉gala komo Yuha꞉pi Godoko dadikuminakui, ibi hiliyonomate ibino hiya꞉hiya꞉ muhulu hopone Yelusalema ko habamo pelameholiya꞉ ba꞉be poko kapimilo kopododima꞉.
ACT 2:6 Ba꞉bene Godote ebeno Gobogobo Ya꞉sukunu hibima꞉ midipa꞉tamo ko diyamago da꞉poemiya꞉, hiya꞉hiya꞉ hopone pokoma꞉ da꞉pelamiya꞉ komo ibi hiliyonomate ba꞉be diyamo uliti hibi komo kumima꞉ ba꞉bo pekapiyuya꞉. Ba꞉bema꞉ iba꞉te koamo hanohanohutiya꞉ mabu hibima꞉ midipa꞉te Yu tawakalubino tabamo kaga꞉lutiya꞉ha꞉ huiyatiya hiya꞉hiya꞉ tabamo ga꞉lutiya꞉, ba꞉ma ka꞉na ulihopi ipuwalo etate ebeno tabonomo ulinakui, etate atumu ebeno tabonomo akulinakui, ibi hiliyonomate ba꞉ba ka꞉na ewagelitiya꞉.
ACT 2:7 Ba꞉bene iba꞉te la꞉wa꞉hate ba hanohanoho na꞉ga꞉luya꞉, “Ba꞉moe tabo da꞉ga꞉luta, ba꞉moi tawakalubi aeno hoponapiha꞉, ibi ba꞉ Ga꞉lili hoponapila,
ACT 2:8 ba꞉bema꞉ keba ka꞉nala꞉ka꞉ iba꞉te aeno hiya꞉hiya꞉ tabonomamo da꞉ga꞉luta a nulihutama꞉?
ACT 2:9 A꞉iye, a hiliyonomate komo muhulu hopone pelameholima꞉! Iyo, a komo Patiyanapila, Midiyanapila, Ilamanapila, ba꞉gala Mesopotemiyanapila, ba꞉gala komo a Yudiyanapila, Ka꞉padosiyanapila, Pontasenapila, ba꞉gala A꞉isiyanapila.
ACT 2:10 Ba꞉gala a komo Piligiyanapila, Pa꞉mapiliyanapila, ba꞉gala Isipitinapila, hibila, komo a Sailiniya haboeno Libiya hopone pelamima꞉, ba꞉gala komo a Loma ko habane da꞉pelamima꞉ ba꞉bi tawakalubila.
ACT 2:11 Numa꞉la꞉, a ipuwalo komo Yu tawakalubinomola, ba꞉gala a komo Yu tawakalubiha꞉ huiyatiya ale iba꞉godone hibi Godo adikumi komo belawiya꞉ma꞉, iyo, a komo Kulitinapila ba꞉gala komo Ala꞉biyanapila, ba꞉bema꞉ ba꞉moi tawakaluba꞉te Godokono koko ododili komoma꞉ da꞉ga꞉luta, ale aeno hiya꞉hiya꞉ tabonomamo badama꞉ kulihutama꞉?”
ACT 2:12 Ba꞉be mabuma꞉ ibi hiliyonomate hanohanoholo ukui bilibilima꞉ ba eda꞉ha, etate etatamo goenakui, etate etatamo goenakui, ba꞉ba ka꞉na ewagelitiya꞉, “A꞉iye! Ba꞉moe komoeno ipuwa keba ka꞉nala꞉ka꞉?”
ACT 2:13 Huiyatiya komopa꞉te Ya꞉sukunu oelamepi dubu ba walilatele na꞉ga꞉luya꞉, “Ba꞉moi dubate helo gao beya nihote da꞉wigulamehole, ba꞉bema꞉ daedaeholita!”
ACT 2:14 Ba꞉bene Pitate komo 11 oelamepi dubago mahigate ebeno tabo madodo hunamo ba adipate tawakalubi hiliyonomatamo ba꞉ma ka꞉na olamagiya꞉, “Naeno Yu mabuluba꞉la꞉, ba꞉gala komo la꞉ Yelusalemamo da꞉pelameholima la꞉ hiliyonomo atumu, nale ba꞉moe komoeno ipuwa la꞉tamo kohawakalimima꞉nemo, ba꞉bema꞉ wadiyala la꞉ naeno tabo hidamo nulia꞉la꞉.
ACT 2:15 Ba꞉moi dubu la꞉le helo gao beya nihoma꞉ da꞉ga꞉lutama, ebe tabo hibiha꞉. Iba꞉te helo gao beya kanihakaha꞉, mabu hibila, dubate helo gao beya duiduiyalo a꞉kanihala꞉. Numa꞉la꞉, hegela ka꞉ma꞉ podoluta!
ACT 2:16 Huiyatiya ba꞉moe komo ba꞉ Godokono ukui hawakalimidawa Yowelate dopamo dolamagiya꞉, ba꞉be tabola.
ACT 2:17 Iyo, Godote Yowelako ipuwado tabo ba꞉ma ka꞉na goiya꞉, ‘Ba꞉moe hopoeno kuititi tetelo na Godote naeno Gobogobo hiliyonomo tawakalubi hunamo kohaminama꞉nemo. Ba꞉ba tetelo la꞉eno kuhi ba꞉gala bohelemele, iba꞉te naeno ukui hibilo kohawakalimima꞉na꞉, ba꞉gala la꞉eno uli ape dubuino baiditi hiya꞉ma꞉ eda꞉halamete koko komokomo kulameholema꞉na꞉, ba꞉gala la꞉eno kadelekadela꞉te atumu hiyolo naeno komokomo kiya꞉tawahama꞉na꞉.
ACT 2:18 Iyo, ba꞉ hibila, ba꞉be hegelalo naeno huiyaha꞉ okopi dubu ba꞉gala kamenakamena, nale ibi hunamo naeno Gobogobo da꞉haminamo, iba꞉te naeno ukui hibinomolo ba꞉bo kohawakalilamema꞉na꞉.
ACT 2:19 Ba꞉bene nale alomo hunulu koko hanohano komo kododilima꞉nemo, ba꞉gala hopo habalo nale atumu iwawi komokomo ba pododili, tawakaluba꞉te hawi ka꞉ka꞉la꞉ komo ba꞉gala koe ba꞉gala ahuta kulamema꞉na꞉.
ACT 2:20 Ba꞉ba tetelo hegelate kuduma꞉ne, ba꞉gala manomete hawihawinomoma꞉ keda꞉ma꞉ne, ba꞉bene Kodawoeno Ko Hegelate ko alonomago kopuluhukuma꞉ne.
ACT 2:21 Ba꞉bema꞉ hibila, puya꞉te Kodawoeno mahilo da꞉ka꞉mimina꞉ Godote ibino ka꞉ka꞉ ba꞉bo komula꞉lelamema꞉ne.’”
ACT 2:22 Ba꞉bene Pitate tabo moga꞉melo gala na꞉kagoiya꞉, “La꞉ Isalaelanapi tawakaluba꞉la꞉, la꞉ ba꞉moe tabo nulia꞉la꞉. La꞉ iya꞉tawahanomola ba꞉moe Ya꞉suku Nasaletenapi Godote hopo habamo poemiya꞉, mabu Godote ebe ipuwado koko hanohano komo ba꞉gala iwawi komo la꞉godolo ba pododili ebeno helo a꞉pehawakalimi.
ACT 2:23 Ba꞉ hibila, ba꞉moe hopo konomolo eta komote uluhukuhino Godote ba꞉be komo dopamo kiya꞉tawama꞉ne. Ba꞉bema꞉ ebeno mulu iya꞉tawa komodo ebete nopo ba꞉ma ka꞉na ihatiya꞉, ebete Ya꞉suku la꞉eno kokotamo ihatete, ba꞉bene kuba ododilipa꞉te la꞉ ba owalubili la꞉le ebe lawete keha pihigamo pihomotete ikoko ba꞉bo alukulimimata, iyo, la꞉le ebe ba꞉moe gabodo anakapumimata.
ACT 2:24 Huiyatiya Godote Ya꞉sukunu hoe temeteme pahalamilimiti ebe hoe ipuwane ba꞉bo adipati, mabu hoete ebe lawema꞉ helo puliyala.
ACT 2:25 Ba꞉be mabuma꞉ Da꞉ibiditi Godokono heloamo Ya꞉sukunu komoma꞉ tabo ba꞉ma ka꞉na miya꞉tiya꞉, ‘Na Kelisote naeno Kodawa Godoko na tamenomolo buminamo, iyo, ebete naeno tu hapulu ba꞉la꞉na nale waguwagukapoma꞉.
ACT 2:26 Ba꞉bema꞉ naeno tepo ipuwate ba moena, nale ko kalakalago olamaginakomo, iyo, nale Godoko hibima꞉ midi ipuwalo ba emedena, naeno apeno hoe komoma꞉ nale a꞉ka-ukuibilibila꞉mo.
ACT 2:27 Mabu, Godo, ama꞉le naeno ape ha꞉lahapino habalo a꞉kamiya꞉pamena꞉ta, iyo, amia꞉no Talona Guduti da꞉hoemene, ama꞉le ebeno abale komo duhimiti ebe ka꞉ka꞉mo gala kakadipatema꞉na꞉ta.
ACT 2:28 Ba꞉ hibila, ama꞉le na ka꞉ka꞉ gabo ya꞉lo iya꞉tunamiya꞉ta, ba꞉bene nale amia꞉no holoholo hapuamo da꞉puluhukumu, ama꞉le natamo ko kalakala kikanamema꞉na꞉ta.’”
ACT 2:29 Ba꞉bene Pitate tabo moga꞉melo gala na꞉kagoiya꞉, “Ekaka꞉la꞉, na hilopoheno aeno iniwa Da꞉ibidikono komo hawakalimima꞉ la꞉tamo kolamagima꞉nemo. Ebete ba꞉moe tabo Godokono Bukamo da꞉miya꞉tiya꞉ ebeno komoma꞉ kamiya꞉tiya꞉ha꞉, mabu numa꞉la꞉, ebete da꞉hoiya꞉ iba꞉te ebe bobamo ihatiya꞉, ba꞉bene ka꞉lo ebeno bobo haba agodolo bitama꞉na.
ACT 2:30 Da꞉ibidiko ba꞉ Godokono ukui hawakalimidawa etala. Ba꞉be mabuma꞉ Godote ebeno mahilamo hibi tabonomo Da꞉ibiditamo da꞉goiya꞉, ebete ba꞉bo iya꞉tawuya꞉ Godote ebeno eyoni gugudi ipuwalo eta kapiya lawete ebeno Ko Gawadubu emede baha꞉mo kadipima꞉ne.
ACT 2:31 Ba꞉gala Kelisote galane tetelo hoe ipuwane da꞉mahigamene, ba꞉be komo uluhukuhino dopamo Da꞉ibiditi Godokono heloamo dumiya꞉, ba꞉be komoeno tabo ba꞉bema꞉ ebeno Bukamo ba꞉ma ka꞉na miya꞉tiya꞉, ‘Godote ebe ha꞉lahapino habalo a꞉kamiya꞉pamene, ba꞉gala ebe bobo ipuwalo a꞉kabala꞉mene.’
ACT 2:32 Ba꞉ hibila, Da꞉ibiditi ba꞉moe tabo Kelisokono komoma꞉ miya꞉tiya꞉, iyo, ba꞉moe Kelisoko ba꞉ Ya꞉sutila, Godote ebe hoe ipuwane dadipati ale aeno baidinomamo ebe ba꞉bo umima꞉,
ACT 2:33 ba꞉gala ba꞉moe Ya꞉suku Godote hununomamo adipatete ebeno tu hapuamo dito adipi. Ba꞉bema꞉ numa꞉la꞉, Nabiwi Godote a hibima꞉ midipa꞉tamo ikaa꞉mema꞉ hibilo da꞉goiya꞉, ba꞉be kalakala komote ka꞉lo ba꞉ uluhuku. Ba꞉ hibila, ebete Ya꞉sutamo Talona Gobogobo ya꞉lo ikami, ba꞉bema꞉ ebete ka꞉lo a hunamo ebeno helo ba꞉ a꞉hamina, iyo, la꞉eno galamo dulihutama ba꞉gala la꞉eno baida꞉mo dumitama ba꞉moe ba꞉be komola.
ACT 2:34 “Ba꞉bema꞉ la꞉ ba꞉moe komo hidamo nemalagidolala꞉, Ya꞉suti Godokono Hunu Habamo keba ka꞉na ka꞉nodolui, Da꞉ibiditi ba꞉ba ka꞉na kanodoluya꞉ha꞉. Ba꞉be mabuma꞉ Da꞉ibiditi Ya꞉sukunu komoma꞉ Godokono Bukamo eta tabo gala ba꞉ma ka꞉na kamiya꞉tiya꞉, ‘Kodawa Godote naeno Kodawa Kelisotamo na꞉goe, ‘Ama꞉ naeno tu hapuamo na꞉pemeda꞉,
ACT 2:35 ba꞉bene ama꞉go alaholohopi nale ibi amia꞉no nato a꞉puti bahima꞉ komidilima꞉nemo.’ ’
ACT 2:36 “Ba꞉bema꞉ la꞉ Isalaelanapi hiliyonomala꞉, wadiyala la꞉ iya꞉tawanomo niya꞉tawahala꞉, ba꞉moe Ya꞉suku la꞉le kehamo da꞉pihomotima, Godote ebe kapiya lawete aeno Kodawama꞉ ba꞉gala aeno Kelisoma꞉ a꞉midi!”
ACT 2:37 Ba꞉bene tabo ulihopa꞉te Pitakono taboeno komoma꞉ ko tepo temeteme ba lawita, ebe ba꞉gala komo oelamepi dubatamo na꞉ga꞉luya꞉, “Nana꞉la꞉, a bada komo na꞉kododima꞉?”
ACT 2:38 Pitate huiyatiya na꞉goiya꞉, “Wadiyala la꞉ la꞉eno tepo ipuwoeno ukui hiya꞉ma꞉ midiliti la꞉eno kuba ododili ipuwane nohobila꞉la꞉, ba꞉bema꞉ ale la꞉ Ya꞉su Kelisokono mahilamo beyamo kowadulatelema꞉na꞉ta. Ba꞉bene Kodawa Godote la꞉eno kuba egebolelamete ba adodolelame, ebete ebeno Gobogobo malemalelo la꞉tamo dito kopoemema꞉ne. Iyo, la꞉ ba꞉gala la꞉eno gugudi ba꞉gala hiya꞉hiya꞉ muhulu hopolo demedehona ba꞉bi tawakalubi atumu, la꞉ hiliyonomo ipuwalo ebete kebe tawakalubi ebetamo pelamema꞉ da꞉ka꞉lamina ebete iba꞉tamo ebeno Gobogoboeno helo kikalamema꞉ne, dopamo hibilo keba ka꞉na ka꞉goiya꞉ ba꞉ba ka꞉na.”
ACT 2:40 Ba꞉bene Pitate komo ba꞉makomako tabo hiliyonomo ba olamagi ibi ba꞉ma ka꞉na kiyahalamiya꞉, “Ba꞉moe hopolo kuba ododili ipuwalo da꞉wapata꞉lamena, la꞉le ba꞉bi tawakalubi ipuwane nikulihala꞉ la꞉eno ka꞉ka꞉ mula꞉ komo kolawema꞉!”
ACT 2:41 Ba꞉ba tetelo puya꞉te ebeno tabo dulihuya꞉ komo ibi hiliyonomate hibima꞉ miditi, ba꞉bene Ya꞉sukunu oelamepi dubate ibi beyamo ba꞉bo wadulateliya꞉. Ba꞉ hibila, ba꞉be hegela kapiyalo 3,000 tawakaluba꞉te hibima꞉ midi ipuwalo iba꞉go kapiyama꞉ eda꞉huya꞉.
ACT 2:42 Ba꞉bene komo hegela hiliyonomolo hibima꞉ midipa꞉te ibino kapiyuimi komo kamiya꞉panakuiha꞉, iyo, iba꞉te kapimilo oelamepi dubuino iya꞉tulame komo ulihonakuya꞉ ba꞉gala Ya꞉suku emalagidolo baa꞉ nahanakui ba꞉gala Godotamo toetoe tabo akolamagiminakuya꞉.
ACT 2:43 Ba꞉ hibila, Godote oelamepi dubu ipuwado hiliyonomo hanohano komo ba꞉gala iwawi komo dododilinakui, ba꞉bema꞉ hiliyonomo tawakaluba꞉godolo ko tolenomote itanami.
ACT 2:44 Ba꞉gala eta komo, hibima꞉ midipa꞉te ukui kapiyama꞉ ba eda꞉ha, ibino ilina hiliyonomo kapiyama꞉ midiliti, ba꞉bi ilinamo etate eta owalubinakui, etate eta akowalubinakui, ba꞉ba ka꞉na ewagelenama꞉.
ACT 2:45 Ba꞉bema꞉ iba꞉godolo modoboha꞉ komokomo dikulinakui, ba꞉ba tetelo etate ebeno pali haka kolowamima꞉ nimidinakui, etate ebeno eta ilina kolowamima꞉ akanimidinakui, iba꞉te ba꞉be gabodo mani duwatehonakui awaepi ba꞉bo owalubilinakuya꞉.
ACT 2:46 Ba꞉gala hibima꞉ midipa꞉te komo hiya꞉hiya꞉ hegela hiliyonomolo Godoko Adikumino Hiya꞉ Genamamo pekapiyuiminakuya꞉, ba꞉bene iba꞉te gala ibino genamamo da꞉katolamenakui, hegehege kapiyuimi ipuwalo ibino baa꞉ ba alabaha kalakala konomago ba꞉bo nahanakuya꞉.
ACT 2:47 Ba꞉ hibila, iba꞉te ba꞉moi ododili komodo Godokono mahilo hunamo ba adipatena, komo hiliyonomo tawakaluba꞉te ibino komoma꞉ hidohido tabo ba꞉bo ga꞉lanakuya꞉. Ba꞉ba tetelo Godote pui dopamo da꞉ka꞉lamiholiya꞉, ba꞉bi tawakaluba꞉te ibino ka꞉ka꞉ mula꞉ komo ebegodone kolawema꞉, iba꞉te komo hiya꞉hiya꞉ hegelalo hibima꞉ midipa꞉tamo da꞉pelamenakui, hibima꞉ midipino kuitititi hunamo ba꞉bema꞉ nodolonami.
ACT 3:1 Eta hegelalo hegelate nanekela꞉mo da꞉nihitigatepaniya꞉, ba꞉be tete ba꞉ 3 koloko tetela, Pitako ba꞉gala Yoneko iba꞉te Godoko Adikumino Hiya꞉ Genamamo Godotamo toetoe tabo ga꞉lanama꞉ toniya꞉.
ACT 3:2 Ba꞉ba tetelo eta dubuti ba꞉bo na꞉lutiya꞉, ebete menokoeno tepo ipuwane nato a꞉ta꞉buta꞉midaleme ba꞉ba ka꞉na pehawakaluya꞉. Ba꞉be mabuma꞉ ebeno mabuluba꞉te komo hiliyonomo tetelo ebe Godokono Genamamo agahenakuya꞉, ebete kala imi tetelo ditana ba꞉be Hido Holoholo mahilagoeno gigiholo pemedete tawakalubi manima꞉ ba꞉bo kopetoelameholenakoma꞉.
ACT 3:3 Ba꞉bene Pitako Yoneko iba꞉te Godoko Adikumino Hiya꞉ Genama guamo kona꞉pa꞉la꞉nama꞉ ba tona ba꞉moe dubuti ibi manima꞉ ba꞉bo toelameholeniya꞉.
ACT 3:4 Huiyatiya ibi netewapa꞉te ebe baidi kodakodalo ba umihona, Pitate ebe na꞉goemeniya꞉, “Ama꞉ a nua꞉ma꞉.”
ACT 3:5 Ba꞉bene ba꞉be dubuti ibi netewapi ba ulamena nemalagidoloniya꞉, “Iba꞉te natamo mani kikanamema꞉na꞉.”
ACT 3:6 Ba꞉ba tetelo Pitate ebetamo na꞉goeniya꞉, “Nagodolo eta mani kitanaha꞉, huiyatiya nagodolo eta komo bitana ama꞉tamo ikamema꞉. Nale ama꞉ Ya꞉su Kelisoko Nasaletanapino mahilamo goememata, wadiyala ama꞉ mahigate na꞉pata꞉!”
ACT 3:7 Ba꞉bene Pitate ba꞉be dubu tu hapu kokotone lawenate dadipateniya꞉, ebeno natote ba꞉ba tetenomolo hidohidohomeniya꞉.
ACT 3:8 Ba꞉bema꞉ ebete hunamo epateganate pata꞉ ba꞉bo tupuiminiya꞉, ba꞉bene ebete epategahago ba꞉gala Godoko milimihago ebe Adikumino Hiya꞉ Genamoeno kala ipuwamo Pitako Yoneko iba꞉go ba꞉ dito na꞉pa꞉la꞉haniya꞉.
ACT 3:9 Ba꞉bene ebete ba꞉bamo da꞉na꞉pa꞉ganiya꞉, hiliyonomo tawakaluba꞉te ebe uminate na꞉ga꞉laniya꞉, “A꞉iye! Ba꞉moe ba꞉ nato a꞉ta꞉buta꞉midaleme dubula, ebete hiliyonomo tetelo Hido Holoholo mahilagoeno gigiholo emedete manima꞉ toetoitanakui!” Ba꞉ hibila, iba꞉te ba꞉be atu dubu buminiya꞉, ebete nato hidamo a꞉putihonalo ba꞉gala ebete Godoko milimihago da꞉pata꞉niya꞉, ba꞉bema꞉ iba꞉te koamo ba hanohanohona nipo emalagidoloniya꞉ ba꞉moe komote ebetamo keba ka꞉na kuluhuku.
ACT 3:11 Godoko Adikumino Genamalo eta pana nitanami, tawakaluba꞉te ba꞉be pana Solomonokono mahilamo ka꞉minakuya꞉, ba꞉bene Pitako Yoneko iba꞉te ba꞉bamo nutihonate, ba꞉be dubuti ibino kokoto ba uwatelelamena hiliyonomo tawakaluba꞉te ko hanohano komago pipulila꞉haniya꞉.
ACT 3:12 Ba꞉bene Pitate tawakalubino komo uminate iba꞉tamo tabo nolamaginiya꞉, “La꞉ Isalaelanapi tawakaluba꞉la꞉, la꞉ bada mabuma꞉ a ua꞉melo konomamo da꞉hanohanohonama? La꞉ bada komo kemalagidolonama? Ale ha꞉kiya aeno heloamo ba꞉gala aeno tuputupu emede komamo ba꞉moe dubu na꞉hiduimimo ka꞉ga꞉lonama?
ACT 3:13 Ao, ale kododiha꞉! Huiyatiya A꞉ibalahamako, Aisa꞉keko, Ya꞉ikoboko, ba꞉gala aeno komo iniwala꞉te dadikuminakui, ba꞉be Godote ba꞉moe komo ha꞉kiya ododi ebeno Okodawa Ya꞉suku kawagaminanama꞉. Numa꞉la꞉, la꞉le ebe anakapumima꞉ Paeletetamo da꞉magatuima, ba꞉ba tetelo Paeletete la꞉eno kokoto ipuwane ebe dito koemema꞉ ubi dihati, huiyatiya la꞉ ebeno holoholo hapulu Ya꞉suku gunima꞉mo ba ihiti ubiha꞉ma꞉ ga꞉luimata.
ACT 3:14 Iyo, ba꞉moe gabodo la꞉le hido tuputupu lumagitamo ubiha꞉ komo ba hawakalimi, huiyatiya Paeleteko na꞉ga꞉lamimata ebete tawakalubi anakapulamedawa dubu Balabasiko ebeno kuba huiyane dito koemema꞉.
ACT 3:15 Ba꞉bema꞉ tawakaluba꞉tamo ka꞉ka꞉ dikalamena la꞉le ba꞉be Kodawa anakapumimata, huiyatiya Godote ebe hoe ipuwane ka꞉ka꞉mo gala a꞉kadipati, iyo, ba꞉moe komo ale aeno baida꞉mo dumima꞉ a ba꞉bema꞉ ga꞉lanama꞉.
ACT 3:16 Ba꞉bema꞉ hibila, ba꞉moe dubu la꞉le duminama ebeno nato Ya꞉sukunu helo mahilote a꞉hiduilameleme. La꞉ iya꞉tawahanomola ebete dopamo kebe temeteme ipuwalo kemedenami, huiyatiya Ya꞉sugodone da꞉pena ba꞉be hibima꞉ midi komodo ebete la꞉ hiliyonomoeno holoholo hapulu a꞉hido.
ACT 3:17 “Ba꞉bema꞉ naeno ekaka꞉la꞉, na iya꞉tawala la꞉ ba꞉gala la꞉eno watowatopa꞉te Ya꞉sukunu hibi komo iya꞉tawahaheno ebetamo hiya꞉hiya꞉ kuba komo ba꞉bo ododilimata.
ACT 3:18 Huiyatiya ba꞉be komoma꞉ ukui bilibilima꞉ akeda꞉hala꞉, mabu ya꞉lo tetelo Godote ebeno ukui hawakalimipi hiliyonomagodone da꞉hawakalimiya꞉, ba꞉be taboeno hibi komote la꞉eno ododili komodo puluhukui, iyo, ba꞉ma ka꞉na ebeno Oemedawa Kelisote la꞉ tawakalubino kokotone koko temeteme uwati.
ACT 3:19 Ba꞉bema꞉ wadiyala la꞉ la꞉eno tepo ipuwoeno ukui hiya꞉ma꞉ midiliti Godotamo nohobila꞉la꞉, ba꞉bene ebete la꞉eno kuba egebolelamete kadodoholelamema꞉na꞉ta.
ACT 3:20 Ba꞉moe gabodo komo hiliyonomo tetelo la꞉eno tepo ipuwa heluimi komote Kodawa Godokono holoholo hapuni ba꞉penakomene, ba꞉gala Godote la꞉ mabuma꞉ Ya꞉suku gala kakapoemema꞉ne, iyo, Godote ya꞉lo tetenomolo ebe ebeno Oemedawa Kelisoma꞉ ka꞉miya꞉.
ACT 3:21 Ba꞉ hibila, ebete Godokono Hunu Habalo nemedenamene ebeno pe kuitita꞉mo, huiyatiya ebete da꞉pemene ba꞉ba tetelo ebete hiliyonomo pakalapakala komo ba pehawaminale uliuli komo kopemiya꞉tema꞉ne, Godote ebeno talona ukui hawakalimipi ipuwado dopamo keba ka꞉na ka꞉hawakalimiya꞉ ba꞉ba ka꞉na.
ACT 3:22 “Numa꞉la꞉, Mosesete Kelisokono komoma꞉ dopamo ba꞉ma ka꞉na goiya꞉, ‘La꞉eno Kodawa Godote la꞉ kopowalubilima꞉ na keba ka꞉na ka꞉poenamiya꞉, ebete ba꞉ba ka꞉na ebeno eta Hiya꞉nomo Ukui Hawakalimidawa la꞉ ipuwane kadipatema꞉ne. Ba꞉bema꞉ ebete kebe komokomo la꞉ diya꞉tulamemena꞉, wadiyala la꞉ ba꞉bi hiliyonomo tabamo na꞉papamila꞉haliya꞉la꞉,
ACT 3:23 mabu la꞉ ipuwalo kebe lumagiti ebeno tabo ulihino, Godote ebe hibima꞉ midipi tawakaluba꞉godone ebe tama꞉mo ba a꞉mida ba꞉bo kokubahimima꞉ne.’”
ACT 3:24 Ba꞉bene Pitate gala na꞉kagoeniya꞉, “Mosesekono gala hapuni komo Godokono ukui hawakalimipi hiliyonomate ibino tabo olamagimi ipuwalo ba꞉ma teteno komokomo behawakalilamenakuya꞉, Sa꞉miyolokono tetene tupuimiti ba꞉ma teta꞉mo puluhuku.
ACT 3:25 Ba꞉bema꞉ numa꞉la꞉, Godote la꞉eno iniwala꞉tamo kebe nopo hibilo da꞉tamotiya꞉, ba꞉gala ebete ebeno ukui hawakalimipi ipuwado kebe hidohido komo la꞉ galanepi mabuma꞉ kododilima꞉ dolamaginakui, la꞉ ba꞉ma tetelo ba꞉bi komo hiliyonomo kuwatema꞉nemata. Iyo, Godote la꞉eno eta iniwa A꞉ibalahamatamo ba꞉ma ka꞉na olamagiya꞉, ‘Nale amia꞉no galanedawagodolo ba꞉moe hopo konomolo demedehona ba꞉bi tawakalubi kapiyuimi hiliyonomo hidonomamo bowalubilinakomo.’
ACT 3:26 Ba꞉moe ba꞉be mabuma꞉ Godote ebeno Okodawa Ya꞉suku adipatete la꞉ Yu tawakaluba꞉tamo dopamo poemiya꞉, iyo, ebe ubila Ya꞉suti la꞉eno koko kuba ododili ipuwane la꞉ ba ohoba꞉midale hidonomamo kowalubilinama꞉.”
ACT 4:1 Ba꞉bene Yonete ebe ba owalubina Pitate tabo olamagi ipuwalo gapogapo hapuamo da꞉nuluhukuniya꞉, ba꞉ba tetelo Godotamo hawa꞉goeno ikamehopi, ba꞉gala Godoko Adikumino Genama lawamepino watodawa, ba꞉gala komo Sa꞉diyusi kapiyuimipi, ba꞉bi koko dubate ibi kopeduhilamenama꞉ ba꞉bo pelameniya꞉.
ACT 4:2 Ba꞉ hibila, iba꞉te Pitako Yoneko iba꞉tamo konomamo maubahaleniya꞉, mabu ba꞉bi oelamepi dubu netewapa꞉te tawakalubi ba꞉ma ka꞉na iya꞉tulameniya꞉, Godote Ya꞉suku hoene ka꞉ka꞉mo adipatiya꞉.
ACT 4:3 Ba꞉moe mabuma꞉ ba꞉bi koko dubate Pitako ba꞉gala Yoneko uwatenate du genama guamo dito nimiya꞉teniya꞉, mabu ba꞉be tete ba꞉ na꞉gapogapohoniya꞉, ba꞉gala ibi ubila eta hegela powaloholo ibino komo hidamo kanagiya꞉midalamema꞉.
ACT 4:4 Huiyatiya puya꞉te Pitakono tabo dulihoniya꞉ ibi ipuwalo komo hiliyonomate hibima꞉ a꞉midiniya꞉, ba꞉ba tetelo hibima꞉ midipino kuititi ba꞉ 5,000 tawakalubima꞉ eda꞉niya꞉.
ACT 4:5 Ba꞉bene eta hegelalo Yu watowatopi, ba꞉gala Godokono Tutumu iya꞉tulamepi, ba꞉gala Yunapino komo koko dubu, ibi hiliyonomate Yelusalema ko habamo pelamete ba꞉bo pekapiyuya꞉.
ACT 4:6 Ba꞉ba tetelo ibi ipuwalo ba꞉moi koko dubate na꞉pola꞉nuya꞉ — A꞉nasiko ebe Godotamo hawa꞉goeno ikamehopino Hununomo Watodawala, ba꞉gala Kayapasiko, Yoneko, A꞉lesandako, ba꞉gala komo A꞉nasikono badininipala dubu gugudi.
ACT 4:7 Ba꞉bene iba꞉te Pitako ba꞉gala Yoneko ibino dopo hapuamo magahelete ibi ba꞉bo alateda꞉liya꞉, “La꞉le dutu gapogapolo ba꞉moe dubu da꞉hiduiminima, kebako heloamo ba꞉gala pokono mahilamo ka꞉hiduimionima?”
ACT 4:8 Ba꞉bema꞉ Godokono Gobogoboeno helote Pitakono tepo ipuwa da꞉tabuya꞉, ebete ibino tabo ba huiya na꞉goiya꞉, “Naeno tawakalubino watowatopi ba꞉gala koko dubala꞉, la꞉ nulia꞉la꞉.
ACT 4:9 Ba꞉moe nato a꞉ta꞉buta꞉midaleme dubuti da꞉hidoni, la꞉le ebeno komo umiti a ba꞉bema꞉ kalatediutama hido komote ebetamo keba ka꞉na kuluhukuni?
ACT 4:10 Aeno watowatopa꞉la꞉, wadiyala la꞉ ba꞉gala Isalaela hopo tawakalubi hiliyonomo atumu, la꞉ hiliyonomate ba꞉moe tabo hidamo niya꞉tawahala꞉. Ka꞉lo la꞉eno holoholo hapulu hidonomamo da꞉la꞉na, ba꞉moe dubuti Ya꞉su Kelisoko Nasaletenapino heloamo a꞉hidoni. Numa꞉la꞉, ba꞉moe Ya꞉suku ba꞉ la꞉le keha pihigamo da꞉pihomotima ba꞉be dawala, huiyatiya Godote hoene ka꞉ka꞉mo ebe gala a꞉kadipati.
ACT 4:11 Ba꞉ hibila, Godokono Bukate ebeno komoma꞉ ba꞉ma ka꞉na goena, ‘La꞉ genama etepa꞉te tama꞉mo dihatima, ba꞉be hototote huiyatiya genamoeno helo mabuma꞉ eda꞉na.’
ACT 4:12 Ba꞉bema꞉ numa꞉la꞉, Ya꞉suku kapiyate modobola tawakalubino ka꞉ka꞉ mula꞉lelamema꞉, ba꞉moe hopo konomolo eta lumagi puliyala. Iyo, Godote Ya꞉sukunu helo mahilo kapiya atamo ikaa꞉mi, ba꞉bema꞉ wadiyala ale ka꞉ka꞉ mula꞉ komo ebegodone kolawema꞉nema꞉.”
ACT 4:13 Ba꞉bene Yu watowatopa꞉te iya꞉tawahuya꞉ Pitako ba꞉gala Yoneko ibino tabo ga꞉la komo hidonomola, tole komo puliyala, huiyatiya iba꞉te sikulamo katuya꞉ha꞉. Ba꞉moe mabuma꞉ iba꞉te hanohanoholo ibino tepo ipuwalo na꞉ga꞉luya꞉, “Hibila, ba꞉moi netewapa꞉te Ya꞉sukuba꞉ wapata꞉nama꞉, ba꞉bema꞉ diyala, iba꞉te ebegodone ba꞉moe hido iya꞉tawa kuda꞉ a꞉lawiya꞉.”
ACT 4:14 Ba꞉ba tetelo dopamo nato a꞉ta꞉buta꞉midaleme dubuti demedenami, ebete Pitako ba꞉gala Yoneko ibi tamelo da꞉la꞉nuya꞉ Yu watowatopa꞉te ebe umiya꞉, ba꞉bene iba꞉te ba꞉be dubuino hido komo umilo kuba tabo ga꞉lama꞉ gabo nipo ohowadiya꞉.
ACT 4:15 Ba꞉bema꞉ Yu watowatopa꞉te ibi netewa-kapiya na꞉kiyalamiya꞉ iba꞉te ba꞉be kapiyuimi habane kikulima꞉, ba꞉bene iba꞉te iba꞉godone dikuliya꞉ Yu watowatopa꞉te ha꞉kiya tabo ba꞉ma ka꞉na ga꞉luya꞉,
ACT 4:16 “A Pitako Yoneko iba꞉tamo bada komo na꞉kododima꞉? Iba꞉te kebe hanohano komo kododini Yelusalemanapi hiliyonomate ba꞉be komoeno hibi komo iya꞉tawahuya꞉, ba꞉bema꞉ ba꞉moe komoma꞉ a modoboha꞉ ha꞉da tabo ga꞉lama꞉.
ACT 4:17 Huiyatiya a ubihinola ibino mulu ododi komote ba꞉moe Yelusalemane komo hiya꞉hiya꞉ tawakaluba꞉tamo to, ba꞉bema꞉ wadiyala a ibi kiyahalamete talona kihatelamema꞉nema꞉ iba꞉te Ya꞉sukunu mahilamo gala a꞉kaga꞉lanakamena꞉.”
ACT 4:18 Ba꞉bema꞉ iba꞉te Pitako ba꞉gala Yoneko gala iba꞉tamo kaka꞉lamiti ibi ba꞉ma ka꞉na kiyahalamiya꞉, “La꞉ tawakalubi iya꞉tulamelo Ya꞉sukunu mahilamo tabo gala akaga꞉lanakala꞉!”
ACT 4:19 Ba꞉bene iba꞉te ibino tabo ba huiya na꞉ga꞉luya꞉, “Wadiyala la꞉ ba꞉moe komo ha꞉kiya nemalagidolala꞉. Ale la꞉eno tabamo ba꞉ka꞉papamila꞉ma꞉ o Godokono tabamola꞉ka? Godokono ubi keba ka꞉nala꞉ka꞉?
ACT 4:20 Ba꞉bema꞉ numa꞉la꞉, ale kebe komokomo kulihuima꞉ ba꞉gala kebe komokomo kulamima꞉, a ba꞉bi komoma꞉ tabo olamagimi a꞉kamiya꞉pama꞉.”
ACT 4:21 Ba꞉ba tetelo Yu watowatopa꞉te ubila kuba huiya iba꞉tamo kikalamema꞉, huiyatiya iba꞉te gabo nipo ohowadiya꞉ mabu hiliyonomo tawakaluba꞉te Pitako ba꞉gala Yoneko ibino hido ododi komo ya꞉lo ulihuya꞉. Iyo, iba꞉te Pitako Yoneko mabuma꞉ Godoko na꞉milimihutiya꞉, mabu hibila, ebete ibi ipuwado da꞉hiduiminiya꞉ ba꞉be nato a꞉ta꞉buta꞉midaleme dubuti 40 gogolo ba꞉be temetema꞉go emedenami. Ba꞉bene watowatopa꞉te ba꞉be komo ba iya꞉tawaha, iba꞉te eta komo ododihino Pitako ba꞉gala Yoneko ibi gala kakiyahalamete ibino genamamo ba꞉ dito oelamiya꞉.
ACT 4:23 Ba꞉bema꞉ Yu watowatopa꞉te ibi dito doelamiya꞉, ba꞉ba tetelo Pitako Yoneko ibino hibima꞉ midipi mabuluba꞉tamo tote ibi ba꞉bo nikiyalamiya꞉, Godotamo hawa꞉goeno ikamehopino hununomo watowatopi ba꞉gala komo koko dubate iba꞉tamo da꞉ga꞉luya꞉ ba꞉be komo.
ACT 4:24 Ba꞉bene hibima꞉ midipa꞉te ba꞉be komo uliti Godotamo ibino tabo madodo ba adipate kapimilo ba꞉ma ka꞉na ga꞉luya꞉, “Aeno Helonomo Kodawa, ama꞉le ha꞉kiya Hunu Haba ba꞉gala hopo haba konomo ba꞉gala hiya꞉hiya꞉ kehaha꞉ kolomo ba꞉gala ilina hiliyonomo ododiliya꞉ta.
ACT 4:25 Ba꞉ hibila, amia꞉no okodawa Da꞉ibidiko ba꞉ aeno iniwa nabiwila, ama꞉le ebeno tabone amia꞉no Talona Gobogoboeno heloamo ba꞉ma ka꞉na olamagiya꞉ta, ‘Mabu keka꞉ hibima꞉ midiha꞉pa꞉te Godotamo koamo da꞉maubahalitiya꞉? Ba꞉gala hopo tawakaluba꞉te ebe kubahimima꞉ nopo bada mabuma꞉ ka꞉tamotiya꞉?
ACT 4:26 Iyo, ba꞉moe hopolo koko gawadubate ebetamo kuba ododima꞉ la꞉mota꞉hanuya꞉, ba꞉gala watowatopi dubate a꞉kapiyuimiya꞉, iba꞉te Kodawa Godoko ba꞉gala ebeno Oemedawa Kelisoko iba꞉tamo alaholo komo kododima꞉.’”
ACT 4:27 Ba꞉bene hibima꞉ midipa꞉te toetoe tabo olamagimi ipuwalo gala na꞉kaga꞉luya꞉, “O Godo, hibila, amia꞉no Hido-talona Okodawa Ya꞉suku ama꞉le amia꞉no Oemedawa Kelisoma꞉ ya꞉lo a꞉midiya꞉ta, huiyatiya Ko Gawadubu Helodiko ba꞉gala Poniyase Paeleteko, iba꞉te ba꞉moe Yelusalema habalo komo hibima꞉ midiha꞉pi ba꞉gala Isalaela tawakaluba꞉go a꞉kapiyuimiya꞉ eba꞉go kalaholohoma꞉.
ACT 4:28 Iyo, ba꞉ hibila, ama꞉le ya꞉lo tetelo amia꞉no heloamo ba꞉gala ukuia꞉mo nopo da꞉tamotiya꞉la, ba꞉be nopoeno hibi komote kuluhukuma꞉ iba꞉te kapiyuimiti alaholo komo Ya꞉sutamo ba꞉bo ododiya꞉.
ACT 4:29 Ba꞉gala ka꞉lo, Kodawa, iba꞉te atumu kuba atamo ododima꞉ da꞉kakiyahuta, ama꞉ nulitata, ba꞉bema꞉ wadiyala ama꞉le a amia꞉no okopi na꞉heluia꞉ma꞉ ale amia꞉no tabo toleheno kolamagimima꞉.
ACT 4:30 Ba꞉gala wadiyala ama꞉le amia꞉no kokoto hogaminate temetemete dulamena ba꞉bi tawakalubi na꞉hiduilamiya꞉, iyo, amia꞉no Talona Okodawa Ya꞉sukunu mahilamo koko hanohano komo ba꞉gala iwawi komo a ipuwado nododiliya꞉.”
ACT 4:31 Ba꞉ba tetelo ibino toetoe tabo olamagimi komote da꞉wibuya꞉, iba꞉te da꞉pola꞉nuya꞉ ba꞉be genamate ba꞉bo aleguya꞉, ba꞉bene Godokono Gobogobote ibino tepo ipuwa ba tabuilame, iba꞉te toleheno Godokono tabo heloamo olamagimi ba꞉bo tupuimiya꞉.
ACT 4:32 Ba꞉ba tetelo hibima꞉ midipi hiliyonomoeno tepo ipuwoeno komo ba꞉gala ukui komo kapiyanomoma꞉ eda꞉halamiya꞉, ba꞉bema꞉ ibi ipuwalo etate ebeno ilina ebenonomoma꞉ kagoenakuiha꞉, huiyatiya ibino ilina hiliyonomo kapiyama꞉ midiliti, ba꞉bi ilinamo etate eta owalubinakui, etate eta akowalubinakui, ba꞉ba ka꞉na ewagelenama꞉.
ACT 4:33 Ba꞉bene Kodawa Ya꞉suti hoe ipuwane da꞉mahiguya꞉, oelamepi dubate ba꞉be tabo helo konomamo ba olamagimina Godokono malemale komote ibi ipuwado oko helonomamo ba꞉bo owatinami.
ACT 4:34 Ba꞉bema꞉ hibima꞉ midipi ipuwalo eta lumagigodolo awae komote kitanamiha꞉, mabu puya꞉godolo ibino genama ba꞉gala pali haka koko da꞉pola꞉lama꞉nami, iba꞉te komo kolowamima꞉ ba nimidili mani da꞉nuwatenakui,
ACT 4:35 ba꞉bene iba꞉te oelamepi dubatamo malemalelo ba꞉bo pikalamenakuya꞉, iba꞉te ba꞉bi mani hidonomamo ba ulamena awaepa꞉tamo ba꞉bo kikalameholema꞉.
ACT 4:36 Ba꞉ba tetelo eta Libai gu dawa Yausepeko Saipalase hoponapila, oelamepi dubate ebetamo eta Banabasi mahilo bikamiya꞉, ba꞉be mahiloeno ipuwa nitana ‘Tawakalubino Tepo Ipuwa Gelebadilame Dawala.’
ACT 4:37 Ba꞉bene ba꞉be dubuti ebeno eta pali haka ba꞉ ba꞉ba ka꞉na kolowamima꞉ atumu kanimiditi mani uwatete oelamepi dubatamo malemalelo dito pikalamiya꞉.
ACT 5:1 Ba꞉ba tetelo eta dubu ebeno mahilo A꞉nanayasitila, ebete ebeno kamena Sapailakoba꞉ ibino eta pali haka kolowamima꞉ nimiditi,
ACT 5:2 ba꞉bene A꞉nanayasiti mani uwatete komo ba pugumuili komo wadahete oelamepi dubatamo dito pikalamiya꞉. Ba꞉ hibila, ebete dododiya꞉ ba꞉be komo ebeno kamenate iya꞉tawuya꞉.
ACT 5:3 Ba꞉bema꞉ Pitate huiyatiya na꞉goiya꞉, “A꞉nanayasi, bada mabuma꞉ ama꞉ gigiho Saitanatamo da꞉hiya꞉midaka? Numa꞉, ebete amia꞉no tepo ipuwamo a꞉pa꞉gate ama꞉ da꞉tabuima꞉ka, ba꞉ba tetelo ama꞉le pali haka kolowami ipuwalo duwata꞉ka ba꞉bi mani komo ba pugumuili Godokono Gobogobo ha꞉da ba꞉bo pamihoma꞉kata.
ACT 5:4 Ba꞉be pali haka ama꞉le kolowamiha꞉ tetelo amia꞉nonomoma꞉ eda꞉nami, ba꞉gala ama꞉le ba꞉be haka ba kolowami duwata꞉ka ba꞉bi mani ba꞉ amia꞉nonomola ama꞉le ha꞉kiya amia꞉no ubi komokomo kododilima꞉. Ba꞉bene ama꞉le amia꞉no tepo ipuwoeno kuba ukui lawete ba꞉moe komo badama꞉ kododa꞉wa? Ba꞉ hibila, ama꞉le ba꞉moe hopo lumagi kamihomeha꞉, Godoko bamihoma꞉ta!”
ACT 5:5 Ba꞉bema꞉ A꞉nanayasiti ba꞉be tabo uliti hopamo gate hoenomo ba꞉bo hoiya꞉, ba꞉ba tetelo ba꞉moe komo dulihuya꞉ ibi hiliyonomate konomamo toletolehutiya꞉.
ACT 5:6 Ba꞉bene uli ape dubate pelamete ebeno ape kalikamo pa꞉wa꞉titi ba꞉bo agatuya꞉ bobamo konihatema꞉.
ACT 5:7 Ba꞉bene hegelate nanekela꞉mo dewegelegatepuya꞉, ba꞉ba tetelo A꞉nanayasikono kamenate na꞉piya꞉, huiyatiya ebeno awitamo duluhukuya꞉, ebete ba꞉be komo iya꞉tawaheno Pitate da꞉lutiya꞉ ba꞉be genamamo dito pa꞉pa꞉guya꞉.
ACT 5:8 Ba꞉bene Pitate ebe nalatediya꞉, “Ama꞉ na na꞉kiyanama꞉, la꞉ pali haka kolowamima꞉ da꞉nimida꞉kama ba꞉moi maninomo bekuwata꞉wakama?” Ebete na꞉huiyuya꞉, “Iyo, hibila, ba꞉moe ba꞉be huiyanomola.”
ACT 5:9 Pitate huiyatiya ebetamo na꞉goiya꞉, “La꞉ netewapi la꞉eno ukui badama꞉ ka꞉kapiyuima꞉wakama Kodawoeno Gobogobo ha꞉da kamihomema꞉? Ama꞉ nulia꞉, amia꞉no awi bobamo da꞉nihata꞉ ba꞉bi uli ape dubate gigiho tetedo ba꞉pelamenapa꞉. Iba꞉te amia꞉no hoe ape atumu bobamo kakagatama꞉na꞉!”
ACT 5:10 Ba꞉ba tetenomolo ba꞉be kamenate Pitakono nato mabamo gate hoenomo ba꞉bo kahoiya꞉, ba꞉bene uli ape dubate pelamete ebeno hoe komo pumiti, iba꞉te ebeno ape agatate ebeno awi kebamo ka꞉nihatiya꞉ ba꞉be atu bobamo ebeno awi tama꞉mo dito kanihatiya꞉.
ACT 5:11 Ba꞉bema꞉ sose tawakalubi hiliyonomo ba꞉gala komo hibima꞉ midiha꞉pi atumu, ibi hiliyonomate ba꞉bi komo dulihuya꞉ konomamo ba꞉bo toletolehutiya꞉.
ACT 5:12 Ba꞉ba tetelo Ya꞉sukunu oelamepi dubate tawakalubi ipuwalo hiliyonomo hanohano komo ba꞉gala iwawi komo bododilinakuya꞉, ba꞉gala hibima꞉ midipi hiliyonomate a꞉kakapiyuiminakuya꞉ Godoko Adikumino Hiya꞉ Genamoeno eta panamo, ba꞉be pana Yu tawakaluba꞉te Solomonokono mahilamo ka꞉minakuya꞉.
ACT 5:13 Ba꞉gala ba꞉ba tetelo tawakalubi hiliyonomate hibima꞉ midipino komoma꞉ hidohido tabo da꞉ga꞉lanakui, huiyatiya komo iba꞉te ibino watowatopino mauba komo koamo emalagidololo iba꞉go kapiyuimima꞉ na꞉toletolehonakuya꞉.
ACT 5:14 Ba꞉bema꞉ Godokono Gobogobote tawakalubi ipuwalo oko ba owatina eta hegelalo komo dubu ba꞉gala kamenakamena magahelenakui, eta hegelalo komopi akamagahelenakui, komo ibi hiliyonomate ba꞉ba ka꞉na Kodawa Ya꞉suku hibima꞉ midilo ebe ta꞉matapa꞉go kapiyama꞉ ba꞉bo peda꞉huya꞉.
ACT 5:15 Ba꞉bene tawakaluba꞉te ibino temetema꞉gopi talatalago ba꞉gala tilago da꞉magahelenakui Pitakono peto gabo tama꞉mo ba꞉bo pewadila꞉latelenakuya꞉. Iba꞉te ba꞉ma ka꞉na emalagidolonakuya꞉, Pitate da꞉petomene ebeno gote ibi ba pemula꞉lenato temetema꞉gopa꞉te ba꞉bo kohidohidohoma꞉na꞉.
ACT 5:16 Ba꞉bema꞉ Yelusalema ko haba tamelo da꞉pola꞉nama꞉ ba꞉bi hegehege habahabane komo tawakalubi hiliyonomate ibino hiya꞉hiya꞉ temetema꞉gopi ba꞉gala kuba gobogobagopi da꞉magahelenakui, ibi hiliyonomate ba꞉bo pehidohidohonakuya꞉.
ACT 5:17 Ba꞉bene Godotamo hawa꞉goeno ikamehopino Hununomo Watodawa ba꞉gala ebeno hopopi, ibi ba꞉ Sa꞉diyusi kapiyuimipila, iba꞉te ko mauba komo betupuimiya꞉ mabu komo tawakalubi hiliyonomate Ya꞉sukunu oelamepi dubatamo koamo kalakalahutiya꞉.
ACT 5:18 Ba꞉bema꞉ iba꞉te oelamepi dubu uwatete du genamamo dito miya꞉tiya꞉,
ACT 5:19 huiyatiya ba꞉be dulu Kodawa Godokono nopodawate penate du genamoeno koko gigiho pa꞉hilamenate ibi uluhukulatelenate iba꞉tamo na꞉goeniya꞉,
ACT 5:20 “La꞉ tolamete Godoko Adikumino Genamalo nutitatate tawakaluba꞉tamo ba꞉moe uli emede komoeno hiliyonomo komokomoma꞉ tabo na꞉nolamagimiya꞉la꞉.”
ACT 5:21 Ba꞉bema꞉ oelamepi dubate ba꞉moe tabo ulinate, duiduiyanomolo Godoko Adikumino Hiya꞉ Genamamo nalehawaminate tawakalubi ba꞉bo niya꞉tulamitiya꞉. Ba꞉bene ba꞉be komo iya꞉tawahaheno Godotamo hawa꞉goeno ikamehopino Hununomo Watodawa ba꞉gala ebeno hopopi, iba꞉te komo Yunapino koko dubu ka꞉lamiti, ba꞉bene ba꞉bi Ka꞉nisolo dubu hiliyonomate da꞉pekapiyuimiya꞉ komo Godokono Genama lawamepi ba꞉bo noelamiya꞉ Ya꞉sukunu oelamepi dubu du genamane iba꞉tamo komagahelema꞉.
ACT 5:22 Huiyatiya iba꞉te du genamamo da꞉tolamiya꞉ oelamepi dubu du genama gulu nipo noholiya꞉, ba꞉bema꞉ iba꞉te dito kapelamiya꞉ Yunapi Ka꞉nisolo dubu kopikiyalamema꞉.
ACT 5:23 Iba꞉te tabo ba꞉ma ka꞉na pega꞉luya꞉, “Ale du genama gigiho kodakoduilame pola꞉nalo nulamema꞉, ba꞉gala genama lawamepi dubu atumu tamelo ba la꞉mota꞉hana ba꞉bo kanulamema꞉, huiyatiya gigiho da꞉na꞉hilamema꞉ ba꞉ba tetelo ale genama gulu eta lumagi kanumiha꞉!”
ACT 5:24 Ba꞉bene Godokono Genama lawamepino watodawa ba꞉gala Godotamo hawa꞉goeno ikamehopino watowatopi, iba꞉te ba꞉be tabo duliya꞉ ukui bilibilinomoma꞉ eda꞉huya꞉, mabu ba꞉be komote keba ka꞉na kuluhukuya꞉ iba꞉te nipo emalagidoluya꞉.
ACT 5:25 Ba꞉ba tetelo eta dubuti pete iba꞉tamo na꞉pegoiya꞉, “A꞉iye, nulia꞉la꞉! La꞉le du genamamo da꞉miya꞉tima, ba꞉bi dubate Godoko Adikumino Genamalo tawakalubi biya꞉tulamita!”
ACT 5:26 Ba꞉bene lawamepino watodawate ebeno hopopa꞉go Godoko Adikumino Genamamo tolamete Ya꞉sukunu oelamepi dubu ba꞉bo nadabuiliya꞉ Yunapi Ka꞉nisolo dubatamo komagatalema꞉. Iba꞉te huiyatiya ibi heloamo kanuwatiya꞉ha꞉ mabu iba꞉te toletoleholo ibino tepo ipuwalo na꞉ga꞉lutiya꞉, “Diyala, tawakalubi ipuwalo puya꞉te ba꞉moi dubatamo da꞉kalakalahana, ba꞉ba꞉te atamo koamo maubahalete a kanakapua꞉mema꞉ nakolamo mapea꞉medemena꞉.”
ACT 5:27 Ba꞉bene iba꞉te Ya꞉sukunu oelamepi dubu Ka꞉nisolo dubatamo da꞉magataliya꞉, iba꞉te ibino dopo hapulu ba la꞉mota꞉hana Godotamo hawa꞉goeno ikamehopino Hununomo Watodawate ibi na꞉goelamiya꞉,
ACT 5:28 “Ale la꞉ dopamo helonomamo a꞉kiyahalamia꞉ta la꞉ Ya꞉sukunu mahilamo akiya꞉tulamenakala꞉, huiyatiya la꞉le dododinama ba꞉be kuba numa꞉la꞉! La꞉ na꞉ga꞉lanamata a watowatopa꞉te Ya꞉suku kuba gabodo anakapumima꞉, ba꞉bene ba꞉moe la꞉eno iya꞉tulame komote hopo konomamo tote Yelusalema habanapi hiliyonomate ba꞉ ulihuya꞉!”
ACT 5:29 Ba꞉bene Pitako ba꞉gala komo oelamepi dubu, iba꞉te ebeno tabo ba huiya na꞉ga꞉luya꞉, “Ale Godoko kapiyatamo ba꞉papamila꞉hanakoma꞉, komopa꞉tamoha꞉!
ACT 5:30 Ba꞉ hibila, Ya꞉suku la꞉le keha pihigamo pihomotete ba꞉bo anakapumimata, huiyatiya aeno iniwala꞉te dadikuminakui ba꞉be Godote ebe hoene adipati,
ACT 5:31 ba꞉bene ebete ebe ebeno tu hapuamo adipatete tawakalubino Watodawama꞉ ba꞉gala Ka꞉ka꞉ Mula꞉lelamedawama꞉ ba꞉bo midi. Ba꞉moe ododi komodo Godote Isalaela tawakaluba꞉tamo hido tete bikalami, iba꞉te ibino ukui hiya꞉ma꞉ midiliti ebetamo ba ohobila꞉ ebete ibino kuba ododili komokomo ba꞉bo kegebolelamema꞉.
ACT 5:32 Mabu ale ba꞉moi komokomo aeno baida꞉mo dulamima꞉, ale ba꞉bema꞉ ga꞉lanama꞉ ba꞉gala a ipuwado Hido-talona Gobogobote atu komokomo bekahawakalilamena. Ba꞉ hibila, puya꞉te Godotamo da꞉papamila꞉hana, ebete ebeno Gobogoboeno helo iba꞉tamo nikalamena.”
ACT 5:33 Ba꞉bene Yunapi Ka꞉nisolo dubate ba꞉be komo uliti kubanomamo ba maubaha Ya꞉sukunu oelamepi dubu anakapulamema꞉ tabo ba꞉bo ga꞉luya꞉.
ACT 5:34 Huiyatiya ibi ipuwalo eta Pa꞉lisi kapiyuimidawa ebeno mahilo Gameliyelatela, ebe Godokono Tutumu Tabo iya꞉tulamedawa etala ba꞉gala tawakalubi hiliyonomate ebeno mulu komoma꞉ ebe nawagaminanama꞉. Ba꞉ba tetelo ebete mahigate tabo ba꞉ma ka꞉na goiya꞉, iba꞉te oelamepi dubu Ka꞉nisolo ipuwane uluhukulatelete tete nanekele tamelo kopola꞉nama꞉.
ACT 5:35 Ba꞉bene oelamepi dubate iba꞉godone dikuliya꞉, Gameliyelate Ka꞉nisolo dubatamo na꞉goiya꞉, “La꞉ Isalaela dubala꞉, ba꞉moi dubatamo eta kuba ododihino dopamo la꞉ hidamo nemalagidolala꞉.
ACT 5:36 Mabu la꞉ iya꞉tawahala, dopamo Tiyudasiko demedenami ebe ha꞉kiya ebe koma꞉ goenakui, ba꞉bene ebetamo komo 400 dubate kapiyuimiya꞉. Huiyatiya numa꞉la꞉, gabomanino alaholohopa꞉te ebe danakapumiya꞉ ebeno kapiyuimipa꞉te hiya꞉hiya꞉ ba alahutiho ebeno komote ba꞉bo wibuya꞉.
ACT 5:37 Ba꞉bene galane tetelo tawakaluba꞉te ibino mahilo gabomanino bukamo da꞉miya꞉tehuya꞉, ba꞉be atu gogolo eta Ga꞉lili hoponapi dubu Yudasiti ba꞉bo kuluhukuya꞉. Ebete komo tawakalubi hiliyonomo ebetamo ka꞉lamiti ba꞉ba ka꞉na ba ewagele, huiyatiya alaholohopa꞉te ebe atumu ba꞉bo kanakapumiya꞉, ba꞉bema꞉ ebeno kapiyuimipa꞉te atumu hiya꞉hiya꞉ dito kalahutihuya꞉.
ACT 5:38 Ba꞉bema꞉ numa꞉la꞉, ka꞉lo ale ba꞉moi dubuino komo danagilamelelamitama꞉, ibino komoma꞉ nale la꞉ begoelamemata, la꞉le iba꞉tamo eta komo akododa꞉la꞉. Ibi na꞉miya꞉pala꞉la꞉, mabu ibino tabo komo ba꞉gala oko komo ibi ha꞉kiya ibino heloamo dododilinaka ba꞉be komote ha꞉kiya kowiboma꞉ne,
ACT 5:39 huiyatiya ibino oko owati helote Godogodone da꞉pena, ba꞉bema꞉ la꞉godolo helo kitanaha꞉ ibi duhilamema꞉. La꞉ hidamo, la꞉ Godotamo alaholodemata!”
ACT 5:40 Ba꞉bene Yunapi Ka꞉nisolo dubate Gameliyelakono tabamo ba꞉ dito papamila꞉haliya꞉. Iba꞉te Ya꞉sukunu oelamepi dubu ibino dopo hapuamo ka꞉lamiti giya꞉pa꞉pa꞉mo a꞉na꞉miga꞉latiliti ibi ba꞉ma ka꞉na goelamiya꞉, “La꞉ Ya꞉sukunu mahilamo tawakaluba꞉tamo tabo gala akaga꞉lanakala꞉!” Ba꞉bene iba꞉te ibi ba꞉ dito noelamiya꞉.
ACT 5:41 Ba꞉ba tetelo oelamepi dubate Ka꞉nisolo haba miya꞉pate ko kalakalago ba ikuli ibi ipuwalo na꞉ga꞉luya꞉, “Hibila, Godote a ebeno hidohido ga꞉limapi gugudima꞉ ba ka꞉mi ebete ebeno ubi ba꞉bo ihate, aeno Ya꞉suku ta꞉mata mabuma꞉ komopa꞉te temeteme ba꞉gala hilopo atamo kikaa꞉mema꞉!”
ACT 5:42 Ba꞉bema꞉ hiliyonomo hegelalo iba꞉te Godoko Adikumino Genamalo ba꞉gala tawakalubino hiya꞉hiya꞉ genamalo oko owati ekelalameheno tawakalubi ba iya꞉tulame Ya꞉su Kelisokono Hido Tabo ba꞉bo olamagiminakuya꞉.
ACT 6:1 Ba꞉be atu gogolo Ya꞉suku ta꞉matapino kuitititi hunamo odolo ekelaheno ibi ipuwalo olowabeletihui komote ba꞉ma ka꞉na uluhukuya꞉. Guliki tabamo da꞉ga꞉lanakui ba꞉bi Yu tawakaluba꞉te ubiha꞉ tabo behawakalimiya꞉ hibi Yu tabamo da꞉ga꞉lanakui ba꞉bi Yudiya hoponapa꞉tamo, mabu komo hiliyonomo hegelalo baa꞉ alabahalame tetelo ibino hamolehamola꞉te hido owalubi kalawenakuiha꞉.
ACT 6:2 Ba꞉bema꞉ Ya꞉sukunu 12 oelamepi dubate komo ta꞉matapi hiliyonomo iba꞉tamo ka꞉lamiti ibi na꞉kiyalamiya꞉, “Ba꞉moe komo modoboha꞉, ale la꞉eno baa꞉ alabahalame komo ba tuputupuimi huiyatiya Godokono tabo olamagimi oko dito miya꞉pa.
ACT 6:3 Ba꞉bema꞉ ekaka꞉la꞉, la꞉ ipuwalo sa꞉ba꞉ni dubu nuwata꞉la꞉, tawakaluba꞉te pui tuputupupima꞉ ba꞉gala Godokono Gobogobamo tabotabohopima꞉ ba꞉gala mulupima꞉ da꞉ga꞉lanaka. Ba꞉bene ale baa꞉ alabahalame oko iba꞉tamo ba ikalame
ACT 6:4 a huiyatiya hiliyonomo tetelo ba꞉moi netewa koko komo bulamenakoma꞉, Godokoba꞉ tabo ga꞉la komo ba꞉gala ebeno tabo tawakaluba꞉tamo olamagimi komo.”
ACT 6:5 Ba꞉ba tetelo ba꞉be taboma꞉ hibima꞉ midipi hiliyonomate koamo kalakalahuya꞉, ba꞉bene iba꞉te dopamo Stibiniko belawiya꞉, ebeno hibima꞉ midi komo kodakodanomola ba꞉gala Godokono Gobogobo tabonomola. Ba꞉bene iba꞉te ba꞉moi komo dubu beka-uwatiya꞉ — Pilipiko, Palokolasiko, Nikanoko, Timonoko, Pamenaseko, ba꞉gala kuititidawa Nikolasiko, ba꞉moe Nikolasiko Yu lumagiha꞉ huiyatiya ebete dopamo A꞉ntiyoka ko habalo Yunapa꞉godone hibi Godokono komo duliya꞉, ba꞉ba tetelo ebete ebe adikumima꞉ iba꞉go kapiyama꞉ ba꞉bo pediya꞉.
ACT 6:6 Ba꞉bene hibima꞉ midipa꞉te ba꞉moi sa꞉ba꞉ni dubu oelamepi dubatamo da꞉magataliya꞉, iba꞉te ibino komoma꞉ Godotamo toetoe tabo ba olamagimi kokoto ba꞉bo emowatilameholiya꞉ ebeno helote iba꞉godolo kitanama꞉.
ACT 6:7 Ba꞉bema꞉ ba꞉moe gabodo Godokono tabote ba꞉be hopo konomodo pinuluhukuya꞉, ba꞉gala Yelusalema ko habalo Ya꞉suku ta꞉matapino kuitititi hunamo ba odolona kekelanamiha꞉. Ba꞉ba tetelo Godotamo hawa꞉goeno ikamehopi dubu ipuwalo komo hiliyonomate atumu Ya꞉suku hibima꞉ midi komo ba꞉bo lawiya꞉.
ACT 6:8 Ba꞉ hibila, hibima꞉ midipa꞉te oelamepi dubu kowalubilima꞉ duwatiya꞉, ba꞉bi dubu ipuwalo eta kapiya dubu Stibinikono komo ba꞉ma ka꞉nala, ebeno tepo ipuwalo Godokono malemale ba꞉gala helo konomote pola꞉nama꞉, ba꞉bema꞉ ebete tawakalubi ipuwalo koko hanohano komo ba꞉gala iwawi komo bododilinakui.
ACT 6:9 Ba꞉ba tetelo Yu tawakalubino baidi ibubulamehole genama eta nitanami, ebeno mahilo ba꞉ ‘Matuhulamehole Ipuwane Dikuliya꞉ Ba꞉bi Dubuino Kapiyuimila,’ ba꞉be kapiyuimi ipuwalo komo Sailiniya habanapila, komo A꞉lesandiya habanapila, komo Silisiya hoponapila, ba꞉gala komo A꞉isiya hoponapila, ibi hiliyonomate kapimilo emedehonama꞉. Ba꞉bene eta hegelalo komo ibino kapiyuimipa꞉te pelamete Stibiniko ba peduhimi eba꞉go olowabeletihui komo ba꞉bo pododiya꞉,
ACT 6:10 huiyatiya ibino helote Stibinikono heloago kapemodobuya꞉ha꞉ mabu Godokono Gobogobote ebetamo hidonomo mulu bikamiya꞉.
ACT 6:11 Ba꞉bema꞉ ba꞉bi dubate ibino modoboha꞉ komo umiti iba꞉te diya gabodo tolamete komo dubatamo mani ba nikalame ba꞉ma ka꞉na nikiyalamiya꞉, “La꞉ ba꞉mako ha꞉da tabo Stibinikono komoma꞉ na꞉nega꞉luya꞉la꞉, la꞉ ulimata ebete la꞉eno dopo hapulu kuba tabo dolamagi Mosesetamo ba꞉gala Godotamo.”
ACT 6:12 Ba꞉bene ba꞉bi ha꞉da amihopa꞉te tolamete ibino tabo ga꞉la ipuwalo komo Yu tawakalubi ba꞉gala ibino watowatopi ba꞉gala Godokono Tutumu iya꞉tulamepi, ibi hiliyonomatamo helo ba꞉bo nikalamiya꞉ Stibinitamo komaubahalema꞉. Ba꞉bema꞉ komo iba꞉te Stibiniko heloamo pelawete Yunapi Ka꞉nisolo dubatamo ba꞉bo magatuya꞉ ebeno komo konanagiya꞉midamema꞉.
ACT 6:13 Ba꞉ba tetelo iba꞉te komo dubu ba꞉bo magaheliya꞉ Ka꞉nisolo dubuino holoholo hapulu Stibinikono komoma꞉ ha꞉da tabo kopolamagimima꞉, ba꞉bene ba꞉bi tabo atapa꞉te pelamete tabo ba꞉ma ka꞉na pega꞉luya꞉, “Ba꞉moe dubuti Godoko Adikumino Talona Genamoeno komoma꞉ ba꞉gala Mosesete atamo dikaa꞉miya꞉ ba꞉bi Tutumu Taboeno komoma꞉ hiya꞉hiya꞉ kuba tabo olamagi kekelamenaha꞉.
ACT 6:14 Hibila, ale ebeno tabo ulima꞉, ebete ba꞉ma ka꞉na goi, ‘Ya꞉suku Nasaletenapi dubuti Godoko Adikumino Genama anabulimiti, ba꞉bene Mosesete aeno iniwala꞉tamo dikalamiya꞉ ebete ba꞉bi hidohido ododili komo kubahilamete hiya꞉ma꞉ komidilima꞉ne!’”
ACT 6:15 Ba꞉ba tetelo Yunapi Ka꞉nisolo kapiyuimi ipuwalo da꞉pola꞉nuya꞉, ba꞉bi dubu hiliyonomate ohobila꞉hate Stibiniko baidi kodakodalo ba umiho, huiyatiya Godokono nopodawoeno alo keba ka꞉nala꞉ka꞉ ebeno holoholote ba꞉ba ka꞉na a꞉la꞉minutiya꞉.
ACT 7:1 Ba꞉bene Godotamo hawa꞉goeno ikamehopino Hununomo Watodawate Stibiniko nalatediya꞉, “Ba꞉moe komo hibila꞉ka꞉?”
ACT 7:2 Stibiniti tabo ba huiya na꞉goiya꞉, “Nani ba꞉gala nabi, la꞉ naeno tabo nulia꞉la꞉. Aeno iniwa A꞉ibalahamate Mesopotemiya hopolo ba emedena Ha꞉la꞉na habamo peheno, ba꞉ba tetelo A꞉la꞉mina Godote ebetamo puluhukuti
ACT 7:3 ba꞉ma ka꞉na pegoiya꞉, ‘Amia꞉no hopo ba꞉gala amia꞉no mabu tawakalubi miya꞉palete, nale ama꞉ da꞉goemema ba꞉be hopamo na꞉tuya꞉.’
ACT 7:4 Ba꞉bema꞉ ebete Ba꞉baloni hopo miya꞉pate Ha꞉la꞉na habamo dito tuya꞉, ba꞉bene ebete ba꞉bolo ba nemedena ebeno nabiwiti da꞉hoiya꞉, Godote ebe ba꞉moe Ka꞉inane hopamo ba꞉bo magahiya꞉, la꞉le ka꞉lo demedehonama ba꞉moe hopamo.
ACT 7:5 Godote huiyatiya ba꞉ba tetelo Ka꞉inane hopo konomo ipuwalo eta emede bahi deha꞉poto kikamiya꞉ha꞉ ebenonomoma꞉ keda꞉nama꞉, ba꞉gala ba꞉ba tetelo ebete gugudihino ba emedena Godote ebetamo hibilo a꞉goiya꞉, ebete galane tetelo Ka꞉inane hopo ebetamo ba꞉gala ebeno galanepa꞉tamo kikalamema꞉.
ACT 7:6 Ba꞉bene Godote ebetamo gala ba꞉ma ka꞉na kagoiya꞉, ‘Amia꞉no galanepa꞉te eta kapela tawakalubino hopolo da꞉nemedenamena꞉, ba꞉be hoponapa꞉te ibi huiyaha꞉ okopima꞉ midiliti 400 gogolo koko temeteme bikalamenakomena꞉.
ACT 7:7 Huiyatiya hibila, puya꞉te iba꞉tamo temeteme dikalamemena꞉, nale ba꞉bi tawakalubino komo anagiya꞉midalamete kuba huiya kikalamema꞉nemo, ba꞉bene nale amia꞉no galanepi ba꞉be muhulu hopone uluhukulatelete da꞉magahelemo, ba꞉ba tetelo iba꞉te na ba꞉moe hopolo kopadikunamema꞉na꞉.’
ACT 7:8 “Ba꞉ba tetelo Godote A꞉ibalahamatamo nopo hibinomolo da꞉tamotiya꞉, ba꞉be nopoeno kukala hawakalimima꞉ tama itamida komo bikamiya꞉, ba꞉bema꞉ A꞉ibalahamate ebeno hogo Aisa꞉keko umiti kapiya wuiki da꞉wibuya꞉ ebetamo tama itamida komo ba꞉bo ihatemiya꞉. Ba꞉gala galane tetelo Aisa꞉kete ba꞉moe atu komo beka-ododiya꞉ ebeno gudu Ya꞉ikobotamo, ba꞉bene Ya꞉ikobote ebeno 12 dubu guguda꞉tamo ba꞉moe atu tama itamida kukala bekamiya꞉telamiya꞉, galane ba꞉bi guguda꞉te aeno 12 gu tawakalubino nabima꞉ eda꞉huya꞉.
ACT 7:9 “Ba꞉bene Ya꞉ikobokono 12 guguda꞉te apepehote ba꞉bi aeno guguino naba꞉te ibino amoga Yausepekono hido emede mabuma꞉ ba maubahale komo kolowamipi dubatamo manima꞉ ba꞉ dito nikalamiya꞉, ebete Isipiti hopolo huiyaha꞉ okodawama꞉ koneda꞉nama꞉. Huiyatiya Godote eba꞉go ba nemedena
ACT 7:10 ebeno temeteme hiliyonomo ipuwalo ebeno ka꞉ka꞉ hidamo mula꞉menakui. Ba꞉bene Yausepete Isipiti hopoeno Ko Gawadubu Pa꞉lokono holoholo hapuamo duluhukuya꞉, ba꞉ba tetelo Godote ebetamo hidonomo mulu ukui bikamiya꞉. Ba꞉ hibila, Godokono owalubi ipuwado Pa꞉lote Yausepetamo konomamo kalakaluya꞉, ba꞉bema꞉ ebete ebe Isipiti hopo konomo ba꞉gala ebeno ko genama ulamedawama꞉ ba꞉bo midiya꞉.
ACT 7:11 “Ba꞉ba tetelo Isipiti hopo ba꞉gala Ka꞉inane hopo konomolo baa꞉te ba wiboho konomo awae komote tawakaluba꞉tamo piya꞉, ba꞉bema꞉ aeno iniwala꞉godolo baa꞉ uwateho gabote kitanamiha꞉.
ACT 7:12 Ba꞉bene Ya꞉ikobote Isipiti hopolo konate da꞉pola꞉nami, ba꞉be komo uliti aeno iniwa nabi baa꞉ konuwatehoma꞉ ba꞉bamo dito noelamiya꞉. Ba꞉moe ba꞉ ibino dopo tetela.
ACT 7:13 Ba꞉bene iba꞉te netewa teta꞉mo gala da꞉katolamiya꞉, ba꞉ba tetelo Yausepete ebeno komo ebeno nana꞉tamo hawakalimilo ba꞉ma ka꞉na goiya꞉, ‘Na ba꞉ Yausepetela!’ ba꞉gala ba꞉be atu tetelo Ko Gawadubu Pa꞉lote Yausepekono mabu tawakalubino pelame komo ba꞉bo iya꞉tawuya꞉.
ACT 7:14 Ba꞉bene Yausepete ebeno nabiwi Ya꞉ikobotamo tabo benoemiya꞉, ebe ba꞉gala ebeno mabu tawakalubi ibi hiliyonomate Isipiti hopamo kopelamema꞉, iyo, ba꞉ba tetelo Ya꞉ikobokono tawakalubino kuititi ba꞉ 75 tawakalubila, ba꞉moi ba꞉te pelamiya꞉ Isipiti hopamo.
ACT 7:15 “Ba꞉bene Ya꞉ikobote ebeno tawakaluba꞉go tote Isipiti hopolo ba nemedena, ebe ba꞉gala komo aeno iniwala꞉te ba꞉bo neha꞉lahuya꞉.
ACT 7:16 Ba꞉bene ibino guguda꞉te Ya꞉ikoboko ba꞉gala Yausepeko ibino ape Ka꞉inane hopoeno Sekeme habamo gala kawadahete bobamo ba꞉bo pimiya꞉tiya꞉, ba꞉be bobo haba A꞉ibalahamate Hamokono guguda꞉godone mana꞉mo ya꞉lo a꞉lawiya꞉.”
ACT 7:17 Ba꞉bene Stibiniti tabo moga꞉melo Yunapi Ka꞉nisolo dubatamo gala na꞉kolamagiya꞉, “Godote A꞉ibalahamatamo hibinomolo da꞉goiya꞉, ba꞉be taboeno hibi komote uluhukuma꞉ ba tatali Isipiti hopolo aeno Isalaela tawakaluba꞉te hiliyonomoma꞉ eda꞉huya꞉.
ACT 7:18 Ba꞉ba tetelo Isipiti hopolo eta Ko Gawadubuti mahiguya꞉, Yausepete dopamo Isipitinapi keba ka꞉na kowalubilinakui ebete ba꞉be komo hidamo kiya꞉tawuya꞉ha꞉.
ACT 7:19 Ba꞉bema꞉ ebete aeno tawakalubi ha꞉da amiholamenami, ba꞉gala ebete aeno iniwali ba꞉mako helo tabamo kubahilamenami, iba꞉te ibino a꞉lia꞉li gugudi agima habalo dito komiya꞉palenakoma꞉.
ACT 7:20 “Ba꞉ba tetelo Mosesete ba꞉bo hawakaluya꞉, ebeno holoholo hidonomola. Ebete netewa-kapiya manomelo ebeno nabiwino genamalo emedete,
ACT 7:21 ba꞉bene ebeno menoko nabiwi iba꞉te ebe genamane nanekela꞉mo matopa꞉tate dito da꞉nemiya꞉patepuya꞉, ba꞉ba tetelo Ko Gawadubu Pa꞉lokono bohelete ebe numiti ebeno guduma꞉ nimiditi hidonomamo dabinami.
ACT 7:22 Ba꞉bene Mosesete Pa꞉lokono genamalo ba ape Isipiti hoponapa꞉te ibino hiliyonomo mulu komokomo ebe ba꞉bo iya꞉tumihuya꞉, ba꞉bema꞉ ebete ebeno tabo olamagi ipuwalo ba꞉gala ododili ipuwalo helonomoma꞉ ediya꞉.
ACT 7:23 “Mosesete 40 gogo tetedawama꞉ ba eda꞉na ebete ebeno tepo ipuwalo ukui bihatiya꞉, ebeno Isalaela tawakaluba꞉te keba ka꞉na kemedenama꞉ ba꞉be komo konumima꞉.
ACT 7:24 Ba꞉ba tetelo Isipitinapi dubuti eta Isalaela dubu danagalimihutiya꞉, Mosesete numiti Isipiti dubutamo kuba huiya ba nikame ebe ba꞉bo nanakapumiya꞉,
ACT 7:25 mabu ba꞉be ododi komodo ebete nemalagidoluya꞉ ebeno tawakaluba꞉te ba꞉moe komo kiya꞉tawahama꞉, Godote Mosesekono kokotamo ibi Pa꞉lokono helo ipuwane kuluhukulatelema꞉ne. Huiyatiya iba꞉te ebeno hido ododi komoeno ipuwa kalawiya꞉ha꞉.
ACT 7:26 Ba꞉bema꞉ eta hegelalo Isalaela dubu netewapa꞉te dalaholutiya꞉, Mosesete ibi ulamete ibi ba gelebadilame na꞉goelamiya꞉, ‘Naeno nana꞉la꞉, la꞉ ba꞉ kapiya badininipala tawakalubi huiyalata. Bada mabuma꞉ etate etatamo, etate etatamo kuba komo dododitama?’
ACT 7:27 “Huiyatiya ba꞉ba tetelo kebe dubuti etatamo helonomoma꞉ deditiya꞉, ebete Moseseko tama꞉mo ba nemokamida ba꞉bo kiyahamiya꞉, ‘Ama꞉ pote ka꞉goemiti ama꞉le aeno koma꞉ eda꞉ma꞉? Ama꞉ aeno komo anagiya꞉midadawaha꞉!
ACT 7:28 Ama꞉ ubila꞉ka꞉ na anakapuname, ama꞉le dutu Isipiti dubu danakapumi ba꞉ba ka꞉na?’
ACT 7:29 Mosesete ba꞉be tabo uliti ebete ko tole lawete Isipiti hopone ba꞉bo alahuliya꞉, ba꞉bene ebete Midiyana hopolo ba nemedena kamena lawete dubu gugudi netewa ba꞉bo nulamiya꞉.
ACT 7:30 “Ba꞉bene 40 gogo da꞉petohuya꞉ eta hegelalo Mosesete Sainai Hununomo Hakoeno dito hopolo ba patita Godokono nopodawate koe ipuwado ebetamo ba꞉bo uluhukuya꞉, iyo, koete kehalo da꞉woitiya꞉ huiyatiya kehate ka꞉mutigutiya꞉ha꞉,
ACT 7:31 Mosesete ba꞉be komo umiti koamo hanohanuya꞉. Ba꞉bema꞉ ebete hidamo umima꞉ tatalia꞉mo ba to Kodawa Godokono tabote ebetamo ba꞉ma ka꞉na piya꞉,
ACT 7:32 ‘Na ba꞉ Godotela. Amia꞉no iniwa nabi A꞉ibalahamako, Aisa꞉keko, ba꞉gala Ya꞉ikoboko iba꞉te poko kadikumina, na ba꞉ ba꞉betela.’ Mosesete ba꞉be tabo uliti heloha꞉ma꞉ ba eda꞉, ebete tabo goedawa kumima꞉ ebeno ape lililalo ko tolenomo ba꞉bo lawiya꞉.
ACT 7:33 “Ba꞉bene Kodawa Godote ebetamo na꞉goiya꞉, ‘Amia꞉no nato ilina na꞉pipikuma꞉ mabu ama꞉le da꞉la꞉na ba꞉be haka talona hakala.
ACT 7:34 Naeno tawakaluba꞉te Isipiti hopolo koko temetema꞉go demedena, nale ka꞉lo ibino modoboha꞉ komokomo ulamelelamemo, iyo, nale ibino ihimi komo ulilatelete na Hunu Habane ba꞉bema꞉ pihitigamo ibi kuba ipuwane kuluhukulatelema꞉. Ba꞉bema꞉ ama꞉ na꞉pa꞉, nale ama꞉ Isipiti hopamo konoemema꞉nemata naeno oko ba꞉bolo konowatima꞉.’”
ACT 7:35 Ba꞉bene Stibiniti tabo moga꞉melo Yunapi Ka꞉nisolo dubatamo gala na꞉kolamagiya꞉, “Numa꞉la꞉, Isalaela tawakaluba꞉te Mosesetamo ibino ubiha꞉ komo dopamo ba hawakalimi ba꞉ma ka꞉na ga꞉luya꞉, ‘Ama꞉ pote ka꞉goemiti ama꞉le aeno koma꞉ eda꞉ma꞉? Ama꞉ aeno komo anagiya꞉midadawaha꞉!’ Huiyatiya ba꞉moe tetelo Godote Moseseko gala a꞉kapoemiya꞉ ibi ulamedawama꞉ ba꞉gala ibino ka꞉ka꞉ mula꞉lelamedawama꞉ kopeda꞉ma꞉. Hibila, koete kehalo da꞉woitiya꞉, ba꞉ba tetelo Godokono nopodawate ebetamo uluhukuti helo ba꞉bo ikamiya꞉ ibi kowalubilinama꞉.
ACT 7:36 Ba꞉bema꞉ 40 gogo ipuwalo Mosesete koko hanohano komo Isipiti hopolo ba꞉gala Hawihawi Kehaha꞉ Kolomolo ba꞉gala dito hopolo ododilinakui, iyo, ebete Isalaela tawakalubi ba꞉moe gabodo uluhukulateliya꞉ Isipiti hopone.
ACT 7:37 Ba꞉bene ba꞉moe ba꞉be Mosesete Isalaela tawakaluba꞉tamo na꞉goiya꞉, ‘Galane Godote ebeno Hiya꞉nomo Ukui Hawakalimidawa eta, na dopo, la꞉ ipuwalo kadipatema꞉ne,’
ACT 7:38 ba꞉gala Isalaela tawakaluba꞉te dito hopolo da꞉nekapiyuya꞉ ba꞉moe Mosesete iba꞉go nemedenami, ba꞉gala ebete ba꞉bi aeno iniwala꞉go ba emedena Godokono nopodawate Sainai Hununomo Hakalo ebetamo dolamagiya꞉ ba꞉bi Tutumu Tabo ebete Godogodone uwatete atamo ba꞉bo ikaa꞉miya꞉ emedena tetelo a kowalubinama꞉.
ACT 7:39 “Huiyatiya ba꞉ba tetelo aeno iniwala꞉te Godotamo papamila꞉ha ubiha꞉ma꞉ eda꞉huya꞉, ba꞉bene iba꞉te ebe ta꞉mata komo tama꞉mo ba owatiya꞉mida ibino tepo ipuwalo Isipiti hopamo wilalema꞉ gala ubi na꞉kamiya꞉tenama꞉.
ACT 7:40 Ba꞉bema꞉ Mosesete tawakaluba꞉go lutaha꞉ tetelo iba꞉te ebeno naniwi A꞉lonitamo na꞉ga꞉luya꞉, ‘Aeno ida꞉da꞉li nododilia꞉ma꞉, iba꞉te a dopaa꞉mete komagatoema꞉, mabu ba꞉moe Moseseko a Isipiti hopone da꞉magahiya꞉ kebamo dalatidi!’
ACT 7:41 Ba꞉ba tetelo iba꞉te uli ape kau-goeno holoholamo ida꞉da꞉li ododiti ebetamo hawa꞉goeno ilina ba ikameho, iba꞉te ha꞉kiya ibino kokotamo dododiya꞉ ba꞉be ilinatamo ko kalakala poko bododiya꞉.
ACT 7:42 Ba꞉be kuba mabuma꞉ Godote ibi gunima꞉mo ba ihilatele dito miya꞉paliya꞉ ibi ha꞉kiya ibino ubilo alomoeno oloki kadikulamenama꞉. Ba꞉ hibila, ba꞉moe komo Godokono ukui hawakalimipa꞉te ebeno Bukalo ya꞉lo ba꞉ma ka꞉na hawakalimiya꞉, ‘La꞉ Isalaela tawakaluba꞉la꞉, la꞉le 40 gogolo dito hopolo da꞉wapata꞉lamenamima, la꞉le na adikunamema꞉ dalukulinakuima, ba꞉bi sipi-goegoeno hawi hibi tepo ipuwoeno komago kapikanamehonenakuiha꞉.
ACT 7:43 Huiyatiya la꞉le la꞉eno ida꞉da꞉li Molekakono sipi-goeno tama talona genama hunamo alokoa꞉miduya꞉mata, ba꞉bene eta ida꞉da꞉li Lepanako olokino holoholamo akododiya꞉mata, ba꞉moi ba꞉ la꞉le dadikulamenamima ba꞉bi ida꞉da꞉lila. Ba꞉moe mabuma꞉ nale la꞉tamo kuba huiya kikalamema꞉ naeno hido Ka꞉inane hopone kuba Ba꞉baloni hapuamo konoelamema꞉nemata.’”
ACT 7:44 Ba꞉bene Stibiniti tabo moga꞉melo gala na꞉kolamagiya꞉, “Ba꞉moe komo ba꞉ hibila, Godokono sipi-goe tama alokoa꞉mida Talona Genama aeno iniwala꞉godolo ba itana Godote iba꞉go ba꞉bolo nemedenami. Numa꞉la꞉, Godokono iya꞉tumi ipuwalo Mosesete keba ka꞉na kuliya꞉ ba꞉gala ebeno baida꞉mo keba ka꞉na kumiya꞉, ebete ba꞉be genama hidonomamo ba꞉ ba꞉ba ka꞉na ododiya꞉.
ACT 7:45 Ba꞉bene aeno iniwalino guguda꞉te ba꞉be Talona Genama ibino naba꞉godone lawete, iba꞉te aguti Yosuwakoba꞉ Ka꞉inane uli hopamo ba꞉ dito tolamiya꞉. Ba꞉ba tetelo ba꞉be hopoeno hiya꞉hiya꞉ tawakalubi Godote ebeno heloamo neta꞉malatelete Isalaela tawakaluba꞉tamo ba꞉bo nikalamiya꞉, ba꞉bene ebeno talona genamate ba꞉bolo ba nitana iba꞉te ba꞉ba tetene pelamete Da꞉ibidiko teta꞉mo pikuliya꞉.
ACT 7:46 Ba꞉bene Godote Da꞉ibidikono ododili komo ulamelemete ebe malemalelo emalagidolonami, ba꞉bema꞉ eta tetelo Godokono emede bahima꞉ Da꞉ibiditi ebe ba꞉bo kiyamiya꞉ ebete ebe adikumino hiya꞉ genama ketema꞉, hibila, ba꞉moe Godo ba꞉ Da꞉ibidikono iniwa Ya꞉ikobote dopamo dadikuminakui ba꞉be Godola.
ACT 7:47 Huiyatiya Godoko Adikumino Genama Da꞉ibidikono gudu Solomonote etiya꞉, Da꞉ibiditiha꞉.
ACT 7:48 “Huiyatiya la꞉ hidamo nulia꞉la꞉, tawakaluba꞉te Hununomo Godoko mabuma꞉ detemotehona, ebete ba꞉bi genamalo hibilo kemedenaha꞉. Iyo, dopamo ebeno eta ukui hawakalimidawate ba꞉moe komo ba꞉ma ka꞉na hawakalimiya꞉,
ACT 7:49 ‘Kodawa Godote na꞉goena, ‘Hunu Haba ba꞉ naeno emede habala, ba꞉gala hopo haba naeno nato a꞉puti bahila. Ba꞉bema꞉ la꞉ hopo tawakaluba꞉te natamo kebako genama na꞉keteoma? Naeno hawela ami bahi la꞉le kebolo na꞉kododioma?
ACT 7:50 Mabu ba꞉moe komo ba꞉ hibila, ba꞉moe hopoeno ilina na ha꞉kiya naeno kokotonomamo ododiliya꞉mo, ba꞉moi ilina hiliyonomate naenoma꞉ ba꞉bema꞉ eda꞉hana.’ ’”
ACT 7:51 Ba꞉bene Stibiniti Yunapi Ka꞉nisolo dubatamo kuititi tabo ba olamagi na꞉goiya꞉, “A꞉iye, la꞉ ba꞉ wato kodakoda tawakalubilata! La꞉ Godokono Tutumu Tabamo papamila꞉halo tama itamida kukala hunu gabodo lawiya꞉mata, huiyatiya tepo ipuwoeno kodakoda komo kiya꞉hiliya꞉ha꞉! Iyo, la꞉ hiliyonomo tetelo la꞉eno galo ba muhilame Godokono Hido-talona Gobogobo beduhiminamata, la꞉eno iniwala꞉te dewagelenama꞉ ba꞉ba ka꞉na!
ACT 7:52 Numa꞉la꞉, Godokono ukui hawakalimipi hiliyonomo ipuwalo la꞉eno iniwala꞉te kapiya dawatamo malemale kihatenakuiha꞉ huiyatiya ibi hiliyonomatamo temeteme bikalamenakuya꞉. Ba꞉ ba꞉ba ka꞉na puya꞉te Godokono Tuputupu Okodawoeno pe komoma꞉ dopamo tabo dolamagimiya꞉ la꞉eno iniwala꞉te ibi anakapulamenakuya꞉, ba꞉gala ba꞉ma tetelo Tuputupudawa Ya꞉suti ebeno komo la꞉tamo da꞉pehawakalimi, la꞉le ebe ha꞉da amiho gabodo lawete ebe anakapumimata.
ACT 7:53 Ba꞉bema꞉ hibila, Godokono Tutumu Tabo ebeno nopopa꞉godone duwatiya꞉ma, la꞉ ba꞉ ba꞉bi tawakalubilata, la꞉le huiyatiya ba꞉bi Tutumu Tabamo hibilo kapapamila꞉hanaha꞉!”
ACT 7:54 Ba꞉bene Yunapi Ka꞉nisolo dubate ba꞉moe tabo duliya꞉ iba꞉te ibino konomo mauba Stibinitamo kohawakalimima꞉ pitoko ba꞉bo aliwatahaliya꞉.
ACT 7:55 Ba꞉ba tetelo huiyatiya Stibiniko Godokono Gobogobote da꞉tabuimiya꞉, ebete Hunu Habamo da꞉negahimiya꞉ Godokono konomo alo ba umita, Ya꞉suti atumu ebeno tu hapulu na꞉kala꞉nuya꞉.
ACT 7:56 Ba꞉bema꞉ ebete na꞉goiya꞉, “La꞉ numa꞉la꞉! Godote Hunu Haboeno gigiho da꞉hiya꞉miduta nale bumitamo, Tawakalubino Naniwiti ebeno tu hapulu ba꞉la꞉na!”
ACT 7:57 Ba꞉ba tetelo Yunapi Ka꞉nisolo dubate kapimilo ga꞉ga꞉go galo muhilameholete ebetamo na꞉nepulila꞉huya꞉ ebe konekubahimima꞉.
ACT 7:58 Ba꞉bene iba꞉te ebe heloamo nelawete haba ipuwane magatate nakolamo mapeme ba꞉bo netupuimiya꞉. Ba꞉ba tetelo kebe dubate Stibinikono komoma꞉ ha꞉da amiho tabo Ka꞉nisolo dubatamo da꞉pega꞉luya꞉, ba꞉bi dubate ebe dopamo anakapumihino ibino watuino kaliko eta uli ape dubu Solokono nato mabamo dito nimiya꞉tiya꞉.
ACT 7:59 Ba꞉bene iba꞉te Stibiniko nakolamo ba mapeme ebete ebeno Kodawa ka꞉milo na꞉goiya꞉, “Kodawa Ya꞉su, naeno gobogobo ama꞉le na꞉pelawa꞉!”
ACT 7:60 Ba꞉ba tetelo ebete pupamo gate ibulunomo na꞉goiya꞉, “Naeno Kodawa, ba꞉moe kuba iba꞉te dododita, ama꞉le iba꞉tamo kuba huiya akikalama꞉la꞉.” Ba꞉bene ebete ba꞉moe tabo goete hoenomo ba꞉bo hoiya꞉.
ACT 8:1 Ba꞉ba tetelo ba꞉be uli ape dubu Solote Stibinikono hoe komo umiti na꞉kalakaluya꞉. Ba꞉gala ba꞉be atu hegelalo sose tawakaluba꞉te Yelusalema ko habalo demedehonama꞉, Yu watowatopa꞉te iba꞉tamo koko temeteme ikalame ba꞉bo tupuimiya꞉. Ba꞉be mabuma꞉ Ya꞉sukunu oelamepi dubate ha꞉kiya ko habalo na꞉pola꞉nuya꞉, huiyatiya komo Ya꞉suku hibima꞉ midipi hiliyonomate alahutihuya꞉, ba꞉ma ka꞉na komo Yudiya hopamo ba꞉gala komo Samaliya hopamo hiya꞉hiya꞉ tolameholiya꞉.
ACT 8:2 Ba꞉bema꞉ komo Yelusalemanapi Godokono malemala꞉go demedenama꞉, iba꞉te Stibinikono ape pelawete bobamo ba nihate ebe mabuma꞉ konomamo nihimitiya꞉.
ACT 8:3 Ba꞉ba tetelo Solote ba꞉moe eta kuba komo betupuimiya꞉, ebete sose tawakalubino hiya꞉hiya꞉ genamamo nodolonakui dubu ba꞉gala kamenakamena da꞉nulamenakui, ebete ibi uwatete da꞉wadimuya꞉talenakui du genamamo dito niya꞉hekenakui.
ACT 8:4 Ba꞉bema꞉ hibima꞉ midipa꞉te kebe hiya꞉hiya꞉ hopamo kalahutihuya꞉, iba꞉te ba꞉bolo hiya꞉hiya꞉ ba newapata꞉lame Ya꞉sukunu Hido Tabo tawakaluba꞉tamo ba꞉bo nolamagiminakuya꞉.
ACT 8:5 Ibi ipuwalo Pilipiko ba꞉ etala, ebete Samaliya ko habamo tote Ya꞉su Kelisokono komoma꞉ tabo da꞉nolamagitiya꞉,
ACT 8:6 tawakalubi hiliyonomate ebeno tabo hidonomamo ulihutiya꞉, ba꞉gala ebete Godokono heloamo kebe hanohano komokomo kododilitiya꞉ iba꞉te atumu nulamitiya꞉.
ACT 8:7 Ba꞉ba tetelo Pilipiti tawakaluba꞉godone kuba gobogobo doelamiya꞉ iba꞉te ga꞉ga꞉go ba꞉bo ikuliya꞉, ba꞉gala ebete ape kodakoda temetema꞉gopi ba꞉gala nato a꞉ta꞉buta꞉midalelamepi akahiduilamiya꞉,
ACT 8:8 ba꞉bema꞉ ba꞉be Samaliya haba konomolo ko kalakalanomote itanuya꞉.
ACT 8:9 Ba꞉ hibila, Pilipiti Samaliya ko habamo dopamo peheno, eta dubuti ba꞉bolo nemedenami ebeno mahilo Saimonotela, ebete ebeno giwali ododili komamo tawakalubi behanohanuilamenami. Ba꞉gala ebe ha꞉kiya ebe koma꞉ ba midina,
ACT 8:10 Samaliya hopoeno dito tawakalubi ba꞉gala koko mahilago tawakalubi ibi hiliyonomate ebeno iya꞉tulame komo hidonomamo ulihonakuya꞉. Ba꞉bene iba꞉te na꞉ga꞉lanakuya꞉, “Ebeno helo Hunu Habane pena, ba꞉bema꞉ ale ebetamo Helonomodawa mahilo kikamiya꞉!”
ACT 8:11 Iyo, Saimonote tete ga꞉ga꞉lo ebeno giwali iya꞉tawa komamo ba꞉bi tawakalubi da꞉hanohanuilamenami, ba꞉bema꞉ iba꞉te ebeno ododili komodo ebe beta꞉matanama꞉.
ACT 8:12 Huiyatiya Pilipiti da꞉piya꞉ ebete Hido Tabo ba polamagi, Godote Ko Gawadubuma꞉ deda꞉na ebete ba꞉be komo ba꞉gala Ya꞉su Kelisokono helo komo ba꞉bo pehawakalilamiya꞉. Ba꞉ba tetelo Samaliyanapa꞉te hibima꞉ miditi, ba꞉bene Pilipiti kamenakamena ba꞉gala dubu hiliyonomo beyamo ba꞉bo wadulateliya꞉.
ACT 8:13 Ba꞉gala Saimonote atumu hibima꞉ miditi Pilipiti ebe beyamo ba꞉bo kadutiya꞉, ba꞉bene Pilipiti Godokono heloamo kebe koko hanohano komo dododilinakui, Saimonote ebe tamenomolo ba luta ba꞉bi komokomo dulamenakui koamo hanohanonakui.
ACT 8:14 Ba꞉be atu tetelo Yelusalema ko habalo oelamepi dubate Samaliya hoponapino komo ba꞉ma ka꞉na uliya꞉, iba꞉te Godokono tabo a꞉lawiya꞉, ba꞉bema꞉ iba꞉te Pitako ba꞉gala Yoneko ba꞉be komo umima꞉ ibi ba꞉ dito noelamiya꞉.
ACT 8:15 Ba꞉bene ibi netewapa꞉te ba꞉bamo nuluhukuti uliuli hibima꞉ midipi Godotamo ba꞉bo newadiya꞉paa꞉lateliya꞉ iba꞉te ebeno Gobogobo kolawema꞉,
ACT 8:16 mabu dopamo Pilipiti ba꞉bi hibima꞉ midipi beyamo da꞉wadulateliya꞉ Kodawa Ya꞉sukunu mahilo kapiyamo ododiya꞉, huiyatiya ba꞉ba tetelo Godokono Gobogobote ibi hunamo kapemediya꞉ha꞉.
ACT 8:17 Ba꞉bema꞉ Pitako Yoneko iba꞉te ba꞉be komo iya꞉tawahate ibino kokoto Samaliya hibima꞉ midipa꞉tamo demowatilameholiya꞉, iba꞉te Godokono Gobogobo ba꞉bo lawiya꞉.
ACT 8:18 Ba꞉ba tetelo Godote oelamepi dubagodone ebeno Hido-talona Gobogobo tawakaluba꞉tamo keba ka꞉na kikalamiya꞉, giwali ododilidawa Saimonote ba꞉be komo dumiya꞉, ebete mani iba꞉tamo ba ikalame na꞉goiya꞉,
ACT 8:19 “La꞉godolo ditana ba꞉be helo nale la꞉godone mana꞉mo kolawa꞉mo, ba꞉bene nale puino watamo naeno kokoto demowatilamenakomo, iba꞉te atumu Godokono Gobogobo nagodone ba꞉lawenakomena꞉.”
ACT 8:20 Ba꞉bene Pitate ebeno tabo ba huiya na꞉goiya꞉, “Amia꞉no ape ba꞉gala amia꞉no mani Saitanakono Koe Habamo kapimilo kotoma꞉na꞉, mabu amia꞉no ukui ba꞉ma ka꞉na itana, lumagiti Godokono Gobogoboeno helo mana꞉mo kolawema꞉ne! Ao, eba ka꞉naha꞉!
ACT 8:21 Amia꞉no kuba ukui komoma꞉ ama꞉ Godokono oko owati ipuwalo ago a꞉kakapiyamena꞉ta, mabu Godokono umi ipuwalo amia꞉no tepo ipuwoeno ukui katuputupuha꞉.
ACT 8:22 Ba꞉bema꞉ wadiyala ama꞉ ukui hiya꞉ma꞉ miditi ama꞉le demalagidoluta ba꞉be kuba ododi komone nohobiguya꞉, ba꞉gala ama꞉ Godoko na꞉toemehuya꞉ ebete amia꞉no kuba ukui egebolemete kadodomema꞉.
ACT 8:23 Ba꞉ hibila, na iya꞉tawala amia꞉no tepo ipuwoeno mauba komote da꞉tabui, ba꞉be mabuma꞉ ama꞉ Saitanakono du genamalo bemedenata!”
ACT 8:24 Ba꞉bene Saimonote tabo ba huiya na꞉goiya꞉, “La꞉ nonolata, wadiyala꞉ka꞉ la꞉ na Kodawa Godotamo nadipanateniya꞉la꞉, mabu la꞉le kebe komoma꞉ ka꞉ga꞉loma ba꞉be kuba huiyate natamo hibilo duluhukumini nale a꞉kamodobamo.”
ACT 8:25 Ba꞉bema꞉ ba꞉moe komo da꞉wibuya꞉, ba꞉ba tetelo Pitako Yoneko iba꞉te Samaliya ko habalo Kodawa Ya꞉sukunu tabo komokomoma꞉ hawakala ga꞉late Yelusalemamo gala ba꞉bo kawiluya꞉, ba꞉bene iba꞉te ba to gabo tetelo Samaliya hopoeno hegehege habahabado Hido Tabo olamagima꞉go ba꞉bo tuya꞉.
ACT 8:26 Ba꞉ba tetelo Kodawa Godokono nopodawate Pilipitamo na꞉goiya꞉, “Ama꞉ mahigate siyale hapuamo na꞉toa, Yelusalemane Gasa habamo dito hopodo da꞉tolamenaka ba꞉be gabamo.”
ACT 8:27 Ba꞉bene ebete mahigate ba꞉bamo na꞉tuya꞉. Ba꞉be atu tetelo eta ko dubu, ebete Itiyopiya hopoeno Ko Gawa Kamena Ka꞉ndesikono okodawama꞉ eda꞉nami, ebete ebeno koko ilina ba꞉gala mani bulamelemenami, ba꞉be dubuti ba꞉moe atu gabodo pitiya꞉. Ebete Yelusalema ko habamo Godoko adikumima꞉ ya꞉lo tote
ACT 8:28 gala ba kapita, ebeno sa꞉liyote-boge hunulu emedete Godokono ukui hawakalimidawa Aisayakono Buka ka꞉lamihola꞉go ba pita, Pilipiti ebe ba꞉bo numiya꞉.
ACT 8:29 Ba꞉ba tetelo Godokono Gobogobote Pilipiko na꞉goemiya꞉, “Ama꞉ sa꞉liyote-boge tama꞉mo nuluhukuti eba꞉go kapimilo na꞉tonatuya꞉.”
ACT 8:30 Ba꞉bema꞉ Pilipiti sa꞉liyote-boga꞉go ba puliganato, ko dubuti Aisayakono Buka tabo da꞉ka꞉lamiholitiya꞉ ebeno tabo nuliti ebetamo na꞉goiya꞉, “Ama꞉le da꞉ka꞉lamiholita ba꞉be taboeno ipuwa na꞉kemalagidoluta?”
ACT 8:31 Ebete tabo ba huiya na꞉goiya꞉, “Ao, na keba ka꞉na na꞉kiya꞉tawamo? Na iya꞉tunamedawa puliyala.” Ba꞉ba tetelo ebete Pilipiko na꞉kiyamiya꞉ ebete sa꞉liyote-boga꞉mo ololote ebe tama꞉mo kopemedema꞉.
ACT 8:32 Ba꞉bene ko dubuti Aisayakono Bukalo Godokono tabo ba꞉ma ka꞉na ka꞉lamiholitiya꞉, “Iba꞉te ba꞉be dubu lawete a꞉magatuya꞉ sipi-goemo konanakapumima꞉, ba꞉bene lumagiti sipi-goe deha꞉potoeno ipo diya꞉hilimita, ba꞉be sipiti gelebadilo ba luta tabo goeha꞉ma꞉ keba ka꞉na keda꞉nako, ebete ba꞉ ba꞉ba ka꞉na tabo akote eta tabo kagoiya꞉ha꞉.
ACT 8:33 Ba꞉ba tetelo iba꞉te ebe ba iduduputimi ebeno komo hidamo anagiya꞉midameheno hoea꞉mo dito noemiya꞉. Numa꞉la꞉, iba꞉te ebeno ka꞉ka꞉ hopo habalo itamidamiya꞉, ba꞉bema꞉ ebeno galanepino komoma꞉ pote na꞉kolamagimini?”
ACT 8:34 Godokono Buka ka꞉lamihole komo da꞉wibuya꞉ ko dubuti huiyatiya Pilipitamo na꞉goiya꞉, “Ama꞉ na na꞉kiyanama꞉, Aisayate pokono komoma꞉ kolamagitiya꞉, ebe ha꞉kiya ebeno komoma꞉la꞉ka꞉ o eta lumagino komoma꞉ kolamagitiya꞉?”
ACT 8:35 Ba꞉bema꞉ iba꞉te badi ba tuta ko dubuti da꞉ka꞉lamiholiya꞉, Pilipiti ba꞉be taboeno ipuwa dopamo hawakalimiti, ba꞉bene Godokono Bukoeno komo tabo komokomoeno ipuwa atumu kahawakalilamete Ya꞉sukunu Hido Tabo ebetamo ba꞉bo olamaginatuya꞉.
ACT 8:36 Ba꞉bene ibi netewapa꞉te ba꞉be gabodo ba tonato beya bobo deha꞉potoamo da꞉nuluhukuya꞉, ko dubuti na꞉goiya꞉, “Ama꞉ ba꞉moe beya numa꞉. Ama꞉ modobola꞉ka꞉ na beyamo adunatene? Eta kodakoda ba꞉kitana?”
ACT 8:37 Ba꞉bene Pilipiti ebetamo na꞉goiya꞉, “Ama꞉ amia꞉no tepo ipuwalo Godokono tabo hibima꞉ da꞉mida꞉, nale ama꞉ beyamo kadutima꞉nemata.” Ebete tabo ba huiya na꞉goiya꞉, “Na ka꞉lo Ya꞉suku hibima꞉ a꞉midimo, ebe ba꞉ Kelisote, Godokono Gudula.”
ACT 8:38 Ba꞉ba tetelo ko dubuti sa꞉liyote-boge atadawa bikiyamiya꞉ ebete boge ba꞉bamo koduhimima꞉, ba꞉bene ebete Pilipikoba꞉ hititi Pilipiti ebe beyamo ba꞉bo adutiya꞉.
ACT 8:39 Ba꞉bene ibi netewapa꞉te beya ipuwane ba podoluta Kodawa Godokono Gobogobote Pilipiko eta hopamo da꞉magatuya꞉, ko dubuti ebe gala kumiya꞉ha꞉, ebete huiyatiya ko kalakalago ba꞉be gabodo gala dito katuya꞉.
ACT 8:40 Ba꞉ba tetelo Pilipiti Godokono heloamo Asotase habamo nuluhukuti, ebete ba꞉be habane tote ba꞉be hopoeno hiliyonomo habahabado Godokono Hido Tabo olamaga꞉go Sisaliya ko habamo ba꞉bo nuluhukuya꞉.
ACT 9:1 Ba꞉be atu tetelo Solote Kodawa Ya꞉suku ta꞉matapi anakapulamema꞉ tabo helonomamo olamaginakui, ebete Godotamo hawa꞉goeno ikamehopino Hununomo Watodawatamo tote
ACT 9:2 leta uwatema꞉ ebe ba꞉bo nikiyamiya꞉. Ebe ubila ba꞉bi letago Dama꞉sakase ko habamo tote, Yunapino hiya꞉hiya꞉ baidi ibubulamehole genamamo na꞉pa꞉gate, puya꞉te Ya꞉suku Hibima꞉ Midi Gabodo da꞉wapata꞉lamenama꞉ ba꞉bi dubu ba꞉gala kamenakamena konoholema꞉, ba꞉bene ebete ibi da꞉nulamemene ibi heloamo nuwatete Yelusalema ko habamo magahelete du genamamo ba꞉bo kopiya꞉hekema꞉.
ACT 9:3 Ba꞉bene ebete Dama꞉sakase ko haba tama꞉mo duluhukunatuya꞉ ba꞉ba tetenomolo Godokono Hunu Habane alote ba pihitiga hegelate da꞉la꞉wa꞉hiya keba ka꞉nala꞉ka꞉, ba꞉be alote ba꞉ba ka꞉na ebe ba꞉bo panagogobeya꞉midadiguya꞉.
ACT 9:4 Ba꞉bene ebete hakamo gate tabo ba꞉ma ka꞉na uliya꞉, “Solo, Solo! Keka꞉ mabu ama꞉le natamo koko temeteme dikanamena?”
ACT 9:5 Solote na꞉huiyuya꞉, “Kodawa, ama꞉ potela꞉ka꞉?” Huiya tabote na꞉piya꞉ ebetamo, “Na ba꞉ Ya꞉suti, ama꞉le temeteme dikanamena, na ba꞉be lumagila.
ACT 9:6 Ama꞉ mahigate haba ipuwamo na꞉nopega. Ba꞉bolo eta lumagiti ama꞉ kokiyamema꞉na꞉ta ama꞉le bada komo dododimina꞉.”
ACT 9:7 Ba꞉ba tetelo Soloko bana da꞉tolamiya꞉ ba꞉bi dubate ba꞉be tabo madodo ba uli huiyatiya lumagi kumiya꞉ha꞉, ba꞉bema꞉ iba꞉te hanohanoholo ka꞉la꞉liya ga꞉lahalamete dito la꞉mota꞉hanuya꞉.
ACT 9:8 Ba꞉bene Solote hakane mahigate baidi pahaa꞉midalete da꞉gahimiya꞉ ba꞉ba tetelo ilina kulamiya꞉ha꞉, ba꞉bema꞉ ebeno mabuluba꞉te ebe kokotamo lawete Dama꞉sakase ko habamo dito magatuya꞉.
ACT 9:9 Ba꞉bene ebete netewa-kapiya hegelalo ilina ulameheno ba꞉bolo dito nemediya꞉, ebete baa꞉ kananakuiha꞉ ba꞉gala beya kaninakuiha꞉.
ACT 9:10 Ba꞉ba tetelo ba꞉be Dama꞉sakase ko habalo eta Ya꞉suku ta꞉matadawa nemedenami, ebeno mahilo A꞉nanayasitila. Ebete u wataheno ebeno baiditi hiya꞉ma꞉ ba eda꞉hame Kodawate ebe na꞉ka꞉miya꞉, “A꞉nanayasi!” Ebete na꞉huiyuya꞉, “Kodawa, na moela. Badala꞉ka꞉?”
ACT 9:11 Ba꞉bene Kodawate ebetamo na꞉goiya꞉, “Ama꞉ mahigate, gabo mahilo Tuputupula ba꞉bamo tote Yudasikono genamalo Tasasenapi dubu Soloko na꞉nohowada꞉. Ba꞉ma tetelo ebete ba꞉bolo toetoe tabo natamo dolamagita, nale nulitamo.
ACT 9:12 Ba꞉bema꞉ ebete u wataheno ebeno baiditi hiya꞉ma꞉ ba eda꞉hame A꞉nanayasi mahilagoeno dubu bumi, ba꞉be dubuti ebeno baidi kohiduilamema꞉ ebete ebeno kokoto ebetamo ba pemowatilamita ba꞉bo umi.”
ACT 9:13 A꞉nanayasiti ebeno tabo ba huiya na꞉goiya꞉, “Kodawa, na tawakalubi hiliyodopagodone ulimo, ba꞉moe dubuti Yelusalemalo amia꞉no tuputupu tawakaluba꞉tamo koko kuba bododilinakui.
ACT 9:14 Ba꞉gala na iya꞉tawala, ba꞉ma tetelo ebete a Yunapino koko watowatopa꞉godone helo a꞉lawi, ebete ba꞉moe Dama꞉sakase habalo puya꞉te amia꞉no mahilo da꞉ka꞉mina ibi uwatete du genamamo koniya꞉hekema꞉.”
ACT 9:15 Kodawate huiyatiya ebetamo na꞉goiya꞉, “Wadiyala ama꞉ na꞉toa, mabu nale ya꞉lo tetelo ebe a꞉lawiya꞉mo ebete naeno hido okodawama꞉ keda꞉ma꞉, iyo, ebete naeno mahilamo tote, Isalaela tawakalubi ba꞉gala Yuha꞉ tawakalubi ba꞉gala ibino koko gawadubu ibi hiliyonomatamo naeno komo konehawakalimima꞉ne.
ACT 9:16 Ba꞉bema꞉ na ha꞉kiya ebe kiya꞉tumima꞉nemo, naeno mahilo mabuma꞉ ebete kebako koko temeteme duwatenakomene.”
ACT 9:17 Ba꞉bene A꞉nanayasiti tote ba꞉be genama guamo nodolote ebeno kokoto Solotamo ba nemowatilame na꞉goemiya꞉, “Naeno amoga Solo, ama꞉le gabodo ba pita ama꞉tamo duluhukui ba꞉be Kodawa Ya꞉suti na bepoename, amia꞉no baidi pehiduilamelemete, ba꞉bene Godokono Gobogobote amia꞉no tepo ipuwa kotabuimima꞉ne.”
ACT 9:18 Ba꞉ba tetenomolo ebeno baidi da꞉mula꞉lemiya꞉ ba꞉bi baidino gibuti hakamo ba gudimi ebeno baiditi ba꞉bo hidohidohomiya꞉, ba꞉bene ebete da꞉mahiguya꞉ A꞉nanayasiti ebe beyamo adutiti,
ACT 9:19 ba꞉ba tetelo ebete baa꞉ da꞉kanuya꞉ helo gala ba꞉bo kalawiya꞉. Ba꞉bene komo hegelalo Solote Dama꞉sakase ko habalo Ya꞉suku ta꞉matapa꞉go ba emede,
ACT 9:20 ebete Yu tawakalubino hiya꞉hiya꞉ baidi ibubulamehole genamalo Ya꞉suti Godokono Guduma꞉ deda꞉na ba꞉be komo hawakalimi ba꞉bo netupuimiya꞉.
ACT 9:21 Ba꞉bene puya꞉te ebeno tabo duliya꞉ ibi hiliyonomate hanohanoholo na꞉ga꞉luya꞉, “Ba꞉moe ba꞉ Yelusalemalo Ya꞉sukunu mahilo da꞉ka꞉mina ba꞉bi tawakalubi da꞉kubahilamenakui, ba꞉moe ba꞉be lumagila! Ebete ba꞉mamo ba꞉bema꞉ pi, iyo, ebe ubila Ya꞉suku hibima꞉ midipi heloamo puwatete Godotamo hawa꞉goeno ikamehopino hununomo watowatopa꞉tamo komagatalema꞉!”
ACT 9:22 Ba꞉ba tetelo Solote Godokono tabo olamagi ipuwalo helonomoma꞉ eda꞉te, Ya꞉suti Godokono Oemedawa Kelisoma꞉ deda꞉na ebete ba꞉be komo hawakaliminomo hawakalimiya꞉, ba꞉bema꞉ hibila, Dama꞉sakase ko habalo demedehonama꞉ ba꞉bi Yu tawakaluba꞉te ukui bilibilima꞉ ba eda꞉ha, iba꞉te olowabeletihui komago ebeno tabo duhimima꞉ kamodobuya꞉ha꞉.
ACT 9:23 Ba꞉bene komo hegela da꞉petolamiya꞉ Yu tawakaluba꞉te kapiyuimiti Soloko anakapumima꞉ nopo ba꞉bo tamotiya꞉.
ACT 9:24 Ba꞉ba tetene tupuimiti iba꞉te hegela ba꞉gala du hiliyonomolo Dama꞉sakase ko haba kaloeno hiya꞉hiya꞉ gigiholo lawamepi ba꞉bo miya꞉tiya꞉ Solote ba꞉bamo nuluhukulu ba꞉bo kanakapumima꞉. Huiyatiya iba꞉te ganalo dolamagimitiya꞉ eta lumagiti Soloko ya꞉lo a꞉piya꞉tumiya꞉,
ACT 9:25 ba꞉bene eta dulu Soloko ta꞉matapa꞉te ebe lawenate ele kuiha ipuwamo adipinate kala hunudu hopamo nadutinate, ebete ba꞉be habane ba꞉ dito alahula꞉niya꞉.
ACT 9:26 Solote Yelusalemamo gala da꞉kapiya꞉ komo Ya꞉suku hibima꞉ midipa꞉go kapiyama꞉ eda꞉ma꞉ pewageliya꞉, huiyatiya ibi hiliyonomate ebe ba toleme hiya꞉hiya꞉ alahutihuya꞉ mabu iba꞉te ebe Ya꞉sukunu hibi ta꞉matadawama꞉ kaga꞉luya꞉ha꞉.
ACT 9:27 Ba꞉be mabuma꞉ Banabasiti ebe lawete oelamepi dubatamo ba magata ba꞉moi komokomo ibi ba꞉bo nikiyalamiya꞉, Solote gabo tetelo Kodawa Ya꞉suku dumi, ba꞉gala Kodawate ebetamo tabo dolamagi, ba꞉gala ebete Dama꞉sakase habalo Ya꞉sukunu mahilamo tabo heloamo dolamaginati.
ACT 9:28 Ba꞉bema꞉ ba꞉ba tetene tupuimiti Solote hibima꞉ midipa꞉go ba emede Yelusalema haba konomolo Kodawa Ya꞉sukunu mahilamo tabo heloamo olamagi ba꞉bo netupuimiya꞉.
ACT 9:29 Ba꞉bene komo tetelo ebete Guliki tabamo da꞉ga꞉lanakui ba꞉bi Yu tawakaluba꞉go Ya꞉sukunu komoma꞉ olowabeletihuinakuya꞉, ba꞉bema꞉ iba꞉te gabo bohowaditiya꞉ ebe anakapumima꞉.
ACT 9:30 Ba꞉ba tetelo hibima꞉ midipi ekaka꞉te ba꞉be komo diya꞉tawahuya꞉, iba꞉te Soloko Sisaliya ko habamo magatate ba꞉bene Tasase habamo dito noemiya꞉.
ACT 9:31 Ba꞉bema꞉ Yudiya ba꞉gala Ga꞉lili ba꞉gala Samaliya hopo kokonomolo demedehonama꞉, ba꞉bi sose tawakaluba꞉te gelebadi komago ba pola꞉na iba꞉te hibima꞉ midi ipuwalo helonomoma꞉ eda꞉halo ba꞉bo apepehuya꞉. Ba꞉ hibila, hibima꞉ midipa꞉te Kodawa Ya꞉sutamo papamila꞉halelo ebeno Gobogoboeno owalubi komodo ibino kuitititi konomoma꞉ ba꞉bo ediya꞉.
ACT 9:32 Ba꞉bene Pitate Yudiya ba꞉gala Samaliya hopodo ba peto, ebete eta hegelalo Lida habamo ba꞉bo nuluhukuya꞉ Godokono tuputupu tawakalubino emede komo konumima꞉.
ACT 9:33 Ebete ba꞉bolo eta dubu binumiya꞉, ebeno mahilo Iniyasitila, ebe a꞉iti gogo ipuwalo ape kodakoda temetemete ba umina ebeno wata bahilo dito watitanakui.
ACT 9:34 Pitate ebe na꞉goemiya꞉, “Iniyasi, Ya꞉su Kelisote ama꞉ a꞉hiduima꞉ta. Ama꞉ mahigate amia꞉no tilo na꞉mokopa꞉mida.” Ba꞉ba tetenomolo temetemete ba꞉be dubugodone da꞉wibuya꞉ ebete ba꞉bo mahiguya꞉,
ACT 9:35 ba꞉bema꞉ Lida ba꞉gala Salono habalo demedehonama꞉ ba꞉bi tawakalubi hiliyonomate ebeno hido komo umiti Kodawa Ya꞉sutamo ba꞉bo ohobiliya꞉.
ACT 9:36 Ba꞉bene Yopa habalo Ya꞉suku ta꞉matadawa eta kamena nemedenami, ebeno mahilo Tabitatela, tawakaluba꞉te ba꞉be mahilo Guliki tabamo Dokasima꞉ ka꞉mina, ba꞉moe mahiloeno ipuwa nitana ‘diya-goela.’ Ba꞉moe kamenoeno komo ba꞉ma ka꞉nala, ebete hidohido komo ba ododili awaepa꞉tamo malemale kodawanomoma꞉ eda꞉nami.
ACT 9:37 Eta hegelalo ebe tawetawete da꞉lawiya꞉ ba꞉ dito hoiya꞉, ba꞉bene genamanapa꞉te ebeno ape ukulate hunu genamoeno haba ko ditanami ba꞉be habamo dito nadila꞉tiya꞉ komo tawakaluba꞉te ebe ba꞉bolo kopela꞉mema꞉.
ACT 9:38 Ba꞉moe Yopa habane Lida habamo to muhuluha꞉, ba꞉bema꞉ Pitate Lida habalo demedenami, komo Ya꞉suku ta꞉matapa꞉te ba꞉be komo uliti netewa dubu ba꞉bo noelamiya꞉, iba꞉te ebe ba netoemeho ebete tiyolo kopema꞉.
ACT 9:39 Ba꞉bene Pitate mahigate iba꞉go ba꞉bo piya꞉. Ebete Dokasikono genamamo da꞉podoluya꞉, hoe kamenoeno ape konumima꞉ tawakaluba꞉te ebe ba꞉bo magatuya꞉ hunu genamalo haba ko ditanami ba꞉be habamo. Ba꞉bolo komo hamolehamola꞉te ebe tamelo putitatate ba ihimita ibino pupulino ilina ba꞉bo mutuimihuya꞉, Dokasiti ba emedena dopamo malemalelo dikalameholenakui ba꞉bi kaliko.
ACT 9:40 Ba꞉ba tetelo Pitate ibi hiliyonomo Dokasikono wata bahini poelamete, ebe ha꞉kiya pupamo emedete Godoko ba꞉bo toemehuya꞉, ba꞉bene ebete hoe kamenatamo ohobigate ebe na꞉goemiya꞉, “Tabita, ama꞉ na꞉mahiga!” Ba꞉ba tetenomolo ebete ebeno baidi a꞉la꞉minalete Pitako dumiya꞉ ebeno wata bahini mahigate dito emediya꞉,
ACT 9:41 ba꞉bene Pitate kokoto hogaminate ebete komahigama꞉ ba owalubi, ebete hamolehamole ba꞉gala komo hibima꞉ midipi ka꞉lamiti Dokasiko iba꞉tamo ba꞉bo ikalamiya꞉.
ACT 9:42 Ba꞉ hibila, ba꞉moe tabote Yopa haba konomamo da꞉tuya꞉ hiliyonomo tawakaluba꞉te Kodawa Ya꞉suku hibima꞉ ba꞉bo midiya꞉,
ACT 9:43 ba꞉bema꞉ Pitate komo hegela hiliyodopo ba꞉be habalo emediya꞉ Saimonokono genamalo, ba꞉be dubu ba꞉ kau-goegoeno tamamo ilina ododilidawala.
ACT 10:1 Ba꞉ba tetelo eta dubuti Sisaliya ko habalo nemedenami, ebeno mahilo Koniliyasitila, ebe ba꞉ Lomanapi alaholohopino gawadubu etala, ba꞉gala ebeno alaholohopino kapiyuimi mahilo ba꞉ Italinapino Kapiyuimila.
ACT 10:2 Ebete ebeno ododili ipuwalo Godotamo na꞉papamiwatanami, ba꞉ma ka꞉na ebete ebeno genamanapa꞉go Godoko badikuminakuya꞉, ba꞉gala komo tetelo ebete Yunapi awaelo demedehonama꞉ ba꞉bi tawakalubi malemalelo owalubilinakui, ba꞉gala hiliyonomo hegelalo ebete Godotamo toetoe tabo bolamaginakui.
ACT 10:3 Ba꞉bene eta hegelalo hegelate nanekela꞉mo da꞉nihitigatepaniya꞉, ba꞉be tete ba꞉ 3 koloko tetela, ebeno baiditi hiya꞉ma꞉ ba eda꞉hamena Godokono nopodawa hidamo ba꞉bo uminiya꞉. Nopodawate ebetamo pa꞉pa꞉ganate na꞉peka꞉miniya꞉, “Koniliyasi!”
ACT 10:4 Ba꞉ba tetelo Koniliyasiti nopodawa tola꞉go ba umihona ebetamo na꞉goeniya꞉, “Kodawa, badala꞉ka꞉?” Nopodawate ebetamo na꞉huiyaniya꞉, “Ama꞉le toetoe tabo Godotamo dolamaginaka ba꞉gala awaepa꞉tamo malemale komo dododilinaka, ba꞉be mabuma꞉ Godote ama꞉tamo na꞉kalakalana, ebe ubila eta hido komo ama꞉tamo ododi.
ACT 10:5 Ba꞉bema꞉ ama꞉le ka꞉lo komo dubu noelama꞉ Yopa habamo, iba꞉te eta dubu Saimono Pitako komagahema꞉.
ACT 10:6 Ba꞉moe Pitako ebe eta Saimono kau-goegoeno tamamo ilina ododilidawoeno genamalo bemedena, ebeno genamate kehaha꞉ kolomo dodolo la꞉ma꞉na, ba꞉bene ama꞉le pui da꞉noelamemena꞉, ba꞉bi dubate ba꞉bamo nikuliti Pitako ba꞉bo konumima꞉na꞉.”
ACT 10:7 Ba꞉ba tetelo Koniliyasitamo dolamaginiya꞉ ba꞉be nopodawate ebegodone da꞉toniya꞉, ebete ebeno genama guino okopi netewa ba꞉gala alaholodawa dubu kapiya ba꞉bo ka꞉laminiya꞉, ba꞉be alaholodawa dubuti Godotamo na꞉papamiwatanami ba꞉gala ebe Koniliyasikono hido hopodawa etala.
ACT 10:8 Ba꞉bene Koniliyasitamo kebe komote kuluhukuniya꞉, ebete ba꞉be komo ibi kiyalamenate Yopa habamo ba꞉bo oelameniya꞉.
ACT 10:9 Eta hegelalo iba꞉te Yopa haba tama꞉mo ikulima꞉ ba tolamenato, Pitate hegela tuli tetelo Godokoba꞉ tabo ga꞉lama꞉ genama hunamo ha꞉kiya dito nodoluya꞉.
ACT 10:10 Ba꞉ba tetelo ebeno tepo ipuwalo baa꞉ kape komo ba iya꞉tawuta baa꞉ nama꞉ ubi bihatitiya꞉, huiyatiya genamanapa꞉te baa꞉ ka꞉ma꞉ ba hiduimita ebeno baiditi hiya꞉ma꞉ ba꞉bo eda꞉hamiya꞉.
ACT 10:11 Ba꞉bene Godote Hunu Haba a꞉hiya꞉midutalo Pitate ba꞉bo umiya꞉, ebegodone eta ilinate pihitiguya꞉, konomo kaliko mubumubu netewa-netewa uwatelete hopamo ba꞉bo padipotiya꞉.
ACT 10:12 Ba꞉ hibila, ba꞉be kaliko ipuwalo da꞉ka꞉ka꞉halena ba꞉bi hiya꞉hiya꞉ ilina hiliyonomate pola꞉nuya꞉, ba꞉ma ka꞉na natamo wapata꞉lame ilina, tepamo wapata꞉lame ilina, ba꞉gala hiliyonomo holahola, Pitate ba꞉bakobako ilina bulamiya꞉.
ACT 10:13 Ba꞉bene tabote ebetamo ba꞉ma ka꞉na pihitiguya꞉, “Pita, ama꞉ mahigate eta ilina anakapumiti na꞉na!”
ACT 10:14 Huiyatiya Pitate na꞉goiya꞉, “Ao, Kodawa, na modoboha꞉! Ama꞉le a Yunapa꞉tamo dopamo da꞉miya꞉tea꞉miya꞉la, nale ba꞉bi talona kadikamidalenakuiha꞉. Nale ba꞉makomako kuba goegoe, kalu, ba꞉gala holahola a꞉kanahalemo!”
ACT 10:15 Ba꞉bene gala ebetamo eta tabote kapiya꞉, “Ba꞉ma tetelo Godote kebe ilina hidohidoma꞉ da꞉goena, ama꞉le ba꞉bi ilina kubakubama꞉ akagaa꞉la꞉.”
ACT 10:16 Ba꞉bene Godote Pitatamo ba꞉be komo netewa-kapiya teta꞉mo ododiti, ba꞉be ilinagoeno kaliko Hunu Habamo gala dito kalawa꞉diguya꞉.
ACT 10:17 Ba꞉ba tetelo Pitate ba꞉moe komoeno ipuwama꞉ ukui bilibilima꞉ ba edita, Koniliyasiti eta gapogapolo doelameniya꞉ ba꞉bi dubate Saimonokono genama niya꞉tawahate ba꞉be genamoeno kala imi gigiholo ba꞉bo nela꞉mota꞉hanuya꞉.
ACT 10:18 Ba꞉bene iba꞉te genamanapi nalateda꞉liya꞉, “Saimono Pitako ba꞉moe genamalo ba꞉ka꞉luta?”
ACT 10:19 Ba꞉be atu tetenomolo Pitate kebe komo kumiya꞉, ebete ba꞉be komoeno ipuwa ba ohowadita Godokono Gobogobote ebe na꞉kiyamiya꞉, “Gigiho tamelo dubu netewa-kapiyate ama꞉ ba꞉pohowaditata.
ACT 10:20 Ama꞉ mahigate iba꞉tamo na꞉nihitiga. Ama꞉ ibino tabo dulimina꞉ iba꞉go toma꞉ aka-ukuibilibila꞉la꞉, mabu ibi nale poelamimo.”
ACT 10:21 Ba꞉ba tetelo Pitate ba꞉bi dubatamo pihitigate na꞉pegoiya꞉, “Na ba꞉ la꞉le dohowadinitama, ba꞉be dubula. La꞉ badama꞉ ka꞉pelameoma?”
ACT 10:22 Iba꞉te ebetamo na꞉huiyuya꞉, “Alaholohopino Gawadubu Koniliyasiti dutu gapogapolo a ama꞉tamo poea꞉meni. Ebe tuputupudawala, ebete hibi Godo badikumina ba꞉gala Yunapi hiliyonomate ebe hidodawanomoma꞉ ga꞉lanaka. Godokono eta talona nopodawate ebe a꞉kiyameni ama꞉le ebeno genamamo kopema꞉, ba꞉bene ebete amia꞉no tabo kulima꞉ne.”
ACT 10:23 Ba꞉bema꞉ Pitate ibino tabo uliti genama guamo magatalete ba꞉be dulu ibi hidamo owalubiliniya꞉. Ba꞉bene eta hegelalo Pitate mahigate ba꞉bi dubago na꞉tuya꞉, ba꞉gala Yopa habane komo hibima꞉ midipi dubate iba꞉go a꞉katolamiya꞉.
ACT 10:24 Iba꞉te gabo tetelo nelahanate, eta hegelalo Sisaliya ko habamo ba꞉bo nikuliya꞉, huiyatiya iba꞉te Koniliyasitamo nikulihino ebete dopamo ebeno hawi tawakalubi ba꞉gala komo mabulubi ka꞉lamiti, iba꞉te ebeno genamamo pekapiyuimiti Pitako ba꞉bo pelatimitiya꞉.
ACT 10:25 Ba꞉bene Pitate ba꞉bamo puluhukuti genamamo a꞉pa꞉gama꞉ ba newagelita, Koniliyasiti eba꞉go palugate ebeno nato mabamo pepapamiwatalo ebe ba꞉bo padikumiya꞉.
ACT 10:26 Pitate huiyatiya ebe adipatelo na꞉goiya꞉, “Ama꞉ na akadikunama꞉la꞉! Ama꞉ na꞉mahiga, mabu na hopo lumagila, na ba꞉ ama꞉ huiyala.”
ACT 10:27 Ba꞉bene Pitate eba꞉go tabo ga꞉lago genama guamo ba na꞉pa꞉la꞉, tawakalubi hiliyonomate ya꞉lo kapiyuimiti ba pola꞉na ba꞉bo nulamiya꞉.
ACT 10:28 Pitate iba꞉tamo na꞉goiya꞉, “La꞉ iya꞉tawahala a Yunapa꞉godolo talona bitana eta Yuha꞉ lumagino genamamo odolo, ba꞉gala ale Yuha꞉ lumaga꞉go a꞉kakapiyuima꞉ma꞉, huiyatiya Godote eta komo na iya꞉tunami, nale eta lumagitamo ubiha꞉ma꞉ eda꞉lo dalowa꞉goenoma꞉ a꞉kagaa꞉mo.
ACT 10:29 Ba꞉bema꞉ la꞉le natamo tabo da꞉poemenima, na ba꞉be tabo uliti ukui bilibila꞉go kapeha꞉, kalakalago pemo, huiyatiya nonolata, la꞉le natamo tabo badama꞉ ka꞉noemeonima?”
ACT 10:30 Ba꞉bene Koniliyasiti ebetamo na꞉huiyuya꞉, “Netewa-kapiya hegela da꞉peniwibui eta ko komote natamo uluhukuni. Ba꞉ba tetelo hegelate nanekela꞉mo da꞉nihitigatepani nale naeno genamalo Godotamo toetoe tabo bolamaginimo, ba꞉bene dubuti a꞉la꞉mina kalikago puluhukunate naeno dopo hapulu la꞉nalo uminimo.
ACT 10:31 Ebete natamo na꞉goeni, ‘Koniliyasi! Godote amia꞉no toetoe tabo uli ba꞉gala amia꞉no malemale ododili komoma꞉ na꞉kalakalana.
ACT 10:32 Ba꞉bema꞉ ama꞉ tabo na꞉noemiya꞉ Yopa habamo Saimono Pitate kopema꞉, ebete eta Saimono kau-goegoe tamamo ilina ododilidawoeno genamalo bemedena, ebeno genamate kehaha꞉ kolomo dodolo la꞉ma꞉na.’
ACT 10:33 Ba꞉bema꞉ nale tabo tiyonomolo poemenimo ama꞉le kopema꞉, ka꞉lo ama꞉ a꞉pa꞉ta. Kalakala konomola, a hiliyonomate ba꞉malo Godokono holoholo hapulu ba꞉pola꞉nama꞉, Kodawa Godote ama꞉tamo dikamehui ba꞉be tabo ale hidamo kulihoma꞉nema꞉.”
ACT 10:34 Ba꞉bene Pitate tabo olamagi ba tupuimi na꞉goiya꞉, “Hibila, na iya꞉tawamo Godote tawakalubino hunu tama kulamelelamenaha꞉,
ACT 10:35 ba꞉bema꞉ ba꞉moe hopo konomolo hiya꞉hiya꞉ tawakalubi ipuwalo kebe lumagiti Godotamo papamiwatalo tuputupu komo dododilinamene, ebete ba꞉be lumagitamo ba꞉kalakalanamene.
ACT 10:36 “Godote dopamo a Isalaela tawakaluba꞉tamo da꞉poemi, la꞉ ba꞉be tabo iya꞉tawahala, iyo, ebete ba꞉be Hido Gelebadi Tabo atamo Ya꞉su Kelisoko ipuwado a꞉pehawakalimi, Ya꞉suku ba꞉ ba꞉moe hopo tawakalubi hiliyonomoeno Kodawala.
ACT 10:37 Ba꞉gala la꞉ ba꞉moe eta ko komo iya꞉tawahala, Yoneko tawakalubi beyamo wadulateledawate Godokono tabo da꞉polamagi, Nasaletenapi Ya꞉suti ebeno oko ba꞉ba tetelo tupuimi, iyo, ebeno komote Ga꞉lili hopolo dopamo hawakalate Yudiya hopo konomamo ba꞉bo nuluhukui. Ba꞉bema꞉ la꞉ iya꞉tawahala, Godote ebe lawete ebeno Talona Gobogoboeno helo ebe hunamo da꞉haminui, ba꞉be mabuma꞉ ebete hidohido komo ododila꞉go ba pata꞉, Saitanate hala꞉mo da꞉matuhulameholenami ebete ba꞉bi tawakalubi hiliyonomo bihiduilamenakui mabu Godote eba꞉go nemedenami.
ACT 10:39 Ba꞉bema꞉ numa꞉la꞉, Ya꞉suti a Yunapino hopolo ba꞉gala Yelusalema ko habalo dododilinakui, ba꞉bi komokomo ale aeno baida꞉mo dulamenakuima꞉, a ba꞉bema꞉ ga꞉lanama꞉. Ba꞉ hibila, tawakaluba꞉te ebe keha pihigamo pihomotete ikoko alukulimiti ba꞉bo anakapumiya꞉,
ACT 10:40 huiyatiya netewa-kapiya hegelalo Godote ebe hoene ka꞉ka꞉mo adipatelo tawakaluba꞉tamo ba꞉bo hawakalimi.
ACT 10:41 “Huiyatiya Ya꞉suti hoe ipuwane da꞉mahigui hiliyonomo tawakaluba꞉tamo kuluhukuha꞉, ao, Godote ebeno ubilo pui Ya꞉sukunu komo hawakalimima꞉ ya꞉lo da꞉ka꞉lamiholiya꞉, ebete a kapiyakapiyatamo uluhukui. Ba꞉bema꞉ hibila, komo tetelo ebete ago baa꞉ a꞉nanakui,
ACT 10:42 ba꞉bene eta tetelo ebete a a꞉kiyaa꞉mi ale tawakaluba꞉tamo Godokono Hido Tabo kolamagiminakoma꞉. Ale ba꞉moe komo ba꞉bema꞉ hawakaliminama꞉, puya꞉te demedehona ba꞉gala puya꞉te dopamo da꞉ha꞉lahuya꞉, Ya꞉suti ba꞉bi hiliyonomo tawakalubino komo kanagilamelelamema꞉ne, mabu ya꞉lo tetenomolo Godote ebetamo ba꞉be oko bikamiya꞉.
ACT 10:43 Iyo, ba꞉ hibila, Godokono ukui hawakalimipi dopamo demedenama꞉ ibi hiliyonomate Ya꞉sukunu komo ba꞉ma ka꞉na hawakaliminakuya꞉, puya꞉te ebe hibima꞉ da꞉midimina꞉ Godote ibino kuba Ya꞉sukunu mahiloeno heloamo egebolelamete kadodoholelamema꞉ne.”
ACT 10:44 Pitate ba꞉moe tabo ba olamagita, Godokono Gobogobote tabo ulihopi hiliyonomo hunamo ba꞉bo pihitiguya꞉.
ACT 10:45 Ba꞉bene komo Yunapi hibima꞉ midipa꞉te Yopa habane Pitakoba꞉ da꞉pelamiya꞉, iba꞉te ba꞉be komo umiti koamo hanohanohutiya꞉, mabu Godote ebeno Gobogobo Yuha꞉pi hunamo malemalelo dito haminuya꞉, dopamo ebete Yunapa꞉tamo keba ka꞉na kikalamiya꞉ ba꞉ba ka꞉na.
ACT 10:46 Iyo, Yuha꞉pa꞉te Godokono Gobogoboeno heloamo Hunu Haboeno nopopino hiya꞉hiya꞉ tabamo ebe ba awagaminuta, Yunapa꞉te ba꞉bo ulihutiya꞉, ba꞉bema꞉ Pitate ebeno mabuluba꞉tamo na꞉goiya꞉,
ACT 10:47 “Numa꞉la꞉, ba꞉moi tawakaluba꞉te Godokono Gobogobo a꞉lawa꞉, ale dopamo da꞉lawima꞉ ba꞉ba ka꞉na. Ba꞉bema꞉ ale ibi beyamo wadulatele modobola, ba꞉moe hido komo ododima꞉ eta lumagiti a a꞉kaduhia꞉ma꞉mene.”
ACT 10:48 Ba꞉bene Pitate komo ibi na꞉kiyalamiya꞉ iba꞉te Ya꞉su Kelisokono mahilamo Yuha꞉pi beyamo kowadulatelema꞉. Iba꞉te ba꞉be komo ododi da꞉wibuya꞉, Koniliyasia꞉te Pitako ba꞉bo toemehuya꞉ komo hegela iba꞉go kemeda꞉tepama꞉.
ACT 11:1 Ba꞉ba tetelo Yudiya hopo konomolo demedenama꞉ ba꞉bi oelamepi dubu ba꞉gala komo hibima꞉ midipi ekaki, iba꞉te ba꞉moe komo uliya꞉ Yuha꞉pa꞉te Godokono tabo da꞉lawiya꞉.
ACT 11:2 Ba꞉bema꞉ Pitate Yelusalema ko habamo da꞉piya꞉ komo iba꞉te ebe koamo kiyahamiya꞉, mabu iba꞉te na꞉ga꞉lanakuya꞉ Yuha꞉pi dubate Yunapino tama itamida kukala uwateheno iba꞉te hibima꞉ midipa꞉go akakapiyuima꞉la꞉.
ACT 11:3 Ba꞉bema꞉ iba꞉te Pitatamo na꞉ga꞉luya꞉, “Ama꞉ bada mabuma꞉ tama itamida kukala uwateha꞉pino genamamo dito nodolote iba꞉go baa꞉ badama꞉ ka꞉nenui? Ama꞉ aeno ko kukala benadikamidalia꞉ta!”
ACT 11:4 Ba꞉bema꞉ Pitatamo kebe komate kikulihuya꞉, ebete ba꞉bi komoeno tupuilame mabuni tupuimiti hidamo ba꞉ma ka꞉na hawakalilamiya꞉,
ACT 11:5 “Na Yopa habalo ba nemedenate eta hegelalo Godokoba꞉ tabo da꞉ga꞉lutima꞉ naeno baiditi hiya꞉ma꞉ ba꞉bo eda꞉hanami. Ba꞉ba tetelo Godokono Hunu Habane eta ilinate pihitigutalo umimo, ebete konomo kaliko mubumubu netewa-netewa uwatelete natamo ba꞉bo padipoti.
ACT 11:6 Ba꞉ba tetelo nale tatalinomolo utiti kaliko ipuwalo da꞉pola꞉nui ba꞉bi ilina hidamo ulamimo, natamo wapata꞉lame dabihole ilina, ba꞉gala komo hiya꞉hiya꞉ dabiholeha꞉ goegoe, ba꞉gala tepamo wapata꞉lame ilina, ba꞉gala holahola hiliyonomo.
ACT 11:7 Ba꞉bene tabote natamo ba꞉ma ka꞉na pi, ‘Pita, ama꞉ mahigate, eta ilina anakapumiti na꞉na!’
ACT 11:8 “Huiyatiya nale na꞉goimo, ‘Ao, Kodawa, na modoboha꞉. Ama꞉le dopamo a Yunapa꞉te nahama꞉ talona da꞉miya꞉tea꞉miya꞉la, nale ba꞉makomako kuba ilina a꞉kanahalemo!’
ACT 11:9 “Ba꞉bene tabote gala Hunu Habane na꞉kapi natamo, ‘Ba꞉ma tetelo Godote kebe ilina hidohidoma꞉ da꞉goena, ama꞉le ba꞉bi ilina kubakubama꞉ akagaa꞉la꞉.’
ACT 11:10 Ba꞉bene Godote natamo netewa-kapiya teta꞉mo ba꞉be komo ododiti, ba꞉be ilinagoeno kaliko Hunu Habamo gala dito kalawa꞉digui.
ACT 11:11 “Ba꞉bene ba꞉ba tetenomolo Sisaliya habane natamo da꞉poelami, ba꞉bi dubu netewa-kapiyate ale demedenatima꞉ ba꞉be genamamo ba꞉bo pikuliya꞉.
ACT 11:12 Ba꞉ba tetelo Godokono Gobogobote na niya꞉tunami, nale iba꞉go ukui bilibilihino kotoma꞉, ba꞉bema꞉ ba꞉moi hibima꞉ midipi sikisi ekaki Yopa habane nago Sisaliya habamo tolamete Koniliyasikono genamamo ba꞉bo nalehawaminuima꞉.
ACT 11:13 Ba꞉bene Godokono nopodawate eta gapogapolo Koniliyasitamo duluhukuni, ebete ba꞉be komo a ba꞉bo kiyaa꞉mi. Ba꞉be nopodawate ebeno genamalo da꞉la꞉nui ebetamo na꞉goeni, ‘Ama꞉ Yopa habamo tabo na꞉noema꞉ Saimono Pitate kopema꞉.
ACT 11:14 Ebete pete Godokono tabo da꞉polamagimini, ba꞉be gabodo ama꞉ ba꞉gala amia꞉no genamanapi la꞉ hiliyonomate ka꞉ka꞉ mula꞉ komo Godogodone kolawema꞉nemata.’
ACT 11:15 “Ba꞉bene nale Koniliyasikono tabo uliti tabo olamagi ba tupuimi, Godokono Gobogobote ibi hunamo ba꞉bo hitigui, dopo tetelo atamo da꞉hitigui ba꞉ba ka꞉na.
ACT 11:16 Ba꞉ba tetelo Kodawa Ya꞉suti dopamo dolamagi, nale ebeno tabo gala na꞉kemalagidoluimo. Ebeno tabo ba꞉ma ka꞉nala, ‘Yonete la꞉ beyanomamo da꞉wadulateli, huiyatiya Godote la꞉ ebeno Gobogobamo kowadulatelema꞉na꞉ta.’
ACT 11:17 Hibila, Godote ebeno Gobogobo Yuha꞉pa꞉tamo ba꞉ma ka꞉na ikalami, dopamo ebete atamo dikaa꞉mi ba꞉ba ka꞉na, ale Kodawa Ya꞉su Kelisoko hibima꞉ da꞉midima꞉ ba꞉ba tetelo. Ba꞉bema꞉ na potela꞉ka꞉, nale Godoko duhimima꞉ dewagelenamo? Nale Godokono helo iba꞉godolo dumimo Yuha꞉pi beyamo ba꞉bema꞉ wadulatelimo.”
ACT 11:18 Ba꞉ba tetelo sose watowatopa꞉te Pitakono tabo uliti ebeno ododi komoma꞉ eta duhimi tabo kaga꞉luya꞉ha꞉, huiyatiya iba꞉te Godoko ba milimiho na꞉ga꞉luya꞉, “Ba꞉ hibila, Godote atumu Yuha꞉pa꞉tamo hido tete ikalami, iba꞉te kuba ukui ipuwane ohobila꞉te Godokono hibi ka꞉ka꞉ kolawema꞉.”
ACT 11:19 Ba꞉moe ba꞉ eta komola. Yu watowatopa꞉te Stibiniko danakapumiya꞉ ba꞉ba tetelo ibino maubate helonomoma꞉ ediya꞉ Ya꞉suku hibima꞉ midipa꞉tamo, ba꞉bema꞉ iba꞉te Yelusalemane hiya꞉hiya꞉ alahutihuya꞉, komopa꞉te Ponisiya hopamo, komopa꞉te Saipalase hopamo, ba꞉gala komopa꞉te A꞉ntiyoka ko habamo, iba꞉te ba꞉ba ka꞉na alahutihuya꞉. Ba꞉bene iba꞉te ba꞉bi hiya꞉hiya꞉ hopolo ba nemedehona, iba꞉te dopamo Yu tawakalubi kapiyatamo Ya꞉sukunu Hido Tabo olamagimi ba꞉bo netupuimiya꞉.
ACT 11:20 Huiyatiya Saipalase hoponapi ba꞉gala Sailiniya hoponapi, ibino komo hibima꞉ midipa꞉te A꞉ntiyoka ko habamo da꞉pelamiya꞉, iba꞉te Yuha꞉pa꞉tamo atumu Kodawa Ya꞉sukunu komoma꞉ Hido Tabo ba꞉bo polamagimiya꞉.
ACT 11:21 Ba꞉ba tetelo tawakalubi hiliyonomate ibino tabo hibima꞉ miditi Kodawa Ya꞉sutamo ba꞉bo ohobiliya꞉, mabu Kodawoeno helote iba꞉godolo nitanami.
ACT 11:22 Ba꞉bene Yelusalema ko haboeno sose watowatopa꞉te ba꞉be komo uliti Banabasiko ba꞉bo poemiya꞉ A꞉ntiyoka ko habamo.
ACT 11:23 Ebete ba꞉bamo da꞉puluhukuya꞉ Godokono malemale komote ibi ipuwalo oko dowatinami ba꞉be komo pumiti koamo pekalakaluya꞉, ba꞉bema꞉ ebete ibi na꞉kiyalamiya꞉ iba꞉te ibino tepo ipuwa kodakoduilamete Kodawa Ya꞉suku ipuwalo hibinomolo kemedenama꞉.
ACT 11:24 Ba꞉ hibila, ba꞉moe Banabasiko ba꞉ hido dubunomola, Godokono Gobogobote ebe a꞉tabuimiya꞉ ba꞉gala ebeno hibima꞉ midi komote konomoma꞉ eda꞉nami, ba꞉bema꞉ Godote ebe ipuwado hido oko ba owati hiliyonomo tawakaluba꞉te Kodawa Ya꞉sutamo ba꞉bo ohobiliya꞉.
ACT 11:25 Ba꞉bene Banabasiti Tasase ko habamo ba꞉ dito tuya꞉ Soloko konumima꞉.
ACT 11:26 Ebete ebe numiti A꞉ntiyoka ko habamo dito magahiya꞉, ba꞉bene ibi netewapa꞉te kapiya gogo ipuwalo sose tawakaluba꞉go da꞉kapiyuiminakui, iba꞉te komopi hiliyonomo ba꞉bo iya꞉tulamenakuya꞉. Ba꞉ba tetelo komo A꞉ntiyokanapa꞉te Ya꞉suku ta꞉ma꞉tapi ebeno mahilamo ka꞉lamilo Kelisoko huiya tawakalubima꞉ ka꞉lami ba꞉bo tupuimiya꞉.
ACT 11:27 Ba꞉bene komo Godokono ukui hawakalimipi dubate Yelusalema ko habane A꞉ntiyokamo dito tolamiya꞉.
ACT 11:28 Ibi ipuwalo eta dubu A꞉gabasiti mahigate Godokono Gobogoboeno heloamo tabo ba꞉ma ka꞉na olamagiya꞉, “Ba꞉moe hopo konomolo tete ga꞉ga꞉dopolo naha ilinate kowibohoma꞉na꞉!” Ba꞉bema꞉ ba꞉be komote galane hibinomolo uluhukuya꞉, Lomanapino Konomo Gawadubu Kolodiyasiko tetelo.
ACT 11:29 Ba꞉bene Ya꞉suku ta꞉matapa꞉te ba꞉be komo uliti tabo ba꞉ma ka꞉na ihatiya꞉, ibi hiliyonomagodolo kebako maniti modobolo ka꞉pola꞉nuya꞉, ba꞉bi mani miya꞉tete iba꞉te Yudiya hopolo demedehonama꞉ ba꞉bi hibima꞉ midipi ekaki malemalelo konowalubilima꞉.
ACT 11:30 Ba꞉bema꞉ iba꞉te ba꞉ ba꞉ba ka꞉na ododiya꞉, ba꞉bi mani iba꞉te Banabasiko ba꞉gala Soloko ibino kokotamo miya꞉tete ba꞉bo oelamiya꞉ Yelusalema sose watowatopa꞉tamo.
ACT 12:1 Ba꞉be atu tetelo Yelusalema ko habalo Ko Gawadubu Heloditi koko temeteme sose tawakaluba꞉tamo ikalame ba꞉bo tupuimiya꞉,
ACT 12:2 ba꞉ma ka꞉na ebete alaholohopi noelamete, iba꞉te Yonekono naniwi Ya꞉imesiko nelawete du genamalo ebe alaholo gila꞉mo ba꞉bo anakapumiya꞉.
ACT 12:3 Ba꞉bema꞉ komo hibima꞉ midiha꞉ Yu tawakaluba꞉te ebeno ododi komoma꞉ da꞉kalakalahutiya꞉, Heloditi ba꞉be komo iya꞉tawate Pitako atumu anakapumima꞉ ubi na꞉kihatitiya꞉, ba꞉bene Yu tawakaluba꞉te ibino Hunamo Mahigaha꞉ Palawa Baa꞉ Poko ba ododita ebete Pitako ba꞉bo lawiya꞉.
ACT 12:4 Ba꞉bene Pitako du genamamo ba noeme Heloditi ebeno komo alaholohopi dito nimiya꞉tiya꞉ iba꞉te ebe hidamo konuminatema꞉. Ba꞉bi alaholohopa꞉te Pitako ba uminate ibino netewa-netewa kapiyuilamelo pola꞉nuya꞉, eta kapiyuimilo powa, eta kapiyuimilo powa, iba꞉te ba꞉ba ka꞉na pola꞉nuya꞉, mabu Heloditi ubi nihatitiya꞉, Adaguila꞉ Poko da꞉wibomene ebete Pitako uluhukutiti tawakalubino holoholo hapulu ebeno komo anagiya꞉midamete ebe ba꞉bo kanakapumima꞉.
ACT 12:5 Ba꞉bema꞉ Pitate ba꞉be tete ba latimi du genamalo ba꞉bo emediya꞉, huiyatiya sose tawakaluba꞉te ebe mabuma꞉ Godotamo konomamo toetoehonama꞉.
ACT 12:6 Heloditi Pitako tawakalubino holoholo hapulu anakapumima꞉ da꞉goiya꞉, ba꞉be hegela peheno eta dulu Pitate netewa alaholohopi dubuino tetelo wataniya꞉, auli hale ma꞉holamelemela, ba꞉gala ba꞉be dulu komo netewa alaholohopi dubate du genama gigiholo na꞉la꞉mota꞉nuya꞉.
ACT 12:7 Ba꞉bene ba꞉ba tetelo Kodawa Godokono nopodawate uluhukadiganate ba la꞉na alote du genama gu ba꞉bo a꞉la꞉minaniya꞉. Ebete Pitako ala ipini ologilo ba modoetena na꞉goemeniya꞉, “Pita, tiyo na꞉mahiga!” ba꞉bene ebete ba꞉be tabo ba goena Pitakono kokotoeno auli halete ha꞉kiya ba꞉bo pahamila꞉haleminiya꞉.
ACT 12:8 Ba꞉bene Godokono nopodawate ebetamo na꞉goeniya꞉, “Amia꞉no apeno ilina pupuliti nato ilina na꞉kapupuliya꞉.” Pitate ba꞉be komo ododinate nopodawate ebe gala na꞉kagoemeniya꞉, “Ama꞉ amia꞉no atuino kaliko puliti na na꞉ta꞉mahena꞉.”
ACT 12:9 Ba꞉bene Pitate ebe ba ta꞉matana Godokono nopodawate ebetamo dododiniya꞉ ba꞉be komo ebete hiyolo numinamo goeniya꞉.
ACT 12:10 Iba꞉te ba꞉ba ka꞉na ba tona eta lawamedawa negogolonate, eta kanegogolonate, ba꞉ba ka꞉na iba꞉te du genamoeno auli gigihamo ba꞉bo nuluhukuniya꞉. Ba꞉ba tetelo koko gigihate ha꞉kiya a꞉hilamenate iba꞉te haba teta꞉mo ba꞉ dito nuluhukuniya꞉, ba꞉bene iba꞉te haba ipuwoeno eta gabodo nanekela꞉mo tonate Godokono nopodawate Pitagodone ba꞉ dito nalatidiniya꞉.
ACT 12:11 Ba꞉ba tetelo Pitate hido ukui lawenate na꞉goeniya꞉, “Hibila, na ka꞉lo iya꞉tawamo Kodawa Godote ebeno nopodawa a꞉poeme, iyo, ebete na Helodikono helo ipuwane a꞉puluhukunatene, ba꞉gala komo hibima꞉ midiha꞉ Yunapino kuba ubi komo ipuwane ebete naeno ka꞉ka꞉ a꞉mula꞉name.”
ACT 12:12 Ba꞉bema꞉ ebete ba꞉moe komo diya꞉tawaniya꞉ ebete Yone Makakono menoko Ma꞉likono genamamo dito nuluhukuniya꞉, mabu hibima꞉ midipi hiliyonomate ba꞉bamo ya꞉lo a꞉kapiyuiminiya꞉ iba꞉te Godotamo toetoe tabo Pitako mabuma꞉ kolamagiminama꞉.
ACT 12:13 Ba꞉bene Pitate gigiho ba nanakamina, eta oko bohele ebeno mahilo Laudate gigiho a꞉hiya꞉midama꞉ ba pena,
ACT 12:14 ebete Pitakono tabo madodo pulinate gigiho a꞉hiya꞉midaheno kalakalago puliganate, Pitate gigiho tamelo da꞉pela꞉nuya꞉ ba꞉be komo ebete tawakalubi ba꞉bo nikiyalameniya꞉.
ACT 12:15 Iba꞉te ebetamo na꞉huiyaniya꞉, “Ao, ama꞉ na꞉daedaenata!” Huiyatiya ebete ebeno tabo hibinomoma꞉ gala da꞉kagoeniya꞉, iba꞉te ukui hiya꞉ma꞉ midilinate na꞉ga꞉laniya꞉, “Diyala, Pitate ya꞉lo hoete Godokono nopodawate ebeno holoholamo kuda꞉ a꞉pe.”
ACT 12:16 Iba꞉te ba꞉be tabo ba ga꞉lana huiyatiya Pitate gigiho anakami kekelameniya꞉ha꞉, ba꞉bema꞉ iba꞉te pelamenate gigiho da꞉pa꞉hiya꞉midaniya꞉ Pitako uminate koamo hanohanohoniya꞉.
ACT 12:17 Ba꞉ba tetelo Pitate ebeno kokotamo tawakalubino kalakala diyamo ba duhilamena, Kodawa Godote ebe du genamane keba ka꞉na kuluhukutiniya꞉ ba꞉be komo ebete ibi ba꞉bo goelameniya꞉. Ba꞉bene ebete iba꞉tamo na꞉goeniya꞉, “Ba꞉moe komo Ya꞉imesiko ba꞉gala aeno komo hibima꞉ midipi ekaki na꞉nikiyalama꞉la꞉.” Ba꞉ba tetelo Pitate ibi miya꞉palenate diya gabodo eta genamamo dito toniya꞉ gabomana꞉te ebe gala lawekapoma꞉.
ACT 12:18 Eta duiduiyalo hegelate da꞉powalohuya꞉ ba꞉ba tetelo du genama lawamepi dubate Pitako du genamane keba ka꞉na kuluhukuniya꞉, iba꞉te ba꞉be mabuma꞉ konomamo ba hanohanohuta ukui bilibilinomoma꞉ eda꞉hutiya꞉.
ACT 12:19 Ba꞉bene Ko Gawadubu Heloditi ba꞉be komo duliya꞉ tabo ba꞉bo ihatiya꞉ Pitako kohowadima꞉, huiyatiya iba꞉te ebe nipo ohowadiya꞉. Ba꞉ba tetelo Heloditi ibi Pitakono komoma꞉ konomamo dalateda꞉liya꞉, huiyatiya iba꞉te hibi komo hawakalimima꞉ kamodobutiya꞉ha꞉, ba꞉bema꞉ ebete ebeno komo alaholohopi bikiyalamiya꞉ iba꞉te ba꞉bi du genama lawamepi dito kanakapulamema꞉. Ba꞉be komo da꞉wibuya꞉ gala hapuni Ko Gawadubu Heloditi Yudiya hopone Sisaliya ko habamo dito tuya꞉ tete ga꞉ga꞉dopolo ba꞉bolo konemedenama꞉.
ACT 12:20 Ba꞉bene eta tetelo ebete Taya ba꞉gala Saidono koko haba netewatamo konomamo da꞉maubuya꞉, ba꞉be mabuma꞉ ba꞉bi tawakaluba꞉te ukui bilibilinomoma꞉ eda꞉huya꞉ mabu ibi hiliyonomate Helodikono hopolo baa꞉ uwatenakuya꞉. Ba꞉ba tetelo iba꞉te Sisaliya ko habamo pelamete Ko Gawadubuino genama umidawa Balastasiko dopamo na꞉pega꞉lamiya꞉ ebete ibi mabuma꞉ Helodiko kogelebadimima꞉.
ACT 12:21 Ba꞉bema꞉ Heloditi iba꞉go tabo kolamagimima꞉ kebe tete kihatiya꞉, ba꞉be tete da꞉piya꞉ ebete ebeno ko gawadubuino ilina pupuliti tabo anagiya꞉mida bahilo ba luta iba꞉tamo tabo ba꞉bo olamagiya꞉.
ACT 12:22 Ba꞉bema꞉ iba꞉te Helodikono tabo duliya꞉, ebe ba milimiho ibulunomamo ga꞉lalo na꞉huiyuya꞉, “Atamo dolamagita ebe hopo lumagiha꞉, ebe ba꞉ aeno Godola!”
ACT 12:23 Ba꞉bene Heloditi ba꞉be tabo kalakalago lawete huiyatiya hibi Godo kadipatiya꞉ha꞉. Ba꞉be mabuma꞉ Kodawa Godokono nopodawate ba꞉ba tetenomolo ebe anagalimiti, ba꞉bene ukate ebeno apa꞉mo ogomote ebeno tepo ipuwoeno ilina naleme ba tupuimi ba꞉ dito hoiya꞉.
ACT 12:24 Ba꞉ba tetelo Godokono tabote ba꞉be hopo konomamo ba peto konomoma꞉ ba꞉bo ediya꞉.
ACT 12:25 Ba꞉gala ba꞉be atu tetelo Banabasiko ba꞉gala Soloko iba꞉te Yelusalemalo oko owatima꞉ da꞉tuya꞉, ba꞉be oko nupula꞉te iba꞉te A꞉ntiyoka ko habamo gala ba kawila Yone Makako ba꞉bo magahiya꞉.
ACT 13:1 Ba꞉ba tetelo A꞉ntiyoka ko haboeno sose ipuwalo komo Godokono ukui hawakalimipi dubu ba꞉gala komo iya꞉tulamepi dubu hiliyodopo iba꞉te ba꞉bolo nemedenama꞉. Ba꞉bi dubuino mahilo ba꞉ Banabasiko, ba꞉gala Simiyonoko ebeno eta mahilo Kilikilidawala, ba꞉gala Lusiyasiko ebe Sailiniya habanapila, ba꞉gala Manayaneko, ebe gudu deha꞉poto tetelo Ko Gawadubu Helodikono menokote dabinami, ba꞉gala Soloko.
ACT 13:2 Ba꞉bene eta hegelalo iba꞉te Kodawa Godoko ba adikumita ebete ibino tolame gabo hidamo kiya꞉tulamema꞉ baa꞉ nahaheno pola꞉nuya꞉. Ba꞉ba tetelo Godokono Gobogobote ibi na꞉goelamiya꞉, “La꞉ Banabasiko Soloko ibi netewapi naeno komoma꞉ tama꞉mo na꞉miya꞉ta꞉la꞉. Ibi nale a꞉ka꞉lamiya꞉mo iba꞉te naeno eta oko kowatinama꞉.”
ACT 13:3 Ba꞉bene iba꞉te baa꞉ nahaheno ba pola꞉na, ibi netewapi mabuma꞉ Godotamo toetoe tabo ga꞉late, kokoto iba꞉tamo emowatilameholete uli okamo ba꞉bo oelamiya꞉.
ACT 13:4 Ba꞉ba tetelo Godokono Gobogobote Banabasiko Soloko da꞉noelamiya꞉, iba꞉te Selusiya habamo nuluhukuti ba꞉bolo ko palai boge lawete kehaha꞉ kolomo hapuamo dito na꞉hiwuya꞉ Saipalase hopamo.
ACT 13:5 Ba꞉bene ba꞉be hopoeno Salamasi habamo nuluhukuti iba꞉te Yu tawakalubino hiya꞉hiya꞉ baidi ibubulamehole genamalo Godokono tabo olamagima꞉go ba꞉bo newapatiya꞉. Ba꞉ba tetelo Yone Makate oko ipuwalo ibi nowalubilinatuya꞉.
ACT 13:6 Ba꞉bene iba꞉te Saipalase hopodo ba petonato ba꞉be hopoeno eta habamo ba꞉bo nuluhukuya꞉, ba꞉be haboeno mahilo ba꞉ Peposala. Ba꞉bolo iba꞉te eta giwali dubu binumiya꞉, ebeno mahilo ba꞉ Ba-Ya꞉sutila ba꞉gala ebeno eta mahilo Guliki tabamo ba꞉ Elimasitila. Ba꞉moe dubu ba꞉ Yunapila, huiyatiya ebete tawakalubi ba iya꞉tulamena ha꞉da tabo Godokono mahilamo ba꞉bo olamaginakui. Ba꞉ba tetelo Saipalase hopoeno Kapela Ko Gawadubu ebeno mahilo Segiyasi Polasitila, ebete hido mulu ukuidawama꞉ eda꞉nami, ba꞉bene ebete Banabasiko ba꞉gala Soloko ebetamo ka꞉lamiya꞉ iba꞉godone Godokono tabo kulima꞉. Huiyatiya ebeno mabulubi Ba-Ya꞉suku ubihinola, ba꞉bema꞉ ebete Soloko ba꞉gala Banabasiko ba duhilame Kapela Ko Gawadubu na꞉kiyamiya꞉ ibino tabo hibima꞉ akamida꞉la꞉.
ACT 13:9 Buka ka꞉lamiholedawa, wadiyala ama꞉ niya꞉tawa Solokono eta mahilo ba꞉ Polotela, ba꞉bema꞉ Godokono Gobogoboeno helote ebe ba tabuimi, ebete ba꞉be giwali dubu baidi kodakodalo umilo ba꞉ma ka꞉na kiyahamiya꞉,
ACT 13:10 “Ama꞉ ba꞉ Saitanakono gudulata, ba꞉gala ama꞉ Godokono tuputupu komo duhimidawama꞉ eda꞉nata! Iyo, ama꞉godolo hiya꞉hiya꞉ ha꞉da amihoho komo tabonomola! Keka꞉ mabu ama꞉le Kodawa Godokono tuputupu gabo da꞉keka꞉kekiminaka?
ACT 13:11 Ba꞉bema꞉ ka꞉lo Godokono kokotote ama꞉ danagalimimina꞉ amia꞉no baiditi duhuma꞉ keda꞉hama꞉ne, iyo, tete ga꞉ga꞉dopolo ama꞉ hegeloeno alo a꞉kuminakamena꞉ta.” Ba꞉ba tetenomolo du konomote ebeno ape da꞉pemuliya꞉ Elimasiti ebeno kokotamo ba ologia꞉tepale owalubidawa bohowadiya꞉ ebe gabo kiya꞉tumima꞉.
ACT 13:12 Ba꞉bema꞉ kebe komote duluhukuya꞉, Kapela Ko Gawadubu Segiyasi Polasiti ba꞉be komo umiti Godoko hibima꞉ ba꞉bo midiya꞉, ba꞉gala ebete Kodawa Godokono iya꞉tumi komoma꞉ konomamo hanohanutiya꞉.
ACT 13:13 Ba꞉bene Polote ebeno mabuluba꞉go ba꞉be Peposa habalo ko palai boge lawete kehaha꞉ kolomo na꞉hiwalete Pa꞉mapiliya hopoeno Pega habamo dito tolamiya꞉. Ba꞉bolo Yone Makate ibi miya꞉palete Yelusalema ko habamo gala dito katuya꞉.
ACT 13:14 Huiyatiya Polua꞉te Pega habane tolamete Pisidiya hopoeno A꞉ntiyoka habamo dito nikuliya꞉, ba꞉bene iba꞉te Yu tawakalubino okoha꞉ talona hegelalo ibino baidi ibubulamehole genamamo nalehawaminate komo tawakaluba꞉go dito nahidiya꞉.
ACT 13:15 Ba꞉bene Mosesete Godokono Tutumu Tabo ebeno Bukamo da꞉miya꞉tiya꞉ ba꞉gala Godokono Ukui Hawakalimipa꞉te da꞉miya꞉tiya꞉, ba꞉bi netewa komokomo genama umipa꞉te tawakaluba꞉tamo ba꞉bo ka꞉lamiholiya꞉. Ba꞉ba tetelo iba꞉te Poloko ba꞉gala Banabasiko iba꞉tamo tabo ba꞉ma ka꞉na noemiya꞉, “Nana꞉la꞉, la꞉godolo a kodakoduia꞉me tabo ditanamene, wadiyala atamo na꞉ga꞉luya꞉la꞉.”
ACT 13:16 Ba꞉bema꞉ Polote mahigate ebeno kokoto hunamo adipatelo na꞉goiya꞉, “Isalaela tawakaluba꞉la꞉, ba꞉gala la꞉ Yuha꞉pi puya꞉te hibi Godo dadikuminama, la꞉ naeno tabo nulia꞉la꞉.
ACT 13:17 A Isalaelanapino iniwala꞉te Isipiti hopolo kapela tawakalubima꞉ ba eda꞉hana, aeno Godote ibi uwatete kapiyuimi konomoma꞉ ba꞉bo midiliya꞉, ba꞉bene ebete ebeno ko heloamo Isipiti hopone ibi ba꞉bo uluhukulateliya꞉.
ACT 13:18 Ba꞉bene iba꞉te 40 gogolo dito hopolo ba wapata꞉lamena Godotamo temeteme nikamenama꞉, huiyatiya ba꞉be tete ga꞉ga꞉nomolo ebete ibi hidamo buiya꞉minalenami,
ACT 13:19 ba꞉gala ebete Ka꞉inane hopolo hiya꞉hiya꞉ sa꞉ba꞉ni kapiyuimipi alukuliti ibino hopo ebeno Isalaela tawakaluba꞉tamo dito ikalamiya꞉.
ACT 13:20 Ba꞉ hibila, Godote ba꞉bi Isalaela tawakalubino iniwali Isipiti hopone duluhukulateliya꞉ ba꞉ba tetene tupuimiti, iba꞉te Ka꞉inane hopo da꞉pelawiya꞉ ba꞉ba teta꞉mo puluhuku, ba꞉ 450 gogo a꞉petohuya꞉. “Ba꞉bene Godote ibi kowalubilima꞉ komo tabo anagilamepi iba꞉tamo ikalamiya꞉, ba꞉moe komote ba꞉ba tetene tupuimiti Godokono ukui hawakalimidawa Sa꞉miyoloko teta꞉mo puluhukuya꞉.
ACT 13:21 Ba꞉ba tetelo iba꞉te Sa꞉miyoloko na꞉ga꞉lamiya꞉ ibi ipuwalo ko gawadubu kadipatema꞉, ba꞉bema꞉ Godote Beniyaminakono gu ipuwalo Kisikono gudu Soloko iba꞉tamo ikalamiya꞉, ebete 40 gogolo ibino watodawama꞉ keda꞉nama꞉.
ACT 13:22 Huiyatiya Godote Soloko tama꞉mo ba ihate Da꞉ibidiko ba꞉bo adipatiya꞉ ebete ibino eta Ko Gawadubuma꞉ keda꞉ma꞉. Ba꞉ba tetelo Godote Da꞉ibidikono komoma꞉ tabo ba꞉ma ka꞉na olamagiya꞉, ‘Nale Yesikono gudu Da꞉ibidiko umimo, ebeno tepo ipuwa hidonomola, na huiyala, iyo, ebete naeno hiliyonomo ubi komamo a꞉papamiwatanako.’
ACT 13:23 “Ba꞉bene Godote kebe tabo dopamo hibinomolo da꞉goiya꞉ ba꞉be taboeno komote a tetelo ba꞉ma ka꞉na uluhukuya꞉, ebete Da꞉ibidikono eta eyono gudu Ya꞉suku badipatiya꞉, ebete Isalaela tawakalubino Ka꞉ka꞉ Mula꞉lelamedawama꞉ keda꞉ma꞉.
ACT 13:24 Ba꞉bene Ya꞉suti ebeno oko tupuimihino, dopamo Yonete Isalaela tawakalubi hiliyonomatamo Godokono tabo ba꞉ma ka꞉na polamagiya꞉, iba꞉te ibino kubane ohobila꞉hate ba꞉bene ebete ibi beyamo kowadulatelema꞉.
ACT 13:25 Ba꞉gala Yonekono oko upula꞉ tete da꞉tataliya꞉, ebete ibi na꞉goelamiya꞉, ‘La꞉le na pokomo ka꞉ga꞉lonakoma? Na Kelisoteha꞉, ebete naeno gala hapuni ba꞉pena, iyo, na hidoenoha꞉ nale ebeno nato ukulalemema꞉.’
ACT 13:26 “Ba꞉bema꞉ naeno ekaka꞉la꞉, la꞉ puya꞉te A꞉ibalahamakono eyoni gugudima꞉ deda꞉hanama ba꞉gala la꞉ Yuha꞉pi puya꞉te hibi Godo dadikuminama, Godote ba꞉moe ebeno ka꞉ka꞉ mula꞉ tabo a hiliyonomatamo a꞉poemiya꞉.
ACT 13:27 Huiyatiya Yelusalema habanapi ba꞉gala ibino watowatopi iba꞉te Godokono ukui hawakalimipa꞉te ebeno Bukamo dopamo da꞉miya꞉tiya꞉, ba꞉bi tabo komokomo iba꞉te hiliyonomo okoha꞉ talona hegelalo a꞉ka꞉lamiholenaka, huiyatiya numa꞉la꞉, iba꞉te ba꞉bi taboeno hibi ipuwa hidamo a꞉kalawa꞉la꞉. Ba꞉be mabuma꞉ iba꞉te Ya꞉suku ubiha꞉ma꞉ ba eda꞉ha ebe anakapumima꞉ tabo ba꞉bo ihatiya꞉, huiyatiya iba꞉te kiya꞉tawahuya꞉ha꞉ ba꞉be ododi komodo Godokono tabote hibima꞉ keda꞉ma꞉ne.
ACT 13:28 Ba꞉ba tetelo iba꞉te Ya꞉suku hoea꞉mo koemema꞉ ubi dihatiya꞉ ebeno kuba nipo ohowadimiya꞉, huiyatiya iba꞉te ekelalameheno Paeleteko gala na꞉kapega꞉lamiya꞉ ebete ebe kanakapumima꞉.
ACT 13:29 Ba꞉bene Godote Ya꞉sukunu komoma꞉ kebe komokomo ebeno Bukamo dopamo da꞉miya꞉tiya꞉, iba꞉te ba꞉bi hiliyonomo komo ebetamo ododiliya꞉, ba꞉bene ebete da꞉hoiya꞉ iba꞉te ebe keha pihigane adipotete nakola bobo ipuwamo dito ihatiya꞉.
ACT 13:30 Huiyatiya Godote hoene ebe gala a꞉kadipatiya꞉,
ACT 13:31 ba꞉bema꞉ puya꞉te Ya꞉sukuba꞉ Ga꞉lili hopone Yelusalemamo da꞉tolamiya꞉, ebete komo hiliyonomo hegelalo hiya꞉hiya꞉ tetelo iba꞉tamo uluhukunakui, iyo, iba꞉te ibino baida꞉mo Ya꞉suti hoene ka꞉ka꞉mo mahiga komo duminakui, ka꞉lo iba꞉te Yu tawakaluba꞉tamo ebeno komo ba꞉bema꞉ hawakalimina.
ACT 13:32 “Ale la꞉tamo da꞉ga꞉lutama꞉, ba꞉moe ba꞉ Godokono Hido Tabola. Numa꞉la꞉, ebete aeno iniwala꞉tamo kebe tabo hibinomolo da꞉goiya꞉,
ACT 13:33 ba꞉be taboeno komote a tetelo ba꞉ma ka꞉na uluhukuya꞉, ebete Ya꞉suku hoene adipatiya꞉. Iyo, ebete Sam Ohale Buka sapta 2 tetelo Ya꞉sukunu komoma꞉ ba꞉ma ka꞉na goiya꞉, ‘Ama꞉ ba꞉ naeno Gudulata, ka꞉lo na ba꞉ amia꞉no Nabiwima꞉ eda꞉mo.’”
ACT 13:34 Ba꞉bene Polote ebeno tabo moga꞉melo gala na꞉kagoiya꞉, “Iyo, ba꞉ hibila, Godote Ya꞉suku hoene adipatiya꞉, ba꞉bema꞉ ebeno apete kabalema꞉ bobo ipuwamo gala a꞉katoamene. Ba꞉bema꞉ Godote ebeno Bukalo eta tabo ba꞉ma ka꞉na kagoiya꞉, ‘Naeno gudu, nale Da꞉ibiditamo ikamehoma꞉ hibinomolo da꞉goiya꞉mo, ba꞉bi talona ba꞉gala hibi komokomo ama꞉tamo kikamehoma꞉nemata, emedena tetelo ama꞉ kowalubinama꞉.’
ACT 13:35 Ba꞉gala Godokono Bukate eta tetelo na꞉kagoena, ‘Godo, amia꞉no helo hawakalimi ipuwado abale komote bobo ipuwamo a꞉kapa꞉mene amia꞉no Hido-talona Okodawa kokubahimima꞉.’”
ACT 13:36 Ba꞉bene Polote ba꞉moe taboeno ipuwa hawakalimilo gala na꞉kagoiya꞉, “Numa꞉la꞉, ba꞉moe tabote Da꞉ibidikono komoma꞉ kagoenaha꞉. Da꞉ibiditi ba꞉moe hopolo ba emedena ebe ba꞉ Godokono okodawama꞉ eda꞉nami, huiyatiya ebete da꞉hoiya꞉ iba꞉te ebeno ape ebeno iniwalino bobo tama꞉mo nihatete ba꞉bo abaliya꞉.
ACT 13:37 Huiyatiya numa꞉la꞉, Godote kebe dawa hoene dadipatiya꞉, ba꞉moe Ya꞉suti bobo ipuwalo kabaliya꞉ha꞉.
ACT 13:38 “Ba꞉bema꞉ naeno ekaka꞉la꞉, ale kebe tabo la꞉tamo dolamagimitama꞉ la꞉ hidamo niya꞉tawahala꞉, Ya꞉suti modobola la꞉eno kuba egebolelamete la꞉ ebeno tuputupupima꞉ komidilima꞉. Iyo, Godote Moseseko ipuwado atamo dikaa꞉mehuiya꞉ ba꞉bi Tutumu Tabote tawakalubino kuba ododili komoeno hale pahalamililame modoboha꞉, huiyatiya puya꞉te Ya꞉suku hibima꞉ da꞉midimina꞉ Godote kuboeno helo ipuwane ibi kuluhukulatelema꞉ne.
ACT 13:40 Ba꞉bema꞉ la꞉ hidamo! La꞉le ebe hibima꞉ midihino, Godokono ukui hawakalimipa꞉te dopamo dolamagimiya꞉ ba꞉be kuba huiyate la꞉tamo kuluhukuma꞉ne! Iyo, Godokono tabote ibi ipuwado ba꞉ma ka꞉na hawakaluya꞉,
ACT 13:41 ‘Naeno tabo komokomoma꞉ na diduduputinamenama, la꞉ hidamo nulia꞉la꞉! Numa꞉la꞉, la꞉eno emedeho tetelo nale eta ko komo kododima꞉nemo, huiyatiya komopa꞉te ba꞉moe komoeno ipuwa la꞉tamo da꞉hawakalimimina꞉, la꞉ hibima꞉ a꞉kamida꞉mata, ba꞉be mabuma꞉ la꞉ naeno ododi komo umiti ba hanohanoho la꞉ dito koha꞉lahama꞉nemata!’”
ACT 13:42 Ba꞉bene tabo olamagi da꞉wibuya꞉, Poloko Banabasiko iba꞉te Yu tawakalubino baidi ibubulamehole genamane ba pihiti, tawakaluba꞉te ibi na꞉kiyalamiya꞉ eta okoha꞉ talona hegelalo ba꞉bi atu komokomo ibi gala kakapiya꞉tulamema꞉.
ACT 13:43 Ba꞉bene ibi hiliyonomate ba꞉be kapiyuimi habane dikuliya꞉, komo Yunapi ba꞉gala Yuha꞉pi puya꞉te hibi Godo dadikuminama꞉ iba꞉te Poloko Banabasiko ba ta꞉matalenato, ibi netewapa꞉te komo hidohido tabamo ibi ba꞉bo owalubilinatuya꞉ iba꞉te Godokono malemale ipuwalo kodakodalo kemedehonama꞉.
ACT 13:44 Ba꞉bene eta okoha꞉ talona hegelalo habalubi hiliyonomate pelameholiya꞉ Godokono tabo ulihoma꞉.
ACT 13:45 Ba꞉ba tetelo komo Yunapa꞉te tabo ulihopino iya꞉wa komo dumiya꞉, ba꞉bema꞉ iba꞉te konomamo ba maubahale Polote dolamagiya꞉ ba꞉be tabo kubama꞉ ga꞉lalo ebe ba꞉bo iduduputimiya꞉.
ACT 13:46 Ba꞉bene Poloko Banabasiko iba꞉te toleheno tabo ba huiya na꞉ga꞉luya꞉, “Godoko ubila ebeno tabote la꞉ Yu tawakaluba꞉tamo dopamo uluhuku, huiyatiya la꞉ ubiha꞉ma꞉ eda꞉hamata. Ba꞉bema꞉ la꞉ hidohidoenoha꞉ la꞉le Godogodone wiboha꞉ ka꞉ka꞉ lawema꞉, mabu la꞉ ha꞉kiya la꞉tamo gigiho ba꞉ a꞉kalapilamata! Ba꞉be mabuma꞉ ale la꞉ ba miya꞉pale a huiyatiya Yuha꞉ tawakaluba꞉tamo kotolamema꞉nema꞉.
ACT 13:47 Mabu Kodawa Godote a ba poea꞉me ebeno Bukoeno eta tabo komamo a ba꞉ma ka꞉na tutumua꞉tiya꞉, ‘Nale ama꞉ a꞉ka꞉miya꞉mata, ama꞉le hiya꞉hiya꞉ hopo tawakalubi hiliyonomatamo aloma꞉ koneda꞉nama꞉, ba꞉bema꞉ ama꞉le ba꞉moe hopo konomamo tote, tawakalubino ka꞉ka꞉ mula꞉lelame komo iba꞉tamo katama꞉na꞉ta.’”
ACT 13:48 Ba꞉bene tabo ulihopi ipuwalo Yuha꞉ tawakaluba꞉te ba kalakalahuta Godokono tabo hidonomoma꞉ ga꞉late ebe ba꞉bo milimihutiya꞉, ba꞉gala ibi ipuwalo Godote dopamo wiboha꞉ ka꞉ka꞉mo da꞉ka꞉lamiya꞉, ibi hiliyonomate ebeno tabo hibima꞉ ba꞉bo midiya꞉.
ACT 13:49 Ba꞉ba tetelo Kodawa Godokono tabote Pisidiya hopo konomamo ba꞉bo tuya꞉,
ACT 13:50 huiyatiya A꞉ntiyoka habalo Yuha꞉pa꞉te Godoko dadikuminama꞉, ibi ipuwalo komo koko kamenakamena ba꞉gala haba watowatopi dubu, Yunapa꞉te ibino ukui kubahilamelelamete helo ba꞉bo ikalamiya꞉ iba꞉te Poloko Banabasiko iba꞉tamo komaubahalema꞉. Ba꞉bema꞉ ba꞉bi watowatopa꞉te ibi netewapa꞉tamo temeteme ba ikalame ibino hopone heloamo ba꞉bo noelamiya꞉.
ACT 13:51 Ba꞉bene haba watowatopa꞉te ibi ba ulamita, Poloko Banabasiko iba꞉te ibino nato puhulu moda꞉midatepalete ibi dito miya꞉paliya꞉, iba꞉te kiya꞉tawahama꞉ Godokono tete ba꞉ na꞉pe ebete ibino kuba huiya iba꞉tamo kopikalamema꞉. Ba꞉bene Poloko Banabasiko iba꞉te Aikoniyama habamo dito tuya꞉,
ACT 13:52 huiyatiya iba꞉te A꞉ntiyoka habalo da꞉miya꞉paliya꞉, ba꞉bi Ya꞉suku ta꞉matapi Godokono Gobogobote ibino tepo ipuwa ko kalakala komamo ba꞉bo tabuilamelelamiya꞉.
ACT 14:1 Ba꞉bene Aikoniyama habalo Poloko Banabasiko iba꞉tamo ba꞉ atu komote kuluhukuya꞉. Iba꞉te Yu tawakalubino baidi ibubulamehole genamalo Godokono tabo hidonomamo ba olamagimi, Yunapi ba꞉gala Yuha꞉pi hiliyonomo atumu iba꞉te Ya꞉suku hibima꞉ ba꞉bo midiya꞉.
ACT 14:2 Huiyatiya komo Yu tawakaluba꞉te hibima꞉ kamidiya꞉ha꞉, ba꞉bema꞉ iba꞉te Yuha꞉pino ukui ba kubahilamelelame helo ba꞉bo ikalamiya꞉ iba꞉te hibima꞉ midipi ekaka꞉tamo komaubahalema꞉.
ACT 14:3 Huiyatiya Poloko Banabasiko iba꞉te ba꞉be Aikoniyama habalo tete ga꞉ga꞉dopo ba emede Kodawa Ya꞉sukunu malemale emalagidolo komoma꞉ toleheno ga꞉lanakuya꞉, ba꞉bene Kodawate ibino tabo ba heluimi iba꞉tamo helo ikalamenakui iba꞉te hiya꞉hiya꞉ hanohano komo kododilima꞉.
ACT 14:4 Ba꞉bema꞉ ba꞉be haba tawakalubi ipuwalo anagiya꞉mida komote uluhukuya꞉, komopa꞉te Yu tawakaluba꞉tamo utitatuya꞉ ba꞉gala komopa꞉te Ya꞉sukunu oelamepi dubatamo utitatuya꞉.
ACT 14:5 Ba꞉ba tetelo komo Yunapi ba꞉gala Yuha꞉pi iba꞉te ba꞉be haba watowatopa꞉go tabo bihatiya꞉ oelamepi dubatamo koko temeteme ba ikalame nakolamo mapelamete ba꞉bo kanakapulamema꞉.
ACT 14:6 Ba꞉bema꞉ Poloko Banabasiko iba꞉te ba꞉moe komo iya꞉tawate Laikoniya hopoeno Lista haba ba꞉gala Debi habamo dalahutiya꞉,
ACT 14:7 iba꞉te ba꞉bi haboeno hopodo ba to Ya꞉sukunu Hido Tabo ba꞉bo olamagiminatuya꞉.
ACT 14:8 Lista habalo eta nato a꞉ta꞉buta꞉midaleme dubuti nemedenami, ebete menokoeno tepone ba꞉ma ka꞉na hawakaluya꞉, ebe pata꞉ iya꞉tawaha꞉.
ACT 14:9 Eta tetelo Polote Godokono tabo dolamagitiya꞉ ba꞉be dubuti nulitiya꞉, ba꞉bene Polote ebe baidi kodakodalo ba umiho ba꞉bo iya꞉tawuya꞉ ebeno hibima꞉ midi komoeno helo modobola Godote ebeno nato kohiduilamelemema꞉ne.
ACT 14:10 Ba꞉bema꞉ Polote ebetamo ibulunomo na꞉goiya꞉, “Ama꞉ mahigate, nuta꞉!” Ba꞉ba tetenomolo ba꞉be dubuti hunamo epategate pata꞉ ba꞉bo tupuimiya꞉.
ACT 14:11 Ba꞉ba tetelo Polote kebe komo kododiya꞉ tawakalubi hiliyonomate ba꞉be komo umiti ibino Laikoniya hopoeno tabamo ga꞉ga꞉lo na꞉ga꞉luya꞉, “Aeno netewa hiya꞉hiya꞉ ida꞉da꞉lino gobogobate dubuino holoholamo aeno hopamo hibilo a꞉puluhuka!”
ACT 14:12 Ba꞉bene iba꞉te Banabasitamo ibino ida꞉da꞉lino Susa mahilo ikamete ba꞉gala Polotamo eta ida꞉da꞉lino Hemisi mahilo akikamiya꞉, mabu ibi netewapi ipuwalo Poloko ba꞉ tabo olamagi helodawanomola.
ACT 14:13 Ba꞉be Lista haba tamelo ibino ida꞉da꞉li Susako Adikumino Genamate na꞉la꞉nami, ba꞉bene Susatamo hawa꞉goeno ikamehodawate ba꞉be genamane pete kau-goegoe ba꞉gala haiyai ilina haboeno kala imi gigihamo ba꞉bo wadahiya꞉ Poloko Banabasiko iba꞉tamo kopikalamema꞉. Ebe ubila kau-goegoe anakapulamete hawi ibi netewapa꞉tamo ba ikalame ibi ba꞉bo kadikulamema꞉.
ACT 14:14 Huiyatiya Banabasiko Poloko iba꞉te ba꞉be komo dumiya꞉ menemene konomo iya꞉tawahate, ba꞉bene iba꞉te tawakalubi ipuwamo pulila꞉te ibino menemene kohawakalimima꞉ ibi ha꞉kiya ibino pupulino ilina anagilamete ga꞉ga꞉lo na꞉ga꞉luya꞉,
ACT 14:15 “Mabuluba꞉la꞉, la꞉ ba꞉moe komo badama꞉ kododiutama? A hopo tawakalubila, a la꞉ huiyala, ba꞉bema꞉ a akadikua꞉ma꞉la꞉! Ale Ka꞉ka꞉ Godokono Hido Tabo badahima꞉ la꞉tamo, ba꞉ma ka꞉na la꞉le ba꞉makomako ida꞉da꞉li adikulame ipuwane ebetamo kohobila꞉ma꞉. Numa꞉la꞉, ebe ba꞉ Hunu Haba ba꞉gala hopo haba ba꞉gala hiya꞉hiya꞉ kehaha꞉ kolomo ba꞉gala ilina hiliyonomo Ododilidawala.
ACT 14:16 Dopamo tetelo tawakaluba꞉te ibino kateneno ubi gabodo da꞉wapata꞉lamenama꞉ Godote ibi kaduhilamenakuiha꞉.
ACT 14:17 Huiyatiya numa꞉la꞉, komo hiliyonomo tetelo ebete ebeno hibi komo hopo habanapa꞉tamo ba꞉ma ka꞉na hawakaliminako, ebete alomo hununi wegola ba poeme la꞉eno pali ilinate ibino hidohido tetelo apepehonaka, ba꞉gala ebete la꞉tamo modobo baa꞉ ba ikalame la꞉eno tepo ipuwoeno kalakalate a꞉tabotabohonaka. Ba꞉bema꞉ mabuluba꞉la꞉, wadiyala la꞉ ba꞉moe hibi Godo kapiya nadikuma꞉la꞉, aha꞉!”
ACT 14:18 Ba꞉ba tetelo Poloko Banabasiko iba꞉te ba꞉moe helo tabamo tawakalubi biduhilamiya꞉, huiyatiya iba꞉godolo ibi netewapi adikulame ubi kekelalamiya꞉ha꞉.
ACT 14:19 Ba꞉bene komo Yu tawakaluba꞉te Pisidiya hopoeno A꞉ntiyoka haba ba꞉gala Aikoniyama habane da꞉pelamiya꞉, iba꞉te Lista habanapino ukui kubahilamelelamete helo iba꞉tamo ba꞉bo ikalamiya꞉ Polotamo komaubahalema꞉. Ba꞉bema꞉ iba꞉te Poloko nakolamo mapemete ebeno ape habane adimuya꞉tate hoemo ga꞉late ba꞉ dito nimiya꞉patepuya꞉.
ACT 14:20 Huiyatiya hibima꞉ midipa꞉te galane pelamete ebe tamelo ibino pupamo ba pegagahidi, Polote mahigate atu haba ipuwamo kana꞉pa꞉gate, ba꞉bene eta hegelalo ebe Banabasikoba꞉ Debi habamo dito tuya꞉.
ACT 14:21 Poloko Banabasiko iba꞉te Debi habalo ba nemede, Ya꞉sukunu Hido Tabo dolamagiminakui hiliyonomo tawakaluba꞉te ba꞉be tabo hibilo lawete Ya꞉suku ta꞉matapima꞉ ba꞉bo eda꞉huya꞉. Ba꞉bene ibi netewapa꞉te Debi habamo kebe gabodo ka꞉puluhukuya꞉ ba꞉be atu gabodo kawiluya꞉. Iba꞉te ba꞉ma ka꞉na Lista haba ba꞉gala Aikoniyama haba ba꞉gala Pisidiya hopoeno A꞉ntiyoka habamo da꞉kanuluhukuya꞉,
ACT 14:22 iba꞉te ba꞉bi habahabalo hibima꞉ midipi ba nowalubili na꞉tutumulatelenatuya꞉ iba꞉te hibima꞉ midi ipuwalo kodakodalo kola꞉mota꞉hanama꞉. Ba꞉ba tetelo iba꞉te hibima꞉ midipa꞉tamo tabo ba꞉ma ka꞉na olamagiminatuya꞉, “Godote Ko Gawadubuma꞉ deda꞉na, ale ba꞉be Habamo kona꞉pa꞉la꞉hama꞉ a dopamo koko temeteme ipuwado kotolamema꞉nema꞉.”
ACT 14:23 Ba꞉gala iba꞉te ba꞉bi hiya꞉hiya꞉ habahabalo hibima꞉ midipi ipuwalo komo dubu buwatiya꞉ iba꞉te soseno watowatopima꞉ keda꞉hanama꞉. Ba꞉bene ibi netewapa꞉te ibino toetoe tabo olamagimi ipuwalo helo kolawema꞉, baa꞉ nahaheno ba lumutita Kodawa Ya꞉suku ba꞉bo toemehuya꞉, ebete ba꞉bi sose tawakalubi hiliyonomo hidamo kobuiya꞉minalenama꞉, mabu hibila, ba꞉bi tawakaluba꞉te ibino hibima꞉ midi komo ebetamo ihatenomo ihatiya꞉.
ACT 14:24 Ba꞉bene Poloko Banabasiko iba꞉te Pisidiya hopodo tote Pa꞉mapiliya hopamo dito nuluhukuya꞉, ba꞉be hopo ba꞉ hunuhunu hakalo ditana ba꞉be hopola.
ACT 14:25 Ba꞉bene iba꞉te ba꞉be hopoeno Pega habalo Godokono tabo nolamagimiti, ba꞉be haba miya꞉pate kehaha꞉ kolomoeno Ataliya habamo dito nihitiya꞉.
ACT 14:26 Ba꞉bolo iba꞉te ko palai boge lawete kehaha꞉ kolomo na꞉hiwate Siliya hopoeno A꞉ntiyoka ko habamo gala dito kanuluhukuya꞉. Ba꞉moe ba꞉be habala, hibima꞉ midipa꞉te ibi dopamo Godokono okamo ba oelame ebe da꞉toemehuya꞉, ebete ibi ebeno malemale komamo hidamo kowalubilinatema꞉. Ba꞉bema꞉ Poloko ba꞉gala Banabasiko iba꞉te ba꞉be oko kuitita꞉mo da꞉nuluhukutiya꞉ A꞉ntiyokamo gala dito kawiluya꞉,
ACT 14:27 ba꞉bene iba꞉te sose tawakalubi hiliyonomo kapiya baha꞉mo ka꞉lamiti ibi na꞉goelamiya꞉, Godote ibi ipuwado kebe komo kododilinakui ba꞉gala ebete gabo keba ka꞉na ka꞉hiya꞉miduya꞉ Yuha꞉pa꞉te ebeno tabo hibima꞉ komidima꞉.
ACT 14:28 Ba꞉ hibila, Poloko Banabasiko iba꞉te tete ga꞉ga꞉lo A꞉ntiyoka haboeno hibima꞉ midipa꞉go ba꞉bo emediya꞉.
ACT 15:1 Ba꞉bene komo dubate Yudiya hopone A꞉ntiyoka ko habamo pelamete hibima꞉ midipi ekaki ba piya꞉tulame na꞉pega꞉luya꞉, “Mosesete a Yu tawakaluba꞉te kododima꞉ diya꞉tua꞉menakui, la꞉ Yuha꞉pi dubate ba꞉be tama itamida kukala laweheno Godote la꞉eno ka꞉ka꞉ a꞉kamula꞉lelama꞉mena꞉ta.”
ACT 15:2 Poloko Banabasiko iba꞉te ba꞉be tabo duliya꞉ ba꞉bi dubago tabo ba ga꞉la koamo ba꞉bo olowabeletihuiya꞉. Ba꞉bema꞉ A꞉ntiyoka sose tawakaluba꞉te Poloko Banabasiko ba꞉gala komo dubu buwatiya꞉, iba꞉te Yelusalema ko habamo tolamete Ya꞉sukunu komo oelamepi dubu ba꞉gala sose watowatopa꞉go ba꞉moe komo hidamo konega꞉lama꞉.
ACT 15:3 Ba꞉bene A꞉ntiyoka sose tawakaluba꞉te ibi da꞉noelamiya꞉, gabo tetelo iba꞉te Ponisiya ba꞉gala Samaliya hopodo ba tolame, Yuha꞉pa꞉te kuba ododili ipuwane Godotamo dohobiliya꞉ ba꞉be komo iba꞉te hibima꞉ midipi ekaki ba꞉bo kiyahalamenatuya꞉. Ba꞉ hibila, puya꞉te ba꞉be tabo duliya꞉ iba꞉te konomamo ba꞉bema꞉ kalakalahuya꞉.
ACT 15:4 Ba꞉bene Polua꞉te Yelusalema habamo da꞉nikuliya꞉, ba꞉ba tetelo Ya꞉sukunu oelamepi dubu ba꞉gala komo sose watowatopi ba꞉gala komo hibima꞉ midipi, ibi hiliyonomate ibi kalakalago uwatiya꞉, ba꞉bene Godote ibi ipuwado Yuha꞉pi ipuwalo dododilinakui iba꞉te ba꞉bi komokomo hiliyonomo ba꞉bo nikiyahuya꞉.
ACT 15:5 Ba꞉ba tetelo huiyatiya komo hibima꞉ midipi, ibi ba꞉ Pa꞉lisi kapiyuimipila, iba꞉te pakaminate helo tabo ba꞉ma ka꞉na ga꞉luya꞉, “Wadiyala ba꞉bi Yuha꞉pi dubate a Yunapino tama itamida kukala na꞉lawa꞉mena꞉, ba꞉gala la꞉ ibi na꞉nikiyalamiya꞉la꞉ iba꞉te Mosesekono komo Tutumu Tabamo atumu hidamo kopapamila꞉halenakoma꞉.”
ACT 15:6 Ba꞉bene ba꞉be taboeno komo koga꞉lama꞉ oelamepi dubu ba꞉gala komo sose watowatopi iba꞉te ha꞉kiya ba꞉bo kapiyuimiya꞉.
ACT 15:7 Iba꞉te tabo tete ga꞉ga꞉lo da꞉ga꞉lutiya꞉ Pitate ibi ipuwalo mahigate na꞉goiya꞉, “Naeno ekaka꞉la꞉, la꞉ iya꞉tawahala Godote la꞉ ipuwane na a꞉laweni, Yuha꞉pa꞉te naeno tabone ebeno Hido Tabo uliti hibima꞉ komidima꞉.
ACT 15:8 Ba꞉ hibila, Godote hiliyonomo tawakalubino tepo ipuwa iya꞉tawanomola. Ba꞉bema꞉ Yuha꞉pa꞉te ebeno tabo nagodone da꞉lawi, ebete ba꞉be komoma꞉ ba kalakala ebeno kalakala kohawakalimima꞉ Hido-talona Gobogobo iba꞉tamo ba꞉bo ikalami, dopamo a Yunapa꞉tamo dikaa꞉miya꞉ ba꞉ba ka꞉na.
ACT 15:9 Numa꞉la꞉, ba꞉moe ododi komodo ebete ba꞉moe komo behawakalimi, ibi ba꞉gala a Yunapi, a hiya꞉hiya꞉ma꞉ keda꞉hanaha꞉, mabu hibila, ebete a hiliyonomo aeno hibima꞉ midi komodo aeno tepo ipuwoeno kuba ukulalea꞉mi.
ACT 15:10 Ba꞉bema꞉ la꞉ Godotamo temeteme kikamema꞉ ubi badama꞉ kihateonama? A ba꞉gala aeno iniwali, ale Mosesekono Tutumu ipuwalo demedenamima꞉, a kamodobonamiha꞉ mabu ba꞉bi Tutumu menemene ilina wagata keba ka꞉nala꞉ka꞉ atamo ba꞉ba ka꞉na eda꞉huya꞉. Ba꞉bema꞉ la꞉eno ukui keba ka꞉nala꞉ka꞉, ba꞉ma tetelo ale Yuha꞉pa꞉tamo atu menemene Tutumu ba꞉kikalamema꞉? Ao, modoboha꞉!
ACT 15:11 Ulihopa꞉la꞉, kalakala konomola, a ba꞉moe ko komo hibima꞉ na꞉midinama꞉, a ba꞉gala Yuha꞉pi, a hiliyonomate Kodawa Ya꞉su Kelisokono malemale kapiyado ka꞉ka꞉ mula꞉ komo na꞉lawenama꞉, tama itamida kukala lawe komodoha꞉.”
ACT 15:12 Ba꞉ba tetelo sose watowatopi hiliyonomate eta tabo kaga꞉luya꞉ha꞉, huiyatiya Poloko Banabasiko iba꞉tamo tete bikalamiya꞉ ibino komo kohawakalimima꞉, ba꞉ma ka꞉na Godote ibi ipuwado hiya꞉hiya꞉ koko hanohano komo Yuha꞉pi ipuwalo dododilinakui.
ACT 15:13 Ibi netewapino tabo olamagimi da꞉wibolamiya꞉, Ya꞉imesiti huiyatiya komo watowatopa꞉tamo na꞉goiya꞉, “Ekaka꞉la꞉, la꞉ naeno tabo nulia꞉la꞉.
ACT 15:14 Saimono Pitate a hidamo a꞉kiyaa꞉me, Godote dopamo Yuha꞉pa꞉tamo ebeno malemale keba ka꞉na ka꞉hawakalimi, ebete hiya꞉hiya꞉ hopo tawakalubi ipuwane komo uwatete ebenoma꞉ komidilima꞉.
ACT 15:15 Ba꞉ hibila, Godokono ukui hawakalimipa꞉te ya꞉lo da꞉hawakalimiya꞉ ba꞉gala Pitate ka꞉ma꞉ da꞉kagoe, ba꞉bi hiya꞉hiya꞉ taboeno ipuwa ba꞉ kapiyala, mabu Godokono Bukalo tabote ba꞉ma ka꞉na itana,
ACT 15:16 ‘Ba꞉moe komo da꞉wibomene, na gala kapete Da꞉ibidikono genama kakapetema꞉nemo, iyo, ba꞉be genamate dopamo kagate ka꞉lo kubanomolo itana, huiyatiya nale gala kakapehiduimima꞉nemo.
ACT 15:17 Ba꞉bema꞉ komo hiya꞉hiya꞉ hopo tawakaluba꞉te na ibino Kodawa kohowadinima꞉na꞉, iyo, nale pui ka꞉ka꞉lamiholiya꞉mo, ba꞉bi Yuha꞉pa꞉te kopelamema꞉na꞉ naeno gugudima꞉ kopeda꞉hama꞉.
ACT 15:18 Na Kodawa Godote ba꞉moe komo hibinomolo goemo, nale kebe komo ya꞉lo da꞉hawakalimiya꞉mo ba꞉moe ba꞉be komola.’”
ACT 15:19 Ba꞉bene Ya꞉imesiti tabo moga꞉melo gala na꞉kagoiya꞉, “Yuha꞉pino komoma꞉ nale ba꞉ma ka꞉na emalagidolomo, ibi ipuwalo Godotamo dohobila꞉na ale iba꞉tamo temeteme a꞉kikalama꞉ma꞉.
ACT 15:20 Wadiyala ale huiyatiya leta ododiti ibi ba꞉ma ka꞉na kokiyalamema꞉nema꞉. Komopa꞉te ida꞉da꞉la꞉tamo dikalamenaka iba꞉te ba꞉bi ilina hiliyonomo a꞉kanahanakamena꞉, mabu ba꞉bi ilinate Godokono holoholo hapulu dalowa꞉ma꞉ eda꞉hana. Ba꞉gala kamena pilo dubu pilo talonala, iba꞉te a꞉kododilinakamena꞉. Ba꞉gala kokobe dowa꞉ga꞉dililamenaka ba꞉bi ilina naha talonala, mabu hawiti ba꞉be katene ipuwalo bitana. Ba꞉bema꞉ modobola iba꞉te ba꞉moi kapiyakapiya tutumamo na꞉papamila꞉hanakamena꞉, eta komamoha꞉.
ACT 15:21 Numa꞉la꞉, hopo habanapi hiliyonomate a Yunapino komo iya꞉tawahanomola. Iyo, ya꞉lo tetenomone tupuimiti ba꞉ma teta꞉mo puluhuku hiliyonomo hopoeno habahabalo ale aeno baidi ibubulamehole genamalo Mosesekono Tutumu Tabo hiliyonomo a꞉ka꞉lamiholenakuima꞉, ba꞉gala ka꞉lo ba꞉moi Tutumu Taboeno hiya꞉hiya꞉ komo ale okoha꞉ talona hegela hiliyonomolo a꞉hawakalilamenakoma꞉.”
ACT 15:22 Ba꞉bene Ya꞉sukunu oelamepi dubu ba꞉gala komo sose watowatopi, iba꞉te komo hibima꞉ midipi hiliyonomago Ya꞉imesikono tabo hidoma꞉ ga꞉lalo ibi ipuwalo komo dubu buwatiya꞉, Poloko Banabasiko bana kotolamema꞉ A꞉ntiyoka ko habamo. Ba꞉ba tetelo iba꞉te Yudasiko ebeno eta mahilo Basabasitila, ebe ba꞉gala Sailasiko buwatiya꞉, mabu ibi netewapa꞉te ekaki ipuwalo koko dubuma꞉ eda꞉nama꞉.
ACT 15:23 Ba꞉bene ba꞉bi dubate A꞉ntiyokamo katama꞉ Yelusalema sose watowatopa꞉te leta tabo ba꞉ma ka꞉na miya꞉tiya꞉, A Ya꞉sukunu oelamepi dubu ba꞉gala sose watowatopi, a ba꞉ la꞉eno nani nabima꞉ deda꞉hanama꞉, ale ba꞉moe leta ba꞉bema꞉ poemema꞉. La꞉ Yuha꞉pa꞉te A꞉ntiyoka habalo ba꞉gala Siliya hopolo ba꞉gala Silisiya hopolo demedehonama, la꞉ aeno ekaka꞉te Godoko hibima꞉ da꞉midinama, nonolata.
ACT 15:24 Hibila, a ulima꞉ komo tawakalubi ha꞉kiya ibino ubilo agodone pelamete ibino tabamo la꞉tamo menemene ba pikalame la꞉eno ukui a꞉pekubahilamiya꞉, huiyatiya ibi ale kapoelameha꞉.
ACT 15:25 Ba꞉bema꞉ a ukui kapiyama꞉ miditi tabo ba꞉bo ihatema꞉ komo dubu Poloko Banabasiko bana kopoelamema꞉, iba꞉te la꞉eno ukui kopetuputupuilamema꞉. Ba꞉ hibila, Poloko ba꞉gala Banabasiko ibi ba꞉ aeno hidohido mabulubila,
ACT 15:26 ba꞉gala ibi netewapa꞉te Kodawa Ya꞉su Kelisoko kapiyatamo papamila꞉lo ebeno oko mabuma꞉ ibino ka꞉ka꞉ gobogobamo dito miya꞉tiya꞉.
ACT 15:27 Ba꞉bema꞉ ibi kowalubilinapema꞉ ale Yudasiko ba꞉gala Sailasiko ibi atumu na꞉kapoelamema꞉, ale kebe tabo ba꞉moe leta ipuwamo da꞉miya꞉tema꞉ iba꞉te ba꞉bi atu komokomo la꞉ ibino tabonomamo kopikiyalamema꞉na꞉ta.
ACT 15:28 Ba꞉ hibila, Godokono Gobogobote a da꞉kapiyuia꞉mi ba꞉bema꞉ aeno ukui ba꞉ma ka꞉na itana, a ubihinola eta menemene la꞉tamo ikalame, huiyatiya la꞉le ba꞉moi kapiyakapiya tutumamo na꞉papamila꞉hanakuya꞉la꞉.
ACT 15:29 Ba꞉ma ka꞉na komopa꞉te ida꞉da꞉la꞉tamo dikalamenaka la꞉ ba꞉bi ilina a꞉kanahanakamata, ba꞉gala kokobe dowa꞉ga꞉dililamenaka ba꞉bi ilina naha talonala mabu hawiti ba꞉be katene ipuwalo bitana, ba꞉gala la꞉ kamena pilo ba꞉gala dubu pilo a꞉kododilinakamata. Ba꞉bema꞉ la꞉le ba꞉moi komo hibilo talonama꞉ da꞉midilinakoma, ale la꞉godolo eta komo kubama꞉ a꞉kaga꞉lama꞉. Nonolata, ba꞉moe aeno leta tabo kuititila.
ACT 15:30 Ba꞉bene Yelusalema sose watowatopa꞉te duwatiya꞉ ba꞉bi dubu ba꞉moe letago da꞉noelamiya꞉, iba꞉te A꞉ntiyoka ko habamo nikuliti hibima꞉ midipi hiliyonomo kapiyuimi habamo ba꞉bo ka꞉lamiya꞉ leta iba꞉tamo kikalamema꞉.
ACT 15:31 Ba꞉bene A꞉ntiyoka sose tawakaluba꞉te leta ka꞉lamiholete koamo kalakalahuya꞉ mabu ba꞉be tabote ibi hibilo owalubiliya꞉.
ACT 15:32 Ba꞉ba tetelo Yudasiko Sailasiko iba꞉te tete ga꞉ga꞉dopolo hibima꞉ midipi ekaki iya꞉tulame tabamo ba owalubilita ba꞉bo heluilamiya꞉, mabu hibima꞉ midipi ipuwalo ibi ba꞉ Godokono ukui hawakalimipila.
ACT 15:33 Ba꞉bene iba꞉te komo hegela hiliyonomo ba꞉bolo emedete, eta hegelalo hibima꞉ midipi ekaka꞉te ibi mabuma꞉ Godotamo ba toetoeho ubi ba꞉bo ihatiya꞉ ibi kalakalago Yelusalema sose watowatopa꞉tamo gala kakapoelamema꞉,
ACT 15:34 huiyatiya ba꞉ba tetelo Sailasiko ubila ba꞉bolo kopekagama꞉, ba꞉bema꞉ ebete Yudasikoba꞉ Yelusalemamo gala kapiya꞉ha꞉.
ACT 15:35 Ba꞉ba tetelo Poloko Banabasiko iba꞉te A꞉ntiyoka ko habalo tete ga꞉ga꞉dopo ba emede, komo okopa꞉go Kodawa Ya꞉sukunu tabo ba olamagimi tawakalubi ba꞉bo iya꞉tulamenakuya꞉.
ACT 15:36 Ba꞉bene komo hegela da꞉petohuya꞉ Polote Banabasitamo na꞉goiya꞉, “Ale dopamo Kodawoeno tabo kebe hiya꞉hiya꞉ habahabalo da꞉nolamagiminakuima꞉, wadiyala a ba꞉bi habahabamo gala kakatoma꞉nema꞉ aeno ekakino hibima꞉ midi komo konulamelelamema꞉.”
ACT 15:37 Ba꞉ba tetelo Banabasiko ubila Yone Makako iba꞉go tote, ebete oko ipuwalo ibi konowalubilima꞉,
ACT 15:38 huiyatiya Poloko ubihinola, mabu dopamo tetelo Makate Pa꞉mapiliya hopolo ibi miya꞉palete oko ipuwane dito palahuliya꞉, ba꞉ma ka꞉na ebete iba꞉go oko kuitita꞉mo kanuluhukuya꞉ha꞉.
ACT 15:39 Ba꞉be mabuma꞉ Poloko Banabasiko iba꞉te koamo olowabeletihuiti hiya꞉hiya꞉ gabodo ba꞉bo tuya꞉, ba꞉ma ka꞉na Banabasiti Makako lawete ko palai boga꞉go kehaha꞉ kolomo dito na꞉hiwuya꞉ Saipalase hopamo,
ACT 15:40 huiyatiya Polote Sailasiko lawete eta gabodo dito katuya꞉. Ba꞉ba tetelo A꞉ntiyoka haboeno hibima꞉ midipi ekaka꞉te Poloko Sailasiko mabuma꞉ Kodawa Godoko betoemehuya꞉, ebete ebeno malemale komamo ibi hidamo kowalubilinatema꞉,
ACT 15:41 ba꞉bene ibi netewapa꞉te Siliya ba꞉gala Silisiya hopodo ba to, ba꞉bi hopoeno hiya꞉hiya꞉ sose tawakalubino hibima꞉ midi ipuwalo ibi ba꞉bo kodakoduilamenatuya꞉.
ACT 16:1 Ba꞉bene Polote Debi haba ba꞉gala Lista habamo nuluhukuti eta Ya꞉suku ta꞉matadawa ba꞉bo numiya꞉, ebeno mahilo Timotitila. Timotikono menoko ba꞉ Yunapi kamenala ba꞉gala ebe hibima꞉ mididawala, huiyatiya ebeno nabiwi Yuha꞉ lumagila, ebe ba꞉ Guliki hoponapima꞉ eda꞉nami.
ACT 16:2 Lista ba꞉gala Aikoniyama habalo demedehonama꞉ ba꞉bi hibima꞉ midipi hiliyonomate Timotikono emede komo iya꞉tawahate hidonomoma꞉ ga꞉lanakuya꞉,
ACT 16:3 ba꞉bema꞉ Poloko ubila Timotiti Godokono oko ipuwalo eba꞉go pata꞉. Huiyatiya ba꞉be hopolo demedehonama꞉ ba꞉bi Yunapi hiliyonomate ba꞉moe komo biya꞉tawahuya꞉, Timotikono nabiwi ba꞉ Guliki hoponapila ba꞉bema꞉ Timotiti Yunapino tama itamida kukala kalawiya꞉ha꞉. Ba꞉be mabuma꞉ Polote Timotiko eta okamo magataheno, Yunapino ukui komodobuilamema꞉ ebete Timotiko dopamo tama itamida iya꞉tawa lumagitamo noemiya꞉ ba꞉be komo konelawema꞉.
ACT 16:4 Ba꞉bene Polua꞉te Timotiko lawete komo habahabamo kapimilo da꞉tolamenakui, iba꞉te Yelusalema sose watowatopi ba꞉gala oelamepi dubagodone kebe tutumu dopamo duwatiya꞉, ba꞉bi komokomo benehawakalilamenakuya꞉ hibima꞉ midipa꞉te ba꞉bi tutumamo kopapamila꞉halenama꞉.
ACT 16:5 Ba꞉bema꞉ hibila, ba꞉be hopo konomolo Godote sose tawakalubino hibima꞉ midi ipuwalo ibi ba heluilame, komo hegela hiliyonomolo ibino kuitititi hunamo odolo kekelanamiha꞉.
ACT 16:6 Ba꞉ba tetelo Godokono Gobogobote Polui na꞉duhilamiya꞉ iba꞉te A꞉isiya hopolo ebeno tabo konolamagimima꞉. Ba꞉bema꞉ iba꞉te Piligiya ba꞉gala Galesiya hopodo ba tolame
ACT 16:7 Misiya hopo tatalia꞉mo da꞉nikuliya꞉, ibi ubila eta Bitiniya hopamo konogomoma꞉ huiyatiya Ya꞉sukunu Gobogobote ibi gala na꞉kaduhilamiya꞉.
ACT 16:8 Ba꞉be mabuma꞉ iba꞉te Misiya hopodo tolamete kehaha꞉ kolomoeno Talowase habamo dito nepalaguya꞉.
ACT 16:9 Ba꞉be dulu Polote hiyolo Ma꞉sadoniya dubu buminiya꞉, ebete utinate Poloko ba꞉ma ka꞉na toemehoniya꞉, “Ama꞉ a owalubima꞉ Ma꞉sadoniya hopamo na꞉pa꞉hiwuya꞉.”
ACT 16:10 Ba꞉bene eta duiduiyalo ale Polokono hiyo komo iya꞉tawahate tabo ba꞉ma ka꞉na ga꞉luya꞉ma꞉, “Godote ebeno ubi atamo a꞉hawakalimi, ale Ma꞉sadoniya hopo tawakaluba꞉tamo ebeno Hido Tabo konolamagimima꞉.” Ba꞉bema꞉ ba꞉ba tetenomolo ale ilina hiduilamete ba꞉ dito tupuimiya꞉ma꞉.
ACT 16:11 Ba꞉bene ale ko palai boga꞉mo ololote Talowase haba ba miya꞉pa kehaha꞉ kolomoeno Sa꞉mota꞉si hopamo ba꞉bo na꞉hiwaliya꞉ma꞉, ba꞉bene eta hegelalo ale gala katupuimiti Niyapolisi habamo dito nikuliya꞉ma꞉.
ACT 16:12 Ba꞉bene a haka gabodo gala katolamete Pilipai ko habamo ba꞉bo nikuliya꞉ma꞉, ba꞉be Pilipai haba ba꞉ Ma꞉sadoniya hopoeno konomo habala, ba꞉bema꞉ komo Loma habanapi hiliyonomate ibino hoponomone pelamete ba꞉be habalo pemedehonama꞉. Ba꞉bene ale komo hegelalo ba꞉bolo emeda꞉tepate,
ACT 16:13 Yu tawakalubino okoha꞉ talona hegelalo ale ba꞉be haba miya꞉pate tuli dodamo dito nepalaguya꞉ma꞉ mabu a ba꞉ma ka꞉na emalagidoluya꞉ma꞉, diyala, Yunapi kapiyakapiyate Godotamo toetoe tabo ga꞉lama꞉ ba꞉bamo da꞉ pekapiyuimimina꞉. Ba꞉bene komo kamenakamenate kapimilo da꞉pola꞉nuya꞉, ale ibi nulamete iba꞉go nahiditi tabo ba꞉bo nega꞉luya꞉ma꞉.
ACT 16:14 Ba꞉bi kamenakamena ipuwalo eta dogodogodawate na꞉lutiya꞉, ebeno mahilo ba꞉ Lidiyatela, ebe ba꞉ Tayataila habanapila ba꞉gala ebete hawihawi kaliko kolowami ipuwalo koko mani buwatenakui. Ba꞉moe kamenate hibi Godo badikuminakui, ba꞉bene Polote Ya꞉sukunu komoma꞉ tabo dolamagiya꞉, Kodawate ebeno tepo ipuwa ba꞉bo a꞉hiya꞉midamiya꞉ ebete tabo hibinomolo kolawema꞉.
ACT 16:15 Ba꞉bema꞉ Lidiyako ba꞉gala ebeno genamanapi, ale ibi beyamo wadulatelete ebete a ba꞉ma ka꞉na kiyaa꞉miya꞉, “La꞉le na Kodawa Ya꞉sukunu eta hibima꞉ mididawama꞉ hibilo da꞉ga꞉lama, wadiyala la꞉ pelamete naeno genamalo na꞉pemediya꞉la꞉.” Ba꞉bene ebete a koamo da꞉toea꞉mehuya꞉ ale ebeno tabamo papamila꞉hate eba꞉go dito pelamiya꞉ma꞉.
ACT 16:16 Komo hegela da꞉petohuya꞉, eta tetelo ale Godotamo toetoe tabo ga꞉la habamo gala da꞉katolamiya꞉ma꞉, gabo tetelo komopino huiyaha꞉ oko bohelete ago ba꞉bo aluguya꞉. Ebe kuba gobogobagoenola, ba꞉be kuba gobogobote ebeno olamagi ipuwado tawakalubi begoelamenakui kebe hiya꞉hiya꞉ komate iba꞉tamo dikulimina꞉, ba꞉bema꞉ ba꞉be boheleno namutuluba꞉te ebeno pakani komo ododi ipuwado tawakaluba꞉godone koko mani buwatenakuya꞉.
ACT 16:17 Ba꞉bene ba꞉be bohelete aeno gala hapuni Poloko ba꞉gala a ba ta꞉matoe gaa꞉tepahalo ba꞉ma ka꞉na negoiya꞉, “Ba꞉moi dubu ba꞉ Hununomo Godokono okopila! Iba꞉te la꞉ kokiyalamema꞉na꞉ta la꞉ ka꞉ka꞉ mula꞉ komo kebe gabodo na꞉ka꞉laweoma!”
ACT 16:18 Komo hiliyonomo hegelalo ebete atamo ba꞉ ba꞉ba ka꞉na ewagelenakui, ba꞉bene eta tetelo Polote menemenema꞉ eda꞉te boheletamo ohobigate kuba gobogobo ba꞉bo kiyahamiya꞉, “Nale Ya꞉su Kelisokono mahilamo ama꞉ bikiyahamemata, ama꞉ ebegodone nuluhuka!” Ba꞉ba tetenomolo kuba gobogobote bohelegodone ba꞉ dito uluhukuya꞉.
ACT 16:19 Ba꞉bema꞉ boheleno namutuluba꞉te ba꞉moe komo umiti iya꞉tawahuya꞉, ba꞉be bohele ipuwado ibino mani lawe gabo ba꞉ a꞉wibo. Ba꞉moe mabuma꞉ iba꞉te Poloko ba꞉gala Sailasiko heloamo uwatete, ba꞉be Pilipai ko haboeno watowatopa꞉te kebolo ka꞉pola꞉nuya꞉ ba꞉be kolowami habamo ba꞉bo wadimuya꞉taliya꞉.
ACT 16:20 Ba꞉bene iba꞉te ba꞉bi Loma gabomani dubuino holoholo hapuamo ibi magatalete na꞉nega꞉luya꞉, “Ba꞉moi Yunapi dubu netewa iba꞉te aeno haba bekubahimina!
ACT 16:21 Ibino tutumu hiya꞉la, a Lomanapino tutumu huiyaha꞉, ba꞉bema꞉ ibino iya꞉tumi komote a bikiyaa꞉mena aeno hidohido kukala kowakalamima꞉!”
ACT 16:22 Ba꞉bene ba꞉ba tetelo komo habalubi hiliyonomate Poluino ododili komokomoma꞉ atu kuba tabo bekaga꞉luya꞉. Ba꞉bema꞉ Loma gabomani dubate ibi netewapino kaliko heloamo pipikulamelelamete komo alaholohopi ba꞉bo kiyalamiya꞉ ibi giya꞉pa꞉pa꞉mo ka꞉na꞉miga꞉latilima꞉.
ACT 16:23 Ba꞉bene ibi kubanomamo a꞉na꞉miga꞉latiliti iba꞉te Poloko ba꞉gala Sailasiko du genamamo niya꞉hekete, ba꞉bene du genama umidawa na꞉kiyamiya꞉ ebete ibi hidamo kulamenatema꞉ iba꞉te alahutikapoma꞉.
ACT 16:24 Ba꞉bema꞉ du genama umidawate ba꞉be tabo duliya꞉, ebete ibi du genama ipuwanomamo magatalete ibino nato keha gugamo newadulatelelamete ibi dito nimiya꞉paliya꞉.
ACT 16:25 Ba꞉be du iwa tetenomolo Poloko Sailasiko iba꞉te Godotamo toetoehonakui komo adikumi ohale akalapihonakuya꞉. Ba꞉bene gabomana꞉te komo dubu ibino kuba ododili mabuma꞉ du genamamo ya꞉lo da꞉miya꞉tiya꞉ ba꞉bi dubate Poloko Sailasiko ibino komo ba ulihona,
ACT 16:26 ba꞉ba tetenomolo ko wima꞉la꞉te penate du genama kubanomamo ba pagegetena, gigihote ha꞉kiya a꞉hilamenate du genamanapino kokotoeno auli halete ha꞉kiya ba꞉bo ta꞉teholameniya꞉.
ACT 16:27 Ba꞉bene du genama umidawate ebeno genamanomolo mahiganate du genamoeno gigiho ya꞉lo a꞉hilame da꞉pulameniya꞉ ebete nemalagidoloniya꞉, du genamanapi hiliyonomate ba꞉ alahutiha. Ba꞉bema꞉ ebete tole konomo lawenate ebeno alaholo gili magubutinate ebe ha꞉kiya ebeno ape ahohamidanama꞉ ba ewagelena,
ACT 16:28 ba꞉ba tetenomolo Polote ba꞉be komo uminate ebe na꞉goepatemeniya꞉, “A꞉iye! Ama꞉ ha꞉kiya ama꞉ akanakapuma꞉la꞉! A hiliyonomo moela, kalahutihoha꞉!”
ACT 16:29 Ba꞉ba tetelo du genama umidawate ebeno hopopi begoelameniya꞉ iba꞉te alo kowadahenama꞉, ba꞉bene ebete du genama guamo tola꞉go tiyonomolo na꞉pa꞉ganate, Poloko Sailasiko ibino nato mabamo neganate ba꞉bo nilililaniya꞉.
ACT 16:30 Ba꞉bene ebete ibi netewapi du genamane puluhukulatelenate ba꞉bo pegoelameniya꞉, “Koko dubala꞉, na bada komo ododiti Godogodone ka꞉ka꞉ mula꞉ komo ebo na꞉ka꞉lawemo?”
ACT 16:31 Iba꞉te na꞉huiyaniya꞉, “Ama꞉ Kodawa Ya꞉suku hibima꞉ na꞉mida꞉, ba꞉bene ebete ama꞉ ba꞉gala amia꞉no genamanapino ka꞉ka꞉ komula꞉lelamema꞉na꞉ta.”
ACT 16:32 Ba꞉bene iba꞉te du genama umidawa ba꞉gala ebeno genamanapa꞉tamo Kodawa Ya꞉sukunu tabo ba olamagimina ebeno komo ba꞉bo hawakaliminiya꞉.
ACT 16:33 Ba꞉bema꞉ ba꞉ba tetenomolo du genama umidawate ibi netewapino bugumu ukulalelamenate, iba꞉te huiyatiya ebe ba꞉gala ebeno genamanapi hiliyonomo beyamo dito wadulateleniya꞉.
ACT 16:34 Ba꞉bene du genama umidawate Poloko Sailasiko ibi ebeno genama guamo magatalenate baa꞉ ba꞉bo nikalameniya꞉. Ba꞉ hibila, ebe ba꞉gala ebeno genamanapa꞉te konomamo kalakalahaniya꞉, mabu iba꞉te ba꞉be dulu ibino hibima꞉ midi komo Godotamo a꞉miya꞉teniya꞉.
ACT 16:35 Ba꞉bene hegelate da꞉powalohuya꞉ Loma gabomani koko dubate komo polisi dubu du genama umidawatamo ba꞉moe tabago poelamiya꞉, “Ama꞉le ba꞉bi dubu netewa du genamane dito nuluhukulatela꞉.”
ACT 16:36 Ba꞉bene du genama umidawate Poloko atu tabo bekanikiyamiya꞉, “Gabomani koko dubate tabo a꞉poema꞉, nale ama꞉ ba꞉gala Sailasiko la꞉ ba꞉moe du genamane kuluhukulatelema꞉. Ba꞉bema꞉ ka꞉lo la꞉ uluhukuti kalakalago na꞉toala꞉.”
ACT 16:37 Huiyatiya Polote ba꞉bi polisi dubu ulamelo iba꞉tamo na꞉goiya꞉, “Ao, ale dito a꞉kuluhukama꞉. La꞉eno koko gabomani dubate ha꞉kiya na꞉pelama꞉mena꞉ a kopuluhukua꞉tema꞉, mabu a netewapa꞉te ba꞉moe hopolo Loma gabomanino pepago wapata꞉nama꞉, ba꞉gala ale kuba ododihino iba꞉te aeno komo hidamo kanagiya꞉midaa꞉meha꞉, iba꞉te huiyatiya a giya꞉pa꞉pa꞉mo a꞉na꞉miga꞉titi du genamamo dito iya꞉hekiya꞉. Ba꞉bema꞉ ka꞉lo ibi ubila a diya gabodo gelebadia꞉go dito koea꞉mema꞉. Ao, iba꞉te dopamo a na꞉pua꞉ma꞉mena꞉!”
ACT 16:38 Ba꞉bene polisi dubate tolamete Polokono tabo koko gabomani dubu da꞉nikiyalamiya꞉, ba꞉ba tetelo ba꞉bi dubate Poloko Sailasiko Loma gabomanino pepago wapata꞉ komo uliti koamo toletolehuya꞉.
ACT 16:39 Ba꞉bema꞉ iba꞉te pelamete Poloko Sailasiko iba꞉tamo nolata tabo pega꞉late ibi konomamo petoelameholiya꞉, iba꞉te Pilipai ko habane eta hopamo gelebadia꞉go kotoma꞉.
ACT 16:40 Ba꞉bene ibi netewapa꞉te du genamane puluhukuti, iba꞉te tote dopamo Lidiyakono genamamo nodolote, ba꞉bolo iba꞉te hibima꞉ midipi ekaki da꞉nulamiya꞉, komo owalubi tabo nikiyahalamete Pilipai ko habane ba꞉ dito tuya꞉.
ACT 17:1 Ba꞉bene Poloko Sailasiko iba꞉te A꞉mapipolisi haba ba꞉gala A꞉poloniya habado tote Tesalonaika ko habamo ba꞉bo nuluhukuya꞉, Yunapino eta baidi ibubulamehole genamate ba꞉bolo na꞉la꞉nami.
ACT 17:2 Ba꞉bene Polote komo habahabalo keba ka꞉na ka꞉pododinakui ebete Tesalonaika ko habalo ba꞉ atumu kapododiya꞉, ebete netewa-kapiya okoha꞉ talona hegelalo Yunapino baidi ibubulamehole genamamo nodolonakui Godokono Buka taboeno komokomo iba꞉tamo ba꞉bo nolamaginakui.
ACT 17:3 Ba꞉bene ebete hiya꞉hiya꞉ taboeno ipuwa ba hawakalilame ibi hibinomolo ba꞉ma ka꞉na iya꞉tulameholiya꞉, Godote ya꞉lo tetelo dihatiya꞉ ba꞉be ebeno nopo ipuwado Kelisote puluhukuti, tawakaluba꞉godone koko temeteme puwatete, hoe ipuwane gala kakamahigama꞉ne. Ba꞉bema꞉ Polote iba꞉tamo na꞉goiya꞉, “Ba꞉moe Kelisoko nale ebeno komo la꞉tamo dolamagimo, ebe ba꞉ Ya꞉sutila! Hoe ipuwane gala a꞉kamahiguya꞉!”
ACT 17:4 Ba꞉ba tetelo komo Yunapa꞉te ba꞉be taboeno hibi komo lawete Poloko Sailasiko bana kapiyama꞉ ba꞉bo eda꞉huya꞉, ba꞉gala ba꞉be Guliki hopolo demedehonama꞉, komo ba꞉bi Yuha꞉pa꞉te hibi Godo dopamo dadikuminama꞉ ba꞉gala komo Yuha꞉pino koko watowatopi kamenakamena atumu, ibi hiliyonomate kapimilo hibima꞉ ba꞉bo midiya꞉.
ACT 17:5 Huiyatiya komo Yu tawakaluba꞉te ba꞉bi Yuha꞉pino hibima꞉ midi komo dulamelelamiya꞉, ba꞉be mabuma꞉ iba꞉te maubahalete ilina kolowami habamo tolamete, komo hiya꞉hiya꞉ kuba ododilipi dubu nuwatete iba꞉go kapimilo konomo mauba komo ba꞉bo nadipatiya꞉. Ba꞉bema꞉ iba꞉te haba konomolo helo adipatelo eta dubu Ya꞉isonikono genamamo gahugahulu tolamete gigiho newakalamiti Poloko Sailasiko ba꞉bo noholiya꞉, iba꞉te ibi nuwatete tawakaluba꞉tamo kopuluhukulatelema꞉.
ACT 17:6 Ba꞉ba tetelo iba꞉te ibi netewapi nipo noholete huiyatiya Ya꞉isoniko ba꞉gala komo Ya꞉suku ta꞉matapi genamane ba꞉bo wadimuya꞉taliya꞉ ba꞉be haboeno gabomani dubatamo. Ba꞉bene iba꞉te gabomani dubatamo ibulunomamo na꞉ga꞉luya꞉, “Ba꞉moe hopo konomo da꞉kubahimina ba꞉bi dubate aeno habamo a꞉pikuliya꞉!
ACT 17:7 Ba꞉gala ba꞉moe eta dubu Ya꞉isoniti ba꞉bi kuba ododilipi kalakalago uwatete ebeno genamalo laha haba iba꞉tamo ikalami. Ibi hiliyonomate Konomo Gawadubu Sisakono kukala bewakalamina, mabu iba꞉te na꞉ga꞉lana eta Ko Gawadubu ba꞉luta, ebeno mahilo ba꞉ Ya꞉sutila!”
ACT 17:8 Ba꞉bene habalubi hiliyonomo ba꞉gala gabomani dubate ba꞉be tabo uliti ukui bilibilinomoma꞉ ba꞉bo eda꞉huya꞉. Ba꞉bema꞉ ibi ipuwalo hiya꞉hiya꞉ tabo konomamo ba ga꞉luta
ACT 17:9 gabomana꞉te Ya꞉isoniko ebeno mabuluba꞉go ibi na꞉kiyalamiya꞉, “Wadiyala la꞉eno kuba mabuma꞉ mani atamo kohuiyama꞉nemata, huiyaheno ale la꞉ du genamamo koniya꞉hekema꞉na꞉ta.” Ba꞉ba tetelo gabomana꞉te iba꞉godone mani uwatelamete ibino genamamo ba꞉ dito noelamiya꞉.
ACT 17:10 Ba꞉bema꞉ ba꞉be dulu hibima꞉ midipi ekaka꞉te Poloko ba꞉gala Sailasiko ba꞉be habane dito oelameniya꞉ Beliya habamo, ba꞉bene iba꞉te ba꞉bamo nuluhukunate, eta hegelalo iba꞉te Yunapino baidi ibubulamehole genamamo dito nodoluya꞉.
ACT 17:11 Ba꞉ba tetelo Beliya habanapa꞉te ibino tepo ipuwoeno gigiho a꞉hilamiya꞉ Ya꞉sukunu tabo hido mulu ukuia꞉go kolawema꞉, Tesalonaikanapa꞉te dewageliya꞉ eba ka꞉naha꞉. Beliyanapa꞉te huiyatiya hegela hiliyonomolo Godokono Buka taboeno komokomo da꞉ka꞉lamiholelenakui, ibi ipuwalo ba꞉bi komoeno ipuwa hidamo ba ga꞉la hibi komo ba꞉bo iya꞉tawahanakuya꞉, mabu ibi ubi konomola ba꞉moe komo umi, Polote iba꞉tamo dolamagiya꞉ ba꞉be tabo da꞉ hibila꞉ o da꞉ ha꞉dala꞉.
ACT 17:12 Ba꞉bema꞉ ibi ipuwalo komo Yunapi hiliyonomate Ya꞉sukunu tabo hibima꞉ na꞉midiya꞉, ba꞉gala ba꞉be atu tetelo ba꞉be Guliki hopolo demedehonama꞉ ba꞉bi Yuha꞉pino koko watowatopi kamenakamena ba꞉gala dubu atumu, komo ibi hiliyonomate Ya꞉sukunu tabo kapimilo ba꞉bo lawiya꞉.
ACT 17:13 Huiyatiya ba꞉ba tetelo Tesalonaika ko habalo demedehonama꞉ ba꞉bi Yu tawakaluba꞉te Polote Godokono tabo Beliya habalo da꞉nolamagiya꞉, iba꞉te ba꞉be komo uliti ba꞉bamo tolamete Beliyanapa꞉tamo helo ba nikalame ibi ba꞉bo nadipalateliya꞉ iba꞉te Polotamo komaubahalema꞉.
ACT 17:14 Ba꞉ba tetenomolo hibima꞉ midipi ekaka꞉te Poloko kehaha꞉ kolomoeno eta habamo komo dubago ba꞉ dito noemiya꞉, huiyatiya Sailasiko Timotiko iba꞉te Beliya habalo ba꞉bo pipikuliya꞉, iba꞉te Polokoba꞉ katuya꞉ha꞉.
ACT 17:15 Ba꞉bene Poloko da꞉buiya꞉minuya꞉ ba꞉bi Beliyanapi dubate boge lawete eba꞉go A꞉tenese ko habamo da꞉nikuliya꞉, ba꞉ba tetelo ibino habamo gala kakawilalema꞉ ba ewagelita, Polote ibi na꞉kiyalamiya꞉ Sailasiko Timotiko iba꞉tamo tabo katama꞉, iba꞉te A꞉tenesa꞉mo ebetamo tiyolo kopuluhukuma꞉.
ACT 17:16 Polote Sailasiko Timotiko ibino pe komo ba latimi, ba꞉be A꞉tenese ko habalo ida꞉da꞉li adikulame komokomo hiliyonomo dulameholiya꞉, ebete tepo ipuwalo menemenenomoma꞉ ediya꞉.
ACT 17:17 Ba꞉bema꞉ ebete Yunapino baidi ibubulamehole genamalo ibi ba꞉gala komo Yuha꞉pa꞉te hibi Godo dadikuminama꞉, ebete ibi hiliyonomatamo Godokono Buka taboeno ipuwa komokomo konomamo olamaginakui, ba꞉gala komo hegela hiliyonomolo ebete kolowami habalo dito da꞉wapata꞉lamitanakui ba꞉bi tawakaluba꞉tamo atu komokomo beka-olamaginakui.
ACT 17:18 Ba꞉bene Polote A꞉tenese habanapa꞉tamo Ya꞉sukunu hoene mahiga komo da꞉hawakalimiya꞉, iba꞉te ibino ukuilo nemalagidoluya꞉ Ya꞉suku ba꞉ eta hopo ida꞉da꞉lino gobogobola, ba꞉bema꞉ komopa꞉te na꞉ga꞉luya꞉, “Ebe ubila ale muhulu hopoeno eta ida꞉da꞉lino komo kota꞉matama꞉.” Ba꞉bene ibi ipuwalo komo Epikuliya kapiyuimipi ba꞉gala Stowika kapiyuimipino iya꞉tulamepa꞉te Polokoba꞉ olowabeletihui da꞉tupuimiya꞉, komopa꞉te ebe walitilo na꞉ga꞉luya꞉, “Ba꞉moe wato ko dubuti daedae tabo dolamaginako, ebeno ipuwa badala꞉ka꞉?”
ACT 17:19 Huiyatiya komo iba꞉te Polotamo hido tete ba ikame ebe ibino A꞉tenese haboeno mulupino ahidi baha꞉mo ba꞉bo magatuya꞉, ba꞉be ahidi bahino mahilo ba꞉ Aleyopagasela. Ba꞉ba tetelo Polote ibino holoholo hapuamo da꞉nuluhukuya꞉ iba꞉te ebe nalatediya꞉, “A ubila ama꞉le a na꞉kiyaa꞉ma꞉, ba꞉moe uli iya꞉tulame tabo dolamaginaka keba ka꞉nala꞉ka꞉?
ACT 17:20 Mabu ama꞉le dolamagina ba꞉be taboeno komokomo aeno uliho ipuwalo hiya꞉nomoma꞉ eda꞉hana, ba꞉bema꞉ a ubila ama꞉ ba꞉moe taboeno ipuwa atamo hidamo na꞉hawakalima꞉.”
ACT 17:21 Iba꞉te Poloko ba꞉ma ka꞉na kiyamiya꞉, mabu A꞉tenese habanapi ipuwalo puya꞉te ba꞉bolo da꞉hawakalahaliya꞉ ba꞉gala puya꞉te muhulu hopone pelamete ba꞉bolo da꞉pemedehonama꞉, ibi hiliyonomate ubi konomamo ihatenama꞉ ibino mulupino hiya꞉hiya꞉ kapiyuimi ipuwalo uli komokomo ulihote koga꞉lanama꞉.
ACT 17:22 Ba꞉bene Polote Aleyopagase mulupi dubuino dopo hapulu mahigate na꞉goiya꞉, “A꞉tenese haba dubala꞉, na umimo la꞉ ida꞉da꞉li adikulame komo ipuwalo helonomoma꞉ eda꞉hanamata.
ACT 17:23 Iyo, nale la꞉eno hido habalo ba pata꞉ la꞉godolo hiya꞉hiya꞉ ida꞉da꞉li adikulame bahi da꞉pola꞉na ulamimo, ba꞉gala ba꞉bi hiliyonomo ipuwalo nale eta kapiya adikumi bahi bekumimo, eta lumagiti ba꞉be hunamo tabo ba꞉ma ka꞉na miya꞉tiya꞉, ‘Tawakaluba꞉te iya꞉tawahaheno dadikuminaka, ba꞉moe ba꞉be Kodawa Adikumi Bahila.’ “Ba꞉bema꞉ la꞉ A꞉tenese habanapa꞉te iya꞉tawahaheno dadikuminakoma, nale ba꞉be Kodawoeno komo la꞉tamo kohawakalimima꞉nemo.
ACT 17:24 Ebe ba꞉ hopo konomo ba꞉gala ilina hiliyonomo Ododilidawala, iyo, ebete ba꞉moe hopolo ba꞉gala Hunu Habalo Kodawanomoma꞉ eda꞉na, ba꞉bema꞉ ebe ubihinola tawakaluba꞉te detemotehona ba꞉bi adikumi genamalo emedena.
ACT 17:25 Ba꞉gala ebe ubihinola a hopo tawakaluba꞉te aeno kokotamo eta ilina ododiti ebetamo ikame, mabu ebe ba꞉ atamo hido ka꞉ka꞉ ba꞉gala helo dikaa꞉mena ba꞉be Kodawala, iyo, ebete a hiliyonomoeno modoboha꞉ komokomo ba emalagidolena ebeno malemale ipuwalo hiliyonomo hidohido komo atamo dito ikaa꞉mena. Huiyatiya numa꞉la꞉, ale ebe owalubima꞉ ebetamo bada ilina na꞉kikamehoma꞉? Puliyala, kitanaha꞉, mabu ebe ha꞉kiya modobonomolo emedena!
ACT 17:26 “Ba꞉gala eta komo. Ba꞉moe Kodawate kapiya dubu ododiti, ebe ipuwane hiya꞉hiya꞉ tawakalubi kapiyuimipi hiliyonomate ikuliya꞉. Ba꞉bene ebete ibi ba꞉moe hopo konomamo hiya꞉hiya꞉ oelameholete ibino hiya꞉hiya꞉ emede teteno kuititi ba꞉gala ibino hopoeno kuititi iba꞉tamo a꞉miya꞉telamiya꞉, ebete dopo dubu ododihino nopo dopamo keba ka꞉na kihatiya꞉ ba꞉ba ka꞉na.
ACT 17:27 Numa꞉la꞉, Godote ba꞉be ododi komodo ebeno ubi bihatiya꞉, tawakalubi hiliyonomate ibino hiya꞉hiya꞉ hopolo ba emedehona, iba꞉te ibi Ododilidawoeno komo emalagidololo ibino mulu ukuia꞉mo ebe dohowadimina꞉ ebeno hibi komo ba꞉bo kumima꞉na꞉, baidi tamihodawate ebeno kokotamo gabo keba ka꞉na kohowadinako ba꞉ba ka꞉na. Huiyatiya kalakala konomola, ale ebe umima꞉ eta kodakoda komote hibilo kitanaha꞉, iyo, ebete muhululu kemedenaha꞉, a tamenomolo bemedena.
ACT 17:28 Ba꞉be mabuma꞉ eta muludawate tabo dopamo ba꞉ma ka꞉na goiya꞉, ‘Ale aeno Hununomo Talonadawoeno ka꞉ka꞉ ipuwalo emedenama꞉, iyo, ale ebeno heloamo wapata꞉lamenama꞉, mabu ebe ba꞉ aeno ka꞉ka꞉ mabuma꞉ eda꞉na.’ Ba꞉gala A꞉tenesenapa꞉la꞉, la꞉ numa꞉la꞉, la꞉eno ohale ododilipi ipuwalo etate ohale ba꞉ma ka꞉na miya꞉tiya꞉, ‘Ba꞉moe komo ba꞉ hibinomola, ale Kodawoeno gugudima꞉ eda꞉hanama꞉.’”
ACT 17:29 Ba꞉bema꞉ Polote tabo moga꞉melo gala na꞉kagoiya꞉, “La꞉ hidamo nulia꞉la꞉. Hibila, ba꞉moe Kodawa Godote a hiliyonomo ebeno gugudima꞉ ododiya꞉ ba꞉bema꞉ a ba꞉ma ka꞉na a꞉kemalagidolama꞉, aeno kokotamo o aeno mulu ukui komamo eta ilinamo aeno Nabiwino holoholo kododima꞉nema꞉. Ao! Tawakaluba꞉te golodo o siliba o hido nakolamo dododilinaka, hibi Godo ba꞉bi hiya꞉hiya꞉ ida꞉da꞉li ilina huiyaha꞉.
ACT 17:30 Ba꞉ hibila, dopamo tawakaluba꞉te ebeno hibi komo iya꞉tawahaheno kuba komokomo dododilinakui, Godote iba꞉tamo kuba huiya hibilo kikalamenakuiha꞉, huiyatiya ba꞉ma tetelo ebete hiliyonomo hiya꞉hiya꞉ hopo tawakalubi begoelamena iba꞉te ibino kuba ododili ipuwane ebetamo kohobila꞉ma꞉,
ACT 17:31 mabu ebete ibi hiliyonomoeno komokomo kanagilamelelamema꞉ ebeno Ko Hegela ya꞉lo ihatiya꞉. Iyo, ebete helo kebe dawatamo kikamiya꞉, ba꞉be Tuputupu Dubuino anagiya꞉mida ipuwalo tawakalubi hiliyonomate ibino kuba huiya ba꞉gala hido huiya modobonomolo kuwatema꞉na꞉. Ba꞉bema꞉ mabu keka꞉ tawakaluba꞉te ba꞉moe taboeno komo hibima꞉ da꞉midimina꞉? Mabu bitana Godote tawakalubino holoholo hapulu ba꞉be Tuputupu Dubu Ya꞉suku hoe ipuwane adipatiya꞉!”
ACT 17:32 Ba꞉bene ba꞉bi A꞉tenese mulupi dubate Ya꞉sukunu hoene mahiga komo duliya꞉ iba꞉te Poloko ba꞉bo walitiya꞉, huiyatiya komopa꞉te ebetamo na꞉ga꞉luya꞉, “Wadiyala ama꞉ gala kapete atamo tabo na꞉kapolamagiya꞉.”
ACT 17:33 Ba꞉bene Polote tabo ga꞉la habane ba uluhuku,
ACT 17:34 komo dubate ebeno tabo hibima꞉ miditi eba꞉go ba꞉ dito nekapiyuya꞉, ibi ipuwalo Dayonisiyasiko ba꞉ Aleyopagase mulupino kapiyuimi dubu etala, ba꞉gala ba꞉be atu tetelo eta kamena Damalisiko ba꞉gala komo kamenakamena iba꞉te atumu Ya꞉suku hibima꞉ ba꞉bo midiya꞉.
ACT 18:1 Ba꞉moe komote da꞉wibuya꞉ Polote A꞉tenese haba miya꞉pate Kolini ko habamo ba꞉ dito tuya꞉,
ACT 18:2 ba꞉bene eta Yu dubu ebeno mahilo Akuilatela, Pontase hopolo hawakaluya꞉, ebete Polokoba꞉ ba꞉bo aluguya꞉. Ba꞉ba tetelo ba꞉be dubuti ebeno kamena Pilisilakoba꞉ Itali hopone piya꞉, mabu Konomo Gawadubu Kolodiyasiti Yu tawakaluba꞉tamo maubalo a꞉goelamiya꞉ ibi hiliyonomate ebeno Itali hopoeno Loma ko habane kikulihoma꞉. Ba꞉bema꞉ eta hegelalo Polote ibi netewapa꞉tamo nuluhukuti,
ACT 18:3 ibino mani oko ipuwalo ibi owalubili ba netupuimi iba꞉go ba꞉bo nemediya꞉, mabu ebete ba꞉be oko iya꞉tawala, ebete dopamo sipi-goegoe tamamo walokoa꞉midahale genama bododilinakui.
ACT 18:4 Ba꞉ba tetelo Yu tawakalubino okoha꞉ talona hegela hiliyonomolo Polote ibino baidi ibubulamehole genamamo tonakui, ba꞉bene ebete ibi ba꞉gala Guliki hoponapi iba꞉go ba kapiyuimi iba꞉tamo Godokono tabo komokomo ba꞉bo olamaginakui, mabu ebe ubi konomola iba꞉te Ya꞉sukunu hibi komo kiya꞉tawahama꞉.
ACT 18:5 Ba꞉bene Sailasiko Timotiko iba꞉te Ma꞉sadoniya hopone Kolini ko habamo Polotamo da꞉puluhukuya꞉, ebete sipi-goegoe tama genama ododili mani oko ba꞉bo miya꞉puya꞉. Ba꞉ba tetelo ebete Godokono oko kapiya ba owatina Yu tawakaluba꞉tamo ba꞉ma ka꞉na olamaginakui, Ya꞉suku ba꞉ Kelisote, Godokono Oemedawala.
ACT 18:6 Huiyatiya eta hegelalo iba꞉te Poloko iduduputimilo ebeno iya꞉tulame komokomo da꞉duhilamiya꞉, Polote ibino dopo hapulu ebeno kalikoeno puhulu ba moda꞉midatepale na꞉goiya꞉, “Ba꞉moe komone la꞉ niya꞉tawahala꞉, la꞉le ba꞉bolo Godokono ka꞉ka꞉ mula꞉ komo nelaweheno, ba꞉be komo ba꞉ la꞉eno kubala! Naeno kubaha꞉, mabu nale Godokono hibi komo la꞉ hidamo iya꞉tulamimata, huiyatiya la꞉ ubihinola. Ba꞉bema꞉ ba꞉ma tetelo na la꞉godone ohobigate huiyatiya Yuha꞉pa꞉tamo kotoma꞉nemo.”
ACT 18:7 Ba꞉bene Polote ibi miya꞉palete eta Yuha꞉ dubuino genamalo nemediya꞉, ba꞉be dubuino mahilo ba꞉ Taitasi Yasitasitila, ebe hibi Godo badikuminami ba꞉gala ebeno genamate Yu tawakalubino baidi ibubulamehole genama tamelo la꞉nami.
ACT 18:8 Ba꞉ba tetelo eta dubu, ebeno mahilo Kilipasatela, ebete Yu tawakalubino baidi ibubulamehole genama umidawama꞉ eda꞉nami, ebe ba꞉gala ebeno genamanapi iba꞉te Kodawa Ya꞉suku hibima꞉ a꞉midiya꞉. Ba꞉gala komo Kolini habanapi hiliyonomate atumu Godokono tabo Pologodone ulihote hibima꞉ miditi beyamo wadulatele komo ba꞉bo lawiya꞉.
ACT 18:9 Ba꞉bene eta dulu Kodawa Ya꞉suti Poloko hiyolo na꞉goemeniya꞉, “Ama꞉ naeno tabo olamagima꞉ akatoletola꞉la꞉, ba꞉gala tabo goeha꞉ma꞉ akeda꞉la꞉,
ACT 18:10 mabu nale ama꞉go bemedenamo, ba꞉bema꞉ eta lumagiti ama꞉ a꞉kakubahima꞉mena꞉ta. Ba꞉gala ba꞉moe haba konomolo naeno komo tawakalubi hiliyonomate bemedena, ama꞉ kapiyaha꞉.”
ACT 18:11 Ba꞉bema꞉ Polote ba꞉bolo kapiya gogo ba꞉gala sikisi manome ba emedena Godokono tabo komokomo tawakalubi ba꞉bo iya꞉tulamenakui.
ACT 18:12 Ba꞉be gogolo Loma gabomani koko dubate Ga꞉liyoko bepoemiya꞉ ebete Guliki hoponapino uli Kapela Ko Gawadubuma꞉ kopeda꞉nama꞉, ba꞉bema꞉ ba꞉be hopoeno Yu tawakaluba꞉te ukui kapiyama꞉ miditi Poloko ebetamo ba꞉bo magatuya꞉ ebeno komo kanagiya꞉midamema꞉.
ACT 18:13 Ba꞉ba tetelo iba꞉te Ko Gawadubutamo na꞉ga꞉luya꞉, “Ba꞉moe dubu Godoko adikumino hiya꞉ gabo ba iya꞉tulame, ebete tawakaluba꞉tamo helo bikalamena gabomanino kukala kowakalamima꞉.”
ACT 18:14 Ba꞉bema꞉ Polote ubila huiya tabo kogoemema꞉, huiyatiya Ga꞉liyote ebe duhimiti Yu tawakaluba꞉tamo na꞉goiya꞉, “Lumagiti eta ko kuba hibilo nododitale, nale la꞉ Yunapino tabo komokomo hidamo bulihona꞉, huiyatiya moe komo ko komoha꞉!
ACT 18:15 La꞉ la꞉eno Yu hopoeno komonomoma꞉ olowabeletihuitamata, ba꞉bi komo ba꞉ la꞉eno Buka taboeno ipuwa komokomo, ba꞉gala la꞉eno tawakalubino mahiloeno komokomo, ba꞉gala la꞉eno iniwalino kukala komokomola, ba꞉bema꞉ wadiyala la꞉ ha꞉kiya la꞉eno ubiha꞉ komo na꞉netuputupuima꞉la꞉. Na ubihinola ba꞉bi komo anagilamedawama꞉ eda꞉!”
ACT 18:16 Ba꞉bene Ga꞉liyote helo lawete ibi hiliyonomo ebeno tabo anagiya꞉mida genamane dito ta꞉malateliya꞉.
ACT 18:17 Ba꞉ba tetelo ba꞉bi Yunapa꞉te menemenenomoma꞉ eda꞉hate ibino baidi ibubulamehole genama umidawa Sostenisiko lawete Ga꞉liyokono tabo anagiya꞉mida genama dopo hapulu kubanomamo ba꞉bo anagalimihuya꞉, huiyatiya Ga꞉liyote ba꞉be komo ko komoma꞉ kagoiya꞉ha꞉, ba꞉bema꞉ ebete iba꞉godone dito ohobiguya꞉ ebeno komo oko kowatima꞉.
ACT 18:18 Ba꞉be komote da꞉wibuya꞉ Polote tete ga꞉ga꞉dopo hibima꞉ midipi ekaka꞉go emedete, ba꞉bene Kolini haba ba miya꞉pa ebete Pilisilako ba꞉gala Akuilako uwatete Siliya muhulu hopamo tolame ba꞉bo tupuimiya꞉. Ba꞉bene iba꞉te Senekiliya habamo nikuliti ko palai boga꞉mo nololoheno, dopamo Polote ebeno tepo ipuwoeno hibi komo kohawakalimima꞉ ebeno hinibo ba꞉bo nelepiya꞉, mabu ebete dopamo kebe tabo Godotamo hibilo da꞉goiya꞉, ebete ba꞉ ba꞉ba ka꞉na oko owati ipuwalo kuitita꞉mo a꞉nuluhukuya꞉.
ACT 18:19 Ba꞉bene Polua꞉te gala katolamete Epesese ko habamo da꞉nikuliya꞉, ebete Pilisilako ba꞉gala Akuilako ba꞉bo nimiya꞉paliya꞉ iba꞉te ba꞉bolo kemedenama꞉. Ba꞉ba tetelo Polote ha꞉kiya tote Yunapino baidi ibubulamehole genamamo nodolote Godokono Buka tabo komokomo iba꞉tamo ba꞉bo nolamagiya꞉.
ACT 18:20 Ba꞉bene iba꞉te ebe na꞉ga꞉lamiya꞉ tete ga꞉ga꞉dopo iba꞉go kemedema꞉, huiyatiya Polote na꞉goiya꞉, “Ao, na kotoma꞉nemo.”
ACT 18:21 Ba꞉ba tetelo ebete ibi ba miya꞉pale eta tabo ba꞉ma ka꞉na goelamiya꞉, “Godote ubi dihatemene na la꞉tamo gala kakapema꞉nemo,” ba꞉bene ebete tote ko palai boga꞉mo da꞉nololuya꞉, ba꞉be bogete Epesese ko habane ba꞉ dito tuya꞉.
ACT 18:22 Ba꞉bene bogete kehaha꞉ kolomo na꞉hiwate Sisaliya ko habamo da꞉nutiya꞉, ba꞉ba tetelo Polote haka gabodo tote Yelusalema ko habamo nuluhukuti sose tawakaluba꞉tamo ebeno malemale tabo nolamagiti, ba꞉bene ibi miya꞉palete ebete A꞉ntiyoka ko habamo ba꞉ dito katuya꞉.
ACT 18:23 Ba꞉bene ebete tete ga꞉ga꞉dopo A꞉ntiyokalo emedete, ba꞉be ko haba kamiya꞉pate Galesiya ba꞉gala Piligiya hopodo ba peto Ya꞉suku ta꞉matapi owalubila꞉go ebete ibi ba꞉bo peheluilamenatuya꞉.
ACT 18:24 Ba꞉ba tetelo eta Yu dubu ebeno mahilo Apolositi, ebe A꞉lesandiya habanapila, ebe Godokono Buka taboeno hiya꞉hiya꞉ komoeno ipuwa iya꞉tawanomola ba꞉gala ebeno tabo olamagi mulunomola, ebete Epesese ko habamo piya꞉.
ACT 18:25 Ba꞉moe dubu eta lumagiti Kodawa Ya꞉suku ta꞉mata gabo dopamo iya꞉tumiya꞉, ba꞉bema꞉ ebete ebeno tepo ipuwalo koenomoma꞉ ba eda꞉na Ya꞉sukunu komoma꞉ komopi hidonomamo iya꞉tulamenakui. Huiyatiya ebete Yonekono beyamo wadulatele komo kapiya biya꞉tawuya꞉, ba꞉bema꞉ ebete kiya꞉tawuya꞉ha꞉ Godote ebeno Gobogobamo tawakalubi keba ka꞉na da꞉wadulatelenako ba꞉be komo.
ACT 18:26 Ba꞉bene eta hegelalo Apolositi Yunapino baidi ibubulamehole genamalo Godokono tabo toleheno dolamagiya꞉, Pilisilako ba꞉gala Akuilako iba꞉te ebeno tabo uliti, Apolosiko ibino genamamo magatate Godokono gaboeno komoma꞉ komo hidohido iya꞉tulame tabo komamo ebe ba꞉bo nowalubiya꞉.
ACT 18:27 Ba꞉bema꞉ eta tetelo Apolositi Guliki hopamo toma꞉ ubi dihatiya꞉, Epesese hibima꞉ midipi ekaka꞉te leta boemiya꞉ Gulikinapi hibima꞉ midipa꞉tamo iba꞉te ebe kalakalago kolawema꞉. Ba꞉bene Apolositi ba꞉bamo da꞉nuluhukuya꞉, puya꞉te Godokono malemaledo hibima꞉ midipima꞉ deda꞉hanama꞉, ebete ba꞉bi tawakalubi koamo ba꞉bo nowalubiliya꞉.
ACT 18:28 Ba꞉ba tetelo ebete Godokono tabo olamagi helonomoma꞉ neda꞉te, komo Yunapa꞉te ebeno taboeno hiya꞉hiya꞉ komo duhilamema꞉ dewagelenakui, huiyatiya Apolositi tawakalubi hiliyonomoeno holoholo hapulu ibino tabo modobolo alukulilamenakui. Iyo, ebete Godokono Buka tabo komokomoeno ipuwa hidamo ba꞉ma ka꞉na hawakaliminakui, Ya꞉suku ba꞉ Kelisote, Godokono Oemedawala.
ACT 19:1 Ba꞉bene Apolositi Kolini habalo ba nemedena, ebete kebe haba da꞉miya꞉puya꞉ Polote A꞉isiya hopoeno komo habahabado petote ba꞉be atu Epesese ko habamo dito nuluhukuya꞉. Ba꞉ba tetelo ebete komo Ya꞉suku ta꞉matapi ba꞉bolo nulamete
ACT 19:2 ibi na꞉nikiyalamiya꞉, “La꞉le la꞉eno hibima꞉ midi komo Ya꞉sutamo dihatima, ba꞉ba tetelo Godokono Gobogobo a꞉ka꞉lawiuima?” Iba꞉te huiyatiya na꞉ga꞉luya꞉, “Ao, a Godokono Gobogobote tawakaluba꞉godolo demedena ba꞉be komo dopamo kuliha꞉.”
ACT 19:3 Huiyatiya Polote ibi nalateda꞉liya꞉, “Komopa꞉te la꞉ beyamo da꞉wadulateli, pokono mahilamo kododi?” Iba꞉te na꞉huiyuya꞉, “A beyamo Yonekono mahilamo palaguima꞉.”
ACT 19:4 Ba꞉bene Polote iba꞉tamo na꞉goiya꞉, “Tawakaluba꞉te ibino kuba ododili ipuwane Godotamo dohobiliya꞉, Yonete ibi beyamo ba꞉bema꞉ wadulateliya꞉, ba꞉gala ba꞉be atu tetelo ebete Isalaela tawakalubi bikiyalamiya꞉, iba꞉te ebeno gala hapuni da꞉pena ba꞉be lumagi hibima꞉ komidima꞉, ebe ba꞉ Ya꞉sutila.”
ACT 19:5 Ba꞉bene Epesese hibima꞉ midipi ekaka꞉te ba꞉be tabo uliti Polote ibi Kodawa Ya꞉sukunu mahilamo beyamo gala ba꞉bo kawadulateliya꞉.
ACT 19:6 Ba꞉gala Polote ebeno kokoto iba꞉tamo demowatilamiya꞉, Godokono Gobogobote ibi hunamo ba hitiga, iba꞉te helo lawete Hunu Haboeno nopopino hiya꞉hiya꞉ tabamo ko kalakala adipatelo Godokono tepo ipuwoeno ukui tabo komokomo ba꞉bo hawakalilamiya꞉.
ACT 19:7 Ba꞉ hibila, ba꞉ba tetelo Godokono Gobogoboeno helote 12 dubatamo ba꞉ma ka꞉na hitiguya꞉.
ACT 19:8 Ba꞉bema꞉ Polote netewa-kapiya manome Yu tawakalubino baidi ibubulamehole genamamo odolonakui Godokono tabo toleheno ba꞉bo olamaginakui, ba꞉bene ba꞉be tete ga꞉ga꞉dopolo Polote iba꞉go Godote Ko Gawadubuma꞉ deda꞉na, ba꞉be komoeno hibi komoma꞉ konomamo olamagiminakuya꞉.
