MAT 1:1 Mamona Yisasi Kalaisina aginagomogami amaki hane. Yisasiꞌa Teviti nofipiti kano maineanagino Tevitiꞌa Apalahamu nofipiti kanoe. Apalahamuꞌa Yisasina aginagomo maine.
MAT 1:2 Apalahamuꞌa Aisakina nefaꞌe. Aisakiꞌa Yekopuna nefaꞌe. Yekopuꞌa Yutagami konagamogami neꞌamafaꞌe.
MAT 1:3 Yutaꞌa Pelesigani Silagani neꞌanafa maineanagino itaꞌanimo agia Tamaꞌe. Pelesiꞌa Hesalonina nefaꞌe. Hesaloniꞌa Lamana nefaꞌe.
MAT 1:4 Lamaꞌa Aminatapina nefaꞌe. Aminatamiꞌa Nasonina nefaꞌe. Nasoniꞌa Salamonina nefaꞌe.
MAT 1:5 Salamoniꞌa Poasina nefa maineanagino itaꞌamo agia Lahapuꞌe. Poasiꞌa Opetina nefa maineanagino itaꞌamo agia Lutiꞌe. Opetiꞌa Yesina nefaꞌe.
MAT 1:6 Yesiꞌa Tevitina nefa maineanagino Tevitiꞌa Isaleli veaꞌmogami ala sauve kanoꞌami maineane. Tevitiꞌa Solomonina nefa maineanagino itaꞌamoꞌa hagoteno Yulia a maineane.
MAT 1:7 Solomoniꞌa Lehopoamina nefaꞌe. Lehopoamiꞌa Apiana nefaꞌe. Apiaꞌa Asana nefaꞌe.
MAT 1:8 Asaꞌa Yehosafatina nefaꞌe. Yehosafatiꞌa Yeholamina nefaꞌe. Yeholamiꞌa Usiana nefaꞌe.
MAT 1:9 Usiaꞌa Yotamina nefaꞌe. Yotamiꞌa Ahasina nefaꞌe. Ahasiꞌa Hesekiana nefaꞌe.
MAT 1:10 Hesekiaꞌa Manasena nefaꞌe. Manaseꞌa Emonina nefaꞌe. Emoniꞌa Yosaiyana nefaꞌe.
MAT 1:11 Yosaiyaꞌa Yehoiyakiniꞌene ani koganamogami neꞌamafaꞌe. Ani kanafina Papiloni kotega vayaꞌmoꞌya tu huteꞌya Isaleli veala amavaleꞌya Papiloni kotega nofi mo hu-ma-tageꞌya miya oꞌali aliꞌya ali-mainae.
MAT 1:12 Ani veaꞌmoꞌya Papiloni kotega nofi huma-tageꞌya miya oꞌali aliꞌyana aliꞌya mainayanagino Yehoiyakinina Sealitielona nefaꞌe. Sealitieloꞌa Selapapelina nefaꞌe.
MAT 1:13 Selapapeliꞌa Apiutana nefaꞌe. Apiutaꞌa Eliakimana nefaꞌe. Eliakimaꞌa Asolana nefaꞌe.
MAT 1:14 Asolaꞌa Satokina nefaꞌe. Satokiꞌa Akimina nefaꞌe. Akimiꞌa Eliutina nefaꞌe.
MAT 1:15 Eliutiꞌa Eleasana nefaꞌe. Eleasaꞌa Matanana nefaꞌe. Matanaꞌa Yekopuna nefaꞌe.
MAT 1:16 Yekopuꞌa Yosefena nefa maineanagino Yosefeꞌa Maliana anauꞌamoꞌagino ani aꞌmoꞌa Yisasina ategeꞌya agaifena Kalaisiꞌe* huꞌya Anumaya Kotiꞌa taugafa aligatigahe hu-tenea kanoe huꞌya hu-mainae.
MAT 1:17 Apalahamuꞌa hagoteno maineno falitegeꞌya haenagaꞌa fotiniꞌa (14) aginagomoꞌya maime maime haiꞌya mo falitageno anile Tevitiꞌa evaꞌyi huno maineno falitegeꞌya haenagaꞌa fotiniꞌa (14) aginagomoꞌya maime maime haigeꞌya Papiloni vayaꞌmoꞌya eꞌya Isaleli veaꞌmogamina nofi hu-ma-tageꞌya miya oꞌali aliꞌyana aliꞌya mainageno haenagaꞌa fotiniꞌa (14) aginagomoꞌya maime maime haigeno Kalaisiꞌa falote hu-maine.
MAT 1:18 Yisasi Kalaisima atenea kea mage huno hu-maine itaꞌamo agia Maliaꞌe Yosefete ago hage-malenaya munalagino nagola vene ofaenea munaꞌmoꞌa aipaene maine. Anumaya Kotina Alu Aotage Avamuꞌaleti aipaene hu-maine.
MAT 1:19 Yosefeteꞌma, hage-malenaya kanoa, fatago kano maineanagino havigu Maliaꞌa agaye huyafenagiꞌna kesi atalesue agesa havimaine.
MAT 1:20 Ani kehena agesa havige havigeteno faeno maineno himona ageana Anumayamo ensole kanoa evaꞌyi huno mage huno hie “Yosefegae, Tevitina neꞌamogae, kolia ohuka Maliaꞌa akamoꞌagi afaꞌa avalo. Anumaya Kotina Alu Aotage Avamuꞌaleti aipaene maineanagino neꞌnafaꞌne ategahie. Ani nafaꞌneꞌmoꞌa agaiꞌa veaꞌmogamina kefo yaꞌamimo nofi hu-matenea veala ali kalu heno amaugafa ali-gatisiafe agia Yisasiꞌe huka malegane.” huno hu-maine.
MAT 1:22 Nayona Anumayamo aune kanomo avayafiti mage huno hama-pai-maineane “Haviho nagola vene ofaenesia munaꞌmoꞌa aipaene huteno neꞌnafaꞌne ategahie. Ani nafaꞌnemo agia mage huꞌya ayegahae Imanueliꞌe huꞌya ayegahae.” huno hu-maineane. “Tagai kefina ani agimoꞌa Anumaya Kotiꞌa tagaiꞌene maine.” huno hu-maine. Yisasina atenea yupa ani kemoꞌa ago falote huno tamage hu-maineane.
MAT 1:24 Yosefeꞌa ani himona ageteno aupiti hetino Anumayamo ensole kanomoꞌma hapaiya kea havino akave maleteno “Maliaga aꞌnimogae.” huno ali-tene.
MAT 1:25 Yosefeꞌa ani afena “Aꞌnimogae” huteno alave yana ohuno afaꞌa maineꞌana ani nafaꞌnea ategeno Yosefeꞌa agia Yisasiꞌe huno malene.
MAT 2:1 Helotiꞌa Yutia kotega ala sauve kano mainea kanafina Yisasina Petelehemu osi Yutia kumate atene. Atetegeꞌya haenagaꞌa yage vaꞌyi nehilegati kanale haviꞌyaꞌami hanea vayaꞌmoꞌya Yelusalemu evaꞌyi hu-mainae.
MAT 2:2 Evaꞌyi huteꞌya mage huꞌya hae “Menima atea nafaꞌnea, Yuta* vayaꞌmogami sauve kanoa, hanate atene? Nagola haegafa kaꞌnefila yagema evaꞌyi nehilegati evaꞌyi higeta ageteta ‘Ago atene.’ huta agai agi alisaga hugahe neꞌone.” huꞌya hae.
MAT 2:3 Hageno sauve kanoa Helotiꞌene mukiꞌa Yelusalemu mainaya veaꞌnene ani kea haviteꞌya atali talu hu-mainae.
MAT 2:4 Atali talu hageno Helotiꞌa mukiꞌa mono note kava vayafeꞌene kahegi kema havilinaya anagafeꞌene ke higeꞌya agaite ageno mage huno hama-vige “Anumaya Kotiꞌma taugafa ali-gatigahema hu-tesia kanoa hana kumate ategahie?” huno hama-vi-ge-maine.
MAT 2:5 Hama-vi-gegeꞌya mage huꞌya hae “Ani nafaꞌnea Petelehemu ategahie. Nayona Anumaya Koti aune kanomoꞌa mage huno kae-maleneane
MAT 2:6 ‘Kagaya Petelehemu kumaꞌmoga Yutia kotega mainananagi Yutia kumaꞌyaga ago amakaseka hai-mainananagino kagaipiti ala kava kanoa falote huteno nagai veala Isaleli* veate kava yakaigahie.’ huno kae-maleneane.” huꞌya hae.
MAT 2:7 Hageno Helotiꞌa yage vaꞌyi nehilegati emainaya kanale haviꞌyaꞌami hanea vayaꞌyagahena kesi huno ke higeꞌya ageno “Ani haegafa kaꞌnefila na yu falote hu-maine?” huno hama-vige.
MAT 2:8 Hama-vigeteno Petelehemu hu-ma-tegahe mage huno hie “Utama ani nafaꞌnehena ati-yetama age-faloteꞌma hinutamahena etetama me naha-paigeꞌna nagaiꞌenena aniꞌa huꞌna agia molisaga hano.” huno hu-maine.
MAT 2:9 Higeꞌya sauve kanomo kea haviteꞌya mogayana yagema vaꞌyi nehilegati age-mainaya kaꞌnefimoꞌa uhagote-ma-teno viaꞌyamo ani nafaꞌnema mainea nomo amupale umaineno amave-li-maine.
MAT 2:10 Amave-ligeꞌya ageteꞌya amaipamoꞌa kanale higeꞌya tusiꞌa muse hu-mainae.
MAT 2:11 Muse hu-teteꞌya ani nopi hai-faleꞌya agayana ani nafaꞌnegi itaꞌamoꞌa Maliaꞌagi huꞌana mainaꞌageꞌya mogeteꞌya mopafi mope huꞌya agia alisaga nehuꞌya kuꞌamifiti muse yana amigahe monegi manaꞌage taꞌnefagi kule fuki kana huno manaꞌage mea tinagi huꞌya aminae.
MAT 2:12 Amiteꞌya himona agayana Anumaya Kotiꞌa himonafi mage huno hama-paiye “Heloti mainesilega etetama oꞌviho” huno higeꞌya alu kate uteꞌya kumaꞌamilega umainae.
MAT 2:13 Kanale haviꞌyaꞌami hanea vayala utageno Yosefeꞌa Anumayamo ensole kanoa himonafi agegeno mage huno hie “Hetika nafaꞌnene itaꞌamoꞌene Isipi kotega tamaiya-yetama viho. Anilega umainegeꞌna nagayama eteꞌna hisugetama etetama egahae. Helotiꞌa kagai nafaꞌnehe ati-yeno haesia ke nehie.” huno hie.
MAT 2:14 Higeno Yosefeꞌa ani himona ageteno aupaꞌa hetino nafaꞌnene itaꞌamoꞌene ani kegela anavaleno Isipi kotega ugahe umainae.
MAT 2:15 Ani kotega ayaꞌaya kanagefa umainageno Helotiꞌa falitegeꞌya neꞌataleꞌya emainae. Ani yafena nayona Anumayamoꞌa aune kanomo avayafiti mage huno hu-maineane “Isipi kotegati nagaiꞌni nafaꞌnea ke hisugeno egahie” huno hu-maineane. Nayoma hu-mainea kemoꞌa ani yupa ago efalote huno tamage hu-maine.
MAT 2:16 Helotiꞌa agesa havitenoꞌe “Ani kanale haviꞌyaꞌami hanea vayaꞌmoꞌya aye-navataga hae.” huno tusiꞌa ke vai-maine. Kanale haviꞌyaꞌami hanea vayaꞌmogami kea haviteno “Yisasiꞌa ani augafa kafuꞌa hane.” huno nagoꞌa vayala hu-ma-tegeꞌya Petelehemu kumateꞌene atupa kumaꞌyagaleꞌene mukiꞌama yaufa tole (2) kafua ohunaya neꞌnafaꞌneyaga “Hamaegeꞌya faliho.” huno hu-ma-tene.
MAT 2:17 Yelemaiyaꞌa nayona Anumaya Koti aune kanomoꞌa mage huno hu-maineane “Lama kumategati mukiꞌa veaꞌmoꞌya ala kefiti ke huꞌya hamau huꞌya avi-taya kea vayaꞌmoꞌya havimainae. Leselina aginagomogami nafaꞌneyagahe tusiꞌa avi-tegeꞌya nafaꞌneyagaꞌama faliya yafe veaꞌmoꞌya aipa ali falu hutayanagi tusi avi-te-maine.” huno hu-maineane. Ani yupa nayoma hu-mainea kemoꞌa ago efalote huno tamage hie.
MAT 2:19 Helotiꞌa falitegeno Yosefeꞌa Isipi kotega maineno himonafi Anumayamo ensole kanomona agegeno mage huno hapaiye.
MAT 2:20 “Hetika nafaꞌnene itaꞌamoꞌene neꞌanavaleka Isaleli kotega viho. Kagai nafaꞌnema haesaya amakesa haviya vayala ago faliye.” huno hie.
MAT 2:21 Higeno Yosefeꞌa hetino nafaꞌnene itaꞌamoꞌene neꞌanavaleno Isaleli kotega umainae.
MAT 2:22 Umainagi “Helotiꞌa ago falitegeno agaiꞌa nafaꞌnemoꞌa Akelausiꞌa Yutia kotega kava hu-maine.” huꞌya haya kea Yosefeꞌa haviteno koli huno “Anilega oꞌugahue.” huteno himonafina “Anilega oꞌviho.” huno hia kea haviteno Kalili umaine.
MAT 2:23 Kalili viana osi kumala Nasaleti uno maine. Nayona Anumaya Koti amaune vayaꞌmoꞌya Yisasifena mage huꞌya hu-mainayane “Agaya Nasaleti kano maine.” huꞌya hugahae huꞌya hu-mainayane Ani yupa nayoma hu-mainaya kemoꞌa ago efalote huno tamage hu-maine.
MAT 3:1 Ti fale-mate Yoniꞌa evaꞌyi huno Yutia kaꞌme kotega maineno Anumaya Koti kea hu-haleno hama-pai-maine.
MAT 3:2 Yoniꞌa mage huno hie Anumaya Kotiꞌma ikapinaga kava yagaisia yamoꞌa aupaꞌa evaꞌyi hugahie. Evaꞌyi hugahigi tamakaya tamakuꞌa aiyahae hutama kefo yatamia “Nagoꞌene ohugahune.” hutama ataleho huno hu-maine.
MAT 3:3 Ani kema hisia kanomofena nayona Anumaya Koti aune kanomoꞌa, Aisayaꞌa mage huno hu-maineane “Kaꞌme kotegati nago kanomoꞌa keha keha huno mage hugahie ‘Anumayamo esia kamaꞌa ali hilato hutama ali fatago hiho.’ huno hugahie.” huno hu-maineane.
MAT 3:4 Yoniꞌa kemolo afumo ayolagefaleti fakaꞌni-male kena fai-line. Fai-lineno pulamakao augafaleti amuꞌnofila aye-talako huno ki-lineno kaveꞌa keꞌnuꞌene tumemo timaꞌaene neneane.
MAT 3:5 Ani kanafina Yelusalemu veaꞌnene Yutia kotega veaꞌnene nagoꞌa Yotani ti agegayalega hanea kumate veaꞌnene Yoni mainelega umainae.
MAT 3:6 Yotani titega emaineꞌya kefo yaꞌamihena hu-falote hageno Yoniꞌa ani Yotani tipi tina fale-ma-tene.
MAT 3:7 Tina fale-neꞌama-tegeꞌya Falasia* vayaꞌene Satiusi* vayaꞌene “Ti fale-la-tesie.” huꞌya neꞌageno Yoniꞌa amaketeno mage huno hie “Tamakaya osifaꞌveyagamo nafaꞌneyaga mainagi tamakaya havigeꞌage vayaꞌmogatama Anumaya Kotiꞌa kaiyekema hu-lama-tesigetama tamaugafa tamakata aisia kanamoꞌa aupaꞌa efalote hisia yafena ‘Faletama viho.’ kea ta tamaha-pai-maine?
MAT 3:8 Hagotetama kefo yatamihema tamakuꞌa ai-yahae hu-mainesaya yana nave-lisageꞌna tina fale-lama-tegahue. Tamakaya ‘Apalahamu nafaꞌneyaga mainone.’ hutama ohiho. Nagaya tamaha-nepauve Anumaya Kotiꞌa ma yafatetila Apalahamu nafaꞌneyaga afaꞌa talo hileꞌasine.
MAT 3:10 Tamakaya yosa kana hutama mainayanagi menia Anumaya Kotiꞌa tuna alino yosamo aipale maleneno kanale alagama oꞌayenesia yosa atagino atafi hagaꞌyu huno kaegahie.” huno hie.
MAT 3:11 Tamakuꞌa ai-yahae hutama kefo yatamia atalegeꞌna nagaya titeti fale-nelama-toanagino nakavela nago kanoma esiana Alu Aotage Avamutetiꞌene ataletiꞌene fale-lama-tegahie. Ani kanomoꞌa tusiꞌa tokiyaꞌa hanea kanogino nagaila ago nagase-maineanagiꞌna nagaya afa kano mainoanagiꞌna agai aiyale ayesuana onategahie.
MAT 3:12 Agaya sipeti ayopaꞌa ali-lineno vitimo anoꞌyaꞌa fuhu hale-taleno alagaꞌa alino nopi halaꞌya hu-malegahigi anoꞌyaꞌa ata tegelege nehia atafi kae-talegahie. Ani avinamoꞌma hu-mainea kava huno veala fako faka hugahie huno hu-maine.
MAT 3:13 Ani kanafina Yisasiꞌa “Yoni ayapiti tina fale-natesie.” huno Kalili kotegatila ataleno Yotani titega umaine.
MAT 3:14 Yoniꞌa Yisasifena “Tina fale-oka-tegahue. Nagaila kagaya tina fale-na-tanageno kanale hileꞌasine naꞌa higeka nagaifena ‘Tina fale-nato.’ huka nehane?” huno hie.
MAT 3:15 Higeno Yisasiꞌa Yonifena mage huno hie “Menia aniꞌa hisanana kanalele. Tima fale-na-tesanana mukiꞌa Anumaya Kotina fatago kavaꞌa alitaꞌa lama hugahuꞌe.” huno higeno Yoniꞌa Yisasi ke akave maleno tina fale-tene.
MAT 3:16 Tina fale-neꞌategeno Yisasiꞌa aupaꞌa tipiti aivati huno ageana ikamoꞌa ai-hagalo higeno Alu Aotage Avamuꞌmoꞌa nama kana huno agaitega elavi-maine.
MAT 3:17 Ageho enelavigeno ikapinagati age aino mage huno hie “Ma kanoa nagaiꞌni nafaꞌnehena agaifena aluya huno nahau nayamopafina nenagea neꞌnimofena agaifena aluya huꞌna musemaꞌa nehue.” huno hu-maine.
MAT 4:1 Anumaya Kotina Alu Aotake Avamuꞌamoꞌa Yisasina veaꞌne omai kaꞌme kotega avaleno vigeno Sataniꞌa Yisasife “Havi kava huo.” huno aye-vataga hu-maine.
MAT 4:2 Umaiyana fotiꞌa (40) yupagefa felugaene kegeꞌene kavela oneno maigeno tusiꞌa agate-maine.
MAT 4:3 Agategeno Sataniꞌa agaite uvaꞌyi huno mage hie “Kagaya Anumaya Koti nafaꞌnema mainenukahena ma yafaꞌyaga hapaigeno maya hapaeno.” huno hie.
MAT 4:4 Higeno Yisasiꞌa mage huno hie Anumaya Koti avopi kemoꞌa mage huno hu-maineane “Veaꞌmoꞌya mayaꞌageꞌma nesayana kanaleꞌya huꞌya omaigahagi mukiꞌa Anumaya Kotiꞌma hu-mainea kene haviꞌya nenesageno amaku nafaꞌnemoꞌa kanaleꞌya huno maigahie. huno hu-maineane.” huno hapaiye.
MAT 4:5 Sataniꞌa Yisasina Yelusalemu tusiꞌa ala kumate avaleno ala mono nomo agotofule motene.
MAT 4:6 Moteteno mage huno hapaiye “Kagaya Anumaya Koti nafaꞌnema mainenukahena ma nomo agotofuleti mopafi asaga hulavigeꞌna agano. Anumaya Koti avopiti kemoꞌa mage hu-maineane ‘Anumaya Kotiꞌa ensole vayaꞌahe ‘Kava hiho.’ huno hu-ma-tesigeꞌya amayateti kavalesaga hu-lisageka tavisanageno yafatela kaiyamona aye kofa ohugahieꞌ huno hu-maineane.” huno hie.
MAT 4:7 Higeno Yisasiꞌa kenonaꞌa mage huno hie “Nagoꞌene Anumaya Koti avopina mage huno kae-maleneane ‘Anumaya Kotikamona afa yafena ‘Tokiya kava huo.’ huka aye-vataga ohuo.’ huno hu-maineane.” huno hie.
MAT 4:8 Higeno Sataniꞌa Yisasina avaleno nago ala agoꞌyafi haiteno mukiꞌa ma mopafima hanea ala kumaꞌyagaene afenoꞌyamaꞌaene ave-li-maine.
MAT 4:9 Aveliteno Yisasife mage huno hie “Kagaya nagaifema ‘Tusiꞌa ala kano mainananagiꞌna kagai kagi alisaga nehue.’ huka kagesama havi namika mopafi kaleꞌyama ayesanageꞌnahena mukiꞌa ani kumaꞌyagaene afenoꞌyaꞌene kava yagaisanafe kamino.” huno hie.
MAT 4:10 Higeno Yisasiꞌa mage huno hie Sataniga* mai haleka amulega vuo. Anumaya Koti avopi kae-malenaya kemoꞌa mage huno hu-maineane “Anumaya Kotikamona akaiꞌagefe ‘Tusiꞌa ala kano maine.’ huka kagesa havi havi huka agai agia alisaga huka agai aliꞌyamaꞌage alio huno hu-maineane.” huno hapai-maine.
MAT 4:11 Higeno Sataniꞌa anile ataleno vigeno ensole anagaꞌmoꞌya Yisasina meya huꞌya kava hu-tenae.
MAT 4:12 Yisasiꞌa “Yonina nofi hu-tenae.” huꞌya haya kea ago haviteno Kalili kotega umaine.
MAT 4:13 Viana Nasaletia ataleno Kapaneamu umaine. Ani kumala Kalili ti kotumona agegayale haneanagino Sepuluni nofi veaꞌmogamiꞌene Napatali veaꞌmogamiꞌene koꞌamiꞌa haneane.
MAT 4:14 Nayona Anumaya Kotiꞌa aune kanoꞌamona, Aisaya avayafiti mage huno hu-maineane
MAT 4:15 “Sepuluni nofi veaꞌmogamiꞌene Napatali veaꞌmogamiꞌene mainesaya kaiyaga ala tikotu visaya katega haneanagiꞌya Yotani lina takaeꞌya vaaya kotega, Kalilie, Yuta veaꞌne omainaya veaꞌmoꞌya nemaiya kumale.
MAT 4:16 Ani kotega mukiꞌa veamoꞌya hani yapi mainayanagino menima aye-hale-matesia yana age-mainae. Mukiꞌa veaꞌmoꞌya afaꞌa maineꞌya faligahe hayanagi Anumaya Koti kemoꞌa ago aye-vasa hu-matene.” huno hu-maineane.
MAT 4:17 Ani yupa Yisasiꞌa aepa heno Anumaya Koti kanale mono kea hu-haleno hama-pai-maine. Mage huno hie “Ikapinagati Anumaya Koti kava yagaisia yana aupaꞌa evaꞌyi hugahigi tamakaya tamakuꞌa aiyahae hutama kefo yatamia ataleho.” huno hu-maine.
MAT 4:18 Kalili ti kotumo agegayalega neꞌuno Saimonina, nago agia Pitaꞌe, aganaꞌamo agia Etaluene anakeana noyame kuꞌya nehaꞌa kanolatana maineꞌana ala kukonogo hagaꞌyu huꞌana ti kotupi nemalaꞌageno anake-maine.
MAT 4:19 Anaketeno Yisasiꞌa mage huno hana-paiye “Nakave eꞌo. Nakave eꞌageꞌna noyame kuꞌyama haꞌa avamete huꞌna veaꞌne amavalesaꞌa auꞌava yana tanavelino.” huno hie.
MAT 4:20 Higeꞌana aupaꞌa kukonogoꞌania neꞌataleꞌana Yisasi akave umainaꞌe.
MAT 4:21 Vaꞌageno Yisasiꞌa anakeana Sepetina netalamaꞌamoꞌagani Yemesigani Yonigania tipi kalefi neꞌanafaꞌene maiꞌana kukonogo nefakaꞌniꞌageno Yisasiꞌa momaketeno anakaife ke hie.
MAT 4:22 Ke higeꞌana aupaꞌa Sepetiꞌa neꞌanafaꞌene tipi kalene neꞌataleꞌana akave umainaꞌe.
MAT 4:23 Yisasiꞌa mukiꞌa Kalili kotega ute ete huno mono nopi Anumaya Koti kava yagai-latesia kanale mono kea mo hama-nepaino mukiꞌa kaliꞌamima hanea veaꞌnene mukiꞌa veaꞌmogami amaugafama ali haviya nehia yana alino kanale hu-ma-tene.
MAT 4:24 Alino kanaleꞌma hu-ma-tea avagemoꞌa mukiꞌa Silia kotega ute ete higeꞌya haviteꞌya mukiꞌa veaꞌmoꞌya kalima aliya veaꞌnene alu kali alu kalima aligeno amaugafa amakata neꞌaiya veaꞌnene Satani Avamuꞌma* amakuꞌafi mainea veaꞌnene mananiꞌya neꞌamakia kali veaꞌnene amaiya amaya avayu hu-lavi-mainea veaꞌnene amavaleꞌya Yisasite ageno alino kanale hu-ma-tene.
MAT 4:25 Alino kanale hu-ma-tegeꞌya kasagoꞌya veaꞌnea Kalilitiꞌene naya-toleꞌa kumaꞌyagaletiꞌene Yelusalemutiꞌene Yutiatiꞌene alulega mainaya veaꞌnea Yotani tina takaeꞌya Yisasina akave umainae.
MAT 5:1 Yisasiꞌa mukiꞌa alitalu hu-mainaya veaꞌnea amaketeno agoꞌyafi haino mopale mainegeꞌya agaiꞌenema tokaeꞌya nemaiya anagaꞌmoꞌya Yisasitega emainae.
MAT 5:2 Ageno Yisasiꞌa avayafiti mage huno hie.
MAT 5:3 Mukiꞌa yaꞌamima omalenea veaꞌmoꞌya “Tagupi nagoꞌa kanale yana omaleanagita tagaitia kanale kavala ohugahunagi Anumaya Kotiꞌa taya hisie.” huꞌya hisaya veaꞌmogamina Anumaya Kotiꞌa amakaila kava yagai-ma-tegahigi ani yafena muse hutama maiho.
MAT 5:4 Hamaumana halesigeꞌya hamau huꞌya nemaisaya veaꞌmoꞌya Anumaya Kotiꞌa amaya huno amaipa falu hisia yana amamisia yafena muse huꞌya maisae.
MAT 5:5 Amaugafama aliꞌya nohaiya veaꞌmogamina Anumaya Kotiꞌa haenagaꞌa mukiꞌa mopa amamisia yafena muse huꞌya maisae.
MAT 5:6 Anumaya Kotiꞌa fatago hu-mainea kavafena “Nelahaigeno ani yafena laga nele.” huꞌya hisaya veaꞌmoꞌya Anumaya Kotiꞌa amamu hisigeꞌya maisaya fatago kavaꞌma amamisia yafe muse huꞌya maisae.
MAT 5:7 Mukiꞌa veaꞌmoꞌya nagoꞌa neꞌamafugamife kalagi ai-mateꞌya hamau hu-neꞌamatesaya veaꞌmogamina Anumaya Kotiꞌa aniꞌa huno kalagi aino hauna hu-matesia yafena huꞌya maisae.
MAT 5:8 Mukiꞌa veaꞌmoꞌya Anumaya Koti kema akave malesaya yafena tole amakesama ohavinaya veaꞌmoꞌya Anumaya Kotima agesaya yafena muse huꞌya maisae.
MAT 5:9 Neꞌamafugamifena “Nagoke tamaku tamakesale maiho.” huꞌya nehisaya veaꞌmogamina Anumaya Kotiꞌa “Nagai nafaꞌneyaga mainae.” huno hu-matesia yafena muse huꞌya maisae.
MAT 5:10 Nagoꞌa veaꞌmoꞌya fatagoma huꞌya mainesageꞌya nagoꞌa veaꞌmoꞌya amaipa kafa he-mateꞌya ali-haviyama hu-ma-tesageꞌya maisayana Anumaya Kotiꞌa amakaiꞌma kava yagai-ma-tenea yafena muse huꞌya maisae.
MAT 5:11 Tamakaya nakaveꞌma nemalageꞌya tamaketeꞌya kamuge hu-lama-teꞌya ali-haviya hu-nela-mateꞌya “Ma kavala havi kava nehae.” huꞌya havigema hu-lama-tesagetama afaꞌa muse nehutama maiho.
MAT 5:12 Aniꞌama hu-lama-taya kavala nayona Anumaya Koti amaune vayaꞌmogamina aniꞌa hu-ma-tenayane. Ani kavaꞌma hu-lama-tesaya kanafina ikapinaga anonaꞌa kasagoꞌya yaꞌyaga alisaya yafena tamaipamoꞌa kanale nehinagetama muse hiho.
MAT 5:13 Tamakaya ma mopale veaꞌmogamina hagama nehamaiya sole kana hutama mainae. Solemoꞌa hagama nehia yamaꞌama haꞌno hisigetama hanaꞌa hutama hagama nehia yamaꞌa ali falote hugahae? Hagama nehia yamaꞌamoꞌa ago yagu yaguma hisiana afa ya kana hinageꞌya ani Solea veaꞌmoꞌya faitega ai-tagu-fe-talesageꞌya amaiyaleti ute ete huꞌya aye-lata-pegahae.
MAT 5:14 Tamakaya mukiꞌa ma mopama hanea kotega kaꞌni kana veaꞌne mainae. Ala kumaꞌma agoꞌyafima hanesiana fala okigahianagiꞌya mukiꞌa veaꞌmoꞌya agegahae.
MAT 5:15 Nagoꞌa veaꞌmoꞌya lamua hanagaliꞌya susufanefinaga aiso hu-nomalagi nopinaga aye-halesigeꞌya veaꞌmoꞌya agesayafe ani lamua sipale nemalae.
MAT 5:16 Naꞌa hu-mainegi tamakaya ani kava hutama lamumoꞌa aye-hale-ma-tea kava hutama Yisasi kea hama-paitama kanale kavala veaꞌmogami amaule hisageꞌya ageteꞌya ikapinaga mainea Nelamafa agia alisaga hugahae.
MAT 5:17 Tamakaya ma lamakesa ohaviho “Nayona Mosese kahegi kene amaune vayamoꞌya hu-mainaya kene Yisasiꞌa ali-talegahe emaine.” hutama ohiho. Nagaya ani yaꞌyaga aliꞌna oꞌatalegahugi ani kea ali falote hisugetama “Tamage nehie.” hutama hisayafe emainoe.
MAT 5:18 Nagaya tamagelafa huꞌna tamaha-nepauve ma mopaene ikaꞌene fanane hugaꞌanagi kahegi kefi mukiꞌa osi osi oꞌagemo avoꞌyaga afaꞌa hanegahie. Nagoke ya kanoꞌagela fanane ohugahigi mukiꞌama hu-mainaya kemoꞌa falote huno tamage-lafa hugahie.
MAT 5:19 Tamage-lafa hu-mainayafe nagoꞌa veaꞌmoꞌya ani kahegi kea osi kanoꞌa “Akavela omalegahunema.” huꞌya alu veaꞌmogamife “Aniꞌa hiho.” huꞌya hisaya veaꞌmoꞌya Anumaya Kotiꞌa kava yagai-mainea kumatela osi nafaꞌne kana veaꞌne maigahagi nagoꞌa veaꞌmoꞌya mukiꞌa kahegi kema ali hipoꞌya huꞌya “Ma kava hiho.” huꞌya hama-paisayana Anumaya Kotiꞌa kava yagai-mainea kumatela ala huno agase-mainea amakiene veaꞌne maigahae.
MAT 5:20 Nagaya tamagelafa huꞌna tamaha-nepauve Falasia* vayaꞌene kahegi kema havilinaya anagaꞌene hu-mainaya fatago kavala tamakaya agasetama tusiꞌa kanale hu-mainea fatago kavaꞌma ohisayana amuha ohunayanagino tokiyatamia omaleneanagitama Anumaya Kotiꞌa kava yagai-mainea kumatela haitama omaigahae.
MAT 5:21 Tamakaya ago havilinae nayoma mainaya veaꞌmogamina mage huꞌya hama-pai-mainayane “Veala hamaetama fali-oꞌamateho. Veaꞌma haemaetama fali-matesayana kaiyeke hu-lama-tegahae.” huꞌya hu-mainayane.
MAT 5:22 Nagi nagaya menia tamaha-nepauve nagoꞌa veaꞌmoꞌya neꞌamafufema amaipa kafa hetesayana Anumaya Kotiꞌa kaiyeke hu-ma-tegahie. Nagoꞌa veaꞌmoꞌya neꞌamafufema “Havi kavakeꞌya nehana kano mainane.” huꞌya hisayana ala kaiyekele he-tigahae. Nagoꞌa veaꞌmoꞌya neꞌamafufema “Kagaya aifoꞌnafo kano mainane.” huꞌya hisayana hani yapima tegelege nehia atafi ugahae.
MAT 5:23 Naꞌa nehaya yafe tamakaya Anumaya Kotina nago yama amigahena mono nopi haitama mainetama “Veha nenafuna haviya hu-tenoanagino aipamoꞌa haviya nehie.” huka kagesa haviteka Anumaya Kotina amisana yana anile neꞌataleka negafutega tanaipa mo-li-falu hutetana eteka esanaꞌamoga amisana yana Anumaya Kotina memio.
MAT 5:25 Nago kanomoꞌa “Havi kava huna-tananagiꞌna kaiyekea hu-gategahe nehue.” huno kavalenoꞌma vinagetana neꞌutana “Nenafuga kaipa falu hisia yana kamigahue.” huka hapaiyo. Aniꞌa ohisanana kavaleno kaiyekema hu-gatesia kanomote vinageno haviteno ati kanomo ayapi katesigeno kavaleno nofila mo hu-gategahie.
MAT 5:26 Nofila mo hu-gategahigi tamage tamaha-nepauve kaiyekema hu-gatenea kanomoꞌma “Mone namio.” huno hu-mainesia monema oꞌaminesanana nofipitila ataleka omegane huno hu-maine.
MAT 5:27 Tamakaya nayo kea ago havimainae mage huno hu-maineane “Kumai he kavala ohiho.” huno hu-maineane.
MAT 5:28 Nage hu-maineanagi nagaya menia tamaha-nepauve nagoꞌa veaꞌmoꞌya nago aꞌmona aulagafiti age haꞌye huno “Ani aꞌmofena naꞌa hu-ga-tegahue.” huno aguꞌafinaga havino haꞌyema hiana ani atela ago kumai kava hu-maine.
MAT 5:29 Tamaga kaiyaga tamaulagamoꞌma agea yafema kefo kavaꞌma hisaya tamaku tamakesa tamamisigetama ani tamaulaga ali faꞌyitama atalesagenoꞌa nago tamaugafa atupaꞌa omalenea yafe kanaleꞌya hutama maigahae. Aniꞌama ohinutamahena muki tamaugafa hanimo aguꞌafi tegelege nehia atafi hagaꞌyu hu-lama-talegahie.
MAT 5:30 Tamaga tamayaꞌmoꞌma tamavayu huno kefo kava hisaya tamaku tamakesama tamamisigetama ani tamayana he-fakalitama ataleho. Naꞌafene? Nago tamaugafa atupaꞌa omalenea yafe kanaleꞌya hutama maigahae. Aniꞌama ohinutamahena muki tamaugafa hanimo aguꞌafi tegelege nehia atafi hagaꞌyu hu-lama-talegahie.
MAT 5:31 Nayona mani kea hagetama havimainae. “Nagoꞌa vayaꞌmoꞌyama aꞌamima hu-tesayana ani vayaꞌmoꞌya aꞌamimofena ‘Ago hu-negatoe.’ huno avona kaeno amino.” huno hu-maineane.
MAT 5:32 Hu-maineanagi nagaya menia tamaha-nepauve aꞌamoꞌma kumai ohenesigeno anauꞌamoꞌma atalesigeno ani aꞌmona alino kumai nehia a kana hu-tene. Nago kanomoꞌa anima atalenea aꞌma aliteana ani kanomoꞌene kumai he yana nehie.
MAT 5:33 Nago kea nayoma hama-pai-mainaya kea ago havimainagi naꞌa hu-maine “Kagaya ‘Anumayamo aufina tamage nehuanagiꞌna naꞌa hugahue.’ huka hisanana fatago huka ani kavala huo.” huno hu-maineane.
MAT 5:34 Hu-maineanagi nagaya tamaha-nepauve tamakaya “Anumaya Koti aufina tamage nehue.” hutama ohiho. Tamakaya “Ikamo agile tamage nehue.” hutama ohiho. Ikapinaga Anumaya Kotiꞌa kava yagai-mainea kuma hanegetama agaife nehae.
MAT 5:35 Tamakaya “Mopamo agile tamage nehue.” hutama ohiho. Ani mopalega Anumaya Kotiꞌa aiya haꞌyo hu-maleno mainea mopa hane. Tamakaya “Yelusalemu kumaꞌmo agle tamage nehue.” hutama ohiho. Ani Yelusalemu kumala ala sauvetimoꞌa Anumaya Koti kava yagai-mainea kuma hane.
MAT 5:36 Tamakaya “Nanuteti huꞌna lamage nehue.” hutama ohiho. Tamakaya tamayolagefahena “Anupa nayolegefaene tuhi nayolegefaene falote hino.” hutama hisaya tokiyatamia omalegi ani kea ohiho.
MAT 5:37 “E,” hinutamahena ani keꞌage hiho. “Aꞌao.” hinutamahena ani keꞌage hiho. Nago kenema hisayana Kefo Avamuꞌmoꞌa ani kea ali falote nehie.
MAT 5:38 Nayona mani kea hagetama ago havimainagi “Nago kanomoꞌa kaulagama ai-lagatisigekahena ani kanomo aulaga anonaꞌa ai-lagatio. Kaveꞌma ai-halalima hisigekahena anonaꞌa agaila aniꞌa huka avela ai-halali huo.” huno hu-maineane.
MAT 5:39 Hu-maineanagi nagaya tamaha-nepauve nago kanomoꞌa havi kavaꞌma hu-ga-tesigekahena kaꞌyona oꞌamio. Nago kanomoꞌa kagalamesaleꞌma kaiko-lisigekahena nago kaiyagakaꞌa mai-yahae hugeno kaiko-lino.
MAT 5:40 Nago kanomoꞌma “Haviya hu-natea kanoe.” huno kaiyekema hu-gateno “Anonaꞌa kagaiꞌa siota namio.” huno hisigekahena ala yasi siotakaene amio.
MAT 5:41 Nago kava kanomoꞌa tokiyaꞌage ke huno “Afenoꞌyaniꞌa nago kilomita alika vuo.” huno hisigekahena ani kilomita mogaseka nagoꞌene tole kilomita alika vuo.
MAT 5:42 Nago kanomoꞌma “Nago yaka namio.” hunoꞌma hisigekahena afaꞌa hagaꞌyu huka amio. Nago kanomoꞌma “Namisanageꞌna yoka aliteꞌna eteꞌna kamigahugi namio.” huno hisigekahena afaꞌa amio.
MAT 5:43 Nayoma hama-pai-mainaya kemoꞌa ago havimainagi “Kumatamile mainesaya nelama-fugamifena tamahau tamayamopafi tamahainagetama kame vayatamihena tamaipa kafa he-mateho.” huꞌya hu-mainayane.
MAT 5:44 Hu-mainayanagi nagaya menia tamaha-nepauve “Kame veatamimofena tamahau tamayamopafi tamahaino. Haviya hu-nelamataya veaꞌmogamina ‘Amaya huo.’ hutama Anumayamotega havigo.”
MAT 5:45 Ani kavaꞌma hisayana ikapinaga mainea Nelamafana nafaꞌneꞌa maigahae. Anumaya Kotiꞌa kanale veaꞌneleꞌene havi veaꞌneleꞌene yagemona hu-tegeno nago avamete huno aye-hale-matene. Anumaya Kotiꞌa fatago nehaya veaꞌneleꞌene havi kava nehaya veaꞌneleꞌene kola hu-tegeno nago avamete huno kola neꞌaiye.
MAT 5:46 Veaꞌmoꞌya tamakaifema hamau amayamopafi neha-mainagetamahena tamakaya aniꞌa hutama amakaifema tamahaisiana ani kavamoꞌa afa yanagino anonatamia oꞌaligahae. Kefo kava nehuꞌya amaugafaleti takisi mone neꞌaliya vayaꞌmoꞌya aniꞌa kavala nehae.
MAT 5:47 Nelamafuꞌenekeꞌyama kea kea nehisaya yana afa yanagi. Yisasi ke ohavinaya veaꞌmoꞌya aniꞌa kavala nehae. Kame vayatamimoꞌene kea kea hiho.
MAT 5:48 Ikapinaga Nelamafaꞌa ala huno kanale kavakeꞌya hu-maineanagitama tamakaya aniꞌa augafa veaꞌne mainetama ala hutama kanale kavakeꞌya nehutama maiho.
MAT 6:1 Yisasiꞌa mage huno hu-maine “Havigu tamakaya veaꞌmogami amaufima kanale kava nehisageꞌya ‘Nageteꞌya kanale kano maine.’ huꞌya hisae.” hutama nehae. Ani kavala hisayana anonatamia hai ali-mainagi ikapinaga mainea Nelamafaꞌa kanale kava haya yafe anonatamia otamamigahie.
MAT 6:2 Ani yafe tamakaya kafuma hisaya veala amaya hutamama amamigahena ala kefiti keha keha hutama oꞌamamitama kesi ako hutama amamiho. Nagoꞌa vagala vayaꞌmoꞌya mono nopiꞌene kategaene “Veaꞌmoꞌya tageteꞌya ‘Kanale kava nehae.’ huꞌya takia alisaga hisae.” huꞌya keha keha huteꞌya vaya amaya nehayanagi nagaya tamagelafa huꞌna tamaha-nepauve kanale anonaꞌamia hai ali-mainayanagino Anumaya Kotiꞌa nago yana oꞌamamigahie.
MAT 6:3 Kagaya kafuma hisaya veaꞌma amaya hugahena tamaga kayamoꞌa hauga kayamo hisia yana oꞌagesigeka kesi momaya huo.
MAT 6:4 Kesi ako huka veaꞌmoꞌya onagesagi huka amaya hisanana ani yakaꞌa Anumaya Koti, Negafaꞌa, kesi kavaꞌma nehaya yana neꞌagea kanomoꞌa age-maineanagino kanaleꞌya huno anonakaꞌa kamigahie.
MAT 6:5 Nunamuma hutama havigegahena vagala vayaꞌmoꞌya nehaya kava hutama Anumaya Kotina havi-okeho. Ani vayaꞌmoꞌya mono nopiꞌene ka agegayaleꞌene “Muki veaꞌmoꞌya tagesae.” huꞌya hetiꞌya Anumayamotega havinegae. Nagaya tamagelafa huꞌna tamaha-nepauve vayaꞌmoꞌya anonaꞌamia hai ali-mainae.
MAT 6:6 Ali-mainagi kagaya oꞌagesaya kava huno mainea Nelafana Anumayamotegama havigegahena nokafinaga fita ki-maleteka maineka falakika havigesanageno Negafaꞌa kesi kavaꞌma haya yama neꞌagea kanomoꞌa ani yana ageteno anonakaꞌa kamigahie.
MAT 6:7 Nunamuma hugahena Anumayamo kema nohaviya veaꞌmoꞌya havinegaya kavala hutama kasagoꞌya afa keyaga hutama havi-okeho. Ani veaꞌmoꞌya ayaꞌaya nunamu ke nehuꞌya mage huꞌya amakesa nehaviye “Ayaꞌaya ke huta havigesunageno havigahie.” huꞌya nehae.
MAT 6:8 Nehagi amakaya nehaya kavala amakave omaleho. Nelamafama havi-oketama maiya kanafina nago yatamima omalene hutama haya yatamia ago havimaineafe nagoꞌene tutu hu-oꞌateho.
MAT 6:9 Anumayamotega havigenutamahena mage hutama havigeho “Ikapinaga mainana Nelafaga kagai kagimoꞌa alu aotage huno hanesie.
MAT 6:10 Kava yagaisana kanamoꞌa efalote hisie. Kahaisia kavala ikapinaga nehagi mopaleꞌenena kahaisia kavala hisae.
MAT 6:11 Meni kanafina nesuna kavela tamio.
MAT 6:12 Tagaya havi kavaꞌma hu-la-tenaya veala aige amateta kefo yaꞌamia atale-ma-tona kava huka kefo yatia aige-tateka atale-lato.
MAT 6:13 Kana yapiꞌene Sataniꞌma aye-lavataga hisia yapiꞌene tavaleka otato. Sataniꞌa ‘Kefo kava hiho.’ hunoꞌma hu-la-tesigeka tahaꞌmaika tavalesaga huo.” huno hu-maine.
MAT 6:14 Huteno mage huno hie tamakaya havi yama hu-lamatenaya veala aigeꞌama-tetetama kefo yaꞌamima atale-ma-tesayana ikapinaga mainea Nelamafaꞌa aniꞌa huno kefo yatamia aige-tamateno atale-lama-tegahie.
MAT 6:15 Atale-lama-tegahigi tamakaiꞌma ali-havi yama hu-lama-tenaya veafena aigeꞌama-tetama kefo yaꞌamima atale-oꞌama-tesayana ikapinaga mainea Nelamafaꞌa aniꞌa huno kefo yatamia aige-tama-teno atale-otamategahie.
MAT 6:16 Tamakaya Anumaya Kotitegama havigegahena kavela mositama mainutama tamaugosa kalaguꞌnagu ohiho. Vagala veaꞌmoꞌya ani kava huꞌya amaugosafina hapaene taꞌnefaene faleteꞌya mage nehae “Veaꞌmoꞌya tageteꞌya kaveꞌma mosi-mainona kavala tagegahae.” huꞌya nehayanagi tamagelafa huꞌna tamaha-nepauve naꞌa kava nehaya veaꞌmoꞌya anonaꞌamia hai ali-mainae. Tamakaya aniꞌa kavala ohiho.
MAT 6:17 Tamakaya Anumayamotegama havigegahena kaveꞌma mositama nemainutama titeti tamaugosa alitama masavema falesayana mukiꞌa veaꞌmoꞌya kaveꞌma mosisaya yafena ohavigahagi mai falakino mainea Nelamafaꞌa falakino hanea yana agaiꞌage neꞌageafe anonatamia tamamigahie.
MAT 6:19 Monetamiene afenoꞌyatamienena ma mopale halaꞌya ohiho. Halaꞌya hu-malenesageno toto ayeno hakaꞌnomoꞌya ali haviya higeꞌya veaꞌmoꞌya notamifi haiꞌya ani yatamia musufa aligahae.
MAT 6:20 Naꞌa hugahagi ma mopafi yafena tamakesa havi havi ohutama haenagama ikapinaga kanale yama alisaya yafe meni kanafina Anumayamofe tamakesa havi havi hutama maiho. Ikapinaga mukiꞌa yama malesayana totona ayeno okasaligahie. Hakaꞌnomoꞌa ali haviya ohugahie. Nagoꞌa musufa veaꞌmoꞌya ani kumatela musufa yana ohugahae.
MAT 6:21 Muse yatamima malenesaya kumatefe tamakesa havi havi hutama ani kumate umaigahae.
MAT 6:22 Tamaulagamoꞌa tamakupinaga aye halesia lamu hane. Tamaulagamoꞌa kanale yama huno agesiana tamakupinaga ai-hale-mainegi tamaulagamoꞌma kefo yama agesiana tamakupinaga hani-ki-maine. Ai-hale mainesia yamoꞌa tamakupima asu hisigenoꞌa hani kiteno ala hanikefa kino aye-talako hu-maine.
MAT 6:24 Nagoke kanomoꞌa “Tole kava kanolatamo aliꞌya kanoꞌania maisue.” huno ohisie. Naꞌama hisiana nago kava kanomofena “Nahaiya kano mainane.” huno hu-tegahianagi nago kava kanomofena “Hai vaiteno naipa nagata aiya kano mainane.” huno hugahie. Nago kava kanomona aguꞌa amiteno nago kanomofena “Falote onahaiya kava nehane.” huno hugahie. Tamakaya aniꞌa hutama Anumaya Kotifeꞌene moneheꞌenena ali lokaeꞌana “Kava yagai-natesaꞌe.” hutama ohiho.
MAT 6:25 Ani yafe nagaya tamaha-nepauve kanaleꞌya hutama maisaya yaꞌene kave nesaya yaꞌene ti nesaya yaꞌene tamakesa havime havime oꞌviho. Tamaugafale kena failisaya yafeꞌenena tamakesa havi havi ohiho. Kave neyana aifa letale yanagi tamahaimula kanaleꞌya hutama maisaya ya hane. Kena fai-lisana yana amegale yanagi veaꞌnea tokiyaꞌage ya mainae.
MAT 6:26 Haleꞌyama vaiyatete nehaya namayaga ageho. Amakaya avina yana nofaiye. Kavela hoyafinagati aliꞌya nopina mo nomalagi ikapinaga mainea nelamafaꞌa kavela neꞌamamigi tamakaya Anumaya Koti aulagafina namayaga amakasetama mainaya veaꞌne mainayafe tamakaiꞌenena kava yakai-lama-tegahie.
MAT 6:27 Tamakaipitila nago kanomoꞌa “Ofaliꞌna nagoꞌene maime maime haigahue.” huno tokiyaꞌage agesama havisiana anima havisia katela hanaꞌa huno falote hugahie? Aꞌao falote ohugahie.
MAT 6:28 Naꞌa higetama kenatamihena tamakesa havi havi nehae? Ageho talapinaga vilasiyamoꞌya haiꞌya ausea nehae. Aliꞌyana aliꞌya kenaꞌamia talo huꞌya fai-noꞌaligi kanale kenaꞌamia hanegeꞌya mainae.
MAT 6:29 Nagaya tamaha-nepauve nayoma mainea ala sauve kanotamia Solomoniꞌa kanale kenaꞌa fai-lianagi ma vilasiyamoꞌa kanaleꞌya huno agase-maine.
MAT 6:30 Tala yana meni kanafina hoyafina haneanagi ega hataga huꞌya atafi kae-talegahagi Anumaya Kotiꞌa ani tala yana kava yagaigeno kanaleꞌya huno hanegi tamakaya mukiꞌa veaꞌmogatama nagaifena tamakupi maletama tamametitia osi kanoꞌa nehayanagi Anumaya Kotiꞌa aniꞌa huno tamakaila kenatamia alino hilato hu-lamategahie.
MAT 6:31 Ani yafe “Kaveꞌene tiꞌene na ya negahune?” hutama tusiꞌa tamakesa havi havi ohiho. “Na kena fai-ligahune?” hutama tamakesa ohaviho.
MAT 6:32 Ani augafa yafena Anumaya Koti kema nohaviya veaꞌmoꞌya amakesa havi havi huꞌya nemaigi ikapinaga Nelamafaꞌa nesaya yaꞌene kena fai-lisaya yaꞌenefena ago havimaine.
MAT 6:33 Havimaineafe tamakaya hagotetama Anumaya Kotiꞌma kava yagaisia kumate visaya yafeꞌene agaiꞌama nehaiya fatago kavaꞌma hisaya yafeꞌene tamakesa havi havi hisayana Anumaya Kotiꞌa ani yaꞌene mukiꞌa kavetamiene kenatamienena tamamiteno ani kumatela tamavaleno tamategahie.
MAT 6:34 Naꞌa hu-maineafe “Ega hanaꞌa hugahune?” hutama tamakesa ohaviho. Egama efalote hisiana tamakesa havi havi hisaya yaꞌenena efalote hugahie. Nagoke yupa falote hisia kana yana ani yupa kanoꞌage tamakesa haviho.
MAT 7:1 Nelamafufena “Naꞌa maꞌa hana kano mainane.” hu-oꞌateho. Aniꞌama ohisagenoꞌa Anumaya Kotiꞌa tamakaifena “Havi kava haya veaꞌne mainae.” huno hu-otama-tegahie.
MAT 7:2 Tamakaya ani veafema “Naꞌa maꞌa hana kano mainane.” hutama hisayana ani augafa keleti Anumaya Kotiꞌa tamakaila aniꞌa hu-lama-tegahie. Ma mopaleꞌma nelama-fugamima hu-ma-tesaya kavala Anumaya Kotiꞌa tamakaila ani kava hu-lama-tegahie.
MAT 7:3 Tagaya tagaiti taguꞌafima hanea yana oꞌageneta alu veaꞌnehena “Havi veaꞌne mainae.” huta hisuna yafena Yisasiꞌa mage huno hu-maine “Negafu aulagafina osiꞌa havi yana hanegeka neꞌagananagi naꞌa higeka kagaikaꞌa kaulagafina nagola muki yosa-lapagefa haneanagi ‘Omalene.’ huka nehane?
MAT 7:4 Naꞌa higeka nega-fufena ‘Kaulagafitila havi yana ali-talegahue.’ huka nehananagi kagaikaꞌa kaulagafina nagola muki yosa-lapagefa hane.
MAT 7:5 Kaguꞌafinaga hanea yana agelama ohuneka kavayaleti havige huka vagala kano maineka kagaikaꞌa kaulagafitila muki yosa-lapagefa ali-taleteka kanaleꞌya huka ageteka negafu aulagafina osiꞌa havi yana ali-talegane huno hie.
MAT 7:6 Tamakaya Anumaya Kotina alu aotage yana alitama kalamogamina oꞌamamiho. Amamisayana mahaiye huꞌya tamakaila akafu tamanigahae. Afumogamina kanale sesua hagaꞌyu hutama oꞌamamiho. Amamisayana amaiyaleti ayeꞌya hapa kaligahae.”
MAT 7:7 Anumayamotega nago yafema havigesagenoꞌa afaꞌa tamamigahie. Nago yafema atiyesagenoꞌa ali falote hugahie. Fitaleꞌma akalu kaluma hisagenoꞌa Anumaya Kotiꞌa yaki-lama-tegahie.
MAT 7:8 Mukiꞌa havigesaya veaꞌmoꞌya aligahae. Ati ayesaya veaꞌmoꞌya ali falote hugahae. Fitaleꞌma akalu kaluma hisagenoꞌa Anumaya Kotiꞌa yaki-lama-tegahie.
MAT 7:9 Hana kanomoga nafaꞌnekamoꞌma mayahema kahavi-gesigeka nefaga yafana alika amigane? Aꞌao ani yana oꞌamigane.
MAT 7:10 Noyamehema kahavi-gesigeka nefaga osifaꞌvea alika amigano? Aꞌao ani yana alika oꞌamigane.
MAT 7:11 Oꞌamiganagi tamakaya havi veaꞌne mainayanagitama nafaꞌnetamimona kanale yana neꞌamamiyanagi ikapinaga mainea nelamafaꞌa tusiya huno tamakase-maineanagitama havigesagenoꞌa kanale yana tamamigahie.
MAT 7:12 Veafe “Maꞌa kava hu-latesae.” hutama hisaya kavala ani kavakeꞌya alu veaꞌnea hu-mateho. Ani yafena Moseseꞌene Anumaya Koti amaune vayaꞌmoꞌyaene hu-mainaya kahegi kemona aepaꞌa hane.
MAT 7:13 Anumaya Koti kumateꞌma visayana osi fia kanoꞌafi ugahae. Hani-ki-mainea kumapi tegelege nehia atafi visaya kaana ala hiꞌyenagefa haneno ala kakefa hanegeꞌya kasagoꞌya veaꞌmoꞌya yoꞌyo huꞌya ani katela neꞌvagi tamakaya osi fia kanoꞌafi hai-faleho.
MAT 7:14 Agola maige maige hisuna kumateꞌma visaya kaana osi fia kanoꞌa haneanagiꞌya kasageke huꞌya ani katela kasagoꞌya veala noꞌvae.
MAT 7:15 Nagoꞌa vayaꞌmoꞌya “Anumaya Koti ke hu-haleta nehuna vaya mainone” huꞌya havigegeꞌyama hisaya vayafena kaꞌyeho. Yuna afu kana vaya mainagetama neꞌagayanagi amakusafinaga kaveꞌage afu kana vaya mainae.
MAT 7:16 Tamakaya amakaipima falote nehia kavala agetetama aepaꞌa hana augafa vaya mainae hutama havigahae. Ave nofite timaꞌa hanea alaga tagisifi? Aꞌao otagigahie. Avetanafa hanea uveꞌuve inomote hagaꞌage yosalaga motaga molagisio? Otagigahie.
MAT 7:17 Otagigahigi kanale yosamoꞌa kanale yosalaga neꞌayegi havi yosamoꞌa havi yosalaga neꞌaye.
MAT 7:18 Kanale yosamoꞌa havi yosalaga noꞌayeanagino havi yosamoꞌa kanale yosalaga oꞌayegahie.
MAT 7:19 Mukiꞌa yosamoꞌya kanale yosalaga oꞌayesayana atagiꞌya atafi kae-talegahae.
MAT 7:20 Naꞌa hinagetama havigegeꞌyama huꞌya falote nehisaya vayapiti falote hisia kavala agetetama aepaꞌa “Hana augafa vaya mainae.” hutama havigahae.
MAT 7:21 Mukiꞌa veaꞌmoꞌya nagaifena “Anumayatimogae Anumayatimogae.” huꞌya hisaya veala Anumaya Kotiꞌma kava yagai-mainea kumatela ohaigahagi ikapinaga mainea Nenafana hau-mainesia kavaꞌma nehisaya veaꞌmoꞌya ani kumatela umaigahae.
MAT 7:22 Anumaya Kotiꞌa kaiyekema hu-matesea yupa kasagoꞌya veaꞌmoꞌya nagaifena mage huꞌya hugahae “Anumayatimogae Anumayatimogae tagaya kagai kagile Anumaya Koti kea hu-haleta nehunane. Kagai kagile Kefo Avamula neꞌanatita tokiya avame yana amave-nelunane.” huꞌya hugahae.
MAT 7:23 Hugahayanagi nagaya ani yupa mage huꞌna hugahue “Tamakaila otamaketafa hu-mainoane. Kefo yakeꞌya hugetama omai veaꞌnegi nagaitegatila mai-haletama viho huꞌna hugahue.” huno hu-maine.
MAT 7:24 Nagoꞌa veaꞌmoꞌya anima hu-mainoa kea haviꞌya ali hipoꞌya huge huge huꞌya nago kanale agu agesaene kanomo avamete nehae. Ani kanomoꞌa noma kiana yafa agotofule ki-malene.
MAT 7:25 Ki-malenegenoꞌa koꞌma aino tima hogino tokiyaꞌage yasimoꞌa tusiya huno nona ali-lagape aigahe hianagi yafa agotofule ki-malenea yafe alino lagapea ai-oꞌatalene.
MAT 7:26 Alino lagapea ai-oꞌatalenegi nagoꞌa veaꞌmoꞌya nagai kema haviteꞌya ali hipoꞌya ohayana agesama omalea kanomo avamete nehae. Ani kanomoꞌa ti kahaepapi nomaꞌa ki-malene.
MAT 7:27 Ki-malenegeno koꞌma aino tima hogino tokiyaꞌage yasimoꞌa alino ani nona ali lagape aino mopafi atalegeno tusiya huno haviya hu-lavi-maine huno hu-maine.
MAT 7:28 Yisasiꞌa mani kea hu-haꞌno hutegeꞌya kahegi kema havilinaya anagaꞌmoꞌya nehaya augafa ke kana huno ohunegi tokiya yamaꞌa hanea kanomo ke kana hia yafe mukiꞌa veaꞌmoꞌya tusiꞌa amamaꞌyo ai-mainae.
MAT 8:1 Nagi Yisasiꞌa agoꞌyalegati tavigeꞌya kasagoꞌya veala akave umainae.
MAT 8:2 Akave neꞌvageno nagola fugitayamo augafa alino haꞌyagino atalako hu-mainea kanoa Yisasite eno ape huno mage huno havige “Anumayamoga kahaisigekahena nagaila alika hilato hu-natateꞌasine.” huno hu-maine.
MAT 8:3 Higeno Yisasiꞌa ayana haꞌyo huno augafale avate hu-lineno mage huno hie “Nagaya nahaigeꞌna kaugafamoꞌa menia kanale hino huꞌna nehue.” huno higeno anile aupaꞌa kaliꞌa haꞌno hu-tene.
MAT 8:4 Yisasiꞌa mage huno hapaiye “Ali hilato hu-ga-toa yafena nago kanoa haꞌopaika mono nopi kava kanomote* uka kalikaꞌama ali kanale hu-ga-toa kema mukiꞌa veaꞌmoꞌya havinuꞌyahena kagaya mono nopi kava kanomoꞌa kaugafa kamota huno kage-tesigeka kaugafama ali hilato hu-ga-toa yafena Moseseꞌma ‘Ma yama Anumaya Kotina amio.’ huno hu-mainea yana Anumaya Kotitega atalo.” huno tokiyaꞌage ke hapaiye.
MAT 8:5 Yisasiꞌa Kapaneamu uvaꞌyi higeno nagola Lomu ati vayate kava kanomoꞌa mage mo havige “Anumayamoga naya hisano? Aliꞌya kanoꞌnimoꞌa muki augafa avayu hu-lavigeno tusi agata aigeno nopi nemaiye.” huno hie.
MAT 8:7 Higeno Yisasiꞌa mage huno hie “Nagaya kaliꞌa mo aliꞌna kanale hu-tegahue.” huno hie.
MAT 8:8 Higeno Lomu ati vayate kava kanomoꞌa mage hie “Anumayamoga nagaya kanale ohunoa kanomoni nopi esanana okategahigi afaꞌa malegati aliꞌya kanoꞌnimo kaliꞌahena keꞌa hu-tesanageno kaliꞌa falu hu-tegahie.
MAT 8:9 Nagaya kava kano mainoe. Nagaiꞌma kava yagai-natenea kanoa anale nagaseno maigeꞌna nagaya aniꞌa huꞌna nagoꞌa ati vayatela kava huꞌna mainoe. Nago kanomofema ‘Vuoma.’ hugenoꞌa umaine. ‘Enoma.’ hugenoꞌa emaine. Aliꞌya kanoꞌnihe ‘Naꞌa huo.’ hugenoꞌa aniꞌa hu-maine.” huno hie.
MAT 8:10 Yisasiꞌa ani kea haviteno agesa kuꞌmoꞌa tusiya huteno akaveꞌma neꞌvaya veaꞌmogamifena mage huno hie “Tamage tamaha-nepauve ma kanomoꞌa tusiya huno nagaifena havino agupi maleno ametitia hu-maine. Ma kanomoꞌma hia ya huꞌya nagaifema haviꞌya amakupi maleꞌya ametiti hu-mainaya veala mukiꞌa Yuta veaꞌne mainaya kumatela oꞌagenoe.” huno hie.
MAT 8:11 Tamaha-nepauve mukiꞌa veaꞌmoꞌya yagemoꞌma tavi nefalelegatiꞌene evaꞌyi nehilegatiꞌene Anumaya Kotiꞌma kava yagai-mainea kumatela taginagomoꞌya Apalahamuꞌene Aisakiꞌene Yekopuꞌene siale mo maineꞌya kavela negahae.
MAT 8:12 Negahagi nagoꞌa Yuta veaꞌmogamina nayoma Anumaya Kotiꞌa “Kava yagaisua kumate maigahae.” huno hu-maineanagi agaifema haviꞌya amakupi omalaya yafe Anumaya Kotiꞌa amavaleno hani yapi amatalesigeꞌya anifi avi neꞌateꞌya amave kemoꞌa hugahae huno hie.
MAT 8:13 Yisasiꞌa Lomu ati vayate kava kanomofe mage huno hie “Nokalega eteka vuo. Aliꞌya kanokama ali falu hu-tesua kea havika kagupi maleka kametiti hana kea hu-ga-tegahue.” huno higeno ani kema hia kana kanoꞌale ani aliꞌya kanoꞌa kanale hu-tene.
MAT 8:14 Yisasiꞌa Pita nopinaga umaineno ageana Pitana aꞌamona itaꞌamo alekanoa tusiꞌa amukonako kali alino mainegeno moge-maine.
MAT 8:15 Mogeteno ayate avate nehigeno amuko-nako kaliꞌamoꞌa agola kanale hu-tetegeno ani aꞌmoꞌa hetino kavela kaeno amamine.
MAT 8:16 Ani unena mukiꞌa ani kumate veaꞌmoꞌya vayaꞌamima Kefo Avamuꞌmo amakusafima mainea veala amavaleꞌya Yisasite ageno Yisasiꞌa Kefo Avamuꞌmogamifena hu-mategeꞌya amataleꞌya vageno mukiꞌa kali veala alino kanale hu-matene.
MAT 8:17 Naꞌa hu-maineafe nayona Anumaya Koti aune kanomoꞌa, Aisaiyaꞌa hu-mainea kemoꞌa agola falote huno tamage hie. Mage huno hu-maineane “Agaya agaiꞌa kalima neꞌaluna yana ali-talene. Taugafamoꞌa fulu fuluma nehuno akavima nohia yaꞌene ago ali-talene.” huno hu-maineane.
MAT 8:18 Kasagoꞌya veaꞌmoꞌya Yisasite meye-kove hageno Yisasiꞌa agaiꞌaene tokaeꞌya nemaiya anagafe mage huno hie “Tikotumona atu faliga vigetao.” huno higeꞌya umainae.
MAT 8:19 Umainageno nagola kahegi kema havilinea kanomoꞌa Yisasite eno mage huno hie “Hu-mave-lina kanomoga mukiꞌa kumate visanana nagaya kakave ugahue.” huno hie.
MAT 8:20 Higeno Yisasiꞌa kenonaꞌa mage huno hapaiye “Kepu yagamoꞌya faesaya komuꞌamia mopafinaga hanegi namamogamina noꞌamia haneanagi ikapinagati emainoa kanoa vayaꞌmo natenea kanomoꞌna faesua noniꞌa omalene.” huno hie.
MAT 8:21 Nagola agai kema nehavia kanomoꞌa mage huno hie “Anumayanimogae nenafana falisigeꞌna aliꞌna he-vai-teteꞌna kakavela ugahue.” huno hie.
MAT 8:22 Higeno Yisasiꞌa mage huno kenonaꞌa hapaiye “Atalo nagai kea ohavinesaya veala amaku amamemoꞌa fali-mainaya veaꞌmoꞌya falia kanomona aliꞌya he-vai-tegahae amakaiꞌami yanagi kagaya nakave eno.” huno hu-maine.
MAT 8:23 Yisasiꞌa tipi kalefi haisaga hu-maigeꞌya agaiꞌene tokaeꞌya nemaiya anagaꞌmoꞌya agaiꞌene umainae.
MAT 8:24 Neꞌvageno aupaꞌa anileti ala yasimoꞌa neꞌaligeno timoꞌa ai-galato huno ani tipi kalefi haiyanagi Yisasiꞌa aufaeno maine.
MAT 8:25 Faeno mainegeꞌya agaiꞌene tokaeꞌya nemaiya anagaꞌmoꞌya agafa huꞌya mage huꞌya hae “Kava kanomogae kava kanomogae tagaya ti nakaita falisuna kava nehunagi Anumayamoga hetika taugafa ali-gatio.” huꞌya hae.
MAT 8:26 Hageno mage huno hama-vi-ge “Naꞌa higetama kolia nehae? Nagaifena havitama tamakupi maletama tamametitima nehaya yamoꞌa aupa nehio?” huno huteno hetino ani limofeꞌene yasimofeꞌene tokiyaꞌage ke huno “Taga huo.” huno higeꞌana alava hu-mainaꞌe.
MAT 8:27 Alava haꞌageꞌya mukiꞌamoꞌya amamaꞌyoma aiya yafena mage hae “Mani kanoa hana augafa kano mainegeno timoꞌene yasimoꞌene keꞌa haviteꞌya akave nemalae?” huꞌya hu-mainae.
MAT 8:28 Ala tikotuna takaeꞌya ame kaiyaga agegayamona Kelasasa* veaꞌne mainalega uvaꞌyi hae. Uvaꞌyi hageꞌana tole kanolana Kefo Avamuꞌyaga anakuꞌafi mainea kanolana matimatipinagati Yisasite emainaꞌe. Ani kanolatana tusi aifoꞌnafo nehaꞌa yafe veaꞌmoꞌya koli huꞌya ani katela noꞌvayane.
MAT 8:29 Oꞌvageꞌana ani kanolatana ala kefiti mage huꞌana haꞌe “Anumaya Kotina neꞌamogae naꞌa hu-laꞌategahe neꞌane? Taꞌagata aisia kanamoꞌa falote ohunegi taꞌagata aisia kava hu-laꞌategahe neꞌano?”
MAT 8:30 Haꞌageꞌya kasagoꞌya afuyagamoꞌya aluꞌale maineꞌya kavela nenae.
MAT 8:31 Nenageꞌya Kefo Avamuꞌmoꞌya Yisasife mage huꞌya hu-mainae “Anakusafinagatiꞌma hu-latesanana ani afuyagamo amakuꞌafi hu-lategeta vamano.” huꞌya havigae.
MAT 8:32 Havigageno Yisasiꞌa “Anifi viho.” huno higeꞌya ani Kefo Avamuꞌmoꞌya ani kanolatamogani anakuꞌafitila hati-laviꞌya afuyagamogami amakupi hai-falageꞌya ani afuyagamoꞌya amaiya-yeꞌya nagola aulufi kapi taviteꞌya tipi asaga hu-laviꞌya ti nakaiꞌya fali haꞌno hu-mainae.
MAT 8:33 Fali haꞌno hageꞌya ani afuyagale kava vayaꞌmoꞌya ageteꞌya faleꞌya ala kumate mainaya veaꞌmogamife “Kefo Avamuꞌmoꞌya anakuꞌafi mainea kanolatamoganina na kava na kava hu-nateno higeta neꞌone.” huꞌya hama-pai-mainae.
MAT 8:34 Hageꞌya ani ala kumateꞌma mainaya veaꞌmoꞌya ani ya agegahe eꞌya Yisasina megeteꞌya “Tagai kumala neꞌataleka alu kumate vuo.” huꞌya hu-mainae.
MAT 9:1 Yisasiꞌa tipi kalefi haisaga hu-maino tikotumona takaeno agaiꞌa kumatega eteno umaine.
MAT 9:2 Umainegeꞌya nagoꞌa vayaꞌmoꞌya nago kanomona aiya aya fali-mainea kanoa hagifanale faeno mainegeꞌya avaleꞌya Yisasite emainae. Ageno Yisasiꞌa ageteno mage huno agesafinaga havimaine “Ma vayaꞌmoꞌya nagaife haviꞌya amakupi maleꞌya amametiti nehae.” huno agesa haviteno ani kali kanohe mage huno hapaiye “Nafaꞌneꞌnimoga kaha-nepauve menia kolia ohuo nagaya ago aige-ka-teꞌna kefo yakaꞌa atale-nega-toe.” huno hapaiye.
MAT 9:3 Higeꞌya kahegi kema havi-linaya anagaꞌmoꞌya amakaiꞌami amakuꞌafiti mage huꞌya hae “Ma kanomoꞌa Anumaya Kotife hu-haviya hu-neꞌate.” huꞌya hae.
MAT 9:4 Hageno Yisasiꞌa amakupinaga haviya kea haviteno mage huno hie “Naꞌa higetama tamakaya tamakesafinaga havi kea nehae?
MAT 9:5 Nagayama huteꞌna hisua kea hana kemo kanaꞌagela hu-maine? ‘Aige-ka-teꞌna kefo yakaꞌa atale-neka-toe.’ huꞌna hisua kemoꞌo? Ifi kali kanomofe ‘He-ti-ka ka vuo.’ huꞌna hisua kemoꞌe?
MAT 9:6 Nagaya ikapinagati emainoa kanoa vayaꞌmo natenea kanomoꞌna ma mopale maineꞌna aige-tama-teꞌna kefo yatamia atale-lama-tesua tokiyaꞌnia hane hutama havisaya yafe nago kavala huꞌna tamave-ligahue.” huno kalima neꞌalia kanomofena mage huno hie “Hetika hagifanaka neꞌalika nokalega vuo.” huno hu-maine.
MAT 9:7 Higeno hetino nomaꞌalega umaine.
MAT 9:8 Naꞌa higeꞌya mukiꞌa alitalu hu-mainaya veaꞌmoꞌya ageteꞌya tusi amamaꞌyo aiteꞌya Anumaya Kotiꞌma tokiya yaꞌama vayaꞌmogamima amamia yafena Anumaya Koti agia alisaga hu-mainae.
MAT 9:9 Anile neꞌamataleno vilegati nago kanomo agia Matiuꞌe musufaya huno vaya amaugafaleti takisi mone ali-liteno nehia kanoa opisi nomaꞌale mopale mainegeno Yisasiꞌa ani kanoa mogeteno mage huno hie “Kagaya nakave eno.” huno higeno Matiuꞌa hetino Yisasina akave umaine.
MAT 9:10 Vigeno Yisasiꞌa Matiu nopi umaineno kave negahe musufayama huꞌya amaugafaleti takisi mone neꞌaliya vayaꞌene nagoꞌa kefo yama nehaya vayaꞌene ani nopi Yisasiꞌene agaiꞌenema tokaeꞌya nemaiya anagaꞌaene tokaeꞌya maineꞌya ne-mainae.
MAT 9:11 Nenageꞌya Falasia vayaꞌmoꞌya Yisasiꞌenema tokaeꞌya nemaiya anagafe mage huꞌya hae “Naꞌa higeno tamakaiꞌma hu-lamave-nelia kanomoꞌa amaugafaleti takisi monema neꞌaliya vayaꞌene kefo yama nehaya vayaꞌenena kavela nene?” huꞌya hama-vigae.
MAT 9:12 Hageno Yisasiꞌa ani kea ago haviteno mage huno hama-paiye “Kalima noꞌaliya veaꞌmoꞌya tota kanomotega oꞌugahagi kali veaꞌmoꞌyage tota kanomotega ugahae.
MAT 9:13 Nagaya aniꞌa huꞌna ‘Fatago veaꞌne mainone.’ huꞌya nehisaya veaꞌnehe ke hugahe nagaya omenogi kefo yama nehaya veaꞌnehe ke hugahe emainoe. Anumaya Kotiꞌa agaiꞌa hu-mainea kea mage huno hu-maineane Afu heꞌya kolamaꞌa takiꞌya naminaya yafena onahaunegi kalagi ai-ma-taya yafekeꞌya nenahaiye huno hu-maineane. Hu-maineanagitama tamakaya ani kemo aepaꞌa mo havilama hutetama ani kavala hiho.” huno hu-maine.
MAT 9:14 Yoni anagaꞌmoꞌya Yisasite mage huꞌya me havigae “Tagaya Yoni anagaꞌmogataene Falasia vayaꞌene nagoꞌa kavela mo-nesunanagi naꞌa higeꞌya kagaiꞌenema tokaeꞌya nemaiya anagaꞌmoꞌya mukiꞌa kavela nenae?” huꞌya havigae.
MAT 9:15 Hageno Yisasiꞌa mage huno hie “Nago kanoa aꞌama faiꞌya esagenoꞌa avaya hesia imu kisia yupa vayaꞌamoꞌyaene mainesigeꞌya ani vayaꞌmoꞌya hamauna hu-tesao? Aꞌao hamauna hu-oꞌategahayanagiꞌya haenagaꞌa nago kanama falote hisigeꞌya kame vayaꞌmoꞌya aꞌma alisia kanoa atafa huꞌya amakaipiti avale-talesageꞌya ani kanale vayaꞌamoꞌya hamau hu-teteꞌya mosigahae.
MAT 9:16 Nago kanomoꞌa haegafa kena alino atafa kenalela maleno ohatigahie. Maleno hatisiana haegafa kena atalaga huno ali haviya hugahie.
MAT 9:17 Nagi nago kanomoꞌa haegafa nofi alagamo timaꞌa* atafa mememo augafa ti keꞌayopina takino oꞌvaigahie. Takino vaisiana timaꞌamoꞌa kaꞌnuka hesigeno ti kena falo huno taki-lavinageno ti kena ali haviya hugahie. Haegafa nofi alagamo timaꞌa hefino haegafa meme augafamo ti keꞌayopi takino vaino. Aniꞌa hisayana tiꞌene keꞌayoꞌene kanaleꞌya huno hanegahie.” huno hu-maine.
MAT 9:18 Yisasiꞌa ani kea nehigeno nagola soka kanomoꞌa Yisasi aiyafi aleꞌya meyeno Yisasina mage huno hapaiye “Munaꞌniꞌamoꞌa ago fali-mainegi kagaya kayana augafale me malesanageno fali-mainefitila eteno he-tisie.” huno hie.
MAT 9:19 Higeno Yisasiꞌa hetino anilega vigeꞌya agaiꞌenema tokaeꞌya nemaiya anagala akave umainae.
MAT 9:20 Neꞌvageno nago aꞌmoꞌa tuelufuꞌa (12) kafu aigu nopinaga mukiꞌa kanale nemaiya aꞌmoꞌa Yisasina akavelegati eno kenaꞌamo atupale mevate hie.
MAT 9:21 Avate neꞌalino agupi mage huno hie “Kenaꞌaleke avate alisugeno kaliꞌnimoꞌa haꞌno hu-nategahie.” huno avate neꞌalie.
MAT 9:22 Avate higeno Yisasiꞌa mai-yahae huno ani aꞌmona ageteno mage huno hapaiye “Ma aꞌmoga kolia ohuo nagaifema havika kagupi maleka kametitima hana yamo kagaila alino kanale hu-negate.” huno higeno aupaꞌa kaliꞌamoꞌa kanale hu-tene.
MAT 9:23 Kanale hu-tegeno Yisasiꞌa soka kanomo note uvaꞌyi huno hamau nehuꞌya kapufama haya veaꞌnene avima ataya veaꞌnene ali-talu huꞌya maineꞌya tusi ke-yesoma haya kea haviteno mage huno hie “Viho mani munala fali lavata ohunegi afaꞌa faeno maine.” huno hama-paiye. Higeꞌya ani munaꞌma faligeꞌya age-mainaya yafenagiꞌya kigi hu-tenae.
MAT 9:25 Hu-teteꞌya kumatega umainageno Yisasiꞌa nopinaga haino ani munaꞌmo ayate atafa nehigeno aupaꞌa hetie.
MAT 9:26 He-ti-teanagi Yisasiꞌma hia yamo avagemoꞌa ute ete higeꞌya mukiꞌa ani kotega veaꞌmoꞌya havi-mainae.
MAT 9:27 Yisasiꞌa ani kumala ataleno neꞌvigeꞌana tole kanolana anaulaga asu hu-mainea kanolana akave neꞌuꞌana ala kefiti mage haꞌe “Kagaya Tevitina aginagomogae taꞌagaila kahau hu-laꞌato.” huꞌana haꞌe.
MAT 9:28 Nehaꞌageno Yisasiꞌa nopinaga hai-falegeꞌana anaulaga asu hu-mainea kanolana agaite aꞌageno Yisasiꞌa ani kanolafena mage huno hana-vige “Nagaya tanaulaga aliꞌna hale-lanatesua tokiyaꞌnia hanea yafena tanakupina malenaꞌao?” huno higeꞌana “E, Anumayamogae kagaya aniꞌa hu-laꞌatateꞌasine.” huꞌana haꞌe.
MAT 9:29 Nage haꞌageno Yisasiꞌa anaulagale aya maleno mage hie “Tanakaya nagaife havitana tanakupi malaꞌa yafe hu-lana-tegahue.” huno hie.
MAT 9:30 Higeꞌana ani kanolamogani anaulagamoꞌa ai-gali hu-maine. Higeno Yisasiꞌa anakaifena tokiyaꞌage ke huno kahegi ki-nateno mage huno hie “Mani yama hu-lana-toa yafena nagoꞌa veala hamaꞌopaiꞌo.” huno hie.
MAT 9:31 Hianagi ani kanolamogania uꞌana mukiꞌa ani kotega veaꞌmogamina Yisasiꞌma hu-na-tea avagea hu-liteꞌana hu-mainaꞌe.
MAT 9:32 Ani tole kanolana utaꞌageno nago kanomona Kefo Avamuꞌmoꞌa* aguꞌafi maineno avefuꞌna alino ai-yahae higeno agea noꞌaiya kanoa Yisasite avaleꞌya ae.
MAT 9:33 Ageno Yisasiꞌa agema noꞌaiya kanomo aguꞌafiti Kefo Avamula anati-talegeno agea aino kea kea higeꞌya alitalu hu-mainaya veaꞌmoꞌya ageteꞌya tusiꞌa amamaꞌyo neꞌaiꞌya mage hae “Mani augafa kavala nayona Isaleli kotega oꞌagenaya kavale.” huꞌya hu-mainae.
MAT 9:34 Hayanagi Falasia vayaꞌmoꞌya mage huꞌya hae “Pielesepuliꞌa Kefo Avamuꞌyagale kava hu-mainea kanomoꞌa tokiya amigeno Kefo Avamuꞌmona anati-neꞌatale.” huꞌya hu-mainae.
MAT 9:35 Yisasiꞌa ala kumateꞌene nagoꞌa ala kumaꞌyagaleꞌene osi kumaꞌyagaleꞌene neꞌuno mono nopi huge amave-lige huno Anumaya Koti kava yagai-ma-tesia kanale mono kea hama-nepaino mukiꞌa kalia alino kanale hu-ma-tene.
MAT 9:36 Hu-neꞌama-teno kasagoꞌya melitalu hu-mainaya veala amaketeno hau hu-ma-tene. Ani veaꞌmoꞌya kana yapi mainageno amakesa kuꞌmoꞌa tusiya higeꞌya sipi sipi kana huꞌya mainayanagi kava yagaisaya vayala omainaya yafe Yisasiꞌa kalagi ai-matene.
MAT 9:37 Kalagi ai-mateteno Yisasiꞌa agaiꞌenema tokaeꞌya nemaiya anagafe mage huno hama-paiye “Nagai kema havisaya veala kasagoꞌya kaveꞌmoꞌma hoyafima afule-mai-lemai hia kava hu-maineanagi hoyafima aliꞌya alisaya veala osi kanoꞌa mainayafe ani hoyamona Nefafena havigegeno nagoꞌa aliꞌya veala hu-matesie.” huno hu-maine.
MAT 10:1 Yisasiꞌa agaiꞌa tuelufuꞌa (12) anagaꞌamogamife ke higeꞌya ageno tokiyaꞌa amamine. Mukiꞌa Kefo Avamuꞌma veaꞌmogami amakusafiti anati-talesaya tokiyaene mukiꞌa kalima aliꞌya kanale hu-matesaya tokiyaene amamine.
MAT 10:2 Agaiꞌa tuelufuꞌa (12) anagaꞌamogami amakia hagote kanomo agia Saimoniꞌe nago agia Pitaꞌe aganaꞌamoꞌa Etaluꞌe Yemesigani Yonigania Sepeti nafaꞌnelataꞌene Filipiꞌene Patolomayuꞌene Tomasiꞌene amaugafaleti takesi mone neꞌalia kanoa Matiuꞌene Yemesiꞌa, Alafiusi nafaꞌne. Tatiusiꞌene Saimoni Selotiꞌene Yutasi Isakaliotiꞌa haenaga Yisasina agesi huno kame ya hu-tesia kanoe.
MAT 10:5 Yisasiꞌa ani tuelufuꞌa (12) anagaꞌa hu-neꞌamateno mage huno hama-paiye tamakaya Yuta vea omainaya veaꞌmogamitela oꞌviho. Samelia veaꞌmogami kumaꞌyagaleꞌene oꞌviho.
MAT 10:6 Oꞌugahagi tamakaya vaꞌyagi mainaya sipi sipi afuyaga kana hu-mainaya Yuta veate viho.
MAT 10:7 Neꞌutama mani ke hu-haletama hama-paiho “Anumaya Kotiꞌa kava yagai-lama-tesia kanamoꞌa ago aupaꞌa falote hugahie.” hutama hiho.
MAT 10:8 Nehutama kali veaꞌnea ali kanale hu-matetama fali-mainesaya veala ali heꞌnelitama fugitaya amake-mainesia veala ali kanale hu-neꞌama-tetama Kefo Avamula veaꞌmogami amakusafinagatila amanati-taleho. Nagaya kanale yana afaꞌa nelamamuanagi anonaꞌa oꞌalinoane. Aniꞌa hutama anonaꞌa monea oꞌalitama afaꞌa amaya hiho.
MAT 10:9 Tamakaya tamia alaga monene haesa monene kutamifina ai-oꞌaliho afaꞌa viho.
MAT 10:10 Tamakaya kama visalega kutamia oꞌalitama oꞌviho. Tole kena oꞌaliho. Tamaiya noꞌene ayopatamiene alitama oꞌviho. Nagai aliꞌyama alisaya yateti veaꞌmoꞌya anonaꞌa kaveꞌma tamamisayana tama-tegahie.
MAT 10:11 Tamakaya nago ala kumatelo osi kumatelo uvaꞌyi hisagenoꞌma nago kanomoꞌma kanale yama hu-lama-teno fatago kavaꞌma hisia kanoene maiho. Fae-litetama ohutama ataletama visaya yupa ani nopinagati viho.
MAT 10:12 Tamakaya nago nopima hai-falenutamahena hagotetama mage hutama hiho “Ma nopi mainaya veaꞌmogatama Anumaya Kotiꞌa yuna hesaya tamaku tamakesa tamamisie.” hutama hu falu fala hu-mateho.
MAT 10:13 Hu-matesageꞌya ani nopi mainesaya veaꞌmoꞌya fatago kavaꞌma nehisaya veaꞌma mainesagenoꞌa Anumaya Kotiꞌa yuna hesaya amakesa amamigahianagi aniꞌa augafa veaꞌnema omainesayana anima yuna hesaya yana oꞌaligahae.
MAT 10:14 Nagoꞌa veaꞌmoꞌya tamavaleꞌya noꞌamifima otama-teꞌya ketamima ohavisagetamahena ani kumala neꞌataletama “Havi kava hae.” hutama tamaiyafima hanesia kugukege yana ai-fopo hu-neꞌataletama alu kumate viho.
MAT 10:15 Tamage-lafa huꞌna tamaha-nepauve Anumaya Kotiꞌa kaiyekema hu-matesia kanafina Sotomu mainaya veaꞌmoyaene Komola mainaya veaꞌmoyaene amaugafa amagata aigahianagi tamakaiꞌma falu fala hu-otama-tesaya kumate veaꞌmoꞌya anima kaiyeke hu-ma-tesia yupa tusiya huno amagata aigahie.
MAT 10:16 Haviho nagaya tamakaila hu-lama-togetama sipi sipi kana hutama afai kala kana kaveꞌage veaꞌne mainesaya amuꞌnopi hu-lama-tesugetama visageꞌya hu-haviya hu-lama-tesagetama osifaꞌvemo kalope lavino neꞌvia avamete hutama tamakesaene vayalagi nama kana hutama kefo yana ohutama yuna hetama maiho.
MAT 10:17 Tamaugafa ali haviya hu-lama-tesaya vayafena kaꞌyeho. Vayaꞌmoꞌya tamavaleꞌya kanisole vayate kaiyeke mo hu-lama-teꞌya mono nopina kaꞌyona tamamigahae.
MAT 10:18 Tamakaya nagai kema akave malenaya yafe tamakaila Kamani kava vayateꞌene ala Sauve vayateꞌene kaiyekea hu-lama-tesaya yafe tamavaleꞌya amaufi tama-tesagetama nagai kanale mono kea hama-paisageꞌya nagoꞌa Yuta veaꞌne omainaya veaꞌnene havigahae.
MAT 10:19 Tama-valeꞌyama kaiyekema hu-lama-tesaya yate tama-tesagetama kolia ohutama “Kenonaꞌamia naꞌane hisune?” hutama tamakesa kuꞌmoꞌa ohiho. Ani yupa kanoꞌa Anumaya Kotiꞌa “Mage hiho.” huno tamaha-painagetama hugahae.
MAT 10:20 Tamakaitamigeꞌya ani kea ohugahagi Nelamafa Avamuꞌmoꞌa ani kea tamakaila tamavayafiti hugahie.
MAT 10:21 Ani kanafina veaꞌmoꞌya amakaiꞌami nepuꞌamimona kame vayaꞌamimote amavaleꞌya visageꞌya “Hamaegeꞌya faliho.” huꞌya hugahae. Nefaꞌa nafaꞌneyagaꞌa ani kava hu-ma-tegahae. Nafaꞌneyagamoꞌya itaꞌafoꞌamimogamina ali-yahae huꞌya kamea hu-ma-teteꞌya “Hamaetama faliho.” huꞌya hugahae.
MAT 10:22 Nagima neꞌayaya yafe mukiꞌa veaꞌmoꞌya amaipa kafa he-lama-tegahagi nagoꞌa veaꞌmoꞌya nagai kema meni kanaleti aepa heꞌya atafa huꞌya tokiya hume hume neꞌvisageꞌna nagaya eteꞌnama esua kanafina nagai kema atafa hu-linaya veaꞌmogamina Anumaya Kotiꞌa amaku amamena ali-gatigahie.
MAT 10:23 Veaꞌmoꞌya havi kavaꞌma hu-lama-tesagetama ani kumala neꞌataletama nago kumate viho. Tamage-lafa huꞌna tamaha-nepauve mukiꞌa Isaleli kumatela oꞌunesageno ikapinagati emainoa kanoa vayaꞌmo natenea nafaꞌnemoꞌna egahue.
MAT 10:24 Nago sugulufi mainesia nafaꞌnemoꞌa hu-ve-nelia kanoꞌamona oꞌagasenea yanagino aniꞌa huno nago aliꞌya kanomoꞌa kava kanoꞌamona oꞌagasene.
MAT 10:25 Sugulufi mainesia nafaꞌnemoꞌa hu-ve-nelia kano kana huno maisiana kanaleꞌya hugahie. Aniꞌa huno aliꞌya kanomoꞌa kava kanoꞌamoꞌene nago avamete huno maisiana kanale hugahie. Nagaifena mage huꞌya hu-mainae “Pielesepulia Kefo Avamuꞌyagale kava kanoꞌami maine.” huꞌya hu-haviya hu-nenateꞌya aliꞌya veaꞌnimogamina tusiya huꞌya kamuge hatageꞌya vai-lama-tegahae.
MAT 10:26 Ali haviya hu-lama-tegahayanagi amakaifena kolia ohiho. Aiso hu-mainea yamona Anumaya Kotiꞌa mukiꞌa alino fufute atalegahie. Falaki-mainesia yamona Anumaya Kotiꞌa mukiꞌa veaꞌmogami amaulagafi ali-falote hugahie.
MAT 10:27 Hanipinaga tamaha-pai-mainoa kea yagefi hama-paiho. Sumi sumi huꞌya tamaha-pai-mainaya kea kuma amuꞌnopiti ala kefiti keha keha hutama hiho.
MAT 10:28 Amega tamaugafaꞌage he-falisaya veafena kolia ohiho. Ani vayaꞌmoꞌya tamaku tamameꞌenema tamahae falisaya tokiyaꞌamia omalene. He-faliteno hanimo aguꞌafi ata tege-lege nehia yapi tamaku tamameꞌene tamaugafaene he-falisia tokiya hanea kanoa, Anumaya Kotifeke, tusiya hutama kolia hiho.
MAT 10:29 Tolea osi namalatana nagoke haesa moneleti miya nehayanagi nagoke ani nama kanoꞌa afaꞌa ofalinegi ikapinaga Nelamafaꞌa “Falisie.” huno ohinagenoꞌa ofaligahie.
MAT 10:30 Tamakaya mukiꞌa namayaga agasetama veaꞌnea ala yaga mainae. Anumaya Kotiꞌa mukiꞌa hanea tamayolagefa ago hapalino havilinea yafe kolima hisaya yana neꞌataletama afaꞌa maiho.
MAT 10:32 Yisasiꞌa mage huno hie “Nagoꞌa kanomoꞌa veaꞌmogami amaulagafi nagaifema ‘Yisasina naguꞌa amitafa hu-mainoe.’ huno hu-falote hisigeꞌnahena nagaya ikapinaga mainea Nenafa aulagafina agaifena ‘Nagai nafaꞌne maine.’ huꞌna hu-falote hugahue.
MAT 10:33 Hu-falote hugahuanagi nagoꞌa veaꞌmoꞌya veaꞌmogami amaulagafima nagaifena ‘Naguꞌa amitafa ohunoe.’ hunoꞌma hu-falote hisigeꞌna nagaya ikapinaga mainea Nenafa aulagafina ani kanohena ‘Oꞌagenoa kano maine.’ huꞌna hugahue.”
MAT 10:34 Tamakaya na tamakesa nehaviye? “Ma mopale taipa falu huta maisuna yana tamigahe Yisasiꞌa emaine.” hutama nehao? Aꞌao nagayama emainoafenagitama tamakaya tuma hisaya yatetila falu hutama omaigahae.
MAT 10:35 Omaigahagi nagaya emainoafe nago afamopina nafaꞌneꞌamoꞌa nefana kame hu-tesigeno munaꞌamoꞌa itaꞌamona kamea hu-tesigeno anofeloꞌamoꞌa anauꞌamona itaꞌamoꞌene apasesaꞌa yamoꞌa falote hugahie.
MAT 10:36 Nagoꞌa veaꞌmoꞌya nagai kea akave nemalayafe amakai afamola kame vayaꞌa maigahae.
MAT 10:37 Nagoꞌa veaꞌmoꞌya itaꞌafoꞌamimofema “Afa veaꞌne mainagi Yisasiꞌa tamakase-mainea kanogiꞌna nagula aminoe.” huꞌya ohisaya veaꞌmoꞌya nagai nafaꞌne maisaya avametela ohune. Nagoꞌa veaꞌmoꞌya nafaꞌneꞌamimofeꞌene munaꞌamimofeꞌene “Afa vea mainagi Yisasiꞌa tamakase-mainea kanogiꞌna naguꞌa aminoe.” huꞌya ohisaya veaꞌmoꞌya nagai nafaꞌne maisaya avametela ohunae.
MAT 10:38 Nagaila nagatama aisigeꞌna falisua yafema nagoꞌa veaꞌmoꞌya “Aniꞌa hugahune.” huꞌya amakaiꞌami yafaga yosa kofiꞌya nakave visaya amakesa ohavisaya veaꞌmoꞌya nagai nafaꞌne maisaya avametela ohunae.
MAT 10:39 Nagoꞌa veaꞌmoꞌya maiyaꞌamima atafa huꞌya ali-talakoma hu-lisayana maiyaꞌamimoꞌa falino afaya hapaegahigi nagoꞌa veaꞌmoꞌyama nagaifema hamainageꞌya maiyaꞌamima atalesaya veaꞌmoꞌya maiyaꞌamia ali-gatisugeꞌya agola maige maige hugahae.
MAT 10:40 Nagoꞌa veaꞌmoꞌya tamakaiꞌma tamavaleꞌya falu falama hu-lama-tesayana nagaila aniꞌa huꞌya navaleꞌya falu fala hu-nenatae. Nagaiꞌma navaleꞌyama falu fala hu-natesayana hu-na-tenea kanomona aniꞌa huꞌya falu fala hu-neꞌatae.
MAT 10:41 Nagoꞌa veaꞌmoꞌya nago kanomona ageteꞌya Anumaya Koti ke hu-haleno nehia kanoma mainesigeꞌya falu falama hu-tesayana ani veaꞌmogamina Anumaya Kotiꞌa hu-haleno nehisia vayaꞌmogami amamisia avamete amamigahie. Nagoꞌa veaꞌmoꞌya nago kanomona ageteꞌya fatago auꞌava yama nehisia kanoma mainesigenoꞌma falu fala hu-tesiana ani veaꞌmogamina Anumaya Kotiꞌa fatago kanomo alisia avamete amamigahie.
MAT 10:42 Nagoꞌa veaꞌmoꞌya nagola afa kanoa Yisasi kema nehavisia kanoma mainesigeꞌya yasi lima amisayana tamage huꞌna tamaha-nepauve ani veaꞌmoꞌya anonaꞌamia fanane ohugahianagiꞌya afaꞌa miyaꞌamia aligahae.
MAT 11:1 Yisasiꞌa tuelufuꞌa (12) agaiꞌaenema tokaeꞌya nemaiya anagaꞌmogamina huge ama-ve-lige huteno alu kumate kumate Anumaya Koti kea mo hama-paino hu-mave-li-maine.
MAT 11:2 Yoniꞌa ti fale neꞌamatea kanoa nofipi maineno Kalaisiꞌma hia kavafena haviteno nagoꞌa agaiꞌa anagala Yisasife havigegahe hu-ma-tegeꞌya mage huꞌya me hae “Kagaya egahiema hu-mainaya kano emainapi alu kanohe agava maisune?” huꞌya hae.
MAT 11:4 Hageno Yisasiꞌa mage huno hie “Tamakaya utama haviya yaꞌene agaya yaꞌene Yonina mo hapaiho.
MAT 11:5 Ma ya agone hutama hiho amaulaga asu hu-mainea veaꞌmoꞌya amaulaga neꞌagae. Amaiya haviya hu-mainea veaꞌmogami amaiyamoꞌa kanale hu-mate. Fugitaya amake-mainea veala kanale hu-mate. Amakesa tile-mainea veala eteꞌya nehaviye. Fali-mainaya veala hetiꞌya mainae. Afenoꞌami omalenea veala Anumaya Kotina kanale keꞌa nehaviye.
MAT 11:6 Nagai kehema tole amakesa ohavisaya veaꞌmoꞌya kanaleꞌya huꞌya maigahae.” huno hu-maine.
MAT 11:7 Yoniꞌma hu-ma-tegeꞌya aya veaꞌmoꞌya neꞌvageno Yisasiꞌa anile mainaya veaꞌmogamina Yonife mage huno hamavige “Tamakaya kaꞌme kotega na ya mogegahe neꞌvae? Nago kanoa yasimoꞌa hopa kana huno ali fagagi mainea kanomona agegahe neꞌvao?
MAT 11:8 Ifi na ya agegahe umainae? Kanale kena fai-linesia kano agegahe neꞌvao? Aꞌao kanale kena fai-linesaya vayala kaꞌme kotega omaigahagi sauve kanomo nopi maigahae.
MAT 11:9 Na ya agegahe neꞌvae? Anumaya Koti aune kano agegahe neꞌvao? Ifi tamage tamaha-nepauve mukiꞌa amaune vayaꞌmogamina amakase-mainea kanoa Yoni maine.
MAT 11:10 Yonife huꞌya nayona Anumaya Koti autaꞌmafina mage huꞌya kae-malenayane ‘Haviho nagaya Anumaya Kotiꞌna aliꞌya kanoꞌnimona hu-tesugeno uhagotegatenoꞌma visana kana valino ali-hilato huga-tegahie.’ huno kae-maleneane.
MAT 11:11 Tamage huꞌna tamaha-nepauve Yoniꞌa ti fale-neꞌamatea kanomoꞌa mukiꞌa ma mopale vayaꞌmogamina ago amakase-maineanagino nagoꞌa afa veaꞌmoꞌya Anumaya Kotife ‘Kava yagailato.’ huꞌya hu-mainesaya veala Yonina ago agase-mainae.
MAT 11:12 Yoniꞌa ti fale-neꞌamatea kanomoꞌa kea hama-pai-mainea kanaleti aepa heꞌya tokiyaꞌami hanea veaꞌmoꞌya Anumaya Kotiꞌma kava yagai-lama-tesia yafe tokiyaꞌage huꞌya ‘Ani yapi maigahune.’ huꞌya hu-mainayanagi nagoꞌa vayaꞌmoꞌya tusiya huꞌya ani yafena kame nehae.
MAT 11:13 Mukiꞌa kanafina Moseseꞌene Anumaya Koti amaune vayaꞌene kea hu-haleꞌya hu-mainayanagino Yoniꞌa evaꞌyi hu-maine.
MAT 11:14 Ani vayaꞌmoꞌya nagoꞌma esia kanomofena, Ilaiyaꞌe kanomofena ago tamaha-pai-mainayanagi ‘Yoniꞌa ani kano maineꞌ hutama havinutamahena havigahae.
MAT 11:15 Tamakesama hanesia veaꞌmogatama haviho.
MAT 11:16 Meni kanafima mainaya veaꞌmogatamahena hanaꞌa veaꞌne mainae huꞌna tamaha-paisue? Ma ma hisua augafa nafaꞌneyagamoꞌya mainaya avamete hutama mainae. Ani nafaꞌneyagamoꞌya veaꞌne alitalu huꞌya mainalega maineꞌya alu nafaꞌneyagahena ke huꞌya mage huꞌya hae.
MAT 11:17 ‘Yaveꞌya aikolunana tamakaya amoa noꞌayae. Tagaya tahau hisuna yagame nehunana tamakaya avia noꞌatae.’ huꞌya hu-mainae.
MAT 11:18 Yoniꞌa ti fale-ma-te kanomoꞌa kaveꞌene haviliꞌene mosino emainegeꞌya amakaya ‘Satani Avamula aguꞌafina maine.’ huꞌya hu-mainae.
MAT 11:19 Hayanagi ikapinagati emainoa kanoa vayaꞌmo natenea nafaꞌnemoꞌna tina kavela me nenogetama nagaifena ‘Kaveꞌene tiꞌene neno haꞌno hugeno omai kano maineno musufaya huꞌya amaugafaleti takisi neꞌaliya vayaꞌene kefo yama nehaya vayaꞌene vayaꞌamoꞌya mainae.’ huꞌya hu-mainae. Hayanagi Anumaya Kotina kanale agu agesama hanea yapiti kanale yana falote hu-maineafe vayaꞌmoꞌya ‘Fatago kava nehie.’ huꞌya hu-mainae.” huno hie.
MAT 11:20 Yisasiꞌa mani kea huteno aepa heno agayama tokiya avame yama higeꞌya age-mainaya kumaꞌyagaletiꞌene ani kumate veaꞌmoꞌya kefo yaꞌamia neꞌataleꞌya amakuꞌa ai-yahae huꞌya akave nohaya yafe Yisasiꞌa tokiyaꞌage ke huno mage hu-maine.
MAT 11:21 “Avoꞌneo Kolasini mainaya veaꞌmogatamaene Petesaita mainaya veaꞌmogatamaene tusiya huꞌna tamakaifena nahau nehue. Tamakai kumapina nagaya tokiyaꞌage avameꞌyana ago huanagi tamaipa ai-yahae ohayanagiꞌna ani tokiyaꞌage avame yama Taiyaene Saitoniene huleꞌasina ani kumate veaꞌmoꞌya kefo yaꞌamihena ago amaipa ai-yahae huꞌya kefo yama hu-mainaya yafena kayavo kena fai-liꞌya taꞌnefafi maileꞌasine.
MAT 11:22 Nagaya tamaha-nepauve Anumaya Kotiꞌa kaiyekema hu-ma-tesia kanafina Taiya mainaya veaꞌnene Saitoni mainaya veaꞌnene amaugafa amagata yana aligahayanagi tamakaya tusiya hutama nagoꞌene tamaugafa tamagata yana aligahae.
MAT 11:23 Tamakaya Kapaneamu mainaya veaꞌmogatama ‘Taugafa alita anale haigahune.’ hutama nehao? Aꞌao afete tavitama tamakaye nehinagetama maigahae. Tamakai kumapi hu-mainoa tokiyaꞌage avame yana Sotomu kumateꞌma huleꞌasina ani kumate veaꞌmoꞌya amakuꞌa ai-yahae hu-mainaleꞌasina atafina fanane ohaleꞌasine.
MAT 11:24 Tamaha-nepauve Anumaya Kotiꞌma kaiyeke hu-ma-tesia yupa Sotomu mainaya veala amaugafa amakata aigahianagi tamakaya amakasetama tusiya huno tamaugafa tamakata aigahie.” huno hu-maine.
MAT 11:25 Ani yupa Yisasiꞌa nunamuna mage huno hie “Nenafagae mukiꞌa ma mopafi yaꞌene ikapinaga yaꞌene kava yagai-mainana Anumayamoga kanale kava nehane. Nagoꞌa veaꞌmoꞌya ‘Havi haviꞌyati hanea vea mainone.’ huꞌya nehaya veaꞌmogamifena ohavisae huka fala-ki-malenane. ‘Ala avo nopi umainona vea mainone.’ huꞌya hisaya veaꞌmogamifena ohavisae huka fala-ki-malenanagi ‘Inamu nafaꞌne kana huta mainone.’ huꞌya nehaya veala ago amaveli-mainana yafena aluya huꞌna musekaꞌa nehue.
MAT 11:26 E, Nenafagae kagai kagu kagesamo hia kava huka ani kavala hu-mainane.” huno nunamuna hu-maine.
MAT 11:27 Veaꞌmogamifena mage huno hu-maine “Nenafaꞌa mukiꞌa lokiya ago namine. Mukiꞌa veaꞌmoꞌya nagaila neꞌamonina aepaꞌnia ohavinagi Nenafaꞌa agaiꞌage nagai aepaꞌa haviline. Havilinegi mukiꞌa veaꞌmoꞌya Nenafa aepaꞌa ohavinae. Aniꞌa huꞌna nagaiꞌnige neꞌamoꞌna Nenafa aepaꞌa havilineꞌna nahaisia veaꞌmogamina hu-mave-lisugeꞌya Nenafana aepaꞌa havigahae.
MAT 11:28 Tamakaya tusi aliꞌya neꞌalitama kana yama ali-mainaya veaꞌmogatama nagaitega egeꞌna mai-falu hisaya yana tamamino.
MAT 11:29 Nagai aliꞌya aligeta tokaeta vaiyamano. Nagaya kayone kano maineꞌna naugafa aliꞌna ohai kano mainoafe aepaꞌnia havisageꞌna tamakuꞌamoꞌma mai-falu hisia yana tamamigahue.
MAT 11:30 Tamakaya nagaiꞌene ai-lokaetama vaiyesayana kana ohugahianagitama yoꞌyo hutama vaiyegahae.”
MAT 12:1 Nago Sapati yupa Yisasiꞌene agaiꞌaene tokaeꞌya nemaiya anagaꞌaene nago atili hoya amuꞌnopi neꞌvageno anagaꞌamogamina amakategeꞌya ani atilia kaleteꞌya takiꞌya ne-mainae.
MAT 12:2 Nenageꞌya nagoꞌa Falasia vayaꞌmoꞌya amaketeꞌya Yisasifena mage huꞌya hae “Ago kagaiꞌenema tokaeꞌya nemaiya anagaꞌmoꞌya Sapati yupama katile-malenaya yana ali haviya nehae.” huꞌya hae.
MAT 12:3 Hageno Yisasiꞌa mage huno hie “Tamakaya Tevitina agava huꞌya umainaya vayaꞌene amaka-te-mainea yamo kea hapalitama ohavinao?
MAT 12:4 Amakategeno Tevitiꞌa Anumaya Koti nopi hai-faleno ‘Afa vayaꞌmoꞌya onesageꞌya mono nopi kava vayaꞌmoꞌya amakaiꞌamige negahae.’ huꞌya katile-malenaya maya Tevitiꞌa agaiꞌaene tokaeꞌya emainaya vayaꞌenena ne-mainae.
MAT 12:5 Tamakaya kahegi kema kae-malenaya avopima hanea kea hapalitama ohavinao? Mage huno hu-maine mono note kava vayaꞌmoꞌya mukiꞌa Sapati yupa aliꞌyaꞌamia neꞌaliꞌya Sapatimo kahegi kemona atagayayanagi Anumaya Kotiꞌa ‘Kefo ya haya vaya mainae.’ huno ohune.
MAT 12:6 Tamaha-pauve Anumaya Koti ala mono nomona agase-mainea kanoa nagaiꞌniꞌa ma mainoe.
MAT 12:7 Nayona Anumaya Koti autaꞌmafina mage huꞌya kae-malenayane. ‘Nagaya Anumaya Kotiꞌna sipi sipia hetama kolama takiꞌya nenamiya kavafena nonahaigeꞌna kalagi ai-ma-tesaya yafeke nenahaiye.’ huꞌya kae-malenayane. Kae-malenagi tamakaya ani kema havilamama hu-mainaleꞌasina kefo yama ohunaya vayafena ‘Kefo ya nehae.’ hutama ohaleꞌasine.
MAT 12:8 Ikapinagati emainoa kanoa vayaꞌmo natenea nafaꞌnemoꞌna Sapati yupa kava yagai-mainoe.” huno hu-maine.
MAT 12:9 Ani kumala neꞌataleno mono nopi haino maine.
MAT 12:10 Maineno ageana nago kanoa aya avayu hu-lavi-mainea kanoa anile maine. Mainegeꞌya nagoꞌa vayaꞌmoꞌya Yisasiꞌa havi kavaꞌma hisiafene huꞌya ati neꞌayeꞌya Yisasife mage huꞌya hae “Sapati yupa kali kanoa alino kanale hu-tesia yana kanale yano?” huꞌya Yisasina havinegeꞌya amata hu-mainae.
MAT 12:11 Yisasiꞌa mage huno hie “Nagola hana kanomoga afukama Sapati yupama komufi tavi-mainesigeka ago hevayu huka faitega ategano? E aniꞌa hugane.
MAT 12:12 Veaꞌmoꞌya afua agaseꞌya ala yaga mainaya yafenagiꞌya kahegi kemoꞌa ‘Sapati yupa kanale ya hu-ma-teho.’ huno hu-maine.”
MAT 12:13 Huteno ani ayama avayu hulavi-mainea kanomofe mage huno hapaiye “Kayana aipi huo.” huno higeno aipi hiana nago kaiyaga ayaꞌmoꞌma hia kava huno kanale hu-maine.
MAT 12:14 Kanale hianagi Falasia vayaꞌmoꞌya mono nopitila ataleteꞌya hati-laviꞌya melitalu huꞌya huge havige huteꞌya “Yisasina hanaꞌa huta haesunageno falisie?” huꞌya vege hu-mainae.
MAT 12:15 Yisasina haegahema huge havige haya kea ago haviteno ani kumala neꞌataleno vigeꞌya kasagoꞌya veaꞌmoꞌya akave vageno mukiꞌa kali veaꞌmogamina kaliꞌamia alino kanale hu-ma-tene.
MAT 12:16 Hu-ma-teteno mage huno hie “Nagai aepaꞌa veala hamaꞌopaiho.” huno hie.
MAT 12:17 Mani kema hia kemofena nayona Aisaiyaꞌa Anumaya Kotina aune kanomo hu-mainea kemoꞌa falote huno tamage hie. Mage huno hu-maineane.
MAT 12:18 Anumaya Kotiꞌa mage huno hie ageho mani kanoa nagai aliꞌya kano maisia yafe ago hapali-tenoe. Ani kanohena aluya huꞌna musena nehuꞌna nahau-mainea kanoe. Nagaya Avamuꞌnia amisugeno nagayama fatago huꞌna yagai-matesua kehena mukiꞌa Yuta vea omainaya veala hama-paigahie.
MAT 12:19 Agaya kea oꞌvaino ala kenake ohugahigi katega veaꞌmoꞌya nagola agea ohavigahae.
MAT 12:20 Nagoꞌma fagagi mainesia hopama alino kofa ohuno aniꞌa huno fulu fuluma hu-mainaya veaꞌmoꞌmogamina kaꞌyona oꞌamamigahie. Asu hugahema hisia kaꞌnila asu ohuno aniꞌa huno fulu fuluma hu-mainaya veaꞌmoꞌmogamina kaꞌyona oꞌamamigahianagino agaiꞌa fatago kavala huge huge hisiana ani fatago kavaꞌamoꞌa havi kavaꞌmona agaseno haigahie.
MAT 12:21 Haisiana muki mopale Yuta vea omainaya veaꞌmoꞌya agai agihe haviꞌya amakupi maleꞌya amametiti hugahae.
MAT 12:22 Nago kanomona Kefo Avamuꞌmoꞌa* aguꞌafi maineno aulaga alino asu huno avefuꞌna alino ai-yahae higeno agea noꞌaiyanagiꞌya Yisasite avaleꞌya ageno Yisasiꞌa ani Kefo Avamula anati-talegeno vigeno ani kanomoꞌa aulaga age-gali huno ageteno agea aino kea kea hie.
MAT 12:23 Ani kava higeꞌya alitalu hu-mainaya veaꞌmoꞌya ageteꞌya tusi amamaꞌyo ai-mainae. Amamaꞌyo aigeꞌya mage hae “Mani kanomoꞌa Tevitina aginagomo maineo? Anumaya Kotiꞌa taugafa ali-gatigahema hutea kano maineo?” huꞌya hae.
MAT 12:24 Hageꞌya Falasia vayaꞌmoꞌya haviteꞌya mage hae “Pielesepuliꞌa Kefo Avamuꞌyagale kava hu-mainea kanomoꞌa tokiyaꞌa amigeno Kefo Avamuꞌmona anati-neꞌatale.” huꞌya hae.
MAT 12:25 Hageno Yisasiꞌa amakupi haviya amaku amakesa ago haviteno mage hie “Mukiꞌa nagoke kotega veaꞌmoꞌya aye-fako huꞌya tuma hisayana ani kotega veaꞌnene haviya hu-lavigahae. Nago kumate afamopina aye-fako huꞌya ‘Alu vaya mainone.’ huꞌya tuma hisayana ani kumaꞌene afamoꞌene haviya hu-lavigahae.
MAT 12:26 Sataniꞌa agaiꞌa aliꞌya Avamuꞌyagamona anati-talesiana agaiꞌa nofi vayaꞌma aye-fako huꞌya ‘Alu vaya mainone.’ huꞌya hisayana Sataniꞌa kava yagaisia tokiyaꞌa hanaꞌa huno hanegahie?
MAT 12:27 Nagaifena ‘Kagaya Pielesepulimo tokiyaleti anati-neꞌatalane.’ hutama hayanagi tamakaitami anagatamimoꞌa Kefo Avamula anati-talageno Pielesepulimo amakaila amaya nehio? Ani anagatamia amakaiꞌami manima haya kea ali fako huꞌya tamave-neliye.
MAT 12:28 Tamage nagaya Anumaya Koti Avamuꞌmo tokiyaleti ani Kefo Avamuꞌyaga anati-neꞌataloafe Anumaya Kotiꞌa kava yagaisia kanamoꞌa tamakaitela ago emaine.
MAT 12:29 Nagola tokiyaꞌage kanomoꞌma nomaꞌafima nago kanomoꞌa musufa ya hugahe vinunoꞌa hagoteno ani tokiya kanomona nofiteti ki-teteno afenoꞌyamaꞌa musufa yana hugahie. Nagaya aniꞌa hu-mainoafe Satanina agaseꞌna nofiteti ki-teteꞌna agai Avamula ago anati-talenoe.
MAT 12:30 Nagoꞌa veaꞌmoꞌya nagai kanapa veaꞌne omaisayana kame vayaꞌniꞌa mainae. Sipi sipiꞌnima naya huꞌya ali-taluma ohisaya veaꞌmoꞌya amanati-neꞌatalae.”
MAT 12:31 Naꞌa hu-maineafe nagaya tamaha-nepauve mukiꞌa alu kefo ya alu kefo yaꞌene hu-haviya hu-neꞌataya yaꞌene Anumaya Kotiꞌa aigeꞌama-teno ani kefo yaꞌamia atale-ma-tegahianagi nagoꞌa veaꞌnemoꞌya Alu aotage Avamuꞌmofema hu-haviya hu-tesayana Anumaya Kotiꞌa aigeꞌma-teno ani kefo yaꞌamia atale-oꞌama-tegahie.
MAT 12:32 Nagoꞌa veaꞌmoꞌya ikapinagati emainoa kanoa vayaꞌmo natenea kanomonihema hu-haviya hu-natesayana Anumaya Kotiꞌa aigeꞌama-teno ani kefo yaꞌamia atale-ma-tegahianagi nagoꞌa veaꞌmoꞌya Alu Aotage Avamuꞌmofema hu-haviya hu-tesayana Anumaya Kotiꞌa aigeꞌamateno ani kefo yaꞌamia meni kanafiꞌene haenagama falote hisia kanafiꞌene agola atale-oꞌama-tegahie.
MAT 12:33 “Kanale yosama hanesigenoꞌa alagaꞌamoꞌenena kanaleꞌya hugahie. Havi yosama hanesigenoꞌa alagaꞌamoꞌenena haviya hugahie. Veaꞌmoꞌya yosalaga ageteꞌya kanale yosalaga hanesigeꞌyahena ‘Kanale yosa hane.’ huꞌya hugahae.
MAT 12:34 Tamakaya osifaꞌvemo nafaꞌneyagamogatama havi vayalagitama hanaꞌa hutama kanale kea hugahae? Veaꞌmoꞌya amaku amakesafinaga havateteno ai-vali-lavi-mainea kea amavayafiti hu-falote nehae.
MAT 12:35 Fatago huꞌya mainaya veaꞌmoꞌya kanale amaku amakesa havilineꞌya kanale kavala nehayanagi kefo yama nehaya veaꞌmoꞌya havi amaku amakesa havi-lineꞌya havi kavakeꞌya nehae.
MAT 12:36 Nagaya tamaha-nepauve Anumaya Kotiꞌa veala kaiyekema hu-ma-teno ali fako hisia yupa mukiꞌa veaꞌmoꞌya amakesa ohavi ke huꞌya hu-haviya hu-ma-tenesaya kehena Anumaya Kotiꞌa hama-vi-gegahie.
MAT 12:37 Hu-mainesana keleti Anumaya Kotiꞌa kagaifena ‘Havi kavala ohunane.’ huno hu-ga-tegahianagi hu-mainesana keleti ‘Kefo ya hu-mainane.’ huno hu-ga-tegahie.”
MAT 12:38 Nagoꞌa kahegi kema havilinaya anagaꞌene Falasia vayaꞌene Yisasife mage huꞌya hae “Huma-ve-nelina kanomogae tokiya avame yana tavelio.” huꞌya hae.
MAT 12:39 Hageno Yisasiꞌa mage huno hama-paiye “Ma kanafima mainaya veaꞌmoꞌya tusiya huꞌya havi veaꞌne mainae. Anumaya Kotina amakaveꞌno hu-tenaya veaꞌne mainae. ‘Tokiyaꞌage avame yana tavelio.’ hutama nehayanagi alu avame yana Anumaya Kotiꞌa otamamigahigi nagoke avame yake tama-ve-ligahie. Nayoma mainea Anumaya Koti aune kanoa Yonaꞌma hu-mainea avame yamaꞌage tama-ve-ligahue.
MAT 12:40 Yonana ala noyamemoꞌa asaga huno nakaigeno tagufa (3) kegeꞌene felugaene aipafinaga mainea kava huꞌna ikapinagati emainoa kanoa vayaꞌmo natenea kanomoꞌna he-vai-natesageꞌna tagufa (3) kegeꞌene felugaene mopafinaga maigahue.
MAT 12:41 Ninive kumate mainaya veaꞌmogamina Yonaꞌa Anumaya Koti kea hama-paigeꞌya kefo yaꞌamihena amaipa aiyahae hu-mainagi haviho menia Yonana agase-mainea kanoa ma mainegetama tamakaya kefo yatamihena tamaipa ai-yahae nohae. Tamaipa ai-yahae nohayafe Anumaya Kotiꞌa kaiyekema hu-lama-tesia kanamoꞌa nayoma Ninive kumate mainaya veaꞌmoꞌya hetiꞌya menia ma kanafima mainaya veaꞌmoꞌya kefo yama hu-mainaya yafena hu-falote hu-lama-tegahae.
MAT 12:42 Nagola alu haupalegati emainea sauve aꞌmoꞌa mopamona atupaleti eno Solomonina kanale agu agesaene kanomo kea me havigahe emaine. Emaineanagi haviho Solomonina agase-mainea kanoa ma mainegetama tamakaya agai kea nohaviye. Nohaviyafe Anumaya Kotiꞌa kaiyekema hu-lama-tesia yupa ani aꞌmoꞌa hetino menia ma kanafima mainetama kefo yama nehutama agai kema nohaviya yafena hu-falote hu-lama-tegahie.”
MAT 12:43 Nagola Kefo Avamuꞌmoꞌa vaya aguꞌafi haino maineleti ataleno viaꞌyamo hau hu-mainea kopinaga mo vaiyatete huno mai-faluma hisia kumafena ati yegeteana mai-falu hisia kumala oꞌagene.
MAT 12:44 Oꞌageno “Hagoteꞌna maigeꞌna emainoa agu nopi eteꞌna umaigahue.” huno huteno mogeana ani agu nopina vayala omaigeno ago sese huno kanale ya hu-malenegeno moge-maine.
MAT 12:45 Mogeteno eteno viaꞌyamo seveniꞌa (7) kefo yaꞌamimoꞌma agase-mainaya Kefo Avamuꞌyaga momavaleno egeꞌya ani agu nopi hai-faleꞌya mainageno hagoteno ani kanomoꞌa nagoke Kefo Avamuꞌmo agu nopina mainegeno haviya huno maineanagino menia kasagoꞌya Kefo Avamuꞌmo agu nopina haiꞌya maigeno tusiꞌa kefo yatafa huno maine. Ani kavala menima mainetama kefo yama nehaya veaꞌmogatama hu-lama-tegahie huno hu-maine.
MAT 12:46 Yisasiꞌa mani kea veaꞌmogamina hama-nepaigeꞌya itaꞌamoꞌene aganaꞌamoꞌyaene “Kea me hapaisune.” huꞌya kumatega emainae.
MAT 12:47 Emainageno nago kanomoꞌa Yisasife mage huno me hapaiye “Itakamoꞌene kaganakamoꞌyaene kea kaha-paigahe kumate me hetiꞌya mainae.” huno hie.
MAT 12:48 Higeno Yisasiꞌa mage huno hie “Itaꞌnimoꞌene naganaꞌnimoꞌyaenena taꞌya mainae?” huno havi-ge.
MAT 12:49 Havigeteno agaiꞌaenema tokaeꞌya nemaiya anagatega ayana hagaꞌyu huno mage huno hie “Ageho itaꞌnimoꞌya naganaꞌnimoꞌya ma mainae.
MAT 12:50 Ikapinagama mainea Nenafana haiya kava huꞌya avayama ali hipoꞌya nehaya veaꞌmoꞌya nagaila itaꞌnimoꞌya naganaꞌnimoꞌya nasaꞌnimoꞌya mainae.” huno hu-maine.
MAT 13:1 Ani yupa Yisasiꞌa nopinagati hati-lavino tikotumo agegayalega mopale umaine.
MAT 13:2 Mopale mainegeꞌya kasagoꞌya veaꞌmoꞌya agaitega melitalu huꞌya yageꞌyage haya yafe tipi kalefi hai-saga huno mainegeꞌya yageꞌyage haya veala ti agegayalega hetiꞌya mainae.
MAT 13:3 Heti-mainageno Yisasiꞌa alu ke alu kea avame kefiti mage huno hama-pai-maine. “Nago kanomoꞌa viti avina faigahe alino vie.
MAT 13:4 Viaꞌyamo ani avina alino ai-he-lafino nefaigeno nagoꞌa avinamoꞌa kapi tavino hanegeno namayagamoꞌya nageno haꞌno hie.
MAT 13:5 Nagoꞌa avinamoꞌa yafa mopafi taviteno osi mopa hanea yafe aupaꞌa hage-maine.
MAT 13:6 Hagetegeno yagemoꞌa hetino amuko-nako higeno hafuꞌya omalea yafe fayoteno asagali-maine.
MAT 13:7 Nagoꞌa avinayagamoꞌa avetaꞌnafa ino hanea amuꞌnopi tavino hageanagi avetaꞌnafa hanea inoꞌene tokaeno hageteno avetaꞌnafa inomoꞌa ayetegeno haviya hu-maine.
MAT 13:8 Nagoꞌa avinamoꞌa kanale mopafi tavino hageteno alagaꞌama ayeana nagoꞌa yosalela tetiꞌa (30) alaga ayegeno nagoꞌa yosalela sikisitiꞌa (60) alaga ayegeno nagoꞌa yosalela kasagoꞌya alaga vani hataletiꞌa (100) ayeno vasai-mai vasai-mai hu-maine.
MAT 13:9 Mani kea tamakesama hanesigetamahena havilama hutama haviho.” huno hie.
MAT 13:10 Agaiꞌaenema tokaeꞌya nemaiya anagaꞌmoꞌya mage huꞌya havigae “Naꞌa higeka avame kefitila veaꞌmogamina hama-nepaine?” huꞌya havigae.
MAT 13:11 Hageno Yisasiꞌa mage hie “Tamakaya Anumaya Kotiꞌa kava yagai-lama-teneanagitama falaki mainea kemona Anumaya Kotiꞌa tamaya higetama ago havi-linagi mukiꞌa veaꞌmoꞌya avame kema hama-paisugeꞌya amakesa havigahayanagi haviteꞌya havilama huꞌya ohavigahae.
MAT 13:12 Havilama huꞌya havilinaya veaꞌmogamina Anumaya Kotiꞌa nagoꞌene havisaya yana amamisigeꞌya havilama huꞌya havigahagi ‘Hai nehavune.’ huno hisaya veaꞌmogamina havilinayamaꞌa hamanafalegahie.” huno hie.
MAT 13:13 Ani veaꞌmoꞌya neꞌagayanagi agelama huꞌya oꞌagegahae. Amakesa havigahayanagi haviteꞌya havilama huꞌya ohavisayafe avame kefiti hama-nepauve.
MAT 13:14 Ani kavaꞌma nehaya yafena Aisaiyaꞌa Anumaya Koti aune kanomoꞌa hu-mainea kemoꞌa ago falote huno tamage hie. Mage huno hu-maineane “Tamakaila tamakesamoꞌa havime havime haigahianagi ani kemona aepaꞌa havilama hutama ohavigahae. Tamaulagamoꞌa ageme geme haigahianagi nago yana agelama hutama ohugahae.
MAT 13:15 Kemona aepaꞌa ohavisaya yafe amaku amakesa omale veaꞌne mainae. Amakesamoꞌa ani ke ohavisiafene huno amakesamoꞌa tile-maine. Amaulagamoꞌa ani yana oꞌagesayafene huno ago asu hu-maine. Havigu ani kea haviꞌya amakuꞌa ai-yahae huꞌya nagaitega esageꞌna ali hilato hu-lama-teyafene.” huno higeꞌya kae-malenayane.
MAT 13:16 Anumaya Kotiꞌa tamakaila tamaulaga kanaleꞌya hutama neꞌagaya yaꞌene tamakesama nehaviya yaꞌene tamaminea yafena tusiꞌa muse hutama maiho.
MAT 13:17 Tamage huꞌna tamaha-nepauve “Nayona mukiꞌa mainaya amaune vayaꞌene fatago kavaꞌma hu-mainaya vayaꞌene tamakayama neꞌagaya yana ‘Agesune.’ huꞌya hayanagi oꞌagenae. Nehaviya kea ‘Havisune.’ huꞌya hayanagi ohavinayane.” huno hama-pai-maine.
MAT 13:18 “Avina yama fai-malenea kanomo avame kemona aepaꞌa hu-falote huꞌna tamaha-paisue.
MAT 13:19 Kapima tavi-mainea avinamoꞌa maꞌa hu-maine nagoꞌa veaꞌmoꞌya Anumaya Koti kava yagai-latesia kea haviteꞌya havilama ohageno Sataniꞌa eno amakuꞌafiti anima fai-malenea kea ali-talene.
MAT 13:20 Yafa mopafima tavi-mainea avinamoꞌa maꞌa hu-maine nagoꞌa veaꞌmoꞌya Anumaya Koti kea haviꞌya muse huteꞌya aupaꞌa atafa hayanagi hafuꞌya mopafi otavia yamoꞌa alige atalege veaꞌne maineꞌya osi kana kanoꞌa osiꞌa haviꞌya amakupi maletageꞌya nagoꞌa veaꞌmoꞌya ani kea heꞌya fala-negiya yafe havi kanamoꞌma amakaite falote nehiana aupaꞌa Anumaya Koti kea neꞌatalae.
MAT 13:22 Avetaꞌnafa ino hanea amuꞌnopima tavi-mainea avinamoꞌa maꞌa hu-maine nagoꞌa veaꞌmoꞌya Anumaya Koti kea haviteꞌya ma mopafi mukiꞌa yaꞌyagaꞌamihena amakesa haviꞌya moneꞌamiene yokaloꞌamienefe kalagi aigeno ani yaꞌyagamoꞌa Anumaya Koti kea alino aiso hu-malegeꞌya atalageno alagamoꞌa aye he-lafino lama nohie.
MAT 13:23 Kanale mopafima tavi-mainea avinamoꞌa maꞌa hu-maine nagoꞌa veaꞌmoꞌya Anumaya Koti kea haviteꞌya havilama hageno anifiti alaga mukiꞌa aye he-nelafie. Nagoꞌa veaꞌmoꞌya nagoke avina yosalela kasagoꞌya vani hataletiꞌa (100) aye-maine. Nagoꞌa veaꞌmoꞌya nagoke avina yosalela sikisitiꞌa (60) alaga aye-maine. Nagoꞌa veaꞌmoꞌya nagoke avina yosalela tetiꞌa (30) alaga aye-maine.” huno hu-maine.
MAT 13:24 Yisasiꞌa nago avame kea mage huno hama-paiye. Anumaya Kotiꞌa kava yagai-lama-tesia yamoꞌa maꞌa hu-maine nago kanomoꞌa kanale avina yana hoyaꞌafina fai-malene.
MAT 13:25 Fai-malenegeꞌya veaꞌmoꞌya faeꞌya mainageno kame kanomoꞌa havi inoꞌmo alaga alino ani hoyafi ai-he-lafino umaine.
MAT 13:26 Utegeno haenaga ani viti alagamoꞌa neꞌayegeno havi ino talamoꞌa anifiti hageno nagopi hai-mainaꞌe.
MAT 13:27 Haigeꞌya aliꞌya vayaꞌmoꞌya hoyamona nefate mage huꞌya mo hae “Ala kanomogae kanale avinama hoyakaꞌafima fai-malananagi naꞌa higeno havi ino talamoꞌa anifitila falote nehie?” huꞌya havigae.
MAT 13:28 Havigageno hoyamona nefaꞌa mage huno hie “Nagola kame kanomo mani kavala me hu-malene.” huno higeꞌya aliꞌya vayaꞌmoꞌya mage huꞌya havigae “Tagaya kanale uta havi inona vakai-talesuno?” huꞌya havigae.
MAT 13:29 Havigageno ani hoyamona nefaꞌa mage hie “Aꞌao, mo vakai-talesayana havigu kanale avinaene vakai-taleyafenagi ataleho.
MAT 13:30 Atalegeꞌana nagopi tokaeꞌana haneꞌo. Kaveꞌma afule yupa hoya aliꞌya vayaꞌnia mage huꞌna hama-paigahue ‘Hagotetama ino talana hakaitama atafi kaesayafe haꞌya kitetama nemaletama anile kanale avinamo yosaꞌa alitalu hutama kave noniꞌafi maleho.’ huꞌna hugahue.” huno hu-maine.
MAT 13:31 Yisasiꞌa nagola avame kea hama-paino mage huno hie “Anumaya Koti kava yagai-lamatesia yamoꞌa maꞌa hu-maine nago kanomoꞌa masatati avina alino hoyafi fai-malene. Ani yosamo avina kanoꞌa oꞌagemo avina kanoꞌa haneanagino mukiꞌa alu alagayagamoꞌya ani alaga kanoꞌa agasageno osi hu-maine.
MAT 13:32 Nago kanomoꞌa ani avina kanoꞌa alino hoyafi fai-malegeno hageno ala huteno mukiꞌa hoyafima hanea yosayaga agaseno yosa haigeꞌya namayagamoꞌya me kale-maineꞌya ani yosamo akopale noꞌamia kigahae.” huno hu-maine.
MAT 13:33 Yisasiꞌa nago avame kea mage huno hama-paiye “Anumaya Kotiꞌa kava yagai-lama-tesia yamoꞌa kai-hamema hale-negia avamete hu-maine. Nago aꞌmoꞌa ani kai-hamema halegisia yana alino taliꞌa (3) ala yopafi taꞌnefa falauvaꞌene ali havigu higeno haenagaꞌa mukiꞌa taꞌnefa palauvamoꞌa halegi-maine.” huno hie.
MAT 13:34 Yisasiꞌa melitalu haya veaꞌmogamina mukiꞌa kema hama-paiya kea avame kegeꞌya hama-nepaino nagola kea hu-falote huno hamaꞌopaine.
MAT 13:35 Ani kavaꞌma hia yafena nagola Anumaya Koti aune kanomoꞌa hu-mainea kemoꞌa ago falote huno tamage hie. Ani kea mage huno hu-maineane “Nagaya avame kea hu-falote nehuꞌna nayoma ma mopama taloma hu-malenea kanaletiꞌma fala-ki-mainea kea menia hama-paigahue.” huno hu-maineane.
MAT 13:36 Yisasiꞌa anima melitalu hu-mainaya veala amataleno nopinaga vigeꞌya agaiꞌaenema tokaeꞌya nemaiya anagaꞌmoꞌya mage huꞌya me hae “Havi inomoꞌma hoyafima falote nehia avame kemona aepaꞌa hu-halegeta havimano.” huꞌya hae.
MAT 13:37 Hageno Yisasiꞌa kenonaꞌamia mage huno hie “Kanale avinama fai-malenea kanoa ikapinagati emainoa kanoa vayaꞌmo natenea kanoa nagaya mainoe.
MAT 13:38 Mukiꞌa ma mopa ani hoyae. Anumaya Kotife ‘Kava yagai-lato.’ huꞌya nehaya veala ani kanale avina mainae. Satani kema akave nemalaya veala havi ino mainae.
MAT 13:39 Kame kanoa havi inoma fai-malenea kanoa Sataniꞌe. Kaveꞌma afulesia yupa ma mopama haꞌno hisia kanae. Mani hoyafi aliꞌya vayala Anumaya Kotina ensole vayaꞌae.
MAT 13:40 Ani havi inoma alitalu huꞌya mukiꞌa atafi kae-talesaya yana ma mopama haꞌno hisia yupa aniꞌa hugahae.
MAT 13:41 Ikapinagati emainoa kanoa vayaꞌmo natena kanomonia ensole vayaꞌnia hu-ma-tesugeꞌya mukiꞌa veaꞌmoꞌya neꞌamafugamina ‘Kefo kava hiho.’ huꞌya ali haviyama hu-mainesaya veaꞌnene Anumaya Koti kema ali-tagae-mainesaya veaꞌnene Anumaya Kotiꞌa kava yagai-mainea yapitila amavaleꞌya hagaꞌyu hu-talegahae.
MAT 13:42 Ala atagefafi hagaꞌyu hu-ma-talegahae. Ani atamoꞌa teno neꞌamasagalisigeꞌya amakata yana neꞌaliꞌya avovo huꞌya avi neꞌateꞌya amave kemoꞌa hugahae.
MAT 13:43 Havi veaꞌnea atafina kaegahayanagi fatago amaku amakesaene veala Neꞌamafaꞌa kava yagai-mainea kumatela hai-faleꞌya maineꞌya yagemoꞌma aye halea kava hugahae. Agesama hanesia kanomoꞌa havilama huno havisie.”
MAT 13:44 Anumaya Kotiꞌa kava yagai-mainea yamoꞌa maꞌa hu-maine nagola mone keꞌayola hoyafi he-vai-malenaya avamete hu-maine. He-vai-malenegeno nago kanomoꞌa mopafiti moli-falote huteno eteno anifi he-vai-maleteno tusi muse huno aupaꞌa “Ma mopa miya hisugeno nagai ya hapaesie.” huno mukiꞌa afenoꞌyamaꞌa moli meli huno monea aliteno ani mopa miya hu-maine.
MAT 13:45 Anumaya Kotiꞌa kava yagai-mainea yamoꞌa maꞌa hu-maine. Nago kanomoꞌa kitana kana yafena atiyege yegeteno nagola miyamoꞌa hai-mainea kitana kana yana alino falote hu-maine. Higeno “Ala mone namio.” huno higeno mukiꞌa afenomaꞌa moli meli huno mukiꞌa yamaꞌa ataleteno monea alino ani kitana kana yana miya hu-malene.
MAT 13:47 Nago kene hugahue. Anumaya Kotiꞌa kava yagai-mainea yamoꞌa maꞌa hu-maine nagola noyame kukonagoma ti kotupima hagaꞌyu hu-talegenoꞌa alu noyamea alu noyamea hagagino fale-mainea avamete hu-maine.
MAT 13:48 Ani kukonagopina hiya higeꞌya ti agegayalega he-vayu huꞌya maleneꞌya kanale noyameyaga yopafi yogiꞌya nemaleꞌya havi noyameꞌa aliꞌya hagaꞌyu hu-neꞌatalae.
MAT 13:49 Ma mopama haꞌno hisia yupa ani kava hugahae. Ensole vayaꞌmoꞌya kefo yama hu-mainesaya veaꞌnene fatago kavaꞌma hu-mainesaya veaꞌnene amuꞌnopiti ali fako hugahae.
MAT 13:50 Huteꞌya ani kefo veala amavaleꞌya tusiꞌa ata nelesia atafi hagaꞌyu hu-talesageno atamoꞌa teno neꞌamasagalisigeꞌya amakata aisigeꞌya avovo huꞌya amave kemo nehuꞌya avitegahae.
MAT 13:51 Yisasiꞌa mage huno hama-vige “Tamakaya mani kemona aepaꞌa havilinafi ohavinae?” huno higeꞌya “E, havilinone.” huꞌya hae.
MAT 13:52 Hageno mage huno hama-paiye “Tamakaya mono kea havilinaya vayaꞌmogatama menia nagai kea nehaviya veaꞌne mainagi aniꞌa hutama nayoma Anumaya Koti kea hu-mainaya kene menima tamaha-nepauva kea Anumaya Kotiꞌa kava yagai-lama-tesia kenena havitetama ala afeno nomona nefaꞌa atafa kanale yaꞌene haegafa kanale yaꞌene nopiti alino neꞌamamia avamete hutama atafa kene yaufa kene hu-haletama hiho.”
MAT 13:53 Yisasiꞌa ani avame kea hu-haꞌno huteno ani kumala ataleno umaine.
MAT 13:54 Uteno ko aepaꞌalega Nasaleti uvaꞌyi huno mono nopi haino Anumaya Koti kea hama-paigeꞌya mukiꞌa veaꞌmoꞌya atali talu huteꞌya mage hae “Mani kea haviꞌyaꞌami hanea vayaꞌmogami avamete kea mukiꞌa hanateti alia ke nehie? Ayapitiꞌma tokiyaꞌa avame yama hu-mainea tokiyaꞌa hanateti ali-maine?
MAT 13:55 Mani kanoa noma negia kanomo nafaꞌneo? Malia nafaꞌneo? Yemesiꞌene Yosefeꞌene Saimoniꞌene Yutasiꞌenena aganaꞌamoꞌya mainao?
MAT 13:56 Mukiꞌa asaꞌamoꞌya tagaiꞌene nagopi mainagi agaya mukiꞌa tokiya yana hanateti ali-maine.” huꞌya hae.
MAT 13:57 Huteꞌya amaipa kafa heteꞌya amakaveꞌno hu-tageno Yisasiꞌa mage huno hie “Anumaya Koti kema nehisia kanomoꞌa mukiꞌa kumateꞌma mono kema hama-paisiana agia alisaga hugahayanagi agaiꞌa afamoꞌene no kumaꞌale veaꞌnenena agia alisaga ohugahae.” huno hu-maine.
MAT 13:58 Higeno agaife haviꞌya amakupi maleꞌya amametitima ohaya yafe ani kumatela kasagoꞌya tokiya avame yana ohune.
MAT 14:1 Ani kanafina Helotiꞌa sauve kanogino Yisasiꞌa mukiꞌama hu-mainea kavaꞌmona avageꞌa havimaine.
MAT 14:2 Haviteno Helotiꞌa agaiꞌa aliꞌya vayaꞌahe mage huno hie “Ma kanoa Yoniꞌe, tima fale-neꞌama-tea kanoa, fali-mainefitila ago heti-maineafe ayapitila tokiyaꞌage avame yana nehie.” huno hie.
MAT 14:3 Helotina aganaꞌamo agia Filipiꞌe. Filipi aꞌmo agia Helotiasiꞌe. Helotiꞌa Helotiasina kumai a ali-tenea yafe Yoniꞌa Helotife mage huno hie “Anumaya Koti kea ali-tagaeka ali-tenane.” huno hu-mainea yateti Helotiꞌa Yonina atafa huno tokiya nofiteti nofi kiteteno kina nopi hu-tene.
MAT 14:5 Nofi huteteno Helotiꞌa Yonifena “Haesugeno falisie.” huno hianagi mukiꞌa veaꞌmogamife koli hu-maine. Ani veaꞌmoꞌya Yonifena “Aune kano maine.” huꞌya haya yafe ohaene.
MAT 14:6 Ohaenegi nago yupa, Helotina atenea kanahe, huꞌya muse hu-taya yupa nagoꞌa veaꞌmoꞌya Helotiꞌene melitalu hu-mainageno Helotiasina munaꞌamoꞌa mukiꞌa veaꞌmogami amuꞌnopi amoa aye-maine. Neꞌayegeno anima ayea yafena Helotiꞌa tusiya huno musena hu-maine.
MAT 14:7 Nehuno ani munafena mage huno hie “Nagaya tamage Anumaya Koti aulagafi kaha-nepauve kahaisia yafena hisanageꞌna afaꞌa kamigahue.” huno hu-maine.
MAT 14:8 Higeno ani munaꞌmona itaꞌamoꞌa nagoꞌa agu agesa amiteno mage huno hie “Yoniꞌa ti fale-neꞌama-tea kanomo ageꞌya fakalika agenopaꞌa ai-fakalika yopafi maleteka me namio.” huno hie.
MAT 14:9 Higenoꞌa ala sauve kanomo aipamoꞌa tusiꞌa kanaꞌage higeno Anumaya Koti aulagafima huno lokiya vai-malea yafeꞌene mainaya vayaꞌamofeꞌene agesa haviteno aliꞌya vayaꞌahe mage hie “Ani munaꞌmo kea ali hipoꞌya hiho.” huno hu-maine.
MAT 14:10 Huteno aliꞌya vayaꞌa hu-mategeꞌya kina nopinaga Yonina ageꞌya mo fakali-talenae.
MAT 14:11 Fakaliteꞌya hatagama haya anumaꞌa yopafi maleteꞌya ani munala aliꞌya memigeno itaꞌamotega alino umaine.
MAT 14:12 Yoni anagaꞌmoꞌya augafaꞌa me hipoꞌya huꞌya mo he-vai-teteꞌya Yisasina mo hapai-mainae.
MAT 14:13 Hapaigeno Yisasiꞌa ani kea haviteno tipi kalefi haisaga hu-maino kaꞌme kotega umaine. Vigeꞌya mukiꞌa veaꞌmoꞌya ani kea haviteꞌya kumaꞌamileti mopafi akave uꞌya anile umainae.
MAT 14:14 Yisasiꞌa tipi kalefiti hati-lavino ti agegayalaga maineno ageana kasagoꞌya melitalu hu-mainaya veaꞌmogamina amaketeno kalagi ai-mateno kali neꞌaliya veala alino kanale hu-ma-tene.
MAT 14:15 Une kigeꞌya agaiꞌene tokaeꞌya nemaiya anagaꞌmoꞌya agaite mage huꞌya me hae “Tagaya vaya omai kaiyaga mainonanagino hani-kisia yafe mukiꞌa veaꞌmogamina hu-ma-tesanageꞌya kumaꞌma hanesilega ute ete huꞌya nesaya kavela miya hisae.” huꞌya hae.
MAT 14:16 Hageno Yisasiꞌa mage huno hama-paiye “Naꞌa hinageꞌya ugahae? Tamakaitami kavela amamiho.” huno hie.
MAT 14:17 Higeꞌya mage hae “Tagaipina osi kave kanoꞌa hane faefuꞌa (5) mayaene tole noyame kanoꞌagi huno hane.” huꞌya hae.
MAT 14:18 Hageno “Ani kavela alitama eho.” huno hu-maine.
MAT 14:19 Huteno Yisasiꞌa mage hie “Mukiꞌamogatama alitalu hute hute hutama apete mopale maiho.” huno higeꞌya mopale mainageno Yisasiꞌa faefuꞌa (5) mayaene tole noyamene alino ikapinaga age-saga huno Anumaya Kotitega huno muse huteno ani maya kolino agaiꞌaenema tokaeꞌya nemaiya anagaꞌa amamigeꞌya mukiꞌa veala amamite amamite hu-mainae.
MAT 14:20 Hageꞌya mukiꞌa nageno amamu higeꞌya atalaya atupa-tapaꞌa aliꞌya tuelufuꞌa (12) kula ai-hava-te-mainae.
MAT 14:21 Kaveꞌma naya vayaꞌyaga faefu tauseniꞌa (5,000) vemoꞌya ne-mainae. Ne-mainagi aꞌne nafaꞌneꞌamia ohapalinae. Ohavunamaꞌa aꞌne nafaꞌnene ne-mainae.
MAT 14:22 Netageno Yisasiꞌa agaiꞌaenema tokaeꞌya nemaiya anagaꞌmogamina mage huno hama-paiye “Tamakaya nagaila nataletama tipi kalefi haisaga hu-maitama atu kaiyaga hagotetama utegeꞌna nagaya veala hu-ma-tesugeꞌya viho.”
MAT 14:23 Hu-ma-tegeꞌya utageno agaiꞌage Anumayamotega havigegahe agoꞌyafi haino agaiꞌage mainegeno hani-ki-maine.
MAT 14:24 Hani-ki-geno tipi kalea ti amuꞌnopi utegeno yasimoꞌa aulegati eno ani lipi kalea molino mo ai-yahae me ai-yahae hu-maine.
MAT 14:25 Koti avametega Yisasiꞌa timo agupile aiya aiyeme aiyeme tipi kalema hanelega umaine.
MAT 14:26 Neꞌvigeꞌya ani anagaꞌmoꞌya Yisasiꞌa ti agupileꞌma aiya ayeme ayeme eaꞌyana ageteꞌya tusiꞌa amamaꞌyo aiteꞌya mage hae “Hakalo neꞌefi?” huꞌya “Avovo.” hae.
MAT 14:27 Avovo nehageno aupaꞌa Yisasiꞌa mage huno hie “Kolia ohutama maiho. Nagaya neꞌogi tokiyaꞌage hutama maiho.” huno hie.
MAT 14:28 Higeno Pitaꞌa kenonaꞌa mage huno hie “Anumayamogae kagayama mainenuka nagaifena ‘Timo agupile kaiya ayeme yeme eno.’ huka hugeꞌna vano.” huno hie.
MAT 14:29 Higeno Yisasiꞌa Pitafe mage hie “Kagaya elavika eno.” huno hapaigeno Pitaꞌa tipi kalefitila hati-lavino timo agupile aiya ayeme yeme Yisasitega ugahe hie.
MAT 14:30 Ugahe hianagi ala yasimoꞌma tokiyaꞌage huno eaꞌyate ageteno koli huno tipi hapaꞌnesia ya huteno mage hie “Anumayamogae naugafa ali-gatio.” huno hie.
MAT 14:31 Higeno aupaꞌa Yisasiꞌa ayana hagaꞌyu huno Pitana atafa huteno mage huno hie “Kagaya nagaifena havika osi kanoꞌa kagupina maleka kametitia hu-mainana kanomogae naꞌa higeka tole kagesa nehavine?” huno hu-maine.
MAT 14:32 Naꞌa huteꞌana tipi kalefi haisaga hu-maiꞌageno yasimoꞌa taga hu-maine.
MAT 14:33 Taga higeꞌya tipi kalefima mainaya vayaꞌmoꞌya Yisasife muse huꞌya agia alisaga huꞌya mage hae “Tamage kagaya Anumaya Koti nafaꞌne mainane.” huꞌya hu-mainae.
MAT 14:34 Ani ti kotuꞌmona takaeꞌya Kenesale kotega uvaꞌyi hu-mainae.
MAT 14:35 Vigeꞌya ani kumate veaꞌmoꞌya Yisasina age-lama huꞌya ageteꞌya alu kumate kumate ke huꞌya mage hae “Kali veala amavaletama eho.” huꞌya hageꞌya kali veala amavaleꞌya Yisasite emainae.
MAT 14:36 Kali neꞌaliya veaꞌmoꞌya emaineꞌya Yisasife mage huꞌya havigae “Kenakamo atupalekeꞌya avate hisune.” huꞌya nehuꞌya avate hu-mainaya veaꞌmogamina kalimoꞌa kanale hu-ma-tene.
MAT 15:1 Ani yupa nagoꞌa Falasia vayaꞌene kahegi kema havilinaya anagaꞌene Yelusalemuti Yisasite eꞌya mage huꞌya hae “Naꞌa higeꞌya kagaiꞌenema tokaeꞌya nemaiya anagaꞌmoꞌya taginagomogami kea ali-tagaeꞌya kaveꞌma negahena amayana sese nohae?*” huꞌya havigae.
MAT 15:3 Hageno Yisasiꞌa kenonaꞌamia mage hie Naꞌa higetama tamakinagomogami auꞌavala akaveꞌma malaya yafe Anumaya Koti kahegi kea ago neꞌatagayae?
MAT 15:4 Anumaya Kotiꞌa agaiꞌa autaꞌmafina mage huno hu-maineane. “Tamakaya itatami afotamimogami amakia alisaga nehutama keꞌamia veganokano ohutama amaiyaꞌafinaga maiho. Nago kanomoga itakafokamona kamugema vaitenukahena faligane.” huno hu-maineane.
MAT 15:5 Hu-maineanagi tamakaya mage hutama nehae “Nago kanomoꞌa itaꞌafoꞌamogani anaya hisia monema hanesigenoꞌma itaꞌafoꞌamoganima anaya ohinunoꞌa mage huno hisie ‘Ani monea Anumaya Kotina amisua yane huꞌna hu-mainoe.’ huno hinunoꞌa nefana aya huno agia alisaga ohisie.” hutama nehae. Ani ke nehutama tamakinagomogami auꞌavala akaveꞌma malaya yafe “Anumaya Koti kea afa ya kana nehie.” nehutama alitama neꞌatagayae.
MAT 15:7 Tamakaya vagala vaya mainae. Aisaiyaꞌa Anumaya Koti aune kanomoꞌa tamakaifena tamage huno Anumaya Koti autaꞌmafina mage huno hu-maineane “Ani nofi veaꞌmoꞌya amavayaleti nagai nagia alisaga nehagi amakuꞌamoꞌa aluꞌale hanegeꞌya ani kavala nehae.
MAT 15:9 Ma mopafi veaꞌmoꞌya malenaya kahegi kehena ‘Mamona Anumaya Koti ke hanegi akave maleho.’ huꞌya nehayanagi nagai nagia alisaga nehayanagi afa kava maiꞌya nehae.” huno kae-maleneane.
MAT 15:10 Yisasiꞌa agaite esae huno kasagoꞌya veaꞌmogamifena ke higeꞌya ageno mage huno hie “Tamakaya mani kea havilama hutama haviho.
MAT 15:11 Nagola tamavayafima nesaya yamoꞌa tamakuꞌamona alino oniꞌyaꞌagela ohugahigi tamavayafitiꞌma hati-lavisia yamo ali-falote hisigeno tamakuꞌamoꞌa oniyaꞌagela hugahie.” huno hu-maine.
MAT 15:12 Higeꞌya agaiꞌaenema tokaeꞌya nemaiya anagaꞌmoꞌya Yisasife mage huꞌya hae “Falasia vayaꞌmoꞌya ani kea haviteꞌya amaipa kafa he-gataya kea ago havimainano?” huꞌya hae.
MAT 15:13 Hageno Yisasiꞌa mage huno hama-paiye “Ikapinaga mainea Nenafaꞌa okalinesia yana agaiꞌa mevakaino hafuꞌyaene tagasi hugahie.
MAT 15:14 Tamakaya mani vayafena tamakesa ohaviho. Amaulaga asu hu-mainea vaya mainae. Nagoꞌma aulaga asu hu-mainea kanomoꞌa nago aulaga asu hu-mainea afaluꞌamona avaleno vaiyesiana tolemogania komufi asaga hu-lavigaꞌe.” huno hie.
MAT 15:15 Higeno Pitaꞌa Yisasife mage hie “Kagaya mani avame kemo aepaꞌa hugeta havimano.” huno hie.
MAT 15:16 Higeno Yisasiꞌa mage huno hie “Tamakaya meni kanaene havilama ohunetama nehao?
MAT 15:17 Tamakaya ohavinao? Mukiꞌa yama tamavayafi nageno tamakuꞌafina oꞌunogi tamaipafike taviteno haenagaꞌa aifayolagafi tavino afa ya kana nehie.
MAT 15:18 Afa ya kana nehianagi nago yana tamavayafitiꞌma hati-lavia kemoꞌa tamakupiti falote huno tamakuꞌamona alino oniꞌyaꞌagela nehie.
MAT 15:19 Tamakuꞌafinagati efalote hia yana maꞌa huno falote nehie kanale ohu tagu tagesa nehavuna yaꞌene vaya he-fali kavaꞌene alu kanomo aꞌne avayu hu yaꞌene aꞌne munaꞌnele kumai he yaꞌene musufaya hu yaꞌene havige hu-ma-te yaꞌene kamuge vai-ma-te yaꞌene taguꞌafitila ali falote nehie.
MAT 15:20 Naꞌama haya yafe tamakupina oniꞌyaꞌagela tamahau-mainegi veaꞌmoꞌya amayama sese ohuꞌya kaveꞌma naya yamoꞌa amakupina oniꞌyaꞌagela ohugahie.” huno hu-maine.
MAT 15:21 Yisasiꞌa nemaiya kumala ataleno Taiya kotegaene Saitoni kotegaene umaine.
MAT 15:22 Umainegeno nagola anile mainea Kenani aꞌmoꞌa, Yuta vea omainea aꞌmoꞌa, agaife ke huno mage me hie “Ala kanomogae, Tevitina aginagomoga, nagaila kahau hunato. Kefo Avamuꞌmoꞌa nagai munala aguꞌafi faleno maineno tusi havi kava hu-neꞌa-te.” huno hie.
MAT 15:23 Higeno Yisasiꞌa nagola osi ke kanoꞌa ohunegi agaiꞌaenema tokaeꞌya nemaiya anagaꞌmoꞌya agaife mage me hae “Ani aꞌmoꞌa tagai takave neꞌeno tusiya huno keha keha nehuno tutu nehigi kagaya hu-tegeno vino.” huꞌya hae.
MAT 15:24 Yisasiꞌa mage hie “Isalelima vaꞌyagi-mainea sipi sipileke Anumaya Kotiꞌa hu-na-tegeꞌna emainoe.” huno hie.
MAT 15:25 Higeno ani aꞌmoꞌa Yisasi aiyafi aleꞌya meye-maineno mage huno hie “Ala kanomogae naya huo.” huno hie.
MAT 15:26 Higeno Yisasiꞌa mage huno hie “Havigu nafaꞌneyagamogami kave hama-faleꞌya kalamogami amamisagi nagaya Isaleli veala amataleꞌna alu vayaꞌne amaya hisuana haviya hugahie.” huno hie.
MAT 15:27 Higeno ani aꞌmoꞌa mage huno hie “Ala kanomogae tamage nehananagi kalamogamina neꞌamafaꞌya nenageꞌya kalamoꞌya sipaletiꞌma asaga hu-lavia atupaꞌa yogiꞌya nenae. Kagaya ani kava huka nagaya Isaleli a omainogi osiꞌa nahaꞌmao.” huno hie.
MAT 15:28 Higeno Yisasiꞌa mage hie “Aꞌmogae tusiya huka nagaifena havika kagupi maleka kametiti hanafe nahavigana yana kamigahue.” huno nehigeno ani kana kanoꞌale munaꞌamona kanale hu-tene.
MAT 15:29 Yisasiꞌa ani kumala ataleno Kalili ti kotumo agegayalega uteno nago agoꞌyafi haino mopale maine.
MAT 15:30 Mainegeꞌya kasagoꞌya veala agaite melitalu nehuꞌya aiya avayu hu-mainea veaꞌnene aiya aya haviya hu-mainea veaꞌnene amaulaga asu hu-mainea veaꞌnene age tagaꞌne-mai veaꞌnene nagoꞌa kali veaꞌnene amavaleꞌya Yisasina aiyafi mematageno alino kanale hu-ma-tene.
MAT 15:31 Kanale hu-ma-tegeꞌya mukiꞌa veala agayana higeꞌya tusiꞌa amamaꞌyo ai-mainae. Age tagaꞌne-mai veaꞌmoꞌya kaiyeke hageꞌya amaiya amayamo kayagi-mai veaꞌmogamina amaiya amayaꞌmoꞌa kanale higeꞌya amaiya haviya hu-mainea veaꞌmogami amaiyamoꞌa kanale higeꞌya neꞌvageꞌya amaulaga asu hu-mainea veaꞌmogami amaulagamoꞌa kanale higeꞌya amaulaga age-mainae. Naꞌama haya yate ageteꞌya Isaleli veaꞌmogami Anumaya Koti agia alisaga hu-mainae.
MAT 15:32 Yisasiꞌa agaiꞌaenema tokaeꞌya nemaiya anagafe ke higeꞌya ageno mage hie “Mani veaꞌmoꞌya taliꞌa (3) yupa nagaiꞌene mainageno nesaya kaveꞌamia omalea yafe nahau hu-neꞌama-toe. Havigu amatalesugeꞌya katega nevisageno amakatesigeꞌya amaugetuꞌnatu huꞌya takatiyafena nonahaiye.” huno hie.
MAT 15:33 Higeꞌya agaiꞌaenema tokaeꞌya nemaiya anagaꞌmoꞌya mage huꞌya hapaiye “Mani kotega vaya omai kotegagi hanateti kosa hesia maya alita ani veaꞌnea amamisune?” huꞌya havigae.
MAT 15:34 Hageno Yisasiꞌa mage huno hama-vige “Tamakaya naꞌmagi maya hane?” huno higeꞌya mage hae “Tagaya seveniꞌa (7) mayaꞌage hanegi nagola osi noyame kanoꞌa hane.” huꞌya hapaiye.
MAT 15:35 Hageno Yisasiꞌa mukiꞌa veafena “Mopale maiho.” huno hama-paigeꞌya mopale mainae.
MAT 15:36 Mopale mainageno Yisasiꞌa ani seveniꞌa (7) mayaene noyamene alino Anumayamotega muse huno havigeteno kolite kolite huno agaiꞌaenema tokaeꞌya nemaiya anagala amamigeꞌya mukiꞌa veaꞌmogamina amaminae.
MAT 15:37 Amamigeꞌya mukiꞌa veala nageno amamu higeꞌya atalaya maya atupayaga agaiꞌaenema tokaeꞌya nemaiya anagaꞌmoꞌya alitalu huteꞌya seveniꞌa (7) kupi ai-hava-te-mainae.
MAT 15:38 Ani kaveꞌma ne-mainaya veneꞌnea fo tauseniꞌa (4,000) vemoꞌya ne-mainae. Nafaꞌneyagaꞌamiene aꞌneyagaꞌamiene nayanagi ohapalinae.
MAT 15:39 Netageno Yisasiꞌa hu-mategeꞌya utageno agaiꞌa tipi kalefi haisaga hu-maino Magatana kaiyaga umaine.
MAT 16:1 Falasia vayaꞌene Satiusi vayaꞌene Yisasina meye-vataga hisayafe mage huꞌya me hae “Kagaya ikapinagati tokiya avame yana hugeta agamano.” huꞌya hae.
MAT 16:2 Hageno Yisasiꞌa mage huno hie “Unena tamakaya mage nehae ‘Ikamoꞌa haesa hianagino ega kanale yage falote hugahie.’ hutama nehae.
MAT 16:3 Natepiti hetitama mage nehae siaꞌmoꞌa okomaꞌage huno ikamoꞌa ai-haesa hianagino ‘Menia yasimoꞌene koꞌmoꞌene falote hugahie.’ hutama nehae. Tamage tamakaya ikana neꞌagetama ‘Naꞌa hugahie.’ hutama fako nehayanagi meni kanafima falote hia yana age-lama hutama noꞌagae.
MAT 16:4 Tamakaya meni kanafima mainaya veaꞌmogatama tusiya hutama kefo veaꞌne mainae. Anumaya Kotina tamakaveꞌno hu-neꞌataya veaꞌne mainae. Tamakaya ‘Tokiya avame yana hugeta agamano.’ hutama nagaifena hayanagi nagaya nago avame yana ohugahuanagi Yonama hu-tenea tokiya avame yamaꞌage tamave-ligahie.” huno huteno Yisasiꞌa amataleno umaine.
MAT 16:5 Yisasiꞌenema tokaeꞌya nemaiya anagaꞌmoꞌya tikotuna lakaeꞌya vayana amake-kaniꞌya nagoꞌa maya oꞌaliꞌya umainae.
MAT 16:6 Oꞌaliꞌya vageno Yisasiꞌa mage huno hama-paiye “Tamakaya Falasia vayaꞌmoꞌyaene Satiusi vayaꞌmoꞌyaene amakupi hanea yana age-lama ohuꞌya amavayaleti havigema nehaya yana kai hame hale-negia avamete huno halegino alakefa hisia yafena kaꞌye ho.” huno hie.
MAT 16:7 Higeꞌya ani vayaꞌmoꞌya amakaiꞌami huge havige huꞌya mage hae “Tagaya maya oꞌalita emainona yafe nehie.” huꞌya amakaiꞌami hae.
MAT 16:8 Hayanagi Yisasiꞌa ani vayaꞌmoꞌya haya kea ago haviteno amakaife mage hie “Naꞌa higetama ‘Kavetia alita omenone.’ hutama tamakaitamia huge havige nehae. Tamakaya nagaifena osi kanoꞌa havitama tamakupi maletama tamametitia hu-mainae.
MAT 16:9 Tamakesa omalegetama havilama nohao? Faefuꞌa (5) mayama faefu tauseniꞌa (5,000) vemoꞌya ne-mainaya yafena tamakesa nohavio? Netagetama naꞌmagi kupi atalaya maya atupayaga ai-mainone hutama nohavio?
MAT 16:10 Tamakaya seveniꞌa (7) maya kanoꞌa fo tauseniꞌa (4,000) vemoꞌya netagetama naꞌmagi kupi aitama havate-mainone hutama tamakesa nohavio?
MAT 16:11 Nagaya mayahena tamaha-opainogi. Naꞌa higetama ohavinae? Tamakaya Falasia vayaꞌene Satiusi vayaꞌene amakusafinaga hanea yana agelama ohuneꞌya amavayaleti havigema nehaya yana kai hamemo hale-negia avamete huno halegino alakefa hia yafena kaꞌye ho.” huno hu-maine.
MAT 16:12 Mani kema higeꞌya haviyana Yisasiꞌa afaꞌa “Kai hame maya hale-negia yafe tamaugafa kaꞌye ho.” huno ohunegi agaya “Falasia vayaꞌene Satiusi vayaꞌmoꞌya nehaya kehe kaꞌye ho.” huno hu-maine.
MAT 16:13 Yisasiꞌa Sisalia Filipai kaiyaga uvaꞌyi huno agaiꞌaenema tokaeꞌya nemaiya anagafe mage huno hama-vige “Veaꞌmoꞌya nagaifena, ikapinagati emainoa kanoa vayaꞌmo natenea kanomoꞌnihena taꞌe huꞌya nehae?” huno hama-vige.
MAT 16:14 Hamavi-gegeꞌya kenonaꞌa mage huꞌya hae “Nagoꞌa vayaꞌmoꞌya kagaifena Yoniꞌe, ti fale-neꞌamatea kano, maine huꞌya hageꞌya nagoꞌa veaꞌmoꞌya kagaifena Ilaiya maine huꞌya hageꞌya nagoꞌa veaꞌmoꞌya Yelemaiya maine huꞌya hageꞌya nagoꞌa veaꞌmoꞌya nayo Anumaya Koti aune kanoa fali-mainea kano maine huꞌya nehae.” huꞌya hapai-mainae.
MAT 16:15 Hapaigeno Yisasiꞌa amakaifena mage huno hama-vige “Tamakaya nagaifena taꞌe hutama nehae?” huno hamavi-ge.
MAT 16:16 Hamavi-gegeno Saimoni Pitaꞌa mage huno hie “Kagaya Kalaisigae, Anumaya Kotiꞌma taugafa ali-gatigahe hu-ga-tenea kano mainane. Haimuꞌaene mainea Anumaya Koti neꞌamoga mainane.” huno hie.
MAT 16:17 Higeno Yisasiꞌa Pitafena mage huno hapaiye “Saimonigae, Yona nafaꞌnemoga, mani kea hanafe Anumaya Kotiꞌa muse hisana yana kamine. Nagola ma mopafi kanomoꞌa ani yana kaveꞌotinegi ikapinaga mainea Nenafa kave-li-maine.
MAT 16:18 Nagaya kaha-nepauve kagaya Pitagae ani kagimo aepaꞌa yafamogae. Kagaya yafa kana nehananagiꞌna nagaya mukiꞌa amakuꞌa naminaya veala mani yafaꞌmo agupile no kana huꞌna ki-malenesugeꞌya vayaꞌma hamae-nefalisaya tokiyaꞌamia anima ki-malesua nona alino haviya ohugahie.
MAT 16:19 Nagaya Anumaya Kotiꞌma kava yagai-mainea kumaꞌma yakisana ki nofila kamigahue. Kagaya ma mopafi maineka ‘Ma yana atafa hutama tokiya vaiho.’ huka hisanana Anumaya Kotiꞌa agaiꞌenena ikapinaga ‘Ani yana atafa hu-liho.’ huno hugahie. Kagaya ma mopafi nago yafema ‘Afaꞌa ataleho.’ hukama hisanana Anumaya Kotiꞌa agaiꞌenena ikapinaga aniꞌa hugahie.” huno hie.
MAT 16:20 Yisasiꞌa agaiꞌaenema tokaeꞌya nemaiya anagafe tokiyaꞌage ke huno mage hie “Tamakaya nagoꞌa veala nagaifena ‘Kalaisiꞌe, Anumaya Kotiꞌma taugafa aligatigahe hutenea kanoa ma maine.’ hutama hama-opaiho.” huno hu-maine.
MAT 16:21 Ani yupa Yisasiꞌa agaiꞌaenema tokaeꞌya nemaiya anagafena haenagama falote hisia yamofe aepa heno amave-li-maine. Mage huno hie “Nagaya Yelusalemu visugeꞌya ala vayaꞌene mono note kava vayaꞌene kahegi kema havilinaya anagaꞌene tusiꞌa nagata aisia kava hu-nateteꞌya nahaesageꞌna faligahue. Falisugeꞌya komufi he-vai-natesageꞌna tole yupa maiꞌna tagufa kanale fali-mainesufitila hetigahue.” huno hu-maine.
MAT 16:22 Higeno Pitaꞌa Yisasina faitega avaleno moteneno aepa heno Yisasife mage hie “Anumaya Kotiꞌa ani kavala ohisaya amaku amakesa amamisie. Anumayanimogae kagaila ani kavala hu-okatesae.” huno hie.
MAT 16:23 Higeno Yisasiꞌa mai-yahae huno Pitafena mage huno hie “Satanigae mai halenato kagaya nagai naguꞌa ali haviya hugahe nehanagi kagaya Anumaya Koti havimainea aguꞌagesa kanaleꞌya huka nohavinagi vayaꞌmoꞌya kaha-paiya amaku amakesa nehavine.” huno hie.
MAT 16:24 Yisasiꞌa agaiꞌaenema tokaeꞌya nemaiya anagafena mage huno hama-paiye “Nagoꞌa veaꞌmoꞌya nagai nakaveꞌma visaya amakesa havinuꞌyahena amaugafama aliꞌya hai yana amakaveꞌno hu-teteꞌya nagaiꞌma nagata aisigeꞌna falisua kava hisaya amakesa haviteꞌya yafaga yosa kofiꞌya nakave aliꞌya visae.
MAT 16:25 Nagoꞌa veaꞌmoꞌya maiyaꞌamima atafa huꞌya ali-talakoma hu-lisayana maiyaꞌamimoꞌa falino afaya hapaegahigi nagoꞌa veaꞌmoꞌya nagaifema hamainageꞌya maiyaꞌamima atalesaya veaꞌmoꞌya maiyaꞌamia ali-gatisugeꞌya agola aliꞌya maigahae.
MAT 16:26 Nagoꞌa veaꞌmoꞌya mukiꞌa ma mopafi mone afenoꞌyaꞌyaga aliteꞌya maineꞌya falisayana agola maige maige hisaya haimula ago atalenayanagiꞌya ali-mainaya mone afenoꞌamimoꞌa hanaꞌa huno amaya hugahie? Aꞌao amaya ohugahie.
MAT 16:27 Nagaya ikapinagati emainoa kanoa vayaꞌmo natenea kanomonia Nenafaꞌa tokiya hale yamaꞌaene Anumaya Kotina ensole vayaꞌamoꞌyaene eteꞌna esua kanafina mukiꞌa veaꞌmoꞌya ma mopaleꞌma hu-mainesaya yateti anonaꞌa amamigahue.
MAT 16:28 Tamage-lafa huꞌna tamaha-nepauve nagoꞌa veala maleꞌma hetiꞌya mainaya veala aupaꞌa ofaligahayanagiꞌya hagoteꞌya nagaya ikapinagati emainoa kanoa vayaꞌmo natenea kanomonina Anumaya Kotiꞌa kava yagai-mainea yapi maineꞌna esugeꞌya nagegahae.” huno hu-maine.
MAT 17:1 Yisasiꞌa sikisiꞌa (6) kana maiteno Pitana Yemesina Yonigamina amavaleno ayaꞌaya agoꞌyafi hai-mainae.
MAT 17:2 Haiꞌya mainageno Yisasina augosamoꞌa alino alu augosa kaligeno augosafitila yage kana huno ai-vasa nehigeno kenaꞌamoꞌa efeꞌage huno alave alave hu-maine.
MAT 17:3 Ageho tole kanolana nayoma fali-mainaꞌa kanolana Moseseꞌene Ilaiyaꞌene Yisasiꞌene kea kea nehaꞌe.
MAT 17:4 Nehaꞌageno Pitaꞌa Yisasife mage hie “Anumayamogae tagaya male maunana kanaleꞌya hie. Kahaisigekahena katega nona taliꞌa (3) ki-lama-tesue kagaila nagolagi Mosesena nagolagi Ilaiyana nagolagi huno hanesie.” huno hie.
MAT 17:5 Ani kea hanepaigeno nagola hale yamaꞌaene siaꞌmoꞌa evaꞌyi huno alino aiso hu-mategeno siapinagati ala kefiti age aino mage huno hie “Mani kanoa nagai nafaꞌnegi nahau nayamopafi nenagea kanogi agaifena aluya huno nenahaigi agai kea haviho.” huno hie.
MAT 17:6 Higeꞌya agaiꞌaenema tokaeꞌya nemaiya anagaꞌmoꞌya koli huꞌya amamaꞌyo aigeꞌya mopafi amakoꞌya aiye-mainae.
MAT 17:7 Amakoꞌya aiyeꞌya mainageno Yisasiꞌa avate eno mage hie “Kolia ohiho. Hetiho.” huno hu-maine.
MAT 17:8 Higeꞌya age-saga huꞌya agayana Yisasiꞌa agaiꞌage mainegeꞌya age-mainae.
MAT 17:9 Ageteꞌya agoꞌyafiti enelaviꞌya Yisasiꞌa kahegi mateno mage huno hie “Anima agaya yafena nagoꞌa veaꞌnea hamaꞌopainegeꞌna ikapinagati emainoa kanoa vayaꞌmo natenea kanomoꞌna fali-mainesufiti hetisua yupa hama-paigahae.” huno hie.
MAT 17:10 Higeꞌya agaiꞌaenema lokaeꞌya nemaiya anagaꞌmoꞌya mage huꞌya havigae “Naꞌa higeꞌya kahegi kema havilinaya anagaꞌmoꞌya ‘Ilaiyaꞌa hagoteno neꞌesigeno Anumaya Kotiꞌa taugafa ali-gatisia kanoa egahie.’ huꞌya nehayane?” huꞌya havigae.
MAT 17:11 Havigageno Yisasiꞌa mage huno hie “Tamage Ilaiyaꞌa hagoteno egahianagino mukiꞌa yana alino kanaleꞌya huno talo tala hugahie.
MAT 17:12 Hugahianagi tamaha-nepauve Ilaiyaꞌa ago emaineanagi agaila age-lama ohuꞌya hamaiya kava huꞌya agaila havi kava hu-tenaya kavala aniꞌa huꞌya ikapinagati emainoa kanoa vayaꞌmo natenea kanomonina ali haviya hu-natesageno naugafa nagata aigahie.” huno hie.
MAT 17:13 Mani kema hiana “Yoniꞌa tima fale-neꞌamatea kanomofe hie.” huꞌya hu-mainae.
MAT 17:14 Yisasiꞌene agaiꞌaenema tokaeꞌya nemaiya anagaꞌmoꞌya mukiꞌa veala melitalu huꞌya mainale evaꞌyi hageno nago kanomoꞌa Yisasite mepe hu-maine.
MAT 17:15 Yisasifena mage huno hie “Anumayamogae kagaya neꞌnafaꞌneꞌnimona kahau huto. Ani nafaꞌneꞌnia mananiꞌya neꞌagegeno augafamona ali haviya nehigeno mukiꞌa yupa ata taꞌnekino tipi asaga hu-nelavino nehie.
MAT 17:16 Naꞌa nehigeꞌna kagaiꞌene tokaeꞌya nemaiya anagakamogamite avaleꞌna oana aliꞌya kanale hu-tesaya amukoꞌamia omalene.” huno hie.
MAT 17:17 Higeno Yisasiꞌa mage huno hama-paiye “Vae tamakaya meni kanafima mainaya veaꞌmogatama nagaifena havitama tamakupi maletama tametitia ohutama fatago hutama nomaiye. Aniꞌa haya yafe kasalo nenahaegi naꞌmagi yupa tamakaiꞌenena mainesugetama nagaifena havitama tamakupina malegahae? huno nehuno ani nafaꞌnemo nefafe ‘Nafaꞌnekaꞌa avaleka eno.’ huno hie.
MAT 17:18 Higeno avaleno egeno Yisasiꞌa anima agupi mainea Kefo Avamufena ke-makino ‘Ataleka hati-lavio.’ huno hutegeno hati-lavigeno aupaꞌa ani nafaꞌnemona kanale hu-tene.”
MAT 17:19 Yisasiꞌene tokaeꞌya nemaiya anagaꞌmoꞌya amakaiꞌamige Yisasite mage huꞌya me havigae “Tagaila naꞌa higeno Kefo Avamuꞌma anatisuna amukotia omale?” huꞌya havigae.
MAT 17:20 Hageno Yisasiꞌa mage huno hama-paiye “Nagaifema havitama tamakupi maletama tamametiti haya yatamimoꞌa osi hu-mainea yafe ani kava hisaya amukotamia omalene. E, nagaya tamage-lafa huꞌna tamaha-nepauve tamakaya osi kanoꞌa oꞌagemo avina kanoꞌa Masatati avinamoꞌma hia kava hutama nagaifena havitama tamakupi malaleꞌasina ma agoꞌyamofena mage hutama hapaisagenoꞌa ‘Hetika alule vuo.’ hisagenoꞌa ani agoꞌyamoꞌa agola vileꞌasine. Nagaifema havitama tamakupi malesayana tamakaya nago aliꞌyafena ‘Amuha ohunone.’ hutama ohugahagi mukiꞌa tokiya kavala iohugahae.” huno hu-maine.
MAT 17:22 Kalili kotega alitalu huꞌya mainageno Yisasiꞌa agaiꞌaenema tokaeꞌya nemaiya anagafe mage huno hama-paiye “Osi kanaꞌa maitesugeno nago kanomoꞌa nagesi huno ikapinagati emainoa kanoa vayaꞌmo natenea kanomonina kame vayaꞌmogami amayapi navaleno nategahie.
MAT 17:23 Natesigeꞌya nahaesageꞌna falisugeꞌya he-vaina-tesageꞌna tole yupa komufi maiteꞌna tagufa (3) molisia kanale eteꞌna he-tigahue.” huno higeꞌya ani kehena agaiꞌaenema tokaeꞌya nemaiya anagaꞌmoꞌya havigeno kanaꞌage hamau-maine.
MAT 17:24 Nago yupa Yisasiꞌene agaiꞌene tokaeꞌya nemaiya anagaꞌmoꞌya Kapaneamu evaꞌyi hageꞌya mono noma ali fatago hisaya monea vaya amaugafaleti takesi neꞌaliya vayaꞌmoꞌya Pitate mage huꞌya me havigae “Tamakaila hu-lamave-nelia kanomoꞌa ani mono note monea neꞌataleo.” huꞌya hae.
MAT 17:25 Hageno Pitaꞌa mage hie “E, ani monea neꞌatale.” huno nehuno nopinaga hai-falegeno Yisasiꞌa hagoteno mage huno havige “Saimonigae naꞌane kagesa nehavine. Ma mopale sauve vayaꞌmoꞌya vaya amaugafaleti takesi monea aliꞌya tagami neꞌamamiye? Mukiꞌa amakaiꞌami kotega vayateti neꞌalio ifi alu vayaꞌmogamiteti neꞌaliyo?” huno havige.
MAT 17:26 Havigegeno Pitaꞌa mage huno hie “Alu vayatetila afaꞌa neꞌaliye.” huno higeno Yisasiꞌa mage hie “Tamage hane. Aniꞌa huꞌya amakaiꞌami kotega vayaꞌmogami amaugafaletila takesi noꞌaliye. Aniꞌa huta lagaya Anumaya Koti anaga mainonagi tagaitetila takesia oꞌalisae.
MAT 17:27 Oꞌaligahayanagi havigu naꞌa hisunageꞌyahena amaipamoꞌa haviya hugahayanagika kagaya ti kotute visanaꞌamoga noyame hukua atalesanageno tavisigeka hagote noyamema avayuma hinuka avaya ali aka hu-lineka nagola monea agegane. Ani monea alika ani vayala memamisanageꞌya tolemogatiꞌa taꞌaugafaleti takesi monea aligahae.” huno hu-maine.
MAT 18:1 Ani yupa Yisasiꞌene tokaeꞌya nemaiya anagaꞌmoꞌya Yisasite mage huꞌya me havigae “Hana kanomo muki vayala amakaseno Anumaya Koti kava yagai-mainea kumatela uhakote-mainea kanoa maigahie.” huꞌya havigae.
MAT 18:2 Havigageno Yisasiꞌa nago osi nafaꞌnea ke higeno egeno mukiꞌa vayaꞌmogami amuꞌnopi avaleno he-ti-tene.
MAT 18:3 He-ti-teneno mage huno hie “Nagaya tamage-lafa huꞌna tamaha-nepauve tamakayama tamakuꞌa ai-yahae hutama nafaꞌnemoꞌyama amaugafa aliꞌya nohaiya kava hutama osi nafaꞌnemogami avamete ohisayana Anumaya Kotiꞌma kava yagai-mainea kumatela hai ofalegahae.”
MAT 18:4 Nago kanomoꞌa agaiꞌa augafama alino ohaino osi nafaꞌnemo avamete maisiana ani kanomoꞌa nagoꞌa veala amakaseno Anumaya Koti kava yagai-mainea kumatela hagote kano maigahie.
MAT 18:5 Nagoꞌa veaꞌmoꞌya nagaifema huꞌya ma ma osi nafaꞌnema avaleꞌya falu fala hu-tesayana nagaiꞌenena navaleꞌya falu fala hu-nenatae.
MAT 18:6 Nagoꞌa veaꞌmoꞌya nagoꞌma nagaife haviꞌya amakupi malenaya anagapiti nago osi kanohema “Kefo yama huo.” huꞌya hisayana tusiꞌa kefo kava nehayanagiꞌna tusiꞌa kana ya amamigahue. Ala yafakefaleti ani kanomo ageꞌyafi maleꞌya nofi ki-teteꞌya hage lipi hagaꞌyu hu-talageno ti nakaino falisiana ani kana yamoꞌa afa ya kana ya haneanagi nagaya tusiꞌa kana ya amamigahue.
MAT 18:7 Avoꞌnio ma mopale veaꞌmogatama tusi nahau hu-nelama-toe. Mopafi mainaya kanafina “Kefo yama hiho.” huꞌya aye-mavataga hisaya yana falote hugahianagi nagoꞌa veaꞌmoꞌya “Kefo yama hiho.” huꞌya aye-mavataga hisaya veafena “Avoꞌnio kefo kava nehananagika kana yana aligane.” huꞌna tusi nahau hu-nelama-toe.
MAT 18:8 Kayaꞌene kaiyamoꞌene “Kefo yama huo.” huꞌana kavaleꞌana havi kapima katesaꞌagekahena ani kaiya kayana ai-fakalika hagaꞌyu hutalo. Hagaꞌyu hu-talesanana kanalele. Kaugafa haviya hu-mainesia kano maisanana kanalelagika haꞌno ohu kahaimuka hanesia kano maiyo. Havigu tole kayano tole kaiyao kefo ya hisana kagesa kaminegeka kefo yama hu-mainesana yafe kavaleno hani yapi agola tegelege nehia atafi hagaꞌyu hu-gatalegahie.
MAT 18:9 Kaulagamoꞌa agesia yamoꞌma kefo ya hisana kagesama kaminageka ani kaulaga ali faꞌyika hagaꞌyu hutalo. Ali faꞌyi-talesanana kanalele. Nagoke kaulaga hanesigeno kanale haꞌno ohu kahaimula kamisigeka alika maigananagi havigu tole kaulagamoꞌa kefo ya hisana kagesa kaminegeka kefo yama hisanafe hani yapi tegelege nehia atafi kavaleno hagaꞌyu hu-ga-talegahie.
MAT 18:10 Tamakaya kaꞌye ho. Havigu nagoꞌa osi anagaꞌnihe “Afa ya kana veaꞌne mainae.” hutama huyafenagi nagaya mage huꞌna tamaha-nepauve ani osi anagala ensole vayaꞌamimoꞌya ani nafaꞌneꞌyagale kava neꞌyagaiꞌya mukiꞌa yupa ikapinaga maineꞌya Nenafa aufina neꞌagae.
MAT 18:12 Na tamakesa nehaviye? Nago kanomoꞌa vani hataletiꞌa (100) afu mainefiti nagola fanane higeno ani afumona nefaꞌa mukiꞌa afuꞌa talapinaga amataleno talapinaga viaꞌyamo nagokeꞌma fanane hu-mainea afuꞌahe ati-yeno yeno ali falote hisio? E, fananema hisigenoꞌa aniꞌa huno ati-yegahie.
MAT 18:13 Nagaya tamage-lafa huꞌna tamaha-nepauve agoꞌma fanane hu-mainesia afuma ali falote huno avalesiana tusiꞌa muse hugahie. Naiti nainiꞌa (99) afuyagaꞌahena muse hianagi nagokeꞌma fanane hu-mainesia afuma ali falote hu-tenoꞌa tusiya huno musena hugahie.
MAT 18:14 Naꞌa hu-mainegi ikapinaga mainea Nelamafaꞌa nagola osi anagaꞌa fanane hisia yafena nohaiye.
MAT 18:15 Kafu-kaganaꞌma kefo yama hu-ga-tesigeka tanakaya tokaetana mainetana kefo yama hu-mainesia yana avelio. Ave-lisanageno kagai kema haviteno kefo yama hisifitila aguꞌa ai-yahae hisigeka avaleka kagaika kametega ategane.
MAT 18:16 Ateganagi kekama ohavisigekahena nagokepi tole kanola anavaleka vinuka tolefi (2) tagufa (3) vayaꞌmoꞌya hu-ga-tenea yana ageteꞌya hu-falote huꞌya fako huꞌya ani kanomona aumono maleho.
MAT 18:17 Aumono maletesageno ani kanoꞌmoꞌma nagoꞌene amakai kema ohavisigeka kagaya Yisasife haviꞌya melitaluma huꞌya maisaya veapi avaleka ugeꞌya aumonola maleho. Aumonoꞌma malesageno ani vayaꞌmogami kema ohavisigeka kagaya mage huka huto “Yisasi kea ohavi vaya kana hana kanomoga tagaiꞌenena eomaika kahaote maiyo.” huka huto.
MAT 18:18 Ani kema hu-tesayana tamage-lafa huꞌna tamaha-nepauve tamakaya ma mopale mainayana “Ma ya atafa hutama tokiya vaiho.” hutama hisayana Anumaya Kotiꞌa ikapinaga aniꞌa huno “Ani yana atafa hiho.” hu-lokiya vaigahie. Tamakaya ma mopale mainetama nago yafema “Afaꞌa ataleho.” hutama hisayana Anumaya Kotiꞌa ikapinaga aniꞌa hugahie.
MAT 18:19 Eteꞌna nago kea tamaha-nepauve mopafi mainetama tole kanolaganima nago yafema nagoke anaku anakesaleꞌma mainenuꞌana ani yafena Anumaya Kotitega havigesaꞌageno ikapinaga mainea Neꞌanafaꞌa anamigahie.
MAT 18:20 E, tole (2) kanofi tagufa (3) vayapi nagai nagileꞌma haviꞌya melitalu hisayana nagaya nagaiꞌniꞌa amuꞌnoꞌamifina maigahue huno hu-maine.
MAT 18:21 Pitaꞌa Yisasite eno mage huno hie “Anumayamogae naꞌmagi kana nafuꞌnaganana kefo yana hu-na-tesigeꞌna ani kefo yamaꞌahe aigeꞌateꞌna atale-tesue? Seveniꞌa (7) yupa kefo yama hu-na-tesigeꞌna aigeꞌateꞌna atale-tesuo?” huno havige.
MAT 18:22 Havigegeno Yisasiꞌa mage huno hapaiye “Kagaifena seveniꞌa (7) yupa ani kavala huo huꞌna nohugi nagaya mage huꞌna nehue kasagoꞌya yupa ohavunamaꞌa kanale havi yama hu-ga-tesigeka aniꞌa huka ohavunamaꞌa kana aigeꞌateka ataleto huꞌna nehue.”
MAT 18:23 Anumaya Kotife “Kava yagai-nato.” huꞌya hu-mainesaya veaꞌmoꞌya ma kava nehae. Nago kumate sauve kanomoꞌa agai aliꞌya veafe mage huno hie “Yoka kaminoa moneꞌniꞌa anonaꞌnia fatago hutama namiho.” huno hie.
MAT 18:24 Huteno fatago hugahe nago kanoa avalegeno eno aminea yatefe anonaꞌa ohavunamaꞌa monegefa, nago kanomoꞌma fifitiniꞌa (15) kafu aliꞌya alino ne-mainea augafa mone eteno anonaꞌa amisia yana hane.
MAT 18:25 Haneanagi monema amisia amukoꞌa omalegeno kava kanomoꞌa mage huno hie “Kagaikaene akamoꞌene nafaꞌnekaene afenoꞌyakaene alu kanomote atalegeno miya hisigeꞌna kagaiteti anonaꞌa monea alino.” huno hie.
MAT 18:26 Higeno ani aliꞌya kanomoꞌa kava kanomo aiyafi aleꞌya meyeno mage huno hie “Naꞌa ohuka kahau hu-na-teka ako huka nagava mainegeꞌna nagaya haenagaꞌa naminana yatela anonakaꞌa mukiꞌa kamigahue.” huno hie.
MAT 18:27 Higeno ala kava kanomoꞌa aliꞌya kanoꞌahena tusiꞌa hau hu-teteno anonaꞌama oꞌamia yafena aigeꞌateno atale-tene.
MAT 18:28 Atale-teanagi ani aliꞌya kanomoꞌa hati-lavino viaꞌyamo tokaeꞌana aliꞌya neꞌaliꞌa kanomona moge-maine. Ani kanomoꞌa nago yupa agaifena mage huno hie “Nagoke Sotama aliꞌyana aliꞌya nenaya augafa mone yoka namio.” huno higeno amianagi anonaꞌa oꞌamine. Oꞌaminea yafe ani kava kanomoꞌma hau hu-tenea kanomoꞌa ani afaluꞌamona ageꞌyafi atafa hu-lineno mage huno hie “Kagaila yoka kaminoa yana anonaꞌa mukiꞌa yaniꞌa aupaꞌa namio.” huno hie.
MAT 18:29 Higeno aliꞌya tokaeꞌana neꞌaliꞌa kanomoꞌa aleꞌya ayeno mage hie “Naꞌa ohuka ataleka afaꞌa kahau hu-na-teka ako huka nagava mainegeꞌnao. Haenaga anonakaꞌa kamigahue.” huno hie.
MAT 18:30 Higeno ani kanomoꞌa mage huno hie “Aꞌao naꞌa kehena nonahaiyafe nofi nopi hu-ga-tesugeka maineka haenaga anonaꞌa namiteka nofi nopitila ataleka maigane.” huno hie.
MAT 18:31 Higeꞌya nagoꞌa tokaeꞌyama aliꞌya neꞌaliya veaꞌmoꞌya naꞌama hia yafena haviteꞌya amaipamoꞌa haviya higeꞌya kava kanomote mukiꞌa hu-mainea kavafena mo falote hae.
MAT 18:32 Mo falote hageno ala kava kanomoꞌa atale-tenea aliꞌya kanoꞌahe ke higeno egeno mage huno ha-paiye “Kagaya tusiya huka havi aliꞌya kano mainane. Hagoteka nagaifena avi metanageꞌna anonakaꞌa aigekateꞌna atalega-tenoe.
MAT 18:33 Nagaya kagaifena nahau hu-ga-toanagi naꞌa higeka ani avamete kavala ohuka kagaya tokaeka aliꞌya neꞌalina kanohena kahauna hu-oꞌatane?” huno hie.
MAT 18:34 Huteno kava kanomoꞌa tusiꞌa hai-vaiteno kina nopi avaleno viaꞌyamo kaꞌyo amisaya vayaꞌmogami amayapi ategeno mage hie “Tusi agata ya amitegeno haenagaꞌa mukiꞌa yaniꞌa anonaꞌa namitesigetama atalegeno vino.” huno hu-maine.
MAT 18:35 Yisasiꞌa mage huno hu-maine “Tamakaya tamafu-tamakanaꞌya kefo yama hu-lama-tesagetamahena amegatila hu kanale ohutama tamage hutama tamaipa kanale yapiti aigeꞌamatetama atale-oꞌama-tesayana ikapinaga mainea Nenafaꞌa aniꞌa huno ani mukiꞌamogatamina kinama hu-tenea avamete huno hu-lamategahie.” huno hu-maine.
MAT 19:1 Yisasiꞌa mukiꞌa mani kema hu haꞌnoma nehunoꞌa Kalili kotega ataleno Yotani limoꞌa ame kaiyaga Yutia kotega uvaꞌyi hu-maine.
MAT 19:2 Mukiꞌa veaꞌmoꞌya Yisasi akave vageno kaliꞌamia alino kanale hu-ma-tene.
MAT 19:3 Nagoꞌa Falasia vayaꞌmoꞌya Yisasite eꞌya kanale ohunea kema hisiafene huꞌya nagola aye-vataga hisaya kea mage huꞌya havigae “Nago kanomoꞌa aꞌamoꞌma nehia kavafe atalesia agesama hisigenoꞌa kanalelagino atalesio? Kahegi kemoꞌa ani yafena naꞌane nehie?” huꞌya havigae.
MAT 19:4 Hageno Yisasiꞌa kenonaꞌamia mage huno hie Tamakaya Anumaya Koti avona hapalitama ohavinao? Mage huꞌya kae-malenayane Anumaya Kotiꞌa ehe yupa aepa heno vene aꞌene talo hu-maleteno mage hie “Vene aꞌene talo humalenoafe nago kanomoꞌma itaꞌafoꞌamoma ataleno aꞌamoꞌene ai-lokaeno maisiana ani tolemogania nagoke anaugafa kaligaꞌe.” huno kae-maleneane.
MAT 19:6 Naꞌa hu-maineafe nagoꞌene tolea omainaꞌagi menia nagoke anagufa kaliꞌana mainesaꞌageno Anumaya Kotiꞌa anakaila alino hagelafi-na-teneanageno nago mopale kanomoꞌa ani alavelamogani mai yaꞌania alino apase oꞌana-tesie.” huno hie.
MAT 19:7 Higeꞌya Falasia vayaꞌmoꞌya Yisasife mage huꞌya havigae “Naꞌa higeno Moseseꞌa nagola kahegi kefina ma kea huno taha-pai-maineane ‘Vemoꞌa aꞌamona avo kaeno neꞌamino hu-tesigeno haꞌno huno ugahie.’ huno hu-maineane?” huꞌya hae.
MAT 19:8 Hayanagi Yisasiꞌa mage huno hama-paiye “Nayona ehela ani yafena Anumaya Kotiꞌa malegeno omalenea kavala haneanagi tamakaya ke ohavitama veganokano haya yafe Moseseꞌa aꞌma atalesaya kaana tama-ve-li-maineane.
MAT 19:9 Nagaya tamaha-nepauve nago kanomona aꞌamoꞌma kumaima ohenesigenoꞌma anauꞌamoꞌa neꞌataleno nago aꞌma alisiana ani kanomoꞌa kumai kano maine.” huno hie.
MAT 19:10 Higeꞌya agaiꞌaenema tokaeꞌya nemaiya anagaꞌmoꞌya Yisasina mage huꞌya hapaiye “Alavemoꞌya tokaeꞌya maisaya auꞌava yamofe tusiꞌa tokiya kema hanesigetahena afaꞌa neyaꞌve maineta aꞌnea oꞌalisune.” huꞌya hae.
MAT 19:11 Hageno Yisasiꞌa mage huno hama-paiye “Haya kea tamage nehagi mukiꞌa neyaꞌvemoꞌya aꞌnema oꞌalisaya amukoꞌamia omaleneanagino Anumaya Kotiꞌa tokiya amaminea vayaꞌmoꞌyage aꞌnea oꞌaligahae.
MAT 19:12 Nagoꞌa neyaꞌvemoꞌya aꞌnema oꞌalisaya tokiyaꞌamia hane. Ani vayapitila nagoꞌa neyaꞌvemoꞌya itaꞌaꞌmimo ama-tenea yupa amakayamoꞌma faꞌyi-talenesaya vayaꞌma mainesayana aꞌnea oꞌaligahae. Nagoꞌa neyaꞌvema alu vayaꞌmoꞌyama amakayamoꞌma faꞌyi-talenesaya vayaꞌmoꞌya aꞌnea oꞌaligahae. Nagoꞌa vayaꞌmoꞌya ‘Anumaya Kotiꞌa kava yagai-la-tesie.’ huꞌya amakesa havi-mainesaya vayaꞌmoꞌya Yisasi kema hama-paisaya yafenagiꞌya ‘Aꞌnea oꞌaligahune.’ huꞌya hugahae. Ani kema havilinesia kanomoꞌa ani kava hisie.”
MAT 19:13 Veaꞌmoꞌya osi osi nafaꞌneyaga Yisasife “Aya maleno amakaife Anumayamotega havigesie.” huꞌya amavaleꞌya neꞌageꞌya agaiꞌaene tokaeꞌya nemaiya anagamoꞌya ageteꞌya “Naꞌa kavala ohiho.” huꞌya ke-amaki-mainae.
MAT 19:14 Ke-amakiyanagi Yisasiꞌa mage huno hie “Amatalegeꞌya nagaitega eho. Nafaꞌneyaga nagaite esaya yafena kahegi oꞌama-teho. Naꞌa huꞌya nafaꞌnemogami avamete maisaya veaꞌmoꞌya mage hugahae ‘Tagaya tokiyatia omalenegi Anumaya Kotiga kava yagai-lato.’ huꞌya hugahae.” huno hu-maine.
MAT 19:15 Anumaya Kotiꞌa hamaꞌmaesia yafe ayana amaugafale maleteno neꞌamataleno alu kotega umaine.
MAT 19:16 Nago kanomoꞌa Yisasiteka eno mage huno havige “Hu-mave-nelina kanomogae nagaya hana augafa kanale kava huteꞌna agola maige maige hisua nahaimula alisue?” huno havige.
MAT 19:17 Havigegeno Yisasiꞌa kenonaꞌa mage huno hie “Naꞌa higeka kanale auꞌavafena nahavi-negane? Nagoke kanoa Anumaya Kotiꞌa agaiꞌage kanale kano maine. Agola maige maige hisana kahaimuꞌma alinukahena Anumaya Koti kahegi kea akave malo.” huno hie.
MAT 19:18 Higeno Yisasifena mage huno havige “Hanaꞌa kahegi kehe nehane?” huno higeno Yisasiꞌa mage huno hie “Vayala haegeno ofalino. Kumai he yana ohuo. Musufayana ohuo. ‘Ma kanoa havi kava nehie.’ huka havigea hu-oꞌato.
MAT 19:19 Itakafokamo kea oꞌatagaeka anakia alisaga huo. Kagaika kaugafahena kahaiya avamete huka aniꞌa huka negafu augafahena kahaino.” huno hie.
MAT 19:20 Higeno ani kanomoꞌa mage huno hie “Nagaya mukiꞌa ani kea akave nemaloe. Na yamo nagoꞌa kosa he-ona-tene? Na yaꞌene hisue?” huno hie.
MAT 19:21 Higeno Yisasiꞌa mage huno hie “Nago kavaꞌene hisanana kosa he-ga-tesigeka fatago kano maigane. Mukiꞌa malenana mone afenoꞌyaꞌyagaka alika fako faka huka moneꞌamima omalenesia veaꞌne amamisanageno Anumaya Kotiꞌa ikapinaga hanea afenoꞌyana kamigahie. Afenoꞌyaꞌyagaka amamite amamite huteka nakave eno.” huno hu-maine.
MAT 19:22 Higeno ani kanomoꞌa ani kea haviteno mone afenomaꞌamoꞌma kasagoꞌma hu-mainea yafe oꞌatalesia agesa haviteno aipamoꞌa tusi kanaꞌage higeno umaine.
MAT 19:23 Vigeno Yisasiꞌa agaiꞌaenema tokaeꞌya nemaiya anagafe mage huno hie “Tamage huꞌna tamaha-nepauve mukiꞌa mone afenoꞌyaꞌamima hanesia veaꞌmoꞌya tusiꞌa kasageke huꞌya Anumaya Kotife ‘Kava yagai-lato.’ huꞌya hugahae.
MAT 19:24 Nagoꞌene tamaha-nepauve nagola pulumaka kana afumo agia kemolomoꞌa nekaꞌyamo kapima hai-falesiana afaꞌa yoꞌyo huno hai-falegahianagi mukiꞌa mone afenoꞌyaꞌamima hanesia veaꞌmoya Anumaya Kotife ‘Kava yagai-lato.’ huꞌya kasageke-voke hugahae.” huno hu-maine.
MAT 19:25 Higeꞌya agaiꞌaenema tokaeꞌya nemaiya anagaꞌmoꞌya amamaꞌyo neꞌaiꞌya mage huꞌya hae “Naꞌama hu-mainesiana Anumaya Kotiꞌa hana veaꞌmogami amaku amame ali-gatigahie?” huꞌya hae.
MAT 19:26 Hageno Yisasiꞌa neꞌamakeno mage hie “Veaꞌmogamina amukoꞌamia omaleneanagiꞌya ohugahayanagi Anumaya Kotiꞌa mukiꞌa kavala hisia amukoꞌa haneanagino afaꞌa huno ali-gatigahie.” huno hie.
MAT 19:27 Nage higeno Pitaꞌa mage huno hie “Havio tagaya mukiꞌa yatia ataleteta kakave neꞌonagi tagaya na ya aligahune?” huno hie.
MAT 19:28 Higeno Yisasiꞌa mage huno hama-paiye “Tamage huꞌna tamaha-nepauve haegafa kanamoꞌa mukiꞌa yana yaufa ya falote hisigeꞌna nagaya ikapinagati emainoa kanoa vayaꞌmo natenea nafaꞌnemoꞌna kava yagaisuafe tusiꞌa tokiya hale yamaꞌa hanea siale mainesugetama tamakaya nakave nehaya vayaꞌmogatama tuelufuꞌa (12) siale mainetama tuelufuꞌa (12) Isaleli nofi veaꞌmogamina kava yagai-ma-tegahae.
MAT 19:29 Mukiꞌa veaꞌmoꞌya nagaifema haviꞌya veaꞌmogamina nagai kema hama-paigahena noꞌamiene nepuꞌamiene amasaꞌamiene itaꞌafoꞌamiene nafaꞌneꞌamiene hoyaꞌamiene amataleꞌya visagenoꞌa Anumaya Kotiꞌa anonaꞌamia atalenesaya yaꞌene vani hataletiꞌa (100) mani yaꞌyaga amamiteno maige maige hisaya hamaimuꞌene amamigahie.
MAT 19:30 Meni kanafina hagoteꞌya mainesaya veaꞌmoꞌya ani kanafina haenagalafa maigahagi meni kanafima haenagalafa mainesaya veaꞌmoꞌya ani kanafina hagoteꞌya maigahae.” huno hu-maine.
MAT 20:1 Anumaya Kotiꞌa kava yagai-mainea yamoꞌa maꞌa hu-maine. Nofi alagamo hoyamona nefaꞌa kege aluganale ani hoyafi aliꞌya alisaya vayafe ke hugahe umaine.
MAT 20:2 Uno mage hie “Nagoke yupa kanoꞌa aliꞌyama alisageꞌnahena nagoke vani (1) kina tamamite tamamite hugahue.” huno higeꞌya nagoke amaipa hageno hoyafi hu-ma-tegeꞌya umainae.
MAT 20:3 Umainageno yagemoꞌa naeni (9) kilokile haigeno vaya atagu-nefaya kumapi viana nagoꞌa vayala afaꞌa hetiꞌya mainageno momake-maine.
MAT 20:4 Momaketeno mage hie “Tamakaiꞌenena nofi alagamo hoyaꞌnifi aliꞌya molisageꞌna miyana fatago huꞌna tamamigahue.” huno higeꞌya umainae.
MAT 20:5 Umainageno yagemoꞌa amuꞌnokaꞌno higeno aniꞌa hu-maine. Yagemoꞌa alitulu huno lavigeno aniꞌa huno nagoꞌa vayafe “Aliꞌya moliho.” huno hie.
MAT 20:6 Higeno unena aupaꞌa velo hugahe higeno nagoꞌa vayala afaꞌa heti-mainageno momaketeno mage huno hie “Naꞌa higetama ayaꞌaya kanagefa heti-taletama afaꞌa mainae?” huno hamavi-ge.
MAT 20:7 Hamavi-gegeꞌya mage hae “Nago kanomoꞌa aliꞌyana otamigeta afaꞌa mainone.” huꞌya hageno “Kanalelagi tamakaya nagai hoyafi aliꞌyana moliho.” huno hama-paiye.
MAT 20:8 Hama-paigeꞌya mo-neꞌaligeno une velo hilega nofi alagamo hoyamona nefaꞌa agaiꞌa aliꞌya kava kanohe mage huno hapaiye “Aliꞌya vayafe ke hugeꞌya egeka miyana amamio. Haenagama amavaloa vayaꞌmogami miyana amamiteka hagoteꞌnama amavale-mainoa vayala haenaga amamio.” huno hie.
MAT 20:9 Higeꞌya une avavema amavalea vayaꞌmoꞌya ageno nagoke vani kina amamite amamite hu-maine.
MAT 20:10 Amamite amamite higeꞌya hagotenoꞌma amavalegeꞌya aliꞌyama meli-mainaya vayaꞌmoꞌya mage huꞌya amakesa haviye “Ala miya aligahune.” huꞌya haviyanagi nagoke vani kinageꞌya ali-mainae.
MAT 20:11 Aliteꞌya hoyamona nefafena tusiya huꞌya kea-makiꞌya mage hae “Haenagama amavale-mainana vayala yagemoꞌa osi kana kanoꞌa nagoke kana nehigeꞌya aliꞌyana meli-mainagi tagaya afaꞌa hetita omainonagi tusiꞌa amukonako hia aliꞌya ali-mainonanagi nagoke avamete havi miya nelamine.” huꞌya hae.
MAT 20:13 Hageno ani hoyamona nefaꞌa amuꞌnoꞌamifi mainea kanohe mage huno hie “Nenafuga havio nagaya havi kavala hu-notama-toe. Natema tamaha-vi-gogetama ‘E, nagoke vani kina aligahune.’ hutama hagetila naꞌa higetama mani kea nehae?
MAT 20:14 Aliꞌyama alitama aliya monea alitama notamilega viho. Nagaya nahaiya avamete huꞌna haenagama amavaloa vayaꞌene nago avamete miyana nelamamue. Nagaiꞌni yanagi haile.
MAT 20:15 Ani monea nagaiꞌniꞌa mone. ‘Nagayama hugahue.’ huꞌna hisua yafena ‘Ohuo.’ hutama nehao? Nagaya vayaꞌma kauva yafe tamaipa haviya nehao?” huno hu-maine.
MAT 20:16 Yisasiꞌa mage hie “Nagaya aniꞌa hugahue. Haenagalafa mainesaya veala hagoteꞌya maigahae. Hagoteꞌya mainesaya veala haenagalafa taviꞌya maigahae.” huno hu-maine.
MAT 20:17 Yelusalemu haigahe katega neꞌuno Yisasiꞌa tuelufuꞌa (12) anagaꞌamogamina amahaote amavaleno moma-teteno mage huno hie “Haviho tagaya Yelusalemu haisunageꞌya ikapinagati emainoa kanoa vayaꞌmo natenea kanomonia nagaila nagesi hinageꞌya mono note kava vayaꞌmoꞌyaene kahegi kema havilinaya anagaꞌene kame vayaꞌmogami amayapi navaleꞌya na-teteꞌya ‘Haegeno falino.’ huꞌya hugahae.