ACT 19:9 Huiyatiya komo iba꞉te wato kodakodahibima꞉ ba eda꞉halame hibima꞉ kamidiya꞉ha꞉. Iba꞉te tawakalubino holoholo hapulu Ya꞉suku Hibima꞉ Midi Gabo kubama꞉ ga꞉luya꞉, ba꞉bema꞉ Polote Ya꞉sukunu hibi ta꞉matapi kapiya uwatete iba꞉te hibima꞉ midiha꞉pa꞉godone kapimilo ba꞉ dito ikuliya꞉. Ba꞉ba tetene tupuimiti iba꞉te ha꞉kiya Taila꞉nasikono Sikulu genamalo da꞉kapiyuiminakui, Polote komo hegela hiliyonomolo Godokono Buka tabo komokomoeno ipuwa iba꞉tamo ba꞉bo olamaginakui.
ACT 19:10 Ba꞉bema꞉ hibila, ebete netewa gogolo Epesese ko habalo ba emedena, A꞉isiya hopo konomolo demedehonama꞉ ba꞉bi Yunapi ba꞉gala Yuha꞉pi atumu, ibi hiliyonomate Kodawa Ya꞉sukunu tabo ba꞉bo ulihuya꞉.
ACT 19:11 Ba꞉ba tetelo Godote Poloko ipuwado komo koko hanohano komo bododilinakui.
ACT 19:12 Ba꞉ma ka꞉na tawakaluba꞉te Polokono wato matumino kaliko ba꞉gala atuino kaliko ebeno apene duwatemenakui, ba꞉bene iba꞉te watate temetema꞉gopa꞉tamo da꞉nemowatilamenakui ibino temeteme komate iba꞉godone ba꞉ dito wiboholamenakui ba꞉gala kuba gobogobate iba꞉godone akikulinakuya꞉.
ACT 19:13 Ba꞉be atu tetelo komo Yu dubate ba꞉be hopolo ba wapata꞉lamena tawakaluba꞉godone kuba gobogobo oelamenakuya꞉, ba꞉bene iba꞉te ba꞉be oko ba owatina komo tetelo Polokono mahilo ba꞉gala Kodawa Ya꞉sukunu mahilo ka꞉lamilo kuba gobogobo ba꞉bo kiyahalamenakuya꞉. Ba꞉bene ibi ipuwalo eta Yu dubu Sikibakono sa꞉ba꞉ni kuhia꞉te nemedenama꞉, ibino nabiwi ba꞉ Godotamo hawa꞉goeno ikamehopino watodawa etala. Eta tetelo ba꞉bi sa꞉ba꞉ni kuhia꞉te eta dubugodone kuba gobogobo oemema꞉ ba ewagelita, iba꞉te na꞉ga꞉luya꞉, “Polote Ya꞉sukunu komoma꞉ dolamaginako, ale ba꞉be Helodawoeno mahilamo la꞉ bikiyahalama꞉ta ebegodone nikula꞉la꞉.”
ACT 19:15 Huiyatiya kuba gobogobote iba꞉tamo na꞉goiya꞉, “Ya꞉suku ba꞉gala Poloko na iya꞉tawala, huiyatiya la꞉ puya꞉tela꞉ka꞉?”
ACT 19:16 Ba꞉bene kuba gobogobagoeno dubuti ko heloago iba꞉tamo pepategate ibi kubanomamo ba palukuli ibino kaliko pipikulamelelamete, iba꞉te genamane hawi ka꞉ka꞉la꞉halama꞉go kikipuiya ba꞉ dito alahutihuya꞉.
ACT 19:17 Ba꞉bema꞉ Epesese ko habalo demedehonama꞉, ba꞉bi Yu tawakalubi ba꞉gala Guliki hoponapi atumu, ibi hiliyonomate ba꞉be komo duliya꞉ iba꞉te konomamo toletolehote Kodawa Ya꞉sukunu mahilo hunamo ba꞉bo adipatiya꞉.
ACT 19:18 Ba꞉ba tetelo hiliyonomo tawakaluba꞉te Ya꞉suku hibima꞉ miditi, ba꞉bene iba꞉te tawakalubino holoholo hapuamo pelamete ibino kuba ododili komokomo ba꞉bo pehawakalilamiya꞉.
ACT 19:19 Ba꞉gala ba꞉be atu tetelo komo giwali ododilipa꞉te ibino giwali iya꞉tawaha buka wadahete tawakalubi hiliyonomate ba ulamita koa꞉mo ba꞉ dito pepuhamidahaliya꞉. Ba꞉ hibila, iba꞉te da꞉kubahilamiya꞉ ba꞉bi bukoeno huiya kuititi konomola, deha꞉potoha꞉, iyo, ba꞉bi buka hiliyonomoeno huiya da꞉ka꞉lamiholiya꞉ ba꞉ 50 taosene manima꞉ ediya꞉.
ACT 19:20 Ba꞉bema꞉ ba꞉moe ododi gabodo Godokono tabote helonomoma꞉ ba eda꞉ ba꞉be hopo konomamo ba꞉bo tuya꞉.
ACT 19:21 Ba꞉moi komate da꞉wibohuya꞉, ba꞉ba tetelo Polote nopo bihatiya꞉ Ma꞉sadoniya ba꞉gala Guliki hopodo petote Yelusalema ko habamo gala kakanuluhukuma꞉. Ebete na꞉goiya꞉, “Na ubila Yelusalemalo tete nanekele nemedete, ba꞉bene na Loma ko haba umima꞉ kotoma꞉nemo.”
ACT 19:22 Ba꞉bene Ma꞉sadoniya hopamo toheno Polote ebeno owalubipi netewa Timotiko ba꞉gala Elastasiko ba꞉be hopamo dopamo noelamiya꞉, huiyatiya ebete A꞉isiya hopolo tete nanekele gala kakemedema꞉ goelo iba꞉go katuya꞉ha꞉.
ACT 19:23 Ba꞉bene ba꞉ba tetelo Ya꞉suku Hibima꞉ Midi Gaboma꞉ Epesese ko habalo eta ko kubanomote ba꞉ma ka꞉na uluhukuya꞉.
ACT 19:24 Ba꞉bolo eta dubuti nemedenami, ebeno mahilo Dimitiyasitila, ebe ba꞉ siliba ilinamo ida꞉da꞉li ododilidawala. Ba꞉ma ka꞉na ebete ebeno ko bisnisi ipuwalo eta habali ida꞉da꞉li Atimisiko mabuma꞉ ebe adikumino genama hegehege siliba ilinamo dododilinakui, ebe ba꞉gala ebeno okopa꞉te tawakaluba꞉tamo kolowamilo koko mani buwatenakuya꞉, iyo, tawakaluba꞉te ba꞉bi hegehege genama mana꞉mo uwatete ibino genama gulu patapata hunamo ba nimiya꞉te Atimisiko emalagidololo ebe ba꞉bo adikuminakuya꞉.
ACT 19:25 Ba꞉bene eta hegelalo Dimitiyasiti ebeno okopi ba꞉gala komo ida꞉da꞉li ododilipi, ibi hiliyonomago tabo koga꞉lama꞉ ka꞉lamiti iba꞉tamo na꞉goiya꞉, “Dubala꞉, la꞉ iya꞉tawahala aeno bisnisi ipuwalo a koko maninomo bododilinakoma꞉, iyo, ba꞉moe ba꞉ aeno ka꞉ka꞉la.
ACT 19:26 Huiyatiya ba꞉moe dubu Polote bada komo kododina, la꞉le la꞉eno baida꞉mo uminakomata ba꞉gala galamo ulihonakomata. Ebete na꞉goenako tawakaluba꞉te kokotamo dododilinaka ba꞉bi ida꞉da꞉lino helo kitanaha꞉, hibi Godo keba ka꞉nala꞉ka꞉ eba ka꞉naha꞉. Ba꞉bema꞉ aeno Epesese habalo ba꞉gala ba꞉moe A꞉isiya hopo konomolo tawakaluba꞉te ebeno tabo uliti hibima꞉ ga꞉late ibino ida꞉da꞉li adikulame ipuwane ohobila꞉huya꞉.
ACT 19:27 Diyala, ale eta komo ododihino tatalila tawakaluba꞉te aeno bisnisi ododi komo kubama꞉ da꞉ ga꞉lamena꞉, ba꞉gala atu tetelo iba꞉te Atimisiko Adikumino Hiya꞉ Genamamo alehawamina komoma꞉ diya꞉da꞉temena꞉. Ba꞉be mabuma꞉ ba꞉ma tetelo tawakalubi hiliyonomate aeno A꞉isiya hopolo ba꞉gala ba꞉moe hopo konomolo dadikuminaka, ba꞉be aeno ida꞉da꞉li Atimisiko ebeno helo konomo kowibomema꞉ne!”
ACT 19:28 Ba꞉bema꞉ ulihopi hiliyonomate ba꞉be taboma꞉ konomamo maubahalete ga꞉ga꞉ ekelalameheno iba꞉te na꞉ga꞉luya꞉, “Epesesenapino Atimisiko, ebe aeno Kodawanomola!”
ACT 19:29 Ba꞉bene ibino helo komote haba konomamo da꞉tuya꞉, habalubi hiliyonomate konomamo maubahaliya꞉. Ba꞉ba tetelo puya꞉te maubahala꞉go da꞉tolamitiya꞉ iba꞉te Ma꞉sadoniya hoponapi netewapi Ga꞉iyasiko ba꞉gala A꞉listakasiko heloamo nuwatete habalubino tabo ga꞉la habamo gahugahulu dito wadimuya꞉taliya꞉, mabu ibi netewapi ba꞉ Polokoba꞉ wapata꞉nama꞉.
ACT 19:30 Ba꞉bema꞉ Polote ubila tawakalubi ipuwamo tote ibi hidohido tabamo konegelebadilamema꞉, huiyatiya Ya꞉suku ta꞉matapi ipuwalo ebeno mabuluba꞉te ebe na꞉duhimiya꞉,
ACT 19:31 ba꞉gala ba꞉be A꞉isiya hopoeno gabomani dubu ipuwalo komo Polokono mabuluba꞉te atumu ebe toemeholo tabo ebetamo na꞉poemiya꞉, “Ama꞉ habalubino tabo ga꞉la habamo akapa꞉la꞉!”
ACT 19:32 Ba꞉bene ba꞉ba tetelo habalubino kapiyuimi ipuwalo ko mauba komote hibinomolo uluhukuya꞉, komopa꞉te ga꞉ga꞉lo eta tabo ga꞉lanakui, eta tabo ga꞉lanakui, ba꞉ba ka꞉na ewagelitiya꞉, ba꞉gala atu tetelo komopa꞉te ukui bilibilima꞉ eda꞉hutiya꞉, mabu iba꞉te kiya꞉tawahuya꞉ha꞉ tawakaluba꞉te kapiyuimi habamo badama꞉ ka꞉pelamiya꞉.
ACT 19:33 Ba꞉bene komo Yu dubate ibino eta lumagi A꞉lesandatamo helo ba ikame, ebete tawakalubino dopo hapulu mahigate kokoto ba꞉bo a꞉midahuya꞉ tawakaluba꞉te tabo ga꞉la kekelalamema꞉, mabu ebe ubila iba꞉tamo owalubi tabo kolamagima꞉.
ACT 19:34 Huiyatiya iba꞉te ebe umihote, ebete Yu lumagima꞉ deda꞉na ba꞉be komo iya꞉tawahate ibulunomo kapimilo ga꞉ga꞉ gala na꞉katupuimiya꞉, “Epesesenapino Atimisiko, ebe aeno Kodawanomola!” Ba꞉bene iba꞉te tete ga꞉ga꞉nomo ba꞉ba ka꞉na ba ewagelita,
ACT 19:35 eta gabomani dubu, ebe ba꞉ Epesese haboeno kukala iya꞉tulamedawala, ebete ibi tatabuilamete iba꞉tamo na꞉goiya꞉, “Epesese dubala꞉, hiliyonomo tawakalubi iya꞉tawahala, aeno Epesese ko haba ba꞉ Kodawa Atimisiko Adikumi Genamoeno hopola. Ba꞉gala ibi iya꞉tawahala, ba꞉be habali ida꞉da꞉lino talona nakola konomo Hunu Habane atamo ya꞉lo peguya꞉, ka꞉lo ba꞉ aeno habalo bitana ale hidamo kuminama꞉.
ACT 19:36 Ba꞉bema꞉ numa꞉la꞉, mulu iya꞉tawa lumagigodolo helo kitanaha꞉ Atimisikono komoma꞉ ha꞉da tabo goema꞉. Ba꞉be mabuma꞉ la꞉ ukui bilibilihino tatabalo na꞉pola꞉nala꞉, daedae ukuilo eta kuba komo akododa꞉la꞉!
ACT 19:37 “Ba꞉bema꞉ la꞉ ba꞉moi dubu netewapi ba꞉mamo badama꞉ ka꞉magaheleoma? Iba꞉te Atimisiko Adikumino Genamalo pilo komo kododiha꞉, ba꞉gala iba꞉te aeno ida꞉da꞉lino komoma꞉ eta kuba tabo kaga꞉laha꞉.
ACT 19:38 Ba꞉bema꞉ Dimitiyasiko ba꞉gala ebeno okopi, iba꞉godolo mauba komo eta lumagitamo hibilo ditana, wadiyala iba꞉te aeno gabomani dubatamo na꞉tolama꞉mena꞉ tabo anagiya꞉midapino holoholo hapulu konolowabeletihuima꞉.
ACT 19:39 Ba꞉gala la꞉ eta komo umi ubi dihatitama, wadiyala komo habaluba꞉te la꞉go pekapiyuimiti tatabalo kopega꞉lama꞉nemata, Loma gabomaniti atamo helo dikaa꞉mena ba꞉ba ka꞉na.
ACT 19:40 Ba꞉bema꞉ nale la꞉ begoelamemata, la꞉ hidamo! Ale ka꞉lo kebe komo kododima꞉, Loma gabomana꞉te dulimina꞉, diyala, iba꞉te ba꞉be komo haba kubahimi komoma꞉ da꞉ ga꞉lamena꞉, ba꞉bene iba꞉te atamo kuba huiya hibinomolo kikaa꞉mema꞉na꞉ mabu aeno mauba komo ipuwalo hibi komo kitanaha꞉.”
ACT 19:41 Ba꞉bene ebeno tabo olamagi da꞉wibuya꞉, Epesese haboeno kukala iya꞉tulamedawate tawakalubi hiliyonomo ibino genamamo ba꞉ dito oelameholiya꞉.
ACT 20:1 Ba꞉bema꞉ Epesese habanapino ko mauba komote da꞉wibuya꞉, Polote Ya꞉suku ta꞉matapi ebetamo ka꞉lamiti ibi komo tabamo ba owalubili yawo tabo goete Ma꞉sadoniya hopamo ba꞉bo tuya꞉.
ACT 20:2 Ba꞉bene ebete ba꞉be hopo konomolo ba nepata꞉, ebete sose tawakaluba꞉tamo owalubi tabo hiliyonomo olamaginatote Guliki hopamo ba꞉ dito nuluhukuya꞉.
ACT 20:3 Ebete ba꞉bolo netewa-kapiya manome ba nemede, ba꞉bene ebete Siliya hopamo palai boga꞉go toma꞉ goiya꞉. Ba꞉ba tetelo komo Yu dubate huiyatiya ebe anakapumima꞉ nopo da꞉tamotiya꞉, Polote ba꞉be komo uliti ebeno ukui hiya꞉ma꞉ miditi Ma꞉sadoniya haka gabodo gala na꞉kapiya꞉.
ACT 20:4 Ba꞉ba tetelo ba꞉moi dubate Polokoba꞉ tolamiya꞉, Beliyanapi Pilasikono gudu Sosipatako, ba꞉gala Tesalonaikanapi dubu netewa A꞉listakasiko ba꞉gala Sekandasiko, ba꞉gala Debinapi Ga꞉iyasiko, ba꞉gala Timotiko, ba꞉gala A꞉isiya hoponapi dubu netewa Tikikasiko ba꞉gala Topimasiko, iyo, ba꞉moi dubate Poloko bana tolamiya꞉.
ACT 20:5 Ba꞉bene iba꞉te dopamo tolamete Talowase habamo nikuliti a ba꞉bo nelatia꞉mitiya꞉,
ACT 20:6 huiyatiya Pilipai ko habalo paibo hegela da꞉peniwibuya꞉, ba꞉ba tetelo a komopa꞉te Hunamo Mahigaha꞉ Palawa Baa꞉ Poko ododiti, ba꞉bene ko palai boga꞉go Talowasa꞉mo tolamete Polua꞉tamo ba꞉bo nikuliya꞉ma꞉. Ba꞉ba tetelo ale iba꞉go kapimilo sa꞉ba꞉ni hegela ba꞉bolo nemediya꞉ma꞉.
ACT 20:7 Ba꞉bene Satade dulu ale Ya꞉suku emalagidolo baa꞉ nahama꞉ eta hunu genamalo ditanami ba꞉be ko habamo da꞉kapiyuiminiya꞉ma꞉, ba꞉be kapiyuimi bahilo wuiki alo hiliyonomate wamotehoniya꞉. Ba꞉bene Polote eta hegelalo toma꞉ ba ewagelena, ebete Godokono tabo olamagi ga꞉gima꞉tepanate iwa tetenomamo ba꞉bo nuluhukuniya꞉.
ACT 20:9 Ba꞉ba tetelo a ipuwalo eta uli ape dubuti na꞉lutiya꞉, ebeno mahilo Yutikasitila, ebete alulu tetelo ba luta ko unomote ba꞉bo laweniya꞉. Ba꞉bema꞉ Polote tabo ga꞉ga꞉nomo ba olamagina Yutikasiko uti da꞉laweniya꞉, ebete ba da꞉da꞉gahana ba꞉be toela genama hununi hopamo ba꞉bo peganiya꞉, ba꞉bene komo tawakaluba꞉te pepalaganate ebe da꞉padipateniya꞉ hoenomo bepuminiya꞉.
ACT 20:10 Huiyatiya Polote da꞉pihitiganiya꞉ ebeno ape Yutikasikono bodolo hunamo pemowatiminate ebe ba a꞉pa꞉watamena na꞉goeniya꞉, “La꞉ katoletolehonala꞉, ebeno ka꞉ka꞉ bitama꞉na!”
ACT 20:11 Ba꞉ba tetelo Polote gala kanodolonate Ya꞉suku emalagidolo baa꞉ wakamihonate ale kapimilo ba꞉bo nahaniya꞉ma꞉, ba꞉bene tete ga꞉ga꞉nomolo ebete ago tabo ba olamagimina hegela ba꞉bo owalohuya꞉. Ba꞉bene Polote a miya꞉poete ba꞉ dito tuya꞉,
ACT 20:12 huiyatiya Yutikasiti gala ka꞉ka꞉ da꞉kalaweniya꞉, ebeno tawakaluba꞉te ba꞉bema꞉ ko kalakalago ebe ebeno genamamo ba꞉bo magatuya꞉.
ACT 20:13 Ba꞉ba tetelo Polote A꞉soso habamo dopamo tuya꞉ haka gabodo, huiyatiya a komo ba꞉bamo ko palai boga꞉go tolamiya꞉ma꞉, mabu Polote a ba꞉ma ka꞉na kiyaa꞉miya꞉ ale ebe ba꞉bolo konatopima꞉.
ACT 20:14 Ba꞉bema꞉ ale eba꞉go A꞉soso habalo da꞉naluguya꞉ma꞉, ebete ale da꞉tolamiya꞉ma꞉ ba꞉be boga꞉mo ololote a hiliyonomate kapimilo Mitilina habamo ba꞉bo na꞉hiwaliya꞉ma꞉.
ACT 20:15 Ba꞉bene Mitilina habane katolamete eta hegelalo Kiyosi kiyamo nikuliti, ba꞉bi kiyoeno dododo tolamete eta hegelalo Samoso habamo na꞉hiwalete, eta hegelalo Mailitase habamo dito nikuliya꞉ma꞉.
ACT 20:16 Ba꞉ba tetelo Polote ebeno nopo ba꞉ma ka꞉na ihatiya꞉, ebete ko palai boga꞉go ba to Epesese ko haba dito konegogoloma꞉, mabu ebe ubihinola ba꞉be A꞉isiya hopolo tete ga꞉ga꞉lo nemede, huiyatiya ebe ubila Yelusalema ko habamo tiyolo tote Pentekose Poko ebe hulupida꞉ kododima꞉.
ACT 20:17 Ba꞉bene Polote Mailitase habane tabo benoemiya꞉ Epesese sose watowatopa꞉tamo iba꞉te ebetamo kopelamema꞉.
ACT 20:18 Ba꞉bi watowatopa꞉te ebetamo da꞉pikuliya꞉, ba꞉ba tetelo ebete iba꞉tamo na꞉goiya꞉, “Na dopo tetenomolo A꞉isiya hopamo da꞉pimo, ba꞉be hegelane tupuimiti komo hegela hiliyonomo ipuwalo la꞉godolo kebako emede ka꞉pemedenamimo, la꞉ ba꞉be komo iya꞉tawahala.
ACT 20:19 Ba꞉ma ka꞉na na ha꞉kiya na hopamo ihatelo Kodawa Ya꞉sukunu oko ba powatina ihi baida꞉go pepata꞉namimo, mabu Yunapa꞉te natamo temeteme ba ikanamena na anakapunamema꞉ ewagelenama꞉.
ACT 20:20 Huiyatiya ba꞉be tete ga꞉ga꞉nomolo la꞉ kowalubilima꞉ Godokono tabo olamagima꞉ na katoletolenamiha꞉, ba꞉bema꞉ komo hiliyonomo tetelo nale hawakala bahilo ba꞉gala la꞉eno hiya꞉hiya꞉ genama gulu la꞉ ba iya꞉tulame nale eta kapiya komo kotanakuiha꞉.
ACT 20:21 Iyo, ba꞉ba tetelo na Yu tawakalubi ba꞉gala Yuha꞉pi atumu, ibi hiliyonomo a꞉kiyalamenakuimo, iba꞉te ibino kuba ododili ipuwane Godotamo ohobila꞉hate Kodawa Ya꞉suku hibima꞉ komidima꞉.
ACT 20:22 “Ba꞉bema꞉ ka꞉lo la꞉ numa꞉la꞉, na Godokono Gobogobote da꞉kiyanami ba꞉be komamo papamiwatate Yelusalemamo toma꞉ ewagelemo, huiyatiya na iya꞉tawaha꞉ ba꞉bolo natamo bada komate dikulihomena꞉.
ACT 20:23 Huiyatiya Godokono Gobogobote na diya꞉tunami ba꞉be kapiya komo biya꞉tawanamo, hiliyonomo habahabalo du genamoeno temeteme ba꞉gala komo kodakoda komate na belatinamena.
ACT 20:24 Huiyatiya naeno ka꞉ka꞉ nitanana, nale koamo a꞉kemalagidolamo. Kodawa Ya꞉suti natamo ya꞉lo dikanamiya꞉, ba꞉be oko ba꞉ Godokono Hido Tabo olamagi okola, ba꞉bema꞉ ba꞉be tabo olamagi ipuwalo nale Godokono malemale komo hawakalimima꞉ oko kuitita꞉mo hibinomolo konuluhukuma꞉nemo.
ACT 20:25 “Ba꞉moe komo ba꞉ hibila, Godote Ko Gawadubuma꞉ deda꞉na, nale ba꞉be komo la꞉ ipuwalo olamaga꞉go pata꞉namimo. Huiyatiya naeno mabuluba꞉la꞉, ka꞉lo na niya꞉tawutamo la꞉ hiliyonomate naeno holoholo gala a꞉kuma꞉mata,
ACT 20:26 ba꞉bema꞉ ka꞉lo hegelalo nale la꞉ bikiyalamemata, la꞉ ipuwalo eta lumagino ka꞉ka꞉te da꞉nalatidimini, ba꞉be komote naeno kubama꞉ a꞉keda꞉mene.
ACT 20:27 Ba꞉ hibila, Godote tawakalubi hiliyonomatamo ebeno ubi keba ka꞉na kihatena iba꞉te kododilinama꞉, nale ba꞉bi hiliyonomo komokomo la꞉tamo olamagima꞉ katoletolenamiha꞉, ba꞉bema꞉ nale la꞉ ba iya꞉tulame eta kapiya komo kotanakuiha꞉.
ACT 20:28 “Ba꞉bema꞉ watowatopa꞉la꞉, la꞉ ha꞉kiya la꞉ ba꞉gala la꞉eno sipi-goegoe hiliyonomo hidamo nulamenala꞉, mabu Godokono Gobogobote la꞉ ibi ulamepima꞉ a꞉midilia꞉ta. Iyo, wadiyala la꞉ Godokono sose tawakaluba꞉tamo hidohido baa꞉ nikalamenakuya꞉la꞉, mabu ebete ebeno hawa꞉mo ibi uwatiya꞉ iba꞉te ebeno gugudima꞉ keda꞉hanama꞉.
ACT 20:29 Na iya꞉tawala, nale la꞉godone duluhukumu, ba꞉ba tetelo helohelo tumu gahagahate la꞉ ipuwamo pa꞉pa꞉la꞉hate la꞉eno sipi-goegoe kubanomamo kopaloholema꞉na꞉.
ACT 20:30 Ba꞉gala la꞉eno tawakalubinomo ipuwalo komo dubate mahila꞉halete Godokono hibi taboeno ipuwa komokomo ohoba꞉midalete huiyatiya ha꞉da taboma꞉ komidilima꞉na꞉, Ya꞉suku hibima꞉ midipi kuba emogabuimi gabamo komagatalema꞉.
ACT 20:31 Ba꞉bema꞉ la꞉ uliholo nemedeniya꞉la꞉ ba꞉gala naeno komo akadodala꞉! Ba꞉ hibila, nale netewa-kapiya gogo ipuwalo naeno ihi baida꞉go du ba꞉gala hegela hiliyonomolo la꞉ hiliyonomo iya꞉tulamenakuimata.
ACT 20:32 “Ba꞉bema꞉ ka꞉lo nale la꞉ Godokono kokotamo miya꞉temata, ebeno malemaledo la꞉tamo da꞉pi ebete ba꞉be tabamo la꞉ hidamo kobuiya꞉minalenama꞉. Iyo, ebe modobola la꞉ kokodakoduilamema꞉, ba꞉bene ebete ya꞉lo ebeno talona tawakalubima꞉ da꞉midiliya꞉, ba꞉bi tawakalubi ba꞉gala la꞉, ebete ebeno hidohido komo la꞉ hiliyonomatamo kapimilo kikalameholema꞉na꞉ta, ebete dopamo hibinomolo keba ka꞉na ka꞉goiya꞉ ba꞉ba ka꞉na.
ACT 20:33 Numa꞉la꞉, nale la꞉ ipuwalo eta lumagino mani ba꞉gala pupulino ilina naeno ukuia꞉mo kuhiliminakuiha꞉.
ACT 20:34 La꞉ iya꞉tawahala, na ha꞉kiya ba꞉moi kokoto netewamo nale oko ba owatina, na ha꞉kiya na ba꞉gala nago da꞉wapata꞉lamenama꞉ aeno modoboha꞉ komokomo a꞉modobuilamenakuimo.
ACT 20:35 Ba꞉ma ka꞉na nale hiliyonomo ododili komokomo ipuwalo la꞉ iya꞉tulamenakuimata, la꞉le hiya꞉hiya꞉ oko kodakodalo ba owatiho mani uwatete awaepi ba꞉bo kowalubilinama꞉. Iyo, Kodawa Ya꞉suti dopamo kebe tabo ka꞉goiya꞉, wadiyala la꞉ ba꞉be tabo gala na꞉kemalagidolala꞉, mabu hibila, ebete ba꞉ma ka꞉na goiya꞉, ‘Ilina uwate tetelo hopo haboeno kalakala bitana, huiyatiya eta lumagitamo ikame tetelo Godokono kalakalate ama꞉ ipuwalo konomoma꞉ keda꞉ma꞉ne.’”
ACT 20:36 Ba꞉bene Polokono tabo olamagi sose watowatopa꞉tamo da꞉wibuya꞉, ba꞉ba tetelo ibi hiliyonomate ebe bana pupamo gagahiditi toetoe tabo Godotamo ba꞉bo adipatiya꞉.
ACT 20:37 Ba꞉bene ibi hiliyonomate boge utihole baha꞉mo kapimilo da꞉nepalagutiya꞉, iba꞉te Poloko a꞉pa꞉watameholo ba꞉gala ba aboeteho ko tepo temetema꞉go ihimitiya꞉ mabu Polote iba꞉tamo ba꞉ma ka꞉na olamagiya꞉, iba꞉te ebeno holoholo gala a꞉kuminakamena꞉.
ACT 21:1 Ba꞉ba tetelo ale Epesese hibima꞉ midipa꞉tamo yawo tabo ga꞉late kehaha꞉ kolomo a꞉hiwalenomo na꞉hiwalete Kosa hopamo ba꞉bo nikuliya꞉ma꞉, ba꞉bene eta hegela a Lodesa hopo nelawete, ba꞉bene Patala habamo dito tolamiya꞉ma꞉.
ACT 21:2 Ba꞉bolo Ponisiya hopamo a꞉hiwama꞉ ditanuya꞉ ba꞉be eta ko palai boge ale numiti, ba꞉ba tetelo a ba꞉be boga꞉mo nololote tolame ba꞉bo netupuimiya꞉ma꞉.
ACT 21:3 Ba꞉bene ale da꞉tolamiya꞉ma꞉ Saipalase hopo numiti pele hapuamo ba a꞉mida ale Siliya hopamo na꞉hiwalete, namutudawate ebeno boge Taya ko habamo dito nutiya꞉ ebeno ilina kokolowamima꞉.
ACT 21:4 Ba꞉be habalo ale komo Ya꞉suku ta꞉matapi ohola꞉go petolamete ibi nulamete sa꞉ba꞉ni hegela iba꞉go ba꞉bo nemediya꞉ma꞉, ba꞉bene kebe kuba komote Polotamo duluhukumini, iba꞉te ba꞉be komo Godokono Gobogoboeno heloamo iya꞉tawahate ebe na꞉kiyahamiya꞉ ebete Yelusalemamo a꞉katoamene.
ACT 21:5 Ba꞉bene boge namutudawate atamo kebe tete dikaa꞉miya꞉, ba꞉be tete duluhukuya꞉ ale ibi miya꞉palema꞉ ga꞉late boga꞉mo ba꞉bo pepalaguya꞉ma꞉. Ba꞉ba tetelo ibi hiliyonomate ibino kamenakamena guguda꞉go a miya꞉poema꞉ habane ago pelamiya꞉ boge utihole baha꞉mo, ba꞉bene a hiliyonomo kehaha꞉ kolomo dodolo pupamo pegagahiditi Godotamo toetoe tabo ba꞉bo padipatiya꞉ma꞉. Ba꞉be komo da꞉wibuya꞉, komopa꞉te komopa꞉tamo yawo tabo ga꞉late
ACT 21:6 ale boga꞉mo ololote iba꞉te ibino genamamo gala dito kawilaliya꞉.
ACT 21:7 Ba꞉ba tetelo Taya ko haba miya꞉pate ale ko palai boga꞉go tolame gala na꞉katupuimiya꞉ma꞉, ba꞉bene Tolameyasi habamo da꞉nikuliya꞉ma꞉, ba꞉bolo hibima꞉ midipi ekaka꞉tamo kalakala tabo nega꞉late kapiya du iba꞉go ba꞉bo nelahaniya꞉ma꞉.
ACT 21:8 Ba꞉bene eta hegelalo ale Sisaliya ko habamo nikuliti Godokono Hido Tabo atedawa Pilipikono genamamo nalehawaminate ba꞉bo nemediya꞉ma꞉. Hibila, Yelusalema sose tawakaluba꞉te dopamo sa꞉ba꞉ni dubu Godokono oko owatima꞉ duwatiya꞉, Pilipiko ba꞉bi tuputupu okopi ipuwalo ebe ba꞉ etala,
ACT 21:9 ba꞉gala ebegodolo ebeno netewa-netewa koko bohelemela꞉te emedenama꞉, Godokono Gobogobote ebeno hiya꞉nomo helo iba꞉tamo ikalamiya꞉ ebeno tepo ipuwoeno ukui kohawakalilamenakoma꞉.
ACT 21:10 Ba꞉bene ale komo hegelalo ba꞉bolo ba emede, eta Godokono ukui hawakalimidawa A꞉gabasiti Yudiya hopone atamo ba꞉bo puluhukuya꞉.
ACT 21:11 Ebete a pua꞉mete Polokono kamake lawete ebe ha꞉kiya ebeno nato kokoto ba matuhulamehole na꞉goiya꞉, “Godokono Gobogobote ba꞉ma ka꞉na goita, ‘Yunapa꞉te Yelusalemalo demedehona, kebe dubuti ba꞉moe kamake da꞉pulinako iba꞉te ba꞉be dubu heloamo lawete Yuha꞉pa꞉tamo konikalamema꞉na꞉ ebe kokubahimima꞉.’”
ACT 21:12 Ba꞉ba tetelo a ba꞉gala komopi ba꞉moe tabo duliya꞉ma꞉, ale Poloko na꞉toemehuya꞉ma꞉, “Ama꞉ Yelusalemamo akatoala꞉!”
ACT 21:13 Ba꞉bene Polote aeno tabo huiyalo na꞉goiya꞉, “Natamo badama꞉ kihimiutama? Mabu keka꞉ la꞉le tepo temeteme natamo ikanamema꞉ dewagelitama? Ba꞉ hibila, nale a꞉hidomo Yelusalemalo komopa꞉te naeno ape hala꞉mo matumihoma꞉, ba꞉gala naeno kalakala bitana ba꞉bolo Kodawa Ya꞉suku mabuma꞉ hoe.”
ACT 21:14 Ba꞉ba tetelo ale Polokono ukui hiya꞉ma꞉ midi kamodobuya꞉ha꞉, ba꞉bema꞉ ba꞉be komo dumiya꞉ma꞉ ale na꞉ga꞉luya꞉ma꞉, “Kubahenola, Godokono ubi komote nuluhukamene.” Ba꞉bene ale eta tabo kaga꞉luya꞉ha꞉.
ACT 21:15 Ba꞉bene ba꞉be komo da꞉wibuya꞉ ale aeno ilina hiduilamete Yelusalema ko habamo haka gabodo ba꞉ dito tolamiya꞉ma꞉.
ACT 21:16 Ba꞉ba tetelo komo Ya꞉suku ta꞉matapa꞉te ibino Sisaliya habane a da꞉buiya꞉minoenatuya꞉, iba꞉te a Nesonikono genamamo dito magatoiya꞉ ale ba꞉bolo konemedema꞉. Nesoniko ba꞉ Saipalase hoponapila, dopo tawakaluba꞉te Ya꞉suku hibima꞉ da꞉midiya꞉ ibi ipuwalo ebe ba꞉ etala.
ACT 21:17 Ba꞉be atu hegelalo Yelusalema ko habalo demedehonama꞉ ba꞉bi hibima꞉ midipi ekaka꞉te a ko kalakalago uwatiya꞉.
ACT 21:18 Ba꞉bene eta hegelalo a hiliyonomate Polokoba꞉ Ya꞉imesiko umima꞉ da꞉tolamiya꞉ma꞉, ba꞉ba tetelo ale ebe komo sose watowatopi hiliyonomago ba luta ba꞉bo numiya꞉ma꞉.
ACT 21:19 Ba꞉bema꞉ Polote iba꞉tamo kalakala tabo negoete, Godote ebeno oko ipuwado kebe hiliyonomo komokomo Yuha꞉pi ipuwalo dododilinakui, ebete ba꞉be komo iba꞉tamo ba꞉bo hawakalimiya꞉.
ACT 21:20 Iba꞉te ba꞉moi tabo dulihuya꞉ Godoko milimiholo na꞉ga꞉luya꞉, “Aeno naniwi, kalakala konomola, huiyatiya ba꞉moe eta komo hidamo numa꞉, a Yunapi ipuwalo kebako hiliyonomo taosene tawakaluba꞉te Ya꞉suku hibima꞉ a꞉midiya꞉. Huiyatiya hibila, Godote Moseseko ipuwado aeno iniwala꞉tamo dikalamiya꞉, ibi hiliyonomate ba꞉bi Tutumu Tabo ta꞉matalema꞉ konomamo emalagidolena.
ACT 21:21 Ba꞉bema꞉ komo hibima꞉ midiha꞉ Yunapa꞉te aeno komo ekakino ukui kubahilamelelamelo dopamo ba꞉ma ka꞉na kiyalamiya꞉, hiya꞉hiya꞉ muhulu hopolo demedehona ama꞉le ba꞉bi Yunapi a꞉niya꞉tulamenakata iba꞉te Mosesekono Tutumu ipuwane kohobila꞉ma꞉. Ba꞉bene iba꞉te amia꞉no komoma꞉ eta ha꞉da tabo bekaga꞉luya꞉ ba꞉ma ka꞉na, ama꞉le tawakaluba꞉tamo talona bihatelamenata ibino dubu guguda꞉tamo Godokono tama itamida kukala komiya꞉telamenakoma꞉ ba꞉gala aeno iniwalino komo hiya꞉hiya꞉ komokomo kododilinakoma꞉.
ACT 21:22 “Ba꞉bema꞉ a keba ka꞉na na꞉kewagelema꞉? Hibila, iba꞉te amia꞉no pe komo kiya꞉tawahama꞉na꞉,
ACT 21:23 ba꞉bema꞉ a ubila ama꞉ ba꞉moe komo nododiya꞉. Aeno kapiyuimi ipuwalo netewa-netewa dubate ba꞉pola꞉na, iba꞉te dopamo tawakalubino holoholo hapulu tabo olamagimiya꞉ ibino ape Godotamo hibinomolo kikamehoma꞉.
ACT 21:24 Ibino tete ba꞉ na꞉pe, ba꞉bema꞉ wadiyala ama꞉ ibi magatalete ibi hawakala na꞉nowalubiliya꞉, hawa꞉goeno ilina mana꞉mo uwatete Godotamo ba nikameho ibino tepo ipuwoeno dalowa꞉ kupula꞉lelamema꞉. Ba꞉bene ama꞉ iba꞉go tote hinibo elepeho iya꞉tawahapa꞉tamo mani nikalamiya꞉ iba꞉te hinibo elepeho komo kuwatema꞉. Ba꞉moe gabodo tawakalubi hiliyonomate kiya꞉tawahama꞉na꞉ komopa꞉te amia꞉no komoma꞉ ha꞉da tabo da꞉ga꞉lana ba꞉be tabo hibiha꞉, huiyatiya iba꞉te kumima꞉na꞉ ama꞉ atumu Mosesekono Tutumu Tabo ipuwalo bemedenata.
ACT 21:25 Ba꞉ hibila, a sose watowatopa꞉te dopamo Yuha꞉pi hibima꞉ midipa꞉tamo leta oemima꞉, iba꞉te Mosesekono Tutumu ipuwalo keba ka꞉na na꞉kemedehonamena꞉. Ba꞉be leta taboeno komo ba꞉ma ka꞉nala, komopa꞉te ida꞉da꞉la꞉tamo dikalamenaka iba꞉te ba꞉bi ilina a꞉kanahanakamena꞉, ba꞉gala kokobe dowa꞉ga꞉dililamenaka ba꞉bi ilina naha talonala mabu hawiti ba꞉be katene ipuwalo bitana, ba꞉gala iba꞉te kamena pilo dubu pilo a꞉kododilinakamena꞉.”
ACT 21:26 Ba꞉bene eta hegelalo Polote ba꞉bi netewa-netewa dubu magatalete ebe ba꞉gala ibino tepo ipuwoeno dalowa꞉ komoma꞉ Godotamo hawa꞉goeno ilina ba꞉bo nikamehuya꞉. Ba꞉bene ebete Godoko Adikumino Hiya꞉ Genamoeno kala imi ipuwamo nopegate ibino mahilo ba nimiya꞉te okodawa ba꞉bo nikiyamiya꞉, “Sa꞉ba꞉ni hegela da꞉wibomene, nale ba꞉moi dubago gala kapete ibino hiya꞉hiya꞉ komokomoma꞉ kuititi hawa꞉goeno ilina Godotamo kopikamehoma꞉nemo.”
ACT 21:27 Ba꞉bene sa꞉ba꞉ni hegela wiboma꞉ ba tatali, komo Yunapa꞉te A꞉isiya hopone dopamo da꞉pelamiya꞉, iba꞉te eta hegelalo Poloko Godoko Adikumino Genamalo ba꞉bo numiya꞉. Ba꞉bema꞉ iba꞉te kuba ukui lawete ubi bihatiya꞉, ba꞉bolo da꞉pola꞉nuya꞉ ba꞉bi tawakalubi hiliyonomatamo helo ikalamete iba꞉te Polotamo komaubahalema꞉, ba꞉bene iba꞉te Poloko heloamo lawete
ACT 21:28 ga꞉ga꞉lo na꞉ga꞉luya꞉, “Isalaela dubala꞉, la꞉ a nowalubia꞉la꞉! Hopo konomolo hiliyonomo tawakalubi kubamo da꞉magatalena, ba꞉moe ba꞉be dubula! Ebeno iya꞉tulame ipuwado ebete aeno tawakalubi ba꞉gala aeno tutumu komokomo ba꞉gala ba꞉moe talona genama bekubahilamenako! Ba꞉gala eta hegelalo ebete komo Yuha꞉pi ba꞉moe Godoko Adikumino Genamamo magahelete aeno talona haboeno kukala adikamidali!”
ACT 21:29 Iba꞉te ba꞉moe tabo bega꞉luya꞉ mabu eta hegelalo iba꞉te Poloko ba꞉gala eta Epesesenapi dubu Topimasiko Yelusalemalo badi wapatitalo dulamiya꞉, ba꞉bema꞉ iba꞉te ba꞉ma ka꞉na emalagidoluya꞉, Polote ibino talona adikamidalete ba꞉be Yuha꞉ dubu Godoko Adikumino Genamamo a꞉magata, huiyatiya ba꞉be komo hibiha꞉.
ACT 21:30 Ba꞉ba tetelo Yelusalema ko habalo tawakalubi hiliyonomate ba꞉be tabo dulihuya꞉, iba꞉te hapuhapuni ba꞉bo pipulila꞉huya꞉. Komo iba꞉te Poloko heloamo pelawete Godoko Adikumino Genamane adimuya꞉tate, ba꞉bene genama umipa꞉te kaloeno gigiho dito kalapilahaliya꞉.
ACT 21:31 Iba꞉te Poloko anakapumima꞉ ba ewagelita, Loma gabomanino alaholohopino watodawate ba꞉bo iya꞉tawuya꞉ Yelusalemalo alaholo komo konomote uluhukuta.
ACT 21:32 Ba꞉bema꞉ ba꞉ba tetenomolo ebete ebeno komo hopopi ba꞉gala alaholohopi dubu uwatete tawakalubino alaholoho komo duhimima꞉ ba꞉bo pipulila꞉huya꞉, ba꞉bene tawakaluba꞉te ibino pelame komo dumiya꞉ Poloko anagalimiho ba꞉ dito ekelalamiya꞉.
ACT 21:33 Ba꞉bene alaholohopino watodawate Poloko tama꞉mo pete ebeno hopopi na꞉kiyalamiya꞉, iba꞉te ebe lawete auli hale netewamo ebe komatuhumihoma꞉, ba꞉gala ebete tawakalubi nalateda꞉liya꞉, “Ba꞉moe dubu potela꞉ka꞉? Ebete bada kuba kododi?”
ACT 21:34 Ba꞉ba tetelo komo tawakalubi hiliyonomate ga꞉ga꞉lo eta tabo ga꞉lanakui, eta tabo ga꞉lanakui, ba꞉ba ka꞉na ewagelitiya꞉. Ba꞉bema꞉ iba꞉te howele konomo ba ododita alaholohopino watodawate ba꞉be komoeno ipuwa hidamo laweheno ebeno hopopi dito kiyalamiya꞉ iba꞉te Poloko gabomanino genamamo komagatama꞉, ba꞉be konomo genama ba꞉ Lomanapi alaholohopino oko genamala ba꞉gala laha genamala.
ACT 21:35 Ba꞉bene iba꞉te Poloko ebamo magatate genamoeno wakolamo ba na꞉putihole ebeno ka꞉ka꞉ mula꞉mema꞉ ibino kokotamo ebe hunamo ba꞉bo adipatiya꞉, mabu habalubino mauba komote konomamo uluhukutiya꞉.
ACT 21:36 Ba꞉ba tetelo ibi hiliyonomate Poloko helo konomago ba ta꞉mahe alaholohopa꞉tamo ga꞉ga꞉lo na꞉ga꞉lanapiya꞉, “Ebe nanakapuma꞉la꞉! Ebe nanakapuma꞉la꞉!”
ACT 21:37 Ba꞉bene Loma gabomanino alaholohopa꞉te Polokoba꞉ ibino konomo genama guamo na꞉pa꞉la꞉haheno, dopamo ebete ibino watodawatamo na꞉goiya꞉, “Na eta tabo ama꞉tamo ba꞉ka꞉goemo?” Alaholohopino watodawate la꞉wa꞉lo na꞉huiyuya꞉, “O! Ama꞉ Guliki tabo iya꞉tawala!
ACT 21:38 Ba꞉bema꞉ eta Isipitinapi dubuti ebeno 4,000 dubu dito hopamo magatalete a Loma gabomana꞉tamo alaholo nopo da꞉netamoti, ama꞉ ebeteha꞉. Diyala, ama꞉ da꞉ eta hoponapila꞉.”
ACT 21:39 Polote ebeno tabo ba huiya na꞉goiya꞉, “Na Yunapila, na Silisiya hopoeno Tasase ko habalo hawakaluya꞉mo, ba꞉bema꞉ hibila, naeno haba deha꞉poto habaha꞉. Na ama꞉ betoemehomata, nale naeno tawakaluba꞉tamo tabo kolamagima꞉.”
ACT 21:40 Ba꞉bene alaholohopino watodawate modoboma꞉ goete, Polote genamoeno wakola hunulu utiti ebeno kokotamo tawakalubi ba duhilame, ba꞉bene ibino tabo ga꞉la komo dito ekelalamiya꞉. Ba꞉ba tetelo ebete Yu tawakalubino tabamo olamagi ba꞉ma ka꞉na tupuimiya꞉,
ACT 22:1 “Naeno ekaki, nabi, naeno kuba ododiha꞉ komo la꞉tamo dolamagimo, la꞉ nulia꞉la꞉.”
ACT 22:2 Ebete iba꞉tamo Yu tabamo dolamagitiya꞉, iba꞉te uliti tabo ga꞉lahaheno tatabanomolo pola꞉nuya꞉. Ba꞉bene Polote gala na꞉kagoiya꞉,
ACT 22:3 “Na Yu lumagila, Silisiya hopoeno Tasase ko habalo hawakaluya꞉mo, huiyatiya na ba꞉moe Yelusalema habalo apete, ba꞉bene komo hiliyonomo gogolo Gameliyelate na iya꞉tunamenakui. Ba꞉bene ebeno iya꞉tumi ipuwane Godote aeno iniwala꞉tamo kebe Tutumu Tabo dikalamiya꞉, nale ba꞉bi komokomo kodakodalo ba uwate naeno ape konomo Godokono okamo ba꞉bo ihatiya꞉mo, ka꞉lo la꞉ hiliyonomate keba ka꞉na kemedeonama ba꞉ba ka꞉na.
ACT 22:4 Ba꞉bema꞉ komo gogolo nale ba꞉moe ukuido puya꞉te Ya꞉suku Hibima꞉ Midi Gabodo da꞉wapata꞉lamenama꞉ iba꞉tamo koko temeteme ikalamenakuimo. Iyo, nale ibi ipuwalo dubu ba꞉gala kamenakamena heloamo uwatenakuimo du genamamo dito niya꞉hekenakuimo, ba꞉bene komopa꞉te ibi danakapulamenakui na ba꞉be komoma꞉ ba꞉bo kalakalanakuimo.
ACT 22:5 Ka꞉lo nale kebe tabo dolamagitamo ba꞉be taboeno hibi komo Godotamo hawa꞉goeno ikamehopino Hununomo Watodawa ba꞉gala komo Ka꞉nisolo dubu, ibi hiliyonomate iya꞉tawahala. Iba꞉te natamo komo leta ikanamehonete Dama꞉sakase habamo na dito oenamiya꞉ nale aeno Yunapi ekaka꞉tamo ba꞉bi leta konikalameholema꞉. Ba꞉ba tetelo na ubi bihatiya꞉mo, nale ba꞉be habamo ba nuluhuku Ya꞉suku ta꞉matapi ba꞉bolo nuwatete hala꞉mo matuhulameholete Yelusalemamo magahelete iba꞉tamo kuba huiya kopikalamema꞉.”
ACT 22:6 Ba꞉bene Polote ebeno tabo moga꞉melo gala na꞉kagoiya꞉, “Huiyatiya na hegela tulilo Dama꞉sakase haba tama꞉mo duluhukunatuya꞉mo, ba꞉ba tetenomolo Godokono Hunu Habane alo konomote ba pihitiga hegelate da꞉la꞉wa꞉hiya keba ka꞉nala꞉ka꞉, na ba꞉be alote ba꞉ba ka꞉na panagogobeya꞉midadiganiya꞉.
ACT 22:7 Nale hakamo gate tabo ba꞉ma ka꞉na uliya꞉mo, ‘Solo, Solo! Keka꞉ mabu ama꞉le natamo koko temeteme dikanamena?’
ACT 22:8 “Nale na꞉huiyuya꞉mo, ‘Kodawa, ama꞉ potela꞉ka꞉?’ “Ba꞉bene ebeno huiya tabote ba꞉ma ka꞉na piya꞉, ‘Na ba꞉ Ya꞉suti Nasaletenapila, ama꞉le natamo temeteme dikanamena na ba꞉be lumagila.’
ACT 22:9 Ba꞉ba tetelo kebe dubate nago da꞉tolamiya꞉, iba꞉te natamo dolamagitiya꞉ ba꞉be lumagino tabo madodo hidamo kuliya꞉ha꞉, huiyatiya alo kapiya bumitiya꞉.
ACT 22:10 “Ba꞉bene nale na꞉goiya꞉mo, ‘Kodawa, ama꞉ bada ubi kihatiuta nale kododima꞉?’ “Ebete na꞉huiyuya꞉, ‘Ama꞉ mahigate Dama꞉sakase haba ipuwamo na꞉nopega, ba꞉bene ama꞉le kododilima꞉ Godote ebeno ubi komo ya꞉lo tetelo dihatiya꞉, ba꞉bi komokomo eta lumagiti ba꞉bolo kokiyahamema꞉na꞉ta.’
ACT 22:11 Ba꞉ba tetelo naeno baiditi a꞉duhunamiya꞉ mabu nale alo konomo bumiya꞉mo, ba꞉bema꞉ naeno mabuluba꞉te na kokotamo lawenete Dama꞉sakase habamo dito magataniya꞉.
ACT 22:12 “Ba꞉bolo eta dubu ebeno mahilo A꞉nanayasitila, ebete Godoko tolemelo Mosesekono Tutumu Tabamo papamiwatanami, ba꞉gala Yunapa꞉te ba꞉be habalo demedehonama꞉ ibi hiliyonomate ebe tuputupudawama꞉ ga꞉lanama꞉. Ebete na unamema꞉ da꞉piya꞉
ACT 22:13 na tama꞉mo putiti na꞉pegoiya꞉, ‘Naeno ekawi Solo, amia꞉no baiditi hidamo na꞉kagahilameholena!’ Ba꞉ba tetenomolo naeno baiditi da꞉hidohidohuya꞉ nale ebe hidamo ba꞉bo umiya꞉mo.
ACT 22:14 “Ba꞉bene ebete natamo na꞉goiya꞉, ‘Aeno iniwala꞉te dadikuminakui, ba꞉be Godote ama꞉ ya꞉lo a꞉ka꞉miya꞉ta ama꞉le ebeno ubi komo kiya꞉tawama꞉, ba꞉gala ebeno Tuputupu Okodawoeno holoholo kumima꞉, ba꞉gala amia꞉no galamo ba꞉moe Tuputupudawoeno tabo madodo kulima꞉.
ACT 22:15 Iyo, ama꞉le ebegodone kebe komokomo kulihui ba꞉gala kebe komokomo kulamiui, ebe ubila ama꞉le ba꞉bi komokomo tawakalubi hiliyonomatamo konolamagima꞉.
ACT 22:16 Ba꞉bema꞉ bada ka꞉latimiuta? Ama꞉ mahigate beyamo aduti komo na꞉lawa꞉. Ama꞉le ebeno mahilo da꞉ka꞉mimina꞉, ebete amia꞉no kuba ukulalemete kadodolemema꞉na꞉ta.’”
ACT 22:17 Ba꞉bene Polote tabo moga꞉melo gala na꞉kagoiya꞉, “Nale Yelusalemamo gala da꞉kapiya꞉mo, eta hegelalo Godoko Adikumino Genamalo eba꞉go tabo ba ga꞉lita naeno baiditi hiya꞉ma꞉ eda꞉hanamete hido komo ba꞉bo umiya꞉mo.
ACT 22:18 Ba꞉ba tetelo Kodawate natamo ba꞉ma ka꞉na goiya꞉, ‘Ama꞉ ka꞉lonomo Yelusalemane tiyonomolo nuluhukuya꞉, mabu ba꞉moi tawakaluba꞉te ama꞉godone naeno hibi komo a꞉kalawa꞉mena꞉.’
ACT 22:19 “Ba꞉bene nale na꞉huiyuya꞉mo, ‘Kodawa, ba꞉moenapi iya꞉tawahala, nale ibino hiya꞉hiya꞉ baidi ibubulamehole genamalo ama꞉ hibima꞉ midipi doholenakuimo, nale ibi ba uwate komo alukulinakuimo, komo du genamamo dito niya꞉hekenakuimo.
ACT 22:20 Ba꞉gala ibi iya꞉tawahala, komopa꞉te ya꞉lo gogolo amia꞉no hibi komo hawakalimidawa Stibiniko danakapumi, nale ba꞉be komo kalakalago ba umita ebe anakapumipino watuino kaliko bulamelelamitimo.’
ACT 22:21 “Huiyatiya Kodawate natamo gala na꞉kagoiya꞉, ‘Ba꞉moe habane ama꞉ nuluhukuya꞉, mabu nale ama꞉ muhululu demedehona ba꞉bi Yuha꞉pa꞉tamo konoemema꞉nemata.’”
ACT 22:22 Tabo ulihopi hiliyonomate Polokono tabo hidonomamo ulihonapiya꞉, huiyatiya ebete Yuha꞉pa꞉tamo Godokono ubilo toma꞉ tabo dolamagiya꞉ ba꞉ba tetelo mauba konomote iba꞉tamo uluhukuti ga꞉ga꞉ ba katupuimi Loma gabomana꞉tamo gala na꞉kaga꞉luya꞉, “Nanakapuma꞉la꞉! Ba꞉moe dubuti na꞉hoena, ebe wadiyaha꞉ ka꞉ka꞉na!”
ACT 22:23 Ba꞉bema꞉ ibino mauba ipuwalo ba ga꞉gita iba꞉te ibino watuino kaliko pipikulamete heloamo hakamo iya꞉hekete, ba꞉bene haka puhulu uwateholete hunamo ba꞉bo iya꞉hekeholiya꞉.
ACT 22:24 Ba꞉bema꞉ Loma alaholohopino watodawate tawakalubino mauba komo umiti ebeno alaholohopi dubu na꞉kiyalamiya꞉, iba꞉te Poloko gabomanino genama guamo magatate ebe giya꞉pa꞉pa꞉mo ba na꞉na꞉miga꞉ti, Yunapa꞉te ebetamo badama꞉ ka꞉ga꞉gitiya꞉ ba꞉be komo ebegodone hibilo kiya꞉tawama꞉.
ACT 22:25 Ba꞉bene alaholohopi dubate tolamete Poloko ka꞉na꞉miga꞉tima꞉ ebeno ape da꞉nehogaminuya꞉, ba꞉ba tetelo Polote ebe tamelo da꞉la꞉nuya꞉ ba꞉be eta gawadubu na꞉kiyamiya꞉, “Talona ba꞉kitana, Loma gabomanino pepago da꞉pata꞉na ba꞉bako lumagi dito a꞉na꞉miga꞉tima꞉? O la꞉ dopamo ebeno komo hidamo ba꞉kanagiya꞉midameoma?”
ACT 22:26 Alaholohopino gawadubuti ba꞉moe tabo duliya꞉, ebete ebeno watodawatamo gala katote ebe ba꞉bo nalatediya꞉, “Ama꞉ ba꞉moe dubutamo bada komo ododima꞉ kewageliuta? Ama꞉ iya꞉tawala꞉ka꞉ ebete Loma gabomanino pepago da꞉pata꞉na?”
ACT 22:27 Ba꞉bene alaholohopino watodawate Polotamo nuluhukuti ebe ba꞉bo nikiyamiya꞉, “Ama꞉ hibilo na na꞉kiyanama꞉, ama꞉ Loma gabomanino pepago ka꞉pateona?” Polote na꞉huiyuya꞉, “Iyo, ba꞉ hibila.”
ACT 22:28 Ba꞉bene alaholohopino watodawate na꞉goiya꞉, “Na atumu ba꞉bi pepago pata꞉namo, huiyatiya na ba꞉bi pepa ko maninomamo uwatiya꞉mo.” Polote na꞉goiya꞉, “Na huiyatiya ba꞉bi pepa mana꞉mo kuwatiya꞉ha꞉. Nale da꞉hawakaluya꞉mo ba꞉ba tetelo gabomana꞉te naeno nabiwitamo dito ikamiya꞉.”
ACT 22:29 Ba꞉bene Poloko a꞉na꞉miga꞉tima꞉ da꞉hidutiya꞉ ba꞉bi alaholohopa꞉te ebeno tabo duliya꞉, ba꞉ba tetenomolo iba꞉te tole komo lawete ebe miya꞉pate tama꞉mo dito utitatuya꞉. Ibino watodawate atumu na꞉katoletoletiya꞉ mabu ebete iya꞉tawaheno Loma gabomanino pepagoeno lumagi auli hala꞉mo da꞉matuhumihuya꞉, ebete ba꞉ba ka꞉na ibino eta ko kukala badikamidaliya꞉.
ACT 22:30 Ba꞉ba tetelo Polote Yu tawakalubino ukuilo iba꞉tamo bada kuba kododiya꞉, alaholohopino watodawate ubila ba꞉be komo hibinomolo kiya꞉tawama꞉. Ba꞉bema꞉ eta hegelalo ebete tabo benoelameholiya꞉, Godotamo hawa꞉goeno ikamehopino hununomo watowatopi ba꞉gala komo Yunapi Ka꞉nisolo dubu ibi hiliyonomate kopekapiyama꞉, ba꞉bene iba꞉te da꞉pelameholiya꞉ ebete Poloko du genamane uluhukutiti ibino holoholo hapuamo ba꞉ dito magahiya꞉.
ACT 23:1 Ba꞉ba tetelo Polote toleheno Yunapi Ka꞉nisolo dubu ulameholelo na꞉goiya꞉, “Naeno nana꞉la꞉, gogo hiliyonomo pete ba꞉ma teta꞉mo puluhuku, nale Godokono holoholo hapulu naeno tepo ipuwoeno mulu ukuido tuputupulu ba emedena ebetamo eta kuba kododiya꞉ha꞉.”
ACT 23:2 Ba꞉bema꞉ Godotamo hawa꞉goeno ikamehopino Hununomo Watodawa, ebeno mahilo A꞉nanayasitila, ebete Poloko tamelo da꞉la꞉mota꞉hanuya꞉ ba꞉bi dubu na꞉kiyalamiya꞉ etate ebe tabone kanagalimima꞉.
ACT 23:3 Polote ba꞉be tabo uliti ebetamo na꞉huiyuya꞉, “A꞉iye! Godote huiyatiya ama꞉ kanagalimima꞉na꞉ta! Ama꞉ kuba kala imi tawakaluba꞉te hido keyakeya tita꞉goenoma꞉ da꞉midi ba꞉ba ka꞉nala, hunu tama modobola huiyatiya ipuwa abalenomola. Ama꞉ tabo anagiya꞉midadawoeno oko habalo ba luta, wadiyala ama꞉ naeno komo Mosesekono Tutumu komago modobolo nanagiya꞉midanama꞉. Ba꞉bema꞉ mabu keka꞉ ama꞉le na anagalinamema꞉ da꞉gaa꞉? Ba꞉be ododi ipuwalo ama꞉ ha꞉kiya Mosesekono eta tutumu adikamidala꞉ta!”
ACT 23:4 Ba꞉ba tetelo Poloko tamelo da꞉la꞉mota꞉hanuya꞉ ba꞉bi dubate ebe na꞉kiyahamiya꞉, “Mabu keka꞉ ama꞉le Godotamo hawa꞉goeno ikamehopino Hununomo Watodawa diduduputima꞉? Ama꞉ konomo kuba bododa꞉ta!”
ACT 23:5 Polote na꞉huiyuya꞉, “Naeno nana꞉la꞉, nonolata. Hibila, Godokono Buka tabote ba꞉ma ka꞉na itana, ‘Amia꞉no tawakalubino watowatopi ipuwalo etoeno komoma꞉ kuba tabo akagaa꞉la꞉.’ Na iya꞉tawaha꞉ ebete Godotamo hawa꞉goeno ikamehopino Hununomo Watodawama꞉ deda꞉na.”
ACT 23:6 Ba꞉ba tetelo da꞉kapiyuimiya꞉ ba꞉bi Yunapi Ka꞉nisolo dubu Polote ulamiya꞉, hapulu Sa꞉diyusi kapiyuimipila, hapulu Pa꞉lisi kapiyuimipila. Ba꞉bema꞉ ebete eta ukui lawete ebeno tabo madodo adipatelo iba꞉tamo na꞉goiya꞉, “Naeno nana꞉la꞉! Na ba꞉ Pa꞉lisi kapiyuimidawala ba꞉gala naeno nabi atumu Pa꞉lisi kapiyuimipila! Numa꞉la꞉, na hibima꞉ na꞉midinamo Godote ha꞉laha tawakalubi ka꞉ka꞉mo kowadiya꞉paa꞉latelema꞉ne, ba꞉bema꞉ la꞉ komopa꞉te naeno komo huiyatiya kubamo anagiya꞉midanamitamata!”
ACT 23:7 Ebete ba꞉moe tabo dolamagiya꞉, ba꞉ba tetelo Ka꞉nisolo dubu ipuwalo anagiya꞉mida komote uluhukuti, ba꞉bene Pa꞉lisi kapiyuimipi ba꞉gala Sa꞉diyusi kapiyuimipi iba꞉te ba꞉bo olowabeletihuitiya꞉.
ACT 23:8 Ibino olowabeletihui komoeno mabu ba꞉ma ka꞉nala, Sa꞉diyusi kapiyuimipa꞉te na꞉ga꞉lanaka Godote ha꞉laha tawakalubi ka꞉ka꞉mo a꞉kawadiya꞉paa꞉latela꞉mene, huiyatiya Pa꞉lisi kapiyuimipa꞉te hibima꞉ na꞉midina Godote ba꞉be komo hibilo kododima꞉ne. Ba꞉gala Sa꞉diyusi kapiyuimipa꞉te na꞉ga꞉lanaka Godokono Hunu Haboeno nopopi puliyala ba꞉gala tawakalubino gobogobo puliyala, huiyatiya Pa꞉lisi kapiyuimipa꞉te na꞉ga꞉lanaka Godote ebeno Hunu Haboeno nopopi ododiliti ba꞉gala tawakalubino ape gobogobago aka-ododiliya꞉.
ACT 23:9 Ba꞉bema꞉ Yunapi Ka꞉nisolo dubuino olowabeletihui ipuwalo tabo itatihuilo helo tabonomote uluhukutiya꞉, ba꞉bene komo Pa꞉lisi kapiyuimipino Godokono Tutumu Tabo iya꞉tulamepa꞉te pakaminate helonomamo na꞉ga꞉luya꞉, “A ba꞉moe dubugodolo eta kuba kumitaha꞉! Diyala, eta hido gobogobo o Hunu Haboeno eta nopodawate ebetamo Godokono nopo kuda꞉ a꞉hawakalimiya꞉!”
ACT 23:10 Ba꞉bene Ka꞉nisolo ipuwalo olowabeletihui komote da꞉kuya꞉ alaholo tatalila. Ba꞉ba tetelo alaholohopino watodawate na꞉toletolitiya꞉ komopa꞉te Poloko kubamo anagalimiholo anakapumidimina꞉, ba꞉bema꞉ Polokono ka꞉ka꞉ komula꞉mema꞉ ebete ebeno alaholohopi na꞉kiyalamiya꞉, iba꞉te Ka꞉nisoloeno kapiyuimi ipuwamo nepalagate Poloko nelawete Loma gabomanino konomo genamamo gala kakamagatama꞉.
ACT 23:11 Ba꞉bene ba꞉be dulu Kodawa Ya꞉suti Poloko tamelo putinate ebe na꞉pegoemeniya꞉, “Ama꞉ na꞉kodakoda! Mabu ama꞉ na mabuma꞉ ba꞉moe Yelusalemalo tabo hidamo dolamaga꞉ka, ama꞉ Loma ko habamo tote ba꞉be atu tabo na꞉kanolamagiya꞉.”
ACT 23:12 Ba꞉bene eta duiduiyalo komo Yu dubate pekapiyuimiti nopo ba petamote Godokono mahilamo helo tabo ba꞉ma ka꞉na pega꞉luya꞉, iba꞉te baa꞉ nahaheno ba꞉gala beya nihoheno talonalo pola꞉nate Poloko anakapumi teta꞉mo ba꞉bo kikulima꞉.
ACT 23:13 Ba꞉ba tetelo ba꞉moe nopo da꞉tamotiya꞉ ba꞉bi dubate ibino kuititi da꞉lawiya꞉ 40 a꞉gogoluya꞉.
ACT 23:14 Ba꞉bene ba꞉bi dubate Godotamo hawa꞉goeno ikamehopino hununomo watowatopi ba꞉gala komo Yunapino koko dubatamo tolamete na꞉nega꞉luya꞉, “Aeno ukui kapiyuimiti ale Godokono mahilamo tabo ba꞉ma ka꞉na hibilo ga꞉lama꞉, ale baa꞉ nahaheno talonalo pola꞉nate Poloko anakapumi teta꞉mo ba꞉bo kikulima꞉.
ACT 23:15 Ba꞉bema꞉ wadiyala la꞉ aeno komo Ka꞉nisolo dubago Loma gabomanino alaholohopino watodawatamo tabo na꞉noemiya꞉la꞉, ebete Poloko genamane puluhukutiti la꞉tamo komagahema꞉. La꞉le ha꞉da amihome gabodo ebe na꞉nega꞉lamiya꞉la꞉ ba꞉ma ka꞉na, la꞉ ubila Polokono komo hidamo kanagiya꞉midamema꞉ ba꞉gala ebeno tabo komokomo gala kakulihoma꞉. Huiyatiya ebete Poloko da꞉magahemene, la꞉tamo puluhukuhino a ya꞉lo kohidoma꞉nema꞉ ebe gabo tetelo kanakapumima꞉.”
ACT 23:16 Huiyatiya ba꞉ba tetelo Polokono bohelete dalahimiya꞉, ba꞉be kuhiti Yu dubate nopo da꞉tamotitiya꞉ ba꞉be tabo uliti, diya gabodo Lomanapi alaholohopino konomo genamamo tote Poloko ba꞉bo nikiyamiya꞉.
ACT 23:17 Ba꞉bene Polote alaholohopino eta gawadubu ebetamo ka꞉miti ebe na꞉goemiya꞉, “Ba꞉moe uli ape dubu la꞉eno Watodawatamo na꞉magata, mabu ebegodolo eta komo bitana Watodawa kokiyamema꞉.”
ACT 23:18 Ba꞉bene alaholohopino gawadubuti ba꞉be kuhi ebeno watodawatamo magatate na꞉negoemiya꞉, “Aeno du genamalo da꞉luta ba꞉be dubu Polote na a꞉kiyaname ba꞉moe uli ape dubu ama꞉tamo komagahema꞉, mabu ebegodolo eta komo bitana ama꞉ kokiyamema꞉.”
ACT 23:19 Ba꞉ba tetelo alaholohopino watodawate ba꞉be kuhi kokotamo lawete nanekela꞉mo hiya꞉ baha꞉mo ebe magatate diya ba꞉bo nalatediya꞉, “Ama꞉godolo bada komote kitana na kiyanamema꞉?”
ACT 23:20 Ebete na꞉huiyuya꞉, “Komo Yu dubate ukui a꞉kapiyuimiya꞉ ama꞉ ba꞉ma ka꞉na kopikiyamema꞉, ama꞉ dumutu Poloko ba꞉moe genamane uluhukutiti ibino Ka꞉nisolo dubatamo komagatama꞉. Ba꞉ba tetelo iba꞉te ha꞉da amiho gabodo ama꞉ ba꞉ma ka꞉na kopikiyamema꞉na꞉ta, ibi ubila Polokono komo hidamo anagiya꞉midamete ebeno tabo komokomo gala kakulihoma꞉. Huiyatiya ba꞉be tabo hibiha꞉.
ACT 23:21 Ama꞉ ibino tabamo akapapamiwatala꞉, mabu 40 dubu keba ka꞉nala꞉ka꞉ ba꞉bako dubate Polokono to gabolo tanama miya꞉teholemete ba꞉bo ba꞉pola꞉na, ebe belatimita. Iba꞉te ukui kapiyuimiti Godokono mahilamo helo tabo ba꞉ma ka꞉na ga꞉laka, iba꞉te baa꞉ nahaheno ba꞉gala beya nihoheno talonalo pola꞉nate Poloko anakapumi teta꞉mo kikulima꞉. Hibila, iba꞉te ya꞉lo hidote ama꞉ belatimitata, ama꞉le amia꞉no alaholohopi kokiyalamema꞉ iba꞉te Poloko ba꞉bamo komagatama꞉.”
ACT 23:22 Ba꞉bene alaholohopino watodawate ba꞉be kuhi ba noeme na꞉kiyamiya꞉, “Ama꞉le na da꞉pikiyanama꞉, ba꞉be komo komopa꞉tamo akanehawakalima꞉la꞉.”
ACT 23:23 Ba꞉ba tetelo alaholohopino watodawate ebeno hopopi gawadubu netewa ebetamo ka꞉lamiti ibi na꞉kiyalamiya꞉, “La꞉eno 200 kiyokiyo gila꞉mo alaholohopi dubu, ba꞉gala komo 70 oso-boga꞉go da꞉wapata꞉lamena ba꞉bi alaholohopi dubu, ba꞉gala komo 200 kibila꞉mo alaholohopi dubu, la꞉le ibi hiliyonomo uwatete na꞉hiduya꞉la꞉ ka꞉lo dulu 9 koloko tetelo Sisaliya ko habamo kotolamema꞉.
ACT 23:24 Ba꞉gala komo oso-boge Poloko mabuma꞉ modobolo nuwata꞉la꞉, ebete ibi hunamo emedete kotoma꞉. Na ubila la꞉le ebe aeno Loma gabomanino kapela Ko Gawadubu Pilikisitamo olalatihino hidamo na꞉magatuya꞉la꞉.”
ACT 23:25 Ba꞉bene ba꞉ba tetelo alaholohopino watodawate leta ododiti tabo ba꞉ma ka꞉na miya꞉tiya꞉,
ACT 23:26 Naeno Hidonomo Ko Gawadubu Pilikisi, ama꞉ nolata. Na Kolodiyasi Lisiyasiti ba꞉moe leta ama꞉tamo poememo.
ACT 23:27 Pote ama꞉tamo ba꞉moe letago da꞉puluhukumini, ba꞉moe dubuino komo ba꞉ma ka꞉nala. Eta hegelalo Yunapa꞉te ebe heloamo lawete anakapumima꞉ dewageliti, nale komo alaholohopi uwatete ibino helo ipuwane ebe ba꞉bo uluhukutimo, mabu nale ba꞉moe komo iya꞉tawuimo ebete Loma gabomanino pepago da꞉pata꞉na.
ACT 23:28 Ba꞉bene ebete Yunapa꞉tamo kebe kuba kododi, nale ba꞉be komo hidamo kiya꞉tawama꞉ ubi ba ihate ebe ibino Ka꞉nisolo dubuino holoholo hapuamo ba꞉bema꞉ magatuimo.
ACT 23:29 Ba꞉bolo nale iya꞉tawuimo, iba꞉te ibino iniwalino tutumuino komokomoma꞉ ebetamo da꞉maubahaliti, huiyatiya ebete eta ko kuba kododiha꞉ nale ebe hoea꞉mo o du genamamo ebema꞉ oemela.
ACT 23:30 Ba꞉moe komo gala hapuni etate diya gabodo pete na a꞉pikiyanami, komo Yu dubate ebe kanakapumima꞉ eta gabo bihiduimiya꞉. Ba꞉bema꞉ nale ba꞉be komo uliti ebe ama꞉tamo tiyonomolo poememo, ba꞉gala nale ebetamo da꞉maubahaliti ba꞉bi dubu a꞉kiyalamimo iba꞉te amia꞉no holoholo hapulu ebeno komo kopanagiya꞉midamema꞉. Kalakala konomola, ba꞉moe ba꞉ naeno tabo kuititila.
ACT 23:31 Ba꞉bema꞉ alaholohopino gawadubu netewapa꞉te ibino watodawoeno tabamo papamila꞉te, ebeno leta lawete ba꞉be dulu iba꞉te ibino alaholohopa꞉go Poloko A꞉ntipatisi habamo dito magataniya꞉.
ACT 23:32 Ba꞉bene eta hegelalo natamo da꞉tolamitiya꞉ ba꞉bi alaholohopi dubu hiliyonomate Yelusalema ko haboeno gabomani genamamo gala kawilalete dito kapelamiya꞉, huiyatiya oso-boga꞉go da꞉tolamitiya꞉ ba꞉bi alaholohopi dubate Poloko ha꞉kiya magatuya꞉ Sisaliya ko habamo. Ba꞉bolo iba꞉te kapela Ko Gawadubutamo nikuliti ibino watodawoeno leta ba nikame Poloko ebeno umi ipuwamo ba꞉bo nihatiya꞉.
ACT 23:34 Ba꞉ba tetelo kapela Ko Gawadubuti ba꞉be leta ka꞉lamiholete Poloko ba꞉bo alatediya꞉ ebe kebe hoponapila꞉ka꞉. Ba꞉bene Polote ebe Silisiya hoponapima꞉ eda꞉ma꞉ da꞉goiya꞉, Ko Gawadubuti ba꞉be tabo duliya꞉
ACT 23:35 ebetamo gala na꞉kagoiya꞉, “Ama꞉le kuba ododima꞉ da꞉ga꞉luti ba꞉bi dubate mamo da꞉pikulimina꞉, ba꞉ba tetelo nale amia꞉no komo kanagiya꞉midamema꞉nemata.” Ba꞉bema꞉ ebete ebeno komo alaholohopi na꞉kiyalamiya꞉, Ko Gawadubu Heloditi dopamo detiya꞉ iba꞉te Poloko ba꞉be hidonomo genamamo magatate ba꞉bolo konuminatema꞉.
ACT 24:1 Ba꞉bene paibo hegela da꞉wibuya꞉ ba꞉ba tetelo Godotamo hawa꞉goeno ikamehopino Hununomo Watodawa A꞉nanayasiti komo Yu watowatopa꞉go Sisaliya ko habamo ba꞉bo pelamiya꞉. Ba꞉ba tetelo iba꞉te eta Loma gabomanino tutumu iya꞉tawadawa, ebeno mahilo Tetalasitila, ba꞉be dubu magahete iba꞉te kapela Ko Gawadubu Pilikisikono holoholo hapuamo kapimilo pikuliya꞉ Polokono ododili komoma꞉ ebe kopega꞉lamema꞉.
ACT 24:2 Ba꞉bene Ko Gawadubu Pilikisiti Polote pema꞉ tabo noemete, ebete da꞉puluhukuya꞉ Tetalasiti Yunapino ubiha꞉ komo Poloko mabuma꞉ Pilikisitamo ba꞉ma ka꞉na hawakalimiya꞉, “Aeno Hidonomo Watodawa, ama꞉ nolata! Amia꞉no ko gawadubu ipuwalo a tete ga꞉ga꞉nomolo heta꞉go emedenamima꞉, ba꞉gala aeno hopolo hiya꞉hiya꞉ kubate ikuliho tetelo amia꞉no mulu ukuilo ba꞉bi komokomo a꞉hiduilamenakata.
ACT 24:3 Ba꞉bema꞉ hibila, hiliyonomo tetelo ale aeno habahaba hiliyonomolo ama꞉godone hidohido owalubi komo ba uwate ama꞉tamo koamo kalakalahanakoma꞉.
ACT 24:4 Nolata, na tabo a꞉kaga꞉gima꞉mo mabu na ubihinola amia꞉no tete kubahimi, ba꞉bema꞉ nale ama꞉ betoemehomata ama꞉ kalakalago aeno tabo deha꞉poto nulia꞉.
ACT 24:5 “Ba꞉moe dubuino komo ale ya꞉lo umiya꞉ma꞉, ebe ba꞉ hiya꞉hiya꞉ kuba tupuilamedawala, mabu eta Nasalete dubuino kapiyuimi ipuwalo ebe ba꞉ watodawa etala. Ebete ba꞉moe hopo konomolo da꞉pata꞉na, ebeno kuba ododili ipuwalo aeno komo Yunapa꞉te hiya꞉hiya꞉ hopolo demedehona ebetamo ba maubahale alaholoho komate ba꞉bo ikulinaka.
ACT 24:6 Ba꞉gala eta komo, ebete aeno Godoko Adikumino Genama kubahimima꞉ dewageliti, ale ebe ba꞉bo lawima꞉. Ba꞉ba tetelo a ubila aeno tutumu komodo ebeno komo kanagiya꞉midamema꞉,
ACT 24:7 huiyatiya alaholohopino watodawa Lisiyasiti pete agodone ebe heloamo pelawi,
ACT 24:8 ba꞉bema꞉ a ipuwalo puya꞉te ba꞉moe Polokono ododili komoma꞉ kubama꞉ da꞉ga꞉lanama꞉, Lisiyasiti a a꞉kiyaa꞉mi ale amia꞉no holoholo hapuamo kopelamema꞉. Ba꞉bema꞉ wadiyala ama꞉ ha꞉kiya ebeno ododili komokomoma꞉ ebe nalateda꞉, ba꞉bene ba꞉moi hiliyonomo komo ale da꞉ga꞉lama꞉, ba꞉be taboeno hibi komo ama꞉ ebegodone kiya꞉tawama꞉na꞉ta.”
ACT 24:9 Ba꞉ba tetelo komo Yunapa꞉te Tetalasikono tabo moga꞉melo na꞉ga꞉luya꞉ ba꞉moi komokomo ba꞉ hibila.
ACT 24:10 Ba꞉bene ba꞉ba tetelo kapela Ko Gawadubu Pilikisiti Poloko kokotamo kiyamiya꞉ ebete ebeno tabo olamagi kotupuimima꞉. Ba꞉bene Polote na꞉goiya꞉, “Kodawa, ama꞉ nolata! Na iya꞉tawala ama꞉ komo hiliyonomo gogolo aeno hoponapino komokomo anagilamelelamenakuya꞉ta, ba꞉bema꞉ nagodolo kalakala bitana naeno kuba ododiha꞉ komo ama꞉tamo hawakalimima꞉.
ACT 24:11 Ama꞉ hibi komo ba꞉ma ka꞉na kiya꞉tawama꞉na꞉ta, nale Yelusalemamo Godoko adikumima꞉ da꞉tuimo, ba꞉ba tetene tupuimiti ba꞉mamo puluhuku 12 hegelanomote a꞉peniwibui.
ACT 24:12 Ba꞉bema꞉ puya꞉te na kuba ododidawama꞉ da꞉ga꞉lita iba꞉te na Godoko Adikumino Genamalo eta lumaga꞉go heloamo tabo ga꞉litalo kunameha꞉, ba꞉gala aeno hiya꞉hiya꞉ baidi ibubulamehole genamalo ba꞉gala Yelusalema ko habalo na heta꞉go ba pata꞉ tawakaluba꞉tamo alaholoho ukui kikalameha꞉.
ACT 24:13 Ba꞉bema꞉ nale kubakuba komo nododilinamo iba꞉te da꞉ga꞉lita, ba꞉be taboeno hibi komo kitanaha꞉, iyo, iba꞉te naeno eta kuba hawakalimi modoboha꞉.
ACT 24:14 “Numa꞉, komo Yunapa꞉te na꞉ga꞉lanaka Ya꞉sukunu Gabo hibi gaboha꞉. Huiyatiya nale ama꞉ eta hibi komo kokiyamema꞉nemata, na Ya꞉suku ta꞉mata gabodo ba tona, a Yunapino iniwala꞉te dadikuminakui nale ba꞉be hibi Godo badikuminakomo. Komo Yunapi keba ka꞉nala꞉ka꞉ na atumu ba꞉ ba꞉ba ka꞉nala, Mosesete Godokono Tutumu Tabo da꞉miya꞉tiya꞉ ba꞉gala Godokono Ukui Hawakalimipa꞉te da꞉miya꞉tiya꞉, ba꞉bi Buka tabo hiliyonomo ale ba꞉ kapimilo hibima꞉ na꞉midilinama꞉.
ACT 24:15 Ba꞉bema꞉ Godokono hido owalubi komote atamo kuluhukuma꞉ nale naeno Yunapi mabuluba꞉go na꞉latiminama꞉, iyo, a ba꞉moe komo hibima꞉ na꞉midinama꞉, Godote kuba ododilipi ba꞉gala hido komo ododilipi ibi hiliyonomatamo huiya kikalamema꞉ ha꞉laha ipuwane ka꞉ka꞉mo kowadiya꞉paa꞉latelema꞉ne.
ACT 24:16 Numa꞉, ba꞉moe mabuma꞉ na ubi konomola, Godoko ba꞉gala tawakalubi ibino holoholo hapulu nale naeno tepo ipuwoeno mulu ukuido tuputupulu kemedenama꞉.
ACT 24:17 “Ba꞉bema꞉ naeno komo ba꞉ma ka꞉nala, nale Yelusalema hopone uluhukuti komo gogolo hiya꞉hiya꞉ muhulu hopolo nemedenamimo, ba꞉bene nale naeno hoponomamo gala na꞉kapimo nale komo awaepa꞉tamo mani malemalelo kopikalameholema꞉ ba꞉gala Godotamo hawa꞉goeno ilina kopikamehoma꞉.
ACT 24:18 Nale Godoko Adikumino Genamalo ba꞉ma ka꞉na ba ododita, komo dubate ba꞉bo unamiya꞉. Ba꞉ hibila, na ba꞉be talona genamamo podoloheno, dopamo Godotamo hawa꞉goeno ilina ikamehote naeno tepo ipuwoeno dalowa꞉ ba꞉bo ukulalimo, ba꞉gala nale alaholo komo kotupuimima꞉ eta lumagitamo kuba ukui kikameha꞉. Huiyatiya na ha꞉kiya heta꞉go ba luta, ba꞉ba tetelo iba꞉te na unamete heloamo ba꞉bo pelaweniya꞉.
ACT 24:19 Ba꞉ba tetelo ibi ipuwalo komo Yunapi dubu A꞉isiya hopolo demedena iba꞉te a꞉pola꞉nuya꞉, huiyatiya ka꞉lo ba꞉bi dubate amia꞉no holoholo hapuamo kapelameha꞉. Ba꞉bema꞉ numa꞉, nale iba꞉tamo kuba hibilo nododilitale, wadiyala iba꞉te ha꞉kiya ba꞉be komo ama꞉tamo ba꞉pehawakalimina꞉,
ACT 24:20 huiyatiya ba꞉moi komo Yu dubate ka꞉lo da꞉pikula꞉, iba꞉te ibino Ka꞉nisolo ipuwalo naeno komo ya꞉lo anagiya꞉midanamiya꞉. Ba꞉ba tetelo iba꞉te naeno kuba ododi komo numitale, wadiyala iba꞉te ama꞉ hibilo ba꞉kiyametana꞉,
ACT 24:21 huiyatiya numa꞉, iba꞉te naeno kuba nipo ohowadiya꞉. Ba꞉ hibila, nale iba꞉tamo ba꞉moe kapiya tabo bolamagimo, ‘Na hibima꞉ na꞉midinamo, Godote ha꞉laha tawakalubi ka꞉ka꞉mo kowadiya꞉paa꞉latelema꞉ne, ba꞉bema꞉ komo iba꞉te naeno komo kubamo anagiya꞉midanamita.’ Diyala, iba꞉te ba꞉moe tabo uliti na ubiha꞉ma꞉ kuda꞉ eda꞉huya꞉.”
ACT 24:22 Mabu Pilikisiti Ya꞉suku Hibima꞉ Midi Gaboeno komo hidonomamo ya꞉lo iya꞉tawuya꞉, ba꞉bema꞉ ebete Poloko ba꞉gala komo Yunapino tabo ga꞉la ba duhilame na꞉kiyalamiya꞉, “A ba꞉moe komo ba꞉mamo miya꞉pate, alaholohopino watodawa Lisiyasiti da꞉pemene ba꞉ba tetelo nale ba꞉moe komo eba꞉go gala kakumima꞉nemo.”
ACT 24:23 Ba꞉bene Pilikisiti Poloko duminami ba꞉be alaholo dubu na꞉kiyamiya꞉ ebete Poloko hidamo kuminatema꞉. Ba꞉gala ebete ebe gala na꞉kakiyamiya꞉, “Polote gabomanino genama gulu pata꞉ma꞉ ama꞉ talona akihata꞉la꞉, ba꞉gala ebeno mabuluba꞉te ebeno modoboha꞉ komokomo ipuwalo ebe owalubima꞉ da꞉pelamenakomena꞉ ama꞉ ibi akaduhilamenakala꞉.”
ACT 24:24 Komo hegela da꞉wibohuya꞉ Pilikisiti ebeno kamena Dulusilakoba꞉ gala na꞉kapiya꞉, ba꞉moe kamena ebe ba꞉ Yu lumagila. Ba꞉bene ebete Polote pema꞉ tabo doemiya꞉, Polote Ya꞉su Kelisoko hibima꞉ midi komo ebetamo da꞉polamagiya꞉ Pilikisiti ba꞉bo uliya꞉.
ACT 24:25 Ba꞉ba tetelo Polote tabo ga꞉ga꞉dopo dolamagiya꞉, ebete Godokono tuputupu emede komo ba꞉gala kateneno ubi komamo papamila꞉haleha꞉ komo Pilikisitamo ba꞉bo hawakalilamiya꞉. Ba꞉bene Godote tawakalubino komokomo danagilamelelamemene ba꞉be Ko Hegeloeno pe komo Polote dolamagitiya꞉, Pilikisiti tole lawete ebe na꞉kiyamiya꞉, “Ba꞉ba꞉la! Ama꞉ na꞉toa! Na hido tete dumimo ama꞉ pema꞉ tabo gala kakapoemema꞉nemo.”
ACT 24:26 Ba꞉ba tetelo Pilikisiti ubi bihatenami Pologodone koko mani uwatete du genamane ebe dito kuluhukutima꞉, ba꞉bema꞉ ebete komo hiliyonomo tetelo tabo boemenakui Polote eba꞉go tabo kopega꞉lama꞉.
ACT 24:27 Huiyatiya netewa gogo da꞉petohuya꞉ ba꞉ba tetelo Loma gabomana꞉te Posiyase Pesitasiko bepoemiya꞉, ebete Pilikisikono kapela Ko Gawadubu haba kopelawema꞉. Ba꞉ba tetelo Pilikisiti Yu tawakalubi kokalakaluilamema꞉ ubi ba ihate, Poloko du genama gulu miya꞉pate eta hopamo ba꞉ dito tuya꞉.
ACT 25:1 Pesitasiti ba꞉be hopoeno kapela Ko Gawadubu haba da꞉pelawiya꞉, ba꞉ba tetelo netewa-kapiya hegela wibote ebete Sisaliya ko habane Yelusalemamo ba꞉bo tuya꞉.
ACT 25:2 Ba꞉bene ba꞉bolo Godotamo hawa꞉goeno ikamehopino watowatopi ba꞉gala komo Yunapino koko dubu iba꞉te Pesitasitamo tolamete Poloko mabuma꞉ ibino ubiha꞉ komokomo ba꞉bo nehawakalilamiya꞉.
ACT 25:3 Ba꞉bene iba꞉te ebe koamo ba toemeho na꞉ga꞉lamiya꞉, “Ale Polokono komo hidamo kanagiya꞉midamema꞉, wadiyala ama꞉ ebe ba꞉moe Yelusalemamo na꞉magahiya꞉.” Iba꞉te ba꞉ma ka꞉na da꞉ga꞉luya꞉ mabu iba꞉te nopo ya꞉lo a꞉tamotiya꞉ Poloko gabo tetelo kanakapumima꞉.
ACT 25:4 Pesitasiti ibino tabo ba huiya na꞉goiya꞉, “Ao, Polote Sisaliyalo du genamalo bemedena, ba꞉gala tatalila nale ba꞉bamo gala kakatoma꞉nemo.
ACT 25:5 Ba꞉bema꞉ la꞉eno watowatopi komo nago da꞉tolamemena꞉, ibino ukui komate ba꞉be dubuino ododili komoma꞉ keba ka꞉na ka꞉pola꞉na, iba꞉te ba꞉bi komo gabomanino tabo anagiya꞉mida habalo na꞉nehawakalilama꞉mena꞉.”
ACT 25:6 Ba꞉ba tetelo Pesitasiti komo a꞉iti o naini o ta꞉ni hegela Yelusalemalo emedete Sisaliya ko habamo gala dito katuya꞉. Ba꞉bene eta hegelalo ebete tabo anagiya꞉mida habalo emedete alaholohopi ba꞉bo kiyalamiya꞉ iba꞉te Poloko ebeno holoholo hapuamo komagahema꞉.
ACT 25:7 Polote tabo anagiya꞉mida habamo da꞉puluhukuya꞉, ba꞉ba tetelo puya꞉te Yelusalemane da꞉pelamiya꞉ ba꞉bi Yu dubate Polokono ginimi hapuni ba꞉gala tametamene ba pegagahidi, ibi ipuwalo etate mahiganakui, etate mahiganakui, ebe koko kuba ododilidawama꞉ ba꞉bo ga꞉lanakuya꞉. Huiyatiya iba꞉te kebe komokomo da꞉ga꞉lanakui ba꞉bi taboeno hibi komo hawakalimima꞉ kamodobuya꞉ha꞉.
ACT 25:8 Ba꞉bene Polote ebeno kuba ododiha꞉ komo ba꞉ma ka꞉na hawakalimiya꞉, “Naeno Yu tawakalubino tutumu, ba꞉gala Godoko Adikumino Genamoeno kukala, ba꞉gala Konomo Gawadubu Sisakono tutumu, nale ba꞉moi komo hiliyonomo ipuwalo eta kapiya kadikanaleha꞉.”
ACT 25:9 Ba꞉ba tetelo Pesitasiti ubila Yu dubu kokalakaluilamema꞉ ba꞉bema꞉ ebete Poloko na꞉goemiya꞉, “Ama꞉ ubila꞉ka꞉ Yelusalemamo tote, nale amia꞉no komo ba꞉bolo hidamo konanagiya꞉midamema꞉?”
ACT 25:10 Polote tabo ba huiya na꞉goiya꞉, “Ao, na ubihinola. Ka꞉lo na ba꞉moe Sisaliya habalo Konomo Gawadubu Sisakono eta hidonomo tabo anagiya꞉mida habalo la꞉namo. Ba꞉gala ka꞉lo ama꞉godolo Sisakono helo bitana, ama꞉le ha꞉kiya naeno komo anagiya꞉midanamete na du genamane dito kuluhukunatenema꞉, iyo, ama꞉ hibi komo iya꞉tawanomola, nale Yunapa꞉tamo eta kapiya kuba kododiha꞉.
ACT 25:11 Numa꞉, nale Loma gabomanino ko tutumu nadikanaletale nale hoe huiya lawema꞉ ba꞉kalakalana꞉, ba꞉bene naeno ka꞉ka꞉ mula꞉ma꞉ ba꞉ka꞉goena꞉. Ba꞉gala ba꞉moi Yu dubate naeno komoma꞉ da꞉ga꞉lita ba꞉bi tabo hibiha꞉, ba꞉bema꞉ la꞉ gabomana꞉godolo helo kitanaha꞉ na ibino kokotamo gala ihatenema꞉, huiyatiya na ubi bihatemo Loma ko habamo tote Sisakono holoholo hapulu naeno kuba ododiha꞉ komo ba꞉bo konehawakalimima꞉nemo!”
ACT 25:12 Ba꞉bema꞉ Pesitasiti ebeno hopopa꞉go Polokono ubi komoma꞉ ga꞉late, ba꞉bene ebete Poloko ba꞉ma ka꞉na goemiya꞉, “Ama꞉ na꞉gaa꞉ta Sisatamo kotoma꞉, ba꞉bema꞉ hibila, nale ama꞉ ebetamo konoemema꞉nemata.”
ACT 25:13 Ba꞉bene komo hegela da꞉petohuya꞉ Ko Gawadubu Agilipako ba꞉gala ebeno naniko Benisiko iba꞉te Sisaliya ko habamo pete ibino kalakala tabo Pesitasitamo pega꞉late komo hegela eba꞉go ba꞉bo pemeda꞉tepuya꞉.
ACT 25:14 Ba꞉bene iba꞉te tete ga꞉ga꞉dopo emedete, eta hegelalo Pesitasiti Polokono komoma꞉ Agilipako ba꞉ma ka꞉na kiyamiya꞉, “Pilikisiti du genamalo da꞉miya꞉pui eta dubu ba꞉malo bemedena.
ACT 25:15 Nale Yelusalemamo da꞉tuimo, ba꞉ba tetelo Yunapino Godotamo hawa꞉goeno ikamehopino watowatopi ba꞉gala komo ibino kokopi, iba꞉te ba꞉be dubuino koko kuba ododili mabuma꞉ na a꞉kiyanamiya꞉ nale ebe hoea꞉mo koemema꞉.
ACT 25:16 Ba꞉bema꞉ nale ibino tabo ba huiya na꞉goimo, ‘Ao, a Loma gabomanino komo ba꞉ma ka꞉nala. Keba tetelo komopa꞉te eta lumagi ko kuba ododidawama꞉ da꞉ga꞉lamena꞉, ale ebe dito a꞉kanakapuma꞉ma꞉ huiyatiya ale ebetamo tete kikamema꞉nema꞉ ibino holoholo hapulu ebeno komo hidamo kohawakalimima꞉. Ba꞉be gabodo a gabomana꞉te hibi komo umiti ba꞉be lumagino komo hidamo kanagiya꞉midamema꞉nema꞉.’
ACT 25:17 “Ba꞉bema꞉ Yunapa꞉te ba꞉be dubu Polokono komo anagiya꞉midamema꞉ ba꞉mamo da꞉pelami, nale ibino tete kakubahimiha꞉, iyo, eta hegelalo nale tabo anagiya꞉mida habalo emedete alaholohopi ba꞉bo kiyalamimo iba꞉te ebe naeno holoholo hapuamo komagahema꞉.
ACT 25:18 Ba꞉ba tetelo nale nemalagidoluimo Yunapa꞉te ebeno eta ko kuba kohawakalimima꞉na꞉, huiyatiya iba꞉te mahila꞉halete
ACT 25:19 ibino Godoko adikumino kukala komokomoma꞉ ebe koamo kiyahamiya꞉. Ba꞉gala eta dubu ebeno mahilo Ya꞉sutila, iba꞉te ebeno komoma꞉ na꞉ga꞉luya꞉, ‘Ebe ya꞉lo a꞉hoiya꞉,’ huiyatiya Polote na꞉goi, ‘Ao, ebete ba꞉ka꞉ka꞉na.’
ACT 25:20 Ba꞉be mabuma꞉ na gabo kumiha꞉ ba꞉bi komoeno hibi komo keba ka꞉na na꞉kiya꞉tawamo, ba꞉bene nale Poloko na꞉goemimo, ‘Ama꞉ ubila꞉ka꞉ Yelusalemamo tote, nale amia꞉no komo ba꞉bolo hidamo gala kakananagiya꞉midamema꞉?’
ACT 25:21 Huiyatiya ba꞉ba tetelo Polote na na꞉goenami ba꞉moe Sisaliya haboeno du genamalo kemedema꞉, mabu ebe ubila Loma ko habamo tote aeno Konomo Gawadubu Sisate ha꞉kiya ebeno komo ba꞉bo kanagiya꞉midamema꞉. Ba꞉bema꞉ nale ebetamo papamiwatalo na꞉goimo, hido gabo dumimo ebe Sisatamo ba꞉bo konoemema꞉nemo, ba꞉gala nale alaholohopi dubu na꞉goelamimo iba꞉te du genamalo ebeno modoboha꞉ komokomo ipuwalo ebe hidamo kuminatema꞉.”
ACT 25:22 Ba꞉ba tetelo Ko Gawadubu Agilipate Pesitasikono tabo komokomo ulihote ebetamo na꞉goiya꞉, “Wadiyala꞉ka꞉ na atumu ba꞉moe dubuino tabo naeno hibila galamo kulihoma꞉?” Ba꞉bene Pesitasiti na꞉goiya꞉, “Kubaha꞉. Ama꞉ dumutu ebeno tabone kulihoma꞉na꞉ta.”
ACT 25:23 Ba꞉bene eta hegelalo Ko Gawadubu Agilipako ba꞉gala ebeno naniko Benisiko iba꞉te ibino hidohido tita꞉gopi kaliko pupuliti, ibino hopopa꞉te ibi ba awagaminale, komo alaholohopino watowatopi ba꞉gala Sisaliya haboeno koko dubate ibi ba ta꞉mahele iba꞉te gabomani genamoeno tabo ga꞉la baha꞉mo ko kalakala diyamago ba꞉bo piya꞉. Ba꞉bene ibi hiliyonomate da꞉nihiduya꞉, ba꞉ba tetelo Pesitasiti komo alaholohopi na꞉goelamiya꞉ iba꞉te Poloko komagahema꞉.
ACT 25:24 Ba꞉ba tetelo Pesitasiti na꞉goiya꞉, “Ko Gawadubu Agilipa ba꞉gala la꞉ hiliyonomo ago da꞉pola꞉nama, la꞉ nonolata. Ba꞉moe dubuino komo numa꞉la꞉. Ba꞉moe Sisaliya habalo demedehona ba꞉gala Yelusalemalo demedehona, ba꞉bi Yu tawakalubi hiliyonomate ebeno komoma꞉ ibino ubiha꞉ komokomo natamo ba wadahe iba꞉te ga꞉ga꞉lo na a꞉kiyanamiya꞉ ebete na꞉haa꞉mene.
ACT 25:25 Huiyatiya nale ebeno komo danagiya꞉midamimo, ebeno eta kapiya kuba kumiha꞉ ebe hoea꞉mo koemema꞉. Ba꞉bema꞉ hibila, ebete Sisakono holoholo hapulu ebeno kuba ododiha꞉ komo konehawakalimima꞉ na da꞉goenami, nale tabo ba꞉bo ihatimo ebe Sisatamo konoemema꞉.
ACT 25:26 Huiyatiya nale leta ipuwalo ba꞉moe dubuino komoma꞉ aeno Kodawa Sisatamo kebe tabo na꞉ka꞉miya꞉temo? Naeno ukui hidamo kitanaha꞉, ba꞉bema꞉ wadiyala la꞉ ulihopi na nowalubiniya꞉la꞉. Ko Gawadubu Agilipa, nale ama꞉ mamo ba꞉bema꞉ ka꞉mimata, ama꞉le na ba owalubini ba꞉moe dubuino komo hidamo anagiya꞉midamete na Sisakono leta hidamo ba꞉bo kododima꞉nemo,
ACT 25:27 mabu modoboha꞉ nale du genamalo demedena ba꞉be lumagino komo leta ipuwalo hidamo hawakalimihino ebe Sisatamo dito oeme.”
ACT 26:1 Ba꞉ba tetelo Ko Gawadubu Agilipate Polotamo na꞉goiya꞉, “Wadiyala ama꞉ ha꞉kiya amia꞉no komo atamo na꞉hawakalima꞉.” Ba꞉bene Polote ebeno kokoto adipatelo ebeno kuba ododiha꞉ komo hawakalimima꞉ ba꞉ma ka꞉na tupuimiya꞉,
ACT 26:2 “Ko Gawadubu Agilipa, Yunapa꞉te nale hiliyonomo hiya꞉hiya꞉ kuba nododilinamo ga꞉lana, huiyatiya ka꞉lo kalakala kapiyate nagodolo bitana, mabu hido tete natamo ba꞉ a꞉pe nale amia꞉no holoholo hapulu naeno kuba ododiha꞉ komo kohawakalimima꞉.
ACT 26:3 Ba꞉moe komo ba꞉ hibila, a Yunapino iniwalino kukala ba꞉gala ibino ododili komokomo ba꞉gala a ipuwalo kebe komokomoma꞉ dolowabeletihuinakoma꞉, ama꞉ ba꞉bi komo iya꞉tawanomola. Ba꞉bema꞉ nolata, nale ama꞉ bikiyamemata, wadiyala ama꞉ naeno tabo kalakalago nuliha.
ACT 26:4 “Yu tawakalubi hiliyonomate naeno emede komo iya꞉tawahanomola, iyo, na deha꞉poto tetelo naeno hopolo demedenamimo ba꞉gala Yelusalemalo nale da꞉pemedenamimo,
ACT 26:5 ba꞉be tete ga꞉ga꞉nomolo iba꞉te naeno emede komo numinama꞉. Ba꞉bema꞉ iba꞉te ubi dihatemena꞉, wadiyala iba꞉te naeno komo ba꞉ma ka꞉na na꞉hawakalima꞉mena꞉ na hido Pa꞉lisi kapiyuimidawa etala. Ba꞉moe komo ba꞉ hibila, Yunapi ipuwalo a Pa꞉lisi kapiyuimipa꞉te ha꞉kiya iniwalino tutumu komokomo hiliyonomamo hidonomamo papamila꞉halenakoma꞉, huiyatiya komo Yunapa꞉te ba꞉ba ka꞉na kewagelenaha꞉.
ACT 26:6 Ba꞉gala eta komo. Ka꞉lo na amia꞉no tabo anagiya꞉mida ipuwalo la꞉namo, mabu Godote aeno iniwala꞉tamo hibinomolo da꞉goiya꞉, nale ba꞉be tabo hibima꞉ midilo ebeno owalubi komote atamo kuluhukuma꞉ na꞉latiminamo.
ACT 26:7 Ba꞉gala naeno Ko Gawadubu, ama꞉ numa꞉, aeno Yunapino 12 gu tawakalubi hiliyonomate ba꞉ atumu du ba꞉gala hegela hiliyonomolo Godoko ba adikumina ebeno tabo hibima꞉ midilo ebeno owalubi komo bekalatimina. Iyo, ba꞉moe komo ba꞉ hibila, ba꞉bi Yu tawakalubi ba꞉gala na, ale atu hido komo Godogodone lawema꞉ na꞉latiminama꞉, huiyatiya iba꞉te na ubiha꞉ma꞉ eda꞉hate naeno hibima꞉ midi mabuma꞉ nale koko kuba nododilinamo ga꞉lana.”
ACT 26:8 Ba꞉bene Polote gala na꞉kagoiya꞉, “La꞉ komo ulihopi, nonolata, mabu keka꞉ la꞉ la꞉eno ukuilo ba꞉ma ka꞉na demalagidolonama, Godote ha꞉laha tawakalubi ka꞉ka꞉mo a꞉kawadiya꞉paa꞉latela꞉mene?
ACT 26:9 Na dopamo atumu komo kubakuba ukui emalagidolenakuimo, ba꞉bema꞉ puya꞉te Nasaletenapi Ya꞉sukunu mahilo hunamo dadipatena ba꞉bi tawakaluba꞉tamo nale hiya꞉hiya꞉ alaholo komo bododilinakuimo,
ACT 26:10 iyo, nale Yelusalemalo ba emedena ba꞉ba ka꞉na ewagelenamimo. Ba꞉bema꞉ hibila, Godotamo hawa꞉goeno ikamehopino watowatopa꞉te natamo helo dikanamenakui, nale komo Ya꞉sukunu tuputupu tawakalubi hiliyonomo du genamamo ba꞉bo oelamenakuimo, ba꞉gala tabo anagiya꞉mida habalo ibino komoma꞉ da꞉ga꞉lanakuima꞉ nale ibi hoea꞉mo oelamema꞉ modoboma꞉ goenakuimo.
ACT 26:11 Ba꞉gala komo tetelo aeno Yu tawakalubino hiya꞉hiya꞉ baidi ibubulamehole genamalo nale Ya꞉suku ta꞉matapa꞉te kuba nododilinamo ba goena, ba꞉bema꞉ na komopa꞉go iba꞉tamo koko temeteme ba꞉bo ikalamenakuima꞉. Ba꞉ba ka꞉na ba ewagelena na ubila iba꞉te Ya꞉suku hibima꞉ midi ipuwane ohobila꞉halete ebeno komo ha꞉dama꞉ koga꞉lama꞉. Ba꞉bene naeno mauba iba꞉tamo koenomoma꞉ eda꞉lo komo hiya꞉hiya꞉ muhulu hopoeno koko habahabamo tonakuimo ibi ba꞉bo nekubahilamenakuimo.”
ACT 26:12 Ba꞉bene Polote ebeno tabo moga꞉melo gala na꞉kagoiya꞉, “Nale ba꞉ba ka꞉na ba ewagelena, eta tetelo Godotamo hawa꞉goeno ikamehopino watowatopa꞉te komo leta ba꞉gala ibino helo natamo dikanamiya꞉ nale Dama꞉sakase ko habamo ba꞉ dito tuya꞉mo.
ACT 26:13 Nale hegela tuli tetelo komo dubago ba꞉bamo ba tuta, gabo tetelo alote Godokono Hunu Habane pihitigate a ba꞉bo panagogobeya꞉midadiguiya꞉, ba꞉be alo helonomola, ebeno helote hegeloeno aloeno helo a꞉gogoluya꞉.
ACT 26:14 Ba꞉ba tetelo a hiliyonomate hakamo guditi nale eta dawoeno tabo madodo Yu tawakalubino tabamo ba꞉ma ka꞉na uliya꞉mo, ‘Solo, Solo! Keka꞉ mabu ama꞉le natamo koko temeteme dikanamena? Ama꞉le nago alaholodawama꞉ deda꞉na, ama꞉ ha꞉kiya ama꞉ bekubahiminata. Aba꞉ hibila꞉ka꞉, kau-goete ebeno namutudawa natamo alihamidama꞉ dewagelemene, namutudawate ebe huiyatiya kukamo gala dito kakanagalimima꞉ne!’
ACT 26:15 “Ba꞉bene nale na꞉goiya꞉mo, ‘Kodawa, ama꞉ potela꞉ka꞉?’ “Kodawate naeno tabo ba huiya na꞉goiya꞉, ‘Na ba꞉ Ya꞉suti, ama꞉le natamo temeteme dikanamena, na ba꞉be lumagila.
ACT 26:16 Wadiyala ama꞉ na꞉mahiga, mabu nale ama꞉tamo uluhukumu nale ama꞉ naeno okodawama꞉ komidima꞉. Ba꞉bema꞉ ka꞉lo ama꞉le nagodolo bada komo kulama꞉wa ba꞉gala nale galane ama꞉ diya꞉tumihoma, ba꞉bi hiliyonomo komokomo ama꞉le komo tawakaluba꞉tamo konehawakalilamema꞉na꞉ta.
ACT 26:17 Ba꞉bene ama꞉ naeno oko ba nowatina Yu tawakalubino helo ipuwalo nale amia꞉no ka꞉ka꞉ ba꞉mula꞉menakomata, ba꞉gala Yuha꞉pino helo ipuwalo na atumu ama꞉ ba꞉kowalubinakomata. Ba꞉ hibila, nale ama꞉ ba꞉bi Yuha꞉pa꞉tamo konoemema꞉nemata,
ACT 26:18 mabu ama꞉le ibino baidi konepahalamililamema꞉na꞉ta iba꞉te du ipuwane alamo kohobila꞉halema꞉. Iyo, iba꞉te Saitanakono helo ipuwane Godotamo ohobila꞉hate na Ya꞉suku hibima꞉ da꞉midinimina꞉, ba꞉be komodo Godote ibino kuba egebolelamete kadodoholelamema꞉ne, ba꞉gala ebete ibi ebeno komo tuputupupa꞉go kapiyama꞉ midiliti eta hido haba iba꞉tamo kikalamema꞉ne.’”
ACT 26:19 Ba꞉bene Polote ebeno tabo moga꞉melo gala na꞉kagoiya꞉, “Ko Gawadubu Agilipa, Godokono Hunu Habane natamo kebe komote kuluhukuya꞉, nale ba꞉be komo umiti ba꞉bo papamiwatuya꞉mo.
ACT 26:20 Ba꞉ba tetene tupuimiti nale tawakaluba꞉tamo Godokono tabo ba꞉ma ka꞉na olamaginakuimo, ‘La꞉eno tepo ipuwa hiya꞉ma꞉ midiliti Godotamo nohobila꞉la꞉, ba꞉gala wadiyala la꞉eno hidohido ododili ipuwado la꞉eno Godotamo ohobila꞉ komo na꞉hawakaliminakuya꞉la꞉.’ Ba꞉ hibila, dopamo tetelo nale Dama꞉sakase ko habalo tabo ba꞉ba ka꞉na olamagiya꞉mo, ba꞉bene Yelusalemamo pete ibi ba꞉be atu tabo a꞉kapikiyalamiya꞉mo, ba꞉bene nale Yudiya hopo konomamo Godokono tabo olamaga꞉go tote Yuha꞉pino hiya꞉hiya꞉ muhulu hopamo ba꞉bo nuluhukuya꞉mo.
ACT 26:21 Ba꞉moe mabuni komo Yunapa꞉te na ubiha꞉ma꞉ eda꞉hate, eta hegelalo iba꞉te Godoko Adikumino Genamalo na heloamo lawenete ubi ba꞉bo ihatiya꞉ na kanakapunamema꞉.
ACT 26:22 Huiyatiya Godokono owalubiti nagodolo nitanui, ba꞉bema꞉ ka꞉lo na ba꞉malo da꞉la꞉namo Godote na hibinomolo dopamo diya꞉tunamiya꞉ nale ba꞉be komo la꞉ koko tawakalubi ba꞉gala hegehege tawakalubi la꞉ hiliyonomatamo na꞉hawakalimitamo. Iyo, dopamo tetelo Mosesete komo Godokono ukui hawakalimipa꞉go kebe komote uluhukuma꞉ dolamagiminakui, na ba꞉ atu komo beka-olamagitamo.
ACT 26:23 Ba꞉moe tabo ba꞉ ba꞉ma ka꞉nala, Godokono Oemedawa Kelisote da꞉hoemene, hoe ipuwane ka꞉ka꞉mo gala da꞉kamahigamene ebete dopo lumagima꞉ keda꞉ma꞉ne, ba꞉bene ebete ka꞉ka꞉ muleno alo ebeno Yunapi ba꞉gala kapela Yuha꞉pi ibi hiliyonomatamo kohawakalimima꞉ne.”
ACT 26:24 Ba꞉ba tetelo Kapela Ko Gawadubu Pesitasiti Polokono tabo olamagi ubiha꞉ma꞉ eda꞉te ebe ba꞉bo goepatemiya꞉, “A꞉iye! Polo, ama꞉ daedae lumagilata! Ama꞉ buka ka꞉lamihole kodawanomolata, ba꞉bema꞉ diyala, amia꞉no iya꞉tawa komote ama꞉ daedaema꞉ kuda꞉ a꞉midia꞉ta!”
ACT 26:25 Ba꞉bene Polote Pesitasitamo na꞉huiyuya꞉, “Naeno Hidonomo Kodawa, na daedae lumagiha꞉. Naeno tabo ba꞉ hibila ba꞉gala na tuputupu ukuinomolo olamagitamo.
ACT 26:26 Ko Gawadubu Agilipate naeno taboeno hibi komo iya꞉tawala, ba꞉bema꞉ na hilopoheno ebeno holoholo hapulu kolamagima꞉nemo. Nale kebe komokomoma꞉ dolamagitamo, ebete ba꞉bi hiliyonomo komo ya꞉lo iya꞉tawuya꞉ mabu ba꞉bi komate diya gabodo kikulihuya꞉ha꞉.”
ACT 26:27 Ba꞉bene Polote gala na꞉kagoiya꞉, “Ko Gawadubu Agilipa, Godokono ukui hawakalimipa꞉te dopamo ebeno Bukamo da꞉miya꞉tiya꞉, ama꞉ ba꞉bi komo hibima꞉ na꞉ka꞉midiliuta? Iyo, na iya꞉tawala ama꞉ hibima꞉ na꞉midilitata!”
ACT 26:28 Ba꞉ba tetelo huiyatiya Agilipate Polotamo na꞉goiya꞉, “Ama꞉ natamo bada komo ododima꞉ kewageliuta? Amia꞉no tabo olamagi ipuwalo ukui ba꞉kitana, nale ba꞉moe gopowahi tetenomolo Ya꞉sukunu eta ta꞉matadawama꞉ keda꞉ma꞉?”
ACT 26:29 Polote na꞉huiyuya꞉, “Ama꞉ Ya꞉sukunu tabo tete gopowahilo uliti ebe hibima꞉ da꞉midimina꞉ naeno kalakala hibilo kitanama꞉ne, o ama꞉ tete ga꞉ga꞉dopo emedete hibima꞉ midi komo da꞉lawemena꞉ na atumu kokalakalama꞉nemo. Iyo, la꞉ hiliyonomate naeno tabo dulihutama, nale la꞉eno komoma꞉ Godoko na꞉toemehonamo la꞉eno hibima꞉ midi ipuwalo la꞉le nago kapiyanomoma꞉ keda꞉hama꞉. Huiyatiya la꞉ mabuma꞉ na ba꞉moe kapiya komo ubihinola, nale ba꞉moi auli hala꞉go da꞉pata꞉namo komopa꞉te la꞉ ba꞉bako hala꞉mo matuhulame modoboha꞉.”
ACT 26:30 Ba꞉ba tetelo Ko Gawadubu Agilipako, ba꞉gala ebeno naniko Benisiko, ba꞉gala kapela Ko Gawadubu Pesitasiko, ba꞉gala komo tabo ulihopi, ibi hiliyonomate mahila꞉halete
ACT 26:31 tabo ga꞉la bahini ba tolamita ibi ipuwalo na꞉ga꞉luya꞉, “Ba꞉moe dubugodolo eta kuba puliyala gabomana꞉te ebe hoea꞉mo oemema꞉, ba꞉gala modoboha꞉ ebete du genamalo dito emedena.”
ACT 26:32 Ba꞉bene Agilipate Pesitasitamo na꞉goiya꞉, “Ba꞉ hibila, ba꞉moe dubuti amia꞉no tabo anagiya꞉mida ipuwalo dopamo da꞉la꞉nui, ba꞉ba tetelo ebete Sisakono holoholo hapuamo toma꞉ ama꞉ kiyameha꞉tale ale ebe du genamane dito boemena꞉, huiyatiya ebete aeno Konomo Gawadubutamo toma꞉ ama꞉ a꞉kiyamia꞉ta, ba꞉be mabuma꞉ ebete ebetamo na꞉nuluhukamene.”
ACT 27:1 Ba꞉bene Loma gabomana꞉te a ibino Itali hopamo palai boga꞉go komagatoema꞉ tabo dihatiya꞉, ba꞉ba tetelo alaholohopa꞉te Poloko ba꞉gala komo du genamalo demedehonama꞉, ibi hiliyonomo eta alaholohopino watodawoeno kokotamo ba꞉ dito nimiya꞉tiya꞉. Ba꞉be alaholohopino watodawoeno mahilo Yuliyasitila, ba꞉gala ebeno alaholohopino kapiyuimino mahilo ba꞉ Konomo Gawadubu Sisakono Kapiyuimipila.
ACT 27:2 Ba꞉bene eta ko palai bogete A꞉damitiyama habane uluhukuti A꞉isiya hopoeno komo kehaha꞉ kolomoeno habahabamo gala kakatoma꞉ dewagelitiya꞉, ale ba꞉be boga꞉mo nololote ba꞉bo tolamiya꞉ma꞉. Ba꞉ba tetelo eta Ma꞉sadoniya hoponapi A꞉listakasiko, ebe Tesalonaika habalo hawakaluya꞉, ago ba꞉moe dubuti tuya꞉.
ACT 27:3 Ba꞉bene eta hegelalo ale Saidono ko habamo da꞉nikuliya꞉ma꞉, ba꞉ba tetelo alaholohopino watodawa Yuliyasiti Poloko malemaletelo ebetamo tete bikamiya꞉, ebete ba꞉be habalo ebeno komo mabulubi nulamete iba꞉te ebeno modoboha꞉ komokomo ipuwalo ebe hidamo kowalubima꞉.
ACT 27:4 Ba꞉bene a Saidono habane gala da꞉katolamiya꞉ma꞉, kehaha꞉ kolomo ba na꞉hiwale ko huhuti a da꞉duhia꞉miya꞉, ba꞉bema꞉ Saipalase hopamo nikuliti ba꞉be hopoeno kehaha꞉ kolomoeno dododo ba꞉bo tolamiya꞉ma꞉ mabu ba꞉be gabote atamo tatabadopoma꞉ ediya꞉.
ACT 27:5 Ba꞉bene ale kehaha꞉ kolomo gala kana꞉hiwalete Silisiya ba꞉gala Pa꞉mapiliya hopo tamedo petolamete Lisiya hopoeno Maila habamo ba꞉bo nikuliya꞉ma꞉.
ACT 27:6 Ba꞉bolo eta ko palai bogete A꞉lesandiya habane Itali hopamo toma꞉ dewagelitiya꞉, alaholohopino watodawa Yuliyasiti ba꞉be komo iya꞉tawate a ba꞉be boga꞉mo ololoma꞉ dito noea꞉miya꞉.
ACT 27:7 Ba꞉bene ale ba꞉be boga꞉go da꞉katolamiya꞉ma꞉ ba꞉ba tetelo huhuino komo umilo a ukuiya ba tolame ko temeteme beniya꞉tawahuya꞉ma꞉. Ba꞉bene komo hegela da꞉petohuya꞉ a Sanaidase haba teta꞉mo nikuliti huhuti a ba꞉bolo hibilo da꞉duhia꞉miya꞉, a huiyatiya ukui hiya꞉ma꞉ miditi tataba gabo ohowada꞉go tolamete kehaha꞉ kolomo ba꞉bo na꞉hiwaliya꞉ma꞉ Kuliti hopoeno Salamone haka kiyamo.
ACT 27:8 Ba꞉bene a Kuliti hopoeno kehaha꞉ kolomo dododo ko temetema꞉go petolamete eta boge utihole bahi ba꞉bo numiya꞉ma꞉, ba꞉be boge utihole bahino mahilo nitana ‘Boge Utiholeno Tataba Bahila,’ Laseya haba tamelo itana.
ACT 27:9 A ba꞉be Kuliti hopamo pelamema꞉ tete ga꞉ga꞉nomoma꞉ dediya꞉, ba꞉bema꞉ Septemba manomeno Ko Hegelate ba peniwibo ba꞉be hopo konomolo ko huhuti a꞉mo ya꞉lo a꞉tupuimiya꞉. Mabu ale kehaha꞉ kolomodo kotolamema꞉ hido tete dotuya꞉ma꞉, ba꞉bema꞉ Polote boge okopi ba kiyalame na꞉goiya꞉,
ACT 27:10 “Dubala꞉, na numitamo a ba꞉ma tetelo tolamema꞉ dewagelema꞉ ale konolalatiholema꞉nema꞉, iyo, bogeno ka꞉ka꞉ ba꞉gala ilina ba꞉gala a tawakalubino ka꞉ka꞉te kalatidiholema꞉na꞉.”
ACT 27:11 Ba꞉ba tetelo alaholohopino watodawate Polote da꞉goiya꞉ ba꞉be tabo kuliya꞉ha꞉, huiyatiya ebete boge atadawa ba꞉gala boge namutudawa ibino ubi komamo dito papamiwatuya꞉.
ACT 27:12 Iyo, ibino tabo ga꞉la ipuwalo ibi hiliyonomate ubi nihatiya꞉ ba꞉be haba miya꞉pate Kuliti hopoeno eta tatali haba Pinikisa꞉mo konikulima꞉, mabu iba꞉te boge da꞉putiya꞉ ba꞉be boge utihole bahi modoboha꞉ ko palai bogete huhu tetelo tete ga꞉ga꞉nomolo ba꞉bolo itana. Ba꞉ba tetelo iba꞉te nemalagidoluya꞉ Pinikisi haboeno boge utihole bahino magata kodopola, hegelate da꞉nihitiganako ba꞉ba hapulu ba itana ba꞉bema꞉ huhuti ba꞉be boge utihole bahi koamo a꞉kalawa꞉le.
ACT 27:13 Ba꞉ba tetelo ko huhuti da꞉wibuya꞉ huiyatiya siyale hapuni nanekela꞉mo da꞉pa꞉mutiya꞉, ba꞉bema꞉ boge okopa꞉te kalakala lawete a ba꞉be habane ikuli hidoma꞉ ga꞉lalo iba꞉te bogeno aga mabu magubutiti Kuliti hopoeno kehaha꞉ kolomo dododo tolame gala ba꞉bo katupuimiya꞉.
ACT 27:14 Huiyatiya iba꞉te nanekela꞉mo ba tolamita, konomo huhuti Kuliti hopo hapuni gala kanemahigate ba꞉bo piya꞉, boge okopa꞉te ba꞉be huhuino mahilo Dibilidubu Hapuino Huhuma꞉ ka꞉miya꞉.
ACT 27:15 Ba꞉ba tetelo huhuti boge da꞉panagalimiya꞉ okopa꞉te boge haka hapuamo ohoba꞉midama꞉ dewageliya꞉ kamodobuya꞉ha꞉, ba꞉bema꞉ iba꞉te bogeno kiya꞉li mabu miya꞉pate huhuti a hakane ko kolomamo ba꞉ dito puluhukua꞉tiya꞉.
ACT 27:16 Ba꞉bene ale kehaha꞉ kolomoeno eta deha꞉poto haka, ebeno mahilo Kolodala, ba꞉be haka siyale hapudu ba negogoluta tete nanekelelo gawiyate tatabadopoma꞉ ba꞉bo ediya꞉. Ba꞉ba tetelo ale ko palai bogeno ka꞉ka꞉ mula꞉meno boge deha꞉poto ba꞉bo nihiduimiya꞉ma꞉ ba꞉be bogete ko kolomolo ululukapoma꞉. Iyo, ale ba꞉be komo ko temetema꞉go ba꞉ma ka꞉na ododiya꞉ma꞉,
ACT 27:17 okopa꞉te ba꞉be deha꞉poto boge ko kolomoeno beyane adipatete ko palai bogeno guamo ihatete hala꞉mo matumihote ba꞉bo kodakoduimiya꞉. Ba꞉be atu tetelo iba꞉te komo koko hala꞉mo ko boge a꞉wa꞉digahalo atumu a꞉kama꞉homehuya꞉, mabu iba꞉te na꞉toletolehutiya꞉ Libiya hopoeno kehaha꞉ kolomoeno beya tetelo ditana, ba꞉be kulili hakamo huhuti aeno boge datamene. Diyala, bogete ba꞉be kulili hakamo da꞉nemuigamene, gawiyate boge ba꞉bolo kubanomamo anagalimihote bogete dito da꞉ nepapohola꞉hamene. Ba꞉be mabuma꞉ okopa꞉te ukui bilibilima꞉ ba eda꞉ha iba꞉te eta komo ba꞉ma ka꞉na ka-ododiya꞉, iba꞉te ko bogeno palai pahamihote boge guamo dito ihatiya꞉, ba꞉bene kehaha꞉ kolomoeno gawiyate ha꞉kiya a ba꞉bo atoiya꞉.
ACT 27:18 Huiyatiya huhu ba꞉gala gawiya ibino helote kekelalamitiya꞉ha꞉, ba꞉bema꞉ eta hegelalo okopa꞉te bogeno kolowami ilina hiliyonomo beyamo dito iya꞉hekiya꞉,
ACT 27:19 ba꞉gala eta hegelalo iba꞉te atumu ka-ewageliya꞉, palai bogeno komo hiya꞉hiya꞉ oko ilina ibino kokotonomamo uwatete beyamo ba꞉ dito kiya꞉hekiya꞉.
ACT 27:20 Ba꞉ba tetelo bogete konomo hawai bubu ipuwado tonami, ba꞉be mabuma꞉ ale komo hegela ba꞉gala du hiliyonomolo hegela ba꞉gala oloki ulameheno konomo huhuti a kubanomamo dalukuinami aeno ka꞉ka꞉ mula꞉ komoeno ukuiti a꞉nalatidihoa꞉miya꞉.
ACT 27:21 Ba꞉bema꞉ boge okopa꞉te komo hegela hiliyonomolo tole komago ba emedena baa꞉ kanahanakuiha꞉, ba꞉bene eta hegelalo Polote ibino holoholo hapulu mahigate na꞉goiya꞉, “Dubala꞉, la꞉ naeno tabo nulihotale ale Kuliti hopoeno haka ba꞉ka꞉miya꞉pana꞉, iyo, ba꞉moe bogete ba꞉ka꞉kubana꞉ ba꞉gala ilina hiliyonomate ba꞉kalatidiholena꞉.
ACT 27:22 Huiyatiya ka꞉lo nale la꞉ toelameholelo na꞉goemo, la꞉ helo gala na꞉kalawa꞉la꞉, mabu bogete kokubama꞉ne huiyatiya la꞉ ipuwalo eta lumagino ka꞉ka꞉te a꞉kalatida꞉mene!
ACT 27:23 Na Godokono lumagi etala, iyo, ebete na ya꞉lo a꞉laweniya꞉ nale ebeno okodawama꞉ keda꞉nama꞉. Ba꞉bema꞉ ka꞉lo dulu ebeno nopodawate natamo puluhukuti
ACT 27:24 na꞉pegoe, ‘Polo, ama꞉ akatoletola꞉la꞉, ama꞉ Sisakono holoholo hapuamo hibilo konuluhukuma꞉na꞉ta. Ba꞉gala Godote ebeno malemalelo eta tabo ba꞉ma ka꞉na kagoe, ba꞉moe bogelo ama꞉go demedena ebete ama꞉ mabuma꞉ ba꞉bi dubu hiliyonomoeno ka꞉ka꞉ komula꞉lelamema꞉ne.’
ACT 27:25 Ba꞉bema꞉ naeno dubala꞉, la꞉ helo gala na꞉kalawa꞉la꞉ mabu na Godoko hibima꞉ na꞉miditamo, ebete na da꞉kiyaname ba꞉be komote hibinomolo ba꞉ba ka꞉na kuluhukuma꞉ne.
ACT 27:26 Ba꞉moe komo ba꞉ hibila, gawiyate a atoete kehaha꞉ kolomoeno eta hopamo konemiya꞉poema꞉ne, ale aeno ka꞉ka꞉ mula꞉ komo ba꞉bo konuwatema꞉.”
ACT 27:27 A Kuliti hopo da꞉miya꞉puya꞉ma꞉, ba꞉ba tetene tupuimiti 14 hegela ba petoho koko gawiyate a Meditala꞉iniya kehaha꞉ kolomo tetenomodo ba atoe, ba꞉bene eta dulu iwa tetenomolo boge okopa꞉te ibino ukuilo haka na꞉tataliminamo ga꞉laniya꞉.
ACT 27:28 Ba꞉bema꞉ iba꞉te auli ilina deha꞉poto hala꞉mo ma꞉homenate ko kolomoeno kulukulu da꞉modoboteniya꞉ 40 mita buminiya꞉, ba꞉bene tete nanekele toatepanate gala da꞉kanemodoboteniya꞉ 30 mitama꞉ eda꞉niya꞉.
ACT 27:29 Ba꞉bene gawiyate a nakolamo na꞉nitakua꞉midoenamo ba ga꞉lana okopa꞉te konomamo toletolehonate, iba꞉te boge gala hapuamo netewa-netewa menemene aga iya꞉hekemenate hegelate tiyo kowalohoma꞉ Godotamo ba꞉bo toetoehoniya꞉.
ACT 27:30 Ba꞉ba tetelo bogeno olalati komo uminate, okopa꞉te ha꞉da amiho gabodo a komiya꞉poenama꞉ iba꞉te ka꞉ka꞉ muleno boge deha꞉poto beyamo ba adipotena a komopi ba꞉bo kiyaa꞉meniya꞉, “Ale boge dopo hapuino aga iya꞉hekema꞉ kotolamenama꞉.”
ACT 27:31 Polote huiyatiya ibino ha꞉da komo uminate alaholohopino watodawa na꞉kiyameniya꞉, “Na niya꞉tawanamo, ba꞉moi okopa꞉te bogelo ago pola꞉naheno la꞉eno ka꞉ka꞉te kalatidiholema꞉na꞉,”
ACT 27:32 ba꞉bema꞉ komo alaholohopa꞉te boge deha꞉potoeno hale da꞉niya꞉hiliminiya꞉ ba꞉be bogete tawakalubihino ba꞉ dito okoa꞉taniya꞉.
ACT 27:33 Ba꞉bene owaloho tete da꞉tataliniya꞉ Polote dubu hiliyonomoeno baa꞉ nahaha꞉ mabuma꞉ tabo helodopamo ba kiyahalamena, ebete ba꞉ma ka꞉na goeniya꞉, “Ba꞉moi 14 hegelalo la꞉le la꞉eno ka꞉ka꞉ komoma꞉ ukui da꞉bilibilihonatima, la꞉le tete ga꞉ga꞉nomolo baa꞉ kanahanakuiha꞉.
ACT 27:34 Nale la꞉ ba꞉bema꞉ kiyahalamenamata, la꞉le baa꞉ konahama꞉. Baa꞉ naha ipuwalo la꞉le helo kolawema꞉nemata, ba꞉bene olalatiti la꞉tamo da꞉puluhukumini la꞉eno ka꞉ka꞉te a꞉kalatidihamena꞉, iyo, ba꞉ hibila, la꞉ hiliyonomo ipuwalo eta lumagino watoeno hinibo eta kapiyate a꞉kalatida꞉mene.”
ACT 27:35 Polokono tabo olamagi da꞉wiboniya꞉, ba꞉ba tetelo ebete ibino holoholo hapulu baa꞉ lawenate Godotamo kalakala tabo goe da꞉wiboniya꞉ baa꞉ adikamidalenate na ba꞉bo tupuiminiya꞉,
ACT 27:36 ba꞉bema꞉ ibi hiliyonomate ibino tole komo gobogobamo miya꞉tenate Polokoba꞉ baa꞉ ba꞉bo nahaniya꞉.
ACT 27:37 Ba꞉be dulu a puya꞉te ba꞉be ko bogelo da꞉pola꞉nuya꞉ma꞉, aeno tawakalubino kuititi ba꞉ 276 tawakalubila,
ACT 27:38 ba꞉bene baa꞉te a hiliyonomo da꞉wigua꞉meniya꞉, komo okopa꞉te bogeno komo kolowami ilina ba꞉be witi-laisa kodopo kolomamo dito iya꞉hekeniya꞉, mabu ibi ubila bogete tutuma꞉ ba eda꞉na hido haka teta꞉mo konutinama꞉.
ACT 27:39 Ba꞉bene hegelate dowalohuya꞉ boge okopa꞉te kehaha꞉ kolomoeno eta hopo ba꞉bo umiya꞉, huiyatiya ibi hiliyonomate ba꞉be hopo dopamo kuminakuiha꞉. Ba꞉ba tetelo iba꞉te ba꞉be hopoeno kolomo dodo ba umihuta hido tete ba꞉bo umiya꞉, nakola puliyala, kulili haka kapiyate itanuya꞉, ba꞉bema꞉ ibino bogete ba꞉be kulili haka teta꞉mo konutima꞉ ubi ba ihate iba꞉te gabo ba꞉bo ohowadiya꞉.
ACT 27:40 Ba꞉be mabuma꞉ iba꞉te bogeno hiya꞉hiya꞉ agoeno hale iya꞉hilimiti kolomolo dito miya꞉paliya꞉, ba꞉gala ba꞉be atu tetelo iba꞉te dopamo da꞉matuhulamiya꞉ ba꞉bi kiya꞉lino hale pahalamiti, ba꞉bene eta deha꞉poto palai ibino boge dopo hapulu ba꞉bo adipatiya꞉, huhuti ibi ba owalubilinato bogete hido kulili hakamo konutima꞉.
ACT 27:41 Huiyatiya iba꞉te ba꞉ba ka꞉na ba newagelita, bogete hido haka teta꞉mo nidihino dopamo beyalo ditanuya꞉ ba꞉be eta kulili haka teta꞉mo nutiti bogeno dopo haputi ba꞉bo nekodakoduya꞉, ba꞉bema꞉ ba꞉ba tetelo koko gawiyate bogeno gala hapu kubanomamo ba anagalimihuta bogete papohola꞉ha ba꞉bo tupuimiya꞉.
ACT 27:42 Alaholohopa꞉te bogeno olalati dumiya꞉ nopo ba꞉bo tamotiya꞉, iba꞉te du genamane boga꞉go da꞉magaheliya꞉ ba꞉bi dubu hiliyonomo kanakapulamema꞉, komo iba꞉te hakamo niholoholete dito nalahutihokapoma꞉.
ACT 27:43 Ba꞉ba tetelo huiyatiya alaholohopino watodawate ubila Polokono ka꞉ka꞉ komula꞉mema꞉, ba꞉bema꞉ ebete ebeno hopopi na꞉duhilamiya꞉ iba꞉te ba꞉bi dubu anakapulamema꞉. Ba꞉be atu tetelo ebete ibi hiliyonomo na꞉kiyalamiya꞉, ibi ipuwalo puya꞉te iholohoma꞉ dewagelitiya꞉ iba꞉te bogene iya꞉patila꞉halete hakamo dopamo koniholohoma꞉
ACT 27:44 ba꞉gala iholoho iya꞉tawaha꞉pa꞉te boge papohola꞉hale hapuhapamo alukuila꞉halete ba꞉bo kona꞉hiwalema꞉. Ba꞉ hibila, a hiliyonomate ba꞉ma ka꞉na aeno ka꞉ka꞉go hakamo modobolo nidimutiya꞉ma꞉.
ACT 28:1 Ba꞉bene a hiliyonomate olalatihino hakamo da꞉nidimutiya꞉ma꞉, ba꞉be hopo tawakaluba꞉te a na꞉kiyaa꞉miya꞉ ba꞉moe kehaha꞉ kolomolo ditana ba꞉be hopoeno mahilo ba꞉ Molotala.
ACT 28:2 Ba꞉ba tetelo iba꞉te a konomamo malemalea꞉telo haka dodolo koe emadoa꞉mete a ba꞉bo ka꞉miya꞉ aeno ape kotanotanuilamema꞉, mabu wegolate ba uta a ko gibate ua꞉mitiya꞉.
ACT 28:3 Ba꞉bene Polote keha piwipiwi nuwatete ba pemaduta, bu kaluti ba꞉be ipuwane puluhukuti ebe kokotolo paliwatate ba꞉bo ta꞉muitanuya꞉.
ACT 28:4 Ba꞉bema꞉ Molota hoponapa꞉te kaluti Polokono kokotolo ta꞉muitanalo dumiya꞉, ibi ipuwalo komopa꞉te komopa꞉tamo na꞉ga꞉luya꞉, “Ba꞉ hibila, ba꞉moe dubuti eta dubu anakapumi. Numa꞉la꞉, tawakaluba꞉tamo kuba huiya dikalamenako ba꞉be aeno ida꞉da꞉lino gobogobote ebetamo kuba huiya ikame! Ebete kehaha꞉ kolomoeno olalati ipuwane dalahula꞉ka, huiyatiya ebeno kuba huiyate eta gabodo ebetamo hibilo a꞉puluhuku.”
ACT 28:5 Ba꞉ba tetelo Polote ebeno kokotone kalu danamogamiduya꞉ koa꞉mo ba꞉ dito guya꞉, huiyatiya Polokono apa꞉mo kaluino helote kodoluya꞉ha꞉.
ACT 28:6 Ba꞉bene tawakaluba꞉te ebe ba umita ibino ukuilo ba꞉bo ga꞉luya꞉, tatalila ebete kohoema꞉ne. Huiyatiya tete ga꞉ga꞉dopo nipo dumitiya꞉ ba꞉ba tetelo iba꞉te ibino ukui hiya꞉ma꞉ midiliti na꞉ga꞉luya꞉, “Diyala, ebe da꞉ kuba lumagiha꞉, huiyatiya aeno ida꞉da꞉lino gobogobo etate ba꞉moe dubuino holoholamo atamo kuda꞉ a꞉puluhuku!”
ACT 28:7 Ba꞉be kehaha꞉ kolomolo ditanami ba꞉be hopoeno ko gabomani dubuino mahilo ba꞉ Pubiliyasitila, ale kebe haka dodamo ka꞉nidimutiya꞉ma꞉ ba꞉be haka tamelo ebeno koko pali haka ba꞉gala genamate na꞉pola꞉ma꞉nami. Ba꞉be dubuti a komopi malemalea꞉telo uwatete a ebeno genamamo dito magatoiya꞉, ba꞉bene netewa-kapiya hegelalo ebete a hidamo ba ua꞉menate ba꞉bo owalubinakui.
ACT 28:8 Ba꞉ba tetelo Pubiliyasikono nabiwi tawetawete ba uminate ne hawa꞉go lihonakui, ba꞉bema꞉ Polote ba꞉be kadeleno wata baha꞉mo tote Godotamo ba netoetoe kokoto ebetamo da꞉nemowatimiya꞉, ebete ba꞉bo hiduya꞉.
ACT 28:9 Ba꞉bene Polote dododiya꞉ Molota hoponapa꞉te ba꞉be komo ulihote, komo hegelalo iba꞉te ibino temetema꞉gopi da꞉magahelenakui Polote Godokono heloamo ba꞉bo hiduilamenakui.
ACT 28:10 Ba꞉be mabuma꞉ iba꞉te a milia꞉mehoelo malemale ilina hiliyonomo atamo dito ikaa꞉mehoenakuya꞉, ba꞉gala ale eta ko palai boga꞉go gala tolamema꞉ da꞉kewageliya꞉ma꞉, ba꞉ba tetelo agodolo kebe ilinate modobolo pola꞉naheno iba꞉te ba꞉bi ilina wadahete boga꞉mo atumu dito kamiya꞉tea꞉miya꞉.
ACT 28:11 Ale Molota hopolo ba emede netewa-kapiya manome da꞉wibuya꞉, ba꞉ba tetelo ale eta ko palai boga꞉go tolame gala dito katupuimiya꞉ma꞉. Ba꞉bene ko huhuino tete puluhukuhino ba꞉be bogete dopamo A꞉lesandiya habane Molota hopamo puluhukuti, ko huhuino wibo tete ba꞉bo pelatimiya꞉ ba꞉gala ba꞉be bogeno wato netewala, ba꞉moe boge namutudawate Lomanapino ida꞉da꞉lino Nedewale Gugudino holoholamo ododiliya꞉.
ACT 28:12 Ba꞉bene a ba꞉be boga꞉go kehaha꞉ kolomo na꞉hiwalete Silakuse ko habamo nikuliti netewa-kapiya hegela ba꞉bo nemediya꞉ma꞉.
ACT 28:13 Ba꞉ba tetelo ale gala katolamete kehaha꞉ kolomo kana꞉hiwalete Legiyama habamo ba꞉bo nikuliya꞉ma꞉, ba꞉bene eta hegelalo hido huhuti siyale hapuni da꞉piya꞉, ba꞉be huhuti netewa hegelalo a ba powalubi bogete tote Putiyoli habamo ba꞉ dito nutiya꞉.
ACT 28:14 Ba꞉bolo ale komo Ya꞉suku hibima꞉ midipi ekaki da꞉nulamiya꞉ma꞉, iba꞉te a na꞉kiyaa꞉miya꞉ iba꞉go kemedema꞉, ba꞉bema꞉ ale iba꞉go sa꞉ba꞉ni hegela emedete gala nato gabodo na꞉katolamiya꞉ma꞉ Loma ko habamo.
ACT 28:15 Ba꞉bene komo Lomanapi hibima꞉ midipa꞉te aeno komo uliti, iba꞉te gabo tetelo ago alugama꞉ ko habane ba꞉bo pelamiya꞉. Ibi ipuwalo dopo tawakaluba꞉te A꞉piyase haboeno ilina kolowami habalo ago palugate, ba꞉gala komopa꞉te gabo tetelo ago gala na꞉kapaluguya꞉, ba꞉be gabo teteno mahilo ba꞉ ‘Kapela Tawakalubino Netewa-kapiya Laha Genama Tetela.’ Ba꞉ba tetelo Polote ba꞉bi Lomanapino holoholo dulamiya꞉ ebete Godotamo kalakala tabo ba goe tepo ipuwalo helo ba꞉bo lawiya꞉.
ACT 28:16 Ba꞉bene ale Loma ko habamo hibilo da꞉nikuliya꞉ma꞉, ba꞉ba tetelo gabomana꞉te Poloko na꞉ga꞉lamiya꞉ ebete du genamalo a꞉kemeda꞉mene, huiyatiya eta genamanomolo ba nemede eta alaholodawa dubu kapiyate eba꞉go kemedema꞉ne ebete alahula꞉kapoma꞉.
ACT 28:17 Netewa-kapiya hegela da꞉peniwibuya꞉, Polote tabo ba꞉bo noemiya꞉ Loma ko habalo demedehonama꞉ ba꞉bi Yunapino watowatopa꞉te ebetamo kopelamema꞉, mabu hibila, iba꞉te Ya꞉sukunu hibi komo dopamo kuliya꞉ha꞉. Ba꞉bene iba꞉te da꞉pekapiyuya꞉ ebete iba꞉tamo na꞉goiya꞉, “Naeno nana꞉la꞉, ba꞉moe komo ba꞉ hibila, nale aeno Yu tawakaluba꞉tamo eta kuba kododiha꞉ ba꞉gala aeno iniwalino kukala eta kapiya kadikamidaleha꞉, huiyatiya komo aeno tawakaluba꞉te natamo ba maubahale iba꞉te Yelusalemalo na lawenete Loma gabomanino kokotamo ba꞉ dito ihateniya꞉.
ACT 28:18 Ba꞉bene komo gogote da꞉petohui ba꞉ba tetelo gabomana꞉te naeno komo ba anagiya꞉midaname, iba꞉te na hoea꞉mo koenamema꞉ naeno eta kapiya kuba kumiha꞉, huiyatiya ibi ubila na du genamane dito kuluhukunatenema꞉.
ACT 28:19 Ba꞉be mabuma꞉ Yunapa꞉te gabomana꞉tamo ibino ubiha꞉ komo koamo hawakalimiya꞉, ba꞉bene na gabomanino tabo anagiya꞉mida habalo ba la꞉na nale eta gabo kumiha꞉. Ba꞉bema꞉ ba꞉ba tetelo nale naeno ubi komo hawakala ihatimo Sisakono holoholo hapulu naeno kuba ododiha꞉ komo konehawakalimima꞉, huiyatiya la꞉ nonolata, naeno ukuiti kitanuiha꞉ Sisakono holoholo hapulu aeno Yu tawakalubino komoma꞉ eta kuba tabo konegoema꞉.
ACT 28:20 Ba꞉ hibila, nale la꞉go tabo kolamagimima꞉ tabo ba꞉bema꞉ poememo. Ba꞉bema꞉ wadiyala la꞉le naeno kokotolo ditana ba꞉moe auli hale numa꞉la꞉, mabu a Isalaela tawakaluba꞉te pokono pe komoma꞉ kalakalago da꞉latiminama꞉, ba꞉be Kodawa mabuma꞉ nale ba꞉moe matuhulamehole komago emedenamo.”
ACT 28:21 Ba꞉ba tetelo Yu watowatopa꞉te Polotamo na꞉ga꞉luya꞉, “Nolata. Ale ama꞉ mabuma꞉ komo leta Yudiya hopone kuwateha꞉, ba꞉gala komo aeno ekaka꞉te ebene kapelameha꞉ amia꞉no ododili komoma꞉ eta kuba tabo a kopikiyaa꞉mema꞉.
ACT 28:22 Huiyatiya kalakala konomola, a iya꞉tawahala hiya꞉hiya꞉ hopolo komo tawakaluba꞉te amia꞉no uli kapiyuimino komoma꞉ kubanomamo ga꞉lana. Ibino tabo ga꞉la komo da꞉ hibila꞉ o da꞉ ha꞉dala꞉, ba꞉bema꞉ aeno ubi bitana amia꞉no tabo komokomo hidamo kulihoma꞉.”
ACT 28:23 Ba꞉bene ba꞉ba tetelo iba꞉te eta kapiya hegela ka꞉miti, ba꞉be hegelalo dopamo da꞉pelamiya꞉ ba꞉bi watowatopa꞉te ba꞉gala komo tabo ulihopi hiliyodopo iba꞉te Polokono genamamo ba꞉bo pekapiyuimiya꞉. Ba꞉bene duiduiya tetene tupuimiti gapogapo teta꞉mo nuluhuku Polote Godokono Ko Gawadubu komo ibi ba꞉bo iya꞉tulamiya꞉. Ba꞉ba tetelo Mosesete Bukamo da꞉miya꞉tiya꞉ ba꞉gala Godokono Ukui Hawakalimipa꞉te da꞉miya꞉tiya꞉, Polote ba꞉bi Buka komokomo ba hawakalilamita ebete ibi ba꞉bo kiyalamiya꞉ Ya꞉suku hibima꞉ komidima꞉.
ACT 28:24 Ba꞉bene komo iba꞉te Polokono tabo modoboma꞉ ga꞉late Ya꞉suku hibima꞉ na꞉midiya꞉, huiyatiya komopa꞉te hibima꞉ kamidiya꞉ha꞉.
ACT 28:25 Ba꞉be mabuma꞉ hegelate ba gapogapohona olowabeletihui komote iba꞉tamo da꞉peniya꞉, ba꞉ba tetelo iba꞉te hiya꞉hiya꞉ tabo ba ga꞉lana ibino genamamo ba꞉ dito tolameniya꞉. Ba꞉ba tetelo Polote hibima꞉ midiha꞉ Yunapa꞉tamo ba꞉moe kapiya kodakoda tabo begoeniya꞉, “Godokono Gobogobote ebeno ukui hawakalimidawa Aisayako bikiyamiya꞉, ebete la꞉eno iniwala꞉tamo tote tabo hibinomolo ba꞉ma ka꞉na konolamagima꞉,
ACT 28:26 ‘Amia꞉no tawakaluba꞉tamo tote ibi ba꞉ma ka꞉na na꞉nikiyalamiya꞉, ‘La꞉ tabo bulinakomata huiyatiya a꞉kiya꞉tawahanakamata, iyo, la꞉ ipuwa bohowadinakomata huiyatiya a꞉kuminakamata.
ACT 28:27 Mabu ba꞉moe tawakalubino ukui hegabema꞉ eda꞉halamiya꞉, ibi hibi komo uli ubihinola, ba꞉bema꞉ iba꞉te galo a꞉muhilameholiya꞉, ba꞉gala ibino baidi atumu a꞉mula꞉haliya꞉. Ba꞉bema꞉ iba꞉te ibino baidi mula꞉haleha꞉ma꞉ neda꞉hatale, ibino baiditi naeno hido komo bulamena꞉, ba꞉gala ibino galote nulihotale, iba꞉te ibino tepo ipuwoeno ukui hidamo emalagidolete natamo bohobila꞉na꞉, ba꞉bema꞉ na modobola ibi nale hiduilamema꞉.’ ’”
ACT 28:28 Ba꞉bene Polote ebeno tabo moga꞉melo gala na꞉kagoeniya꞉, “Wadiyala la꞉ niya꞉tawahala꞉, ba꞉ma tetelo Godokono ka꞉ka꞉ mula꞉ komoeno tabo ebete ba꞉ Yuha꞉pa꞉tamo ikalami, mabu iba꞉te kalakalago uliti kolawema꞉na꞉ huiyatiya la꞉leha꞉.”
ACT 28:29 Ba꞉bema꞉ Polokono tabo olamagi komote da꞉wiboniya꞉, Yunapa꞉te ebeno genamane ba tolamena ibi ha꞉kiya ibi ipuwalo olowabeletihui konomago tolameniya꞉.
ACT 28:30 Ba꞉bene Polote gogo netewa Loma ko habalo ba emedena ebete kebe wata genama ka꞉huiyahanami, puya꞉te ba꞉be genamamo da꞉pelamenakui ebete ibi kalakalago ba꞉bo uwatenakui.
ACT 28:31 Ba꞉bema꞉ ba꞉be tete ga꞉ga꞉nomolo ebete Godokono Ko Gawadubu komo ba꞉gala Kodawa Ya꞉su Kelisokono komo ba꞉bi tawakaluba꞉tamo hawakala olamaginakui, etate ebe kaduhiminakuiha꞉.
ROM 1:1 Na ba꞉ Polotela, Ya꞉su Kelisokono okodawala, iyo, ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala, mabu Godote na ka꞉namiti ba꞉bema꞉ laweniya꞉ nale ebeno Hido Tabo kolamaginama꞉.
ROM 1:2 Ba꞉moe Hido Tabo ba꞉ Godote dopamo hibinomolo kopema꞉ ebeno ukui hawakalimipi ipuwado da꞉goiya꞉, ba꞉moe ba꞉be komola, iyo, ebete ebeno Hido Taboeno pe komo ebeno Hido-talona Bukalo ya꞉lo tetenomolo a꞉hawakalimiya꞉.
ROM 1:3 Ba꞉bema꞉ ba꞉moe Hido Tabote Godokono Guduino komo ba꞉ma ka꞉na hawakalimina, ebete Da꞉ibidikono eyoni gugudi ipuwane lumagino apa꞉mo hopo habamo a꞉pehawakaluya꞉,
ROM 1:4 ba꞉gala ebete hopo habalo ba emedena Hido-talona Gobogoboeno holoholonomamo emedenami, ba꞉bene Godote ebeno Guduino hibi komo kohawakalimima꞉ ebe hoe ipuwane ka꞉ka꞉mo adipatiya꞉. Iyo, ba꞉moe Gudu ba꞉ aeno Kodawa Ya꞉su Kelisotela.
ROM 1:5 Ba꞉ hibila, Kelisokono mahilote konomoma꞉ keda꞉ma꞉ Godote na malemalelo laweniya꞉, ba꞉ma ka꞉na na ebeno oemedawama꞉ ba eda꞉na nale hopo haboeno hiliyonomo hiya꞉hiya꞉ tawakalubi ebetamo komagahelenakoma꞉, ba꞉bene iba꞉te ebe hibima꞉ midi ipuwalo ebetamo kopapamila꞉halema꞉.
ROM 1:6 Ba꞉bema꞉ la꞉ puya꞉te Loma ko habalo demedehonama, Godote ebeno oko ipuwado la꞉ ba꞉ atumu a꞉kaka꞉lamiya꞉ta la꞉le Ya꞉su Kelisokonoma꞉ keda꞉hanama꞉.
ROM 1:7 Ba꞉be mabuma꞉ Loma habanapi ipuwalo la꞉ puya꞉te Godokono tawakalubima꞉ keda꞉hanama꞉ ebete ebeno malemale emalagidolo ipuwalo la꞉ da꞉ka꞉lamiya꞉la, na Polote la꞉ hiliyonomatamo ba꞉moe leta bepoememo. Wadiyala aeno Nabiwi Godoko ba꞉gala Kodawa Ya꞉su Kelisoko iba꞉te ibino malemale komo ba꞉gala hete komo la꞉tamo nikalama꞉mena꞉ta.
ROM 1:8 Naeno dopo tabo ba꞉ma ka꞉nala, Ya꞉su Kelisote atamo da꞉hiduimia꞉miya꞉, ba꞉be toetoe tabo olamagi gabodo nale la꞉ hiliyonomo mabuma꞉ kalakala tabo Godotamo adipatenakomo, mabu ba꞉moe hopo haba konomolo tawakaluba꞉te la꞉eno hibima꞉ midi komo nulihona.
ROM 1:9 Numa꞉la꞉, nale Godoko kokalakaluiminama꞉ ebeno Guduino Hido Tabo olamagi oko naeno tepo ipuwoeno helo konomamo owatinamo. Ba꞉bema꞉ hibila, ebete naeno komo ba꞉ma ka꞉na iya꞉tawana, nale komo tete hiliyonomolo la꞉ toetoe tabamo ba wadiya꞉paa꞉latele ebe ba꞉bo toemehonakomo, ebeno ubi ditanamene ebete gabo natamo na꞉hiduima꞉mene nale la꞉tamo kopema꞉, mabu tete ga꞉ga꞉nomolo nale ba꞉be komo belatiminamo.
ROM 1:11 Iyo, naeno konomo ubi ba꞉ma ka꞉nala, nale la꞉ da꞉pulamema ba꞉ba tetelo Godokono Gobogobote ebeno oko kowatinama꞉ kebe hiya꞉nomo helo natamo dikanamiya꞉, nale la꞉ ba꞉be komamo kopowalubilima꞉nemata la꞉le hibima꞉ midi ipuwalo kokodakodahama꞉.
ROM 1:12 Ba꞉bene ale kapimilo ba emedena aeno hibima꞉ midi komodo etate eta kowalubi, etate eta kowalubi, ba꞉bo kowaluba꞉tihuima꞉nema꞉, iyo, la꞉eno hibima꞉ midi komote na ba owalubini, naeno hibima꞉ midi komote la꞉ atumu ba꞉bo kakowalubilima꞉na꞉ta.
ROM 1:13 O naeno hibima꞉ midipi ekaka꞉la꞉, wadiyala la꞉ ba꞉moe komo hidamo niya꞉tawahala꞉, nale naeno ubi komo ya꞉lo ihatiya꞉mo, nale la꞉tamo pete la꞉eno Loma haba konomolo Godokono oko ba powati komo noloho gao kopetapihoma꞉, nale dopamo komo Yuha꞉pino hiya꞉hiya꞉ hopolo oko keba ka꞉na kowatinamimo ba꞉ba ka꞉na. Ba꞉bema꞉ hibila, komo hiliyonomo tetelo na nopo a꞉miya꞉tenakuimo la꞉tamo kopema꞉, huiyatiya komo hiya꞉hiya꞉ komate na a꞉duhinamenakuya꞉.
ROM 1:14 Numa꞉la꞉, Godote na huiyaha꞉ okodawama꞉ a꞉midiniya꞉ nale hopo habanapi hiliyonomatamo ebeno Hido Tabo katama꞉, ba꞉bema꞉ puya꞉te Guliki tawakaluba꞉godolo ibino hiya꞉hiya꞉ mulu ukui duwatiya꞉ ba꞉gala puya꞉te uwateha꞉pima꞉ deda꞉hana, puya꞉te koko sikulamo da꞉tolamiya꞉ ba꞉gala puya꞉te iya꞉tawaha꞉pima꞉ deda꞉hana, nale ibi hiliyonomatamo hibilo ba꞉tonakomo.
ROM 1:15 Iyo, ba꞉moe ba꞉be mabula, nagodolo ubi konomo bitana nale Loma ko habamo pete la꞉eno habanapa꞉tamo atumu Godokono Hido Tabo kakapolamagima꞉.
ROM 1:16 Ba꞉bema꞉ Godokono Hido Tabo olamagi mabuma꞉ nagodolo hilopo kitanaha꞉, mabu puya꞉te hibima꞉ da꞉midimina꞉, Godote ebeno Taboeno heloamo ibino ka꞉ka꞉ komula꞉lelamema꞉ne, iyo, dopamo Yunapa꞉te ibino ka꞉ka꞉ mula꞉ komo uwatete ba꞉bene Yuha꞉pa꞉te atumu kakuwatema꞉na꞉.
ROM 1:17 Ba꞉ hibila, Hido Tabote ba꞉moe komo behawakalimina, Godote tawakalubi ibino hibima꞉ midi komo kapiyado tuputupupima꞉ midilinako, iyo, tawakaluba꞉te hibima꞉ midi komone tupuimiti kuitita꞉mo ba꞉ba ka꞉na konikulima꞉na꞉, mabu Godokono Bukalo eta tabote ba꞉ma ka꞉na goena, “Puya꞉te Godokono tuputupupima꞉ deda꞉hana, iba꞉te ebe hibima꞉ midi komodo hibi ka꞉ka꞉ kolawema꞉na꞉.”
ROM 1:18 Ba꞉bema꞉ tawakalubino kuba ododili komokomo ba꞉gala ibino tepo ipuwoeno kubakuba ukui, Godote ba꞉bi komo hiliyonomo kanagilamelelamema꞉ ebeno konomo mauba komote Hunu Habane ba꞉ na꞉hawakala, mabu tawakalubino hiya꞉hiya꞉ kuba komate ibi na꞉duhilamena iba꞉te Godokono hibi komo kiya꞉tawahama꞉.
ROM 1:19 Numa꞉la꞉, tawakaluba꞉te ebeno komo hibilo kumima꞉ Godote ya꞉lo tetelo hidohido ukui iba꞉tamo modobolo ikalamiya꞉, ba꞉be mabuma꞉ ebete ebeno hibi komo duhimipa꞉tamo kuba huiya hibinomolo kikalamema꞉ne.
ROM 1:20 Ba꞉ hibila, Godote hopo haba dododiya꞉, ba꞉ba tetene tupuimiti ba꞉ma teta꞉mo puluhuku, tawakaluba꞉te ebe mabuma꞉ ibino baidinomamo kebe netewa komokomo ulamema꞉ modoboha꞉ma꞉ deda꞉hanama꞉, ba꞉bi komo ba꞉ ebeno wiboha꞉ teteno helo komo ba꞉gala ebeno talonanomolo emede komola. Huiyatiya numa꞉la꞉, Godote hopo habanapa꞉tamo ebeno komo eta gabodo modobolo hawakaliminako, ba꞉be gabo ba꞉ iba꞉te ebeno hibi komo ibino tepo ipuwoeno baida꞉mo dumina ba꞉be gabola. Ba꞉bema꞉ hibila, ebete dododiliya꞉ ba꞉bi tawakaluba꞉te ba꞉moe hopo ba꞉gala hopoeno ilina hiliyonomo ulamete ebeno komo ibino tepo ipuwalo ba꞉bo iya꞉tawahana, ba꞉be mabuma꞉ gabote hibilo kitanaha꞉ iba꞉te ibino kuba huiya uwate komone kalahutihoma꞉.
ROM 1:21 Iyo, tawakaluba꞉te Godokono komo ba꞉ba ka꞉na iya꞉tawahuya꞉, huiyatiya iba꞉te ebe hibi Godoma꞉ ga꞉laheno ebe kamilimihonakuiha꞉ ba꞉gala ebetamo kalakala tabo kadipatenakuiha꞉, ba꞉bema꞉ ibino ukuiti ba꞉moe ododiha꞉ komodo daedaenomoma꞉ ba eda꞉halame ibino tepo ipuwoeno kodakoda ukuiti duhuma꞉ ba꞉bo eda꞉halamiya꞉.
ROM 1:22 Ba꞉bene ibi ha꞉kiya ibi iya꞉tawa kokopima꞉ ba ga꞉la huiyatiya daedaema꞉ dito eda꞉huya꞉.
ROM 1:23 Ba꞉be mabuma꞉ iba꞉te emedena emedena tetelo demedenamene ba꞉be Kodawa Godoko adikumi komo miya꞉pate, huiyatiya komo ida꞉da꞉li adikulame komo ba꞉bo tupuimiya꞉, iyo, iba꞉te komo ida꞉da꞉li ibino ha꞉laha apeno holoholonomamo, ba꞉gala komo goegoeno hiya꞉hiya꞉ holoholamo, ba꞉gala komo holaholoeno holoholamo, ba꞉gala komo kaluino holoholamo dito ododiliya꞉.
ROM 1:24 Ba꞉moe ba꞉be mabuma꞉ Godote ibi dito miya꞉paliya꞉, iba꞉te ibino tepo ipuwoeno kuba dalowa꞉ ba hawakalilame, ibi ipuwalo etate etatamo, etate etatamo, koko hilopo komo ibino apa꞉mo kododilinakoma꞉.
ROM 1:25 Ba꞉bema꞉ ba꞉bi tawakalubino kuba komoeno mabu ba꞉ ba꞉ma ka꞉nala, iba꞉te Godokono hibi komone ohobila꞉hate ha꞉da komo kalakalago dito lawiya꞉, ba꞉gala iba꞉te ba꞉moe hopoeno hiya꞉hiya꞉ ilina adikulamema꞉ ida꞉da꞉lino okopima꞉ ba eda꞉ha, huiyatiya ba꞉bi ilina hiliyonomo dododiliya꞉ iba꞉te ba꞉be hibi Kodawa adikumi dito miya꞉puya꞉. A꞉iye! Wadiyala tawakaluba꞉te hibi Godo kapiya emedena emedena tetelo nadikuminakamena꞉! Ba꞉moe tabo ba꞉ hibinomola, ba꞉ba꞉la.
ROM 1:26 Ba꞉bema꞉ hibila, hopo habanapa꞉te hibi Godo adikumi da꞉miya꞉puya꞉, Godote ibi atumu dito kamiya꞉paliya꞉ iba꞉te ibino tepo ipuwalo kebe kubakuba ubi komo demalagidolenama꞉ ba꞉bi hilopo komo kododilinakoma꞉. Ba꞉be mabuma꞉ kamenakamenate ibino awa꞉go ododi komo miya꞉pate huiyatiya komo kamena-kamena gabatamo hilopo komo bododilinaka,
ROM 1:27 ba꞉gala atu gabodo dubate ibino kamenakamenago ododi komo miya꞉pate huiyatiya komo dubatamo hilopo komokomo ba꞉bo ka-ododilinaka, iyo, ba꞉ba꞉te dubu gabatamo kubakuba komo kododilima꞉ ibino tepo ipuwalo koenomoma꞉ eda꞉hana, ba꞉bema꞉ ibino kuba huiyate Godogodone iba꞉tamo modobolo penako.
ROM 1:28 Numa꞉la꞉, tawakaluba꞉te ibino tepo ipuwalo Godokono hibi komo ubiha꞉ma꞉ deda꞉huya꞉, ba꞉bema꞉ Godote ibi dito miya꞉paliya꞉ iba꞉te ibino ukuilo kuba dalowa꞉nomoma꞉ ba eda꞉ha ebeno kukala dito kowakalaminakoma꞉.
ROM 1:29 Ba꞉be mabuma꞉ ibino tepo ipuwalo hiliyonomo hiya꞉hiya꞉ kuba tabotabohonomoma꞉ ba꞉ dito eda꞉huya꞉. Iyo, ba꞉ma ka꞉na ilina konomamo uwate ubi komo, ba꞉gala ibino ukui kuba dalowa꞉ma꞉ midili komo, ba꞉gala komopino ilina mabuma꞉ iba꞉tamo mauba komo, ba꞉gala tawakalubi anakapulame komo, ba꞉gala alaholoho komo, ba꞉gala ha꞉da amihoho komo, ba꞉gala komopino emede komo kubahilame ukui komo, ba꞉moi komate iba꞉godolo tabotabohonomola. Ba꞉bene komopa꞉te pola꞉naha꞉ tetelo iba꞉te ibino komoma꞉ kubakuba tabo bega꞉lanaka,
ROM 1:30 iyo, eta tetelo iba꞉te ha꞉da amiho tabamo komopino komo dito kubahilamenaka. Ba꞉bene iba꞉te Godotamo ba maubahana, komo hiya꞉hiya꞉ tawakalubi iduduputilamelo ibino konomo awagaha ipuwalo ibi ha꞉kiya ibi ba꞉bo wadiya꞉paa꞉latelenaka, ba꞉gala iba꞉te ibino tepo ipuwalo komo uliuli kuba ododili komo boholenaka, ba꞉gala iba꞉te ibino nabi menokobi iba꞉tamo a꞉kapapamila꞉hala꞉.
ROM 1:31 Iyo, iba꞉godolo eta hido ukui kapiyanomote kitalama꞉naha꞉, ba꞉be mabuma꞉ iba꞉te keba tetelo eta komo hibilo kododima꞉ da꞉ga꞉lanaka huiyatiya gala hapulu a꞉kododa꞉la꞉, ba꞉gala iba꞉te owalubi komo awaedawatamo a꞉kihata꞉la꞉ mabu iba꞉godolo malemale puliyanomola.
ROM 1:32 Iba꞉te Godokono tuputupu taboeno komokomo ya꞉lo ba꞉ma ka꞉na iya꞉tawahuya꞉, kebe dawate ba꞉bako kuba komokomo dododilina, ebete hoe huiya modobolo kolawema꞉ne. Huiyatiya iba꞉te ba꞉be komo hibilo emalagidoloheno atu kuba komokomo gala ba ka-ododili, kebe uliuli tawakaluba꞉te ba꞉bi ododili ipuwalo iba꞉go da꞉pekapiyanaka iba꞉te iba꞉tamo ba꞉bema꞉ kalakalahanaka.
ROM 2:1 Huiyatiya naeno mabulubi, ama꞉ hidamo! Ama꞉ ba꞉ma ka꞉na akemalagidolala꞉, na modobola eta lumagino komo anagilamelemema꞉. Hibila, ama꞉ ba꞉ba ka꞉na dewagelemena꞉, ba꞉ba tetelo kuba huiyate ama꞉tamo kopema꞉ne mabu ama꞉ ba꞉ atu kuba komokomo beka-ododilinakata.
ROM 2:2 Ba꞉ hibila, kebe tawakaluba꞉te hiya꞉hiya꞉ kuba dododilinaka, nale ibino komoma꞉ dopamo a꞉goemo, ba꞉bene nale eta tabo ba꞉ma ka꞉na na꞉kagoemo, a iya꞉tawahala Godote ba꞉bakobako kuba ododilipa꞉tamo huiya ikalamema꞉ ibino komo tuputupulu kanagilamelelamema꞉ne.
ROM 2:3 Ba꞉bema꞉ mabulubi, ama꞉ eta lumagino kuba komokomo ba anagilameleme ama꞉le atu komokomo da꞉kododilinaka, ama꞉ daedae ukuilo ba꞉ma ka꞉na akemalagidolala꞉, na modobola, Godokono mauba komote natamo a꞉kapa꞉mene.
ROM 2:4 Numa꞉, ama꞉ ba꞉bako daedae ukui demalagidolomena꞉, diyala, ama꞉le amia꞉no tepo ipuwalo ba꞉ma ka꞉na da꞉ goeomena꞉, “Godote ebeno malemale ipuwalo tete ga꞉ga꞉nomolo kuba ododilipa꞉tamo huiya hibilo kikalamenaha꞉, ba꞉bema꞉ diyala, ebegodolo helo da꞉ kitanaha꞉ natamo kuba huiya kikanamema꞉.” A꞉iye! Godokono malemale komote ama꞉ eba ka꞉na kiya꞉tuminaha꞉, huiyatiya ebeno malemale komote ama꞉ ba꞉ma ka꞉na iya꞉tuminata, ama꞉ ba꞉ma tetenomolo kuba ododili ipuwane kohobigama꞉ mabu galane tetelo ebeno mauba komote hibinomolo kopuluhukuma꞉ne!
ROM 2:5 Huiyatiya ama꞉le kuba ododili komoma꞉ amia꞉no tepo ipuwa na꞉kodakoduiminakata, ba꞉bema꞉ Godokono Ko Hegelalo ebeno konomo mauba komote ebeno tuputupulu anagiya꞉mida komago duluhukumini, amia꞉no kuba huiyate konomoma꞉ keda꞉ma꞉ne.
ROM 2:6 Ba꞉ hibila, ba꞉ba tetelo Godote tawakalubi hiliyonomoeno komo ba anagilamelelame iba꞉tamo modobo huiyanomo ba꞉bo kikalameholema꞉ne.
ROM 2:7 Iyo, puya꞉te hopo habalo ba emedena hidohido komo dododilina, iba꞉te ba꞉be gabodo ibino hibi kalakala ba꞉gala wiboha꞉ ka꞉ka꞉ ba꞉gala awagaha komo Godogodone uwatema꞉ ubi da꞉miya꞉tena, ba꞉bi tawakaluba꞉tamo ebete emedena teteno ka꞉ka꞉ hibinomolo kikalamema꞉ne.
ROM 2:8 Huiyatiya hopo habanapi ipuwalo puya꞉te ibi ha꞉kiya ibi kapiya ba emalagidolena kuba ododili komo ta꞉matalelo Godokono hibi gabo ubiha꞉ma꞉ deda꞉hana, Godote ba꞉bi tawakalubino komo anagilamelelamete ebeno mauba komote iba꞉tamo konomamo kopema꞉ne.
ROM 2:9 Iyo, ba꞉ hibila, puya꞉te kuba komo dododilina, Godote ibi hiliyonomatamo olalati komokomo ba ikalame, iba꞉te temeteme ba꞉bo kiya꞉tawahama꞉na꞉, ba꞉be huiya komote Yunapa꞉tamo dopamo uluhukuti ba꞉bene Yuha꞉pa꞉tamo atumu kakuluhukuma꞉ne.
ROM 2:10 Huiyatiya puya꞉te hidohido komo dododilina, Godote ibi hiliyonomatamo kalakala komo ba꞉gala awagaha komo ba꞉gala hete komo kikalamema꞉ne, ba꞉be huiya komote Yunapa꞉tamo dopamo uluhukuti ba꞉bene Yuha꞉pa꞉tamo atumu galane kakuluhukuma꞉ne.
ROM 2:11 Ba꞉bema꞉ ama꞉ nulia꞉, Godote tawakalubi hiliyonomoeno komokomo kapiya tuputupu gabodo kanagilamelelamema꞉ne.
ROM 2:12 Ba꞉moe ba꞉ eta komola. Godote ebeno Tutumu Tabo komokomo Yunapa꞉tamo Moseseko ipuwado ba ikalame ebete Yuha꞉pa꞉tamo kikalamiya꞉ha꞉, ba꞉bema꞉ Yunapa꞉te ba꞉bi Tutumu ulihote ba iya꞉tawaha iba꞉te da꞉wakalamimina꞉, Godote ebeno Tutumu Tabo komamo ibino komo ba꞉bo kanagilamelelamema꞉ne. Huiyatiya numa꞉, Yuha꞉pa꞉te ba꞉bi Tutumu Tabo ulihoheno da꞉wakalamimina꞉, iba꞉te atumu kuba huiya ba꞉bema꞉ kolawema꞉na꞉, iyo, iba꞉te ibino kuba ododili mabuma꞉ dito koha꞉lahama꞉na꞉.
ROM 2:13 Ba꞉bema꞉ hibila, tawakaluba꞉te Godokono Tutumu Tabo dito dulihomena꞉, ba꞉be komo kapiyado Godote ibi tuputupupima꞉ a꞉kamidila꞉mene. Ao, iba꞉te ebeno Tutumu Tabo hiliyonomamo hibinomolo da꞉papamila꞉hamena꞉, ba꞉ba tetelo ebete ibi ebeno tuputupupima꞉ koka꞉lamima꞉ne.
ROM 2:14 Ba꞉bema꞉ wadiyala ama꞉ Yuha꞉pino komo nemalagidola, iba꞉te Godokono Tutumu Tabo dopamo kulihuya꞉ha꞉, huiyatiya ibino ulihoha꞉ tetelo ibi ipuwalo puya꞉te tuputupu ubi komodo Godokono Tutumu komamo da꞉papamila꞉hanaka, ba꞉ba꞉te ba꞉moe komo behawakalimina, ibi modobola ibi ha꞉kiya ibino tepo ipuwoeno iya꞉tawa komodo hido komo ba꞉gala kuba komo kanagilamema꞉.
ROM 2:15 Ba꞉ hibila, Godote ha꞉kiya Yuha꞉pi hiliyonomoeno tepo ipuwanomamo ebeno Tutumu Tabo ya꞉lo a꞉miya꞉telamiya꞉. Iyo, ibino tepo ipuwoeno mulu ukui komate ba꞉be komo ba꞉ma ka꞉na hawakalimina, keba tetelo ibi ipuwalo etate kuba komo dododimini ebeno tepo ipuwoeno ukuiti ebe kubadawama꞉ ba꞉bo koka꞉mima꞉ne, ba꞉gala keba tetelo ebete tuputupu komo dododimini ebeno tepo ipuwoeno ukuiti ebe tuputupudawama꞉ ba꞉bo koka꞉mima꞉ne.
ROM 2:16 Ba꞉moe ba꞉be mabuma꞉ tete hiliyonomolo na Polote Godokono Hido Tabo olamagi ipuwalo ba꞉moe komo bolamaginakomo, Godokono Ko Hegelalo ebete Ya꞉su Kelisoko ipuwado tawakalubino ugumuili komo hiliyonomo hawakalilamelelamete, Yunapi ba꞉gala Yuha꞉pi ibi hiliyonomoeno komo kapimilo ba꞉bo kanagilamelelamema꞉ne.
ROM 2:17 Ba꞉bema꞉ naeno Yunapi mabulubi, amia꞉no komo keba ka꞉nala꞉ka꞉? Ama꞉ ha꞉kiya ama꞉ awagaha ipuwalo na꞉goenata, “Na Yu lumagila. Iyo, Godote ebeno Tutumu Tabo naeno iniwala꞉tamo ya꞉lo ikalamiya꞉, ba꞉bema꞉ na eta komo ododihino na modobola ka꞉ka꞉ mula꞉ komo kolawema꞉, mabu Godote a Yunapi ebenoma꞉ keda꞉hanama꞉ ya꞉lo uwatiya꞉.”
ROM 2:18 Hibila, ama꞉ gala na꞉kagoenata, “Na Godokono ubi komokomo iya꞉tawanomola, iyo, na ebeno hiya꞉hiya꞉ Tutumu Tabo ba iya꞉tawa, na ha꞉kiya modobola kuba ododi komo ba꞉gala hido ododi komo hidamo kanagilamema꞉.”
ROM 2:19 Ba꞉gala ama꞉ na꞉kagoenata, “Na modobola baidi tamihopi gabo iya꞉tulame, iyo, na ba꞉ alola, puya꞉te du ipuwalo demedehona naeno alote ibi a꞉la꞉minalenako.
ROM 2:20 Ba꞉gala na modobola daedaepi tuputupu gabodo magatale, iyo, nale uliuli ape tawakalubi iya꞉tulamenakomo mabu Mosesekono Tutumu Tabo komate nagodolo ba꞉pola꞉na. Ba꞉moe ba꞉be mabuma꞉ naeno ukui modobola Godokono iya꞉tawa komo ba꞉gala ebeno hibi komo uwatenomo kuwatema꞉.”
ROM 2:21 A꞉iye! Ama꞉ pote komopi iya꞉tulamema꞉ dewagelena huiyatiya ama꞉ ha꞉kiya ama꞉ hidamo kiya꞉tuminaha꞉? Iyo, ama꞉ Godokono Tutumu Tabo tawakalubi ba iya꞉tulame na꞉goenata, “La꞉ komopino ilina pilolo akuwata꞉la꞉,” huiyatiya ama꞉ ba꞉be atu pilo komo a꞉kododinakata!
ROM 2:22 Ba꞉gala ama꞉ na꞉kagoenata, “La꞉ eta dubuino kamena pilolo akalawa꞉la꞉,” huiyatiya ama꞉ ba꞉be atu kuba a꞉kododinakata! Ba꞉gala ama꞉ ida꞉da꞉li adikulame komo konomo kubama꞉ dolamaginaka, huiyatiya ama꞉ ba꞉be tabo olamagi komone tote komopino ida꞉da꞉li adikulameno genamamo diya gabodo na꞉pa꞉gate ba꞉bi ilina pilolo ba꞉bo nuwatelamenakata!
ROM 2:23 Iyo, Godokono Tutumu Tabo komate amia꞉no tawakaluba꞉godolo da꞉pola꞉na, ba꞉be komoma꞉ ama꞉ pote dawagahana ama꞉ ba꞉ ba꞉be lumagilata, huiyatiya ama꞉ ebeno Tutumu hibilo emalagidoleheno da꞉wakalamina ebeno mahilo hopamo ba꞉bo adipotenakata.
ROM 2:24 Ba꞉ hibila, amia꞉no komo kohawakalimima꞉ Godokono Bukalo eta tabote ba꞉ma ka꞉na goena, “La꞉ Yunapino kuba ododili komone Yuha꞉pa꞉te Godokono komoma꞉ kubakuba tabo bega꞉lana!”
ROM 2:25 Ba꞉bema꞉ Yu dawa, keba tetelo ama꞉ Godokono Tutumu Tabo hiliyonomamo hibilo da꞉papamiwatanamena꞉, ba꞉be komodo ama꞉le gudu deha꞉poto tetelo da꞉lawiya꞉la, Godote ba꞉be tama itamida kukaloeno komo hidoma꞉ kogoema꞉ne. Huiyatiya ama꞉ nulia꞉, ama꞉le ebeno komo Tutumu Tabo komamo papamiwataha꞉ma꞉ deda꞉mena꞉, amia꞉no tama itamida komoeno hido komote a꞉kitanamene.
ROM 2:26 Ba꞉gala wadiyala ama꞉ Yuha꞉pino komo nemalagidola. Ibi ipuwalo etate tama itamida kukala laweha꞉ tetelo huiyatiya Godokono komo Tutumu Tabo komamo da꞉papamiwatanamene, aba꞉ hibila꞉ka꞉, Godote ebeno tama itamida laweha꞉ komo emalagidoloheno ebe tuputupudawama꞉ kogoema꞉ne!
ROM 2:27 A꞉iye! Galane Godokono holoholo hapulu ba꞉bako tama itamida kukala laweha꞉ lumagiti la꞉ Yunapi kubapima꞉ kogoema꞉ne, mabu Tutumu Tabo komate la꞉godolo ba pola꞉na, la꞉le tama itamida kukala apa꞉mo uwatelo huiyatiya Godokono komo hiliyonomo kukala dito wakalaminakomata!
ROM 2:28 Ba꞉ hibila, Godokono umi ipuwalo pote hibi Yu lumagima꞉ deda꞉mene, ebete ebeno hunu tama kapiya hiya꞉ma꞉ a꞉kamida꞉-mene, ao, ebeno tepo ipuwate atumu hiya꞉ma꞉ na꞉keda꞉mene.
ROM 2:29 Ba꞉bema꞉ puya꞉te kuba ododili ipuwane ikuliti ibino tepo ipuwalo hiya꞉ tawakalubima꞉ deda꞉hana, ba꞉moi tawakalubi kapiya ba꞉ hibi Yunapila, iyo, ba꞉moe hopolo Godokono komo tawakaluba꞉te hibilo kapola꞉naha꞉. Ba꞉moe ba꞉be mabuma꞉ ebete kebe tutumu tabo dopamo dihatiya꞉ Yu dubate ibino apa꞉mo ebeno kukala kuwatema꞉, ba꞉ma tetelo ebete ba꞉be tutumu tama꞉mo ihatete eta ubi komo ba꞉ma ka꞉na hawakalimina, ebeno Gobogoboeno heloamo tawakalubino tepo ipuwamo eta kukala kihatelamema꞉. Ba꞉bema꞉ hibila, puya꞉te ibino tepo ipuwalo hiya꞉ma꞉ ba꞉ba ka꞉na deda꞉hana, Godote ibi kapiya mililamehole tabamo bawagaminalenakomene, huiyatiya diyala, hopo habanapa꞉te iba꞉tamo da꞉ a꞉kakalakalahamena꞉.
ROM 3:1 Ba꞉bema꞉ naeno tabo ulidawa, diyala, ama꞉le na ba꞉ma ka꞉na da꞉ kiyanameomena꞉, “Kebe lumagiti a Yunapa꞉godolo hawakalate ba꞉bene bahibahi guduino tama itamida kukala da꞉lawiya꞉, ebete ba꞉be komodo bada hido komo ka꞉lawiya꞉? Da꞉ puliyala꞉, iyo, Godokono umi ipuwalo Yunapa꞉godolo eta hido komote da꞉ kitanaha꞉.”
ROM 3:2 Nale huiyatiya na꞉goemo, “Ao, eba ka꞉naha꞉! Godote a Yunapi kowalubinama꞉ komo hiliyonomo hidohido komo atamo ikaa꞉miya꞉, ba꞉bi komo ipuwalo dopo komo ba꞉ ebeno Bukoeno tabo komokomo ikaa꞉me komola.”
ROM 3:3 Ba꞉bene ama꞉le na ba꞉ma ka꞉na gala da꞉kakiyanamemena꞉, “Numa꞉, a Yunapa꞉te Godotamo papamila꞉haheno hibi komo kododilinakuiha꞉, ba꞉bema꞉ ebete dopamo a emedena tetelo kowalubinama꞉ hibilo da꞉goiya꞉, ebete ba꞉be tabo gala a꞉kemalagidolamene, aba꞉ hibila꞉ka꞉?”
ROM 3:4 Nale huiyatiya na꞉kagoemo, “Ao, Godokono komo eba ka꞉naha꞉. Hopo habanapi hiliyonomate ha꞉da amihopima꞉ ba eda꞉hana, ebe kapiyate hibidawanomoma꞉ beda꞉namene, ba꞉bema꞉ ebete kebe tabo dopamo hibilo da꞉goiya꞉ galane ba꞉be tabo a꞉kadikamidala꞉mene. Iyo, Godokono hibi komo hawakalimima꞉ ebeno Bukalo tabote ba꞉ma ka꞉na itana, ‘Godo, ama꞉le kebe tabo komokomo dolamaginaka, galane tetelo tawakaluba꞉te ba꞉bi taboeno hibi komo kumima꞉na꞉, ba꞉bema꞉ puya꞉te ama꞉ ha꞉dadawama꞉ da꞉ga꞉lana, amia꞉no hidohido ododili komate ibino daedae ukui komo ba꞉bo kohawakalilamema꞉ne.’”
ROM 3:5 Ba꞉bema꞉ diyala, eta lumagiti hopo habanapino daedae ukuia꞉mo natamo ba꞉ma ka꞉na da꞉ huiyamene, “Godote aeno kuba ododili mabuma꞉ huiya ikaa꞉mema꞉ modoboha꞉, iyo, ebete ba꞉ba ka꞉na dewagelemene tuputupu komo a꞉kahawakalima꞉mene. Numa꞉, ebete aeno kuba ododili komodo hido tete belawenako ebeno malemale komo hawakaliminomo kohawakalimima꞉. Ba꞉bema꞉ mabu keka꞉ ebete kuba huiya atamo galane ikaa꞉mema꞉ da꞉goena? Ebete ba꞉ba ka꞉na dododimini, ba꞉be komo ba꞉ tuputupu komoha꞉, ebeno kuba ododi komola.”
ROM 3:6 Na huiyatiya ba꞉ma ka꞉na goemo, “A꞉iye! Ama꞉le da꞉gaa꞉, ba꞉be tabo hibi taboha꞉! Godoko ba꞉ tuputupu ododilidawala, ebegodolo eta kuba ododi komo puliyanomola. Ba꞉bema꞉ ebe kapiya modobonomola hopo habanapi hiliyonomoeno komo anagilamelelamete huiya iba꞉tamo ikalame.”
ROM 3:7 Ba꞉bema꞉ diyala, eta daedae lumagiti ba꞉ma ka꞉na da꞉ kagoemene, “Godote naeno ha꞉da amiho komodo hido tete belawenako ebeno hido ododi komo hawakaliminomo kohawakalimima꞉. Iyo, ba꞉ ba꞉ba ka꞉na ebe ha꞉kiya ebe bawagaminanako, ba꞉bema꞉ ebete tawakalubino komo danagilamelelamemene, ba꞉ba tetelo modoboha꞉ ebete na kuba ododidawama꞉ goe!
ROM 3:8 Ba꞉be mabuma꞉ kubaha꞉ a hopo habanapa꞉te aeno ubilo hiya꞉hiya꞉ kuba komokomo bododilinama꞉, mabu Godote aeno kuba ododili ipuwane ebeno hido malemale komo ba uluhukuti atamo kuba huiya a꞉kikaa꞉ma꞉mene.” Ba꞉bema꞉ na Polote na꞉kagoemo, “Ama꞉le kebako kubanomo daedae tabo da꞉gaa꞉, komo ha꞉da amiho tawakaluba꞉te ba꞉bako tabo ba ga꞉la eta kuba tabo ba꞉ma ka꞉na kaga꞉lanaka, nale naeno iya꞉tulame komago iba꞉go kapiyama꞉ eda꞉te atu tabo bekagoenamo. A꞉iye! Ba꞉bi ha꞉da amihopa꞉te ibino kuba tabo mabuma꞉ Godogodone huiya modobolo kuwatema꞉na꞉!”
ROM 3:9 Ba꞉bema꞉ la꞉ Yuha꞉pa꞉te naeno Yunapino komoma꞉ bada ukui na꞉kihateoma? Godokono umi ipuwalo Yunapino ododili komo hidohidodopola꞉ka꞉, ba꞉gala Yuha꞉pino ododili komo kubadopola꞉ka꞉? Ao, eba ka꞉naha꞉! Na ba꞉moe leta dopo hapulu hibi komo ba꞉ma ka꞉na hawakalimimo, Yunapi ba꞉gala Yuha꞉pi, ibi hiliyonomoeno namutudawa ba꞉ kapiyala, ebe ba꞉ ibi ipuwalo ditana ba꞉be kuba ododili komoeno helo komola.
ROM 3:10 Ba꞉be komo hawakalimima꞉ Godokono Bukalo eta tabote ba꞉ma ka꞉na itana, “Hopo haba konomolo kuba ododiha꞉dawa puliyanomola, iyo, eta tuputupudawa kapiyate kalutaha꞉.
ROM 3:11 Ba꞉gala eta hido emalagidolodawa puliyala, iyo, Godokono hibi gabo ohowadidawa kemedenaha꞉.
ROM 3:12 Ba꞉ hibila, hopo habanapi hiliyonomate Godogodone ohobila꞉hate ba꞉ kubanomoma꞉ eda꞉huya꞉, ba꞉bema꞉ hidohido ododilidawa kalutaha꞉, iyo, eta kapiya puliyanomola.
ROM 3:13 “Ba꞉bema꞉ tawakalubino tabo ga꞉la komo ba꞉ ha꞉lahapino bobo huiyala, pote ba꞉be bobo ipuwa da꞉hiya꞉midamene abale kapiya ba꞉bo kumima꞉ne. Iyo, ibino ma꞉lapilate ha꞉da tabo bega꞉lanaka, ba꞉bema꞉ helo kaluino pagu keba ka꞉nala꞉ka꞉, ibino tabo komokomo ba꞉ ba꞉ba ka꞉nala.
ROM 3:14 “Ba꞉ hibila, iba꞉te maubahate ibino tabo ipuwane mela tabo kokonomate pikulinaka,
ROM 3:15 ba꞉gala iba꞉te ibino ubi komo konomamo miya꞉tenaka, gahugahulu tolamelo komopa꞉tamo temeteme ba nikalame komopi dito konanakapulamema꞉.
ROM 3:16 Iyo, iba꞉te kebe hiya꞉hiya꞉ hopamo da꞉tolamenaka, ba꞉bolo tawakalubi ba nekubahilame iba꞉tamo hiya꞉hiya꞉ menemene komo ba꞉bo nikalamenaka.
ROM 3:17 Ba꞉moe komo ba꞉ hibila, ibi hibi tataba emede komo iya꞉tawahaha꞉,
ROM 3:18 ba꞉gala iba꞉te ibino kuba ododili mabuma꞉ Godokono helo komoma꞉ katoletolehonaha꞉.”
ROM 3:19 Ba꞉bema꞉ a ba꞉moe ko komo iya꞉tawahala, kebe tawakaluba꞉te Godokono Tutumu Tabo dopamo dulihuya꞉, ba꞉ba tetene tupuimiti ba꞉bi Tutumu Tabo komate ibino namutudawama꞉ ba꞉ dito ediya꞉. Ba꞉moe ba꞉be mabuma꞉ Godote ibino komo danagilamelelamemene, ba꞉ba tetelo iba꞉te kuba huiya uwatelo ebe duhimima꞉ eta tabo ga꞉lama꞉ a꞉kamodobamena꞉. Iyo, Godote ba꞉ ba꞉ba ka꞉na ba꞉moe hopo konomolo demedehona ba꞉bi Yunapi ba꞉gala Yuha꞉pi ibi hiliyonomatamo ibino kuba huiya modobolo kikalamema꞉ne.
ROM 3:20 Ba꞉bema꞉ hibila, Godote ebeno Tutumu Tabo tawakaluba꞉tamo dikalamiya꞉, ba꞉ba tetelo ebete ukui kihatiya꞉ha꞉ ebete Tutumu ikalame gabodo eta lumagi tuputupudawama꞉ komidima꞉. Ao, ebete ebeno Tutumu Tabo tawakaluba꞉tamo ikalamiya꞉, ibi hiliyonomate ibino kuba ododili komo hidonomamo kiya꞉tawahama꞉.
ROM 3:21 Ba꞉bema꞉ Godote ebeno Tutumu Tabo komamo eta lumagi tuputupudawama꞉ a꞉kamida꞉mene, huiyatiya ebete tawakalubi ebeno tuputupupima꞉ kebe komodo ka꞉midilina, ba꞉ma tetelo ebete ba꞉be komo atamo a꞉hawakalimiya꞉. Numa꞉la꞉, dopamo Mosesete ba꞉be komoma꞉ hibinomolo da꞉goiya꞉ Godokono Tutumu Tabo bukamo ba꞉bo miya꞉tiya꞉, iyo, komo Godokono ukui hawakalimipa꞉te atu komonomoma꞉ kaga꞉lanakuya꞉.
ROM 3:22 Ba꞉be komo ba꞉ ba꞉ma ka꞉nala, puya꞉te Ya꞉su Kelisoko hibima꞉ da꞉midimina꞉, Godote ba꞉be komodo ibi ebeno tuputupupima꞉ komidilima꞉ne. Iyo, ba꞉ma tetelo Godote Yunapi ba꞉gala Yuha꞉pi ibi hiliyonomo kapimilo ba꞉ba ka꞉na ibino hibima꞉ midi komodo owalubilinako,
ROM 3:23 mabu hopo habanapi hiliyonomate kuba komokomo ododiliti ibino hibo gabo ududi komodo Godokono holoholo hapuni muhulunomamo a꞉tolamiya꞉.
ROM 3:24 Huiyatiya iba꞉te Godotamo eta hido komo ododiha꞉ tetelo ebete ebeno malemale ipuwalo Ya꞉su Kelisokono oko komodo ibi tuputupupima꞉ ba꞉bo ka꞉lamiya꞉. Iyo, Godote tawakalubino kuba ododili komoeno helo ipuwane ibi ba꞉ma ka꞉na uluhukulateliya꞉,
ROM 3:25 ibino kuba ododili mabuma꞉ ebete Ya꞉suku hawa꞉goeno malemale ilinama꞉ miditi keha pihigalo ba꞉ dito hoiya꞉. Ba꞉bema꞉ puya꞉te Ya꞉sukunu hoe komo hibima꞉ da꞉midimina꞉, Godote ba꞉be gabodo ibino kuba ododili komo hiliyonomo egebolelamete ba꞉bo kadodoholelamema꞉ne, hibila, ebete ba꞉be gabo bihiduimiya꞉ ebeno tuputupu ododi komo kohawakalimima꞉. Iyo, numa꞉la꞉, Ya꞉suti hopo habamo peheno dopamo puya꞉te demedehonama꞉, Godote ebeno malemale ipuwalo ibino kuba ododili mabuma꞉ huiya iba꞉tamo hibilo kikalamenakuiha꞉,
ROM 3:26 mabu ebe ubila ebeno tuputupu ododi komo a tetelo hibilo hawakaliminomo ba꞉ma ka꞉na kohawakalimima꞉, ebe kapiya tuputupudawama꞉ ba eda꞉na ebete tawakalubi hiliyonomo ipuwalo puya꞉te Ya꞉suku hibima꞉ da꞉midimina꞉ ibi atumu tuputupupima꞉ komidilima꞉ne.
ROM 3:27 Ba꞉bema꞉ ale tuputupupima꞉ eda꞉ha komo ba emalagidolo awagaha komote agodolo akitanala꞉, mabu ale aeno heloamo Godokono Tutumu Tabamo papamila꞉ha gabodo o eta hido ododi komodo owalubi komo kalawiya꞉ha꞉. Ba꞉ hibila, ale aeno hido komo ododiha꞉ tetelo Ya꞉sukunu ododi komo kapiya hibima꞉ da꞉midiya꞉ma꞉, ba꞉be gabodo ale Godokono tuputupupima꞉ eda꞉huya꞉ma꞉,
ROM 3:28 iyo, a ba꞉moe konomo komo iya꞉tawahala, lumagiti hibima꞉ midi komodo tuputupudawama꞉ keda꞉ma꞉ne huiyatiya Godokono Tutumu Tabamo papamiwata komodoha꞉.
ROM 3:29 Ba꞉bema꞉ la꞉eno ukui ba꞉ma ka꞉na kitana, Godoko ba꞉ Yunapi kapiyoeno Godola? Ao, Yuha꞉pi ba꞉gala Yunapi, Godoko ba꞉ ibi hiliyonomoeno kapiya Godola, ba꞉bema꞉ ebete ibi hiliyonomo kapiya gabonomodo tuputupupima꞉ midilinako, ba꞉be gabo ba꞉ Ya꞉suku hibima꞉ midi komola.
ROM 3:31 Ba꞉bema꞉ la꞉ ba꞉ma ka꞉na kemalagidolutama, ale Godokono Tutumu Tabamo papamila꞉ha komo tama꞉mo dito kihatema꞉nema꞉? Ao, eba ka꞉naha꞉. Ale Tutumu Tabamo papamila꞉ha komo ko komonomoma꞉ ga꞉lanama꞉, huiyatiya ale hibima꞉ midi komo kapiyado helo kolawema꞉nema꞉.
ROM 4:1 Ba꞉bema꞉ wadiyala la꞉ Yuha꞉pa꞉te a Yunapino iniwa A꞉ibalahamakono komo nemalagidolala꞉. Ebeno hibima꞉ midi komoma꞉ Godote bada ko komonomo kiya꞉tumiya꞉?
ROM 4:2 Numa꞉la꞉, A꞉ibalahamate kebe hidohido komo kododilinakui, Godote ba꞉bi ododili komodo ebe tuputupudawama꞉ na꞉midiya꞉tale, ebe ha꞉kiya ebe bawagaminuya꞉na꞉. Huiyatiya Godokono umi ipuwalo A꞉ibalahamate ebeno hidohido ododili mabuma꞉ ebe ha꞉kiya ebe awagaminama꞉ modoboha꞉,
ROM 4:3 ba꞉bema꞉ ebeno Bukalo tabote ba꞉ma ka꞉na itana, “Godote A꞉ibalahamakono hibima꞉ midi komo umiti ebe tuputupudawama꞉ ba꞉bo ka꞉miya꞉.”
ROM 4:4 Numa꞉la꞉, kebe dubuti mani oko dowatina, ebete oko namutudawagodone huiya da꞉lawemene, ba꞉be huiya lawe komo ba꞉ namutudawoeno dito ikame komoha꞉. Ao, ba꞉be dubuti oko owati ipuwalo ebeno heloamo modobo huiya ba꞉ a꞉lawe, eta lumagino malemale komodoha꞉.
ROM 4:5 Huiyatiya kebe dubuti Godoko hibima꞉ da꞉midina, ebeno komo hiya꞉la mabu ebete ebeno oko owati heloamo hido huiya lawema꞉ kagoenaha꞉. Ao, ebete Godokono oko owati helo kapiya hibima꞉ ba midina, Godote ebe tuputupudawama꞉ ka꞉milo hido huiya ba꞉bo kikamema꞉ne, mabu hibila, ba꞉be Kodawa iya꞉tawanomola puya꞉te ebetamo papamila꞉haha꞉pima꞉ deda꞉hana, ebete ba꞉bi tawakalubi ibino papamila꞉haha꞉ komo ipuwane uluhukulatelete ibi tuputupupima꞉ komidilima꞉.
ROM 4:6 Ba꞉bema꞉ kebe lumagiti hidohido komo ododiliha꞉ tetelo Godote ebe lawete tuputupudawama꞉ dito da꞉ka꞉mimini, ebete Godokono owalubi mabuma꞉ ko kalakalanomo kolawema꞉ne. Da꞉ibiditi ba꞉be komo ba emalagidolo Godokono Bukamo tabo ba꞉ma ka꞉na miya꞉tiya꞉,
ROM 4:7 “Godote puino kuba ododili komo malemalelo dadodoholelamemene, ibino kalakala bada konomola꞉ka꞉, mabu Godote ibino kuba dito egebolelame!
ROM 4:8 Iyo, Kodawate pokono kuba ododili komo gala emalagidolemeha꞉ma꞉ da꞉goemene, ebeno kalakalate konomoma꞉ keda꞉ma꞉ne.”
ROM 4:9 La꞉eno ukui keba ka꞉nala꞉ka꞉? Godokono ododi ipuwalo duluhukuna, ba꞉be kalakala komo ba꞉ puya꞉te bahibahi gugudino tama itamida kukala da꞉lawiya꞉ ibi kapiyatamo kitana? O ba꞉be kalakalate tama itamida kukala laweha꞉pa꞉tamo atumu ba꞉ka꞉-itana? Numa꞉la꞉, a ya꞉lo a꞉ga꞉lama꞉ ba꞉ma ka꞉na, Godote A꞉ibalahamakono hibima꞉ midi komo umiti ebe tuputupudawama꞉ ba꞉bo ka꞉miya꞉.
ROM 4:10 Ba꞉bema꞉ ba꞉moe tuputupudawama꞉ ka꞉mi komote A꞉ibalahamatamo kebako tetelo kuluhukuya꞉, ebe tama itamida kukala laweha꞉ tetelola꞉ka꞉, o ebete kukala da꞉lawiya꞉ gala hapunila꞉ka꞉? Iyo, ebete kukala laweha꞉ tetelo Godote ebeno hibima꞉ midi komodo ebe tuputupudawama꞉ ka꞉miti, gala hapuni ebeno tuputupudawama꞉ eda꞉ komo hawakalimima꞉, ebete Godokono tabamo papamiwatate tama itamida kukala ba꞉bo lawiya꞉. Ba꞉bema꞉ puya꞉te tama itamida kukala laweha꞉ tetelo Godote ibino hibima꞉ midi komodo ibi tuputupupima꞉ da꞉ka꞉lamina, A꞉ibalahamako ba꞉ ba꞉bi Yuha꞉pi hiliyonomoeno iniwa nabiwila.
ROM 4:12 Ba꞉gala ba꞉moe hopo habalo a puya꞉te tama itamida kukala ya꞉lo da꞉lawiya꞉ma꞉, a Yunapi ipuwalo puya꞉te hibima꞉ midi gabodo da꞉wapata꞉lamena, ibi atumu ba꞉ A꞉ibalahamakono hibi eyoni gugudila. Ba꞉bema꞉ naeno Yunapi mabuluba꞉la꞉, aeno iniwa nabiwi A꞉ibalahamate tama itamida kukala laweha꞉ tetelo hibima꞉ midi ipuwalo keba ka꞉na ka꞉pata꞉nami, wadiyala ale emedena tetelo ba꞉ atumu ba꞉ba ka꞉na ba꞉kawapata꞉lamenama꞉.
ROM 4:13 Ba꞉bene ya꞉lo tetenomolo Godote A꞉ibalahamako ba꞉gala ebeno eyoni gugudi hibilo ba꞉ma ka꞉na goelamiya꞉, ba꞉moe hopo konomo ibinoma꞉ beda꞉namene. Mabu keka꞉ ebete ba꞉ma ka꞉na da꞉goiya꞉? A꞉ibalahamate ebeno Tutumu Tabamo da꞉papamiwatanami ba꞉be mabuma꞉la꞉ka꞉? Ao, ebete A꞉ibalahamakono hibima꞉ midi komodo ebe tuputupudawama꞉ da꞉ka꞉miya꞉, ba꞉be mabuma꞉ ebe ba꞉gala ebeno eyoni gugudi kowalubilinama꞉ ba꞉be tabo bihatiya꞉.
ROM 4:14 Numa꞉la꞉, Godote tawakaluba꞉tamo ikalamema꞉ hibilo da꞉goiya꞉, iba꞉te ebeno Tutumu Tabamo ba papamila꞉hana ba꞉bi hidohido komo ibi ha꞉kiya ibino heloamo duwatemena꞉, ba꞉ba tetelo iba꞉te hibima꞉ midi komo ko komoha꞉ma꞉ koga꞉lama꞉na꞉, iyo, iba꞉te daedae ukui lawete ba꞉ma ka꞉na kemalagidoloma꞉na꞉, aeno helo modobola huiyatiya Godote a owalubima꞉ dopamo da꞉goiya꞉ ba꞉be taboeno helote hibilo kitanaha꞉.
ROM 4:15 Huiyatiya hibila, Godokono Tutumu Tabo komodo iba꞉te ebegodone hidohido komo a꞉kuwata꞉mena꞉, kapiya komonomo kolawema꞉na꞉, ba꞉be komo ba꞉ ibino kuba ododili huiya lawe komola. Ba꞉be mabuma꞉ Godote ebeno Tutumu Tabo tama꞉mo ba miya꞉te eta gabo a꞉hiduimiya꞉ tawakaluba꞉te ebeno hidohido komo kuwatema꞉, mabu Tutumu Tabo pola꞉naha꞉ tetelo tawakalubino papamila꞉haha꞉ mabuma꞉ kuba huiya lawe komote a꞉kitanamene. Numa꞉la꞉, Godote atamo da꞉hiduimiya꞉, ba꞉be gabo ba꞉ hibima꞉ midi gabola, iyo, ba꞉be malemale gabodo a A꞉ibalahamakono eyoni gugudi hiliyonomate Godogodone hidohido komo buwatenakoma꞉. Ba꞉bema꞉ hibila, puya꞉te A꞉ibalahamako ba ta꞉matana hibima꞉ midi komodo Godokono Tutumu Tabamo da꞉papamila꞉hana, A꞉ibalahamako ba꞉ ba꞉bi tawakalubi hiliyonomoeno iniwa nabiwila.
ROM 4:17 Iyo, Godote ebeno Bukalo A꞉ibalahamatamo ba꞉ma ka꞉na goiya꞉, “Nale ama꞉ tawakalubino kapiyuimi hiliyonomoeno iniwama꞉ a꞉midimata,” ba꞉bema꞉ A꞉ibalahamate poko hibima꞉ da꞉midinami, ba꞉be Kodawoeno umi ipuwalo ebe ba꞉ a hibima꞉ midipino iniwa nabiwima꞉ eda꞉na. Numa꞉la꞉, ba꞉be Kodawa Godoko kapiyagodolo helo bitana ha꞉laha tawakalubi ka꞉ka꞉mo kowadiya꞉paa꞉latelema꞉, iyo, ebe kapiya modobola ebeno ubilo hiliyonomo komokomo ebeno tabo kapiyanomamo ododilima꞉, eta ilinamoha꞉.
ROM 4:18 Ba꞉bema꞉ Godote A꞉ibalahamatamo ikamema꞉ da꞉goiya꞉, ebete ba꞉be gudu lawema꞉ gabo umihino huiyatiya Godoko hibima꞉ ba꞉bo midiya꞉. Iyo, ebete hibi komo lawema꞉ tete ga꞉ga꞉lo uliholo demedenami, ba꞉be gabodo ebe tawakalubi kapiyuimi hiliyonomoeno iniwama꞉ ediya꞉, mabu Godote ebetamo dopamo hibilo a꞉goiya꞉, “Amia꞉no galanepa꞉te hiliyonomoma꞉ keda꞉hama꞉na꞉.”
ROM 4:19 Ba꞉bene A꞉ibalahamate 100 gogo tetema꞉ ba eda꞉na, ebeno ape dumiya꞉ ebe hoe tatalila, huiyatiya ebete ba꞉be komo ba꞉gala Selakono hogoha꞉ma꞉ eda꞉ komoma꞉ ukui bilibilima꞉ eda꞉heno hibima꞉ midi ipuwalo kodakodalo la꞉nami.
ROM 4:20 Iyo, Godote ebetamo ikamema꞉ hibilo da꞉goiya꞉, ebete ba꞉be komo hibima꞉ midi gabone kelehegatepanakuiha꞉, ba꞉bema꞉ ebete hibi komo laweheno ebeno tepo ipuwoeno ukui ba kodakoduimi Godoko ba꞉bo milimihonakui.
ROM 4:21 Ebete ebeno tepo ipuwalo iya꞉tawanomo niya꞉tawanami, Godote kebe komo ododima꞉ hibilo da꞉goiya꞉ ebegodolo helo bitana ba꞉be komo kododima꞉.
ROM 4:22 Iyo, ba꞉moe ba꞉be mabuma꞉ Godote A꞉ibalahamakono hibima꞉ midi komodo ebe tuputupudawama꞉ ba꞉bema꞉ ka꞉miya꞉.
ROM 4:23 Huiyatiya eta ko komo ba꞉ ba꞉ma ka꞉nala. A꞉ibalahamakono tuputupudawama꞉ eda꞉ komo Godokono Bukalo ditana, ba꞉be tabote ebe kapiya mabuma꞉ kagoenaha꞉,
ROM 4:24 ao, ba꞉be tabote a mabuma꞉ atumu na꞉kagoena, mabu kebe dawate aeno Kodawa Ya꞉suku hoe ipuwane dadipatiya꞉, a puya꞉te ebe hibima꞉ da꞉midinama꞉ ebete ba꞉be komodo a atumu ebeno tuputupupima꞉ kaka꞉mina.
ROM 4:25 Ba꞉bema꞉ kalakala konomola, mabu Godote aeno kuba ododili komoma꞉ Ya꞉suku ebe anakapumipa꞉tamo ikalamiya꞉, huiyatiya ebete da꞉hoiya꞉ Godote ebe hoe ipuwane gala a꞉kadipatiya꞉, ebete ba꞉be gabodo a ebeno tuputupupima꞉ koka꞉minama꞉.
ROM 5:1 Ba꞉ hibila, aeno hibima꞉ midi komodo Godote a ebeno tuputupupima꞉ a꞉midiya꞉, ba꞉bema꞉ aeno Kodawa Ya꞉su Kelisote a mabuma꞉ dowatiya꞉, ba꞉be oko ipuwado ale Godokoba꞉ gelebadi ipuwalo bemedehonama꞉.
ROM 5:2 Iyo, Kelisote aeno hibima꞉ midi komodo a Godoko tama꞉mo a꞉magahiya꞉ ale ebeno malemale ipuwalo kemedenama꞉. Ba꞉bema꞉ kalakala bada konomola꞉ka꞉, mabu a Godokono hido huiya lawema꞉ uliholo ba latimina, a iya꞉tawahala galane ale ebeno konomo alo ipuwalo hibilo bemedenama꞉.
ROM 5:3 Ba꞉gala ale kebe temeteme ipuwalo kemedenama꞉ ba꞉bi temeteme ipuwalo atumu a na꞉kakalakalahanama꞉, mabu a iya꞉tawahala aeno temeteme ipuwane aeno hibima꞉ midi komoeno kodakodalo la꞉mota꞉hana komote kuluhukuma꞉ne.
ROM 5:4 Ba꞉bene aeno kodakodalo la꞉mota꞉hana komone aeno tepo ipuwalo hidamo apepeho komote kuluhukuma꞉ne. Ba꞉bene aeno tepo ipuwoeno apepeho komone Godokono hido huiya lawema꞉ uliholo latimi komote kuluhukuma꞉ne.
ROM 5:5 Ba꞉ hibila, a ipuwalo kebe lumagiti ba꞉bako uliholo latimi ipuwalo demedena, ebete galane hidonomo komo Godogodone laweha꞉ma꞉ a꞉keda꞉mene, mabu Godote hido ododi komo ya꞉lo ba꞉ma ka꞉na hawakalimiya꞉, ebete ebeno Gobogobo atamo ba꞉ dito ikaa꞉miya꞉, ba꞉bene ba꞉be Gobogobote pete ebeno malemale emalagidolo komo aeno tepo ipuwamo konomamo a꞉pehaminuya꞉.
ROM 5:6 Ba꞉bema꞉ ba꞉moe eta komo numa꞉la꞉. A ha꞉kiya a owalubima꞉ modoboha꞉ma꞉ ba eda꞉hana, Godote ba꞉be komo umia꞉mete hido tetenomoma꞉ goiya꞉, a puya꞉te ebeno ubi komamo papamila꞉haha꞉pima꞉ deda꞉hanama꞉ Kelisote a mabuma꞉ kohoema꞉.
ROM 5:7 Ba꞉ hibila, hopo habanapi ipuwalo eta lumagiti eta lumagino ka꞉ka꞉ komula꞉mema꞉ da꞉hoemene, ba꞉bako komote kapiyakapiya tetenomolo ikulinaka. Iyo, eta lumagiti ebeno tamedawoeno tuputupunomo emede komo ba emalagidolo, diyala, ebete ebeno ka꞉ka꞉ mula꞉mema꞉ da꞉ hoemene.
ROM 5:8 Huiyatiya Godote ebeno malemale atamo da꞉hawakalimiya꞉ bada konomola꞉ka꞉, mabu a tuputupuha꞉pa꞉te kuba ododili ipuwalo ba emedehona Kelisote a hiliyonomo mabuma꞉ hoiya꞉!
ROM 5:9 Numa꞉la꞉, Godote Kelisokono hawi ka꞉ka꞉la꞉ komodo a ebeno tuputupupima꞉ hibilo a꞉midiya꞉, ba꞉bema꞉ a iya꞉tawahanomola ba꞉moe eta komo atumu hibinomoma꞉ keda꞉ma꞉ne, Godote ebeno konomo mauba komo kuba ododilipa꞉tamo da꞉hawakalimimini, ba꞉be atu tetelo ale Kelisoko ipuwalo ka꞉ka꞉ mula꞉ komo kolawema꞉nema꞉!
ROM 5:10 Iyo, a iya꞉tawahala ale dopamo Godokoba꞉ alaholohopima꞉ eda꞉hanamima꞉, huiyatiya ebete ebeno Guduino hoe komodo gabo da꞉hiduimia꞉miya꞉, ba꞉ba tetelo ale ebeno hidohido mabulubima꞉ hibilo ba꞉bo eda꞉huya꞉ma꞉. Ba꞉be mabuma꞉ a iya꞉tawahanomola ba꞉moe eta hido komote hibinomolo kuluhukuma꞉ne, ebete ebeno Gudu Kelisokono ka꞉ka꞉ komodo aeno ka꞉ka꞉ komula꞉lea꞉mema꞉ne!
ROM 5:11 Ba꞉gala eta komo, ale Godoko hibima꞉ midi ipuwalo ba꞉moi hidohido komo ba iya꞉tawahana, aeno konomo kalakalate Ya꞉su Kelisogodolo atumu ba꞉ka-itana, ebe ba꞉ aeno Kodawala, pote ebeno oko owati ipuwalo a Godokono mabulubima꞉ da꞉midiya꞉ ba꞉moe ba꞉be dawala.
ROM 5:12 Ba꞉bema꞉ A꞉da꞉mete Godokono kukala dadikamidaliya꞉, wadiyala ale ba꞉be komo kemalagidoloma꞉nema꞉. Ebe kapiya dubula, huiyatiya ebeno kuba ododi gabodo hoe huiyate hopo habanapi hiliyonomatamo dito uluhukuya꞉, iyo, ba꞉moe mabuma꞉ tawakalubi hiliyonomate koha꞉lahama꞉na꞉ mabu iba꞉te atumu Godokono komo kukala a꞉kawakalamiya꞉.
ROM 5:13 Ba꞉ hibila, Godote Mosesetamo ebeno Tutumu Tabo dikamehuya꞉, ba꞉ba tetene tupuimiti Kelisoko teta꞉mo puluhuku puya꞉te ba꞉bi tabamo papamila꞉haha꞉ma꞉ deda꞉huya꞉, Godote ibino kuba ododili mabuma꞉ iba꞉tamo hoe huiya bikalamenakui, ebete A꞉da꞉metamo ebeno papamiwataha꞉ mabuma꞉ hoe huiya dopamo keba ka꞉na kikamiya꞉ ba꞉ba ka꞉na. Ba꞉gala Godote ibino kuba ododili mabuma꞉ eta komo ba꞉ma ka꞉na kododinakui, ebete ibino kuba ododili komokomo hiliyonomo ebeno Huiya Ikalame Bukamo a꞉miya꞉telamenakui. Huiyatiya numa꞉la꞉, A꞉da꞉meko tetene tupuimiti Moseseko teta꞉mo nuluhuku, tawakaluba꞉godolo Godokono Tutumu Tabo komate kapola꞉namiha꞉ mabu ba꞉be tete ga꞉ga꞉nomolo ebete iba꞉tamo kikalamiya꞉ha꞉. Ba꞉be mabuma꞉ ba꞉ba tetelo demedehonama꞉ ba꞉bi tawakaluba꞉te iya꞉tawaha꞉ma꞉ ba eda꞉hana Godokono hiya꞉hiya꞉ kukala da꞉wakalaminakui, ebete iba꞉tamo hoe huiya kapiya bikalamenakui huiyatiya ebeno Huiya Ikalame Bukamo ebete ibino kuba ododili komokomo kamiya꞉telamenakuiha꞉. Ba꞉ hibila, dopo dubu A꞉da꞉mekono emede komo atamo ba꞉ goma꞉ eda꞉na, galane da꞉pehawakaluya꞉ ba꞉be Kodawa Kelisokono komo ale kiya꞉tawahama꞉.
ROM 5:15 Huiyatiya A꞉da꞉mete atamo dikaa꞉miya꞉ ba꞉gala Godote Kelisoko ipuwado atamo da꞉kikaa꞉miya꞉, ba꞉bi netewa komokomo hiya꞉hiya꞉ ba꞉pola꞉na. Ba꞉ hibila, kapiya dubuino kuba ododi ipuwado hopo habanapi hiliyonomate hoe huiya belawiya꞉, huiyatiya ba꞉moe eta komo atumu hibinomoma꞉ keda꞉na, hiliyonomo tawakaluba꞉te eta kapiya dubu Ya꞉su Kelisokono malemale komodo Godokono ka꞉ka꞉ belawiya꞉, iyo, Godote ebeno malemale konomo iba꞉tamo ba꞉ma ka꞉na hawakalimiya꞉!
ROM 5:16 Numa꞉la꞉, dopo dubuti Godokono kukala dadikamidaliya꞉, Godote ebe kuba ododidawama꞉ ka꞉miti hoe huiya ba꞉bo ikamiya꞉. Huiyatiya ba꞉ma tetelo hiya꞉ komote uluhukuya꞉. A A꞉da꞉mekono gala hapu tawakaluba꞉te komo hiliyonomo tetelo Godokono kukala da꞉wakalaminakuima꞉, Godote atamo hoe huiya ikaa꞉meheno ebeno malemalelo a kuba ododiliha꞉pima꞉ ka꞉miti hibi ka꞉ka꞉ atamo dito ikaa꞉miya꞉.
ROM 5:17 Iyo, ba꞉ hibila, kapiya dubuti kuba dododiya꞉ ba꞉bema꞉ hoe komote hopo habanapino namutudawama꞉ ediya꞉, huiyatiya ba꞉moe eta komo atumu hibinomoma꞉ keda꞉na, eta kapiya dubu Ya꞉su Kelisokono hido ododi komodo komo tawakaluba꞉te hibi ka꞉ka꞉ ipuwalo bemedehonamena꞉. Iyo, puya꞉te Godogodone ebeno konomo malemale ba꞉moe hopolo da꞉lawemena꞉, ba꞉ba꞉te ebeno tuputupupima꞉ ba eda꞉hana kuba ododi komoeno wato kikipo ba꞉bo kolawema꞉na꞉.
ROM 5:18 Ba꞉bema꞉ kapiya dubuino kuba ododi komodo hoe huiyate tawakalubi hiliyonomatamo keba ka꞉na ka꞉piya꞉, ba꞉ ba꞉ba ka꞉na eta kapiya dubuino hidonomo ododi komodo hibi ka꞉ka꞉ komote iba꞉tamo piya꞉, iyo, Godote ibi tuputupupima꞉ ba ka꞉lamina ebeno ka꞉ka꞉ iba꞉tamo dito ikalamena.
ROM 5:19 Ba꞉bema꞉ numa꞉la꞉, kapiya dubuti Godokono tabamo papamiwataha꞉ komodo hiliyonomo tawakaluba꞉te Godokono komo kukala wakalamipima꞉ atumu a꞉keda꞉huya꞉. Huiyatiya eta kapiya dubuti Godotamo hibinomolo da꞉papamiwatuya꞉, ba꞉be dubuino hido ododi komodo Godote gabo bihiduimiya꞉ komo hiliyonomo tawakalubi uwatete ebeno tuputupupima꞉ komidilima꞉.
ROM 5:20 Ba꞉bema꞉ mabu keka꞉ Godote dopamo ebeno Tutumu Tabo tawakaluba꞉tamo dikalamiya꞉? Ba꞉ hibila, ebete ba꞉moe komo ododiya꞉ mabu ebete ubi bihatiya꞉ iba꞉te ebeno hiya꞉hiya꞉ kukala ba wakalamina ibino modoboha꞉ komo ba꞉bo kiya꞉tawahama꞉. Huiyatiya kalakala konomola, keba tetelo hopo habanapino kuba ododili komate hiliyonomoma꞉ deda꞉huya꞉, ba꞉be atu tetenomolo Godokono malemale komote konomamo kuluhukuya꞉ ba꞉bi kuba ododili komo hibinomolo kegebolema꞉.
ROM 5:21 Iyo, ebete ebeno ubi ba꞉ma ka꞉na ihatiya꞉, kuba ododili komate dopamo hoe huiya ipuwado aeno namutudawama꞉ keba ka꞉na kediya꞉, ba꞉ ba꞉ba ka꞉na ba꞉ma tetelo Godokono malemale komote a tuputupupima꞉ midi komodo aeno namutudawama꞉ ba eda꞉na, ale aeno Kodawa Ya꞉su Kelisoko ipuwado wiboha꞉ ka꞉ka꞉ hibinomolo kolawema꞉.
ROM 6:1 Ba꞉bema꞉ diyala, la꞉ ipuwalo etate tabo ba꞉ma ka꞉na da꞉ goemene, “Godote aeno kuba ododili komokomo ebeno malemalelo degebolea꞉mena, ba꞉bema꞉ ale hiya꞉hiya꞉ kuba dododilinakoma꞉, kubaha꞉, mabu ba꞉be gabodo ebete ebeno konomo malemale atamo kohawakalimima꞉ne.”
ROM 6:2 A꞉iye! Ba꞉mako ukui ba꞉ daedaenomo ukui komola! A hibima꞉ midipima꞉ neda꞉huya꞉tale kuba ododili komate agodolo ba꞉ha꞉lahuya꞉na꞉, ba꞉bema꞉ ale kuba ododili ipuwalo gala badama꞉ na꞉kemedenama꞉?
ROM 6:3 La꞉ ba꞉moe komo iya꞉tawahanomola, komopa꞉te a beyamo da꞉wadua꞉tiya꞉, iba꞉te ba꞉be komo Ya꞉su Kelisoko ipuwalo ododiya꞉, ale ebeno hoe komo ipuwamo eba꞉go kapimilo konogomoma꞉.
ROM 6:4 Iyo, aeno beyamo wadua꞉te komodo ale eba꞉go kapimilo ha꞉lahate, ba꞉bene aeno ha꞉laha apa꞉te bobo ipuwamo atumu eba꞉go kapimilo ba꞉ dito nogomuya꞉. Ba꞉be mabuma꞉ Nabiwi Godote ebeno konomo aloeno heloamo Kelisoko hoe ipuwane keba ka꞉na kadipatiya꞉, ebete ba꞉ ba꞉ba ka꞉na a atumu a꞉wadiya꞉paa꞉tiya꞉ ale ebeno uli ka꞉ka꞉go kemedenama꞉.
ROM 6:5 Ba꞉bema꞉ hibila, ale Kelisokono hoe komo ipuwamo eba꞉go kapimilo da꞉nogomuya꞉ma꞉, ba꞉be mabuma꞉ ale atumu ebeno uli ka꞉ka꞉ komamo eba꞉go kapimilo kakamahila꞉halema꞉nema꞉.
ROM 6:6 Iyo, a ba꞉ iya꞉tawahala Kelisote keha pihigalo da꞉hoiya꞉, ba꞉ba tetelo Godote aeno pakala emede komo eba꞉go kapimilo keha pihigamo a꞉pihomolatelea꞉miya꞉, ebete ba꞉be gabodo pakala emede komoeno helo ba anakapumi ale kuba ododili komoeno huiyaha꞉ okopima꞉ gala a꞉keda꞉hanama꞉.
ROM 6:7 Ba꞉ hibila, keba tetelo lumagiti ebeno pakala emede komoma꞉ da꞉hoemene, ba꞉ba tetelo ebete kuba ododili komoeno helo ipuwane hibilo kuluhukuma꞉ne.
ROM 6:8 Ba꞉bema꞉ ale ba꞉moe komo hibima꞉ na꞉midinama꞉, ale Kelisokoba꞉ hibilo da꞉ha꞉lahuya꞉ma꞉, ba꞉be mabuma꞉ ale eba꞉go ebeno ka꞉ka꞉go atumu bemedenama꞉.
ROM 6:9 Iyo, a ba꞉ iya꞉tawahala, Godote Kelisoko hoe ipuwane dadipatiya꞉, ba꞉bema꞉ hoe komoeno helote ebetamo gala kitanaha꞉, ebete emedena tetelo gala a꞉kahoenamene.
ROM 6:10 Ba꞉ hibila, ebete kuba ododili komoeno wato kikipo lawema꞉ kapiya tetenomolo a꞉hoiya꞉, iyo, hoe komoeno helote ebetamo gala a꞉kuluhukunamene, mabu ba꞉ma tetelo ebete Godoko mabuma꞉ uli ka꞉ka꞉go bemedenamene.
ROM 6:11 Ba꞉bema꞉ wadiyala la꞉ ba꞉ atumu la꞉eno kateneno ubi komo kododilinama꞉ ha꞉laha tawakalubima꞉ ba eda꞉hana, la꞉le huiyatiya ba꞉be komo emalagidololo Kelisoko ipuwalo Godoko mabuma꞉ nemedeniya꞉la꞉.
ROM 6:12 Ba꞉ hibila, la꞉eno ha꞉laha apene kateneno hiya꞉hiya꞉ ubi komate a꞉mahila꞉halenaka, huiyatiya ba꞉bi kuba ubi komate la꞉eno namutudawama꞉ akeda꞉la꞉, la꞉le ba꞉bi kuba ododili komamo papamila꞉hakapoma꞉.
ROM 6:13 Iyo, la꞉eno apeno hiliyonomo komokomo ipuwalo eta deha꞉potonomo komamo kateneno eta kuba ubi komamo akapapamila꞉hala꞉. La꞉ huiyatiya la꞉eno ape konomo Godotamo ikamehonomo nikamehonala꞉ ebeno tuputupu komokomo kapiya kododilinama꞉, mabu numa꞉la꞉, la꞉le eta hido komo kapiya kododima꞉ la꞉ dopamo ha꞉lahapimo ba emedena, Godote la꞉ ebeno ka꞉ka꞉mo ba꞉bo wadiya꞉paa꞉lateliya꞉ta.
ROM 6:14 Ba꞉bema꞉ kuba ododi komote la꞉eno namutudawama꞉ gala a꞉keda꞉mene, mabu ba꞉ma tetelo la꞉le Godokono malemale ipuwado ebeno heloamo emedenamata, iyo, kalakala konomola, la꞉ ha꞉kiya la꞉eno heloamo ebeno Tutumu Tabamo papamila꞉hama꞉ dewagelenamima, ba꞉be komote la꞉ ipuwalo ya꞉lo a꞉wibuya꞉.
ROM 6:15 Ba꞉bema꞉ diyala, la꞉ ipuwalo etate tabo ba꞉ma ka꞉na da꞉ goemene, “Wadiyala ale aeno ubilo hiya꞉hiya꞉ kuba komokomo dito bododilinakoma꞉, mabu ale Godokono malemale ipuwalo bemedenama꞉, ebeno Tutumu Tabamo papamila꞉ha komodoha꞉. Ba꞉be mabuma꞉ ale ebeno kukala da꞉wakalamima꞉, kuba huiya komote ebegodone atamo a꞉kapa꞉mene.” A꞉iye! Ba꞉mako ukui ba꞉ daedaenomo ukuila!
ROM 6:16 La꞉ ba꞉ iya꞉tawahala, keba tetelo eta lumagiti ebeno ape ba꞉gala ka꞉ka꞉ konomo eta lumagitamo ikamehonomo dikamehomene, ba꞉ba tetene tupuimiti ebete ba꞉be namutudawa kapiyatamo papamiwatalo ebeno huiyaha꞉ oko bowatihonakomene. Ba꞉bema꞉ la꞉ ba꞉ ba꞉ba ka꞉nala. Keba tetelo la꞉le la꞉eno ka꞉ka꞉ konomo kuba ododili komamo dikamehoma, kuba ododili komote la꞉eno namutudawama꞉ ba eda꞉na, la꞉le hoea꞉mo dito konikulima꞉nemata. Huiyatiya la꞉le la꞉eno ka꞉ka꞉ konomo Godotamo papamila꞉ha komamo dikamehoma, ebete la꞉eno namutudawama꞉ eda꞉te la꞉ tuputupupima꞉ komidilima꞉na꞉ta.
ROM 6:17 Ba꞉bema꞉ wadiyala ale Godotamo kalakala tabo kadipatiya꞉! Ba꞉ hibila, dopamo la꞉le ba꞉ kuba ododili komoeno huiyaha꞉ okopima꞉ eda꞉hanamimata, huiyatiya la꞉ ba꞉be menemene emede ipuwane ikuliti Godokono tutupima꞉ eda꞉huya꞉mata. Iyo, keba tetelo komopa꞉te ebeno uli emede komoma꞉ la꞉ diya꞉tulamiya꞉la, la꞉le la꞉eno tepo ipuwoeno ukui konomamo ba꞉bi komamo papamila꞉halete tuputupu emede komoeno huiyaha꞉ oko ba꞉bo tupuimiya꞉mata.
ROM 6:19 Ba꞉bema꞉ nale ba꞉moe eta komoma꞉ la꞉ hopo habanapino ukui komamo kiyalamemata, mabu la꞉le la꞉eno tepo ipuwalo heloha꞉dopoma꞉ eda꞉hanamata. Dopamo tetelo la꞉eno ape konomo la꞉le kateneno kuba dalowa꞉ ukui komamo ba꞉gala koko kuba ododili komamo ikamehonomo ikamehuya꞉mata, iyo, la꞉ kuba ododili komoeno huiyaha꞉ okopima꞉ eda꞉hanamimata. Ba꞉bema꞉ ba꞉ma tetelo wadiyala la꞉ ba꞉ ba꞉ba ka꞉na tuputupu emede komoeno huiyaha꞉ okopima꞉ ba eda꞉hana, la꞉eno ape konomo Godokono hido-talona oko owati komamo nikamehonala꞉.
ROM 6:20 Numa꞉la꞉, keba tetelo la꞉le kuba ododili komoeno huiyaha꞉ okopima꞉ deda꞉hanamima, ba꞉ba tetelo Godokono tuputupu emede komote la꞉eno namutudawama꞉ keda꞉namiha꞉.
ROM 6:21 Ba꞉bema꞉ ba꞉ma tetelo la꞉le kebe komokomo ba ododili hilopoma꞉ da꞉ga꞉lanama, dopamo la꞉le ba꞉bi kuba komo ba ododili bada hido komo ka꞉lawiuiya꞉ma? A꞉iye! La꞉le eta hido komo kalawiya꞉ha꞉, mabu kuba ododili komone hoe huiya kapiyate uluhukuna!
ROM 6:22 Huiyatiya kalakala konomola, Godote la꞉ kuba ododili komoeno menemene ipuwane uluhukulatelete, ba꞉bene ba꞉ma tetelo la꞉ tutu emede ipuwalo ebeno huiyaha꞉ okopima꞉ eda꞉hanamata. Ba꞉be mabuma꞉ la꞉eno uli emede komone hido noloho gaote ba ikulihona, Godote la꞉ ebeno talona okopima꞉ ba꞉bo koka꞉lamima꞉na꞉ta, ba꞉bene la꞉le ebeno wiboha꞉ ka꞉ka꞉ hibilo kolawema꞉nemata.
ROM 6:23 Ba꞉ hibila, kuba ododili komoeno huiya ba꞉ hoela, huiyatiya kalakala konomola, Godote aeno Kodawa Ya꞉su Kelisoko ipuwalo wiboha꞉ ka꞉ka꞉ malemalelo atamo dito ikaa꞉mena.
ROM 7:1 Naeno hibima꞉ midipi ekaka꞉la꞉, la꞉ hopo habanapino hiya꞉hiya꞉ tutumu tabo diya꞉tawahanama, ba꞉be mabuma꞉ la꞉ ba꞉moe komo iya꞉tawahanomola, eta dubuti ba꞉moe hopolo ba emedena ebeno hopoeno gabomana꞉te kebe tutumu tabo da꞉miya꞉tena ebete ba꞉bi taboeno helo ipuwalo bemedenamene. Ebete huiyatiya da꞉hoemene ba꞉ba tetelo ba꞉bi hiya꞉hiya꞉ tutumu taboeno helote ebegodone kowiboma꞉ne.
ROM 7:2 Ba꞉bema꞉ wadiyala la꞉ ba꞉moe go tabo numa꞉la꞉. Eta kamenoeno awiti ba emedena, ebete eta dubago toma꞉ ba꞉moe hopoeno talona konomote bitana. Huiyatiya ebeno awiti da꞉hoemene, ba꞉ba tetelo ebeno kapiyama꞉ eda꞉ komoeno tutumuti wibote, talonate a꞉kitanamene ebete gala eta dubago kapiyama꞉ kakeda꞉ma꞉.
ROM 7:3 Iyo, ba꞉be kamenoeno awiti ba emedena ebete eta dubutamo da꞉tomene, gabomanino tabo anagiya꞉midadawate ebe dubu pilolo lawe kamenama꞉ kogoema꞉ne, huiyatiya keba tetelo ebeno awiti da꞉hoemene, ba꞉ba tetelo ebete eta dubu da꞉lawemene ba꞉be komo pilo komoma꞉ a꞉keda꞉mene.
ROM 7:4 Ba꞉bema꞉ naeno ekaka꞉la꞉, ba꞉moe go taboeno ipuwate la꞉tamo ba꞉ma ka꞉na itana. Godote Moseseko ipuwado tawakaluba꞉tamo dikalamiya꞉, dopamo la꞉le ba꞉bi Tutumu Tabago kapiyama꞉ eda꞉hanamimata. Huiyatiya la꞉le hibima꞉ midi komodo Tutumu Taboeno helo komoma꞉ ha꞉lahapima꞉ eda꞉huya꞉mata, ba꞉be mabuma꞉ la꞉ ba꞉ma tetelo Kelisokoba꞉ kapiyama꞉ ba eda꞉na la꞉ ebeno ape ipuwalo bemedenamata. Iyo, Godote hoe ipuwane poko dadipatiya꞉, la꞉ ba꞉be Kodawoeno uli kamenama꞉ eda꞉hanamata, Godokono hidohido gaote la꞉godolo konolohonakoma꞉.
ROM 7:5 Ba꞉ hibila, ale dopamo Tutumu Taboeno helo ipuwalo demedenamima꞉, ba꞉ba tetelo ale aeno kateneno ubi komamo dito papamila꞉hanamima꞉. Iyo, Tutumu Tabo komate aeno kuba ododili komo hibilo kaduhilamiya꞉ha꞉, huiyatiya ba꞉bi Tutumu uliho komodo aeno kateneno ubi komate helo gala a꞉kalawiya꞉ komo kuba komokomo kododilinama꞉. Ba꞉bema꞉ ba꞉ ba꞉ba ka꞉na hoe komoeno kuba gaote agodolo ba꞉bo nolohonakuya꞉, aeno kuba ubi komate aeno ape ipuwalo oko konomamo kowatinama꞉.
ROM 7:6 Iyo, dopamo ale ba꞉ ba꞉ba ka꞉na Tutumu Taboeno komodo aeno kuba ododili komoeno huiyaha꞉ okopima꞉ eda꞉hanamima꞉. Ale huiyatiya Kelisoko hibima꞉ midi komodo Tutumu Taboeno helo komoma꞉ da꞉ha꞉lahuya꞉ma꞉, ba꞉bema꞉ ale ibino helo ipuwane ikuliti ba꞉be helote atamo gala a꞉kitanamene, gabomanino tutumuino helote hoe lumagigodone keba ka꞉na ka꞉wibonako ba꞉ba ka꞉na. Ba꞉bema꞉ Mosesete Godokono Bukamo da꞉miya꞉tiya꞉, ale pakala emede tetelo ba꞉bi Tutumu Taboeno helo ipuwalo ba emedena, ale aeno heloamo Godotamo kebe oko kowatihonamima꞉ ba꞉bi oko ipuwalo a kamodobonamiha꞉. Huiyatiya kalakala konomola, ba꞉ma tetelo ale ebeno Gobogoboeno uli emede komodo ebeno heloamo modobo oko hibilo nowatihonama꞉.
ROM 7:7 Ba꞉bema꞉ diyala, la꞉ ipuwalo etate tabo ba꞉ma ka꞉na da꞉ goemene, “Godokono hidohido Tutumu Tabote tawakalubi kuba ododilipima꞉ midilina!” A꞉iye, ba꞉mako ukui ba꞉ daedae ukui komola! Godokono Tutumu Tabote na kuba ododidawama꞉ kamidiniya꞉ha꞉, ao, huiyatiya ebete kebe ododili komo kubama꞉ da꞉goena, ebeno Tutumu Tabote ba꞉bi komokomo na biya꞉tunamiya꞉. Ba꞉bema꞉ Tutumu Tabote na ba꞉ma ka꞉na da꞉kiyanamiya꞉, “Ama꞉le eta lumagino ilina uwatema꞉ ubi akihata꞉la꞉,” na ba꞉bo iya꞉tawuya꞉mo Godote ba꞉be komo ba꞉ kubama꞉ goena.
ROM 7:8 Ba꞉bene ba꞉be kuba ododi komote hido tete dumiya꞉, ebete Godokono Tutumu Tabo komodo na ipuwalo oko owati ba꞉bo tupuimiya꞉ nale hiya꞉hiya꞉ tawakalubino ilina uwatema꞉ ubi kihatenakoma꞉. Ba꞉bema꞉ numa꞉la꞉, keba tetelo eta lumagiti hiya꞉hiya꞉ Tutumu Tabo hibilo iya꞉tawaheno, ba꞉ba tetelo kuba ododi komoeno helote ebegodolo hibilo a꞉kitanamene.
ROM 7:9 Ba꞉be mabuma꞉ naeno komo ba꞉ ba꞉ma ka꞉nala. Dopamo tetelo nale Tutumu Tabo komokomo iya꞉tawaha꞉ma꞉ ba eda꞉na, na modobolo emedenamimo, huiyatiya ba꞉bi Tutumu Tabo komate natamo da꞉pikuliya꞉, ba꞉be atu tetenomolo na ipuwalo kuba ododi ukuiti koma꞉ dediya꞉,
ROM 7:10 na ba꞉bo iya꞉tawuya꞉mo nale Godoko kokalakaluimima꞉ ya꞉lo a꞉hoiya꞉mo, iyo, helo nagodolo kitanaha꞉ ebeno ubi komamo kopapamiwatama꞉. Ba꞉bema꞉ hibila, Godote ebeno Tutumu Tabo natamo ikanamiya꞉ nale hibilo koka꞉ka꞉nama꞉, huiyatiya na niliya mabu ba꞉be Tutumu Tabo komodo hoe komote natamo dito piya꞉,
ROM 7:11 iyo, kuba ododi komote Tutumu Tabo komodo hido tete dumiya꞉, na ha꞉da ba amihoname hibi ka꞉ka꞉ nagodone pilolo ba꞉bo lawiya꞉.
ROM 7:12 Ba꞉bema꞉ Godokono Tutumu Taboeno hiliyonomo hiya꞉hiya꞉ komate talonanomoma꞉ ba꞉gala tuputupunomoma꞉ ba꞉gala hidohidonomoma꞉ deda꞉hana, nale ba꞉be komo ba iya꞉tawana,
ROM 7:13 nale gala ba꞉ma ka꞉na a꞉kolamaginakamo, naeno tepo ipuwoeno hoe komote ba꞉bi Tutumu Tabo komone uluhukuya꞉. Ao, ba꞉bako ukui ba꞉ daedae ukui komola! Ba꞉ hibila, kuba ododi komote Godokono hidohido Tutumu Tabo ipuwado hoe huiya natamo dito ikanamiya꞉, ba꞉bema꞉ kuba ododi komoeno helote Tutumu Tabo komodo na ipuwalo hunamo odolutalo diya꞉tawuya꞉mo, ebeno abalenomo nibote da꞉patiya꞉ nale ba꞉bo niyobuya꞉mo.
ROM 7:14 A ba꞉moe komo iya꞉tawahala, Godokono Tutumu Tabote ebeno ubi komokomo atamo na꞉hawakalilamena, huiyatiya na niliya, na hopo haba lumagima꞉ ba eda꞉na hoe komote na ipuwalo na꞉helona, ba꞉bema꞉ na kuba ododi komoeno huiyaha꞉ okodawama꞉ eda꞉namo.
ROM 7:15 Mabu keka꞉ nale naeno apa꞉mo kuba komokomo dododilinamo? A꞉iye! Naeno ododili komoeno mabu na hibi iya꞉tawaha꞉, iyo, naeno tepo ipuwalo na ubihinola eta kuba komo ododi, huiyatiya nale kebe komo kuba niboma꞉ da꞉goenamo ba꞉bako komokomo gala dito ka-ododilinakomo.
ROM 7:16 Ba꞉bema꞉ numa꞉la꞉, keba tetelo nale apa꞉mo eta kuba komo ba ododita, ba꞉bene naeno tepo ipuwalo ba꞉be komo ododi ubiha꞉ma꞉ deda꞉mo, ba꞉be komote na꞉hawakalimita nale naeno tepo ipuwalo Godokono Tutumu Tabo hidoma꞉ goemo.
ROM 7:17 Ba꞉be mabuma꞉ kuba ododi komoeno helote naeno tepo ipuwoeno ukui komone hibilo kuluhukunaha꞉, ao, kuba ododi komote naeno katene ipuwalo ba emedena, ebeno helote natamo ba꞉bana uluhukuna.
ROM 7:18 Iyo, na iya꞉tawala, eta hido ododi komo kapiyate naeno katene ipuwalo hibilo kitanaha꞉, ba꞉bema꞉ Godote naeno tepo ipuwamo hido ubi komo dihatiya꞉, ba꞉be komote ba itana nagodolo helote kitanaha꞉ ba꞉be komo kododima꞉!
ROM 7:19 A꞉iye! Naeno tepo ipuwalo kebe hido ododi ubi komote ditana nale a꞉kododa꞉lemo, ba꞉gala nagodolo kebe kuba ododiha꞉ ubi komote ditana, nale ba꞉be kuba dito ododinakomo.
ROM 7:20 Ba꞉bema꞉ nale naeno tepo ipuwoeno ubiha꞉ komo naeno kateneno ubilo dito dododinakomo, ba꞉be komote naeno komo ba꞉ma ka꞉na hawakalimina, ba꞉be ododi komoeno helote naeno tepo ipuwane kuluhukunaha꞉. Ao, eba ka꞉naha꞉, huiyatiya kuba ododi komote naeno kateneno ubilo ba emedena, ebeno helote natamo ba꞉bana puluhukuna.
ROM 7:21 Ba꞉moe ba꞉be mabuma꞉ na ba꞉ma ka꞉na iya꞉tawanamo, nale naeno tepo ipuwalo eta hido komo ododima꞉ ubi dihatenakomo, huiyatiya kuba ododi komote naeno kateneno ubi komone atumu ba puluhukuna na ebetamo ba꞉ dito papamiwatanakomo.
ROM 7:22 Ba꞉ hibila, naeno tepo ipuwalo nale Godokono Tutumu Tabamo kopapamiwatama꞉ hibilo na꞉kalakalanamo,
ROM 7:23 huiyatiya naeno katene ipuwalo ditana, ba꞉be komote naeno tepo ipuwoeno hido ukui komago nalaholona. Iyo, ba꞉be helo komote na na꞉matuhunamena, nale kuba ododili komo ipuwane alahula꞉kapoma꞉.
ROM 7:24 A꞉iye, ba꞉moe naeno menemene komo bada konomola꞉ka꞉! Naeno katene ipuwalo ditana ba꞉be helo komote na hoe komamo hibinomolo magatanena, ba꞉bema꞉ naeno ka꞉ka꞉ pote na꞉ka꞉mula꞉namemene?
ROM 7:25 Wadiyala a kalakala konomo Godotamo kadipatiya꞉, mabu ebe kapiya Ka꞉ka꞉ Mula꞉dawama꞉ ba eda꞉na aeno Kodawa Ya꞉su Kelisoko ipuwado aeno ka꞉ka꞉ komula꞉lea꞉mema꞉ne! Ba꞉bema꞉ ba꞉moe komo ba꞉ ko iya꞉tulame komola, nale naeno tepo ipuwoeno heloamo Godokono Tutumu Tabamo ba papamiwatana, huiyatiya nale naeno kateneno ubi komoeno heloamo kuba ododili komoeno tutumamo dito papamiwatanakomo.
ROM 8:1 Ba꞉be mabuma꞉ puya꞉te Ya꞉su Kelisoko ipuwalo tuputupupima꞉ deda꞉hana, eta dawate ibi kubapima꞉ ka꞉lami modoboha꞉.
ROM 8:2 Numa꞉la꞉, dopamo tetelo Godote Moseseko ipuwado atamo dikaa꞉mehuiya꞉ ba꞉bi Tutumu Tabo komate aeno namutudawama꞉ deda꞉nami, ale ba꞉bi kukala ba wakalami hoe huiya ba꞉bema꞉ iya꞉tawahanakuima꞉, huiyatiya Ya꞉su Kelisoko ipuwalo ebeno Gobogobote naeno namutudawama꞉ dediya꞉, ba꞉ba tetelo ebete na pakala namutudawoeno helo ipuwane uluhukunatenete ka꞉ka꞉ natamo ba꞉bo ikanamiya꞉.
ROM 8:3 Ba꞉ hibila, Mosesekono Tutumu Tabo komate atamo helo kikaa꞉miya꞉ha꞉ ale ebeno kukalamo kopapamila꞉hanama꞉, mabu aeno kateneno ubi komate hiya꞉hiya꞉ kuba komo kododilima꞉ a ipuwalo helohelonomoma꞉ eda꞉hanama꞉. Huiyatiya kalakala konomola, Godote aeno modoboha꞉ komo umiti a ba꞉ma ka꞉na owalubiya꞉, ebete ebeno Gudu lumagino apa꞉mo poemiya꞉ ba꞉moe hopamo, ba꞉bema꞉ a tawakaluba꞉te aeno kateneno ubilo kebe kuba komokomo dododilinama꞉, ebete ba꞉bi komoeno hoe huiya a mabuma꞉ a꞉pelawea꞉miya꞉. Iyo, ebete ba꞉moe hopolo atu kateneno ubi komokomo ba piya꞉tawa, huiyatiya ba꞉bi komamo papamiwataheno kuba ododili komoeno helo ba꞉ dito panakapumiya꞉.
ROM 8:4 Ba꞉bema꞉ hibila, Godote ba꞉moe gabodo helo atamo ikaa꞉miya꞉ ale tuputupulu ba emedena ebeno hiliyonomo Tutumu Tabamo kopapamila꞉hanama꞉. Iyo, ba꞉moe ba꞉be mabula ale ba꞉ma tetelo aeno kateneno kuba ubi komamo papamila꞉haheno ebeno Gobogoboeno heloamo bemedenama꞉.
ROM 8:5 Ba꞉ hibila, puya꞉te ibino kateneno kuba ubi komamo da꞉papamila꞉hana ibino kateneno ubi komate ba꞉ ibino namutudawama꞉ eda꞉na, huiyatiya puya꞉te Godokono Gobogoboeno ubi komamo da꞉papamila꞉hana, ebete ibino namutudawama꞉ ba eda꞉na ebeno hido komokomo kododilima꞉ iba꞉tamo hidohido ukui koamo miya꞉telamena.
ROM 8:6 Ba꞉gala kebe lumagiti ebeno kateneno kuba ubi komo ebeno namutudawama꞉ da꞉midina, ebetamo hoe huiyate kopema꞉ne, huiyatiya kebe lumagiti Godokono Gobogobo ebeno namutudawama꞉ da꞉midina, ebete hibi ka꞉ka꞉ ba꞉gala hete kuwatema꞉ne.
ROM 8:7 Ba꞉bema꞉ pote ebeno kateneno kuba ubi komamo da꞉papamiwatanako, ebete Godokoba꞉ alaholodawama꞉ eda꞉na, mabu ebe ubihinola Godokono Tutumu Tabamo papamiwata ba꞉gala ebegodolo helo kitanaha꞉ ba꞉be komo kododima꞉.
ROM 8:8 Ba꞉ hibila, kebe lumagiti ebeno kateneno ubi komamo da꞉papamiwatanako, ebete Godoko kalakaluimima꞉ modoboha꞉!
ROM 8:9 Ba꞉be mabuma꞉ Godokono Gobogobote la꞉ ipuwalo hibilo demedena, la꞉ la꞉eno kateneno ubi komamo a꞉kapapamila꞉hanamata, huiyatiya ebete la꞉ keba ka꞉na ka꞉kiyalametana la꞉ ba꞉ba ka꞉na bemedenamata. Iyo, ba꞉ hibila, Kelisokono Gobogobote kebe lumagigodolo emedenaheno, ba꞉be lumagi ba꞉ Kelisokonoha꞉!
ROM 8:10 Numa꞉la꞉, la꞉ niliya mabu la꞉ ba꞉gala komo hopo habanapi hiliyonomo kuba ododilipima꞉ ba eda꞉hana la꞉eno apete ba꞉bema꞉ hibinomolo koha꞉lahama꞉na꞉. Huiyatiya kalakala konomola, Kelisote la꞉ ipuwalo hibilo demedena, ebeno Gobogobote la꞉tamo hibi ka꞉ka꞉ kikalamema꞉na꞉ta mabu Godote la꞉ ebeno tuputupupima꞉ ya꞉lo a꞉midiliya꞉ta.
ROM 8:11 Iyo, kebe dawate Ya꞉su Kelisoko hoe ipuwane ka꞉ka꞉mo dadipatiya꞉, ebeno Gobogobote la꞉ ipuwalo hibilo demedena, ebete atumu la꞉eno ha꞉laha ape koka꞉kilamema꞉ne mabu ebeno Ka꞉ka꞉ Gobogobote la꞉ ipuwalo hido oko bowatina.
ROM 8:12 Ba꞉bema꞉ naeno ekaka꞉la꞉, wadiyala ale Godokono Gobogoboeno ubi komamo ba꞉papamila꞉hanakoma꞉, aeno kateneno ubi komamoha꞉, mabu numa꞉la꞉, la꞉le ba꞉ma tetelo ebeno ubi komamo papamila꞉hate kateneno kuba ododili komo hibilo danakapulamenakoma la꞉le wiboha꞉ ka꞉ka꞉ ba꞉bo kolawema꞉nemata, huiyatiya la꞉ la꞉eno kateneno ubi komamo da꞉papamila꞉hanakoma hoe huiyate la꞉tamo kopema꞉ne.
ROM 8:14 Ba꞉ hibila, Godokono Gobogobote pui da꞉magatalena, ibi ba꞉ Godokono gugudila,
ROM 8:15 ba꞉bema꞉ Godote la꞉tamo dikalamiya꞉la ba꞉be Talona Gobogobo ipuwado la꞉le tole komo kalawenaha꞉. Iyo, huiyaha꞉ okopa꞉te oko ba owatina ibino namutudawoeno mauba komamo keba ka꞉na ka꞉toletolehona la꞉ eba ka꞉na kewagelenaha꞉, mabu Gobogobote la꞉ hibi gugudima꞉ a꞉midiliya꞉ta, huiyaha꞉ okopima꞉ha꞉. Ba꞉be mabuma꞉ ale ebeno heloamo aeno Nabiwi Godoko Abama꞉ ka꞉milo toetoe tabo ebetamo olamagiminakoma꞉,
ROM 8:16 iyo, hibila, ale toetoe tabo olamagimi tetelo ebeno Gobogobo ba꞉gala aeno gobogobo, iba꞉te ukui kapiyama꞉ eda꞉hate a ebeno hibi gugudima꞉ ba꞉bo ka꞉minaka.
ROM 8:17 Ba꞉bema꞉ la꞉ ba꞉moe eta komo na꞉kuma꞉la꞉, ale Godokono gugudima꞉ hibilo deda꞉hanama꞉, ba꞉be mabuma꞉ galane aeno Nabiwigodone ebeno hidohido komo konomamo konuwatema꞉nema꞉, Kelisote dopamo keba ka꞉na ka꞉nuwatiya꞉ ba꞉ba ka꞉na. Iyo, ale ba꞉moe hopolo Kelisoko mabuma꞉ temeteme komokomo eba꞉go duwatenakoma꞉, ba꞉be mabuma꞉ ale galane tetelo eba꞉go ebeno konomo alo ipuwalo konepola꞉nama꞉nema꞉.
ROM 8:18 Huiyatiya ale ba꞉ma tetelo kebe temeteme ipuwalo demedenama꞉ ba꞉be komo nale ko komoha꞉ma꞉ goemo, mabu Godote galane tetelo kebe konomo alamo a da꞉la꞉minoemene nale ba꞉be hido komo konomamo emalagidolonamo.
ROM 8:19 Numa꞉la꞉, Godote ba꞉moe hopo tupuimi mabu tetelo dododiliya꞉, ba꞉bi hiya꞉hiya꞉ ilina hiliyonomate kapimilo ubi konomamo miya꞉tena Godokono guguda꞉te ebegodone hido huiya hawakala ba uwate ba꞉bo kumima꞉.
ROM 8:20 Ba꞉ hibila, ba꞉bi ilinate ubihinola ba꞉moe hopolo temetema꞉go pola꞉na, huiyatiya ibi mabuma꞉ Godote ebeno ubi ya꞉lo ba꞉ma ka꞉na ihatiya꞉, iba꞉te Saitanakono hoe temeteme ipuwalo tete ga꞉ga꞉nomolo pola꞉nate Godokono gugudino hido aloeno a꞉la꞉mina teta꞉mo ibino temeteme ipuwane konikulima꞉. Iyo, keba tetelo ebeno guguda꞉te ebegodone hido huiya duwatemena꞉, ba꞉moe hopoeno ilina hiliyonomate ba꞉be atu tetenomolo ibino kokonomo menemene ipuwane ikuliti ibino hibi kalakala atumu iba꞉go kapimilo kakuwatema꞉na꞉.
ROM 8:22 Ba꞉bema꞉ a iya꞉tawahanomola, ba꞉moe hopo tupuimi mabuni pete ba꞉ma teta꞉mo puluhuku, da꞉ka꞉ka꞉halena ba꞉bi ilina hiliyonomate koko temetema꞉go ihimina, kamenate gudu ko temetema꞉go keba ka꞉na kalahiminako ba꞉ba ka꞉na.
ROM 8:23 Huiyatiya ba꞉moe hopoeno ilina hiliyonomo kapiyate kihiminaha꞉, ao, a puya꞉te Godokono Gobogobo da꞉lawiya꞉ma꞉ a ba꞉ atumu aeno tepo ipuwalo koko temetema꞉go ihiminama꞉, mabu a ubi konomamo nihatenama꞉ ale aeno Nabiwigodone uliuli apeno wiboha꞉ ka꞉ka꞉ konuwatema꞉. Ba꞉ hibila, ebete ebeno Gobogobo atamo dopamo da꞉poemiya꞉, ba꞉be ododi komodo ebete galane teteno komo ba꞉ma ka꞉na hawakalimiya꞉, keba tetelo ale hibi gugudima꞉ eda꞉ha komote da꞉hawakalamene, ba꞉be atu tetelo ale wiboha꞉ ka꞉keno komo hidohido komo hibinomolo kuwatema꞉nema꞉.
ROM 8:24 Numa꞉la꞉, lumagiti kebe hido komo lawema꞉ uliholo da꞉latimina, ba꞉be komote ebetamo hibilo duluhukumini ebete ba꞉be komo lawema꞉ uliholo gala a꞉kemedenamene mabu ebete ebeno ubi komo ba꞉ a꞉lawi. Huiyatiya a hibima꞉ midipino komo eba ka꞉naha꞉. Ba꞉ hibila, ale aeno hido ka꞉ka꞉ Godogodone lawema꞉ uliholo da꞉latiminamima꞉, ebete ba꞉be komodo aeno ka꞉ka꞉ a꞉mula꞉lea꞉miya꞉, huiyatiya aeno uliholo latimi komote kekelaa꞉menaha꞉. Iyo, ba꞉ba tetelo ale aeno hidonomo komo hibilo kalawiya꞉ha꞉, galane tetelo Godogodone konelawema꞉nema꞉, ba꞉bema꞉ ale tete ga꞉ga꞉nomolo uliholo ba latimina ubiha꞉ma꞉ a꞉keda꞉hama꞉.
ROM 8:26 Ba꞉bema꞉ numa꞉la꞉, ale ba꞉be hido ka꞉keno hiliyonomo komokomo uwateha꞉ma꞉ deda꞉hanama꞉, Godokono Gobogobote ba꞉be komoma꞉ atumu kemalagidolona, ba꞉bema꞉ aeno hiya꞉hiya꞉ modoboha꞉ komokomo ipuwalo ebeno owalubi komo ba꞉ ba꞉ma ka꞉nala. A ubila ale aeno komoma꞉ Godotamo toetoe tabo olamagimima꞉, huiyatiya a ha꞉kiya gabo hibi iya꞉tawaha꞉. Ba꞉be mabuma꞉ Gobogobote aeno modoboha꞉ komoma꞉ ko tepo temeteme ihi komago ebe betoemehonako, huiyatiya hopo habanapa꞉te ibino hiya꞉hiya꞉ tabamo da꞉ga꞉lana ebete ba꞉bako tabamo a꞉kolamaga꞉le, ebete ebeno tabonomamo olamaginako.
ROM 8:27 Ba꞉bema꞉ kalakala konomola, mabu Godote a tawakalubino tepo ipuwoeno ukui iya꞉tawanomola, ba꞉gala ebete ebeno Gobogoboeno ukui atumu iya꞉tawala, iyo, keba tetelo Gobogobote a ebeno tawakalubi mabuma꞉ da꞉toetoenako, ba꞉ba tetelo ebete Godokono ubi komago a hibilo a꞉wadiya꞉paa꞉tenako.
ROM 8:28 Ba꞉bema꞉ a ba꞉moe komo iya꞉tawahala, puya꞉te Godoko malemalelo demalagidolona ba꞉gala ebete pui ka꞉ka꞉lamiya꞉ ebeno ubi komokomo kododilinama꞉, ba꞉bi tawakaluba꞉tamo kebe hiliyonomo temeteme komate dikulihona Godote ba꞉bi komokomo ipuwalo oko ba owatina, ibi mabuma꞉ ebete ba꞉bi temeteme ipuwane hidohido komo buluhukulatelenakomene.
ROM 8:29 Ba꞉ hibila, hopo tupuimiha꞉ tetelo Godote pui ebenoma꞉ keda꞉hanama꞉ iba꞉tamo kukala da꞉miya꞉telamiya꞉, ebete ba꞉be komo ba emalagidolo ba꞉bi atu tawakalubi a꞉kuwatiya꞉ iba꞉te ebeno Guduino holoholonomo kohawakaliminama꞉, iyo, ba꞉be gabodo ebeno badininipala ipuwalo Ya꞉suti dopodawama꞉ ba eda꞉na ebeno komo hiliyonomo ekaka꞉te eba꞉go bemedehonamena꞉.
ROM 8:30 Ba꞉bema꞉ Godote pui ebeno gugudima꞉ keda꞉hanama꞉ ibi duwatiya꞉, ebete ibi a꞉kaka꞉lamiya꞉. Ba꞉bene ebete pui da꞉ka꞉lamiya꞉, ebete ibi ebeno tuputupupima꞉ a꞉kamidiliya꞉. Ba꞉bene ebete pui ebeno tuputupupima꞉ da꞉midiliya꞉, ebete ibi ebeno konomo alo ipuwamo a꞉kamagaheliya꞉ iba꞉te ebeno wiboha꞉ a꞉la꞉mina alo ipuwalo kemedehonama꞉.
ROM 8:31 Ba꞉bema꞉ a ba꞉moi hidohido komo ba emalagidole a bada tabo na꞉ka꞉ga꞉lama꞉? Wadiyala a tabo ba꞉ma ka꞉na koga꞉lama꞉nema꞉, Godote a hapulu hibilo ba꞉la꞉na, ba꞉bema꞉ ago dalaholohona ba꞉ba꞉te wato kikipo a꞉kalawa꞉mena꞉!
ROM 8:32 Numa꞉la꞉, Godote a mabuma꞉ ebeno Gudunomo kokolomiya꞉ha꞉, huiyatiya ebete ebe aeno kuba ododili komoeno hoe huiya lawema꞉ a hiliyonomatamo dito ikaa꞉miya꞉. Iyo, ebete ebeno Gudu atamo dikaa꞉miya꞉, malemale bada konomola꞉ka꞉! Ba꞉bema꞉ ba꞉moe komo ba꞉ hibila, ebete komo hiliyonomo hidohido komo atu malemale komodo atamo dito bikaa꞉menakomene.
ROM 8:33 Ba꞉bema꞉ Godote pui ebeno tawakalubima꞉ keda꞉hanama꞉ duwatiya꞉, pote na꞉ka꞉modobomene ibi kubapima꞉ koka꞉lamima꞉? Eta puliyanomola mabu Godote ibi ebeno tuputupupima꞉ ya꞉lo a꞉ka꞉lamiya꞉,
ROM 8:34 iyo, etate a kubapima꞉ ka꞉mi modoboha꞉ mabu Ya꞉su Kelisote a mabuma꞉ hoiya꞉. Ba꞉bene Godote ebe hoe ipuwane ka꞉ka꞉mo dadipatiya꞉, ba꞉ba tetelo ebete Godokono tu hapuamo nemediya꞉, ba꞉bema꞉ ba꞉ma tetelo kalakala bada konomola꞉ka꞉, ebete aeno modoboha꞉ komokomo Godotamo a꞉wadiya꞉paa꞉latelenako!
ROM 8:35 Ba꞉bema꞉ Kelisokono konomo malemale ipuwane a tama꞉mo miya꞉tema꞉ pote na꞉ka꞉modobomene? Eta puliyanomola! Ba꞉ hibila, komopa꞉te Ya꞉suku mabuma꞉ atamo temeteme dikaa꞉mena, ibino ododili komo ba꞉gala komo hiya꞉hiya꞉ menemene komo ba꞉gala komo ukui bilibili komo, ba꞉bi komokomo hiliyonomate a ebeno malemale komone uluhukua꞉tema꞉ kamodobonaha꞉. Ba꞉gala atumu baa꞉ kape komo ba꞉gala ilinaheno emede komo, olalati komo ba꞉gala hoe komo, ba꞉bi komokomo hiliyonomate modoboha꞉ a Kelisokono malemale ipuwane uluhukua꞉tema꞉!
ROM 8:36 Ba꞉ hibila, Godokono Buka ipuwalo eta tabote aeno komo ba꞉ma ka꞉na hawakalimina, “Godo, tete hiliyonomolo komopa꞉te ama꞉ mabuma꞉ a anakapua꞉mema꞉ ewagelena, iyo, ibi ubila a dabihole sipi-goegoemo kanakapua꞉mema꞉!”
ROM 8:37 Huiyatiya aeno Kodawate a malemalelo konomamo emalagidoloena, ba꞉bema꞉ ale ebe ipuwado ba꞉moi hiliyonomo kuba komo ipuwalo a wato kikipo kolawema꞉nema꞉!
ROM 8:38 Iyo, ba꞉moe komo na iya꞉tawanomola, atamo hoe ikaa꞉me komo ba꞉gala ka꞉ka꞉ ikaa꞉me komo, ba꞉bi hiya꞉hiya꞉ komate aeno Kodawoeno malemale ipuwane a a꞉kuluhukua꞉tea꞉mene. Ba꞉ hibila, Hunu Haboeno nopopi, ba꞉gala Saitanakono helohelo nopopi, ba꞉gala ebeno komo kubakuba gobogobo, iyo, kebe hiya꞉hiya꞉ komate ba꞉ma tetelo dikulihona ba꞉gala galane tetelo dikulihomena꞉,
ROM 8:39 ba꞉gala alomo hunulu da꞉pola꞉na, ba꞉gala haka ipuwalo da꞉pola꞉na, ba꞉gala hopolo da꞉wapata꞉lamena, ba꞉moi gobogobo ba꞉gala ilina hiliyonomo ipuwalo eta kapiyate a Godokono malemale ipuwane uluhukua꞉te modoboha꞉, mabu ba꞉be malemale komo ebete aeno Kodawa Ya꞉su Kelisoko ipuwado atamo hibinomolo ya꞉lo ikaa꞉miya꞉.
ROM 9:1 Ba꞉bema꞉ na Polote Kelisoko ipuwalo hibi tabo goelo ha꞉da tabo kagoitaha꞉, iyo, naeno tepo ipuwoeno mulu ukuiti Godokono Gobogoboeno heloamo naeno hibi komo ba꞉ma ka꞉na hawakalimita,
ROM 9:2 naeno hawi tawakalubi mabuma꞉ naeno tepo ipuwalo konomo temeteme komote wiboha꞉ menemene komago na꞉tabona.
ROM 9:3 Ba꞉bene naeno ubi ba꞉ma ka꞉na itana, gabote modobolo ditanamene, diyala, naeno Yunapino hibima꞉ midiha꞉ mabuma꞉ na kapiyate Godokono mauba ipuwamo da꞉ nopegamo, ba꞉bema꞉ Godote Kelisoko ipuwane na itamidanete Koe Habamo ba a꞉da꞉nane, ebete huiyatiya ibino ka꞉ka꞉ ba꞉bo komula꞉lelamema꞉ne.
ROM 9:4 Ibi ba꞉ Godote dopamo da꞉ka꞉lamiholiya꞉ ba꞉bi Isalaela tawakalubila, ba꞉bema꞉ ebete ibi malemalelo uwatete ebeno gugudima꞉ ba midili ebeno konomo alo iba꞉tamo ba꞉bo hawakalimiya꞉, ba꞉gala ebete ibi kowalubilinama꞉ ibino iniwala꞉tamo ebeno hidohido nopo bimiya꞉tenakui, ba꞉bene ebeno Tutumu Tabo komokomo atumu gala a꞉kikalamiya꞉. Ba꞉bema꞉ iba꞉godolo Godoko hibi adikumi iya꞉tawa komote bitana, ba꞉gala ebete ebeno Bukalo ibino ka꞉ka꞉ komula꞉lema꞉ kebe komokomo hibinomolo dolamaginakui, ba꞉bi hidohido tabo komate iba꞉godolo atumu ba꞉kapola꞉na.