MAT 20:19 Yuta vea omainaya vayate navaleꞌya momamisageꞌya nagaye hisifa kea hu-nateꞌya hu-haviya hu-na-teteꞌya hegi kaꞌyoteti nahaeteꞌya yafaga yosale nili nahaeꞌya asaisageꞌna faligahue. Falisugeꞌya he-vai-natesageꞌna tole yupa komufi maiteꞌna tagufa (3) kanale fali-mainesufitila Anumaya Kotiꞌa ali he-ti-na-tegahie.” huno hu-maine.
MAT 20:20 Sepetina aꞌamoꞌa netalamaꞌaene Yisasite eꞌya ani aꞌmoꞌa nago yafe havigegahe aiyafi aleꞌya meye-maine.
MAT 20:21 Aye-mainegeno Yisasiꞌa mage huno havige “Naꞌa hu-gatesue?” huno higeno mage huno hie “Kava yagaisana kumate umainesanageꞌana mani tole neꞌnimogania kavate maineꞌana nagoꞌmoꞌa tamaga kayatega maisigeno nagoꞌmoꞌa hauga kayatega maisie.” huno havige.
MAT 20:22 Havigegeno Yisasiꞌa mage huno netalamaꞌamogania hana-paiye “Nahavi-gea yana ohavinaꞌe. Falisua yana satuꞌage hu-mainea timo avamete ti hanea keꞌayopiti negahugi tanakaya kanale negaꞌo?” huno higeꞌana “E, tokiyatiꞌa haneanagitaꞌa negahuꞌe.” huꞌana haꞌe.
MAT 20:23 Haꞌageno mage huno hie “Tamage satuꞌage hu-mainea tina negaꞌanagi ala vaya mainelega tamaga nayategaene hauga nayategaene siale maisaya yana nagaiꞌni yana omalenegi Nenafaꞌa ani yana nagoꞌa vayafe ago talo tala huno fatago hu-ma-tene.” huno hie.
MAT 20:24 Higeꞌya teniꞌa (10) anagaꞌamoꞌya ani kea haviteꞌya ani kanolafe amaipa haviꞌya haviya hu-na-tenae.
MAT 20:25 Yisasiꞌa “Nagaitega eho.” huno higeꞌya ageno mage huno hie “Ma mopale ala kava vayaꞌmoꞌya ‘Tusiꞌa ala vaya mainone.’ huꞌya Yuta vea omainaya veafe ke amama-kiꞌya aliꞌya ke hu-ma-teꞌya kava vayaꞌmogami avamete nehae.
MAT 20:26 Naꞌa nehayanagi tamakaya ani kavala ohiho. Tamakaipina ‘Nagi hanea kanoma maigahue.’ huno hisia kanomoꞌa aliꞌya kanotami maino.
MAT 20:27 ‘Uhagoteꞌna maigahue.’ huno hisia kanomoꞌa mone oꞌali aliꞌya kanotami maino.
MAT 20:28 Nagaya ikapinagati emainoa kanoa vayaꞌmo natenea kanomoꞌna vayaꞌmoꞌya naya huꞌya kanaleꞌya hu-na-tesaya yafe omenogi nagaya amaya huꞌna aliꞌya kanoꞌami maisua yafe emainoanagiꞌna mukiꞌa veaꞌmoꞌya kefo yama hageno ai-gagi-ma-tenea yapiti kalu he-ma-tesua miya atalesua yafe faligahe emainoe.”
MAT 20:29 Yisasiꞌa agaiꞌaenema tokaeꞌya nemaiya anagaꞌmoꞌya Yeliko kumala ataleꞌya ugahe hageꞌya kasagoꞌya veaꞌmoꞌya amakave umaine.
MAT 20:30 Neꞌvageꞌana tole anaulaga asu hu-mainea kanolamogania kate mopale mainanageꞌya “Yisasiꞌa tanakaseno neꞌvie.” haya kea haviteꞌana ala kegefafiti mage huꞌana haꞌe “Anumayamogae, Tevitina aginagomogae, taꞌagaila kahauna hu-laꞌato.” huꞌana haꞌe.
MAT 20:31 Haꞌageꞌya umainaya veaꞌmoꞌya kenama-kiꞌya “Ke ohutana maiꞌo.” huꞌya hayanagi nagoꞌene ala kefiti keha keha haꞌe “Anumayamogae, Tevitina aginagomogae, kahauna hulaꞌato.” huꞌana keha keha haꞌe.
MAT 20:32 Haꞌageno Yisasiꞌa haviteno aupaꞌa anile heti-maineno “Naꞌa hu-lana-tesue hugetana nehaꞌe?” huno hie.
MAT 20:33 Higeꞌana “Museka nehuꞌagi taꞌagaya etetaꞌa taꞌaulaga agesuꞌe hutaꞌa nehuꞌe.” huꞌana haꞌe.
MAT 20:34 Haꞌageno Yisasiꞌa kalagi ai-na-teno anaulagale aya malegeꞌana aupaꞌa anaulaga neꞌageꞌana Yisasi akave vaꞌe.
MAT 21:1 Yelusalemu aupaꞌa uvaꞌyi hugahe Petafasi umainae. Petafasi kumala Olivi yosa hanea agoꞌyamona agegayalega hanegeno Yisasiꞌa agaiꞌaenema tokaeꞌya nemaiya anagapiti tole kanolana hu-na-teno mage huno hana-paiye “Atu kumate utana aupaꞌa hosi kana afumo agia tokigi ani tokimona itaꞌamoꞌene nafaꞌneꞌaene aye-tenayanagitana agegaꞌe. Agetetana kalu hetana avaletana male eꞌo.
MAT 21:3 Nagoꞌa vayaꞌmoꞌyama tanahavi-gesagetana mage hutana hiꞌo ‘Kava kanotimoꞌa nago aliꞌya aligahe higetaꞌa neꞌoꞌe.’ hutana hama-paisaꞌageꞌya aupaꞌa lanamigahae.” huno hie.
MAT 21:4 Hiana ani yupama haya kavala Anumaya Koti aune kanomoꞌa nayoma hu-mainea kemoꞌa agola falote huno tamage hie. Mage huno kae-maleneane
MAT 21:5 Yelusalemu veaꞌmogamina mage huka hama-paiyo “Agegeho menia tamakaite kava yagai-lama-tesia kanoa augafa alino ohaino hosi kana afumo agia tokimo nafaꞌnemo agupifi maiteno eneꞌe.” huno kae-maleneane.
MAT 21:6 Tole Yisasiꞌene tokaeꞌana nemaiꞌa kanolana uꞌana Yisasiꞌma hana-paiya kea mo haꞌe.
MAT 21:7 Ani hosi kana afumo nafaꞌnene itaꞌamoꞌene Yisasitega anavaleꞌana kenaꞌania anaugafaleti hateꞌana ani afumo agupile yakai-malaꞌageno Yisasiꞌa anile haino maine.
MAT 21:8 Haino maiteno neꞌegeꞌya mukiꞌa veaꞌmoꞌya “Ala kano neꞌe.” huꞌya nagoꞌamoꞌya amaugafaleti kenaꞌamia hateꞌya visia katela yakaiteꞌya yosa akopa kofa huꞌya katela yakai-tenae.
MAT 21:9 Hagoteꞌya vaya veaꞌmoꞌyaene akave aya veaꞌmoꞌyaene mage huꞌya hae “Taugafa ali-gatisana kanoa Teviti aginagomogae kanale ya huka neꞌane. Anumayamo aliꞌya aligahe hanageno hu-ga-tenea kanoa Anumaya Kotiꞌa kanale manu kamino kaya hu-maine. Anafinaga mainea Anumaya Kotiꞌa taugafa ali-gatisiafe musena hisune.” huꞌya hae.
MAT 21:10 Yisasiꞌa Yelusalemu hai-falegeꞌya anile mainaya veaꞌmoꞌya atali talu nehuꞌya mage hae “Mani kanoa ta neꞌe?” huꞌya havigae.
MAT 21:11 Nehageꞌya alitalu hu-mainaya veaꞌmoꞌya mage huꞌya hae “Mani kanoa Nasaleti Yisasiꞌe Kalili kotegati emainea aune kano neꞌe.” huꞌya hae.
MAT 21:12 Yisasiꞌa ala mono nopi hai-faleno ageana ani nopi mainaya veaꞌmoꞌya monehe ke huꞌya neꞌaliya veaꞌnene afaꞌa miyama nehaya veaꞌnene “Mai haleho.” huno nehuno vayaꞌmoꞌya alu kote nehanea monea neꞌaliꞌya ani kotegama nehanea monea neꞌamamiya veaꞌmogami folamoa ali-talegeno aige helafige hie. Higeno kugofa kana nama miya nehaya veala ani mono nopi mopale mainaya sipa aniꞌa huno ali-talegeno ai-helafi-lavigeno amanati-tale-tene.
MAT 21:13 Mage huno hie “Anumaya Koti autaꞌmafina mage huno kae-maleneane ‘Nagai nona mukiꞌa veaꞌmoꞌya Anumaya Koti agi ayeꞌya nunamu hisaya no hane.’ huno kae-maleneanagi tamakaya musufa yama nehaya kava hugahe ma nopina emainae.” huno hie.
MAT 21:14 Yisasiꞌa ala mono nopi mainegeꞌya nagoꞌa amaulaga asu hu-mainea veaꞌnene amaiya avayu hu-mainea veaꞌnene agaite ageno ani kaliꞌamia alino kanale hu-ma-tene.
MAT 21:15 Alino kanale hu-ma-teanagi ala mono note kava vayaꞌene kahegi kema havilinaya anagaꞌene mono nopi mainaya nafaꞌneyagamoꞌya Yisasifena “Teviti nafaꞌnemogae, taugafa ali-gatigahe hu-ga-tenea kanomogae.” huꞌya kema haya kenefena Yisasiꞌma kanale auꞌava yama hia yafeꞌene haviꞌya amaipa haviya hu-tenae.
MAT 21:16 Amaipa haviya huteꞌya Yisasifena mage hae “Kagaya mani kema haya kea havilinano?” huꞌya havigageno Yisasiꞌa mage huno hie “E, tamakaya Anumaya Koti avona hapalitama ohavinao? mage hu-maineane ‘Anumaya Kotiga osi nafaꞌneyagaene nute nafaꞌnemogami amavayafitila kagai kagia kanaleꞌya huꞌya alisaga hisayafe hu-ma-tenane.’ huno kae-maleneane.” huno hu-maine.
MAT 21:17 Mani kea huteno ala kumatetila ataleno ani kegela Petani kumate mo faene.
MAT 21:18 Faeteno kotigeno Petania neꞌataleno Yelusalemu ugahe neꞌvigeno Yisasina aga-te-maine.
MAT 21:19 Aga-tegeno ka haigilega nagola fiki yosa hanegeno ageteno ani yosa aepale mogeana alagaꞌa omalegeno haisaꞌage hanegeno mogeteno Yisasiꞌa ani yosahe mage huno hie “Namo yosa hetika maiyo. Agola kagai kaugafafitila nagola alaga falote ohisie.” huno higeno aupaꞌa fayo-te-maine.
MAT 21:20 Yisasiꞌaenema tokaeꞌya nemaiya anagaꞌmoꞌya ageteꞌya tusiꞌa amamaꞌyo aigeꞌya mage huꞌya hae “Naꞌa higeno ani fiki yosamoꞌa aupaꞌa fayo-nelie?” huꞌya havigae.
MAT 21:21 Hageno Yisasiꞌa mage huno hama-paiye “Lamage huꞌna tamaha-nepauve Anumaya Kotifena tole lamakesa ohavitama ‘Mukiꞌa yama hisanana kanalelageka hateꞌasine.’ hutama tamakupi maletama tametiti hisayana fiki yosama hu-toa kavaꞌene nagoꞌa kavaꞌenena hugahae. Ma agoꞌyamofena ‘Kofa hu-lavika ala ti kotumo amuꞌnopi mo hetika maiyo.’ hutama hapaisagenoꞌa ketamia akave maleno ugahie.
MAT 21:22 Mukiꞌa yafema ‘Anumaya Kotitega havigesunana kanaleꞌya huno tamigahie.’ hutama tamakupi maletama tamametiti hisayana afaꞌa amamigahie.” huno hie.
MAT 21:23 Yisasiꞌa ala mono nopi umaineno alitalu huꞌya maiya vayala hu-mave-neligeꞌya mono note kava vayaꞌmoꞌyaene ala vayaꞌene agaitega mage huꞌya me hae “Hana augafa ala kanomo hu-gategeka mani kavala menehane? Tokiya yakaꞌa ta kamine?” huꞌya havigae.
MAT 21:24 Havigageno Yisasiꞌa mage huno hie “Nagaya aniꞌa huꞌna nago yafema tamaha-vigesugetamama naha-paisageꞌnahena ala kanomo hu-na-tegeꞌna emainoa kanomo agia tamaha-paigahue.
MAT 21:25 Yoniꞌma tima fale-ma-tenea yana Anumaya Koti hu-tegeno ani kavala me-nehifi afa vayaꞌmoꞌya hu-tageno tina me fale-mateneo? Hu-falote hutama naha-paiho.” huno hu-maine. Higeꞌya “Naꞌa maꞌa hugahune.” huꞌya mohu mehu huteꞌya mage hae. “Anumaya Koti hu-tegeno emaine.” huta hisunagenoꞌa Yisasiꞌa “Naꞌa higetama agai kea tamakupina nomalae?” huno hugahie.
MAT 21:26 Hugahiafe tagaya “Afa vayaꞌmoꞌya hutageno emaine.” huta hisunageꞌyahena mukiꞌa veaꞌmoꞌya “Yoniꞌa Anumaya Koti aune kano maine.” huꞌya ago havimainaya yafe ali haviya hu-la-tegahae huꞌya mohu mehu nehae.
MAT 21:27 Huteꞌya Yisasifena kenonaꞌa mage huꞌya hae “Tapiga hu-tene? Tagaya ohavinone.” huꞌya hageno Yisasiꞌa mage huno hama-paiye “Nagaya aniꞌa huꞌna hana kanomo hu-na-tegeꞌna emainoe huꞌna tamaha-opaigahue.” huno hu-maine.
MAT 21:28 Na tamakesa nehaviye? Nago kanomoꞌa tole neꞌnafaꞌneꞌa mainaꞌanagino neꞌanafaꞌa hagote nafaꞌneꞌahe mage huno mo hie “Nafaꞌneꞌnimogae meni yupa nofi alagamo hoyafi aliꞌyana molio.” huno hapaiye.
MAT 21:29 Higeno nafaꞌneꞌamoꞌa mage huno hie “Oꞌugahue.” huno huteno haenagaꞌa agu ai-yahae huno aliꞌyana moli-maine.
MAT 21:30 Neꞌanafaꞌa haenaga nafaꞌneꞌahena ani ke huno hapaigeno mage huno hie “Nagaya moligahue.” huno huteno oꞌune.
MAT 21:31 Hana nafaꞌnemo nefa kea ali hipoꞌya hu-maine? huno hama-vi-gegeꞌya “Hagote nafaꞌnemoꞌe.” huꞌya hageno Yisasiꞌa mage huno hie “Tamage-lafa huꞌna tamaha-nepauve musufayama nehuꞌya vaya amaugafaleti takesi mone ali-liteꞌya nehaya vayaꞌene moli hu-liteꞌya nehaya aꞌneyagaene hagoteꞌya tamakaseꞌya Anumaya Kotifena ‘Kava yagai-lato.’ huꞌya nehae.
MAT 21:32 Yoniꞌa hu-haleno huno fatago hutama maisaya kaana tamave-lianagi tamakaya agai kea havitama tamakupi maletama tamametitia ohunagi musufayama nehuꞌya vaya amaugafaleti takisi mone ali-liteꞌya nehaya vayaꞌene moli hu-liteꞌya nehaya aꞌnene Yoni kea haviꞌya amakupina malenae. Amakupi malagetama tamakaya agetetama haenagaꞌa kefo yatamihena tamaipa aiyahae hutama tamakuꞌa oꞌamitama agai kea tamakupina omalenae.”
MAT 21:33 Yisasiꞌa “Nagola avame kea haviho.” huno mage huno hama-paiye Nago kanomoꞌa vaini nofi alagamo hoya kali-maleteno kegiꞌya hu-gove hu-maleteno ani alagayagama vaiteno aye-latigeno timaꞌamoꞌma lavisia komua kafiteno yagainoꞌma nemaiya nona anafi ki-maleteno noꞌagea vayafe “Etama hoyaꞌnifina yagaitama maineho. Ani nofiꞌmo alagafitila ali fako hutama nagoꞌa aliho.” huno hu-ma-teteno alu kotega umaine.
MAT 21:34 Umainegeno afuma nelea kanafina ani hoyamona nefaꞌa nagoꞌa aliꞌya vayala hu-ma-tegeꞌya kava vayatega nagoꞌa vaini nofi alaga aligahe umainae.
MAT 21:35 Vageꞌya hoyale kava vayaꞌmoꞌya ani vayala amatafa huꞌya nago kanoa kaꞌyo amiteꞌya nago kanomona tavata haeteꞌya nago kanomona yafa kaꞌyoteti hae-mainae.
MAT 21:36 Hamayageꞌya utageno hoyamona nefaꞌa eteno nagoꞌa kasagoꞌya aliꞌya vayaꞌa hu-ma-tegeꞌya vayana hoyaleꞌma kava yagai-mainaya vayaꞌmoꞌya ani kavakeꞌya hu-ma-tenae.
MAT 21:37 Hu-ma-tageno hoyamona nefaꞌa eteno agaiꞌa nafaꞌnea hu-tegahe mage huno hie “Nafaꞌneꞌnimo kea havigahae.” huno hu-teno hu-tegeno ani hoyalega umaine.
MAT 21:38 Vigeꞌya ani hoyafima kava vayaꞌmoꞌya ageteꞌya mage huꞌya hae “Mamona mani hoyamona nefa nafaꞌne. Nefaꞌma falisigenofena mani nafaꞌnemoꞌa hoyaꞌa aligahianagita agaila ago haegetao. Haesunageno falisigeno mani hoya tagai ya hapaegahie.” huꞌya hae.
MAT 21:39 Huteꞌya avaleꞌya hoyafinagatila ai-halatu huꞌya malaga hagaꞌyu hu-taleteꞌya haeyageno fali-maine huno hie.
MAT 21:40 Huteno mage hie “Naꞌa hayanagi hoyamona nefaꞌa naꞌa hu-ma-tegahie?” huno hama-vigegeꞌya mage huꞌya hae “Eteno hoyaꞌafima kava yagai-mainaya vayala tavata me-hamaesigeꞌya faligahae. Fali haꞌno hisageno alu vayafe ‘Hoyaꞌnifina kava me yagaiho.’ huno hugahie.” huꞌya hu-mainae.
MAT 21:42 Hageno Yisasiꞌa mage huno hama-paiye ani yafena Anumaya Koti avopina ago hapali-mainao? Mage huno hu-maineane “Vayaꞌmoꞌya yafa noma kigahena nago yafafena ‘Haviya hu-maine.’ huꞌya atalenayanagi haenagaꞌa ani yafamofena ‘Tusiꞌa kanale yafane.’ huꞌya nomo aye-tagenale malenae. Anumayamoꞌa ani avamete hu-mainegeta ageteta tusiꞌa kanaleꞌyanagino tamaꞌyo aiya kava nehie huta nehune.” huno kae-maleneane.
MAT 21:43 Kae-malenegi mukiꞌa veamoꞌya ani yafateꞌma asaga hu-lavisayana amaugafamoꞌa atalaga huno haviya hu-lavigahianagi ani yafamoꞌa vaya amaugafaleꞌma asaga hu-lavisiana ai-latapeno ai-talaga talago hu-talegahie. Naꞌa huyafe tamaha-nepauve Anumaya Koti kava yagai-mainea yana tamayapitila tamaha-faleno alu veaꞌmogami amayapi malegahie. Kanale alagaꞌma ayesaya veaꞌmogami amayapi malegahie huno hie.
MAT 21:45 Higeꞌya mono note kava vayaꞌene Falasia vayaꞌene haviteꞌya “Tagaife mani avame kea nehie.” huꞌya havimainae.
MAT 21:46 Haviteꞌya “Menia avaleta kina nopi ategahune.” huꞌya hayanagi veaꞌmoꞌya Yisasife “Aune kano maine.” huꞌya haya yafe vaya amauhe koli huꞌya atalenae.
MAT 22:1 Yisasiꞌa nagoꞌene mukiꞌa vayafe avame kea mage huno hie Anumaya Koti kava yagai-mainea kumate maꞌa hu-maine nagola sauve kanomoꞌa agaiꞌa nafaꞌnemoꞌa a aligahe higeno nefaꞌa ala kave talo tala hugahe hie.
MAT 22:3 Agaiꞌa aliꞌya vayala hu-ma-tegahe mage huno hie “Kema hu-ma-tenoa vayatega utama hama-paisageꞌya ani imuma ki-maloa kavela me nesae.” huno hu-ma-tegeꞌya uꞌya mo hama-paiyana ani vayaꞌmoꞌya imulena omesaya ke hae.
MAT 22:4 Hageno eteno nagoꞌene alu aliꞌya vayaꞌa hu-ma-teno mage huno “Tamakaya utama kema hu-ma-toa veafe mage hutama hama-paiho Tamakaya haviho nagaya ve pulamakaene tali oꞌvai afuꞌniene ago heꞌna mukiꞌa yana ago talo tala hu-malenogi tamakaya a alisia imule eho.” huno hie.
MAT 22:5 Higeꞌya ani aliꞌya vayala uꞌya mani kea mo hama-paiyanagi ani veaꞌmoꞌya ohavisaya ke huꞌya ataleꞌya vageꞌya nagoꞌa veala hoyaꞌamilega vageꞌya nagoꞌa veala mone aliꞌyaꞌamile vageꞌya nagoꞌa vayaꞌmoꞌya ani aliꞌya vayala amatafa huꞌya hamayageꞌya fali-mainae.
MAT 22:7 Naꞌa hageno sauve kanomo aipamoꞌa haviya higeno agaiꞌa ati vayaꞌa hu-ma-tegeꞌya uꞌya mo hamaeꞌya haꞌno hu-taleteꞌya no kumaꞌamia kaeꞌya haꞌno hu-talenae.
MAT 22:8 Hu-talageno ala sauve kanomoꞌa aliꞌya vayaꞌahena mage huno hama-paiye “A alisia imua ago kiꞌna talo tala hu-malogi ‘Eho.’ huꞌnama hu-ma-toa veala amakaiꞌamia kanale huꞌya omesaya avamete hu-mainae.
MAT 22:9 Naꞌa hu-mainagi tamakaya kamo avayaleꞌma momakesaya veafena ‘A alisia imule eho.’ hutama hiho.” huno hie.
MAT 22:10 Higeꞌya aliꞌya vayaꞌmoꞌya anima katega momakaya veala haviya hu-mainaya veaꞌnene kanale veaꞌnene amavaleꞌya melitalu hageno mukiꞌa sauve kanomo nafaꞌnemoꞌma aꞌma alisia imulela ani nopina me hiya hae.
MAT 22:11 Hageno sauve kanomoꞌa amakegahe ani nopi haino mogeana nago kanomoꞌa aꞌma alisia kanaleꞌma fai-neꞌaliya augafa kena fai-oꞌalinegeno moge-maine.
MAT 22:12 Mogeteno ani kenama fai-oꞌalinea kanohena mage hie “Nenafugae naꞌa higeka a alisia kanaleꞌma nefaiya kena ofaika ma nopina emainane?” huno havigegeno ani kanomoꞌa kea ohuno maine.
MAT 22:13 Afaꞌa maigeno sauve kanomoꞌa agaiꞌa aliꞌya vayafe mage huno hama-paiye “Aiya ayate nofi kitetama asaga hutama haniꞌyapinaga malaga hagaꞌyu hu-talegeno avi-neꞌateno avekemo nehinageno agaiꞌa augafahe kalagi aino.” huno hie.
MAT 22:14 Anumaya Kotiꞌa kasagoꞌya veafe kea hianagi mukiꞌa veala omageꞌya nagoke nagoke huyo-gi-malenea veaꞌneꞌage ehai-nefalae.
MAT 22:15 Falasia vayaꞌmoꞌya neꞌuꞌya “Hanaꞌa huta Yisasiꞌma hisia keletila atafa hisune?” huꞌya hu-mainae.
MAT 22:16 Huteꞌya keꞌamima nehaviya vayaꞌene Heloti vayaꞌene Yisasite hu-ma-tageꞌya ani vayaꞌmoꞌya mage huꞌya mo hae “Humave-nelina kanomogae tagaya havunana kagaya tamageꞌage kano mainane. Kava vayaꞌene afa vayaꞌenefena kagesa ohavika nagoke kate tamagegeꞌya nehuka Anumaya Koti kea hama-nepainane.
MAT 22:17 Nagi takisi he yatela kava kanoa Sisana kanale amigahuno ifi oꞌamisune? Na kagesa nehavipi? Taha-paiyo.” huꞌya hae.
MAT 22:18 Hageno Yisasiꞌa havi kavaꞌma hisaya amaku amakesa ago amaketeno “Vagala vaya mainagi amegati afa ke nehae. Naꞌa higetama nagaila aye-navataga hutama natafa hisaya yafena nahavi-negae?
MAT 22:19 Nagola takisima nehaya alaga monea alitama naveliho.” huno higeꞌya aliꞌya ave-li-mainae.
MAT 22:20 Aveligeno mage huno hie “Mani alaga monelela ta augosaene ta agiene hane?” huno hie.
MAT 22:21 Higeꞌya “Sisa augosaene agiene hane.” huꞌya hae. Hageno Yisasiꞌa mage hie “Sisana agaiꞌa yanagi agaila amiho. Nagi Anumaya Kotina agaiꞌa yana agaila amiho.” huno hie.
MAT 22:22 Higeꞌya anima kesi kateꞌma vaiyaya vayaꞌmoꞌya anima hia kehena amamaꞌyo aigeꞌya ataleꞌya umainae.
MAT 22:23 Ani kanafina nagoꞌa Satiusi vayaꞌmoꞌya* Yisasitega emainae. Ani Satiusi vayaꞌmoꞌya mage nehaya vayale “Fali-mainaya vayala eteꞌya he-otigahae.” huꞌya nehaya vayale.
MAT 22:24 Vayalegiꞌya Yisasina mage huꞌya me havigae “Humave-nelina kanomogae Moseseꞌa mage huno hu-maineane ‘Nago kanomoꞌa nafaꞌnema oꞌate kanomoꞌa aꞌama ataleno falisigenoꞌa aganaꞌamoꞌa ani aala ali-tesigeno fali-mainea kanomofe huno anonaꞌa nafaꞌnea atesie.’ huno kae-maleneane.
MAT 22:25 Seveniꞌa (7) koganamoꞌya tagaipina mainayanagino nepuꞌamimoꞌa aala ali-teneanagino nafaꞌnea oꞌate kano maineno faligeno anile aganaꞌamoꞌa aꞌamona ali-tene.
MAT 22:26 Ali-teanagi nafaꞌnea oꞌate kano maineno faligeno anile aganaꞌamoꞌa eteno ali-tene. Aniꞌa hute hute hayanagi mukiꞌa seveniꞌa (7) konagamoꞌya ani aala ali-tayanagi nafaꞌneꞌamia oꞌateꞌya afaꞌa fali-mainae.
MAT 22:27 Faltageno haenagalafa ani aala fali-maine.
MAT 22:28 Seveniꞌa (7) konagamoꞌya ani aala ali-tenayanagiꞌya fali-mainesafitiꞌma hetisaya kanafina hana kanomo ani aala alikahie?” huꞌya havigae.
MAT 22:29 Havigageno Yisasiꞌa mage huno hama-paiye Anumaya Koti kema kae-malenaya kene tokiya yamaꞌaenefena havilama hutama ohaviya yafe tamakaya havi lamakesageꞌya nehaviye.
MAT 22:30 Veaꞌmoꞌya fali-mainesafitiꞌma hetisaya kanafina nago vemoꞌa aꞌnea oꞌaligahianagi aꞌmoꞌa venena oꞌaligahie. Ensole vaya kana huꞌya maigahae.
MAT 22:31 Fali-mainaya veaꞌma he-ti-saya kea Anumaya Kotiꞌa tamakaifema hu-mainea kea avopina mage huno hu-mainea kea hapalitama ohavinao?
MAT 22:32 Mage huno hu-maine “Nagaya Anumaya Kotiꞌna Apalahamunagi Aisakinagi Yekopugami Anumaya Kotiꞌami mainoe.” huno hu-maineane. Ani anagala fali-mainayanagi “Anumaya Kotiꞌamimoꞌna mainoe.” huno hu-maineafe amaku amamemoꞌa ofalinegi afaꞌa mainae huno mani kea hu-maine.
MAT 22:33 Higeꞌya melitalu hu-mainaya veaꞌmoꞌya haviteꞌya anima hia kehena amamaꞌyo ai-mainae.
MAT 22:34 Yisasiꞌma hia kehena Satiusi vayaꞌmoꞌya kea ohuꞌya maiya yafe Falasia vayaꞌmoꞌya haviteꞌya Yisasite melitalu huꞌya mainae.
MAT 22:35 Maiya vayaꞌmogami amuꞌnopina nagola kahegi kema havilinea kanomoꞌa Yisasina aye-vataga hugahe mage huno havige.
MAT 22:36 “Hu-lave-nelina kanomogae hana kahegi kemo mukiꞌa kahegi kemona amakaseno uhagoteno tokiyaꞌage kea hane?” huno havige.
MAT 22:37 Havigegeno Yisasiꞌa mage hie “Anumaya Kotiꞌa alakamofena tusiya huno kahaino. Kaguꞌafinagatiꞌene kagu kametetiꞌene kahaino. Aliꞌyama neꞌalina himamukaene kagesama nehavina yaꞌenena ami haꞌno huka amio.
MAT 22:38 Mani kemoꞌa uhagoteno amakase-mainea ke hane.
MAT 22:39 Anileꞌma molia kemoꞌa ani kemoꞌma hia avamete hu-mainea kemoꞌa mage huno hu-maine ‘Kagaikaꞌa kaugafahema kahaisia avamete mukiꞌa veaꞌmogami amaugafahena kahaino.’ huno hu-maine.
MAT 22:40 Mukiꞌa Anumaya Koti amaune vayaꞌmogami kene Mosese kemoꞌenena ani tole kefi aepaꞌa hane.” huno hie.
MAT 22:41 Falasia vayala melitalu hageno Yisasiꞌa mage huno hama-vige “Kalaisifena naꞌane tamakesa nehaviye? Ta nafaꞌne maine?” huno higeꞌya “Teviti nafaꞌne maine.” huꞌya hae.
MAT 22:43 Hageno “Naꞌa higeno Tevitiꞌa Avamuꞌmo hapaiya ke huno Kalaisifena ‘Anumayanimogae.’ hunoꞌma hu-maineana ani kemo aepaꞌahena naꞌane hutama nehae? Tevitiꞌa mage huno hu-maineane
MAT 22:44 Anumaya Kotiꞌa Anumayanimofena mage huno hie ‘Tamaga nayatega, ala vaya mainalega hanea siale emainesanageꞌna kame vayakaꞌa kaiyafinaga ama-tesugeꞌya kagaifena ‘Ago tagasane.’ huꞌya hugahae.’ huno kae-maleneane.
MAT 22:45 Tevitiꞌa Kalaisifena ‘Anumayaniꞌa mainane.’ huno hu-maineanagi naꞌa higeno Tevitiꞌa haenagama atesia aginagomofena ‘Anumayaniꞌa mainane.’ huno hu-maineane?” huno hama-vi-ge.
MAT 22:46 Hama-vi-geanagi nago kanomoꞌa kenonaꞌa nago kea ohunegi ani kanaleti aepa heꞌya koliꞌa huꞌya nago yafena haviokenae.
MAT 23:1 Yisasiꞌa melitaluma hu-maiya vayafeꞌene agaiꞌaenema tokaiꞌya nemaiya anagafeꞌenena mage huno hie kahegi kema havilinaya anagaꞌene Falasia vayaꞌene Mosese kea huge hama-velige nehae.
MAT 23:3 Nehayanagi tamaha-paiya kea akave malegahayanagi kefo yama nehaya kavaꞌamia tamakaveꞌno hu-teho. Amakaya ala kenakea nehayanagi amakaiꞌamima haya kemona akave nomalae.
MAT 23:4 “Kahegi kea akave maleho.” huꞌya mukiꞌa veaꞌmogamina kanaꞌage yakefa amayoꞌnalela nemaleꞌya nehagi amaya hugahena nagoꞌke amakinagoa maleꞌya amaya ohageꞌya tusiꞌa kana yakefa neꞌaliye.
MAT 23:5 Mukiꞌama nehaya kavaꞌamia “Veaꞌmoꞌya tagesae.” huꞌya Anumayamo kae-malenea kea hanea keꞌayola veaꞌmoꞌya agesayafe ala keꞌayola talo huꞌya yagamusago kana huꞌya hamanile ko nefiꞌya kena atupaꞌamile ayaꞌaya konagali nofila aye-maleneꞌya hu-neꞌaliyane.
MAT 23:6 Nehuꞌya mono nopiꞌene imuleꞌene “Ala vayaꞌage nemaiya siale maigahune.” huꞌya nehae.
MAT 23:7 Vaya atagu-nefaya kumapi mo-vaiyatete nehuꞌya “Naꞌa vaya mainae huꞌya ali falu fala hu-la-tesae.” huꞌya nehayane.
MAT 23:8 Nehayanagi nagaya tamakaifena “Ala tisa kanomogae.” huꞌya ohiho. Tamakaila nagoke huge lama-ve-lige hisia kanotami nagaya mainogi tamakaya nagoke avamete mainetama nagoke konaga kana maiho.
MAT 23:9 Ma mopafi mainetama nago kanomofena “Nelafaꞌe.” hutama ohiho. Tamakai Nelamafaꞌa nagoke ikapinaga maine.
MAT 23:10 Tamakaifena nagoꞌa veaꞌmoꞌya “Kava kanotimogae.” huꞌya ohiho. Kalaisiꞌa agaiꞌage kava kanotamia maine.
MAT 23:11 Tusiꞌa ala kanoa tamakaipima mainesiana aliꞌya kanotami kana huno maino.
MAT 23:12 Nagoꞌa veaꞌmoꞌya amakaiꞌami amaugafama aliꞌya haisagenoꞌa Anumaya Kotiꞌa “Osi kano maiyo.” huno hu-tegahianagi nagoꞌa veaꞌmoꞌya “Osi kano mainoe.” huno hisigenofena Anumaya Kotiꞌa agia alisaga huno anale malegahie huno hie.
MAT 23:13 Avoꞌnio kahegi kema havilinaya anagaꞌmogatamaene Falisia vayaꞌmogatamaenena vagala vayalagi kaꞌye ho. Anumaya Kotiꞌa kava yagai-mainea yapi veaꞌmoꞌya ugahe nehayanagi “Oꞌviho.” hutama katile-neꞌamatae. Tamakaya “Ani nopi ohaigahune.” hutama haleti nagoꞌa veaꞌmoꞌya “Hai falegahune.” huꞌya haya veaꞌmogamifena “Hai-ofalegahae.” hutama katile-neꞌamatae.
MAT 23:15 Avoꞌnio kahegi kema havilinaya anagaꞌmogatamaene Falasia vayaꞌmogatamaenena vagala vayalagi kaꞌye ho. Tamakaya hagelimo agegayalegaene mopafiꞌene vai-neꞌayetama “Nagoke kanomo Yuta vayaꞌmogati mono kea havisie.” hutama huge ave-lige nehayanagi kefo yafe hu-ve-nelitama havi kapi avaletama atageno tamakayama haya kavala tamakaila tamakaseno tusiꞌa kefo yana nehianagino hani yapi tegelege nehia atafi tamakaiꞌene ugahie.
MAT 23:16 Avoꞌnio tamakaila tamaulaga asu hu-mainegetama veafena “Kaana tamave-ligahune.” hutama nehaya vayaꞌmogatama kaꞌye ho. Mage hutama nehae “Nagoꞌa veaꞌmoꞌya ‘Ala mono nomo agile hu-lokiya vaiꞌna tamagelafa nehue.’ hunoꞌma hisiana ‘Afa ke kana hu-maine.’ hutama hu-mainagi nagoꞌa veaꞌmoꞌya ‘Ani mono nopima kanileta yafatetiꞌma talo hu-malenaya yamo agile hu-lokiya vaiꞌna tamagelafa nehue.’ hunoꞌma hisiana ani kema hisia kanomoꞌa hia kea hu-lama huno hino.” hutama nehae.
MAT 23:17 Tamakaila tamaulagamoꞌa asu hu-mainegetama aifoꞌnafo vaya mainae. Na yamo ala yana hane? Ani kanileta yafateti talo hu-malenaya yano? Ifi ani mono nomoꞌa ala yakefa haneo? Aꞌao anima kanileta yafateti talo hu-malenaya yana mono nopinaga malenaya yafekeꞌya alu aotage yana hane. Naꞌa hu-maineafe mono nomoꞌa agaseno ala yakefa hane.
MAT 23:18 Tamakaya mage hutama nehae “Nagoꞌa veaꞌmoꞌya ‘Mono nopi sipi sipi heꞌya nemalaya folamo* hanea yate agi ayeꞌna hu-lokiya vaiꞌna tamagelafa nehue.’ huno hisiana afa ya kana ke nehigi hesaya yafe folamole nemalaya sipi sipihena nagoꞌa veaꞌmoꞌya ‘Agi ayeꞌna tamagelafa hu-lokiya vaiꞌna nehue.’ huno hisia kemona ani veaꞌmoꞌya hu-mainesaya kemona akave maleꞌya hiho.” hutama nehae.
MAT 23:19 Nehayanagi tamaulaga asu hu-mainea vea mainae. Na yamo ala yana hane? Anumaya Kotina sipi sipi amisaya yano ifi muse yama nemalaya folamoa ala yane? E, folamoa ala ya hane. Nagoꞌa sipi sipia ani folamole nemalayafe alu aotage sipi sipi haneanagino folamoa tusiꞌa ala yane.
MAT 23:20 Nagoꞌa veaꞌmoꞌya “Folamomo agi neꞌayone.” huꞌya hisaya veaꞌmoꞌya mukiꞌa yama ani folamoleꞌma nemalaya yafeꞌene nehae.
MAT 23:21 Nagoꞌa veaꞌmoꞌya “Ala mono nomo agi ayeꞌna hu-lokiya vaiꞌna tamagelafa nehue.” huꞌyama hisayana ani mono nomofeꞌene ani nopima mainea Anumaya Kotifeꞌene nehae.
MAT 23:22 Nagoꞌa veaꞌmoꞌya “Ikamo agile hu-lokiya vaiꞌna tamagelafa nehue.” huꞌyama hisayana Anumaya Kotina siaꞌaene ani yateꞌma mainea kanomofeꞌene nehae.
MAT 23:23 Avoꞌnio kahegi kema havilinaya anagaꞌmogatamaene Falasia vayaꞌmogatamaene vagala vayalagi kaꞌye ho. Tamakaya supu tala yaꞌene atuꞌene hefi kana yaꞌene osi osi yana alitama teniꞌa (10) haꞌya malenafiti nagoke haꞌya Anumaya Kotina neꞌamiyanagi kahegi kefina ala yamona aepaꞌa neꞌatalae. Fatago hutama kaiyeke hu-matesaya yaꞌene kayone hutama maisaya yaꞌene Anumaya Kotife havitama lamakupi maletama tamametiti hisaya yaꞌene ago neꞌatalae. Hagotetama ani aepaꞌa hanea kea hutetama anile supu tala yaꞌene atuꞌene hefi kana yaꞌene alitama teniꞌa (10) haꞌya malenafiti nagoke haꞌya Anumaya Kotima amisayana kanaleꞌya hugahie.
MAT 23:24 Tamaulaga asu hu-mai veala “Nakave eho.” hutama nehaya veaꞌmogatama tamakaya mage nehae “Osi osi havigafa nesuna tipina maineanagita onegahune.” hutama neꞌatalayanagi ala hosia nesaya tipina mainegetama netama nenakaiye.
MAT 23:25 Avoꞌnio kahegi kema havilinaya anagaꞌmogatamaene Falasia vayaꞌmogatamaene vagala vayalagi kaꞌye ho. Amega lamaugafale kava hutama masutamiene yopatamiene amega kaiyagaꞌa sese nehayanagi tamakupinaga musufa yama nehaya yaꞌene tamaugafa age lama-haꞌye nehaya yatamiene hiya hu-lama-teneanagi sesela nohae.
MAT 23:26 Tamaulagamoꞌa asu hu-mainea Falasia vayaꞌmogatama hagotetama ti kemo ayopinagaene yopamo ayopinagaene seseꞌma hisayana amega kaiyagaenena oniꞌyaꞌagela ohugahie.
MAT 23:27 Avoꞌnio kahegi kema havilinaya anagaꞌmogatamaene Falasia vayaꞌmogatamaene vagala vayalagi kaꞌye ho. Tamakaya maꞌa nehae vaya komuleꞌma mopama ayeꞌya ali-masave huꞌya ali konagali hu-malayanagi ani komufinaga vayala kasaligeno ayamufama ali yogita huno havi yama hu-lavia avamete kava nehae.
MAT 23:28 Nehayanagi tamakayaenena ani kavakeꞌya hutama mainae. Veaꞌmoꞌya amega tamaugafale nelamakeꞌya “Fatago veaꞌne mainae.” huꞌya nehayanagi tamakupinaga havigema nehaya yatamiene kefo yama nehaya yatamiene kasago hu-maine.
MAT 23:29 Avoꞌnio kahegi kema havilinaya anagaꞌmogatamaene Falasia vayaꞌmogatamaene vagala vayalagi kaꞌye ho. Anumaya Koti amaune vayaꞌene fatago kavaꞌma hu-mainaya veaꞌnenema faligeꞌya he-vai-ma-tenaya komulega tamakaya kanagune hu-maletama mainae.
MAT 23:30 Mainetama mage hutama nehae “Tagaya tototimoꞌya mainaya kanafima mainoteꞌasina Anumaya Koti amaune vayala hamaonageꞌya ofalileꞌasine.” hutama nehae.
MAT 23:31 Ani kema nehaya kemoꞌa “Amaune vayala hamayageꞌya fali-mainaya vayaꞌmogami nafaꞌneꞌamimogata mainone.” hutama nehae.
MAT 23:32 Nehayanagi tamakinagomoꞌya kefo yama hu-mainaya kavala tamakaya nagoꞌene hisageno hiya hisie.
MAT 23:33 Tamakaya osifaꞌvemogatamae. Osifaꞌveyagamo nafaꞌnemogatama Anumaya Kotiꞌa “Hanimo aguꞌafi agola tamakata aisia kumate umaiho.” huno kaiyekema hu-lama-tesiana hanaꞌa hutama faletama ugahae?
MAT 23:34 Ani yafe nagaya amaune vayaꞌene havi haviꞌyaꞌami hanea vayaꞌene hu-lama-ve-neliya vayaꞌene tamakaiteꞌma hu-ma-tesugeꞌya esagetamahena nagoꞌamogamina yafaga yosale nili hetama asaisageꞌya faligahae. Nagoꞌamogamina mono nopinaga hegi kaꞌyoteti hamaetama ali-haviya hu-matesageꞌya alu kumate kumate faleꞌya ugahae.
MAT 23:35 Hamaesageꞌya falisaya yafe ma mopafina mukiꞌa fatago veaꞌmogamina ago hamayageꞌya fali-mainaya kolamoꞌa Evoloꞌa kefo yana ohunea kanoꞌagi hagoteꞌya hayageno falitegeꞌya nagoꞌa hamaeme hamaeme ageno haꞌno higeꞌya haenagalafa Pelakia nafaꞌnea Sekalaiyana ala mono nomo kegiꞌyamo amuꞌnopi yafa folamole heti-mainegeꞌya hayageno fali-mainegi tamakaya menima mainaya veaꞌmogatama agoꞌma hu-mainaya kefo yamo anonaꞌamia aligahae.
MAT 23:36 Tamage huꞌna tamaha-nepauve ago hamayageꞌya fali-mainagi tamakaya menima mainaya veaꞌmogatama agoꞌma hu-mainaya kefo yamo anonaꞌamia tamakaya aligahae.
MAT 23:37 Vaeha Yelusalemu mainaya veaꞌmogatama tamakaya Anumaya Koti amaune vayala nehamaetama Anumaya Koti hu-ma-tegeꞌya tamakaitega aya vayala yafa kaꞌyoteti tavata hamae-mainagi nagaya mukiꞌa yupa a kokolemoꞌma nafaꞌneꞌama agekoꞌnafinaga alitaluma nehia avamete huꞌna tamakaila nagaya nagaiꞌniꞌalega alitalu hu-lama-tegahe nehugetama tamakaya “Aniꞌa kavala ohuo.” hutama nehae.
MAT 23:38 Nehagi haviho na ma mainaya kumafena Anumaya Kotiꞌa ago neꞌataleno “Aoteꞌyamaꞌae.” huno hu-maineanagitama menia nagoꞌene onagegahagi “Anumayamo aliꞌya aligahe higeno hu-tenea kanoa Anumaya Kotiꞌa kanale manua amisie.” huꞌya hisaya kanafina nagoꞌene nagaila nagegahae huno hu-maine.
MAT 24:1 Yisasiꞌa ala mono nona neꞌataleno vigeꞌya agaiꞌaenema tokaeꞌya nemaiya anagaꞌmoꞌya ayaꞌamoꞌya ala mono noꞌyaga ave-liye.
MAT 24:2 Ave-ligeno Yisasiꞌa mage huno hie “Tamakaya mukiꞌa ma noꞌyaga neꞌagao? Tamage huꞌna tamaha-nepauve ani nomo yafaꞌyaga mukiꞌa alino lagape ai-talesigeno aposi-lavigeno nago yafamoꞌa nago yafamo agupifina ai-kalo huno omaigahie.” huno hie.
MAT 24:3 Yisasiꞌa Olivi yosa hanea agoꞌyamo agegayalega haino mopale mainegeꞌya agaiꞌaenema tokaeꞌya nemaiya anagala amakaiꞌamige mage huꞌya me hae “Na kanafi ani yamoꞌa falote hugahie? Hana augafa tokiya avame yamo esana kanaene ma mopama haꞌno hisia kanaene faloteꞌma hisia yana taveligahie?” huꞌya havigae.
MAT 24:4 Hageno Yisasiꞌa mage huno hie Nagoꞌa veaꞌmoꞌya havigema tamaha-paisagetama ohavisaya yafe kaꞌye ho.
MAT 24:5 Kasagoꞌya vayaꞌmoꞌya nagai nagi ayeꞌya nagoke nagokeꞌmoꞌya “Tamaugafa ali-gatisua yafe Anumaya Kotiꞌa hu-na-tegeꞌna neꞌue.” huꞌya hisageꞌya kasagoꞌya veaꞌmoꞌya amakai kea haviteꞌya amakave malegahae.
MAT 24:6 Malegahagi “Nagoꞌa kotega kame nehae. Nagoꞌa kotega tu hugahe nehae.” huꞌya tamaha-paisagetamahena kolia ohiho. Ani yaꞌyagamoꞌa hagoteno falote hugahianagi ma mopama haꞌno hisia kanamoꞌa aupaꞌa huno falote ohugahie.
MAT 24:7 Nagoꞌa vayaꞌmoꞌya alu vayaꞌenena kamea hugahae. Ala kotega vayaꞌene nago ala kotega vayaꞌene kamea hugahae. Kasagoꞌya alu kote kotega tusiꞌa kafu nehuꞌya amakatesia kanaene falote hisigeno tusiꞌa imila aligahie.
MAT 24:8 Ani yaꞌyagamoꞌa afaꞌa aꞌnemoꞌya nafaꞌnema ategahe hageno aepa heno agatama neꞌaiya avamete kava hugahianagi haenagaꞌa tusiꞌa tamakata aisia yana falote hugahie.
MAT 24:9 Tamakaya nakaveꞌma neꞌaya yafe tamatafa huꞌya ali haviya hu-lama-teteꞌya tama-haesagetama faligahae. Nagima neꞌayaya yateti kasagoꞌya vayaꞌmoꞌya amaipa kafa he-lama-tegahae.
MAT 24:10 Amaipa kafa he-lama-tesaya yateti kasagoꞌya veaꞌmoꞌya nagaifena haviꞌya amakupi maleꞌya amametitima nehaya yana ataleꞌya nagoꞌa veala amakesi huꞌya amaipa kafa he-lama-tegahae.
MAT 24:11 Kasagoꞌya havige amaune vayaꞌmoꞌya havige hisageꞌya kasagoꞌya veaꞌmoꞌya amakai kea haviteꞌya amakave malegahae.
MAT 24:12 Kefo yama nehaya yamoꞌma ala hisigeno nagoꞌa veaꞌmoꞌya nagoꞌamimogamifema hamau amayamopafi nehamaiya yamoꞌa osi hugahie.
MAT 24:13 Osi hugahigi nagoꞌa veaꞌmoꞌya nagai kema atafa huꞌya tokiyaꞌage hume humema visageꞌnahena nagaya eteꞌnama esua kanafina nagai kema atafa hu-linesaya veaꞌmogamina Anumaya Kotiꞌa amaku amamena ali-gatigahie.
MAT 24:14 Anumaya Kotiꞌma kava yagai-mainea yafe kanale mono kea mukiꞌa ma mopafi veaꞌmogamina hama-paisageꞌya havitesageno ma mopamoꞌa haꞌno hugahie.
MAT 24:15 Yisasiꞌa mage huno hie nayoma mainea aune kanoa Tanioloꞌa tusi havi yana, ma mopa alino hagagitalesia yamoꞌa tamaꞌyo aisia kava falote hisia yafe taha-pai-maine. Anima hu-mainea kema hapalitama havisamogatama havilama hiho. Ani yamoꞌa alu aotage yapi he-ti-mainesigetama agegahae.
MAT 24:16 Agenutamahena Yutia mainesaya veaꞌmogatama tamaiyayetama agoꞌyalega faletama viho.
MAT 24:17 Nagoꞌa veaꞌmoꞌya nogatofule haiꞌya mainesaletila afenoꞌyaꞌamima alisaya yafena eteꞌya nopinaga ohaiho.
MAT 24:18 Nagoꞌa veamoꞌya hoyafinaga mainesaletila eteꞌya kenaꞌamima alisaya yafena notega oꞌviho.
MAT 24:19 Avoꞌnio ani kanafina amaipaene aꞌnene nute ani-linesaya nafaꞌnemogami itaꞌamimoꞌyaenefena tusiꞌa nahau nehie.
MAT 24:20 Nehigi nunamuna mage hutama havigeho “Tani koꞌma tisia ikateꞌene Sapati yupaenena ani yamoꞌa falote ohinageta faleta oꞌvisune.” hutama havigeho.
MAT 24:21 Ani kanafina tusiꞌa kana yamo falote hugahie. Eheꞌma Anumaya Kotiꞌa ma mopama taloma hu-malenea kanaletiꞌene meni kanafiꞌene ani avamete ala kana yamoꞌa falote ohuneane. Falote ohuneanagi tusiꞌa kana yamo ala hutesigeno haenagaꞌa aniꞌa huno falote ohugahie.
MAT 24:22 Anumaya Kotiꞌa ani havi kanama alino aupa hu-malene. Aniꞌama ohileꞌasina mukiꞌa veaꞌmoꞌya falileꞌasinagi. Anumaya Kotiꞌa haigenoꞌma hapali-ma-tenea veafe agesa havino amaugafama ali-gatisia yafe ani kanaꞌa alino aupa hugahie.
MAT 24:23 Ani kanafina nagoꞌa veaꞌmoꞌya mage huꞌya hugahae “Anumaya Kotiꞌma taugafa aligatigahie huno hutenea kanoa ma mainegi ageho. Atu mainegi ageho.” huꞌyama hisagetamahena “Tamage nehae.” hutama tamametitia ohiho.
MAT 24:24 Ani kanafina nagoꞌa havigeꞌage amaune vayaꞌene “Nagaya Anumaya Kotiꞌa tamaugafa aligatigahie huno hu-na-tenea kano mainoe.” huꞌya havigema hisaya vayaꞌenena evaꞌyi huꞌya veaꞌmogamina aye-mavataga hugahe tokiyaꞌage avame yana hugahayanagi Anumaya Kotiꞌa haꞌye higeno hapali-ma-tenea veaꞌmoꞌya ani kea ohavigahae.
MAT 24:25 Tamage ani yana falote ohunaya kanafi mani kea ago tamaha-paugi haviho.
MAT 24:26 Nagoꞌa veaꞌmoꞌya “Ani kanoa kaꞌme kotega maine.” huꞌya hisagetamahena oꞌviho. “Nopinaga maine.” huꞌyama hisagetamahena ani kea havitama tamametitia ohiho.
MAT 24:27 Ikapinagati emainoa kanoa vayaꞌmo natenea nafaꞌnemoꞌna eteꞌna esua yamoꞌa maꞌa hugahie yagema vaꞌyi nehilegati aulumaya kotino aupaꞌa mukiꞌa kotega ai-vasa nehia avamete huꞌna nagaya eteꞌna egahue.
MAT 24:28 Afuma fali-mainea kefafima hakikimoꞌya yage yage huꞌya alitaluma nehaya avamete huꞌna ikapinagati emainoa kanomoꞌna mukiꞌa veaꞌmogami amuꞌnopi egahue.
MAT 24:29 Ani havi kanamoꞌma haꞌno hisigenoꞌa yagemoꞌa hani-kinageno ikamoꞌa ai-vasa ohugahie. Kaꞌnefiꞌmoꞌa ikatetila atafai-lavigahie. Ikateꞌma hanea yamoꞌa alu kate kate huno vaiyegahie.
MAT 24:30 Ani yaꞌyagamoꞌa haꞌno hutesigeꞌna ikapinagati emainoa kanoa vayaꞌmo natenea nafaꞌnemoꞌna esua alekana yana ikate falote hisigeꞌya mukiꞌa ma mopafima mainaya veaꞌmoꞌya hamau huꞌya avi-tegahae. Ikapinagati emainoa kanoa vayaꞌmo natenea nafaꞌnemoꞌna ikapinagati siate elavisugeꞌya nagegahae. Tusiꞌa tokiya yaniꞌaene tusiꞌa hale yaniꞌaene esugetama nagegahae.
MAT 24:31 Nagetesageꞌna ensole vayaꞌnia hu-ma-tesugeꞌya ala ufe kemo nehinageꞌya yagemoꞌma tavi nefalelegatiꞌene evaꞌyi nehilegatiꞌene aluga aluga haupalegatiꞌene mukiꞌa ma mopafi nagaiꞌniꞌa nahaꞌye higeꞌna hapali-ma-tenoa veaꞌnea amavalesageꞌya aluga aluga ma mopamona atupaleti melitalu hugahae.
MAT 24:32 Yisasiꞌa nagoꞌene mage huno hie fiki yosamoꞌa nago avame yana tamave-ligahigi ageho. Ani yosamoꞌa hagoteno akopapiti agusasima ayeno amuꞌmalesigetamahena “Anuna neꞌvalea kanamoꞌa ago falote hugahie.” hutama nehae.
MAT 24:33 Naꞌa hugahianagi manima tamaha-nepauva kuguva yama agenutamahena “Yisasiꞌa esia kanamoꞌa ago aupa higeno fiate hetino maineanagino ago egahie.” hutama tamakesa havigahae.
MAT 24:34 Nagaya tamage huꞌna tamaha-nepauve meni kanafima mainaya veaꞌnea ofalinesageno ani yamoꞌa falote hugahie.
MAT 24:35 Ikaꞌene ma mopaene fanane hugahianagi nagai kemoꞌa fanane ohugahie.
MAT 24:36 Manima tamaha-nepauva kanama falote hisia kanahena nago kanomoꞌa ohavine. Ikapinaga mainaya ensole vayaꞌmoꞌyaenena ohavinae. Anumaya Kotina nafaꞌneꞌamoꞌnaenena ani kanama falote hisia kanahena ohavinoe. Ohavinogi Nenafaꞌa agaiꞌage haviline.
MAT 24:37 Nagaya ikapinagati emainoa kanoa vayaꞌmo natenea nafaꞌnemoꞌna eteꞌna esua kanafima mainesaya veaꞌmoꞌya nayoma Noaꞌma mainea kanafima mainaya veaꞌmoꞌya hu-mainaya avamete kava hugahae.
MAT 24:38 Timoꞌa yaufa hoꞌokinea kanafima mainaya veaꞌmoꞌya kavela neneꞌya tina neneꞌya nehuꞌya aꞌnema aliyamoꞌene vele uyamoꞌene mukiꞌa kanafina ani yafekeꞌya amakesa havi havi huꞌya mainageno Noaꞌa ala tipi kalefi haisaga hu-maigeno tusiꞌa lina hogino mukiꞌa ani veaꞌnea alino haviya higeꞌya agola fali haꞌno hu-mainayane. Nagaya ikapinagati emainoa kanoa vayaꞌmo natenea kanomoꞌna eteꞌna esua kanafima mainesaya veaꞌmoꞌya nayona Noaꞌma mainea kanafima mainaya veaꞌmoꞌya hu-mainaya avamete kavala hugahae.
MAT 24:40 Tamage tamaha-nepauve nagayama eteꞌna esua kanaleꞌma tole vekalatana nagola hoyafima aliꞌya neꞌalisaꞌagenofena Anumaya Kotiꞌa nagoke neꞌavaleno nagola alita-ye-talegahie.
MAT 24:41 Tole atalama tokaeꞌana aliꞌya neꞌalisaꞌagenofena Anumaya Kotiꞌa nagoke neꞌavaleno nagola alita-ye-talegahie.
MAT 24:42 Anumayatamimoꞌa evaꞌyima hisia kanahena ohavinagi tamakesa havige havige hutama kava yagaitama maiho.
MAT 24:43 Tamage huꞌna tamaha-nepauve nomona nefaꞌa musufa kanomoꞌa nomaꞌafima ehai-falesiana kegela na kanalelo huno agoꞌma havimainesiana yagaino mainageno musufa kanomoꞌa nomaꞌafina ehaino ofalegahie.
MAT 24:44 Tamakaiꞌenena talo tala hutama maiho. “Menia omegahie.” hutama hisaya kana kanoꞌale ikapinagati emainoa kanoa vayaꞌmo natenea nafaꞌnemoꞌna egahue.
MAT 24:45 Anumayamoꞌa mage huno hie aliꞌya kanoa kanale agu agesa hanea kanoa aliꞌyamaꞌale agegeno alige aligema nehia kanoa tamakaipina hanate maine? Naꞌama nehisia kanomofena kava kanomoꞌa mage huno hugahie “Mukiꞌa aliꞌya veatela yagai-maineka kavela fako huka mukiꞌa kanafina amamite amamite huo.” huno hugahie.
MAT 24:46 Hugahianagi haenagama ani ala kanomoꞌa eteno esiana hapai-mainea augafa kavaꞌma nehinunofena ani aliꞌya kanomoꞌa muse hugahie.
MAT 24:47 Tamage huꞌna tamaha-nepauve naꞌama nehisia aliꞌya kanomofena kava kanomoꞌa mage hugahie “Mukiꞌa yaniꞌa kava yagaiyo.” huno hugahie.
MAT 24:48 Hugahianagi ani aliꞌya kanomoꞌa kefo yama nehisia kanoma mainenunofena agaiꞌa agesa mage hunoꞌma havisiana “Kava kanoꞌnia menia hivi huno omegahie.” huno nehuno agaiꞌa yagai-mainesia veneꞌnegi munaꞌnegi nehamaeno ala kanomo kaveꞌene haviliꞌenena neneno aneginagi hugahie.
MAT 24:50 Ani kavala maino nehisiana “Omegahie.” huno hisia yupamo kana kanoꞌale ani kava kanoa egahie.
MAT 24:51 Enunofena ani havi kavaꞌma maino nehisia kanomona kaꞌyo kevea amiteno alino haviya hu-teteno mage hugahie “Vagala vayaꞌene amakupi haviꞌya omaleꞌya amegati nehaviya vayaꞌene maiyo.” huno hu-tesigeno visiaꞌamo anilega avia mo neꞌateno ave kemoꞌa tusiya hugahie.
MAT 25:1 Anumaya Kotiꞌma kava yagai-mainea yamo aepa hesia kanamoꞌa maꞌa hugahie Yisasiꞌa avame kea mage huno hie nago kanomoꞌa aꞌnea meni kanoꞌa ali-mainea kanoa egahe higeꞌya teniꞌa (10) vele omainaya munaꞌnemoꞌya lamuꞌamia neꞌaliꞌya katega neꞌuꞌya avalegahe umainae.
MAT 25:2 Vayana faefuꞌa (5) munaꞌnemoꞌya aifoꞌnafo hageꞌya faefuꞌa (5) munaꞌnemoꞌya kanale havi haviꞌyamia hane.
MAT 25:3 Ani aifoꞌnafo munaꞌnemoꞌya kanaleꞌya huꞌya lamua aliꞌya vayanagi ata kaesaya tina oꞌaliꞌya umainae.
MAT 25:4 Vageꞌya kanale havi haviꞌyaꞌamima hanea munaꞌnemoꞌya kanaleꞌya huꞌya lamuma hanagalisaya tina keꞌayopi taki-liꞌya lamuꞌamiene aliꞌya umainae.
MAT 25:5 Umainageno ani aꞌma alisia kanoa aupaꞌa omegeꞌya ani munaꞌnemoꞌya agava-mainageno amau lokotoko higeꞌya faeꞌya mainae.
MAT 25:6 Faeꞌya mainageno kege amuꞌnona nagola ala kemoꞌa mage huno hie “Aꞌma alisia kanoa ago neꞌegi tamakaya kategati movaletama eho.” huno hie.
MAT 25:7 Higeꞌya mani teniꞌa (10) veleꞌma omainaya munaꞌnemoꞌya hetiꞌya lamuꞌamia hanagaliꞌya talo tala hae.
MAT 25:8 Hageꞌya aifoꞌnafo munaꞌnemoꞌya kanale havi haviꞌyamima hanea munaꞌnehena mage huꞌya hae “Tagai lamumoꞌa ago asu hisia kava nehigi atama nelea tina keꞌayopitamifiti takitama tamiho.” huꞌya hae.
MAT 25:9 Hageꞌya kanale havi haviꞌyamima hanea munaꞌnemoꞌya kenonaꞌamia mage huꞌya hae “Tagaiꞌene tamakaiꞌenema aye halesuna timoꞌa kosa ohenegi tamakaya afeno nopiti mo miya hiho.” huꞌya hama-paiye.
MAT 25:10 Hageꞌya ani timaꞌa miya hugahe vageno aꞌma alisia kanoa anile egeꞌya talo talaꞌma hu-malaya munaꞌnemoꞌya agaiꞌene ala kave negahe nopinaga hai-falageno fita agola ki-malene.
MAT 25:11 Ki-malenegeꞌya haenaga aifonafo munaꞌnemoꞌya mage huꞌya me hae “Ala kanomogae ala kanomogae fita yaki-la-to.” huꞌya me hae.
MAT 25:12 Me hageno aꞌma alisia kanomoꞌa mage huno kenonaꞌamia hie “Aꞌao tamage huꞌna tamaha-nepauve no-tama-koa anaga emainae.” huno hie.
MAT 25:13 Yisasiꞌa mage huno hie “Nagayama esua yupamona kanaꞌaenena ohavinaya yafe menia kava yagaiho.” huno hie.
MAT 25:14 Yisasiꞌa Anumaya Kotiꞌa kava yagai-mainea yamoꞌa maꞌa hu-maine “Nago kava kanomoꞌa ayaꞌaya kotega ugahe nehuno aliꞌya vayaꞌamofena ke higeꞌya ageno monea ali fako huno amamite amamite hie.
MAT 25:15 Aliꞌya aepaꞌamia ageteno nago kanomona faefu tauseni kina (K5,000) amino nago kanomona tole tauseni kina (K2,000) amino nago kanomona vani tauseni kina (K1,000) amino huno amamite amamite huteno alu kotega umaine.
MAT 25:16 Umainegeno faefu tauseni kinama (K5,000) amigeno ali-mainea kanomoꞌa ani moneleti aliꞌya aligeno aꞌva monea nago faefu tauseni kina (K5,000) aliteno teni tauseni kina (K10,000) higeno ali-maine.
MAT 25:17 Ali-geno tole tauseni kinama (K2,000) ali-mainea kanomoꞌa ani moneleti aliꞌya aligeno aꞌva monea nago tole tauseni kina (K2,000) aliteno foꞌa tauseni kina (K4,000) higeno ali-maine.
MAT 25:18 Ali-geno vani tauseni kinama (K1,000) ali-mainea kanomoꞌa ani monea alino mopafi kafino kava kanomo monea he-vai-malene.
MAT 25:19 Ani aliꞌya vayaꞌmogami kava kanomoꞌa ayaꞌaya kanagefa umaiteno eteno eno mage hie ‘Monema fako huꞌna tamaminoa monea naꞌmagi mone malenae?)’ huno hama-vige.
MAT 25:20 Hama-vigegeno faefu tauseni kinama (K5,000) aminea kanomoꞌa teni tauseni kina (K10,000) alino neꞌeno mage huno hie ‘Kava kanomogae musekaꞌa nehugi faefu tauseni kinama (K5,000) naminapitila eteꞌna aꞌva monene alugeno teni tauseni kina (K10,000) hane.’ huno hie.
MAT 25:21 Higeno kava kanomoꞌa mage huno hie ‘Kagaya kanale kano maineka kanaleꞌya huka osi mone kanoꞌa kaminofitila efi efi huka aliꞌyana alinageno ala hu-maineafe ala yakefa kagaila kava yagaisanafe kamigahue. Nopinaga ehaigetaꞌa tokaetaꞌa muse hutaꞌa maiꞌano.’ huno hie
MAT 25:22 Higeno tole tauseni kinama (K2,000) aminea kanomoꞌa mage huno me hie ‘Kava kanomogae musekaꞌa nehugi kagaya tole tauseni kina (K2,000) naminapitila aꞌva monene tole tauseni kina (K2,000) higeꞌna aliꞌna neꞌoe.’ huno hie.
MAT 25:23 Higeno kava kanomoꞌa ani kanomofena mage huno hie ‘Kagaya kanale kano maineka kanaleꞌya huka osi mone kanoꞌa kaminofitila efi efi huka aliꞌyana alinageno ala hu-maineafe ala yakefa kagaila kava yagaisana yafe kamigahue. Nopinaga ehaigetaꞌa tokaetaꞌa muse hutaꞌa maiꞌano.’ huno hie.
MAT 25:24 Higeno vani tauseni kinama (K1,000) aminea kanomoꞌa eno mage hie ‘Kava kanomogae musekaꞌa nehugi kagaya keꞌage kanoa alu kanomo yana alika kaugafa hegeka omai kano mainane. Nago kanomoꞌa hoyaꞌafima kali-malenea yaꞌene alika negeka omai kano mainane.
MAT 25:25 Mainanafe kolikaꞌa huꞌna vani tauseni kinama (K1,000) naminanaꞌmaga mopafi kafiꞌna he-vaiꞌna ka-tenoanagiꞌna menia kagaikaꞌa yanagiꞌna negamue.’ huno hie.
MAT 25:26 Higeno kava kanomoꞌa ani aliꞌya kanohena mage hie ‘Kagaya havi kanoe. Feluꞌage aliꞌya kano mainane. Kagaya ago nehavine nago kanomoꞌma hoyaꞌafima kali-malenea yaꞌene aliꞌna negeꞌna omai kano mainoa yafena kagaya ago havimainano?
MAT 25:27 Naꞌa higeka monema nemalaya nopina moneꞌnima malenateꞌasina menia nagaya nagoꞌa aꞌva monene aluleꞌasine.
MAT 25:28 Vani tauseni (K1,000) kinaꞌnia hafaletama teni tauseni kinama (K10,000) malenea kanomona amiho.
MAT 25:29 Nagaya tamaha-nepauve nagoꞌa yaꞌamima hanesia veaꞌmogamina nagoꞌene amamisigeno kasago hu-ma-tegahianagi nagoꞌa yaꞌamima omalenesia veaꞌmogamina ali-linesaya yamaꞌa hamana-falegahie.
MAT 25:30 Ani havi kavaꞌma nehisia aliꞌya kanomona hani yapinaga avaletama hagaꞌyu hu-talesageno tusiya huno avia neꞌateteno avekemoꞌa hugahie.’ huno hie.”
MAT 25:31 Yisasiꞌa nagoꞌene mage huno hie Ikapinagati emainoa kanoa vayaꞌmo natenea nafaꞌnemoꞌna kava yagaigahema esuana tokiyaꞌage hale yaniꞌaene ensole vayaꞌene tokiyaꞌage hale yaniꞌaleti kava yagaisua siale maigahue.
MAT 25:32 Mainesugeꞌya mukiꞌa kotega veaꞌmoꞌya nagaite melitalu hisageꞌna sipi sipile neꞌyagaiya kanomoꞌma memene sipi sipiene ali fakoma nehia avamete huꞌna mukiꞌa veala ali fako hugahue.
MAT 25:33 Ali fako huteꞌna sipi sipiyaga tamaga nayatega neꞌamateꞌna memeyaga hauga nayatega amategahue.
MAT 25:34 Amateteꞌna ala sauve kanomoꞌna tamaga nayategama amatesua veafena mage huꞌna hugahue “Nenafaꞌa kanale manua tamaminea vealagi eho. Ma mopama taloma hu-mainea kanaleti aepa heno tamakaife huno talo tala hu-maleteno kava yagai-mainea kumatelagi emaiho.” huꞌna hugahue.
MAT 25:35 “Nagaila nagaꞌma tegetama kavela naminae. Tifema nagegetama afaꞌa naminae. Natu kanoma ogetama navaletama falu fala hu-natetama notamifina na-tenae.
MAT 25:36 Kenaꞌnima omalegetama kena fai-natenae. Kalima alugetama navaletama yagai-natenae. Kinafima mainogetama nagegahena emainayane. Naꞌa kavaꞌma hu-mainayafe talo hu-lama-tenea kumatela emaiho.” huꞌna hugahue.
MAT 25:37 Hugeꞌya tamaga nayategama fatago kavaꞌma nehaya veaꞌmoꞌya mage huꞌya hugahae “Anumayamogae na yu kagala tegeta kageteta kavela kaminone? Na yu tifena kagegeta tina kaminone?
MAT 25:38 Na yu natu kanoa evaꞌyi hanageta alita kanale huta ka-tenone? Na yu kenakaꞌa omalegeta kena kaminone?
MAT 25:39 Na yu kalia alinageta kage-mainone? Na yu kinafina mainanageta mo kage-mainone?” huꞌya hugahae.
MAT 25:40 Huꞌya hisageꞌna ala kava kanomoꞌna kenonaꞌamia mage hugahue “Tamagelafa huꞌna tamaha-nepauve tamakaya amakima omale naganaꞌnimogamima ani kavaꞌma hu-ma-tayana nagai ani kavala hu-natenae.” huꞌna hugahue.
MAT 25:41 Hugahuanagi haoga nayatega veafena mage huꞌna hugahue “Tamakaya hu-haviya hu-matenoa kefo kavakeꞌya nehaya veaꞌmogatama mai-haletama viho. Sataniꞌene aliꞌya vayaꞌaenena agola tegelege nehia atafi maisaya kumala ago talo hu-malenogi ani kumate agola umaiho.
MAT 25:42 Nagaila nagaꞌma liana kavela onaminae. Tifema nagegetama tina onaminae.
MAT 25:43 Natu kanoma ogetama navaletama falu fala hu-ona-tenae. Kenaꞌnima omalegetama kena fai-ona-tenae. Kalima alugetamao kinafima maugetamao me onagegenayane.” huꞌna hugahue.
MAT 25:44 Hisugeꞌya kenonaꞌnia mage huꞌya hugahae “Anumayamogae na yu kagala tegeta kage-mainone? Na yu tifena kagegeta kage-mainone? Na yu natu kanoa anageta kage-mainone? Na yu kenakaꞌa omalegeta kage-mainone? Na yu kalia alinageta kage-mainone? Na yu kinafina mainanageta kage-mainone? Tagayama kage-mainoteꞌasina ago kaya hu-mainoteꞌasine.” huꞌya hugahae.
MAT 25:45 Hisageꞌna nagaya eteꞌna amakaifena mage hugahue “Tamagelafa huꞌna tamaha-nepauve tamakaya amakima omalenea naganaꞌnimogamina ani kavaꞌma hu-oꞌama-tayana namona nagaiꞌene hu-ona-tenayane.” huꞌna hugahue.
MAT 25:46 Huteno kefo yama nehaya anonaꞌamia hu-ma-tenageꞌya agola amakata aisia hani yapi maisaya kumate ugahagi fatago kavaꞌma hu-mainesaya veaꞌmoꞌya ofaliꞌya agola maige maige hisaya kumate ugahae huno hie.
MAT 26:1 Yisasiꞌa mukiꞌa mani kea hu haꞌno huteno agaiꞌaenema lokaeꞌya nemaiya anagafena mage huno hie “Tamakaya ago havimainae tole kana mainesunageꞌya kafuꞌahe kafuꞌahe Anumaya Kotiꞌa taginagomogami amaugafama ali-gati-mainea kanahe* alitalu huꞌya imua kigahae. Ani imuma kisaya kanafina ikapinagati emainoa kanoa vayaꞌmo natenea nafaꞌnemoꞌnia natafa huꞌya yafaga yosale nili heꞌya nasasaigeꞌna faligahue.” huno hie.
MAT 26:3 Mono note kava vayaꞌene Yuta vayatamaene ala mono note uhagote-mainea kava kanoa, Kaiyafasiꞌe ani kanomo nopi, melitalu huꞌya mainae.
MAT 26:4 Maineꞌya mage hae “Hanaꞌa huta agesi huta Yisasina atafa huta haesunageno falisie?
MAT 26:5 Ala imuma kisaya kanafina atafa ohugahune. Atafa hisunageꞌya veaꞌmoꞌya havigu tusiꞌa ke huꞌya tu huyafenagita atalegahune.” huꞌya hae.
MAT 26:6 Yisasiꞌa Petani viana nayona fugitaya age-mainea kanomo agia Saimoniꞌe kanomo nopi umaine.
MAT 26:7 Umainegeno nago aꞌmoꞌa yafa keꞌayola alilino anileꞌma eana ani keꞌayoꞌma taloma hu-malenaya yafamo agia alapasata. Ani li keꞌayopina nagola tusiꞌa miyamaꞌa hanea masavena manaꞌage tina haneanagino Yisasiꞌa kave maino nenegeno ani aꞌmoꞌa Yisasi anupi ani masavena takino fale-tene.
MAT 26:8 Takino fale-neꞌa-tegeꞌya Yisasiꞌenema tokaeꞌya nemaiya anagaꞌmoꞌya ageteꞌya ke vaiꞌya mage hae “Naꞌa higeno mani manaꞌage masavena afaꞌa neꞌatale?
MAT 26:9 Ani masavena nago kanomoꞌma miya hileꞌasina tusiꞌa mone aliteta ani masaveteti monea afenoꞌamima omalenea veaꞌne amamuteꞌasine.” huꞌya hae.
MAT 26:10 Hageno Yisasiꞌa ani kea haviteno mage huno hie “Kea oꞌama-kitama afaꞌa ataleho. Havige nehagi nagaila tusiꞌa kanale kava hu-nena-te.
MAT 26:11 Moneꞌamima omale veaꞌmoꞌya mukiꞌa kanafina tamakaiꞌenekeꞌya maigahayanagi nagaya tamaikaiꞌenena mukiꞌa kanafina omaigahue.
MAT 26:12 Mani aꞌmoꞌa masavena naugafaleꞌma takino fale-nena-teana afaꞌa ofaliꞌna mainogeno masavema faleꞌya he-vai-na-tesaya avamete huno fale-nena-te.
MAT 26:13 Tamage huꞌna tamaha-nepauve mukiꞌa ma mopafi veapima nagaifena kanale mono kema hama-paisafina mani aꞌmoꞌma hia kavafeꞌenema hama-paisageꞌya mukiꞌa veaꞌmoꞌya agaifena amakesa havigahae.” huno hie.
MAT 26:14 Higeno Yutasi Isakaliotiꞌa Yisasina tuelufuꞌa (12) anagaꞌene tokaeno nemaiya kanogino neꞌamataleno viaꞌamo mono note kava vayate umaine.
MAT 26:15 Uvaꞌyi huno mage huno hie “Agesi huꞌna tamave-lisugetama Yisasima atafa hisayana na kano namigahae?” huno higeꞌya muse huteꞌya aupaꞌa tetiꞌa (30) siliva alaga mone aminae*.
MAT 26:16 Amigeno Yutasiꞌa vaya kulata oꞌaiya yate kesi kateti Yisasina movalesigeꞌya atafa hisaya kafe ati-ye-maine.
MAT 26:17 Hale oki kai-hamema nenaya kanamona hagote kanale Yisasiꞌenema tokaeꞌya nemaiya anagaꞌmoꞌya Yisasife mage huꞌya me havigae “Anumaya Kotiꞌa Yuta vaya amaugafama ali-ga-ti-mainea kanahe kagesa havisana kavela hana nopi mo-lalo tala hisune hunageka nehane?” huꞌya hae.
MAT 26:18 Hageno Yisasiꞌa mage huno hama-paiye “Ala kumate uvaꞌyi hutama nago kanomote mage hutama mo hiho ‘Hu-lave-nelia kanomoꞌa mage hie ‘Falisua kanamoꞌa ago aupa higeꞌna kagai nopi nagaiꞌenema tokaeꞌya nemaiya anagaꞌaene Anumaya Kotiꞌa Yuta vaya amaugafama ali-ga-ti-mainea kanahe tagesa havisuna kavela nesune huꞌna nehueꞌ huno hie.’ hutama hiho.” huno hie.
MAT 26:19 Higeꞌya agaiꞌaenema tokaeꞌya nemaiya anagaꞌmoꞌya Yisasiꞌma hama-paiya avamete huꞌya ani kavela mo-lalo tala hu-mainae.
MAT 26:20 Talo tala hu-malageꞌya yagemoꞌma tavi faleamaꞌa Yisasiꞌa tuelufuꞌa (12) anagaꞌaene kave negahe folamole mainae.
MAT 26:21 Maineꞌya kavela nenageno Yisasiꞌa mage huno hie “Tamage huꞌna tamaha-nepauve nagaiꞌenema mainafitila nago kanomoga nagesi huka nahaesana yatela vai-neꞌayane.” huno hie.
MAT 26:22 Higeꞌya anagaꞌamoꞌya amaipa haviya huteꞌya agaifena mage huꞌya havigae “Anumayamogae nagaife nehano?” huꞌya nagoke nagokeꞌmoꞌya havigae.
MAT 26:23 Havigageno Yisasiꞌa mage huno hie “Nagaiꞌenema nagoke yopafiti ayateti vayagofinoꞌma nenea kanomo nagesila huno nahaesia yatela vai-neꞌaye.
MAT 26:24 Nagaya ikapinagati emainoa kanoa vayaꞌmo natenea kanomoꞌna nagaife huꞌya Anumaya Koti avopina kae-malenaya kate ugahuanagi vayaꞌmoꞌya havisagi huno nagesi hisia kanomofena avoꞌnio nahau hanagi kagaya kaꞌyeka maiyo huꞌna nehue. Ani kanomoga itakamoꞌma okateneleꞌasina kanale hileꞌasine.” huno hie.
MAT 26:25 Higeno Yutasiꞌa agesiꞌma hisia kanomoꞌa mage huno hie “Hu-lave-nelina kanomogae nagaife nehano?” huno higeno Yisasiꞌa mage huno hapaiye “Kagaya kagaika ago hu-falote nehane.” huno hu-maine.
MAT 26:26 Kavela nenageno Yisasiꞌa kai-hame kana maya alino nunamu huno muse huteno kolite kolite huno agaiꞌaenema tokaeꞌya nemaiya anagala neꞌamamino mage huno hie “Mamona nagaiꞌni naugafagi alitama neho.” huno hie.
MAT 26:27 Nagola vaini nofi alagamo ti* hanea keꞌayola aliteno nunamu huno muse huteno amamite amamite nehuno mage huno hie “Mukiꞌamogatama neho.
MAT 26:28 Ma lina nagaiꞌa kolaniꞌae. Nahaesageꞌna falisugeno kolaniꞌamoꞌa tamakaifene huno take take hu-lavisiafe haegafa kea, Anumaya Kotiꞌene hagelafitama maisaya kea* ali fatago hugahianagino Anumaya Kotiꞌa ani kolatetifene huno kasagoꞌya veaꞌmogami kefo yaꞌamia aige-ama-teno atale-ma-tegahie.
MAT 26:29 Nagaya tamaha-nepauve menia nagaya vaini nofi alagamo tina* nagoꞌene onegahuanagiꞌna Nenafaꞌa kava yagai-mainea kumate umaineꞌna haegafa nofi alagamo tina* eteꞌna tamakaiꞌene tokaeꞌna maineꞌna negahue.” huno hie.
MAT 26:30 Higeꞌya nagola yagamea huteꞌya Olivi yosa hanea agoꞌyafi hai-mainae.
MAT 26:31 Yisasiꞌa mage huno hama-paiye “Tamakaya mukiꞌamogatama meni kegela nagaiꞌma hu-na-tesaya kavafena nagaifema havitama tamakupi maletama tamametiti nehaya yana ataletama asaga hu-lavisagi nayona ani yafena mage huno kae-maleneane ‘Nagaya sipi sipi kava kanoa haesugeꞌya sipi sipiyaga atagufeꞌya faleꞌya ute ete hugahae.’ huno kae-maleneane.
MAT 26:32 Kae-maleneanagi fali-mainesufiti Anumaya Kotiꞌa alino he-ti-na-tesigeꞌna Kalili uhagote-lama-teꞌna ugahue.” huno hie.
MAT 26:33 Higeno Pitaꞌa kenonaꞌa mage huno hie “Hu-ga-tesaya yafema mukiꞌa anagaꞌmoꞌya kagaifema haviꞌya amakupi maleꞌya amametiti nehaya yama ataleꞌyama falesageꞌnahena nagaya mukiꞌa kanafina kataleꞌna ofalegahue.” huno hie.
MAT 26:34 Higeno Yisasiꞌa kenonaꞌa mage huno hie “Pitaga tamage kaha-nepauve meni kegela kokolemoꞌa agea oꞌainesigeka tagufa (3) kanale ‘Nagaya oꞌagenoa kanoeꞌ huka avane hugane.” huno hie.
MAT 26:35 Higeno Pitaꞌa mage huno hie “Kagaiꞌene nahaesageꞌna faligahuanagiꞌna kagai kagia avanena huꞌna ali fala okigahue.” huno higeꞌya mukiꞌa agaiꞌaenema tokaeꞌya nemaiya anagaꞌmoꞌya nagoke kegeꞌya hu-mainae.
MAT 26:36 Yisasiꞌa amakaiꞌene viaꞌamo Ketesemani uvaꞌyi huteꞌya Yisasiꞌa agaiꞌaenema tokaeꞌya nemaiya anagafena mage huno hie “Tamakaya male maineho. Nagaya amule visuaꞌamoꞌna nunamuna huꞌna havigegahue.” huno hie.
MAT 26:37 Pitaꞌene Sepeti nafaꞌnetalaꞌene amavaleno viana aipamoꞌa kanaꞌage higeno haumanamoꞌa halegeno kasageke nehie.
MAT 26:38 Huteno mage huno hama-paiye “Nahau nayamopamoꞌa tusiꞌa kanaꞌage nehigeꞌna ago falisua kava nehugi male mainetama kava yagaitama maineho.” huno hie.
MAT 26:39 Osiꞌa viaꞌamo Anumayamotega ke huno havigegahe mopafi agoꞌya moyeno maineno nunamuna mage huno havige “Nagaya ago falisua kava nehugeno ani havi kanamoꞌa satuꞌage hu-mainea tima hanea keꞌayola kahaisigekahena ani keꞌayola naha-fale-talo. Nagai nagu nagesa akave omaleka afaꞌa kahaisia yana huo.” huno havige.
MAT 26:40 Havigeteno momakeana agaiꞌaenema tokaeꞌya nemaiya anagaꞌmoꞌya faeꞌya mainageno Pitafena mage huno mo hie “Vae kagaya aupa yage kanoꞌa kava oꞌyagaika mainano?
MAT 26:41 Sataniꞌa aye-lama-vataga hisigeno tamakuꞌamoꞌa ‘Ohugahue.’ huno tokiyaꞌage hugahianagi amega tamaugafamoꞌa tokiyaꞌa afaꞌa omaleneanagino ‘Hugahue.’ huno hisia yana hugahigi Satani kema ohavisaya yafena kava yagaitama mainetama Anumayamotega ke hutama havigeho.” huno hama-paiye.
MAT 26:42 Huteno amataleno viaꞌamo tole (2) kanale nagoꞌene nunamuna mage huno havige “Nenafagae nagaya falisua kava hugeno ani havi kanamoꞌa satuꞌage hu-mainea tima hanea keꞌayola kahaisigekahena ani keꞌayola naha-fale-talo huꞌna nehuanagi afaꞌa kahaisia yana huo.” huno havige.
MAT 26:43 Havigeteno eteno momakeana amau tokotoko higeꞌya faeꞌya mainae.
MAT 26:44 Faeꞌya mainageno tagufa (3) kanale nunamuna nagoꞌene ani avamete huno havige-maine.
MAT 26:45 Havigeteno Yisasiꞌa agaiꞌaenema tokaeꞌya nemaiya anagate eteno mage huno mo hama-vige “Mai-falu hutamage faetama mainao? Haviho kanaꞌniꞌa ago falote nehie. Nagaya ikapinagati emainoa kanoa vayaꞌmo natenea nafaꞌnemonia nagesi huno navaleno kefo yama nehaya vayaꞌmogami amayapi natesigeꞌya nahaegahe nehae.
MAT 26:46 Mukiꞌamogatama hetitama vigetao. Ageho nagesi huno nahaesia kanoa ago neꞌegi vigeta mogamano.” huno hu-maine.
MAT 26:47 Ani kea nehigeno Yutasiꞌa tuelufuꞌa (12) anagaꞌaene tokaeno nemaiya kanomoꞌa evaꞌyi higeꞌya agaiꞌene mukiꞌa vayala, mono note kava vayaꞌene nagoꞌa Yuta vayatamaenema hu-matea vayaꞌenena, ayaꞌaya naepege naepege huꞌya muki kaꞌyoꞌene aliꞌya emainae.
MAT 26:48 Agesi huno Yisasima haesaya avame yama huno amavalea kanomoꞌa ani vayafena mage huno hama-paiye “Atakoꞌma hisua kanoa haesaya kano mainegi atafa hutama tokiyaꞌage hutama avaletama viho.” huno hama-paiye.
MAT 26:49 Hama-paiteno Yutasiꞌa aupaꞌa Yisasite viaꞌamo mage hie “Hulave-nelina kanomogae.” nehuno atako hu-maine.
MAT 26:50 Atako higeno Yisasiꞌa mage huno hie “Nenafugae hugahema esana yana aupaꞌa huo.” huno higeꞌya ani vayaꞌmoꞌya Yisasina atafa huꞌya aye-talako hu-mainae.
MAT 26:51 Atafa nehageno nagola agaiꞌaenema he-ti-maiya kanomoꞌa ayaꞌaya naepeꞌa he-vayu huno ala mono noteꞌma uhagote mainea kava kanomona aliꞌya kanoꞌamona agesa ai-fakali-talegeno asaga hu-lavi-maine.
MAT 26:52 Ai-fakali-talegeno Yisasiꞌa ani kanomofena mage huno hie “Ayaꞌaya naepekaꞌa tafugepi eteka vaiyo. Ayaꞌaya naepeleti tu hisaya vayaꞌmoꞌya ayaꞌaya naepeleti hamaesageꞌya faligahae.
MAT 26:53 Kagaya ohavinano? Nagaya Nenafategama ke huꞌna havigesuana seveti tauseniꞌa (70,000) ensole vayaꞌa nahauke heꞌya tuma hisaya yafena hu-ma-tesigeꞌya egahae.
MAT 26:54 Egahayanagi naꞌama hisagenoꞌa hanaꞌa huno nagaifena ‘Naꞌa kavala hu-tesageno faligahiema.’ huꞌya Anumaya Koti avopima kae-malenaya kemoꞌa falote huno tamagea hugahie?” huno havige.
MAT 26:55 Anileꞌma melitalu hu-maiya vayafena Yisasiꞌa mage huno hie “Tamakaya nagaifena ‘Vaya hamaeno musufaya nehia kano maine.’ hutama ayaꞌaya naepene muki kaꞌyoꞌene alitama natafa hugahena neꞌao? Nagaya mukiꞌa kanafina efi efi huꞌna tamakaiꞌene ala mono nopina maineꞌna mono kea tamaha-pauvanagi naꞌa higetama natafa ohunayane?
MAT 26:56 Ohunayanagi nayoma mainaya amaune vayaꞌmoꞌya kae-malenaya kemoꞌa falote huno tamage hisia yafe mukiꞌa mani kavala hutama natafa nehae.” huno hie. Higeꞌya mukiꞌa agaiꞌaenema tokaeꞌya nemaiya anagala neꞌataleꞌya fale haꞌno hu-mainae.
MAT 26:57 Yisasima atafa haya vayaꞌmoꞌya avaleꞌya ala mono note uhagote-mainea kava kanomo* note, Kaiyafasi note, avaleꞌya vageꞌya kahegi kema havilinaya anagaꞌene Yuta vayatamaene alitalu huꞌya mainae.
MAT 26:58 Pitaꞌa akave anatino vianagi avatela oꞌunegi ago aluꞌale umaineno ala mono note hagote kava kanomo nomo haupale uvaꞌyi huno hai-faleno maineno ati vayaꞌene mopale maineno “Yisasina hu-tesaya yana agesue.” huno umaine.
MAT 26:59 Mono note kava vayaꞌene mukiꞌa kanisole vayaꞌene Yisasiꞌma haesaya kaiyeke hu-tegahe nagoꞌa vaya “Kefo kava higeta age-mainone.” huꞌya havige hu-tesaya vayafe ati-ye-mainae.
MAT 26:60 Atiyayana omaigeꞌya kasagoꞌya vayaꞌmoꞌya havige huꞌya Yisasifena huteꞌya haenaga tole kanolatana he-tiꞌana Yisasifena mage huꞌana haꞌe “Ma kanomoꞌa mage huno hu-maine ‘Nagaya Anumaya Kotina ala mono nomaꞌa aliꞌna lagape ai-taleꞌna tagufa (3) kanale ani nona eteꞌna ki-talegahue.’ huno hu-maine.” huꞌana haꞌe.
MAT 26:62 Haꞌageno ala mono note hagote kava kanomoꞌa heti-maineno Yisasina mage huno havige “Kagaifena na augafa kea nehae? Kaiyekema hu-ga-taꞌa kemo anonaꞌania hu-falote huka nohane?” huno havige.
MAT 26:63 Higeno Yisasiꞌa avaya tukino ke ohuno maineno nago ke kanoꞌa ohune. Ohigeno ala mono note hagote kava kanomoꞌa eteno mage huno havige “Haimuꞌaene Anumaya Koti aufima kaha-vi-goa kea tamage huka taha-paiyo. Kagaya Anumaya Kotiꞌa taugafa ali-gatigahema hu-ga-tenea kanoa, Kalaisiga, mainano? Kagaya Anumaya Kotina nafaꞌneꞌamoga mainano?” huno havige.
MAT 26:64 Havigegeno Yisasiꞌa hu-falote huno mage huno hie “E, kagaya ani kema hanana hai nehane. Tamage ani kano mainoe. Tamaha-nepauve tamakaya haenaga ikapinagati emainoa kanoa vayaꞌmo natenea kanomoꞌna tusiꞌa himamuꞌa hanea Anumaya Kotina aya tamaga kaiyaga hanea siale maineꞌna ikate hanea siate esugetama nagegahae.” huno hie.
MAT 26:65 Higeno ala mono note hagote kava kanomoꞌa ani kea haviteno aipamoꞌa tokiyaꞌage higeno kenaꞌa alino hatata nehuno mage huno hie “Anumaya Kotife hu-haviya hu-neꞌatea kea hai havunanagiꞌya nagoꞌa vayaꞌmoꞌya kaiyekea hu-oꞌatesae. Tamakaya Anumaya Kotife hu-haviya hu-neꞌatea kea ago haviye.
MAT 26:66 Hai havunagi na tamakesa nehaviye?” huno higeꞌya mage hae “Anonaꞌa alisia yafe haesageno falisie.” huꞌya hae.
MAT 26:67 Huteꞌya nagoꞌa vayaꞌmoꞌya Yisasi augosafi amavetuꞌna he-neꞌateꞌya amayateti aiko-ligeꞌya nagoꞌamoꞌya amayana ali atale-lineꞌya aiko neliꞌya mage huꞌya havigae “Kalaisigae kaune laga huka taha-paiyo taꞌya negahayae?” huꞌya havigae.
MAT 26:69 Pitaꞌa nomo haupalega mopale mainegeno nago aliꞌya munaꞌmoꞌa eaꞌamo Pitafe mage huno hie “Kagaya Kalili Yisasiꞌene tokaeka nemaina kano mainane.” huno hie.
MAT 26:70 Higeno Pitaꞌa avane huno mukiꞌa vaya amaufi “Aꞌao, ani kanoa oꞌagenoa kanohe maika nehane.” huno hu-maine.
MAT 26:71 Huteno fiatega umainegeno nago aliꞌya munaꞌmoꞌa megeteno anile he-ti-mainaya vayafe mage huno hie “Mani kanoa Nasaleti Yisasiꞌene vai-neꞌayea kanoe.” huno hie.
MAT 26:72 Higeno Pitaꞌa nagoꞌene eteno “Aꞌao Anumayamo aufi tamage nehue oꞌagenoa kanomofe nehane.” huno hie.
MAT 26:73 Osiꞌa mainegeꞌya anile he-ti-maiya vayaꞌmoꞌya Pitafena mage huꞌya me hae “Tamage kagaya Kalili kano mainananagika kavefuꞌna ali-yahae higeka kema nehana yana tave-linageta havune agai anagapi kano mainane.” huꞌya hae.
MAT 26:74 Hageno Pitaꞌa mage huno hie “Nagaya tamakema ohisugenoꞌa Anumaya Kotiꞌa nahaesie. Anumaya Koti aulagafi tamage huꞌna tamaha-nepauve tamakayama nehaya kanoa nagaya oꞌagenoa kanoe.” huno nehigeno kokolemoꞌa age ai-maine.
MAT 26:75 Agea aigeno Pitana agesamoꞌa aikalo higeno Yisasiꞌma hapaigeno havi-mainea kea mage huno hu-maineane “Kokolemoꞌa agea oꞌainesigeka kagaya tagufa (3) kanale avane huka nagaifena ali fala-kigane.” huno hu-mainea kemoꞌa Pitana agesamoꞌa aikalo higeno haviteno hati-lavino viaꞌamo tusiꞌa avi mo-te-maine.
MAT 27:1 Koꞌma alino ha-neleana mukiꞌa mono note kava vayaꞌene Yuta vayaꞌmogami vayatamaene Yisasina haesageno falisia kea huge havige hu-mainae.
MAT 27:2 Huteꞌya Yisasina nofi kiteteꞌya ala kamani kava kanoa, Pailatite, avaleꞌya ayapi motenae.
MAT 27:3 Yutasiꞌa Yisasina agesi huno kame yama hu-tea kanomoꞌa ageana Yisasina kaiyekema hu-teteꞌya “Faligahie.” huꞌya haya yana ageteno aipamoꞌa kanaꞌage higeno eteno aminaya monea tetiꞌa (30) siliva alaga monea* alino ala mono note kava vayaꞌene Yuta vayatamaene momamine.
MAT 27:4 Mo neꞌamamino mage huno hie “Nagaya tusiꞌa kefo yama huꞌna kefo yama ohunea kanomona agesila huꞌna kame yana hu-toanagino afa yafe faligahie.” huno higeꞌya ani vayaꞌmoꞌya mage hae “Kahaote yakae. Tagai yana omalenegi kagaikaꞌa yane.” huꞌya hu-tenae.
MAT 27:5 Hu-tageno Yutasiꞌa ani yafa monea ala mono nopi hagaꞌyu hu-neꞌataleno viaꞌamo agaiꞌa ayapiti nofila alino anoꞌmu mo-ye-maine.
MAT 27:6 Mo-yegeꞌya mono note kava vayaꞌmoꞌya ani monea aliteꞌya mage huꞌya hae “Mani monea ‘Vaya haesageno falisie.’ huꞌya ali hage-mainaya monegita alita ala mono note monenena omalesune.” huꞌya hae.
MAT 27:7 Huteꞌya aliꞌya haꞌya kiteꞌya “Mani monea hapaleti susufane talo nehia kanomo mopa miya hugahune. Ani mopa natu vaya he-vai-ma-tesuna mopa hanegahie.” huꞌya hu-mainae.
MAT 27:8 Naꞌa huteꞌya ani mopamo agia kolamo tavi-mainea mopae huꞌya agia malenayanagino meni kanafina ani agimoꞌa hanegeꞌya neꞌayae.
MAT 27:9 Naꞌama hayana nayona aune kanoa Yelemaiyaꞌma hu-mainea kemoꞌa ani kanafina falote huno tamage hie. Mage huno hu-maineane “Ani tetiꞌa (30) silva alaga monea* Isaleli vayaꞌmoꞌya ‘Haesageno falisigeta ani monea kamigahune.’ huꞌya hu-mainae.
MAT 27:10 Anumayamo naha-pai-mainea kava huꞌya ani monea aliꞌya hapaleti susufanema talo nehia kanomo mopa miya hu-mainae.” huno hu-maineane. Ani mopama miya hu-mainaya yupa ani kemoꞌa falote huno tamagea hu-maine.
MAT 27:11 Yisasiꞌa ala kava kanoa, Pailatite, he-ti-mainegeno Pailatiꞌa Yisasifena mage huno havi-ge “Kagaya Yuta veaꞌmogami Sauveꞌami mainano?” huno havigegeno Yisasiꞌa mage hie “Kagaikaꞌa mani kea hai nehane.” huno hie.
MAT 27:12 Higeꞌya mono note kava vayaꞌene Yuta vayatamaene “Maꞌa avamete kefo ya hu-maineane.” huꞌya hu-tayanagi Yisasiꞌa kenonaꞌamia ohune.
MAT 27:13 Ohigeno Pailatiꞌa nagoꞌene mage huno hie “Mukiꞌa kefo yama nehana yana ali-faloteꞌma nehayana nohavino?” huno hie.
MAT 27:14 Higeno Yisasiꞌa kenonaꞌa nagola osi kea ohigeno Pailatiꞌa amaꞌyo ai-maine.
MAT 27:15 Kafuꞌahe kafuꞌahe Anumaya Kotiꞌa amaugafama ali-gati-mainea kanahe amakesa haviꞌya imua negiyanagino Pailatiꞌa mukiꞌa ani imu negia kanafina nagoꞌa nofi hu-matageꞌya nemaiya vayapiti vayaꞌyagamoꞌya haesagama huꞌya “Agaya esie.” huꞌya haya kanohe nofipitila “Hai haꞌno hanagi vuo.” huno hu-neꞌatea kanae.
MAT 27:16 Ani kanafina nago kanomo agia Palapasiꞌe vayala tavata nehamaya kanoa kina nofipi maineane.
MAT 27:17 Maineanagiꞌya vayaꞌyagamoꞌya melitalu hageno Pailatiꞌa mage huno hama-vige “Palapasife ‘Hai haꞌno hanagi vuo.’ huꞌna hisuo ifi nagaya Yisasife, veaꞌmoꞌya ‘Anumaya Kotiꞌa taugafa ali-gatigahema hu-tenea kano maine.’ huꞌya nehaya kanomofe, ‘Hai haꞌno hanagi vuo.’ huꞌna hisue? Tafe musena nehae?” huno hama-vige.
MAT 27:18 Higeꞌya Yisasima atafa huꞌyama avaleꞌya emainaya vayaꞌmoꞌya ma amakesa haviye “Mukiꞌa vayala Yisasina agai ke nehaviꞌya tagai kea nohaviye.” huꞌya nehayanagiꞌya Yisasifena amaipamoꞌa haviya higeꞌya Pailatite avaleꞌya metalaya yafe Pailatiꞌa agesa haviteno hama-vige.
MAT 27:19 Huteno kaiyeke hu-ma-tesia siale mainegeno aꞌamoꞌa nago kanomofe “Mage huka hapaiyo.” huno hu-tegeno eaꞌamo mage huno hie “Akamoꞌa mage huno hie ‘Namona fatago kanogi afaꞌa atalo. Nagaya meni kegela tusiya huno koli nagesa hia himona agaitela age-mainoe.’ huno higeꞌna me kaha-nepauve.” huno hie.
MAT 27:20 Mono note kava vayaꞌene Yuta vayatamaene mukiꞌa veafe mage huꞌya mo hama-paiye “Mage hutama hiho ‘Yisasina haegeno falino. Tagaya Palapasife nofipitila haꞌno hisie huta nehune.’ hutama hiho.” huꞌya hae.
MAT 27:21 Hageno Pailatiꞌa vayaꞌyagahe nagoꞌene mage huno hie “Tole kanolata mainaꞌagi hana kanohe ‘Hai haꞌno hanagi vuo.’ huꞌna hisue?” huno higeꞌya “Palapasina afaꞌa atalegeno eno.” huꞌya hae.
MAT 27:22 Hageno Pailatiꞌa mage huno hama-vige “Ma kanomofena amakaya ‘Anumaya Kotiꞌa taugafa ali-gatigahema hu-tenea kanoe.’ huꞌya nehaya kanoa naꞌa hu-tesue?” huno hama-vige. Higeꞌya mukiꞌa veaꞌmoꞌya “Yafaga yosale nili hetama asaigeno falino.” huꞌya hu-mainae.
MAT 27:23 Hageno Pailatiꞌa mage huno hama-vige “Naꞌa higetama ani kea nehae? Hanaꞌa kefo yama hu-maine?” huno hianagi eteꞌya aliꞌya alapi ataleꞌya ala kefiti mage huꞌya hae “Yafaga yosale nili hetama asaigeno falino.” huꞌya hu-mainae.
MAT 27:24 Hageno Pailatiꞌa “Nagai kea ohaviyanagiꞌya tu hugahe nehae.” huno agesa haviteno mage huno hie “Ani fatago kanomo kolamoꞌa nagaipina kumila omalegahigi tamakaitamifi kumitamia hanegahie.” huno nehuno tina alino ani vayaꞌmogami amaule ayana sese hie.
MAT 27:25 Sese higeꞌya mukiꞌa veaꞌmoꞌya mage huꞌya hae “Haesanageno falisia kumiꞌmoꞌa tagayaene nafaꞌnetimoꞌyaene afaꞌa aligahune.” huꞌya hae.
MAT 27:26 Hageno Pailatiꞌa Palapasina nofipitila avaleno neꞌataleno Yisasina agata aisifa kaꞌyoteti haifu amiteno Yisasina ati vaya amayapi ateteno “Yafaga yosale nili hetama asaigeno falino.” huno hie.
MAT 27:27 Ala kava kanomo ati vayaꞌmoꞌya Yisasina avaleꞌya ala kava kanomo no haupalega umaineꞌya mukiꞌa amakaiꞌenema nemaiya ati vayafe ke hageꞌya emainae.
MAT 27:28 Ayaꞌamoꞌya Yisasina kenaꞌa asagi-taleteꞌya akaya ateꞌya “Ala kano mainane.” huꞌya hisaya yafe ayaꞌaya haesa kena fai-tenae.
MAT 27:29 Fai-teteꞌya avetaꞌnafaꞌage nofiteti tumano kula talo huteꞌya anutela vai-teteꞌya kupaga kaꞌyona tamaga ayapi amiteꞌya amaleꞌya neꞌayeꞌya hu-haviya hu-teteꞌya kigi hu-teꞌya kamuge hatageꞌya vai-neꞌa-teꞌya mage huꞌya hae “Felugae. Yuta veaꞌmogami ala sauve kanomogae.” huꞌya kigi hu-tenae.
MAT 27:30 Augafale amavetuꞌna he-teteꞌya anutela kupaga kaꞌyoteti aiko-li-mainae.
MAT 27:31 Hu-haviya hu-teteꞌya kigi hu-neꞌa-teꞌya haesa kena hate neꞌa-taleteꞌya agaiꞌa kena fai-teteꞌya yafaga yosale nili hegahe avaleꞌya umainae.
MAT 27:32 Yisasina avaleꞌya kategama vayana Sailini Saimoniꞌene mo-fotu huteꞌya ati vayaꞌmoꞌya motafa huꞌya tokiyaꞌage ke huꞌya “Yafaga yosa Yisasi akave kofika vuo.” huꞌya hu-tageno alino vie.
MAT 27:33 Vigeꞌya Yisasina Kologota kumale, ani agimoꞌa tagai kefina anu ayamufae huꞌya nehaya kumate avaleꞌya umainae.
MAT 27:34 Ani ati vayaꞌmoꞌya “Haesunageno falisiana agata ai yafenagita agatama oꞌaisia tina nesie.” huꞌya nehuꞌya ani atuꞌage timo agia gala. Ani atuꞌage tiꞌene nofi alagamo tiꞌene nagopi ali havigu huteꞌya aliꞌyama amiyana Yisasiꞌa ani lina neno agegeana higeno masu hugeno atalene.
MAT 27:35 Onegeꞌya yafaga yosale nilia heꞌya asai-maleteꞌya kenaꞌa fako huꞌya aligahe musufa yama nehaya yokalo lageno amakasesaya vayaꞌmoꞌya ali-mainae.
MAT 27:36 Aliteꞌya mopale maineꞌya kava yagaiꞌya mainae.
MAT 27:37 Anutela kaiyekema hu-taya kema kaeꞌya malaya avomoꞌa mage huno hie “Mani kanoa Yuta veate ala Sauve kanoe.” huꞌya kaeꞌya malenae.
MAT 27:38 Kae-maleteꞌya Yisasiꞌene tole kanolatana vaya nehamaeꞌana musufa ya nehaꞌa kanolatana nago kanoa tamaga kaiyagaꞌa haeꞌya asai-maleꞌya nago kanoa haoga kaiyagaꞌa haeꞌya asai-maleꞌya hu-mainae.
MAT 27:39 Hu-malenageꞌya kateꞌma ute ete huꞌya agasaya veaꞌmoꞌya amakeꞌya kaꞌyo neꞌaiꞌya “Kefo kano maine.” huꞌya kigi yokalofiti hu-haviya hu-tenae.
MAT 27:40 Mage huꞌya hae “Oho kagaya ‘Ala mono nona aliꞌna lagape ai-taleteꞌna tagufa (3) kanale eteꞌna ki-talegahue.’ huka nehana kano mainane? Kagaya Anumaya Koti nafaꞌne mainenukahena menia yafaga yosa ataleka elavika kagaikaꞌa kaugafa aligatio.” huꞌya hae.
MAT 27:41 Hageꞌya mono note kava vayaꞌene kahegi kema havilinaya anagaꞌene Yuta vayatamaene aniꞌa huꞌya kamuge hatageꞌya vai-neꞌateꞌya hu-haviya hu-tenae.
MAT 27:42 Mage huꞌya hae “Nagoꞌa veala amaugafa ali-negatia kanogi agaiꞌa augafa naꞌa higeno ali-nokatie? Isaleli veaꞌmogami Sauve kanoꞌamima mainenunofena yafaga yosaletila ataleno elavinageta agamano. Agesunana ‘Kagaya lamage nehane.’ huta tametitia hugahune.
MAT 27:43 Agaya Anumaya Kotife ametiti nehuno mage huno hu-maineane ‘Nagaya Anumaya Koti nafaꞌnemoꞌnae.’ huno nehianagino Anumaya Kotiꞌa agaifema hainagenoꞌa menia augafa ali-gatisie.” huꞌya hu-haviya hu-tenae.
MAT 27:44 Agaiꞌenema musufa kanolatama yafaga yosaleꞌma asai-malaya kanolatamoganienena aniꞌa huꞌana Yisasina hu-haviya hu-tenaꞌe.
MAT 27:45 Anile yagemoꞌa euno amuꞌnokaꞌno higeno hale-mainea yamoꞌa haꞌno higeno mukiꞌa kotega tusiꞌa hani-kino viaꞌamo une kanalega eteno ali hale-maine.
MAT 27:46 Une kanalega Yisasiꞌa ala kefiti ke huno agaiꞌa kefiti mage huno hie “Eli Eli lema sapakatani.” huno hie. Tagaiti kefina mage huno hie “Anumaya Kotiꞌnimogae Anumaya Kotiꞌnimogae naꞌa higeka nagaila nenatalane?” huno hie.
MAT 27:47 Higeꞌya nagoꞌa anile heti-mainaya veaꞌmoꞌya haviteꞌya mage huꞌya hae “Ilaiyafe ke nehie.” huꞌya hae.
MAT 27:48 Hageno nago kanomoꞌa aiya-yeno viaꞌamo hava koꞌyafa kana yana alino atuꞌage nofi alagamo tipi ayeteno alino viaꞌamo kupaga kaꞌyote maleno ani hava koꞌyafa kana yana kiteno “Yisasiꞌa mayu mayu huno nesie.” huno amine.
MAT 27:49 Amigeꞌya nagoꞌamoꞌya mage huꞌya hae “Atalo, agava mainesunageno Ilaiyaꞌa esiaꞌamo yafaga yosaletila mevaleno elavisiaꞌamo augafama ali-gatisia yafe esio. Agetetae.” huꞌya hae.
MAT 27:50 Hageno Yisasiꞌa nagoꞌene ala kefiti nehuno agu nafaꞌnea atalegeno vigeno fali-maine.
MAT 27:51 Faligenofena ala mono nopi asai-malenaya kenagefa* ayaꞌaya ala kenagefamoꞌa Yisasiꞌma falia kana kanoꞌale ani kenamoꞌa analeti aepa heno tavigeno amuꞌnopiti hatata hu-lole huno mo-talegeno imila aligeno yafaꞌyagamoꞌa aposi-lavi-maine.
MAT 27:52 Higeꞌya veaꞌma he-vai-ma-tenaya komumoꞌa ai-hagalo higeꞌya kasagoꞌya veala, Anumaya Kotina amakuꞌama amitafa huteꞌya fali-mainaya veala, he-ti-mainae.
MAT 27:53 He-tigeꞌya ani veala komufitila hetigeno Yisasiꞌa fali-mainefiti he-ti-mainea yupa Yelusalemu vageꞌya mukiꞌa veaꞌmoꞌya amake-mainae.
MAT 27:54 Ati vayaꞌene kava kanoene Yisasiteꞌma yagaiꞌya maiya ati vayaꞌmoꞌya imiꞌma alia yaꞌene alu ya alu yama falote hia yana ageteꞌya tusiꞌa amamaꞌyo aigeꞌya mage huꞌya hae “Tamage huno mani kanoa Anumaya Koti nafaꞌne-lafa maine.” huꞌya hu-mainae.
MAT 27:55 Nagoꞌa aꞌneyaga Yisasina aya hugahe Kaliliti akave emainaya aꞌneyaga aluꞌale hetiꞌya maineꞌya age-mainae.
MAT 27:56 Nagoꞌamogami amakia osi Yemesiꞌene Yosefegani itaꞌanimoꞌa Maliaꞌe Magatala kumate Maliaꞌene tole Sepeti nafaꞌnelatamaꞌamogani itaꞌanimoꞌene anifina mainae.
MAT 27:57 Yagemoꞌa tavi falegahe higeno Yosefeꞌa Alimatia kumate kanoa, ala moneꞌa hanea kanoa Yisasi ke havino akave nemalea kanogino Pailatite mage huno me havige “Yisasina augafaꞌa aligahe nehue.” huno havigegeno Pailatiꞌa “E” higeno ati vayaꞌahe “Yisasi augafa aliꞌya Yosefena amiho.” huno hu-maine.
MAT 27:59 Hapaigeno Yosefeꞌa augafa alino me-maleneno kenaleti aigalaki kalaki huno haꞌya kino anoꞌvai-tene.
MAT 27:60 Anoꞌvai-teteno alino alino viaꞌamo agaiꞌma he-vai-tesaya yafe higeꞌya he falegeꞌya kafi-malenaya yafakapi Yisasina mo he-vai-tene. He-vai-teteno ani yafa kamo avayaleꞌma ai-lilesia yafana, ala yafakefa ayetu-feno anile mo ai-lile-maleteno umaine.
MAT 27:61 Vigeꞌana Magatala Maliaꞌene hamoꞌamoꞌene anile mopale maineꞌana he-vai-tea yafa kana age-mainaꞌe.
MAT 27:62 Sapati kanahe haviꞌya kavela talo tala hu-maleꞌya faeteꞌya kotigeꞌya ala mono note kava vayaꞌene Falasia vayaꞌene ala kanoa Pailatite mage huꞌya me hae “Ala kanomogae tagaya ago havune anima havigeꞌage kanomoꞌa afaꞌama mainea kanafina mage huno taha-pai-maine ‘Nagaya tagufa (3) kanale maiteꞌna komufitila he-tigahue.’ huno hu-maine.
MAT 27:64 Nage hu-maineafe kagaya tokiyaꞌage ke hugeꞌya ani yafa kamona ai-lileꞌya tokiya vai-malesageno tagufa (3) kanafina tokiyaꞌage huꞌya yagaisae. Havigu agaiꞌaenema tokaeꞌya nemaiya anagaꞌmoꞌya ani komufiti Yisasi augafa musufaya huꞌya aliꞌya uteꞌya veafe ‘Fali-mainefitila agaiꞌa he-tino umaine.’ huꞌya hama-paisageno ani kema hisaya kemoꞌa hagoteno hu-mainea kemona agasegahie.” huꞌya hae.
MAT 27:65 Hageno Pailatiꞌa mage huno hie “Kava yagaisaya ati vayala tamamisugetama ani komule amavaletama moma-tesageꞌya yagai-lama hugahae.” huno hie.
MAT 27:66 Higeꞌya vayaꞌyamoꞌya ani yafa kateꞌma malenaya yafana fukiteti aye-gaꞌmaeꞌya ai-lileteꞌya nagoꞌa ati vayafe “Yagaiho.” huꞌya hu-ma-tenae.
MAT 28:1 Sapati kanamoꞌa haꞌno hu-tegeno Sota yupa kola otinegeꞌya Magatala Maliaꞌene hamoꞌamoꞌene he-vai-taya komulega agegahe umainaꞌe.
MAT 28:2 Neꞌvaꞌageno tusiꞌa imi aligeno Anumayamo ensole kanoa ikapinagati elavino ani yafakefa ayetu-fe-neꞌataleno agupile mopale maine.
MAT 28:3 Mainegeno augosamoꞌa aulumayaꞌma alia kava huno aye-vasa higeno kenaꞌamoꞌa efeꞌage huno alave alave hu-maine.
MAT 28:4 Higeꞌya he-vai-taya yafakateꞌma yagaiꞌya maiya ati vayaꞌmoꞌya ani ensole kanoa ageteꞌya atili huꞌya amakoꞌya faiteꞌya fali-mainaya vaya kana hu-mainae.
MAT 28:5 Hageno ensole kanomoꞌa ani atalafena mage huno hie “Tanakaila tanamaꞌyoa oꞌaino. Nagaya ago havimainoe tanakaya Yisasina, yafaga yosale nilima heꞌya asai-malenaya kanohe ati-neꞌayaꞌe.
MAT 28:6 Mafina omainegi fali-mainefitila ago heti-maine. Tamaha-pai-mainea kemoꞌa falote higeno ago he-ti-mainegi etana malenaya kumala ma hanegi megeꞌo.
MAT 28:7 Megetetana tanaiyayetana agaiꞌaenema tokaeꞌya nemaiya anagala mage hutana mo hama-paiꞌo ‘Yisasiꞌa ofalino afaꞌama maineno tamaha-pai-mainea kea haviho. Uhagotela-mateno Kalili ago umainegi anilega neꞌutama Yisasina mogeho.’ hutana hiꞌo. Hai tanaha-pauve.” huno hie.
MAT 28:8 Higeꞌana tolemogania anamaꞌyoa neꞌaiꞌana musena nehuꞌana anaiyayeꞌana agaiꞌaenema tokaeꞌya nemaiya anaga mo hama-paigahe umainaꞌe.
MAT 28:9 Neꞌvaꞌageno anile aupaꞌa Yisasiꞌene fotu mo haꞌageno Yisasiꞌa mage huno hanapaiye “Neꞌaꞌo?” huno higeꞌana eꞌana aiyale metafa huꞌana ali soso haꞌe.
MAT 28:10 Haꞌageno Yisasiꞌa mage huno hie “Tanamaꞌyoa oꞌaitana mage hutana nafuꞌnaganagamina mo hama-paiꞌo ‘Kalili neꞌutama anilega mo nagegahae.’ hutana hama-paiꞌo.” huno hie.
MAT 28:11 Tole atalana yaufa neꞌvaꞌageꞌya nagoꞌa komuleꞌma yagai-maiya ati vayala ala kumate uꞌya ala mono note kava vayafena mukiꞌa yama faloteꞌma hia yafena mo hama-paiye.
MAT 28:12 Mo hageꞌya ala mono note kava vayaꞌene Yuta vayatamaene melitalu huꞌya huge havige huteꞌya hu-haꞌya kiteꞌya ani ati vayaꞌmogamina ala mone hageꞌya neꞌamamiꞌya “Mani kea hutama falote ohisaya yafe ma monea negeno haꞌno hino.” huꞌya hae.
MAT 28:13 Huteꞌya mage huꞌya hae “Tamakaya veafena mage hutama hiho ‘Yisasiꞌene tokaeꞌya nemaiya anagaꞌmoꞌya kege ayaꞌamoꞌya faeta mainonageꞌya augafa musufaya huꞌya aliꞌya vae.’ hutama hiho.
MAT 28:14 Ala kamani kanomoꞌa mani kema haya kea haviteno kema tamama-kisiana tagaya ali fala-ki-lama-teta ‘Amakaipina kea omale.’ huta alu kema hapaisunanagenoꞌa kea-otamama-kigahie.” huꞌya hae.
MAT 28:15 Hageꞌya ati vayaꞌmoꞌya ani monea aliteꞌya ma ma hama-paiya kemo akave malageno mukiꞌa Yuta vea mainalega mani kemoꞌa ute ete huno menia aniꞌa huno hane.
MAT 28:16 Yisasina aleveniꞌa (11) anagaꞌmoꞌya Kalili agoꞌyalega umainae.
MAT 28:17 Valegati Yisasina mogeteꞌya agia alisaga hayanagi nagoꞌamoꞌya tole amakesa havimainae.
MAT 28:18 Yisasiꞌa ani vaya mainale emaineno mage huno hie “Anumaya Kotiꞌa ikategaene mopafiꞌene tusiꞌa kava yagaisua tokiya yana ago namiafe tamakaya mukiꞌa ma mopaene mopaene neꞌutama nagai kea hama-paigeꞌya amakuꞌa namisagetamahena Nenafa agileꞌene nafaꞌneꞌamoni nagileꞌene Alu Aotage Avamumo agileꞌene tina fale-ma-teho.
MAT 28:20 Tina fale-ma-tetama nagayama tamaha-pai-mainoa kea ‘Akave maleho.’ hutama huge hama-velige hiho. Tamage nagaya tamakaiꞌene mukiꞌa kanafina maime maime neꞌvisugeno ma mopama haꞌno hisia kanamoꞌa falote hugahianagiꞌna otama-talegahue.” huno Yisasiꞌa hu-maine.
MAR 1:1 Yisasi Kalaisiꞌa Anumaya Kotina neꞌamofena kanale kea mage huno aepa hie.
MAR 1:2 Anumaya Koti aune kanoa Aisaiyaꞌa mage huno kaemaleneane Anumaya Kotiꞌa mage huno hie “Haviho ke hamapaisia kanoꞌnia Yisasi aulega hagoteꞌna hutesugeno kana valino hilato hugahie.
MAR 1:3 Kaꞌme kotegati nago kanomoꞌa keha keha huno mage hugahie “Anumayamo esia kana ali hilato hutama fatago hiho.” huno humaineane.
MAR 1:4 Yoniꞌa ti faleneꞌamatea kanoa evaꞌyi huno kaꞌme kotega maineno mage huno hie “Tamakaya tamakuꞌa aiyahae hutama kefo yatamia ‘Nagoꞌene ohugahune.’ hutama ataletesageꞌna tina falelamatesugeno Anumaya Kotiꞌa kefo yatamia aigetamateno atalelamategahie.” huno humaine.
MAR 1:5 Ani yupa Yelusalemu veaꞌene Yutia kotega veaꞌene Yoni mainelega umaineꞌya kefo yaꞌamihena hufalote hageno Yoniꞌa Yotani lipi tina falematene.
MAR 1:6 Yoniꞌa kemolu afumo ayolagefaleti kenaꞌa fakaꞌnino failineno amuꞌnofila pulamakamo augafaleti ayetalako huno kilineno kaveꞌa kenuꞌene tumemo timaꞌaene neneane.
MAR 1:7 Mage huno hamapaiye “Nakavela nago kanoa ago egahie. Ani kanoa tusiꞌa tokiya yamaꞌa hanea kanogino nagaila ago nagaseno maigeꞌna nagaya afa kano mainoanagiꞌna agai aiyale ayesuana onategahie.
MAR 1:8 Nagaya titeti falenelamatoanagino ani kanomoꞌa Anumaya Kotina Alu Aotage Avamuꞌaleti falelamategahie.” huno hie.
MAR 1:9 Ani kanafina Yisasiꞌa Kalili kotega hanea kumala Nasaleti kumateti egeno Yoniꞌa Yisasina Yotani lipi tina faletene.
MAR 1:10 Tina faleneꞌategeno Yisasiꞌa tipinagati aivati huno aupaꞌa ageana ikamoꞌa aihagalo higeno Anumaya Koti Alu Aotage Avamuꞌmoꞌa nama kana huno agaitega elavimaine.
MAR 1:11 Elavigeno ikapinagati nagola agea aino mage huno hie “Kagaya nagaiꞌni nafaꞌnemoga kagaifena aluya huno nahau nayamopafi nenagea neꞌnimoga kagaifena aluya huꞌna musekaꞌa nehue.” huno hie.
MAR 1:12 Anumaya Kotina Alu Aotage Avamuꞌamoꞌa Yisasina veaꞌne omai kaꞌme kotega anatino umaine.
MAR 1:13 Umainegeno Sataniꞌa* Yisasife “Havi kava huo.” huno ayevataga higeno fotiꞌa (40) yupa Yisasiꞌa ani kotega afela afuyagaene mainegeꞌya ensole anagaꞌmoꞌya meya huꞌya kava hutenae.
MAR 1:14 Yonina nofi hutenageno Yisasiꞌa Kalili kotega Anumaya Koti kanale kea mo hamapaiye.
MAR 1:15 Yisasiꞌa mage huno hie “Anumayamo malenea kanamoꞌa ago evaꞌyi humainegi Anumaya Koti yagailamatesia kanamoꞌa aupaꞌa evaꞌyi hisia yafe tamakaya tamakuꞌa aiyahae hutama kefo yatamia ataletetama nagaifena kanale kea humainea kemoꞌa ‘Tamage humaine.’ hutama tamakupi maletama tamametitia hiho.” huno humaine.
MAR 1:16 Yisasiꞌa Kalili ti kotumo agegayalega neꞌuno Saimonina aganaꞌamoꞌene Etaluꞌene anakeana noyame kuꞌya nehaꞌa kanolana maineꞌana ala kukonogo ti kotupi hagaꞌyu huꞌana nemalaꞌe.
MAR 1:17 Yisasiꞌa mage huno hanapaiye “Nakave eꞌo. Nakave esaꞌageꞌna noyame kuꞌyama haꞌa kava huꞌna vaya kuꞌya hulanategahue.” huno hie.
MAR 1:18 Higeꞌana aupaꞌa kukonogoꞌania neꞌataleꞌana Yisasi akave umainaꞌe.
MAR 1:19 Vaꞌageno Yisasiꞌa nagoꞌene neꞌuno Sepetina netalamaꞌamogania Yemesiꞌene Yoniꞌene tipi kalefi maineꞌana kukonogo nefakaꞌniꞌageno Yisasiꞌa monake.
MAR 1:20 Anaketeno Yisasiꞌa ke higeꞌana Sepetia neꞌanafaꞌene aliꞌya vayaꞌaene tipi kalefiti neꞌamataleꞌana Yisasina akave vaꞌe.
MAR 1:21 Kapaneamu kumate taviteꞌya Yisasiꞌa Sapati yupa mono nopi haino Anumaya Koti ke humavelie.
MAR 1:22 Humaveligenoꞌa agai kemoꞌa toꞌkiya yamaꞌa hanea kanomo ke kana hia yafena tusiꞌa amamaꞌyo aigeꞌya mage hae “Nagoꞌa kahegi kema havilinaya anagaꞌmoꞌya nehaya avamete ke nehie.” huꞌya hae.
MAR 1:23 Anile nago kanoa Kefo Avamuꞌmoꞌa aguꞌafi falemainea kanoa mono nopi emaine.
MAR 1:24 Emaineno ala kenake huno mage hie “Avo Yisasigae Nasaleti kumate nafaꞌnemoga naꞌa hulategane? Tagaila tahaeka falilategahe emainano? Nagaya kagaifena ago havimainoe kagaya alu aotage kanoa Anumaya Koti hugatenea kano mainane.” huno hie.
MAR 1:25 Higeno Yisasiꞌa Kefo Avamufena tokiyaꞌage ke huno mage hie “Kea ohuka maiyo. Mani kanoa ataleka agusafinagati vuo.” huno hutene.
MAR 1:26 Higeno ani Kefo Avamuꞌmoꞌa moyege meyege huteteno kasageke hia kava huteteno alakenake huno agusafiti ataleno hatilavimaine.
MAR 1:27 Vigeꞌya mukiꞌa vayala amamaꞌyo aigeꞌya huge havige huꞌya mage hae “Na kava nehie? Na augafa haekafa ke nehie? Tusiꞌa toꞌkiyaleti anumayaꞌage ke higeꞌya Kefo Avamuꞌmoꞌya agai kea ali hipoꞌya huꞌya hatilaviꞌya vae.” huꞌya hae.
MAR 1:28 Hageno Yisasiꞌma humainea avagemoꞌa mukiꞌa Kalili kotega ute ete higeꞌya mukiꞌa veaꞌmoꞌya havimainae.
MAR 1:29 Yisasiꞌa Yemesiꞌene Yoniꞌene mono nona ataleꞌya anileti Saimonigani Etalugani nopinaga umainae.
MAR 1:30 Umainageno Saimonina aꞌamona itaꞌamo alekanoa amukonako kali neꞌaligeno Yisasiꞌa uvaꞌyi higeꞌya aupaꞌa ani alekanohe Yisasina hapaimainae.
MAR 1:31 Hapaigeno Yisasiꞌa agaite eno ayate alino hetitegeno amukonako kaliꞌamoꞌa agola kanale hutegeno kavela kaeno amamine.
MAR 1:32 Unena yagea tavifalegahe higeꞌya veaꞌmoꞌya kasagoꞌya kali veaꞌnea Kefo Avamuꞌmoꞌya amakuꞌafima ali haviya nehia veaꞌnea Yisasite amavaleꞌya emainae.
MAR 1:33 Mukiꞌa ani kumate veala fiate elitalu humainae.
MAR 1:34 Yisasiꞌa havigu havagu kali neꞌaliya veaꞌnene ali hilato humateno mukiꞌa Kefo Avamuꞌmola amakuꞌafiti amanatitalegeꞌya Kefo Avamuꞌmoꞌya Yisasina agoꞌma agemainaya yafe Yisasiꞌa mage huno hamapaiye “Mani yafena kea ohiho.” huno hamapaiye.
MAR 1:35 Natena tani kotigeno Yisasiꞌa hetino ani nona ataleno vaya omai kotega umaineno nunamuna humaine.
MAR 1:36 Umainegeꞌya Saimoniꞌene nagoꞌa anagaꞌamoꞌyaene agaife aiyaka maeꞌya agaitega uꞌya mage huꞌya mo hae “Mukiꞌa veaꞌmoꞌya kagaifena katineꞌayae.” huꞌya hapaiye.
MAR 1:38 Hapaigeno Yisasiꞌa mage huno hamapaiye. “Alu kumate kumate vigetao nagaya mono kea mo hamapaigahue. Mono kema hamapaisua yafe nagaya emainoe.” huno hamapaiye.
MAR 1:39 Mukiꞌa Kalili kotega viaꞌyamo mono nopi Anumaya Koti kea hamapaino Kefo Avamula veaꞌmogami amakuꞌafiti amanatitalene.
MAR 1:40 Nagola fugitayamo augafa alino haꞌyagino atalako humainea kanomoꞌa Yisasite mepe huno mage huno hapaiye “Kahaisigekasina nagaila ago ali hilato hunatateꞌasine.” huno humaine.
MAR 1:41 Higeno Yisasiꞌa kalagi aiteteno ayana haꞌyo huno augafale avate nehuno mage huno hie “Nahaigeꞌna kaugafamoꞌa menia kanale hino huꞌna nehue.” huno higeno anile aupaꞌa kaliꞌamoꞌa haꞌno hutene.
MAR 1:43 Haꞌno hutetegeno Yisasiꞌa mage huno hapaiye “Aupaꞌa visanaꞌamoga ali hilato hugatoa yafena nago kanoa haꞌopaika mono nopi kava kanomote uka mukiꞌa veala kalikaꞌama aliꞌna kanale hugatoa kema havinuꞌyahena mono nopi kava kanomoꞌa kaugafa kamota huno kagetesigeka kaugafama ali kanale hugatoa yafena Moseseꞌa ‘Ma yama Anumaya Kotina amio.’ huno humainea yana Anumaya Kotina momio.” huno toꞌkiyaꞌage ke hapaiye.
MAR 1:45 Hapaiyanagi ani kanomoꞌa viaꞌamo kanaleꞌma hutea avagea alu kumate kumate hamapaigeꞌya kasagoꞌya veaꞌne haviteꞌya “Kalitia alino kanale hulatesie.” huꞌya Yisasite emainae. Aya yafe Yisasiꞌa fufuꞌyate visia kana omalegeno amataleno vaya omai kotega umainegeꞌya alu kumateti kumateti veala Yisasite emainae.
MAR 2:1 Yisasiꞌa aupa kana kanoꞌa maiteno Kapaneamu kumate eteno nomaꞌafi “Emaine.” haya kea veaꞌmoꞌya havimainae.
MAR 2:2 Haviteꞌya veaꞌmoꞌya melitalu hageno nomaꞌafiꞌene nosiꞌmekaenena hiya higeꞌya nagoꞌa veala fiategaenena maisaya yana omalegeno Yisasiꞌa Anumaya Koti kanale mono kea hamapaiye.
MAR 2:3 Hamanepaigeꞌya foꞌa (4) vayaꞌmoꞌya nago kanoa aiya aya falimainea kanoa hagifanale avaleꞌya faeteteꞌya Yisasite avaleꞌya ae.
MAR 2:4 Ayana kasagoꞌya vea hiya haya yafe kana omalegeꞌya nogatofulega haiteꞌya Yisasi maineamaꞌaleti hanae yosa alisaga humaleneꞌya ani hagifanale kali kanoa atalageno Yisasina avate elavimaine.
MAR 2:5 Elavigeno Yisasiꞌa “Ma vayaꞌmoꞌya nagaife haviꞌya amakupi maleꞌya amametiti hae.” agesa haviteno kali kanohe mage hie “Nafaꞌneꞌnimoga nagaya kahanepauve ago aigekateꞌna kefo yakaꞌa atalegatoe.” huno hapaiye.
MAR 2:6 Higeꞌya kahegi kema havilinaya anagaꞌmoꞌya anile mopale emaineꞌya amakaiꞌami amakuꞌafiti mage hae “Naꞌa higeno mani kea nehie? Ma kanomoꞌa Anumaya Kotifena huhaviya huneꞌate. Nagoꞌa vayaꞌmoꞌya aigetateꞌya kefo yatia ataleotategahayanagi Anumaya Kotiꞌa agaiꞌage aigetateno kefo yatia atalelatesia kanoa maine.” huꞌya hae.
MAR 2:8 Hageno Yisasiꞌa aupaꞌa amakuꞌafinaga haviya kea agupi ago haviteno mage huno hie “Naꞌa higetama mani kea tamaku tamakesafinaga nehaviye?
MAR 2:9 Nagayama huꞌna hisua kea hana kemo kanaꞌagela humaine? ‘Aigekateꞌna kefo yakaꞌa atalenegatoe.’ huꞌna hisua kemoꞌo? Ifi kali kanomofe ‘Hetika hagifanakaꞌa alisaga hulika vuo.’ huꞌna hisua kemoꞌo?
MAR 2:10 Nagaya ikapinagati emainoa kanoa vayaꞌmo natenea kanomoꞌna ma mopale maineꞌna kefo yafe aigetamateꞌna kefo yatamia atalelamatesua tokiyaꞌnia hanea yafema havisaya yafe nago kavala huꞌna tamaveligahue.” nehuno kalima alia kanohena mage huno hie “Hetika hagifanakaꞌa neꞌalika nokalega vuo.” huno hapaiye.
MAR 2:12 Higeno ani kali kanomoꞌa aupaꞌa mukiꞌa vea amaulagafi hetino hagifanaꞌa neꞌalino hatilavimaine. Hetino via yafe mukiꞌa melitalu huꞌya mainaya veaꞌmoꞌya tusiꞌa amamaꞌyo aigeꞌya Anumaya Koti agia alisaga nehuꞌya mage huꞌya hae “Menia ma yupa noꞌagona tokiyaꞌage yana neꞌagone.” huꞌya hae.
MAR 2:13 Yisasiꞌa amataleno Kalili tikotumo agegayalega neꞌvigeꞌya mukiꞌa veaꞌmoꞌya agaitega molitalu hageno Yisasiꞌa humavelie.
MAR 2:14 Vilegati nago kanoa mogeana ani kanomo agia Livaiꞌe Alafiusi nafaꞌnea mogeanagi Livaiꞌa musufa ya huno vaya amaugafaleti takisi mone aliliteno nehia kanogino opisi nomaꞌale mopale mainegeno Yisasiꞌa ani kanoa mogeteno mage huno hapaiye “Kagaya nakave eno.” huno higeno Livaiꞌa hetino Yisasina akave umaine.
MAR 2:15 Haenaga Yisasiꞌa Livaina nomaꞌafi kave mo nenegeꞌya mukiꞌa musufaya huꞌya amaugafaleti takisi mone neꞌaliya vayaꞌene nagoꞌa kefo yama nehaya vayaꞌene Yisasiꞌene tokaeꞌya nemaiya anagaꞌmoꞌyaene ani nopina tokaeꞌya maineꞌya kavela nenae. Ani yupa kasagoꞌya vayaꞌmoꞌya Yisasi kea haviteꞌya akave umainae.
MAR 2:16 Yisasiꞌa ani kefo yama nehaya vayaꞌene vaya amaugafaleti takisi miya neꞌaliya vayaꞌene kave nenegeꞌya nagoꞌa kahegi kema havilinaya Falasia vayaꞌmoꞌya mogeteꞌya Yisasiꞌene tokaeꞌya nemaiya anagafe mage huꞌya hae “Naꞌa higeno Yisasiꞌa amaugafaleti takisi monema neꞌaliya vayaꞌene kefo yama nehaya vayaꞌenena kavela nene?” huꞌya hamavigae.
MAR 2:17 Hamavigageno Yisasiꞌa ani kea ago haviteno kenonaꞌamia mage huno hamapaiye “Afaꞌa kalima noꞌaliya veaꞌmoꞌya tota kanalega oꞌugahagi kali veake tota kanalega ugahae. ‘Fatago vea mainone.’ huꞌya nehaya veafe ke hugahe nagaya omenogi kefo yama nehaya veafe ke hugahe emainoe.” huno hie.
MAR 2:18 Nago yupa Yoniꞌene tokaeꞌya nemaiya anagaꞌmoꞌyaene Falasia vayaꞌmoꞌyaene* kave monesiya yafe nagoꞌa vayala Yisasite eꞌya mage huꞌya havigae “Naꞌa higeꞌya Yoniꞌene tokaeꞌya nemaiya anagaꞌene Falasia vayaꞌene kavela mosiꞌya nemaiyanagi kagaiꞌene tokaeꞌya nemaiya anagaꞌmoꞌya kavela nege nege huꞌya nemaiye?” huꞌya hae.
MAR 2:19 Hageno Yisasiꞌa mage huno hie “Nago kanomo aꞌma faiꞌya esageno avaya heno nesia imu kisia yupa vayaꞌamoꞌyaene toꞌkaeꞌyama maisayana ani vayaꞌmoꞌya kavela mosisao? Aꞌao ani kanoa maineanagiꞌya moꞌosigahae.
MAR 2:20 Moꞌosigahagi haenaga alu kana falote hisigeꞌya kame vayamoꞌya aꞌma alisia kanoa atafa huꞌya amakaipiti avalesageꞌya ani kanafina mainesaya vayaꞌamoꞌya hamau huteteꞌya mosigahae.
MAR 2:21 Nago kanomoꞌa haegafa kena alino atafa kenalela maleno ohatigahie. Maleno hatisiana haegafa kenamoꞌa taga huno ali haviya hugahie.
MAR 2:22 Nago kanomoꞌa haegafa nofi alagamo timaꞌa takino atafa mememo augafa ti keꞌayopina otakigahie. Takisiana ani limoꞌa kaꞌnuka hesigeno ti kena falo huno takilavinageno ani liꞌene keꞌayoꞌene ali haviya hugahie. Haegafa nofi alagamo timaꞌa hefino haegafa meme augafamo ti keꞌayopi takino vaino.” huno humaine.
MAR 2:23 Nago Sapati yupa Yisasiꞌene agaiꞌaenema tokaeꞌya nemaiya anagaꞌene atili hoyafi neꞌuꞌya atilia kalemainae.
MAR 2:24 Negalageꞌya nagoꞌa Falasia vayaꞌmoꞌya ageteꞌya Yisasife mage huꞌya hae “Ago Sapati yupahena nagalu humalenaya kea neꞌatagayae.” huꞌya hae.
MAR 2:25 Hageno Yisasiꞌa mage huno hie “Tamakaya Tevitiꞌa agaiꞌma avagi huꞌya vaya vayaꞌene amakategeꞌya humainaya yafena nayoma kaemalenaya kea hapalitama ohavinayanagitama nehao?
MAR 2:26 Amakategeno Anumaya Koti nopi haino afa vayaꞌmoꞌya onegahae mono note kava vayala* amakaiꞌamige negahae.’ huꞌya nagalu humalenaya kavela Anumaya Koti aulagale malenaya kaihame maya Tevitiꞌa neneno tokaeꞌya umainaya vayaꞌaene amamigeꞌya nemainae.” huno humaine. Ani kanafina Apiataꞌa ala mono note uhagote mainea kava kano mainea kanafine.
MAR 2:27 Yisasiꞌa Falasia vayafe mage huno hamapaiye “Vayaꞌmoꞌya maifalu hisaya kana Anumaya Kotiꞌa Sapati kana talo humalenegi veaꞌmoꞌya ani kanamona atafa hisaya yafe veala talo ohune.
MAR 2:28 Ikapinagati emainoa kanoa vayaꞌmo natenea nafaꞌnemoꞌna Sapati kanamona kava yagaimainoe.” huno hie.
MAR 3:1 Yisasiꞌa nago yupa mono nopi haino mainegeno nago kanoa ayamo falimainea kanoa anile maine.
MAR 3:2 Mainegeꞌya nagoꞌa vayaꞌmoꞌya Yisasiꞌma havi kavaꞌma hisiafene huꞌya amata huꞌya mainageno “Yisasiꞌa Sapati yupa ani kali kanoa alino kanale hutesio.” huꞌya Yisasina amata huꞌya mainae.
MAR 3:3 Amata huꞌya mainageno Yisasiꞌa ayama falimainea kanomofe mage huno hapaiye “Hetika vaya amuꞌnopi me hetio.” huno hapaiye.
MAR 3:4 Hapaiteno Yisasiꞌa amata huꞌya maiya vayafena mage huno hie “Tamahavigoe Sapati yupama hisaya yafena mono kemoꞌa naꞌane humaine? Sapati yupa vayala aliꞌya kanale humategahao ifi ali haviya humategahae? Sapati yupa veala amavaleꞌya avina me matesao ifi veala tavata hamaegahae?” huno hamavigegeꞌya kea ohuꞌya mainae.
MAR 3:5 Kea ohuꞌya maigeno Yisasiꞌa mukiꞌa vaya amaulagafi moge mege hiana mukiꞌamogami amakuꞌmoꞌa atalako hia yafe aipamoꞌa kana higeno kali kanomofe mage huno hapaiye “Kayana aipi huo.” huno higeno aipi hiana ayamoꞌa kanale hutene.
MAR 3:6 Kanaleꞌma hutea yafena Falasia vayaꞌmoꞌya mono nona neꞌataleꞌya Heloti vayaꞌene alitalu huꞌya huge havige huteꞌya “Yisasina hanaꞌa huta haesunageno falisie.” huꞌya vege humainae.
MAR 3:7 Yisasiꞌene agaiꞌaenema tokaeꞌya nemaiya anagaꞌaene Kalili ti kotumo agegaya neꞌvageꞌya kasagoꞌya veaꞌne Kaliliti akave vae. Yutiatiꞌene Yelusalemutiꞌene Itumeatiꞌene Yotani tifaligati veaꞌnene Taiyatiꞌene Saitonitiꞌene mukiꞌa veala Yisasiꞌma hia avageꞌa haviteꞌya agaitega vae.
MAR 3:9 Neꞌvageno agaiꞌaenema tokaeꞌya nemaiya anagafe mage huno hamapaiye “Mukiꞌa alitalu haya veaꞌmoꞌya nagaila ayenatunefayafe tipi kalea talo tala hunateho.” huno hie.
MAR 3:10 Kasagoꞌya veala kaliꞌamia alino kanale humatea yafe mukiꞌa kali veaꞌmoꞌya Yisasi augafale avate hugahe ayetufeliꞌya vae.
MAR 3:11 Neꞌvageꞌya Kefo Avamuꞌmoꞌya vea amakusafi maineꞌya ageteꞌya Yisasina aulegati mopafi amakoꞌya meyeꞌya ala kenake huꞌya mage hae “Kagaya Anumaya Kotina nafaꞌneꞌamoga mainane.” huꞌya hae.
MAR 3:12 Hageno Yisasiꞌa tokiyaꞌage ke huno mage hie “Ani kea nagoꞌa veala hamaopaiho.” huno hamapaiye.
MAR 3:13 Yisasiꞌa agoꞌyafi haiteno haiya vayafe ke higeꞌya emainae.
MAR 3:14 Ageno ani vayapiti tuelufuꞌa (12) vaya hapalimateteno agaiꞌaenema tokaeꞌya maisaya yafeꞌene agai kema huhaleꞌya hisaya yafeꞌene hapalimatene. Hapaliteno tokiyaꞌa neꞌamamino Kefo Avamula veaꞌmogami amakusafiti amanatitalesaya yafeꞌene hapalimatene. Mage huno hamapaiye “Nagai kema havigeꞌna hulamatoa vayala (Aposolo vaya)* maiho.” huno hapalimatene.
MAR 3:16 Ani tuelufuꞌa (12) anagaꞌmogami amakia Saimoniꞌe kanomo agia Yisasiꞌa Pitaꞌe huno malene.
MAR 3:17 Yemesiꞌene aganaꞌamoꞌa Yoniꞌene Sepetina neꞌamogania Yisasiꞌa anakia Poanesiꞌe huno malene. Ani anakimoꞌa tagai kefina monagemoꞌma hia avamete huꞌana tokiyaꞌage ke nehaꞌa kanolatane huno anakia malene.
MAR 3:18 Etaluꞌe Filipiꞌe Patolomiuꞌe Matiuꞌe Tomasiꞌene Yemesiꞌa Alafiusi nafaꞌnene Tatiusiꞌene Saimonina hamoꞌamoꞌa nago agia Selotiꞌe.
MAR 3:19 Yutasi Isakaliotiꞌa Yisasina haenagaꞌa agesi huno kame vaya amayapi avaleno atesia kanoe.
MAR 3:20 Yisasiꞌa nomaꞌalega umainegeꞌya mukiꞌa veala Yisasite elitalu hageno Yisasiꞌaene tokaeꞌya nemaiya anagaꞌene kave negahe haya yapi veala mehiya hageꞌya onenae.
MAR 3:21 Agaiꞌa konaga afamoꞌamoꞌya haviteꞌya Yisasife “Aifonafo nehie.” huꞌya Yisasina avalegahe emainae.
MAR 3:22 Yelusalemu kumateti kahegi kema havilinaya anagaꞌmoꞌya Yisasife mage huꞌya mehae “Kefo Avamuꞌma kava humainea kanoa Pielesepulimoꞌa agupi maineno tokiya amigeno Kefo Avamula anatineꞌatale.” huꞌya humainae.
MAR 3:23 Hageno Yisasiꞌa haviteno “Nagaite eho.” huno ke higeꞌya ageno avame kefiti mage huno hamapaiye “Sataniꞌa hanaꞌa huno Satanina anatitalegahie?
MAR 3:24 Nagoke kotega veaꞌmoꞌya ali fako huꞌya “Alu vea mainone.” huꞌya tuma hisayana ani kotega veaꞌnenena haꞌno hugahae.
MAR 3:25 Nagoke afamoꞌmoꞌya ali fako huꞌya “Alu anaga mainone.” huꞌya tuma hisayana ani afamola haꞌno hugahae.
MAR 3:26 Haꞌno hugahagi Satani anagaꞌmoꞌya ali fako huꞌya “Alu vaya mainone.” huꞌya hisayana Satani kava yagaisia tokiyaꞌa omalegahianagino haviya huno haꞌno hugahie.
MAR 3:27 Nagola tokiya kanomoꞌa nomaꞌafima yagaino mainesigenoꞌa nago kanomoꞌa musufa yama hugahe vinunoꞌa hagoteno ani tokiya kanomona nofiteti kitalako huteteno afenoꞌyamaꞌa musufa yana hugahie.
MAR 3:28 Naꞌa humaineafe nagaya tamage huꞌna tamahanepauve veaꞌmoꞌya mukiꞌa alu kefo yama alu kefo yaꞌene huhaviya humate yaꞌene hisayana Anumaya Kotiꞌa aigetamateno kefo yana atalelamategahianagi nagoꞌa veaꞌmo Alu Aotage Avamufema huhaviya hutesayana Anumaya Kotiꞌa aigeoꞌamategahianagi ani kefo yamaꞌa hanege hanege huno hanegahie.” huno humaine.
MAR 3:30 Higeꞌya “Kefo Avamuꞌmoꞌa Yisasiꞌna agupi maine.” huꞌya haya kehe Yisasiꞌa ani kea huno hamapaiye.
MAR 3:31 Yisasina itaꞌamoꞌene aganaꞌamoꞌyaene eꞌya kumatega me hetiꞌya maineꞌya nago kanoa hutageno Yisasife ke hie.
MAR 3:32 Ke higeꞌya mukiꞌa veala elitalu huꞌya Yisasina aiyafi mopale maineꞌya agaife mage huꞌya hae “Itakamoꞌene kaganakamoꞌyaene kumatega emaineꞌya kagaife ke nehae.” huꞌya hapaiye.
MAR 3:33 Hapaigeno Yisasiꞌa mage huno hie “Itaꞌnimoꞌene naganaꞌnimoꞌya taꞌya mainae?” huno hamavige.
MAR 3:34 Hamavigeno agaiꞌenema mopale mainaya veala momake memake huno amaketeno mage huno hie “Itaꞌnimoꞌyaene naganaꞌnimoꞌyaenena ma ma nagaiꞌene mopale mainae.
MAR 3:35 Anumaya Koti kema haviteꞌya haiya kavaꞌma nehaya veala itaꞌnimoꞌya naganaꞌnimoꞌya nasaꞌnimoꞌya mainae.” huno hie.
MAR 4:1 Yisasiꞌa tikotumo agegayalega umaineno nagoꞌene humaveligeꞌya kasagoꞌya veaꞌnea agaite elitalu huꞌya yageꞌyage haya yafe tipi kalefi haisaga humaino mopale maiteno ti amuꞌnopi umainegeꞌya yageꞌyage haya veaꞌmoꞌya ti agegayalega hetiꞌya mainae.
MAR 4:2 Hetiꞌya mainageno Yisasiꞌa alu ke alu kea avame kefiti mage huno hamapaiye “Haviho nago kanomoꞌa avina hanaigahe vie.
MAR 4:4 Avina yamaꞌa alino aihelafino nehanaigeno nagoꞌa avinamoꞌa kapi tavino hanegeꞌya namayagamoꞌya me neꞌya haꞌno hae.
MAR 4:5 Nagoꞌa avinamoꞌya yafa mopafi taviteꞌya osiꞌa mopa hanea yafe aupaꞌa hagemainae.
MAR 4:6 Hagayanagi yagemoꞌa teno amukonako higeno hafuꞌya omalea yafe fayoteꞌya asagaliye.
MAR 4:7 Nagoꞌa avinamoꞌa avetanafa inomo amuꞌnopi tavino hageteno avetanafa inoꞌene tokaeꞌana haiteteꞌana avetanafa inomoꞌa ayetegeno haviya higeno alagaꞌa falote ohune.
MAR 4:8 Falote ohunegi nagoꞌa avinamoꞌa kanale mopafi tavino hageteno ala huno alaga ayeana nagoꞌa avinamoꞌa tetiꞌa (30) alaga ayegeno nagoꞌa avinamoꞌa sikisitiꞌa (60) alaga ayegeno nagoꞌa yosalela kasagoꞌya vani hataletiꞌa (100) alaga ayeno vasaimai vasaimai humaine.
MAR 4:9 Tamakesama hanesigetama havilama hutama haviho.” huno hie.
MAR 4:10 Mukiꞌa veala utageꞌya agaiꞌa tuelufuꞌa (12) anagaꞌamoꞌyaene nagoꞌa veaꞌene ani avame kemona aepaꞌahe havigae.
MAR 4:11 Havigageno Yisasiꞌa mage huno hamapaiye “Tamakaila Anumaya Kotiꞌa kava yagailamatenea yafe falakimainea kea Anumaya Kotiꞌa tamaya hinagetama havigahagi nagai kema nohaviya veala avame kekeꞌya hamanepauve.
MAR 4:12 Ani veaꞌmoꞌya ageme geme nehaiyanagi agelama huꞌya oꞌagegahae. Havime havime nehaiyanagi havilama huꞌya ohavigahae. Havilama ohisaya yafe avame kea hamanepauve. Havigu havilama huꞌya amakuꞌa aiyahae hisageno Anumaya Kotiꞌa aigeꞌamateno kefo yaꞌami atalemateyafe nehue.” huno hie.
MAR 4:13 Yisasiꞌa mage huno hie “Mani avame kea havilama ohunao? Mukiꞌa avame kea hanaꞌa hutama havigahae?” huno hie.
MAR 4:14 Avina yama hanaigahe via kanomoꞌa Yisasife kanale mono kea nefaiye.
MAR 4:15 Nagoꞌa veaꞌmoꞌya kapi tavimainea avinamo avamete mainageno kanale kea faimalegeya maineꞌya Anumaya Koti kea haviyanagi amakupi omalesaya yafe Sataniꞌa amakupitila ani kea melitalene.
MAR 4:16 Aniꞌa huno yafa mopafima tavimainea avinamoꞌa maꞌa humaine nagoꞌa veaꞌmoꞌya Anumaya Koti kea haviꞌya aupaꞌa atafa huteꞌya muse hae.
MAR 4:17 Muse hayanagi hafuꞌyamoꞌa mopafi otavinea yamoꞌa alige atalege veaꞌne maineꞌya osi kana kanoꞌa osiꞌa haviꞌya amakupi maletageno havi kanama falote nehiano Anumayamo kema haviya yafe veaꞌmoꞌya ali haviya humatesaya kanamoꞌma amakaite falote nehiano aupaꞌa Anumaya Koti kea neꞌatalae.
MAR 4:18 Nagoꞌa avina avetanafa hanea inomo agusafi tavimainea avinamoꞌa maꞌa humaine nagoꞌa veaꞌmoꞌya Anumaya Koti kea haviteꞌya ma mopafi mukiꞌa yaꞌyagaꞌamihena amakesa haviꞌya moneꞌamima yokaloꞌamihena kalagi aigeꞌya ani yaꞌyagamoꞌa Anumaya Koti kea aliꞌya ayetalako huteꞌya atalageno alaga aye helafino tama nohie.
MAR 4:20 Tama nohianagi kanale mopafima tavimainea avinamoꞌa maꞌa humaine nagoꞌa veaꞌmoꞌya Anumaya Koti kea haviꞌya amakupi malageno ani alaga mukiꞌa aye henelafie. Nagoꞌa veaꞌmoꞌya nagoke avina yosalela tetiꞌa (30) alaga ayemainae. Nagoꞌa veaꞌmoꞌya nagoke avina yosalela sikisitiꞌa (60) alaga ayemainae. Nagoꞌa avina yosalela vani hataletiꞌa (100) alaga ayemainae.” huno humaine.
MAR 4:21 Hamapaiya yafe Yisasiꞌa mage huno hamavige “Nagoꞌa veaꞌmoꞌya lamua hanagaliꞌya susufaneletila aiso hunemalao ifi sipa kapinaga hanagaliꞌya aiso hunemalae? Aꞌao aihalesia yafe sipale hanagaliꞌya nemalae.
MAR 4:22 Haenagaꞌa mukiꞌa falakimainesia yamoꞌa efalote hugahie. Mukiꞌa kesi kava nehisaya yamoꞌa efalote hinageꞌya veaꞌmoꞌya agegahae.
MAR 4:23 Tamakesama hanesimogatama havilama hutama haviho.” huno hie.
MAR 4:24 Huteno mage huno hie “Anumaya Koti kema havisaya yafena tamakesa havilama hutama haviho. Havisaya kea akave malesageno nagoꞌa kene tamahapaisigetama havigahae.
MAR 4:25 Havilama huno havilinesia kanomona Anumaya Kotiꞌa nagoꞌene havisia yana amigahianagi ‘Ago havilinoe.’ huno nehisia kanomona havilinesiamaꞌa hafalegahie.” huno hie.
MAR 4:26 Yisasiꞌa mage huno hie “Anumaya Koti kava yagaimainea yamoꞌa maꞌa humaine. Nago kanomoꞌa avina yana hoyafi hanaemaleteno kegela mo faeteno feluga hetiteno huge hugeteana ani avinamoꞌa hanaꞌa huno falote huno ala nehia yamona aepaꞌa ani kanomoꞌa oꞌagene.
MAR 4:28 Oꞌagenegi afaꞌa mopamoꞌa agaiꞌageꞌya nuna amigeno aifalo huno hageteno haisa falote huteno haenaga alaga ayeno afu nele.
MAR 4:29 Akavi huteno afuma nelea kanamoꞌa ago evaꞌyi hia yafe aupaꞌa viaꞌyamo naepeleti hataga humaine.
MAR 4:30 Yisasiꞌa mage huno hie “Anumaya Kotiꞌa kava yagaimainea yamoꞌa hanaꞌa maine? Naꞌane huꞌna maꞌa huno hane huꞌna avame kefitila tamahapaisue?
MAR 4:31 Ma ma osi alagamo hia avamete humaine. Ani alagamo agia masatatie. Ani osi osi alagamoꞌa nagoꞌa yosalagama negaliya yosalagamoꞌa agaseno osi kanoꞌa hane.
MAR 4:32 Osi osi humaineanagi kalimaletegeno hageno haiteno ala yosagefa haino mukiꞌa hoyafima hanea yosayaga amakaseno ayaꞌaya humainegeꞌya namayagamoꞌya akopatela noꞌamia me negiye.” huno hie.
MAR 4:33 Yisasiꞌa aniꞌa huno kasagoꞌya avame kea alumo alumo huno amakupima havisaya avamete kea hamapaiye.
MAR 4:34 Yisasiꞌa vayaꞌyagaene maineno mukiꞌa kema hamapaiya kea avame kegeꞌya hamahapaiyanagi agaiꞌaenema tokaeꞌya nemaiya anagala amahaote mainageno hufalote huno hamapaimaine.
MAR 4:35 Ani yupa yagemoꞌa tavifalegahe higeno Yisasiꞌa agaiꞌaenema tokaeꞌya nemaiya anagafe mage huno hie “Tikotumona atu faliga vigetao.” huno hamapaiye.
MAR 4:36 Higeꞌya mukiꞌa elitalu humainaya veala neꞌamataleꞌya tipi kalefi haisaga humaiꞌya Yisasina avaleꞌya vageno nagoꞌa tipi kaleyagamoꞌya agai tipi kalene tokaeꞌya vae.
MAR 4:37 Neꞌvageno tusiꞌa yasimoꞌa alino timona aikalato kalato huno tipi kalefi atalegeno tipi kalefi havategahe hie.
MAR 4:38 Havategahe higeno Yisasiꞌa tipi kalemona akavelega tala yosale afita aino faemainegeꞌya agafa huꞌya mage hae “Hulavenelina kanomogae tikotupi asaga hulavita ti nakaita falisunageka kahauna huotategano?” huꞌya hae.
MAR 4:39 Hageno Yisasiꞌa hetino ani limofeꞌene yasimofeꞌenena tokiyaꞌage ke huno “Taga huo.” higeno yasimoꞌene timoꞌenena taga huꞌana alava humainaꞌe.
MAR 4:40 Alava higeno Yisasiꞌa agaiꞌaenema tokaeꞌya nemaiya anagafe mage huno hie “Naꞌa higetama kolia nehae? Nagaife havitama tamakupi maletama tamametiti nehaya yamoꞌa kaleꞌyo humaineo?” huno hamavige.
MAR 4:41 Hamavigegeꞌya amamaꞌyo aiteꞌya huge havige huꞌya mage hae “Ma kanoa taꞌe? Yasimoꞌene timoꞌene agai kea haviteꞌya akave nemalae.” huꞌya hae.
MAR 5:1 Kalili ala tikotuna takaeꞌya ame agegayamona Kelasa* vea mainalega uvaꞌyi hae.
MAR 5:2 Yisasiꞌa ani tipi kalea neꞌataleno ti agegayalega neꞌvigeno nago kanomona Kefo Avamuꞌmo agupi mainea kanomoꞌa matimatipinagati Yisasite emaine.
MAR 5:3 Ani kanoa yafakapinaga nomaꞌa hanegeno anifinaga mainegeꞌya tokiyaꞌage seni nofiteti kitesaya vayala omainae.
MAR 5:4 Vayaꞌmoꞌya seni nofiteti aiya ayaꞌene kisalu kimalenageno ani nofila aigalu heneꞌataleno aiyafi nofila yafateti ailatapegeno nofila aikaꞌno higeno “Ako huka maiyo” huꞌya hapaisaya tokiyaꞌamima hanea vayala omainae.
MAR 5:5 Omaigeno ani kanomoꞌa nateꞌene kegeꞌene efi efi huno matimatipinagaene agoꞌyaleꞌene maineno tusi aviteno avovo nehuno yafateti agaiꞌa augafa aige talaga talagoma humainea yamoꞌa amumoꞌa tusiya humaine.
MAR 5:6 Ani kanomoꞌa Yisasina ayaꞌayate neꞌegeno ageteno aiyayeno eno aiyafi aleꞌya meyeno mopafi maineno alisoso huneꞌate.
MAR 5:7 Yisasiꞌa mage huno hie “Kefo Avamuꞌmogae agusafinagatila hatilavio.” huno hutea yafe ani kanomoꞌa ala kegefafiti mage huno hie “Yisasigae, ago tagaseno anale mainea Anumaya Kotina neꞌamogae, naꞌa hunategahe nehane? Musekaꞌa nehugi nagata aisia kavala huonato.” huno hie.
MAR 5:9 Higeno Yisasiꞌa ani kanohena mage huno hie “Kagai kagia tagae?” huno havigegeno “Nagia Kasagoꞌya-moꞌnae. Mukiꞌa Kefo Avamuꞌmoꞌya nagupi haifaleꞌya mainaya yafe nagia Kasagoꞌyamoꞌnae.” huno hie.
MAR 5:10 Huteno Yisasifena mage huno hie “Musekaꞌa nehue ma kumatetila Kefo Avamula humatesanageꞌya alulega oꞌvisae.” huno hie.
MAR 5:11 Nehigeꞌya kasagoꞌya afuyagamoꞌya agoꞌyafi maineꞌya kave nenae.
MAR 5:12 Nenageꞌya Kefo Avamuꞌmoꞌya Yisasife mage huꞌya havigae “Ani afuyagamo amakuꞌafi hulategeta vamano.” huꞌya havigae.
MAR 5:13 Havigageno Yisasiꞌa “Aniꞌa hiho.” huno higeꞌya Kefo Avamuꞌmoꞌya ani kanomo agupitila hatilaviꞌya afuyagamogami amakupi haifalageno ani afuyagamoꞌya amaiyayeꞌya nagola aulufi kapi taviteꞌya tipi asaga hulaviꞌya ti nakaiꞌya fali haꞌno humainae. Afua tu tauseniꞌa (2,000) afuyaga fali haꞌno humainae.
MAR 5:14 Fali haꞌno hageꞌya ani afuyagale kava neꞌyagaiya vayala faleꞌya ala kumatega mainaya veaꞌneheꞌene hoyafinaga mainaya veaꞌneheꞌene “Naꞌa maꞌa higeta neꞌone.” huꞌya hamapaigeꞌya ani veala “Hia yana agesune.” nehuꞌya emainae.
MAR 5:15 Yisasite eꞌya kasagoꞌya Kefo Avamuꞌmoꞌma agupifiti hatilavino via kanomona agesa akalo higeno kenaꞌa failino anile mopale mainegeꞌya megeteꞌya koli hae.
MAR 5:16 Yisasiꞌma humainea kavaꞌma agemainaya veaꞌmoꞌya naꞌa maꞌa huno Kefo Avamula agupima mainea kanoa alino kanale hutea yafeꞌene afuyagama humatea yafeꞌene hamapaiye.
MAR 5:17 Hamapaigeꞌya ani veaꞌmoꞌya Yisasifena “Tagaila tataleka ago vuo.” huꞌya hae.
MAR 5:18 Hageno Yisasiꞌa ugahe tipi kalefi haisaga hunemaigeno Kefo Avamuꞌma agupiti ataleno umainea kanomoꞌa Yisasifena “Kagaiꞌene visuꞌe.” huno havigegeno Yisasiꞌa “Aꞌao kagaya nokalega visanaꞌamoga mukiꞌa Anumayamoꞌma aigekateno hugatea yafena vayakamogamina mo hamapaiyo.” huno hie.
MAR 5:20 Higeno ani kanomoꞌa viaꞌyamo teniꞌa (10) ala kumaꞌyaga hanea kotega uno Yisasiꞌma hutea yafena hamapaigeꞌya mukiꞌa veaꞌmoꞌya amamaꞌyoa aimainae.
MAR 5:21 Yisasiꞌa tipi kalefi asaga humaino tina lakaeno eteno ti agegayalega egeꞌya muki veaꞌmoꞌya agaite melitalu humainae.
MAR 5:22 Emainageno nagola soka kanoa, Yailasiꞌe nehaya kanoa, emaineno Yisasina mogeteno aiyafi mope humaine.
MAR 5:23 Mope humaineno tokiyaꞌage huno Yisasina mage huno havige “Vae nagai munala faligahe ayaya neꞌaigi kaya mo maletesanageno kanale hutesie.” huno hie.
MAR 5:24 Higeno Yisasiꞌa agaiꞌene vigeꞌya veala yageꞌyage huꞌya akave umainae.
MAR 5:25 Vageno tuelufuꞌa (12) kafua mukiꞌa kanale aigu nopinaga nemaiya aala anile maine.
MAR 5:26 Nagoꞌa tota vayate ute ete hugeteana agataiya kavala hageno moneꞌama amaminea yamoꞌa haꞌno higeno ani kaliꞌa nago kanomoꞌa ali kanale huoꞌatenegi kaliꞌamoꞌa ala humaine.
MAR 5:27 Ani aꞌmoꞌa Yisasi avagea haviteno ani yageꞌyageꞌma haya veapi Yisasina akavelegati kenaꞌale mevate hie.
MAR 5:28 Avate nehuno agesa mage huno havie “Kenaꞌale avate nehisugeno kaliꞌnimoꞌa haꞌno hunategahie.” huno agesafinaga havimaine.
MAR 5:29 Haviteno aniꞌa higeno aupaꞌa kolamoꞌa taꞌnegeno augafafinaga malegeno ageana kaliꞌamoꞌa ago kanale hutene.
MAR 5:30 Kanale huteanagi Yisasiꞌa “Nagoꞌa tokiyaꞌnia ago nataleno vie.” huno agesafinaga haviteno anifima alitalu humainaya veaꞌmogami amuꞌnopi maiyahae huno mage hie “Ta kenaꞌnilela mevate hie?” huno humaine.
MAR 5:31 Higeꞌya agaiꞌaenema tokaeꞌya nemaiya anagaꞌamoꞌya mage hae “Mukiꞌa veala yageꞌyage hageka neꞌaganagi naꞌa higeka na kea hamavinegane?” huꞌya hae.
MAR 5:32 Hageno Yisasiꞌa moge mege huno avate hia kanohe ati ayemaine.
MAR 5:33 Ati neꞌayegeno ani aꞌmoꞌa kaliꞌa ago kanale hutegeno agea yafe koli huno atili huteno aiyafi mope huno Yisasiꞌma hutea yafena tamage huno hapaiye.
MAR 5:34 Hapaigeno Yisasiꞌa mage huno hie “Aꞌmogae nagaifema havika kagupi maleka kametiti hanageno ago kalikaꞌamoꞌa kanale hugategi kaipamoꞌa yasi nehinageka afaꞌa vuo. Kalikaꞌa agola haꞌno hie.” huno hapaiye.
MAR 5:35 Hanepaigeꞌya nagoꞌa vayala soka kanoa, Yailasi notegati mage huꞌya me hapaiye “Munakamoꞌa ago falimainegi ataleka kava kanomona kasalo haegi nagoꞌene havioko.” huꞌya hae.
MAR 5:36 Hageno Yisasiꞌa hapaiya kehena ohavisia agesa haviteno soka kanohena mage huno hie “Kolia ohuka nagaife havika kagupi maleka kametiti huo.” huno humaine.
MAR 5:37 Mukiꞌa veafena omeho huneꞌamateno Pitaꞌene Yemesiꞌene nepuꞌamoꞌa Yoniꞌene amavaleno umainae.
MAR 5:38 Soka kanomo note uvaꞌyi huꞌya agayana mukiꞌa veala tusiꞌa avineꞌatageno Yisasiꞌa nopi haifaleno amakaifena mage huno hie “Naꞌa higetama tusiꞌa avianeꞌatae? Ma munala ofalinegi afaꞌa faeno maine.” huno hie.
MAR 5:40 Mani kea higeꞌya veaꞌmoꞌya faligeꞌyama agaya yafe kigiꞌa hutageno “Kumatega hatilavitama viho.” huno higeꞌya kumatega hatilavigeno Yisasiꞌa itaꞌafoꞌamoganiene agaiꞌaenema vaya anagaꞌene amavaleno falimainea munaꞌma malalega amavaleno haimaine.
MAR 5:41 Haino umaineno ayate atafa hulineno agaiꞌa kefiti mage huno hie “Talita kumi.” huno hie. Tagaiti kefina “Ma munaꞌmoga kahanepaugi hetio.” huno humaine.
MAR 5:42 Higeno aupaꞌa ani munaꞌmoꞌa hetino ute ete hie. Ago ala munalagino tuelufuꞌa (12) kafuꞌa hanea munalagino hetino ute ete higeꞌya anile mainaya veaꞌmoꞌya amamaꞌyo aiye.
MAR 5:43 Amamaꞌyo aigeno Yisasiꞌa tokiyaꞌage ke huno “Anima agaya yafena veala hamaꞌopaiho” huno kahegi neꞌamateno “Kavela amiho.” huno humaine.
MAR 6:1 Yisasiꞌa ani kumala ataleno viaꞌamo ko aepaꞌalega vigeꞌya agaiꞌaenema tokaeꞌya nemaiya anagaꞌmoꞌya akave umainae.
MAR 6:2 Sapati yupa mono noꞌamifi haino Anumaya Koti kea mukiꞌa vayala hamapaigeꞌya haviteꞌya amamaꞌyo aigeꞌya mage huꞌya hae “Mukiꞌa havi haviꞌyana hanateti alia kea nehie? Ayapitila tokiyaꞌage avame yama humainea tokiyaꞌa hanateti alimaine?
MAR 6:3 Mani kanoa no negia aliꞌyate kano maineanagi Malia nafaꞌne mainegi Yemesiꞌene Yoseseꞌene Yutasiꞌene Saimoniꞌenena aganaꞌamoꞌya mainagi asaꞌamoꞌya tagaiꞌene nagopi mainae.” huꞌya huteꞌya amaipa kafa heteꞌya amakaveꞌno hutenae.
MAR 6:4 Amakaveꞌno hutayanagi Yisasiꞌa mage huno hie “Anumaya Koti kema nehia kanomoꞌa mukiꞌa kumate mono huhaleno hamapaisiana agia alisaga nehagi kumaꞌale maisiana agaiꞌa afamoꞌene no kumaꞌale vayaꞌenena agia alisaga ohugahae.” huno humaine.
MAR 6:5 Mani kumatela ala tokiya avame yana ohunegi afaꞌa nagoke nagoke kali vayake aya malegeno kanale humatene.
MAR 6:6 Kanale humatenegi afaꞌa mukiꞌa veala agaife haviꞌya amakupi maleꞌya amametiti ohaya yafe Yisasiꞌa amaꞌyo aigeno alu kumate kumatela vaiyeno monola hamapaino humaveli maine.
MAR 6:7 Yisasiꞌa tuelufuꞌa (12) anagaꞌamogamife ke higeꞌya ageno mukiꞌa Kefo Avamuꞌma veaꞌmogami amakupiti amanatitalesaya tokiya amamiteno mage hie “Tole ali lokaete lokaete hutama viho.” huno humatene.
MAR 6:8 Huneꞌamateno mage huno hie “Kama visayana ayopatamige alilitama viho. Kutamiene mayaene monetamiene alitama oꞌviho.
MAR 6:9 Tamaiya nona vaigahayanaki tole siota vaioꞌaliho.”
MAR 6:10 Nagoꞌene mage huno hie “Nago nopima haifalenutamahena ani nopi faetama maitama hutetama amataletama alu kumatela viho. Faelitetama ohiho.
MAR 6:11 Nagoꞌa kumateꞌma visageꞌya veaꞌmoꞌya ali falu falama huotamateꞌya ‘Tamakai kema ohavigahune.’ huꞌya hisagetama ani kumala neꞌataletama ‘Havi kava hae.’ hutama hisaya yafe tamaiyafima hanesia kugukege mopa aihehe huneꞌataletama viho.” huno hamapaiye.
MAR 6:12 Hamapaigeꞌya ani vayala neꞌuꞌya mukiꞌa veaꞌnehe mage huꞌya hae “Kefo yatamihena havitama tamakaye nehinagetama tamakuꞌa aiyahae hiho.” huꞌya hamapaiye.
MAR 6:13 Hamapaiꞌya mukiꞌa Kefo Avamula veaꞌmogami amakupitila amanati neꞌataleꞌya kasagoꞌya kali veala amaugafale masavena falematageno kanale humatene.
MAR 6:14 Ani kanafina Yisasi avagemoꞌa ala higeno nagola sauve kanomo agia Helotiꞌe anima haya kea havimaine. Nagoꞌa veaꞌmoꞌya Yisasifena mage huꞌya hae “Ma kanoa tima falematea Yoniꞌe falimainefiti hetimaine. Hetimaineafe tokiyaꞌa hanegeno ma tokiya aliꞌyana neꞌalie.” huꞌya hae.
MAR 6:15 Hageꞌya nagoꞌa veaꞌmoꞌya Yisasifena mage huꞌya hae “Ma kanoa Ilaiya maine.” huꞌya hageꞌya nagoꞌa veaꞌmoꞌya “Aune kanoa nayo amaune vaya kana nehie.” huꞌya hae.
MAR 6:16 Hageno Helotiꞌa haviteno mage huno hie “Yonina haeho huꞌna hugeꞌya ageꞌya hataga hutalenaya kanoa faliteno komufiti hetimaine.” huno hie.
MAR 6:17 Helotina aganaꞌamo agia Filipiꞌe. Filipi aꞌmo agia Helotiasiꞌe. Helotiꞌa Helotiasina kumai a alitenea yafe Yoniꞌa Helotife mage huno hie “Anumaya Koti kea atagaeka kaganakamo aala kumai a alitenane.” huno hia yafe Helotiꞌa vayala humategeꞌya Yonina motafa huꞌya avaleꞌya kina nopi hutenayane.
MAR 6:19 Hutenageno Helotiasiꞌa Yonifena tusi hai vaiteteno haesageno falisia agesa havino maiyanagi Helotiꞌa agesa mage huno havimaine “Yoniꞌa kefo yana ohuno fatago kanoa alu aotage kano maine.” huno havilinea yafe Yonifena koli huno “Ohaegahae.” huno auꞌneꞌvaino agai kea haviteno agesa kuꞌmo nehuno tole agesa havino afaꞌa muse huno keꞌa nehaviane.
MAR 6:21 Nago yupa Helotina atenea kanamoꞌa falote higeno Helotiꞌa ala imu kimaleteno mukiꞌa kamani kava vayaꞌene ati kava vayaꞌene Kalili kotegama afenomaꞌa kasago humainea vayaꞌyagaene ke higeꞌya imulega emainae.
MAR 6:22 Emainageno Helotiasina munaꞌamoꞌa eno amoneꞌayegeno Helotiꞌene vayaꞌamoꞌyaene neꞌageꞌya tusiꞌa musemaꞌa hageno Helotiꞌa ani munaꞌmofena mage huno hie “Kahaisia yafena afaꞌa hisanageꞌna kamigahue.
MAR 6:23 Anumaya Koti aulagafi kahanepauve nagoꞌa yafema nahavigesanana afaꞌa kamigahue. Mone fenoꞌenefema nehuka mopaenefema hisanana afaꞌa nagai yaꞌyaga haneanagiꞌna amuꞌnopiti ali fako huꞌna kamigahue.” huno humaine.
MAR 6:24 Higeno ani munaꞌmoꞌa viaꞌamo itaꞌamofena mage huno havige “Na kanohe ke huꞌna havigesue?” huno higeno itaꞌamoꞌa mage huno hie “Yoniꞌa ti falemate kanomo ageꞌya fakaliteka anumaꞌa aifakalika me namio huka hapaiyo.” huno hie.
MAR 6:25 Higeno aiyayeno ala sauve kanomotega viaꞌamo mage huno hapaiye “Aupaꞌa ti falemate Yonina ageꞌya fakaliteka anumaꞌa yopafi maleka me namio.” huno hie.
MAR 6:26 Higeno ala sauve kanomoꞌa haviteno aipamoꞌa tusiꞌa kanaꞌage higeno Anumaya Koti aulagafima huno lokiya vaimalea yafeꞌene maiya vayafeꞌene agesa haviteno mage huno hie “Ani munaꞌmo kea he falaꞌokigahue.” huno hie.
MAR 6:27 Higeno aupa kanoꞌa nago ati kanoꞌa huteno mage huno hapaiye “Yonina ageꞌya mo fakalika anumaꞌa alika eno.” huno higeno kina nopi viaꞌamo Yoni ageꞌya mo fakalitalene.
MAR 6:28 Fakaliteno anumaꞌa yopafi maleno alino eaꞌamo ani munaꞌmona memigeno itaꞌamona alino amine.
MAR 6:29 Amigeꞌya Yoniꞌenema tokaeꞌya nemaiya anagaꞌmoꞌya ani kea haviteꞌya uꞌya augafaꞌa moliꞌya yafakapi mo hevaitenae.
MAR 6:30 Aposolo vayala Yisasitega eteꞌya mukiꞌa humainaya kavaꞌene humaveliya kene eꞌya me hapaimainae.
MAR 6:31 Me hanepaigeꞌya mukiꞌa veaꞌmoꞌya agaitega neꞌuꞌya neꞌeꞌya maiꞌya hageno Yisasiꞌenema tokaeꞌya nemaiya anagaꞌmoꞌya kaveꞌamima nesaya kanaꞌamia omalea yafe Yisasiꞌa mage huno hie “Egeta tagaitige kaꞌme kotega umaifalu hamano.” huno hie.
MAR 6:32 Higeꞌya amakaiꞌamige tipi kalefi haisaga humaiꞌya kaꞌme kotega ugahe umainae.
MAR 6:33 Vageꞌya mukiꞌa veaꞌmoꞌya amaketeꞌya amaugosafina ago agemainaya vayalegiꞌya kumaꞌamileti mopafi amaiya yeꞌya uhagoteꞌya ani kaꞌme kotega uvaꞌyi humainae.
MAR 6:34 Uvaꞌyi hageno Yisasiꞌa tipi kalefiti asaga hulavino ageana mukiꞌa veaꞌnea elitalu humaiya veala amaketeno agesa mage huno havie “Ma veaꞌnea sipi sipi kana huꞌya mainayanagi kava yagaisaya vayala omainae.” huno agesama havia yafe kalagi aimateno alu ke alu kea hamapaiye.
MAR 6:35 Hamanepaigeno yagemoꞌa tavi falegahe higeꞌya agaiꞌaenema tokaeꞌya nemaiya anagaꞌmoꞌya agaite eꞌya mage huꞌya hae “Ma kumala vaya omai kuma hanegeno yagemoꞌa tavi falegahe nehiafe ma veala humatesanageꞌya uꞌya nagoꞌa veaꞌmogami hoyafitiꞌene notegatiꞌene nesaya kaveꞌamia mo miya hisae.” huꞌya hae.
MAR 6:37 Hageno Yisasiꞌa mage huno hamapaiye “Tamakaya tamakaitami nesaya kavela amamiho.” huno higeꞌya agaifena mage huꞌya hae “Nago kanomoꞌa tu hataletiꞌa (200) kanafi aliꞌya aliteno ani moneleti kosa hesia maya miya ohileꞌasine. Tagaya ani moneleti mo miya hulita ani maya memamisune hunageka nehano?” huꞌya hae.
MAR 6:38 Hageno Yisasiꞌa mage huno hie “Mogeho naꞌmagi maya hane?” huno higeꞌya uꞌya mogayana higeꞌya “Faefuꞌa (5) mayagi tole noyamegi huno hane.” huꞌya hae.
MAR 6:39 Hageno Yisasiꞌa mage hie “Mukiꞌamogatama alitalu hute hute hutama kanale apepate mopale maiho.” huno hie.
MAR 6:40 Higeꞌya fifitiꞌa (50) veala nagopi alitalu huꞌya maigeꞌya vani hataletiꞌa (100) veala nagopi alitalu huꞌya mainae.
MAR 6:41 Yisasiꞌa faefuꞌa (5) mayaene tole noyamene aliteno anafinaga agesaga huno neꞌageno Anumaya Kotitega ani kavefe huno muse huteno maya kofa huno agaiꞌaenema tokaeꞌya nemaiya anagala amamigeꞌya aliꞌya fako hutele huꞌya veala neꞌamamigeno tole noyamene kolino mukiꞌa veaꞌma nesayafe amamine.
MAR 6:42 Amamigeꞌya mukiꞌamoꞌya neꞌya amamu hae.
MAR 6:43 Amamu higeꞌya atalaya mayaene noyamene atupatapaꞌa alitalu huꞌya kupi aiteꞌya tuelufuꞌa (12) kupi aigeno havatemaine.
MAR 6:44 Ani kaveꞌma nemainaya vayala faefu tauseniꞌa (5,000) vemoꞌya nemainae.
MAR 6:45 Aupaꞌa Yisasiꞌa agaiꞌaenema tokaeꞌya nemaiya anagafe mage huno hie “Tamakaya nagaila nenataletama hagotetama tipi kalefina haisaga humaitama atu kaiyaga Petesaita kumatega utegeꞌna nagaya veala humatesugeꞌya viho.” huno hie.
MAR 6:46 Viho humategeꞌya utageno Yisasiꞌa Anumayamotega ke huno havigegahe agoꞌyafi haimaine.
MAR 6:47 Haino mainegeno hanikigeno tipi kalemoꞌa tikotumona amuꞌnopi utegeno Yisasiꞌa agaiꞌage ti agegayale maine.
MAR 6:48 Maineno ageana amaulegati yasimoꞌa eaꞌamo tipi kalemona meyetu fegeteana oꞌvigeno Yisasiꞌa ageteno kotigahe hia avametega ti kotumona agupile viaꞌamo amakaitela momakasegahe hie.
MAR 6:49 Amakasegahe ti agupile vianagi eneꞌegeꞌya ageteꞌya amakesa mage huꞌya haviye “Hakalo neꞌefi?” nehuꞌya “Avovo.” hae
MAR 6:50 Avovo huꞌya tusiꞌa koli huteꞌya atali talu hayanagi aupaꞌa amakaifena mage huno hie “Kolia ohutama maiho. Nagaya neꞌogi tokiya vaitama maiho.” huno hie.
MAR 6:51 Huteno tipi kalefi haino amakaiꞌene nemaiyana yasimoꞌa taga higeꞌya ani vayaꞌmoꞌya tusiꞌa amamaꞌyoge humainae.
MAR 6:52 Yisasiꞌa tokiyaꞌaleti kaveꞌma amaminea yafena amakuꞌamoꞌa haꞌyagino atalako higeꞌya aepaꞌa havilama ohunae.
MAR 6:53 Ti kotuna takaeꞌya Kenesale kotega uvaꞌyi huteꞌya hatilaviꞌyama vayana tipi kalea nofiteti ayetenae.
MAR 6:54 Tipi kalefiti hatilavino neꞌvigeꞌya aupaꞌa veaꞌmoꞌya Yisasina augosafina agemainae.
MAR 6:55 Ageteꞌya note note amaiyayeꞌya ute ete huꞌya kali veala hagifanale amavaleꞌya “Yisasiꞌa ma kumate maine.” huꞌya haya kea haviteꞌya agaite amavaleꞌya etele humainae.
MAR 6:56 Yisasiꞌa vilega osi kumatelo ala kumatelo talapinagao kali veala amavaleꞌya kuma amuꞌnopi momateneꞌya Yisasifena mage huꞌya havigae “Kanale kenakamo atupalela avate hisuno?” huꞌya hateꞌya avate humainaya veala kalimoꞌa kanale humatene.
MAR 7:1 Nagoꞌa Falasia vayaꞌene kahegi kema havilinaya anagaꞌene Yelusalemuti Yisasite emainae.
MAR 7:2 Emaineꞌya agayana nagoꞌa Yisasiꞌene tokaeꞌya nemaiya anagaꞌmoꞌya amayana sese ohuꞌya kavela nenageꞌya amakemainae*.
MAR 7:3 Falasia vayaꞌagela omainagi mukiꞌa Yuta veaꞌmoꞌyaene amakinagomoꞌya humainaya kava akave maleꞌya amayama seseꞌma ohayana kavela onenagi sese huteꞌyage nenae.
MAR 7:4 Situatega ugeꞌyama enuꞌya tima ofalesayana onegahagi tina faleteꞌyage amaugafamoꞌa hilato hutegeꞌya kavela nenae. Ani yamaꞌagelomagi nayona vayaꞌmoꞌya kahegi kea tokiyaꞌage huꞌya humainaya kehe haviꞌya masuene yopaene susufanene mukiꞌa sese nehae.
MAR 7:5 Falasia vayaꞌene kahegi kema havilinaya anagaꞌene Yisasife mage huꞌya me hae “Naꞌa higeꞌya kagaiꞌenema tokaeꞌya nemaiya anagaꞌmoꞌya taginagomogami kavala neꞌataleꞌya ani kea atagaeꞌya kaveꞌma negahena amayana sese nohae?” huꞌya havigae.
MAR 7:6 Hageno Yisasiꞌa kenonaꞌamia mage hie “Tamakaya vagala vaya mainae. Aisaiyaꞌa Anumaya Koti aune kanomoꞌa tamakaifena tamage huno Anumaya Koti autaꞌmafina mage huno humaineane ‘Ani nofi veaꞌmoꞌya amavayaleti huꞌya nagai nagia alisaga nehayanagi amakuꞌamoꞌa alulega hanegeꞌya aniꞌa kavala nehae.
MAR 7:7 Amakaya ma mopafi veaꞌmogami amavayafiti humainaya kahegi kehe mage humainayane ‘Mani kea Anumaya Koti ke hanegi akave maleho.’ huꞌya humainayanagi nagai nagia alisaga hisaya kavala ohuꞌya afa kava maiꞌya nehae.’ huno kaemaleneane.
MAR 7:8 Anumaya Koti kahegi kea ataletama veaꞌmoꞌya malenaya kea akave nemalae.
MAR 7:9 Huteno nagoꞌene mage huno hie “Tamakaitami tamakinagomogami kavaꞌma akave nemalaya yafe Anumaya Koti kahegi kea ago atalenae.
MAR 7:10 Moseseꞌa mage huno humaineane ‘Tamakaya itatami afotamimogami amakia alisaga nehutama keꞌamia veganokanola ohutama amaiyaꞌafinaga maiho. Nagoꞌa veaꞌmoꞌya itaꞌafoꞌamimogamima kamugema vaimatesayana faligahae.’ huno humaineane.
MAR 7:11 Humaineanagi tamakaya mage hutama hae ‘Nago kanomoꞌa itaꞌafoꞌamogani anaya hisia monema hanesigenoꞌa itaꞌafoꞌamoganina anayama ohinunoꞌa mage huno hisie ‘Ani monea Anumaya Kotina amisua yane huꞌna humainoe.’ huno hinunofena itaꞌafoꞌamoganina nagoꞌene anayama ohisiana kanalele.’ hutama nehae.
MAR 7:13 Ani kema haya yafe tamakinagomogami kavala akave malenayafe Anumaya Koti kehena ‘Afa yane.’ hutama mukiꞌa ani kavala nehae.” huno humaine.
MAR 7:14 Yisasiꞌa kasagoꞌya veala agaite esaya yafe nagoꞌene ke higeꞌya ageno mage huno hie “Tamakaya mani kea havilama hutama haviho.
MAR 7:15 Nagoꞌa nesaya yamoꞌma tamavayafi visia yamoꞌa tamakuꞌafina oniꞌya otamahaugahigi tamakuꞌafitiꞌma hatilavisia yamo ali falote hisigeno tamakuꞌamoꞌa oniꞌyaꞌagela hugahie.” huno hie.
MAR 7:17 Huteno neꞌamataleno nopinaga haino mainegeꞌya agaiꞌaenema tokaeꞌya nemaiya anagaꞌmoꞌya Yisasife mage huꞌya hae “Kagaya mani avame kemona aepaꞌa hugeta havimano.” huꞌya havigae.
MAR 7:18 Havigageno Yisasiꞌa mage huno hie “Tamakaiꞌenena havilama ohutama nehao? Tamakaya ohavinao mukiꞌa yana tamavayafima nesaya yamoꞌa oniꞌya otamahaugahie.
MAR 7:19 Tamavayafi nayaꞌamoꞌa tamakuꞌafina oꞌuno afaꞌa tamaipafike taviteno haenagaꞌa aifayolagafina taviteno afa ya kana nehie.” huno hie. Mani kema hiana mukiꞌa kavela afaꞌa nesaya kavekeꞌya hane huno hie.
MAR 7:20 Huteno mage huno hie “Nagoꞌa yama tamavayafitiꞌma hatilavisia kemoꞌa tamakuꞌamona alino oniꞌyaꞌage nelamahaiye.
MAR 7:21 Veaꞌmogati taguꞌafitiꞌma efalote hia yamoꞌa maꞌa huno ali falote nehie kanale ohunea tagu tagesa nehavuna yaꞌene aꞌne munaꞌnene kumai he yaꞌene musufaya hu yaꞌene vaya hamaefali yaꞌene alu kanomo aꞌne amavayu hu yaꞌene alu kanomo yafe age haꞌye hu yaꞌene kefo yaꞌene havige huno savale savala hu yaꞌene age lamahaꞌye nehaya yaꞌene veamogami taipa havita haviya huneꞌamatona yaꞌene veafe havige humate yaꞌene taugafa alita hai yaꞌene kema ohavi yaꞌene taguꞌafitila ali falote nehie.
MAR 7:23 Mukiꞌa ani kefo yama nehaya yana tamakuꞌafiti efalote hia yamo tamakuꞌafina oniꞌyaꞌagela humaine.” huno hie.
MAR 7:24 Yisasiꞌa ani kumala neꞌataleno Taiya kumaꞌmo kaiyaga umaineno agaiꞌama anileꞌma emainea yafena veaꞌmoꞌya ohavisae huno nago nopi haino maiyanagi afaꞌa agaiꞌa falaꞌokigahie. Veaꞌmoꞌya ago haviye.
MAR 7:25 Aupaꞌa nago aꞌmoꞌa Yisasi avagea haviteno eno aiyafi aleꞌya meyemaine. Ani aꞌmo munaꞌmona agupi Kefo Avamula mainea alagino.
MAR 7:26 Isaleli vea omainea alagino Kaliki ke nehuno Fonisia nofi ale. Silia kotega alagino munaꞌamona agupi mainea Kefo Avamu* anatitalesie huno aukaꞌya huno havige.
MAR 7:27 Yisasiꞌa mage huno hie “Nafaꞌnemoꞌya hagoteꞌya kavela negahae. Havigu nafaꞌnemogami kavela hamanafaleta kalayagamogami amamisunana haviya hugahie.” huno hie.
MAR 7:28 Higeno ani aꞌmoꞌa mage huno hie “Anumayamogae tamage hananagi nafaꞌnemoꞌya nenageno osi atupaꞌa sipaleti asaga hulavia yana kalamoꞌya yogiꞌya nenae. Kagaya ani kava huka nagaya Isaleli a omainoanagi osiꞌa nahaꞌmao.” huno hie.
MAR 7:29 Higeno Yisasiꞌa ani afena mage huno hapaiye “Kekaꞌa ago hanageꞌna havuafe nokalega vuo. Kefo Avamuꞌmoꞌa munakamona ago ataleno vie.” huno humaine.
MAR 7:30 Higeno nomaꞌalega viaꞌamo mogeana Kefo Avamuꞌmoꞌa ago ataleno vigeno munaꞌamoꞌa kanale huno sipale faemainegeno itaꞌamoꞌa mogemaine.
MAR 7:31 Yisasiꞌa Taiya kumala ataleno aiyahae huno Saitoni kumala agaseno viaꞌamo teniꞌa (10) kuma hanelega mogaseno Kalili ti agegayalega uvaꞌyi humaine.
MAR 7:32 Uvaꞌyi higeꞌya veaꞌmoꞌya nagola yuna aifo kanoa Yisasitega avaleꞌya vayana ani aifo kanomoꞌa hagifali ke nehatagegeꞌya Yisasife mage huꞌya hae “Augafale kayateti avate hisane.” huꞌya havigae.
MAR 7:33 Yisasiꞌa ani kanoa neꞌavaleno veala amataleno faitega anakaiꞌanige umaineꞌana aya avoyaleti aifo kanomona agesafi vaiteno avetuꞌna heno ayateti avefuꞌnale avatemalene.
MAR 7:34 Malegeno anafinaga agesaga huno “Vaeha ausoꞌnio.” huteno agaifena agaiꞌa kefiti mage huno hie “Efata.” huno hie. Tagai kefina “Kagesa akalo hino.” huno hapaiye.
MAR 7:35 Higeno agesamoꞌa akalo higeno avefuꞌnamoꞌa kanale higeno aikalo huno kea kea hie.
MAR 7:36 Yisasiꞌa mage huno hie “Nagoꞌa veala mani yafena hamaꞌopaiho.” huno kahegi mateanagi ani kea huꞌya atile male huꞌya mukiꞌa veaꞌmogami amakesale mohu mehu humainae.
MAR 7:37 Hageꞌya haviya veaꞌmoꞌya tusiꞌa amamaꞌyo aigeꞌya mage hae “Mukiꞌa yana aligeno kanale kanale nehie. Yuna aifo vayala aya malegeꞌya kea nehaviye. Aifo vayala keꞌamia ali falote huneꞌamamie.” huꞌya nehae.
MAR 8:1 Nago yupa kasagoꞌya veaꞌmoꞌya alitalu huꞌya maiyana nesaya yana omalegeno Yisasiꞌa agaiꞌaenema tokaeꞌya nemaiya anagafe ke higeꞌya ageno mage hie “Mani veala tagufa (3) yupa nagaiꞌene mainageno nesaya kaveꞌamia omalea yafe nahau huneꞌamatoe.
MAR 8:3 Nagoꞌa veala ayaꞌaya kotegati emainagi havigu amatalesugeꞌya katega neꞌvisageno amakatesigeꞌya amaugetunatu huꞌya takatiyafena nonahaiye.” huno hamapaiye.
MAR 8:4 Yisasiꞌenema tokaeꞌya nemaiya anagaꞌmoꞌya mage huꞌya hapaiye “Mauna kola vaya omai kolagi hanateti maya alita ani veaꞌnea amamisune?” huꞌya havigae.
MAR 8:5 Hageno Yisasiꞌa mage huno hamavige “Tamakaya naꞌmagiꞌa maya hane?” huno higeꞌya mage hae “Tagaipina seveniꞌa (7) mayaꞌage hane.” huꞌya hapaiye.
MAR 8:6 Hageno Yisasiꞌa muki veafena “Mopale maiho.” huno higeꞌya mopale mainageno Yisasiꞌa ani seveniꞌa (7) maya alino Anumayamotega muse huno havigeteno aposite aposite huteno agaiꞌaenema tokaeꞌya nemaiya anagala amamigeꞌya mukiꞌa veapina vaya kaimainae.
MAR 8:7 Nagoke okasi noyame kanoꞌa hanegeno Yisasiꞌa Anumayamotega ani noyamehe muse huteno “Amamite amamite hiho.” huno higeꞌya vaya kaimainae.
MAR 8:8 Kaigeꞌya mukiꞌa veaꞌnea nageno amamu higeꞌya atalaya maya atupayaga Yisasiꞌenema tokaeꞌya nemaiya anagaꞌmoꞌya alitalu huteꞌya seveniꞌa (7) kupi aihavatemainae.
MAR 8:9 Ani kaveꞌma naya veneꞌnea fo tauseniꞌa (4,000) vayaꞌmoꞌya nemainae. Netageno Yisasiꞌa humategeꞌya umainae.
MAR 8:10 Utageno Yisasiꞌa agaiꞌaenema tokaeꞌya nemaiya anagaꞌene tipi kalefi haisaga humaiꞌya Talamanuta kumatega umainae.
MAR 8:11 Falasia vayaꞌmoꞌya Yisasite eꞌya agaiꞌene ke vaiꞌya ayevataga hisaya yafe mage huꞌya hae “Kagaya ikapinagati tokiyaꞌage avame yana hugeta agamano.” huꞌya hae.
MAR 8:12 Hageno Yisasiꞌa aipa havino kanaꞌage huteno mage huno hie “Naꞌa higetama meni kanafima mainaya veaꞌmogatama tokiyaꞌage avame yafena nahavinegae? Tamage tamahapaisua kea haviho meni kanafima mainaya veaꞌmogatamina tokiyaꞌage avame yana tamaveotigahue.” huno hie.
MAR 8:13 Huteno neꞌamataleno tipi kalefi haisaga humaino atu faliga ugahe umaine.
MAR 8:14 Yisasiꞌenema tokaeꞌya nemaiya anagaꞌmoꞌya tima lakaeꞌya vayana amakekaniꞌya nagoke maya kanoꞌa aliꞌya umainae.
MAR 8:15 Aliꞌya vayanagino Yisasiꞌa mage huno hamapaiye “Tamakaya Falasia vayaꞌene Helotiꞌene amakupima hanea yana agelama ohuneꞌya amavayaleti havigema nehaya yamoꞌa kaihamemo halenegia avamete huno halegino alakefa hisia yafena kaꞌye ho.” huno hie.
MAR 8:16 Higeꞌya ani vayaꞌmoꞌya amakaiꞌamia huge havige nehuꞌya mage hae “Tagaya maya oꞌalita emainona yafe nehie.” huꞌya amakaiꞌamia hae.
MAR 8:17 Hageno Yisasiꞌa ani vayaꞌmoꞌya haya kea ago haviteno mage hie “Naꞌa higetama ‘Kavetia alita omenone.’ hutama tamakaitamia huge havige nehae. Tamakesa havilama hutama ohavinao? Tamakuꞌamoꞌa tilemainegetama nohavio?
MAR 8:18 Tamaulaga haneanagi agelama nohao? Tamakesa haneanagi havilama nohao? Faefuꞌa (5) maya aliꞌna apositeꞌna faefu tauseniꞌa (5,000) veyagama amaminoa yafena tamakekanitama mainao? Naꞌmagi kupi atupatapa aimalageno havatemaine?” huno hamavigegeꞌya “Tuelufuꞌa (12) kule.” huꞌya hapaiye.
MAR 8:20 Hageno mage huno hie “Seveniꞌa (7) maya aliꞌna apositeꞌna fo tauseniꞌa (4,000) vaya amamugeꞌya neteꞌya naꞌmagi kupi atupatapa aigeno havatemaine?” huno hamavigegeꞌya “Seveniꞌa (7) kule” huꞌya hapaiye.”
MAR 8:21 Hageno mage huno hie “Naꞌa higetama nohaviye?” huno hamavige.
MAR 8:22 Petesaita kumate uvaꞌyi hageꞌya veaꞌmoꞌya nagola aulaga asu humainea kanoa avaleꞌya Yisasite neꞌeꞌya mage huꞌya hae “Musekaꞌa nehunagi augafale avate huo.” huꞌya hae.
MAR 8:23 Hageno Yisasiꞌa aulagama asu humai kanoa ayate alino kumala ataleno avaleno malaga viaꞌamo aulagafi avetuꞌna heteno aya nemaleno mage huno havige “Nago yana neꞌagano?” huno havige.
MAR 8:24 Higeno agesaga huno ageana higeno mage huno hie “Veala neꞌagogeꞌya yosa kana huꞌya vaiyatete nehae.” huno hie.
MAR 8:25 Higeno Yisasiꞌa nagoꞌene aniꞌa huno ayana aulagale malegeno aulagamoꞌa kanale higeno agemaine. Aulaga age haleno muki yana kanaleꞌya huno agemaine.
MAR 8:26 Agegeno Yisasiꞌa mage huno hie “Ma kumatela oꞌuka eteka nokalega vuo.” huno hie.
MAR 8:27 Yisasiꞌa agaiꞌaenema tokaeꞌya nemaiya anagaꞌene Sisalia Filipai kotega hanea kumate ugahe katega neꞌuno mage huno hamavige “Veaꞌmoꞌya nagaifena taꞌe huꞌya nehae?” huno hamavige.
MAR 8:28 Hamavigegeꞌya kenonaꞌa mage huꞌya hae “Nagoꞌa veaꞌmoꞌya kagaifena ‘Tima fale neꞌamatea Yoniꞌe.’ huꞌya hageꞌya nagoꞌa veaꞌmoꞌya ‘Ilaiya maine.’ huꞌya hageꞌya nagoꞌa veaꞌmoꞌya ‘Anumaya Kotina aune kanoꞌa maine.’ huꞌya nehae.” huꞌya hapaiye.
MAR 8:29 Hapaigeno Yisasiꞌa mage huno hamavige “Tamakaya nagaifena taꞌe hutama nehae?” huno hamavigegeno Pitaꞌa kenonaꞌa mage huno hie “Kagaya Kalaisigae Anumaya Kotiꞌa taugafa aligatigane huno hugatenea kano mainane.” huno hie.
MAR 8:30 Higeno Yisasiꞌa amaumono maleno mage huno hie “Mani kea nagoꞌa veala hamaopaiho.” huno humaine.
MAR 8:31 Ani yupa Yisasiꞌa agaiꞌaenema tokaeꞌya nemaiya anagafena haenagama falote hisia yafe aepa heno hamapaino mage huno hie “Nagaya ikapinagati emainoa kanoa vayaꞌmo natenea kanomoꞌna tusiya huꞌna nagata yana alisugeno Yuta vayatamaene mono note kava vayaꞌene kahegi kema havilinaya anagaꞌene amakaveꞌno hunateꞌya nahaesageꞌna falisugeꞌya komufi hevainatesageno naugafamoꞌa tole yupa maitenageꞌna tagufa kanale falimainesufitila eteꞌna hetigahue.” huno hamapaiye.
MAR 8:32 Hufalote huno hamapaigeno Pitaꞌa Yisasina faitega avaleno mage huno mo hapaiye “Kagaya ani kea ohuo.” huno hie.
MAR 8:33 Higeno Yisasiꞌa maiyahae huno nagoꞌa agaiꞌaenema tokaeꞌya nemaiya anagala amaketeno Pitafe keamakino mage huno hie “Sataniga mai halenato kagaya Anumaya Koti havimainea aguꞌagesa kanaleꞌya huka nohavinagi vayaꞌmoꞌya kahapaiya amaku amakesa nehavine.” huno hie.
MAR 8:34 Huteno kasagoꞌya alitalu haya veaꞌnene agaiꞌaenema tokaeꞌya nemaiya anagafeꞌene ke higeꞌya ageno mage huno hamapaiye “Nagoꞌa veaꞌmoꞌya nakave visaya amakesa havinuꞌyahena amaugafama aliꞌya hai yana amakaveꞌno huteteꞌya nagaiꞌma nagata aisigeꞌnama falisua avamete amakesa haviteꞌya yafaga yosa kofiꞌya nakave visae.
MAR 8:35 Nagoꞌa veaꞌmoꞌya hamaimuꞌma hanesigeꞌya mai yaꞌamima atafa hutalako hisagenoꞌa ani yamoꞌa fanane hugahianagi nagoꞌa veaꞌmoꞌya nagaife huꞌya nagai kanale mono kema hamapaisaya yafema mai yaꞌamiene hamaimuꞌamiene atalesagenoꞌa ani mai yaꞌami aligatisigeꞌya agola maigahae.
MAR 8:36 Nago kanomoꞌa mukiꞌa ma mopafi afeno yama alisia yafe faliteno agola maige maige hisia haimuꞌa atalesiana alimainea mone afeno yamoꞌa hanaꞌa huno haꞌmaegahie? Aꞌao haꞌomaegahie
MAR 8:37 Falitesigenofena agola maige maige hisia haimula eteno alisia yafe mukiꞌa ma mopafi mone fenoꞌyana afaꞌa atalegahianagi aya ohugahie.
MAR 8:38 Nagoꞌa veaꞌmoꞌya meni kanafina kefo yama nehaya veaꞌnene, Anumaya Koti kema ataleteꞌya alu kate neꞌvaya veaꞌnene, maineꞌya nagai kene nagaiꞌnienefema huꞌya ‘Aoteꞌyamaꞌae.’ hunatesageꞌna nagaya ikapinagati emainoa kanoa vayaꞌmo natenea kanomoꞌna esua yupa Nenafana tokiya hale yamaꞌaene alu aotage ensole anagaꞌmoꞌyaene eteꞌna esuana aniꞌa huꞌna ani veaꞌnehena nagaye huꞌna ‘Tamahaoteꞌyatamie.’ huꞌna humategahue.” huno humaine.
MAR 9:1 Yisasiꞌa mage huno hamapaiye “Tamage huꞌna tamahanepauve maleꞌma hetiꞌya mainaya veala nagoꞌamogatama ofalinesageno hagoteno Anumaya Koti kava yagaisia yamoꞌa himamu yamaꞌaene efalote hinagetama agetetama haenaga faligahae.” huno hamapaiye.
MAR 9:2 Yisasiꞌa sikisiꞌa (6) kana maiteno Pitana Yemesina Yonigamina amavaleno ayaꞌaya agoꞌyafi haiꞌya amakaiꞌamige maineꞌya agayana Yisasi augafamoꞌa alino alu augafa kalimaine.
MAR 9:3 Kenaꞌamoꞌa mopafima mainaya veaꞌmoꞌya sese nehageno efeꞌage nehia avamete ohunegi tusiya huno efeꞌage huno alave alave humaine.
MAR 9:4 Tole kanolatana Moseseꞌene Ilaiyaꞌene evaꞌyi huꞌana Yisasiꞌene kaiyeke nehaꞌageꞌya agemainae.
MAR 9:5 Pitaꞌa Yisasife mage huno hie “Hulavenelina kanomogae tagaya male maunana kanale nehie. Tagaya katega nona tagufa (3) kilamatesune kagaila nagolagi Mosesena nagolagi Ilaiyana nagolagi huta kilamatesune.” huno hie.
MAR 9:6 Tusiya huꞌya kolima haya yafe Pitaꞌa ‘Naꞌane ke hisue?’ huno agesa havigeno mani kea humaine.
MAR 9:7 Ani kea hanepaigeno agola siaꞌmoꞌa evaꞌyi huno melino aiso humategeno ani siapinagati age aino mage huno hie “Mani nafaꞌnea nagai nafaꞌnegi naguꞌafifena nenahaiya nafaꞌnegi agai kea haviho.” huno siapinagati humaine.
MAR 9:8 Higeꞌya aupaꞌa moge mege huꞌya agayana nagoꞌa vayala omaigeno Yisasiꞌa agaiꞌage mainegeꞌya agemainae.
MAR 9:9 Ageteꞌya agoꞌyafitila enelaviꞌya Yisasiꞌa kahegi maleno mage huno hamapaiye “Manima agaya yafena nagoꞌa veaꞌnea hamaꞌopaiho. Haenagama nagaya ikapinagati emainoa kanoa vayaꞌmo natenea kanomoꞌna falimainesufiti hetisua yupa hamapaigahae.” huno hie.
MAR 9:10 Higeꞌya ani kemo akave maleꞌya hamaꞌopainagi “Falimainesufitila eteꞌna hetigahue.” huno hia kemo aepaꞌahe atiyeꞌya amakaiꞌami huge havige hae.
MAR 9:11 Mage huꞌya Yisasina havigae “Naꞌa higeꞌya kahegi kema havilinaya anagaꞌmoꞌya Ilaiyaꞌa hagoteno etesigeno Anumaya Kotiꞌa hutesigeno taugafa aligatisia kanoa egahie huꞌya humainae?” huꞌya havigae.