ROM 9:5 Ba꞉bene A꞉ibalahamako ba꞉gala komo koko iniwa nabi, Yunapi ba꞉ ba꞉bi dubuino eyoni gugudila, ba꞉gala kalakala konomola, Kelisote ibi ipuwane hopo lumagino apa꞉mo pehawakaluya꞉. Ba꞉ hibila, Kelisoko ba꞉ Godotela! Iyo, ebeno helo komote komopi hiliyonomoeno helo komokomo na꞉gogolena, ba꞉bema꞉ wadiyala tawakaluba꞉te emedena emedena tetelo ebe na꞉milimiho-nakamena꞉! Ba꞉ba꞉la!
ROM 9:6 La꞉le naeno iya꞉tulame komo hidamo na꞉lawa꞉la꞉, nale Godokono komoma꞉ ba꞉ma ka꞉na kagoitaha꞉, ebe ha꞉da tabo olamagidawama꞉ eda꞉na. Ao, ebete Yunapi emedena emedena tetelo kowalubilinama꞉ hibinomolo dolamagiya꞉, ba꞉be tabo ebete kadikamidaliya꞉ha꞉ huiyatiya ba꞉be taboeno hibi komote a hibima꞉ midipa꞉godolo uluhukuya꞉. Numa꞉la꞉, ebeno umi ipuwalo puya꞉te Yunapino hawa꞉mo da꞉hawakalahalenaka ibi hiliyonomate ebeno hibi Isalaela tawakalubima꞉ keda꞉hanaha꞉.
ROM 9:7 Iyo, katene hapulu A꞉ibalahamakono eyoni gugudima꞉ deda꞉hana, ibi ipuwalo komopa꞉te Godokono hibi gugudima꞉ keda꞉hanaha꞉. Ba꞉moe ba꞉be mabuma꞉ Godote A꞉ibalahamatamo dopamo ba꞉ma ka꞉na goiya꞉, “Amia꞉no gugudi ipuwalo ama꞉le Aisa꞉keko kapiyagodone amia꞉no gugudi hogo hiliyonomo kulamema꞉na꞉ta.”
ROM 9:8 Ba꞉moe taboeno ipuwa ba꞉ ba꞉ma ka꞉nala, puya꞉te kateneno ubi gabodo da꞉hawakalahalemena꞉, iba꞉te Godokono hibi gugudima꞉ a꞉keda꞉hamena꞉. Ao, puya꞉te Godokono hibi owalubi tabodo da꞉hawakalahalemena꞉, ebeno umi ipuwalo ibi kapiyate ebeno hibi gugudima꞉ keda꞉hama꞉na꞉.
ROM 9:9 Ba꞉be mabuma꞉ Godote A꞉ibalahamako kowalubima꞉ ebetamo hibinomolo ba꞉ma ka꞉na goiya꞉, “Na hibi tetenomolo gala da꞉kapemo, ba꞉ba tetelo Selate dubu gudu kalahimima꞉ne.”
ROM 9:10 Ba꞉bema꞉ wadiyala la꞉le ba꞉moe eta komo atumu na꞉kemalagidolala꞉. A Yunapino eta iniwa nabiwi Aisa꞉kete Lebekagodolo dubu gugudi netewa bulamiya꞉, ba꞉bene iba꞉te ebe kapiya ibino nabiwima꞉ ka꞉minakuya꞉.
ROM 9:11 Huiyatiya ba꞉bi nedewale guguda꞉te eta hido komo ba꞉gala eta kuba komo ododilihino, iyo, iba꞉te ibino menokoeno tepo ipuwane hawakalahaheno, ba꞉ba tetelo Godote ebeno ubilo ibi ipuwalo kapiya gudunomo belawiya꞉, ebete ba꞉be gudu ipuwado ebeno ubi komokomo kododilinama꞉. Ba꞉bema꞉ ebete ba꞉be komo kohawakalimima꞉ Lebekatamo na꞉goiya꞉, “Ehomono dubuino helote konomoma꞉ ba eda꞉na, naniwino hiya꞉hiya꞉ gugudino kapiyuimipa꞉te ebetamo huiyaha꞉ okopima꞉ beda꞉hanamena꞉.” Ba꞉be komone a ba꞉moe komo iya꞉tawahala, Godote ebeno ubi komo kapiyado ebeno hibi gugudi uwatenako, ibino ododili komodoha꞉.
ROM 9:13 Iyo, ba꞉be komo kohawakalimima꞉ Godokono Bukalo eta tabote ba꞉ma ka꞉na itana, “Na Ya꞉ikoboko malemalelo ba emalagidolona ebe ba꞉bo lawiya꞉mo, huiyatiya na ebeno naniwi Isoko ubiha꞉ma꞉ ediya꞉mo.”
ROM 9:14 Ba꞉be mabuma꞉ ale Godoko tuputupu komo ododiha꞉dawama꞉ ba꞉ka꞉ga꞉lama꞉? Ao, ba꞉mako ukui ba꞉ daedae ukuila!
ROM 9:15 Godote ebeno komo kohawakalimima꞉ Mosesetamo tabo ba꞉ma ka꞉na goiya꞉, “Na ba꞉ Godotela, ba꞉bema꞉ keba tetelo na ha꞉kiya ubi dihatemo, ba꞉ba tetelo eta lumagitamo malemale kohawakalimima꞉nemo, ba꞉gala keba tetelo naeno ubi ditanamene, na eta lumagi malemalelo ba꞉bo kowalubima꞉nemo.”
ROM 9:16 Ba꞉bema꞉ kapiya ko komonomote bitana, ba꞉be komo ba꞉ Godokono malemale komola. Iyo, lumagiti ha꞉kiya ebeno ubi komodo ba꞉gala ebeno heloamo oko owati komodo eta hido komo Godogodone a꞉kalawa꞉mene, Godokono malemale kapiyado kolawema꞉ne!
ROM 9:17 Numa꞉la꞉, Godokono Bukalo ebete Ko Gawadubu Pa꞉lokono wato kodakoda komoma꞉ ebetamo ba꞉ma ka꞉na goiya꞉, “Nale ha꞉kiya ama꞉ ko gawadubu habamo ihatiya꞉mata, nale ama꞉godone naeno ubi komokomo kododilima꞉. Iyo, nale ama꞉ ipuwado naeno helo hopo habanapa꞉tamo ba hawakalimi, ibi hiliyonomate naeno awagaha mahilo ba꞉bo kiya꞉tawahama꞉na꞉.”
ROM 9:18 Ba꞉bema꞉ ba꞉moe komo ba꞉ hibinomola, Godote ebeno ubilo kapiya lumagitamo malemale ba hawakalimi, eta lumagino wato dito kodakoduimiya꞉ ebeno mauba komote ebetamo kuluhukuma꞉.
ROM 9:19 Ba꞉bema꞉ diyala, la꞉ ipuwalo etate natamo tabo ba꞉ma ka꞉na da꞉ goemene, “Godote ha꞉kiya wato kodakoda ukui eta lumagitamo dikamemene, ebete ba꞉be lumagino kuba ododi mabuma꞉ huiya keba ka꞉na na꞉kikamemene? Ebete ba꞉ba ka꞉na dododimini, ba꞉be komo tuputupu ododi komoha꞉, mabu ebe ha꞉kiya ebeno ubilo wato kodakoda ukui ba꞉be lumagitamo ikame! A꞉iye, hopo lumagigodolo helo kitanaha꞉ Godokono ubi komo duhimima꞉!”
ROM 9:20 Na huiyatiya ba꞉bako tabo goedawatamo na꞉goemo, “Naeno mabulubi, ama꞉ pote ama꞉ ha꞉kiya ama꞉ koma꞉ midilo Godokono ubi komago dolowabeletihuita? Numa꞉, muludawate ebeno ubilo eta kalili gebetamo dododimini, ba꞉ba tetelo kaliliti ebetamo ba꞉mako daedae ukui tabo a꞉kagaa꞉mene, ‘Na ubihinola ba꞉moe holoholamo luta. Mabu keka꞉ ama꞉le na ba꞉ma ka꞉na dododina꞉?’
ROM 9:21 A꞉iye! Kalili ododilidawa ba꞉ mulu iya꞉tawadawala. Ba꞉bema꞉ ebete ebeno ubilo kapiya gebetone eta kalili hido baeno oko kowatima꞉ ododiti, ba꞉gala eta kalili neneno oko kowatima꞉ da꞉ka-ododimini, ba꞉be komo ba꞉ ebeno komola. Eta dawate modoboha꞉ ebe kuba okodawama꞉ goe.”
ROM 9:22 Ba꞉moe go tabote Godokono komo behawakalimita. Ebete ebeno ubilo hopo habanapi hiliyonomo dito ododiliya꞉, ibi ipuwalo komopa꞉te hibima꞉ midiha꞉pima꞉ ba eda꞉hana ebete iba꞉godolo ebeno helo komo ba꞉gala mauba komo kohawakalilamema꞉. Numa꞉la꞉, ba꞉bako tawakaluba꞉te ya꞉lo a꞉hiduya꞉ Godote ibino kuba ododili mabuma꞉ ibi kokubahilamema꞉, huiyatiya tete ga꞉ga꞉nomolo ebete ibi kahawaminadigalenaha꞉ mabu ebeno konomo mauba hawakalimi komote ibi ipuwado kekelamenaha꞉.
ROM 9:23 Ba꞉gala Godote a hibima꞉ midipi aka-ododiya꞉ ebete a ipuwado ebeno konomo alo kohawakalimima꞉, iyo, ebete ya꞉lo tetelo ebeno malemalelo a a꞉hiduia꞉miya꞉ ale ebeno konomo aloeno hidohido dogodogo komo ebegodone konuwatema꞉.
ROM 9:24 Ba꞉bema꞉ hibila, Godote Yunapi ba꞉gala Yuha꞉pi hiliyonomo ipuwalo puya꞉te ebeno gugudima꞉ keda꞉hanama꞉ da꞉ka꞉lamiholiya꞉, a ba꞉ ba꞉bi tawakalubila.
ROM 9:25 Numa꞉la꞉, Godote Yuha꞉pino komo kohawakalimima꞉ ebeno Bukalo ebeno okodawa Hoseyagodone tabo ba꞉ma ka꞉na goiya꞉, “Kebe tawakaluba꞉te naeno tawakalubima꞉ keda꞉hanamiha꞉, nale ibi naeno hibi tawakalubima꞉ koka꞉lamima꞉nemo, ba꞉gala nale dopamo kebe gudu malemalelo kemalagidolonamiha꞉, nale huiyatiya ebe naeno hidonomo guduma꞉ kogoema꞉nemo.
ROM 9:26 Ba꞉bema꞉ na Godote dopamo kebe hoponapi da꞉kiyalamiya꞉mo, ‘La꞉ ba꞉ naeno tawakalubiha꞉,’ ba꞉ma tetelo ibino hoponomolo komopa꞉te iba꞉tamo koga꞉lama꞉na꞉, ‘Emedena emedena tetelo da꞉ka꞉ka꞉namene, la꞉le ba꞉be Kodawa Godokono gugudima꞉ eda꞉hanamata.’”
ROM 9:27 Ba꞉bene Godote ebeno Bukalo ba꞉moe helonomo tabo Aisayagodone ba꞉ma ka꞉na goena, “Isalaela tawakalubino ka꞉lamihole kuititi ba꞉ kehaha꞉ kolomoeno kulili keba ka꞉nala꞉ka꞉, iba꞉te hiliyonomoma꞉ ba꞉ba ka꞉na ba eda꞉hana, huiyatiya ibi ipuwane nale kapiyakapiyanomo uwatete ibino ka꞉ka꞉ komula꞉lelamema꞉nemo.
ROM 9:28 Mabu tete gahugahulu ba꞉ na꞉pe, na Kodawate hopo habanapino komokomo ba anagilamelelame, ibi hiliyonomatamo modobonomo huiya ba꞉bo kikalamema꞉nemo.”
ROM 9:29 Iyo, ba꞉moe tabo hawakalimihino, Aisayate dopamo Godokono Bukalo eta tabo ba꞉ma ka꞉na kagoiya꞉, “Helonomo Kodawate ebeno malemale nanekele atamo hawakalimiha꞉tale, aeno kuba ododili mabuma꞉ ebete a upulenomo bupulia꞉na꞉, iyo, ebete Sodomo haba ba꞉gala Gomola habanapi keba ka꞉na kanakapulamiya꞉, ebete a ba꞉ba ka꞉na ba꞉kubahia꞉mena꞉.”
ROM 9:30 Ba꞉bema꞉ ba꞉moe iya꞉tulame komoeno konomo ipuwa ba꞉ ba꞉ma ka꞉nala. Keba tetelo Yuha꞉pa꞉te Godokono tuputupupima꞉ eda꞉ha gabo ohowadihino, ba꞉ba tetelo huiyatiya Godote ibi uwatete ibino hibima꞉ midi komodo ibi tuputupupima꞉ ba꞉bo midiliya꞉.
ROM 9:31 Huiyatiya Godote dopamo da꞉ka꞉lamiholiya꞉ ba꞉bi Yunapa꞉te Mosesekono Tutumu Tabo hiliyonomo ipuwalo eta helo ikalame tutumu konomamo nipo ohowadiya꞉, iba꞉te ba꞉be tutumu tabamo papamila꞉ha komodo tuputupupima꞉ keda꞉hanama꞉.
ROM 9:32 Mabu keka꞉ iba꞉te kumiya꞉ha꞉? Mabu iba꞉te hibima꞉ midi gabodo kohowadiya꞉ha꞉, iba꞉te huiyatiya kebe komo ibino heloamo dododilinakui ba꞉bi komo ko komonomoma꞉ ba ga꞉la, iba꞉te tuputupupima꞉ eda꞉hama꞉ Godokono nakolalo nato dito nukamidahaliya꞉.
ROM 9:33 Ba꞉be mabuma꞉ Godote ebeno Bukalo Kelisokono komoma꞉ tabo ba꞉ma ka꞉na goena, “Numa꞉la꞉, nale Isalaela tawakalubino Sayono hopamo nato ukamidahaleno nakola bihatiya꞉mo, iyo, ba꞉be nakola ba꞉ nale iba꞉tamo da꞉poemiya꞉mo ba꞉be Hido Okodawala. Ba꞉bema꞉ komo iba꞉te ba꞉be nakolalo nato ukamidahalete ba꞉bo konegudima꞉na꞉, huiyatiya puya꞉te naeno Okodawa hibima꞉ da꞉midimina꞉, iba꞉te hilopo gala a꞉kiya꞉tawahanakamena꞉.”
ROM 10:1 Naeno hibima꞉ midipi ekaka꞉la꞉, naeno Yu tawakaluba꞉te ka꞉ka꞉ mula꞉ komo kolawema꞉ nale ba꞉be komo tepo ipuwalo konomamo ba emalagidolo Godoko ba꞉bema꞉ toemehonakomo.
ROM 10:2 Na ibino komoma꞉ hibi tabonomo la꞉tamo ba꞉ma ka꞉na olamagimo, iba꞉te ibino hiliyonomo komokomo Godotamo ba ododilina ba꞉bo emalagidolonaka ebete iba꞉tamo kokalakalama꞉ne, huiyatiya ibi iya꞉tawahaha꞉ iba꞉te ebeno hibi gabo ya꞉lo dotuya꞉.
ROM 10:3 Iyo, Godote tawakalubi ebeno tuputupupima꞉ kebe gabodo ka꞉midilina, Yunapa꞉te ba꞉be gabodo tolamema꞉ ubiha꞉ma꞉ ba eda꞉ha, ba꞉bema꞉ iba꞉te Godokono ubi komamo papamila꞉haheno ibi ha꞉kiya ibino eta ukui gabo hibi gaboma꞉ ba꞉bo ga꞉luya꞉,
ROM 10:4 ba꞉be gabo ba꞉ Godote ibino iniwala꞉tamo Moseseko ipuwado dikalamiya꞉ ba꞉bi Tutumu Tabamo papamila꞉ha gabola. La꞉ huiyatiya numa꞉la꞉, Kelisokono oko ipuwalo ebete ba꞉be pakala gabo a꞉duhimiya꞉, ba꞉bema꞉ ba꞉ma tetelo ebeno uli gabo kapiyanomote bitana, iyo, puya꞉te ebe hibima꞉ da꞉midina Godote ibi hiliyonomo ebeno tuputupupima꞉ midiliti, iba꞉te ka꞉ka꞉ mula꞉ komo ba꞉bo kolawema꞉na꞉.
ROM 10:5 Ba꞉bema꞉ Godote eta lumagi ebeno Tutumu Tabamo papamiwata komodo tuputupudawama꞉ da꞉ka꞉mimini, Mosesete ba꞉be komo Godokono Bukalo ba꞉ma ka꞉na hawakalimiya꞉, “Pote Godokono hiliyonomo Tutumu Tabamo da꞉papamiwatanako eta kapiya adikanaleheno, Godote ebe tuputupudawama꞉ ka꞉miti hibi ka꞉ka꞉ ebetamo ba꞉bo kikamema꞉ne.” Huiyatiya numa꞉la꞉, a hopo habanapi niliya mabu a ipuwalo ba꞉bako lumagiti kalutaha꞉.
ROM 10:6 Huiyatiya Godote kebe lumagi ebeno hibima꞉ midi komodo tuputupudawama꞉ da꞉ka꞉mimini, ebete ba꞉bako dawoeno komoma꞉ ebeno Bukamo komo tabo komokomo a꞉kamiya꞉tiya꞉. Iyo, ebeno Bukalo dopo tabote ba꞉ma ka꞉na goena, “Hopo lumagi, ama꞉ ba꞉mako tabo tepo ipuwalo akagaa꞉la꞉, ‘Naeno hibi ka꞉ka꞉ konelawema꞉, Hunu Habamo pote na꞉ka꞉nodolomene?’” A꞉iye! Ba꞉moe tabo ba꞉ daedae ukui tabola, mabu hibima꞉ mididawate iya꞉tawala Kelisote Hunu Habane hopo habamo ya꞉lo a꞉pihitiguya꞉!
ROM 10:7 Ba꞉gala atu Buka tabote gala ba꞉ma ka꞉na kagoena, “Hopo lumagi, ama꞉ atumu eta daedae tabo ma kumu akagaa꞉la꞉, ‘Naeno hibi ka꞉ka꞉ konelawema꞉, ha꞉laha tawakalubino hopamo pote na꞉ka꞉nihitigamene?’” Hibima꞉ mididawa, ama꞉ numa꞉, Kelisote ba꞉bamo ya꞉lo nihitigate hoe ipuwane atamo gala ba꞉bo kamahiguya꞉!
ROM 10:8 Ba꞉bema꞉ Godokono Bukalo eta tabote hibima꞉ mididawoeno komoma꞉ ba꞉ma ka꞉na itana, “Naeno ka꞉ka꞉ tabote ya꞉lo puluhukuti ama꞉ tamenomolo bitana, iyo, amia꞉no tepo ipuwalo ba itana ba꞉bo olamaginakata.” Ba꞉ hibila, tawakaluba꞉te Ya꞉suku hibima꞉ komidima꞉ ale iba꞉tamo dolamagiminakoma꞉, ba꞉moe ba꞉be Hido Tabola.
ROM 10:9 Ba꞉bema꞉ Godote Ya꞉suku hoe ipuwane dadipatiya꞉, kebe lumagiti ba꞉be komo ebeno tepo ipuwalo hibima꞉ ba midina, Ya꞉suti Kodawama꞉ deda꞉na ba꞉be komo ebeno tabamo da꞉hawakalimimini, Godote ba꞉be lumagino ka꞉ka꞉ komula꞉mema꞉ne.
ROM 10:10 Ba꞉ hibila, ale hibima꞉ da꞉midinama꞉, Godote a tuputupupima꞉ ba꞉bema꞉ ka꞉mina, ba꞉gala ale aeno hibima꞉ midi komo tabamo da꞉hawakaliminakoma꞉, Godote ba꞉be gabodo aeno ka꞉ka꞉ ba꞉bo mula꞉lea꞉menako.
ROM 10:11 Ba꞉bema꞉ Godokono Bukalo eta tabote ba꞉ma ka꞉na itana, “Puya꞉te ebe hibima꞉ da꞉midimina꞉, ibi hiliyonomate hilopo gala a꞉kiya꞉tawahanakamena꞉.”
ROM 10:12 Numa꞉la꞉, Godote ba꞉moe tabamo tawakalubi hiliyonomoeno komoma꞉ goena, mabu ebeno ododi ipuwalo ebete Yunapi ba꞉gala Yuha꞉pi atu gabodo uwatete kapiya tawakalubima꞉ ba꞉bo midiliya꞉. Iyo, Kodawa Ya꞉suku ba꞉ ibi hiliyonomoeno kapiya Kodawala, ba꞉bema꞉ ibi hiliyonomo ipuwalo puya꞉te ebeno mahilo da꞉ka꞉mimina꞉, ebete ibi hiliyonomatamo hidohido dogodogo komo konomamo kikalamema꞉ne.
ROM 10:13 Ba꞉ hibila, Godote ebeno Bukalo eta tabo gala ba꞉ma ka꞉na kagoena, “Puya꞉te Kodawoeno owalubi komo lawema꞉ ebeno mahilo da꞉ka꞉mimina꞉, Godote ibi hiliyonomoeno ka꞉ka꞉ hibinomolo komula꞉lelamema꞉ne.”
ROM 10:14 Ba꞉bema꞉ wadiyala la꞉ ba꞉moe komo nemalagidolala꞉. Tawakaluba꞉te Kodawa Ya꞉suku hibima꞉ midihino, iba꞉te ebe keba ka꞉na na꞉ka꞉ka꞉mimina꞉ ebete ibino ka꞉ka꞉ komula꞉lelamema꞉? Ba꞉gala iba꞉te ebeno komo ulihoheno ebe hibima꞉ keba ka꞉na na꞉ka꞉midimina꞉? Ba꞉gala komopa꞉te ebeno Hido Tabo iba꞉tamo olamagimihino, iba꞉te keba ka꞉na na꞉kulihomena꞉?
ROM 10:15 Ba꞉gala Godote okopi ebeno heloago oelameheno iba꞉te Hido Tabo keba ka꞉na na꞉ka꞉nolamagimimina꞉? Numa꞉la꞉, ba꞉be komo hawakalimima꞉ ebeno Bukalo eta tabote ba꞉ma ka꞉na itana, “Olalati ipuwalo demedehona, puya꞉te ba꞉bako tawakalubi kowalubilima꞉ Hido Tabo dadahemena꞉, ba꞉bi okopino pelame komo bada hidonomola꞉ka꞉!”
ROM 10:16 Huiyatiya Ya꞉sukunu Hido Tabote Yunapa꞉tamo duluhukuya꞉, komo ibi hiliyonomate ubiha꞉ma꞉ eda꞉huya꞉. Ba꞉bema꞉ eta tetelo Godokono ukui hawakalimidawa Aisayate ebe na꞉goemiya꞉, “O Kodawa, a amia꞉no okopa꞉te tabo dolamagiminakoma꞉ tawakaluba꞉te huiyatiya a꞉kulihala꞉, ibi ipuwalo kapiyakapiyanomate hibima꞉ midinaka!”
ROM 10:17 Ba꞉moe komo ba꞉ hibila, tawakalubino hibima꞉ midi komote Kelisokono Hido Tabo uliho komodo uluhukunako, ba꞉gala Kelisokono tabo hawakalimi komodo iba꞉te ba꞉bo ulihonaka.
ROM 10:18 Ba꞉bema꞉ hibila, Yunapa꞉te Kelisokono tabo ibino galonomamo ba꞉ ba꞉ba ka꞉na ulihuya꞉ huiyatiya kalawiya꞉ha꞉, iyo, Godokono Bukalo eta tabote ibino uliho komo ba꞉ma ka꞉na hawakalimina, “Godote tupuimi mabu tetelo dododiliya꞉, ba꞉bi ilinate ebeno komoma꞉ tabo ba olamagimina, ba꞉be tabote ba꞉moe hopo konomamo ba꞉ dito tuya꞉. Ba꞉bema꞉ muhulu hoponomolo demedehona, ba꞉bi tawakaluba꞉te ebeno tabo komokomo hidamo ya꞉lo ulihuya꞉.”
ROM 10:19 Ba꞉bema꞉ na Polote naeno leta tabo ulihopi la꞉ begoelamemata, la꞉ ba꞉ma ka꞉na kemalagidolutama, Isalaela hopolo demedehona Godokono tabote ba꞉bi Yunapa꞉tamo da꞉ kuluhukuya꞉ha꞉? Ao, iba꞉te hibinomolo ulihote huiyatiya kalawiya꞉ha꞉, mabu ibino hibima꞉ midiha꞉ komo uluhukuhino, dopamo Mosesete ba꞉be komo Godokono Bukalo ba꞉ma ka꞉na hawakalimiya꞉, “Godote na꞉goe, ‘La꞉ Yunapa꞉te pui tawakalubiha꞉ma꞉ da꞉ga꞉lanama, nale la꞉eno haba ba꞉bi Yuha꞉pa꞉tamo dikalamemo, la꞉ ba꞉bema꞉ komaubahama꞉nemata. Iyo, dopamo daedae ukui ipuwalo demedehonama꞉, nale la꞉eno iya꞉tawa komokomo iba꞉tamo dikalamemo, ba꞉be mabuma꞉ la꞉ tepo ipuwalo iba꞉tamo koenomoma꞉ keda꞉hama꞉nemata.’”
ROM 10:20 Ba꞉gala eta tetelo Aisayate toleheno Godokono Bukalo Yuha꞉pino komo gala na꞉kahawakalimiya꞉, “Godote na꞉goe, ‘Na ohowadiniha꞉pa꞉te na unamiya꞉, iyo, nale pema꞉ puya꞉te na katoenamehoniya꞉ha꞉, huiyatiya na iba꞉tamo malemalelo a꞉puluhukuya꞉mo.’”
ROM 10:21 Ebete huiyatiya Isalaela tawakalubino komoma꞉ ba꞉ma ka꞉na kagoiya꞉, “Nale ibino ka꞉ka꞉ komula꞉lelamema꞉, tete ga꞉ga꞉nomolo naeno kokoto iba꞉tamo hogaminalete da꞉la꞉namimo, huiyatiya iba꞉te naeno tabamo papamila꞉haheno wato kodakodahibinomoma꞉ eda꞉hanama꞉.”
ROM 11:1 Ba꞉bema꞉ nale la꞉ begoelamemata, la꞉eno ukui ba꞉ma ka꞉na kitana, Godote ebeno Yu tawakalubino komoma꞉ ukui hiya꞉ma꞉ miditi iba꞉tamo ubiha꞉ma꞉ ba꞉bo kediya꞉? Ao, eba ka꞉naha꞉. Ba꞉ hibila, komo ibi hiliyonomate Kelisoko hibima꞉ kamidinaha꞉, huiyatiya numa꞉la꞉, ba꞉moe atu tetelo komo kapiyakapiyate ebe hibilo lawiya꞉. Ba꞉ma ka꞉na na atumu Yu lumagima꞉ ba keda꞉na huiyatiya hibima꞉ na꞉midinamo, iyo, A꞉ibalahamako ba꞉ naeno iniwa nabiwila, ba꞉gala na Isalaela tawakalubino Beniyaminakono gu ipuwane hawakaluya꞉mo.
ROM 11:2 Ba꞉bema꞉ hibila, Godote ba꞉moe hopo tupuimiha꞉ tetelo puya꞉te ebeno gugudima꞉ keda꞉hanama꞉ ebeno kukala iba꞉tamo da꞉miya꞉telamiya꞉, ba꞉ma tetelo ebete ba꞉bi Isalaela tawakalubi ubiha꞉ma꞉ keda꞉naha꞉. La꞉ iya꞉tawahala, Godokono Bukalo eta tabote keba ka꞉na kitana, iyo, Godote Isalaelanapa꞉tamo kuba huiya ikalamema꞉ Elayate ebe ba toemeho tabo ba꞉ma ka꞉na goiya꞉,
ROM 11:3 “O Kodawa, Isalaela tawakalubino kuba ododili komo ba꞉ kokonomola. Iba꞉te ama꞉ owatidoloeno nakolamo ododili patapata kubahilamete amia꞉no ukui hawakalimipi hiliyonomo ba꞉bo anakapulamiya꞉, ba꞉bema꞉ ibi ipuwalo na kapiyate ba ka꞉ka꞉na iba꞉te atumu na anakapunamema꞉ kewagelena!”
ROM 11:4 Ba꞉bene Godote Elayakono tabo ba huiya na꞉goiya꞉, “Naeno Isalaela tawakalubi ipuwalo ama꞉ kapiyate hibima꞉ midi ipuwalo kemedenaha꞉. Ba꞉ hibila, komo miliya꞉ni tawakalubi hiliyonomate na ya꞉lo miya꞉panete ha꞉da amiho ida꞉da꞉li Ba꞉iliko ibino godoma꞉ ka꞉minaka, huiyatiya Ba꞉iliko adikumiha꞉pi komo sa꞉ba꞉ni taosene tawakaluba꞉te ba꞉pola꞉na, iba꞉te na adikunamenaka. Numa꞉, ba꞉bi hibima꞉ midipino kuititi hiliyoha꞉, huiyatiya nale ibi hidamo anukulamenamo.”
ROM 11:5 Ba꞉bema꞉ Elayako tetelo dopamo duluhukuya꞉, ba꞉ma tetelo ba꞉be atu komote kuluhukuya꞉, komo Yunapi hiliyonomate Godoko ubiha꞉ma꞉ ba eda꞉hana, huiyatiya ibi ipuwalo ebete ebeno malemale komodo kapiyakapiyanomo buwatiya꞉.
ROM 11:6 Ba꞉ hibila, Godote ibi ibino hidohido ododili komodo kuwatiya꞉ha꞉, ao, ebete ibi ebeno malemale komodo ba꞉ dito uwatiya꞉. Numa꞉la꞉, ba꞉moe hopolo oko namutuluba꞉te hido huiya hidohido okopa꞉tamo ba ikalamena huiyatiya kuba huiya kubapa꞉tamo ikalamenaka, huiyatiya Godokono komo eba ka꞉naha꞉, ebete ebeno hido komo a kuba ododilipi hiliyonomatamo dito ba ikaa꞉mena ebeno hibi malemale komo ba꞉ma ka꞉na hawakaliminako.
ROM 11:7 Ba꞉bema꞉ ba꞉moe komoeno ipuwa keba ka꞉nala꞉ka꞉? Ba꞉ hibila, Isalaela tawakaluba꞉te ibi ha꞉kiya ibino heloamo Godogodone hido komo lawema꞉ ba ewagelena huiyatiya iba꞉te gabo nipo ohowadiya꞉. Ba꞉bene ibi ipuwalo Godote pui ebeno gugudima꞉ keda꞉hanama꞉ dopamo da꞉ka꞉lamiholiya꞉, ba꞉bi kapiyakapiyanomate hibi komo ba lawe, huiyatiya Godote komo Yunapi hiliyonomoeno galo ba꞉ dito muhilamelelamiya꞉ iba꞉te ebeno tabo ulihokapoma꞉.
ROM 11:8 Iyo, ebeno Bukalo eta tabote ibino komo ba꞉ma ka꞉na hawakalimina, “Godote iba꞉tamo u laha komo bikalamiya꞉, ba꞉bema꞉ ya꞉lo tetene tupuimiti ba꞉ma teta꞉mo puluhuku, iba꞉te ibino baida꞉mo Godokono hibi komo kuminakuiha꞉, ba꞉gala iba꞉te ibino galamo ebeno tabo kulihonakuiha꞉.”
ROM 11:9 Ba꞉gala eta tetelo Da꞉ibiditi Godokono Bukalo Yunapino komoma꞉ tabo ba꞉ma ka꞉na kagoiya꞉, “Iba꞉te ukui bilibilihino poko baa꞉ ba nahuta, wadiyala Godote ibino kuba huiya iba꞉tamo nikalama꞉mene, iyo, iba꞉te ebeno gubi ipuwamo ba nigudi, kubanomamo ba꞉bo na꞉nela꞉wa꞉hamena꞉.
ROM 11:10 Ba꞉bene ibino baiditi na꞉duhulama꞉mena꞉, iba꞉te ebeno hido komo umikapoma꞉, ba꞉gala menemene komo ipuwalo ba emedehona, wadiyala iba꞉te koko temetema꞉go na꞉wapata꞉lamenamena꞉.”
ROM 11:11 Ba꞉bema꞉ nale la꞉ eta komoma꞉ kagoelamemata. La꞉eno ukui ba꞉ma ka꞉na kitana, Yunapa꞉te hibima꞉ midi ipuwalo nato da꞉nukamidahaliya꞉, Godote ba꞉be mabuma꞉ ibi gunima꞉mo dito kihilatiliya꞉ha꞉ iba꞉te emedena emedena tetelo ebegodone muhulunomolo kopola꞉nama꞉? Ao, eba ka꞉naha꞉! Numa꞉la꞉, Yunapino hibo gabo ududi komodo Godokono ka꞉ka꞉ mula꞉ komote Yuha꞉pa꞉tamo piya꞉. Ba꞉bema꞉ Yunapa꞉te ba꞉bi muhulupino hibi kalakala komo dumimina꞉, diyala, iba꞉te ba꞉be komoma꞉ maubatepahalete Godotamo da꞉ ohobila꞉mena꞉, ba꞉bene ibino kalakala atumu ebegodone kakalawema꞉na꞉.
ROM 11:12 Ba꞉ hibila, keba tetelo Isalaela tawakaluba꞉te hibi gabo da꞉miya꞉puya꞉, komo hiya꞉hiya꞉ hopo tawakaluba꞉te gabo ba꞉bo umiya꞉ Godogodone hidohido komo kuwatema꞉. Iyo, Yunapino hibima꞉ midiha꞉ komone iba꞉te kebe komokomo katulateliya꞉, Yuha꞉pa꞉te ba꞉bi atu komokomo ba꞉ dito uwatiya꞉, ba꞉bema꞉ ibino kalakala komote ba꞉ma tetelo konomoma꞉ eda꞉na. Huiyatiya Yunapa꞉te ibino ka꞉ka꞉ mula꞉ komo atumu da꞉kalawemena꞉, aeno kalakala bada konomola꞉ka꞉ mabu a hibima꞉ midipino gala hapuino kalakalate ba꞉ma teteno kalakala konegogoloma꞉ne!
ROM 11:13 Ba꞉bema꞉ na Polote ba꞉moe eta tabo la꞉ Yuha꞉pa꞉tamo goemo, ba꞉ hibila, Godokono oelamepi ipuwalo ebete na la꞉ mabuma꞉ a꞉laweniya꞉. Ba꞉be oko owati komoma꞉ nagodolo ko kalakalanomote itana,
ROM 11:14 mabu naeno Yu tawakalubinomate la꞉ Yuha꞉pino ka꞉ka꞉ muleno hibi kalakala dumilamemena꞉, diyala, iba꞉te ba꞉be komoma꞉ maubatepahalete Godotamo da꞉ ohobila꞉mena꞉, ba꞉bene ibino kalakala komo ebegodone atumu kakalawema꞉na꞉. Ba꞉bema꞉ kalakala konomola, nale oko Yuha꞉pa꞉tamo ba owatina, ba꞉be atu oko ipuwalo gabote da꞉ itanamene Yunapino ka꞉ka꞉ mula꞉ komote iba꞉tamo naeno oko ipuwado kopema꞉.
ROM 11:15 Numa꞉la꞉, Godote Yunapi tama꞉mo ba miya꞉ta꞉tepa, huiyatiya ba꞉moe hopo haboeno Yuha꞉pino hido tetete ba꞉bo uluhukuya꞉ iba꞉te Godokoba꞉ hidohido mabulubima꞉ gala kakeda꞉hama꞉. Ba꞉bema꞉ galane tetelo Godote ebeno Yunapi gala da꞉kuwatemene, kalakala bada konomola꞉ka꞉, mabu puya꞉te ba꞉ma tetelo da꞉ha꞉lahana ba꞉ba꞉te ka꞉ka꞉mo komahila꞉hama꞉na꞉!
ROM 11:16 Numa꞉la꞉, keba tetelo lumagiti palawa baa꞉ hapu talonama꞉ miditi Godotamo dikamemene, ba꞉ba tetelo ba꞉be baa꞉ mumuhiyanomote Godokonoma꞉ keda꞉ma꞉ne. Ba꞉gala eta lumagiti hido gao keha talonama꞉ miditi Godotamo dikamemene, ba꞉be kehoeno ape konomote ebeno gedawa ba꞉gala hahago Godokono talona ilinama꞉ keda꞉ma꞉ne.
ROM 11:17 Ba꞉bema꞉ la꞉ ba꞉moe eta go tabo nemalagidolala꞉. Eta dawate hido olibi gao keha ebeno genama tama꞉mo dito amiya꞉. Ba꞉bene ebete ba꞉be kehoeno komo gedawa iya꞉hiliti, tumulu da꞉la꞉nuya꞉ ba꞉be eta olibi gao kehatamo tote gedawa kapiya nitamidate, gala kapete tumu kehoeno gedawa dopo kehoeno apa꞉mo dito pemowatimiya꞉, iba꞉te atu ka꞉ka꞉go ba pola꞉na hidohido gaote kapimilo konolohonakoma꞉. Ba꞉bema꞉ la꞉ Yuha꞉pa꞉te Godoko hibima꞉ da꞉midinama, la꞉eno komo ba꞉ ba꞉ba ka꞉nala. Godote la꞉ malemalelo uwatete Yunapino ka꞉ka꞉ mabamo a꞉pemowatilamiya꞉ta, la꞉le iba꞉go kapimilo ebeno hidohido komokomo kalakalago kuwatenakoma꞉.
ROM 11:18 La꞉ huiyatiya hidamo! Godote la꞉tamo haba ikalamema꞉ goelo komo Yunapino gedawa dito diya꞉hiliya꞉, la꞉ ha꞉kiya ibino olalati komoma꞉ akawagahala꞉. A꞉iye! La꞉ ba꞉ gedawanomolata, la꞉ kehoeno hibi ka꞉ka꞉ mabuha꞉! Kehoeno hahate la꞉ gedawatamo ka꞉ka꞉ bikalamenata, huiyatiya la꞉le hahatamo eta hido komo kikalamenaha꞉.
ROM 11:19 Ba꞉bema꞉ diyala, la꞉ ipuwalo etate naeno tabo ba huiya ba꞉ma ka꞉na da꞉ goemene, “Kalakala konomola, haba natamo ikaname mabuma꞉ Godote komo Yunapino gedawa dito iya꞉hiliya꞉.”
ROM 11:20 Ba꞉bema꞉ nale ba꞉be lumagitamo kohuiyama꞉nemo, “Amia꞉no tabo ba꞉ hibila, huiyatiya hidamo! Ama꞉ Godoko tolemelo ama꞉ ha꞉kiya akawagahala꞉, mabu puya꞉te dopamo hibima꞉ midiha꞉ma꞉ deda꞉hanama꞉ ebete ibi dito iya꞉hiliya꞉, ba꞉bene ama꞉ amia꞉no hibima꞉ midi komo kapiyado ibino habalo la꞉nata.
ROM 11:21 Ba꞉ hibila, dopamo Godote komo gedawa ibino hibima꞉ midiha꞉ mabuma꞉ kokololamiya꞉ha꞉, ba꞉bema꞉ ama꞉ hibima꞉ midiha꞉ma꞉ deda꞉mena꞉, ebete ama꞉ atumu ba꞉ dito kakitamidama꞉na꞉ta!”
ROM 11:22 Ba꞉bema꞉ la꞉ Yuha꞉pi hibima꞉ midipa꞉la꞉, wadiyala la꞉ Godokono konomo malemale ba꞉gala ebeno helo konomo ba꞉moi netewa komokomo nemalagidolenala꞉. Puya꞉te kuba ododili ipuwamo da꞉negudiya꞉ ebete iba꞉tamo koamo ba helona, huiyatiya la꞉tamo ebeno malemale behawakalimina, iyo, keba tetelo la꞉le ebeno malemale ipuwane gudihino ba꞉be malemalete la꞉ mabuma꞉ a꞉kawibonamene. Huiyatiya la꞉le kubapino komo ba ta꞉mata atumu da꞉kanegudima, hidamo! Ba꞉ba tetelo Godote la꞉ atumu ba꞉ dito kakiya꞉hilima꞉na꞉ta!
ROM 11:23 Ba꞉gala keba tetelo Yunapa꞉te kuba ipuwane ikuliti Kelisoko hibima꞉ da꞉midimina꞉, ba꞉ba tetelo Godote ba꞉be gedawa gala kuwatete ebeno olibi gao kehoeno ka꞉ka꞉ mabamo kakemowatilamema꞉ne, mabu ebegodolo helo bitana ba꞉be malemale komo kododima꞉.
ROM 11:24 Ba꞉bema꞉ numa꞉la꞉, Godote la꞉ Yuha꞉pino gedawa ebeno olibi gao kehamo emowatilamema꞉ kodakodadopola, mabu la꞉ ba꞉ tumu gao kehoeno gedawala. Huiyatiya ebete ebeno Yunapino gedawa gala da꞉kemowatilamemene, ba꞉be komo ebete ododima꞉ kodakodaha꞉ mabu ba꞉bi gedawa ba꞉ atu kehane ya꞉lo diya꞉hiliya꞉ ba꞉bi gedawala, iyo, ba꞉be kehoeno mabu ba꞉ ibino ka꞉ka꞉ mabunomola.
ROM 11:25 Naeno hibima꞉ midipi ekaka꞉la꞉, Godote galane tetelo kododima꞉ dopamo dugumuiya꞉, nale ba꞉be komo la꞉tamo kohawakalimima꞉nemo, la꞉le la꞉eno ka꞉ka꞉ mula꞉ komo lawe mabuma꞉ awagahakapoma꞉. Ba꞉be komo ba꞉ ba꞉ma ka꞉nala, Isalaela tawakalubino wato kodakoda komote emedena tetelo a꞉kitanamene, ao, Yuha꞉pi ipuwalo puya꞉te hibima꞉ da꞉midimina꞉ ibi hiliyonomate Godotamo dopamo pelamete, ba꞉bene Yunapa꞉te atumu galane kakapelamema꞉na꞉.
ROM 11:26 Ba꞉bema꞉ hibila, ba꞉ba tetelo Isalaela tawakalubi hiliyonomate ibino ka꞉ka꞉ mula꞉ komo kolawema꞉na꞉, mabu Godokono Bukalo eta tabote ba꞉ma ka꞉na goena, “Na Godote ibino kuba ododili komo gobogobamo da꞉watalamemo, ba꞉ba tetelo nale naeno uli nopo tamotete iba꞉tamo ba꞉ma ka꞉na kohawakalimima꞉nemo, Ya꞉ikobokono eyoni gugudino Ka꞉ka꞉ Mula꞉lelamedawate Isalaela hopolo da꞉mahigamene, ebete ibino Godoko holoholoha꞉ komokomo iba꞉godone uwatelamete tama꞉mo dito komiya꞉telamema꞉ne.”
ROM 11:28 Ba꞉bema꞉ Godote ebeno ubi ba꞉ma ka꞉na ihatiya꞉, Yunapa꞉te ebeno Hido Tabo lawema꞉ ubiha꞉ma꞉ eda꞉hate, ebete iba꞉go alaholodawama꞉ ba eda꞉na ibino ubiha꞉ komodo ka꞉ka꞉ mula꞉ gigiho la꞉ Yuha꞉pa꞉tamo ka꞉hiya꞉midalamema꞉. Huiyatiya numa꞉la꞉, ebete ibi hibilo kibulakeliya꞉ha꞉, ao, ebete ibino iniwa nabi malemalelo ya꞉lo duwatiya꞉, ba꞉bema꞉ ba꞉be komo adodoheno ebete ba꞉bi hibima꞉ midipi mabuma꞉ ibino eyoni gugudi emedena tetelo malemalelo atumu ba꞉kemalagidolenamene.
ROM 11:29 Ba꞉ hibila, Godote dopamo kebe hidohido komo tawakaluba꞉tamo dikalamiya꞉, ebete ukui hiya꞉ma꞉ miditi gala a꞉kuwata꞉mene, ba꞉gala ebete dopamo pui malemalelo duwatiya꞉, ebete galane tetelo ibi ubiha꞉ma꞉ eda꞉te dito a꞉kamiya꞉pala꞉mene.
ROM 11:30 Ba꞉bema꞉ numa꞉la꞉, dopamo tetelo Godote ebeno malemale Yunapa꞉tamo ba hawakalimina, ba꞉ba tetelo la꞉ Yuha꞉pa꞉te ebetamo kapapamila꞉hanamiha꞉, huiyatiya ba꞉ma tetelo la꞉ Yuha꞉pa꞉te ibino papamila꞉haha꞉ komodo malemale Godogodone na꞉lawenamata.
ROM 11:31 Ba꞉gala Godokono malemale la꞉tamo hawakalimi mabuma꞉ Yunapa꞉te tete nanekelelo ibino papamila꞉haha꞉ komo ipuwalo emeda꞉tepate, ba꞉bene galane tetelo ibi atumu ebegodone malemale gala kakalawema꞉na꞉.
ROM 11:32 Iyo, ba꞉ hibila, Godote hopo habanapi hiliyonomatamo tete ikalamiya꞉ iba꞉te kuba ododili komoeno matuhumiho ipuwalo kemeda꞉tepama꞉, mabu ebe ubila ibi hiliyonomate ba꞉be temetema꞉go ba꞉ba ka꞉na ba emedena ebete iba꞉tamo ebeno malemale ba꞉bo kohawakalimima꞉.
ROM 11:33 Ba꞉bema꞉ Godokono malemale komo ba꞉gala ebeno mulu komo ba꞉gala ebeno iya꞉tawa komo bada kokonomola꞉ka꞉! Ebeno ododili komoeno ipuwa hibilo uwatema꞉ eta lumagiti a꞉kamodobamene, iyo, ebeno tuputupu gaboeno mabu eta dawate a꞉kiya꞉tawamene!
ROM 11:34 Dopamo tupuimi mabuni eta lumagiti Kodawa Godokono tepo ipuwoeno ukui hibilo kalawenakuiha꞉, ba꞉gala eta dawate ebe uli komo iya꞉tumima꞉ kamodobonakuiha꞉!
ROM 11:35 Ba꞉gala hibila, Godogodolo eta kapiya modoboha꞉ komo kitanaha꞉, ba꞉bema꞉ ebete hopo lumagigodone eta owalubi komo hibilo a꞉kalawa꞉le, ebete ba꞉be lumagitamo gala ebema꞉ kahuiyala!
ROM 11:36 Ba꞉ hibila, Godote ebeno heloamo hiliyonomo ilina bododiliya꞉, ba꞉bene ibi hiliyonomate ebe kawagaminanama꞉ ebeno ka꞉ka꞉ ipuwalo pola꞉na, ba꞉bema꞉ wadiyala emedena emedena tetelo awagaha komote ebegodolo nitanamene! Ba꞉moe tabo ba꞉ hibinomola, ba꞉ba꞉la!
ROM 12:1 Naeno hibima꞉ midipi ekaka꞉la꞉, Godote ebeno malemale konomo atamo keba ka꞉na ka꞉hawakalimiya꞉, nale la꞉ ba꞉be komo ba꞉moe leta ipuwalo hidamo iya꞉tulamemata. Ba꞉be mabuma꞉ nale la꞉ betoelameholemata, la꞉le la꞉eno emede ipuwalo la꞉eno ka꞉ka꞉ ebetamo hibinomolo nikamehonala꞉, komo tawakaluba꞉te ebetamo hawa꞉goeno ilina keba ka꞉na kikamehonaka ba꞉ba ka꞉na. Iyo, la꞉le Godoko kokalakaluiminama꞉ wadiyala ebeno oko owati komoma꞉ la꞉eno ka꞉ka꞉ talonama꞉ na꞉midilinakuya꞉la꞉, ba꞉bene ba꞉moe gabodo la꞉le ebe hido tuputupu ukuia꞉go badikuminakomata.
ROM 12:2 Ba꞉bema꞉ hopo habalo demedehona ba꞉bi hibima꞉ midiha꞉pino ododili komodo ibi akibamilatela꞉la꞉, la꞉ huiyatiya Godotamo haba nikamenala꞉ ebete la꞉eno tepo ipuwoeno ukui uliulinoma꞉ komidilinama꞉, ba꞉bene Godote kebe komo hidohidonomoma꞉ da꞉goena, la꞉ ba꞉bi komo hidamo kiya꞉tawahama꞉nemata la꞉le ebeno ubi komamo kopapamila꞉hanama꞉.
ROM 12:3 Ba꞉bema꞉ nale Godokono oko kowatinama꞉ ebete kebe hiya꞉nomo helo natamo malemalelo dikanamiya꞉, nale ba꞉be komamo la꞉ hiliyonomo ba꞉ma ka꞉na kiyalamemata, awagaha ipuwalo la꞉ ha꞉kiya la꞉ kokopima꞉ akamidila꞉la꞉. Huiyatiya Godote la꞉eno hibima꞉ midi komodo la꞉tamo kebakobako hiya꞉hiya꞉ helo dikalameholiya꞉la, wadiyala la꞉ ba꞉bi komo tuputupu ukuia꞉go nemalagidolenala꞉, mabu la꞉ ba꞉ ba꞉ba ka꞉na hibilo kiya꞉tawahama꞉nemata la꞉le ebetamo kebe hiya꞉hiya꞉ oko modobolo dowatihonama.
ROM 12:4 Ba꞉bema꞉ wadiyala a hiliyonomate lumagino apeno komo ba emalagidolo eta go tabo ba꞉ma ka꞉na kumima꞉nema꞉, lumagino ape ba꞉ kapiyala huiyatiya ebeno hiya꞉hiya꞉ oko owatiho komo ba꞉pola꞉ma꞉na.
ROM 12:5 Ba꞉ ba꞉ba ka꞉na a hibima꞉ midipa꞉te Kelisoko ipuwalo kapiya apema꞉ ba eda꞉na aeno hiya꞉hiya꞉ oko kapimilo bowatihonama꞉. Ba꞉gala eta komo, lumagino apeno moga꞉lamehole komate ibino hiya꞉hiya꞉ habalo modobolo da꞉pola꞉namena꞉ ibino oko owati komate hidamo kopola꞉nama꞉na꞉, huiyatiya apeno hiya꞉hiya꞉ komokomo ipuwalo eta kapiyate ko ape ipuwane ditamidamene ebe ha꞉kiya oko owati a꞉kamodobamene.
ROM 12:6 Ba꞉ hibila, Godote malemalelo a hiliyonomatamo hiya꞉hiya꞉ helo ikaa꞉mehoiya꞉ ale ebeno oko kapimilo kowatihonama꞉. Ba꞉bema꞉ hibima꞉ mididawa, Godote ama꞉tamo hiya꞉nomo helo dikamiya꞉la ebeno ukui hibinomolo kohawakaliminama꞉, wadiyala ama꞉godolo ditana ba꞉be hibima꞉ midi komago ama꞉le ebeno ukui na꞉hawakaliminakuya꞉.
ROM 12:7 Ba꞉gala ebete ama꞉tamo hiya꞉nomo helo dikamiya꞉la tawakalubino ododili ipuwalo ibi kowalubilinama꞉, wadiyala ama꞉le ibi nowalubilinakuya꞉. Ba꞉gala ebete ama꞉tamo hiya꞉nomo helo dikamiya꞉la ebeno Bukoeno tabo komokomo kiya꞉tulamenama꞉, wadiyala ama꞉le tawakalubi niya꞉tulamenakuya꞉.
ROM 12:8 Ba꞉gala ebete ama꞉tamo hiya꞉nomo helo dikamiya꞉la tawakalubino temeteme ipuwalo ibi kogelebadilamenama꞉, wadiyala ama꞉le ibi na꞉gelebadilamenakuya꞉. Ba꞉gala ebete ama꞉tamo hiya꞉nomo helo dikamiya꞉la awaepa꞉tamo mani ba꞉gala ilina kikalameholenama꞉, wadiyala ama꞉ iba꞉tamo konomamo nikalamenakuya꞉. Ba꞉gala ebete ama꞉tamo hiya꞉nomo helo dikamiya꞉la tawakalubino watodawama꞉ keda꞉nama꞉, wadiyala ama꞉ hidonomo ukuido ibi na꞉magatalenakuya꞉. Ba꞉gala ebete ama꞉tamo hiya꞉nomo helo dikamiya꞉la ebeno malemale komopa꞉tamo kohawakaliminama꞉, wadiyala ama꞉ ba꞉be malemale iba꞉tamo kalakalago na꞉hawakaliminakuya꞉.
ROM 12:9 Ba꞉bema꞉ wadiyala la꞉ hibima꞉ midipa꞉te eta kapiya lumagi ha꞉da amihomeheno komopi hiliyonomatamo malemale na꞉hawakaliminakuya꞉la꞉, ba꞉gala kuba ododili komoma꞉ konomamo ubiha꞉ma꞉ ba eda꞉hana hido ododi komo kodakodalo natila꞉nuya꞉la꞉.
ROM 12:10 Hibila, la꞉ Kelisoko ipuwalo kapiya badininipalama꞉ eda꞉hanamata, ba꞉bema꞉ la꞉ ipuwalo etapa꞉te etapi malemalelo ba emalagidolena, la꞉ ha꞉kiya la꞉ hopamo miya꞉telo la꞉eno ukui ipuwalo komopi hunamo na꞉wadiya꞉paa꞉latelenakuya꞉la꞉.
ROM 12:11 Ba꞉gala la꞉ buhamama꞉ eda꞉haheno Kodawa Ya꞉sukunu oko la꞉eno tepo ipuwoeno helo konomago nowatinala꞉.
ROM 12:12 Iyo, ebeno pe komoma꞉ uliholo ba emedena na꞉kalakalahanala꞉, ba꞉gala temeteme komate la꞉tamo dikulihomena꞉, la꞉eno hibima꞉ midi ipuwalo kodakodalo ba la꞉mota꞉hana la꞉ Godokoba꞉ tabo ga꞉la akekelalamenala꞉.
ROM 12:13 Ba꞉bene ebeno tawakalubi ipuwalo puya꞉te modoboha꞉ma꞉ deda꞉hana, wadiyala la꞉le ibi nowalubilinakuya꞉la꞉, ba꞉gala kapela tawakalubi atumu ba owalubili baa꞉ ba꞉gala laha haba iba꞉tamo nikalameholenakuya꞉la꞉.
ROM 12:14 Ba꞉gala puya꞉te Kelisoko mabuma꞉ la꞉tamo temeteme dikalamena, wadiyala la꞉ Godoko na꞉toemehonakuya꞉la꞉ ebete ibi hidamo kowalubilinama꞉, huiyatiya la꞉le ebe akakiyama꞉la꞉ ebete ibi dito kokubahilamema꞉.
ROM 12:15 Ba꞉bene puya꞉te kalakala ipuwalo demedena wadiyala la꞉ iba꞉go kapimilo na꞉kalakalahanala꞉, ba꞉gala puya꞉te temeteme ipuwalo demedehona wadiyala la꞉ iba꞉go kapimilo nihiminala꞉.
ROM 12:16 Ba꞉ma ka꞉na la꞉ hiliyonomate kapimilo tatabalo ba emedehona la꞉ ha꞉kiya la꞉ akawagaminalenakala꞉, iyo, la꞉ wato kokoma꞉ eda꞉haheno koko mahiloha꞉ tawakaluba꞉go mabulubima꞉ neda꞉huya꞉la꞉.
ROM 12:17 Ba꞉bema꞉ eta lumagiti ama꞉tamo kuba dododimini ebeno kubama꞉ akahuiyala꞉, huiyatiya hiliyonomo tawakaluba꞉te hidoma꞉ da꞉ga꞉lanaka ba꞉bako hido komo kapiyate ebetamo nododiya꞉.
ROM 12:18 Ba꞉gala keba tetelo tawakaluba꞉te ama꞉ duhimihino iba꞉go tatabalo kemedenama꞉, wadiyala ama꞉ ibi hiliyonomago kapimilo ba꞉ ba꞉ba ka꞉na nemedeniya꞉.
ROM 12:19 Ba꞉bema꞉ naeno hidohido mabuluba꞉la꞉, la꞉go alaholohopima꞉ deda꞉hana iba꞉tamo kuba huiya akikalama꞉la꞉. La꞉ huiyatiya Godokono mauba komo hawakalimi tete na꞉latima꞉la꞉, mabu ebeno Bukalo eta tabote ba꞉ma ka꞉na itana, “Na Kodawate goemo, na kapiyate ba꞉ kuba huiya ikalamedawala, ba꞉bema꞉ tawakalubino kuba ododili mabuma꞉ nale naeno hibi tetenomolo iba꞉tamo huiya kikalamema꞉nemo.”
ROM 12:20 Ba꞉gala Godokono Bukalo eta tabote ba꞉ma ka꞉na kagoena, “Ama꞉go dalaholohona ba꞉be lumagi baa꞉ kapete dumimini, wadiyala ama꞉ ebetamo baa꞉ nikamiya꞉, ba꞉gala ebe beya kapete dumimini, ama꞉ ebe beyamo na꞉kowalubiya꞉. Hibila, ba꞉moe ododi gabodo ebete ebeno kuba ododili komoma꞉ hilopo kolawema꞉ne.”
ROM 12:21 Ba꞉bema꞉ naeno mabulubi, ama꞉ hidamo! Kuba ododi komote eta lumagigodone ama꞉tamo duluhukumini, ba꞉be kuba ododi komamo akapapamiwatala꞉. Wadiyala ama꞉ huiyatiya hidohido komo kapiya ba ododili kuba komoeno wato kikipo ba꞉bo na꞉lawiya꞉.
ROM 13:1 La꞉ hibima꞉ midipi hiliyonomate gabomana꞉tamo na꞉papamila꞉hanala꞉, mabu gabomani okopi hiliyonomo ibino habamo ba꞉ Godote miya꞉tiya꞉.
ROM 13:2 Ba꞉bema꞉ kebe lumagiti ebeno kuba ododi komodo eta gabomani okodawoeno komo da꞉duhimimini, ebete gabomani ibino oko habamo pote ka꞉miya꞉tiya꞉ ba꞉be Kodawa Godoko atumu koduhimima꞉ne, ba꞉bene ebete ebeno kuba ododi komodo ebe ha꞉kiya ebetamo kuba huiya hibinomolo kadahema꞉ne.
ROM 13:3 Ba꞉ hibila, kuba ododilipa꞉te gabomana꞉tamo na꞉toletolehona, huiyatiya hidohido komo dododilina ba꞉ba꞉te katoletolehonaha꞉. Ba꞉bema꞉ mabulubi, ama꞉ ubila꞉ka꞉ toleheno kemedenama꞉? Wadiyala ama꞉ hidohido komo kapiya nododilinakuya꞉, ba꞉bene gabomana꞉te ama꞉tamo ba kalakalaha ama꞉ ba꞉bo komilimihoma꞉na꞉ta, iyo, ba꞉be mabuma꞉ ama꞉godolo tole komote a꞉kitanamene.
ROM 13:4 Ba꞉ hibila, gabomani okodawa ba꞉ Godokono okodawala, ebete ama꞉ mabuma꞉ hido oko bowatina. Huiyatiya keba tetelo ama꞉le eta kuba komo dododimina꞉, ama꞉ ba꞉be komoma꞉ na꞉toletoliya꞉ mabu gabomana꞉te ama꞉tamo kuba huiya hibilo kikamema꞉na꞉ta, iyo, ba꞉be dawate Godokono okodawama꞉ ba eda꞉na ebegodolo helo bitana kuba ododilipa꞉tamo huiya ikalamema꞉.
ROM 13:5 Ba꞉bema꞉ wadiyala la꞉ hiliyonomate gabomana꞉tamo na꞉papamila꞉hanala꞉, mabu la꞉eno tepo ipuwoeno mulu ukuiti la꞉ ba꞉ba ka꞉na iya꞉tulamenata, ba꞉gala diyala, la꞉le papamila꞉haheno iba꞉godone temeteme komo da꞉ laweoma.
ROM 13:6 Ba꞉moe ba꞉be mabuma꞉ la꞉le gabomana꞉tamo ta꞉kese mani nikalamenakuya꞉la꞉, mabu iba꞉te ba꞉bi mana꞉mo ibino hiya꞉hiya꞉ oko hiliyonomo Godoko mabuma꞉ owatihona.
ROM 13:7 Iyo, gabomana꞉te tawakalubi tutumu tabo keba ka꞉na ka꞉kiyalamenaka, wadiyala la꞉ iba꞉tamo ba꞉ba ka꞉na hiya꞉hiya꞉ ta꞉kese mani modobolo nikalamenakuya꞉la꞉, ba꞉gala wadiyala la꞉eno tepo ipuwoeno ukuilo la꞉ ha꞉kiya la꞉ hopamo ba miya꞉te gabomani okopi hiliyonomo hunamo na꞉wadiya꞉paa꞉latelenakuya꞉la꞉.
ROM 13:8 Ba꞉gala eta komo. Amia꞉no modoboha꞉ tetelo eta mabulubigodone mani ba lawita ama꞉le ebetamo gala kakikamema꞉ da꞉kiyami, wadiyala ama꞉ tiyonomolo na꞉kahuiyuya꞉, ba꞉bene ama꞉le ba꞉bako gabodo mani gala akalawa꞉la꞉. Huiyatiya numa꞉la꞉, la꞉ hibima꞉ midipino modoboha꞉ komokomo ipuwalo, etate etatamo, etate etatamo malemalelo dito dikama꞉tihuinakoma, talona puliyala. Ba꞉ hibila, eta lumagino modoboha꞉ tetelo ama꞉le ebe malemaletelo dito dowalubimina꞉, ba꞉bako malemale emalagidolo komodo ama꞉ Godokono hiliyonomo Tutumu Tabo komamo kopapamiwatama꞉na꞉ta.
ROM 13:9 Numa꞉, Godokono Tutumu Tabo hiliyonomate ba꞉moe kapiya tutumu ipuwalo ba꞉pola꞉na, ba꞉moe ko tutumu ba꞉ ba꞉ma ka꞉nala, “Ama꞉ ha꞉kiya ama꞉ demalagidolona, wadiyala ama꞉le ba꞉ba ka꞉na ama꞉ tamelo demedena ba꞉be lumagi malemalelo nemalagidolona.” Ba꞉bema꞉ lumagiti ba꞉moe ko tutumu tabo kapiya kodakodalo ba atila꞉na, komo tutumu tabo wakalami gabote ebegodolo a꞉kitanamene, iyo, ebete eta dubuino kamena pilolo a꞉kalawa꞉mene, ba꞉gala eta lumagi dito a꞉kanakapuma꞉mene, ba꞉gala eta ilina pilolo a꞉kalawa꞉mene, ba꞉gala eta lumagino ilina uwatema꞉ ubi a꞉kihata꞉mene.
ROM 13:10 Ba꞉ hibila, malemale emalagidolo komote lumagigodolo ba itana, ebete kuba ododi ipuwalo eta dawatamo temeteme a꞉kikama꞉le, ba꞉moe mabuma꞉ kebe lumagiti komopi malemalelo emalagidole tutumamo hibinomolo da꞉papamiwatanako, ebete ba꞉be komodo atumu Godokono komo hiliyonomo tutumu tabamo a꞉kapapamiwatanako.
ROM 13:11 Nale ba꞉moi komokomo la꞉ bikiyalamemata, mabu na ubila la꞉ ba꞉ma teteno komo ba꞉ma ka꞉na niya꞉tawahala꞉, tete hibinomolo a꞉pe la꞉le u laha komone komahila꞉hama꞉, mabu a hibima꞉ midipino ka꞉ka꞉ mula꞉ tetete ba꞉ na꞉tatali. Numa꞉la꞉, dopamo ale aeno hibima꞉ midi komo Ya꞉sutamo dihatiya꞉ma꞉, ba꞉ba tetelo aeno ka꞉ka꞉ mula꞉ komoeno uluhuku tete muhuludopolo itanami, huiyatiya ba꞉ma tetelo ba꞉ tatalinomoma꞉ edi.
ROM 13:12 Iyo, hegela owaloho tete ba tatali du teteno hilibubuti ba꞉ na꞉wibo, ba꞉bema꞉ wadiyala ale du teteno kuba ododili komo tama꞉mo miya꞉tete, ale alo teteno alaholoho komo kododima꞉ modobo ilina kopupulima꞉nema꞉.
ROM 13:13 Ba꞉bema꞉ ale hegeloeno alo ipuwalo ba emedena, komopa꞉te aeno hidohido ododili komo kapiya bulamenakomena꞉. Ba꞉ ba꞉ma ka꞉na a hibima꞉ midipa꞉godolo kuba hilopo poko ododi komo ba꞉gala gamoda niho komo, bohelemele pilo komo ba꞉gala iba꞉tamo hilopo tabo ga꞉la komo, alaholoho komo ba꞉gala mauba komo, ba꞉bi kuba komo hiliyonomate agodolo akapola꞉nala꞉.
ROM 13:14 Ba꞉bema꞉ wadiyala la꞉eno kateneno ubi komamo papamila꞉ha komote ba ekelalame, la꞉le huiyatiya Kodawa Ya꞉su Kelisokono hidohido kaliko na꞉pupula꞉la꞉.
ROM 14:1 La꞉ hibima꞉ midipi ipuwalo pote heloha꞉ma꞉ deda꞉na, wadiyala ama꞉le ebe malemale emalagidolamo na꞉lawiya꞉, ba꞉bene ebete ebeno hibima꞉ midi komone kebe komokomo dododilinako, ama꞉le ba꞉bi komoma꞉ eba꞉go akolowabeletihuia꞉la꞉.
ROM 14:2 Ba꞉bema꞉ numa꞉la꞉, eta hibima꞉ midi dawate ebeno hibima꞉ midi ipuwalo heloma꞉ deda꞉na, ebete kolowami habamo tote, puya꞉te ida꞉da꞉li adikulameno katene ilina da꞉pemiya꞉tenaka, ebete ba꞉bako ilina lawema꞉ talonama꞉ kagoenaha꞉. Huiyatiya eta dawate ebeno hibima꞉ midi ipuwalo heloha꞉dopoma꞉ ba eda꞉na, kolowami habane pali ilinanomo buwatenako mabu ba꞉bi ilina ida꞉da꞉li adikulameno ilinaha꞉.
ROM 14:3 Ba꞉bema꞉ dopo lumagiti ilina hiliyonomo naha talonaha꞉ma꞉ ba goena, huiyatiya ebeno hibima꞉ midi ekawiti eta ilina na talonama꞉ da꞉goemene, ebete ba꞉be komoma꞉ ebeno ekawino ukui kubama꞉ akagaa꞉la꞉. Ba꞉gala pote eta ilina na talonama꞉ da꞉goemene, ebete talonaha꞉ma꞉ goedawoeno ododi komo atumu kubama꞉ akagaa꞉la꞉, mabu Godote ebe malemale emalagidolamo ya꞉lo a꞉lawiya꞉.
ROM 14:4 A꞉iye! Mabu keka꞉ ama꞉le Godokono eta okodawoeno komo danagiya꞉midamenaka? Ba꞉be okodawoeno Namutudawate ha꞉kiya ebeno komo ba anagiya꞉midame hidoma꞉ da꞉goemene o kubama꞉ da꞉goemene, huiyatiya ama꞉leha꞉! Numa꞉, Kodawa Godokono helo modobola ba꞉be okodawatamo owalubi komo ihate, ba꞉bema꞉ hibila, ebete ebeno hibima꞉ midi ipuwalo a꞉kagamene, huiyatiya ebete kodakodalo kola꞉nama꞉ne.
ROM 14:5 Ba꞉gala eta komo. Eta hibima꞉ midi dawate Godoko adikumima꞉ kapiya hegela konomamo emalagidolonako, ba꞉bema꞉ ebete ba꞉be hegela talonama꞉ ba goena tawakaluba꞉tamo talona ba꞉bo ihatenako, iba꞉te ba꞉be hegelalo ibino hiya꞉hiya꞉ oko owatiho komo ba꞉gala kalakala komo kododilima꞉. Huiyatiya eta lumagiti Godoko adikumima꞉ hiliyonomo hegela modoboma꞉ ba goena eta kapiya hegela hiya꞉nomo talona hegelama꞉ kamidinaha꞉. Ba꞉bema꞉ ba꞉moe komoma꞉ la꞉eno sose tawakalubino hiya꞉hiya꞉ ukuiti da꞉pola꞉lama꞉na, la꞉ ipuwalo etate etoeno ukui komamo dito akapapamiwatala꞉. Ao, wadiyala la꞉ hiliyonomate ba꞉ ba꞉ma ka꞉na nododiya꞉la꞉, eta lumagino hibima꞉ midi komote ebeno tepo ipuwalo keba ka꞉na kiya꞉tumina, ebe ha꞉kiya ba꞉be ukui kodakodalo lawete aeno Kodawa kawagaminanama꞉ ba꞉ba ka꞉na nemedenamene.
ROM 14:6 Iyo, numa꞉la꞉, la꞉ ipuwalo pote eta hegela koma꞉ da꞉goena, ebete eta lumagino komo emalagidoloheno aeno Kodawa kapiya adipatema꞉ ba꞉be hegela talonama꞉ midinako. Ba꞉gala pote kolowami habalo katene lawete da꞉nanako, ebete atumu aeno Kodawa kapiya emalagidololo ododinako, mabu ebete ba꞉be naha ilinama꞉ Godotamo kalakala tabo badipatenako. Ba꞉gala pote ba꞉be katene na talonama꞉ da꞉goena, ebete atumu aeno Kodawa kapiya emalagidololo komo naha ilinoeno komoma꞉ kalakala tabo ebetamo ba adipate, huiyatiya ba꞉be katene ilina tama꞉mo dito ihatenako.
ROM 14:7 Ba꞉bema꞉ la꞉ ba꞉moe ko komo nemalagidolala꞉, a hibima꞉ midipa꞉te ba꞉moe hopolo ba emedena, a ha꞉kiya a kokalakaluia꞉mema꞉ aeno ubi komokomo ododili modoboha꞉, mabu a aeno Kodawa kawagaminanama꞉ bemedenama꞉. Ba꞉bema꞉ ale aeno hibima꞉ midi mabuma꞉ da꞉ha꞉lahama꞉, ba꞉be komo atumu aeno ubi gabodo a꞉kododa꞉ma꞉, ale aeno Kodawa kawagaminanama꞉ koha꞉lahama꞉nema꞉. Ba꞉bema꞉ ale demedenama꞉ o ale da꞉ha꞉lahama꞉ ba꞉be komo ko komoha꞉. Ko komo ba꞉ ale Kodawoeno tawakalubima꞉ deda꞉hanama꞉ ba꞉be komola.
ROM 14:9 Ba꞉ hibila, Kelisote ba꞉be mabuma꞉ hoe ipuwane gala ka꞉ka꞉mo a꞉kamahiguya꞉, dopamo da꞉ha꞉lahuya꞉ ba꞉gala ba꞉ma tetelo ka꞉ka꞉go demedehona ba꞉bi tawakalubi hiliyonomoeno Kodawama꞉ keda꞉nama꞉.
ROM 14:10 Ba꞉bema꞉ mabu keka꞉ ama꞉le amia꞉no hibima꞉ midi ekawino komo danagiya꞉midamenaka? Ba꞉gala bada mabuma꞉ ama꞉le ebeno tepo ipuwoeno ukui kubama꞉ da꞉goena? Numa꞉, a hiliyonomate Godokono holoholo hapulu ba la꞉mota꞉hana ebe kapiyate aeno komo ba꞉bo kanagilamelea꞉mema꞉ne.
ROM 14:11 Ba꞉be mabuma꞉ Godokono Bukalo eta tabote ba꞉ma ka꞉na itana, “Na ba꞉ emedena tetelo demedenamo ba꞉be Kodawala, ba꞉bema꞉ na hibi tabonomo begoemo, hiliyonomo tawakaluba꞉te pupamo ba pegagahidi na ba꞉bo kopadikunamema꞉na꞉. Iyo, na hibi Godoma꞉ deda꞉namo, ibi hiliyonomate ba꞉be komo ibino tabamo kopehawakalimima꞉na꞉.”
ROM 14:12 Ba꞉bema꞉ ba꞉moe komo ba꞉ ko komonomola, Godoko kapiyate a hiliyonomoeno komo ba anagilamelea꞉me, ale aeno hiya꞉hiya꞉ kuba ododili huiya uwatelo ebe duhimima꞉ ale eta tabo ga꞉lama꞉ a꞉kamodobama꞉.
ROM 14:13 Ba꞉bema꞉ wadiyala a hibima꞉ midipi ipuwalo etate etoeno komo anagiya꞉midame komote nekelaa꞉ma꞉mene. La꞉ huiyatiya ba꞉moe komo nemalagidoluya꞉la꞉, la꞉ ipuwalo etate ebeno hibima꞉ midi ekawino nato ukamidadawama꞉ akeda꞉la꞉ ebete gakapoma꞉.
ROM 14:14 Ba꞉ hibila, na Kodawa Ya꞉suku ipuwalo ba emedena ba꞉moe ukui komote nagodolo konomoma꞉ eda꞉na, naha ilina hiliyonomo ipuwalo Godote eta ilina kapiya talonama꞉ kagoenaha꞉, huiyatiya keba tetelo lumagiti ebeno hibima꞉ midi komone eta ilina talonama꞉ da꞉goemene, ba꞉ba tetelo ba꞉be ilinate ebetamo dalowa꞉ma꞉ keda꞉ma꞉ne.
ROM 14:15 Ba꞉bema꞉ amia꞉no hibima꞉ midi ekawiti kebe ilina talonama꞉ da꞉goena, ama꞉le ba꞉be ilina ba nuta ebeno ukui da꞉kubahimimina꞉, ama꞉le ba꞉be komo malemale emalagidolamo kododitaha꞉. A꞉iye! Ama꞉ baa꞉ na ipuwalo ekawino nato ukamidadawama꞉ akeda꞉la꞉, mabu Kelisote ba꞉be lumagi mabuma꞉ atumu a꞉kahoiya꞉!
ROM 14:16 Ba꞉bema꞉ amia꞉no hibima꞉ midi komone kebe komo ododima꞉ modoboma꞉ da꞉goena, ama꞉ ba꞉be komo ba ododita eta lumagino nato dukamidamemena꞉, ba꞉be komo modoboha꞉. Mabu keka꞉ ama꞉le eta komo amia꞉no tuputupu ukuilo ba ododita, komopa꞉te ba꞉be komoma꞉ kubama꞉ da꞉ga꞉luta?
ROM 14:17 Numa꞉, Godote Ko Gawadubuma꞉ deda꞉na ba꞉be komoeno ipuwa ba꞉ naha komoha꞉ ba꞉gala niho komoha꞉! Ao, ebeno Gobogobote hibima꞉ midipa꞉tamo dikalamena, ba꞉be tuputupulu emede komo ba꞉gala hete komo ba꞉gala kalakala komo, ba꞉bi komokomo ba꞉ ebeno Ko Gawadubu komoeno ipuwala.
ROM 14:18 Ba꞉bema꞉ eta lumagiti ba꞉ ba꞉ba ka꞉na Kelisotamo oko ba owatina ebeno hibima꞉ midi ekawino nato ukamidameheno, Godote ebetamo hibilo kokalakalama꞉ne ba꞉gala tawakaluba꞉te atumu ebetamo kakakalakalahama꞉na꞉.
ROM 14:19 Ba꞉moe ba꞉be mabuma꞉ wadiyala ale aeno ukui konomamo hete gabo kapiya ba꞉ta꞉matanama꞉, ale ba꞉ba ka꞉na etate eta kowalubi, etate eta kowalubi, ale hibima꞉ midi ipuwalo kapepehoma꞉.
ROM 14:20 Ba꞉bema꞉ Godote kebe hido oko eta lumagi ipuwalo dowatina, ama꞉le amia꞉no baa꞉ na komamo ba꞉be oko akakubahima꞉la꞉. Naha ilina hiliyonomo talonahenola, huiyatiya ama꞉ eta ilina ba nuta hibima꞉ midi dawoeno nato ukamidadawama꞉ deda꞉mena꞉, Godote ba꞉be komoma꞉ kubama꞉ kogoema꞉ne.
ROM 14:21 Huiyatiya keba tetelo eta ododi komoma꞉ talona hibi itanaheno, ba꞉bene ama꞉le amia꞉no hibima꞉ midi ekawi ba emalagidolo ama꞉ ha꞉kiya ama꞉tamo talona dihatenakomena꞉, Godokono umi ipuwalo ama꞉le hidonomo komo bododinakomena꞉ta, mabu ama꞉ mabuma꞉ ekawiti ida꞉da꞉li adikulameno katene na komodo o helo gao beya ni komodo o eta ba꞉bako hiya꞉hiya꞉ ododili komodo nato a꞉kukamidamene.
ROM 14:22 Ba꞉bema꞉ ba꞉bako hiya꞉hiya꞉ ododili ipuwalo Godote amia꞉no hibima꞉ midi komodo eta komoeno talonaha꞉ komo ama꞉ diya꞉tumina, wadiyala ama꞉ ba꞉be tepo ipuwoeno ukui komopa꞉tamo akahawakalima꞉la꞉. Numa꞉, kebe lumagiti ebeno hibima꞉ midi komone ba꞉ma ka꞉na diya꞉tawana, ebeno ododili komo hiliyonomo ipuwalo ebete Godokono eta deha꞉poto talona kapiya kadikamidalenaha꞉, ba꞉bema꞉ ebete na꞉kalakalamene!
ROM 14:23 Huiyatiya ebete ebeno tepo ipuwalo eta ilina nama꞉ talonama꞉ ba goe dito da꞉namene, kuba huiya ebetamo kopema꞉ne mabu Godote ebetamo dikamiya꞉, ebete ba꞉be tepo ipuwoeno hibima꞉ midi komamo kapapamiwataha꞉. Ba꞉ hibila, lumagiti ebeno tepo ipuwoeno hibima꞉ midi komamo papamiwataha꞉ma꞉ ba edita eta komo dododimini, Godokono umi ipuwalo ba꞉be komote ba꞉ hibo gabo ududi komoma꞉ keda꞉ma꞉ne.
ROM 15:1 Ba꞉bema꞉ hibima꞉ midipi ipuwalo a puya꞉te helohelopima꞉ deda꞉hanama꞉, wadiyala ale aeno heloheloha꞉ hibima꞉ midipi ekaki ba owalubili, iba꞉te kodakodalo kola꞉mota꞉hanama꞉ a ha꞉kiya aeno komo kapiya a꞉kemalagidolenama꞉.
ROM 15:2 Iyo, a hiliyonomo ipuwalo etate ebeno ododili ipuwalo ebeno ekawi hidamo ba owalubi ebe na꞉kalakaluima꞉mene, ebete ebeno hibima꞉ midi ipuwalo hidamo kapema꞉.
ROM 15:3 Numa꞉la꞉, Kelisote ba꞉ ba꞉ba ka꞉na ewagelenakui, iyo, ebeno ododili ipuwalo ebe ha꞉kiya ebeno komo kapiya kemalagidolonamiha꞉, ba꞉bema꞉ ebete Godokono Bukalo ebeno komo ya꞉lo ba꞉ma ka꞉na hawakalimiya꞉, “Godo, tawakaluba꞉te kebe komamo ama꞉ diduduputiminaka, nale ama꞉tamo papamiwata ipuwalo ba꞉bi atu komate natamo ba꞉ na꞉ka-ikulihona.”
ROM 15:4 Ba꞉ hibila, Godote ebeno Bukamo kebe hiya꞉hiya꞉ tabo dopamo da꞉miya꞉tiya꞉, ba꞉bi tabo komokomo hiliyonomate a iya꞉tua꞉mema꞉ pola꞉na, iyo, ale ebeno Buka tabo komokomone owalubi helo lawete temeteme ipuwalo kodakodalo ba la꞉mota꞉hana, aeno hibi kalakala tetete kopema꞉ uliholo latiminama꞉.
ROM 15:5 Ba꞉bema꞉ pote ebeno hibima꞉ midipa꞉tamo kodakodalo la꞉mota꞉hana komo ba꞉gala owalubi helo komo dikalamena, wadiyala ba꞉be Kodawa Godote la꞉ nowalubila꞉mena꞉ta, la꞉le Ya꞉su Kelisoko ba ta꞉mata ukui kapiyama꞉ keda꞉hanama꞉.
ROM 15:6 Ba꞉moe ba꞉be gabodo la꞉ hiliyonomate la꞉eno tabo madodo kapiyama꞉ ba midi, aeno Kodawa Ya꞉su Kelisokono Nabiwi Godoko ba꞉bo komilimihoma꞉nemata.
ROM 15:7 Ba꞉bema꞉ komopa꞉te la꞉eno tuputupu emede komoma꞉ Godoko komilimihoma꞉, wadiyala la꞉ ipuwalo etate eta malemale emalagidolamo na꞉lawenakuya꞉la꞉, Kelisote la꞉ malemalelo keba ka꞉na kuwatitiya꞉la ba꞉ba ka꞉na.
ROM 15:8 Nale la꞉ begoelamemata, Kelisote a Yunapa꞉tamo huiyaha꞉ okodawamo piya꞉, Godote aeno iniwali naba꞉tamo kebe hibi tabo dopamo dolamaginakui ba꞉bi komate ebeno ododili ipuwalo hibinomolo kohawakalahalema꞉. Ba꞉gala Kelisote Godokono hibi komo ba꞉ba ka꞉na ba pehawakalimi,
ROM 15:9 ba꞉be komodo ebete la꞉ Yuha꞉pa꞉tamo atumu gabo a꞉pa꞉hiya꞉miduya꞉ la꞉le Godokono malemale komoma꞉ ebe komilimihonakoma꞉. Ba꞉be komo hawakalimima꞉ Godokono Bukalo eta tabote ba꞉ma ka꞉na itana, “O Godo, nale Yuha꞉pi ipuwalo ba la꞉na, naeno kalakala tabo ama꞉tamo ba꞉bema꞉ adipatenakomo, iyo, ibi ipuwalo nale ama꞉ adikumi ohale balapihonakomo.”
ROM 15:10 Ba꞉gala Godokono Bukalo eta tabote na꞉kagoena, “La꞉ Yuha꞉pa꞉la꞉, wadiyala la꞉le komo hibima꞉ midipa꞉go koamo na꞉kalakalahanala꞉!”
ROM 15:11 Ba꞉bene Godokono Bukoeno eta tabote ba꞉ma ka꞉na kitana, “La꞉ Yuha꞉pa꞉la꞉, Kodawa Godoko na꞉milimihala꞉, iyo, hiliyonomo hiya꞉hiya꞉ hoponapa꞉te ebe adikumi ohale nalapihamena꞉!”
ROM 15:12 Ba꞉gala eta tetelo Aisayate Godokono Bukamo tabo ba꞉ma ka꞉na miya꞉tiya꞉, “Da꞉ibidikono nabiwi Yesiko, ebeno eyoni gugudi ipuwane eta Kodawate kopehawakalama꞉ne. Ba꞉bene Yuha꞉pa꞉te ebeno ubi komamo kopapamila꞉hanama꞉, Godote ebe ebeno Ko Gawadubu habamo kihatema꞉ne, ba꞉bema꞉ iba꞉te ibino ka꞉ka꞉ mula꞉ komo ebegodone kolawema꞉ ebeno pe komoma꞉ uliholo bemedehonamena꞉.”
ROM 15:13 Ba꞉ hibila, Godote helo hibima꞉ midipa꞉tamo ikalamiya꞉ iba꞉te ibino ka꞉ka꞉ mula꞉ komo hibilo lawema꞉ uliholo kemedehonama꞉. Ba꞉bema꞉ wadiyala ebete la꞉ Yuha꞉pino hibima꞉ midi komodo la꞉eno tepo ipuwa ko kalakala komamo ba꞉gala hete komamo na꞉tabuilama꞉mene, ba꞉bene la꞉le ebeno Gobogoboeno heloamo uliholo emede komo ipuwalo konomamo kapepehoma꞉nemata.
ROM 15:14 Naeno hibima꞉ midipi ekaka꞉la꞉, nonolata. Naeno tepo ipuwalo niya꞉tawanamo la꞉godolo hidohido ododili komo ba꞉gala koko iya꞉tawa komo tabotabohonomola, iyo, la꞉ ipuwalo etate eta mulu komamo iya꞉tumi modobola.
ROM 15:15 Huiyatiya na ba꞉moe leta ba ododi, la꞉le kebe komokomo dopamo diya꞉tawahuya꞉ma nale toleha꞉ komago ba꞉bi atu komo la꞉ beka-iya꞉tulamemata, mabu Godote ebeno malemale komodo na a꞉laweniya꞉,
ROM 15:16 nale Ya꞉su Kelisokono okodawama꞉ ba eda꞉na la꞉ Yuha꞉pi mabuma꞉ ebeno oko kowatinama꞉. Iyo, na Godotamo hawa꞉goeno ikamehodawa huiyama꞉ ba eda꞉na, nale Yuha꞉pi hawa꞉goeno malemale ilinamo midiliti ebetamo ba꞉bo nikamehonakomo. Ba꞉bema꞉ naeno ubi komo ba꞉ ba꞉ma ka꞉nala, Godote ba꞉bi hibima꞉ midipi Yuha꞉pi nagodone kalakalago ba uwate, ebeno Gobogobote ibi ebeno talona okopima꞉ ba꞉bo komidilima꞉ne.
ROM 15:17 Ba꞉bema꞉ na Ya꞉su Kelisoko ipuwalo Godotamo ba꞉moe oko ba owatina, ba꞉be mabuma꞉ awagahanamo.
ROM 15:18 Numa꞉la꞉, Kelisote na ipuwado kebe hidonomo oko Yuha꞉pi mabuma꞉ dowatinami, na ba꞉be kapiya komoma꞉ tabo toleheno kolamagima꞉nemo. Ba꞉be oko ba꞉ nale tabo olamagi komamo ba꞉gala apa꞉mo ododili komamo, iyo, Godokono hanohano ododili komamo ba꞉gala ebeno Gobogoboeno helo komamo dowatinamimo, ba꞉moe ba꞉be okola. Ba꞉gala naeno oko ba꞉ nale Yuha꞉pi Godotamo ba magatale iba꞉te ebetamo da꞉papamila꞉halena ba꞉be komola, ba꞉bema꞉ nale Kelisokono Hido Tabo olamagi komago tote Yelusalema ko habane tupuimiti Ilikama muhulu hopamo ba꞉ dito nuluhukuimo, iyo, ba꞉be oko konomo nale hibilo upulimo.
ROM 15:20 Ba꞉ hibila, na ubi konomamo ba꞉ma ka꞉na ihatenamimo, nale Kelisoko iya꞉tawaha꞉pa꞉tamo ebeno Hido Tabo konolamaginakoma꞉, mabu na ubihinola eta lumagiti dopamo da꞉tupuimi ba꞉be oko hunamo oko gala kanowati.
ROM 15:21 Numa꞉la꞉, Godokono Bukalo eta tabote ba꞉be komo hawakalimima꞉ ba꞉ma ka꞉na itana, “Dopamo puya꞉te Kodawoeno komo kiya꞉tawahuya꞉ha꞉, iba꞉te ebeno komo kumima꞉na꞉, ba꞉gala puya꞉te ebeno tabo dopamo kulihuya꞉ha꞉, iba꞉te galane tetelo hidamo kiya꞉tawahama꞉na꞉.”
ROM 15:22 Ba꞉bema꞉ hibila, dopamo komo hiliyonomo tetelo nale la꞉tamo pema꞉ dewagelenakuimo, gabote huiyatiya natamo kalapilalo itananakui.
ROM 15:23 Huiyatiya ba꞉ma tetelo ba꞉moi tatali hopo hiliyonomolo oko ba꞉ upula꞉limo, ba꞉bema꞉ na ubila nale Spa꞉ini hopamo okoma꞉ ba peto gabo tetelo la꞉ pulame. Ba꞉ hibila, komo gogo hiliyonomolo la꞉ mabuma꞉ ubi ba꞉ma ka꞉na ihatenakuimo, ba꞉bema꞉ tete tatalila na la꞉go kalakalago ba pemeda꞉tepa, wadiyala la꞉le na ba꞉bo kowalubinima꞉nemata nale naeno uli oko habamo kotoma꞉.
ROM 15:25 Ba꞉ma tetenomolo nale huiyatiya la꞉tamo peheno dopamo Yelusalema ko habamo kotoma꞉nemo, Godokono tawakaluba꞉te ba꞉bolo demedehona ibi konowalubilima꞉.
ROM 15:26 Mabu Ma꞉sadoniya hopo ba꞉gala Guliki hopolo demedehona, ba꞉bi sose tawakaluba꞉te ibino ubilo malemale ba hawakalimi mani ba꞉bo miya꞉tiya꞉, Godokono tawakaluba꞉te Yelusalemalo demedehona ibino awaepi kowalubilima꞉.
ROM 15:27 Ba꞉ hibila, iba꞉te Yunapino komo awae tawakalubi kowalubilima꞉ ibino ubi komo kalakalago dihati, ba꞉be komo ba꞉ modobo ukui komola. Iyo, dopamo Yunapa꞉te Yuha꞉pino ka꞉ka꞉ mula꞉le mabuma꞉ iba꞉tamo Godokono tepo ipuwoeno hidohido komo huiyaheno dito ikalamiya꞉, ba꞉bema꞉ wadiyala ba꞉ma tetelo Yuha꞉pa꞉te ibino malemale mana꞉mo ba꞉gala ilinamo Yunapi dito nowalubila꞉mena꞉.
ROM 15:28 Ba꞉bema꞉ naeno komo ba꞉ma ka꞉nala. Yuha꞉pa꞉te malemalelo da꞉miya꞉ti, nale ba꞉be mani kodopo Yelusalema-napa꞉tamo ba pikalame, ba꞉be owalubi oko iba꞉tamo pupula꞉te nale Spa꞉ini muhulu hopamo to ba꞉bo kotupuimima꞉nemo. Ba꞉bene gabo tetelo nale la꞉tamo da꞉puluhukumu, na iya꞉tawala nale la꞉go ba pemeda꞉tepa, Kelisote na ipuwado ebeno kalakala komokomamo la꞉ ba꞉bo kotabuilamema꞉na꞉ta.
ROM 15:30 Naeno hibima꞉ midipi ekaka꞉la꞉, nale Godokono Gobogoboeno malemale komamo la꞉ aeno Kodawa Ya꞉su Kelisoko ipuwalo ba꞉ma ka꞉na toelameholemata, nale naeno komoma꞉ Godotamo keba ka꞉na ka꞉toetoenakomo, wadiyala la꞉le nago kapimilo atumu na helonomamo nadipanateniya꞉la꞉.
ROM 15:31 Ba꞉bene nale Yudiya hopamo da꞉tomo, wadiyala la꞉eno toetoe taboeno owalubi komodo Godote na ba꞉bolo na꞉ga꞉lunatena꞉mene hibima꞉ midiha꞉pa꞉te na kubahinamekapoma꞉, ba꞉gala ebeno tawakaluba꞉te Yelusalemalo demedehona, nale komo hibima꞉ midipino malemale mani iba꞉tamo da꞉nikalamemo, ebete ba꞉be komodo ibino kalakala na꞉koimilama꞉mene.
ROM 15:32 Ba꞉bema꞉ hibila, Godote ubi dihatemene, na ba꞉be komone la꞉tamo ko kalakalago pete naeno gobogobo hapulu nale la꞉godolo hido hawela kopama꞉tepama꞉nemo.
ROM 15:33 Tawakaluba꞉tamo hete dikalamena, wadiyala ba꞉be Godote la꞉ hiliyonomagodolo nemedenamene. Ba꞉moe tabo ba꞉ hibinomola, ba꞉ba꞉la.
ROM 16:1 Ba꞉bema꞉ a hibima꞉ midipino naniko Pibikono komoma꞉ na Polote la꞉ begoelamemata, ebe ba꞉ Senekiliya haboeno sose watowatopi ipuwalo eta hido owalubi kamenama꞉ eda꞉na.
ROM 16:2 Ebete la꞉tamo da꞉puluhukumini, wadiyala la꞉le Kodawoeno mahilamo ebe kalakalago ba lawe, eta modoboha꞉ komo ebegodolo dumima ebetamo dito nikamiya꞉la꞉, mabu Godokono tawakaluba꞉te ba꞉bako ododi komodo ebeno hidohido ga꞉limapi gugudima꞉ eda꞉hana. Ba꞉ hibila, dopamo komo hiliyonomo tetelo na ba꞉gala komo hiliyonomo tawakalubi ebete a hidamo owalubinakui.
ROM 16:3 Ba꞉gala nale Pilisilako Akuilako iba꞉tamo nolata tabo bepoememo, hibila, iba꞉te Ya꞉su Kelisoko ipuwalo nago hido oko bowatinaka.
ROM 16:4 Iyo, eta tetelo iba꞉te na mabuma꞉ ibino ka꞉ka꞉ atulatelema꞉ na꞉ga꞉luya꞉ ba꞉be komo ba꞉ ko komoha꞉, ba꞉bema꞉ ibino katene apa꞉mo tatalila ha꞉la, ba꞉be mabuma꞉ na ba꞉gala Yuha꞉pino sose tawakalubi hiliyonomate iba꞉tamo na꞉kalakalaha-nama꞉.
ROM 16:5 Ba꞉gala kebe hibima꞉ midipa꞉te ibino genamalo da꞉kapiyuiminaka, naeno nolata tabo iba꞉tamo atumu na꞉kapoememo. Ba꞉gala naeno hidonomo lumagi Epinitasitamo nolata tabo bekapoememo, ebe ba꞉ A꞉isiya hopo konomolo Kelisoko hibima꞉ midipi ipuwalo dopo lumagima꞉ ediya꞉.
ROM 16:6 Ba꞉gala naeno nolata tabo Ma꞉litamo na꞉kapoememo, ebe ba꞉ la꞉ mabuma꞉ oko helonomamo dowatinami ba꞉be kamenala.
ROM 16:7 Ba꞉gala naeno komo Yunapi dubu A꞉ndolonaikasiko ba꞉gala eta kamena Yuniyasiko, iba꞉tamo naeno nolata tabo atumu na꞉kapoememo. Iba꞉te Ya꞉sukunu oelamepi ipuwalo kokopima꞉ eda꞉hana, hibila, iba꞉te dopamo nago du genamalo emedenama꞉, ba꞉gala nale Kelisoko hibima꞉ midihino iba꞉te dopamo ebetamo ohobiliya꞉.
ROM 16:8 Ba꞉gala A꞉mapiliyatasitamo naeno nolata tabo bekapoememo, ebete aeno Kodawa ipuwalo naeno hido mabulubima꞉ eda꞉na.
ROM 16:9 Ba꞉gala naeno nolata tabo Ebanasitamo na꞉kapoememo, ebe Kelisoko ipuwalo ago oko bowatina, ba꞉bene naeno eta hido lumagi Sta꞉ikisiko ebete atumu naeno nolata tabo uliti na꞉lawa꞉mene.
ROM 16:10 Ba꞉gala Apilisitamo naeno nolata tabo bekapoememo, ebete ebeno Kelisoko ta꞉mata komo toleheno ya꞉lo hawakaliminomo hawakalimiya꞉. Ba꞉gala Alistabulasikono genama gunapa꞉tamo naeno nolata tabo atumu na꞉kapoememo.
ROM 16:11 Ba꞉gala naeno eta Yu lumagi Helodiyanatamo naeno nolata tabo bekapoememo. Ba꞉gala Nasisasikono genama gunapi ipuwalo puya꞉te Kodawa Kelisoko hibima꞉ midipima꞉ deda꞉hana, nale naeno nolata tabo iba꞉tamo atumu na꞉kapoememo.
ROM 16:12 Ba꞉gala Taipinako Taiposako iba꞉tamo naeno nolata tabo bekapoememo, ba꞉moi kamenakamenate Kodawatamo oko hidamo owatina. Ba꞉gala nale naeno hidonomo lumagi Pesisitamo naeno nolata tabo atumu na꞉kapoememo, ebe ba꞉ Kodawatamo oko helonomamo dowatinami ba꞉be eta kamenala.
ROM 16:13 Ba꞉gala Lupasitamo naeno nolata tabo bekapoememo, ebete Kodawatamo oko heloamo ba owatina hidonomo mahilo ba꞉bo lawiya꞉, ba꞉gala ebeno menokote atumu naeno nolata tabo uliti na꞉lawa꞉mene, mabu ebete na ebeno eta guduma꞉ midiniya꞉.
ROM 16:14 Ba꞉bene Asinikitasiko ba꞉gala Pelegoniko, Hemisiko ba꞉gala Patobasiko, ba꞉gala eta dubu Hemasiko, ibi ba꞉gala iba꞉go demedena nale ba꞉bi hibima꞉ midipi hiliyonomatamo atumu naeno nolata tabo bekapoememo.
ROM 16:15 Ba꞉bene Pologasiko ba꞉gala Yuliyako, Neliyasiko ba꞉gala ebeno ekawi bohele, iyo, Olimapasiko atumu ba꞉gala Godokono komo hiliyonomo tawakaluba꞉te iba꞉go demedena, iba꞉tamo nale naeno nolata tabo bekapoememo.
ROM 16:16 Ba꞉bene la꞉ da꞉kapiyuimima, wadiyala la꞉ hiliyonomo etapa꞉te etapino kokoto uwatehuilo na꞉pa꞉watamehuiya꞉la꞉. Ba꞉ hibila, komo hiya꞉hiya꞉ sose tawakalubi hiliyonomate ibino nolata tabo la꞉tamo poelama꞉.
ROM 16:17 Naeno hibima꞉ midipi ekaka꞉la꞉, nale la꞉ koamo goeholamemata, la꞉ hidamo! Puya꞉te hibima꞉ midipi ipuwalo anagiya꞉mida komokomo ba ododili komopino hibima꞉ midi komo da꞉kubahilamenaka, la꞉ iba꞉go kapiyama꞉ akeda꞉hala꞉. Ba꞉ hibila, la꞉le hido ukuia꞉go dopamo duwatiya꞉ma, iba꞉te ba꞉bi hidohido iya꞉tulame komago alaholohona,
ROM 16:18 ba꞉bema꞉ puya꞉te ba꞉bako kuba komokomo dododilina, iba꞉te aeno Kodawa Kelisotamo hibi oko owatihoheno, ibino kateneno kuba ubi komokomo kapiyamo papamila꞉hana. Ba꞉bene puya꞉te kuba ododili iya꞉tawaha꞉ gugudimo demedena, iba꞉te ba꞉bako tuputupupi ha꞉da amiho mulu komodo ba awagaminalena ibino tepo ipuwoeno ukui ba꞉bo kubahilamenaka.
ROM 16:19 Huiyatiya la꞉eno komo eba ka꞉naha꞉. Iyo, komo tawakalubi hiliyonomate ya꞉lo ulihuya꞉, la꞉le Kelisokono hibi tabamo da꞉papamila꞉hanama, ba꞉bema꞉ la꞉ mabuma꞉ na koamo kalakalanamo, ba꞉gala na ubila la꞉ mulu ukuido hidohido komo kapiya ba emalagidolena, kuba ododili iya꞉tawaha꞉ gugudimo nemedenala꞉.
ROM 16:20 Ba꞉bene tawakaluba꞉tamo hete dikalamena, ba꞉be Godote tete tatalila Saitanako la꞉eno nato mabamo a꞉da꞉nate, la꞉le ebe natamo ba꞉bo komikitama꞉nemata. Wadiyala Kodawa Ya꞉sukunu malemale komote la꞉godolo nitanamene.
ROM 16:21 Ba꞉bene nago oko kapimilo dowatina, ba꞉be hidodawa Timotiti naeno komo Yu mabuluba꞉go Lusiyasiko ba꞉gala Ya꞉isoniko ba꞉gala Sosipatako, iba꞉te ibino nolata tabo la꞉tamo poema꞉.
ROM 16:22 Ba꞉gala eta komo. Na Tetiyasiti Poloko mabuma꞉ ba꞉moe leta tabo a꞉miya꞉temo, ba꞉ma ka꞉na nale aeno Kodawoeno mahilamo naeno nolata tabo atumu la꞉tamo na꞉kapoememo.
ROM 16:23 Ba꞉gala Ga꞉iyasiti ebeno nolata tabo bekapoeme, ebeno genamamo sose tawakaluba꞉te pekapiyuiminaka, ba꞉gala na Polote eba꞉go ba emedena ebete na hidamo owalubininako. Ba꞉bene ba꞉moe ko haboeno gabomani hapulu mani dumina ba꞉be dubu Elastasiko, ebete aeno hibima꞉ midi ekawi Katasikoba꞉, iba꞉te la꞉tamo ibino nolata tabo atumu na꞉kapoema꞉.
ROM 16:24 Wadiyala aeno Kodawa Ya꞉su Kelisokono malemale komote la꞉ hiliyonomagodolo nitanamene. Ba꞉moe tabo ba꞉ hibinomola, ba꞉ba꞉la.
ROM 16:25 Ba꞉bema꞉ wadiyala a Godoko kawagaminuya꞉! Na Polote Ya꞉su Kelisoko mabuma꞉ kebe Hido Tabo dolamaginakomo, Godote modobola ba꞉be hido komamo la꞉ hibima꞉ midi ipuwalo kodakoduilame. Ba꞉ hibila, ebete dopamo tete ga꞉ga꞉nomolo kebe hibi komo dugumuinami, ba꞉ma tetelo ebete ba꞉be komo ba hawakalimina na ba꞉bema꞉ olamaginakomo.
ROM 16:26 Iyo, Godokono ukui hawakalimipa꞉te ebeno Bukamo dopamo da꞉miya꞉tenakui, ba꞉bi tabo komokomone ebeno hibi komote ba꞉ma tetelo ba꞉ na꞉hawakalana, ba꞉bema꞉ Wiboha꞉ Ka꞉ka꞉ Godote a ebeno okopi na꞉tutumua꞉tena, ale ebeno hibi komo hopo habanapi hiliyonomatamo konehawakalimima꞉, iba꞉te ebe hibima꞉ ba midina ebetamo kopapamila꞉halenama꞉.
ROM 16:27 Ba꞉bema꞉ Mulunomodawa ba꞉ Godoko kapiyala. Wadiyala ebete Ya꞉su Kelisoko ipuwado awagaha komo lawete, ba꞉bene ba꞉be hido komote emedena emedena tetelo ebegodolo nitanamene! Ba꞉moe ba꞉ naeno tabo kuititila. Ba꞉ba꞉la.
1CO 1:1 Na ba꞉ Polotela, Ya꞉su Kelisote ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala mabu Godote ebeno ubilo na ba꞉bema꞉ ka꞉namiya꞉. Na ba꞉gala a hibima꞉ midipino ekawi Sostenisiko,
1CO 1:2 ale la꞉ puya꞉te Kolini habalo Godokono sose tawakalubima꞉ deda꞉hanama, iyo, ebete Ya꞉su Kelisoko ipuwalo la꞉ pui ebeno hido-talonapima꞉ keda꞉hanama꞉ da꞉ka꞉lami, ale ba꞉moe leta la꞉tamo poemema꞉. Ba꞉gala puya꞉te hiya꞉hiya꞉ hopolo ba emedehona aeno Kodawa Ya꞉su Kelisote ibi kowalubilima꞉ ebeno mahilo da꞉ka꞉minaka, ba꞉moe leta ibi hiliyonomatamo atumu na꞉katoamene, mabu ibino Kodawa ba꞉gala aeno Kodawa, ebe ba꞉ kapiyala.
1CO 1:3 Wadiyala aeno Nabiwi Godoko ba꞉gala Kodawa Ya꞉su Kelisoko iba꞉te ibino malemale komo ba꞉gala hete komo la꞉tamo nikalama꞉mena꞉ta.
1CO 1:4 Komo hiliyonomo tetelo na la꞉ mabuma꞉ kalakala tabo Godotamo adipatenakomo, mabu ebete Ya꞉su Kelisokono oko ipuwado ebeno malemale komo la꞉tamo hibinomolo ikalamia꞉ta.
1CO 1:5 Numa꞉la꞉, la꞉ Kelisoko ipuwalo ba emedena la꞉eno tepo ipuwoeno owalubi komo hiliyonomo ebegodone dito uwatimata, ba꞉bema꞉ ebeno helo ba꞉gala iya꞉tawa komokomo la꞉godolo ba꞉pola꞉na, la꞉le hiliyonomo hiya꞉hiya꞉ tetelo ebeno tabo hidamo kolamagiminakoma꞉ ba꞉gala ebeno ukui hidamo kohawakaliminakoma꞉.
1CO 1:6 Ba꞉ hibila, ale Kelisokono komo la꞉tamo da꞉polamagimima꞉, Godote ba꞉be tabo la꞉ Kolini sose tawakalubino tepo ipuwamo ihatelamete ba꞉bo kodakoduimi.
1CO 1:7 Ba꞉bene aeno Kodawa Ya꞉su Kelisokono komo hawakalimi tete kopema꞉ la꞉le kalakalago ba latimina, ebeno Gobogobote ebeno oko kowatinama꞉ kebe hiya꞉hiya꞉ helo komo tawakaluba꞉tamo dikalamena, la꞉le ba꞉bi owalubi komo hiliyonomo ba꞉bo uwatimata, iyo, ba꞉bi dito ikalame komokomo ipuwalo eta kapiya laweha꞉ komote la꞉godolo kitanaha꞉.
1CO 1:8 Ba꞉bema꞉ kalakala konomola, mabu Godokono ododili komo hiliyonomo ipuwalo ebe ba꞉ hibidawanomola. Numa꞉la꞉, ebete la꞉ hibinomolo a꞉ka꞉lamia꞉ta, la꞉le hibi tuputupupima꞉ ba eda꞉hana Kodawa Ya꞉su Kelisokono Ko Hegelalo la꞉le ebeno holoholo hapuamo ba꞉ba ka꞉na konikulima꞉nemata. Ba꞉bema꞉ hibila, la꞉le la꞉eno hibima꞉ midi ipuwalo kuititi teta꞉mo kodakodalo kola꞉mota꞉hanama꞉ ebete la꞉ hidamo ba꞉buiya꞉minalenakomena꞉ta, iyo, ebete ebeno ubi ya꞉lo ihatiya꞉ la꞉le ebeno Gudago kapimilo kalakalago kemedehonama꞉, ba꞉be Gudu ba꞉ aeno Kodawa Ya꞉su Kelisotela.
1CO 1:10 Naeno hibima꞉ midipi ekaka꞉la꞉, nale Kalowikono genamanapa꞉godone tabo ba꞉ma ka꞉na ulimo, hiya꞉hiya꞉ olowabeletihui komate la꞉godolo ba꞉pola꞉na. Ba꞉bema꞉ aeno Kodawa Ya꞉su Kelisokono mahilamo nale la꞉ ba꞉ma ka꞉na kiyalamemata, la꞉ Godokono ubi komo kapimilo kododilinakoma꞉ ukui kapiya na꞉lawenakuya꞉la꞉ ba꞉bakobako anagiya꞉mida komate la꞉ ipuwalo pola꞉nakapoma꞉, iyo, wadiyala la꞉ la꞉eno tepo ipuwalo ukui kapiyanomoma꞉ neda꞉hanala꞉.
1CO 1:12 Numa꞉la꞉, naeno ubiha꞉ komo ba꞉ ba꞉ma ka꞉nala. La꞉eno sose kapiyuimi ipuwalo komo la꞉ hiliyonomate hiya꞉hiya꞉ daedae ukui tabo ba꞉ma ka꞉na ga꞉lanakomata, etate na Polokono kapiyuimidawama꞉ ba꞉goe, etate na Apolosikono kapiyuimidawama꞉ ba꞉goe, ba꞉bene etate atumu na Pitakono kapiyuimidawama꞉ ba꞉kagoe, ba꞉gala etate atumu ebeno awagaha ipuwalo na Kelisokono kapiyuimidawama꞉ kagoenako.
1CO 1:13 A꞉iye! Kelisokono sosete ebeno ape kapiyama꞉ ba eda꞉na, la꞉ komopa꞉te ba꞉be ape hiya꞉hiya꞉ anagilamema꞉ ewagelenamata! Komo la꞉ naeno kapiyuimipima꞉ da꞉ga꞉lanama, na ubihinola. Numa꞉la꞉, na Polote la꞉ mabuma꞉ keha pihigalo kahoiya꞉ha꞉, ba꞉be mabuma꞉ la꞉le la꞉eno beyamo wadulatele komo da꞉lawima, ba꞉be komo ba꞉ Kelisokono mahilamo lawimata, naeno mahilamoha꞉!
1CO 1:14 Iyo, naeno kalakalate bitana, mabu nale la꞉ beyamo kawadulateleha꞉ huiyatiya la꞉ hiliyonomo ipuwalo Kalisipasiko ba꞉gala Ga꞉iyasiko ba꞉bi dubu netewanomo bewadulatelimo.
1CO 1:15 Ba꞉bema꞉ komo la꞉ hiliyonomo ipuwalo etate kamodobonaha꞉ ba꞉mako daedae tabo goe, beyamo aduti ipuwalo na Polokono ta꞉matadawama꞉ edimo.
1CO 1:16 Hiya꞉! Eta ukui natamo ka꞉ma꞉ a꞉kuluhuku, ba꞉ma ka꞉na la꞉ ipuwalo nale Stepanasiko ebeno genamanapa꞉go atumu beyamo a꞉kawadulatelimo, ba꞉bene la꞉godolo eta dawa kuda꞉ a꞉luta nale ebe beyamo dadutimo, huiyatiya ba꞉be dawoeno komo na nipo emalagidolutamo.
1CO 1:17 Ba꞉ hibila, Kelisote na hiya꞉hiya꞉ tawakaluba꞉tamo koenamiya꞉ha꞉ nale ibi beyamo konewadulatelema꞉, ao, ebe huiyatiya na ebeno Hido Tabo olamagima꞉ oenamiya꞉. Numa꞉la꞉, ba꞉be Taboeno helo komo ba꞉ Kelisote keha pihigalo da꞉hoiya꞉ ba꞉be komoeno helo hawakalimi komola, ba꞉bema꞉ nale hopo habanapino hiya꞉hiya꞉ mulu komamo Hido Tabo olamagi modoboha꞉, mabu kebe lumagiti ba꞉be Tabo hopo haboeno mulu tabo komamo dolamagimini, Kelisokono hoe komoeno helote ba꞉be tabo olamagi ipuwalo hibilo a꞉kahawakalamene.
1CO 1:18 Ba꞉ hibila, puya꞉te ibino ka꞉ka꞉ mula꞉ gabo ota ipuwalo Saitanakono hibo gabo dududina, iba꞉te nemalagidolona nale Kelisokono hoe komoma꞉ dolamaginakomo ba꞉be tabo ba꞉ daedae ukui tabola. Huiyatiya a puya꞉te aeno ka꞉ka꞉ mula꞉ komo lawema꞉ hibima꞉ midi gabodo da꞉tolamenama꞉, aeno ukuilo ba꞉be tabo ba꞉ Godokono helo hawakalimi komola.
1CO 1:19 Ba꞉be mabuma꞉ Godote ebeno Bukalo tabo ba꞉ma ka꞉na goena, “Hopo habanapa꞉te pui ibino mulupima꞉ da꞉ga꞉lana, nale ba꞉bi dubuino hiya꞉hiya꞉ mulu komo kokubahilamema꞉nemo. Iyo, iba꞉te sikulu ipuwalo kebe koko komo diya꞉tawahuya꞉, nale ba꞉bi komo kokoha꞉ma꞉ goete tama꞉mo dito komiya꞉tema꞉nemo.”
1CO 1:20 Ba꞉moe taboeno ipuwa ba꞉ma ka꞉nala, ba꞉moe hopote kuititi teta꞉mo nuluhukuhino tawakalubi hiliyonomo ipuwalo muludawa eta kapiyate hibilo a꞉kemedenamene, iyo, ibino koko sikulu ipuwalo la꞉le hibi iya꞉tawadawa kapiya a꞉kuma꞉lemata, ba꞉gala gabomani hapulu dolowabeletihuinaka ba꞉ba꞉te ibino daedae ukui komokomo kapiya bolamagiminaka. Ba꞉bema꞉ hibila, hopo habanapa꞉te kebe komo hidohido mulu komoma꞉ da꞉ga꞉lana, Godote ba꞉bi hiliyonomo komoeno daedae komo ya꞉lo a꞉hawakalimiya꞉!
1CO 1:21 Numa꞉la꞉, Godote ebeno hibi mulu komodo gabo a꞉duhimiya꞉, hopo habanapi ha꞉kiya ibino mulu ukui komodo ebeno hibi komo kiya꞉tawahama꞉. Ba꞉ba tetelo ebete huiyatiya ebeno ubi komo ba꞉ma ka꞉na ihatiya꞉, ale tawakaluba꞉tamo kebe Hido Tabo dolamagiminakoma꞉, ba꞉be Tabo iba꞉te aeno daedae ukui taboma꞉ da꞉ga꞉lana, Godote ba꞉be Tabo hawakalimi komodo hibima꞉ midipino ka꞉ka꞉ hibinomolo na꞉mula꞉lelamena.
1CO 1:22 Ba꞉ hibila, Yunapino komo ba꞉ma ka꞉nala, komo ibi hiliyonomate na꞉ga꞉lana, iba꞉te Godokono helo hawakalimino hanohano komo hibilo dulamemena꞉ ebeno tabo hibima꞉ ba꞉bo komidima꞉na꞉. Huiyatiya Yuha꞉pino komo hiya꞉la, komo ibi hiliyonomate na꞉ga꞉lana, keba tetelo iba꞉te eta tabo uliho komodo ba꞉moe hopoeno mulu komokomo diya꞉tawahamena꞉, iba꞉te ba꞉be tabo hibima꞉ ba꞉bo komidima꞉na꞉.
1CO 1:23 A huiyatiya ba꞉bi hibima꞉ midiha꞉pino hiya꞉hiya꞉ kuba ukui komamo papamila꞉haheno, Kelisote keha pihigalo da꞉hoiya꞉ ba꞉be komo ko komonomoma꞉ ba ga꞉lana ba꞉be tabo tawakaluba꞉tamo ba꞉bo olamagiminakoma꞉. Ba꞉be mabuma꞉ hibima꞉ midiha꞉pi ipuwalo Yunapino komo ba꞉ma ka꞉nala, iba꞉te Hido Tabo uliholo eta hanohano komo umihino nato ba꞉bo ukamidahalenaka, ba꞉gala Yuha꞉pa꞉te atumu ba꞉be Taboma꞉ ubiha꞉ma꞉ ba keda꞉ha daedae ukui tabo komoma꞉ ba꞉bo emalagidolonaka.
1CO 1:24 Huiyatiya kalakala konomola, Yunapi ba꞉gala Yuha꞉pi ipuwalo Godote pui ebeno gugudima꞉ eda꞉hama꞉ da꞉ka꞉lamiya꞉, ba꞉ba꞉te Hido Tabo uliho tetelo hibima꞉ ba midi ba꞉ma ka꞉na ba꞉bo ga꞉lanaka, hibila, Kelisoko ba꞉ Godokono helo ba꞉gala ebeno mulu hawakalilamedawala.
1CO 1:25 Iyo, numa꞉la꞉, Godokono ododili ipuwalo hopo habanapa꞉te kebe komo daedae ukui komoma꞉ da꞉ga꞉lana, ba꞉be komoeno muluti ibi hiliyonomoeno mulu komo ba꞉ na꞉gogolena, ba꞉gala Godokono ododili ipuwalo iba꞉te kebe komo heloha꞉ komoma꞉ da꞉ga꞉lana, ba꞉be komoeno helote atumu ibi hiliyonomoeno helo ba꞉ na꞉kagogolena.
1CO 1:26 Ba꞉bema꞉ naeno hibima꞉ midipi ekaka꞉la꞉, Godote la꞉ ebeno gugudima꞉ eda꞉hama꞉ da꞉ka꞉lami, ba꞉be kalakala tetete uluhukuhino la꞉ dopamo kebako tawakalubima꞉ keda꞉honamima, wadiyala la꞉ ba꞉be komo hidamo nemalagidolala꞉. Ba꞉ hibila, la꞉ hibima꞉ midipi hiliyonomo ipuwalo dopamo kapiyakapiyate hopo habanapino mulu ukui komamo ba꞉gala helo komamo ba꞉gala dogodogo ilina uwate komamo kokopima꞉ eda꞉hanamimata. Iyo, la꞉ kapiyakapiyanomate Hido Tabo kalakalago ba lawe, huiyatiya la꞉eno tawakalubi ipuwalo komo mulupi ba꞉gala helohelopi ba꞉gala ilina dogodogopi ibi hiliyonomate ubiha꞉ma꞉ ba꞉bo eda꞉huya꞉.
1CO 1:27 Numa꞉la꞉, hopo habanapa꞉te pui muluha꞉pima꞉ ba꞉gala dito tawakalubima꞉ da꞉ga꞉lana, ya꞉lo tetenomolo Godote ba꞉bi tawakalubinomo buwatiya꞉, mabu ebete ebeno ubi ba꞉bo ihatiya꞉ ba꞉be ododi komodo hopo habanapino mulupi ba꞉gala kokopa꞉tamo hilopo kikalamema꞉.
1CO 1:28 Iyo, hopo habanapa꞉te pui hidohidoha꞉pima꞉ ba꞉gala tawakalubiha꞉ma꞉ da꞉ga꞉lana, Godote ba꞉bako tawakalubi ebeno gugudima꞉ keda꞉hanama꞉ uwatiya꞉, mabu ebe ubila ba꞉be ebeno ododi komodo kebe komokomo ba꞉moe hoponapa꞉te hidohidonomoma꞉ da꞉ga꞉lana, ba꞉bi komo hiliyonomate wibohote ebete ibino hibi modoboha꞉ komokomo ba꞉bo kohawakalilamema꞉ne.
1CO 1:29 Ba꞉bema꞉ hibila, hopo habanapi hiliyonomate Godokono holoholo hapuamo da꞉nikulimina꞉, ibi ipuwalo eta kapiyate a꞉kamodobamene ebe ha꞉kiya ebe kawagaminama꞉.
1CO 1:30 Numa꞉la꞉, Godokono ododi komodo la꞉ ba꞉ma tetelo Ya꞉su Kelisoko ipuwalo emedehonamata, la꞉eno ododi komodoha꞉, iyo, ebete Kelisoko ebeno mulu hawakalimidawama꞉ da꞉midiya꞉, ba꞉bema꞉ ebete ebe ipuwado atamo hibi mulu ukui bikaa꞉menako. Ba꞉gala ba꞉moe ba꞉ eta komola, ba꞉moe Kelisote a Saitanakono du genama ipuwane duluhukua꞉tiya꞉, ba꞉ba tetelo ebete ebeno tuputupu emede komo atamo ikaa꞉mete a Godokono tawakalubima꞉ dito midiya꞉.
1CO 1:31 Ba꞉be mabuma꞉ Godokono Bukalo eta tabote ba꞉ma ka꞉na itana, “Lumagiti ha꞉kiya ebeno ododi komoma꞉ akawagaminala꞉, huiyatiya Godote ebe ipuwalo hido oko dowatina, wadiyala ebete ba꞉be komoma꞉ ba kalakala ebeno Kodawa kapiya nawagaminamene.”
1CO 2:1 Ba꞉bene naeno hibima꞉ midipi ekaka꞉la꞉, dopamo nale la꞉tamo da꞉puluhukuimo, ba꞉ba tetelo na Godokono hibi komo la꞉tamo kohawakalimima꞉ ebeno tabo ba olamagi na hopo habanapino koko iya꞉tulame tabo komamo ba꞉gala ibino mulu ukui komamo kapolamagiha꞉, mabu na ubiha꞉ma꞉ edimo la꞉le na hunamo adipanatenema꞉.
1CO 2:2 Ba꞉bema꞉ nale la꞉go ba emedena naeno tepo ipuwoeno ukui ba꞉ma ka꞉na ihatimo, naeno hiliyonomo ododili ipuwalo kapiyadawa hunamo ba adipatena, ebeno hidonomo oko kapiya ba꞉bo kohawakalimima꞉. Ba꞉be dawa ba꞉ Ya꞉su Kelisotela, ba꞉bene ebeno hidonomo oko ba꞉ ebete keha pihigalo da꞉hoiya꞉ ba꞉be komola.
1CO 2:3 Ba꞉ hibila, nale la꞉ ipuwalo oko dowatinamimo, ba꞉be tete ga꞉ga꞉dopolo naeno ape heloha꞉ma꞉ ba eda꞉na, nale Godokono tabo la꞉tamo hidamo kolamagima꞉ komo hiliyonomo tetelo na la꞉eno holoholo hapulu tole komago a꞉lililanakuimo.
1CO 2:4 Ba꞉gala eta komo. Ba꞉ba tetelo nale Hido Taboeno komokomo la꞉tamo kohawakalilamema꞉ hopo habanapino mulu ukui komamo kolamaginakuiha꞉. Iyo, na iya꞉tawuimo nale ba꞉moe hopoeno mulu ukui komamo la꞉ diya꞉tulamema, ba꞉bema꞉ Godokono Gobogobote la꞉ ipuwalo hibi oko a꞉kowata꞉mene, huiyatiya keba tetelo ebete ebeno heloamo la꞉eno tepo ipuwoeno ukui hiya꞉ma꞉ da꞉midililamemena꞉, la꞉ ebeno oko owati ipuwado hibima꞉ midipima꞉ ba꞉bo keda꞉hama꞉nemata.
1CO 2:5 Ba꞉be mabuma꞉ la꞉ ba꞉moe komo hidamo niya꞉tawahala꞉, la꞉eno hibima꞉ midi komoeno mabu ba꞉ Godokono helo komola, hopo habanapino mulu ukui komoha꞉.
1CO 2:6 La꞉ huiyatiya numa꞉la꞉, ale Hido Tabo dolamagiminakoma꞉ ba꞉be Taboeno mulu komo hibilo bitana, puya꞉te hibima꞉ midi ipuwalo hidamo dapepehona ibi kapiyate ba꞉be mulu modobolo lawenaka. Huiyatiya ba꞉be Taboeno mulu komo ba꞉moe hopo habanapa꞉te ibino ukuilo kalawenaha꞉, ba꞉gala kebe kuba gobogobate ba꞉moe hopolo helohelonomoma꞉ deda꞉hana, ibi atumu ba꞉be mulu komo modobolo a꞉kalawa꞉la꞉, hibila, ba꞉bi kuba gobogoboeno helo komote ba꞉ na꞉wibona.
1CO 2:7 Iyo, ale Godokono Hido Tabo ba olamagimi, ebete dopamo diya gabodo dugumuiya꞉ ba꞉be mulu komote hibima꞉ midipa꞉tamo ba꞉ma tetelo na꞉hawakalana, mabu Godote ba꞉moe hopo ba꞉gala alomo ododilihino dopamo ebete ebeno ubi komo ba꞉ma ka꞉na ihatiya꞉, galane tetelo ebete ebeno mulu ukui komamo a hibima꞉ midipi kawagaminoema꞉ne.
1CO 2:8 La꞉ huiyatiya numa꞉la꞉, ba꞉moe hopo habalo helohelonomoma꞉ deda꞉hana, ba꞉bi kuba gobogobate kamodobuya꞉ha꞉ Konomo Alago Emededawoeno hoe komoeno hibi mulu ipuwa lawema꞉. Iyo, iba꞉te ba꞉be Kodawoeno hoe komoeno ipuwa hibilo niya꞉tawahuya꞉tale iba꞉te ebe keha pihigalo ba꞉kanakapumiya꞉na꞉.
1CO 2:9 Huiyatiya Godokono Bukalo eta tabote a hibima꞉ midipino komo ba꞉ma ka꞉na hawakalimina, “Hopo habanapi hiliyonomate dopamo kebe hido komo kuminakuiha꞉, ba꞉gala iba꞉te kebe hido komo dopamo kulihonakuiha꞉, ba꞉gala iba꞉te kebe hido komote kuluhukuma꞉ ibino tepo ipuwoeno ukuilo kemalagidolonakuiha꞉, ba꞉moe ba꞉be komo Godote a꞉hiduimiya꞉, puya꞉te ebe malemalelo demalagidolona, ba꞉bi tawakalubi kapiyatamo kikalamema꞉.”
1CO 2:10 Ba꞉bema꞉ Godote dopamo dugumuiya꞉, ba꞉ma tetelo ebete ba꞉be hido komo ebeno Gobogoboeno heloamo atamo a꞉hawakalimiya꞉. Ba꞉ hibila, kebe komate Godokono tepo ipuwalo da꞉pola꞉na, ebeno Gobogobote ba꞉bi komo iya꞉tawanomola, iyo, kebe komate awalela ipuwalo da꞉pola꞉na, ba꞉bi komo hiliyonomo ba꞉ atumu ebete modobonomolo ulamenako.
1CO 2:11 Numa꞉la꞉, lumagino tepo ipuwoeno ukui eta lumagiti hibilo a꞉kiya꞉tawamene, huiyatiya ba꞉be lumagino gobogobo kapiyate ebeno tepo ipuwoeno komo iya꞉tawala. Ba꞉ ba꞉ba ka꞉na Godokono tepo ipuwoeno ukui eta lumagiti iya꞉tawa modoboha꞉, huiyatiya ebeno Gobogobo kapiyate ebeno komo iya꞉tawala.
1CO 2:12 Ba꞉moe ba꞉be mabuma꞉ ba꞉moe hopolo demedehona ba꞉bi hiya꞉hiya꞉ gobogobo ipuwalo Godote eta kapiya a hibima꞉ midipa꞉tamo kikaa꞉miya꞉ha꞉, ao, ebe huiyatiya ebeno Gobogobonomo atamo ikaa꞉miya꞉, ba꞉bene ale ebeno oko kowatinama꞉ ebete kebe hiya꞉hiya꞉ helo atamo dito dikaa꞉miya꞉, ale ebeno Gobogoboeno ukui komodo ba꞉bi owalubi komo hidamo kiya꞉tawahama꞉nema꞉.
1CO 2:13 Ba꞉be mabuma꞉ ale hopo habanapino mulu iya꞉tulame komamo Godokono tabo a꞉kolamagima꞉lema꞉, ao, a huiyatiya ebeno Gobogoboeno iya꞉tulame tabo komamo olamagiminakoma꞉. Numa꞉la꞉, ale Godokono taboeno ipuwa komokomo ebeno Gobogoboeno owalubi komamo da꞉hawakalilamema꞉, puya꞉te ebeno ukuilo demalagidolona ba꞉ba꞉te ba꞉bi taboeno ipuwa komokomo hidamo kuwatema꞉na꞉.
1CO 2:14 Huiyatiya pote Godokono Gobogoboeno ukuilo emalagidolonaheno, ba꞉be lumagi modoboha꞉ Godote tawakaluba꞉tamo dikalamena ba꞉bi hiya꞉hiya꞉ helo komo kuwatema꞉. Ba꞉ hibila, ba꞉be lumagiti Godokono dito ikame komo hibima꞉ midipa꞉godolo dulamemene, ba꞉bi komoeno mabu iya꞉tawaheno tawakalubino daedae ukui komoma꞉ ba꞉bo kemalagidoloma꞉ne. Iyo, Gobogobote ebe owalubihino ebete ba꞉be Gobogoboeno oko owati komokomo hidamo a꞉kiya꞉tawamene.
1CO 2:15 Huiyatiya la꞉ numa꞉la꞉, pote Godokono Gobogoboeno ukuilo demalagidolona, ba꞉be lumagi modobola kebe komate ebe ba꞉gala komo tawakaluba꞉godolo da꞉pola꞉na, ba꞉bi hiliyonomo komo Gobogoboeno owalubi komamo hidamo kanagilamelelamema꞉ne. Huiyatiya kalakala konomola, hopo habanapi ipuwalo eta lumagiti modoboha꞉ hibima꞉ mididawagodolo da꞉pola꞉na ba꞉bi komo kanagilamelemema꞉, mabu Godote ha꞉kiya ebeno komo kanagilamelemema꞉ne.
1CO 2:16 Ba꞉be mabuma꞉ Godokono Bukalo eta tabote ba꞉ma ka꞉na goena, “Dopamo tupuimi mabuni eta lumagiti Kodawa Godokono tepo ipuwoeno ukui hibilo kalawenakuiha꞉, ba꞉bema꞉ eta dawate modoboha꞉ ebe uli komo iya꞉tumima꞉!” A hibima꞉ midipa꞉te huiyatiya Kelisokono tepo ipuwoeno ukui komokomo hiliyonomo ya꞉lo uwatiya꞉ma꞉.
1CO 3:1 Naeno hibima꞉ midipi ekaka꞉la꞉, nonolata, nale la꞉tamo dopamo da꞉puluhukuimo, ba꞉ba tetelo la꞉ Godokono Gobogoboeno ukuilo demedehona ba꞉bako tawakalubima꞉ keda꞉hanamiha꞉, iyo, la꞉ Kelisokono emede ipuwalo a꞉lia꞉li gugudi huiyama꞉ eda꞉hanamimata! Ba꞉bema꞉ hibila, Godokono tabo iya꞉tulame ipuwalo na ba꞉be taboeno koko ipuwa komo la꞉tamo hawakalilame kamodoboha꞉, huiyatiya la꞉ puya꞉te hopo habanapino ukuilo demedenama nale la꞉ ba꞉bako tawakalubimo ba emalagidole la꞉ ba꞉bo owalubilinakuimata.
1CO 3:2 Iyo, ba꞉ba tetelo naeno iya꞉tulame ipuwalo nale la꞉tamo nono kapiya bikalamenakuimata, nale hibi baa꞉ la꞉tamo ikalame kamodobonakuiha꞉. Ba꞉bene tete ga꞉ga꞉dopo ba peto, la꞉ huiyatiya hibima꞉ midi ipuwalo apepehoheno, ba꞉ma tetelo la꞉ ba꞉ atumu hibi baa꞉ nahama꞉ kamodobonaha꞉.
1CO 3:3 Numa꞉la꞉, hibima꞉ midiha꞉pa꞉te keba ka꞉na kemedehona, la꞉ ba꞉ba ka꞉na la꞉eno kateneno ukuilo emedenamata, iyo, la꞉ ipuwalo komopa꞉te komopino mulu ukui ba꞉gala ilinama꞉ ba maubaha, hiya꞉hiya꞉ olowabeletihui komate la꞉godolo ba꞉pola꞉na. Ba꞉ hibila, ba꞉bi komodo la꞉eno hibi komote ba꞉ma ka꞉na hawakalana, la꞉ la꞉eno kateneno ukuilo emedenamata.
1CO 3:4 Ba꞉gala nale dopamo a꞉goemo, la꞉eno sose ipuwalo etate na Polokono kapiyuimidawama꞉ ba꞉goe, etate na Apolosikono kapiyuimidawama꞉ ba꞉goe. Ba꞉be komodo la꞉eno hibi komote atumu ba꞉ma ka꞉na kahawakalana, la꞉le hibima꞉ midiha꞉pino emede komo bibamilatelenamata.
1CO 3:5 A꞉iye! Ba꞉moe Apolosiko potela꞉ka꞉? Ba꞉gala na Poloko potela꞉ka꞉? A netewapi ba꞉ Godokono okopila, iyo, la꞉ aeno oko ipuwado ebeno Hido Tabo hibima꞉ a꞉midimata. Ba꞉bema꞉ numa꞉la꞉, a netewapa꞉te la꞉ ipuwalo hiya꞉hiya꞉ oko bepowatima꞉, Godote atamo keba ka꞉na kikaa꞉mi ba꞉ ba꞉ba ka꞉na.
1CO 3:6 Iyo, nale dopamo pete Hido Taboeno kikipo la꞉ ipuwamo pamihote, ba꞉bene Apolositi pete ba꞉bi kikipo hunamo modobo beya bepehaminahui. Ba꞉bene a netewapino oko gala hapuni Godote ha꞉kiya ba꞉bi kikipatamo helo ba ikalame, iba꞉te hidamo ba꞉bo apepehuya꞉.
1CO 3:7 Ba꞉bema꞉ oko owati ipuwalo kikipo amihodawa ba꞉gala beya hola꞉minahalelamedawa ibino ododili komo ba꞉ hegehegenomola, iyo, oko ipuwalo Godoko kapiyate konomo komo bododinako, mabu ebe ba꞉ kikipatamo helo ikalamedawala, iba꞉te hidamo ba꞉bema꞉ apepehonaka.
1CO 3:8 Numa꞉la꞉, Godokono umi ipuwalo puya꞉te kikipo amiho oko dowatihona ba꞉gala puya꞉te beya hola꞉minahalelame oko dowatihona, iba꞉te ibino hiya꞉hiya꞉ komo ba ododili huiyatiya kapiya oko bowatina, ba꞉be mabuma꞉ ebete ibino oko kapiyanomo gabodo danagilamelelamemene ibi hiliyonomatamo modobonomo huiya ba꞉bo kikalameholema꞉ne.
1CO 3:9 Ba꞉ hibila, Apolosiko ba꞉gala na, a ba꞉ Godokoba꞉ oko kapimilo dowatinama꞉ ba꞉bi okopila, ba꞉bene la꞉ hibima꞉ midipi ba꞉ ebeno hidohido naha ilinate kebolo kapepehona ba꞉be pali hakala, ba꞉gala la꞉ ba꞉ ebete detena ba꞉be hido genamala.
1CO 3:10 Ba꞉bema꞉ hibila, Godokono oko kowatinama꞉ ebete ya꞉lo tetelo kebe hiya꞉nomo helo natamo dikanamiya꞉, na ba꞉be heloamo ebeno hidonomo genama ete oko la꞉ ipuwalo ba꞉bo tupuimimo, mulu okodawate tuputupu ukuilo nopo keba ka꞉na ka꞉tamotenako ba꞉ba ka꞉na. Ba꞉bene naeno gala hapuni komo okopa꞉te pelamete, iba꞉te nale dopamo da꞉pehawakalimimo ba꞉be hototo mabu hunulu eta hido oko beka-owatina. Ba꞉bema꞉ wadiyala okopi hiliyonomate ibino hiya꞉hiya꞉ oko hidonomamo nulamenakamena꞉,
1CO 3:11 mabu Godote ebeno genamoeno kodakoda hototo ya꞉lo amiya꞉, ba꞉be hototo ba꞉ Ya꞉su Kelisotela. Ba꞉be mabuma꞉ okopi ipuwalo eta lumagiti modoboha꞉ Godote damiya꞉ ba꞉be dopo hototo magubutiti eta uli hototo ba꞉bo kamima꞉.
1CO 3:12 Ba꞉ hibila, okopa꞉te ibino hiya꞉hiya꞉ ilina uwatenaka ba꞉be hototoeno genama ete oko kupula꞉ma꞉, ba꞉bene komo iba꞉te golodo ilina, ba꞉gala siliba ilina, ba꞉gala huiya kokonomo a꞉la꞉minale nakola uwatete, ba꞉bako hidohidonomo ilinamo genama ete oko ba꞉bo owatina. Huiyatiya komo iba꞉te balibali keha, ba꞉gala kalawa oga, ba꞉gala sa꞉lo uwatete, ba꞉bako ilinamo atu oko beka-owatina.
1CO 3:13 Ba꞉bema꞉ Kelisokono Ko Hegelate da꞉puluhukumini, ba꞉bi genama etepino hiya꞉hiya꞉ oko owati komate hibinomolo kohawakalahama꞉na꞉. Iyo, iba꞉te genama ete ipuwalo kebe ilinamo detena, ebete pete ba꞉bi ilina hiliyonomo ebeno koa꞉mo ba pemadolame kubakubadopo ilina ba꞉ dito kohawaminadigalema꞉ne, ba꞉bene koete naleha꞉ ilina ba꞉bi kodakoda ilina kapiyate ebeno genamalo emedena tetelo ba꞉pola꞉namene. Ba꞉ hibila, Kelisote ba꞉be gabodo hiliyonomo okopino hiya꞉hiya꞉ hidohido oko ba꞉gala kubakuba oko ba꞉bo kohawakalilamema꞉ne.
1CO 3:14 Ba꞉bema꞉ Godote damiya꞉, kebe lumagiti ba꞉be hototo hunulu hido oko dowatina, ba꞉be lumagino okote koe ipuwalo wiboheno ebete ebeno hido huiya ba꞉bo kolawema꞉ne.
1CO 3:15 Huiyatiya kebe lumagiti Godokono genama ete ipuwalo kuba oko dowatina, ebeno okote koe ipuwalo alatiditi, ba꞉bene ebete Godokono malemale ipuwalo ebeno ka꞉ka꞉ mula꞉ komo kapiya kolawema꞉ne huiyatiya eta hido huiya a꞉kalawa꞉mene. Iyo, ba꞉be lumagino komote ba꞉ma ka꞉na kitanama꞉ne, eta lumagino genama koete ba woita, ebete ilinaheno ebeno ka꞉ka꞉ kapiyago koe ipuwane keba ka꞉na ka꞉puluhukunako ebete Hunu Habalo ba꞉ba ka꞉na konilutama꞉ne.
1CO 3:16 La꞉ iya꞉tawahala, la꞉ hibima꞉ midipi ba꞉ Godoko adikumino hiya꞉ genamalata, ba꞉gala ebeno Gobogobote la꞉ ipuwalo bemedena,
1CO 3:17 ba꞉bema꞉ kebe lumagiti Godoko adikumino genama da꞉kubahimimini, Godote ba꞉be lumagi hibinomolo kokubahimima꞉ne. Numa꞉la꞉, Godoko adikumino hiya꞉ genama ba꞉ ebeno hido-talona genamanomola, iyo, la꞉ hibima꞉ midipi ba꞉ ba꞉be genamama꞉ eda꞉hanamata.
1CO 3:18 Ba꞉bema꞉ la꞉ ipuwalo eta lumagiti ebe ha꞉kiya ebe ha꞉da akamihoma꞉la꞉, iyo, etate hopo habanapino hiya꞉hiya꞉ mulu ukui komodo ebe ha꞉kiya ebe muludawama꞉ akagaa꞉la꞉. Wadiyala ebe huiyatiya hopo habanapino holoholo hapulu daedae lumagima꞉ ba eda꞉na Godogodone hibi mulu ukui komo ba꞉bo nuwata꞉mene.
1CO 3:19 Mabu hopo habanapa꞉te kebe komokomo ibino mulu ukui komoma꞉ da꞉ga꞉lana, huiyatiya Godote ba꞉bi komo ibino daedae ukui komoma꞉ goena. Ba꞉be mabuma꞉ ebeno Bukalo eta tabote ba꞉ma ka꞉na goena, “Godote hopo habanapino mulu komamo gubi a꞉delamete, iba꞉te ba꞉bamo dito konegudima꞉na꞉.”
1CO 3:20 Ba꞉gala ebeno Bukalo ebete gala ba꞉ma ka꞉na kagoena, “Mulupa꞉te ibino tepo ipuwalo kebe nopo ka꞉tamolatelenaka, na Kodawate iya꞉tawamo ba꞉bi ukui komodo eta hido komote a꞉kuluhukamene!”
1CO 3:21 Ba꞉bema꞉ la꞉ ipuwalo etate hopo habanapino mulu komoma꞉ ebe ha꞉kiya ebe gala akawagaminala꞉! Numa꞉la꞉, la꞉ Kelisoko ipuwalo ba emedena, ebeno hiliyonomo hidohido komate la꞉enoma꞉ eda꞉hana.
1CO 3:22 Iyo, na Poloko ba꞉gala Apolosiko ba꞉gala Pitako, a Kelisokono okopima꞉ ba eda꞉hana la꞉eno okopima꞉ atumu na꞉ka-eda꞉hanama꞉. Ba꞉bene ba꞉moe hopoeno ilina hiliyonomo ba꞉gala hibi ka꞉ka꞉ komo ba꞉gala hoe ipuwalo wato kikipo lawe komo ba꞉gala ba꞉ma tetelo dikulihona ba꞉bi komokomo hiliyonomate la꞉enoma꞉ ba eda꞉hana, galane tetelo dikulihomena꞉ ba꞉bi hiliyonomo komate atumu la꞉enoma꞉ kakeda꞉hama꞉na꞉. Ba꞉bema꞉ hibila, hidohido komo hiliyonomo ba꞉ la꞉eno komola,
1CO 3:23 mabu la꞉ Kelisokono tawakalubima꞉ eda꞉hanamata, ebe ba꞉ atumu Godokonoma꞉ keda꞉na.
1CO 4:1 Ba꞉bema꞉ wadiyala la꞉le na Poloko ba꞉gala Apolosiko ba꞉gala komo a huiya hibima꞉ midipi, la꞉le aeno komo ba emalagidole a Kelisokono hibi okopima꞉ na꞉midiya꞉la꞉. Iyo, Godote dopamo dugumuiliya꞉, ebete ba꞉ma tetelo ba꞉bi komo puya꞉tamo da꞉hawakalilamiya꞉ iba꞉te hopo habanapi hidamo kiya꞉tulamema꞉, a ba꞉ ba꞉bi okopila.
1CO 4:2 Numa꞉la꞉, ba꞉moe hopolo eta kodawate ebeno hiliyonomo okopi ipuwalo kapiyakapiya kuwatema꞉ne iba꞉te komopino oko namutulubima꞉ keda꞉hanama꞉, ba꞉bema꞉ ba꞉bi watowatopa꞉te komo okopino ododili ipuwalo ibi hidonomamo ba owalubilina ibino kodawa ba꞉bo kokalakaluimima꞉na꞉, iyo, iba꞉te ba꞉be gabodo ibino tepo ipuwoeno hibi komo ebetamo kohawakalimima꞉na꞉.
1CO 4:3 Ba꞉bema꞉ naeno komo ba꞉ma ka꞉nala, na ha꞉kiya naeno komo anagiya꞉midaheno ba꞉be komo naeno anagiya꞉midadawa Godotamo miya꞉panamo. Ba꞉bene la꞉le naeno oko komo anagilamelenamete kubama꞉ da꞉ga꞉lama, ba꞉gala gabomana꞉te atumu naeno komo anagiya꞉mida ipuwalo kubama꞉ da꞉kaga꞉lamena꞉, na ba꞉be komoma꞉ ukui bilibilima꞉ a꞉keda꞉mo. Ba꞉ hibila, naeno tepo ipuwoeno mulu ukuiti na kuba ododidawama꞉ kamidininaha꞉, huiyatiya numa꞉la꞉, Godoko kapiyate naeno hibi komo iya꞉tawala, naeno tepo ipuwoeno ukui komoteha꞉.
1CO 4:5 Ba꞉be mabuma꞉ Kodawa Kelisote puluhukuhino, la꞉le eta lumagino komo anagiya꞉midamete ebe kubadawama꞉ akaga꞉lala꞉. Ba꞉ hibila, Kelisokono hibi tetenomolo ebe ha꞉kiya tawakalubino komo ba panagilamelelame, iba꞉te ba꞉ma tetelo kebe komokomo du ipuwamo dugumuilina ba꞉gala kebe ubi komokomo ibino tepo ipuwamo dawaminalena, ebete ba꞉bi hiliyonomo komo alamo uluhukulatelete ba꞉bo kohawakalilamema꞉ne. Ba꞉bema꞉ ba꞉be tete ba꞉ Godokono hido tetema꞉ keda꞉ma꞉ne, ebete ebeno hiliyonomo tawakalubino hidohido ododili mabuma꞉ ibi komililameholema꞉.
1CO 4:6 Ba꞉bema꞉ naeno hibima꞉ midipi ekaka꞉la꞉, la꞉eno ukui kotuputupuilamema꞉ nale Apolosiko ba꞉gala na, aeno oko komo ba hawakalimi ba꞉moi hiya꞉hiya꞉ tabo la꞉ biya꞉tulamemata. Na ubila la꞉ naeno iya꞉tulame tabo komodo hido ukui ba꞉ma ka꞉na kolawema꞉nemata, Godote ebeno Bukalo a keba ka꞉na ka꞉tutumua꞉tena, la꞉ ba꞉bi hidohido owalubi komone a꞉kohobila꞉hamata, iyo, modoboha꞉ la꞉ ipuwalo etate etoeno ododi komoma꞉ ebe kapiya ba awagamina eta lumagino komo kubama꞉ dito goe.
1CO 4:7 La꞉ ba꞉ma ka꞉na kemalagidolutama, Godote la꞉ hiya꞉hiya꞉ miya꞉tete eta hunamo ba adipate eta huiyatiya hopamo dito ihati? Ao, eba ka꞉naha꞉, ebete la꞉ kapiya tawakalubima꞉ a꞉midilia꞉ta, la꞉le awagahaheno kopola꞉nama꞉. Numa꞉la꞉, kebe hidohido komate la꞉godolo da꞉pola꞉na, ba꞉bi hiliyonomo komo Godote malemalelo la꞉tamo dito ikalamia꞉ta, la꞉ ha꞉kiya la꞉eno heloamo eta hido komo kalaweha꞉. Ba꞉bema꞉ mabu keka꞉ la꞉ ipuwalo komopa꞉te ibi ha꞉kiya ibino komoma꞉ dawagaminalena?
1CO 4:8 A꞉iye, la꞉ puya꞉te dawagahanama, la꞉ kubamo emalagidolonamata eta kapiya modoboha꞉ komote la꞉godolo kitanaha꞉! Diyala, la꞉eno ukuilo la꞉ ba꞉ma ka꞉na da꞉ga꞉lonama, Godokono Gobogobote hibima꞉ midipa꞉tamo dikalamena, ba꞉bi komo ipuwalo la꞉ dogodogopima꞉ ba eda꞉ha huiyatiya a komopa꞉te awaepima꞉ eda꞉hanama꞉! Ba꞉gala la꞉ da꞉kaga꞉lanama, Godokono umi ipuwalo la꞉ koko gawadubuma꞉ ya꞉lo eda꞉huimata, huiyatiya aha꞉! Ba꞉bema꞉ na Polote ba꞉bako daedae ukuipa꞉tamo na꞉goemo, la꞉le koko gawadubuma꞉ hibilo neda꞉hatale, a Ya꞉sukunu hibi oelamepa꞉te la꞉ mabuma꞉ ba꞉kalakalahana꞉, iyo, a ba꞉be komone biya꞉tawahana꞉, la꞉ ba꞉gala a, ale kapimilo koko gawadubuma꞉ ba eda꞉ha hiliyonomo tawakaluba꞉te atamo kalakalago kopapamila꞉hama꞉na꞉.
1CO 4:9 Huiyatiya Godokono ubi komo eba ka꞉naha꞉, iyo, naeno umi ipuwalo ebete a hibi oelamepi ya꞉lo a꞉miya꞉tiya꞉ hibima꞉ midipi ipuwalo ale kuititinomopima꞉ keda꞉hanama꞉. Ba꞉be mabuma꞉ ebete gabomani kaduhilamenaha꞉, iba꞉te a hibi oelamepino komo anagilamelea꞉mete a kubapima꞉ ka꞉milo tawakalubino holoholo hapulu a dito kanakapua꞉mema꞉. Iyo, ebeno ubi komo ba꞉ma ka꞉na itana, ebeno Hunu Habalo demedehona ba꞉bi nopopi, ba꞉gala kuba gobogobo ba꞉gala hopo habanapi atumu, ibi hiliyonomate aeno modoboha꞉ komo hibinomolo kumima꞉.
1CO 4:10 A꞉iye! Diyala, la꞉ ba꞉ma ka꞉na demalagidolonama, a Kelisokono hibi oelamepa꞉te ebe mabuma꞉ daedaepima꞉ eda꞉hanama꞉, huiyatiya la꞉ ebe ipuwalo mulupima꞉ eda꞉hanamata! Ba꞉gala la꞉ ba꞉ma ka꞉na da꞉kemalagidolonama, a hibima꞉ midi ipuwalo heloha꞉ma꞉ ba eda꞉hana huiyatiya la꞉ helonomoma꞉ eda꞉hanamata, iyo, tawakaluba꞉te la꞉ hunamo ba wadiya꞉paa꞉latele iba꞉te huiyatiya a kokoha꞉pima꞉ ga꞉lana!
1CO 4:11 Huiyatiya numa꞉la꞉, aeno hibi komo ba꞉ ba꞉ma ka꞉nala. A oko tupuimi mabuni ba꞉ma teta꞉mo puluhuku, komo hiliyonomo tetelo baa꞉ kape komote a ua꞉menako ba꞉gala beya kapete atumu atamo a꞉kapenako, iyo, a kubakuba kaliko kapiyakapiya bepupulinakoma꞉. Ba꞉be mabuma꞉ a ha꞉kiya aeno modoboha꞉ komo ulamelea꞉mete komo tetelo a mani nanekele kuwatema꞉ kodakoda oko aeno kokotamo dito owatinakoma꞉. Ba꞉gala eta komo. Aeno laha genama hibilo pola꞉naheno, a hiya꞉hiya꞉ hopolo ba wapata꞉lamena ba꞉bo lahatepahanatonanakoma꞉, ba꞉bene komo tetelo hibima꞉ midiha꞉pa꞉te a ba iduduputia꞉me a tatakolo dalukuinaka, a huiyatiya ibi mabuma꞉ Godoko betoemehonakoma꞉ ebete ibi hidamo kowalubilinama꞉. Iyo, keba tetelo tawakaluba꞉te temeteme atamo dikaa꞉menaka, a huiyatiya oko owati ipuwalo kodakodalo la꞉mota꞉hananakoma꞉,
1CO 4:13 ba꞉gala iba꞉te ibino tabamo a da꞉kubahia꞉mena, a ibi malemale tabamo owalubilinakoma꞉. Ba꞉bema꞉ wadiyala la꞉ a hibi oelamepino komo ba꞉ma ka꞉na hidamo niya꞉tawahala꞉, hopo habanapino umi ipuwalo a ba꞉ ibino nene huiyama꞉ eda꞉hanama꞉, iyo, iba꞉te a ubiha꞉ma꞉ ba eda꞉hana, a kuba nibo ilinama꞉ ga꞉late gigilepalama꞉ ya꞉lo a꞉midiya꞉.
1CO 4:14 O naeno mabuluba꞉la꞉, nale ba꞉moe tabo la꞉tamo hilopo ikalamema꞉ kamiya꞉teha꞉. Ao, nale konomamo demalagidolenamo la꞉ ba꞉bako gugudima꞉ ba eda꞉hana, naeno ubi ba꞉bema꞉ ihatemo la꞉ hibi gabo kiya꞉tulamema꞉.
1CO 4:15 Numa꞉la꞉, la꞉eno Kelisoko ta꞉mata komoma꞉ la꞉eno iya꞉tulamepi hiliyonomate ba pola꞉na, lumagiti ibi ka꞉lamiholema꞉ da꞉ kamodobonaha꞉, huiyatiya na kapiyate la꞉eno nabiwi huiyama꞉ eda꞉namo. Iyo, la꞉le Ya꞉su Kelisoko ipuwalo kemedenama꞉, ebeno Hido Tabo la꞉tamo olamagi ipuwalo na ba꞉ dopo lumagima꞉ edimo,
1CO 4:16 ba꞉bema꞉ naeno guguda꞉la꞉, nale la꞉ betoelameholemata, la꞉eno emede ipuwalo wadiyala la꞉le na la꞉eno nabiwi nibaminatena꞉la꞉.
1CO 4:17 Numa꞉la꞉, ba꞉be komo ba emalagidolo nale naeno eta hibima꞉ midi gudu Timotiko la꞉tamo poememo, mabu nale konomamo demalagidolonamo ebete ba꞉bako guduma꞉ eda꞉na, iyo, ebete naeno ubi komo hibinomolo ododilinako. Ba꞉bema꞉ ebete la꞉tamo da꞉puluhukumini, nale hiya꞉hiya꞉ hopolo sose tawakalubi Kelisokono emede komoma꞉ keba ka꞉na kiya꞉tulamenakomo, ebete ba꞉bi atu komo ba꞉ ba꞉ba ka꞉na la꞉ kakapiya꞉tulamema꞉na꞉ta.
1CO 4:18 Na ba꞉moe komo iya꞉tawala, la꞉ komopa꞉te nawagahanamata mabu la꞉ kubamo ba꞉ma ka꞉na emalagidolonamata, nale la꞉tamo a꞉kapa꞉mo.
1CO 4:19 Huiyatiya aeno Kodawate ubi dihatemene, tete tatalila na hibilo kopema꞉nemo. Ba꞉bema꞉ ba꞉ba tetelo nale ba꞉bi awagahapino hibi komo kopumima꞉nemo, ba꞉ma ka꞉na ibino tabo ga꞉la kokonomola huiyatiya Godogodone duluhukuna ba꞉be hibi helote iba꞉godolo kitanaha꞉.
1CO 4:20 Numa꞉la꞉, Godote Ko Gawadubuma꞉ deda꞉na ba꞉be komoeno ipuwate lumagino ukui tabo komone kuluhukunaha꞉, ao, ba꞉be komoeno ipuwate kapiya gabodo kohawakalama꞉ne, ebe ba꞉ Godokono helote lumagino emede ipuwalo ditanamene ba꞉be gabola.
1CO 4:21 Ba꞉bema꞉ la꞉ puya꞉te dawagahanama, la꞉eno ubi keba ka꞉nala꞉ka꞉? Nabiwiti ebeno wato koko gugudi kukamo keba ka꞉na kalukulinako, la꞉eno kuba ododili mabuma꞉ nale la꞉tamo ba꞉bako komo ba꞉ka꞉pododimo? Huiyatiya na peheno, wadiyala la꞉ dopamo la꞉eno awagaha komone nohobila꞉huya꞉la꞉, ba꞉bene na malemale ukuia꞉go ba꞉gala tataba komago la꞉ naeno guguda꞉tamo ba꞉bo kopema꞉nemo.
1CO 5:1 Ba꞉ hibila, la꞉ ipuwalo eta konomo kubate duluhukui, komo hiya꞉hiya꞉ tawakaluba꞉te ba꞉be komoma꞉ tabo a꞉ga꞉lanaka, iyo, la꞉eno sose kapiyuimidawa etate ebeno nabiwino kamenago kapiyama꞉ eda꞉nako. A꞉iye! Godoko iya꞉tawaha꞉pi ipuwalo ba꞉bako kubate a꞉kuluhukale, mabu ibi iya꞉tawahala ba꞉be hilopo ododi komo kubanomoma꞉ eda꞉na! Huiyatiya la꞉ koko daedaepi huiyama꞉ ba eda꞉hana, ba꞉be kuba ododidawatamo la꞉le eta komo kododiha꞉!
1CO 5:2 A꞉iye! Mabu keka꞉ la꞉le la꞉eno sose komoma꞉ dawagahanama? Wadiyala la꞉ huiyatiya la꞉ ipuwalo ditana ba꞉be kuba mabuma꞉ tepo temetema꞉go nihimiya꞉la꞉, ba꞉gala wadiyala la꞉ kuba ododidawatamo talona nihatemiya꞉la꞉ ebete la꞉eno kapiyuimi ipuwamo gala akapa꞉la꞉.
1CO 5:3 Numa꞉la꞉, nale muhulunomolo ba emedena, huiyatiya Kelisoko ipuwalo nale naeno gobogoboeno ukui komamo la꞉go kapimilo bemedenamo. Ba꞉ hibila, nale galane la꞉eno Kolini habamo puluhukuti kuba ododidawoeno komoma꞉ keba ka꞉na da꞉pododimo, na huiyatiya la꞉tamo puluhukuhino dopamo ba꞉ ba꞉ba ka꞉na nale ba꞉be dubuino komo Kodawa Ya꞉sukunu mahilamo anagiya꞉midamete kuba huiya ihatemimo. Ba꞉bema꞉ nale lutaha꞉ tetelo la꞉le gala da꞉kakapiyuimima, wadiyala naeno gobogoboeno ukui komamo papamila꞉hate Kodawa Ya꞉sukunu heloamo
1CO 5:5 ba꞉be dubu Saitanatamo dito nikamiya꞉la꞉. Numa꞉la꞉, la꞉ ba꞉ba ka꞉na dododima, Saitanate ba꞉ma tetelo ebeno ape kokubahimima꞉ne, huiyatiya aeno Kodawate ebeno Ko Hegelalo ba꞉be dubuino gobogobo hapuino ka꞉ka꞉ dito komula꞉mema꞉ne.
1CO 5:6 Ba꞉ hibila, la꞉le dawagahanama ba꞉be komo ba꞉ hido komoha꞉. La꞉ iya꞉tawahala, tawakaluba꞉te ba꞉ma ka꞉na ga꞉lana, “Palawa baa꞉ kokalimima꞉ kamenate huhuimino puhulu ilina nanekelenomo palawago da꞉kapiyuimimini, baa꞉te ha꞉kiya ba꞉bo kohuhuma꞉ne.” Ba꞉ ba꞉ba ka꞉na la꞉eno kapiyuimi ipuwalo awagaha komo deha꞉potonomote ditana, ba꞉be kubate ha꞉kiya koma꞉ keda꞉ma꞉ne, aba꞉ hibila꞉ka꞉?
1CO 5:7 Ba꞉bema꞉ wadiyala la꞉le pakala emede komoeno awagaha komo hiliyonomo la꞉eno kapiyuimi ipuwane nuluhukulatela꞉la꞉, la꞉ ipuwalo eta kuba deha꞉potonomote itanaheno Godokono umi ipuwalo la꞉le uliulinoma꞉ keda꞉hanama꞉. Numa꞉la꞉, gogo hiliyonomolo Yunapa꞉te ibino Adaguila꞉ Poko ba ododi iba꞉te ba꞉be Pokoeno palawa baa꞉ ohoma꞉ huhuimino puhulu palawago kapiyuimihino ohonaka, mabu Godote ibi ba꞉be komo kododinakoma꞉ ya꞉lo a꞉tutumulateliya꞉. Iyo, ebete ibi biya꞉tulamiya꞉ huhuimino puhulu ilina ba꞉ gola, tawakaluba꞉te awagaha ipuwalo kebe kuba komo dododilinaka ba꞉bi komo huiyala, ba꞉bema꞉ iba꞉te ebetamo ibino ko poko tupuimihino, iba꞉te dopamo ibino hiliyonomo genamane huhuimino puhulu uluhukulatelenomo nuluhukulatelenakamena꞉. Huiyatiya Kelisote a hibima꞉ midipi mabuma꞉ ebeno ape Adaguila꞉ Pokoeno sipi-goe deha꞉potomo miditi Godotamo ba ikame, ebeno hawi ka꞉ka꞉la꞉ komodo ebete a uliuli tawakalubima꞉ ya꞉lo a꞉midiya꞉ ale aeno kuba ododili komoeno hoe huiya uwatekapoma꞉.
1CO 5:8 Ba꞉bema꞉ a hibima꞉ midipa꞉te Godoko adikumilo eta ko poko ebetamo ododi tupuimihino, wadiyala ale dopamo aeno pakala emede komoeno awagaha komo hiliyonomo a ipuwane kuluhukulatelema꞉nema꞉. Ba꞉ma ka꞉na aeno tepo ipuwalo hiya꞉hiya꞉ kuba ododili ukui komate pola꞉naheno, hibi gaboeno ododili komo ba꞉gala tabo ga꞉la komo kapiyate aeno emede ipuwane bikulihonakomena꞉.
1CO 5:9 Ba꞉bema꞉ nale la꞉tamo dopamo da꞉poemimo, ba꞉be leta ipuwalo la꞉ ba꞉ma ka꞉na kiyalamimata, la꞉ bohelemele pilolo duwatenaka ba꞉gala kamenakamena pilolo duwatenaka, ba꞉bako tawakaluba꞉go akakapiyala꞉.
1CO 5:10 Huiyatiya modoboha꞉ la꞉ naeno taboeno ipuwa kubamo lawe. Numa꞉la꞉, la꞉ sose tawakalubi ipuwalo puya꞉te ba꞉bako koko kuba dododilinaka nale ibino komo kapiyama꞉ olamagimo, mabu ibi Godokono hibi komo ya꞉lo iya꞉tawahuya꞉. Huiyatiya hopo habanapi ipuwalo komo hiliyonomate Godokono komo kiya꞉tawahanaha꞉, ba꞉bema꞉ iba꞉godolo kamenakamena ba꞉gala bohelemele pilo komate ba꞉pola꞉na, ba꞉gala iba꞉te dogodogopima꞉ keda꞉hama꞉ ubi konomamo ba miya꞉te komo tetelo komopino ilina pilolo uwatenaka, ba꞉gala iba꞉te hiya꞉hiya꞉ ida꞉da꞉lino gobogobo akadikulamenaka. Ba꞉bema꞉ nale la꞉tamo talona kihateha꞉ ba꞉bako hibima꞉ midiha꞉pa꞉go wapata꞉lamema꞉, mabu la꞉ ba꞉moe hopolo iba꞉go kapimilo ba emedena gabote a꞉kitanamene la꞉ ha꞉kiya la꞉ ibi ipuwane hibinomolo kowatiya꞉midalema꞉.
1CO 5:11 Iyo, nale la꞉ sose tawakalubino komo kapiyama꞉ olamagimo. La꞉le pui la꞉eno hibima꞉ midipi ekakima꞉ da꞉ka꞉laminama, ibi ipuwalo pote bohele pilo o kamena pilo dododinako, pote dogodogodawama꞉ keda꞉ma꞉ ubi konomamo dihatenako ba꞉gala pote eta ida꞉da꞉lino gobogobo dadikuminako, pote komopino komoma꞉ ha꞉da amiho gabodo kuba tabo dolamaginako ba꞉gala pote gamoda da꞉nihonako, ba꞉gala pote komopino ilina pilolo duwatenako, nale ba꞉bako sose lumagino komoma꞉ la꞉ gala na꞉kakiyalamitamata la꞉ eba꞉go akakapiyala꞉, iyo, la꞉ eba꞉go baa꞉ nahama꞉ la꞉tamo talona bihatelamemata.
1CO 5:12 Ba꞉ hibila, puya꞉te sose ipuwalo pola꞉naheno Godote ha꞉kiya ba꞉bi hibima꞉ midiha꞉pino komo kanagilamelelamema꞉ne, ba꞉bema꞉ ba꞉be oko ba꞉ ebenola, na ebe tolemelo a꞉kowata꞉lemo. Huiyatiya sose ipuwalo da꞉pola꞉na ba꞉bi tawakalubino komo anagilamelelame oko hiya꞉la, iyo, Godote ba꞉be oko a hibima꞉ midipa꞉tamo ikaa꞉miya꞉. Ba꞉bema꞉ la꞉ ipuwalo puya꞉te kuba dododilina ibino komo nanagilamelelametota꞉la꞉, mabu Godokono Bukalo tabote ba꞉ma ka꞉na bitana, “La꞉le konomo kuba ododidawa la꞉ ipuwane dito noemiya꞉la꞉!”
1CO 6:1 Ba꞉moe ba꞉ eta komola. La꞉eno kapiyuimi ipuwalo etate etago eta komoma꞉ dolowabeletihuimina꞉, mabu keka꞉ la꞉le Godokono ubi komoma꞉ toleheno gabomanino tabo anagiya꞉midadawatamo da꞉tolamema, ba꞉be tuputupu emede komo iya꞉tawaha꞉ lumagiti la꞉eno komo kanagiya꞉midalamema꞉? A꞉iye! Wadiyala Godokono sose tawakaluba꞉te ha꞉kiya ibino olowabeletihui komo nanagilamelelama꞉mena꞉!
1CO 6:2 La꞉ ba꞉ iya꞉tawahala, galane tetelo Godokono tawakaluba꞉te ba꞉moe hopo habanapi hiliyonomoeno komokomo kanagilamelelamema꞉na꞉. Iyo, Godokono ubilo la꞉le ba꞉be anagiya꞉mida oko ipuwalo kopola꞉nama꞉nemata, ba꞉bema꞉ ba꞉ma tetelo kebe olowabeletihui komate la꞉ ipuwalo dikulihonaka, la꞉eno ukui ba꞉gala helo modobola ba꞉bi hegehege komo tuputupulu kanagilamema꞉, aba꞉ hibila꞉ka꞉?
1CO 6:3 Ba꞉gala la꞉ hibilo iya꞉tawahala, Godote ebeno Hunu Haboeno hiya꞉hiya꞉ oko kowatihonama꞉ dododiliya꞉, ba꞉bi nopopino komo a hibima꞉ midipa꞉te kanagilamelelamema꞉nema꞉. Ba꞉ hibila, a ba꞉be oko kowatima꞉ Godote modobo helo atamo kikaa꞉mema꞉ne, ba꞉bema꞉ a iya꞉tawahanomola, ba꞉moe hopolo atamo kebe komate dikulihona, ebete modobo helo atamo atumu na꞉kikaa꞉mena ba꞉bi komo hidamo kanagilamema꞉.
1CO 6:4 Ba꞉bema꞉ mabu keka꞉ la꞉le olowabeletihui ipuwalo gabomanino tabo anagiya꞉midapa꞉tamo da꞉tolamenakoma? Numa꞉la꞉, a sose tawakalubi iya꞉tawahala, ba꞉bi hibima꞉ midiha꞉pa꞉te Godokono komo ba꞉gala aeno komo hibilo kiya꞉tawahanaha꞉.
1CO 6:5 A꞉iye! La꞉le kohilopohoma꞉ nale la꞉eno kuba ododi komo ba꞉bema꞉ hawakalimimo. Na iya꞉tawala la꞉eno komo mulu ukuipi ba꞉pola꞉na, ibi ba꞉ modobola la꞉ hibima꞉ midipino olowabeletihui ipuwalo la꞉eno komo kanagilamelelamema꞉. Huiyatiya diyala, komo la꞉ ba꞉ma ka꞉na daedae ukuilo da꞉ga꞉lonama, “Eta mulu ukuidawate aeno kapiyuimi ipuwalo kalutaha꞉.”
1CO 6:6 Numa꞉la꞉, la꞉ hibima꞉ midipi ekakima꞉ ba eda꞉ha, la꞉eno daedae ukui mabuma꞉ etate eta gabomanino tabo anagiya꞉midadawatamo dito magatanakomata, iyo, la꞉le la꞉eno olowabeletihui komokomo hibima꞉ midiha꞉pa꞉tamo watanakomata!
1CO 6:7 A꞉iye! La꞉eno kapiyuimi ipuwalo etate eta gabomana꞉tamo da꞉magatamene, ba꞉ba tetelo la꞉eno alaholodawa Saitanate la꞉eno wato kikipo ya꞉lo a꞉lawe, iyo, la꞉ ebeno ubi komamo a꞉papamila꞉hamata! Numa꞉la꞉, etate ama꞉tamo kuba ododiti ba꞉bene ama꞉ ba꞉be komo dito degebolememena꞉, ba꞉be komo modobola, huiyatiya modoboha꞉ wato kikipo Saitanatamo dito ikame! Iyo, etate amia꞉no eta ilina pilolo lawete ba꞉bene ama꞉ ba꞉be komo dito dadodomena꞉, ba꞉be komo modobola, huiyatiya Saitanatamo papamiwata modoboha꞉!
1CO 6:8 Ba꞉bema꞉ la꞉eno ododi komoeno kuba bada konomola꞉ka꞉, mabu la꞉le hibima꞉ midipi ekakima꞉ ba eda꞉hana etate etatamo kuba bododinakomata ba꞉gala etoeno ilina pilolo a꞉kalawenakomata!
1CO 6:9 La꞉ ba꞉ iya꞉tawahala, tuputupulu emedeha꞉ tawakaluba꞉te Godokono Ko Gawadubu haboeno hidohido dogodogo komo ipuwalo eta komo a꞉kalawa꞉mena꞉. Iyo, ba꞉moe komo ba꞉ hibinomola, puya꞉te bohelemele ba꞉gala kamenakamena pilolo duwatenaka, ba꞉gala ida꞉da꞉lino gobogobo dadikulamenaka, ba꞉gala dubu gabatamo dododilinaka,
1CO 6:10 ba꞉gala komopino ilina diya gabodo pilolo duwatenaka, ba꞉gala komopino ilina ibino heloamo dito duwatenaka, ba꞉gala dogodogopima꞉ keda꞉hama꞉ ubi konomamo da꞉miya꞉tenaka, ba꞉gala gamoda da꞉nihonaka, ba꞉gala komopino komoma꞉ ha꞉da amiho gabodo kuba tabo da꞉ga꞉lanaka, ba꞉bako kuba ododilipi hiliyonomo ipuwalo etate Godokono Ko Gawadubu haboeno hidohido komo a꞉kuwata꞉mene.
1CO 6:11 Numa꞉la꞉, dopamo tetelo komo la꞉ ba꞉bako kuba ododili ipuwalo emedenamimata, huiyatiya kalakala konomola, ba꞉ma tetelo la꞉ ba꞉ba ka꞉na kemedenaha꞉. Iyo, Kodawa Ya꞉su Kelisote la꞉eno kuba ododili komo dukulalelami, ebete aeno Godokono Gobogoboeno heloamo la꞉ ebeno tuputupupima꞉ ba midili, la꞉le ebeno ubi komokomo kapiya kododilinakoma꞉ la꞉ talonapima꞉ ba꞉bo eda꞉huimata.
1CO 6:12 Ba꞉bema꞉ diyala, la꞉ ipuwalo etate natamo ba꞉ma ka꞉na da꞉ goemene, “Numa꞉, apa꞉mo ododili komokomo hiliyonomo ipuwalo nale eta komo kododima꞉ talona hibilo kitanaha꞉.” Ba꞉bene nale ebeno tabo ba huiya kogoema꞉nemo, “Iyo, na Kelisoko ipuwalo tutudawama꞉ ba eda꞉na, talona natamo hibilo kitanaha꞉ eta komo kododima꞉. Huiyatiya numa꞉, apa꞉mo ododili komokomo hiliyonomo ipuwalo komo ododili komate naeno hibima꞉ midi ipuwalo na a꞉kowalubina꞉mena꞉, ba꞉bema꞉ nale naeno tepo ya꞉lo a꞉kodakoduimiya꞉mo ba꞉bako kuba ododili komamo a꞉kapapamiwatamo, iyo, nale eta kuba ododi komo naeno namutudawama꞉ a꞉kamida꞉mo.”
1CO 6:13 Ba꞉bema꞉ diyala, eta lumagiti tabo ba꞉ma ka꞉na da꞉ goemene, “Numa꞉, Godote tawakalubino kape mabuma꞉ hiya꞉hiya꞉ baa꞉ ododililamiya꞉, ba꞉gala ebete tawakalubi ba ododili ibino tepo ipuwamo ubi komokomo ba꞉bo miya꞉telamiya꞉ baa꞉ konahanama꞉.” Ba꞉bene nale ebeno tabo ba꞉ma ka꞉na kohuiyama꞉nemo, “Iyo, Godote tawakalubi ba꞉gala ilina hiliyonomo ododiliya꞉, huiyatiya ebeno ubi tetelo ebete kateneno ubi komokomo ba꞉gala baa꞉ naha komo kapimilo dito kohawaminadigalema꞉ne. Ba꞉bema꞉ ko komo ba꞉ ba꞉ma ka꞉nala, la꞉ dubate la꞉eno apa꞉mo hiya꞉hiya꞉ kuba ubi komo bohelemela꞉tamo ba꞉gala kamenakamenatamo ododili modoboha꞉, mabu Kodawate tawakalubino apeno modoboha꞉ komokomo ipuwalo ibi malemalelo ba owalubilina, ubi ba꞉bo ihatenako iba꞉te ibino apa꞉mo ebeno ubi komokomo kapiya kododilinakoma꞉.”
1CO 6:14 Numa꞉la꞉, Godote aeno Kodawa hoe ipuwane ba adipate ebeno hoe ape ba꞉bo ka꞉kimiya꞉, ba꞉bema꞉ ebete ebeno heloamo a wadiya꞉paa꞉telo aeno ha꞉laha ape atumu kakaka꞉kilamema꞉ne.
1CO 6:15 La꞉ ba꞉ iya꞉tawahala, a hibima꞉ midipi hiliyonomate Kelisokono talona apema꞉ eda꞉hanama꞉, ba꞉bema꞉ aeno hiya꞉hiya꞉ ape ba꞉ ebeno apeno hiya꞉hiya꞉ komola. Ba꞉be mabuma꞉ a ipuwalo etate Kelisokono talona apeno eta komoma꞉ ba eda꞉na, ebete dubu bilibili kamenatamo ba꞉ka꞉tomene eba꞉go kuba ba ododi kapiyama꞉ keda꞉ma꞉? Ao, ba꞉be komo ba꞉ kubanomoma꞉ keda꞉ma꞉ne!
1CO 6:16 A꞉iye! La꞉ iya꞉tawahala, keba tetelo eta dubuti ebeno ape dubu bilibili kamenatamo dikamemene, ibi netewapa꞉te kapiyama꞉ ba꞉bo keda꞉ma꞉na꞉, aba꞉ hibila꞉ka꞉? Numa꞉la꞉, ibi netewapino komoma꞉ Godokono Bukalo tabote ba꞉ma ka꞉na goena, “Dubuti kamenago kapiyama꞉ keda꞉ma꞉ne,”
1CO 6:17 ba꞉bema꞉ ba꞉ ba꞉ba ka꞉na pote hibima꞉ midi ipuwalo ebeno gobogobo Kodawa Kelisotamo dikamemene, ibi netewapa꞉te gobogobo hapulu kapiyama꞉ keda꞉ma꞉na꞉.
1CO 6:18 Ba꞉bema꞉ hibima꞉ mididawa, wadiyala ama꞉le bohelemele ba꞉gala kuhi pilo, kamenakamena ba꞉gala dubu pilo, ba꞉bako hiliyonomo ododili komokomo ama꞉le kuba nibote patema꞉ goelo ba꞉bi ododili ipuwane nalahula꞉nakuya꞉. Ba꞉ hibila, pote ba꞉bako kuba dododimini, ba꞉be komodo ebe ha꞉kiya ebeno ape kokubahimima꞉ne, huiyatiya komo hiliyonomo kuba ododili komo eba ka꞉naha꞉.
1CO 6:19 Ama꞉ iya꞉tawala, Godote ama꞉tamo dikami ba꞉be Gobogobote ama꞉ ipuwalo ba emedena, amia꞉no apete ba꞉ ebe adikumino genamama꞉ eda꞉na, aba꞉ hibila꞉ka꞉? Iyo, amia꞉no ape ba꞉ amia꞉noha꞉,
1CO 6:20 mabu Kelisote ebeno huiya konomo hawa꞉mo ama꞉ a꞉lawia꞉ta. Ba꞉bema꞉ amia꞉no apeno ododili ipuwalo wadiyala ama꞉le ebe kapiya kawagaminanama꞉ hiliyonomo komokomo nododilinakuya꞉.
1CO 7:1 Ba꞉bema꞉ la꞉ dopamo la꞉eno leta ipuwalo kebe komoma꞉ na da꞉kiyanamima, nale ba꞉ma tetelo ba꞉bi komo la꞉ kiya꞉tulamema꞉nemata. Dopo komo ba꞉ la꞉ komopa꞉te ba꞉ma ka꞉na da꞉ga꞉lanama, “Dubuti kamena laweheno ebe ha꞉kiya demedenamene, ba꞉be komo ba꞉ hido komola.”
1CO 7:2 Huiyatiya bohelemele ba꞉gala kamenakamena pilo komo ipuwalo, iyo, atumu kuhi ba꞉gala dubu pilo komo ipuwalo Saitanate kuba gabamo emogabuimi komo hiliyonomo bewadahenako, ba꞉bema꞉ hibima꞉ midipi hiliyonomo ipuwalo wadiyala eta dubuti ebeno kamena na꞉lawa꞉mene, ba꞉gala eta kamenate atumu ebeno awi na꞉kalawa꞉mene.
1CO 7:3 Ba꞉gala dubu ebeno kamenago kapiyama꞉ eda꞉ ipuwalo, kamenate ebeno awi kokalakaluimima꞉ wadiyala ebete ebeno ape ebetamo nikamenakamene, ba꞉gala dubuti atumu ebeno kamena kokalakaluimima꞉ ebeno ape ebetamo na꞉kikamenakamene, mabu Godote ebeno ubi komo tawakaluba꞉tamo dopamo ba꞉ba ka꞉na ihatiya꞉.
1CO 7:4 Numa꞉la꞉, ba꞉be komo ipuwalo kamenate ebeno ape namutudawama꞉ keda꞉naha꞉, awiti ba꞉ ebeno ape namutudawama꞉ eda꞉na, ba꞉gala atumu dubuti ebeno ape namutudawama꞉ keda꞉naha꞉, huiyatiya ebeno kamenate ebeno ape namutudawama꞉ keda꞉na.
1CO 7:5 Ba꞉bema꞉ dubuti ebeno kamenago kapiyama꞉ eda꞉ ipuwalo etate etatamo ba꞉be komo kododima꞉ talona akihata꞉la꞉, huiyatiya ibi netewapa꞉te ukui kapiyama꞉ ba eda꞉ ba꞉ma ka꞉na da꞉ga꞉lamena꞉, iba꞉te gopowahi tetelo kapiyama꞉ eda꞉ komo a꞉kododa꞉mena꞉ iba꞉te Godokoba꞉ tabo ga꞉la komo kododinakoma꞉, ba꞉be komo kubaha꞉, hido ododi komola. Huiyatiya iba꞉te kebe gopowahi tete dihatemena꞉ ba꞉ba teta꞉mo da꞉nuluhukumina꞉, wadiyala iba꞉te kapiyama꞉ eda꞉ komo tiyonomolo gala na꞉katupuima꞉mena꞉, mabu Saitanate kateneno ubi komodo iba꞉tamo da꞉wadahenako, iba꞉te ba꞉bi kuba gabamo emogabuimi komamo eta dubago o eta kamenago gudi modoboha꞉.
1CO 7:6 Huiyatiya la꞉ hidamo niya꞉tawahala꞉, la꞉le la꞉eno komo komiya꞉patepama꞉ na Polote la꞉ katutumulateleha꞉, ao, nale na꞉goemo talona puliyala la꞉ ba꞉be komo kododima꞉.
1CO 7:7 Ba꞉ hibila, naeno ubi komo ba꞉ma ka꞉na bitana, la꞉ kamenakamenaheno emedena modobola, nale keba ka꞉na kemedenamo ba꞉ba ka꞉na. Huiyatiya na iya꞉tawala Godote kebe hiya꞉nomo helo natamo dikanamiya꞉ nale kamenaheno kemedenama꞉, diyala, ebete ba꞉be atu helo la꞉ komopa꞉tamo da꞉ kikalameha꞉. Iyo, hibima꞉ midipa꞉te ebeno hiya꞉hiya꞉ oko kowatihonama꞉, ebete iba꞉tamo ebeno hiya꞉hiya꞉ helo dito ikalamenako, ba꞉ma ka꞉na ebete eta hiya꞉nomo helo kapiya lumagitamo ba ikame huiyatiya etatamo eta hiya꞉nomo helo ba꞉bo kakikamema꞉ne.
1CO 7:8 Ba꞉bema꞉ hibima꞉ midipi dubu ipuwalo puino kamenakamenate da꞉ha꞉lahuya꞉ ibino komoma꞉ ba꞉gala hamolehamoleno komoma꞉ na Polote tabo ba꞉ma ka꞉na goemo, nale kamenaheno keba ka꞉na kemedenamo, wadiyala iba꞉te ba꞉ ba꞉ba ka꞉na nemedenamena꞉.
1CO 7:9 Huiyatiya ibi ipuwalo kebe dawoeno kateneno ubi komate helohelonomoma꞉ deda꞉hana, ba꞉ma ka꞉na eta dubuti kamena laweheno kuba ododi komamo da꞉gamene, wadiyala ba꞉bako dubuti eta kamena na꞉lawa꞉mene ba꞉gala ba꞉bako kamenate atumu eta dubu na꞉kalawa꞉mene. Numa꞉la꞉, keba tetelo dubuti kamena tuputupu gabodo da꞉lawemene, ba꞉be komo ba꞉ hido komola, huiyatiya ebete laweheno ebeno tepo ipuwalo koenomoma꞉ deda꞉mene, ba꞉be komote Saitanakono kuba gabamo emogabuimi komoma꞉ keda꞉ma꞉ne.
1CO 7:10 Ba꞉gala eta komo. Kebe dubuti ebeno kamenago demedena ba꞉gala kebe kamenate ebeno awa꞉go demedena, nale ba꞉bako tawakaluba꞉tamo tutumu tabo bikalamemo, ba꞉moe tutumu tabo naeno ukuiha꞉, ebe ba꞉ aeno Kodawoeno tutumu tabola. Iyo, ebeno ubi komo ba꞉ ba꞉ma ka꞉nala, dubuti ebeno kamena dito akibuka꞉la꞉ ba꞉gala kamenate atumu ebeno awi akamiya꞉pala꞉. Huiyatiya kebe kamenate ebeno awi ya꞉lo da꞉miya꞉pui, wadiyala ebete awihino dito nemedenamene, ba꞉bene ebete ba꞉ba ka꞉na ba emedena ukui hiya꞉ma꞉ deda꞉mene, talona a꞉kitanamene ebete ba꞉be atu awa꞉go kapiyama꞉ gala keda꞉te eba꞉go gala kakemedenama꞉.
1CO 7:12 Ba꞉bema꞉ nale la꞉ komopa꞉tamo eta tabo begoemo, ba꞉moe tabo da꞉ naeno ukui komola꞉, iyo, ba꞉moe tabote aeno Kodawagodone natamo da꞉ kapeha꞉. Diyala, la꞉ hibima꞉ midipi ipuwalo eta dubuti ebeno hibima꞉ midiha꞉ kamenago demedena, ba꞉bene ba꞉be kamenoeno ubi ditama꞉na eba꞉go kemedenama꞉ ebete ebe dito akibuka꞉la꞉.
1CO 7:13 Ba꞉gala hibima꞉ midi kamenate hibima꞉ midiha꞉ awa꞉go demedena, ba꞉ atumu ba꞉be dubuino ubi ditama꞉na eba꞉go kemedenama꞉ ebete ebe dito akibuka꞉la꞉.
1CO 7:14 Ba꞉ hibila, Godote eta hibima꞉ midiha꞉ dubu ebeno hibima꞉ midi kamena ipuwado ebe tatalia꞉mo komagahema꞉ne, ba꞉gala ebete hibima꞉ midiha꞉ kamena atumu ebeno hibima꞉ midi awi ipuwado ebe tama꞉mo pema꞉ kowalubima꞉ne. Numa꞉la꞉, ba꞉be komote hibima꞉ eda꞉ha꞉tale, ba꞉be dubu ba꞉gala ebeno kamena ibino guguda꞉te Godokono umi ipuwalo dalowa꞉ma꞉ ba eda꞉ha, iba꞉te ebetamo pelamema꞉ ba꞉ka꞉modobona꞉ huiyatiya ba꞉be komote ba꞉ba ka꞉na kitanaha꞉, ao, ba꞉bako guguda꞉te Godoko tama꞉mo pelamema꞉ talona puliyanomola.
1CO 7:15 Huiyatiya numa꞉la꞉, keba tetelo hibima꞉ midiha꞉ kamenate ebeno hibima꞉ midi awi miya꞉pama꞉ ubi dihatemene, ba꞉gala keba tetelo hibima꞉ midiha꞉ dubuti ebeno hibima꞉ midi kamena miya꞉pama꞉ dewagelemene, hibima꞉ mididawate eta duhimi komo akododa꞉la꞉. Ba꞉bene hibima꞉ midiha꞉dawate ebeno hibima꞉ midi kamena o awi ba꞉ba ka꞉na da꞉miya꞉pamene, ba꞉ba tetelo hibima꞉ mididawate tutunomoma꞉ ba eda꞉ eta matuhumi komote ebegodolo gala a꞉kitanamene. Huiyatiya Godote a hibima꞉ midipi hiliyonomo ya꞉lo a꞉ka꞉miya꞉ ale komopa꞉go alaholohoheno tataba ipuwalo kemedenama꞉,
1CO 7:16 ba꞉bema꞉ hibima꞉ midi kamena, wadiyala ama꞉ gabo nohowadiya꞉ amia꞉no hibima꞉ midiha꞉ awa꞉go tatabalo kemedenama꞉. Diyala, amia꞉no awiti ama꞉ ipuwado ebeno ka꞉ka꞉ mula꞉ komo da꞉ lawemene. Ba꞉gala hibima꞉ midi dubu, wadiyala ama꞉ ba꞉ atumu gabo na꞉kohowadiya꞉ amia꞉no hibima꞉ midiha꞉ kamenago tatabalo kemedenama꞉, mabu ama꞉ hibilo kiya꞉tawanaha꞉ ebete ebeno ka꞉ka꞉ mula꞉ komo ama꞉ ipuwado da꞉lawemene.
1CO 7:17 Ba꞉bema꞉ nale sose hiliyonomo ipuwalo kebe komo kiya꞉tulamenakomo, ba꞉be tutumu tabo a hiliyonomo mabuma꞉ ba꞉ma ka꞉na bitana. Godote eta lumagi ebe hibima꞉ komidima꞉ da꞉ka꞉mimini, ebeno emede komo keba ka꞉na kitana, ebete galane tetelo gabo akohowada꞉la꞉ ba꞉be emede komo ebe ha꞉kiya ebeno heloamo hiya꞉ma꞉ komidima꞉. Ao, Kodawate ebetamo kebako emede komo kikami, wadiyala ebete ba꞉be atu emede ipuwalo kalakalago nemedenamene, ebeno ubi komo eta lumagino emede komamo akihata꞉la꞉.
1CO 7:18 Ba꞉ ba꞉ba ka꞉na Godote Yunapino tama itamida kukala lawe dubu da꞉ka꞉mimini, ebete gabo akohowada꞉la꞉ ba꞉be kukala ebeno apene egebolemema꞉, ba꞉gala Godote eta tama itamida kukala laweha꞉ dubu da꞉ka꞉mimini, ebete ebeno ubi komo akihata꞉la꞉ ba꞉be komo kolawema꞉.
1CO 7:19 Numa꞉la꞉, Godokono umi ipuwalo eta dubuti Yunapino tama itamida kukala ya꞉lo da꞉lawiya꞉ ba꞉be komo ko komoha꞉, ba꞉gala eta dubuti ba꞉be komo laweha꞉ma꞉ deda꞉mene ba꞉be komo atumu ko komoma꞉ a꞉keda꞉mene. Kapiya ko komonomo bitana, ba꞉be komo ba꞉ Godokono komo koko tutumu tabamo papamiwata komola.
1CO 7:20 Ba꞉bema꞉ ba꞉moe komone a hiliyonomate iya꞉tawahala, ba꞉ma ka꞉na Godote eta lumagi da꞉ka꞉mimini, ebeno emede komo keba ka꞉na kitana ebete galane tetelo gabo akohowada꞉la꞉ ba꞉be emede komo ebe ha꞉kiya hiya꞉ma꞉ komidima꞉.
1CO 7:21 Iyo, hibima꞉ mididawa, Godote ama꞉ da꞉ka꞉mi, ba꞉ba tetelo ama꞉ eta ko dubuino huiyaha꞉ okodawama꞉ dedi, ba꞉be mabuma꞉ ama꞉le ba꞉ma tetelo amia꞉no emede komo hiya꞉ma꞉ komidima꞉ ukui bilibilima꞉ akeda꞉la꞉. Huiyatiya ama꞉ numa꞉, amia꞉no namutudawate ama꞉tamo gabo malemalelo da꞉hiduimimini ama꞉le ebeno huiyaha꞉ oko ipuwane kuluhukuma꞉, kubaha꞉, ama꞉ ba꞉be hido tutu emede komo ebegodone dito na꞉lawiya꞉.
1CO 7:22 Ba꞉ hibila, pote eta ko dubuino huiyaha꞉ okodawama꞉ ba eda꞉na Godote ebe Kodawa Kelisoko hibima꞉ midima꞉ da꞉ka꞉mi, ba꞉ba tetene tupuimiti ebete Kelisokono oko ipuwalo ebeno tutudawama꞉ edi. Ba꞉gala ba꞉ atumu pote eta ko dubutamo huiyaha꞉ oko owatiha꞉ tetelo Godote ebe da꞉ka꞉mi, ba꞉ba tetenomolo ebete Kelisotamo huiyaha꞉ oko owati ba꞉bo tupuimi.
1CO 7:23 Iyo, Kelisote ebeno huiya konomo hawa꞉mo la꞉ uwatia꞉ta, ba꞉bema꞉ la꞉ ebe kapiyatamo oko ba owatina komopino huiyaha꞉ okopima꞉ akeda꞉hanala꞉.
1CO 7:24 Ba꞉bema꞉ naeno hibima꞉ midipi ekaka꞉la꞉, ba꞉moe ba꞉ naeno iya꞉tulame taboeno ko komola. Godote kebe lumagi da꞉ka꞉mimini, ba꞉be lumagino emede komo keba ka꞉na kitana, ebete Godokoba꞉ kalakalago ba emedena gabo akohowada꞉la꞉ ba꞉be emede komo ebe ha꞉kiya ebeno heloamo hiya꞉ma꞉ komidima꞉.
1CO 7:25 Ba꞉bema꞉ la꞉eno leta ipuwalo la꞉ eta komoma꞉ na da꞉kiyanamima, ba꞉be komo ba꞉ la꞉eno sose ipuwalo puya꞉te kamenaheno demedena ba꞉gala puya꞉te dubuhino demedena, ba꞉bi dubu ba꞉gala kamenakamena iba꞉te keba ka꞉na na꞉kewagelemena꞉. Numa꞉la꞉, nale ba꞉moe komoma꞉ aeno Kodawa Kelisogodone eta tutumu tabo dopamo hibilo kalaweha꞉, huiyatiya na iya꞉tawala ba꞉ma ka꞉na ebete ebeno malemalelo na hibi okodawama꞉ ka꞉namiti ebeno oko habamo ihateniya꞉, nale ba꞉mako komoma꞉ naeno ukuia꞉mo la꞉ kowalubilima꞉.
1CO 7:26 Ba꞉ hibila, hibima꞉ midipa꞉tamo temeteme ikuli komote ya꞉lo tupuimiti, ba꞉bi temeteme komate tete tatalila kokonomoma꞉ keda꞉hama꞉na꞉, ba꞉bema꞉ naeno ukui ba꞉ ba꞉ma ka꞉nala, Godote ba꞉ma tetelo kebe dubu da꞉ka꞉mimini, ebeno emede komo keba ka꞉na kitana, wadiyala ebete ba꞉ ba꞉ba ka꞉na kalakalago nemedenamene, iyo, ebete gabo akohowada꞉la꞉ ebeno emede komo hiya꞉ma꞉ komidima꞉.
1CO 7:27 Ba꞉bema꞉ hibima꞉ midi dubu, ama꞉le kamena dopamo da꞉lawi, ama꞉ ebe ibukima꞉ ukui akihata꞉la꞉, ba꞉gala ama꞉le ba꞉ma tetelo kamenaheno demedena, amia꞉no kamena lawe gabo akohowada꞉la꞉.
1CO 7:28 Huiyatiya numa꞉, ama꞉le kamena lawema꞉ ubi ba ihate tuputupu gabodo da꞉lawemena꞉, Godokono umi ipuwalo ba꞉be komo kubaha꞉, ba꞉gala ba꞉ atumu eta bohelete dubu da꞉lawemene, Godote ba꞉be komo kubama꞉ a꞉kagaa꞉mene. La꞉ huiyatiya ba꞉moe komo niya꞉tawahala꞉, kamenakamena ipuwalo pote awi dopamo lawete eba꞉go demedena, ba꞉gala dubu ipuwalo pote kamena dopamo lawete eba꞉go demedena, ba꞉be mabuma꞉ iba꞉te ba꞉moe hopoeno komo hiya꞉hiya꞉ temeteme komokomo biya꞉tawahanakomena꞉. Ba꞉bema꞉ hibima꞉ midi dubu, na ubila ama꞉le kamena laweheno ba꞉bako temeteme a꞉kiya꞉tawamena꞉ta, ba꞉gala hibima꞉ midi bohele, na ubila ama꞉ atumu awi akalawa꞉la꞉ ama꞉le ba꞉bako temeteme komo uwatekapoma꞉.
1CO 7:29 Naeno hibima꞉ midipi ekaka꞉la꞉, naeno iya꞉tulame taboeno ipuwa ba꞉ ba꞉ma ka꞉nala, Godokono Kuititi Hegelate ba꞉ na꞉tatali, ba꞉bema꞉ kebe dubuti kamena dopamo lawete eba꞉go demedena, wadiyala ebete ba꞉ma tetene tupuimiti kamena laweha꞉ dubu huiyamo nemedenamene.
1CO 7:30 Ba꞉bene ba꞉ ba꞉ba ka꞉na pote temetema꞉go dihina, wadiyala ebete atumu temetemeha꞉ lumagimo nemedenamene, ba꞉gala pote kalakala ipuwalo da꞉luta, wadiyala ebete kalakalaha꞉ lumagimo nemedenamene, ba꞉gala pote dogodogo ilina mana꞉mo dopamo duwati, wadiyala ebete ilinaha꞉dawamo nemedenamene,
1CO 7:31 ba꞉gala pote ba꞉moe hopoeno komoma꞉ oko dowatina, wadiyala ebete ba꞉bi hiya꞉hiya꞉ oko ya꞉lo da꞉miya꞉pali ba꞉bako lumagimo nemedenamene, mabu ba꞉moe hopoeno komate keba ka꞉na ka꞉pola꞉na, ba꞉bi pakala komo hiliyonomate ba wiboho uli komate ba꞉ na꞉pikulihona.
1CO 7:32 Ba꞉bema꞉ na ubihinola la꞉ hopo haboeno komoma꞉ ukui bilibilima꞉ eda꞉ha. Numa꞉la꞉, kebe hibima꞉ midi dubuti kamenaheno demedena, ebete aeno Kodawa kokalakaluimima꞉ ebeno ubi konomo ba ihatena ebeno komokomo kapiya ba꞉bo emalagidolenako.
1CO 7:33 Huiyatiya kebe hibima꞉ midi dubuti kamena dopamo lawete eba꞉go demedena, ebete ebeno konomo ubi ba꞉be kamena kokalakaluimima꞉ ihatenako, ba꞉ma ka꞉na ebete ba꞉moe hopoeno komokomo ba emalagidolena
1CO 7:34 ebeno tepo ipuwalo ba꞉bi komate Godokono ubi komago nalaholohona. Ba꞉bene kebe hibima꞉ midi kamenate awihino demedena ba꞉gala kebe hibima꞉ midi bohelete awihino demedena, iba꞉te aeno Kodawoeno talona oko mabuma꞉ ibino ape ba꞉gala gobogobo ebetamo kikamehoma꞉ ebeno komokomo kapiya ba꞉bo emalagidolenaka. Huiyatiya kebe hibima꞉ midi kamenate dubu dopamo lawete eba꞉go demedena, ebete ebeno konomo ubi ba꞉be awi kokalakaluimima꞉ ihatenako, ba꞉ma ka꞉na ebete ba꞉moe hopoeno komokomo nemalagidolena.
1CO 7:35 Ba꞉bema꞉ tabo ulihopa꞉la꞉, nale ba꞉moi iya꞉tulame tabamo kamena lawe komoma꞉ ba꞉gala dubu lawe komoma꞉ la꞉tamo kukala kamiya꞉telameha꞉, ao, na ubila ba꞉moi tabamo la꞉ ba owalubili la꞉le hidonomamo kemedenama꞉, ba꞉gala la꞉le la꞉eno komo aeno Kodawoeno oko mabuma꞉ ebetamo hibinomolo kikamehoma꞉, na ubihinola eta kapiya duhimi komote la꞉godolo itanama꞉.
1CO 7:36 Ba꞉gala eta komo. Keba tetelo hibima꞉ midipi ipuwalo eta bohele ba꞉gala eta kuhi ba emedena, ibino nabi menokoba꞉te ebe ebetamo da꞉galuimimina꞉, ba꞉bene tete ga꞉ga꞉dopolo iba꞉te kapiyama꞉ eda꞉heno ba꞉be kuhiti ebe lawema꞉ ebeno ubi komote konomoma꞉ deda꞉mene, keba ka꞉nala꞉ka꞉ ebete ebetamo modoboha꞉ ukui komokomo emalagidole da꞉tupuimimini, ba꞉ba tetelo ebete ebe ebeno kamenama꞉ da꞉midimini Godokono umi ipuwalo ebete eta kuba a꞉kododa꞉mene.
1CO 7:37 Huiyatiya keba tetelo ba꞉be kuhiti eta lumagino ubi komamo papamiwataheno, ba꞉bene ebe ha꞉kiya ebeno kateneno ubi komo ebetamo da꞉galuimi ba꞉be boheleno komoma꞉ ba matuhumiho, ebete ebeno tepo ipuwoeno ukui ba꞉ma ka꞉na da꞉kodakoduilamemene Godokono hiya꞉hiya꞉ oko kapiya kowatihonama꞉, ebete ba꞉be bohele ebeno kamenama꞉ tiyolo midihino tete da꞉ga꞉gima꞉tepamene, Godokono umi ipuwalo ebete atumu kuba a꞉kododa꞉mene.
1CO 7:38 Ba꞉bema꞉ numa꞉la꞉, kebe kuhiti ebetamo da꞉galuimi ba꞉be bohele tiyolo da꞉lawemene, ebete hido komo kododima꞉ne, ba꞉gala kebe kuhiti Godokono oko kowatinama꞉ ebetamo da꞉galuimi ba꞉be bohele tete ga꞉ga꞉nomolo laweheno ba꞉ba ka꞉na demedenamene, ebeno ododi komote atumu hidoma꞉ keda꞉ma꞉ne, iyo, ebeno ododi komoeno hido komote dopo kuhino hido komo konegogoloma꞉ne.
1CO 7:39 Ba꞉gala ba꞉moe ba꞉ eta komola. Hibima꞉ midi kamenoeno awino hoe teta꞉mo ebete talona ipuwalo ba emedena eta dubu akalawa꞉la꞉, huiyatiya keba tetelo ebeno awiti da꞉hoemene, ba꞉be talonate ebegodone wibote ebeno ubilo eta dubu da꞉lawemene, kubaha꞉, huiyatiya ebete hibima꞉ midiha꞉dawa akalawa꞉la꞉.
1CO 7:40 Ba꞉bene Godokono Gobogobote nagodolo ba emedena, na nemalagidolutamo ba꞉moe eta ukui komote ebegodone duluhuku, kebe kamenate hamolema꞉ eda꞉te Godokono oko mabuma꞉ awihino demedenamene, ebeno kalakalate konomoma꞉ keda꞉ma꞉ne, iyo, ebeno kalakalate eta dubu da꞉lawemene ba꞉be kamenoeno kalakala konegogoloma꞉ne.
1CO 8:1 Ba꞉bema꞉ la꞉eno leta ipuwalo la꞉le eta komoma꞉ na da꞉kiyanamima, ba꞉be komo ba꞉ eta hibima꞉ midi dawate kolowami habamo tote, puya꞉te ida꞉da꞉li adikulameno katene ilina da꞉pemiya꞉tenaka, ebete ba꞉bi tawakalubino ilina lawema꞉ talonala꞉ka꞉ o talonahenola꞉ka꞉. Ba꞉be komoma꞉ la꞉ komopa꞉te na꞉ga꞉lanakomata, “A hiliyonomate iya꞉tawa komo ya꞉lo a꞉lawima꞉.” Nale huiyatiya na꞉goemo, “Keba tetelo iya꞉tawa komote eta dawagodolo ditana, ba꞉be mabuma꞉ ebe ha꞉kiya ebe bawagaminanako, huiyatiya keba tetelo malemale emalagidolo komote ebegodolo ditana, ba꞉be komodo ebete komopi ibino hibima꞉ midi ipuwalo na꞉kodakoduilamenako.”
1CO 8:2 Ba꞉bema꞉ numa꞉la꞉, pote komopino owalubi tabo komokomo ulihoheno awagahalo ba꞉ma ka꞉na demalagidolona, ebete eta komoma꞉ iya꞉tawa komo dopamo modobolo a꞉lawi, ebegodolo hibi iya꞉tawa komote kitanaha꞉.
1CO 8:3 Huiyatiya pote Godoko malemalelo demalagidolona, ba꞉bema꞉ Godote ebeno komo hibinomolo ba iya꞉tawana ebe hidonomamo umina.
1CO 8:4 Ba꞉bema꞉ eta hibima꞉ midi dawate kolowami habamo tote, puya꞉te ida꞉da꞉li adikulameno katene ilina da꞉pemiya꞉tenaka, ebete ba꞉bi tawakalubino ilina lawete da꞉namene ba꞉be komo talonala꞉ka꞉? A iya꞉tawahala ida꞉da꞉li ba꞉gala Godoko ibino komo hiya꞉la, mabu aeno Kodawa kapiyate hibi Godoma꞉ ba eda꞉na hibi helote ebe kapiyagodolo bitana, huiyatiya ida꞉da꞉li gobogoboeno helote hibilo kitanaha꞉.
1CO 8:5 Hibila, kebe gobogobate alomolo ba꞉gala hopo haba konomolo demedehona, Godoko hibima꞉ midiha꞉pa꞉te ibi ba adikulamena ibi ibino godoma꞉ ba꞉bo ka꞉laminaka, iyo, komo tetelo iba꞉te ibino hiya꞉hiya꞉ ida꞉da꞉li gobogobatamo godo mahilo ba꞉gala kokopino mahilo dito ikalamenaka.
1CO 8:6 Huiyatiya a hibima꞉ midipino Godo ba꞉ kapiyanomola, ebe ba꞉ aeno Nabiwila. Ba꞉ hibila, pote alomo konomo ba꞉gala hopo haba konomo dododiliya꞉, iyo, pote hiya꞉hiya꞉ ilina ba꞉gala tawakalubi ba꞉gala gobogobo hiliyonomo dododiliya꞉, ebete ba꞉be Helodawama꞉ ba eda꞉na ale ebe kawagaminanama꞉ ba꞉bema꞉ emedehonama꞉. Ba꞉gala aeno Kodawa atumu ba꞉ kapiyala, ebe ba꞉ Ya꞉su Kelisotela, ebeno helo ipuwado hiya꞉hiya꞉ ilina ba꞉gala tawakalubi ba꞉gala gobogobo hiliyonomate ikulihuya꞉, iyo, ale ebeno malemale komodo ka꞉ka꞉go bemedehonama꞉.
1CO 8:7 Huiyatiya komo hopo habanapi hiliyonomate Godokono hibi komo iya꞉tawahaha꞉, ibi ba꞉ ida꞉da꞉lino gobogobo adikulamepila. Ba꞉bema꞉ ibi ipuwalo puya꞉te ba꞉bi adikulame ipuwane Godotamo dohobila꞉hamena꞉, komo iba꞉te tete ga꞉ga꞉dopolo ibino tepo ipuwoeno mulu ukui hibilo kodakoduilameheno, iba꞉te ida꞉da꞉li emalagidole komo tiyolo ba꞉bema꞉ a꞉kamiya꞉pamena꞉. Numa꞉la꞉, ba꞉bako hibima꞉ mididawate kolowami habamo tote, puya꞉te ida꞉da꞉li adikulameno katene ilina da꞉pemiya꞉tenaka, ebete ba꞉bi tawakalubino ilina lawete da꞉penamene ebeno tepo ipuwoeno ukuiti ebe kuba ododidawama꞉ ba꞉bema꞉ kogoema꞉ne.
1CO 8:8 Huiyatiya hibi komo ba꞉ ba꞉ma ka꞉nala, ale eta ilina da꞉nama꞉ ba꞉be ilinate a Godokono holoholo hapulu tuputupupima꞉ a꞉kamidia꞉mena꞉. Ba꞉bema꞉ hibila, naha ilina hiliyonomo ipuwalo lumagiti eta ilina da꞉namene ba꞉be komodo kubadawama꞉ a꞉keda꞉mene, ba꞉gala ebete eta ilina nama꞉ talonama꞉ da꞉goemene, ebeno naha꞉ komodo ebete tuputupudawama꞉ a꞉keda꞉mene.
1CO 8:9 Huiyatiya la꞉le ilina hiliyonomo nahama꞉ tutupima꞉ ba eda꞉hana, la꞉ hidamo! La꞉ ipuwalo kebe lumagiti ebeno hibima꞉ midi ipuwalo kodakodalo la꞉naheno, etate ebeno naha komodo ba꞉be lumagino tepo ipuwoeno mulu ukui kubahilamete ebeno nato ukamidadawama꞉ akeda꞉la꞉.
1CO 8:10 Numa꞉la꞉, la꞉ puya꞉te Godokono hibi tutu emede komo diya꞉tawahanama, la꞉ ipuwalo etate katene ilina konama꞉ eta ida꞉da꞉li adikumino genamamo da꞉tomene, ba꞉bene ebete ba꞉bolo ba꞉be gobogobo adikumino ilina ba nuta, diyala, eta hibima꞉ mididawate ebeno ododi komo da꞉ pumimini. Ba꞉bema꞉ ba꞉be dawate ebeno tepo ipuwoeno mulu ukui dopamo hibilo kodakoduilameheno, ebetamo bada komote na꞉kuluhukumini? Iyo, ebete ebeno tepo ipuwalo ba꞉be katene ilina naha komo kuba ododi komoma꞉ ba goena, huiyatiya ebeno mabulubi ibamitilo dito da꞉namene, ebete ebeno hibima꞉ midi komo ba꞉bo kokubahimima꞉ne.
1CO 8:11 Ba꞉bema꞉ ama꞉ pote ama꞉ iya꞉tawadawama꞉ da꞉ka꞉mina, ama꞉le amia꞉no iya꞉tawa komamo amia꞉no hibima꞉ midi ekawi ba꞉ba ka꞉na dito kokubahimima꞉na꞉ta! Numa꞉, Kelisote ba꞉be ekawi mabuma꞉ a꞉hoiya꞉,
1CO 8:12 ba꞉bema꞉ hibima꞉ midipi ipuwalo puya꞉te ibino tepo ipuwoeno mulu ukui dopamo kodakoduilameheno, ama꞉le amia꞉no tutu emede iya꞉tawa komodo ba꞉bako ekakino hibima꞉ midi komo da꞉kubahilamemena꞉, ba꞉be gabodo ama꞉ iba꞉tamo konomo kuba ba ododi Kelisotamo atu kuba komo hibinomolo ba꞉bo kakododima꞉na꞉ta.
1CO 8:13 Ba꞉be mabuma꞉ nale katene ilina naha komodo naeno hibima꞉ midi ekawino nato ukamidadawama꞉ deda꞉mo, ba꞉be komo ba iya꞉tawa nale emedena tetelo katene ilina gala a꞉kananakamo, naeno ekawiti na ibaminatenelo kuba ododi komamo gakapoma꞉.
1CO 9:1 Ba꞉bema꞉ nale la꞉ balateda꞉lemata, la꞉ iya꞉tawahala꞉ka꞉ nale aeno Kodawa Ya꞉suku naeno baida꞉mo hibilo dumiya꞉mo? Ba꞉gala la꞉ iya꞉tawahala꞉ka꞉ ebete ebeno sose tupuimima꞉ hiya꞉hiya꞉ hopamo doelamiya꞉ ba꞉bi okopi ipuwalo na etama꞉ ba eda꞉, ba꞉be oko ipuwalo na tutudawama꞉ deda꞉namo? Numa꞉la꞉, nale aeno Kodawatamo dowatinamimo, ba꞉be oko ipuwane kebe hidohido gaote dikulihui la꞉ ba꞉ ba꞉bi tawakalubilata.
1CO 9:2 Ba꞉bema꞉ komopa꞉te na Ya꞉sukunu hibi oelamepi ipuwalo etama꞉ ka꞉namihino, la꞉ huiyatiya naeno komo iya꞉tawahala, iyo, la꞉le Kelisoko ipuwalo demedenama ba꞉be komote na hibi oelamepi ipuwalo etama꞉ deda꞉namo ba꞉be komo behawakaliminako.
1CO 9:3 Ba꞉bene keba tetelo komopa꞉te naeno oko komo anagiya꞉midanamete kubama꞉ da꞉ga꞉lanaka, nale naeno tuputupu ododi komo hawakalimima꞉ iba꞉tamo tabo ba꞉ma ka꞉na olamaginakomo,
1CO 9:4 na ba꞉gala puya꞉te nago oko dowatina ale kebe hibima꞉ midipi dowalubilinakoma꞉, ale aeno oko huiyama꞉ eta modoboha꞉ komoma꞉ ibi a꞉kakiyalama꞉lema꞉. Huiyatiya numa꞉la꞉, aeno oko mabuma꞉ ale sose tawakaluba꞉godone baa꞉ modobolo kuwatema꞉ talona kitanaha꞉!
1CO 9:5 A꞉iye! La꞉ iya꞉tawahala꞉ka꞉, Kodawa Ya꞉sukunu komo oelamepi, iyo, ebeno ekaki ba꞉gala Pitako atumu, iba꞉te oko ipuwalo ibino hibima꞉ midipi kamenakamenago ba wapata꞉lamena ibi hiliyonomate sose tawakaluba꞉godone owalubi keba ka꞉na kuwatenaka, talona puliyala na ba꞉gala nago oko dowatina ale atumu ba꞉ ba꞉ba ka꞉na kawapata꞉lamenama꞉?
1CO 9:6 Huiyatiya diyala, la꞉ komopa꞉te na ba꞉gala Banabasiko a netewapino komoma꞉ ba꞉ma ka꞉na demalagidolonama, “Oelamepi ipuwalo ibi kapiyatamo talona bitana sose tawakaluba꞉godone owalubi komokomo kuwatema꞉, iyo, wadiyala iba꞉te huiyatiya hegehege mani oko owati ipuwalo ibi ha꞉kiya ibino modoboha꞉ komokomo nulama꞉mena꞉.”
1CO 9:7 A꞉iye! Nale la꞉eno daedae ukui tabo ba huiya ba꞉ma ka꞉na goemo, “Gabomanino alaholohopi ipuwalo ibi hiliyonomate ibino baa꞉ ba꞉gala oko huiya gabomana꞉godone modobolo uwatenaka, aba꞉ hibila꞉ka꞉? Iyo, ba꞉ ba꞉ba ka꞉na kebe lumagiti gala꞉ipi gao pali dopamo dododi komo hiliyonomo tetelo ba꞉bi hidohido gao a꞉penahanako, ba꞉gala kebe dubuti sipi-goegoe ulamedawama꞉ deda꞉na ebeno ubi tetelo ba꞉bi ilinoeno nono uwatenako.”
1CO 9:8 Ba꞉bema꞉ la꞉ na꞉kemalagidolutama, na ha꞉kiya naeno ukui komamo ka꞉goemo ba꞉moe go tabo? Ao, eba ka꞉naha꞉, mabu Godote ebeno Bukoeno eta tutumu tabamo ba꞉be atu komo a biya꞉tua꞉mena.
1CO 9:9 Iyo, Mosesete Godokono Tutumu Tabo ebeno Bukamo ba miya꞉te eta tabo ba꞉ma ka꞉na hawakalimiya꞉, “Tawakaluba꞉te witi-laisa nahoeno kikipo kuwatema꞉ ibino kau-goete ba꞉bi ilina mikimoelelo oko iba꞉tamo dowatimini, ba꞉ba tetelo iba꞉te ba꞉be kau-goeno tabo hala꞉mo matumi modoboha꞉, mabu ebete iba꞉tamo oko owati ipuwalo witi-laisa kikipo kapiyakapiya naha modobola, iyo, ba꞉bi naha ilina ba꞉ ebeno okoeno huiya deha꞉potola.” Ba꞉bema꞉ la꞉ ba꞉moe taboeno ipuwa ba emalagidolo na na꞉kiyanamiya꞉la꞉, mabu keka꞉ Godote ba꞉moe tutumu atamo dikaa꞉miya꞉, ebeno malemalelo ebete kau-goegoe konomamo kemalagidolena o ebete tawakalubi konomamo kemalagidolena?
1CO 9:10 Ba꞉ hibila, ebete aeno ka꞉ka꞉ konomamo demalagidolena, ba꞉moe tabo Bukamo ba꞉bema꞉ miya꞉tiya꞉. Iyo, ebete a ba꞉ma ka꞉na kiyaa꞉mena, pali oko ipuwalo kebe lumagiti haka aligilino ilinamo oko da꞉tupuiminako ba꞉gala kebe lumagiti naha ilina uwate oko dowatinako, ibi netewapa꞉te ba꞉moe atu ukui komago bemedena, iba꞉te ibino oko huiyama꞉ naha ilina ipuwane ibino komo kapimilo kuwatema꞉na꞉.
1CO 9:11 Numa꞉la꞉, pali ododidawate haka ipuwamo kikipo keba ka꞉na kamihonako, ale dopamo la꞉ Kolini sose tawakalubi ipuwalo oko ba꞉ ba꞉ba ka꞉na powatima꞉. Ba꞉bema꞉ ale kapiyakapiya tetelo la꞉godone owalubi komo da꞉lawenakoma꞉, la꞉ ba꞉be komo aeno modobo oko huiyama꞉ ba꞉ka꞉ga꞉loma o pilo komoma꞉ ba꞉ka꞉ga꞉loma?
1CO 9:12 Ba꞉ hibila, komo hiya꞉hiya꞉ okopa꞉te la꞉godone owalubi da꞉lawenaka ba꞉be komote modoboma꞉ neda꞉tale, la꞉le aeno oko owati komoma꞉ a dowalubinakoma, Godokono umi ipuwalo ba꞉be komote atumu modobonomoma꞉ ba꞉ka-eda꞉na꞉. Huiyatiya numa꞉la꞉, dopamo ale oko ipuwalo hiya꞉hiya꞉ modoboha꞉ komokomo ba iya꞉tawahana, la꞉ ipuwalo eta lumagigodone owalubi komo laweheno aeno tepo ipuwa dito kodakoduilamenakuima꞉. Iyo, ale Kelisokono Hido Tabo puya꞉tamo dolamagiminakoma꞉, a ubihinola iba꞉godone eta owalubi komo ba lawe ba꞉be komote aeno oko duhimi komoma꞉ eda꞉.
1CO 9:13 Ba꞉gala eta komo. La꞉ Yunapino komo iya꞉tawahala꞉ka꞉, ba꞉ma ka꞉na puya꞉te Godoko Adikumino Hiya꞉ Genamalo oko dowatina, iba꞉te ba꞉be oko ipuwane ibino baa꞉ modobolo nahanaka? Iyo, puya꞉te Godoko owatidoloeno patapata hunamo hawa꞉goeno ilina koa꞉mo da꞉miya꞉tenaka, ibi ha꞉kiya ibi kowalubilima꞉ ba꞉bi hawa꞉goeno ilina ipuwane katene hapuhapu uwatenaka.
1CO 9:14 Ba꞉ hibila, aeno Kodawate ebe ta꞉matapi atumu a꞉tutumulateliya꞉, ba꞉ma ka꞉na puya꞉te ebeno Hido Tabo olamagi oko dowatina, wadiyala hibima꞉ midipi ulihopa꞉te ibino modoboha꞉ komokomo na꞉modobuilamelelamenakamena꞉.
1CO 9:15 Nale kebe tabo ka꞉goemo, ba꞉be tabo ba꞉ hibila, ba꞉ma ka꞉na nale oko ipuwalo hiya꞉hiya꞉ modoboha꞉ komo ba iya꞉tawana, eta lumagigodone owalubi komo laweheno naeno tepo ipuwa dito kodakoduiminakuimo. Huiyatiya nale ba꞉moe leta la꞉tamo ba ododita, naeno ukui kitanaha꞉ ba꞉ma tetelo la꞉le naeno eta modoboha꞉ komo umiti na owalubini ba꞉bo kotupuimima꞉. A꞉iye, na ubihinola! Nale la꞉godone eta kapiya owalubi komo laweheno wadiyala na dopamo kohoema꞉nemo, mabu keba tetelo nale eta dawagodone owalubi komo lawe da꞉tupuimimo, naeno Kodawa mabuma꞉ dawagahanamo ba꞉be komote nagodolo ba꞉bo kalatidima꞉ne!
1CO 9:16 Huiyatiya numa꞉la꞉, na Hido Tabo olamagi mabuma꞉ na ha꞉kiya na a꞉kawagaminamo, mabu Kodawate ebeno ubilo ba꞉be oko natamo ikanamiya꞉, nale naeno ubilo kalawiya꞉ha꞉. Ba꞉bema꞉ nale ba꞉be oko tama꞉mo dito dihatemo, natamo duluhukumini ba꞉be temeteme bada konomola꞉ka꞉!
1CO 9:17 Iyo, ba꞉be okote naeno ubi komodo natamo na꞉puluhukuya꞉tale, nale modobo oko huiya tawakaluba꞉godone ba꞉lawenakona꞉, huiyatiya Godote ha꞉kiya na eta hibidawama꞉ ba ka꞉nami ebeno ubilo Hido Tabo olamagi oko natamo ba꞉bo ikanamiya꞉. Ba꞉bema꞉ nale ebe kapiya kokalakaluimima꞉ oko ba owatina
1CO 9:18 kebe hido huiya na꞉ka꞉lawemo? Naeno huiya ba꞉ naeno tepo ipuwoeno kalakala komola, iyo, ba꞉be kalakalate oko owati komodo natamo puluhukuna, mabu gabo bitana nale naeno modoboha꞉ komokomoma꞉ tawakaluba꞉godone eta hido komo laweheno iba꞉tamo Hido Tabo huiyaheno dito olamaginakomo.
1CO 9:19 Ba꞉bema꞉ na eta hopo lumagino matuhumiho ipuwalo emedenaheno Kelisoko ipuwalo tutudawama꞉ eda꞉namo, huiyatiya nale Hido Tabo ba olamagina tabo ulihopi mabuma꞉ na ha꞉kiya na ibi hiliyonomoeno huiyaha꞉ okodawama꞉ a꞉midinakomo, komo ibi hiliyonomate ba꞉be tabo hibinomolo kolawema꞉.
1CO 9:20 Ba꞉ hibila, keba tetelo nale naeno Yunapa꞉tamo Hido Tabo dolamaginakomo, iba꞉te ba꞉be tabo hibilo lawema꞉ nale ibino eta lumagi huiyamo bemedenamo. Iyo, Godote aeno iniwala꞉tamo dikalamiya꞉ iba꞉te ba꞉bi Tutumu Tabo hiliyonomamo papamila꞉ha ko komonomoma꞉ ba ga꞉lana, ba꞉bema꞉ ba꞉bi Tutumu Tabamo nale atumu a꞉kapapamiwatanakomo, iba꞉te Hido Tabo uliho tetelo eta duhimi komo nagodolo umikapoma꞉.
1CO 9:21 Ba꞉gala keba tetelo nale Yuha꞉pa꞉tamo Hido Tabo dolamaginakomo, iba꞉te ba꞉be tabo hibilo lawema꞉ nale ibino eta lumagi huiyamo atumu ba꞉kemedenamo. Iyo, naeno iniwala꞉te Godogodone duwatiya꞉ nale ba꞉bi Tutumu Tabo hiliyonomamo papamiwataheno, huiyatiya Kelisokono kapiya tutumu ipuwalo bemedenamo, mabu na ubihinola Yuha꞉pa꞉te Hido Tabo uliho tetelo eta duhimi komo nagodolo umi.
1CO 9:22 Ba꞉bema꞉ numa꞉la꞉, puya꞉te hibima꞉ midi ipuwalo kodakodalo kala꞉mota꞉hanaha꞉, nale iba꞉tamo Hido Tabo dolamaginakomo, iba꞉te ba꞉be tabo lawema꞉ nale ibino ododili komamo papamiwatate na ha꞉kiya na ibi huiyama꞉ ba꞉midinakomo. Iyo, ba꞉ ba꞉ba ka꞉na nale komo hiya꞉hiya꞉ gabodo komo hiya꞉hiya꞉ tawakalubi huiyama꞉ beda꞉nakomo, mabu na ubila iba꞉te Hido Tabo uliho tetelo eta duhimi komo nagodolo umihino komo iba꞉te tabo hibinomolo ba꞉bo kolawema꞉.
1CO 9:23 Ba꞉ hibila, na Hido Tabo olamagi mabuma꞉ ba꞉bi hiliyonomo hiya꞉hiya꞉ komokomo ododilinakomo, nale ba꞉be oko owati ipuwalo emedena teteno hidohido owalubi komo Godogodone kuwatema꞉.
1CO 9:24 La꞉ iya꞉tawahala, sikulu gugudino iya꞉da꞉mi hegelalo ibi hiliyonomate heloamo ba pulila꞉ha, ibi ipuwalo kapiyanomote sikulu watodawagodone hido huiya kolawema꞉ne. Ba꞉bema꞉ la꞉ Godoko mabuma꞉ oko ba owatina, wadiyala la꞉ ba꞉ ba꞉ba ka꞉na helonomoma꞉ neda꞉huya꞉la꞉ la꞉le ebegodone hido huiya konelawema꞉.
1CO 9:25 Ba꞉gala ba꞉moe ba꞉ eta go tabola. Bolamo iya꞉da꞉mipa꞉te eta kapiyuimino wato kikipo lawema꞉ ubi ba ihate, ko hegela peheno dopamo ibi hiliyonomate ibino ape bekodakoduilamenaka, iyo, ibi ubila wato kikipo lawe ipuwalo tawakaluba꞉te ibi kawagaminalema꞉. Ba꞉bema꞉ numa꞉la꞉, iba꞉te da꞉lawemena꞉ ba꞉be kalakalate tete nanekelelo itanatepate ba꞉bo kowiboma꞉ne, huiyatiya ale Godokono oko owati ipuwalo kebe hido huiya lawema꞉ ubi dihatenama꞉, ba꞉be komo hiya꞉la mabu ba꞉be komoeno kalakalate emedena emedena tetelo agodolo a꞉kawibonamene.
1CO 9:26 Ba꞉be mabuma꞉ sikulu gugudino iya꞉da꞉mi hegelalo ibi ipuwalo etate dopo lumagima꞉ keda꞉ma꞉ heloamo keba ka꞉na ka꞉puliganako, na oko owati ipuwalo heloamo ba꞉ba ka꞉na owatinakomo, ba꞉gala alaholoho ipuwalo eta dubuti eba꞉go dalaholohona ba꞉be eta lumagi kubanomamo keba ka꞉na kanagaliminako, na alaholoho ipuwalo ba꞉ ba꞉ba ka꞉na kewagelenamo wato kikipo kolawema꞉.
1CO 9:27 Iyo, bolamo iya꞉da꞉mipa꞉te kateneno ubi komamo papamila꞉haheno ibino ape keba ka꞉na ka꞉kodakoduilamenaka, hibima꞉ midi ipuwalo na ba꞉ ba꞉ba ka꞉na emedenamo. Ba꞉bema꞉ hibila, nale Hido Tabo puya꞉tamo dolamaginakomo, komo iba꞉te hibima꞉ midi ipuwalo wato kikipo da꞉lawemena꞉, na ubihinola ibi ipuwalo na kapiyate hido huiya laweha꞉ma꞉ eda꞉.
1CO 10:1 Ba꞉bema꞉ naeno hibima꞉ midipi ekaka꞉la꞉, kebe komate a Yunapino iniwala꞉tamo dikulihuya꞉, na ubila la꞉ ba꞉bi komo hidamo kemalagidoluilamema꞉. Iba꞉te Isipiti temeteme hopone dikuliya꞉, ba꞉ba tetelo Kodawa Godote ebeno hawai ipuwado ibi dopalamenakui ibi hiliyonomo ba꞉bo itagua꞉midalenakui, ba꞉bene ibi hiliyonomate ebeno owalubi komodo Hawihawi Kehaha꞉ Kolomo hapuamo modobolo na꞉hiwaliya꞉.
1CO 10:2 Ba꞉bema꞉ ale ba꞉ma tete tawakalubino Kelisoko ta꞉mata komo kohawakalimima꞉ ibi beyamo keba ka꞉na ka꞉wadulatelenakoma꞉, ba꞉ ba꞉ba ka꞉na aeno iniwala꞉te Godokono okodawa Moseseko ba ta꞉matana, Godote ibi hiliyonomo ebeno hawai ipuwamo ba꞉gala kolomo ipuwamo ba꞉bo wadulateliya꞉.
1CO 10:3 Ba꞉bene iba꞉te dito hopolo ba wapata꞉lamena, Godote hanohano komodo iba꞉tamo dikalamenakui ibi hiliyonomate ba꞉be baa꞉ ba꞉bo nahanakuya꞉,
1CO 10:4 ba꞉gala ebete eta hanohano komodo nakola ipuwane dikalamenakui, ibi hiliyonomate ba꞉be beya atumu a꞉kanihonakuya꞉, ba꞉bema꞉ ba꞉be nakola ba꞉ gola, ebe ba꞉ Kelisotela, kebe Kodawate iba꞉go da꞉pata꞉nami ba꞉moe ba꞉be dawala.
1CO 10:5 Huiyatiya numa꞉la꞉, iba꞉te Godokono hiya꞉hiya꞉ hidohido owalubi ba ulamena, komo hiliyonomate ebe hibima꞉ kamidiya꞉ha꞉, ba꞉bema꞉ ebete iba꞉tamo maubate ibi danakapulamiya꞉, ibino ha꞉laha apa꞉te dito hopolo hiya꞉hiya꞉ ba꞉bo toda꞉la꞉mota꞉hanuya꞉.
1CO 10:6 Ba꞉bema꞉ Godoko ubila ale ba꞉bi komodo hido ukui ba꞉ma ka꞉na kolawema꞉, Yunapino iniwala꞉te kuba komo kododilima꞉ ibino tepo ipuwoeno ubi konomamo keba ka꞉na ka꞉miya꞉tenakui, ale ba꞉ba ka꞉na eda꞉ha modoboha꞉.
1CO 10:7 Ba꞉bene eta tetelo komo iba꞉te eta ida꞉da꞉lino poko dododiya꞉, Godokono Buka tabote ba꞉be komo ba꞉ma ka꞉na hawakalimina, “Tawakaluba꞉te poko ba ododita, baa꞉ konomamo nahate, helonomo gao beya nihote, hilopo moe komo ba꞉bo ododiya꞉.” A꞉iye! Ibi ida꞉da꞉li adikulamepima꞉ keba ka꞉na keda꞉huya꞉, la꞉ ba꞉ba ka꞉na eda꞉ha talonala!
1CO 10:8 Ba꞉bene eta tetelo komo iba꞉te bohelemele ba꞉gala kuhi pilo komo, kamenakamena ba꞉gala dubu pilo komo, ba꞉bako koko kuba ododili da꞉tupuimiya꞉, ba꞉bema꞉ kapiya hegela tetelo 23 taosene tawakaluba꞉te ba꞉ dito ha꞉lahuya꞉. A꞉iye! Ale ba꞉bako kuba ododili ipuwamo na꞉pa꞉la꞉ha modoboha꞉!
1CO 10:9 Ba꞉bene eta tetelo komo iba꞉te Kodawa Godoko bepawiya꞉, iyo, ebete ibino daedae ukui komamo papamiwataheno ba꞉be mabuma꞉ iba꞉te ebeno ododi komo kubama꞉ da꞉ga꞉luya꞉, ba꞉bema꞉ bu kalate ibi ba alohole ibi hiliyonomate ba꞉ dito ha꞉lahuya꞉. A꞉iye! Ale ba꞉bako kuba tabamo aeno Kodawa pawi modoboha꞉!
1CO 10:10 Ba꞉bene eta tetelo komo iba꞉te ubiha꞉ tabo Godokono okopa꞉tamo da꞉ga꞉luya꞉, ba꞉bema꞉ Godokono Hoe Nopodawate ibi ba꞉bo anakapulamiya꞉. A꞉iye! Ale ba꞉bako ubiha꞉ tabo ga꞉la tupuimi modoboha꞉!
1CO 10:11 Numa꞉la꞉, Godote ebeno ubi komo dopamo ihatiya꞉, komopa꞉te ba꞉bi hiliyonomo komo ba iya꞉tawaha iba꞉te hidohido ukui kuwatema꞉, ba꞉bene ebete a mabuma꞉ ba꞉bi komo ebeno Bukamo a꞉miya꞉tiya꞉, ale ba꞉bi atu kuba ododili ipuwamo gudikapoma꞉. Ba꞉ hibila, a puya꞉te ba꞉ma tetelo demedehonama꞉ hopo haboeno kuititi tetete atamo ba꞉ na꞉tatali,
1CO 10:12 ba꞉bema꞉ pote ba꞉ma ka꞉na demalagidolona, “Na naeno heloamo modobolo la꞉namo,” ebe hidamo! Diyala, tete tatalila ebete kuba ododi ipuwamo da꞉ negamene.
1CO 10:13 Ba꞉ hibila, Saitanate hiya꞉hiya꞉ kuba gabamo emogabuimi komo ama꞉tamo da꞉wadahenako, ebete ba꞉bako atu komokomo hopo habanapi hiliyonomatamo ikalamenako. Huiyatiya kalakala konomola, Godote ama꞉ kowalubima꞉ hibidawama꞉ eda꞉na. Ba꞉be mabuma꞉ amia꞉no hibima꞉ midi helote keba ka꞉na kitana, ebete ba꞉be komo ba iya꞉tawana Saitanako ba꞉bo koduhimima꞉ne, ebete amia꞉no helo da꞉gogolona ba꞉bako eta konomo emogabuimi komo ama꞉tamo kadahema꞉. Ba꞉gala ba꞉be atu tetelo Godote ama꞉ gabo kiya꞉tumima꞉na꞉ta, ama꞉le Saitanakono emogabuimi komone keba ka꞉na na꞉kalahuliomena꞉ ama꞉le hibima꞉ midi ipuwalo kodakodalo kola꞉nama꞉.
1CO 10:14 Ba꞉bema꞉ naeno hidohido mabuluba꞉la꞉, wadiyala la꞉le hiya꞉hiya꞉ ida꞉da꞉lino gobogobo adikulame komo kuba nibote patema꞉ ga꞉lalo ba꞉bi ododili ipuwane nalahutihonakuya꞉la꞉.
1CO 10:15 Numa꞉la꞉, la꞉ puya꞉te naeno tabo dulihutama, nale naeno tepo ipuwoeno ukuilo la꞉ hidohido ukuipima꞉ midilitamata, ba꞉bema꞉ wadiyala la꞉ ba꞉moe naeno tabo hidamo nanagiya꞉midala꞉.
1CO 10:16 Ya꞉suku emalagidolo baa꞉ naha komo ododi tetelo ale kebe kalilino komoma꞉ Godotamo kalakala tabo dadipatenakoma꞉, ba꞉be kalili ba꞉ Kelisokono hawi kalilila, ba꞉bema꞉ hibila, ale kapimilo ba niho a eba꞉go kapiyama꞉ ba꞉bo eda꞉hanakoma꞉. Ba꞉gala ale ebe kemalagidoloma꞉ kebe baa꞉ ka꞉wakamihonakoma꞉, ba꞉be baa꞉ ba꞉ ebeno apela, ba꞉bema꞉ ale kapimilo ba naha a Kelisokoba꞉ atumu kapiyama꞉ ba꞉bo keda꞉hanakoma꞉.
1CO 10:17 Numa꞉la꞉, ale ba꞉be baa꞉ wakamihoheno dopamo kapiya baa꞉te itananako, ba꞉bema꞉ ba꞉be komo ba꞉ a hibima꞉ midipino komo hawakalimino gola, iyo, a hiliyonomate Kelisokono kapiya apema꞉ ba eda꞉hana, ale kapiya baa꞉ kapimilo ba꞉bema꞉ nahanakoma꞉.
1CO 10:18 Ba꞉ hibila, a Isalaelanapino hawa꞉goeno ilina Godotamo ikameho komo atumu ba꞉ ba꞉ba ka꞉nala, ba꞉bema꞉ wadiyala la꞉le ba꞉be komo nemalagidolala꞉. Iba꞉te ba꞉bi ilina Godoko owatidoloeno patapata hunamo miya꞉teheno, dopamo iba꞉te mokoholete ibi mabuma꞉ katene hapuhapu tama꞉mo miya꞉tenaka, ba꞉bene iba꞉te Godoko adikumi tetelo eba꞉go kapiyama꞉ ba eda꞉ha katene kapimilo ba꞉bo nahanaka.
1CO 10:19 Ba꞉bema꞉ na ubila ale ida꞉da꞉li gobogoboeno adikulame komo gala kakemalagidoluya꞉. Mabu keka꞉ nale la꞉ ba꞉be komo ipuwane alahutihoma꞉ da꞉kiyalamema? Ba꞉bi ida꞉da꞉lino helote hibilo ba꞉kitana, ba꞉gala adikulamepa꞉te iba꞉tamo kebe ilina kikalamenaka ba꞉bi ilinate talona ipuwalo hibilo ba꞉ka꞉pola꞉na?
1CO 10:20 Ao, naeno taboeno ipuwa eba ka꞉naha꞉! Hibi komo ba꞉ ba꞉ma ka꞉nala, ida꞉da꞉li adikulamepa꞉te ibino hawa꞉goeno ilina Godotamo a꞉kikamehala꞉, iba꞉te huiyatiya ida꞉da꞉lino ha꞉da amiho gobogobatamo ikalameholenaka. Ba꞉be mabuma꞉ na ubihinola la꞉ hibima꞉ midipa꞉te la꞉eno ododili ipuwalo ba꞉bako kuba gobogobago kapiyama꞉ keda꞉hanama꞉!
1CO 10:21 A꞉iye! La꞉le eta hegelalo Ya꞉suku emalagidolo kalila꞉mo nihote, eta hegelalo kuba gobogobo emalagidole kalila꞉mo da꞉kanihoma, ba꞉be komo modoboha꞉! Iyo, la꞉le eta hegelalo Ya꞉suku emalagidolo baa꞉ eba꞉go nahate, eta hegelalo kuba gobogobo emalagidolelo iba꞉go baa꞉ da꞉kanahama, ba꞉be komo atumu modoboha꞉!
1CO 10:22 Ba꞉bema꞉ a hidamo! Ale ida꞉da꞉li adikulamepino ododili komamo a꞉kana꞉pa꞉la꞉hama꞉, mabu a ubihinola aeno Kodawate ba꞉be komoma꞉ atamo mauba. Ba꞉gala ale daedae ukuilo ba꞉ma ka꞉na a꞉kemalagidolama꞉, aeno helote ebeno heloago komodoboma꞉ne.
1CO 10:23 Ba꞉bema꞉ ba꞉moe ba꞉ eta komola. La꞉ komopa꞉te ba꞉ma ka꞉na na꞉ga꞉lanamata, “Apa꞉mo ododili komo hiliyonomo ipuwalo eta komo kododima꞉ talona hibilo kitanaha꞉.” Ba꞉bema꞉ nale tabo ba huiya na꞉goemo, “Iyo, lumagiti Kelisoko ipuwalo tutudawama꞉ ba eda꞉na, talona ebetamo hibilo kitanaha꞉ eta komo kododima꞉. Huiyatiya numa꞉la꞉, apa꞉mo ododili komo hiliyonomo ipuwalo komo ododili komate aeno hibima꞉ midi ipuwalo a a꞉kowalubia꞉mena꞉, iyo, a sose tawakaluba꞉te ba꞉bi ododili komago ba emedena hidamo a꞉kapepehama꞉.
1CO 10:24 Ba꞉bema꞉ la꞉ ipuwalo etate ukui akihata꞉la꞉ ebe ha꞉kiya ebe kapiya kowalubima꞉, huiyatiya wadiyala ebete komopino hibima꞉ midi ipuwalo ibi kowalubilima꞉ ibino komokomo dopamo nemalagidolenakamene.”
1CO 10:25 Ba꞉ hibila, ama꞉ kolowami habamo tote, puya꞉te ida꞉da꞉li adikulameno katene ilina da꞉pemiya꞉tenaka, ba꞉bi tawakalubino ilina uwatete da꞉nahamena꞉, talona puliyala. Iyo, amia꞉no tepo ipuwoeno mulu ukui komate amia꞉no eta naha komoma꞉ ama꞉ kubadawama꞉ ka꞉mi modoboha꞉,
1CO 10:26 mabu Godokono Bukalo tabote ba꞉ma ka꞉na itana, “Ba꞉moe hopo konomo ba꞉ aeno Kodawoenola, ba꞉bema꞉ hopo haboeno ilina hiliyonomate ba꞉ ebenoma꞉ eda꞉hana.”
1CO 10:27 Ba꞉bema꞉ keba tetelo eta hibima꞉ midiha꞉ mabulubiti ama꞉ eba꞉go baa꞉ nahama꞉ da꞉kiyamemena꞉, ama꞉ ubi dihatemena꞉, kubaha꞉, ama꞉le eba꞉go tote ebete baa꞉ naha tetelo ama꞉tamo kebe ilina dikamemena꞉, wadiyala ama꞉ ba꞉be ilina kalakalago dito na꞉nuya꞉, iyo, ama꞉le tepo ipuwoeno mulu ukui komodo ida꞉da꞉li adikulameno kateneno komoma꞉ ukui bilibilima꞉ akeda꞉la꞉.
1CO 10:28 Ba꞉bema꞉ numa꞉, naeno komo ba꞉ ba꞉ma ka꞉nala. Na Kelisoko ipuwalo tutudawama꞉ ba eda꞉na, naeno tepo ipuwoeno mulu ukuiti eta ododi komoma꞉ na kubadawama꞉ ka꞉namihino, eta dawoeno mulu ukui komate naeno tutu emede komo matuhumiho a꞉kamodobamena꞉. Iyo, nale eta baa꞉ na komoma꞉ Godotamo kalakala tabo adipatelo ebeno kalakalago da꞉namo, ba꞉ba tetelo pote na꞉ka꞉modobomene na kuba ododidawama꞉ ka꞉namima꞉? A꞉iye, lumagi puliyala, kalutaha꞉! Ba꞉bema꞉ a hibima꞉ midipino ododili komoma꞉ ba꞉moe ba꞉ naeno ko iya꞉tulame tabola, amia꞉no baa꞉ naha ipuwalo, ba꞉gala amia꞉no beya niho ipuwalo, ba꞉gala amia꞉no komo hiya꞉hiya꞉ ododili komo hiliyonomo ipuwalo, wadiyala ama꞉ ba꞉bi hiliyonomo komamo Godoko nawagaminanakuya꞉. Huiyatiya ba꞉moe ba꞉ eta komola. Keba tetelo eta dawate ama꞉ ba꞉ma ka꞉na da꞉kiyamemena꞉, “Ba꞉moe katene ba꞉ ida꞉da꞉li adikulameno ilinala, ale a꞉kanahama꞉!” ama꞉ ebe malemalelo emalagidolote ebeno tepo ipuwoeno mulu ukui komamo na꞉papamiwatuya꞉. Iyo, amia꞉no tepo ipuwoeno ukuiti ba꞉be katene nama꞉ modoboma꞉ goena, huiyatiya amia꞉no mabulubino komoma꞉ ama꞉ a꞉kanamena꞉ta.
1CO 10:32 Ba꞉bema꞉ amia꞉no hiliyonomo ododili komamo eta lumagino nato ukamidadawama꞉ akeda꞉la꞉, iyo, puya꞉te Godokono sose tawakalubima꞉ deda꞉hana, ba꞉gala puya꞉te Yunapi ba꞉gala Yuha꞉pi ipuwalo hibima꞉ midiha꞉pima꞉ deda꞉hana, ibi hiliyonomo ipuwalo etate amia꞉no ododili komoma꞉ kuba ododi ipuwamo ga modoboha꞉.
1CO 10:33 Ba꞉ hibila, na ha꞉kiya na kapiya kowalubima꞉ emalagidoloheno, naeno ubi komo ba꞉ma ka꞉na ihatenamo, nale naeno hiliyonomo ododili komamo tawakalubi hiliyonomo dowalubilinakomo, ibi ba kalakaluilamena iba꞉te Godogodone ibino ka꞉ka꞉ mula꞉ komo galane ba꞉bo kolawema꞉na꞉. Ba꞉bema꞉ hibima꞉ mididawa, naeno ubi komote komopa꞉tamo keba ka꞉na kitana, wadiyala la꞉eno ubi komote iba꞉tamo atumu ba꞉ ba꞉ba ka꞉na na꞉kitananakamene.
1CO 11:1 Iyo, wadiyala la꞉ hibima꞉ midipi hiliyonomoeno ododili komokomo ipuwalo la꞉le na nibaminatena꞉la꞉, nale Kelisoko keba ka꞉na kibamitinamo ba꞉ba ka꞉na.
1CO 11:2 Ba꞉bema꞉ nale la꞉ bimililameholemata, mabu la꞉eno hiliyonomo ododili komokomo ipuwalo la꞉le na ba emalagidolone, nale la꞉ dopo soseno ododili komo keba ka꞉na kiya꞉tulametanakuima, la꞉ ba꞉bi komamo hibinomolo ba꞉ba ka꞉na papamila꞉hanamata.
1CO 11:3 Huiyatiya na ubila ba꞉ma tetelo eta uli komo la꞉ kiya꞉tulamema꞉, ba꞉ma ka꞉na Godote Kelisokono watodawama꞉ keba ka꞉na keda꞉na, Kelisote hibima꞉ midipi dubuino watodawama꞉ ba꞉ ba꞉ba ka꞉na keda꞉na, ba꞉bene hibima꞉ midi dubuti ebeno kamenoeno watodawama꞉ atumu keda꞉na.
1CO 11:4 Ba꞉bema꞉ la꞉ ipuwalo eta dubuti Godotamo toetoe tabo olamagi tetelo o ebete Godokono ukui hawakalimi tetelo ebeno wato kalikamo da꞉mula꞉mene, ba꞉be ododi komo ba꞉ ebeno watodawa Kelisotamo hilopo ikame komo huiyala.
1CO 11:5 Huiyatiya la꞉ ipuwalo eta kamenate ebeno wato kalikamo mula꞉heno Godotamo toetoe tabo dolamagimini o ebete Godokono ukui sose tawakaluba꞉tamo da꞉hawakalimimini, ba꞉be ododi komo ba꞉ ebeno awitamo hilopo ikame komola, mabu ebeno awi ba꞉ ebeno watodawala. Numa꞉la꞉, la꞉ tawakalubino komo ba꞉ma ka꞉nala, eta dubuti ebeno kamenoeno konomo kuba mabuma꞉ ebeno hinibo elepe komamo hilopo ebetamo kikamema꞉ne, ba꞉bema꞉ la꞉ ipuwalo eta kamenate ebeno wato kalikamo mula꞉heno hilopoha꞉ma꞉ deda꞉mene, wadiyala ebete hilopo na꞉lawa꞉mene, kamenoeno awiti hinibo elepe komamo ebetamo hilopo keba ka꞉na kikamenako ba꞉ba ka꞉na. Iyo, la꞉ iya꞉tawahala, hinibo elepe komo ba꞉gala hinibo iya꞉hili komo ba꞉ kamenakamenatamo hilopo ikalame komola, ba꞉bema꞉ wadiyala iba꞉te ibino wato kalikamo na꞉mula꞉lenakamena꞉.
1CO 11:7 Huiyatiya dubuino komo hiya꞉la, ebete ebeno wato kalikamo mula꞉ha꞉ma꞉ deda꞉mene hilopo komote a꞉kitanamene. Numa꞉la꞉, Godote dopo dubu ebeno holoholamo ododiya꞉, ba꞉bema꞉ ba꞉ma tetelo dubu hiliyonomate ba꞉be holoholamo ba emedehona Godokono hido mulu emede ka꞉ka꞉ komo ba꞉bo hawakaliminaka. Huiyatiya dubuino hido mulu emede ka꞉ka꞉ komo kamenakamenate hawakaliminaka,
1CO 11:8 mabu Godote dopo dubu ba꞉gala kamena ba ododili, ebete dubuino ka꞉ka꞉ kamenagodone kalawiya꞉ha꞉, ao, ebete huiyatiya kamenoeno ka꞉ka꞉ dubugodone lawiya꞉.
1CO 11:9 Ba꞉gala numa꞉la꞉, Godote ebe ha꞉kiya ebe kokalakaluimima꞉ dopo dubu bododiya꞉, huiyatiya ebete ba꞉be dubu kokalakaluimima꞉ dopo kamena aka-ododiya꞉.
1CO 11:10 Ba꞉bema꞉ la꞉ ipuwalo kamenakamenate ibino wato kalikamo na꞉mula꞉lenakamena꞉, mabu Godote ebeno Gobogoboeno helo iba꞉tamo dikalami, ibino wato mula꞉le komote ba꞉be komo hidamo kohawakalimima꞉ne. Iyo, ba꞉be komodo Hunu Haboeno nopopa꞉te ba꞉moe komo kiya꞉tawahama꞉na꞉, dubate Godokono hido mulu emede ka꞉ka꞉ komo keba ka꞉na ka꞉hawakaliminaka, talona puliyala hibima꞉ midipi kamenakamenate ba꞉be atu hido mulu emede ka꞉ka꞉ komo ba꞉ ba꞉ba ka꞉na atumu kohawakalimima꞉.
1CO 11:11 Huiyatiya ba꞉moe eta komo akadodala꞉. A hibima꞉ midipi ipuwalo kamenakamenate dubuino komoma꞉ akaga꞉lala꞉, “Ale iba꞉godolo eta owalubi komo a꞉kuma꞉lema꞉,” ba꞉gala dubate atumu kamenakamenoeno komoma꞉ ba꞉bako daedae ukui tabo akolamagima꞉la꞉. Ao, eba ka꞉naha꞉, mabu ale aeno Kodawa ipuwalo ba emedena dubu hiliyonomate kamenakamenagodolo owalubi komo ulamenaka, ba꞉gala atumu kamenakamena hiliyonomate dubagodone owalubi komo a꞉ka-uwatenaka.
1CO 11:12 Numa꞉la꞉, Godokono ododi komodo dopo kamenate dubugodone uluhukuya꞉, ba꞉bene ba꞉ma tetelo ebeno owalubi komodo dubu hiliyonomate kamenakamena ipuwane a꞉hawakalahalenaka, iyo, hiya꞉hiya꞉ tawakalubi ba꞉gala ilina hiliyonomate ebeno ubi komo kapiyado ba꞉bema꞉ ikulihonaka.
1CO 11:13 Ba꞉bema꞉ wadiyala la꞉ ha꞉kiya la꞉eno ukuia꞉mo nemalagidolala꞉, la꞉ ipuwalo eta kamenate ebeno wato kalikamo mula꞉heno Godotamo toetoe tabo dolamagimini, ba꞉be komo modobola꞉ka꞉ o modoboha꞉ma꞉ ba꞉keda꞉mene?
1CO 11:14 Numa꞉la꞉, Godote pui ebeno ubilo dododiliya꞉, ba꞉bi hiya꞉hiya꞉ tawakalubi ipuwalo komo hiliyonomate ibino tepo ipuwoeno ukuilo na꞉ga꞉lana, eta dubuti ga꞉ga꞉ga꞉ hinibago demedena ba꞉be komo ba꞉ kuba hilopo komola, huiyatiya eta kamenate ga꞉ga꞉ga꞉ hinibago demedena ba꞉be komo ba꞉ ebe hagalu kamenama꞉ midi komola. Ba꞉bema꞉ wadiyala la꞉ ba꞉be komone niya꞉tawahala꞉, Godote kamenakamenatamo ibino ga꞉ga꞉ga꞉ hinibo bikalamiya꞉ ba꞉bi hinibate ibino wato mula꞉leno ilinama꞉ keda꞉hanama꞉.
1CO 11:16 Ba꞉bene la꞉ ipuwalo etate ba꞉moe komoma꞉ nago olowabeletihuima꞉ dewagelemene, naeno kuititi tabo ebetamo ba꞉ma ka꞉na itana, la꞉eno hopo konomolo puya꞉te Godokono sose tawakalubima꞉ deda꞉hana, ibi hiliyonomate ago ukui kapiyama꞉ ba eda꞉hana kamenakamenoeno komoma꞉ ba꞉ ba꞉ba ka꞉na iya꞉tulamenaka.
1CO 11:17 Ba꞉bema꞉ nale ba꞉be komo miya꞉pate nale komo hiya꞉hiya꞉ komoma꞉ la꞉ diya꞉tulamema, ba꞉bi komo ipuwalo nale la꞉ a꞉kamililamehola꞉mata, mabu keba tetelo la꞉ da꞉kapiyuiminakoma, la꞉ la꞉eno ododili komamo komopino hibima꞉ midi ipuwalo ibi owalubilihino ibi dito kubahilamenakomata.
1CO 11:18 Ba꞉bene dopo komo ba꞉ma ka꞉nala, komopa꞉te na a꞉kiyanamiya꞉, la꞉ sose tawakaluba꞉te da꞉kapiyuiminakoma la꞉ ipuwalo anagiya꞉mida komokomo ba꞉pola꞉lama꞉nata. Ba꞉bema꞉ ibino tabo ga꞉la ipuwalo nale komo tabo hibima꞉ a꞉midilimo,
1CO 11:19 mabu diyala, ba꞉bako anagiya꞉mida komate Godokono ubilo dikulihuya꞉, la꞉ ipuwalo puya꞉te ebeno ubi komamo hibilo da꞉papamila꞉hanama, la꞉le ebeno hiya꞉nomo tuputupu emede ipuwalo ba la꞉mota꞉hana, komopa꞉te ba꞉be hido emede komo dumilamemena꞉ iba꞉te ibino kuba ododili komokomo ba꞉bo kiya꞉tawahama꞉na꞉.
1CO 11:20 Huiyatiya numa꞉la꞉, la꞉ komopino kuba ododi komo ba꞉ ba꞉ma ka꞉nala. La꞉ da꞉kapiyuiminakoma, la꞉le Kodawa Ya꞉suku emalagidolo baa꞉ naha tetelo ebe hibilo kemalagidolonaha꞉. Iyo, Ya꞉suku emalagidolo baa꞉ naha tetete peheno, dopamo la꞉eno poko baa꞉ naha ipuwalo etapa꞉te etapi emalagidoleheno ibi a꞉kalatilama꞉lemata, ba꞉bene la꞉ komopi ha꞉kiya la꞉eno baa꞉ gahugahulu ba naha komopa꞉tamo malemalelo a꞉kalabahalama꞉lemata. Ba꞉bema꞉ hibila, la꞉eno ododi ipuwalo komopa꞉te poko baa꞉ konomamo ba naha huiyatiya komopi baa꞉te hibilo a꞉kawigulama꞉le, komopa꞉te helo gao beya konomamo niho ipuwalo daedaema꞉ ba eda꞉ha huiyatiya komopi nonaminalenaka.
1CO 11:22 A꞉iye! Mabu keka꞉ la꞉le Godokono sose tawakalubi ipuwalo komopi dito tawakalubima꞉ da꞉midilinakoma? Ba꞉gala mabu keka꞉ la꞉le awaepi owalubilihino iba꞉tamo hilopo dikalamenakoma? La꞉eno ukui ba꞉kitana, nale ba꞉moe ododi komoma꞉ la꞉ da꞉mililameholema? Ao, mililamehole tabo nagodolo kitanaha꞉! Ba꞉moe kapiya tabo la꞉tamo olamagimo, la꞉le la꞉eno ekaka꞉tamo malemale hawakalimima꞉ ubiha꞉ma꞉ deda꞉hama, la꞉le soseno kapiyuimi komamo akapelama꞉la꞉. Wadiyala la꞉ huiyatiya la꞉ ha꞉kiya la꞉eno hiya꞉hiya꞉ genamalo baa꞉ na꞉nahanakuya꞉la꞉.
1CO 11:23 Numa꞉la꞉, nale Kodawa Ya꞉sugodone da꞉lawiya꞉mo, ba꞉be atu komo dopamo la꞉ ba꞉ma ka꞉na iya꞉tulamimata, ebeno eta mabulubiti ebe ebeno anakapumipino kokotamo dihateniya꞉, ba꞉be dulu ebete baa꞉ lawenate,
1CO 11:24 Godotamo kalakala tabo olamaginate, ba wakamihona ebe ta꞉matapa꞉tamo na꞉goeniya꞉, “Ba꞉moe ba꞉ naeno apela, la꞉ mabuma꞉ Godotamo ikamemo. La꞉le na emalagidolonelo ba꞉moe komo nododinakuya꞉la꞉.”
1CO 11:25 Ba꞉bene baa꞉ naha komote da꞉wibolameniya꞉, ebete kalili gala kalawenate na꞉kagoeniya꞉, “Ba꞉moe kalili ba꞉ Godote tawakaluba꞉go komiloma꞉ uli nopo da꞉tamotiya꞉ ba꞉moe ba꞉be komola, iyo, ba꞉moe naeno hawiti ba꞉be nopo bekodakoduimina. Keba tetelo la꞉le da꞉nihonakoma, wadiyala na emalagidolonelo nododinakuya꞉la꞉.”
1CO 11:26 Ba꞉bema꞉ numa꞉la꞉, Kodawate ba꞉moe hopamo gala peheno, kebe hiya꞉hiya꞉ tetelo la꞉le ebe emalagidolo baa꞉ da꞉nahanakoma ba꞉gala ebeno hawi kalili da꞉nihonakoma, ba꞉bi netewa komodo la꞉ Ya꞉sukunu hoe komo ba꞉hawakaliminakomata.
1CO 11:27 Ba꞉be mabuma꞉ kebe lumagiti ebeno tepo ipuwoeno ukuilo Kodawa Ya꞉suku hibilo adikumihino ebe emalagidolo baa꞉ da꞉namene ba꞉gala ebeno hawi kalili da꞉nimini, ba꞉be komodo ebete Kodawoeno apeno talona ba꞉gala hawino talona wakalamiti konomo kuba kododima꞉ne.
1CO 11:28 Ba꞉bema꞉ lumagiti Ya꞉suku emalagidolo baa꞉ naheno ba꞉gala ebete ebeno hawi kalilini nihino, wadiyala ebete dopamo ebeno tepo ipuwoeno komo hidamo nanagiya꞉midamene,
1CO 11:29 mabu kebe dawate Ya꞉sukunu ape komoeno ipuwa hidamo emalagidoloheno ebe emalagidolo baa꞉ dito da꞉namene, ba꞉gala ebeno hawi kalilini dito da꞉kanimini, ba꞉be dawoeno komo Godote kubama꞉ kogoema꞉ne, iyo, ebetamo kuba huiya kikamema꞉ne.
1CO 11:30 Ba꞉moe ba꞉be mabuma꞉ apeno temeteme komate la꞉ komo hiliyonomagodolo ba꞉pola꞉na, ba꞉gala tawetawete atumu la꞉ ba ulamena la꞉ ipuwalo komopa꞉te dito ha꞉lahuya꞉.
1CO 11:31 Huiyatiya numa꞉la꞉, a ha꞉kiya aeno komo dopamo modobolo danagilamenakoma꞉, ba꞉bema꞉ aeno Kodawate aeno komo anagiya꞉midaa꞉me tetelo aeno eta ododi komoma꞉ a kubapima꞉ a꞉kagaa꞉mene.
1CO 11:32 Ba꞉ hibila, keba tetelo ebete a anagiya꞉midoe ipuwalo kuba huiya dikaa꞉memene, ebeno ubi komo atamo ba꞉ma ka꞉na itananako, ebete a ba꞉ma tetelo temeteme komamo tuputupulu kemedenama꞉ diya꞉tua꞉menako, galane tetelo hopo habanapa꞉te ibino wiboha꞉ teteno kuba huiya ba uwate, a huiyatiya kuba huiya a꞉kalawa꞉ma꞉.
1CO 11:33 Ba꞉bema꞉ naeno hibima꞉ midipi ekaka꞉la꞉, la꞉le poko baa꞉ ba꞉gala Ya꞉suku emalagidolo baa꞉ naha komoma꞉ da꞉kapiyuiminakoma, wadiyala la꞉ naha tupuimihino tawakalubi hiliyonomoeno pelame komo na꞉latiminakuya꞉la꞉.
1CO 11:34 Ba꞉gala la꞉ ipuwalo baa꞉ kapete kebe lumagi koamo dumimini, wadiyala ebete ebeno genamalo baa꞉ nanekele dopamo nate ba꞉bene soseno kapiyuimi komamo na꞉pa꞉mene, mabu ba꞉bako ododi komodo kuba huiyate Godogodone la꞉ sose tawakaluba꞉tamo a꞉kapa꞉mene. Ba꞉bema꞉ kalakala konomola, ba꞉ma tetelo ba꞉moi kapiyakapiya komoma꞉ nale la꞉ hidamo a꞉kiyalamemata, huiyatiya la꞉eno komo ododili komoma꞉ kebe tabo dulihuimo, nale da꞉pemo ba꞉bi komokomo atumu ba꞉bo kopetuputupuilamema꞉nemo.
1CO 12:1 Ba꞉bema꞉ la꞉le eta komoma꞉ na da꞉kiyanamima, ba꞉be komo ba꞉ a hibima꞉ midipa꞉te Godokono oko kowatihonama꞉ ebeno Gobogobote malemalelo atamo hiya꞉hiya꞉ helo dikaa꞉menako, ba꞉bi komate keba ka꞉na ka꞉pola꞉na. Naeno hibima꞉ midipi ekaka꞉la꞉, na ubihinola la꞉ ba꞉bi dito ikalame komoma꞉ iya꞉tawaha꞉pima꞉ eda꞉ha.
1CO 12:2 La꞉ iya꞉tawahala, dopamo la꞉ hibima꞉ midiha꞉pima꞉ ba eda꞉hana, ida꞉da꞉li adikulame ipuwalo ha꞉da amiho gobogobate komo hiya꞉hiya꞉ gabodo la꞉ ba꞉bo magatalenakuya꞉ta, huiyatiya ba꞉bi ida꞉da꞉la꞉godolo hibi ka꞉ka꞉te itanaheno iba꞉te la꞉ kowalubilinamiha꞉.
1CO 12:3 Ba꞉bema꞉ na ubila la꞉ ba꞉moe komo niya꞉tawahala꞉, Godokono Gobogobote eta lumagigodolo demedena, ebete a꞉kamodobamene kuba tabo ba꞉ma ka꞉na goe, “Ya꞉suku kuba dawama꞉ ba eda꞉na Godote ebe Saitanakono Koe Habamo ka꞉da꞉nama꞉ne!” Ba꞉gala la꞉le eta lumagino tabo ba꞉ma ka꞉na dulihoma, “Ya꞉suku ba꞉ Kodawala!” la꞉ ba꞉bo kiya꞉tawahama꞉nemata, Godokono Gobogobote ebe ipuwalo bemedena, mabu ebete ba꞉be lumagi ipuwalo emedenaha꞉tale ebete ba꞉be hibi tabo goe ba꞉ka꞉modobona꞉.
1CO 12:4 Ba꞉bema꞉ numa꞉la꞉, Godokono Gobogobo ba꞉ kapiyala, huiyatiya hibima꞉ midipi hiliyonomoma꞉ ba eda꞉hana, ebete iba꞉tamo hiya꞉hiya꞉ helo dikalamenako ba꞉bi hiya꞉nomo helo komate hiya꞉hiya꞉ ba꞉pola꞉na.
1CO 12:5 Ba꞉gala Kodawa Ya꞉suku ba꞉ kapiyala, huiyatiya hibima꞉ midipa꞉te ebe mabuma꞉ dowatihona ba꞉bi oko komate hiya꞉hiya꞉ ba꞉pola꞉na.
1CO 12:6 Ba꞉bene Godoko atumu ba꞉ kapiyala, huiyatiya ebete hibima꞉ midipa꞉tamo hidohido ukui dikalamenako, ba꞉bi ukui komate atumu hiya꞉hiya꞉ ba꞉kapola꞉na iba꞉te ebeno hiya꞉hiya꞉ oko kowatihonama꞉.
1CO 12:7 Ba꞉ hibila, Godokono Gobogobote hibima꞉ midipi hiliyonomo ipuwalo bemedena, ba꞉bema꞉ iba꞉te ba꞉be komo ba iya꞉tawaha kapimilo kapepehoma꞉ ebete ebeno hiya꞉hiya꞉ helo ikame komamo ebeno komo iba꞉godolo hawakaliminako.
1CO 12:8 Ba꞉ma ka꞉na Godokono Gobogobote eta lumagitamo hiya꞉nomo helo dito ikamenako komopa꞉tamo mulu ukui tabo kolamagima꞉, ba꞉gala ba꞉be atu Gobogobote eta lumagitamo hiya꞉nomo helo dito kikamenako hido iya꞉tawa komo kohawakalimima꞉.
1CO 12:9 Ba꞉bene ba꞉be Gobogobote eta lumagitamo hiya꞉nomo helo dito ikamenako ebeno hibima꞉ midi komo Kelisotamo konomamo kihatema꞉, ba꞉gala ebete eta lumagitamo hiya꞉nomo helo dito kikamenako temetema꞉gopi kohiduilamema꞉.
1CO 12:10 Iyo, ba꞉be atu Gobogobote komo tawakaluba꞉tamo ebeno hiya꞉nomo helo malemalelo hiya꞉hiya꞉ ikalameholenako, ibi ipuwalo etate hanohano komo kododilinakoma꞉, etate Godokono tepo ipuwoeno ukui kohawakaliminakoma꞉, etate kuba gobogoboeno ododili komo ba꞉gala Godokono Gobogoboeno ododili komo hidonomamo kanagilamelelamenakoma꞉, etate Hunu Haboeno nopopino hiya꞉hiya꞉ tabamo kolamaginakoma꞉, ba꞉gala etate ba꞉bako hiya꞉hiya꞉ taboeno ipuwa ulihopa꞉tamo kohawakalilamenakoma꞉.
1CO 12:11 Ba꞉bema꞉ numa꞉la꞉, ba꞉bi hiliyonomo dito ikalame komate Helodawa kapiyanomo ipuwado ikulihonaka, ebe ba꞉ Godokono Gobogobola, iyo, ebeno ubilo ebete hiliyonomo hibima꞉ midipa꞉tamo ebeno hiya꞉hiya꞉ helo ba꞉ba ka꞉na ikalameholenako.
1CO 12:12 Ba꞉ hibila, lumagino ape ba꞉ kapiyanomola, huiyatiya hiya꞉hiya꞉ oko kowatihonama꞉ apeno hiya꞉hiya꞉ komate ba꞉pola꞉ma꞉na. Ba꞉bema꞉ ba꞉ ba꞉ba ka꞉na Kelisokono kapiya ape ipuwalo apeno hiya꞉hiya꞉ komate ba꞉pola꞉ma꞉na,
1CO 12:13 ba꞉bi hiya꞉hiya꞉ apeno komo ba꞉ a hibima꞉ midipila. Numa꞉la꞉, a ipuwalo puya꞉te Yunapima꞉ deda꞉hanama꞉ ba꞉gala puya꞉te Yuha꞉pima꞉ deda꞉hanama꞉, puya꞉te komopa꞉tamo huiyaha꞉ oko dowatihonama꞉ ba꞉gala puya꞉te a ha꞉kiya a kowalubima꞉ hegehege mani oko dowatihonama꞉, a hiliyonomate beyamo wadulatele komo Godokono kapiya Gobogoboeno heloamo a꞉lawiya꞉ma꞉, iyo, ba꞉be atu Gobogobote a hiliyonomoeno tepo ipuwa ya꞉lo a꞉tabuilamiya꞉.
1CO 12:14 Iyo, lumagino ape ipuwalo apeno hiya꞉hiya꞉ komate ba꞉pola꞉ma꞉na, kapiya komote kitama꞉naha꞉.
1CO 12:15 Ba꞉bema꞉ lumagino natote ba꞉ma ka꞉na da꞉goemene, “Na apeno eta komoha꞉, mabu na kokotoha꞉,” ba꞉bako tabo goe komote a꞉kamodobamene ebe ape ipuwane dito kitamidama꞉.
1CO 12:16 Ba꞉gala galote atumu ba꞉ma ka꞉na da꞉goemene, “Na apeno eta komoha꞉, mabu na baidiha꞉,” ba꞉bako tabo goe komote a꞉kamodobamene ebe ape ipuwane dito kitamidama꞉.
1CO 12:17 Numa꞉la꞉, lumagino ape konomote baidi kapiyanomoma꞉ neda꞉tale, ebete hiya꞉hiya꞉ komo ulihoma꞉ ba꞉ka꞉modobona꞉, ba꞉gala ebeno ape konomote galo kapiyanomoma꞉ neda꞉tale ebete hiya꞉hiya꞉ nibo niyobahalema꞉ ba꞉ka꞉modobona꞉!
1CO 12:18 Huiyatiya Godote dopo lumagino ape ba ododi, ebete apeno hiya꞉hiya꞉ komo hiliyonomo ebeno ubilo miya꞉temiya꞉,
1CO 12:19 ba꞉be mabuma꞉ eta lumagino ape konomote kapiya komonomoma꞉ neda꞉tale, ebeno apete hibilo ba꞉ka꞉-itanana꞉!
1CO 12:20 A꞉iye, apeno komo eba ka꞉naha꞉, ebe ba꞉ kapiyala huiyatiya hiya꞉hiya꞉ oko kowatihonama꞉ apeno hiya꞉hiya꞉ komate ba꞉pola꞉ma꞉na.
1CO 12:21 Ba꞉be mabuma꞉ baiditi modoboha꞉ kokototamo tabo ba꞉ma ka꞉na goe, “Na ubihinola ama꞉ mabu ama꞉godone eta owalubi komo kalawenaha꞉!” ba꞉gala watote atumu natotamo ba꞉mako tabo a꞉kagaa꞉mene, “Na ubihinola ama꞉ mabu ama꞉godolo eta owalubi komo a꞉kuma꞉lemo!”
1CO 12:22 Ao, eba ka꞉naha꞉. Lumagino ape ipuwalo apeno hiya꞉hiya꞉ komate ba pola꞉ma꞉na, ba꞉bi komokomo ipuwalo ale kebe komo heloheloha꞉dopoma꞉ da꞉ga꞉lanama꞉, ebete ba꞉bi komokomo ebeno ape ipuwane diya꞉hilimimini ebeno ka꞉ka꞉te ba꞉ dito kowiboma꞉ne.
1CO 12:23 Ba꞉ ba꞉ba ka꞉na ale apeno hiya꞉hiya꞉ komokomo ipuwalo kebe komo kubakubadopoma꞉ demalagidolenama꞉, aeno ododili komamo ba꞉bi komokomo hidonomamo ulamenakoma꞉ iba꞉te modobolo kopola꞉nama꞉. Ba꞉gala aeno ape ipuwalo kebe komate hawakala ba pola꞉na atamo hilopo dikaa꞉mena, ale ba꞉bi komokomo konomamo emalagidolete kalikamo mula꞉lenakoma꞉,
1CO 12:24 huiyatiya numa꞉la꞉, kebe komate hawakala ba pola꞉na atamo hilopo kikaa꞉menaha꞉, ale ba꞉bi komokomo kemalagidolenaha꞉ ibi kalikamo komula꞉lema꞉. Ba꞉bema꞉ hibila, Godote dopo lumagino ape ba ododi apeno hiya꞉hiya꞉ komo miya꞉temelo ukui ba꞉ma ka꞉na ihatiya꞉, tawakaluba꞉te apeno hiliyonomo komokomo ipuwalo kebe komo kubakubadopoma꞉ da꞉ga꞉la꞉namena꞉, iba꞉te ba꞉bi komokomo konomamo ba emalagidolena ibino ododili komamo hidonomamo bulamenakomena꞉.
1CO 12:25 Ba꞉bema꞉ numa꞉la꞉, Godoko ubihinola, ebete dododiya꞉ ba꞉be ape ipuwalo anagiya꞉mida komote uluhuku. Ebe huiyatiya ubila apeno hiliyonomo komate ba pola꞉na, etate etatamo atu malemale komo nihatenakamene,
1CO 12:26 ba꞉bema꞉ keba tetelo eta komote temeteme diya꞉tawamene, ba꞉ba tetelo hiliyonomo komate atu temetema꞉go kopola꞉nama꞉na꞉, ba꞉gala keba tetelo eta komote eta dawoeno milimiho ipuwalo kalakala da꞉lawemene, ba꞉ba tetelo hiliyonomo komate eba꞉go kapimilo kokalakalahama꞉na꞉.
1CO 12:27 Ba꞉bema꞉ la꞉ hibima꞉ midipi hiliyonomo ba꞉ Kelisokono apelata, iyo, ebeno ape ipuwalo da꞉pola꞉ma꞉na la꞉ ba꞉ ba꞉bi hiya꞉hiya꞉ komolata.
1CO 12:28 Numa꞉la꞉, sose tupuimima꞉ hiya꞉hiya꞉ hopamo doelamiya꞉ Godote ba꞉bi okopi bimiya꞉tiya꞉ iba꞉te ebeno sose okopi ipuwalo dopopima꞉ keda꞉hanama꞉, ba꞉bene komo okopa꞉te ba꞉bi dopopino hopolo kopola꞉nama꞉ ebete ebeno ukui hawakalimipi kamiya꞉tete, ba꞉bene ibino hopolo kopola꞉nama꞉ puya꞉te ebeno Bukoeno tabo komokomo diya꞉tulamenaka ebete ba꞉bi okopi kamiya꞉tete, ba꞉bene ibino hopolo kopola꞉nama꞉ puya꞉te hanohano komo dododilinaka ebete ba꞉bi okopi ba꞉bo kamiya꞉tiya꞉. Ba꞉gala Godote puya꞉tamo hiya꞉hiya꞉ helo dikalamena iba꞉te ebeno soseno komo oko kowatihonama꞉, ebete ba꞉bi okopi atumu a꞉kamiya꞉tiya꞉, ba꞉ma ka꞉na ebete dopamo temetema꞉gopi hiduilamepi miya꞉tete, ba꞉bene puya꞉te tawakalubino ododili ipuwalo ibi dito dowalubilinaka ba꞉bi okopi kamiya꞉tete, ba꞉bene sose tawakalubino komo watowatopi kamiya꞉tete, ba꞉bene puya꞉te Hunu Haboeno nopopino hiya꞉hiya꞉ tabamo dolamagiminaka ba꞉bi okopi ba꞉bo kamiya꞉tiya꞉.
1CO 12:29 Ba꞉bema꞉ numa꞉la꞉, soseno hiya꞉hiya꞉ okopi ipuwalo ibi hiliyonomate Kelisokono dopo oelamepima꞉ keda꞉hanaha꞉, ba꞉gala ba꞉ atumu ibi hiliyonomate Godokono ukui hawakalimipiha꞉, ba꞉gala ibi hiliyonomate ebeno Bukoeno tabo komokomo iya꞉tulamepiha꞉. Hibila, ibi hiliyonomate ebeno Gobogoboeno heloamo hanohano komo kododilinaha꞉,
1CO 12:30 ba꞉gala ibi hiliyonomate ebeno heloamo temetema꞉gopi kahiduilamenaha꞉, ba꞉gala ibi hiliyonomate Hunu Haboeno nopopino hiya꞉hiya꞉ tabamo kolamagiminaha꞉, ba꞉gala ibi hiliyonomate ba꞉bako hiya꞉hiya꞉ taboeno ipuwa ulihopa꞉tamo kahawakalilamenaha꞉.
1CO 12:31 Ba꞉bema꞉ Godokono Gobogobote hiya꞉hiya꞉ helo hibima꞉ midipa꞉tamo malemalelo dikalamena, ba꞉bi komokomo ipuwalo wadiyala la꞉le hiya꞉nomo hidohido helo kuwatema꞉ ubi konomamo nihatenakuya꞉la꞉. Huiyatiya numa꞉la꞉, na ba꞉ma tetelo Godokono eta gabo la꞉ kiya꞉tulamema꞉nemata, ba꞉be tuputupu gaboeno hidote ebeno Gobogoboeno hiya꞉hiya꞉ dito ikalame komoeno hido komo na꞉gogolona.
1CO 13:1 Diyala, hiya꞉hiya꞉ hoponapino tabamo ba꞉gala Hunu Haboeno nopopino tabamo olamagi helote nagodolo kuda꞉ itana, huiyatiya malemale emalagidolo komote nagodolo itanaha꞉tale nale tabo olamagi ipuwalo eta hido komo ba꞉ka꞉-ododina꞉, iyo, na ba꞉ lumagiti bele dito danagaliminako ba꞉bako lumagima꞉ eda꞉namo, ba꞉be bele diyamote ekelaheno tawakaluba꞉te uli ubiha꞉ma꞉ keda꞉hama꞉na꞉.
1CO 13:2 Ba꞉bene diyala, Godokono ukui kohawakalimima꞉ ebeno Gobogobote natamo hiya꞉nomo helo kuda꞉ ikanamenako, ba꞉gala hiliyonomo iya꞉tawa komate nagodolo ba pola꞉na Godokono ugumuili komokomo hiliyonomo nale mulu ukuia꞉mo kuda꞉ iya꞉tawanakomo, ba꞉gala hunuhunu haka hiya꞉ baha꞉mo koelamema꞉ hibima꞉ midi komoeno helote nagodolo kuda꞉ itana, huiyatiya malemale emalagidolo komote nagodolo itanaha꞉tale na ipuwalo eta hido komote ba꞉ka꞉-itanana꞉.
1CO 13:3 Ba꞉bene diyala, nale naeno ilina hiliyonomo awaepa꞉tamo dito da꞉ ikalamemo, ba꞉gala Ya꞉suku mabuma꞉ hibima꞉ midiha꞉pa꞉te naeno ape koa꞉mo da꞉ emadomemena꞉, huiyatiya malemale emalagidolo komote nagodolo itanaha꞉tale nale Godogodone eta hido huiya ba꞉ka꞉lawena꞉.
1CO 13:4 Ba꞉bema꞉ ama꞉ eta lumagi malemalelo demalagidolona, ama꞉le ebeno daedae ododi komoma꞉ ebetamo tiyolo ubiha꞉ma꞉ a꞉keda꞉mena꞉ta, ba꞉gala ama꞉ malemale ododili komodo ebetamo hido owalubi kihatema꞉na꞉ta. Ba꞉bene ama꞉le malemale ipuwalo demedena, ama꞉ eta lumagino ilinama꞉ ebetamo a꞉kamaubamena꞉ta, ba꞉gala amia꞉no komoma꞉ awagaha tabo olamagihino amia꞉no tepo ipuwalo ama꞉ ha꞉kiya ama꞉ hunamo a꞉kadipata꞉mena꞉ta,
1CO 13:5 iyo, ama꞉ apeno ododili komamo eta modoboha꞉ ukui kapiya a꞉kahawakalima꞉mena꞉ta. Ba꞉bene ama꞉le malemale ipuwalo demedena ama꞉ ha꞉kiya amia꞉no komo kapiya a꞉kemalagidolonamena꞉ta, ba꞉gala amia꞉no tepo ipuwoeno koete eta lumagitamo tiyolo mahigaheno ama꞉ ebeno kuba ododili komo dito kadodolemema꞉na꞉ta.
1CO 13:6 Ba꞉bene ama꞉le malemale ipuwalo demedena ama꞉ komopino kuba ododi komo eta lumagitamo dumimina꞉ a꞉kakalakalamena꞉ta, ama꞉ huiyatiya Godokono hibi komote da꞉hawakalamene ama꞉ ba꞉bo kokalakalama꞉na꞉ta.
1CO 13:7 Ba꞉bema꞉ malemale emalagidolo komote ama꞉godolo hibinomolo ditana, hiliyonomo temeteme komate ama꞉tamo dikulihonakomena꞉ ama꞉ emedena tetelo ba꞉bi kuba komamo papamiwataheno kuiyodopoma꞉ a꞉keda꞉mena꞉ta, huiyatiya ama꞉le amia꞉no hibima꞉ midi komo ba atila꞉na, ba꞉be komo ipuwalo kodakodalo utiti Godokono hido owalubi tete ba꞉latiminamena꞉ta.
1CO 13:8 Iyo, malemale emalagidolo komote emedena emedena tetelo a꞉kawibonamene. Huiyatiya numa꞉la꞉, Godokono tepo ipuwoeno ukui hawakalilame komate ebeno okopa꞉godolo dikulihonaka ba꞉bi komate kowibohoma꞉na꞉, ba꞉gala komopa꞉te Hunu Haboeno nopopino hiya꞉hiya꞉ tabamo Godokono Gobogoboeno heloamo dolamagiminaka, ba꞉bi komate emedena tetelo a꞉kapola꞉namena꞉, ba꞉gala hiliyonomo iya꞉tawa komate tawakaluba꞉godolo da꞉pola꞉na ba꞉bi komate atumu kowibohoma꞉na꞉.
1CO 13:9 Ba꞉ hibila, Godote kebe iya꞉tawa komokomo aeno ukui mabamo da꞉miya꞉tena, ba꞉gala ebete kebe helo atamo dikaa꞉mena ale ebeno tepo ipuwoeno ukui kohawakalilamema꞉, ba꞉bi komate agodolo ba pola꞉na huiyatiya Godokono umi ipuwalo kubadopoma꞉ eda꞉hana.
1CO 13:10 Ba꞉bema꞉ kalakala konomola, mabu galane tetelo aeno Hido Tuputupudawanomote hibinomolo da꞉pemene, ba꞉ba tetelo kubadopo komokomo hiliyonomate ba꞉ dito kowibohoma꞉na꞉.
1CO 13:11 Numa꞉la꞉, na gudu deha꞉poto tetelo naeno tabo olamagi komo ba꞉gala komopino tabo anagiya꞉mida ukui komo ba꞉gala tepo ipuwoeno emalagidolo komo, ba꞉bi netewa-kapiya komate nagodolo gudu deha꞉potoeno ododili komokomo huiyama꞉ eda꞉hanama꞉. Huiyatiya ba꞉ma tetelo naeno komo hiya꞉ma꞉ eda꞉na, mabu na dubuma꞉ dediya꞉mo ba꞉ba tetelo gudu deha꞉potoeno ododili komo hiliyonomo naeno ginimi hapuamo dito miya꞉paliya꞉mo.
1CO 13:12 Ba꞉bema꞉ hibila, ba꞉ma tetelo ale Godokono komo nanekelenomo uminakoma꞉, lumagiti dalowa꞉ galasilo ebeno holoholo keba ka꞉na kuminako ba꞉ba ka꞉na, huiyatiya galane tetelo a ebeno holoholo hapuamo da꞉nikulima꞉ ebeno holoholo hidonomamo ba꞉bo konumima꞉nema꞉. Iyo, ba꞉ma tetelo naeno iya꞉tawa komate kubadopoma꞉ eda꞉hana, huiyatiya galane tetelo nale hiliyonomo komokomo hidonomamo kiya꞉tawama꞉nemo, Godote naeno hiliyonomo komokomo keba ka꞉na kiya꞉tawana ba꞉ba ka꞉na.
1CO 13:13 Ba꞉bema꞉ numa꞉la꞉, emedena emedena tetelo da꞉pola꞉namena꞉ ba꞉moi ba꞉bi koko komokomola, aeno hibima꞉ midi komo, ba꞉gala ale Godokono hido tetete uluhukuma꞉ uliholo demedenama꞉ ba꞉be komo, ba꞉gala ale komopi malemalelo demalagidolenama꞉ ba꞉be komo, ba꞉moi ba꞉bi netewa-kapiya komokomola. Huiyatiya hibila, ba꞉moi komate ba pola꞉na ibi ipuwalo malemale emalagidolo komote ko komonomoma꞉ beda꞉namene.
1CO 14:1 Ba꞉bema꞉ wadiyala la꞉ la꞉eno ukui konomamo nihatenala꞉ malemale emalagidolo ipuwalo kemedenama꞉, ba꞉gala atu tetelo la꞉ iya꞉wanomoma꞉ neda꞉hanala꞉ Godokono Gobogobote hiya꞉hiya꞉ helo dito dikalamenako la꞉le ba꞉bi hiya꞉nomo komokomo kuwatema꞉. Numa꞉la꞉, ba꞉bi dito ikalame komo ipuwalo pote Godokono ukui kohawakalimima꞉ helo da꞉lawemene, ebete hidonomo komo ba꞉ a꞉lawe.
1CO 14:2 Huiyatiya kebe lumagiti Hunu Haboeno nopopino hiya꞉hiya꞉ tabamo dolamaginako, ebete ba꞉be komodo Godoko kapiyatamo olamaginako, hopo habanapa꞉tamoha꞉. Iyo, ebete Godokono Gobogoboeno heloamo ebeno ugumuili komoma꞉ olamaginako, ba꞉bema꞉ ulihopa꞉te ebeno taboeno ipuwa lawema꞉ a꞉kamodobala꞉.
1CO 14:3 Huiyatiya Godokono ukui hawakalimidawoeno komo eba ka꞉naha꞉. Ebeno tabo olamagi komodo tawakaluba꞉te hidamo ulihonaka, ba꞉bema꞉ komo tetelo Godokono tabote ibino hibima꞉ midi ipuwalo ibi ba owalubili a꞉heluilamenako, ba꞉gala komo tetelo ibi temeteme ipuwalo a꞉gelebadilamenako.
1CO 14:4 Ba꞉be mabuma꞉ kebe lumagiti Hunu Haboeno nopopino hiya꞉hiya꞉ tabamo dolamaginako, ba꞉be komodo ebe ha꞉kiya ebe hibima꞉ midi ipuwalo a꞉kodakoduiminako, huiyatiya kebe lumagiti Godokono ukui da꞉hawakaliminako, ba꞉be komodo ebete sose tawakalubi hiliyonomoeno hibima꞉ midi komo bekodakoduilamelelamenako.
1CO 14:5 Numa꞉la꞉, na ubila la꞉ hiliyonomate Hunu Haboeno nopopino hiya꞉hiya꞉ tabamo kolamagimima꞉, iyo, ba꞉be ododi komo kubaha꞉, huiyatiya naeno ubi konomote bitana la꞉le Godogodone hiya꞉nomo helo na꞉lawiya꞉la꞉, la꞉le ebeno tepo ipuwoeno ukui hopo habanapino tabamo kohawakalilamema꞉. Ba꞉ hibila, Godokono umi ipuwalo ebeno ukui hawakalimipino hido komote ba꞉bi nopopino hiya꞉hiya꞉ tabamo olamagimipino hido komo na꞉gogolena, mabu keba tetelo lumagiti nopopino tabamo eta komo dolamagimini, ba꞉ba tetelo sose tawakalubi ipuwalo eta tabo ohoba꞉midadawate ba꞉be taboeno ipuwa hawakalimihino ulihopa꞉te ba꞉be komodo eta owalubi komo a꞉kalawa꞉mena꞉.
1CO 14:6 Ba꞉bema꞉ naeno hibima꞉ midipi ekaka꞉la꞉, nale la꞉tamo da꞉puluhukumu la꞉ ipuwalo Hunu Haboeno nopopino hiya꞉hiya꞉ tabamo da꞉polamagimo, la꞉le naeno ododi komodo bada hido owalubi komo na꞉ka꞉laweoma? A꞉iye, eta hido komo puliyala! Ba꞉be mabuma꞉ nale da꞉pemo, wadiyala na la꞉go ba emedena eta tetelo Godokono eta ugumui komo la꞉tamo la꞉eno tabamo hawakalimiti, ba꞉bene eta tetelo eta hido iya꞉tawa komamo la꞉eno tabamo atumu la꞉ kakaheluilamema꞉nemata. Ba꞉gala nale eta tetelo Godokono ubi komo la꞉eno tabamo hawakalimiti, ba꞉bene eta tetelo ebeno Bukoeno tabo komokomo la꞉eno tabamo atumu la꞉ kakiya꞉tulamema꞉nemata. Ba꞉bema꞉ hibila, keba tetelo ba꞉bi ododili komodo nale la꞉ la꞉eno tabamo owalubilihino la꞉ nagodone hido ukui lawema꞉ a꞉kamodobamata!
1CO 14:7 Numa꞉la꞉, pa꞉lola꞉ ba꞉gala dolopo ibino komo ba꞉ atumula. Ba꞉bako ilina moleholepi ba꞉gala modohopi iba꞉te eta ohale ibino hibi ododili komamo hidamo hawakalimihino, ba꞉ba tetelo ulihopa꞉te ba꞉be ohaleno madodo a꞉kiya꞉tawahamena꞉.
1CO 14:8 Ba꞉gala eta komo, alaholoho tetelo eta gawadubuti gebole hidamo moleheno, komo dubate alaholo ipuwalo ebe owalubima꞉ a꞉kapihidamena꞉.
1CO 14:9 Ba꞉bema꞉ la꞉eno soseno komo ba꞉ atumu ba꞉ba ka꞉na ba꞉ka-itana. La꞉ ipuwalo etate Hunu Haboeno nopopino tabamo eta komo dolamagimini, ebeno taboeno ipuwate hibilo a꞉kahawakalamene, iyo, ulihopa꞉te eta hido iya꞉tawa komo ebegodone a꞉kalawa꞉mena꞉. A꞉iye, ba꞉be lumagino tabo komote ba꞉ ahuta huhuti ba pata ha꞉kiya keba ka꞉na ka꞉piniwibonako ba꞉ba ka꞉nala!
1CO 14:10 Numa꞉la꞉, ba꞉moe hopolo hiya꞉hiya꞉ tawakaluba꞉te ibino tabonomamo olamagiminaka, iyo, iba꞉te ibino hiya꞉hiya꞉ tabo komodo ibino mabuluba꞉tamo ibino tepo ipuwoeno ukui modobolo hawakalilamenaka.
1CO 14:11 Huiyatiya keba tetelo na eta hoponapino tabo iya꞉tawaha꞉ma꞉ deda꞉mo, ba꞉ba tetelo iba꞉te na kapeladawama꞉ ba ka꞉nami, nale ba꞉ atumu ibi kapelapima꞉ ba꞉ka꞉laminakomo.
1CO 14:12 Ba꞉bema꞉ la꞉ Godokono Gobogoboeno hiya꞉hiya꞉ dito ikalame komo uwatema꞉ ubi konomamo da꞉miya꞉tenama, kubaha꞉, huiyatiya ba꞉bi komokomo ipuwalo kebe komate sose tawakalubino hibima꞉ midi komo hibinomolo da꞉kodakoduilamenaka, wadiyala la꞉ ba꞉bi komamo oko kowatihonama꞉ ukui konomamo nihatenakuya꞉la꞉.
1CO 14:13 Ba꞉be mabuma꞉ la꞉ ipuwalo kebe dawate Hunu Haboeno nopopino eta tabamo dolamaginako, wadiyala ebete Godoko na꞉toemehamene ebegodone eta hiya꞉nomo helo komo dito kolawema꞉, ba꞉be eta helo komo ba꞉ nopopino hiya꞉hiya꞉ tabo komoeno ipuwa hawakalilame helo komola.
1CO 14:14 Ba꞉ hibila, nale nopopino eta tabamo Godotamo toetoe tabo dolamagimo, ba꞉ba tetelo ebeno Gobogobote na ipuwado tabo modobolo ba olamagi, huiyatiya na ba꞉bi tabo komoeno ipuwa iya꞉tawaheno naeno tepo ipuwoeno ukuilo eta hido owalubi komo a꞉kalawa꞉mo.
1CO 14:15 Ba꞉bema꞉ na Godokoba꞉ tabo ga꞉la ipuwalo bada komo na꞉kododimo? Numa꞉la꞉, nale naeno gobogobo hapulu ebetamo tabo olamaginakomo, ba꞉gala naeno tepo ipuwoeno ukui komamo a꞉kolamaginakomo. Ba꞉ atumu nale ebe adikumi ipuwalo naeno gobogobo hapulu ebetamo ohale alapihonakomo, ba꞉gala naeno tepo ipuwoeno ukui komamo a꞉kalapihonakomo.
1CO 14:16 Ba꞉bema꞉ hibima꞉ mididawa, ama꞉le soseno kapiyuimi ipuwalo Godoko ba milimiho kalakala toetoe tabo ebetamo dolamagimina꞉, ba꞉ba tetelo ulihopi mabuma꞉ ama꞉le la꞉eno tabonomamo eta komo olamagihino huiyatiya Godokono Gobogobote nopopino tabamo ama꞉ ipuwado dolamagimini, puya꞉te la꞉ ipuwalo uliuli tawakalubima꞉ deda꞉hana iba꞉te ba꞉be tabo komoeno ipuwa keba ka꞉na na꞉kiya꞉tawahamena꞉? Ba꞉gala iba꞉te amia꞉no kalakala toetoe tabo kuititi hapulu “Ba꞉ba꞉la” tabo keba ka꞉na na꞉ka꞉ga꞉lamena꞉?
1CO 14:17 Numa꞉la꞉, keba tetelo Godokono Gobogobote nopopino tabamo kalakala tabo ama꞉ ipuwado hidonomamo dadipatemene, ba꞉ba tetelo ulihopa꞉te amia꞉no tabo komoeno ipuwa laweheno, ba꞉be tabo komote ibino hibima꞉ midi komo a꞉kakodakoduilama꞉mene.
1CO 14:18 Ba꞉ hibila, na Polote kalakala tabo Godotamo adipatemo, mabu ebete hiya꞉nomo helo natamo ikanamiya꞉ Hunu Haboeno nopopino hiya꞉hiya꞉ tabamo kolamaginakoma꞉, iyo, ba꞉be ododi komo ipuwalo naeno helote la꞉ hiliyonomoeno helo hibilo na꞉gogolena.
1CO 14:19 Huiyatiya keba tetelo nale sose tawakaluba꞉go da꞉kapiyuiminakomo, ba꞉bi hiya꞉hiya꞉ tete hiliyonomolo na ubi koamo ihatenakomo nale naeno ukui komodo ibino tabonomamo ibi kiya꞉tulamenakoma꞉. Iyo, nale paibo hegehegenomo tabo komopino tabonomamo dolamagimo iba꞉te modobolo kiya꞉tawahama꞉na꞉, huiyatiya nale Hunu Haboeno nopopino hiya꞉hiya꞉ tabamo ta꞉ni taosene tabo komokomo dolamagimo iba꞉te nagodone eta iya꞉tawa komo a꞉kalawa꞉mena꞉!
1CO 14:20 Ba꞉bema꞉ naeno hibima꞉ midipi ekaka꞉la꞉, la꞉eno ukui emalagidole ipuwalo iya꞉tawaha꞉ gugudima꞉ akeda꞉hala꞉. La꞉ kuba ododili ipuwalo ba꞉bako gugudima꞉ eda꞉ha modobola, huiyatiya la꞉eno hibima꞉ midi ipuwalo wadiyala la꞉ apepehote koko dubuma꞉ ba꞉gala kamenakamenama꞉ neda꞉huya꞉la꞉.
1CO 14:21 Numa꞉la꞉, dopamo Godote ebeno Bukalo tabo ba꞉ma ka꞉na olamagiya꞉, “Nale hiya꞉hiya꞉ kapela hoponapino tabo ipuwado naeno tawakaluba꞉tamo tabo kolamagima꞉nemo, huiyatiya iba꞉te dopamo keba ka꞉na kewagelenama꞉ ba꞉ ba꞉ba ka꞉na uliho ubiha꞉ma꞉ gala kakeda꞉hama꞉na꞉. Iyo, nale komo kapelapi ipuwado ibi diya꞉tulamemo ba꞉ba tetelo iba꞉te naeno tabamo atumu a꞉kapapamila꞉hamena꞉.”
1CO 14:22 Ba꞉bema꞉ ale ba꞉moe komo umima꞉, sose tawakaluba꞉te Hunu Haboeno nopopino hiya꞉hiya꞉ tabamo dolamagiminaka, Godote ba꞉be hanohano komodo ebeno helo hibima꞉ midiha꞉pa꞉tamo a꞉hawakaliminako, huiyatiya sose ipuwalo etapa꞉te etapa꞉tamo Godokono ukui ibino tabonomamo da꞉hawakaliminaka, Godote ba꞉be eta hanohano komodo ebeno helo hibima꞉ midipa꞉tamo a꞉hawakaliminako.
1CO 14:23 Ba꞉bema꞉ la꞉eno sose konomote ba kapiyuimi la꞉ hiliyonomate Hunu Haboeno nopopino hiya꞉hiya꞉ tabamo olamagimi da꞉tupuimima, ba꞉ba tetelo kebe uliuli tawakalubi ba꞉gala hibima꞉ midiha꞉pa꞉te la꞉eno kapiyuimi komo umima꞉ da꞉pelamemena꞉, iba꞉te la꞉eno ododi komoma꞉ keba ka꞉na na꞉kemalagidolomena꞉? Iba꞉te la꞉eno ododi komodo Godoko hibima꞉ ba꞉ka꞉midimina꞉? Ao, iba꞉te la꞉ daedae ukuipima꞉ koga꞉lama꞉na꞉!
1CO 14:24 Huiyatiya la꞉eno kapiyuimi tetelo la꞉ hiliyonomo ipuwalo etapa꞉te etapa꞉tamo Godokono ukui la꞉eno tabonomamo da꞉hawakalilamema, ba꞉ba tetelo kebe uliuli tawakalubi ba꞉gala hibima꞉ midiha꞉pa꞉te la꞉eno kapiyuimi komamo da꞉pelamemena꞉, iba꞉te Godokono tabo modobolo ulihote ibino kuba ododili komokomo ba꞉gala hibima꞉ midiha꞉ komo ba꞉bo kiya꞉tawahama꞉na꞉. Iyo, iba꞉te Godokono tabo dulihomena꞉ ba꞉be taboeno hiya꞉hiya꞉ komo hiliyonomate ibi ipuwalo eta lumagino komo ba anagilameleme
1CO 14:25 ebeno tepo ipuwoeno ugumuili komo ebetamo ba꞉bo kohawakalilamema꞉na꞉. Ba꞉be mabuma꞉ ebete ebeno kuba ododili komoma꞉ hilopo lawete ebeno holoholo hopamo ihatelo Godoko ba adikumi kogoema꞉ne, “Godote ba꞉moi sose tawakaluba꞉godolo hibinomolo bemedena!”
1CO 14:26 Ba꞉bema꞉ naeno hibima꞉ midipi ekaka꞉la꞉, la꞉eno sose kapiyuimi tetelo la꞉le la꞉eno komo keba ka꞉na dododinakoma, ba꞉be komo ba꞉ ba꞉ma ka꞉nala. La꞉ da꞉kapiyuiminakoma, wadiyala la꞉ ipuwalo etate Godoko eta ohala꞉mo nadikuminakamene, etate la꞉ komopi Godokono Bukoeno eta tabo komo niya꞉tulamenakamene, etate Godokono eta ugumui komo la꞉tamo na꞉hawakaliminakamene, etate Hunu Haboeno nopopino tabamo eta komo nolamaginakamene, ba꞉bene etate ba꞉be taboeno ipuwa la꞉tamo na꞉kahawakaliminakamene. Iyo, wadiyala la꞉ ba꞉ ba꞉ba ka꞉na newagelenakuya꞉la꞉ la꞉eno hiliyonomo hiya꞉hiya꞉ ododili komamo la꞉eno hibima꞉ midi komo kokodakoduilamenakoma꞉.
1CO 14:27 Ba꞉bema꞉ la꞉eno kapiyuimi tetelo Hunu Haboeno nopopino tabamo olamagimi helote puya꞉godolo ditana, wadiyala ibi ipuwalo netewa o netewa-kapiyanomate ba꞉be komo nododa꞉mena꞉, etate netewa-netewa tetedawama꞉ akeda꞉la꞉. Ba꞉gala wadiyala iba꞉te ibino hiya꞉hiya꞉ tabo komo la꞉ komopa꞉tamo kapiya tetelo akolamagiminakala꞉, ba꞉gala eta tetedawoeno tabo olamagi da꞉wibomene, wadiyala pogodolo helo ditana ba꞉be tabo ohoba꞉midadawate mahigate ba꞉be tabo komoeno ipuwa la꞉ komopa꞉tamo na꞉hawakalima꞉mene.
1CO 14:28 Huiyatiya ba꞉bako tabo ohoba꞉midama꞉ eta lumagigodolo helo itanaheno, ba꞉ba tetelo puya꞉te Hunu Haboeno nopopino hiya꞉hiya꞉ tabamo olamagimima꞉ helo da꞉lawenaka, ibino tabo olamagimi komate nekelalama꞉mena꞉. Numa꞉la꞉, ibi ipuwalo eta lumagiti ebe ha꞉kiya ebetamo ba꞉gala Godotamo ebeno komo ododima꞉ talona puliyala, huiyatiya ebete sose kapiyuimipino holoholo hapulu akododa꞉la꞉.
1CO 14:29 Ba꞉gala puya꞉godolo Godokono ukui la꞉eno tabonomamo hawakalimima꞉ helo ditalama꞉na ibino komo ba꞉ atumula, la꞉eno kapiyuimi tetelo ibi ipuwalo netewa o netewa-kapiyate Godokono ukui na꞉hawakalilama꞉mena꞉, ba꞉bene la꞉ komopa꞉te ibino tabo komo hidamo ulihote la꞉ ha꞉kiya la꞉eno komo ba꞉bi tabamo nanagilamiya꞉la꞉.
1CO 14:30 Huiyatiya keba tetelo dopo tabo olamagidawate oko ba owati, iya꞉tawa komote eta tabo olamagidawatamo Godokono heloamo da꞉pemene, wadiyala dopo lumagiti tabo miya꞉patepate ebeno mabulubitamo tete ba ikame, ba꞉be eta tetedawate ebeno luta bahini mahigate tabo olamagi ba꞉bo kotupuimima꞉ne.
1CO 14:31 Ba꞉ ba꞉ba ka꞉na la꞉eno kapiyuimi tetelo la꞉ puya꞉godolo Godokono ukui hibinomolo hawakalimima꞉ helo ditanamene, la꞉ hiliyonomate la꞉eno hiya꞉hiya꞉ tetelo oko bowatihonamata, iyo, tabo ulihopa꞉te Godokono ubi komo hidamo ba꞉bo kiya꞉tawahama꞉na꞉ iba꞉te hibima꞉ midi ipuwalo kodakodalo kola꞉mota꞉hanama꞉.
1CO 14:32 Ba꞉bema꞉ ba꞉moe ba꞉ eta komola. Kebe lumagiti Godogodone hiya꞉nomo helo da꞉lawenako ebeno ukui la꞉eno tabonomamo kohawakalimima꞉, wadiyala ebete ba꞉be komo ba iya꞉tawana ba꞉be helo komote ebeno tepo ipuwoeno mulu ukui komamo papamiwatalo nitanamene. Numa꞉la꞉, ebe ha꞉kiya ebeno ubi tetelo tabo dito akolamaga꞉la꞉,
1CO 14:33 mabu Godoko ba꞉ tawakaluba꞉tamo gelebadi ba꞉gala tataba dikalamena ba꞉be hidonomo Godola. Iyo, ebe ubihinola ebeno sose tawakaluba꞉te da꞉kapiyuiminaka, ibi hiliyonomate ibino ubi tetelo hiya꞉hiya꞉ geboho komo kododilima꞉, mabu ba꞉bi komo ba꞉ hibi oko duhimi komola! Ba꞉bema꞉ ba꞉moe ba꞉ eta komola. Godokono tawakalubi hiliyonomate ibino hiya꞉hiya꞉ sose ipuwalo kebe komo kododina,
1CO 14:34 na ubila la꞉ ba꞉be atu komo na꞉kododinakuya꞉la꞉, ba꞉ma ka꞉na la꞉eno sose kapiyuimi tetelo kamenakamenate Godokono taboeno komoma꞉ ibino ukui tabo olamagimihino dito nulihonakamena꞉. Iyo, numa꞉la꞉, Godote Moseseko ipuwado ebeno Tutumu Tabo Yunapa꞉tamo dikalamiya꞉, ba꞉bi Tutumu ipuwalo eta talonate kamenakamenoeno komoma꞉ ba꞉ma ka꞉na bitana, ibino watowatopa꞉tamo ba papamila꞉ha iba꞉te ibino ukui tabo komamo ibi akiya꞉tulamenakala꞉.
1CO 14:35 Ba꞉bema꞉ Godokono tabo olamagidawate eta komo hidamo hawakalimihino, kamenakamenate ba꞉be komoeno ipuwa hidamo lawema꞉ ubi dihatemena꞉, wadiyala iba꞉te sose kapiyuimi komone ibino genamamo tolamete ba꞉be komo ibino awi ba꞉bo na꞉nikiyalama꞉mena꞉. Numa꞉la꞉, iba꞉te sose kapiyuimi ipuwalo ba꞉bako komoma꞉ ibino ukui tabo komokomo da꞉hawakalilamemena꞉, ba꞉be komote ba꞉ hilopo ikalame komoma꞉ keda꞉ma꞉ne.
1CO 14:36 A꞉iye! La꞉ Kolini sose tawakaluba꞉te awagaha ipuwalo ba꞉ma ka꞉na kemalagidolonama, Godokono Hido Tabote la꞉ ipuwalo dopamo tupuimiti, ba꞉bene komo hiya꞉hiya꞉ tawakalubi hiliyonomatamo ba꞉bo nuluhukui? Diyala, la꞉ komopa꞉godolo eta daedae ukui ba꞉ma ka꞉na kuda꞉ itana, Godokono Hido Tabote la꞉ kapiyatamo puluhukui, komopa꞉tamoha꞉!
1CO 14:37 Ba꞉bema꞉ la꞉ ipuwalo pote ebeno awagaha ukuilo da꞉goena Godokono Gobogobote ebetamo hiya꞉nomo helo ikamenako ebeno ukui hibinomolo kohawakalimima꞉, ba꞉gala pote demalagidolona ebete Godokono eta oko kowatima꞉ Godote eta hiya꞉nomo helo ebetamo dito ikamenako, wadiyala ba꞉bako tawakaluba꞉te ba꞉moe komo niya꞉tawahamena꞉, nale ba꞉moe leta ipuwalo la꞉tamo dolamagimo ba꞉be komo ba꞉ Kodawoeno tutumu tabola.
1CO 14:38 A꞉iye, la꞉ ipuwalo puya꞉te ba꞉moe tabo ulihoheno, wadiyala la꞉ komopa꞉te atumu ibino tabo komokomo akulihala꞉!
1CO 14:39 Ba꞉bema꞉ naeno hibima꞉ midipi ekaka꞉la꞉, wadiyala la꞉ la꞉eno sose kapiyuimi ipuwalo Godokono ukui la꞉eno tabonomamo kohawakalilamema꞉ la꞉eno ukui konomamo nihatenala꞉, ba꞉gala puya꞉te Hunu Haboeno nopopino hiya꞉hiya꞉ tabamo olamagimima꞉ helo da꞉lawenaka, iba꞉tamo talona akihatelama꞉la꞉ ba꞉be komo kododima꞉.
1CO 14:40 Eta ko komo ba꞉ ba꞉ma ka꞉nala, la꞉eno kapiyuimi ipuwalo wadiyala la꞉ hiliyonomo komokomo hidonomamo ba ododili, eta dawoeno komo da꞉wibomene, eta tetedawate mahigate ebeno komo ba꞉bo na꞉kododa꞉mene.
1CO 15:1 Ba꞉bema꞉ naeno hibima꞉ midipi ekaka꞉la꞉, dopamo nale Godokono Hido Taboeno komokomo la꞉tamo dolamagimo, na ubila ba꞉ma tetelo ba꞉bi atu komo la꞉ gala kakakiyalamema꞉nemata. Ba꞉ hibila, la꞉le nagodone Hido Taboeno koko komo dopamo hibinomolo uwatimata, ba꞉bene ba꞉ma tetelo la꞉ hibima꞉ midi ipuwalo la꞉mota꞉hanamata.
1CO 15:2 Ba꞉be mabuma꞉ la꞉ la꞉eno hibima꞉ midi komo kuititi teta꞉mo kodakodalo datila꞉nama, Godote la꞉eno ka꞉ka꞉ hibinomolo komula꞉lelamema꞉na꞉ta. Numa꞉la꞉, la꞉ ba꞉ma teta꞉mo modobolo a꞉pikulimata, ba꞉bema꞉ modoboha꞉ la꞉ ba꞉ma tetelo hibima꞉ midi komo miya꞉pate la꞉eno ka꞉ka꞉ mula꞉ komote dito alatidi.
1CO 15:3 Ba꞉ hibila, nale komopa꞉godone Hido Taboeno ko komonomo keba ka꞉na ka꞉lawiya꞉mo, ba꞉be atu komo la꞉tamo ba꞉ma ka꞉na olamagimo, Godote ebeno Bukamo Kelisokono komoma꞉ kebe komokomo dopamo da꞉miya꞉tiya꞉ ba꞉bi komate hibinomolo ikulihuya꞉. Ba꞉ ba꞉ma ka꞉na Kelisote aeno kuba ododili komoma꞉ da꞉hoiya꞉,
1CO 15:4 tawakaluba꞉te ebeno ape bobamo ba꞉bo ihatiya꞉, huiyatiya netewa-kapiya hegelalo Godote ebe hoe ipuwane ka꞉ka꞉mo gala a꞉kadipatiya꞉, iyo, ba꞉bi komate ebetamo ikulihuya꞉ Godokono Buka tabo komate hibima꞉ keda꞉hama꞉.
1CO 15:5 Ba꞉gala Kelisokono hoe ipuwane mahiga komo gala hapuni ebete Pitatamo dopamo ka꞉ka꞉lo uluhukuti, ba꞉bene ebeno 12 oelamepi dubate kapiya habalo ba pola꞉na ibi hiliyonomatamo ba꞉bo kuluhukuya꞉.
1CO 15:6 Ba꞉gala eta tetelo ebeno komo ta꞉matapa꞉te kapiya habalo ba pola꞉na Kelisote iba꞉tamo atumu ba꞉bo kuluhukuya꞉. Ba꞉ hibila, ba꞉ba tetelo ba꞉bi ta꞉matapino kuitititi 500 a꞉gogoluya꞉, ba꞉bene ibi ipuwalo komo hiliyonomate ba꞉ma tetelo bemedena huiyatiya komo iba꞉te ya꞉lo a꞉ha꞉lahuya꞉.
1CO 15:7 Ba꞉gala eta tetelo gala hapuni Kelisote ebeno ekawi Ya꞉imesitamo kuluhukuti, ba꞉bene ebete ebeno sose tupuimima꞉ hiya꞉hiya꞉ hopamo pui da꞉ka꞉lamiya꞉ ba꞉bi komo oelamepi hiliyonomatamo atumu a꞉kuluhukuya꞉.
1CO 15:8 Ba꞉bene tete ga꞉ga꞉nomo da꞉petuya꞉ ebete atumu natamo ba꞉bo kuluhukuya꞉, iyo, ebete hoe ipuwane mahigate puya꞉tamo ka꞉ka꞉lo duluhukunakui ibi hiliyonomo ipuwalo na ba꞉ kuititidawama꞉ ediya꞉mo. Numa꞉la꞉, eta guduti menokoeno tepo ipuwane hibi tetelo hawakalaheno, na ba꞉ ba꞉bako guduma꞉ eda꞉namo, mabu wadiyala na naeno koko kuba ododili mabuma꞉ dito ba꞉hoiya꞉na꞉, huiyatiya Godokono malemale komodo na ka꞉ka꞉lo bemedenamo. Iyo, nale Godokono sose tawakalubi ba kubahilame iba꞉tamo koko temeteme dito ikalamenakuimo, ba꞉be mabuma꞉ Kelisote ba꞉be sose hiya꞉hiya꞉ hopolo tupuimima꞉ pui doelamiya꞉, ba꞉bi okopi hiliyonomoeno hido komote naeno hido komo na꞉gogolona, ba꞉gala ibi ipuwalo na kapiyate modoboha꞉ma꞉ eda꞉namo tawakaluba꞉te na Kelisokono eta oemedawama꞉ ka꞉nami.
1CO 15:10 Ba꞉bema꞉ hibila, ka꞉lo na kebe oko ipuwalo kemedenamo, Godote ba꞉be oko ebeno malemalelo natamo dito ikanamiya꞉, ba꞉bene ba꞉be malemale hawakalimi komodo hidohido gaote naeno oko ipuwane ba꞉bo ikulihuya꞉. Ba꞉bema꞉ hibila, na tete ga꞉ga꞉nomolo oko ba owatina, naeno helote komo oelamepi hiliyonomoeno helo ba꞉bo gogoli, huiyatiya na iya꞉tawala kebe gaote dikulihui ba꞉bi hidohido komo ba꞉ Godokono malemale ododili komola, naeno ododili komoha꞉.
1CO 15:11 Ba꞉be mabuma꞉ Kolini sose tawakaluba꞉la꞉, ko komo ba꞉ a oelamepa꞉te Hido Taboeno hiya꞉hiya꞉ komo ba꞉ba ka꞉na ba olamagimi la꞉le hibima꞉ da꞉midima ba꞉be komola. Huiyatiya numa꞉la꞉, na ba꞉gala komo oelamepi a hiliyonomo ipuwalo pote ba꞉bi komokomo la꞉ diya꞉tulami, ba꞉be komo ba꞉ ko komoha꞉.
1CO 15:12 Ba꞉ hibila, Godote Kelisoko hoe ipuwane dadipatiya꞉, a oelamepi hiliyonomate ba꞉be tabo hiya꞉hiya꞉ hopolo olamagiminakoma꞉, ba꞉bema꞉ mabu keka꞉ la꞉ komopa꞉te ba꞉ma ka꞉na da꞉ga꞉lanama, galane tetelo Godote ha꞉lahapi ka꞉ka꞉mo a꞉kawadiya꞉paa꞉latela꞉mene?
1CO 15:13 A꞉iye! La꞉eno daedae ukui komote hibima꞉ neda꞉tale, Godote Kelisoko hoe ipuwane hibilo ba꞉ka꞉-adipatiya꞉na꞉!
1CO 15:14 Ba꞉bema꞉ Godote Kelisoko hoe ipuwane hibilo adipateha꞉tale, Hido Tabo olamagimi komodo eta hido komote ba꞉ka꞉-itanana꞉, iyo, la꞉eno hibima꞉ midi komodo la꞉le eta hido komo a꞉kuma꞉mata.
1CO 15:15 Numa꞉la꞉, Kelisote hoe ipuwane mahigaha꞉tale, ale Godokono ododi komoma꞉ ha꞉da tabo ba꞉ga꞉lana꞉, mabu Hido Tabo olamagi oko ipuwalo ale ba꞉ma ka꞉na olamagiminakoma꞉, ebete Kelisoko hoe ipuwane hibilo adipatiya꞉. Huiyatiya la꞉ komopa꞉te na꞉ga꞉lanamata Godote ha꞉lahapi ka꞉ka꞉mo a꞉kawadiya꞉paa꞉latela꞉mene. A꞉iye, ba꞉be komote hibima꞉ neda꞉tale, Godote Kelisoko hoe ipuwane hibilo ba꞉ka꞉-adipatiya꞉na꞉!
1CO 15:16 Ba꞉be mabuma꞉ nale atu tabo ba꞉ma ka꞉na kagoemo, Godote tawakalubi hoe ipuwane wadiya꞉paa꞉lateleha꞉tale, a ba꞉moe komone biya꞉tawahana꞉ ebete Kelisoko hoe ipuwane kadipatiya꞉ha꞉.
1CO 15:17 Ba꞉bema꞉ Godote Kelisoko hoe ipuwane adipateha꞉tale, ebete la꞉eno kuba ododili komokomo hibilo ba꞉ka꞉-egebolelametana꞉, iyo, la꞉eno kuba ododili komo hiliyonomate la꞉godolo ba pola꞉na la꞉eno hibima꞉ midi komodo Godokono eta hido komote la꞉tamo a꞉kuluhukamene.
1CO 15:18 A꞉iye! La꞉ komopino ukui komote hibima꞉ neda꞉tale, dopamo puya꞉te Kelisoko hibima꞉ midi ipuwalo da꞉ha꞉lahuya꞉, ibi niliya, ibino ka꞉ka꞉ komote alatidinomo balatidiholelamiya꞉na꞉!
1CO 15:19 Ba꞉bema꞉ numa꞉la꞉, ale aeno hibima꞉ midi komo Kelisotamo ba ihatena ba꞉ma ka꞉na demalagidolonama꞉, ba꞉moe hopolo ba emedena ale hegehege owalubi komo ebegodone kuwatema꞉nema꞉, huiyatiya ale da꞉ha꞉lahama꞉ eta hido komote uluhukuhino aeno ka꞉ka꞉te dito kalatidihoma꞉na꞉, ba꞉be mabuma꞉ wadiyala hibima꞉ midiha꞉pa꞉te a awaepima꞉ na꞉ka꞉ma꞉mena꞉. Iyo, iba꞉te tabo ba꞉ma ka꞉na na꞉ga꞉lamena꞉, Kelisoko hibima꞉ midipa꞉te ebegodone hido owalubi komo hibilo a꞉kalawa꞉mena꞉, ba꞉bema꞉ ebe ta꞉matapino modoboha꞉ komote komo hopo habanapi hiliyonomoeno modoboha꞉ komokomo na꞉gogolena.
1CO 15:20 Huiyatiya kalakala konomola, Godote Kelisoko hoe ipuwane hibinomolo adipatiya꞉. Numa꞉la꞉, lumagino pali ipuwane dikulihomena꞉ ba꞉bi ilina hiliyonomo ipuwalo ebete doponomo ilina Godotamo kalakalago dito kikamema꞉ne, mabu ebe iya꞉tawala galane tetelo Godokono owalubi komodo komo hidohido ilinate ba꞉be pali ipuwalo bapepehonakomena꞉. Ba꞉bema꞉ Kelisoko ba꞉ pali ilinoeno dito ikame komoeno dopo ilina huiyala, mabu ebete dopamo hoe ipuwane mahigate Godotamo ba꞉bo tuya꞉. Ba꞉be komone a hibima꞉ midipi iya꞉tawahala, galane tetelo a ba꞉ atumu hoe ipuwane komahila꞉halema꞉nema꞉!
1CO 15:21 Numa꞉la꞉, hoe komote kapiya dubuino ododi komodo a hopo habanapi hiliyonomatamo uluhukuya꞉, ba꞉bema꞉ eta dubuino ododi komodo aeno ha꞉laha ipuwane mahila꞉hale komote atumu kuluhukuya꞉.
1CO 15:22 Iyo, a ba꞉moe hopolo A꞉da꞉mekono ka꞉ka꞉ ipuwalo ba emedena, a iya꞉tawahala tete ba꞉ na꞉pe ale ba꞉ dito koha꞉lahama꞉nema꞉, ba꞉bema꞉ a atumu iya꞉tawahala a Kelisokono ka꞉ka꞉ ipuwalo demedenama꞉, galane tetelo Godote a hiliyonomo aeno ha꞉laha ipuwane hibilo kowadiya꞉paa꞉tema꞉ne.
1CO 15:23 Ba꞉ hibila, Godokono ubilo Kelisote hoe ipuwane mahiga komodo dopo lumagima꞉ ediya꞉, huiyatiya a puya꞉te ebeno tawakalubima꞉ deda꞉hanama꞉ a galane tetelo ka꞉ka꞉mo komahila꞉halema꞉nema꞉, Kelisote hopo habamo gala da꞉kapuluhukumini ba꞉ba tetelo.
1CO 15:24 Ba꞉bema꞉ numa꞉la꞉, ba꞉be tetete ba꞉moe hopoeno wibo tetema꞉ ba eda꞉, Kelisote hiya꞉hiya꞉ helohelonomo gobogobo ba꞉gala helohelodopo gobogobago alaholo ipuwalo wato kikipo ba꞉bo kolawema꞉ne, ba꞉gala tawakalubi ipuwalo puya꞉te eba꞉go dalaholohona ebete Godokono heloamo ba꞉bi kokopi hiliyonomo atumu hibilo komikimoelema꞉ne. Kalakala konomola, ebete ba꞉be wato kikipo lawe teta꞉mo ebeno Ko Gawadubu emede bahilo na꞉lutamene, ba꞉bene ebete ba꞉be Ko Gawadubu emede bahi Nabiwi Godotamo kalakalago dito kikamema꞉ne.
1CO 15:26 Ba꞉ hibila, Kelisokoba꞉ dalaholohona ibi ipuwalo hoe komote kuititidawama꞉ ba eda꞉na Kelisote ebe atumu kubahiminomo ba꞉bo kokubahimima꞉ne.
1CO 15:27 Iyo, ba꞉be komo hawakalimima꞉ Godokono Bukalo tabote ba꞉ma ka꞉na goena, “Kelisokoba꞉ dalaholohona ebete Godokono heloamo ibi hiliyonomo komikimoelema꞉ne.” Ba꞉bema꞉ ale ba꞉moe taboeno ipuwa iya꞉tawahala, Kelisote alaholoho ipuwalo helonomoma꞉ deda꞉mene, ba꞉ba tetelo hiya꞉hiya꞉ gobogobo ba꞉gala hiya꞉hiya꞉ tawakalubi ba꞉gala kebe hiya꞉hiya꞉ komate Hunu Habalo ba꞉gala hopo habalo da꞉pola꞉na, ibi hiliyonomate ebetamo hibinomolo kopapamila꞉halema꞉na꞉. Huiyatiya numa꞉la꞉, ba꞉ba tetelo Godoko kapiyate Kelisotamo a꞉kapapamiwatamene, mabu ebe ba꞉ pote Kelisotamo wato kikipo lawe helo dikamiya꞉ ba꞉be Kodawala.
1CO 15:28 Ba꞉bema꞉ hibila, hiya꞉hiya꞉ komo hiliyonomate Godokono Gudu Kelisotamo ba꞉ba ka꞉na da꞉papamila꞉halemena꞉, ba꞉ba tetelo Guduti ha꞉kiya ebeno ubilo Nabiwitamo kopapamiwatama꞉ne, mabu ebe iya꞉tawala ebete Nabiwino ubilo ba꞉gala ebeno heloamo wato kikipo ba꞉ a꞉lawe. Iyo, Guduti ebeno ubi ba꞉bema꞉ kihatema꞉ne, ebeno Ko Gawadubu haba Nabiwiti hibinomolo lawete hiya꞉hiya꞉ hiliyonomo komate ebe kapiyatamo emedena emedena tetelo ba꞉papamila꞉halenakomena꞉.
1CO 15:29 Ba꞉bema꞉ wadiyala a ba꞉moe eta komo atumu kakemalagidoluya꞉. Komopa꞉te ibino mabulubino ha꞉laha tawakalubi mabuma꞉ ibi beyamo da꞉wadulatelenaka, iba꞉te ba꞉be komo bada mabuma꞉ kododinaka? Numa꞉la꞉, ibi iya꞉tawahala hoe ipuwane mahiga komote hibima꞉ eda꞉ha꞉tale, iba꞉te ibino ododi komodo eta hido komo a꞉kuma꞉mena꞉, huiyatiya iba꞉te Godoko hibima꞉ ba midina konomamo ga꞉lana ebete ibino ha꞉lahapi ka꞉ka꞉mo hibinomolo kowadiya꞉paa꞉latelema꞉ne.
1CO 15:30 Ba꞉gala eta komo. Ha꞉lahapino ka꞉ka꞉mo mahila꞉hale komote hibima꞉ eda꞉ha꞉tale, mabu keka꞉ ale hegela ba꞉gala du hiliyonomolo komo hiya꞉hiya꞉ tetelo aeno ka꞉ka꞉ emalagidoleheno Hido Tabo mabuma꞉ hiya꞉hiya꞉ hoe olalati komamo dito da꞉na꞉pa꞉la꞉hanakoma꞉?
1CO 15:31 O naeno hibima꞉ midipi ekaka꞉la꞉, ale aeno Kodawa Ya꞉su Kelisoko ipuwalo ba emedena, na la꞉ mabuma꞉ awagahalo la꞉tamo hibinomolo olamagimo, hegela hiliyonomolo nale naeno ka꞉ka꞉ gobogobamo ihatenakomo!
1CO 15:32 Ba꞉bema꞉ la꞉eno ukui keba ka꞉nala꞉ka꞉? Na Epesese ko habalo helohelonomo goegoe huiya dubago dalaholohuimo, nale ba꞉be komo tawakalubino holoholo hapulu awagahalo kododimo? Ao, nale ba꞉moe hopoeno ka꞉ka꞉ emalagidoloheno Hunu Haboeno hido ka꞉ka꞉ Godogodone lawema꞉ ododimo. Huiyatiya numa꞉la꞉, ha꞉lahapino ka꞉ka꞉mo mahila꞉hale komote hibima꞉ eda꞉ha꞉tale, nale hibima꞉ midiha꞉pino kuba ukui kota꞉matama꞉ ba꞉modobona꞉, mabu iba꞉te ba꞉moe hopo haboeno ka꞉ka꞉ kapiya ba emalagidolona tabo ba꞉ma ka꞉na ga꞉lana, “Diyala, dumutu ale da꞉ ha꞉lahama꞉, ba꞉bema꞉ wadiyala a ka꞉lo a ha꞉kiya a ba kalakaluia꞉me, baa꞉ konomamo nahate helonomo gao beya koamo ba꞉bo konihoma꞉nema꞉!”
1CO 15:33 Diyala, komopa꞉te la꞉ ha꞉da da꞉ amiholametamena꞉, ba꞉bema꞉ hidamo! Ba꞉ hibila, ba꞉bi ha꞉da amihopino komoma꞉ mulu ukuipa꞉te tabo ba꞉ma ka꞉na ga꞉lanaka, “Ama꞉ kuba ododilipa꞉go da꞉pata꞉naka, iba꞉te amia꞉no tepo ipuwoeno hidohido ukui kokubahilamema꞉na꞉.”
1CO 15:34 Ba꞉bema꞉ naeno Kolini sose tawakaluba꞉la꞉, wadiyala la꞉ hidohido ukui komamo gala na꞉kohobila꞉la꞉, iyo, la꞉eno kuba ododili komate nekelalama꞉mena꞉ta. A꞉iye! Nale hilopo la꞉tamo kikalamema꞉ ba꞉moe kodakoda tabo ba꞉bema꞉ olamagimo, mabu la꞉ komopa꞉te Godokono komo hibilo kiya꞉tawahanaha꞉!
1CO 15:35 Ba꞉bema꞉ diyala, la꞉ ipuwalo etate na ba꞉ma ka꞉na da꞉ kiyanamemene, “Godote ha꞉lahapi ka꞉ka꞉mo keba ka꞉na na꞉ka꞉wadiya꞉paa꞉latelemene? Ba꞉gala lumagiti ka꞉ka꞉mo hibinomolo da꞉mahigamene, ebeno uli emede komoeno apete keba ka꞉na na꞉kitanamene? Naeno ukui ba꞉ nitana ba꞉be komote a꞉kuluhukamene!”
1CO 15:36 Huiyatiya nale tabo ba꞉ma ka꞉na kogoema꞉nemo, “Ama꞉ daedae ukuidawalata! Numa꞉, ama꞉ kikipo haka ipuwamo damimina꞉, ba꞉be kikipote da꞉hoemene ebeno ka꞉ka꞉te hibilo a꞉kawibamene, iyo, ebegodone uli huhiti kuluhukuma꞉ne.
1CO 15:37 Ba꞉gala ama꞉ kona pali ododi tetelo ama꞉ kona kehoeno ape pahago haka ipuwamo a꞉kamihala꞉ta, ao, ama꞉ huiyatiya kikiponomo bamihonakata. Numa꞉, ama꞉ ba꞉ba ka꞉na kona kikipo ba꞉gala komo ba꞉bakobako hiya꞉hiya꞉ kikipo damihomena꞉, galane tetelo ba꞉bi kikiponomo ipuwane kokonomo ilinate hiya꞉ holoholamo kikulihoma꞉na꞉.”
1CO 15:38 Ba꞉bema꞉ hibila, Godokono ubilo ebete eta pali ilinatamo ba꞉be ilinoeno holoholonomo bikamenako, ba꞉gala ebete ba꞉ atumu hiya꞉hiya꞉ kikipatamo ibino hiya꞉hiya꞉ holoholonomo a꞉kikalamenako.
1CO 15:39 Ba꞉bene ka꞉ka꞉go da꞉wapata꞉lamena ba꞉bi hiya꞉hiya꞉ ilinate ba꞉ atumu ibino hiya꞉hiya꞉ holoholonomago bemedehona, iyo, tawakalubino eta holoholo bitalama꞉na, ba꞉gala hakalo da꞉wapata꞉lamena ba꞉bi ilinoeno eta holoholo ba꞉ka-italama꞉na, ba꞉gala holaholoeno eta holoholo bitalama꞉na, ba꞉gala beya ipuwado da꞉wapata꞉lamena ba꞉bi ilinoeno eta holoholo bitalama꞉na.
1CO 15:40 Ba꞉bema꞉ ba꞉moi ilinate hopo habalo ba pola꞉na, ale ibi hiliyonomoeno holoholo iya꞉tawahala, ba꞉gala ale atumu alomo hunulu da꞉pola꞉na ba꞉bi ilinoeno hiya꞉hiya꞉ holoholo iya꞉tawahala. Iyo, ale ba꞉moe hopoeno ilina ba꞉gala alomoeno ilina ba꞉ma ka꞉na ulamenakoma꞉, ibino hido a꞉la꞉mina komo kapiyaha꞉, ao, hiya꞉hiya꞉ ba꞉pola꞉lama꞉na.
1CO 15:41 Ba꞉ma ka꞉na hegeloeno hido a꞉la꞉mina komo ba꞉gala manomeno hido a꞉la꞉mina komo ba꞉gala olokino hido a꞉la꞉mina komo iba꞉te hiya꞉hiya꞉ma꞉ eda꞉hana, iyo, oloki hiliyonomo ipuwalo ibi ba꞉ atumu hiya꞉hiya꞉ hido a꞉la꞉mina komago ba꞉pola꞉na.
1CO 15:42 Ba꞉bema꞉ numa꞉la꞉, Godote ha꞉lahapi ka꞉ka꞉mo da꞉wadiya꞉paa꞉latelemene ibino komote ba꞉ ba꞉ba ka꞉na kitanama꞉ne. Lumagiti ba꞉moe hopolo ba emedena ebeno apete ba꞉ hoe apema꞉ eda꞉na, ba꞉bema꞉ ebete da꞉hoemene tawakaluba꞉te ba꞉be ape bobo ipuwamo dito kihatema꞉na꞉. Huiyatiya Godote kebe ape hoe ipuwane dadipatemene, ba꞉ba tetelo ba꞉be apete ulinoma꞉ eda꞉te lumagiti ba꞉be apa꞉go emedena emedena tetelo bemedenamene.
1CO 15:43 Ba꞉ hibila, lumagiti kebe apa꞉go hopo habalo demedena, ba꞉be ape ba꞉ kubadopoma꞉ eda꞉na ba꞉gala heloha꞉ma꞉ keda꞉na, ba꞉bema꞉ ebete da꞉hoemene tawakaluba꞉te ba꞉be ape bobamo dito kihatema꞉na꞉. Huiyatiya numa꞉la꞉, Godote ba꞉be lumagino ape hoe ipuwane dadipatemene, ba꞉be apete hido a꞉la꞉minama꞉ ba꞉gala helonomoma꞉ ba꞉bo keda꞉ma꞉ne.
1CO 15:44 Iyo, ba꞉moe hopolo lumagiti ba꞉moe hopoeno apa꞉mo pata꞉na, ba꞉bema꞉ ebete da꞉hoemene tawakaluba꞉te ebeno ape bobamo dito kihatema꞉na꞉, huiyatiya Godote ebe hoe ipuwane dadipatemene, ba꞉ba tetelo ebeno apete ulinoma꞉ keda꞉ma꞉ne mabu Godokono Gobogobote ebeno apetamo hibi ka꞉ka꞉ kikamema꞉ne. Ba꞉bema꞉ hibila, lumagino ape netewate ba꞉pola꞉ma꞉na, iyo, eta apete ba꞉ ba꞉moe hopoeno apema꞉ eda꞉na ba꞉gala eta ape ba꞉ Hunu Haboeno apema꞉ keda꞉na, ba꞉be apa꞉tamo Godokono Gobogobote hibi ka꞉ka꞉ kikamema꞉ne.
1CO 15:45 Ba꞉be mabuma꞉ Godokono Bukalo eta tabote ba꞉ma ka꞉na bitana, “Godote dopo dubu A꞉da꞉meko ododiti ka꞉ka꞉ dikamiya꞉, dubuti ba꞉bo iwigiluya꞉.” Iyo, ba꞉be dopo dubuti hopo habalo ba꞉bema꞉ emedenami, huiyatiya a tetelo da꞉puluhukuya꞉ ba꞉be gala hapu A꞉da꞉me ebeno komo hiya꞉la, mabu ebe tawakaluba꞉tamo hibi ka꞉ka꞉ ikalame gobogoboma꞉ ediya꞉.
1CO 15:46 Numa꞉la꞉, a ba꞉moe komone iya꞉tawahanama꞉, dopamo hopo haboeno komote uluhukuti, ba꞉bene galane tetelo uli komote kakuluhukuma꞉ne, ba꞉be uli komo ba꞉ Godokono Gobogobote hibi ka꞉ka꞉ atamo dikaa꞉memene ba꞉be komola.
1CO 15:47 Iyo, dopo dubu A꞉da꞉mete ba꞉moe hopo ipuwane uluhukuya꞉ mabu Godote ebe haka puhulamo ododiya꞉, huiyatiya a tetelo duluhukuya꞉ ba꞉be gala hapu A꞉da꞉mete Hunu Habane piya꞉.
1CO 15:48 Ba꞉bema꞉ Godote haka puhulamo poko kododiya꞉, ba꞉be dubuti kebako dawama꞉ keda꞉nami ba꞉moe hopo habanapa꞉te ba꞉ba ka꞉na haka puhulamo ododilipima꞉ keda꞉hana, huiyatiya kalakala konomola, a puya꞉te Hunu Habanapima꞉ deda꞉hanama꞉, ale Hunu Habane ba꞉moe hopamo da꞉piya꞉ ba꞉be dubu huiyama꞉ hibilo keda꞉hama꞉nema꞉.
1CO 15:49 Iyo, ba꞉ma tetelo a hibima꞉ midipa꞉te haka puhulamo ododi dubuino holoholamo keba ka꞉na kemedehonama꞉, galane tetelo a ba꞉ba ka꞉na Hunu Habane da꞉piya꞉ ba꞉be dubuino holoholamo bemedehonama꞉.
1CO 15:50 Naeno hibima꞉ midipi ekaka꞉la꞉, naeno iya꞉tulame taboeno ipuwa ba꞉ ba꞉ma ka꞉nala. Lumagiti ba꞉moe hopolo ba emedena ebeno apete kamodobonaha꞉ Godokono Ko Gawadubu haboeno hidohido komo hibinomolo kuwatema꞉, iyo, lumagiti ebeno hoe apa꞉mo ba emedena ebete kamodobonaha꞉ emedena emedena teteno ka꞉ka꞉ kolawema꞉.
1CO 15:51 Ba꞉bema꞉ Godote hibima꞉ midiha꞉pa꞉tamo dugumuina, wadiyala la꞉ ba꞉be komo hidamo niya꞉tawahala꞉. A hibima꞉ midipi hiliyonomate dito a꞉kaha꞉lahama꞉, ao, a ipuwalo komopa꞉te Kuititi Hegelalo ka꞉ka꞉go kopola꞉nama꞉nema꞉. Huiyatiya numa꞉la꞉, tawakaluba꞉te kuititi teteno gebole diyamo dulihomena꞉, ba꞉ba tetenomolo Godote a hibima꞉ midipi hiliyonomoeno ape hiya꞉nomoma꞉ dito komidilia꞉mema꞉ne, iyo, ebete ba꞉be komo tiyonomolo kododima꞉ne, lumagiti ebeno baidi ibubulamete keba ka꞉na ka꞉la꞉minalenako ba꞉ba ka꞉na. Ba꞉bema꞉ hibila, gebole mole tetelo Godote ha꞉lahapi hiliyonomo ka꞉ka꞉mo wadiya꞉paa꞉latelete, ba꞉bene iba꞉te emedena emedena tetelo ba emedehona gala a꞉kaha꞉lahamena꞉, ba꞉gala ba꞉be atu tetelo Godote a hibima꞉ midipino ape hiya꞉nomoma꞉ komidilia꞉mema꞉ne,
1CO 15:53 iyo, ebete tawakalubino ha꞉laha ape hiya꞉nomoma꞉ na꞉midililama꞉mene iba꞉te ebeno emedena emedena teteno ka꞉ka꞉go kemedehonama꞉.
1CO 15:54 Ba꞉bema꞉ numa꞉la꞉, Godote tawakalubino ha꞉laha ape hiya꞉ma꞉ ba midililame iba꞉tamo emedena emedena teteno ka꞉ka꞉ dikalamemene, ba꞉ba tetelo ebeno Bukalo kebe tabote ditana ba꞉be tabote hibima꞉ ba꞉bo keda꞉ma꞉ne. Iyo, ebete ebeno Bukamo tabo dopamo ba꞉ma ka꞉na miya꞉tiya꞉, “Ba꞉ba tetelo na Godote hoe komoeno wato kikipo lawete ebe anakapuminomo kanakapumima꞉nemo!
1CO 15:55 Ba꞉bema꞉ hoe komo, ama꞉ wato kikipo gala a꞉kalawa꞉mena꞉ta, iyo, ama꞉le eta dawatamo temeteme gala a꞉kikamenakamena꞉ta!”
1CO 15:56 Ba꞉ hibila, ba꞉ma tetelo hoe komoeno temeteme ikalame helote tawakalubino kuba ododili ipuwado iba꞉tamo a꞉puluhukunako, ba꞉gala Godote dopamo Moseseko ipuwado dikalamiya꞉, ibino kuba ododili komoeno helote ba꞉bi Tutumu Tabo komodo a꞉kapuluhukunako,
1CO 15:57 huiyatiya wadiyala a kalakala konomo Godotamo kadipatiya꞉, mabu ebete aeno Kodawa Ya꞉su Kelisokono ododi komodo wato kikipo lawe helo atamo nikaa꞉mena!
1CO 15:58 Ba꞉bema꞉ naeno hidohido hibima꞉ midipi ekaka꞉la꞉, wadiyala la꞉ la꞉eno hibima꞉ midi ipuwalo kodakodalo na꞉la꞉mota꞉hanala꞉, iyo, la꞉ ukui gagagagama꞉ eda꞉haheno aeno Kodawoeno oko owatiho mabuma꞉ la꞉eno ape ebetamo konomamo nikamehonala꞉, mabu a iya꞉tawahala ale ebe ipuwalo ba emedena aeno oko ipuwane hidohido gaote ikulihonaka.
1CO 16:1 Ba꞉bema꞉ la꞉le eta komoma꞉ na da꞉kiyanamima, ba꞉be komo ba꞉ Godokono tawakaluba꞉te Yudiya hopolo awae ipuwalo demedehona, la꞉le ibi malemale mana꞉mo keba ka꞉na na꞉kowalubilioma. Ba꞉bene nale dopamo Galesiya hopoeno sose tawakaluba꞉te kebe komo ododima꞉ da꞉kiyalamimo, wadiyala la꞉ ba꞉be atu komo ba꞉ma ka꞉na nododiya꞉la꞉.
1CO 16:2 Sande hegela hiliyonomolo la꞉ hiliyonomate la꞉ ha꞉kiya la꞉eno malemale mani tama꞉mo na꞉miya꞉tenakuya꞉la꞉ ba꞉bi maniti la꞉godolo kokodopoma꞉ keda꞉hama꞉, iyo, Godote eta lumagi ebeno emede ipuwalo keba ka꞉na kowalubinako ebete ba꞉ ba꞉ba ka꞉na malemalelo dito na꞉miya꞉tenakamene. Numa꞉la꞉, na peheno la꞉ hiliyonomate dopamo ba꞉ba ka꞉na dododinakoma, ba꞉be oko la꞉godolo ya꞉lo da꞉wibui nale ba꞉bo kopumima꞉nemo.
1CO 16:3 Ba꞉gala la꞉le kebe dubu la꞉eno malemale mani Yudiya hopoeno Yelusalema ko habamo wata modoboma꞉ da꞉ga꞉lama, wadiyala la꞉ ibi mabuma꞉ leta nododiya꞉la꞉, ba꞉bene nale la꞉tamo da꞉puluhukumu ba꞉ba tetelo nale ibi la꞉eno letago ba꞉gala mana꞉go ba꞉bo konoelamema꞉nemo.
1CO 16:4 Huiyatiya ba꞉ba tetelo la꞉le la꞉eno ukuilo na ba꞉ma ka꞉na da꞉kiyanamema, nale ba꞉bi dubago ebamo kotoma꞉, kubaha꞉, naeno kalakalate bitana ale kapimilo kotolamema꞉.
1CO 16:5 Ba꞉bema꞉ naeno nopote ba꞉ma ka꞉na bitana, nale Ma꞉sadoniya hopodo petote la꞉tamo ba꞉bo kopuluhukuma꞉nemo, mabu na ba꞉bi hoponapi dopamo konulama꞉tepalema꞉ nemalagidolonamo.
1CO 16:6 Huiyatiya na ubila la꞉go tete ga꞉ga꞉dopolo kemedenama꞉, ba꞉bema꞉ diyala, nale pete hopoeno gibate wibo teta꞉mo la꞉go da꞉ pemedemo. Ba꞉bene na iya꞉tawala, ba꞉ba tetelo nale kebe hopamo toma꞉ ubi dihatemo, la꞉le na ba꞉bo kowalubinima꞉nemata.
1CO 16:7 Iyo, numa꞉la꞉, na ubihinola ba꞉ma tetelo la꞉eno hopodo ba peto la꞉ pulama꞉tepalete eta hopamo tiyolo ba꞉bo kotoma꞉. Ao, naeno ukuiti eba ka꞉na kitanaha꞉, ba꞉bema꞉ Kodawate modoboma꞉ da꞉goemene, nale tete ga꞉ga꞉dopolo la꞉go kopemedema꞉nemo.
1CO 16:8 Huiyatiya nale pe tupuimihino, dopamo nale komo hegelalo ba꞉moe Epesese habalo kemedema꞉nemo Pentekose Poko Hegela teta꞉mo.
1CO 16:9 Numa꞉la꞉, ba꞉moe habalo naeno oko duhimima꞉ komopi hiliyonomate nago nalaholohonaka, huiyatiya kalakala konomola, na numinamo gigihote a꞉hiya꞉midalo hibilo bitana, naeno oko owati ipuwado hidohido gaote konolohoma꞉.
1CO 16:10 Ba꞉gala eta komo. Timotiti la꞉tamo da꞉puluhukumini, la꞉le ebe kalakalago ba lawe eta ukui bilibili komo ebetamo akikama꞉la꞉, mabu na Kodawoeno oko keba ka꞉na kowatinamo, ebete ba꞉ atu oko beka-owatina.
1CO 16:11 Ba꞉bema꞉ la꞉ ipuwalo eta dawate ebeno tepo ipuwalo ba꞉mako ukui emalagidolo modoboha꞉, Timotiko hibi okodawama꞉ keda꞉naha꞉. Wadiyala la꞉ huiyatiya ebe hidamo nowalubiya꞉la꞉, ebete ebeno to gabodo gala kalakalago ba katupuimi natamo modobolo ba꞉bo kowilama꞉ne, mabu ebete komo hibima꞉ midipi ekaka꞉go natamo pema꞉ nale ebe belatiminamo.
1CO 16:12 Ba꞉gala aeno hibima꞉ mididawa ekawi Apolosikono komo ba꞉ma ka꞉nala. Nale komo tetelo naeno ubilo ebe a꞉kiyamenakuimo ebete komo hibima꞉ midipi ekaka꞉go pelamete la꞉go kopemeda꞉tepama꞉, huiyatiya ebete na꞉goi ebete Godogodone hibi ukui kalaweha꞉, ba꞉bema꞉ ebete ba꞉ma tetelo la꞉tamo a꞉kapa꞉mene. Huiyatiya wadiyala la꞉ niya꞉tawahala꞉, ebeno ubi komote hibilo bitana Godokono hido tetelo la꞉tamo kopema꞉.
1CO 16:13 Ba꞉bema꞉ la꞉ uliholo ba emedena hibima꞉ midi ipuwalo kodakodalo na꞉la꞉mota꞉hanala꞉, iyo, alaholoho ipuwalo toleha꞉ma꞉ ba eda꞉hana la꞉ na꞉helohelohonala꞉.
1CO 16:14 Ba꞉bene la꞉eno emede ipuwalo wadiyala la꞉le hiliyonomo komo malemale emalagidolo kapiyado nododilinakuya꞉la꞉.
1CO 16:15 Naeno hibima꞉ midipi ekaka꞉la꞉, la꞉ ba꞉moe komo iya꞉tawahala, Stepanasiko ba꞉gala ebeno genamanapi ibi ba꞉ Guliki hopo konomolo puya꞉te dopo tetenomolo Ya꞉sutamo dohobili ba꞉bi tawakalubila, iba꞉te Godokono komo tawakalubi kowalubilinama꞉ ibino ape konomo hibinomolo a꞉miya꞉tiya꞉. Ba꞉be mabuma꞉ na Polote la꞉ ba꞉ma ka꞉na toelameholemata,
1CO 16:16 wadiyala la꞉ ba꞉bako tuputupu ododilipa꞉tamo na꞉papamila꞉hanala꞉, ba꞉gala puya꞉te iba꞉go oko dowatihona iba꞉tamo atumu na꞉kapapamila꞉hanala꞉.
1CO 16:17 Ba꞉bema꞉ numa꞉la꞉, Stepanasiko ba꞉gala Potunatasiko ba꞉gala Akeyakasiko ibino pelame komoma꞉ nale konomamo kalakaluimo. Ba꞉ hibila, la꞉le muhululu ba emedena la꞉ kalakala natamo ikanamema꞉ modoboha꞉, huiyatiya iba꞉te la꞉eno haba ba pelawe
1CO 16:18 naeno ukui bilibili komo la꞉ mabuma꞉ gobogobamo ba꞉bo pimiya꞉tiya꞉, dopamo iba꞉te la꞉eno ukui bilibili komo keba ka꞉na ka꞉piwibuilami ba꞉ba ka꞉na. Ba꞉bema꞉ keba tetelo la꞉ sose tawakaluba꞉te da꞉kapiyuiminakoma, wadiyala la꞉ ba꞉bako dubu na꞉mililameholenakuya꞉la꞉.
1CO 16:19 Ba꞉bema꞉ A꞉isiya hopo konomolo hiya꞉hiya꞉ demedehona, ba꞉bi sose tawakaluba꞉te ibino nolata tabo la꞉tamo poelama꞉, ba꞉bene Akuilako Pilisilako ibi ba꞉gala ibino genamalo da꞉kapiyuiminaka ba꞉bi sose tawakalubi, ibi hiliyonomate Kodawa Ya꞉suku ipuwalo ba emedena ibino konomo kalakala nolata tabo la꞉tamo atumu kapoelama꞉.
1CO 16:20 Iyo, puya꞉te ba꞉malo nago demedena, ba꞉bi hibima꞉ midipi ekaki hiliyonomate atumu ibino nolata tabo la꞉tamo kapoelama꞉. Wadiyala la꞉ da꞉kapiyuimima la꞉ hiliyonomo etapa꞉te etapino kokoto uwatehuilo na꞉pa꞉watamehuiya꞉la꞉.
1CO 16:21 Ba꞉bene ba꞉moe leta kuititi hapulu na Polote na ha꞉kiya naeno kokotamo ba꞉moe kapiya nolata tabo da꞉miya꞉temo, la꞉ ba꞉moe tabo numa꞉la꞉, iyo, eta lumagiti ba꞉moe kuititi tabo kamiya꞉teha꞉.
1CO 16:22 Ba꞉ hibila, tawakalubi ipuwalo pote Kodawa Ya꞉suku malemalelo emalagidolonaheno, wadiyala Godote ebetamo kuba huiya nikama꞉mene ebete emedena tetelo temeteme kiya꞉tawanakoma꞉! O aeno Kodawa, wadiyala ama꞉ na꞉pa꞉!
1CO 16:23 Ba꞉bema꞉ wadiyala aeno Kodawa Ya꞉sukunu malemale komote la꞉godolo nitanamene,
1CO 16:24 ba꞉gala a Ya꞉su Kelisoko ipuwalo kapiyama꞉ ba eda꞉hana, wadiyala naeno malemale emalagidolo komote la꞉ hiliyonomagodolo atumu na꞉ka-itanamene. Ba꞉moe ba꞉ naeno tabo kuititila. Ba꞉ba꞉la.
2CO 1:1 Na ba꞉ Polotela, Ya꞉su Kelisote ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala mabu Godote ebeno ubilo na a꞉laweniya꞉. Na ba꞉gala a hibima꞉ midipino ekawi Timotiko, ale la꞉ puya꞉te Kolini habalo Godokono sose tawakalubima꞉ deda꞉hanama, ba꞉gala komo la꞉ puya꞉te Guliki hopo konomolo Godokono tawakalubima꞉ da꞉keda꞉hanama, ale ba꞉moe leta la꞉ hiliyonomatamo poemema꞉.
2CO 1:2 Wadiyala aeno Nabiwi Godoko ba꞉gala Kodawa Ya꞉su Kelisoko iba꞉te ibino malemale komo ba꞉gala hete komo la꞉tamo nikalama꞉mena꞉ta.
2CO 1:3 Wadiyala ale aeno Kodawa Ya꞉su Kelisokono Nabiwi Godotamo kalakala tabo kadipatiya꞉, mabu ebe ba꞉ ebeno gugudi konomamo da꞉malemalelatelena ba꞉be Nabiwila, ba꞉gala ebe ba꞉ iba꞉tamo gelebadi dikalamena ba꞉be Godola.
2CO 1:4 Iyo, ebete a aeno temeteme hiliyonomo ipuwalo a꞉gelebadia꞉menako, mabu ebe ubila ale kebe gelebadi ebegodone da꞉lawenakoma꞉ a ba꞉be atu gelebadi komamo komopino hiya꞉hiya꞉ temeteme ipuwalo ibi atumu kakowalubilinakoma꞉.
2CO 1:5 Numa꞉la꞉, ale Kelisoko ipuwalo ba emedena ebe mabuma꞉ hiya꞉hiya꞉ temeteme komate atamo konomamo keba ka꞉na kikulihonaka, ba꞉ ba꞉ba ka꞉na ebe ipuwado gelebadi komote atamo konomamo atumu ba꞉kuluhukunakomene.
2CO 1:6 Ba꞉bema꞉ Godokono ubi komo ba꞉ ba꞉ma ka꞉nala, kebe hiya꞉hiya꞉ temeteme komate atamo dikulihonaka, ba꞉bi temeteme komodo la꞉le la꞉eno temeteme ipuwalo la꞉eno gelebadi komo ba꞉gala ka꞉ka꞉ mula꞉ komo kuwatema꞉nemata, ba꞉gala aeno temeteme ipuwalo kebe gelebadi komote atamo duluhukunako, ba꞉be gelebadi komodo la꞉le atumu la꞉eno gelebadi komo kakalawema꞉nemata. Iyo, agodolo da꞉pola꞉na ba꞉bako atu temeteme komate la꞉tamo da꞉pikulimina꞉, ba꞉bi temeteme ipuwalo la꞉le hido gelebadi komo lawete kodakodalo ba꞉bo kola꞉mota꞉hanama꞉nemata.
2CO 1:7 Ba꞉bema꞉ numa꞉la꞉, la꞉le la꞉eno hibima꞉ midi ipuwado kuititi teta꞉mo modobolo da꞉nikulima, ale ba꞉be komo galane tetelo kumima꞉ hibima꞉ na꞉midinama꞉. Iyo, ba꞉moe komote aeno ukuilo kodakodalo bitana, mabu a iya꞉tawahala atu hiya꞉hiya꞉ temeteme komate la꞉ ba꞉gala a hiliyonomatamo kapimilo keba ka꞉na kikulihonaka, ba꞉ba ka꞉na Godokono gelebadi komote atumu la꞉ ba꞉gala a hiliyonomatamo kapimilo ba꞉kuluhukunakomene.
2CO 1:8 Ba꞉bema꞉ aeno hibima꞉ midipi ekaka꞉la꞉, A꞉isiya hopolo atamo duluhukui, a ubila la꞉le ba꞉be komo hidonomamo iya꞉tawaha. Hibila, ba꞉ba tetelo koko temeteme komate atamo dikulihui aeno ukui komate menemenenomoma꞉ ba eda꞉haa꞉me, ale ba꞉bo emalagidoluima꞉ ale aeno temeteme komoma꞉ ba꞉ dito koha꞉lahama꞉nema꞉.
2CO 1:9 Iyo, ale aeno tepo ipuwalo ba꞉ma ka꞉na emalagidoluima꞉, Godokono ubilo aeno ha꞉laha tetete hibinomolo uluhukui. Huiyatiya eba ka꞉naha꞉, hoe komote atamo kuluhukuha꞉. Ao, Godote a mabuma꞉ ebeno eta ubi ba꞉ma ka꞉na ihati, ale ba꞉bi temeteme ipuwado a ha꞉kiya aeno helo modoboha꞉ma꞉ ga꞉lalo ale ebe kapiya hibima꞉ ba꞉bo komidima꞉, mabu ebe ba꞉ ha꞉lahapi ka꞉ka꞉mo da꞉wadiya꞉paa꞉latelenako ba꞉be Godola.
2CO 1:10 Ba꞉ hibila, ebete ba꞉bako konomo hoe olalati ipuwalo aeno ka꞉ka꞉ a꞉mula꞉lea꞉mi, ba꞉bema꞉ a iya꞉tawahala ebete galane tetelo aeno ka꞉ka꞉ gala kakamula꞉lea꞉mema꞉ne, iyo, la꞉le a toetoe tabamo ba owalubi ale aeno hiya꞉hiya꞉ olalati komo hiliyonomo ipuwalo aeno hibima꞉ midi komo Godotamo bihatenama꞉ ebete aeno ka꞉ka꞉ komula꞉lea꞉mema꞉. Ba꞉bema꞉ numa꞉la꞉, Godote la꞉eno hiliyonomo toetoe tabo dulihona ba꞉be komodo ebete a hidamo bowalubinakomene, iyo, komo tawakalubi hiliyonomate kalakala tabo ebetamo ba꞉bema꞉ badipatenakomena꞉.
2CO 1:12 Ba꞉bema꞉ hibila, ale nawagahanama꞉ mabu aeno tepo ipuwoeno mulu ukui komate a ba꞉ma ka꞉na kiyaa꞉menaka, aeno ododili ipuwalo ale hopo habanapi hiliyonomatamo Godokono talona ba꞉gala tuputupu emede komo kapiyanomo ba hawakalimi, huiyatiya ba꞉be komo la꞉ Kolini sose tawakaluba꞉tamo konomamo a꞉hawakaliminakuima꞉. Numa꞉la꞉, Godokono malemale komodo ebete helo atamo nikaa꞉mena ale ba꞉ba ka꞉na kemedenama꞉, eta hopo lumagino mulu ukui komodo ale helo a꞉kalawa꞉lema꞉.
2CO 1:13 Ba꞉be mabuma꞉ nale naeno hiya꞉hiya꞉ leta ipuwalo naeno ubi bihatenamo, la꞉le naeno tabo komokomo ba ka꞉lamihole naeno iya꞉tulame komoeno ipuwa tiyolo ba꞉bo kuwatenakoma꞉,
2CO 1:14 iyo, wadiyala la꞉le dopamo aeno iya꞉tulame komo nanekele keba ka꞉na ka꞉lawa꞉tepuima, ba꞉ma tetelo la꞉ huiyatiya ba꞉be iya꞉tulame komoeno konomo ipuwa hidonomamo kolawema꞉nemata. Ba꞉bema꞉ numa꞉la꞉, la꞉ ba꞉be gabodo Kodawa Ya꞉sukunu Ko Hegelalo a mabuma꞉ kawagahama꞉nemata, ba꞉ba tetelo ale la꞉ mabuma꞉ keba ka꞉na dawagahama꞉ ba꞉ba ka꞉na.
2CO 1:15 Ba꞉ hibila, na ba꞉be komo ba iya꞉tawa nale nopo ba꞉ma ka꞉na ihatimo, la꞉ kowalubilima꞉ nale netewa hiya꞉hiya꞉ tetelo la꞉tamo kopuluhukuma꞉nemo. Ba꞉bema꞉ nale ba꞉ma ka꞉na emalagidoluimo, na Ma꞉sadoniya hopamo ba to gabo tetelo la꞉go dopamo pemeda꞉tepate, ba꞉bene Ma꞉sadoniya hopone da꞉kawilamo la꞉tamo atumu gala kakapuluhukuma꞉nemo. Ba꞉gala nale eta ukui ba꞉ma ka꞉na kihatimo, nale la꞉ ipuwane Yudiya hopamo to ba tupuimi la꞉godone owalubi ba꞉bo kolawema꞉nemo.
2CO 1:17 Huiyatiya nale ba꞉be nopo hiya꞉ma꞉ miditi la꞉tamo kapuluhukuha꞉, ba꞉bema꞉ diyala, la꞉le na ukui gagagagadawama꞉ kuda꞉ a꞉midinimata. La꞉ iya꞉tawahala, hopo habanapa꞉te ha꞉da amiho gabodo etapa꞉tamo “Iyo, na kododima꞉nemo” tabo ba ga꞉la, huiyatiya ba꞉be tabo komone ohobila꞉hate “Ao, na a꞉kododa꞉mo” tabo etapa꞉tamo gala dito kaga꞉lanaka. A꞉iye! La꞉le na ba꞉bako lumagima꞉ kemalagidolonama?
2CO 1:18 Numa꞉la꞉, Godoko hibidawanomoma꞉ ba eda꞉na ebete aeno hibi komo iya꞉tawala, ale la꞉tamo pelamema꞉ ha꞉da amiho gabodo “Iyo” tabo kaga꞉laha꞉. Ba꞉ hibila, ale aeno dopo tabo komone ohobila꞉te ale la꞉tamo pelamema꞉ “Ao” tabo gala ba kaga꞉la, a ba꞉be komo hibi gabodo ododima꞉.
2CO 1:19 A꞉iye! Na Poloko ba꞉gala Sailasiko ba꞉gala Timotiko, ale dopamo la꞉ ipuwalo Hido Tabo ba polamagimi Godokono Gudu Ya꞉su Kelisokono komo ba꞉ma ka꞉na hawakaliminakuima꞉, ebete etapa꞉tamo “Iyo, na kododima꞉nemo” tabo ha꞉da amiho gabodo goete, ba꞉be tabone etapa꞉tamo ohobigalo “Ao, na a꞉kododa꞉mo” tabo a꞉kagaa꞉mene. Numa꞉la꞉, ebete hibidawama꞉ ba eda꞉na, a hibima꞉ midipi kowalubinama꞉ hiliyonomo tetelo “Iyo” tabo kapiyanomo begoenako,
2CO 1:20 mabu hibila, Godote a kowalubinama꞉ hiya꞉hiya꞉ tabo dolamaginako, ba꞉bi hiliyonomo tabo komoma꞉ Ya꞉suti “Iyo” tabo ba goena, ebe kapiyado ba꞉bi komate hibinomoma꞉ beda꞉hanamena꞉. Ba꞉moe mabuma꞉ ale Godokono hidohido ododili komoma꞉ aeno toetoe tabamo ebe dawagaminanakoma꞉, ale “Ba꞉ba꞉la” tabo Ya꞉sukunu mahilamo ba꞉bema꞉ ga꞉lanakoma꞉.
2CO 1:21 Ba꞉bema꞉ kalakala konomola, mabu ale la꞉go kapimilo Godokono Oemedawa Kelisoko ipuwalo ba emedena, Godoko ba꞉ a da꞉kodakoduia꞉mena ba꞉be Helodawala. Iyo, ale ebeno oko kowatihonama꞉ ebete a ba꞉bema꞉ uwatiya꞉,
2CO 1:22 ba꞉bene ale ebenoma꞉ deda꞉hanama꞉ ba꞉be komo kiya꞉tawahama꞉ ebete ebeno kukala atamo ba miya꞉tea꞉me, ebeno Gobogobo aeno tepo ipuwamo ba꞉ dito ihatea꞉miya꞉. Ba꞉ hibila, ale ba꞉be komodo ba꞉ma ka꞉na kiya꞉tawahama꞉nema꞉, kebe hidohido komate ebegodolo da꞉pola꞉na, galane tetelo ebete atumu ba꞉bi hiliyonomo komo atamo hibinomolo kikaa꞉mema꞉ne.
2CO 1:23 Ba꞉bema꞉ numa꞉la꞉, Godote naeno tepo ipuwoeno komokomo ba ulamelenamena, ebete naeno tabo hibi tabonomoma꞉ goe, ba꞉ma ka꞉na na eta ko temeteme la꞉tamo ikalamema꞉ ubiha꞉ma꞉ edimo, ba꞉bema꞉ nale naeno nopo hiya꞉ma꞉ miditi la꞉eno Kolini habamo kapeha꞉.
2CO 1:24 Huiyatiya ale la꞉ mabuma꞉ kebe oko kowatinama꞉, ba꞉be oko komoma꞉ ukui kubamo akalawa꞉la꞉. Numa꞉la꞉, Godokono hibi kalakalate la꞉eno tepo ipuwalo kitanama꞉ ale oko ba꞉bema꞉ owatinama꞉, mabu a iya꞉tawahala la꞉ hibima꞉ midi ipuwalo kodakodalo la꞉mota꞉hanamata, iyo, a ubihinola la꞉le a la꞉eno kokopima꞉ ka꞉milo aeno ukui komamo la꞉le la꞉eno menemene komago dito papamila꞉hale!
2CO 2:1 Ba꞉bema꞉ nale la꞉ mabuma꞉ ukui ba꞉ma ka꞉na ihatimo, ba꞉ma tetelo nale la꞉tamo a꞉kapa꞉mo, mabu nale da꞉pemo, diyala, la꞉le kalakala nagodone laweheno huiyatiya menemene komo kapiya da꞉ laweoma.
2CO 2:2 A꞉iye! Nale la꞉ menemenema꞉ da꞉pimidilima, ba꞉be menemene komote ba itana la꞉ ipuwalo kalakala natamo pote na꞉kikanamemene? Lumagi puliyala, da꞉ a꞉kalutamene!
2CO 2:3 Ba꞉ hibila, nale dopamo naeno eta leta la꞉tamo dododimo, ba꞉ba tetelo na ubiha꞉ma꞉ edimo, nale la꞉tamo ba puluhuku la꞉godone kalakala laweheno huiyatiya menemene komo kapiya pelawe. Iyo, nale ba꞉ma ka꞉na emalagidoluimo, “Wadiyala kalakala komote iba꞉godone natamo na꞉puluhukamene, menemene komoteha꞉!” Ba꞉bene nale la꞉eno komoma꞉ ba꞉moe eta komo hibima꞉ ba midina ba꞉bo kemalagidoluimo, “Keba tetelo naeno tepo ipuwalo kalakalate ditanamene, ba꞉ba tetelo iba꞉te ba꞉ atumu nago hibilo kokalakalahama꞉na꞉.”
2CO 2:4 Ba꞉moe ba꞉be mabuma꞉ nale la꞉tamo dopo leta ba ododi la꞉ mabuma꞉ ukui bilibilima꞉ eda꞉te ko temetema꞉go ba꞉gala ihi baida꞉go tabo ba꞉bo miya꞉timo, mabu na ubihinola naeno tabo komote la꞉ menemenema꞉ midili. Ao, na huiyatiya naeno ubi ba꞉ma ka꞉na ihatimo, nale malemalelo la꞉ konomamo demalagidolenama, la꞉le ba꞉be komo naeno tabo uliho komodo hibilo kiya꞉tawahama꞉nemata.
2CO 2:5 Ba꞉bema꞉ numa꞉la꞉, la꞉ ipuwalo pote konomo kuba dododi, ba꞉be lumagino kuba ododi komodo menemene komote na kapiyatamo kuluhukuha꞉, ao, la꞉ hiliyonomate ba꞉be atu menemene komo nanekele iya꞉tawatepahuimata. Huiyatiya nale ba꞉moe tabamo ba꞉ma ka꞉na kagoeha꞉, la꞉le ba꞉be dawoeno komo kubanomoma꞉ ba ga꞉la eta kuba huiya ebetamo gala ikame,
2CO 2:6 ao, ebete la꞉ komopi hiliyonomagodone dopamo da꞉lawi ba꞉be kuba huiyate ba꞉ modoboma꞉ edi.
2CO 2:7 Ba꞉bema꞉ wadiyala la꞉ ba꞉ma tetelo ebeno kuba egebolemete nadodoma꞉la꞉, iyo, gelebadi komo ebetamo nikama꞉la꞉, ebete la꞉eno malemale hawakalimiha꞉ mabuma꞉ menemene konomo lawete kuiyodopoma꞉ dito eda꞉kapoma꞉.
2CO 2:8 Ba꞉be mabuma꞉ nale la꞉ betoelameholemata, la꞉le ebe malemalelo demalagidolonama, wadiyala la꞉ ba꞉be komo ebetamo gala na꞉kahawakalima꞉la꞉.
2CO 2:9 Ba꞉ hibila, nale dopamo naeno eta leta la꞉tamo ododimo mabu na ubi ba꞉ma ka꞉na ihatimo, la꞉eno ododili komodo la꞉ kopawilima꞉, ba꞉ma ka꞉na la꞉le naeno tabamo da꞉papamila꞉homa o da꞉ a꞉kapapamila꞉hamata.
2CO 2:10 Ba꞉bema꞉ numa꞉la꞉, keba tetelo la꞉ eta lumagino kuba ododi komo egebolemete dadodomema, ba꞉ba tetelo na ebeno kuba atumu dito kegebolemema꞉nemo, huiyatiya diyala, ba꞉ma tetelo ba꞉bako kubate la꞉ ipuwalo hibilo da꞉ kitanaha꞉. Ba꞉ hibila, nale eta lumagino kuba egebolemete dadodomemo, nale ba꞉be komo Kelisokono holoholo hapulu la꞉ mabuma꞉ kododima꞉nemo,
2CO 2:11 mabu na ubihinola Saitanate ago ba alaholohona ebete ebeno eta ha꞉da amiho gabodo atamo heloma꞉ eda꞉. Iyo, a iya꞉tawahala ebete tawakalubi ebeno gubi ipuwamo kebe hiya꞉hiya꞉ gabodo da꞉magatalenako!
2CO 2:12 Ba꞉bema꞉ wadiyala la꞉ niya꞉tawahala꞉, nale Kelisokono Hido Tabo Talowase habalo konolamagima꞉ ebamo da꞉nuluhukuimo, Kodawate gigiho natamo ya꞉lo a꞉hiya꞉mida ba itana ba꞉bo numimo.
2CO 2:13 Huiyatiya ba꞉ba tetelo nale aeno hibima꞉ midi ekawi Taitasiko nipo da꞉nohowadimo, ba꞉bema꞉ nale ukui bilibilima꞉ ba eda꞉ Talowase hibima꞉ midipi tiyolo miya꞉palete ba꞉moe Ma꞉sadoniya hopamo ba꞉ dito pimo.
2CO 2:14 Numa꞉la꞉, ba꞉moe hopoeno eta ko gawadubuino ododi komo ba꞉ma ka꞉nala, alaholo ipuwalo puya꞉tamo helonomoma꞉ deda꞉mene, ebete ba꞉bi tawakalubi hala꞉mo matuhulameholete ibi ebeno haba tulinomodo dopalamete dito komagatalema꞉ne ebeno awagaha komo hibilo kohawakalimima꞉. Ba꞉bema꞉ a Godotamo kalakala tabo kadipatiya꞉, mabu Kelisoko ipuwalo a puya꞉te ebeno hibi okopima꞉ deda꞉hanama꞉ ebete a ba꞉ ba꞉ba ka꞉na dopaa꞉mena ebe ha꞉kiya ebe kawagaminanama꞉. Iyo, ebe ubila ebete a hopo haba konomodo ba magatoena tawakalubi hiliyonomate Kelisokono komo agodolo ba꞉ma ka꞉na kiya꞉tawahama꞉na꞉, ebe ba꞉ hido nibote keba ka꞉na ka꞉patena ba꞉ ba꞉ba ka꞉nala.
2CO 2:15 Ba꞉ hibila, Godoko adikumidawate eta hido nibo ilina ebe owatidoloenoma꞉ koa꞉mo dito dihatenako, Kelisote a Godotamo ba꞉ ba꞉ba ka꞉na ikaa꞉mehoiya꞉, ba꞉bema꞉ puya꞉te ka꞉ka꞉ mula꞉ gabodo da꞉tolamena ba꞉gala puya꞉te hoe gabodo da꞉tolamena ibi hiliyonomatamo Kelisokono hido nibote agodone patena.
2CO 2:16 Iyo, puya꞉te hoe gabodo da꞉tolamena iba꞉te ba꞉be nibo kuba hoe ikame komoma꞉ ga꞉lana, huiyatiya puya꞉te ka꞉ka꞉ gabodo da꞉tolamena iba꞉te ba꞉be atu nibo hido ka꞉ka꞉ ikame komoma꞉ ga꞉lana. Ba꞉bema꞉ a Kelisokono hibi okopi hiliyonomo ipuwalo pote modoboma꞉ keda꞉na ebeno oko kowatinama꞉? Lumagi puliyanomola mabu aeno helote hibilo kitanaha꞉.
2CO 2:17 Ba꞉bema꞉ numa꞉la꞉, a puya꞉te hibi oko dowatinama꞉ ba꞉gala puya꞉te kateneno ubi komamo dowatina, aeno komo ba꞉gala ibino komo hiya꞉hiya꞉la, mabu iba꞉te Godokono Tabo olamagimi oko ba owatina, ulihopa꞉godone mani uwatema꞉ konomamo emalagidolonaka, ilina kolowamipa꞉te ibino ilina kolowami habamo kebe ukuido ka꞉watanaka ba꞉ba ka꞉na. Huiyatiya a hibi okopino komo ba꞉ma ka꞉nala, Godote a ebeno oko owatima꞉ hibilo uwatiya꞉, ba꞉bema꞉ ale ebeno holoholo hapulu ba la꞉mota꞉hana eta ha꞉da amiho tabo olamagimihino, ale Kelisokono ukui tabo kapiya bolamagiminakoma꞉.
2CO 3:1 Huiyatiya modoboha꞉ la꞉le ba꞉ma ka꞉na emalagidolo, a hibi okopa꞉te a ha꞉kiya a ba꞉moe tabamo dawagaminoema꞉. A꞉iye, komo okopa꞉te ibino komo kohawakalimima꞉ iba꞉te komopino letago keba ka꞉na ka꞉wapata꞉lamenaka, ale la꞉tamo ba꞉ba ka꞉na a꞉kapelama꞉lema꞉ mabu la꞉le aeno komo ya꞉lo iya꞉tawahuimata! Ba꞉gala a atumu ubihinola ale la꞉godone eta hopoeno sose tawakaluba꞉tamo ba nikuli, la꞉le a mabuma꞉ iba꞉tamo ba꞉bako leta ba꞉bo ododili!
2CO 3:2 Numa꞉la꞉, la꞉ Kolini sose tawakalubi la꞉ ba꞉ aeno hibi komo hawakalimino letalata. Iyo, Kelisote ebe ha꞉kiya aeno tepo ipuwamo la꞉eno komokomo bimiya꞉ti, hopo habanapi hiliyonomate ba꞉bi tabo ba ka꞉lamihole la꞉eno komo ba꞉gala aeno komo hibinomolo kiya꞉tawahama꞉.
2CO 3:3 Ba꞉ hibila, ebeno leta ododi tetelo la꞉eno komo kohawakalimima꞉ ebete hopo haboeno baelo pene kalaweha꞉ ba꞉gala ebete atumu ba꞉moe hopoeno tabo miya꞉teno koko dilidili nakola kuwateha꞉. Ao, ebete huiyatiya Ka꞉ka꞉ Godokono Gobogoboeno heloamo ba꞉be leta ba ododi aeno tepo ipuwanomamo la꞉eno komokomo ba꞉bo miya꞉ti, ba꞉bene ebete a hiya꞉hiya꞉ hopamo oea꞉mi hiya꞉hiya꞉ tawakaluba꞉te la꞉eno komo a ipuwado hidamo kiya꞉tawahama꞉.
2CO 3:4 Numa꞉la꞉, aeno Kelisoko ipuwalo emede komodo ale Godoko hibima꞉ ba midina la꞉eno komo hawakalimima꞉ ba꞉moe tabo ba꞉bema꞉ ga꞉lama꞉,
2CO 3:5 huiyatiya a iya꞉tawahala, a ha꞉kiya aeno heloamo Godokono oko mabuma꞉ eta tabo ga꞉la modoboha꞉. Huiyatiya kalakala konomola, ale ebeno oko kowatima꞉ ebe kapiyate a a꞉modobuia꞉menako,
2CO 3:6 iyo, Godote modobo helo atamo ya꞉lo ikaa꞉miya꞉ ale ebeno uli nopo komodo tawakaluba꞉tamo owalubi oko kowatinama꞉. Ba꞉bema꞉ numa꞉la꞉, ebete dopamo ebeno hiya꞉hiya꞉ Tutumu Tabo ba꞉moe hopoeno netewa koko nakola hunamo keba ka꞉na ka꞉miya꞉tiya꞉, ebete ba꞉ma tetelo ebeno uli nopoeno tabo ba꞉ba ka꞉na kamiya꞉tiya꞉ha꞉, mabu ba꞉bi pakala Tutumu Tabo komodo hopo habanapa꞉te hoe huiya kapiya belawenaka. Iyo, ba꞉ma tetelo ebete ebeno uli nopo ebeno Gobogoboeno heloamo ba꞉bema꞉ hawakalimiya꞉, mabu ba꞉be Gobogobo ba꞉ hibi ka꞉ka꞉ tawakaluba꞉tamo dikalamena ba꞉be hido Owalubidawala.
2CO 3:7 Ba꞉ hibila, Godote dopamo ebeno Tutumu Tabo koko nakola hunamo miya꞉tete Mosesetamo ba ikame ba꞉be atu tetenomolo ebete ebeno konomo alo ebetamo ba꞉bo hawakalimiya꞉. Ba꞉be mabuma꞉ Mosesekono holoholote a꞉la꞉minanomoma꞉ ediya꞉, ba꞉bene ebete tawakaluba꞉tamo gala da꞉kapuluhukuya꞉ ba꞉be a꞉la꞉mina komo ha꞉kiya ba wibonato iba꞉te huiyatiya ebetamo gahilamehole kamodobuya꞉ha꞉. Ba꞉bema꞉ numa꞉la꞉, tawakaluba꞉tamo hoe huiya dikalamena ba꞉bi Tutumu Taboeno nopote Godokono alago ba꞉ba ka꞉na da꞉puluhukuya꞉,
2CO 3:8 ba꞉be komodo a iya꞉tawahala, ebeno Gobogobogodone galane tetelo duluhukuya꞉ ba꞉be nopoeno alo bada konomola꞉ka꞉, iyo, ba꞉be uli a꞉la꞉minoeno helote dopo a꞉la꞉minoeno helo na꞉gogolona!
2CO 3:9 Ba꞉ hibila, Godote ebeno dopo nopoeno komodo tawakalubi kuba ododilipima꞉ ka꞉laminako, huiyatiya ba꞉be kuba huiya ikalame nopote ebeno konomo alago uluhukuya꞉. Ba꞉bema꞉ ba꞉be komote a ba꞉ma ka꞉na iya꞉tua꞉mena, Godote ba꞉ma tetelo kebe uli nopoeno komodo tawakalubi ebeno tuputupupima꞉ da꞉ka꞉laminako, ba꞉be uli nopoeno a꞉la꞉mina helote dopo nopoeno a꞉la꞉mina helo hibinomolo na꞉gogolona!
2CO 3:10 Ba꞉moe ba꞉be mabuma꞉ ale dopamo tetelo kebe nopo konomo a꞉la꞉mina komoma꞉ da꞉ga꞉lanakuima꞉, a tetelo uli nopoeno hibi konomo a꞉la꞉mina komote ba꞉be dopo komoeno haba da꞉pelawiya꞉, ale ba꞉be uli komo ba umi ukui hiya꞉ma꞉ midiliti ba꞉bo ga꞉luya꞉ma꞉, dopo komo ba꞉ hibi a꞉la꞉mina komoha꞉, iyo, pakala nopoeno a꞉la꞉mina komote aeno ukuilo ba꞉ dito wibadiguya꞉.
2CO 3:11 Numa꞉la꞉, kebe nopote agodolo tete nanekele kitanatepama꞉ dopamo duluhukuya꞉, ba꞉be nopoeno a꞉la꞉mina komote hibilo itanami huiyatiya galane ha꞉kiya wibuya꞉, ba꞉bema꞉ ba꞉be komodo a hibilo iya꞉tawahala, kebe uli nopote Godokono ubilo emedena emedena tetelo ditanamene, ba꞉be nopoeno a꞉la꞉mina helote dopo a꞉la꞉minoeno helo konomamo na꞉gogolona!
2CO 3:12 Ba꞉gala eta komo. A Godokono hibi okopa꞉te ebeno konomo a꞉la꞉mina komo hibilo kumima꞉ uliholo bemedenama꞉, ba꞉bema꞉ ale toleheno Hido Tabo olamagimi oko helonomamo bowatinakoma꞉.
2CO 3:13 Huiyatiya a puya꞉te ba꞉ma tetelo oko dowatinama꞉ a Moseseko huiyaha꞉, mabu ebeno holoholote a꞉la꞉minama꞉ dediya꞉, ba꞉ba tetelo ebe ubiha꞉ma꞉ ediya꞉ Isalaela tawakaluba꞉te ba꞉be a꞉la꞉mina komote ebegodone wibadigalo umi, iyo, ebete ba꞉be komo iba꞉tamo kawaminama꞉ ebeno holoholo kalikamo ba꞉bema꞉ muliya꞉.
2CO 3:14 Numa꞉la꞉, Moseseko tetelo Isalaela tawakaluba꞉te Godotamo wato kodakodahibinomoma꞉ eda꞉hanama꞉, iyo, Mosesete ebeno holoholo kalikamo keba ka꞉na ka꞉muliya꞉, Godote ba꞉ ba꞉ba ka꞉na ibino tepo ipuwoeno ukui atumu a꞉kamula꞉lelamiya꞉ iba꞉te du ipuwalo kemedehonama꞉. Ba꞉bema꞉ ba꞉ba tetene tupuimiti ba꞉ma teta꞉mo puluhuku ibino ukui komate ba꞉ ba꞉ba ka꞉na du ipuwalo pola꞉lama꞉nama꞉, iyo, Mosesete Godokono Bukamo pakala nopoeno hiya꞉hiya꞉ Tutumu Tabo ba꞉gala komo owalubi tabo da꞉miya꞉tiya꞉, iba꞉te ba꞉bi komokomo ba ka꞉lamihole ba꞉bi taboeno ipuwa hibilo kuwatenaha꞉. Huiyatiya numa꞉la꞉, keba tetelo lumagiti Kelisokoba꞉ kemedenama꞉ ebetamo da꞉pemene, Godote ba꞉be komo kapiyado ebeno tepo ipuwa mula꞉meno kaliko ebegodone kolawemema꞉ne,
2CO 3:16 iyo, kalakala konomola, lumagiti aeno Kodawatamo dohobigamene ba꞉ba tetelo Godote ebeno tepo ipuwoeno du komo ebegodone hibinomolo kuluhukutimima꞉ne.
2CO 3:17 Ba꞉bema꞉ numa꞉la꞉, aeno Kodawa ba꞉gala ebeno Gobogobo ibi ba꞉ kapiyala, ba꞉bema꞉ ba꞉be Kodawoeno Gobogobote kebe lumagigodolo demedena ba꞉be lumagiti hibi tutu emede komo kiya꞉tawama꞉ne.
2CO 3:18 Iyo, kalakala konomola, ba꞉be mabuma꞉ a hibima꞉ midipi hiliyonomate ba꞉ma ka꞉na bemedehonama꞉, aeno holoholo komula꞉lema꞉ eta komote itanaheno Kodawoeno konomo a꞉la꞉mina komote a ipuwane hibinomolo uluhukunako. Ba꞉ hibila, aeno Kodawa ba꞉gala ebeno Gobogobo iba꞉te kapiyanomoma꞉ deda꞉na, ba꞉bema꞉ ebegodone duluhukuna ba꞉gala agodone da꞉kuluhukuna ba꞉be a꞉la꞉mina komo atumu ba꞉ kapiyala. Ba꞉bema꞉ numa꞉la꞉, ba꞉be a꞉la꞉mina komote a ipuwalo hido oko ba owatina a hiya꞉nomo tawakalubima꞉ midina. Iyo, lumagiti wakolado hunamo keba ka꞉na ka꞉nodolonako ale ba꞉ ba꞉ba ka꞉na Kodawoeno konomo a꞉la꞉mina hawakalimi komodo alehawaminanama꞉, ba꞉bema꞉ galane tetelo ale ebeno holoholonomoma꞉ hibinomolo koneda꞉hama꞉nema꞉.
2CO 4:1 Ba꞉bema꞉ a puya꞉te Godokono hibi okopima꞉ deda꞉hanama꞉ ale oko owati ipuwalo kuiyodopoma꞉ a꞉keda꞉hama꞉, mabu Godote ebeno malemale komodo ba꞉moe hido oko atamo dito ikaa꞉miya꞉.
2CO 4:2 Ba꞉be mabuma꞉ ale ba꞉moe oko hidamo kowatinama꞉, hopo habanapa꞉te kebe hiya꞉hiya꞉ hilopo komo diya gabodo dododilina ale ba꞉bi hiliyonomo komo gunima꞉mo ya꞉lo ihilateliya꞉ma꞉. Ba꞉gala ale Godokono taboeno ipuwa komokomo hibinomolo ba hawakalilame, tabo ulihopa꞉te aeno ubi komamo kopapamila꞉halema꞉ ale ha꞉da amiho gabodo ibi dito kakalakaluilamenaha꞉. Ao, ale Godokono umi ipuwalo demedenama꞉ ba꞉be komo ba emalagidolona, ale ebeno hibi komo hawakala ba꞉bema꞉ olamagiminakoma꞉, mabu a ubila aeno tabo ulihopi hiliyonomate ibino tepo ipuwoeno mulu ukui komago ba꞉ma ka꞉na koga꞉lama꞉na꞉, a ba꞉ Godokono hibi okopima꞉ eda꞉hanama꞉, ba꞉bene iba꞉te ebeno iya꞉tulame tabo komokomo agodone hidamo kuwatema꞉na꞉.
2CO 4:3 Numa꞉la꞉, ale Hido Tabo ba olamagimi huiyatiya ba꞉be taboeno ipuwate ulihopa꞉godone awaminalo ditanamene, ibi ipuwalo puya꞉te hoe gabodo da꞉tolamena ibi kapiyate ba꞉be ka꞉ka꞉ taboeno ipuwa a꞉kalawa꞉mena꞉.
2CO 4:4 Iyo, iba꞉te Kelisoko hibima꞉ kamidinaha꞉ mabu Saitanate ba꞉moe hopo konomolo hibima꞉ midiha꞉pino godoma꞉ ba eda꞉na, ebete ibino tepo ipuwoeno ukui duma꞉ ya꞉lo a꞉midililamiya꞉ iba꞉te Hido Tabo ipuwane duluhukuna ba꞉be alo umikapoma꞉. Huiyatiya numa꞉la꞉, Kelisogodolo konomo a꞉la꞉mina komote ditana ebeno Hido Tabote ba꞉be komo ba꞉ma ka꞉na hawakalimina, ebe ba꞉gala Godoko ibi ba꞉ kapiya holoholonomola.
2CO 4:5 Ba꞉moe ba꞉be mabuma꞉ a ha꞉kiya a ba awagaminoe aeno komoma꞉ tabo kolamagiminaha꞉, ao, a huiyatiya Hido Tabo olamagimi ipuwalo Kodawa Ya꞉su Kelisokono komo kapiya ba hawakalimina, ebe mabuma꞉ a ha꞉kiya a la꞉eno huiyaha꞉ okopima꞉ midinama꞉.
2CO 4:6 Ba꞉ hibila, Godote ba꞉ dopamo ba꞉ma ka꞉na goiya꞉, “Alo, ama꞉ du ipuwane puluhukuti na꞉pa꞉la꞉mina,” ba꞉bema꞉ a tetelo ba꞉moe atu Helodawate ebeno alamo aeno tepo ipuwa a꞉pa꞉la꞉minalea꞉miya꞉, Kelisokono holoholo ipuwane duluhukuna ba꞉be a꞉la꞉mina komodo ale Godokono konomo alo hidonomamo kuminama꞉.
2CO 4:7 Huiyatiya numa꞉la꞉, a puya꞉te Godokono hibi okopima꞉ deda꞉hanama꞉ aeno komo ba꞉ ba꞉ma ka꞉nala. Ale kubadopo gebeto hakamo ododili kalilima꞉ ba eda꞉hana, ebete ebeno huiya konomo ka꞉ka꞉ tabo a ipuwamo dito ihatiya꞉, mabu ebe ubila ba꞉be tabote a ipuwalo ba itana a ba꞉bo kiya꞉tawahama꞉nema꞉, ba꞉be ka꞉ka꞉ taboeno konomo a꞉la꞉mina helo aenoha꞉, ba꞉ ebenola.
2CO 4:8 Ba꞉be mabuma꞉ hiliyonomo hiya꞉hiya꞉ gabodo temeteme komate atamo ikulihonaka, huiyatiya ba꞉bi komate aeno ka꞉ka꞉ mula꞉ komo lawema꞉ gabo duhimi modoboha꞉. Ba꞉gala ukui bilibili komate atamo a꞉pelamenaka, huiyatiya ba꞉bi komate oko gunima꞉mo ihiti ukui atamo ikaa꞉me modoboha꞉.
2CO 4:9 Ba꞉gala atamo hiya꞉hiya꞉ alaholohopa꞉te a꞉mahila꞉halenaka, huiyatiya iba꞉te atamo temeteme ikaa꞉me ipuwalo Godote a a꞉kamiya꞉poa꞉le. Ba꞉gala komo hiliyonomo tetelo iba꞉te a kubamo alukuinaka, huiyatiya ebete ibi na꞉duhilamena iba꞉te a hibinomolo kubahia꞉mekapoma꞉.
2CO 4:10 Ba꞉bema꞉ hibila, hiya꞉hiya꞉ tete hiliyonomolo ale ba꞉moe hopolo aeno ha꞉laha apa꞉go ba wapata꞉lamena, ale aeno temeteme komodo hiya꞉hiya꞉ tawakaluba꞉tamo Ya꞉sukunu hoe komo ba꞉hawakaliminakoma꞉, mabu a ubila iba꞉te atu tetelo ebeno ka꞉ka꞉ agodolo hibinomolo umi.
2CO 4:11 Iyo, ale Ya꞉suku mabuma꞉ ba꞉moe hopolo ba emedena atamo hiya꞉hiya꞉ hoe olalati komate ba꞉bo pelamenaka, mabu ebe ubila ba꞉moe hopo habanapa꞉te ebeno ka꞉ka꞉ aeno ha꞉laha apeno temeteme komodo umi.
2CO 4:12 Ba꞉bema꞉ kalakala konomola, keba tetelo ba꞉bako hoe komote a ipuwalo oko dowatina, ba꞉be atu tetelo Ya꞉sukunu hibi ka꞉ka꞉te la꞉ ipuwalo oko ba꞉ka-owatina.
2CO 4:13 Ba꞉ hibila, Godokono Bukalo ebeno eta okodawate tabo dopamo ba꞉ma ka꞉na goiya꞉, “Nale Godoko hibima꞉ ba midina tabo ba꞉bema꞉ olamagimo.” Ba꞉bema꞉ numa꞉la꞉, a ba꞉ atumu, aeno tepo ipuwoeno gobogobate atu hibima꞉ midi komo ba lawe, ale Godokono tabo ba꞉bo olamagiminakoma꞉ mabu ale ebe hibima꞉ na꞉midinama꞉.
2CO 4:14 Iyo, a ba꞉moe komo iya꞉tawahala, pote aeno Kodawa Ya꞉suku ka꞉ka꞉mo dadipatiya꞉, ba꞉be Helodawate ebe keba ka꞉na ka꞉ka꞉kimiya꞉, ebete ba꞉ ba꞉ba ka꞉na a ebeno hibi okopi ka꞉ka꞉mo atumu kowadiya꞉paa꞉tema꞉ne, ba꞉bene ebete la꞉la, ala, a hiliyonomo ebeno holoholo hapuamo hibilo ba꞉ dito komagatoema꞉ne.
2CO 4:15 Ba꞉gala ba꞉moe eta komo na꞉kuma꞉la꞉, la꞉ tabo ulihopi mabuma꞉ ale aeno hiya꞉hiya꞉ temeteme komo biya꞉tawahanakoma꞉. Ba꞉be mabuma꞉ ba꞉ma tetelo Godokono malemale komote hopo haba konomamo ba tona, komo hiya꞉hiya꞉ tawakaluba꞉te ibino dopo tetenomolo ebeno tabo dulihonakomena꞉, ibi ipuwalo komo hiliyonomate kalakala tabo ebetamo ga꞉la ba꞉bo kotupuimima꞉na꞉, iyo, ba꞉be komodo iba꞉te ebe hibinomolo kawagaminama꞉na꞉.
2CO 4:16 Ba꞉moe ba꞉be mabuma꞉ ale oko ipuwalo kuiyodopoma꞉ a꞉keda꞉hama꞉. Iyo, ale aeno ha꞉laha apeno ka꞉ka꞉te hopamo hitigalo duminama꞉, a huiyatiya ba꞉moe eta komo kalakalago biya꞉tawahanama꞉, aeno tepo ipuwoeno ka꞉ka꞉te Godogodone ba pena, eta hegelalo eta helo kalawe, eta hegelalo eta helo kalawe, ba꞉ ba꞉ba ka꞉na ba꞉be hibi ka꞉ka꞉ komoeno helote a ipuwalo hunamo odolona.
2CO 4:17 Ba꞉bema꞉ hibila, ba꞉ma tetelo ale kebe temeteme komokomo diya꞉tawahanakoma꞉ ale ba꞉bi komo hegehegenomo komoma꞉ ga꞉lanama꞉, mabu a iya꞉tawahala ba꞉bi komate emedena emedena tetelo agodolo a꞉kapola꞉namena꞉. Iyo, ba꞉bi temeteme komodo ale wiboha꞉ a꞉la꞉mina huiya konomo konelawema꞉nema꞉, ba꞉bema꞉ ba꞉be hido teteno kalakala komote ba꞉ma teteno temeteme komo hibinomolo konomamo konegogoloma꞉ne.
2CO 4:18 Ba꞉bema꞉ numa꞉la꞉, ba꞉ma tetelo ale ba꞉moe hopolo kebe hiliyonomo komo aeno baida꞉mo dulamenama꞉, ale ba꞉bi komo hibilo kemalagidolenaha꞉, a huiyatiya tawakaluba꞉te ibino baida꞉mo ulamema꞉ modoboha꞉ma꞉ deda꞉hana, ba꞉bi komokomo kapiya konomamo emalagidolonama꞉. Ba꞉ hibila, ba꞉bi komate emedena emedena tetelo Godogodolo ba꞉pola꞉namena꞉, huiyatiya hopo habalo da꞉pola꞉na ba꞉bi ilinate na꞉wibohona.
2CO 5:1 Ba꞉bema꞉ a hibima꞉ midipi iya꞉tawahala, a ba꞉moe hopolo ba emedena aeno ha꞉laha apa꞉te ba꞉ tawakaluba꞉te kubadopo mimiya tumulu detemoteholena ba꞉bi mimiya huiyala. Huiyatiya kalakala konomola, ba꞉ma tetelo da꞉pola꞉ma꞉na ba꞉bi mimiyate da꞉kubakubahamena꞉, Godote a mabuma꞉ kebe ulinonomo genama ebeno Hunu Habalo detiya꞉, ale ba꞉be hibi genama lawete emedena emedena tetelo ba꞉bolo bemedenama꞉. Numa꞉la꞉, nale da꞉goemo ba꞉be tabo ba꞉ gola, mabu lumagiti kebe uli genama Godogodone da꞉nelawemene ba꞉be genama ba꞉ ebeno uli ka꞉ka꞉ apela, iyo, Godote ba꞉be genama ha꞉kiya etiya꞉, ba꞉moe hopo lumagitiha꞉.
2CO 5:2 Ba꞉bema꞉ hibila, ba꞉ma tetelo ale temetema꞉go ba ihimina aeno ubi komo konomamo ihatenama꞉, Godote a ba꞉be Hunu Haboeno genamamo tiyonomolo konewadipima꞉. Numa꞉la꞉, a ba꞉be hibi genama da꞉nelawema꞉,
2CO 5:3 ba꞉be komo ba꞉ lumagiti uli hidonomo kaliko keba ka꞉na ka꞉pulinako ba꞉ba ka꞉nala, iyo, ebete uli kaliko kalakalago kolawema꞉ne mabu ebete kalikoheno hilopago emede ubihinola.
2CO 5:4 Ba꞉ hibila, ale hopo haboeno apa꞉go ba emedena ba꞉moe hopoeno hiya꞉hiya꞉ menemene ipuwalo ihiminama꞉, huiyatiya aeno ukui komote ba꞉ma ka꞉na kitanaha꞉ ale ba꞉moe hopoeno ape dito miya꞉pale. Ao, ale ba꞉ma tetelo aeno ape modobodopoma꞉ ga꞉lanama꞉, huiyatiya ba꞉moe atu tetelo ale Hunu Haboeno uli emede ape uwatema꞉ ubi konomamo ihatenama꞉, mabu a iya꞉tawahala ale hibilo da꞉nuwatema꞉, ba꞉ba tetelo wiboha꞉ uli emede ka꞉ka꞉ komote aeno pakala emede ape ba mula꞉lea꞉me ba꞉bi ape hiya꞉ma꞉ ba꞉bo komidilima꞉ne.
2CO 5:5 Ba꞉bema꞉ numa꞉la꞉, ale ba꞉be uli emede ka꞉ka꞉ kolawema꞉ pote a da꞉hiduia꞉miya꞉ ba꞉be Helodawa ba꞉ Godotela. Iyo, ebete ebeno Gobogobo atamo dito ikaa꞉miya꞉, ba꞉bema꞉ ale ba꞉be komodo ba꞉ma ka꞉na kiya꞉tawahama꞉nema꞉, kebe hidohido komate ebegodolo da꞉pola꞉na, galane tetelo ebete atumu ba꞉bi hiliyonomo komo atamo hibinomolo kikaa꞉mema꞉ne.
2CO 5:6 Ba꞉gala eta komo. Ale aeno hibima꞉ midi ipuwalo toleheno kalakalago bemedenama꞉, mabu a iya꞉tawahala ale ba꞉moe hopoeno apa꞉go ba emedena aeno uli ka꞉ka꞉ apa꞉te aeno Kodawagodolo ebeno Hunu Habalo ba꞉nepola꞉ma꞉na. Huiyatiya numa꞉la꞉, ba꞉be hido ka꞉ka꞉te a muhulunomolo ditana,
2CO 5:7 ale ba꞉be komoma꞉ ubiha꞉ma꞉ keda꞉hanaha꞉, ao, a toleheno kalakalago bemedenama꞉ mabu ale ba꞉ma tetelo aeno baida꞉mo kebe komokomo ulamema꞉ modoboha꞉ma꞉ deda꞉hanama꞉, ale hibima꞉ midi ipuwalo ba wapata꞉lamena ba꞉bo biya꞉tawahanama꞉, ale ba꞉bi komo galane tetelo hibinomolo kulamema꞉nema꞉. Iyo, hibila, a ubi konomola ba꞉moe hopo haboeno ape miya꞉pate aeno Kodawoeno uli genamalo eba꞉go konemedenama꞉,
2CO 5:9 huiyatiya ale ba꞉moe hopolo tete ga꞉ga꞉nomolo demedenama꞉ o ba꞉moe hopo tiyolo miya꞉pate Hunu Habalo da꞉nemedenama꞉, ale hiliyonomo tetelo aeno Kodawa kapiya kalakaluimima꞉ aeno tepo ipuwoeno ubi konomamo ihatenama꞉.
2CO 5:10 Ba꞉bema꞉ ba꞉moe komo ba꞉ ko komonomola, a hiliyonomate Kelisotamo da꞉nikulima꞉, ebete Godokono ubi komodo aeno komokomo ba꞉bo kanagilamelea꞉mema꞉ne. Iyo, ale hopo haboeno apa꞉go ba emedena kebe hiya꞉hiya꞉ komo dododilinakoma꞉, ebete ba꞉bi hiliyonomo komoma꞉ atamo hido huiya ba꞉gala kuba huiya modobonomolo ba꞉bo kikaa꞉mema꞉ne.
2CO 5:11 Ba꞉bema꞉ numa꞉la꞉, a puya꞉te aeno Kodawoeno hibi okopima꞉ deda꞉hanama꞉, ale ebe toleme gabo ba iya꞉tawaha komopi hiliyonomo ba꞉bema꞉ kiyalamenakoma꞉ iba꞉te ebetamo kohobila꞉halema꞉. Iyo, Godote aeno hibi komo iya꞉tawanomola, huiyatiya na ubila la꞉ la꞉eno tepo ipuwoeno mulu ukui komago aeno komo ba꞉ atumu hidamo niya꞉tawahuya꞉la꞉.
2CO 5:12 Numa꞉la꞉, ba꞉moe tabamo a ha꞉kiya a kawagaminoeha꞉, ao, a huiyatiya aeno ubi komo ba꞉ma ka꞉na ihatema꞉, ale aeno hibi ododi komoma꞉ hidohido ukui la꞉tamo ba ikalame la꞉le a mabuma꞉ ba꞉bo kawagahama꞉nemata. Ba꞉bema꞉ la꞉eno sose ipuwalo puya꞉te komopino tepo ipuwoeno komokomo hibilo emalagidoleheno ba꞉bi tawakalubino hunu tama kapiyama꞉ dawagahana, ba꞉ba꞉te ibino kuba ukuia꞉go la꞉go dolowabeletihuima, ba꞉ba tetelo la꞉le modobo helo kolawema꞉nemata iba꞉tamo tabo hidamo kohuiyama꞉.
2CO 5:13 A꞉iye! Iba꞉te aeno hibi oko owati komoma꞉ a daedaepima꞉ da꞉ga꞉lana ba꞉be tabo hibila꞉ka꞉? Ao, hibiha꞉, huiyatiya la꞉ komopa꞉te tabo ba꞉ba ka꞉na da꞉ga꞉lama, kubaha꞉, mabu a ba꞉bo kemalagidoloma꞉nema꞉ ale Godoko kapiya kawagaminanama꞉ oko bowatinama꞉. Ba꞉gala eta tetelo la꞉le la꞉eno ukui hiya꞉ma꞉ miditi a daedaeha꞉pima꞉ da꞉kaga꞉lama, ba꞉be komote atumu modoboma꞉ keda꞉ma꞉ne, mabu ba꞉ba tetelo a ba꞉ma ka꞉na kemalagidoloma꞉nema꞉ aeno oko owati ipuwalo la꞉le hibi owalubi komo a꞉lawemata.
2CO 5:14 Numa꞉la꞉, oko owati ipuwalo Kelisokono malemale emalagidolo komo kapiyate a a꞉magatoenako, mabu ale ba꞉moe komo hibima꞉ na꞉midinama꞉, ebe kapiyate hopo habanapi hiliyonomo mabuma꞉ hoiya꞉, iyo, ba꞉be mabuma꞉ ibi hiliyonomate atumu ebe ipuwado a꞉kaha꞉lahuya꞉.
2CO 5:15 Numa꞉la꞉, ebete ibi hiliyonomo mabuma꞉ hoiya꞉, mabu Godoko ubihinola hopo habanapa꞉te ibi ha꞉kiya ibi kalakaluilamelo gala kakemedehonama꞉. Ebete huiyatiya ebeno ubi komo ba꞉ma ka꞉na ihatena, kebe Kodawate ibi mabuma꞉ da꞉hoiya꞉ iba꞉te ebe kapiya kokalakaluiminama꞉ nemedehonamena꞉, iyo, ebe ba꞉ Godote ka꞉ka꞉mo dadipatiya꞉ ba꞉be dawala.
2CO 5:16 Ba꞉be mabuma꞉ ale ba꞉ma tetene tupuimiti eta lumagino komo ba꞉moe hopo haboeno hunu tama gabodo gala a꞉kanagiya꞉midama꞉ma꞉. A꞉iye! Ale dopamo Kelisokono komo ba꞉ba ka꞉na kubamo anagiya꞉midamenakuima꞉, huiyatiya kalakala konomola, ale ba꞉be kuba ukui komo miya꞉palete ba꞉ma tetelo ebe hidamo buminama꞉.
2CO 5:17 Ba꞉bema꞉ kebe lumagiti Kelisoko ipuwalo demedena ebeno komo ba꞉ ba꞉ma ka꞉nala, ebeno pakala emede komote ebegodolo da꞉wibui, uli emede komote ebetamo ba꞉ dito pi, iyo, ba꞉ma tetelo ebe uli lumagima꞉ eda꞉na.
2CO 5:18 Numa꞉la꞉, ba꞉be hido okoeno hiliyonomo komo Godote ya꞉lo tetelo ha꞉kiya ododiliya꞉, iyo, ale dopamo eba꞉go alaholohopima꞉ ba eda꞉hana, ebete huiyatiya a uwatete Kelisokono ododi ipuwado a ebeno hidonomo mabulubima꞉ ba꞉bo midiya꞉. Ba꞉ba tetelo ebete ba꞉be atu hido oko atamo ba꞉ma ka꞉na ikaa꞉miya꞉, ale komo tawakalubi ebetamo ba magahele iba꞉te ago kapimilo ebeno hido mabulubima꞉ keda꞉hanama꞉.
2CO 5:19 Ba꞉bema꞉ ale hopo habanapi hiliyonomatamo tabo ba꞉ma ka꞉na olamagiminakoma꞉, Godote Kelisokono ododi komodo iba꞉tamo hido oko ba owatina ibi ebeno hido mabulubima꞉ ba꞉bo midiliya꞉, iyo, iba꞉te dopamo kebe kuba kododilinakui ebete ba꞉bi hiliyonomo komokomo ebeno ukuini ba꞉ dito egebolelamiya꞉. Ba꞉ hibila, a puya꞉te ba꞉moe oko dowatinama꞉, dopamo tetelo Godote a ebeno hibi okopima꞉ ba ka꞉mi ebete ba꞉moe oko atamo ba꞉bema꞉ ikaa꞉miya꞉, iyo, ebe ubila tawakaluba꞉te ebeno tabo a ipuwado kulihoma꞉.
2CO 5:20 Ba꞉moe ba꞉be mabuma꞉ ale ba꞉moe hopolo Kelisokono oko habalo ba la꞉mota꞉hana ale tawakaluba꞉tamo ba꞉ma ka꞉na olamagiminakoma꞉, “Ale la꞉ betoelamehola꞉ta, wadiyala la꞉ Godotamo haba nikama꞉la꞉, ba꞉bene la꞉le eba꞉go alaholoho komo dododinakoma, ebete la꞉ ba꞉be komone uluhukulatelete la꞉ ebeno hido mabulubima꞉ komidilima꞉na꞉ta.” Numa꞉la꞉, Godote a ipuwado ba꞉moe tabo bolamaginako, aleha꞉.
2CO 5:21 Ba꞉ hibila, Kelisote eta kuba ododi komo hibilo kiya꞉tawanamiha꞉, huiyatiya Godote a kowalubima꞉ aeno kuba ododili komo ebetamo miya꞉tea꞉mete ebe eta kuba ododilidawa huiyama꞉ ba꞉ dito midiya꞉, mabu ebete ebeno ubi ba꞉ma ka꞉na ihatiya꞉, ale Kelisoko ipuwalo demedenama꞉ ebete ba꞉be komodo a ebeno tuputupupima꞉ komidima꞉.
2CO 6:1 Ba꞉bema꞉ la꞉ nonolata, a Godokono hibi okopa꞉te eba꞉go oko ba owatina, ale la꞉ ba꞉ma ka꞉na toelamehola꞉ta, Godote hopo habanapa꞉tamo da꞉hawakalimiya꞉ la꞉ puya꞉te ba꞉be malemale komo da꞉lawima, la꞉ hidamo! Modoboha꞉ ba꞉be malemale komote la꞉ ipuwalo hibi oko owatihino la꞉ ipuwane hidohido gaote ba꞉bema꞉ a꞉kikulihamena꞉.
2CO 6:2 Iyo, Godote ebeno Bukalo eta tabo ba꞉ma ka꞉na goena, “Nale kebe tete hidoma꞉ da꞉goiya꞉mo, ba꞉ba tetenomolo nale la꞉eno toetoe tabo uliya꞉mo, iyo, nale la꞉eno ka꞉ka꞉ komula꞉lema꞉ kebe hegela modoboma꞉ da꞉goiya꞉mo, ba꞉be hegelanomolo la꞉ hibilo owalubiliya꞉mata.” Ba꞉bema꞉ la꞉ hidamo nulia꞉la꞉, ba꞉moe tete ba꞉ Godokono hido tetela, iyo, ba꞉moe hegela ba꞉ ebeno ka꞉ka꞉ mula꞉ hegelala.
2CO 6:3 Numa꞉la꞉, a ubihinola ale tawakaluba꞉tamo dowatinama꞉ etate ba꞉be oko kubama꞉ goe, ba꞉bema꞉ ale oko hidonomo ukuia꞉go owatinama꞉ ale komopino nato ukamidalepima꞉ eda꞉hakapoma꞉.
2CO 6:4 Ba꞉be mabuma꞉ a Godokono hibi okopima꞉ deda꞉hanama꞉, ale ba꞉be komo aeno hiliyonomo ododili ipuwalo kohawakaliminakoma꞉ aeno oko ipuwalo kodakodalo ba꞉bema꞉ la꞉mota꞉hanama꞉, iyo, hiya꞉hiya꞉ temeteme komo ba꞉gala menemene komo ba꞉gala olalati komate atamo dikulihonaka, ba꞉bi komoma꞉ ale oko a꞉kamiya꞉palema꞉.
2CO 6:5 Ba꞉bema꞉ numa꞉la꞉, komo tetelo hibima꞉ midiha꞉pa꞉te a alukuinaka, ba꞉gala komo tetelo iba꞉te a du genamamo dito iya꞉hekenaka, ba꞉gala komo tetelo iba꞉te tawakaluba꞉tamo helo ikalamenaka a kanakapua꞉mema꞉. Iyo, komo tetelo komopa꞉te a owalubihino a ha꞉kiya menemene oko owatihonakoma꞉, ba꞉gala komo tetelo u laha komote a a꞉miya꞉poenaka, ba꞉gala komo tetelo baa꞉ kape komote a ua꞉menako.
2CO 6:6 Huiyatiya ba꞉bako hiliyonomo komokomo ipuwalo Godote atamo dikaa꞉mena ba꞉be hido dalowa꞉ha꞉ emede komo, ba꞉gala ebeno mulu iya꞉tawa komo, ba꞉gala aeno tepo ipuwa kodakoduilame komo, ba꞉gala ebeno malemale hawakalimi komo, ale ba꞉bi hidohido komo kapiya behawakalilamenakoma꞉. Ba꞉bene ebeno Hido-talona Gobogobote a ipuwalo demedena ba꞉be komo, ba꞉gala ale tuputupu gabodo komopi konomamo demalagidolenama꞉ ba꞉be komo,
2CO 6:7 ba꞉gala ale ebeno Hibi Tabo dolamagiminakoma꞉ ba꞉be komo, ba꞉gala ebeno helote a ipuwalo oko dowatina ba꞉be komo, ale atumu ba꞉bi komokomo bekahawakalilamenakoma꞉. Numa꞉la꞉, Godokono tuputupu emede komote ba꞉ aeno alaholo gilima꞉ eda꞉na, ba꞉bako gila꞉te aeno kokoto netewalo ba꞉pola꞉na.
2CO 6:8 Ba꞉bema꞉ hibila, komo tetelo tawakaluba꞉te a hunamo a꞉wadiya꞉paa꞉tenaka ba꞉gala komo tetelo iba꞉te atamo hilopo ikaa꞉menaka, iyo, komo tetelo iba꞉te a kuba ododilipima꞉ a꞉ga꞉lanaka ba꞉gala komo tetelo iba꞉te a a꞉milia꞉mehoenaka. Ba꞉bene iba꞉te a ha꞉da amihopima꞉ a꞉ka꞉minaka, huiyatiya hiliyonomo tetelo ale hibi tabo kapiya bolamagiminakoma꞉,
2CO 6:9 iyo, iba꞉te a uwatema꞉ ubiha꞉ma꞉ ba eda꞉hana, huiyatiya Godote a kalakalago uwatenako. Ba꞉gala iba꞉te na꞉kaga꞉lana aeno olalati mabuma꞉ tatalila a ba꞉ koha꞉lahama꞉nema꞉, huiyatiya numa꞉la꞉, ale Godokono ubilo ka꞉ka꞉go bemedenama꞉, iyo, ale iba꞉godone koko temeteme iya꞉tawahanakoma꞉, huiyatiya ebete ibi na꞉duhilamenako aeno ka꞉ka꞉ hibinomolo kiya꞉hilia꞉mema꞉.
2CO 6:10 Ba꞉bema꞉ komo tetelo ale ihi baida꞉gopima꞉ eda꞉hanakoma꞉, huiyatiya hiliyonomo tetelo aeno tepo ipuwalo kalakala kapiyate itananako, ba꞉gala tawakaluba꞉te a awaepima꞉ ga꞉lanaka huiyatiya komo ibi hiliyonomo ale Godokono tepo ipuwoeno hidohido komamo dogodogopima꞉ midilinakoma꞉, iyo, iba꞉te a ilinaha꞉pima꞉ ka꞉minaka huiyatiya Godokono dogodogo komo hiliyonomate agodolo ba꞉pola꞉na.
2CO 6:11 O Kolini mabuluba꞉la꞉, numa꞉la꞉! Ale la꞉ ba emalagidolena aeno tepo ipuwoeno malemale gigihote la꞉tamo a꞉hiya꞉midalo bitana, iyo, ale eta hibi komo awaminaheno tabo la꞉tamo hawakala ba꞉bema꞉ olamagimima꞉. La꞉ huiyatiya la꞉eno tepo ipuwoeno gigiho atamo a꞉kalapilalimata,
2CO 6:13 ba꞉bema꞉ nale la꞉ naeno gugudima꞉ ba midili tabo ba꞉ma ka꞉na olamagimo, aeno tepo ipuwalo la꞉ mabuma꞉ ditana, wadiyala la꞉le ba꞉be atu malemale komodo la꞉eno tepo ipuwoeno gigiho atamo atumu na꞉ka-a꞉hilama꞉la꞉.
2CO 6:14 La꞉ hidamo! La꞉le eta oko owati ipuwalo hibima꞉ midiha꞉pa꞉go kapiyama꞉ akeda꞉hala꞉, mabu puya꞉te Godokono tuputupu ododilipima꞉ deda꞉hana ba꞉gala puya꞉te Godokono tutumu tabamo papamila꞉ha ubiha꞉ma꞉ deda꞉hana, iba꞉te eta komo kapimilo keba ka꞉na na꞉kododimina꞉? Iyo, alo ipuwalo da꞉wapata꞉lamena ba꞉gala du ipuwalo da꞉wapata꞉lamena, iba꞉te kapimilo keba ka꞉na na꞉kemedenamena꞉?
2CO 6:15 A꞉iye! Kelisoko ba꞉gala Saitanako iba꞉te eta komo ododima꞉ ibino ukui kapiyama꞉ a꞉kamida꞉mena꞉! Iyo, hibima꞉ mididawa ba꞉gala hibima꞉ midiha꞉dawa, ibino ukui komate hiya꞉hiya꞉ ba pola꞉na iba꞉te kapimilo emedenama꞉ gabote a꞉kitanamene!
2CO 6:16 Ba꞉gala ba꞉ ba꞉ba ka꞉na Godoko adikumidawa ba꞉gala ida꞉da꞉li gobogobo adikulamedawa, ibi netewapino ukui komate ba alaholohona milo komoeno nopo tamote gabo a꞉kuma꞉mena꞉! Numa꞉la꞉, a puya꞉te Ka꞉ka꞉ Godo hibima꞉ da꞉midinama꞉, a ba꞉ ebe adikumino hiya꞉nomo genamala, ba꞉bema꞉ ebete ba꞉be komo ba emalagidolo ebeno Bukalo tabo dopamo ba꞉ma ka꞉na goiya꞉, “Nale naeno tawakaluba꞉go ba emedena, iba꞉te naeno holoholo hapulu ba꞉wapata꞉lamenamena꞉, iyo, iba꞉te na kapiya ibino Godoma꞉ ba ka꞉namina, nale atumu ibi naeno hibi tawakalubima꞉ ba꞉ka꞉laminamo.”
2CO 6:17 Ba꞉bema꞉ Kodawate gala ba꞉ma ka꞉na kagoiya꞉, “Naeno tawakaluba꞉la꞉, wadiyala la꞉le hibima꞉ midiha꞉pi ipuwane nikulihala꞉, la꞉ ba꞉gala ibi la꞉le netewa hiya꞉hiya꞉ kapiyuimi ipuwalo kemedehonama꞉. Ba꞉bene nale kebe komokomo kubama꞉ da꞉goenakomo, la꞉le ba꞉bi kuba dalowa꞉ komo akologilinakala꞉, mabu la꞉le ba꞉moe tabamo da꞉papamila꞉hanakoma, nale la꞉ hibilo kalakalago buwatenakomata.
2CO 6:18 Iyo, ba꞉ba tetelo nale la꞉eno nabiwima꞉ ba eda꞉na, la꞉le naeno gugudima꞉ beda꞉hanamata, mabu na Helonomo Kodawate ba꞉moe tabo hibilo goemo.”
2CO 7:1 Naeno hidohido mabuluba꞉la꞉, numa꞉la꞉, Godote ba꞉bi hido tabo a hibima꞉ midipi mabuma꞉ hibinomolo olamagiya꞉, ba꞉bema꞉ ale aeno apa꞉mo dododilinakoma꞉ ba꞉gala aeno tepo ipuwalo demalagidolenakoma꞉, ba꞉bi hiliyonomo komo ipuwalo eta dalowa꞉ komote itana modoboha꞉. Iyo, kebe kuba dalowa꞉ komate agodolo da꞉pola꞉na, wadiyala ale ba꞉bi komo hiliyonomo ukulalete, Godoko toleme ipuwalo ba emedena aeno ka꞉ka꞉ konomo ebe kapiyatamo bikamehonakoma꞉.
2CO 7:2 Ba꞉bema꞉ nale la꞉ gala na꞉kakiyalamemata, wadiyala la꞉ la꞉eno tepo ipuwoeno gigiho atamo na꞉hilama꞉la꞉, mabu numa꞉la꞉, ale la꞉eno kapiyuimi ipuwalo eta lumagitamo eta kuba komo kododiha꞉, iyo, ale eta kapiya lumagi kakubahimiha꞉ ba꞉gala ha꞉da amiho gabodo eta lumagino eta kapiya ilina kalawemeha꞉.
2CO 7:3 Huiyatiya nale ba꞉moe tabo komamo ba꞉ma ka꞉na kagoitaha꞉, la꞉le eta kuba natamo ododimata. Ao, nale ba꞉moe leta ipuwalo dopamo keba ka꞉na ka꞉goemo atu tabo gala ba꞉ma ka꞉na kagoitamo, ale aeno tepo ipuwoeno malemalelo la꞉ nemalagidolenata, iyo, la꞉la, ala, ale tete ga꞉ga꞉nomolo ba꞉moe hopolo kapimilo demedehonama꞉, aeno ha꞉laha teta꞉mo ba꞉be atu malemale ipuwado pawa konikulima꞉nema꞉.
2CO 7:4 Ba꞉bema꞉ la꞉le na atumu malemalelo da꞉kemalagidolonenama, nale ba꞉be komo hibilo ba iya꞉tawana la꞉ mabuma꞉ konomamo awagahanamo. Iyo, naeno tepo ipuwalo kalakala komote konomamo bitana, mabu a hibi okopa꞉tamo hiya꞉hiya꞉ temeteme komate dikulihuya꞉, nale ba꞉bi temeteme ipuwalo ba luta la꞉eno hibi komo demalagidolonakomo, gelebadi komote naeno tepo ipuwa ba꞉bo tabuiminako.
2CO 7:5 Numa꞉la꞉, ale aeno konomo oko mabuma꞉ heloha꞉dopoma꞉ ba eda꞉ha ba꞉moe Ma꞉sadoniya hopamo ba꞉bo pelamima꞉, huiyatiya ale ba꞉malo hawela amiho tete hibilo kapumiha꞉, mabu komo hiya꞉hiya꞉ temeteme komate atamo gala ba꞉ma ka꞉na kapikuliya꞉, komo hibima꞉ midiha꞉pa꞉te alaholo komo atamo a꞉wadahiya꞉ ba꞉gala aeno tepo ipuwalo tole komate a꞉mahila꞉haliya꞉.
2CO 7:6 Huiyatiya Godoko iya꞉tawanomola, puya꞉te oko ipuwalo kuiyodopoma꞉ deda꞉hana ba꞉bi tawakalubino tepo ipuwa koheluilamema꞉, ba꞉bema꞉ aeno ukui bilibili ipuwalo ebete Taitasikono pe komamo a owalubi.
2CO 7:7 Hibila, ale ebeno pe komo dumima꞉ kalakala ba꞉bo lawima꞉, huiyatiya ba꞉ba tetelo ale ba꞉be kapiyanomo komoma꞉ kakalakalahaha꞉. Ao, la꞉le ebe keba ka꞉na kowalubiuima, ale ba꞉be tabo ebegodone dulima꞉ eta kalakala gala ba꞉bo kalawima꞉. Ba꞉bene ebete a ba꞉ma ka꞉na da꞉kiyaa꞉mi, la꞉le na unamema꞉ ubi konomamo dihatenama, ba꞉gala la꞉le natamo temeteme ikaname mabuma꞉ la꞉eno tepo ipuwalo menemenema꞉ deda꞉hanama, ba꞉gala ba꞉ma tetelo la꞉le na kokalakaluinamema꞉ konomamo demalagidolonama, nale ba꞉bi komokomo dulihuimo naeno kalakalate hununomamo ba꞉bo odolui.
2CO 7:8 La꞉le naeno eta leta ododi komodo temeteme da꞉lawima, nale ba꞉be komo iya꞉tawate temeteme komo atumu a꞉kalawa꞉tepuimo, huiyatiya nale ba꞉be temeteme tama꞉mo dito ihatimo mabu na ba꞉ma ka꞉na iya꞉tawuimo, naeno tabo komote kebe temeteme la꞉tamo dikalami ba꞉be temeteme komote tete ga꞉ga꞉nomolo la꞉godolo a꞉kitanamene.
2CO 7:9 Ba꞉bema꞉ ba꞉ma tetelo naeno leta ododi komoma꞉ kalakala komote nagodolo bitana, huiyatiya numa꞉la꞉, la꞉le dopamo diya꞉tawahuima ba꞉be temeteme komoma꞉ na kakalakalanaha꞉, ao, naeno kalakala bitana mabu Godote la꞉eno temeteme komamo eta hido oko la꞉ ipuwalo ba owati, la꞉le la꞉eno ukui hiya꞉ma꞉ midiliti ebetamo gala ba꞉bo kohobilimata. Ba꞉bema꞉ hibila, a Godokono hibi okopa꞉te aeno tabamo temeteme la꞉tamo dikalami, ale ba꞉be komodo eta kuba komo la꞉tamo kododiha꞉!
2CO 7:10 Iyo, kebe temeteme komate Godogodone lumagitamo dikulinaka, ba꞉bi temeteme komodo ebete ebeno ukui hiya꞉ma꞉ miditi Godotamo ba꞉bo kohobigama꞉ne, ba꞉bema꞉ ebete ka꞉ka꞉ mula꞉ komo da꞉lawemene, ba꞉ba tetelo ebeno temeteme komote wibadigate kalakala kapiyate kitanama꞉ne! Huiyatiya kebe temeteme komate ba꞉moe hopoeno ubi komo ta꞉matale ipuwane lumagitamo dikulinaka, ebete ba꞉bi komodo eta kalakala a꞉kuma꞉mene mabu ebete hoe komo kapiya kolawema꞉ne.
2CO 7:11 Ba꞉bema꞉ wadiyala la꞉ ba꞉moe komo numa꞉la꞉. Godote la꞉eno temeteme komodo la꞉ ipuwalo eta hidonomo oko ba꞉ma ka꞉na owati, la꞉le ebegodone hido ukui lawete ebeno tuputupu emede komo kohawakalimima꞉ la꞉eno ubi konomamo ba꞉bo ihatimata. Ba꞉bene la꞉eno kapiyuimi ipuwalo kebe lumagiti kuba dododi, la꞉le ebeno kuba mabuma꞉ tole konomo ba lawe la꞉eno mauba komo ebetamo hibinomolo ba꞉bo hawakalimimata. Iyo, la꞉le na gala kakunamema꞉ ubi konomamo ba ihate, la꞉le la꞉eno ododili komamo na kokalakaluinamema꞉ ukui hibinomolo ba꞉ma ka꞉na a꞉lawimata, la꞉le kuba ododidawatamo ebeno kuba huiya modobonomolo kikamema꞉. Ba꞉bema꞉ kalakala konomola, la꞉le ba꞉moi hiliyonomo ododili komodo la꞉eno tepo ipuwoeno tuputupu komo a꞉hawakalimimata, iyo, kebe kubate la꞉ ipuwalo duluhukui Godote ba꞉be kuboeno huiya la꞉tamo ba꞉bema꞉ a꞉kikalama꞉mena꞉ta.
2CO 7:12 Ba꞉ hibila, dopamo nale la꞉tamo eta leta dododimo, ba꞉be komodo nale kuba ododi dubutamo ebeno temeteme huiya ikamema꞉ kemalagidoloha꞉, ba꞉gala ebete potamo kuba dododi nale ba꞉be lumagi gelebadimima꞉ ukui atumu kihateha꞉. Ao, nale huiyatiya naeno ubi komo ba꞉ma ka꞉na ihatimo, la꞉le a Godokono hibi okopi malemalelo konomamo keba ka꞉na kemalagidoloeonama, la꞉le la꞉eno tuputupu ododi komodo ebeno holoholo hapulu ba꞉be komo hidamo kiya꞉tawahama꞉nemata.
2CO 7:13 Ba꞉bema꞉ ba꞉moe ba꞉be mabula, ale la꞉eno komo Taitasigodone dulima꞉, ba꞉be komodo hido gelebadi komote atamo ba꞉bo pi. Ba꞉ hibila, ba꞉be atu tetelo eta hido komote atamo ba꞉ma ka꞉na kuluhukui, ale Taitasikono kalakala dumima꞉ aeno kalakalate hunamo ba꞉bo odolui, mabu ebete a bikiyaa꞉mi, ebegodolo kebe ukui bilibili komote ditanui, ba꞉be komo ipuwalo la꞉ hiliyonomate ebe keba ka꞉na kowalubiuima.
2CO 7:14 Numa꞉la꞉, dopamo nale Taitasiko la꞉ Kolini sose tawakalubino komoma꞉ ba kiyame naeno oko komoeno hido awagaha ipuwalo la꞉ ba꞉bo mililameholimata, ba꞉bema꞉ kalakala konomola, ebete la꞉tamo da꞉puluhukui la꞉le ebeno holoholo hapulu kebe hidohido komo dododilinakuima, la꞉ ba꞉be komodo na kahilopuinameha꞉. Ba꞉ hibila, ale la꞉eno komoma꞉ kebe mililamehole tabo da꞉ga꞉luima꞉, ebete ebeno baida꞉mo ba꞉bi komokomo la꞉godolo hibinomolo a꞉pulami.
2CO 7:15 Iyo, la꞉ hiliyonomate Taitasiko ba toleme la꞉eno ukuilo ebe hunamo adipatelo da꞉lawima, ba꞉gala la꞉le ebeno tabo ulihote ebetamo da꞉papamila꞉huima, ebete ba꞉ma tetelo ba꞉bi komo kalakalago ba emalagidole, ebeno tepo ipuwalo ditana ba꞉be malemale komote la꞉ mabuma꞉ hununomamo odolona.
2CO 7:16 Ba꞉bema꞉ Kolini sose tawakaluba꞉la꞉, nagodolo ditana ba꞉be kalakala bada konomola꞉ka꞉, mabu na la꞉eno hibi komo iya꞉tawanomola, ba꞉ma ka꞉na na katoletolenaha꞉ la꞉le la꞉eno ododili komodo natamo hilopo kikanamema꞉.
2CO 8:1 Ba꞉bema꞉ aeno hibima꞉ midipi ekaka꞉la꞉, a ubila la꞉le ba꞉moe komo niya꞉tawahala꞉, Godote ebeno malemale Ma꞉sadoniya hopoeno hiya꞉hiya꞉ sose tawakaluba꞉tamo ba ikalame iba꞉godolo bada hido oko dowati.
2CO 8:2 Numa꞉la꞉, keba tetelo iba꞉te ibino hibima꞉ midi mabuma꞉ koko temeteme duwatenakui, iba꞉te huiyatiya ibino awae emede komo kubanomamo ba iya꞉tawaha ibino kalakala hununomamo dodolui, ba꞉bema꞉ iba꞉te konomo malemala꞉go ibino mani Godotamo konomamo dito ikamehuya꞉.
2CO 8:3 Iyo, na Polote hibi tabo ba꞉ma ka꞉na goemo, ibi ha꞉kiya ibi owalubilima꞉ eta komo amawada꞉heno Godotamo konomamo ikamehuya꞉, ba꞉bema꞉ a komopa꞉te Ma꞉sadoniyanapino awae emede komo ba emalagidolo iba꞉te Godotamo kebe mani ikamehoma꞉ modoboma꞉ da꞉ga꞉luima꞉, ibino ikame ukuiti huiyatiya aeno ikameho ukui a꞉gogolui. Ba꞉ hibila, eta lumagiti ibi kiyalameha꞉ tetelo ibi ha꞉kiya ibino ubilo
2CO 8:4 a betoea꞉mehoiya꞉, ale komo hopoeno sose tawakaluba꞉tamo tete keba ka꞉na kikalamima꞉ ale iba꞉tamo tete ba꞉ba ka꞉na kakikalamema꞉, Godokono tawakalubi ipuwalo puya꞉te awaelo kubamo demedehona iba꞉te ba꞉bi Yudiya hoponapi ibino mana꞉mo kowalubilima꞉.
2CO 8:5 Ba꞉bema꞉ numa꞉la꞉, iba꞉te a toea꞉mehoe komodo ibino tepo ipuwoeno hido ukui ba꞉ma ka꞉na hawakalimiya꞉, iba꞉te ibino ka꞉ka꞉ konomo aeno Kodawatamo dopamo ikamehote, ba꞉bene Godokono ubilo iba꞉te ibino ka꞉ka꞉ atamo malemalelo atumu gala a꞉kikaa꞉mehuiya꞉. Ba꞉ hibila, ale ibino tabo dulima꞉, a koamo la꞉wa꞉hate kalakala ba꞉bo lawima꞉.
2CO 8:6 Ba꞉be mabuma꞉ Kolini sose tawakaluba꞉la꞉, la꞉ ipuwalo ba꞉moe malemale oko dopamo da꞉tupuimi ba꞉be dawa ba꞉ Taitasitila, ba꞉bema꞉ ale ebe a꞉kiyamima꞉, la꞉le la꞉eno komo mani malemalelo tama꞉mo da꞉miya꞉tenakoma, wadiyala ba꞉be komo hibilo kupula꞉ma꞉ ebete la꞉ komo tabamo na꞉powalubila꞉mena꞉ta.
2CO 8:7 Numa꞉la꞉, Godote la꞉tamo ebeno hidohido komo konomamo ikalamia꞉ta, ba꞉ma ka꞉na la꞉eno hibima꞉ midi komo, ba꞉gala la꞉le ebeno tabo olamagimi komo, ba꞉gala la꞉eno iya꞉tawa komo, ba꞉gala ebeno oko owatima꞉ la꞉eno ubi konomamo miya꞉te komo, ba꞉gala la꞉eno malemale atamo hawakalimi komo, ba꞉bi hidohido komo hiliyonomate la꞉godolo modobonomolo pola꞉na. Ba꞉bema꞉ a ubila la꞉ ba꞉ atumu ba꞉ma tetelo ba꞉moe eta malemale oko owati ipuwalo la꞉eno mani awaepa꞉tamo konomamo dito nikalamiya꞉la꞉.
2CO 8:8 Numa꞉la꞉, nale ba꞉moe tabo olamagi komodo la꞉tamo Godokono eta tutumu tabo kikalameha꞉, ao, nale huiyatiya ubi bihatemo la꞉eno malemale emalagidolo komo kumima꞉, da꞉ kola꞉ o da꞉ deha꞉potola꞉. Iyo, komo hibima꞉ midipa꞉te ibino malemale komo hawakalimima꞉ ibino ubi komo konomamo keba ka꞉na ka꞉miya꞉tena, nale ba꞉be komoma꞉ goemo mabu na ubila la꞉ la꞉eno ubi komo atumu ba꞉ ba꞉ba ka꞉na na꞉kamiya꞉tiya꞉la꞉.
2CO 8:9 La꞉ iya꞉tawahala aeno Kodawa Ya꞉su Kelisote ebeno malemale keba ka꞉na ka꞉hawakalimiya꞉ ba꞉be komo. Ba꞉ hibila, ebete Hunu Habalo dogodogodawanomoma꞉ ba eda꞉na, huiyatiya la꞉ mabuma꞉ ebe ha꞉kiya ebe awaedawama꞉ miditi ba꞉moe hopamo ba꞉bo pehawakaluya꞉, iyo, ebete ebeno ubi bihatiya꞉ la꞉le ebeno awae emede komodo dogodogopima꞉ keda꞉hanama꞉.
2CO 8:10 Numa꞉la꞉, la꞉le awaepi kowalubilima꞉ ya꞉lo gogolo la꞉eno komo mani malemalelo tama꞉mo miya꞉te da꞉tupuimima, la꞉le hibima꞉ midipi hiliyonomo ipuwalo dopo tawakalubima꞉ eda꞉huimata, iyo, komopa꞉te eta komo tupuimihino la꞉le la꞉eno ubi komo dopamo a꞉hawakalimimata. Ba꞉be mabuma꞉ naeno ukui ba꞉ma ka꞉na itana, ba꞉moe tetete ba꞉ hido tetenomoma꞉ eda꞉na la꞉le ba꞉be hido oko kupula꞉ma꞉.
2CO 8:11 Ba꞉bema꞉ la꞉godolo kebako maniti modobolo da꞉pola꞉lama꞉na, wadiyala la꞉le malemalelo ba꞉ ba꞉ba ka꞉na dito na꞉miya꞉tenakuya꞉la꞉, iyo, la꞉le ba꞉moe oko owatima꞉ kebe hidonomo ubi komo dopamo da꞉miya꞉tima, wadiyala la꞉ ba꞉ma tetelo ba꞉be atu ubi komago la꞉eno komo nupula꞉digala꞉.
2CO 8:12 Ba꞉gala eta komo. Kebe lumagiti eta komo Godotamo malemalelo ikamema꞉ dewagelena, ebeno tepo ipuwa komote keba ka꞉na kitana ba꞉gala ebegodolo kebe maniti modobolo da꞉pola꞉na, Godote ba꞉bi komo ba iya꞉tawa ebeno ikame komo modoboma꞉ o modoboha꞉ma꞉ ba꞉bo kogoema꞉ne, iyo, kebe lumagigodolo mani pola꞉ma꞉naheno Godote ebeno ikameha꞉ komoma꞉ ebe kubadawama꞉ a꞉kagaa꞉mene.
2CO 8:13 Ba꞉bema꞉ numa꞉la꞉, naeno ubi komo ba꞉ma ka꞉naha꞉, la꞉ kapiyate la꞉eno mani malemalelo miya꞉te komodo konomo temeteme ba iya꞉tawaha, komo hibima꞉ midipa꞉te hibilo a꞉kododa꞉mena꞉. Ao, na iya꞉tawala la꞉eno maniti ba꞉ma tetelo kokodopoma꞉ eda꞉hana, ba꞉bema꞉ naeno ukui ba꞉ hibima꞉ midipi ipuwalo puya꞉te ba꞉ma tetelo awaelo demedehona, wadiyala la꞉ la꞉eno dogodogo komamo ibi dito nowalubiliya꞉la꞉. Ba꞉bema꞉ hibila, galane keba tetelo iba꞉te dogodogopima꞉ deda꞉hanamena꞉, la꞉ huiyatiya awae ipuwalo ba emedena iba꞉te owalubi komo la꞉tamo ba꞉bo kihatema꞉na꞉. Kalakala konomola, ba꞉ ba꞉ba ka꞉na hibima꞉ midipi hiliyonomo ipuwalo etapa꞉te etapa꞉tamo ibino hiya꞉hiya꞉ modobo tetelo nikama꞉tihuinakamena꞉.
2CO 8:15 Numa꞉la꞉, ba꞉be komo hawakalimima꞉ Godokono Bukalo eta tabote ba꞉ma ka꞉na bitana, “Godote Isalaela tawakaluba꞉tamo hanohano gabodo dikalamenakui, puya꞉te ba꞉be ma꞉na baa꞉ konomamo duwatenakui iba꞉godolo komo ka꞉luhilinakuiha꞉, ba꞉gala puya꞉te nanekela꞉mo duwatenakui ibino baa꞉te atumu kawibonakuiha꞉.”
2CO 8:16 Ba꞉bema꞉ wadiyala a Godotamo kalakala tabo kadipatiya꞉, mabu la꞉ kowalubilima꞉ kebe ubi komote agodolo konomamo ditana, ebete ba꞉be atu ubi komo Taitasikono tepo ipuwamo ya꞉lo ihati.
2CO 8:17 Numa꞉la꞉, sose tawakaluba꞉te awaepi mabuma꞉ mani malemalelo da꞉miya꞉tenaka, Taitasiti ba꞉be oko la꞉ ipuwalo katama꞉ ale ebe da꞉kiyamima꞉, ebete ebeno ubi komo ba hawakalimi aeno tabo kalakalago ba꞉bo uli, ba꞉bene ebete ebeno ubi konomo ba꞉moe eta komodo atumu a꞉kahawakalimi, ebe ha꞉kiya ebeno ubilo tabo ba꞉bo ihati ebete ba꞉moe leta la꞉tamo adahete la꞉eno malemale ododi ipuwalo la꞉ kopowalubilima꞉.
2CO 8:18 Ba꞉bema꞉ ale eba꞉go aeno eta hibima꞉ mididawa ekawi la꞉tamo kapoemema꞉, ebe ba꞉ Hido Tabo olamagi oko hidonomamo dowatina ba꞉be dubula, iyo, ebeno oko mabuma꞉ hiya꞉hiya꞉ sose tawakalubi hiliyonomate ebeno komo iya꞉tawahate ebe na꞉milimihona.
2CO 8:19 Ba꞉gala ba꞉moe owalubidawoeno komoma꞉ ba꞉moe eta komo na꞉kuma꞉la꞉, sose watowatopa꞉te ebe a꞉lawiya꞉, ebete a komo okopa꞉go ba wapata꞉lamena sose tawakalubino malemale mani awaepa꞉tamo katama꞉. Ba꞉ hibila, a hiliyonomoeno ubi komo ba꞉ ba꞉ma ka꞉nala, wadiyala ba꞉moe oko owati ipuwalo tawakaluba꞉te Kodawa Godoko nawagaminamena꞉, ba꞉gala awaepi kowalubilima꞉ kebe ubi komote a watowatopa꞉godolo konomamo ditana, wadiyala ale aeno ododi komamo ba꞉be hido ukui komo hibima꞉ midipi hiliyonomatamo kohawakalimima꞉nema꞉.
2CO 8:20 Huiyatiya sose tawakaluba꞉te kebe mani ibino konomo malemala꞉go da꞉miya꞉tenaka, ale ba꞉be konomo mani eta muhulu hopamo katama꞉ iba꞉godone duwatema꞉, a ubihinola eta lumagiti aeno hiliyonomo ododili komo ipuwalo eta kapiya komo kubama꞉ goe.
2CO 8:21 Iyo, ale aeno konomo ubi komo ba꞉ma ka꞉na ihatenama꞉, aeno Kodawa Godokono holoholo hapulu tuputupu komokomo kapiya kododilima꞉, ba꞉bene ale ba꞉be komo ba emalagidolona aeno ubi komo na꞉ka-ihatenama꞉, ale hopo habanapi hiliyonomoeno holoholo hapulu atumu tuputupulu kowapata꞉lamenama꞉.
2CO 8:22 Ba꞉moe ba꞉be mabuma꞉ ale aeno komo netewa okopa꞉go ba꞉moe eta hibima꞉ mididawa ekawi la꞉tamo kapoemema꞉. Ba꞉ hibila, ale hiya꞉hiya꞉ oko ebetamo dopamo dikamehonakuima꞉, ebete ba꞉bi hiliyonomo komo tuputupunomolo kododilima꞉ ebeno ubi komo koamo ba hawakalimi ale ba꞉bo uminakuima꞉. Ba꞉bema꞉ ba꞉ma tetelo ebete ebeno ubi konomamo gala na꞉ka-ihatena ba꞉moe eta oko la꞉godolo kopowatima꞉, mabu la꞉le la꞉eno malemale komo awaepa꞉tamo hibilo da꞉hawakalimima ebete ba꞉be komo hibima꞉ na꞉midina. Numa꞉la꞉, ba꞉moe uli oko kowatima꞉ ebegodolo kebe ubi komote kitana, ba꞉be komoeno helote ebegodolo dopamo ditanami ba꞉be pakala ubi komoeno helo hibilo na꞉gogolona.
2CO 8:23 Ba꞉bema꞉ nale dopamo da꞉goemo ba꞉be komoma꞉ gala na꞉kagoemo, na ubila naeno hidonomo mabulubi Taitasiko la꞉tamo gala kapuluhuku, mabu ebe ba꞉ la꞉ mabuma꞉ nago oko kapimilo dowatina ba꞉be lumagila. Ba꞉gala numa꞉la꞉, komo netewa hibima꞉ midipi ekaka꞉te Taitasikoba꞉ la꞉tamo ba꞉moe letago da꞉puluhukumina꞉, ibi ba꞉ ba꞉moe Ma꞉sadoniya hopoeno hiya꞉hiya꞉ sose kapiyuimipa꞉te la꞉tamo da꞉poelama꞉ ba꞉bi okopila, ba꞉ hibila, ibino ododili ipuwalo iba꞉te Kelisoko nawagaminana.
2CO 8:24 Ba꞉bema꞉ Kolini sose tawakaluba꞉la꞉, la꞉godolo ditana wadiyala la꞉ ba꞉be malemale komo iba꞉tamo na꞉hawakalimiya꞉la꞉, ba꞉bema꞉ ba꞉moe hopoeno hiya꞉hiya꞉ sose tawakaluba꞉te ba꞉ma ka꞉na kiya꞉tawahama꞉na꞉, la꞉eno malemale komote hibilo ba itana, ale la꞉ mabuma꞉ kebe mililamehole tabo dopamo da꞉ga꞉lanakuima꞉ ba꞉be tabote hibinomoma꞉ eda꞉na.
2CO 9:1 Numa꞉la꞉, Godokono awaepi mabuma꞉ komo hiya꞉hiya꞉ sose tawakaluba꞉te malemalelo ibino mani tama꞉mo da꞉miya꞉tenaka, nale ba꞉be komo la꞉tamo hawakalimihino, na iya꞉tawala la꞉ huiyatiya la꞉eno komo modobolo kododima꞉nemata,
2CO 9:2 mabu la꞉le la꞉eno tepo ipuwalo ba꞉bi awaepi malemalelo kowalubilima꞉ ya꞉lo a꞉hiduimata. Iyo, nale naeno oko komoeno hido awagaha ipuwalo la꞉ Guliki hoponapi sose tawakalubi ba mililamehole, la꞉le ya꞉lo gogolo da꞉hiduima ba꞉be komo Ma꞉sadoniya hopoeno hibima꞉ midipa꞉tamo olamagimo. Ba꞉bema꞉ kalakala konomola, la꞉le la꞉eno malemale hawakalimima꞉ ubi konomamo da꞉miya꞉tenakoma, komo ibi hiliyonomate ba꞉be komo uliti atu malemale oko tupuimima꞉ ukui ba꞉bo lawiya꞉.
2CO 9:3 Huiyatiya na ubihinola nale dopamo la꞉ kebe komoma꞉ da꞉mililameholima, la꞉ ba꞉ma tetelo ba꞉be komo ododiha꞉pima꞉ eda꞉ha. Ba꞉bema꞉ numa꞉la꞉, nale ba꞉moi hibima꞉ midipi ekaki la꞉tamo poelamemo, mabu iba꞉te la꞉ komo tabamo ba powalubili, la꞉eno malemale mani noelame tete peheno la꞉le ba꞉be komo ododima꞉ dopamo hibilo kohidoma꞉nemata, nale la꞉ mabuma꞉ dopamo keba ka꞉na kolamagimo ba꞉ba ka꞉na.
2CO 9:4 Huiyatiya la꞉ nulia꞉la꞉, na ba꞉gala komo Ma꞉sadoniya hopoeno hiya꞉hiya꞉ sose tawakalubi, ale la꞉eno malemale mani uwatema꞉ da꞉pikulima꞉, ba꞉ba tetelo la꞉ ba꞉be komo ododiha꞉pimo da꞉pulamemena꞉, a keba ka꞉na na꞉kewagelema꞉? Iyo, aeno hilopote konomoma꞉ keda꞉ma꞉ne, mabu a dopamo la꞉ hibima꞉ ba midili la꞉le ba꞉be malemale komo hibinomolo kododima꞉ hawakala a꞉ga꞉luima꞉. A꞉iye, ba꞉ba tetelo la꞉ ba꞉ atumu, la꞉ kebe hilopo da꞉lawema ba꞉be hilopo bada konomola꞉ka꞉!
2CO 9:5 Ba꞉moe mabuma꞉ nale naeno ukui ba꞉ma ka꞉na ihatimo, nale peheno ba꞉moi komo ekaki kogahugahuilamema꞉nemo iba꞉te la꞉tamo dopamo kopikulima꞉. Ba꞉ ba꞉ba ka꞉na la꞉le kebe konomo malemale komo hibilo ododima꞉ dopamo dolamagimima, iba꞉te la꞉ komo tabamo ba powalubili, la꞉le la꞉eno komo mani tama꞉mo malemalelo dito komiya꞉tema꞉nemata naeno pe teta꞉mo. Iyo, wadiyala nale peheno la꞉ ha꞉kiya la꞉eno kalakala tetelo ba꞉be malemale komo dopamo na꞉hiduimiya꞉la꞉, huiyatiya modoboha꞉ nale la꞉eno ododiha꞉ komo pumiti, la꞉ ba pikiyahalame la꞉le hilopo komago la꞉eno komo ba꞉bo ododi.
2CO 9:6 Ba꞉bema꞉ ba꞉moe ba꞉ ko komonomola. Kebe lumagiti kapiyakapiya kikipo hakamo damihomene ebete ba꞉ ba꞉ba ka꞉na ebeno pali ipuwane kapiyakapiya naha ilina kuwatema꞉ne, huiyatiya kebe lumagiti hiliyonomo kikipo damihomene ebete atumu hiliyonomo naha ilina kuwatema꞉ne.
2CO 9:7 Ba꞉bema꞉ wadiyala la꞉ hiliyonomate la꞉eno malemale mani ba꞉ma ka꞉na na꞉miya꞉tenakuya꞉la꞉. Eta lumagiti kebako mani da꞉miya꞉temene, ba꞉be komoma꞉ etate ebe iya꞉tumihino ebe ha꞉kiya ebeno tepo ipuwoeno ukui dopamo keba ka꞉na ka꞉kodakoduimi, wadiyala ebete ba꞉ ba꞉ba ka꞉na na꞉miya꞉ta꞉mene, huiyatiya ebete tepo ipuwoeno ubiha꞉ komago a꞉kikama꞉mene, kalakala kapiyate ebegodolo nitanamene mabu Godote ba꞉bako ikamedawa malemalelo nemalagidolona.
2CO 9:8 Numa꞉la꞉, Godokono helo modobola la꞉eno emede komoeno hiliyonomo komokomo ipuwalo la꞉ konomamo kowalubilinakoma꞉, iyo, ba꞉ ba꞉ba ka꞉na ebete la꞉eno hiliyonomo modoboha꞉ komokomo ba modobuilamelelame, la꞉godolo komo mani ba꞉gala ilina modobonomolo ba꞉pola꞉namena꞉ la꞉le ebeno komo hiliyonomo hidohido oko kowatihonama꞉.
2CO 9:9 Ba꞉bema꞉ ba꞉be komo hawakalimima꞉ ebeno Bukalo tabote ba꞉ma ka꞉na itana, “Puya꞉te awae ipuwalo demedehona, ebete malemalelo iba꞉tamo konomamo ikalamenako, iyo, ebeno malemale hawakalimi komote iba꞉tamo emedena emedena tetelo bitanamene.”
2CO 9:10 Ba꞉bema꞉ numa꞉la꞉, kebe Kodawate hiliyonomo hiya꞉hiya꞉ kikipo pali ododidawatamo dikamehonako ba꞉gala naha ilina tawakaluba꞉tamo atu gabodo modobolo da꞉kikalamenako, ebete la꞉eno modoboha꞉ komokomo ipuwalo la꞉ atumu ilinamo ba꞉gala mana꞉mo kakowalubilima꞉na꞉ta. Iyo, ebete la꞉tamo kikipo konomamo dopamo ikalamete, ba꞉bene ebeno heloamo ba꞉bi kikipo ipuwane ilinate hidonomamo apepehonaka, ba꞉bema꞉ kalakala konomola, mabu la꞉ naha ilina uwate tetelo ebete la꞉eno malemale ikalame komodo la꞉ ba꞉gala komo tawakalubi hiliyonomatamo modobo baa꞉ kapimilo kikalamema꞉na꞉ta.
2CO 9:11 Ba꞉ hibila, emedena tetelo Godote la꞉eno modoboha꞉ komokomo hidonomamo bulamelelamenakomena꞉ta, la꞉le la꞉eno dogodogo komone hiliyonomo tetelo komo hiliyonomo tawakalubi atumu kowalubilinakoma꞉, iyo, ebe ubila ale la꞉eno malemale mani awaepa꞉tamo da꞉nikalamema꞉, iba꞉te la꞉ mabuma꞉ kalakala tabo ebetamo ba꞉bo kadipatema꞉na꞉.
2CO 9:12 Ba꞉bema꞉ numa꞉la꞉, la꞉le la꞉eno malemale mani tama꞉mo da꞉miya꞉tenakoma, Godote ba꞉be gabodo ebeno komo tawakalubino modoboha꞉ komokomo komodobuilamelelamema꞉ne. Huiyatiya la꞉eno ododi komodo ba꞉be hido komo kapiyate a꞉kuluhukamene, ao, awaepa꞉te ibino owalubi komo da꞉lawemena꞉, ba꞉ba tetelo atumu eta hido komote ba꞉ma ka꞉na kakuluhukuma꞉ne, ba꞉bi tawakaluba꞉te ibino konomo kalakala Godotamo hununomamo ba꞉bo kadipatema꞉na꞉.
2CO 9:13 Iyo, ba꞉moe oko owati ipuwalo komopa꞉te la꞉eno tepo ipuwoeno hibi komo hidamo ba꞉ma ka꞉na kumima꞉na꞉, la꞉le Kelisoko mabuma꞉ kebe Hido Tabo dolamagiminakoma ba꞉be tabamo la꞉ hibinomolo papamila꞉hanamata. Ba꞉gala iba꞉te ba꞉moe eta komo kakiya꞉tawahama꞉na꞉, la꞉eno malemale ipuwalo ibi konomamo keba ka꞉na kowalubiliuima, la꞉ ba꞉be atu gabodo komo hiliyonomo tawakalubi atumu a꞉kowalubilinakomata. Ba꞉bema꞉ hibila, la꞉eno ododi komoma꞉ iba꞉te Godoko awagaminalo
2CO 9:14 ibino tepo ipuwoeno malemale komago la꞉ ba emalagidole la꞉ toetoe tabamo ba꞉bo kowadiya꞉paa꞉latelema꞉na꞉ta, mabu iba꞉te ba꞉moe komo umiya꞉, ebeno malemale komote la꞉ ipuwalo hidonomo oko bowatina.
2CO 9:15 Ba꞉bema꞉ wadiyala a kalakala tabo Godotamo kadipatiya꞉, mabu ebete atamo da꞉hawakalimiya꞉ ba꞉be malemale bada konomola꞉ka꞉, iyo, eta lumagiti ba꞉be dito ikaa꞉me komo ebeno tabamo hibilo hawakalimi a꞉kamodobamene!
2CO 10:1 Ba꞉bema꞉ na Polote naeno tepo ipuwoeno ukuilo la꞉ betoelameholemata la꞉le naeno ubi komamo kopapamila꞉halema꞉. Numa꞉la꞉, la꞉ komopa꞉te na mabuma꞉ ba꞉ma ka꞉na ga꞉lanamata, “Ebete dopamo agodolo ba pemedena ebeno taboeno helote hibilo kitanamiha꞉, iyo, ebete aeno helo tolemelo oko bepowatinami, huiyatiya ebete a ipuwane muhulamo da꞉tui ba꞉ba tetene tupuimiti ebeno leta ipuwalo komo helo tabo komokomo bolamaginapi!” Nale huiyatiya ba꞉bako daedae ukui tabo emalagidoloheno, Kelisokono tataba emede ukui komamo
2CO 10:2 la꞉ gala ba꞉ma ka꞉na katoelameholemata, wadiyala la꞉ naeno ubi komamo na꞉papamila꞉huya꞉la꞉, mabu nale la꞉tamo hibilo kopema꞉nemo, ba꞉bema꞉ ba꞉ba tetelo la꞉le naeno ubi komokomo ododililo la꞉ da꞉pulamema, helo tabo olamagi komote nagodolo a꞉kitanamene. Huiyatiya la꞉ ipuwalo puya꞉te a hibi okopino komo kubamo da꞉hawakaliminama, ba꞉ma ka꞉na la꞉le a ha꞉kiya aeno tepo ipuwoeno kuba ukui komodo oko owatima꞉ da꞉ga꞉lanama, la꞉ hidamo! A꞉iye, na ha꞉kiya naeno komo hibilo niya꞉tawanamo, nale la꞉tamo da꞉pemo naeno helote komodoboma꞉ne la꞉ la꞉eno daedae ukui taboma꞉ kopikiyahalamema꞉!
2CO 10:3 Ba꞉bema꞉ numa꞉la꞉, a puya꞉te Godokono hibi okopima꞉ deda꞉hanama꞉, ale hopo habalo ba emedena huiyatiya hopo haboeno ukui komamo kalaholohonaha꞉.
2CO 10:4 Ba꞉ hibila, ale kebe ilinamo dalaholohonakoma꞉ ba꞉bi ilina hopo habanapa꞉te atamo kikaa꞉miya꞉ha꞉, ao, a huiyatiya ba꞉bi helohelonomo alaholo ilina Godogodone uwatiya꞉ma꞉, ba꞉bema꞉ ale ba꞉bi ilinamo Saitanakono hiya꞉hiya꞉ alaholohoeno kala imi ba꞉bo anabulilamenakoma꞉.
2CO 10:5 Iyo, ba꞉bi ilinamo ale komopino ha꞉da amiho iya꞉tulame komo bekubahilamenakoma꞉, ba꞉gala kebe hiya꞉hiya꞉ awagaha komamo iba꞉te Godokono hibi iya꞉tawa komago dalaholohona, ba꞉bi awagaha komo atumu ale hopamo a꞉piya꞉hekenakoma꞉. Ba꞉bene hopo habanapino tepo ipuwalo kebe hiya꞉hiya꞉ ukui komate da꞉pola꞉na, ale Godokono alaholohoeno ilinamo ba꞉bi hiliyonomo komo atumu kodakodalo ba uwate ba꞉bo matuhulameholenakoma꞉, iba꞉te ibino hiliyonomo ukui komodo Kelisoko kapiyatamo kopapamila꞉halema꞉.
2CO 10:6 Ba꞉bema꞉ Kolini sose tawakaluba꞉la꞉, keba tetelo la꞉eno hiliyonomo ododili komokomo ipuwalo la꞉le Kelisotamo da꞉papamila꞉halema, ale ba꞉be komo hibilo dumima꞉, galane tetelo la꞉ puya꞉te papamila꞉ha ubiha꞉ma꞉ gala da꞉keda꞉hama, a hibi okopa꞉te alaholoho ipuwalo kohidoma꞉nema꞉ la꞉eno hiliyonomo papamila꞉haha꞉ ododili komoma꞉ kuba huiya la꞉tamo kikalamema꞉.
2CO 10:7 A꞉iye, la꞉le tawakalubi hunu nikapa꞉mo ulamenakomata, huiyatiya ba꞉bako kuba ukui komote la꞉godolo itana modoboha꞉! La꞉ ipuwalo etate ebeno ukuilo ebe ha꞉kiya ebe Kelisokono hibi ta꞉matadawama꞉ da꞉goena, wadiyala ebete a hibi okopino komo gala ba kemalagidolo ukui ba꞉ma ka꞉na na꞉lawa꞉mene, a ba꞉ atumu Kelisokono hibi ta꞉matapima꞉ eda꞉hanama꞉, ebe ha꞉kiya ebeno komoma꞉ keba ka꞉na ka꞉goena ba꞉ba ka꞉na.
2CO 10:8 Ba꞉bema꞉ la꞉ nonolata, aeno helo komoma꞉ nale ba꞉moi awagaha huiya tabo la꞉tamo olamagimo, huiyatiya nale ba꞉be komoma꞉ hilopo a꞉kalawa꞉mo. Numa꞉la꞉, Kodawate ha꞉kiya ba꞉moe helo atamo hibinomolo ikaa꞉miya꞉, ale la꞉ sose tawakalubi ulamepima꞉ ba eda꞉hana la꞉eno hibima꞉ midi ipuwalo ale la꞉ kokodakoduilamema꞉, huiyatiya ebete atamo helo kikaa꞉miya꞉ha꞉ ale aeno eta ododi komamo la꞉eno hibima꞉ midi komo kokubahilamema꞉.
2CO 10:9 Ba꞉bema꞉ nale naeno hiya꞉hiya꞉ leta ipuwalo kebe tabo kolamaginakomo, la꞉ komopa꞉te ba꞉bi tabo ba uliho ba꞉mako ukui kubamo lawenakomata, Polote atamo tole ikaa꞉mema꞉ kuda꞉ ewagelena. Ao, naeno leta ododili ipuwalo naeno ubi komo eba ka꞉na kitanaha꞉.
2CO 10:10 Ba꞉gala la꞉ komopa꞉te daedae ukuilo eta komo ba꞉ma ka꞉na ga꞉lanamata, “Polote ebeno leta ipuwalo atamo tole komo ikaa꞉mema꞉ helonomo tabo bolamaginako, huiyatiya dopamo ebete ago ba pemedena ale ebeno apeno heloha꞉ komo ba꞉bo umima꞉, ba꞉gala ebete aeno holoholo hapulu tabo dolamaginakui ale ebeno helo hibilo kuminakuiha꞉.”
2CO 10:11 Ba꞉bema꞉ la꞉ puya꞉te ba꞉ba ka꞉na da꞉ga꞉lanama, wadiyala la꞉ niya꞉tawahala꞉, keba tetelo a hibi okopa꞉te la꞉godolo kemedenaha꞉, ba꞉ba tetelo ale aeno leta ipuwalo kebe helo komo ka꞉hawakaliminakoma꞉, ba꞉ hibila, ale la꞉tamo da꞉pikulima꞉ ba꞉be atu helo komo aeno ododili ipuwalo la꞉le la꞉eno baidinomamo kumima꞉nemata!
2CO 10:12 A꞉iye, puya꞉te a mabuma꞉ kubamo demalagidolona, ibino daedae ukui komo bada konomola꞉ka꞉! Numa꞉la꞉, ibi ha꞉kiya iba꞉tamo komo hiya꞉hiya꞉ kukala dito miya꞉tenaka, mabu ibi iya꞉tawahala ba꞉bi atu kukalamo iba꞉te papamila꞉ha ya꞉lo a꞉tupuimiya꞉. Ba꞉be mabuma꞉ iba꞉te tawakalubino holoholo hapulu ibi ha꞉kiya ibino kukala mabuma꞉ ba꞉bo awagaminalenaka, huiyatiya puya꞉te ibino kukala da꞉wakalamina iba꞉te ibi kubapima꞉ dito ga꞉lana. Iyo, ba꞉ ba꞉ba ka꞉na iba꞉te tawakalubino hiya꞉hiya꞉ komo ibino kukalamo modobolatelelamenaka, sose ipuwalo ibi ha꞉kiya ibi hunamo kowadiya꞉paa꞉latelema꞉. Huiyatiya a Godokono hibi okopi ubihinola ale aeno komo ibino kukalamo modobolatele, ba꞉bema꞉ diyala, iba꞉te a mabuma꞉ eta daedae ukui tabo ba꞉ma ka꞉na da꞉ ga꞉lamena꞉, “Tole komote Poluia꞉godolo bitana aeno kukalamo kopapamila꞉hama꞉!”
2CO 10:13 Numa꞉la꞉, ibino awagaha komo ba꞉gala a hibi okopino awagaha komo hiya꞉hiya꞉la, mabu iba꞉te awagaha ipuwalo komopino oko bekubahilamena. Huiyatiya aeno komo ba꞉ma ka꞉nala, Godote atamo dikaa꞉miya꞉ ebete ba꞉be oko komoeno kuititi komokomo a ya꞉lo iya꞉tua꞉miya꞉, ale eta hibima꞉ mididawoeno oko ipuwamo nogomokapoma꞉, iyo, ale Godogodone ya꞉lo tetelo da꞉lawiya꞉ma꞉ ba꞉be oko kapiyama꞉ awagaha tabo ba꞉ga꞉lanakoma꞉. Numa꞉la꞉ la꞉ Kolini sose tawakaluba꞉te aeno oko komoeno kuititi komokomo ipuwalo hibilo ba꞉pola꞉namata,
2CO 10:14 mabu puya꞉te muhuluni pelamete Kelisokono Hido Tabo la꞉tamo da꞉polamagimi, a ba꞉ ba꞉bi okopila, iyo, ale la꞉tamo da꞉pelamima꞉ ba꞉ba tetelo ale eta lumagino oko ipuwamo kapogomoha꞉.
2CO 10:15 Ba꞉gala eta komo. Godote atamo dikaa꞉miya꞉ ale ba꞉be oko komoeno kuititi komokomo ba iya꞉tawaha, modoboha꞉ ale eta hibima꞉ mididawoeno oko ipuwamo nogomote ebeno oko owati komoma꞉ a ha꞉kiya a awagaminoe. Huiyatiya numa꞉la꞉, ale la꞉ ipuwalo kebe oko kowatinama꞉ ba꞉be okoma꞉ aeno ubi komo ba꞉ma ka꞉na bitana, la꞉ hibima꞉ midi ipuwalo ba apepeho, aeno okote la꞉ ipuwalo atumu apete Godokono ubilo konomoma꞉ eda꞉te,
2CO 10:16 ebete gigiho atamo ba꞉bo ka꞉hiya꞉midama꞉ne ale la꞉ Kolini habanapino Guliki hopo hapuamo kotolamema꞉. Ba꞉ hibila, puya꞉te ba꞉bolo demedehona ale iba꞉tamo Kelisokono Hido Tabo ba nolamagimi, a ha꞉kiya a eta hibima꞉ mididawoeno oko komoma꞉ a꞉kanawagahama꞉, mabu eta lumagiti ba꞉bi muhulu hopolo oko dopamo kanetupuimiha꞉.
2CO 10:17 Ba꞉bema꞉ wadiyala a ba꞉moe eta komo kemalagidoluya꞉. Godokono Bukalo tabote ba꞉ma ka꞉na itana, “Lumagiti ha꞉kiya ebeno ododi komoma꞉ akawagaminala꞉, huiyatiya Godote ebe ipuwalo hido oko dowatina, wadiyala ebete ba꞉be komoma꞉ ba kalakala ebeno Kodawa kapiya nawagaminamene.”
2CO 10:18 Iyo, ba꞉ hibila, keba tetelo aeno Kodawate eta lumagi hido okodawama꞉ da꞉goena, ebete ba꞉be lumagi ebeno hibi kalakalago kolawema꞉ne, huiyatiya kebe lumagiti awagaha ipuwalo ebe ha꞉kiya ebe hido okodawama꞉ da꞉goena, Kodawoeno kalakalate ebetamo a꞉kitanamene.
2CO 11:1 Ba꞉bema꞉ Kolini sose tawakaluba꞉la꞉, la꞉ nonolata, na ubila la꞉ ba꞉moe eta tabo ulihoma꞉ ubiha꞉ma꞉ akeda꞉hala꞉, mabu nale naeno hibi komo kohawakalimima꞉ daedae ukui huiya tabo la꞉tamo kolamagima꞉nemo.
2CO 11:2 Wadiyala la꞉ ba꞉moe go tabo nemalagidolala꞉. La꞉eno sose kapiyuimi ba꞉ dubuino komo iya꞉tawaha꞉ bohele huiyala, iyo, dopamo tetelo ba꞉be bohelete komo dubuino komoma꞉ tuputupu ukui kapiya bemalagidolonami, ba꞉bene nale ebeno nabiwima꞉ ba eda꞉na, ebe kapiya dubutamo a꞉galuimimo, ba꞉be dubu ba꞉ Kelisotela. Ba꞉bema꞉ ba꞉ma tetelo komo dubate naeno hido bohele pilolo lawema꞉ ubi da꞉miya꞉tena, nale ibino kuba ubi komo ba ulamelelamena, Godogodone kuba ododilipi mabuma꞉ duluhukuna ba꞉be koete naeno tepo ipuwalo iba꞉tamo ba꞉bo mahiganako.
2CO 11:3 A꞉iye! La꞉le dopamo la꞉eno tuputupu ubi komo Kelisoko kapiyatamo hibilo ihatenakuimata, huiyatiya nale na꞉toletolenamo la꞉le ba꞉be hido ukui ta꞉mata gabo Saitanakono ha꞉da amiho komodo dito komiya꞉pama꞉, dopo kamena Ibiti kaluino ha꞉da amiho mulu komodo ebeno kuba gabamo emogabuimi komamo keba ka꞉na ka꞉guya꞉ ba꞉ba ka꞉na.
2CO 11:4 La꞉ iya꞉tawahala a dopamo Ya꞉sukunu hibi komoma꞉ kebe tabo la꞉tamo ka꞉polamagimima꞉, ba꞉gala la꞉ iya꞉tawahala ba꞉ba tetelo la꞉le ebeno Hido Tabo kalakalago uliti ebegodone kebe Gobogobo ka꞉lawiuima. Huiyatiya ba꞉ma tetelo ha꞉da amiho okopi ipuwalo etate pete Ya꞉sukunu komoma꞉ eta hiya꞉ tabo la꞉tamo da꞉polamagi, la꞉le ebeno tabamo kalakalago a꞉papamila꞉huimata, iyo, la꞉le ba꞉be ha꞉da tabo dulima Godokono Hido Taboma꞉ miditi, ba꞉bene ba꞉be lumagigodolo oko dowatina la꞉le ba꞉be ha꞉da amiho gobogobo ba꞉bo lawimata.
2CO 11:5 A꞉iye! La꞉le ba꞉bako ha꞉da amihopino oko hununomamo adipatelo ibi Kelisokono hiya꞉nomo oelamepima꞉ ka꞉laminamata! Huiyatiya numa꞉la꞉, Kelisokono hibi oelamepi ipuwalo na etama꞉ ba eda꞉na, naeno tepo ipuwalo nale ba꞉moe komo niya꞉tawanamo, ba꞉bi ha꞉da amihopa꞉te kebe hiya꞉hiya꞉ oko dowatihona, ba꞉bi okoeno helote eta kapiya deha꞉poto komodo naeno okoeno helo hibilo kagogolonaha꞉!
2CO 11:6 Diyala, komopa꞉te ba꞉ma ka꞉na da꞉ga꞉lana, nale eta ko sikulamo katonakuiha꞉ ba꞉bema꞉ na tabo olamagi iya꞉tawa hibilo kalawiya꞉ha꞉. Hibila, komo tetelo Godokono tabo olamagi tetelo naeno tabo madodote heloha꞉dopoma꞉ eda꞉na, huiyatiya numa꞉la꞉, na Godokono hiya꞉hiya꞉ taboeno ipuwa iya꞉tawanomola, iyo, la꞉ dopamo komo hiliyonomo tetelo ba꞉be iya꞉tawa komo a hibi okopa꞉godolo hidonomamo uminakuimata.
2CO 11:7 Numa꞉la꞉, nale dopamo Godokono Hido Tabo la꞉tamo da꞉polamagimo, ba꞉ba tetelo la꞉ ulihopi hunamo kowadiya꞉paa꞉latelema꞉ na ha꞉kiya na hopamo ba ihate naeno oko mabuma꞉ la꞉godone eta deha꞉poto huiya kalaweha꞉. Ba꞉bema꞉ la꞉eno ukui ba꞉ma ka꞉na kitana, nale ba꞉be oko owati ipuwalo la꞉godone huiya laweheno, ba꞉moe gabodo nale la꞉tamo eta kuba bekododimo? A꞉iye, nale la꞉tamo dododimo ba꞉be komo ba꞉ hido komola, kuba komoha꞉!
2CO 11:8 Huiyatiya diyala, komo hiya꞉hiya꞉ sose kapiyuimipa꞉te naeno ododi komo kubama꞉ da꞉ga꞉lana, mabu nale la꞉ Kolini sose tawakaluba꞉tamo oko ba owatina, nale naeno modoboha꞉ komokomo ipuwalo iba꞉godone mani dito uwatenakuimo, la꞉godoneha꞉. Iyo, komo iba꞉te ba꞉be ododi komo pilo komoma꞉ da꞉ ga꞉lana, mabu nale ibino mani duwatenakuimo huiyatiya iba꞉godolo eta oko owatihino la꞉ kapiyagodolo owatinamimo.
2CO 11:9 Ba꞉ hibila, nale la꞉go demedenamimo ba꞉be tete ga꞉ga꞉nomolo naeno modoboha꞉ komokomo ipuwalo nale eta deha꞉poto owalubi komo la꞉godone kalaweha꞉, mabu Ma꞉sadoniya hopoeno hibima꞉ midipi ekaka꞉te da꞉pelami ibi kapiyate naeno modoboha꞉ komo komodobuimima꞉ mani natamo ba꞉bo pikanamiya꞉. Numa꞉la꞉, dopamo na oko owati ipuwalo eta temeteme la꞉tamo kikalamenakuiha꞉, ba꞉bema꞉ ba꞉ ba꞉ba ka꞉na nale galane tetelo atumu eta temeteme deha꞉potonomo la꞉tamo a꞉kikalama꞉mata.
2CO 11:10 A꞉iye, nale awagaha huiya tabo da꞉goemo, ba꞉be tabo ba꞉ Kelisokono hibi tabola. ba꞉bema꞉ nale ba꞉be tabo olamagima꞉ Guliki hopo konomolo eta lumagiti na a꞉kaduhinama꞉mene!
2CO 11:11 Ba꞉bema꞉ la꞉le na mana꞉mo owalubiniha꞉ komo nale hiya꞉hiya꞉ tawakaluba꞉tamo ba nehawakalimi la꞉eno ukui ba꞉ma ka꞉na kitana, nale la꞉ malemalelo hibilo kemalagidolenaha꞉? Ao, eba ka꞉naha꞉! Naeno tepo ipuwalo la꞉ mabuma꞉ hibilo ditana, ba꞉be malemale emalagidolo komo Godote iya꞉tawala!
2CO 11:12 Numa꞉la꞉, nale naeno oko huiya laweha꞉ komo a꞉hawakaliminakomo, mabu na ubila nale naeno hibi ododi komo ba nehawakalimi, ha꞉da amiho okopino awagaha tabo olamagimi komote iba꞉godolo ba꞉bo kekelalamema꞉ne, mabu iba꞉te ha꞉da amiho tabo ba꞉ma ka꞉na olamagiminaka, ibi ba꞉gala a hibi okopi, a hiliyonomate kapiyanomo gabodo atu oko bowatihonama꞉.
2CO 11:13 A꞉iye! Ba꞉bi dubate ibi ha꞉kiya ibi Kelisokono hibi oelamepima꞉ ka꞉laminaka, ba꞉bema꞉ tawakalubi ha꞉da kamiholamema꞉ ibi ha꞉kiya ibi hibi oelamepino holoholoma꞉ midilina, huiyatiya iba꞉godolo hibi komote kitanaha꞉, ibino oko owati ipuwalo ha꞉da amiho komo kokonomate ba꞉pola꞉na.
2CO 11:14 Huiyatiya la꞉la, ala, ale ibino ododili komoma꞉ a꞉kala꞉wa꞉hama꞉. Numa꞉la꞉, Saitanate tawakalubi ha꞉da kamiholamema꞉ ebe ha꞉kiya ebe Godokono eta hido a꞉la꞉mina nopodawamo midina, ba꞉bema꞉ ebeno okopa꞉te ebe ba ta꞉matana, iba꞉te atumu hopo habanapi ha꞉da kamiholamema꞉ ibi ha꞉kiya ibi Godokono tuputupu emede okopimo midilina. Ba꞉bema꞉ la꞉le ibino hiya꞉hiya꞉ ha꞉da amiho ododili komone niya꞉tawahala꞉, ibino kuititi tetelo ibino kuba ododili mabuma꞉ huiya modobonomolo kuwatema꞉na꞉.
2CO 11:16 Ba꞉bema꞉ nale dopamo da꞉goemo ba꞉be atu tabo gala na꞉kagoemo, modoboha꞉ eta lumagiti ebeno ukuilo na hibi daedae lumagimo midini. A꞉iye, la꞉ komopa꞉te na ba꞉bako lumagima꞉ ya꞉lo da꞉midinima, kubaha꞉, huiyatiya wadiyala la꞉le naeno komoma꞉ ba꞉be kuba ukui ba emalagidolo ba꞉moe naeno tabo nulia꞉la꞉! Ba꞉moi ha꞉da amiho okopa꞉te ibino hiya꞉hiya꞉ awagaha tabo la꞉tamo keba ka꞉na kolamagiminaka, nale naeno hibi komo kohawakalimima꞉ na ba꞉ ba꞉ba ka꞉na daedae awagaha tabo kapiyakapiya atumu kakolamagima꞉nemo.
2CO 11:17 Ba꞉bema꞉ nale ba꞉ma tetelo kebe awagaha tabo dolamagimo, la꞉ niya꞉tawahala꞉ ba꞉be tabo nale aeno Kodawoeno ukui komamo a꞉kolamaga꞉mo, ao, na huiyatiya hopo habanapino daedae ukui komamo kolamagima꞉nemo.
2CO 11:18 Ba꞉ hibila, la꞉ ipuwalo komo ha꞉da amiho okopi hiliyonomate hopo habanapino ukui komamo ibino hiya꞉hiya꞉ awagaha tabo bolamagiminaka, ba꞉bema꞉ kubaha꞉, na ba꞉ atu tabo olamagi gabodo ibi kota꞉matalema꞉nemo.
2CO 11:19 A꞉iye, la꞉ Kolini sose tawakaluba꞉te la꞉ ha꞉kiya la꞉ mulu ukuipima꞉ ba ga꞉lana, la꞉ huiyatiya ba꞉bako daedaepino awagaha tabo ulima꞉ konomamo kalakalahanamata!
2CO 11:20 Iyo, ba꞉ ba꞉ba ka꞉na komopa꞉te ibino ubilo la꞉tamo pelamete ibi ha꞉kiya ibi hibi okopima꞉ ba pega꞉la la꞉ ibi hibima꞉ ba꞉bo midilimata. Ba꞉bema꞉ ibi ipuwalo etate la꞉ sose tawakaluba꞉te ebeno ubi komokomo kododilima꞉ la꞉ heloamo da꞉kiyahalami, ba꞉gala etate ha꞉da amiho gabodo mani la꞉godone dito duwati, ba꞉gala etate la꞉ ebeno gubi ipuwamo da꞉magatali, ba꞉gala etate la꞉eno holoholo hapulu ebe ha꞉kiya ebe dadipati, ba꞉gala etate la꞉ iduduputilamelo ebeno tabamo la꞉ dalukuli, ba꞉ba tetelo la꞉ huiyatiya ibi ubiha꞉ma꞉ eda꞉haheno ibino ododili komokomo kubama꞉ kaga꞉laha꞉.
2CO 11:21 Diyala, la꞉le a hibi okopino komoma꞉ ba꞉ma ka꞉na kubamo da꞉ga꞉lonama, ale ba꞉bako helo hawakalimi komo la꞉ ipuwalo a꞉kododila꞉lema꞉ mabu a tawakalubino mauba komoma꞉ na꞉toletolehonama꞉, iyo, la꞉ ba꞉bako tabo komodo la꞉eno ubi komo dihatenama, na Polotamo hilopo kikanamema꞉! Huiyatiya numa꞉la꞉, na hilopo la꞉godone a꞉kalawa꞉mo mabu tole komote a hibi okopa꞉godolo kitanaha꞉! Ba꞉bema꞉ ha꞉da amiho okopa꞉te ibino daedae ukuilo toleheno ibino awagaha tabo kebe komokomoma꞉ dolamagiminaka, nale ba꞉ma tetelo naeno hibi komo kohawakalimima꞉ ba꞉bi atu komoma꞉ awagaha tabo la꞉tamo atumu kakolamagima꞉nemo. A꞉iye! Ba꞉moe tabo olamagi komodo na ha꞉kiya na eta daedae lumagima꞉ komidima꞉nemo, huiyatiya kubaha꞉, wadiyala la꞉ hidamo nulia꞉la꞉.
2CO 11:22 Ba꞉bi ha꞉da amiho okopa꞉te Yunapino hawi tawakalubima꞉ eda꞉ha komoma꞉ awagahana, huiyatiya na ba꞉ atumu Yunapima꞉ keda꞉namo. Ba꞉gala iba꞉te Isalaela tawakalubima꞉ deda꞉hana ba꞉be komoma꞉ kawagahana, huiyatiya na ba꞉ atumu Isalaela lumagima꞉ keda꞉namo. Ba꞉gala iba꞉te A꞉ibalahamakono eyoni gugudima꞉ deda꞉hana ba꞉be komoma꞉ kawagahana, huiyatiya numa꞉la꞉, na ba꞉ atumu ebeno eta eyoni guduma꞉ keda꞉namo.
2CO 11:23 Ba꞉gala iba꞉te awagaha ipuwalo ibi ha꞉kiya ibi Kelisokono okopima꞉ kaga꞉lana, huiyatiya na ebeno oko atumu ba kowatina naeno oko ipuwalo dikulihui ba꞉bi gaoeno hido komote ibino gaoeno hido komo hibilo na꞉gogolona. A꞉iye, na niliya! Nale ba꞉bi ha꞉da amihopino awagaha olamagimi tabo ta꞉mata komodo na ha꞉kiya na watoha꞉ daedae lumagima꞉ a꞉midimo! Ba꞉bema꞉ wadiyala la꞉ naeno hibi okoeno komokomo hidamo niya꞉tawahala꞉, mabu nale Kelisokono oko owati ipuwalo naeno okoeno helote ibino okoeno helo konomamo a꞉gogolui. Ba꞉ hibila, Kelisoko mabuma꞉ komo hiliyonomo tetelo tawakaluba꞉te na kubamo anagalinamehonenakuya꞉ ba꞉gala gabomana꞉te na du genamamo dito ihatenenakuya꞉, ba꞉bema꞉ ba꞉bi netewa komodo naeno temeteme komate ha꞉da amiho okopino temeteme komo konomamo atumu a꞉kagogoliya꞉. Ba꞉bene komo hiya꞉hiya꞉ tetelo nale hoe olalati ipuwamo hibilo a꞉nopeganakuimo,
2CO 11:24 ba꞉ma ka꞉na paibo hiya꞉hiya꞉ tetelo Yunapa꞉te giya꞉pa꞉pa꞉ ilinamo 39 teta꞉mo na dito a꞉na꞉miga꞉natenenakuya꞉,
2CO 11:25 ba꞉gala netewa-kapiya hiya꞉hiya꞉ tetelo komo hibima꞉ midiha꞉pa꞉te na kukamo anagalinamehonenakuya꞉, ba꞉gala eta tetelo iba꞉te na anakapunamema꞉ nakolamo mapenamiya꞉. Ba꞉bene netewa-kapiya hiya꞉hiya꞉ tetelo na komopa꞉go ko palai boga꞉go ba wapata꞉lame aeno bogete beyamo dito ululunakui, ba꞉gala eta tetelo ba꞉mako olalatiti da꞉pi nale kapiya hegela ba꞉gala kapiya du konomolo kehaha꞉ kolomoeno beyate dito okoa꞉natenenati.
2CO 11:26 Ba꞉bene nale Kelisoko mabuma꞉ hiya꞉hiya꞉ hiliyonomo hopodo ba pata꞉na, komo hiya꞉hiya꞉ olalati komate natamo a꞉pikulinakuya꞉, iyo, hiya꞉hiya꞉ hulama beya komo, ba꞉gala puya꞉te wapata꞉lamepino ilina iba꞉godone heloamo duwatenaka ba꞉bi pilo dubuino komo, ba꞉gala naeno Yunapi ba꞉gala komo Yuha꞉pi ibino mauba komo, ba꞉gala kebe olalati komate koko habalo ba꞉gala dito hopolo ba꞉gala kehaha꞉ kolomolo dikulihona ba꞉bi komo, ba꞉gala puya꞉te ha꞉da amiho gabodo hibima꞉ midipi ekakimo demedehona ibino kuba ododili komo, ba꞉moi ba꞉bi hiliyonomo hiya꞉hiya꞉ olalati komate natamo hibinomolo pikulinakuya꞉.
2CO 11:27 Ba꞉ hibila, nale naeno kokotamo menemene oko ba owatihona komo hiya꞉hiya꞉ kodakoda komo atumu a꞉kulamenakuimo, ba꞉bene komo tetelo u wata komote na dito miya꞉panenakui, ba꞉gala komo tetelo baa꞉ kape komo ba꞉gala beya kape komate na unamenakuya꞉, iyo, komo tetelo nale baa꞉ naha komoma꞉ ba꞉gala laha genama komoma꞉ ba꞉gala apa꞉mo pupulino ilina komoma꞉ modoboha꞉ komokomo hibilo iya꞉tawanakuimo.
2CO 11:28 Ba꞉bema꞉ numa꞉la꞉, ba꞉makomako hiya꞉hiya꞉ temeteme komate nagodolo ba pola꞉na, naeno eta ko temeteme atumu ba꞉ma ka꞉na kitananako, nale komo hiliyonomo hopoeno hiya꞉hiya꞉ sose tawakalubi ba malemalelatele ibino modoboha꞉ komokomoma꞉ nale koamo emalagidolenamo. Iyo, iba꞉godolo kebe temeteme komate dikulihonaka nale atu temeteme komo hiliyonomo beka-iya꞉tawanakomo.
2CO 11:29 Ba꞉bema꞉ ibi ipuwalo etate heloha꞉ma꞉ deda꞉mene, nale ebe owalubima꞉ atumu heloha꞉ma꞉ keda꞉ma꞉nemo, ba꞉gala keba tetelo etate kuba ododi ipuwamo da꞉negamene, nale ebe mabuma꞉ naeno tepo ipuwalo konomo menemene komo kiya꞉tawama꞉nemo.
2CO 11:30 Ba꞉bema꞉ numa꞉la꞉, kebe komate naeno heloha꞉ komo ba꞉gala naeno modoboha꞉ komo da꞉hawakalilamenaka, ba꞉bi komokomo kapiyama꞉ na awagahalo bolamaginakomo.
2CO 11:31 Ba꞉ hibila, aeno Kodawa Ya꞉sukunu Nabiwi ba꞉ Godotela, ba꞉bema꞉ wadiyala tawakaluba꞉te ebe emedena emedena tetelo hunamo nadipatenakamena꞉, iyo, ebete naeno tepo ipuwoeno komo iya꞉tawala, nale dolamagitamo ba꞉be tabo ha꞉da taboha꞉.
2CO 11:32 Ba꞉bema꞉ wadiyala la꞉ ba꞉moe komo niya꞉tawahala꞉, nale ya꞉lo tetelo Dama꞉sakase ko habalo ba emedena, ba꞉be hopoeno Ko Gawadubu Aletasiko mabuma꞉ ebeno eta hopodawate ba꞉be ko haba namutudawama꞉ ba eda꞉na, ebete ebeno alaholohopi ba꞉bo kiyalamiya꞉ iba꞉te na lawenete du genamamo dito kihatenema꞉. Ba꞉bene ba꞉be komo ododima꞉ komo lawamepa꞉te haba kaloeno hiya꞉hiya꞉ gigihamo tolameholete, nale ba꞉moe habane uluhuku komo ba nelatimi,
2CO 11:33 huiyatiya eta dulu naeno komo mabuluba꞉te na ele kuiha ipuwamo adipininate kala hunudu hopamo da꞉nadunateneniya꞉, nale ba꞉be gabomani dubuino helo ipuwane ba꞉moe gabodo ba꞉ dito alahula꞉niya꞉mo.
2CO 12:1 Numa꞉la꞉, awagaha tabo olamagi ipuwalo eta hido gaote a꞉kuluhukamene, huiyatiya la꞉tamo da꞉pikuli ba꞉bi ha꞉da amiho okopino hiya꞉hiya꞉ awagaha tabo mabuma꞉, wadiyala na ba꞉ atumu komo awagaha huiya tabo la꞉tamo kakolamagima꞉nemo. Ba꞉bema꞉ dopamo eta lumagino baiditi hiya꞉ma꞉ ba eda꞉hame, Kodawate kebe hiya꞉hiya꞉ hidohido komo ebe diya꞉tumiya꞉, nale ba꞉ma tetelo ba꞉bi komo la꞉ kokiyalamema꞉nemata.
2CO 12:2 Iyo, na ba꞉be dubuino komo iya꞉tawanomola, ba꞉ma ka꞉na ebetamo hanohano komote duluhukuya꞉ ba꞉ba tetene tupuimiti ba꞉mamo puluhuku 14 gogote a꞉petohui. Ba꞉bema꞉ ba꞉be dubuino baiditi hiya꞉ma꞉ deda꞉hamiya꞉ ba꞉be komo ba꞉ ba꞉ma ka꞉nala, ebete Kelisoko ipuwalo ba emedena, eta tetelo Godote ebe ebeno Hununomo Habamo magatate ebe ba꞉bamo dito nadipiya꞉. Huiyatiya numa꞉la꞉, ba꞉ba tetelo ebete ebeno apa꞉go Hunu Habamo da꞉nodoluya꞉ o ebeno gobogobo kapiyate da꞉nodoluya꞉, ba꞉be komo na hibi iya꞉tawaha꞉, Godoko kapiyate iya꞉tawala.
2CO 12:3 Ba꞉bema꞉ nale atu tabo gala na꞉kagoemo, na iya꞉tawala Godote ba꞉be dubu ebeno Kalakala Habamo hibilo a꞉magatuya꞉, huiyatiya na iya꞉tawaha꞉ ebete ebeno apa꞉go ba꞉bamo da꞉nodoluya꞉ o ebeno gobogobo kapiyate da꞉nodoluya꞉, mabu ba꞉be komo Godoko kapiyate iya꞉tawala. Ba꞉bene ba꞉ba tetelo Hunu Habalo ebetamo duluhukuya꞉ ba꞉be komo ba꞉ ba꞉ma ka꞉nala, ba꞉be dubuti komo hiya꞉hiya꞉ koko hanohano komo ba꞉bo ulihuya꞉, iyo, hopo habanapa꞉te ba꞉bi komo ibino tabamo hawakalilamema꞉ kamodobonaha꞉ ba꞉gala iba꞉godolo talona bitana ba꞉bi komokomo olamagimima꞉.
2CO 12:5 Ba꞉be mabuma꞉ nale ba꞉be dubuino komoma꞉ awagaha huiya tabo ba olamagi, huiyatiya naeno komoma꞉ eta awagaha tabonomo olamagihino, kebe komate naeno heloha꞉ komo ba꞉gala naeno modoboha꞉ komo da꞉hawakalilamenaka, ba꞉bi hiya꞉hiya꞉ komo kapiyama꞉ olamaginakomo.
2CO 12:6 Numa꞉la꞉, nale naeno oko komoma꞉ awagaha tabo olamagima꞉ ubi hibilo nihatetale, nale hibi daedaedawama꞉ ba꞉ka꞉-eda꞉na꞉ mabu naeno hiya꞉hiya꞉ tabote hibinomoma꞉ beda꞉hana꞉. Huiyatiya na ha꞉kiya naeno komoma꞉ awagaha tabonomo a꞉kolamaga꞉mo, mabu na ubihinola eta lumagiti ba꞉bako awagaha tabo uli komodo na hunamo adipanatene! Wadiyala nale oko owati ipuwalo kebe komo kododilinakomo ba꞉gala kebe tabo kolamaginakomo, tawakaluba꞉te ba꞉bi komo kapiyado naeno hibi komo hidamo na꞉lawa꞉mena꞉, awagaha tabo olamagi komodoha꞉.
2CO 12:7 Numa꞉la꞉, kebe dubuino baiditi hiya꞉ma꞉ eda꞉hame komoma꞉ dolamagimo, na ba꞉ ba꞉be dubula, huiyatiya ba꞉ba tetelo nale kebe koko hanohano komo kulamiya꞉mo, Godoko ubihinola nale ba꞉bi komoma꞉ awagahama꞉. Ba꞉be mabuma꞉ ebete Saitanatamo modobo tabo bolamagiya꞉, ebete ebeno eta kuba ododi nopodawa natamo ba poeme ebete natamo eta konomo temeteme kikanamenakoma꞉, iyo, ba꞉be temetemete naeno ape ipuwalo tete ga꞉ga꞉nomolo kitanama꞉ne nale awagahakapoma꞉.
2CO 12:8 Ba꞉bema꞉ netewa-kapiya hiya꞉hiya꞉ tetelo nale aeno Kodawa betoemehonakuimo, ebete ba꞉be temeteme komo nagodone kuluhukutima꞉,
2CO 12:9 huiyatiya ebete naeno tabo ba huiya na꞉goiya꞉, “Ao, a꞉kuluhukuta꞉mo. Nale ama꞉tamo kebe malemale komo da꞉hawakaliminamo, ba꞉be malemale komote amia꞉no temeteme ipuwalo ama꞉ ba꞉modobuiminakomena꞉ta. Ama꞉ numa꞉, kebe lumagiti ebeno heloha꞉ komo dumina, naeno helote ebe ipuwalo naeno hido oko hibinomolo kupula꞉ma꞉ne.” Ba꞉bema꞉ Kolini sose tawakaluba꞉la꞉, nale naeno hiya꞉hiya꞉ heloha꞉ komoma꞉ konomo kalakala ba lawe awagaha tabo hibilo kolamagima꞉nemo, mabu na iya꞉tawala ba꞉bako heloha꞉ komote nagodolo ba itana, Kelisokono helote na ipuwalo kebe oko kowatina, tawakaluba꞉te ba꞉be hido komo ba꞉bo kumima꞉na꞉.
2CO 12:10 Ba꞉bema꞉ hibila, Kelisoko mabuma꞉ naeno ape ipuwalo da꞉pola꞉na ba꞉bi heloha꞉ komo, ba꞉gala komopa꞉te na iduduputinamelo hiya꞉hiya꞉ tabo da꞉ga꞉lana ba꞉bi komo, ba꞉gala nale hiya꞉hiya꞉ kodakoda komo ipuwalo demedenamo ba꞉bi komo, ba꞉gala komopa꞉te alaholoho ipuwalo temeteme natamo dikanamena ba꞉bi komo, ba꞉gala komo hiya꞉hiya꞉ olalati komo atumu, ba꞉bi hiliyonomo komate natamo ba ikulina na kalakala kapiya ba꞉lawenakomo, mabu keba tetelo nale naeno heloha꞉ komokomo dulamenakomo, ba꞉ba tetelo hibi helote na ipuwalo oko bowatinakomene.
2CO 12:11 Ba꞉ hibila, Godote na owalubiniha꞉tale na ipuwalo eta hido komote ba꞉ka꞉-itanana꞉. Ba꞉be mabuma꞉ naeno awagaha tabo olamagi ipuwalo na ha꞉kiya na daedae lumagima꞉ a꞉midimo, huiyatiya numa꞉la꞉, nale eta gabo hibilo kumiha꞉ la꞉eno kuba ukui komokomo la꞉tamo kohawakalilamema꞉. Iyo, la꞉le la꞉eno hibi ukuilo naeno oko mabuma꞉ na na꞉milinamehonetale, nale awagaha tabo la꞉tamo ba꞉ka꞉-olamagina꞉. La꞉ huiyatiya na milinamehoneheno komo ha꞉da amihopino oko hununomamo adipatelo ibi Kelisokono hiya꞉nomo hibi oelamepima꞉ ka꞉laminamata. A꞉iye, numa꞉la꞉! Kelisokono hibi oelamepi ipuwalo na etama꞉ ba eda꞉na, nale ba꞉moe komo niya꞉tawanamo, ba꞉bi ha꞉da amihopa꞉te kebe hiya꞉hiya꞉ oko kowatihona, ba꞉bi okoeno helote naeno eta kapiya deha꞉poto okoeno helo komodo hibilo kagogolonaha꞉!
2CO 12:12 Iyo, Godokono helo kohawakalimima꞉ nale komo hiliyonomo tetelo ebeno hiya꞉hiya꞉ hanohano komo la꞉ ipuwalo ba ododili, na eta kapiya tetelo ba꞉be oko kowatima꞉ ubiha꞉ma꞉ keda꞉nakuiha꞉. Numa꞉la꞉, ba꞉bi hanohano ododili komate naeno komo ba꞉ma ka꞉na hawakalimina, nale Kelisokono hibi oelamepi ipuwalo etama꞉ hibilo eda꞉namo.
2CO 12:13 Huiyatiya diyala, la꞉ komopa꞉te ba꞉ma ka꞉na da꞉ga꞉lonama, nale la꞉ Kolini sose tawakaluba꞉tamo hido owalubi kihateha꞉. A꞉iye, nale hiya꞉hiya꞉ sose ipuwalo oko ba owatina kebe owalubi komo iba꞉tamo dikalamenakomo, ba꞉bi hiliyonomo komo ipuwalo nale eta kapiya hido ododi komo la꞉tamo kamawada꞉ha꞉! Nale kapiya komonomo la꞉tamo kododinakuiha꞉, ba꞉be komo ba꞉ nale naeno modoboha꞉ komoma꞉ la꞉ manima꞉ kakiyalamenakuiha꞉! Huiyatiya diyala, la꞉ komopa꞉te daedae ukui lawete la꞉eno hido ododiha꞉ komo naeno kuba ododi komoma꞉ da꞉midioma, ba꞉bema꞉ la꞉ ubila꞉ka꞉, la꞉le la꞉eno kuba ododi komo naeno kubama꞉ ba ga꞉la, nale la꞉ ba꞉ka꞉toelameholetama la꞉le ba꞉be kuba kegebolenamema꞉? A꞉iye, ba꞉be daedae ukui komoma꞉ nale la꞉ a꞉katoelamehola꞉mata mabu nale kuba la꞉tamo kododiha꞉!
2CO 12:14 Ba꞉ hibila, ba꞉ma tetelo nale la꞉tamo gala kakapema꞉ na꞉hidomo, iyo, nale la꞉ gala da꞉kapulamema, ba꞉moe ba꞉ netewa-kapiya tetema꞉ keda꞉ma꞉ne. Huiyatiya naeno pe komoma꞉ eta kuba ukui akalawa꞉la꞉, mabu nale naeno modoboha꞉ komoma꞉ la꞉ manima꞉ a꞉kapikiyalama꞉mata. Ao, na ubihinola la꞉eno ilina ba꞉gala mani puwatema꞉, na huiyatiya ubi konomola la꞉ malemalelo kopowalubilima꞉. Numa꞉la꞉, Godokono ubi komote a hopo habanapa꞉tamo ba꞉ma ka꞉na bitana, keba tetelo hegehege guguda꞉te ibino nabi menokobi owalubiliha꞉pima꞉ deda꞉hana, kubaha꞉, huiyatiya nabi ba꞉gala menokobi iba꞉te hiliyonomo tetelo ibino guguda꞉tamo hidohido owalubi komokomo na꞉miya꞉tenakamena꞉.
2CO 12:15 Ba꞉bema꞉ nale la꞉ mabuma꞉ naeno mani ba꞉gala ilina hiliyonomo dupula꞉lemo, ba꞉gala la꞉ kowalubilima꞉ nale naeno ka꞉ka꞉ gobogobamo dito dihatemo, nale konomamo kokalakalama꞉nemo. Iyo, nale kebe malemale komago la꞉ demalagidolenama, ba꞉be malemale bada konomola꞉ka꞉, huiyatiya la꞉eno malemale natamo keba ka꞉na kitana? Deha꞉potoma꞉ kuda꞉ eda꞉na!
2CO 12:16 Ba꞉bema꞉ la꞉ hiliyonomate iya꞉tawahala, nale kebe tabo kolamagimo ba꞉be tabo ba꞉ hibila, ba꞉ma ka꞉na nale eta kapiya tetelo la꞉ manima꞉ kakiyalameha꞉! Huiyatiya diyala, la꞉ komopa꞉te na mabuma꞉ eta kuba tabo ba꞉ma ka꞉na da꞉ ga꞉loma, “Polokono ha꞉da amiho mulu ukui gabodo ebete a ebeno guba꞉mo a꞉magatui!”
2CO 12:17 A꞉iye, nale kebe hiliyonomo okopi la꞉tamo dopamo da꞉poelamenakuimo, ibi atumu ibi ipuwalo eta kapiyate eta hido komo la꞉godone ha꞉da amiho gabodo lawema꞉ ukui kapihateha꞉!
2CO 12:18 Ba꞉gala numa꞉la꞉, nale dopamo Taitasiko la꞉tamo pema꞉ ba kiyame ebe ba꞉gala eta hibima꞉ mididawa ekawa꞉go la꞉tamo da꞉poelamimo, ebete la꞉tamo puluhukuti ha꞉da amiho gabodo la꞉godone bada hido komo ka꞉pelawi? A꞉iye! La꞉ iya꞉tawahala ebeno komo, ebe ba꞉gala na, a oko owati ipuwalo aeno tepo ipuwoeno ukui kapiyanomoma꞉ ba eda꞉hana, ale atu nato bobodo tuputupulu wapata꞉nama꞉.
2CO 12:19 Ba꞉bema꞉ a puya꞉te Godokono hibi okopima꞉ deda꞉hanama꞉, ale ba꞉moe leta ipuwalo kebe hiya꞉hiya꞉ tabo kolamagiminapema꞉, diyala, la꞉ komopa꞉te ba꞉bi taboma꞉ ba꞉ma ka꞉na da꞉ emalagidoloma, komopa꞉te a kuba ododilipima꞉ ba ga꞉la, ale ibi tolelamelo la꞉eno holoholo hapulu a ha꞉kiya a kuba ododiha꞉pima꞉ ba꞉bema꞉ ga꞉lanama꞉. Ao, eba ka꞉naha꞉! Ale Godokono holoholo hapulu ba la꞉mota꞉hana, eta lumagi tolemeheno Kelisokono ukui tabo kapiya bolamagiminakoma꞉, iyo, a ubila ale aeno hiliyonomo tabamo la꞉ hibima꞉ midi ipuwalo kokodakoduilamema꞉, mabu la꞉ ba꞉ aeno hidohido mabulubilata.
2CO 12:20 Numa꞉la꞉, naeno ukui bilibili komote ba꞉ma ka꞉na itana, nale la꞉tamo pete la꞉eno hiya꞉hiya꞉ ododili komo da꞉pulamelelamema, ba꞉ba tetelo diyala, naeno kalakalate la꞉tamo da꞉ a꞉kitanamene. Ba꞉bene ba꞉ba tetelo nale naeno ubiha꞉ komodo kebe komokomo la꞉tamo da꞉pododilimo, diyala, ba꞉be mabuma꞉ la꞉ komopa꞉te natamo atumu da꞉ a꞉kakalakalahamata. Iyo, ukui bilibili komote nagodolo bitana, mabu na ubihinola la꞉godolo ba꞉makomako kuba komo pulame — olowabeletihui komo, ba꞉gala komopino ilinama꞉ mauba komo, ba꞉gala tepo ipuwalo koete tiyolo mahiga komo, ba꞉gala lumagiti ebe ha꞉kiya ebe kapiya emalagidolo komo, ba꞉gala komopi iduduputilame komo, ba꞉gala komopino komoma꞉ tabo ga꞉la komo, ba꞉gala awagaha komo, ba꞉gala hiya꞉hiya꞉ utitata komo.
2CO 12:21 Iyo, na iya꞉tawala la꞉le kebe koko kuba dopamo dododilinakuima, la꞉ ipuwalo komo hiliyonomate ba꞉bi kuba ipuwane Godotamo hibilo kohobila꞉haha꞉, ba꞉ma ka꞉na kamenakamena pilo komo ba꞉gala bohelemele pilo komo, ba꞉gala tepo ipuwoeno kuba dalowa꞉ ukui hawakalilame komo, ba꞉gala bohelemela꞉tamo kateneno kuba ubi tabo ga꞉la komo, ba꞉bako hiya꞉hiya꞉ kuba la꞉ komopa꞉te hibilo kamiya꞉paleha꞉. Ba꞉bema꞉ naeno ukui bilibili komo bitana, mabu nale la꞉tamo gala da꞉kapemo, ba꞉ba tetelo diyala, nale la꞉eno kuba ododili komoma꞉ konomamo da꞉ pihimo, iyo, la꞉eno holoholo hapulu naeno Godote hilopo natamo ba꞉ba ka꞉na dikanamemene.
2CO 13:1 Iyo, nale la꞉tamo gala da꞉kapemo, ba꞉moe ba꞉ netewa-kapiya tetema꞉ keda꞉ma꞉ne. Ba꞉bema꞉ ba꞉moe ba꞉ eta komola, Godokono Bukate a biya꞉tua꞉mena, keba tetelo eta hibima꞉ mididawate ha꞉kiya pete eta lumagino ododi komo kubama꞉ da꞉pegoemene, ale ebeno tabo a꞉kulia꞉ma꞉, huiyatiya netewa o netewa-kapiyate ebeno kuba komo da꞉pehawakalimimina꞉, ba꞉ba tetelo ale ebetamo kuba huiya kikamema꞉nema꞉.
2CO 13:2 Ba꞉bema꞉ la꞉ puya꞉te dopamo hiya꞉hiya꞉ kuba dododilinakuima, ba꞉gala la꞉ puya꞉te ba꞉ma tetelo kuba dododilinakoma, na peheno la꞉ hiliyonomo dopamo ba꞉ma ka꞉na kiyahalamemata, nale da꞉pemo la꞉ kuba ododilipi hiliyonomatamo la꞉eno kuba huiya kopikalamema꞉nemata. Numa꞉la꞉, nale dopamo da꞉pimo, ba꞉be tete ba꞉ naeno netewa tetema꞉ edi, puya꞉te ba꞉ba tetelo kuba ododili ipuwalo da꞉pola꞉nui, nale ibi ba꞉moe atu tabamo ba꞉bo pikiyahalamimo.
2CO 13:3 A꞉iye! Nale la꞉go lutaha꞉ tetelo la꞉le ba꞉ma ka꞉na olamagimimata, ale Kelisokono helo Pologodolo hibilo dumima꞉ ebe hibi okodawama꞉ ba꞉bo koga꞉lama꞉nema꞉. Ba꞉bema꞉ tete tatalila, la꞉le naeno komo ba꞉ma ka꞉na hibilo kumima꞉nemata, naeno tabo olamagi komodo Kelisote ha꞉kiya la꞉ ba꞉bo kokiyahalamema꞉na꞉ta, iyo, ebete la꞉ ipuwalo ebeno oko ebeno helo konomamo ba owatina la꞉tamo kuba huiya ikalamema꞉ heloha꞉ma꞉ keda꞉naha꞉!
2CO 13:4 Numa꞉la꞉, dopamo Kelisote ebe ha꞉kiya ebe heloha꞉dawama꞉ da꞉midiya꞉ ba꞉ba tetelo kuba ododilipa꞉te ebe keha pihigamo pihomotete ikoko ba꞉bo alukulimiya꞉, huiyatiya kalakala konomola, ba꞉ma tetelo ebete Godokono heloamo ka꞉ka꞉go bemedena. Ba꞉bema꞉ hibila, Kelisote dopamo heloha꞉ma꞉ keba ka꞉na kediya꞉, a ebeno hibi okopa꞉te ba꞉ atumu heloha꞉ma꞉ eda꞉hanama꞉, huiyatiya ale ebe ipuwalo ba emedena Godokono helo ba꞉bo kolawema꞉nema꞉, ale la꞉ mabuma꞉ hiya꞉hiya꞉ oko hidamo kowatihonama꞉.
2CO 13:5 Ba꞉bema꞉ wadiyala la꞉ ha꞉kiya la꞉eno hiya꞉hiya꞉ komo hidamo nulamenala꞉, mabu diyala, la꞉ hibima꞉ midi ipuwalo kuda꞉ emedehonamata o da꞉ kemedehonaha꞉. La꞉ iya꞉tawahala, la꞉ puya꞉te hibima꞉ midi ipuwalo demedenama, Ya꞉su Kelisote la꞉ ipuwalo hibilo bemedena, aba꞉ hibila꞉ka꞉? Huiyatiya numa꞉la꞉, la꞉ puya꞉te hibima꞉ midi ipuwalo emedenaheno, la꞉ niliya!
2CO 13:6 Ba꞉gala na ubila la꞉le aeno komo atumu hidamo na꞉kulamenala꞉, mabu ba꞉be komodo la꞉ kiya꞉tawahama꞉nemata, a puya꞉te Godokono hibi okopima꞉ deda꞉hanama꞉, ale hibima꞉ midi ipuwalo hibinomolo bemedenama꞉.
2CO 13:7 Ba꞉bema꞉ ale Godoko betoemehonakoma꞉ la꞉le la꞉eno hiliyonomo ododili ipuwalo eta kapiya kuba ododikapoma꞉, mabu a ubila la꞉ Godokono umi ipuwalo tuputupu komokomo kapiya ododili. Huiyatiya numa꞉la꞉, la꞉le tuputupu ododili komokomo ipuwalo hibilo demedenama, a ubihinola tawakaluba꞉te la꞉eno emede komoma꞉ a hunamo wadiya꞉paa꞉te, ao, iba꞉te daedae ukuilo la꞉ hidohidopima꞉ ba ga꞉la huiyatiya a kubapima꞉ da꞉kaga꞉lamena꞉, ale ba꞉be komo ko komoha꞉ma꞉ koga꞉lama꞉nema꞉.
2CO 13:8 Ba꞉ hibila, Godokono hibi tabo olamagi oko owatima꞉ ale eta duhimi komo ododima꞉ kamodobonaha꞉, mabu ebete modobo helo atamo nikaa꞉mena ale kapiya komonomo kododima꞉, ba꞉be komo ba꞉ ale ebeno hibi komo da꞉hawakaliminakoma꞉ ba꞉be komola.
2CO 13:9 Numa꞉la꞉, keba tetelo ale aeno heloha꞉ komo ba iya꞉tawaha huiyatiya la꞉ hibima꞉ midi ipuwalo helohelopima꞉ eda꞉halo dulamena, ba꞉ba tetelo aeno kalakalate hibilo bitana, iyo, ale Godoko betoemehonakoma꞉ ebeno owalubi komodo la꞉ hibima꞉ midi ipuwalo kodakodalo gala kakala꞉mota꞉hanama꞉.
2CO 13:10 Ba꞉bema꞉ konomo komo ba꞉ ba꞉ma ka꞉nala. Nale la꞉godone muhululu ba emedena ba꞉moe leta ododiti la꞉tamo poememo, mabu na ubihinola nale da꞉pemo ba꞉ba tetelo nale la꞉eno hiya꞉hiya꞉ kuba ododili komoma꞉ la꞉ heloamo ba pikiyahalame kuba huiya la꞉tamo dito pikalame. Ba꞉bema꞉ na peheno wadiyala la꞉ dopamo la꞉eno kuba ododili komone nohobila꞉hala꞉, ba꞉bene Kodawate kebe helo natamo dikanamiya꞉, nale ba꞉be heloamo la꞉eno hibima꞉ midi ipuwalo la꞉ kopekodakoduilamema꞉nemata. Ba꞉ hibila, ebete helo natamo kikanamiya꞉ha꞉ nale la꞉eno hibima꞉ midi komo kokubahilamema꞉.
2CO 13:11 Ba꞉bema꞉ naeno hibima꞉ midipi ekaka꞉la꞉, ba꞉moe leta kuititi hapulu nale la꞉tamo yawo tabo bolamagimo. Wadiyala la꞉ la꞉eno ukui konomamo nihatenakuya꞉la꞉, la꞉le la꞉eno hibima꞉ midi ipuwalo kodakodalo gala kakala꞉mota꞉hanama꞉. Ba꞉gala la꞉le awaepi kowalubilima꞉ nale la꞉ da꞉kiyalamema, wadiyala la꞉ ba꞉be tabamo na꞉papamila꞉hala꞉la꞉, ba꞉bene ukui kapiyama꞉ ba eda꞉ha hido tataba ipuwalo nemedenala꞉. Ba꞉bema꞉ la꞉ ba꞉ba ka꞉na ba emedehona, pote malemale komo ba꞉gala hete komo tawakaluba꞉tamo dikalamena, ba꞉be Godote la꞉ ipuwalo bemedenamene.
2CO 13:12 Wadiyala la꞉ da꞉kapiyuimima la꞉ hiliyonomo etapa꞉te etapino kokoto uwatehuilo na꞉pa꞉watamehuiya꞉la꞉.
2CO 13:13 Godokono tawakaluba꞉te ba꞉malo demedehona, ibi hiliyonomate ibino nolata tabo la꞉tamo poelama꞉.
2CO 13:14 Wadiyala Kodawa Ya꞉su Kelisogodone duluhukuna ba꞉be malemale komo, ba꞉gala Godogodone duluhukuna ba꞉be malemale emalagidolo komo, ba꞉gala Hido-talona Gobogobogodone duluhukuna ba꞉be kalakalago kapimilo emede komo, ba꞉bi komate la꞉ hiliyonomagodolo na꞉pola꞉namena꞉. Ba꞉moe ba꞉ naeno tabo kuititila. Ba꞉ba꞉la.
GAL 1:1 Na ba꞉ Polotela, Ya꞉su Kelisote ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala, iyo, pote ebe hoe ipuwane dadipatiya꞉, ba꞉be Nabiwi Godote eba꞉go na ba꞉be oko kowatinama꞉ a꞉ka꞉namiya꞉, eta lumagino ubi komodoha꞉.
GAL 1:2 Na ba꞉gala nago demedena ba꞉bi hibima꞉ midipi ekaki, ale la꞉ puya꞉te Galesiya hopoeno hiya꞉hiya꞉ sose tawakalubima꞉ deda꞉hanama, ale ba꞉moe leta la꞉ hiliyonomatamo poemema꞉.
GAL 1:3 Wadiyala aeno Nabiwi Godoko ba꞉gala Kodawa Ya꞉su Kelisoko iba꞉te ibino malemale komo ba꞉gala hete komo la꞉tamo nikalama꞉mena꞉ta.
GAL 1:4 Ba꞉ hibila, Kelisote aeno Nabiwi Godokono ubi komamo papamiwatalo aeno kuba ododili mabuma꞉ ebeno ka꞉ka꞉ gobogobamo ihatiya꞉, ebete a ba꞉moe hopoeno koko kuboeno helo ipuwane kuluhukua꞉tema꞉.
GAL 1:5 Ba꞉bema꞉ wadiyala Godogodolo awagaha komote emedena emedena tetelo nitanamene. Ba꞉moe tabo ba꞉ hibinomola, ba꞉ba꞉la!
GAL 1:6 Ba꞉ma tetelo nale la꞉ mabuma꞉ konomamo na꞉la꞉wa꞉namo, mabu la꞉le eta ka꞉ka꞉ mula꞉ gaboeno ha꞉da amiho tabo dulihuima, ba꞉bema꞉ la꞉le Hido Tabone ohobila꞉hate pote Kelisokono malemale komodo la꞉ da꞉ka꞉lami, ba꞉be Kodawa tiyonomolo miya꞉pama꞉ ewagelenamata.
GAL 1:7 La꞉ hidamo nulia꞉la꞉, eta ka꞉ka꞉ mula꞉ gabote hibilo kitanaha꞉! Huiyatiya komopa꞉te Kelisokono Hido Tabo kubahimima꞉ ba ewagelena, iba꞉te eta hiya꞉ gaboma꞉ tabo olamagimiti ukui bilibili komo la꞉tamo ba꞉bema꞉ ikalamenata.
GAL 1:8 A꞉iye! Nale dopamo tetelo kebe Hido Tabo la꞉tamo da꞉polamagimo, pote ba꞉be tabo hiya꞉ma꞉ miditi eta ka꞉ka꞉ mula꞉ gabo da꞉hawakalimimini, wadiyala Godote ebe Saitanakono Koe Habamo dito noema꞉mene! Ba꞉bene Hunu Haboeno nopopi ipuwalo etate ba꞉be atu konomo kuba komo dododimini, iyo, na ba꞉ atumu, wadiyala aeno kuba huiyate ba꞉ ba꞉ba ka꞉na atamo atumu na꞉kapa꞉mene.
GAL 1:9 Ba꞉bema꞉ ale dopamo la꞉ kebe komo ka꞉kiyalamiti, nale ba꞉be atu komo la꞉ gala ba꞉ma ka꞉na kakiyalamemata, la꞉le dopamo kebe Hido Tabo da꞉lawima, pote ba꞉be tabo hiya꞉ma꞉ miditi eta hiya꞉ ka꞉ka꞉ mula꞉ gabo da꞉hawakalimimini, wadiyala Godote ebe Saitanakono Koe Habamo dito noema꞉mene!
GAL 1:10 Numa꞉la꞉, ba꞉moe tabo olamagi ipuwalo nale eta hopo haba lumagi kalakaluimima꞉ kewagelenaha꞉, ba꞉gala nale eta lumagigodolo na milinamehone tabo ulima꞉ ubi kihatenaha꞉. Ao, eba ka꞉naha꞉, Godote naeno komoma꞉ da꞉kalakalana, nale ba꞉be ubi kapiyamo ihatenamo! Ba꞉ hibila, dopamo nale komo hopo habanapi hiliyonomo kalakaluilamema꞉ ewagelenamimo, huiyatiya ba꞉ma tetelo na modoboha꞉ ba꞉ba ka꞉na ewagelena mabu nale oko Kelisoko kapiyatamo owatinamo, eta lumagitamoha꞉.
GAL 1:11 Naeno hibima꞉ midipi ekaka꞉la꞉, na ubila la꞉ ba꞉moe eta komo hidamo niya꞉tawahala꞉, nale kebe Hido Tabo kolamaginakomo, ba꞉be Tabote eta hopo lumagino ukui komone kuluhukuya꞉ha꞉.
GAL 1:12 Iyo, nale ba꞉be Tabo hopo habanapi ipuwalo eta iya꞉tulamedawagodone kalawiya꞉ha꞉, huiyatiya hibila, Ya꞉su Kelisote ha꞉kiya ba꞉be Tabo natamo ikanamete ebeno ipuwa ba꞉bo hawakalimiya꞉.
GAL 1:13 La꞉ dopamo ba꞉moe komo ulihuimata, naeno pakala emede ipuwalo nale Godoko adikumima꞉ Yunapino ododili komo hiliyonomo keba ka꞉na ka꞉ta꞉matalenakuimo. Numa꞉la꞉, ba꞉ba tetelo nale komo Yu watowatopa꞉go Godokono hibi sose tawakalubi kubanomamo kubahilamema꞉ koko temeteme iba꞉tamo hibinomolo ikalamenakuima꞉.
GAL 1:14 Ba꞉gala naeno komo Yunapa꞉te Godoko adikumima꞉ nale ibino ododili ipuwalo ibi ba iya꞉tulamena ibi ipuwalo eta kodawama꞉ ba꞉bo ediya꞉mo, mabu hibila, a Yunapino iniwala꞉te atamo kebe hiya꞉hiya꞉ kukala dikaa꞉mehuiya꞉, nale ba꞉bi hiliyonomo kukalamo papamiwatalo helonomoma꞉ ba eda꞉na, naeno helo komote naeno apegabo dubu hiliyonomoeno helo dito negogoliya꞉.
GAL 1:15 Huiyatiya kalakala konomola, nale naeno menokoeno tepone hawakalaheno, dopamo Godote ebeno malemale komodo na ka꞉namiti ba꞉bo laweniya꞉, nale galane tetelo Yunapino ododili komo ipuwane uluhukuti ebeno hibi oko kowatinama꞉. Ba꞉gala nale ibino ododili ipuwalo ba emedena, ebete atu ubi komo gala ba꞉ma ka꞉na kihatiya꞉,
GAL 1:16 ebeno Guduino komo natamo hawakalimiti, ba꞉bene nale tote Yuha꞉pa꞉tamo Hido Tabo ba nolamagi iba꞉te ebeno komo atumu hidamo kiya꞉tawahama꞉. Ba꞉bene ba꞉be komote natamo duluhukuya꞉, nale naeno mabulubi ipuwalo eta lumagitamo katuya꞉ha꞉, nale keba ka꞉na da꞉nododimo ba꞉be ukui ebegodone konelawema꞉.
GAL 1:17 Ba꞉gala Yelusalema ko habalo demedehonama꞉, nale ba꞉bi Ya꞉sukunu komo oelamepino ukui lawema꞉ iba꞉tamo atumu katuya꞉ha꞉. Iyo, na iya꞉tawuya꞉mo Ya꞉suti na ka꞉namihino ebete ba꞉bi dubu dopamo a꞉ka꞉lamiya꞉, huiyatiya nale iba꞉tamo nuluhukuhino Ala꞉biya dito hopamo tote, na ha꞉kiya ba꞉bolo nemeda꞉tepate ba꞉bene Dama꞉sakase ko habamo gala dito kawiluya꞉mo.
GAL 1:18 Ba꞉bene netewa-kapiya gogote da꞉petohuya꞉, ba꞉ba tetelo nale Pitakoba꞉ tabo ga꞉lama꞉ Yelusalemamo tote eba꞉go netewa wuikilo ba nemeda꞉tepa,
GAL 1:19 huiyatiya komo oelamepi dubu ipuwalo nale eta kapiyanomo ba꞉bo numiya꞉mo, ba꞉be dubu ba꞉ Kodawa Ya꞉sukunu ekawi Ya꞉imesitila.
GAL 1:20 La꞉ nulia꞉la꞉, nale ba꞉moe leta ipuwalo da꞉hawakalimimo ba꞉be tabo ba꞉ hibinomola, iyo, Godoko iya꞉tawala na ha꞉da amiho tabo kolamagitaha꞉.
GAL 1:21 Ba꞉bene nale Yelusalemane tiyolo gala kapete, Siliya hopo ba꞉gala Silisiya hopamo dito nuluhukuya꞉mo.
GAL 1:22 Ba꞉moe ba꞉be mabuma꞉ kebe sose tawakaluba꞉te Yudiya hopoeno hiya꞉hiya꞉ habalo demedehonama꞉, ba꞉bi Kelisoko hibima꞉ midipa꞉te na ibino baida꞉mo unameheno naeno komo ba꞉be mabuma꞉ hidamo kiya꞉tawahuya꞉ha꞉.
GAL 1:23 Huiyatiya iba꞉te komopino tabo ga꞉la kapiya ba꞉ma ka꞉na ulihuya꞉, “Dopamo kebe dubuti a hibima꞉ midipi kubahia꞉mema꞉ koko temeteme atamo dikaa꞉menakui, ebete ba꞉ma tetelo tabo olamaginako tawakalubi hiliyonomate Ya꞉suku hibima꞉ komidima꞉!”
GAL 1:24 Ba꞉ hibila, iba꞉te ba꞉be tabo uliti na mabuma꞉ Godoko ba꞉bo milimihuya꞉.
GAL 2:1 Ba꞉bene 14 gogo da꞉kapetohui, ya꞉lo gogolo na Taitasiko lawete Banabasiko bana Yelusalemamo gala na꞉katuimo,
GAL 2:2 mabu Godote ebeno ubi natamo a꞉hawakalimi nale ba꞉be komo kododima꞉. Ba꞉bene nale sose koko watowatopi kapiyago ba nekapiyuimi, na Hido Tabo mabuma꞉ kebe tabo komokomo Yuha꞉pa꞉tamo kolamaginakomo, ba꞉bi komo iba꞉tamo ba꞉bo hawakalilamimo. Ba꞉ hibila, nale ba꞉be komo benododimo, mabu na ubihinola kebe gaote naeno kodakoda oko ipuwalo Yuha꞉pa꞉godone da꞉pikuli, iba꞉te ba꞉bi gao kubadopoma꞉ ga꞉la.
GAL 2:3 Ba꞉bene iba꞉te naeno tabo ulihote, na owalubinidawa Taitasikono komoma꞉ iba꞉te nago ukui kapiyama꞉ ba꞉bo eda꞉huya꞉, ba꞉ma ka꞉na ebe Yuha꞉dawama꞉ ba eda꞉na, talona puliyala ebete Yunapi dubuino tama itamida kukala laweha꞉ma꞉ eda꞉lo Godokono oko nago kapimilo kowatinama꞉.
GAL 2:4 Huiyatiya aeno kapiyuimi habamo puya꞉te ha꞉da amiho gabodo da꞉pelami, ibi ha꞉kiya ibi hibima꞉ midipi ekakima꞉ ba ka꞉lami ba꞉bo ga꞉luya꞉, ebete tama itamida kukala na꞉lawa꞉mene. A꞉iye! Ba꞉bi dubate kuba ukui gabodo ago pekapiyuya꞉, a puya꞉te Yuha꞉pi ipuwalo oko dowatihonama꞉ aeno ododi komo kubama꞉ koga꞉lama꞉, ba꞉bema꞉ a Ya꞉su Kelisoko ipuwalo Mosesekono Tutumu Taboeno menemene ipuwane dikulima꞉, iba꞉te ba꞉be tabo ulihote ubi ba꞉bo ihatiya꞉ Tutumu Taboeno hala꞉mo a gala kakamatuhua꞉mehoema꞉.
GAL 2:5 Huiyatiya iba꞉te Taitasitamo ododima꞉ da꞉ga꞉lui, ale ibino ubi komamo papamila꞉haheno aeno ukuilo tete nanekelenomolo ukui gagagagama꞉ keda꞉haha꞉, iyo, ale la꞉ Yuha꞉pi hibima꞉ midipi mabuma꞉ ibi ba꞉bo duhilamima꞉, iba꞉te Hido Taboeno hibi komo kubahimikapoma꞉.
GAL 2:6 Ba꞉ba tetelo aeno kapiyuimi ipuwalo puya꞉te watowatopima꞉ deda꞉hui, ba꞉ba꞉te huiyatiya naeno okoeno ododili komo hiliyonomo ulihote modoboma꞉ ga꞉luya꞉. Iba꞉te ba꞉moe komo iya꞉tawahuya꞉, Godote ya꞉lo tetelo natamo Hido Tabo Yuha꞉pa꞉tamo olamagi oko dikanamiya꞉, dopamo ebete Pitatamo Hido Tabo Yunapa꞉tamo olamagi oko keba ka꞉na kikamiya꞉ ba꞉ba ka꞉na. Ba꞉ hibila, Godote kebe heloamo Pitako Yunapa꞉tamo oemedawama꞉ da꞉midiya꞉, ebete ba꞉be atu heloamo na Yuha꞉pa꞉tamo oenamedawama꞉ a꞉kamidiniya꞉, ba꞉bema꞉ ba꞉bi watowatopa꞉te naeno oko komoma꞉ modoboma꞉ ga꞉late eta hiya꞉ gabodo kododima꞉ na kakiyanameha꞉. Huiyatiya numa꞉la꞉, iba꞉te naeno oko kubama꞉ na꞉ga꞉latale nale ba꞉be komoma꞉ ukui bilibilima꞉ ba꞉ka꞉-eda꞉na꞉, mabu hopo habanapa꞉te pui kokopima꞉ da꞉ga꞉lana, Godote ba꞉bi dubu hunu nikapa꞉mo kulamenaha꞉ huiyatiya ebete tepo ipuwamo ulamena.
GAL 2:9 Ba꞉bene Ya꞉imesiko, Pitako, ba꞉gala Yoneko iba꞉te ba꞉be kapiyuimipino umi ipuwalo koko watowatopima꞉ ba eda꞉hana, iba꞉te naeno hidonomo oko Godogodone pe komo diya꞉tawahui, ba꞉ba tetelo iba꞉te na ba꞉gala Banabasiko aeno kokoto uwatehuilo ale kapimilo tabo ba꞉ma ka꞉na ga꞉luima꞉, na Banabasikoba꞉ oko Yuha꞉pino hiya꞉hiya꞉ hopolo ba owatina, ibi huiyatiya oko Yunapino hopolo bowatihonamena꞉.
GAL 2:10 Ba꞉bene ale eta kapiya komo ododima꞉ iba꞉te a ba꞉bo kiyaa꞉miya꞉, ba꞉ma ka꞉na Yunapi ipuwalo puya꞉te awaepima꞉ deda꞉hana, ale Yuha꞉pi hibima꞉ midipi kokiyalamema꞉ iba꞉te ba꞉bi tawakalubi malemale mani miya꞉te komamo kemalagidolenakoma꞉, huiyatiya numa꞉la꞉, ibino tabo ulihino nale ba꞉be komo ododima꞉ na ha꞉kiya naeno ubi dopamo ihatimo.
GAL 2:11 Ba꞉bene komo hegela hiliyonomo da꞉petohui, eta tetelo Pitate A꞉ntiyoka ko habamo puluhukuti eta kuba komo Yuha꞉pi hibima꞉ midipi ekaka꞉tamo da꞉pododi, na ba꞉bema꞉ sose tawakalubino holoholo hapulu ebe koamo kiyahamimo.
GAL 2:12 Iyo, ebete ago da꞉pemeda꞉tepui, komo hegelalo ebete Yuha꞉pi ekaka꞉go baa꞉ kapimilo kalakalago a꞉nahanakui. Huiyatiya Ya꞉imesiti komo Yunapi dubu Yelusalemane da꞉poelami, Pitate ba꞉bo iya꞉tawui ibi ba꞉ puya꞉te tama itamida kukala laweha꞉pa꞉go pola꞉na talonama꞉ da꞉ga꞉lana ba꞉bi dubula, ba꞉bema꞉ ibino ubiha꞉ tabo komoma꞉ ba toletole ebete Yuha꞉pa꞉go baa꞉ na ba꞉bo ekelami.
GAL 2:13 Ba꞉bene A꞉ntiyoka habalo demedehona, komo ba꞉bi Yunapi ekaki Banabasiko bana, iba꞉te Pitakono ododi komo umiti tola꞉go ba꞉ atu kuba komo ba꞉bo ka-ododiya꞉, iyo, iba꞉te Yelusalemanapi dubuino ubiha꞉ tabo komoma꞉ toletolehote baa꞉ naha ipuwalo ibino Yuha꞉pi hibima꞉ midipi ekaki dito miya꞉paliya꞉.
GAL 2:14 Ba꞉bema꞉ Hido Tabote ale ododima꞉ keba ka꞉na ka꞉kiyaa꞉mena, iba꞉te ba꞉be hibi tuputupu gabo da꞉miya꞉pui, nale ba꞉be komo ba umi ibi hiliyonomoeno holoholo hapulu Pitako ba꞉ma ka꞉na kiyahamimo, “Ama꞉ Yu lumagima꞉ ba eda꞉na, huiyatiya Yelusalemanapi pelameheno ama꞉ Yuha꞉pino komokomo iba꞉go kalakalago ododinakuya꞉ta. A꞉iye, ba꞉moe ba꞉ hido ododi komola! Ba꞉bema꞉ mabu keka꞉ ama꞉ ba꞉ma tetelo ba꞉be hido ododi komo miya꞉pate temeteme Yuha꞉pa꞉tamo dikalamena, ba꞉ma ka꞉na iba꞉te a Yunapino iniwalino ododili komo ta꞉mataleheno ama꞉ iba꞉go gala a꞉kalutamena꞉ta?”
GAL 2:15 Ba꞉bema꞉ a puya꞉te Yunapi ipuwane da꞉hawakalahaliya꞉ma꞉, a ba꞉moe komo hibilo iya꞉tawahala, a la꞉ Yuha꞉pi keba ka꞉nala꞉ka꞉ eba ka꞉naha꞉, mabu la꞉eno komo tawakalubi hiliyonomate Godokono hibi gabo iya꞉tawaha꞉ma꞉ ba eda꞉hana koko kuba ba꞉bo ododilinaka.
GAL 2:16 Huiyatiya a hibima꞉ midipi hiliyonomate iya꞉tawahala, lumagiti Ya꞉su Kelisoko hibima꞉ da꞉midimini, Godote ba꞉be komo kapiyado ebe tuputupudawama꞉ koka꞉mima꞉ne, ebete Moseseko ipuwado tawakaluba꞉tamo dikalamiya꞉ ba꞉bi Tutumu Tabamo papamiwata komodoha꞉. Iyo, ba꞉moe ba꞉be mabuma꞉ a Yunapi ba꞉gala la꞉ Yuha꞉pi, a hiliyonomate Kelisoko hibima꞉ midi gabodo tuputupupima꞉ ba eda꞉hana ba꞉bo ga꞉lanama꞉, eta gabo kitanaha꞉ lumagiti Godokono Tutumu Tabamo papamiwata komodo ebeno tuputupudawama꞉ keda꞉ma꞉.
GAL 2:17 Ba꞉bema꞉ diyala, daedae ukuidawate ba꞉ma ka꞉na da꞉ goemene, “La꞉ hibima꞉ midipa꞉te Kelisoko ipuwalo Godokono tuputupupima꞉ eda꞉hama꞉ ba ga꞉la, huiyatiya la꞉le Mosesekono komo Tutumu Tabamo kapapamila꞉hanaha꞉. Ba꞉bema꞉ numa꞉la꞉, Kelisote la꞉ na꞉heluilamenata la꞉le la꞉eno papamila꞉haha꞉ komodo hibo gabo kududima꞉, koko kuba ododilipa꞉te keba ka꞉na kududinaka ba꞉ba ka꞉na!” Na huiyatiya ebetamo tabo ba꞉ma ka꞉na kogoema꞉nemo, “Ao, ama꞉ daedae ukuilo gaa꞉ta!
GAL 2:18 Godote Moseseko ipuwado atamo dikaa꞉miya꞉, nale ba꞉bi hiya꞉hiya꞉ Tutumu Tabo kodakodanomolo gala a꞉kuwata꞉mo. Ama꞉ numa꞉, ebete naeno hibima꞉ midi komodo na kebe komo kodakodalo lawema꞉ kubama꞉ goelo diya꞉tunamiya꞉, nale ba꞉be komone ohobigate ba꞉bene ukui hiya꞉ma꞉ miditi ba꞉be atu komo gala da꞉kalawemo, Godokono umi ipuwalo na ba꞉ konomo kuba ebetamo kododima꞉nemo.”
GAL 2:19 Ba꞉ hibila, Godokono Tutumu Tabo komate na biya꞉tunamena, na ha꞉kiya naeno heloamo ebeno ubi komamo papamiwata modoboha꞉. Ba꞉bema꞉ na ba꞉bi Tutumu komoeno helo ipuwane uluhukuti naeno heloamo ododi komoma꞉ ba꞉ dito hoiya꞉mo, nale ba꞉ba tetene tupuimiti Godokono heloamo ebe mabuma꞉ kemedenama꞉.
GAL 2:20 Iyo, ba꞉moe ba꞉be gabodo nale Kelisokoba꞉ keha pihigalo ba꞉ dito hoiya꞉mo, ba꞉bema꞉ ba꞉ma tetelo Kelisote na ipuwalo ba emedena na ha꞉kiya naeno heloamo gala a꞉kemedenamo. Ba꞉ hibila, Godokono Guduti na malemalelo ba emalagidolonena ebeno ka꞉ka꞉ na mabuma꞉ gobogobamo dihatiya꞉, ba꞉bema꞉ na ba꞉ma tetelo ebe hibima꞉ midi komodo bemedenamo.
GAL 2:21 A꞉iye! Lumagiti Tutumu Tabamo papamiwata komodo tuputupudawama꞉ eda꞉ gabote hibilo nitanatale, a biya꞉tawahana꞉ Kelisokono hoe komo ba꞉ ko komoha꞉. Huiyatiya numa꞉la꞉, Tutumu Tabamo papamiwata komodo gabote kitanaha꞉, ba꞉bema꞉ Godote ebeno eta malemale gabo na diya꞉tunamiya꞉, nale ba꞉be hidonomo gabo ubiha꞉ma꞉ a꞉keda꞉namo.
GAL 3:1 O Galesiyanapa꞉la꞉, mabu keka꞉ la꞉ daedae tawakalubima꞉ deda꞉huima? A꞉iye, Ya꞉suti keha pihigalo da꞉hoiya꞉, na dopamo ba꞉be komoeno ipuwa la꞉tamo hidonomamo a꞉hawakalimimo! Ba꞉bema꞉ la꞉godolo dopamo da꞉pola꞉nama꞉, Saitanakono ododi komodo ba꞉bi hidohido ukui pote kiya꞉hekelamiti? Numa꞉la꞉, la꞉le ebeno ha꞉da amiho komokomo uwatete kuba ukui ba꞉ma ka꞉na emalagidolo a꞉tupuimimata, Godote Moseseko ipuwado tawakaluba꞉tamo dikalamiya꞉ la꞉le ba꞉bi Tutumu Tabamo papamila꞉ha komodo tuputupupima꞉ keda꞉hanama꞉.
GAL 3:2 Ba꞉bema꞉ wadiyala la꞉ ba꞉moe kapiya komo na na꞉kiyanama꞉la꞉, la꞉le Godokono Gobogoboeno helo kebe gabodo ka꞉lawiuima, ebeno Tutumu Tabamo papamila꞉ha gabodola꞉ka꞉, o la꞉ ebeno Hido Tabo uli tetelo hibima꞉ da꞉midima ba꞉be komodola꞉ka꞉?
GAL 3:3 A꞉iye, la꞉ daedae tawakalubima꞉ akeda꞉hala꞉! Godokono Gobogobote la꞉ ipuwalo kebe oko ka꞉tupuimi, la꞉ modobola꞉ka꞉ ebeno helo komone ohobila꞉hate la꞉ ha꞉kiya la꞉eno ododili heloamo ba꞉be oko upula꞉?
GAL 3:4 Numa꞉la꞉, la꞉eno hibima꞉ midi ipuwalo kebe hiliyonomo komate la꞉tamo dikulihonakui, Godote ba꞉bi komodo la꞉ hidamo iya꞉tulamenakuya꞉ta, aba꞉ hibila꞉ka꞉? A꞉iye, modoboha꞉ la꞉ ba꞉bi hidohido ukui dito adodole!
GAL 3:5 Ba꞉bema꞉ Godote ebeno Gobogoboeno helo la꞉tamo konomamo ba ikalamena la꞉ ipuwalo koko hanohano komo dododilinako, ba꞉be komote la꞉godolo bada mabuma꞉ kitana? La꞉ Godokono Tutumu Tabamo papamila꞉ha mabuma꞉la꞉ka꞉, o la꞉ ebeno Hido Tabo uli tetelo hibima꞉ da꞉midima ba꞉be mabuma꞉la꞉ka꞉?