MAR 9:12 Hageno Yisasiꞌa mage huno hie “Tamage Ilaiyaꞌa hagoteno eno mukiꞌa yana melino talo tala hugahie. Aniꞌa huꞌya nagaifena Anumaya Koti autaꞌmafina kaemalenayane “Ikapinagati emainoa kanoa vayaꞌmo natenea kanomonina amakaveꞌno hunateꞌya ali haviya hunatesageno naugafa nagata aigahie.” huꞌya nagaifena humainayane.
MAR 9:13 Tamahanepauve Ilaiyaꞌa ago egeꞌya Anumaya Koti autaꞌmafina kaemalenaya avamete huꞌya amakaiꞌamia hamaiya avamete agaila havi kavala hutenae.” huno humaine.
MAR 9:14 Nagoꞌa agaiꞌaenema tokaeꞌya nemaiya anagatega evaꞌyi huꞌya agayana kasagoꞌya veala anile alitalu humainageꞌya kahegi kema havilinaya anagaꞌmoꞌya Yisasiꞌenema tokaeꞌya nemaiya anagaꞌene mo huhaviya me huhaviya huꞌya kea vaiye.
MAR 9:15 Neꞌvaigeno mukiꞌa veaꞌmoꞌya Yisasina ageteꞌya tusi muse nehuꞌya amaiyayeꞌya moli falu fala hutenae.
MAR 9:16 Yisasiꞌa mage huno hamavige “Naꞌafene hutama mo huhaviya me huhaviya nehae?” huno hamavige.
MAR 9:17 Higeno nagola anile maiya kanomoꞌa mage huno hie “Humavenelina kanomogae Kefo Avamuꞌmoꞌa nafaꞌneꞌnimona agupi haimaineno nafaꞌneꞌnimo avayale maihiya humainegeꞌna kagaitega avaleꞌna neꞌoe.
MAR 9:18 Neꞌogi Kefo Avamuꞌmoꞌa atafa huteno atalegeno takatino faemainegeno agalemoꞌa selu selu nehigeno ave kume neganeno augafamoꞌa apipupapu nehigeꞌna kagaiꞌenema tokaeꞌya nemaiya anagafe ‘Kefo Avamula anatitaleho.’ huꞌna huana ya hugeteꞌya anatioꞌatalenae.” huno hie.
MAR 9:19 Higeno Yisasiꞌa mage huno hie “Ae meni kanafima mainaya veaꞌmogatama nagaifena havitama tamakupina omalenetama tamametitia nohaya veaꞌmogatama naꞌmagi kanafi tamakaiꞌenena mainesugetama havigahae? Ohaviya yafena kasalo nenahae. Naꞌmagi kanafi tamakaiꞌenena kanaleꞌya huꞌna ako huꞌna maisue? Nagaitega avaletama eho.” huno hie.
MAR 9:20 Higeꞌya avaleꞌya ageno Kefo Avamuꞌmoꞌa Yisasina ageteno ani nafaꞌnemona alino kigepagige hia kava huteteno ali takatitalegeno ani nafaꞌnemoꞌa mopafi asaga hulavino kasegase nehigeno agalemoꞌa selu selu humaine.
MAR 9:21 Higeno Yisasiꞌa nefafena mage huno havige “Naꞌmagi kanafi aniꞌa haumaine?” huno havigegeno nefaꞌa mage huno hie “Osi nafaꞌne mainegeno aniꞌa haumaine.
MAR 9:22 Mukiꞌa kanafina Kefo Avamuꞌmoꞌa ayelakatitalegeno atafiꞌene tipiꞌene haefalisia kava nehigeꞌna kagaya kanale humainenuka kahau hulateka tahaꞌmao.” huno hie.
MAR 9:23 Higeno Yisasiꞌa mage huno hie “Naꞌa higeka nagaifena kanale humainenuka nahaꞌmao huka nehane? Nagaifema agupi maleno ametiti nehia kanomoꞌa mukiꞌa yana alu ya alu yana afaꞌa hileꞌasinagi.” huno hie.
MAR 9:24 Higeno aupaꞌa ani nafaꞌnemona nefaꞌa mage huno hie “Nagaya kagaifena nagupi maleꞌna nametiti nehuanagi nagupi maleꞌna nametiti hua yanimoꞌa aupa nehigi alika ayaꞌaya hunato.” huno hie.
MAR 9:25 Hanepaigeꞌya veala tusiya huꞌya amaiyayeꞌya elitalu hageno Yisasiꞌa neꞌamakeno Kefo Avamufena kemakino mage huno hie “Kagaya Kefo Avamuꞌmogae agesama ailileka avaya alilu kimainana Kefo Avamuꞌmogae hai kahapauve agupitila hatilavika vuo. Nagoꞌa kanafina nagoꞌene agupina haiofalo.” huno hutene.
MAR 9:26 Higeno Kefo Avamuꞌmoꞌa ala kenake nehuno ani nafaꞌnemona tusiya huno alino kigepagige hia kava huteteno hatilavino ataleno vigeno ani nafaꞌnemoꞌa fali vaya kana huno faemainegeꞌya kasagoꞌya veaꞌmoꞌya “Ago falimaine.” huꞌya hae.
MAR 9:27 Nehageno Yisasiꞌa ayate alino avalesaga hutegeno hetimaine.
MAR 9:28 Haenaga Yisasiꞌene nopinaga haino mainegeꞌya agaiꞌaenema tokaeꞌya nemaiya anagaꞌmoꞌya amakaiꞌamige maineꞌya mage huꞌya havigae “Tagaya ya hugetonana ani Kefo Avamula naꞌa higeta anatioꞌatalenone?” huꞌya hae.
MAR 9:29 Hageno Yisasiꞌa mage huno hamapaiye “Maꞌa augafa Kefo Avamula alu yatetila oꞌanatigahagi Anumaya Kotitega ke huta havigesaya yatetike anatigahae.” huno hamapaiye.
MAR 9:30 Ani kumala neꞌataleꞌya Kalili kotegama vayana “Veaꞌmoꞌya visua kumafena ohavisae.” huno higeꞌya ako huꞌya falakiꞌya neꞌvageno agaiꞌaenema tokaeꞌya nemaiya anagala Yisasiꞌa mage huno humavenelie “Ikapinagati emainea kanoa vayaꞌmo atenea kanoa agaila atafa huꞌya avaleꞌya vaya amayapi atesageꞌya haesageno faligahie. Faliteno hevaitesageno tole yupa komufi maiteno tagufa (3) kana falimainesifitila hetigahie.” huno hamapaiye.
MAR 9:32 Anima hamapaiya kea havilama ohaya yafe koliꞌa huꞌya haviokenae.
MAR 9:33 Kapaneamu evaꞌyi huteꞌya Yisasiꞌa nopi haino maineno amakaife mage huno hamavige “Katega naꞌane kea kea hume hume emainae?” huno hamavige.
MAR 9:34 Katega neꞌeꞌya ma ke hume emainae “Kagaya ala kano mainapi nagaya kagaseꞌna ala kanoa mainoe?” huꞌya huge havige hume aya kehenagiꞌya kea ohuꞌya mainae.
MAR 9:35 Mainageno Yisasiꞌa mopale maineno “Egeꞌna tamahapaino.” huno higeꞌya tuelufuꞌa (12) anagala ageno mage huno hamapaiye “Nago kanomoꞌa ‘Ala kanoma maisue.’ hinunofena haenagalafa maineno mukiꞌa veala kayo kayoꞌma humatesiana ala kano maigahie.” huno hamapaiye.
MAR 9:36 Huteno nagola okasi nafaꞌnea avaleno amuꞌnoꞌamifi hetiteneno avalesaga huno anukilineno mage huno hie “Nagoꞌa veaꞌmoꞌya nagaifema haviꞌya maꞌa augafa osi nafaꞌnema avaleꞌya falu fala hisayana nagaiꞌene navaleꞌya falu fala hunenatae. Nagaiꞌma navaleꞌya falu fala hisayana hunatenea Nenafaꞌene avaleꞌya falu fala huneꞌatae.”
MAR 9:38 Yoniꞌa mage huno humaineane “Hulavenelina kanomoga tagaya agonana nago kanomoꞌa kagai kagile Kefo Avamula vea amakusafinagatila anatineꞌatalegeta neꞌageteta takaveꞌma nohia yafe ‘Aniꞌa ohuo.’ huta ‘Aꞌao.’ hutenone.” huno hapaiye.
MAR 9:39 Yisasiꞌa Yonife mage huno hapaiye. “Ani kanoa alitama ‘Aꞌao.’ huoꞌateho. Nagoꞌa veaꞌmoꞌya nagai nagile tokiyaꞌage aliꞌyama alisayana aupaꞌa nagaifena huhaviyana huonategahae.
MAR 9:40 Veaꞌmoꞌya kamema huotatesayana tagai kanapa maigahae.
MAR 9:41 Tamage tamahanepauve nagoꞌa veaꞌmoꞌya tamakayama Kalaisi nafaꞌnema mainaya yafe yasi tima tamamisagetama nesayana anonaꞌa kanale miya aligahae.”
MAR 9:42 “Nagola osi nafaꞌneꞌni, nagaife havino agupi maleno ametiti nehisia nafaꞌnehema nagoꞌa veaꞌmoꞌya ‘Kefo yama huo.’ huꞌya havi kapima avaletesayana tusiꞌa havi kava nehayanagiꞌna tusiꞌa kana ya amamigahue. Ala yafagefaleti ani kanomo ageꞌyafi maleꞌya nofi kiteteꞌya hage lipi hagaꞌyu hutalesayana afa ya kana kana ya haneanagi nagaya tusiꞌa kana ya amamigahue.
MAR 9:43 Kayamoꞌa ‘Kefo yama huo.’ huno kavaleno havi kapima katesigekahena ani kayana aifakalitalo. Aifakalitalesanana kanale hugahie. Kaugafamoꞌa haviya humainesia kanoma maisanana haꞌno ohisia kahaimula hanesia kano maigane. Havigu tole kaya hanenageka kefo ya hisana kagesa kaminegeka kefo yama humainana yafe kavaleno hani yapi agola tegelege nehia atafi hagaꞌyu hugatalegahie.
MAR 9:45 Kaiyamoꞌa ‘Kefo yama huo.’ huno kavaleno havi kapima katesigekahena ani kaiya aifakalika atalo. Aifakalitalesanana kanale hugahie. Kaugafa haviya humai kano maisanana haꞌno ohu kahaimula hanesia kano maigane. Havigu tole kaiyamoꞌa kefo ya hisana kagesa kaminegeka kefo ya humainana yafe kavaleno hani yapi agola tegelege nehia atafi hagaꞌyu hugatalegahie.
MAR 9:47 Kaulagamoꞌma agea yafema kefo yama hisana kagesa kaminagekahena ani kaulaga ali faꞌyika atalo. Ali faꞌyitalesanana kanale hugahie. Nagoke kaulaga hanesigeno Anumaya Kotiꞌa kava yagaimainea kumatela umaigananagi havigu tole kaulagamoꞌa kefo ya hisana kagesa kaminegeka kefo ya humainana yafe hani yapi tegelege nehia atafi kavaleno hagaꞌyu hugatalegahie.
MAR 9:48 Anima ata legelege nehia kumapi veaꞌmoꞌya ani atafi mainageno kani kafaꞌamimoꞌa ofalisigeno atamoꞌa asua ohugahie.
MAR 9:49 Hagema kavete falea avamete huno veala mukiꞌamogatamina ataleti falelamategahie.
MAR 9:50 Hagea kanale ya haneanagi hagaꞌageꞌma nehia yamaꞌa haꞌnoma hisiana hanaꞌa hutama hagaꞌageꞌma nehia yamaꞌa ali falote hugahae? Hage kana yana tamakuꞌafi hanesigetama alava hutama nagoke tamaku tamakesale kigi yokalo hutama maiho.” huno humaine.
MAR 10:1 Yisasiꞌa ani kola neꞌataleno Yutia kotega viaꞌamo Yotani timoꞌa ame kaiyaga uvaꞌyi huno mainegeꞌya mukiꞌa veala agaite melitalu hageno nehia kava huno nagoꞌene hamapaiye.
MAR 10:2 Hamanepaigeꞌya nagoꞌa Falasia vayaꞌmoꞌya Yisasite eꞌya ase ohisea kema hisiafene huꞌya nagola ayevataga hisaya kea mage huꞌya havigae “Nago kanomoꞌa aꞌama atalesia agesa hisigenoꞌa kahegi kemoꞌa ‘Afaꞌa atalegahie.’ huno humaineo?” huꞌya havigae.
MAR 10:3 Hageno Yisasiꞌa kenonaꞌamia mage huno hamavige “Mosese kahegi kemoꞌa ani yafena naꞌane humaine?” huno hamavige.
MAR 10:4 Higeꞌya mage huꞌya hae “Moseseꞌa nagola kahegi kefina mage huno tahapaimaine ‘Vemoꞌa aꞌamona avo kaeno neꞌamino hutesigeno haꞌno huno ugahie.’ huno humaineane.” huꞌya hae.
MAR 10:5 Hayanagi Yisasiꞌa mage huno hamapaiye “Tamakaya ke ohavitama veganokano haya yafe Moseseꞌa aꞌma atalesaya kea kaemaleneane.
MAR 10:6 Kaemaleneanagi Anumaya Koti avopina mage huno humaineane ‘Ehe yupa Anumaya Kotiꞌa vene aꞌene talo humaleneane. Vene aꞌene talo humalenea yafe nago kanomoꞌma itaꞌafoꞌamoganima anataleno aꞌamoꞌene ailokaeno maisiana ani tolemogania nagoke anaugafa kaligaꞌe.’ huno humaineane. Naꞌa humaineafe nagoꞌene tolelatana omaigaꞌagi nagoke anaugafa kaliꞌana maigaꞌe.
MAR 10:9 Anumaya Kotiꞌa ago alino hagelafimaleneanagino nagola ma mopale kanomoꞌa ani alavelatana mai yaꞌania alino apase oꞌanatesie.” huno hie.
MAR 10:10 Mani kea huteno nopinaga haino maineno agaiꞌaenema tokaeꞌya nemaiya anagaꞌmoꞌya ani kehena havinegae.
MAR 10:11 Havigageno mage huno hie “Nago kanomoꞌa aꞌama ataleno alu aꞌma aliana ani kanomoꞌa kumai kava huno hagote aꞌamona ali haviya huneꞌate.
MAR 10:12 Nagi nago aꞌmoꞌma anauꞌamoma ataleno alu veleꞌma viana ani aꞌmoꞌa kumai kava nehie.” huno hie.
MAR 10:13 Veaꞌmoꞌya nafaꞌneꞌamia avaleꞌya Yisasite “Aya malese.” huꞌya neꞌageꞌya agaiꞌaenema tokaeꞌya nemaiya anagaꞌmoꞌya “Naꞌa ohiho.” huꞌya kemamakimainae.
MAR 10:14 Yisasiꞌa kema amamakiya yana ageteno haivaimateno mage huno hie “Nafaꞌneyaga amatalegeꞌya nagaitega eho. Ka heakioꞌamateho. Nafaꞌne avamete maiya veaꞌmoꞌya mage nehae ‘Tagaitige maunana tokiyatia omalegi Anumaya Koti kava yagailatesie.” huꞌya hae.
MAR 10:15 Tamagelafa huꞌna tamahanepauve nafaꞌne avamete maisaya veaꞌmoꞌya ‘Tagaitige maunana tokiyatia omaleafe Anumaya Kotiꞌa kava yagailatesie.’ huꞌya ohisayana Anumaya Kotiꞌa kava yagaimainea kumatela oꞌugahae.” huno hie.
MAR 10:16 Huteno Yisasiꞌa ani nafaꞌneyaga amavaleno amanukilineno “Anumaya Kotiꞌa kanale manua tamamisie.” huno amaugafale ayana malene.
MAR 10:17 Yisasiꞌa katega ugahe nehigeno nago kanomoꞌa aiyayeno eaꞌamo aule aleꞌya meyeno mage huno havige “Kagaya kanale ya huka humavenelina kanomogae hanaꞌa huteꞌna agola maige maige hisua nahaimula alisue?” huno hie.
MAR 10:18 Higeno Yisasiꞌa mage huno hie “Naꞌa higeka nagaifena ‘Kanale kano mainane.’ huka nehane? Anumaya Kotiꞌa agaiꞌage kanale kanoa maine.
MAR 10:19 Kagaya Anumaya Koti kahegi kea havilinane ani kemoꞌa mage huno humaine ‘Vayala haegeno ofalino. Kumai he yana ohuo. Musufa yana ohuo. ‘Ma kanomoꞌa havi kava nehie.’ huka havigehena kena oꞌvalo. Havigea ayevataga huka alu veaꞌmo yana oꞌalio. Itakafokamo kea ‘Kahaoteꞌyakaꞌae.’ ohuo.” huno hie.
MAR 10:20 Higeno ani kanomoꞌa mage huno hie “Hulavenelina kanomogae nagaya nafaꞌnema mainoa kanaleti aepa heꞌna mukiꞌa ani kema hana kea akave nemaloane.” huno hie.
MAR 10:21 Higeno Yisasiꞌa ani kanoa ageana agaifena hau ayamopafima haiya yafena ageteno mage huno hie “Nagoꞌa yafena kosa heꞌokatene. Nago kavaꞌene huo. Mukiꞌa malenana mone afenoꞌyakaꞌa alika fako huka moneꞌamima omalenesia veaꞌnema amamisanagenoꞌa Anumaya Kotiꞌa ikapinaga afenoꞌyana kamigahie. Afenoꞌyakaꞌa fako huka amamite amamite huteka nakave eno.” huno hie.
MAR 10:22 Higeno ani kanomoꞌa ani kea havianagi mone afenomaꞌama kasago humainea yafe oꞌatalesia agesa haviteno augosamoꞌa atili kaegeno aipamoꞌa tusi kanaꞌage higeno ataleno umaine.
MAR 10:23 Vigeno Yisasiꞌa agaiꞌaenema tokaeꞌya nemaiya anagala moge mege huno neꞌamakeno mage huno hie “Mukiꞌa mone afenoꞌyaꞌamima hanesia veaꞌmoꞌya kasageke humaiꞌya humaiꞌya Anumaya Kotife ‘Kava yagailato.’ huꞌya hugahae.” huno hie.
MAR 10:24 Higeꞌya agaiꞌaenema tokaeꞌya nemaiya anagaꞌmoꞌya ani kehena amamaꞌyoa aiyanagi Yisasiꞌa nagoꞌene mage huno hie “Nafaꞌneꞌnimogatama veaꞌmoꞌya kasageke humaiꞌya humaiꞌya Anumaya Kotifena ‘Kava yagailato.’ huꞌya hugahae.
MAR 10:25 Nagola pulumaka kana afumo agia kemolumoꞌa nekaꞌyamo kapima haifalesiana afaꞌa yoꞌyo huno haifalegahianagi mukiꞌa mone afenoꞌyamaꞌa hanesia kanomoꞌa Anumaya Kotifena ‘Kava yagainato.’ huno kasageke huno haifalegahie.” huno humaine.
MAR 10:26 Haviya anagaꞌmoꞌya tusiꞌa amamaꞌyo aigeꞌya mage huꞌya hae “Naꞌama humainesiana hana veaꞌmogami amaku amame Anumaya Kotiꞌa aligatigahie?” huꞌya hae.
MAR 10:27 Hageno Yisasiꞌa amakeke huno amakemaineno mage huno hie “Veaꞌmogamina tokiyaꞌamia omaleneanagiꞌya ohugahayanagi Anumaya Kotiꞌa mukiꞌa kava hisia tokiyaꞌa haneanagino afaꞌa aligatigahie.” huno hie.
MAR 10:28 Higeno Pitaꞌa mage huno hie “Havio tagaya mukiꞌa yatia ataleteta kagai kakavela neꞌone.” huno hie.
MAR 10:29 Higeno Yisasiꞌa mage huno hapaiye “Tamage huꞌna tamahanepauve mukiꞌa veaꞌmoꞌya nagaifema huꞌya nagai kanale mono kema veaꞌmogamima mo hamapaigahena noꞌamiene nepuꞌamiene amasaꞌamiene itaꞌamiene neꞌamafaꞌene nafaꞌneꞌ-amiene mopaꞌamiene amataleꞌya visagenoꞌa Anumaya Kotiꞌa mopale mainaya kanafima atalenesaya noꞌamiene nepuꞌamiene amasaꞌamiene itaꞌamiene nafaꞌneꞌamiene mopaꞌamiene nagoꞌene nagoꞌene ohavunamaꞌa ya aliteꞌya huhaviyama humatesaya yaꞌene aliteꞌyagi haenagaꞌa maige maige hisaya hamaimula amamigahie.
MAR 10:31 Meni kanafima hagoteꞌya mainaya veala ani kanafina haenagalafa maigahayanagi meni kanafima haenagalafa mainaya veala ani kanafina hagoteꞌya maigahae.” huno humaine.
MAR 10:32 Yelusalemu haigahena katega neꞌuꞌya Yisasiꞌa hagoteno vigeꞌya agaiꞌaenema tokaeꞌya nemaiya anagaꞌmoꞌya amamaꞌyo aiꞌya neꞌvageꞌya amakave vaya veaꞌmoꞌya koli nehageno Yisasiꞌa eteno nagoꞌene tuelufuꞌa (12) anagaꞌamogamina amahaote amavaleno momateneno haenagama agaila hutesaya yafena hamanepaiye.
MAR 10:33 Mage huno hie “Haviho tagaya Yelusalemu haisunageꞌya ikapinagati emainoa kanoa vayaꞌmo natenea kanomonia natafa huteno mono note kava vayaꞌmogami amayapiꞌene kahegi kema havilinaya anagaꞌmogami amayapiꞌene natesigeꞌya nagaifena ‘Afaꞌa falisie.’ huꞌya Yuta vea omainaya vayaꞌmogami amayapi navaleꞌya nategahae.
MAR 10:34 Natesageꞌya nagaye hisifa ke hunateꞌya amavetuꞌna henenateꞌya hegi kaꞌyoteti haifu namiteꞌya nahaesageꞌna yafaga yosale faligahue. Falisugeꞌya hevainatetesageꞌna tole yupa komufinaga maiteꞌna tagufa (3) kanale falimainesufitila hetigahue.” huno hie.
MAR 10:35 Sepeti nafaꞌnelatana Yemesiꞌene Yoniꞌene Yisasite eꞌana mage huꞌana havigaꞌe “Hulavenelina kanomogae nago yafe kahavigesuꞌageka ani yana hulaꞌato.” huꞌana havigaꞌe.
MAR 10:36 Haꞌageno Yisasiꞌa mage huno hanavige “Naꞌa hulanatesue?” huno hie.
MAR 10:37 Higeꞌana mage huꞌana haꞌe “Tokiya hale yakaꞌafima umaisanagetaꞌa taꞌagaya kavate mainesuꞌageka ‘Nagoꞌmoga tamaga nayatega maiyo.’ huteka ‘Nagoꞌmoga hauga nayatega maiyo.’ huka hulaꞌato.” huꞌana havigemainaꞌe.
MAR 10:38 Havigaꞌanagi Yisasiꞌa mage huno hanapaiye “Nahavigaꞌa yafena ohavinaꞌe. Falisua yana satuꞌage humainea ti kana humainea ti hanea keꞌayopitila negahugi tanakaya naꞌaleꞌasino onaꞌaleꞌasine? Nagaila falenatesaya yamoꞌa, nagatama aisia yatetila tanakaila ani yateti falelanatesagetanahena afaꞌa aligaꞌo?” huno hie.
MAR 10:39 Higeꞌana “E, tokiyatiꞌa haneanagitaꞌa aniꞌa hugahuꞌe.” huꞌana haꞌageno Yisasiꞌa mage huno hie “Tamage satuꞌage humainea tina negaꞌanagi falenatesaya yamoꞌa nagatama aisia yateti falelanategahae.
MAR 10:40 Falelanategahayanagi ala vayaꞌma mainalega tamaga nayategaene hauga nayategaenena siale maisaya yana nagai yana omalegi Anumaya Kotiꞌa agaiꞌa ani yana ago nagoꞌa vayafe huno talo tala huno ali fatago humatene.” huno hie.
MAR 10:41 Higeꞌya teniꞌa (10) anagaꞌmoꞌya ani kea haviteꞌya Yemesigani Yoniganina amaipa haviꞌya haviya hunatenae.
MAR 10:42 Yisasiꞌa “Nagaitega eho.” huno higeꞌya ageno mage huno hie “Ma mopafi ala kava vayaꞌmoꞌya ‘Tusiꞌa ala vaya mainone.’ huꞌya Yuta vea omainaya veafe ke amamakiꞌya aliꞌya ke humateꞌya kava vayaꞌmo nehaya avamete kava nehae.
MAR 10:43 Naꞌa nehayanagi tamakaya aniꞌa kavala ohiho. Tamakaipima ‘Nagi hanea kanoma maigahue.’ huno hisia kanomoꞌa aliꞌya kanotami maino.
MAR 10:44 ‘Uhagoteꞌna maigahue.’ huno hisia kanomoꞌa miya oꞌali aliꞌya kanotami maino.
MAR 10:45 Nagaya ikapinagati emainoa kanoa vayaꞌmo natenea kanomoꞌna veaꞌmoꞌya naya huꞌya ali kanale hunatesaya yafene huꞌna omenogi nagaya amaya huꞌna aliꞌya kanoꞌami maisuafene huꞌna emaineꞌna mukiꞌa veaꞌmoꞌya kefo yama nehaya yamo aigagimatenea yapiti alikalu hematesuafe miya atalesue huꞌna faligahe emainoe.”
MAR 10:46 Yisasiꞌa agaiꞌaenema tokaeꞌya nemaiya anagaꞌene kasagoꞌya veaꞌnene Yeliko kumate uvaꞌyi huteꞌya ani kumala mogaseꞌya ugahe nehageno nagola aulaga asu humainea kanomo agia Patimeusiꞌa Timeusi nafaꞌnegino ka agegayale mopale maineno monehe aukaꞌya huge huge huno maine.
MAR 10:47 “Nasaleti Yisasiꞌa ago neꞌe” huꞌya haya kea haviteno ke huno mage huno hie “Yisasigae, Tevitina aginagomogae nagaila kahau hunato.” huno hie.
MAR 10:48 Higeꞌya kasagoꞌya veaꞌmoꞌya kemakiꞌya “Ke ohuka maiyo.” huꞌya hayanagi nagoꞌene ke huno “Tevitina aginagomogae nagaila kahau hunato.” huno hie.
MAR 10:49 Higeno Yisasiꞌa anile mo hetimaineno mage huno hie “Hapaigeno eno.” huno higeꞌya ani kanohe ke huꞌya mage huꞌya hae “Kaguꞌa ali lokiya vaika aupaꞌa hetio. Kagaife ke nehie.” huꞌya hae.
MAR 10:50 Hageno ayaꞌaya yasi kenaꞌa asagi neꞌataleteno aupaꞌa hetino Yisasite vie.
MAR 10:51 Vigeno Yisasiꞌa mage huno hie “Naꞌa hugatesue?” huno higeno aulagama asu humai kanomoꞌa mage huno hie “Humavenelina kanomogae naulaga agesue huꞌna nehue.” huno hie.
MAR 10:52 Higeno Yisasiꞌa mage huno hapaiye “Afaꞌa vuo nagaifema havika kagupi maleka kametitima hana yateti ago aliꞌna kanale hugatoe.” huno higeno aupaꞌa aulagamoꞌa kanale higeno Yisasi akave umaine.
MAR 11:1 Yelusalemua aupate hanegeꞌya tole osi kumatalana Petafasiene Petaniene hanea kumate umainae. Ani kumatalana Olivi yosa hanea agoꞌyamo agegayalega hane. Anile maineꞌya Yisasiꞌa tole agaiꞌaenema tokaeꞌana nemaiꞌa kanolatana hunateno mage huno hanapaiye “Atu kumate utetana atupa note hosi kana afumo agia tokimo nafaꞌnea ayetenayanagitana agegaꞌe. Ani tokimo nafaꞌnea vayala oꞌamavalenea tokie. Kalu hetana avaletana male eꞌo.
MAR 11:3 Neꞌeꞌageꞌya nagoꞌa vayaꞌmoꞌya ‘Naꞌa higetana naꞌa kavala nehaꞌe?’ huꞌya hisagetanahena mage hutana hiꞌo ‘Kava kanotimoꞌa nago aliꞌya aligahe higetaꞌa neꞌoꞌanagino aliꞌyamaꞌa aliteno aupaꞌa eteno tamamigahie.’ hutana hamapaiꞌo.” huno hie.
MAR 11:4 Higeꞌana ani kanolatana uꞌana ani tokimo nafaꞌnea no fiate ayetageno ka agegayale hetino mainegeꞌana mogefalote huteꞌana nofila alikalu hemainaꞌe.
MAR 11:5 Nehaꞌageꞌya nagoꞌa anile hetimainaya vayaꞌmoꞌya mage huꞌya hae “Naꞌa higetana tokimo nafaꞌnea kalu nehaꞌe?” huꞌya hae.
MAR 11:6 Hageꞌana Yisasiꞌma “Nage hutana hiꞌo.” hunoꞌma hia kea hamapaiꞌageꞌya ani vayaꞌmoꞌya “Afaꞌa tokia avaletana viꞌo.” huꞌya hae.
MAR 11:7 Hageꞌana ani tokimo nafaꞌnea Yisasite avaleꞌana evaꞌyi huteꞌana kenaꞌania anaugafaleti hateꞌana ani afumo agupile yakaimalaꞌageno Yisasiꞌa anile haino maine.
MAR 11:8 Maigeꞌya mukiꞌa veapiti nagoꞌamoꞌya amaugafaleti kenaꞌamia hateꞌya via katela yakaigeꞌya nagoꞌamoꞌya haisa hanete hanete yosayaga kofanafa huꞌya katela yakaimalageno Yisasiꞌa ani kate afumo agupifina maiteno umaine.
MAR 11:9 Hagoteꞌya vaya veaꞌmoꞌyaene haenagama vaya veaꞌmoꞌyaene ala kenake kefiti mage huꞌya hae “Alamogae taugafa aligatisana kanoa kanaleꞌya huka neꞌane. Anumayamo aliꞌya alisana yafe hugategeka emainana kanomoga Anumaya Kotiꞌa kanale manu kamino kaya humaine.
MAR 11:10 Taginagomoꞌa Tevitiꞌe nayona kava hunoꞌma yagaimainea avamete kavala eteno aniꞌa huno falote hugahie. Ani yafena muse higetao. Anafinaga Anumaya Kotiꞌa taugafa aligatisia kanohe muse hisune.” huꞌya humainae.
MAR 11:11 Yisasiꞌa Yelusalemu uvaꞌyi huteno ala mono nopi umaineno mukiꞌa mono nopima hanea yana ako huno ageliteno huno ageteno neꞌataleno hani kisia avamete higeno ataleno tuelufuꞌa (12) anagaꞌaene Petaniga vae.
MAR 11:12 Faeteꞌya kotigeꞌya Petania ataleꞌya neꞌvageno Yisasina agatemaine.
MAR 11:13 Agategeno nagola haisa afaꞌa hanea fiki yosamoꞌa aluꞌale hanegeno ageteno alagaꞌahe mogegahe ani yosamo aepale uno mogeana alagaꞌa omalegeno haisayagaꞌage hane. Ani fiki yosamoꞌa alagaꞌama neꞌayea kanamoꞌa yaufa falote ohune.
MAR 11:14 Mogeteno Yisasiꞌa ani yosahena mage huno hie “Namo yosa hetika maiyo. Agola kagai kaugafa veaꞌmoꞌya nagoꞌene onegahae.” huno huhaviya hutegeꞌya agaiꞌaenema tokaeꞌya nemaiya anagaꞌmoꞌya ani kea havimainae.
MAR 11:15 Yelusalemu evaꞌyi huteꞌya Yisasiꞌa ala mono nopi haino mone aliꞌya neꞌaliya veaꞌnene afaꞌa miyama nehaya veaꞌnene “Maihaleho.” huno amanatineꞌataleteno nagoꞌa veaꞌmoꞌya alu kotegama nehanea monea neꞌaliꞌya ani kotegama nehanea monea neꞌamamiya veaꞌmogami folomoa alitalegeno aige helafige higeno kugofa kana namama miya nehaya veaꞌmogami sipaꞌamia aniꞌa huno alitalegeno aihelafilavimaine.
MAR 11:16 Afenoma aliliteꞌya nehaya veafena mage hie “Ala mono no kumapina afenona alitama ute ete ohiho.” huno hie.
MAR 11:17 Huteno mage huno hamapaiye “Anumaya Kotiꞌma humainea kemoꞌa autaꞌmafina mage huno kaemaleneane ‘Nagai nona mukiꞌa kotega veaꞌmoꞌya Anumaya Koti agi ayeꞌya havigesaya no hane.’ huno kaemaleneanagi tamakaya musufa yama nehaya veaꞌmogami nomo avamete kava hutama falakitama musufa ya hugahe ma mono nopina emainae.” huno nehie.
MAR 11:18 Higeꞌya mono note kava vayaꞌmoꞌyaene kahegi kema havilinaya anagaꞌmoꞌyaene Yisasiꞌma hia ke haviteꞌya muki veaꞌmoꞌya Yisasiꞌma hamapaiya kema haviteꞌya amamaꞌyoma aiya yafe koli huteꞌya “Hanaꞌa huta haesune.” huꞌya humainae.
MAR 11:19 Hayanagi Yisasiꞌa anagaꞌamoꞌyaene hani kigeꞌya Yelusalemua ataleꞌya umainae.
MAR 11:20 Yisasiꞌa faeteno natena agaiꞌaenema tokaeꞌya nemaiya anagaꞌaene kate vayana anima alaga oꞌayenea fiki yosa mogayana hafuꞌyayagafiti amagino haisamoꞌa amagiteno fayo temaine.
MAR 11:21 Yisasiꞌa ani yosahema humainea kehena Pita agesamoꞌa hao higeno haviteno Yisasife mage huno hie “Humavenelina kanomogae ago fiki yosama huhaviya hutana yosamoꞌa ago faꞌyotemaine.” huno hie.
MAR 11:22 Higeno Yisasiꞌa mage huno hamapaiye “Anumaya Kotifena mage hutama hiho ‘Kagaya mukiꞌa yana hateꞌasine.’ hutama tamakupi maletama tamametiti hisayana tamage huꞌna tamahanepauve Anumaya Kotifena tole lamakesa ohavitama ‘Havigesua yana falote hugahie.’ hutamama hisagenofena ani yamoꞌa falote hugahie. Ani kavaꞌma hisia kanomoꞌa ma agoꞌyahena ‘Ma agoꞌyamoga kofa hulavika ala tikotumo amuꞌnopi ufaemaiyo.’ huno hapaisigenofena akave maleno aniꞌa hugahie.
MAR 11:24 Ani yafe mage huꞌna tamahanepauve mukiꞌa yafena Anumaya Kotitega havigesayana ‘Anumaya Kotiꞌa kanaleꞌya huno lamigahie.’ hutama tamakesa havisagenofena afaꞌa tamamigahie.
MAR 11:25 Tamakaya hetitama Anumaya Kotitegama ke hutama havigegahena hagotetama kefo yama hulamatenesaya veafena aigeꞌamatetama kefo yaꞌamia atalematesagenofena ikapinaga mainea Nelamafaꞌa kefo yatamia aigetamateno atalelamategahie.
MAR 11:27 Yelusalemu alehate evaꞌyi hayana Yisasiꞌa ala mono no kumapi ute ete nehigeꞌya mono note kava vayaꞌmoꞌyaene Yuta vayatamaene kahegi kema havilinaya anagaꞌene agaitega evaꞌyi hae.
MAR 11:28 Evaꞌyi huteꞌya mage huꞌya hae “Hana augafa ala kanomo hugategeka mani kavala me nehane? Himamu yakaꞌa ta kamine?” huꞌya havigae.
MAR 11:29 Hageno Yisasiꞌa kenonaꞌamia mage huno hie “Nagaya hagoteꞌna nago yafena tamahavigesugetama nahapaisageꞌna nagaya ani yama talo nehua himamuꞌnima hanea navagea tamahapaigahue.
MAR 11:30 Yoniꞌa tima fale neꞌamatea yana Anumaya Koti hutegeno ani kavala me nehifi afa vayaꞌmoꞌya hutageno lina faleneꞌamate? Tamakaya hufalote hutama nahapaiho.” huno hamavige.
MAR 11:31 Higeꞌya “Naꞌa maꞌa hugahune.” huꞌya mohu mehu huteꞌya mage hae “Anumaya Koti hutegeno emaine.” huta hisunagenoꞌa Yisasiꞌa “Naꞌa higetama agai kea havitama tamakupina nomalae?” huno hugahie.
MAR 11:32 Hugahianagita mukiꞌa veaꞌmoꞌya Yonifena “Anumaya Koti aune kano maine.” huꞌya tokiyaꞌage kema nehaya yafe tagaya “Afa vayaꞌmoꞌya hutageno emaine.” huta hisunagenofena kelamakigahie huta koli nehune.” huꞌya hae.
MAR 11:33 Kolia nehuꞌya Yisasifena mage huꞌya hae “Tagaya ohavinonanagita hufalote huta kahaꞌopaigahune.” huꞌya hageno Yisasiꞌa mage huno hie “Nahaꞌopaisayana nagayaenena aniꞌa huꞌna hufalote huꞌna ani yama taloma nehua himamuꞌnima hanea navagea tamahaꞌopaigahue.” huno humaine.
MAR 12:1 Yisasiꞌa aepa heno avame kea mage huno hamapaiye nago kanomoꞌa vaini* nofi alaga hoya humaleteno kegiꞌya hugove humaleneno ani alagayagamo timaꞌa ayelatisigeno timaꞌamoꞌa tavino umaisia komua kafiteno yagaiꞌyama maisaya nona anafi kimaleteno alu vayafe ke huno “Etama hoyaꞌnile me yagaitama maineho. Ani nofiꞌmo alagafitila aye fako hutama nagoꞌa aliho.” huno humateteno alu kotega umaine.
MAR 12:2 Umaineno fuma nelea kanafina ani hoyamona nefaꞌa nagola aliꞌya kanoa hutegeno ani vaini hoyaleꞌma neꞌyagaiya vayatega alaga aligahe umaine.
MAR 12:3 Vigeꞌya hoyaleꞌma neꞌyagaiya vayaꞌmoꞌya ani aliꞌya kanoꞌamona atafa huꞌya kaꞌyo amiteꞌya mage hae “Okamigahunagi kagaya eteka vuo.” huꞌya hageno eteno umaine.
MAR 12:4 Eteno vigeno hoyamona nefaꞌa alu aliꞌya kanoꞌa hutegeno viana aniꞌa huꞌya atafa huꞌya anu aliteꞌya tusiꞌa agaye hisifa kava hutenae.
MAR 12:5 Hutageno vigeno eteno alu aliꞌya kanoꞌa hutegeno ani hoyafi viana atafa huꞌya hayageno falimaine. Falitegeno hoyamona nefaꞌa kasagoꞌya aliꞌya vayaꞌyaga humategeꞌya vageꞌya nagoꞌa aliꞌya vayala amatafa huꞌya nehamaeꞌya nagoꞌa kuyafa neꞌamataleꞌya nagoꞌa tefa hamae falimainae.
MAR 12:6 Mukiꞌa vageno hau ayamopafima nehaiya nafaꞌneꞌa agaiꞌage maigeno nefaꞌa mage huno hie “Nafaꞌneꞌnimo kea havigahae.” huteno hutegeno haenagalafa ani hoyalega umaine.
MAR 12:7 Vigeꞌya ani hoyafima yagaimainaya vayaꞌmoꞌya mage huꞌya hae “Mamona mani hoyamona nefa nafaꞌne. Nefaꞌma falisigenofena mani nafaꞌnemoꞌa hoyaꞌa aligahianagita ago haegetao. Haesunageno falisigeta mani hoya tagai ya hapaegahie.” huꞌya hae.
MAR 12:8 Huteꞌya atafa huꞌya hayageno faligeꞌya augafaꞌa aliꞌya hoyafinagati ai halatu huꞌya malaga hagaꞌyu hutalenae.” huno hie.
MAR 12:9 Huteno Yisasiꞌa mage huno hamavige “Naꞌa hayanagino hoyamona nefaꞌa hanaꞌa humategahie? Eno hoyaꞌafima yagaimainaya vayala tavata me hamaesigeꞌya faligahae. Fali haꞌno hisageno alu vayafe “Tamakaya hoyalela kava me yagaiho.” huno humategahie.” huno hie.
MAR 12:10 Nagoꞌene Yisasiꞌa mage huno hie “Manima Anumaya Koti avopima hanea kea ago hapalitama havimainao? Mage huno humaineane ‘Vayaꞌmoꞌya yafa noma kiyana nago yafafena ‘Haviya humaine.’ huꞌya atalayanagi ani yafamoꞌa haenagaꞌa ‘Tusiꞌa kanale yafanagino amakaseno haimainea yafane.’ huꞌya nomo ayetagenale malenae.
MAR 12:11 Anumayamoꞌa aniꞌa humaineanagita neꞌageta tusiꞌa kanale ya hane huta nehune.’ huꞌya kaemalenayane.” huno hie.
MAR 12:12 Yisasiꞌa mani kea higeꞌya mono note kava vayaꞌmoꞌya “Mani avame kema hiana tagaife nehie.” huꞌya amakesa haviteꞌya mage hae “Avaleta kina nopi ategahune.” huꞌya hayanagi alitalu humainaya veafe koli huteꞌya Yisasina ataleꞌya umainae.
MAR 12:13 Nagoꞌa Falasia vayaꞌene nagoꞌa Heloti vayaꞌene humatageꞌya Yisasiꞌma havigaya keleti ayevataga huꞌya atafa huꞌya haegahe Yisasi mainelega umainae.
MAR 12:14 Umaineꞌya mage huꞌya havigae “Humavenelina kanomogae tagaya ago havunana kagaya tamageꞌage kano mainane. Amakima hanea vayaꞌene amakima omale vayaꞌenefena nagoke katekeꞌya havi neꞌamamika kelamage nehuka Anumaya Koti kea tahanepainane. Takisi monema ataleyatela Sisaꞌa kava kanomotega kanale atalesuno ifi oꞌatalesune? huꞌya havigae.
MAR 12:15 Hageno Yisasiꞌa amakupinagama haviya kea ago haviteno “Vagala vaya mainetama amegati ke nehae. Naꞌa higetama nagaila ayenavataga hutama natafa hisaya yafena nahavinegae? Nagola alaga monea alitama me namigeꞌna agano.” huno hie.
MAR 12:16 Higeꞌya nagola alaga monea aliꞌya memigeno ageteno mage huno hamavige “Mani alaga monelela ta augosaene ta agiene hane?” huno hamavigegeꞌya “Sisa augosaene agiene hane.” huꞌya hae.
MAR 12:17 Hageno Yisasiꞌa mage hie “Sisana agaiꞌa yana agaila amiho. Nagi Anumaya Kotina agaiꞌa yana agaila amiho.” huno higeꞌya ani kehena amamaꞌyo aimaine.
MAR 12:18 Nagoꞌa Satiusi vayaꞌmoꞌya* Yisasitega emainae. Ani vayaꞌmoꞌya mage nehaya vayale “Falimainaya vayala eteꞌya heotigahae.” huꞌya nehaya vayale.
MAR 12:19 Vayalegiꞌya Yisasina me havigeꞌya mage huꞌya hae “Humavenelina kanomogae Moseseꞌa tagaifena mage huno kaemaleneane ‘Nago kanomona nepuꞌamoꞌa nafaꞌneꞌa oꞌate kanoa aꞌama ataleno falinagenoꞌa aganaꞌamoꞌa ani aala aliteneno agoꞌma falimainea kanomofe anonaꞌa nafaꞌne atesie.’ huno kaemaleneane.
MAR 12:20 Nago kanafina seveniꞌa (7) konaga mainayanagino nepuꞌamimoꞌa aala aliteneanagino nafaꞌnea oꞌate kano maineno falimaine.
MAR 12:21 Falitegeno anile aganaꞌamoꞌa ani aala aliteana nafaꞌnea aniꞌa huno oꞌatenea kano falitegeno anile aganaꞌamoꞌa aniꞌa humaine.
MAR 12:22 Mukiꞌa seveniꞌa (7) konagamoꞌya aliteme aliteme ayana nafaꞌnea oꞌateꞌya fali haꞌno hageno haenagalafa ani aala falimaine.
MAR 12:23 Seveniꞌa (7) konagamoꞌya ani aala alitenayanagi falimainesafitiꞌma hetisaya kanafina hana kanomo ani aala aligahie?” huꞌya havigae.
MAR 12:24 Havigageno Yisasiꞌa mage huno hamapaiye “Anumaya Koti kefima kaemalenea kene tokiya yamaꞌaenefena havilama hutama ohaviya yafe tamakaya havi tamakesageꞌya nehaviye.
MAR 12:25 Veaꞌma falimainesafiti hetisaya kanafina ensole vaya kana huꞌya vemoꞌya aala oꞌaligahae. Aꞌmoꞌyaenena vea oꞌaligahae.
MAR 12:26 Falimainaya veaꞌma eteꞌya hetisaya yafe nahavinegao? Mosese kaemalenea avopima ohapalinao? Nagola osi yosaleꞌma ala ata anefela leanagi ani osi yosa otene.” huno kaemalenea kea ohavinao? Anumaya Kotiꞌa ani kanafina Mosesefena mage huno humaineane “Nagaya Apalahamunagi Aisakinagi Yekopugami Anumaya mainoe.” huno humaineane.
MAR 12:27 Ani anagala falimainayanagi “Nagaya Anumaya Kotiꞌamimoꞌna mainoe.” huno humainea yafena amaku amamemoꞌa ofalinegi afaꞌa mainaya yafe ani kea humaine. Tamakaya veaꞌmoꞌya heꞌotigahae hutama nehaya kea havige nehae.” huno hamapaimaine.
MAR 12:28 Nago kanoa kahegi kema havilinea kanomoꞌa anile eno huge havige haya kea haviana Yisasiꞌa kanale kema huhaleno hamapaiya kea me haviteno Yisasifena mage huno havige “Anumaya Koti kahegi kefitila hana kemo mukiꞌa kemona agaseno uhagoteno tokiyaꞌage kea hane?” huno havige.
MAR 12:29 Havige-geno Yisasiꞌa mage huno hie “Uhagoteno tokiyaꞌageꞌma humainea kemoꞌa mage huno humaine ‘Isaleli vayala* haviho Anumayamoꞌa tagaiti Anumaya Kotiꞌa agaiꞌage mainegi nagoꞌa Anumaya omaine. Kagaya Anumaya Kotikamofena kahau kayamopafina tokiyaꞌage huno kahaino. Mukiꞌa kagesama havisana yaꞌene kagu kamema havisana yaꞌene aliꞌya neꞌalina kayamufaene tokiyaꞌage huka Anumaya Kotina amio.’
MAR 12:31 Anile nago kea mage huno humaineane ‘Mukiꞌa vayafena tusiya huno kahau kayamopafi kahaino. Kagaika kaugafahema kahaisia avamete aniꞌa huno alu veaꞌmogami amaugafahena kahaino.’ Menima tole kema kahapauva kemoꞌa mukiꞌa Anumaya Koti kahegi kemona ago amakasemainea ke hane.” huno hie.
MAR 12:32 Higeno ani kahegi kema havilinea kanomoꞌa Yisasifena mage huno hie “Humavenelina kanomogae tamage nehane. Nagoke Anumaya Koti mainegi nagoꞌa Anumaya Koti omaiye.
MAR 12:33 Omaigi tagaya mukiꞌa tahau tayamopafi tokiyaꞌage huno tahaisigeta mukiꞌa tagesama havisuna yaꞌene tagu tamema havisuna yaꞌene aliꞌya neꞌaluna tayamufaene tokiyaꞌage huta mukiꞌa Anumaya Kotina amisune. Amiteta mukiꞌa veafena tahau tayamopafi tahainageno tagaiti laugafahema tahaisia avamete aniꞌa huta alu veaꞌmogami amaugafahena tahaisie. Naꞌama hisuna yamoꞌa mukiꞌa alu kavala amakasemaine. Nayona veaꞌmoꞌya ‘Anumaya Kotina muse yana neꞌamune.’ huꞌya nagola sipi sipi heꞌya neꞌamiꞌya nago sipi sipia atafi kae salaꞌmana aineꞌataleꞌya nehaya yamona menima kahapauva kemoꞌa ani kavala ago agasemaine.” huno hie.
MAR 12:34 Yisasiꞌa anima huhalenoꞌma hia kea haviteno “Haviꞌyamaꞌaene kano maineafenagino nahapaiye.” huno agesafinaga haviteno kenonaꞌa mage huno hie “Ani kema hana kemoga aupaꞌa Anumaya Kotife ‘Kava yagainato.’ huka hugane.” huno hie. Higeꞌya vayaꞌyagamoꞌya haviteꞌya koli huꞌya Yisasina nagoꞌene haviokenae.
MAR 12:35 Yisasiꞌa ala mono nopi mo humavenelino mage huno hamavige “Kahegi kema havilinaya anagaꞌmoꞌya naꞌa higeꞌya Kalaisifena, ‘Anumaya Kotiꞌa hutenea kanomofena Tevitina aginagomoꞌa mopale kano maine?’ huꞌya nehae.” huno hamavige.
MAR 12:36 Hamavinegeno mage hie “Tevitiꞌa Anumaya Kotina Alu Aotage Avamumo hapaiya kea mage huno humaineane ‘Anumaya Kotiꞌa Anumaya-niꞌamofena mage huno humaine ‘Tamaga nayatega, ala vaya mainalega hanea siale emainesanageꞌna kame vayakaꞌa kaiyafinaga amatesugeꞌya kagaife ‘Ago tagasane.’ huꞌya hugahae.’ huno kaemaleneane.
MAR 12:37 Tevitiꞌa Kalaisife ‘Anumayaniꞌa mainane.’ huno humainegi naꞌa higeno Tevitiꞌa haenagama atesia aginagomofena ‘Anumayaniꞌamoga mainane.’ huno humaineane?” huno hamavige. Higeꞌya mukiꞌa alitalu humainaya veaꞌmoya Yisasi kea haviteꞌya tusiꞌa muse hae.
MAR 12:38 Yisasiꞌa hamapaiya kefiti mage huno hamapaiye “Kahegi kema havilinaya anagafena kaꞌyeho. Ani vayaꞌmoꞌya ayaꞌaya kena failiya yafena ‘Nelagafi notagafi?’ huꞌyama haya yafena tusiya huno nehamaiye. Vaya atagu nefaya kumapi mo vaiyatete nehuꞌya ‘Naꞌa vaya mainae.’ huꞌya ‘Ali falu fala hulatesae.’ huꞌya nehae.
MAR 12:39 Mono nopiꞌene imuleꞌene ‘Ala vayaꞌageꞌma nemaiya sialekeꞌya maigahune.’ huꞌya nehae.
MAR 12:40 Ani vayaꞌmoꞌya keto aꞌneyagahena ‘Mono nopima atalesaya monea tamiho.’ huꞌya nehuꞌya noꞌamifima hanea yaꞌyaga musufaya huꞌya moneꞌamia ali haꞌno nehaya vayalagiꞌya. Vayaꞌyaga ayemavataga huꞌya ‘Kanale vaya mainae.’ huꞌya hisae huꞌya ayaꞌaya nunamu nehayane. Aniꞌama nehaya vayaꞌmoꞌya havi miyana tusiya huno amaugafa amagata aisia yaꞌene aligahae.” huno hie.
MAR 12:41 Yisasiꞌa mono nopi mone neꞌatalaya kaiyaga maineno monema atalaya veala amakeana moneꞌamima hanea veaꞌmoꞌya “Monetia Anumaya Kotina amigahune.” huꞌya ala mone pokisifina atalenae.
MAR 12:42 Atalageno nagola moneꞌa omale keto aꞌmoꞌa tole osi haesa monea metalene. Ani haesa yafatalamogania tokayaꞌagenoꞌa vani toya kana humaine.
MAR 12:43 Yisasiꞌa ani yana ageteno agaiꞌaenema tokaeꞌya nemaiya anagafe ke higeꞌya ageno mage huno hamapaiye “Nagaya tamagelafa huꞌna tamahanepauve ma ma moneꞌa omale keto aꞌmoꞌa hagoteꞌyama metalaya veaꞌmogamina amakaseno ala mone metale.
MAR 12:44 Metaleneanagi moneꞌamima hanea veaꞌmoꞌya aliꞌyamaꞌa omalenea monegiꞌya havigu malenaya monegiꞌya afaꞌa metalayanagi ani aꞌmoꞌa mukiꞌa yamaꞌa ali haꞌno huno metale. Mukiꞌa kaveꞌama alino nesia moneꞌa mukiꞌa alino metale.” huno hie.
MAR 13:1 Yisasiꞌa ala mono nona neꞌataleno vigeno nagola agaiꞌaenema tokaeno nemaiya kanomoꞌa mage hie “Hulavenelina kanomogae male ago. Ala yafana kanale yafaꞌyagaleti kimalenaya kanale noꞌyaga hanegeka neꞌagane.” huno hie.
MAR 13:2 Higeno Yisasiꞌa mage huno hie “Kagaya mani kanaleꞌnale ala noꞌyaga neꞌagano? Ani mukiꞌa yafaꞌyaga alino lagape aitalesigeno aposilavisianagi nago yafamoꞌa nago yafamo agupifina aikalo huno omaigahie.” huno hie.
MAR 13:3 Yisasiꞌa Olivi yosa hanea agoꞌyamo agegayalega haino mopale maineno ageana ala mono nona atu kaiyaga hanegeno neꞌagegeꞌya Pitaꞌene Yemesiꞌene Yoniꞌene Etaluꞌene Yisasiꞌma mainelega emainae.
MAR 13:4 Eꞌya Yisasife mage huꞌya havigae “Ani yafa nomoꞌa tagapema aisia kana na kanafine? Hana augafa tokiya avame yamo ani kanama faloteꞌma hisia kanafina taveligahie?” huꞌya havigae.
MAR 13:5 Hageno Yisasiꞌa mage huno hie “Nagoꞌa vayaꞌmoꞌya havigema lamahapaisagetamahena ohavisaya yafe kaꞌye ho.
MAR 13:6 Mukiꞌa vayaꞌmoꞌya nagai nagia neꞌayeꞌya ‘Anumaya Kotiꞌa tamaugafa aligatisuna yafe hulategeta neꞌone.” huꞌyama hisayana kasagoꞌya veaꞌne havige ayemavataga hugahae.
MAR 13:7 “Nagoꞌa kotega kamema nehae.” huꞌya hisagetamaene “Kotamile-gaenema kamema nehae” huꞌyama tamahapaisagetamahena kolia ohiho. Ani yaꞌyagamoꞌa hagoteno falote hugahianagi ma mopama haꞌno hisia kanamoꞌa yaufa falote ohune.
MAR 13:8 Nagoꞌa vayaꞌmoꞌya alu vayaꞌenena kamea hugahae. Ala kotega vayaꞌene nago ala kotega vayaꞌenena kamea hugahae. Kasagoꞌya alu kote kotela tusiꞌa imila aligahie. Alu kote kotela tusiꞌa kafu nehuꞌya amakatesia kanamoꞌa falote hugahie. Ani yaꞌyagamoꞌa afaꞌa aꞌnemoꞌya nafaꞌnema ategahema hageno aepa heno amagata neꞌaiya avamete kava hugahianagi haenagaꞌa tusiꞌa tamagata yamo falote hugahie.
MAR 13:9 Tamakaitamia kava yagailama hiho. Nagoꞌa veaꞌmoꞌya tamakaila tamavaleꞌya kanisole vayate kaiyekea hulamategahae. Mono nopi tamavaleꞌya kaꞌyona mo lamamigahae. Nagai nakaveꞌma haya yafe tamavaleꞌya ala kava vayateꞌene amakasemainea sauve vayateꞌene tamavaleꞌya hetilamatesageꞌya kaiyekea hulamatesagetama nagai kanale mono kea hamapaigahae.
MAR 13:10 Hamapaigahayanagi hagoteꞌya Yisasi kanale mono kea aliꞌya ute ete huꞌya mukiꞌa kote veaꞌmogamina hamapaitesageno ma mopamoꞌa haꞌno hugahie.
MAR 13:11 Tamavaleꞌyama kaiyeke hulamatesaya kanafina kema hisaya yafena “Naꞌane huta hugahuneꞌ hutama tamakesa kuꞌmoꞌa ohutama afaꞌa viho. Ani kanafina kanale kema hisaya kea Anumaya Kotiꞌa tamahapainagetama hugahae. Ani kea tamakai kea omalegi Anumaya Koti Alu Aotage Avamuꞌmoꞌa huno lamakesa hinagetama hugahae.
MAR 13:12 Ani kanafina veaꞌmoꞌya amakaiꞌami nepuꞌamimona kame vayaꞌamimote amavaleꞌya visayaꞌamoꞌya ‘Hamaegeꞌya faliho.’ huꞌya hugahae. Nefaꞌa nafaꞌneyagaꞌa aniꞌa humategahae. Nafaꞌneꞌamimoꞌya itaꞌafoꞌamimoꞌene-na aliyahae huꞌya kamea humateteꞌya ‘Hamaetama faliho.’ huꞌya hugahae.
MAR 13:13 Nagima neꞌayaya yafe mukiꞌa veaꞌmoꞌya haviꞌya amaipa kafa helamategahae. Nagoꞌa veaꞌmoꞌya nagai kemona meni kanaleti aepa heꞌya atafa huꞌya tokiyaꞌage hume hume neꞌvisageꞌna Yisasiꞌna eteꞌnama esua kanafina nagai kema atafa hulinesaya veaꞌmogamina Anumaya Kotiꞌa amaku amamena aligatigahie.
MAR 13:14 Yisasiꞌa nagoꞌene mage huno hie tusiꞌa havi yana ma mopa alino hagagitalesia yana alu aotage yapi hetimainesigetama agegahae. Anima tamamaꞌyoma aisia yama agenuta-mahena Yutia mainaya veaꞌmogatama tamaiyayetama agoꞌyalega viho. Ani Yisasiꞌma humainea kema hapalitama havisamogatama havilama hutama haviho.
MAR 13:15 Nagi nago kanomoꞌa nogatofuleꞌma haino maineno ani kema havinunofena tavino nomaꞌafinagati haifaleno nagoꞌa yana oꞌalino. Afaꞌa aiyayeno vino.
MAR 13:16 Nagoꞌa veaꞌmoꞌya hoyafinagama mainesaletila kenaꞌamima aligahena notega eteꞌya oꞌviho.
MAR 13:17 Avoꞌnio ani kanafina tusiꞌa havi yamo falote hugahie. Amaipaene aꞌnene nute anilinesia nafaꞌnemogami itaꞌamimoꞌyaenefena tusiꞌa nahau nehie.
MAR 13:18 Anumaya Kotitega nunamuna mage hutama havigeho “Ani havi yamoꞌa tani koꞌma ikate tisia kanafina falote ohisie.’ hutama havigeho.
MAR 13:19 Ani kanafina tusiꞌa kana ya falote hugahie. Eheꞌma Anumaya Kotiꞌa ma mopama talo humalenea kanafiꞌene meni kanafiꞌenena aniꞌa ala kana yana falote ohuneanagi tusiꞌa ala kana yamoꞌa nagoꞌene haenagaꞌa aniꞌa huno falote ohugahie.
MAR 13:20 Anumaya Kotiꞌa ani havi kanama alino aupa ohileꞌasina mukiꞌa veaꞌmoꞌya falileꞌasinagi Anumaya Kotiꞌa haigenoꞌma hapalimatenea veafe agesa havino amaugafa aligatisia yafe ani kanaꞌa alino aupa hugahie.
MAR 13:21 Ani kanafina nagoꞌa veaꞌmoꞌya mage hugahae “Anumaya Kotiꞌma taugafa aligatigahie huno hutenea kanoa ma mainegi ageho. Atu mainegi ageho.” huꞌya hisagetamahena “Tamage nehae.” hutama havitama tamametitia ohiho.
MAR 13:22 Ani kanafina nagoꞌa havigeꞌage amaune vayaꞌene “Nagaya Anumaya Kotiꞌma tamaugafa aligatigahie huno hunatenea kano mainoe.” huno havige hisia kanoene evaꞌyi huꞌya veaꞌmogamina ayemavataga hugahe tokiyaꞌage avame yana hugahayanagi Anumaya Kotiꞌa haꞌye huno hapalimatenea veaꞌmoꞌya ohavigahae.
MAR 13:23 Ohavigahagi falote ohunaya kanafina ago tamahapaimainogi kaꞌyetama maiho.
MAR 13:24 Ani havi kanamoꞌa haꞌno hutesigeno yagemoꞌa hanimaꞌage hinageno ikamoꞌa aivasa ohugahie.
MAR 13:25 Kaꞌnefiꞌmoꞌya ikatetila atafailavigahie. Ikateꞌma hanea yaꞌyagamoꞌya kanage kanage huno alu kate kate vaiyegahie.
MAR 13:26 Mukiꞌa ani yamoꞌa falote hutesigeꞌna ikapinagati emainoa kanoa vayaꞌmo natenea kanomoꞌna ikapinagatila siate elavisugeꞌya nagegahae. Tusiꞌa tokiyaꞌniene tusiꞌa hale yaniꞌaene esugetama nagegahae.
MAR 13:27 Nenagesageꞌna ensole vayaꞌnia humatesugeꞌya yagemoꞌma tavi nefalelegatiꞌene evaꞌyi nehilegatiꞌene aluga aluga haupalegatiꞌene mukiꞌa mopaene mopaene nagaiꞌniꞌa nahaigeꞌna hapalimatenoa veaꞌnea aluga aluga mukiꞌa ma mopamona atupaletiꞌene ikamo atupaletiꞌene amavalesageꞌya melitalu hugahae.
MAR 13:28 Yisasiꞌa mage huno hie “Fiki yosamoꞌa nago avame ya tamaveligahigi ageho. Ani yosamoꞌa hagoteno akopapitiꞌma agusasiyeno amuꞌma malesigetamahena ‘Anuna valesia kanamoꞌa falote hugahe nehie.’ hutama nehae.
MAR 13:29 Naꞌa hugahayanagi manima tamahanepauva kuguva yama agenutamahena “Yisasiꞌa esia kanamoꞌa ago aupa higeno fiate hetino maineanagino ago egahie.’ hutama tamakesa havigahae.
MAR 13:30 Nagaya tamage huꞌna tamahanepauve meni kanafima mainaya veala ofalinesageno ani yamoꞌa falote hugahie.
MAR 13:31 Ikaꞌene mopaene fanane hugahianagi nagai kemoꞌa fanane ohugahie.
MAR 13:32 Manima tamahapauva kanama falote hisia kanahena nago kanomoꞌa ohavine. Ikapinaga mainaya ensole vayaꞌmoꞌya ohavinae. Anumaya Kotina nafaꞌneꞌamoꞌna ani kanama falote hisia kanahena ohavinoanagi nenafaꞌa agaiꞌage haviline.
MAR 13:33 Tamakaya ani kanama falote hisia kanahena ohavinaya yafe tamaula ofaetama tamakaitamile yagaiho.
MAR 13:34 Nago kava kanomoꞌma hia kava huno Yisasiꞌa egahie. Ani kava kanomoꞌa aliꞌya vayaꞌamofena ‘Ma aliꞌyana alu aliꞌya alu aliꞌyana tamahaote tamahaote yagaitama maiho.’ huneꞌamateno “Fiateꞌma mainamoga kagaikaꞌa yagaiyo.” huneꞌateno ataleno alu kotega umaine.
MAR 13:35 Naꞌa humaineafe tamakaya aniꞌa hutama yagaiho. Nomona nefaꞌma esia kanahena ohavinae. Une esio? Kege amuꞌnopi esio? Kokolemoꞌa age neꞌaisigeno esio? Ifi nate esio? Esia kanahena ohavinaya yafe kava yagaitama maiho.
MAR 13:36 Faetama mainesageno havigu aupaꞌa esigetama tamakaye hu yafenagi kaꞌyetama maiho.
MAR 13:37 Mani kea tamakaifema hua kea mukiꞌa veaꞌmogamife nehugi kava yagaitama tokiyaꞌage hutama maiho.” huno hamapaiye.
MAR 14:1 Ani kanafina tole yupa maiteꞌya kafuꞌahe kafuꞌahe Anumaya Kotiꞌma amakinagomo amaugafama aligatimainea yafe* alitalu huꞌya hale oki kaihamena nenaya imu kigahe nehageꞌya mono note kava vayaꞌmoꞌyaene kahegi kema havilinaya anagaꞌene Yisasina haesaya kea kesi ako huꞌya atafa hisaya yafe ke huge havige humainae.
MAR 14:2 Mage huꞌya hae “Mukiꞌa veala imuleꞌma alitalu huꞌya maisafima Yisasina atafama hisunageꞌya mukiꞌa veaꞌmoꞌya ageteꞌya ke huꞌya atile male huꞌya tu hugahae.” huꞌya hae.
MAR 14:3 Yisasiꞌa Petani umaineno nayona fugitaya agemainea kanomo agia Saimoniꞌe kanomo nopi umaine. Mopale umaineno kave nenegeno nago aꞌmoꞌa anile eno manaꞌage masavena havatemai yafa keꞌayola alilino emaine. Ani keꞌayopina nagola tusiꞌa monele hanea masavena manaꞌage tina hane. Ani limo agia natie. Ani keꞌayoꞌma taloma hia yafamo agia alapasata yafane. Ani aꞌmoꞌa masave keꞌayola alino aitagino Yisasi anupi takino faletene.
MAR 14:4 Faletegeꞌya nagoꞌa anile mainaya vayaꞌmoꞌya ageteꞌya ke vaiꞌya mohu mehu nehuꞌya mage huꞌya hae “Naꞌa higeno mani aꞌmoꞌa manaꞌage masavena afaꞌa neꞌatale?
MAR 14:5 Nago kanomoꞌma miya hileꞌasina tali hataleti kina (K300) aluteꞌasine. Aliteta ani masavete monea alita afenoꞌamima omalenea veaꞌnea amamuteꞌasine.” huꞌya ani aꞌmofena “Kefo kava talo hane.” huꞌya kemakimainae.
MAR 14:6 Ke neꞌamakigeno Yisasiꞌa mage huno hie “Agaila afaꞌa ataleho. Naꞌa higetama kea neꞌamakiye? Ani aꞌmona aipamoꞌa haviya hisia kava nehagi nagaila tusiꞌa kanale kava hunenate.
MAR 14:7 Afenoꞌamima omalenea veaꞌmoꞌya mukiꞌa kanafina tamakaiꞌene maigahayanagitama amaya hisaya tamakesama havisayana amaya hugahayanagi nagaya tamakaiꞌenena mukiꞌa kanafina omaigahue.
MAR 14:8 Ani aꞌmoꞌa amukoꞌa hanegeno ani kavala hagoteno afaꞌa ofaliꞌna mainogeno masavema faleꞌya hevainatesaya masavena agola fale nenate.
MAR 14:9 Tamage huꞌna tamahanepauve mukiꞌa ma mopafi veapima Yisasifena kanale mono kema hamapaisayana ani aꞌmoꞌma hia kavafeꞌenena hamapaisageꞌya mukiꞌa veaꞌmoꞌya agaife amakesa havi havi huꞌya maigahae.” huno hie.
MAR 14:10 Ani kanafina Yutasi Isakaliotiꞌa tuelufuꞌa (12) anagaꞌaene nemaiya kanomoꞌa viaꞌamo Yisasina agesi huno momavalesigeꞌya metafa hisaya yafe mono note kava vayatega umaine.
MAR 14:11 Viaꞌamo mo hamapaigeꞌya ani kea haviteꞌya tusiꞌa muse huteꞌya ‘Mone kamigahune.’ huꞌya hapaitageno Yutasiꞌa vaya kuluta oꞌai yate kesi kateti momavaleno esigeꞌya Yisasina haesaya kafe atiyemaine.
MAR 14:12 Hale oki kaihame kana maya nenaya kanamoꞌa ehe kanale Anumaya Kotiꞌa Yuta vaya amaugafama aligatimainea kanahe amakesa nehaviya imuma kigahena sipi sipi heꞌya kiꞌya nenaya kanamoꞌa falote higeꞌya Yisasiꞌene tokaeꞌya nemaiya anagaꞌmoꞌya Yisasina mage huꞌya havigae “Hanatega kahaisia kumatela Anumaya Kotiꞌa amaugafama aligatimainea kanahe kagesa havisana kavela mo lalo tala hisune?” huꞌya hae.
MAR 14:13 Hageno Yisasiꞌa tole kanolatana hunateno mage huno hanapaiye “Ala kumate neꞌviꞌageno ti keꞌayoꞌma alino esia kanoene fotu hutetana akave viꞌo.
MAR 14:14 Akave neꞌviꞌageno haino mo falesia nopi haitana ani nomona nefafe mage hutana havigeꞌo ‘Hulavenelia kanomoꞌa mage hie ‘Hanate ayenalagimalenana nona hane? Yoka namisanageꞌna nagaiꞌene tokaeꞌya nemaiya anagaꞌniene Anumaya Kotiꞌa amaugafama aligatimainea kanahe tagesa havisuna kavela nesune?’ huno hie.’ hutana havigeꞌo.
MAR 14:15 Hisaꞌagenoꞌa folamo huno anale kimalenea nona ago alino hilato humaleneanagino ala nona tanavelisigetana kavetia talo tala hiꞌo.” huno hanapaiye.
MAR 14:16 Higeꞌana ala kumate vaꞌana Yisasiꞌma hia kemoꞌa mukiꞌa falote higeꞌana ageteꞌana Anumaya Kotiꞌa amaugafa aligatimainea kanahe amakesa havi havi hisaya kavela talo tala humainaꞌe.
MAR 14:17 Talo humalenaꞌageꞌya yagemoꞌma tavi faleamaꞌa Yisasiꞌa tuelufuꞌa (12) anagaꞌamoꞌyaene emainae.
MAR 14:18 Mopale emaineꞌya kavela nenageno Yisasiꞌa mage huno hie “Tamage huꞌna tamahanepauve nagaiꞌenema kaveꞌma nenaya anagaꞌmogatama tamakaipiti kesi nahaesaya yatela nago kanomoꞌa vaineꞌaye.” huno hie.
MAR 14:19 Higeꞌya ani anagaꞌmoꞌya amaipa haviya huteꞌya agaifena amahaote amahaote mage huꞌya hae “Nagaife nehano?” higeꞌya “Nagaife nehano?” higeꞌya huꞌya havigae.
MAR 14:20 Havigageno Yisasiꞌa mage huno hie “Tamakaya tuelufuꞌa (12) anagaꞌnimogatama tamakaipiti nagokeꞌmoga kesi nahaesaya katela vaineꞌayane. Ani kanomoꞌa nagaiꞌene nagoke yopafiti kaihame kana maya ali vayagofino nene.
MAR 14:21 Nagaya ikapinagati emainoa kanoa vayaꞌmo natenea nafaꞌnemonihena Anumaya Koti autaꞌmafima kaemalenaya avamete kava hugahuanagi vayaꞌmoꞌya havisagi huno nagesi hunatesia kanomofena ‘Avoꞌnio nahau hanagi kagaya maigaꞌyeka mainekao.’ huꞌna nehue. Ani kanomoga itakamoꞌa okateneleꞌasina tusiꞌa kanale kava hileꞌasine.” huno hie.
MAR 14:22 Ani kavela nenageno Yisasiꞌa kaihame kana maya alino nunamu huteno muse huno havigeno kolite kolite huno neꞌamamino mage huno hie “Aliho. Mamona nagaiꞌni naugafae.” huno hie.
MAR 14:23 Nagola vaini nofi alagamo ti* hanea keꞌayola aliteno nunamu huno muse huno havigeno alino amamite amamite higeꞌya nemainae.
MAR 14:24 Nenageno Yisasiꞌa mage huno hie “Mamona nagaiꞌni kolane. Vayaꞌmoꞌya nahaesageꞌna falisugeno kolaniꞌamoꞌa takilavino mukiꞌa veafene huno takilavisia yafe Anumaya Kotiꞌa hulokiya vaino alino halegafilamatenea kemo* aepamoꞌa alino fatago hugahie.
MAR 14:25 Tamage huꞌna tamahanepauve menia nagaya vaini nofi alagamo timaꞌa* nagoꞌene onegahuanagiꞌna Anumaya Kotiꞌma kava yagaimainea kumate umaineꞌna haegafa nofi alagamo tina* eteꞌna negahue.” huno hie.
MAR 14:26 Higeꞌya yagamea nagola huteꞌya Olivi yosa hanea agoꞌyafi haimainae.
MAR 14:27 Yisasiꞌa mage huno hamapaiye “Tamakaya mukiꞌamogatama nagaife havitama tamakupi maletama tamametiti nehaya yana ataletama asaga hulavisagi nayona ani yafe kaemaleneane ‘Nagaya sipi sipi kava kanoa haesugeꞌya sipi sipiyaga atagufeꞌya falegahae.’ huno kaemaleneane.
MAR 14:28 Kaemaleneanagi falimainesufiti Anumaya Kotiꞌa alino hetinatesigeꞌna Kalili uhagotelamateꞌna visugetama nakave egahae.” huno hie.
MAR 14:29 Higeno Pitaꞌa kenonaꞌa mage huno hie “Mukiꞌa anagala kagaifema haviꞌya amakupi maleꞌya amametiti nehaya yama ataleꞌya falesageꞌnahena nagaya aniꞌa ohugahue.” huno hie.
MAR 14:30 Higeno Yisasiꞌa mage huno hie “Tamage huꞌna kahanepauve meni kegela kokolemoꞌa tole kanale agea oꞌainesigeka kagaya tagufa (3) kanale mage hugane ‘Nagaya oꞌagenoa kanoe.’ huka avane hunategane.” huno hie.
MAR 14:31 Higeno Pitaꞌa tokiyaꞌage ke huno hie “Kagaiꞌene nahaesageꞌna faligahuanagiꞌna kagai kagihena avanena huꞌna fala okigahue.” huno higeꞌya mukiꞌa anagaꞌmoꞌya nagoke kegeꞌya humainae.
MAR 14:32 Huteꞌya Ketesemani uvaꞌyi hageno Yisasiꞌa agaiꞌaenema tokaeꞌya nemaiya anagafena mage huno hie “Tamakaya male maineho. Nagaya Anumaya Kotitega nunamu huꞌna havigegahue.” huno hie.
MAR 14:33 Pitaꞌene Yemesiꞌene Yoniꞌene amavaleno viana aepa heno aipamoꞌa kanaꞌage higeno haumana halegeno kasageke hie.
MAR 14:34 Huteno mage huno hamapaiye “Nahau nayamopamoꞌa tusiꞌa kanaꞌage nehigeꞌna ago falisua kava nehugi male mainetama kava yagaitama maineho.” huno hie.
MAR 14:35 Osiꞌa viaꞌamo nunamu huno havigegahe mopafi agoꞌya moyeno maineno nunamuna mage huno havige “Kahaisigekahena falisua kanaꞌnia alitalesane huꞌna kahavinegoe.
MAR 14:36 Nenafagae kagaya mukiꞌa yana kanale hateꞌasine. Nagaya falisua kava nehugi ani havi kanamoꞌa satuꞌage hia ti kana tima hanea keꞌayola nahafaletalo. Afaꞌa nagai nagu nagesa akave ohuka kahaisia yana afaꞌa huo.” huno havige.
MAR 14:37 Havigeteno viaꞌamo momakeana agaiꞌaenema tokaeꞌya nemaiya anagala faeꞌya mainageno Pitafena mage huno hie “Saimonigae faekage mainano? Vae kagaya aupa kana kanoꞌa kava oꞌyagaikage mainano?
MAR 14:38 Sataniꞌa ayelamavataga hisigeno tamakuꞌamoꞌa ‘Ohugahue.’ huno tokiyaꞌage humaineanagi afaꞌa amega tamaugafamoꞌa tokiyaꞌa omaleneanagino ‘Hugahue.’ huno hisia yana hugahigi Satani kema ohavisaya yafena kava yagaitama mainetama Anumayamotega ke hutama havigeho.” huno hamapaiye.
MAR 14:39 Huteno amataleno viaꞌamo Anumayamotega havigea kea aniꞌa huno nagoꞌene mo havige.
MAR 14:40 Havigeteno eteno momakeana amau tokotoko higeꞌya faeꞌya mainageno momakeanagi “Vae tagaya naꞌane hisune?” hugeꞌya amakesaguꞌmo humainae.
MAR 14:41 Hageno Yisasiꞌa eteno eaꞌamo tagufa (3) kanale amakaifena mage huno hamavige “Maifalu hutamage faetama mainao? Hailagino kanaꞌnia ago falote nehie. Nagaya ikapinagati emainoa kanoa vayaꞌmo natenea nafaꞌnemonia nagesi huno navaleno kefo yama nehaya vayaꞌmogami amayapi natesigeꞌya nahaegahe nehae.
MAR 14:42 Mukiꞌamogatama hetitama vigetao. Ageho nagesi huno nahaesia kanoa ago neꞌegi vigeta mogamano.” huno humaine.
MAR 14:43 Yisasiꞌa mani kea nehigeno aupaꞌa Yutasiꞌa tuelufuꞌa (12) anagaꞌaenema tokaeno nemaiya kanomoꞌa evaꞌyi higeꞌya agaiꞌene mukiꞌa vayaꞌyagaene mono note kava vayaꞌene kahegi kema havilinaya anagaꞌene nagoꞌa Yuta vayatamaenema humataya vayaꞌmoꞌya ayaꞌaya naepege naipege huꞌya muki kaꞌyoꞌene aliꞌya emainae.
MAR 14:44 Agesi huno Yisasina haesaya yama amavalisea kanomoꞌa vayaꞌyagahena mage huno hamapaiye “Atakoꞌma hisua kanoa haesaya kano mainegi atafa hutama tokiyaꞌage hutama avaletama viho.” huno hamapaiye.
MAR 14:45 Yutasiꞌa evaꞌyi huno Yisasite eaꞌamo mage hie “Hulavenelina kanomogae.” nehuno atako me hie.
MAR 14:46 Atako higeꞌya ageteꞌya vayaꞌyagamoꞌya Yisasina atafa huꞌya ayetalako humainae.
MAR 14:47 Atafa nehageno nagola agaiꞌaenema hetimaiya kanomoꞌa ayaꞌaya naepeꞌa hevayu huno ala mono note hagote kava kanomo aliꞌya kanoꞌamo agesa aifakalitalegeno asaka hulavimaine.
MAR 14:48 Aifakalitegeno Yisasiꞌa mage huno hie “Tamakaya nagaifena ‘Vaya nehamaeno musufaya nehia kano maine.’ hutama nagaiꞌma natafa hugahena ayaꞌaya naepene muki kaꞌyoꞌene alitama neꞌao?
MAR 14:49 Mukiꞌa kanafina efiꞌefi huꞌna tamakaiꞌene maineꞌna ala mono nopina mono kea huhaleꞌna nehuanagi nagaila natafa ohunayanagi afaꞌa kanalele. Nayoma kaemalenaya kemoꞌa falote huno tamage hisia yafe menia natafa nehae.” huno hie.
MAR 14:50 Higeꞌya mukiꞌa agaiꞌaenema tokaeꞌya nemaiya anagala neꞌataleꞌya fale haꞌno humainae.
MAR 14:51 Nago neyamoꞌa aye ohati kena kenalafamaꞌage failino Yisasi akave umainegeꞌya agaila atafa hugahe hageno kenaꞌa hateno neꞌataleno augafa alapaꞌage aiyayeno faleno umaine.
MAR 14:53 Yisasina avaleꞌya ala mono notela hagote kava kanomote ageꞌya mono note kava vayaꞌyagaene Yuta vayatamayagaene kahegi kema havilinaya anagaꞌene alitalu huꞌya mainae.
MAR 14:54 Pitaꞌa akave anatino vianagi avatela oꞌunegi aluꞌale umaineno ala mono notela hagote kava kanomo nomo haupale uvaꞌyi huno ati vayaꞌene mopale umaineno atale tota huno maine.
MAR 14:55 Mono note kava vayaꞌmoꞌyaene mukiꞌa kanisole vayaꞌene Yisasiꞌma haesaya kaiyekema hutegahena nagoꞌa vayaꞌmoꞌya “Kefo kavala higeta agemainone.” huꞌya hutesaya vayafe atiyayana omainae.
MAR 14:56 Omaigeꞌya kasagoꞌya vayaꞌmoꞌya havige huꞌya Yisasifena hayanagi amakai kemoꞌa nago katela ohunagi alu ke alu ke maiꞌya humainae.
MAR 14:57 Nagoꞌa vayaꞌmoꞌya hetiꞌya havige huꞌya Yisasifena mage huꞌya hae “Tagaya agaiꞌama humainea kea havilinone mage huno humaine ‘Nagaya vayaꞌmoꞌyama kimalenaya ala mono nona aliꞌna lagape aitaleꞌna tagufa (3) kanafi ani nona eteꞌna vayaꞌmoꞌya nokiya avamete no ali hetigahue.’ huno higeta havilinone.” huꞌya nehae.
MAR 14:59 Hayanagi ani kemoꞌa nago avamete kea ohunagi alu ke alu ke maiꞌya humainae.
MAR 14:60 Hageno ala mono notela hagote kava kanomoꞌa amuꞌnoꞌamifi hetimaineno Yisasina mage huno havige “Na augafa ke kagaifena nehae? Kagaifena kaiyekema hunegatayana kenonaꞌamia hufalote huka nohane?” huno havige.
MAR 14:61 Havigeanagi Yisasiꞌa kea ohuno avaya lukino maineno nagola osi ke kanoꞌa ohutafa huno mainegeno ala mono notela hagote kava kanomoꞌa eteno nagoꞌene havige “Kagaya Anumaya Kotiꞌa taugafa aligatigahema hugatenea kano mainano? Kagaya agima alisaga nehaya Anumaya Kotina nafaꞌneꞌamoga mainano?” huno havige.
MAR 14:62 Havigegeno Yisasiꞌa hufalote huno hie “E, nagaya ani kano mainoanagitama tamakaya haenagaꞌa Ikapinagati emainoa kanoa vayaꞌmo natenea nafaꞌnemonia tusiꞌa tokiya yamaꞌa hanea Anumaya Kotina tamaga ayatega hanea siale maineꞌna ikate hanea siate esugetama nagegahae.” huno hie.
MAR 14:63 Higeno ala mono notela hagote kava kanomoꞌa ani kea havigeno aipamoꞌa tokiyaꞌage higeno kenaꞌa alino hatata nehuno mage huno hie “Tagaya hai havunanagiꞌya nagoꞌa vayaꞌmoꞌya kaiyekea huoꞌatesae.
MAR 14:64 Anumaya Kotifema huhaviya hutea kea ago nehavigi. Na tamakesa nehaviye?” huno higeꞌya mage huꞌya hae “Tamage nehane anona yamaꞌa alisia yafe haesageno falisie.” huꞌya hae.
MAR 14:65 Huteꞌya nagoꞌa vayaꞌmoꞌya Yisasina amavetuꞌna heneꞌateꞌya aulagafi aiso huteneꞌya aikoneliꞌya mage huꞌya havigae “Kaune kema nehana kanomoga tahapaiyo taꞌya negahayae?” huꞌya havinegeꞌya ati vayaꞌmoꞌya amayateti aikolimainae.
MAR 14:66 Pitaꞌa nomo haupalega afetega mainegeno ala mono notela hagote kava kanomona aliꞌya munaꞌmoꞌa anile emaineno ageana Pitaꞌa ata lota nehigeno ani munaꞌmoꞌa megeteno Pitana agesagali maineno mage huno hie “Kagayaenena Nasaleti Yisasiꞌene vaiyatete nehana kanoe.” huno hie.
MAR 14:68 Higeno Pitaꞌa avane huno “Aꞌao nagaya ani kanoa oꞌagenoa kanohe maika nehane.” huno nehuno fiate neꞌvigeno anile kokolemoꞌa agea aimaine.
MAR 14:69 Fiate mainegeno ani munaꞌmoꞌa mogeteno anile hetimaiya vayafena mage huno hie “Mani kanoa Yisasi anagapiti kanoe.” huno hie.
MAR 14:70 Higeno Pitaꞌa nagoꞌene eteno “Aꞌao nagaya ani kanoa omainoe.” huno hie. Osi kana kanoꞌa maigeꞌya anile hetimaiya vayaꞌmoꞌya mage huꞌya hae “Tamage kagaya Kalili kano mainana yafe agaiꞌene vaiyatete nehana kano mainane.” huꞌya hae.
MAR 14:71 Hageno Pitaꞌa mage huno hie “Nagaya tamagema ohisugenoꞌa Anumaya Kotiꞌa nahaesie. Anumaya Koti aulagafina tamage huꞌna tamahanepauve tamakayama haya kanoa nagaya oꞌagenoa kanoe.” huno hie.
MAR 14:72 Nehigeno aupaꞌa hagoteno agema aiya kokolemoꞌa anile viaꞌamo agea aigeno Pitana agesamoꞌa aikalo higeno Yisasiꞌma hapaigeno havimainea kea mage huno humaineane “Kokolemoꞌa tole kanale agea oꞌainesigeka kagaya tagufa (3) kanale avane huka nagaifena ‘Noꞌagoa kano maine.’ huka hugane huno humainea kemoꞌa Pita agesamoꞌa aikalo higeno haviteno tusiꞌa avitemaine.
MAR 15:1 Kola alino halegeꞌya mukiꞌa mono note kava vayaꞌene Yuta vayatamaene kahegi kema havilinaya anagaꞌene kanisole vayaꞌene Yisasina haesageno falisia kea huge havige huteꞌya Yisasina nofi kiteteꞌya ala kamani kava kanole, Pailatite* avaleꞌya ayapi motenae.
MAR 15:2 Motageno Pailatiꞌa Yisasifena mage huno hie “Kagaya Yuta veaꞌmogami Sauve kano mainano?” huno havigegeno Yisasiꞌa mage hie “Kagaikaꞌa ani kea hai nehane.” huno hie.
MAR 15:3 Higeꞌya mono note kava vayaꞌmoꞌya kasagoꞌya kea “Maꞌa kefo kava humainane.” huꞌya hutenae.
MAR 15:4 Huneꞌatageno Pailatiꞌa nagoꞌene mage huno hie “Havio mukiꞌa kefo yama nehana yana ali falote nehagi kagaya kenonaꞌamia naꞌa higeka nohane?” huno hie.
MAR 15:5 Hianagi Yisasiꞌa kenonaꞌa nagola osi ke kanoꞌa ohigeno Pailatina amaꞌyo aimaine.
MAR 15:6 Kafuꞌahe kafuꞌahe Anumaya Kotiꞌa amaugafama aligatimainea kanahe amakesa haviꞌya imua negiyanagino Pailatiꞌa mukiꞌa ani imu kisaya kanafina nagoke nofi hutegeno nemaiya kanoa vayaꞌyagamoꞌya haesaga huꞌya “Agaya esie.” huꞌya haya kanohe nofipitila “Hai haꞌno hanagi vuo.” huno huneꞌatea kanae.
MAR 15:7 Ani kanafina nago kanomo agia Palapasiꞌe kamani vayaꞌene tuma nehaya vayaꞌene maineno tuma haya kanafina vayala tavata nehamaeyaya vayaꞌene mainegeꞌya kina nopi avaleꞌya hutenayane.
MAR 15:8 Hutenayanagiꞌya vayaꞌyagamoꞌya Pailatife mage huꞌya me hae “Mukiꞌa imuma kina kanafima nehana kavala hulato.” huꞌya hae.
MAR 15:9 Hageno Pailatiꞌa mage huno hamavige “Nagaya Yisasifena Yuta veate Sauve kanomofe ‘Hai haꞌno hanagi vuo.’ huꞌna hisugetama musena hugahao?” huno hamavige.
MAR 15:10 Higeꞌya mono note kava vayaꞌmoꞌya ma amakesa haviye “Mukiꞌa veala Yisasi kegeꞌya nehaviꞌya tagai kea nohaviye.” huteꞌya ani yafe Yisasifena amaipamoꞌa haviya huteteꞌya Pailatite avaleꞌya ageno Pailatiꞌa ani yafe agesa nehavino humaine.
MAR 15:11 Havianagi mono note kava vayaꞌmoꞌya mukiꞌa vayaꞌmogami amaipa moyeꞌya mage huꞌya hamapaiye “Mage hutama hiho ‘Palapasina atalesanageno afaꞌa esie.’ hutama hiho.” huꞌya hae.
MAR 15:12 Hageno Pailatiꞌa vayaꞌyagahena mage huno hamavige “Aniꞌa hisuana ma kanomofe tamakaya Yuta vayate Sauve kano maine hutama nehaya kanomofena naꞌa hutesue?” huno hamavige.
MAR 15:13 Hamavigegeꞌya mukiꞌa vayaꞌmoꞌya ala kefiti mage huꞌya hae “Yafaga yosale nili hetama asaigeno falino.” huꞌya hae.
MAR 15:14 Hageno Pailatiꞌa mage huno hamavige “Naꞌa higetama na kea nehae? Hanaꞌa augafa kefo kava humaine?” huno hianagi amakaya eteꞌya aliꞌya alapi ataleꞌya ala kefiti mage huꞌya hae “Yafaga yosale nili hetama asaigeno falino.” huꞌya hae.
MAR 15:15 Hageno Pailatiꞌa mukiꞌa vayaꞌmoꞌya muse hisaya kava hugahue huno Palapasina nofipiti avaleno neꞌataleno Yisasina agata aisifa kaꞌyoteti haifu amiteno Yisasina ati vaya amayapi ateteno “Yafaga yosale nili hetama asaigeno falino.” huno hie.
MAR 15:16 Ati vayaꞌmoꞌya Yisasina avaleꞌya ala kava kanomo no haupalega umaineꞌya mukiꞌa amakaiꞌene nemaiya ati vayafe ke hageꞌya emainae.
MAR 15:17 Emaineꞌya Yisasina akaya ategahe “Ala kano mainane.” huꞌya hisaya yafe ayaꞌaya haesa kena aliꞌya faiteteꞌya avetaꞌnafaꞌage nofi aliꞌya mo aigalaki me aigalaki huꞌya tumano kula talo huꞌya Yisasina anute vaitenae.
MAR 15:18 Vaiteteꞌya aepa heꞌya huhaviya hutegahena mage huꞌya hae “Felugae. Yuta vayaꞌmogami sauve kanomogae.” huꞌya akaya atae.
MAR 15:19 Neꞌateꞌya anute kaꞌyoteti nagoꞌene nagoꞌene huꞌya aikoneliꞌya augafale amavetuꞌna heneꞌateꞌya amaleꞌya ayeꞌya mopale maineꞌya “Ala kano mainane” huꞌya ayevataga vatago humainae.
MAR 15:20 Kigi huneꞌateꞌya haesa kena hateneꞌataleteꞌya agaiꞌa kena faiteteꞌya yafaga yosale nili hegahe avaleꞌya umainae.
MAR 15:21 Kategama vayana Saimoniꞌene fotu humainae. Ani kanoa Sailini kumate kanoe. Alekasataꞌene Lufasiganiene neꞌanafaꞌe. Ani Saimoniꞌa hoyafinagati kate eneꞌvigeꞌya ati vayaꞌmoꞌya tokiyaꞌage ke huꞌya “Kaiyayeka yafaga yosa melika vuo.” huꞌya hageno molino umaine.
MAR 15:22 Alino vigeꞌya Yisasina avaleꞌya vayaꞌamoꞌya Kologota kumate uvaꞌyi hae. Ani kumaꞌmo agimoꞌa tagaiti kefina anu ayamufa kumale huꞌya nehae.
MAR 15:23 Ani ati vayaꞌmoꞌya “Haesunageno falisiana agata ai yafenagita agatama oꞌaisia tina amisunageno nesie.” huꞌyama hayana anima agata oꞌaisia timo agia mea. Meaꞌene nofi alagamo tiꞌene nagopi ali havigu huteꞌya aliꞌya amiyana Yisasiꞌa ani tifena “Aꞌao.” huno onene.
MAR 15:24 Onegeꞌya yafaga yosale nili heꞌya asaimaleteꞌya kenaꞌa fako huꞌya aligahe musufa yama nehaya yokalo lageꞌya amakasaya vayaꞌmoꞌya alimainae.
MAR 15:25 Natena naeni (9) kiloki yagemoꞌa anale hai vaꞌyi higeꞌya Yisasina yafaga yosalela nilia maleꞌya heteꞌya asaimainae.
MAR 15:26 Asaiteꞌya “Ma kava higeta haune.” huꞌya kaemalenae “Mani kanoa Yuta veate ala Sauve kanoe.” huꞌya kaeꞌya malenae.
MAR 15:27 Kaemaleteꞌya Yisasiꞌene tole kanolatana vaya nehamaeꞌana musufa yama nehaꞌa kanolatana nago kanoa Yisasina tamaga kaiyagaꞌa haeꞌya asaimaleꞌya nago kanoa haoga kaiyagaꞌa haeꞌya asaimaleꞌya humainae.
MAR 15:29 Humalenageꞌya kateꞌma ute ete huꞌya agasaya vayaꞌmoꞌya amakeꞌya kaꞌyo aiꞌya “Kefo kano maine.” huꞌya kigi yokalofiti huhaviya huneꞌateꞌya mage huꞌya hae “Oho kagaya ‘Ala mono nona aliꞌna lagape aitaleteꞌna tagufa (3) kanafi eteꞌna kitalegahue.’ huka nehana kano mainane?
MAR 15:30 Menia kagaya yafaga yosa neꞌataleka kagaikaꞌa elavika kaugafa aligatio.” huꞌya hae.
MAR 15:31 Hageꞌya mono note kava vayaꞌene kahegi kema havilinaya anagaꞌene amakaiꞌami vayaꞌmoꞌyaene aniꞌa huꞌya kamuge hatageꞌya vaineꞌateꞌya mohu mehu huꞌya huhaviya huneꞌateꞌya mage huꞌya hae “Nagoꞌa vea amaugafa aligatimainegi naꞌa higeno agaiꞌa augafa ali nokatie.
MAR 15:32 Kalaisiga Isaleli vayate Sauve kanoꞌamimoga yafaga yosa neꞌataleka elavigeta agamano. Agesunana kagaifena havita tagupi maleta tametitia hugahune.” huꞌya huhaviya huneꞌatageno agaiꞌenema yafaga yosaleꞌma asaimalaya musufa kanolatamoganienena aniꞌa huꞌana Yisasina huhaviya hutenaꞌe.
MAR 15:33 Yagemoꞌa euno amuꞌnokaꞌno higeno halemainea yamoꞌa haꞌno higeno mukiꞌa kotega tusiꞌa hanikino viaꞌamo une kanalega eteno ali halemaine.
MAR 15:34 Une kanalega Yisasiꞌa ala kefiti ke huno agaiꞌa kefiti mage huno hie “Eli Eli lema sapakatani.” huno hie. Tagaiti kefina mage huno hie “Anumaya Kotiꞌnimogae, Anumaya Kotiꞌnimogae naꞌa higeka nagaila nenatalane?” huno hie.
MAR 15:35 Higeꞌya nagoꞌa anile hetimaiya veaꞌmoꞌya haviteꞌya mage huꞌya hae “Ilaiyafe ke nehigi haviho.” huꞌya hae.
MAR 15:36 Hageno nago kanomoꞌa viaꞌamo hava koꞌyafa kana yana alino atuꞌage nofi alagamo tipi ayeteno alino viaꞌamo kupaga kaꞌyote maleno ani hava koꞌyafa kana yana kiteno “Yisasiꞌa mayu mayu huno nesie.” huno neꞌamino mage huno hie “Agava maineta agesune Ilaiyaꞌa yafaga yosaletila mevaleno elavisifi agegahune.” huno hie.
MAR 15:37 Higeno Yisasiꞌa ala kegefa huteno falimaine.
MAR 15:38 Faligenoꞌa ala mono nopima ala kena ayaꞌaya kenagefama asaimalenaya kenamoꞌa Yisasiꞌma falia kana kanoꞌale analeti aepa heno amuꞌnopiti hatata hulole hulavino mo talene.
MAR 15:39 Ati vayate kava kanomoꞌa Yisasina aulega hetimaineno Yisasiꞌa kema huteno falia yana ageteno mage huno hie “Tamage huno mani kanoa Anumaya Koti nafaꞌnelafa maine.” huno hie.
MAR 15:40 Nagoꞌa aꞌneyaga aluꞌale maineꞌya agemainae. Nagoꞌamogami amakia, osi Yemesiꞌene Yosefegani itaꞌanimoꞌa Maliaꞌe Salomiꞌagi Magatala kumate Maliaꞌagi huꞌya mainae.
MAR 15:41 Yisasiꞌa Kalilima mainea kanafina ani aꞌneyagamoꞌya akave vaiyatete nehuꞌya kavela kaeꞌya neꞌamiyane. Mukiꞌa aꞌneyaga Yisasiꞌene Yelusalemu tokaeꞌya umainaya aꞌneyaga aluꞌale hetiꞌya maineꞌya Yisasina agemainae.
MAR 15:42 Sapati yupahe haviꞌya talo tala hisaya kanagino yagemoꞌa lavi falegahe higeno Yosefeꞌa Alimatia kumate kanoa Yuta kanisolefi nemaiya kanoa evaꞌyi hie. Ani kanoa Anumaya Kotiꞌma kava yagaisia kanahe muse huno agava nehia kanogino kolia ohuno Pailatite viaꞌamo mage huno havige “Yisasina augafaꞌa aligahe nehue.” huno mo havige.
MAR 15:44 Havigegeno Pailatiꞌa “Aupaꞌa ago falimainegeka nehano? Avoꞌnio namaꞌyo aiye.” huno agesa nehavino nagoꞌa ati vayate kava yagaimainea kanohe ke higeno egeno “Yisasiꞌa ago falimaineo?” huno havige.
MAR 15:45 Havigegeno ati vayate kava kanomoꞌa “E, ago falimaine.” huno higeno Pailatiꞌa Yosefena mage huno hapaiye “Kanalelagi augafa afaꞌa moligane.” huno hie.
MAR 15:46 Higeno Yosefeꞌa viaꞌamo kaꞌyo muki ayaꞌaya kena molino viaꞌamo augafa yafaga yosaleti alino maleneno kenaleti augafalela aigalaki kalaki huno haꞌya kiteno alino viaꞌamo hefalegeꞌya kafimalenaya yafakapi Yisasina hevaiteteno avayaleꞌma aililesia yafana ayetufeno anile mo aililemalene.
MAR 15:47 Magatala Maliaꞌene Yosefena itaꞌamoꞌa Maliaꞌene maineꞌana hevaitea yafa kaana agemainaꞌe.
MAR 16:1 Sapati yupamoꞌa haꞌno higeꞌya Yemesina itaꞌamoꞌa Maliaꞌe hamoꞌamoꞌa Magatala kumate alagi Salomiꞌene Yisasina augafale manaꞌage masaveteti faletegahe ani masavena aliꞌya emainae.
MAR 16:2 Sota yupa yagemoꞌa yaufa nehaigeꞌya ani aꞌneyaga komulega vae.
MAR 16:3 Kategama vayana amakaiꞌamige kea hume hume umainae “Komumo avayaleꞌma aililemalea yafana ta taya huno avayaletila alino avayu huno faitega atalelategahie?” huꞌya hae.
MAR 16:4 Nehuꞌya agesaga huꞌya agayana ani ala yafakefa ago alikelitalageno faitega hanegeꞌya agemainae.
MAR 16:5 Ageteꞌya ani yafakapinaga hai faleꞌya mogayana nago neyana aya tamaga kaiyaga mopale mainegeꞌya agayana ani kanomoꞌa ayaꞌaya efe kena failinegeꞌya ageteꞌya tusiꞌa amamaꞌyo aimainae.
MAR 16:6 Amamaꞌyo neꞌaigeno ani kanomoꞌa mage huno hie “Tamakaila tamamaꞌyoa oꞌaino. Tamakaya Nasaleti Yisasife ati neꞌayae. Yafaga yosale nilima heꞌya asaimalaya kanohe ati neꞌayayanagi agaya falimainefiti ago hetimaine. Mafina omainegi ani kanoma malaya kumala ma hanegi ageho.
MAR 16:7 Tamakaya utama Yisasiꞌenema tokaeꞌya nemaiya anagaꞌene Pitaꞌene mage hutama hamapaiho “Yisasiꞌa ofalino afaꞌa mainenoꞌma tamahapaimainea kemoꞌa ago uhagotelamateno Kalili umainegi anilega neꞌutama Yisasina mogeho.” huno hamanepaiye.
MAR 16:8 Higeꞌya amakaya atili huteꞌya amamaꞌyo aigeꞌya yafakapitila hatilaviꞌya amaiyayeꞌya vayanagi kolima haya yafe nagoꞌa vayala ani kea hamaopainae.
MAR 16:9 Sota yupa nate alakefafi Yisasiꞌa falimainefitila hetino viaꞌamo hagoteno Magatala kumate Malia mainelega uvaꞌyi higeno agemaine. Nayona ani aꞌmo agupina seveniꞌa (7) Satani Avamula mainegeno Yisasiꞌa anatitaleneane.
MAR 16:10 Ani Maliaꞌa ageteno viaꞌamo Yisasiꞌenema tokaeꞌya nemaiya anagala mogeana tusiꞌa hamau huꞌya avineꞌatageno ani aꞌmoꞌa mage huno mo hamapaiye “Yisasiꞌa falimainefitila ago hetigeꞌna nagaya agaila ago ageteꞌna neꞌoe.” huno hamapaigeꞌya haviteꞌya “Havige nehane.” huꞌya amametitia ohunae.
MAR 16:12 Haenagaꞌa ani vayapitila tolemogania kumala ataleꞌana katega neꞌvaꞌageno Yisasiꞌa evaꞌyi higeꞌana agemainaꞌe.
MAR 16:13 Ageteꞌana ani kanolatana eteꞌana vayaꞌanimoꞌya mainalega vaꞌaꞌamogani “Yisasiꞌa naꞌa kano agoꞌe.” huꞌana mo nehaꞌana ani vayaꞌmoꞌya “Havige nehaꞌe.” huꞌya haviꞌya amametitia ohunae.
MAR 16:14 Haenagaꞌa aleveniꞌa (11) anagala kave maiꞌya nenageno Yisasiꞌa evaꞌyi huno maineno amakaya vayaꞌmoꞌyama haya kemoꞌa “Yisasiꞌa falimainefitila ago hetigeta agemainone.” huꞌya haya kema havisaya yafena amakuꞌamoꞌa tilegeꞌya haviꞌya amametitima ohaya yafe Yisasiꞌa ke memamakie.
MAR 16:15 Kemamakiteno mage huno hamapaiye “Mukiꞌa kotega utama nagai kanale mono kea alitama veaꞌmogamina mo hamapaiho.
MAR 16:16 Hamapaisageꞌya nagoꞌa veaꞌmoꞌya ani kehena ‘Tamage nehae.’ huꞌya haviꞌya amakupi maleꞌya amametiti hisagetama tina falematesageno Anumaya Kotiꞌa amaku amamena aligatigahianagi nagoꞌa veaꞌmoꞌya ani kehena ‘Havige nehae.’ huꞌya haviꞌya amakupi omalesaya veafena Anumaya Kotiꞌa ‘Hani yapi tegelege nehia atafi viho.’ huno humategahie.