GAL 3:6 Ba꞉bema꞉ wadiyala la꞉ A꞉ibalahamakono komo nemalagidolala꞉. Godokono Bukalo tabote ba꞉ma ka꞉na itana, “Godote ebeno hibima꞉ midi komo umiti ebe tuputupudawama꞉ ba꞉bo ka꞉miya꞉.”
GAL 3:7 Iyo, ba꞉moe Buka tabone wadiyala la꞉ ba꞉moe komo hidamo niya꞉tawahala꞉, puya꞉te hibima꞉ midipima꞉ deda꞉hana ibi ba꞉ A꞉ibalahamakono hibi eyoni gugudila.
GAL 3:8 Numa꞉la꞉, Godote a tetelo Yuha꞉pi uwatete ibino hibima꞉ midi komodo ibi tuputupupima꞉ da꞉midilina, ba꞉be komote uluhukuhino dopamo ebete A꞉ibalahamatamo ba꞉be nopo ba hawakalimi Kelisokono Hido Taboeno ipuwa ebetamo ba꞉bo olamagiya꞉. Iyo, ba꞉be tabote ebeno Bukalo ba꞉ma ka꞉na itana, “Hiya꞉hiya꞉ hopolo demedehona ba꞉bi tawakalubi kapiyuimi hiliyonomate na ba꞉ma ka꞉na ba꞉toenamehonenakomena꞉, ‘Ama꞉le A꞉ibalahamako keba ka꞉na kowalubionakui, wadiyala ama꞉le a atumu ba꞉ba ka꞉na nowalubinakuya꞉.’”
GAL 3:9 Ba꞉ hibila, A꞉ibalahamate Godokono tabo uliti hibima꞉ da꞉midiya꞉, ba꞉ba tetene tupuimiti Godote ebeno emede ipuwalo ebe hidonomamo owalubinakui, ba꞉bema꞉ ba꞉ma tetelo puya꞉te Godoko atumu hibima꞉ da꞉midina, ebete ibi ba꞉ ba꞉ba ka꞉na atumu a꞉kowalubilinako.
GAL 3:10 Huiyatiya numa꞉la꞉, puya꞉te Tutumu Tabamo papamila꞉halema꞉ ibi ha꞉kiya ibino helo hibima꞉ da꞉midilina, Godote ibi owalubilihino iba꞉te ibino kuba ododili mabuma꞉ ko temeteme biya꞉tawahanakomena꞉. Iyo, ebeno Bukalo tabote ibino komoma꞉ ba꞉ma ka꞉na itana, “Tutumu Tabo komokomo hiliyonomo ipuwalo pote kapiya tutumu kapiya tetenomolo dadikanalemene, ba꞉be mabuma꞉ ebete ebeno hoe kuitita꞉mo wiboha꞉ temeteme ba꞉ma ka꞉na biya꞉tawanakomene, ebeno kuba huiyate Godogodone hibinomolo kopema꞉ne!”
GAL 3:11 Ba꞉bema꞉ numa꞉la꞉, a hopo habanapi hiliyonomagodolo eta lumagiti modoboha꞉ma꞉ eda꞉na Godokono hiliyonomo Tutumu Tabamo kopapamiwatama꞉, iyo, ba꞉be komone a iya꞉tawahala, Tutumu Tabamo papamiwata komodo Godote eta lumagi ebeno tuputupudawama꞉ a꞉kamida꞉mene. Ba꞉ hibila, ba꞉be gabo kitanaha꞉, huiyatiya kalakala konomola, Godokono Bukalo eta tabote ba꞉ma ka꞉na goena, “Puya꞉te Godokono tuputupupima꞉ deda꞉hana, iba꞉te ebe hibima꞉ midi komodo hibi ka꞉ka꞉ kolawema꞉na꞉.”
GAL 3:12 Ba꞉gala ebeno Bukalo eta tabote ba꞉ma ka꞉na kagoena, “Puya꞉te ebeno Tutumu Tabo komokomo hiliyonomamo ba papamila꞉hana eta kapiya adikanaleheno, hopo habanapi ipuwalo ibinomate hibi ka꞉ka꞉go bemedenamena꞉,” huiyatiya nale dopamo ba꞉ma ka꞉na goemo, ba꞉bako lumagiti hopo habalo kemedenaha꞉. Ba꞉bema꞉ ba꞉moe komo ba꞉ ko komonomola, Godote ebeno Bukalo a biya꞉tua꞉mena, Tutumu Tabamo papamiwata komo ba꞉gala hibima꞉ midi komo, ba꞉bi netewa komate hiya꞉hiya꞉ ba꞉pola꞉na, ibi kapiyaha꞉.
GAL 3:13 Ba꞉bema꞉ hibila, ale Godokono Tutumu Tabo adikanale mabuma꞉ ebete a temeteme ipuwalo kemedenama꞉ da꞉goiya꞉, huiyatiya Kelisote a malemalea꞉telo ba꞉be temeteme uwatea꞉mete ba꞉bo hoiya꞉. Iyo, ba꞉ ba꞉moe gabodo ebete aeno kuba ododili komoeno temeteme ipuwane a ya꞉lo uluhukua꞉tiya꞉. Numa꞉la꞉, Kelisokono hoe komoeno ipuwa kohawakalimima꞉ Godokono Bukalo eta tabote ba꞉ma ka꞉na goena, “Tawakaluba꞉te eta lumagi anakapumima꞉ ebeno ape kehamo dihatemena꞉, ba꞉be lumagiti ebeno kuba ododili mabuma꞉ Godokono holoholo hapulu wiboha꞉ temeteme ba꞉lawenakomene.”
GAL 3:14 Ba꞉moe ba꞉be mabuma꞉ Ya꞉su Kelisote keha pihigalo da꞉hoiya꞉, ebete ebeno ubi ba꞉bo ihatiya꞉, ebeno hoe komodo aeno kuba ododili komoeno temeteme huiya kuwatea꞉mema꞉, ba꞉gala ebe ubila ebeno Gobogobote aeno hibima꞉ midi komodo a ipuwalo kemedenama꞉. Iyo, Godote Yunapi kowalubilima꞉ tabo dopamo hibinomolo a꞉goiya꞉, huiyatiya ebete Kelisokono hoe komodo Yuha꞉pa꞉tamo gigiho atumu a꞉ka-a꞉hiya꞉miduya꞉ ibino emede ipuwalo Godote ibi hidonomamo kowalubilinakoma꞉, ebete dopamo A꞉ibalahamako keba ka꞉na kowalubinakui ba꞉ba ka꞉na.
GAL 3:15 Naeno hibima꞉ midipi ekaka꞉la꞉, nale hopo habanapino eta ododi komo go taboma꞉ miditi ba꞉be komamo la꞉ kiya꞉tulamema꞉nemata. Ba꞉ma ka꞉na tawakalubino holoholo hapulu netewa dubate ibino nopo tamotete baa꞉ kapimilo da꞉nahamena꞉, galane tetelo ibi ipuwalo etate ba꞉be nopoeno tabo dito adikanale modoboha꞉, iyo, iba꞉godolo gabote a꞉kitanamene ba꞉be tabo hiya꞉ma꞉ komidima꞉.
GAL 3:16 Ba꞉ ba꞉ba ka꞉na Godote ebeno Bukalo komo hiya꞉hiya꞉ tetelo ebeno nopo A꞉ibalahamatamo ba tamote tabo hibinomolo ba꞉bo goenakui, ebete ebe ba꞉gala ebeno galanepi kowalubilinakoma꞉, huiyatiya numa꞉la꞉, ba꞉bi tabo komate A꞉ibalahamakono galanepi hiliyonomoeno komoma꞉ hunulu ba pola꞉na, ibino ko ipuwa ba꞉ kapiyanomo galanedawoeno komoma꞉ goena, ba꞉be dawa ba꞉ Kelisotela.
GAL 3:17 Ba꞉bema꞉ naeno ko iya꞉tulame komo ba꞉ ba꞉ma ka꞉nala. Dopamo tetelo Godote ebeno nopo ba tamote kebe tabo hibilo da꞉goiya꞉, ba꞉be taboeno helote emedena emedena tetelo a꞉kawibonamene. Iyo, komo 430 gogote da꞉petohuya꞉, ba꞉ba tetelo Godote ebeno Tutumu Tabo tawakaluba꞉tamo dikalamiya꞉, ba꞉bi Tutumu Taboeno helote modoboha꞉ma꞉ ediya꞉ ebeno dopo taboeno helo kadikamidalema꞉.
GAL 3:18 Ba꞉bema꞉ numa꞉la꞉, Godokono hidohido owalubi komate Tutumu Tabamo papamila꞉ha komodo tawakaluba꞉tamo nikulitale, a biya꞉tawahana꞉ ebete dopamo hibilo da꞉goiya꞉ ba꞉be dopo taboeno helote ba꞉ ya꞉lo a꞉wibuya꞉. Huiyatiya eba ka꞉naha꞉. Godote A꞉ibalahamatamo hibilo da꞉goiya꞉, ba꞉be hibi tabo kapiyado hidohido owalubi komo ebetamo ba꞉ dito ikamehonakui, A꞉ibalahamakono eta ododi komodoha꞉. Ba꞉moe ba꞉be mabuma꞉ a iya꞉tawahala, ba꞉be hibi taboeno helote emedena tetelo ba itana, ba꞉ma tetelo a mabuma꞉ atumu hido oko beka-owatina.
GAL 3:19 Ba꞉bema꞉ mabu keka꞉ A꞉ibalahamakono gala hapuni Godote Tutumu Tabo komokomo tawakaluba꞉tamo dikalamiya꞉? Hibila, Godote ba꞉be ododi komodo ubi bihatiya꞉, hopo habanapa꞉te aeno kuba ododili komo hidamo kiya꞉tawahama꞉ A꞉ibalahamakono eta eyono guduino pe teta꞉mo. Numa꞉la꞉, ba꞉be eyono gudu ba꞉ Godote pokono komoma꞉ tabo A꞉ibalahamatamo hibilo da꞉goiya꞉ ba꞉be gudula, iyo, ebe ba꞉ Kelisotela. Ba꞉gala eta komo. Dopamo tetelo Mosesete Godoko ba꞉gala a hopo habanapi tetenomolo ba la꞉na, Hunu Haboeno nopopa꞉te Godokono Tutumu Tabo komokomo ebetamo ba꞉bo ikamehuya꞉, ebete ba꞉be Tutumu Taboeno nopo ibi hidamo kiya꞉tulamema꞉.
GAL 3:20 Huiyatiya galane tetelo kebe uli nopote atamo Kelisogodone duluhukuya꞉, ba꞉be nopoeno komo hiya꞉la mabu Kelisoko ba꞉gala Godoko ibi ba꞉ kapiyanomola. Ba꞉bema꞉ numa꞉la꞉, eta hopo lumagiti Godoko ba꞉gala a tetenomolo la꞉naheno, ba꞉ba tetelo ebe ha꞉kiya ba꞉moe hopamo piya꞉ ebeno nopo a kopiya꞉tua꞉mema꞉.
GAL 3:21 Ba꞉bema꞉ la꞉eno ukui keba ka꞉nala꞉ka꞉? Godokono Tutumu Taboeno nopote Moseseko ipuwado duluhukuya꞉ ba꞉gala Godokono Hibinomo Tabo Goe Komoeno nopote Kelisogodone duluhukuya꞉, ba꞉bi netewa nopo ipuwalo alaholoho komote ba꞉kitana? Ao, kitanaha꞉! Gabote nitanuya꞉tale ale eta tutumu tabamo papamila꞉hale komodo hibi ka꞉ka꞉ kolawema꞉, Godote a ba꞉be gabodo tuputupupima꞉ ba midina ebeno eta nopo atamo ba꞉ka꞉-ikaa꞉miya꞉na꞉.
GAL 3:22 Huiyatiya ebeno Bukalo ebete a biya꞉tua꞉mena, hopo habanapi hiliyonomate kuba ododili komoeno helo ipuwalo emedena, iba꞉te hibi ka꞉ka꞉ lawema꞉ kamodobonaha꞉. Ba꞉moe ba꞉be mabuma꞉ tawakaluba꞉te ibino ododili komoeno helo hibima꞉ midihino Ya꞉su Kelisoko kapiya hibima꞉ da꞉midina, Godote ba꞉be komodo kebe owalubi komo iba꞉tamo ikalamema꞉ dopamo hibilo da꞉goiya꞉, ba꞉be komote iba꞉tamo hibinomolo kopuluhukuma꞉ne.
GAL 3:23 Ba꞉ hibila, Godote ebeno Hibima꞉ Midi Komoeno nopo hawakalimihino, dopamo tete ga꞉ga꞉nomolo hibima꞉ midi komoeno pe teta꞉mo a hopo habanapa꞉te ebeno Tutumu Taboeno helo ipuwalo emedenamima꞉, kuba ododilipa꞉te gabomanino du genamalo keba ka꞉na kemedena ba꞉ba ka꞉na.
GAL 3:24 Iyo, Godote ebeno Tutumu Tabo atamo dikaa꞉mehuiya꞉, ebeno ubi ba꞉ma ka꞉na ihatiya꞉, ale ba꞉bi taboeno helo ipuwalo ba emedena ba꞉bi tabo komate Kelisokono pe teta꞉mo a hidamo iya꞉tua꞉menapete, ba꞉bene ale ebegodone ebeno eta uli nopo dulihoma꞉ ebe hibima꞉ midi komodo ebeno tuputupupima꞉ ba꞉bo keda꞉hama꞉nema꞉.
GAL 3:25 Ba꞉bema꞉ kalakala konomola, a ba꞉ma tetelo Tutumu Taboeno helo ipuwalo kemedenaha꞉, iyo, ba꞉be komoeno helote agodone ya꞉lo a꞉wibuya꞉, hibima꞉ midi komote duluhukuya꞉ ba꞉ba tetelo.
GAL 3:26 Numa꞉la꞉, Ya꞉su Kelisoko ipuwalo la꞉ hiliyonomate ebe hibima꞉ ba midina Godokono gugudima꞉ beda꞉hanamata.
GAL 3:27 Iyo, la꞉le beyamo wadulatele komo Kelisoko ipuwalo a꞉lawimata, ba꞉bema꞉ ba꞉ma tetelo la꞉ ebeno uli emede komago wapata꞉lamenamata, lumagiti uli kaliko puliti kalakalago keba ka꞉na ka꞉pata꞉nako ba꞉ba ka꞉na.
GAL 3:28 Ba꞉bema꞉ hibila, la꞉ Ya꞉su Kelisoko ipuwalo ba emedena, la꞉ puya꞉te Yunapima꞉ deda꞉hanama ba꞉gala la꞉ puya꞉te Yuha꞉pima꞉ deda꞉hanama, la꞉ puya꞉te komopino huiyaha꞉ oko dowatihonama ba꞉gala puya꞉te la꞉ ha꞉kiya la꞉ kowalubilima꞉ mani oko dowatihonama, la꞉ puya꞉te dubuma꞉ deda꞉hanama ba꞉gala la꞉ puya꞉te kamenakamenama꞉ deda꞉hanama, Godokono umi ipuwalo la꞉ hiliyonomo ba꞉ kapiya tawakalubilata, la꞉ hiya꞉hiya꞉ tawakalubima꞉ keda꞉hanaha꞉.
GAL 3:29 Iyo, la꞉ hiliyonomo ba꞉ Kelisokono tawakalubilata, ba꞉bema꞉ la꞉ A꞉ibalahamakono hibi eyoni gugudima꞉ ba eda꞉hana, Godote ebetamo wiboha꞉ owalubi komo ikamehoma꞉ hibilo da꞉goiya꞉, la꞉ ba꞉ atumu Godogodone atu owalubi komo ba꞉kalawenakomata.
GAL 4:1 Ba꞉bema꞉ nale eta go tabo ba꞉ma ka꞉na goemo. Eta ko dubuino genamanapi ipuwalo ebeno hibi gudu ba꞉gala huiyaha꞉ okopi iba꞉te kapimilo emedena. Hibila, galane tetelo ba꞉be guduti ebeno nabiwigodone hiliyonomo ilina ba꞉gala helo kuwatema꞉ne, huiyatiya ebeno nabiwiti ebeno komoma꞉ kebe tete modoboma꞉ ka꞉goiya꞉, ebete ba꞉be ko teta꞉mo uluhukuhino dopamo ebe ha꞉kiya ebeno ubilo eta komo a꞉kododa꞉le. Iyo, ebete deha꞉potoma꞉ ba eda꞉na, ebeno nabiwiti puya꞉tamo helo dikalamiya꞉ iba꞉te ebeno dawalipima꞉ ba꞉gala iya꞉tulamepima꞉ keda꞉hanama꞉, ebete ba꞉bi kokopino tabamo dito papamiwatanako, ebeno nabiwino huiyaha꞉ okopa꞉te ibino oko namutuluba꞉tamo keba ka꞉na ka꞉papamila꞉hanaka ba꞉ba ka꞉na.
GAL 4:3 Ba꞉bema꞉ a ba꞉ atumu, kuba gobogobo ipuwalo puya꞉te ba꞉moe hopo habalo ba꞉gala alomo hunulu kokopima꞉ deda꞉hana, a dopamo ibino helo ipuwalo emedenamima꞉ aeno tepo ipuwoeno iya꞉tawa komote koma꞉ eda꞉ teta꞉mo.
GAL 4:4 Ba꞉bene ba꞉be tetenomote Godokono ubilo modobonomolo duluhukuya꞉, ebete ebeno Gudu ba꞉moe hopamo ba꞉bo poemiya꞉, iyo, ebete eta kamenoeno tepo ipuwane hawakalate a hopo habanapa꞉go Godokono Tutumu Taboeno helo ipuwalo emedenami.
GAL 4:5 Numa꞉la꞉, ebete ba꞉ ba꞉ba ka꞉na ododiya꞉, a puya꞉te eba꞉go Tutumu Taboeno helo ipuwalo demedenamima꞉, ebete a ba꞉be helo ipuwane ba uluhukua꞉te ale Godokono hibi gugudima꞉ ba꞉bo keda꞉hama꞉nema꞉.
GAL 4:6 Ba꞉bema꞉ kalakala konomola, mabu a hibima꞉ midipa꞉te ba꞉ma tetelo Godokono gugudima꞉ deda꞉hanama꞉, ebete ebeno Guduino Gobogobo atamo ba꞉bema꞉ poemiya꞉ ebete aeno tepo ipuwalo kopemedenama꞉. Numa꞉la꞉, ba꞉be Gobogobote ba꞉ a ipuwado Godoko Abama꞉ ba ka꞉mina ebe da꞉toemehonako ba꞉be dawala.
GAL 4:7 Ba꞉bema꞉ hibima꞉ mididawa, ama꞉ dopamo Tutumu Taboeno huiyaha꞉ okodawama꞉ ba eda꞉na kebe temeteme ipuwalo demedenama꞉, ama꞉ ba꞉be temeteme ipuwane ya꞉lo uluhukuti ba꞉ma tetelo huiyaha꞉ okodawama꞉ gala keda꞉naha꞉, ama꞉ huiyatiya Godokono hibi guduma꞉ eda꞉nata. Ba꞉gala eta komo. Ama꞉le ebeno guduma꞉ deda꞉na, ba꞉bema꞉ Godote ebeno gugudi mabuma꞉ kebe hidohido komo ya꞉lo da꞉dogodoguilamiya꞉, ba꞉bi owalubi komokomo ebete ama꞉tamo emedena tetelo dito bikamehonakomena꞉ta.
GAL 4:8 Numa꞉la꞉, dopamo la꞉ Godokono hibi komo iya꞉tawaha꞉ma꞉ ba eda꞉hana, komopa꞉te kebe kuba gobogobo kadikulamenaka la꞉ ba꞉bi gobogoboeno temeteme ikalame komoeno helo ipuwalo atumu nemedenamimata.
GAL 4:9 Huiyatiya ba꞉ma tetelo la꞉ Godokono hibi komo umimata, ebete ya꞉lo tetelo la꞉eno komo hibilo dulamelelamiya꞉la ba꞉be dawala. Ba꞉bema꞉ la꞉ ebe hibidawama꞉ ba ga꞉lana, mabu keka꞉ la꞉ ubi dihatenama, la꞉le dopamo kebe kubakuba gobogoboeno temeteme ipuwalo demedehonamima la꞉ ba꞉bi atu gobogoboeno komamo gala kakohobila꞉ma꞉? A꞉iye, ba꞉bi gobogobate awaepimo emedehona, iyo, ibino helo hibi kitanaha꞉ la꞉ kowalubilima꞉! Ba꞉bema꞉ la꞉ ubi bada mabuma꞉ kihateonama ibino helo ipuwalo gala kakemedehonama꞉?
GAL 4:10 A꞉iye! La꞉eno ukui komate kubakubahate, ba꞉bene Yunapino ododili ipuwalo iba꞉te kokonomoma꞉ da꞉ga꞉lana, ba꞉bi hiya꞉hiya꞉ hegeloeno komo, ba꞉gala uli manomeno komo, ba꞉gala koko pokoeno komo, ba꞉gala komo gogoeno koko ododili komo, la꞉ ba꞉ atumu ba꞉bi komo kokonomoma꞉ ga꞉lanamata!
GAL 4:11 Ba꞉be mabuma꞉ nale la꞉eno hibima꞉ midi komoma꞉ nukuibilibilitamo. Nale la꞉ ipuwalo kebe oko kodakodalo dowatimo, diyala, ba꞉be okoeno gaote ya꞉lo kuda꞉ a꞉kubakubahuya꞉!
GAL 4:12 Ba꞉bema꞉ naeno hibima꞉ midipi ekaka꞉la꞉, nale la꞉ betoelameholemata, nale dopamo la꞉go kapiyama꞉ keba ka꞉na ka꞉pedimo, wadiyala la꞉ ba꞉ba ka꞉na nago kapiyama꞉ eda꞉hate na nibaminatena꞉la꞉. Iyo, dopamo la꞉le temeteme natamo kikanamenakuiha꞉, ba꞉bema꞉ la꞉ nonolata, ba꞉ma tetelo temeteme natamo ikaname akatupuima꞉la꞉.
GAL 4:13 Ba꞉ hibila, natamo dopamo duluhukui, la꞉ ba꞉be komo iya꞉tawahala, ba꞉ma ka꞉na tawetawete na dunamiti, na ba꞉be komodo hido tete umiti Godokono Hido Tabo la꞉tamo ba꞉bo olamagimo.
GAL 4:14 Ba꞉ba tetelo naeno tawetawe komoma꞉ la꞉le na ba owalubini menemene komote la꞉tamo uluhukui, huiyatiya la꞉ na iduduputinameheno, la꞉eno tepo ipuwoeno ukuilo la꞉le na Godokono Hunu Haboeno eta nopodawa huiyama꞉ da꞉midinima, naeno tabo olamagi komo ubiha꞉ma꞉ keda꞉haha꞉, iyo, la꞉le na Ya꞉su Kelisokomo midiniti na kalakalago ba꞉bema꞉ lawenimata.
GAL 4:15 Numa꞉la꞉, ba꞉ba tetelo la꞉godolo na mabuma꞉ ditanati, ba꞉be kalakala bada konomola꞉ka꞉! Ba꞉bema꞉ bada komote duluhukui la꞉eno kalakala ba꞉bo kanakapumi? Ba꞉ hibila, dopamo la꞉ na mabuma꞉ ubi ba꞉ma ka꞉na ihatimata, gabote nitanatale la꞉ ipuwalo etate ebeno hidohido baidi magobelete natamo dito bikanamena꞉.
GAL 4:16 Huiyatiya numa꞉la꞉, nale ba꞉ma tetelo Godokono hibi komo la꞉tamo gala da꞉kahawakaliminamo, ba꞉be mabuma꞉ komo la꞉ la꞉eno ukuilo na malemalenateneheno la꞉le na la꞉eno alaholodawama꞉ midininamata!
GAL 4:17 Ba꞉ hibila, puya꞉te Godokono mahilamo ha꞉da amiho tabo dolamagiminaka, iba꞉te la꞉eno komoma꞉ ibino ubi konomamo ba꞉ma ka꞉na ihatena, iba꞉te la꞉eno ukui kubahilamete, la꞉ ba꞉gala na, a hiya꞉hiya꞉ komiya꞉tema꞉, ba꞉bene la꞉ ibino kapiyuimipima꞉ ba eda꞉ha la꞉eno ubi iba꞉tamo atumu konomamo ba꞉bo komiya꞉tema꞉nemata.
GAL 4:18 Ba꞉bema꞉ numa꞉la꞉, eta lumagiti la꞉ hibi gabodo kowalubilima꞉ ebeno ubi konomamo dihatemene, ba꞉be komo ba꞉ hidonomola. Iyo, nale la꞉ ipuwalo luta tetelo ba꞉gala na lutaha꞉ tetelo, la꞉le ba꞉bako hido iya꞉tulamedawatamo ubi dihatema, kubahenola, naeno kalakalate ba꞉bema꞉ kitanama꞉ne!
GAL 4:19 Huiyatiya la꞉ eta dawoeno gugudiha꞉, la꞉ ba꞉ naeno hidonomo hibima꞉ midipi gugudilata, ba꞉bema꞉ nale la꞉ mabuma꞉ diya꞉tawutamo, ba꞉be temeteme komo ba꞉ kamenate gudu alahimima꞉ temeteme diya꞉tawanako ba꞉ba ka꞉nala! Hibila, ba꞉bi temeteme komote kitanama꞉ne la꞉le la꞉eno hibima꞉ midi ipuwalo Kelisoko huiyamo deda꞉hama ba꞉ba teta꞉mo,
GAL 4:20 ba꞉bema꞉ numa꞉la꞉, la꞉ mabuma꞉ nagodolo ditana ba꞉be ukui bilibili komo deha꞉potoha꞉. Ba꞉moe ba꞉be mabuma꞉ nale naeno ubi komo konomamo ba꞉ma ka꞉na ihatitamo, gabote ditanamene nale ba꞉ma tetelo pete la꞉go kapimilo ahiditi Godokono hibi tabo komamo la꞉ diya꞉tulamema, ba꞉be atu tetelo naeno malemale hawakalimi komamo la꞉ kowalubilima꞉nemata!
GAL 4:21 Ba꞉bema꞉ la꞉ puya꞉te Godokono Tutumu Taboeno helo ipuwalo gala emedema꞉ ubi dihatenama, la꞉ ba꞉moe komo na na꞉kiyanama꞉la꞉. Mosesete Godokono Buka ipuwamo kebe Tutumu Tabo ka꞉miya꞉tiya꞉, la꞉ modobola꞉ka꞉ ba꞉bi Tutumu Taboeno konomo ipuwa hibinomolo lawe?
GAL 4:22 Numa꞉la꞉, Godokono Bukalo tabote ba꞉moe komo behawakalimina, A꞉ibalahamate dubu gugudi netewa bulamiya꞉, dopo guduti ebeno huiyaha꞉ okodawa kamenagodone hawakalate, etate ebeno hibi kamenagodone akahawakaluya꞉. Ba꞉bene dopo guduti tawakalubino kateneno ubi komodo ba hawakala, eta guduti huiyatiya Godokono hanohano komodo hawakaluya꞉, mabu dopamo ebete A꞉ibalahamatamo tabo hibilo a꞉goiya꞉ ebeno kamenate ba꞉be gudu kalahimima꞉ne.
GAL 4:24 Numa꞉la꞉, ba꞉bi kamenakamena netewoeno komo ba꞉ a iya꞉tua꞉meno go taboma꞉ eda꞉na, ba꞉gala ba꞉moe komoeno ipuwa ba꞉ ba꞉ma ka꞉nala. Netewa kamenakamena ba꞉ Godote hiya꞉hiya꞉ nopo tawakaluba꞉tamo da꞉hawakalilamiya꞉ ba꞉bi netewa komo huiyala. Dopo kamena Ha꞉igate huiyaha꞉ okodawama꞉ deda꞉nami, ba꞉bema꞉ ebete kebe gugudi kalahilamiya꞉ ba꞉bi gugudi ba꞉ atumu huiyaha꞉ okopima꞉ keda꞉huya꞉. Ba꞉be mabuma꞉ Ha꞉igako ba꞉ Godote Sainai Hununomo Hakalo da꞉hawakalimiya꞉ ba꞉be Tutumu Tabamo papamila꞉hale komoeno nopo huiyala, iyo, puya꞉te ba꞉be nopoeno helo ipuwalo demedehona ibi ba꞉ huiyaha꞉ okopila, iba꞉te oko owati ipuwalo koko temeteme kapiya biya꞉tawahanakomena꞉.
GAL 4:25 Ba꞉gala a iya꞉tawahala Sainai Hakate Ala꞉biya hopolo bitana, ba꞉bema꞉ ba꞉be haka ba꞉ gola, ebe ba꞉ Yelusalema ko habala, mabu ba꞉ma tetelo Yelusalemalo demedehona ba꞉bi Yunapi hiliyonomate Godokono Tutumu Taboeno helo ipuwalo ba emedena huiyaha꞉ okopima꞉ eda꞉hana.
GAL 4:26 Huiyatiya Godokono Hunu Habalo ditana ba꞉be uli Yelusalema haboeno komo hiya꞉la. Ba꞉be haba ba꞉ A꞉ibalahamakono hibi kamena Selako huiyala, iyo, ebe ba꞉ a hibima꞉ midipino menokola, ba꞉bema꞉ puya꞉te hibima꞉ midi ipuwalo demedehona iba꞉te ibino temeteme oko ipuwane ya꞉lo ikuliti, ba꞉ma tetelo oko owati ipuwalo tutupima꞉ ba eda꞉ha huiyaha꞉ temeteme oko gala a꞉kowatinamena꞉.
GAL 4:27 Numa꞉la꞉, Selate tete ga꞉ga꞉nomolo hogoha꞉ma꞉ ba eda꞉na, Godote kebe hibi tabo ebeno awi A꞉ibalahamatamo dopamo da꞉goiya꞉, ebete ba꞉be tabo emalagidololo Selako ba꞉bo owalubiya꞉ Aisa꞉keko kalahimima꞉. Ba꞉be mabuma꞉ Godokono Bukalo eta tabote ba꞉ma ka꞉na goena, “Hogoha꞉ kamena, wadiyala ama꞉ na꞉kalakala! Iyo, ama꞉ dopamo gudu alahimiha꞉ma꞉ deda꞉nama꞉, amia꞉no tabo madodo hunamo adipatelo kalakala konomamo na꞉hawakalima꞉! Ba꞉ hibila, tawakaluba꞉te poko kuba hogoha꞉ kamenama꞉ da꞉ga꞉lanama꞉, ba꞉be kamenate hogo hiliyonomo kulamema꞉ne, ba꞉bene ebeno gugudino kuititi komote ya꞉lo da꞉lawiya꞉ ba꞉be kamenoeno gugudino kuititi konegogoloma꞉ne.”
GAL 4:28 Ba꞉bema꞉ naeno hibima꞉ midipi ekaka꞉la꞉, la꞉ ba꞉ Godokono gugudilata mabu ebete ya꞉lo tetelo la꞉ owalubilima꞉ hibinomolo da꞉goiya꞉, la꞉ ba꞉be taboeno helo ipuwado a꞉hawakalahalimata, Aisa꞉kete dopamo ebeno hibi tabo komodo keba ka꞉na ka꞉hawakaluya꞉ ba꞉ba ka꞉na.
GAL 4:29 Ba꞉ hibila, A꞉ibalahamako tetelo ebeno gugudi ipuwalo pote tawakalubino kateneno ubi komodo da꞉hawakaluya꞉, ba꞉be dopo guduti ebeno amogatamo koko temeteme bikamehonakui mabu ebe iya꞉tawala, amogate Godokono Gobogoboeno hanohano owalubi komodo hawakaluya꞉. Numa꞉la꞉, ba꞉ma tetelo atu komote gala na꞉kuluhukuna, Tutumu Taboeno helo ipuwalo huiyaha꞉ okopima꞉ deda꞉hana, iba꞉te koko temeteme a tutupima꞉ eda꞉hapa꞉tamo ikaa꞉menaka.
GAL 4:30 Ba꞉be mabuma꞉ Godokono Bukalo tabote a keba ka꞉na kiya꞉tua꞉mena? Iyo, Godote A꞉ibalahamako ba꞉ma ka꞉na kiyamiya꞉, “Wadiyala, ama꞉ huiyaha꞉ okodawa kamena ebeno gudago la꞉godone gobogobamo noelama꞉. Ba꞉ hibila, ama꞉le amia꞉no hibi kamenagodolo dumi, ba꞉be hibi gudago amia꞉no dopo guduti amia꞉no dogodogo ilina ipuwalo eta kapiya komo a꞉kalawa꞉mene, ao, ba꞉bi dogodogo ilinate amia꞉no hibi gudu kapiyagodolo na꞉pola꞉namene!”
GAL 4:31 Ba꞉bema꞉ naeno hibima꞉ midipi ekaka꞉la꞉, huiyaha꞉ oko temetema꞉go dowatina a ba꞉be kamenoeno gugudi huiyaha꞉. Ao, a hibima꞉ midi ipuwalo tutupima꞉ eda꞉hanama꞉, ba꞉bema꞉ a ba꞉ hibi kamenoeno gugudila ba꞉gala ale aeno Nabiwigodone hido owalubi komokomo buwatenakoma꞉.
GAL 5:1 La꞉ numa꞉la꞉, Kelisote keha pihigalo a tutupima꞉ a꞉midiya꞉ ale ebeno tutu emede ipuwalo hibinomolo kemedenama꞉, ba꞉bema꞉ wadiyala la꞉ ba꞉be tutu emede ipuwalo kodakodalo ba la꞉mota꞉hana eta lumagino huiyaha꞉ temeteme oko komoeno gubi ipuwamo gala akanogomala꞉.
GAL 5:2 Naeno tabo hidamo nulia꞉la꞉. Na Polote ba꞉moe komo la꞉ Yuha꞉pi dubu bikiyalamemata, la꞉ eta lumagino kuba ukui komamo papamila꞉hate Yunapino tama itamida kukala la꞉eno apa꞉mo da꞉lawema, ba꞉be komodo la꞉le la꞉eno ukui ba꞉ma ka꞉na kohawakalimima꞉nemata, Kelisote la꞉ mabuma꞉ dododiya꞉ la꞉ ba꞉be komo gigilepalama꞉ ba midina gobogobamo a꞉da꞉nama꞉ ewagelenamata.
GAL 5:3 Ba꞉bema꞉ nale la꞉ eta kapiya teta꞉mo gala na꞉kakiyahalamemata, la꞉ ipuwalo eta dubuti Yunapino tama itamida kukala da꞉lawemene, ba꞉ba tetene tupuimiti ebete komo Tutumu Taboeno hiliyonomo komamo na꞉papamiwatanakamene ebeno kuba huiyate ebetamo pekapoma꞉!
GAL 5:4 A꞉iye! La꞉ puya꞉te Godokono Tutumu Tabamo papamila꞉ha komodo ebeno tuputupupima꞉ eda꞉hama꞉ dewagelenama, la꞉ ha꞉kiya la꞉ Kelisogodone ya꞉lo iya꞉hilimata, iyo, la꞉ ba꞉ Godokono malemalelo dito ikaa꞉me komone ohobila꞉huimata.
GAL 5:5 A hibima꞉ midipa꞉te huiyatiya uliholo na꞉latiminama꞉, Godote aeno hibima꞉ midi komodo oko ba owatina ebe ha꞉kiya ebeno Gobogoboeno heloamo a ebeno hibi tuputupupima꞉ komidima꞉ne.
GAL 5:6 Ba꞉bema꞉ hibila, a Ya꞉su Kelisoko ipuwalo ba emedena, ale Yunapino tama itamida kukala ya꞉lo da꞉lawiya꞉ma꞉ ebe ko komoha꞉, ba꞉gala ale laweha꞉pima꞉ deda꞉hanama꞉ ba꞉be komo atumu ko komoma꞉ keda꞉naha꞉. Numa꞉la꞉, kapiyanomo komote koma꞉ eda꞉na, ba꞉be komo ba꞉ aeno hibima꞉ midi komote aeno malemale hawakalimi komodo oko dowatina ba꞉be komola.
GAL 5:7 A꞉iye! La꞉ dopamo la꞉eno hibima꞉ midi gabodo helonomamo tolamimata, sikulu gugudino iya꞉da꞉mi hegelalo iba꞉te keba ka꞉na ka꞉pulila꞉hanaka ba꞉ba ka꞉na. Ba꞉bema꞉ la꞉eno nato ukamidadawama꞉ pote kedi? Iyo, la꞉le dopamo Godokono hibi komo ulihote ba꞉be komamo papamila꞉ha da꞉tupuimima, ba꞉be komo pokono ododi komodo kekelalamiti?
GAL 5:8 Numa꞉la꞉, Godoko la꞉eno nato ukamidadawaha꞉, ao, ebe ba꞉ dopamo la꞉ hibima꞉ midi komamo da꞉ka꞉lami ba꞉be dawala.
GAL 5:9 Ba꞉gala eta komo. Tawakaluba꞉te ba꞉ma ka꞉na ga꞉lana, “Palawa baa꞉ kokalimima꞉ kamenate huhuimino puhulu ilina nanekelenomo palawago da꞉kapiyuimimini, baa꞉te ha꞉kiya ba꞉bo kohuhuma꞉ne.” Ba꞉bema꞉ numa꞉la꞉, ba꞉ ba꞉ba ka꞉na la꞉eno kapiyuimi ipuwalo kuba ukui deha꞉potonomote ditana, ebe ha꞉kiya koma꞉ ba꞉bo keda꞉ma꞉ne.
GAL 5:10 Huiyatiya kalakala konomola, la꞉la, nala, a hiliyonomate Kodawa ipuwalo kapiyama꞉ ba eda꞉hana na ba꞉moe komo hibima꞉ na꞉midinamo, na ba꞉ma tetelo la꞉ gala da꞉kakiyalamema la꞉ ba꞉moe tabo komone a꞉kohobila꞉hamata. Ba꞉be mabuma꞉ pote ukui bilibili komo la꞉tamo ikalamema꞉ dewagelena, na ba꞉be lumagino komo iya꞉tawaha꞉, huiyatiya Godote ebeno komo ba iya꞉tawa kuba huiya ebetamo hibinomolo kikamema꞉ne!
GAL 5:11 Ba꞉bema꞉ naeno hibima꞉ midipi ekaka꞉la꞉, numa꞉la꞉. Nale Hido Tabo olamagi ipuwalo hibima꞉ midipi dubate Yunapino tama itamida kukala lawema꞉ ibi na꞉kiyalametale, Yunapi ipuwalo etate natamo temeteme ba꞉ka꞉-ikanamena꞉. Ba꞉ hibila, dopamo nale ba꞉be komo ko komonomoma꞉ goenakuimo, huiyatiya nale ba꞉ma tetelo Kelisote keha pihigalo da꞉hoiya꞉ ba꞉be komoeno ipuwa kapiya hawakalimi tabo bolamaginakomo, iyo, ba꞉moe ba꞉be mabuma꞉ komopa꞉te natamo maubahate koko temeteme dito ikanamenaka.
GAL 5:12 A꞉iye! Ibi ba꞉ puya꞉te tama itamida kukala lawe komoma꞉ la꞉tamo ukui bilibili komo dikalamena ba꞉bi dubula, ba꞉bema꞉ nale ibi mabuma꞉ naeno ubi ba꞉ma ka꞉na ihatenamo, wadiyala iba꞉te la꞉tamo eta komo ododihino huiyatiya ibi ha꞉kiya ibino tama kubanomamo ba iya꞉hili ibino gugudi ododili gabote na꞉wibadigamene!
GAL 5:13 Naeno hibima꞉ midipi ekaka꞉la꞉, hibila, Godote la꞉ ebeno tutu emede komamo a꞉ka꞉lamia꞉ta. Huiyatiya la꞉ hidamo, ebeno tutu emede komo ipuwalo ba emedena, ba꞉be komone la꞉le la꞉eno kateneno kuba ubi komamo papamila꞉halema꞉ modoboma꞉ akaga꞉lala꞉. Wadiyala la꞉ huiyatiya la꞉ ipuwalo etapa꞉te etapi malemalelo ba emalagidolena nowalubihuinakuya꞉la꞉, huiyaha꞉ okopa꞉te ibino namutuluba꞉tamo oko keba ka꞉na kowatihona ba꞉ba ka꞉na.
GAL 5:14 Ba꞉ hibila, Godokono Tutumu Tabo hiliyonomo ipuwalo kebe tutumuti konomoma꞉ deda꞉na, ba꞉moe tutumu ba꞉ “Ama꞉ ha꞉kiya ama꞉ demalagidolona, ba꞉ba ka꞉na ama꞉ tamelo demedena, wadiyala ama꞉le ba꞉be lumagi malemalelo nemalagidolona.” Iyo, pote ba꞉moe kapiya tutumamo hibinomolo da꞉papamiwatanako, ebete ba꞉be komodo Godokono komo hiliyonomo Tutumu Tabamo atumu a꞉kapapamiwatanako.
GAL 5:15 Huiyatiya gahagahate alaholoho tetelo keba ka꞉na kewagelenaka, ba꞉ba ka꞉na la꞉ ipuwalo etate eta kubahimima꞉ daliwatahuinakoma, la꞉ hidamo! Diyala, la꞉ hiliyonomate alaholoho ipuwalo da꞉ ha꞉lahoma!
GAL 5:16 Ba꞉bema꞉ nale la꞉ bikiyalamemata, Godokono Gobogoboeno heloamo ba wapata꞉lamena la꞉le la꞉eno kateneno kuba ubi komamo dito akapapamila꞉hala꞉,
GAL 5:17 mabu lumagino kateneno ubi komate Godokono Gobogoboeno ubi komo ba duhilamena, Godokono Gobogoboeno ubi komate ba꞉be lumagino kateneno ubi komo atumu na꞉kaduhilamena. Ba꞉ hibila, ba꞉bi komate kubanomamo alaholohona, ba꞉bema꞉ la꞉ hibima꞉ midipa꞉te Godokono Gobogobo ba kalakaluimina, la꞉le la꞉eno kateneno ubi komamo dito papamila꞉ha modoboha꞉.
GAL 5:18 Numa꞉la꞉, la꞉ Godokono Gobogoboeno heloamo ebeno ubi komamo da꞉papamila꞉halenakoma, ba꞉ba tetelo la꞉ tutupima꞉ ba eda꞉hana ebeno Tutumu Taboeno temeteme komoeno helo ipuwalo gala a꞉kemedehonamata.
GAL 5:19 Ba꞉ hibila, tawakalubi iya꞉tawahanomola kateneno ubi komone kebe komate kikulina. Ba꞉bi komokomo ba꞉ kamenakamena ba꞉gala bohelemele pilo komo, ba꞉gala tepo ipuwoeno kuba dalowa꞉ ukui hawakalilame komo, ba꞉gala bohelemela꞉tamo kateneno kuba ubi tabo ga꞉la komo,
GAL 5:20 ba꞉gala ida꞉da꞉lino gobogobo adikulame komo, ba꞉gala giwali ododili komo, ba꞉gala alaholoho komo, ba꞉gala olowabeletihui komo, ba꞉gala eta lumagino ilinama꞉ mauba komo, ba꞉gala tepo ipuwane koe uluhuku komo, ba꞉gala lumagiti ebe ha꞉kiya ebe kapiya emalagidolo komo, ba꞉gala tawakalubi hiya꞉hiya꞉ anagiya꞉midale komo,
GAL 5:21 ba꞉gala eta lumagino hido mahiloeno komoma꞉ maubaha komo, ba꞉gala gamoda niho komo, ba꞉gala hilopo poko ododili komo, iyo, ba꞉moi ba꞉ ba꞉bi hiya꞉hiya꞉ kuba komokomo hiliyonomola. Ba꞉ hibila, puya꞉te ibino kateneno kuba ubi komamo da꞉papamila꞉halena, iba꞉te ba꞉bi komo hiliyonomo ba꞉gala komo ba꞉bakobako kuba komo atumu a꞉kododilinaka. Ba꞉bema꞉ nale la꞉ dopamo keba ka꞉na ka꞉kiyahalamitima ba꞉ ba꞉ba ka꞉na gala na꞉kakiyahalamemata, la꞉ hidamo! Puya꞉te ba꞉makomako kuba komo dododilinaka, iba꞉te Godokono Ko Gawadubu haboeno hidohido dogodogo komo hibinomolo a꞉kuwata꞉mena꞉.
GAL 5:22 Huiyatiya lumagino emede ipuwalo Godokono Gobogoboeno gaote duluhukuna, ba꞉be gaote golanomoma꞉ ba eda꞉na ebe ipuwalo hidohido komate ba꞉pola꞉namena꞉. Ba꞉bi komokomo ba꞉ komopi malemalelo emalagidole komo, tepo ipuwoeno kalakala komo, hete komo, temeteme ipuwalo kodakodalo la꞉mota꞉hana komo, awaepa꞉tamo malemale hawakalimi komo, komopi dito owalubili komo, hibidawama꞉ eda꞉ komo,
GAL 5:23 lumagi ebe ha꞉kiya ebe hopamo ihate komo, ba꞉gala kateneno ubi komamo papamiwataha꞉ komo. Ba꞉ hibila, puya꞉te ba꞉makomako komo dododilinaka, ibi kuba ododilipima꞉ ka꞉lamima꞉ eta tutumu tabote ba꞉moe hopo konomolo kitanaha꞉.
GAL 5:24 Iyo, numa꞉la꞉, puya꞉te ibino kateneno helohelonomo kuba ubi komo danakapulami, ba꞉ba꞉te ba꞉ Ya꞉su Kelisokono hibi tawakalubima꞉ eda꞉hana.
GAL 5:25 Ba꞉bema꞉ wadiyala ale Godokono Gobogoboeno ubi komokomo hiliyonomamo ba꞉papamila꞉halenakoma꞉, mabu ebete ebeno hibi ka꞉ka꞉ atamo ya꞉lo ikaa꞉miya꞉.
GAL 5:26 Ba꞉be mabuma꞉ a ha꞉kiya a awagaminoe modoboha꞉, iyo, ale menemene komo komopa꞉tamo dito a꞉kikalama꞉ma꞉, ba꞉gala ale komopino ilinama꞉ iba꞉tamo a꞉kamaubahala꞉ma꞉.
GAL 6:1 Ba꞉bema꞉ naeno hibima꞉ midipi ekaka꞉la꞉, la꞉ ipuwalo etate kuba ododi komamo da꞉negamene, wadiyala la꞉ puya꞉te Godokono Gobogobotamo da꞉papamila꞉hanama, la꞉ ebe hidamo nowalubiya꞉la꞉ ebete kuba ododi komone kohobigama꞉. Huiyatiya la꞉le ba꞉be lumagitamo malemale hawakalimi komodo ebe ba owalubi, ba꞉be atu tetelo la꞉ ha꞉kiya la꞉eno komo hidamo nulamenakuya꞉la꞉, la꞉le Saitanakono emogabuimi komamo atumu kanegudikapoma꞉.
GAL 6:2 Ba꞉gala komo tetelo la꞉eno hiya꞉hiya꞉ tepo ipuwane dikulinaka ba꞉bi menemene komo tutuma꞉ komidilima꞉, wadiyala la꞉ etapa꞉te etapi nowalubihuinakuya꞉la꞉, mabu la꞉ ba꞉ ba꞉be ododi komodo Kelisokono ko tutumamo ba꞉papamila꞉hanakomata.
GAL 6:3 La꞉ huiyatiya hidamo. Godote a hegehegepima꞉ ba goena, huiyatiya a ipuwalo etate ebeno ukuilo ebe ha꞉kiya ebe kodawama꞉ da꞉midimini, ebe ha꞉kiya ebe ha꞉da kamihomema꞉ne.
GAL 6:4 Ba꞉gala la꞉ hibima꞉ midipi hiliyonomo ipuwalo, wadiyala etate buhamama꞉ eda꞉heno ebe ha꞉kiya ebeno oko owati komokomo hidamo ba ulamena, ebeno ododili komo Godokono mulu ukuia꞉mo nanagilamenakamene, ba꞉bene ebete ba꞉ma ka꞉na kiya꞉tawama꞉ne ba꞉bi ododili komate da꞉ hidohidola꞉ o da꞉ kubakubala꞉. Iyo, ba꞉ba tetelo ba꞉be lumagiti eta hibima꞉ mididawoeno komo anagiya꞉midameheno, ebe ha꞉kiya ebeno emede komo kapiya ba emalagidolo Godokono hidohido komo dulamemene, ebete hibi kalakala ba꞉bo kolawema꞉ne.
GAL 6:6 Ba꞉gala eta komo. Kebe lumagiti Hido Taboeno iya꞉tulame komo Godokono eta okodawagodone duwatenako, wadiyala ebete ba꞉be iya꞉tulamedawa ebeno mana꞉mo ba꞉gala komo ilinamo hidamo nowalubinakamene.
GAL 6:7 Ba꞉bene la꞉ ha꞉kiya la꞉ ha꞉da akamiholama꞉la꞉, eta lumagiti Godoko iduduputimilo ebe daedaedawama꞉ demalagidolona, ebete galane hilopo konomo kolawema꞉ne. Ba꞉ hibila, lumagiti kebe ilina ebeno pali hakamo damihomene, galane tetelo ba꞉bi atu ilinate da꞉nolohomena꞉ ebete dito konahama꞉ne.
GAL 6:8 Ba꞉bene lumagiti ebeno kateneno ubi komamo papamiwatate kuba komo damihomene, ba꞉be ododi komone hoe huiyate uluhukuti ebe dito kopelawema꞉ne, huiyatiya ebete Godokono Gobogoboeno ubi komamo papamiwatate hidohido komo damihomene, ba꞉be komone ebetamo wiboha꞉ ka꞉ka꞉ huiyate kuluhukuma꞉ne.
GAL 6:9 Ba꞉bema꞉ wadiyala a aeno hidohido ododili ipuwalo heloha꞉ma꞉ a꞉keda꞉hama꞉, mabu ale heloha꞉ma꞉ eda꞉haheno galane tetelo a aeno hidohido huiya kuwatema꞉nema꞉, lumagiti pali oko owati ipuwane hidohido ilina keba ka꞉na kuwatenako ba꞉ba ka꞉na.
GAL 6:10 Ba꞉moe ba꞉be mabuma꞉ keba tetelo a hido tete duminakoma꞉, wadiyala a hido owalubi komo bihatenakoma꞉ hiliyonomo hiya꞉hiya꞉ tawakaluba꞉tamo, iyo, ba꞉be hido ododili komokomo ipuwalo wadiyala ale dopamo hibima꞉ midipi badininipala tawakalubi konomamo bemalagidolenakoma꞉.
GAL 6:11 Ba꞉bene ba꞉moe leta kuititi hapulu na Polote na ha꞉kiya naeno kokotamo tabo da꞉miya꞉temo, la꞉ ba꞉moi kapiyakapiya koko miya꞉teho tabo komo nulama꞉la꞉, iyo, eta lumagiti ba꞉moe kuititi tabo kamiya꞉teha꞉.
GAL 6:12 Numa꞉la꞉, puya꞉te la꞉ Yuha꞉pi dubu da꞉kiyahalamenaka Yunapino tama itamida kukala kolawema꞉, ibi ba꞉ puya꞉te ibi ha꞉kiya ibino hunu tama ododili komoma꞉ dawagaminalena ba꞉bi dubula. Ba꞉ hibila, iba꞉te ibino tabamo ba꞉be temeteme la꞉tamo ikalamenakata mabu ibi ba꞉moe komoma꞉ na꞉toletolehona, Kelisote keha pihigalo da꞉hoiya꞉ iba꞉te ba꞉be komoeno hibi ipuwa da꞉hawakalimimina꞉, komo Yunapa꞉te ba꞉be mabuma꞉ iba꞉tamo koko temeteme da꞉ ikalamemena꞉.
GAL 6:13 A꞉iye, ba꞉bi dubate tama itamida kukala ko komonomoma꞉ ba ga꞉lana, iba꞉te huiyatiya Godokono komo Tutumu Tabo dito wakalaminaka! Ba꞉gala ibino eta kuba ododi komo ba꞉ma ka꞉nala, ibi ubila la꞉ Yuha꞉pi dubu iba꞉godone tama itamida kukala da꞉lawema, la꞉le ibino ubi komamo ba papamila꞉ha ibi ha꞉kiya ibi ba꞉bo kawagaminalema꞉na꞉.
GAL 6:14 Huiyatiya naeno komo eba ka꞉naha꞉! Aeno Kodawa Ya꞉su Kelisote keha pihigalo da꞉hoiya꞉, nale ba꞉be komoeno ipuwa kapiya ba hawakalimina ba꞉bo bawagahanamo. Ba꞉ hibila, ebe ipuwado ba꞉moe hopoeno awagaha komoeno helote naeno tepo ipuwalo ya꞉lo a꞉wibadiguya꞉, iyo, hopo haboeno hiya꞉hiya꞉ awagaha komo kuwatema꞉ naeno ubi komate a꞉ha꞉lahuya꞉.
GAL 6:15 Ba꞉be mabuma꞉ lumagiti tama itamida kukala da꞉lawemene ba꞉be komo ba꞉ ko komoha꞉, ba꞉gala eta lumagiti laweha꞉dawama꞉ deda꞉mene ba꞉be komo atumu ko komoha꞉. Kapiyanomo komote koma꞉ deda꞉na, ba꞉be komo ba꞉ lumagiti Godokono heloamo ebeno uli gudumu da꞉hawakalamene ba꞉be komola.
GAL 6:16 Ba꞉bema꞉ numa꞉la꞉, puya꞉te ba꞉moe ukui komamo da꞉papamila꞉hanakomena꞉, wadiyala Godokono hete ba꞉gala lumagitamo kuba huiya ikameha꞉ komo ebete iba꞉tamo nikalamenakamene, mabu ba꞉bi tawakalubi kapiyate ebeno hibi Isalaela tawakalubima꞉ eda꞉hana, komopiha꞉.
GAL 6:17 Ba꞉bene ba꞉moe leta kuititi hapulu nale la꞉ ba꞉ma ka꞉na kiyahalamemata, Ya꞉sukunu huiyaha꞉ oko mabuma꞉ na dopamo koko temeteme ipuwalo ba emedena, komo hiya꞉hiya꞉ tetelo hibima꞉ midiha꞉pa꞉te naeno ape bugumagoma꞉ a꞉midinakuya꞉, iyo, tawakaluba꞉te ba꞉bi bugumu naeno apelo ba ulamena ba꞉bo iya꞉tawahanaka, na ba꞉ Ya꞉sukunu huiyaha꞉ okodawala. Numa꞉la꞉, nale dopamo komo hiya꞉hiya꞉ temeteme hiliyonomo uwatenakuimo, ba꞉bema꞉ ba꞉ma tetelo modoboha꞉ etate natamo eta temeteme gala ikaname.
GAL 6:18 O naeno hibima꞉ midipi ekaka꞉la꞉, wadiyala aeno Kodawa Ya꞉su Kelisokono malemale komote la꞉ hiliyonomoeno tepo ipuwalo nitanamene. Ba꞉moe ba꞉ naeno tabo kuititila. Ba꞉ba꞉la.
EPH 1:1 Na ba꞉ Polotela, Ya꞉su Kelisote ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala, mabu Godote ebeno ubilo na ba꞉bema꞉ laweniya꞉. Ba꞉bema꞉ la꞉ puya꞉te Epesese habalo Godokono tawakalubima꞉ ba eda꞉hana Ya꞉su Kelisoko ipuwalo hibilo demedehonama, nale ba꞉moe leta la꞉tamo poememo.
EPH 1:2 Wadiyala aeno Nabiwi Godoko ba꞉gala Kodawa Ya꞉su Kelisoko iba꞉te ibino malemale komo ba꞉gala hete la꞉tamo nikalama꞉mena꞉ta.
EPH 1:3 Numa꞉la꞉, aeno Kodawa Ya꞉su Kelisokono Nabiwi ba꞉ Godotela, ba꞉bene ale Kelisoko ipuwalo demedenama꞉, ebete ba꞉be komodo a hidonomamo kowalubinama꞉ ebeno Hunu Habalo kebe hidohido komate da꞉pola꞉na ba꞉bi komo hiliyonomo ebete atamo dito ikaa꞉mena. Ba꞉moe ba꞉be mabuma꞉ wadiyala ale ebe komilimihoma꞉nema꞉!
EPH 1:4 Ba꞉ hibila, ba꞉moe hopo ododi tupuimihino dopamo ebete a uwatiya꞉, ale Kelisokono oko ipuwado ebeno tawakalubima꞉ ba eda꞉hana, eta deha꞉potonomo kubate agodolo itanaheno ale ebeno holoholo hapulu talonanomolo ba꞉ba ka꞉na kola꞉mota꞉hanama꞉. Iyo, ya꞉lo tetenomolo ale hawakalahaleheno ebete a malemalelo ba emalagidoloena
EPH 1:5 ebeno ubi komo ba꞉bo ihatiya꞉, ebe ha꞉kiya ebe kokalakaluimima꞉ ebete a uwatete Ya꞉su Kelisokono oko ipuwado a ebeno hibi gugudima꞉ komidima꞉.
EPH 1:6 Ba꞉bema꞉ numa꞉la꞉, ebete poko konomamo demalagidolona ba꞉be Gudugodone ebeno hidonomo malemale komo atamo dito dikaa꞉miya꞉, ba꞉be mabuma꞉ wadiyala ale ebe komilimihoma꞉nema꞉!
EPH 1:7 Ba꞉ hibila, Kelisokono hawiti da꞉ka꞉ka꞉liya꞉, Godote a ba꞉be hawa꞉mo uwatete aeno kuba ododili komo egebolea꞉mete Saitanakono du genamane ba꞉ dito uluhukua꞉tiya꞉. Numa꞉la꞉, ebete hiya꞉hiya꞉ komo hiliyonomo ba iya꞉tawa ebeno mulunomo ukui komodo kebe komo atamo konomamo dikaa꞉miya꞉, ba꞉be malemale komoeno hido komo bada konomola꞉ka꞉!
EPH 1:9 Ba꞉bema꞉ numa꞉la꞉, Godote ebeno ubilo kalakalago dihatiya꞉ ba꞉be nopo ebete dopamo ugumuiya꞉, huiyatiya ba꞉ma tetelo ebete ba꞉be nopoeno komo atamo ba꞉ma ka꞉na hawakalimiya꞉, ebete ebeno hido oko Kelisoko ipuwado kupula꞉ma꞉ne. Iyo, ebete ba꞉moe hopolo ba꞉gala Hunu Habalo kebe tawakalubi ba꞉gala gobogobo ba꞉gala ilina ba꞉gala komo hiliyonomo komokomo dododiliya꞉, ba꞉ba꞉te hidonomamo kopola꞉nama꞉ ebete ibi hiliyonomo kapiya ukuia꞉mo kapiyuilamete Kelisote ibino Ko Gawadubuma꞉ keda꞉nama꞉ ebe ba꞉bo kihatema꞉ne. Ba꞉bema꞉ kalakala konomola, Godote kebe tete hidonomoma꞉ da꞉goemene, ba꞉ba tetenomolo ba꞉moe nopoeno komote hibinomolo ba꞉bo kuluhukuma꞉ne!
EPH 1:11 Ba꞉ hibila, kebe komokomo hiliyonomate ba꞉moe hopo habalo ba꞉gala Hunu Habalo dikulinaka, ba꞉bi komate Godokono ubi komo kapiyado ikulihonaka, iyo, ba꞉moe hopo ododi tupuimihino ebete dopamo ebeno hido ukui komodo dihatiya꞉, ba꞉be nopoeno komokomo hiya꞉ma꞉ komidilima꞉ eta komote a꞉kuluhukamene. Ba꞉bema꞉ a hawakalahaleha꞉ tetelo Godote a mabuma꞉ ebeno ubi keba ka꞉na kihatiya꞉, ebete ba꞉ ba꞉ba ka꞉na ododiya꞉, iyo, ebete a Kelisoko ipuwalo uwatete a ebeno tawakalubima꞉ ba꞉bo midiya꞉.
EPH 1:12 Numa꞉la꞉, a Yunapi ipuwalo puya꞉te Kelisoko dopamo hibima꞉ da꞉midiya꞉ma꞉, Godote ebeno nopo atamo dopamo ba꞉bema꞉ hawakalimiya꞉ ale ebeno hido ododi komoma꞉ ebe komilimihonama꞉.
EPH 1:13 Huiyatiya ba꞉ma tetelo la꞉ Yuha꞉pa꞉te Godokono tawakalubima꞉ atumu a꞉keda꞉huimata, iyo, la꞉ Godokono hibi taboeno komokomo dulihuima, ba꞉be Hido Tabo komodo la꞉eno ka꞉ka꞉ mula꞉ komote ba hawakala, la꞉ Kelisoko hibima꞉ ba꞉bo midimata. Ba꞉bema꞉ la꞉le Godokono hibi gugudima꞉ eda꞉ha komo kohawakalimima꞉, ebete ba꞉be atu tetelo ebeno Gobogobo la꞉tamo ikalamia꞉ta, dopamo ebete hibinomolo keba ka꞉na ka꞉goiya꞉ ba꞉ba ka꞉na.
EPH 1:14 Numa꞉la꞉, Godokono Gobogobote a hibima꞉ midipi hiliyonomo ipuwalo bemedena, ba꞉bema꞉ a iya꞉tawahanomola kebe hidohido komate aeno Nabiwi Godogodolo a mabuma꞉ da꞉pola꞉na, ba꞉bi komo hiliyonomate a ebeno guguda꞉tamo hibinomolo kikulihoma꞉na꞉, iyo, ba꞉be tete ba꞉ ebete a ba꞉moe hopoeno hiliyonomo temeteme komone duluhukua꞉temene ba꞉be kalakala tetela. Ba꞉ hibila, ba꞉ba tetelo ale ebeno hido ododi komoma꞉ ebe konomamo komilimihoma꞉nema꞉!
EPH 1:15 Ba꞉moe ba꞉be mabuma꞉ la꞉le Kodawa Ya꞉suku hibima꞉ da꞉midinama ba꞉gala la꞉le Godokono komo tawakalubi hiliyonomo malemalelo demalagidolenama, na Polote ba꞉bi netewa komo dulihuimo,
EPH 1:16 ba꞉ba tetene tupuimiti ba꞉ma teta꞉mo puluhuku nale la꞉eno komoma꞉ kalakala tabo Godotamo ba꞉bema꞉ adipatenakomo, iyo, ba꞉be komote nagodolo kekelanaha꞉. Ba꞉bene naeno toetoe tabo olamagi ipuwalo nale la꞉ ba emalagidolena
EPH 1:17 Godoko ba꞉ma ka꞉na kiyamenakomo, ebeno hibi komo da꞉hawakalimina ba꞉gala mulu ukui tawakaluba꞉tamo dikalamena ebete ba꞉be Gobogobo la꞉tamo kikalamema꞉, mabu hibila, ba꞉be Gobogobote la꞉ ipuwalo ba emedena, ebete la꞉ komodobuilamema꞉na꞉ta la꞉eno tepo ipuwalo Godokono hibi komo kiya꞉tawahama꞉. Numa꞉la꞉, ba꞉be Godo ba꞉ aeno Kodawa Ya꞉su Kelisote ebeno Godoma꞉ da꞉ka꞉mina ba꞉be Helodawala, iyo, ebe ba꞉ alo konomo ipuwalo demedena ba꞉be Nabiwila.
EPH 1:18 Ba꞉bene nale ebe eta komoma꞉ gala ba꞉ma ka꞉na katoemehonakomo, ebete la꞉eno tepo ipuwoeno gigiho na꞉hilama꞉mene la꞉le ebeno taboeno hibi komokomo kiya꞉tawahama꞉. Ba꞉ ba꞉ba ka꞉na la꞉le ba꞉moe komo kiya꞉tawahama꞉nemata, ebete la꞉ hibilo a꞉ka꞉lamia꞉ta la꞉le Kelisokono pe komoma꞉ uliholo hidonomamo kemedenama꞉. Ba꞉gala la꞉le eta komo ba꞉ma ka꞉na kakiya꞉tawahama꞉nemata, ebete la꞉ ebeno tawakaluba꞉tamo kebe tepo ipuwoeno dogodogo komo ikalamema꞉ hibinomolo da꞉goiya꞉, ba꞉bi komoeno hido komo bada konomola꞉ka꞉!
EPH 1:19 Iyo, ba꞉ba tetelo la꞉ ba꞉moe eta komo ba꞉ atumu kakiya꞉tawahama꞉nemata, a hibima꞉ midipi ipuwalo oko dowatina ebeno helote konomoma꞉ eda꞉na, eta dawoeno helote ba꞉be helo a꞉kagogolonamene. Ba꞉ hibila, Godote ba꞉be atu konomo heloamo Kelisoko hoe ipuwane dadipatiya꞉, ebe ebeno Hunu Habamo magatate ebeno tu hapu Ko Gawadubu luta baha꞉mo ba꞉ dito nadipiya꞉.
EPH 1:21 Ba꞉be mabuma꞉ Kelisote ba꞉bolo Ko Gawadubuma꞉ ba neda꞉na, ebeno helote hiliyonomo hiya꞉hiya꞉ nopopino helo na꞉gogolena, iyo, ibi ipuwalo puya꞉te helohelonomoma꞉ deda꞉hana ba꞉gala puya꞉te helohelodopoma꞉ deda꞉hana, puya꞉te Hunu Habalo oko dowatihona ba꞉gala puya꞉te hopo habalo oko dowatihona, ibi hiliyonomate ebeno ubi komamo na꞉papamila꞉halena. Ba꞉gala kalakala konomola, iba꞉te ba꞉ma tetelo keba ka꞉na kewagelena, iba꞉te ba꞉ ba꞉ba ka꞉na emedena emedena tetelo ebe kapiyatamo hibinomolo ba꞉papamila꞉hanamena꞉!
EPH 1:22 Iyo, hibila, Godote ebeno helo konomo Kelisotamo ba꞉ ba꞉ba ka꞉na ikamiya꞉, ba꞉bema꞉ Kelisote hiliyonomo komokomoeno Kodawanomoma꞉ ba eda꞉na, Godote ebetamo helo atumu a꞉kikamiya꞉ sose tawakalubino Watodawama꞉ keda꞉nama꞉.
EPH 1:23 Ba꞉bema꞉ sose tawakalubi ba꞉ Kelisokono apela, mabu ebete ya꞉lo tetenomolo Hunu Habalo ba꞉gala hopo haba konomolo kebe hidohido oko ka꞉tupuilamiya꞉, ba꞉bi hiya꞉hiya꞉ oko ba hawaminale ebete a sose tawakalubi ipuwado ebeno hidonomo kuititi oko bowatina.
EPH 2:1 Ba꞉bema꞉ numa꞉la꞉, la꞉ dopamo Godokono ubi komamo papamila꞉haheno kuba ododili ipuwalo ba emedena, la꞉le ha꞉lahapima꞉ eda꞉hanamimata.
EPH 2:2 Ba꞉ba tetelo la꞉le ba꞉moe hopo haboeno kuba ododili gabodo ba tolamena, kebe Kubadawate Godotamo papamila꞉haha꞉ tawakalubi ipuwalo oko dowatina, la꞉le ba꞉be dawoeno gobogobo beta꞉matanamimata. Iyo, alomo hunulu demedehona ba꞉bi kuba gobogobate potamo da꞉papamila꞉hana, la꞉le dopamo ba꞉be atu Kubadawa la꞉eno Ko Gawadubuma꞉ midinamimata.
EPH 2:3 Ba꞉ hibila, dopamo a hiliyonomate komo kuba ododilipa꞉go kapiyuimiti ba꞉ ba꞉ba ka꞉na emedenamima꞉, iyo, ale aeno kateneno kuba ubi komo konomamo ba emalagidolena aeno apeno hiya꞉hiya꞉ kuba ukui komamo ba꞉ dito papamila꞉halenakuima꞉. Ba꞉moe ba꞉be mabuma꞉ ale komo hopo habanapima꞉ ba eda꞉hana, Godote a hiliyonomoeno tepo ipuwoeno kuba komoma꞉ konomamo maubate aeno kuba ododili komoeno huiya ikaa꞉mema꞉ ba꞉bo goiya꞉.
EPH 2:4 Huiyatiya kalakala konomola, Godote a malemalelo ba emalagidoloena ebeno malemale atamo konomamo hawakalimina,
EPH 2:5 ba꞉bema꞉ keba tetelo ale aeno kuba ododili ipuwalo ha꞉lahapima꞉ deda꞉hanamima꞉, ba꞉ba tetelo ebete Kelisokono ododi komodo a uwatete ba꞉ dito ka꞉kia꞉miya꞉. Iyo, ebete ebeno malemale komamo la꞉eno ka꞉ka꞉ ba꞉ba ka꞉na mula꞉lelamiya꞉ta,
EPH 2:6 ba꞉bema꞉ hibila, Godote Kelisoko hoe ipuwane keba ka꞉na kadipatiya꞉, a hibima꞉ midipa꞉te eba꞉go kapiyama꞉ deda꞉huya꞉ma꞉, ba꞉ba tetelo Godote a ba꞉ atumu ka꞉ka꞉mo ba kawadiya꞉paa꞉te ebete ubi ba꞉bo ihatiya꞉, ale ebeno Hunu Habalo Kelisokono Ko Gawadubu helo ipuwalo eba꞉go kapimilo kopola꞉nama꞉.
EPH 2:7 Numa꞉la꞉, Godote ebeno malemale Ya꞉su Kelisokono ododi komodo atamo da꞉hawakalimiya꞉, ba꞉be malemale komote konomoma꞉ deda꞉na, ebete ba꞉be komo emedena emedena tetelo kohawakaliminama꞉ aeno ka꞉ka꞉ ba꞉bema꞉ mula꞉lea꞉miya꞉.
EPH 2:8 Ba꞉bema꞉ hibila, la꞉ Godoko hibima꞉ da꞉midima, ba꞉be komodo ebete ebeno malemale komamo la꞉eno ka꞉ka꞉ a꞉mula꞉lelamia꞉ta. Iyo, la꞉ ha꞉kiya la꞉eno eta hido ododi komamo la꞉eno ka꞉ka꞉ mula꞉ komo kalaweha꞉, huiyatiya ba꞉moe komo ba꞉ Godokono dito ikame komola,
EPH 2:9 ba꞉bema꞉ lumagiti ebeno ka꞉ka꞉ mula꞉ komoma꞉ awagahalo ebe ha꞉kiya ebe adipate modoboha꞉.
EPH 2:10 Ba꞉bema꞉ numa꞉la꞉, a hibima꞉ midipi ba꞉ Godokono oko owati komokomola, iyo, ebete Ya꞉su Kelisokono ododi komodo a uliuli tawakalubima꞉ a꞉midiya꞉, ale ebeno oko ba owatina hidohido komokomo kododilinakoma꞉. Ba꞉ hibila, a hawakalahaleha꞉ tetelo ebete ebeno ubi komo ya꞉lo ihatiya꞉, ale galane tetelo ba꞉moi komokomo hidamo kododilinakoma꞉.
EPH 2:11 Ba꞉gala eta komo. Yunapi dubate ibi ha꞉kiya Godokono tama itamida kukala lawepima꞉ ba ka꞉lamina, la꞉ puya꞉te Yuha꞉pi ipuwalo da꞉hawakalahaliya꞉ma, iba꞉te la꞉ Godokono kukala laweha꞉pima꞉ ka꞉laminakata. Iyo, iba꞉te la꞉ Godokono tawakalubiha꞉ma꞉ ga꞉lana, mabu iba꞉te ibino apelo kebe tama itamida komo hopo habanapino ukuia꞉mo da꞉lawiya꞉, ba꞉be komo Godokono ubi komoma꞉ ga꞉lalo konomamo emalagidolona. Huiyatiya numa꞉la꞉, la꞉ Yuha꞉pi puya꞉te hibima꞉ da꞉midinama la꞉ ba꞉ atumu Godokono tawakalubilata, ba꞉bema꞉ la꞉ dopamo la꞉eno hibima꞉ midiha꞉ tetelo keba ka꞉na kemedeonamima, wadiyala la꞉ ba꞉be kuba pakala emede komo hidamo nemalagidolala꞉.
EPH 2:12 Ba꞉ba tetelo la꞉ Kelisokoba꞉ kapiyama꞉ keda꞉hanamiha꞉, ba꞉gala la꞉ kapelapima꞉ ba eda꞉hana Godokono hibi Isalaela tawakaluba꞉go atumu kakapiyanamiha꞉. Ba꞉be mabuma꞉ Godote ibi kowalubilinama꞉ ibino iniwala꞉tamo kebe hiya꞉hiya꞉ nopo da꞉tamoteholiya꞉ ba꞉gala kebe hido tabo komokomo dolamagiya꞉, la꞉ ba꞉bi komo iya꞉tawahaheno la꞉ Godogodone eta hido komo lawema꞉ uliholo kemedenamiha꞉, iyo, ba꞉be tete ga꞉ga꞉nomolo la꞉le ebeno komo hibilo kiya꞉tawahanamiha꞉.
EPH 2:13 Huiyatiya kalakala konomola, la꞉ puya꞉te dopamo muhululu demedenamima, Ya꞉su Kelisokono hawiti la꞉eno kuba egebolelamema꞉ da꞉ka꞉ka꞉liya꞉, ba꞉be hawi komodo Godote la꞉ ba꞉ma tetelo tatalia꞉mo a꞉magaheliya꞉ta, iyo, ebete Kelisoko ipuwado ba꞉be hido komo hibinomolo ododiya꞉.
EPH 2:14 Ba꞉bema꞉ numa꞉la꞉, Kelisote keha pihigalo Yunapi ba꞉gala Yuha꞉pi kapiya tawakalubima꞉ da꞉midiliya꞉, ba꞉ ba꞉ba ka꞉na ebe ha꞉kiya ebe ibino milo komoeno nopoma꞉ midiya꞉ ibi ipuwalo etapa꞉te etapa꞉go gala alaholohokapoma꞉. Iyo, ba꞉bi netewa kapiyuimipa꞉te alaholo ipuwalo hiya꞉hiya꞉ kopola꞉nama꞉ ibi tetenomolo dopamo ditanami, ebete ba꞉be kala imi ebeno hoe komodo dito anabulimiya꞉.
EPH 2:15 Ba꞉ hibila, Godote dopamo Moseseko ipuwado Yunapa꞉tamo dikalamiya꞉, Kelisote ba꞉bi hiya꞉hiya꞉ Tutumu Tabo ba꞉gala kukala komokomo tama꞉mo a꞉miya꞉tiya꞉, mabu ebe ubila Yunapi ba꞉gala Yuha꞉pi ebete ibi hiliyonomo uwatete kapiya uli tawakalubima꞉ ba midili, iba꞉te gala alaholohoheno ebe ipuwalo kapimilo kemedehonama꞉. Iyo, ebete keha pihigalo da꞉hoiya꞉ ba꞉be komodo Yunapi ba꞉gala Yuha꞉pi ibino alaholoho komo hibinomolo anakapumiya꞉, ba꞉gala ba꞉be atu tetelo ebete ibi hiliyonomo uwatete Godokono mabulubima꞉ keda꞉hanama꞉ ibi ebetamo gala a꞉kamagaheliya꞉.
EPH 2:17 Ba꞉moe ba꞉be mabuma꞉ Kelisote ba꞉moe hopamo pete ebeno Hido Tabo ba꞉ma ka꞉na polamagiya꞉, la꞉ Yuha꞉pi puya꞉te Godogodone muhululu dopamo demedehonamima ba꞉gala a Yunapi puya꞉te ebe tamedopolo demedehonamima꞉, a hiliyonomate alaholohoheno kapimilo kemedehonama꞉.
EPH 2:18 Iyo, a Yunapi ba꞉gala la꞉ Yuha꞉pi a hiliyonomatamo modobo gabote bitana, ale Kelisokono ododi komodo aeno Nabiwi Godokono holoholo hapuamo kopelamema꞉, ba꞉be gabo ba꞉ ebeno kapiya Gobogobote da꞉hiduimiya꞉ ba꞉be gabola.
EPH 2:19 Ba꞉bema꞉ kalakala konomola, la꞉ Yuha꞉pa꞉te ba꞉ma tetelo Godokono holoholo hapulu kapelapimo kemedehonaha꞉, iyo, la꞉ dopamo kapelapima꞉ deda꞉hanamima ba꞉be komote ya꞉lo a꞉wibuya꞉, ba꞉bema꞉ ba꞉ma tetelo la꞉ Godokono badininipalama꞉ ba eda꞉hana ebeno komo guguda꞉go kapiya tawakalubima꞉ eda꞉hanamata.
EPH 2:20 Ba꞉bema꞉ hibila, la꞉ Yuha꞉pi ba꞉gala Yunapi hibima꞉ midipi, la꞉ ba꞉ Kodawa Godoko adikumino hiya꞉ genamalata, iyo, Ya꞉su Kelisote detena la꞉ hiliyonomo ba꞉ ba꞉be genamama꞉ eda꞉hanamata. Ebe ha꞉kiya ba꞉be talona genamoeno nakola huiya hototoma꞉ eda꞉na, ba꞉bene ebete ebeno sose tupuimima꞉ hiya꞉hiya꞉ doelamiya꞉ ba꞉bi okopi ba꞉gala puya꞉te Godokono ukui hawakalimipima꞉ deda꞉hana ibi atumu, ibi hiliyonomo ba꞉ ba꞉be genamoeno komo kodakoda aboma꞉ eda꞉hana. Ba꞉bema꞉ ba꞉ma tetelo ebete ebeno heloamo ba꞉be genamoeno hiya꞉hiya꞉ keha modobuilamete ba moga꞉lamehole hunamo ba꞉bo adipatena,
EPH 2:22 ba꞉ma ka꞉na la꞉ Yuha꞉pa꞉te Kelisoko ipuwalo ba emedehona, ebete la꞉ ba꞉gala Yunapi hibima꞉ midipi, la꞉ hiliyonomo kapimilo uwatete ebeno genama eteno ilinama꞉ midiliti la꞉ ba꞉bo moga꞉lameholenata, ba꞉be genama ba꞉ Godokono Gobogobote kebolo kemedena ba꞉be talona genamala.
EPH 3:1 Ba꞉bema꞉ na Polote Ya꞉su Kelisoko mabuma꞉ du genamalo ba emedena la꞉ Yuha꞉pi Godotamo a꞉wadiya꞉paa꞉latelenakomata, iyo, nale ebeno tabo la꞉tamo dolamaginakomo ba꞉be mabuma꞉ gabomana꞉te na ba꞉moe du genamamo ihateniya꞉.
EPH 3:2 La꞉ dopamo hibilo ulihuimata Godote ba꞉moe oko natamo ikanamiya꞉, ebeno malemale komote la꞉ Yuha꞉pa꞉tamo ditana nale ba꞉be komo la꞉tamo kohawakalimima꞉,
EPH 3:3 iyo, ebete dopamo kebe komo dugumuiya꞉, ba꞉ma tetelo ebete ba꞉be diya nopoeno ipuwa na iya꞉tunamiya꞉, nale ba꞉be komo ba꞉bema꞉ hawakaliminakomo. Numa꞉la꞉, ba꞉moe leta ipuwalo na ba꞉be komo a꞉hawakalima꞉tepamo,
EPH 3:4 ba꞉bema꞉ la꞉ naeno tabo komokomo ka꞉lamihole ipuwalo wadiyala la꞉ Kelisokono diya nopoeno ipuwa hidonomamo na꞉lawiya꞉la꞉, ba꞉be komo ba꞉ nale ebegodone dopamo diya꞉tawuya꞉mo ba꞉be komola.
EPH 3:5 Ba꞉ hibila, hopo habalo dopamo demedehonama꞉ ba꞉bi hiya꞉hiya꞉ tawakalubi tetelo Godote ba꞉moe diya nopoeno ipuwa iba꞉tamo kahawakaliminakuiha꞉, huiyatiya kalakala konomola, a tetelo ebeno Gobogobote ebeno hido-talona okopa꞉tamo a꞉hawakalimiya꞉, ibi ba꞉ ebete ebeno sose tupuimima꞉ hiya꞉hiya꞉ doelamiya꞉ ba꞉gala puya꞉te ebeno ukui hawakalimipima꞉ deda꞉huya꞉ ba꞉bi okopila.
EPH 3:6 Ba꞉bema꞉ numa꞉la꞉, ba꞉moe diya nopoeno ipuwa ba꞉ ba꞉ma ka꞉nala. Ba꞉ma tetelo Yuha꞉pi ba꞉gala Yunapi ibi hiliyonomate Hido Tabo hibima꞉ midi komodo Godokono hidohido owalubi komo hiliyonomo kapimilo kuwatema꞉na꞉, ba꞉gala iba꞉te ebeno kapiya tawakalubima꞉ ba eda꞉hana, Godote Ya꞉su Kelisoko ipuwado ibi kowalubilima꞉ kebe tabo dopamo hibilo dolamagiya꞉, ba꞉be taboeno komote ibi hiliyonomatamo kapimilo kuluhukuma꞉ne.
EPH 3:7 Ba꞉ hibila, ebeno oko na ipuwado owatima꞉ Godote ebeno hiya꞉nomo helo ebeno malemalelo natamo ikanamiya꞉, iyo, ba꞉be ikame komodo ebete na ebeno okodawama꞉ a꞉midiniya꞉ nale Ya꞉sukunu Hido Tabo tawakaluba꞉tamo kolamaginakoma꞉.
EPH 3:8 Ba꞉bema꞉ numa꞉la꞉, Godokono tawakalubi hiliyonomo ipuwalo puya꞉te hegehegenomoma꞉ deda꞉hana ibi ipuwalo na deha꞉potonomoma꞉ ba eda꞉na, huiyatiya Godote na lawenete hidonomo oko natamo dito ikanamiya꞉. Hibila, naeno oko ba꞉ ebeno tabo Yuha꞉pa꞉tamo olamagi okola, iyo, Kelisogodolo kebe dogodogonomo komate da꞉pola꞉na, ebete ba꞉bi hidohido komamo tawakalubino tepo ipuwa dowalubilinako, na ba꞉be komoma꞉ iba꞉tamo ba꞉bema꞉ olamaginakomo.
EPH 3:9 Ba꞉gala Godote komo gogo hiliyonomolo dugumuinami, ebete ba꞉ma tetelo ba꞉be diya nopoeno komodo oko keba ka꞉na kowatina, nale ba꞉be komo tawakaluba꞉tamo atumu a꞉kahawakaliminakomo. Ba꞉ hibila, ba꞉moe hopolo ba꞉gala alomo hunulu da꞉pola꞉na, Godoko ba꞉bi hiliyonomo ilina ododilidawama꞉ eda꞉na, ba꞉bene ebete ebeno diya nopoeno ugumui komo ipuwalo ubi ba꞉ma ka꞉na ihatiya꞉,
EPH 3:10 ebete ba꞉ma tetelo ebeno sose tawakaluba꞉godolo ebeno mulu komoeno hiya꞉hiya꞉ hidohido komokomo kohawakalilamema꞉. Iyo, ebe ubila ba꞉be komodo Hunu Habalo demedehona ba꞉bi nopopi ipuwalo puya꞉te helohelonomoma꞉ deda꞉hana ba꞉gala puya꞉te helohelodopoma꞉ deda꞉hana, ibi hiliyonomate ebeno mulu komo hidonomamo kumima꞉.
EPH 3:11 Ba꞉bema꞉ hibila, Godote ya꞉lo tetenomolo kebe komote uluhukuma꞉ ubi dihatiya꞉, komo gogo hiliyonomate ba petolame ukui hiya꞉ma꞉ midihino ebete ba꞉ma tetelo aeno Kodawa Ya꞉su Kelisokono oko ipuwado ba꞉be komo hibinomolo ododiya꞉.
EPH 3:12 Ba꞉bema꞉ kalakala konomola, ale ebe ipuwalo ba emedena ebe hibima꞉ midi komodo ale Godokono holoholo hapuamo pelamema꞉ toleha꞉ma꞉ eda꞉hanama꞉, iyo, gigihote atamo a꞉hiya꞉midalo itana.
EPH 3:13 Ba꞉be mabuma꞉ na Polote la꞉ bikiyalamemata, la꞉le naeno temeteme komoma꞉ la꞉eno hibima꞉ midi ipuwalo heloha꞉ma꞉ akeda꞉hala꞉, mabu naeno temeteme komate la꞉ hibilo owalubilinakata la꞉le Kelisoko mabuma꞉ kawagahanama꞉.
EPH 3:14 Ba꞉moe ba꞉be mabuma꞉ komo hiliyonomo tetelo nale Nabiwi Godokono holoholo hapuamo pupamo pemedete la꞉ mabuma꞉ ebe na꞉petoemehonakomo,
EPH 3:15 mabu hibila, puya꞉te Hunu Habalo demedehona ba꞉gala puya꞉te hopo habalo demedehona, Godoko ba꞉ ibi hiliyonomoeno Nabiwila, iyo, ibi hiliyonomoeno ka꞉ka꞉te ba꞉ ebe kapiyagodone puluhukuna.
EPH 3:16 Ba꞉bene nale Godoko na꞉toemehonakomo, ebete ebeno Gobogoboeno helo ikame komodo la꞉eno tepo ipuwoeno ukui kokodakoduilamema꞉. Iyo, ebe modobola la꞉ kowalubilima꞉, mabu kebe dogodogo komate ebeno hido A꞉la꞉minanomo Habalo da꞉pola꞉na, ebete ba꞉bi hidohido komamo tawakalubino tepo ipuwa owalubilinako.
EPH 3:17 Ba꞉gala nale ebe gala na꞉katoemehonakomo, la꞉le Kelisoko hibima꞉ ba midina ebete ba꞉be komodo la꞉eno tepo ipuwalo kemedenama꞉. Numa꞉la꞉, malemale emalagidolo komo ba꞉ hido pali haka huiyala, ba꞉bema꞉ nale eta komoma꞉ Godoko ba꞉ma ka꞉na katoemehonakomo, ebete la꞉ ba owalubilina la꞉eno tepo ipuwoeno hahate ebeno malemale haka ipuwamo na꞉tohamena꞉, iyo, wadiyala malemale emalagidolo komo kapiyate la꞉eno hiliyonomo ododili komoeno mabuma꞉ neda꞉namene.
EPH 3:18 Ba꞉ ba꞉ba ka꞉na la꞉le Godokono komo tawakalubi hiliyonomago ukui hidamo kolawema꞉nemata, Kelisokono malemale emalagidolo komote konomoma꞉ deda꞉na ba꞉be komo la꞉le kapimilo kiya꞉tawahama꞉. O ebeno malemale bada konomola꞉ka꞉, iyo, ba꞉be malemale komo eta lumagiti modobotema꞉ hiya꞉hiya꞉ modobolatele gabo nipo oholena!
EPH 3:19 Ba꞉bema꞉ numa꞉la꞉, komo hopo habanapa꞉te Kelisokono malemale komoeno ipuwa hibinomolo a꞉kiya꞉tawahanakamena꞉, huiyatiya nale Godoko betoemehonakomo, ebete la꞉ ba owalubilina la꞉le ba꞉be malemale komo hidonomamo kiya꞉tawahama꞉. Hibila, ba꞉moe ba꞉be gabodo ebete ebeno hido emede komamo la꞉eno tepo ipuwa konomamo da꞉tabuilamelelamemena꞉, ba꞉ba tetelo la꞉eno ododili ipuwalo la꞉ ebe huiyama꞉ hibinomolo keda꞉hama꞉nemata.
EPH 3:20 Ba꞉bema꞉ kalakala konomola, aeno tepo ipuwoeno modoboha꞉ komo komodobuilamema꞉ ale aeno ubi miya꞉te ipuwalo kebe hidohido komo uwatema꞉ Godoko da꞉kiyamenakoma꞉, ebe modobola ba꞉bi komo hiliyonomo atamo ikaa꞉me, iyo, ebete atamo modobonomolo ikaa꞉mete gala eta tetelo dito kakikaa꞉mema꞉ne, mabu ebeno helo komote aeno tepo ipuwalo oko bowatina.
EPH 3:21 Ba꞉bema꞉ ba꞉moe hopo haboeno kuititi tete peheno, wadiyala Kelisokono sose tawakaluba꞉te ebe ipuwalo ba emedena ibino oko owatiho komo ipuwado Godoko nawagaminanakamena꞉, iyo, emedena emedena tetelo awagaha komote ebegodolo nitanamene! Ba꞉moe tabo ba꞉ hibinomola, ba꞉ba꞉la!
EPH 4:1 Ba꞉bema꞉ nale aeno Kodawoeno oko mabuma꞉ gabomanino du genamalo ba emedena la꞉ ba꞉ma ka꞉na toelameholemata, Godote la꞉ ebeno ubilo kowapata꞉lamenama꞉ da꞉ka꞉lamiya꞉la, wadiyala la꞉ ba꞉ ba꞉ba ka꞉na ebeno hidohido ga꞉limapi gugudima꞉ neda꞉haniya꞉la꞉.
EPH 4:2 Ba꞉bene la꞉eno kapiyuimi ipuwalo etate eta malemalelo demalagidolona, ba꞉be komo kohawakalimima꞉ wadiyala etate etatamo tiyolo akamaubanakala꞉, iyo, wadiyala la꞉ ha꞉kiya la꞉ hopamo miya꞉tete komopa꞉tamo temeteme ikalameha꞉ma꞉ ba eda꞉hana komopino komoma꞉ ubiha꞉ tabo tiyolo akaga꞉lanakala꞉.
EPH 4:3 Numa꞉la꞉, Godokono Gobogobote la꞉eno tepo ipuwamo dihatelamena ba꞉be hetete la꞉ kapiya tawakalubima꞉ midilinata, ba꞉bema꞉ la꞉eno ukuilo la꞉le kapiyama꞉ eda꞉ komo hidonomo komoma꞉ ba ga꞉lana, la꞉eno ododili komo hiliyonomo ipuwalo gabo hidonomamo numinakuya꞉la꞉ ba꞉be komote la꞉godolo hibilo kitanama꞉.
EPH 4:4 Ba꞉ hibila, ale kebe hido komo kumima꞉ uliholo demedenama꞉ ba꞉be komo ba꞉ kapiyala, iyo, Godote a a꞉ka꞉miya꞉ ale aeno emede ipuwalo ba꞉be komo kapimilo kolatiminama꞉. Ba꞉ ba꞉ma ka꞉na a ebeno tawakalubi ba꞉ kapiya ape huiyala, ba꞉gala a ipuwalo oko dowatina ba꞉be Gobogobo atumu ba꞉ kapiyanomola.
EPH 4:5 Iyo, aeno Kodawa ba꞉ atumu kapiyala, aeno hibima꞉ midi komo ba꞉ kapiyala, ba꞉gala aeno watowatopa꞉te a kebe beyamo da꞉wadua꞉tiya꞉ ba꞉be beya atumu ba꞉ kapiyala.
EPH 4:6 Ba꞉gala aeno Nabiwi Godoko ba꞉ kapiyala, iyo, hopo habanapi hiliyonomate ebegodone ikulihuya꞉, ba꞉bema꞉ ebe kapiyate ibi hiliyonomoeno Namutudawama꞉ ba eda꞉na, ibi hiliyonomagodolo ebeno oko bowatina, iyo, ebete ibi hiliyonomo ipuwalo bemedena.
EPH 4:7 Ba꞉gala eta komo. Kelisote Godokono hiya꞉hiya꞉ oko a ipuwado kowatihonama꞉ ebete eta kapiyatamo eta hiya꞉nomo helo komo ikamete, eta kapiyatamo eta hiya꞉nomo helo komo akikamiya꞉, a hiliyonomatamo malemalelo ba꞉ ba꞉ba ka꞉na ikaa꞉mehoiya꞉, iyo, ebete ebeno ubi komo atamo keba ka꞉na kihatiya꞉, ebete oko owati komoeno helo atamo hiya꞉hiya꞉ ba꞉ba ka꞉na ikaa꞉mehoiya꞉.
EPH 4:8 Ba꞉ hibila, Godokono Bukalo eta tabote ba꞉be komo ba꞉ma ka꞉na hawakalimina, “Godokono Oemedawa Kelisote hopo habanapi kowalubilima꞉ ebeno hiya꞉hiya꞉ komo iba꞉tamo malemalelo dito ikalameholiya꞉. Iyo, puya꞉te eba꞉go dalaholohonama꞉, ebete ibino wato kikipo lawete, ba꞉bene ebeno awagaha habamo da꞉nodoluya꞉, ebete ebeno tawakaluba꞉tamo malemale komokomo ba꞉bo ikalameholiya꞉.”
EPH 4:9 Ba꞉bema꞉ wadiyala la꞉ ba꞉moe taboeno ipuwa hidamo ba꞉ma ka꞉na nemalagidolala꞉. Kelisote ebeno awagaha habamo hibinomolo odoluya꞉, mabu dopamo ebete ebe ha꞉kiya deha꞉potoma꞉ miditi ba꞉moe hopoeno ha꞉laha tawakalubino habamo dito nihitiguya꞉.
EPH 4:10 Iyo, pote hoe ipuwamo da꞉nihitiguya꞉, ebe ba꞉ galane tetelo alomo hununomamo ebeno awagaha haba lawema꞉ da꞉nodoluya꞉ ba꞉be atu dawala. Ba꞉bema꞉ ebete Ko Gawadubu haba ba꞉ba ka꞉na da꞉nelawiya꞉, ba꞉ba tetelo ebete Hunu Habalo ba꞉gala hopo haba konomolo kebe hidohido oko ya꞉lo tetenomolo da꞉tupuilamiya꞉, ba꞉bi hiya꞉hiya꞉ oko hiliyonomo hawaminalema꞉ tabo ba꞉bo ihatiya꞉.
EPH 4:11 Ba꞉bema꞉ ebete ba꞉bi oko kohawaminalema꞉, ebete ebeno hiya꞉hiya꞉ oko owati komoeno helo hopo habanapa꞉tamo malemalelo ikalameholiya꞉. Iyo, ebete komopi ba noelame iba꞉tamo helo ikalamiya꞉ iba꞉te hiya꞉hiya꞉ hopolo ebeno kapiya hibi sose konetupuimima꞉, ba꞉gala ebete Godokono ukui hawakalimipa꞉tamo eta helo atumu a꞉kikalamiya꞉ iba꞉te oko hidamo kowatima꞉, ba꞉gala ebete ebeno Hido Tabo atapa꞉tamo eta helo atumu a꞉kikalamiya꞉ hibima꞉ midiha꞉pa꞉te iba꞉godone hibi komo kulihoma꞉, ba꞉gala ebete hiya꞉hiya꞉ pasta ba꞉gala Godokono Bukoeno hiya꞉hiya꞉ taboeno ipuwa iya꞉tulamepi ibi hiliyonomatamo eta helo atumu a꞉kikalamiya꞉.
EPH 4:12 Numa꞉la꞉, ebete ebeno hiya꞉hiya꞉ helo Godokono tawakaluba꞉tamo ba꞉ba ka꞉na ikalameholiya꞉, mabu ebete ebeno ubi bihatiya꞉ ibi hiliyonomo ba heluilame iba꞉te ba꞉moe hopolo ebeno hiya꞉hiya꞉ oko kowatihonama꞉, iyo, ba꞉moe ba꞉be gabodo ibi hiliyonomate kapimilo Kelisokono apema꞉ ba eda꞉hana ibino hibima꞉ midi ipuwalo hidonomamo kapepehoma꞉na꞉.
EPH 4:13 Ba꞉bema꞉ a hiliyonomate ba꞉ba ka꞉na aeno hibima꞉ midi komoeno ododili ipuwalo kapiyanomo tawakalubima꞉ ba eda꞉hana, a kapimilo Godokono Guduino komo hibinomolo ba꞉bo kiya꞉tawahama꞉nema꞉. Ba꞉ hibila, ale aeno ukuilo koko kelatala apepeho tawakalubima꞉ deda꞉hama꞉, Kelisote ebeno tuputupunomo ododili ipuwalo keba ka꞉na kemedena, ale ba꞉ba ka꞉na aeno ododili ipuwalo ebe huiyamo hibinomolo bemedehonama꞉.
EPH 4:14 Ba꞉bema꞉ numa꞉la꞉, ha꞉da amiho dubate ibino mulu ukui komamo tawakalubi kuba gabamo hiya꞉hiya꞉ magatalema꞉ ba ewagelena, puya꞉te ibino tabamo da꞉papamila꞉hanaka ibi ba꞉ daedae gugudi huiyala. Iyo, huhuti hiya꞉hiya꞉ hapuni a꞉mo tetelo koko gawiyate hiya꞉hiya꞉ keba ka꞉na ka꞉mahila꞉halenaka, ba꞉bi tawakalubi ba꞉ ba꞉ba ka꞉nala mabu iba꞉te ibino ukui ipuwalo gagagagama꞉ eda꞉hana. Huiyatiya ale aeno hibima꞉ midi ipuwalo hegehege gugudima꞉ eda꞉ha komo da꞉miya꞉pama꞉, ba꞉ba tetelo ale ha꞉da amihopino iya꞉tulame komamo gala a꞉kaguda꞉ma꞉,
EPH 4:15 iyo, ale huiyatiya aeno emede ipuwalo komopi malemalelo ba emalagidolena, etate etatamo Godokono hibi tabo komokomo kapiya ba꞉bo olamagiminakoma꞉. Ba꞉be gabodo ale hidonomamo apepehote aeno ododili hiliyonomo ipuwalo Kelisoko huiyama꞉ keda꞉hama꞉nema꞉, mabu a sose tawakalubi Kelisokono apema꞉ ba eda꞉hana ebe ba꞉ aeno apeno watoma꞉ eda꞉na.
EPH 4:16 Ba꞉ hibila, wituwitate apeno hiya꞉hiya꞉ komo hidamo moga꞉lameholete, ba꞉bene ba꞉bi komate ibino ape kapiya ipuwalo ba pola꞉na ibino hiya꞉hiya꞉ oko modobolo owatihona. Ba꞉bema꞉ numa꞉la꞉, Kelisokono malemale komo ba꞉ ebeno apeno wituwitu hiliyonomo huiyala, iyo, ba꞉be malemale komote sose ipuwalo ba itana, sosete hibima꞉ midi ipuwalo hidamo apete hiya꞉hiya꞉ oko owatihoma꞉ helonomoma꞉ ba꞉bo keda꞉ma꞉ne.
EPH 4:17 Ba꞉be mabuma꞉ nale la꞉ Kodawa Kelisokono mahilamo ba kiyalame ba꞉moe eta komo ko komonomoma꞉ goemo, hibima꞉ midiha꞉pa꞉te keba ka꞉na kemedehona, la꞉eno emede ipuwalo ibi huiyama꞉ akeda꞉hala꞉. Numa꞉la꞉, ibino tepo ipuwalo du konomote bitana, ba꞉bema꞉ ibino ukui komate ibi kuba gabamo ba magatale gabo kuititi tetelo eta hido komo a꞉kanuma꞉mena꞉. Iyo, iba꞉te Godokono hibi komo ubiha꞉ma꞉ eda꞉hate, huiyatiya daedae ukui komo uwatete ibino tepo ipuwoeno ukui ba kodakoduilame, ibi ha꞉kiya ibi Godogodone ba꞉bo iya꞉hiliya꞉ ebeno hido ka꞉ka꞉ kolawema꞉.
EPH 4:19 Ba꞉bema꞉ dopamo iba꞉te kuba ododili ipuwalo kebe hilopo komo diya꞉tawahanakui, ba꞉ma tetelo atu kuba komokomo ba ododili iba꞉te hilopoha꞉ma꞉ eda꞉hana. Ba꞉ ba꞉ba ka꞉na iba꞉te ibino ukuilo konomamo emalagidolena, kateneno ubi komamo papamila꞉halelo ibino apa꞉mo hiya꞉hiya꞉ hilopo komo kododilinama꞉, iyo, iba꞉te ba꞉bako kuba ododilima꞉ ibino iya꞉wa konomote bitana.
EPH 4:20 A꞉iye, la꞉ Kelisogodone ba꞉bako kuba emede komo kiya꞉tawahaha꞉!
EPH 4:21 Ba꞉ hibila, la꞉le Ya꞉sukunu komo hidamo ulihuimata, ba꞉bene la꞉ ebe hibima꞉ ba midina, ebegodolo ditana ba꞉be hibi gaboeno komokomo ebeno okopa꞉te la꞉ ba꞉bo iya꞉tulamia꞉ta.
EPH 4:22 Ba꞉bema꞉ la꞉ dopamo keba ka꞉na kemedeonamima, ba꞉be pakala emede komoeno hiliyonomo kuba ododili komo na꞉wadipipikulama꞉la꞉. Numa꞉la꞉, ba꞉be pakala emede komote la꞉eno ha꞉da amiho ubi komodo hibo gabo la꞉tamo ba ududi la꞉ ba꞉bo kubahilamenama꞉ta,
EPH 4:23 ba꞉bema꞉ Godote la꞉eno tepo ipuwoeno ukui ulinoma꞉ komidilima꞉, wadiyala la꞉ haba ebetamo nikamiya꞉la꞉.
EPH 4:24 Iyo, wadiyala la꞉ ebeno uli emede komoeno ododili komo nuwatiya꞉la꞉, lumagiti hidohido kaliko kopupulima꞉ kalakalago duwatenako ba꞉ba ka꞉na. Ba꞉ hibila, Godote ba꞉be uli emede komo a hibima꞉ midipi mabuma꞉ a꞉hiduimia꞉miya꞉ ale ebe huiyama꞉ keda꞉hanama꞉, ba꞉bema꞉ keba tetelo ale ebeno uli emede ipuwalo hibilo demedenama꞉, ba꞉ba tetelo hopo habanapa꞉te ebeno hibi komoeno tuputupu ba꞉gala talona emede komo a ipuwado hidamo kumima꞉na꞉.
EPH 4:25 Ba꞉bema꞉ hibima꞉ mididawa, ha꞉da amiho tabo gala akolamaga꞉la꞉. Wadiyala ama꞉ huiyatiya ama꞉ tamelo demedena ba꞉be lumagitamo hibi tabo komokomo kapiya nolamaginakuya꞉, mabu a hibima꞉ midipi hiliyonomate Kelisokono apema꞉ kapimilo eda꞉hanama꞉.
EPH 4:26 Ba꞉bema꞉ ama꞉ eta komoma꞉ da꞉maubamena꞉, hidamo! Mauba komote hibo gabo ududi komodo ama꞉ kubamo magata modoboha꞉, ba꞉bene keba tetelo mauba komote ama꞉godolo duluhukumini, wadiyala tiyolo na꞉wibadigamene. Iyo, kebe hegelalo mauba komote ama꞉tamo da꞉pemene, wadiyala ba꞉be atu hegelate nihitigaheno ama꞉ dopamo amia꞉no mauba komo tama꞉mo nihatiya꞉,
EPH 4:27 mabu hibila, ama꞉ ba꞉moe ododi komodo Saitanatamo haba a꞉kikama꞉mena꞉ta.
EPH 4:28 Ba꞉gala eta komo. Kebe lumagiti komopino ilina ba꞉gala mani pilolo dopamo duwatenakui, ebete ba꞉bako kuba ododi komo miya꞉pate ebe ha꞉kiya ebeno kokotamo hibi oko na꞉tupuima꞉mene. Ba꞉ hibila, mani oko owati ipuwalo ebe ha꞉kiya ebeno modoboha꞉ komokomo ba modobuilame, gabote ebegodolo kakitanama꞉ne ebete awaepi atumu kakowalubilima꞉.
EPH 4:29 Ba꞉gala ama꞉ kuba tabo komokomo akolamaginakala꞉, wadiyala ama꞉ huiyatiya hido owalubi tabo komokomo kapiya nolamaginakuya꞉, iyo, ba꞉bako tabo olamagi komote ama꞉godolo ba itana, ulihopa꞉te ibino modoboha꞉ ukui komoma꞉ hido owalubi buwatenakomena꞉.
EPH 4:30 Ba꞉bene la꞉eno ododili ipuwalo la꞉ Godokono Gobogobotamo temeteme ikamema꞉ modoboha꞉, mabu Godote ebe la꞉tamo ikalamia꞉ta, ebete la꞉ ipuwalo ba emedena Godokono kukalama꞉ keda꞉nama꞉. Iyo, ba꞉be kukalate la꞉ ba꞉ma ka꞉na iya꞉tulamenata, la꞉ ba꞉ ebeno gugudima꞉ eda꞉hanamata ba꞉bema꞉ ebeno Hido Hegelate la꞉ mabuma꞉ hibinomolo kuluhukuma꞉ne, ba꞉be Hegelalo ebete la꞉ ba꞉moe hopoeno hiliyonomo temeteme komone kuluhukulatelema꞉na꞉ta.
EPH 4:31 Ba꞉bema꞉ wadiyala la꞉ hiya꞉hiya꞉ mauba komo hiliyonomo na꞉wadipipikulama꞉la꞉, ba꞉ma ka꞉na la꞉le eta lumagino komoma꞉ la꞉eno tepo ipuwate kakama꞉ akeda꞉hanakala꞉, ba꞉gala la꞉eno tepo ipuwalo koe komote akuluhukunakala꞉, iyo, la꞉ eta lumagitamo hilopo ikamema꞉ helo tabo ba꞉gala ebe iduduputimi tabo akaga꞉lanakala꞉, ba꞉gala la꞉eno ubi komo akihatenakala꞉ ebe eta gabodo kubahimima꞉.
EPH 4:32 Huiyatiya wadiyala la꞉ ipuwalo etate etatamo malemale ba hawakalimi la꞉le komopino temeteme komoma꞉ la꞉eno tepo ipuwa akakodakoduilama꞉la꞉, iyo, keba tetelo eta lumagiti kuba dododimini la꞉ ebeno kuba egebolemete nadodomiya꞉la꞉, Godote la꞉eno kuba Kelisoko ipuwalo egebolelamete keba ka꞉na kadodolelamitiya꞉la ba꞉ba ka꞉na.
EPH 5:1 Hibila, la꞉ ba꞉ Godote konomamo demalagidolena ba꞉bi gugudilata, ba꞉bema꞉ wadiyala la꞉ la꞉eno emede ipuwalo ebe huiyama꞉ neda꞉hanala꞉.
EPH 5:2 Numa꞉la꞉, Kelisote hoe ipuwalo ebeno ape hawa꞉goeno ilina huiyama꞉ miditi ebeno ka꞉ka꞉ a mabuma꞉ Godotamo dikamiya꞉, Godote ba꞉be komo hido nibo ilina ikame komoma꞉ goiya꞉. Ba꞉be mabuma꞉ Kelisote atamo ebeno konomo malemale keba ka꞉na ka꞉hawakalimiya꞉, wadiyala la꞉ ba꞉ ba꞉ba ka꞉na atu malemale ipuwalo nemedenala꞉.
EPH 5:3 Numa꞉la꞉, la꞉ ba꞉ Godokono tuputupu tawakalubilata, ba꞉bema꞉ ba꞉moi kuba komokomo la꞉godolo akapola꞉nala꞉ — kamenakamena ba꞉gala bohelemele pilo komo, apa꞉mo hiya꞉hiya꞉ hilopo ododili komo, ba꞉gala mani konomamo emalagidolo komo. Iyo, ba꞉bakobako kuba ododili ipuwalo eta deha꞉potonomo kubate la꞉godolo aka-itanala꞉, hibima꞉ midiha꞉pa꞉te la꞉eno emede komoma꞉ kuba tabo ga꞉lakapoma꞉.
EPH 5:4 Ba꞉gala la꞉ hiya꞉hiya꞉ dalowa꞉ ukui hawakalilamema꞉ tabo akolamagiminakala꞉, iyo, komopino hilopo ododili komoma꞉ tabo ga꞉laheno wadiyala la꞉ huiyatiya hiya꞉hiya꞉ tetelo kalakala tabo Godotamo na꞉wadiya꞉paa꞉latelenakuya꞉la꞉.
EPH 5:5 Ba꞉bema꞉ wadiyala la꞉ ba꞉moe komo hidonomamo nemalagidolala꞉. Puya꞉te kamenakamena ba꞉gala bohelemela꞉tamo pilo komo dododilinaka, ba꞉gala puya꞉te ibino apa꞉mo hiya꞉hiya꞉ hilopo komo dododilinaka, ba꞉gala puya꞉te mani konomamo demalagidolona, ibi hiliyonomo ipuwalo etate Kelisoko ba꞉gala Godoko ibi netewapino Ko Gawadubu komodo eta hido owalubi komo a꞉kuminakamene. Numa꞉la꞉, pote mani konomamo demalagidolona, ebeno komo ba꞉ ida꞉da꞉li adikulamedawoeno komo huiyala.
EPH 5:6 Ba꞉bema꞉ la꞉ ipuwalo etate mahigate hopo habanapino daedae ukui komamo la꞉ ha꞉da amiholamema꞉ dewagelemene, la꞉ ebeno tabo akulia꞉la꞉. Ba꞉ hibila, nale kebe kuba komokomoma꞉ la꞉ da꞉kiyahalamema, ba꞉bako ododili komoma꞉ Godokono konomo mauba komote kopema꞉ne, iyo, puya꞉te ebetamo papamila꞉ha ubiha꞉ma꞉ deda꞉hana ba꞉ba꞉te kuba huiya kolawema꞉na꞉.
EPH 5:7 Ba꞉be mabuma꞉ la꞉ ba꞉bako tawakaluba꞉go eta komo ododihino iba꞉go akakapiyala꞉.
EPH 5:8 Ba꞉ hibila, la꞉ dopamo du ipuwalo emedenamimata, huiyatiya la꞉ du ipuwane ikuliti ba꞉ma tetelo aeno Kodawoeno alo ipuwalo emedenamata, ba꞉bema꞉ la꞉ aloeno gugudima꞉ ba eda꞉hana wadiyala la꞉ alo ipuwalo hidamo na꞉wapata꞉lamenala꞉.
EPH 5:9 Iyo, la꞉ Kodawa Godoko kokalakaluimima꞉ la꞉eno ododili ipuwalo gabo hidamo numinakuya꞉la꞉, mabu numa꞉la꞉, puya꞉te alo ipuwalo hibilo demedehona, iba꞉godone hidohido gao hiliyonomate ikulinaka, ba꞉gala iba꞉te Godokono tuputupu emede komo ba hawakalimina ebeno hibi tabo komokomo ba꞉bo olamagiminaka.
EPH 5:11 Ba꞉be mabuma꞉ puya꞉te du ipuwalo demedehona, la꞉ ba꞉bi tawakalubino ododili komamo iba꞉go akakapiyala꞉, mabu ibino ododili ipuwane eta hido gaote a꞉kuluhukale. Wadiyala la꞉ huiyatiya Godokono alamo ibino ododili komo na꞉la꞉minaliya꞉la꞉, komo tawakaluba꞉te ba꞉bi kuba komoeno temeteme ipuwa hidamo kumima꞉,
EPH 5:12 mabu hibila, tuputupu lumagiti tabo goema꞉ kohilopoma꞉ne iba꞉te diya gabodo dododilinaka ba꞉bi komoma꞉!
EPH 5:13 Ba꞉gala eta komo. Tawakaluba꞉te dugumuilina Godote ba꞉bi hiliyonomo komo awalela ipuwane ebeno alamo kuluhukulatelema꞉ne, iyo, ba꞉bi komoeno hibi ipuwa ba꞉bo kohawakalahalema꞉na꞉,
EPH 5:14 ba꞉bema꞉ ba꞉moe hopoeno hiliyonomo komo ipuwalo alote kebe komo da꞉la꞉minamene tawakaluba꞉te hidonomamo kumima꞉na꞉, awalela ipuwalo gala a꞉kitanamene. Ba꞉moe ba꞉be mabuma꞉ Godokono tawakaluba꞉te eta mulu tabo ba꞉ma ka꞉na ga꞉lana, “U da꞉watita, ama꞉ na꞉mahiga! Ama꞉ hoe ipuwane uluhukuti ka꞉ka꞉ gala da꞉kalawemena꞉, Kelisokono alote ama꞉ ba꞉bo ka꞉la꞉minama꞉na꞉ta.”
EPH 5:15 Ba꞉bema꞉ wadiyala la꞉ mulu ukui tawakalubima꞉ ba eda꞉hana la꞉eno ododili komokomo hidonomamo nemalagidolenala꞉, iyo, muluha꞉ tawakalubi akibamilatela꞉la꞉.
EPH 5:16 Numa꞉la꞉, hopo haba konomolo ba꞉ma tete ba꞉ hibima꞉ midiha꞉pino kuba ododili tetema꞉ eda꞉na, ba꞉bema꞉ Godote kebe hidohido tete la꞉tamo dikalamenaka, wadiyala la꞉ ba꞉bi hiya꞉hiya꞉ tetelo hido owalubi komo tawakaluba꞉tamo nododilinakuya꞉la꞉.
EPH 5:17 Ba꞉bema꞉ la꞉ daedae tawakalubima꞉ eda꞉haheno, huiyatiya Kodawa Godote la꞉le kododilima꞉ ebeno ubi komo keba ka꞉na kihatena, wadiyala la꞉ ba꞉bi komokomo hidamo niya꞉tawahanala꞉.
EPH 5:18 Ba꞉gala eta komo. La꞉ helo gala꞉ipi gao beya koamo akanihala꞉, mabu la꞉ ba꞉ba ka꞉na dewagelema, la꞉eno niho tetelo daedaema꞉ ba eda꞉ha la꞉ ha꞉kiya la꞉ ba꞉bo kokubahilamema꞉nemata. Wadiyala la꞉ huiyatiya Godokono Gobogoboeno komo koamo na꞉nihonakuya꞉la꞉, ebete la꞉eno tepo ipuwa hidamo kotabuilamema꞉.
EPH 5:19 Ba꞉bema꞉ la꞉ la꞉eno tepo ipuwalo hiya꞉hiya꞉ ohale alapiho komamo Godoko hidonomamo nadikuminakuya꞉la꞉. Iyo, ba꞉ ba꞉ma ka꞉na Godokono Bukoeno Sam Ohale bukalo da꞉pola꞉na ba꞉bi ohale, ba꞉gala hibima꞉ midipa꞉te Godokono hanohano komo hawakalilamema꞉ dododilinaka ba꞉bi ohale, ba꞉gala ebeno Gobogobote la꞉eno tepo ipuwamo da꞉miya꞉tenako ba꞉bi ohale, la꞉eno hiya꞉hiya꞉ tetelo komopa꞉te komopi ba꞉bi hiya꞉hiya꞉ ohaleno tabamo ba owaluba꞉tihui la꞉eno Kodawatamo balapihonakomata.
EPH 5:20 Ba꞉bene la꞉le aeno Kodawa Ya꞉su Kelisoko ta꞉mata komo kohawakalimima꞉, wadiyala la꞉eno emede ipuwalo kebe hiya꞉hiya꞉ komate la꞉tamo dikulihona, la꞉ ba꞉bi hiliyonomo komoma꞉ Nabiwi Godotamo kalakala tabo na꞉wadiya꞉paa꞉latelenakuya꞉la꞉.
EPH 5:21 Ba꞉bema꞉ hibima꞉ midipa꞉la꞉, la꞉ Kelisotamo ba papamila꞉ha, ebe hunamo kadipatema꞉ wadiyala la꞉ ipuwalo etate etatamo malemalelo na꞉papamila꞉hanakuya꞉la꞉.
EPH 5:22 Ba꞉bema꞉ wadiyala la꞉ hibima꞉ midipi kamenakamenate la꞉eno awa꞉tamo na꞉papamila꞉hanakuya꞉la꞉, la꞉le Kelisotamo keba ka꞉na ka꞉papamila꞉honama ba꞉ba ka꞉na.
EPH 5:23 Numa꞉la꞉, Kelisote sose ipuwalo hibima꞉ midipino watodawama꞉ keba ka꞉na keda꞉na, ba꞉ ba꞉ba ka꞉na dubuti ebeno kamenoeno watodawama꞉ ka-eda꞉na, huiyatiya wadiyala la꞉ dubate ba꞉moe eta komo hidamo nemalagidolala꞉, sose tawakaluba꞉te Kelisokono apema꞉ ba eda꞉hana, ebete ibi mabuma꞉ ebeno malemale konomo hawakalimiti ibino Ka꞉ka꞉ Mula꞉ledawama꞉ ba꞉bo ediya꞉.
EPH 5:24 Ba꞉bema꞉ sose tawakaluba꞉te Kelisotamo keba ka꞉na ka꞉papamila꞉hana, wadiyala kamenakamenate atumu ibino awa꞉tamo ba꞉ba ka꞉na na꞉kapapamila꞉hanakamena꞉.
EPH 5:25 Huiyatiya hibima꞉ midipi dubala꞉, la꞉ ba꞉moe eta ko komo akadodala꞉. Kelisote sose tawakalubi malemalelo ba emalagidolena ibi mabuma꞉ ebeno ka꞉ka꞉ gobogobamo keba ka꞉na kihatiya꞉, wadiyala la꞉ ba꞉ ba꞉ba ka꞉na la꞉eno kamenakamena malemalelo nemalagidolenala꞉.
EPH 5:26 Numa꞉la꞉, Kelisote ebeno ka꞉ka꞉ gobogobamo ihate komodo ebete sose tawakalubi ba꞉ dito uwatiya꞉, iba꞉te Godokono talonapima꞉ ba eda꞉hana ebeno oko kowatinama꞉. Iyo, Kelisote ba꞉bi tawakalubino kuba ododili komo ba꞉gala ibino tepo ipuwoeno dalowa꞉ ukui komo ebeno taboeno komokomamo ukulalenomo dukulaliya꞉, iba꞉te uliuli tawakalubima꞉ ba꞉bo eda꞉huya꞉, tawakaluba꞉te mala꞉ ikila komodo dulinomoma꞉ keba ka꞉na keda꞉hanaka ba꞉ba ka꞉na.
EPH 5:27 Ba꞉ hibila, Kelisote ebeno ubi komo ba꞉ma ka꞉na ihatiya꞉, ebeno oko owati komodo sosete hagalu bohelema꞉ deda꞉mene, ba꞉bene ebe ha꞉kiya ba꞉be hido a꞉la꞉mina sose ebeno kamenama꞉ kolawema꞉ne. Ba꞉bema꞉ ba꞉be kamenagodolo eta kuba deha꞉potonomote a꞉kitanamene, iyo, ebete eta dubuino komo iya꞉tawaheno tuputupunomolo ba emedena, ebete da꞉pulinako ba꞉be kaliko ba꞉ dalowa꞉ha꞉ hidonomo kalikola, ebeno a꞉la꞉mina bada konomola꞉ka꞉!
EPH 5:28 Ba꞉bema꞉ wadiyala hibima꞉ midipi ipuwalo eta dubuti ebeno kamena malemalelo nemalagidolonamene, ebe ha꞉kiya ebeno ape keba ka꞉na kemalagidolona ba꞉ba ka꞉na. Numa꞉la꞉, dubuti kamena da꞉lawemene ba꞉ba tetene tupuimiti ibino emede ka꞉ka꞉te kapiyama꞉ keda꞉ma꞉ne, ba꞉bema꞉ keba tetelo ebete ebeno kamena demalagidolona, ba꞉be atu gabodo ebe ha꞉kiya ebe na꞉ka-emalagidolona.
EPH 5:29 Ba꞉ hibila, ba꞉moe hopolo eta dubuti ba꞉ma ka꞉na kemedenaha꞉, ebete ebeno apeno modoboha꞉ komokomo ulame tetelo ebe ha꞉kiya ebe a꞉kowaluba꞉le. Ao, dubuino ododili komo eba ka꞉naha꞉. Keba tetelo baa꞉ kape komote ibi dulame, ibi ha꞉kiya ibi owalubilima꞉ baa꞉ ohote ba꞉bo nahanaka, ba꞉bema꞉ wadiyala hibima꞉ midipi dubate ibino kamenakamenoeno modoboha꞉ komokomo ipuwalo ibi atumu na꞉kowalubilinakamena꞉. Numa꞉la꞉, Kelisote a sose tawakalubi konomamo ba emalagidoloena ebete a ba꞉ba ka꞉na owalubinako,
EPH 5:30 mabu a hibima꞉ midipi hiliyonomo ba꞉ ebeno apeno komokomola.
EPH 5:31 Ba꞉bene Godokono Bukalo eta tabote ba꞉ma ka꞉na itana, “Ba꞉moe ba꞉be mabuma꞉ dubuti ebeno menoko nabiwi miya꞉palete ebeno kamenago kapiyama꞉ keda꞉ma꞉ne.”
EPH 5:32 Numa꞉la꞉, ba꞉moe taboeno eta ipuwa komote diya ditana, nale ba꞉be komo la꞉tamo ba꞉ma ka꞉na hawakalimimo, sose tawakalubi ba꞉ Kelisokono kamenala, ba꞉bema꞉ hibima꞉ midipi ba꞉gala ebe iba꞉te kapiyama꞉ hibinomolo eda꞉na.
EPH 5:33 Ba꞉bema꞉ la꞉ ba꞉be naeno dopo iya꞉tulame tabo ba lawe, ba꞉moi netewa koko komo atumu na꞉kemalagidola꞉la꞉. Dubuti ebe ha꞉kiya ebe keba ka꞉na kemalagidolona, wadiyala ebete ebeno kamena ba꞉ba ka꞉na nemalagidolonamene, ba꞉gala kamenate ebeno tepo ipuwoeno ukuilo ebe ha꞉kiya ebe hopamo ba ihate ebeno awi hunamo nadipatenakamene.
EPH 6:1 Guguda꞉la꞉, wadiyala la꞉ la꞉eno nabi menokobi iba꞉tamo na꞉papamila꞉hanakuya꞉la꞉, mabu Godote ba꞉be komo tuputupu ododi komoma꞉ goena.
EPH 6:2 Iyo, Godote Isalaela tawakaluba꞉tamo eta ko tutumu tabo ba꞉ma ka꞉na ikalamiya꞉, “Amia꞉no nabiwi ba꞉gala menoko ibino komoma꞉ kuba tabo olamagihino iba꞉tamo na꞉papamiwatanakuya꞉.” Ba꞉bene ebete gala na꞉kagoiya꞉, “Ba꞉moe tutumu tabamo papamiwata komodo ama꞉ hido owalubi komo nagodone ba꞉ma ka꞉na kolawema꞉na꞉ta, ama꞉le tete ga꞉ga꞉nomolo hido hopolo ba emedena hiliyonomo komokomo ipuwalo nale ama꞉ hidonomamo bowalubinakomata.” Ba꞉bema꞉ numa꞉la꞉, Godokono Tutumu Tabo hiliyonomo ipuwalo ba꞉moe tutumu ba꞉ dopo tutumuma꞉ ediya꞉, lumagino papamiwata komodo Godote ebetamo hido owalubi komo kihatenakoma꞉ hibilo a꞉goiya꞉.
EPH 6:4 Ba꞉gala la꞉ puya꞉te nabima꞉ deda꞉hanama, la꞉ la꞉eno gugudino ododili komokomoma꞉ ibi hiliyonomo tetelo koamo akakiyahalamenakala꞉, iba꞉te ibino tepo ipuwalo la꞉tamo maubahakapoma꞉. Wadiyala la꞉ huiyatiya Kodawa Kelisokono iya꞉tulame komamo ibi ba tutumulatelena ibino kuba ododili tetelo iba꞉tamo modobo huiya nikalamenakuya꞉la꞉, iba꞉te hibima꞉ midi ipuwalo hidamo kapepehoma꞉.
EPH 6:5 Ba꞉bene koko okopi dubate la꞉ pui mana꞉mo duwatiya꞉la la꞉le ibino huiyaha꞉ oko kowatihonama꞉, ba꞉bi dubate ba꞉moe hopolo la꞉eno oko namutulubima꞉ ba eda꞉hana, wadiyala la꞉ la꞉eno ukuilo ibi tolelamelo ibi hunamo wadiya꞉paa꞉latelete iba꞉tamo na꞉papamila꞉hanakuya꞉la꞉, la꞉le Kelisotamo keba ka꞉na ka꞉papamila꞉honama ba꞉ba ka꞉na. Iyo, wadiyala la꞉ la꞉eno tepo ipuwalo eta kuba ukui ugumuihino oko hibinomolo nowatinakuya꞉la꞉.
EPH 6:6 Ba꞉gala oko owati ipuwalo la꞉ ba꞉ma ka꞉na akemalagidolala꞉, oko namutudawate natamo kokalakalama꞉, ebete na dunamita ba꞉be kapiya tetelo nale oko hidamo owatinakomo. Ao, eba ka꞉naha꞉. Namutudawate la꞉ ulame tetelo ba꞉gala ulameha꞉ tetelo, wadiyala la꞉ Godokono ubi komamo papamila꞉halo, la꞉ ha꞉kiya la꞉ Kelisokono okopima꞉ ba ga꞉la la꞉eno tepo ipuwoeno helo konomamo oko ba꞉bo nowatinakuya꞉la꞉.
EPH 6:7 Iyo, la꞉le la꞉eno oko hibi kalakalago owati modobola, manaha꞉ hopo habanapi kalakaluilamema꞉, la꞉ huiyatiya aeno Kodawa Kelisoko kokalakaluimima꞉ oko hidamo nowatinakuya꞉la꞉.
EPH 6:8 Ba꞉bema꞉ puya꞉te huiyaha꞉ okopima꞉ deda꞉hana ba꞉gala puya꞉te mani oko dowatihona, wadiyala la꞉ hiliyonomate ba꞉moe ko komo akadodala꞉, aeno Kodawate hiliyonomo tawakalubino ododili komo ba ulamena, ebete hido okodawatamo ebeno hido huiya hibinomolo kikamema꞉ne.
EPH 6:9 Ba꞉gala la꞉ hibima꞉ midipi oko namutuluba꞉la꞉, puya꞉te la꞉eno oko huiyaheno kowatihonama꞉ mana꞉mo duwatiya꞉ma, la꞉ ba꞉bi okopa꞉tamo atumu hido tepo ipuwoeno malemale na꞉hawakaliminakuya꞉la꞉, iyo, keba tetelo iba꞉te oko modobodopolo owatihino, ba꞉ba tetelo la꞉le ibi temeteme huiya ikalamema꞉ akakiyahalama꞉la꞉. Wadiyala la꞉ ba꞉moe ko komo akadodala꞉, la꞉ ba꞉gala ibi la꞉ hiliyonomo ba꞉ Hunu Habalo demedena ba꞉be Konomo Namutudawoeno huiyaha꞉ okopilata. Ba꞉ hibila, ba꞉be Kodawate kapiya gabonomodo hiliyonomo tawakalubino komo tuputupulu kanagilamelelamema꞉ne ibino modobo huiya iba꞉tamo kikalameholema꞉.
EPH 6:10 Ba꞉bema꞉ ba꞉moe leta kuititi hapulu nale la꞉ ba꞉ma ka꞉na kiyalamemata, la꞉ aeno Kodawa Kelisoko ipuwalo ba emedena ebeno konomo helo lawete helonomoma꞉ neda꞉huya꞉la꞉.
EPH 6:11 Ba꞉gala la꞉ hibima꞉ midi komoeno alaholoho ipuwalo wato kikipo kolawema꞉, wadiyala la꞉ Godokono alaholohoeno ilina hiliyonomo na꞉pupulinakuya꞉la꞉, ba꞉bema꞉ Saitanakono ha꞉da amihoho komate la꞉tamo dikulimina꞉, ba꞉ba tetelo la꞉ modoboma꞉ keda꞉hama꞉nemata la꞉le kodakodalo kola꞉mota꞉hanama꞉.
EPH 6:12 Numa꞉la꞉, aeno alaholoho komote komo hopo habanapa꞉tamo kitanaha꞉, huiyatiya ale hiya꞉hiya꞉ kuba gobogobo kapiyago alaholohonakoma꞉. Iyo, ibi ipuwalo komo ba꞉ helohelodopo gobogobola ba꞉gala komo ba꞉ helohelonomo gobogobola, komo ba꞉ ba꞉moe hopoeno du ipuwalo da꞉wapata꞉lamena ba꞉bi gobogobola ba꞉gala komo ba꞉ alomo hunulu heloamo da꞉wapata꞉lamena ba꞉bila.
EPH 6:13 Ba꞉bema꞉ la꞉eno alaholo komoma꞉ Godokono modobo ilina hiliyonomo na꞉pupula꞉la꞉, mabu hibila, la꞉ ba꞉bi ilina ba pupuli, kuba tetete la꞉tamo duluhukumini, la꞉ Saitanatamo ba꞉bo kohelohelohoma꞉nemata, iyo, alaholo ipuwalo la꞉le haba ebetamo ikameheno kodakodalo kola꞉mota꞉hanama꞉nemata.
EPH 6:14 Ba꞉bema꞉ hibima꞉ mididawa, ama꞉ kodakodalo ba la꞉na ba꞉ma ka꞉na na꞉hiduya꞉. Ama꞉le Godokono hibi komo amia꞉no kamakemo puliti na꞉kodakoduimiya꞉, ba꞉gala ebeno tuputupu emede komo amia꞉no nehe ilinamo kapuliti,
EPH 6:15 ba꞉gala ebeno hete tawakaluba꞉tamo dikalamena ba꞉be Hido Tabo amia꞉no nato ilinamo na꞉pupuliya꞉, alaholoho ipuwalo amia꞉no natote igulugadigakapoma꞉.
EPH 6:16 Ba꞉bene ama꞉le Godoko hibima꞉ da꞉midina, wadiyala ama꞉ hiliyonomo tetelo ba꞉be komo amia꞉no makeyo ilinamo lawete natanakuya꞉, mabu hibila, ama꞉go dalaholona ba꞉be Kubadawate ebeno koe powagoeno tele ama꞉tamo da꞉pemelemene, ama꞉ modoboma꞉ keda꞉ma꞉na꞉ta ba꞉bi ilina amia꞉no hibima꞉ midi komamo koduhilamema꞉.
EPH 6:17 Ba꞉bene tawakalubino ka꞉ka꞉ mula꞉ komote Godogodone duluhukuna, wadiyala ama꞉ alaholoho ipuwalo ba꞉be komo amia꞉no dibamo kapuliti, ba꞉gala Godokono Gobogoboeno alaholo gili akona꞉lawiya꞉, ba꞉be gili ba꞉ Godokono Tabola.
EPH 6:18 Ba꞉bene hiliyonomo hiya꞉hiya꞉ tetelo la꞉le hiya꞉hiya꞉ toetoe tabo ga꞉la komodo Godokono Gobogoboeno heloamo ebetamo nolamagiminakuya꞉la꞉, iyo, wadiyala la꞉ ba꞉be komo ododima꞉ heloha꞉ma꞉ eda꞉haheno ebeno hiya꞉hiya꞉ tawakalubi hiliyonomo ba꞉bo na꞉wadiya꞉paa꞉latelenakuya꞉la꞉.
EPH 6:19 Ba꞉gala wadiyala la꞉ na mabuma꞉ Godoko atumu ba꞉ma ka꞉na na꞉katoemehonakuya꞉la꞉, keba tetelo nale Hido Tabo kolamagima꞉ hido tete duminakomo, ebete natamo hidohido ukui modobolo nikanamenakamene. Numa꞉la꞉, Godote ba꞉be Taboeno ipuwa tawakaluba꞉tamo dopamo ugumuiya꞉, huiyatiya ba꞉ma tetelo ebe ubi bihatena nale ba꞉be komo hibima꞉ midiha꞉pa꞉tamo toleheno ba hawakalimi iba꞉te hidamo kiya꞉tawahama꞉,
EPH 6:20 iyo, nale Hido Tabo hiya꞉hiya꞉ tawakaluba꞉tamo atama꞉ ebete na ba꞉bema꞉ ka꞉namiya꞉. Ba꞉ hibila, ba꞉be oko owati mabuma꞉ nale gabomanino du genamalo emedenamo, ba꞉bema꞉ wadiyala la꞉le toetoe tabamo na Godotamo nadipanatenenakuya꞉la꞉, ebete modobo helo natamo ba ikaname ba꞉be Tabo olamagi ipuwalo nale toleha꞉ma꞉ keda꞉nama꞉.
EPH 6:21 La꞉ nonolata, aeno hibima꞉ mididawa ekawi eta Tikikasiti la꞉tamo da꞉puluhukumini, ebete naeno emede komo ba꞉gala ododili komo hiliyonomo la꞉ kopikiyalamema꞉na꞉ta. Ba꞉ hibila, ebete Kodawa Ya꞉sukunu eta hido okodawama꞉ eda꞉na,
EPH 6:22 ba꞉bema꞉ nale ebe la꞉tamo poememo, la꞉le aeno emede komokomo ebegodolo dulihoma la꞉ kalakala ba꞉bo kolawema꞉nemata.
EPH 6:23 Ba꞉bema꞉ wadiyala Nabiwi Godoko ba꞉gala Kodawa Ya꞉su Kelisoko iba꞉te hibima꞉ midipi ekaki hiliyonomatamo hete komo ba꞉gala malemale emalagidolo komo ba ikalame ibino hibima꞉ midi komo ba꞉bo na꞉koimilama꞉mena꞉.
EPH 6:24 Ba꞉gala puya꞉te emedena tetelo aeno Kodawa Ya꞉su Kelisoko konomamo demalagidolonamena꞉, wadiyala Godokono malemale komote ibi hiliyonomagodolo nitanamene. Ba꞉moe ba꞉ naeno tabo kuititila. Ba꞉ba꞉la.
PHI 1:1 Na ba꞉ Polotela. Na ba꞉gala Timotiko ale Ya꞉su Kelisokono komo okopima꞉ eda꞉hanama꞉, ba꞉bema꞉ la꞉ Pilipai habalo puya꞉te Ya꞉su Kelisoko ipuwalo Godokono tawakalubima꞉ deda꞉hanama, ale ba꞉moe leta la꞉tamo poemema꞉, ba꞉gala la꞉ sose watowatopi ba꞉gala la꞉ puya꞉te oko owati ipuwalo watowatopi dowalubilinama, ale ba꞉moe leta la꞉ mabuma꞉ atumu na꞉kapoemema꞉.
PHI 1:2 Wadiyala aeno Nabiwi Godoko ba꞉gala Kodawa Ya꞉su Kelisoko, iba꞉te ibino malemale komo ba꞉gala hete komo la꞉tamo nikalama꞉mena꞉ta.
PHI 1:3 Nale tete hiliyonomolo la꞉ ba emalagidolena naeno Kodawa Godotamo kalakala tabo badipatenakomo.
PHI 1:4 Iyo, nale la꞉ toetoe tabamo kalakalago a꞉wadiya꞉paa꞉latelenakomata,
PHI 1:5 mabu la꞉le Godokono Hido Tabo nagodone dulihuima, ba꞉ba tetene tupuimiti ba꞉ma teta꞉mo puluhuku la꞉le nago kapimilo ba꞉be atu oko bowatinapimata.
PHI 1:6 Ba꞉bema꞉ nale ba꞉moe komo iya꞉tawanomola, kebe Kodawate la꞉ ipuwalo hido oko da꞉tupuimi, ebete ba꞉be oko miya꞉paheno Ya꞉su Kelisokono Kuititi Hegelalo upula꞉nomo kupula꞉ma꞉ne.
PHI 1:7 Ba꞉ hibila, nale la꞉ naeno tepo ipuwoeno malemala꞉mo demalagidolenama, ba꞉be komo modobonomoma꞉ eda꞉na, mabu Godote ebeno malemale natamo ba hawakalimi kebe oko natamo dikanamiya꞉, na dopamo du genamalo emedenaha꞉ tetelo la꞉ hiliyonomate ba꞉be oko ipuwalo na owalubininakuimata. Ba꞉gala kalakala konomola, ba꞉ma tetelo nale du genamalo ba emedena, kebe hiya꞉hiya꞉ tetelo gabomana꞉te naeno komo danagiya꞉midanamenaka, la꞉le na gala a꞉kowalubininakomata nale Hido Taboeno hibi komo hidamo kohawakaliminakoma꞉.
PHI 1:8 Iyo, Godote naeno hibi komo iya꞉tawala, ba꞉ma ka꞉na nale Ya꞉su Kelisokono tepo ipuwoeno malemale komago la꞉ demalagidolenama.
PHI 1:9 Ba꞉bema꞉ nale la꞉ mabuma꞉ toetoe tabo Godotamo dadipatenakomo, ba꞉be komo ba꞉ ba꞉ma ka꞉nala. Wadiyala Godokono hibi iya꞉tawa komote ebeno mulu ukui komago la꞉ ipuwalo ba apepehona, la꞉eno malemale emalagidolo komote atumu konomamo na꞉ka-apenamene.
PHI 1:10 Ba꞉be mabuni la꞉le la꞉eno emede ipuwalo hiliyonomo komo hidamo ba anagilamena, la꞉le tuputupu komo kapiya lawete Kelisokono Kuititi Hegelalo dalowa꞉ha꞉ma꞉ deda꞉hanama, eta dawate a꞉kamodobamene la꞉ kuba ododilipima꞉ ka꞉lamima꞉.
PHI 1:11 Iyo, ba꞉ ba꞉moe gabodo Ya꞉su Kelisokono tuputupu emede ipuwane dikulihona ba꞉bi gaote la꞉ ipuwalo ba꞉tabotabohonamena꞉, ba꞉bema꞉ Godokono mahilote koma꞉ ba eda꞉ ebe ha꞉kiya ebe ba꞉bo bawagaminanamene.
PHI 1:12 Ba꞉bema꞉ naeno hibima꞉ midipi ekaka꞉la꞉, na ubila la꞉ ba꞉moe komo hidamo iya꞉tawaha, kebe temeteme komate natamo dikulihui, Godote ba꞉bi komo ipuwado gigiho a꞉hiya꞉midui komopa꞉te Hido Tabo hidamo kulihoma꞉.
PHI 1:13 Ba꞉moe ba꞉be mabuma꞉ Lomanapino Konomo Gawadubuino genama da꞉lawamena, ba꞉bi alaholohopi ba꞉gala puya꞉te ba꞉moe ko habalo demedehona, komo ibi hiliyonomate naeno komo hidamo ba꞉ma ka꞉na iya꞉tawahana, nale Kelisokono oko owati mabuma꞉ du genamalo demedenamo.
PHI 1:14 Ba꞉gala kalakala konomola, naeno du genamalo emede komoma꞉ komo hibima꞉ midipi ekaki hiliyonomate aeno Kodawagodone helo gala a꞉kalawiya꞉, iba꞉te na keba ka꞉nala꞉ka꞉ toleheno ebeno Hido Tabo hawakala kolamagimima꞉.
PHI 1:15 Ba꞉ hibila, ibi ipuwalo komopa꞉te ibino tepo ipuwoeno kuba ukuia꞉mo Kelisokono tabo olamagiminaka, ba꞉ma ka꞉na iba꞉te naeno hido mahilo pilo gabodo lawema꞉ ewagelena, ba꞉gala iba꞉te ibi ipuwalo ba olowabeletihui ibino oko owati mabuma꞉ awagahana. Huiyatiya komo ibi eba ka꞉naha꞉, iba꞉te hido ukui kapiyamo Hido Tabo olamagi oko bowatinaka,
PHI 1:16 iyo, ba꞉ba꞉te na malemalelo ba emalagidolonena hido oko bowatina. Ibi iya꞉tawahala Godokono ubilo na du genamalo demedenamo, mabu gabomana꞉te kebe hiya꞉hiya꞉ tetelo naeno komo danagiya꞉midanamenaka, nale Hido Taboeno hibi komo hidamo ba꞉bo hawakaliminakomo.
PHI 1:17 Huiyatiya puya꞉te kuba ukuia꞉mo Kelisokono komoma꞉ dolamagiminaka, iba꞉te ubi bihatena na du genamalo ba emedena komo temeteme natamo dito kikanamema꞉. Iyo, ibi ubila komopino mahilo ba kubahilame ibi ha꞉kiya ba꞉bo kawagaminalema꞉, ba꞉bema꞉ iba꞉te oko hibi gabodo kowatinaha꞉.
PHI 1:18 A꞉iye, iba꞉te temeteme natamo ikanamema꞉ dewagelena, ba꞉be komo ko komoha꞉! Huiyatiya ko komo ba꞉ ibino tabo olamagimi komodo hiya꞉hiya꞉ tawakaluba꞉te Kelisokono komo dulihonaka ba꞉be komola. Ba꞉bema꞉ okopa꞉te ibino tepo ipuwoeno kuba ukuia꞉mo o hido ukuia꞉mo ebeno komo da꞉hawakaliminaka naeno kalakalate itananako. Ba꞉gala na ba꞉moe eta komoma꞉ na꞉kalakalutamo,
PHI 1:19 na iya꞉tawala la꞉le toetoe tabo Godotamo dadipatenakoma, ba꞉be komodo ba꞉gala Ya꞉su Kelisokono Gobogoboeno owalubi komodo nale ba꞉moe du genamane kuluhukuma꞉nemo.
PHI 1:20 Ba꞉ hibila, nale ubi konomago uliholo latiminamo, naeno komo anagiya꞉midaname tete gabomana꞉godone duluhukumini, nale eta tabo olamagima꞉ hilopoheno toleha꞉ma꞉ ba eda꞉, Kelisote tawakalubino holoholo hapulu awagaha komo ba꞉bo kolawema꞉ne. Wadiyala ebete hiliyonomo tetelo na ipuwado awagaha komo na꞉lawenakamene, iyo, na demedenamo o iba꞉te naeno ka꞉ka꞉ dito ditamidanamemena꞉, naeno ubi komote ba꞉ ba꞉ba ka꞉na bitananakomene.
PHI 1:21 Ba꞉bema꞉ numa꞉la꞉, nale hopo habalo ba emedena naeno ka꞉ka꞉ Kelisoko mabuma꞉ kalakalago ihatenamo, huiyatiya nale da꞉hoemo naeno eta kalakalate kakitanama꞉ne mabu nale ebegodone naeno hido huiya konelawema꞉nemo.
PHI 1:22 Iyo, na hopo haboeno ka꞉ka꞉go ba emedena oko owati ipuwalo hidohido gao Godotamo da꞉noluilamenakomo, ba꞉be hido gabote natamo ba itana huiyatiya naeno hoe komodo eta hido gabote natamo kitanama꞉ne. A꞉iye, ba꞉moi netewa hidohido gabote natamo ba pola꞉na ibi ipuwalo nale kebe gabodo na꞉ka꞉tomo?
PHI 1:23 Ba꞉ hibila, naeno tepo ipuwalo ba꞉bi netewa ukui komate ba꞉bema꞉ olowabeletihuina. Nale ba꞉moe hopo miya꞉pate Ya꞉sukunu emede habalo eba꞉go konemedenama꞉ ubi konomamo ihatenamo, mabu na niya꞉tawanamo ebeno Hunu Haboeno kalakalate ba꞉moe hopoeno kalakala hibinomolo kogogoloma꞉ne.
PHI 1:24 Huiyatiya na eta ko komonomo ba꞉ma ka꞉na kiya꞉tawanamo, wadiyala nale la꞉ mabuma꞉ hopo habalo emedena, mabu keba tetelo nale la꞉go emedenaheno la꞉le owalubi komo pogodone na꞉ka꞉laweonakoma?
PHI 1:25 Ba꞉moe ba꞉be mabuma꞉ na iya꞉tawala, nale ba꞉ma tetelo la꞉ miya꞉paleheno la꞉ gala da꞉kapowalubilima, la꞉eno hibima꞉ midi ipuwalo kalakala komote hununomamo ba odolo la꞉ ba꞉bo kapepehoma꞉nemata.
PHI 1:26 Iyo, ba꞉ hibila, nale ba꞉moe du genamane uluhukuti la꞉go kemedanama꞉ la꞉tamo gala da꞉kapemo, ba꞉ba tetelo la꞉le Ya꞉su Kelisoko ipuwalo kalakala konomo na mabuma꞉ ba꞉bo kolawema꞉nemata.
PHI 1:27 Ba꞉bema꞉ ba꞉moe ba꞉ konomo komola, wadiyala la꞉ Kelisokono hidohido ga꞉limapi gugudima꞉ neda꞉haniya꞉la꞉, ebeno Hido Tabote la꞉ keba ka꞉na kiya꞉tulametana ba꞉ba ka꞉na. Ba꞉bene nale la꞉go da꞉pemedenamo o nale muhululu ba emedena la꞉eno komo dito dulinakomo, nale hiliyonomo tetelo ba꞉moe komo biya꞉tawanamo, la꞉le la꞉eno hibima꞉ midi ipuwalo ukui kapiyalo kodakodalo ba la꞉mota꞉hana kapimilo alaholohonakomata, tawakaluba꞉te Hido Tabo uli komone hibima꞉ komidima꞉.
PHI 1:28 Iyo, ba꞉ ba꞉ba ka꞉na puya꞉te la꞉go dalaholohona la꞉le ibino ododili komoma꞉ a꞉katoletolehonamata, ba꞉bene Godote la꞉eno toleha꞉ komodo ibi kiya꞉tulamema꞉ne, ebete ebeno helo kapiyamo la꞉eno ka꞉ka꞉ ba mula꞉lelame ibi huiyatiya dito kokubahilamema꞉ne.
PHI 1:29 Numa꞉la꞉, Godote ebeno malemale komodo la꞉ a꞉ka꞉lamia꞉ta la꞉le Kelisoko hibima꞉ midipima꞉ keda꞉hanama꞉, ba꞉gala kalakala konomola, ebete atu malemale ipuwalo la꞉ a꞉kaka꞉lamia꞉ta la꞉eno hibima꞉ midi mabuma꞉ temeteme komo kuwatenakoma꞉.
PHI 1:30 Ba꞉moe ba꞉be mabuma꞉ la꞉le alaholo ipuwalo ba꞉pola꞉namata, nale dopamo kebe alaholo ipuwalo kemedenamimo ba꞉gala ba꞉ma tetelo da꞉kalutamo ba꞉be atu alaholo komola. Ba꞉ hibila, la꞉le dopamo naeno alaholo temeteme dumima, ba꞉be komo nagodolo gala ba kitana la꞉ ba꞉ma tetelo gala a꞉kulihuimata.
PHI 2:1 La꞉ numa꞉la꞉, la꞉ Kelisoko ipuwalo ebegodone helo a꞉lawenakomata, ba꞉gala la꞉ temeteme ipuwalo ebeno malemale komodo gelebadi iya꞉tawahanakomata, ba꞉gala la꞉ ebeno Gobogobago kapimilo a꞉wapata꞉lamenakomata, ba꞉gala la꞉eno tepo ipuwalo etapa꞉te etapa꞉tamo malemale a꞉hawakaliminakomata.
PHI 2:2 Ba꞉moe ba꞉be mabuma꞉ wadiyala la꞉ naeno kalakala ba꞉ma ka꞉na na꞉koiminala꞉, la꞉ ukui kapiyalo ba emedena etapa꞉te etapi atu malemale komamo nemalagidolenala꞉, iyo, la꞉eno tepo ipuwalo kapiyama꞉ ba eda꞉hana la꞉le oko owatima꞉ ubi komo kapiyanomoma꞉ na꞉midinakuya꞉la꞉.
PHI 2:3 Ba꞉bema꞉ la꞉ ipuwalo etate ebe ha꞉kiya ebe kapiya emalagidolo komone o awagaha komone eta komo akododa꞉la꞉, huiyatiya wadiyala la꞉ ha꞉kiya la꞉ hopamo ba miya꞉tena, la꞉eno tepo ipuwoeno ukuilo komo hibima꞉ midipi kokopima꞉ na꞉midilinakuya꞉la꞉.
PHI 2:4 Ba꞉bene la꞉ ipuwalo etate ebe ha꞉kiya ebeno komo kapiya akemalagidolonakala꞉, ao, ebete huiyatiya komopino modoboha꞉ komo ebeno modoboha꞉ komago kapimilo nulamenakamene.
PHI 2:5 Ba꞉be mabuma꞉ wadiyala Ya꞉su Kelisokono tepo ipuwalo ditana, ba꞉be atu malemale ukui komote la꞉ ipuwalo oko nowatinamene.
PHI 2:6 Ebete dopamo Godokono holoholo kapiyamo emedenami, huiyatiya a owalubi tete da꞉puluhukuya꞉, ebe ha꞉kiya ebeno komo kemalagidoloma꞉ ebete Godoma꞉ deda꞉na ba꞉be komo kodakodalo katila꞉nuya꞉ha꞉.
PHI 2:7 Ebete huiyatiya ebeno ko gawadubu emede bahi tama꞉mo kalakalago ba ihate, ebete hopo lumagima꞉ eda꞉te tawakalubino holoholamo atamo ba꞉bo pehawakaluya꞉, iyo, ebete huiyaha꞉ okodawoeno holoholamo puluhukuya꞉.
PHI 2:8 Ba꞉bene ebete ebe ha꞉kiya hopamo ba ihatena ebeno Nabiwino ubi komamo ba꞉bo papamiwatanakui, ba꞉bema꞉ ebeno papamiwata ipuwalo ebete ebeno hoe komoma꞉ modoboma꞉ goiya꞉, iyo, ebete keha pihigalo koko temeteme ba꞉ dito uwatiya꞉.
PHI 2:9 Ba꞉moe ba꞉be mabuma꞉ Godote ebe hununomamo adipatete eta hidonomo mahilo ebetamo ba꞉bo ikamiya꞉, ba꞉be mahiloeno helote komo mahilo hiliyonomoeno helo na꞉gogolena,
PHI 2:10 iyo, ba꞉be mahilo ba꞉ Ya꞉sutila! Ba꞉bema꞉ puya꞉te Hunu Habalo ba꞉gala hopo habalo ba꞉gala haka ipuwalo demedehona, ibi hiliyonomate ebe adikumima꞉ pupamo pegagahiditi,
PHI 2:11 iba꞉te Nabiwi Godoko ba milimiho hawakala na꞉ga꞉lanakamena꞉, Ya꞉su Kelisoko kapiya ba꞉ Kodawala.
PHI 2:12 Ba꞉bema꞉ naeno hidohido mabuluba꞉la꞉, dopamo na la꞉eno habalo ba emedena la꞉ naeno tabamo keba ka꞉na ka꞉papamila꞉honakuima, wadiyala nale lutaha꞉ tetelo la꞉le ba꞉ ba꞉ba ka꞉na na꞉kewagelenala꞉, iyo, la꞉ naeno iya꞉tulame komamo papamila꞉hama꞉ la꞉eno ukui konomamo nihatenakuya꞉la꞉. Ba꞉gala Godote la꞉tamo dikalami, ba꞉be ka꞉ka꞉ mula꞉ komoeno kuititi komo hibilo lawema꞉, wadiyala la꞉ la꞉eno ukuilo ebe tolemelo hunamo ba adipate oko hidamo nowatihonala꞉,
PHI 2:13 mabu kalakala konomola, Godote ba꞉ la꞉ ipuwalo ebeno oko bowatina, iyo, ebete la꞉tamo hidohido tepo ipuwoeno ukui ba꞉gala helo bikalamenata la꞉le ebeno ubi komamo kopapamila꞉hanama꞉!
PHI 2:14 Ba꞉bema꞉ la꞉eno ododili komo hiliyonomo ipuwalo etapa꞉te etapa꞉tamo ubiha꞉ tabo ga꞉laheno akolowabeletihuinakala꞉.
PHI 2:15 Ba꞉ ba꞉ma ka꞉na ba꞉moe hopo habanapa꞉te koko kuba ododilipima꞉ eda꞉hate keka꞉keka꞉ gabodo ba tolamena, la꞉ huiyatiya Godokono hidohidonomo gugudima꞉ beda꞉hanamata, iyo, la꞉godolo eta kuba ododi komo ba꞉gala eta dalowa꞉ ukui komo deha꞉potonomote a꞉kitanamene. Ba꞉bene la꞉le tawakaluba꞉tamo Godokono ka꞉ka꞉ tabo dikalamenakoma, la꞉le ebeno aloma꞉ ba eda꞉hana ba꞉moe hopo ba꞉la꞉minanamata, olokiti alomo hunulu da꞉pola꞉na keba ka꞉nala꞉ka꞉ ba꞉ba ka꞉na. Ba꞉moe ba꞉be mabuma꞉ nale Kelisokono Kuititi Hegelalo ba꞉moe komo kiya꞉tawama꞉nemo, nale kebe oko la꞉ ipuwalo dowatinamimo ba꞉be kodakoda oko ipuwane hidohido gaote hibinomolo a꞉pikuliya꞉, iyo, nale la꞉ mabuma꞉ ba꞉bema꞉ kawagahama꞉nemo.
PHI 2:17 Numa꞉la꞉, la꞉eno hibima꞉ midi komo ba꞉ la꞉le Godoko owatidoloma꞉ eta hawa꞉goeno ilina ebetamo dikamehoma ba꞉be komo huiyala. Ba꞉gala nale ba꞉ma tetelo da꞉hoemo, iyo, komopa꞉te naeno hawi hakamo dito da꞉haminamena꞉, ba꞉be komo ba꞉ eta Godotamo ikameho komoma꞉ keda꞉ma꞉ne, ba꞉bema꞉ ba꞉be komote hibilo duluhukumini, naeno kalakalate ba itana, wadiyala la꞉ ba꞉ atumu kalakala lawete nago na꞉kalakalahuya꞉la꞉.
PHI 2:19 Ba꞉bene Kodawa Ya꞉sukunu ubi ditanamene, nale gabo kumima꞉nemo tete tatalilo Timotiko la꞉tamo kopoemema꞉, ba꞉bema꞉ ebete la꞉eno komoma꞉ tabo gala da꞉kapoememene, nale ba꞉be tabo uliti naeno ukui bilibili komo la꞉ mabuma꞉ ba꞉bo kowibohoma꞉ne.
PHI 2:20 Ebe kapiyate nago la꞉ malemalelo konomamo emalagidolenata, iyo, ebeno tepo ipuwoeno ukuiti naeno tepo ipuwoeno ukui komago kapiyama꞉ eda꞉na.
PHI 2:21 Ba꞉ hibila, komo sose tawakalubi hiliyonomate ibino komo kapiya bemalagidolena, Ya꞉su Kelisokono ubi komokomoha꞉.
PHI 2:22 Huiyatiya Timotiko eba ka꞉naha꞉. La꞉ iya꞉tawahala nale ebeno nabiwi huiyama꞉ ba eda꞉na, ebete Hido Tabo olamagi mabuma꞉ nago kapimilo huiyaha꞉ oko dowatinami, ba꞉be ododi gabodo ebete ebeno hibi komo ya꞉lo a꞉hawakalimi.
PHI 2:23 Ba꞉bema꞉ naeno ubi ba꞉ma ka꞉na itana, gabomana꞉te naeno komo anagiya꞉midaname dupula꞉mena꞉, ba꞉ba tetenomolo gabote ditanamene nale Timotiko la꞉tamo kopoemema꞉nemo.
PHI 2:24 Ba꞉gala nale Kodawa hibima꞉ na꞉midinamo, tete tatalila nale ba꞉moe du genamane uluhukuti la꞉tamo kopema꞉nemo.
PHI 2:25 Ba꞉gala nale eta komo na꞉ka-emalagidolutamo, aeno hibima꞉ midi ekawi Epa꞉paladaitasiko la꞉tamo gala kakapoemema꞉. Ebe ba꞉ la꞉le naeno modoboha꞉ komokomo ipuwalo na owalubinima꞉ da꞉poemima ba꞉be hido dawala, iyo, ebete la꞉ mabuma꞉ na tamelo ba la꞉na alaholoho oko nago kapimilo owatina.
PHI 2:26 Ebe iya꞉tawala la꞉le ebeno tawetawe komo dulima, ba꞉bema꞉ ukui bilibili komote ebegodolo ba itana, ebe ubi konomamo nihatena la꞉tamo puluhukuti la꞉eno holoholo gala kakapulamema꞉.
PHI 2:27 Ba꞉ hibila, ko tawetawete ebe duminati hoe tatalila, huiyatiya Godote malemalelo ebe a꞉hiduimi, ba꞉bene ba꞉be ododi komodo Godote ebeno malemale natamo atumu a꞉kahawakalimi, mabu naeno hido lumagiti na꞉hoetale nale ba꞉be komoma꞉ eta ko temeteme hibilo biya꞉tawana꞉.
PHI 2:28 Ba꞉bema꞉ nale atumu naeno ubi konomago ebe la꞉tamo poemitamo, mabu na iya꞉tawala la꞉le ebe gala da꞉kumima, la꞉eno kalakalate ebe mabuma꞉ ba itana naeno ukui bilibili komote la꞉ mabuma꞉ ba꞉bo kowibohoma꞉ne.
PHI 2:29 Ba꞉bema꞉ wadiyala la꞉le ebe aeno Kodawa ipuwalo eta ekawima꞉ ga꞉late konomo kalakalago na꞉lawiya꞉la꞉. Ba꞉gala la꞉eno hibima꞉ midipi kapiyuimi ipuwalo wadiyala la꞉le ebe huiya tawakalubi atumu na꞉kamililameholiya꞉la꞉,
PHI 2:30 mabu la꞉le nagodone muhululu ba emedehona na owalubini modoboha꞉ma꞉ deda꞉huima, ba꞉ba tetelo ba꞉moe ekawi Epa꞉paladaitasiko la꞉eno habalo na da꞉powalubini, ebete Kelisokono oko mabuma꞉ ebeno ka꞉ka꞉ ebete ko komoha꞉ma꞉ goelo tatalila ba꞉hoena꞉.
PHI 3:1 Naeno hibima꞉ midipi ekaka꞉la꞉, ba꞉moe leta kuititi hapulu nale la꞉ ba꞉ma ka꞉na kiyalamemata, wadiyala la꞉ aeno Kodawa ipuwalo na꞉kalakalahanala꞉. Ba꞉ hibila, na ubiha꞉ma꞉ keda꞉naha꞉ nale la꞉ dopamo diya꞉tulamenakuima, ba꞉be atu komoma꞉ eta kapiya teta꞉mo la꞉ ba꞉moe leta ipuwalo gala kakiya꞉tulamema꞉, mabu ba꞉moe iya꞉tulame komote la꞉eno hibima꞉ midi komo hidamo ka꞉ga꞉lulatelema꞉ne la꞉le hibi gabo otakapoma꞉.
PHI 3:2 La꞉ hidamo! Puya꞉te ibino kuba ubi komo dododilinaka ba꞉bi dubuino komo hidamo nulamenala꞉, mabu ibi ba꞉ helohelo gahagaha huiyala, iyo, iba꞉te ibino ubi konomamo ihatena Yunapi dubuino tama itamida kukala komopa꞉tamo ba ikalame ibino apeno hiya꞉hiya꞉ komo ba꞉bo kiya꞉hililamema꞉.
PHI 3:3 Huiyatiya a ba꞉ puya꞉te Godokono Gobogoboeno heloamo ebe dadikuminakoma꞉, a ba꞉bi tawakalubila. Iyo, Godote bahibahi gugudino tama itamida kukala Yunapa꞉tamo dopamo dikalamiya꞉, ale ba꞉be komoeno ipuwa iya꞉tawahapima꞉ eda꞉hanama꞉, mabu Godote a tuputupupima꞉ ka꞉mi komo ale kulima꞉, ale hunu tamamo ododili komo hiliyonomo ipuwalo eta kapiya komo hibima꞉ kamidinaha꞉. Ao, a huiyatiya Ya꞉su Kelisoko kapiya hibima꞉ ba midina ebe kapiya ba꞉bema꞉ awagaminanama꞉.
PHI 3:4 La꞉ numa꞉la꞉, puya꞉te naeno pakala emede komo diya꞉tawahana, diyala, iba꞉te ibino kateneno ukuilo ba꞉ma ka꞉na da꞉ ga꞉lamena꞉, “Ba꞉be dubu Poloko ebete ebeno hunu tamamo ododili komodo ebe ha꞉kiya ebe hidodawanomoma꞉ midiya꞉.” Ba꞉ hibila, dopamo nale hunu tamamo ododili komo ipuwado komo hiliyonomo tawakalubi a꞉negogoliya꞉mo, ba꞉bema꞉ diyala, nale ba꞉ma ka꞉na da꞉ emalagidolomo, Godote naeno hunu tamamo ododili gabodo na ebeno eta tuputupudawama꞉ koka꞉namima꞉ne.
PHI 3:5 Ba꞉ma ka꞉na nale Isalaela tawakalubino Beniyaminakono gu ipuwane hawakaluya꞉mo, iyo, na ba꞉ Yunapino hawinomola, ba꞉bema꞉ nale hawakalate kapiya wuiki da꞉wibuya꞉ dubu guduino tama itamida kukala ba꞉bo lawiya꞉mo. Ba꞉gala a Yunapino Pa꞉lisi kapiyuimi ipuwalo na eta dawama꞉ dediya꞉mo, ba꞉bema꞉ Mosesete atamo dikaa꞉miya꞉ ba꞉bi Tutumu Tabo hiliyonomo nale kodakodanomolo uwatenakuimo.
PHI 3:6 Ba꞉bene nale ba꞉bi Tutumu Tabamo papamiwatama꞉ naeno ubi konomamo ba ihatena, nale Godokono sose tawakalubino komoma꞉ ba꞉bo goenakuimo iba꞉te ebetamo hibi gabodo a꞉kapapamila꞉hala꞉, iyo, nale iba꞉tamo koko temeteme ba꞉bema꞉ ikalamenakuimo. Ba꞉ hibila, Tutumu Taboeno hiliyonomo komamo papamiwata ipuwalo nale eta kapiya deha꞉poto komo kotanakuiha꞉, ba꞉bema꞉ Yunapino umi ipuwalo na ba꞉ tuputupudawanomoma꞉ eda꞉namimo.
PHI 3:7 Huiyatiya nagodolo dopamo da꞉pola꞉nama꞉, tawakalubi hiliyonomate ba꞉bi ododili komo ba꞉gala iya꞉tawa komo ba꞉gala Yunapino hawi komo hidohidoma꞉ ba ga꞉lana, nale ba꞉ma tetelo huiyatiya Kelisoko mabuma꞉ ba꞉bi komokomo gigilepalama꞉ midilinamo.
PHI 3:8 Iyo, hopo habanapa꞉te kebe hiliyonomo komo hidohidonomoma꞉ da꞉ga꞉lana ba꞉gala naeno pakala emede komoeno hiya꞉hiya꞉ komo, nale ba꞉bi komo hiliyonomo gigilepalama꞉ ba midilina gunima꞉mo ihilateliya꞉mo. Ba꞉bema꞉ naeno ukui ipuwalo kapiya komote ko komonomoma꞉ eda꞉na, ba꞉be komo ba꞉ naeno Kodawa Ya꞉su Kelisokoba꞉ kapiyama꞉ eda꞉ komola. Iyo, nale ebe mabuma꞉ ba꞉moe hopoeno hiliyonomo hidohido komo nenema꞉ ba goena, ebe kapiya kodakodanomolo lawenamo
PHI 3:9 nale ebe ipuwalo hidamo kemedenama꞉. Ba꞉ hibila, Godote lumagino hibima꞉ midi komodo modobo helo ebetamo ba ikamena ebe tuputupudawama꞉ ba꞉bo komidima꞉ne, ba꞉bema꞉ ba꞉ma tetelo nale Godokono Tutumu Tabamo papamiwata komodo na ha꞉kiya na tuputupudawama꞉ kagoenaha꞉, ao, nale huiyatiya Kelisoko kapiya hibima꞉ na꞉midinamo.
PHI 3:10 Ba꞉be mabuma꞉ na ba꞉moe kapiya konomo komoma꞉ ubi nihatenamo, nale Kelisokoba꞉ kapiyama꞉ ba eda꞉na, ebete hoe ipuwane kebe helo komamo ka꞉mahiguya꞉ ba꞉be atu helo komote naeno emede ipuwalo kitanama꞉ne. Ba꞉bene ba꞉be helo komote nagodolo ba itana, nale ebeno temeteme ipuwalo eba꞉go kapimilo kolutama꞉nemo, ba꞉gala ebete hoe komamo keba ka꞉na ka꞉tuya꞉ nale ba꞉ba ka꞉na atumu da꞉tomo,
PHI 3:11 na hibima꞉ na꞉midinamo ebeno helo ba꞉ modobola, ebete na hoe ipuwane ka꞉ka꞉mo gala kakadipanatenema꞉ne.
PHI 3:12 Numa꞉la꞉, nale tabo ba꞉ma ka꞉na kagoitaha꞉, nale Godogodone hido huiya lawema꞉ naeno emede ipuwalo tuputupunomoma꞉ ya꞉lo ediya꞉mo. Ao, eba ka꞉naha꞉, nale huiyatiya helonomamo oko owati ipuwado ba꞉be huiya galane tetelo lawema꞉ ewagelenamo, mabu Ya꞉su Kelisote ba꞉be huiya natamo hibinomolo ikanamema꞉ na ba꞉bema꞉ laweniya꞉.
PHI 3:13 Ba꞉gala naeno hibima꞉ midipi ekaka꞉la꞉, na ba꞉ma ka꞉na kemalagidolutaha꞉ nale alaholo ipuwalo wato kikipo ya꞉lo a꞉lawiya꞉mo, ao, na ba꞉be kalakala tete galane konumima꞉nemo. Ba꞉be mabuma꞉ kebe komate natamo dopamo da꞉pikulinakui, nale ba꞉bi komo gala emalagidolema꞉ naeno oko owati ipuwalo gala hapuamo kagahiminaha꞉, na huiyatiya naeno holoholo dopo hapunomamo ihatenatomo kuititi teta꞉mo modobolo konuluhukuma꞉.
PHI 3:14 Iyo, sikulu guduti iya꞉da꞉mi hegelalo heloamo keba ka꞉na ka꞉puliganako, na oko owati ipuwalo ba꞉ ba꞉ba ka꞉na puliganamo, nale kuititi teta꞉mo da꞉nuluhukumu naeno hido huiya ba꞉bo konelawema꞉. Ba꞉ hibila, Godote Hunu Haboeno kalakala komo natamo ikanamema꞉, Ya꞉su Kelisoko ipuwalo na ba꞉bema꞉ ka꞉namiya꞉.
PHI 3:15 Ba꞉bema꞉ nonolata, a puya꞉te Kelisoko ipuwalo hidamo dapepehonama꞉, wadiyala a ba꞉bako ukui kapiyado oko ebetamo bowatihonama꞉, huiyatiya diyala, la꞉ komopa꞉te oko eta kuba ukui komago dowatihonama, ba꞉bema꞉ Godote ha꞉kiya ebeno ubi tetelo ebeno tuputupu ukui gabo la꞉ kiya꞉tulamema꞉na꞉ta.
PHI 3:16 Numa꞉la꞉, ba꞉moe komo ba꞉ ko komola, ale hibima꞉ midi ipuwalo ba꞉mamo kebe gabodo ka꞉pikulima꞉, wadiyala ba꞉be atu gabodo ale kuititi teta꞉mo hibinomolo konikulima꞉nema꞉.
PHI 3:17 Naeno hibima꞉ midipi ekaka꞉la꞉, wadiyala la꞉ kapimilo la꞉eno emede ipuwalo na nibaminatenenala꞉, iyo, puya꞉te dopamo aeno ododili komo ta꞉matalema꞉ hidohido ukui duwati, wadiyala la꞉le ba꞉be atu gabodo kotolamema꞉ ibino komo hidamo nulamenala꞉.
PHI 3:18 Ba꞉gala nale dopamo komo hiliyonomo tetelo la꞉ kebe komoma꞉ da꞉kiyalamenakuima, mu numitota꞉la꞉, ka꞉lo ba꞉be komo gala ihi baida꞉go la꞉ ba꞉ma ka꞉na kakiyalamemata, Kelisokono keha pihigalo hoe mabuma꞉ komo tawakalubi hiliyonomate eba꞉go alaholohona.
PHI 3:19 Ba꞉ hibila, ba꞉bako tawakaluba꞉te ibino kuititi tetelo Saitanakono Koe Habamo konikulima꞉na꞉. Iba꞉te ibino kateneno ubi komamo kubanomamo papamila꞉halete, ba꞉bene hilopo komo ibino ododili ipuwalo ba awagahana, iba꞉te ba꞉moe hopoeno ilina uwate gabo kapiya bemalagidolona.
PHI 3:20 Huiyatiya a hibima꞉ midipino hibi emede haba ba꞉ Godokono Hunu Habala, ba꞉bema꞉ aeno Ka꞉ka꞉ Mula꞉lea꞉medawate ba꞉bene kopema꞉ ale ba꞉be komo uliholo latiminama꞉, ebe ba꞉ aeno Kodawa Ya꞉su Kelisotela.
PHI 3:21 Ba꞉bema꞉ hibila, hiya꞉hiya꞉ tawakalubi ba꞉gala gobogobo hiliyonomo iba꞉te ebegodolo ditana ba꞉be konomo helo dumimina꞉, iba꞉te ebeno ubi komamo ba꞉bo kopapamila꞉halema꞉na꞉. Ba꞉ba tetelo Kelisote ba꞉be atu heloamo aeno heloha꞉ ape ba꞉gala ha꞉laha ape hiya꞉nomoma꞉ komidilia꞉mema꞉ne, iyo, ebeno apete hidonomo a꞉la꞉minama꞉ keba ka꞉na keda꞉na, aeno apa꞉te ba꞉ atumu ba꞉ba ka꞉na kakeda꞉haa꞉mema꞉na꞉.
PHI 4:1 Ba꞉bema꞉ naeno hibima꞉ midipi ekaka꞉la꞉, wadiyala la꞉ naeno tabo komokomo ba emalagidolena ba꞉bi komamo papamila꞉hate aeno Kodawa ipuwalo kodakodanomolo na꞉la꞉mota꞉hanala꞉. Ba꞉ hibila, la꞉ nale ulamema꞉ konomamo demalagidolenama ba꞉bi tawakalubilata, ba꞉gala la꞉le natamo ko kalakala komo ba ikanamena, nale Saitanatamo alaholo ipuwalo da꞉lawimo la꞉ ba꞉be wato kikipo huiyama꞉ eda꞉hanamata.
PHI 4:2 Naeno hibima꞉ midipi ekaki bohelemele Yuwodiyako ba꞉gala Sintakiko, nale la꞉ betoelameholemata la꞉le olowabeletihui komo miya꞉pate aeno Kodawa ipuwalo ukui kapiyama꞉ keda꞉ma꞉.
PHI 4:3 Ba꞉bema꞉ ama꞉ pote naeno oko ipuwalo hido owalubidawama꞉ deda꞉na, wadiyala ama꞉ ba꞉moi kamenakamena nowalubiliya꞉. Ba꞉ hibila, ibi netewapa꞉te Hido Tabo olamagimi mabuma꞉ eta dubu Kelaminakoba꞉ dopamo nago kodakoda oko dowatinama꞉, ba꞉bema꞉ ibino mahilote Godokono Ka꞉ka꞉ Bukalo ba꞉pola꞉lama꞉na, komopa꞉te nago oko dowatina ibino mahilote keba ka꞉na ka꞉pola꞉lama꞉na ba꞉ba ka꞉na.
PHI 4:4 Ba꞉bema꞉ la꞉ hiliyonomate aeno Kodawa ipuwalo hiliyonomo tetelo na꞉kalakalahanala꞉, iyo, na gala na꞉kagoemo, wadiyala la꞉ na꞉kalakalahala꞉!
PHI 4:5 Ba꞉gala wadiyala la꞉ hiliyonomo tawakalubino holoholo hapulu tatabalo ba emedena, komopa꞉te la꞉eno ukui komamo papamila꞉halema꞉ ibi heloamo akakiyahalama꞉la꞉. Numa꞉la꞉, aeno Kodawoeno pe tete ba꞉ na꞉tatali,
PHI 4:6 ba꞉bema꞉ wadiyala la꞉ eta komoma꞉ aka-ukuibilibilihala꞉, huiyatiya la꞉eno modoboha꞉ komo hiliyonomo ipuwalo la꞉eno tepo ipuwoeno kalakalago la꞉ Godotamo na꞉toetoehonakuya꞉la꞉ ebete la꞉ kowalubilima꞉.
PHI 4:7 Ba꞉ba tetelo la꞉ Ya꞉su Kelisoko ipuwalo ba emedena Godokono hete komote la꞉eno tepo ipuwoeno hiya꞉hiya꞉ ukui komo hidamo ba꞉ga꞉lulatelenamene, ba꞉ hibila, hopo habanapa꞉te ibino mulu ukui komamo ba꞉be hete komoeno ipuwa lawema꞉ kamodobonaha꞉.
PHI 4:8 Ba꞉bema꞉ naeno hibima꞉ midipi ekaka꞉la꞉, ba꞉moe leta kuititi hapulu nale la꞉ ba꞉ma ka꞉na kiyalamemata, Godote kebe komokomo tuputupu emede komoma꞉ da꞉goena ba꞉gala ebete kebe komo da꞉mililameholena, wadiyala la꞉ ba꞉bi komokomo kapiya la꞉eno tepo ipuwalo nemalagidolenala꞉. Iyo, ebete kebe ukui komo hibima꞉ da꞉goena ba꞉gala muluma꞉ da꞉goena, ebete kebe ukui komo hidoma꞉ da꞉goena ba꞉gala dalowa꞉ha꞉ma꞉ da꞉goena, ebete kebe ukui komo malemale hawakalimima꞉ da꞉goena ba꞉gala kalakala adipatema꞉ da꞉goena, wadiyala la꞉ ba꞉bakobako ukui komo kapiyamo la꞉eno tepo ipuwa na꞉tabuilameniya꞉la꞉.
PHI 4:9 Ba꞉bene la꞉ kebe komo naeno iya꞉tulame komodo dulihonakuima ba꞉gala naeno ododili komodo dulamenakuima, wadiyala la꞉ ba꞉bi hiliyonomo komo nododilinakuya꞉la꞉. Ba꞉ ba꞉moe gabodo pote hete tawakaluba꞉tamo dikalamena, ba꞉be Godote la꞉godolo hibilo bemedenamene.
PHI 4:10 Ba꞉ hibila, naeno kalakalate aeno Kodawa ipuwalo la꞉ mabuma꞉ ditana, ba꞉be kalakala bada konomola꞉ka꞉! Iyo, tete ga꞉ga꞉dopolo la꞉eno ubi ba italama꞉na la꞉le gabo umihino na kowalubininakuiha꞉, ba꞉ma tetelo huiyatiya la꞉le gabo dumima na mana꞉mo ba꞉bo owalubinimata, dopamo la꞉le na owalubinima꞉ ubi keba ka꞉na kihateonakuima ba꞉ba ka꞉na.
PHI 4:11 Huiyatiya nale ba꞉moe kalakala tabo olamagi komamo eta modoboha꞉ komo la꞉tamo kahawakalimitaha꞉, ao, ba꞉moe komo ya꞉lo iya꞉tawuya꞉mo, na hiya꞉hiya꞉ modoboha꞉ komo ipuwalo ba emedena huiyatiya naeno Kodawoeno kalakala kapiyate nagodolo bitanamene.
PHI 4:12 Ba꞉ hibila, dopamo nale komo tetelo hiya꞉hiya꞉ modoboha꞉ komo ipuwalo lutanakuimo ba꞉gala komo tetelo na ilinago modobolo lutanakuimo, ba꞉bema꞉ nale kalakala komoeno ipuwa ba꞉ma ka꞉na ya꞉lo a꞉lawiya꞉mo, hiliyonomo hiya꞉hiya꞉ tetelo, iyo, baa꞉te wiguname tetelo ba꞉gala kape tetelo, dogodogo ilina pola꞉na tetelo ba꞉gala ilina pola꞉naha꞉ tetelo, naeno kalakalate naeno Kodawagodone ba pena a꞉kawibonamene.
PHI 4:13 Ba꞉bema꞉ hibila, ebete natamo helo ba ikanamena, na modobola ebe ipuwalo hiliyonomo hiya꞉hiya꞉ temeteme ipuwado kuitita꞉mo konuluhukuma꞉.
PHI 4:14 Huiyatiya na la꞉tamo kalakala tabo gala na꞉kagoemo, mabu la꞉le naeno temeteme ipuwalo na mana꞉mo dowalubinima ba꞉be komo ba꞉ hido malemale komola.
PHI 4:15 La꞉ Pilipai sose tawakalubi ba꞉moe komo iya꞉tawahanomola, dopamo Hido Tabote nagodone la꞉tamo da꞉puluhukui, ba꞉bene nale la꞉ ipuwane Ma꞉sadoniya hopone gala da꞉katuimo, ba꞉ba tetelo komo hiya꞉hiya꞉ sose tawakalubi ipuwalo la꞉ kapiyanomate mana꞉mo na malemalelo owalubinimata.
PHI 4:16 Iyo, na Tesalonaika habalo ba nemedena, la꞉ komo tetelo naeno modoboha꞉ komo ipuwalo owalubi komo natamo ba꞉bo poemenakuimata.
PHI 4:17 Huiyatiya numa꞉la꞉, naeno ubi komo ba꞉ma ka꞉na kitanaha꞉, na ha꞉kiya na emalagidolonelo mani la꞉godone dito uwate, ao, na ubila la꞉eno malemale ikame komodo Godote ebeno hidonomo huiya la꞉tamo dito kikalamema꞉.
PHI 4:18 Ba꞉ hibila, ba꞉ma tetelo eta modoboha꞉ komo kapiyate nagodolo kitanaha꞉, mabu la꞉le na owalubinima꞉ Epa꞉paladaitasitamo dikamehuima, ebete ba꞉be mani mamo dadahi nale modobolo lawimo. Numa꞉la꞉, la꞉eno malemale ikame komo ba꞉ Godotamo hido nibo pate ilina ikame komo huiyala, iyo, ebete ba꞉bako komo eta lumagigodone kalakalago lawete modoboma꞉ kogoema꞉ne.
PHI 4:19 Ba꞉moe ba꞉be mabuma꞉ kebe modoboha꞉ komate la꞉godolo da꞉pola꞉na, naeno Godote ba꞉bi hiliyonomo komo ulamete la꞉tamo modobolo kikalamema꞉na꞉ta, mabu ebeno dogodogo ilinate Ya꞉su Kelisokono A꞉la꞉minanomo Habalo ebegodolo ba꞉pola꞉na.
PHI 4:20 Ba꞉bema꞉ wadiyala awagaha komote aeno Nabiwi Godogodolo emedena emedena tetelo nitanamene! Ba꞉moe tabo ba꞉ hibinomola, ba꞉ba꞉la!
PHI 4:21 Ba꞉bene puya꞉te Ya꞉su Kelisoko ipuwalo Godokono tawakalubima꞉ deda꞉hana, nale naeno nolata tabo ibi hiliyonomatamo poememo, ba꞉gala nago demedena ba꞉bi hibima꞉ midipi ekaka꞉te ibino nolata tabo atumu la꞉tamo na꞉kapoema꞉.
PHI 4:22 Ba꞉gala puya꞉te ba꞉moe Loma ko habalo Godokono tawakalubima꞉ deda꞉hana, ibi hiliyonomate la꞉tamo nolata tabo bekapoema꞉, iyo, ibi ipuwalo puya꞉te Konomo Gawadubu Sisakono genamalo ebeno oko dowatihona, ba꞉ba꞉te ibino nolata tabo konomo atumu na꞉kapoema꞉.
PHI 4:23 Wadiyala aeno Kodawa Ya꞉su Kelisokono malemale komote la꞉ hiliyonomoeno tepo ipuwalo nitanamene. Ba꞉moe ba꞉ naeno tabo kuititila. Ba꞉ba꞉la.
COL 1:1 Na ba꞉ Polotela, Ya꞉su Kelisote ebeno sose tupuimima꞉ hiya꞉hiya꞉ hopamo doelamiya꞉ ba꞉bi okopi ipuwalo na ba꞉ etala, mabu Godote ebeno ubilo na ba꞉bema꞉ laweniya꞉. Na ba꞉gala a hibima꞉ midipino ekawi Timotiko,
COL 1:2 ale la꞉ puya꞉te Kolosi habalo Godokono tawakalubima꞉ ba eda꞉hana Kelisoko ipuwalo aeno hibima꞉ midipi ekakima꞉ deda꞉hanama, ale ba꞉moe leta la꞉tamo poemema꞉. Wadiyala aeno Nabiwi Godote ebeno malemale komo ba꞉gala hete komo la꞉tamo nikalama꞉mena꞉ta.
COL 1:3 Tete hiliyonomolo ale toetoe tabamo la꞉ ba wadiya꞉paa꞉latele kalakala tabo Godotamo ba꞉bo adipatenakoma꞉, hibila, ebe ba꞉ aeno Kodawa Ya꞉su Kelisokono Nabiwila.
COL 1:4 Ale ebetamo kalakala tabo ba꞉bema꞉ olamagiminakoma꞉ mabu ale ba꞉moe hido komo ulima꞉, la꞉le Ya꞉su Kelisoko hibima꞉ ba midina Godokono tawakalubi hiliyonomo malemalelo emalagidolenamata.
COL 1:5 Iyo, dopamo tetelo Godokono Hido Tabote la꞉tamo da꞉pi, ba꞉bema꞉ hibila, la꞉le ba꞉be hibinomo tabo dulihuima, ba꞉ba tetelo la꞉le Godogodone hido huiya lawema꞉ ebeno pe komoma꞉ uliholo latimi komo ba꞉bo tupuimimata, mabu ebete ba꞉be hido huiya ebeno Hunu Habalo ya꞉lo hiduilamete la꞉ mabuma꞉ hidamo ulamena. Ba꞉moe ba꞉be mabuma꞉ ba꞉ma tetelo la꞉eno hibima꞉ midi komo ba꞉gala malemale emalagidolo komote la꞉godolo ba꞉pola꞉lama꞉nata.
COL 1:6 Ba꞉ hibila, ba꞉moe atu tetelo Godokono Hido Tabote hopo haba konomo hapuhapuamo ba pena hidohido gaote a꞉nolohonaka, la꞉eno uliho tupuimi mabuni ba꞉be tabote la꞉ ipuwalo oko keba ka꞉na kowatinami ba꞉ba ka꞉na. Numa꞉la꞉, la꞉le Godokono hibi tabo uliho tetelo ebeno malemale komo pogodone diya꞉tawahuima,
COL 1:7 ba꞉be dubu ba꞉ Epa꞉palasitila, ebe ba꞉ ale koamo demalagidolonama꞉ ba꞉gala ago oko dowatina ba꞉be lumagila. Iyo, ebete Kelisokono oko a mabuma꞉ owatinako,
COL 1:8 ba꞉gala kalakala konomola, Godokono Gobogobote la꞉tamo malemale emalagidolo komo keba ka꞉na kikalametana, ba꞉ma tetelo Epa꞉palasiti ba꞉be komo atamo a꞉pehawakalimi.
COL 1:9 Ba꞉bema꞉ ale la꞉eno hibima꞉ midi komo dulihuima꞉, ba꞉ba tetene tupuimiti ale la꞉ mabuma꞉ Godotamo toetoe tabo olamagimi kekelaa꞉menaha꞉. Ba꞉bene ale ebe ba꞉ma ka꞉na toemehonakoma꞉, ebeno Gobogobote tawakaluba꞉tamo konomamo dikalamena, ebete ba꞉be mulu ukui komamo ba꞉gala ebeno ubilo wapata꞉lame komamo la꞉eno tepo ipuwa kotabuilamema꞉ne.
COL 1:10 Ba꞉ ba꞉moe gabodo Kodawoeno helote la꞉godolo bitanamene, la꞉le ebeno hidohido ga꞉limapi gugudima꞉ ba eda꞉hana la꞉eno hiliyonomo ododili komo ipuwalo ebe kokalakaluiminakoma꞉, iyo, la꞉ ipuwalo hidohido gaote ba꞉ba ka꞉na ba nolohona la꞉eno Godoko iya꞉tawa komodo hibilo kapepehoma꞉nemata.
COL 1:11 Ba꞉gala la꞉ mabuma꞉ ale Nabiwi Godoko betoemehonakoma꞉, ebete ebeno aloeno konomo heloamo la꞉ koheluilamenama꞉, la꞉le komo hiya꞉hiya꞉ temeteme ipuwalo kodakodalo ba la꞉mota꞉hana
COL 1:12 kalakala tabo ebetamo konomamo kadipatenakoma꞉. Ba꞉ hibila, Godote Kelisokono ododi komodo la꞉ a꞉modobuilamiya꞉ta, ebeno A꞉la꞉minanomo Habalo da꞉pola꞉na ba꞉bi dogodogo ilina ipuwane la꞉le ebeno komo hiliyonomo tawakaluba꞉go la꞉eno hido huiya konuwatema꞉,
COL 1:13 mabu ebete aeno ka꞉ka꞉ ba mula꞉lea꞉me du namutudawoeno helo ipuwane a uluhukua꞉tete, ba꞉bene ebeno Guduti Ko Gawadubuma꞉ deda꞉na ba꞉be komoeno kalakala emede komamo ebete a a꞉miya꞉tiya꞉. Numa꞉la꞉, ebete ba꞉be Gudu konomamo emalagidolona, ebe ba꞉ pote aeno kuba ododili ipuwane a huiya konomamo duwatiya꞉ ba꞉be Hidodawala, iyo, ebete aeno kuba hiliyonomo egebolea꞉mete ya꞉lo adodoholea꞉miya꞉.
COL 1:15 Ba꞉gala eta komo. A hopo habanapa꞉te Godoko baida꞉mo umi modoboha꞉, huiyatiya Kelisote ebeno holoholo kapiyamo atamo ba꞉ a꞉puluhukuya꞉, ebe ba꞉ Nabiwino dopo Gudunomola, iyo, ba꞉moe hopoeno ilina hiliyonomo ikulihino ebete dopamo nemedenami.
COL 1:16 Ba꞉bema꞉ Hunu Habalo da꞉pola꞉na ba꞉gala hopo habalo da꞉pola꞉na, iyo, hopo habanapa꞉te baida꞉mo dulamena ba꞉gala iba꞉te kebe komo baida꞉mo ulameheno, ba꞉bi hiya꞉hiya꞉ helohelonomo gobogobo, ba꞉gala helohelodopo gobogobo, ba꞉gala hiya꞉hiya꞉ tawakalubi, ba꞉gala hopolo da꞉ka꞉ka꞉halena ba꞉bi ilina, ibi hiliyonomo Nabiwiti ebeno Guduino heloamo ododiliya꞉. Ba꞉ hibila, ibi hiliyonomate Kelisoko kawagaminanama꞉ ebeno helo kapiyado ikulihuya꞉,
COL 1:17 ba꞉gala ibi hiliyonomo ipuwalo etate uluhukuhino ebete dopamo nemedenami. Ba꞉be mabuma꞉ ebe kapiyagodolo helo bitana ibi hiliyonomatamo ka꞉ka꞉ kikalamema꞉.
COL 1:18 Ba꞉gala Kelisokono ape ba꞉ sosela, ba꞉bema꞉ ebe soseno watola ba꞉gala ka꞉ka꞉ mabula. Iyo, ha꞉laha tawakalubi hiliyonomo ipuwalo ebe ba꞉ hoe ipuwane mahigama꞉ dopodawama꞉ ediya꞉, ba꞉bema꞉ ebe ba꞉ hiliyonomo komokomoeno Namutudawa kapiyanomola.
COL 1:19 Ba꞉ hibila, Godote kalakalago ebeno ubi bihatiya꞉, kebe komote ebe ipuwalo tabonomo ditana ba꞉be atu komote ebeno Gudu ipuwalo tabonomo kakitanama꞉.
COL 1:20 Ba꞉gala ebete ebeno ubi komo ba꞉ma ka꞉na kihatiya꞉, ebeno Guduino hawiti keha pihigalo da꞉ka꞉ka꞉la꞉mene, ebete ba꞉be hawa꞉mo ba꞉moe hopolo ba꞉gala Hunu Habalo da꞉pola꞉na, ba꞉bi hiya꞉hiya꞉ ilina ba꞉gala tawakalubi ba꞉gala gobogobo ibi hiliyonomo uwatete ebeno mabulubima꞉ keda꞉hanama꞉ ibi gala ebetamo kakamagahelema꞉ne, mabu ibi hiliyonomate dopamo eba꞉go alaholohopima꞉ eda꞉hanama꞉.
COL 1:21 La꞉ hibima꞉ midipi ba꞉ atumu, dopamo la꞉le kuba komokomo ba ododilina la꞉eno tepo ipuwoeno ukuilo Godogodone muhuludopone putitatate eba꞉go alaholohopima꞉ eda꞉hanamimata.
COL 1:22 Huiyatiya kalakala konomola, Kelisote ba꞉moe hopamo pete lumagino apa꞉mo da꞉pehoiya꞉, ba꞉be mabuma꞉ la꞉ ba꞉ma tetelo Godokono hidohido mabulubima꞉ eda꞉hanamata, iyo, ebete gabo ba꞉ma ka꞉na hiduimiya꞉ la꞉ ebeno talonapima꞉ ba꞉gala tuputupupima꞉ ba꞉gala dalowa꞉ha꞉ tawakalubima꞉ midiliti ebeno holoholo hapuamo komagahelema꞉.
COL 1:23 Ba꞉bema꞉ wadiyala la꞉ kodakodalo ba la꞉mota꞉hana la꞉eno tepo ipuwalo ukui gagagagama꞉ akeda꞉hanala꞉, mabu la꞉ dopamo dulihuima ba꞉be Hido Tabo hibima꞉ ba midina la꞉le Godogodone hido huiya uwatema꞉ uliholo latiminamata. Ba꞉ hibila, ba꞉be Hido Tabo kolamagima꞉ na Poloko ba꞉ Godokono eta okodawala, ba꞉gala kalakala konomola, ba꞉be Tabote hopo habanapi hiliyonomatamo ya꞉lo uluhukui.
COL 1:24 Ba꞉gala eta komo, nale la꞉ sose tawakalubi mabuma꞉ duwatenakomo ba꞉bi apeno temeteme komoma꞉ na꞉kalakalanamo. Numa꞉la꞉, sose tawakalubi ba꞉ Kelisokono apela, ba꞉bema꞉ keba tetelo hibima꞉ midipa꞉te ebeno oko owati ipuwalo temeteme duwatenaka, Kelisote ba꞉bako atu temeteme beka-uwatenako. Iyo, ebeno temeteme uwate komo ba꞉moe hopolo hibilo kupula꞉lemeha꞉, ba꞉bema꞉ naeno kalakala bitana nale ebeno temeteme upula꞉leme teta꞉mo ebeno oko kowatinama꞉.
COL 1:25 Ba꞉ hibila, Godote sose tawakalubi mabuma꞉ na okodawama꞉ a꞉midiniya꞉, iyo, nale ebeno tabo konomo iba꞉tamo hawakaliminomo da꞉hawakaliminakomo ba꞉be ododi komo ba꞉ ebete natamo dikanamiya꞉ ba꞉be okola.
COL 1:26 Ba꞉bema꞉ numa꞉la꞉, dopamo tetelo Godote komo gogo hiliyonomolo hopo habanapa꞉tamo ugumuilo ditanami, ba꞉be nopo ebete ba꞉ma tetelo ebeno tabo olamagimipino oko ipuwado la꞉ ebeno tawakaluba꞉tamo ba꞉ma ka꞉na hawakaliminako, Kodawa Kelisote la꞉ hibima꞉ midipino tepo ipuwalo bemedena, ba꞉bene la꞉le ebeno pe komoma꞉ uliholo ba latimina, ebete da꞉pemene ba꞉ba tetelo la꞉le Godokono konomo alo ipuwalo ba꞉nemedenamata. Kalakala konomola, ba꞉ma tetelo ebeno hidonomo a꞉la꞉mina nopote hopo habanapi hiliyonomatamo ba꞉ ba꞉ba ka꞉na itana!
COL 1:28 Ba꞉bema꞉ ale Kelisokono komoma꞉ ebeno Hido Tabo tawakalubi hiliyonomatamo olamagiminakoma꞉, iyo, ale hiliyonomo hiya꞉hiya꞉ mulu tabamo ibi ba kiyahalame ba꞉bo iya꞉tulamenakoma꞉, mabu a ubila ibi hiliyonomate Kelisoko ipuwalo hidonomamo apepehote ibi kokopima꞉ deda꞉hamena꞉, ale ibi Godokono holoholo hapuamo ba꞉bo konewadipilima꞉nema꞉.
COL 1:29 Ba꞉ hibila, nale ba꞉be komo kumima꞉ Kelisokono konomo heloamo oko bowatinamo, ba꞉gala ebeno helote atumu na ipuwalo oko na꞉ka-owatina.
COL 2:1 Ba꞉bema꞉ na ubila la꞉ ba꞉moe komo iya꞉tawaha, na Polote la꞉ Kolosi sose tawakalubi ba꞉gala Lodosiya sose tawakalubi, la꞉ hiliyonomo mabuma꞉ Godokono oko temetema꞉go dowatinamo, ba꞉gala hibila, la꞉eno kapiyuimi ipuwalo puya꞉te naeno holoholo dopamo kumiha꞉, nale la꞉ hiliyonomo mabuma꞉ atumu oko na꞉ka-owatinamo.
COL 2:2 Iyo, naeno ubi ba꞉ma ka꞉na itana, nale la꞉ hiliyonomo hiya꞉hiya꞉ tawakalubi gelebadi tabamo ba heluilame la꞉le malemale emalagidolo komo ipuwalo kapiyama꞉ keda꞉hama꞉. Ba꞉ ba꞉moe gabodo Godote dopamo tawakaluba꞉tamo dugumuiya꞉, ba꞉be diya nopoeno ipuwa la꞉le hidonomamo iya꞉tawahate kodakodalo ba꞉bo katila꞉nama꞉nemata, lumagiti konomo mana꞉goeno kuiha keba ka꞉na katila꞉nanako ba꞉ba ka꞉na. Ba꞉ hibila, ba꞉be diya nopoeno ipuwate ka꞉lo tawakaluba꞉tamo da꞉hawakalana, ebe ba꞉ Kelisotela,
COL 2:3 iyo, hiliyonomo hidohido mulu emalagidolo komo ba꞉gala hiya꞉hiya꞉ iya꞉tawa komo, ba꞉bi komo hiliyonomate ebegodolo ba꞉pola꞉na. Ba꞉be mabuma꞉ Godote dopamo kebe hidohido komo kugumuiliya꞉ ka꞉lo ebete huiyatiya Kelisogodone tawakaluba꞉tamo hawakalilamenako.
COL 2:4 Ba꞉bema꞉ nale ba꞉moe komo la꞉tamo na꞉goemo, mabu na ubihinola la꞉ ipuwalo etate mahigate komo hidohido tabo hunu tama iya꞉tulame gabodo ba olamagi, komo ha꞉da tabo komamo la꞉ amiholamete kuba gabamo ba꞉bo komagatalema꞉.
COL 2:5 Ba꞉ hibila, naeno ape muhulunomola huiyatiya nale naeno tepo ipuwoeno ukui ipuwalo la꞉go bemedenamo, ba꞉bema꞉ la꞉le Kelisoko hibima꞉ midi ipuwalo kapiyama꞉ eda꞉hate kodakodalo keba ka꞉na ka꞉la꞉mota꞉honama, nale ba꞉be komo ba iya꞉tawa konomamo kalakalutamo.
COL 2:6 Ba꞉bema꞉ la꞉ dopamo Ya꞉su Kelisoko la꞉eno Kodawama꞉ ka꞉milo ebe keba ka꞉na ka꞉lawiuima, wadiyala la꞉ ba꞉ma tetelo ebe ipuwalo ba꞉ ba꞉ba ka꞉na nemedenala꞉.
COL 2:7 Numa꞉la꞉, Kelisoko ba꞉ hido pali haka huiyala, ba꞉bema꞉ wadiyala la꞉le la꞉eno haha ebe ipuwamo amihohote, hahate ba mela꞉midahale la꞉ hidamo napepehonakuya꞉la꞉. Iyo, wadiyala la꞉ la꞉eno genama ebe hunamo hidamo netiya꞉la꞉, ba꞉bene la꞉le hibima꞉ midi ipuwalo helohelonomoma꞉ keda꞉hama꞉nemata, Godokono okodawate la꞉ dopamo diya꞉tulamenakui ba꞉ba ka꞉na. Ba꞉gala eta komo, wadiyala la꞉ hiliyonomo tetelo Godotamo kalakala tabo nadipatenakuya꞉la꞉.
COL 2:8 Ba꞉bema꞉ la꞉ hidamo! Na ubihinola la꞉ ipuwalo etate mahigate hopo habanapino komo mulu tabo komokomo ba olamagi ha꞉da amihoho komodo la꞉ kuba gabamo magatale. Ba꞉bako lumagino iya꞉tulame komote la꞉ kuba ododili komoeno okopima꞉ komidilima꞉na꞉ta, mabu ebete hopo habanapino iniwalino hiya꞉hiya꞉ kukala komo ba꞉gala ba꞉moe hopoeno kubakuba gobogoboeno hiya꞉hiya꞉ ukui komo hibima꞉ ba midilina tawakalubi ba꞉bo iya꞉tulamenako. Iyo, ebeno iya꞉tulame komote Kelisogodone kapenaha꞉.
COL 2:9 Wadiyala la꞉ huiyatiya ba꞉moe konomo komo niya꞉tawahala꞉, Kelisote lumagino apa꞉mo ba꞉moe hopolo da꞉pemedenami, ba꞉ba tetelo Godote ebeno holoholo ba꞉gala ododili komago ebe ipuwalo emedenami, iyo, Godote ka꞉lo atumu ebe ipuwalo ba꞉ka-emedena mabu Kelisoko ba꞉gala Godoko ibi ba꞉ kapiyanomola.
COL 2:10 Ba꞉bema꞉ kalakala konomola, mabu la꞉ hibima꞉ midipa꞉te atumu Kelisoko ipuwalo ba emedena ebeno hiliyonomo komokomo konomamo ya꞉lo uwatimata. Iyo, hibila, ebete ebeno Ko Gawadubu emede bahilo ba luta, Saitanakono hiya꞉hiya꞉ nopopi ba꞉gala komo kubakuba gobogobo ibi hiliyonomate ebe tolemelo ebetamo a꞉papamila꞉halenaka.
COL 2:11 Ba꞉bema꞉ Yunapa꞉te ibino iniwala꞉godone da꞉lawiya꞉, wadiyala la꞉ ba꞉be dubu guduino tama itamida kukala nemalagidolala꞉. Iba꞉te dododinaka ba꞉be kukala dubate ha꞉kiya ibino kokotamo ibino guguda꞉tamo miya꞉telamenaka, huiyatiya la꞉ Kelisoko ipuwalo ba emedena ebete la꞉tamo da꞉miya꞉telami ba꞉be tama itamida kukala hiya꞉la. Iyo, Kelisote la꞉eno tepo ipuwalo dododilami ba꞉be komodo ebete la꞉ kateneno kuba ubi komamo papamila꞉ha ipuwane uluhukulatelia꞉ta.
COL 2:12 Ba꞉bema꞉ numa꞉la꞉, la꞉eno Kelisoko hibima꞉ midi komo kohawakalimima꞉ sose watowatopa꞉te la꞉ beyamo ba wadulatele la꞉le beya ipuwamo ba꞉bo nepalaguimata, dopamo tetelo komopa꞉te Kelisokono hoe ape bobo ipuwamo keba ka꞉na kihatiya꞉ ba꞉ba ka꞉na. Ba꞉gala la꞉ beya ipuwane da꞉mahila꞉halima, ba꞉ba tetelo la꞉ Godokono helo hibima꞉ ba midi ebete la꞉ ka꞉ka꞉mo ba꞉bo wadiya꞉paa꞉latelia꞉ta, dopamo ebete Kelisoko ka꞉ka꞉mo keba ka꞉na kadipatiya꞉ ba꞉ba ka꞉na.
COL 2:13 Ba꞉ hibila, la꞉ Yuha꞉pi dopamo Godokono umi ipuwalo ha꞉laha tawakalubima꞉ eda꞉hanamimata, mabu la꞉ la꞉eno kateneno kuba ubi komamo ba papamila꞉hana kuba komokomo ba꞉bo ododilinakuimata. Huiyatiya kalakala konomola, la꞉le ebeno komo iya꞉tawahaheno ba꞉ba tetelo Godote la꞉ ha꞉laha ipuwane uwatete, ebete Kelisoko keba ka꞉na ka꞉ka꞉kimiya꞉ la꞉ ba꞉ba ka꞉na eba꞉go a꞉ka꞉kilamiya꞉ta. Numa꞉la꞉, la꞉la, ala, a hiliyonomate dopamo Godokono hiya꞉hiya꞉ kukala hiliyonomo da꞉wakalaminakuima꞉, ebete ba꞉bi kuba ododili komo ebeno Tabo Anagiya꞉mida Bukamo ba꞉bo miya꞉tenakui. Huiyatiya tawakaluba꞉te Kelisoko keha pihigamo da꞉pihomotiya꞉, ba꞉be atu tetelo Godote aeno kuba ododili miya꞉teho tabo komokomo ba꞉gala ebeno kukala miya꞉teho tabo komokomo, ba꞉bi netewa komokomo keha pihigamo kapimilo miya꞉tete ikoko ba꞉bo alukulilamiya꞉, iyo, ba꞉moe ba꞉be gabodo ebete aeno kuba ododili komo hiliyonomo egebolea꞉mete dito adodoholea꞉miya꞉.
COL 2:15 Ba꞉bema꞉ hibila, Kelisote keha pihigalo da꞉hoiya꞉, ba꞉ba tetelo ebete Saitanakono hiya꞉hiya꞉ nopopi ba꞉gala komo kubakuba gobogobo ibi hiliyonomoeno helo ipuwane nuluhukuti wato kikipo ba꞉bo lawiya꞉, iyo, puya꞉te eba꞉go dalaholohonakui ebete hopo habanapino holoholo hapulu ibi hiliyonomo heloha꞉ma꞉ ba꞉ dito midiliya꞉.
COL 2:16 Ba꞉bema꞉ na ubihinola eta kuba ukuidawate mahigate naha ilina komoma꞉ ba꞉gala niho ilina komoma꞉ hiya꞉hiya꞉ kukala la꞉tamo ikalame. Ba꞉gala la꞉ ba꞉ atumu Yunapa꞉te hiliyonomo gogolo ibino hiya꞉hiya꞉ poko dododilinaka ba꞉bi komoma꞉, ba꞉gala ibino uli manomeno poko ododili komoma꞉, ba꞉gala ibino okoha꞉ talona hegeloeno komoma꞉, la꞉ ba꞉bi hiya꞉hiya꞉ komoma꞉ eta lumagigodone eta kukala akalawa꞉la꞉.
COL 2:17 Ba꞉ hibila, dopamo tetelo Godote ba꞉makomako kukala Yunapino iniwala꞉tamo ikalamiya꞉, iba꞉te ba꞉bi komamo papamila꞉ha komodo ebeno holoholo nanekela꞉mo kuminakoma꞉, huiyatiya kalakala konomola, ba꞉ma tetelo ale Kelisoko ipuwalo ba emedena Godokono holoholo hibinomolo uminakoma꞉, mabu Kelisoko ba꞉ ebeno hibi komo hawakalimidawala.
COL 2:18 Ba꞉gala na ubihinola eta kuba ukuidawate mahigate la꞉ kuba gabamo ba magatale la꞉eno hibima꞉ midi komoeno hido huiya ba꞉bo alatidihole. Ba꞉ hibila, komopa꞉te ibino tepo ipuwoeno kuba ukui gabodo ibi ha꞉kiya ibi ba awagaminalena, ibino baida꞉te hiya꞉ma꞉ eda꞉halame komokomo ba꞉gala Hunu Haboeno nopopi adikulame komokomo tawakalubi ba꞉bo kiyahalamenaka. Numa꞉la꞉, iba꞉te ha꞉kiya ibi Godokono huiyaha꞉ okopima꞉ da꞉ga꞉lana, huiyatiya ba꞉be tabo ga꞉la komo ba꞉ hunu tamoeno iya꞉tulame komola mabu ibino tepo ipuwalo awagaha konomote itana.
COL 2:19 Iyo, ba꞉bako lumagiti ebeno tepo ipuwoeno ukuilo a sose tawakalubino watodawa Kelisoko ya꞉lo a꞉miya꞉pui, ba꞉bema꞉ ebete ebetamo hibilo kapapamiwatanaha꞉. Huiyatiya kalakala konomola, hibi sose tawakalubino komo ba꞉ma ka꞉nala, ibi ba꞉ Kelisokono apela ba꞉gala ebe ba꞉ watola. Ba꞉moe ba꞉be mabuma꞉ ape konomoeno hiya꞉hiya꞉ komate watoeno ubi komamo hibilo ba papamila꞉hana, ba꞉ba tetelo apeno moga꞉lamehole tete hiliyonomo ba꞉gala hiliyonomo wituwitu iba꞉te ibino hiya꞉hiya꞉ oko modobolo dowatihonamena꞉ ba꞉be apete hidonomamo kapema꞉ne, Godote ubi keba ka꞉na kihatena ba꞉ba ka꞉na.
COL 2:20 Numa꞉la꞉, puya꞉te hibima꞉ midiha꞉pima꞉ deda꞉hana, iba꞉te Saitanakono helo ipuwalo ba emedehona ko tola꞉go hiya꞉hiya꞉ kukala konomamo emalagidolenanaka. Huiyatiya la꞉ hibima꞉ midipa꞉te Kelisokoba꞉ da꞉ha꞉lahuya꞉ma, ba꞉ba tetelo ba꞉moe hopo dumina la꞉le ba꞉bi kubakuba gobogoboeno helo ipuwane ya꞉lo ikuliya꞉mata. Ba꞉bema꞉ mabu keka꞉ la꞉ hiya꞉hiya꞉ kukaloeno komo ba emalagidolena hopo haboeno hibima꞉ midiha꞉pimo demedenama? A꞉iye! Komopa꞉te la꞉tamo tabo ba꞉ma ka꞉na dolamagimimina꞉,
COL 2:21 “Ba꞉moe ilina akologa꞉la꞉,” ba꞉gala “Ba꞉be ilina akanala꞉,” ba꞉gala “Ba꞉be eta ilinoeno talona konomola,” la꞉le ibino tabo komokomo akulihala꞉.
COL 2:22 Numa꞉la꞉, ba꞉bako kukala ba꞉ hopo habanapino ukui komola ba꞉gala ibino iya꞉tulame komola, iyo, kebe ilinate ibino naha komodo wapamo da꞉tolamita nea꞉go da꞉pinikulimina꞉, iba꞉te ba꞉bi ilina nahama꞉ ko komonomoma꞉ ga꞉late kukala ba꞉bo miya꞉tenaka.
COL 2:23 Ba꞉bi kukala ba꞉ daedae ukui komola, huiyatiya iba꞉te ha꞉kiya ibi ha꞉da ba amiholame ibino kukala mulunomo komokomoma꞉ ga꞉lana. Ba꞉gala iba꞉te komo daedae tabo ba꞉ma ka꞉na kaga꞉lana, hibima꞉ midipa꞉te Hunu Haboeno nopopi nadikulamenakamena꞉ ba꞉gala iba꞉te ibi ha꞉kiya iba꞉tamo apeno temeteme dito nikalamenakamena꞉ Godoko hibilo kokalakaluiminama꞉. Numa꞉la꞉, iba꞉te ha꞉kiya ibi Godokono huiyaha꞉ okopima꞉ da꞉ga꞉lana, ba꞉be tabo ga꞉la komo ba꞉ hunu tamoeno iya꞉tulame komola mabu ibino tepo ipuwalo awagaha konomote itana. Ba꞉bema꞉ ibi niliya, mabu ibino kukalate iba꞉tamo helo kikalamenaha꞉ kateneno kuba ubi komokomo hibilo kanakapulamema꞉.
COL 3:1 Ba꞉ hibila, la꞉ hibima꞉ midipa꞉te Kelisokoba꞉ ya꞉lo a꞉ha꞉lahuya꞉mata, ba꞉bene Godote la꞉ eba꞉go ka꞉ka꞉mo a꞉wadiya꞉paa꞉lateliya꞉ta. Ba꞉bema꞉ wadiyala la꞉ Hunu Habalo da꞉pola꞉na ba꞉bi hidohido komo hibilo kuwatema꞉ la꞉eno tepo ipuwoeno ukui nihatenakuya꞉la꞉, mabu Kelisote dopamo Godokono tu hapuamo nemedete ebeno Ko Gawadubu emede bahilo ba꞉luta. Iyo, wadiyala la꞉ Hunu Haboeno komokomo kapiya nemalagidolenala꞉, manaha꞉ hopo haboeno hiya꞉hiya꞉ komo, mabu Kelisokono ododi komodo la꞉eno hibi ka꞉ka꞉te Godogodolo bitana.
COL 3:4 Ba꞉bema꞉ numa꞉la꞉, Kelisote ebeno helonomo alago da꞉kapemene, ba꞉be atu tetelo la꞉eno hibi ka꞉ka꞉te kohawakalama꞉ne mabu Kelisoko kapiya ba꞉ la꞉eno ka꞉ka꞉ mabula.
COL 3:5 Ba꞉bema꞉ la꞉eno tepo ipuwalo kebe kuba ubi komate da꞉pola꞉na, wadiyala la꞉ ba꞉bi komo nanakapulama꞉la꞉. Iyo, kamenakamena ba꞉gala bohelemele pilo komo, ba꞉mako kuba ododima꞉ ubi ihate komo, kateneno ubi komamo papamiwata komo, apa꞉mo hiya꞉hiya꞉ hilopo ododili komo, ba꞉gala mani konomamo emalagidolo komo, wadiyala la꞉ ba꞉bi kuba komo hiliyonomo alukulinomo nalukula꞉la꞉. Numa꞉la꞉, pote mani konomamo demalagidolona, ebeno komo ba꞉ ida꞉da꞉li adikulamedawoeno komo huiyala.
COL 3:6 Ba꞉ hibila, puya꞉te Godotamo papamila꞉haheno ba꞉bako hiya꞉hiya꞉ kuba komo dododilina, ba꞉bema꞉ ebeno konomo mauba komote iba꞉tamo ba꞉ na꞉pe!
COL 3:7 Numa꞉la꞉, dopamo la꞉ hibima꞉ midipi ba꞉ atumu ba꞉bako kuba ubi komokomo ipuwalo emedenamimata, mabu ba꞉ba tetelo la꞉ ba꞉ daedae ukuilo wapata꞉lamenamimata.
COL 3:8 Huiyatiya ka꞉lo wadiyala la꞉ ba꞉moi kuba komo hiliyonomo na꞉wadipipikulama꞉la꞉ — mauba komo, tepo ipuwalo koema꞉ eda꞉ komo, ba꞉gala eta lumagi kubahimima꞉ ubi ihate komo. Iyo, la꞉ eta lumagi iduduputimi tabo ba꞉gala dalowa꞉ ukui hawakalimi tabo akolamagiminakala꞉,
COL 3:9 ba꞉gala la꞉ ipuwalo etate etatamo ha꞉da tabo akagaa꞉la꞉, mabu la꞉ pakala emede komoeno ododili komokomo tama꞉mo ya꞉lo a꞉miya꞉timata, lumagiti dalowa꞉ kaliko keba ka꞉na ka꞉pekananako ba꞉ba ka꞉na.
COL 3:10 Ba꞉ hibila, lumagiti hidohido kaliko kopupulima꞉ kalakalago keba ka꞉na kuwatenako, la꞉le ba꞉ ba꞉ba ka꞉na Kelisokono uli emede komoeno ododili komokomo ba꞉bo uwatimata. Ba꞉bema꞉ numa꞉la꞉, ba꞉ma tetelo la꞉le uli emede komoeno ododili ipuwalo ba emedena hopo habanapi Ododilidawate la꞉ ebeno holoholonomoma꞉ midilinata, la꞉le ebeno hibi komo iya꞉tawanomo kiya꞉tawahanama꞉.
COL 3:11 Ba꞉gala eta komo. Ba꞉moe uli emede komo ipuwalo hibima꞉ midipa꞉te hiya꞉hiya꞉ kala꞉mota꞉hanaha꞉, ao, Yunapi ba꞉gala Yuha꞉pi ibi hiliyonomate kapiya tawakalubima꞉ eda꞉hana. Ba꞉ma ka꞉na kebe dubate Yunapino tama itamida kukala duwatiya꞉ ba꞉gala puya꞉te ibino kukala uwateha꞉ma꞉ deda꞉hana, puya꞉te tukulubima꞉ deda꞉hana ba꞉gala puya꞉te komo hiya꞉hiya꞉ muhulu hopolo demedehona, puya꞉te mani oko dowatina ba꞉gala puya꞉te komopino huiyaha꞉ okopima꞉ deda꞉hana, Kelisote ba꞉bi tawakalubi hiliyonomoeno Kodawama꞉ ba eda꞉na kapiya oko ibi ipuwalo owatina, iba꞉te ebeno kapiya tawakalubinomoma꞉ keda꞉hanama꞉.
COL 3:12 La꞉ ba꞉ Godote duwati ba꞉bi tawakalubilata, iyo, ebete la꞉ malemalelo ba emalagidolena la꞉ ebeno talona tawakalubima꞉ ba꞉bo midilia꞉ta. Ba꞉bema꞉ wadiyala la꞉ ebeno uli emede komoeno ododili komokomo la꞉eno hidohido kalikomo na꞉pupula꞉la꞉ — awaepi owalubili komo, komopa꞉tamo malemale hawakalimi komo, la꞉ ha꞉kiya la꞉ hopamo miya꞉te komo, komopa꞉tamo temeteme ikalameha꞉ komo, ba꞉gala komopa꞉tamo ubiha꞉ tabo tiyo ga꞉laha꞉ komo.
COL 3:13 Ba꞉bene la꞉ ipuwalo etate etatamo tiyolo akamaubala꞉, ba꞉gala keba tetelo eta lumagiti kuba dododimini la꞉ ebeno kuba egebolemete nadodomiya꞉la꞉, Kodawa Kelisote la꞉eno kuba egebolelamete keba ka꞉na kadodolelamitiya꞉la ba꞉ba ka꞉na.
COL 3:14 Ba꞉bene ba꞉moi hiliyonomo hidohido ododili komo hunamo wadiyala la꞉ malemale emalagidolo komo na꞉kapuliya꞉la꞉, mabu hibila, ba꞉moe kuititi komote la꞉godolo ba itana, la꞉eno hiliyonomo hiya꞉hiya꞉ ododili ipuwalo la꞉ tawakalubi kapiyanomoma꞉ beda꞉hanamata.
COL 3:15 Iyo, Godote la꞉ da꞉ka꞉lami ba꞉ba tetelo ebete ebeno ubi ba꞉ma ka꞉na ihati, la꞉le Kelisokono kapiya apemo ba emedena ebeno hete ipuwalo kemedehonama꞉. Ba꞉be mabuma꞉ wadiyala ebeno hete komote la꞉eno tepo ipuwa namutudawama꞉ ba eda꞉na, la꞉ la꞉eno kalakala Godotamo ba꞉bo na꞉hawakaliminakuya꞉la꞉.
COL 3:16 Ba꞉bene Kelisokono Hido Tabote la꞉eno tepo ipuwalo konomamo nitanamene. Ba꞉be gabodo la꞉ ipuwalo etate eta ebeno konomo mulu komamo ba꞉be taboeno ipuwa komokomo ba iya꞉tumi, puya꞉te kuba gabodo tolamema꞉ dewagelena ibi ba꞉bo nowalubilinakuya꞉la꞉. Ba꞉gala wadiyala la꞉ Godoko adikumi ipuwalo la꞉eno tepo ipuwoeno heloamo hiya꞉hiya꞉ ohala꞉mo kalakala ebetamo na꞉hawakaliminakuya꞉la꞉, iyo, ba꞉ ba꞉ma ka꞉na Godokono Bukoeno Sam Ohale bukalo da꞉pola꞉na ba꞉bi ohale, ba꞉gala hibima꞉ midipa꞉te Godokono hanohano komo hawakalilamema꞉ dododilinaka ba꞉bi ohale, ba꞉gala ebeno Gobogobote la꞉eno tepo ipuwamo da꞉miya꞉tenako ba꞉bi ohale, la꞉ ba꞉bi hiya꞉hiya꞉ ohala꞉mo ebe badikuminakomata.
COL 3:17 Ba꞉bema꞉ la꞉le Nabiwi Godotamo la꞉eno kalakala Kodawa Ya꞉suku ipuwalo ba hawakalimina, wadiyala la꞉le la꞉eno hiliyonomo tabo ga꞉la komodo ba꞉gala apa꞉mo ododili komodo la꞉eno Ya꞉suku ta꞉mata komo na꞉hawakaliminakuya꞉la꞉.
COL 3:18 Hibima꞉ midipi kamenakamenala꞉, wadiyala la꞉ la꞉eno awa꞉tamo na꞉papamila꞉hanakuya꞉la꞉, mabu la꞉ ba꞉ Kodawa Ya꞉suku ta꞉matapima꞉ eda꞉hanamata.
COL 3:19 Ba꞉gala hibima꞉ midipi dubala꞉, wadiyala la꞉ la꞉eno kamenakamena malemalelo nemalagidolenakuya꞉la꞉, iyo, la꞉ iba꞉tamo akahelohelohonala꞉.
COL 3:20 Ba꞉gala guguda꞉la꞉, wadiyala la꞉ la꞉eno nabi menokobi ibino tabamo na꞉papamila꞉hanakuya꞉la꞉, mabu Godote ba꞉moe komo umima꞉ na꞉kalakalana.
COL 3:21 Ba꞉gala naba꞉la꞉, la꞉eno gugudino ododili komokomoma꞉ heloamo akakiyahalamenakala꞉, iba꞉te ibino tepo ipuwalo kuiyodopoma꞉ eda꞉hakapoma꞉.
COL 3:22 Ba꞉bene koko okopi dubate la꞉ pui mana꞉mo duwatiya꞉la la꞉le ibino huiyaha꞉ oko kowatihonama꞉, ba꞉bi dubate ba꞉moe hopolo la꞉eno oko namutulubima꞉ ba eda꞉hana, wadiyala la꞉ ibino hiliyonomo tabo komamo na꞉papamila꞉hanakuya꞉la꞉. Ba꞉gala oko owati ipuwalo la꞉ ba꞉ma ka꞉na akemalagidolala꞉, oko namutudawate natamo kokalakalama꞉, ebete na dunamita ba꞉be kapiya tetelo nale oko hidamo owatinakomo. Ao, eba ka꞉naha꞉. Namutudawate la꞉ ulame tetelo ba꞉gala ulameha꞉ tetelo, wadiyala la꞉ Kodawa Ya꞉suku ba toleme, eta kuba ukui tepo ipuwalo ugumuihino hibi kalakalago oko nowatinakuya꞉la꞉.
COL 3:23 Iyo, la꞉ kebe oko dowatima, wadiyala la꞉ la꞉eno tepo ipuwoeno helo konomamo nowatiya꞉la꞉, manaha꞉ hopo habanapi kalakaluilamema꞉, la꞉ huiyatiya aeno Kodawa kokalakaluimima꞉ oko hidamo nowatinakuya꞉la꞉.
COL 3:24 Ba꞉moe ko komo akadodala꞉, ba꞉be Kodawate kebe dogodogo komo ebeno tawakalubi mabuma꞉ tama꞉mo da꞉miya꞉tiya꞉, ebete ba꞉bi hiya꞉hiya꞉ komo ipuwane hido huiya ama꞉tamo hibilo kikamema꞉na꞉ta, mabu ebe ba꞉ amia꞉no oko namutudawanomola, eta hopo haba lumagiha꞉.
COL 3:25 Ba꞉ hibila, Godote kapiyanomo gabodo hiliyonomo tawakalubino komo tuputupulu kanagilamelelamema꞉ne, ba꞉bema꞉ ebete ama꞉ hido okodawatamo hido huiya dikamemena꞉, ba꞉be atu tetelo ebete kuba ododilipi hiliyonomatamo kuba huiya ba꞉bo kakikalamema꞉ne.
COL 4:1 Ba꞉bema꞉ la꞉ hibima꞉ midipi oko namutuluba꞉la꞉, puya꞉te la꞉eno oko huiyaheno kowatihonama꞉ mana꞉mo duwatiya꞉ma, wadiyala la꞉ ibino oko ba ulamelelamena ibino kuba ododiha꞉ tetelo eta temeteme ikalameheno ibino baa꞉ modobolo dito nikalamenakuya꞉la꞉. La꞉ ba꞉moe ko komo akadodala꞉, la꞉ atumu ba꞉ Hunu Habalo demedena ba꞉be Konomo Namutudawoeno huiyaha꞉ okopilata.
COL 4:2 Ba꞉bema꞉ la꞉ hibima꞉ midipi hiliyonomala꞉, la꞉ Godokoba꞉ tabo ga꞉la kekelalamenala꞉, ba꞉bene la꞉le ebe da꞉toemehonakoma, wadiyala la꞉ toetoe tabo tepo ipuwoeno ukui konomago ba ga꞉la ba꞉be atu tetelo ebetamo kalakala tabo na꞉wadiya꞉paa꞉latelenakuya꞉la꞉.
COL 4:3 Ba꞉gala wadiyala la꞉le a na꞉wadiya꞉paa꞉tenala꞉, Godote gigiho atamo a꞉hiya꞉midate ba꞉bene ale ebeno tabo tawakaluba꞉tamo hidamo kolamagiminakoma꞉. Ba꞉ hibila, ebete dopamo tawakaluba꞉tamo dugumuinami ba꞉be diya nopoeno ipuwa ba꞉ Kelisotela, ale ebeno komoma꞉ tabo ba꞉bema꞉ olamagiminakoma꞉, iyo, ba꞉moe mabuma꞉ nale du genamalo emedenamo.
COL 4:4 Ba꞉bema꞉ wadiyala la꞉ na nadipanatenenala꞉, mabu na ubila Kelisokono komo hidonomamo hawakalimima꞉, nale kododima꞉ Godote ubi keba ka꞉na kihatena ba꞉ba ka꞉na.
COL 4:5 Ba꞉gala wadiyala la꞉le ba꞉moe hopo haboeno hibima꞉ midiha꞉pi ipuwalo mulu ukui komo kapiyago nemedenala꞉, ba꞉bene Godote hido tete la꞉tamo dikalamenakomena꞉ la꞉ ebeno hibi komo iba꞉tamo atumu na꞉hawakaliminakuya꞉la꞉.
COL 4:6 Iyo, la꞉le ibi ipuwalo la꞉eno hiya꞉hiya꞉ tabo olamagimi komo hidohidonomoma꞉ na꞉midilinakuya꞉la꞉, tawakaluba꞉te ibino baa꞉ solamo ba goluilame hidohidoma꞉ keba ka꞉na ka꞉midilinaka ba꞉ba ka꞉na. Ba꞉bene iba꞉te la꞉eno hibima꞉ midi komoma꞉ la꞉ da꞉kiyalamenakomena꞉, wadiyala iba꞉te hido huiya tabo la꞉godone hibilo nulihonakamena꞉.
COL 4:7 La꞉ nonolata, aeno hibima꞉ mididawa ekawi eta Tikikasiti la꞉tamo da꞉pemene, ebete naeno emede komoeno hiya꞉hiya꞉ komo la꞉ kopikiyalamema꞉na꞉ta. Ba꞉ hibila, ebete ago Kodawa Ya꞉sukunu oko ba owatina eta hido okodawama꞉ eda꞉na,
COL 4:8 ba꞉bema꞉ nale ebe la꞉tamo poememo, la꞉le aeno emede komokomo ebegodone dulihoma la꞉ kalakala ba꞉bo kolawema꞉nemata.
COL 4:9 Ba꞉gala la꞉eno Kolosi habanapi eta Onisimasiko, ebe ba꞉ aeno hidonomo hibima꞉ mididawa etala, ebete Tikikasikoba꞉ la꞉tamo kopema꞉na꞉, ba꞉bene kebe komate ba꞉malo dikulihui, ibi netewapa꞉te ba꞉bi komo hiliyonomo la꞉tamo kopehawakalilamema꞉na꞉.
COL 4:10 Ba꞉moe du genamalo nago demedena ba꞉be A꞉listakasiti ebeno nolata tabo la꞉tamo poeme, ba꞉gala Banabasikoba꞉ kapiya hawinomo ekawi Makate la꞉tamo atumu nolata tabo beka-olamagita. Ba꞉ hibila, nale tabo la꞉tamo dopamo ba꞉ma ka꞉na poemimo, ebete la꞉tamo da꞉puluhukumini la꞉le ebe kalakalago na꞉lawiya꞉la꞉.
COL 4:11 Ba꞉bene Yosuwako, ebeno eta mahilo ba꞉ Yasitasitila, ebe atumu nolata tabo bekapoeme la꞉tamo. Hibila, Yunapi ipuwalo ebe ba꞉gala Makako ba꞉gala A꞉listakasiko, ibi kapiyate Ya꞉suku hibima꞉ miditi ebeno Ko Gawadubu komote kopema꞉ nago uliholo oko bowatina, iyo, ba꞉be oko owati ipuwalo iba꞉te na konomamo owalubinina.
COL 4:12 Ba꞉bene la꞉eno eta kapiyuimidawate Ya꞉su Kelisokono oko ba꞉malo dowatina, ebe ba꞉ Yuha꞉dawa Epa꞉palasitila, ebete atumu la꞉tamo nolata tabo bekapoeme. Ba꞉ hibila, tete hiliyonomolo ebete la꞉ mabuma꞉ Godotamo toetoe tabo konomamo olamaginako, la꞉le hibima꞉ midi ipuwalo kodakodalo ba la꞉mota꞉hana Godokono ubi komamo hibinomolo kopapamila꞉hanakoma꞉, mabu la꞉le ba꞉be gabodo ukui gagagagama꞉ eda꞉haheno apepehote helonomoma꞉ keda꞉hama꞉nemata.
COL 4:13 Nale Epa꞉palasikono komoma꞉ hibi tabonomo ba꞉ma ka꞉na olamagitamo, ebete la꞉ Kolosinapi mabuma꞉ oko helonomamo owatina, ba꞉gala kebe hibima꞉ midipa꞉te Hiyalapolasi habalo ba꞉gala Lodosiya habalo demedehona, ibi hiliyonomo mabuma꞉ atumu oko konomo beka-owatina.
COL 4:14 Ba꞉gala dogeta oko dowatina, ba꞉moe dubu ba꞉ aeno hidonomo lumagi Lukuku, ebete Dimasikoba꞉ ibino nolata tabo atumu la꞉tamo na꞉kapoema꞉.
COL 4:15 Ba꞉bene hibima꞉ midipi ekaki ipuwalo puya꞉te Lodosiya habalo demedehona ba꞉gala kebe sose tawakaluba꞉te Nimapasikono genamalo da꞉kapiyuiminaka, ibi hiliyonomatamo aeno nolata tabo na꞉noelamiya꞉la꞉.
COL 4:16 Ba꞉gala la꞉ Kolosinapi ba꞉moe leta la꞉eno kapiyuimi ipuwalo hawakala da꞉ka꞉lamiholema, wadiyala la꞉ galane Lodosiya sose tawakaluba꞉tamo ba nikalame, huiyatiya nale iba꞉tamo doemimo ba꞉be leta iba꞉godone na꞉nelawiya꞉la꞉. Kalakala konomola, ba꞉moe ba꞉be gabodo nale netewa leta ipuwamo kebe komokomo ka꞉miya꞉timo, la꞉ hiliyonomate ba꞉bi tabo komokomo hiliyonomo hidamo kulihoma꞉nemata.
COL 4:17 Naeno kuititi tabo ba꞉ma ka꞉nala, la꞉ Akipasiko na꞉kiyamiya꞉la꞉ ebete Kodawa Ya꞉suku mabuma꞉ ebegodone da꞉lawiya꞉, wadiyala ebete ba꞉be oko hibilo nupula꞉mene.
COL 4:18 Numa꞉la꞉, eta lumagiti na mabuma꞉ ba꞉moe leta tabo komokomo ba miya꞉teho, huiyatiya ba꞉moe kuititi nolata tabo na Polote ha꞉kiya naeno kokotonomamo miya꞉temo. Nale du genamalo demedenamo, la꞉le ba꞉be temeteme komo dodomati modoboha꞉. Wadiyala Godokono malemale komote la꞉godolo nitanamene. Ba꞉moe ba꞉ naeno tabo kuititila. Ba꞉ba꞉la.
1TH 1:1 Na Polote Sailasiko ba꞉gala Timotiko, ale la꞉ Tesalonaika sose tawakaluba꞉tamo ba꞉moe leta bepoemema꞉. Ba꞉ hibila, la꞉ hibima꞉ midipa꞉te Nabiwi Godoko ba꞉gala Kodawa Ya꞉su Kelisoko ipuwalo bemedenamata. Wadiyala Godokono malemale komo ba꞉gala ebeno hete komote la꞉godolo na꞉pola꞉namena꞉.
1TH 1:2 Ale hiliyonomo tetelo la꞉ hiliyonomoeno komoma꞉ Godotamo kalakala tabo ba adipate la꞉ toetoe tabamo ba꞉bo wadiya꞉paa꞉latelenakata.
1TH 1:3 Iyo, la꞉eno hibima꞉ midi ipuwalo kebe hido komokomo dododilinakuima, ba꞉gala malemale emalagidolo ipuwalo kebe oko helonomamo dowatinamima, ba꞉gala ba꞉ma tetelo la꞉le kodakodalo ba la꞉mota꞉hana Kodawa Ya꞉su Kelisokono pe komoma꞉ da꞉latiminama, ale Nabiwi Godokono holoholo hapulu ba꞉moi komokomo kadodolenaha꞉.
1TH 1:4 Aeno hibima꞉ midipi ekaka꞉la꞉, a iya꞉tawahala Godote ya꞉lo tetelo la꞉ malemalelo ba emalagidolena la꞉ ba꞉bo uwatiya꞉ta la꞉le ebeno tawakalubima꞉ keda꞉hanama꞉.
1TH 1:5 Ba꞉be mabuma꞉ ale Ya꞉sukunu Hido Tabo la꞉tamo dadahima꞉, ba꞉ba tetelo ba꞉be tabote hopo habanapino mulu tabo ga꞉la ipuwalo kitanuiha꞉. Ao, ba꞉be tabote huiyatiya Godokono Gobogoboeno heloamo la꞉tamo pi, ba꞉bema꞉ la꞉le la꞉eno tepo ipuwalo iya꞉tawahuimata ba꞉be tabote Godogodone hibinomolo puluhuku. Numa꞉la꞉, ale la꞉eno hibima꞉ midi ipuwalo la꞉ kowalubilima꞉ komo hegelalo la꞉ ipuwalo keba ka꞉na ka꞉pemedima꞉, ba꞉be komo la꞉ iya꞉tawahala.
1TH 1:6 Ba꞉bene Godokono Gobogobogodone duluhukuna, la꞉le ba꞉be kalakalago ebeno Hido Tabo da꞉lawima, ba꞉ba tetene tupuimiti hibima꞉ midiha꞉pa꞉te koko temeteme la꞉tamo ba ikalame, la꞉ huiyatiya aeno emede komoma꞉ ba꞉gala Kodawa Kelisokono emede komoma꞉ a ba꞉bo ibamia꞉tenapimata.
1TH 1:7 Ba꞉bema꞉ la꞉eno ododili komate ba꞉ atumu Ma꞉sadoniya ba꞉gala Guliki hoponapa꞉tamo goma꞉ eda꞉huya꞉, la꞉le keba ka꞉na kemedeonama iba꞉te ibino hibima꞉ midi ipuwalo ba꞉ ba꞉ba ka꞉na na꞉kemedenamena꞉.
1TH 1:8 Huiyatiya Kodawoeno tabote la꞉eno ododili ipuwado Ma꞉sadoniya ba꞉gala Guliki hoponapi ibi kapiyatamo katoha꞉, iyo, ba꞉be tabote geboleno diyamo keba ka꞉nala꞉ka꞉ hiya꞉hiya꞉ muhulu hopamo ba꞉ba ka꞉na a꞉tui, ba꞉bema꞉ ale ba꞉bi hoponapa꞉tamo da꞉nikulima꞉, ale tabo olamagimihino iba꞉te la꞉eno hibima꞉ midi komo ya꞉lo ulihuya꞉.
1TH 1:9 Numa꞉la꞉, ibi hiliyonomate na꞉ga꞉lana, ale Hido Tabo la꞉tamo dadahima꞉ la꞉le a kalakalago keba ka꞉na kuwatiuima, ba꞉gala iba꞉te na꞉kaga꞉lana, la꞉le ha꞉da amiho gobogoboeno ida꞉da꞉li adikulame ipuwane Ka꞉ka꞉dawa ba꞉gala Hibidawa Godoko adikumi komamo keba ka꞉na kohobila꞉huima,
1TH 1:10 ba꞉gala Godokono Guduti Hunu Habane pema꞉ la꞉le ba꞉be komo da꞉latiminama, iba꞉te ba꞉be komoma꞉ atumu na꞉kaga꞉lana. Ba꞉moe komo ba꞉ hibila, Godote ebeno Gudu hoe ipuwane ka꞉ka꞉mo adipatiya꞉, ba꞉bema꞉ ba꞉moe Ya꞉suti a hibima꞉ midipino ka꞉ka꞉ na꞉mula꞉lea꞉mena, Godogodone da꞉pemene ba꞉be konomo mauba komote a puwatekapoma꞉.
1TH 2:1 Ba꞉bema꞉ aeno hibima꞉ midipi ekaka꞉la꞉, la꞉ iya꞉tawahanomola ale la꞉ ipuwalo oko owatima꞉ da꞉pelamima꞉ ba꞉be oko ipuwalo hidohido gaote ikuliya꞉.
1TH 2:2 Ba꞉gala la꞉ iya꞉tawahala, ale la꞉tamo pelameheno dopamo Pilipai habalo hibima꞉ midiha꞉pa꞉te a iduduputia꞉melo temeteme atamo keba ka꞉na kikaa꞉mi, ba꞉bene ale la꞉eno habamo da꞉pelamima꞉ ba꞉bolo komo hiliyonomate atumu a konomamo duhia꞉mema꞉ ba ewagele, huiyatiya aeno Godote tole komo tama꞉mo ihatea꞉mete, ale ebegodone da꞉pena ba꞉be Hido Tabo la꞉tamo hidonomamo ba꞉bo polamagimima꞉.
1TH 2:3 Ba꞉ hibila, la꞉le ba꞉moe Hido Tabo hibima꞉ komidima꞉ ale la꞉ da꞉kiyalami, ba꞉ba tetelo ale hibo gabo ududi komodo ba꞉gala tepo ipuwoeno keka꞉keka꞉ ukui komodo ha꞉da amiho tabo komokomo kaga꞉laha꞉.
1TH 2:4 Ao, aeno komo eba ka꞉naha꞉, ale huiyatiya tawakaluba꞉tamo Godokono hibi tabo kapiya bolamagiminakoma꞉, mabu Godote a ebeno hidohido okopima꞉ ka꞉milo ebeno Hido Tabo olamagimi oko atamo ikaa꞉miya꞉. Ba꞉bema꞉ ba꞉be oko owati ipuwalo aeno ukui ba꞉ma ka꞉na kitanaha꞉, ale tawakalubi ba kalakaluilame iba꞉te a kawagaminoenama꞉, a huiyatiya aeno ubi nihatenakoma꞉ Godoko kapiya kokalakaluiminama꞉, mabu ebete aeno tepo ipuwoeno komokomo hiliyonomo ba ulame ba꞉bo anagilamelea꞉menako.
1TH 2:5 Ba꞉bema꞉ la꞉ iya꞉tawahala, a la꞉go ba pemede ale hunu gabodo la꞉ awagaminalelo la꞉tamo nolata tabo kolamagiminakuiha꞉ komo ilina ba꞉gala mani la꞉godone kuwatema꞉, iyo, Godote aeno hibi komo atumu iya꞉tawala aeno tepo ipuwoeno ukuilo ba꞉bako ha꞉da amiho komote la꞉tamo kitanatiha꞉!
1TH 2:6 Numa꞉la꞉, ale Kelisokono oelamepima꞉ deda꞉hanama꞉ ba꞉be komo koamo emalagidoloheno ale la꞉ kakiyalamenakuiha꞉ komo hiya꞉hiya꞉ ilina ba꞉gala mani atamo dito kikaa꞉mehoema꞉, iyo, aeno oko owati ipuwalo ale tawakalubino awagaha komo la꞉godolo ba꞉gala komopa꞉godolo kohowadinakuiha꞉, huiyatiya ale la꞉ hidamo anukulamenapia꞉ta, menokote ebeno gugudi hidamo danukulamenanako ba꞉ba ka꞉na.
1TH 2:8 O aeno hibima꞉ midipi ekaka꞉la꞉, ale la꞉ konomamo nemalagidolenata, ba꞉be mabuma꞉ ale Godogodone da꞉pena ba꞉be Hido Tabo la꞉tamo ba ikalame la꞉ mabuma꞉ aeno ka꞉ka꞉ tama꞉mo ba꞉bo miya꞉tenakuima꞉. Ba꞉ hibila, aeno malemale la꞉tamo deha꞉potoma꞉ keda꞉namiha꞉, ba꞉bema꞉ ale la꞉ ipuwalo menemene oko ba owati kebe kodakoda komokomo dulamenakuima꞉, na iya꞉tawala la꞉ ba꞉bi komo kadodolenaha꞉. Iyo, du ba꞉gala hegela ale aeno kokotamo oko owatihonakuima꞉ a ha꞉kiya aeno modoboha꞉ komokomo kulamema꞉, mabu ale Godokono Hido Tabo olamagimi oko la꞉godolo ba powati ale eta deha꞉poto temeteme la꞉tamo kikalamema꞉ ubiha꞉ma꞉ eda꞉hanakuima꞉.
1TH 2:10 Ba꞉ hibila, ale ba꞉ba tetelo la꞉ hibima꞉ midipi ipuwalo kebe komokomo kododilinakuima꞉ ba꞉bi komo ba꞉ tuputupu hibinomola, eta kuba ododi komo kapiyate agodolo kitananakuiha꞉. Iyo, la꞉ ba꞉gala Godoko la꞉le aeno hido-talona emede komo iya꞉tawahanomola,
1TH 2:11 ba꞉gala la꞉ ba꞉moe eta komo iya꞉tawahala, naba꞉te ibino gugudi keba ka꞉na kowalubilinaka, ale la꞉ hiliyonomo ba꞉ba ka꞉na owalubilinakuya꞉ta.
1TH 2:12 Numa꞉la꞉, komo hiya꞉hiya꞉ tetelo ale la꞉ hido tabo komamo ba owalubili la꞉ a꞉kiyalamenakuya꞉ta la꞉le la꞉eno emede ipuwalo Godokono hidohido ga꞉limapi gugudima꞉ keda꞉hanama꞉, mabu ba꞉be Kodawate la꞉ ka꞉lami kekelamenaha꞉ la꞉le ebeno Ko Gawadubu Haboeno konomo a꞉la꞉mina komo eba꞉go kapimilo kolawema꞉.
1TH 2:13 Ba꞉bema꞉ wadiyala ale hiliyonomo tetelo Godotamo kalakala tabo ba꞉ga꞉lanama꞉, mabu Godogodone da꞉pena la꞉le ba꞉be tabo agodone dulihuima, ba꞉ba tetelo la꞉le hopo lumagino taboma꞉ kaga꞉laha꞉, huiyatiya la꞉le kodakodalo lawete Godokono hibi tabonomoma꞉ midimata. Ba꞉ hibila, ba꞉be tabo ba꞉ Godokonola, ba꞉bema꞉ kebe lumagiti ebe hibima꞉ da꞉midina, ba꞉be tabote ebe ipuwalo hido oko bowatinamene.
1TH 2:14 Ba꞉bema꞉ aeno hibima꞉ midipi ekaka꞉la꞉, Godokono tabote la꞉ ipuwalo oko dowatina, a ba꞉be komo iya꞉tawahala mabu ebeno sose tawakaluba꞉te Yudiya hopoeno hiya꞉hiya꞉ habahabalo demedehona, ba꞉bi hibima꞉ midipa꞉tamo kebe temeteme komate kikulihuya꞉ ba꞉bi atu komate la꞉tamo a꞉kikulihuya꞉. Iyo, la꞉eno hoponapa꞉te la꞉tamo kebako temeteme kikalameti, dopamo tetelo Yunapino hopolo komopa꞉te Ya꞉su Kelisokono ta꞉matapa꞉tamo ba꞉bako atu temeteme beka-ikalamiya꞉.
1TH 2:15 Ba꞉bema꞉ wadiyala la꞉ ba꞉bi hibima꞉ midiha꞉ Yunapino komo nemalagidolala꞉, Godokono mauba komote iba꞉tamo konomamo itana, mabu iba꞉te tawakalubi biduhilamena ebetamo pelamema꞉! Iyo, iba꞉te dopamo Godokono ukui hawakalimipi danakapulamenakui, ba꞉bene ba꞉be atu gabodo Kodawa Ya꞉suku akanakapumiya꞉ ba꞉gala a ebe hibima꞉ midipi aeno hopone heloamo dito ta꞉maa꞉tiya꞉.
1TH 2:16 Ba꞉bene ale aeno hopo miya꞉pate muhulu hopolo demedehona ba꞉bi Yuha꞉pa꞉tamo tolamete Godokono ka꞉ka꞉ mula꞉ tabo iba꞉tamo olamagimi ba netupuimi, huiyatiya ba꞉bolo komo Yunapa꞉te a duhia꞉mema꞉ atumu kewageliya꞉. Ba꞉bema꞉ numa꞉la꞉, iba꞉te ba꞉moe kuititi tetelo ba꞉moe eta konomo kuba ba ododi Godokono holoholo hapulu ibino kuba ododili komate a꞉tabotabohui, ba꞉moe mabuma꞉ ebeno konomo mauba komote iba꞉tamo ba꞉ a꞉puluhuku!
1TH 2:17 Ba꞉bema꞉ aeno hibima꞉ midipi ekaka꞉la꞉, ale la꞉ da꞉miya꞉pali ba꞉ba tetene tupuimiti ba꞉ma teta꞉mo puluhuku, ale tete nanekelelo aeno katene apa꞉mo hiya꞉hiya꞉ ba emeda꞉tepa huiyatiya aeno tepo ipuwoeno ukuilo ale la꞉go kapiyanomoma꞉ eda꞉hanatima꞉. Ba꞉be mabuma꞉ komo hiliyonomo tetelo ale ubi konomamo ihatenakuima꞉ la꞉tamo kapimilo pelamete la꞉eno holoholo gala kakapulamema꞉, ba꞉gala komo tetelo na Poloko na ha꞉kiya pema꞉ ewagelenakuimo huiyatiya Saitanate a na꞉duhia꞉menakui.
1TH 2:19 Ba꞉ hibila, aeno ubi la꞉tamo konomamo bitana. Numa꞉la꞉, la꞉ ba꞉ aeno kalakala komoeno mabulata, ba꞉bema꞉ ale Ya꞉sukunu pe komo na꞉latiminama꞉ mabu ale la꞉ ebeno holoholo hapulu gala da꞉kulamemena꞉, ba꞉ba tetelo aeno kalakalate konomoma꞉ kakeda꞉ma꞉ne. Iyo, ale Saitanatamo alaholoho ipuwalo da꞉lawima꞉, la꞉ ba꞉ ba꞉be wato kikipolata,
1TH 2:20 mabu ale Ya꞉su Kelisoko ipuwalo ba emedena, la꞉ ba꞉ aeno awagaha komolata ba꞉gala aeno kalakala mabulata.
1TH 3:1 Numa꞉la꞉, ale la꞉tamo kapimilo pelamema꞉ gabo nipo dohowadima꞉, ba꞉bema꞉ aeno tepo ipuwalo ukui bilibilima꞉ ba eda꞉ha ale na꞉ga꞉luima꞉, “Wadiyala a komopa꞉te ba꞉moe A꞉tenese habalo ba emede,
1TH 3:2 a ipuwalo aeno hibima꞉ mididawa ekawi Timotiko kapiya konoemema꞉nema꞉.” Ba꞉ hibila, ale Ya꞉sukunu Hido Tabo dolamagiminakoma꞉ Timotiti ago kapimilo Godokono hido oko bowatina, ba꞉bema꞉ ale ebe la꞉tamo a꞉poemima꞉ ebete la꞉ ba powalubili la꞉le hibima꞉ midi ipuwalo kodakodalo kola꞉mota꞉hanama꞉,
1TH 3:3 mabu a ubihinola hibima꞉ midiha꞉pino temeteme ikalame komodo la꞉ ipuwalo eta kapiyate kubamo alega. La꞉ iya꞉tawahanomola ba꞉mako temetema꞉te ba꞉ Godokono ubilo a hibima꞉ midipa꞉tamo pikulinaka,
1TH 3:4 mabu a la꞉go ba pemede ale la꞉ ba꞉ma ka꞉na a꞉kiyalamia꞉ta, “Hibima꞉ midiha꞉pa꞉godone temeteme komate atamo kopikulima꞉na꞉.” Iyo, hibila, ba꞉ma tetelo la꞉ iya꞉tawahanomola ba꞉be komote ba꞉ la꞉tamo uluhukui.
1TH 3:5 Ba꞉bema꞉ numa꞉la꞉, nale ba꞉moe komo ba emalagidolo Timotiko ba꞉bema꞉ poemimo, iyo, la꞉ mabuma꞉ nale naeno tepo ipuwalo ukui bilibilima꞉ ba eda꞉ ubi ba꞉bo ihatimo, ebete la꞉go ba pemede la꞉eno hibima꞉ midi komokomo hidamo kopulamelelamema꞉. Ba꞉ba tetelo na ubihinola la꞉ komopa꞉te Saitanakono kuba emogabuimi gabamo da꞉gudima ebete ba꞉be komo pumi, mabu ba꞉mako komote la꞉tamo nuluhukutale, ale kebe kodakoda oko la꞉ ipuwalo dowatima꞉ ba꞉be okote dito ba꞉kubana꞉!
1TH 3:6 Huiyatiya Timotiti la꞉godone atamo gala da꞉kapi, ba꞉ba tetelo ebete la꞉ mabuma꞉ hidonomo tabo atamo adahi, ba꞉ma ka꞉na la꞉eno hibima꞉ midi komote Godotamo kodakodalo itana ba꞉gala la꞉eno malemale komopa꞉tamo atumu ba꞉ka-itana, ba꞉gala ebete a na꞉pekiyaa꞉mi la꞉ hiliyonomo tetelo a malemalelo keba ka꞉na kemalagidoloeonama, iyo, ale la꞉ ulamema꞉ ubi konomamo dihatenama꞉ la꞉ ba꞉ atumu a ua꞉mema꞉ ubi na꞉kihatenamata.
1TH 3:7 O aeno hibima꞉ midipi ekaka꞉la꞉, Timotiti la꞉eno hibima꞉ midi komoma꞉ a da꞉pikiyaa꞉mi ba꞉be tabote a hibinomolo a꞉kalakaluia꞉mi! Ba꞉be mabuma꞉ ale aeno menemene komo ba꞉gala hiya꞉hiya꞉ temeteme komokomo koamo a꞉kemalagidola꞉ma꞉,
1TH 3:8 mabu keba tetelo la꞉ Kodawa Ya꞉suku ipuwalo kodakodalo da꞉la꞉mota꞉hanama, ale ba꞉be komo dulima꞉ ba꞉ba tetelo a ko kalakala lawete aeno emede ipuwalo eta ukui bilibili komote hibilo a꞉kitanamene.
1TH 3:9 Ba꞉bema꞉ ale Godokono holoholo hapulu da꞉la꞉mota꞉hanama꞉ la꞉ mabuma꞉ aeno kalakala bada konomola꞉ka꞉! Iyo, ale aeno kalakala tabo ebetamo ba wadiya꞉paa꞉latele,
1TH 3:10 hegela ba꞉gala du hiliyonomolo ebe na꞉toemehonakoma꞉ ebete a gabo diya꞉tua꞉memene, ale pelamete la꞉eno holoholo ba pulame kebe modoboha꞉ komate la꞉eno hibima꞉ midi ipuwalo da꞉pola꞉na ba꞉bi komokomo kopetuputupuilamema꞉nema꞉.
1TH 3:11 Ba꞉bema꞉ wadiyala aeno Nabiwi Godoko ba꞉gala aeno Kodawa Ya꞉suku iba꞉te gabo na꞉hiduima꞉mena꞉ ale la꞉tamo kopelamema꞉.
1TH 3:12 Ba꞉gala wadiyala Kodawate la꞉eno tepo ipuwalo ebeno malemale emalagidolo komo konomoma꞉ na꞉mida꞉mene, ba꞉bene la꞉ ipuwalo etapa꞉te etapi malemalelo ba emalagidole la꞉le komo hopo tawakalubi hiliyonomo atumu konomamo bemalagidolenamata, ale la꞉ keba ka꞉na kemalagidoletana ba꞉ba ka꞉na.
1TH 3:13 Ba꞉gala wadiyala aeno Kodawa Ya꞉suti ba꞉moe gabodo la꞉eno tepo ipuwa na꞉kodakoduilama꞉mene, ba꞉bene ebete ebeno talona ta꞉matapi hiliyonomago gala da꞉kapemene, ba꞉ba tetelo la꞉le aeno Nabiwi Godokono holoholo hapulu tuputupupinomoma꞉ ba eda꞉ha ba꞉bo konela꞉mota꞉hanama꞉nemata, mabu la꞉ ipuwalo eta kapiya kubate a꞉kitanamene.
1TH 4:1 Ba꞉bema꞉ aeno hibima꞉ midipi ekaka꞉la꞉, la꞉ dopamo agodone iya꞉tawahuimata la꞉eno emede ipuwalo la꞉ Godoko keba ka꞉na na꞉ka꞉kalakaluimionama, ba꞉bema꞉ aeno kalakala bitana mabu la꞉ ba꞉ ba꞉ba ka꞉na bemedenamata. Ba꞉bene ba꞉moe leta kuititi hapulu ale ba꞉moe komoma꞉ la꞉ Kodawa Ya꞉sukunu mahilamo gala konomamo na꞉kakiyalama꞉ta, wadiyala la꞉ ba꞉be tuputupu emede ipuwalo ba pola꞉na la꞉eno hidohido ododili ipuwalo napepehonala꞉,
1TH 4:2 iyo, ale dopamo Ya꞉sugodone uwatete la꞉tamo dikalami ba꞉bi tutumu tabo komokomo la꞉ iya꞉tawahala.
1TH 4:3 Ba꞉bema꞉ la꞉ mabuma꞉ Godokono ubi ba꞉ ba꞉ma ka꞉nala, la꞉le ebeno talona emede ipuwalo ba pola꞉na bohele pilo komo ba꞉gala eta dubuino kamena pilo komo ba꞉makomako kuba komokomo akododila꞉la꞉.
1TH 4:4 Wadiyala la꞉ hiliyonomate huiyatiya hidohido ba꞉gala talona emede ukui kapiya nuwatiya꞉la꞉, hiliyonomo tetelo la꞉eno kateneno kuba ubi komate la꞉eno tepo ipuwoeno hido mulu ukui komamo hibilo kopapamila꞉halenama꞉.
1TH 4:5 Numa꞉la꞉, puya꞉te ibino kateneno hilopo komokomo helonomamo da꞉ta꞉matalena ba꞉bi kuba ododilipa꞉te Godokono komo iya꞉tawahaha꞉, ba꞉be mabuma꞉ ebe ubihinola la꞉le ibi huiyama꞉ eda꞉ha.
1TH 4:6 Iyo, la꞉le hibima꞉ midi ipuwalo kapiya badininipalama꞉ ba eda꞉hana, modoboha꞉ etate ebeno lumagitamo kateneno kuba hilopo komo ododi, ba꞉gala modoboha꞉ etate ha꞉da amiho gabodo ebeno ekawino eta hido komo pilolo lawe. Ba꞉ hibila, ale dopamo la꞉ konomamo ba꞉ma ka꞉na a꞉kiyahalamia꞉ta, puya꞉te ba꞉mako kuba komokomo dododilina Godote iba꞉tamo huiya hibilo kikalamema꞉ne.
1TH 4:7 Numa꞉la꞉, Godote a hibima꞉ midipa꞉te ebeno talona emede ipuwalo kopola꞉nama꞉ a ya꞉lo a꞉ka꞉miya꞉, iyo, ebe ubihinola ale kateneno kubakuba ubi komoeno ododili ipuwalo kemedenama꞉.
1TH 4:8 Ba꞉gala eta komo. Godote ebeno Gobogobo la꞉tamo nikalamenata la꞉le ebeno talonapima꞉ keda꞉hanama꞉, ba꞉bema꞉ la꞉ ipuwalo etate aeno iya꞉tulame tabo ubiha꞉ma꞉ deda꞉na, ebete hopo lumagino tutumu taboma꞉ ebeno ubiha꞉ komo kahawakaliminaha꞉, ao, ebeno ododi ipuwalo ebete Godokono tutumu taboma꞉ ebeno ubiha꞉ komo behawakalimina.
1TH 4:9 Ba꞉gala wadiyala la꞉ ba꞉moe eta komo na꞉kuma꞉la꞉, la꞉le hibima꞉ midipi malemalelo kemalagidolenama꞉ Godote la꞉ dopamo iya꞉tulamia꞉ta. Ba꞉ hibila, la꞉le ebeno tabamo papamila꞉halelo Ma꞉sadoniya hoponapi hibima꞉ midipi ekaki hiliyonomo na꞉malemalelatelenakomata, huiyatiya aeno ekaka꞉la꞉, kubaha꞉ ale ba꞉moe leta ipuwalo Godokono malemale emalagidolo komoma꞉ la꞉ gala kakakiyalamema꞉, iyo, a ubi konomola ba꞉moe eta kapiya tabo la꞉ kokiyalamema꞉na꞉ta, wadiyala la꞉ Godokono malemale ipuwalo gala na꞉kapepehala꞉.
1TH 4:11 Ba꞉bema꞉ la꞉ la꞉eno ubi konomamo ba꞉ma ka꞉na nihatenala꞉, la꞉le komo tawakaluba꞉go tatabalo ba emedena komopino komoma꞉ tabo ga꞉laheno la꞉ ha꞉kiya la꞉eno emede komokomo kapiya hidamo kulamema꞉nemata. Ba꞉gala kebe modoboha꞉ komokomo la꞉godolo da꞉pola꞉na, hegehege mani oko owatiho ipuwalo la꞉ ha꞉kiya ba꞉bi komo na꞉modobuilamenakuya꞉la꞉, ale la꞉ dopamo keba ka꞉na ka꞉kiyalamiti ba꞉ba ka꞉na.
1TH 4:12 Numa꞉la꞉, la꞉ ba꞉moe komamo hibilo da꞉papamila꞉halema, ba꞉ba tetelo la꞉ mani ba꞉gala ilina tawakaluba꞉godone dito uwatema꞉ temeteme iba꞉tamo a꞉kikalama꞉mata, iyo, ba꞉be mabuma꞉ hibima꞉ midiha꞉pa꞉te la꞉eno tuputupu ododili komo dulamelelamemena꞉ iba꞉te la꞉ hidohido tawakalubima꞉ ba꞉bo koga꞉lama꞉na꞉.
1TH 4:13 Aeno hibima꞉ midipi ekaka꞉la꞉, puya꞉te hibima꞉ midi ipuwalo da꞉ha꞉lahui, a ubila la꞉ ibino hibi komo hidamo niya꞉tawahala꞉, la꞉le ibino ha꞉laha komoma꞉ tepo ipuwalo menemene lawekapoma꞉. Numa꞉la꞉, hibima꞉ midiha꞉pa꞉te ibino tawakalubino ha꞉laha komoma꞉ kubanomamo ihiminaka, mabu iba꞉te Ya꞉sukunu kalakala komo ba꞉gala ebeno pe komoma꞉ uliholo kalatiminaha꞉. Huiyatiya la꞉ ibi huiyama꞉ akeda꞉hala꞉,
1TH 4:14 mabu a hibima꞉ midipa꞉te iya꞉tawahala, Ya꞉suti da꞉hoiya꞉ ebete ka꞉ka꞉mo gala a꞉kamahiguya꞉, iyo, ba꞉be mabuma꞉ puya꞉te hibima꞉ midi ipuwalo da꞉ha꞉lahamena꞉ Godote iba꞉tamo ka꞉ka꞉ gala kakikalamema꞉ne, ebete Ya꞉sutamo ka꞉ka꞉ keba ka꞉na kikamiya꞉ ba꞉ba ka꞉na, ba꞉bema꞉ kalakala konomola, ebeno pe hegelalo ebete ibi atamo gala kakamagahelema꞉ne!
1TH 4:15 Ba꞉bema꞉ ka꞉lo ale la꞉ diya꞉tulamita, ba꞉moe tabo ba꞉ Kodawoeno iya꞉tulame tabola. Ba꞉ hibila, Ya꞉sukunu pe hegelalo a puya꞉te hibima꞉ midi ipuwalo ka꞉ka꞉lo demedehonama꞉, Hunu Habamo konalehawaminama꞉ puya꞉te dopamo da꞉ha꞉lahui ale ba꞉bi hibima꞉ midipi a꞉kadopalama꞉ma꞉.
1TH 4:16 Numa꞉la꞉, ba꞉be hegelalo Godote ebeno tabo madodo hunamo adipatelo modobo tabo da꞉goewatamene, ba꞉ba tetelo hopo habanapa꞉te Godokono gebole diyamo ba꞉gala ebeno helonomo nopodawoeno tabo madodo ulihote Kodawa Ya꞉suti Hunu Habane ba꞉bo kopihitigama꞉ne. Ba꞉bema꞉ puya꞉te hibima꞉ midi ipuwalo da꞉ha꞉lahui, ba꞉ba꞉te dopamo ka꞉ka꞉mo mahila꞉halete,
1TH 4:17 ba꞉bene a puya꞉te hopo habalo demedehonama꞉ Ya꞉suti a uwatete, a hibima꞉ midipi hiliyonomate eba꞉go alomo hunulu ba꞉bo konekapiyama꞉nema꞉. Ba꞉ hibila, ba꞉ba tetene tupuimiti ale Kodawa Ya꞉sukuba꞉ emedena emedena tetelo bemedehonama꞉,
1TH 4:18 ba꞉bema꞉ wadiyala la꞉ ipuwalo ba꞉moe tabo komoma꞉ etapa꞉te etapi hidamo nowalubihuinakuya꞉la꞉.
1TH 5:1 Ba꞉bema꞉ aeno hibima꞉ midipi ekaka꞉la꞉, Kodawa Ya꞉sukunu Ko Hegelalo kebe hiya꞉hiya꞉ komate dikulihomena꞉ ba꞉bi komoma꞉ nale ba꞉moe leta ipuwalo la꞉ koamo a꞉kakiyalama꞉mata, mabu la꞉ iya꞉tawahanomola pilo dubuti du ipuwalo keba ka꞉na ka꞉penako Ya꞉suti ba꞉be Hegelalo ba꞉ba ka꞉na kopema꞉ne.
1TH 5:3 Iyo, ba꞉be hegelate peheno dopamo hibima꞉ midiha꞉pa꞉te ba꞉ma ka꞉na ba꞉ga꞉lanakomena꞉, “Aeno emede komo ba꞉ hidonomola, ba꞉gala tole komote agodolo kitanaha꞉ mabu hopo habanapa꞉te hete ipuwalo bemedena.” Huiyatiya ba꞉ba tetenomolo Godokono konomo olalatiti iba꞉tamo dito kuluhukuma꞉ne, lamitu kamenate hiya꞉hiya꞉ komo ba ododili ebeno gudu alahimi temetemete ebetamo keba ka꞉na kuluhukunako ba꞉ba ka꞉na. Ba꞉ hibila, ba꞉ba tetelo hibima꞉ midiha꞉pa꞉tamo duluhukumini, iba꞉te ba꞉be olalati temeteme ipuwane alahutihoma꞉ gabo nipo kohowadima꞉na꞉!
1TH 5:4 O hibima꞉ midipi ekaka꞉la꞉, puya꞉te du konomolo u da꞉lahanaka ba꞉ba꞉te pilo dubuino pe komo a꞉kiya꞉tawahala꞉, huiyatiya la꞉eno komo eba ka꞉naha꞉! La꞉ du ipuwalo kemedenaha꞉ huiyatiya la꞉ Kodawoeno pe komoma꞉ uliholo emedenamata, ba꞉bema꞉ ebete ebeno Ko Hegelalo da꞉pemene la꞉le ba꞉be komo umiti a꞉kala꞉wa꞉hamata.
1TH 5:5 Numa꞉la꞉, la꞉ hiliyonomate alo teteno gugudima꞉ eda꞉hanamata, iyo, a hibima꞉ midipi du teteno gugudiha꞉,
1TH 5:6 ba꞉bema꞉ komopa꞉te u da꞉lahanaka ale ba꞉bako tawakalubima꞉ eda꞉ha modoboha꞉, mabu du tete ba꞉ ibino u laha tetela ba꞉gala du tete ba꞉ ibino gamoda niho tetela. Wadiyala ale huiyatiya tuputupu ukuilo ba emedena aeno Kodawoeno pe komoma꞉ uliholo kolatiminama꞉nema꞉,
1TH 5:8 iyo, a hibima꞉ midipi ba꞉ hegela teteno tawakalubila, ba꞉bema꞉ wadiyala ale hiliyonomo tetelo tuputupu ukuilo bemedenama꞉. Ba꞉gala wadiyala ale Godoko hibima꞉ midi komo ba꞉gala malemale emalagidolo komo, ba꞉bi netewa koko komo aeno apa꞉mo kopupulima꞉nema꞉, alaholodawate ebeno nehe ilina da꞉pulinako ba꞉ba ka꞉na. Ba꞉gala ale aeno ka꞉ka꞉ mula꞉ komo Ya꞉sugodone hibilo lawema꞉, wadiyala ale ebeno pe komoma꞉ uliholo ba꞉latiminama꞉, mabu ba꞉bako uliho komo ba꞉ alaholodawoeno diba huiyala.
1TH 5:9 Numa꞉la꞉, Godote a kaka꞉miya꞉ha꞉ ebete aeno kuba ododili mabuma꞉ ebeno konomo mauba ipuwalo huiya atamo kikaa꞉mema꞉. Ao, ebete huiyatiya a uwatiya꞉ ale aeno Kodawa Ya꞉su Kelisokono oko komodo aeno ka꞉ka꞉ mula꞉ komo kolawema꞉,
1TH 5:10 mabu Ya꞉sukunu hoe komoeno ipuwa ba꞉ ba꞉ma ka꞉nala, ebe ubila ale emedena emedena tetelo eba꞉go kemedenama꞉. Ba꞉bema꞉ kalakala konomola, hibima꞉ midipi ipuwalo puya꞉te dopamo da꞉ha꞉lahui ba꞉gala puya꞉te ebeno pe hegelalo hopo habalo demedehonamena꞉, ibi hiliyonomate kapiya tetelo ibino hibi kalakala ebegodone konelawema꞉na꞉.
1TH 5:11 Iyo, ba꞉moe mabuma꞉ wadiyala la꞉ la꞉eno tabo komamo ba꞉gala la꞉eno ododili komamo la꞉ ipuwalo etapa꞉te etapi hidamo nowalubihuinakuya꞉la꞉, la꞉ ba꞉ma tetelo keba ka꞉na kododionama ba꞉ba ka꞉na.
1TH 5:12 Aeno hibima꞉ midipi ekaka꞉la꞉, ale la꞉ begoelama꞉ta la꞉eno hibima꞉ midi ipuwalo puya꞉te Kelisokono hibi gabo ba꞉gala emede komo la꞉ iya꞉tulamema꞉ oko dowatina, wadiyala la꞉ la꞉eno tepo ipuwoeno ukuilo ibi hunamo wadiya꞉paa꞉latelelo ibino tabamo na꞉papamila꞉hanala꞉.
1TH 5:13 Numa꞉la꞉, iba꞉te la꞉ kowalubilima꞉ hido oko bowatina, ba꞉bema꞉ wadiyala la꞉ ibino tabamo hidonomamo ba papamila꞉hale ibi malemalelo nemalagidolenala꞉. Ba꞉gala eta komo, wadiyala la꞉eno kapiyuimi ipuwalo la꞉ hiliyonomate tatabalo nemedenala꞉.