MAR 16:17 Nagai kema haviꞌya amakupi maleꞌya ametiti hisaya veaꞌmoꞌya ani tokiyaꞌage avame yana hugahae nagai nagile Kefo Avamula vea amakupitila amanati neꞌataleꞌya amaku amakesafiti ohavinesaya kefitila alu amake alu amakea aigahae.
MAR 16:18 Veaꞌma akafu neꞌamanisia osifaꞌvema atafa hisayana amaugafa amagata oꞌaisigeꞌya ofaligahae. Vayaꞌma nefalia posini lima nesayana amaugafa amagata oꞌaisigeꞌya ofaligahae. Kalima neꞌaliya vayaꞌmogami amaugafaleꞌma amayama malesagenoꞌa kaliꞌamimoꞌa kanale humategahie.” huno hie.
MAR 16:19 Yisasiꞌa, Anumayatimoꞌe mani kea hamapaitegeno ikapinaga avalesaga higeno haino Anumaya Kotina tamaga ayatega umaine.
MAR 16:20 Umainegeꞌya Yisasiꞌene tokaeꞌya nemaiya anagala mukiꞌa kotega ute ete huꞌya Yisasi mono kea hamanepaigeno Anumayamoꞌa amakaiꞌene vaiyeno amaya huno tokiya yamaꞌaleti “Ani kea tamage nehae.” huꞌya veaꞌmoꞌya havisaya yafe kasagoꞌya tokiya avame yana humainae. Mani kema hua kea tamage.
LUK 1:1 Tiofilasiga ala kava kanomoga mukiꞌa vayaꞌmoꞌya Yisasiꞌma tagai amuꞌnopi humainea yana ago kaemalenae.
LUK 1:2 Yisasi kema hamanepaiya vayaꞌmoꞌya ehe kanale aepa heꞌya ani yana ageteꞌya tamahapaimainae.
LUK 1:3 Mukiꞌama kahapaiya kemona aepaꞌa kelamake ke havisa-nafe nagaya kanaleꞌya huꞌna havilama huꞌna havilinoafe fatago huꞌna kaeꞌna kamigahue huꞌna nehue.
LUK 1:5 Nagi Yutia kotega ala kava kanomo agia Helotiꞌe kava yagaino mainea kanafina nago kanomo agia Sekalaiyaꞌe mono note kava kano maineanagino Apaisa nofi kano mai-geno aꞌamoꞌa Eloni nofi vayapiti falote humaineane. Ani aꞌmo agia Ilisapetiꞌe.
LUK 1:6 Ani alavelatana Anumaya Koti aulagafina fatago huꞌana mai-neꞌana mukiꞌa Anumayamo kahegi kea haviꞌana akave maleꞌana havi kavala ohunaꞌane.
LUK 1:7 Ilisapetiꞌa namo a maineafe nafaꞌneꞌania omai alavelata kosuna alekano lemainaꞌe.
LUK 1:8 Apaisa nofi vayaꞌmoꞌya aliꞌya alisaya kana Sekalaiyaꞌa Anumaya Koti aulagafi aliꞌyamaꞌa neꞌaligeꞌya mono nopi kava vayaꞌmoꞌya Sekalaiyafe “Kagayae.” huꞌya hageno Sekalaiyaꞌa Anumaya Koti mono nopi maineno manaꞌage yana kaesalamana Anumaya Kotina huneꞌateane.
LUK 1:10 Halinamo manaꞌa Anumaya Kotina neꞌamigeꞌya mukiꞌa veaꞌne-yaga kumatega maineꞌya Anumaya Kotitega havigemainae.
LUK 1:11 Havigageno Sekalaiyaꞌa mono nopi mainegeno Anumayamo ensole kanomoꞌa agaite efalote huno manaꞌage ata kaemalea folamole* tamaga kaiyagaꞌa me hetimainegeno agemaine.
LUK 1:12 Sekalaiyaꞌa ani kanoa ageteno atali talu huno koli humaine.
LUK 1:13 Koli hianagi ani kanomoꞌa mage huno hie “Sekalaiyaga kolia ohuka afaꞌa maiyo. Nunamuma humainana yafena Anumaya Kotiꞌa ago havianagino akamoꞌa Ilisapetiꞌa ne nafaꞌne atesigeka agia Yoniꞌe huka malo.
LUK 1:14 Kagaya tusiꞌa muse nehisanageꞌya mukiꞌa veaꞌmoꞌya ani nafaꞌnema falote hisia yafena tusiꞌa muse hugahae.
LUK 1:15 Ani nafaꞌnemoꞌa Anumaya Koti aulagafina ala agiene kano maineno havilina onegahia-nagino atenea kanaleti aepa heno Anumaya Koti Alu Aotage Avamuꞌmoꞌa aguꞌafina hiya hugahie.
LUK 1:16 Hiya hisigeno mukiꞌa Isaleli kumate veaꞌnemoꞌya agai kea haviteꞌya amakuꞌa aiyahae huꞌya amakaiꞌami Anumaya Kotitega ugahae.
LUK 1:17 Anumayamo aulega hagoteno Ilaiyaꞌma humainea kavaꞌene aminea tokiꞌyaꞌaene vigeꞌya amafaheꞌya agai kea haviteꞌya amakuꞌa aiyahae huꞌya nafaꞌneꞌamihena amakesa havigahae. Veganokano nehaya veaꞌneꞌmoꞌya agai kea haviteꞌya amakuꞌa aiyahae huꞌya fatago veaꞌneꞌmoꞌya humainaya kanale kea havigahae. Aniꞌama hisayafe veaꞌneyaga Anumayamoꞌma esiafe amakuꞌa talo tala huꞌya maigahae.” huno hie.
LUK 1:18 Higeno Sekalaiyaꞌa mage huno hie “Tamage nehapi havige nehane? Nagaya kosunagiꞌna aꞌnimoꞌa alekano lemaineanagitaꞌa hanaꞌa hutaꞌa ani kea havisuꞌe?” huno humaine.
LUK 1:19 Higeno ensole kanomoꞌa mage huno hie “Nagaya Kepalieliꞌnae Anumaya Koti aule hetiꞌna mainogeno Anumaya Kotiꞌa ani kanale kema kahapaisuafene huno hunategeꞌna emainoe.
LUK 1:20 Havio nagai kemoꞌma haenagaꞌa efaloteꞌma huno tamage hisigeka keꞌnia ohavinanafe menia tugogekamoꞌa tileno atalako hinageka kaiyekea ohugananagika kema hua kemoꞌa efalote huno tamage hisia kanale tugogekamoꞌa akalo hinageka kagea aikalo hugane.” huno humaine.
LUK 1:21 Higeꞌya kumate mainaya veaꞌmoꞌya Sekalaiyafe agava huge hugeteꞌya ayaꞌaya kanagefa Anumaya Koti noma hunalagimale nopima maiya yafe “Naꞌa higeno aupaꞌa nome.” huꞌya amakesa haviꞌya mainae.
LUK 1:22 Mainageno ani nopinagati hatilaviana kaiyekea nohie. Kaiyekema ohia yafe veaꞌmoꞌya amakesa mage huꞌya havimainae “Nopinaga maiya yamo alu ya agemai kano maine.” huꞌya havigeno ani kanomoꞌa ayateti avameꞌname huno kea hamapaiya-nagi avayamoꞌa tuki maine.
LUK 1:23 Tuki mainegeno aliꞌyamaꞌama haꞌno hia kanale nomaꞌalega umaine.
LUK 1:24 Umainegeno haenagaꞌa aꞌamoꞌa, Ilisapetiꞌa aipaene maineno faefuꞌa (5) ikana falakino maineno mage hie “Anumayamoꞌa kanale ya hunatene. Nageteno veaꞌmogami amaulagafina nagayema humainoa yana ago alitalene.” huno humaine.
LUK 1:26 Ilisapetiꞌa aipaene mainea ikana sikisiꞌa (6) ika agasetegeno Anumaya Kotiꞌa nago ensole kanoa, Kepalielina, nago Kalili kotega hanea kumala, Nasaleti hutene.
LUK 1:27 Anumaya Kotiꞌa nagola vene ofaenea munate Kepalielina hutegeno umaine. Ani munaꞌmo agia Maliaꞌe. Yosefena agaite hagemalenaya munale. Yosefena aginagomo agia Tevitiꞌe.
LUK 1:28 Kepalieliꞌa Maliate eno mage huno hie “Mainano? Anumaya Kotiꞌa kagaila muse nehia munaꞌmoga Anumayamoꞌa kagaiꞌene maine.” huno hie.
LUK 1:29 Higeno anima hia kehena Maliaꞌa tusi amaꞌyo neꞌaino ma agesa havimaine “Ani kea naꞌane ke me nahapaiye?” huno humaine.
LUK 1:30 Higeno ensole kanomoꞌa agaife mage huno hie “Maliaga kolia ohuo. Anumaya Kotiꞌa kagaifena aipa kanale hunegate
LUK 1:31 Havio kagaya kaipa ya huteka ne nafaꞌne ateteka agia Yisasiꞌe huka malo.
LUK 1:32 Ani nafaꞌnemoꞌa agi hanesia kano mainesigeꞌya veaꞌmoꞌya ‘Anale mainea Anumaya Koti nafaꞌne maine.’ huꞌya hugahae. Aginagomoꞌa, Teviti kava yagaimainea tokiyaꞌa Anumaya Kotiꞌa amisigeno Yekopu nofi veate agola kava yagaino maineno kava yagaisia tokiyaꞌa hanege hanege huno hanesigeno haꞌno ohugahie.” huno humaine.
LUK 1:34 Higeno Maliaꞌa ensole kanomofe mage huno hie “Hanaꞌa huꞌna aniꞌa hisue? Nagaya velela omainoa muna mainoe.” huno hie.
LUK 1:35 Higeno ensole kanomoꞌa agaife mage huno hie “Anumaya Kotina Alu Aotage Avamuꞌamoꞌa kagaite emaisigeno anale mainea Anumaya Kotina tokiyaꞌamoꞌa aiso hugatesigeka maineka nafaꞌnea ategane. Atesanana alu aotage kanale nafaꞌne mainesigeꞌya veaꞌmoꞌya ani nafaꞌnehena ‘Anumaya Kotina neꞌamo maine.’ huꞌya hugahae.
LUK 1:36 Havio neꞌitakamoꞌa, Ilisapetiꞌa, alekano lemaineanagi aipaene maineanagino ne nafaꞌne ategahie. ‘Namo a maine.’ huꞌya humainaya alekanomoꞌa aipaene mainea ikamaꞌa sikisiꞌa (6) ika agasemaine.
LUK 1:37 Anumaya Kotiꞌa tagaya ohuteꞌasina yanagi afaꞌa hugahie.” huno humaine.
LUK 1:38 Higeno Maliaꞌa mage huno hie “Nagaya ago Anumayamo aliꞌya muna mainoe. Hana kemoꞌa kanalelagino nagaitela falote hunategahie.” huno hie. Higeno ensole kanomoꞌa anileti neꞌataleno umaine.
LUK 1:39 Maliaꞌa ani kanafina hetino aiyayeno agoꞌyafi haino Yutia kotega hanea kumate umaine.
LUK 1:40 Uvayi huno Sekalaiya nopi hai faleno Ilisapetina falu fala hutene.
LUK 1:41 Falu fala huneꞌategeno Ilisapetiꞌa Maliaꞌma hia kea nehavigeno aipafima mainea nafaꞌnemoꞌa kanage kanage higeno Anumaya Koti Alu Aotage Avamuꞌmoꞌa Ilisapetina aguꞌafina hiya higeno Ilisapetiꞌa ala kefiti mage huno hie “Kagaya mukiꞌa aꞌneyaga amakaseka mainanageno Anumaya Kotiꞌa kanale muse ya kamianagika atesana nafaꞌnea kanale muse ya alimainea nafaꞌne kaipafina maine.
LUK 1:43 Nagaya hanaꞌa a mainogeka Anumayaniꞌamona itaꞌamoga nagaitega neꞌane.
LUK 1:44 Havio hu falu fala hunatana kea nagesafi nehavugeno naipafinaga mainea nafaꞌnemoꞌa tusi muse nehuno kanage kanage nehie.
LUK 1:45 Kagaya Maliaga Anumayamo ensole kanomoꞌa kahapaiya kea ago tamage huno falote hugahie huka ago havika kagupi maleka kametiti humainanafe Anumaya Kotiꞌa muse hisana yana ago kamine.” huno hie.
LUK 1:46 Maliaꞌa mage huno hie “Nagu nafaꞌnemoꞌa Anumayamo agi alisaga nehigeno nagu namena alinegatia Anumaya Kotiniꞌamofena tusi muse nehue.
LUK 1:48 Muse nehuanagiꞌna nagaya afa munalagiꞌna aliꞌya munaꞌa mainoanagi agaiꞌa nagaila kalagi ainateanagiꞌna ani nafaꞌnea atesugeꞌya mukiꞌa veala meni veaꞌnene haenagama falote hisaya veaꞌnene nagaifena ‘Ma aꞌmona Anumaya Kotiꞌa tusiꞌa muse hisia ya aminea ale.’ huꞌya hugahae.
LUK 1:49 Tusi tokiyaꞌa hanea kanomoꞌa nagaila kanale ya hunatene. Ani kanomo agia ‘Kanale alu aotage kano.’ maine huꞌya nehae.
LUK 1:50 Agaife ‘Ala kanoꞌni maine.’ huꞌya humai-naya veaꞌmofena menima mainaya veaꞌnene haenaga veaꞌmogamifeꞌene tusiꞌa kalagi aimaine.
LUK 1:51 Ayateti tokiya aliꞌyana alimaineanagino ‘Tagaya ala veaꞌne mainone.’ huꞌya amakuꞌafinaga nehaviꞌya amaugafa aliꞌya haimainaya amakesa haviya veaꞌmogamina amanatitalene.
LUK 1:52 Tokiyaꞌage kava vayala alino mopafi amataleneanagi amakima omale veaꞌmogamina amakia alisaga humaine.
LUK 1:53 Amakuꞌafinaga amakaꞌ-nelea veaꞌmogamina kanale yana kasagoꞌya alino amamigeno amamu higeꞌya havatemainae. Mukiꞌa yaꞌamima hanea veala oꞌamamino humategeꞌya ataleꞌya umainae.
LUK 1:54 Taginagomoꞌa Apalahamuꞌene agaiꞌa nofi veaꞌnene haenagama falote hisaya veaꞌnenefe mage huno hie ‘Kalagi ailamategahue.’ huno nayona humainea kele menia agesa haviteno Isaleli kumate aliꞌya vayaꞌamogamina amaya humaine.” huno Maliaꞌa humaine.
LUK 1:56 Maliaꞌa Ilisapetiꞌene tagufa (3) ika maiteno kumaꞌalega eteno umaine.
LUK 1:57 Ilisapetina inamu ya alitegeno ne nafaꞌne atene.
LUK 1:58 Atetegeꞌya agaiꞌa kumate veaꞌnene agaiꞌa nofi veaꞌnene Anumaya Kotiꞌa kalagi aitenea yafena haviteꞌya tusiꞌa muse humainae.
LUK 1:59 Nago sota maiteꞌya ani ne nafaꞌnemona agoya anoꞌya taga hisia ya agegahune huꞌya emaineꞌya nefate hamoꞌya hugahe agia Sekalaiyaꞌe huꞌya malegahe nehageno itaꞌamoꞌa “Aꞌao agia Yoniꞌe huta malegahune.” huno hie.
LUK 1:61 Higeꞌya veaꞌmoꞌya mage huꞌya hae “Naꞌa higeka ani agia nemalane? Tanakai nofi veaꞌmoga-mina aniꞌa amakia omalene.” huꞌya hae.
LUK 1:62 Nefa tugokemoꞌa tilemainegeno agema oꞌaiya yafe avameꞌname huꞌya “Na agi malegane?” huꞌya havigae.
LUK 1:63 Havigageno avameꞌname huno “Avo kaesua ya namiho.” huno higeꞌya amigeno “Agia Yoniꞌe.” huno kaegeꞌya ageteꞌya vayaꞌmoꞌya “Nohaya kava hie.” huꞌya amamaꞌyoa aiye.
LUK 1:64 Ani agia kaemaletegeno aupaꞌa Sekalaiya tugokemoꞌa akalo higeno avefuꞌnamoꞌa ayaꞌaya higeno kaiyekea huno Anumaya Koti agia alisaga hie.
LUK 1:65 Ani kumate veaꞌmoꞌya tusiꞌa amamaꞌyo aigeꞌya ani yafena ke hu atile male hageno ani kemoꞌa mukiꞌa Yutia agoꞌya hanea kumatega ute ete higeꞌya havimainae.
LUK 1:66 Haviteꞌya veaꞌmoꞌya haviꞌya amakupi maleteꞌya mage huꞌya hae “Anumayamoꞌa aya hugahe agaiꞌene maineafe haenagaꞌa mani nafaꞌnemoꞌa hanaꞌa hisia nafaꞌne maigahie?” huꞌya humainae.
LUK 1:67 Nefaꞌa, Sekalaiyana aguꞌafi Anumaya Kotina Alu Aotage Avamuaꞌamoꞌa me hiya huno havatemainegeno Anumaya Koti aune kano kana huno mage hie “Isaleli veaꞌmogati Anumaya Kotiꞌa agaiꞌa veaꞌnele me laya huno taugafa aligatimainea yafe agia alisaga hisune.
LUK 1:69 Tevitiꞌa Anumaya Kotina aliꞌya kanoꞌamo nofi anagapiti nago tokiyaꞌage kanoa taugafa aligatisia kano ali hetitene.
LUK 1:70 Ani kea Anumaya Kotiꞌa nayona alu aotage aune vayaꞌamogami amavayafiti hu falote humaineane.
LUK 1:71 Mage huꞌya humainae ‘Kame vayatimoꞌya ago tatafa hulinaya vayaꞌmogamiꞌene tagaife amaipa kafa henelataya vayaꞌmogami amayapitila tavaleno taugafa aligatigahie.’
LUK 1:72 Anumaya Kotiꞌa taginagomofe ‘Aigetamateꞌna tamaya hugahue.’ huno humainea yana hugahie. Alu aotage huno alino hagelafilateneafe agesa havi havi huno agekani otategahie.
LUK 1:73 Alino hagelafilatenea kemona hulokiya vaino taginagomona Apalahamufe humaineane. Nayoma humainea kea menia ani kava hisiafe hie.
LUK 1:74 Anima hulokiya vaimalenea kemoꞌa mage huno humaine ‘Nagaya kame vayatamimogami amayapitila tamavalesaga huꞌna tamaugafa aligatisugetama tamakaya kolia ohutama mukiꞌa kanafina tamahaimula hanesigetama kefo yatamia omale veaꞌnea fatago kavaꞌage hutama nagai naulela aliꞌyaniꞌa aligahae.’ huno humaineane.
LUK 1:76 Humaineanagi kagaya Yoniga nafaꞌneꞌnimogae haenagaꞌa kagaifena ‘Anafinaga mainea Anumaya Kotina aune kanoꞌa mainane.’ huꞌya hugahae. Kagaya uhagoteka Anumayamo visia kana talo tala hugane. Anumaya Kotiꞌa tagaifena tusiya huno kalagi ailateneafe agaiꞌa veaꞌnea kefo yaꞌamia agetamateno ataleꞌamateno amaku amamena aligatisiafe humavelisanageꞌya havigahae. Monafinagati halemainea kanoa falote huno tagaiteꞌma esiana ani kava hugahie.
LUK 1:79 Hani yapi maineta faligahe humainona veaꞌmogata ayevasa hulateno ako huta maisuna kate tategahe egahie.” huno humaine.
LUK 1:80 Ani nafaꞌnemoꞌa ala huno agu agesamoꞌa tokiyaꞌage higeno kaꞌme kotega umaiteno Isaleli veaꞌmogami amaulagale efalote higeꞌya agemainae.
LUK 2:1 Ani kanafina nago kava kanomo agia Sisa Ogasatasiꞌe mage huno humaine “Mukiꞌa Lomu kamanimoꞌya kava yagaimainesaya kumate veala amaki me ayegeꞌya kaeho.” huno humaine.
LUK 2:2 Higeno ani kanafina hagote kanale aepa heꞌya amakia kaemainayane. Ani kanafina nago osi kava mainea kanomo agia Kuiliniusiꞌe ani kanoa Silia kotega kava yagaino nemaiya kanoe.
LUK 2:3 Mukiꞌa vayala amaki aligahe hageꞌya mopa aepaꞌamilega umainae. Yosefena aginagomoꞌa Tevitiꞌma maineafe Yosefeꞌa Kalili kotega hanea kumala Nasaleti kumaꞌa ataleno Petelehemu, Tevitina atenea kumate umaine.
LUK 2:5 Maliana hagemalenaya munala aipaene mainegeꞌana “Taꞌagi alisae.” huno avaleno umaine.
LUK 2:6 Ani kumate umainaꞌageno inamu yana alitene.
LUK 2:7 Maliaꞌa yage nafaꞌneꞌa ne nafaꞌne ateteno mukiꞌa faesia nona hiya higeno pulamakamo nopi ateteno kupi asaga huno aiteno pulamakamoꞌya kave nenaya yopafi faetene.
LUK 2:8 Ani kegela sipi sipi kava vayala talapinaga maineꞌya sipi sipiyagale kava yagaiꞌya mainae.
LUK 2:9 Mainageno anile Anumaya Koti ensole kanomoꞌa egeno Anumayamo tokiya hale yamaꞌamoꞌa aivasa hulino egeꞌya ageteꞌya koli humainae.
LUK 2:10 Hageno ensole kanomoꞌa mage huno hie “Kolia ohutama mainetama haviho nagaya kanale kaiyekea tamahapaigahe aliꞌna neꞌoe. Tusiꞌa muse hisaya kea tamahapaisugeꞌya mukiꞌa veaꞌmoꞌya havigahae.
LUK 2:11 Meni kegela Teviti kumatela tamaugafa aligatisia kanoa ago neꞌate. Ani kanomo agia Anumaya Kalaisiꞌe, Anumaya Kotiꞌma taugafa aligatigahema hutenea kanoe.
LUK 2:12 Ani nafaꞌnea kupi aiteteno pulamakamo kave nenea yopafi faeteneanagitama mogetetama ‘Ma yafema hia yana ago falote humaine.’ hutama hugahae.” huno hie.
LUK 2:13 Higeꞌya mukiꞌa ensole vayaꞌyaga ani kanomote aupaꞌa melitalu huꞌya Anumaya Koti agia alisaga nehuꞌya mage huꞌya humainae.
LUK 2:14 “Anumayatimogae anafinaga mainane huta kagi alisaga nehunageka mopale mainaya veaꞌmogamina kaipa falu humatesana veaꞌmoꞌya amaipa falu huꞌya kanaleꞌya huꞌya maigahae.” huꞌya humainae.
LUK 2:15 Ensole vayaꞌmoꞌya neꞌamataleꞌya ikapinaga haigeꞌya sipi sipi kava vayaꞌmoꞌya ke mohu mehu huꞌya mage hae “Petelehemu vigetao Anumayamoꞌa tahapaiya yana mogegahune.” huꞌya humainae.
LUK 2:16 Amaiyayeꞌya agegahe vaayana Maliagani Yosefegania nafaꞌneꞌania afumo kave nenea yopafi faeteteꞌana mainaꞌageꞌya mogemainae.
LUK 2:17 Mogeteꞌya ensole vayaꞌmoꞌya ani nafaꞌnehema hamapaiya kea mukiꞌa veaꞌnea hamapaiye.
LUK 2:18 Hamapaigeꞌya mukiꞌa havimainaya veaꞌꞌmoꞌya sipi sipi kava vayaꞌmoꞌyama hamapaiya kehena tusiꞌa amamaꞌyo aimainae.
LUK 2:19 Amamaꞌyo aiyanagi Maliaꞌa mukiꞌa yama humainea kavala aguꞌafi maleneno agesa havino maine.
LUK 2:20 Mainegeꞌya sipi sipi kava vayaꞌmoꞌya eteꞌya kumaꞌamilega neꞌuꞌya agoꞌma hamapaigeꞌya haviteꞌya agemainaya yafena Anumaya Kotitega muse huꞌya agia alisaga hume hume vae.
LUK 2:21 Yisasina atetegeꞌya nago sota maiteꞌya agoya anoꞌya tagama haya kanale* agia Yisasiꞌe huꞌya malenae. Ani agia oꞌatenegeno itaꞌamoꞌa aipa yana ohunegeno ensole kanomoꞌa ani agia malenea agie.
LUK 2:22 Itaꞌamoꞌene nafaꞌnene faeꞌana hali hutaꞌageno Moseseꞌma humainea kemo akave maleꞌana Yisasina avaleꞌana Anumaya Kotina amigahe Yelusalemua haimainaꞌe.
LUK 2:23 Anumaya Koti ke kaemalenaya kefina mage huno humaine “Mukiꞌa yage ne nafaꞌneyaga Anumaya Kotina alu aotage nafaꞌneꞌa maisie.” huꞌya kaemalenayane.
LUK 2:24 Kaemalenayana Anumaya Kotitega muse ya amigahe haimainaꞌe. Anumaya Koti ke kaemalenaya kefina mage huno humaine “Tole nama haefatalapi tole ala namalata amigahae.” huꞌya kaemalenayane.
LUK 2:25 Ani kanafina nagola Yelusalemu mainea kanomo agia Simioniꞌe. Fatago kano maineno Anumaya Koti kea akave nemalea kanoa Isaleli veaꞌmogami amaugafa aligatisia kanomo esiafe agava mainegeno Alu Aotage Avamuꞌmoꞌa agaiꞌene maineno mage huno hapaiye “Aupaꞌa ofaligananagika Anumaya Kotiꞌma amaugafa aligatigahema hutesia kanoa ageteka faligane.” huno hapaimaineane.
LUK 2:27 Hapaimaineanagino ala mono nopi avaleno egeno anile mainegeꞌana Yisasina itaꞌafoꞌamogania mono kemo avaya ali hipoꞌya huꞌana avaleꞌana aꞌageno ani kanomoꞌa Yisasina avaleno anukilineno Anumaya Koti agia alisaga humaine.
LUK 2:29 Avalelineno Simeoniꞌa mage huno hie “Anumayamoga hagoteka nahapaimainana nafaꞌnea menia ani nafaꞌnemoꞌa tagaila taugafama aligatisia kanoa neꞌagoafe naipamoꞌa kanale hinageꞌna aliꞌya kanokamonia ‘Falio.’ hisanageꞌna falisue.
LUK 2:31 Mukiꞌa veaꞌmogami amaulagafina anima taugafa aligatisia kanoa tavelinanagino ani kanomoꞌa kagaikaꞌa Isaleli veaꞌmogamina amakia alisaga huteno Yuta veala omainaya veaꞌmogamina aye vasa humateno kagai kea hamapaigahie.” huno hie.
LUK 2:33 Yisasina itaꞌafoꞌamogania Simeoniꞌa ani nafaꞌnehema hia kehena tusi anakesa havi havi humainaꞌe.
LUK 2:34 Haꞌageno Simeoniꞌa kanale manu anamino ani nafaꞌnemo itaꞌamoꞌa, Maliafena mage huno hie “Havio Anumaya Kotiꞌa mani nafaꞌnea huteneafe mukiꞌa Isaleli kumate veaꞌnea nagoꞌamogamina ali lakatineꞌamataleno nagoꞌamogamina ali hetimategahe hutegeno emaine. Anumaya Kotiꞌa nagola alegana ya kana huno hanesiafe hutegeno emaineanagi mukiꞌa veaꞌmoꞌya agaifena ‘Kahaoteꞌyakae.’ huꞌya hugahae. Hugahayanagi mukiꞌa veaꞌmoꞌya amaku amakesa haviya kemoꞌa falote humategahie. Maliaga haenagaꞌa kagaila kahaumanamoꞌa tusiya huno halegahie.” huno hapaiye.
LUK 2:36 Ani mono nopina nagola Anumaya Koti aune aala maine. Ani aꞌmo agia Anaꞌe nefa agia Fanueliꞌe. Anakai nofi veaꞌnea Asa nofi veaꞌne mainae. Ani aala alekano maine. Yauva a mainea kanafina neveꞌene seveniꞌa (7) kafu mainegeno neveꞌa falitegeno megusa heno maino haimainea kafua eiti foꞌa (84) kafu maine. Ani aꞌmoꞌa mono nona oꞌataleno anifi mukiꞌa kanafina kegeꞌene felugaene Anumaya Koti agia alisaga nehuno kavela mosino Anumaya Kotitega havinegeane.
LUK 2:38 Ani aꞌmoꞌa anile evaꞌyi huno Yisasina megeteno Anumaya Kotifena tusi muse huteteno mukiꞌa Yelusalemu veaꞌnea amaugafa aligatisia kanohe agava mainaya veala Yisasifena hamapaiye.
LUK 2:39 Yisasina itaꞌafoꞌamogania mono kema hamanepaiya kavala haꞌno huteteꞌana Kalili uꞌana kumaꞌanilega Nasaleti umainaꞌe.
LUK 2:40 Yisasiꞌa ala huno tokiyaꞌage nafaꞌne maineno kanale agu agesaene nafaꞌne mainegeno Anumaya Kotiꞌa agaiꞌene maineno kayone hu yana amine.
LUK 2:41 Isaleli kotega veaꞌnea mukiꞌa kafuꞌahena Anumaya Kotiꞌma amaugafa aligatimainea yafe amakesa hao hisia imu negigeꞌana* Yisasina itaꞌafoꞌamogania mukiꞌa kafuleꞌma ani imulega Yelusalemuga umainaꞌe.
LUK 2:42 Vaꞌageno Yisasiꞌa tuelufuꞌa (12) kafuꞌa hanegeꞌana mukiꞌa kafule nehaꞌa kava huꞌana Yelusalemu ani imulega haimainae.
LUK 2:43 Anima imuma kiya kanamoꞌa haꞌno higeꞌya itaꞌafoꞌamogania noꞌamilega aepa heꞌya ugahe hageno ani nafaꞌnea Yisasiꞌa oꞌuno afaꞌa Yelusalemu mainegeꞌana maiya yafena ohavinaꞌe.
LUK 2:44 “Nagoꞌa vayatiene katega neꞌvifi?” huꞌana nago yupa kate uteꞌana kegela agai nofi vayaꞌamogami amuꞌnoꞌamifiꞌene nefugami amuꞌnoꞌamifiꞌene atiyaꞌana oꞌagenaꞌe.
LUK 2:45 Oꞌagetafa huteꞌana atiyegahe Yelusalemu alehate eteꞌana umainaꞌe.
LUK 2:46 Tagufa (3) feluga atiyegetaꞌana oꞌageꞌana ala mono nopi haiꞌana mogaꞌana anile ala humaveli vayaꞌene mopale maineno amakai ke haviteno anonaꞌamia hamavige.
LUK 2:47 Hamavigegeꞌya mukiꞌa ani kema haviya vayaꞌmoꞌya kenonaꞌahena tokiyaꞌage agesama hanea yafena tusiya huꞌya amamaꞌyoa aimainae.
LUK 2:48 Amamaꞌyoa neꞌaigeno itaꞌafoꞌamogania mogeteꞌana anamaꞌyo neꞌaiꞌana itaꞌamoꞌa mage hie “Neꞌnimoga naꞌa higeka ma kavala hu nelaꞌatane? Negafaꞌene taꞌaipa havitaꞌa kanaꞌage hutaꞌa kagaifena katineꞌayoꞌe.” huno hie.
LUK 2:49 Higeno Yisasiꞌa anakaifena “Naꞌa higetana nagaifena natineꞌayaꞌe? Nagaya Nenafa nopina aliꞌya alisua yafe nenahaiye huꞌna hua kea nohaviꞌafio?” huno hie.
LUK 2:50 Higeꞌana agayama hia kea havilama ohunaꞌe.
LUK 2:51 Havilama ohaꞌageno Yisasiꞌa anakaiꞌene tavino Nasaleti umaineno anakai ke haviteno akave malegeno itaꞌamoꞌa mukiꞌa humainea kavala alino aguꞌafi malene.
LUK 2:52 Malegeno Yisasiꞌa ala hutegeno kanale aku agesamoꞌa ala higeno Anumaya Kotiꞌene veaꞌmoꞌyaene tusiꞌa muse hutenae.
LUK 3:1 Taipiliasi Sisaꞌa mukiꞌa Lomu veaꞌnela ala kava maine. Fifitiniꞌa (15) kafu ala kava kano maigeno ani kanafina Potiusi Pailatiꞌa Yutia kotega Gavana kava kano maigeno Helotiꞌa Kalili Kavana kava kano maigeno aganaꞌamoꞌa Filipiꞌa Ituliaene Talakonaitisiene Gavana kava kano maigeno Laiseniasiꞌa Apilini Gavana kava kano maigeno huꞌya mainae.
LUK 3:2 Mainageꞌana ani kanafina Anasiꞌagi Kaiyafasiꞌagi ala mono note kava kanolata mainaꞌanagino ani kanafina Sekalaiya nafaꞌnea, Yoniꞌa kaꞌme kotega umainegeno Anumaya Kotiꞌa nago ke hapaiye.
LUK 3:3 Yoniꞌa ani kanafina Yotani ti agegaya kumaꞌyagale uno Anumaya Koti kea hamapaino mage huno hie “Kefo yatamihe tamakuꞌa aiyahae hutama ‘Nagoꞌene ohugahune.’ hutama vigeꞌna tina falelamatesugeno Anumaya Kotiꞌa kefo yatamia aigetamateno atalelamateno.” huno humaine.
LUK 3:4 Nayona Anumaya Koti aune kanomoꞌa, Aisaiyaꞌa, mage huno kaemaleneane “Kaꞌme kotegati nago kanomoꞌa keha keha huno mage hugahie ‘Anumayamo esia kamaꞌa ali hilato hutama ali fatago hiho.
LUK 3:5 Otufina male havatetama osi agoꞌyaene ala agoꞌyaene kafilava higeno tavino afete hanesie. Ugayagi egayagi humainea kamona ali fatago nehutama yafama hanea kaꞌene ali fatago hulama hiho.
LUK 3:6 Mukiꞌa veala Anumaya Koti amaku amamena aligatisia yana agegahae.’ huno kaemaleneane.”
LUK 3:7 Mukiꞌa veala Yonitega “Ti falelatesie.” huꞌya neꞌageno Yoniꞌa amakaife mage huno hamapaiye “Tamakaya osifaꞌveyagamo nafaꞌneyaga mainetama, havigeꞌage vayaꞌmogatama, Anumaya Kotiꞌma kaiyeke hulamatesigeno tamaugafa tamagata aisia kanaꞌa aupaꞌa efalote hisia yafena ‘Faletama viho.’ kea ta tamahapaimaine?
LUK 3:8 Hagotetama kefo yatamihena tamakuꞌa aiyahae humainayafe tamakaitami kanale kava humainesaya yafema navelisayana tina falelamategahue. Tamakaya ‘Apalahamu nafaꞌneyaga mainone.’ hutama ohiho. Nagaya tamahanepauve Anumaya Kotiꞌa ma yafatetila Apalahamu nafaꞌneyaga kanale talo hileꞌasine.
LUK 3:9 Tamakaya yosa kana humainayanagi menia Anumaya Kotiꞌa tuna alino yosamo aipalela maleneno kanale alagama oꞌayenea yosa atagino atafi hagaꞌyu huno kaegahie.” huno hie.
LUK 3:10 Higeꞌya mukiꞌa veaꞌmoꞌya mage huꞌya havigae “Tagaya na kava hisune?” huꞌya hae.
LUK 3:11 Yoniꞌa mage huno hie “Nago kanomoga tole siotama hanesigekahena siotaꞌa omalesia kanoa nagola afaꞌa amio. Kaveꞌama hanesia kanomoꞌa aniꞌa huno kaveꞌa omalesia kanomona afaꞌa amino.” huno humaine.
LUK 3:12 Nagoꞌa vayala amaugafaleti takisi mone neꞌaliya vayaꞌmoꞌya “Ti falelatesie.” huꞌya emaineꞌya agaife mage huꞌya hae “Hulaveli kanomoga tagaya naꞌa hisune?” huꞌya hae.
LUK 3:13 Hageno amakaifena mage hie “Ala kava kanomoꞌma ‘Naꞌa mone aliho.’ hisia kate aliho. Afa moneꞌamienena oꞌaliho.” huno hie.
LUK 3:14 Nagoꞌa ati vayaꞌmoꞌya mage huꞌya havigae “Tagaya naꞌa hisune?” huꞌya hageno amakaifena mage hie “Tamakaya veala hamaetama moneꞌamia oꞌaliho. Havigea hutama alu moneꞌamia ali oꞌamateho. Alisaya moneꞌage muse hutama aliho.” huno nehie.
LUK 3:15 Mukiꞌa veaꞌmoꞌya Anumaya Kotiꞌa amaugafama aligatigahe hutesia kanohe “Aupaꞌa egahie.” huꞌya agava maineꞌya Yonifena tusiꞌa amaku amakesa haviꞌya “Yoniꞌa ani Kalaisiꞌe haya kano mainefi?” huꞌya humainae.
LUK 3:16 Hageno Yoniꞌa kenonaꞌamia mage huno hie “Nagaya titeti fale nelamatoanagino haenagama nago kano esiana Alu Aotage Avamutetiꞌene ataletiꞌene falelamategahie. Ani kanomoꞌa tusiꞌa tokiyaꞌa hanea kanogino nagaila ago nagasemaineanagiꞌna nagaya afa kano mainoanagiꞌna agai aiyale ayesuana onategahie.
LUK 3:17 Agaya sipeti ayopaꞌa alilineno vitimo anoꞌyaꞌa fu huno haletaleno alagaꞌa alino nopi halaꞌya humalegahigi anoꞌyaꞌa ata tegelege nehia atafi kaetalegahie. Ani avinamoꞌma hia kava huno veala fako faka hugahie.” huno nehie.
LUK 3:18 Mani kene alu ke alu kene Anumaya Kotina kanale keꞌa hamapaiye.
LUK 3:19 Helotiꞌa Gavana kanomoꞌa mukiꞌa kefo ya humainea yafeꞌene aganaꞌamo aala Helotiasina kumai heno vigeno alitenea yafeꞌene Yoniꞌa aufi ke ayesali huno humainea keleti Helotiꞌa mukiꞌa kefo ya humainea yana agaseno Yonina nofi hutene.
LUK 3:21 Nofila hu oꞌatenegeno Yoniꞌa mukiꞌa veala tina fale neꞌamategeno Yisasiꞌa anile egeno agaila fale neꞌategeno Anumaya Kotitega ke huno havigegeno ikamoꞌa aihagalo higeno Alu Aotage Avamuꞌmoꞌa nama kana huno agaitega enelavigeno ikapinagati age aino mage huno hie “Kagaya nagaiꞌni nafaꞌnemoga kagaifena aluya huno nahau nayamopafi nenagea neꞌnimoga kagaifena aluya huꞌna musekaꞌa nehue.” huno humaine.
LUK 3:23 Yisasiꞌa tetiꞌa (30) kafuꞌa hanegeno aliꞌyamaꞌa aepa hemaine. Mukiꞌa veaꞌmoꞌya agaifena “Yosefe nafaꞌne maine.” huꞌya hae. Yosefena nefa agia Heliꞌe.
LUK 3:24 Helina nefa agia Matataꞌe. Matatana nefa agia Livaiꞌe. Livaina nefa agia Melekiꞌe. Melekina nefa agia Yanaiꞌe. Yanaina nefa agia Yosefeꞌa.
LUK 3:25 Yosefena nefa agia Matatiasiꞌa. Matatiasina nefa agia Amosiꞌa. Amosina nefa agia Nahumiꞌa. Nahumina nefa agia Esaliꞌa. Esalina nefa agia Nagaiꞌa.
LUK 3:26 Nagaina nefa agia Matiꞌe. Matina nefa agia Matatiasiꞌe. Matatiasina nefa agia Semeniꞌe. Semenina nefa agia Yosekiꞌe. Yosekina nefa agia Yotaꞌe.
LUK 3:27 Yotana nefa agia Yoananaꞌe. Yoananana nefa agia Lesae. Lesana nefa agia Selupapeliꞌe. Selupapelina nefa agia Sealitieloꞌe. Sealitielona nefa agia Neliꞌe.
LUK 3:28 Nelina nefa agia Melekiꞌe. Melekina nefa agia Atiꞌa. Atina nefa agia Kosamaꞌe. Kosamana nefa agia Elamatamaꞌe. Elamatamana nefa agia Eaꞌe.
LUK 3:29 Eana nefa agia Yosuꞌae. Yosuꞌana nefa agia Eliesaꞌe. Eliesana nefa agia Yolimaꞌe. Yolimana nefa agia Matataꞌe. Matatana nefa agia Livaiꞌe.
LUK 3:30 Livaina nefa agia Simioniꞌe. Simionina nefa agia Yutaꞌe. Yutana nefa agia Yosefeꞌe. Yosefena nefa agia Yonamaꞌe. Yonamana nefa agia Eliakimaꞌe.
LUK 3:31 Eliakimana nefa agia Meleaꞌe. Meleana nefa agia Menaꞌe. Menana nefa agia Matataꞌe. Matatana nefa agia Natanaꞌe. Natanana nefa agia Tevitiꞌe.
LUK 3:32 Tevitina nefa agia Yesiꞌe. Yesina nefa agia Opetiꞌe. Opetina nefa agia Poasiꞌe. Poasina nefa agia Salamoniꞌe. Salamonina nefa agia Nasoniꞌa.
LUK 3:33 Nasonina nefa agia Aminatapiꞌe. Aminatapina nefa agia Atamiꞌe. Atamina nefa agia Aniꞌe. Anina nefa agia Hesaloniꞌe. Hesalonina nefa agia Pelesiꞌe. Pelesina nefa agia Yutaꞌe.
LUK 3:34 Yutana nefa agia Yekopuꞌe. Yekopuna nefa agia Aisakiꞌe. Aisakina nefa agia Apalahamuꞌe. Apalahamuna nefa agia Telaꞌe. Telana nefa agia Nahoꞌe.
LUK 3:35 Nahona nefa agia Selukiꞌe. Selukina nefa agia Leuꞌe. Leuna nefa agia Pelekeꞌe. Pelekena nefa agia Epeꞌe. Epena nefa agia Selaꞌe.
LUK 3:36 Selana nefa agia Kainaniꞌe. Kainanina nefa agia Apakasatiꞌe. Apakasatina nefa agia Siemiꞌe. Siemina nefa agia Noaꞌe. Noana nefa agia Lamekaꞌe.
LUK 3:37 Lamekana nefa agia Metuselaꞌe. Metuselana nefa agia Enokiꞌe. Enokina nefa agia Yaletiꞌe. Yaletina nefa agia Mahalaleliꞌe. Mahalalelina nefa agia Kenaniꞌe.
LUK 3:38 Kenanina nefa agia Enosiꞌe. Enosina nefa agia Setiꞌe. Setina nefa agia Atamuꞌe. Atamuna nefa agia Anumaya Kotiꞌe.
LUK 4:1 Anumaya Kotina Alu Aotage Avamuꞌamoꞌa Yisasina aguꞌafi hiya higeno Yisasiꞌa Yotani tina atalenoꞌma neꞌviana Alu Aotage Avumuꞌmoꞌa veaꞌne omai kaꞌme kotega avaleno motegeno fotiꞌa (40) yupa mainegeno Sataniꞌa Yisasina “Havi kava ho.” huno ayevataga humaine. Ayevataga huge huge nehigeno Yisasiꞌa kavela ani fotiꞌa (40) kanafina oneno afaꞌa mainegeno tusiꞌa agatemaine.
LUK 4:3 Sataniꞌa Yisasife mage hie “Kagaya Anumaya Koti nafaꞌnema mainenukahena ma yafana hapaigeno maya hapaeno.” huno hie.
LUK 4:4 Higeno Yisasiꞌa kenonaꞌa mage huno hapaiye “Anumaya Koti avopiti kemoꞌa mage humaineane ‘Vayaꞌmoꞌya mayaꞌage nesayana kanaleꞌya huꞌya omaigahae.’ huno humaineane.” huno hie.
LUK 4:5 Sataniꞌa Yisasina anale avaleno viaꞌyamo aupaꞌa mukiꞌa ma mopafi hanea ala kumaꞌyagaene afenoꞌyamaꞌaene avelimaine.
LUK 4:6 Aveliteno Sataniꞌa agaifena mage hie “Mani kanale kumaꞌyaga kavama yagaisana tokiya kamigahue. Ani kava yagaisia tokiyaꞌa nagaiꞌni ya haneanagiꞌna nagaya nahaisia kanomona afaꞌa amigahue.
LUK 4:7 Kagayama nagaifema ‘Tusiꞌa ala kano mainane.’ huka naiyafi ape huka ala nagi namitesanageꞌna ani kavama yagaisana tokiya kamigahue.” huno hie.
LUK 4:8 Yisasiꞌa kenonaꞌa mage huno hie “Anumaya Koti avopi kaemalenaya kemoꞌa mage huno humaineane ‘Anumaya Kotikamona agaiꞌagefe ‘Tusiꞌa ala kano maine.’ huka kagesa havi havi huka agia alisaga huka agai aliꞌyamaꞌage alio.’ huno humaineane.” huno hapaimaine.
LUK 4:9 Sataniꞌa Yisasina Yelusalemu avaleno ala mono nomo agotofule ateneno mage huno hapaiye “Kagaya Anumaya Koti nafaꞌnema mainenukahena ma nomo agotofuleti mopafi asaga hulavio.
LUK 4:10 Anumaya Koti avopiti kemoꞌa mage humaineane ‘Anumaya Kotiꞌa ensole vayaꞌahe ‘Kava hiho.’ huno humatesigeꞌya amayateti kavalesaga hulisageka tavisanageno yafatela kaiyamona aye kofa ohugahieꞌ huno humaineane.” huno hie.
LUK 4:12 Higeno Yisasiꞌa kenonaꞌa mage huno hie “Anumaya Koti avopiti kemoꞌa mage humaineane ‘Anumaya Kotikamo tokiya ayevataga ohuo. Afa yafe ‘Tokiya kava huo.’ huka ohuo.’ huno humaineane.” huno hie.
LUK 4:13 Higeno Sataniꞌa mukiꞌa alu ya alu ya huno ayevataga hugeteana higeno Yisasina ataleno nagoꞌa kanale ayevataga hisia kanalefe agava maine.
LUK 4:14 Yisasiꞌa Alu Aotage Avamuꞌmo tokiyaꞌaene Kalili kotega egeno agai avagemoꞌa ani kotega ute ete higeꞌya havimainae.
LUK 4:15 Mono noꞌyagaꞌamifi huge amavelige higeꞌya mukiꞌa veaꞌmoꞌya agai agi alisaga humainae.
LUK 4:16 Yisasiꞌa Nasaleti maino ala humainea kumate uno Sapati yupa mukiꞌa kanale nehia kava huno mono nopi hai faleno Anumaya Koti ke hapaligahe hetimaine.
LUK 4:17 Hetimainegeno Anumaya Kotina aune kanoꞌamo Aisaiya kaemalenea autaꞌma aliꞌya amigeno vakayeno hapalino autaꞌmafiti kea mage huno hamapaimaine.
LUK 4:18 “Anumayamoꞌa Alu Aotage Avamuꞌamona nagaite hutegeno nagaiꞌene emainegeꞌna mukiꞌa yamaꞌa omale veaꞌmogamina agaiꞌa kanale ke hamapaisuafeꞌene kina humainaya veaꞌne kalu hematesuafeꞌene amaulaga asu humainaya veaꞌne aligali humatesuafeꞌene amakaiꞌami amaugafahe tusiꞌa kalagi aiꞌya mai haviya humainaya veaꞌne amaugafa aligatisuafeꞌene Anumaya Kotiꞌa tokiyaꞌa namiteno hunategeꞌna emainoe.
LUK 4:19 Nagaya menia ma kanafina Anumayamoꞌa tamakaife kalagi ailamatesia kanaꞌa ago efalote humaine huꞌna tamahapaisuafe nagaila hunategeꞌna emainoe.” huno hamapaiye.
LUK 4:20 Huteno avona alino ailileteno kava kanoa amiteno mopale mainegeꞌya mukiꞌa mono nopi mainaya veaꞌmoꞌya Yisasi aulagafi aulu heꞌya mainae.
LUK 4:21 Mainageno aepa heno mage huno hie “Menia ma ma kaemalenea kea tamakai tamakesale ago egetama havigeno ago efalote huno tamage hie.” huno hie.
LUK 4:22 Higeꞌya mukiꞌa veaꞌmoꞌya “Tamage hane.” huꞌya avayafitiꞌma hia ke haviteꞌya muse haya kehe amakesa havi havi huꞌya mage hae “Mamona Yosefe nafaꞌnefi?” huꞌya hae.
LUK 4:23 Hageno Yisasiꞌa amakaife mage huno hie “Tamage, tamakaya ma ma haya kea nagaife mage hugahae ‘Tota kanomoga kagaika kaugafa hagoteka ali hilato hugeta agamano. Kapaneamu kumate ‘Naꞌa maꞌa kava hie.’ hageta havimainona yana male kagaika kumate hugeta agamano.’ hutama hugahae.
LUK 4:24 Tamagelafa huꞌna tamahanepauve nagola Anumaya Koti ke hamanepaiya kanomoꞌa agaiꞌa vayaꞌamogami amuꞌnopi mainegeꞌya veaꞌamoꞌya ‘Ala kanomo kegi havigetao.’ huꞌya ohugahae.
LUK 4:25 Nagaya tamage huꞌna tamahanepauve nayona Ilaiyaꞌma mainea kanafina tagufa (3) kafugi sikisiꞌa (6) ikanagi huno kola oꞌaigeꞌya ani Isaleli kotega mainaya veaꞌmoꞌya tusiꞌa amakateno kaveꞌamia omalene. Ani kanafina mukiꞌa megusa aꞌneyaga Isaleli kotega mainayanagi Anumaya Kotiꞌa agaiꞌa aune kanomona, Ilaiyana, ani megusa aꞌnele hu oꞌatenegi nago Salefati kumate mainea megusa aꞌmote hutegeno umaine. Ani kumala Saitoni kotega hane.
LUK 4:27 Nayona Ilaisaꞌma mainea kanafina mukiꞌa fugitaya amakemainea veala Isaleli kotega mainayanagi ani veaꞌnefitila nagoꞌa veala kanale hu oꞌamatenegi alulega mainea kanoa, Nemaniꞌe, Silia mainea kanomona agaiꞌage fugitayama agemainea yana kanale huteneane.” huno hie.
LUK 4:28 Higeꞌya ani kea haviteꞌya mukiꞌa mono nopi mainaya vayaꞌmoꞌya tusiya huꞌya ke vaiꞌya hamai vaitenae.
LUK 4:29 Hamai vaiteteꞌya hetiꞌya Yisasina atafa huꞌya kumapiti avayu huꞌya avaleꞌya ani kumaꞌma kimalenaya agoꞌyale haiteꞌya ani agoꞌyafiti aye lakatiꞌya hagaꞌyu hutalegahe humainae.
LUK 4:30 Hayanagi Yisasiꞌa mukiꞌa veaꞌne mainaya amuꞌnopiti afaꞌa amataleno ago alu kotega umaine.
LUK 4:31 Yisasiꞌa nagola Kalili hanea kumate Kapaneamu taviteno Sapati yupa Anumaya Koti ke hamapaimaine.
LUK 4:32 Hamapaigeꞌya agai kemoꞌa tokiya yamaꞌa hanea kanomo ke kana hia yafe tusiꞌa amamaꞌyo aimainae.
LUK 4:33 Anile nago kanoa Kefo Avamuꞌmoꞌa aguꞌafi mainea kanoa mono nopi maineno “Avovo.” huno alakenake humaine.
LUK 4:34 Mage huno hie “Avo Yisasiga Nasaleti nafaꞌnemoga na ya hulategane? Tagaila tahaeka falilategahe emainano? Nagaya kagaila ago kagemainoe kagaya kanale alu aotage kanoa Anumaya Kotiꞌa hugatenea kano mainane.” huno hie.
LUK 4:35 Higeno Yisasiꞌa Kefo Avamufe tokiyaꞌage ke huno mage hie “Ke ohuka afaꞌa maiyo. Mani kanoa ataleka agusafinagatila hatilavio.” huno higeno ani Kefo Avamuꞌmoꞌa mukiꞌa veaꞌne mainaya amuꞌnopi ani kanomona mopafi ayelakatino agoꞌya fai neꞌateno agusafitila hatilavino vianagi ani kanomona ali haviya hu oꞌatene.
LUK 4:36 Hatilavigeꞌya mukiꞌa veaꞌmoꞌya tusi amamaꞌyo aigeꞌya huge havige huꞌya mage hae “Naꞌane ke hie? Tusi tokiyaꞌaleti tokiyaꞌage ke higeꞌya Kefo Avamuꞌyagamoꞌya agai ke hipoꞌya huꞌya hatilavie.” huꞌya hae.
LUK 4:37 Hageno Yisasiꞌma hia kavaꞌmo avagemoꞌa mukiꞌa ani kumaꞌyagalega ute ete higeꞌya mukiꞌa veaꞌmoꞌya havimainae.
LUK 4:38 Yisasiꞌa hetino mono nona ataleno Saimonina nomaꞌafinaga umainegeno Saimonina aꞌamona itaꞌamo alekanoa tusiꞌa amukonako kali alino mainegeꞌya Yisasife “Melika kanale huto.” huꞌya havigageno avate uno ani kaliꞌahe ke amakigeno ani kaliꞌamoꞌa ataleno vigeno aupaꞌa ani alekanomoꞌa hetino kavela amine.
LUK 4:40 Ani unena yagemoꞌa tavi falegahe higeꞌya mukiꞌa ani kumate veaꞌmoꞌya vayaꞌamima alu kali alu kali alimainaya veala amavaleꞌya Yisasite ageno mukiꞌa nagoke nagokeꞌmogamina amaugafale aya maleno kaliꞌamia alino kanale humatene.
LUK 4:41 Alino kanale humatetegeꞌya nagoꞌa veala amakusafiti Kefo Avamuꞌmoꞌya amataleꞌya neꞌuꞌya ala kefiti mage huꞌya hae “Kagaya Anumaya Kotina neꞌamoga mainane.” huꞌya hageno Yisasiꞌa ke neꞌamamakigeꞌya agaife Anumaya Kotiꞌa “Amaugafa aligatigahie huno hutenea kanoa ma maine.” huꞌya havilinayafe Yisasiꞌa “Nagoꞌene osi kea ohiho.” huno hamapaimaine.
LUK 4:42 Natena tani ko tigeno Yisasiꞌa amataleno veaꞌne omai kotega umainegeꞌya mukiꞌa veaꞌmoꞌya agaifena atiyeꞌya ayeꞌya agaite uvaꞌyi huꞌya mage huꞌya hae “Tataleka oꞌuka tagaiꞌene maisane.” huꞌya hae.
LUK 4:43 Hayanagi Yisasiꞌa mage huno hamapaiye “Nagaila Anumaya Kotiꞌa kava yagaisia kanale keꞌa alu kumate kumate ute ete huꞌna hamapaigahue. Anumaya Kotiꞌa ani aliꞌyatefe hunategeꞌna emainoe.” huno hie.
LUK 4:44 Yisasiꞌa mukiꞌa Yutia kumaꞌyagalega ute ete huno mono nopi Anumaya Koti kea hamapaimaine.
LUK 5:1 Nago yupa Yisasiꞌa Kenesaleti* tikotumo agegayalega hetimainegeꞌya mukiꞌa veaꞌmoꞌya Anumaya Koti ke havigahe meligovegave hutenae.
LUK 5:2 Hutageno Yisasiꞌa ageana tole tipi kale ti agegayalega avayu huꞌya maleteꞌya noyame kuꞌyama nehaya vayala ani tipi kalea ataleꞌya kukonago sese humainae.
LUK 5:3 Sese nehageno Yisasiꞌa Saimoni tipi kalefi haisaga humaino maineno mage hie “Saimoniga ti agegaya neꞌataleka osiꞌa tipi vuo.” huno hapaiteno ani tipi kalefi haino mopale maineno mukiꞌa alitalu humainaya veaꞌmogamina kea hamapaiye.
LUK 5:4 Hamapaiteno Saimonife mage hie “Tipi kalekaꞌa ti amuꞌnopi ayetufeka kotumona augelifi kukonagokaꞌa ataleka noyame kuꞌya huo.” huno hie.
LUK 5:5 Higeno Pitaꞌa Yisasife mage huno hapaiye “Ala kanomogae tagaya kegela noyame kuꞌya huge hugetonana noyamea oꞌalunageno ko timaine. Oꞌalinonagi kagayama hana kemo akave maleꞌna kukonagona malegahue.” huno hie.
LUK 5:6 Ani kukonagona tipi maleana kasagoꞌya noyame hai falegeno kukonagomoꞌa kanaꞌage huno atalaga hisia kava higeꞌya nago tipi kalefi mainaya vaya amakaiꞌene tokaeꞌya aliꞌya neꞌaliya vayafe amayateti avameꞌname huꞌya “Etama taya hiho.” huꞌya hageꞌya emainae. Eteꞌya ani tole lipi kalelatapina noyamea aliꞌya male havatageno kanaꞌage huno hapaꞌnesia kava humaine.
LUK 5:8 Saimoni Pitaꞌa ani yana ageteno Yisasina aiyafi aleꞌya ayemaineno mage hie “Anumayamogae nagaya kefo kava nehua kano mainogi nagaila nataleka vuo.” huno hie.
LUK 5:9 Saimoniꞌene agaiꞌaene mainaya vayaꞌmogamina noyamemoꞌma havateno hiya hia yafena tusiꞌa amamaꞌyo aimainae.
LUK 5:10 Saimoniꞌene aliꞌya neꞌaliꞌa kanolatana, Sepeti nafaꞌnelatane, Yemesiꞌene Yoniꞌene aniꞌa huꞌana tusiꞌa anamaꞌyo aiꞌageno Yisasiꞌa Saimonife mage hie “Menia kolia ohuo. Noyame kuꞌyama hana avamete Anumaya Kotiꞌa agola maisaya hamaimula amamigahe veaꞌne kuꞌya hugane.” huno hie.
LUK 5:11 Higeꞌya tipi kalea aliꞌya kahaepatega nemaleꞌya mukiꞌa yaꞌyaga neꞌataleꞌya Yisasina akave umainae.
LUK 5:12 Nagi nago yupa Yisasiꞌa nago ala kumate mainegeno nago fugitayamo augafa alino haꞌyagino atalako humainea kanoa maineno Yisasina ageteno agaitega eno mopafi agoꞌya ayemaineno mage huno havige “Anumayamoga kahaisigekahena nagaila ago alika hilato hunatateꞌasine.” huno humaine.
LUK 5:13 Higeno Yisasiꞌa ayana haꞌyo huno augafale avate hulineno mage huno hie “Nagaya nahaigeꞌna kaugafamoꞌa menia kanale hino huꞌna nehue.” huno higeno anile aupaꞌa kaliꞌa haꞌno hutene.
LUK 5:14 Yisasiꞌa mage huno hapaiye “Ali hilato hugatoa yafena nago kanoa haꞌopaika mono nopi kava kanomote uka mukiꞌa veala kalikaꞌama kanale hugatoa kema havinuꞌyahena mono nopi kava kanomoꞌa kaugafa kamota huno kagetesigeka kaugafama ali hilato hugatoa yafena Moseseꞌma ‘Ma yama Anumaya Kotina amio.’ huno humainea yana Anumaya Kotitega atalo.” huno tokiyaꞌage ke hapaiye.
LUK 5:15 Hapaiyanagi kalima alino kanale hutea kemoꞌa ute ete higeꞌya kasagoꞌya veaꞌmoꞌya haviteꞌya “Agai ke havita kalitia alino kanale hulatesie.” huꞌya emainae.
LUK 5:16 Emainayanagi Yisasiꞌa ani veala neꞌamataleno veaꞌne omai kotega umaineno Anumayamotega ke huno havige havige huno maine.
LUK 5:17 Nagi nago yupa Yisasiꞌa humaveli hamaveli nehigeꞌya mukiꞌa Falasia vayaꞌene kahegi kemo aepaꞌama havilinaya anagaꞌene Yelusalemutiꞌene mukiꞌa Kalili kumaꞌyagaletiꞌene Yutia kumaꞌyagaletiꞌene eꞌya avate mopale maineꞌya havimainageno kali veaꞌne kanale humatesia tokiyaꞌa Anumayamoꞌa amigeno Yisasipi hane.
LUK 5:18 Anile nagoꞌa vayaꞌmoꞌya nago kanomona aiya aya falimainea kanoa hagifanale faeno mainegeꞌya avaleꞌya “Yisasi avate motegahune.” huꞌya hayanagi kasagoꞌya veaꞌmoꞌya hiya humainaya yafe kana omalegeꞌya amega nogatofule haiteꞌya hanae yosa alisaga humaleneꞌya ani hagifanale faeno mainea kali kanoa mukiꞌa veaꞌmogami amuꞌnopi atalageno Yisasi avate tavimaine.
LUK 5:20 Tavigeno Yisasiꞌa “Ma vayaꞌmoꞌya ago nagaife haviꞌya amakupi maleꞌya amametiti nehae.” agesa haviteno kali kanohe mage huno hie “Nenafuga kahanepauve nagaya ago aigekateꞌna kefo yakaꞌa atale negatoe.” huno hapaiye.
LUK 5:21 Higeꞌya kahegi kemo havilinaya anagaꞌene Falasia vayaꞌene haviteꞌya amakaiꞌami amakuꞌafiti mage huꞌya hae “Mani kanoa Anumaya Kotife huhaviya hutea kanoa taꞌe? Nagoꞌa vayaꞌmoꞌya aigetateꞌya kefo yatia atale otategahayanagi Anumaya Kotiꞌa agaiꞌage aigetateno kefo yatia atalelatesia kano maine.” huꞌya hae.
LUK 5:22 Hageno Yisasiꞌa amakupi haya kea ago nehavino mage huno hie “Naꞌa higetama mani kea tamaku tamakesafinaga nehae?
LUK 5:23 Nagayama huteꞌna hisua kea hana kemo kanaꞌage humaine? ‘Aigekateꞌna kefo yakaꞌa atalenegatoe.’ huꞌna hisua kemopi? Kali kanomofe ‘Hetika ka vuo.’ huꞌna hisua kemoꞌe?
LUK 5:24 Nagayama ikapinagati emainoa kanoa vayaꞌmo natenea kanomoꞌna ma mopale maineꞌna aigetamateꞌna kefo yatamia atalelamatesua tokiyaꞌnia hane hutama havisaya yafe nago kava huꞌna tamaveligahue.” huno kalima neꞌalia kanomofe mage huno hie “Hetika hagifanaka neꞌalika nokalega vuo.” huno humaine.
LUK 5:25 Higeno ani kalima neꞌalia kanomoꞌa aupaꞌa mukiꞌa veaꞌmogami amaulagafi hetino faeno nemaiya hagifanaꞌa neꞌalino Anumaya Koti agia alisaga hume hume nomaꞌalega umaine.
LUK 5:26 Na kava higeꞌya mukiꞌa alitalu humainaya veaꞌmoꞌya ageteꞌya tusi amamaꞌyo aigeꞌya Anumaya Koti agia alisaga nehuꞌya mage huꞌya hae “Meni kanalela aluꞌa ya neꞌagone.” huꞌya humainae.
LUK 5:27 Anile neꞌamataleno vilegati nago kanoa agia Livaiꞌe musufa huno vaya amaugafaleti takisi mone aliliteno nehia kanoa opisi nomaꞌale mopale mainegeno Yisasiꞌa ani kanoa mogeteno mage huno hie “Kagaya nakave eno.” huno hie.
LUK 5:28 Higeno Livaiꞌa hetino mukiꞌa yamaꞌa neꞌataleno Yisasina akave umaine.
LUK 5:29 Livaiꞌa nomaꞌafina tusiꞌa kave Yisasina kaetegeꞌya mukiꞌa musufa huꞌya amaugafaleti takisi mone neꞌaliya vayaꞌene nagoꞌa vayaꞌene ani nopi Yisasiꞌene tokaeꞌya maineꞌya kavela nemainae.
LUK 5:30 Nemainageꞌya Falasia anagaꞌene kahegi kemo havilinaya anagaꞌene Yisasiꞌenema tokaeꞌya nemaiya anagahe kalugalu ke nehatageꞌya mage huꞌya nehae “Naꞌa higetama tamakaya amaugafaleti takisi monema neꞌaliya vayaꞌene kefo yama nehaya vayaꞌenena kavela maitama nenae?” huꞌya hamavigae.
LUK 5:31 Hageno Yisasiꞌa kenonaꞌamia mage huno hamapaiye “Kalima noꞌaliya veaꞌnea tota kanomotega oꞌugahagi kali veaꞌmoꞌyage tota kanomotega ugahae.
LUK 5:32 ‘Fatago veaꞌne mainone.’ huꞌya nehaya veaꞌnehena ke hugahe omenogi nagaya kefo yama nehaya veaꞌnehe ‘Tamakuꞌa aiyahae hiho.’ huꞌna hamapaigahe emainoe.” huno hamapaiye.
LUK 5:33 Vayaꞌmoya mage huꞌya nehae “Yoniꞌenema tokaeꞌya nemaiya vayaꞌene Falasia vayaꞌene mukiꞌa kanalela kavela mosiꞌya Anumayamotega havige havige huꞌya nemaiyanagi kagaiꞌenema tokaeꞌya nemaiya anagaꞌmoꞌya mukiꞌa kaveꞌene tiꞌene nege nege nehae.” huꞌya hae.
LUK 5:34 Hageno Yisasiꞌa mage huno hie “Nago kanoa aꞌama faiꞌya esakenoꞌa avaya hesia imu kisia yupa vayaꞌamoꞌyaene toꞌkaeꞌya mainesigeꞌya ani vayaꞌyaga kavela mosisafio? Aꞌao moꞌosigahayanagiꞌya haenagaꞌa alu kana falote hisigenoꞌa kame vayamoꞌya aꞌma alisia kanoa atafa huꞌya amakaipiti avaletalesageꞌya ani kanale mainesaya vayaꞌamoꞌya hamau huteteꞌya mosigahae.” huno humaine.
LUK 5:36 Yisasiꞌa nago avame kea mage huno hamapaimaine “Nago kanomoꞌa haegafa kena alino laga huteno atafa kenalela maleno ohatigahie. Maleno hatisiana haegafa kena laga huno ali haviya hugahie. Haegafa kenamoꞌa atafa kenalela nagoke avamete ohune.
LUK 5:37 Nago kanomoꞌa haegafa nofi alagamo timaꞌa* atafa mememo augafa ti keꞌayopina takino oꞌvaigahie. Takino vaisiana timaꞌamoꞌa kaꞌnuka hesigeno ti kena falo huno takilavinageno ti kena ali haviya hugahie.
LUK 5:38 Naꞌa hugahiafe haegafa nofi alagamo timaꞌa hefino haegafa meme augafamo ti keꞌayopi takino vaimaleno.
LUK 5:39 Kaꞌnuka hemainea nofi alagamo timaꞌa nemainaya veaꞌneꞌmoꞌya haegafa nofi alagamo timaꞌahena ohamaigeꞌya mage huꞌya hae ‘Kaꞌnuka hemainea nofi alagamo timaꞌahena nelahaiye.’ huꞌya humainae.” huno hie.
LUK 6:1 Nago Sapati kanale Yisasiꞌene agaiꞌaene tokaeꞌya nemaiya anagaꞌaene nago atili hoya amuꞌnopi neꞌuꞌya anagaꞌamoꞌya nago atilia kaleꞌya atafaiꞌya nae.
LUK 6:2 Nenageꞌya nagoꞌa Falasia vayala anile mainaleti ageteꞌya mage huꞌya hae “Sapati kanama katilemalenaya yana naꞌa higetama ani kavala nehae?” huꞌya hae.
LUK 6:3 Hageno Yisasiꞌa mage huno hie “Tamakaya Tevitiꞌene avagi huꞌya umainaya vayaꞌene amakatemainaya yafena hapalitama ohavinafio?
LUK 6:4 Amakategeno Tevitiꞌa Anumaya Koti nopi hai faleno ageana ‘Afa vayamoꞌya onesageꞌya mono nopi kava vayaꞌmoꞌya amakaiꞌamige negahae.’ huꞌya katilemalenaya maya Anumaya Koti aulagale malenaya kaihame alino neneno avagi huꞌya emainaya vayala amamine. Tamakaya ani kea hapalitama ohavinafio?” huno hie.
LUK 6:5 Yisasiꞌa mage huno hie “Nagaya ikapinagati emainoa kanoa vayaꞌmo natenea kanomoꞌna Sapati kana kava yagaimainoe.” huno hie.
LUK 6:6 Nago Sapati yupa Yisasiꞌa mono nopi haino mono ke hamanepaigeno nago kanoa tamaga aya avayu hulavimainea kanoa anile maine.
LUK 6:7 Mainegeꞌya nagoꞌa kahegi kema havilinaya anagaꞌene Falasia vayaꞌene Yisasiꞌa havi kavaꞌma hisiafene huꞌya ati neꞌayeꞌya “Yisasiꞌa Sapati kanale ani kali kanoa alino kanale hutesifi huotesifi?” huꞌya Yisasina amata huꞌya mainae.
LUK 6:8 Mainageno Yisasiꞌa ani vayaꞌmoꞌyama haviya amaku amakesa ago haviteno ayama avayu hulavimainea kanomofe mage huno hapaiye “Hetika vayaꞌmogami amuꞌnoꞌamifi me hetio.” huno higeno hetino anile me hetimaine.
LUK 6:9 Me hetimainegeno Yisasiꞌa amata huꞌya maiya vayafe mage huno hie “Tamahavinegoe Sapati yupahe mono kemoꞌa naꞌane ke nehie? Sapati yupa veaꞌne ali hilato humatesifi alino haviya humategahie ifi Sapati yupa veaꞌnea amavaleno avina me mategahafi ifi veala tavata hamaegahie?” huno hamavige.
LUK 6:10 Hamavigeteno mukiꞌa vayaꞌmogami amaulagafi ageno ute ete nehuno kali kanomofe mage huno hapaiye “Kayana aipi huo.” higeno aipi hiana ayamoꞌa ago kanale hute.
LUK 6:11 Hutegeꞌya amata huꞌya maiya vayaꞌmoꞌya tusiya huꞌya amaipa kafa heteteꞌya “Yisasina na kava hutesune.” huꞌya humainae.
LUK 6:12 Nago yupa Yisasiꞌa Nefatega nunamu huno havigegahe agoꞌyafi haino ani kegela Anumaya Kotitega ke huno havige havige nehigeno kola ali halemaine.
LUK 6:13 Kola alino halegeno agaiꞌenema tokaeꞌya nemaiya anagaꞌamofe ke higeꞌya ageno ani anagapiti tuelufuꞌa (12) anaga hapalimateteno “Nagai kema nehavigeꞌna hunelamatoa anagala Aposolo anaga maiho.” huꞌna hapalinelamatoe.
LUK 6:14 Anima agaiꞌene tokaeꞌya nemaiya anagaꞌamogami amakia Saimoniꞌe kanomo agia Yisasiꞌa Pitaꞌe huno malene. Pitana aganaꞌamoꞌa Etaluꞌe, Yemesiꞌe Yoniꞌe Filipiꞌe Patolomayuꞌe Matiuꞌe, Tomasiꞌe, Yemesiꞌa Alafiusi nafaꞌne Saimonina hamoꞌamoꞌe nago agia Selotiꞌe.
LUK 6:16 Yutasiꞌa Yemesi nafaꞌne, Yutasi Isakaliotiꞌa haenaga ani kanomoꞌa Yisasina agesi huno kame hutesia kanoe.
LUK 6:17 Yisasiꞌa agaiꞌenema tokaeꞌya nemaiya anagaꞌaene tavino otufi hetimainegeꞌya nagoꞌa kasagoꞌya agai kema nehaviya veaꞌnea Yutiatiꞌene Yelusalemutiꞌene hage limo agegayalega tole kumatalana Taiyaene Saitonitiꞌene kasagoꞌya vea elitalu huꞌya agai kea nehaviꞌya “Kalitia alino kanale hulatesie.” huꞌya emainageno Yisasiꞌa Kefo Avamuꞌyaga veaꞌmogami amakupiti amanati neꞌataleno alino kanale humatene.
LUK 6:19 Tokiyaꞌamoꞌa efalote higeno mukiꞌa veaꞌnea alino kanale humategeꞌya mukiꞌa veaꞌmoꞌya ageteꞌya augafale avate hugahe hae.
LUK 6:20 Yisasiꞌa agesaga huno agaiꞌene toꞌkaeꞌya nemaiya anagaꞌamogamina neꞌamakeno mage huno hie “Mukiꞌa yatamima omalenaya veaꞌnemogatama Anumaya Kotiꞌa tamakaila kava yagai nelamatea yafe musena hiho.
LUK 6:21 Tamakaila menia tamakaꞌma nelea veaꞌmogatama haenagaꞌa nesageno tamamu hisiafe musena hiho. Menia tamakaya avi neꞌataya veaꞌnemogatama haenagaꞌa kigi hisayafe musena hiho.
LUK 6:22 Ikapinagati emainoa kanoa vayaꞌmo natenea nafaꞌnemonima nakave nemalayafe veaꞌnemoꞌya amaipa kafa helamateꞌya ‘Aluꞌale maiho.’ hulamateꞌya kamuge vailamateꞌya ‘Otahaiya kagi hane.’ huꞌya hisagetamahena tamakaya ani kanafina afaꞌa muse hutama maiho.
LUK 6:23 Aniꞌama hulamatenaya veaꞌneꞌmogamina amakinagomoꞌya nayona Anumaya Koti amaune vayaꞌmogamina aniꞌa huꞌya humatenayane. Aniꞌama hisaya kanafina haenagaꞌa ikapinaga umainetama anonaꞌa kasagoꞌya ya alisayafe tamaipa kanale hutama muse hiho.
LUK 6:24 Avoꞌnio mukiꞌa yatamima hanea veaꞌneꞌmogatama tamakaya kaꞌye ho. Tamaipa kanale hisia yana hai ali mainae.
LUK 6:25 Avoꞌnio tamakaya menia mukiꞌa yama nelamamuꞌma nehaya veaꞌmogatama tamakaya kaꞌye ho. Haenagaꞌa tusiꞌa lamakategahie. Avoꞌnio menia kigima hutama nemaiya veaꞌnemogatama kaꞌye ho. Haenagaꞌa tamahau nelagitama avia ategahae.
LUK 6:26 Avoꞌnio veaꞌmoꞌya ‘Ala vaya mainae.’ huꞌya tamaki alisaga nehisaya anagala kaꞌye ho. Aniꞌama humainaya veaꞌnemogamina amakinagomoꞌya nayona aniꞌa huꞌya havigeꞌage amaune vayamogami amaki alisaga humainayane.”
LUK 6:27 “Nagai kema havisaya veaꞌmogatama ‘Kame veaꞌnetamimofena tamahau tamayamopafi tamahaino. Amaipa kafama henelamataya veaꞌnemogamina kanale kava humateho.’
LUK 6:28 ‘Anumaya Kotiꞌa ali haviya hugatesie.’ huꞌya nehaya veaꞌmogamife ‘Kanale ya amamio.’ huka Anumayamotega ke huka havigo. Hu haviya hunegatesaya veaꞌnemogamifena ‘Amaya huo.’ huka Anumayamotega havigo.
LUK 6:29 Nago kanomoꞌma kagalamesaleꞌma kaikolisigekahena ‘Nago kaiyaga nagalamesaleꞌene naikolio.’ hisanageno kaikolisie. Nago kanomoꞌma ala yasi siotakama musufama alisigekahena nago siotakaꞌa afaꞌa kaufila ohuo.
LUK 6:30 Nago kanomoꞌma ‘Nago yakahema namio.’ hisigekahena afaꞌa hagaꞌyu huka amio. Kagai yama alimainesia kanomofena ‘Eteka namio.’ huka tokiya kea hu oꞌato.
LUK 6:31 Veaꞌneyagahe ‘Ma kava hulatesae.’ hutama hisaya kavala ani kavakeꞌya alu veaꞌnea humateho.
LUK 6:32 Veaꞌmoꞌya hamau amayamopafi tamakaifena nehamainagetamahena tamakaya aniꞌa hutama amakaifena tamahaisia yana afa yanagi anonaꞌa oꞌaligahae. Kefo yama nehaya veaꞌnemoꞌya aniꞌa huꞌya amahau amayamopafima amahaiya veafena nehamaiye.
LUK 6:33 Kanale kavaꞌma hulamataya veaꞌnemogamina aniꞌa hutama kanale ya humatesayana ani yana afa yanagitama anonaꞌa oꞌaligahae. Kefo yama nehaya veaꞌnemoꞌya aniꞌa kavala nehae.
LUK 6:34 ‘Eteno namigahie.’ hutama hutetama amisaya veala yoka amisayana afa yanagitama anonaꞌa oꞌaligahae. Kefo yama nehaya veaꞌmoꞌya nagoke augafa ya alisayafe kefo yama nehaya veaꞌneꞌamimona yoka neꞌamamiye.
LUK 6:35 Anumaya Kotiꞌa kefo veaꞌnemoꞌyaene agaifena musema nohaya veaꞌnemogamifeꞌene kayone huneꞌamatea yafe tamakaya ani kava hutama kame veaꞌnetamihena tamahau tamayamopafi nelamahaisigetama kanale kavakeꞌya humateho. ‘Anonaꞌa nago yana oꞌaligahune.’ hutama hamaisia yana amamiho. Naꞌama hisayana haenagaꞌa Anumaya Kotiꞌa kasagoꞌya anonaꞌa tamamisigetama ala Anumaya Koti kana hutama nafaꞌneyagaꞌa maigahae.
LUK 6:36 Nelamafaꞌma hauma huneꞌamatea kavala aniꞌa hutama tamahauna humateho.”
LUK 6:37 “Nelamafufena ‘Naꞌa maꞌa hana kano mainane.’ hu oꞌateho. Aniꞌama ohisagenoꞌa Anumaya Kotiꞌa tamakaifena ‘Havi kava haya veaꞌne mainae.’ huno hu otamategahie. Nelamafugamina kaiyekema hu oꞌamatesayana Anumaya Kotiꞌa tamakaila kaiyekea hu otamategahie. Haviya hulamatenesia kanomona aigeꞌatetama kefo yamaꞌa ataleteho. Aniꞌa hisagenoꞌa Anumaya Kotiꞌa kefo yatamia aigetamateno atalelamategahie.
LUK 6:38 Nelamafugamima amamisaya kavala Anumaya Kotiꞌa aniꞌa huno lamamigahie. Tamakaila kutamifina aye talako huno havatesia kava huno ku ailamategahie. Ma mopaleꞌma nelamafugamima humatesaya kavala Anumaya Kotiꞌa tamakaila ani kava hulamategahie.” huno humaine.
LUK 6:39 Nago avame kea mage huno hie “Nagoꞌma aulaga asu humainesia kanomoꞌa nago aulaga asu humainesia nefaluna avaleno kanale vaiyesaꞌafi? Aꞌao avalenoꞌma vaiyesiana tolemogania komufi asaga hulavigaꞌe.
LUK 6:40 Nago sugulufi mainesia nafaꞌnemoꞌa huveli kanoꞌamona oꞌagaseneanagino mukiꞌa huvenelia yamaꞌa havilama hulineno huvelimainea kano kana huno maigahie.”
LUK 6:41 Tagaya tagaiti taguꞌafima hanea yana ageteta alu veaꞌnehena “Havi veaꞌne mainae.” huta hisuna yafe Yisasiꞌa mage huno hie “Naꞌa higeka negafu aulagafina osiꞌa havi yana hanegeka neꞌagananagi kagaikaꞌa kaulagafina nagola muki yosalapagefa hanegeka ‘Omale.’ huka nehane?
LUK 6:42 Naꞌa higeka negafufena ‘Kaulagafitila havi yana alitalegahue.’ huka hananagi kagaika kaulagafina nagola muki yosalapagefa hanegeka ‘Omalene.’ huka nehane? Kaguꞌafinaga hanea yana agelama ohuneka kavayaleti havige huka vagala kano maineka kagaikaꞌa kaulagafitila muki yosalapagefa alitaleteka negafu aulagafina kanale neꞌageka osiꞌa havi yana alitalegane.” huno hie.
LUK 6:43 “Kanale yosamoꞌa havi yosalaga noꞌayegi havi yosamoꞌa kanale yosalaga noꞌaye.
LUK 6:44 Noꞌayegi veaꞌmoꞌya yosalaga ageteꞌya kanale yosalaga hanesigeꞌyahena ‘Kanale yosa hane.’ huꞌya hugahae. Avetaꞌnafa yosaletila kaimona hataga ohugahae. Avetaꞌnafa nofitetila fulutu alaga avayu huꞌya notagiye.
LUK 6:45 Fatago huꞌya mainaya veaꞌmoꞌya kanale amaku amakesa havilineꞌya kanale kavala nehayanagi kefo ya nehaya veaꞌmoꞌya havi amaku amakesa havilineꞌya havi kavakeꞌya nehae. Veaꞌmoꞌya amaku amakesafinaga havateteno aivalilavimainea kea amavayafiti hu falote nehae.”
LUK 6:46 “Nagaifena afa kava nehune hutama ‘Anumayatimogae, Anumayatimogae.’ hutama nehayanagi tamahapauva kea ali hipoꞌya nohae.
LUK 6:47 Nagoꞌa veaꞌmoꞌya nagaite neꞌeꞌya nagai ke havige havige huꞌya ali hipoꞌya nehaya veaꞌmogamina maꞌa augafa veaꞌne mainae huꞌna tamaveligahue.
LUK 6:48 Nago kanomoꞌa noma kigahena ayaꞌaya komu kafiteno yafana anifinaga maleteno u posia ani komufinaga yafa agotofule maleteno aye talako huno nona kimalegeno timoꞌa tusiꞌa li hogino ani note eanagi tokiyaꞌage no kimaleneafe anima hogino ea timoꞌa alino lagape aioꞌatalene.
LUK 6:49 Ali lagape aioꞌatalenegi nagoꞌa veaꞌmoꞌya nagai ke haviteꞌya ali hipoꞌya nohaya veaꞌmoꞌya maꞌa veaꞌne mainae. Nago kanomoꞌa noma kiana amega komu kafiteno fulu fulu posi ayeno nona kimalenegeno timoꞌa hogino ani note eana aupaꞌa ani nomaꞌa ali lagape aino mopafi atalegeno tusiya huno haviya hulavimaine.”
LUK 7:1 Yisasiꞌa mukiꞌa humainea kea veala hamapaigeꞌya havitageno Kapaneamu umaine.
LUK 7:2 Nago Lomu ati vayate kava humainea kanomoꞌa agaiꞌa aliꞌya kanoꞌa tusiya huno nehaiya kanoꞌagino tusiꞌa kali alino ago faligahe hie.
LUK 7:3 Faligahe nehigeno ati vayate kava humainea kanomoꞌa Yisasi avagea haviteno nagoꞌa Yuta vayate ala vayaꞌmoꞌya humateno mage humaine “Nagayama hua kea Yisasina havigeho ‘Musekaꞌa nehugi kanale eka aliꞌya kanoꞌnia ali kanale huto huno hie.’ hutama havigeho.” huno hie.
LUK 7:4 Nage higeꞌya neꞌuꞌya Yisasite uvaꞌyi huꞌya tutu huꞌya mage hae “Ani kava kanomoꞌa tagaiti Yuta vayaꞌmogatife aluya huno nehaigeno mono notia kilatene. Ani yafe kanale kano mainegi afaꞌa haꞌmaisanana katesia kava hugane.” huꞌya hae.
LUK 7:6 Yisasiꞌa amakaiꞌene tokaeno viaꞌamo nomaꞌale uvaꞌyi hugahe nehageno Lomu ati vayate kava humainea kanomoꞌa vayaꞌamogamife “Mage hutama hiho.” huno humategeꞌya Yisasite eꞌya mage huꞌya mehae “Mage hie ‘Anumayamoga kasalo kahaesigekahena atalo. Nagaya kanale ohunoa kanomoni noniꞌafi esanana okategahie huꞌna ani yafe kagaitega oꞌunogi afaꞌa menia aliꞌya kanoꞌnimona kaliꞌahena keꞌa hutesanageno kanale hutesie huꞌna nehue.
LUK 7:8 Nagaya kava kano mainoe. Nakaiꞌma kava yagainatenea kanoa anale nagaseno maineanagi nagaya aniꞌa huꞌna nagoꞌa ati vayatela kava huꞌna mainoe. Nago kanomofe ‘Vuoma.’ hugenoꞌa umaine. ‘Enoma.’ hugenoꞌa emaine. Aliꞌya kanoꞌnihe ‘Naꞌa huo.’ hugenoꞌa aniꞌa humaine.’ huno hie.” huꞌya hapaimainae.
LUK 7:9 Hapaigeno Yisasiꞌa ani kea haviteno agesaguꞌmoꞌa tusiya huteno kasagoꞌya akaveꞌma umainaya veaꞌmogamifena mage huno hie “Tamahanepauve ma kanomoꞌa tusiya huno nagaifena havino agupi maleno ametiti humaine. Ma kanomoꞌma hia ya huꞌya nagaifema haviꞌya amakupi maleꞌya ametiti humainaya veala mukiꞌa Yuta veaꞌne mainaya kumatela oꞌagenoe.” huno hie.
LUK 7:10 Higeꞌya humatenea vayaꞌmoꞌya notega eteꞌya uꞌya mogayana ani aliꞌya kanoa ago kanale huno mainegeꞌya mo gemainae.
LUK 7:11 Yisasiꞌa osi kanaꞌa maiteno agaiꞌene tokaeꞌya nemaiya anagaꞌaene mukiꞌa veaꞌnene Neni kumate umainae.
LUK 7:12 Ani kumala kegiꞌya humalenaya fiate neꞌvageꞌya nagola falimainea kanoa aliꞌya hevaitegahe emainae. Anima falimainea neyamona itaꞌamoꞌa aiya nagoke nafaꞌneꞌagino itaꞌamoꞌa megusa alagiꞌya ani yafe mukiꞌa ani kumate veaꞌmoꞌya ani aꞌmo akave umainae.
LUK 7:13 Neꞌvageno Anumayamoꞌa ani aꞌmona ageteno tusiꞌa hau huteteno mage huno hapaiye “Kagaya kahauma huka avima atana yana haꞌno huka afaꞌa maiyo.” huno hapaiye.
LUK 7:14 Hapaiteno alilinaya hagifanale motafa hulineno hagifanama aliꞌya aya vayala anile hetimainageno Yisasiꞌa mage hie “Ma neyamoga hetio huꞌna nagaya kahanepauve.” huno hie.
LUK 7:15 Higeno anima falimainea neyamoꞌa hetino kaiyekea aepa henoꞌma nehiana Yisasiꞌa avaleno itaꞌamona amine.
LUK 7:16 Amigeꞌya mukiꞌa veaꞌnemoꞌya tusiꞌa amamaꞌyo aiteꞌya Anumaya Koti agia alisaga nehuꞌya mage hae “Anumaya Koti ala aune kanoa tagai amuꞌnopina ago emaine. Anumaya Kotiꞌa mukiꞌa veaꞌa amaugafa aligatigahe emaine.” huꞌya humainae.
LUK 7:17 Yisasiꞌa aniꞌama hia avagemoꞌa mukiꞌa Yutia kotegaene alu kotegaene ute ete humaine.
LUK 7:18 Yoni kema nehaviya vayaꞌmoꞌya Yisasi avagea Yonina hapaimainae.
LUK 7:19 Hapaigeno Yoniꞌa agaiꞌene tokaeꞌya nemaiya anagapiti tole kanolafe ke higeꞌana agaite aꞌageno Anumayamotega hunateno “Mage hutana havigeꞌo.” huno hanapaiye “Kagaya egahiema humainaya kano emainapi alu kanohe agava maisune?” hutana havigeꞌo. huno hie.
LUK 7:20 Higeꞌana ani tole kanolatana Yisasitega eꞌana mage huꞌana haꞌe “Yoniꞌa tima fale neꞌamatea kanomo hulaꞌategetaꞌa kagaitega neꞌoꞌe. Mage hutana havigeꞌo huno taꞌahapaiye ‘Kagaya egahie huꞌya humainaya kano mainapi alu kanohe agava maisune.’ huno hie.” huꞌana haꞌe.
LUK 7:21 Ani kanafina Yisasiꞌa mukiꞌa alu kali alu kali alimainaya veaꞌnene Kefo Avamula amakusafinaga mainea veaꞌnene ali hilato humatene. Amaulaga asu humai veaꞌnea amaulaga agesaya ya humatene.
LUK 7:22 Anakaifena kenonaꞌania mage huno hie “Tanakaya utana agaꞌa yaꞌene haviꞌa yaꞌene Yonina hapaiꞌo. Amaulaga asu humainea veaꞌmoꞌya amaulaga neꞌagae. Amaiya haviya humainea veaꞌmogami amaiyamoꞌa kanale humate. Fugitaya amakemainea veala kanale humate. Amakesa tilemainea veala eteꞌya nehaviye. Falimainaya veala hetiꞌya mainae. Afenoꞌami omalenea veala Anumaya Kotina kanale keꞌa nehaviye hutana hapaiꞌo.
LUK 7:23 Nagai kehema tole amakesa ohavisaya veaꞌmoꞌya kanaleꞌya huꞌya maigahae.” huno humaine.
LUK 7:24 Yoniꞌma hunategeꞌana emainaꞌa kanolatana utaꞌageno Yisasiꞌa anile mainaya veaꞌmogamina Yonife mage huno hamavige “Tamakaya kaꞌme kotega utama na ya agegahe neꞌvae? Nago vemoꞌa hopa kana huno yasimoꞌa ali fagagi mainea kanomona agegahe neꞌvafio?
LUK 7:25 Ifi na ya agegahe neꞌvae? Kanale kena failinesia kanoa kaꞌme kotega agegahe neꞌvafio? Aꞌao kanale kena failinesaya vayala kanale kave nege nege nehaya vayala kaꞌme kotega omainagi ala kanomona kanale nomaꞌafi maigahae.
LUK 7:26 Na ya agegahe neꞌvae? Anumaya Koti aune kano agegahe neꞌvafio? Tamage tamahapauve mukiꞌa Anumaya Koti aune vayaꞌmogamina amakasemainea kanoa Yoni maine.
LUK 7:27 Yonife nayona Anumaya Koti autaꞌmafina mage huꞌya kaemalenayane ‘Haviho nagaya Anumaya Kotiꞌna aliꞌya kanoꞌnimona hagoteꞌna hutogeno uhagotegateno visana kana valino ali hilato hugategahie.’ huno kaemaleneane.
LUK 7:28 Tamahapauve Yoniꞌa mukiꞌa ma mopale atenaya vayaꞌmogamina ago amakasemaineanagino nagoꞌa afa veaꞌmoꞌya Anumaya Kotife ‘Kava yagailato.’ huꞌya humainaya veala Yonina ago agasemainae.
LUK 7:29 Kasagoꞌya veala musufaya nehuꞌya vaya amaugafaleti takisi neꞌaliya vayaꞌene Yoni humainea kaiyekea haviteꞌya ‘E, Anumaya Kotiꞌa ‘Naꞌa maꞌa huo.’ huno humainea kea fatago ke huno hie.’ hutageno Yoniꞌa tina falemateanagi Falasia vayaꞌene kahegi kema havilinaya anagaꞌene ‘Anumaya Kotiꞌma ‘Naꞌa maꞌa hiho.’ humainea kehe tagaifena ohune.’ Yoniꞌma falematea tina ofalegahune.” huꞌya amakaveꞌno hutenae.
LUK 7:31 Meni kanafima mainaya veaꞌmogatamahena hana augafa veaꞌne mainae huꞌna tamahapaisue?
LUK 7:32 Ma ma hisua augafa nafaꞌneyagamoꞌya mainaya kava hutama mainae. Ani nafaꞌneyagamoꞌya veaꞌne alitalu huꞌya mainalega maineꞌya alu nafaꞌneyagahena ke huꞌya mage huꞌya hae ‘Yaveꞌya aikolunana tamakaya amoa noꞌayae. Tagaya tahau hisuna yagame nehunana tamakaya avia noꞌatae.’ huꞌya hae.
LUK 7:33 Yoniꞌa ti fale neꞌamatea kanomoꞌa kaveꞌene haviliꞌene mosino emainegetama tamakaya ‘Satani Avamula aguꞌafina maine.’ hutama nehae.
LUK 7:34 Hayanagi ikapinagati emainoa kanoa vayaꞌmo natenea nafaꞌnemoꞌna tina kavela nenogetama nagaifena ‘Kaveꞌene tiꞌene neno haꞌno hugeno omai kano maineno musufaya nehaya vayaꞌene amaugafaleti takisi neꞌaliya vayaꞌene kefo yama nehaya vayaꞌene vayaꞌamoꞌya mainae.’ hutama nehae.
LUK 7:35 Hayanagi Anumaya Kotiꞌna kanale agu agesama hanea kavala akaveꞌma neꞌvaya veaꞌmoꞌya ‘Fatago kava nehie.’ huꞌya nehae.” huno hie.
LUK 7:36 Nagola Falasia kanoa Saimoniꞌe Yisasife “Nagaiꞌene kavela meno.” huno higeno Yisasiꞌa kave mo negahe Falasia kanomo nopi haino mopale maine.
LUK 7:37 Haino mainegeno nagola kumai aala ani kumate nemaiyanagino “Yisasiꞌma Falasia kanomo nopiti kave negahe umaine.” huꞌya haya kea haviteno manaꞌage masavena havatemai yafa keꞌayo alilino emaine. Ani keꞌayoꞌma talo hia yafamo agia alapasatae.
LUK 7:38 Yisasi akavelega aiyafi umaineno Yisasife “Ala kano mainane.” nehuno aiyafi ape huno avi neꞌategeno aunumoꞌa takilavino Yisasi aiyale tavigeno agaiꞌa ayolagefaleti aye haꞌmino alisoso hu neꞌateno aiyale atako nehuno manaꞌage masaveteti faletene.
LUK 7:39 Fale neꞌategeno kema humainea Falasia kanomoꞌa ani aꞌmoꞌma hia kavala ageteno agesafinaga mage huno havie “Ma kanomoꞌa Anumaya Koti aune kanoma maineleꞌasina aiyaleꞌma alisoso hutea aꞌmofena ago havileꞌasine. Ani aꞌmoꞌa tusiꞌa kefo yamaꞌage nehia a maine.” huno nehavie.
LUK 7:40 Agesafinaga ani kea nehavigeno Yisasiꞌa agaife mage huno hie “Saimonigae nago kea kahapaisue.” huno higeno “Hulavenelina kanomogae nahapaigeꞌna havino.” huno hie.
LUK 7:41 Higeno Yisasiꞌa mage huno hie “Nagola moneꞌa hanea kanomote tole kanolatamogania uꞌana nagoꞌmoꞌa ‘Vani hataleti kina (K100) namigeꞌna alino.’ higeno nagoꞌmoꞌa teni kina (K10) namigeꞌna alino. Alitetaꞌa anonaꞌa haenaga megamiꞌano huꞌana haꞌageno anamigeꞌana aliꞌana umainaꞌe.
LUK 7:42 Uteꞌana haenagaꞌa anonaꞌama amisaꞌa monea kosa ohegeꞌana oꞌamiꞌageno ‘Kanalelagi onamitana ataleꞌo.’ huno humaine. Ani kema humainea yafena ani tole kanolatalapitila hana kanomo monema aminea kanohena tusia musena huno hau ayamopafina haugahie?” huno havige.
LUK 7:43 Saimoniꞌa mage hie “Nagesa havuana ala monema alimainea kanohe atalo hunoꞌma hutea kanomoꞌa tusiꞌa muse huno hau ayamopafi haugahie.” huno higeno Yisasiꞌa mage huno hie “Tamage hane.” huno humaine.
LUK 7:44 Ani kea huteno maiyahae huno ani aꞌmona agemaineno Saimonina mage huno hapaiye “Kagaya mani aꞌmona ago. Nagaya kagai nopi ogeka naiya sese huonatanageno ma aꞌmoꞌa agaiꞌa aunuleti naiya sese hunateteno agaiꞌa ayolagefaleti ali hau hunenate.
LUK 7:45 Kagai nopi ogeka nagaila naugafalela alisoso hu onatenanagi ma aꞌmoꞌa naiyalela eno aluya huno alisoso hunenate.
LUK 7:46 Kagaya afa masavetetila nanupina fale onatenanagi mani aꞌmoꞌa manaꞌage masaveteti naiyalela falenatene.
LUK 7:47 Ani yafe kahanepauve mani aꞌmoꞌa kefo yamaꞌamoꞌa kasago humainegeno Anumaya Kotiꞌa ago aigeꞌateno ataletea yafe tusiya huno hau ayamopafi haumaineanagino osi kefo yamaꞌama hanea kanomona Anumaya Kotiꞌa ani kefo yamaꞌa aigeꞌateno ataletesiana osiꞌa hau ayamopafina haugahie.”
LUK 7:48 Yisasiꞌa mage huno ani afena hie “Nagaya kefo yakaꞌa ago aigekateꞌna atalegatoe.” huno hapaiye.
LUK 7:49 Agaiꞌaene tokaeꞌya mopale mainaya veaꞌmoya sumi sumi kefiti mage huꞌya hae “Mani kanoa hanaꞌa kano maineno ‘Kefo yakaꞌa aigekateꞌna atalegatoe.’ huno nehie.” huꞌya hae. “Nagaifena havika kagupi maleꞌka kametiti hanafe kagu kamena ago aligatigatogi kamena male falu huka vuo.” huno hapaiye.
LUK 8:1 Yisasiꞌa osi kanaꞌa maiteno ala kumaꞌyagaleꞌene osi kumaꞌyagaleꞌene vaiyatete huno Anumaya Koti kava yagaimatesia kanale mono kea hamapaimaine. Agaiꞌa tuelufuꞌa (12) anagaꞌaene nagoꞌa aꞌneyagaene Yisasiꞌa amakupitiꞌma Kefo Avamuꞌma anatitaleno kaliꞌamima alino kanale humatenea aꞌneyagaene agaiꞌaene vaiyatete humainae. Nago aꞌmo agia Magatala Maliaꞌe. Yisasiꞌa hagoteno seveniꞌa (7) Kefo Avamuꞌyaga aguꞌafiti anatitalenea ale.
LUK 8:3 Nago aꞌmo agia Yoanaꞌe Heloti nopi kava kanomo alagi. Ani kava kanomo agia Susaꞌe. Nago aꞌmo agia Susanaꞌe nagoꞌa aꞌneyagaene Yisasiꞌene vaiyatete nehuꞌya ani aꞌneyagamoꞌya amakaiꞌami moneꞌamifiti Yisasiꞌene anagaꞌamogamiꞌene amaya humainae.
LUK 8:4 Mukiꞌa alu kumateti kumateti veala Yisasite melitalu hageno Yisasiꞌa nago avame kea hamapaimaine.
LUK 8:5 Mage huno hie “Nago kanomoꞌa avina faigahe alino vie. Avina alino aihelafino nefaigeno nagoꞌa avinamoꞌa kapi tavino hanegeno veaꞌmoꞌya ani avinale amaiya ayeꞌya ute ete hageno namayagamoꞌya nageno haꞌno hie.
LUK 8:6 Nagoꞌa avinamoꞌa yafa mopafi taviteno hageana tina omalea mopafinagino eteno fayoteno asagalimaine.
LUK 8:7 Nagoꞌa avinayagamoꞌa avetaꞌnafa ino hanea amuꞌnopi tavino hageteno avetaꞌnafa hanea inoꞌmoꞌa ayetegeno haviya humaine.
LUK 8:8 Nagoꞌa avinamoꞌa kanale mopafi tavino hageteno alagaꞌama ayeana nagoke yosalela kasagoꞌya alaga vani hataletiꞌa (100) ayeno vasaimai vasaimai humaine.” huno hie. Ani kea huteno ala ke huno mage hie “Mani kea tamakesama hanesigetamahena havilama hutama haviho.” huno hie.
LUK 8:9 Agaiꞌenema tokaeꞌya nemaiya anagaꞌmoꞌya ani avame kemo aepaꞌahe havigae.
LUK 8:10 Havigageno Yisasiꞌa mage hie “Tamakaya Anumaya Kotiꞌa kava yagailamateneafe kemoꞌa falaki mainea kea Anumaya Kotiꞌa tamaya higetama ago havilinagi mukiꞌa veaꞌmoꞌya avame kema hamapaisugeꞌya amakesa havigahagi haviteꞌya havilama huꞌya ohavigahae. Veaꞌmoꞌya neꞌagayanagi agelama huꞌya oꞌagegahae.
LUK 8:11 Mani avame kemona aepaꞌa hu falote huꞌna tamahapaisue. Mani avinamoꞌa Anumaya Koti ke kana humaine.
LUK 8:12 Kateꞌma tavimainea avinamoꞌa maꞌa humaine nagoꞌa veaꞌmoꞌya Anumaya Koti kea havitageno Sataniꞌa mage hie ‘Amakupi aliꞌya omalesageno Anumaya Kotiꞌa amaku amamena ali okatisie.’ huno amakupitila ani kea alitalene.
LUK 8:13 Yafa mopafima tavimainea avinamoꞌa maꞌa humaine nagoꞌa veaꞌmoꞌya Anumaya Koti kea haviꞌya muse huꞌya atafa hayanagi hafuꞌya mopafi otavia yamoꞌa alige atalege veaꞌne maineꞌya osi kanaꞌa osiꞌa haviꞌya amakupi maletageno havi kanama amakaiteꞌma falote nehiana aupaꞌa Anumaya Koti kea neꞌatalae.
LUK 8:14 Avetaꞌnafa ino hanea amuꞌnopi tavimainea avinamoꞌa maꞌa humaine nagoꞌa veaꞌmoꞌya Anumaya Koti kea haviteꞌya ma mopafi mukiꞌa yaꞌyagaꞌamihe amakesa haviꞌya moneꞌamiene yokaloꞌamienefe kalagi aiteꞌya ani yaꞌyagaꞌamimo Anumaya Koti kea alino aiso humalegeꞌya atalageno alagaꞌamoꞌa aye helafino lama nohie.
LUK 8:15 Kanale mopafima tavimainea avinamoꞌa maꞌa humaine nagoꞌa veaꞌmoꞌya tokiyaꞌage amaku amakesa hanegeya Anumaya Koti kea haviteꞌya aliꞌya amakupi maleꞌya atafa hu talako huꞌya mainaya veaꞌmoꞌya ani alagaꞌa mukiꞌa aye henelafie.”
LUK 8:16 Anumaya Koti ke nehaviyafe Yisasiꞌa mage huno hamapaiye “Nagoꞌa veaꞌmoꞌya lamua hanagaliꞌya susufaneleti aiso hu nemalafi ifi sipa kapinaga hanagaliꞌya aiso hu nemalae? Aꞌao lamua hanagaliteꞌya esaya veaꞌmoꞌya ani lamule agesayafe sipale nemalae.
LUK 8:17 Ani yafe haenagaꞌa mukiꞌa falakimainesia yamoꞌa efalote hugahie. Mukiꞌa kesi kava nehaya yamoꞌa efalote hinageꞌya veaꞌmoꞌya agegahae.