1TH 5:14 Ba꞉bema꞉ aeno hibima꞉ midipi ekaka꞉la꞉, ale la꞉ koamo na꞉ga꞉lalama꞉ta la꞉ ipuwalo puya꞉te buhamama꞉ deda꞉hana, wadiyala la꞉le ibi na꞉kiyahalama꞉la꞉ oko hibilo kowatihoma꞉. Ba꞉gala puya꞉te ibino hibima꞉ midi ipuwalo hilopo diya꞉tawahana ba꞉gala puya꞉te heloha꞉ma꞉ deda꞉hana, wadiyala la꞉le la꞉eno tabamo ba꞉gala ododili komamo ibi nowalubiliya꞉la꞉, iyo, la꞉le komo hiya꞉hiya꞉ hiliyonomo tawakalubi la꞉eno tabamo dowalubilinakoma la꞉le iba꞉tamo tiyolo ubiha꞉ma꞉ akeda꞉hanakala꞉.
1TH 5:15 Ba꞉gala ba꞉moe ba꞉ eta komola. La꞉eno emede ipuwalo etate etatamo kuba dododimini, ba꞉ba tetelo temeteme lawedawate kuba ododidawatamo huiya akikama꞉la꞉, huiyatiya wadiyala la꞉le hiliyonomo tetelo la꞉eno ubi konomamo nihatenakuya꞉la꞉, la꞉ ipuwalo etate etatamo malemale ba hawakalimi komo hiya꞉hiya꞉ tawakalubi hiliyonomatamo atumu hido komokomo kapiya kakododilinama꞉.
1TH 5:16 Ba꞉bene hiliyonomo tetelo la꞉le Godokono kalakalago ba emedena,
1TH 5:17 du ba꞉gala hegela hiliyonomolo eba꞉go tabo ga꞉la komo ekelalameheno,
1TH 5:18 hidohido komate ikuliho tetelo ba꞉gala olalati komate ikuliho tetelo ebetamo kalakala tabo na꞉wadiya꞉paa꞉latelenakuya꞉la꞉. Ba꞉ hibila, ba꞉moi netewa-kapiya komo ba꞉ Godote la꞉eno emede ipuwalo ulamema꞉ ubi dihatena ba꞉bi komola, mabu la꞉le Ya꞉su Kelisoko ipuwalo ba emedena ba꞉bi hidohido komate la꞉godolo nikulihonakamena꞉.
1TH 5:19 Ba꞉bema꞉ Godokono Talona Gobogobote kebe oko kowatina ba꞉be oko akaduhima꞉la꞉,
1TH 5:20 iyo, keba tetelo eta lumagiti Godokono ukui hibinomolo da꞉hawakalimimini, wadiyala la꞉le ba꞉be tabo lawete kubama꞉ akaga꞉lala꞉.
1TH 5:21 Huiyatiya la꞉ hidamo, tawakaluba꞉te kebe hiya꞉hiya꞉ tabo komo Godokono mahilamo dolamagiminaka, la꞉le ba꞉bi hiliyonomo tabo komo la꞉eno hido ukuia꞉mo anagilamete hibi tabonomoma꞉ tiyolo akaga꞉lala꞉. Ba꞉ ba꞉moe gabodo la꞉le Godokono hibi tabo komokomo kodakodalo ba watila꞉mota꞉na,
1TH 5:22 hiya꞉hiya꞉ kuba tabo ba꞉gala ododili komokomo hiliyonomo la꞉le gala hapuamo na꞉midaliya꞉la꞉.
1TH 5:23 Ba꞉ hibila, kebe dawate a hibima꞉ midipa꞉tamo hete dikaa꞉mena, ba꞉be Kodawa ba꞉ Godotela, ba꞉bema꞉ ale la꞉ mabuma꞉ ebe ba꞉ma ka꞉na toemehonakoma꞉, ebete la꞉eno emede komokomo hiliyonomo ipuwalo la꞉ ebeno hibi talonapima꞉ ba midili, ebete la꞉eno gobogoboeno ukui ba꞉gala tepo ipuwoeno ubi komo ba꞉gala ape konomoeno ododili komo hidamo nulamelelamenakamena꞉ta. Kalakala konomola, ba꞉ ba꞉moe gabodo Kodawa Ya꞉su Kelisokono pe tetelo eta kuba deha꞉potonomote la꞉ ipuwalo a꞉kitanamene.
1TH 5:24 Numa꞉la꞉, Godote la꞉ ebeno talonapima꞉ keda꞉hama꞉ ka꞉laminata, ba꞉bema꞉ ebe modobola ebete ba꞉be hido oko la꞉ ipuwalo upula꞉, iyo, ebete kebe komo ododilima꞉ tabo dolamagina ebete ba꞉bi komokomo hibinomolo bododilinakomene.
1TH 5:25 Ba꞉bema꞉ aeno hibima꞉ midipi ekaka꞉la꞉, wadiyala la꞉ ba꞉ atumu a mabuma꞉ Godotamo na꞉toetoehonakuya꞉la꞉,
1TH 5:26 ba꞉gala la꞉ da꞉kapiyuiminakoma, wadiyala la꞉ hiliyonomo etapa꞉te etapino kokoto uwatehuilo na꞉pa꞉watamehuinakuya꞉la꞉.
1TH 5:27 Na Polote Godokono mahilamo la꞉ ba꞉ma ka꞉na goelamemata, la꞉ ba꞉moe leta hibima꞉ midipi ekaki hiliyonomatamo na꞉ka꞉lamiholiya꞉la꞉.
1TH 5:28 Wadiyala aeno Kodawa Ya꞉su Kelisokono malemale komote la꞉godolo nitanamene. Ba꞉moe ba꞉ naeno tabo kuititila. Ba꞉ba꞉la.
2TH 1:1 Na Polote Sailasiko ba꞉gala Timotiko, ale la꞉ Tesalonaika sose tawakaluba꞉tamo ba꞉moe leta bepoemema꞉. Ba꞉ hibila, la꞉ hibima꞉ midipa꞉te aeno Nabiwi Godoko ba꞉gala Kodawa Ya꞉su Kelisoko ipuwalo bemedenamata.
2TH 1:2 Wadiyala Nabiwi Godoko ba꞉gala Kodawa Ya꞉su Kelisoko iba꞉te ibino malemale komo ba꞉gala hete komo la꞉tamo nikalama꞉mena꞉ta.
2TH 1:3 Aeno hibima꞉ midipi ekaka꞉la꞉, wadiyala hiliyonomo tetelo ale la꞉ mabuma꞉ Godotamo kalakala tabo ba꞉wadiya꞉paa꞉latelenakoma꞉. Iyo, ale ba꞉ba ka꞉na kewagelenama꞉ ba꞉moe ba꞉ hido komola, mabu la꞉eno hibima꞉ midi komote ba apepehona, la꞉ ipuwalo etapa꞉te etapi malemalelo demalagidolenama ba꞉be komote atumu koma꞉ neda꞉na.
2TH 1:4 Ba꞉be mabuma꞉ ale komo Godokono sose tawakaluba꞉tamo da꞉nikulinakoma꞉, ibi ipuwalo la꞉ ba awagaminale la꞉eno hidohido ododili komoma꞉ ga꞉lanakoma꞉. Iyo, hibima꞉ midiha꞉pa꞉te la꞉tamo koko temeteme dikalamena la꞉ huiyatiya ba꞉be menemene ipuwalo Godoko hibima꞉ midi mabuma꞉ kodakodalo da꞉la꞉mota꞉hanama, ale ba꞉be komoma꞉ komo hibima꞉ midipi konomamo ba꞉bema꞉ kiyalamenakoma꞉.
2TH 1:5 Ba꞉ hibila, la꞉le temeteme uwate tetelo kodakodalo da꞉la꞉mota꞉hanama, ba꞉be komote ba꞉moe komo behawakalimina, Godote hopo habanapino kuba ododili komokomo danagilamelelamemene ebete ba꞉be komo tuputupunomolo ba꞉ma ka꞉na kododima꞉ne, ebete la꞉eno temeteme uwate mabuma꞉ la꞉ ebeno hidohido ga꞉limapi gugudima꞉ ba ka꞉lami, modobo tabo ba꞉bo kogoema꞉ne la꞉le ebeno Ko Gawadubu habamo kona꞉pa꞉la꞉hama꞉.
2TH 1:6 Iyo, Godoko ba꞉ tuputupu komokomo kapiya ododilidawala, ba꞉bema꞉ puya꞉te ba꞉ma tetelo temeteme la꞉tamo dikalamena ebete iba꞉tamo kuba huiya kikalamema꞉ne,
2TH 1:7 huiyatiya ebete la꞉godone ba꞉gala agodone aeno temeteme komo hiliyonomo gobogobamo ba miya꞉te a kapimilo ba꞉bo kogelebadia꞉mema꞉ne. Ba꞉ hibila, ba꞉ba tetelo aeno Kodawa Ya꞉suti ebeno helonomo nopopa꞉go Hunu Habane hawakala da꞉pemene,
2TH 1:8 puya꞉te ebeno Hido Tabamo papamila꞉haheno ba꞉gala Godoko ubiha꞉ma꞉ deda꞉hana, ebete ba꞉bi tawakaluba꞉tamo helonomo powagoeno koa꞉mo huiya ba꞉bo kopikalamema꞉ne.
2TH 1:9 Ba꞉bene ba꞉bi kuba ododilipino temeteme komote itana itana tetelo bitanamene, iyo, Kodawate ibi ebeno holoholo hapuni ba꞉gala ebeno helonomo a꞉la꞉mina alone tama꞉mo ba꞉ dito koelamema꞉ne iba꞉te ibino kuba huiya ipuwalo konemedehonama꞉.
2TH 1:10 Huiyatiya kalakala konomola, Kodawate ebeno Ko Hegelalo da꞉pemene, ba꞉ba tetelo puya꞉te ebeno tawakalubima꞉ deda꞉hana ba꞉bi hibima꞉ midipi hiliyonomate ebe hunamo ba adipate ebe mabuma꞉ konomamo kohanohanohoma꞉na꞉! Ba꞉bema꞉ numa꞉la꞉, la꞉le ba꞉bi tawakalubino konomo kapiyuimi ipuwalo atumu kopola꞉nama꞉nemata, mabu ale la꞉tamo ebeno Hido Tabo da꞉polamagimima꞉ la꞉ ba꞉be tabo hibima꞉ a꞉midimata.
2TH 1:11 Ba꞉bema꞉ ale ba꞉be komo ba emalagidolo komo hiliyonomo tetelo la꞉ mabuma꞉ aeno Godotamo ba꞉ma ka꞉na toetoehonakoma꞉, ebete kebe hido emede komoma꞉ la꞉ da꞉ka꞉lami, wadiyala ebete ba꞉be emede ipuwalo la꞉ ebeno hidohido ga꞉limapi gugudima꞉ na꞉midila꞉mena꞉ta, ba꞉gala wadiyala ebete ebeno helo la꞉tamo nikalama꞉mena꞉ta, la꞉le la꞉eno tepo ipuwoeno hidohido ubi komone ba꞉gala la꞉eno hibima꞉ midi ipuwane tuputupu ododili komo ba uluhukulatele ba꞉bi komo hidamo kupula꞉lema꞉.
2TH 1:12 Ba꞉be mabuma꞉ puya꞉te la꞉eno hidohido emede komokomo dulamemena꞉, iba꞉te aeno Kodawa Ya꞉suku awagaminalo ebeno mahilo hunamo ba adipate, ba꞉be hido awagaha komote Ya꞉sugodone la꞉tamo atumu kakapuluhukuma꞉ne, ba꞉bema꞉ wadiyala ba꞉moe hido komote aeno Godo ba꞉gala Kodawa Ya꞉su Kelisoko ibino malemale ipuwado ba꞉ ba꞉ba ka꞉na nuluhukamene.
2TH 2:1 Ba꞉bema꞉ aeno hibima꞉ midipi ekaka꞉la꞉, aeno Kodawa Ya꞉sukunu pe tetelo ebete a hibima꞉ midipi eba꞉go kemedenama꞉ da꞉pekapiyuia꞉memene, ba꞉be komoma꞉ ale la꞉ ba꞉ma ka꞉na kiyalama꞉ta,
2TH 2:2 puya꞉te ha꞉da amiho tabo ba꞉ma ka꞉na da꞉ga꞉lana, “Kodawoeno Ko Hegelate ya꞉lo uluhukui,” ba꞉be mabuma꞉ la꞉eno ukuiti gagagagama꞉ akeda꞉hala꞉ ba꞉gala la꞉ ukui bilibili komo akalawa꞉la꞉. Diyala, la꞉ ipuwalo komopa꞉te da꞉ na꞉ga꞉lana ba꞉moe tabo komote agodone pi. Ao, eba ka꞉naha꞉! Ale dopamo la꞉godolo ba pemede la꞉tamo Godokono ukui da꞉hawakaliminakuima꞉ ba꞉gala komo tetelo ale tabo dito da꞉ga꞉lanakuima꞉, ba꞉gala ale galane dopo leta la꞉tamo da꞉poemima꞉, ba꞉bi hiya꞉hiya꞉ tete hiliyonomolo ba꞉mako tabote agodone kuluhukuha꞉.
2TH 2:3 Ba꞉bema꞉ komopino ha꞉da amiho tabo komokomo hibima꞉ akamidila꞉la꞉. Numa꞉la꞉, Ya꞉sukunu pe hegelate uluhukuhino, dopamo hopo habanapi hiliyonomate Godokono hibi gabo ba miya꞉pa Koko Kuba Ododilidawate ba꞉bo komahigama꞉ne. Ba꞉ hibila, ba꞉be dawate Saitanakono Koe Habalo kuba huiya hibinomolo kolawema꞉ne,
2TH 2:4 mabu a hibima꞉ midipa꞉te hibi Godoma꞉ da꞉ka꞉minakoma꞉ ebete ba꞉be Kodawa hibiha꞉ma꞉ kogoema꞉ne. Ba꞉gala komo hopo habanapa꞉te hiya꞉hiya꞉ ida꞉da꞉lino gobogobo dadikulamenaka, ebete ibino adikulame komokomo hiliyonomo ba duhilame ebe ha꞉kiya ebe hunamo adipatelo ba꞉bo kogoema꞉ne, “Na ba꞉ Godotela, na hopo lumagiha꞉!” Iyo, ba꞉ba tetelo ebete hibi Godo Adikumino Hiya꞉ Genamalo ba luta, tawakalubi hiliyonomo ba꞉bo kokiyahalamema꞉ne iba꞉te ebe kapiya kadikumima꞉.
2TH 2:5 Ba꞉ hibila, nale dopamo komo hegelalo la꞉godolo ba pemede ba꞉moi komokomo la꞉ iya꞉tulamimata, huiyatiya wadiyala la꞉ ba꞉ma tetelo naeno tabo komokomo gala na꞉kemalagidola꞉la꞉.
2TH 2:6 La꞉ iya꞉tawahala, ba꞉ma tetelo hopo habalo etoeno helote Koko Kuba Ododilidawoeno komo na꞉duhimina, iyo, ba꞉be mabuma꞉ Godokono ubi tete peheno ba꞉be dawate a꞉kamahigamene.
2TH 2:7 Ba꞉bema꞉ ba꞉ma tetelo kebe helote Kubadawoeno mahiga komo da꞉duhimina, Godote ba꞉be helo tama꞉mo ihateheno Kubadawate diya gabodo hopo konomolo ebeno oko bowatina, iyo, ebete ba꞉ ba꞉ba ka꞉na ebeno kuba ododili komo ya꞉lo a꞉tupuimiya꞉.
2TH 2:8 Huiyatiya numa꞉la꞉, galane ba꞉be dawoeno kuba komote tawakaluba꞉tamo hawakalanomo kohawakalama꞉ne, ba꞉bene Godote kebe tete ebetamo dikamemene, ba꞉be tete wibote Kodawa Ya꞉suti pete ebeno tabone da꞉puluhukumini ba꞉be deha꞉potonomo tabo kapiyamo ba꞉be Kubadawa ba꞉ dito kopanakapumima꞉ne.
2TH 2:9 Ba꞉bema꞉ wadiyala la꞉ niya꞉tawahala꞉, ba꞉moe Kubadawate da꞉pemene, ebete hiliyonomo hiya꞉hiya꞉ hanohano komo ba꞉gala tole komo Saitanakono konomo heloamo kopododilima꞉ne hopo habanapi ha꞉da kopamiholamema꞉.
2TH 2:10 Iyo, ibi ipuwalo puya꞉te Godoko hibima꞉ midihino dito da꞉ha꞉lahamena꞉, iba꞉te ha꞉lahaheno dopamo Kubadawate hiya꞉hiya꞉ ha꞉da amiho gabodo ibi ibino olalati kuitita꞉mo komagatalema꞉ne. Ba꞉ hibila, ba꞉bi tawakaluba꞉te Godokono hibi komo kalakalago na꞉lawiya꞉tale Godote ibino ka꞉ka꞉ ba꞉mula꞉lelamiya꞉na꞉, huiyatiya iba꞉te ba꞉be komo ko komoma꞉ kaga꞉luya꞉ha꞉ ba꞉bema꞉ iba꞉te hibilo kokubakubahama꞉na꞉.
2TH 2:11 Numa꞉la꞉, iba꞉te hibi komo laweha꞉ mabuma꞉ Godote iba꞉tamo Ha꞉da Amihodawa oemema꞉ modoboma꞉ goena. Ba꞉ ba꞉ma ka꞉na iba꞉te ba꞉be dawoeno helo komamo guditi ebeno ha꞉da tabo komokomo hibima꞉ komidilima꞉na꞉,
2TH 2:12 iyo, hopo habanapi ipuwalo puya꞉te Godokono hibi komo laweheno ibino kateneno ubilo hiya꞉hiya꞉ kuba komo kalakalago dododilina, ebete ibi hiliyonomoeno komokomo anagilamelelamete iba꞉tamo kuba huiya ba꞉bo kikalamema꞉ne.
2TH 2:13 Ba꞉bema꞉ aeno hibima꞉ midipi ekaka꞉la꞉, wadiyala hiliyonomo tetelo ale la꞉ mabuma꞉ kalakala tabo Godotamo ba꞉wadiya꞉paa꞉latelenakoma꞉. Hibila, ebete la꞉ malemalelo demalagidolena, ba꞉be mabuma꞉ ebete ba꞉moe hopo tupuimi mabuni la꞉ uwatiya꞉ta, la꞉le ebeno komo hibima꞉ ba midi ebeno Gobogobote la꞉ talonapima꞉ midiliti la꞉le ka꞉ka꞉ mula꞉ komo ba꞉bo kolawema꞉.
2TH 2:14 Iyo, ale Hido Tabo la꞉tamo dolamagimima꞉ Godote ba꞉be komodo la꞉ a꞉ka꞉lamia꞉ta, la꞉le komo hibima꞉ midipa꞉go Kodawa Ya꞉su Kelisokono helonomo alo ipuwalo kemedenama꞉.
2TH 2:15 Ba꞉bema꞉ aeno ekaka꞉la꞉, ale Godokono tabo olamagimi ipuwalo ba꞉gala aeno dopo leta ipuwalo la꞉ kebe komokomo kiya꞉tulametanakui, wadiyala la꞉ ba꞉bi komo hibilo ba watila꞉mota꞉na kodakodalo na꞉la꞉mota꞉hanala꞉.
2TH 2:16 Numa꞉la꞉, ya꞉lo tetenomolo aeno Kodawa Ya꞉su Kelisote aeno Nabiwi Godokoba꞉ a konomamo ba emalagidoloena, iba꞉te ibino malemale ipuwado a emedena teteno tepo ipuwoeno helo atamo ikaa꞉miya꞉ ale Ya꞉sukunu pe kuitita꞉mo uliholo kolatiminama꞉. Ba꞉bema꞉ wadiyala iba꞉te ba꞉ ba꞉ba ka꞉na la꞉eno tepo ipuwa na꞉heluilamenakamena꞉, hiliyonomo tetelo hidohido komate la꞉eno tabo ga꞉la ipuwane ba꞉gala ododili ipuwane kopikulinakoma꞉.
2TH 3:1 Ba꞉bema꞉ aeno hibima꞉ midipi ekaka꞉la꞉, ba꞉moe leta kuititi hapulu ale la꞉ ba꞉ma ka꞉na kiyalama꞉ta, wadiyala la꞉ toetoe tabamo a Godotamo na꞉wadiya꞉paa꞉tiya꞉la꞉, mabu a ubila Kodawa Ya꞉sukunu tabote aeno oko ipuwado komo hiliyonomo hopo tawakaluba꞉tamo tiyonomolo kotoma꞉, ba꞉gala a ubila ulihopa꞉te ba꞉be tabo ba milimiho Godotamo kalakala tabo kadipatema꞉, la꞉le dopamo ebeno tabo keba ka꞉na ka꞉lawiuima ba꞉ba ka꞉na.
2TH 3:2 Ba꞉bene wadiyala la꞉ ba꞉moe eta komoma꞉ Godoko na꞉katoemehuya꞉la꞉, ebete koko kuba ododilipi dubuino helo ipuwane aeno ka꞉ka꞉ komula꞉lea꞉mema꞉, mabu komo hopo habanapa꞉te Godokono tabo uliho tetelo hibima꞉ kamidinaha꞉.
2TH 3:3 Ba꞉bema꞉ kalakala konomola, la꞉eno hibima꞉ midi mabuma꞉ Kodawate atumu la꞉ ba heluilame, Saitanakono alaholoho ododili ipuwalo la꞉ ebete kitagua꞉midalema꞉na꞉ta! Iyo, aeno Kodawa ba꞉ Hibidawanomola!
2TH 3:4 Ba꞉bema꞉ a iya꞉tawahala ale kebe hiya꞉hiya꞉ komoma꞉ la꞉ da꞉kiyalamenaka, la꞉ ba꞉bi komokomo ododili ipuwalo ba pola꞉na ba꞉bi komo dito a꞉kamiya꞉pala꞉mata. Numa꞉la꞉, Kodawate la꞉ mabuma꞉ ba꞉be hido ukui atamo nikaa꞉mena, ba꞉bema꞉ ukui bilibili komote agodolo kitanaha꞉.
2TH 3:5 Wadiyala la꞉le hibima꞉ midi gabodo ba tolame, Kodawa Kelisote la꞉ dopalamete temeteme ikuliho tetelo ebete ebeno kodakodalo utitata komago ba꞉gala Godokono malemale emalagidolo komago la꞉ na꞉magatalenakamena꞉ta.
2TH 3:6 Ba꞉bema꞉ aeno hibima꞉ midipi ekaka꞉la꞉, ale aeno Kodawa Ya꞉su Kelisokono mahilamo la꞉ ba꞉ma ka꞉na kiyalama꞉ta, la꞉ ipuwalo puya꞉te aeno iya꞉tulame komamo papamila꞉haleheno ba꞉gala iba꞉te ibi ha꞉kiya owalubilima꞉ buhamama꞉ deda꞉hana, wadiyala la꞉ ba꞉bako hibima꞉ midipino ododili ipuwamo akogomala꞉.
2TH 3:7 Iyo, ale la꞉ ipuwalo keba ka꞉na ka꞉pemedima꞉ la꞉ ba꞉be komo iya꞉tawahanomola, ba꞉bema꞉ wadiyala la꞉ atu ododili ipuwalo nemedenala꞉. Numa꞉la꞉, ba꞉ba tetelo ale oko owatima꞉ buhamama꞉ eda꞉haheno,
2TH 3:8 du ba꞉gala hegela hiliyonomolo aeno kokotamo menemene oko owatihonakuima꞉ a ha꞉kiya aeno modoboha꞉ komokomo kulamema꞉, ba꞉bene ba꞉be gabodo ale eta lumagigodone baa꞉ malemalelo dito kalawenakuiha꞉, ao, a ebetamo a꞉huiyanakuima꞉.
2TH 3:9 Ba꞉ hibila, Godokono okopa꞉te ibino modoboha꞉ komokomo ipuwalo hibima꞉ midipa꞉godone ilina ba꞉gala mani uwatema꞉ talona kitanaha꞉, huiyatiya ale la꞉go ba emedena ba꞉ba ka꞉na kewagelenakuiha꞉, mabu a ubi bihatima꞉ la꞉tamo eta hido go hawakalimiti, la꞉le oko owati ipuwalo aeno ododili komo kota꞉matalema꞉.
2TH 3:10 Ba꞉moe ba꞉be mabuma꞉ ale la꞉ ba꞉ma ka꞉na a꞉kiyalamia꞉ta, “Kebe lumagiti oko owati ubiha꞉ma꞉ deda꞉mene, wadiyala komopa꞉te ebetamo baa꞉ akikama꞉la꞉.”
2TH 3:11 Ba꞉bema꞉ numa꞉la꞉, ale ba꞉moe komoma꞉ la꞉ gala na꞉kakiyalama꞉ta mabu tabote atamo ba꞉ma ka꞉na puluhukui, la꞉ ipuwalo komopa꞉te oko owatima꞉ buhamama꞉ ba eda꞉ha, ibi ha꞉kiya ibino hiya꞉hiya꞉ komo ulameheno ibino tabo ga꞉la ipuwalo puya꞉te hibi oko komokomo dowatihona iba꞉tamo temeteme ba꞉bo ikalamenaka.
2TH 3:12 Iyo, ale ba꞉bako tawakalubi ba tutumulatele Kodawa Ya꞉su Kelisokono mahilamo ibi koamo kiyahalamema꞉, iba꞉te tabo ga꞉la ipuwalo komo tawakaluba꞉tamo temeteme ikalameheno, huiyatiya iba꞉te hegehege mani oko owatiho ipuwalo ibi ha꞉kiya ibino modoboha꞉ komokomo nulamenakamena꞉.
2TH 3:13 Ba꞉bema꞉ ekaka꞉la꞉, kalakala konomola, la꞉eno hibima꞉ midi ipuwalo hidohido komo kododilima꞉ heloha꞉ma꞉ akeda꞉hala꞉.
2TH 3:14 Ba꞉gala la꞉ ipuwalo eta lumagiti ba꞉moe leta taboeno iya꞉tulame komamo papamiwata ubiha꞉ma꞉ eda꞉lo oko owatihino dito da꞉lutamene, wadiyala la꞉ ba꞉bako lumagino kuba komo kohawakalimima꞉ ebeno ododili ipuwalo eba꞉go akakapiyala꞉. Diyala, ba꞉moe gabodo ebete hilopo lawete ebeno kuba ukui komone Godotamo gala da꞉ kohobigamene,
2TH 3:15 huiyatiya numa꞉la꞉, ebete ukui hiya꞉ma꞉ tiyolo midihino ebe la꞉go alaholodawama꞉ akamida꞉la꞉, la꞉le huiyatiya ebe la꞉eno hibima꞉ midi ekawima꞉ ka꞉milo ebeno tepo ipuwoeno kuba ukui komoma꞉ ebe malemalelo na꞉kiyamiya꞉la꞉.
2TH 3:16 Ba꞉bema꞉ hete atamo dikaa꞉mena, wadiyala ba꞉be Kodawate la꞉ hiliyonomagodolo ba emedena hiliyonomo tetelo ebe ha꞉kiya la꞉eno hiliyonomo komokomo ipuwalo ebeno hete la꞉tamo nikalamenakamena꞉ta.
2TH 3:17 Numa꞉la꞉, ba꞉moe leta kuititi hapulu na Polote naeno mahilo ba꞉gala nolata tabo naeno kokotonomamo miya꞉temo, eta lumagiti ba꞉moe kuititi tabo kamiya꞉teha꞉. Iyo, ba꞉moe ba꞉ naeno kokotola, naeno leta hiliyonomo ododili ipuwalo na ha꞉kiya naeno mahilo ba꞉ma ka꞉na miya꞉tenakomo.
2TH 3:18 Wadiyala aeno Kodawa Ya꞉su Kelisokono malemale komote la꞉ hiliyonomagodolo nitanamene. Ba꞉moe ba꞉ naeno tabo kuititila. Ba꞉ba꞉la.
1TI 1:1 Na ba꞉ Polotela. A hibima꞉ midipa꞉te pokono pe komoma꞉ uliholo da꞉latiminama꞉, ba꞉be Kodawa ba꞉ Ya꞉su Kelisotela, ba꞉bene ebete ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala, iyo, ebe ba꞉gala aeno Ka꞉ka꞉ Mula꞉dawa Godoko iba꞉te na a꞉kiyanamiya꞉ ba꞉be oko kowatinama꞉.
1TI 1:2 O Timoti, ama꞉le hibima꞉ midi ipuwalo naeno hibi guduma꞉ eda꞉nata, ba꞉bema꞉ nale ba꞉moe leta ama꞉tamo poememo. Wadiyala Nabiwi Godoko ba꞉gala aeno Kodawa Ya꞉su Kelisoko iba꞉te ibino malemale komo, ba꞉gala lumagitamo kuba huiya ikameha꞉ komo, ba꞉gala hete komo ama꞉tamo nikama꞉mena꞉ta.
1TI 1:3 Nale dopamo Ma꞉sadoniya hopamo toma꞉ ba hiduta ama꞉ kebe tabo ka꞉kiyamitima ba꞉be atu tabo bekakiyamemata, ba꞉ma ka꞉na ama꞉ Epesese ko habalo ba emedena, hibima꞉ midipi ipuwalo puya꞉te ha꞉da tabo komokomo diya꞉tulamenaka, wadiyala ama꞉ ibi ba kiyahalame na꞉duhilamiya꞉.
1TI 1:4 Wadiyala ama꞉ talona iba꞉tamo nihatelamiya꞉ iba꞉te iniwalino hiya꞉hiya꞉ iya꞉tulame uwi ba꞉gala iniwalino mahilo komokomo akiya꞉tulama꞉la꞉, mabu ba꞉bakobako daedae komate ibi ipuwalo olowabeletihui komo ba wadiya꞉paa꞉latele, iba꞉te Godokono gabo ba꞉bo kotama꞉na꞉. Ba꞉ hibila, ale ebeno gabo aeno hibima꞉ midi kapiyado biya꞉tawahanakoma꞉, huiyatiya ale hopo habanapino hiya꞉hiya꞉ iniwalino iya꞉tulame komoma꞉ tabo ga꞉la ipuwado hibi komo a꞉kuma꞉ma꞉.
1TI 1:5 Ba꞉bema꞉ nale ama꞉ ba꞉moe tabo begoememata, mabu na ubila dalowa꞉ha꞉ tepo ipuwoeno emalagidolo komo ba꞉gala tataba emede komoeno mulu ukui komo ba꞉gala tuputupunomo hibima꞉ midi komo, ba꞉bi komate amia꞉no sose tawakaluba꞉godolo ba pola꞉na ba꞉bi komokomo ipuwane malemale emalagidolo komote buluhukunakomene.
1TI 1:6 Huiyatiya numa꞉, komo hibima꞉ midipa꞉te daedae taboma꞉ olowabeletihui komodo ba꞉moi hidohido komone dito elehiya꞉.
1TI 1:7 Ba꞉bema꞉ ba꞉ma tetelo iba꞉te ibino ubi bihatena, Godote Moseseko ipuwado tawakaluba꞉tamo dikalamiya꞉ ba꞉bi Tutumu Tabo iya꞉tulamepima꞉ keda꞉hanama꞉, huiyatiya ibi modoboha꞉ mabu Godokono taboeno ipuwa komokomo ibi iya꞉tawahaha꞉, iyo, iba꞉te tabo toleheno olamagiminaka huiyatiya Godokono hibi komo kuminaha꞉.
1TI 1:8 A iya꞉tawahala, keba tetelo ale hibi gabodo Godokono Tutumu Tabo diya꞉tulamema꞉ ba꞉be komote ulihopino hido owalubi komoma꞉ keda꞉ma꞉ne.
1TI 1:9 Huiyatiya numa꞉, Godote ebeno Tutumu Tabo ba꞉moe hopoeno tuputupupino komoma꞉ kikalamiya꞉ha꞉, ao, ebete ebeno Tutumu Tabo komokomo kuba ododilipino komoma꞉ ikalamiya꞉ iba꞉te ebeno hibi gabo kiya꞉tawahama꞉. Ba꞉bema꞉ hibila, Godokono Tutumu emalagidoleha꞉pi ba꞉gala ebetamo papamila꞉ha꞉pi, ebe holoholoma꞉ eda꞉ha꞉pi ba꞉gala hibo gabo ududipi, ebeno kukala wakalamipi ba꞉gala ebe tolemeha꞉pi, nabi menokobi anakapulamepi ba꞉gala komo tawakalubino ka꞉ka꞉ iya꞉hililamepi, ba꞉bi kuba ododilipi hiliyonomo iya꞉tulamema꞉ Godote ebeno Tutumu Tabo ba꞉bema꞉ ikalamiya꞉.
1TI 1:10 Ba꞉bene puya꞉te bohelemele pilo ba꞉gala kamena pilo dododilina, puya꞉te dubu gabatamo ba꞉gala hegehege guguda꞉tamo hilopo komo dododilina, puya꞉te ibino menemene oko huiyaheno kowatihonama꞉ komopi pilolo duwatena, puya꞉te gabomanino tabo anagiya꞉mida habalo ba꞉gala komo hiya꞉hiya꞉ tetelo ha꞉da tabo dolamagimina, Godote atumu ba꞉bi kuba ododilipino komoma꞉ ebeno Tutumu Tabo ba꞉bema꞉ ikalamiya꞉. Iyo, hopo habanapi hiliyonomo ipuwalo kebe lumagiti Ya꞉sukunu dopo ta꞉matapino iya꞉tulame tabo kapiyanomo dadikamidalemene, ba꞉be lumagino komoma꞉ Godokono Tutumu Tabo komate ba꞉bema꞉ pola꞉na.
1TI 1:11 Ba꞉bema꞉ numa꞉, Ya꞉suku ta꞉matapino iya꞉tulame komate ebeno Hido A꞉la꞉mina Tabo ipuwane ikulina, ba꞉be tabo ba꞉ nale hiya꞉hiya꞉ tawakaluba꞉tamo kolamaginakoma꞉ Hidonomo Godote natamo dikanamiya꞉ ba꞉moe ba꞉be tabola.
1TI 1:12 Ba꞉bema꞉ natamo helo dikanamiya꞉ nale aeno Kodawa Ya꞉su Kelisotamo kalakala tabo begoemo, mabu ebete na hibidawama꞉ goelo ebeno oko kowatinama꞉ na ba꞉bema꞉ ka꞉namiya꞉.
1TI 1:13 Ba꞉ hibila, dopamo tetelo nale ebeno komoma꞉ kubakuba tabo ba olamagi konomo mauba ipuwalo koko temeteme ebetamo ba꞉bo ikamenakuimo. Huiyatiya ba꞉ba tetelo ebete iya꞉tawuya꞉, nale ebe hibima꞉ midiha꞉ mabuma꞉ daedae ukuilo ba꞉bako kuba komo dododilinakuimo, ba꞉bema꞉ ebete kuba huiya natamo ikanameheno ebeno malemale natamo dito hawakalimiya꞉.
1TI 1:14 Iyo, aeno Kodawa Ya꞉su Kelisote ebeno malemale natamo konomamo da꞉haminuya꞉, ba꞉ba tetelo ebegodone duluhukuna ba꞉be hibima꞉ midi komo ba꞉gala malemale emalagidolo komo naeno tepo ipuwalo a꞉mahiliya꞉.
1TI 1:15 Ba꞉bema꞉ nale ba꞉moe hibinomo tabo begoemo, Ya꞉su Kelisote kuba ododilipino ka꞉ka꞉ mula꞉lelamema꞉ ba꞉moe hopamo a꞉piya꞉. Iyo, wadiyala ama꞉ ba꞉moe tabo kodakodalo na꞉lawa꞉, mabu naeno kuba ododili komate komo tawakalubi hiliyonomoeno kuba ododili komo ba gogole,
1TI 1:16 Ya꞉su Kelisote na koko kuba ododilidawatamo huiya ikanameheno malemale dito hawakalimiya꞉. Ba꞉moe mabuma꞉ Ya꞉suti pui ebeno wiboha꞉ ka꞉ka꞉ lawema꞉ da꞉ka꞉lamiholiya꞉, wadiyala ba꞉ba꞉te ebe hibima꞉ midiha꞉ tetelo ba꞉moe hido komo niya꞉tawahamena꞉, Ya꞉suti ibi malemalelatelelo na꞉latilamena iba꞉te ibino kuba ododili ipuwane ebetamo hibilo kohobila꞉hama꞉, ebete na Poloko keba ka꞉na ka꞉latinamenami ba꞉ba ka꞉na.
1TI 1:17 Ba꞉bema꞉ kalakala konomola! Godoko ba꞉ emedena emedena tetelo demedenamene ba꞉be Ko Gawadubula, ba꞉gala ebete a꞉kahoenamene, ba꞉gala a hopo habanapa꞉te ebe baida꞉mo umi modoboha꞉, ba꞉gala ebe ba꞉ kapiyanomo Godola, eta puliyanomola. Ba꞉bema꞉ wadiyala emedena emedena tetelo tawakaluba꞉te ebe hunamo ba adipatena awagaha komote ebegodolo nitanamene! Ba꞉moe tabo ba꞉ hibinomola, ba꞉ba꞉la!
1TI 1:18 Timoti, numa꞉, ama꞉le hibima꞉ midi ipuwalo naeno guduma꞉ eda꞉nata, ba꞉bema꞉ na ubila ba꞉moe leta ipuwalo kapiyakapiya komoma꞉ ama꞉ kiyahame, ama꞉le ba꞉moi tabamo kopapamiwatama꞉. Ba꞉ hibila, Godokono okopa꞉te ebeno Gobogoboeno heloamo kebe hidohido komate ama꞉godolo kikulihoma꞉ tabo dopamo dolamagimiya꞉, ba꞉ma tetelo ibino hibi tabo komate naeno tabo komago kapiyama꞉ eda꞉te ama꞉ hibilo kowalubima꞉na꞉ta. Ba꞉bema꞉ wadiyala ama꞉ ba꞉bi owalubi tabo komokomo hiliyonomo kodakodalo na꞉watila꞉mota꞉nuya꞉, helo dubuti alaholoho ilina keba ka꞉na ka꞉watila꞉mota꞉nanako ba꞉ba ka꞉na,
1TI 1:19 ba꞉gala amia꞉no hibima꞉ midi ipuwalo kodakodalo ba la꞉na, amia꞉no tepo ipuwoeno mulu ukui komate hidamo kopola꞉nama꞉ eta kuba deha꞉potonomo akododa꞉la꞉. Numa꞉, komo Ya꞉suku ta꞉matapino komo ba꞉ ba꞉ma ka꞉nala, Godote kebe mulu tepo ipuwoeno ukui komo iba꞉tamo dikalamiya꞉, iba꞉te papamila꞉ha ubiha꞉ma꞉ deda꞉hui ibi ha꞉kiya ibino hibima꞉ midi komo ba꞉ a꞉kubahilamiya꞉, lumagiti kehaha꞉ kolomodo ebeno boge kubamo atalo ba꞉be bogete koko gawiya ipuwamo keba ka꞉na ka꞉nululunako ba꞉ba ka꞉na.
1TI 1:20 Iyo, Haimaneyasiko ba꞉gala A꞉lesandako ibi netewapi ba꞉bakopila, ba꞉be mabuma꞉ nale ibi hibima꞉ midipino kapiyuimi ipuwane uluhukulatelete Saitanakono kokoto ipuwamo dito miya꞉timo, iba꞉te ibino huiya ba lawe hido ukui ba꞉ma ka꞉na kolawema꞉, iba꞉te Godokono komoma꞉ kubakuba tabo gala a꞉kaga꞉lanakamena꞉.
1TI 2:1 Ba꞉bema꞉ Timoti, nale ama꞉ kebe komokomoma꞉ da꞉goemema ba꞉moe ba꞉ ko komonomola. La꞉ hibima꞉ midipino kapiyuimi tetelo Godotamo toetoe tabo dolamagiminakoma, wadiyala la꞉le hiliyonomo hopo habanapino hiya꞉hiya꞉ komoma꞉ ba toetoeho kalakala tabo atumu na꞉kaga꞉lanakuya꞉la꞉,
1TI 2:2 ba꞉bene atu tetelo koko gawadubu ba꞉gala komo gabomani okopi hiliyonomo atumu na꞉kawadiya꞉paa꞉latelenakuya꞉la꞉. Ama꞉ numa꞉, a hibima꞉ midipa꞉te ba꞉ ba꞉ba ka꞉na gabomana꞉godolo hido tataba emede komo kumima꞉nema꞉, ba꞉gala ale Godokono ubi komokomo hiliyonomamo ba papamila꞉halena komo tawakalubino holoholo hapulu tuputupunomolo bemedenama꞉.
1TI 2:3 Ba꞉bema꞉ hibila, ba꞉mako toetoe tabo olamagi komo ba꞉ aeno Ka꞉ka꞉ Mula꞉dawa Godote hidoma꞉ da꞉goena ba꞉moe ba꞉be komola,
1TI 2:4 mabu ebe ubila ba꞉moe hopo habanapi hiliyonomate ebeno hibi komo iya꞉tawahate ibino ka꞉ka꞉ mula꞉ komo ba꞉bo kolawema꞉.
1TI 2:5 Numa꞉, Godoko ba꞉ kapiyanomola. Ba꞉gala ba꞉moe ba꞉ eta komola, ebe ba꞉gala tawakalubi tetenomolo da꞉la꞉na ba꞉be Ya꞉su Kelisote ba꞉ ba꞉moe hopolo lumagino apa꞉mo da꞉hawakaluya꞉ ba꞉be dawala. Ba꞉bema꞉ hibila, ebe kapiyagodolo helo bitana tawakalubi Godotamo komagahelema꞉,
1TI 2:6 mabu ebe ha꞉kiya ebeno ka꞉ka꞉ tama꞉mo ihatete ibi Saitanakono du genamane kuluhukulatelema꞉ ebeno hawa꞉mo ba꞉bo huiyahaliya꞉. Iyo, ebete ba꞉be gabodo ebeno hido tetenomolo ba꞉moe komo behawakalimiya꞉, Godokono ubi bitana hiliyonomo tawakaluba꞉te ebegodone ka꞉ka꞉ mula꞉ komo kolawema꞉.
1TI 2:7 Ba꞉be mabuma꞉ ebete na Polotamo ebeno oko ikanamiya꞉, nale ebeno oelamepi dubu etama꞉ eda꞉te Yuha꞉pa꞉tamo Hido Tabo ba olamagi ibi ba꞉bo kiya꞉tulamenakoma꞉. Ama꞉ nolata, ba꞉moe tabo nale da꞉goitamo ba꞉ hibinomola, na ha꞉da tabo kolamagitaha꞉!
1TI 2:8 Ba꞉bema꞉ naeno ubi komo ba꞉ma ka꞉na itana. Kebe hiya꞉hiya꞉ tetelo hibima꞉ midipa꞉te da꞉kapiyuiminaka, wadiyala dubate mauba komo ba꞉gala olowabeletihui komo hiliyonomo tama꞉mo miya꞉tete, ba꞉bene ibino tepo ipuwalo dalowa꞉ha꞉ma꞉ ba eda꞉ha iba꞉te ibino kokoto Godotamo wadiya꞉paa꞉latelelo toetoe tabo ba꞉bo nolamagiminakamena꞉.
1TI 2:9 Ba꞉gala na ubila hibima꞉ midipi kamenakamenate hido mulu gabodo kaliko pupuliti ibino hunu tama koamo akemalagidolenala꞉. Ba꞉bema꞉ iba꞉te hinibo a꞉wihole komo, ba꞉gala galoeno golodo nolenole pupuli komo, ba꞉gala nehe tulikahula pupuli komo, ba꞉gala huiya kokonomo kaliko pupuli komo, ba꞉bi hiya꞉hiya꞉ hunu nikapi hiduimi komokomo iba꞉te kokonomo komoma꞉ akaga꞉lala꞉.
1TI 2:10 Huiyatiya wadiyala iba꞉te komopa꞉tamo hidohido komo nododilinakamena꞉, mabu ba꞉moe ododili gabodo iba꞉te hibi hagaluhagalu kamenakamenama꞉ keda꞉hama꞉na꞉, iyo, kebe kamenate ebe ha꞉kiya ebe Godoko ta꞉matadawama꞉ da꞉goena, wadiyala ebete ebeno ododili ipuwalo hibi komo na꞉hawakalima꞉mene.
1TI 2:11 Ba꞉gala hibima꞉ midipa꞉te da꞉kapiyuiminaka, wadiyala kamenakamenate tabo ga꞉laheno Godokono tabo olamagimipino iya꞉tulame komamo dito na꞉papamila꞉halenakamena꞉.
1TI 2:12 Ba꞉be mabuma꞉ hibima꞉ midipi ipuwalo nale eta kamenatamo helo a꞉kikama꞉lemo, ebete Godokono tabamo dubu ba iya꞉tulamita ibino namutudawama꞉ keda꞉ma꞉, ao, Godokono tabo iya꞉tulame tetelo kamenakamenate tabo ga꞉laheno dito nulihonakamena꞉.
1TI 2:13 Ba꞉bema꞉ numa꞉, nale kamenakamenoeno komo kohawakalimima꞉ kebe netewa komate Godokono Bukalo da꞉pola꞉na, nale ba꞉bi komo ama꞉ kiya꞉tumima꞉nemata. Dopo komo ba꞉ ba꞉ma ka꞉nala, Godote A꞉da꞉meko dopamo ododiti, galane ebeno kamena Ibiko ba꞉bo ododiya꞉.
1TI 2:14 Ba꞉gala eta komo ba꞉ma ka꞉na itana, Saitanate tawakalubi kuba gabamo emogabuilamema꞉ dewageliya꞉, ba꞉ba tetelo ebete dopo dubu A꞉da꞉meko kamihomiya꞉ha꞉, ao, ebete ebeno kamena Ibiko kapiya amihomete ba꞉bene ebete Godokono kukala ba꞉bo adikanaliya꞉.
1TI 2:15 Huiyatiya Godokono ka꞉ka꞉ mula꞉ komote hibima꞉ midipi dubu kapiyatamo kitanaha꞉, ao, kamenakamenatamo atumu ba꞉ka-itana, ba꞉bema꞉ kebe kamenate hido mulu ukuilo Ya꞉suku hibima꞉ ba midina tuputupu emede komo ba꞉gala malemale emalagidolo komo miya꞉paleheno, ebete gugudi alahilame gabodo ka꞉ka꞉ mula꞉ komo hibilo kolawema꞉ne.
1TI 3:1 Ba꞉moe komo ba꞉ hibila, keba tetelo dubuti sose watodawama꞉ eda꞉ma꞉ ubi koamo dihatemene, ba꞉moe ba꞉ hido komola mabu sose watodawoeno oko hidonomola.
1TI 3:2 Ba꞉be mabuma꞉ ba꞉be okodawoeno ododili komo ipuwalo eta kapiya deha꞉potonomo kubate itana modoboha꞉. Ba꞉ma ka꞉na sose watodawate kamena kapiyagodawama꞉ eda꞉te, ba꞉bene hibima꞉ midipi ipuwalo ebeno emede komo tuputupunomolo ba itana, ebete hidohido mulu ukui kapiya emalagidolelo ebe ha꞉kiya ebeno komo hidamo nulamenakamene. Ba꞉bene ebete ebeno genamalo kapela tawakalubi hidamo nowalubilinakamene, ba꞉gala wadiyala ebete Godokono tabo olamagi ipuwalo hido iya꞉tulamedawama꞉ neda꞉mene.
1TI 3:3 Ba꞉gala sose watodawate gamoda nihodawama꞉ eda꞉ modoboha꞉, ba꞉bene ebete alaholoho komo ba꞉gala olowabeletihui komo ododili modoboha꞉, huiyatiya tatabadawama꞉ neda꞉mene. Ba꞉gala ebete ebeno tepo ipuwalo mani koamo emalagidolo modoboha꞉.
1TI 3:4 Ba꞉bene ebete ebeno genamanapino komo hidamo ulamelelamete, wadiyala ebete ebeno gugudi hidamo niya꞉tulamenakamene, iba꞉te ibino hiliyonomo ododili komodo ibino nabiwi ba emalagidolo ebeno tabamo kopapamila꞉halenama꞉.
1TI 3:5 Ba꞉ hibila, kebe dubuti ebeno genamanapi hidamo ulameheno, ebete atumu Godokono sose tawakalubi hidamo a꞉kulama꞉mene.
1TI 3:6 Ba꞉gala numa꞉, sose watodawate Ya꞉suku ta꞉mata ipuwalo uli lumagima꞉ eda꞉ modoboha꞉. Ba꞉bako dawate sose atama꞉ ubi dihatemene, diyala, ebe ha꞉kiya ebe da꞉ awagaminamene, ba꞉bema꞉ Godote kuba huiya ebetamo kikamema꞉ne, ebete dopamo Saitanatamo kuba huiya keba ka꞉na kikamiya꞉ ba꞉ba ka꞉na.
1TI 3:7 Ba꞉bene wadiyala sose watodawate hibima꞉ midiha꞉pino holoholo hapulu atumu hidohido komo na꞉kododilinakamene, iba꞉te ebeno hido emede komo umimiti ebe tuputupudawama꞉ koga꞉lama꞉. Iba꞉te ebeno emede ipuwalo eta kuba umi modoboha꞉, mabu iba꞉te ebegodolo eta tuputupuha꞉ komo umiti ebe kubadawama꞉ da꞉ga꞉lamena꞉, diyala, ebete hilopo lawete Saitanakono gubi ipuwamo dito da꞉ negamene.
1TI 3:8 Ba꞉bema꞉ sose watowatopi owalubilidawoeno emede komote komopino umi ipuwalo atumu hidonomoma꞉ neda꞉mene. Ba꞉ma ka꞉na ebete ma꞉lapila netewa lumagima꞉ akeda꞉la꞉, ba꞉bene ebete helo gala꞉ipi gao beya konomamo niho modoboha꞉, ba꞉gala ebete ha꞉da amiho gabodo ilina dogodogodawama꞉ eda꞉ma꞉ ubi ihate modoboha꞉.
1TI 3:9 Ba꞉gala Godote kebe hibi gabo tawakaluba꞉tamo da꞉hawakalimiya꞉, wadiyala sose watowatopi owalubilidawate ba꞉be gaboeno hiliyonomo iya꞉tulame komokomo kodakodalo ba watila꞉mota꞉na ebeno tepo ipuwalo ukui gagagagama꞉ akeda꞉la꞉.
1TI 3:10 Ba꞉bema꞉ pote sose owalubidawama꞉ oko tupuimima꞉ ubi da꞉hawakalimimini, wadiyala la꞉ sose watowatopa꞉te ebeno emede komokomo dopamo hidonomamo nulamelemiya꞉la꞉, ba꞉bene la꞉ ebegodolo eta kuba umihino wadiyala ebete sose oko na꞉tupuima꞉mene.
1TI 3:11 Ba꞉gala okopi kamenakamenoeno emede komate komopino umi ipuwalo atumu hidohidonomoma꞉ neda꞉hamena꞉. Ba꞉ma ka꞉na iba꞉te tawakalubino hiya꞉hiya꞉ komoma꞉ kubakuba tabo akaga꞉lanakala꞉, ba꞉bene iba꞉te hidohido mulu ukui kapiya emalagidolelo ibino hiliyonomo ododili ipuwalo hibinomopima꞉ neda꞉hamena꞉.
1TI 3:12 Ba꞉gala numa꞉, sose watowatopi owalubilidawate kamena kapiyagodawama꞉ eda꞉te, ba꞉bene wadiyala ebete ebeno gugudi ba꞉gala komo genamanapi ibino komokomo hidamo nulamelelamenakamene.
1TI 3:13 Ba꞉ hibila, puya꞉te sose watowatopi owalubili oko hidamo dowatina, komopa꞉te ibi ibino hido oko mabuma꞉ da꞉mililameholemena꞉, iba꞉te Ya꞉su Kelisoko hibima꞉ midi ipuwalo apepehote ebeno oko owatima꞉ tole komote iba꞉godolo a꞉kitanamene.
1TI 3:14 Ba꞉bema꞉ Timoti, nale ama꞉tamo tiyonomo pema꞉ ubi bihatimo, huiyatiya na gabo tiyolo umihino, ba꞉be komo ba emalagidolo nale ba꞉moe leta ipuwalo komo iya꞉tulame tabo ba꞉bema꞉ miya꞉temo. Ba꞉ma ka꞉na nale ama꞉ biya꞉tumimata, sose tawakalubino kapiyuimi tetelo iba꞉te Godokono umi ipuwalo tuputupu komo keba ka꞉na na꞉kododilinakomena꞉. Numa꞉, emedena emedena tetelo demedenamene, a sose tawakalubi ba꞉ ba꞉be Kodawoeno genamanapila, ba꞉gala a ebeno genamoeno hototo ba꞉gala abo huiyala, mabu ale ebeno hibi iya꞉tulame komo ba꞉moe hopolo ba wadiya꞉paa꞉latelena ebeno genamoeno la꞉na komote kodakodalo kitanama꞉ne.
1TI 3:16 Ba꞉bema꞉ hibila, a hibima꞉ midipa꞉te Godokono ubi gabodo ebe keba ka꞉na da꞉ta꞉matanama꞉, ba꞉be komoeno ipuwa bada konomola꞉ka꞉! Aeno Kodawate ba꞉moe hopo habalo lumagino apa꞉mo a꞉hawakaluya꞉, ba꞉bene ebeno tuputupu emede komo kohawakalimima꞉, ebete ebeno Gobogoboeno heloamo hoe ipuwane mahigate, Godokono nopopa꞉te ebe wiboha꞉ ka꞉ka꞉go ba꞉bo umiya꞉. Ba꞉gala ebe ta꞉matapa꞉te ebeno komo hopo haba konomolo a꞉hawakalimiya꞉, ba꞉bene hiliyonomo tawakaluba꞉te ebe hibima꞉ ba midi, ebete Godokono Hunu Habamo ba꞉bo odoluya꞉, ebeno holoholo hapulu konomo alo ipuwalo konemedenama꞉.
1TI 4:1 Numa꞉, Godokono Gobogobote hawakala ba꞉ma ka꞉na goena, hopo haboeno kuititi tetelo komopa꞉te Saitanakono kubakuba gobogobo ba꞉gala ha꞉da amihoho gobogoboeno iya꞉tulame komamo papamila꞉halete, iba꞉te Ya꞉suku hibima꞉ midi ipuwane ba꞉bo kohobila꞉halema꞉na꞉.
1TI 4:2 Ba꞉ hibila, ba꞉moi ha꞉da amiho komate ba꞉ ma꞉lapila netewa tawakaluba꞉godone ikulina, iyo, Godote kebe hido mulu ukui ibino tepo ipuwamo dopamo da꞉miya꞉telamiya꞉, ba꞉bi hidohido ukui ibino kuba ododili ipuwalo dito alatidiholamiya꞉, hidohido ilinate koelo keba ka꞉na ka꞉wamotenaka ba꞉ba ka꞉na.
1TI 4:3 Ba꞉bi ha꞉da amihopa꞉te na꞉ga꞉lanaka hibima꞉ midipi ipuwalo dubuti kamena lawema꞉ Godote talona bihatelamiya꞉, ba꞉gala iba꞉te na꞉kaga꞉lanaka komo hidohido ilina nahama꞉ talonala. Huiyatiya numa꞉, Godote ba꞉bi komo hiliyonomo hibima꞉ midipi mabuma꞉ ododiliti iba꞉tamo ikalamiya꞉, ba꞉bema꞉ puya꞉te ebeno hibi komo diya꞉tawahana, iba꞉te kalakala tabo ebetamo adipatelo ba꞉bi ilina dito ba꞉nahanakomena꞉, ba꞉gala dubuti ebeno kamenago kapiyama꞉ eda꞉ tetelo iba꞉te atumu Godotamo kalakala badipatenakomena꞉.
1TI 4:4 Ba꞉ hibila, Godote ba꞉moe hopoeno hiliyonomo komokomo ebeno tawakalubi mabuma꞉ ododiliya꞉, iyo, ba꞉bi komate hidohidonomoma꞉ eda꞉hana, ba꞉bema꞉ wadiyala tawakaluba꞉te ba꞉bi malemale komo uwatema꞉ ubiha꞉ma꞉ eda꞉haheno Godotamo kalakala tabo ba ga꞉la ebeno kokotone nuwatenakamena꞉.
1TI 4:5 Ba꞉bema꞉ numa꞉, Godote ba꞉moe hopoeno ilina ododili da꞉wibuya꞉, ebete ba꞉bi ilina hiliyonomo ulamete ebeno tabo olamagi komamo hidohidoma꞉ ba꞉bo midiliya꞉, ba꞉gala ba꞉ma tetelo ale komo ilina uwatelo ebetamo kalakala tabo dadipatenakoma꞉, ebete ba꞉be komodo atumu ba꞉bi ilina hidohidoma꞉ gala ba꞉kagoenakomene.
1TI 4:6 Ba꞉bema꞉ Timoti, ama꞉le Ya꞉su Kelisokono hido okodawama꞉ eda꞉ komo kohawakalimima꞉, wadiyala ama꞉ ba꞉moi iya꞉tulame tabo hibima꞉ midipi ekaka꞉tamo nolamaginakuya꞉. Iyo, ama꞉ ibino gobogobo hapuino baa꞉ iba꞉tamo modobolo dikalamemena꞉ ba꞉be komote amia꞉no komo ba꞉ma ka꞉na kohawakalimima꞉ne, ama꞉le hibima꞉ midi ipuwalo kebe iya꞉tulame komo da꞉ta꞉mahelenapiya꞉la, ama꞉le hidamo apema꞉ ba꞉bi hibi tabo komokomo atumu hibilo na꞉kanahanata.
1TI 4:7 Ba꞉gala ama꞉ iniwalino hiya꞉hiya꞉ uwi akulihonakala꞉, mabu ba꞉bakobako uwi komate tawakalubino daedae ukuido ba ikulina Godokono hibi komo kahawakaliminaha꞉. Huiyatiya numa꞉, ama꞉ Godotamo hibilo kopapamiwatanama꞉ wadiyala ama꞉ amia꞉no tepo ipuwa na꞉kodakoduiminakuya꞉, bolamo iya꞉da꞉dawate heloma꞉ keda꞉ma꞉ ebeno ape keba ka꞉na ka꞉kodakoduiminako ba꞉ba ka꞉na.
1TI 4:8 Ama꞉ iya꞉tawala bolamo iya꞉da꞉mipa꞉te ibino ape helohelonomoma꞉ keda꞉hama꞉ keba ka꞉na ka꞉midilinaka, iyo, ba꞉ba ka꞉na iba꞉te ibino katene ape owalubilima꞉ ba꞉moe komo bododinaka. Huiyatiya numa꞉, amia꞉no tepo ipuwate heloma꞉ keda꞉ma꞉ ama꞉le amia꞉no ukui atumu da꞉kodakoduiminakomena꞉, ba꞉moe gabodo ama꞉ ha꞉kiya ama꞉ owalubima꞉ hidonomo komo bododinakomena꞉ta, mabu ama꞉ ba꞉moe hopolo Godokono hido emede komokomo duwatemena꞉ galane wiboha꞉ ka꞉ka꞉ hibilo konelawema꞉na꞉ta.
1TI 4:9 Ba꞉bema꞉ nale ama꞉tamo da꞉goemo, wadiyala ama꞉ ba꞉moe tabo kodakodalo na꞉lawa꞉,
1TI 4:10 mabu a hibima꞉ midipa꞉te Godokono wiboha꞉ ka꞉ka꞉ lawema꞉ oko ebetamo helonomamo ba꞉bema꞉ owatinama꞉. Ba꞉ hibila, ebete hopo habanapi hiliyonomoeno Ka꞉ka꞉ Mula꞉ledawama꞉ ba eda꞉na hibima꞉ midipa꞉tamo hibi ka꞉ka꞉ ba꞉bo kikalamema꞉ne, iyo, ebe ba꞉ emedena emedena tetelo demedenamene ba꞉be Ka꞉ka꞉dawala, ba꞉bema꞉ ale ebeno pe komo uliholo latiminama꞉.
1TI 4:11 Ba꞉bema꞉ naeno gudu, wadiyala ama꞉ ba꞉moi tutumu tabo ba꞉gala iya꞉tulame tabo hibima꞉ midipa꞉tamo nolamaginakuya꞉.
1TI 4:12 Hibila, ama꞉ sose tawakalubi ipuwalo uli ape dubulata, huiyatiya iba꞉tamo gigiho aka꞉hiya꞉midala꞉ ibi ipuwalo etate ba꞉ma ka꞉na goe, ama꞉ sose watodawaha꞉. Iyo, wadiyala ama꞉ amia꞉no tabo olamagi komo ba꞉gala ododili komo hiliyonomo ipuwalo tuputupudawanomoma꞉ ba eda꞉ hido go iba꞉tamo na꞉hawakaliminakuya꞉. Ba꞉bema꞉ iba꞉te amia꞉no malemale emalagidolo komo ba꞉gala amia꞉no hibima꞉ midi komo ba꞉gala amia꞉no tepo ipuwoeno dalowa꞉ha꞉ ukui komo dulamelememena꞉, ba꞉ba tetelo iba꞉te ama꞉ hibi sose watodawama꞉ koka꞉mima꞉na꞉ta.
1TI 4:13 Ba꞉bene sose oko owati ipuwalo wadiyala ama꞉ hibima꞉ midipa꞉tamo Godokono Bukoeno tabo komokomo ka꞉lamiholete ebeno tabamo ibi ba owalubili ba꞉bo niya꞉tulamenakuya꞉. Numa꞉, nale Epesese habamo da꞉pemo, ba꞉ba tetelo ba꞉moi atu komokomo ama꞉go kapimilo kopododilima꞉nemo.
1TI 4:14 Ba꞉bema꞉ naeno gudu, kebe komote ama꞉tamo dopamo duluhukuya꞉, ama꞉ ba꞉be komo akadodala꞉. Iyo, ama꞉ sose oko tupuimihino watowatopa꞉te Godokono Gobogoboeno heloamo ibino kokoto ama꞉tamo ba emowatilame hidohido komate ama꞉godolo kikulihoma꞉ hibi tabo dolamagimiya꞉, ba꞉ba tetelo ama꞉le Godokono oko kowatinama꞉ ebete malemalelo hiya꞉nomo helo ama꞉tamo ikamiya꞉ta. Ba꞉bema꞉ wadiyala ama꞉ ba꞉be heloamo ebeno oko nowatinakuya꞉,
1TI 4:15 ba꞉bene sose tawakaluba꞉tamo ba꞉moi komokomo ba iya꞉tulamena amia꞉no ka꞉ka꞉ gobogobamo ihatelo heloha꞉ma꞉ akeda꞉la꞉, mabu ama꞉ ba꞉ ba꞉ba ka꞉na oko owati ipuwalo ba ape tawakaluba꞉te ba꞉be komo ba꞉bo kumima꞉na꞉.
1TI 4:16 Huiyatiya ama꞉ hidamo! Wadiyala ama꞉ ha꞉kiya amia꞉no emede komo ba꞉gala iya꞉tulame komo hidonomamo nulamenakuya꞉. Ama꞉godolo ba꞉moi netewa koko komate modobolo da꞉pola꞉namene, ba꞉ba tetelo puya꞉te amia꞉no iya꞉tulame tabo dulihona, ama꞉le ibino ka꞉ka꞉ ba꞉gala amia꞉no ka꞉ka꞉ kapimilo komula꞉lema꞉na꞉ta.
1TI 5:1 Ba꞉bema꞉ Timoti, hibima꞉ midipi ipuwalo kebe kadelete kuba dododimini, wadiyala ama꞉ ebe koamo kiyahameheno amia꞉no hibi nabiwima꞉ goelo Godokono tabamo ebe nowalubiya꞉. Ba꞉gala ama꞉ huiya uli apepeho dubuino komoma꞉ wadiyala ama꞉ ibi amia꞉no ekaki ba꞉gala nanima꞉ midiliti,
1TI 5:2 ba꞉bene kabelekabela꞉te amia꞉no menokobima꞉ neda꞉hamena꞉. Ba꞉gala ama꞉ hidamo! Ama꞉ uli apepeho kamenakamena ba꞉gala bohelemele Godokono tabamo dowalubilimina꞉, ba꞉ba tetelo ibi amia꞉no ekaki ba꞉gala nanikokubima꞉ na꞉midiliya꞉ amia꞉no tepo ipuwoeno ukuiti iba꞉tamo tuputupunomolo kitanama꞉.
1TI 5:3 Ba꞉gala eta komo. Hamolehamole ipuwalo etate hido owalubi komo lawema꞉ ebeno mabu tawakaluba꞉godolo owalubidawa hibilo umihino, wadiyala ama꞉ sose tawakalubi na꞉kiyalamiya꞉ iba꞉te ebe hidamo kowalubinakoma꞉.
1TI 5:4 Huiyatiya keba tetelo eta hamoleno koko gugudi ba꞉gala koko eyoni guguda꞉te hibima꞉ midipima꞉ deda꞉hana, wadiyala ibi ha꞉kiya ibino menoko hiliyonomo tetelo kowalubinama꞉ hidohido ukui nuwatenakamena꞉, mabu ba꞉ ba꞉ba ka꞉na ba꞉bi guguda꞉te ibino Godoko ta꞉mata komo hibilo kohawakalimima꞉na꞉. Ba꞉ hibila, nabiwi menoko iba꞉te gugudi hegehege tetelo ibi keba ka꞉na kowalubilinakui, koko guguda꞉te ba꞉bi owalubi komo emalagidolelo hido huiya ibino hamole menokotamo dikamemena꞉, Godote ibino malemale komo umilamete hidonomoma꞉ kogoema꞉ne.
1TI 5:5 Ba꞉bene kebe hamolete hido owalubi komo lawema꞉ ebeno mabu tawakaluba꞉godolo owalubidawa hibilo umihino, wadiyala ebete Godokono oko kapiya ba owatina ebeno ka꞉ka꞉ komoma꞉ aka-ukuibilibila꞉la꞉. Ba꞉ba ka꞉na ebete du hegela hiliyonomolo Godokoba꞉ tabo ga꞉lalo ebeno modoboha꞉ komokomo ba꞉gala komopino modoboha꞉ komokomo ba wadiya꞉paa꞉latelena owalubi komo ebegodone lawema꞉ uliholo na꞉latiminakamene.
1TI 5:6 Huiyatiya ama꞉ iya꞉tawala komo hamolehamoleno komo eba ka꞉naha꞉. Ibi ha꞉kiya ibi ibino kateneno ubilo kalakaluilamema꞉ ba ewagelena Godokono oko kowatinaha꞉, ba꞉bema꞉ hibila, ba꞉bako hamolehamola꞉te ibino hunu tamoeno ka꞉ka꞉ konomamo ba emalagidole huiyatiya iba꞉te tepo ipuwalo ya꞉lo a꞉ha꞉lahuya꞉.
1TI 5:7 Ba꞉bema꞉ naeno gudu, wadiyala ama꞉ hibima꞉ midipi ba꞉moi tabo komamo nowalubiliya꞉ komopa꞉te ibino hamolehamoleno ododili komo ulamelo kubama꞉ ga꞉lakapoma꞉.
1TI 5:8 Ba꞉gala ba꞉moe ba꞉ eta komola. Wadiyala hibima꞉ mididawate ebeno hibi gugudino modoboha꞉ komokomo ulamelo ibi dopamo owalubiliti, ba꞉bene ebeno komo mabu tawakalubi atumu hidamo na꞉kowalubilinakamene. Ba꞉ hibila, ebegodolo owalubi gabote ba itana ebete ibino modoboha꞉ komokomo ulamelelameheno, ebete ebeno malemale ododiha꞉ komodo ba꞉ma ka꞉na goena, Ya꞉suku hibima꞉ midi gabo ba꞉ hibiha꞉. Iyo, ebete ebeno malemale ododiliha꞉ komodo kubadawama꞉ eda꞉te, ba꞉bene ba꞉moe ebeno kuba ododi komote komo hibima꞉ midiha꞉pino kuba ododili komokomo ba꞉ a꞉gogoli.
1TI 5:9 Ba꞉bema꞉ kebe hamolete dopamo kapiyanomo awa꞉godawama꞉ deda꞉nami, ba꞉gala ebe ka꞉ma꞉ 60 gogote da꞉gogolui, wadiyala ama꞉ ba꞉bako dawoeno mahilo soseno hamolehamoleno mahilo bukamo ihatete, ba꞉bene hibima꞉ midipa꞉te ba꞉bako hamole kapiya malemalelo nowalubinakamena꞉. Huiyatiya ama꞉ ebeno mahilo ihateheno,
1TI 5:10 wadiyala sose tawakaluba꞉te ebeno ododili komo dopamo nulamelema꞉mena꞉. Ba꞉bema꞉ iba꞉te ebe hidonomo kamenama꞉ da꞉ga꞉lamena꞉, ba꞉ma ka꞉na dopamo ebeno gugudino hegehege tetelo ebete ibi hidohido iya꞉tulame komamo dowalubilinakui, ba꞉gala ba꞉ma tetelo ebete hiya꞉hiya꞉ malemale komo hiliyonomo ododilima꞉ ebeno ubi konomamo ba ihatena, ebete ebeno genamalo kapela tawakalubi hidonomamo dowalubilinako, ba꞉gala komo hibima꞉ midipi owalubilima꞉ nato ukulaleno beya iba꞉tamo da꞉wadahenako, ba꞉gala komo tetelo awaepi malemalelo atumu da꞉kowalubilinako, wadiyala ama꞉ ba꞉bako hamole kapiya owalubi na꞉tupuimiya꞉.
1TI 5:11 Huiyatiya modoboha꞉ ama꞉ uli ape hamoleno mahilo bukamo ihate. Ba꞉ hibila, kebe hamolehamoleno mahilote bukalo da꞉pola꞉lama꞉na, sose tawakaluba꞉te ibino mahilo miya꞉telameheno dopamo iba꞉te Kelisokono oko owatima꞉ ibino ape ebe kapiyatamo ikamehoma꞉ hibi tabonomo hawakala ga꞉luya꞉. Huiyatiya numa꞉, uli ape hamolete ba꞉mako hibi tabo goe a꞉kamodobamene, mabu galane ebeno kateneno ubi komate da꞉mahila꞉hamena꞉ dubu lawema꞉ gala kakewagelema꞉ne. Ba꞉bema꞉ ebe niliya, mabu ebete dopamo kebe tabo hibilo da꞉goiya꞉ ba꞉be tabo dadikamidalemene, ebeno kuba huiyate Godogodone ebetamo kopema꞉ne.
1TI 5:13 Ba꞉gala ba꞉moe ba꞉ eta komola. Uli ape hamolehamola꞉te hibima꞉ midi ipuwalo kodakodalo kala꞉mota꞉hanaha꞉, ba꞉bema꞉ diyala, iba꞉te eta kuba ododi komamo ba꞉ma ka꞉na da꞉ negudimina꞉, iba꞉te hibi oko owatihino ibino mabulubi ipuwalo eta genamane eta genamamo ba wapata꞉lame hiya꞉hiya꞉ tawakalubino komoma꞉ tabo ga꞉la ba꞉bo konetupuimima꞉na꞉. Iyo, ba꞉ba tetelo iba꞉te eta kuba ba꞉ma ka꞉na kakododima꞉na꞉, iba꞉te oko owatima꞉ buhamama꞉ ba eda꞉ha, ibi ha꞉kiya ibino hiya꞉hiya꞉ komo ulameheno, ibino tabo ga꞉la ipuwalo puya꞉te hibi oko komokomo dowatihona iba꞉tamo temeteme ba꞉bo kikalamema꞉na꞉.
1TI 5:14 Ba꞉bema꞉ na ubila uli ape hamolete dubu gala kalawete hogagoma꞉ ba eda꞉ ebeno genamalo hiya꞉hiya꞉ hidohido oko ba꞉bo nowatihonakamene, mabu kebe hibima꞉ midiha꞉pa꞉te ago dalaholohona, iba꞉te ba꞉bako kamenoeno tuputupu emede komo dumimina꞉, ebe mabuma꞉ iba꞉te gabo a꞉kuma꞉mena꞉ a hibima꞉ midipino komo kubama꞉ koga꞉lama꞉.
1TI 5:15 Numa꞉la꞉, komo hamolehamola꞉te Saitanako kota꞉matama꞉ hibima꞉ midi ipuwane ya꞉lo ohobila꞉huya꞉, ba꞉bema꞉ ibino kuba ododili mabuma꞉ komo hibima꞉ midiha꞉pa꞉te aeno emede komoma꞉ kuba tabo bega꞉lanaka.
1TI 5:16 Ba꞉bema꞉ hamolehamoleno komoma꞉ ba꞉moe tabo ba꞉ naeno iya꞉tulame tabo komola. Keba tetelo hibima꞉ midi kamenoeno mabu tawakalubi ipuwalo hamolehamola꞉te da꞉pola꞉namena꞉, wadiyala ebete ha꞉kiya ibi hidamo nowalubilinakamene, iyo, ba꞉bi hamolehamoleno tawakaluba꞉te sose ipuwalo owalubi komo uwatema꞉ akaga꞉lanakala꞉. Huiyatiya kalakala konomola, hamolehamole ipuwalo pokono mabu tawakaluba꞉te hibilo pola꞉naheno, wadiyala sosete ba꞉bako hamole kapiya malemale komamo nowalubinakamene.
1TI 5:17 Ba꞉bema꞉ ba꞉moe ba꞉ eta komola. Sose watowatopi ipuwalo puya꞉te Godokono tabo olamagimi oko ba꞉gala ebeno iya꞉tulame oko hidamo kowatihoma꞉ ibino ka꞉ka꞉ hibilo da꞉miya꞉tena, ba꞉gala puya꞉te watowatopino komo hiya꞉hiya꞉ oko hidamo dowatihona ibi atumu, wadiyala sosete ba꞉bako okopa꞉tamo huiya konomamo nikalamenakamene, netewa okoeno hido huiya keba ka꞉nala꞉ka꞉ ba꞉ba ka꞉na.
1TI 5:18 Mabu Godokono Bukalo tutumu tabote ba꞉ma ka꞉na itana, “Tawakaluba꞉te witi-laisa nahoeno kikipo kuwatema꞉ ibino kau-goete ba꞉bi ilina mikimoelelo oko iba꞉tamo dowatimini, ba꞉ba tetelo iba꞉te ba꞉be kau-goeno tabo hala꞉mo matumi modoboha꞉, mabu ebete iba꞉tamo oko owati ipuwalo witi-laisa kikipo kapiyakapiya naha modobola, iyo, ba꞉bi naha ilina ba꞉ ebeno okoeno huiya deha꞉potola.” Ba꞉bene eta tabote ba꞉ma ka꞉na ka-itana, “Okopa꞉te habaluba꞉godone huiya lawe wadiyala.”
1TI 5:19 Ba꞉gala ama꞉ hidamo, keba tetelo lumagiti ha꞉kiya ama꞉tamo pete sose watodawoeno ododi komo kubama꞉ da꞉pegoemene ebeno tabo akulia꞉la꞉, huiyatiya netewa o netewa-kapiya hibima꞉ midipa꞉te ebeno kuba komo kapimilo da꞉pehawakalimimina꞉, ba꞉ba tetelo ama꞉ tote ba꞉be sose watodawoeno komo hibilo na꞉numiya꞉.
1TI 5:20 Ba꞉bene ba꞉be sose watodawate kuba komo hibilo dododi, wadiyala ama꞉ sose tawakalubino holoholo hapulu ebe na꞉kiyahamiya꞉, ba꞉be gabodo komo watowatopa꞉te atu kuba ododilima꞉ kotoletolehoma꞉.
1TI 5:21 Ba꞉bema꞉ naeno gudu, nale Godoko ba꞉gala Ya꞉su Kelisoko ba꞉gala ibino hido-talona nopopi ibino holoholo hapulu ama꞉ bikiyamemata ba꞉moi komokomo sose ipuwalo kododilima꞉, ba꞉bene ama꞉ hidamo, sose tawakalubino komo anagilamelelame tetelo ama꞉ lumagi hunu nikapa꞉mo ba umi eta lumagi miya꞉palo eta lumagi dito akalawa꞉la꞉.
1TI 5:22 Ba꞉gala ama꞉ eta lumagino watamo kokoto emowatilamelo ebe Godokono okamo tiyolo akihata꞉la꞉, mabu keba tetelo ama꞉ tuputupu ukui komago ododihino, diyala, ama꞉le ba꞉be gabodo kuba emededawatamo oko da꞉ ikameomena꞉. Numa꞉, ebete ebeno oko habalo ba luta komo kuba komokomo gala da꞉kododilimini, ba꞉ba tetelo ebeno kuba huiyate ama꞉tamo atumu kopema꞉ne. Ama꞉ hidamo, amia꞉no ododili ipuwalo gigiho aka꞉hiya꞉midala꞉ tepo ipuwoeno dalowa꞉ komote ama꞉tamo kopema꞉!
1TI 5:23 Ba꞉gala Timoti, ba꞉moe ba꞉ eta komola. Komo hiya꞉hiya꞉ tetelo kateneno temeteme komate amia꞉no tepo ipuwalo ama꞉ uminakata, ba꞉bema꞉ beya kapiyanomo akana꞉la꞉, wadiyala ama꞉ huiyatiya komo tetelo helo gala꞉ipi gao beya nanekela꞉mo na꞉ninakuya꞉.
1TI 5:24 Ba꞉gala sose oko owati ipuwalo ba꞉moe eta komo na꞉kemalagidola. Komo tawakalubino kuba ododili komate hawakala ba꞉pola꞉lama꞉na, ba꞉bema꞉ komopa꞉te na꞉ga꞉lana iba꞉te galane kuba huiya hibinomolo kuwatema꞉na꞉. Huiyatiya komo tawakalubino kuba ododili eba ka꞉naha꞉ mabu iba꞉te ibino kuba ododili komo nugumuilina, ba꞉bema꞉ numa꞉, galane Godote ebeno ubi tetelo ba꞉bi kuba komo hiliyonomo kohawakalilamema꞉ne.
1TI 5:25 Ba꞉ hibila, tawakalubino hidohido ododili komate atumu hawakala ba꞉pola꞉na, huiyatiya komo kapiyakapiya awalelalo da꞉pola꞉na ba꞉bi komate Godokono hido tetelo hibilo kohawakalahalema꞉na꞉.
1TI 6:1 Ba꞉bema꞉ ba꞉moe ba꞉ eta komola. Koko okopi dubate pui mana꞉mo duwatiya꞉ iba꞉tamo huiyaha꞉ oko kowatihonama꞉, ba꞉bi huiyaha꞉ okopi ipuwalo puya꞉te hibima꞉ midipima꞉ deda꞉hana, wadiyala iba꞉te ibino tepo ipuwoeno ukuilo ibi ha꞉kiya ibi hopamo ba miya꞉te ibino oko namutulubi hunamo na꞉wadiya꞉paa꞉latelenakamena꞉. Numa꞉, hibima꞉ midiha꞉pa꞉te ba꞉bako okopino tuputupu emede komo dulamelelamemena꞉, ibi mabuma꞉ iba꞉te gabo a꞉kuma꞉mena꞉ aeno iya꞉tulame komo kubama꞉ koga꞉lama꞉, iyo, iba꞉te ibino tabo ga꞉la ipuwalo Godokono mahilo atumu a꞉kakubahima꞉mena꞉.
1TI 6:2 Ba꞉bene huiyaha꞉ okopi ipuwalo puya꞉te hibima꞉ midipi namutuluba꞉tamo oko dowatina, ba꞉ba꞉te kuba tabo ba꞉ma ka꞉na akaga꞉lala꞉, “Aeno oko namutulubi koko tawakalubiha꞉. Ao, ibi a keba ka꞉nala꞉ka꞉ ba꞉bako hibima꞉ midipi ekakila, ba꞉bema꞉ ale iba꞉tamo hibi oko a꞉kowata꞉ma꞉!” A꞉iye, ba꞉bako ukui tabo ba꞉ kubanomola! Wadiyala ba꞉bi huiyaha꞉ okopa꞉te huiyatiya ibino namutulubino hibima꞉ midi komo ba emalagidolo, ibi malemalelatelelo ubi konomamo ba꞉bo na꞉miya꞉tenakamena꞉, iba꞉te oko owati ipuwalo ibino namutulubi kowalubilinama꞉. Ba꞉bema꞉ Timoti, wadiyala ama꞉ Godokono tabo ba olamagi ba꞉moi komokomo sose tawakalubi hidamo niya꞉tulamiya꞉.
1TI 6:3 Numa꞉, aeno iya꞉tulame komate tawakalubi bowalubilina iba꞉te Godotamo hibilo kopapamila꞉halema꞉, huiyatiya kebe lumagiti hiya꞉ gaboeno komokomo diya꞉tulamenako, ebete aeno Kodawa Ya꞉su Kelisokono hiya꞉hiya꞉ mulu iya꞉tulame komago kapiyama꞉ keda꞉naha꞉,
1TI 6:4 mabu ba꞉bako ha꞉da tabo iya꞉tulamedawa ebe ha꞉kiya ebe ba awagaminana ebegodolo eta hido ukui kapiyate kitama꞉naha꞉. Ebe ubi konomola tawakalubi kubahilamelo iba꞉go hiya꞉hiya꞉ taboeno ipuwama꞉ olowabeletihui, ba꞉bema꞉ ba꞉moe komo ipuwane hiya꞉hiya꞉ kubate ikulinaka. Ba꞉ ba꞉ma ka꞉na ebete komopino ilina mabuma꞉ iba꞉tamo na꞉maubana, ba꞉gala ebete komopi ipuwalo anagiya꞉mida komo bewadiya꞉paa꞉latelenako, ba꞉gala ebete komopi biduduputilamenako, ba꞉gala ebete ebeno kuba tepo ipuwoeno ukuilo komopino ododili komo kubanomoma꞉ goenako,
1TI 6:5 ba꞉gala ebete komo atu kubakuba ukuipa꞉go alaholo komo a꞉kamiya꞉pale. Ba꞉ hibila, ba꞉bako dubu hiliyonomate Godokono hibi gabo ya꞉lo a꞉miya꞉puya꞉, ba꞉bema꞉ ibino daedae ukuilo ha꞉da tabo ba꞉ma ka꞉na ga꞉lana, lumagiti Godoko ta꞉mata ipuwalo dogodogodawama꞉ keda꞉ma꞉ne.
1TI 6:6 Huiyatiya Godokono hibi komo ba꞉ma ka꞉nala. Kebe lumagiti ebe ta꞉matama꞉ ebeno kalakala ipuwalo demedena, ba꞉be lumagiti Hunu Haboeno hido komokomo konomamo kuwatema꞉ne, hopo haboeno ilinaha꞉.
1TI 6:7 Ba꞉be mabuma꞉ hido tepo ipuwoeno ukuia꞉gopa꞉te ba꞉ma ka꞉na emalagidolona, “A hopo habalo da꞉hawakalahaliya꞉ma꞉ bada ilinago ka꞉pikuliya꞉ma꞉? Puliyala! Ba꞉gala ale da꞉ha꞉lahama꞉ bada ilinago na꞉ka꞉tolamema꞉? Puliyanomola!
1TI 6:8 Ba꞉be mabuma꞉ a hopo habalo ba emedena agodolo kebako kapiyakapiya naha ilina ba꞉gala pupulino ilinate modobolo da꞉pola꞉ma꞉na, wadiyala kalakalate agodolo nitanamene!”
1TI 6:9 Huiyatiya numa꞉, kebe tawakaluba꞉te dogodogopima꞉ eda꞉hama꞉ ubi dihatena, Saitanate ibi kuba gabamo ba emogabuilame iba꞉te ebeno guba꞉mo ba꞉bo konegudima꞉na꞉. Iyo, ebe ubila ebete ba꞉bi tawakalubi kubahilamema꞉, ba꞉bema꞉ ebete ibi ibino daedae ubi komamo uwatete hoe ipuwamo ba꞉bo kadimuya꞉midalema꞉ne.
1TI 6:10 Ba꞉bema꞉ hibila, lumagiti mani koamo demalagidolona, ba꞉be komo ba꞉ ba꞉be lumagino hiliyonomo kuba ododili komoeno mabula. Iyo, komo tawakaluba꞉te koko mani uwatema꞉ ubi miya꞉telo hibima꞉ midi ipuwane dikuliya꞉, ba꞉moe ba꞉be gabodo ibi ha꞉kiya iba꞉tamo koko tepo temeteme ba꞉bo ikalamiya꞉.
1TI 6:11 O naeno gudu, ama꞉ huiyatiya Godokono hido okodawalata, ba꞉bema꞉ wadiyala ama꞉ ba꞉moi kuba ubi komo hiliyonomo kuba nibote patema꞉ goelo Godokono hido emede komokomo hidonomamo na꞉ta꞉mataliya꞉. Ba꞉ma ka꞉na Godoko hibima꞉ midilo ebe kapiyatamo papamiwata komo, ba꞉gala ebeno tuputupu ododili komo, ba꞉gala ebeno malemale emalagidolo komo, ba꞉gala ebeno tataba emede komo, ba꞉gala temeteme ipuwalo kodakodalo la꞉na komo, ba꞉moi hiliyonomo komate ama꞉godolo na꞉pola꞉namena꞉.
1TI 6:12 Ba꞉bene ama꞉le hibima꞉ midi ipuwalo kuititi teta꞉mo modobolo konuluhukuma꞉, wadiyala ama꞉ kodakodama꞉ nediya꞉, sikulu gugudino iya꞉da꞉mi hegelalo etate dopodawama꞉ keda꞉ma꞉ helonomamo da꞉puliganako ba꞉ba ka꞉na. Ba꞉ ba꞉ma ka꞉na ama꞉ Godogodone wiboha꞉ ka꞉ka꞉ konelawema꞉na꞉ta, mabu ama꞉le dopamo tawakalubino holoholo hapulu Godoko ta꞉matama꞉ hibi tabo da꞉goiya꞉la, ba꞉ba tetelo ebete ba꞉be ka꞉ka꞉ ama꞉tamo ikamema꞉ ka꞉miya꞉ta.
1TI 6:13 Ba꞉bema꞉ numa꞉, Godoko ba꞉ hopo ilina hiliyonomatamo ka꞉ka꞉ dikalamena ba꞉be Kodawala, ba꞉gala Ya꞉su Kelisoko ba꞉ Poniyase Paeletekono dopo hapulu ebeno hibima꞉ midi komo da꞉hawakalimiya꞉ ba꞉be Hibidawala. Ba꞉bema꞉ naeno gudu, nale ibi netewapino holoholo hapulu ama꞉ koamo tutumutimata,
1TI 6:14 ama꞉le aeno Kodawa Ya꞉su Kelisokono pe kuitita꞉mo ebeno hiya꞉hiya꞉ tutumu tabamo hidonomamo na꞉papamiwatanakuya꞉, iyo, modoboha꞉ komopa꞉te eta kapiya deha꞉potonomo komoma꞉ amia꞉no oko kubama꞉ ga꞉la.
1TI 6:15 Ba꞉ hibila, Godoko kapiya ba꞉ Hidonomodawala ba꞉gala Hununomodawala! Iyo, hopo habanapino hiliyonomo kokopi ba꞉gala gawadubu ipuwalo ebe kapiya ba꞉ Konomodawala, ba꞉gala ebe kapiya ba꞉ Konomo Gawadubula! Ba꞉be mabuma꞉ ebete modobo tabo da꞉goemene, ba꞉be hido tetenomolo Ya꞉suti hopo habamo gala kakapema꞉ne.
1TI 6:16 Iyo, hibila, Godoko kapiya ba꞉ emedena emedena Ka꞉ka꞉dawala. Ebete kebe konomo alo ipuwalo demedena, eta lumagiti ebeno holoholo hapuamo konuluhukuma꞉ ba꞉be alo ipuwamo to modoboha꞉, ba꞉bema꞉ hopo habanapi hiliyonomo ipuwalo etate ebe dopamo kumiya꞉ha꞉ ba꞉gala ba꞉ma tetelo ibi ipuwalo etate atumu ebe kuminaha꞉. Ba꞉bema꞉ wadiyala emedena emedena tetelo awagaha komo ba꞉gala helo konomote ebegodolo na꞉pola꞉namena꞉! Ba꞉ba꞉la!
1TI 6:17 Ba꞉bema꞉ puya꞉te ba꞉moe hopolo dogodogopima꞉ deda꞉hana, wadiyala ama꞉ ibi na꞉kiyalamiya꞉ ibi ha꞉kiya ibino komoma꞉ akawagahala꞉. Wadiyala iba꞉te huiyatiya ibino dogodogo ilina koamo emalagidoleheno, Godoko kapiya ibino owalubidawama꞉ ga꞉lalo ebeno pe komoma꞉ uliholo na꞉latiminamena꞉. Ba꞉ hibila, Godote ha꞉kiya aeno modoboha꞉ komo ba ulamelea꞉mena, ebete kebe hiya꞉hiya꞉ ilinamo a koamo dowalubinako, ebe ubi bihatena ale ba꞉bi ilinama꞉ hibilo kokalakalahanama꞉.
1TI 6:18 Ba꞉gala ama꞉le ibi gala ba꞉ma ka꞉na na꞉kakiyalamiya꞉, wadiyala iba꞉te ibino hido ododili komokomo na꞉dogodoguilama꞉mena꞉, iyo, iba꞉te konomo malemale hawakalimi ipuwalo ubiha꞉ma꞉ akeda꞉hala꞉ komopino modoboha꞉ komokomo komodobuilamelelamema꞉.
1TI 6:19 Numa꞉, ba꞉ ba꞉moe gabodo ibi ha꞉kiya ibi kowalubilima꞉na꞉, mabu Godokono Hunu Habalo ibino dogodogo ilinate hibilo ba꞉nepola꞉lama꞉namene, iyo, ibino malemale hawakalimi komo ba꞉ ibino genamoeno kodakoda mabu huiyala, mabu iba꞉te galane tetelo Godogodone da꞉nelawemena꞉ ba꞉be hibi ka꞉ka꞉ ba꞉ ibino wiboha꞉ ka꞉ka꞉ komola.
1TI 6:20 O Timoti, ama꞉ nolata! Godote ama꞉ hido okodawama꞉ goelo ama꞉tamo kebe hiya꞉hiya꞉ oko dikamehuya꞉la, wadiyala ama꞉ ba꞉bi oko hidonomamo nulamenakuya꞉. Ba꞉bema꞉ ha꞉da amiho tawakaluba꞉te kebe komokomo mulu iya꞉tawa komoma꞉ da꞉ga꞉lana, ama꞉ ba꞉bako daedae tabo olamagimi ipuwamo akanopegala꞉. Wadiyala ama꞉ huiyatiya ibi miya꞉palete iba꞉go akolowabeletihuia꞉la꞉, mabu hibila, ibino tabo ga꞉la komate komo ulihopi Godoko holoholoha꞉pima꞉ midilinaka,
1TI 6:21 iyo, dopamo komo ba꞉bako tawakalubi ibi ha꞉kiya ibi mulu iya꞉tawahapima꞉ ba ga꞉la iba꞉te hibima꞉ midi ipuwane ba꞉ dito ikuliya꞉. Naeno gudu, wadiyala Godokono malemale komote ama꞉ ba꞉gala ama꞉go da꞉kapiyuiminaka la꞉ hiliyonomagodolo nitanamene. Ba꞉moe ba꞉ naeno tabo kuititila. Ba꞉ba꞉la.
2TI 1:1 Na ba꞉ Polotela, Ya꞉su Kelisote ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala. Iyo, Godote ebeno ubilo na a꞉laweniya꞉, nale ebeno oko ba owatina tabo ba꞉ma ka꞉na kolamaginakoma꞉, Ya꞉su Kelisoko ipuwalo ditana ebete ba꞉be ka꞉ka꞉ ebe ta꞉matapa꞉tamo dito kikalamema꞉ hibinomolo a꞉goiya꞉.
2TI 1:2 O Timoti, ama꞉ ba꞉ nale koamo demalagidolonama ba꞉be gudulata, ba꞉bema꞉ nale ba꞉moe leta ama꞉tamo poememo. Wadiyala Nabiwi Godoko ba꞉gala aeno Kodawa Ya꞉su Kelisoko iba꞉te ibino malemale komo, ba꞉gala lumagitamo kuba huiya ikameha꞉ komo, ba꞉gala hete komo ama꞉tamo nikama꞉mena꞉ta.
2TI 1:3 Ba꞉ hibila, nale naeno tepo ipuwoeno mulu ukui komamo Godotamo oko bowatinamo, naeno komo Yunapi iniwala꞉te ebetamo hibi oko dopamo keba ka꞉na kowatinama꞉ ba꞉ba ka꞉na. Ba꞉bema꞉ komo du hegela hiliyonomolo naeno toetoe tabo olamagi ipuwalo nale ama꞉ ba emalagidolo amia꞉no komoma꞉ kalakala tabo ebetamo goelo ama꞉ ba꞉bo adipatenakomata.
2TI 1:4 Iyo, ba꞉be ododi komodo nale amia꞉no ihi komo kadodonaha꞉, ba꞉bema꞉ na ubi konomamo nihatenamo ama꞉ gala kakumima꞉, mabu na iya꞉tawala nale ba꞉ba tetelo naeno tepo ipuwalo konomomamo kokalakalama꞉nemo.
2TI 1:5 Ba꞉gala nale atumu amia꞉no hidonomo hibima꞉ midi komo kadodonaha꞉. Ba꞉ hibila, kebe hibima꞉ midi komote dopamo amia꞉no kabele Lowisigodolo ditanami, ba꞉be atu komote amia꞉no menoko Yunisigodolo gala na꞉ka-itanami, ba꞉bema꞉ kalakala konomola, na iya꞉tawala ba꞉ma tetelo ba꞉be atu hibima꞉ midi komote ama꞉godolo hibilo ba꞉ka-itana.
2TI 1:6 Ba꞉be mabuma꞉ nale ama꞉ gala na꞉kakiyamemata, ama꞉ sose oko tupuimihino dopamo nale ama꞉tamo kokoto demowatilamiya꞉mo, ba꞉ba tetelo ama꞉le Godokono oko kowatinama꞉ ebete malemalelo ama꞉tamo kebe hiya꞉nomo helo kikametiya꞉la, wadiyala ama꞉ ba꞉be heloamo ebeno oko nowatinakuya꞉. Iyo, lumagiti koe powa deha꞉potoamo ko koe keba ka꞉na kemadonako, ba꞉ ba꞉ba ka꞉na wadiyala ama꞉ Godokono oko ba owatina ebeno helote ama꞉ ipuwalo konomoma꞉ neda꞉mene.
2TI 1:7 Numa꞉, ale Godokono oko kowatinama꞉ ebete atamo tole komo kikaa꞉miya꞉ha꞉. Ao, ebete huiyatiya ebeno helo atamo ikaa꞉mete, ba꞉bene ebeno malemale emalagidolo komo atumu atamo kikaa꞉mete, ba꞉bene ebete hido ukui atamo atumu aka-ikaa꞉miya꞉ ale kateneno ubi komamo papamila꞉hakapoma꞉.
2TI 1:8 Ba꞉bema꞉ ama꞉ Kodawa Ya꞉sukunu komo hawakalimima꞉ akahilopala꞉, ba꞉gala nale ebe mabuma꞉ gabomanino du genamalo demedenamo ba꞉be komoma꞉ atumu akahilopala꞉. Iyo, na keba ka꞉nala꞉ka꞉, wadiyala ama꞉ ba꞉ba ka꞉na ebeno Hido Tabo olamagima꞉ komo temeteme hibima꞉ midiha꞉pa꞉godone kalakalago nuwatenakuya꞉, ba꞉bene Godote ama꞉tamo helo kikamema꞉na꞉ta ba꞉bi temeteme ipuwalo kodakodalo kola꞉nama꞉.
2TI 1:9 Ba꞉bema꞉ numa꞉, a hibima꞉ midipa꞉te Godokono talonapima꞉ keda꞉hanama꞉ ebete aeno ka꞉ka꞉ mula꞉lea꞉mete ebeno malemale ipuwado a ba꞉bo ka꞉miya꞉, aeno hidohido ododili komodoha꞉. Iyo, ba꞉moe hopo tupuimihino ebete dopamo ebeno ubilo ba꞉moe malemale komo Ya꞉su Kelisoko ipuwado atamo ikaa꞉miya꞉.
2TI 1:10 Ba꞉be mabuma꞉ aeno Ka꞉ka꞉ Mula꞉dawa Ya꞉su Kelisote ba꞉moe hopamo da꞉piya꞉, ebete ba꞉be malemale komo atamo hibilo a꞉pehawakalimiya꞉, iyo, ale ebeno Hido Tabo uliho komodo ba꞉moe komo iya꞉tawahuya꞉ma꞉, ebete hoe komoeno helo anakapumiti wiboha꞉ ka꞉ka꞉ atamo ba꞉bo adahiya꞉.
2TI 1:11 Ba꞉bene Godote na ba꞉bo laweniya꞉, nale ebeno oelamepi dubu ipuwalo etama꞉ keda꞉nama꞉, mabu ebe ubila nale Ya꞉sukunu Hido Taboeno hiliyonomo komokomo ba niya꞉tulame tawakaluba꞉tamo konolamaginakoma꞉.
2TI 1:12 Ba꞉moe ba꞉be mabuma꞉ na komopa꞉godone temeteme uwatenakomo, huiyatiya numa꞉, nagodolo hilopo komo kitanaha꞉ mabu nale poko hibima꞉ da꞉midinamo ba꞉be Kodawoeno helo na iya꞉tawala. Ba꞉bema꞉ hibila, ebete na hido okodawama꞉ goelo natamo dikanamiya꞉, ba꞉be Hido Tabo olamagi oko ebete Kuititi Hegela teta꞉mo hidamo ba buiya꞉minanato eta dawate a꞉kakubahiminakamene.
2TI 1:13 Ba꞉bema꞉ Timoti, ama꞉le Ya꞉su Kelisoko ipuwalo ba emedena, ebete ama꞉tamo dikamenaka, wadiyala ama꞉ ba꞉be hibima꞉ midi komo ba꞉gala malemale emalagidolo komo na꞉watila꞉mota꞉na, ba꞉gala ama꞉le nagodone kebe mulu iya꞉tulame komokomo kulihuya꞉la, wadiyala ama꞉ ba꞉bi komo atumu kodakodalo uwatete na꞉ta꞉mataliya꞉, mabu ba꞉bi iya꞉tulame komate tawakaluba꞉tamo hido emede go behawakalimina.
2TI 1:14 Ba꞉gala eta komo. Godote ama꞉ hido okodawama꞉ goelo Hido Tabo olamagi oko ama꞉tamo dikamiya꞉la, wadiyala ama꞉ ebeno Gobogoboeno heloamo ba꞉be oko hidamo na꞉buiya꞉minaniya꞉. Kalakala konomola, ba꞉be Hido-talona Dawate a hibima꞉ midipi ipuwalo bemedena!
2TI 1:15 Naeno gudu, ama꞉ iya꞉tawala, Paigelasiko ba꞉gala Hemogenesiko iba꞉te na miya꞉panete, ba꞉bene A꞉isiya hopo konomolo demedehona ba꞉bi tawakalubi hiliyonomate nagodone atumu a꞉kohobila꞉huya꞉.
2TI 1:16 Huiyatiya Onisipolasikono komo hiya꞉la, mabu nale gabomanino du genamalo demedenamo ebete ba꞉be komoma꞉ hilopoheno komo hiya꞉hiya꞉ tetelo na dito owalubininakui, ba꞉bema꞉ wadiyala Kodawa Ya꞉suti ebe ba꞉gala ebeno genamanapi iba꞉tamo ebeno malemale na꞉hawakalima꞉mene.
2TI 1:17 Numa꞉, ebete Loma ko habamo da꞉puluhukui ba꞉be atu hegelalo na kowalubinima꞉ na ohowadininapete du genamalo ba꞉bo punami,
2TI 1:18 ba꞉bema꞉ Kodawate ebeno Kuititi Hegelalo tawakalubino komo danagilamelelamemene, komo tawakaluba꞉te ibino kuba huiya ebegodone ba uwate, wadiyala Onisipolasiti huiyatiya ebegodone malemale kapiya na꞉lawa꞉mene! Ama꞉ iya꞉tawanomola, na Epesese ko habalo komo hegelalo da꞉pemedimo ebete kebako hido ododili komodo na dowalubininakui.
2TI 2:1 Ba꞉bema꞉ naeno gudu Timoti, wadiyala ama꞉ Ya꞉su Kelisogodone da꞉pena ba꞉be malemale ipuwalo kodakodalo utiti heloma꞉ neda꞉na.
2TI 2:2 Ba꞉gala puya꞉te hibima꞉ midi ipuwalo ukui gagagagaha꞉ma꞉ eda꞉halo oko hibilo dowatina, wadiyala ama꞉ ba꞉bako dubu kapiyakapiya uwatete ibi hidonomamo niya꞉tulamenakuya꞉, iyo, dopamo ama꞉ ba uliho nale hiliyonomo tawakalubino holoholo hapulu kebe komokomo kolamaginakuimo ba꞉bi atu komamo ibi nowalubiliya꞉. Numa꞉, ama꞉le komo hibi okopi ba꞉ba ka꞉na diya꞉tulamemena꞉, galane iba꞉te ba꞉bi atu komo komopi hidamo koniya꞉tulamema꞉na꞉.
2TI 2:3 Ba꞉gala eta komo, ama꞉ Ya꞉su Kelisoko mabuma꞉ Saitanakoba꞉ alaholodawama꞉ ba eda꞉na komo hibima꞉ midipa꞉godone hiya꞉hiya꞉ temeteme duwatenaka, wadiyala ama꞉ heloha꞉ma꞉ akeda꞉la꞉.
2TI 2:4 Numa꞉, hido alaholoho dubuti ebeno watodawa kapiya kalakaluimima꞉ ubi ba ihate, ebe ha꞉kiya ebeno ubi komokomo a꞉kododila꞉le. Ba꞉ ba꞉ma ka꞉na ebete alaholoho komo kapiya emalagidoloma꞉ ba kalakala, ebete ubiha꞉ma꞉ eda꞉na kamenakamena ba꞉gala gugudi ba꞉gala komo alaholoho komo ododiha꞉pino hiya꞉hiya꞉ emede komate ebe matuhumiho, mabu ebe iya꞉tawala alaholoho ipuwalo ba꞉bi komate ebe heloha꞉dawama꞉ komidima꞉na꞉.
2TI 2:5 Ba꞉gala bolamo iya꞉da꞉dawate atumu eta kapiyuimino wato kikipo lawema꞉ ubi ba ihate, ebete bolamo iya꞉da꞉ komoeno tutumu tabamo papamiwatalo ebe ha꞉kiya ebeno ubi komokomo a꞉kododila꞉le, mabu ebe iya꞉tawala ebete ba꞉ba ka꞉na ewageleheno eta kapiyuimipa꞉te wato kikipo ebegodone dito kolawema꞉na꞉.
2TI 2:6 Ba꞉gala pali ododidawate ebeno oko helonomamo kowatima꞉ne, mabu ebe iya꞉tawala tawakaluba꞉te hibi tabo ba꞉ma ka꞉na ga꞉lana, ebeno pali ilinate dikulihomena꞉ ebe ba꞉ dopo lumagima꞉ keda꞉ma꞉ne pali ilina ipuwalo ebeno komokomo kuwatema꞉.
2TI 2:7 Ba꞉bema꞉ naeno gudu, nale dolamagitamo wadiyala ama꞉ ba꞉be taboeno ipuwa hidamo nemalagidola, mabu Godote hidohido ukui ama꞉tamo kikamema꞉na꞉ta naeno tabo komokomoeno ipuwa hiliyonomo hidamo kemalagidolema꞉.
2TI 2:8 Ba꞉gala wadiyala ama꞉ Ya꞉su Kelisokono komo hidamo nemalagidola, ba꞉ma ka꞉na ebe Ko Gawadubu Da꞉ibidikono galanepi ipuwalo hawakalate, ba꞉bene ebete da꞉hoiya꞉ Godote ebe ka꞉ka꞉mo gala a꞉kadipatiya꞉. Ba꞉ hibila, nale ebeno Hido Tabo ba olamagi ba꞉moi koko komo da꞉hawakalilamenakomo,
2TI 2:9 ba꞉be mabuma꞉ hibima꞉ midiha꞉pa꞉te koko temeteme natamo ikanamenaka. Iyo, ba꞉ma tetelo na du genamalo ba emedena iba꞉te naeno kokoto auli hala꞉mo a꞉matuhulamiya꞉, gabomana꞉te konomo kuba ododidawoeno kokoto keba ka꞉na ka꞉matuhulamelemenaka ba꞉ba ka꞉na. Huiyatiya kalakala konomola, mabu Godokono hibi okopa꞉te dolamagiminaka ba꞉be tabote helonomoma꞉ ba eda꞉na, eta lumagiti ba꞉be tabo olamagi komo matuhumiho modoboha꞉!
2TI 2:10 Ba꞉bema꞉ nale komo hiya꞉hiya꞉ temeteme kalakalago uwatenakomo, mabu Godote pui ebeno gugudima꞉ keda꞉hama꞉ dopamo da꞉ka꞉lamiholiya꞉, na ubila ba꞉bi tawakaluba꞉te Ya꞉su Kelisoko ipuwado ka꞉ka꞉ mula꞉ komo nago lawete emedena emedena tetelo ale ebeno awagaha ipuwalo kapimilo bemedenama꞉.
2TI 2:11 Ba꞉bema꞉ numa꞉, eta ohale ododidawate aeno ka꞉ka꞉ mula꞉ komo ba emalagidolo hibi tabonomo ba꞉ma ka꞉na miya꞉tiya꞉, “Mabu ale Ya꞉sukuba꞉ a꞉ha꞉lahuya꞉ma꞉, ale eba꞉go Hunu Habalo ba꞉nemedehonama꞉,
2TI 2:12 ba꞉bene temeteme ipuwalo ale heloha꞉ma꞉ eda꞉haheno, galane eba꞉go koko gawadubuma꞉ keda꞉hama꞉nema꞉, huiyatiya ale temeteme ipuwalo ebe iya꞉tawaha꞉ma꞉ da꞉ga꞉lama꞉, ba꞉be mabuma꞉ ebete atumu a iya꞉tawaha꞉ma꞉ kogoema꞉ne.
2TI 2:13 Huiyatiya kalakala bada konomola꞉ka꞉, mabu keba tetelo ale ebe hibilo ta꞉mataheno, ba꞉ba tetelo ebete Hibidawanomoma꞉ ba eda꞉na a dito a꞉kamiya꞉poa꞉mene, iyo, ebete a kowalubima꞉ dopamo hibilo da꞉goiya꞉, ebete ba꞉be tabo tama꞉mo ihate modoboha꞉!”
2TI 2:14 Ba꞉bema꞉ Timoti, wadiyala ama꞉ ba꞉moi komokomoma꞉ sose tawakalubi gala ba kakiyalame, Godokono holoholo hapulu ibi ba꞉ma ka꞉na na꞉kiyahalamiya꞉, iba꞉te hiya꞉hiya꞉ iya꞉tulame taboeno ipuwama꞉ akolowabeletihuia꞉la꞉. Ba꞉ hibila, ba꞉bako ododi ipuwalo hido komote a꞉kuluhukamene mabu olowabeletihui komote ulihopi kokubahilamema꞉ne.
2TI 2:15 Ba꞉bene ama꞉le amia꞉no oko ipuwalo Godoko kokalakaluimima꞉, wadiyala amia꞉no ape konomo ebetamo ikamenomo nikamiya꞉, mabu kebe okodawate Godokono hibi tabo komopi hidamo diya꞉tulamenako ba꞉be lumagiti hilopo komo a꞉kiya꞉tawamene.
2TI 2:16 Ba꞉bema꞉ puya꞉te Godotamo papamila꞉ha ubiha꞉ma꞉ deda꞉hana ibino tabo ga꞉la ipuwamo aka꞉pa꞉gala꞉, mabu ibino daedae iya꞉tulame komate pui kuba gabamo demogabuilamena, iba꞉te ba꞉bako ulihopi Godogodone muhulunomamo komagatalema꞉na꞉,
2TI 2:17 iyo, ibino kuba iya꞉tumi komote ba꞉ konomo kuma tawetawete lumagino ape ipuwamo keba ka꞉na ka꞉tonako ba꞉ba ka꞉nala. Ba꞉ hibila, Haimaneyasiko ba꞉gala Pailitasiko ibi netewapi ba꞉ ba꞉ba ka꞉nala.
2TI 2:18 Iba꞉te Godokono hibi iya꞉tumi komo ba miya꞉pa ha꞉da tabo ba꞉ma ka꞉na ga꞉lana, puya꞉te hibima꞉ midi ipuwalo da꞉ha꞉lahuya꞉ Godote ibi ka꞉ka꞉mo ya꞉lo a꞉wadiya꞉paa꞉lateliya꞉, ba꞉bene ebete komo a hibima꞉ midipi ka꞉ka꞉mo a꞉kawadiya꞉paa꞉tea꞉mene! A꞉iye, iba꞉te ba꞉moe kuba iya꞉tumi komamo komopino hibima꞉ midi komo gobogobamo iya꞉hekelamenaka!
2TI 2:19 Huiyatiya kalakala konomola, tete hiliyonomolo Godokono Genamoeno hibi kodakoda hototote ba꞉la꞉na, ba꞉be hototo hunamo ebete ba꞉moe tabo ya꞉lo a꞉miya꞉tiya꞉, “Puya꞉te Godokono tawakalubima꞉ deda꞉hana, ebete ibino komo iya꞉tawanomola,” ba꞉bene hototo gala hapuamo ebete tabo gala ba꞉ma ka꞉na kamiya꞉tiya꞉, “Puya꞉te ibi ha꞉kiya Godokono tawakalubima꞉ da꞉ga꞉lana, wadiyala iba꞉te kuba ododili komone hibilo nohobila꞉hamena꞉.”
2TI 2:20 Ba꞉bema꞉ numa꞉, dogodogodawoeno ko genamalo hiya꞉hiya꞉ kalili ba꞉gala meleke ba꞉ma ka꞉na pola꞉na, komo golodo ba꞉gala siliba ilinamo ododili kokonomo huiya ilinala, ba꞉gala komo kehamo ba꞉gala gebetamo ododili hopodopo huiya ilinala, ba꞉bene ebete ba꞉bi hiya꞉hiya꞉ kalili ba꞉gala meleke ipuwalo komo uwatete ibi hunamo ebeno baa꞉ a꞉miya꞉tenako, huiyatiya ebete komo kuwatete ba꞉bamo nene dito iya꞉hekenako.
2TI 2:21 Ba꞉moe tabo komo ba꞉ gola, ba꞉ma ka꞉na Godoko ba꞉ dogodogodawa huiyala, ba꞉gala tawakalubi ebeno genamalo da꞉pola꞉na ba꞉bi hiya꞉hiya꞉ kalili ba꞉gala meleke huiyala. Ba꞉be mabuma꞉ wadiyala lumagiti kuba ododili komo hiliyonomo miya꞉palete ebeno namutudawa Godokono oko kapiya kowatinama꞉ ebe ha꞉kiya ebe na꞉hiduima꞉mene, mabu Godote ba꞉be lumagino tepo ipuwa hidamo itanalo dumimimini, ebete ebe lawete hiya꞉hiya꞉ hiliyonomo hidohido komo ebe ipuwado ba꞉bo kododilima꞉ne.
2TI 2:22 Ba꞉bema꞉ naeno gudu, uli ape tawakaluba꞉te ibino kateneno kuba ubi gabodo kebe komokomo kododilinaka, ama꞉ ba꞉bi komo kuba nibote patema꞉ goelo ba꞉bi ododili ipuwane nalahula꞉nakuya꞉. Wadiyala ama꞉ huiyatiya tuputupu emede komo ba꞉gala hibima꞉ midi komo, malemale emalagidolo komo ba꞉gala hete komo, ba꞉bi komokomo uwatema꞉ ubi konomamo nihatenakuya꞉. Ba꞉ hibila, puya꞉te ibino tepo ipuwalo dalowa꞉ ukui emalagidoleheno Kodawa Godote ibi kowalubilima꞉ ebe da꞉toemehonaka, ba꞉ba꞉te ibino ubi komo ama꞉go kapimilo ba꞉ba ka꞉na miya꞉tenaka.
2TI 2:23 Huiyatiya komopa꞉te ibino daedae ukuilo hiya꞉hiya꞉ iya꞉tulame taboeno komoma꞉ dolowabeletihuinaka, ama꞉ ibino tabo ga꞉la komamo aka꞉pa꞉gala꞉, mabu ama꞉ iya꞉tawala, ba꞉bako tabo ga꞉la komone hiya꞉hiya꞉ anagiya꞉mida komate tawakalubi ipuwalo mahila꞉halenaka.
2TI 2:24 Numa꞉, ama꞉ ba꞉ Kodawa Godokono okodawalata, ba꞉bema꞉ wadiyala ama꞉ komo tawakaluba꞉go olowabeletihuihino ibi hiliyonomatamo malemale ba hawakalimina ibino hido iya꞉tulamedawama꞉ nediya꞉, iyo, ama꞉ eta lumagi ubiha꞉ma꞉ tiyolo akeda꞉la꞉.
2TI 2:25 Ba꞉gala ama꞉ Godokono oko ba owati puya꞉te ama꞉ duhimima꞉ dewagelemena꞉, wadiyala ama꞉ iba꞉tamo ibino kuba ododili komo hete gabodo na꞉hawakalilamiya꞉. Diyala, Godote ama꞉ ipuwado iba꞉tamo hido ukui da꞉ ikalamemene, ba꞉bema꞉ iba꞉te kuba ododili ipuwane ohobila꞉hate ebeno hibi komo diya꞉tawahamena꞉,
2TI 2:26 ba꞉ba tetelo iba꞉te hidohido ukui ba uwate Saitanakono gubi ipuwane tama꞉mo dito kiya꞉patila꞉hama꞉na꞉. Ba꞉ hibila, iba꞉te ebeno kuba ubi komamo papamila꞉halema꞉ ba꞉be Kubadawate ibi ebeno gubi ipuwamo ya꞉lo a꞉miya꞉ti, ba꞉bema꞉ wadiyala ama꞉ ibi nowalubiliya꞉.
2TI 3:1 Ba꞉bema꞉ wadiyala ama꞉ ba꞉moe komo niya꞉tawa, hopo haboeno kuititi tetelo hiliyonomo hiya꞉hiya꞉ kodakoda komate kopikulihoma꞉na꞉.
2TI 3:2 Ba꞉ba tetelo komo tawakalubi hiliyonomate ibi ha꞉kiya ibi ba emalagidolena mani uwatema꞉ ubi konomamo ba꞉miya꞉tenakomena꞉, ba꞉gala iba꞉te awagaha ipuwalo komo tawakalubi tawakalubiha꞉ma꞉ ga꞉lalo ibi biduduputilamenakomena꞉, ba꞉gala iba꞉te ibino menokobi ba꞉gala naba꞉tamo papamila꞉haheno kalakala komo iba꞉tamo a꞉kahawakaliminakamena꞉, iyo, iba꞉te atumu Godoko tolemeha꞉pima꞉ beda꞉hanamena꞉.
2TI 3:3 Ba꞉bene iba꞉te malemaleha꞉pima꞉ ba eda꞉ha, puya꞉te iba꞉tamo kuba dopamo dododili iba꞉te ba꞉bi tawakaluba꞉tamo huiya ikalamema꞉ ubi konomamo bihatenakomena꞉, ba꞉gala iba꞉te komo tuputupupino komoma꞉ ha꞉da amiho tabo dito ba꞉ga꞉lanakomena꞉. Ba꞉bene iba꞉te ibino kateneno kuba ubi komo kapiyatamo papamila꞉halo komopi ibino helonomo alaholoho komamo ba kubahilame, iba꞉te huiyatiya eta hido komo kapiya ododima꞉ ubiha꞉ma꞉ beda꞉hanakomena꞉.
2TI 3:4 Ba꞉bene iba꞉te pui ibino mabulubima꞉ hunu gabodo da꞉ga꞉lana iba꞉tamo diya gabodo kuba komokomo bododilinakomena꞉, ba꞉gala iba꞉te ukui hidamo uwateheno ibino kuba ubi komo kododilima꞉ gahugahulu ba꞉tolamenakomena꞉, iyo, iba꞉te konomo awagaha ipuwalo Godoko kalakaluimima꞉ ubihinola huiyatiya ibi ha꞉kiya ibi kapiya kalakaluilamema꞉ bewagelenakomena꞉.
2TI 3:5 Ba꞉bene iba꞉te hunu gabodo ibi ha꞉kiya ibi Godoko ta꞉matapima꞉ ba ga꞉la huiyatiya ibino tepo ipuwalo hibi komote a꞉kitanamene, iyo, ibino ubi komate keka꞉keka꞉lo ba pola꞉lama꞉na Godokono hibi helo gigilepalama꞉ miditi lawe ubihinola. Ba꞉ hibila, galane ba꞉bako kuba ododilipi hiliyonomate kikulihoma꞉na꞉, ba꞉bema꞉ ba꞉ma tetelo ama꞉ ba꞉bako tawakaluba꞉go akakapiyala꞉.
2TI 3:6 Ibi ipuwalo komo dubate ibino genamanomo miya꞉palete komopino genamalo ba nemedehona daedae ukui bohelemele ba꞉gala kamenakamena ibino kuba ubi gabodo ba꞉bo magatalenaka. Ba꞉bema꞉ numa꞉, ba꞉bi kamenakamenate ibino kuba ododili mabuma꞉ tepo ipuwalo menemenema꞉ ba eda꞉ha, huiyatiya ibino kateneno hiya꞉hiya꞉ kuba ubi komate ha꞉kiya mahila꞉halenaka, ba꞉bema꞉ iba꞉te hibima꞉ midi ipuwalo ukui gagagagama꞉ eda꞉halo ba꞉bako kuba dubuino tabamo dito papamila꞉hanaka.
2TI 3:7 Ba꞉ hibila, ba꞉bi kamenakamena niliya, mabu iba꞉te Godokono hibi komo lawema꞉ gabo ba ohowadi ibino kateneno ubi komate ibi ba꞉ dito duhilamenaka, iyo, ba꞉be mabuma꞉ iba꞉te emedena tetelo hibilo a꞉kiya꞉tawahanakamena꞉.
2TI 3:8 Ba꞉bema꞉ dopamo tetelo Godote Moseseko ipuwado ebeno hibi komo ba hawakalimi puya꞉te ebe duhimima꞉ dewageliya꞉, wadiyala ama꞉ ba꞉bi dubu netewa Ya꞉nesiko ba꞉gala Ya꞉mbalasiko ibino komo nemalagidola. Numa꞉, ibino kuba ododi mabuma꞉ hiliyonomo tawakalubino holoholo hapulu hilopo komote iba꞉tamo ba꞉ dito puluhukuya꞉, ba꞉bema꞉ ba꞉ma tetelo puya꞉te hibima꞉ midipi kamenakamena da꞉kubahilamenaka ba꞉bi ha꞉da tabo iya꞉tulamepa꞉te atumu ko hilopo kolawema꞉na꞉, mabu ibino keka꞉keka꞉ ukui komodo iba꞉te hibima꞉ midi ipuwane ya꞉lo a꞉negudiya꞉. Ba꞉ hibila, iba꞉te Godokono komo duhimima꞉ ba ewagelena huiyatiya ebe duhimima꞉ a꞉kamodobamena꞉, mabu ibino ododili ipuwalo tawakalubi hiliyonomate tatalila ibino daedae ukui komo hibilo kumima꞉na꞉.
2TI 3:10 Ba꞉bema꞉ Timoti, ama꞉ iya꞉tawanomola naeno iya꞉tumi komo ba꞉gala ododili komo ba꞉gala oko owati komoeno konomo ipuwa. Iyo, ama꞉ naeno emede komo hibilo uminakuya꞉ta, ba꞉ma ka꞉na nale hibima꞉ midi ipuwalo tawakalubi malemalelo ba emalagidolena eta lumagi tiyolo ubiha꞉ma꞉ keda꞉nakuiha꞉, ba꞉gala komopa꞉te natamo hiya꞉hiya꞉ temeteme dikanamenakui, ba꞉bi komo ipuwalo ba꞉gala komo hiya꞉hiya꞉ menemene ipuwalo nale kodakodalo ba la꞉na heloha꞉ma꞉ keda꞉nakuiha꞉. Ba꞉ hibila, A꞉ntiyoka habalo ba꞉gala Aikoniyama habalo ba꞉gala Lista habalo hibima꞉ midiha꞉pa꞉te kokonomo temeteme natamo dikanamehonenakui, ba꞉ba tetelo ba꞉bi hiliyonomo temeteme ipuwalo Godote naeno ka꞉ka꞉ a꞉mula꞉nakui.
2TI 3:12 Ba꞉bema꞉ hibila, puya꞉te Ya꞉su Kelisoko ipuwalo ba emedena Godoko kapiyatamo papamila꞉hama꞉ dewagelena, ibi hiliyonomate komopa꞉godone temeteme buwatenakomena꞉.
2TI 3:13 Ba꞉gala ha꞉da tabo iya꞉tulamepi, iyo, komo kuba ododilipi atumu, ibi hiliyonomoeno komo ba꞉ma ka꞉nala. Ibi ipuwalo etapa꞉te etapi ha꞉da ba amiholame kuba gabamo ba꞉bo ba꞉magatalenakomena꞉, ba꞉bema꞉ puya꞉te ba꞉ma tetelo hegehege kuba dododilinaka, galane ba꞉ba꞉te kokonomo kuba komokomo kapiya ododili ba tupuilame kubanomoma꞉ ba꞉bo keda꞉hama꞉na꞉.
2TI 3:14 Naeno gudu, ama꞉ huiyatiya Godokono tabo komokomo dopamo uwatete hibima꞉ da꞉midiliya꞉la, wadiyala ama꞉ ba꞉be iya꞉tumi ipuwalo ukui gagagagama꞉ eda꞉heno na꞉pata꞉na. Numa꞉, puya꞉te ama꞉ dopamo diya꞉tuminakui ama꞉le ba꞉bi hibima꞉ midipino komo iya꞉tawala,
2TI 3:15 ba꞉bene gudu deha꞉poto tetene tupuimiti ba꞉ma teta꞉mo puluhuku ama꞉le Godokono Talona Bukoeno tabo komokomo iya꞉tawanapiya꞉ta. Ba꞉bema꞉ hibila, ba꞉be Buka tabo komate hido mulu ukui ama꞉tamo ba ikame, ama꞉le Ya꞉su Kelisoko hibima꞉ midi ipuwado amia꞉no ka꞉ka꞉ mula꞉ komo ba꞉bo kolawema꞉na꞉ta.
2TI 3:16 Iyo, Godokono Buka taboeno komokomo hiliyonomate ebeno Gobogoboeno heloamo ikuliya꞉ hopo habanapi kowalubilinama꞉, ba꞉ma ka꞉na ebeno Buka tabo komate komo tetelo ebeno hibi komo tawakaluba꞉tamo a꞉hawakaliminaka, komo tetelo ha꞉da amiho iya꞉tumi komo a꞉duhiminaka, komo tetelo tawakalubino kuba ododili ipuwane ibi ohoba꞉midalenaka, ba꞉gala komo tetelo ibi tuputupu emede komo iya꞉tulamenaka.
2TI 3:17 Ba꞉bema꞉ hibila, Godokono Bukoeno tabo komokomone ebeno okodawate helo lawete eta hidonomo ba꞉gala mulunomo okodawama꞉ beda꞉namene, mabu ebete ba꞉be gabodo helo hibilo kolawema꞉ne hiliyonomo hidohido komo kododilima꞉.
2TI 4:1 Ba꞉bema꞉ naeno gudu, numa꞉, Ya꞉su Kelisote ebeno Ko Gawadubu haba lawema꞉ ba꞉ na꞉pe, iyo, ebete da꞉puluhukumini ba꞉ba tetelo puya꞉te dopamo da꞉ha꞉lahuya꞉ ba꞉gala puya꞉te demedehona, ebete ba꞉bi tawakalubi hiliyonomoeno komo kopanagilamelelamema꞉ne. Ba꞉be mabuma꞉ nale ebe ba꞉gala Godoko ibi netewapino holoholo hapulu ama꞉ bikiyamemata,
2TI 4:2 ama꞉le Godokono tabo tawakaluba꞉tamo kolamaginakoma꞉, iyo, ibino ubi tetelo ba꞉gala ubiha꞉ tetelo wadiyala ama꞉ kodakodalo utiti ebeno tabo komokomo ibi niya꞉tulamenakuya꞉. Ba꞉bene ulihopi ipuwalo ama꞉le eta lumagi tiyolo ubiha꞉ma꞉ eda꞉heno, puya꞉te kuba dododilina, ama꞉le ibi hido tabo komamo ba owalubili toleheno ibino kuba hawakalilamete ibi na꞉kiyahalamenakuya꞉ iba꞉te kuba ododili ipuwane kohobila꞉hama꞉.
2TI 4:3 Mabu tete ba꞉ na꞉pe, tawakaluba꞉te Ya꞉sukunu mulu iya꞉tulame komokomo ulihoma꞉ ubiha꞉ma꞉ keda꞉hama꞉na꞉, huiyatiya iba꞉te ubi konomo bihatenamena꞉ puya꞉te ibino kateneno ododili komokomo modoboma꞉ da꞉ga꞉lanaka ba꞉bako iya꞉tulamepi kapiyatamo gahugahulu kotolamema꞉na꞉ ibino tabo konulihoma꞉.
2TI 4:4 Numa꞉, ba꞉bi ulihopa꞉te Godokono hibi komone ba ohobila꞉ha hiya꞉hiya꞉ hoponapi iniwalino ha꞉da amiho uwi komo ta꞉matale ba꞉bo konetupuimima꞉na꞉.
2TI 4:5 Ba꞉bema꞉ naeno gudu, ama꞉ ukui gagagagama꞉ eda꞉heno oko owati komoeno temeteme ipuwalo kodakodalo ba la꞉na, wadiyala ama꞉ hibima꞉ midiha꞉pa꞉tamo Godokono Hido Tabo natanakuya꞉, ba꞉gala Godote kebe hiya꞉hiya꞉ komo oko ama꞉tamo dikamehonaka ba꞉bi hiliyonomo komo atumu hidamo nupula꞉lenakuya꞉.
2TI 4:6 Numa꞉, naeno komo ba꞉ ba꞉ma ka꞉nala. Tete ba꞉ a꞉pe Godote ebe ha꞉kiya ebe ba owatidolo ebete naeno ka꞉ka꞉ da꞉pelawenamemene na ba꞉bo kohoema꞉nemo, iyo, tatalila na ba꞉moe hopo komiya꞉pama꞉nemo.
2TI 4:7 Ba꞉ hibila, nale naeno hibima꞉ midi komo ba atila꞉na Saitanakoba꞉ alaholonapete wato kikipo ba꞉ a꞉pelawemo, iyo, nale heloha꞉ma꞉ eda꞉heno kuitita꞉mo ba꞉ a꞉puluhukumu, sikulu gugudino iya꞉da꞉mi hegelalo etate heloamo keba ka꞉na ka꞉puliganako ba꞉ba ka꞉na.
2TI 4:8 Ba꞉bema꞉ tete tatalila Kodawa Ya꞉suti natamo hido huiya kikanamema꞉ne, sikulu watodawate gugudi ipuwalo helonomodawatamo hido huiya keba ka꞉na kikamenako ba꞉ba ka꞉na. Iyo, tuputupu emede komoeno hido huiyate na mabuma꞉ bitana, huiyatiya na kapiyate a꞉kalawa꞉mo, mabu Ya꞉suti tawakalubino komo tuputupulu danagilamelelamemene, ba꞉be Ko Hegelalo puya꞉te ebe malemale emalagidolo komago ebeno pe tete da꞉latimina, ebete ibi hiliyonomatamo kapimilo ba꞉be hido huiya atumu kakapikalamema꞉ne.
2TI 4:9 O naeno gudu, ama꞉le natamo tiyolo pema꞉ gabo hibinomolo nohowadiya꞉,
2TI 4:10 mabu Dimasiti ba꞉moe hopoeno hiya꞉hiya꞉ kalakala komo konomamo demalagidolenati ebete na miya꞉panete Tesalonaika habamo ba꞉ dito tui, ba꞉bene Godokono oko konowatima꞉ Kelesenete nagodone Galesiya hopamo ba nuluhuku, naeno eta mabulubi Taitasiti atumu Da꞉lamesiya hopamo ba꞉ dito katui.
2TI 4:11 Ba꞉gala numa꞉, naeno eta owalubidawa Tikikasiko nale Epesese habamo dopamo oemimo, huiyatiya ba꞉ma tetelo Lukuku kapiyate nagodolo bemedena, ba꞉bema꞉ na ubila ama꞉ Makako lawete ebe natamo na꞉magahiya꞉ mabu oko owati ipuwalo ebete naeno hido owalubidawama꞉ eda꞉na.
2TI 4:13 Ba꞉gala eta komo. Amia꞉no pe tetelo nale Talowase habalo Kapasigodolo da꞉miya꞉puimo, wadiyala ama꞉ naeno ape otanotanuimino ga꞉ga꞉ kaliko ba꞉gala naeno hiya꞉hiya꞉ buka mokopihole uwatete ba꞉bo na꞉wadahiya꞉, ba꞉bi buka ipuwalo naeno ubi konomo bitana sipi-goegoeno tamamo ododili buka kuwatema꞉.
2TI 4:14 Ba꞉gala ama꞉ ba꞉moe eta dubuino komo hidamo numa꞉ ebete ama꞉tamo kuba ododikapoma꞉, ebe ba꞉ A꞉lesandatela, auli ilina ododili okodawala! Ebete a hibima꞉ midipino iya꞉tulame oko koduhimima꞉ alaholoho komo ba ododili natamo koko temeteme ba꞉bo ikanamenakui, ba꞉bema꞉ Kodawa Godote ebeno kuba ododili mabuma꞉ ebetamo huiya hibilo kikamema꞉ne!
2TI 4:16 Ba꞉ hibila, Loma gabomana꞉te naeno komo danagiya꞉midanami, ba꞉be tete ba꞉ naeno dopo tetela ibino holoholo hapuamo da꞉nuluhukuimo. Numa꞉, ba꞉ba tetelo komo hibima꞉ midipi hiliyonomate tolema꞉ eda꞉hate na dito miya꞉paniya꞉, ba꞉bema꞉ na ha꞉kiya ba la꞉na naeno kuba ododiha꞉ komo tabo anagiya꞉midadawatamo ba꞉bo hawakalimimo. Huiyatiya kalakala konomola, mabu gabomanino holoholo hapulu Kodawa Ya꞉suti nago ba la꞉na helo natamo ikanami, nale komo hiliyonomo Yuha꞉pa꞉tamo ebeno Hido Tabo olamaginomo kolamagima꞉, ba꞉gala atu tetelo ebete naeno ka꞉ka꞉ ba mula꞉name tabo anagiya꞉midadawate hoe huiya natamo kikanameha꞉. Numa꞉, puya꞉te na da꞉miya꞉pani, na ubihinola Godote ibino tole komoma꞉ kuba huiya iba꞉tamo ikalame,
2TI 4:18 mabu na ba꞉moe komo iya꞉tawala, Kodawoeno ubilo ebete hiliyonomo kuba ododilipino kokoto ipuwane naeno ka꞉ka꞉ gala kamula꞉namete, ebeno Ko Gawadubu helote kebolo kitana ebete na ba꞉be Hunu Habamo olalatihino komagatanema꞉ne. Wadiyala emedena emedena tetelo awagaha komote ebegodolo nitanamene! Ba꞉moe tabo ba꞉ hibinomola, ba꞉ba꞉la!
2TI 4:19 Ba꞉bema꞉ wadiyala ama꞉le Pilisilako ba꞉gala Akuilako ba꞉gala Onisipolasikono genamanapi ibi hiliyonomatamo naeno nolata tabo nolamagiya꞉.
2TI 4:20 Numa꞉, nale ba꞉moe Loma habamo da꞉pimo, gabo tetelo Elastasiti Kolini habalo pepekagate, ba꞉bene naeno eta owalubidawa Topimasiko tawetawete da꞉pelawi, ba꞉bema꞉ nale ebe Mailitase habalo dito kapemiya꞉puimo.
2TI 4:21 O naeno gudu, na ubi konomola, giba tete peheno ama꞉le natamo pema꞉ gabo nohowadiya꞉! Ba꞉malo demedena Yubulasiko, Pudenisiko, Lainasiko, Kolodiyako, ba꞉gala komo hibima꞉ midipi ekaki, ibi hiliyonomate ibino nolata tabo ama꞉tamo poema꞉.
2TI 4:22 Wadiyala Kodawa Ya꞉suti amia꞉no tepo ipuwalo nemedenamene, ba꞉gala ebeno malemale komote ama꞉ ba꞉gala ama꞉go da꞉kapiyuiminaka la꞉ hiliyonomagodolo nitanamene. Ba꞉moe ba꞉ naeno tabo kuititila. Ba꞉ba꞉la.
TIT 1:1 Na ba꞉ Polotela, Godokono okodawala, iyo, Ya꞉su Kelisote ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala. Ba꞉ hibila, Godote ya꞉lo tetelo pui da꞉ka꞉lamiholiya꞉, nale ba꞉bi tawakalubino hibima꞉ midi ipuwalo ibi kowalubilinama꞉ ebete na ba꞉bema꞉ laweniya꞉, iyo, ebete ubi natamo ihatiya꞉ nale ba꞉bi tawakalubi Godokono hibi iya꞉tawa komodo ba magatale, iba꞉te ebeno ubi komamo papamila꞉ha ipuwalo
TIT 1:2 ebeno wiboha꞉ ka꞉ka꞉ lawema꞉ uliholo bemedenamena꞉. A iya꞉tawahala, Godoko ha꞉da amihodawaha꞉, ebete hibi tabonomo bolamaginako, ba꞉bema꞉ ba꞉moe hopo tupuimihino ebete dopamo hibima꞉ midipa꞉tamo kebe komo ikalamema꞉ dolamagiya꞉, iba꞉te ba꞉be ka꞉ka꞉ ebegodone hibinomolo kolawema꞉na꞉.
TIT 1:3 Iyo, aeno Ka꞉ka꞉ Mula꞉lea꞉medawa Godote ebeno hido tetenomolo ba꞉moe Hido Tabo hopo habanapa꞉tamo a꞉hawakalimiya꞉, ba꞉bema꞉ na ba꞉be tabo bolamaginakomo mabu ebete na a꞉kiyanamiya꞉ nale ba꞉moe oko kowatinama꞉.
TIT 1:4 O Taitasi, ama꞉ ba꞉gala na, aeno hibima꞉ midi komo ba꞉ kapiyala, ba꞉bema꞉ ama꞉ ba꞉be hibima꞉ midi ipuwalo naeno hibi guduma꞉ ba eda꞉na, nale ba꞉moe leta ama꞉tamo poememo. Ba꞉ hibila, aeno Ka꞉ka꞉ Mula꞉lea꞉medawa ba꞉ Ya꞉su Kelisotela, ba꞉bema꞉ wadiyala ebe ba꞉gala Nabiwi Godoko iba꞉te ibino malemale komo ba꞉gala hete komo ama꞉tamo nikama꞉mena꞉ta.
TIT 1:5 Numa꞉, Kuliti hopolo naeno oko owati ipuwalo nale kebe komokomo upula꞉leheno da꞉pola꞉na, wadiyala ama꞉ ba꞉bi komo ba ulame ba꞉be hopoeno hiya꞉hiya꞉ haboeno sose ipuwalo watowatopi nuwatiya꞉, nale ama꞉ keba ka꞉na ka꞉kiyamitima ba꞉ba ka꞉na. Ba꞉ hibila, ama꞉le ba꞉be oko kowatima꞉ nale ama꞉ ba꞉bolo ba꞉bema꞉ pimiya꞉puimata.
TIT 1:6 Ba꞉bema꞉ sose watodawoeno emede komo tuputupunomolo ba itana, ebeno ododili komo ipuwalo eta kapiya deha꞉potonomo kubate itana modoboha꞉. Wadiyala ebete kamena kapiyagodawama꞉ ba eda꞉na, ebeno guguda꞉te atumu tuputupunomo hibima꞉ midipima꞉ neda꞉hamena꞉, ba꞉bene tawakaluba꞉te ibino ododili komoma꞉ ibi talaluwapima꞉ ba꞉gala nabiwino tabo ulihoha꞉pima꞉ ka꞉lami modoboha꞉.
TIT 1:7 Ba꞉ hibila, sose watodawate Godokono genamoeno hiya꞉hiya꞉ komo bulamena, ba꞉bema꞉ ebeno emede ipuwalo eta kapiya deha꞉potonomo kubate itana modoboha꞉. Iyo, ebete awagaha dubuma꞉ akeda꞉la꞉, ba꞉gala ebeno tepo ipuwalo koe komote tiyolo akuluhukunakala꞉. Ba꞉bene ebete gamoda nihoha꞉dawama꞉ neda꞉mene, ba꞉gala ebete alaholo ipuwalo komopi kubahilame modoboha꞉, ba꞉gala ebete ha꞉da amiho gabodo ilina dogodogodawama꞉ eda꞉ma꞉ ubi ihate modoboha꞉.
TIT 1:8 Wadiyala ebe huiyatiya ebeno genamalo kapela tawakalubi hidamo nowalubilinakamene, ba꞉gala ebete Godokono hido emede komo konomamo ba emalagidolona, ebe ha꞉kiya ebeno komokomo hidamo nulamenakamene. Ba꞉bene sose watodawoeno tuputupunomo emede ipuwalo wadiyala ebete ebeno ape Godokono oko kapiyamo ba ihatena kateneno kuba ubi komamo papamiwata modoboha꞉,
TIT 1:9 ba꞉gala Ya꞉sukunu dopo ta꞉matapa꞉te ebeno hibi taboeno komokomo a keba ka꞉na kiya꞉tua꞉menakui, wadiyala ebete ba꞉bi atu mulu komo kodakodalo na꞉watila꞉mota꞉namene. Numa꞉, ba꞉moe gabodo hido watodawate sose tawakalubi hibi taboeno komamo ba owalubilina, puya꞉te ba꞉be tabago alaholohoma꞉ dewagelena, ebete ibino daedae ukui komo ba꞉bo ba꞉hawakalilamenakomene.
TIT 1:10 Ba꞉bema꞉ Taitasi, ama꞉ numa꞉, Kuliti hopoeno sose tawakalubi ipuwalo komo hiliyonomate hibi taboeno komamo papamila꞉ha ubiha꞉ma꞉ ba eda꞉hana, iba꞉te ibino daedae ukui komamo komopi ha꞉da ba꞉bo amiholamenaka, iyo, puya꞉te Yunapi dubuino tama itamida kukala ko komonomoma꞉ da꞉ga꞉lana, ibi ba꞉ ba꞉bako ha꞉da tabo olamagimipi ipuwalo dopopima꞉ eda꞉hana.
TIT 1:11 Ba꞉ hibila, ba꞉ba꞉te ubi bihatena ibino ha꞉da tabo iya꞉tulame komodo soseno komo hiya꞉hiya꞉ badininipala꞉tamo ukui bilibili komo ba ikalame iba꞉godone koko mani kuwatelamema꞉, ba꞉bema꞉ wadiyala ama꞉ ibi na꞉duhilamiya꞉ eta kapiya tabo ga꞉lakapoma꞉.
TIT 1:12 A꞉iye! Dopamo tetelo Kuliti hoponapa꞉godolo eta muludawate uluhukuti ebeno tawakalubino komoma꞉ ba꞉moe kodakoda tabo hibinomolo goiya꞉, “Kuliti hoponapi hiliyonomo ba꞉ ha꞉da amihopila, iyo, ibi tumuino helohelo ilina huiyala, ba꞉bema꞉ iba꞉te hido ukui komamo a꞉kapapamila꞉hala꞉la꞉, huiyatiya buhamama꞉ ba eda꞉hana ibino kateneno ubi komo kapiya bemalagidolena!”
TIT 1:13 Numa꞉, ba꞉be taboeno komo ba꞉ hibinomola, ba꞉bema꞉ wadiyala ama꞉ Kuliti tawakalubi konomamo na꞉kiyahalamiya꞉ iba꞉te ibino hibima꞉ midi ipuwalo hidohido ukui kuwatema꞉.
TIT 1:14 Ba꞉ma ka꞉na iba꞉te Yunapino komo iniwali ha꞉kiya ibino kateneno ukuia꞉mo da꞉ga꞉lanakui ba꞉bi hiya꞉hiya꞉ uwi konomamo gala akemalagidola꞉la꞉, iyo, puya꞉te Godokono hibi komo ubiha꞉ma꞉ deda꞉hui iba꞉te ba꞉bi dubuino hiya꞉hiya꞉ tutumu tabo gala akulia꞉la꞉.
TIT 1:15 Ama꞉ numa꞉, kebe lumagino tepo ipuwalo kuba dalowa꞉ ukui kapiyate itama꞉naheno, ba꞉be mabuma꞉ ebete Godoko adikumima꞉ dododilinako ba꞉bi hiliyonomo komate atumu dalowa꞉ha꞉ma꞉ eda꞉hanaka. Huiyatiya puya꞉te Godokono tabo hibima꞉ midihino, ba꞉gala puya꞉te ibino tepo ipuwalo kuba dalowa꞉ ukui demalagidolena, iba꞉te Godoko adikumima꞉ eta hido komo ododi modoboha꞉, mabu ebete iba꞉tamo dopamo dikalamiya꞉ ba꞉be hido mulu tepo ipuwa ba꞉gala emalagidolo komo iba꞉te ya꞉lo a꞉kubahilamiya꞉.
TIT 1:16 Ba꞉be mabuma꞉ ibi ha꞉kiya ibi Godokono hibi komo iya꞉tawahapima꞉ ga꞉lanaka, huiyatiya ibino kuba ododili komate ba꞉moe komo behawakalimina, iba꞉te ebeno komo hibilo kiya꞉tawahanaha꞉. Iyo, ibino emede komate kuba dalowa꞉ma꞉ ba eda꞉hana Godotamo kapapamila꞉hanaha꞉, ba꞉bema꞉ ebeno umi ipuwalo ibi modoboha꞉ ebetamo eta hido komo ododima꞉.
TIT 2:1 Naeno gudu Taitasi, ama꞉ huiyatiya tawakalubi hidamo niya꞉tulamenakuya꞉, Ya꞉sukunu dopo ta꞉matapa꞉te ebeno mulu taboeno komokomo a keba ka꞉na kiya꞉tua꞉menakui ba꞉ba ka꞉na.
TIT 2:2 Ba꞉bema꞉ puya꞉te hibima꞉ midipi ipuwalo nabima꞉ deda꞉hana, wadiyala ama꞉ ibi na꞉kiyalamiya꞉, iba꞉te hidohido mulu ukui uwatelo ibi ha꞉kiya ibino komo hidamo ba ulamena, ibino emede komate komopino umi ipuwalo hidonomoma꞉ neda꞉hamena꞉. Iyo, na ubila iba꞉te ibino hibima꞉ midi ipuwalo ba꞉gala ibino malemale hawakalimi ipuwalo ba꞉gala ibi Ya꞉suku mabuma꞉ duwatenaka, ba꞉bi temeteme ipuwalo iba꞉te kodakodalo na꞉la꞉mota꞉hanamena꞉.
TIT 2:3 Ama꞉ ba꞉ atumu hibima꞉ midipi menokobi na꞉kakiyalamiya꞉, iba꞉te Godokono holoholo hapulu hidonomamo ba emedena ebe mabuma꞉ talonapima꞉ neda꞉hanamena꞉. Ba꞉ma ka꞉na iba꞉te helo gala꞉ipi gao beya konomamo niho modoboha꞉ ibino ukui komate daedaema꞉ eda꞉hakapoma꞉, ba꞉gala iba꞉te ha꞉da tabo olamagimi komodo komopi akakubahilama꞉la꞉. Wadiyala iba꞉te huiyatiya uli ape kamenakamena hidamo ba iya꞉tulame
TIT 2:4 iba꞉tamo mulu ukui ba꞉bo nikalamenakamena꞉, iba꞉te ibino awi ba꞉gala gugudi malemalelo kemalagidolenama꞉.
TIT 2:5 Iyo, uli ape kamenakamenate ibi ha꞉kiya ibino komokomo ba ulamena ibino tepo ipuwalo eta dalowa꞉ ukui komote itana modoboha꞉, ba꞉gala iba꞉te ibino genama gulu hiya꞉hiya꞉ oko hidamo ba owatihona ibino awino ubi komamo ba꞉papamila꞉hanakomena꞉. Ba꞉ hibila, kamenakamenate ba꞉ba ka꞉na demedenamena꞉, eta hibima꞉ midiha꞉ dawate ibino komoma꞉ Godokono tabo kubama꞉ goe gabo a꞉kuma꞉mene.
TIT 2:6 Wadiyala ama꞉ ba꞉ atumu uli ape dubu na꞉kakiyalamiya꞉, iba꞉te ibi ha꞉kiya ibino komokomo hidamo nulamenakamena꞉.
TIT 2:7 Ba꞉gala naeno gudu, wadiyala ama꞉ amia꞉no hiliyonomo ododili komo ipuwalo hido go ba꞉bi uli ape dubatamo na꞉hawakaliminakuya꞉ iba꞉te ama꞉ hidamo kibamitinama꞉. Ba꞉ma ka꞉na Godokono tabo iya꞉tulame okoeno komoma꞉ ma꞉lapila netewa komote ama꞉godolo itanaheno, wadiyala ama꞉le amia꞉no tabo ulihopino komokomo ba emalagidolena ama꞉ tuputupunomolo nemedeniya꞉.
TIT 2:8 Iyo, ama꞉le tawakalubi hidonomo tabamo nowalubilinakuya꞉, ba꞉bene eta lumagiti a꞉kamodobamene amia꞉no iya꞉tulame komo kubama꞉ goe. Ba꞉ ba꞉ma ka꞉na puya꞉te ama꞉go dalaholohona, iba꞉te a hibima꞉ midipino komoma꞉ eta kuba tabo ga꞉la gabo nipo dohowadimina꞉ ba꞉bo kohilopohoma꞉na꞉.
TIT 2:9 Ba꞉gala koko okopi dubate pui mana꞉mo duwatiya꞉ ibino huiyaha꞉ oko kowatihonama꞉, ba꞉bi huiyaha꞉ okopi ipuwalo puya꞉te hibima꞉ midipima꞉ deda꞉hana, wadiyala ama꞉ ibi na꞉kiyalamiya꞉ iba꞉te ibino hiliyonomo oko ipuwalo ibino namutulubi kokalakaluilamenama꞉ iba꞉te ibino ubi komamo na꞉papamila꞉hanakamena꞉. Iyo, ibino namutuluba꞉te hiya꞉hiya꞉ oko iba꞉tamo ba ikalame, modoboha꞉ iba꞉te ba꞉bi oko mabuma꞉ iba꞉tamo kuba tabo ga꞉la,
TIT 2:10 ba꞉gala iba꞉te ibino namutulubino mani pilolo uwateheno, wadiyala ibi huiyatiya ibino tuputupu ododili komamo ba꞉moe komo na꞉hawakaliminakamena꞉, ibino hiliyonomo oko owatiho komo ipuwalo eta ha꞉da ododi komo kapiyate kitanaha꞉. Ba꞉bema꞉ iba꞉te ba꞉ ba꞉ba ka꞉na aeno Ka꞉ka꞉ Mula꞉lea꞉medawa Godokono iya꞉tulame komokomo hidamo ba hawakalilamena, tawakalubi hiliyonomate ba꞉bi komo hidohidonomoma꞉ ba꞉ga꞉lanakomena꞉.
TIT 2:11 Ba꞉ hibila, Godote ebeno malemale komo ba꞉ma ka꞉na hawakalimiya꞉, ebete hopo habanapi hiliyonomoeno ka꞉ka꞉ komula꞉lelamema꞉ atamo ba꞉bema꞉ piya꞉.
TIT 2:12 Ba꞉bema꞉ ebeno malemale komote a biya꞉tua꞉mena, ale kuba ododili ipuwane ba꞉gala ba꞉moe hopoeno kateneno ubi komone ohobila꞉hate, a ha꞉kiya aeno komo hidamo ba ulamena Godokono tuputupu emede komamo ebe kapiyatamo ba꞉papamila꞉halenakoma꞉.
TIT 2:13 Ba꞉ ba꞉ba ka꞉na aeno Ka꞉ka꞉ Mula꞉lea꞉medawa Ya꞉su Kelisokono Hidonomo Hegelate uluhukuma꞉ ale uliholo bemedenama꞉, mabu ba꞉ba tetelo ebete ebeno alo konomago atamo hibilo kopema꞉ne, iyo, ebe ba꞉ aeno Kodawa Godotela.
TIT 2:14 Ba꞉ hibila, ebete ebeno ka꞉ka꞉ gobogobamo a mabuma꞉ ba꞉ma ka꞉na ihatiya꞉, ebete a aeno hiliyonomo kuba ododili ipuwane ba꞉gala aeno tepo ipuwoeno dalowa꞉ ukui komone a uluhukua꞉tete, ale ebeno tawakalubinomoma꞉ ba eda꞉hana aeno ubi konomo ba꞉bo bihatenama꞉ hido komokomo kapiya kododilinama꞉.
TIT 2:15 Ba꞉bema꞉ naeno gudu, Godote kebe helo konomo ama꞉tamo dikamiya꞉la, wadiyala ama꞉le toleheno ba꞉be heloamo ba꞉moi komokomo hidamo ba iya꞉tulame, tabo ulihopi ipuwalo hidohidopino ukui kodakoduilamete huiyatiya kuba ododilipi dito na꞉kiyahalamenakuya꞉. Iyo, amia꞉no hiliyonomo ododili ipuwalo sose tawakaluba꞉tamo gigiho aka꞉hiya꞉midala꞉, ibi ipuwalo etate tabo ba꞉ma ka꞉na akagaa꞉la꞉ ama꞉ sose watodawaha꞉.
TIT 3:1 Ba꞉bema꞉ Taitasi, ale Kuliti hopoeno sose tawakalubi dopamo kebe komo kiya꞉tulamima꞉, wadiyala ama꞉ ba꞉be atu komo ibi gala ba꞉ma ka꞉na na꞉kakiyalamiya꞉, iba꞉te gabomanino hiya꞉hiya꞉ okopino tabamo na꞉papamila꞉hanakamena꞉. Ba꞉gala wadiyala iba꞉te na꞉hidonakamena꞉ hiliyonomo hidohido komo kododilima꞉,
TIT 3:2 ba꞉bene iba꞉te eta lumagino komoma꞉ kuba tabo akaga꞉lala꞉, ba꞉gala komopa꞉go olowabeletihuihino tatabapima꞉ ba eda꞉hana, ba꞉be tataba emede komo iba꞉te tawakalubi hiliyonomatamo na꞉hawakaliminakamena꞉.
TIT 3:3 Ba꞉ hibila, ale dopamo daedae ukui ipuwalo ba emedena, Godotamo papamila꞉haheno hibo gabo dito ududiya꞉ma꞉. Numa꞉, ba꞉ba tetelo a ha꞉kiya a kokalakaluia꞉mema꞉ ale aeno kateneno hiya꞉hiya꞉ ubi komamo papamila꞉hanakuima꞉, ba꞉bene aeno emede ipuwalo hiya꞉hiya꞉ kuba ododili komate ba tabotabohona, ale komopino dogodogo ilina mabuma꞉ iba꞉tamo ba꞉bo maubahanakuima꞉, iyo, komopino maubaha ipuwalo iba꞉te ago alaholohoma꞉ ba ewagelena ale ba꞉ atumu iba꞉go alaholohoma꞉ kewagelenamima꞉.
TIT 3:4 Huiyatiya kalakala konomola, aeno Ka꞉ka꞉ Mula꞉lea꞉medawa ba꞉ Godotela, iyo, ale aeno modoboha꞉ komokomo ipuwalo ba emedena ebeno hido owalubi komote ebeno malemale emalagidolo komago atamo hibilo uluhukuya꞉.
TIT 3:5 Ba꞉bema꞉ a ha꞉kiya aeno heloamo kebe kapiyakapiya hidohido komo dododilinakuima꞉, ebete ba꞉bi ododili komamo a kowalubiya꞉ha꞉, ao, ebete huiyatiya ebegodolo ditana ba꞉be malemale komo kapiyanomamo aeno ka꞉ka꞉ a꞉mula꞉lea꞉miya꞉. Numa꞉, ebeno Gobogobote aeno tepo ipuwoeno dalowa꞉ ukulalea꞉me helo atamo ikaa꞉miya꞉ ale ebeno uli ka꞉ka꞉mo kohawakalahalema꞉, ba꞉bema꞉ Godote ba꞉be gabodo ebeno ka꞉ka꞉ mula꞉ komo atamo dito ikaa꞉miya꞉.
TIT 3:6 Iyo, ebete aeno Ka꞉ka꞉ Mula꞉lea꞉medawa Ya꞉su Kelisoko ipuwado ebeno Gobogoboeno helo konomo aeno tepo ipuwamo a꞉haminuya꞉,
TIT 3:7 mabu ebete ebeno ubi ba꞉ma ka꞉na ihatiya꞉, ebete ebeno malemale komodo a tuputupupima꞉ miditi, ba꞉bene ale ebegodone lawema꞉ uliholo da꞉latiminama꞉ ba꞉be wiboha꞉ ka꞉ka꞉te atamo hibinomolo kuluhukuma꞉ne.
TIT 3:8 Ama꞉ numa꞉, ba꞉moe iya꞉tulame tabo komo ba꞉ hibinomola. Naeno gudu, na ubila puya꞉te ibino hibima꞉ midi komo Godotamo da꞉miya꞉ti, ama꞉le ibi ba꞉moi hiya꞉hiya꞉ komo hidonomamo niya꞉tulamiya꞉, ba꞉bene iba꞉te ibino ubi konomamo nihatenakamena꞉ komo tawakalubi kowalubilima꞉ iba꞉te ibino emede ipuwane hidohido komo kuluhukulatelema꞉, iyo, ba꞉be gabodo komo hiliyonomo tawakaluba꞉te naeno iya꞉tulame komone hido owalubi komokomo kuwatema꞉na꞉.
TIT 3:9 Huiyatiya wadiyala ama꞉ tawakalubino daedae olowabeletihui komone dito nohobiguya꞉, ba꞉ ba꞉ma ka꞉na Yunapi iniwalino mahilo iya꞉tulame komoma꞉, ba꞉gala Godote Moseseko ipuwado tawakaluba꞉tamo dikalamiya꞉, ama꞉le ba꞉bi hiya꞉hiya꞉ Tutumu Taboeno ugumuili ipuwa komoma꞉ anagiya꞉mida ukui tawakaluba꞉tamo ikalameheno iba꞉go akolowabeletihuia꞉la꞉. Ba꞉ hibila, ba꞉bakobako tabo ga꞉la ipuwane eta hido owalubi komote a꞉kuluhukale!
TIT 3:10 Ba꞉bema꞉ hibima꞉ midipi ipuwalo eta dubuti olowabeletihui komamo ibi anagiya꞉midalema꞉ dewagelenako, wadiyala ama꞉le ebe kapiya o netewa teta꞉mo koamo na꞉kiyahamiya꞉ ebete ba꞉be komo komiya꞉pama꞉. Ebete huiyatiya amia꞉no tabo ulihino atu kuba ododi da꞉katupuimimini, ba꞉ba tetelo sose tawakaluba꞉te ebetamo talona nihata꞉mena꞉ ebete ibino kapiyuimi komamo gala akapa꞉la꞉.
TIT 3:11 Ba꞉ hibila, ba꞉bako dubuino ododi komone ama꞉ kiya꞉tawama꞉na꞉ta, ebete ebeno tepo ipuwalo Godokono hibi komone ya꞉lo ohobigui, iyo, ebe ha꞉kiya ebeno kuba ododili komodo ba꞉moe komo behawakalimina, ebete kuba huiya hibinomolo kolawema꞉ne.
TIT 3:12 Ba꞉bema꞉ Taitasi, ama꞉ numa꞉, tete tatalila na Polote Atimasiko o Tikikasiko ibi ipuwalo eta kapiya ama꞉tamo kopoemema꞉nemo, ba꞉bene ebete ama꞉tamo hawela ikama꞉tepama꞉ da꞉pemene, wadiyala ama꞉ na unamema꞉ Nikapolasi habamo pe gabo tiyonomolo na꞉hiduimiya꞉, mabu nale nopo ba꞉ma ka꞉na ihatimo hopoeno giba teteno kuititi teta꞉mo ba꞉moe habalo kemedema꞉.
TIT 3:13 Ba꞉bene Apolosiko ba꞉gala gabomanino tutumu iya꞉tawadawa Sinasiko ibi netewapa꞉te natamo atumu kakapuluhukuma꞉, wadiyala ama꞉ ibi hidamo nowalubiliya꞉, iyo, ibino pe gaboma꞉ kebe modoboha꞉ komate da꞉pola꞉lama꞉na ba꞉bi komo ama꞉ malemalelo dito na꞉tuputupuilamiya꞉.
TIT 3:14 Ba꞉gala eta komo. Aeno hibima꞉ midipa꞉te Kuliti hopolo demedehona, wadiyala ama꞉ ibi na꞉tutumulateliya꞉, iba꞉te ibino emede ipuwalo hegehege mani oko ba owatiho ibi ha꞉kiya ibino modoboha꞉ komokomo nulamenakamena꞉, ba꞉bene komo tetelo iba꞉te hiya꞉hiya꞉ gabo atumu kakulamema꞉na꞉ hidohido komo komopa꞉tamo kododilima꞉. Iyo, wadiyala iba꞉te ibino ukui konomamo nihatenakamena꞉ ba꞉ba ka꞉na kewagelenama꞉, iba꞉te ibino emede ipuwalo buhamama꞉ eda꞉hakapoma꞉.
TIT 3:15 Ba꞉bema꞉ puya꞉te nagodolo demedena, ibi hiliyonomate ibino nolata tabo ama꞉tamo poema꞉, ba꞉bene Kuliti hopolo puya꞉te Godoko hibima꞉ midi ipuwalo a demalagidoloena, wadiyala ama꞉ aeno nolata tabo iba꞉tamo nolamagiya꞉. Wadiyala Godokono malemale komote la꞉ hiliyonomagodolo nitanamene. Ba꞉moe ba꞉ naeno tabo kuititila. Ba꞉ba꞉la.
PHM 1:1 Na ba꞉ Polotela, nale Ya꞉su Kelisoko mabuma꞉ du genamalo emedenamo. Na ba꞉gala a hibima꞉ midipino ekawi Timotiko, ale ba꞉moe leta ama꞉ Pailimonitamo poemema꞉. Hibila, ama꞉ ba꞉ aeno hidonomo lumagila ba꞉gala ama꞉le ago Godokono oko bowatinata.
PHM 1:2 Ba꞉bene la꞉ sose tawakalubi puya꞉te Pailimonikono genamalo da꞉kapiyuiminakoma, ba꞉gala a hibima꞉ midipino naniko A꞉piyako, ba꞉gala Saitanatamo alaholo komo ago kapimilo dododina ba꞉be dubu Akipasiko, ale la꞉ hiliyonomatamo atumu ba꞉moe leta bepoemema꞉.
PHM 1:3 Wadiyala aeno Nabiwi Godoko ba꞉gala Kodawa Ya꞉su Kelisoko, iba꞉te ibino malemale komo ba꞉gala hete komo la꞉tamo nikalama꞉mena꞉ta.
PHM 1:4 Naeno hido lumagi Pailimoni, nale dadikuminakomo ba꞉be Godotamo toetoe tabo ba olamagi amia꞉no komoma꞉ nale kalakala tabo ebetamo adipatenakomo.
PHM 1:5 Iyo, naeno kalakala bitana mabu ama꞉le Godokono tawakalubi hiliyonomo malemalelo demalagidolena ba꞉gala ama꞉le Kodawa Ya꞉suku hibima꞉ midi ipuwalo kodakodalo da꞉la꞉na, nale ba꞉bi netewa komokomo ulihonakomo.
PHM 1:6 Ba꞉bene nale Godoko ba꞉ma ka꞉na toemehonakomo, ama꞉la, ala, ale hibima꞉ midi ipuwalo kapiya tawakalubinomoma꞉ deda꞉hanama꞉, ba꞉be komone ale Kelisoko ipuwalo ba emedena kebe hidohido komo Godogodone duwatenakoma꞉, ama꞉le ba꞉bi hiliyonomo komo hidonomamo kiya꞉tawama꞉.
PHM 1:7 O naeno hidonomo ekawi, ba꞉ hibila, ama꞉ komopi malemalelo ba emalagidolena ibino tepo ipuwoeno menemene ukui da꞉wibuilamelelamenaka, nale ba꞉be komo dulimo naeno hiya꞉hiya꞉ temeteme ipuwalo konomo gelebadi komo ba꞉gala kalakala komo ba꞉bo uwatimo!
PHM 1:8 Ba꞉bema꞉ a netewapi Kelisoko hibima꞉ midi ipuwalo ba emedena ebeno modobo helote na Pologodolo bitana, iyo, talona kitanaha꞉ nale naeno ubi komo hawakalimiti ama꞉ koamo kiyahamema꞉, ba꞉ma ka꞉na ama꞉le naeno ubi komamo dito kopapamiwatama꞉.
PHM 1:9 Huiyatiya nale ama꞉ malemalelo demalagidolonama, ba꞉bema꞉ ama꞉le naeno ubi komo ododima꞉ nale ama꞉ a꞉kakiyahama꞉mata, ao, na huiyatiya ama꞉ tataba gabodo toemehomata. Ama꞉ numa꞉, na ba꞉ Polotela, na kadelema꞉ ba eda꞉na Ya꞉su Kelisoko mabuma꞉ du genamalo emedenamo, ba꞉bema꞉ amia꞉no malemale natamo hibilo ditana, wadiyala ba꞉be komo hawakalimima꞉ ama꞉ ba꞉moe naeno toetoe tabo komamo na꞉papamiwatuya꞉.
PHM 1:10 Ba꞉bema꞉ mabulubi, nale Onisimasiko mabuma꞉ ama꞉ betoemehomata, mabu nale ba꞉moe du genamalo ba emedena ebete hibima꞉ midi ipuwalo naeno eta guduma꞉ edi.
PHM 1:11 Dopamo ebete amia꞉no genamalo ba emedena, diyala, ebete komo tetelo ebeno oko owati ipuwalo hidohido komo ama꞉tamo da꞉ kododilinakuiha꞉. Ka꞉lo huiyatiya ebete uli lumagima꞉ eda꞉na, ba꞉bema꞉ na iya꞉tawala ba꞉ma tetene tupuimiti ebete ama꞉tamo ba꞉gala natamo hidohido komo kapiya hibilo bododilinakomene.
PHM 1:12 Ba꞉bema꞉ numa꞉, nale naeno uli gudu ama꞉tamo poememo. Naeno tepo ipuwoeno malemale komote ebetamo ditana bada konomola꞉ka꞉,
PHM 1:13 ba꞉bema꞉ na ubi ba꞉ma ka꞉na ihatimo, Ya꞉sukunu Hido Tabo mabuma꞉ Onisimasiti nago ba꞉moe du genamalo ba emedena natamo hido owalubi kihatenama꞉. Ba꞉ hibila, ama꞉ muhululu ba emedena ama꞉ modoboha꞉ owalubi natamo ihate, ba꞉bema꞉ kubaha꞉ amia꞉no okodawate amia꞉no haba pelawete na tamelo ba luta naeno modoboha꞉ komokomo kododilima꞉ne.
PHM 1:14 Huiyatiya nale ukui ba꞉ba ka꞉na ba ihatita ebe ama꞉tamo poemema꞉ kamawaditaha꞉, mabu na ubihinola ama꞉le modobo tabo goeheno ebete na dito owalubinina. Ba꞉bema꞉ ama꞉la, nala, ale ba꞉moe guduino komoma꞉ ukui kapiyama꞉ eda꞉heno, nale ebe kodakodalo atila꞉na modoboha꞉.
PHM 1:15 Diyala, Godote Onisimasikono komoma꞉ ubi ba꞉ma ka꞉na kuda꞉ ihati, ebete ama꞉godone alahula꞉te tete nanekele ama꞉godolo emedeheno eta habalo konemeda꞉tepama꞉, huiyatiya kalakala konomola, ba꞉ma tetelo ebete ama꞉tamo gala da꞉kapemene ebete ama꞉godolo tete ga꞉ga꞉nomolo bemedenamene, mabu hibila, ba꞉ma tetelo la꞉ netewapa꞉te hibima꞉ midi ipuwalo ba꞉ kapiya badininipalama꞉ eda꞉namata.
PHM 1:16 Ba꞉bema꞉ ba꞉ma tetelo ama꞉le ebe amia꞉no huiyaha꞉ okodawama꞉ da꞉goena, wadiyala ama꞉ atu tetelo ebe amia꞉no hibima꞉ mididawa ekawi etama꞉ ba ka꞉mina ebe malemalelo nemalagidolona. Hibila, Onisimasiko mabuma꞉ naeno kalakalate konomoma꞉ eda꞉na, huiyatiya ama꞉le ebe gala da꞉kumimina꞉, ba꞉ba tetelo amia꞉no kalakala komote nagodolo ditana ba꞉be kalakala hibilo kogogoloma꞉ne, mabu ebe ba꞉ amia꞉no hido okodawala ba꞉gala ebe Kodawa Ya꞉suku ipuwalo amia꞉no ekawima꞉ eda꞉na.
PHM 1:17 Ba꞉bema꞉ ama꞉le na Kelisoko ipuwalo amia꞉no hido mabulubima꞉ da꞉ka꞉namina, wadiyala ama꞉le Onisimasiko konomo kalakalago na꞉lawiya꞉, nale ama꞉tamo da꞉pemo ba꞉ba tetelo ama꞉le na keba ka꞉na na꞉ka꞉laweneomena꞉ ba꞉ba ka꞉na.
PHM 1:18 Ba꞉gala ebete alahula꞉heno, diyala, dopamo ebete eta kuba ama꞉tamo kuda꞉ ododi, ba꞉ma ka꞉na ebete pilo komo dododi, wadiyala ama꞉ huiyatiya ba꞉be kuba naeno kubama꞉ na꞉midiya꞉, ba꞉bema꞉ hibila, ba꞉be komo galane na ha꞉kiya kopetuputupuimima꞉nemo.
PHM 1:19 Ama꞉ numa꞉, eta lumagiti na mabuma꞉ ba꞉moe letoeno tabo komokomo ba miya꞉teho, huiyatiya na Polote naeno hibi komo hawakalimima꞉ na ha꞉kiya naeno kokotamo ba꞉moe kapiya tabo bimiya꞉temo, nale Onisimasikono kuba ododi mabuma꞉ ama꞉tamo hibilo kopehuiyama꞉nemo. Huiyatiya ama꞉le na ba꞉be komo kohuiyama꞉ kiyanameheno ebeno kuba ododi komo dito degebolememena꞉, kubaha꞉, mabu ama꞉ hibilo iya꞉tawala, nale dopamo kebe konomo owalubi komo ama꞉tamo dihatimo, iyo, nale Ya꞉sukunu komo ama꞉tamo ba hawakalimi amia꞉no ka꞉ka꞉ mula꞉ gabo ba꞉bo iya꞉tumiya꞉mata.
PHM 1:20 Ba꞉bema꞉ naeno ekawi, na ubila ama꞉ ba꞉moe malemale komo Kodawa Kelisoko mabuma꞉ natamo nododiya꞉, ba꞉bene nale ebe ipuwalo ba emedena naeno temeteme komokomo emalagidoleheno gelebadi ukui ba꞉bo kolawema꞉nemo.
PHM 1:21 Ba꞉ hibila, na niya꞉tawutamo ama꞉le naeno tabo komo Onisimasiko mabuma꞉ dumimina꞉ ba꞉bo kopapamiwatama꞉na꞉ta. Iyo, amia꞉no malemale natamo konomola, ba꞉bema꞉ na iya꞉tawala ama꞉ ba꞉moe kapiya ubi komamo a꞉kapapamiwatamena꞉ta, huiyatiya nale ba꞉moe leta ipuwalo kebe ubi komokomo kahawakalilamitaha꞉, ama꞉le ba꞉bi hiliyonomo komamo atumu kakapapamiwatama꞉na꞉ta.
PHM 1:22 Ba꞉gala eta kapiya komo. La꞉ Kolosi sose tawakaluba꞉te Godoko da꞉toemehonakoma ebete na du genama guni kuluhukunatenema꞉, nale ba꞉be hido komote ebegodone kuluhukuma꞉ kalakalago latiminamo. Ba꞉be komote duluhukumini nale ama꞉tamo hibilo kopema꞉nemo, ba꞉bema꞉ wadiyala amia꞉no genamalo haba na꞉hiduimiya꞉ nale ama꞉go kopemeda꞉tepama꞉.
PHM 1:23 Du genamalo nago demedena ba꞉be dubu Epa꞉palasiti ebeno nolata tabo la꞉tamo poeme,
PHM 1:24 ba꞉bene puya꞉te ba꞉malo oko nago dowatina, ibi ba꞉ Makako, A꞉listakasiko, Dimasiko, ba꞉gala Lukuku, ba꞉moi ba꞉te atumu nolata tabo la꞉tamo kapoema꞉.
PHM 1:25 Kodawa Ya꞉su Kelisokono malemale komote la꞉eno tepo ipuwalo nitanamene. Ba꞉moe ba꞉ naeno tabo kuititila. Ba꞉ba꞉la.
HEB 1:1 Dopamo Godote a Yunapino iniwala꞉tamo komo hiya꞉hiya꞉ gabodo tabo olamaginakui, iyo, ba꞉ba tetelo ebete ebeno ukui hawakalimipi ipuwado ebeno ubi komo behawakalilamenakui.
HEB 1:2 Huiyatiya a eyoni gugudi tetelo ba꞉moe hopoeno kuititi tetete ba tatali, ebete eta hopo lumagi ipuwado tabo poemeheno ebeno Gudugodone atamo tabo a꞉polamagiya꞉. Ba꞉ hibila, dopamo ba꞉be Gudu ipuwado ebete alomo ba꞉gala hopo konomo bododiliya꞉, ba꞉gala ebete ebe a꞉lawiya꞉ hopoeno kuititi tetenomolo hiliyonomo komoeno Namutudawama꞉ keda꞉ma꞉.
HEB 1:3 Ba꞉bene ba꞉be Gudu ba꞉ Godokono konomo a꞉la꞉minoeno awagaha komola, ba꞉gala ebete Godokomo ba eda꞉na ibi netewapi ba꞉ kapiyanomola. Ba꞉ hibila, alomo ba꞉gala hopoeno ilina hiliyonomate hidonomamo kopola꞉nama꞉, ebete ebeno helonomo tabamo ibi bulamena. Numa꞉la꞉, ba꞉be Guduti tawakalubino kuba ododili komo kegebolelamema꞉ gabo da꞉hiduimiya꞉, ebete ba꞉be komone Hunu Habamo odolote, pote ba꞉bolo Helonomo Gawadubuma꞉ deda꞉na ba꞉be Kodawoeno tu hapuamo dito nemediya꞉.
HEB 1:4 Ba꞉bema꞉ Godote ebeno Gudutamo kebe mahilo kikamiya꞉, ba꞉be mahilote Hunu Haboeno nopopino mahilo hiliyonomo keba ka꞉na ka꞉gogolena, ba꞉ ba꞉ba ka꞉na Guduino helote ibino helo atumu na꞉kagogolena, mabu Nabiwiti ebe Kodawama꞉ komidima꞉ hibinomolo ebe ba꞉bema꞉ lawiya꞉.
HEB 1:5 Ba꞉ hibila, Godokono nopopi hiliyonomo ipuwalo ebete eta kapiya ba꞉ma ka꞉na kakiyamiya꞉ha꞉, “Ama꞉ ba꞉ naeno Gudulata, ka꞉lo na ba꞉ amia꞉no Nabiwima꞉ eda꞉mo.” Ba꞉gala Godote ebeno eta nopodawoeno komoma꞉ ba꞉ma ka꞉na kagoiya꞉ha꞉, “Nale ebeno Nabiwima꞉ ba eda꞉na, ebe naeno hibi Guduma꞉ beda꞉namene.”
HEB 1:6 Ba꞉bema꞉ numa꞉la꞉, Godote ebeno dopo Gudunomo ba꞉moe hopamo poemema꞉ da꞉hiduya꞉, ba꞉ba tetelo ebete ebeno komoma꞉ eta tabo ba꞉ma ka꞉na kagoiya꞉, “Wadiyala naeno nopopi hiliyonomate ebe nadikuma꞉mena꞉.”
HEB 1:7 Ba꞉bene ebeno nopopino komoma꞉ Godote tabo ba꞉ma ka꞉na goiya꞉, “Nale naeno nopopi huhumu a꞉midilinakomo, iba꞉te naeno ubi komamo papamila꞉halelo hiya꞉hiya꞉ kotolamema꞉. Iyo, nale ibi koe powamo ba midilina, iba꞉te naeno hiya꞉hiya꞉ oko bowatihonamena꞉.”
HEB 1:8 Huiyatiya Godote ebeno Guduino komoma꞉ ebetamo na꞉goiya꞉, “Ama꞉ hibi Godoma꞉ ba eda꞉na, amia꞉no Ko Gawadubu komote emedena emedena tetelo bitanamene. Ba꞉bema꞉ ama꞉le amia꞉no tawakalubino komo tuputupu ukui kapiyamo banagilamelelamenakomena꞉ta,
HEB 1:9 ba꞉gala ama꞉ kuba komo ododima꞉ ubiha꞉ma꞉ ba eda꞉na, hidohido komo kapiya ododilima꞉ ubi konomamo ihatenata. Ba꞉moe ba꞉be mabuma꞉ pote amia꞉no Godoma꞉ deda꞉na, ba꞉be Kodawate komo hopo habanapi uwateheno ama꞉ kapiya belawiya꞉ta, iyo, ebete konomo kalakala ama꞉ hunamo a꞉haminuya꞉, ama꞉le ba꞉be kalakalago Ko Gawadubu emede bahilo kolutama꞉.”
HEB 1:10 Ba꞉gala eta tetelo Godote ebeno Gudutamo tabo ba꞉ma ka꞉na kagoiya꞉, “Pote tupuimi mabuni alomo ba꞉gala hopo konomo ebeno kokotamo dododiliya꞉, o Kodawa, ama꞉ ba꞉be Helonomodawalata.
HEB 1:11 Ba꞉ hibila, ama꞉le dododiliya꞉la ba꞉bi ilina hiliyonomate ha꞉kiya kowibohoma꞉na꞉, pupulino ilinate keba ka꞉na ka꞉kubakubahanaka ba꞉ba ka꞉na, huiyatiya amia꞉no komo eba ka꞉naha꞉, ama꞉ emedena tetelo bemedenamena꞉ta.
HEB 1:12 Iyo, ba꞉moe hopoeno ilinate kowibohoma꞉, ama꞉le amia꞉no ubilo ibi hiliyonomo tama꞉mo dito komiya꞉tema꞉na꞉ta, lumagiti uli kaliko pulima꞉ ebeno pakala kaliko tama꞉mo keba ka꞉na kihatenako ba꞉ba ka꞉na. Ama꞉ huiyatiya hiya꞉ma꞉ a꞉keda꞉mena꞉ta, mabu emedena emedena tetelo amia꞉no ka꞉ka꞉te a꞉kawibonamene.”
HEB 1:13 Ba꞉gala ba꞉moe ba꞉ eta komola. Godote ebeno nopopi hiliyonomo ipuwalo eta kapiya ba꞉ma ka꞉na kakiyamiya꞉ha꞉, “Ama꞉ Ko Gawadubuma꞉ ba eda꞉na, wadiyala ama꞉ naeno tu hapuamo na꞉pemeda꞉, ba꞉bene ama꞉go alaholohopi nale ibi amia꞉no nato a꞉puti bahima꞉ komidilima꞉nemo.”
HEB 1:14 Ba꞉bema꞉ numa꞉la꞉, Godokono ubi komote ebeno nopopa꞉tamo keba ka꞉na kitana? Ba꞉ hibila, ba꞉bi gobogobate ebe ba adikumina, ebete ibi hiya꞉hiya꞉ oelamenako, puya꞉te ka꞉ka꞉ mula꞉ komo ebegodone da꞉lawemena꞉ ba꞉bi tawakalubi hidamo konowalubilinama꞉.
HEB 2:1 Ba꞉bema꞉ ba꞉be komo ba emalagidolo wadiyala ale kebe hibi tabo komokomo dulihuya꞉ma꞉, ba꞉bi komo kodakodanomolo kowatila꞉mota꞉nama꞉nema꞉ ale eta hibo gabo ududikapoma꞉.
HEB 2:2 Numa꞉la꞉, Godote ebeno nopopi ipuwado kebe hiya꞉hiya꞉ Tutumu Tabo a Yunapino iniwala꞉tamo dikalamiya꞉, ebete ebeno ubi bihatiya꞉ iba꞉te ba꞉bi tabamo hibinomolo kopapamila꞉hanama꞉. Ba꞉be mabuma꞉ ibi ipuwalo puya꞉te papamila꞉haheno eta kukala dadikanaliya꞉, ba꞉bako tawakaluba꞉te ebegodone ibino modobo huiya ba꞉ dito uwatenakuya꞉.
HEB 2:3 Huiyatiya a tetelo duluhukuya꞉, ba꞉be ka꞉ka꞉ mula꞉ taboeno helote dopo taboeno helo na꞉gogolona. Kodawa Ya꞉suti da꞉piya꞉, ebete ba꞉be uli taboeno komo ha꞉kiya polamagiya꞉, ba꞉bene puya꞉te ebeno tabo dulihuya꞉, iba꞉te ba꞉be taboeno hibi komo atamo ba pehawakalimi, Godote hiya꞉hiya꞉ hanohano komo hiliyonomo ba꞉bo ododiliya꞉ ale ba꞉be tabo hibinomoma꞉ komidima꞉. Ba꞉gala ba꞉be atu tetenomolo Godote ebeno ubilo ebeno Gobogoboeno hiya꞉hiya꞉ helo atamo dito ikaa꞉miya꞉ ale hibima꞉ midi ipuwado ebeno oko kowatihonama꞉. Ba꞉moe mabuma꞉ ale ba꞉be hido ka꞉ka꞉ tabo ubiha꞉ma꞉ deda꞉hama꞉, ale Godokono mauba komone keba ka꞉na na꞉kalahutihoma꞉? Gabohenola, aeno kuba huiyate atamo hibinomolo kopema꞉ne!
HEB 2:5 Numa꞉la꞉, Godokono Ko Gawadubuino uli habate atamo hibilo duluhukumini, nale ba꞉be haboeno komoma꞉ olamagitamo, ba꞉moe pakala hopoeno komoma꞉ kolamagitaha꞉. Ba꞉ hibila, ebete ebeno nopopi kamiya꞉tiya꞉ha꞉ iba꞉te ba꞉be uli habalo koko gawadubuma꞉ keda꞉hanama꞉.
HEB 2:6 Huiyatiya Godote ebeno Ko Gawadubu haba potamo ikamema꞉ ubi dihatiya꞉, ebeno Buka taboeno komokomo hiliyonomo ipuwalo eta tabote ba꞉be komo ba꞉ma ka꞉na hawakalimina, “O Godo, amia꞉no malemale bada konomola꞉ka꞉! Amia꞉no helo konomoma꞉ ba eda꞉na, mabu keka꞉ ama꞉le hopo habanapi demalagidolena? Iyo, ama꞉le ibi bada mabuma꞉ ka꞉malemalelateleona?
HEB 2:7 Amia꞉no helo modobolo itana tawakalubi dito kokubahilamema꞉, huiyatiya ibi hopo habamo ama꞉le miya꞉tiya꞉ta, iba꞉te tete nanekelelo amia꞉no nopopino ulame ipuwalo kopola꞉nama꞉. Ba꞉bene ama꞉le kebe tete hidoma꞉ da꞉goiya꞉la, ba꞉ba tetelo ibi hunamo a꞉wadiya꞉paa꞉lateliya꞉ta, iba꞉te amia꞉no konomo alo ipuwalo ba emedena
HEB 2:8 hopo haboeno hiliyonomo komate iba꞉tamo kopapamila꞉hanama꞉.” Ba꞉bema꞉ hibila, ba꞉moe Buka tabote ba꞉ma ka꞉na goena, Godote tawakalubi a꞉miya꞉tiya꞉ hopo haboeno hiliyonomo komoeno namutulubima꞉ keda꞉hanama꞉. Huiyatiya ba꞉ma tetelo ale ba꞉be komo hibilo a꞉kuma꞉lema꞉, iyo, hopo haboeno hiliyonomo komate tawakalubino ubi komamo hibilo kapapamila꞉hanaha꞉.
HEB 2:9 A huiyatiya eta hido komo buminama꞉, ba꞉be komo ba꞉ Ya꞉sukunu Ko Gawadubu komola. Ba꞉ hibila, ebete hopo habamo da꞉pihitiguya꞉, tete nanekelelo Godokono nopopino umi ipuwalo ba pemedena, ebete Godokono malemale komodo tawakalubi hiliyonomoeno kuba ododili mabuma꞉ ba꞉bo hoiya꞉, iyo, ebete hoe ipuwalo koko temeteme duwatiya꞉, ba꞉be mabuma꞉ Godote ebe hunamo adipatiya꞉ ebete ebeno konomo alo ipuwalo kemedenama꞉.
HEB 2:10 Numa꞉la꞉, Godoko ba꞉ pote hiliyonomo ilina dododiliya꞉ ba꞉be Helodawala, ba꞉bene ba꞉bi ilinate ebe kawagaminanama꞉ ebeno ka꞉ka꞉go pola꞉na, ba꞉gala Ya꞉suku ba꞉ pote tawakalubi ebeno konomo a꞉la꞉mina habamo da꞉magatalena ba꞉be Kodawala. Ba꞉bema꞉ Godote ebeno temeteme komodo ebe hidonomodawama꞉ ba midi, ebete tuputupunomo komo ba꞉bo ododiya꞉, mabu ba꞉ ba꞉ba ka꞉na ebete gigiho a꞉hiya꞉miduya꞉ komo tawakalubi hiliyonomo ebetamo komagahelema꞉. Iyo, hibila, Ya꞉suku ba꞉ pote tawakalubi Godokono talona gugudima꞉ ba midilina ibino kuba ododili komokomo degebolelamena ba꞉be Malemaledawala, ba꞉bema꞉ puya꞉te ba꞉be gabodo talonapima꞉ deda꞉huya꞉, ba꞉ba꞉te Ya꞉sukuba꞉ kapiya badininipalama꞉ ba eda꞉hana, ebete ibi ebeno ekakima꞉ ka꞉lamima꞉ kahiloponaha꞉.
HEB 2:12 Ba꞉be mabuma꞉ ebete Godokono Bukalo ba꞉ma ka꞉na goena, “O Godo, naeno ekaka꞉te ama꞉ adikumima꞉ da꞉kapiyuiminaka, nale ibino dopo hapulu amia꞉no mahilo hunamo ba adipate amia꞉no hidohido komo ba꞉bo ba꞉hawakalilamenakomo.”
HEB 2:13 Ba꞉gala eta tetelo ebete tabo ba꞉ma ka꞉na kagoena, “Nale naeno hibima꞉ midi komo Godotamo bihatenamo.” Ba꞉bene ebete ba꞉be tabo moga꞉melo gala na꞉kagoena, “Puya꞉te nago Godoko hibima꞉ da꞉midina, ebete ba꞉bi tawakalubi natamo dito ikanamiya꞉, iba꞉te naeno gugudima꞉ keda꞉hanama꞉.”
HEB 2:14 Numa꞉la꞉, ba꞉moi ebeno badininipala tawakaluba꞉te hopo habalo bemedehona, ba꞉be mabuma꞉ Ya꞉suti ebeno ubilo hopo haboeno eta lumagima꞉ eda꞉te ba꞉moe hopamo ba꞉bo pehawakaluya꞉ tawakalubino hiya꞉hiya꞉ temeteme ba꞉gala modoboha꞉ komokomo hidamo kopiya꞉tawahama꞉. Kalakala konomola, ebete ebeno ubi ba꞉ma ka꞉na ihatiya꞉, ebete ebeno hoe komodo Kubadawoeno helo kanakapumima꞉, mabu dopamo tete ga꞉ga꞉nomolo ba꞉be dawate hopo habanapa꞉tamo hoe huiya bikalamenakui,
HEB 2:15 iyo, puya꞉te emedena tetelo ibino ha꞉laha komoma꞉ da꞉toletolehonama꞉, Ya꞉suti ubi ba꞉bo ihatiya꞉ ba꞉bi tawakalubi tole komoeno helo ipuwane kuluhukulatelema꞉.
HEB 2:16 Ba꞉bema꞉ Ya꞉sukunu ododili ipuwalo a ba꞉moe komo buminama꞉, ebete Hunu Haboeno nopopi owalubilihino A꞉ibalahamakono eyoni gugudi kapiya bowalubilinako.
HEB 2:17 Ba꞉moe ba꞉be mabuma꞉ ba꞉moe hopolo puya꞉te Ya꞉sukunu ekakima꞉ deda꞉hana, ebete ibino holoholonomoma꞉ hibinomolo ediya꞉, iyo, eta gabote kitanuya꞉ha꞉ ebete tawakalubino kuba ododili komo egebolelamete kadodoholelamema꞉. Numa꞉la꞉, ebete hopo lumagima꞉ dediya꞉, ba꞉be mabuma꞉ ebe Godotamo hawa꞉goeno ilina ikamehopino Watodawa kapiyanomoma꞉ ba eda꞉na, ebete hopo habanapi malemalelo kowalubilinama꞉ Godotamo oko modobolo owatinako.
HEB 2:18 Iyo, Saitanate kebe tawakalubi kuba gabamo demogabuilamenako, Ya꞉suku ba꞉ modobola ibi hidamo kowalubilinama꞉ mabu dopamo ebete hopo habalo demedenami, ebete atumu komo hiya꞉hiya꞉ tetelo kuba gabamo emogabuimi komodo temeteme iya꞉tawanakui.
HEB 3:1 Ba꞉bema꞉ naeno ekaka꞉la꞉, Godote la꞉ pui ebeno talonapima꞉ eda꞉hama꞉ nago da꞉ka꞉lamiya꞉la, wadiyala la꞉ Ya꞉sukunu komo hidamo nemalagidolala꞉. Ale kebe tabo komokomo Godokono hibi iya꞉tulame komoma꞉ da꞉midilinama꞉, Ya꞉suti ba꞉bi tabo aeno tepo ipuwalo na꞉kodakoduilamena. Iyo, ebe ba꞉ Godote a kowalubima꞉ da꞉poemiya꞉ ba꞉be dawala, mabu ebete ebeno hawi ikame komodo aeno kuba ododili komo egebolea꞉menako, dopamo Godotamo hawa꞉goeno ikamehopino Watodawate a Yunapi keba ka꞉na kowalubinakui ba꞉ba ka꞉na.
HEB 3:2 Ba꞉ hibila, pote ba꞉be hido oko kowatima꞉ ebe da꞉lawiya꞉, Ya꞉suti ba꞉be Kodawoeno hiliyonomo ubi komamo a꞉papamiwatuya꞉, dopamo Mosesete Godokono tawakalubi hiliyonomo kowalubilinama꞉ ebetamo hibi oko dowatinami ba꞉ba ka꞉na.
HEB 3:3 Numa꞉la꞉, eta lumagiti hido genama detemene, tawakaluba꞉te umiti ba꞉be genama muluma꞉ a꞉kaga꞉lamena꞉, huiyatiya iba꞉te genama etedawa kapiya muludawama꞉ koka꞉mima꞉na꞉. Ba꞉bema꞉ hibila, Ya꞉suti Godokono hidonomo genama etedawama꞉ ba eda꞉na, wadiyala ale ebe hunamo kadipatiya꞉, huiyatiya ale Moseseko hunamo a꞉kadipata꞉ma꞉ mabu ebete Godokono genama ketiya꞉ha꞉, ao, ba꞉be genamalo demedena ba꞉bi badininipala ipuwalo ebe etama꞉ eda꞉na.
HEB 3:4 Ba꞉gala ba꞉moe eta komo a iya꞉tawahala, kebe hiya꞉hiya꞉ genamate da꞉pola꞉na, ibino hiya꞉hiya꞉ etemotehopi atumu ba꞉kapola꞉na, iyo, eta kapiyate ha꞉kiya kuluhukuya꞉ha꞉. Ba꞉ ba꞉ba ka꞉na ba꞉moe hopolo da꞉pola꞉na ba꞉bi ilina hiliyonomo atumu iba꞉te ha꞉kiya ibino ubilo kikulihuya꞉ha꞉, huiyatiya Godote ba꞉bi ilina ebeno ubilo ododiliya꞉.
HEB 3:5 Ba꞉ hibila, Godokono genamanapi ipuwalo Moseseko ba꞉ hido okodawa etala, iyo, ebete Godokono hiliyonomo ubi komamo na꞉papamiwatanami. Ba꞉be mabuma꞉ Godote galane tetelo hopo habanapa꞉tamo kebe hidohido tabo dolamagimini, Mosesete ebeno oko ipuwalo ba꞉bi komokomo dopamo a꞉hawakalilamenakui.
HEB 3:6 Huiyatiya genama etedawa Ya꞉sukunu komo hiya꞉la. Ebe ba꞉ genama Namutudawoeno Gudula, ba꞉bema꞉ puya꞉te ebeno genamalo oko dowatina, ebete ba꞉bi okopi hiliyonomoeno Watodawama꞉ eda꞉na, iyo, ebete ba꞉be komodo ebeno Nabiwino ubi komamo hibilo papamiwatanako. Ba꞉bema꞉ ba꞉moe ko komo numa꞉la꞉, keba tetelo a hibima꞉ midipa꞉te aeno hido huiya lawema꞉ uliholo demedehonama꞉ ba꞉gala ale komopino mauba komoma꞉ toleheno kodakodalo da꞉la꞉mota꞉hanama꞉, ba꞉ba tetelo a ba꞉ Godokono hido genamama꞉ beda꞉hanama꞉.
HEB 3:7 Ba꞉be mabuma꞉ Godokono Gobogobote ebeno Bukalo ba꞉ma ka꞉na goena, “La꞉eno iniwala꞉te dito hopolo na Godotamo papamila꞉ha ubiha꞉ma꞉ eda꞉huya꞉, iyo, iba꞉te natamo wato kodakodahibima꞉ ba eda꞉ha, nale ibino kateneno ubi komo iba꞉tamo ikalameheno iba꞉te ba꞉bo ga꞉luya꞉ na hibi Godoha꞉. La꞉ huiyatiya naeno tabo ka꞉lo hegelalo dulima, iba꞉te dopamo keba ka꞉na kewageliya꞉, la꞉ ba꞉ba ka꞉na akewagela꞉la꞉.
HEB 3:9 A꞉iye! Na Godote 40 gogolo ibi kebe komamo kowalubilinakuimo, iba꞉te ba꞉bi hido komokomo ulamenakuya꞉, huiyatiya keba tetelo nale ibino kuba ukui komamo papamiwataheno iba꞉te ba꞉bo ga꞉luya꞉ na hibi Godoha꞉!
HEB 3:10 Ba꞉ba tetelo nale ba꞉bi tawakaluba꞉tamo maubate na꞉goiya꞉mo, ‘Iba꞉te na hibilo kata꞉mahenenaha꞉, iyo, ibi ubihinola naeno Tutumu Tabamo kopapamila꞉halema꞉.’
HEB 3:11 Ba꞉bema꞉ naeno mauba ipuwalo hibi tabonomo ba꞉ma ka꞉na goiya꞉mo, ‘Nale iba꞉tamo kebe hopo ikalamema꞉ dopamo demalagidoluya꞉mo, na ukui hiya꞉ma꞉ miditi, ba꞉bene emedena emedena tetelo iba꞉te naeno Hido Hawela Ami Hopamo a꞉kana꞉pa꞉la꞉hamena꞉!’”
HEB 3:12 Ba꞉bema꞉ naeno hibima꞉ midipi ekaki, la꞉ hidamo! Modoboha꞉ la꞉ ipuwalo etate ebeno tepo ipuwalo kuba ukui emalagidolo ba tupuimi Hibi Ka꞉ka꞉dawa Godokono ubi komamo papamiwataha꞉ma꞉ eda꞉te ebegodone dohobigamene.
HEB 3:13 Wadiyala la꞉ huiyatiya hiliyonomo hegelalo la꞉eno hibima꞉ midi ipuwalo etapa꞉te etapi nowalubihuinakuya꞉la꞉, la꞉ ipuwalo etate kuba ododi komoeno ha꞉da amiho komamo gate Godotamo wato kodakodama꞉ eda꞉kapoma꞉. Ba꞉ hibila, Godote ebeno Bukalo da꞉goena lumagiti ka꞉lo hegelalo ebeno tabo kulima꞉, ba꞉be taboeno ipuwa a hiliyonomo mabuma꞉ itana.
HEB 3:14 La꞉ numa꞉la꞉, a kebe hibima꞉ midi komo tupuimi mabuni da꞉lawiya꞉ma꞉, ale ba꞉be atu komo ipuwalo kodakodalo ba la꞉mota꞉hana kuititi hapuamo da꞉nikulima꞉, ba꞉be mabuma꞉ Kelisote a hiliyonomo eba꞉go kapimilo oko owatipima꞉ koka꞉mima꞉ne.
HEB 3:15 Iyo, ba꞉moe mabuma꞉ Godokono Buka tabote ba꞉ma ka꞉na goena, “La꞉eno iniwala꞉te Godotamo wato kodakodahibima꞉ ba eda꞉ha, ebetamo papamila꞉ha ubiha꞉ma꞉ eda꞉huya꞉. La꞉ huiyatiya ebeno tabo ka꞉lo hegelalo dulima, iba꞉te dopamo keba ka꞉na kewageliya꞉, la꞉ ba꞉ba ka꞉na akewagela꞉la꞉.”
HEB 3:16 Ba꞉bema꞉ Godokono tabo ulihote huiyatiya ebetamo kopapamila꞉hama꞉ ubiha꞉ma꞉ deda꞉huya꞉, ba꞉bi tawakalubi hiliyonomo puya꞉tela꞉ka꞉? Ibi ba꞉ Mosesete Isipiti hopone Godokono heloamo duluhukulateliya꞉ ba꞉bi tawakalubila.
HEB 3:17 Ba꞉gala 40 gogolo Godote puya꞉tamo da꞉maubanami, ibi puya꞉tela꞉ka꞉? Ibi ba꞉ puya꞉te dito hopolo ebetamo kuba komokomo dododilinakui ba꞉bi tawakalubila, iyo, ba꞉ba꞉te ba꞉bolo ba꞉bema꞉ ha꞉lahuya꞉.
HEB 3:18 Ba꞉gala Godote hido hopo ikalamema꞉ puya꞉tamo hibi tabonomo da꞉goiya꞉, ibi puya꞉tela꞉ka꞉? Ba꞉gala ebete ukui hiya꞉ma꞉ miditi ba꞉be Hawela Ami Hopo emedena tetelo ikalameha꞉ma꞉ da꞉goiya꞉, ba꞉be tabo ebete puino komoma꞉ ka꞉goiya꞉? Numa꞉la꞉, ibi ba꞉ puya꞉te ebetamo papamila꞉ha ubiha꞉ma꞉ deda꞉huya꞉ ba꞉bi tawakalubila.
HEB 3:19 Ba꞉bema꞉ ale ba꞉moe ko komo hibilo umima꞉, ba꞉bi tawakalubino hibima꞉ midiha꞉ mabuma꞉ iba꞉te Godokono hido hopamo kona꞉pa꞉la꞉hama꞉ kamodobuya꞉ha꞉.
HEB 4:1 Ba꞉bema꞉ numa꞉la꞉, Godote dopamo aeno iniwala꞉tamo kebe tabo hibilo da꞉goiya꞉, ba꞉be tabote ka꞉lo aeno komoma꞉ bitana, iyo, ale ebeno Hido Hawela Ami Hopamo kona꞉pa꞉la꞉hama꞉ ebete modobo gabo atamo ikaa꞉miya꞉. Ba꞉be mabuma꞉ wadiyala aeno iniwalino komo ba emalagidolo ale tole komo lawete hidonomamo kemedenama꞉nema꞉, la꞉ ipuwalo etate ba꞉be Hido Hawela Ami Hopamo na꞉pa꞉gama꞉ hibo gabo ududikapoma꞉.
HEB 4:2 Ba꞉ hibila, a ba꞉ma tetelo Hido Tabo keba ka꞉na kulihuya꞉ma꞉, aeno iniwala꞉te ba꞉ atumu dopamo Godokono tabo ulihuya꞉, huiyatiya ibino tabo uliho tetelo iba꞉te hido komo ebegodolo kumiya꞉ha꞉ mabu ebeno tabo hibima꞉ midi komodo kalawiya꞉ha꞉.
HEB 4:3 Huiyatiya ba꞉ma tetelo a puya꞉te Godoko hibima꞉ da꞉midinama꞉ aeno komo eba ka꞉naha꞉, mabu a ebeno Hido Hawela Ami Hopamo hibinomolo kona꞉pa꞉la꞉hama꞉nema꞉, ebete atamo hibinomo tabo keba ka꞉na ka꞉goiya꞉ ba꞉ba ka꞉na. Ba꞉ hibila, Godote ebeno hawela ami komoma꞉ ba꞉gala aeno iniwalino komoma꞉ ba꞉moe tabo dopamo a꞉goiya꞉, “Naeno mauba ipuwalo hibi tabonomo ba꞉ma ka꞉na goiya꞉mo, ‘Nale iba꞉tamo kebe hopo ikalamema꞉ dopamo demalagidoluya꞉mo, na ukui hiya꞉ma꞉ miditi ba꞉bene emedena emedena tetelo iba꞉te naeno Hido Hawela Ami Hopamo a꞉kana꞉pa꞉la꞉hamena꞉!’” Numa꞉la꞉, Godote ba꞉moe tabo goeheno, dopamo ebete alomo ba꞉gala hopo haba konomo ya꞉lo tetenomolo ododiliti, ba꞉be oko owati komo sa꞉ba꞉ni hegela tetelo da꞉wibuimiya꞉ hawela ba꞉bo amitiya꞉.
HEB 4:4 Iyo, ba꞉ hibila, Godokono Buka taboeno komokomo hiliyonomo ipuwalo sa꞉ba꞉ni hegeloeno komoma꞉ eta tabote ba꞉ma ka꞉na bitana, “Godote ebeno oko hiliyonomo hawaminalete sa꞉ba꞉ni hegela tetelo hawela bamitiya꞉.”
HEB 4:5 Ba꞉bene ale ba꞉moe komo umima꞉, Godokono Bukalo ebeno hawela ami komoma꞉ eta tabote ba꞉ma ka꞉na ka-itana, “Emedena emedena tetelo iba꞉te naeno Hido Hawela Ami Hopamo a꞉kana꞉pa꞉la꞉hamena꞉.”
HEB 4:6 Numa꞉la꞉, dopamo tetelo puya꞉te Godokono Hido Tabo dulihuya꞉, iba꞉te hibima꞉ midihino ebeno tabamo kapapamila꞉haliya꞉ha꞉, ba꞉bema꞉ iba꞉te ibino hido tete otate ebeno hawela ami komamo kana꞉pa꞉la꞉huya꞉ha꞉. Huiyatiya kalakala konomola, ba꞉ma tetelo gigihote a꞉hiya꞉midalo itana komopa꞉te ba꞉be atu hawela ami komamo hibima꞉ midi komodo kona꞉pa꞉la꞉hama꞉.
HEB 4:7 Ba꞉moe komo ba꞉ ba꞉ma ka꞉nala, komo gogo hiliyonomate da꞉petolamiya꞉ Godote dopo tawakalubino hido tete ota komo ba emalagidolonape, ebete komo tawakalubi mabuma꞉ gala eta hegela beka-ihatiya꞉, ba꞉be hegela ebete ka꞉lo hegelama꞉ goena. Ba꞉ hibila, ebeno Bukalo kebe tabote ba꞉be eta hegeloeno komo da꞉hawakalimina ale dopamo umima꞉, iyo, Godote ba꞉be tabo Da꞉ibidiko ipuwado ba꞉ma ka꞉na goiya꞉, “La꞉ huiyatiya ka꞉lo hegelalo Godokono tabo dulima, ebetamo wato kodakodahibima꞉ akeda꞉hala꞉!”
HEB 4:8 Ba꞉bema꞉ numa꞉la꞉, puya꞉te Godokono dopo tabo dulihuya꞉, ebeno okodawa Yosuwate ibi hibi hawela ami komamo na꞉magataliya꞉tale, Godote galane tetelo eta hido hegeloeno komoma꞉ Da꞉ibidigodone ba꞉ka꞉goiya꞉na꞉.
HEB 4:9 Ba꞉be mabuma꞉ a ba꞉moe komo iya꞉tawahala, eta hibi hawela ami komote Godogodolo bitana ebete ebeno tawakaluba꞉tamo kikalamema꞉, iyo, ebete sa꞉ba꞉ni hegelalo ebeno oko owati komone hawela keba ka꞉na kamitiya꞉, ale ba꞉ba ka꞉na ba꞉be atu hawela ami ipuwamo kona꞉pa꞉la꞉hama꞉nema꞉.
HEB 4:10 Ba꞉bema꞉ hibila, kebe lumagiti Godokono hibi Hawela Ami Hopamo da꞉na꞉pa꞉gamene, ebete ebeno oko owati komone hawela ba꞉bo konamima꞉ne, Godote dopamo ebeno oko owati komone hawela keba ka꞉na kamitiya꞉ ba꞉ba ka꞉na.
HEB 4:11 Ba꞉bema꞉ wadiyala a hibima꞉ midipa꞉te oko owati ipuwalo helonomoma꞉ keda꞉hama꞉nema꞉, ale ba꞉be Hawela Ami Hopamo hibilo kona꞉pa꞉la꞉hama꞉, mabu puya꞉te Godokono tabo dopamo dulihuya꞉, iba꞉te ibino hibima꞉ midiha꞉ komodo hibo gabo keba ka꞉na ka꞉nududiya꞉, a hiliyonomo ipuwalo eta kapiyate ba꞉ba ka꞉na nega modoboha꞉.
HEB 4:12 Ba꞉moe komo ba꞉ hibila, Godokono tabote ba ka꞉ka꞉na tawakalubino tepo ipuwalo oko helonomamo owatina, gihanomo kiyokiyo gili keba ka꞉nala꞉ka꞉ ba꞉ba ka꞉na, iyo, ebeno gihate komo hiliyonomo alaholoho gilino giha na꞉gogolena. Ba꞉bema꞉ Godokono tabote lumagino ukui mabamo a꞉pa꞉ganomo a꞉pa꞉ganako, ba꞉be lumagino tepo ipuwoeno ukui ba꞉gala gobogoboeno ukui hidonomamo kanagilamelemema꞉. Iyo, ba꞉ hibila, tawakaluba꞉godolo da꞉pola꞉na, Godote ba꞉bi tepo ipuwoeno ubi komo ba꞉gala emalagidolo komo ebeno tabamo ba anagilamelelame, ba꞉bi hiya꞉hiya꞉ komo hiliyonomo ba꞉bo hawakalilamenako.
HEB 4:13 Ba꞉bema꞉ numa꞉la꞉, Godote hiya꞉hiya꞉ hiliyonomo komo ba iya꞉tawa, tawakaluba꞉te ebegodone eta komo ugumui modoboha꞉, iyo, hopo haba konomolo ba꞉gala alomo hunulu da꞉pola꞉na ebete ba꞉bi komokomo hiliyonomo ebeno baida꞉mo hibinomolo nulamena. Ba꞉moe mabuma꞉ galane tetelo a hiliyonomate aeno ododili komo ipuwalo eta kapiya komo ugumui gabo umihino Godokono holoholo hapuamo ba꞉ba ka꞉na da꞉nikulima꞉, ebete ha꞉kiya aeno komo ba anagilamelea꞉me, ale aeno kuba ododili huiya uwate ipuwalo ale ebe duhimima꞉ eta tabo ga꞉lama꞉ a꞉kamodobama꞉.
HEB 4:14 Ba꞉moe ba꞉be mabuma꞉ ale tawakaluba꞉tamo kebe hibima꞉ midi komo ka꞉hawakaliminakoma꞉, wadiyala a ba꞉be komo kodakodanomolo katila꞉nama꞉nema꞉, mabu Ya꞉suti a mabuma꞉ Godotamo hawa꞉goeno ilina ikamehopino Hununomo Watodawama꞉ eda꞉na, iyo, ebe Godokono Guduma꞉ ba eda꞉na Godokono holoholo hapuamo a꞉nuluhukuya꞉ emedena emedena tetelo a kowalubinama꞉.
HEB 4:15 Ba꞉bema꞉ a mabuma꞉ Godotamo hawa꞉goeno ikamehopino Watodawama꞉ deda꞉na, dopamo ebete hopo habalo ba emedena Saitanate komo hiliyonomo tetelo ebetamo hiya꞉hiya꞉ kuba emogabuimi gabodo penakui, atamo keba ka꞉na ka꞉penako ba꞉ba ka꞉na. Ba꞉ hibila, Ya꞉suti ba꞉be komone aeno apeno hiya꞉hiya꞉ heloha꞉ komo ba iya꞉tawana, ba꞉be mabuma꞉ ebete a na꞉malemalea꞉tena. Ba꞉bema꞉ numa꞉la꞉, ale aeno heloamo kuba gabamo emogabuimi komone alahutiho kamodobonaha꞉, huiyatiya kalakala konomola, Ya꞉suti a owalubi modobola, mabu dopamo ebete Saitanatamo papamiwataheno eta kapiya tetelo eta kuba kododiya꞉ha꞉.
HEB 4:16 Ba꞉moe ba꞉be mabuma꞉ wadiyala ale Godokono Ko Gawadubu luta baha꞉mo toleheno konikulima꞉nema꞉ aeno kuba ododili mabuma꞉ ebeno malemale ale ba꞉bo konelawema꞉. Iyo, hibila, a ha꞉kiya a owalubima꞉ modoboha꞉ma꞉ ba eda꞉hana, huiyatiya ebeno malemale komote modobolo itana aeno kuba ododili komokomo hiliyonomo kegebolea꞉mema꞉.
HEB 5:1 La꞉ iya꞉tawahala, Godotamo hawa꞉goeno ikamehopi ipuwalo ebete kebe dubu ibino Hununomo Watodawama꞉ keda꞉ma꞉ da꞉lawemene, ba꞉be dawate tawakalubino kuba ododili mabuma꞉ Godokono oko owati ipuwalo hawa꞉goeno ilina ba꞉gala malemale ilina ebetamo kikamehoma꞉ne.
HEB 5:2 Ba꞉bema꞉ numa꞉la꞉, ba꞉be dubu ba꞉ modobola komopino kuba ododili mabuma꞉ maubaheno Godokono malemale iba꞉tamo kohawakalimima꞉ne, mabu ebete ibino heloha꞉ komo iya꞉tawanomola. Iyo, iba꞉te Godokono hibi komo iya꞉tawaha꞉ma꞉ ba eda꞉hana hiliyonomo tetelo hibo gabo dududinaka, komo tetelo Godoko kalakaluimima꞉ ebete atumu heloha꞉ma꞉ keda꞉nako.
HEB 5:3 Ba꞉moe mabuma꞉ ebete kebe hiya꞉hiya꞉ tetelo hawa꞉goeno ilina Godotamo komopino kuba ododili mabuma꞉ dikamehonakomene, ba꞉be atu tetelo ebete ebeno kuba ododili mabuma꞉ ba꞉ka-ikamehonakomene.
HEB 5:4 Ba꞉ hibila, Godotamo hawa꞉goeno ikamehopi ipuwalo eta dubuti ebe ha꞉kiya ebe hunamo adipatelo Hununomo Watodawama꞉ eda꞉ haba a꞉kalawa꞉mene. Ao, Godote ha꞉kiya ebeno ubilo ba꞉be dubu kolawema꞉ne, ebete dopamo A꞉loniko keba ka꞉na ka꞉lawiya꞉ ba꞉ba ka꞉na.
HEB 5:5 Ba꞉bema꞉ Kelisote ba꞉ atumu, ba꞉be Hununomo Watodawama꞉ eda꞉ haba lawema꞉ ebe ha꞉kiya ebe hunamo kadipatiya꞉ha꞉. Ao, Godote huiyatiya ebe ba awagamina ebetamo tabo ba꞉ma ka꞉na goiya꞉, “Ama꞉ ba꞉ naeno Gudulata, ka꞉lo na ba꞉ amia꞉no Nabiwima꞉ eda꞉mo.”
HEB 5:6 Ba꞉bene Godote ebeno Bukalo ebeno komo gala ba꞉ma ka꞉na kahawakalimiya꞉, “Emedena emedena tetelo ama꞉ natamo hawa꞉goeno ilina ikanamehonedawama꞉ beda꞉namena꞉ta, Mekisadekate dopamo naeno okodawama꞉ keba ka꞉na keda꞉nami ba꞉ba ka꞉na.”
HEB 5:7 Numa꞉la꞉, Ya꞉suti hopo habalo ba emedena ebe iya꞉tawuya꞉ Godokono helo modobola hoe temeteme ipuwalo ebeno ka꞉ka꞉ komula꞉mema꞉, ba꞉bema꞉ ebete ihi baida꞉go ebeno tabo madodo hunamo adipatelo Godoko ba꞉bo toemehuya꞉. Ba꞉ba tetelo Godote ebeno toetoe tabo uliti ebe hibilo owalubiya꞉, mabu Ya꞉sukunu emede ipuwalo ebete ubi bihatenami ebe ha꞉kiya ebe hopamo ba ihate huiyatiya ebeno Nabiwi hunamo kadipatema꞉.
HEB 5:8 Ba꞉ hibila, Ya꞉suti Godokono Guduma꞉ ba eda꞉na huiyatiya koko temeteme iya꞉tawuya꞉, iyo, ebete ebeno temeteme komone hidohido ukui ba꞉bo uwatiya꞉ ebeno Nabiwino ubi komamo hibinomolo kopapamiwatama꞉.
HEB 5:9 Ba꞉bene ebete ebeno Nabiwino ubi komo hiliyonomo da꞉hawaminaliya꞉, ba꞉ba tetelo ebete hidonomoma꞉ ba eda꞉na Nabiwino ubi komamo da꞉papamila꞉halena ba꞉bi tawakalubino ka꞉ka꞉ mula꞉lelame komoeno mabuma꞉ ba꞉bo ediya꞉,
HEB 5:10 ba꞉gala ba꞉be atu tetelo Godote ebe ebeno hawa꞉goeno ilina ikamehopino Hununomo Watodawama꞉ ka꞉miya꞉, ebete Mekisadekako dopamo keba ka꞉na ka꞉ka꞉miya꞉ ba꞉ba ka꞉na.
HEB 5:11 Ba꞉ hibila, nale la꞉ ba꞉moe ko komo kiya꞉tulamema꞉ komo hiliyonomo tabo komate nagodolo ba꞉pola꞉na, huiyatiya ba꞉ma tetelo modoboha꞉, mabu la꞉ hegabe gugudi huiyama꞉ eda꞉hanamata.
HEB 5:12 A꞉iye! La꞉ Godokono tabo hibima꞉ da꞉midiya꞉ma, ba꞉ba tetene tupuimiti tete ga꞉ga꞉nomo a꞉petuya꞉, la꞉ huiyatiya ebeno taboeno hiya꞉hiya꞉ iya꞉tulame iya꞉tawa komodo hibilo kapepehonamiha꞉. Ba꞉be mabuma꞉ la꞉ modoboha꞉ ba꞉ma tetelo komo hibima꞉ midipino iya꞉tulamepima꞉ eda꞉ha, iyo, etate la꞉ hibima꞉ midi komoeno dopo iya꞉tulame komokomo gala na꞉kiya꞉tulama꞉mena꞉ta la꞉le gudikapoma꞉. Ba꞉bema꞉ la꞉ ba꞉ a꞉lia꞉li gugudi keba ka꞉nala꞉ka꞉ ba꞉bakoma꞉ eda꞉hanamata, mabu menokoba꞉te iba꞉tamo nono kapiya bikalamenaka, iba꞉tamo hibi baa꞉ ikalame gabote kitanaha꞉.
HEB 5:13 Numa꞉la꞉, ba꞉bako a꞉lia꞉li guduino iya꞉tawate deha꞉potoma꞉ ba eda꞉na, ebe modoboha꞉ Godokono tuputupu taboeno ipuwa hibilo lawete hido ododi komo ba꞉gala kuba ododi komo kanagilamema꞉,
HEB 5:14 huiyatiya puya꞉te hibima꞉ midi ipuwado apepehote hegehege gugudima꞉ eda꞉ha komo ya꞉lo da꞉miya꞉puya꞉, ba꞉bi tawakaluba꞉te hibi baa꞉ naha modobola. Iyo, iba꞉te hibi baa꞉ naha komodo hidohido ukui ya꞉lo uwatiya꞉, iba꞉te hidohido komo ba ododili ibino emede ipuwalo hido komo ba꞉gala kuba komo hidamo kanagilamenakoma꞉.
HEB 6:1 Ba꞉bema꞉ wadiyala ale aeno ubi ba꞉ma ka꞉na kihatema꞉nema꞉, aeno hibima꞉ midi komo ipuwalo ale hidohido apepeho tawakalubino iya꞉tulame komokomo hibilo kuwatema꞉, iyo, ale ba꞉ma tetelo hibima꞉ midi komoeno dopo iya꞉tulame tabo komokomo konomamo gala a꞉kemalagidola꞉ma꞉. Ba꞉ hibila, la꞉ ba꞉bi dopo komokomo ya꞉lo iya꞉tawahuya꞉mata, ba꞉ma ka꞉na puya꞉te ibi ha꞉kiya ibino heloamo Godoko kalakaluimima꞉ oko dowatina, ba꞉ba꞉te ibino ododili komone ohobila꞉hate Godokono ododi komo kapiya hibima꞉ na꞉mida꞉mena꞉.
HEB 6:2 Ba꞉gala eta dopo iya꞉tulame komo ba꞉ma ka꞉na bitana, puya꞉te ibino hibima꞉ midi komo hawakalimilo Godogodone helo lawema꞉ dewagelena, ba꞉ba꞉te beyamo wadulatele komamo ibino ape ukulalete komopa꞉te kokoto iba꞉tamo nemowatilama꞉mena꞉. Ba꞉gala eta dopo iya꞉tulame komo ba꞉ma ka꞉nala, ha꞉lahapi hiliyonomate ka꞉ka꞉mo gala da꞉kamahila꞉halemena꞉, Godote ibino komo anagilamelelamete iba꞉tamo emedena teteno modobo huiya ba꞉bo kikalamema꞉ne.
HEB 6:3 Ba꞉bema꞉ numa꞉la꞉, ba꞉moi dopo komokomo nale la꞉ gala a꞉kiya꞉tulama꞉mata, huiyatiya Godokono ubi komo atamo keba ka꞉na kitana, ale ba꞉ ba꞉ba ka꞉na komo uli iya꞉tulame komo kapimilo kuwatema꞉nema꞉.
HEB 6:4 A꞉iye! Puya꞉te ibino kuba ododili komone Godotamo ohobila꞉hate, ba꞉bene ibino hibima꞉ midi komone da꞉negudimina꞉, iba꞉te hibima꞉ midi komamo gala keba ka꞉na na꞉kohobila꞉hamena꞉? Gabo puliyala, kitanaha꞉, mabu dopamo iba꞉te Godokono alo ipuwalo ba emedena, ebegodone duluhukuya꞉ ba꞉be dito ikame komo lawete hido golanomoma꞉ ba꞉bo ga꞉luya꞉. Iyo, Godokono Gobogobote iba꞉tamo da꞉piya꞉, ba꞉ba tetene tupuimiti ebete ibi ba꞉gala komo hibima꞉ midipi ibi hiliyonomo ipuwalo oko ba owatina,
HEB 6:5 iba꞉te Godokono Ko Gawadubuma꞉ eda꞉ komoeno helo duminakui ba꞉gala ebeno tabo dulihonakui ba꞉bi komokomo golanomoma꞉ ba꞉bo ga꞉lanakuya꞉.
HEB 6:6 Huiyatiya numa꞉la꞉, ba꞉ba tetelo iba꞉te ibino hibima꞉ midi komone ba nigudi Godokono Gudu gunima꞉mo dito ihitiya꞉. A꞉iye! Ba꞉moe ba꞉be komodo iba꞉te ebetamo hilopo hawakala ba ikame komopa꞉te ebe ba꞉ dito iduduputimitiya꞉, dopamo komo kubapa꞉te ebe keha pihigamo pihomotelo hilopo keba ka꞉na kikamiya꞉ ba꞉ba ka꞉na.
HEB 6:7 Numa꞉la꞉, Godokono hido owalubi komodo wegolate hopo habamo onako, ba꞉be mabuma꞉ kebe pali hakalo hidohido naha ilinate dapepehomena꞉, ebete ba꞉be haka hidonomoma꞉ kogoema꞉ne.
HEB 6:8 Huiyatiya kebe hakalo naha ilinate apepehoheno kuba hemo ba꞉gala olagopi ilina ha꞉kiya ebe ipuwane dikulimina꞉, tete tatalila Godote ba꞉be haka kubanomoma꞉ goelo koa꞉mo dito kemadomema꞉ne.
HEB 6:9 Naeno hidohido hibima꞉ midipi mabuluba꞉la꞉, nale ba꞉moe helodopo tabo la꞉tamo ba olamagita, huiyatiya na iya꞉tawala la꞉eno ka꞉ka꞉ mula꞉ komo ipuwado la꞉ kuba haka keba ka꞉nala꞉ka꞉ eba ka꞉naha꞉, ba꞉bema꞉ Godokono owalubi komote la꞉godolo itananako.
HEB 6:10 Iyo, Godoko ba꞉ tawakalubino komo tuputupu gabodo danagilamelelamenako ba꞉be dawala, ba꞉bema꞉ la꞉ dopamo ebe mabuma꞉ oko ba owatina ebeno komo tawakaluba꞉tamo malemale hawakalimi komodo kebe hido komokomo kododilionakuima, ebete ba꞉bi komo dito a꞉kadodola꞉mene. Ba꞉ hibila, la꞉ ba꞉ma tetelo atu hidonomo oko beka-owatinamata,
HEB 6:11 ba꞉bema꞉ la꞉ mabuma꞉ naeno ubi konomote ba꞉ma ka꞉na bitana, la꞉ hiliyonomate hibima꞉ midi komodo kuititi teta꞉mo atu oko helonomamo na꞉kowatiniya꞉la꞉. Ba꞉ ba꞉moe gabodo la꞉ hido huiya lawema꞉ da꞉latiminama, ba꞉be komote la꞉tamo hibilo kopema꞉ne.
HEB 6:12 Ba꞉bema꞉ na ubihinola la꞉ oko owati ipuwalo heloha꞉ma꞉ eda꞉ha, huiyatiya na ubila puya꞉te ibino hibima꞉ midi komo Ya꞉sutamo dihatena, la꞉ ba꞉bi tawakalubi ba ibamilatelena, la꞉ la꞉eno hibima꞉ midi mabuma꞉ temeteme uwate ipuwalo kodakodalo na꞉la꞉mota꞉hanala꞉. Iyo, ba꞉ ba꞉ba ka꞉na Godote kebe hido huiya la꞉tamo ikalamema꞉ dopamo hibilo da꞉goiya꞉, la꞉ ba꞉be huiya hibinomolo konelawema꞉nemata.
HEB 6:13 Numa꞉la꞉, Godote A꞉ibalahamako kowalubima꞉ ebetamo hibilo da꞉goiya꞉, ba꞉ba tetelo ebeno tabo kokodakoduimima꞉ ebete ebeno mahilo ka꞉miti ba꞉bo goiya꞉, iyo, ebete hopo lumagino mahilo ka꞉mihino ebeno mahilonomo beka꞉miya꞉ mabu ebeno helote tawakalubi hiliyonomoeno hiya꞉hiya꞉ helo na꞉gogolena.
HEB 6:14 Ba꞉bene A꞉ibalahamate Godokono tabo ba꞉ma ka꞉na duliya꞉, “Nale ama꞉ ba owalubina amia꞉no galanepi konomamo kohiliyuilamema꞉nemo,”
HEB 6:15 ba꞉ba tetene tupuimiti ebete ba꞉be hido komo umima꞉ hibima꞉ midi ipuwalo tete ga꞉ga꞉nomolo kalakalago latiminami. Ba꞉be mabuma꞉ Godokono hido tetenomolo A꞉ibalahamate ebeno hido owalubi komo hibilo umiya꞉.
HEB 6:16 Iyo, a iya꞉tawahala, hopo habanapino olowabeletihui ipuwalo etate tabo ba goita, ebeno tabo kodakoduimima꞉ eta kodawoeno mahilo da꞉ka꞉mimini, ba꞉ba tetelo ulihopa꞉te ebeno tabo hibima꞉ miditi, ba꞉bene ibino olowabeletihui komote ba꞉ dito kowiboma꞉ne.
HEB 6:17 Ba꞉bema꞉ numa꞉la꞉, Godote hopo habanapino ododi komo ba emalagidolo, ebete a hibima꞉ midipi owalubima꞉ ebeno nopo da꞉hawakalimiya꞉, ba꞉ba tetelo ebete ebeno tabo kodakoduimima꞉ ebeno mahilo ka꞉miti ba꞉bo goiya꞉. Ba꞉be mabuma꞉ a ba꞉moe komo iya꞉tawahanomola, Godote ba꞉be nopoeno hido owalubi komo atamo hibilo kikaa꞉mema꞉ ebeno ukui galane hiya꞉ma꞉ a꞉kamida꞉mene.
HEB 6:18 Iyo, Godoko ha꞉da amihodawaha꞉, ba꞉bema꞉ keba tetelo ebete eta komo ododima꞉ tabo hibilo da꞉goemene, ebete ebeno ukui hiya꞉ma꞉ midihino ba꞉be komo kododima꞉ne, ba꞉gala keba tetelo ebete tabo ba goita ebeno mahilo da꞉ka꞉mimini, ebete ba꞉be tabo atumu a꞉kadikanala꞉mene. Ba꞉bene Godokono hibi tabo mabuma꞉ ba꞉gala ebeno tabo kodakoduimima꞉ ebeno mahilo ka꞉mi mabuma꞉, a puya꞉te aeno ka꞉ka꞉ mula꞉ komo lawema꞉ kuba ododili ipuwane ebetamo dalahutihuya꞉ma꞉, ale ebeno tabo hibima꞉ ba midina helo ba꞉bo lawenakoma꞉, ale aeno hibi ka꞉ka꞉ lawema꞉ uliholo kolatiminama꞉.
HEB 6:19 Ba꞉bema꞉ aeno uliholo latimi komote bogeno aga huiyama꞉ ba eda꞉na aeno tepo ipuwoeno ukui na꞉kodakoduilamena, ale aeno ka꞉ka꞉ mula꞉ habane dito okoa꞉tekapoma꞉. Ba꞉bene Godokono Hunu Habalo da꞉la꞉na, aeno agate ba꞉be Adikumino Hiya꞉ Genamoeno Talonanomo Habalo ba itana, ebeno halete Talonanomo Haboeno kaliko ubilido petote a kodakodalo ba꞉bo matuhua꞉mena, ba꞉bema꞉ kalakala konomola, ba꞉be agoeno hale ba꞉ kodakodanomola, a꞉kata꞉gala꞉mene.
HEB 6:20 Iyo, dopamo Ya꞉suti a mabuma꞉ Adikumi Genamoeno Talonanomo Habamo a꞉na꞉pa꞉guya꞉, ebete Godotamo hawa꞉goeno ikameho komodo aeno kuba ododili komo konegebolea꞉mema꞉, ba꞉bema꞉ hibila, ebe Godotamo hawa꞉goeno ikamehopino Hununomo Watodawama꞉ ediya꞉ emedena emedena tetelo ba꞉be oko habalo kemedenama꞉, Mekisadekate dopamo Godokono okodawama꞉ keba ka꞉na keda꞉nami ba꞉ba ka꞉na.
HEB 7:1 A꞉ibalahamako tetelo ba꞉moe Mekisadekate ba꞉ Yelusalema ko haboeno Ko Gawadubuma꞉ deda꞉nami ba꞉be dubula, ba꞉gala ebe ba꞉ Hununomo Godotamo hawa꞉goeno ikamehodawa etala. Ba꞉ hibila, ba꞉moe kodawoeno dopo mahiloeno ipuwa ba꞉ ‘Tuputupu Emede Ko Gawadubula,’ ba꞉gala ebeno eta ipuwa mahilo ba꞉ ‘Hete Ikame Ko Gawadubula’ mabu ebeno Yelusalema haboeno mahilo ipuwa ba꞉ ‘Hete Ikame Ko Habala.’ Ba꞉bene eta tetelo A꞉ibalahamate netewa-netewa koko gawadubago alaholohote wato kikipo da꞉lawiya꞉, ba꞉ba tetelo ebete alaholoho habane gala ba kapita, Mekisadekate eba꞉go palugate Godoko ba꞉bo pikiyamiya꞉ ebete A꞉ibalahamako hidonomamo kowalubinakoma꞉. Ba꞉bene A꞉ibalahamate ebeno dubago alaholo komamo duwatiya꞉, ebete ba꞉bi ilina hiliyonomo anagilameholete komo ta꞉ni komokomo ipuwane eta kapiya lawenakui, eta kapiya lawenakui, Mekisadekatamo ba꞉bo ikamehuya꞉.
HEB 7:3 Numa꞉la꞉, Godokono Bukalo eta tabote kitanaha꞉ ba꞉moe kodawoeno komoma꞉ a kiya꞉tua꞉mema꞉, ba꞉bema꞉ a iya꞉tawaha꞉ ebeno iniwalino komo ba꞉gala ebeno menoko nabiwi ibino mahilo, iyo, ebeno hawakala tete ba꞉gala hoe tete atumu atamo kahawakalilamenaha꞉. Ba꞉ ba꞉ba ka꞉na ebe ba꞉ Godokono Gudu huiyala, mabu emedena emedena tetelo ebete Godotamo hawa꞉goeno ikamehodawama꞉ beda꞉namene.
HEB 7:4 Ba꞉bema꞉ numa꞉la꞉, ba꞉moe dubu Mekisadekako ebe bada konomodawala꞉ka꞉! A Yunapi hiliyonomoeno iniwa nabiwi A꞉ibalahamate ba꞉be komo ba iya꞉tawa, ebete Mekisadekako kawagaminama꞉ alaholo komamo duwatiya꞉ ba꞉bi ilina hiliyonomo anagilameholete komo ta꞉ni komokomo ipuwane eta kapiya lawenakui, eta kapiya lawenakui, ebetamo kalakalago ba꞉ba ka꞉na ikamehuya꞉.
HEB 7:5 Ba꞉gala eta komo. A Yunapi hiliyonomate A꞉ibalahamagodone ikuliya꞉ma꞉, huiyatiya a ipuwalo Libai gu dubate ha꞉kiya Godotamo hawa꞉goeno ikamehopima꞉ eda꞉hana. Ba꞉bema꞉ ibi kowalubilima꞉ a komo Yunapa꞉te aeno oko huiya mani ba꞉gala ilina anagilameholete ta꞉ni komokomo ipuwane eta kapiya ba꞉lawema꞉, eta kapiya ba꞉lawema꞉, iba꞉tamo dito ikalameholenakoma꞉, mabu Godokono Tutumu Tabote ba꞉be komo kododima꞉ a biya꞉tua꞉mena.
HEB 7:6 Ba꞉bema꞉ numa꞉la꞉, Mekisadekako Libai gudawama꞉ keda꞉namiha꞉, huiyatiya Libai gunapino iniwa A꞉ibalahamate ebeno ilina hiliyonomo anagilameholete Mekisadekako kawagaminama꞉ ebeno komo ebetamo dito ikamehuya꞉, ba꞉bene ba꞉ba tetelo Mekisadekate Godoko bikiyamiya꞉ ebete A꞉ibalahamako kowalubinakoma꞉. Iyo, ba꞉moe A꞉ibalahamako ba꞉ Godote dopamo ebe kowalubima꞉ potamo hibilo da꞉goiya꞉ ba꞉be ko dubula,
HEB 7:7 huiyatiya Mekisadekate A꞉ibalahamako mabuma꞉ Godoko da꞉kiyamiya꞉, a ba꞉moe komone niya꞉tawahanama꞉ ba꞉moe eta dubuino helote A꞉ibalahamakono helo hibinomolo na꞉gogolona.
HEB 7:8 Ba꞉ hibila, Libai gunapa꞉te Godotamo hawa꞉goeno ilina ikamehopima꞉ deda꞉hana, ba꞉bema꞉ a komo Yunapa꞉te aeno oko huiya mani ba꞉gala ilina anagilameholete ibino komokomo iba꞉tamo dito bikalameholenakoma꞉. Huiyatiya numa꞉la꞉, Godokono umi ipuwalo ba꞉bi Libai gu okopa꞉te kokopima꞉ hibilo keda꞉hanaha꞉ mabu ibi hiliyonomate koha꞉lahama꞉na꞉, ebeno Bukate huiyatiya Mekisadekakono komo ba꞉ma ka꞉na hawakalimina, ebete ko dawanomoma꞉ ba eda꞉na ebeno ka꞉ka꞉ komote kawibonaha꞉. Iyo, A꞉ibalahamate ba꞉moe komo ba iya꞉tawa Mekisadekako kawagaminama꞉ ebeno komo ilina ebetamo ba꞉ dito ikamehuya꞉.
HEB 7:9 Ba꞉bema꞉ diyala, lumagiti ba꞉be komo ba emalagidolo ba꞉ma ka꞉na da꞉ goemene, Libai gupa꞉te ibino iniwa nabiwi A꞉ibalahamako ipuwado Mekisadekako atumu a꞉kawagaminuya꞉. Iyo, ba꞉ hibila, A꞉ibalahamate ebeno ilina hiliyonomo anagilamehole tetelo Mekisadekakono komo ebetamo dikamehuya꞉, ba꞉be atu tetelo Libai gunapa꞉te ibino iniwagodone ilina ba꞉ atumu kikamehuya꞉.
HEB 7:10 Ba꞉bema꞉ numa꞉la꞉, Libaiko hopo habamo hawakalaheno, dopamo ebete ebeno iniwoeno ape ipuwalo ba emedena, ba꞉ba tetelo A꞉ibalahamate Mekisadekakoba꞉ daluguya꞉, Libaiti ba꞉be kodawa ebeno iniwa nabiwa꞉go kapimilo ba꞉bo awagaminuya꞉.
HEB 7:11 Ba꞉gala eta komo. Godote ebeno Yunapi ipuwalo Libai gu dubu ebetamo hawa꞉goeno ilina ikamehoma꞉ ibi kapiya duwatiya꞉, ba꞉be atu tetelo ebete Yunapa꞉tamo ebeno komo hiliyonomo Tutumu Tabo ikalamiya꞉ iba꞉te hidamo kemedenama꞉. Ba꞉bema꞉ Libai gu okopino hawa꞉goeno ilina ikameho ipuwado tawakaluba꞉te hidohidonomoma꞉ neda꞉huya꞉tale, Godote ebeno eta hiya꞉nomo hawa꞉goeno ilina ikamehodawa ba꞉ka꞉-adipatiya꞉na꞉. Huiyatiya Godokono ubilo eta dawate hibilo uluhukuya꞉, ba꞉be dawa ba꞉ A꞉lonigodone da꞉pikuliya꞉ ba꞉bi Libai gu okopi huiyaha꞉, ao, ebe hiya꞉nomo okodawama꞉ eda꞉na, Mekisadekate dopamo keba ka꞉na keda꞉nami ba꞉ba ka꞉na.
HEB 7:12 Ba꞉bema꞉ keba tetelo Godote ebetamo hawa꞉goeno ilina ikamehoma꞉ pakala okopino habalo uli okodawa dadipatemene, ba꞉be atu tetelo ebete pakala Tutumu Taboeno hiya꞉hiya꞉ komokomo tama꞉mo miya꞉tete uli Tutumu Tabo ebeno tawakaluba꞉tamo kikalamema꞉ne.
HEB 7:13 Numa꞉la꞉, nale aeno Kodawa Ya꞉sukunu komoma꞉ olamagitamo, ebe ba꞉ Godote dadipatiya꞉ ba꞉be uli okodawala. Huiyatiya tawakalubi hiliyonomo iya꞉tawahala, ba꞉moe Ya꞉suku Libai gudawaha꞉, ebete Yuda gu ipuwane hawakaluya꞉, ba꞉gala ibi ba꞉moe eta komo atumu iya꞉tawahala, Godotamo hawa꞉goeno ilina ikamehoma꞉ eta dawate Yuda gu ipuwane dopamo kuluhukuya꞉ha꞉, mabu Mosesete Godokono Tutumu Tabo ebeno Bukamo ba miya꞉te, ebete Yuda gunapi kakiyalamiya꞉ha꞉ ba꞉bako oko kowatima꞉.
HEB 7:15 Ba꞉bema꞉ numa꞉la꞉, nale dolamagitamo ba꞉moe taboeno ipuwa ba꞉ma ka꞉na a꞉hawakala, Godokono eta hiya꞉nomo hawa꞉goeno ilina ikamehodawate ba꞉ uluhukuya꞉, ba꞉be dawate Mekisadekate dopamo kebako dawama꞉ keda꞉nami ba꞉bako dawama꞉ keda꞉na.
HEB 7:16 Iyo, Mosesete a dopamo da꞉tutumua꞉tiya꞉ Godotamo hawa꞉goeno ikamehopa꞉te Libai gu kapiya ipuwane kopikulima꞉, ba꞉be tutumu komodo Godokono uli okodawate ebeno oko haba kalawiya꞉ha꞉. Ebete huiyatiya Godotamo hawa꞉goeno ikamehodawoeno haba belawiya꞉, mabu ebete kebe ka꞉ka꞉go emedena emedena tetelo demedenamene ba꞉be ka꞉ka꞉te helo ebetamo ikamiya꞉.
HEB 7:17 Ba꞉bema꞉ hibila, Godote ebeno uli okodawoeno komoma꞉ ebeno Bukalo tabo ba꞉ma ka꞉na ihatiya꞉, “Emedena emedena tetelo ama꞉ natamo hawa꞉goeno ilina ikanamehonedawama꞉ beda꞉namena꞉ta, Mekisadekate dopamo naeno okodawama꞉ keba ka꞉na keda꞉nami ba꞉ba ka꞉na.”
HEB 7:18 Numa꞉la꞉, Godote dopamo kebe hiya꞉hiya꞉ Tutumu Tabo Moseseko ipuwado a Yunapa꞉tamo dikaa꞉miya꞉, ba꞉bi Tutumate kamodobonamiha꞉ tawakalubi Godokono tuputupupinomoma꞉ komidilinama꞉. Ba꞉be mabuma꞉ ebetamo hawa꞉goeno ilina ikamehopino komoma꞉ da꞉pola꞉nama꞉, ebete ba꞉bi pakala Tutumu tama꞉mo ba miya꞉te aeno kuba ododili komo kegebolea꞉mema꞉ eta gabo ba꞉ma ka꞉na hiduimiya꞉, a hidonomo huiya ebegodone konomamo lawema꞉ uliholo da꞉latiminama꞉, ale ba꞉be ukui komodo ebeno holoholo hapuamo kalakalago pelamenakoma꞉.
HEB 7:20 Ba꞉gala ba꞉moe ba꞉ eta komola. Dopamo tetelo Libai gu dubate Godotamo hawa꞉goeno ilina ikamehopima꞉ eda꞉hate oko tupuimihino, etate ibino komoma꞉ Godokono mahilo kaka꞉miya꞉ha꞉ iba꞉te ba꞉be oko ebeno heloamo kowatihonama꞉.
HEB 7:21 Huiyatiya Ya꞉suti ebetamo hawa꞉goeno ikamehodawama꞉ dediya꞉, ba꞉ba tetelo Godote ebeno mahilonomo ba ka꞉mi ebetamo hibinomolo ba꞉ma ka꞉na goiya꞉, “Na Kodawa Godote amia꞉no okoma꞉ naeno ukui hiya꞉ma꞉ a꞉kamida꞉mo, mabu nale naeno mahilamo ba꞉moe hibinomo tabo ba꞉ a꞉goemo, ‘Emedena emedena tetelo ama꞉ natamo hawa꞉goeno ilina ikanamehonedawama꞉ beda꞉namena꞉ta.’”
HEB 7:22 Ba꞉bema꞉ numa꞉la꞉, Godote tawakalubino kuba ododili komo egebolelamema꞉ kebe nopo dopamo da꞉tamotiya꞉, ba꞉be nopoeno helote deha꞉potodopoma꞉ eda꞉nami. Huiyatiya ebete ba꞉ma tetelo uli nopo da꞉katamotiya꞉, ba꞉be nopote ebeno helo mahilamo duluhukuya꞉ ba꞉be mabuma꞉ ba꞉be helote konomoma꞉ eda꞉na, iyo, a hibima꞉ midipi ba꞉moe komone niya꞉tawahanama꞉ Ya꞉suti a mabuma꞉ oko hidonomamo nowatina.
HEB 7:23 Ba꞉gala eta komo. Dopamo Godotamo hawa꞉goeno ilina dikamehonakui ba꞉bi dubate hiliyonomoma꞉ eda꞉hanama꞉, mabu ibi ipuwalo komopi da꞉ha꞉lahanakui komo uliuli apepeho dubate ha꞉lahapino oko haba ba꞉ dito kuwatenakuya꞉.
HEB 7:24 Huiyatiya Ya꞉sukunu komo hiya꞉nomola mabu ebete emedena emedena tetelo ba emedena, ebeno hawa꞉goeno ikameho okote Godotamo a꞉kawibonamene, iyo, eta lumagiti ebeno oko haba a꞉kalawenamene.
HEB 7:25 Ba꞉moe mabuma꞉ puya꞉te ebe ipuwado Godotamo da꞉pelamenaka, ba꞉bi tawakalubino ka꞉ka꞉ komula꞉lelamema꞉ Ya꞉sukunu helote modobonomoma꞉ eda꞉na, mabu ebete emedena emedena tetelo ba emedena ibi mabuma꞉ Godoko ba꞉toemehonakomene.
HEB 7:26 Ba꞉bema꞉ kalakala konomola, ba꞉ma tetelo Ya꞉suku ba꞉ Godotamo hawa꞉goeno ikamehopino Hununomo Watodawala, iyo, ebe ha꞉kiya aeno modoboha꞉ komo hiliyonomo ipuwalo a hidonomamo owalubinako. Ba꞉ hibila, ebete Godoko kalakaluimima꞉ tuputupunomoma꞉ ba eda꞉na, eta kuba ododi komote ebegodolo kitanaha꞉, puliyanomola. Ba꞉be mabuma꞉ puya꞉te hopo habalo kuba komo dododilinaka, Godote Ya꞉suku ibi hiliyonomo ipuwane owatiya꞉midate ebe hunamo ba꞉bo adipatiya꞉ ebete Hunu Habalo kemedenama꞉.
HEB 7:27 Ba꞉bema꞉ numa꞉la꞉, Ya꞉suti Godotamo hawa꞉goeno ilina ikamehopino komo hununomo watowatopi huiyaha꞉. Ba꞉ba꞉te ibino kuba ododili komo kegebolelamema꞉ hawa꞉goeno ilina Godotamo dopamo ikamehote, ba꞉bene iba꞉te komo hawa꞉goeno ilina tawakalubi mabuma꞉ gala a꞉kikamehonaka, huiyatiya Ya꞉sukunu komo hiya꞉nomola. Ebegodolo eta kuba kapiyate itanaheno, ebe ha꞉kiya ebeno ape hawa꞉goeno malemale ilinama꞉ miditi Godotamo kapiya tetenomolo ba꞉bo ikamiya꞉, ba꞉bema꞉ hibila, ebeno hawiti emedena emedena tetelo modobo oko bowatinamene.
HEB 7:28 Ba꞉bema꞉ ale ba꞉moe ko komo hidamo umima꞉, Godote atamo Moseseko ipuwado dikaa꞉miya꞉ ba꞉bi Tutumu Tabo komodo tete ga꞉ga꞉nomolo komo tuputupuha꞉ dubate Godotamo hawa꞉goeno ikamehopino hununomo watowatopima꞉ eda꞉hanama꞉. Huiyatiya galane tetelo ebete ba꞉bi Tutumu Tabo komokomo tama꞉mo ba miya꞉te ebeno helo mahilamo hibinomolo ba꞉bo goiya꞉, ebeno Gudu kapiyate ebetamo hawa꞉goeno ikameho oko habalo kemedenama꞉. Ba꞉ hibila, ba꞉be Guduti ba꞉be oko owati komo hidonomamo ya꞉lo iya꞉tawate emedena emedena tetelo ba꞉ba ka꞉na bowatinamene.
HEB 8:1 Ba꞉bema꞉ nale kebe tabo kolamagitamo, ba꞉moe ba꞉ ba꞉be taboeno konomo ipuwala, a hibima꞉ midipi mabuma꞉ ba꞉bako hidonomo okodawate bemedena. Iyo, a mabuma꞉ Godotamo hawa꞉goeno ikamehopino Hununomo Watodawama꞉ deda꞉na, ba꞉be dawate Hunu Haboeno Konomo Gawadubu Godokono tu hapulu bemedena.
HEB 8:2 Numa꞉la꞉, a Yunapino iniwali tetelo iba꞉te Godoko adikumima꞉ eta sipi-goegoeno tama alokoa꞉mida genama ba꞉bo adipatiya꞉, ba꞉bema꞉ ibi mabuma꞉ Godotamo hawa꞉goeno ilina ikamehopa꞉te oko ba꞉bolo owatinama꞉. Huiyatiya a mabuma꞉ hawa꞉goeno ikameho oko dowatina, ba꞉be dawate hopo habanapa꞉te detiya꞉ ba꞉bako genamalo kowatinaha꞉, ao, ebeno oko haba ba꞉ aeno Kodawate Hunu Habalo detiya꞉, ba꞉be hibi Adikumino Genamoeno Talonanomo Habala.
HEB 8:3 Ba꞉ hibila, hopo habalo Godotamo oko dopamo dowatinama꞉, Godote ba꞉bi hawa꞉goeno ilina ikamehopino hununomo watowatopi ibino oko habamo a꞉miya꞉tenakui, iba꞉te tawakalubi mabuma꞉ hiya꞉hiya꞉ dabihole ilinoeno hawi ba꞉gala komo malemale ilina ebetamo dito kikamehonakoma꞉. Ba꞉be mabuma꞉ hawa꞉goeno ikameho oko a mabuma꞉ dowatina, wadiyala ba꞉be Kodawate eta hido komo atumu Godotamo na꞉kikamehamene.
HEB 8:4 Huiyatiya numa꞉la꞉, a mabuma꞉ Hunu Habalo oko dowatina, ba꞉be dawate Hunu Habamo odoloheno hopo habalo nemedenatale ebete Godotamo hawa꞉goeno ikamehodawama꞉ ba꞉ka꞉-eda꞉na꞉, mabu ba꞉moe hopolo komo okopa꞉te ba emedehona komo hiliyonomo tetelo Godotamo malemale ilina dito ikamehonaka, Mosesete a Yunapino iniwali keba ka꞉na ka꞉tutumulateliya꞉ ba꞉ba ka꞉na.
HEB 8:5 Ba꞉bema꞉ puya꞉te hopo habalo oko dowatina, ba꞉bi dubuino oko ba꞉ aeno Kodawate Hunu Habalo dowatina ba꞉be hibi okoeno go huiyala. Ba꞉ ba꞉ba ka꞉na Mosesete Godoko adikumino sipi-goegoe tama alokoa꞉mida genama dadipatiya꞉, ba꞉be genamate ba꞉ Godokono Hunu Habalo da꞉la꞉na ba꞉be hibi genamoeno goma꞉ atumu keda꞉na. Iyo, ba꞉be mabuma꞉ Mosesete ba꞉be genama dito hopolo ete tupuimihino, dopamo Godote ebe ba꞉ma ka꞉na kiyamiya꞉, “Nale naeno hibi genamoeno go ama꞉ Sainai Hununomo Hakalo keba ka꞉na ka꞉mutuimitima, wadiyala ama꞉le na adikunameno genama ba ete genamoeno hiya꞉hiya꞉ komo ba꞉ ba꞉ba ka꞉na nododiliya꞉.”
HEB 8:6 Ba꞉ hibila, Ya꞉suti hopo habanapi ba꞉gala Godoko ibi tetenomolo ba la꞉na, kebe uli nopo da꞉tamotiya꞉ ba꞉be nopoeno helote pakala nopoeno helo na꞉gogolona, iyo, Godote ebeno uli nopodo kebe owalubi komokomo hibima꞉ midipa꞉tamo ikalamema꞉ hibilo da꞉goiya꞉ ba꞉bi komo ba꞉ hidohidonomola, huiyatiya pakala nopoeno owalubi komote hibilo kitanamiha꞉. Ba꞉bema꞉ numa꞉la꞉, ba꞉ ba꞉ba ka꞉na Godote ebeno uli nopodo kebe hawa꞉goeno ikameho oko Ya꞉sutamo dikamiya꞉, ba꞉be okoeno helote atumu pakala nopoeno okopino helo na꞉kagogolena.
HEB 8:7 Iyo, hibila, tawakalubino kuba ododili komo kegebolelamema꞉ pakala nopoeno helote modobolo nitanuya꞉tale, Godote galane tetelo eta nopo ba꞉ka꞉tamotiya꞉na꞉.
HEB 8:8 Huiyatiya ebete ebeno tawakalubino kuba ododili komokomo ba ulame, ebeno pakala nopoeno komo ibi owalubilima꞉ modoboha꞉ma꞉ goelo tabo ba꞉ma ka꞉na olamagiya꞉, “Na Kodawate goemo, naeno Isalaela tawakalubi ba꞉gala Yuda tawakalubi mabuma꞉ tete tatalila na uli nopo kotamotema꞉nemo.
HEB 8:9 Iyo, na ibino iniwali Isipiti hopone uluhukulatelete hidonomamo da꞉magataliya꞉mo, ba꞉ba tetelo nale kebe nopo iba꞉tamo da꞉tamotiya꞉mo, ba꞉be nopoeno tabamo iba꞉te hibilo kapapamila꞉haliya꞉ha꞉, ba꞉bema꞉ nale ibi dito miya꞉patepaliya꞉mo, ibi ha꞉kiya ibino ubilo hiya꞉hiya꞉ kowapata꞉lamenama꞉. Huiyatiya na ba꞉ma tetelo uli nopo da꞉tamotemo, ba꞉moe nopoeno helote hiya꞉nomoma꞉ keda꞉ma꞉ne.
HEB 8:10 Iyo, na Kodawate goemo, tete ba꞉ na꞉tatali, na uli nopo naeno Isalaela tawakaluba꞉tamo ba꞉ma ka꞉na kotamotema꞉nemo, nale naeno tutumu tabo komokomoma꞉ ibi dito a꞉kakiyalama꞉mo, ao, na huiyatiya ba꞉bi tutumu tabo ibino ukui mabamo ba꞉gala ibino tepo ipuwanomamo komiya꞉telamema꞉nemo. Ba꞉bema꞉ ba꞉moe ododi komodo iba꞉te na kapiya ibino Godoma꞉ ba ka꞉namina, nale atumu ibi naeno hibi tawakalubima꞉ ba꞉bo koka꞉lamima꞉nemo.
HEB 8:11 Ba꞉ba tetelo ibi ipuwalo etate ebeno tamedawa ba꞉ma ka꞉na a꞉kakiyama꞉mene, ‘Wadiyala ama꞉ Godoko amia꞉no Kodawama꞉ na꞉midiya꞉.’ Ao, etate ba꞉mako tabo ebeno mabulubitamo a꞉kolamaga꞉mene, mabu ibi ipuwalo kokopi ba꞉gala hegehegepi atumu, ibi hiliyonomate tepo ipuwoeno ukui ya꞉lo a꞉hiduilamiya꞉, iba꞉te na ibino Kodawama꞉ hibilo komidininama꞉!
HEB 8:12 Ba꞉bema꞉ ba꞉moe komo ba꞉ hibila, ba꞉ba tetelo nale ibino kuba ododili komo egebolelamete nale gala a꞉kemalagidolelama꞉mo.”
HEB 8:13 Ba꞉bema꞉ wadiyala la꞉ ba꞉moe komo hidamo nemalagidolala꞉. Godote uli nopoeno komoma꞉ tabo ba꞉ba ka꞉na dolamagiya꞉, ba꞉ba tetelo ebete dopamo da꞉tamotiya꞉ ba꞉be nopo pakaladopoma꞉ goiya꞉, ba꞉bema꞉ hibila, ba꞉moe hopolo kebe ilinate pakaladopoma꞉ deda꞉hanaka, tete tatalila ba꞉bi ilinoeno hido komote wibonomo wibote dito kalatidihoma꞉na꞉.
HEB 9:1 Numa꞉la꞉, Godote dopamo kebe nopo da꞉tamotiya꞉, ba꞉be pakala nopoeno kukalate na꞉pola꞉nama꞉, tawakaluba꞉te ebe adikumi genama etete ebe ba꞉bolo keba ka꞉na na꞉kadikuminakomena꞉.
HEB 9:2 Ba꞉bene tawakaluba꞉te ba꞉bi kukalamo kopapamila꞉halenama꞉ Godoko adikumino sipi-goegoe tama alokoa꞉mida genama ba꞉bo adipatiya꞉, ba꞉be genama gulu netewa habate na꞉pola꞉nama꞉. Ba꞉bene Godoko adikumima꞉ okopa꞉te genamoeno dopo hapulu ditanami ba꞉be kaliko ubilido ba꞉moe genamoeno dopo habamo ba꞉bo na꞉pa꞉la꞉hanakuya꞉. Ba꞉be dopo haboeno mahilo ba꞉ Talona Habala, ebe ipuwalo alo kapiyate ba itana patapatate atumu na꞉kitanami, ba꞉bene ba꞉be patapata hunulu okopa꞉te talona baa꞉ Godotamo dikamehonakui ba꞉bi baa꞉te ba꞉bolo na꞉pola꞉nanakuya꞉.
HEB 9:3 Ba꞉bene genama gunomolo eta habate na꞉ka-itanami, ebeno mahilo ba꞉ Talonanomo Habala, ba꞉gala ba꞉be haboeno dopo hapulu eta kaliko ubiliti na꞉ka-itanami, ba꞉be talona habalo talonanomo ilinate ugumuili ipuwalo hidamo kopola꞉nama꞉.
HEB 9:4 Ba꞉bema꞉ ba꞉be Talonanomo Habalo ba꞉moi netewa ilinate na꞉pola꞉nama꞉, Godoko owatidoloeno golodo patapata ba꞉gala ebete dopamo da꞉tamotiya꞉ ba꞉be nopoeno golodo Talona Bokose. Ba꞉bene golodo patapatoeno komo ba꞉ma ka꞉nala, koete ba꞉be patapata hunulu ba woe modobodawate Godoko owatidoloeno hido nibo puhulu ilina koa꞉mo ba꞉bo haminahalenakui. Ba꞉gala Godokono Talona Bokoseno komo ba꞉ma ka꞉nala, ba꞉be Bokose ipuwalo ebete kebe hanohano ilinamo aeno iniwala꞉tamo ebeno helo da꞉hawakalimiya꞉, ba꞉moi ba꞉bi netewa-kapiya ilinate na꞉kapola꞉nama꞉ — ma꞉na mahilagoeno baa꞉ golodo kalili, ba꞉gala A꞉lonikono komoma꞉ ebeno kukuni huha꞉te ha꞉kiya da꞉pikulihuya꞉ ba꞉be kuku, ba꞉gala Godote kebe nakola hunamo ebeno koko Tutumu Tabo da꞉miya꞉tiya꞉ ba꞉bi netewa nakolala.
HEB 9:5 Ba꞉bene Godokono Talona Bokose hunulu kola꞉mota꞉nama꞉, okopa꞉te netewa hiya꞉nomo holoholo nopopi golodo ilinamo ododiliti ba꞉bamo dito miya꞉tiya꞉. Ba꞉bi nopopi ba꞉ patamagopila, ba꞉bene ibino patamu hogaminalelo ba la꞉mota꞉na iba꞉te ba꞉be Talona Bokose ba꞉bo mula꞉nama꞉. Ba꞉ hibila, ba꞉be Bokose hunuino tete ba꞉ talonanomola, mabu Godote ba꞉bolo ba emedena tawakalubino kuba ododili komo hiliyonomo ba꞉bo egebolelamenakui. Huiyatiya naeno tabo ulihopa꞉la꞉, la꞉ nonolata. Nale ba꞉moe sipi-goegoe tama alokoa꞉mida genamoeno komo hiliyonomo komoma꞉ la꞉ kiya꞉tulamema꞉ ba꞉moe tete hidoma꞉ kagoeha꞉.
HEB 9:6 Numa꞉la꞉, nale genamoeno kapiyakapiya ilinama꞉ la꞉ diya꞉tulamema, ba꞉bi ilina ba꞉ okopa꞉te Godokono tabamo papamila꞉halete ebe adikumima꞉ da꞉miya꞉tiya꞉ ba꞉bi ilinala. Ba꞉bema꞉ Godotamo hawa꞉goeno ilina ikamehopino komo ba꞉ma ka꞉nala, iba꞉te hiliyonomo hegelalo ba꞉moe genamoeno dopo haba ipuwamo a꞉pa꞉pa꞉la꞉hanakuya꞉ ibino hiya꞉hiya꞉ oko Godotamo kowatihonama꞉.
HEB 9:7 Huiyatiya okopi ipuwalo ibino Hununomo Watodawa kapiyate modobola genama gunomolo ditanami ba꞉be Talonanomo Haba ipuwamo kona꞉pa꞉gama꞉, iyo, gogo hiliyonomo ipuwalo eta kapiya tetenomolo ebe ha꞉kiya hidonomo gautu-goeno hawa꞉go ba꞉bamo tonakui. Ba꞉bene ebe ba꞉gala ebeno tawakalubi hiliyonomo, iba꞉te iya꞉tawaha꞉ma꞉ ba eda꞉ha ba꞉be gogo konomolo kebe hiya꞉hiya꞉ kuba dododilinakui, Godote ba꞉bi kuba hiliyonomo kegebolelamema꞉ okodawate hawi ebetamo ba꞉bo nikamenakui.
HEB 9:8 Ba꞉bema꞉ ba꞉be dawoeno oko owati komodo Godokono Gobogobote a ba꞉moe komo biya꞉tua꞉mena, dopamo Godoko adikumino sipi-goegoe tama alokoa꞉mida genamate da꞉la꞉nami, ba꞉be tete ga꞉ga꞉nomolo tawakaluba꞉te Godokono Talonanomo Habamo na꞉pa꞉la꞉hama꞉ gabote a꞉hiya꞉midalo kitanamiha꞉.
HEB 9:9 Ba꞉bema꞉ numa꞉la꞉, pakala nopoeno Godoko adikumino hiya꞉hiya꞉ komokomo ba꞉ goma꞉ eda꞉hana, iyo, pakala nopoeno komote ba꞉ma teteno uli nopoeno ipuwa atamo na꞉kahawakalimina. Ba꞉be mabuma꞉ a ba꞉moe komo iya꞉tawahala, dopamo tetelo tawakaluba꞉te Godoko adikumima꞉ ebetamo hiya꞉hiya꞉ dabihole ilinoeno hawi ba꞉gala komo malemale ilina dikamehonakui, iba꞉te ba꞉be komodo kamodobohonamiha꞉ ibino tepo ipuwoeno ukui tuputupunomoma꞉ komidilima꞉.
HEB 9:10 Iyo, hibila, a Yunapa꞉godolo dopamo da꞉pola꞉nama꞉ ba꞉bi Godoko adikumino kukalate naha ilinoeno komo, ba꞉gala beya niho komo, ba꞉gala ape ukulale komo, ba꞉bi hiya꞉hiya꞉ hunu tamoeno komoma꞉ tawakalubi biya꞉tulamenakuya꞉. Huiyatiya numa꞉la꞉, pakala nopoeno kukalate tepo ipuwoeno ukui tuputupuilamema꞉ tawakalubi kiya꞉tulamiya꞉ha꞉, ba꞉bema꞉ Godote ubi ba꞉bo ihatiya꞉ ba꞉bi kukalate ebeno uli nopo tamote teta꞉mo pola꞉nate ba꞉bo kowibohoma꞉.
HEB 9:11 Ba꞉bema꞉ kalakala konomola, mabu Kelisote Godokono uli nopo tamote komodo piya꞉, ba꞉bene ebe Godotamo hawa꞉goeno ikamehopino Hununomo Watodawama꞉ ba eda꞉na, Godokono hidohido owalubi komate ebegodone atamo pikulinaka. Iyo, ebete a mabuma꞉ kebe uli genamalo oko dowatina, ba꞉be genamate ba꞉moe hopolo la꞉naheno ebe ba꞉ Hunu Habalo da꞉la꞉na ba꞉be Godoko Adikumino Genamala, ba꞉bema꞉ ba꞉be genamoeno hido komote aeno iniwala꞉te dopamo detiya꞉ ba꞉be genamoeno hido komo hibilo na꞉gogolona.
HEB 9:12 Ba꞉bene Kelisote kapiya tetenomolo ba꞉be genamoeno kaliko ubilido Talonanomo Habamo da꞉na꞉pa꞉guya꞉, ebete a mabuma꞉ gautu-goegoe ba꞉gala kau-goegoeno hawi Godotamo kanikamehuya꞉ha꞉. Ao, ebete ba꞉ba tetelo ebeno hawinomo binikamiya꞉ ebete aeno ka꞉ka꞉ emedena emedena tetelo komula꞉lea꞉menama꞉.
HEB 9:13 Ba꞉ hibila, dopamo tetelo puya꞉te Godokono genamalo oko dowatinama꞉, iba꞉te gautu-goegoe ba꞉gala kau-goegoeno hawi Godotamo ba ikameho komo hawi ebe adikumipi hunamo ba꞉bo anamogamidahalenakuya꞉, ba꞉gala iba꞉te atumu kebe kau-goegoe hegehege Godotamo ikamehoma꞉ koelo da꞉wamotenakui, ba꞉bi kau-goegoeno ipulu beyago kapiyuimiti tawakalubi hunamo gala dito kanamogamidahalenakuya꞉. Iyo, ba꞉ ba꞉moe gabodo okopa꞉te tawakalubino hunu tamoeno modoboha꞉ komokomo iba꞉godone gobogobamo ba꞉bo uluhukulatelelamenakuya꞉, Godote iba꞉tamo talona ihatelameheno ebe adikumima꞉ kopelamema꞉.
HEB 9:14 Ba꞉bema꞉ numa꞉la꞉, ibino ododili komate hunu tamoeno komokomo kapiya bihiduilamenakuya꞉, huiyatiya Ya꞉suti ebeno hawa꞉mo dododiya꞉ ba꞉be komoeno helo bada konomola꞉ka꞉! Iyo, ebeno hawiti aeno tepo ipuwoeno modoboha꞉ komokomo kotuputupuilamema꞉ne, ba꞉bema꞉ ale ukui gala a꞉kihata꞉ma꞉ aeno hiya꞉hiya꞉ ododili komodo aeno hunu tama kapiya komodobuilamema꞉. Ba꞉ hibila, hunu tama hiduimi komodo lumagiti hibi ka꞉ka꞉ a꞉kalawa꞉mene, iyo, ebete Godoko adikumima꞉ hibi gabo a꞉kuma꞉mene.
HEB 9:15 Ba꞉bema꞉ ko komo ba꞉ ba꞉ma ka꞉nala, Kelisote Godokono uli nopote atamo uluhukuma꞉ gabo a꞉hiduimiya꞉, mabu ebete ebeno ubi ba꞉ma ka꞉na ihatiya꞉, Godote pui ebeno tawakalubima꞉ keda꞉hanama꞉ da꞉ka꞉lamiya꞉, iba꞉te ibino wiboha꞉ teteno hido huiya ebegodone kuwatema꞉, ebete dopamo hibinomo tabo keba ka꞉na ka꞉goiya꞉ ba꞉ba ka꞉na. Iyo, Kelisoko ubila puya꞉te pakala nopoeno tetelo kuba komo dododilinakui, ebete ba꞉bi tawakalubi ebeno hawa꞉mo huiyahalete kuba ododili komoeno helo ipuwane kuluhukulatelema꞉ne.
HEB 9:16 Ba꞉gala eta komo. Ba꞉moe hopolo komopino ododi komo ba꞉ma ka꞉nala, dogodogo dubuti hoeheno dopamo ebete ebeno gugudi mabuma꞉ nopo kotamotema꞉ne, iba꞉te ebeno hoe tetelo ebeno dogodogo ilina keba ka꞉na na꞉kuwatemena꞉. Ba꞉bema꞉ ebeno hoe tetete ebetamo hibilo duluhukumini, ebeno guguda꞉te ba꞉be nopo tamote komodo nabiwigodone hidohido komo ba꞉bo kuwatema꞉na꞉.
HEB 9:17 Huiyatiya hibila, ba꞉be dogodogodawate hoeheno, ebete da꞉tamotiya꞉ ba꞉be nopodo eta guduti eta ilina kapiya dito a꞉kalawa꞉mene, iyo, ebete ka꞉ka꞉lo ba luta ba꞉be nopoeno helote a꞉kitanamene huiyatiya ba꞉be dubuino hoe komo kapiyado kodakodama꞉ keda꞉ma꞉ne.
HEB 9:18 Ba꞉bema꞉ Godote atumu ba꞉ ba꞉ba ka꞉na ka-ododiya꞉, ebeno tawakaluba꞉tamo dopo nopo da꞉tamotiya꞉ ebeno okodawa Mosesete eta dabi ilina danakapumiya꞉, ba꞉ba tetenomolo ba꞉be nopoeno helote ba꞉be ilinoeno hoe komodo ba꞉bo tupuimiya꞉.
HEB 9:19 Iyo, ba꞉ba tetelo Mosesete Godokono ubi komamo papamiwatate, dopamo ebeno Tutumu Taboeno hiliyonomo komokomo tawakalubi ba꞉bo kiyalamiya꞉. Ba꞉bene ba꞉be komo da꞉wibuya꞉, ebete komo kau-goegoe anakapulamete ibino hawi beyago kapiyuimiti, Godokono Tutumu Tabo Buka hunamo ba꞉gala tawakalubi hunamo ba꞉ dito anamogamidahaliya꞉, ba꞉be komo ebete eta uli gedawoeno pahago ba꞉gala sipi-goe tamoeno hawihawi ipago ododiya꞉, Godote ebe keba ka꞉na ka꞉tutumutiya꞉ ba꞉ba ka꞉na.
HEB 9:20 Ba꞉bene Mosesete ba꞉be komo ba ododi tawakalubi ba꞉ma ka꞉na kiyalamiya꞉, “Godote ebeno nopo la꞉tamo da꞉tamoti, ba꞉moe hawiti ba꞉be nopo bekodakoduimi, ba꞉bema꞉ la꞉le ba꞉be nopoeno hiliyonomo tabo komamo na꞉papamila꞉halenakuya꞉la꞉.”
HEB 9:21 Ba꞉ba tetelo ebete komo hawi Godoko adikumino sipi-goegoe tama alokoa꞉mida genama guamo ba anamogamidahale, kebe talona ilina ba꞉bolo da꞉pola꞉nama꞉ ba꞉bi hiliyonomo ilina hunamo ebete atumu ba꞉bo kanamogamidahaliya꞉.