LUK 8:18 Ani yafe Anumaya Koti ke havisaya yafena tamakesa havitama havilama hutama haviho. Havilama huno havilinesia kanomona Anumaya Kotiꞌa nagoꞌene havilisia yana amigahianagi nagoꞌamoꞌya ‘Ago havilinoe.’ huno hisia kanomona havilinesiamaꞌa hanafaletalegahie.” huno humaine.
LUK 8:19 Yisasina itaꞌamoꞌene aganaꞌamoꞌyaene agegahe ayanagi kasagoꞌya veaꞌmoꞌya hiya huꞌya maigeno Yisasiꞌma mainea avatela omenae.
LUK 8:20 Omenagi nago kanomoꞌa Yisasife mage hie “Itakamoꞌene kaganakamoꞌyaene kagai kagegahe emaineꞌya kumatega hetiꞌya mainae.” huno hie.
LUK 8:21 Higeno kenonaꞌa mage huno hie “Mukiꞌama Anumaya Koti kema haviꞌya akave nemalaya veala itaꞌnimoꞌya naganaꞌnimoꞌya mainae.” huno hapaiye.
LUK 8:22 Nago yupa Yisasiꞌenema tokaeꞌya nemaiya anagaꞌene tipi kalefi haisaga humaiꞌya neꞌuꞌya Yisasiꞌa mage huno hamapaiye “Tikotumona atu faliga vigetao.” huno higeꞌya umainae.
LUK 8:23 Yaufa neꞌvageno Yisasiꞌa aukalokalo higeno faemainegeno tusiꞌa yasimoꞌa tina mevaleno tipi kalefi atalegeno ani lipi kalefina havatesia kava higeꞌya mukiꞌamoꞌya haviya hisaya kava humainae.
LUK 8:24 Huteꞌya Yisasiꞌa faemainegeꞌya mogafa huꞌya mage hae “Kava kanomogae, kava kanomogae tagaya ti nakaita falisuna kava nehunageka notagane.” huꞌya hageno hetino ani limofeꞌene yasimofeꞌene tokiyaꞌage ke huno “Taga huo.” huno higeno yasimoꞌene timoꞌene taga huꞌana alava humainaꞌe.
LUK 8:25 Alava hutegeno Yisasiꞌa agaiꞌaene tokaeꞌya nemaiya anagafe mage huno hamavige “Nagaifena havitama tamakupi maletama tamametitima haya yana hanate atalae?” huno higeꞌya koli huꞌya tusiꞌa amamaꞌyo neꞌaiꞌya huge havige huꞌya mage hae “Mani kanoa taꞌe? Timoꞌene yasimoꞌene keꞌa haviteꞌya akave malae.” huꞌya hae.
LUK 8:26 Kaliliti ala tikotuna takaeꞌya ame kaiyaga agegayamona Kelasasa* veaꞌne mainalega uvaꞌyi hae.
LUK 8:27 Yisasiꞌa tipi kalea ataleno ti agegayalega neꞌuno ageana nagola ala kumate kanoa Kefo Avamuꞌyagamoꞌya aguꞌafi mainaya kanoa Yisasite emaine. Ani kanoa ayaꞌaya kanafi kenaꞌa fai oꞌalino nopina nomaiyane. Matimatipikeꞌya nemaiya kanoe.
LUK 8:28 Ani kanomoꞌa Yisasina ageteno mopafi agoꞌya ayemaineno ala kefiti mage hie “Yisasiga tagasenoꞌma anale mainea Anumaya Kotina nafaꞌneꞌamoga naꞌa hunategahe neꞌane? Musekaꞌa nehugi nagata aisia kavala hu onato.” huno nehie.
LUK 8:29 Higeno Yisasiꞌa Kefo Avamufe mage huno hie “Agusafitila hatilavio.” huno higeno Kefo Avamuꞌmoꞌya mukiꞌa kanafina ani kanomona atafa nehigeꞌya kava neꞌyagaiya vayaꞌmoꞌya aiya ayapi seni nofiteti kisalu kitayanagi ani nofila aikaꞌnokaꞌnu huneꞌataleana Kefo Avamuꞌmoꞌya afai kotega anatigeno faleno neꞌviane.
LUK 8:30 Yisasiꞌa ani kanohe mage hie “Kagai kagia tagae?” huno higeno mage hie “Nagai nagia kasagoꞌyamoꞌnae.” huno hie. Naꞌafene kasagoꞌya Kefo Avamuꞌmoꞌya aguꞌafima hai falemainayafe “Nagia kasagoꞌyamoꞌnae.” huno hie.
LUK 8:31 Ani Kefo Avamuꞌmoꞌya Yisasifena mage hae “Hanikimainea kumapina tagaila hulategeta oꞌvamano.” huꞌya hae.
LUK 8:32 Nehageꞌya kasagoꞌya afuyagamoꞌya agoꞌyafi maineꞌya kave nenageno ani Kefo Avamuꞌmoꞌya Yisasifena mage huꞌya hae “Amuga afuyagamo amakuꞌafina hulategeta vamano.” huꞌya havigageno Yisasiꞌa “Aniꞌa hiho.” huno hie.
LUK 8:33 Higeꞌya ani Kefo Avamuꞌmoꞌya ani kanomo aguꞌafitila hatilaviꞌya afuyagamogami amakupi hai nefalayana ani afuyagamoꞌya amaiyayeꞌya nagola aulufi kapi taviteꞌya tipi asaga hulaviꞌya ti nakaiꞌya fali haꞌno humainae.
LUK 8:34 Fali haꞌno hageꞌya ani afuyagale kava vayaꞌmoꞌya ani afuyaga tima nakaiꞌya fali haꞌnoma haya yana ageteꞌya faleꞌya ala kumate mainaya veaꞌmogamifeꞌene hoyafinaga mainaya veaꞌmogamifeꞌene “Naꞌa maꞌa higeta neꞌone.” huꞌya hamapaimainae.
LUK 8:35 Hageꞌya ani veaꞌmoꞌya humainea yama agegahe Yisasite eꞌya Kefo Avamuꞌmoꞌma agusafiti ataleno umainea kanomona agesa akalo higeno kenaꞌa failino Yisasi aiyafi mopale mainegeꞌya megeteꞌya koli humainae.
LUK 8:36 Yisasiꞌma humainea yama agemainaya veaꞌmoꞌya “Naꞌa maꞌa huno Kefo Avamuꞌmogamina agusafi mainea kanomona alino kanale hutene.” huꞌya hamapaiye.
LUK 8:37 Hamapaigeꞌya mukiꞌa Katalaga kumate veaꞌmoꞌya Yisasifena tusiꞌa koli huteꞌya “Tagaila tataleka vuo.” huꞌya hageno Yisasiꞌa amataleno emainelega ugahe tipi kalefi haisaga humaine.
LUK 8:38 Haisaga hunemaigeno Kefo Avamuꞌmoꞌma agusafiti hatilavino umainea kanomoꞌa Yisasifena “Kagaiꞌene ugahe nehue.” huno higeno Yisasiꞌa “Aꞌao kagaya eteka nokalega uka mukiꞌa Anumaya Kotiꞌma hugatenea yafena veaꞌneyaga mo hamapaiyo.” huno higeno ani kanomoꞌa viaꞌyamo mukiꞌa ala kumaꞌale veaꞌmogamina Yisasiꞌma hutea yafena hamapaimaine.
LUK 8:40 Yisasiꞌa eteno egeꞌya mukiꞌa veaꞌmoꞌya agava maineꞌya tusiꞌa muse huꞌya falu fala hutenae.
LUK 8:41 Falu fala huneꞌatageno nago kanoa Yailasiꞌe nehaya kanoa emaine. Ani kanoa soka kano maineanagino Yisasi aiyafi mepe humaineno tutu nehuno Yisasina mage huno havige “Noniꞌalega egetaꞌa vaꞌano.” huno hie.
LUK 8:42 Ani kanomoꞌa aiya nagoke munaꞌa maine. Ani munala kafuꞌa tuelufuꞌa (12) kafuꞌa hanea munala faligahe ayaya neꞌaigeno “Noniꞌalega eno.” huno tutu higeno Yisasiꞌa anilega vigeꞌya veaꞌmoꞌya yageꞌyage huꞌya aulega akavelega huꞌya akave umainae.
LUK 8:43 Vageno ani veaꞌnefiti nago aꞌmoꞌa tuelufuꞌa (12) kafu aigu nopinaga mukiꞌa kanale nemaiya aala nagoꞌa vayaꞌmoꞌya aliꞌya kanale hu oꞌataleꞌasine.
LUK 8:44 Ani aꞌmoꞌa Yisasina akavelagati eno kenaꞌamo atupale avate aligeno aupaꞌa kolamaꞌamoꞌa taꞌnemaine.
LUK 8:45 Taꞌnegeno Yisasiꞌa mage huno humaine “Ta kenaꞌnilela mevate humaine?” huno higeꞌya mukiꞌamoꞌya “Tagaya naꞌa ohunone.” huꞌya hageno Pitaꞌa mage hie “Kava kanomoga mukiꞌa veaꞌmoya yageꞌyage huꞌya kaulegati kakavelagati nehagi naꞌa higeka mani kea hamavinegane?” huno hie.
LUK 8:46 Yisasiꞌa mage huno hie “Tamage huꞌna nehue nago kanomoꞌa kenaꞌnile avate higeꞌna nagaya nagesa nehavugeno navate aligeno nagoꞌa tokiyaꞌnimoꞌa ago nataleno umaine.” huno hapaiye.
LUK 8:47 Hapaigeno ani aꞌmoꞌa “Falakigahe huanagi ago nagane.” huno atili huteno Yisasi aiyafi mepe humaineno mukiꞌa veamogami amaulagafi “Naꞌa maꞌa huꞌna kali alimainoafe avate alugeno kaliꞌniꞌa aupaꞌa kanale hunate.” huno hapaimaine.
LUK 8:48 Hapaigeno Yisasiꞌa mage huno hapaiye “Ma aꞌmoga nagaife kagupi maleka kametiti hanafe kanale negahaiye kagaya kaipamoꞌa yasi nehinageka vuo.” huno hapaiye.
LUK 8:49 Ani kea nehigeno nago kanomoꞌa soka kanomo notegati anile evaꞌyi huno Yailasife mage huno hie “Munakamoꞌa ago falimainegi ataleka kava kanomona kasalo haegi nagoꞌene havioko.” huno hie.
LUK 8:50 Yisasiꞌa ani kea haviteno Yailasife mage huno hie “Kolia ohuka afaꞌa nagaife kagupi maleka kametiti hisanageno munakaꞌa falimainefitila hetigahie.” huno hie.
LUK 8:51 Soka kanomo note uvaꞌyi huno Yisasiꞌa mukiꞌa veaꞌnehe “Omeho.” huno Pitaꞌene Yoniꞌene Yemesiꞌene ani munaꞌmo itaꞌafoꞌamoꞌene amavaleno ani nopi haimainae.
LUK 8:52 Mukiꞌa veaꞌmoꞌya ani munaꞌma falimainea yafena tusiꞌa avi neꞌatageno Yisasiꞌa mage huno hie “Avia oꞌateho mani munala falilavata ohunegi afaꞌa faeno maine.” huno hamapaimaine.
LUK 8:53 Ani munala faligeꞌyama agemainaya yafena ani veaꞌmoꞌya Yisasina kigiꞌa hutenae.
LUK 8:54 Kigi hutayanagi Yisasiꞌa ani munaꞌmo ayate atafa nehuno mage hie “Ma munaꞌmoga hetio.” huno hie.
LUK 8:55 Nehigeno agu nafaꞌnea eteno egeno aupaꞌa hetie. Hetigeno Yisasiꞌa mage hie “Nagoꞌa nesia kavela amiho.” huno hamapaimaine.
LUK 8:56 Itaꞌafoꞌamogania ani yana ageteꞌana tusiꞌa anamaꞌyo aimaiꞌanagi Yisasiꞌa mage hie “Nago kanomona ma ma hua yafena hamaopaiꞌo.” huno kaheginatene.
LUK 9:1 Yisasiꞌa tuelufuꞌa (12) anagaꞌamofe ke higeꞌya ageno mukiꞌa Kefo Avamuꞌyagama veaꞌmogami amakusafiti amanatitalesaya tokiyaene kalima aliꞌya kanale humatesaya tokiyaene amamine.
LUK 9:2 Amamiteno Anumaya Kotiꞌma kava yagaisia yafe hamapaigahe kalima hamaemainea yana aliꞌya kanale humatesayafe humatene.
LUK 9:3 Huneꞌamateno mage huno hamapaiye “Kama visayafena ayopatamiene kutamiene mayatamiene monetamiene alitama oꞌviho. Tole kena oꞌaliho. Alu nopi alu nopi faelitetama ohiho.
LUK 9:4 Nago nopima hai falenutamahena ani nopi faetama maitama amataletama alu kumatela viho. Faelitetama ohiho.
LUK 9:5 Nagoꞌa kumate veaꞌmoꞌya falu falama huotamatesagetamahena ani kumala neꞌataletama ‘Havi kava hae.’ hutama tamaiyafima hanesia kugukege yana aifopo huneꞌataletama viho.” huno hamapaimaine.
LUK 9:6 Hamapaitegeꞌya alu kumate kumate neꞌuꞌya mukiꞌa kumatela Anumaya Kotina kanale keꞌa hamanepaiꞌya kaliꞌamia aliꞌya kanale huneꞌamateꞌya humainae.
LUK 9:7 Ani kanafina Helotiꞌa sauve kanogino Yisasiꞌa mukiꞌama humainea kavaꞌmo avagema haviana nagoꞌa veaꞌmoꞌya ani yana ageteꞌya “Yoniꞌa falimainefiti ago hetimaine.” huꞌya hageꞌya nagoꞌa veaꞌmoꞌya “Ilaiyaꞌa eteno falote humaine.” huꞌya hageꞌya nagoꞌa veaꞌmoꞌya “Nayoma Anumaya Kotina aune kanoꞌa falimainefiti hetimaine.” huꞌya haya yafe Helotiꞌa ani kea haviteno agu agesamoꞌa anilega vigeno “Hana veaꞌmogami kemo tamagea nehafi?” huno humaine.
LUK 9:9 Huteno Helotiꞌa mage hie “Nagaya aliꞌya vayaꞌniꞌa humatogeꞌya Yonina ageꞌya ago fakalitalageno falimaine. Naꞌa maꞌa kava nehie huꞌya avagema humainaya kanoa taꞌe?” huno nehuno Yisasima agesia kafena ati ayemaine.
LUK 9:10 Aposolo anagala eteꞌya “Naꞌa maꞌa kava huteta neꞌone.” huꞌya Yisasina me hapaigeno Yisasiꞌa haviteno ani anagaꞌa amavaleno Petesaita kumatega ugahe katega umainae.
LUK 9:11 Neꞌvageꞌya mukiꞌa veaꞌmoꞌya haviteꞌya akave agaitega ageno Yisasiꞌa falu fala humateteno Anumaya Kotiꞌma kava yagaisia yafe hamapaiteno kalima neꞌaliya veala alino kanale humatene.
LUK 9:12 Une kigeꞌya tuelufuꞌa (12) anagaꞌamoꞌya Yisasite mage me hae “Tagaya vaya omai kaiyaga mainonafe mukiꞌa veaꞌmogamina humatesanageꞌya hanesia kumateꞌene noma hanesilegaene ute ete huꞌya faesaya nofeꞌene nesaya yafeꞌene atiyesae.” huꞌya humainae.
LUK 9:13 Hageno Yisasiꞌa mage huno hamapaiye “Tamakaitami kavela amamiho.” huno hamapaigeꞌya mage hae “Utama mukiꞌa mainaya veaꞌmogami kavela miya hiho huka nehano? Tagaipina osi kave kanoꞌa hane faefuꞌa (5) mayaene tole noyame kanoꞌagi huno hane.” huꞌya hae.
LUK 9:14 Anifima mainaya vayala faefu tauseniꞌa (5,000) vayaꞌyaga mainayanagi Yisasiꞌa agaiꞌenema tokaeꞌya nemaiya anagaꞌamogamife mage huno hamapaiye “Hamapaigeꞌya fifitiꞌa (50) veaꞌne ‘Alitalu hutama maite maite hutama mopale maiho.’ hutama hamapaiho.” huno humaine.
LUK 9:15 Hamapaigeꞌya aniꞌa hute hute huꞌya mopale mainae.
LUK 9:16 Yisasiꞌa faefuꞌa (5) maya neꞌalino tole noyamene neꞌalino huteno ikapinaga agesaga huno Anumaya Kotitega huno muse huteno ani mayaene noyamene koliteno agaiꞌenema tokaeꞌya nemaiya anagaꞌa amamigeꞌya mukiꞌa veala amamite amamite humainae.
LUK 9:17 Amamite amamite hageꞌya mukiꞌa nageno amamu higeꞌya atalaya atupatapaꞌa aliꞌya tuelufuꞌa (12) kula aihavatemainae.
LUK 9:18 Nago yupa Yisasiꞌa agaiꞌage Anumaya Kotitega havinegegeꞌya agaiꞌenema tokaeꞌya nemaiya anagaꞌamoꞌya avate mainageno mage huno hamavige “Veaꞌmoꞌya nagaifena taꞌe huꞌya nehae?” huno hamavige.
LUK 9:19 Hamavigegeꞌya kenonaꞌa mage huꞌya hae “Nagoꞌa veaꞌmoꞌya kagaifena ‘Ti faleneꞌamatea Yoni maine.’ huꞌya hageꞌya nagoꞌa veaꞌmoꞌya kagaifena ‘Ilaiya maine.’ huꞌya hageꞌya nagoꞌa veaꞌmoꞌya ‘Anumaya Koti aune kanoa nayo ago falimainea kano falimainefiti eteno hetimaine.’ huꞌya nehae.” huꞌya hapaimainae.
LUK 9:20 Hapaigeno Yisasiꞌa amakaifena mage huno hamavige “Tamakaya nagaifena taꞌe hutama nehae?” huno hamavigegeno Pitaꞌa mage huno hie “Kagaya Kalaisigae Anumaya Kotiꞌa taugafa aligatigahe hugatenea kano mainane.” huno hie.
LUK 9:21 Higeno Yisasiꞌa tokiyaꞌage ke huno “Mani kea nagoꞌa veala hamaopaiho.” huno humaine.
LUK 9:22 Yisasiꞌa mage huno hamapaiye “Soka vayaꞌene mono note kava vayaꞌene kahegi kema havilinaya anagaꞌene nagaila ikapinagati emainoa kanoa vayaꞌmo natenea kanomonihena ‘Kahaoteꞌyakae.’ huꞌya hunatesageno tusiꞌa nagata aisigeꞌya nahaesageꞌna faligahue. Falisugeꞌya komufi hevainatesageꞌna tole yupa maiꞌna tagufa kanale falimainesufiti hetigahue.” huno humaine.
LUK 9:23 Alitalu humaiya veaꞌnene agaiꞌaene tokaeꞌya nemaiya anagaꞌenefe mage huno hie “Nagoꞌa veaꞌmoꞌya nagai nakaveꞌma visaya amakesa havinuꞌyahena amaugafama aliꞌya hai yana amakaveꞌno huteteꞌya nakaiꞌma nagata aisigeꞌna falisua kava hisaya amakesa haviteꞌya yafaga yosa kanaꞌaene kanaꞌaene kofiꞌya nakave aliꞌya visae.
LUK 9:24 Nagola veaꞌmoꞌya maiyaꞌamima atafa huꞌya ali talakoma hulisayana maiyaꞌamimoꞌa falino afaya hapaegahigi nagoꞌa veaꞌmoꞌyama nagaifema hamainageꞌya maiyaꞌamima atalesaya veaꞌmoꞌya maiyaꞌamia aligatisugeꞌya agola aliꞌya maigahie.
LUK 9:25 Nagola veaꞌmoꞌya mukiꞌa ma mopale mone fenoꞌyaga aliteꞌya maineꞌya falisagenoꞌa agola maige maige hisaya haimula ago atalenayanagiꞌya alimainaya mone fenoꞌamimoꞌa hanaꞌa huno amaya hugahie? Aꞌao amaya ohugahie.
LUK 9:26 Nagoꞌa veaꞌmoꞌya keꞌniꞌaene nagaiꞌenefema amakaye huꞌya ‘Aoteꞌyamaꞌae.’ huꞌya hunatesayana nagaya ikapinagati emainoa kanoa vayaꞌmo natenea kanomoꞌna esua kanafina tokiya hale yaniꞌaene Nenafana tokiya hale yamaꞌaene alu aotage ensole anagaꞌamoꞌyaenema eteꞌna esuana aniꞌa huꞌna ani veaꞌnehena nagaye huꞌna ‘Tamahaoteꞌyatamie.’ humategahue.
LUK 9:27 Tamagelafa huꞌna tamahanepauve nagoꞌa veala maleꞌma hetimainaya veaꞌmoꞌya aupaꞌa ofaligahayanagiꞌya hagoteꞌya Anumaya Kotiꞌma kava yagaisia kanaꞌamoꞌma efalote hisia yana agegahae.” huno humaine.
LUK 9:28 Yisasiꞌa mani kea huteno seveniꞌa (7) kana maiteno Pitana Yonina Yemesigamina amavaleno Anumayamotega ke huno havigegahe agoꞌyafi haimainae.
LUK 9:29 Haimainageno Yisasiꞌa Anumayamotega ke huno havinegegeno augosamoꞌa alino alu augosa kaligeno kenaꞌamoꞌa efeꞌage huno alave alave humaine.
LUK 9:30 Tole kanolatana nayo falimainaꞌa kanolatana Moseseꞌene Ilaiyaꞌene tokiya hale yaꞌene maineꞌana Anumaya Kotiꞌa Yisasifema “Naꞌa maꞌa huka Yelusalemu faligane.” huno hutenea kehe Yisasiꞌene kea kea humainaꞌe.
LUK 9:32 Ani kaiyekea nehageꞌya Pitaꞌene anagaꞌamoꞌyaene amaukalokalo higeꞌya faemainafiti aupaꞌa hetiꞌya agayana Yisasiꞌa tokiya hale yamaꞌaene avate tokaeꞌana hetimaiꞌa kanolataꞌene amakemainae.
LUK 9:33 Neꞌamakageꞌana ani lole kanolatana Yisasina ataleꞌana ugahe nehaꞌageno Pitaꞌa Yisasife mage hie “Anumayamoga tagaya male maunana kanale ya hie. Katega nona taliꞌa (3) kilamatesune. Kagaila nagolagi Mosesena nagolagi Ilaiyana nagolagi huno hanesie.” huno hianagi agesa havilama ohuno ani kea hapaiye.
LUK 9:34 Hanepaigeno nago siaꞌmoꞌa evaꞌyi huno alino aiso humategeꞌana Mosesegani Ilaiyagania ani siapi falaꞌageꞌya Pitaꞌene anagaꞌamoꞌyaene tusiꞌa koli humainae.
LUK 9:35 Koli nehageno siapinagati ala kefiti age aino mage huno hie “Mani kanoa nagaiꞌni nafaꞌne ago hapaliꞌna hutenoa nafaꞌnegi agai kea haviho.” huno hamapaimaine.
LUK 9:36 Hamapaigeꞌya ani kea haviteꞌya agayana Yisasiꞌa agaiꞌage mainegeꞌya ageteꞌya ke ohuꞌya mainayanagiꞌya ani kanafina nagoꞌa veala hamaꞌopainae.
LUK 9:37 Faeteꞌya kotigeꞌya Yisasiꞌene Pitaꞌene Yoniꞌene Yemesiꞌene ani agoꞌya neꞌataleꞌya elavigeꞌya kasagoꞌya veaꞌmoꞌya Yisasi agegahe emainae.
LUK 9:38 Aya veaꞌnefiti nago kanomoꞌa hetino ala kefiti mage huno hie “Humavenelina kanomoga tusiya huꞌna kahavinegoe. Aiya nagoke ne nafaꞌneꞌniꞌagi mego.
LUK 9:39 Kanaꞌaene kanaꞌaene Kefo Avamuꞌmoꞌa agusafinaga haimainegeno nafaꞌneꞌnimoꞌa ala kegefafiti ke nehigeno Kefo Avamuꞌmoꞌa aige hafalege huneꞌategeno avayafitila efeꞌage agalemoꞌa selu selu nehigeno augafa alino haviya nehuno aupaꞌa ataleno oꞌvisia kava nehie.
LUK 9:40 Naꞌa higeꞌna kagaiꞌene tokaeꞌya nemaiya anagakaꞌmogamife ani Kefo Avamula nafaꞌneꞌnimo agusafinagati anatitalesae huꞌna hamavige hamavige hugetoana amuha ohunaya yafe anati oꞌatalenae.” huno hie.
LUK 9:41 Higeno Yisasiꞌa mage huno hamapaiye “Vae tamakaya meni kanafima mainaya veaꞌmogatama nagaife havitama tamakupi maletama tametiti ohutama fatago hutama nomaiye. Aniꞌa haya yafe kasalo nenahaegi naꞌmagi yupa tamakaiꞌenena mainesugetama nagaife tamakupi malegahae?” nehuno ani nafaꞌnemo nefafe “Nafaꞌnekaꞌa avaleka eno.” huno hie.
LUK 9:42 Higeno ani nafaꞌnea yaufa avaleno neꞌegeno Kefo Avamuꞌmoꞌa alino mopafi ailakatitalegeno faemaineno kasegase nehigeno Yisasiꞌa ageteno Kefo Avamuꞌmofe kemakino “Ataleka hatilavio.” huno hutegeno hatilavigeno ani nafaꞌnea alino kanale huteteno nefana amine.
LUK 9:43 Amigeꞌya mukiꞌa anile mainaya veaꞌmoꞌya ageteꞌya Anumaya Kotina tokiya yamaꞌahe tusiꞌa atalitalu huꞌya amamaꞌyo aiyanagi Yisasiꞌa agaiꞌenema tokaeꞌya nemaiya anagaꞌamogamife mage huno hie “Menima hisua kea tamakesa havilama hutama haviho. Osi kanaꞌa maitesugeno nago kanomoꞌa nagesi hinageꞌya ikapinagati emainoa kanoa vayaꞌmo natenea kanomonia kame vayaꞌmogami amayapi navaleꞌya nategahae.” huno hie.
LUK 9:45 Higeꞌya ani kemona aepaꞌamoꞌa ago falakimaineafe havilama ohunagi koli huꞌya ani kemo aepaꞌahena haviokenae.
LUK 9:46 Yisasiꞌene tokaeꞌya nemaiya anagaꞌmoꞌya “Tagaipima uhakotemainea kanotia ta maine?” huꞌya huteꞌya ani yateti ke vaimainae.
LUK 9:47 Yisasiꞌa amakaipima hanea amaku amakesa ago haviteno nagola osi nafaꞌnea avaleno avate hetitene.
LUK 9:48 Ateteno mage huno hamapaiye “Nagoꞌa veaꞌmoꞌya nagaifema huꞌya ma osi nafaꞌne avaleꞌya falu fala hutesayana nagaiꞌene navaleꞌya falu fala hunatae. Nagaiꞌma navaleꞌya falu fala hunatesayana hunatenea kanoene avalemainae. Tamakaipina ‘Osiꞌa afa kano kana huꞌna mainoe.’ huno hisia kanomoꞌa tamakaila tamakaseno kava kano maine.” huno hamapaiye.
LUK 9:49 Yoniꞌa mage huno hie “Kava kanomoga tagaya agonana nago kanomoꞌa kagai kagi neꞌayeno Kefo Avamula veaꞌmogami amakusafinagati amanatigeta ageteta kagaiꞌenema kakave nohia yafe ‘Aniꞌa ohuo.’ huta nagalu huneꞌatone.” huno hie.
LUK 9:50 Higeno Yisasiꞌa agaife mage huno hie “Ani kanoa alitama nagalu hu oꞌateho. Vaya nagoꞌmo kamema hu otamatesiana nelamafuꞌya mainae.” huno hapaiye.
LUK 9:51 Yisasiꞌa ikapinaga haisia kanamoꞌa aupa higeno Yelusalemu visia agesa havino tokiya vaiteno katega umaine.
LUK 9:52 Nagoꞌa anagaꞌa talo tala hisaya yafe hagoteno humategeꞌya nago Samelia kumate uꞌya vayafe mage huꞌya hae “Yisasiꞌa egahigi mukiꞌa yana talo tala hiho.” huꞌya mo hamapaimainae.
LUK 9:53 Samelia kumate veaꞌmoꞌya Yisasiꞌa Yelusalemu ugahe hia yafe amakesa haviteꞌya mage huꞌya hae “Tagaya avaleta ali falu fala hu oꞌategahune.” huꞌya hae*.
LUK 9:54 Agaiꞌenema toꞌkaeꞌana nemaiꞌa kanolatana Yemesigani Yonigani ani kavaꞌma haya kavala ageteꞌana mage haꞌe “Vae Anumayamoga kahaisiana taꞌagaya ikapinagati atahe ke hisuꞌageno ata maleno ani veala asagalisie?” huꞌana haꞌe.
LUK 9:55 Haꞌageno Yisasiꞌa maiyahae huno keꞌanamakiteno “Aꞌao aniꞌa ohiꞌo.” huno humaine.
LUK 9:56 Huteno anileti neꞌataleꞌya alu kumatega umainae.
LUK 9:57 Katega neꞌuꞌya nago kanomoꞌa Yisasifena mage huno humaine “Mukiꞌa kumate visanana nagaya kakave ugahue.” huno hie.
LUK 9:58 Higeno Yisasiꞌa kenonaꞌa mage huno hapaiye “Kepu yagamoꞌya faesaya komuꞌamia mopafinaga hanegi namamogamina noꞌamia haneanagi ikapinagati emainoa kanoa vayaꞌmo natenea kanomoꞌna faesua noniꞌa omale.” huno hie.
LUK 9:59 Nago kanohe mage huno hapaiye “Nakave eno.” huno higeno mage huno humaine “Alanimogae nenafana falisigeꞌna aliꞌna hevaiteteꞌna kakavela ugahue.” huno hie.
LUK 9:60 Higeno Yisasiꞌa mage huno kenonaꞌa hapaiye “Atalo nagai kea ohavinesaya veala amaku amamemaꞌamo falimainaya veaꞌmoꞌya falia kanomona aliꞌya hevaitegahae amakaiꞌami yanagi kagaya neꞌataleka veaꞌmogamite Anumaya Koti kava yagaimatesia kaiyekea mukiꞌa veaꞌmogamina hamapaiyo.” huno hie.
LUK 9:61 Nago kanomoꞌa hetino mage huno hapaiye “Alanimogae kagai kakave malegahe huanagi natalegeꞌna nenafa nopi mainaya veala nayana amamite amamite huteꞌna kakavela vano.” huno hie.
LUK 9:62 Higeno Yisasiꞌa kenonaꞌa mage huno hapaiye “Nagoꞌa veamoꞌya avina yama kaligahena amakavelega maiyahae huꞌya moge mege hinuꞌyahena Anumaya Kotiꞌa aniꞌa hisaya veafena ‘Nagai aliꞌya alitama veamogamite kava yakaisua kea hamapaiho.’ huno ohugahie.”
LUK 10:1 Anile Anumayamoꞌa sevetituꞌa (72) vaya hapaliteno “Nagaiꞌnima visua kumate ali lokaete lokaete hutama uhagotetama neꞌviho.” huno humategahe amakaife mage huno hamapaiye “Nagai kema havisaya veala kasagoꞌya kaveꞌma hoyafi afulemailemai hia kava humainegi hoyafima aliꞌya alisaya veala osiꞌa veaꞌne kanoꞌa mainayafe ani hoyamona nefafe havigegeno nagoꞌa aliꞌya vayala kaveꞌma alisayafe humatesie.
LUK 10:3 Tamakaya neꞌutama haviho tamakaya sipi sipi nafaꞌne kana hutama mainagi nagaila ago amakaveꞌno hunenataya veala afai kala kana kaveꞌage veaꞌne mainaya amuꞌnopi hulamatesugetama ugahae.
LUK 10:4 Ugahagi monetamiene kutamiene tamaiya noꞌene alitama oꞌviho. Katega neꞌvisaya veaꞌnenena ayaꞌayate maitama kaiyekea ohiho.
LUK 10:5 Nago nopima hai falenutama hagotetama mage hutama hiho ma nopima mainaya veaꞌmogatamina ‘Anumaya Kotiꞌa tamaipa falu hisaya tamaku tamakesa tamamisie.’ hutama hiho.
LUK 10:6 Aipa falu hisia agesaene kano ani nopima mainesiana Anumaya Kotiꞌa aipa falu hisia agesa amigahigi aniꞌa kana kanoma omainesiana aipa falu hisia yana oꞌaligahie.
LUK 10:7 Ani nopi mainetama nesaya yama tamamisagetama afaꞌa neho. Nagai aliꞌya alisaya anonaꞌa nesaya yana afaꞌa alisayana kanale hugahie. Alu nopi alu nopi faelitetama ohiho.
LUK 10:8 Nago kumateꞌma visageno falu fala hulamateteꞌya tamamisaya kavela afaꞌa neho.
LUK 10:9 Ani kumateꞌma mainesaya kali veala ali kanale humatetama mukiꞌa veafe mage hutama hamapaiho ‘Anumaya Kotiꞌa kava yagailamatesia kana ago efalote huno aupa humaine.’ hutama hamapaiho.
LUK 10:10 Nago kumateꞌma visageꞌya falu fala hu otamatesagetama ani kumala ataletama veaꞌmoꞌyama mainesaya katega utama mage hiho ‘Havi kava hae. Tamakai kumapiti kugukege yana taiyalegati aifopo hutalegahunagi tamakaya havilama hutama haviho Anumaya Kotiꞌa kava yagaisia kanamoꞌa ago efalote huno aupa humaine.’ hutama hamapaiho.
LUK 10:12 Nagaya tamahanepauve Anumaya Kotiꞌa kaiyekema hulamatesia kanafina Sotomu mainaya veaꞌmogami amaugafa amagata aigahigi tamakaiꞌma falu fala hu otamatesaya kumate veaꞌmoꞌya tusiya huno amakaseno amaugafa amagata aigahie.”
LUK 10:13 “Avoꞌnio Kolasini mainaya veaꞌmogatamaene Petesaita mainaya veaꞌmogatamaene tusiya huꞌna tamakaifena nahau nehue. Tamakai kumapi nagaya tokiya avameꞌyana ago huanagi tamaipa aiyahae ohageno ani tokiya avameꞌyana Taiyaene Saitoniene huleꞌasine ani kumate veaꞌmoꞌya kefo yaꞌamihena ago amaipa aiyahae huꞌya kefo yama humainaya yafena kayavo kena failiꞌya taꞌnefafi mopale maileꞌasine.
LUK 10:14 Anumaya Kotiꞌa kaiyekema humatesia kanafina Taiya mainaya veaꞌnene Saitoni mainaya veaꞌnene amaugafa amagata yana aligahayanagi tamakaya tusiya hutama nagoꞌene tamaugafa tamagata yana aligahae.
LUK 10:15 Tamakaya Kapaneamu mainaya veaꞌmogatama ‘Taugafa alita anale haigahune.’ hutama nehao? Aꞌao afete tavitama tamakaye nehinagetama maigahae.” huno hie.
LUK 10:16 Nagoꞌene humatenea vayaꞌmogamife mage huno hamapaiye “Tamakai kema havisaya veaꞌmoꞌya aniꞌa huꞌya nagai kea havigahae. Tamakaifema ‘Tamahaoteꞌyatamie.’ hisaya veaꞌmoꞌya aniꞌa huꞌya nagaifena ‘Kahaoteꞌyakae.’ huꞌya hunategahae. Nagaife ‘Kahaoteꞌyakae.’ hisaya veaꞌmoꞌya aniꞌa huꞌya hunatenea kanomofena ‘Kahaoteꞌyakae.’ huꞌya hutegahae huno hamapaigeꞌya umainae.”
LUK 10:17 Uteꞌyama ayana ani sevetituꞌa (72) vayala muse huꞌya eꞌya mage hae “Anumayamoga tagaya kagai kagileti Kefo Avamuꞌa humatonageꞌya tagai ke akave malae.” huꞌya me hae.
LUK 10:18 Hageno Yisasiꞌa amakaifena mage huno hie “Nagaya agoana Sataniꞌa ikateti aulumaya alia kava huno aupaꞌa asaga hunelavigeꞌna agoe.
LUK 10:19 Haviho nagaya tokiya ago tamaminoe. Nagoꞌa yamoꞌa tamakaila alino haviya otamahaugahie. Satani tokiyamona agasesaya tokiya ago tamaminoe. Vaya anigeno nefalia osifaꞌvene yapaveꞌene tamaiyaleti ayelatapesayana nagaiꞌni tokiya ago tamaminoafe otamahaegahie. Nagoꞌa yamoꞌa tamakaila ali haviya otamahaugahie.
LUK 10:20 Tokiyaꞌnia ago tamaminogi Kefo Avamula amakasesaya tokiya tamaminoa yafena musena ohutama Anumaya Kotiꞌa tamakima ikapinaga kaemalenea yafena tusiꞌa muse hiho.” huno hamapaiye.
LUK 10:21 Ani kanafina Alu Aotage Avamuꞌmoꞌa tusiya huno muse hisia agu agesa amigeno Yisasiꞌa muse nehuno mage huno hie “Nenafagae mukiꞌa ma mopafi yaꞌene ikapinaga yaꞌene kava yagaimainana Anumayamoga kanale kava nehane. Ma ma hamapauva kea nagoꞌa ‘Mukiꞌa yafena havilinoa kano mainoe.’ huꞌya haya veaꞌmogamifena ohavisae huka falakimalenane. ‘Ala avo nopi umainona vea mainone.’ huꞌya hisaya veaꞌmogamifena ohavisae huka falakimalenanagi ‘Inamu nafaꞌne kana huta mainone.’ huꞌya humainaya veala ago huhaleka amavelimainanafe aluya huꞌna musekaꞌa nehue. E, Nenafagae kagai kagu kagesamoꞌa aniꞌa humainegeka ani kavala humainane.” huno hie.
LUK 10:22 Veaꞌmogamifena mage huno humaine “Nenafaꞌa mukiꞌa lokiya ago namine. Mukiꞌa veaꞌmoꞌya nagaila neꞌamonina aepaꞌnia ohavinagi Nenafaꞌa agaiꞌage nagai aepaꞌa haviline. Havilinegi mukiꞌa veaꞌmoꞌya Nenafa aepaꞌa ohavinae. Nagaiꞌnige neꞌamoꞌna havilineꞌna nahaisia veaꞌmogamina humavelisugeꞌya Nenafa aepaꞌa havigahae.” huno hie.
LUK 10:23 Yisasiꞌene toꞌkaeꞌya nemaiya anagaꞌmoꞌya amahaote mainageno Yisasiꞌa mage huno hamapaiye “Anumaya Kotiꞌa tamaulagama neꞌagaya yana ago tusiꞌa kanale ya ago tamamia yafena tusiꞌa muse hutama maiho.
LUK 10:24 Tamahapauve nayona mukiꞌa mainaya amaune vayaꞌene sauve vayaꞌyagaene tamakayama neꞌagaya yana ‘Agesune.’ huꞌya hayanagi oꞌagenae. Havilinaya kea ‘Havisune.’ huꞌya hayanagi ohavinae.” huno hamapaimaine.
LUK 10:25 Nagoꞌa kahegi kema havilinea kanomoꞌa hetino Yisasina ayevataga huno mage huno havige “Humavenelina kanomogae nagaya hanaꞌa huteꞌna agola maige maige hisua nahaimula alisue?” huno havige.
LUK 10:26 Havigegeno Yisasiꞌa mage hie “Anumaya Koti autaꞌmafina naꞌane huꞌya kaemalenae? Kagaya hapaliteka ani kemo aepaꞌa naꞌane huka nehavine?” huno havige.
LUK 10:27 Havigegeno mage hie “Ani kemoꞌa mage humaine ‘Ala Anumaya Kotikamofena tusiya huno kahaino. Kaguꞌafinagatiꞌene kahaino. Kagu kameꞌene amio. Aliꞌya neꞌalina himamukaene amio. Kagesama nehavina yana amio. Kagaika kaugafahema kahaisia avamete mukiꞌa veamogami amaugafahena kahaino.’ huno humaineane.” huno hie.
LUK 10:28 Higeno Yisasiꞌa mage hie “Kagai kemoꞌa tamage huka nehane mukiꞌa kanafina ani kava huge huge hisanana maige maige hisana kahaimula aligane.” huno hapaiye.
LUK 10:29 Higeno ani kanomoꞌa agesafinaga mage huno havie “Yisasiꞌa nagaife kanale kagesa hanea kano mainane.” huno hisiafene huno havige “Mukiꞌa veala tagamife nehane?” huno havige.
LUK 10:30 Havigegeno Yisasiꞌa mage hie “Nago Yuta kanoa Yelusalemu kumala ataleno Yeliko kumatega ugahe katega neꞌvigeꞌya nagoꞌa musufa vayaꞌmoꞌya katega ageteꞌya atafa huꞌya mukiꞌa afenomaꞌa hanafaleteꞌya aikolimainae. Aikoliteꞌya ataleꞌya vageno falisia kava huno maine.
LUK 10:31 Mainegeno ani yupa mono note kava kanoa ani kate taviana ani kanoa mo neꞌageno agaseno ka agegayalega umaine.
LUK 10:32 Umainegeno nago Yuta kanoa Livai nofi kanoa aniꞌa huno mo neꞌageno agaseno nago kaiyaga ka agegayalega umaine.
LUK 10:33 Naꞌa haꞌageno nagola Samelia kanoa kame kanoꞌamoꞌa anile neꞌeleti megeteno tusiꞌa hau hutene.
LUK 10:34 Hau huteteno avate umaineno masave tiꞌene nofi alagamo tiꞌene haemalaya amupina takino haꞌya kiteteno avaleno agaiꞌa toki afumo agupifi ateteno avaleno viaꞌyamo natu vaya nefayaya nopi moteneno kanale huno kava hutene.
LUK 10:35 Kava huteno mainegeno ko tigeno ani nomona nefana tole kina neꞌamino mage huno hapaiye ‘Kagaya kanaleꞌya huka mani kanoa kava huto. Nagoꞌa monekamoꞌma ani kanoleꞌma haꞌno hisigeꞌna nagaya eteꞌna anonakaꞌa kamigahue.’ huno hapaiye.”
LUK 10:36 Yisasiꞌa anima hia kea hu haꞌno hugahe mage hie “Naꞌa humainagi na kagesa nehavine? Taliꞌa (3) vayala agaseꞌya vageno hana kanomo musufa vayaꞌmoꞌya hae-malenaya kanomona alino kanapa vayaꞌmoya nehaya kavala hu-tene?” huno havige.
LUK 10:37 Higeno ani kahegi kema havilinea kanomoꞌa mage hie “Tusiꞌa hau hutenea kanomoꞌa kanapa vaya kana kavala hutene.” huno higeno Yisasiꞌa agaifena mage hie “Kagaya visanaꞌamoga mukiꞌa kanafina aniꞌageꞌya huo.” huno hapai-maine.
LUK 10:38 Yisasiꞌene agaiꞌaenema tokaeꞌya nemaiya anagala katega neꞌvageno Yisasiꞌa nago kumate vigeno nago aꞌmo agia Mataꞌe Yisasina avaleno nomaꞌafinaga umaine.
LUK 10:39 Umainegeno Matana negana agia Maliaꞌe Yisasina aiyafi mopale emaineno Yisasiꞌma hia kaiyekea nehavie.
LUK 10:40 Havino mainegeno nunaꞌamoꞌa, Mataꞌa, mukiꞌa kavela talo tala hiana agesamoꞌa tole-lole higeno Yisasite eno mage huno hie “Anumayamogae naganaꞌnimoꞌa natalegeꞌna nakaiꞌnige kavela tusiya huꞌna neꞌalugi ani yafena kagesa nohavino? Hapaigeno me naya hino.” huno hie.
LUK 10:41 Higeno Yisasiꞌa mage huno hie “Mataga mukiꞌa yafena kagesamoꞌa tole-lole huka aliꞌyana neꞌalinana havi kava nehane.
LUK 10:42 Nagoke yamaꞌage alisana kagesa havige havige huka maiyo. Maliaꞌa ani yafena agesa havi havi huno atafa nehigi ani yana nago kanomoꞌa hana-ofalegahie.” huno hapaiye.
LUK 11:1 Nago yupa Yisasiꞌa nago kotega maineno Anumaya-motega ke huno havige-maine. Havigeteno agaiꞌaene tokaeno nemaiya anagapiti nago kanomoꞌa mage huno havige “Anumayamogae Yoniꞌene tokaeꞌya nemaiya anagaꞌmogamina humavelimainea kavala huka ‘Naꞌa maꞌa hutama nunamuna hiho.’ huka hulavelio.” huno hie.
LUK 11:2 Higeno Yisasiꞌa mage huno hie “Nunamuma hinutamahena mage hutama hiho ‘Nelafaga kagai kagimoꞌa alu aotage huno hanesie. Kava yagaisana kanamoꞌa efalote hisie.
LUK 11:3 Mukiꞌa kanafima nesuna kavela tamio.
LUK 11:4 Tagaya havi kavaꞌma hulatenaya veala aigeꞌamateteta kefo yaꞌamia atalematona kava huka kefo yatia aigetateka atalelato. Sataniꞌma ayelavataga hisia katela tavaleka otato.’ hutama hiho.” huno hamapaiye.
LUK 11:5 Hamapaiteno mage huno hie “Hana kanomoga kege amuꞌnona negafute uka mage huka hugane ‘Nenafugae taliꞌa (3) maya yoka namisano?
LUK 11:6 Nago nenafuꞌa kategati eana nesia yana omalegi kanale namisano?’ hukama hisanageno negafuꞌa nomaꞌafinagati make huno kahapaisio ‘Kasalo nenahaegi natalo. Fita ago ki-maleteꞌna nafaꞌneyagaꞌniene ago fae-mainonanagita nagaya hetiꞌna nahavigana yana okamigahue.’ huno hisio?
LUK 11:8 Aꞌao tamahanepauve ‘Negafuꞌma mainoe.’ huno hisia yafena oꞌamigahigi tutuꞌma hia yafe hetino havigea yana amigahie.”
LUK 11:9 Ani yafe tamahanepauve Anumaya Kotitega nago yafema ke hutama havigesagenoꞌa ago tamamigahie. Nago yafema atiyesagenoꞌa afaꞌa tamaveligahie. Fitaleꞌma akalu-kaluma hisagenoꞌa Anumaya Kotiꞌa yakilamategahie.
LUK 11:10 Mukiꞌa havigesaya veaꞌmoya aligahae. Atiyesaya veaꞌmoya ali falote hugahae. Fitaleꞌma akalu-kalu hisaya veaꞌmogamina fita yakimategahie.
LUK 11:11 Hana kanomoga nafaꞌnekamoꞌa noyamehema kahavigesigeka nefaga osifaꞌvea alika amigano? Aꞌao ani yana alika oꞌamigane.
LUK 11:12 Kokole amufema kahavigesigeka yapavena alika amigano? Aꞌao ani yana alika oꞌamigane.
LUK 11:13 Oꞌamiganagi tamakaya havi veaꞌne mainayanagitama nafaꞌnetamimona kanale ya amamiyanagi ikapinaga mainea nelamafaꞌa tusiya huno tamakase-maineanagitama havigesageno Alu Aotage Avamuꞌa tamamigahie.
LUK 11:14 Nago kanomona Kefo Avamuꞌmoꞌa* aguꞌafi mainegeno avefuꞌna alino aiyahae higeno agea noꞌaiyane. Yisasiꞌa ani Kefo Avamula anati-talegeno vigeno ani kanomoꞌa age aino kea kea higeꞌya alitalu hu-mainaya veaꞌmoꞌya ageteꞌya tusiꞌa amamaꞌyo aimainae.
LUK 11:15 Amamaꞌyo neꞌaigeꞌya nagoꞌa veaꞌmoꞌya mage hae “Pielesepuliꞌa Kefo Avamuꞌyagale kava hu-mainea kanomoꞌa tokiyaꞌa amigeno Kefo Avamuꞌmona anati-neꞌatalie.” huꞌya hae.
LUK 11:16 Hageꞌya nagoꞌa vayaꞌmoꞌya aye-vataga hugahe mage hae “Monafinagati avame yana hugeta tokiyakaꞌa agamano.” huꞌya hae.
LUK 11:17 Hageno Yisasiꞌa amakupinagama ma haviya amaku amakesa ago haviteno mage hie “Nagoke kotega veaꞌmoꞌya aye fako huꞌya tuma hisayana ani kotega veaꞌnene haviya hu-lavigahae. Nago afamo aye fako huꞌya ‘Alu vaya mainone.’ huꞌya tuma hisayana ani afamola haviya hu lavigahae.
LUK 11:18 Sataniꞌa anagaꞌaenema aye fako huꞌya ‘Alu vaya mainone.’ amakaiꞌami tuma hisayana Satani kava yagaisia tokiya hanaꞌa huno hanegahie? Aꞌao tokiyaꞌa omalegahie ani yafe tamakaya nagaifena ‘Pielesepulimoꞌa tokiya kamigeka ani yateti Kefo Avamula neꞌanatine.’ hutama nehayanagi havige nehae.
LUK 11:19 Nagaifena ‘Kagaya Pelesepulimo tokiyaleti anati neꞌatalane.’ hutama hayanagi tamakaitami anagatamia Kefo Avamula amanati-talageno Pielesepulimo amakaila amaya nehio? Ani anagatamia amakaiꞌami manima haya kea ali fako huꞌya tamaveneliye.
LUK 11:20 Tamage nagaya Anumaya Koti tokiyaleti ani Kefo Avamula anati neꞌataloe. Ani yafe Anumaya Kotiꞌa kava yagaisia yana tamakaitela ago emaine.
LUK 11:21 Nagola tokiyaꞌage kanomoꞌma nomaꞌafima ati keveꞌa alino yagai-maleno maisiana mukiꞌa yamaꞌamoꞌa kanale huno hanegahie.
LUK 11:22 Nagola tokiyaꞌage kanomoma eno ani tokiyaꞌage kanoenema tuma hisaꞌana tokiyaꞌage kanomoꞌa agasesiana hagote kanomoꞌma ametitima huno mainea ati keveꞌa melino ani kanomo afeno yamaꞌa musufa alino vayaꞌamogami amamite amamite hugahie.
LUK 11:23 Nagoꞌa veaꞌmoꞌya nagai kanapa veaꞌne omaisayana kame vayaꞌniꞌa mainae. Nagoꞌa veaꞌmoꞌya sipi sipiꞌniꞌama naya huꞌya ali-taluma ohisayana amanati neꞌatalae.” huno hie.
LUK 11:24 Nago Kefo Avamuꞌmoꞌa vaya aguꞌafi haino maineleti ataleno viaꞌyamo hau hu-mainea kopinaga mo vaiyatete huno mai-faluma hisia kumafe ati neꞌaye. Ati ayegeteana mai-falu hisia kumala omalegeno “Hagoteꞌna maigeꞌna emainoa aguꞌafi eteꞌna mo maigahue.” huno hie.
LUK 11:25 Uno mogeana ani agupi ago sese huno kanaleꞌya hu-malenegeno mogemaine.
LUK 11:26 Mogeteno eteno viaꞌyamo seveniꞌa (7) kefo kavaꞌamimoꞌma agase-mainea Kefo Avamuꞌyaga momavaleno egeꞌya ani agupi hai-faleꞌya mainageno hagotenoꞌa ani kanomoꞌa nagoke Kefo Avamuꞌmoꞌa aguꞌafima mainegeno haviya huno maineanagino menia mukiꞌa Kefo Avamuꞌmoꞌya aguꞌafina haiꞌya maigeno tusiꞌa kefo ya hutafa huno maine.”
LUK 11:27 Mani kema higeꞌya anifima alitalu hu-mainaya veaꞌnefiti nago aꞌmoꞌa ala kefiti mage huno hie “Katetenoꞌma numa kaminea aꞌmona Anumaya Kotiꞌa tusiꞌa muse huno haiya yana amine.” huno hie.
LUK 11:28 Higeno Yisasiꞌa mage huno hie “Ani aꞌmoꞌa musena hugahianagi Anumaya Koti kema haviꞌya akave malesaya veaꞌmoꞌya tusiꞌa muse hugahae.” huno hie.
LUK 11:29 Mukiꞌa veala agaite melitalu hageno mage huno hamapaiye “Menia ma kanafima mainaya veaꞌmoꞌya tusiya huꞌya kefo veaꞌne mainae. ‘Tokiyaꞌage avame yana tavelio.’ huꞌya hayanagi Anumaya Kotiꞌa ani yana oꞌamamigahigi nagoke avame yana nayoma mainea aune kanoa Yonama hutenea tokiya avame yana tamaveligahie.
LUK 11:30 Yonana noyamemoꞌa asaga huno nakaigeno taliꞌa (3) yupa aipafinaga maineafe Ninive mainaya veaꞌmoꞌya avame yana amaveli-maineane. Nagaya ikapinagati emainoa kano vayaꞌmo natenea kanomoꞌna menia ma kanafima mainaya veaꞌmogamina nagaya aniꞌa kavala hisua kavaꞌniꞌa avame yana tamaveligahue.
LUK 11:31 Nagola alu haupalegati emainea sauve aꞌmoꞌa mopamona atupaleti eno Solomoniꞌa kanale agu agesaene kanomo kea havigahe emaineanagi haviho Solomonina agase-mainea kanoa ma mainegetama tamakaya agai kea nohaviye. Nohaviyafe Anumaya Kotiꞌa kaiyekema hulamatesia yupa ani aꞌmoꞌa hetino menia ma kanafima mainaya veafe kefo kava hutama agai kema ohavinaya yafena hu falote hulamategahie.
LUK 11:32 Ninive kumate mainaya veaꞌmogamina Yonaꞌa Anumaya Koti kea hamapaigeꞌya kefo yaꞌamihena amaipa aiyahae hu-mainagi haviho menia Yonana agase-mainea kanoa ma mainegetama tamakaya kefo yatamihena tamaipa aiyahae nohae. Tamaipa aiyahae nohayafe Anumaya Kotiꞌa kaiyekema hulamatesia kanamoꞌa Ninive kumate nayoma mainaya veaꞌmoꞌya hetiꞌya menia ma kanafima mainaya veaꞌmoꞌya havi kava hu-mainayafe hu falote hulamategahae.”
LUK 11:33 “Veaꞌmoꞌya lamua hanagaliteꞌya nopinaga hanesia komufinaga omalegahae. Susufaneletila aiso ohugahagi ani nopima hai falesaya veaꞌmoꞌya agesayafe sipale nemalae.
LUK 11:34 Tamaulagamoꞌa tamakupinaga aivasa hisia lamu hane. Tamaulagamoꞌa kanale yama agesiana tamakupinaga aivasa hu-mainegi tamaulagamoꞌa kefo yama agesiana tamakupinaga haniki-maine.
LUK 11:35 Tamakesa havilama hiho ‘Nagupinaga aivasa hu-maine.’ hutamama hisayana asu huno haniki-mainesia yafe hisagi kava yagaitama maiho.
LUK 11:36 Mukiꞌa tamaugafa aivasa hisigeno nagoke kaiyaga hanima okisiana lamumoꞌma aivasa hia avamete mukiꞌa lamakupinaga tusiya huno aivasa hugahie.” huno hie.
LUK 11:37 Nagola Falasia kanomoꞌa Yisasifena mage huno hie “Menia kagaya nagaiꞌene kavela me negane.” huno higeno Yisasiꞌa kave mo negahe Falasia kanomo nopi haino mopale maine.
LUK 11:38 Mainegeno ani Falasia kanomoꞌa mogeana Yisasiꞌa kaveꞌma negahena ayana sese ohuno* mopale maiya yafena agesa havi havi huno maine.
LUK 11:39 Mainegeno Yisasiꞌa mage huno hapaiye “Tamakaya Falasia* vayaꞌmogatama amega kava hutama masutamiene yopatamiene amega kaiyagaꞌa sese nehagi tamakupina musufa yaꞌene kefo yatamiene hiya hulamatenegetama sesela nohae.
LUK 11:40 Tamakaya aifoꞌnafo vaya mainageno Anumaya Kotiꞌa amega kaiyagaꞌage talo nehuno agusafinaga talo ohuneo?
LUK 11:41 Masutamiene yopatamienema hanesia kavela kasagoꞌya yaꞌamima omalenesia veaꞌmogamima amamisayana tamakuꞌamoꞌa oniꞌyaꞌage ohugahie.
LUK 11:42 Avoꞌnio Falasia vayaꞌmogatama kaꞌyeho. Tamakaya supu tala yaꞌene atuꞌene hefi kana yaꞌene osi osi yana alitama teniꞌa (10) malenafiti nagoke Anumaya Kotina neꞌamitama nehayanagi fatago hutama maisaya yaꞌene Anumaya Kotifema lamahaisia yaꞌene ago atalenae. Hagotetama fatago hutama mainetama Anumaya Kotifena tamahau tamayamopafi tamahau-maineanagitama haenagaꞌa supu tala yaꞌene atuꞌene hefi kana yaꞌene teniꞌa (10) malenafiti nagoke Anumaya Kotina amisayana kanale hugahie.
LUK 11:43 Avoꞌnio Falasia vayaꞌmogatama kaꞌyeho. Mono nopima neꞌutama ‘Kava vayayaga nemaiya sialefekeꞌya maigahune.’ hutama veaꞌne atagu nefaya kumapina ‘Nagaifena ala kano mainane huꞌya hisae.’ hutama nehae.
LUK 11:44 Avoꞌnio tamakaya kaꞌyeho. Tamakaya vaya hevaimatenaya komu kana hutama mainae. Tamakuꞌamoꞌa oniꞌyaꞌage higetama falaki-mainageꞌya veaꞌmoꞌya oniꞌyaꞌage yama hanea komufi vaya hevaitenaya komule oꞌageꞌya ute ete nehae.” huno hie.
LUK 11:45 Higeno nagola kahegi kema havilinea kanomoꞌa kenonaꞌa mage huno hapaiye “Hulavenelina kanomogae ani kema hanana tagaiꞌenefe tagaye hia ke nehane.” huno hie.
LUK 11:46 Higeno mage huno hie kahegi kema havilinaya vayaꞌmogatama tamakaifeꞌene nehugi avoꞌnio kaꞌyeho. Tamakaya kahegi ke malenaya ke hutama tusiꞌa kanaꞌage ya mukiꞌa veaꞌmogami amayoꞌnale malenetama amaya hugahena nagoꞌke tamakinagoa maletama amaya ohageꞌya tusiꞌa kana yakefa neꞌaliye.
LUK 11:47 Avoꞌnio kaꞌyeho. Tamakinago-moꞌya Anumaya Koti amaune vayaꞌa hamayageꞌya fali-mainayanagitama tamakaya anima fali-mainaya amaune vayaꞌmogami komulega vilasi hoya maitama nehae.
LUK 11:48 Vilasi hoya maitama nehayafe “Tamakinagomoꞌya amaune vayala hamayageꞌya fali-mainaya yafena kanale kava humainae.” hutama nehae.
LUK 11:49 Anumaya Kotiꞌa kanale agu agesaene kanomoꞌa mage huno humaine “Nagaya nagaiꞌni amaune vayaꞌene Aposolo vayaꞌene amakaipina visageꞌya nagoꞌa veaꞌmoꞌya ali haviya humateꞌya nagoꞌa veaꞌmoꞌya hamaesageꞌya faligahae.”
LUK 11:50 Hamayageꞌya fali-mainaya yafe ma mopama talo hu-mainoa kanafina aepa heꞌya mukiꞌa kafua amaune vaya hamayageꞌya fali-mainagi tamakaya meni kanafima mainaya veaꞌmogatama amakaiꞌma humatenaya havi kavaꞌmo anonaꞌamia aligahae.
LUK 11:51 Hagoteno Epolona haegeno fali-maineane. Nagoꞌa hamaeme hamaeme ageno haꞌno hutegeꞌya haenagalafa Sekalaiyana ala mono no kegiꞌyamo amuꞌnopi yafa folamole heti-mainegeꞌya hayageno fali-maineane. Nagaya tamage huꞌna tamahanepauve hamayageꞌya fali-mainagi tamakaya menima mainaya veaꞌmogatama hu-mainaya havi kavaꞌmo anonaꞌamia aligahae.
LUK 11:52 Avoꞌnio kahegi kema havilinaya anagaꞌmogatama kaꞌye ho. Mukiꞌa Yisasi kea havimainayanagi veaꞌmoꞌya ohavisae hutama fita ki-maletetama yakisaya ki nofila ago alitama atalenae. Tamakaya “Ani nopi ohaigahune.” hutama haleti nagoꞌa veaꞌmoꞌya “Hai falegahune.” huꞌya haya veaꞌmogamife “Hai ofalegahae.” hutama katile neꞌamatae huno hamapaiye.
LUK 11:53 Yisasiꞌa ani nopiti hati-lavigeꞌya mukiꞌa kahegi kema havilinaya anagaꞌene Falasia vayaꞌene akave neꞌuꞌya tusiya huꞌya amaipa kafa heteteꞌya amata huꞌya alu yafe alu yafe agaila havige havige nehuꞌya mage hae “Agaiꞌama hisia keleti atafa huta kaiyekea hutegahune.” huꞌya humainae.
LUK 12:1 Ani kava higeꞌya ohavunamaꞌa veaꞌmoꞌya alitalu humainaya yapina nagoꞌa veaꞌmogami amaiya aye latapemo huꞌya mainageno Yisasiꞌa agaiꞌenema tokaeꞌya nemaiya anagaꞌamogamife nagoꞌa veaꞌnenefe mage huno hie “Falasia vayaꞌmoꞌya amakupima hanea yana agelama ohuꞌya amavayaleti havigema nehaya yafena kaꞌyeho. Ani yana kai hamemoꞌma halegia kava huno halegino alakefa hugahie. Tamakaya ani yafena kaꞌyeho.
LUK 12:2 Aiso humainea yamona Anumaya Kotiꞌa mukiꞌa alino fufute atalegahie. Falaki-mainesia yamona Anumaya Kotiꞌa mukiꞌa veaꞌmogami amaulagafi ali falote hugahie.
LUK 12:3 Hanipinaga hu-mainesaya kea veaꞌmoꞌya yagefi havigahae. Notamifinaga sumi sumi hutama hu-mainesaya kea kuma amuꞌnopiti ala kefiti keha keha huꞌya hugahae.”
LUK 12:4 Nenafugatama tamahanepauve amega tamaugafaꞌage hefalisaya veafena kolia ohiho. Ani veaꞌmoꞌya tamaku tamameꞌene tamahae falisaya himamuꞌamia omalene.
LUK 12:5 “Hana kanomofe kolia hisune?” hutama hayanagiꞌna tamahapaigahue. Hefalitenoꞌma hanimo aguꞌafi ata tegelege nehia yapi tamaku tamamema hagaꞌyu hulama-talesia tokiyaꞌama hanea kanoa, Anumaya Kotifeke tusiya hutama koliꞌa hiho huꞌna tamahanepaugi Anumaya Kotifeke koliꞌa hiho.
LUK 12:6 “Faefuꞌa (5) osi osi namayaga tole haesa moneleti miya nehayanagi Anumaya Kotiꞌa ani nama nagokefena agelaꞌokanino amakaifena agesa havi havi huno mainegi tamakaitamifiti nagokeꞌmoga mukiꞌa namayaga agasetama mainayanageꞌya veaꞌnea ala yaga mainae. Anumaya Kotiꞌa mukiꞌa hanea tamayolagefa ago hapalino haviline. Kolima hisaya yana neꞌataletama afaꞌa maiho. huno hie.”
LUK 12:8 Tamahanepauve nago kanomoꞌma veaꞌmogami amaulagafi nagaifema “Yisasina naguꞌa amitafa humainoe.” huno hu falote hisigeꞌna nagaya ikapinagati emainoa kanoa vayaꞌmo natenea kanomoꞌna Anumaya Koti ensole anagaꞌmogami amaulagafina agaifena “Nagai nafaꞌne maine.” huꞌna hu falote hugahue.
LUK 12:9 Hu falote hugahugi nago kanomoꞌma veaꞌmogami amaulagafi nagaifema “Naguꞌa amitafa nohue.” hunoꞌma hufalote hisigeꞌna nagaya Anumaya Koti ensole anagaꞌmogami amaulagafina ani kanohena “Oꞌagenoa kano maine.” huꞌna hugahue.
LUK 12:10 Nagoꞌa veaꞌmoꞌya ikapinagati emainoa kanoa vayaꞌmo natenea kanomonihema hu-haviya hunatesayana Anumaya Kotiꞌa aigeꞌamateno ani kefo yaꞌamia atalemategahigi veaꞌmoꞌya Alu Aotage Avamuꞌmofema hu-haviya hutesayana Anumaya Kotiꞌa aipa haviya huno aigeꞌamateno ani kefo yaꞌamia ataleoꞌamategahie.
LUK 12:11 Nagai kema huhaletama hisaya yafena kaiyeke hulamategahae. Tamavaleꞌya mono nopi ala kaiyeke hulamate vayate visagetama kolia hutama “Kenonaꞌamia naꞌane ke hisune?” hutama tamakesa kuꞌmoꞌa ohiho.
LUK 12:12 Ani yupa kanoꞌa Alu Aotage Avamuꞌmoꞌa “Mage hiho.” huno tamahapainagetama hugahae.
LUK 12:13 Anima alitalu hu-mainaya veapiti nago kanomoꞌa Yisasina mage huno havige “Humavenelina kanomogae nepuꞌnimona hapaigeno nelaꞌafaꞌma ataleno fali-mainea afenopiti fako huno nagoꞌa namisie.” huno havinege.
LUK 12:14 Havigegeno kenonaꞌa Yisasiꞌa mage huno hapaiye “Nagaya kaiyekea huꞌna fako hisua kanoa omainoe.” huno hapaiye.
LUK 12:15 Hapaiteno Yisasiꞌa amakaifena mage huno hie “Tamakaya maihao hutama maiho. Alu kanomo yafena agetama tamahaꞌyea ohiho. Nago kanomoꞌa kasagoꞌya afenomaꞌa haneanagi ani afenomaꞌamoꞌa kanaleꞌya huno maisia haimula oꞌamigahie.”
LUK 12:16 Nago avame kea mage huno hamapaiye “Tusiꞌa afenomaꞌa hanea kanomona hoyaꞌafina tusiya huno alaga aye-maine.
LUK 12:17 Aye-mainegeno agesafinaga mage huno havimaine ‘Na ya hisue? Kaveꞌnia aliꞌna halaꞌya hisua nona omaleanagiꞌna hanaꞌa hisue?’
LUK 12:18 Maꞌa hisue. Yu noꞌyagaꞌniꞌa tagape aitaleteꞌna ala noꞌyaga kasagoꞌya kigahue. Kiteꞌna mukiꞌa kaveꞌniꞌaene afenoꞌyaniꞌaene anifi halaꞌya hu-malegahue.
LUK 12:19 Hu-maleteꞌna nagaiꞌnihena mage huꞌna hugahue ‘Nagu nagesamoga mukiꞌa kafua nesua kaveꞌene afenoꞌyaniꞌaene ago halaꞌya hu-malenogi menia nagaya maifalu huꞌna maineꞌna kaveꞌniene tiniꞌaene nege nege nehuꞌna muse huꞌna maigahue.’ huno humaine.
LUK 12:20 Hianagi Anumaya Kotiꞌa agaifena mage huno humaine ‘Ani kava hana kavala aifoꞌnafo kano kana kano mainananagika meni kegela kahaimula kahafalesugeka faligane. Falitesanageꞌya talo tala humalenana afenoꞌyagakaꞌa taꞌya aligahae?’ huno humaine.
LUK 12:21 Huteno Yisasiꞌa mage huno hie nagoꞌa veaꞌmoꞌya amakaiꞌami amaugafa aliꞌya haisaya yafe mone afenoꞌamia halaꞌya nehayanagi Anumaya Kotiꞌa musema hisia kavala aliꞌya halaꞌya nohayafe ani kanomoꞌma humainea kava kana veaꞌne mainae.” huno humaine.
LUK 12:22 Tuelufuꞌa (12) anagaꞌamogamife mage huno hamapaiye “Ani yafena nagaya tamahanepauve kanale hutama maisaya yaꞌene kave nesaya yaꞌene ti nesaya yaꞌene tamakesa havi havi ohiho. Tamaugafale kena failisaya yafeꞌene tamakesa havi havi ohiho.
LUK 12:23 Kave neyana aifa letale yanagi kahaimuna kanaleꞌya huka maisana yana kanale ya hane. Kena failisana yana amegale yanagi veaꞌnea tokiya ya mainae.
LUK 12:24 Hakiki namayaga ageho. Amakaya avina yana ofaiꞌya kavela hoyafinagatila noꞌaliye. Kave malesaya noꞌamiene yu noꞌamiene omaleneanagi Anumaya Kotiꞌa kavela afaꞌa neꞌamamie. Tamakaya namayaga amakase-mainaya veaꞌne mainayafe tamakaiꞌene kava yagailamategahie.
LUK 12:25 Tamakaitamifitila nago kanomoꞌa ‘Ofaliꞌna nagoꞌene maime maime haigahue.’ huno tokiyaꞌage agesa havisiana anima havia katela hanaꞌa huno falote hugahie? Aꞌao falote ohugahie
LUK 12:26 Ohugahigi ani osi ya kanoꞌa ohaleꞌasine naꞌa higetama nagoꞌa maisaya yafena tamakesa havime havime nehaiye?
LUK 12:27 Ageho talapinaga hanea vilasiyamoꞌya haiꞌya ausea nehae. Aliꞌyana aliꞌya kenaꞌamia talo huꞌya fainoꞌaligi kanale kenaꞌami hanegeꞌna nagaya tamahanepauve nayoma mainea ala sauve kanotamia Solomoniꞌa kanale kenaꞌa failianagi ma vilasiyamoꞌya kanaleꞌya huꞌya agase-mainae.
LUK 12:28 Tala yana meni kanafina hoyafina haneanagi ega hataga huꞌya atafi atalegahagi Anumaya Kotiꞌa ani tala yana kava yagaigeno kanaleꞌya humainegi tamakaya mukiꞌa veaꞌmogatama nagaifena tamakupi maletama tamametitia osi kanoꞌa nehagi Anumaya Kotiꞌa aniꞌa huno tamakaila kenatamia alino hilato hulamategahie.
LUK 12:29 Ani yafe ‘Kaveꞌene tiꞌene na ya negahune?’ hutama tusiꞌa tamakesa havi havi ohiho.
LUK 12:30 Naꞌa yafena ma mopale mainaya veaꞌmoꞌya Anumaya Koti kema nohaviya veala amakesa havi havi huꞌya nemaigi Nelamafaꞌa nesaya yaꞌene kena failisaya yaꞌenefena ago havimaine.
LUK 12:31 Havimaineafe tamakaya ani kavala ohutama Anumaya Kotiꞌma kava yagaisia kumate visayafe tamakesa havi havi hutama maisayana Anumaya Kotiꞌa ani yaꞌene mukiꞌa kavetamiene kenatamiene tamamiteno ani kumatela tamavaleno tamategahie.” huno hie.
LUK 12:32 Nenafugatama tamakaya osi kanoꞌa sipi sipia mainagi kolia ohiho. Nelamafaꞌa kava humainea kumatela utama visageno kava yagailama-tesigetama maisayafe agesa havino mainegi kolia ohiho.
LUK 12:33 Ani agesa havimaineanagitama afenoꞌyatamia alitama afenoꞌyaꞌami omalesia veaꞌmogami amamiho. Na kava hisayana ikapinaga muse yatamia talo hugahae. Ani ikapinaga muse yana haꞌno ohugahie. Musufaya nehaya vayaꞌmoya musufayama hugahena ani kumatela oꞌugahae. Hakaꞌnomoꞌa ali haviya ohugahie.
LUK 12:34 Muse yatamima malenesaya kumatefe tamakesa havi havi hutama ani kumate visaya tamaku tamakesa havitama maigahae.
LUK 12:35 Yisasiꞌa mage huno hie “Ala kanoma esiafe kenatamia alitama aupa hutama failinetama tamamu nofila hulinetama kaꞌnitamia aye haletama maiho.
LUK 12:36 Nagoꞌa aliꞌya vayaꞌmoꞌya ala kanoꞌamimofe agava maisaya kava hutama maiho. Ani ala kanomoꞌa aꞌma alisia imulegati eteno no fitaꞌaleꞌma me kalu-kalu hisigeꞌya aupaꞌa hetiꞌya yakitesayafe agava mainae. Tamakaya aniꞌa hutama nagava maiho.
LUK 12:37 Ala kanoma emainea kanafina hetiꞌya maineꞌya agavama mainaya aliꞌya vayaꞌamoꞌya tusiꞌa muse huꞌya maigahae. Tamage tamahanepauve ani ala kanomoꞌa kenaꞌa ali aupa huno failineno aliꞌya vayaꞌahe ‘Mopale maiho.’ huno humateteno kavela amamite amamite hugahie.
LUK 12:38 Kege amuꞌnopi esio? Kokolemoꞌa agea oꞌainesigeno esio? Esigenofena hetiꞌya agava maisaya aliꞌya veaꞌmoꞌya tusiꞌa muse hugahae.
LUK 12:39 Tamage huꞌna tamahanepauve nomona nefaꞌma musufaya hisia kanomoꞌa nomaꞌafi ehai falesia kanahema havimaineleꞌasina nomaꞌa ataleno oꞌvigeno nomaꞌafina ehaino musufayana ohileꞌasine.
LUK 12:40 Tamakaiꞌenena talo tala hiho. ‘Menia omegahie.’ hutama hisaya kana kanoꞌale ikapinagati emainoa kanoa vayaꞌmo natenea kanomoꞌna egahue.” huno humaine.
LUK 12:41 Pitaꞌa mage huno humaine “Anumayamogae tagaifekeꞌya ani avame kaiyekea tahanepaino ifi mukiꞌa veaꞌne havisae?” huno havigemaine.
LUK 12:42 Anumayamoꞌa mage huno humaine “Aliꞌya kanomoꞌa kanale agu agesa hanea kanoa aliꞌyamaꞌa agegeno alige alige nehia kanoa tamakaipina hanate maine? Aniꞌama humainea kanomofe kava kanomoꞌa mage hugahie ‘Mukiꞌa aliꞌya veate yagai-maineka kavela fako faka huka mukiꞌa kanafina amamite amamite huo.’ huno hugahie.
LUK 12:43 Hugahigi haenagaꞌa ani ala kanomoꞌa eteno esigenoꞌa hapai-mainea augafa kavaꞌma hinagenofena ani aliꞌya kanomoꞌa muse hugahie.
LUK 12:44 Tamage huꞌna tamahanepauve aniꞌama humainesia aliꞌya kanomofena ala kanomoꞌa mage hugahie ‘Mukiꞌa yaniꞌa kava yagaiyo.’ huno hugahie.
LUK 12:45 Hugahianagi ani aliꞌya kanomoꞌa agaiꞌa agesafinaga mage huno havisiana ‘Kava kanoꞌnia menia hivi huno omegahie.’ nehuno agaiꞌa aliꞌyate kava yagai-mainesia vegi munaꞌnegi nehamaeno ala kanomo kavela tina neno havilina neno aneginagi nehuno ‘Omegahie.’ huno hisia yupaene kanaꞌaene kava kanoa egahie. Enunoꞌa ani havi kavaꞌma humainea kanomona kaꞌyo kevia ami-maleteno alino haviya huteteno mage hugahie nagaiꞌma veganokano hunenataya veaꞌnene umaiyo huno hutegahie.
LUK 12:47 Nago aliꞌya kanomoꞌa agaiꞌa ala kava kanomona haiya kavafena ago havitenoꞌagi kava kanomona haiya kavala ohuno talo talaꞌma ohunesiana ala kava kanomoꞌa agaila alakefa huno haegahie.
LUK 12:48 Haegahigi nago aliꞌya kanomoꞌa ala kanomona haiya kavafema ohavino havi kavaꞌma maino nehisigenoꞌa ala kava kanomoꞌa ako huno haegahie. Mukiꞌa yama ali-mainaya veafena ‘Anonaꞌa etetama mukiꞌa yaniꞌa namiho.’ huno hugahie. Mukiꞌa yamaꞌa amamigeꞌya ali-mainesaya veafena ‘Anonaꞌa aꞌva monene etetama menamiho.’ huno hugahie.”
LUK 12:49 Yisasiꞌa mage huno hie “Nagaya ma mopafi ata kaesugeno tesia yafe emainoe. Ani atamoꞌa aupaꞌa tesie huꞌna nagu nagesa nehavue.
LUK 12:50 Nahaesagenofena nagaila tusiꞌa nagata aigahie. Aupaꞌa huꞌya onahaesaya yafe nagu nagesa havua nagesamoꞌa hivi huno talavaꞌnote.
LUK 12:51 Tamakaya na tamakesa nehaviye? ‘Ma mopale taipa falu huta maisuna yana tamigahe Yisasiꞌa emaine.’ hutama nehafi? Aꞌao nagaya tamakaila ali fako hisua yafe emainoe.
LUK 12:52 Meni kanafina aepa heꞌya faefuꞌa (5) afamola nagoke nopi nemaisaletila tolemogania (2) taliꞌamogamina (3) kame humategaꞌe. Taliꞌamoꞌya (3) tolemoganina (2) kame hunategahae.
LUK 12:53 Mago afamotalamogania nefaꞌa agaiꞌa nafaꞌnemona kame hutesigeno nafaꞌneꞌamoꞌa agaiꞌa nefana kamea hutegahie. Nago tayametalamogania itaꞌamoꞌa munaꞌamona kame hutenageno munaꞌamoꞌa itaꞌamona kamea hutegahie. Vemona itaꞌamoꞌa anofeloꞌamona kame hutenageno anofeloꞌamoꞌa aniꞌa huno nevena itaꞌamona kamea hutegahie.” huno humaine.
LUK 12:54 Alitalu humainaya veaꞌmogamifena mage hie “Tamakaya yagemoꞌma tavi nefalelegati siaꞌmoꞌma evaꞌyi higetamahena aupaꞌa mage nehae ‘Ko aigahe nehie.’ hutama nehageno ani yana tamage huno falote nehie.
LUK 12:55 Oko ikama agetetama ‘Amukoꞌage hugahe nehie.’ hutama nehageno ani yana tamage huno falote nehie.
LUK 12:56 Tamakuꞌafina havitama omaletama amegati kea nehaya vagala veala tamakaya mopale yaꞌene ikate yaꞌene agelama hutama neꞌagayanagi naꞌa higetama meni kanafima falote hia kavala agelama hutama noꞌagae?” huno humaine.
LUK 12:57 “Naꞌa higetama fatago kavafena tamakaitamia tamakesa havilama hutama nohaviye?
LUK 12:58 Nago kanomoꞌma ‘Haviya hunatanageꞌna kaiyeke hugategahe nehue.’ hunoꞌma kavaleno vinagetana kaiyekema havi kanomoteꞌma ugahema neꞌutana ‘Nenafuga kaipa falu hisia yana kamigahue.’ huka hapaiyo. Aniꞌa ohisanana kavaleno kaiyekema hugatesia kanomote vinageno ani kea haviteno ati vayaꞌmogami ayapi katesigeno kavaleno nofila hugategahie.
LUK 12:59 Nofi hugatesigekahena kaiyekema hugatenea kanomoꞌma ‘Mone namio.’ huno hu-mainesia yamaꞌa oꞌaminukahena nofi nopitila ataleka omegane.” huno humaine.
LUK 13:1 Ani yupa nagoꞌa vayala Kalili vayafe Yisasina kea hapaigahe eꞌya mage hae “Ani Kalili vayaꞌmoꞌya Anumaya Koti muse yama amigahena sipi sipi nehageno Pailatiꞌa, kava kanomoꞌa, ati vaya humategeꞌya me hamayageꞌya faligeno kolaꞌamiene sipi sipi afuma haya kolaꞌamoꞌene nagopi tavi-maine.” huꞌya hae.
LUK 13:2 Hageno Yisasiꞌa mage huno hie “Kalili vayaꞌma fali-mainaya vayaꞌmogami kefo yaꞌamia nagoꞌa Kalili vayaꞌmogami kefo yaꞌamimona ago amakaseno hai-mainea yafe fali-mainae hutama tamakesa nehavio?
LUK 13:3 Tamahapauve ani vayaꞌyaga kefo yaꞌamia ala huno otamakaseneanagi tamakaya kefo yatamihena tamakuꞌa aiyahae ohisayana aniꞌa hutama faligahae.
LUK 13:4 Nago yupa Siloamu kumate ayaꞌaya nona tagape ailavino eitiniꞌa (18) vaya hamaegeꞌya fali-mainaya kea havilinao? Na tamakesa nehaviye ani vayaꞌmogami kefo yaꞌamimoꞌa nagoꞌa Yelusalemu mainaya veaꞌmogami kefo yaꞌami ago amakaseno hai-maineafe fali-mainae hutama tamakesa nehavio?
LUK 13:5 Tamahanepauve anima fali-mainaya vayala kefo yaꞌamimoꞌa ala huno otamakasenegi tamakaya kefo yatamihena tamakuꞌa aiyahae ohisayana aniꞌa hutama faligahae.”
LUK 13:6 Yisasiꞌa nago avame kea huno mage hie “Nago kanomoꞌa hoyaꞌafina figi yosa hane. Nago yupa alagaꞌa tagigahe vianagi alagaꞌa omale.
LUK 13:7 Omalegeno hoyafi aliꞌya neꞌalia kanomofe mage huno hie ‘Havio nagaya taliꞌa (3) kafu alaga aligahe ete ete huanagi alaga omalene. Oꞌayeneafe ani yosa atagi-talo. Naꞌa higeno mopamona limaꞌa afaꞌa nenegeꞌna alu yosa faisue huꞌna nehue.’ huno hie.
LUK 13:8 Higeno hoyafi aliꞌya kanomoꞌa mage hie ‘Musekaꞌa nehugi ma kafuene atalegeꞌna hafuꞌyafina aipopoꞌma huꞌna afumo aifa kateꞌna maleꞌna agano.
LUK 13:9 Malesugeno nago kafuleꞌma alagaꞌa ayesio? Oꞌayesigeka afaꞌa atagi-talegane.’ huno humaine.”
LUK 13:10 Nago Sapati yupa Yisasiꞌa nago mono nopi maineno humavenelie.
LUK 13:11 Humaveneligeno nagola kali neꞌalia alagino ani nopina maine. Ani aꞌmona aguꞌafina Kefo Avamula hai fale-maineno tusiꞌa kali neꞌamigeno eitiniꞌa (18) kafu ani kalia ali-maineanagino akaveꞌya ayamufamoꞌa fagagigeno hetino fatago huno nomaiyane.
LUK 13:12 Yisasiꞌa ageteno ke huno mage huno hie “Ma aꞌmogae kalikaꞌa ago ali neꞌataloe.” huno hie.
LUK 13:13 Nehuno ani aꞌmo augafale aya malegeno anile aupaꞌa akaveꞌya aifatago higeno hetino maineno Anumaya Koti agia alisaga humaine.
LUK 13:14 Nehigeno ani mono nopi soka kanomoꞌa Yisasiꞌma Sapati kanaleꞌma hutea yafena aipa kafa heteteno mukiꞌa veafe mage huno hamapaiye “Aliꞌya kana sikisiꞌa (6) kana hanegi kalitima alino kanale hisie hinutamahena ani aliꞌya kanale eho. Sapati kana kalitami alilino kanale hulamatesia yafena omeho.” huno humaine.
LUK 13:15 Higeno Anumayamoꞌa kenonaꞌa mage huno hie “Tamakaya tamakuꞌafina havi omaletama amegati ke nehaya vagala vayaꞌmogatama tamakaya mukiꞌamogatama Sapati yupa toki afuene pulamakatamiene noꞌamifina mo kalu hetama ti amigahena amavaletama neꞌvayane.
LUK 13:16 Naꞌa nehayanagi ma aꞌmona Apalahamu aginagomona Sataniꞌa eitiniꞌa (18) kafu nofi hutegeno kalia ali-maineafe Sapati yupa ani yana ali kalu hetaloa yafe ‘Havi kava hane.’ hutama nehao?” huno humaine.
LUK 13:17 Higeꞌya kame vayaꞌamoꞌya tusiꞌa amakaye higeꞌya mukiꞌa veaꞌmoꞌya kanale kava hia yafe tusiꞌa muse humainae.
LUK 13:18 Yisasiꞌa mage huno hie “Anumaya Kotiꞌma kava yagaisia kavaꞌmoꞌa ma kava humaine? Hanaꞌa huꞌna maꞌa augafa yana hane huꞌna tamahapaisue?
LUK 13:19 Ma osi osi alagamoꞌma hia avamete nehie. Ani alagamo agia masatatie. Osi osi alagama nago kanomoꞌa alino hoyafima fai-malegeno hageteno haino haino ala yosagefa hanegeꞌya namayagamoꞌya akopale noꞌamia ki-mainae.” huno hie.
LUK 13:20 Nagoꞌene mage huno hie “Anumaya Kotiꞌma kava yagaisia kavafena hanaꞌa huꞌna maꞌa yana hane huꞌna tamahapaisue?
LUK 13:21 Kaihamema hale negia avamete humaine. Nago aꞌmoꞌa ani kaihamema halegisia yana alino taliꞌa (3) ala yopafi taꞌnefa falauvaꞌene ali havigu higeno haenagaꞌa mukiꞌa taꞌnefa falauvaꞌmoꞌa halegi-maine.” huno hie.
LUK 13:22 Yisasiꞌa Yelusalemu ugahe osiꞌosi kumaꞌyagaleꞌene ala kumaꞌyagaleꞌene uno humavelie.
LUK 13:23 Humaveneligeno nago kanomoꞌa mage huno havige “Anumayamogae Anumaya Kotiꞌa naꞌmagi veaꞌne amaku amamena aligatigahie? Osiꞌa veaꞌnefi kasagoꞌya veaꞌne?” huno higeno Yisasiꞌa alitalu humainaya veaꞌmogamina mage huno hamapaiye “Anumaya Koti kumateꞌma visaya fiana osi fia kanoꞌa hane. Ani fiapima vinutamahena tamayamufa alitama tokiyaꞌage hutetama hai falegahae. Hai falegahagi kasagoꞌya veaꞌmoꞌya ‘Hai falesune.’ huꞌya hugahayanagi amukoꞌamia omaleneanagiꞌya hai ofalegahae.
LUK 13:25 Haenagaꞌa ani noteꞌma kava yagai-mainea kanomoꞌa hetino fita alino kilamatesigetama fiate heti-mainetama fitale aiko nelitama mage hutama hugahae ‘Anumayamogae fita yakilato.’ hutama hisagenoꞌa mage hugahie ‘Nagaya otamakenoane. Tamakaya hanategati aya veaꞌne neꞌae?’ huno hulamategahie.
LUK 13:26 Hulamatesigetama mage hutama hugahae ‘Kagaiꞌene kavela nenonane. Tagai kumate kaiyekea tahapai-mainana kano mainane.’ hutama hugahae.
LUK 13:27 Hugahayanagi mage huno hulamategahie ‘Ago tamahanepauve tamakaila otamakenoane. Hanategati aya veaꞌne neꞌae? Kefo kavakeꞌya ali falote hutama nehaya vealagi nagaitegatila mai-haletama viho.’ huno hulamategahie.
LUK 13:28 Tamakaya mogesayana Apalahamuꞌene Aisakiꞌene Yekopuꞌene Anumaya Koti amaune vayaꞌene Anumaya Koti kumatela mainesagetama mogegahayanagi tamakaya anilela oꞌugahayanagitama malaga mainetama tusiya hutama avia neꞌatetama tamakaitami tamaugafahena tusiꞌa kalagi aigahae.
LUK 13:29 Nagi mukiꞌa veaꞌmoꞌya yagemoꞌma tavi nefalelegatiꞌene evaꞌyi nehilegatiꞌene aluga aluga haupalegatiꞌene Anumaya Koti kumate melitalu huꞌya siale maineꞌya kavela negahae.
LUK 13:30 Haviho meni kanafina nagoꞌa veaꞌmoꞌya haenagalafa mainaya veaꞌmoꞌya uhagoteꞌya maigahae. Hagoteꞌya mainaya veaꞌmoꞌya haenagalafa maigahae.” huno hamapaiye.
LUK 13:31 Higeꞌya ani kanafina nagoꞌa Falasia vayaꞌmoꞌya mage me hae “Ma kumala ataleka alu kumate vuo. Helotiꞌa ala kava kanomoꞌa ago kahaegahe nehie.” huꞌya humainae.
LUK 13:32 Hageno Yisasiꞌa mage hie “Tamakaya utama ani afai kalamona, kesi kate vaiyatete nehia kalamona, nagayama hisua kea mage hutama hapaiho ‘Havio nagaya osi kanaꞌa Kefo Avamula veaꞌmogami amakuꞌafiti ali-taleteꞌna kali veaꞌnene aliꞌna kanale humateteꞌna taliꞌa (3) kanale aliꞌyaniꞌa ali avaya ayegahue.’ huꞌna tamahapai-mainoa kea mo hapaiho.” huno hamapaiye.
LUK 13:33 Hamapaiteno “Anumaya Koti aune kanomona alu kumatela ohaegahayanagiꞌya Yelusalemuge haegahae. Ani yafe nagaya meniene egaene olagaene kate vaiyegahue.
LUK 13:34 Vaeha Yelusalemu mainaya veaꞌmogatama tamakaya Anumaya Koti amaune vayaꞌyaga nehamaetama yafa kaꞌyo alitama Anumaya Koti humategeꞌya tamakaitega emainaya vayala yafa kaꞌyoteti tavata hamae-mainayanagi nagaya mukiꞌa yupa a kokolemoꞌa nafaꞌneꞌama agekoꞌnafinagama alitalu nehia avamete huꞌna tamakaila nagaya nagaiꞌniꞌale alitalu hulamategahe nehugetama tamakaya ‘Ani kavala ohuo.’ hutama nehae.
LUK 13:35 Haviho ma mainaya kumatefena Anumaya Kotiꞌa ago ataleno ‘Aoteꞌyamaꞌae.’ huno humaineanagitama menia nagoꞌene onagegahagi ‘Anumayamo aliꞌya aligahe higeno hutenea kanoa Anumaya Koti kanale manu amisie.’ huꞌya hisaya kanafi nagoꞌene nagegahae.” huno humaine.
LUK 14:1 Nago Sapati yupa Yisasiꞌa Falasia vayate kava humainea kanomo nopi kave mo nenegeꞌya nagoꞌa Falasia vayaꞌmoꞌya Yisasina ageꞌya mainae.
LUK 14:2 Mainageno nagola augafa halegimai kanoa, faligahe nehia kanoa, anile maine.
LUK 14:3 Mainegeno Yisasiꞌa ani kanoa ageteno ani nopi mainaya Falasia vayaꞌene kahegi kema havilinaya vayaꞌene mage huno hamavige “Sapati kanafina kaliꞌamia alino kanale hutesia yana kanale yapi havi yane? Tamakai mono kemoꞌa naꞌane nehie?” huno hamavige.
LUK 14:4 Hamavigegeꞌya ani vayaꞌmoꞌya nagola osi ke kanoꞌa ohuꞌya afaꞌa mainageno Yisasiꞌa ani kali kanoa atafa hulineno kaliꞌa alino kanale huteteno atalegeno umaine.
LUK 14:5 Vigeno Yisasiꞌa mage huno hamavige “Hana kanomoga Sapati kanafima nafaꞌnekafi pulumakafi komufima tavi-mainesigetama ‘Sapati yupae.’ hutama anifinaga atalesafi ifi aupaꞌa amavayu hugahae?” huno hamavige.
LUK 14:6 Hamavigegeꞌya mukiꞌa vayaꞌmoya kenonaꞌa kea ohuꞌya mainae.
LUK 14:7 “Kaveꞌma me neho.” huno ke higeꞌya emainaya vayaꞌmoꞌya “Ala kanomo nemaiya siale emaisune.” huꞌyama nehaya kavala Yisasiꞌa ageteno ani kavaꞌma nehaya yafena mage huno hamapaiye.
LUK 14:8 “Nago kanomoꞌa kagaifema ‘Ala imuleꞌma eno.’ huno kema hinageka vinukahena ala kanomo nemaiya sialela uomaiyo. Havigu anile mainesanageno nago kanoa kagaseno mainesia ala kanomofe ke hinagenoꞌma emainesigeno kava kanomoꞌa kagaifena mage me hugahie ‘He-tio. Ala kanomo sialelagi kagaya omaiyo.’ huno hugatesigeka kagaye nehinageka akavelaga mo maigane.
LUK 14:10 Nago kanomoꞌma kagaifema ‘Ala kave meno.’ huno kema hinageka vinukahena osi kanomo mainesile mo maiyo. Mopale mainesanageno kagaifema ke humainesia kanomoꞌa megagesiana hinagenoꞌa mage huno hugahie ‘Nenafugae malela omaika neꞌataleka ala kanomo siale haisaga humaika maiyo.’ huno hugategahie. Ani kema hisigeꞌya mukiꞌa anile mainesaya veaꞌmoꞌya kagai kagi alisaga hugahae.
LUK 14:11 Nagoꞌa veaꞌmoꞌya ‘Ala vaya mainonanagita tagia alisaga hugahune.’ huꞌya hisagenoꞌa Anumaya Kotiꞌa ‘Afa vaya mainae.’ huno humategahigi nagoꞌa veaꞌmoꞌya ‘Tagia omale veaꞌne mainone.’ huꞌya hisagenoꞌa Anumaya Kotiꞌa ani veaꞌmogami amakia alisaga hugahie.” huno hie.
LUK 14:12 “Kavela me neho.” huno ke humainea kanomofe Yisasiꞌa mage huno hie “Ala imuma kigahena mukiꞌa kameta negafuꞌene kafukaganaꞌene kagaika nofi vayaꞌene moneꞌamima hanesia veaꞌneheke ‘Kave me nesae.’ huka kea hu oꞌamato. Haenagaꞌa kagaife ‘Kave meno.’ huꞌya hisagekama mo nesanana anonakaꞌa hai ali-mainane.
LUK 14:13 Hai ali-mainanagi ala imuma kigahena maꞌa veafe kea huo moneꞌamima omale veaꞌnegi amaugafa haviya humai veaꞌnegi amaiya haviya humai veaꞌnegi amaulaga asu humai veaꞌnegi huka ke hisanageno Anumaya Kotiꞌa muse yana kamigahie. Ani veaꞌmoꞌya anonaꞌa kavekale kamisaya amakula omalenea yafe kagaya muse hisanageno fatago humainaya veaꞌnema fali-mainesafiti hetisaya kanafina Anumaya Kotiꞌa agaiꞌa anonakaꞌa kamisigeka muse hugane.”
LUK 14:15 Nago kanomoꞌa Yisasiꞌene maineno kave neneno Yisasi kea haviteno mage hie “Nagoꞌa veaꞌmoꞌya Anumaya Koti kava yagaisia kumate haiꞌya maineꞌya kavela neneꞌya tusiꞌa muse hugahae.” huno hie.
LUK 14:16 Higeno Yisasiꞌa mage huno hapaiye “Nago kanomoꞌa ala imu kigahe mukiꞌa veaꞌneyaga ‘Meneho.’ huno ke humaine.
LUK 14:17 Ke humateteno imua ago kimaleteno aliꞌya kanoꞌamona hutegeno viaꞌyamo kema humatenea veaꞌnehe ‘Tamakaya eho. Mukiꞌa nesaya yana ago talo tala humalene.’ huno hamapai-maine.
LUK 14:18 Hamapaigeꞌya ani mukiꞌa veala nagoke nagokeꞌmoꞌya mage hae ‘Tagaya oꞌugahune.’ huꞌya hae. Hageno nagoke kanomoꞌa mage hie ‘Nagola hoya yaufa miya humalenoanagiꞌna mogegahe nehue. Museka nehugi nagaya oꞌugahue.’ huno hie.
LUK 14:19 Higeno nago kanomoꞌa mage hie ‘Nagaya teniꞌa (10) aliꞌya alisia pulumaka miya humaleneꞌna nehuanagiꞌna kanale aliꞌya neꞌalifi agegahe neꞌue. Museka nehugi nagaya oꞌugahue.’ huno hie.
LUK 14:20 Higeno nago kanomoꞌa mage huno hie ‘Menia nagaya yaufa aꞌniꞌa alitenoanagiꞌna museka nehugi nagaya oꞌugahue.’ huno hie.
LUK 14:21 Nage hageno eteno ani aliꞌya kanomoꞌa kava kanomona mo hapaigeno ani kava kanomona aipamoꞌa haviya higeno aliꞌya kanoꞌamofe mage huno hapaiye ‘Kagaya aupaꞌa eteka uka kumate mainaya veaꞌnegi moneꞌamiꞌa omale veaꞌnegi aiya haviya humai veaꞌnegi aulaga asu humai veaꞌnegi aumiꞌya haviya humai veaꞌnegi amavaleka eno.’ huno hie.
LUK 14:22 Higeno ani aliꞌya kanomoꞌa ani kava huteno eteno mage huno kava kanomona me hapaiye ‘Kagai kavaya ali hipoꞌya huanagi nagoꞌa siale maisaya yana afaꞌa hanegeno nokaꞌafina hiyala ohune.’ huno hie.
LUK 14:23 Higeno ala kanomoꞌa aliꞌya kanoꞌahena mage huno hapaiye ‘Kagaya kumala neꞌataleka ala katega neꞌuka tala agegayalega nemaiya veaꞌnea ke huka amavayu huka amavaleka noniꞌafina memategeꞌya hiya hiho.
LUK 14:24 Nagaya kahanepauve hagoteꞌna kema nehugeꞌyama omenaya veaꞌnea mukiꞌamoꞌya menia kavela meliꞌya onegahae.’ huno hie.” huno hamapaiye.
LUK 14:25 Kasagoꞌya veaꞌmoꞌya Yisasiꞌene neꞌvageno maiyahae huno hamapaiye “Nagoꞌa veaꞌmoꞌya nagai nakaveꞌma egahena nefaꞌene itaꞌamoꞌene aꞌamoꞌene nafaꞌneꞌamoꞌene nepuꞌamoꞌene asaꞌamoꞌene aganaꞌamofeꞌenena ‘Afa vaya mainagi Yisasiꞌa tamakase-mainea yafe naguꞌa aminoa kano mainoe.’ huno ohisia kanomoꞌa nagai kea havino akave omale kano maine.
LUK 14:26 ‘Kanaleꞌya huꞌna maisua nahaimula afa ya hanegi Yisasiꞌa agasemai kanogiꞌna naguꞌa aminoe.’ huno ohisia kanomoꞌa nagai kea havino aꞌkave omale kano maine.
LUK 14:27 Nagaila nagatama aisigeꞌna falisua yafema nago kanomoꞌa ‘Ani kava hugahue.’ huno agaiꞌa yafaga yosa kofino nakave visia agesa ohavisia kanomoꞌa nagai kea havino aꞌkave omale kano maine.
LUK 14:28 Tamakaipiti nago kanomoga ‘Ala nokefa kigahue.’ kagesa havinukahena hagoteka ‘Ani noniꞌa kiꞌna avaya ayesua moneꞌnia hanefi?’ huka kagesa havi havi hugane. ‘Mukiꞌa kisua monea hane.’ huteka ani nona aepa heka kigane.
LUK 14:29 Hagotekama naꞌa ohinuka aepa heka amalagu aiteka posia ayesanageno monekaꞌa haꞌno hisigeka ani no kika avaya ayesana amukoka omalesigeꞌya mukiꞌa agesaya veaꞌmoꞌya kigika hugateꞌya ‘Ma kanomoꞌa nona aepa heno kianagi ani nona hivi huno ki haꞌno hisia amukoꞌa omalene.’ huꞌya hugahae.
LUK 14:31 Nagi nagola sauve kanomoꞌa ‘Nago sauve kanoenema aepa heꞌna tu hugahue.’ huno agesama havinunofena hagoteno mage huno agesa havisie ‘Nagaya teni tauseniꞌa (10,000) ati vayaꞌnia mainagi nago sauve kanomoꞌa tueti tauseniꞌa (20,000) ati vayaꞌa mainayanagiꞌna tuma hisua himamuꞌnia haneo?’ huno agesa havigahie.
LUK 14:32 Agesa haviteno ‘Aꞌao tuma hisua himamuꞌnia omalene.’ hunoꞌma hinunofena agaiꞌene tuma hisaya vayaꞌmoꞌya ayaꞌayate mainesageno nagoꞌa vayala humateno mage huno hugahie ‘Mage hutama mo havigeho ‘Hanaꞌa hutaꞌa taꞌaipa ali falu hutaꞌa maisuꞌe.’ hutama mo havigeho.’ huno hamapaisigeꞌya mo havigegahae.
LUK 14:33 Mo havigegahagi tamakaipitila nagoꞌa veaꞌmoꞌya mukiꞌa yaꞌamima amakaveꞌno hu oꞌatesayana nagai kea ohavi veaꞌne maigahae.”
LUK 14:34 Tamakaya havilinae solea kanale ya haneanagi hagama nehia yamaꞌa haꞌnoma hisigetama hanaꞌa hutama hagama nehia yamaꞌa ali falote hugahae?
LUK 14:35 Hagama nehia yamaꞌa omalesiana afa ya hanegi afumo aifaene aliꞌya ituyaꞌene hoyafi malesayana afovaꞌage ohugahigi veaꞌmoꞌya afaꞌa hagaꞌyu hutalegahae. Tamakesama hanesiana havilama hutama haviho.
LUK 15:1 Vaya amaugafaleti takisi mone huhatiꞌya aliliteꞌya huꞌya musufayama nehaya vayaꞌene kefo yama hume hume nehaiya veaꞌnene Yisasi ke havigahe avate emainae.
LUK 15:2 Emainageꞌya Falasia vayaꞌmoꞌyaene kahegi kema havilinaya anagaꞌmoꞌyaene ageteꞌya mage huꞌya ke vaimainae “Ma kanomoꞌa kefo ya nehaya vayaꞌene tokaeno maineno kavela nene.” huꞌya hae.
LUK 15:3 Nehageno Yisasiꞌa avame kea mage huno hamapaiye “Hana kanomoga tamakaipitila vani hataletiꞌa (100) afua mainefiti nagola fanane higeno ani afumona nefaꞌa mukiꞌa afuꞌa talapinaga amataleno viaꞌyamo nagokeꞌma fanane humainea afuꞌahe atiyeno yeno ageno ali falote hisifi? E, fananema hisigeno aniꞌa huno ati ayegahae.
LUK 15:5 Atiyeno agefalote huteno tusiꞌa muse huno ageꞌyafi aigagino avaleno umaine.
LUK 15:6 Kumate uvaꞌyi huteno vayaꞌahe ke higeꞌya melitalu hageno mage hie ‘Fananema humainea afua ago agefalote huafe tamakaiꞌene nagaiꞌene muse hisune.’ huno humaine.”
LUK 15:7 Yisasiꞌa hufalote huno mage hie “Ani kava huno mukiꞌa vani hataletiꞌa (100) veaꞌmoꞌya kefo yafe amakuꞌa aiyahae huꞌya fatago kava nehaya veafena Anumaya Kotiꞌa muse hugahianagi nagoke kanomoꞌa kefo yama hume hume nehaisiletiꞌma ‘Kefo yaniꞌa ataleꞌna nagaye higeꞌna aigagiꞌna Anumaya Kotitega eteꞌna naguꞌa amigahue.’ hunoꞌma hisigenofena Anumaya Kotiꞌa tusiꞌa muse hutegahie.”