HEB 9:22 Ba꞉bema꞉ numa꞉la꞉, Godote dopamo kebe Tutumu Tabo tawakaluba꞉tamo dikalamiya꞉, ba꞉be Tutumu Tabote a biya꞉tua꞉mena, hawi anamogamidahale komo kapiyado hopo haboeno ilina ipuwalo komo hiliyonomate talonama꞉ keda꞉hama꞉na꞉, ba꞉gala eta dabi ilinoeno hawiti ka꞉ka꞉la꞉heno Godote tawakalubino kuba ododili komokomo a꞉kegebolelama꞉mene.
HEB 9:23 Ba꞉bema꞉ hibila, Godoko adikumino genamalo dopamo da꞉pola꞉nama꞉ ba꞉bi ilina ba꞉ Hunu Habalo da꞉pola꞉na ba꞉bi hibi adikumi ilinoeno go huiyala. Iyo, hopo haboeno ilinoeno komoma꞉ ibino talonate dabihole ilinoeno hawi komodo keba ka꞉na ka꞉hawakalahaliya꞉, ba꞉ba ka꞉na Hunu Habalo da꞉pola꞉na ba꞉bi ilinoeno talonate atumu hawi komodo kohawakalahalema꞉na꞉. Huiyatiya kapiya komote hiya꞉ma꞉ eda꞉na, Hunu Haboeno talonate kohawakalama꞉ hopo haboeno dabihole ilinoeno hawiti kamodobonaha꞉, iyo, Hunu Haboeno ilinate Hunu Haboeno hidonomo hawi kapiyado talonama꞉ keda꞉hama꞉na꞉.
HEB 9:24 Ba꞉be mabuma꞉ hopo habalo da꞉la꞉nami Kelisote ba꞉be Godoko adikumino genamoeno Talona Habamo kana꞉pa꞉guya꞉ha꞉, ao, ebete iya꞉tawuya꞉ hopo habalo da꞉la꞉na ba꞉be genama ba꞉ Hunu Haboeno hibi adikumi genamoeno goma꞉ eda꞉na. Ba꞉bema꞉ kalakala konomola, ebete a mabuma꞉ Hunu Habamo a꞉na꞉pa꞉guya꞉, iyo, ba꞉ma tetelo ebete Godokono holoholo hapulu emedena emedena tetelo ba꞉bolo bemedenamene.
HEB 9:25 Ba꞉gala ba꞉moe ba꞉ eta komola, Kelisote Hunu Habalo ba emedena ebete ebeno hawi Godotamo komo hiya꞉hiya꞉ tetelo gala a꞉kikamehonakamene. Iyo, puya꞉te hopo habalo hawa꞉goeno ikameho oko dowatinakui ebe ba꞉bi okopi huiyaha꞉, mabu dopamo ba꞉bi okopi ipuwalo ibino Watodawate ha꞉kiya hiliyonomo gogolo kapiya tetenomolo Talonanomo Habamo ba na꞉pa꞉ga dabihole ilinoeno hawi Godotamo ba꞉bo nikamehonakui.
HEB 9:26 Ba꞉bema꞉ hibila, Kelisote ba꞉bako hopo haboeno oko dubuma꞉ nediya꞉tale, ebete ba꞉moe hopo haba ododi mabuni tupuimiti ba꞉ma teta꞉mo puluhuku komo hiliyonomo tetelo hoe temeteme ipuwado ebeno hawi Godotamo bikamehonakona꞉. Huiyatiya ebeno komo eba ka꞉naha꞉. Ao, ba꞉moe hopo haboeno kuititi tete tatalima꞉ ba eda꞉na, ebete kapiya tetenomolo uluhukuti ebe ha꞉kiya ebeno ape hawa꞉goeno malemale ilinama꞉ ba꞉bo midiya꞉, ebete ebeno hoe temeteme ipuwado a hiliyonomoeno kuba ododili komo gobogobamo hibilo kowataa꞉mema꞉.
HEB 9:27 Ba꞉ hibila, hopo habanapi hiliyonomoeno komo ba꞉ ba꞉ma ka꞉nala, eta lumagiti kapiya tetenomolo hoete, Godote modobo huiya ebetamo kikamema꞉ ebeno ododili komokomo ba꞉bo kanagilamelemema꞉ne.
HEB 9:28 Ba꞉bema꞉ numa꞉la꞉, Kelisoko ba꞉ atumu, kapiya tetenomolo ebe ha꞉kiya ebeno ape hawa꞉goeno malemale ilinama꞉ da꞉midiya꞉, komo hiliyonomo tawakalubino kuba ododili komokomo gobogobamo miya꞉tenomo ba꞉bo miya꞉telamiya꞉. Ba꞉be mabuma꞉ ebete gala da꞉kapemene, ba꞉ba tetelo ebete komopino kuba ododili komokomo egebolelamema꞉ gala a꞉kapehaa꞉mene, ao, ba꞉ba tetelo puya꞉te ebeno pe komoma꞉ uliholo da꞉latimina, ebete ba꞉bi tawakalubino ka꞉ka꞉ hibilo mula꞉lelamete emedena emedena tetelo iba꞉go bemedenamene.
HEB 10:1 Numa꞉la꞉, Godote a Yunapino iniwala꞉tamo dikalamiya꞉ ba꞉bi Tutumu Tabo komate kebe komokomo da꞉hawakalilamiya꞉, ba꞉bi komo ba꞉ Hunu Habalo da꞉pola꞉na ba꞉bi hidohido komoeno hibidopo go huiyala, iyo, galane tetelo ale ba꞉bi hibi ka꞉ka꞉ komoeno hiya꞉hiya꞉ komo Godogodone konuwatema꞉nema꞉. Ba꞉bema꞉ hibila, dopamo tetelo okopa꞉te komo hiliyonomo gogolo hawa꞉goeno ilina Godotamo gala ikamehonakui, gala ikamehonakui, ba꞉ba ka꞉na ewagelenama꞉, huiyatiya ba꞉bi hawa꞉goeno ikameho komate kamodobonamiha꞉ Godoko adikumima꞉ da꞉pelamenakui ba꞉bi tawakalubino tepo ipuwoeno ukui kotuputupuilamema꞉.
HEB 10:2 Iyo, dopamo tetelo ibino Godotamo hawa꞉goeno ikameho komate ibino kuba ododili komokomo hibilo negebolelamiya꞉tale, iba꞉te ibino tepo ipuwalo kuba itanaha꞉ komo ba iya꞉tawahana eta tetelo hawa꞉goeno ilina ebetamo gala ba꞉ka꞉-ikamehuya꞉na꞉.
HEB 10:3 Huiyatiya ibino ododi komo eba ka꞉naha꞉. Komo gogo hiliyonomate ba petolame, iba꞉te Godotamo hawa꞉goeno ilina ikameho komodo ibino tepo ipuwalo ba꞉bo iya꞉tawahanakuya꞉, ibi ba꞉ kuba ododilipila,
HEB 10:4 mabu ba꞉moe komo ba꞉ hibila, kau-goegoe ba꞉gala gautu-goegoeno hawiti kamodobonaha꞉ tawakalubino kuba ododili komo egebolelamete ibino tepo ipuwane gobogobamo hibinomolo kowatalamema꞉.
HEB 10:5 Ba꞉moe mabuma꞉ Kelisote hopo habamo peheno huiyatiya ebeno pe tete tatalima꞉ ba eda꞉, ebete Godotamo ba꞉ma ka꞉na goiya꞉, “Ilinoeno hawi ba꞉gala komo malemale ilina tawakaluba꞉godone uwatema꞉, ama꞉ amia꞉no ubi hibilo kihatenaha꞉, ba꞉be mabuma꞉ ama꞉le naeno ape natamo ikanamiya꞉ta, nale ibi mabuma꞉ naeno ape hawa꞉goeno malemale ilinama꞉ miditi ama꞉tamo kikamema꞉.
HEB 10:6 Hibila, tawakaluba꞉te dabihole ilina koa꞉mo emadolamete ama꞉tamo dikamehonaka, ba꞉bi ikameho komate ama꞉ kakalakaluiminaha꞉, iyo, ibino kuba ododili komokomo gobogobamo kowatalamema꞉, ama꞉ hawa꞉goeno ilina iba꞉godone uwatema꞉ ubihinola.
HEB 10:7 Ba꞉bema꞉ nale ba꞉be komo ba iya꞉tawa na꞉goemo, ‘Na mola, amia꞉no ubi komo hibilo kododima꞉, iyo, ama꞉le amia꞉no Tutumu Tabo Bukalo nale kebe komo kododima꞉ da꞉hawakalimina, na ba꞉be komo hibinomolo kododima꞉nemo.’”
HEB 10:8 Ba꞉bema꞉ hibila, ba꞉moe tabo olamagi ipuwalo Kelisote dopamo na꞉goiya꞉, “Godo, tawakalubino kuba ododili komo gobogobamo kowatalamema꞉, ama꞉le hiya꞉hiya꞉ ilinoeno hawi ba꞉gala komo malemale ilina ba꞉gala komo dabihole ilina koa꞉mo demadolamenaka, ba꞉bi ilina iba꞉godone uwatema꞉ ama꞉ ubihinola, iyo, iba꞉te ba꞉bi hiya꞉hiya꞉ ikameho komodo ama꞉ kakalakaluiminaha꞉.” Iyo, hibila, tawakaluba꞉te ba꞉bako ilina Godotamo ikamehoma꞉ ebeno Tutumu Tabote ibi betutumulatelena, huiyatiya Kelisote Godokono tepo ipuwoeno hibi komo ba iya꞉tawa, ebete ba꞉bi ilina uwatema꞉ ubiha꞉ma꞉ ba꞉bema꞉ goiya꞉.
HEB 10:9 Ba꞉gala ebete ba꞉moe eta tabo moga꞉melo na꞉kagoiya꞉, “Na mola, na amia꞉no ubi komo hibinomolo kododima꞉nemo.” Ba꞉bema꞉ kalakala konomola, Godote dopamo kebe nopo ka꞉tamotiya꞉, Kelisote ebeno hawa꞉goeno ikame komodo ba꞉be pakala nopoeno hawa꞉goeno ikameho komo tama꞉mo ba ihate eta uli nopo ba꞉bo kodakoduimiya꞉.
HEB 10:10 Iyo, Ya꞉su Kelisote Godokono ubi komamo ba papamiwata ebeno ape kapiya tetenomolo hawa꞉goeno malemale ilinama꞉ miditi ebetamo dikamiya꞉, ebete ba꞉be komodo a hibima꞉ midipi hiliyonomoeno kuba ododili komo egebolea꞉mete a ebeno hido-talonapima꞉ ba꞉bo midiya꞉.
HEB 10:11 Ba꞉ hibila, dopamo tetelo Godotamo hawa꞉goeno ikamehopi ipuwalo ibi hiliyonomate hiliyonomo hegelalo ibino oko ba owatina, komo hiliyonomo tetelo atu hawa꞉goeno ilina ebetamo ba꞉bo ikamehonakuya꞉, mabu ba꞉bi hawa꞉goeno ikameho komate modoboha꞉ tawakalubino kuba ododili komo egebolelamete ibino tepo ipuwane gobogobamo hibinomolo kowatalamema꞉.
HEB 10:12 Huiyatiya kalakala konomola, Kelisokono komo hiya꞉nomola. Ebete tawakalubi hiliyonomoeno kuba ododili mabuma꞉ ebeno ape kapiya hawa꞉goeno malemale ilinama꞉ miditi Godotamo ba꞉bo ikamiya꞉, ba꞉bema꞉ emedena emedena tetelo iba꞉godolo eta kubate gala a꞉kitanamene. Ba꞉ hibila, ba꞉be oko dupuliya꞉ ebete tote Godokono tu hapuamo nemedete,
HEB 10:13 ba꞉bene ebete ba꞉bolo ebeno Ko Gawadubu tetete hawakalama꞉ latimina, iyo, ba꞉ba tetelo eba꞉go dalaholohona Godote ibi ebeno nato a꞉puti bahima꞉ hibilo komidilima꞉ne.
HEB 10:14 Ba꞉be mabuma꞉ Kelisote ebeno ape kapiya tetenomolo hawa꞉goeno malemale ilinama꞉ da꞉midiya꞉, ba꞉be gabodo ebete puino kuba ododili komo degebolelamiya꞉ ebete ibi Godokono talonapima꞉ ba꞉bo midiliya꞉, iba꞉te emedena emedena tetelo ba꞉ba ka꞉na tuputupupinomoma꞉ keda꞉hanama꞉.
HEB 10:15 Ba꞉bene Godokono Gobogobote ebeno Buka tabo komamo Kelisokono hido ododi komo atumu kahawakalimina, iyo, ebeno dopo tabote ba꞉ma ka꞉na itana,
HEB 10:16 “Na Kodawate na꞉goemo, tete ba꞉ na꞉tatali, na uli nopo naeno tawakaluba꞉tamo ba꞉ma ka꞉na kotamotema꞉nemo, nale naeno tutumu tabo komokomoma꞉ ibi dito a꞉kakiyalama꞉mo, ao, na huiyatiya ba꞉bi tutumu tabo ibino tepo ipuwanomamo ba꞉gala ibino ukui mabamo komiya꞉telamema꞉nemo.”
HEB 10:17 Ba꞉bene ebete tabo moga꞉melo gala na꞉kagoena, “Emedena emedena tetelo nale ibino hegehege ba꞉gala koko kuba ododili komo gala a꞉kemalagidolenamo.”
HEB 10:18 Ba꞉bema꞉ hibila, Godote tawakalubino kuba ododili komo hiliyonomo ba꞉ ba꞉ba ka꞉na egebolelamete dadodoholelamemene, ba꞉ba tetelo tawakalubino kuba pola꞉lama꞉naheno iba꞉te ebetamo hawa꞉goeno ilina gala a꞉kikamehonamena꞉.
HEB 10:19 Ba꞉bema꞉ naeno hibima꞉ midipi ekaka꞉la꞉, ale Godoko adikumima꞉ Ya꞉sukunu hawi ka꞉ka꞉la꞉ komodo ebeno Talonanomo Habamo toleheno kona꞉pa꞉la꞉hama꞉nema꞉.
HEB 10:20 Ba꞉ hibila, ebete hoe ipuwalo ebeno ape Godotamo dikamiya꞉, ebete Talonanomo Haboeno kaliko ubili ba꞉bo a꞉hiya꞉miduya꞉ ale ba꞉bamo kona꞉pa꞉la꞉hama꞉, mabu ebeno ikame komodo ebeno ape ba꞉be kaliko ubili huiyama꞉ ediya꞉, iyo, ebete kebe uli gabo atamo da꞉hiduimia꞉miya꞉, ba꞉be gabo ba꞉ wiboha꞉ teteno ka꞉ka꞉ gabola.
HEB 10:21 Ba꞉bema꞉ kalakala konomola, Hunu Habalo da꞉la꞉na ba꞉be Godoko Adikumi Genamalo Ya꞉suku ba꞉ ebetamo a mabuma꞉ hawa꞉goeno ikamehopino Hununomo Watodawala, ba꞉bene puya꞉te ba꞉be genamalo Godoko dadikumina ebe ba꞉ ba꞉bi tawakalubi hiliyonomoeno namutudawala.
HEB 10:22 Ba꞉be mabuma꞉ wadiyala aeno tepo ipuwalo eta gagagaga ukuiti itanaheno, ale ukui bilibiliha꞉ma꞉ ba eda꞉hana aeno hibima꞉ midi komodo Godoko tamenomamo konikulima꞉nema꞉. Ba꞉ hibila, Kelisote dopamo aeno tepo ipuwamo ebeno hawi danamogamidahaliya꞉, ba꞉bema꞉ ba꞉ma tetelo aeno tepo ipuwoeno ukuiti a kuba ododilipima꞉ kaka꞉minaha꞉, ba꞉gala ale ba꞉moe eta komo iya꞉tawahala, ale aeno apeno dalowa꞉ komo atumu kakukulalea꞉mema꞉ beyamo ya꞉lo a꞉nepalaguya꞉ma꞉.
HEB 10:23 Ba꞉gala ale kebe hido huiya Godogodone lawema꞉ uliholo da꞉latiminama꞉, wadiyala ale ba꞉be hido komoma꞉ hibi tabo tawakaluba꞉tamo ba olamagimina ba꞉be hido ukui kuititi teta꞉mo kodakodalo batila꞉nama꞉, mabu hibila, Godote a mabuma꞉ kebe komo ododima꞉ hibilo da꞉goiya꞉, a iya꞉tawahala ebete ba꞉be komo hibinomolo kododima꞉ne.
HEB 10:24 Ba꞉gala wadiyala a ipuwalo etate etoeno komo emalagidololo bowalubihuinakoma꞉, ale komopa꞉tamo hidohido komo ba ododili Godokono malemale komo ba꞉bo kohawakaliminama꞉.
HEB 10:25 Ba꞉gala komo hibima꞉ midipa꞉te ba꞉ma tetelo keba ka꞉na kewagelena, ba꞉ma ka꞉na iba꞉te komo sose tawakaluba꞉go kapiyuimi komo ya꞉lo da꞉miya꞉puya꞉, modoboha꞉ ale ibi ibamilatele. Ale huiyatiya Kodawoeno Ko Hegelate pe tatalima꞉ eda꞉ komo ba iya꞉tawahana, wadiyala aeno hibima꞉ midi mabuma꞉ ba kapiyuimina etate eta hiya꞉hiya꞉ owalubi tabo komamo ba꞉kodakoduimihuinakoma꞉.
HEB 10:26 Ba꞉ hibila, ale Godokono taboeno hibi komokomo aeno tepo ipuwalo uwatete, ba꞉bene ale kuba ododili komo miya꞉paleheno aeno ubilo dito dododilinakoma꞉, ba꞉bako kuba ododili komo kegebolea꞉mema꞉ Godotamo hawa꞉goeno ikameho komote kitanaha꞉.
HEB 10:27 Ba꞉be mabuma꞉ ba꞉bako tawakaluba꞉te ko tole ipuwalo ba꞉moe kapiya komo niya꞉tawahamena꞉, Godote kebe Hegelalo tawakalubino komo danagilamelelamemene ba꞉be Hegelate hibinomolo kopema꞉ne, iyo, ba꞉ba tetelo puya꞉te eba꞉go dalaholohona ebete ibi ebeno helonomo koa꞉mo kokubahilamema꞉ne.
HEB 10:28 La꞉ iya꞉tawahala, Godote dopamo Moseseko ipuwado kebe Tutumu Tabo tawakaluba꞉tamo dikalamiya꞉, ba꞉ba tetelo etate ba꞉bi tabamo papamiwata ubiha꞉ma꞉ ba eda꞉na, netewa o netewa-kapiyate ebeno papamiwataha꞉ emede komo umimiti ba꞉be komo kapimilo watowatopa꞉tamo da꞉pehawakalimiya꞉, tawakaluba꞉te ebe lawete malemale ebetamo hawakalimihino dito anakapumiya꞉, iyo, Godokono tawakaluba꞉te ba꞉be komo kododima꞉ ebete ibi bikiyalamiya꞉.
HEB 10:29 Ba꞉bema꞉ la꞉eno ukui keba ka꞉nala꞉ka꞉? A tetelo Godokono Guduti atamo a꞉piya꞉, ba꞉bema꞉ kebe lumagiti ebetamo papamiwata ubiha꞉ma꞉ deda꞉na, Godote ebetamo kuba huiya dikamemene bada konomola꞉ka꞉! A꞉iye, Ya꞉sukunu hawiti Godokono uli nopo ba kodakoduimina, ebe modobola ba꞉be lumagino kuba gobogobamo kowatamema꞉! Huiyatiya ba꞉be lumagiti ba꞉be hido hawi gigilepalama꞉ ba goena, kebe Owalubidawate ebetamo malemale hawakalimima꞉ dewagelenako ebete ba꞉be Hido-talona Gobogobo biduduputiminako.
HEB 10:30 Ba꞉ hibila, ale aeno Kodawoeno komo iya꞉tawahala, ebete dopamo ba꞉moe tabo hibilo a꞉goiya꞉, “Puya꞉te natamo kuba komo dododilinaka, nale naeno mauba ipuwalo iba꞉tamo modobo huiya kikalamema꞉nemo,” ba꞉gala ebeno tabo moga꞉melo gala na꞉kagoiya꞉, “Na Kodawate naeno tawakalubino komo kanagilamelelamema꞉nemo.”
HEB 10:31 A꞉iye, Helodawa Godote emedena emedena tetelo da꞉ka꞉ka꞉namene, ebete eta lumagi ebeno kuba huiya ikamema꞉ da꞉lawemene, ebeno tole komo bada konomola꞉ka꞉!
HEB 10:32 Ba꞉bema꞉ dopamo Godokono alote la꞉ ba a꞉la꞉minalena la꞉ keba ka꞉na kemedehonamima, wadiyala la꞉ ba꞉be komo hidamo gala na꞉kemalagidolala꞉, iyo, la꞉le la꞉eno hibima꞉ midi mabuma꞉ koko temeteme ba iya꞉tawahana la꞉ huiyatiya kodakodalo la꞉mota꞉hanamimata.
HEB 10:33 Ba꞉bene komo tetelo hibima꞉ midiha꞉pa꞉te la꞉ ba iduduputilame komo temeteme dito ikalamenakuya꞉ta, ba꞉gala komo tetelo iba꞉te komo hibima꞉ midipi mabuluba꞉tamo ba꞉ba ka꞉na ba ewagelena, la꞉ huiyatiya toleheno ba꞉bi ekaka꞉go ba꞉bo la꞉mota꞉hanamimata.
HEB 10:34 Ba꞉bema꞉ komo kuba ododilipa꞉te la꞉eno hibima꞉ midi mabuma꞉ komo la꞉ la꞉eno mabuluba꞉go du genamamo dito diya꞉hekiya꞉la, la꞉ ba꞉bolo komo temeteme kapimilo iya꞉tawahanakuimata, ba꞉bene iba꞉te la꞉eno genamoeno ilina heloamo duwatelamiya꞉la, la꞉ huiyatiya Godokono kalakala ba꞉bo lawiya꞉mata. Iyo, ba꞉ba tetelo la꞉ iya꞉tawahuya꞉mata, Godogodolo emedena emedena tetelo la꞉ mabuma꞉ da꞉pola꞉lama꞉namena꞉, ba꞉bi ilinoeno hido komote la꞉godolo dalatidiholiya꞉ ba꞉bi ilinoeno hido komo hibilo na꞉gogolena.
HEB 10:35 Ba꞉bema꞉ la꞉le ibi tolelameheno keba ka꞉na kemedehonama, modoboha꞉ ba꞉be komote la꞉godolo alatidi, mabu Godote la꞉eno hibima꞉ midi mabuma꞉ hidonomo huiya la꞉tamo kikalamema꞉na꞉ta.
HEB 10:36 Iyo, wadiyala la꞉ ba꞉ma tetelo la꞉eno temeteme ipuwalo kodakodalo gala na꞉kala꞉mota꞉hanala꞉, mabu Godote la꞉tamo ikalamema꞉ hibinomo tabo dopamo keba ka꞉na ka꞉goiya꞉, la꞉ ba꞉ ba꞉ba ka꞉na ebeno ubi komamo papamila꞉ha komodo hido huiya kuwatema꞉nemata.
HEB 10:37 Ba꞉ hibila, Godokono Bukalo eta tabote ba꞉ma ka꞉na goena, “Kebe Kodawate da꞉pena, tete tatalila ebe hibilo kopuluhukuma꞉ne, iyo, ebete ebeno hido tetenomolo kopema꞉ne.
HEB 10:38 Ba꞉bema꞉ tawakalubi ipuwalo pote naeno tuputupudawama꞉ deda꞉na, ebete na hibima꞉ midini komodo hibi ka꞉ka꞉ kolawema꞉ne, huiyatiya kebe dawate hibima꞉ midi komone dohobigamene, ba꞉be mabuma꞉ naeno kalakalate ebetamo a꞉kitanamene.”
HEB 10:39 Huiyatiya kalakala konomola, puya꞉te Godoko hibima꞉ midi komone ohobila꞉haheno ibino ka꞉ka꞉ mula꞉ komo kodakodalo datila꞉na, a ba꞉ ba꞉bi tawakalubila, iyo, Godokono hibi ka꞉ka꞉te agodolo a꞉kalatida꞉mene.
HEB 11:1 A Godoko hibima꞉ da꞉midinama꞉, ba꞉ba tetelo aeno tepo ipuwalo ba꞉ma ka꞉na emalagidolonama꞉, ale kebe hido huiya lawema꞉ uliholo demedehonama꞉ ba꞉be komote atamo hibilo kopema꞉ne, iyo, a iya꞉tawahanomola ale kebe hidohido komo aeno baidinomamo ulameheno ba꞉bi komate hibilo ba꞉pola꞉na.
HEB 11:2 Numa꞉la꞉, a Yunapino iniwalino tetelo puya꞉te hibima꞉ midi ipuwalo demedehonama꞉, Godote ibino hibima꞉ midi komoma꞉ iba꞉tamo na꞉kalakalanami.
HEB 11:3 Ba꞉bene a aeno hibima꞉ midi komodo niya꞉tawahanama꞉, Godote ebeno Hunu Haba ba꞉gala hopo haba konomo ebeno tabo olamagi komamo ododiliya꞉, iyo, ale aeno baidinomamo dulamenama꞉ ba꞉bi ilina hiliyonomo ebete eta lepalamo kododiliya꞉ha꞉.
HEB 11:4 Mabu A꞉ibolote Godoko hibima꞉ na꞉midinami, ba꞉bema꞉ ebete hawa꞉goeno ilina Godotamo modobolo ikamiya꞉, iyo, ebete hibima꞉ midi komodo dikamiya꞉ ba꞉be ilinoeno hido komote Ka꞉inikono ikame komoeno hido komo ba꞉bo gogoluya꞉. Ba꞉ hibila, Godote A꞉ibolokono ikame komoma꞉ ba kalakala ebe tuputupudawama꞉ goiya꞉, ba꞉bema꞉ ebeno ka꞉ka꞉te hopo habalo da꞉wibuya꞉, huiyatiya emedena emedena tetelo ebeno hibima꞉ midi komoeno ododi komote hopo habanapa꞉tamo goena.
HEB 11:5 Mabu Inokote Godoko hibima꞉ na꞉midinami, ba꞉bema꞉ hoe komote ebetamo uluhukuhino, Godote huiyatiya ebe Hunu Habamo dito da꞉pelawa꞉diguya꞉, ba꞉ba tetelo ebeno tawakaluba꞉te ebeno ape nipo ohowadiya꞉. Iyo, Godokono Bukate a biya꞉tua꞉mena, Godote Inokoko pelaweheno dopamo ebete ebeno hibima꞉ midi komoma꞉ ebetamo na꞉kalakalanami.
HEB 11:6 Ba꞉bema꞉ numa꞉la꞉, hopo habanapi ipuwalo pote Godoko hibima꞉ midihino, ba꞉be lumagiti ebe kalakaluimi modoboha꞉, mabu pote Godoko tama꞉mo pema꞉ dewagelena, ebete ebeno hibima꞉ midi komodo ba꞉ma ka꞉na niya꞉tawamene, Godote hibilo bemedena ba꞉gala pote ebe umima꞉ ubi dihatena, ba꞉be lumagiti ebegodone hido huiya hibilo kolawema꞉ne.
HEB 11:7 Mabu Nowate Godoko hibima꞉ na꞉midinami, ba꞉bema꞉ Godote galane teteno olalati komote uluhukuma꞉ da꞉kiyamiya꞉, ebete ebeno tabamo papamiwatalo konomo boge ba꞉bo ododiya꞉, ebe ba꞉gala ebeno genamanapino ka꞉ka꞉ komula꞉lelamema꞉. Iyo, kebe olalati komate hopo habamo dikulihomena꞉, Nowate ba꞉bi komo ebeno baidinomamo ulameheno, Godoko hibima꞉ ba midi ebete ba꞉be komodo hopo habanapino kuba emede komo da꞉hawakalimiya꞉, Godote huiyatiya ebe tuputupudawama꞉ ba꞉bo ka꞉miya꞉.
HEB 11:8 Mabu A꞉ibalahamate Godoko hibima꞉ na꞉midinami, ba꞉bema꞉ Godote ebe ebeno nabiwino hopo miya꞉pate eta uli hopamo toma꞉ da꞉kiyamiya꞉, ba꞉be hopote kebolo ditana A꞉ibalahamate iya꞉tawaha꞉ma꞉ ba eda꞉ ba꞉be tabamo ba꞉ dito papamiwatuya꞉. Ba꞉bema꞉ Godote ba꞉be hopo ebetamo ikamema꞉ hibilo da꞉goiya꞉,
HEB 11:9 A꞉ibalahamate ba꞉be komo hibima꞉ miditi ba꞉be uli hopamo tote, ba꞉bene ebete tete ga꞉ga꞉nomolo kapeladawama꞉ ba neda꞉na ebeno tawakaluba꞉go sipi-goegoeno tama walokoa꞉midahale genamalo nemedenami. Ba꞉bema꞉ hibila, A꞉ibalahamakono gala hapuni ebeno gudu Aisa꞉keko ba꞉gala ebeno eyono gudu Ya꞉ikoboko, iba꞉te ba꞉be atu hopolo ibino tawakaluba꞉go sipi-goegoeno tama walokoa꞉midahale genamalo kemedehonama꞉, mabu Godote ba꞉be hopo iba꞉tamo atumu hibilo ikalamema꞉ ya꞉lo a꞉goiya꞉.
HEB 11:10 Ba꞉bene A꞉ibalahamate hopo habalo da꞉pata꞉nami ebeno emede haba hibilo kohowadinamiha꞉, mabu ebete hibima꞉ midi komodo ba꞉ma ka꞉na emalagidolonami, galane tetelo ebete Godokono Hunu Haba konumima꞉ne. Ba꞉ hibila, Godote ba꞉be Haboeno ododi nopo keba ka꞉na ka꞉tamotiya꞉, ebete ba꞉ ba꞉ba ka꞉na ba ododi ba꞉be Haboeno kodakodanomo kala ba꞉bo imiya꞉ ba꞉be kalate emedena emedena tetelo kitanama꞉.
HEB 11:11 Mabu Selate Godoko hibima꞉ na꞉midinami, ba꞉bema꞉ ebeno kabele tetenomolo ebe hogoha꞉ma꞉ ba eda꞉na, Godote ebetamo helo bikamiya꞉ ebeno awi A꞉ibalahamako mabuma꞉ gudu kalahimima꞉. Iyo, Godote iba꞉tamo gudu ikalamema꞉ dopamo hibilo da꞉goiya꞉, A꞉ibalahamate ba꞉be tabo hibima꞉ miditi,
HEB 11:12 ba꞉bene ebete hoe tatalinomoma꞉ ba eda꞉ ebeno guduti Selagodone ba꞉bo hawakaluya꞉. Ba꞉ hibila, ba꞉be gudugodone ebeno eyoni guguda꞉te hiliyonomoma꞉ eda꞉huya꞉, alomoeno oloki keba ka꞉nala꞉ka꞉ ba꞉gala kehaha꞉ kolomo dodoeno kulili keba ka꞉nala꞉ka꞉, ba꞉ba ka꞉na eta lumagiti ibi ka꞉lamihole modoboha꞉.
HEB 11:13 Ba꞉bema꞉ numa꞉la꞉, nale puino komo la꞉tamo da꞉hawakalilamemo, ba꞉ba꞉te hibima꞉ midi ipuwalo ba emedena, Godote iba꞉tamo kebe hidohido komo kikalamema꞉ hibilo da꞉goiya꞉, iba꞉te ba꞉bi komo ba꞉moe hopolo uwateheno ba꞉ dito ha꞉lahuya꞉, iyo, iba꞉te muhuluni putitatate ba꞉bi hidohido komo Hunu Habalo ibi mabuma꞉ pola꞉nalo ba꞉bo nulamenama꞉. Ba꞉ hibila, iba꞉te niya꞉tawahanama꞉, ba꞉be Hunu Habate ibino hibi hopoma꞉ deda꞉na, ba꞉bema꞉ iba꞉te ba꞉moe hopo habalo ba emedena ibi ha꞉kiya ibi kapelapima꞉ ga꞉lanakuya꞉.
HEB 11:14 Ba꞉bema꞉ numa꞉la꞉, puya꞉te ba꞉moe hopolo ibi ha꞉kiya ibi kapelapima꞉ da꞉ga꞉lana, ba꞉bi tawakaluba꞉te ibino komo ba꞉ma ka꞉na hawakalimina, iba꞉te eta uli hoponomo lawema꞉ uliholo emedehona, iyo, iba꞉te ba꞉be hopo dumimina꞉ ibino hoponomoma꞉ ba꞉bo keda꞉ma꞉ne.
HEB 11:15 Ba꞉be mabuma꞉ puya꞉te hibima꞉ midi ipuwalo dopamo demedehonama꞉, ibino iniwala꞉te kebe hopolo da꞉hawakalahaliya꞉ iba꞉te ba꞉be hopo miya꞉pate gala kemalagidolonamiha꞉. Ba꞉ hibila, iba꞉te ba꞉be hopamo wilalema꞉ ubi nihatiya꞉tale, ba꞉be komo ododima꞉ gabo iba꞉tamo ba꞉hiya꞉miduya꞉na꞉, huiyatiya ibi ubihinola.
HEB 11:16 Ao, iba꞉te huiyatiya Godokono Hunu Haba hido habanomoma꞉ ba ga꞉lana, ba꞉bamo nikulima꞉ konomamo emalagidolonama꞉, ba꞉be mabuma꞉ Godote kahiloponaha꞉ iba꞉te ebe ibino hibi Godoma꞉ ka꞉minama꞉, iyo, ibi mabuma꞉ ebete ba꞉be Hunu Haba ya꞉lo a꞉hiduimilamiya꞉.
HEB 11:17 Mabu A꞉ibalahamate Godoko hibima꞉ na꞉midinami, ba꞉bema꞉ ebete ebeno gudu Aisa꞉keko ebetamo ikamema꞉ kokolomiya꞉ha꞉. Numa꞉la꞉, dopamo Godote A꞉ibalahamatamo ba꞉moe tabo hibilo a꞉goiya꞉, “Ba꞉moe gudu Aisa꞉kegodone amia꞉no eyoni gugudi hiliyonomate kikulihoma꞉na꞉.” Huiyatiya Godote A꞉ibalahamakono hibima꞉ midi komo kumima꞉, ebete Aisa꞉keko hawa꞉goeno malemale ilinama꞉ miditi ebetamo ikamema꞉ da꞉kiyamiya꞉, ba꞉ba tetelo A꞉ibalahamate ebeno tabamo papamiwatama꞉ ba꞉bo hiduya꞉,
HEB 11:19 mabu ebete ebeno tepo ipuwalo ba꞉ma ka꞉na emalagidoluya꞉, Godoko modobola Aisa꞉keko hoe ipuwane ka꞉ka꞉mo gala kakadipatema꞉. Ba꞉bema꞉ hibila, A꞉ibalahamate ebeno gudu Aisa꞉keko Godotamo ikamema꞉ ebeno tepo ipuwalo ebe ya꞉lo hoema꞉ ba goe, Godote ba꞉be gudu ebetamo ka꞉ka꞉go gala ba꞉ dito kikamiya꞉.
HEB 11:20 Mabu Aisa꞉kete Godoko hibima꞉ na꞉midinami, ba꞉bema꞉ ebete ebeno gugudi Ya꞉ikoboko ba꞉gala Isoko mabuma꞉ Godoko bikiyamiya꞉, ebete galane tetelo ibi netewapi keba ka꞉na na꞉kowalubilinakomene.
HEB 11:21 Mabu Ya꞉ikobote Godoko hibima꞉ na꞉midinami, ba꞉bema꞉ ebeno hoe komote tatalima꞉ ba eda꞉, ebete Yausepegodone da꞉hawakalahuya꞉ ba꞉bi eyoni gugudi mabuma꞉ Godoko ba꞉bo kiyamiya꞉, ebete ibi hidamo kowalubilinama꞉, iyo, ba꞉ba tetelo ebete ebeno kukago mahigate ebeno holoholo hopamo toda꞉miduimilo Godotamo toetoe tabo ba꞉ba ka꞉na olamagiya꞉.
HEB 11:22 Mabu Yausepete Godoko hibima꞉ na꞉midinami, ba꞉bema꞉ ebeno hoe tatalima꞉ ba eda꞉ ebete Isalaela tawakalubi ba꞉bo kiyalamiya꞉, iba꞉te galane tetelo Isipiti hopone ba tolame ebeno goha kowatama꞉.
HEB 11:23 Mabu Mosesekono nabiwi menoko iba꞉te Godoko hibima꞉ na꞉midinama꞉, ba꞉bema꞉ ebete da꞉hawakaluya꞉ iba꞉te netewa-kapiya manomelo ebe ba꞉bo ugumuiya꞉, Isipiti hopoeno Ko Gawadubu Pa꞉lote ebe anakapumikapoma꞉. Iyo, iba꞉te ibino a꞉lia꞉li gudu hidonomoma꞉ ba ga꞉la, ba꞉bema꞉ Pa꞉lote Isalaelanapino bahibahi gugudi anakapulamema꞉ da꞉kiyalamiya꞉, iba꞉te ba꞉be tabamo papamila꞉heno ebetamo katoletolehuya꞉ha꞉.
HEB 11:24 Mabu Mosesete Godoko hibima꞉ na꞉midinami, ba꞉bema꞉ ebete apete dubu teta꞉mo duluhukuya꞉, ubiha꞉ma꞉ ba꞉bo ediya꞉ tawakaluba꞉te ebe Pa꞉lokono boheleno guduma꞉ ka꞉mima꞉.
HEB 11:25 Iyo, ba꞉ba tetelo ebete ebeno ubi ba꞉ma ka꞉na kihatiya꞉ha꞉, ebete tete nanekelelo hiya꞉hiya꞉ kuba komo ba ododili hopo haboeno kalakala kolawa꞉tepama꞉. Ao, ebete huiyatiya ubi ba꞉ma ka꞉na ihatiya꞉ ebeno hibima꞉ midi mabuma꞉ Godokono komo tawakaluba꞉go temeteme kuwatema꞉.
HEB 11:26 Ba꞉bene Mosesete galane tetelo ebeno hido huiya Godogodone da꞉nelawemene, ebete ba꞉be komo konomamo nemalagidolonami. Ba꞉be mabuma꞉ komopa꞉te ebe diduduputiminakui, ebete Godokono Oemedawa Kelisoko mabuma꞉ ba꞉be temeteme lawema꞉ modobonomoma꞉ ba goe, Isipiti hopoeno koko dogodogo ilina uwatema꞉ ubiha꞉ma꞉ eda꞉te ebeno ukuilo ba꞉bi ilina gigilepalama꞉ midiliya꞉.
HEB 11:27 Mabu Mosesete Godoko hibima꞉ na꞉midinami, ba꞉bema꞉ hopo habanapa꞉te kebe Kodawa ibino baidinomamo umihino, Mosesete ba꞉be Kodawa ebeno tepo ipuwoeno ukuilo ba umina, Ko Gawadubu Pa꞉lokono mauba komoma꞉ toleheno Isipiti hopone ba꞉ dito tuya꞉, iyo, ebete komo temeteme ipuwalo ebeno tepo ipuwoeno ukui ba kodakoduimina ebeno Kodawa kota꞉matama꞉ ukui hiya꞉ma꞉ kamidiya꞉ha꞉.
HEB 11:28 Ba꞉gala Mosesekono hibima꞉ midi mabuma꞉ ebete Godokono tabamo papamiwatalo ebeno Isalaela tawakalubi ba꞉bo kiyalamiya꞉, iba꞉te dopo Adaguila꞉ Poko ba ododi ibino hiya꞉hiya꞉ genamoeno gigihamo sipi-goeno hawi kanamogamidahalema꞉, Godokono Hoe Nopodawate ibino dopo dubu gugudi anakapulamekapoma꞉.
HEB 11:29 Mabu Isalaelanapa꞉te Godoko hibima꞉ na꞉midinama꞉, ba꞉bema꞉ Isipitinapino alaholohopa꞉te ibi anakapulamema꞉ da꞉na꞉mataliya꞉, ba꞉ba tetelo Godote Hawihawi Kehaha꞉ Kolomoeno beya gagale hakama꞉ da꞉midiya꞉, iba꞉te hapuamo olalatihino na꞉hiwaliya꞉. Huiyatiya numa꞉la꞉, Isipitinapa꞉te ba꞉be atu gabodo ibi heloamo da꞉ta꞉malateliya꞉, ba꞉ba tetelo kolomoeno beyate ibi hiliyonomo ba꞉ dito analopamidaliya꞉.
HEB 11:30 Ba꞉gala eta tetelo Isalaelanapino hibima꞉ midi mabuma꞉ iba꞉te Godokono tabamo papamila꞉halelo Yeliko ko haba tamedo sa꞉ba꞉ni hegelalo negopa꞉te komo da꞉wibuya꞉, Godote ba꞉be haboeno kokonomo kala ba anabulilame hakamo ba꞉ dito gudiya꞉.
HEB 11:31 Ba꞉gala eta komo. Godote ba꞉be Yeliko haba kubahimihino, dopamo Isalaelanapi ipuwalo iba꞉te pui ba꞉be haba diya gabodo umima꞉ da꞉noelamiya꞉, ba꞉bi dubu netewapa꞉te ba꞉be haboeno modoboha꞉ komo ulamema꞉ ba꞉bamo dito nuluhukuya꞉. Ba꞉ba tetelo Yeliko habanapi ipuwalo eta kamena La꞉iha꞉bako, ebe dopamo dubu bilibili kamenama꞉ eda꞉nami, ebete Godoko hibima꞉ miditi ba꞉bi dubu ebeno genamamo kalakalago uwatete ibi ba꞉bo owalubiliya꞉. Ba꞉bema꞉ hibila, ba꞉moe kamenoeno hibima꞉ midi mabuma꞉ Godote Isalaelanapi alaholohopa꞉tamo talona bihatiya꞉, iba꞉te Yeliko haboeno hibima꞉ midiha꞉pi hiliyonomo ba anakapulame ba꞉be kamenoeno ka꞉ka꞉ ba꞉bo komula꞉mema꞉.
HEB 11:32 Ba꞉bema꞉ nale la꞉tamo komo hibima꞉ midipino uwi atumu ba꞉ka꞉kiyahamo? Naeno ukui ba꞉ma ka꞉nala, tete modoboha꞉ ibi hiliyonomoeno komokomo hidamo kohawakalilamema꞉, iyo, Gidiyonoko, Belakako, Sa꞉msoniko, Yepatako, Da꞉ibidiko, Sa꞉miyoloko, ba꞉gala Godokono komo ukui hawakalimipi, ibi hiliyonomoeno ododili komokomo da꞉pola꞉lama꞉na, na modoboha꞉ ba꞉bi hiliyonomo komo la꞉tamo olamagi.
HEB 11:33 Ba꞉ hibila, komo iba꞉te ibino hibima꞉ midi komodo alaholoho ipuwalo komo hoponapino wato kikipo ba uwate ibino kapela koko gawadubuma꞉ ba꞉bo eda꞉hanakuya꞉. Iyo, iba꞉te ibino emede ipuwalo tuputupu komo dododilinakui, ba꞉bema꞉ Godote iba꞉tamo kebe hidohido komo ikalamema꞉ hibilo da꞉kiyalamenakui, iba꞉te ba꞉bi komo ba꞉ dito uwatenakuya꞉. Ba꞉ ba꞉ba ka꞉na eta tetelo komo iba꞉te layono-gahagaha dito gelebadilamiya꞉, ba꞉bi helohelo ilinate ibi kubahilamekapoma꞉.
HEB 11:34 Ba꞉bene eta tetelo komo iba꞉te ibino hibima꞉ midi komodo helonomo koe ba꞉ dito ha꞉gumiya꞉ ibino ka꞉ka꞉te ba꞉be koelo wibohokapoma꞉, ba꞉gala komo tetelo puya꞉te ibi alaholoho gila꞉mo anakapulamema꞉ dewagelenakui, ba꞉bi tawakalubino helo ipuwane iba꞉te Godokono owalubi komodo dito alahutihonakuya꞉. Iyo, iba꞉te ibino ape ipuwalo heloha꞉ma꞉ ba eda꞉hana, Godote huiyatiya ibi ba꞉bo heluilamenakui, ba꞉bema꞉ iba꞉te alaholoho ipuwalo kokopima꞉ ba eda꞉ha komo tetelo kapela hopoeno alaholohopino hiya꞉hiya꞉ kapiyuilame kubanomamo alukulinakuya꞉.
HEB 11:35 Ba꞉bene komo hibima꞉ midipi kamenakamenate atumu ibino hibima꞉ midi komodo Godokono helo ba꞉ma ka꞉na uminakuya꞉, ibino ha꞉lahapi ipuwalo ebete komo ibi ka꞉ka꞉mo gala a꞉kawadiya꞉paa꞉latelenakui. Huiyatiya komo hibima꞉ midipino komo eba ka꞉naha꞉. Ba꞉ba꞉te du genamalo ba emedena, kuba ododilipa꞉te koko hoe temeteme ba꞉bo ikalamenakuya꞉ iba꞉te ibino hibima꞉ midi komone kohobila꞉hama꞉. Ba꞉ba tetelo ibi huiyatiya ubihinola ibino hibima꞉ midi komo ba miya꞉pa kuba ododilipa꞉te ibi du genamane dito konoelamema꞉, iyo, ibi iya꞉tawahala Godote ibino ha꞉laha komodo ibi hidonomo uli ka꞉ka꞉mo kowadiya꞉paa꞉latelema꞉ne, ba꞉bema꞉ iba꞉te ibino temeteme ipuwalo ba꞉ dito neha꞉lahanakuya꞉.
HEB 11:36 Ba꞉bene kuba ododilipa꞉te komo hibima꞉ midipi ba iduduputilame ibi giya꞉pa꞉pa꞉mo ba꞉bo a꞉na꞉miga꞉latilinakuya꞉, ba꞉gala iba꞉te komo auli hala꞉mo matuhulameholenakui du genamamo dito niya꞉hekenakuya꞉.
HEB 11:37 Iyo, komo tetelo iba꞉te hibima꞉ midipi ba anakapulame komo ibi nakolamo mapelamenakuya꞉, komo ibino ape tetenomodo gihanomo ilinamo iya꞉hilinakuya꞉, ba꞉gala komo ibino wato gila꞉mo dito migililamenakuya꞉. Ba꞉gala eta komo. Komo hibima꞉ midipi hiliyonomate ba꞉moe hopolo ilinaha꞉pima꞉ ba eda꞉hana hidohido kalikago kawapata꞉lamenakuiha꞉, iyo, iba꞉te modoboha꞉ sipi-goegoe ba꞉gala gautu-goegoe tama kaliko kapiya bepupulinakuya꞉. Ba꞉ hibila, hiliyonomo tetelo hopo habanapa꞉te iba꞉tamo hiya꞉hiya꞉ temeteme kubanomamo ba ikalame
HEB 11:38 ibi tawakalubiha꞉ma꞉ ga꞉lalo ibino emede habahabane heloamo da꞉ta꞉malatelenakui, ba꞉ba tetelo iba꞉te dito hopamo ba꞉gala hunuhunu hakamo ba꞉ dito nalahutihonakuya꞉, iba꞉te ba꞉bakobako tawakalubiha꞉ hopolo haka gugu ipuwalo konemedehonama꞉.
HEB 11:39 Ba꞉bema꞉ ba꞉bi hibima꞉ midipi hiliyonomoeno komoma꞉ Godote iba꞉tamo na꞉kalakalanami, ebeno kalakala ibino hibima꞉ midi mabuma꞉ bada konomola꞉ka꞉! Huiyatiya numa꞉la꞉, ebete iba꞉tamo kebe hidohido komo ikalamema꞉ hibilo da꞉goiya꞉, iba꞉te ba꞉moe hopolo ba꞉bi komo hibilo kulamiya꞉ha꞉,
HEB 11:40 mabu a puya꞉te ba꞉ma tetelo demedehonama꞉, Godote a mabuma꞉ hidonomo uli nopo ba꞉ma ka꞉na tamotiya꞉. Aeno emedeho tetete uluhukuhino ebete dopo hibima꞉ midipi mabuma꞉ eta komo a꞉kododa꞉mene, huiyatiya keba tetelo ebete a iba꞉go da꞉kapiyuia꞉memene, ba꞉ba tetelo ebete a hiliyonomo kapimilo ebeno tuputupupinomoma꞉ komidima꞉ne.
HEB 12:1 Ba꞉bema꞉ numa꞉la꞉, dopamo demedehonama꞉ ibi hiliyonomate a a꞉ga꞉lua꞉telo ba la꞉mota꞉hana, iba꞉te hibima꞉ midi komodo kebe komo kododilinama꞉ ba꞉bi komo atamo a꞉hawakalilama꞉. Ba꞉be mabuma꞉ ibi keba ka꞉nala꞉ka꞉, wadiyala a ba꞉ atumu nato ukamida komo hiliyonomo aeno tolame gabone tametama꞉mo koniya꞉hekema꞉nema꞉, ba꞉gala kebe kuba ododili komate a da꞉matuhua꞉mena, wadiyala ale ba꞉bi hale iya꞉hiliti ginimi hapuamo dito komiya꞉palema꞉nema꞉. Iyo, hibima꞉ midi gaboeno kuititi teta꞉mo ikulima꞉ konomamo ba emalagidolona ale helonomamo ba꞉bo kopulila꞉hama꞉nema꞉, sikulu guguda꞉te ibino iya꞉da꞉mi hegelalo keba ka꞉na ka꞉pulila꞉hanaka ba꞉ba ka꞉na.
HEB 12:2 Ba꞉gala wadiyala a hiliyonomo tetelo aeno tepo ipuwoeno ukuilo Ya꞉suku hidamo buminakoma꞉, iyo, ebete aeno hibima꞉ midi komoeno mabuma꞉ ba eda꞉na a dopaa꞉mete kuitita꞉mo a hidamo komagatoema꞉ne. Ba꞉ hibila, ebete keha pihigalo da꞉hoiya꞉, ebete kebe kalakala Godogodone galane da꞉lawemene ba꞉be kalakala ebeno tepo ipuwoeno ukuilo ba꞉bo umiya꞉. Ba꞉moe ba꞉be mabuma꞉ ebete ebeno hoe komoeno koko hilopo ba꞉gala temeteme komo emalagidoleheno wato kikipo ba꞉bo lawiya꞉, iyo, ba꞉ma tetelo ebete Ko Gawadubu Godokono tu hapulu bemedena.
HEB 12:3 Ba꞉ hibila, Ya꞉suti kuba ododilipino mauba komodo kokonomo temeteme duwatiya꞉, huiyatiya Godokono ubi komamo papamiwatama꞉ ukui hiya꞉ma꞉ kamidiya꞉ha꞉. Ba꞉bema꞉ wadiyala la꞉ atumu la꞉eno temeteme ipuwalo ba꞉be komo hidamo ba emalagidolona la꞉eno hibima꞉ midi komodo kuiyodopoma꞉ eda꞉haheno heloha꞉ma꞉ akeda꞉hala꞉.
HEB 12:4 Numa꞉la꞉, Ya꞉sutamo duluhukuya꞉ ba꞉bako hoe komote la꞉tamo kuluhukuha꞉, iyo, kuba ododilipa꞉te komo hiya꞉hiya꞉ temeteme la꞉tamo hibilo ikalamenakata, huiyatiya iba꞉te la꞉ hiliyonomo ipuwalo eta kapiya dawa ebeno hibima꞉ midi mabuma꞉ kanakapumiha꞉.
HEB 12:5 Ba꞉bema꞉ ba꞉moe ko komo akadodala꞉. Godote la꞉ ebeno gugudima꞉ ka꞉laminata, iyo, ba꞉bema꞉ ebeno Bukalo ba꞉moe tabote la꞉eno temeteme komoma꞉ goena, “Naeno gudu, komo temeteme komate Kodawoeno ubi komodo ama꞉tamo ikuliti, ebete ba꞉bi komamo ama꞉ diya꞉tumimina꞉, wadiyala ama꞉ ba꞉bi iya꞉tumi komamo na꞉papamiwatuya꞉, ba꞉gala ebete amia꞉no eta kuba ododi komoma꞉ da꞉kiyahamemena꞉, ama꞉ kuiyodopoma꞉ akeda꞉la꞉. Ba꞉ hibila, Kodawate pui malemalelo demalagidolena, ebete ibi temeteme komamo iya꞉tulamenako, ba꞉gala ebete poko ebeno guduma꞉ da꞉ka꞉minako, ebete ba꞉be lumagino kuba ododili komoma꞉ ebetamo hiya꞉hiya꞉ temeteme komamo huiya ikamehonako.”
HEB 12:7 Iyo, numa꞉la꞉, ba꞉moe hopo konomolo naba꞉te ibino gugudi owalubilima꞉ temeteme ikalame komamo ibi iya꞉tulamenaka, iba꞉te kuba ododili komo ba miya꞉pale hido komokomo kapiya kododilima꞉. Ba꞉bema꞉ la꞉ hiya꞉hiya꞉ temeteme ipuwalo da꞉pola꞉nama heloha꞉ma꞉ akeda꞉hala꞉, mabu hopo habanapi keba ka꞉nala꞉ka꞉ Godote ba꞉ ba꞉ba ka꞉na la꞉ ebeno gugudima꞉ ba ka꞉lamina la꞉ temeteme komamo ba꞉bo iya꞉tulamenakata. Ba꞉bema꞉ hibila, ebete la꞉ temeteme komamo iya꞉tulameha꞉tale, la꞉le ebeno hibi gugudima꞉ ba꞉ka꞉-eda꞉hona꞉, la꞉ huiyatiya pilo gabodo da꞉hawakalahaliya꞉ ba꞉bako gugudima꞉ beda꞉hona꞉.
HEB 12:9 Iyo, a aeno nabino komo iya꞉tawahala, a gugudi hegehege tetelo iba꞉te hiya꞉hiya꞉ temeteme komamo a iya꞉tua꞉menakuya꞉, ale ba apepeho hidohido ukui ba꞉bo kuwatema꞉. Ba꞉gala a ba꞉moe hopolo ba emedena aeno nabino iya꞉tulame komamo da꞉papamila꞉hanakoma꞉, tawakaluba꞉te ba꞉be komo aeno mulu ukui komoma꞉ ga꞉lanaka. Huiyatiya numa꞉la꞉, a ba꞉ma tetelo aeno Hunu Haboeno Nabiwitamo da꞉papamila꞉hanakoma꞉ ba꞉be komoeno mulu bada konomola꞉ka꞉, mabu ba꞉be komodo a hibinomo ka꞉ka꞉ ebegodone kolawema꞉nema꞉!
HEB 12:10 Ba꞉gala eta komo. Hopo haboeno naba꞉te ibi ha꞉kiya ibino ubilo kebe komo hidohidoma꞉ da꞉ga꞉lanaka, a ba꞉bi komo kododilima꞉ iba꞉te hiya꞉hiya꞉ temeteme komamo tete nanekelelo a iya꞉tua꞉menaka. Huiyatiya Godote ebeno hido ka꞉ka꞉ atamo ikaa꞉mema꞉ ubi bihatena, ba꞉bema꞉ ebete a kebe komo ododilima꞉ diya꞉tua꞉menako a ba꞉bi komo hibilo dododilinakoma꞉, ba꞉ba tetelo ebete Hido-talonadawama꞉ keba ka꞉na keda꞉na, a ba꞉ atumu talonapima꞉ kakeda꞉hama꞉nema꞉.
HEB 12:11 Iyo, hibila, ale aeno hibima꞉ midi komodo kapepehoma꞉ keba tetelo ale temeteme duwatema꞉, ale ba꞉bi temeteme komoma꞉ a꞉kakalakalahalema꞉, huiyatiya numa꞉la꞉, lumagiti ba꞉bako temeteme komamo hidohido ukui duwatemene, Godote ba꞉be gabodo ebetamo hete ba꞉gala tuputupu emede komo ba ikame hidohido gaote ebegodone hibilo bikulihonakomena꞉.
HEB 12:12 Ba꞉be mabuma꞉ wadiyala la꞉ la꞉eno hiya꞉hiya꞉ temeteme ipuwalo heloha꞉ma꞉ eda꞉haheno kalakala gala na꞉kalawiya꞉la꞉, la꞉le la꞉eno kokotamo hidohido komo ba ododili la꞉eno natamo Godokono tuputupu gabodo hidamo kowapata꞉lamenama꞉. Ba꞉ ba꞉ba ka꞉na la꞉ ipuwalo pote nato a꞉ta꞉buta꞉midalemedawama꞉ deda꞉na, ebete temeteme ipuwalo hidote gala na꞉kapata꞉mene.
HEB 12:14 Ba꞉bema꞉ hibima꞉ midipa꞉la꞉, wadiyala la꞉ la꞉eno ubi komo ba꞉ma ka꞉na nihateniya꞉la꞉, la꞉ hiliyonomo tawakaluba꞉go Kodawa Godokono hete komago ba emedena la꞉eno ododili ipuwalo ebe kapiya kokalakaluiminama꞉. Ba꞉ hibila, kebe lumagiti aeno Kodawa ba꞉ba ka꞉na kalakaluimihino, ebete ebeno holoholo a꞉kanuma꞉mene.
HEB 12:15 Ba꞉gala Godokono malemale komodo duluhukuna, modoboha꞉ la꞉ ipuwalo etate ba꞉be ka꞉ka꞉ mula꞉ komone ga. Numa꞉la꞉, kakanomo ilinate lumagino palilo apete, ba꞉bene ebete iya꞉tawaheno lawete ebeno guguda꞉te nahama꞉ iba꞉tamo dikalamemene, diyala, ebeno genamalo olalati konomote uluhukuti ebeno gugudi ipuwalo komo hiliyonomate da꞉ ha꞉lahamena꞉. A꞉iye, la꞉ hidamo! La꞉ ipuwalo etate ebeno tepo ipuwoeno mauba komodo ba꞉bako kaka ilinama꞉ eda꞉ modoboha꞉!
HEB 12:16 Ba꞉bema꞉ Isote dopamo ebeno kateneno ubi komoeno ododili ipuwalo keba ka꞉na kemedenami, la꞉ ipuwalo etate ba꞉bako dawama꞉ eda꞉ modoboha꞉. Numa꞉la꞉, ebete Godokono ubi komokomo emalagidoleheno, ebeno baa꞉ kape kupula꞉ma꞉ kapiya teteno baa꞉ amogagodone ba lawe ebeno dopo guduma꞉ eda꞉ komo ko komoha꞉ma꞉ goelo amogatamo ba꞉ dito ikamiya꞉.
HEB 12:17 Ba꞉bema꞉ la꞉ iya꞉tawahala, galane Isote ebeno ukui hiya꞉ma꞉ midima꞉ dewageliya꞉, ebete ebeno nabiwitamo ihi baida꞉go ba꞉bo tuya꞉, ebeno nabiwiti Godoko kokiyamema꞉ ebeno emede ipuwalo ebe hidamo kowalubinama꞉. Huiyatiya Isoko niliya, gabote kitanuya꞉ha꞉ Godogodone hidohido komo uwatema꞉, iyo, ebe modoboha꞉ ebete dopamo kuba ukui ipuwalo dododiya꞉ ba꞉be komo gala hiya꞉ma꞉ midi.
HEB 12:18 Ba꞉bema꞉ la꞉ puya꞉te Ya꞉suku hibima꞉ da꞉midinama, dopamo Moseseko tetelo a Yunapino iniwala꞉te Godotamo konomo tole ipuwado keba ka꞉na ka꞉pelamiya꞉, la꞉ ebetamo ba꞉ba ka꞉na kapelamiya꞉ha꞉. Iyo, dopamo iba꞉te Sainai Hununomo Hakalo Godokono tole ikalame komokomo ibino baidinomamo ba꞉ma ka꞉na ulamiya꞉, ba꞉be hunu hakalo helonomo koete ba woita, du konomote hegeloeno alo da꞉muliya꞉, konomo huhuti uluhukuti ibi kubanomamo ba꞉bo pimida꞉lamiya꞉.
HEB 12:19 Ba꞉gala ba꞉be atu tetelo eta hanohano komote ba꞉ma ka꞉na kuluhukuya꞉, Godokono nopodawate gebole konomamo da꞉moliya꞉ iba꞉te ulihuya꞉, ba꞉bene iba꞉te Godokono tabo madodo ibino galonomamo ba ulihuta iba꞉te ko tole lawete Moseseko ba꞉bo toemehuya꞉, iba꞉te eta kapiya tabo Godogodone ba꞉ba ka꞉na a꞉kulia꞉mena꞉.
HEB 12:20 Ba꞉ hibila, ba꞉ba tetelo Mosesete atu koko hanohano komo ba ulame na꞉goiya꞉, “Naeno tole konomo ipuwalo naeno apete ha꞉kiya lililuta!” Ba꞉bema꞉ numa꞉la꞉, aeno iniwala꞉te konomamo ba toletoleho modoboha꞉ma꞉ ba꞉bo eda꞉huya꞉, mabu Godote ibi dopamo ba꞉ma ka꞉na tutumulateliya꞉, “Ba꞉moe hunu haka talonanomola, ba꞉bema꞉ la꞉ ipuwalo eta dawate pete ba꞉moe hakamo da꞉pa꞉putimini, ebete dito na꞉haa꞉mene. Iyo, la꞉eno dabihole ilina ba꞉ atumu, ibi ipuwalo eta kapiyate ba꞉moe naeno kukala da꞉padikanalemene, wadiyala la꞉ ebe nakolamo mapemete nanakapumiya꞉la꞉!”
HEB 12:22 Huiyatiya kalakala konomola, la꞉ puya꞉te la꞉eno hibima꞉ midi komo Ya꞉sutamo dihatiya꞉ma, la꞉eno komo eba ka꞉naha꞉ mabu la꞉eno Godotamo pelame ipuwalo tole kitanuya꞉ha꞉, puliyanomola. Iyo, hibi ka꞉ka꞉ pogodone da꞉pena, ba꞉be Kodawa Godoko ebeno mumulunomo nopopa꞉go kebolo kemedena, la꞉le ba꞉be Hunu Haboeno Yelusalema ko habamo kalakalago pelamiya꞉mata, ba꞉be haboeno eta mahilo ba꞉ Sayono Hunu Hakala.
HEB 12:23 Numa꞉la꞉, puya꞉te Godokono dopo gudu Ya꞉suku huiyama꞉ deda꞉hana, Godote ba꞉bi hibima꞉ midipi hiliyonomoeno mahilo ebeno Hunu Haboeno Bukamo ya꞉lo a꞉miya꞉telamiya꞉. Ba꞉bema꞉ ba꞉bi tuputupupi ipuwalo ebete puya꞉godolo ebeno oko da꞉hawaminaliya꞉, la꞉le ba꞉bi tawakalubino gobogoboeno Kalakala Habamo pelamete iba꞉go a꞉pekapiyuiya꞉mata, iyo, la꞉ Godokono holoholo hapuamo atumu a꞉kapelamiya꞉mata, hibila, ebe ba꞉ hopo habanapi hiliyonomoeno komo danagilamelelamemene ba꞉be Kodawala.
HEB 12:24 Ba꞉gala eta komo. La꞉ atumu Ya꞉sutamo a꞉kapelamiya꞉mata, ebe ba꞉ Godokono uli nopote atamo uluhukuma꞉ gabo da꞉hiduimiya꞉ ba꞉be dawala. Ebete ebeno hawi Godotamo ikamelo a mabuma꞉ da꞉ka꞉ka꞉liya꞉, ba꞉be hawido ale hidohido owalubi komo hibilo buwatenakoma꞉, ba꞉bema꞉ hibila, Ya꞉sukunu hawino oko owati helote A꞉ibolote Godotamo dopamo dikamiya꞉ ba꞉be hawa꞉goeno ilinoeno helo na꞉gogolona.
HEB 12:25 Ba꞉bema꞉ la꞉ hidamo, ba꞉ma tetelo pote la꞉tamo dolamagina ba꞉be Kodawoeno tabo ulihoma꞉ ubiha꞉ma꞉ akeda꞉hala꞉. Numa꞉la꞉, dopamo ba꞉moe hopo habalo ebeno tabote Moseseko ipuwado duluhukuya꞉, ba꞉ba tetelo puya꞉te ibino galo da꞉muhilameholiya꞉ iba꞉te ebeno helo ipuwane alahutihoma꞉ gabo nipo ohowadiya꞉. Ba꞉be mabuma꞉ ebete a tetelo Hunu Habane tabo gala ba kolamagina, ale ubiha꞉ma꞉ eda꞉hate ebegodone dohobila꞉hama꞉, gabo keka꞉ ale ebeno helo ipuwane alahutihoma꞉? Gabo puliyanomola, a kuba huiya konomamo kuwatema꞉nema꞉!
HEB 12:26 Ba꞉ hibila, dopamo tetelo ebete tabo dolamagiya꞉ hopo habate ba꞉bema꞉ aleguya꞉, huiyatiya a tetelo ebete hibinomo tabo gala ba꞉ma ka꞉na kolamagiya꞉, “Nale eta kapiya tetelo ba꞉moe hopo konomo ba꞉gala alomo hunu atumu kopewagegelatelema꞉nemo.”
HEB 12:27 Ba꞉bema꞉ numa꞉la꞉, ebete eta kapiya tetelo ba꞉moe komo kododima꞉ tabo da꞉goiya꞉, ba꞉be komoeno ipuwa ba꞉ ba꞉ma ka꞉nala. Ebete hopo haba ba꞉gala alomo ba꞉gala ibino ilina hiliyonomo dopamo dododiliya꞉, galane tetelo ebete ba꞉bi ilina hiliyonomo ba wagegelatele, iba꞉te ba꞉bo kalatidiholema꞉na꞉ ba꞉bema꞉ lumagiti gala a꞉kulama꞉mene. Iyo, ba꞉ba tetelo Hunu Haboeno uliuli ilina kapiyate kopola꞉nama꞉na꞉, mabu eta dawoeno helote kitanaha꞉ ba꞉bi ilina kokubahilamema꞉.
HEB 12:28 Ba꞉bema꞉ wadiyala ale aeno kalakala tabo Godotamo kadipatema꞉nema꞉, mabu ebe kebe uli hopolo Ko Gawadubuma꞉ deda꞉na ebete ba꞉be hidonomo hopo atamo kikaa꞉mema꞉ne, hibila, eta dawate ba꞉be hopo kubahimima꞉ a꞉kamodobamene. Ba꞉gala Godokono hiya꞉hiya꞉ owalubi komoma꞉ aeno tepo ipuwalo ba kalakalaha, wadiyala ebete a keba ka꞉na kiya꞉tua꞉mena a ba꞉ ebe ba꞉ba ka꞉na badikuminakoma꞉. Iyo, ebe adikumima꞉ wadiyala ale aeno tepo ipuwalo ebe hunamo ba adipate hido papamiwata ukui komago kopelamema꞉nema꞉,
HEB 12:29 mabu aeno Godo ba꞉ pote ebeno koa꞉mo kuba ododilipi hiliyonomo da꞉kubahilamemene ba꞉be Helonomodawala.
HEB 13:1 Ba꞉bema꞉ wadiyala la꞉ hibima꞉ midipa꞉te kapiya badininipala ekaki huiyama꞉ ba eda꞉hana, la꞉ ipuwalo etate eta malemalelo nemalagidolohuinala꞉.
HEB 13:2 Ba꞉gala puya꞉te kapelapimo eta hopone la꞉tamo da꞉pelamenaka, la꞉ ibi la꞉eno genamamo kalakalago uwatema꞉ ukui hidamo na꞉miya꞉tenakuya꞉la꞉. Ba꞉ hibila, dopamo komo hibima꞉ midipa꞉te ibino emede ipuwalo ba꞉ba ka꞉na ba ododina, komo Godokono Hunu Haboeno nopopa꞉te iba꞉tamo da꞉pelamiya꞉, iba꞉te ba꞉bi nopopino hibi komo iya꞉tawahaheno ba꞉ dito owalubiliya꞉.
HEB 13:3 Ba꞉gala hibima꞉ midipi ipuwalo puya꞉te du genamalo ba꞉gala komo temeteme ipuwalo demedehona, wadiyala la꞉ ibi malemalelo ba emalagidolena ibi ba꞉bo nowalubilinakuya꞉la꞉, iyo, la꞉ galane tetelo atu temeteme diya꞉tawahama, la꞉le komopa꞉godone owalubi komo uwatema꞉ ubi keba ka꞉na na꞉kihateoma, la꞉ ba꞉ba ka꞉na nododinakuya꞉la꞉.
HEB 13:4 Ba꞉gala eta komo. La꞉ hiliyonomo ipuwalo keba tetelo dubuti kamenago kapiyama꞉ deda꞉mene, wadiyala iba꞉te ibino kapiyama꞉ eda꞉ komo Godokono hido owalubi komoma꞉ ba ga꞉la, ba꞉be dubuti eta kamena gala pilolo a꞉kalawa꞉mene ba꞉gala ebeno kamenate atumu eta dubutamo pilolo gala a꞉katoamene. Ba꞉ hibila, puya꞉te bohelemele ba꞉gala kuhi pilo gabodo duwatenaka, iyo, kebe dubuti kamena pilo komo dododimini ba꞉gala kebe kamenate dubu pilo komo dododimini, Godote ba꞉bi kuba ododilipa꞉tamo ibino huiya kikalamema꞉ne.
HEB 13:5 Ba꞉gala la꞉le koko mani uwate gabo umima꞉ konomamo akemalagidolala꞉. Wadiyala la꞉ huiyatiya Godote la꞉tamo kebe ilina dopamo kikalametiya꞉la ba꞉bi ilina modoboma꞉ ba ga꞉la, la꞉eno tepo ipuwalo ebeno kalakalate nitanamene, mabu ebete ebeno Bukalo tabo ba꞉ma ka꞉na goena, “Nale la꞉go ba emedena la꞉ hidonomamo bowalubilinakomata, iyo, emedena emedena tetelo la꞉eno modoboha꞉ komokomo ipuwalo nale la꞉ dito a꞉kamiya꞉pala꞉mata.”
HEB 13:6 Ba꞉bema꞉ Godote ebeno Bukamo eta tabo dihatiya꞉, wadiyala a ukui bilibilihino ba꞉be atu tabo ba꞉ma ka꞉na koga꞉lama꞉nema꞉, “Kodawa Godoko ba꞉ naeno Owalubidawala, ba꞉bema꞉ nale eta komoma꞉ a꞉katoletola꞉mo, iyo, ebete na ba owalubinina, eta dawate na kubahinamema꞉ a꞉kamodobamene.”
HEB 13:7 Ba꞉gala eta komo. Dopamo tetelo puya꞉te la꞉eno watowatopima꞉ ba eda꞉ha Godokono tabo la꞉tamo dolamagiminakui, wadiyala la꞉ ibino emede komo nemalagidolala꞉, iyo, kebe hidohido gaote iba꞉godolo dikulihonakui, ba꞉bako atu gaote la꞉godolo kikulihonama꞉, wadiyala la꞉ ibi hibima꞉ midi komodo nibamilateleniya꞉la꞉.
HEB 13:8 Numa꞉la꞉, Ya꞉su Kelisote dopamo keba ka꞉na kemedenami, ebete ba꞉ma tetelo ba꞉ ba꞉ba ka꞉na ba꞉ka-emedena, ba꞉bene ebete atumu emedena emedena tetelo hiya꞉ma꞉ a꞉keda꞉namene.
HEB 13:9 Ba꞉bema꞉ la꞉ hidamo! Ya꞉sukunu malemale komodo duluhukuya꞉ puya꞉te ba꞉be ka꞉ka꞉ mula꞉ komoeno hibi komo iya꞉tulameheno, la꞉ ba꞉bi iya꞉tulamepino hiya꞉hiya꞉ tabamo papamila꞉ha komodo hibo gabo akududa꞉la꞉! Ba꞉ hibila, ale tuputupulu kemedenama꞉ Ya꞉sukunu malemale komote aeno tepo ipuwoeno ukui na꞉kodakoduilamena, huiyatiya puya꞉te hiya꞉hiya꞉ baa꞉ naha talona kukalamo da꞉papamila꞉halenaka, ba꞉ba꞉te ibino kukala ta꞉matale komodo hido owalubi a꞉kuma꞉la꞉.
HEB 13:10 La꞉ iya꞉tawahala, aeno komo Yunapa꞉te Godokono pakala nopodo ebe kebe genamalo kadikuminaka, hawa꞉goeno ilina ikamehopa꞉te adikumipino kuba ododili mabuma꞉ hiya꞉hiya꞉ dabihole ilina Godotamo ba ikameho koa꞉mo ba꞉bo emadolamenaka, ba꞉bema꞉ ba꞉bi katene nahama꞉ talona konomote iba꞉godolo bitana. Huiyatiya numa꞉la꞉, Ya꞉suti keha pihigalo ebeno ape hawa꞉goeno malemale ilinama꞉ miditi Godotamo dikamiya꞉, a hibima꞉ midipa꞉godolo talona kitanaha꞉ ba꞉be ikame komo kalakalago nahama꞉, iyo, puya꞉te pakala nopo ipuwane kikuliha꞉ ba꞉moe talonate ibi kapiyatamo italama꞉na.
HEB 13:11 Ba꞉moe komo nemalagidolala꞉. A Yunapino iniwala꞉te Godoko kebolo kadikuminakui, ba꞉be genamoeno Talonanomo Habalo hawa꞉goeno ikamehopino Hununomo Watodawate tawakalubino kuba ododili komo egebolelamema꞉ komo dabihole ilinoeno hawi Godotamo ba꞉bo ikamehonakui. Ba꞉bene ba꞉be atu tetelo komo okopa꞉te tawakalubino kuba ododili komo gobogobamo watalamema꞉ ba꞉ma ka꞉na ododinakuya꞉, iba꞉te ba꞉bi ilinoeno ha꞉laha ape haba ipuwane uluhukulatelenakui koa꞉mo ba꞉bo nemadolamenakuya꞉.
HEB 13:12 Ba꞉moe mabuma꞉ Ya꞉suti atumu ebeno ape Godotamo ba ikame ebete Yelusalema ko haba ipuwane uluhukuti haba tamelo ba꞉ dito nehoiya꞉, iyo, ba꞉ ba꞉ba ka꞉na ebete ebeno hawa꞉mo tawakalubino kuba ododili komo gobogobamo watalamiya꞉ iba꞉te Godokono talonapima꞉ keda꞉hanama꞉.
HEB 13:13 Ba꞉bema꞉ wadiyala a hibima꞉ midipa꞉te Ya꞉suku ba ta꞉mata, hibima꞉ midiha꞉pino kapiyuimipa꞉te kebolo demedehona ale ba꞉be haba ipuwane ikuliti atu hilopo kalakalago ba꞉bo konelawema꞉nema꞉.
HEB 13:14 Ba꞉ hibila, ba꞉moe hopo haba konomolo aeno Wiboha꞉ Emede Habate hibilo kitanaha꞉, huiyatiya kalakala konomola, ale aeno tepo ipuwoeno baida꞉mo Hidonomo Haba numinama꞉, galane tetelo a ba꞉be Habalo emedena emedena tetelo ba꞉nemedehonama꞉.
HEB 13:15 Ba꞉bema꞉ wadiyala a hiliyonomo hiya꞉hiya꞉ tetelo Godoko aeno Kodawama꞉ hawakala ba ka꞉mina, Ya꞉suti atamo da꞉hiduimia꞉miya꞉ ba꞉be gabodo ebe ba꞉milimihonakoma꞉, mabu ale ebe milimiho komodo Godote hibi kalakala kolawema꞉ne, ebete dopamo tawakalubino hawa꞉goeno ilina ikameho komodo keba ka꞉na ka꞉lawenakui ba꞉ba ka꞉na.
HEB 13:16 Ba꞉gala la꞉le hidohido komo ba ododili la꞉ ipuwalo etate eta kowalubima꞉ ukui hidamo na꞉miya꞉tenakuya꞉la꞉, mabu ba꞉moi ododili komo ba꞉ atumu hawa꞉goeno ilina ikameho komo huiyala, iyo, la꞉le ba꞉mako ododi komodo Godoko ba꞉kalakaluiminakomata.
HEB 13:17 Ba꞉gala la꞉eno sose watowatopi kokalakaluilamenama꞉, wadiyala la꞉ ibino tabo ulihote na꞉papamila꞉hanala꞉. Numa꞉la꞉, iba꞉te du hegela hiliyonomolo la꞉eno tepo ipuwoeno ukui komokomo hidamo ulamelelamenata, mabu Godote tawakalubino komo danagilamelelamemene, ibi ubihinola ebete ba꞉ba tetelo ibino oko kubama꞉ goe. Ba꞉ hibila, keba tetelo iba꞉te ibino oko konomo ipuwalo la꞉godone eta temeteme da꞉lawemena꞉, ba꞉ba tetelo la꞉ ba꞉ atu temeteme ipuwalo kopola꞉nama꞉nemata, ba꞉bema꞉ wadiyala la꞉ la꞉eno ododili ipuwalo kalakala kapiya iba꞉tamo nikalamenakuya꞉la꞉.
HEB 13:18 Ba꞉bene la꞉eno toetoe tabo olamagimi ipuwalo wadiyala la꞉le na ba꞉gala nago oko dowatina a hiliyonomo Godotamo na꞉wadiya꞉paa꞉tenakuya꞉la꞉. Ba꞉ hibila, aeno tepo ipuwoeno mulu ukuiti a kuba ododilipima꞉ kaka꞉minaha꞉, mabu a iya꞉tawahala aeno ubi komo ba꞉ ba꞉ma ka꞉nala, ale hiliyonomo tetelo hidohido komo kapiya bododilinama꞉.
HEB 13:19 Ba꞉gala nale ba꞉moe eta komoma꞉ la꞉ konomamo toelameholemata, la꞉le na Godotamo nadipateniya꞉la꞉ ebete gabo na꞉hiduima꞉mene nale la꞉tamo tiyolo kopuluhukuma꞉.
HEB 13:20 Ba꞉ hibila, aeno Kodawa Ya꞉su Kelisote ebeno sipi-goegoe Helonomo Ulamedawama꞉ eda꞉na, mabu ebeno hoe tetelo da꞉ka꞉ka꞉liya꞉ ba꞉be hawiti Godokono emedena teteno nopo bekodakoduimina. Ba꞉bema꞉ pote ebe hoe ipuwane dadipatiya꞉, ba꞉be Kodawa Godoko ba꞉ tawakaluba꞉tamo hete dikalamena ba꞉be dawala,
HEB 13:21 wadiyala ebete hiliyonomo hidohido komo la꞉tamo nikalamenakamena꞉ta, la꞉le ebeno heloamo ebeno ubi komamo hibilo kopapamila꞉hanama꞉. Ba꞉gala Ya꞉su Kelisote atamo da꞉hiduimia꞉miya꞉, wadiyala Godote ba꞉be gabodo ebeno hidonomo oko a ipuwalo nowatinamene, mabu ba꞉ ba꞉ba ka꞉na ebe ha꞉kiya ebe ba kalakaluimina Ya꞉sugodolo awagaha komote emedena emedena tetelo nitanamene! Ba꞉moe tabo ba꞉ hibila, ba꞉ba꞉la!
HEB 13:22 Ba꞉bema꞉ hibima꞉ midipi ekaka꞉la꞉, nale la꞉ bekatoelameholemata, nale la꞉eno tepo ipuwoeno ukui owalubilima꞉ ba꞉moe leta ipuwamo kebe tabo komokomo da꞉miya꞉temo, la꞉ ba꞉bi komo hiliyonomo ulihoma꞉ ubiha꞉ma꞉ akeda꞉hala꞉, mabu hibila, nale ba꞉moe leta ipuwalo naeno tabo komokomo kaga꞉gilama꞉tepaleha꞉.
HEB 13:23 Ba꞉gala na ubila la꞉ ba꞉moe eta komo niya꞉tawahala꞉. Gabomana꞉te aeno eta hibima꞉ midi ekawi Timotiko du genamane dito oemiya꞉, ba꞉bema꞉ ebete natamo tiyo da꞉pemene, ba꞉ba tetelo na eba꞉go la꞉ ulamema꞉ badi kopema꞉nema꞉.
HEB 13:24 Ba꞉bene la꞉eno hopo konomolo kebe watowatopa꞉te sose oko la꞉tamo dowatihona, wadiyala la꞉ ibi hiliyonomatamo naeno nolata tabo na꞉noelamiya꞉la꞉. Ba꞉moe Itali hopolo demedehona ba꞉bi hibima꞉ midipi ekaka꞉te ibino nolata tabo atumu la꞉tamo kapoelama꞉.
HEB 13:25 Wadiyala Godokono malemale komote la꞉ hiliyonomagodolo nitanamene. Ba꞉moe ba꞉ naeno tabo kuititila. Ba꞉ba꞉la.
JAM 1:1 Na ba꞉ Ya꞉imesitila, Godoko ba꞉gala Kodawa Ya꞉su Kelisoko ibino okodawala. Ba꞉bema꞉ Isalaela 12 gu ipuwalo la꞉ puya꞉te Yudiya hopone ikuliti ba꞉moe hopo konomolo hiya꞉hiya꞉ da꞉nemedehonama, la꞉ nonolata, nale ba꞉moe leta la꞉tamo poememo.
JAM 1:2 Naeno hibima꞉ midipi ekaka꞉la꞉, hiliyonomo hiya꞉hiya꞉ temeteme komate la꞉tamo dikulihona, wadiyala la꞉ konomamo na꞉kalakalahanala꞉,
JAM 1:3 mabu la꞉ iya꞉tawahala koko temeteme komate hibima꞉ mididawatamo da꞉pelamemena꞉, ba꞉bi komodo ebete ebeno hibima꞉ midi ipuwalo apete kodakodalo kola꞉nama꞉ne.
JAM 1:4 Ba꞉bema꞉ la꞉ kodakodalo la꞉mota꞉hana komo akamiya꞉pala꞉, mabu la꞉ ba꞉ma ka꞉na ba emedena la꞉eno hibima꞉ midi ipuwalo helohelonomoma꞉ keda꞉hama꞉nemata, iyo, la꞉eno apepeho ipuwalo la꞉le eta kapiya hido komo a꞉kotamata.
JAM 1:5 Ba꞉bema꞉ la꞉ ipuwalo kebe lumagigodolo mulu ukui itanaheno, wadiyala ebete Godoko na꞉toemehamene, ba꞉bene Godote ebetamo mulu komo kikamema꞉ne. Ba꞉ hibila, Godote ba꞉bako toemehodawatamo ubiha꞉ tabo a꞉kagaa꞉mene, mabu ebeno kalakala bitana tawakalubi hiliyonomatamo ebeno hidohido komo ikalameholema꞉.
JAM 1:6 Huiyatiya numa꞉la꞉, la꞉ Godogodone eta komo lawema꞉ la꞉eno hibima꞉ midi ipuwalo ukui gagagagama꞉ eda꞉halo ebe akatoemehala꞉, mabu ukui gagagagagodawoeno emalagidole komate ba꞉ kehaha꞉ kolomoeno gawiya keba ka꞉nala꞉ka꞉ ba꞉ba ka꞉nala, huhuti hiya꞉hiya꞉ hapuni da꞉monako gawiyate ba꞉ atumu hiya꞉hiya꞉ ba꞉ba ka꞉na komahila꞉halema꞉na꞉.
JAM 1:7 Ba꞉bako lumagiti akemalagidolala꞉ ebete Godoko toemeho ipuwalo eta hido komo kolawema꞉ne,
JAM 1:8 ao, ebegodolo ukui netewa ba꞉pola꞉na, ba꞉bema꞉ ebeno ododili hiliyonomo ipuwalo ebe nalegana.
JAM 1:9 Ba꞉bema꞉ wadiyala hibima꞉ midipi ipuwalo ilinaha꞉dawate na꞉kalakalamene, mabu ebeno tepo ipuwalo Godote hidohido komamo ebe ya꞉lo a꞉tabuimiya꞉, ba꞉gala galane ebete hido huiya kikamema꞉ne.
JAM 1:10 Ba꞉gala wadiyala dogodogodawate atumu na꞉kakalakalamene, mabu Godote ebeno tepo ipuwoeno awae komo ba iya꞉tumi ebe ba꞉ma ka꞉na kiyamiya꞉, ebegodolo ditana ba꞉be dogodogo komo ba꞉ ko komoha꞉. Iyo, galane hopo haboeno dogodogo komate kowibohoma꞉na꞉, hopo haboeno haiyaiti hopamo ma꞉tigate waiwaima꞉ keba ka꞉na keda꞉nako ba꞉ba ka꞉na.
JAM 1:11 Iyo, hibila, hegelate ba podolo koenomoma꞉ deda꞉mene ba꞉ba tetelo haiyaa꞉te waiwaima꞉ eda꞉hate ibino hidohido tita꞉te ba꞉ dito kowibohoma꞉na꞉, ba꞉bema꞉ dogodogodawate ba꞉ ba꞉ba ka꞉na kewagelema꞉ne, ebete ebeno hiya꞉hiya꞉ mani oko ba owatiho ebeno ka꞉ka꞉te ba꞉bo kalatidima꞉ne.
JAM 1:12 Ba꞉bema꞉ kebe hibima꞉ mididawate koko temeteme ipuwalo kodakodanomolo da꞉la꞉namene, wadiyala ebete na꞉kalakalamene mabu ebete ba꞉bako pawi ipuwalo kodakodama꞉ deda꞉mene ebete emedena ka꞉ka꞉ huiya kolawema꞉ne. Numa꞉la꞉, ba꞉moe ka꞉ka꞉ ba꞉ puya꞉te Godoko malemalelo demalagidolona ebete iba꞉tamo ikalamema꞉ hibilo da꞉goiya꞉ ba꞉be komola.
JAM 1:13 Ba꞉gala eta komo. Etate hiya꞉hiya꞉ temeteme ipuwalo ba la꞉na kuba gabamo emogabuimi komote ebetamo da꞉pemene, ebete ba꞉ma ka꞉na akagaa꞉la꞉, “Ba꞉moe kubate Godogodone natamo pe.” Ao, eba ka꞉naha꞉. Godote lumagi kuba gabamo a꞉kemogabuima꞉le, ba꞉gala Saitanakono helo puliyala ebete ebeno kuba gabamo emogabuimi komo Godotamo kododima꞉.
JAM 1:14 Ba꞉bema꞉ numa꞉la꞉, kuba gabamo emogabuimi komate ba꞉ lumagino kateneno kubakuba ubi gabodo pelamenaka, iyo, ba꞉moe ba꞉be gabodo Saitanate ebe adimuya꞉tate ebeno gubi ipuwamo dito kona꞉da꞉nama꞉ne.
JAM 1:15 Ba꞉ba tetelo ba꞉be lumagino tepo ipuwalo kateneno kuba ubi komote apete kuba ododi komo kalahimima꞉ne, ba꞉bene ebeno kuba ododi komote ebeno emede ipuwalo konomoma꞉ deda꞉mene, ebete hoe ba꞉bo kalahimima꞉ne mabu kuba ododi komoeno huiya ba꞉ hoela.
JAM 1:16 Ba꞉bema꞉ naeno hidohido hibima꞉ midipi ekaka꞉la꞉, la꞉ ha꞉kiya la꞉ ha꞉da akamiholama꞉la꞉,
JAM 1:17 mabu hiliyonomo hidohido komate Hunu Haboeno Nabiwigodone ebeno malemalelo atamo pelamena, huiyatiya kuba komate ebegodone a꞉kapelama꞉la꞉. Ebe ba꞉ alomo da꞉la꞉minana ba꞉bi olokino Namutudawala ba꞉gala ebe ba꞉ hibi malemale Kodawanomola, ba꞉bema꞉ ebeno malemale komote atamo hiya꞉ma꞉ a꞉keda꞉le, ba꞉ma ka꞉na eta tetelo konomamo kahawakalimi, eta tetelo nanekela꞉mo kahawakalimi, ebete ba꞉ba ka꞉na kewagelenaha꞉.
JAM 1:18 Numa꞉la꞉, ebete a ebeno gugudima꞉ komidima꞉ ebeno ubi bihatiya꞉, ale ebeno Hibi Tabo ipuwado uliulinoma꞉ eda꞉hate kohawakalahalema꞉. Ba꞉bema꞉ ba꞉moe komo ba꞉ hibinomola, ebete ba꞉moe hopoeno ilina hiliyonomo dododiliya꞉, ibi ipuwalo a ba꞉ dopo noloho gao keba ka꞉nala꞉ka꞉ ba꞉ba ka꞉nala.
JAM 1:19 Naeno hidohido ekaka꞉la꞉, wadiyala la꞉ ba꞉moe komo nemalagidolala꞉. Modoboha꞉ lumagiti komopino tabo ulihoheno ebe ha꞉kiya ebeno komo tiyolo olamagi, ba꞉gala modoboha꞉ lumagiti eta lumagitamo tiyolo mauba,
JAM 1:20 mabu Godokono tuputupu emede komoeno gaote lumagino mauba gabodo a꞉kanolohamena꞉.
JAM 1:21 Ba꞉bema꞉ la꞉eno tepo ipuwalo da꞉pola꞉na ba꞉bi dalowa꞉ ukui komo, ba꞉gala la꞉eno apa꞉mo dododilinakoma ba꞉bi kuba ododili komo, wadiyala la꞉ ba꞉bi komo hiliyonomo tama꞉mo miya꞉tete, ba꞉bene Godote la꞉eno tepo ipuwamo damihonako ba꞉be tabamo hibilo na꞉papamila꞉hala꞉, mabu ba꞉be tabote ba꞉ la꞉eno ka꞉ka꞉ muleno gaboma꞉ eda꞉na.
JAM 1:22 Numa꞉la꞉, la꞉ Godokono tabo ulihote papamila꞉haleheno, ba꞉moe gabodo la꞉ ha꞉kiya la꞉ bamihoholamenakomata. Ba꞉bema꞉ wadiyala la꞉ ebeno tabo uliti hibilo na꞉papamila꞉hala꞉,
JAM 1:23 mabu kebe lumagiti Godokono tabo uliti papamiwataheno, ebe ba꞉ pote galasilo ebeno holoholo daedae ukuilo dumita ba꞉be lumagi huiyala.
JAM 1:24 A꞉iye! Ba꞉bako lumagiti ebeno holohololo eta kuba dumimini, ebete ba꞉be komo hiduimihino, tote bada kuba komo kumi ba꞉be komo ba꞉ dito konadodoma꞉ne.
JAM 1:25 Huiyatiya kebe lumagiti Godokono Hidonomo Tutumu Tabo hidamo umiti kalakalago ba lawe, ebete ba꞉be tabamo papamiwatate adodoheno ba꞉be komo ipuwalo demedenamene, Godote ebeno hiliyonomo ododili ipuwalo ebe hidonomamo bowalubinakomene. Ba꞉ hibila, Godokono Hidonomo Tabote ba꞉bako lumagi ebeno hibima꞉ midi ipuwalo tutunomoma꞉ komidima꞉ne.
JAM 1:26 Ba꞉bema꞉ la꞉ hidamo! Kebe lumagiti ebe ha꞉kiya ebe Godoko ta꞉matadawama꞉ ba goe huiyatiya ebeno ma꞉lapila hidamo uminaheno, ba꞉be lumagi ebe ha꞉kiya ebe ha꞉da kamihomema꞉ne. Ebeno Godoko ta꞉mata komo ba꞉ nene huiyala, iyo, ebeno emede ipuwalo hido komote a꞉kitanamene!
JAM 1:27 Ba꞉bema꞉ Godokono hibi ta꞉matadawoeno komo keba ka꞉nala꞉ka꞉? Ebete halipa gugudi ba꞉gala hamolehamole kamenakamena ba꞉bakobako awae tawakalubi ibino menemene ipuwalo hidonomamo owalubilina, ba꞉gala ebete ba꞉moe hopolo ba emedena kuba komokomo kododilinaha꞉, ba꞉ma ka꞉na ebete ebeno tepo ipuwa ukulate gala dalowa꞉ma꞉ a꞉kamida꞉mene. Ba꞉ hibila, Godote ba꞉bako lumagi dumimini ebe ebeno hibi ta꞉matadawama꞉ koka꞉mima꞉ne.
JAM 2:1 Naeno ekaka꞉la꞉, la꞉ ba꞉ aeno Kodawa Ya꞉su Kelisoko hibima꞉ midipilata ba꞉gala ebe ba꞉ Godokono helo alo ipuwalo demedena ba꞉be Kodawala, ba꞉bema꞉ la꞉le tawakalubi hunu nikapa꞉mo ulameheno ba꞉ma ka꞉na eta lumagi miya꞉palo eta lumagi ebo akalawa꞉la꞉.
JAM 2:2 Ba꞉be mabuma꞉ keba tetelo eta dogodogodawate ebeno hidohido kaliko pupuliti ba꞉gala huiya konomo kakaeto ebeno kokotamo puliti la꞉eno sose kapiyuimi komamo da꞉pemene, ba꞉bene ba꞉be atu tetelo eta ilinaha꞉dawate la꞉ ipuwamo da꞉kapemene, la꞉eno ukui ibi netewapa꞉tamo keba ka꞉na na꞉kitanamene?
JAM 2:3 Hidohido kaliko pupuliti da꞉pemene, la꞉ ba꞉be lumagi koamo ba emalagidolo ebetamo ba꞉ma ka꞉na ba꞉ka꞉ga꞉loma, “Ama꞉ nolata, ba꞉moe dopo hapu habamo nemeda꞉?” Huiyatiya ilinaha꞉dawa da꞉pemene, la꞉ ebe malemalelo emalagidoloheno ebetamo ba꞉ma ka꞉na ba꞉ka꞉ga꞉loma, “Eta haba hibi kitanaha꞉, wadiyala ama꞉ tamelo dito na꞉la꞉na?”
JAM 2:4 A꞉iye! La꞉ ba꞉mako ododi komodo la꞉eno tepo ipuwoeno kuba ukui komo behawakalilamenakomata, mabu la꞉eno tepo ipuwalo la꞉ dogodogopi hidohidoma꞉ ba ga꞉la, ilinaha꞉pi nenema꞉ midililo ibi malemalelo kemalagidolenaha꞉!
JAM 2:5 O naeno hidohido ekaka꞉la꞉, wadiyala la꞉ ba꞉moe tabo hidamo nulia꞉la꞉! Godote ilinaha꞉pi hibinomolo uwatiya꞉, iba꞉te ba꞉moe hopolo ba emedena hibima꞉ midi ipuwalo kokopima꞉ keda꞉hanama꞉. Ba꞉ hibila, galane iba꞉te Godokono Ko Gawadubu Habalo da꞉pola꞉na ba꞉bi dogodogo ilina kuwatema꞉na꞉, mabu Godote hibinomo tabo ya꞉lo olamagiya꞉, ba꞉be Haboeno hidohido komo ebe malemalelo demalagidolona ba꞉bi tawakaluba꞉tamo kikalamema꞉.
JAM 2:6 Huiyatiya numa꞉la꞉, la꞉ ba꞉bako ilinaha꞉pi malemalelo kemalagidolenaha꞉, dogodogopi kapiya bemalagidolenamata. A꞉iye! La꞉eno kuba ukui bada konomola꞉ka꞉! Komo tetelo ba꞉bi atu dogodogopa꞉te la꞉ hibima꞉ midipa꞉tamo koko temeteme ba ikalame gabomanino tabo anagiya꞉mida habamo la꞉ ba꞉bo magatalenakata.
JAM 2:7 Iyo, komo ibi ba꞉ Ya꞉su Kelisoko diduduputiminaka ba꞉bi hibima꞉ midiha꞉pila, ba꞉bema꞉ Ya꞉sukunu hido mahilo ebete la꞉ kowalubilima꞉ dikalamiya꞉la, iba꞉te ba꞉be mahilo kubama꞉ ga꞉lana.
JAM 2:8 Numa꞉la꞉, Ko Gawadubu Godote ebeno konomo tutumu tabo ebeno Bukalo ba꞉ma ka꞉na hawakalimina, “Ama꞉ ha꞉kiya ama꞉ demalagidolona, ba꞉ba ka꞉na ama꞉ tamelo demedehona ba꞉bi tawakalubi malemalelo nemalagidolena,” ba꞉bema꞉ wadiyala la꞉ ba꞉moe tabamo hibinomolo na꞉papamila꞉hanala꞉.
JAM 2:9 Huiyatiya la꞉ papamila꞉haheno, ba꞉ma ka꞉na la꞉ tawakalubi hunu nikapa꞉mo ulamelo eta ilinaha꞉dawa nenema꞉ miditi, ba꞉bene ebe miya꞉pate eta dogodogodawa da꞉lawema, la꞉ ko kuba kododima꞉nemata. A꞉iye! Godokono konomo tutumu adikanale mabuma꞉ kuba huiyate la꞉tamo hibilo kopema꞉ne,
JAM 2:10 mabu kebe lumagiti Godokono hiliyonomo tutumu tabo ba uwate eta kapiya dadikanalemene, ba꞉ba tetelo ebete hiliyonomo tutumu tabo da꞉wakalamina ba꞉bako dubuma꞉ keda꞉ma꞉ne. Iyo, kapiya tutumu tabo adikanaledawa ba꞉gala hiliyonomo tutumu tabo wakalamidawa ibino komo ba꞉ kapiyala, mabu ibi netewapa꞉te kapiya gabodo ibino kuba huiya Godogodone kuwatema꞉na꞉.
JAM 2:11 Ba꞉bema꞉ numa꞉la꞉, Kodawa Godote tutumu tabo ba꞉ma ka꞉na goiya꞉, “Ama꞉ eta dubuino kamena pilolo akalawa꞉la꞉,” ba꞉gala ba꞉moe atu Kodawate gala na꞉kagoiya꞉, “Ama꞉ eta lumagi akanakapuma꞉la꞉.” Ba꞉bene keba tetelo ama꞉ dopo tutumu tabo ba lawe huiyatiya ama꞉ tote eta lumagi dito da꞉nanakapumimina꞉, amia꞉no komote keba ka꞉na na꞉kitanamene? Ama꞉ dopo tutumu tabo adikanaleheno, ba꞉be mabuma꞉ Godote ama꞉tamo ba꞉ka꞉kalakalamene? Ao, ebete kuba huiya ama꞉tamo hibilo kikamema꞉na꞉ta, mabu ama꞉ ba꞉ ebeno eta tutumu tabo adikanala꞉ta!
JAM 2:12 La꞉ hidamo nulia꞉la꞉, Godokono konomo tutumu tabo ba꞉ malemale hawakalimi tutumu tabola, ba꞉be tutumu tabote tawakalubino hibima꞉ midi ipuwalo ibi tutunomoma꞉ midilina. Ba꞉bema꞉ wadiyala la꞉ la꞉eno tabo ga꞉la ipuwalo ba꞉gala ododili komo ipuwalo ba꞉be ko tutumu tabamo hibilo na꞉papamila꞉hanala꞉, mabu galane Godokono Hunu Habalo ba꞉be kapiya tutumuti la꞉eno komo kanagiya꞉midalamema꞉na꞉ta.
JAM 2:13 Ba꞉ hibila, ba꞉ba tetelo Godote malemaleha꞉ tawakaluba꞉tamo ebeno malemale hawakalimihino kuba huiya iba꞉tamo kikalamema꞉ne, huiyatiya malemale hawakalimipa꞉tamo ebete kuba huiya a꞉kikalama꞉mene, ao, ebete ebeno malemale iba꞉tamo konomamo kohawakalimima꞉ne.
JAM 2:14 Naeno ekaka꞉la꞉, kebe lumagiti Godoko hibima꞉ midima꞉ goelo hidohido komo ododilihino, ebeno komo keba ka꞉nala꞉ka꞉? Godote tawakalubino komo danagiya꞉midalamemene, ba꞉ba tetelo ebete ba꞉be lumagino hibima꞉ midi komo modoboma꞉ ba꞉ka꞉goemene? Ao, ba꞉bako lumagino hibima꞉ midi komo ba꞉ ha꞉da amiho komola, ebeno ka꞉ka꞉ mula꞉ komote a꞉kitanamene.
JAM 2:15 Diyala la꞉eno hibima꞉ midipi kapiyuimi ipuwalo eta lumagiti kalikoha꞉ma꞉ kuda꞉ eda꞉na, ba꞉gala nahoeno ilinaha꞉dawate kuda꞉ a꞉luta.
JAM 2:16 Ba꞉bene la꞉ ipuwalo etate ba꞉bako awae lumagi umiti, ebe owalubihino ebetamo ba꞉ma ka꞉na da꞉goemene, “Ama꞉ Godokono kalakalago na꞉toa, ebe ha꞉kiya ama꞉ kalikamo ba꞉gala baa꞉mo kowalubima꞉na꞉ta,” ba꞉be tabo owalubi taboha꞉, ba꞉ kuba tabola. Ba꞉bema꞉ keba tetelo eta hibima꞉ mididawate ilinaheno demedena, ba꞉bene ama꞉le ebe kalikamo ba꞉gala baa꞉mo owalubihino, amia꞉no hibima꞉ midi komote keba ka꞉na kitana?
JAM 2:17 Ama꞉ hidamo nulia꞉, ama꞉le Godoko hibima꞉ midima꞉ goete huiyatiya hidohido komo ododilihino, amia꞉no hibima꞉ midi komo ba꞉ hoela.
JAM 2:18 Huiyatiya la꞉eno hibima꞉ midipi kapiyuimi ipuwalo komopa꞉te na꞉ga꞉lana, “Lumagigodolo hidohido ododili komate pola꞉naheno kubaha꞉, mabu Godoko hibima꞉ midi komo ba꞉ tepo ipuwoeno ododi komola, apa꞉mo ododi komoha꞉.” Ba꞉bema꞉ na Ya꞉imesiti ibino tabo ba huiya na꞉goemo, “La꞉le hidohido komo dododilima nale la꞉eno hibima꞉ midi komo ba꞉bo kiya꞉tawama꞉nemo, huiyatiya la꞉le ododilihino na a꞉kiya꞉tawamo. Numa꞉la꞉, naeno komo ba꞉ ba꞉ma ka꞉nala, komopa꞉te naeno hibima꞉ midi komo kiya꞉tawahama꞉ nale hidohido komo ba꞉bema꞉ ododilinakomo.”
JAM 2:19 Huiyatiya la꞉ komopa꞉te koga꞉lama꞉nemata, “Ale Godoko kapiya hibima꞉ na꞉midinama꞉, ba꞉moe ba꞉ ko komola, aeno apa꞉mo ododili komoha꞉.” Na huiyatiya kogoema꞉nemo, “Iyo, Godoko kapiya ba꞉ Kodawala, Saitanakono kubakuba gobogobo ba꞉be komo atumu iya꞉tawahala. Ba꞉bema꞉ iba꞉te ba꞉be komo hibima꞉ ba midi Godokono heloma꞉ lililahalelo na꞉toletolehona, huiyatiya numa꞉la꞉, iba꞉te ibino kuba ododili komo miya꞉paleheno hidohido komo a꞉kododila꞉la꞉. Ba꞉bema꞉ la꞉ na꞉kemalagidolutama Godote ibino tole komoma꞉ iba꞉tamo kokalakalama꞉ne? Ao, ibino hidohido komo ododiliha꞉ mabuma꞉ ebete iba꞉tamo kuba huiya hibilo kikalamema꞉ne!”
JAM 2:20 A꞉iye, ama꞉ hidohido komo ododiliha꞉ lumagima꞉ deda꞉na, ama꞉ daedae lumagilata! Ama꞉ numa꞉, Godokono Bukoeno eta tabo komote a ba꞉ma ka꞉na iya꞉tua꞉mena, kebe lumagiti Godoko hibima꞉ midima꞉ goelo huiyatiya hidohido komo ododilihino, ba꞉be lumagino hibima꞉ midi komo ba꞉ ha꞉da amiho komola.
JAM 2:21 Iyo, ama꞉ aeno iniwa A꞉ibalahamakono komo nemalagidola. Ebete Godoko hibima꞉ ba midi, ebeno hibima꞉ midi komote ebeno ododi komodo ba꞉ma ka꞉na hawakaluya꞉, ebete Godoko owatidoloeno nakola patapata hunamo ebeno gudu Aisa꞉keko adila꞉tete Godotamo hibilo ikamiya꞉, iyo, ebeno hido ododi komodo Godote ebe eta tuputupudawama꞉ ba꞉bo ka꞉miya꞉.
JAM 2:22 Ba꞉bema꞉ ale ba꞉moe komo umima꞉, A꞉ibalahamakono hibima꞉ midi komo ba꞉gala ebeno ododi komo kapiyanomoma꞉ ba eda꞉, ebeno hibima꞉ midi komote ebeno ododi komodo modobonomoma꞉ ba꞉bo eda꞉miya꞉.
JAM 2:23 Iyo, ba꞉moe komote A꞉ibalahamatamo uluhukuya꞉, Godote ebeno Bukalo dopamo da꞉goiya꞉ ba꞉be tabote hibima꞉ keda꞉ma꞉, mabu ebeno Bukalo tabo ba꞉ma ka꞉na itana, “A꞉ibalahamate Godoko hibima꞉ da꞉midiya꞉, ba꞉bema꞉ Godote ebe tuputupudawama꞉ ba꞉bo goiya꞉.” Iyo, hibila, A꞉ibalahamakono hibima꞉ midi mabuma꞉ Godote ebe ebeno hido mabulubima꞉ ka꞉miya꞉.
JAM 2:24 Ba꞉bema꞉ wadiyala ama꞉ ba꞉moe ko komo hidamo na꞉lawa꞉, ama꞉ Godoko hibima꞉ midilo hidohido komo nododilinakuya꞉, mabu Godote hidohido ododili komo ama꞉godolo dulamemene ebete ama꞉ tuputupudawama꞉ koka꞉mima꞉na꞉ta. Huiyatiya ama꞉ hibima꞉ midi ipuwalo hidohido komo ododilihino, amia꞉no hibima꞉ midi komo ba꞉ ha꞉da amiho komola, Godote ama꞉ tuputupudawama꞉ a꞉kaka꞉ma꞉mena꞉ta.
JAM 2:25 Ba꞉gala Godokono Bukate eta hibima꞉ mididawoeno komo bekahawakalimina, ebeno mahilo ba꞉ La꞉iha꞉batela. Ba꞉be kamenate dopamo Godoko hibima꞉ midiha꞉ tetelo dubu bilibili kamenama꞉ eda꞉nami, huiyatiya Isalaela tawakaluba꞉te ebeno Ka꞉inane hopo lawema꞉ da꞉pikuliya꞉, ba꞉ba tetelo ebete ibino Godo hibima꞉ miditi ibi ba꞉ma ka꞉na owalubiliya꞉. Isalaela dubu netewapa꞉te hopo umihoma꞉ diya gabodo ebetamo da꞉puluhukuya꞉, La꞉iha꞉bate ibi Ka꞉inane hopo gabomani dubatamo kikalamiya꞉ha꞉, ebete huiyatiya ibi hiya꞉ gabodo dito oelamiya꞉ gabomani dubate ibi anakapulamekapoma꞉. Ba꞉ hibila, mabu La꞉iha꞉bate ba꞉moe hido komo dododiya꞉, ba꞉be mabuma꞉ Godote ebe eta tuputupudawama꞉ ba꞉bo ka꞉miya꞉.
JAM 2:26 Ba꞉bema꞉ naeno iya꞉tulame taboeno ipuwa kohawakalimima꞉ eta go tabo ba꞉ma ka꞉na itana. Lumagiti da꞉hoemene ba꞉ba tetelo ebeno gobogobote ebeno apene dito kuluhukuma꞉ne, gala ba꞉be hoe apelo a꞉kemedenamene. Ba꞉bema꞉ hibila, lumagino hibima꞉ midi komo ba꞉ ba꞉ba ka꞉nala, ebegodolo hidohido ododili komate pola꞉naheno, komopa꞉te ba꞉bo kiya꞉tawahama꞉na꞉ ebeno hibima꞉ midi komo ya꞉lo a꞉hoi.
JAM 3:1 Naeno hibima꞉ midipi ekaka꞉la꞉, la꞉eno sose kapiyuimi ipuwalo kapiyakapiyanomate iya꞉tulamepima꞉ neda꞉huya꞉la꞉, mabu la꞉ iya꞉tawahala a puya꞉te Godokono tabo iya꞉tulamepima꞉ deda꞉hanama꞉, galane ebete aeno tabo olamagimi komo ba꞉gala ododili komo konomamo kanagilamelea꞉mema꞉ne, huiyatiya ebete komo hibima꞉ midipino komo ba꞉ba ka꞉na a꞉kanagilamelelama꞉mene.
JAM 3:2 Ba꞉ hibila, komo tetelo a hibima꞉ midipi hiliyonomate Godokono hibi gabo otanakoma꞉. Huiyatiya numa꞉la꞉, a ipuwalo kebe lumagiti ebeno tabo olamagi komo hiliyonomo hidonomamo dulamena, ba꞉ma ka꞉na ebeno ma꞉lapilate eta kapiya tabo kubamo goeheno, ba꞉be lumagino ododili ipuwalo eta kubate atumu a꞉kitanamene, iyo, ebete ebeno apeno hiya꞉hiya꞉ ododili komo hiliyonomo hidonomamo ulamena eta kuba ododikapoma꞉.
JAM 3:3 Ba꞉bema꞉ wadiyala la꞉ ba꞉moe go tabo hidamo nemalagidolala꞉, oso-goeno namutudawate ebeno tabamo hale ihatete, ba꞉bene ebete oso-goe hunamo ba emede ba꞉be deha꞉poto hala꞉mo oso-goe hibi gabodo ba꞉bo katama꞉ne.
JAM 3:4 Ba꞉gala eta go tabo ba꞉ma ka꞉nala, huhuti kehaha꞉ kolomoeno ko palai boge heloamo ba atuta, boge atadawate atumu kiya꞉li deha꞉potoamo ba꞉be boge ebeno ubi gabodo dito katama꞉ne.
JAM 3:5 Ba꞉bema꞉ lumagino ma꞉lapila ba꞉ atumula. Ebe ba꞉ lumagino ape konomo ipuwalo ditana ba꞉be apeno deha꞉poto komola, huiyatiya ebe ha꞉kiya ubi dihatemene ma꞉lapilate lumagi kuba gabamo ba꞉bo komagatama꞉ne. Iyo, ebete awagaha tabo olamagi komodo koko komo ododilima꞉ da꞉goemene, ebete ba꞉ ba꞉ba ka꞉na ebeno ka꞉ka꞉ konomo konekubahimima꞉ne, koe powa deha꞉potote konomoma꞉ eda꞉te koko kehate da꞉la꞉mota꞉hana ba꞉bi ilina keba ka꞉na ka꞉wamotenako ba꞉ba ka꞉na.
JAM 3:6 Iyo, hibila, lumagino ma꞉lapila ba꞉ koe powa huiyala, mabu ma꞉lapilate lumagino apelo ba꞉ deha꞉poto ilinama꞉ eda꞉na, huiyatiya ebeno kuba tabo olamagi komate ba꞉be lumagino ape konomo dalowa꞉ma꞉ miditi ebeno emede komoeno hiliyonomo komokomo dito kokubahilamema꞉na꞉. Ba꞉bema꞉ numa꞉la꞉, ma꞉lapiloeno koete Saitanakono Koe Habane puluhukunako, iyo, ma꞉lapilate ba꞉be Kubadawoeno ubi komamo papamiwatanako.
JAM 3:7 Ba꞉ hibila, natamo wapata꞉lame ilina ba꞉gala tepamo wapata꞉lame ilina, beya ipuwalo da꞉ka꞉ka꞉halena ba꞉bi ilina ba꞉gala holahola, tawakaluba꞉te ba꞉bi hiya꞉hiya꞉ ilina hiliyonomo gelebadilame iya꞉tawahala,
JAM 3:8 huiyatiya lumagiti ebeno ma꞉lapila gelebadimi modoboha꞉. Gabo kitanaha꞉ mabu ma꞉lapilate kubanomoma꞉ ba eda꞉, ebeno kuba tabo olamagi komate komo tawakalubi anakapulamema꞉ ewagelena, ebe helo kalu keba ka꞉nala꞉ka꞉ ba꞉ba ka꞉nala.
JAM 3:9 Ba꞉bema꞉ naeno hibima꞉ midipi ekaka꞉la꞉, wadiyala la꞉ ba꞉moe komo hidamo nemalagidolala꞉. Komo tetelo a hibima꞉ midipa꞉te aeno ma꞉lapilamo aeno Kodawa Nabiwi Godoko a꞉milimihonakoma꞉, ba꞉bene komo tetelo ale komo tawakaluba꞉tamo maubahalete aeno tabamo ibi ba꞉bo kubahilamenakoma꞉. Numa꞉la꞉, Godote ba꞉bi tawakalubi ebeno holoholamo ododiliti ebeno gugudima꞉ ka꞉lamina, ba꞉bema꞉ milimiho tabo ba꞉gala mela tabo atu lumagino tabone dikulimina꞉ ba꞉be komo ko kubanomoma꞉ keda꞉ma꞉ne! A꞉iye, ba꞉bako kubate a ipuwalo akuluhukala꞉!
JAM 3:11 O naeno ekaka꞉la꞉, la꞉ iya꞉tawahala, sipolo gao kehane tawakaluba꞉te boga꞉me gao a꞉katapihala꞉, ba꞉gala hiwila gao kehane atumu sipolo gaote a꞉kanolohala꞉. Ba꞉ ba꞉ba ka꞉na tawakaluba꞉te hido a꞉la꞉mina beya ma꞉pene kuba solo beya a꞉kiyapohala꞉, iba꞉te huiyatiya hido beyanomo biyapohonaka, iyo, hibila, solagoeno beya ma꞉pete hido gola beya tawakaluba꞉tamo ikalame modoboha꞉.
JAM 3:13 Ba꞉bema꞉ la꞉eno hibima꞉ midipi kapiyuimi ipuwalo eta mulu ukuidawa ba꞉ka꞉luta? Wadiyala ba꞉bako dawate tuputupu emede komodo ebeno mulu ba꞉ma ka꞉na na꞉hawakalima꞉mene, ebete awagahaheno hidohido komo kapiya bododilinakomene.
JAM 3:14 Huiyatiya la꞉ la꞉eno tepo ipuwalo komopino ilinama꞉ iba꞉tamo da꞉maubahanama, ba꞉gala awagaha ipuwalo la꞉ ha꞉kiya la꞉ da꞉wadiya꞉paa꞉latelenama, la꞉ hidamo! La꞉eno awagaha komoeno ododili ipuwado la꞉ Godokono hibi gabo ha꞉da gaboma꞉ ga꞉lanamata, ba꞉bema꞉ wadiyala la꞉ ba꞉be awagaha komo na꞉miya꞉pala꞉.
JAM 3:15 A꞉iye, la꞉godolo ditana ba꞉be awagaha ukui Godokono Hunu Habane kapenaha꞉! Ao, ba꞉bako ukui ba꞉moe hopoeno mulu ukui komola, ba꞉be ha꞉da mulu komote Saitanagodone ba pena Godokono hibi mulu komago ba꞉bo palaholonako.
JAM 3:16 Ba꞉bema꞉ puya꞉te komopino ilinama꞉ iba꞉tamo da꞉maubahana, ba꞉gala puya꞉te awagaha ipuwalo ibi ha꞉kiya ibi kapiya demalagidolena, ba꞉ba꞉te olowabeletihui ipuwalo hiya꞉hiya꞉ utitatate hiliyonomo hiya꞉hiya꞉ kuba komo ba꞉bo ododilinaka.
JAM 3:17 Huiyatiya Godogodone da꞉pena ba꞉be mulu komoeno ododili komo eba ka꞉naha꞉, mabu ebeno hibi muluti tawakaluba꞉godolo ditana, iba꞉te kuba dalowa꞉ komokomo a꞉kododila꞉la꞉. Ba꞉bi tawakaluba꞉te tatabalo ba emedena olowabeletihui komo a꞉kiya꞉tawahala꞉, huiyatiya ibi ipuwalo etate eta malemaletelo hidohido komo ba꞉bo ododilinaka. Ba꞉bene iba꞉te tawakalubi hunu nikapa꞉mo ulameheno ba꞉ma ka꞉na eta lumagi miya꞉pate eta lumagi ebo a꞉kalawa꞉la꞉, ba꞉gala iba꞉godolo ma꞉lapila netewa komote kitanaha꞉.
JAM 3:18 Ba꞉ hibila, puya꞉te ba꞉mako tataba emede komo komopa꞉tamo dikalamena, ibi ba꞉ hidohido kikipo hakamo damihona ba꞉bi okopi huiyala, mabu ibino oko owati ipuwalo hidohidonomo naha ilinate hibilo kopikulima꞉na꞉.
JAM 4:1 Ba꞉bema꞉ la꞉ hibima꞉ midipi ipuwalo alaholoho komo ba꞉gala olowabeletihui komo kebene ka꞉pelamenaka? Iyo, ba꞉bi komate la꞉eno kateneno kubakuba ubi komodo pikulinaka, mabu ba꞉bako ubi komate la꞉eno tepo ipuwalo hidohido ukui komago alaholohona.
JAM 4:2 Ba꞉ ba꞉ba ka꞉na la꞉le komopino ilina uwatema꞉ ewagelenamata, huiyatiya uwate gabo umihino ba꞉bema꞉ la꞉le la꞉eno tabamo ibi anakapulamenakomata. Ba꞉gala la꞉ koko ilina uwatema꞉ ubi konomola, huiyatiya la꞉godolo pola꞉naheno ba꞉bema꞉ la꞉le ba olowabeletihui kubanomamo ba꞉bo alaholohonakomata. A꞉iye! Mabu keka꞉ la꞉le la꞉eno komo ilina modobolo kuwatenaha꞉? Mabu ba꞉ la꞉le Godoko la꞉eno modoboha꞉ komoma꞉ hibi gabodo a꞉katoemehalemata.
JAM 4:3 Ba꞉bema꞉ numa꞉la꞉, keba tetelo la꞉le eta ilinama꞉ Godoko da꞉toemehonakoma, ba꞉ba tetelo la꞉eno tepo ipuwoeno ukui tuputupulu kapola꞉naha꞉, mabu la꞉ ubila ba꞉be ilina lawete la꞉ ha꞉kiya la꞉ kokalakaluilamema꞉. Iyo, la꞉le Godoko kokalakaluimima꞉ ukui kihatenaha꞉, ba꞉bema꞉ ebe ubihinola eta ilina la꞉tamo ikalame.
JAM 4:4 A꞉iye, la꞉ ba꞉ hibima꞉ midiha꞉ tawakalubi huiyalata! La꞉ iya꞉tawahala꞉ka꞉, kebe lumagiti ba꞉moe hopoeno komokomo koamo demalagidolena ebete Godokoba꞉ alaholohodawama꞉ eda꞉na? Iyo, ba꞉ hibila, pote ba꞉moe hopoeno ilina ba꞉gala awagaha komokomo uwatema꞉ dewagelena, ebe ba꞉ Godokoba꞉ alaholodawala.
JAM 4:5 Ba꞉bema꞉ numa꞉la꞉, Godokono Bukalo tabote ba꞉ma ka꞉na itana, “Godoko ubi konomola ebeno Gobogobote ha꞉kiya aeno tepo ipuwalo kemedenama꞉, ba꞉bema꞉ ebete aeno kubakuba ukui komago helonomamo alaholohonako.” Iyo, la꞉ iya꞉tawahala ba꞉be tabote hibinomoma꞉ ba eda꞉na,
JAM 4:6 ebeno Bukalo ba꞉moe eta tabote atumu ba꞉ka-itana, “Puya꞉te dawagahana Godote iba꞉go nalaholohona, huiyatiya puya꞉te ibi ha꞉kiya ibi hopamo da꞉miya꞉tena, ebete iba꞉tamo ebeno ko malemale behawakaliminako.” Kalakala konomola, Godote ebeno malemale atamo ba꞉ ba꞉ba ka꞉na hawakalimina!
JAM 4:7 Ba꞉bema꞉ wadiyala la꞉ ha꞉kiya la꞉ Godotamo ikamehote Saitanatamo helonomoma꞉ neda꞉hanala꞉, mabu la꞉le ba꞉ba ka꞉na dewagelema, Saitanate la꞉ kuba gabamo emogabuilame ipuwane la꞉ miya꞉palete gobogobamo tiyo kalahula꞉ma꞉ne.
JAM 4:8 Ba꞉ hibila, keba tetelo la꞉ Godoko tama꞉mo da꞉pelamema, ba꞉be atu tetelo ebete la꞉tamo puluhukuti la꞉ kalakalago kopuwatema꞉na꞉ta. Ba꞉bema꞉ la꞉ puya꞉te kuba komokomo dododilinama, wadiyala la꞉ la꞉eno dalowa꞉ kokoto ukulalete kuba komo gala akododila꞉la꞉. Ba꞉gala la꞉ puya꞉te Godoko ba꞉gala ba꞉moe hopoeno komo atu tetelo ta꞉matalema꞉ dewagelenama, wadiyala la꞉ la꞉eno tepo ipuwoeno kubakuba ukui hiduilamete,
JAM 4:9 ba꞉bene la꞉eno kuba mabuma꞉ wadiyala la꞉le tepo temetemema꞉ eda꞉hate nihima꞉la꞉. Iyo, wadiyala la꞉ la꞉eno iya꞉da꞉ komo miya꞉pate tepo ipuwoeno ihi komo na꞉lawiya꞉la꞉, ba꞉bene la꞉eno kalakala komote huiyatiya menemenema꞉ neda꞉mene.
JAM 4:10 Ba꞉bema꞉ hibila, la꞉ Godokono holoholo hapulu la꞉ ha꞉kiya la꞉ hopamo ba miya꞉te, ebete huiyatiya la꞉ hunamo kowadiya꞉paa꞉latelema꞉na꞉ta.
JAM 4:11 Naeno ekaka꞉la꞉, ba꞉moe ba꞉ eta komola. La꞉eno hibima꞉ midipi kapiyuimi ipuwalo etate etoeno komo kubama꞉ akagaa꞉la꞉, mabu keba tetelo ama꞉ eta hibima꞉ mididawoeno komo kubama꞉ da꞉goemena꞉, ba꞉ba tetelo ama꞉ Godokono konomo malemale tutumu tabo kadikanalema꞉na꞉ta. Numa꞉la꞉, Godote ebeno tutumu tabamo ama꞉ bikiyamenata ama꞉le amia꞉no hibima꞉ midi ekawi malemalelo kemalagidolonama꞉, ba꞉bema꞉ keba tetelo ama꞉ amia꞉no ekawi kubama꞉ da꞉goemena꞉, ba꞉ba tetelo ama꞉ Godokono tutumu tabo atumu kubama꞉ kakagoema꞉na꞉ta.
JAM 4:12 A꞉iye, ama꞉ ko lumagiha꞉! Ama꞉tamo helo pote kikametana eta lumagino komo kanagiya꞉midamema꞉? Godoko kapiya ba꞉ tutumu tabo ododilidawala, ba꞉gala ebe kapiya ba꞉ tawakalubino komokomo anagilamelelamedawala, ba꞉bema꞉ ba꞉moe Kodawa kapiyate modobola tawakalubino emede komokomo ba anagilamelelame etoeno ka꞉ka꞉ mula꞉mete etatamo kuba huiya kikamema꞉ne.
JAM 4:13 Ba꞉gala eta komo. La꞉ komopi ba꞉ma ka꞉na ga꞉lanakomata, “Ka꞉lo gapogapolo o dumutu hegelalo na ko habamo tote, ba꞉bolo nale kapiya gogo ba nemede bisnisi oko nowatiti mani kokonomo konuwatema꞉nemo.”
JAM 4:14 A꞉iye! Ama꞉ iya꞉tawaha꞉ dumutu ama꞉tamo bada komote na꞉kuluhukumini. Ama꞉ hopo lumagilata, ba꞉bema꞉ amia꞉no ka꞉ka꞉ ba꞉ ahuta keba ka꞉nala꞉ka꞉ ba꞉ba ka꞉nala, lumagiti tete nanekele umiti ha꞉kiya tiyonomo ba꞉bo kowiboma꞉ne.
JAM 4:15 Ba꞉bema꞉ wadiyala ama꞉le awagaha tabo olamagi komo miya꞉pate ba꞉ma ka꞉na na꞉goiya꞉, “Godote helo natamo dikanamemene, na dumutu ka꞉ka꞉go ba luta nale ebeno ubi komo ba꞉bo kododima꞉nemo.”
JAM 4:16 Huiyatiya la꞉ komopi ba꞉mako hidohido tabo a꞉kaga꞉lalemata, la꞉ ha꞉kiya la꞉ bawagaminalenamata, ba꞉bema꞉ Godote la꞉eno awagaha tabo ga꞉la komoma꞉ kakalakalanaha꞉.
JAM 4:17 Iyo, ba꞉moe komo ba꞉ hibila, kebe lumagiti tuputupu ododi komo ba iya꞉tawa huiyatiya ba꞉be komamo papamiwataheno, ebeno ododiha꞉ komodo ebete Godokono kukala ba꞉bo kadikanalema꞉ne.
JAM 5:1 Ba꞉bema꞉ dogodogopa꞉la꞉, la꞉ naeno tabo hidamo nulia꞉la꞉. Wadiyala la꞉ ba꞉ma tetelo ihimi na꞉tupuima꞉la꞉, mabu koko temetema꞉te la꞉tamo ba꞉ na꞉pelama꞉,
JAM 5:2 iyo, tete tatalila la꞉eno dogodogo komate kokubakubahama꞉na꞉. Ba꞉ba tetelo la꞉eno pupulino ilina unawa꞉te nalete,
JAM 5:3 ba꞉bene la꞉eno hidohido disi hakate ba uwate nonokama꞉ ba꞉bo keda꞉hama꞉na꞉. Ba꞉bema꞉ hibila, Godote tawakalubino kuba danagilamelelamemene, ba꞉be Ko Hegelalo ba꞉bi nonoka ilinate la꞉eno kuba ododili komo ba꞉gala kuba ukui komo kohawakalilamema꞉na꞉. Numa꞉la꞉, ba꞉moe hopoeno kuititi tetete ba penape, la꞉eno ilina ya꞉lo a꞉dogodoguilamenamimata, huiyatiya tete tatalila la꞉eno kalakala komote kowiboma꞉ne, iyo, la꞉eno nonoka ilinate la꞉eno ape ba kubahilame la꞉eno kalakalate ba꞉bo kowiboma꞉ne, helonomo koete daha ipulunomoma꞉ keba ka꞉na ka꞉midinako ba꞉ba ka꞉na.
JAM 5:4 Ba꞉ hibila, la꞉eno kuba komo ba꞉ ba꞉ma ka꞉na itana. La꞉eno koko bisnisi ipuwalo puya꞉te la꞉eno kolowamino pali ilina da꞉tapiholamenaka, la꞉le iba꞉tamo hido huiya a꞉kikalama꞉lemata, ba꞉bema꞉ iba꞉te ibino temeteme ipuwalo konomamo ihimina. A꞉iye, Helodawa Godote ba꞉be ihimi komo ya꞉lo iya꞉tawui!
JAM 5:5 Ba꞉bema꞉ numa꞉la꞉, la꞉ ba꞉moe hopolo dogodogopima꞉ ba eda꞉hana la꞉ ha꞉kiya la꞉eno kateneno ubilo la꞉ a꞉kalakaluilamenakomata, iyo, la꞉ hidohido baa꞉ ba nahana gadigadihibima꞉ ya꞉lo eda꞉huimata. Ba꞉bema꞉ gadigadi kau-goegoe keba ka꞉nala꞉ka꞉ la꞉ ba꞉ba ka꞉nala, tete tatalila Namutudawate la꞉ anakapulamema꞉ kopema꞉ne.
JAM 5:6 Ba꞉gala eta komo. Komo tetelo la꞉le tuputupu tawakaluba꞉tamo maubahalete, ba꞉bene la꞉le ibi gabomana꞉tamo dito magatalenakomata iba꞉te iba꞉tamo hoe huiya kikalamema꞉. A꞉iye! Ba꞉bi tawakaluba꞉te la꞉tamo eta kuba a꞉kododa꞉la꞉, huiyatiya ba꞉be gabodo la꞉le ibi dito anakapulamenakomata!
JAM 5:7 Ba꞉bema꞉ naeno ekaka꞉la꞉, la꞉eno hibima꞉ midi ipuwalo kodakodalo na꞉la꞉mota꞉hanala꞉ Kodawa Ya꞉sukunu pe teta꞉mo. Wadiyala la꞉ pali ododidawoeno komo nemalagidolala꞉, ebete pali ilina amihote hidohido pali ilina naha tete ba꞉bo kolatimima꞉ne. Ba꞉ma ka꞉na dopo manome tetelo wegolate donakomene ba꞉gala kuititi manomelo gala da꞉konakomene, hakate hido gibama꞉ ba eda꞉ ebeno pali ilinate hidamo ba꞉bo kapepehoma꞉na꞉.
JAM 5:8 Ba꞉bema꞉ la꞉ ba꞉ atumu Ya꞉sukunu pe komo latimima꞉ ubiha꞉ma꞉ eda꞉haheno kodakodalo na꞉la꞉mota꞉hanala꞉, mabu ebeno pe tete ba꞉ na꞉tatali!
JAM 5:9 Ba꞉bema꞉ naeno ekaka꞉la꞉, la꞉ ipuwalo etate eta lumagino komoma꞉ ubiha꞉ tabo akagaa꞉la꞉, mabu diyala, Godote amia꞉no tamedawoeno emede komo modoboma꞉ ba goe huiyatiya ama꞉ kubadawama꞉ da꞉ goemene. Iyo, ba꞉be Kodawate ba꞉ na꞉pe a hiliyonomoeno komokomo kopanagilamelea꞉mema꞉!
JAM 5:10 Ba꞉gala naeno ekaka꞉la꞉, wadiyala la꞉le ya꞉lo tetelo da꞉pikuliya꞉ ba꞉bi Godokono ukui hawakalimipino komo nemalagidolala꞉. Iba꞉te Godokono oko ba owatina koko temeteme duwatenakui, huiyatiya iba꞉te hibima꞉ midi ipuwalo kodakodalo la꞉mota꞉hananakuya꞉, ba꞉bema꞉ iba꞉te keba ka꞉na kemedenama꞉, wadiyala la꞉ ba꞉ ba꞉ba ka꞉na nemedenala꞉.
JAM 5:11 Numa꞉la꞉, a hibima꞉ midipa꞉te ba꞉bako okopi ba emalagidole ba꞉ma ka꞉na ga꞉lanakoma꞉, “Ibino kodakodalo la꞉mota꞉hana mabuma꞉ Godokono kalakala komote iba꞉godolo hibilo nitanami!” Ba꞉bema꞉ wadiyala la꞉ eta hibima꞉ mididawa Yaubakono komo atumu na꞉kemalagidolala꞉. Konomo olalati komote ebetamo duluhukuya꞉, ba꞉ba tetelo ebete hibima꞉ midi ipuwalo kodakodalo la꞉nami, ba꞉bema꞉ Kodawa Godote ebe owalubiti olalati ipuwane ebeno ka꞉ka꞉ a꞉mula꞉miya꞉. Kalakala konomola, Godoko ba꞉ konomo malemaledawala.
JAM 5:12 Ba꞉bema꞉ naeno hibima꞉ midipi ekaka꞉la꞉, ba꞉moe eta komo ba꞉ ko komonomola. La꞉le komopa꞉tamo hibinomo tabo ga꞉lama꞉ dewagelema, ulihopa꞉te la꞉eno tabo hibima꞉ komidima꞉ la꞉le Godokono Hunu Haboeno mahilo akaka꞉ma꞉la꞉ ba꞉gala hopo haboeno mahilo atumu akaka꞉ma꞉la꞉. Ba꞉bema꞉ hibima꞉ mididawa, wadiyala ama꞉ huiyatiya amia꞉no tabo olamagi ipuwalo eta ilinoeno mahilo ka꞉mihino tabo hibilo ba꞉ma ka꞉na na꞉goiya꞉, “Iyo, na kododima꞉nemo,” ba꞉gala keba tetelo ama꞉ eta komo ododi modoboha꞉ma꞉ deda꞉mena꞉, wadiyala ama꞉ eta hibi tabo ba꞉ma ka꞉na na꞉goiya꞉, “Ao, na a꞉kododa꞉mo.” A꞉iye! Komopa꞉te ama꞉ hibima꞉ komidima꞉ ama꞉le amia꞉no tabo heluimima꞉ eta tabo akagaa꞉la꞉, mabu ba꞉bako tabo olamagi komoma꞉ Godote kuba huiya ama꞉tamo kopoemema꞉ne.
JAM 5:13 Ba꞉bema꞉ la꞉ ipuwalo kebe lumagiti komo temeteme ipuwalo demedena, wadiyala ebete toetoe tabo Godotamo nolamaga꞉mene. Ba꞉gala kebe lumagiti kalakala ipuwalo demedena, wadiyala ebete Godoko adikumi ohale nalapihohamene.
JAM 5:14 Ba꞉gala kebe lumagi temetemete dumina, wadiyala ebete sose watowatopi ka꞉lamiti, ba꞉bene iba꞉te pelamete Kodawa Ya꞉sukunu mahilamo olibi kikipoeno iha꞉mo ebeno wato kali pabutimiti Godotamo ebe ba꞉bo nadipata꞉mena꞉.
JAM 5:15 Ba꞉bema꞉ iba꞉te Godoko hibima꞉ ba midi, ebete ibino toetoe tabo uliti temetema꞉goeno lumagi ba꞉bo kohiduimima꞉ne, ba꞉gala diyala, ba꞉be temetemete ba꞉be lumagino kuba ododili komodo ebetamo kuda꞉ a꞉pi, ba꞉bene Godote ba꞉be komo iya꞉tawate ba꞉be atu tetelo ebeno kuba egebolemete kadodolemema꞉ne.
JAM 5:16 Ba꞉bema꞉ wadiyala la꞉ ipuwalo etate ebeno kuba ododili komokomo kahawakalilame, etate ebeno kuba ododili komokomo kahawakalilame, ba꞉ba ka꞉na newagelenala꞉, ba꞉bene la꞉ ipuwalo etate eta Godotamo nadipatenakuya꞉la꞉, ebete la꞉eno kuba egebolelamete la꞉eno apeno hiya꞉hiya꞉ temeteme komo tama꞉mo komiya꞉telamema꞉. Ba꞉ hibila, kapiya tuputupudawoeno toetoe tabo olamagi ipuwado Godoko ba꞉ modobola koko hanohano komo ododilima꞉.
JAM 5:17 Numa꞉la꞉, Godokono ukui hawakalimidawa Elayako ba꞉ hopo lumagila, a keba ka꞉nala꞉ka꞉ ebe ba꞉bako lumagila. Huiyatiya ebe hido tuputupudawala, ba꞉bema꞉ wegolate kowiboma꞉ ebete Godotamo konomamo da꞉toetoiya꞉, Godote ebeno tabo hibilo uliya꞉, iyo, ba꞉ba tetene tupuimiti wegolate tete ga꞉ga꞉nomolo konakuiha꞉, ba꞉be tete ba꞉ netewa-kapiya gogo ba꞉gala sikisi manome tetela.
JAM 5:18 Huiyatiya wegolate gala oma꞉ Elayate Godotamo toetoe tabo da꞉kolamagiya꞉, Godote ebeno toetoe tabo gala kuliti wegola hopamo ba꞉bo poemiya꞉ tawakalubino pali ilinate gala kakapepehoma꞉.
JAM 5:19 Ba꞉bema꞉ naeno hibima꞉ midipi ekaka꞉la꞉, naeno kuititi leta tabo ba꞉ ba꞉ma ka꞉nala. La꞉ ipuwalo etate Godokono hibi gabone gobogobamo delehegamene, wadiyala etate ebe gala na꞉kamagaha꞉mene.
JAM 5:20 Iyo, la꞉ ba꞉moe ko komo nemalagidolala꞉, kebe lumagiti kuba ododidawa umiti ebeno kuba gabone Godokono hibi komamo gala da꞉kamagahemene, Godote ba꞉be tuputupudawoeno ododi komodo kubadawoeno ka꞉ka꞉ mula꞉mete ebeno kuba ododili komokomo ba꞉bo kegebolemema꞉ne. Ba꞉moe ba꞉ naeno tabo kuititila. Ba꞉ba꞉la.
1PE 1:1 Na ba꞉ Pitatela, Ya꞉su Kelisote ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala. Godote ebeno tawakalubima꞉ keda꞉hanama꞉ pui ka꞉ka꞉lamiholiya꞉, ibi ipuwalo komo la꞉ Yudiya hopone hiya꞉hiya꞉ hopamo ikuliti ba꞉bo da꞉nemedehonama, ba꞉ma ka꞉na komo la꞉ Pontase hopolo, komo Galesiya hopolo, komo Ka꞉padosiya hopolo, komo A꞉isiya hopolo, ba꞉gala komo Bitiniya hopolo, la꞉le ba꞉moi hiya꞉hiya꞉ hopolo bemedehonamata, nale ba꞉moe leta la꞉ hiliyonomatamo ba꞉bema꞉ poememo.
1PE 1:2 Ba꞉ hibila, ya꞉lo tetelo Nabiwi Godote la꞉ a꞉ka꞉lamiya꞉ta la꞉le ebeno Gobogoboeno heloamo ebeno talona tawakalubima꞉ keda꞉hanama꞉, iyo, ebete ubi bihatiya꞉ Ya꞉su Kelisokono hawa꞉mo la꞉eno tepo ipuwoeno dalowa꞉ ukulalelamete, la꞉le ebetamo hibilo kopapamila꞉halenama꞉. Wadiyala Godokono malemale komo ba꞉gala hete komote la꞉godolo konomamo na꞉pola꞉namena꞉.
1PE 1:3 Wadiyala a kalakala tabo aeno Kodawa Ya꞉su Kelisokono Nabiwitamo kadipatema꞉nema꞉, mabu ebe ba꞉ hibi Godola. Numa꞉la꞉, ebete ebeno konomo malemale ba꞉ma ka꞉na hawakalimiya꞉, ebete Ya꞉su Kelisoko hoe ipuwane ka꞉ka꞉mo dadipatiya꞉ ba꞉be komodo uli ka꞉ka꞉ atamo ikaa꞉miya꞉. Ba꞉be mabuma꞉ ale ebeno pe komoma꞉ uliholo kalakalago ebe belatiminama꞉,
1PE 1:4 mabu ba꞉ba tetelo Godote ebeno gugudi mabuma꞉ da꞉hiduilamiya꞉ ale ba꞉bi hidohido ilina hibilo kuwatema꞉nema꞉. Ba꞉bi hidohido ilinate ebeno Hunu Habalo ba pola꞉na emedena tetelo a꞉kawibohonamena꞉ ba꞉gala a꞉kababalehonamena꞉ ba꞉gala a꞉kakubakubahanamena꞉.
1PE 1:5 Ba꞉ hibila, Godoko ubila ebete ba꞉moe hopoeno Kuititi Hegelalo ebeno ka꞉ka꞉ mula꞉ komo la꞉tamo ikalame, ba꞉bema꞉ ebete la꞉eno hibima꞉ midi komodo ebeno heloamo la꞉ nitagua꞉midalenata.
1PE 1:6 Ba꞉moe mabuma꞉ la꞉ na꞉kalakalahanala꞉, iyo, hibila, ba꞉ma tetelo la꞉le komo hiya꞉hiya꞉ temeteme ipuwalo ba emedena menemene iya꞉tawahanakomata, huiyatiya tete tatalila la꞉eno kalakala tete kopuluhukuma꞉ne.
1PE 1:7 Numa꞉la꞉, ba꞉moe hopolo iya꞉tawahapa꞉te golodo ilina koe ipuwamo dihatemena꞉, koete golodo ilinoeno dalowa꞉ ba upula꞉ iba꞉te ba꞉be ilinoeno hido a꞉la꞉mina komo ba꞉bo kumima꞉na꞉. Ba꞉ ba꞉ba ka꞉na Godote la꞉eno hiya꞉hiya꞉ temeteme ipuwalo ebeno hido oko bowatina la꞉eno hibima꞉ midi komo kulamelelamema꞉, da꞉ hibila꞉ o da꞉ hibiha꞉. Ba꞉bema꞉ numa꞉la꞉, hopo habanapa꞉te golodo ilina duminaka hidonomoma꞉ ga꞉lanaka, mabu tete nanekelelo ba꞉be hopo ilinoeno a꞉la꞉mina komote konomamo kitanama꞉ne. Huiyatiya kalakala konomola, la꞉eno hibima꞉ midi komoeno hido komote ba꞉bako golodo ilinoeno hido komo na꞉gogolona, mabu hibima꞉ midi komote la꞉godolo emedena tetelo a꞉kawibonamene. Ba꞉be mabuma꞉ wadiyala la꞉ temeteme ipuwalo kodakodalo na꞉la꞉mota꞉hanala꞉, mabu Ya꞉su Kelisote gala da꞉kapemene, ebete la꞉ ba pimililamehole la꞉ pawagaminalete hunamo ba꞉bo kopewadiya꞉paa꞉latelema꞉na꞉ta.
1PE 1:8 La꞉le ebe dopamo kuminakuiha꞉ ba꞉gala ba꞉ma tetelo la꞉eno baida꞉mo ebe kuminaha꞉, huiyatiya la꞉le ebe hibima꞉ ba midina malemalelo ba꞉bo emalagidolonamata. Ba꞉be mabuma꞉ la꞉eno temeteme koamo emalagidoleheno konomo kalakalate la꞉godolo bitana, ba꞉bako kalakala bada konomola꞉ka꞉! Iyo, tawakaluba꞉te ba꞉bako kalakala tabamo hawakalimi modoboha꞉!
1PE 1:9 Numa꞉la꞉, ba꞉be kalakalate la꞉godolo hibilo bitana, mabu la꞉ iya꞉tawahala la꞉eno hibima꞉ midi komodo la꞉le Godogodone ka꞉ka꞉ mula꞉ komo na꞉lawenamata.
1PE 1:10 Dopamo tetelo Godokono ukui hawakalimipa꞉te ba꞉moe ka꞉ka꞉ mula꞉ komoeno hibi komo kiya꞉tawahama꞉ ebeno Bukoeno hiya꞉hiya꞉ tabo komokomo beka꞉lamiholenakuya꞉, ba꞉bene iba꞉te ba꞉ma ka꞉na ga꞉lanakuya꞉, galane tetelo Godote ebeno ka꞉ka꞉ mula꞉ komo la꞉ hibima꞉ midipa꞉tamo malemalelo dito kikalamema꞉na꞉ta.
1PE 1:11 Huiyatiya numa꞉la꞉, iba꞉te ba꞉moe eta komo nipo umiya꞉, Godokono ka꞉ka꞉ mula꞉ komote keba ka꞉na na꞉ka꞉pemene ba꞉gala kebako tetelo na꞉ka꞉puluhukumini. Ba꞉ba tetelo Kelisokono Gobogobote ebeno ka꞉ka꞉ mula꞉ komoeno pe tete iba꞉tamo hibilo kahawakalimiya꞉ha꞉, huiyatiya ebete ibi ipuwado ba꞉ma ka꞉na olamaginakui, Godokono Oemedawa Kelisote da꞉pemene, ebete dopamo koko temeteme uwatete, galane Godote ebeno hido a꞉la꞉mina komamo ebe ba꞉bo kawagaminama꞉ne.
1PE 1:12 Ba꞉gala ibino oko owati ipuwalo Godote ibi a꞉kiyalamiya꞉, iba꞉te kebe komokomo da꞉ga꞉lanakui ba꞉bi komate iba꞉tamo a꞉kikulihamena꞉ huiyatiya galane tawakaluba꞉tamo kikulihoma꞉na꞉. Ba꞉bema꞉ hibima꞉ midipa꞉la꞉, la꞉ ba꞉ ba꞉bi tawakalubilata, iyo, la꞉ tetelo komo Godokono okopa꞉te pikuliti Ya꞉sukunu Hido Tabo ebeno Hunu Haboeno Talona Gobogoboeno heloamo la꞉tamo a꞉polamagiminakuya꞉. Ba꞉ hibila, Hunu Haboeno nopopa꞉te ibino ubi konomamo miya꞉tena, la꞉le kebe ugumuili komo kuwatiuya꞉ma, iba꞉te ba꞉bi hidohido komo atumu kakiya꞉tawahama꞉.
1PE 1:13 Ba꞉bema꞉ la꞉le Godokono hido oko kowatihonama꞉ la꞉eno ukui na꞉hiduilama꞉la꞉. Ba꞉gala wadiyala la꞉ Ya꞉su Kelisokono pe komoma꞉ uliholo nemedehonala꞉, mabu ebete da꞉pehawakalamene ba꞉be hegelalo ebeno ka꞉ka꞉ mula꞉ komo la꞉tamo malemalelo kopikalamema꞉na꞉ta.
1PE 1:14 Ba꞉gala dopamo tetelo la꞉le Godokono hibi komo iya꞉tawahaheno kebe komo kododilinakuima, la꞉ ba꞉ma tetelo ebegodone ohobila꞉hate ba꞉bi kateneno ubi komokomo ododili komodo hibima꞉ midiha꞉pimo gala akemedehonala꞉.
1PE 1:15 Huiyatiya la꞉ Godotamo ba papamila꞉ha ebeno tutumu tabo hiliyonomo ipuwalo eta kapiya adikanaleheno, wadiyala la꞉ la꞉eno hiliyonomo ododili komo ipuwalo talonama꞉ neda꞉huya꞉la꞉. Iyo, la꞉ da꞉ka꞉lamiya꞉la ba꞉be Kodawate talonama꞉ keba ka꞉na keda꞉na la꞉ ba꞉ atumu ba꞉ba ka꞉na nemedehonala꞉,
1PE 1:16 mabu ebete ebeno Bukalo a ba꞉ma ka꞉na iya꞉tua꞉mena, “La꞉eno ododili komo ipuwalo talonama꞉ neda꞉hanala꞉, mabu na ba꞉ Talonanomolo Emededawala.”
1PE 1:17 Numa꞉la꞉, Godote kapiya tuputupunomo gabodo hiliyonomo hopo habanapino komokomo kanagilamelelamema꞉ne, iyo, ebe ba꞉ hido huiya ba꞉gala kuba huiya iba꞉tamo modobolo dikalamemene ba꞉be Kodawala, ba꞉gala hibila, la꞉le ebetamo da꞉toetoehonakoma ebe la꞉eno Nabiwima꞉ ka꞉minakomata. Ba꞉be mabuma꞉ wadiyala la꞉ ba꞉moe hopolo kapelapimo ba emedehona, la꞉eno ododili ipuwalo ebe tolemelo ebe kapiyatamo na꞉papamila꞉hanakuya꞉la꞉,
1PE 1:18 mabu la꞉ iya꞉tawahala la꞉eno hido huiyate ebegodone kopema꞉ne, ba꞉gala la꞉le dopamo iniwala꞉godone da꞉lawiya꞉ma ba꞉be emede komoeno ododili ipuwalo ebeno hibi ka꞉ka꞉ komo nipo umiya꞉mata. Iyo, dopamo la꞉le ba꞉be pakala emede komamo da꞉papamila꞉hanamima Saitanakono du genamanapima꞉ ba eda꞉hana, Godote la꞉ malemalelatelelo ba꞉be du genama ipuwane ba꞉bo uluhukulateliya꞉ta. Ba꞉bema꞉ numa꞉la꞉, ba꞉ba tetelo ebete la꞉ ba꞉moe hopoeno mana꞉mo kuwatiya꞉ha꞉,
1PE 1:19 huiyatiya ebete la꞉ Kelisokono huiya konomo hawa꞉mo la꞉ a꞉huiyaliya꞉ta. Iyo, eta kuba kapiyate Kelisogodolo itanaheno, ebete hidonomo sipi-goe deha꞉poto huiyama꞉ ba eda꞉na la꞉eno kuba ododili mabuma꞉ ebeno ape hawa꞉goeno malemale ilinama꞉ miditi Godotamo ba꞉bo ikamiya꞉.
1PE 1:20 Ba꞉ hibila, ba꞉moe hopo ododihino dopamo Godote Kelisoko ya꞉lo a꞉ka꞉miya꞉ la꞉eno ka꞉ka꞉ komula꞉lelamema꞉, ba꞉bema꞉ kalakala konomola, a tetelo ba꞉moe hopoeno kuititi tete ba tatali ebete hopo habanapa꞉tamo ba꞉bo pehawakaluya꞉,
1PE 1:21 ba꞉bene ebete da꞉hoiya꞉ ba꞉ba tetelo Godote hoe ipuwane ebe ba adipate ebeno helonomo alago ebe ba꞉bo awagaminuya꞉. Ba꞉be mabuma꞉ la꞉le Kelisoko ipuwado Godoko hibima꞉ ba midina, ebegodone la꞉eno hidohido komo hibilo uwatema꞉ ebeno pe komo uliholo latiminamata.
1PE 1:22 Numa꞉la꞉, la꞉ Godokono hibi komamo ba papamila꞉ha la꞉eno tepo ipuwa ukulaliya꞉mata la꞉le la꞉eno hibima꞉ midipi ekaki malemalelo hibilo kemalagidolenama꞉. Ba꞉bema꞉ wadiyala la꞉ ipuwalo etate eta kemalagidolo, etate eta kemalagidolo, la꞉ ba꞉ba ka꞉na ba ewagelena la꞉eno tepo ipuwoeno konomo malemala꞉mo komopi nemalagidolenala꞉.
1PE 1:23 Ba꞉ hibila, dopamo la꞉eno nabi ba꞉ puya꞉te ibino kadele teta꞉mo nikuliti da꞉neha꞉lahuya꞉ ibi ba꞉ ba꞉bi dubula, huiyatiya ba꞉ma tetelo la꞉ ba꞉ Ka꞉ka꞉ Nabiwi Godokono gugudilata, iyo, la꞉le ebeno wiboha꞉ Ka꞉ka꞉ Tabodo hawakalahalete uliulinoma꞉ eda꞉huya꞉mata.
1PE 1:24 Ba꞉be mabuma꞉ Godokono Bukalo tabote ba꞉ma ka꞉na itana, “Tawakalubi hiliyonomo ba꞉ hemo keba ka꞉nala꞉ka꞉ ba꞉ba ka꞉nala, ba꞉gala ibino awagaha komokomo ba꞉ haiyaino titi huiyala. Ka꞉lo dapepehuta ba꞉bi hemate dumutu hegelalo kowaiwaihoma꞉na꞉, ba꞉gala ka꞉lo hido tita꞉gopi da꞉pola꞉na ba꞉bi haiyaa꞉te dumutu hopamo dito koma꞉tila꞉ma꞉na꞉.
1PE 1:25 Godokono Tabote huiyatiya emedena emedena tetelo bitanamene.” Numa꞉la꞉, ba꞉moe tabo ba꞉ komopa꞉te dopamo tetelo la꞉tamo dolamagimiya꞉ ba꞉be Hido Tabola.
1PE 2:1 Ba꞉moe ba꞉be mabuma꞉ la꞉godolo da꞉pola꞉na ba꞉bi hiya꞉hiya꞉ kuba hiliyonomo tama꞉mo na꞉miya꞉ta꞉la꞉, ba꞉ma ka꞉na ha꞉da tabo akolamagiminakala꞉, ba꞉gala ma꞉lapila netewa komo na꞉miya꞉pala꞉la꞉, ba꞉gala komopino ilinama꞉ akamaubahalenakala꞉, ba꞉gala tawakalubino mahilo kubahilame talonala.
1PE 2:2 La꞉ huiyatiya a꞉lia꞉li gugudimo ba eda꞉ha Godokono Gobogoboeno hido nono nihoma꞉ la꞉ la꞉eno ubi komo konomamo nihatenala꞉, iyo, ba꞉ ba꞉ba ka꞉na la꞉ la꞉eno ka꞉ka꞉ mula꞉ komo hibilo lawema꞉ hibima꞉ midi ipuwalo kapepehoma꞉nemata.
1PE 2:3 Ba꞉ hibila, dopamo tetelo la꞉ Kodawoeno malemale totoma꞉namidate golanomoma꞉ ba꞉bo ga꞉luya꞉mata.
1PE 2:4 Ba꞉bema꞉ la꞉le Ko Ka꞉ka꞉dawa Ya꞉sutamo na꞉pelama꞉la꞉, ebe ba꞉ tawakaluba꞉te kubama꞉ ga꞉late tama꞉mo dihatiya꞉ ba꞉be dawala, huiyatiya Godote ebe hidonomo nakola huiya hototoma꞉ goelo ba꞉bo lawiya꞉.
1PE 2:5 Numa꞉la꞉, ebeno ka꞉ka꞉te la꞉ ipuwalo atumu ba꞉ka-itana, ba꞉bema꞉ wadiyala la꞉ pelamete la꞉ ha꞉kiya la꞉ Godotamo na꞉pikamehala꞉, la꞉le ebe adikumino genamoeno hidohido kehama꞉ keda꞉hanama꞉. Ba꞉bene la꞉ ba꞉be genama gulu ebe ba owatidolona ebeno Gobogoboeno talona oko owati komodo malemale ilina ebetamo ikamehopima꞉ beda꞉hanamata, ba꞉bema꞉ la꞉le Ya꞉su Kelisoko ipuwado ebetamo dikamehonakoma, ebete kalakalago la꞉godone buwatenakomene.
1PE 2:6 Numa꞉la꞉, Godote ba꞉be komo hawakalimima꞉ ebeno Bukalo ba꞉ma ka꞉na goena, “Na hidonomo nakola huiya abo lawete Yelusalema ko habalo detenamo ba꞉be genamoeno hototoma꞉ komidima꞉nemo. Ba꞉bema꞉ kebe lumagiti ba꞉be dawa hibima꞉ da꞉midimini, ebete emedena tetelo hilopo komo a꞉kiya꞉tawanamene.”
1PE 2:7 Ba꞉ hibila, la꞉ puya꞉te Ya꞉suku hibima꞉ da꞉midinama, la꞉ iya꞉tawahala ebe ba꞉ Godokono huiya konomo hototoma꞉ eda꞉na. Huiyatiya numa꞉la꞉, komopa꞉te ebe hibima꞉ kamidinaha꞉, ba꞉bema꞉ Godokono Buka tabote ibino ubiha꞉ komo hawakalimima꞉ ba꞉ma ka꞉na goena, “Genama etepa꞉te tama꞉mo dihati, ba꞉be hototote huiyatiya genamoeno helo mabuma꞉ eda꞉na.”
1PE 2:8 Ba꞉gala Godokono Bukalo eta tabote ba꞉ma ka꞉na itana, “Ba꞉moe Kodawa ba꞉ gabo tetelo ditana ba꞉be nakolala, tawakaluba꞉te ibino kuba ubi komago ba tolame ebegodolo nato nukamidahalete ebe hunamo ba꞉bo konegudima꞉na꞉.” Ba꞉bema꞉ hibila, iba꞉te Godokono tabo hibima꞉ midiha꞉ mabuma꞉ nato ukamidahalete ba꞉bo gudinaka, Godote ibi mabuma꞉ ya꞉lo da꞉goiya꞉ ba꞉ba ka꞉na.
1PE 2:9 Huiyatiya la꞉ hibima꞉ midipino komo hiya꞉nomola. La꞉ ba꞉ Godote ebeno ubilo duwatiya꞉la ba꞉bi tawakalubilata, ba꞉gala la꞉ Ko Gawadubu Godoko adikumilo ebetamo malemale ilina dikamehonakoma, la꞉ ba꞉ ba꞉bi okopilata. Iyo, la꞉ ba꞉ ebetamo talona oko dowatinama ba꞉bi kapiyuimipilata, ba꞉gala la꞉ ba꞉ Godokono hiya꞉nomo tawakalubima꞉ eda꞉hanamata. Ba꞉ hibila, Godote la꞉ du ipuwane a꞉ka꞉lamiya꞉ta, mabu ebe ubila la꞉le ebeno hidonomo alo ipuwalo ba emedena ebeno hidohido ododili komokomo komopa꞉tamo kolamagiminakoma꞉.
1PE 2:10 Ba꞉bema꞉ kalakala konomola, la꞉le dopamo tetelo Godokono tawakalubima꞉ keda꞉hanamiha꞉ huiyatiya ka꞉lo la꞉ ba꞉ ebeno gugudilata, ba꞉gala dopamo la꞉ ebeno malemale kiya꞉tawahuya꞉ha꞉ huiyatiya ba꞉ma tetelo ebegodone a꞉lawiya꞉mata.
1PE 2:11 Naeno hidohido mabuluba꞉la꞉, nale la꞉ betoelameholemata la꞉ ba꞉moe hopolo ba emedehona kapelapima꞉ neda꞉hanala꞉, mabu la꞉ ba꞉ Godokono Hunu Habanapilata. Ba꞉bema꞉ la꞉eno kateneno ubi komamo akapapamila꞉hala꞉, mabu ba꞉bi kuba ubi komate la꞉eno gobogoboeno ka꞉ka꞉go ba alaholoho la꞉ kubahilamema꞉ ewagelena.
1PE 2:12 Ba꞉gala la꞉le hibima꞉ midiha꞉pa꞉go ba emedena ibino holoholo hapulu hidohido komo kapiya nododilinakuya꞉la꞉, mabu ibi ipuwalo puya꞉te la꞉ kubapima꞉ da꞉ka꞉lamina, iba꞉te la꞉eno hidohido ododili komo ba ulamena la꞉ mabuma꞉ ukui hiya꞉ma꞉ ba꞉bo komidilima꞉na꞉. Iyo, hibila, Godote hopo habanapino komo anagilamelelamema꞉ da꞉pemene, ba꞉be Ko Hegelalo ba꞉bi atu tawakaluba꞉te la꞉eno hidohido ododili komoma꞉ Godokono mahilo kadipatema꞉na꞉.
1PE 2:13 Ba꞉bema꞉ Kodawa Ya꞉suku mabuma꞉ la꞉le Loma habanapino Konomo Gawadubutamo na꞉papamila꞉hanala꞉, mabu hopo konomolo ebeno helote hibilo bitana. Ba꞉gala ebete komo hiliyonomo hiya꞉hiya꞉ hopamo da꞉noelamiya꞉ ba꞉bi koko gawadubu ba꞉gala ibino komo gabomani okopi, wadiyala la꞉ ibi hiliyonomatamo atumu na꞉kapapamila꞉halenakuya꞉la꞉. Ba꞉ hibila, ba꞉bi dubagodolo helo bitana kuba ododilipa꞉tamo kuba huiya ba ikalame hidohido komo ododilipi hunamo kowadiya꞉paa꞉latelema꞉na꞉.
1PE 2:15 Ba꞉moe mabuma꞉ Godokono ubi komo ba꞉ma ka꞉na bitana, keba tetelo ebeno hibi komo iya꞉tawaha꞉pa꞉te la꞉ kubapima꞉ da꞉ka꞉lamimina꞉, la꞉le la꞉eno hidohido ododili komamo ibino daedae tabo ga꞉la komo ba꞉bo koduhilamema꞉nemata.
1PE 2:16 Ba꞉bema꞉ la꞉ Kelisoko ipuwalo tutupima꞉ deda꞉hanama, la꞉ hidamo! La꞉ daedae ukuilo ba꞉ma ka꞉na akaga꞉lala꞉, “Kelisote aeno kuba huiya ya꞉lo uwatea꞉miya꞉, ba꞉bema꞉ ale aeno kuba ubi komokomo gala da꞉kododilima꞉, Godogodone kuba huiya a꞉kalawa꞉ma꞉.” Ao, eba ka꞉naha꞉! Wadiyala la꞉ huiyatiya la꞉eno ape Godotamo ikamehonomo nikamehuya꞉la꞉, la꞉le la꞉eno ododili ipuwalo ebeno huiyaha꞉ okopima꞉ keda꞉hanama꞉.
1PE 2:17 Ba꞉ ba꞉ba ka꞉na la꞉le komo hibima꞉ midipi hiliyonomo malemalelo ba emalagidole Godoko kapiya na꞉tolemenala꞉. Ba꞉gala ba꞉moe hopo konomolo heloma꞉ deda꞉na, ba꞉be Lomanapino Konomo Gawadubuino komoma꞉ la꞉le la꞉eno tepo ipuwalo kuba tabo ga꞉laheno ebeno tutumamo na꞉papamila꞉hanakuya꞉la꞉. Iyo, wadiyala la꞉ ha꞉kiya la꞉ hopamo ba miya꞉te, komo tawakalubi hiliyonomoeno komoma꞉ la꞉eno tepo ipuwoeno ukuilo ibi hunamo na꞉wadiya꞉paa꞉latelenakuya꞉la꞉.
1PE 2:18 Ba꞉bema꞉ koko oko dubate la꞉ pui mana꞉mo duwatiya꞉la, wadiyala la꞉le ba꞉bi dubuino huiyaha꞉ oko kowatihonama꞉ la꞉eno tepo ipuwalo ibino komoma꞉ kuba tabo ga꞉laheno iba꞉tamo oko helonomamo nowatinakuya꞉la꞉. Iyo, oko namutulubi ipuwalo puya꞉te la꞉ da꞉malemalelatelena, la꞉le hidohido oko ibi kapiyatamo owatihoheno, puya꞉te la꞉ kiyahalamelo la꞉tamo da꞉maubahalena, wadiyala la꞉ ba꞉bako oko namutuluba꞉tamo atumu kalakalago na꞉papamila꞉halenakuya꞉la꞉.
1PE 2:19 Ba꞉ hibila, ama꞉ ba꞉ba ka꞉na ba ewagelena amia꞉no kuba ododiha꞉ tetelo etate ama꞉tamo temeteme dikamemena꞉, Godote ba꞉be komo umiti ama꞉tamo kokalakalama꞉ne mabu ama꞉ amia꞉no tepo kodakoduimilo ebeno ubi komamo na꞉papamiwatanata.
1PE 2:20 Huiyatiya ama꞉ oko kubamo owati ipuwalo namutudawate hiya꞉hiya꞉ temeteme ama꞉tamo dikamehomena꞉, ba꞉ba tetelo ama꞉ amia꞉no tepo kodakoduimilo ko komoha꞉ma꞉ da꞉goemena꞉, ba꞉be mabuma꞉ Godote ama꞉tamo ba꞉ka꞉kalakalamene? Ao, ebeno kalakalate a꞉kitanamene mabu ama꞉ ba꞉ kuba okodawalata, huiyatiya keba tetelo ama꞉ hido oko owati ipuwalo temeteme da꞉lawemena꞉, ba꞉ba tetelo ebeno kalakalate ama꞉tamo hibilo kitanama꞉ne.
1PE 2:21 Ba꞉ hibila, Godote la꞉ hibima꞉ midipi a꞉ka꞉lamiya꞉ta, la꞉eno hibima꞉ midi mabuma꞉ ba꞉moe hopoeno temeteme ipuwalo kopola꞉nama꞉. Ba꞉bema꞉ Kelisote la꞉eno ka꞉ka꞉ komula꞉lelamema꞉ ebeno hoe ipuwalo koko temeteme keba ka꞉na kuwatiya꞉, Godoko ubila la꞉ Kelisokono nato bobodo ebe hibilo kota꞉matanama꞉.
1PE 2:22 Iyo, numa꞉la꞉, Kelisote eta kuba kododiya꞉ha꞉ ba꞉gala ebegodolo eta ha꞉da amiho komo puliyala.
1PE 2:23 Ba꞉gala kubapa꞉te ebe diduduputimiya꞉ ebete huiyatiya iba꞉tamo iduduputilame tabamo kahuiyuya꞉ha꞉, iyo, ebete iba꞉godone koko temeteme duwatiya꞉, ebete ibi kiyahalamelo iba꞉tamo kuba huiya ikalamema꞉ kagoiya꞉ha꞉. Ba꞉ba tetelo ebete huiyatiya ebeno hibima꞉ midi komo Godotamo ihatiya꞉ ebete ebeno ka꞉ka꞉ komula꞉mema꞉, mabu ebe iya꞉tawuya꞉ galane ba꞉be Kodawate hiliyonomo tawakalubino komo tuputupunomo gabodo kanagilamelelamema꞉ne.
1PE 2:24 Ba꞉bene Kelisote ha꞉kiya ebeno apa꞉mo aeno kuba ododili komo uwatea꞉mete keha pihigamo ba꞉bo watuya꞉. Ebete ba꞉ba ka꞉na ododiya꞉ mabu ebe ubila ale aeno kuba ododili ipuwalo ha꞉lahate ebeno tuputupu emede ipuwalo kemedehonama꞉, iyo, ebete ebeno temeteme uwate komodo la꞉ a꞉hiduilamiya꞉ta.
1PE 2:25 Ba꞉bema꞉ numa꞉la꞉, dopamo tetelo la꞉ hiya꞉hiya꞉ dalatidiholiya꞉ma ba꞉bi sipi-goegoemo emedehonamimata, huiyatiya ka꞉lo Godote la꞉ gala a꞉kamagaheliya꞉ta la꞉eno Hido Sipi-goegoe Ulamedawa kota꞉matanama꞉, ebe ba꞉ la꞉eno tepo ipuwoeno Ukui Buiya꞉minaledawala.
1PE 3:1 Ba꞉bema꞉ kamenakamenala꞉, nale okopi ibino namutuluba꞉tamo papamila꞉hama꞉ keba ka꞉na ka꞉kiyalamemo, wadiyala la꞉ ba꞉ atumu la꞉eno awa꞉tamo na꞉papamila꞉hanakuya꞉la꞉. Diyala, ibi ipuwalo komopa꞉te Ya꞉sukunu Hido Tabo hibima꞉ kamidinaha꞉, huiyatiya la꞉le ebeno Hibi Taboeno eta komo iba꞉tamo ga꞉laheno, la꞉eno hidohido ododili komate ibi hibi gabo ba꞉bo kiya꞉tulamema꞉na꞉ iba꞉te atumu hibima꞉ midipima꞉ keda꞉hama꞉.
1PE 3:2 Ba꞉bema꞉ la꞉eno ododili ipuwalo eta dalowa꞉ ukui komote itanaheno, la꞉le Godoko la꞉eno ukui komamo dawagaminanama, wadiyala iba꞉te ba꞉bi netewa komo la꞉eno emede ipuwalo hidamo nulamenamena꞉.
1PE 3:3 Ba꞉gala wadiyala la꞉ la꞉eno hunu tama hiduilamema꞉ koamo akemalagidolonala꞉. Ba꞉ma ka꞉na la꞉eno hinibo hiduilame komo, ba꞉gala huiya kokonomo tulikahula pupuli komo, ba꞉gala galoeno nolenole pupuli komo, ba꞉gala hidohido kaliko pupuli komo, ba꞉bi komo hiliyonomo ba꞉ koko komoha꞉.
1PE 3:4 Huiyatiya numa꞉la꞉, ko komo ba꞉ tepo ipuwa hiduilame komola, mabu kebe kamenate ebeno tepo ipuwa da꞉hiduimimini, ba꞉be hido komote ebegodolo a꞉kawibamene, iyo, ba꞉bako hido tataba emede komote ebegodolo ba itana, Godote ba꞉be komo umiti hidonomoma꞉ kogoema꞉ne.
1PE 3:5 Ba꞉bema꞉ wadiyala la꞉le ya꞉lo tetelo tuputupulu demedehonama꞉ ba꞉bi kamenakamenoeno emede komo nemalagidolala꞉. Iba꞉te Godoko hibima꞉ ba midina ibino awa꞉tamo papamila꞉ha komodo ibi ha꞉kiya ibino tepo ipuwa hidohidonomoma꞉ ba꞉bo midilinakuya꞉,
1PE 3:6 iyo, ba꞉ ba꞉ma ka꞉na Selate ebeno awi A꞉ibalahamatamo hidonomamo papamiwatalo ebe ebeno hido namutudawama꞉ ka꞉minakui. Ba꞉bema꞉ la꞉le Selako ba ibamitina la꞉eno awi tolelameheno iba꞉tamo hidohido komo dododilinakoma, la꞉eno hibima꞉ midi ipuwalo la꞉ ba꞉ ebeno bohelemele gugudima꞉ beda꞉hanamata.
1PE 3:7 Ba꞉gala hibima꞉ midipi dubala꞉, la꞉ atumu la꞉eno kamenakamenago tatabalo ba emedehona hido ukuia꞉go ibi nowalubilinakuya꞉la꞉, mabu la꞉eno helote ibino helo na꞉gogolona. Iyo, wadiyala la꞉ la꞉eno tepo ipuwoeno ukuilo la꞉ ha꞉kiya la꞉ hopamo ba miya꞉te la꞉eno kamenakamena hunamo na꞉wadiya꞉paa꞉latelenakuya꞉la꞉, mabu Godote tawakaluba꞉tamo malemalelo dikalamena iba꞉te ba꞉be wiboha꞉ ka꞉ka꞉ la꞉go kapimilo kolawema꞉na꞉. Ba꞉ hibila, la꞉ ba꞉ma ka꞉na dewagelema, Godote la꞉eno toetoe tabo ulihoma꞉ eta komote gigiho a꞉kakalapilamene.
1PE 3:8 Ba꞉bema꞉ la꞉ hibima꞉ midipino emede komoma꞉, na Pitate kuititi tabo ba꞉ma ka꞉na goemo. Wadiyala la꞉ hiliyonomate ukui kapiyama꞉ eda꞉hate tatabalo nemedenala꞉, ba꞉ma ka꞉na awagaha komote la꞉tamo akapa꞉la꞉, ba꞉gala la꞉ hibima꞉ midipi malemalelo ba emalagidolena, ibino temeteme komoma꞉ la꞉eno tepo ipuwa akakodakoduilama꞉la꞉.
1PE 3:9 Ba꞉bene eta lumagiti ama꞉tamo kuba dododimini, ama꞉ ebeno kubama꞉ akahuiyala꞉, ba꞉gala ebete ama꞉tamo mela tabo da꞉goemene, ama꞉ ebeno mela tabo huiyaheno huiyatiya ebe mabuma꞉ Godoko na꞉kiyamiya꞉ ebete ebe hidamo kowalubinama꞉. Ba꞉ hibila, Godote ebeno malemale ama꞉ ipuwado hawakalimima꞉ ama꞉ ya꞉lo a꞉ka꞉miya꞉ta, mabu ba꞉be gabodo ebeno hido owalubi komote ama꞉tamo atumu ba꞉kapenakomene.
1PE 3:10 Ba꞉moe ba꞉be mabuma꞉ Godokono Bukalo tabote ba꞉ma ka꞉na itana, “Kebe lumagiti kalakalago emedema꞉ ubi dihatemene, ebete kubakuba tabo ba꞉gala ha꞉da amiho tabo akolamaginakala꞉.
1PE 3:11 Ba꞉gala wadiyala ebete kuba ododili ipuwane ohobigate hidohido komo nododilinakamene, iyo, ebete ebeno ubi konomamo nihatenakamene komopi hiliyonomago tatabalo kemedenama꞉.
1PE 3:12 Ba꞉ hibila, puya꞉te ba꞉ba ka꞉na tuputupupima꞉ deda꞉hana, Kodawa Godote ibi hidonomamo ba ulamena ibino toetoe tabo ulihonako, huiyatiya puya꞉te kuba komokomo dododilina, ebete iba꞉tamo alaholo komo bododinako.”
1PE 3:13 Ba꞉bema꞉ ama꞉le hidohido komo ododilima꞉ helonomoma꞉ deda꞉mena꞉, ba꞉ba tetelo eta lumagiti ubi a꞉kihata꞉mene ama꞉ kubahimima꞉.
1PE 3:14 Huiyatiya diyala, eta tetelo ama꞉ hido komo ba ododi komopa꞉te temeteme ama꞉tamo da꞉ ikametamena꞉, ba꞉bene ba꞉be temeteme ipuwalo iba꞉tamo akatoletola꞉la꞉ ba꞉gala aka-ukuibilibila꞉la꞉, huiyatiya ama꞉ koamo na꞉kalakaluya꞉!
1PE 3:15 Iyo, ama꞉ amia꞉no tepo ipuwalo Kelisoko kapiya tolemelo ebe hunamo ba adipate Kodawama꞉ na꞉ka꞉minakuya꞉, ba꞉gala wadiyala ama꞉ ba꞉ma ka꞉na na꞉hidonakuya꞉, keba tetelo Kelisoko iya꞉tawaha꞉ lumagiti amia꞉no hibima꞉ midi komoma꞉ ama꞉ da꞉kiyamemena꞉, ama꞉ ba꞉be komoeno ipuwa ebe hidamo ba꞉bo kiya꞉tumima꞉na꞉ta.
1PE 3:16 Ba꞉bene ama꞉ amia꞉no komo ebetamo da꞉hawakalimimina꞉, wadiyala ama꞉ ha꞉kiya ama꞉ hopamo ihatelo amia꞉no ukuia꞉mo ebe ba adipate tataba gabodo ebe nowalubiya꞉. Ba꞉ hibila, ama꞉le amia꞉no ododili ipuwalo Kelisokono tuputupudawama꞉ ba eda꞉na amia꞉no tepo ipuwoeno mulu ukui komamo da꞉papamiwatanakomena꞉, puya꞉te amia꞉no Kelisoko ta꞉mata mabuma꞉ ama꞉ iduduputimilo kuba tabo dolamagimina, galane iba꞉te amia꞉no hido emede komo ba emalagidolo hilopo ba꞉bo kolawema꞉na꞉.
1PE 3:17 Ba꞉bema꞉ hibima꞉ mididawa, ama꞉ numa꞉. Godote ubi dihatemene, ama꞉le eta hido ododi komo mabuma꞉ temeteme da꞉lawemena꞉, kubaha꞉, ba꞉ hido komola, mabu ba꞉bako temeteme ipuwalo Godokono kalakalate ama꞉tamo kitanama꞉ne, huiyatiya keba tetelo ama꞉ kuba ododi ipuwalo temeteme da꞉lawemena꞉ ebete ama꞉tamo a꞉kakalakalamene.
1PE 3:18 Ba꞉bema꞉ wadiyala la꞉ Kelisokono komo nemalagidolala꞉. Ebe ba꞉ tuputupudawanomola, huiyatiya ebete hopo habanapino kuba ododili hiliyonomo mabuma꞉ koko temeteme uwatete ba꞉bo hoiya꞉, ba꞉moe gabodo ebete a Godotamo a꞉magahiya꞉ ale ebeno hidohido mabulubima꞉ keda꞉hanama꞉. Numa꞉la꞉, tawakaluba꞉te Ya꞉suku danakapumiya꞉ ba꞉ba tetelo ebeno katene apeno ka꞉ka꞉te dito wibuya꞉, huiyatiya Godote hoe ipuwane ebe dadipatiya꞉ ebete wiboha꞉ ka꞉ka꞉ ape ba꞉bo kalawiya꞉, iyo, ebete emedena emedena tetelo gala a꞉kahoenamene.
1PE 3:19 Ba꞉gala ba꞉moe ba꞉ eta komola. Godote ebe ka꞉ka꞉mo adipateheno dopamo Ya꞉suti Saitanakono du genama guamo tote Godokono tabo ba꞉bo nolamagiya꞉.
1PE 3:20 Ba꞉bolo puya꞉te ebeno tabo dulihuya꞉, ibi ba꞉ hopo habalo Godotamo papamila꞉haha꞉ma꞉ deda꞉hanama꞉ ba꞉bi kuba ododilipino ha꞉laha gobogobola, iyo, Nowate konomo boge dododiya꞉ Godote hido tete iba꞉tamo ba꞉bo ikalamiya꞉, huiyatiya iba꞉te ebeno tabo kulihuya꞉ha꞉. Ba꞉be mabuma꞉ hulama beyate dodoluya꞉ ba꞉ba tetelo hopo habanapi ipuwalo kapiyakapiyate Nowakono boge guamo nogomuya꞉, iyo, a꞉iti tawakalubinomate beya ipuwane ibino ka꞉ka꞉ mula꞉ komo ba lawe komo hiliyonomate ba꞉ dito ha꞉lahuya꞉.
1PE 3:21 Ba꞉bema꞉ Nowako tetelo duluhukuya꞉ ba꞉be hulama beya ba꞉ go komola. Iyo, ka꞉lo hibima꞉ midipino beyamo wadulatele komo ba꞉ ibino ka꞉ka꞉ mula꞉ gabola, huiyatiya ba꞉be ododi ipuwalo beyate lumagino tepo ipuwa a꞉kukulama꞉mene, ao, beyate hunu tamoeno dalowa꞉ kapiya kukulama꞉ne. Ba꞉bema꞉ ka꞉ka꞉ mula꞉ komo keba ka꞉nala꞉ka꞉? Lumagiti beyamo aduti komo lawe tetelo ebeno tepo ipuwoeno mulu ukui komamo papamiwatalo Godotamo hibilo ba꞉ma ka꞉na da꞉goemene, ebete ebeno emede ipuwalo tuputupu komokomo kapiya kododilinama꞉, ba꞉be komodo ebete ka꞉ka꞉ mula꞉ komo kolawema꞉ne, mabu Ya꞉su Kelisote ebeno ka꞉ka꞉ ba꞉bako lumagitamo ikamema꞉ hoe ipuwane gala a꞉kamahiguya꞉.
1PE 3:22 Ba꞉ hibila, ba꞉be Ka꞉ka꞉dawoeno helo konomola. Ebete Hunu Habamo gala kanodolote ba꞉bolo Godokono tu hapuamo da꞉nemediya꞉, ba꞉ba tetene tupuimiti ba꞉ma teta꞉mo puluhuku hiliyonomo nopopa꞉te, Godokono nopopi ba꞉gala Saitanakono nopopi, helohelonomo nopopi ba꞉gala helohelodopo nopopi, ibi hiliyonomate Ya꞉sukunu ubi komamo ba꞉papamila꞉halenakomena꞉.
1PE 4:1 Ba꞉ hibila, Kelisote ba꞉moe hopolo ba emedena ebeno apa꞉mo koko temeteme iya꞉tawanakui, ba꞉bema꞉ wadiyala la꞉ la꞉eno temeteme ipuwalo ebeno hido owalubi ukui atumu kodakodalo na꞉lawiya꞉la꞉, alaholodawate ebeno ka꞉ka꞉ mula꞉ma꞉ gili kibili keba ka꞉na ka꞉lawenako ba꞉ba ka꞉na. Numa꞉la꞉, pote ebeno hibima꞉ midi mabuma꞉ ebeno apa꞉mo temeteme duwatenako, ba꞉be lumagiti pakala emede komoeno kuba ododili komamo gala a꞉kapapamiwatanakamene,
1PE 4:2 iyo, ebete ebeno hoe kuitita꞉mo ba nuluhuku Godokono ubi komamo ba꞉papamiwatanakomene, ebeno kateneno ubi komamoha꞉.
1PE 4:3 Ba꞉ hibila, hibima꞉ midiha꞉pa꞉te kebe kuba komokomo dododilinaka, la꞉ komo gogo hiliyonomolo ba꞉bi atu komo beka-ododilinakuimata. Iyo, dopamo la꞉ la꞉eno kateneno ubi komamo ba papamila꞉hale bohelemele pilo komo, ba꞉gala gamoda niho ipuwalo daedaema꞉ eda꞉ha komo, ba꞉gala hiya꞉hiya꞉ hilopo poko ipuwalo emedeho komo, ba꞉moi komate la꞉ ipuwalo kokonomoma꞉ eda꞉hanama꞉, ba꞉gala la꞉ Godokono eta ko tutumu tabo adikanalete ida꞉da꞉li badikulamenamimata. Huiyatiya kalakala konomola, la꞉ ba꞉bi kuba ododili komokomo a꞉miya꞉paliya꞉mata,
1PE 4:4 iyo, ba꞉ma tetelo la꞉le hibima꞉ midiha꞉pa꞉go ba꞉bako koko kuba ba꞉gala daedae ukui komokomo kododilinaha꞉, ba꞉bema꞉ iba꞉te la꞉ mabuma꞉ konomamo la꞉wa꞉hate la꞉ ba꞉bo iduduputilamenakata.
1PE 4:5 Ba꞉bema꞉ hibila, Godokono Ko Hegelalo iba꞉te ebeno holoholo hapulu da꞉nutitatamena꞉, ebete ibino hiya꞉hiya꞉ kuba ododili mabuma꞉ iba꞉tamo huiya ba ikalame ebe duhimima꞉ iba꞉te eta tabo ga꞉lama꞉ a꞉kamodobamena꞉. Iyo, ba꞉be Helodawate ya꞉lo hidote bemedena, ba꞉moe hopolo dopamo demedehonama꞉ ba꞉gala ka꞉lo tetelo demedehona ba꞉bi tawakalubi hiliyonomoeno ododili komokomo anagilamelelamete iba꞉tamo modobo huiya kikalamema꞉ne.
1PE 4:6 Numa꞉la꞉, ba꞉moe ba꞉be mabuma꞉ Ya꞉sukunu Hido Tabote ha꞉lahapa꞉tamo duluhukuya꞉. Iyo, ba꞉ba꞉te hopo habalo ba emedehona ibino apa꞉mo dododilinakui ba꞉bi kuba mabuma꞉ Godote iba꞉tamo hoe huiya ikalamete, ba꞉bene ebete ebeno ubi komo ba꞉ma ka꞉na ihatiya꞉, ba꞉bi ha꞉lahapino gobogobate Hido Tabo uliho ipuwalo uli ka꞉ka꞉ uwatete Godokono ubi komamo emedena emedena tetelo ba꞉papamila꞉hanakomena꞉.
1PE 4:7 Numa꞉la꞉, tete tatalila ba꞉moe hopoeno hiliyonomo komokomate kowibohoma꞉na꞉, ba꞉bema꞉ wadiyala la꞉ tepo kodakoduilamete ba꞉be komote pema꞉ uliholo nemedeniya꞉la꞉, mabu ba꞉moe gabodo la꞉ Godotamo toetoe tabo olamagimi ipuwalo helonomoma꞉ keda꞉hama꞉nemata.
1PE 4:8 Ba꞉bema꞉ la꞉eno hiliyonomo ododili komokomo ipuwalo ba꞉moe komo ba꞉ ko komonomola. Wadiyala la꞉eno emede ipuwalo etate eta malemalelo nemalagidolonala꞉, mabu keba tetelo la꞉ malemale ipuwalo demedenama, ba꞉ba tetelo etate etoeno kuba ododili komokomo koamo emalagidolemeheno tiyolo kegebolemema꞉nemata.
1PE 4:9 Ba꞉gala wadiyala la꞉ ubiha꞉ tabo ga꞉laheno komopa꞉te komopi baa꞉mo ba꞉gala laha haboeno komamo nowalubihuinakuya꞉la꞉.
1PE 4:10 Ba꞉gala ba꞉moe ba꞉ eta komola. Godote malemalelo hibima꞉ midipi hiliyonomatamo ebeno hiya꞉hiya꞉ helo ikalamiya꞉ iba꞉te ebeno oko kowatihonama꞉, ba꞉bema꞉ hibima꞉ mididawa, ebete ama꞉tamo kebe hiya꞉nomo helo dikamiya꞉la, wadiyala ama꞉ ba꞉be heloamo komo tawakalubi hidamo nowalubilinakuya꞉.
1PE 4:11 Ba꞉ma ka꞉na Godote kebe lumagitamo helo dikamiya꞉ ebeno tabo kolamaginama꞉, wadiyala ebete hibilo nolamaginakamene, ba꞉gala Godote potamo helo dikamiya꞉ komopino modoboha꞉ komokomo ipuwalo ibi kowalubilinama꞉, wadiyala ebete ba꞉be heloamo ba꞉bako tawakalubi hidonomamo nowalubilinakamene. Ba꞉moe ba꞉be gabodo la꞉ hibima꞉ midipino hiliyonomo ododili ipuwalo komopa꞉te Ya꞉su Kelisokono mahilo ba adipate Godoko ba꞉bo kawagaminama꞉na꞉. Ba꞉bema꞉ wadiyala konomo awagaha komo ba꞉gala konomo helo komote Kelisogodolo emedena emedena tetelo na꞉pola꞉namena꞉! Ba꞉moe tabo ba꞉ hibinomola, ba꞉ba꞉la!
1PE 4:12 Ba꞉bema꞉ naeno hidohido mabuluba꞉la꞉, la꞉ temeteme ipuwalo demedehonama akala꞉wa꞉hala꞉, mabu temeteme komate Godokono tawakaluba꞉tamo da꞉pikulinaka ba꞉be komo ba꞉ uli komoha꞉.
1PE 4:13 Iyo, la꞉eno temeteme ipuwalo wadiyala la꞉ na꞉kalakalahala꞉, mabu la꞉le kebako hiya꞉hiya꞉ temeteme duwatenakoma Kelisote dopamo ba꞉bako atu temeteme a꞉ka-uwatenakui. Ba꞉ hibila, galane ebete ebeno helonomo alago da꞉pehawakalamene, ba꞉ba tetelo la꞉ konomamo kokalakalahama꞉nemata.
1PE 4:14 Ba꞉bema꞉ komopa꞉te ba꞉ma tetelo la꞉eno Kelisoko ta꞉mata mabuma꞉ la꞉ diduduputilamemena꞉, la꞉ na꞉kalakalahuya꞉la꞉ mabu ibino iduduputilame komote ba꞉moe komo behawakalimina, Godokono a꞉la꞉mina Gobogobote la꞉ ipuwalo hido oko bowatina.
1PE 4:15 Ba꞉ hibila, eta lumagiti eta lumagi dito danakapumimini, ba꞉gala etate etoeno ilina pilolo da꞉lawemene, ba꞉gala etate gabomanino eta tutumu dadikanalemene, ba꞉gala etate ebeno pata꞉ ipuwalo komopa꞉tamo menemene dito dikalamemene, wadiyala ba꞉bako kuba ododi lumagiti huiya ba lawe temeteme niya꞉tawamene. Numa꞉la꞉, Godoko ubihinola la꞉ hibima꞉ midipi ipuwalo etate ba꞉bako kuba ododi komodo temeteme huiya lawe,
1PE 4:16 huiyatiya hibima꞉ mididawate Kelisoko ta꞉mata mabuma꞉ temeteme da꞉lawemene, ba꞉be komo ba꞉ hido komola, ebe akahilopala꞉. Iyo, lumagiti Kelisokono mahilo mabuma꞉ temeteme ipuwalo da꞉lutamene, wadiyala ebete kalakala Godotamo hunamo nadipata꞉mene!
1PE 4:17 Ba꞉ hibila, hopo habanapino komokomo anagilamelelame tete ba꞉ a꞉pe. Ba꞉ba tetelo Godote a hibima꞉ midipino ododili komo dopamo anagilamelea꞉mete atamo modobo huiya kikaa꞉mema꞉ne, ba꞉bene galane ebete ebeno Hido Tabo hibima꞉ midiha꞉pino kuba ododili komokomo ba anagilamelelame huiya konomo iba꞉tamo atumu ba꞉bo kakikalamema꞉ne. Ba꞉ba tetelo ibino temeteme bada konomola꞉ka꞉!
1PE 4:18 Ba꞉moe mabuma꞉ Godokono Bukalo tabote ba꞉ma ka꞉na itana, “Tuputupudawate ebeno ka꞉ka꞉ mula꞉ komo lawema꞉ kodakodadopola, ba꞉bema꞉ puya꞉te Godotamo papamila꞉ha ubiha꞉ma꞉ deda꞉hana, ba꞉gala puya꞉te kuba komokomo dododilina, iba꞉te ka꞉ka꞉ mula꞉ komo keba ka꞉na na꞉ka꞉lawemena꞉? Gabote a꞉kitanamene, puliyanomola!”
1PE 4:19 Ba꞉bema꞉ la꞉ puya꞉te Godokono ubilo temeteme ipuwalo demedehonama, wadiyala la꞉ tuputupu komokomo ba ododili la꞉ ha꞉kiya la꞉eno ka꞉ka꞉ Godotamo hibilo nikamehonakuya꞉la꞉. Ebe ba꞉ la꞉ hidonomamo dododiliya꞉la ba꞉be Helodawala, ba꞉gala ebete la꞉ kowalubilima꞉ kebe komo ododima꞉ dopamo da꞉goiya꞉, galane ebete ba꞉be komo hibinomolo kododima꞉ne.
1PE 5:1 Ba꞉bema꞉ na Pitate, la꞉ puya꞉te la꞉eno hibima꞉ midipino kapiyuimi ipuwalo watowatopima꞉ deda꞉hanama, na ubila la꞉ eta tabo kokiyalamema꞉, mabu na ba꞉ atumu sose watodawa etala. Ba꞉ hibila, Kelisote temeteme duwatiya꞉ nale naeno baida꞉mo umiya꞉mo, ba꞉gala ebete helonomo alago da꞉pehawakalamene ba꞉ba tetelo nale ebeno alo ipuwalo eba꞉go kolutama꞉nemo. Ba꞉bema꞉ nale la꞉ sose watowatopi ba꞉ma ka꞉na tutumulatelemata,
1PE 5:2 wadiyala la꞉ la꞉eno tepo ipuwalo ubiha꞉ tabo ga꞉laheno, Godote la꞉tamo dikalamiya꞉la la꞉ la꞉eno ubi konomamo ba꞉bi sipi-goegoe hidamo nulameniya꞉la꞉. Ba꞉gala la꞉eno oko owati ipuwalo oko huiya lawema꞉ koamo emalagidoloheno, huiyatiya la꞉le Godokono kalakalago komo tawakalubi hiliyonomo dito nowalubilinakuya꞉la꞉
1PE 5:3 Ba꞉gala watowatopa꞉la꞉, Godote la꞉tamo dikalamiya꞉la la꞉ ba꞉bi sipi-goegoe kubamo kiyahalamelo wato kokoma꞉ akeda꞉hala꞉. Wadiyala la꞉le huiyatiya la꞉eno tataba emede komodo iba꞉tamo hido go ba hawakalimina ibi ba꞉ba ka꞉na na꞉magahelenakuya꞉la꞉.
1PE 5:4 Ba꞉bema꞉ la꞉ ba꞉ba ka꞉na ba ewagelena, la꞉ sipi-goegoe ulamepino Kodawate da꞉puluhukumini, ba꞉ba tetelo koko gawadubate ibino watamo da꞉pupulinaka la꞉ ba꞉bako hidohido a꞉la꞉minale pake ilina ebegodone kuwatema꞉nemata. Kalakala konomola, ba꞉bi pake ilinoeno a꞉la꞉mina komote emedena tetelo a꞉kawibonamene.
1PE 5:5 Ba꞉bema꞉ la꞉ komo hibima꞉ midipa꞉la꞉, nale atu gabodo la꞉ komo hiya꞉hiya꞉ tabo kokiyahalamema꞉nemata. La꞉ uli apepeho dubala꞉, wadiyala la꞉ la꞉eno watowatopa꞉tamo na꞉papamila꞉hanala꞉, ba꞉gala la꞉ hibima꞉ midipi hiliyonomala꞉, la꞉ ha꞉kiya la꞉ hopamo ba miya꞉te etapa꞉te etapa꞉tamo huiyaha꞉ okopima꞉ neda꞉hanala꞉, mabu Godokono Bukalo tabote ba꞉ma ka꞉na itana, “Puya꞉te dawagahana Godote iba꞉go nalaholohona, huiyatiya puya꞉te ibi ha꞉kiya ibi hopamo da꞉miya꞉tena, ebete iba꞉tamo ebeno ko malemale behawakaliminako.”
1PE 5:6 Ba꞉be mabuma꞉ la꞉ ha꞉kiya la꞉ hegehegema꞉ ba midili Godotamo da꞉papamila꞉halema, Godote ebeno hido tetelo la꞉ hunamo ba wadiya꞉paa꞉latele kokopima꞉ komidilima꞉na꞉ta.
1PE 5:7 Ba꞉bema꞉ wadiyala la꞉ la꞉eno ukui bilibili komo hiliyonomo ebetamo miya꞉palenomo na꞉miya꞉pala꞉la꞉, mabu ebete la꞉ malemalelo konomamo emalagidolenata.
1PE 5:8 La꞉ hidamo! La꞉ uliholo nemedehonala꞉, mabu la꞉go alaholohodawa ebe ba꞉ Saitanatela, ebe konomo layono-gaha huiyala, iyo, ebete tawakaluba꞉tamo tole konomo ba ikalame ugahalo ibi nalema꞉ oholena.
1PE 5:9 Ba꞉bema꞉ wadiyala la꞉ la꞉eno hibima꞉ midi ipuwalo kodakodalo ba la꞉mota꞉hana ebetamo alaholoho komo nododinakuya꞉la꞉, mabu la꞉ iya꞉tawahala eba꞉go alaholo ipuwalo la꞉ kapiyate kemedenaha꞉, iyo, ba꞉moe hopo konomolo la꞉eno komo hibima꞉ midipi ekaka꞉te ba꞉ atu temeteme ipuwalo ka-emedehona.
1PE 5:10 Huiyatiya kalakala konomola, la꞉ tete nanekelelo temeteme ipuwalo emeda꞉tepate, galane Godote ha꞉kiya la꞉eno temeteme ipuwane la꞉ uluhukulatelete hibilo koheluilamema꞉na꞉ta, la꞉le la꞉eno tepo ipuwalo ukui gagagagama꞉ eda꞉hakapoma꞉. Ba꞉ hibila, ba꞉be Konomo Malemaledawate dopamo tetelo la꞉ Kelisoko ipuwado a꞉ka꞉lamiya꞉ta la꞉le ebeno helonomo alago emedena tetelo kemedehonama꞉,
1PE 5:11 ba꞉bema꞉ wadiyala konomo helo komote ebegodolo emedena tetelo nitanamene! Ba꞉moe tabo ba꞉ hibinomola, ba꞉ba꞉la!
1PE 5:12 Numa꞉la꞉, ba꞉moe deha꞉poto leta Sailasiti na mabuma꞉ pepamo miya꞉teho, naeno umi ipuwalo ebe ba꞉ eta hido hibima꞉ mididawa ekawila. Ba꞉bema꞉ naeno leta kuititi hapulu la꞉ ba꞉ma ka꞉na kiyalamemata, nale la꞉ la꞉eno hibima꞉ midi ipuwalo kowalubilima꞉ ba꞉moi tabo komokomo bemiya꞉tehomo, iyo, ba꞉bi komate Godokono hibi malemale behawakalimita, ba꞉bema꞉ wadiyala la꞉ ba꞉be malemale ipuwalo kodakodalo na꞉la꞉mota꞉hanala꞉.
1PE 5:13 Numa꞉la꞉, nago da꞉kapiyuiminaka ba꞉bi Ba꞉baloni sose hibima꞉ midipino kapiyuimi ba꞉gala la꞉eno hiya꞉hiya꞉ sose kapiyuimi, la꞉eno hiya꞉hiya꞉ kapiyuimi ba꞉ kapiya badininipala bohelemele huiyala, iyo, Godote ebeno ubilo la꞉ keba ka꞉na kuwatitiya꞉la, ebete ba꞉ ba꞉ba ka꞉na ibi atumu a꞉kuwatiya꞉. Ba꞉be mabuma꞉ iba꞉te ibino nolata tabo bepoema꞉ la꞉tamo, ba꞉gala naeno gudu Makate atumu nolata tabo bekapoeme.
1PE 5:14 Wadiyala la꞉ da꞉kapiyuimima, la꞉ hiliyonomo etapa꞉te etapa꞉tamo la꞉eno malemale kohawakalimima꞉ kokoto uwatehuilo na꞉pa꞉watamehuiya꞉la꞉. Ba꞉bema꞉ la꞉ puya꞉te Kelisoko ipuwalo demedehonama, ebeno kalakalate la꞉ hiliyonomagodolo nitanamene. Ba꞉moe ba꞉ naeno tabo kuititila. Ba꞉ba꞉la.
2PE 1:1 Na ba꞉ Saimono Pitatela, Ya꞉su Kelisokono okodawala, iyo, ebete ebeno sose tupuimima꞉ hiya꞉hiya꞉ hopamo doelamiya꞉, ba꞉bi okopi ipuwalo na ba꞉ etala. Ba꞉ hibila, Ya꞉su Kelisoko ba꞉ aeno Ka꞉ka꞉ Mula꞉lea꞉medawala, ebe ba꞉ Godotela. Ba꞉gala ebete ebeno tuputupu ododili gabodo puya꞉tamo hibima꞉ midi komo dikalamiya꞉, la꞉ ba꞉ ba꞉bi tawakalubilata, ba꞉bema꞉ nale ba꞉moe leta la꞉tamo poememo, mabu la꞉eno hibima꞉ midi komo ba꞉gala aeno hibima꞉ midi komo ba꞉ kapiyanomola.
2PE 1:2 Wadiyala la꞉ Godokono komo ba꞉gala aeno Kodawa Ya꞉sukunu komo ba iya꞉tawaha, ibino malemale komo ba꞉gala ibino hete komote la꞉godolo konomamo na꞉pola꞉namena꞉.
2PE 1:3 Ba꞉ hibila, dopamo tetelo Ya꞉suti a a꞉ka꞉miya꞉ ale ebeno helonomo alago ba꞉gala ebeno tuputupu ododili komago kemedehonama꞉. Ebegodolo Godokono helote bitana ba꞉bema꞉ ebete atamo hiliyonomo hidohido komo ikaa꞉miya꞉, ale ebeno komo ba iya꞉tawaha Godokono ubi komamo hibilo kopapamila꞉hanama꞉.
2PE 1:4 Iyo, ebete dopamo a kowalubima꞉ kebe tabo hibilo da꞉goiya꞉, ba꞉be taboeno hibi komote ba꞉ma ka꞉na uluhukuya꞉, ebete atamo kokonomo komo ba꞉gala hidohidonomo komo dito ikaa꞉miya꞉, mabu ebe ubila ale hopo tawakalubino kateneno kuba ododili ipuwane ikuliti aeno emede ipuwalo ale Godokomo kemedehonama꞉.
2PE 1:5 Ba꞉be mabuma꞉ la꞉le la꞉eno hibima꞉ midi ipuwalo apepeho wakolado kalehawaminama꞉, wadiyala la꞉ la꞉eno ukui konomamo nihatenala꞉. Iyo, la꞉ ba꞉ ba꞉ma ka꞉na Godoko hibima꞉ ba midina, ebeno tuputupu emede komo na꞉lawiya꞉la꞉. Ba꞉bene la꞉ tuputupulu ba emedehona, Godokono hibi iya꞉tawa komo na꞉lawiya꞉la꞉.
2PE 1:6 Ba꞉bene la꞉ Godokono komo hibilo ba iya꞉tawahana, Godokono helo lawema꞉ tepo kodakoda komo na꞉lawiya꞉la꞉. Ba꞉bene la꞉ tepo kodakodalo ba la꞉mota꞉hana, koko temeteme ipuwalo heloha꞉ma꞉ eda꞉haheno kalakala na꞉lawiya꞉la꞉. Ba꞉bene la꞉ temeteme ipuwalo heloha꞉ma꞉ eda꞉haheno ba la꞉mota꞉hana, Godotamo hibilo papamiwata komo na꞉lawiya꞉la꞉.
2PE 1:7 Ba꞉bene Godotamo hibilo ba papamila꞉hana, la꞉ komo hibima꞉ midipa꞉tamo malemale hawakalimi komo na꞉lawiya꞉la꞉. Ba꞉bene la꞉ hibima꞉ midipa꞉tamo malemale ba hawakalimina, wadiyala Godokono malemale emalagidolo komote hopo habanapi hiliyonomatamo la꞉ ipuwalo konomoma꞉ neda꞉mene.
2PE 1:8 Ba꞉ hibila, ba꞉moi apepeho wakoloeno komo hiliyonomate la꞉godolo konomamo da꞉pola꞉namena꞉, ba꞉ba tetelo la꞉ aeno Kodawa Ya꞉su Kelisokono hibi komo ba iya꞉tawaha ebeno hidohido gao noloho oko bowatihonamata.
2PE 1:9 Huiyatiya numa꞉la꞉, kebe hibima꞉ midi lumagigodolo ba꞉bi komokomate pola꞉naheno, ebe ba꞉ baidi tamihodawala, iyo, ebeno emede komote ba꞉moe komo behawakalimina, Ya꞉suti ebe ebeno kuba ododili ipuwane uluhukutiti ebeno tepo ipuwa dukulamiya꞉, ebete ba꞉be hido komo ya꞉lo adodui.
2PE 1:10 Ba꞉bema꞉ naeno ekaka꞉la꞉, Godote la꞉ dopamo da꞉ka꞉lamiholiya꞉ ba꞉be komo hibilo kohawakalimima꞉, wadiyala la꞉ la꞉eno hibima꞉ midi ipuwalo helohelonomoma꞉ neda꞉huya꞉la꞉, mabu hibila, la꞉ ba꞉ba ka꞉na dewagelema la꞉ nato ukamidahalete a꞉kaguda꞉mata.
2PE 1:11 Iyo, ba꞉moe ba꞉be gabodo Godote la꞉tamo gigiho ka꞉hiya꞉midalamema꞉na꞉ta, la꞉le aeno Ka꞉ka꞉ Mula꞉lea꞉medawoeno kalakala emede habamo kona꞉pa꞉la꞉hama꞉, ba꞉be Kodawa ba꞉ Ya꞉su Kelisotela ba꞉gala ebeno Ko Gawadubuma꞉ eda꞉ komote emedena emedena tetelo bitanamene.
2PE 1:12 Ba꞉ hibila, la꞉ ba꞉moi komokomo ya꞉lo iya꞉tawahuya꞉mata, ba꞉bema꞉ Godote la꞉tamo dikalamiya꞉la la꞉ ba꞉be hibima꞉ midi ipuwalo heloma꞉ eda꞉hanamata. Huiyatiya numa꞉la꞉, naeno kalakala bitana komo hiya꞉hiya꞉ tetelo ba꞉moi atu komo la꞉ gala kakakiyalamenakoma꞉,
2PE 1:13 ba꞉bema꞉ na hoeheno dopamo la꞉ ba꞉moi komo gala da꞉kakiyalamema, ba꞉be komo ba꞉ hido komola.
2PE 1:14 Iyo, na iya꞉tawala tete tatalila na ba꞉ kohoema꞉nemo, mabu aeno Kodawa Ya꞉su Kelisote ba꞉moe komo na ya꞉lo iya꞉tunami.
2PE 1:15 Ba꞉moe ba꞉be mabuma꞉ ba꞉moe leta ipuwalo nale ba꞉moi komokomo la꞉ gala ba꞉bema꞉ kakiyalamemata, naeno hoe gala hapuni la꞉le ba꞉moi komo hidamo kemalagidolenama꞉.
2PE 1:16 Numa꞉la꞉, a Kodawa Ya꞉su Kelisokono oelamepa꞉te ebeno helo komo ba꞉gala hawakala komo la꞉tamo da꞉pehawakalimiya꞉ma꞉, ba꞉ba tetelo ale la꞉ ha꞉da kamiholamiya꞉ha꞉. Ba꞉gala komo hiya꞉hiya꞉ tawakalubino iniwala꞉te ibi ha꞉kiya ibino kapiyuimi mabuma꞉ eyoni guguda꞉tamo kebako uwi ka꞉kiyahanakui, ale ba꞉bako tawakalubino uwi komokomo la꞉ kakiyahalamiya꞉ha꞉. Ba꞉ hibila, ale Ya꞉sukunu Ko Gawadubu helo aeno baida꞉mo dumiya꞉ma꞉, ba꞉be komo la꞉ a꞉kiyalamiya꞉ta,
2PE 1:17 mabu Nabiwi Godote Ya꞉suku ba milimiho ebe dawagaminutiya꞉, ba꞉ba tetelo komo a ebeno oelamepa꞉te ba꞉bolo na꞉pola꞉nuya꞉ma꞉. Ba꞉bene ale aeno galamo Ko Alonomodawoeno tabo madodo ba꞉ma ka꞉na uliya꞉ma꞉, “Ba꞉moe ba꞉ naeno kapiya Gudunomola. Na ebetamo na꞉kalakalutamo!”
2PE 1:18 Iyo, a Ya꞉sukuba꞉ talona hununomo hakalo da꞉pola꞉nuya꞉ma꞉, ba꞉ba tetelo Godokono tabo madodote ebeno Hunu Habane atamo ba꞉ba ka꞉na puluhukuya꞉.
2PE 1:19 Ba꞉bema꞉ Godokono ukui hawakalimipa꞉te Ya꞉suku mabuma꞉ Bukamo ya꞉lo tetelo da꞉miya꞉tiya꞉, ale ba꞉bi komokomo hibima꞉ na꞉midilinama꞉. Numa꞉la꞉, ibino tabo komokomo ba꞉ alo deha꞉potote konomo du ipuwalo keba ka꞉na ka꞉la꞉minana ba꞉ba ka꞉nala, ba꞉bene tete tatalila Huli Olokiti ha꞉kiya kuluhukuma꞉ne, iyo, ba꞉ba tetelo hido hegelate ba powaloho duino hilibubuti dito kowiboma꞉ne. Ba꞉bema꞉ hibila, ba꞉be alote la꞉eno tepo ipuwalo hidamo ka꞉la꞉minalema꞉, wadiyala la꞉ Godokono okopa꞉te dopamo da꞉hawakalimiya꞉ ba꞉be tabo hibima꞉ miditi hidonomamo na꞉lawiya꞉la꞉.
2PE 1:20 Ba꞉gala ba꞉moe ko komo hidamo niya꞉tawahala꞉. Godokono ukui hawakalimipa꞉te ebeno Bukamo dopamo kebe tabo komokomo ka꞉miya꞉tiya꞉, lumagiti ha꞉kiya ebeno mulu ukuia꞉mo ba꞉bi taboeno ipuwa uwate modoboha꞉,
2PE 1:21 mabu Godokono ukui hawakalimipa꞉te ibi ha꞉kiya ibino ubilo ibino ukui tabo Bukamo kamiya꞉tenakuiha꞉. Ao, Godokono Gobogobote ibi keba ka꞉na kiya꞉tulamenakui, iba꞉te ebeno tabonomo Bukamo miya꞉telo ba꞉ ba꞉ba ka꞉na olamagiminakuya꞉.
2PE 2:1 Ba꞉bema꞉ numa꞉la꞉, la꞉eno iniwalino tetelo Godokono hibi tabo olamagimipa꞉te oko ba owatina, atu tetelo Godokono mahilamo ha꞉da tabo olamagimipa꞉te a꞉mahila꞉halenakuya꞉, ba꞉bema꞉ ba꞉ma tetelo komo ba꞉bakobako dubate la꞉ ipuwalo gala kakikulima꞉na꞉. Ba꞉ba꞉te la꞉eno ka꞉ka꞉ mula꞉ komo kokubahilamema꞉ ibino ha꞉da tabo komokomo kolamagimima꞉na꞉, ba꞉bene kebe dawate ibino kuba ododili komoeno helo ipuwane ibi ebeno hawa꞉mo malemalelo duluhukulateliya꞉, iba꞉te ebe ubiha꞉ma꞉ ba eda꞉ha ba꞉bo koga꞉lama꞉na꞉ ebe ibino Namutudawaha꞉. Ba꞉ hibila, ba꞉moe gabodo ibi ha꞉kiya ibi kokubahilamema꞉na꞉, iyo, iba꞉te iya꞉tawaha꞉ tetelo olalatiti ibi dito kopuwatema꞉ne.
2PE 2:2 Huiyatiya olalatiti iba꞉tamo peheno, dopamo komo sose tawakalubi hiliyonomate kateneno ubi gabodo ibi ba ta꞉matale Godokono hibi gabo komiya꞉pama꞉na꞉, iyo, ba꞉ba tetelo hibima꞉ midiha꞉pa꞉te ibino kuba ododili komokomo ba ulamelelame Godokono hibi gabo kuba gaboma꞉ ba꞉bo koga꞉lama꞉na꞉.
2PE 2:3 Ba꞉gala eta komo. Ba꞉bi ha꞉da tabo olamagimipa꞉te ubi konomamo ihatena la꞉eno mani ha꞉da gabodo uwatema꞉, ba꞉bema꞉ ibi ha꞉kiya ibino ukui komamo komo hiya꞉hiya꞉ uwi la꞉ ba꞉bo kokiyahalamema꞉na꞉ta. Huiyatiya numa꞉la꞉, dopamo tetelo Godote ibino kuba huiya ikalamema꞉ hibilo a꞉goiya꞉, ba꞉bema꞉ ba꞉be kuba huiyate ba꞉ na꞉pe, iyo, ibi Anakapulamedawate ya꞉lo a꞉hiduya꞉, ebete hido tete belatimina.
2PE 2:4 Ba꞉ hibila, Hunu Haboeno komo nopopa꞉te Godokono tutumu dadikanaliya꞉, ba꞉ba tetelo ebete ibi Saitanakono konomo du bobamo dito iya꞉hekiya꞉, iba꞉te du ipuwalo auli hala꞉mo matuhulamehola꞉go ba emedehona ibino kuba huiya uwate hegela kolatiminama꞉.
2PE 2:5 Ba꞉gala Nowate hopo habanapa꞉tamo Godokono tuputupu emede komo dolamagiya꞉, iba꞉te Godokono ubi komamo kapapamila꞉huya꞉ha꞉. Ba꞉be mabuma꞉ Godote iba꞉tamo kuba huiya atumu ka-ikalamiya꞉, iyo, ebete hulama beya ba꞉moe hopamo da꞉poemiya꞉, ba꞉ba tetelo ibi hiliyonomate a꞉ha꞉lahuya꞉, huiyatiya Nowate komo sa꞉ba꞉ni tawakaluba꞉go ibi kapiyate ka꞉ka꞉ mula꞉ komo ba꞉bo lawiya꞉.
2PE 2:6 Ba꞉gala Sodomo Gomola koko habalo demedehonama꞉, Godote ba꞉bi tawakaluba꞉tamo kuba huiya ba ikalame koe powagoeno da꞉poemiya꞉, ibi hiliyonomo koete ba꞉ dito pehawaminadigaliya꞉. Ba꞉bema꞉ numa꞉la꞉, ibino olalati komo ba꞉ gola, Godokono ubi komamo papamila꞉haleha꞉pa꞉tamo kuba huiyate keba ka꞉na duluhukumini.
2PE 2:7 Ba꞉ba tetelo Godote Sodomo habanapino kuba ododili mabuma꞉ ibi hiliyonomo ba anakapulame tuputupu dubu Lotokono ka꞉ka꞉ kapiya bemula꞉miya꞉, mabu ba꞉be dubuti ibi ipuwalo ba emedena ibino kateneno kuba ubi komokomoma꞉ tepo menemene da꞉lawenakui ibino kuba ododili ipuwamo kopeganakuiha꞉. Iyo, ebete iba꞉godolo hiya꞉hiya꞉ kuba ododili komo dulamenakui ba꞉gala ibino kuba tabo ga꞉la komo dulihonakui, ba꞉bema꞉ ebete ebeno tepo ipuwalo ko temetemenomo biya꞉tawanakui.
2PE 2:9 Ba꞉bema꞉ hibila, Godoko iya꞉tawala puya꞉te ebeno ubi komamo da꞉papamila꞉hana ba꞉bi tawakalubino temeteme ipuwalo ibino ka꞉ka꞉ komula꞉lelamema꞉. Ba꞉gala ebe iya꞉tawala ebete kuba ododilipi ibino olalati komamo matuhulameholete ibi Kuititi Hegela teta꞉mo komagatalema꞉ne iba꞉te kuba huiya ba꞉bo konuwatema꞉.
2PE 2:10 Iyo, puya꞉te ibino hiya꞉hiya꞉ kateneno dalowa꞉ ubi ipuwalo ba wapata꞉lamena Godotamo papamila꞉hale ubiha꞉ma꞉ deda꞉hana, Godote ba꞉bako tawakaluba꞉tamo kuba huiya konomamo hibinomolo kikalamema꞉ne. Numa꞉la꞉, ba꞉bi kuba ododilipi ba꞉ Godokono mahilamo ha꞉da tabo olamagimipila. Ba꞉bema꞉ ibino emede komo ba꞉ma ka꞉nala, ibi ha꞉kiya ibi hunamo wadiya꞉paa꞉latelelo Hunu Haboeno nopopi katolelamenaha꞉, iyo, iba꞉te ibi biduduputilamenaka.
2PE 2:11 Huiyatiya Godokono nopopino komo hiya꞉la, iba꞉te ebe tolemelo ebeno holoholo hapulu ba꞉bako kuba ukuia꞉gopi iduduputilameheno ibi kubapima꞉ akaga꞉lala꞉, mabu ibi iya꞉tawahala komopino komo anagilamelelame oko ba꞉ Godokono okola, ibino okoha꞉. Ba꞉ hibila, ba꞉bi nopopino helo konomote hopo tawakalubino helo na꞉gogolona, huiyatiya iba꞉te ba꞉be komo ba iya꞉tawaha ibi ha꞉kiya ibi kawagaminalenaha꞉.
2PE 2:12 A꞉iye, ba꞉ma tetelo da꞉mahila꞉halena ba꞉bi ha꞉da tabo olamagimipino komo eba ka꞉naha꞉! Iba꞉te Godokono hibi komo iya꞉tawahaheno, ebeno hidohido komoma꞉ kuba tabo ba꞉bema꞉ ga꞉lanaka. Iyo, ibi ba꞉ tumu goegoe keba ka꞉nala꞉ka꞉ ukuihino ba꞉ba ka꞉na emedehona, ba꞉bema꞉ pomolo dubate ba꞉bako goegoe gubi ipuwalo uwateholete keba ka꞉na kanakapulamenaka, ibino kuititi tete ba꞉ ba꞉ba ka꞉na kuluhukuma꞉ne.
2PE 2:13 Mabu iba꞉te temeteme komopa꞉tamo dito dikalamenaka, ba꞉bema꞉ Godote ibino kuba huiyama꞉ temeteme iba꞉tamo kikalamema꞉ne. A꞉iye! Iba꞉te na꞉kalakalahana kateneno kuba ubi komokomo hegela tetelo hilopoheno kododilinama꞉, ba꞉bema꞉ la꞉ hibima꞉ midipino kapiyuimi poko baa꞉ naha ipuwalo iba꞉te la꞉go da꞉pola꞉namena꞉, ibi ba꞉ hido baa꞉ ipuwalo da꞉pola꞉na ba꞉bi kuba nene huiyala, iyo, ibino ododili komamo la꞉ ha꞉da kamiholamema꞉ iba꞉te konomo kalakala belawenaka.
2PE 2:14 Ba꞉bema꞉ numa꞉la꞉, keba tetelo iba꞉te kamenakamena ba꞉gala bohelemele dulamenaka, kuba ododi ukui kapiyate iba꞉tamo ba꞉bo penako, iyo, iba꞉te kateneno kuba ododilima꞉ iya꞉wa kokonomola. Ba꞉bene puya꞉te hibima꞉ midi ipuwalo heloha꞉ma꞉ deda꞉hana, iba꞉te ba꞉bi gugudi Saitanakono kuba emogabuimi komamo magatalenaka, ba꞉gala ibi ipuwalo ibi ha꞉kiya ibi iya꞉tulamiya꞉ ibino tepo ipuwoeno ukuiti mani emalagidole komamo kopapamila꞉halenama꞉. Ba꞉be mabuma꞉ ibi Saitanakono gugudila, iyo, Godote iba꞉tamo kuba huiya hibilo kikalamema꞉ne!
2PE 2:15 Iyo, hibila, iba꞉te hido tuputupu gabo miya꞉pate, Biyokono gudu Ba꞉ilamako ebeno kuba ododili gabodo ebe ba꞉bana ta꞉matana. Ba꞉be dubuino komo ba꞉ma ka꞉nala, ebete mani kokonomo uwatema꞉ ebeno ubi dihatiya꞉, ba꞉bema꞉ ebete kuba ododi gabodo to ba꞉bo tupuimiya꞉.
2PE 2:16 Huiyatiya Godote ebeno daedae ukui koduhimima꞉ ebeno donoki-goe ipuwane lumagino tabo madodamo ebe koamo kiyahamiya꞉, ba꞉be ha꞉da tabo olamagidawate Isalaela tawakaluba꞉tamo eta kuba ododikapoma꞉.
2PE 2:17 Ba꞉bema꞉ numa꞉la꞉, ba꞉moi ha꞉da tabo olamagimipi dubu ba꞉ beya ma꞉pete gagalema꞉ deda꞉ ba꞉ba ka꞉nala, mabu hopo tawakaluba꞉te iba꞉godolo hido owalubi a꞉kuma꞉mena꞉. Ba꞉gala hopote gagalema꞉ deda꞉, ba꞉ba tetelo konomo huhuti da꞉watanako ba꞉bi bubuti dito kopokoa꞉tahalema꞉na꞉ huiyatiya wegolate a꞉koamene, ba꞉bi dubu ba꞉ ba꞉ba ka꞉nala mabu iba꞉te tawakaluba꞉tamo giba a꞉kikalama꞉la꞉. Ba꞉bema꞉ Godote ibi mabuma꞉ kebe du bobo konomo ya꞉lo dododilamiya꞉, ebete ibi ba꞉bamo konoelamema꞉ne iba꞉te ba꞉bolo temetema꞉go konemedehonama꞉.
2PE 2:18 A꞉iye! Iba꞉te hiya꞉hiya꞉ awagaha tabo komokomo ba꞉gala daedae ukui komokomo bega꞉lanaka, ba꞉gala puya꞉te Godotamo ohobila꞉ma꞉ kuba ododili ipuwane ka꞉ma꞉nomo da꞉pikula꞉, iba꞉te ba꞉bi tawakalubi ibino kateneno ubi komamo gala kuwatete Saitanakono kuba gabamo ba꞉bo magatalenaka.
2PE 2:19 Iba꞉te iba꞉tamo tutulu emede komo ikalamema꞉ ibi a꞉kiyalamenaka, huiyatiya ibi Godokono hibi tutu ipuwalo kemedehonaha꞉, mabu iba꞉te ibino kateneno ubi komoeno huiyaha꞉ okopima꞉ eda꞉hana. Iyo, hibila, lumagiti kebe kuba ododi komamo da꞉papamiwatana, ebete ba꞉be komoeno okodawama꞉ eda꞉na, ebegodolo tutulu emede komo puliyanomola.
2PE 2:20 Ba꞉bema꞉ hibima꞉ midipa꞉la꞉, la꞉ hidamo! Kebe tawakaluba꞉te aeno Kodawa ba꞉gala Ka꞉ka꞉ Mula꞉lea꞉medawa Ya꞉su Kelisokono hibi komo ba iya꞉tawaha ba꞉moe hopoeno kuba ubi komone da꞉pikuliya꞉, ba꞉bene kuba ubi komate ibi gala kamatuhulameholete, iba꞉te ba꞉bi kuba ododili komamo gala da꞉kapapamila꞉halemena꞉, ibi niliya! Dopamo tetelo iba꞉te nanekela꞉mo kubadopoma꞉ eda꞉hanama꞉, huiyatiya galane ibino ka꞉ka꞉ kuititi tetelo iba꞉te kubanomoma꞉ keda꞉hama꞉na꞉.
2PE 2:21 Ba꞉bema꞉ numa꞉la꞉, ba꞉bako tawakaluba꞉te Godokono tuputupu gabo iya꞉tawaha꞉ma꞉ neda꞉honatale, iba꞉te kuba huiya nanekela꞉mo buwatena꞉. Huiyatiya iba꞉te Godokono gabo ba iya꞉tawaha, ebete ibi ebeno talona ipuwalo kemedenama꞉ dikalamiya꞉, iba꞉te ba꞉be tutumu gunima꞉mo dito ihilateliya꞉, ba꞉be mabuma꞉ ibino olalati komote konomoma꞉ keda꞉ma꞉ne!
2PE 2:22 Ba꞉ hibila, Godokono mulu ukui tabote ibino komo ba꞉ma ka꞉na hawakalimina, “Gahate kebe kuba ilina da꞉dalohomene, ebete ba꞉be atu ilina gala dito kakanalema꞉ne,” ba꞉gala eta mulu ukui tabote ba꞉ma ka꞉na goena, “Lumagiti ebeno dabi goe hidamo dukulamene, ba꞉be goete bula꞉i ipuwamo kanopegate ba꞉bo konilulugutihoma꞉ne.”
2PE 3:1 Naeno hidohido mabuluba꞉la꞉, ba꞉moe ba꞉ netewa tetema꞉ eda꞉ nale la꞉tamo leta oelame, iyo, ba꞉moi netewa leta ipuwalo la꞉le Godokono tuputupu komokomo hidamo kemalagidolenama꞉, nale la꞉ ba꞉bema꞉ iya꞉tulamemata.
2PE 3:2 Numa꞉la꞉, Godokono ukui hawakalimipa꞉te kebe komate ibino gala hapuni pikulihoma꞉ dopamo dolamagiminakui, na ubila la꞉le ba꞉bi talona okopino bukoeno tabo komokomo gala hidamo na꞉kemalagidola꞉la꞉. Ba꞉gala aeno Ka꞉ka꞉ Mula꞉lea꞉medawa, ebe ba꞉ aeno Kodawala, ebeno oelamepa꞉te kebe tutumu tabo ebegodone uwatete la꞉tamo dikalamiya꞉la, wadiyala la꞉le ba꞉bi komoma꞉ atumu ukui gala na꞉kamiya꞉ta꞉la꞉.
2PE 3:3 Ba꞉bema꞉ ba꞉moe ko komo hidamo niya꞉tawahala꞉. Ba꞉moe hopoeno kuititi tete ba tatali, komo hibima꞉ midiha꞉pa꞉te pikuliti ibino kateneno kuba ubi komamo ba꞉bo kopapamila꞉halema꞉na꞉. Ba꞉bene iba꞉te la꞉ walilatelelo
2PE 3:4 ba꞉ma ka꞉na koga꞉lama꞉na꞉, “Hibila꞉ka꞉, Ya꞉suti gala pema꞉ a꞉ka꞉goiya꞉? Ale ebe kuminaha꞉, kebolo kemedena? Ba꞉moe hopo tupuimi mabuni pete ba꞉ma teta꞉mo puluhuku tawakaluba꞉te dito emedehonama꞉, ba꞉gala eta hanohano komote aeno naba꞉tamo uluhukuhino iba꞉te ba꞉ dito ha꞉lahuya꞉!”
2PE 3:5 A꞉iye! Ba꞉bako tabo ga꞉lapa꞉te iya꞉tawahala ya꞉lo tetenomolo Godote ba꞉moe hopo ba꞉gala alomo ebeno tabamo dododiliya꞉, huiyatiya iba꞉te ubihinola ba꞉be komo hibima꞉ midi. Numa꞉la꞉, Godote ba꞉moe hopo dododiya꞉, ba꞉ba tetelo ebete gagale hopo kulukulu beya ipuwane uluhukutiti beyamo ba꞉bo ododiya꞉,
2PE 3:6 ba꞉gala ebete eta tetelo hulama beya da꞉poemiya꞉ ba꞉be atu beyamo pakala hopo haba konomo a꞉kubahimiya꞉.
2PE 3:7 Ba꞉bema꞉ ebete kodakoda tabo ba꞉ma ka꞉na ihatiya꞉, ba꞉ma tetelo da꞉pola꞉na ba꞉moe hopo konomo ba꞉gala alomo iba꞉te ebeno ubi teta꞉mo modobolo kopola꞉nama꞉, ba꞉bene puya꞉te ebetamo papamila꞉ha꞉pima꞉ deda꞉hana, ebete ebeno Kuititi Hegelalo ba꞉bi tawakalubino komo anagilamelelamete ibi ba hawaminadigale ba꞉moe hopo koa꞉mo ba꞉bo kokubahimima꞉ne.
2PE 3:8 Ba꞉bema꞉ naeno hidohido mabuluba꞉la꞉, ba꞉moe kapiya ko komo akadodala꞉. Kodawa Godogodolo kapiya hegela ba꞉ kapiya taosene gogo huiyala, ba꞉gala kapiya taosene gogo ba꞉ kapiya hegela huiyala, ba꞉ma ka꞉na gopowahi tete ba꞉gala ga꞉ga꞉nomo tete ebete kapiya tetenomoma꞉ goena.
2PE 3:9 Ba꞉bema꞉ puya꞉te daedae ukuilo ba꞉ma ka꞉na da꞉ga꞉lana, “Hopo kuititi a꞉kuluhukamene,” iba꞉te Kodawa Godokono komo hibilo kiya꞉tawahanaha꞉. Iyo, Godote ba꞉moe hopoeno kuititi tetema꞉ hibilo da꞉goiya꞉, ba꞉be komote ebeno ubi tetelo kopuluhukuma꞉ne, huiyatiya numa꞉la꞉, ebete hopo habanapi malemalelo emalagidolelo tete ba꞉bema꞉ ga꞉gima꞉tepana, mabu ebe ubila tawakalubi hiliyonomate ibino kuba ododili ipuwane ohobila꞉te ka꞉ka꞉ mula꞉ komo ebegodone kolawema꞉.
2PE 3:10 Ba꞉bema꞉ hibila, Kodawa Godokono Ko Hegelalo Ya꞉suti kopema꞉ne, pilo dubuti tawakalubino ulihoha꞉ tetelo keba ka꞉na ka꞉penako ba꞉ba ka꞉na. Ba꞉ba tetelo ba꞉moe hopo ba꞉gala hopoeno ilina hiliyonomate kapimilo dito kowibohoma꞉na꞉, ba꞉bene atu tetelo alomo ba꞉gala alomoeno koko ilinate konomo diyamago kowibohoma꞉na꞉, mabu helonomo koete ba꞉moi ilina hiliyonomo dito kohawaminadigalema꞉ne.
2PE 3:11 Iyo, Godote ba꞉moi ilina hiliyonomo ba꞉moe gabodo kohawaminadigalema꞉ne, ba꞉bema꞉ wadiyala la꞉ hibima꞉ midipa꞉te la꞉eno emede ipuwalo talonapima꞉ eda꞉halo ebe kapiyatamo na꞉papamila꞉hanakuya꞉la꞉,
2PE 3:12 ba꞉gala wadiyala la꞉ la꞉eno hidohido ododili komodo ebe nowalonala꞉ ba꞉be tetete tiyonomolo kopema꞉. Ba꞉ hibila, Godokono Ko Hegelalo helonomo koete alomo ba꞉gala alomoeno koko ilina kapimilo kupula꞉digalema꞉ne,
2PE 3:13 huiyatiya kalakala konomola, ba꞉ba tetelo ebete a hibima꞉ midipi ebeno uli hopo haba ba꞉gala uli hunu haba a ba꞉bamo komagatoema꞉ne, ba꞉bolo ebeno tuputupu emede komo kapiyate kitanama꞉ne. Numa꞉la꞉, ebete dopamo ba꞉be hido komo ododima꞉ hibilo da꞉goiya꞉, ale ba꞉be komoeno tete ba꞉bema꞉ latiminama꞉.
2PE 3:14 Ba꞉bema꞉ naeno hidohido mabuluba꞉la꞉, la꞉ ba꞉be Ko Hegela ba latimina, wadiyala la꞉eno ukui konomamo ba꞉ma ka꞉na nihatenakuya꞉la꞉, la꞉le Godokono holoholo hapulu ba la꞉mota꞉hana la꞉eno hiliyonomo ododili komo ipuwalo eta kapiya deha꞉potonomo kubate a꞉kitanamene. Iyo, la꞉le ebeno tataba ipuwalo ba emedehona, modoboha꞉ komopa꞉te la꞉eno eta kapiya ododi komo kubama꞉ ga꞉la.
2PE 3:15 Ba꞉gala aeno Kodawate tiyolo puluhukuhino, la꞉ ba꞉moe komo nemalagidoluya꞉la꞉ ebete tete na꞉ga꞉gima꞉tepana komo hopo habanapa꞉te ibino ka꞉ka꞉ mula꞉ komo kolawema꞉. La꞉ iya꞉tawahala Poloko ba꞉ hibima꞉ midipi ipuwalo aeno hido naniwi etala, ba꞉bema꞉ ebete dopamo eta leta la꞉tamo poemelo atu tabonomo beka-olamagi. Iyo, Godote kebe mulu ukui ebetamo dikamiya꞉ ebete ba꞉be mulu komamo la꞉ ya꞉lo owalubilia꞉ta,
2PE 3:16 ba꞉bema꞉ hibila, nale kebe tabo dolamagimo, Polokono hiliyonomo leta ododili ipuwalo ebete aeno Kodawoeno pe komoma꞉ ba꞉ atu tabo beka-olamaginako. Na iya꞉tawala, komo tetelo ebeno tabo komokomoeno ipuwa kodakoda hibinomola, ba꞉be mabuma꞉ komo daedae ukuia꞉gopi ba꞉gala hibima꞉ midi ipuwalo ukui gagagagama꞉ deda꞉hana, ba꞉bakobako tawakaluba꞉te ebeno taboeno ipuwa ha꞉da amihoho gabodo hawakalilamenaka. Numa꞉la꞉, iba꞉te atu gabodo Godokono Bukoeno komo tabo komokomoma꞉ tawakalubi kubamo iya꞉tulamenaka, ba꞉be mabuma꞉ ibi ha꞉kiya ibino ukui ba kubahilamena ibino olalati komote hibilo kopema꞉ne.
2PE 3:17 Naeno hidohido mabuluba꞉la꞉, la꞉le ba꞉bakobako tawakalubino ha꞉da amiho komo dopamo iya꞉tawahuya꞉mata, ba꞉bema꞉ la꞉ hidamo! Puya꞉te Godokono tutumu tabo da꞉wakalaminaka, na ubihinola iba꞉te ibino ha꞉da amiho komamo la꞉ ba magatale, la꞉le ba꞉ma tetelo kebe hibi gabodo olalatihino da꞉tolamenama ba꞉be gabote la꞉godone alatidi.
2PE 3:18 Ba꞉bema꞉ la꞉ aeno Kodawa ba꞉gala Ka꞉ka꞉ Mula꞉lea꞉medawa Ya꞉su Kelisokono komo ba iya꞉tawahana ebeno malemale ipuwalo napepehonala꞉. Wadiyala awagaha komote ba꞉ma tetelo ba꞉gala emedena emedena tetelo ebegodolo nitanamene! Ba꞉moe ba꞉ naeno tabo kuititila. Ba꞉ba꞉la.
1JO 1:1 La꞉ ulihopa꞉la꞉, ale Ka꞉ka꞉ Taboeno komo ba꞉moe leta ipuwalo la꞉tamo da꞉hawakalimitama꞉, ba꞉be Tabote ba꞉ dopamo tupuimi mabuni demedenami ba꞉be Kodawala. Ba꞉ hibila, ale ba꞉ma tetelo ba꞉be Taboeno komo aeno galamo ulihote ba꞉gala aeno baidinomamo a꞉ka-umiya꞉ma꞉, iyo, ale umiti aeno kokotonomamo ebe atumu ologiya꞉ma꞉.
1JO 1:2 Mabu ba꞉be Ka꞉ka꞉te ba꞉moe hopolo a꞉hawakaluya꞉ ba꞉gala ale aeno baida꞉mo ebe umiya꞉ma꞉, ba꞉bema꞉ ale ebeno komo hawakalimilo Nabiwi Godokono wiboha꞉ ka꞉ka꞉ komoma꞉ la꞉tamo ba꞉moe tabo ba꞉bema꞉ olamagimitama꞉. Numa꞉la꞉, kebe Ka꞉ka꞉te dopamo Godokoba꞉ demedenami, ba꞉be Ka꞉ka꞉ ba꞉ galane atamo da꞉pehawakaluya꞉ ba꞉be atu Ka꞉ka꞉la.
1JO 1:3 Ba꞉bema꞉ mabu keka꞉ ale ulamete dulihuya꞉ma꞉ ba꞉bi komo la꞉tamo dolamagimitama꞉? Mabu bitana a ubila la꞉ ulihopa꞉te ago kapiyama꞉ eda꞉ha, ale Nabiwi Godokoba꞉ ba꞉gala ebeno Gudu Ya꞉su Kelisokoba꞉ kapiyama꞉ keba ka꞉na keda꞉hanama꞉ ba꞉ba ka꞉na,
1JO 1:4 ba꞉bema꞉ hibila, ale ba꞉moe leta bododima꞉, la꞉la, ala, a hiliyonomoeno kalakalate konomoma꞉ keda꞉ma꞉.
1JO 1:5 Ba꞉ hibila, ale Godokono Gudugodone duliya꞉ma꞉ ba꞉be atu tabo ba꞉ma ka꞉na kolamagimitama꞉, Godoko ba꞉ alola, ebegodolo eta du komote kitanaha꞉, puliyanomola.
1JO 1:6 Ba꞉bema꞉ ale du ipuwalo ba wapata꞉lame ba꞉ma ka꞉na da꞉ga꞉lama꞉, a eba꞉go kapiyanomoma꞉ eda꞉hanama꞉, hibila, a ba꞉ ha꞉da amihohopila mabu ale aeno emede ipuwalo ha꞉da gabodo tolamenama꞉.
1JO 1:7 Huiyatiya Godote alo ipuwalo keba ka꞉na kemedena ale ba꞉ba ka꞉na ebeno alo ipuwalo da꞉wapata꞉lamenama꞉, ba꞉ba tetelo ale ebe ipuwalo ba emedehona kapiyanomoma꞉ beda꞉hanama꞉, iyo, ebeno Gudu Ya꞉suti ebeno hawa꞉mo aeno kuba ododili komokomo hiliyonomo bukulalea꞉menakomene.
1JO 1:8 Numa꞉la꞉, keba tetelo a ha꞉kiya a kuba ododiliha꞉pima꞉ da꞉ga꞉lama꞉, a ha꞉kiya a ha꞉da kamihoa꞉mema꞉nema꞉, ba꞉bene agodolo hibi komote a꞉kitanamene.
1JO 1:9 Huiyatiya ale aeno kuba Godotamo da꞉hawakalilamema꞉, ebete a owalubima꞉ kebe tabo dopamo dolamagiya꞉ ba꞉be komo ebete hibi tuputupu gabodo kododima꞉ne, iyo, ebete aeno kuba ododili komokomo egebolea꞉mete kadodolea꞉mema꞉ne, ba꞉gala ebete aeno tepo ipuwoeno kuba dalowa꞉ kukulalea꞉mema꞉ne.
1JO 1:10 Ba꞉moe ba꞉be mabuma꞉ a ha꞉kiya a kuba ododiliha꞉pima꞉ da꞉ga꞉lama꞉, ale ba꞉be tabamo Godoko ha꞉da dawama꞉ midilo ebeno hibi tabote a ipuwalo a꞉kitanamene.
1JO 2:1 Naeno guguda꞉la꞉, nale ba꞉moe tabo ba꞉moe letamo miya꞉tete la꞉tamo poememo la꞉le eta kuba Godotamo ododikapoma꞉, huiyatiya keba tetelo a ipuwalo lumagiti kuba dododimini, ba꞉ba tetelo ebe owalubima꞉ aeno Tuputupudawa ba꞉luta, ebe ba꞉ Ya꞉su Kelisotela, toetoe tabamo a Nabiwi Godotamo da꞉wadiya꞉paa꞉tenako ba꞉be Owalubidawala.
1JO 2:2 Ba꞉ hibila, Godokono mauba komote atamo dopamo uluhukuya꞉ mabu a ba꞉ kuba ododilipila, huiyatiya Kelisote aeno kuba ododili komokomo ebeno hawa꞉mo degebolea꞉miya꞉, ba꞉ba tetelo ebete Godokono mauba komo upula꞉te a Godokoba꞉ a꞉kapiyuia꞉miya꞉. Huiyatiya numa꞉la꞉, ba꞉be ododi komodo ebete a hibima꞉ midipi kapiya kowalubiya꞉ha꞉, ao, ebete ba꞉be atu tetelo hopo habanapi hiliyonomo owalubilima꞉ ibino kuba komokomo ebeno hawa꞉mo egebolelamiya꞉.
1JO 2:3 Ba꞉bema꞉ ale Godokono tutumu tabamo da꞉papamila꞉halema꞉, ba꞉moe gabodo a ebeno komo hibilo kiya꞉tawahama꞉nema꞉.
1JO 2:4 Iyo, eta lumagiti Godokono tutumu tabamo papamiwataheno ba꞉ma ka꞉na da꞉goemene, “Na Godokono komo iya꞉tawala,” ebe ba꞉ ha꞉da amihodawala, ebegodolo hibi komote kitanaha꞉,
1JO 2:5 huiyatiya kebe lumagiti Godokono tabamo papamiwatate hibilo dododimini, ebeno malemale emalagidolo komote ba꞉be lumagino tepo ipuwalo kotaboma꞉ne. Ba꞉bema꞉ ale Godoko ipuwalo demedehonama꞉, a keba ka꞉na na꞉kiya꞉tawahama꞉?
1JO 2:6 A ba꞉be komo ba꞉ma ka꞉na kiya꞉tawahama꞉nema꞉, pote Godoko ipuwalo emedenama꞉ da꞉goemene, wadiyala Kelisote keba ka꞉na ka꞉pata꞉nami ebete ba꞉ba ka꞉na na꞉pata꞉namene.
1JO 2:7 Naeno hidohido mabuluba꞉la꞉, nale ba꞉moe leta ipuwalo Ya꞉sukunu uli tutumuino komo da꞉hawakalimitamo, ba꞉be tutumu dopamo tupuimi mabuni la꞉ ba꞉ uliya꞉mata, ba꞉bema꞉ ba꞉moe uli tutumu la꞉godolo pakala tutumu keba ka꞉nala꞉ka꞉ ba꞉ba ka꞉nala.
1JO 2:8 Huiyatiya wadiyala ba꞉be pakala tutumuti la꞉tamo ulinoma꞉ gala na꞉keda꞉mene, mabu ba꞉ma tetelo ebeno hibi komote Kelisoko ipuwalo ba꞉gala la꞉ ipuwalo a꞉hawakalanako, iyo, du komote ba꞉ na꞉wibo, ba꞉bene hibi alote ba puluhuku ba꞉ na꞉la꞉mina.
1JO 2:9 Ba꞉bema꞉ nale ba꞉moe leta ipuwalo uli tutumuino komo gala ba꞉ma ka꞉na kahawakalimitamo, kebe lumagiti alo ipuwalo emedenama꞉ goelo ebeno ekawitamo da꞉maubana, ebete du ipuwalo bemedena, iyo, ebete du ipuwane kuluhukuha꞉.
1JO 2:10 Huiyatiya kebe lumagiti ebeno ekawi malemalelo demalagidolona, ebete alo ipuwalo bemedena ba꞉gala ebeno ododi komodo ebeno ekawiti nato ukamidate a꞉kagamene.
1JO 2:11 Ba꞉ hibila, kebe lumagiti ebeno ekawitamo da꞉maubana, ebe ba꞉ du ipuwalo emede lumagila, iyo, ebete kebe gabodo ka꞉pata꞉na ba꞉gala ebete kebamo ka꞉tona, ebe ba꞉bi komo iya꞉tawaha꞉ mabu duti ebeno baidi a꞉mula꞉lemi.
1JO 2:12 Naeno guguda꞉la꞉, na la꞉tamo leta bododimo mabu Godote Kelisokono helo mahilamo la꞉eno kuba egebolelamete adodolelamia꞉ta.
1JO 2:13 Ba꞉gala naeno naba꞉la꞉, na la꞉tamo leta bododimo mabu la꞉ aeno Kodawoeno komo iya꞉tawahala, ba꞉ma ka꞉na ebe ba꞉ dopamo tupuimi mabuni demedenami ba꞉gala emedena tetelo demedenamene ba꞉be dawala. Ba꞉gala uli apepeho dubala꞉, na la꞉tamo leta bododimo mabu la꞉ Kuba Namutudawatamo ba alaholoho ebeno wato kikipo ba꞉bo lawimata. Iyo, naeno guguda꞉la꞉, na la꞉tamo leta bododimo mabu la꞉ Nabiwi Godokono komo iya꞉tawahala.
1JO 2:14 Ba꞉gala naeno naba꞉la꞉, na la꞉tamo leta bododimo mabu la꞉ aeno Kodawoeno komo iya꞉tawahala, ba꞉ma ka꞉na ebe ba꞉ dopamo tupuimi mabuni demedenami ba꞉gala emedena tetelo demedenamene ba꞉be dawala. Ba꞉gala uli apepeho dubala꞉, na la꞉tamo leta bododimo mabu la꞉ helohelonomola, ba꞉bene Godokono tabote la꞉ ipuwalo ba itana la꞉ Kuba Namutudawoeno wato kikipo ba꞉bo lawimata.
1JO 2:15 Ba꞉bema꞉ la꞉ hidamo! Ba꞉moe hopoeno ilina ba꞉gala ebeno awagaha komokomo koamo akemalagidolenala꞉, mabu kebe lumagiti ba꞉moe hopoeno komokomo koamo demalagidolena, ebete Nabiwi Godoko malemalelo emalagidolo modoboha꞉.
1JO 2:16 Ba꞉bema꞉ hopo haboeno komokomo keba ka꞉nala꞉ka꞉? Ba꞉bi komokomo ba꞉ kuba tawakaluba꞉te kateneno ubilo demalagidolenaka ba꞉bi komokomola, ba꞉gala iba꞉te baida꞉mo ulamete ibino ubilo duwatenaka ba꞉bi komokomola, ba꞉gala iba꞉te kebe komokomo ododililo dawagahanaka ba꞉bi komokomola. Numa꞉la꞉, ba꞉bi hiliyonomo hiya꞉hiya꞉ kuba komate hopo habanapino ukuini ikulinaka, Nabiwi Godogodoneha꞉!
1JO 2:17 Ba꞉bema꞉ ba꞉moe komo ba꞉ hibila, ba꞉moe hopo ba꞉gala ba꞉moe hopoeno kuba ubi komate ba꞉ na꞉wibohona, huiyatiya kebe lumagiti Godokono ubi komamo da꞉papamiwatamene, ebete wiboha꞉ ka꞉ka꞉go bemedenamene.
1JO 2:18 Naeno guguda꞉la꞉, hopo haboeno kuititi tetete ba꞉ na꞉tatali. Iyo, dopamo la꞉ ba꞉ma ka꞉na uliya꞉mata, Kelisotamo Alaholo Komo Ododidawate ba꞉ na꞉pe, ba꞉bema꞉ hibila, komo dubu hiliyonomate ya꞉lo a꞉mahila꞉haliya꞉ Kelisotamo alaholo komo kododilinakoma꞉, iba꞉te ba꞉ma tetelo hopo habalo bemedehona. Ba꞉bema꞉ a ba꞉moe komone niya꞉tawahanama꞉, ba꞉moe ba꞉ hopo haboeno kuititi tetela.
1JO 2:19 Numa꞉la꞉, ba꞉bi dubate aeno kapiyuimi da꞉miya꞉pui, ba꞉be mabuma꞉ iba꞉te aeno kapiyuimi tawakalubima꞉ hibilo keda꞉hanaha꞉. Keba tetelo iba꞉te aeno kapiyuimipima꞉ neda꞉honatale iba꞉te a ipuwalo bemedehonana꞉, huiyatiya iba꞉te a hibilo da꞉miya꞉pui ba꞉be komote a biya꞉tua꞉mena, ibi ipuwalo eta lumagiti aeno kapiyuimidawama꞉ keda꞉naha꞉.
1JO 2:20 Huiyatiya la꞉eno komo hiya꞉nomola. Kelisote ebeno Hido-talona Gobogobo la꞉ hunamo da꞉haminuya꞉, ba꞉bema꞉ ka꞉lo la꞉ hiliyonomate Godokono hibi komo iya꞉tawahala.
1JO 2:21 Iyo, la꞉ daedae ukuia꞉go kemedehonaha꞉, huiyatiya la꞉ Godokono hibi komo iya꞉tawahanomola, ba꞉ma ka꞉na eta ha꞉da tabote ebegodone a꞉kuluhukale. Ba꞉ hibila, ba꞉be mabuma꞉ nale ba꞉moe leta la꞉tamo ododimo.
1JO 2:22 Ba꞉bema꞉ la꞉ ipuwalo ha꞉da amihodawa potela꞉ka꞉? Ebe ba꞉ Kelisotamo alaholo komo dododina ba꞉be lumagila, ba꞉gala ebe ba꞉ pote da꞉goena Ya꞉suku Kelisoteha꞉ ba꞉be dawala. Numa꞉la꞉, ba꞉bako lumagiti Nabiwi Godoko ba꞉gala ebeno Gudu Ya꞉suku ubiha꞉ma꞉ ba eda꞉na ba꞉be komo hawakala ba꞉bo goenako.
1JO 2:23 Iyo, kebe lumagiti Godokono Gudu mabuma꞉ ubiha꞉ tabo hawakala da꞉goena, ebete atumu Nabiwi Godotamo ubiha꞉ tabo bekagoena, huiyatiya kebe lumagiti Godokono Gudu anukumima꞉ hawakala da꞉goena, ebete atumu Nabiwi Godoko anukumima꞉ kagoena.
1JO 2:24 Ba꞉bema꞉ la꞉le dopamo tupuimi mabuni kebe hibi tabo kulihuya꞉ma, wadiyala la꞉ ipuwalo ba꞉be tabote nitanamene. Ba꞉ hibila, la꞉ ba꞉be tabo kodakodalo datila꞉nama, ba꞉bema꞉ la꞉ Nabiwi Godoko ba꞉gala ebeno Gudu Ya꞉suku ibi ipuwalo bemedehonamata.
1JO 2:25 Iyo, numa꞉la꞉, Godokoba꞉ emede komo ba꞉ wiboha꞉ ka꞉ka꞉la, Ya꞉suti atamo ikaa꞉mema꞉ hibinomolo da꞉goiya꞉ ba꞉moe ba꞉be komola.
1JO 2:26 Ba꞉bema꞉ puya꞉te la꞉ ha꞉da amiholamema꞉ dewagelena, nale ibino ha꞉da komo hawakalimima꞉ ba꞉moe leta ba꞉bema꞉ ododimo.
1JO 2:27 Ba꞉ hibila, la꞉ ibino ha꞉da amiho komamo a꞉kaguda꞉mata, mabu Kelisote ebeno Gobogobo la꞉ hunamo ya꞉lo a꞉haminuya꞉, iyo, ebete emedena tetelo la꞉go ba emedena ebe ha꞉kiya hiliyonomo komokomo la꞉ biya꞉tulamenakomena꞉ta, eta lumagitiha꞉. Numa꞉la꞉, ebeno iya꞉tulame komo ba꞉ hibinomola, iyo, eta ha꞉da amiho komote ebegodone a꞉kuluhukale, ba꞉bema꞉ ebete la꞉ keba ka꞉na kiya꞉tulametana, wadiyala la꞉ ba꞉ba ka꞉na ebe ipuwalo nemedehonala꞉.
1JO 2:28 Iyo, naeno guguda꞉la꞉, wadiyala la꞉ Kelisoko ipuwalo nemedehonala꞉, ba꞉bema꞉ ebeno pe hegelate duluhukumini, ale ba꞉ba teta꞉mo nikuliti toleha꞉ma꞉ ba eda꞉ha ebeno holoholo hapulu eta komoma꞉ a꞉kahilopohama꞉.
1JO 2:29 La꞉ iya꞉tawahala Kelisoko ba꞉ tuputupudawala, ba꞉bema꞉ wadiyala la꞉ ba꞉moe eta komo atumu na꞉kiya꞉tawahala꞉, kebe lumagiti ebeno tuputupu komo ipuwalo demedena, ebe ba꞉ Kelisoko huiyala ba꞉gala ebe ba꞉ Godokono gudu etala.
1JO 3:1 Ba꞉bema꞉ Nabiwiti a malemalelo keba ka꞉na kemalagidoloena, wadiyala la꞉ ba꞉be komo numa꞉la꞉, iyo, ebeno malemale atamo bada konomola꞉ka꞉! Ba꞉ hibila, ebete ebeno malemale ipuwado a ebeno gugudima꞉ ka꞉mina, iyo, a hibima꞉ midipi ba꞉ ebeno gugudima꞉ eda꞉hanama꞉, ba꞉bema꞉ hopo habanapa꞉te aeno komo kiya꞉tawahanaha꞉ mabu iba꞉te atumu Godokono komo iya꞉tawaha꞉.
1JO 3:2 Ba꞉bema꞉ naeno hidohido mabuluba꞉la꞉, a iya꞉tawahala ka꞉lo a ba꞉ Godokono gugudila, huiyatiya a hibi iya꞉tawaha꞉ galane a keba ka꞉na na꞉kemedehonama꞉. Ba꞉ma tetelo a ba꞉moe kapiya komo iya꞉tawahala, Kelisote atamo gala da꞉kapuluhukumini, ba꞉ba tetelo a ebe huiyama꞉ keda꞉hama꞉nema꞉ mabu ale ebeno holoholo hibilo kumima꞉nema꞉.
1JO 3:3 Ba꞉be mabuma꞉ kebe lumagiti uliholo Kelisoko da꞉latimina, ba꞉be lumagiti ebeno tepo ipuwoeno dalowa꞉ ukulate gala dalowa꞉ma꞉ a꞉kamida꞉mene, ba꞉bene ebete Kelisoko keba ka꞉nala꞉ka꞉ ba꞉ba ka꞉na bemedenamene, ebeno tepo ipuwalo eta dalowa꞉ komote a꞉kitanamene.
1JO 3:4 Ba꞉gala eta komo. Lumagiti Godokono kukala hiliyonomo ipuwalo eta kapiya dadikanalemene ba꞉ba tetelo ebete ebetamo kuba hibilo kododima꞉ne, mabu hibila, ebetamo kuba ododi komo ba꞉gala ebeno kukala adikanale komo ibi ba꞉ kapiyanomola.
1JO 3:5 Iyo, la꞉ iya꞉tawahala Kelisote ba꞉moe hopamo a꞉pehawakaluya꞉ ebete tawakalubino kuba ododili komokomo gobogobamo kopemiya꞉telamema꞉. Ebe kapiyate ba꞉moe komo ododi modobola mabu ebe kapiyagodolo kuba ododi komo puliyala.
1JO 3:6 Ba꞉bema꞉ kebe lumagiti Kelisoko ipuwalo demedena, ebete kuba ododi ipuwalo a꞉kemedenamene, huiyatiya kebe lumagiti kuba ododili ipuwalo demedena, ba꞉be lumagiti Kelisokono komo hibilo kalaweha꞉ ba꞉gala ebete ebeno komo iya꞉tawaha꞉.
1JO 3:7 Naeno guguda꞉la꞉, la꞉ hidamo, eta lumagiti la꞉ ha꞉da akamiholama꞉la꞉! Numa꞉la꞉, kebe lumagiti tuputupu komokomo dododilinakomene ba꞉be lumagi ba꞉ tuputupudawala, Kelisoko keba ka꞉nala꞉ka꞉ ba꞉ba ka꞉nala.
1JO 3:8 Huiyatiya kebe lumagiti kuba komokomo dododilinakomene ebe ba꞉ Saitanakono guduma꞉ eda꞉na, mabu ba꞉moe hopoeno tupuimi mabuni pete ba꞉ma teta꞉mo puluhuku Saitanate kuba komokomo kapiya bododilinako. Ba꞉moe mabuma꞉ Godokono Guduti ba꞉moe hopamo ba꞉bema꞉ pehawakaluya꞉, Saitanate dododilinako ba꞉bi kuba komo ebete hibilo palukulimiti kopehawaminadigalema꞉.
1JO 3:9 Numa꞉la꞉, Godokono gugudima꞉ deda꞉hana ba꞉ba꞉te kuba ododili ipuwalo gala a꞉kemedehonamena꞉, mabu Godote ibi ipuwamo ebeno ka꞉ka꞉ ya꞉lo ihatiya꞉, lumagiti hidohido kikipo hakamo keba ka꞉na kamihonako ba꞉ba ka꞉na. Ba꞉ hibila, Godokono ka꞉ka꞉te ebeno guguda꞉godolo ditanamene, iba꞉te kuba komokomo ododili modoboha꞉.
1JO 3:10 Ba꞉bema꞉ wadiyala la꞉ niya꞉tawahala꞉, tawakalubino ododili komate ibi banagiya꞉midalena, ba꞉ma ka꞉na Godokono gugudi ba꞉gala Saitanakono gugudi iba꞉te hiya꞉hiya꞉ kopola꞉nama꞉. Iyo, ba꞉moe komo ba꞉ hibila, puya꞉te tuputupu komokomo ododilihino ba꞉gala puya꞉te ibino ekaki malemalelo emalagidoleheno, ba꞉ba꞉te Godokono gugudima꞉ keda꞉hanaha꞉.
1JO 3:11 Ba꞉bema꞉ numa꞉la꞉, la꞉ dopamo tupuimi mabuni kebe tabo kulihuya꞉ma ba꞉be tabo ba꞉ ba꞉ma ka꞉nala, wadiyala a hibima꞉ midipi ipuwalo etate eta malemalelo kemalagidolo, etate eta malemalelo kemalagidolo, a ba꞉ba ka꞉na bemedehonama꞉.
1JO 3:12 La꞉ iya꞉tawahala Ka꞉inikono komo, ba꞉bema꞉ la꞉ ebe huiyama꞉ eda꞉ha modoboha꞉. A꞉iye, ebe Saitanakono guduma꞉ ba eda꞉ ebeno amogatamo konomo kuba bododiya꞉. Mabu keka꞉ ebete ebeno amoga dito danakapumiya꞉? Iyo, ebete kuba ododili ipuwalo ba emedena, huiyatiya ebeno amogate tuputupu komokomo bododilinami, ebete ebetamo ba꞉bema꞉ maubuya꞉.
1JO 3:13 Ba꞉bema꞉ naeno hibima꞉ midipi ekaka꞉la꞉, la꞉ tuputupu ododili ipuwalo ba emedehona hopo habanapa꞉te la꞉tamo mauba komokomo dododilimina꞉, la꞉ ba꞉be komoma꞉ akala꞉wa꞉hala꞉.
1JO 3:14 A iya꞉tawahala a hoe ipuwane ka꞉ka꞉mo ya꞉lo ogomuya꞉ma꞉ mabu a komo hibima꞉ midipi ekaki malemalelo nemalagidolenama꞉, huiyatiya kebe lumagiti malemale emalagidolo ipuwalo emedenaheno, ba꞉be lumagiti hoe ipuwane hibilo kuluhukuha꞉.
1JO 3:15 Ba꞉gala kebe lumagiti ebeno ekawitamo da꞉maubana, ba꞉be lumagino komo ba꞉ pote ebeno ekawi danakapumiya꞉ ba꞉be dawoeno ododi komo huiyala, iyo, ibi netewapino ukui ba꞉ kapiyala. Ba꞉bema꞉ a iya꞉tawahala, ba꞉bako lumagino tepo ipuwalo wiboha꞉ ka꞉ka꞉ puliyanomola mabu lumagi anakapumidawagodolo Godokono hibi ka꞉ka꞉te a꞉kitanamene.
1JO 3:16 Numa꞉la꞉, Kelisote ebeno ka꞉ka꞉ a mabuma꞉ tama꞉mo ihatiya꞉, ba꞉bema꞉ a ebeno ododi komodo malemale emalagidoloeno komo hibilo kiya꞉tawahama꞉nema꞉, iyo, wadiyala a ba꞉ atumu aeno ka꞉ka꞉ hibima꞉ midipi mabuma꞉ tama꞉mo ba꞉miya꞉tenakoma꞉.
1JO 3:17 Huiyatiya keba tetelo a hibima꞉ midipi ipuwalo eta ilina dogodogodawate ilinaha꞉dawa umiti ebe owalubihino, ebete ba꞉mako tabo keba ka꞉na na꞉ka꞉goemene, “Na Godoko malemalelo nemalagidolonamo?” A꞉iye, ebete ba꞉bako tabo goe modoboha꞉!
1JO 3:18 Ba꞉bema꞉ naeno guguda꞉la꞉, a komopa꞉tamo malemale tabo dito a꞉kaga꞉lanakama꞉. Ao, wadiyala a komopino modoboha꞉ komokomo ulamelelamete iba꞉tamo malemale ilina ba ikalame Godokono hibi malemale iba꞉tamo ba꞉ba ka꞉na kohawakalimima꞉nema꞉.
1JO 3:19 Ba꞉bema꞉ kalakala konomola, a ba꞉moe malemale gabodo kiya꞉tawahama꞉nema꞉ a ba꞉ Godokono hibi komo ipuwalo emedehonama꞉, ba꞉gala aeno tepo ipuwalo ebeno hete kapiyate ba itana ale toleha꞉ma꞉ eda꞉hanama꞉ ebeno holoholo hapulu utitatama꞉.
1JO 3:20 Huiyatiya keba tetelo aeno tepo ipuwoeno ukuiti a kubapima꞉ da꞉ka꞉mimina꞉, ale ba꞉be kuba ukui lawe modoboha꞉ mabu ba꞉bako ukuiti Godogodone a꞉kapa꞉le. Numa꞉la꞉, ebete aeno hiliyonomo ugumuili komo ba iya꞉tawana ebete dopamo a tuputupupima꞉ a꞉ka꞉miya꞉, ba꞉bema꞉ ale ukui bilibilima꞉ a꞉keda꞉hama꞉ mabu ebeno taboeno helote aeno tepo ipuwoeno helo na꞉gogolona.
1JO 3:21 Ba꞉bema꞉ naeno hidohido mabuluba꞉la꞉, eta tetelo aeno tepo ipuwoeno ukuiti a kubapima꞉ da꞉ka꞉mimina꞉, ba꞉be kuba ukui laweheno ale toleha꞉ma꞉ eda꞉hate aeno toetoe tabo komago Godokono holoholo hapuamo dito konikulima꞉nema꞉.
1JO 3:22 Ba꞉ba tetelo ale bada komoma꞉ ebe da꞉toemehoma꞉ ebete atamo hibilo kikaa꞉mema꞉ne, mabu ale ebeno tutumu tabamo papamila꞉halete ebeno ubi komokomo kapiya ba꞉bo ododilinakoma꞉.
1JO 3:23 Hibila, ba꞉moe ba꞉ Godokono konomo tutumu tabola, ale ebeno Gudu Ya꞉su Kelisokono mahilo hibima꞉ ba midina, a ipuwalo etate eta malemalelo bemalagidolonama꞉, Ya꞉suti a dopamo keba ka꞉na kiya꞉tua꞉miya꞉ ba꞉ba ka꞉na.
1JO 3:24 Ba꞉gala eta komo ba꞉ma ka꞉nala. Kebe lumagiti Godokono tutumu tabamo da꞉papamiwatanako, ebete Godoko ipuwalo bemedena ba꞉gala Godote atumu ebe ipuwalo ba꞉ka-emedena. Ba꞉bema꞉ Godote a ipuwalo demedena a ba꞉be hibi komo iya꞉tawahala, mabu ebete atamo dikaa꞉miya꞉ ba꞉be Hido-talona Gobogobote a ba꞉be komo biya꞉tua꞉mena.
1JO 4:1 Naeno hidohido mabuluba꞉la꞉, komopa꞉te ba꞉ma ka꞉na dito da꞉ga꞉lanaka, “A Godokono Gobogobagopila,” la꞉ ibino tabo hibima꞉ akamida꞉la꞉. Wadiyala la꞉ huiyatiya ibino tabo komokomo ba꞉gala emede komokomo hidamo nulamelelamenala꞉, mabu diyala, iba꞉te Godokono Gobogoboeno heloamo kuda꞉ emedehona o kuba gobogoboeno heloamo demedehona. Numa꞉la꞉, ba꞉ma tetelo hopo konomolo ha꞉da tabo olamagimipa꞉te Godokono mahilo ka꞉milo ba꞉ dito wapata꞉lamena!
1JO 4:2 Ba꞉bema꞉ la꞉ Godokono Gobogobagoeno okodawa ba꞉ma ka꞉na kiya꞉tawahama꞉nemata, kebe lumagiti ba꞉ma ka꞉na dolamaginako, “Ya꞉su Kelisote lumagino apa꞉mo ba꞉moe hopamo hibilo a꞉pehawakaluya꞉,” ebe ba꞉ Godokono Gobogobagoenola.
1JO 4:3 Huiyatiya kebe lumagiti Ya꞉sukunu komoma꞉ ha꞉da tabo dolamaginako ebe Godokono Gobogobagoeno okodawaha꞉, ao, ebeno gobogobo ba꞉ Kelisotamo Alaholo Komo Ododidawoeno gobogobola. Ba꞉ hibila, dopamo la꞉ ba꞉ma ka꞉na uliya꞉mata, ba꞉be kuba gobogobote hopo habamo kopema꞉ne, ba꞉bema꞉ ebete tawakaluba꞉tamo ya꞉lo puluhukuti ba꞉moe hopolo bemedena.
1JO 4:4 Naeno hidohido guguda꞉la꞉, puya꞉te Godokono mahilamo ha꞉da tabo dolamagiminaka la꞉le ibino wato kikipo ya꞉lo a꞉lawimata, mabu la꞉ ba꞉ Godokono gugudila ba꞉gala la꞉ ipuwalo oko dowatina ba꞉be Hido-talona Gobogoboeno helote konomoma꞉ eda꞉na, iyo, ba꞉be helote ibi ipuwalo oko dowatina ba꞉be eta gobogoboeno helo na꞉gogolona.
1JO 4:5 Numa꞉la꞉, ba꞉bi ha꞉da amihohopa꞉te ba꞉moe hopoeno komoma꞉ ga꞉lana mabu hopo habalo oko dowatina ibi ba꞉ ba꞉be kuba gobogobagopila, iyo, hopo habanapino kalakala ba꞉bema꞉ itana ibino tabo komokomo ulihoma꞉.
1JO 4:6 Huiyatiya aeno komo ba꞉ hiya꞉nomola mabu a Godokono gugudima꞉ eda꞉hanama꞉. Ba꞉bema꞉ numa꞉la꞉, kebe lumagiti Godokono komo hibilo diya꞉tawana ebete aeno tabo kulima꞉ne, huiyatiya Godokono komo iya꞉tawaha꞉ lumagiti aeno tabo a꞉kulia꞉mene. Iyo, a ba꞉moe gabodo niya꞉tawahanama꞉ kebe komate Godokono hibi Gobogobogodone da꞉pikulina ba꞉gala kebe komate ha꞉da amiho gobogobogodone da꞉pikulina ba꞉bi hiya꞉hiya꞉ komo.
1JO 4:7 Naeno hidohido mabuluba꞉la꞉, wadiyala a ipuwalo etate eta malemalelo kemalagidolo, etate eta malemalelo kemalagidolo, a ba꞉ba ka꞉na bewagelenama꞉ mabu malemale komo ba꞉ Godogodone pena. Ba꞉bema꞉ kebe tawakaluba꞉godolo malemale emalagidolo komo ditanamene ibi ba꞉ Godokono gugudila, iyo, ibi Godokono hibi komo iya꞉tawahala,
1JO 4:8 huiyatiya kebe lumagigodolo malemale emalagidolo komote itanaheno, ba꞉be lumagi Godokono hibi komo iya꞉tawaha꞉ mabu Godoko ba꞉ konomo malemaledawala.
1JO 4:9 Numa꞉la꞉, Godote ebeno malemale atamo ba꞉ma ka꞉na hawakalimiya꞉, ebete ebeno Gudu kapiyanomo ba꞉moe hopamo a꞉poemiya꞉ ale hibi ka꞉ka꞉ ebegodone kolawema꞉.
1JO 4:10 Ba꞉bema꞉ ba꞉be hibi malemale komo ba꞉ ba꞉ma ka꞉nala. Dopamo ale Godoko malemalelo emalagidoloha꞉ tetelo ebete a konomamo ba emalagidoloe ebeno Gudu Kelisoko atamo ba꞉bo poemiya꞉, iyo, ebete ebeno ubi ba꞉bo ihatiya꞉ aeno kuba ododili komokomo Kelisokono hawa꞉mo egebolea꞉mete a ebeno gugudima꞉ komidima꞉.
1JO 4:11 O naeno hidohido mabuluba꞉la꞉, Godote ebeno malemale komo atamo ba꞉ba ka꞉na hawakalimiya꞉, ba꞉bema꞉ wadiyala a ba꞉ atumu etate eta malemalelo ba꞉ka-emalagidolonakoma꞉.
1JO 4:12 Ba꞉ hibila, ba꞉moe hopo tupuimi mabuni eta lumagiti Godoko kumiya꞉ha꞉, huiyatiya keba tetelo a ipuwalo etate eta malemalelo kemalagidolo, etate eta malemalelo kemalagidolo, a ba꞉ba ka꞉na demedehonama꞉, ba꞉ba tetelo komopa꞉te aeno ododi ipuwado Godoko hibilo kumima꞉na꞉ mabu ebete a ipuwalo bemedena ba꞉gala ebeno malemale komote a ipuwalo tabonomola.
1JO 4:13 Godote a ipuwalo demedena ba꞉gala ale ebe ipuwalo demedehonama꞉, ba꞉be komo a keba ka꞉na na꞉kiya꞉tawahama꞉? Dopo komo ba꞉ ba꞉ma ka꞉nala, Godote atamo dikaa꞉miya꞉ ba꞉be Gobogobote a kiya꞉tua꞉mema꞉ne.
1JO 4:14 Ba꞉gala aeno tabo olamagimi komo ba꞉ eta a iya꞉tua꞉me komola. Iyo, ale baida꞉mo dumiya꞉ma꞉ ba꞉be hibi komo komopa꞉tamo ba꞉ma ka꞉na bolamagiminakoma꞉, “Godote ebeno Gudu hopo habamo a꞉poemiya꞉, ebete tawakalubino Ka꞉ka꞉ Mula꞉lelamedawama꞉ kopeda꞉nama꞉.” Ba꞉bema꞉ hibila, kebe lumagiti hawakala ba꞉ma ka꞉na dolamagina, “Ya꞉suku ba꞉ Godokono Gudula,” Godote ba꞉be lumagi ipuwalo hibilo bemedena ba꞉gala ebete atumu Godoko ipuwalo ba꞉ka-emedena.
1JO 4:16 Ba꞉gala ba꞉be hido ukui lawema꞉ Godokono malemale komote atumu aeno eta iya꞉tua꞉medawama꞉ keda꞉na. Iyo, Godote konomo malemaledawama꞉ ba eda꞉na a malemalelo emalagidoloena, ba꞉bema꞉ a ipuwalo kebe lumagiti ba꞉be komo hibima꞉ miditi malemale emalagidolo ipuwalo demedenamene, ba꞉be lumagiti kiya꞉tawama꞉ne ebete Godoko ipuwalo bemedena ba꞉gala Godote ebe ipuwalo atumu ba꞉ka-emedena.
1JO 4:17 Numa꞉la꞉, ba꞉moe malemale emalagidolo komodo a ba꞉ tuputupu tawakalubima꞉ eda꞉hanama꞉, ba꞉bema꞉ Godote hiliyonomo tawakalubino kuba komokomo danagilamelelamemene, ba꞉be Ko Hegelalo ale ebeno holoholo hapuamo kalakalago konutitatama꞉nema꞉. Ba꞉ba tetelo tole komote agodolo a꞉kitanamene, mabu ebete Hunu Habalo keba ka꞉na kemedena, ale ba꞉moe hopolo ba꞉ atumu ba꞉ba ka꞉na ka-emedehonama꞉.
1JO 4:18 Ba꞉ hibila, Godokono hibi malemale emalagidolo ipuwalo tole komo puliyala, mabu malemale emalagidolo komote tole komo gobogobamo ebeno heloamo ka꞉na꞉matema꞉ne. Ba꞉bema꞉ kebe lumagiti Godokono holoholo hapuamo utima꞉ da꞉toletolena, Godokono malemale emalagidolo komote ebe ipuwalo oko hidamo kowatinaha꞉, iyo, ba꞉bako lumagiti nemalagidolona Godote ebetamo kuba huiya kikamema꞉ne, ba꞉bema꞉ ebegodolo tole komo kapiyate itana.
1JO 4:19 Numa꞉la꞉, Godote a dopamo malemalelo nemalagidoloenami, ba꞉bema꞉ wadiyala a malemale emalagidolo ipuwalo bemedehonama꞉.
1JO 4:20 Ba꞉bema꞉ kebe lumagiti ebeno ekawitamo maubalo ba꞉ma ka꞉na da꞉goemene, “Nale Godoko malemalelo nemalagidolonamo huiyatiya ama꞉ kemalagidolonaha꞉,” ba꞉be lumagi ba꞉ ha꞉da amihodawala. A꞉iye! Ebete ba꞉moe hopolo ba emedena kebe lumagi ebeno baida꞉mo dumina ba꞉be ekawi malemalelo emalagidoloheno, ebete umiha꞉ma꞉ deda꞉na ba꞉be Godo malemalelo keba ka꞉na na꞉kemalagidolonamene? Gabo puliyanomola, a꞉kitanamene!
1JO 4:21 Ba꞉ hibila, Kelisote atamo kebe ko tutumu tabo dikaa꞉miya꞉ ba꞉be tabo ba꞉ ba꞉ma ka꞉nala, kebe lumagiti Godoko malemalelo demalagidolona, wadiyala ebete atu gabodo ebeno ekawi malemalelo na꞉ka-emalagidolonamene.
1JO 5:1 Numa꞉la꞉, Ya꞉suti Godokono Oemedawa Kelisoma꞉ deda꞉na, puya꞉te ba꞉be komo hibima꞉ da꞉midina ibi ba꞉ Godokono gugudila, ba꞉bema꞉ puya꞉te Nabiwi Godoko malemalelo demalagidolona, iba꞉te atumu ebeno gugudi hiliyonomo atu malemale komago ka-emalagidolena.
1JO 5:2 Ba꞉bema꞉ Godokono malemale emalagidolo komote agodolo ebeno komo guguda꞉tamo ditana, ale ba꞉be komo ba꞉ma ka꞉na iya꞉tawahanama꞉, keba tetelo ale ebe malemalelo ba emalagidolo ebeno tutumu tabamo da꞉papamila꞉hanakoma꞉, ba꞉ba tetelo ebeno malemale komote a ipuwalo hibilo itananako.
1JO 5:3 Ba꞉ hibila, Godoko malemalelo emalagidolo komo ba꞉gala ebeno tutumu tabamo papamiwata komo, ba꞉bi netewa komate hiya꞉hiya꞉ kapola꞉naha꞉, ibino oko owati komo ba꞉ kapiyala. Ba꞉gala ale ba꞉ma ka꞉na a꞉kemalagidolama꞉, Godokono tutumu tabamo papamila꞉ha komote atamo kodakodanomoma꞉ eda꞉na.
1JO 5:4 Ao, eba ka꞉naha꞉, mabu Godokono gugudi hiliyonomagodolo ebeno helo bitana iba꞉te ba꞉moe hopoeno kuba ododi helo kanakapumima꞉. Ba꞉bema꞉ hopo haboeno kuba ododili komo anakapumima꞉ lumagiti helonomoma꞉ keba ka꞉na na꞉keda꞉mene, iyo, pote na꞉ka꞉modobomene ba꞉moe hopoeno helo anakapumima꞉? Ba꞉ hibila, a ipuwalo pote ebeno hibima꞉ midi ipuwalo Ya꞉suku Godokono Guduma꞉ da꞉goena, ba꞉be dawate modobo helo ba꞉lawenakomene.
1JO 5:6 Ba꞉moe komo ba꞉ hibila. Ya꞉su Kelisote ba꞉moe hopamo da꞉piya꞉, ebete ebeno hibi komo hawakalimima꞉ ebete beya ba꞉gala hawi ka꞉ka꞉la꞉ komago atamo a꞉puluhukuya꞉, iyo, ebete ba꞉moi netewa gabodo ebeno komo atamo a꞉pehawakalimiya꞉. Ba꞉gala ba꞉moe ba꞉ eta komola, Godokono Gobogobote atumu Ya꞉sukunu hibi komo bekahawakalimina mabu ebe ba꞉ Godokono hibi komo hawakalimidawala.
1JO 5:7 Ba꞉bema꞉ Kelisokono komo kohawakalimima꞉ ba꞉moi netewa-kapiya komate ba꞉pola꞉namena꞉,
1JO 5:8 Godokono Gobogoboeno tabo komo, ba꞉gala Kelisokono hawiti da꞉ka꞉ka꞉liya꞉ ba꞉be komo, ba꞉gala hopo lumagiti ebe beyamo dadutiya꞉ ba꞉be komo, iyo, ba꞉moi netewa-kapiya komate ba꞉moe atu komo behawakalimina, Ya꞉su Kelisoko ba꞉ Godokono Gudula.
1JO 5:9 Numa꞉la꞉, hopo habanapa꞉te hibilo da꞉ga꞉lanaka, komo hiliyonomo tetelo ale ba꞉bi tabo komo hibima꞉ da꞉midilinakoma꞉ ba꞉be komo kubaha꞉. Huiyatiya Godote ebeno Guduino komoma꞉ kebe tabo ka꞉goena, wadiyala ale ba꞉be tabo hidamo uliti hibinomoma꞉ komidima꞉nema꞉, iyo, Godokono tabo komokomo ba꞉ hibinomola, ebete ha꞉da tabo a꞉kolamaga꞉le, ba꞉bema꞉ ebeno taboeno helote hopo tawakalubino helo na꞉gogolona.
1JO 5:10 Ba꞉bema꞉ kebe lumagiti Godokono Gudu hibima꞉ da꞉midina, ba꞉be lumagino tepo ipuwalo Godokono hibi tabote bitana. Huiyatiya numa꞉la꞉, kebe lumagiti Godokono tabo hibima꞉ midihino ba꞉be lumagiti ba꞉moe gabodo Godoko ha꞉da amihodawama꞉ midina, mabu Godote ebeno Guduino komoma꞉ hibilo da꞉goiya꞉, ba꞉be hibima꞉ midiha꞉dawate ba꞉be tabo ubiha꞉ma꞉ eda꞉na.
1JO 5:11 Ba꞉ hibila, Godote ebeno Guduino hibi komo hawakalimima꞉ ba꞉moe komo bododiya꞉, ebete ebeno Gudugodolo ditana ba꞉be wiboha꞉ ka꞉ka꞉ atamo ikaa꞉miya꞉.
1JO 5:12 Ba꞉be mabuma꞉ kebe lumagiti Godokono Gudu hibilo danukumina ebegodolo wiboha꞉ ka꞉ka꞉te bitana, huiyatiya kebe lumagiti Godokono Gudu laweheno, ebe niliya, hibi ka꞉ka꞉te ebegodolo kitanaha꞉.
1JO 5:13 Ba꞉bema꞉ la꞉ puya꞉te Godokono Guduino mahilo hibima꞉ da꞉midinama, na ba꞉moe leta la꞉tamo ododimo, la꞉le wiboha꞉ ka꞉ka꞉ da꞉lawiya꞉ma ba꞉be ka꞉ka꞉te la꞉godolo ba itana la꞉le hibilo kiya꞉tawahama꞉.
1JO 5:14 Ba꞉ hibila, ale toetoe tabago Godokono holoholo hapuamo da꞉nikulima꞉, ba꞉ba tetelo ale toleheno aeno modoboha꞉ komokomoma꞉ ebe kokiyamema꞉nema꞉, ba꞉bema꞉ a ba꞉moe komo iya꞉tawahala, ale kebe komo Godokono ubilo ebe da꞉toemehoma꞉, ebete ba꞉be toetoe tabo hibilo kulima꞉ne.
1JO 5:15 Ba꞉gala a iya꞉tawahala, Godote aeno toetoe tabo dulihomene ebete a hibilo kowalubima꞉ne, iyo, a kebe komo ebegodone lawema꞉ ebe da꞉toemehoma꞉ ebete atamo kikaa꞉mema꞉ne, mabu hiliyonomo tetelo ebete aeno toetoe tabo komokomo ulihonako.
1JO 5:16 Ba꞉bema꞉ la꞉le hibima꞉ midipi ipuwalo eta ekawino kuba ododi komo dumima, wadiyala la꞉ ebeno komo Godotamo toetoe tabamo nadipatimiya꞉la꞉, ba꞉bene Godote ebeno tepo ipuwoeno komo hiduimiti ebetamo ka꞉ka꞉ gala kakikamema꞉ne. Huiyatiya keba tetelo lumagiti konomo kuba dododimini, ba꞉ma ka꞉na ebete Godokono Gobogoboeno hibi oko kubama꞉ da꞉goemene, ba꞉ba tetelo ebeno ka꞉ka꞉ mabuma꞉ Godotamo akatoetoehala꞉, wadiyala ba꞉bako kubadawate hoea꞉mo na꞉toamene.
1JO 5:17 Numa꞉la꞉, ba꞉moe kuba ododi komo kapiyanomote lumagi hoea꞉mo komagatama꞉ne, ba꞉bema꞉ la꞉ naeno tabo komoma꞉ aka-ukuibilibilihala꞉. Ba꞉ hibila, a tawakalubino ododili komo hiliyonomo ipuwalo aeno tuputupuha꞉ komo ba꞉ Godokono kukala wakalami komola, huiyatiya kalakala konomola, ebegodolo helo bitana ba꞉bako hiya꞉hiya꞉ kuba ododili komo egebolea꞉mete ka꞉ka꞉ atamo gala kakikaa꞉mema꞉.
1JO 5:18 Ba꞉ hibila, a iya꞉tawahala Godokono guguda꞉te kuba ododili ipuwalo kemedehonaha꞉, mabu Godogodone da꞉hawakaluya꞉ ba꞉be Helodawate ibi na꞉ga꞉lulatelena Kubadawa Saitanate ibi kubahilamekapoma꞉. Ba꞉bema꞉ numa꞉la꞉, ba꞉moe hopo konomote ba꞉be Kubadawoeno helo ipuwalo itana, huiyatiya a iya꞉tawahala a hibima꞉ midipa꞉te ba꞉moe hopolo ba emedehona a ba꞉ Godokono gugudima꞉ eda꞉hanama꞉, ba꞉bema꞉ eta kuba komote a a꞉kologia꞉mene.
1JO 5:20 Ba꞉gala a eta komo iya꞉tawahala, Godokono Guduti ba꞉moe hopamo da꞉piya꞉, ebete atamo hido mulu komo a꞉pikaa꞉miya꞉ ale Hibidawoeno komo hidamo kiya꞉tawahanama꞉. Numa꞉la꞉, ba꞉be Hibidawa ba꞉ Godotela, ebe ba꞉ Wiboha꞉ Ka꞉ka꞉la, ba꞉bema꞉ kalakala konomola, ale ebeno Gudu Ya꞉su Kelisoko ipuwalo bemedehonama꞉!
1JO 5:21 Ba꞉bema꞉ naeno hidohido guguda꞉la꞉, wadiyala la꞉ hibi Godo kapiya ba adikumina, komo ida꞉da꞉li adikulame komamo ba꞉gala ibino ha꞉da amiho gobogoboeno ukui komamo akapapamila꞉hanakala꞉. Ba꞉moe ba꞉ naeno tabo kuititila. Ba꞉ba꞉la.
2JO 1:1 Na ba꞉moe leta dododimo, na ba꞉ hibima꞉ midipino watodawa etala. Godote ya꞉lo tetelo pui da꞉ka꞉lamiholiya꞉ iba꞉te ebeno gugudima꞉ keda꞉hanama꞉, ba꞉bi tawakalubino kapiyuimi ba꞉ ebeno uli kamena keba ka꞉nala꞉ka꞉ ba꞉ba ka꞉nala. Ba꞉ hibila, la꞉ ba꞉ ba꞉bi hibima꞉ midipi gugudilata, ba꞉bema꞉ nale la꞉ malemalelo nemalagidolenamata, ba꞉gala Godokono hibi komo iya꞉tawahapa꞉te ba꞉ atumu la꞉ na꞉kemalagidolenata. Numa꞉la꞉, nale ba꞉moe leta la꞉tamo ba꞉bema꞉ poememo,
2JO 1:2 mabu Godokono hibi komote a hiliyonomatamo duluhukuya꞉, ba꞉be hibi komote a ipuwalo ba itana a꞉kawibonamene, emedena tetelo agodolo bitanamene.
2JO 1:3 Ba꞉bema꞉ numa꞉la꞉, Nabiwi Godoko ba꞉gala ebeno Gudu Ya꞉su Kelisoko iba꞉godone atamo da꞉pikulina ba꞉be malemale komo ba꞉gala lumagitamo kuba huiya ikameha꞉ komo ba꞉gala hete komo, wadiyala ale Godokono hibi komo ba꞉gala ebeno malemale emalagidolo ipuwalo ba emedehona ba꞉moi netewa-kapiya komate agodolo na꞉pola꞉namena꞉.
2JO 1:4 Ba꞉bema꞉ hibima꞉ midipi guguda꞉la꞉, la꞉ komopi Nabiwi Godokono hibi komo ipuwalo da꞉wapata꞉lamenama, na ba꞉be komo uliti ko kalakala ba꞉bo lawimo, mabu ale ba꞉ba ka꞉na kowapata꞉lamenama꞉ Nabiwiti ya꞉lo a꞉tutumua꞉tiya꞉.
2JO 1:5 Ba꞉ hibila, la꞉ hibima꞉ midipi gugudino kapiyuimi ba꞉ Godokono uli kamena keba ka꞉nala꞉ka꞉, la꞉ ba꞉ba ka꞉nala. Ba꞉bema꞉ nale ba꞉moe leta bododimo ebeno eta tutumu tabo la꞉tamo ba꞉ma ka꞉na kohawakalimima꞉, wadiyala a ipuwalo etate eta malemalelo kemalagidolo, etate eta malemalelo kemalagidolo, a hiliyonomate ba꞉ba ka꞉na bewagelenama꞉. Na iya꞉tawala ba꞉moe tutumu la꞉tamo uli tutumuha꞉, ba꞉ pakala tutumula, iyo, Godote dopamo tupuimi mabuni atamo dikaa꞉miya꞉ ba꞉be tutumula.
2JO 1:6 Ba꞉bema꞉ ebeno malemale emalagidolo komo keba ka꞉nala꞉ka꞉? Ba꞉be komoeno ipuwa ba꞉ma ka꞉nala, ale aeno emede ipuwalo Godokono hiliyonomo tutumu tabamo ba꞉papamila꞉hanakoma꞉. Ba꞉ hibila, ba꞉bi tutumu hiliyonomo ipuwalo ale ebeno ko tutumu tabo tupuimi mabuni ba꞉ma ka꞉na uliya꞉ma꞉, a ebeno malemale komago ba꞉wapata꞉lamenakoma꞉.
2JO 1:7 Numa꞉la꞉, komo ha꞉da amihohopi hiliyonomate ya꞉lo a꞉mahila꞉haliya꞉, ba꞉ma tetelo hopo konomolo bemedehona. Iyo, iba꞉te tabo ba꞉ma ka꞉na ga꞉lana, “Ya꞉su Kelisoko lumagino apa꞉mo ba꞉moe hopamo kapehawakaluya꞉ha꞉,” ba꞉bema꞉ ba꞉be tabo ga꞉la komamo iba꞉te ibino komo ba꞉ma ka꞉na hawakalimina, ibi ba꞉ Konomo Ha꞉da Amihodawa ba꞉gala Kelisotamo Alaholo Komo Ododidawoeno gobogobagopila.
2JO 1:8 Huiyatiya la꞉eno komo hiya꞉la, mabu la꞉le kebe hido oko da꞉tupuimiya꞉ma ba꞉be okote la꞉godolo ekelaheno, galane la꞉le la꞉eno kokonomo huiya hibilo konuwatema꞉nemata. Ba꞉be mabuma꞉ la꞉ ha꞉kiya la꞉ hidamo nulamenala꞉, la꞉le ba꞉be oko huiya otakapoma꞉.
2JO 1:9 Ba꞉gala eta komo. Kebe lumagiti Kelisokono iya꞉tulame tabago emedenaheno ebe ha꞉kiya ebeno ubilo da꞉tona, ba꞉be lumagino ododili komate ebeno tepo ipuwoeno komo ba꞉ma ka꞉na hawakalimina, Godote ebe ipuwalo kemedenaha꞉. Huiyatiya kebe lumagiti Kelisokono iya꞉tulame tabago demedena, ba꞉be lumagi ipuwalo Nabiwi Godoko ba꞉gala ebeno Gudu Ya꞉suku hibilo bemedena.
2JO 1:10 Ba꞉bema꞉ eta kapela lumagiti la꞉ hibima꞉ midipa꞉tamo ba puluhuku, ebe ha꞉kiya ebe Godokono okodawama꞉ da꞉pegoemene, la꞉ hidamo! Ebete Kelisokono hibi iya꞉tulame tabago peheno la꞉ ebe kalakalago lawete la꞉eno genamamo ebe akadiya꞉minala꞉,
2JO 1:11 mabu kebe lumagiti ba꞉bako ha꞉da amihodawa kalakalago da꞉lawemene, ebete ebetamo helo ba꞉bo kikamema꞉ne Saitanakono oko kowatima꞉.
2JO 1:12 Ba꞉ hibila, nagodolo komo hiliyonomo komokomo ba꞉pola꞉na la꞉ kokiyahalamema꞉, huiyatiya na ubihinola ba꞉bi komokomo pepamo miya꞉teho, ba꞉bema꞉ naeno ukui bitana naeno apenomamo la꞉tamo kopuluhukuma꞉, iyo, gabote ditanamene na kopema꞉nemo. Ba꞉ba tetelo aeno kalakalate hibinomoma꞉ keda꞉ma꞉ne, mabu na la꞉eno hiya꞉hiya꞉ holoholo ba pulame aeno tabo komokomo ba꞉bo koga꞉lama꞉nema꞉.
2JO 1:13 Ba꞉bema꞉ hibila, kebe hibima꞉ midipa꞉te nago da꞉kapiyuiminaka, Godote ibi atumu ya꞉lo a꞉ka꞉lamiholiya꞉ iba꞉te ebeno gugudima꞉ keda꞉hanama꞉. Numa꞉la꞉, ibino sose kapiyuimi ba꞉gala la꞉eno sose kapiyuimi, ba꞉moi la꞉eno kapiyuimi netewate ba꞉ kapiya badininipaloeno bohelemele netewa huiyala, ba꞉bema꞉ iba꞉te ibino nolata tabo bepoema꞉ la꞉tamo. Ba꞉moe ba꞉ naeno tabo kuititila. Ba꞉ba꞉la.
3JO 1:1 Na ba꞉moe leta dododimo, na ba꞉ hibima꞉ midipino watodawa etala. Naeno hido mabulubi Ga꞉iyasi, ama꞉ nolata. Nale ba꞉moe leta ama꞉tamo poememo, mabu ama꞉la, nala, a Godokono hibi komo ipuwalo ba emedena nale ama꞉ malemalelo nemalagidolonamata.
3JO 1:2 Naeno hido mabulubi, na ama꞉ mabuma꞉ Godotamo ba꞉ma ka꞉na toetoenakomo, ebete ama꞉ ba owalubina amia꞉no emede ipuwalo hiliyonomo komate modobolo kopola꞉nama꞉. Ba꞉gala nale ama꞉ a꞉kadipatenakomata ama꞉le tawetaweheno kemedenama꞉, mabu amia꞉no tepo ipuwoeno hibima꞉ midi komote helonomoma꞉ keba ka꞉na keda꞉na, wadiyala amia꞉no apeno helote atumu modobonomoma꞉ na꞉ka-eda꞉namene.
3JO 1:3 Ba꞉bema꞉ numa꞉, komo hibima꞉ midipi ekaka꞉te natamo pelamete amia꞉no emede komo da꞉pehawakalimi, ba꞉ba tetelo na kalakala konomo ba꞉bo lawimo, mabu iba꞉te tabo ba꞉ma ka꞉na pega꞉luya꞉, ama꞉ Godokono hibi komo ipuwalo pata꞉nata ba꞉gala amia꞉no hibima꞉ midi komo kodakodanomola.
3JO 1:4 Ba꞉ hibila, naeno hibima꞉ midipi gugudi ipuwalo eta lumagino komo ba꞉ma ka꞉na dulimo, ebete Godokono hibi komo ipuwalo da꞉pata꞉na, ba꞉ba tetelo naeno kalakalate ebe mabuma꞉ hununomamo odolote konomoma꞉ keda꞉ma꞉ne.
3JO 1:5 Naeno hido mabulubi, numa꞉, ama꞉le hibima꞉ midipi ekaki Godokono oko owati ipuwalo ulamete ibi baa꞉mo ba꞉gala laha haboeno komamo dowalubilinaka, ba꞉bema꞉ ama꞉ atumu Godokono eta hibi okodawama꞉ eda꞉nata. Ba꞉gala kalakala konomola, Godokono okopi hiliyonomo ipuwalo ama꞉ amia꞉no tawakalubi kapiya kowalubilinaha꞉, ao, puya꞉te hiya꞉hiya꞉ kapela habahabane da꞉pelamenaka ama꞉le ibi atumu hidonomamo a꞉kowalubilinakata.
3JO 1:6 Ba꞉bema꞉ ama꞉le dopamo pui kowalubiliui, ba꞉ba꞉te atamo pikuliti sose tawakalubino holoholo hapulu amia꞉no malemale emalagidolo komo kalakalago a꞉pehawakalimiya꞉. Ba꞉bene eta tetelo ba꞉bako hidohido okopa꞉te ama꞉tamo gala da꞉kapikulimina꞉, iba꞉te la꞉godolo emedenate ba꞉bene eta habamo gala tolamema꞉ dewagelemena꞉, wadiyala ama꞉ ibi atumu malemale komago noelamiya꞉, ama꞉le Godokono komo hidohido ga꞉limapi gugudi keba ka꞉na kowalubilionaka ba꞉ba ka꞉na.
3JO 1:7 Ama꞉ numa꞉, ba꞉bako okopa꞉te Kelisokono mahilo mabuma꞉ ibino hiya꞉hiya꞉ haba miya꞉palete ya꞉lo ikuliya꞉, iba꞉te hiya꞉hiya꞉ habahaba hiliyonomolo ba wapata꞉lamena ebeno Hido Tabo hibima꞉ midiha꞉pa꞉tamo ba꞉bo konolamagimima꞉. Huiyatiya ba꞉be oko tupuimihino dopamo iba꞉te ibino tepo ipuwa ba꞉ma ka꞉na kodakoduilamiya꞉, iba꞉te eta kapiya deha꞉poto komo hibima꞉ midiha꞉pa꞉godone lawe modoboha꞉ma꞉ ga꞉lalo a꞉kalawa꞉mena꞉.
3JO 1:8 Ba꞉be mabuma꞉ wadiyala a hibima꞉ midipa꞉te ba꞉bako okopi baa꞉mo ba꞉gala laha haboeno komamo bowalubilinakoma꞉, iyo, a ba꞉be owalubi komodo Godokono Hibi Tabo olamagi oko iba꞉go kapimilo bowatihonama꞉.
3JO 1:9 Ba꞉ hibila, nale amia꞉no sose tawakaluba꞉tamo eta leta dopamo ododimo, huiyatiya ba꞉ba tetelo Diyotipasiti ba꞉be leta lawete na sose watodawaha꞉ma꞉ goelo ebete naeno tabamo kapapamiwataha꞉. Iyo, ebeno ubi komo ba꞉ ba꞉ma ka꞉nala, ebe ha꞉kiya ebe ba adipate sose tawakalubi ipuwalo ebe kapiya dopo lumaginomoma꞉ keda꞉ma꞉.
3JO 1:10 Ba꞉be mabuma꞉ naeno pe tetelo ebete kebe kuba komo dododilina ba꞉gala a sose watowatopino komoma꞉ kebe kuba tabo dolamagina, nale ba꞉bi komo sosetamo ba pehawakalilame ebe ba꞉bo kopikiyahamema꞉nemo. Numa꞉, ebe ubihinola ba꞉moi kapiyakapiya kuba komo ododili, ba꞉bema꞉ ebete eta komo ba꞉ma ka꞉na ka-ododinako, puya꞉te Godokono hibi oko owatima꞉ la꞉tamo da꞉pelamenaka, ebete ebeno awagaha ipuwalo ibi baa꞉mo ba꞉gala laha haboeno komamo a꞉kowalubila꞉le, ba꞉gala puya꞉te ibi dopamo dowalubilinakui ebete ibi ba꞉ dito duhilami. A꞉iye! Ebe ha꞉kiya ebe sose watodawama꞉ goelo ba꞉bi hidohido ukuia꞉gopino owalubili komoma꞉ kuba huiya ba ikalame, la꞉eno soseno kapiyuilame komamo pelamema꞉ talona ba꞉bo ihatelami!
3JO 1:11 Ba꞉bema꞉ naeno hido mabulubi, ama꞉ eta lumagino kuba ododi komo dumimina꞉, ebe akibamita꞉la꞉. Wadiyala ama꞉ hido komote na꞉ta꞉matuya꞉, mabu puya꞉te hidohido komo dododilina ibi ba꞉ Godokono gugudila, huiyatiya puya꞉te kuba komokomo dododilina iba꞉te dopamo Godokono hibi komo kumiya꞉ha꞉.
3JO 1:12 Ba꞉ ba꞉ba ka꞉na na Dimitiyasikono komo nemalagidolutamo, hiliyonomo tawakaluba꞉te ebeno ododili komoma꞉ hidohido tabo bega꞉lana, ba꞉gala ebeno emede komote atumu ebeno komo ba꞉ma ka꞉na hawakalimina, Godokono hibi komote ebe ipuwalo bitana. Numa꞉, a sose watowatopa꞉te atumu ebe hido lumaginomoma꞉ kaga꞉lanama꞉, ba꞉bema꞉ keba tetelo a watowatopa꞉te ba꞉mako tabo da꞉ga꞉lama꞉, ba꞉ba tetelo ama꞉ kiya꞉tawama꞉na꞉ta aeno tabo ba꞉ hibila mabu a ha꞉da amihohopima꞉ keda꞉hanaha꞉.
3JO 1:13 Ba꞉ hibila, nagodolo komo hiliyonomo komokomo ba꞉pola꞉na la꞉ kokiyahalamema꞉, huiyatiya na ubihinola ba꞉bi komokomo pepamo miya꞉teho.
3JO 1:14 Ba꞉bema꞉ naeno ukui bitana tete tatalila naeno apenomamo ama꞉tamo kopuluhukuma꞉, iyo, gabote ditanamene na kopema꞉nemo. Ba꞉ba tetelo na amia꞉no holoholo ba pumi aeno tabo komokomo ba꞉bo koga꞉lama꞉nema꞉.
3JO 1:15 Wadiyala Godokono kalakalate ama꞉godolo nitanamene. A hibima꞉ midipino kapiyuimi ipuwalo puya꞉te amia꞉no mabulubima꞉ deda꞉hana, iba꞉te ibino nolata tabo ama꞉tamo poema꞉, ba꞉bema꞉ la꞉eno kapiyuimi ipuwalo puya꞉te aeno mabulubima꞉ deda꞉hana, wadiyala ama꞉ sose tawakalubino holoholo hapulu ibi ka꞉lamiti aeno nolata tabo iba꞉tamo ba꞉bo na꞉hawakalimiya꞉. Ba꞉moe ba꞉ naeno tabo kuititila. Ba꞉ba꞉la.
JUD 1:1 Na ba꞉ Yudate, Ya꞉su Kelisokono okodawa etala ba꞉gala Ya꞉imesikono ekawila. La꞉ hibima꞉ midipi Nabiwi Godote dopamo da꞉ka꞉lamiya꞉la, iyo, ebete la꞉ pui malemalelo demalagidolena ba꞉gala Ya꞉su Kelisokono itagua꞉midale ipuwalo demedehonama, na ba꞉moe leta la꞉tamo poememo.
JUD 1:2 Ba꞉bema꞉ wadiyala hete komo ba꞉gala lumagitamo kuba huiya ikameha꞉ komo ba꞉gala malemale emalagidolo komo, ba꞉moi netewa-kapiya komate la꞉godolo konomamo na꞉pola꞉namena꞉.
JUD 1:3 Naeno hidohido mabuluba꞉la꞉, ale Godogodone kapimilo da꞉lawiya꞉ma꞉, na dopamo ba꞉be ka꞉ka꞉ mula꞉ komoma꞉ leta ipuwalo olamagima꞉ ewagelimo. Huiyatiya ba꞉ma tetelo eta ukuiti natamo a꞉pi, mabu nale ba꞉moe komo ulimo, Godokono ubi komamo papamila꞉haha꞉ dubate la꞉eno kapiyuimi ipuwamo diya gabodo a꞉pa꞉pa꞉la꞉huya꞉. Ba꞉be mabuma꞉ na ubila ba꞉moe eta komamo la꞉ ba꞉ma ka꞉na kowalubilima꞉, Godote a ebeno tawakaluba꞉tamo dikaa꞉miya꞉, wadiyala la꞉ ba꞉be hibima꞉ midi komoma꞉ helonomamo nalaholonakuya꞉la꞉. Numa꞉la꞉, ba꞉bakobako dubate Godokono malemale hawakalimino tabo hiya꞉ma꞉ miditi na꞉ga꞉lanaka, lumagiti kuba dododimini Godote huiya a꞉kikama꞉mene mabu ebeno malemale konomola, ba꞉gala iba꞉te na꞉kaga꞉lana Ya꞉su Kelisoko hibi ka꞉ka꞉ mula꞉dawaha꞉. A꞉iye, ebe kapiya ba꞉ aeno hibi Namutudawala ba꞉gala Kodawala, ba꞉bema꞉ ibino kuba mabuma꞉ Godokono Buka tabote ya꞉lo tetenomolo a꞉goiya꞉, galane iba꞉te ibino temeteme huiya hibilo kolawema꞉na꞉!
JUD 1:5 Iyo, Godote kuba ododilipa꞉tamo huiya dikalamemene, la꞉ ba꞉be komo dopamo iya꞉tawahuya꞉mata, huiyatiya na ubila kebe olalati komote Godokono Isalaela tawakaluba꞉tamo duluhukuya꞉, la꞉ ba꞉moe komo gala na꞉kemalagidolala꞉. Numa꞉la꞉, Godote ibino ka꞉ka꞉ mula꞉lelamelo Isipiti hopone ibi duluhukulateliya꞉, gala hapuni komo iba꞉te ebe hibima꞉ kamidiya꞉ha꞉, ba꞉bema꞉ ebete ibi dito anakapulamiya꞉.
JUD 1:6 Ba꞉gala ba꞉moe eta komo na꞉kuma꞉la꞉, tupuimi mabuni Hunu Haboeno komo nopopa꞉te ibino hido emede haba miya꞉pate Godotamo alaholo komo ba꞉bo tupuimiya꞉. Ba꞉be mabuma꞉ Godote ibi ta꞉tehoha꞉ auli hala꞉mo matuhulameholete du ipuwamo dito iya꞉hekiya꞉, iba꞉te ba꞉bolo ibino kuba huiya uwatema꞉ Godokono Ko Hegela kolatiminama꞉.
JUD 1:7 Ba꞉gala wadiyala la꞉ Sodomo habanapi ba꞉gala Gomola habanapi ba꞉gala ibi tamelo demedehonama꞉ ba꞉bi habahabanapi ibino komo atumu na꞉kemalagidolala꞉. Ibi hiliyonomate atumu Godokono kukala badikamidaliya꞉, ba꞉ma ka꞉na ibi ipuwalo etate etatamo kateneno hiya꞉hiya꞉ kuba ubi komokomo bododilinakuya꞉. Ba꞉be mabuma꞉ Godote ibino kuba huiya iba꞉tamo ikalamiya꞉, ba꞉bene ba꞉ma tetelo iba꞉te ha꞉gaha꞉ koe ipuwalo ko temeteme biya꞉tawahana. Ba꞉moe ba꞉be mabuma꞉ puya꞉te ba꞉ma tetelo kuba ododili ipuwalo demedehona, wadiyala iba꞉te ba꞉bi tawakalubino temeteme komo ba emalagidolo hidohido ukui nuwata꞉mena꞉ iba꞉te atu kuba huiya lawekapoma꞉.
JUD 1:8 Ba꞉bema꞉ puya꞉te diya gabodo la꞉ ipuwamo da꞉pa꞉pa꞉la꞉hui, ba꞉bi dubate ba꞉ atumu ibino kateneno kuba ododili ubi gabodo ibino ape ba꞉bo kubahilamenaka. Ba꞉gala iba꞉te Godotamo papamila꞉hale ubiha꞉ma꞉ eda꞉halo Hunu Haboeno nopopi ba꞉bo iduduputilamenaka, mabu ba꞉bako awagaha ukui komate iba꞉tamo hiyolo ikulinaka.
JUD 1:9 Huiyatiya wadiyala la꞉le Hunu Haboeno nopopino Gawadubu Maikolokono komo nemalagidolala꞉, ebeno helo konomola huiyatiya ebete ba꞉be komoma꞉ kawagahanaha꞉. Ba꞉bema꞉ keba tetelo ebete Mosesekono hoe ape lawema꞉ Saitanakoba꞉ dolowabeletihuiya꞉, ba꞉ba tetelo ebete Saitanatamo eta iduduputimi tabo goeheno na꞉goiya꞉, “Kodawa Godote ha꞉kiya ebeno tabamo ama꞉ koduhimima꞉na꞉ta, huiyatiya naeno heloamo nale ama꞉tamo eta komo a꞉kododa꞉mo!”
JUD 1:10 Huiyatiya la꞉ ipuwalo da꞉pola꞉na ba꞉bi dubuino komo eba ka꞉naha꞉. Iba꞉te Hunu Haboeno komokomo iya꞉tawaha꞉, ba꞉bema꞉ iba꞉te ba꞉be haboeno nopopino komoma꞉ ibi iduduputilame tabo bega꞉lana. A꞉iye! Iba꞉te kapiya komo iya꞉tawahanomola, ba꞉be komo ba꞉ ba꞉moe hopoeno katena꞉mo wapata꞉lame gabola, iyo, ibi ba꞉ tumu goegoe keba ka꞉nala꞉ka꞉ ba꞉ba ka꞉nala mabu iba꞉te hidohido ukuihino dito emedehona! Ba꞉bema꞉ numa꞉la꞉, ibino kateneno ubi komate ibi hibilo kanakapulamema꞉na꞉.
JUD 1:11 Iyo, Godote ibino kuba huiya iba꞉tamo dikalamemene ba꞉be kuba huiya konomoma꞉ keda꞉ma꞉ne, mabu iba꞉te Ka꞉inikono gabodo tolame ya꞉lo a꞉tupuimiya꞉. Ba꞉gala ibi Ba꞉ilamako keba ka꞉nala꞉ka꞉ ba꞉ba ka꞉nala, iba꞉te mani koamo emalagidololo koko kuba komokomo ba꞉bo ododilinaka. Ba꞉gala ibi Kolako huiyama꞉ eda꞉hana, ba꞉ma ka꞉na iba꞉te Godotamo papamila꞉ha ubihinola, ba꞉bema꞉ hibila, Godote Kolakono kuba mabuma꞉ ebe keba ka꞉na kanakapumiya꞉, ebete ibi ba꞉ atumu kohawaminadigalema꞉ne.
JUD 1:12 Numa꞉la꞉, la꞉ hibima꞉ midipino kapiyuimi poko baa꞉ naha tetelo, ba꞉bi dubuino komo ba꞉ hido baa꞉ ipuwalo da꞉pola꞉na ba꞉bi kuba nene huiyala, mabu baa꞉ naha ipuwalo hilopohenola, iyo, ibi ha꞉kiya ibi kapiya bemalagidolena. Ba꞉bema꞉ hopote gagalema꞉ deda꞉, ba꞉ba tetelo huhuti da꞉wadahenako ba꞉bi bubuti dito kopokoa꞉tahalema꞉na꞉ huiyatiya wegolate a꞉koamene, ba꞉bi dubu ba꞉ ba꞉ba ka꞉nala mabu iba꞉te tawakaluba꞉tamo giba a꞉kikalama꞉la꞉. Ba꞉gala ba꞉bi dubu ba꞉ nolohoha꞉ gao kehala, mabu ko gogote da꞉pemene ibino haha da꞉pemagobelelamemene hakamo dito kopiya꞉hekema꞉ne, iyo, ibino ka꞉ka꞉te ba꞉ba ka꞉na wibonomo kowibohoma꞉na꞉.
JUD 1:13 Ba꞉bema꞉ komo netewa go tabote ba꞉bi dubuino komo hawakalimima꞉ ba꞉pola꞉na. Dopo go taboeno komo ba꞉ma ka꞉nala, ba꞉bi dubuino hilopo ododili komo ba꞉ koko gawiyate hununomamo da꞉pakaminanaka ba꞉ba ka꞉nala, ba꞉gala eta go tabo ba꞉ma ka꞉na itana, ba꞉bi dubu ba꞉ du ipuwalo keka꞉keka꞉lo da꞉wapata꞉lamena ba꞉bi oloki huiyala. Ba꞉bema꞉ Godote ibi mabuma꞉ kebe du bobo konomo ya꞉lo dododilamiya꞉, ebete ibi ba꞉bamo konoelamema꞉ne iba꞉te emedena tetelo ba꞉bolo temetema꞉go konemedehonama꞉.
JUD 1:14 Numa꞉la꞉, A꞉da꞉mekono eyoni gugudi hiliyonomo ipuwalo Inokote ba꞉ sa꞉ba꞉ni badininipaloeno dopo dubu guduma꞉ ediya꞉, ba꞉gala ebe ba꞉ Godokono ukui hawakalimidawa etala. Ba꞉bema꞉ ba꞉moe Inokote ba꞉bi kuba dubuino komoma꞉ ya꞉lo tetelo ba꞉ma ka꞉na goiya꞉, “Numa꞉la꞉, Kodawa Godote ebeno mumulunomo talona nopopa꞉go pete,
JUD 1:15 ebete hopo habanapino komokomo hiliyonomo ba panagilamelelame ebeno ubi komamo papamila꞉haha꞉ tawakaluba꞉tamo kuba huiya kopikalamema꞉ne. Iyo, iba꞉te Godotamo kebe kuba komokomo dododilinaka ba꞉gala ebetamo kebe kuba tabo da꞉ga꞉lanaka, ba꞉bi komokomoma꞉ kuba huiyate iba꞉tamo hibilo kopema꞉ne.”
JUD 1:16 Ba꞉bema꞉ wadiyala la꞉ ba꞉moi kuba ododilipino komo hidamo niya꞉tawahala꞉. Iba꞉godolo ubiha꞉ tabo ga꞉la konomola, ba꞉gala ibi ha꞉kiya ibino kuba ulameheno komopi kubapima꞉ ka꞉laminaka. Iba꞉te ibino kateneno ubi gabodo wapata꞉lamema꞉ helohelonomola, ba꞉gala ibi ha꞉kiya ibi awagaminalelo eta lumagi ha꞉da amiho gabodo da꞉milimihomena꞉, ba꞉ba tetelo iba꞉te ubi bihatena ibino tabo olamagi komodo ebegodone eta hido komo dito kolawema꞉.
JUD 1:17 Ba꞉bema꞉ naeno hidohido mabuluba꞉la꞉, Kodawa Ya꞉su Kelisokono oelamepi dubate la꞉ dopamo da꞉kiyalamiya꞉la, wadiyala la꞉ ba꞉be tabo gala hidamo na꞉kemalagidolala꞉.
JUD 1:18 Iba꞉te la꞉tamo ba꞉ma ka꞉na ga꞉luya꞉, “Kuititi tetelo kubapa꞉te Godokono ubi komamo papamila꞉ha ubiha꞉ma꞉ eda꞉halo ibino kateneno ubi gabodo ba wapata꞉lame la꞉ hibima꞉ midipi kiya꞉da꞉latelema꞉na꞉ta.”
JUD 1:19 Numa꞉la꞉, Ya꞉sukunu oelamepino tabo ba꞉ hibila. Ba꞉moi kuba ododilipi ba꞉ la꞉eno kapiyuimi ipuwalo anagiya꞉mida komo dododina ba꞉moi ba꞉bi tawakalubila, iyo, iba꞉te ibino kateneno ubi komamo ba papamila꞉hale, Godokono Gobogobote ibi ipuwalo kemedenaha꞉.
JUD 1:20 Ba꞉bema꞉ naeno hidohido mabuluba꞉la꞉, wadiyala la꞉ la꞉eno hibima꞉ midi komo talonanomoma꞉ ga꞉late kodakodalo ba lawe ba꞉bo napepehonala꞉, ba꞉gala la꞉ Godokono Gobogoboeno heloamo ebetamo na꞉toetoehonala꞉.
JUD 1:21 Ba꞉bene la꞉le Godokono malemale emalagidolo ipuwalo demedehonama, ba꞉be komo miya꞉paheno Kodawa Ya꞉su Kelisokono pe komo na꞉latiminala꞉. Ba꞉ hibila, ebete da꞉pemene la꞉le kebe kuba komokomo dododilinakuima, ebete ba꞉bi kuba hiliyonomo egebolelame tabo polamagiti wiboha꞉ ka꞉ka꞉ la꞉tamo ba꞉bo kopikalamema꞉na꞉ta.
JUD 1:22 Ba꞉bema꞉ hibima꞉ midi ipuwalo puya꞉te kodakodalo la꞉mota꞉hanaheno ukui gagagagama꞉ deda꞉hanaka, la꞉ ibi malemalelo ba emalagidole ibi nowalubilinakuya꞉la꞉,
JUD 1:23 iyo, ba꞉moe modobo tete ba itana, wadiyala la꞉ ibi Saitanakono koe ipuwane tiyonomolo nuluhukulatela꞉la꞉, iba꞉te ibino ka꞉ka꞉ mula꞉ komo Ya꞉sugodone kolawema꞉. Ba꞉gala wadiyala la꞉ komo kuba ododilipi atumu malemalelo ba emalagidole na꞉kowalubila꞉la꞉. Huiyatiya la꞉ hidamo, ibi ba owalubili ibino kuba ododili komokomo kokoha꞉ma꞉ a꞉kaga꞉lamata! Numa꞉la꞉, iba꞉te ibino kateneno kuba ubilo dododilinaka, ba꞉bi komo ba꞉ ibino pupulino ilina huiyala, ba꞉bema꞉ wadiyala la꞉ ba꞉bi dalowa꞉go kaliko ubiha꞉ma꞉ eda꞉halo la꞉eno kokotamo akologihola꞉la꞉, ibino kuba dalowa꞉ komote la꞉tamo pekapoma꞉.
JUD 1:24 O hibima꞉ midipa꞉la꞉, aeno Hido Helodawate bemedena, ebe modobola la꞉ ba a꞉ga꞉lulatele la꞉le a꞉kaguda꞉mata. Ba꞉ hibila, ebete la꞉ kubaha꞉pima꞉ midiliti, ba꞉bene ko kalakalanomago ebete la꞉ ebeno a꞉la꞉mina holoholo hapuamo komagahelema꞉na꞉ta.
JUD 1:25 Ebe kapiya ba꞉ Godotela, ebete aeno Kodawa Ya꞉su Kelisoko ipuwado aeno Ka꞉ka꞉ Mula꞉lea꞉medawama꞉ eda꞉na. Ba꞉ hibila, ebeno awagaha komo ba꞉gala ebeno hido a꞉la꞉mina komo, ebeno konomo helo ba꞉gala ebeno ko gawadubu komo, ba꞉moi komate dopamo tupuimi mabuni ebegodolo pola꞉nama꞉! Ba꞉bema꞉ wadiyala ba꞉ma tetelo ba꞉gala emedena emedena tetelo ba꞉moi atu komate ebe kapiyagodolo na꞉kapola꞉namena꞉! Ba꞉moe ba꞉ naeno tabo kuititila. Ba꞉ba꞉la.
REV 1:1 Ba꞉moe hopo habalo tete tatalilo dikulihomena꞉, Ya꞉su Kelisote ba꞉bi komokomo ebeno huiyaha꞉ okopa꞉tamo ba꞉moe bukalo hawakalilamena. Ba꞉ hibila, Godote ba꞉bi komo Ya꞉sutamo dopamo hawakalilamete, ba꞉bene ebete ebeno nopodawa na ebeno huiyaha꞉ okodawa Yonetamo poemi, nale ba꞉bi atu komo ebegodone hidamo kiya꞉tawama꞉.
REV 1:2 Ba꞉bema꞉ na Yonete kebe komo nopodawagodolo dulamimo, nale ba꞉bi hiya꞉hiya꞉ komo ba꞉moe bukamo miya꞉tehomo, iyo, kebe tabo komokomo Godogodone natamo da꞉pikuli ba꞉gala Ya꞉suti natamo kebe hibi komokomo da꞉hawakalilami, nale ba꞉moe bukalo ba꞉bi hiliyonomo komo ama꞉ buka ka꞉lamiholedawatamo olamagitamo.
REV 1:3 Ba꞉bema꞉ lumagiti ba꞉moe bukoeno tabo da꞉ka꞉lamiholemene, ebete na꞉kalakalamene! Ba꞉gala puya꞉te ba꞉moe bukoeno tabo ulihote da꞉papamila꞉hamena꞉, iba꞉te na꞉kalakalahamena꞉! Ba꞉ hibila, Godote kebe hiliyonomo komo ba꞉moe bukalo da꞉hawakalilamena, tete tatalila ba꞉bi komate kikulihoma꞉na꞉.
REV 1:4 Na Yonete ba꞉moe bukoeno tabo komokomo A꞉isiya hopoeno sa꞉ba꞉ni habahaboeno sose tawakaluba꞉tamo poelamitamo. Ba꞉moe hopo tupuimihino Godote dopamo nemedenami, ba꞉gala ba꞉ma tetelo ebete bemedena, ba꞉gala ebete emedena emedena tetelo bemedenamene. Ba꞉ hibila, ebeno Gobogoboeno sa꞉ba꞉ni komate ebeno Ko Gawadubu luta bahi dopo hapulu la꞉mota꞉hana. Ba꞉gala ebeno hibi komo hawakalimidawa ba꞉ Ya꞉su Kelisotela, ebe ba꞉ hoe ipuwane da꞉mahiguya꞉ ba꞉be Dopodawala, ba꞉gala ebe hopo haboeno hiliyonomo koko gawadubuino Namutudawala. Ba꞉bema꞉ wadiyala malemale komo ba꞉gala hete komote la꞉ hibima꞉ midipi ipuwalo na꞉pola꞉namena꞉, mabu ba꞉bi netewa komate Godogodone ba꞉gala ebeno Gobogobogodone ba꞉gala Ya꞉sugodone la꞉tamo puluhukuna. Ba꞉ hibila, Ya꞉suti a malemalelo emalagidoloena, ba꞉gala ebete ha꞉kiya ebeno hawa꞉mo a aeno kuba ododili ipuwane uluhukua꞉tete,
REV 1:6 ebeno Ko Gawadubu habanapima꞉ a꞉midiya꞉, ale emedena tetelo ebeno Nabiwi Godokono oko kowatinama꞉. Ba꞉bema꞉ wadiyala konomo awagaha komo ba꞉gala konomo helo komote Ya꞉su Kelisogodolo emedena emedena tetelo na꞉pola꞉namena꞉! Ba꞉moe tabo hibinomola, ba꞉ba꞉la!
REV 1:7 Mu numitota꞉la꞉, ebete hawai ipuwado puluhukuta! Ba꞉bema꞉ hopo habanapi hiliyonomate ebe ibino baida꞉mo kumima꞉na꞉, ba꞉gala puya꞉te ebe ba anakapumi tabilo kibila꞉mo dahohamiduya꞉ iba꞉te ebe ba꞉ atumu kakumima꞉na꞉, iyo, ba꞉moe hopo konomolo demedehona ba꞉bi tawakalubi hiliyonomate ibino hiya꞉hiya꞉ tama kapiyuimi ipuwalo ebe eba toleme konomamo ba꞉bo kihimitama꞉na꞉. Ba꞉bema꞉ wadiyala ba꞉be tetete hibilo nuluhukamene!
REV 1:8 Kodawa Godote na꞉goena, “Na ba꞉ Mabula ba꞉gala na ba꞉ Kuititila!” Ba꞉ hibila, ebe Helonomodawala, ebete ba꞉moe hopo tupuimihino dopamo nemedenami, ba꞉gala ebete ba꞉ma tetelo bemedena, ba꞉gala ebete emedena emedena tetelo bemedenamene!
REV 1:9 Na ba꞉ Yonetela, a hibima꞉ midipino badininipala ipuwalo na ba꞉ ekawi etala. Iyo, na ba꞉gala la꞉, a ba꞉ puya꞉te Ya꞉suku ta꞉mata mabuma꞉ koko temeteme ipuwalo kapimilo demedehonama꞉ ba꞉bi tawakalubila, huiyatiya a ebeno Ko Gawadubu habanapima꞉ ba eda꞉hana aeno tepo ipuwa kodakoduilamete heloha꞉ma꞉ keda꞉hanaha꞉. Ba꞉ hibila, nale Godokono tabo komokomo ba꞉gala Ya꞉sukunu hibi komo tawakaluba꞉tamo dolamaginakomo, ba꞉bema꞉ Loma gabomana꞉te na lawenete kehaha꞉ kolomoeno Pa꞉tamoso haka deha꞉potoamo oenamiya꞉ nale naeno kuba huiyama꞉ oko ba꞉bolo konowatinama꞉.
REV 1:10 Ba꞉bene eta tetelo, ale kebe hegelalo Kodawa Ya꞉suku dadikuminakoma꞉, ba꞉be hegelalo ebeno Gobogoboeno heloamo naeno baiditi hiya꞉ma꞉ deda꞉hanami naeno ginimi hapulu ebeno tabo madodo konomo bulimo, gebole diyamo keba ka꞉nala꞉ka꞉ ba꞉ba ka꞉nala.
REV 1:11 Ebete natamo ba꞉ma ka꞉na goi, “Ama꞉le naeno heloamo dulamenakomena꞉ ba꞉bi komo hiliyonomo kapiya bukamo miya꞉tehote, ba꞉bene ba꞉be buka Epesese ba꞉gala Samena, Pegamama ba꞉gala Tayataila, Sadisi ba꞉gala Piladelapiya ba꞉gala Lodosiya, ba꞉moi sa꞉ba꞉ni habahabamo noemiya꞉ ibi ipuwalo demedehona ba꞉bi sose tawakalubi hiliyonomate koka꞉lamiholema꞉.”
REV 1:12 Ba꞉bene pote natamo tabo da꞉goi, nale ba꞉be dawa umima꞉ dohobiguimo, huiya koko golodo alo sa꞉ba꞉ni ba ulamita
REV 1:13 ibi tetenomolo ebete la꞉nalo ba꞉bo umimo. Ba꞉be dawoeno holoholo ba꞉ hopo lumagino holoholo huiyala, ba꞉bene ebete da꞉puli ba꞉be ga꞉ga꞉ kalikote haka ologi, ba꞉gala ebeno bodolo tetelo ditama꞉nui ba꞉be kawali ba꞉ huiya konomo golodo ilinala.
REV 1:14 Ba꞉bene ebeno wato ba꞉gala hinibo keyakeya hibinomola, alomoeno a꞉la꞉mina keba ka꞉nala꞉ka꞉ ba꞉ba ka꞉nala, ba꞉gala ebeno baiditi koe powamo wamotemeti.
REV 1:15 Ba꞉bene ba꞉be dawoeno natote alonomoma꞉ eda꞉hami, iyo, okodawate hiya꞉nomo auli ilinoeno dalowa꞉ koa꞉mo demadolamemene, ba꞉bene koe ipuwane uluhukutiti kalikamo ba meteteho a꞉la꞉minanomoma꞉ da꞉midinako, ebeno natote ba꞉ba ka꞉na a꞉la꞉minalemiti, ba꞉gala konomo beyate da꞉goenapenanako ebeno tabo madodo ba꞉ ba꞉ba ka꞉nala.
REV 1:16 Ba꞉bene ebeno tu hapu kokotolo sa꞉ba꞉ni oloki na꞉pola꞉ma꞉nui, ba꞉gala ebeno tabo ipuwane kiyokiyo giha giliti puluhukui, ba꞉gala hegela tuli tetelo hegelate keba ka꞉na ka꞉la꞉minutanako ebeno holoholoeno a꞉la꞉mina ba꞉ ba꞉ba ka꞉nala.
REV 1:17 Ba꞉bema꞉ nale ba꞉be Kodawa dumimo, nale ebeno nato mabamo dito guimo, hoe lumagi keba ka꞉nala꞉ka꞉ ba꞉ba ka꞉na. Ba꞉ba tetelo ebete ebeno tu hapu kokotamo na ba ologini na꞉goi, “Ama꞉ akatoletola꞉la꞉, na ba꞉ Mabula ba꞉gala na ba꞉ Kuititila.
REV 1:18 Iyo, na ba꞉ emedena tetelo demedenamo ba꞉be Kodawala, mabu nale da꞉hoiya꞉mo ka꞉ka꞉ gala a꞉kalawiya꞉mo, ba꞉be ka꞉ka꞉te emedena emedena tetelo a꞉kawibonamene, ba꞉bema꞉ nagodolo helo konomo bitana nale Ha꞉lahapino Haboeno gigiho a꞉hiya꞉midate komo tawakalubi ba꞉bamo konoelamema꞉ ba꞉gala komo tawakalubi ba꞉be haba ipuwane ka꞉ka꞉mo kuluhukulatelema꞉.
REV 1:19 Ba꞉bema꞉ wadiyala ama꞉le nagodolo dulamemena꞉ ba꞉bi hiliyonomo komo bukamo na꞉miya꞉tehuya꞉, iyo, kebe komate ba꞉ma tetelo dikulihomena꞉ ba꞉gala galane tetelo dikulihomena꞉ ba꞉bi komokomo hiliyonomo amia꞉no bukalo na꞉hawakalilamiya꞉.
REV 1:20 Ka꞉lo ama꞉le naeno kokotolo dulamita ba꞉moi sa꞉ba꞉ni oloki, ba꞉gala na tetenomolo da꞉la꞉namo ba꞉moi sa꞉ba꞉ni golodo alo, ba꞉bi netewa komoeno ipuwate hopo habanapa꞉tamo awalelalo pola꞉na. Huiyatiya numa꞉, ba꞉bi komoeno ipuwa nale ama꞉ ba꞉ma ka꞉na iya꞉tumimata, sa꞉ba꞉ni oloki ba꞉ A꞉isiya hopoeno sa꞉ba꞉ni sose kapiyuimipino nopopila, Godote ba꞉bi nopopi ya꞉lo oelamiya꞉ iba꞉te ba꞉bi sose tawakalubi hidamo kobuiya꞉minalenama꞉, ba꞉gala sa꞉ba꞉ni alo ba꞉ ba꞉bi sa꞉ba꞉ni habahaboeno hibima꞉ midipino hiya꞉hiya꞉ kapiyuimila.”
REV 2:1 Ba꞉bene Kodawate tabo gala natamo na꞉kagoi, “Wadiyala ama꞉ Epesese sose nopodawatamo tabo ba꞉ma ka꞉na noema꞉. Na ba꞉ sa꞉ba꞉ni oloki tu hapu kokotamo uwatedawala, ba꞉gala na ba꞉ sa꞉ba꞉ni golodo alo ipuwalo pata꞉dawala, ba꞉bema꞉ nale la꞉ Epesese hibima꞉ midipa꞉tamo tabo ba꞉ma ka꞉na olamagitamo.
REV 2:2 La꞉le dododilinakoma nale ba꞉bi komokomo iya꞉tawala, ba꞉ma ka꞉na la꞉le kodakoda oko ba owatina temeteme duwatenakoma, la꞉eno tepo ipuwa kodakoduilamete heloha꞉ma꞉ a꞉keda꞉halemata. Ba꞉gala na iya꞉tawala, la꞉le kuba ododilipino komo ubiha꞉ma꞉ ba eda꞉hana, puya꞉te ibi ha꞉kiya ibi naeno oelamepima꞉ ha꞉da amiho gabodo da꞉ga꞉lana, la꞉le ibino komo hidonomamo ulamelelamete ibino ha꞉da amiho komo ba꞉bo hawakalilamenakomata.
REV 2:3 Iyo, la꞉le na mabuma꞉ koko temeteme ba uwatena, huiyatiya la꞉eno tepo ipuwa kodakoduilamete naeno oko owatima꞉ heloha꞉ma꞉ keda꞉hanaha꞉.
REV 2:4 Na huiyatiya la꞉godolo ba꞉moe kapiya modoboha꞉ komo buminamo, la꞉le dopamo tetelo etate eta malemalelo konomamo keba ka꞉na kemalagidolonakuima, la꞉ ba꞉be komo a꞉miya꞉puimata.
REV 2:5 Ba꞉bema꞉ numa꞉la꞉, la꞉eno hibima꞉ midi ipuwalo la꞉ guditi kebe hido komo da꞉miya꞉puima, ba꞉be komo gala kemalagidolote la꞉eno kuba ododili ipuwane ohobila꞉te, la꞉le dopamo dododilinakuima ba꞉bi hidohido komo ododili gala na꞉katupuimiya꞉la꞉. Ba꞉ hibila, la꞉le kuba ododili ipuwane ohobila꞉heno, nale pete la꞉eno kuba huiya la꞉tamo ba pikalame la꞉eno alo gobogobamo dito kopihatelamema꞉nemata.
REV 2:6 Huiyatiya numa꞉la꞉, kapiya komote la꞉godolo modobolo ditana ba꞉be komo ba꞉ ba꞉ma ka꞉nala, puya꞉te Nikolayasiko ta꞉matapima꞉ deda꞉hana, la꞉le ba꞉bi kuba ododilipino komo ubiha꞉ma꞉ konomamo eda꞉hanamata, nale ibino komo ubiha꞉ma꞉ keba ka꞉na keda꞉namo ba꞉ba ka꞉na.
REV 2:7 Ba꞉bema꞉ galagodawa, Godokono Gobogobote sose tawakaluba꞉tamo dolamagita, wadiyala ama꞉ ba꞉be tabo nulia꞉! Ba꞉ hibila, puya꞉te ibino hibima꞉ midi ipuwalo wato kikipo da꞉lawemena꞉, nale iba꞉tamo modobo tabo kogoema꞉nemo, iba꞉te Godokono Pali ipuwalo da꞉la꞉na ba꞉be kehoeno wiboha꞉ ka꞉ka꞉ gao konahama꞉.”
REV 2:8 Ba꞉bene Kodawate tabo gala natamo na꞉kagoi, “Wadiyala ama꞉ Samena sose nopodawatamo tabo ba꞉ma ka꞉na noema꞉. Na ba꞉ Mabula ba꞉gala na ba꞉ Kuititila. Nale da꞉hoiya꞉mo ka꞉ka꞉ gala a꞉kalawiya꞉mo, ba꞉bema꞉ nale la꞉ Samena hibima꞉ midipa꞉tamo tabo ba꞉ma ka꞉na olamagitamo.
REV 2:9 La꞉le na ta꞉mahene mabuma꞉ koko temeteme ipuwalo demedenama, nale ba꞉be komo iya꞉tawala. Ba꞉gala na ba꞉moe eta komo iya꞉tawala, la꞉le ilinaheno dito demedenama huiyatiya la꞉ Godokono Hunu Habalo dogodogopima꞉ eda꞉hanamata. Ba꞉gala puya꞉te ha꞉da amiho gabodo ibi ha꞉kiya ibi Yunapima꞉ ga꞉lalo la꞉ kuba ododilipima꞉ da꞉ka꞉lamina, nale ibino kuba tabo ga꞉la komo iya꞉tawala, iyo, ibino komo ba꞉ma ka꞉nala, ibi ba꞉ Saitanakono kapiyuimi tawakalubila, Godokonoha꞉.
REV 2:10 Ba꞉bema꞉ la꞉le tete tatalilo da꞉lawema ba꞉be ko temetemema꞉ akatoletolehala꞉. Ba꞉ hibila, Saitanakono okopa꞉te komo la꞉ du genamamo da꞉niya꞉hekemena꞉, ba꞉ba tetelo Godote la꞉eno hibima꞉ midi komo pawiholelo ba꞉ma ka꞉na kulamelelamema꞉na꞉ta, da꞉ hibila꞉ o da꞉ hibiha꞉. Ba꞉bene la꞉le na ta꞉mahene mabuma꞉ ta꞉ni hegelalo koko temeteme ba uwate, la꞉eno hibima꞉ midi ipuwalo kodakodalo na꞉la꞉mota꞉hanuya꞉la꞉. Diyala, la꞉ komopi na mabuma꞉ da꞉ neha꞉lahoma, huiyatiya nale la꞉tamo wiboha꞉ ka꞉ka꞉ huiya ba꞉bo kikalamema꞉nemata.
REV 2:11 Ba꞉bema꞉ galagodawa, Godokono Gobogobote sose tawakaluba꞉tamo dolamagita, wadiyala ama꞉ ba꞉be tabo nulia꞉! Ba꞉ hibila, puya꞉te ibino hibima꞉ midi ipuwalo wato kikipo da꞉lawemena꞉, iba꞉te Koe Haboeno hoe temeteme a꞉kiya꞉tawahamena꞉, ba꞉be habalo hibima꞉ midiha꞉pino ha꞉laha gobogobate hoe temeteme ipuwamo gala kakanogomoma꞉na꞉.”
REV 2:12 Ba꞉bene Kodawate tabo gala natamo na꞉kagoi, “Wadiyala ama꞉ Pegamama sose nopodawatamo tabo ba꞉ma ka꞉na noema꞉. Na ba꞉ kiyokiyo giha gila꞉go dawala, ba꞉bema꞉ nale la꞉ Pegamama hibima꞉ midipa꞉tamo tabo ba꞉ma ka꞉na olamagitamo.
REV 2:13 La꞉le kebe habalo demedenama ba꞉be haboeno komo na iya꞉tawala, ba꞉ma ka꞉na ba꞉be habanapa꞉te Saitanako ibino ko gawadubuma꞉ midina. Huiyatiya la꞉eno komo hiya꞉nomola. La꞉le na kodakodalo lawenelo na hibima꞉ ba midinina heloha꞉ma꞉ keda꞉hanaha꞉, ba꞉bema꞉ naeno tabo hibilo dolamaginakui, ba꞉be dubu A꞉ntapasiko Saitanakono habanapa꞉te ebe lawete danakapumi, la꞉le ba꞉be komo umiti la꞉eno hibima꞉ midi komo kamiya꞉paha꞉.
REV 2:14 Na huiyatiya la꞉godolo kapiyakapiya modoboha꞉ komo bulamenamo. Dopo komo ba꞉ ba꞉ma ka꞉nala, la꞉eno hibima꞉ midi kapiyuimi ipuwalo komopa꞉te kuba ododidawa Ba꞉ilamakono iya꞉tulame gabodo ebe beta꞉matana. Iyo, Isalaelanapino iniwali tetelo ba꞉be dawate Ko Gawadubu Balakako biya꞉tumiya꞉, ebete naeno tawakaluba꞉go ba alaholoho ibi Saitanakono gubi ipuwamo komagatalema꞉. Ba꞉bema꞉ Balakate ibi ba꞉ma ka꞉na kubahilamiya꞉, ebete ibi kuba gabamo emogabuilamelo hibima꞉ midiha꞉pa꞉te ida꞉da꞉lino gobogobo ba adikulame hawa꞉goeno ilina iba꞉tamo dikalamiya꞉, naeno tawakaluba꞉te ba꞉be katene ba꞉bo nahuya꞉. Ba꞉be atu tetelo iba꞉te ibino kuba ubi komamo ba papamila꞉ha, bohelemele pilo komo ba꞉gala kamenakamena pilo komo ba꞉bo ododiliya꞉.
REV 2:15 Ba꞉gala la꞉eno eta kuba komo ba꞉ma ka꞉nala, komo la꞉ Nikolayasikono kuba iya꞉tulame gabodo wapata꞉lamenamata.
REV 2:16 Ba꞉bema꞉ wadiyala la꞉ la꞉eno kuba ododili ipuwane nohobila꞉la꞉, mabu hibila, la꞉ ipuwalo puya꞉te natamo gala ohobila꞉heno, tete tatalila nale pete naeno tabo ipuwane da꞉puluhukuna ba꞉be giha gila꞉mo ibi kopalukulima꞉nemo.
REV 2:17 Ba꞉bema꞉ galagodawa, Godokono Gobogobote sose tawakaluba꞉tamo dolamagita, wadiyala ama꞉ ba꞉be tabo nulia꞉! Ba꞉ hibila, puya꞉te ibino hibima꞉ midi ipuwalo wato kikipo da꞉lawemena꞉, nale Godokono awalela ipuwalo ditana ba꞉be baa꞉ iba꞉tamo kikalamema꞉nemo, ba꞉be ka꞉ka꞉ baeno eta mahilo ba꞉ ma꞉nala, ba꞉gala nale ibi hiliyonomatamo keyakeya nakola hegehege ibino uliuli mahilagoeno kikalamema꞉nemo. Ba꞉ba tetelo ibi ipuwalo komopa꞉te iya꞉tawahaheno, etate ebeno mahilagoeno nakola kalawe, etate ebeno mahilagoeno nakola kalawe, iba꞉te ba꞉ba ka꞉na ba ewagele ibino hido huiya nagodone ba꞉bo kuwatema꞉na꞉.”
REV 2:18 Ba꞉bene Kodawate tabo gala natamo na꞉kagoi, “Wadiyala ama꞉ Tayataila sose nopodawatamo tabo ba꞉ma ka꞉na noema꞉. Na ba꞉ Godokono Gudula, naeno baiditi koe powamo wamotenamena ba꞉gala naeno natote alonomoma꞉ eda꞉hanamena, iyo, okodawate hiya꞉nomo auli ilinoeno dalowa꞉ koa꞉mo demadolamemene, ba꞉bene kalikamo metetehote a꞉la꞉minanomoma꞉ da꞉midinako, naeno natoeno a꞉la꞉minale komo ba꞉ ba꞉ba ka꞉nala. Ba꞉bema꞉ nale la꞉ Tayataila hibima꞉ midipa꞉tamo tabo ba꞉ma ka꞉na olamagitamo.
REV 2:19 La꞉le dododilinakoma nale ba꞉bi komokomo iya꞉tawala. Iyo, la꞉eno malemale emalagidolo komo, ba꞉gala la꞉eno hibima꞉ midi komo, ba꞉gala la꞉le natamo oko dowatihonama ba꞉be komo, ba꞉gala temeteme ipuwalo la꞉le la꞉eno tepo ipuwa da꞉kodakoduilamenama ba꞉be komo, nale ba꞉bi komo hiliyonomo iya꞉tawala. Ba꞉bema꞉ hibila, la꞉le ba꞉ma tetelo dododilinakoma ba꞉moi hidohido komate la꞉le dopamo dododilinakuima ba꞉bi hidohido komo ba꞉ na꞉gogolena.
REV 2:20 Na huiyatiya la꞉godolo kapiya modoboha꞉ komo buminamo, la꞉le kuba Ko Gawa Kamena Yesebelakono kuba ododili komo dito ulama꞉tepalemenakomata. Ebe ha꞉kiya ebe Godokono ukui hawakalimidawama꞉ ha꞉da amiho gabodo goena, ba꞉bema꞉ ebete ba꞉ ba꞉ba ka꞉na naeno komo huiyaha꞉ okopi kuba gabamo emogabuilamena. Iyo, komo iba꞉te ebeno iya꞉tulame komamo ba papamila꞉ha bohelemele pilo komo ba꞉gala kamenakamena pilo komo ba꞉bo ododilinaka, ba꞉gala hibima꞉ midiha꞉pa꞉te ida꞉da꞉lino gobogobo adikulamelo hawa꞉goeno ilina dikalamenaka, komo iba꞉te ba꞉be katene dito nahanaka.
REV 2:21 A꞉iye, nale ba꞉be kamenatamo tete ikamenapimo ebete ebeno kuba ododili ipuwane natamo kohobigama꞉, huiyatiya ebe ubihinola dubu bilibila꞉go pata꞉ komo miya꞉pa!
REV 2:22 Ba꞉bema꞉ mu numitota꞉la꞉, ebeno kuba ododili mabuma꞉ nale ko tawetawe ebetamo konoemema꞉nemo, ba꞉gala eba꞉go kateneno kuba ubi gabodo da꞉wapata꞉lamena nale ba꞉bi dubu bilibila꞉tamo koko temeteme komo atumu kakikalamema꞉nemo, iyo, iba꞉te ibino kuba ododili ipuwane ohobila꞉heno ba꞉be huiyate iba꞉tamo kopema꞉ne.
REV 2:23 Ba꞉ hibila, puya꞉te ba꞉be kamena da꞉ta꞉matana nale ibi kanakapulamema꞉nemo, ba꞉bema꞉ sose tawakalubi hiliyonomate ba꞉moe komo kiya꞉tawahama꞉na꞉, nale tawakalubino tepo ipuwoeno ukui iya꞉tawanomola, ba꞉gala nale ibi hiliyonomoeno komo ba anagilamelelame huiya iba꞉tamo modobolo kikalamema꞉nemo.
REV 2:24 Huiyatiya kalakala konomola, komo la꞉ Tayataila hibima꞉ midipa꞉te Yesebelakono ha꞉da amiho iya꞉tulame komamo kapapamila꞉hanaha꞉, ba꞉bema꞉ ebeno ta꞉matapa꞉te kebe iya꞉tawa komokomo Saitanakono ugumuili komoma꞉ da꞉ga꞉lana, la꞉le ba꞉bi kuba komokomo la꞉eno ukuia꞉mo iba꞉godone kuwatenaha꞉. Ba꞉be mabuma꞉ naeno kalakalate la꞉tamo hibilo ba itana, ba꞉moe tutumu tabo kapiyanomo la꞉tamo ikalamemata,
REV 2:25 wadiyala la꞉ la꞉eno hibima꞉ midi komokomo kodakodalo na꞉watila꞉mota꞉nala꞉ naeno pe kuitita꞉mo.
REV 2:26 Ba꞉ hibila, puya꞉te ibino hibima꞉ midi ipuwalo wato kikipo ba lawena naeno pe kuitita꞉mo natamo da꞉papamila꞉hanakomena꞉, nale iba꞉tamo Huli Oloki ba꞉gala konomo helo ikalamete, ba꞉bene iba꞉te hopo habanapi hiliyonomoeno watowatopima꞉ beda꞉hanamena꞉. Iyo, iba꞉te helo konomo kolawema꞉na꞉, nale Nabiwi Godogodone helo keba ka꞉na ka꞉lawiya꞉mo ba꞉ba ka꞉na, ba꞉bene hopo habanapi ipuwalo puya꞉te ebeno tuputupu emede komamo papamila꞉ha ubiha꞉ma꞉ deda꞉hana, iba꞉te ba꞉bi kuba ododilipa꞉tamo huiya ba ikalame auli kukamo ba꞉bo kalukulima꞉na꞉. Ba꞉ hibila, lumagiti gebetamo ododi kalili hopamo da꞉da꞉na keba ka꞉na ka꞉ta꞉ta꞉pula꞉hanako, kebe dawate naeno okopa꞉tamo papamiwata ubiha꞉ma꞉ deda꞉mene, ebete ba꞉ ba꞉ba ka꞉na dito kokubama꞉ne.
REV 2:29 Ba꞉bema꞉ galagodawa, Godokono Gobogobote sose tawakaluba꞉tamo dolamagita, wadiyala ama꞉ ba꞉be tabo nulia꞉!”
REV 3:1 Ba꞉bene Kodawate tabo gala natamo na꞉kagoi, “Wadiyala ama꞉ Sadisi sose nopodawatamo tabo ba꞉ma ka꞉na noema꞉. Na ba꞉ sa꞉ba꞉ni oloki uwatedawala, ba꞉gala Godokono Gobogoboeno sa꞉ba꞉ni komate naeno ubi komamo a꞉papamila꞉halenaka, ba꞉bema꞉ nale la꞉ Sadisi hibima꞉ midipa꞉tamo tabo ba꞉ma ka꞉na olamagitamo. La꞉le dododilinakoma nale ba꞉bi komokomo iya꞉tawala, ba꞉ma ka꞉na komopa꞉te la꞉ hibi ka꞉ka꞉go nemedenamo ga꞉lana, huiyatiya hibi komo ba꞉ma ka꞉nala, la꞉ la꞉eno hibima꞉ midi ipuwalo ya꞉lo a꞉ha꞉lahuimata!
REV 3:2 Ba꞉bema꞉ ha꞉lahapa꞉la꞉, wadiyala la꞉ nagodolo ka꞉ka꞉ gala kalawete la꞉eno emede ipuwalo da꞉ha꞉lahana ba꞉bi komokomo na꞉kakodakoduilama꞉la꞉, mabu nale kebe Kodawatamo da꞉papamiwatanamo, ba꞉be Godote la꞉eno hibima꞉ midi oko owatiho komo dulamelelamena hidohidoma꞉ kagoenaha꞉.
REV 3:3 Ba꞉gala naeno okopa꞉te la꞉ kebe komokomo kiya꞉tulametanakui, wadiyala la꞉ ba꞉bi komo gala ba kemalagidole la꞉eno kuba ododili ipuwane ohobila꞉te ba꞉bi iya꞉tulame komamo gala na꞉kapapamila꞉hala꞉. Huiyatiya la꞉le nagodone ka꞉ka꞉ gala laweheno, la꞉ iya꞉tawaha꞉ tetelo nale la꞉tamo kuba huiya ikalamema꞉ kopema꞉nemo, pilo dubuti tawakalubino ilina uwatema꞉ keba ka꞉na ka꞉penako ba꞉ba ka꞉na.
REV 3:4 Huiyatiya Sadisi hibima꞉ midipa꞉la꞉, la꞉ ipuwalo kapiyakapiyate kuba ododili komokomo kiya꞉tawahanaha꞉. Ibino tuputupu emede komokomo ba꞉ hidohido dalowa꞉ha꞉ kaliko huiyala, ba꞉bema꞉ iba꞉te naeno Ko Gawadubu habamo da꞉nikulimina꞉, nale iba꞉tamo pupulino hidohido keyakeya ilina ikalamete, ba꞉ba tetene tupuimiti iba꞉te nago ba꞉wapata꞉lamenakomena꞉.
REV 3:5 Ba꞉ hibila, puya꞉te ibino hibima꞉ midi ipuwalo wato kikipo da꞉lawemena꞉, iba꞉te nagodone ba꞉bako hidohido keyakeya kaliko kuwatema꞉na꞉, ba꞉bene nale naeno Nabiwi ba꞉gala ebeno nopopino holoholo hapulu hawakala kogoema꞉nemo ba꞉bi tawakalubi ba꞉ naeno hibi ta꞉matapila, iyo, nale ibino mahilo naeno Ka꞉ka꞉ Bukane a꞉kegebolelama꞉mo.
REV 3:6 Ba꞉bema꞉ galagodawa, Godokono Gobogobote sose tawakaluba꞉tamo dolamagita, wadiyala ama꞉ ba꞉be tabo nulia꞉!”
REV 3:7 Ba꞉bene Kodawate tabo gala natamo na꞉kagoi, “Wadiyala ama꞉ Piladelapiya sose nopodawatamo tabo ba꞉ma ka꞉na noema꞉. Na ba꞉ Talonanomodawala ba꞉gala na ba꞉ Hibinomodawala, ba꞉gala Ko Gawadubu Da꞉ibidigodolo dopamo ditanami ba꞉be atu kiti nagodolo ba꞉ka-itana, ba꞉bema꞉ nale ba꞉be kia꞉mo kebe gigiho da꞉hiya꞉midamo eta lumagiti a꞉kakalapilamene, ba꞉gala nale ba꞉be kia꞉mo kebe gigiho da꞉kalapilamo eta lumagiti a꞉ka꞉hiya꞉midamene. Ba꞉bema꞉ nale la꞉ Piladelapiya hibima꞉ midipa꞉tamo tabo ba꞉ma ka꞉na olamagitamo.
REV 3:8 La꞉le dododilinakoma nale ba꞉bi komokomo iya꞉tawala, ba꞉ma ka꞉na la꞉le naeno oko owati ipuwalo la꞉eno helote hibilo kawibonaha꞉, ba꞉gala na iya꞉tawala komopa꞉te na mabuma꞉ koko temeteme la꞉tamo dikalami, la꞉le naeno iya꞉tulame komamo ba papamila꞉ha hibima꞉ midi komo kamiya꞉paha꞉. Ba꞉bema꞉ na la꞉tamo gigiho a꞉hiya꞉midalamemata, etagodolo helo kitanaha꞉ gala kakakalapilama꞉.
REV 3:9 Mu numitota꞉la꞉, puya꞉te ibi ha꞉kiya ibi Yunapima꞉ ha꞉da amiho gabodo da꞉ga꞉lana, ibi ba꞉ Saitanakono kapiyuimi tawakalubila, Godokonoha꞉. Ba꞉bema꞉ nale ba꞉bi ha꞉da amihopi uwatete la꞉tamo komagahelema꞉nemo iba꞉te la꞉eno nato mabamo kopepapamila꞉halema꞉, iyo, ba꞉moe ododi komodo nale ibi ba꞉ma ka꞉na kiya꞉tulamema꞉nemo, nale la꞉ malemalelo konomamo demalagidolenama.
REV 3:10 Ba꞉ hibila, la꞉le na ta꞉mahene mabuma꞉ temeteme ba uwate huiyatiya la꞉ naeno tabamo papamila꞉hate heloha꞉ma꞉ keda꞉haha꞉, ba꞉be mabuma꞉ nale hopo habanapi kubahilamema꞉ da꞉poelamemo, ba꞉bi kokonomo temeteme ipuwalo nale la꞉ ba itagua꞉midale la꞉eno hibima꞉ midi komote a꞉kakubakubahamena꞉.
REV 3:11 Iyo, tete tatalila nale hopo habamo kopema꞉nemo, ba꞉bema꞉ wadiyala la꞉ la꞉eno hibima꞉ midi komokomo kodakodalo na꞉watila꞉mota꞉nala꞉, etate la꞉eno hidohido huiya pilo gabodo uwatelamekapoma꞉.
REV 3:12 Ba꞉ hibila, pote ebeno hibima꞉ midi ipuwalo wato kikipo da꞉lawemene, nale ebe lawete Godokono genama eteno hido aboma꞉ ba midi ba꞉bo kamima꞉nemo, ba꞉bene ebete ba꞉be genamoeno aboma꞉ ba la꞉na emedena emedena tetelo etate ebe a꞉kamagubutinamene. Ba꞉gala ba꞉be lumagi kawagaminanama꞉ nale naeno uli mahilo ba꞉gala naeno Kodawoeno mahilo ba꞉gala ebeno Ko Gawadubu haboeno mahilo ebe hunamo komiya꞉tema꞉nemo. Ba꞉ hibila, naeno Kodawa ba꞉ Godotela, ba꞉gala uli Yelusalema habate ebeno Ko Gawadubu habama꞉ keda꞉ma꞉ Hunu Habane ba꞉moe hopamo kopihitigama꞉ne.
REV 3:13 Ba꞉bema꞉ galagodawa, Godokono Gobogobote sose tawakaluba꞉tamo dolamagita, wadiyala ama꞉ ba꞉be tabo nulia꞉!”
REV 3:14 Ba꞉bene Kodawate tabo gala natamo na꞉kagoi, “Wadiyala ama꞉ Lodosiya sose nopodawatamo tabo ba꞉ma ka꞉na noema꞉. Na ba꞉ Godokono Kuititi Tabo Olamagidawala, ba꞉gala na ba꞉ Godokono hibi komo hidonomamo da꞉hawakaliminamo ba꞉be dawala. Ba꞉gala Godote ba꞉moe hopoeno ilina hiliyonomo dododiliya꞉, na ba꞉be oko owati komoeno Helo Mabudawala, ba꞉bema꞉ nale la꞉ Lodosiya hibima꞉ midipa꞉tamo tabo ba꞉ma ka꞉na olamagitamo.
REV 3:15 La꞉le dododilinakoma nale ba꞉bi komokomo iya꞉tawala, ba꞉ma ka꞉na la꞉eno hibima꞉ midi ipuwalo la꞉ gibagiba ba꞉gala otanotano tetenomolo pola꞉namata. O sose tawakaluba꞉la꞉, naeno ubi konomamo itana la꞉ koenomoma꞉ neda꞉huya꞉la꞉, huiyatiya la꞉ ubiha꞉ma꞉ deda꞉hanama wadiyala la꞉ na miya꞉panete gibagibanomoma꞉ neda꞉huya꞉la꞉!
REV 3:16 Ba꞉ hibila, mabu la꞉ la꞉eno ododili ipuwalo gibagibadopoma꞉ eda꞉hanamata, ba꞉be mabuma꞉ nale la꞉ hiliyonomo naeno tabo ipuwane gobogobamo konedaloa꞉pa꞉midalema꞉nemata!
REV 3:17 O sose lumagi, ama꞉ ba꞉ma ka꞉na goenata, ‘Na dogodogodawala ba꞉gala na ilina hiliyonomo modobolo uwatenamo, ba꞉bema꞉ eta awae komote natamo a꞉kapa꞉mene.’ Huiyatiya amia꞉no tabo goe ipuwalo ama꞉le amia꞉no hibi komo kiya꞉tawanaha꞉, ba꞉ma ka꞉na ama꞉ ilinaheno halipa gudumu emedenata ba꞉gala galane tetelo ama꞉ atumu awae ipuwalo kolutama꞉na꞉ta. Iyo, naeno umi ipuwalo ama꞉ dogodogodawaha꞉, ba꞉gala ama꞉ kikipuiya pata꞉nata, ba꞉gala ama꞉ baidi tamihodawalata.
REV 3:18 Ba꞉bema꞉ nale naeno hido ukui komamo ama꞉ bikiyamemata, ama꞉le natamo pete, nale tawakaluba꞉tamo kolowamima꞉ da꞉midilinakomo ba꞉bi hidohido ilina huiyamo na꞉puwatiya꞉. Iyo, ba꞉ ba꞉ba ka꞉na ama꞉le dogodogodawanomoma꞉ keda꞉ma꞉, wadiyala ama꞉ hido golodo ilina nagodone na꞉pelawiya꞉, nale ba꞉be golodo koelo hido a꞉la꞉minanomoma꞉ a꞉midimo. Ba꞉gala ama꞉le kikipuiya emede hilopo komo komiya꞉pama꞉, wadiyala ama꞉ hidonomo keyakeya kaliko nagodone na꞉puwatiya꞉. Ba꞉gala ama꞉le amia꞉no tamiho baidi kohiduilamema꞉, wadiyala ama꞉ abutilameno hido mulamula nagodone na꞉pelawiya꞉.
REV 3:19 Ba꞉bema꞉ ama꞉ ba꞉moe naeno taboma꞉ ubiha꞉ma꞉ akeda꞉la꞉, huiyatiya amia꞉no hibima꞉ midi komo kodakoduimiti kuba ododili ipuwane natamo hibinomolo nohobiguya꞉, mabu hibila, nale kebe gugudi malemalelo demalagidolenamo, ba꞉bi guguda꞉te naeno hibi gabo kiya꞉tawahama꞉ nale komo tetelo ibi a꞉kiyahalamenakomo ba꞉gala komo tetelo ibi temeteme komamo iya꞉tulamenakomo.
REV 3:20 Mu numitota꞉la꞉, na gigiho tetelo putiti gigiho bepanakamitamo, ba꞉bema꞉ lumagiti naeno tabo uliti natamo gigiho da꞉hiya꞉midamene, na ebetamo a꞉pa꞉gate, ba꞉bene ebe ba꞉gala na, a baa꞉ kapimilo konahama꞉nema꞉.
REV 3:21 Ba꞉ hibila, puya꞉te ibino hibima꞉ midi ipuwalo wato kikipo da꞉lawemena꞉, nale iba꞉tamo helo kikalamema꞉nemo iba꞉te naeno Ko Gawadubu luta bahilo nago kogagahidima꞉, dopamo nale wato kikipo da꞉lawiya꞉mo, ba꞉ba tetelo nale naeno Nabiwa꞉go badi kemedehoma꞉ ebete helo natamo keba ka꞉na kikanamiya꞉ ba꞉ba ka꞉na.
REV 3:22 Ba꞉bema꞉ galagodawa, Godokono Gobogobote sose tawakaluba꞉tamo dolamagita, wadiyala ama꞉ ba꞉be tabo nulia꞉!”
REV 4:1 Ba꞉bene Kodawagodone ba꞉moi hiliyonomo komo uliho da꞉wibohui, ba꞉ba tetelo naeno baiditi hiya꞉ma꞉ deda꞉hanami ba꞉be komote wiboheno, nale Hunu Haboeno gigiho ya꞉lo a꞉hiya꞉mida ba꞉bo umimo. Ba꞉bene nale dopamo dulimo ba꞉be atu tabo madodote natamo gala na꞉kapi, ba꞉be tabo ba꞉ geboleno diyamo keba ka꞉nala꞉ka꞉ ba꞉ba ka꞉nala. Ba꞉bema꞉ nale tabo ba꞉ma ka꞉na ulimo, “Ama꞉ natamo na꞉podola. Tete tatalilo da꞉pikulihomena꞉ ba꞉bi komokomo nale ama꞉ kiya꞉tumihoma꞉nemata.”
REV 4:2 Ba꞉ba tetelo Godokono Gobogoboeno helote na hunamo ba pihitiga, nale Kodawa ebeno Hunu Haboeno Ko Gawadubu emede bahilo lutalo ba꞉bo umimo.
REV 4:3 Ba꞉be dawoeno Ko Gawadubu luta bahi a꞉la꞉mina ilaguiti a꞉bega anagogobeya꞉midadigui, ba꞉gala ebeno holoholo alonomoma꞉ eda꞉mi, hegelate konomamo ba a꞉la꞉minuta hidohido gedo nakola ba꞉gala hawihawi nakola iba꞉te keba ka꞉na ka꞉la꞉minalitanaka ba꞉ba ka꞉na.
REV 4:4 Ba꞉gala nale komo 24 koko gawadubuino gagahidi baha꞉te Kodawoeno luta bahi anagogobeya꞉midalo pola꞉nalo kanulamimo, ba꞉bi gagahidi bahi hunamo 24 Watowatopa꞉te gagahidiya꞉, ba꞉ba꞉te keyakeya kaliko pupuliti ba꞉gala koko gawadubuino golodo pake ilina watamo akapupuliya꞉.
REV 4:5 Ba꞉bene Kodawoeno luta bahini alomoeno hiya꞉hiya꞉ ga꞉lawatahale komo ba꞉gala hegela a꞉la꞉wa꞉hiyahale komate ikulihutiya꞉, ba꞉gala ba꞉be luta bahi dopo hapulu sa꞉ba꞉ni wuiki alo pa꞉tiho na꞉pola꞉nuya꞉, ba꞉moi alo ba꞉ Godokono Gobogoboeno sa꞉ba꞉ni komokomola.
REV 4:6 Ba꞉bene Kodawoeno luta bahi dopo hapulu alonomo beya bobo konomote itanui, ba꞉be beyoeno a꞉la꞉mina hidonomola. Ba꞉ba tetelo nale Kodawoeno luta bahi tametamelo Hunu Haboeno netewa-netewa Hiya꞉nomo Helohelo Nopopa꞉te la꞉mota꞉hanalo kulamimo, ibino holoholo hapulu ba꞉gala ginimi hapulu baidi hiliyonomate pola꞉lama꞉nui.
REV 4:7 Ibi ipuwalo dopo nopodawoeno holoholo ba꞉ layono-gaha huiyala, ba꞉gala etoeno holoholo ba꞉ kalitagoeno kau-goeno holoholola, ba꞉gala etoeno holoholo ba꞉ hopo lumagino holoholola, ba꞉gala kuititi nopodawoeno holoholo ba꞉ alomo hunudu da꞉puilanako ba꞉bako wali holoeno holoholola.
REV 4:8 Ba꞉bi netewa-netewa Hiya꞉nomo Nopopi ba꞉ patamagopila ba꞉gala baida꞉gopila, ba꞉bema꞉ iba꞉godolo sikisi patamuti pola꞉lama꞉nui, ba꞉gala ibino baidi hiliyonomate hunu tamalo ba꞉gala ipuwa hapulu atumu na꞉kapola꞉lama꞉nui. Ba꞉ hibila, hegela du hiliyonomolo iba꞉te Kodawa adikumi ekelalameheno, nale ibino tabo madodo ba꞉ma ka꞉na ulimo, “Kodawa Godoko ba꞉ Helonomodawala, ebe ba꞉ talonala, iyo, ebe ba꞉ talonanomola, ebe ba꞉ talonanomodawala! Kebe dawate dopamo demedenami, ba꞉gala ba꞉ma tetelo demedena, ba꞉gala emedena tetelo demedenamene, ebe ba꞉ ba꞉be Ka꞉ka꞉dawala!”
REV 4:9 Ba꞉ hibila, ba꞉be Kodawate emedena emedena tetelo ebeno Ko Gawadubu emede bahilo da꞉lutamene, ba꞉be mabuma꞉ ba꞉bi Hiya꞉nomo Nopopa꞉te ebe adikumi ekelalameheno, ebe ba awagaminana ebeno mahilo hunamo adipatelo kalakala tabo ebetamo ba꞉bo ga꞉lanaka.
REV 4:10 Iyo, mabu Kodawate emedena emedena tetelo ebeno Ko Gawadubu bahilo da꞉lutamene, ba꞉bema꞉ Hiya꞉nomo Nopopa꞉te ebe ba adikumina atu tetenomolo 24 Watowatopa꞉te ibino watamo da꞉pupulinaka, iba꞉te ba꞉bi koko gawadubuino pake ilina Kodawoeno luta bahi dopo hapuamo ba niya꞉heke, ibino holoholo hopamo miya꞉tete ebe adikumilo ba꞉ma ka꞉na ga꞉lanaka,
REV 4:11 “Aeno Kodawa Godo, wadiyala Hunu Haboeno nopopi ba꞉gala tawakalubi hiliyonomate ama꞉ nawagaminamena꞉ta, ba꞉gala amia꞉no mahilo hunamo nadipata꞉mena꞉, ba꞉gala amia꞉no helo komamo na꞉papamila꞉hamena꞉! Mabu hopo ba꞉gala alomoeno ilina hiliyonomo ama꞉le ododiliya꞉ta, iyo, amia꞉no ubi komodo ba꞉moi ilina hiliyonomate ikulihuya꞉!”
REV 5:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, Kodawate ebeno Ko Gawadubu emede bahilo ba luta, nale ebeno tu hapu kokotolo mokopa꞉mida pepa ba꞉bo umimo, dopamo lumagiti ba꞉be pepoeno ipuwa hapuamo ba꞉gala hunu hapuamo tabo komokomo miya꞉tete, ba꞉bene ebete mokopa꞉midate sa꞉ba꞉ni hala꞉mo dito matuhumihuya꞉.
REV 5:2 Ba꞉gala nale Godokono helonomo nopodawa eta bekumimo, ebete ebeno tabo madodo hunamo adipatelo na꞉goi, “Kebe dawate modobola꞉ka꞉ ba꞉moe mokopa꞉mida pepoeno hale iya꞉hiliti, pepoeno tabo komokomo ulameholema꞉?”
REV 5:3 Huiyatiya ba꞉ba tetelo Godokono Hunu Habalo ba꞉gala hopo habalo ba꞉gala Ha꞉lahapino Habalo eta modobo lumagiti kalutaha꞉ ba꞉be mokopa꞉mida pepa a꞉hiya꞉midate pepoeno tabo komokomo ulamema꞉.
REV 5:4 Ba꞉bema꞉ hibila, ba꞉moe komoma꞉ nale konomamo ihimo mabu eta modobo lumagiti kalutaha꞉ mokopa꞉mida pepa a꞉hiya꞉midama꞉.
REV 5:5 Ba꞉ba tetelo 24 Watowatopi ipuwalo etate natamo na꞉goi, “Ama꞉ kihitala꞉! Numa꞉, Yuda gudawoeno Layono-gahate ba꞉luta! Ebe Da꞉ibidikono galanepi ipuwalo Ko Gawadubuma꞉ eda꞉na, ba꞉gala ebete wato kikipo ya꞉lo a꞉lawiya꞉. Ba꞉be mabuma꞉ ebete modobola ba꞉moe mokopa꞉mida pepoeno sa꞉ba꞉ni hale iya꞉hiliti pepa a꞉hiya꞉midama꞉.”
REV 5:6 Ba꞉bema꞉ nale Ko Gawadubuino luta bahi tamelo Sipi-goe Deha꞉poto la꞉nalo umimo, ba꞉gala netewa-netewa Hiya꞉nomo Nopopa꞉te 24 Watowatopa꞉go ebe anagogobeya꞉midalo ba pola꞉na ba꞉bo kulamimo. Ebe ba꞉ tawakaluba꞉te danakapumi ba꞉be Sipi-goe Deha꞉poto keba ka꞉nala꞉ka꞉ ba꞉ba ka꞉nala. Ebe sa꞉ba꞉ni kalitagoenola ba꞉gala sa꞉ba꞉ni baida꞉gola, ba꞉bema꞉ hibila, ba꞉bi sa꞉ba꞉ni kalita ba꞉gala sa꞉ba꞉ni baidi ba꞉ Godokono Gobogoboeno sa꞉ba꞉ni komokomola, ebete ba꞉be Gobogobo ya꞉lo tetelo hopo haba konomamo a꞉poemiya꞉.
REV 5:7 Ba꞉ba tetelo Sipi-goe Deha꞉potote Ko Gawadubuino luta baha꞉mo tote ebeno tu hapu kokotone mokopa꞉mida pepa ba꞉bo nelawi.
REV 5:8 Ba꞉bene ebete ba꞉be komo dododi, ba꞉ba tetenomolo netewa-netewa Hiya꞉nomo Nopopi ba꞉gala 24 Watowatopi iba꞉te ibino holoholo hopamo ba miya꞉te ebe ba꞉bo adikumiya꞉. Ba꞉bene nale Watowatopino komo ba꞉ma ka꞉na umimo, ibino kokotolo dolopo ba꞉gala golodo kalili ba꞉bi ilina netewate pola꞉lama꞉nui, ba꞉bi golodo kalili ipuwalo hidohido nibo ilina tabotabohonomola, ba꞉bi hidohido nibo ilina ba꞉ hibima꞉ midipa꞉te toetoe tabo Godotamo dolamagiminaka ba꞉bi tabo komokomola.
REV 5:9 Ba꞉bene iba꞉te Sipi-goe Deha꞉poto adikumima꞉ uli ohale ba꞉ma ka꞉na alapihuya꞉, “Ama꞉ kapiyate modobola mokopa꞉mida pepa lawete pepoeno hale iya꞉hilima꞉, mabu tawakaluba꞉te ama꞉ danakapumiya꞉la, ba꞉ba tetelo ama꞉le Godoko kokalakaluimima꞉ ibi Saitanakono du genamane uluhukulatelete amia꞉no hawa꞉mo ibi a꞉huiyahaliya꞉ta. Iyo, ama꞉le komo tawakalubi ibino hiya꞉hiya꞉ tama kapiyuimi ipuwane ba꞉gala hiya꞉hiya꞉ tabo ga꞉la kapiyuimi ipuwane ba꞉gala hiya꞉hiya꞉ hopo ipuwane uwatete,
REV 5:10 ibi Ko Gawadubu Godokono habanapima꞉ a꞉midiliya꞉ta, iba꞉te emedena tetelo ebeno oko kowatinama꞉. Iyo, ba꞉be mabuma꞉ hopo haba konomolo komo tawakalubi hiliyonomate iba꞉tamo ba꞉papamila꞉halenakomena꞉.”
REV 5:11 Ba꞉ba tetelo nale gala Hunu Haboeno komo nopopi hiliyonomoeno tabo madodo bekulihuimo, ba꞉bi nopopi mumulunomola, nale ibi ka꞉lamihole modoboha꞉. Iba꞉te Ko Gawadubuino luta bahi anagogobeya꞉midalo ba pola꞉na, netewa-netewa Hiya꞉nomo Nopopi ba꞉gala 24 Watowatopi iba꞉te
REV 5:12 ibino tabo madodo hunamo wadiya꞉paa꞉latelelo na꞉ga꞉luya꞉, “Sipi-goe Deha꞉poto kubapa꞉te danakapumiya꞉, wadiyala tawakalubi hiliyonomate ebeno helo komamo na꞉papamila꞉hamena꞉, ba꞉gala dogodogo ilina ebetamo ba ikameho, ebe Muludawama꞉ ba꞉gala Ha꞉hidawama꞉ na꞉ka꞉ma꞉mena꞉! Iyo, iba꞉te ebeno mahilo hunamo nadipata꞉mena꞉, ba꞉gala ebe ba awagamina, ebetamo kalakala tabo na꞉ga꞉lamena꞉!”
REV 5:13 Ba꞉ba tetelo Hunu Habalo ba꞉gala hopo habalo demedehona, iyo, haka ipuwalo ba꞉gala kehaha꞉ kolomoeno beya ipuwalo ba꞉gala alomo hunulu demedehona, ba꞉bi tawakalubi ba꞉gala ka꞉ka꞉ ilina hiliyonomate kapimilo da꞉ga꞉luti, nale ba꞉be tabo ba꞉ma ka꞉na ulimo, “Kodawate ebeno Ko Gawadubu emede bahilo emedena tetelo da꞉lutamene ba꞉gala Sipi-goe Deha꞉poto, wadiyala ale emedena tetelo iba꞉tamo kalakala tabo ba ga꞉lana, ibino mahilo hunamo ba꞉wadiya꞉paa꞉latelenakoma꞉! Iyo, wadiyala ale ibi ba awagaminalena, ibino helo komamo ba꞉papamila꞉halenakoma꞉!”
REV 5:14 Ba꞉ba tetelo netewa-netewa Hiya꞉nomo Nopopa꞉te na꞉ga꞉luya꞉, “Ba꞉moe tabo hibinomola, ba꞉ba꞉la!” ba꞉bene 24 Watowatopa꞉te ibino holoholo hopamo ba miya꞉te Kodawa Godoko ba꞉gala Sipi-goe Deha꞉poto ba꞉bo adikulamiya꞉.
REV 6:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, Sipi-goe Deha꞉potote sa꞉ba꞉ni hala꞉mo matuhumiho ditanui ba꞉be mokopa꞉mida pepoeno dopo hale ditamidui, nale ba꞉be komo ba꞉bo umimo. Ba꞉ba tetelo netewa-netewa Hiya꞉nomo Nopopi ipuwalo etate ebeno tabo madodo hunamo adipatelo ebete alomo goewata huiyamo na꞉goi, “Ama꞉ mamo na꞉pa꞉!”
REV 6:2 Ba꞉bene nale ba꞉be tabo dulimo, keyakeyanomo oso-goe ba꞉gala ebeno namutudawa ebe hunulu lutalo ba꞉bo ulamimo, ba꞉be namutudawoeno kokotolo alaholohoeno gagaliti itanui. Ba꞉bene Kodawate ko gawadubuino pake ilina ebetamo dikami, ebete lawete ba꞉bo nuluhukui komo tawakaluba꞉go ba nalaholoho iba꞉tamo helonomoma꞉ koneda꞉ma꞉.
REV 6:3 Ba꞉bene Sipi-goe Deha꞉potote mokopa꞉mida pepoeno eta hale da꞉kitamidui, ba꞉moe ba꞉ netewa tetema꞉ ba eda꞉ Hiya꞉nomo Nopopi ipuwalo eta tetedawate na꞉goi, “Ama꞉ mamo na꞉pa꞉!”
REV 6:4 Nale ba꞉be tabo dulimo, eta oso-goete ba꞉bo kapuluhukui, ebe ba꞉ hawihawinomola. Ba꞉bene ba꞉be oso-goe hunulu da꞉luti, Kodawate ba꞉be namutudawatamo alaholo gili konomo ba꞉gala helo bikami, ebete hopo habanapa꞉tamo mauba konomo ba nikalame iba꞉te alaholoho ipuwalo etapa꞉te etapi kanakapulamema꞉.
REV 6:5 Ba꞉bene Sipi-goe Deha꞉potote mokopa꞉mida pepoeno eta hale da꞉kitamidui, ba꞉moe ba꞉ netewa-kapiya tetema꞉ ba eda꞉ Hiya꞉nomo Nopopi ipuwalo eta tetedawate na꞉goi, “Ama꞉ mamo na꞉pa꞉!” Nale ba꞉be tabo dulimo, kilikilinomo oso-goe ba꞉gala ebeno namutudawa ebe hunulu lutalo ba꞉bo ulamimo, ba꞉be dubuino kokotolo naha ilinoeno menemene ulameno ilinate itanui.
REV 6:6 Ba꞉ba tetelo netewa-netewa Hiya꞉nomo Nopopa꞉te kebolo ka꞉la꞉mota꞉hanui, ba꞉be ipuwane nale hopo lumagino tabo madodo keba ka꞉nala꞉ka꞉ ba꞉bako tabo madodo ba꞉ma ka꞉na ulimo, “Ama꞉ hopo habanapa꞉tamo baa꞉ wiboho komo natuya꞉, ba꞉ma ka꞉na iba꞉te kapiya kilogalama witi-laisa kapiya hegeloeno oko huiyamo ba꞉lawenakomena꞉, ba꞉gala netewa-kapiya kilogalama baa꞉nomo atumu mani konomamo ba꞉ka-uwatenakomena꞉. Ba꞉be mabuma꞉ ibino komo gugudi hiliyonomate baa꞉ma꞉ koha꞉lahama꞉na꞉, huiyatiya nale talona ama꞉tamo ba꞉ma ka꞉na ihatememata, ama꞉le ibino gala꞉ipi gao keha ba꞉gala olibi gao keha akakubahilama꞉la꞉.”
REV 6:7 Ba꞉bene Sipi-goe Deha꞉potote mokopa꞉mida pepoeno eta hale da꞉kitamidui, ba꞉moe ba꞉ netewa-netewa tetema꞉ ba eda꞉ Hiya꞉nomo Nopopi ipuwalo eta tetedawate na꞉goi, “Ama꞉ mamo na꞉pa꞉!”
REV 6:8 Nale ba꞉be tabo dulimo, ga꞉wega꞉wenomo oso-goe ba꞉gala ebeno namutudawa ebe hunulu lutalo ba꞉bo ulamimo, ba꞉be dubuino mahilo ba꞉ Hoetela, ba꞉bema꞉ Ha꞉lahapino Haba umidawate ebe beta꞉matana. Ba꞉bene Kodawate helo ibi netewapa꞉tamo ikalami, iba꞉te alaholoho komo ba꞉gala baa꞉ wiboho komo, hoe tawetawe komo ba꞉gala helohelo ilinoeno ikuliho komo, ba꞉bi olalati komokomo hopo habanapa꞉tamo kowatama꞉. Ba꞉bema꞉ tawakalubi hiliyonomo ipuwalo, komo netewa-netewa ipuwane eta kapiya kahoe, eta kapiya kahoe, ba꞉ma ka꞉na kewagelema꞉na꞉.
REV 6:9 Ba꞉bene Sipi-goe Deha꞉potote mokopa꞉mida pepoeno eta hale da꞉kitamidui, ba꞉moe ba꞉ paibo tetema꞉ edi. Ba꞉ba tetelo kuba ododilipa꞉te Godokono tabo olamagimi mabuma꞉ kebe tawakalubi dopamo danakapulamiya꞉, nale ba꞉bi tuputupupino gobogobo ba꞉bo ulamimo, Godoko owatidoloeno patapata ipuwalo iba꞉te na꞉pola꞉nuya꞉. Ba꞉ hibila, ba꞉be patapata hunamo Godoko adikumipa꞉te hawa꞉goeno ilina koa꞉mo ba꞉bo miya꞉tenaka.
REV 6:10 Ba꞉bene ba꞉bi gobogobate koamo ga꞉lawatahalo na꞉ga꞉luya꞉, “O Kodawa, ama꞉ Helonomodawalata, iyo, ama꞉ talonanomolata ba꞉gala hibidawanomoma꞉ eda꞉nata! Ba꞉bema꞉ puya꞉te a danakapua꞉miya꞉, ama꞉le ibino kuba ododili komo keba tetelo na꞉kanagilamelelameomena꞉? Ibino kuba huiya iba꞉tamo ikalamema꞉, wadiyala ama꞉le a ba emalagidoloe tete akaga꞉gima꞉tepala꞉!”
REV 6:11 Ba꞉ba tetelo Kodawate ibi hiliyonomatamo ga꞉ga꞉ga꞉ keyakeya kaliko ikalameholete ibi ba꞉ma ka꞉na kiyalami, “La꞉le ukui bilibilima꞉ eda꞉haheno tete nanekele gala na꞉kemeda꞉tepuya꞉la꞉. Ba꞉ hibila, kuba ododilipa꞉te la꞉ keba ka꞉na kanakapulamitiya꞉la, iba꞉te ba꞉ba ka꞉na la꞉eno komo hibima꞉ midipi ekaki kakanakapulamema꞉na꞉, mabu nale tete iba꞉tamo gala a꞉kikalamemo iba꞉te ba꞉bi kuba ododili komo kupula꞉lema꞉. Huiyatiya naeno okopi anakapulame kuititi hibilo da꞉lawemene, ba꞉ba tetelo nale ibi anakapulamepa꞉tamo kuba huiya kikalamema꞉nemo.”
REV 6:12 Ba꞉bene Sipi-goe Deha꞉potote mokopa꞉mida pepoeno eta hale da꞉kitamidui, ba꞉moe ba꞉ sikisi tetema꞉ edi. Ba꞉ba tetelo hopo habalo konomo wima꞉la꞉te duluhukui, hegeloeno a꞉la꞉mina komote wibote kilikilinomo kaliko huiyama꞉ dito edi. Ba꞉bene hopo konomote dunate, manomeno a꞉la꞉mina komote atumu kawibonate hawihawinomoma꞉ ba eda꞉na,
REV 6:13 alomoeno oloka꞉te hopamo ba꞉ dito pegudiniya꞉, ba꞉ma ka꞉na konomo gogote gao keha ba pagegete komo wiwahaha꞉ gaote hakamo keba ka꞉na ka꞉pegudinaka ba꞉ba ka꞉na.
REV 6:14 Ba꞉bene Kodawate alomo konomo lawenate ba꞉bo mokopa꞉midani, lumagiti tilo keba ka꞉na ka꞉mokopa꞉midanako ba꞉ba ka꞉na, ba꞉gala ebete hopo haba lawenate konomamo ba agegetena, hopoeno hunuhunu haka hiliyonomo ba꞉gala kehaha꞉ kolomoeno haka hiliyonomate ibino pola꞉na bahi miya꞉palenate tama꞉mo ba꞉bo tolama꞉tepahaleniya꞉.
REV 6:15 Ba꞉ba tetelo hiya꞉hiya꞉ hopoeno koko gawadubu ba꞉gala ibino koko gabomani dubu, alaholohopino koko gawadubu ba꞉gala ilina dogodogopi dubu, puya꞉te komo okopino namutulubima꞉ deda꞉hana ba꞉gala puya꞉te huiyaha꞉ oko dowatihona ba꞉gala puya꞉te hegehege mani oko dowatihona, iyo, ibi hiliyonomate tole konomo lawenate hunuhunu hakamo ba alahutihona haka gugu ba꞉gala nakola ipuwamo ba꞉bo nawalelahaleniya꞉.
REV 6:16 Ba꞉bene iba꞉te ibino tabo madodo hunamo wadiya꞉paa꞉latelelo hunuhunu hakatamo ba꞉gala koko nakolatamo na꞉ga꞉laniya꞉, “Wadiyala la꞉le a hunamo piguditi a na꞉pihia꞉tea꞉la꞉! La꞉le a owalubihino, Hunu Haboeno Ko Gawadubu emede bahilo da꞉luta ba꞉be Kodawate a dua꞉memene, ba꞉bene Sipi-goe Deha꞉potoeno konomo mauba komote atamo kopema꞉ne!
REV 6:17 Iyo, ibino konomo mauba hegelate atamo ba꞉ a꞉puluhuku, ba꞉bema꞉ a ipuwalo eta lumagiti modoboha꞉ ibino holoholo hapulu la꞉na!”
REV 7:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale Hunu Haboeno komo netewa-netewa nopopa꞉te hopoeno kuititi netewa-netewalo la꞉mota꞉hanalo ba꞉bo ulamimo. Ba꞉ba tetelo iba꞉te hopo haboeno koko huhu netewa-netewa duhilamenomo a꞉duhilamiya꞉, hopo konomoeno keha hunulu ba꞉gala kehaha꞉ kolomo konomolo huhuti pa꞉mutakapoma꞉.
REV 7:2 Ba꞉ hibila, Godote ba꞉moi nopopa꞉tamo helo dopamo ikalamiya꞉ iba꞉te hopo haba konomo ba꞉gala kehaha꞉ kolomo konomo kubahilamema꞉. Ba꞉ba tetelo nale Hunu Haboeno eta nopodawa hegelate da꞉powalohonako ba꞉ba hapuni podolutalo kumimo, ebeno kokotolo Ka꞉ka꞉ Godote tawakaluba꞉tamo kukala da꞉miya꞉telamenako ba꞉be ilinate itanui. Ba꞉bene ebete komo netewa-netewa nopopa꞉tamo ibulunomamo ba꞉ma ka꞉na goi,
REV 7:3 “Ba꞉ma tetelo la꞉le koko huhu komamo ba꞉moe hopotamo ba꞉gala hopoeno kehatamo ba꞉gala kehaha꞉ kolomo konomotamo eta kuba komo akododa꞉la꞉, huiyatiya ale dopamo Godokono okopino wato kala꞉mo ebeno kukala miya꞉telame komo dupula꞉ma꞉, wadiyala la꞉le hopo haba konomo ba꞉bo na꞉kubahimiya꞉la꞉.”
REV 7:4 Ba꞉bene puya꞉te Godokono kukala nopopa꞉godone duwatemena꞉ nale ba꞉bi tawakalubino kuititi ba꞉ma ka꞉na ulimo, ibino kuititi ba꞉ 144 taosenela, iba꞉te Isalaela tawakalubino hiya꞉hiya꞉ 12 gu ipuwane kikulihoma꞉na꞉.
REV 7:5 Ba꞉moi ba꞉ ba꞉bi Isalaela tawakalubino hiya꞉hiya꞉ guino mahilola — Yuda, Lubeni, Ga꞉da, A꞉sa, Na꞉patali, Ma꞉na꞉sa, Simiyono, Libai, Isaka, Sebulana, Yausepe, ba꞉gala Beniyamina. Ba꞉bema꞉ ba꞉moi gu hiliyonomoeno komoma꞉, eta guni komo 12 taosene tawakaluba꞉te Godokono kukala uwatete, eta guni komo 12 taosene tawakaluba꞉te kukala kuwatete, ibi hiliyonomate ba꞉ ba꞉ba ka꞉na kikulihoma꞉na꞉.
REV 7:9 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale eta komo ba꞉ma ka꞉na kumimo. Hiliyonomo tawakaluba꞉te ibino hiya꞉hiya꞉ hopone ba꞉gala hiya꞉hiya꞉ tama kapiyuimi ipuwane ba꞉gala hiya꞉hiya꞉ tabo ga꞉la kapiyuimi ipuwane ya꞉lo da꞉pikulihuya꞉, iba꞉te ga꞉ga꞉ga꞉ keyakeya kaliko pupuliti, ibino kokotamo ele ba a꞉midalita, Ko Gawadubuino luta bahi dopo hapulu ba꞉gala Sipi-goe Deha꞉potoeno holoholo hapulu ba꞉bo la꞉mota꞉hanuya꞉. Ba꞉ hibila, ba꞉bi tawakalubi mumulunomola, lumagiti ibi ka꞉lamihole modoboha꞉!
REV 7:10 Ba꞉bene ibi hiliyonomate kapimilo ibulunomamo na꞉ga꞉luya꞉, “Aeno Kodawate ebeno Ko Gawadubu habalo da꞉luta, ebe ba꞉ Godotela. Ba꞉ hibila, ka꞉ka꞉ mula꞉ komote ebe ba꞉gala Sipi-goe Deha꞉potago ibi kapiyagodone puluhukuna!”
REV 7:11 Ba꞉ba tetelo Ko Gawadubuino luta bahi ba꞉gala 24 Watowatopi ba꞉gala netewa-netewa Hiya꞉nomo Nopopi, komo Hunu Haboeno nopopi hiliyonomate ibi anagogobeya꞉midalete ba꞉bo la꞉mota꞉hanuya꞉. Ba꞉bene iba꞉te Godokono Ko Gawadubu luta bahi dopo hapulu ibino holoholo hopamo ba miya꞉te ebe adikumilo
REV 7:12 ba꞉ma ka꞉na ga꞉luya꞉, “Wadiyala tawakaluba꞉te emedena emedena tetelo aeno Kodawa Godoko na꞉milimihonakamena꞉, ba꞉gala iba꞉te ebe ba awagaminana ebe mulunomodawama꞉ na꞉ka꞉minakamena꞉! Iyo, iba꞉te ebetamo kalakala tabo na꞉ga꞉lanakamena꞉, ba꞉gala ebeno mahilo hunamo ba adipatena iba꞉te ebeno helo ba꞉gala ha꞉hi komamo na꞉papamila꞉hanakamena꞉! Ba꞉moe tabo hibinomola, ba꞉ba꞉la!”
REV 7:13 Ba꞉bene Watowatopi ipuwalo etate na ba꞉ma ka꞉na kiyanami, “Ba꞉moi ga꞉ga꞉ga꞉ keyakeya kalikagopi puya꞉tela꞉ka꞉, ba꞉gala iba꞉te kebene ka꞉pikuliya꞉?”
REV 7:14 Nale ebeno tabo ba huiya na꞉goimo, “Kodawa, na iya꞉tawaha꞉. Wadiyala ama꞉le na niya꞉tunama꞉.” Ba꞉bene ebete natamo na꞉goi, “Puya꞉te hopoeno kuititi teteno koko temeteme ipuwado pelamete ibino ka꞉ka꞉ mula꞉ komago kuitita꞉mo da꞉pikuli, ba꞉moi tawakalubi ba꞉ ba꞉bi hibima꞉ midipila, iyo, iba꞉te ibino ga꞉ga꞉ga꞉ kaliko Sipi-goe Deha꞉potoeno hawa꞉mo dukulaliya꞉ keyakeyahibinomoma꞉ ba꞉bo midiliya꞉.
REV 7:15 Ba꞉bema꞉ iba꞉te hegela du hiliyonomolo Godote ebeno Ko Gawadubu emede bahilo ba luta, iba꞉te ebeno holoholo hapulu ebe Adikumino Hiya꞉ Genamalo oko bowatihona. Ba꞉bene Godote iba꞉go ba emedena, ebete ibi itagua꞉midalelo
REV 7:16 baa꞉ kapete ba꞉gala beya kapete gala a꞉kulamenakamene, ba꞉gala hegeloeno koete iba꞉tamo temeteme gala a꞉kikalamenakamene.
REV 7:17 Ba꞉ hibila, Sipi-goe Deha꞉potote Ko Gawadubuino luta bahi tamelo da꞉la꞉na, ebete ba꞉bi tawakalubi ulamedawama꞉ beda꞉namene, ba꞉ma ka꞉na ebete sipi-goegoe ulamedawama꞉ ba eda꞉na ibi dito da꞉peka꞉ka꞉la꞉na ba꞉be beyamo komagatalema꞉ne, iba꞉te nihote wiboha꞉ ka꞉ka꞉ ba꞉bo kolawema꞉. Ba꞉ba tetelo ebete ibino temeteme komo hiliyonomo da꞉wibuilamelelamemene, ibino ihi baidi meteteholelamete eta temeteme komote iba꞉tamo gala a꞉kuluhukunakamene.”
REV 8:1 Ba꞉bene Sipi-goe Deha꞉potote mokopa꞉mida pepoeno kuititi hale ditamidui, ba꞉moe ba꞉ sa꞉ba꞉ni tetema꞉ edi. Ba꞉bema꞉ Godokono Hunu Habalo tete gopowahidopolo tawakalubi ba꞉gala nopopi ibi hiliyonomate tabo ga꞉laheno tatabanomolo ba pola꞉na eta diyamote kuluhukutiha꞉,
REV 8:2 ba꞉bene nale Godokono holoholo hapulu emedena tetelo da꞉la꞉mota꞉hana ba꞉bi sa꞉ba꞉ni nopopi ba꞉bo ulamimo, ebete iba꞉tamo sa꞉ba꞉ni gebole bikalameholi.
REV 8:3 Ba꞉ba tetelo eta nopodawate golodo kalili adahete Kodawa Godoko owatidoloeno patapata tama꞉mo da꞉puti, Kodawate hido nibo puhulu ilina ebeno kalili ipuwamo konomamo ba꞉bo haminali, ebete ba꞉be hido nibo ilina hibima꞉ midipino toetoe tabago kapiyuilamete Godoko owatidoloeno golodo patapata hunamo koa꞉mo komiya꞉tema꞉, ba꞉be golodo patapatate Hunu Haboeno Ko Gawadubu luta bahi dopo hapulu itana.
REV 8:4 Ba꞉bene nopodawate kalili koa꞉mo ihatete hido nibo ilina okalimi da꞉tupuimi, ebete kalili ebeno kokotamo koe ipuwane gala kalawete Godotamo ba adipate, hido nibo ilinoeno ahutate hibima꞉ midipino toetoe tabago ebetamo ba꞉bo nalehawaminuya꞉.
REV 8:5 Ba꞉bene nopodawate Godoko owatidoloeno patapata hununi koe ae uwatete kalili ipuwamo miya꞉tete hopo habamo ba꞉bo pa꞉da꞉nui. Ba꞉be mabuma꞉ wima꞉la꞉te hopo konomo ba agegete alomoeno hiya꞉hiya꞉ ga꞉lawatahale komo ba꞉gala hegela a꞉la꞉wa꞉hiyahale komate ba꞉bo ikulihutiya꞉.
REV 8:6 Ba꞉ba tetelo gebola꞉gopi nopopi sa꞉ba꞉ni iba꞉te ibino gebole moleholema꞉ hidote la꞉mota꞉hanuya꞉.
REV 8:7 Ba꞉bene dopo nopodawate ebeno gebole da꞉moli, ba꞉ba tetelo Kodawate nakola huiya wegola kikipo ba꞉gala koe powa hawa꞉go kapiyuilamete hopo habamo helonomamo ba꞉bo piya꞉heki. Ba꞉be mabuma꞉ hopolo da꞉la꞉mota꞉hanui, ba꞉bi keha hiliyonomo ipuwalo, komo netewa-kapiya ipuwane eta kapiya koelo woenakui, eta kapiya woenakui, ba꞉ba ka꞉na hopoeno kehate dito kubakubahuya꞉. Ba꞉ba tetelo hopo konomoeno hiya꞉hiya꞉ hemo ba꞉gala pali ilinate koelo atumu dito kawamotiya꞉.
REV 8:8 Ba꞉bene eta nopodawate ebeno gebole da꞉kamoli, ba꞉moe ba꞉ netewa tetema꞉ edi. Ba꞉ba tetelo eta hununomo hakate koelo da꞉woiti Kodawate ba꞉be haka lawete kehaha꞉ kolomamo dito pa꞉da꞉nui,
REV 8:9 ba꞉bene kehaha꞉ kolomoeno netewa-kapiya komokomo ipuwalo kapiya komoeno beyate hawima꞉ eda꞉te ba꞉bo kubui. Ba꞉be mabuma꞉ ba꞉be beya ipuwoeno ka꞉ka꞉ka꞉ka꞉ ilina hiliyonomate a꞉ha꞉lahuya꞉, ba꞉gala ba꞉be beyalo dopamo da꞉wapata꞉lamenakui ba꞉bi tawakalubino boge hiliyonomate atumu dito kakubakubahuya꞉.
REV 8:10 Ba꞉bene eta nopodawate ebeno gebole da꞉kamoli, ba꞉moe ba꞉ netewa-kapiya tetema꞉ edi. Ba꞉ba tetelo alomo hununi konomo olokiti pegui, keba ka꞉nala꞉ka꞉ lumagiti koe powagoeno ketole alo da꞉da꞉namene ba꞉ba ka꞉nala. Ba꞉bema꞉ ba꞉be olokiti eta tuli beyamo da꞉pegui hopo konomoeno hiliyonomo tuli ba꞉gala beya ma꞉pe ipuwalo, komo netewa-kapiya ipuwane eta kapiya kubanakui, eta kapiya kubanakui, ba꞉ba ka꞉na hopo habanapino niho beyate dito kubakubahuya꞉.
REV 8:11 Ba꞉be olokino mahilo ba꞉ Kaka Hoe Komotela, mabu ebete hopo habamo da꞉pegui, tawakalubino hiya꞉hiya꞉ beya iyapoho bahi hiliyonomo ipuwalo, komo netewa-kapiya ipuwane eta kapiya kakama꞉ eda꞉nakui, eta kapiya kakama꞉ eda꞉nakui, ba꞉ba ka꞉na eda꞉huya꞉. Ba꞉bene komo tawakalubi hiliyonomate ba꞉be beya da꞉nihui, iba꞉te ba꞉ dito ha꞉lahuya꞉.
REV 8:12 Ba꞉bene eta nopodawate ebeno gebole da꞉kamoli, ba꞉moe ba꞉ netewa-netewa tetema꞉ edi. Ba꞉ba tetelo Kodawate hegela ba꞉gala manome ba꞉gala oloki dalukuli, ibino alote hegehegema꞉ dito eda꞉huya꞉, ba꞉bema꞉ hegela teteno netewa-kapiya komokomo ipuwalo kapiya komote duma꞉ edi, ba꞉gala du teteno netewa-kapiya komokomo ipuwalo kapiya komote atumu dunomoma꞉ kedi mabu manome oloki iba꞉te hidamo ka꞉la꞉minahaletiha꞉.
REV 8:13 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale wali alomo hunudu puilutalo umimo, ebete ibulunomo ba꞉ma ka꞉na goi, “Iya꞉, la꞉ niliya! Iya꞉, la꞉ niliya! Iyo, la꞉ puya꞉te hopo habalo demedehonama, la꞉ niliya! Ba꞉ hibila, komo netewa-kapiya nopopa꞉te ya꞉lo a꞉hida ibino gebole komoleholema꞉, ba꞉bema꞉ ibino hiya꞉hiya꞉ geboleno diyamo dikulimina꞉, ba꞉ba tetelo komo netewa-kapiya kokonomo temetema꞉te hopo habamo kopikulima꞉na꞉!”
REV 9:1 Ba꞉bene eta nopodawate ebeno gebole da꞉kamoli, ba꞉moe ba꞉ paibo tetema꞉ edi. Ba꞉ba tetelo nale eta oloki hopo habalo kapitanalo ba꞉bo umimo, ba꞉be olokiti dopamo Hunu Habane peguya꞉. Ba꞉bene Kodawate ba꞉be olokitamo ki bikami, ba꞉be ki ba꞉ Du Bobo Konomoeno gigiho a꞉hiya꞉midoeno kila, ba꞉be Du Bobolo kuba gobogobo hiliyonomate bemedehona.
REV 9:2 Ba꞉bene olokiti ba꞉be ki lawete Du Boboeno gigiho da꞉hiya꞉midui, ahutate ba꞉moe bobo ipuwane konomamo ba podoluta hegela hunu haputi duma꞉ ba꞉bo edi, keba ka꞉nala꞉ka꞉ tawakaluba꞉te gagale hemo ba emadolamehole ahutate hununomamo dodolomene ba꞉ba ka꞉nala.
REV 9:3 Ba꞉ba tetelo ahuta ipuwane mumulunomo wawakate da꞉pikulihui, Kodawate iba꞉tamo iwawoeno helo ba ikalame
REV 9:4 iba꞉tamo talona ba꞉bo ihatelami, iba꞉te hopo habalo dapepehona ba꞉bi hemo ba꞉gala pali ilina ba꞉gala kehoeno paha a꞉kakubahilama꞉mena꞉, huiyatiya puya꞉te Kodawoeno kukala ibino wato kala꞉mo miya꞉telameha꞉pima꞉ deda꞉hana, wawakate ba꞉bi tawakalubi kapiyatamo temeteme ikalamema꞉ modobola.
REV 9:5 Ba꞉bene wawakate paibo manome ipuwalo hibima꞉ midiha꞉pa꞉tamo kokonomo temeteme kikalamema꞉na꞉, ba꞉be temeteme ba꞉ iwawate lumagi ba aliwata ebetamo dikamemene ba꞉be temeteme keba ka꞉nala꞉ka꞉ ba꞉ba ka꞉nala. Ba꞉be mabuma꞉ hibima꞉ midiha꞉pa꞉te kokonomo temeteme ba iya꞉tawaha, iba꞉te ha꞉lahama꞉ ubi komiya꞉tema꞉na꞉ huiyatiya gabo nipo kohowadima꞉na꞉, iyo, wawakate tawakalubi a꞉kanakapulama꞉mena꞉, mabu iba꞉te ba꞉be komo ododima꞉ Kodawate talona ihatelami.
REV 9:7 Ba꞉ hibila, nale dulamimo ba꞉bi wawakoeno holoholo hiya꞉nomola, iyo, ibino ape ba꞉ alaholoho komamo da꞉tolamita ba꞉bi alaholohopino oso-goegoeno ape huiyala, ba꞉bene iba꞉te ibino watamo koko gawadubuino golodo pake ilina pupulila. Ba꞉gala ibino dopo ba꞉gala baidi ba꞉ dubuino dopo ba꞉gala baidila,
REV 9:8 huiyatiya ibino hinibo ba꞉ kamenakamenoeno ga꞉ga꞉ga꞉ hinibo keba ka꞉nala꞉ka꞉ ba꞉ba ka꞉nala, ba꞉gala ibino lalo ba꞉ layono-gahoeno lalola.
REV 9:9 Ba꞉bi wawaka ibino bodolo teta꞉mo alaholohopino auli nehe ilina pupulila ba꞉gala ibi patamagopila, ba꞉bema꞉ iba꞉te ibino patamamo da꞉wapata꞉lamiti diyamo konomote ba꞉bo uluhukuti, sa꞉liyote-boge hiliyonomate oso-goegoe hiliyonomago alaholoma꞉ keba ka꞉na ka꞉tolamitanaka ba꞉ba ka꞉na.
REV 9:10 Ba꞉gala ba꞉bi wawaka wetagopila, iyo, iba꞉te paibo manome ipuwalo hopo habanapa꞉tamo temeteme dikalamemena꞉ ba꞉be temetemeno helote ibino wetolo kopola꞉lama꞉nama꞉ne.
REV 9:11 Ba꞉gala hibila, ibino ko gawadubu ba꞉ helonomo nopodawa etala, huiyatiya ebe Godokono okodawaha꞉, ao, ebe ba꞉ Du Bobo Konomolo demedehona ba꞉bi kuba gobogoboeno namutudawala. Ebeno mahilo Yu tawakalubino tabamo Aba꞉donatela ba꞉gala Guliki tawakalubino tabamo Apoliyonatela, ba꞉be mahiloeno ipuwa ba꞉ ‘Kubanomamo Alukulidawala.’
REV 9:12 Mu numitota꞉la꞉, kokonomo temeteme ipuwalo dopo komote ba꞉ a꞉peto, huiyatiya komo netewa temeteme komate ba꞉ na꞉pa꞉!
REV 9:13 Ba꞉bene eta nopodawate ebeno gebole da꞉kamoli, ba꞉moe ba꞉ sikisi tetema꞉ edi. Ba꞉ba tetelo nale eta dawoeno tabo madodo bulimo, ba꞉be tabo madodote Godoko owatidoloeno golodo patapatoeno mubumubu netewa-netewa ipuwane puluhukui, ba꞉be patapatate Godokono holoholo hapulu itana.
REV 9:14 Ba꞉bema꞉ tabo madodote naba sikisi nopodawatamo ba꞉ma ka꞉na goi, “Yupala꞉itisi ko tulilo matuhulamehola꞉go demedena, ama꞉le ba꞉bi netewa-netewa nopopino hale pahalamililamete naeno ubi komokomo ododilima꞉ noelama꞉!”
REV 9:15 Ba꞉bema꞉ puya꞉te matuhulamehola꞉go Godokono tete da꞉latiminama꞉, ba꞉bi netewa-netewa nopopa꞉te ibino matuhulamehole ipuwane dito ikuliya꞉, iba꞉te tawakalubi hiliyonomo ipuwalo, komo netewa-kapiya ipuwane eta kapiya kanakapumi, eta kapiya kanakapumi, ba꞉ba ka꞉na konewagelema꞉. Ba꞉ hibila, Godote ba꞉bi netewa-netewa nopopino oko owati komoma꞉ kebe gogo ba꞉gala kebe manome ba꞉gala kebe hegela ya꞉lo da꞉miya꞉tiya꞉, iba꞉te ba꞉ ba꞉be tetenomolo ebeno ubi komokomo ododilima꞉ ikuliya꞉.
REV 9:16 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale eta komo ba꞉ma ka꞉na kumimo, alaholohopi dubu mumulunomate ibino oso-goegoa꞉go ba꞉bo ikulihuya꞉, ba꞉bene nale ibino kuititi ba꞉ma ka꞉na ulimo, ba꞉be kuititi ba꞉ 200 miliya꞉nila.
REV 9:17 Ba꞉bi alaholohopi dubate auli nehe ilina pupulila, ba꞉bi nehe ipuwalo komo ba꞉ hawihawi hibila, komo bumibumi hibila, ba꞉gala komo hipawahipawa hibila. Ba꞉bene ba꞉bi dubuino oso-goegoeno komo ba꞉ma ka꞉nala, ibino wato ba꞉ layono-gahoeno wato huiyala, ba꞉gala ibino tabo ipuwane koe powa ahutago ba꞉gala kubanomo nibo papateho komate kapimilo ikulihutiya꞉.
REV 9:18 Ba꞉bema꞉ oso-goegoeno tabo ipuwane dikulihuti ba꞉bi netewa-kapiya kuba komamo iba꞉te hopo habanapi hiliyonomo ba꞉bo anakapulamiya꞉, iyo, tawakalubi hiliyonomo ipuwalo, iba꞉te komo netewa-kapiya ipuwane eta kapiya kanakapumi, eta kapiya kanakapumi, ba꞉ba ka꞉na ewageliya꞉.
REV 9:19 Ba꞉ hibila, oso-goegoeno helote ibino tabolo ba꞉gala wetolo na꞉pola꞉lama꞉nui, iyo, ibino wetoeno helote tawakaluba꞉tamo temeteme atumu a꞉kikalamiya꞉ mabu ibino weto ba꞉ helo kaluino wato huiyala.
REV 9:20 Huiyatiya nale eta komo ba꞉ma ka꞉na kumimo, tawakalubi hiliyonomo ipuwalo puya꞉te ba꞉moi kokonomo temeteme komone ha꞉lahaheno, iba꞉te ibino kubakuba ukui hiya꞉ma꞉ midiliti Godotamo kohobila꞉ha꞉. Ba꞉ma ka꞉na iba꞉te ibino ida꞉da꞉li ba꞉gala kuba gobogobo adikulame komo kamiya꞉paleha꞉, iyo, iba꞉te ha꞉kiya ibino kokotamo hiya꞉hiya꞉ dododilinaka, ba꞉bi golodo ba꞉gala siliba ba꞉gala auli ilina ida꞉da꞉li, ba꞉bi nakola ba꞉gala keha ida꞉da꞉li, ba꞉bi baidi tamiholame ba꞉gala galo duhulame ba꞉gala wapata꞉lameha꞉ ida꞉da꞉li, iba꞉te ba꞉bi hiya꞉hiya꞉ ida꞉da꞉li adikulame komo kekelalameha꞉.
REV 9:21 Ba꞉gala iba꞉te Godotamo ohobila꞉ma꞉ ibino komo kuba ododili komokomo atumu kamiya꞉paleha꞉, ba꞉ma ka꞉na tawakalubi anakapulame komo ba꞉gala giwali ododili komo, bohelemele pilo komo ba꞉gala komopino ilina pilo komo, iba꞉te ba꞉bi kuba komokomo miya꞉palema꞉ ubiha꞉ma꞉ eda꞉huya꞉.
REV 10:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale eta helonomo nopodawa Hunu Habane pihitigutalo ba꞉bo umimo. Ilaguiti ebeno wato a꞉bega anagogobeya꞉midadigui, ba꞉gala ebeno holoholo hegeloeno a꞉la꞉mina huiyala, ba꞉bene ebete alomoeno bubu puliti, ebeno nato ba꞉ koko hototo netewa koe powago da꞉wamotita keba ka꞉nala꞉ka꞉ ba꞉ba ka꞉nala.
REV 10:2 Ba꞉ba tetelo nale ebeno kokotolo ditanui ba꞉be tabo miya꞉te pepa bekumimo. Ba꞉bene ebete hopo habalo ba la꞉na, ebeno tu hapu nato kehaha꞉ kolomamo a꞉putiti ba꞉gala pele hapu nato gagale hakamo aka꞉puti,
REV 10:3 ebete ebeno tabo madodo hunamo adipatelo tabo ba꞉bo goi, layono-gahate helo konomago keba ka꞉na kugahanako ba꞉ba ka꞉na. Ba꞉bene alomoeno sa꞉ba꞉ni ga꞉lawatahale komate ebeno tabo ba huiya,
REV 10:4 nale ibino tabo uliti bukamo miya꞉tema꞉ dewagelimo, ba꞉ba tetelo eta tabo madodote Hunu Habane puluhukuti na ba꞉ma ka꞉na pikiyanami, “Ao, alomoeno sa꞉ba꞉ni ga꞉lawatahale komate da꞉ga꞉la, ama꞉ bukamo akamiya꞉ta꞉la꞉! Ibino tabo komote ugumui ipuwalo nitanamene!”
REV 10:5 Ba꞉bene kehaha꞉ kolomamo ba꞉gala gagale hakamo da꞉puti, ba꞉be helonomo nopodawate ebeno tu hapu kokoto Hunu Habamo ba adipate,
REV 10:6 ebete pote hopo haba ba꞉gala alomo dododiliya꞉ ba꞉gala pote emedena tetelo demedenamene ba꞉be Ko Ka꞉ka꞉dawoeno mahilamo hibinomo tabo ba꞉ma ka꞉na goi, “Ba꞉ba꞉la, latimi tete ba꞉ a꞉wibo!
REV 10:7 Iyo, Godote ya꞉lo tetelo dugumuiya꞉, tete ga꞉ga꞉nomo petote ba꞉be nopo ebeno ukui hawakalimipi okopa꞉tamo galane da꞉hawakalimiya꞉, ebete ba꞉be nopoeno hiya꞉hiya꞉ komo ba꞉ma tetelo kododilima꞉ne, mabu hibila, naba sa꞉ba꞉ni nopodawate ebeno gebole da꞉molemene, ba꞉ba tetelo ba꞉bi komoeno ikuliho komo ba꞉bo kotupuimima꞉ne.”
REV 10:8 Ba꞉bene dopamo Hunu Habane da꞉puluhukui, ba꞉be atu tabo madodote natamo gala ba꞉ma ka꞉na kapi, “Ama꞉le kehaha꞉ kolomamo ba꞉gala gagale hopamo da꞉puti, ba꞉be nopodawatamo tote ebeno kokotolo ditana ba꞉be tabo miya꞉te pepa na꞉nelawa꞉.”
REV 10:9 Ba꞉bema꞉ nale nopodawatamo tote pepa lawema꞉ ebe da꞉nikiyamimo, ba꞉ba tetelo ebete natamo na꞉goi, “Wadiyala, ama꞉ lawete na꞉na. Ba꞉moe pepate amia꞉no tabo ipuwalo golanomoma꞉ keda꞉ma꞉ne, moloeno gola keba ka꞉nala꞉ka꞉ ba꞉ba ka꞉na, huiyatiya amia꞉no tepo ipuwalo kakanomoma꞉ keda꞉ma꞉ne.”
REV 10:10 Ba꞉bene nale pepa lawete da꞉nuimo, ba꞉ hibila, naeno tabo ipuwalo moloeno golama꞉ eda꞉te, huiyatiya da꞉migiguimo tepo ipuwalo kakanomoma꞉ ba꞉bo edi.
REV 10:11 Ba꞉ba tetelo nopodawate na gala na꞉kakiyanami, “Wadiyala ama꞉ gala katote komo tawakalubi hiliyonomatamo Godokono tabo na꞉nolamaginakuya꞉. Iyo, ebeno ubi komodo kebe komate iba꞉tamo ba꞉gala ibino hiya꞉hiya꞉ hopamo ba꞉gala ibino hiya꞉hiya꞉ tabo ga꞉la kapiyuimi tawakaluba꞉tamo ba꞉gala ibino hiya꞉hiya꞉ koko gawadubatamo dikulihomena꞉, ba꞉bi komokomoma꞉ ibi na꞉nikiyalamenakuya꞉.”
REV 11:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, Kodawate genamoeno ga꞉ga꞉ modoboteno kuku natamo ikanamete ba꞉ma ka꞉na goi, “Ama꞉ tote na Adikunameno Hiya꞉ Genama nemodobotete, ba꞉gala ba꞉be genamalo ditana na owatidoloneno patapata kanemodobotete, ba꞉bene ba꞉bolo na dadikunamena ama꞉le ba꞉bi tawakalubi akona꞉ka꞉lamiholiya꞉.
REV 11:2 Huiyatiya ama꞉le na Adikuname Genamoeno kala imi ipuwalo ditana ba꞉be tame dito hapu akamodobota꞉la꞉, mabu nale hibima꞉ midiha꞉pa꞉tamo 42 manome tete kikalamema꞉nemo, ba꞉bema꞉ iba꞉te ba꞉be tete ga꞉ga꞉dopolo na Adikuname Genamoeno tame dito hapu ba꞉gala naeno Yelusalema ko haba konomo ibino mauba ipuwalo natamo ba mikita ibino kuba komokomo ba꞉bo kododilima꞉na꞉.
REV 11:3 Ba꞉gala naeno tepo ipuwoeno ukui kohawakalilamema꞉ nale okopi netewapa꞉tamo helo kikalamema꞉nemo, ba꞉bema꞉ 42 manome ipuwalo, ba꞉moe tete ba꞉ 1,260 hegela tetela, iba꞉te naeno tabo hopo habanapa꞉tamo ba nolamagimi, iba꞉te tawakalubino hibima꞉ midiha꞉ mabuma꞉ ibino tepo temeteme hawakalimima꞉ kubakuba kaliko kopupulima꞉na꞉.”
REV 11:4 Ba꞉ hibila, Kodawa Godoko ba꞉ hopo haboeno Namutudawala, ba꞉gala ba꞉moi ebeno tabo olamagimipi netewa ba꞉ ebeno holoholo hapulu da꞉la꞉mota꞉na ba꞉bi olibi gao keha netewala ba꞉gala alo netewala.
REV 11:5 Ba꞉be mabuma꞉ hopo habanapa꞉te iba꞉tamo temeteme ikalamema꞉ ubi dihatemena꞉, huiyatiya ibino tabo ipuwane Godokono koete puluhukuti iba꞉tamo da꞉maubahalena ba꞉bi tawakalubi ba꞉bo kemadolamema꞉ne, iyo, puya꞉te ibi netewapa꞉tamo temeteme ikalamema꞉ dewagelemena꞉, Godote ibi ba꞉ ba꞉ma ka꞉na kanakapulamema꞉ne.
REV 11:6 Ba꞉bene ba꞉moi okopi netewoeno komo ba꞉ma ka꞉nala, iba꞉godolo helo bitana wegola o komo koduhimima꞉, ba꞉bema꞉ tete ga꞉ga꞉nomolo iba꞉te Godokono tepo ipuwoeno ukui ba hawakalilamena wegolate a꞉koamene. Ba꞉gala iba꞉godolo helo atumu ba꞉ka-itana, iba꞉te tawakalubino niho beya hawinomoma꞉ komidilima꞉ ba꞉gala komo hiliyonomo olalati komamo hibima꞉ midiha꞉pi kalukulima꞉, iyo, keba tetelo iba꞉te ubi dihatenakomena꞉ ba꞉bakobako hiya꞉hiya꞉ temeteme komo hopo habanapa꞉tamo bikalamenakomena꞉.
REV 11:7 Huiyatiya iba꞉te Godokono tabo olamagimi oko hibilo dupula꞉mena꞉, ba꞉ba tetelo eta Hiya꞉nomo Holoholo Ilinate Du Bobo Konomo ipuwane podolote iba꞉go ba palaholo helonomoma꞉ eda꞉te ibi ba꞉bo kanakapulamema꞉ne.
REV 11:8 Ba꞉bene ba꞉be helo Ilinate ibino ha꞉la ape dito miya꞉palete, iba꞉te tawakalubino eta konomo haboeno ilina kolowami haba tulituliyalo dito kokapitahiya꞉mota꞉nama꞉na꞉. Ba꞉be ko haboeno ipuwa mahilo ba꞉ Sodomola ba꞉gala eta ipuwa mahilo ba꞉ Isipitila, dopamo tawakaluba꞉te ba꞉be atu habalo Kodawa Ya꞉suku keha pihigalo ba pihomote ebe atumu ba꞉bo anakapumiya꞉.
REV 11:9 Ba꞉bene hiya꞉hiya꞉ hopo tawakalubi ba꞉gala hiya꞉hiya꞉ tama tawakalubi ba꞉gala hiya꞉hiya꞉ tabo ga꞉la kapiyuimi tawakalubi, ibi hiliyonomate Godokono okopi netewapino ha꞉la ape ba ulamelelame bobo ipuwamo miya꞉tema꞉ talona ba꞉bo kihatelamema꞉na꞉. Ba꞉gala ibi netewapino ha꞉la mabuma꞉ hopo habalo demedehona ba꞉bi hibima꞉ midiha꞉pi hiliyonomo ipuwalo etapa꞉te etapa꞉tamo malemale ilina ba ikama꞉tihuita ibino kalakala konomamo kadipatema꞉na꞉, iyo, ibino kalakala konomote kitanama꞉ne mabu tete ga꞉ga꞉dopolo ba꞉bi Godokono ukui hawakalimipi netewapa꞉te iba꞉tamo temeteme ikalamenakuya꞉.
REV 11:11 Huiyatiya ibino kalakala komote netewa-kapiya hegelalo itanate, ba꞉bene eta hegela ba lawe hegela tuli tetelo ba꞉bo kowiboma꞉ne. Iyo, hibila, ba꞉ba tetenomolo Godokono ka꞉ka꞉te ebeno okopi netewapi ipuwamo popegate iba꞉te hoe ipuwane mahila꞉te, ba꞉bene hopo habanapa꞉te ibi ka꞉ka꞉lo ba ulame konomo tole ba꞉bo lawiya꞉.
REV 11:12 Ba꞉bene ibi netewapa꞉go alaholohopima꞉ deda꞉hanama꞉, ba꞉bi hibima꞉ midiha꞉pa꞉te ibi ba ulamita, Godokono okopi netewate ebeno konomo tabo madodo Hunu Habane pitalo ba꞉ma ka꞉na uliya꞉, “La꞉ mamo na꞉podolala꞉!” ba꞉bema꞉ iba꞉te alomoeno hawai ipuwado ebetamo ba꞉bo nodoluya꞉.
REV 11:13 Ba꞉bene ba꞉ba tetenomolo konomo wima꞉la꞉te uluhukuti, ko haboeno 7,000 tawakaluba꞉te ba ha꞉laha ibino genama hiliyonomo ipuwalo, komo ta꞉ni ipuwane eta kapiya kubanakui, eta kapiya kubanakui, genamate ba꞉ba ka꞉na kubakubahuya꞉. Ba꞉be mabuma꞉ puya꞉te ha꞉lahaheno iba꞉te konomamo ba toletoleho Hunu Haboeno Godo ba꞉bo awagaminuya꞉.
REV 11:14 Mu numitota꞉la꞉, kokonomo temeteme ipuwalo netewa komate ba꞉ a꞉petoha, huiyatiya eta kapiya temeteme komote ba꞉ na꞉pe!
REV 11:15 Ba꞉bene eta nopodawate ebeno gebole da꞉kamoli, ba꞉moe ba꞉ sa꞉ba꞉ni tetema꞉ edi. Ba꞉bema꞉ ba꞉ba tetelo komopa꞉te Hunu Habalo ibino hiya꞉hiya꞉ tabo madodo hunamo da꞉wadiya꞉paa꞉lateli, na Yonete ibino tabo ba꞉ma ka꞉na ulimo, “Aeno Kodawa Godoko ba꞉gala ebeno Oemedawa Kelisoko, ibi netewapa꞉te helo konomo ba꞉ a꞉lawa꞉, ba꞉bema꞉ ba꞉ma tetene tupuimiti emedena emedena tetelo ebe kapiyate hopo konomoeno Ko Gawadubuma꞉ beda꞉namene!”
REV 11:16 Ba꞉ba tetelo 24 watowatopa꞉te Godokono holoholo hapulu koko gawadubuino ahidi bahi hunamo da꞉gagahidi, iba꞉te ibino ahidi haba miya꞉palete ibino holoholo Godokono nato mabamo ba miya꞉te ebe adikumilo
REV 11:17 ba꞉bo ga꞉luya꞉, “Helonomo Kodawa Godo, hopo haba tupuimihino ama꞉ dopamo nemedenama꞉ta, ba꞉gala ama꞉ ka꞉lo bemedenata! Ale ama꞉tamo kalakala tabo badipatitama꞉, mabu ama꞉ amia꞉no konomo helo ba꞉ a꞉lawa꞉ta, ba꞉bene ba꞉ma tetene tupuimiti ama꞉ kapiyate Ko Gawadubuma꞉ beda꞉namena꞉ta!
REV 11:18 “Hibima꞉ midiha꞉pa꞉te ama꞉tamo ba maubahana, ama꞉ huiyatiya iba꞉tamo konomo mauba ipuwalo ba꞉bo uluhukata. Ba꞉bema꞉ ba꞉moe ba꞉ tetela, ama꞉le ha꞉lahapino komo kanagilamelelamema꞉na꞉ta, ba꞉gala ba꞉moe ba꞉ tetela, amia꞉no ukui hawakalimipi ba꞉gala komo okopi, ibi hiliyonomate hidohido huiya ama꞉godone kuwatema꞉na꞉. Iyo, ba꞉moe ba꞉ tetela, puya꞉te amia꞉no mahilo hunamo dadipatena ba꞉bi tuputupu tawakalubi hiliyonomo ipuwalo kokopi ba꞉gala hegehegepi atumu hidohido huiya ama꞉godone kuwatema꞉na꞉, ba꞉gala ba꞉moe ba꞉ tetela, puya꞉te ibino kuba ododili ipuwalo hopo haba da꞉kubahimiya꞉, ama꞉le ibi huiyatiya kokubahilamema꞉na꞉ta.”
REV 11:19 Ba꞉bema꞉ ba꞉ba tetelo Godoko Adikumino Hiya꞉ Genamate ebeno Hunu Habalo da꞉la꞉na, ebete ba꞉be genamoeno gigiho dito a꞉hiya꞉midui, ba꞉bene ya꞉lo tetenomolo Godote ebeno tawakalubi kowalubilinama꞉ iba꞉tamo nopo da꞉tamotiya꞉, na Yonete ba꞉be nopoeno Talona Bokose genama gulu ba꞉bo umimo. Ba꞉gala ba꞉be atu tetenomolo kokonomo nakola huiya wegola kikipo ba꞉gala alomoeno hiya꞉hiya꞉ ga꞉lawatahale komo ba꞉gala hegela a꞉la꞉wa꞉hiyahale komo ba꞉gala konomo wima꞉la꞉, ba꞉bi komate kapimilo ikulihutiya꞉.
REV 12:1 Ba꞉ba tetelo Godokono Hunu Habalo eta konomo hanohano komote duluhukui, na Yonete ba꞉be komo ba꞉ma ka꞉na umimo, kamenate hegela puliti ebeno nato netewa manoma꞉mo ba a꞉puti, ba꞉bene Kodawate ebe mabuma꞉ 12 oloka꞉mo ko gawadubuino pake ilina ododiti, ebete ba꞉be ilina kamenoeno watamo ba꞉bo pulimi.
REV 12:2 Ba꞉be kamena lamitula, ba꞉bema꞉ ebete gudu alahimima꞉ konomo temeteme ba ulita ba꞉bo ihiti.
REV 12:3 Ba꞉bene eta hanohano komote Hunu Habalo ba꞉ma ka꞉na uluhukui, Hawihawi Pahiya Konomo nale umimo, ebe ta꞉ni kalitagoenola ba꞉gala sa꞉ba꞉ni watagoenola, ba꞉bene ebeno sa꞉ba꞉ni watolo sa꞉ba꞉ni koko gawadubuino pake ilinate na꞉pola꞉ma꞉nui.
REV 12:4 Nale ebe ba umita ebete alomo hunuino oloki hiliyonomo ipuwalo, komo netewa-kapiya ipuwane eta kapiya ebeno wetamo hopamo pa꞉da꞉nanakui, eta kapiya hopamo pa꞉da꞉nanakui, ibi ba꞉ba ka꞉na kubahilami. Ba꞉bene kamenate gudu alahimima꞉ dewageliti, Konomo Pahiyate ebeno dopo hapuamo ba꞉bo pinuti, guduti menokoeno tepo ipuwane pehawakalalo ebete dito konama꞉.
REV 12:5 Ba꞉bene ba꞉be kamenate dubu gudu balahimi. Ba꞉ hibila, galane tetelo ba꞉be guduti hopo haboeno hiliyonomo hiya꞉hiya꞉ tawakalubino Ko Gawadubuma꞉ keda꞉ma꞉ne, ba꞉bene puya꞉te eba꞉go alaholohopima꞉ deda꞉hamena꞉ ebete auli kukamo ibi kubamo kalukulima꞉ne. Ba꞉bema꞉ Pahiyate ba꞉be gudu nama꞉ dewageliti, Godokono nopodawate ebeno ka꞉ka꞉ ba pemula꞉me ebe pelawa꞉digate Hunu Habamo magatate Godokono Ko Gawadubu luta bahilo ebeno dopo hapuamo dito nadipi.
REV 12:6 Ba꞉be atu tetelo kamenate Pahiyoeno helo ipuwane dito alahuli, Godote ebeno ka꞉ka꞉ mula꞉mema꞉ dito hopolo ya꞉lo da꞉hiduimiya꞉ ba꞉be awalela baha꞉mo, ba꞉bene ebete 1,260 hegelalo ba꞉bolo ba nemedena Godote ebe hidamo kobuiya꞉minanatema꞉ne.
REV 12:7 Ba꞉bema꞉ Godokono Hunu Habalo alaholo komote duluhukui, ba꞉ba tetelo Maikoloko ba꞉gala Godokono komo tuputupu nopopi iba꞉te Konomo Pahiya ba꞉gala ebeno nopopa꞉go kubamo alaholuya꞉.
REV 12:8 Ba꞉bene alaholo ipuwalo Maikoluia꞉te wato kikipo da꞉lawi, ba꞉bema꞉ iba꞉te Pahiya ebeno nopopa꞉go Hunu Habane helonomamo ba ta꞉malatele,
REV 12:9 ibi hiliyonomo uwata꞉digate hopamo dito piya꞉hekiya꞉. Ba꞉ hibila, Konomo Pahiyate ba꞉ hopo haba tupuimi mabuni kaluino holoholamo duluhukuya꞉ ba꞉be dawala, ebeno netewa mahilo ba꞉ Kubadawala ba꞉gala Saitanatela, ebete hopo habanapi hiliyonomo ha꞉da amihoholamema꞉ ewagelena.
REV 12:10 Ba꞉ba tetelo na Yonete Hunu Habalo eta dawoeno konomo tabo madodo bulimo, ebete ba꞉ma ka꞉na goi, “Ka꞉lo Godokono ka꞉ka꞉ mula꞉ komote hopo habanapa꞉tamo ba꞉ a꞉puluhuku! Iyo, ebeno helo ba꞉gala ebeno Oemedawa Kelisokono helote hawakala pe, mabu ba꞉moe ba꞉ ebeno Ko Gawadubuma꞉ eda꞉ tetela! Ba꞉ hibila, aeno Godokono Ko Gawadubuma꞉ eda꞉ komote a꞉puluhuku, mabu ebeno holoholo hapulu kebe dawate dopamo du hegela hiliyonomolo a hibima꞉ midipi ekaki kuba ododilipima꞉ da꞉ka꞉minakui, ebete ba꞉be Kubadawa Hunu Habane a꞉pa꞉da꞉nui.
REV 12:11 Ba꞉ ba꞉ma ka꞉na hibima꞉ midipa꞉te ba꞉be Kubadawoeno wato kikipo itamidamiya꞉, mabu iba꞉te alaholoho ipuwalo katoletolehonaha꞉ ibino hibima꞉ midi mabuma꞉ koha꞉lahama꞉, iyo, iba꞉te Godokono Hido Tabo dolamagiminaka ba꞉be taboeno hibi komamo ba꞉gala Sipi-goe Deha꞉potoeno hawa꞉mo helonomoma꞉ eda꞉hana.
REV 12:12 Ba꞉be mabuma꞉ la꞉ puya꞉te Hunu Habalo demedehonama, wadiyala la꞉ hiliyonomo na꞉kalakalahala꞉! Huiyatiya la꞉ tawakalubi ba꞉gala ilina puya꞉te hopolo ba꞉gala kehaha꞉ kolomolo demedehonama, la꞉ niliya mabu Kubadawate la꞉tamo ba꞉ a꞉pihitigui. Ebe iya꞉tawala ebeno kuba ododili tete ba꞉ gopowahima꞉ neda꞉, ba꞉bema꞉ ebete konomo mauba ipuwado la꞉tamo a꞉puluhukui!”
REV 12:13 Ba꞉bene na Yonete ba꞉moe eta komo bekumimo, Godote Konomo Pahiya hopo habamo da꞉pa꞉da꞉nui, ebete ba꞉be komo ba piya꞉tawuta, dubu gudu dalahimi ba꞉be kamena heloamo ba꞉bo ta꞉matui ebe konekubahimima꞉.
REV 12:14 Ba꞉bema꞉ ba꞉ba tetelo Godote konomo walino patamu netewa kamenatamo ikami, ebete Pahiya miya꞉pate dito hopamo ba nepuila ebeno ka꞉ka꞉ mula꞉ bahi ba꞉bo konumima꞉. Ba꞉bene kamenate ba꞉bolo ba nemedena, Godokono ka꞉ka꞉ mula꞉ komote ebegodolo netewa-kapiya gogolo ba itana, eta gogo da꞉lawemene ba꞉be gogoeno tetenomamo ba꞉bo konuluhukuma꞉ne.
REV 12:15 Ba꞉bene kamenoeno alahula꞉ ipuwalo Pahiyate ebe ba ta꞉mata, ebeno tabo ipuwane konomo hulama beyate uluhukui ba꞉be kamena lawa꞉digate ebeno ka꞉ka꞉ mula꞉ bahini dito katama꞉,
REV 12:16 huiyatiya Godote kamenatamo owalubi komo ba poeme, hakate ha꞉kiya da꞉bolagali ba꞉ba tetelo hakate Pahiyoeno tabone duluhukui ba꞉be konomo beya dito migigui.
REV 12:17 Ba꞉be mabuma꞉ Pahiyate kamenatamo konomamo da꞉maubui, huiyatiya ebete ebe miya꞉pate ba꞉ dito tui ebeno komo guguda꞉go konalaholohonama꞉, ba꞉bi gugudi ba꞉ puya꞉te Godokono tutumu tabamo da꞉papamila꞉halena ba꞉gala Ya꞉suku mabuma꞉ hibi tabo dolamagimina ba꞉bi tawakalubila. Ba꞉ba tetelo ba꞉be Pahiya Konomote tote hopo haboeno kehaha꞉ kolomo dodolo ba꞉bo nela꞉nui.
REV 13:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale Hiya꞉nomo Holoholo Ilina kehaha꞉ kolomo ipuwane podolutalo ba꞉bo umimo. Ebe sa꞉ba꞉ni watagoenola ba꞉gala ta꞉ni kalitagoenola, ba꞉bene ebeno ta꞉ni kalitalo ta꞉ni koko gawadubuino pake ilinate na꞉pola꞉lama꞉nui, ba꞉gala ebete ebeno sa꞉ba꞉ni watamo Godoko iduduputimino mahilo ya꞉lo a꞉miya꞉teholiya꞉.
REV 13:2 Ba꞉be Ilinoeno holoholo ba꞉ma ka꞉nala, ebeno ape ba꞉ helonomo tumu pusino apela, ba꞉gala ebeno nato ba꞉ konomo helo gahoeno natola, ba꞉gala ebeno tabo ba꞉ helonomo layono-gahoeno tabola. Ba꞉bene Konomo Pahiyate ebeno konomo helo Hiya꞉nomo Holoholo Ilinatamo dito ikami, ebe kapiyate hopo haba konomolo ko gawadubuma꞉ keda꞉nama꞉.
REV 13:3 Ba꞉bene nale ebeno eta watolo hoe bugumuti ditama꞉nui ba꞉bo umimo, ebete ba꞉be bugumu alaholo ipuwalo lawi, huiyatiya ba꞉be hoe komote ebegodolo wibote ebeno watote gala dito kahidui, ba꞉be mabuma꞉ hopo habanapi hiliyonomate hanohanoholo Hiya꞉nomo Holoholo Ilina kalakalago ba꞉bo ta꞉matuya꞉.
REV 13:4 Ba꞉be atu tetelo tawakaluba꞉te Pahiya ba꞉bo adikumiya꞉ mabu ebete ebeno helo Hiya꞉nomo Holoholo Ilinatamo hibilo ikami, ba꞉gala iba꞉te Hiya꞉nomo Holoholo Ilina atumu ba kadikumi ba꞉ma ka꞉na ga꞉luya꞉, “Ba꞉moe Hiya꞉nomo Holoholo Ilinoeno helo bada konomola꞉ka꞉! Hibila, lumagino helo modoboha꞉ ba꞉moe Ilinago alaholohoma꞉!”
REV 13:5 Ba꞉bene Godote 42 manome tete Hiya꞉nomo Holoholo Ilinatamo ikami, ebete hopo habalo helodawama꞉ ba eda꞉na ebe ha꞉kiya ebe awagaminalo Godoko ba꞉bo kiduduputimima꞉.
REV 13:6 Ba꞉bema꞉ Hiya꞉nomo Holoholo Ilinate ba꞉ ba꞉ba ka꞉na ewageli, ebete Godoko ba iduduputimi ebeno mahiloeno komoma꞉ ba꞉gala ebeno Emede Haboeno komoma꞉ ba꞉gala Hunu Habalo demedehona ba꞉bi tawakalubino komoma꞉ kubakuba tabo ba꞉bo olamagi.
REV 13:7 Ba꞉be atu tetelo Godote ebetamo tete bikami ebete hibima꞉ midipa꞉go ba alaholoho ibi kokubahilamema꞉, ba꞉be mabuma꞉ ebete hopo konomolo helodawama꞉ ba eda꞉na, hiya꞉hiya꞉ tama tawakalubi ba꞉gala hiya꞉hiya꞉ tabo ga꞉la kapiyuimi tawakalubi ba꞉gala hiya꞉hiya꞉ hopo tawakalubi ibi hiliyonomate ebetamo kopapamila꞉halema꞉na꞉.
REV 13:8 Ba꞉bema꞉ hopo konomolo demedehona ba꞉bi tawakaluba꞉te Hiya꞉nomo Holoholo Ilina ba꞉bo kadikumima꞉na꞉, huiyatiya Godote hopo haba ododihino dopamo puino mahilo Sipi-goe Deha꞉potoeno Ka꞉ka꞉ Bukamo da꞉miya꞉telamiya꞉ ba꞉bi tawakalubi kapiyate ebe a꞉kadikuma꞉mena꞉, ba꞉be Sipi-goe Deha꞉poto ba꞉ kubapa꞉te danakapumiya꞉ ba꞉be dawala.
REV 13:9 Ba꞉bene Godote na꞉goe, “Galagodawa, ama꞉ ba꞉moe tabo hidamo nulia꞉!
REV 13:10 Naeno hibima꞉ midipi ipuwalo nale kebe lumagitamo ubi dihatemo komopa꞉te ebe du genamamo dito noemema꞉, iba꞉te ba꞉be lumagi ba꞉bamo hibilo konoemema꞉na꞉, ba꞉gala na kebe lumagitamo ubi dihatemo komopa꞉te ebe alaholo gila꞉mo anakapumima꞉, iba꞉te ebe alaholo gila꞉mo hibilo kanakapumima꞉na꞉. Ba꞉be mabuma꞉ naeno tawakaluba꞉te ba꞉bakobako temeteme duwatemena꞉, wadiyala iba꞉te ibino hibima꞉ midi ipuwalo kodakodalo ba la꞉mota꞉hana heloha꞉ma꞉ akeda꞉hala꞉.”
REV 13:11 Ba꞉bene nale eta Hiya꞉nomo Holoholo Ilinate haka ipuwane podolutalo ba꞉bo umimo, ebe netewa kalita ka꞉ma꞉ dikulihumita ba꞉bako dabi sipi-goe deha꞉poto huiyala, huiyatiya ebeno tabo madodo ba꞉ helonomo pahiyoeno tabo madodola.
REV 13:12 Ba꞉bene ba꞉be Ilinate dopamo duluhukui ba꞉be eta Hiya꞉nomo Holoholo Ilinoeno dopo hapulu ba la꞉na helo ebegodone ba꞉bo lawi, hopo habalo demedehona ba꞉bi tawakalubi hiliyonomate ebeno tabamo kopapamila꞉halema꞉. Ba꞉bema꞉ ba꞉moe gabodo ebete tawakalubi konomamo kiyahalami iba꞉te dopo Ilina kadikumima꞉, ba꞉be dopo Ilina ba꞉ hoe bugumuti ba itama꞉na gala da꞉kahidui ba꞉be Ilinala.
REV 13:13 Huiyatiya galane duluhukui ba꞉be eta Hiya꞉nomo Holoholo Ilinoeno komo ba꞉ma ka꞉nala, ebe koko hanohano komo ododilidawala, ba꞉bema꞉ ebete hiliyonomo tawakalubino holoholo hapulu koe powago alomo hununi hopo habamo dito puluhukuti.
REV 13:14 Ba꞉ hibila, Godote tete ebetamo ikami ebete dopo Hiya꞉nomo Holoholo Ilinoeno dopo hapulu ba꞉makomako hanohano komo kododilima꞉, ba꞉bema꞉ ba꞉moi hanohano ododili ipuwalo ebete tawakalubi hiliyonomo ha꞉da ba amihoholame ebete ibi ba꞉bo kiyahalami, iba꞉te dopo Ilinoeno holoholo huiya ida꞉da꞉li kododima꞉. Ebe ubila tawakaluba꞉te ba꞉be dopo Ilina ba adikumi ebeno mahilo hunamo kadipatema꞉, mabu etate alaholo gila꞉mo ebe hoe bugumagoma꞉ da꞉midi ebe huiyatiya kahoeha꞉.
REV 13:15 Ba꞉ba tetelo Godote modoboma꞉ da꞉goi, galane duluhukui ba꞉be Ilinate helo ba꞉bo lawi, tawakaluba꞉te kebe ilina ibino kokotamo dododi ba꞉be ida꞉da꞉litamo ka꞉ka꞉ kikamema꞉. Ba꞉be mabuma꞉ dopo Hiya꞉nomo Holoholo Ilinoeno ida꞉da꞉liti ba ka꞉ka꞉na, ba꞉bete hopo habanapa꞉tamo tabo olamagi da꞉tupuimi ibi ba꞉ma ka꞉na kiyalami, puya꞉te ebe adikumihino wadiyala komopa꞉te ibi dito nanakapulama꞉mena꞉.
REV 13:16 Ba꞉bene hegehege ba꞉gala koko tawakalubi, dogodogopi ba꞉gala ilinaha꞉pi, puya꞉te huiyaha꞉ oko dowatihona ba꞉gala puya꞉te mani oko dowatihona, ba꞉bi tawakalubi hiliyonomatamo ba꞉moe Hiya꞉nomo Holoholo Ilinate tutumu bikalami iba꞉te ebeno kukala ibino tu hapu kokotamo o wato kala꞉mo kuwatema꞉.
REV 13:17 Ba꞉ba tetelo tawakalubi hiliyonomo ipuwalo puya꞉te ebeno kukala uwateheno, ibi kubahilamema꞉ ebete komopa꞉tamo talona bihatelami, iba꞉te kolowami ipuwalo ba꞉bi tawakaluba꞉tamo naha ilina ba꞉gala mani a꞉kikalama꞉mena꞉. Ba꞉bema꞉ la꞉ puya꞉te ba꞉moe buka tabo dulihutama, la꞉ niya꞉tawahala꞉ ba꞉moe Hiya꞉nomo Holoholo Ilinoeno kukala ba꞉ ebeno nabala, iyo, ba꞉be naboeno ipuwa ba꞉ ebeno mahilola. Ba꞉bema꞉ wadiyala la꞉ ipuwalo muludawate ebeno hido ukuia꞉mo ba꞉moe naboeno ipuwa na꞉lawa꞉mene, mabu hibila, naba 666 ba꞉ Hiya꞉nomo Holoholo Ilinoeno nabala.
REV 14:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale Yelusalema ko haboeno hunu hakalo Sipi-goe Deha꞉potote ebeno 144 taosene tawakaluba꞉go la꞉mota꞉hanalo ba꞉bo ulamimo. Hibila, ba꞉bi tawakalubino wato kala꞉mo ebete ebeno mahilo ba꞉gala ebeno Nabiwino mahilo ya꞉lo a꞉miya꞉teholamiya꞉.
REV 14:2 Ba꞉bene Godokono Hunu Habane da꞉pi, nale eta tabo madodo ba꞉bo ulimo, ba꞉be tabo madodo ba꞉ helonomola, beya konomoeno diyamo ba꞉gala alomoeno goewata diyamo huiyala, huiyatiya nale gala da꞉kemalagidoluimo ba꞉be tabo hidonomoma꞉ goimo, tawakaluba꞉te dolopo kapimilo keba ka꞉na ka꞉modohutanaka ba꞉ba ka꞉na.
REV 14:3 Ba꞉ba tetelo nale 144 taosene hibima꞉ midipino komo ba꞉ma ka꞉na umimo, iba꞉te Godokono Ko Gawadubu luta bahino dopo hapulu ba꞉gala ebeno netewa-netewa Hiya꞉nomo Nopopino holoholo hapulu ba꞉gala 24 Watowatopino holoholo hapulu ba la꞉mota꞉hana uli ohale ba꞉bo alapihuya꞉. Ba꞉ hibila, hopo habanapi hiliyonomo ipuwalo ba꞉bi 144 taosene tawakalubi kapiyate ba꞉be uli ohale alapihoma꞉ modobola, mabu Kodawate ibino ka꞉ka꞉ huiyahalete Saitanakono du genamane ba꞉bo uluhukulateliya꞉.
REV 14:4 Ba꞉moi tawakalubi ba꞉ kebe dubate ibi ha꞉kiya ibino ape talonama꞉ ba midili kamenakamenago kapiyama꞉ keda꞉hanakuiha꞉ ba꞉moi ba꞉bi dubula, iyo, iba꞉te kamenakamena kuwateholiya꞉ha꞉. Ba꞉bema꞉ hibila, Sipi-goe Deha꞉potote kebamo da꞉tonako iba꞉te ebe ba꞉bamo dito ta꞉matanaka, mabu ebete hopo habanapi hiliyonomo ipuwalo kebe tawakalubi Saitanakono du genamane duluhukulateliya꞉ ibi ba꞉ ba꞉bi tawakalubila. Iyo, ebe ba꞉gala Godoko ibi netewapino hidonomo palino dopo naha ilina keba ka꞉nala꞉ka꞉, ba꞉moi 144 taosene tawakalubi ba꞉ ba꞉ba ka꞉nala,
REV 14:5 ibino tabo ipuwalo ha꞉da amiho komo puliyanomola, ba꞉gala ibino ododili ipuwalo ibi tuputupunomoma꞉ ba eda꞉ha eta kubate iba꞉godolo kitanaha꞉.
REV 14:6 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale Godokono eta nopodawate alomo hunudu puilutalo ba꞉bo umimo, ebe ba꞉ Godokono emedena emedena teteno Hido Tabo atedawala. Ba꞉bema꞉ puya꞉te hiya꞉hiya꞉ hopolo ba꞉gala hiya꞉hiya꞉ tama tawakalubi ipuwalo ba꞉gala hiya꞉hiya꞉ tabo ga꞉la kapiyuimi ipuwalo demedehona, ba꞉bi tawakalubi hiliyonomatamo ba꞉moe nopodawate Godokono tabo konolamagima꞉ne.
REV 14:7 Ba꞉bene ebete ibulunomamo na꞉goi, “Wadiyala la꞉ hiliyonomo Godoko tolemelo ebe hunamo nadipata꞉la꞉, mabu tete ba꞉ a꞉pe ebete hopo habanapino hiliyonomo komokomo kanagilamelelamema꞉. Wadiyala la꞉ hiliyonomo ebe nadikuma꞉la꞉, mabu hopo haba ba꞉gala alomo hunu, kehaha꞉ koko kolomo ba꞉gala dito peka꞉ka꞉la꞉hale beya hegehege, ebe ba꞉ ba꞉moi hiliyonomo komo Ododilidawala.”
REV 14:8 Ba꞉bene ba꞉moe dopo nopodawoeno tabote da꞉wibui, ba꞉ba tetelo nale etoeno tabo ba꞉ma ka꞉na kulimo, “Ba꞉baloni haba konomo niliya! Dopamo ebeno tawakaluba꞉te ibino kateneno kuba ubi komamo komo tawakalubi hiliyonomo ba꞉bo kubahilamenakuya꞉, lumagiti gamoda beya etatamo ikamelo keba ka꞉na ka꞉kubahiminako ba꞉ba ka꞉na. Ba꞉ hibila, dopamo tetelo tawakaluba꞉te na꞉ga꞉lanakuya꞉ ba꞉be ko haba helonomola, huiyatiya ba꞉ma tetelo Godokono mauba ipuwalo ebe ba꞉ a꞉kubadiga!”
REV 14:9 Ba꞉bene ba꞉moe nopodawoeno tabote da꞉wibui, ba꞉ba tetelo nale etoeno tabo bekulimo, ebe ba꞉ netewa-kapiya tete dawama꞉ dedi ba꞉be dawala. Ebete tabo ibulunomamo ba꞉ma ka꞉na goi, “Pote Hiya꞉nomo Holoholo Ilinoeno kukala ebeno wato kala꞉mo o kokotamo lawete ba꞉be Ilinoeno ida꞉da꞉li dadikumimini,
REV 14:10 Godote ba꞉be lumagitamo ebeno konomo mauba kalili hibilo kikamema꞉ne, ebete ebeno niho ipuwalo dupula꞉mene ebeno komo dito kokubadigama꞉. Ba꞉ hibila, ebeno kuba ododili mabuma꞉ ba꞉be lumagiti Sipi-goe Deha꞉poto ba꞉gala ebeno hido-talona nopopino holoholo hapulu koko temeteme kuwatema꞉ne, mabu ebete helonomo koe ipuwalo ba꞉gala kubanomo nibo pate ipuwalo ba꞉bo konilutama꞉ne.
REV 14:11 Ba꞉bema꞉ ebete kebolo da꞉lutamene ba꞉be Koe Haboeno ahutate hununomamo ba odolo, hegela du hiliyonomolo hawela ami tete nanekelenomo a꞉kuma꞉mene, iyo, ebete Hiya꞉nomo Holoholo Ilina ebeno ida꞉da꞉la꞉go ba adikulamena ebeno mahiloeno kukala ebeno ape hunulu kalakalago da꞉lawi, ba꞉be mabuma꞉ ebete koko temeteme ipuwalo emedena emedena tetelo bemedenamene.”
REV 14:12 Ba꞉moe ba꞉be mabuma꞉ na Yonete goemo, puya꞉te Godokono tutumu tabamo papamila꞉ha mabuma꞉ temeteme duwatemena꞉, wadiyala iba꞉te Ya꞉suku hibima꞉ midi ipuwalo kodakodalo ba la꞉mota꞉hana heloha꞉ma꞉ akeda꞉hala꞉.
REV 14:13 Ba꞉bene eta tabo madodo Hunu Habane da꞉pi nale ba꞉ma ka꞉na ulimo, “Ama꞉ naeno tabo bukamo ba꞉ma ka꞉na na꞉miya꞉ta꞉, ba꞉ma tetene tupuimiti kuititi hegela teta꞉mo nuluhuku, puya꞉te Kodawa Ya꞉suku hibima꞉ midi mabuma꞉ da꞉ha꞉lamena꞉, ba꞉ba꞉te na꞉kalakalahamena꞉!” Ba꞉bene Godokono Gobogobote natamo tabo ba꞉ma ka꞉na olamagi, “Ba꞉ hibila, ba꞉ba꞉te konomamo kokalakalahama꞉na꞉! Iba꞉te natamo kebe menemene oko dowatihonakui, ba꞉be oko ipuwane hidohido noloho gaote a꞉pikulinakuya꞉, ba꞉bema꞉ iba꞉te ba꞉be oko ipuwane hido hawela kamihoma꞉na꞉.”
REV 14:14 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale naeno dopo hapulu Kodawate alomoeno keyakeya hawai hunulu lutalo ba꞉bo umimo. Ba꞉be Kodawoeno ape hopo lumagino ape huiyala, ba꞉gala ebete ebeno watamo ko gawadubuino golodo pake ilina puliti ebeno kokotolo witi-laisa iya꞉hilino giha giliti itama꞉nui.
REV 14:15 Ba꞉bene Godokono Hunu Habalo ditana ba꞉be Adikumino Hiya꞉ Genama ipuwane eta nopodawate puluhukuti, hawai hunulu da꞉luti ba꞉be Kodawatamo ibulunomamo na꞉pegoi, “Tete ba꞉ uluhuku! Wadiyala ama꞉ amia꞉no gila꞉mo hopo haboeno witi-laisa hiliyonomo niya꞉hila꞉, mabu ba꞉bi ilinate hibinomolo a꞉kodakodahui!”
REV 14:16 Ba꞉bema꞉ pote hawai hunulu da꞉luti ba꞉be Kodawate ebeno witi-laisa iya꞉hilino gili adipatete hopo habado da꞉patanatui ba꞉bi ilina hiliyonomo iya꞉hiliti ba꞉ dito uwateholi.
REV 14:17 Ba꞉bene Godoko Adikumino Hiya꞉ Genama ipuwane eta nopodawate da꞉puluhukui, ebeno kokotolo gala꞉ipi gao ma꞉taleno giha giliti itama꞉nui.
REV 14:18 Ba꞉ba tetelo Godoko owatidoloeno patapata tamene ebeno eta nopodawate kapuluhukui, ebe ba꞉ Godotamo hawa꞉goeno ilina ikamehoeno koe namutudawala. Ba꞉bene ebete gala꞉ipi gao ma꞉taleno gila꞉godawatamo ibulunomamo na꞉goi, “Hopo haboeno pali konomolo gala꞉ipi gaote hibinomolo a꞉wiwahui! Ba꞉bema꞉ wadiyala ama꞉ amia꞉no gila꞉mo ba꞉bi gao hiliyonomo na꞉ma꞉tala꞉!”
REV 14:19 Ba꞉bema꞉ gila꞉godawate ebeno gili da꞉midahui, ebete hopo haboeno palino gala꞉ipi gao hiliyonomo ma꞉talete Godote dopamo koamo daligiya꞉ ba꞉be gao ihi adilutihoeno nakola bobo ipuwamo dito niya꞉heki, mabu ba꞉be bobolo Godote kuba ododilipa꞉tamo ebeno konomo mauba kohawakalimima꞉ne.
REV 14:20 Ba꞉bene Godokono Yelusalema ko haba tamelo ebeno okopa꞉te ba꞉bi gala꞉ipi gao hiliyonomo natamo ba mikimoelita, ibino ape ipuwane hawihawinomo beyate hawi keba ka꞉nala꞉ka꞉ ba꞉ba ka꞉na konomamo peka꞉ka꞉la꞉huti. Ba꞉ba tetelo ba꞉be beyoeno kulukulu ba꞉ deha꞉poto tulino kulukulu huiyala, iyo, ba꞉be beyate oso-goeno wato teta꞉mo ba nodolo 300 kilomitama꞉ eda꞉te ba꞉bo neka꞉ka꞉li.
REV 15:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale Godokono Hunu Habalo eta konomo hanohano komo ba꞉ma ka꞉na umimo, ebeno sa꞉ba꞉ni nopopa꞉te hopo habanapa꞉tamo sa꞉ba꞉ni koko temeteme komo kikalamema꞉ ba꞉bolo la꞉mota꞉hanuya꞉. Hibila, iba꞉te kuititi tetenomolo hopo habamo ba꞉bi temeteme komo poelame da꞉wibomene, ba꞉ba tetelo Godokono konomo mauba komote atumu kakawiboma꞉ne.
REV 15:2 Ba꞉bene nale a꞉la꞉mina beya bobo konomote ditanui ba꞉bo umimo, ba꞉be ipuwane hegela a꞉la꞉wa꞉hiya komate ikulihuya꞉, koe keba ka꞉nala꞉ka꞉ ba꞉ba ka꞉nala. Ba꞉gala ba꞉be beya bobo tamelo da꞉la꞉mota꞉hanui, nale ba꞉bi hibima꞉ midipa꞉te Godokono dolopo ibino kokotolo pola꞉lama꞉nalo kulamimo, ba꞉bi tawakalubi ba꞉ puya꞉te Hiya꞉nomo Holoholo Ilinoeno wato kikipo da꞉lawiya꞉ ba꞉bi tuputupupila, iyo, ba꞉ba꞉te alaholoho ipuwalo ba꞉be Ilinoeno holoholo ida꞉da꞉li ba꞉gala ebeno mahiloeno 666 naba a꞉kubahilamiya꞉.
REV 15:3 Ba꞉bema꞉ Mosesete kebe ohale ebeno oko namutudawa Godoko adikumima꞉ dododiya꞉, ba꞉be ohale ba꞉ atumu Sipi-goe Deha꞉potoeno ohalela, ba꞉bi tuputupupa꞉te ba꞉be ohale ba alapiho ba꞉ma ka꞉na ga꞉luya꞉, “Kodawa Godo, ama꞉ ba꞉ Helonomodawalata! Ama꞉le kebe koko komo dododilina ba꞉bi komo ba꞉ hanohano hibinomola! Ama꞉ kapiya ba꞉ emedena teteno Ko Gawadubulata! Amia꞉no ododili gabo ba꞉ tuputupunomola ba꞉gala hibinomola!
REV 15:4 “O Kodawa, ama꞉ kapiyate Hido-talona Dawama꞉ eda꞉nata, ba꞉bema꞉ hiliyonomo tawakaluba꞉te ama꞉ tolemelo amia꞉no mahilo hunamo badipatenakomena꞉! Iyo, amia꞉no tuputupu ododili komo hopo habanapa꞉tamo a꞉hawakalilamiya꞉ta, ba꞉bema꞉ hiya꞉hiya꞉ hoponapi hiliyonomate ama꞉ adikumima꞉ kopelameholema꞉na꞉!”
REV 15:5 Ba꞉bene ba꞉be komo da꞉wibui, Godokono sipi-goe tama alokoa꞉mida Talona Genamate Yunapino iniwala꞉godolo da꞉la꞉nami, ba꞉be Genama nale Hunu Habalo ba꞉ma ka꞉na umimo, ba꞉be Genama tetenomolo ditana ba꞉be Talonanomo Haba Godote dito a꞉hiya꞉midui.
REV 15:6 Ba꞉bema꞉ puya꞉godolo helo ditanui sa꞉ba꞉ni koko temeteme hopo habamo kopoelamema꞉, ba꞉bi sa꞉ba꞉ni nopopa꞉te Talona Genama guni ba꞉bo pikuliya꞉, ibi alonomo hidohido kaliko pupulila, ba꞉gala ibino bodolo tetelo da꞉pola꞉lama꞉nui ba꞉bi kawali ba꞉ huiya kokonomo ilinala.
REV 15:7 Ba꞉bene Godokono netewa-netewa Hiya꞉nomo Nopopi ipuwane eta kapiyate ba꞉moi sa꞉ba꞉ni nopopa꞉tamo puluhukuti iba꞉tamo sa꞉ba꞉ni golodo kalili dito pikalami, ba꞉bi kalili ba꞉ emedena tetelo demedena ba꞉be Kodawa Godokono konomo mauba komamo tabuilamela.
REV 15:8 Ba꞉ba tetelo Godokono konomo alo ba꞉gala ebeno helote ebeno Talona Genama ba tabuimi ahutate konomamo ba꞉bo odolui, ba꞉bema꞉ hibila, sa꞉ba꞉ni nopopa꞉te hopo habamo koko temeteme da꞉poelamemena꞉, ba꞉be oko iba꞉godolo upula꞉heno etate ba꞉be Talona Genama guamo a꞉pa꞉ga a꞉kamodobamene.
REV 16:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, Godokono Talona Genamane tabo madodote sa꞉ba꞉ni nopopa꞉tamo ibulunomamo da꞉goi nale ba꞉ma ka꞉na ulimo, “La꞉ tolamete Godokono konomo mauba komoeno sa꞉ba꞉ni kalili hopo habanapa꞉tamo na꞉nehaminahala꞉la꞉!”
REV 16:2 Ba꞉bema꞉ doponomo nopodawate tote ebeno kalili hopo habamo da꞉nehaminui, ba꞉ba tetelo puya꞉te Hiya꞉nomo Holoholo Ilina adikumilo ebeno kukala ibino apa꞉mo da꞉lawi, ba꞉bi tawakalubino apene kokonomo kumate ba ikuliho ibino temeteme konomoma꞉ ba꞉bo eda꞉halami.
REV 16:3 Ba꞉bene eta nopodawate ebeno kalili hopo haboeno kehaha꞉ kolomamo da꞉nehaminui, ba꞉moe ba꞉ netewa kalilima꞉ ba eda꞉ kehaha꞉ kolomoeno beyate hoe lumagino hawima꞉ eda꞉te, ba꞉be beya ipuwalo da꞉ka꞉ka꞉halena ba꞉bi ilina hiliyonomate ba꞉ dito ha꞉lahuya꞉.
REV 16:4 Ba꞉bene eta nopodawate ebeno kalili hopo haboeno hiya꞉hiya꞉ tuli ba꞉gala beya ma꞉pe hunamo da꞉nehaminahui, ba꞉moe ba꞉ netewa-kapiya kalilima꞉ ba eda꞉ tawakalubino niho beyate hawinomoma꞉ ba꞉bo eda꞉halami.
REV 16:5 Ba꞉bema꞉ hopo konomoeno beya namutudawama꞉ deda꞉na, ba꞉be nopodawate tabo Kodawatamo da꞉goi, na Yonete ba꞉ma ka꞉na ulimo, “Hido-talona Dawa, hopo haba tupuimihino ama꞉ dopamo nemedenama꞉ta, ba꞉gala ba꞉ma tetelo ama꞉ bemedenata! Hibila, amia꞉no helo ipuwalo hopo habanapa꞉tamo kebe komokomo dododila꞉ ba꞉bi komo ba꞉ tuputupunomola,
REV 16:6 mabu iba꞉te amia꞉no ukui hawakalimipi ba꞉gala komo hibima꞉ midipi ba anakapulame ibino hawiti hakamo a꞉ka꞉ka꞉la꞉halamiya꞉. Ba꞉be mabuma꞉ ama꞉le iba꞉tamo hawi bikalama꞉ta, iyo, iba꞉te da꞉nihomena꞉ ibino kuba ododili mabuma꞉ modobo huiya ba꞉bo kuwatema꞉na꞉.”
REV 16:7 Ba꞉bene puya꞉te dopamo Ya꞉suku mabuma꞉ da꞉ha꞉lahuya꞉, nale ba꞉bi tawakalubino tabo madodote Godoko owatidoloeno patapata ipuwane duluhukui ba꞉ma ka꞉na ulimo, “Kodawa Godo, ama꞉ ba꞉ Helonomodawalata! Amia꞉no ododili komo ba꞉ tuputupu hibinomola!”
REV 16:8 Ba꞉bene eta nopodawate ebeno kalili hegela hunamo da꞉nehaminui, ba꞉moe ba꞉ netewa-netewa kalilima꞉ ba eda꞉ hegelate koenomoma꞉ eda꞉lo hopo habanapa꞉tamo konomo temeteme ba꞉bo ikalami.
REV 16:9 Ba꞉bema꞉ iba꞉te hegeloeno ko temeteme ipuwalo ba emedena ba꞉bo iya꞉tawahuya꞉, ibino hiya꞉hiya꞉ koko temeteme komate Godogodone ikulihuya꞉. Ba꞉be mabuma꞉ iba꞉te mauba ipuwalo ebeno mahilo komoma꞉ kubakuba tabo bolamagimiya꞉, huiyatiya ibi ubihinola ibino kuba ododili ipuwane ebetamo ohobila꞉hate ebe kawagaminama꞉.
REV 16:10 Ba꞉bene eta nopodawate ebeno kalili Hiya꞉nomo Holoholo Ilinoeno ko gawadubu luta baha꞉mo da꞉nehaminui, ba꞉moe ba꞉ paibo kalilima꞉ edi. Ba꞉bema꞉ ba꞉be Kubadawoeno hopote dunomoma꞉ dedi, ba꞉ba tetelo hopo habanapino koko kumoeno temeteme mabuma꞉ iba꞉te ibino ma꞉lapila ba aliwatahale, Hunu Habalo demedena ba꞉be Kodawa Godokono komoma꞉ kubakuba tabonomo ga꞉late, iba꞉te ubiha꞉ma꞉ ba꞉bo eda꞉huya꞉ ibino kuba ododili komone ebetamo ohobila꞉ma꞉.
REV 16:12 Ba꞉bene eta nopodawate ebeno kalili Yupala꞉itisi ko tuli hunamo da꞉nehaminui, ba꞉moe ba꞉ sikisi kalilima꞉ ba eda꞉ ba꞉be tulino beyate a꞉pa꞉hoenomo ba꞉ dito a꞉pa꞉hoi. Ba꞉be mabuma꞉ hegelate da꞉puluhukunako ba꞉be hapulu demedehona, komo koko gawadubate ba꞉be tulino gagale hakado pelamiya꞉ komo hopo habanapa꞉go kopalaholohoma꞉.
REV 16:13 Ba꞉ba tetelo na Yonete kuba gobogobo netewa-kapiyate talotaloeno holoholamo ba ikulita ba꞉bo ulamimo, etate Konomo Pahiyoeno tabo ipuwane uluhukuti, ba꞉gala etate Hiya꞉nomo Holoholo Ilinoeno tabo ipuwane kuluhukuti, ba꞉gala etate Godokono mahilamo Ha꞉da Amiho Tabo Olamagidawoeno tabo ipuwane akuluhukui.
REV 16:14 Hibila, ibi ba꞉ Saitanakono komo kuba gobogobola. Iyo, iba꞉godolo ebeno helote itana ebeno hanohano komo kododilima꞉, ba꞉bema꞉ iba꞉te hopo haba konomamo kotolamema꞉na꞉, hiya꞉hiya꞉ hopoeno koko gawadubu hiliyonomo kapiya baha꞉mo magahelete, iba꞉te Helonomodawa Godokono Ko Hegelalo etapa꞉te etapa꞉go kalaholohoma꞉.
REV 16:15 Ba꞉be mabuma꞉ Kodawa Ya꞉suti ebeno tawakaluba꞉tamo ba꞉ma ka꞉na goita, “Mu numitota꞉la꞉! La꞉le iya꞉tawaha꞉ tetelo nale la꞉tamo kopema꞉nemo, pilo dubuti tawakalubino ilina uwatema꞉ keba ka꞉na ka꞉penako ba꞉ba ka꞉na. Ba꞉bema꞉ pote naeno pe komoma꞉ uliholo demedena ebete na꞉kalakalamene, mabu pilo dawate ebeno hidohido kaliko a꞉kuwata꞉mene, ba꞉bene ebete tawakalubino holoholo hapulu kikipuiya a꞉kapata꞉mene.”
REV 16:16 Ba꞉ba tetelo Saitanakono netewa-kapiya kuba gobogobate hopo habanapino koko gawadubu hiliyonomo ibino alaholoho habamo dito magaheliya꞉, ba꞉be haboeno mahilo Yu tawakalubino tabamo ba꞉ Amagedonela.
REV 16:17 Ba꞉bene eta nopodawate ebeno kalili alomo hunamo da꞉nehaminui, ba꞉moe ba꞉ sa꞉ba꞉ni kalilima꞉ edi. Ba꞉bema꞉ Godoko Adikumino Hiya꞉ Genamalo ditana, ba꞉be Ko Gawadubu luta bahini tabo madodote ibulunomo ba꞉ma ka꞉na uluhukui, “Ba꞉ba꞉la, naeno oko komo ba꞉ a꞉wibo!”
REV 16:18 Ba꞉ba tetelo alomoeno hiya꞉hiya꞉ ga꞉lawatahale komo ba꞉gala hegela a꞉la꞉wa꞉hiyahale komate ikulihuya꞉, ba꞉bene konomo wima꞉la꞉te hopo habamo pi. Ba꞉ hibila, Godote tawakalubi ododiliti ibi hopo habamo da꞉miya꞉tiya꞉, ba꞉ba tetene tupuimiti ba꞉ma teta꞉mo puluhuku, iba꞉te ba꞉bako wima꞉la꞉ kuminakuiha꞉ mabu ba꞉be wima꞉la꞉ helonomola.
REV 16:19 Ba꞉be mabuma꞉ Ba꞉baloni ko habate netewa-kapiya teta꞉mo hiya꞉hiya꞉ bola꞉la꞉halete, ba꞉bene komo hopoeno koko habate atumu dito kakubakubahuya꞉. Ba꞉ ba꞉ba ka꞉na Godote Ba꞉baloni habanapino koko kuba ododili komokomo ba emalagidole, ebete huiya iba꞉tamo dito ikalami, iyo, ibi hiliyonomate Godokono konomo mauba komoeno kalili ba niho ba꞉bo upula꞉diguya꞉.
REV 16:20 Ba꞉bene hopo haba konomoeno hunuhununomo haka hiliyonomate wibohonomo ba wiboho, atu tetelo kehaha꞉ kolomolo da꞉pola꞉na ba꞉bi hiya꞉hiya꞉ hopo hiliyonomate beya ipuwamo dito ululadigahaliya꞉.
REV 16:21 Ba꞉gala koko nakola huiya wegola kikipate hopo habanapa꞉tamo konomamo alomo hununi doi, ba꞉bi wegola kikipoeno menemene ba꞉ 50 kilogalamala. Ba꞉ hibila, ba꞉be hiya꞉nomo wegola mabuma꞉ tawakalubino temetemete kubanomoma꞉ ba eda꞉, iba꞉te maubahalete Godokono komoma꞉ kubakuba tabo ba꞉bo ga꞉luya꞉.
REV 17:1 Ba꞉ba tetelo Godokono konomo mauba kalila꞉go nopopi sa꞉ba꞉ni ipuwalo etate na Yonetamo pete natamo tabo ba꞉ma ka꞉na pegoi, “Ama꞉le eta komo umima꞉ mamo na꞉pa꞉. Nale ama꞉ kiya꞉tumima꞉nemata, Godote Dubu Bilibili Kamenatamo ebeno kuba huiya keba ka꞉na na꞉kikamemene. Ba꞉be Kamenoeno komo ama꞉ na꞉puma꞉, ebe ba꞉ tawakaluba꞉te hiya꞉hiya꞉ koko tuli tametamelo dododiya꞉ ba꞉be konomo awagaha habala.
REV 17:2 Ba꞉ hibila, hopo haboeno koko gawadubate ba꞉be Kamenatamo pelamenakuya꞉, hiya꞉hiya꞉ tetelo iba꞉te eba꞉go kapiyama꞉ ba peda꞉ha ibino kateneno kuba ubi komokomo ba꞉bo kopododilinakoma꞉. Iyo, hopo habanapa꞉te eba꞉go kapiyama꞉ da꞉peda꞉hanakui iba꞉te ba꞉bo daedaeholenakuya꞉, dubate gamoda konomamo da꞉nihonaka ba꞉ba ka꞉na.”
REV 17:3 Ba꞉bene nopodawate Godokono Gobogoboeno heloamo na dito hopamo da꞉magatani, ba꞉ba tetelo nale ba꞉be Kamenate Hiya꞉nomo Hawihawi Ilina hunulu lutalo ba꞉bo numimo. Ba꞉be Hawihawi Ilinoeno komo ba꞉ma ka꞉nala, ebe sa꞉ba꞉ni watagoenola ba꞉gala ta꞉ni kalitagoenola, ba꞉gala ebete ebeno ape hunamo Godoko iduduputimino mahilo hiliyonomo ya꞉lo a꞉miya꞉teholiya꞉.
REV 17:4 Ba꞉bene ebe hunulu da꞉luti, ba꞉be Kamena hawihawi kaliko pupulila, ko gawa kamenate ilina keba ka꞉na ka꞉pupulinako ba꞉ba ka꞉na, ba꞉gala ebeno kokobelo hiya꞉hiya꞉ golodo ba꞉gala hidohido a꞉la꞉mina nakola ba꞉gala nehe tulikahula na꞉pola꞉ma꞉nui. Ba꞉bene ebeno kokotolo ditanui nale ba꞉be golodo kalili ba꞉bo umimo, ba꞉be kalili ba꞉ ebeno kateneno hiya꞉hiya꞉ kuba ubi komo ba꞉gala dalowa꞉ ubi komo tabonomola.
REV 17:5 Ba꞉bema꞉ ebete ebeno wato kala꞉mo ebeno mahilo ya꞉lo a꞉miya꞉tiya꞉ ba꞉ma ka꞉na, “Na ba꞉ Ba꞉baloni ko habala, naeno helo konomola!” Ba꞉gala ebete ba꞉be mahiloeno ipuwa hawakalimiti gala ba꞉ma ka꞉na kamiya꞉tiya꞉, “Na ba꞉ dubu bilibili kamenakamenoeno Menokola, ba꞉bene nagodone kateneno hiya꞉hiya꞉ kuba ubi komo hiliyonomate ikulihonaka!”
REV 17:6 Ba꞉bene nale ba꞉be Kamenoeno komo gala da꞉kumimo ba꞉moe komo ba꞉bo iya꞉tawuimo, tawakaluba꞉te Ya꞉suku ta꞉matapi ipuwalo pui kanakapulamenakui, ebete ba꞉bi hibima꞉ midipino hawi da꞉nihonakui daedaema꞉ ba꞉bema꞉ edi, lumagiti gamoda konomamo da꞉ninako ba꞉ba ka꞉na. Ba꞉ hibila, nale ba꞉be Kamenoeno komokomo dulamimo ba꞉bema꞉ konomamo hanohanutimo.
REV 17:7 Ba꞉bene nopodawate natamo na꞉goi, “Ama꞉ bada mabuma꞉ ka꞉hanohanuta? Ba꞉moe Kamenoeno ipuwa komo nale ama꞉ kiya꞉tumima꞉nemata, ba꞉gala kebe ilinate ebe dagatanako ba꞉be sa꞉ba꞉ni watagoeno ba꞉gala ta꞉ni kalitagoeno Ilinoeno komo atumu kakiya꞉tumima꞉nemata.
REV 17:8 Ba꞉be Hawihawi Ilinate hopo habalo dopamo emedenami huiyatiya ka꞉lo ba꞉bolo kalutaha꞉. Tete tatalila ebete Du Bobo Konomo ipuwane gala da꞉kamahigamene hopo habanapa꞉tamo ebeno ka꞉ka꞉go hawakala ba꞉bo kopuluhukuma꞉ne, mabu Godote ubi ya꞉lo ihatiya꞉ hopoeno kuititi tetelo ebe hibilo kokubahimima꞉. Huiyatiya Godote ebe kubahimihino, dopamo hibima꞉ midiha꞉pa꞉te ba꞉be Ilinoeno komoma꞉ konomamo kohanohanohoma꞉na꞉, mabu ebete dopamo emedenami, ba꞉bene ebeno komo da꞉wibui huiyatiya iba꞉tamo gala na꞉kuluhukuna. Ba꞉bema꞉ ba꞉moe komo ba꞉ hibila, Godote hopo haba ododihino ebeno tuputupupino mahilo Ka꞉ka꞉ Bukamo dopamo da꞉miya꞉telamiya꞉, Hawihawi Ilina adikumipino mahilote ba꞉be Bukalo a꞉kapola꞉lama꞉namena꞉.
REV 17:9 “Ama꞉ nulia꞉, ba꞉moe ba꞉ mulu emalagidolo komola. Hawihawi Ilinoeno sa꞉ba꞉ni wato ba꞉ sa꞉ba꞉ni hakala, hopo habanapa꞉te ba꞉bi haka hunamo ibino ko haba ya꞉lo ododiti, ba꞉ma tetelo Dubu Bilibili Kamenate ba꞉bi haka hunulu luta. Ba꞉gala sa꞉ba꞉ni watoeno eta ipuwa ba꞉ma ka꞉nala, ibi ba꞉ sa꞉ba꞉ni koko gawadubula.
REV 17:10 Ba꞉moi sa꞉ba꞉ni koko gawadubu ipuwalo paibate ya꞉lo a꞉wibuya꞉, huiyatiya ba꞉ma tetelo etate hopo habalo bemedena ba꞉gala etate galane kakapuluhukuma꞉ne, ba꞉bene ba꞉be kuititidawate da꞉pemene ebeno ko gawadubu komote tete nanekelelo kitanama꞉ne.
REV 17:11 Ba꞉ hibila, kebe dawate dopamo da꞉hoi ba꞉be Hawihawi Ilinate gala da꞉ka-uluhukumini, ebeno ko gawadubu komote ba itana ebete naba a꞉iti tetedawama꞉ keda꞉ma꞉ne. Ebete dopamo ba emedena dopo sa꞉ba꞉ni koko gawadubu ipuwalo etama꞉ eda꞉nami, huiyatiya ka꞉lo ebe hopo habalo kalutaha꞉. Ba꞉bema꞉ hibila, ebete ebeno atu ko gawadubu haba lawema꞉ gala kakamahigama꞉ne, ba꞉bene hopoeno kuititi tetelo Godote ebe dito kokubahimima꞉ne.
REV 17:12 “Ba꞉gala eta komo. Ama꞉le dulama꞉ ba꞉bi ta꞉ni kalita ba꞉ komo ta꞉ni hopoeno koko gawadubula, iba꞉te tete tatalila Hawihawi Ilinago helo kolawema꞉na꞉ iba꞉te eba꞉go kapimilo hopo habanapino kokopima꞉ keda꞉hama꞉. Ba꞉ hibila, Godote iba꞉tamo tete nanekele kikalamema꞉ne, iba꞉te ibino koko gawadubuino habalo ba pola꞉na
REV 17:13 Hawihawi Ilinago ukui kapiyama꞉ eda꞉hate ebeno hiya꞉hiya꞉ ubi komamo ba꞉bo kopapamila꞉hama꞉na꞉.
REV 17:14 Ba꞉bema꞉ iba꞉te ibino alaholohopi hiliyonomago kapiyuilamete Sipi-goe Deha꞉potago ba palaholoho, ebete huiyatiya ibino wato kikipo dito kolawema꞉ne mabu hopo habanapino hiliyonomo kokopi ba꞉gala gawadubu ipuwalo ebe kapiya ba꞉ Kodawanomola, iyo, ebe kapiya ba꞉ Ko Gawadubula! Ba꞉be mabuma꞉ ebete ya꞉lo tetelo pui ebeno hibi ta꞉matapima꞉ keda꞉hanama꞉ da꞉ka꞉lamiholiya꞉, ba꞉bi hibima꞉ midipa꞉te atumu wato kikipo hibilo kakalawema꞉na꞉.”
REV 17:15 Ba꞉bene Godokono nopodawate natamo eta tabo ba꞉ma ka꞉na goi, “Ama꞉le ka꞉ma꞉ dulama꞉ ba꞉bi koko hiya꞉hiya꞉ tulino komo ba꞉ma ka꞉nala. Dubu Bilibili Kamenoeno ko habate ba꞉bi tuli tametamelo itana, ba꞉bema꞉ ba꞉bi hiya꞉hiya꞉ tuli ba꞉ hopo haba konomoeno hiliyonomo hiya꞉hiya꞉ tawakalubila ba꞉gala ba꞉bi tawakalubino hiya꞉hiya꞉ hopola ba꞉gala ba꞉bi tawakalubino hiya꞉hiya꞉ tabo ga꞉la kapiyuimila.
REV 17:16 Ba꞉gala Hawihawi Ilinoeno ta꞉ni kalita ama꞉le dulama꞉ ba꞉bi koko gawadubuino komo ba꞉ma ka꞉nala. Iba꞉te Hawihawi Ilinago Dubu Bilibili Kamenatamo konomamo ba maubahale ebeno kaliko pipikulamelemete, ebeno ilina ba꞉gala mani ebegodone heloamo uwatemete, ba꞉bene ebe danakapumimina꞉ ebeno katene nalemete ebe koa꞉mo dito ka꞉da꞉nama꞉na꞉.
REV 17:17 Ba꞉ hibila, Godote dopamo kebe ubi komo kihatiya꞉ ebete ba꞉be ukui koko gawadubuino tepo ipuwamo dihatemene, ba꞉bema꞉ iba꞉te ibino ukui kapiyama꞉ eda꞉hate Hawihawi Ilinatamo kopapamila꞉hama꞉na꞉, ebete ibi ipuwado ebeno ubi komokomo hopo habanapa꞉tamo kopododilima꞉. Ba꞉bene Godote dopamo kebe komate ikulihoma꞉ da꞉goiya꞉, ba꞉bi hiliyonomo komate hibilo ikulihote da꞉wibohomena꞉, ba꞉bi koko gawadubuino helote ba꞉be atu teteno kuitita꞉mo kanuluhukuti ba꞉bo kakaniwibohoma꞉na꞉.
REV 17:18 Ba꞉gala eta kapiya komo ba꞉ma ka꞉nala. Ama꞉le duma꞉ ba꞉be Dubu Bilibili Kamena, ebe ba꞉ hopo haboeno konomo awagaha habala, komo hiya꞉hiya꞉ hopoeno koko gawadubu hiliyonomate ba꞉be haboeno Ko Gawadubuino hiya꞉hiya꞉ ubi komamo a꞉papamila꞉halenaka.”
REV 18:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale Godokono eta nopodawate Hunu Habane pihitigutalo ba꞉bo umimo, ebeno helo konomola ba꞉gala ebeno alote hopo haba konomo a꞉la꞉minahui.
REV 18:2 Ba꞉bene ebete ebeno tabo madodo hunamo adipatelo na꞉goi, “Ba꞉baloni haba konomo niliya, mabu Godokono mauba ipuwalo ebe ba꞉ a꞉kubadiga! Numa꞉la꞉, ba꞉ma tetelo tawakaluba꞉te ebe ipuwalo kemedenaha꞉, huiyatiya kubakuba gobogobo hiliyonomo ba꞉gala katene ababale da꞉nalenaka ba꞉bakobako holahola hiliyonomo, ibi kapiyate ba꞉bolo ba꞉pola꞉na!
REV 18:3 Hiya꞉hiya꞉ hoponapi hiliyonomate Ba꞉balonigodone kateneno kuba ododili komoeno ukui duwatenakui, ba꞉bema꞉ ebeno kuba ododili komo ba꞉ gamoda niho komo huiyala, iyo, puya꞉te Ba꞉balonino ododili ipuwamo da꞉nepalaganakui iba꞉te dito nedaedaeholenakuya꞉. Ba꞉bene hopo haboeno koko gawadubate atumu ibino kateneno ubi ipuwalo ebetamo pelamenakuya꞉, dubate dubu bilibili kamenatamo keba ka꞉na ka꞉pelamenaka ba꞉ba ka꞉na, ba꞉gala hopo haboeno koko bisnisi ododilipa꞉te atumu ba꞉be haboeno kateneno ubi gabodo ebetamo pelamenakuya꞉ ibino ilina konomamo eba꞉go kopedogodoguilamema꞉.”
REV 18:4 Ba꞉ba tetelo Godokono tabo madodote Hunu Habane pitalo na Yonete ba꞉ma ka꞉na ulimo, “Naeno tawakaluba꞉la꞉, wadiyala la꞉ Ba꞉baloni haba ipuwane nikula꞉la꞉! Na ubihinola la꞉ ebeno kuba ododili komago kapiyama꞉ eda꞉ha, iyo, na ubihinola la꞉ ebeno kuba ododili mabuma꞉ huiya eba꞉go uwate!
REV 18:5 Ba꞉ hibila, ebeno kuba ododili komate hiliyonomoma꞉ eda꞉hamiya꞉, ba꞉bi kubate eta hunamo eta hunamo ba podolo naeno Hunu Haba ba꞉ a꞉pologi, ba꞉bema꞉ na Godote ebeno ododili komo ba emalagidoleme huiya ebetamo hibilo kikamema꞉nemo.”
REV 18:6 Ba꞉bene Godote tabo gala ba kagoita na Yonete ba꞉ma ka꞉na kulimo, “Wadiyala la꞉ Ba꞉baloni habatamo ebeno kuba huiya nikama꞉la꞉, ebete komopa꞉tamo temeteme keba ka꞉na kikalamenakui ba꞉ba ka꞉na, ba꞉bene la꞉le ebeno dopo huiya modobolo dikamema, wadiyala la꞉ ebetamo eta tetelo gala konomamo na꞉kikamiya꞉la꞉! Ba꞉gala ebete komo tawakalubi kokubahilamema꞉ da꞉hiduimiya꞉, wadiyala la꞉ ba꞉be helo gamoda kalili lawete, huiyatiya ebetamo nikamiya꞉la꞉ ebete konima꞉, ba꞉bene ebete ba꞉be kalili da꞉nimini, wadiyala la꞉ eta tetelo gala na꞉kikamiya꞉la꞉, ebete daedaema꞉ eda꞉te kubanomoma꞉ keda꞉ma꞉!
REV 18:7 “Ebete ha꞉kiya ebe awagaminalo ilina keba ka꞉na ka꞉dogodoguilamenami, wadiyala la꞉ ba꞉bako dogodogo temeteme ebetamo nikamehala꞉, mabu ebete ebeno tepo ipuwalo na꞉goena, ‘Na modobola, na ba꞉ hopo haboeno Ko Gawa Kamenala! Ba꞉gala na hamoleha꞉, na dubu bilibila꞉godawala, na emedena tetelo ihi komo a꞉kiya꞉tawanamo!’
REV 18:8 “Ba꞉bema꞉ numa꞉la꞉, ebeno awagaha mabuma꞉ ebete kapiya hegelalo na Kodawa Godogodone temeteme hiliyonomo kuwatema꞉ne! Iyo, na ba꞉ Helodawanomola, ba꞉bema꞉ nale ebeno komo ba anagilameleme ebetamo tawetawe komo ba꞉gala ihi komo ba꞉gala baa꞉ha꞉ komo ikamehote koe ba꞉bo kopoemema꞉nemo ebete koelo kowoema꞉!”
REV 18:9 Hibila, Godote Ba꞉baloni habatamo kuba huiya dikamehomene, ba꞉ba tetelo hopo habanapino koko gawadubate ebe koelo ba woita dumimina꞉ iba꞉te ebe ba꞉bo kola꞉mema꞉na꞉, iyo, iba꞉te ibino kateneno kuba ubi gabodo eba꞉go kapiyama꞉ eda꞉halo kuba komokomo dododilinakui, ba꞉bema꞉ iba꞉te ba꞉be koe ahuta umilo dito kihimitama꞉na꞉.
REV 18:10 Ba꞉ba tetelo iba꞉te atu kuba huiya lawema꞉ ba toletoleho muhuluni putitatate ba꞉ma ka꞉na kopega꞉lama꞉na꞉, “Ba꞉baloni haba konomo, ama꞉ niliya! Dopamo ama꞉ helonomoma꞉ eda꞉nama꞉ta, huiyatiya Godote ama꞉tamo huiya ba ikame ama꞉ ba꞉ a꞉kubadigata!”
REV 18:11 Ba꞉bema꞉ koko bisnisi ododilipa꞉te atumu ebe la꞉melo kihimitama꞉na꞉ mabu hopo habanapa꞉te ibino kolowami ilina gala a꞉kuwatenakamena꞉.
REV 18:12 Iyo, ibino golodo ba꞉gala siliba mani, ibino hidohido a꞉la꞉mina nakola ba꞉gala nehe ilina, ibino hidohido keyakeya ba꞉gala hawihawi pupulino ilina, ibino hiya꞉hiya꞉ kodakodanomo keha ba꞉gala hidohido nibo keha, iba꞉te ba꞉moi ilina hiliyonomo gala a꞉kakolowamiholenakamena꞉. Ba꞉gala iba꞉te ba꞉bakobako hidohido kehamo ba꞉gala auli ilinamo ba꞉gala goegoeno kalitamo ba꞉gala keyakeyanomo nakolamo dododilina, ba꞉bi hiya꞉hiya꞉ huiya kokonomo ilina iba꞉te atumu gala a꞉kakolowamiholenakamena꞉.
REV 18:13 Ba꞉gala ibino hiliyonomo hiya꞉hiya꞉ hido nibo papateho ilina, ibino gala꞉ipi gao beya ba꞉gala olibi kikipoeno gadi ihi, ibino palawa baa꞉ ba꞉gala witi-laisa, ibino kau-goegoe ba꞉gala sipi-goegoe, ibino oso-goegoe ba꞉gala osago da꞉wapata꞉lamenaka ba꞉bi sa꞉liyote-boge, ibino huiyaha꞉ okopi mana꞉mo ba꞉gala alaholo komamo duwatenaka, ba꞉moi hiya꞉hiya꞉ ilina ba꞉gala tawakalubi iba꞉te atumu hibinomolo gala a꞉kakolowamiholenakamena꞉.
REV 18:14 Ba꞉bema꞉ ba꞉bi koko bisnisi ododilipa꞉te Ba꞉baloni habatamo koga꞉lama꞉na꞉, “Ama꞉ kateneno ubi komamo da꞉dogodoguilamenama꞉, ba꞉bi hidohido ilina hiliyonomate ama꞉godone ba꞉ alatidihola꞉. Ba꞉ hibila, ama꞉ emedena emedena tetelo genamoeno hidohido a꞉la꞉mina ilina ba꞉gala gadigadi ilina gala a꞉kulamenakamena꞉ta!”
REV 18:15 Iyo, Godote Ba꞉baloni habatamo kuba huiya dikamehomene, kebe dubate ibino oko owati ipuwalo eba꞉go koko ilina da꞉dogodoguilamenama꞉, ba꞉ba꞉te atu kuba huiya lawema꞉ ba toletoleho muhuluni putitatate ebe mabuma꞉ ba꞉bo kihimitama꞉na꞉. Iba꞉te ebe la꞉melo
REV 18:16 ba꞉ma ka꞉na koga꞉lama꞉na꞉, “Ba꞉moe konomo haba niliya! Dopamo ebete hidohido keyakeya ba꞉gala hawihawi kaliko bepupulinakui, ba꞉bene ebeno kokobelo hiya꞉hiya꞉ golodo ba꞉gala hidohido a꞉la꞉mina nakola ba꞉gala nehe tulikahula na꞉pola꞉ma꞉nami,
REV 18:17 huiyatiya Godote ebetamo huiya ba ikame ebeno dogodogo ilina hiliyonomate ba꞉ dito wibadigahama꞉!” Ba꞉gala atu tetelo koko bogeno namutulubi ba꞉gala ibino okopi ba꞉gala puya꞉te kehaha꞉ kolomolo bisnisi oko owatima꞉ hiya꞉hiya꞉ da꞉wapata꞉lamena, ibi hiliyonomate muhuluni putitatate
REV 18:18 ko habate koelo ba woita da꞉pumimina꞉ ba꞉bo kihimitama꞉na꞉. Iba꞉te koe ahuta umilo ba꞉ma ka꞉na koga꞉lama꞉na꞉, “Ba꞉moe konomo haboeno helote dopamo ditanami bada konomola꞉ka꞉! Ba꞉ba tetelo eta ba꞉bako holoholo habate kitanamiha꞉!”
REV 18:19 Ba꞉bene iba꞉te ibino tepo menemene kohawakalimima꞉ hakoeno puhulu ibino watamo iya꞉hekeholete Ba꞉baloni la꞉melo gala kakaga꞉lama꞉na꞉, “Ba꞉moe konomo haba niliya! Dopamo kehaha꞉ kolomolo da꞉wapata꞉lamenama꞉, ba꞉bi koko bogeno namutulubi hiliyonomate ebegodolo dogodogopima꞉ eda꞉hanama꞉, huiyatiya Godote ebetamo huiya ba ikame ebeno ilina hiliyonomate ba꞉ dito wibadigahama꞉!”
REV 18:20 Ba꞉bema꞉ na Yonete eta tabo ba꞉ma ka꞉na kulimo, “Godokono Hunu Habalo demedehona ba꞉gala ebeno oelamepi dubu ba꞉gala ebeno ukui hawakalimipi ba꞉gala ebeno komo tawakalubi hiliyonomo, wadiyala la꞉ na꞉kalakalahala꞉ mabu Ba꞉baloni habate ba꞉ a꞉kubadiga! Iyo, ebete la꞉tamo koko temeteme dikalamenakui, ba꞉be mabuma꞉ Godote ebetamo huiya ba꞉ ikame!”
REV 18:21 Ba꞉ba tetelo nale eta helonomo nopodawa ba꞉bo umimo, ebete menemenenomo nakola lawete kehaha꞉ kolomamo ba a꞉da꞉na na꞉goi, “Godote ba꞉ma ka꞉na ebeno mauba ipuwalo Ba꞉baloni ko haba ba kubahimi hopamo da꞉pa꞉da꞉namene, tawakaluba꞉te ebe gala a꞉kuminakamena꞉.
REV 18:22 Iyo, Ba꞉baloni, amia꞉no kuba huiyate hibinomolo ba꞉ a꞉puluhuku, mabu hopo haboeno dogodogopi ipuwalo amia꞉no bisnisi ododilipa꞉te dopopinomoma꞉ ba eda꞉hana, ama꞉le amia꞉no giwali ododili komamo komo hoponapi hiliyonomo ha꞉da bamihoholamenama꞉ta! Ba꞉moe ba꞉be mabuma꞉ ama꞉ ipuwalo tawakaluba꞉te ohale alapiho komo ba꞉gala dolopo modoho diyamo gala a꞉kulia꞉mena꞉, ama꞉ ipuwalo atumu pa꞉lola꞉ diyamo ba꞉gala gebole diyamo gala a꞉kamahila꞉hala꞉mena꞉! Iyo, mulu okopi dubuino hiya꞉hiya꞉ komo ba꞉gala kamenakamenoeno baa꞉ hiduilame komo ba꞉bi okote ama꞉ ipuwalo kowibohoma꞉na꞉, ba꞉bema꞉ ba꞉moi okoeno hiya꞉hiya꞉ diyamo atumu gala a꞉kapola꞉namena꞉! Ba꞉bene tawakaluba꞉te ama꞉ ipuwalo wuiki alo gala a꞉kuma꞉mena꞉, ba꞉gala kuhiti bohela꞉go kapiyama꞉ eda꞉ pokoeno kalakala komote gala a꞉kitanamene.”
REV 18:24 Ba꞉bema꞉ na Yonete goemo, Ba꞉baloni ko habate ba꞉moe gabodo Godogodone kuba huiya ba꞉ a꞉lawe, mabu ebe ipuwalo kuba ododilipa꞉te Godokono ukui hawakalimipi ba꞉gala ebeno komo tawakalubi anakapulamenakuya꞉, iyo, hopo haba konomolo iba꞉te kebe tuputupupi dito danakapulamenakui ba꞉bi tawakalubino hawiti ebe ipuwalo bitana.
REV 19:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale Hunu Habalo tawakalubino kapiyuimi konomote kapimilo da꞉ga꞉lui ibino tabo madodo konomo ba꞉ma ka꞉na ulimo, “Godoko na꞉milimihala꞉! Ka꞉ka꞉ mula꞉ komote ebegodone nuluhukuna, ba꞉bene konomo awagaha komo ba꞉gala konomo helo komote ebegodolo ba꞉pola꞉na!
REV 19:2 Ebeno ododili komo ba꞉ tuputupunomola! Ba꞉ma ka꞉na ebete Dubu Bilibili Kamenatamo kuba huiya hibinomolo ikame, mabu ba꞉be Ko Kamenate kateneno kuba ubi komamo hopo haba konomo ba kubahimina, ebeno mauba ipuwalo Godokono huiyaha꞉ okopi dito anakapulamenakui.”
REV 19:3 Ba꞉bene hibima꞉ midipino kapiyuimi konomote ibulunomamo gala na꞉kaga꞉luya꞉, “Godoko na꞉milimihala꞉! Ba꞉baloni konomo habate koelo da꞉woena, ba꞉be ahutate emedena emedena tetelo hunamo bodolonamene!”
REV 19:4 Ba꞉bene Godote ebeno Ko Gawadubu emede bahilo ba luta, ebe tametamelo da꞉pola꞉nui ba꞉bi 24 Watowatopi ba꞉gala netewa-netewa Hiya꞉nomo Nopopi, iba꞉te kapimilo ibino holoholo ebeno nato mabamo ba pemiya꞉te ebe adikumilo na꞉ga꞉luya꞉, “Ba꞉ba꞉la! Godoko na꞉milimihala꞉!”
REV 19:5 Ba꞉bema꞉ Godokono Ko Gawadubu luta bahini eta tabo madodote da꞉pi, nale ba꞉ma ka꞉na ulimo, “La꞉ puya꞉te aeno Godotamo papamila꞉halelo ebeno huiyaha꞉ oko dowatihonama, iyo, la꞉ kokopi ba꞉gala hegehegepi, wadiyala la꞉ hiliyonomate ebe nawagaminala꞉!”
REV 19:6 Ba꞉bene tawakalubi mumulunomate kapimilo da꞉ga꞉luti ibino tabo madodo nale gala na꞉kulimo, ba꞉be tabo madodo ba꞉ helonomola, konomo beyate da꞉goenapenanako ba꞉gala alomote da꞉ga꞉lawatahale ba꞉bi kokonomo diyamo huiyala. Iba꞉te ba꞉ma ka꞉na ga꞉luya꞉, “Godoko na꞉milimihala꞉! Aeno Helonomo Kodawate Ko Gawadubuma꞉ eda꞉na!
REV 19:7 Ba꞉bema꞉ wadiyala a hiliyonomate konomamo ba kalakalaha ebe hunamo kadipatiya꞉! Ba꞉ hibila, Sipi-goe Deha꞉potoeno Kamenate ya꞉lo hidote ibino kapiyama꞉ eda꞉ poko tete ba꞉ uluhuku,
REV 19:8 ba꞉bene ba꞉be pokoeno komoma꞉ Godote hidohido a꞉la꞉mina kaliko keyakeyanomo ba꞉be Kamenatamo ba꞉ ikame.” Ba꞉ba tetelo na Yonete ba꞉moe komo iya꞉tawuimo, ba꞉bi pupulino ilina ba꞉ hibima꞉ midipino tuputupunomo ododili komokomola.
REV 19:9 Ba꞉bema꞉ Godokono nopodawate natamo na꞉goi, “Ama꞉ Bukamo tabo ba꞉ma ka꞉na na꞉miya꞉ta꞉, Sipi-goe Deha꞉potote ebeno Kamenago kapiyama꞉ eda꞉ poko habamo kopelamema꞉ pui ka꞉ka꞉lamiholiya꞉, ba꞉bi tawakaluba꞉te na꞉kalakalahamena꞉!” Ba꞉bene nopodawate ebeno tabo moga꞉melo gala na꞉kagoi, “Ba꞉moe ba꞉ Godokono hibi tabola.”
REV 19:10 Ba꞉bema꞉ nale ebe adikumima꞉ ebeno nato mabamo dito guimo, ebete huiyatiya natamo na꞉goi, “Ao, ama꞉ na akadikunama꞉la꞉! Na ba꞉ ama꞉ ba꞉gala komo hibima꞉ midipi ekaki huiyala, mabu na Godokono huiyaha꞉ okodawa etala, iyo, Ya꞉suti ebeno hibi komo da꞉hawakalimiya꞉, la꞉le ba꞉be komo kodakodalo keba ka꞉na ka꞉laweonama, na ba꞉ ba꞉ba ka꞉na kalawenamo. Ba꞉bema꞉ wadiyala ama꞉ Godoko kapiya nadikuma꞉.” Ba꞉ba tetelo na Yonete ba꞉moe komo iya꞉tawuimo, a hibima꞉ midipa꞉te Ya꞉sukunu hibi komo hawakalimima꞉ kebe tabo dolamagiminakoma꞉, ba꞉be tabo ba꞉ Godokono ukui hawakalimipa꞉te dopamo da꞉hawakaliminakui ba꞉be atu tabola.
REV 19:11 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, Hunu Haba a꞉hiya꞉mida ba itana nale keyakeya oso-goe ebeno namutudawate ebe hunulu lutalo ba꞉bo umimo. Ba꞉be oso-goe namutudawoeno mahilo ba꞉ Hibi Komo Hawakalimidawala, mabu ebete tuputupu gabodo tawakalubino komo ba anagilamelelamena kuba ododilipa꞉go ba꞉bo alaholohona.
REV 19:12 Ebeno baiditi koe powamo ba wamoteme ebeno watolo hiliyonomo koko gawadubuino pake ilinate pola꞉ma꞉nui, ba꞉gala ebete ebeno apa꞉mo ebeno mahilo ya꞉lo a꞉miya꞉tiya꞉ huiyatiya eta dawate ba꞉be mahiloeno komo iya꞉tawaha꞉.
REV 19:13 Ba꞉bene tawakaluba꞉te ebe da꞉ka꞉minaka ba꞉be mahilo ba꞉ Godokono Tabola, ba꞉gala ebete da꞉puli ba꞉be ga꞉ga꞉ kaliko hawa꞉goenola, ba꞉be hawi ba꞉ puya꞉te eba꞉go dalaholohona ba꞉bi dubuino hawila.
REV 19:14 Ba꞉bema꞉ Hunu Habanapi alaholohopa꞉te hidohido keyakeya kaliko pupuliti ibino hiya꞉hiya꞉ kapiyuimi ipuwalo komo keyakeya oso-goegoe hunulu ba pola꞉na ba꞉be Kodawa ba꞉bo ta꞉matuya꞉.
REV 19:15 Ba꞉bene ebeno tabo ipuwane giha giliti da꞉puluhukuna ebete ba꞉be gila꞉mo hiya꞉hiya꞉ hoponapi kanakapulamema꞉ne, ba꞉gala ibi ipuwalo puya꞉te ebetamo papamila꞉haleheno ebete auli kukamo ibi kubamo kalukulima꞉ne, iyo, ba꞉ba tetelo ebete hopo haboeno gala꞉ipi gao hiliyonomo uwateholete ihi adilutihoeno nakola bobo ipuwamo iya꞉hekete Helonomodawa Godokono konomo mauba komamo ibi ba꞉bo konimikimoelema꞉ne.
REV 19:16 Ba꞉bene ebeno ga꞉ga꞉ kaliko hunamo ba꞉gala ebeno oke hunamo ebete ebeno mahilo kohawakalimima꞉ tabo ya꞉lo ba꞉ma ka꞉na miya꞉tiya꞉, “Hopo habanapino hiliyonomo kokopi ba꞉gala gawadubu ipuwalo na kapiya ba꞉ Kodawanomola, ba꞉gala na kapiya ba꞉ Ko Gawadubula!”
REV 19:17 Ba꞉ba tetelo nale eta nopodawate hegela hunulu la꞉nalo ba꞉bo umimo, ba꞉bene ebete alomo hunudu da꞉puilahalenaka ba꞉bi holahola hiliyonomo ba ka꞉lami iba꞉tamo ibulunomo ba꞉ma ka꞉na goewatui, “La꞉ mamo na꞉pelama꞉la꞉, Godokono konomo pokoeno ilina kopenahama꞉!
REV 19:18 Alaholoho ipuwalo da꞉ha꞉lahamena꞉, ba꞉bi koko gawadubuino katene ba꞉gala ibino alaholohopino katene, ba꞉gala alaholohopino komo watowatopino katene ba꞉gala ibino oso-goegoeno katene, wadiyala la꞉le ba꞉bi hiya꞉hiya꞉ katene na꞉penaliya꞉la꞉! Iyo, puino ka꞉ka꞉te alaholoho ipuwalo da꞉wibohomena꞉, ba꞉bi koko tawakalubi ba꞉gala hegehege tawakalubi, mani oko dowatina ba꞉gala huiyaha꞉ oko dowatihona, wadiyala la꞉le pelamete ibi hiliyonomoeno katene na꞉pehawaminadigaliya꞉la꞉!”
REV 19:19 Ba꞉bene nale Hiya꞉nomo Holoholo Ilina ba꞉gala hopo habanapino koko gawadubu ibino alaholohopi hiliyonomago, iba꞉te ba pekapiyuimita nale ba꞉bo ulamimo, iba꞉te ibino ubi tabo kapimilo ba꞉ma ka꞉na ihatiya꞉, iba꞉te oso-goe hunulu da꞉luti ba꞉be Kodawa ba꞉gala ebeno alaholohopi iba꞉go kalaholoma꞉.
REV 19:20 Ba꞉bema꞉ alaholoho ipuwalo Hiya꞉nomo Holoholo Ilina ba꞉gala Godokono mahilamo Ha꞉da Amiho Tabo Olamagidawa, Kodawate ibi netewapi ka꞉ka꞉lo uwatelete Saitanakono Koe Bobamo dito niya꞉heki, ba꞉be Bobolo helonomo nibote patena. Hibila, dopamo ba꞉be Ha꞉da Amiho Tabo Olamagidawate Hiya꞉nomo Holoholo Ilinoeno dopo hapulu koko hanohano komo dododilinakui, ebete ba꞉bi komamo hibima꞉ midiha꞉pi ha꞉da ba꞉bo amiholamenakui, iyo, puya꞉te Hiya꞉nomo Holoholo Ilinoeno kukala uwatete ebeno ida꞉da꞉li dadikuminakui ba꞉bi tawakaluba꞉te ebeno kuba gabamo emogabuimi komamo dito gudinakuya꞉.
REV 19:21 Ba꞉bema꞉ Kodawate oso-goe hunulu da꞉luti, ebeno tabone da꞉puluhukuna ba꞉be gila꞉mo ebete Hiya꞉nomo Holoholo Ilinoeno komo ta꞉matapi hiliyonomo dito anakapulami, ba꞉bene holahola hiliyonomate pelamete ba꞉bi alaholohopino ha꞉laha katene konomamo da꞉penali ba꞉bo wigulameholi.
REV 20:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale Hunu Habane Godokono eta nopodawate pihitigutalo ba꞉bo umimo, ebeno kokotolo Du Bobo Konomoeno gigiho ki ba꞉gala konomo auli halete pola꞉ma꞉nui.
REV 20:2 Ba꞉ba tetelo ebete Pahiya Konomo pelawa꞉digate auli hala꞉mo matuhumihote Du Bobo Konomo ipuwamo na꞉da꞉nate gigiho kia꞉mo ba꞉ dito kalapilui, ebete kapiya taosene gogo tetelo ba꞉bolo kemedenama꞉. Ba꞉bema꞉ kapiya taosene gogo ipuwalo Pahiyate hopo habanapi ha꞉da a꞉kamihoholama꞉mene, huiyatiya ba꞉be tete ga꞉ga꞉nomo da꞉wibomene, Godote ebe Du Bobo Konomo ipuwane uluhukutiti gopowahi tete ebetamo gala kakikamema꞉ne ebete tawakalubi ha꞉da kamiholamema꞉. Hibila, Pahiyoeno eta mahilo ba꞉ Kubadawala, ebete hopo tupuimi mabuni kaluino holoholamo duluhukuya꞉ ba꞉be dawala.
REV 20:4 Ba꞉ba tetelo na Yonete komopa꞉te koko gawadubuino gagahidi bahilo ba pola꞉na ba꞉bo ulamimo, Godote iba꞉tamo helo ya꞉lo ikalamiya꞉ hopo habanapino komo kanagilamelelamema꞉. Ba꞉bene nale ba꞉moe komo iya꞉tawuimo, ba꞉bi tawakalubi ba꞉ puya꞉te Ya꞉sukunu komo hawakalimi mabuma꞉ ba꞉gala Godokono tabo olamagimi mabuma꞉ kuba ododilipa꞉te ibino ka꞉ka꞉ diya꞉hililamiya꞉ ba꞉bi ha꞉lahapino gobogobola. Ba꞉ba꞉te Hiya꞉nomo Holoholo Ilina ebeno ida꞉da꞉la꞉go adikulamema꞉ ubiha꞉ma꞉ eda꞉huya꞉, ba꞉bema꞉ iba꞉te ebeno kukala ibino wato kala꞉mo ba꞉gala kokotamo kuwatiya꞉ha꞉. Ba꞉be mabuma꞉ Godote ibi ka꞉ka꞉mo gala kawadiya꞉paa꞉latelete iba꞉tamo helo ba꞉bo ikalami, iba꞉te kapiya taosene gogo ipuwalo ebeno Oemedawa Kelisokoba꞉ koko gawadubuma꞉ keda꞉hanama꞉.
REV 20:5 Ba꞉bene ba꞉moi ha꞉lahapa꞉te ka꞉ka꞉mo da꞉mahila꞉hali, ba꞉be komo ba꞉ Godokono dopo tetela ebete ha꞉lahapi ka꞉ka꞉mo wadiya꞉paa꞉latelema꞉. Ba꞉ hibila, kapiya taosene gogo tetete da꞉wibomene, ba꞉ba tetelo ebete komo ha꞉lahapi atumu ka꞉ka꞉mo gala kakawadiya꞉paa꞉latelema꞉ne.
REV 20:6 Ba꞉bema꞉ puya꞉te Godokono ka꞉ka꞉mo dopamo da꞉mahila꞉halemena꞉, ba꞉bi tawakaluba꞉te konomamo kokalakalahama꞉na꞉, mabu hoe komoeno helote iba꞉tamo gala a꞉kitanamene, ba꞉bene iba꞉te kapiya taosene gogo ipuwalo Kelisokoba꞉ koko gawadubuma꞉ ba eda꞉hana ebe ba꞉gala Godoko badikulamenakomena꞉.
REV 20:7 Ba꞉bene kapiya taosene gogo tete da꞉wibomene, Godote Saitanako du genama ipuwane uluhukutiti ebetamo gopowahi tete ba ikame,
REV 20:8 ebete hopo habanapino hiya꞉hiya꞉ hopamo gala katote ibi hiliyonomo ha꞉da ba namihoholame ba꞉bo konekapiyuilamema꞉ne iba꞉te Godokoba꞉ kalaholohoma꞉. Ba꞉ba tetelo Saitanate pui da꞉kapiyuilamemene ibino hiliyonomo hopo ipuwalo koko mahilo netewa ba꞉ Goga ba꞉gala Magogala, ibino alaholohopi dubu hiliyonomoma꞉ ba eda꞉ha lumagiti ka꞉lamihole modoboha꞉, iyo, ibi kehaha꞉ kolomoeno kulili keba ka꞉nala꞉ka꞉ ba꞉ba ka꞉nala.
REV 20:9 Ba꞉bene nale Yonete ba꞉bi alaholohopino komo ba꞉ma ka꞉na umimo, iba꞉te hopo haboeno hiya꞉hiya꞉ hapuni pelameholete, ba꞉bene kebe tawakalubi Godote malemalelo konomamo demalagidolena iba꞉te ba꞉bi tuputupupi kokubahilamema꞉ ibino ko haba ba꞉bo pegopa꞉miduya꞉. Ba꞉ba tetelo huiyatiya Godote konomo koe Hunu Habane da꞉poemi ibi hiliyonomo ba꞉bo kubahilami,
REV 20:10 ba꞉bene pote ibi ha꞉da damiholami Godote ba꞉be Kubadawa heloamo lawa꞉digate Koe Bobamo dito na꞉da꞉nui, ba꞉be Koe Bobolo helonomo nibote patena. Ba꞉ hibila, Godote ebeno mahilamo Ha꞉da Amiho Tabo Olamagidawa ba꞉gala Hiya꞉nomo Holoholo Ilina atu Koe Bobamo ya꞉lo iya꞉hekiya꞉, ba꞉bene ba꞉ma tetene tupuimiti emedena emedena tetelo ba꞉bi netewa-kapiyate hegela du hiliyonomolo koko temetema꞉go bemedenamena꞉.
REV 20:11 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale Kodawate ebeno ko gawadubuino konomo keyakeya emede bahilo lutalo umimo. Ba꞉bene ebeno holoholo hapulu hopo haba ba꞉gala alomo iba꞉te ibino ilina hiliyonomago ha꞉kiya wibohuya꞉, ba꞉bema꞉ lumagiti ibi gala a꞉kulama꞉mene.
REV 20:12 Ba꞉ba tetelo puya꞉te dopamo da꞉ha꞉lahuya꞉, nale ba꞉bi tawakalubi hiliyonomo, koko ba꞉gala hegehege atumu, iba꞉te Ko Gawadubuino luta bahi dopo hapulu la꞉mota꞉hanalo ba꞉bo ulamimo. Ba꞉bene nopopa꞉te komo buka ba a꞉hilame Kodawate ebeno Ka꞉ka꞉ Buka ba꞉bo a꞉hiya꞉midui, ba꞉bi buka ipuwamo ebete hopo habanapino ododili komokomo ya꞉lo a꞉miya꞉teholamiya꞉. Ba꞉be mabuma꞉ ebete hiliyonomo ha꞉lahapino komo ba꞉moi bukoeno komokomamo tuputupunomolo ba꞉bo anagilamelelami.
REV 20:13 Ba꞉bene tawakalubi ipuwalo puya꞉te ibino ka꞉ka꞉ kehaha꞉ kolomolo datulateliya꞉ ba꞉gala puya꞉te Ha꞉lahapino Habamo dopamo da꞉nepalaguya꞉, ba꞉bi ha꞉lahapi hiliyonomate Ko Gawadubuino luta baha꞉mo pikulihote, ba꞉bene ebete ibino hiya꞉hiya꞉ ododili komo ba꞉bo anagilamelelami.
REV 20:14 Ba꞉bema꞉ ba꞉be komo da꞉wibui Kodawate Ha꞉lahapino Haba kubahimima꞉ ba꞉be haba Saitanakono Koe Bobo ipuwamo dito na꞉da꞉nui, ba꞉be Koe Bobo ipuwalo netewa teteno hoe komote hibilo bitana,
REV 20:15 ba꞉bene ha꞉lahapi hiliyonomo ipuwalo puino mahilo Ka꞉ka꞉ Bukalo pola꞉lama꞉naheno, ba꞉bi tawakalubi hiliyonomo Kodawate Saitanakono Koe Bobo ipuwamo atumu a꞉kaniya꞉heki.
REV 21:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nale uli Hunu Haba ba꞉gala uli hopo haba ba꞉bo ulamimo, mabu Godote dopamo dododiliya꞉ ba꞉be pakala Hunu Haba ba꞉gala pakala hopo haba iba꞉te a꞉wibuya꞉, ba꞉gala dopamo ditanami ba꞉be kehaha꞉ kolomote atumu kitanuiha꞉.
REV 21:2 Ba꞉bene nale Godokono uli Yelusalema ko habate ebeno Hunu Habane ebegodone pihitigutalo ba꞉bo umimo, ba꞉be haba ba꞉ ebeno hido-talona habala. Iyo, ba꞉be uli Yelusalema haba a꞉la꞉minanomola, uli kamenate ebeno dubago kapiyama꞉ eda꞉ma꞉ poko tetelo hidohido a꞉la꞉mina kaliko keba ka꞉na ka꞉pupulinako ba꞉ba ka꞉na.
REV 21:3 Ba꞉ba tetelo Godokono Ko Gawadubu luta bahini eta tabo madodote ibulu da꞉pi, nale ba꞉ma ka꞉na ulimo, “Mu numitota꞉la꞉, ba꞉ma tetene tupuimiti emedena emedena tetelo Godokono emede habate hopo habanapa꞉godolo bitama꞉namene, ba꞉bema꞉ iba꞉te ebe kapiya ba adikumina iba꞉te ebeno hibi tawakalubima꞉ beda꞉hanamena꞉.
REV 21:4 Ba꞉bene iba꞉te kebe komokomoma꞉ dopamo dihiminakui Godote ba꞉bi komo ibino ukuini ba egebolelame ibino ihi baidi ba꞉bo kometeteholelamema꞉ne. Iyo, hoe komo ba꞉gala hoe lumagi la꞉me komo, tepo temeteme komo ba꞉gala ihi komo, ba꞉bi hiliyonomo pakala teteno menemene komo Godote ba upula꞉le tawakaluba꞉godone hibinomolo kowibohoma꞉na꞉.”
REV 21:5 Ba꞉ba tetelo Kodawate ebeno Ko Gawadubu emede bahilo ba luta tabo ba꞉ma ka꞉na goi, “Mu numitota꞉la꞉, nale ka꞉lo pakala teteno hiliyonomo komokomo uliulinoma꞉ gala na꞉kamidilitamo!” Ba꞉bene Kodawate ebeno tabo moga꞉melo na Yonetamo na꞉kagoi, “Ba꞉moe tabo ba꞉ hibinomola, iyo, tawakaluba꞉te hibima꞉ na꞉mida꞉mena꞉, ba꞉bema꞉ wadiyala ama꞉ bukamo na꞉miya꞉ta꞉.”
REV 21:6 Ba꞉bene ebete natamo gala na꞉kagoi, “Ba꞉ba꞉la, naeno oko hiliyonomo ba꞉ a꞉wiboha! Na ba꞉ Mabula ba꞉gala na ba꞉ Kuititila, iyo na ba꞉ Dopo Hapula ba꞉gala Gala Hapula! Ba꞉bema꞉ beya kapete pui dulamena, nale iba꞉tamo dito da꞉peka꞉ka꞉la꞉na ba꞉be beya huiyaheno kikalamema꞉nemo iba꞉te emedena emedena tetelo koka꞉ka꞉halenama꞉.
REV 21:7 Ba꞉ hibila, puya꞉te ibino hibima꞉ midi ipuwalo wato kikipo da꞉lawemena꞉, ba꞉moi naeno hiliyonomo hidohido komate iba꞉godolo emedena tetelo ba꞉pola꞉namena꞉, ba꞉gala iba꞉te na ba adikunamena ibi naeno hibi gugudima꞉ beda꞉hanamena꞉.
REV 21:8 Huiyatiya puya꞉te hibima꞉ midi ipuwane kuba ododilipino helo tolemete dalahutihuya꞉ ba꞉gala puya꞉te Ya꞉sugodone dohobila꞉haliya꞉, puya꞉te koko kuba ododili ipuwalo dalowa꞉pima꞉ deda꞉huya꞉ ba꞉gala komo tawakalubi dito danakapulamiya꞉, puya꞉te kamena pilo ba꞉gala dubu pilo ododilipima꞉ deda꞉huya꞉, puya꞉te giwali ododili ba꞉gala ida꞉da꞉li adikulame komo diya꞉tawahuya꞉, puya꞉te hiya꞉hiya꞉ ha꞉da amiho tabo da꞉ga꞉luya꞉, Godote ba꞉bi hiya꞉hiya꞉ kuba ododilipi hiliyonomatamo huiya ba ikalame Saitanakono Koe Bobamo dito koniya꞉hekema꞉ne. Hibila, ba꞉be Koe Bobo ipuwane helonomo nibote patena, ba꞉bema꞉ ba꞉be Bobolo ba꞉bi tawakalubino netewa teteno hoe komote bitana.”
REV 21:9 Ba꞉ba tetelo kebe sa꞉ba꞉ni nopopa꞉te Godokono koko sa꞉ba꞉ni temeteme kalili hopo habamo dopamo da꞉poelami, ibi ipuwalo kapiyate natamo pete ba꞉ma ka꞉na pegoi, “Mamo na꞉pa꞉, nale Sipi-goe Deha꞉potoeno uli Kamena ama꞉ komutuimima꞉nemata.”
REV 21:10 Ba꞉bene ebete Godokono Gobogoboeno heloamo na magatanete hununomo hakamo da꞉nadipini, ba꞉ba tetelo Godokono uli Yelusalema ko habate ebeno Hunu Habane ebegodone pihitigutalo ebete na ba꞉bo mutuinami.
REV 21:11 Ba꞉be habate Godokono alo konomago itanui, ba꞉bema꞉ ebeno hido a꞉la꞉mina komo ba꞉ huiya konomo gedo nakola hegeloeno alote keba ka꞉na ka꞉la꞉minutanako ba꞉ba ka꞉na.
REV 21:12 Ba꞉be haboeno kala konomola ba꞉gala hununomola, ba꞉bene 12 gigiho tetelo Godokono 12 nopopa꞉te la꞉mota꞉hanuya꞉ iba꞉te ba꞉be haba hidamo kolawamenama꞉. Ba꞉ba tetelo nale gigihoeno komo ba꞉ma ka꞉na ulamimo, Isalaela tawakalubino 12 guino mahilo ipuwalo Kodawate eta gigiho hunamo eta mahilo ihatete, eta gigiho hunamo eta mahilo kihatete, ba꞉ba ka꞉na ebete ibino 12 guino mahilo ba꞉bi 12 gigiho hunamo ya꞉lo a꞉miya꞉tehuya꞉.
REV 21:13 Ba꞉gala ba꞉bi gigihate ba꞉ma ka꞉na pola꞉nuya꞉, hegelate da꞉puluhukunako ba꞉ba hapulu netewa-kapiya, ba꞉gala hegelate da꞉nihitiganako ba꞉ba hapulu netewa-kapiya, ba꞉gala taidi hapulu netewa-kapiya, ba꞉gala siyale hapulu netewa-kapiya.
REV 21:14 Ba꞉bene ba꞉be ko haboeno kala imino 12 mabumabu ba꞉ 12 kokonomo nakolala, ba꞉bema꞉ Sipi-goe Deha꞉potoeno 12 Oelamepi Dubuino mahilo ipuwalo, Kodawate eta nakola hunamo eta mahilo ihatete, eta nakola hunamo eta mahilo kihatete, ba꞉ba ka꞉na ebete ebeno 12 Oelamepino mahilo ba꞉bi nakola hunamo ya꞉lo a꞉miya꞉tehuya꞉.
REV 21:15 Ba꞉ba tetelo natamo dolamagiti, ba꞉be nopodawagodolo genamoeno ga꞉ga꞉ modoboteno golodo kuku nitama꞉nui, ebete ba꞉be ko haboeno kuititi ba꞉gala ebeno gigihoeno kuititi ba꞉gala ebeno kaloeno kuititi konemodobolateholema꞉.
REV 21:16 Ba꞉bema꞉ nopodawate ebeno kukamo ba꞉be haboeno netewa-netewa hapuhapu ba꞉gala ebeno hunuino modobo da꞉modobolateli, nale ba꞉moe komo umimo, ba꞉bi hiya꞉hiya꞉ modobote ba꞉ kapiyanomola, iyo, eta modobote 24 taosene kilomitama꞉ eda꞉te, eta modobote 24 taosene kilomitama꞉ keda꞉te, Yelusalema ko habate ba꞉ma ka꞉na itanui.
REV 21:17 Ba꞉bene nopodawate ko haboeno kala da꞉modoboti, nale ebeno hunuino modobote 60 mitama꞉ dedi ba꞉bo umimo. Ba꞉ hibila, ba꞉ba tetelo nopodawate ko haboeno komokomo da꞉modobolateli, ebeno ododi komo ba꞉ hopo habanapa꞉te ibino koko genama ba꞉gala haba keba ka꞉na ka꞉modobolateholenaka ba꞉ba ka꞉na.
REV 21:18 Ba꞉bene nale ko haboeno komo ba꞉ma ka꞉na umimo, ko haboeno a꞉la꞉mina ba꞉ hidonomola mabu ebeno kala Kodawate hido gedo nakolamo ododiti, ba꞉bene kala ipuwalo da꞉pola꞉nui ba꞉bi hiya꞉hiya꞉ genama ba꞉gala gabo ebete hidonomo golodo ilinamo ododiliya꞉, ba꞉be golodo ba꞉ a꞉la꞉minanomola.
REV 21:19 Ba꞉bene kala imino 12 mabumabuino koko nakoloeno komo ba꞉ma ka꞉nala, ibi hunamo nakola hegehege huiya kokonomo Kodawate hiya꞉hiya꞉ a꞉miya꞉tehuya꞉ iba꞉te hidonomamo ka꞉la꞉minahalenama꞉. Ba꞉bema꞉ kala imino dopo mabuino nakola ba꞉ gedo tita꞉mo a꞉la꞉mina nakolala, eta teteno nakola ba꞉ bumibumi tita꞉mo a꞉la꞉mina nakolala, eta teteno nakola ba꞉ hiya꞉hiya꞉ tita꞉goenamo a꞉la꞉mina nakolala, ba꞉gala eta teteno nakola ba꞉ eta hiya꞉ gedo tita꞉mo a꞉la꞉mina nakolala.
REV 21:20 Ba꞉bene kala imino eta mabuino nakola ba꞉ keyakeya tita꞉mo a꞉la꞉mina nakolala, eta teteno nakola ba꞉ hawihawi tita꞉mo a꞉la꞉mina nakolala, eta teteno nakola ba꞉ hipawa tita꞉mo a꞉la꞉mina nakolala, ba꞉gala eta teteno nakola ba꞉ eta hiya꞉ bumibumi tita꞉mo a꞉la꞉mina nakolala. Ba꞉bene eta mabuino nakola ba꞉ eta hiya꞉ hipawa tita꞉mo a꞉la꞉mina nakolala, eta teteno nakola ba꞉ eta hiya꞉ gedo tita꞉mo a꞉la꞉mina nakolala, eta teteno nakola ba꞉ eta hiya꞉ hawihawi tita꞉mo a꞉la꞉mina nakolala, ba꞉gala kuititinomoeno nakola ba꞉ eta hiya꞉ bumibumi tita꞉mo a꞉la꞉mina nakolala.
REV 21:21 Ba꞉bene haboeno 12 koko gigiho hunulu 12 kokonomo nehete ba꞉bo pola꞉nuya꞉, eta gigiho hunulu kapiya konomo nehe, eta gigiho hunulu eta konomo nehe, nale ibi ba꞉ba ka꞉na ulamimo. Ba꞉gala haba tulinomolo ditanui, nale ba꞉be gabo atumu a꞉kumimo, Kodawate ba꞉be gabo hidonomo golodo ilinamo a꞉la꞉minanomoma꞉ a꞉midiya꞉.
REV 21:22 Ba꞉ hibila, Kodawa Godoko ba꞉ Helonomodawala, ba꞉bema꞉ ebete Sipi-goe Deha꞉potago ba꞉be konomo haboeno Talona Genamama꞉ ba eda꞉hana, ba꞉bolo eta adikumino genama ketiya꞉ha꞉.
REV 21:23 Ba꞉gala ba꞉be habalo hegela ba꞉gala manome iba꞉te ka꞉la꞉minalenaha꞉, mabu Godokono helonomo alo kapiyate ebeno hopo ba꞉la꞉minana, iyo, ba꞉be a꞉la꞉mina ba꞉ Sipi-goe Deha꞉potoeno alola.
REV 21:24 Ba꞉bema꞉ emedena emedena tetelo hiya꞉hiya꞉ hoponapi hiliyonomate ba꞉be ko haboeno alolo ba wapata꞉lamena, ibino koko gawadubate ibino hidohido dogodogo ilina Kodawatamo kopikamehoma꞉ ba꞉bamo ba꞉wadahenakomena꞉.
REV 21:25 Ba꞉ hibila, hegela konomolo ba꞉be haboeno gigihate a꞉hilamelo ba꞉pola꞉namena꞉ tawakaluba꞉te ipuwamo kopa꞉pa꞉la꞉hama꞉. Iyo, ba꞉be haba lawamepa꞉te gigiho a꞉kakalapilahalenakamena꞉ mabu ba꞉bolo hopote a꞉kadunakamene,
REV 21:26 ba꞉bema꞉ wiboha꞉ tetelo gabote bitanamene hiya꞉hiya꞉ hoponapa꞉te ibino hidohido dogodogo ilina ba꞉gala awagaha komokomo Kodawatamo ba꞉bo kopikamehonakoma꞉.
REV 21:27 Huiyatiya numa꞉la꞉, kuba hilopo komo ododidawa ba꞉gala kuba dalowa꞉ komo ba꞉gala ha꞉da tabo olamagidawa, ba꞉ba꞉te ba꞉be haba ipuwamo a꞉kapa꞉pa꞉la꞉hamena꞉. Kodawate puino mahilo Sipi-goe Deha꞉potoeno Ka꞉ka꞉ Bukamo ya꞉lo da꞉miya꞉telamiya꞉, ibi kapiyate modobola ba꞉bamo a꞉pa꞉la꞉hama꞉.
REV 22:1 Ba꞉bema꞉ naeno baiditi hiya꞉ma꞉ deda꞉hanami ba꞉be komote wiboheno, nopodawate Godokono wiboha꞉ ka꞉ka꞉ tuli na ba꞉bo mutuinami, ba꞉be beya ba꞉ hido a꞉la꞉minanomola, Godoko ba꞉gala Sipi-goe Deha꞉poto ibino Ko Gawadubu emede bahini ba puluhukuna,
REV 22:2 ko haboeno tulituli gabodo ba꞉bana neka꞉ka꞉la꞉na. Ba꞉bene ba꞉be tuli dodo hapuhapulu wiboha꞉ ka꞉ka꞉ dikalamena ba꞉bi kehate na꞉la꞉mota꞉hanuya꞉, ba꞉ba꞉te kapiya gogo ipuwalo 12 hiya꞉hiya꞉ manome tetelo gao a꞉nolohonaka ba꞉gala ibino pahate hopo habanapino hiya꞉hiya꞉ tawetawe ba꞉gala temeteme komo hiduilamema꞉ pola꞉na.
REV 22:3 Ba꞉bema꞉ Godote kebe komokomo kubama꞉ da꞉goena, ba꞉bi komo hiliyonomo ipuwalo eta kapiyate ebeno uli Yelusalema haba konomolo a꞉kitanamene, iyo, ba꞉be habate talonanomoma꞉ eda꞉lo Godokono okopa꞉te ebe ba adikumina, ebe ba꞉gala Sipi-goe Deha꞉poto ibino Ko Gawadubu emede bahiti ba꞉bolo bitanamene.
REV 22:4 Ba꞉ hibila, Godote ba꞉bi okopino wato kala꞉mo ebeno mahilo dopamo a꞉miya꞉telamiya꞉, ba꞉bema꞉ iba꞉te ibino baidinomamo ebeno holoholo kumima꞉na꞉.
REV 22:5 Iba꞉te ba꞉bolo ba emedena Kodawa Godoko kapiyate ibino aloma꞉ eda꞉te hopo konomote gala a꞉kadunakamene, ba꞉bema꞉ hegeloeno alo ba꞉gala wuikino aloma꞉ ubi gala miya꞉teheno iba꞉te emedena emedena tetelo koko gawadubuma꞉ eba꞉go beda꞉hanamena꞉.
REV 22:6 Ba꞉bene na Yonete ba꞉moi hiliyonomo komokomo ulame da꞉wibohui, ba꞉ba tetelo Godokono nopodawate natamo na꞉goi, “Ba꞉moi tabo komokomo ba꞉ hibinomola, iyo, kebe lumagiti ama꞉godone dulihomene, wadiyala ebete hibima꞉ na꞉midila꞉mene. Hibila, Kodawa Godote ebeno Gobogoboeno helo ebeno ukui hawakalimipa꞉tamo keba ka꞉na ka꞉poemenako, ebete ba꞉ ba꞉ba ka꞉na na hopo habamo poename, tete tatalila kebe komate dikulihomena꞉ ba꞉bi komokomo nale ebeno okopi kopiya꞉tulamema꞉.
REV 22:7 Iyo, Ya꞉suti tawakaluba꞉tamo ba꞉ma ka꞉na goena, ‘Mu numitota꞉la꞉, tete tatalila na ba꞉ kopema꞉nemo!’” Ba꞉bema꞉ na Yonete goemo, puya꞉te ba꞉moe bukoeno tabo komamo da꞉papamila꞉halemena꞉ iba꞉te na꞉kalakalahamena꞉, mabu ba꞉moi tabo komokomo ba꞉ Godote hopo habamo ikulihoma꞉ a diya꞉tua꞉mehui ba꞉moi ba꞉bi komokomola.
REV 22:8 Iyo, na ba꞉ Yonete, nale ba꞉moi komokomo ulame komo ba꞉gala Godokono nopodawoeno tabo uliho komo da꞉wibohui, ba꞉ba tetelo nale ba꞉be nopodawa adikumima꞉ ebeno nato mabamo dito guimo.
REV 22:9 Huiyatiya ebete natamo na꞉goi, “Ao, ama꞉ na akadikunama꞉la꞉! Na ba꞉ ama꞉ ba꞉gala komo Godokono ukui hawakalimipi ekaki huiyala, mabu na Godokono huiyaha꞉ okodawa etala, ba꞉gala la꞉le ba꞉moe bukoeno tabamo keba ka꞉na ka꞉papamila꞉haleonama, na ba꞉ ba꞉ba ka꞉na kapapamiwatanamo. Ba꞉bema꞉ wadiyala ama꞉ Godoko kapiya nadikuma꞉.”
REV 22:10 Ba꞉bene nopodawate ebeno tabo moga꞉melo natamo gala na꞉kagoi, “Tete tatalila ba꞉moe bukoeno tabo komokomate hibilo kikulihoma꞉na꞉, ba꞉bema꞉ wadiyala ama꞉ ba꞉moi komo ugumuilihino tawakalubi hiliyonomatamo na꞉hawakalilamiya꞉.
REV 22:11 Huiyatiya hopo habanapi ipuwalo puya꞉te kuba komokomo ba꞉gala dalowa꞉ komokomo dododilinaka, ba꞉bakobako tawakaluba꞉te ukui hiya꞉ma꞉ midilihino hopoeno kuititi teta꞉mo atu komokomo nododilinakamena꞉. Ba꞉gala puya꞉te tuputupu komokomo dododilinaka ba꞉gala hidohido talona ipuwalo demedehona, ba꞉bakobako tawakaluba꞉te kuba gabamo emogabuimi komamo gudihino iba꞉te atu hidohido komo nododilinakamena꞉.”
REV 22:12 Ya꞉suti tabo ba꞉ma ka꞉na goena, “Mu numitota꞉la꞉, tete tatalila na ba꞉ kopema꞉nemo. Ba꞉bema꞉ tawakaluba꞉te kebe komokomo dododilinakui, nale ba꞉bi komo da꞉panagilamelelamemo ibi hiliyonomatamo huiya modobolo kopikalameholema꞉nemo.
REV 22:13 Na ba꞉ Mabula ba꞉gala na Kuititila, iyo, na ba꞉ Dopo Hapula ba꞉gala Gala Hapula!
REV 22:14 “Ba꞉bema꞉ puya꞉te ibino ga꞉ga꞉ga꞉ kaliko dukulalenaka ba꞉ba꞉te na꞉kalakalahanamena꞉, mabu na Kodawate iba꞉tamo modobo tabo kogoema꞉nemo iba꞉te naeno ko habamo hibi gigihodo pa꞉pa꞉la꞉hate wiboha꞉ ka꞉ka꞉ dikalamena ba꞉be kehane gao kopenahama꞉.
REV 22:15 Huiyatiya gahagaha huiya tawakalubi na Kodawate ibi koduhilamema꞉nemo iba꞉te naeno ko habamo a꞉kapa꞉pa꞉la꞉hamena꞉. Iyo, kuba hilopo komokomo ododilipi ba꞉gala giwali iya꞉tawahapi, puya꞉te kamena pilo ba꞉gala dubu pilo dododilina, puya꞉te komo tawakalubi anakapulamema꞉ dewagelena ba꞉gala puya꞉te ida꞉da꞉li dadikulamena ba꞉gala puya꞉te ha꞉da amiho tabo kalakalago dolamagimina, ibi hiliyonomo ipuwalo eta kapiyate naeno habamo a꞉kapa꞉pa꞉gamene.
REV 22:16 “Na ba꞉ Ya꞉sutila, Da꞉ibidikono galanepi ipuwalo Ko Gawadubuma꞉ deda꞉namo ba꞉betela, iyo, na ba꞉ Huli Olokila mabu uli hegela owaloho tetelo na konomamo a꞉la꞉minanakomo. Ba꞉moe ba꞉be mabuma꞉ nale naeno nopodawa la꞉ hiya꞉hiya꞉ sose tawakaluba꞉tamo a꞉poememo, la꞉le ba꞉moi komokomo hidamo kiya꞉tawahama꞉.”
REV 22:17 Ba꞉bema꞉ Sipi-goe Deha꞉potoeno Gobogobote ba꞉gala ebeno Kamena iba꞉te ebetamo kapimilo ga꞉lana, “Wadiyala, ama꞉ na꞉pa꞉!” Ba꞉bema꞉ puya꞉te ba꞉moe tabo dulihomena꞉, wadiyala ibi hiliyonomate ebetamo atumu na꞉kaga꞉lamena꞉, “Wadiyala, ama꞉ na꞉pa꞉!” Ba꞉bene beya kapete pui dulamena, wadiyala ba꞉ba꞉te ibino ubilo Sipi-goe Deha꞉pototamo na꞉pelama꞉mena꞉, iba꞉te ebeno wiboha꞉ ka꞉ka꞉ beya huiyaheno kopenihoma꞉.
REV 22:18 Ba꞉ hibila, ba꞉moe bukoeno tabo komokomo ba꞉ Godokono ubilo hopo habalo dikulihomena꞉ ba꞉bi komokomola. Ba꞉bema꞉ puya꞉te ba꞉moi tabo dulihomena꞉, na Yonete iba꞉tamo kodakoda tabo ba꞉ma ka꞉na goemo, kebe lumagiti ba꞉moe buka kubahimima꞉ eta hiya꞉ tabo kapiya deha꞉potonomo ba꞉moe bukamo dihatemene, Godote ebetamo kuba huiya kikamema꞉ne, iyo, ba꞉moe buka ipuwalo kebe koko temeteme komate hopo habanapa꞉tamo pelamema꞉ da꞉hawakalilamena, Godote ba꞉bi atu temeteme ebetamo hibilo kopoelamema꞉ne.
REV 22:19 Ba꞉gala kebe lumagiti ba꞉moe buka kubahimima꞉ eta hiya꞉ tabo kapiya deha꞉potonomo ba꞉moe bukane dito degebolemene, Godote ebegodone ebeno hidohido komo kuwatemema꞉ne, iyo, ebete Godokono talona haba ipuwamo a꞉kana꞉pa꞉gamene ba꞉bema꞉ ebete wiboha꞉ ka꞉ka꞉ dikalamena ba꞉be kehoeno gao a꞉kanenamene.
REV 22:20 Ba꞉bema꞉ Ya꞉suti ba꞉moe bukoeno tabo komokomo hiliyonomo hibinomoma꞉ goelo ebe ha꞉kiya ba꞉ma ka꞉na goena, “Hibila, na tatalila kopema꞉nemo!” Ba꞉bene na Yonete huiya tabo na꞉kagoemo, “Ba꞉ba꞉la! Kodawa Ya꞉su, ama꞉ na꞉pa꞉!”
REV 22:21 Wadiyala Kodawa Ya꞉sukunu malemale komote ebeno tawakalubi hiliyonomagodolo nitanamene. Ba꞉moe ba꞉ naeno tabo kuititila. Ba꞉ba꞉la.