LUK 15:8 Nago aꞌmoꞌa teni (10) kina malenefiti nagola fanane higeno lamua hanagaliteno nomaꞌafina halafi huno atiyeno yeno ali falote humaine.
LUK 15:9 Ali falote huteno vayaꞌahe ke higeꞌya melitalu hageno mage hie “Tamakaiꞌene nagaiꞌene muse hisune. Moneꞌnima fanane humainea monea ago atiyeꞌna yeꞌna ali falote hue.” huno humaine.
LUK 15:10 Yisasiꞌa hufalote huno mage hie “Nagaya tamahanepauve ani kava huꞌya Anumaya Kotina ensole vayaꞌamoꞌya nagoke kanomoꞌma kefo yama hume hume nehaisiletiꞌma ‘Kefo yaniꞌahena nagaye higeꞌna aigagiꞌna Anumaya Kotitega eteꞌna naguꞌa neꞌamue.’ hunoꞌma hisigenofena ensole anagaꞌmoꞌya tusiꞌa muse hutegahae.”
LUK 15:11 Yisasiꞌa amakaifena mage huno hie nago kanomoꞌa nafaꞌnelatamaꞌa tole mainaꞌe.
LUK 15:12 Mainaꞌanagino haenaga nafaꞌnemoꞌa nefafe mage huno hapaiye “Nenafagae falisanana nagai ya hapaegahie huka hunatenana yana ago namio.” huno higeno nefaꞌa mukiꞌa yamaꞌa alino fako huno tole nafaꞌnelatamaꞌamokani anamine.
LUK 15:13 Anamitegeno haenaga nafaꞌneꞌamoꞌa osi kana kanoꞌa maiteno mukiꞌa mone afenoꞌyamaꞌa alino ayaꞌaya kotega umaineno hu osuꞌyate mone afenomaꞌa motale metale huno age haꞌye hu yateꞌene mone afenomaꞌa mukiꞌa atale haꞌno humaine.
LUK 15:14 Mukiꞌa yamaꞌa haꞌno higeno ani kumatega ala kafu haya kanamoꞌa falote higeno nagoꞌa nesia yana omalegeno tusiꞌa agatemaine.
LUK 15:15 Agategeno nagola ani kumate kanomotega viaꞌyamo “Aliꞌyakaꞌa alisue.” huno havigegeno “E.” huteno talapinaga hutegeno viaꞌyamo afuꞌale kava yagaino maineno kaveꞌamia amamine.
LUK 15:16 Neꞌamamino mage hie “Vae nesua kavela omaleanagiꞌna afumo kavepiti haletiꞌnaꞌa nesue.” huno humaine. Hianagi nago kanomoꞌa nesia yana oꞌamine.
LUK 15:17 Oꞌamigeno agesamoꞌa hao higeno agesafinaga mage huno hie “Mukiꞌa nenafa aliꞌya veaꞌmoꞌya amamu hia no maineꞌya kasagoꞌya kavela nenageꞌna nagaya nagala legeꞌna maꞌa huꞌna falisua kavala nehue.
LUK 15:18 Nehuafe hetiꞌna nenafatega uꞌna mage huꞌna hapaigahue ‘Nenafagae nagaya kefo ya hugatenoe. Kagaiꞌene Anumaya Kotiꞌene kefo ya hulanatoe.
LUK 15:19 Nagaila natenana nafaꞌnekamoꞌnae huꞌna hisuana onategahianagiꞌna musekaꞌa nehugi aliꞌya kanokaꞌa maisua yafe navalo.’ huꞌna hugahue.” huno agesa havimaine.
LUK 15:20 Haviteno nefatega neꞌeno aluꞌale neꞌegeno nefaꞌa ageteno kalagi aino aiyayeno monukino atako humaine.
LUK 15:21 Atako nehigeno nafaꞌneꞌamoꞌa agaifena mage huno hie “Nenafagae nagaya kefo ya hugatoe. Kagaiꞌene Anumaya Kotiꞌene kefo ya hulanatoe. Nagaya natenana nafaꞌnekamoꞌnae huꞌna hisuana onategahie.” huno hie.
LUK 15:22 Higeno nefaꞌa aliꞌya veaꞌamofena mage huno hie “Aupaꞌa utama kanaleꞌyama humainea kukena alitama me vaiteho. Ayapi vaisia kihana vaitetama aiya noꞌene vaiteho.
LUK 15:23 Ala pulumaka afovaꞌageꞌma humainesia afua hetama kisageta neneta musekase hutesune.
LUK 15:24 Ma ma mainea nafaꞌneꞌnimoꞌa fali-mainefiti hetia yafeꞌene fananema hu-mainefiti efalote hia yafeꞌene musena hutesune.” huno higeꞌya aepa heꞌya tusi muse hutenae.
LUK 15:25 Huneꞌatageno yage nafaꞌneꞌamoꞌa hoyafinagati eno note evaꞌyi nehuno haviana yagame haya yaꞌene amo ayaya kene me haviteno aliꞌya kanomofena ke higeno egeno mage huno havige “Na kava nehae?” huno havigemaine.
LUK 15:27 Havigegeno mage hie “Kaganakamoꞌa ago emaine. Augafamoꞌa kanaleꞌya higeno ea yafe negafaꞌa afovaꞌage afua hegeꞌya neneꞌya hafali ateꞌya mainae.” huno hie.
LUK 15:28 Higeno nepuꞌamoꞌa aipa haviya higeno “Nagaya nopinaga ohaigahue.” huno higeno nefaꞌa nopinagati eno mage hie “Musekaꞌa nehugi ehaiyo.” huno tutu higeno nefafe mage huno hapaiye “Havio nagaya kasagoꞌya kafua kagai aliꞌya alige-lige huꞌna kekaꞌa nago kanafina ‘Aꞌao.’ huꞌna ohunuanagika vayaꞌniꞌamogamiꞌene muse hisuna yana nagoke meme ataꞌauꞌa heka onamitafa hu-mainanane.
LUK 15:30 Onaminana yana ma nafaꞌnekamoꞌa mone fenoꞌyagakaꞌa alino kumai aꞌnele momi memi higeno monekaꞌa haꞌno higeno emainegeka afovaꞌage afua heka musekase huneꞌatane.” huno hapaiye.
LUK 15:31 Higeno nefaꞌa mage huno hie “Nafaꞌneꞌnimogae mukiꞌa kanafina nagaiꞌene nemainanagino mukiꞌa yaniꞌa kagai ya hanegi kaganakamoꞌa falino fanane humainefiti evaꞌyi hianagita muse huta taipamoꞌa kanale hinageta maisunana ani yamoꞌa kanale hulatesie.” huno hapaimaine.
LUK 16:1 Yisasiꞌa agaiꞌaene tokaeꞌya nemaiya anagafe mage huno hamapaiye nagola tusiꞌa moneꞌa hanea kanomoꞌa ani afenomaꞌale kava nehea aliꞌya kanoꞌamoꞌa mainegeꞌya nagoꞌa vayala ayaꞌamoꞌya ani aliꞌya kanomofe akavelaga ke huꞌya mage hae “Kagai aliꞌyate kava kanomoꞌa mukiꞌa yakaꞌa alino motale metale humaine” huꞌya hae.
LUK 16:2 Hageno moneꞌama hanea kanomoꞌa kava nehea aliꞌya kanoꞌamofena ke higeno egeno mage hie “Naꞌane huꞌya kagaifena nahanepaiye? Kagaila kava hisana tokiya ago kaminoafe kagaya hanaꞌa huka kava humainane? Huyogiteka menahapaiyo. Nagoꞌene kagaya mani aliꞌyana oꞌaligane.” huno humaine.
LUK 16:3 Higeno ani aliꞌya kanomona agu agesamoꞌa mage hie “Aliꞌyaniꞌa nahafalegahe higi hanaꞌa hisue? Hoya aliꞌya alisua tokiyaꞌnia omaleneanagiꞌna aukaꞌya hisugenoꞌa nagaye hugahianagiꞌna hanaꞌa hisue?
LUK 16:4 Hisua yafena menia nagesa havue. Ani kava humatesugeno aliꞌyaniꞌama nahafalesigeꞌya anonaꞌa ani vayaꞌmoꞌya ‘Notifi emaiyo.’ huꞌya hugahae.” huno havimaine.
LUK 16:5 Nagoꞌa ala kanoꞌamoteti nofi humainaya veafe amahaote amahaote ke higeꞌya ageno hagote kanomofena mage huno havige “Nagai kava kanomoꞌa naꞌmagi ya nofila hugatene?” huno havige.
LUK 16:6 Havigegeno mage hie “Nagaya vani hataletiꞌa (100) kalasini talamu nofila huanagi anonaꞌa oꞌaminoe.” huno higeno aliꞌya kanoꞌamoꞌa mage hie “Anima kae-malenea autaꞌma ma hanegi ani vani hataletie (100) huno hanea avona ayehananeka fifitiꞌae (50) huka kao.” huno hapaiye.
LUK 16:7 Nago kanomofena mage hie “Nofiꞌma humainana yana naꞌmagi ali-mainane?” huno higeno “Vani hataletiꞌa (100) alaisi kula nofi huanagi anonaꞌa oꞌaminoe.” huno higeno aliꞌya kanoꞌamoꞌa mage hie “Anima kae-malenea autaꞌma ma hanegi ani vani hataletia (100) ayehananeka eitiꞌae (80) huka kao.” huno humaine. Ani kavaꞌma hia yamoꞌa ma agesa havie “Haenagaꞌa aliyaniꞌama nahafalesigeꞌya ani vayaꞌmoꞌya mage hugahae ‘Notifi emaiyo.’ huꞌya hisayafenagiꞌna naꞌa kava hugahue.” huno hie.
LUK 16:8 Ani musufaꞌage aliꞌya kanomoꞌa agesa havi havi huno ani kava humainea yafe ala moneꞌama hanea kanomoꞌa mage hie “Kanale kagu kagesa hane.” huno humainegeno Yisasiꞌa mage huno hie “Ma mopale yafema muse nehaya veaꞌmoꞌya mone alisaya yafe amakesa havi havi huteꞌya aliyama aliyana hale yapi mainaya veala ago amakaseꞌya amakesaene veaꞌne mainae.
LUK 16:9 Nagaya tamakaitamige tamahanepauve tamakaya ma mopale monea alitama veaꞌmogami amamisageꞌya nelamafuꞌya maisagetama falisaya yupa ani monea haꞌno hisigeno Anumaya Kotiꞌa maige maige hisaya nopina tamavaleno ali falu fala hulamategahie.
LUK 16:10 Nagoꞌa veaꞌmoꞌya osi osi yate kanaleꞌya huꞌya yagaisayana ala yakefalela aniꞌa huꞌya kanaleꞌya huꞌya yagaigahayanagi nagoꞌa veaꞌmoꞌya osi osi yateꞌma kanaleꞌya huꞌya oꞌyagaisayana ala yakefalela aniꞌa huꞌya kanaleꞌya huꞌya oꞌyagaigahae.
LUK 16:11 Tamakaya ma mopale monema kanaleꞌya hutama kava oꞌyagaisayana ikapinaga tama afenoꞌyateꞌma yagaisae huno otamamigahie.
LUK 16:12 Tamakaya alu veaꞌmogami yateꞌma kanaleꞌya hutama kavama oꞌyagaisayana tamakaitami afenona otamamigahie.
LUK 16:13 Nagoke aliꞌya kanomoꞌa ‘Tole kava kanolatamogani aliꞌya kanoꞌania maisue.’ huno ohisie. Aniꞌa hisiana nagoke kava kanomofe ‘Haivaino naipa nagata aiya kano mainane.’ huno hugahianagi nago kava kanomofena ‘Nahaiya kano mainane.’ huno hugahie. Nago kava kanomona aipa amiteno nago kava kanomofe ‘Falote onahaiya kava hana kano mainane.’ huno hugahie. Tamakaya aniꞌa hutama Anumaya Kotiꞌenefe ma mopale mone fenoꞌenefe ‘Ali lokaetana kava yagailateꞌo.’ hutama hisayana haviya hugahie.” huno humaine.
LUK 16:14 Falasia vayaꞌmoꞌya ani kea haviteꞌya mone fenofema nehamaiya yafena tusiya huꞌya kigiꞌa nehuꞌya kamuge hatageꞌya vaitenae.
LUK 16:15 Kigi hutayanagi Yisasiꞌa amakaifena mage hie “Tamakaya veaꞌmogami amaulagafina ‘Fatago anaga mainone.’ hutama nehayanagi Anumaya Kotiꞌa tamakupina ago agelama huno agemaine. Age-maineanagiꞌya tamakaifema veaꞌmoꞌya tamakeꞌya ‘Tusiꞌa kanaleꞌnale kava nehae.’ huꞌya nehaya kavafena Anumaya Koti aulagafina hiꞌmanaꞌage hia kava nehae.
LUK 16:16 Mukiꞌa kanafina vayaꞌmoꞌya Moseseꞌene Anumaya Koti amaune vayaꞌene humainaya kea haviyanagi Yoniꞌma falote humainea kanaleti aepa heꞌna Anumaya Koti kava yagailamatesia kanale mono kea tamahapaugetama mukiꞌa veaꞌmogatama ‘Anumaya Kotiꞌa kava yagailatesie.’ hutama hugahe tamayamufa aitama tusi ya maitama nehae.
LUK 16:17 Ikaꞌene mopaene haꞌno hugahianagi Anumaya Koti kema kae-malenaya kemoꞌa nagoke kanoꞌa afa ya kanala ohugahie.”
LUK 16:18 Nago kanomoꞌma aꞌama neꞌataleno alu aꞌma alisiana kumai kava humaine. Nagi nago aꞌma anauꞌamoꞌa atalesigenoꞌma mainesia aꞌma alu kanomoꞌma alisayana aniꞌa huno kumai kava humaine.
LUK 16:19 Nago kanoa tusiꞌa moneꞌa hanea kanomoꞌa mukiꞌa kanafina kanaleꞌnale siotaꞌaene kava vayaꞌmoꞌya nehaya kava huno haesa kenaꞌaene failino maineno kanaleꞌnale kavekeꞌya neneane.
LUK 16:20 Neneanagino no fiamaꞌalela nago kanoa afenomaꞌa omale kanomona amumoꞌa augafa alino haꞌyagi-mainea kanoa mopale nemaiyane. Ani kanomo agia Lasalusiꞌe.
LUK 16:21 Ani kanomoꞌa agesa mage huno havimaine “Afenomaꞌa hanea kanomo nea kaveꞌmo atupa-napaꞌa yogiꞌna nesue.” huno huteno emainegeꞌya kalayagamoꞌya amutetila me haene haene humainae.
LUK 16:22 Naꞌa hageno maineno haenagaꞌa afenomaꞌa omale kanoa faligeꞌya ensole anagaꞌmoꞌya mevaleꞌya Apalahamu mainele motageno maine. Mainegeno moneꞌama hanea kanoa aniꞌa huno faligeꞌya aliꞌya mo hevaitenae.
LUK 16:23 Mo hevaitageno haniki-mainea kumapi umaineno augafa agata tusiya huno aigeno maineno agesaga huno anafinaga ageana amuga aluꞌafi Apalahamuꞌene Lasalusiꞌene mainaꞌageno anakemaine.
LUK 16:24 Anaketeno mage huno ke hie “Vae Apalahamuga naginagomogae kagaya tusiya huka kahauna hunato. Kahau hunateka Lasalusina hutegeno eno aya aginagoleti tipina ayeteno navefuꞌnale malesigeno tani tani nahaisie. Nagaya tusiꞌa atafi mainogeno tusiꞌa nagata neꞌaiye.” huno hie.
LUK 16:25 Hianagi Apalahamuꞌa mage huno hie “Nafaꞌneꞌnimoga kagaya nayona mopaleꞌma kanaleꞌya huka mainana kanafina mukiꞌa kanaleꞌnale yakaꞌa ago ali-mainananagi Lasalusiꞌa mukiꞌa havi yamaꞌage ali-maine. Ani yafe kagesamoꞌa aikalo hinageka havio. Menia Lasalusiꞌa ma kumate egenoꞌa aipamoꞌa kanale huno yasi yasi higeno mainegeka kagaya kaugafa kagataenena mainane.
LUK 16:26 Nago yana tagaya mauna kaiyagaene tamakaya mainaya kaiyagaene amuꞌnotifina Anumaya Kotiꞌa tusiꞌa ayo omale komugefa kafi-maleneanagiꞌya ma kumate mainaya veaꞌmoꞌya tamakaitega visaya amakesa haviꞌya usaga humaiꞌya oꞌugahae. Aniꞌa huꞌya kagaiꞌene mainaya veaꞌnea esaga humaiꞌya ma kaiyaga omegahae.” huno hie.
LUK 16:27 Higeno ani kanomoꞌa mage hie “Naginagomogae nagaya tusiya huꞌna tutu hugateꞌna kalagi neꞌauve. Lasalusina hutesanageno nenafa notega visie.
LUK 16:28 Visigeꞌya faefuꞌa (5) naganaꞌnimoꞌya mainageꞌna nagaya tusiꞌa nagata aiya kumate emainoafe kagaya Lasalusina hutegeno visiaꞌamo ala kefiti mage huno hisie ‘Tamaipama aiyahae ohinutamahena nagayama mainoa kumatela egahae.’ huno hamapaisie.” huno hie.
LUK 16:29 Higeno Apalahamuꞌa mage hie “Amakaya Moseseꞌa humainea kene Anumaya Koti amaune vayaꞌmogami kene hanegi ani kemona hapaliꞌya havisae.” huno hie.
LUK 16:30 Higeno moneꞌama hanea kanomoꞌa mage hie “Aꞌao, naginagomogae, Apalahamuga, nani kea ohavinayanagino nagola fali-mainea kanoma komufiti hetino amakaitega mo hamapaisigeꞌya kefo yaꞌamia ataleteꞌya amakaye huꞌya aigagiꞌya Anumaya Kotina amakuꞌa amigahae.” huno hie.
LUK 16:31 Higeno Apalahamuꞌa agaifena mage hie “Moseseꞌma humainea kene Anumaya Koti amaune vayaꞌmoꞌya humainaya kene amakupima omalenesayana nagola fali-mainea kanomoꞌa komufitila hetino mo hamapaisiana ani kea haviꞌya amakupina omalegahae.” huno humaine.
LUK 17:1 Yisasiꞌa agaiꞌaene tokaeꞌya nemaiya anagafe mage huno humaine kefo yama huo huno ayemavataga hisaya yana falote hugahianagi kefo yama hisaya kate tamavaleno visia kanomofena “Kefo kava nehananagika kana yana aligane.”
LUK 17:2 Ani kanomoꞌa nagoꞌa osi anagaꞌnihe “Kefo yama huo.” huno hisiana tusiꞌa kefo kava nehianagiꞌna tusiꞌa kana ya amigahue. Ala yafakefaleti ani kanomo ageꞌyafi maleꞌya nofi kiteꞌya hage lipi hagaꞌyu hutalesayana ani kana yana afa avamete kana ya haneanagi nagaya tusiꞌa kana ya amigahue.
LUK 17:3 Amigahuanagi tamakaya kaꞌye ho. Negafuꞌa kefo yama hinageka “Naꞌa kavala ohuo.” huka kemakio. Amakigeno agayama aguꞌa aiyahaeꞌma hinageka aigeꞌateka kefo yamaꞌa ataleto.
LUK 17:4 Negafuꞌa nagoke yupa seveniꞌa (7) kanaleꞌma kefo yama hugateteno ani kefo yafe “Naguꞌa aiyahae nehue.” huno hisigekahena kagaya aniꞌa huka seveniꞌa (7) kanale aigeꞌateka kefo yamaꞌa ataleto huno humaine.
LUK 17:5 Yisasiꞌene tokaeꞌya nemaiya anagaꞌmoꞌya Anumayamofe mage hae “Kagaife havita tagupi maleta tametiti nehuna yana kagaya nagoꞌene alika ayaꞌaya hulato.” huꞌya hae.
LUK 17:6 Hageno Yisasiꞌa mage hie “Tamakaya nagaifena havitama tamakupi maletama tamametiti nehaya kavala osi masatati yosamo alaga kanoꞌa hanea avamete hutama osiꞌa havitama tamakupi malesayana ma yosahe mage hutama hapaigahae ‘Ma yosamoga kagaya aepa muki tagasi huka ala tipi hageka haiyo.’ hutama hapaisageno tamakai kea akave malegahie.” huno hamapaiye.
LUK 17:7 Tamakaipiti nago kanoa aliꞌya neꞌalia kanoꞌamoꞌa hoya aliꞌyapi, afu kava aliꞌyapi, ani aliꞌyana alino haꞌno huno esigenoꞌa ala kanomoꞌa ani aliꞌya kanohe mage huno hapaisio “Kagaya aupaꞌa me maifalu huka maineka kavela no.” huno hapaisio?
LUK 17:8 Aꞌao ani kea ohugahianagino mage huno hugahie “Kagaya kaveꞌnia talo tala hunateka kenakaꞌa faiteka kaveꞌnia alika me namigeꞌna hagoteꞌna netesugeka kagaya haenaga negane.” huno hugahie.
LUK 17:9 Anima hapaiya kema akave malenea yafena ala kanomoꞌa “Kanale kava hanafe musekaꞌa nehue.” huno hisifi? Aꞌao aniꞌa ohugahie.
LUK 17:10 Tamakaya aniꞌa hutama mukiꞌa tamahapai-mainoa aliꞌyana alitama avaya ayetetama mage hutama hiho “Tagaya kanale aliꞌya anaga omainone. Tagaiti aliꞌyanagita ago alune.” hutama hiho huno humaine.
LUK 17:11 Yisasiꞌa Yelusalemu ukahe viana Sameliaꞌene Kaliliene amuꞌnopi katega umaine.
LUK 17:12 Nago kumate uvaꞌyi higeꞌya teniꞌa (10) fugita kali neꞌaliya vayala aluꞌale heti-maineꞌya ala kefiti mage hae “Yisasiga ala kano mainanagi tagaila kahau hulato.” huꞌya hae.
LUK 17:14 Hageno Yisasiꞌa amaketeno mage hie “Tamakaya mono nopi kava vayate utama tamaugafa momaveliho.” huno higeꞌya ani vayatega neꞌvageno katega amaugafamoꞌa eteno kanale humatene.
LUK 17:15 Kanale humategeꞌya vafiti nagoke kanomoꞌa augafa ageana kanale higeno eteno katega viaꞌamo ala kefiti muse huno Anumaya Koti agi alisaga humaine.
LUK 17:16 Huteno Yisasite aiyafi mepe huno maineno aiyale alisoso nehuno “Kagaifena tusiꞌa musekaꞌa nehue.” huno hie. Aiyale alisosoma hia kanoa Sameliati kanoe.
LUK 17:17 Yisasiꞌa ani kanoa ageteno mage hie “Nagesa havuana teniꞌa (10) vaya ago aliꞌna kanale humatenofi? huꞌna huanagi nainiꞌa (9) vayala hanate mainagekae?
LUK 17:18 Naꞌa higeꞌya ani vayaꞌyaga Anumaya Koti agia melisaga ohae? Mani nagoke kanoa alu kotegati emainea kanomoꞌa agaiꞌage Anumaya Koti agia melisaga nehie.” huno hie.
LUK 17:19 Yisasiꞌa ani kanomofena mage huno hapaiye “Kagaya hetika vuo. Nagaifema havika kagupi maleka kametiti hana yamo kagaila alino kanale hugate.” huno hie.
LUK 17:20 Nagoꞌa Falasia vayaꞌmoꞌya mage huꞌya havigae “Na kanafi Anumaya Kotiꞌa aepa heno kava yagaigahie?” huꞌya hageno Yisasiꞌa mage huno humaine “Anumaya Kotiꞌma kava yagaisia kanama falote hisiana tamaulagamoꞌa oꞌagesia kava huno egahie.
LUK 17:21 Veaꞌmoꞌya ‘Malega hane. Amualega hane.’ huꞌya ohugahagi haviho Anumaya Kotiꞌa tamakaipi ago kava yagaino maine.” huno hie.
LUK 17:22 Yisasiꞌa agaiꞌaene tokaeꞌya nemaiya anagafe mage huno hamapaiye “Haenagaꞌa nago kanama falote hisigetama mage hutama hugahae ‘Ikapinagati emainea kanoa vayaꞌmo atenea nafaꞌnemona nagoke yupa kanoꞌa agesune.’ hutama hugahayanagi afaꞌa oꞌagegahae.
LUK 17:23 Oꞌagegahagi nagoꞌa veaꞌmoꞌya ‘Amugalega mainegi ageho.’ nehuꞌya ‘Malega mainegi ageho.’ nehuꞌyama hisagetamahena amakavela oꞌviho.
LUK 17:24 Ikapinagati emainoa kanoa vayaꞌmo natenea nafaꞌnemoꞌna eteꞌna esua yamoꞌa maꞌa hugahie ikamoꞌa nago kaiyaga aupaꞌa aulumayaꞌmoꞌma nehia avamete huno mukiꞌa kotega aivasa nehinageꞌna nagaya eteꞌna egahue.
LUK 17:25 Egahuanagi hagoteꞌya meni kanafima mainaya veaꞌmoꞌya nagaifena ‘Kahaoteꞌyakae.’ huꞌya hunatesageno tusiya huno nagata aigahie.
LUK 17:26 Nagaya ikapinagati emainoa kanoa vayaꞌmo natenea nafaꞌnemoꞌna eteꞌna esua kanafima mainaya veaꞌmoꞌya nayoma Noaꞌma mainea kanafima mainaya veaꞌmoꞌya humainaya kavala hugahae.
LUK 17:27 Noaꞌma mainea kanafina kavela neneꞌya tina neneꞌya aꞌnema aliyamoꞌene vele uyamoꞌene mukiꞌa kanafina ani yafekeꞌya amakesa havi havi huꞌya mainageno Noaꞌa ala tipi kalefi haisaga humaigeno tusiꞌa lina hogino mukiꞌa ani veaꞌnea alino haviya higeꞌya ago fali haꞌno humainayane.
LUK 17:28 Lotiꞌma mainea kanafina ani kava huꞌya kaveꞌene tiꞌene neneꞌya nagoꞌa yaꞌamia miya nehuꞌya hoya aliꞌyaꞌamia neꞌaliꞌya noꞌamia negiꞌya mukiꞌa kanafina ani yafekeꞌya amakesa havi havi humainayane.
LUK 17:29 Ani amakesale mainageno Lotiꞌa Sotomua neꞌataleno umainea kanalela Anumaya Kotiꞌa ikapinagati tusiꞌa hiꞌmanaꞌage ata nelea yafaꞌyaga koꞌmopa hia kava huno asaga hulavino mukiꞌa veaꞌnea hamaegeꞌya fali-mainayane.
LUK 17:30 Nagayama ikapinagati emainoa kanoa vayaꞌmo natenea kanomoꞌna eteꞌna esua kanafima mainesaya veaꞌmoꞌya nayona Loti mainea kanafima mainaya veaꞌmoꞌya humainaya kavala aniꞌa hugahae.
LUK 17:31 Yisasiꞌma esia kanafina nagoꞌa veaꞌmoꞌya kumatega mainesaletila afenoꞌyaꞌamia alisaya yafena eteꞌya nopinaga ohaisae. Nagi aniꞌa huꞌya hoyafinaga mainesaya veaꞌmoꞌya eteꞌya noꞌamilegama hanesea afenoꞌya alisaya yafena oꞌvisae.
LUK 17:32 Tamakaya Loti aꞌmoma hutenea kavafena tamakesa aikalo hinagetama havilama hutama haviho.
LUK 17:33 Nagoꞌa veaꞌmoꞌya hamaimuꞌma hanesigeꞌya ‘Mai yatia atafa hutalako huligahune.’ huꞌya amakesama havisayana ani kanale mai yaꞌamimoꞌa fanane hugahianagi nagoꞌa veaꞌmoꞌya ‘Kanalelagita maisuna yatiene tahaimuene Yisasife tagesa nehavita afaꞌa atalegahune.’ huꞌya hisagenoꞌa kanaleꞌya huno mai yaꞌamia aligatimatesigeꞌya maige maige yana aliteꞌya agola maigahae.
LUK 17:34 Tamahanepauve nagayama eteꞌna esua yupa ani kegela tole vekalatana nagoke sipale faeꞌana mainesaꞌagenofena Anumaya Kotiꞌa nagoke avalegahianagino nagola alitaye-talegahie.
LUK 17:35 Tole atalana tokaeꞌana aliꞌya neꞌalisaꞌageno Anumaya Kotiꞌa nagoke avalegahianagino nagoꞌmona alitaye-talegahie.” huno hie.
LUK 17:37 Higeꞌya mage huꞌya havigae “Anumayamogae mani kavala hana kumate falote hugahie?” huꞌya havigageno Yisasiꞌa mage huno hamapaiye “Afumoꞌma fali-mainesia kefafina hakikimoꞌya yage yage huꞌya alitalu hunemaiyanagi ikapinagati kanomoꞌna aniꞌa huꞌna mukiꞌa veaꞌmogami amuꞌnopi egahue.” huno hamapaiye.
LUK 18:1 Yisasiꞌa mage hie “Mukiꞌa kanafina nunamuna hiho. ‘Kasalo tahae.’ hutama oꞌataleho. Ani kema havisaya yafe nagola huvame ke tamahapaigahue.” huno mage huno hie “Nago ala kumatela Yasi kanoa maine. Ani kanomoꞌa veaꞌnehe agesa havioꞌamamino Anumaya Kotifena koliꞌa nohiane.
LUK 18:3 Nagola megusa alagino ani kumatela maineno mukiꞌa kanafina ani Yasi kanomote ete ete huno mage huno nehiane ‘Nago kanomoꞌa ali-haviya hunategi kagaya kaiyekeꞌnia havika fatago ho.’ huno havige.
LUK 18:4 Havige havige maino higeno ani Yasi kanomoꞌa hagote kanafina ‘Kaya ohugahue.’ huno hu-maineanagi eteno haenagaꞌa agu agesamoꞌa mage hie ‘Tamage huꞌna nagaya Anumaya Kotifeꞌene veafeꞌene kolia nohuanagi ma megusa aꞌmoꞌa nagaite ete ete hia yamoꞌa onahaiyanagiꞌna afaꞌa kaiyekeꞌa haviꞌna fatago hugahue. Aniꞌa ohisuana mukiꞌa yupa ete ete hisigeno tusiꞌa kasalo nahaegahie.’ huno humaine.”
LUK 18:6 Yisasiꞌa mage huno hie “Fatago kava ohunea Yasi kanomoꞌma humainea kehena havilama hutama haviho.
LUK 18:7 Anumaya Kotiꞌma hisia yafena na tamakesa nehaviye? Agaiꞌa havinoꞌma hapalimatenea veaꞌmoꞌya nateꞌene kegeꞌene mage huꞌya havinegae ‘Ali-haviya hulataya veaꞌmogamina ageteka fatago huka kaiyekea humato.’ huꞌya havige havige hisageno ani kea havisio? E, afaꞌa havigahie. Ayaꞌaya kanagefa maiteno amaya hisio? Aꞌao tamahanepauve ali-haviya hu-neꞌamataya veaꞌmogamina aupaꞌa anonaꞌamia humategahie. Nagaya ikapinagati emainoa kanoa vayaꞌmo natenea kanomoꞌna eteꞌna esuana nagaifema haviꞌya amakupi maleꞌya ametiti nehaya veaꞌnea ma mopafina mainesao omainegahao?” huno humaine.
LUK 18:9 Nagoꞌa veaꞌmoꞌya amakaiꞌami amaku amakesafiti “Kanale kava nehunageꞌya nagoꞌa veaꞌnea kefo kava nehaya anaga mainae.” huꞌya nehaya veaꞌmogamifena Yisasiꞌa avame ke huno mage huno hie “Tole kanolatamogania nunamu hugahe mono nopi haiꞌana umainaꞌe. Nago kanoa Falasia kanoe. Nago kanoa musufaya huno vaya amaugafaleti takisi mone aliliteno nehia kanoe.
LUK 18:11 Falasia kanomoꞌa amuꞌnote mo hetino maineno Anumayamotega agaiꞌahe mage huno hie ‘Nagaya nagoꞌa veaꞌmoꞌya nehaya kavala nohue. Musufayama haya kavala nohue. Fatago ohunaya veaꞌmogami augafa kavala nohue. Aꞌnele kumai nehaya kavala nohue. Mama mainenoꞌma vaya amaugafaleti takisi mone aliliteno nehia kano kana ohunoe. Ani yafe musekaꞌa nehue.
LUK 18:12 Mukiꞌa sotamo aliꞌyapina nagaya tole yupa kavela mosiꞌna maineꞌna mukiꞌa neꞌalua yapitila teniꞌama (10) malenofitila nagoke alitayeꞌna negamuane.’ huno hie.
LUK 18:13 Hianagi vaya amaugafaleti takisi monema aliliteno nehia kanomoꞌa aluꞌale maineno Anumaya Kotitega ke huno havigegahe hetimaineno ‘Nagaya kefo kano mainoe.’ huno ikapinaga agesaga ohuno ape huno havi kafa yonegino Anumaya Kotitega mage huno havige ‘Anumayamogae nagaya kefo kava hume hume nehauva kano mainoe. Nagaifena kalagi ainateka kahau hunato.’ huno havige.”
LUK 18:14 Yisasiꞌa mage huno hie “Nagaya tamahanepauve anima musufayama huno takisi monema aliliteno nehia kanomofena Anumaya Kotiꞌa ‘Fatago kano mainane.’ huno hutegeno nomaꞌalega eteno umaineanagi hagote kanomofena ani kea hu oꞌatene. Nagoꞌa veaꞌmoꞌya amakaiꞌami amaugafa aliꞌya haisayana Anumaya Kotiꞌa ‘Osi veaꞌne kanoꞌa mainae.’ huno humategahianagi nagoꞌa veaꞌmoꞌya ‘Osi veaꞌne kanoꞌa mainone.’ huꞌya hisayana Anumaya Kotiꞌa amakia alisaga hugahie.” huno humaine.
LUK 18:15 Nagoꞌa veaꞌmoꞌya osi osi nafaꞌneyaga Yisasite “Aya malesie.” huꞌya amavaleꞌya neꞌageꞌya agaiꞌaene tokaeꞌya nemaiya anagamoꞌya ageteꞌya “Naꞌa kavala ohiho.” huꞌya kemamaki-mainae.
LUK 18:16 Kemamakiyanagi Yisasiꞌa ani nafaꞌneyagahe mage hie “Amatalegeꞌya nagaitega eho.” higeꞌya ageno mage hie “Nafaꞌneyaga nagaite esaya yafena kahegi oꞌamateho. Naꞌa huꞌya nafaꞌnemogami avamete maisaya veaꞌmoꞌya mage hugahae ‘Tagaya tokiyatia omalenegi Anumaya Kotiga kava yagailato.’ huꞌya hugahae.
LUK 18:17 Tamagelafa huꞌna tamahanepauve nagoꞌa veaꞌmoꞌya nafaꞌne mainaya avamete maisaya veaꞌmoꞌya mage hugahae ‘Tagaila tokiyatia omaleanagika Anumaya Kotiga kava yagailato.’ huꞌya ohisayana Anumaya Kotiꞌma kava yagaisia kumatela oꞌugahae.” huno hie.
LUK 18:18 Nago kava kanomoꞌa mage huno havige “Kagaya kanaleꞌya huka humavenelina kanomoga nagaya hanaꞌa huteꞌna agola maige maige hisua nahaimula alisue?” huno havige.
LUK 18:19 Havigegeno Yisasiꞌa kenonaꞌa mage huno hie “Naꞌa higeka nagaifena kanale kanoa mainane huka nehane? Anumaya Kotiꞌa agaiꞌage kanale kanoa maine.
LUK 18:20 Kagaya Anumaya Koti kahegi kea ago havilinanagi ani kemoꞌa mage huno humaine ‘Kumai he yana ohuo. Vayala hamaegeꞌya ofaliho. Musufayana ohuo. ‘Ma kanomoꞌa havi kava nehie.’ huka havigea huoꞌato. Itakafokamo kea oꞌatagaeka anakia alisaga huo.’ huno humaineane.” huno hie.
LUK 18:21 Higeno ani kanomoꞌa mage hie “Nagaya nafaꞌnema mainoa kanaleti aepa heꞌna mukiꞌa ani kema hana kea akave nemaloane.” huno hie.
LUK 18:22 Higeno Yisasiꞌa ani kea haviteno mage huno hie “Nago kavaꞌene huo. Mukiꞌama malenana mone fenoꞌyaꞌyagaka alika fako faka huka moneꞌamima omalenesia veaꞌne amamisanageno Anumaya Kotiꞌa ikapinaga hanea afenoꞌyana kagaila kamigahie. Afenoꞌyaꞌyagaka fako huka amamite amamite huteka nakave eno.” huno humaine.
LUK 18:23 Higeno ani kanomoꞌa ani kea haviteno mone fenomaꞌamoꞌma kasagoꞌma humainea yafe oꞌatalesia agesa haviteno aipamoꞌa tusi kanaꞌage humaine.
LUK 18:24 Kanaꞌage higeno Yisasiꞌa ageteno mage huno hie “Mukiꞌa mone fenoꞌyaꞌamima hanesia veaꞌmoꞌya tusiꞌa kasageke huꞌya ‘Anumaya Kotife kava yagailato.’ huꞌya hugahae.
LUK 18:25 Nagola pulumaka kana afumo agia kemolomoꞌa nekaꞌyamo kapima hai falesiana afaꞌa yoꞌyo huno hai falegahianagi mukiꞌa mone fenoꞌyamaꞌa hanesia kanomoꞌa Anumaya Kotife ‘Kava yagainato.’ huno kasageke-voke hugahie.” huno humaine.
LUK 18:26 Higeꞌya ani kea haviteꞌya veaꞌmoꞌya mage huꞌya hae “Naꞌama hu-mainesiana Anumaya Kotiꞌa hana veaꞌmogami amaku amamemaꞌa aligatigahie?” huꞌya hae.
LUK 18:27 Hageno Yisasiꞌa mage hie “Veaꞌmogamina himamuꞌamia omaleneanagiꞌya ohugahayanagi Anumaya Kotiꞌa mukiꞌa kava hisia himamuꞌa haneanagino afaꞌa aligatigahie.” huno hie.
LUK 18:28 Nage higeno Pitaꞌa mage huno hie “Havio tagaya mukiꞌa yatia ataleteta kagai kakavela neꞌone.” huno hie.
LUK 18:29 Higeno Yisasiꞌa mage huno hamapaiye “Tamage huꞌna tamahanepauve mukiꞌa veaꞌmoꞌya Anumaya Kotiꞌa kava yagaisia keꞌa veaꞌnema mo hamapaigahena noꞌamiene aꞌamiene amasaꞌamiene nepuꞌamiene itaꞌafoꞌamimoꞌene nafaꞌneꞌamiene amataleꞌya visagenoꞌa Anumaya Kotiꞌa mopaleꞌma mainaya kanaleꞌma atalenaya yaꞌene nagoꞌene nagoꞌene anonaꞌa ohavunamaꞌa ya amamiteno haenagama falote hisia kanafina maige maige hisaya hamaimuꞌene amamigahie.” huno humaine.
LUK 18:31 Yisasiꞌa agaiꞌaenema tokaeꞌya nemaiya anagala hamaote amavaleno momateneno mage huno hie “Haviho tagaya Yelusalemu haisunageꞌya mukiꞌa Anumaya Koti amaune vayaꞌmoꞌya ikapinagati emainoa kanoa vayaꞌmo natenea kanomonihema kae-malenaya kemoꞌa efalote huno tamage hugahie.
LUK 18:32 Nagaila natafa huꞌya Yuta vea omainaya vayate navaleꞌya momamisageꞌya nagaye hisifa kea hunateꞌya hu-haviya hunateteꞌya amavetuꞌna henategahae.
LUK 18:33 Hegi kaꞌyoteti nahaeteꞌya tavata nahaesageꞌya hevainatesageꞌna tole yupa komufina maiteꞌna tagufa kanale fali-mainesufitila eteꞌna hetigahue.” huno hie.
LUK 18:34 Hianagi Yisasiꞌene tokaeꞌya nemaiya anagaꞌmoꞌya keꞌa haviyanagi ani kemo aepamoꞌa falaki-mainea yafe havilama ohunae.
LUK 18:35 Yisasiꞌa Yeliko kumate uvaꞌyi hugahe mo aupa higeno nagola aulaga asu humainea kanomoꞌa kate mopale maineno monehe aukaꞌya hie.
LUK 18:36 Aukaꞌya maino nehigeꞌya mukiꞌa veaꞌmoꞌya agaseꞌya eutele haya yafe “Naꞌa higeꞌya mukiꞌa veaꞌmoꞌya nagaseꞌya eneꞌvae?” huno hie.
LUK 18:37 Higeꞌya “Nasaleti Yisasiꞌa neꞌegeꞌya kagaseꞌya eneꞌvae.” huꞌya hae.
LUK 18:38 Hageno ala kegefafiti mage huno hie “Yisasiga Tevitina aginagomogae nagaila kahauna hunato.” huno hie.
LUK 18:39 Higeꞌya aulegama mainaya veaꞌmoꞌya kemakiꞌya “Ke ohuka maiyo.” huꞌya hayanagi nagoꞌene ala kefiti keha keha hie “Yisasiga, Tevitina aginagomogae kahauna hunato.” huno keha keha humaine.
LUK 18:40 Higeno Yisasiꞌa haviteno anile heti-maineno “Avaletama nagaite eho.” huno higeꞌya avaleꞌya ageno Yisasiꞌa “Naꞌa hugatesue hugeka nehane?” huno havigegeno “Musekaꞌa nehue nagaya eteꞌna naulaga agesua yafe nehue.” huno hie.
LUK 18:42 Higeno Yisasiꞌa agaifena mage hie “Kaulaga agegali huo. Nagaifema havika kagupi maleka kametiti hanafe kaulagamoꞌa ago kanale hugate.” huno hie.
LUK 18:43 Higeno aupaꞌa ani kanomoꞌa agegali nehuno Yisasi akave neꞌeno Anumaya Koti agi alisaga nehigeꞌya mukiꞌa anile alitalu humainaya veaꞌmoꞌya ageteꞌya Anumaya Koti agia alisaga humainae.
LUK 19:1 Yisasiꞌa Yeliko kumate uvaꞌyi huteno agaseno alulega ugahe vie.
LUK 19:2 Neꞌvigeno ani kumatela nago kanomo agia Sakiusiꞌa musufaya huno vaya amaugafaleti takisi mone aliꞌyate kava kanogino moneꞌamoꞌa kasago humainea kanoe.
LUK 19:3 Ani kanomoꞌa “Yisasiꞌa hanaꞌa augafa kano neꞌefigagiꞌna agesue.” huno hianagi aupa kanogiꞌya yage yage humainaya veaꞌmoꞌya agasageno “Hanaꞌa huꞌna Yisasina agesue?” huno humaine.
LUK 19:4 Yisasiꞌma visia katega aiyayeno uhagoteno nagola fiki yosafi moliteno haimaine.
LUK 19:5 Haino mainegeno Yisasiꞌa ani yosamo aepale neꞌeno agesaga huno ageteno Sakiusifena mage huno hie “Kagaya aupaꞌa elavio menia kagai nopi momaigahue.” huno hie.
LUK 19:6 Higeno Sakiusiꞌa aiyayeno laviteno tusiꞌa muse huno Yisasina avaleno nomaꞌalega atene.
LUK 19:7 Avaleno vigeꞌya veaꞌmoꞌya aniꞌama hia yana ageteꞌya Yisasifena kalugalu ke vaiꞌya mage huꞌya hae “Kefo kavakeꞌya maino nehia kanomo nopinaga maigahe viana havi kava hie.” huꞌya hae.
LUK 19:8 Hayanagi Sakiusiꞌa hetino Anumayamofe mage huno hie “Havio Anumayaniꞌamoga menia nagaya afenoꞌyaniꞌa amuꞌnopiti ali fako huꞌna moneꞌamima omale vaya amamigahue. Havigema huꞌna moneꞌamima musufa ali-mainoa monea eteꞌna foꞌa (4) malete malete huꞌna amamigahue.” huno humaine.
LUK 19:9 Higeno Yisasiꞌa mage huno hapaiye “Kagaya Apalahamuna aginagomoga mainanagi menia anagakaene kagaiꞌene Anumaya Kotiꞌa tamaku tamamena ago alinegatie.
LUK 19:10 Ikapinagati emainoa kanoa vayaꞌmo natenea kanomoꞌna fanane humainaya veafe amatiyeꞌna amaku amame aligatigahe emainoe.” huno hie.
LUK 19:11 Yisasiꞌa Yelusalemu uvaꞌyi hugahe higeꞌya veaꞌmoꞌya amaku amakesa mage huꞌya haviye “Anumaya Kotiꞌa kava yagaisia kanamoꞌa aupaꞌa falote hugahie.” huꞌya amakesa haviya yafe Yisasiꞌa mage huno nago avame kea hamapaiye.
LUK 19:12 “Nago kava kanomoꞌa kava yagaisia tokiyaꞌa aligahe ‘Ayaꞌaya kotega mo maineꞌna aliteꞌna eteꞌna egahue.’ huno humaine.
LUK 19:13 Ayaꞌaya kotega ugahe nehuno teniꞌa (10) aliꞌya vayaꞌamogamife ke higeꞌya ageno monea ali-fako huno tueti (20) kina tueti (20) kina amamite amamite hie. Amamiteno mage huno hamapaiye ‘Mani moneleti aliꞌyana aligeno ali kosa nehenageꞌna nagaya eteꞌna ano.’ huno hamapai-maine.
LUK 19:14 Hamapaiteno ataleno umainegeꞌya nagoꞌa vayaꞌamoꞌya ani kava kanomofe amaipa haviya huteteꞌya nagoꞌa aliꞌya vayala humatageꞌya mo humakesa huꞌya ‘Mage hutama hiho. Tagaya mani kanoma kavatima maisia yafena notahaiye hutama hiho.’ huꞌya hae.
LUK 19:15 Hageno ani kava kanomoꞌa kava yagaisia tokiyaꞌa ago moliteno ani kotegati eteno monema fako huno amaminea aliꞌya vayamogamife ‘Naꞌmagi mone halaꞌya humalenafi?’ huno havisia yafe amakaife ke hie.
LUK 19:16 Ke higeno hagote kanomoꞌa evaꞌyi huno mage hie ‘Ala kanomogae kagaya tueti (20) kinama naminapitila eteꞌna nagoꞌene aliꞌya aliꞌna kosa hua monene tu hataleti (200) kina alugeno hane.’ huno hie.
LUK 19:17 Higeno ala kanomoꞌa mage huno hie ‘Kagaya kanale kano mainane. Kanaleꞌya huka osi mone kanoꞌa kaminofitila efi efi huka aliꞌyana alinageno ala hiafe kagaila teniꞌa (10) ala kumate kava yagaisane huꞌna hapalinegatoe.’ huno hapaiye.
LUK 19:18 Higeno anile kanoa eno mage huno hapaiye ‘Ala kanomogae kagaya tueti (20) kina naminapitila eteꞌna nagoꞌene aliꞌya aliꞌna kosa hoa monene vani hataleti (100) kina alugeno hane.’ huno hie.
LUK 19:19 Higeno ani kanomofena ala kanomoꞌa mage huno hapaiye ‘Nagaya faefuꞌa (5) kumate kava yagaisane huꞌna hapalinegatoe.’ huno hapaiye.
LUK 19:20 Higeno nago aliꞌya kanomoꞌa anile eno mage hie ‘Ala kanomogae tueti (20) kinama naminana monea afaꞌa omanafi haꞌya kiꞌna katenoanagiꞌna menia ma ma aliꞌna me negamue.
LUK 19:21 Kagaya keꞌage kanoma mainananagiꞌna kolikaꞌa hue. Alu veaꞌmogami yana alika kaugafa hegeka omai kano mainananagika nago kanomoꞌa hoyaꞌafima kali-malenea yaꞌene alika negeka omai kanogiꞌna kolikaꞌa hue.’ huno hie.
LUK 19:22 Higeno kava kanomoꞌa ani aliꞌya kanohena mage hie ‘Kagaya havi aliꞌya kano mainane. Kagaikaꞌa kemo eteno maiyahae huno kaiyekea hugategahie. Kagaya ago havimainane nagaya keꞌage kano mainoe. Alu veaꞌmogami yama aliꞌna naugafa hegeꞌna omai kano mainoanagiꞌna nago kanomoꞌma hoyaꞌafima kali-malenea yaꞌene aliꞌna negeꞌna omai kano mainoanagika kagaya nagaifena ago havimainano?
LUK 19:23 Naꞌa higeka monema nemalaya nopina moneꞌnia omaleka afaꞌa malenane. Monema nemalaya nopima malenateꞌasina menia nagaya nagoꞌa aꞌva monene aluleꞌasine.’ huno hie.
LUK 19:24 Anile hetiꞌya mainaya vayafe mage huno hie ‘Tueti (20) kinaꞌnia hafaletama tu hataleti (200) kinama malenea kanomona amiho.’ huno hie.
LUK 19:25 Higeꞌya amakaya kava kanomofena mage huꞌya hapaiye ‘Ala kanomogae ani kanomoꞌa tu hataleti (200) kina ago alino malene.’ huꞌya hae.
LUK 19:26 Hageno mage hie ‘Tamage huꞌna tamahanepauve nago yama hanesia veaꞌmogamina nagoꞌene amamigahigi nago yama omalesaya veaꞌmogamina alilinesamaꞌa hanafalegahie.
LUK 19:27 Kame veaꞌniꞌamoꞌya nagaifena ‘Kavatima maisia yafena notahaiye.’ huꞌya humainaya veala amavaletama naulagale hamaegeꞌya faliho.’ huno hie.”
LUK 19:28 Yisasiꞌa anima hia kaiyekea huno haꞌno humaleteno Yelusalemu ugahe uhagoteno katega umaine.
LUK 19:29 Petafasiene Petaniene ani kumatalana Olivi yosa hanea agoꞌyamona agegayalega hanegeꞌya aupaꞌa uvaꞌyi hugahe hageno Yisasiꞌene tokaeꞌya nemaiya anagapiti tole kanolatana hunateteno mage huno hanapaiye “Atu kumate utana atupa notela hosi kana afumo agia tokigi ani tokimo nafaꞌnea ayetenayanagitana agegaꞌe. Ani tokimo nafaꞌnea vayala oꞌamavalenea tokigi kalu hetana avaletana male eꞌo.
LUK 19:31 Nagoꞌa vayaꞌmoꞌya ‘Naꞌa higetana kalu hetana neꞌvaꞌe?’ huꞌya tanahavigesagetana mage hutana hiꞌo ‘Kava kanotimoꞌa nago aliꞌya aligahe higetaꞌa neꞌoꞌe.’ hutana hamapaiꞌo.” huno hie.
LUK 19:32 Hunatea kanolatamogania mogeteꞌana Yisasiꞌma hanapaiya yana ago moge falote humainaꞌe.
LUK 19:33 Ani tokimo nafaꞌnea kalu nehaꞌageꞌya ani afumo nefaꞌya megeteꞌya mage huꞌya hae “Naꞌa higetana tokimo nafaꞌnea kalu nehaꞌe?” huꞌya hageꞌana mage huꞌana haꞌe “Kava kanotimoꞌa aliꞌya aligahe higetaꞌa kalu nehoꞌe.” huꞌana hamapaiꞌe.
LUK 19:35 Huteꞌana Yisasite avaleꞌana evaꞌyi huꞌana kenaꞌania anaugafaleti hateꞌana ani afumo agupile yakai-malaꞌageno Yisasiꞌa anile haino maine.
LUK 19:36 Haino maiteno katega neꞌvigeꞌya veaꞌmoꞌya “Ala kanoa neꞌie.” huꞌya amaugafaleti kenaꞌamia hateꞌya visia katela yakaitenae.
LUK 19:37 Yisasiꞌa viaꞌyamo Olivi yosa hanea agoꞌyamona agegayalegati enelavigeꞌya mukiꞌama melitalu humainaya veaꞌnene agaiꞌenema tokaeꞌya nemaiya anagaꞌaene tokiya avameꞌyama higeꞌya age-mainaya yafe aepa heꞌya ala kefiti Yisasife muse nehuꞌya Anumaya Koti agia alisaga hume hume neꞌuꞌya mage hae
LUK 19:38 “Ala kava kanomogae kanaleꞌya huka neꞌane. Anumayamo aliꞌya aligahe hanageno hugategeka emainana kanomoga Anumaya Kotiꞌa kanale manu kamiteno kaya humaine. Ikapinaga amaipa falu hisaya yana hanesie. Anafi mainea Anumaya Kotina agai agia alisaga hisune.” huꞌya hae.
LUK 19:39 Hageꞌya anima melitalu humainaya veapiti nagoꞌa Falasia vayala anifi maineꞌya Yisasife mage huꞌya hae “Humavenelina kanomogae kagaiꞌenema tokaeꞌya nemaiya anagakamogamifena ‘Kea ohutama maiho.’ huka hamapaiyo.” huꞌya hae.
LUK 19:40 Hageno Yisasiꞌa mage hie “Nagaya tamahanepauve ani veaꞌmoꞌya kema ohuꞌya maisayana yafaꞌyagamoꞌya amakaiꞌami ani kea hugahae.” huno humaine.
LUK 19:41 Yelusalemu kumala aupate hanegeno Yisasiꞌa ageteno ani kumate veafe avite-maine.
LUK 19:42 Avia ateteno mage hie “Ma kea meni havisae huꞌna nehugi nagaya tamaipamoꞌa falu hisia yana tamamisua kano mainoe. Menima mainogetama ani yana falaki mainegetama noꞌagae.
LUK 19:43 Nagola alu kana falote hisigeꞌya kame vayatamimoꞌya esayaꞌamoꞌya kegiꞌya lafi humalenaya kegiꞌyafi me kagi kagi nehuꞌya ali haviya hulamategahae.
LUK 19:44 Anumaya Kotiꞌa tamaya hugahe neꞌegetama agai kema ohaviya yafe kame vayatamimoꞌya tamakaiꞌene nafaꞌnetamiene mukiꞌa lafifima mainaya veaꞌnene falifalutisageꞌya yafatetiꞌma kimalenaya nona mukiꞌa ani yafamoꞌa mopafi helafilavigahie.” huno hamapaiye.
LUK 19:45 Yisasiꞌa ani kaiyekea huteno ala mono nopi hai faleno ageana ani nopi mainaya veaꞌmoꞌya monehe ke huꞌya neꞌaliya veaꞌmogamina aepa heno amanatigahe nehuno mage hie “Anumaya Koti autaꞌmafina mage huno kae-maleneane ‘Nagai nona mukiꞌa veaꞌmoꞌya Anumaya Koti agi ayeꞌya ke huꞌya havigesaya no hane.’ huno kae-maleneanagi tamakaya musufa yama hisaya kava hugahena ma nopi emainae.” huno hie.
LUK 19:47 Mukiꞌa kanafina ani ala mono nopi hai faleno huge amavelige nehigeꞌya ani mono note kava vayaꞌene kahegi kema havilinaya anagaꞌene mukiꞌa veate kava vayaꞌene Yisasima haesaya kafena atiyemainae.
LUK 19:48 Ati maiꞌya ayayanagi mukiꞌa veaꞌmoꞌya agai kehema muse huꞌya agima alisaga haya yafe ala vayaꞌmoꞌya haesaya kana ageꞌya ali falote ohunae.
LUK 20:1 Nago yupa Yisasiꞌa ala mono nopi maineno alitalu humainaya vayala humavelino Anumaya Koti kanale mono kea hamapaigeꞌya ani kumate vayatamaene mono note kava vayaꞌene kahegi kema havilinaya anagaꞌene agaitega emainae.
LUK 20:2 Mage huꞌya hae “Hana augafa ala kanomo hugategeka mani kavala me nehane? Tokiya yaka ta kamine?” huꞌya havigae.
LUK 20:3 Havigageno Yisasiꞌa mage huno hie “Nagaya hagoteꞌna nago yafena tamahavigegahue nagaila nahapaiho. Yoniꞌma tima falematenea yana Anumaya Kotiꞌa hutegeno ani kavala me nehifi afa vayaꞌmoꞌya hutageno lina fale neꞌamate? Hufalote hutama nahapaiho.” huno hamavige.
LUK 20:5 Higeꞌya “Naꞌa maꞌa hugahune.” huꞌya mohu mehu huteꞌya mage hae “Anumaya Koti hutegeno emaine.” hisunagenoꞌa Yisasiꞌa “Naꞌa higetama agai kea tamakupina nomalae?” huno hugahianagita tagaya “Afa vayaꞌmoꞌya hutageno emaine.” huta hisunana mukiꞌa veaꞌmoꞌya “Yoniꞌa Anumaya Koti aune kano maine.” huꞌya ago humainayafe “Yafa kaꞌyoteti tahaesageta faliyafene.” huꞌya mohu mehu huteꞌya Yisasifena kenonaꞌa mage huꞌya hae “Tapiga hutene? Tagaya ohavinone.” huꞌya humainae.
LUK 20:8 Hageno Yisasiꞌa mage huno hamapaiye “Nagaya aniꞌa huꞌna hana kanomoꞌa hunategeꞌna emainoe huꞌna tamahaopaigahue.” huno hie.
LUK 20:9 Yisasiꞌa aepa heno veafe nago avame kea mage huno hamapaiye nago kanomoꞌa vaini nofi alaga hoya kali-maleteno noꞌagea vayafe mage hie “Etama hoyaꞌnilela yagaitama maineho. Ani nofiꞌmo alagafitila aye fako hutama aliho.” humateteno ayaꞌaya kanagefa umaigahe alu kotega umaine.
LUK 20:10 Afu nelea kanafina ani hoyamona nefaꞌa nago aliꞌya kanoꞌa hutegeno kava vayatega nagoꞌa vaini nofi alaga aligahe umaine. Vigeꞌya hoyale kava vayaꞌmoya atafa huꞌya aikoliteꞌya “Okamigahunagi ataleka vuo.” huꞌya hageno ataleno umaine.
LUK 20:11 Utegeno nagola kayo kayo kanoꞌa hutegeno viana aniꞌa huꞌya aikoliteꞌya agaye hisifa kava huteteꞌya “Okamigahunagi ataleka vuo.” huꞌya hageno ataleno umaine.
LUK 20:12 Utegeno eteno nagola kayo kayo kanoꞌa hutegeno viana aniꞌa huꞌya aikoligeno kolamoꞌa higeꞌya hoyafinagati avaleꞌya malaga hagaꞌyu hutalenae.
LUK 20:13 Hagaꞌyu hutalageno hoyamona nefaꞌa agesafinaga mage huno havie “Hanaꞌa hisue? Nafaꞌneꞌnimona nahau nayamopafi nenahaiya nafaꞌneꞌnia hutesugeno visigeꞌya agai kea havisao?” huno havimaine.
LUK 20:14 Agesa haviteno hutegeno neꞌvigeꞌya ageteꞌya mage huꞌya hae “Mamona mani hoyamona nefa nafaꞌne. Nefaꞌma falisigenofena mani nafaꞌnemoꞌa hoyaꞌa aligahianagita agaila ago haegetao. Haesunageno falisigeta mani hoya tagai ya hapaegahie.” huꞌya hae.
LUK 20:15 Huteꞌya hoyafinagati avaleꞌya hagaꞌyu hutaleteꞌya hayageno fali-maine. Yisasiꞌa mage hie “Naꞌa hayanagi hoyamona nefaꞌa naꞌa humategahie?
LUK 20:16 Eteno hoyaꞌafima kava yagai-mainaya vayala tavata me hamaesigeꞌya faligahae. Fali haꞌno hisageno alu vayafe ‘Hoyaꞌnilela kava me yagaiho.’ huno hugahie.” huno hie. Higeꞌya anifima alitalu humainaya veaꞌmoꞌya mage hae “Avoꞌnio ani kavala ohisie.” huꞌya humainae.
LUK 20:17 Hageno Yisasiꞌa nago kea mage huno hie “Kae-malenaya kemoꞌa mage huno humaineane ‘Vayaꞌmoꞌya yafa noma kigahena nago yafafena ‘Haviya humaine.’ huꞌya atalayanagi haenagaꞌa ani yafamoꞌa ‘Tusiꞌa kanale yafane.’ huꞌya nomo ayetagenale malenae.’ huꞌya kae-malenayane.” huno hie. Huteno amakeno ute ete hiana higeno mage huno hie “Agoꞌma kae-malenaya kemona aepaꞌa havilinao?
LUK 20:18 Mukiꞌa veamoꞌya ani yafateꞌma asaga hulavisayana amaugafamoꞌa atalaga huno haviya hugahianagi ani yafamoꞌa vaya amaugafaleꞌma asaga hulavisiana ailatapeno aitalaga talago hutalegahie.” huno hie.
LUK 20:19 Higeꞌya kahegi kema havilinaya anagaꞌene mono note kava vayaꞌene “Tagaife ani avame kea nehie.” huꞌya ago haviteꞌya “Menia avaleta kina nopi ategahune.” huꞌya hayanagi vaya amauhe koli huꞌya atalenae.
LUK 20:20 Ataleꞌya ala tokiyaꞌama hanea kanomote kaiyeke hutesiafe Yisasifena kesi amata huꞌya maineꞌya agesaya vayala humatageꞌya moyevataga hisayafe ani vayala “Kanale fatago vaya mainone.” huꞌya fau nehuꞌya Yisasiꞌma hisia keleti atafa hugahe humainae.
LUK 20:21 Anima kesi kateꞌma vaiyaya vayaꞌmoꞌya mage huꞌya hae “Humaveli kanomogae tagaya havunana nehana kea fatago katekeꞌya hana kanoe. Nagi kava vayaꞌene afa vayaꞌene nagoke katekeꞌya hamapaika veaꞌma amaipa aye kea nohanagi tamage hutafa huka Anumaya Kotiꞌa ‘Ma kate vuo.’ huno hia kegeꞌya taveneline.
LUK 20:22 Nagi takisi he yatela kava kanoa Sisana kanale amisupi oꞌamisune?” huꞌya havigae.
LUK 20:23 Havigageno Yisasiꞌa agaiꞌma ayevataga haya kea ago haviteno mage huno hamapaiye “Nagola alaga monea alitama naveliho.” higeꞌya aveligeno “Mani alaga monelela ta augosaene ta agiene hane?” huno higeꞌya “Sisa augosaene agiene hane.” huꞌya hae.
LUK 20:25 Hageno Yisasiꞌa mage huno hie “Sisana agaiꞌa yanagi agaila amiho. Nagi Anumaya Kotina agaiꞌa yana agaila amiho.” huno hie.
LUK 20:26 Higeꞌya anima kesi kateꞌma vaiyaya vayaꞌmoꞌya “Vaya amaulagafi hisia keleti atafa hugahe hunanagi tokiya ke hianagita atafa ohugahune.” huꞌya nehuꞌya hia kehe amakesa havi havi huꞌya ke ohuꞌya mainae.
LUK 20:27 Nagoꞌa Satiusi vayaꞌmoꞌya* Yisasitega emainae. Ani vayala mage nehaya vayale “Falimainaya vayala eteꞌya heotigahae.” huꞌya nehaya vayalagiꞌya Yisasite mage huꞌya me havigae “Humavenelina kanomoga Moseseꞌa tagaifena mage huno kae-maleneane ‘Nago kanoma nepuꞌamoꞌa nafaꞌneꞌa oꞌate kanomoꞌma aꞌama ataleno falisigenoꞌa aganaꞌamoꞌa ani aala aliteno maineno fali-mainesia kanomofe anonaꞌa nafaꞌne atesie.’ huno kae-maleneane.
LUK 20:29 Seveniꞌa (7) konaga mainayanagino nepuꞌamimoꞌa aala aliteneanagino nafaꞌnea oꞌate kano maineno falimaine.
LUK 20:30 Falitegeno anile aganaꞌamoꞌa aliteana nafaꞌnea oꞌate kano falimaine.
LUK 20:31 Falitegeno anile aganaꞌamoꞌa eteno aniꞌa hute hute hayana mukiꞌa seveniꞌa (7) konagamoꞌya ani aala alitayana nafaꞌneꞌamia oꞌateꞌya afaꞌa falimainae.
LUK 20:32 Haenagalafa ani aala falimaine.
LUK 20:33 Seveniꞌa (7) konagamoꞌya ani aala alitenayanagi fali-mainesafitiꞌma hetisaya kanafina hana kanomo ani aala aligahie?” huꞌya havigae.
LUK 20:34 Havigageno Yisasiꞌa mage huno hamapaiye “Ma mopafi mainaya veaꞌmoꞌya vea aligeꞌya aꞌne aligeꞌya nehayanagi haenagaꞌama falote hisia kanafina veaꞌmoꞌya amatea kavama agoꞌma huteꞌya maineꞌya fali-mainesafitiꞌma hetisaya kanafina vemoꞌya aꞌnea oꞌaligahae. Aꞌmoꞌyaenena vea oꞌaligahae.
LUK 20:36 Ikapinaga ensole vaya kana huꞌya maisayafenagiꞌya nagoꞌene ofaligahae. Agoꞌma fali-mainafitila heti-mainayafe Anumaya Koti nafaꞌneyaga maigahae.
LUK 20:37 Fali-mainaya veaꞌmoꞌya hetisaya kea Moseseꞌa ago haviline. Nago osi yosale ala ata anefela leanagi ani osi yosa otene huno kae-malenea kefiti mage huno kae-maleneane ‘Anumaya Kotiꞌa Apalahamuꞌagi Aisakiꞌagi Yekopugami Anumaya Kotiꞌami mainoe.’ huno humaineane. Ani anagala fali-mainayanagi ‘Anumaya Kotiꞌami mainoe.’ huno humaineafe amaku amamemoꞌa ofaliꞌya afaꞌa mainae huno ani kea humaine. Anumaya Koti aulagafina ani anagala hamaimula afaꞌa hane.” huno humaine.
LUK 20:39 Higeꞌya nagoꞌa kahegi kema havilinaya anagaꞌmoꞌya agaifena mage hae “Humaꞌvenelina kanomoga kanale ke nehane.” huꞌya hae.
LUK 20:40 Hageꞌya Satiusi vayaꞌmoꞌya koli huꞌya nagoꞌene haviokenae.
LUK 20:41 Yisasiꞌa mage huno hamavige “Veaꞌmoꞌya Kalaisifena, Anumaya Kotiꞌma huꞌtenea kanomofena, ‘Tevitina aginagomoꞌa ma mopale kano maine?’ huꞌya haya kemona aepaꞌa naꞌane hae?
LUK 20:42 Anumaya Kotifena yagame kae-malenaya avona Tevitiꞌa mage huno humaineane ‘Anumaya Kotiꞌa Anumayanimofena mage huno humaine ‘Tamaga nayatega ala vaya mainalega siale mopale emainesanageꞌna kame vayakaꞌa kaiyafi amatesugeꞌya kagaife ‘Ago tagasane.’ huꞌya hugahae.’ huno kae-maleneane.’
LUK 20:44 Tevitiꞌa Kalaisife ‘Anumayaniꞌa mainane.’ huno humainegi naꞌa higeno Tevitiꞌa haenagama atesia aginagomofena ‘Anumayaniꞌa mainane.’ huno humaineane?” huno hamavige.
LUK 20:45 Mukiꞌa veaꞌnea maineꞌya havigeno Yisasiꞌa agaiꞌene tokaeꞌya nemaiya anagafe mage huno hie “Kahegi kema havilinaya anagafena kaꞌyeho. Ani anagaꞌmoꞌya ayaꞌaya kena failiya yafena ‘Nelagafi notagafi?’ huꞌya nehaya anagale. Vaya atagu nefaya kumapi mo vaiyatete nehuꞌya ‘Naꞌa vaya mainae huꞌya ali falu fala hulatesae.’ huꞌya nehuꞌya mono nopiꞌene imuleꞌene ‘Ala vayaꞌage alitalu huꞌya nemaiya yatekeꞌya maigahune.’ huꞌya nehae.
LUK 20:47 Ani anagaꞌmoꞌya keto aꞌneyagahena ‘Mono nopima atalesaya monea tamiho.’ huꞌya nehuꞌya noꞌamifima hanea yaꞌyaga musufaya huꞌya moneꞌamia ali haꞌno nehaya anagalagiꞌya vayala ayemavataga huꞌya ‘Kanale anaga mainae.’ huꞌya hisae huꞌya ayaꞌaya nunamuna humainae. Aniꞌama nehaya anagaꞌmoꞌya havi miyana tusiya huno amaugafa amagata aisia yaꞌene aligahae.” huno hie.
LUK 21:1 Yisasiꞌa agesaga huno ageana veaꞌmoya moneꞌamimoꞌma haimainea veaꞌmoꞌya “Monetia Anumaya Kotina amigahune.” huꞌya pokisifi atalenae.
LUK 21:2 Atalageno ageana nagola moneꞌa omale keto aꞌmoꞌa tole osi haesa monea anifi me vaimaine.
LUK 21:3 Me vaigeno Yisasiꞌa ageteno mage huno hie “Tamagelafa huꞌna tamahanepauve ma ma moneꞌa omale keto aꞌmoꞌa mukiꞌa hagoteꞌyama metalaya veaꞌmogamina amakaseno ala mone metale.
LUK 21:4 Metaleanagi moneꞌami-moꞌma haimainea veaꞌmoꞌya aliꞌyamaꞌa omalenea monegiꞌya, afaꞌa malenaya mone metalageno ani aꞌmoꞌa mukiꞌa kaveꞌma alino nesia moneꞌa mukiꞌa metale.” huno humaine.
LUK 21:5 Nagoꞌa vayaꞌmoꞌya ala mono nofena mage huꞌya hae “Anumaya Koti agi alisaga hugahe vayaꞌmoꞌya kanale yafana aliꞌya ma nona ali hilato huꞌya kimalenae.” huꞌya hae.
LUK 21:6 Hageno Yisasiꞌa mage huno hie “Ma ma neꞌagaya nona nago kanama falote hinagenoꞌa ani yafaꞌyaga mukiꞌa alino lagape aitalesigeno aposi-lavino tole yafamoꞌa nago yafamo agupile aikalo huno omaigahie.” huno humaine.
LUK 21:7 “Hulave nelina kanomogae na kanafi ani kavala hugahie? Hanaꞌa tokiya avameꞌya ani kanama faloteꞌma hisia kanafina taveligahie?” huꞌya havigae.
LUK 21:8 Hageno Yisasiꞌa mage huno hie “Nagoꞌa veaꞌmoꞌya havigema tamahapaisagetama havisao? Ohavisaya yafe kaꞌye ho. Kasagoꞌya vayala nagai nagi ayeꞌya ‘Tamaugafa aligatisuna yafe Anumaya Kotiꞌa hulategeta neꞌone.’ huꞌya hisaya vayala evaꞌyi huꞌya ‘Yisasiꞌma eteno esia kanamoꞌa ago falote nehie.’ huꞌya hisagetama amakavela oꞌviho.
LUK 21:9 ‘Nagoꞌa kotega kame nehae. Nagoꞌa kotegaenema tu hugahe nehae.’ huꞌyama tamahapaisagetama kolia ohiho. Ani yaꞌyaga hagoteꞌya hugahayanagi ma mopama haꞌno hisia yaꞌyaga aupaꞌa vaꞌyi ohugahie.
LUK 21:10 Nago nofi vayaꞌmoꞌya nagoꞌa nofi vayaꞌene kamea hugahae. Ala kotega vayaꞌene nago ala kotega vayaꞌene kamea hugahae.
LUK 21:11 Tusiꞌa imila aligahie. Alu kotega alu kotega tusiꞌa kafu nehuꞌya amakatesia kanaene tusiꞌa kali alisaya kanaene falote hugahie. Ikapinagatila tusiꞌa lamamaꞌyo aisia tokiya avame yaꞌyaga falote hugahie.
LUK 21:12 Ma ma tamahapauva kemoꞌa falote ohunesigeꞌya tamakaya nagai nakaveꞌma nehayafe vayaꞌmoꞌya tamatafa huꞌya ali haviya hulamateteꞌya mono nopi kava vayateꞌene Kamani kava vayateꞌene kaiyekea hulamatesayafe tamavaleꞌya kina nopi tamategahae.
LUK 21:13 Tamatesagetama ani kanafina nagai kea hamapaigahae.
LUK 21:14 Hamapaigahagi kaiyekema hulamatesaya yupa ‘Naꞌane hugahune?’ hutama tamakesa ohaviho.
LUK 21:15 Nagi nagaya nagaiꞌniꞌa ani kanafina kanale ke hisaya kea tamahapaisugetama hisageꞌya kame vayatamimoꞌya ‘Havige hae.’ huꞌya ketamia hefala okigahae.
LUK 21:16 Hefala okigahagi ani kanafina itatamimogamiꞌene nelamafaꞌene neputamimoꞌyaene tamasatamimoꞌyaene tamakaitami afamoꞌene nelamafuꞌyaene tamakaifena ‘Ma mainae.’ huꞌya kaiyekema hulamatesaya yafena kame vayatamimogami amayapi tamavaleꞌya tamatesageꞌya nagoꞌamogatamina tamahaesagetama faligahae.
LUK 21:17 Tamakaya nagai nakaveꞌma nehayafe mukiꞌa veaꞌmoꞌya amaipa kafa helamategahae.
LUK 21:18 Aniꞌa hulama-tegahayanagi kanaleꞌya hutama maigahae. Tamayolegefafina nagola haviya ohugahigi tokiyaꞌage hutama hetitama maisayafe agola maige maige hisaya tamahaimula aligahae.”
LUK 21:20 “Kasagoꞌya kame ati vayaꞌmoꞌya Yelusalemu kumaꞌma kove kove hisagetama agesayana ani kumala ‘Ali hagagi-talegahae.’ hutama tamakesa havigahae.
LUK 21:21 Havisayana Yutia mainesaya veaꞌmogatama tamaiya-yetama agoꞌyalega viho. Yelusalemu mainesaya veaꞌmogatama tamaiya-yetama ani kumala ataletama viho. Hoyafinaga mainesaya veaꞌmoꞌya eteꞌya kumaꞌamilega omesae.
LUK 21:22 Ani kanafina mukiꞌa Anumaya Koti kema kae-malenaya kemoꞌa falote huno tamage hisiafe Anumaya Kotiꞌa ani veala kefo yama humainaya anonaꞌa ali haviya humategahie.
LUK 21:23 Ani kanafina amaipaene aꞌnene nute ani-linesia nafaꞌnemogami itaꞌamimoꞌyaenefe tusiꞌa nahau nehie. Ani kanafina Isaleli kumala tusiya huno haviya hugahie. Isaleli veaꞌmoꞌya kefo yama humainaya anonatamia Anumaya Kotiꞌa havi kavala hulamatesigetama tusiꞌa tamaugafa lamakata yana aligahae.
LUK 21:24 Kame vayaꞌmoꞌya nagoꞌa veala ayaꞌaya naepeleti hataga hamaesageꞌya faligahae. Nagoꞌa veala nofi humateteꞌya amavaleꞌya alu kotega Yuta veaꞌne omainaya veaꞌmogami kotega momategahae. Yuta vea omainaya veaꞌmoꞌya eꞌya Yelusalemu kumala mukiꞌa amaiyaleti ayelata-pesageno aposi-lavigahie. Aposi-lavisigeꞌya ani Yuta vea omainaya veala anile emaige maige huꞌya maisageno Yuta vea omainaya veaꞌmoꞌya kava yagaisaya kanaꞌamia haꞌno hugahie.”
LUK 21:25 Yisasiꞌa nagoꞌene mage huno hie “Yagene kaꞌnefiꞌene ikamoꞌene kugava kava huno alu kava humaveligahie. Nagi hage limoꞌa ayepafa hulino ute ete hisia yafena mukiꞌa kotega ma mopafi veala tusiꞌa amamaꞌyo aigahie.
LUK 21:26 Ikateꞌma hanea yamoꞌya kanage kanage huꞌya alu kate kate visaya yafena mukiꞌa ma mopafima mainaya veaꞌmoya ‘Na ya falote hugahe nehie?’ huꞌya nehisageno amaipamoꞌa kanaꞌage nehinageno amaulagamoꞌa kagi kagi hinageꞌya asaga hulavigahae.
LUK 21:27 Mukiꞌa ani yamaꞌa faloteꞌma hutesigeꞌna ikapinagati emainoa kanoa vayaꞌmo natenea kanomoꞌna siate elavisugeꞌya nagegahae. Tusiꞌa himamu yaniꞌaene tusiꞌa hale yaniꞌaene esugetama nagegahae.
LUK 21:28 Ani kugava yaꞌyaga aepama heno esigetamahena ‘Taugafa aligatisia kanamoꞌa ago aupaꞌa falote hugahe nehie.’ hutama hetitama tamanuna alisaka hutama ageho.” huno humaine.
LUK 21:29 Yisasiꞌa nago avame kea mage huno hamapaiye “Fiki yosaleꞌene afa yosaleꞌene ageho.
LUK 21:30 Ani yosamoꞌa haegafa haisama falote higetamahena ‘Anuna neꞌvalea kana falote hugahie.’ hutama nehae.
LUK 21:31 Aniꞌa hugahianagi anima tamahapauva kugava yama agenutamahena ‘Anumaya Kotiꞌa kava yagaisia kanamoꞌa ago falote hugahie.’ hutama havigahae.
LUK 21:32 Nagaya tamage huꞌna tamahanepauve meni kanafima mainaya veaꞌnea ofalinesageno ani yaꞌyaga falote hugahie.
LUK 21:33 Ikaꞌene ma mopaene ago fanane hugahianagi nagai kemoꞌa fanane ohugahie.
LUK 21:34 Tamakaitamile yagaiho. Havigu havili nelitetama nehutama havigu kave nesaya yafeꞌene tamaugafale yaꞌenefe tamakesa havi havi hisageno ani yamoꞌma aiso hulamatesiana ala kanomo kalifumoꞌma aupaꞌa hatea kava huno esigetamahena talo tala ohunesageno esigi kava yagaitama maiho. Yisasiꞌa mukiꞌa ma mopafi veaꞌmogami amaulagale evaꞌyi hinageꞌya atali-talu hugahae.
LUK 21:36 Ani yafena tamakaitami nagoke nagokemogatama kava yagaiho. Mukiꞌa kanale tokiyama alisayafena nunamuna higeno ani tokiya tamamisigeno ani havi yama falote hisia kanafina Anumaya Kotiꞌa tamaugafa aligatisigetama ikapinagati emainoa kanoa vayaꞌmo natenea kanomoni naule hetigahae.” huno hamapai-maine.
LUK 21:37 Yisasiꞌa mukiꞌa kanafina ala mono nopi haino maineno humavenelino mukiꞌa kegela Olivi yosa hanea agoꞌyafi haino nemaiyane.
LUK 21:38 Haino mainegeno koꞌma neleana mukiꞌa veala “Agai kema havigahune.” huꞌya mono nopina etele nehayane.
LUK 22:1 Ala imu negiya kanamoꞌa meupa higeꞌya ani imule hale oki kaihamena nenayane. Ani imua kafuꞌahe kafuꞌahe Anumaya Kotiꞌma Yuta veaꞌmogami amakinago-mogamima amaugafa aligatimainea kanahe amakesa havi havi hisaya imu* alitalu huꞌya negiyane.
LUK 22:2 Ani kanafina mono note hagote kava vayaꞌene kahegi kema havilinaya anagaꞌene Yisasina haesaya kafe atiyayanagi vaya amaulagahe koli humainae.
LUK 22:3 Koli nehageno aupaꞌa Sataniꞌa* Yutasi aipafi hai fale-maine. Yutasi Isakaliotiꞌa Yisasina tuelufuꞌa (12) anagaꞌene nemaiya kanogino neꞌamataleno viaꞌamo mono note kava vayaꞌene mono note ati kava vayaꞌene kea kea huno mage hie “Nagaya hanaꞌa kateti agesila huꞌna tamahapaisugetama Yisasina atafa hugahae?” huno higeꞌya muse huteꞌya “Aniꞌama hisanageta mone hageta kamigahune.” huꞌya hapaimainae.
LUK 22:6 Hapaigeno Yutasiꞌa “E, kanalele” huno huteno vaya kulata oꞌaiya yate kesi kateti Yisasina movalesigeꞌya atafa hisaya kafe ati ayemaine.
LUK 22:7 Hale oki kaihamema nenaya kanamoꞌa hagote yupa falote hie. Ani yupa amaugafama aligatimainea yafe amakesa ali hao hisayafe nagola sipi sipi nafaꞌneꞌa hemainae.
LUK 22:8 Yisasiꞌa Pitaꞌene Yoniꞌene hunateno mage hie “Utana Anumaya Kotiꞌma taginagomogami amaugafa aligatimainea yafe tagesa ali hao hisuna kavela utana talo tala hiꞌageta monamano.” huno hie.
LUK 22:9 Higeꞌana “Hana nopi mo lalo tala hisuꞌe huꞌageka nehane?” huꞌana havigaꞌe.
LUK 22:10 Haꞌageno Yisasiꞌa mage huno hanapaiye “Haviꞌo ala kumate utana nago kanomoꞌa ti kema hefilino visia kanoene mo fotu hutetana akave utana haisia nopi haitana ani nomona nefafe mage hutana havigeꞌo ‘Hulavenelia kanomoꞌa kagaife mage huno kahavige ‘Hana nopi nagaiꞌene tokaeꞌya nemaiya anagaꞌmoꞌyaene Anumaya Kotiꞌma taginagomogami amaugafama aligatimainea yafe tagesa ali hao hisuna kavela nesune?’ huno hie.’ hutana havigeꞌo.
LUK 22:12 Havigesaꞌageno folamo huno anayapi kimalenea nona ago alino hilato humalenea nona, ala nokefa, tanavelisigetana ani nopi kavetia talo tala hiꞌo.” huno hanapaiye.
LUK 22:13 Hanapaigeꞌana vaꞌana hia kemoꞌa mukiꞌa falote higeꞌana Anumaya Kotiꞌa amaugafa aligatimainea kanahe amakesa havi havi hisaya kavela mo lalo tala humainaꞌe.
LUK 22:14 Kave ne kanamoꞌa aupa higeꞌya Yisasiꞌene agaiꞌaene tokaeꞌya nemaiya anagaꞌmoꞌyaene kave negahe folamole mainae.
LUK 22:15 Mainageno Yisasiꞌa mage huno hamapaiye “Anumaya Kotiꞌma taginagomogami amaugafama aligatimainea yafe tagesa ali hao hisuna kavela tamakaiꞌene tokaeta nesuna yafe tusiya huno nenahaiye. Neteꞌna tusiꞌa nagata aisigeꞌna faligahue.
LUK 22:16 Tamahapauve ma kavela nagoꞌene ma mopafi maineꞌna onegahue. Anumaya Kotiꞌa agola tamaku tamamena aligatisigeꞌna ikapinaga eteꞌna negahue.” huno hamapaiye.
LUK 22:17 Nagola nofi alagamo timo agia vainie. Yisasiꞌa ani lima hanea keꞌayola alino Anumayamotega muse huno havigeteno mage huno hamapaiye “Ma keꞌayola alitama nete nete hiho.
LUK 22:18 Tamahanepauve menia ma vaini nofi alagamo tina* nagoꞌene onegahue. Anumaya Kotiꞌma kava yagaisia kanamoꞌma falote hinageꞌna eteꞌna negahue.” huno hamapaiye.
LUK 22:19 Naꞌa huteno kaihamena alino nunamu huno muse huno havigeteno kolite kolite huno neꞌamamino mage huno hie “Mamona nagaiꞌni naugafae. Tamakaife huꞌna naugafa atalesugetama mukiꞌa kanafina aniꞌa hutama nete nete nehutama nagaifena tamakesa havi havi hutama maiho.” huno hamapaiye.
LUK 22:20 Higeꞌya ani kavela netageno vaini nofi alagamo tima* hanea keꞌayola alino aniꞌa huno Anumayamotega muse huno havigeteno alino amamite amamite nehuno mage huno hamapaiye “Ma lina nagai kolaniꞌae. Nahaesageꞌna falisuana kolaniꞌamoꞌa tamakaifene huno take take hulavisiafe haegafa kea, Anumaya Kotiꞌene hage-lafitama maisaya kea* alino fatago hugahie.
LUK 22:21 Haviho vayaꞌmoꞌya havisagi huno nagaila nagesi huno kame hunatesia kanomoꞌa nagaiꞌene tokaeno mainegetaꞌa nagokepiti kavela alitaꞌa nenoꞌe.
LUK 22:22 Ikapinagati emainoa kanoa vayaꞌmo natenea kanomoꞌna Anumaya Kotiꞌma hunatenea kate ugahuanagi vayaꞌmoꞌya havisagi huno nagesi hunatesia kanomofena ‘Avoꞌnio nahau hanagi kagaya maigaꞌyo huꞌna nehue.’ huno humaine.”
LUK 22:23 Higeꞌya amakaiꞌami huge havige nehuꞌya mage hae “Ani kavala tagaipitila ta hugahie?” huꞌya mo havige me havige hae.
LUK 22:24 Yisasiꞌenema tokaeꞌya nemaiya anagamoꞌya mage huꞌya hae “Ta tagaipina tagaseno ala kanoa maine?” huꞌya ani yateti ke vaimainae.
LUK 22:25 Ke neꞌvaigeno Yisasiꞌa mage huno hie “Ma mopale ala kava vayamoꞌya kemamakiꞌya aliꞌya ke huneꞌamateꞌya ‘Tagaifela kayone huka kanale kava kanoe huꞌya hunatesae.’ huꞌya nehae.
LUK 22:26 Nehayanagi tamakaya aniꞌa kavala ohiho. Tamakaipima agima hanesia kanomoꞌa osi nafaꞌnemoꞌma maiya avamete maisia kanomoꞌa kava kanotami maineno kayo kayo kano maisie.
LUK 22:27 Ta ala kava kanoa maine? Mopale maineno kavela nenea kanofi? Kavela hatino neꞌamamia kanofi? Afaꞌa mopale maineno kaveꞌma nenea kanoa ala kano mainegi nagaya tamakaiꞌene maineꞌna kayo kayo hunelamatoe.
LUK 22:28 Nagaiteꞌma havi kanama falote higetamahena tamakaya onataletama nagaiꞌene mainayane.
LUK 22:29 Ani yafena Nenafaꞌa nagaife ‘Kava yagaigane.’ huno hunatenea kava huꞌna tamakaila ‘Kava yagaigahae.’ huꞌna nelamamue.
LUK 22:30 Naꞌa hisugetama kavama yagaisua kumaꞌnilela umainetama nagaiꞌene kavela nenetama kava vayaꞌmogami siale mainetama teniꞌa (10) Isaleli nofi veaꞌmogamite kava yagaigahae.” huno humaine.
LUK 22:31 Saimonifena mage huno hie “Saimonigae, Saimonigae havio Sataniꞌa tamakayama nagaila natalesaya yafe tamakaila tamatafa huno ayelamavataga hisia yafe ‘Ani vayala namio.’ huno Anumaya Kotifena havigeanagi nagaya kagaifena Saimoniga nagaifema ‘Tusiꞌa tokiyaꞌa hane.’ huka kagupi maleka kametiti humainana kea oꞌatalesanafe Anumaya Kotitega ago havigogi kaguꞌa aiyahae huka vayakamoꞌya nagaifema amakupi maleꞌya amametiti hisayafe amaya huo.” huno hie.
LUK 22:33 Higeno Saimoniꞌa kenonaꞌa mage huno hie “Alaniꞌamogae nagaya kagaiꞌene kina hulaꞌateteꞌya taꞌahaesagetaꞌa faligahuꞌe huꞌna nagu nagesa talo tala nehue.” huno hie.
LUK 22:34 Higeno Yisasiꞌa kenonaꞌa mage huno hie “Pitaga kahanepauve meni kegela kokolemoꞌa agea oꞌainesigeka tagufa (3) kanale ‘Nagaya oꞌagenoa kanoe.’ huka avane hunategane.” huno humaine.
LUK 22:35 Huteno nagoꞌene mage huno hamapaiye “Monetamiene kutamiene tamaiya noꞌene oꞌalitama viho huꞌna hulamatogetama vayana nagoꞌa yafena aupa humainao?” huno higeꞌya “Aꞌao mukiꞌa yana kanaleꞌya huta alimainone.” huꞌya hae.
LUK 22:36 Hageno nagoꞌene mage huno hie “Hagoteꞌna mani kea tamahapai-mainoanagi menia monetamima hanesimogatama alitama viho. Kutamima hanesi-mogatama alitama viho. Ayaꞌaya naepetamima omalesi-mogatama kenatamia alu kanomona amisageno anonaꞌa ayaꞌaya naepea tamamisie.
LUK 22:37 Naꞌafene nagaya tamahanepauve nayona Anumaya Koti kefima kae-malenaya kemoꞌa mage huno kae-maleneane ‘Vayaꞌyagamoꞌya agaifena mage hae ‘Havi kavakeꞌya nehia kano maine.’ huꞌya hae.’ huꞌya kae-malenayanagi nagaiꞌma hunatesaya kavaꞌma hisagenoꞌa ani kemoꞌa falote hisigeꞌya ‘Tamage humaineane.’ huꞌya hugahae.” huno nehie.
LUK 22:38 Higeꞌya mage hae “Alatimogae ago tole ayaꞌaya naepea ma hane.” huꞌya hageno kenonaꞌamia mage hie “Haile.” huno humaine.
LUK 22:39 Yisasiꞌa kumala ataleno mukiꞌa kanafi nehia kava huno Olivi yosa hanea agoꞌyafi haigeꞌya agaiꞌenema tokaeꞌya nemaiya anagaꞌamoꞌya akave haimainae.
LUK 22:40 Ago anilega uvaꞌyi huteꞌya mage huno hamapaiye “Anumaya Kotitega nunamu hutama havigeho ‘Sataniꞌma ayelavataga hisia yapina tavaleka oꞌvuo.’ hutama havigeho.” huno hie.
LUK 22:41 Ani kea huteno neꞌamataleno viaꞌamo vayaꞌmoꞌya yafama hagaꞌyu hutalageno neꞌvia avamete viaꞌamo aleꞌya moye maineno Anumayamotega mage huno havige “Nenafagae falisua kava nehugi kahaisigekahena ani havi kanamoꞌa satuꞌage hia ti kana ti hanea keꞌayola nahafalo. Afaꞌa nagai nagu nagesa akave ohuka kahaisia kavala huo.” huno havige-maine.
LUK 22:43 Nehigeno ikapinagati nago ensole kanomoꞌa tokiya memine.
LUK 22:44 Memigeno Yisasiꞌa augafafinaga malageno ageana tusiꞌa kanaꞌage haiya yafe Anumayamotega nagoꞌene tusiya huno havinegegeno amuꞌnamoꞌa kolamoꞌma hia kava huno mopafina take take hulavimaine.
LUK 22:45 Take take nehigeno Anumayamotega havigeteno hetino mogeana agaiꞌaenema tokaeꞌya nemaiya anagaꞌmoꞌya hamauma haya yafe ago fae-mainageno momake-maine.
LUK 22:46 Momaketeno mage huno hie “Ae faetamage mainao? Hetitama Sataniꞌa ayelama-vataga hisigetama asaga hu otavisaya yafena Anumayamotega nunamuna hutama havigeho.” huno hie.
LUK 22:47 Ani kea nehigeꞌya kasagoꞌya vaya evaꞌyi hageno Yutasiꞌa tuelufuꞌa (12) anagapi tokaeno nemaiya kanomoꞌa amavaleno Yisasina me tako hugahe emaine.
LUK 22:48 Neꞌegeno Yisasiꞌa mage huno hie “Yutasigae natako hisana yateti nagaila ikapinagati emainoa kanoa vayaꞌmo natenea kanomonia nagesi huka kame vaya amayapi nategahe nehano?” huno hie.
LUK 22:49 Nehigeꞌya agaiꞌaenema tokaeꞌya nemaiya anagaꞌmoꞌya haya kavala ageteꞌya mage hae “Alamogae ayaꞌaya naepeleti hamaesuno?” huꞌya hae.
LUK 22:50 Nehageno amakaipiti nago kanoa ala mono nopima hagote kava kanomona aliꞌya kanoꞌamona ayaꞌaya naepeleti tamaga kaiyaga agesa aifakali-talegeno asaga hulavimaine.
LUK 22:51 Aifakaligeno Yisasiꞌa mage hie “Tu hisaya kavala ohiho.” huno nehuno ayana ani agesamo aepale maleno agesa alino kanale hutene.
LUK 22:52 Alino kanale huteteno mono note kava vayafeꞌene ala mono note ati kava vayafeꞌene Yuta vayatamaene agaiꞌma atafa hugahe aya vayaꞌmogamifeꞌene Yisasiꞌa mage huno hamapaiye “Tamakaya nagaifena ‘Vaya nehamaeno musufaya nehia kano maine.’ hutama ayaꞌaya naepene muki kaꞌyoꞌene alitama neꞌao?
LUK 22:53 Nagaya mukiꞌa kanafina efi efi huꞌna tamakaiꞌene ala mono nopina nemauvanagi natafa ohunayane. Anumaya Kotiꞌa meni kana tamayapi malegetama Sataniꞌa hani yamo nefaꞌa aliꞌya alisia kanamoꞌa ago falote humaine.” huno hie.
LUK 22:54 Atafa huꞌya mono note hagote kava kanomo* kumate avaleꞌya vageno Pitaꞌa akave anatino vianagi avatela oꞌunegi ago aluꞌale umaine.
LUK 22:55 Umainegeꞌya ani no kegiꞌya kovefi ata kae-maleteꞌya mopale mainageno Pitaꞌa amakaiꞌene mopale umaine.
LUK 22:56 Ata anefete mopale mainegeno nagola aliꞌya munaꞌmoꞌa Pitana ageke huno ageteno mage hie “Ma kanoa Yisasiꞌene vaiyatete nehia kanoe.” huno hie.
LUK 22:57 Higeno Pitaꞌa avane huno mage hie “Aꞌao ma munaꞌmoga nagaya oꞌagenoa kanohe nehane.” huno humaine.
LUK 22:58 Osiꞌa maigeꞌya nago kanomoꞌa Pitana ageteno mage huno hie “Kagaya Yisasiꞌene tokaetana nemaiꞌa kano mainane.” huno higeno Pitaꞌa mage hie “Aꞌao ma neꞌmoga nagaya oꞌagenoa kanohe nehane.” huno humaine.
LUK 22:59 Osiꞌa maigeꞌya nago kanomoꞌa tokiyaꞌage kefiti mage huno hie “Tamage huꞌna tamahanepauve ma kanoa Kalili kanoe. Yisasiꞌene vaiyatete nehia kano maine.” huno hie.
LUK 22:60 Higeno Pitaꞌa mage huno hie “Ma neꞌmoga nagaya ohavinoa kehe nehane.” huno nehigeno anile aupaꞌa kokolemoꞌa agea aimaine.
LUK 22:61 Age aigeno Anumayamoꞌa maiyahae huno Pitana ageke huno agegeno Pitana agesamoꞌa aikalo higeno Yisasiꞌma hapaigeno havimainea kea mage huno humaineane “Meni kegela kokolemoꞌa agea oꞌainesigeka kagaya tagufa (3) kanale avane huka nagaila ali falakigane.” huno humainea kehe Pitana agesamoꞌa aikalo higeno haviteno hatilavino viaꞌyamo tusiꞌa avi motemaine.
LUK 22:63 Yisasima atafa humainaya vayaꞌmoꞌya kigi huneꞌateꞌya akaya ateꞌya kaꞌyo aikoneliꞌya aulagafina kenaleti nofi kisalu kiteneꞌya mage huꞌya hae “Kaune laga nehana kanogi tahapaiyo taꞌya negahayae?” huꞌya havigae.
LUK 22:65 Nagoꞌene alu ke alu ke huꞌya kigi huneꞌateꞌya akaya atenae.
LUK 22:66 Kotigeꞌya Yuta vayaꞌmogami vayatamaene mono note kava vayaꞌene kahegi kema havilinaya anagaꞌene kanisolefi melitalu huteꞌya Yisasina avaleꞌya anile umaineꞌya Yisasifena mage huꞌya havigae.
LUK 22:67 “Tahapaiyo kagaya Anumaya Kotiꞌa taugafa aligatigahie huno hugatenea kano mainano?” huꞌya hageno Yisasiꞌa kenonaꞌamia mage hie “Nagayama tamahapaisugetamahena ‘Tamage nehane.’ hutama ani kea havitama tamakupina omalegahae.
LUK 22:68 Nagaya nago kema tamahavigesugetamahena kenonaꞌania nahaꞌopaigahae.
LUK 22:69 Meni aepa heno ikapinagati emainoa kanoa vayaꞌmo natenea kanomoꞌna tusiꞌa himamuꞌa hanea Anumaya Kotina aya tamaga kaiyaga hanea siale umaineꞌna agola maige maige huꞌna maigahue.” huno humaine.
LUK 22:70 Higeꞌya mukiꞌa anile melitalu huꞌya mainaya vayaꞌmoꞌya mage huꞌya hae “Kagaya ani kea nehananagi Anumaya Kotina nafaꞌneꞌamoga mainano?” huꞌya havigageno “Tamakaya nagaifena tamage nehae. ‘Ani kano mainane.’ hutama nehae.” huno humaine.
LUK 22:71 Higeꞌya mage hae “Agaiꞌa avayafiti ago haesuna kea hufalote higeta havune. Havigu nagoꞌa vayaꞌmoꞌya nagoꞌa kea agaifena tahapaiyafenagita alu vayaꞌmogamifena ke ohisune.” huꞌya humainae.
LUK 23:1 Mukiꞌa kanisolefi metalu huꞌya mainaya vayaꞌmoꞌya hetiꞌya Yisasina avaleꞌya ala kava kanoa, Pailatite umainae.
LUK 23:2 Avaleꞌya umaineꞌya aepa heꞌya “Ma kava huno kefo kavala humaine. Tagaya agonana mani kanomoꞌa tagai nofi vayafena mage hie ‘Kamani vayaꞌmogami kea neꞌataletama havi kava hiho.’ huno nehuno tagaifena ‘Takisi neꞌamamiya yana Sisana oꞌamiho.’ huno nehuno ‘Nagaya nagaiꞌniꞌa Kalaisiꞌna, Sauve kano mainoe.’ huno humaine.” huꞌya hae.
LUK 23:3 Hageno Pailatiꞌa Yisasifena mage huno havige “Kagaya Yuta nofi vayaꞌmogami Sauveꞌami mainano?” huno havigegeno Yisasiꞌa mage hie “Kagaikaꞌa mani kea hai nehane.” huno hie.
LUK 23:4 Higeno Pailatiꞌa mono note kava vayafeꞌene mukiꞌa alitalu huꞌya mainaya vayafeꞌene mage huno hamapaiye “Kefo kavaꞌma hu-mainesiafene huꞌna atiyoana nago yamaꞌa omale.” huno hamapaiye.
LUK 23:5 Higeꞌya tokiyaꞌage kefiti mage huꞌya hae “Mukiꞌa Yutia kotega ute ete nehuno veafena mage humaine ‘Kamani vayaꞌmogami kea neꞌataletama ma kava hiho.’ huno humaveligeꞌya veaꞌmoꞌya ‘Ani kava humategahune.’ huꞌya hae. Kaliliti ani kavala aepa heno hulino hulino menia male neꞌe.” huꞌya hae.
LUK 23:6 Pailatiꞌa ani kea haviteno mage huno hamavige “Ani kanoa Kalili kano maineo?” huno hamavige.
LUK 23:7 Hamavigegeꞌya “E, ani kumateti kanoe.” huꞌya hageno “Heloti kava yagaimainea kotegati kanoe.” huꞌya hageno haviteno hutegeno Helotite umaine. Ani kanafina Helotiꞌa Yelusalemu nemaiyane.
LUK 23:8 Helotiꞌa Yisasina ageteno tusiꞌa muse hie. Avagema haviana “Tokiyaꞌage avameꞌya yana nagoꞌa hinageꞌna agesue.” huno nehuno ayaꞌaya kanale Yisasina agesia agesa havianagi noꞌageane.
LUK 23:9 Yisasina ageteno mukiꞌa kehena havige havige hugeteana Yisasiꞌa nagola osi ke kanoꞌa ohune.
LUK 23:10 Ke ohuno maigeꞌya mono note kava vayaꞌene kahegi kema havilinaya anagaꞌene anile hetiꞌya maineꞌya tusiꞌa ke nehuꞌya “Na kava ma kava huno kefo kavala humaine.” huꞌya hae.
LUK 23:11 Hageno Helotiꞌene ati vayaꞌamoꞌyaene Yisasina huhaviya huteteꞌya kigi huteꞌya kamuge hatageꞌya vaineꞌateꞌya nagola kanale kena aliꞌya me faitetageno Helotiꞌa Yisasifena “Pailatite etetama avaletama viho.” huno humatene.
LUK 23:12 Helotiꞌene Pailatiꞌene kame kanolata mainaꞌaleti ani yupa anakaya ali konaga ayemainaꞌe.
LUK 23:13 Pailatiꞌa mono note kava vayafeꞌene Yuta vayaꞌmogami kava vayafeꞌene vayaꞌyagamogamifeꞌene ke higeꞌya melitalu hageno mage huno hamapaiye “Tamakaya ma kanomofena ‘Kefo kava huno veafena ‘Kamani vayaꞌmogami kea neꞌataletama havi kava hiho.’ huno hamapai-maine.’ hutama nehutama nagaifena kaiyeke hutesane hutama avaletama ayanagi nagaya tamakai tamaulagafima havigoana ‘Kefo kavaꞌma humaine.’ hutama haya kavala tamage huno kefo kavala ohune huꞌna nehue.
LUK 23:15 Aguꞌafina agoanagino Helotiꞌa aniꞌa huno ageana tagaitefe ‘Eteka vuo.’ huno hutegeno eanagi ageho mani kanoa falisia augafa kefo kavala ohuneafe afaꞌa kaꞌyo amiꞌna aumono maleteꞌna atalesugeno visie.” huno hie.
LUK 23:18 Hianagi mukiꞌa alitalu humainaya veaꞌmoꞌya ailulupeꞌya mage hae “Yisasina haegeno falino. Tagaya Palapasife nofipiti haꞌno hisie huta nehune.” huꞌya hae.
LUK 23:19 Ani Palapasiꞌa ala kumate vayaꞌyagamofe mage hie “Kava vayaꞌene tu higetao.” huno huteno nago kanoa haegeno falimainea yateti avaleꞌya kina hutenaya kanogiꞌya agaife ani kea hae.
LUK 23:20 Hageno Pailatiꞌa “Yisasina atalesugeno afaꞌa visie.” huno agesa havia yafe nagoꞌene ke huno hamavige.
LUK 23:21 Hamavigegeꞌya ala kefiti mage hae “Yafaga yosale nili hetama asaigeno falino. Yafaga yosale nili hetama asaigeno falino.” huꞌya humainae.
LUK 23:22 Hageno Pailatiꞌa nagoꞌene eteno mage hie “Naꞌa higetama ani kea nehae? Hanaꞌa kefo ya humaine? Nagaya atiyoana falisia kefo augafa kavala ohuneafe afaꞌa kaꞌyo amiꞌna aumono maleteꞌna atalesugeno visie.” huno hie.
LUK 23:23 Ani kea hianagi amakaya tusi tokiyaꞌage kefiti mage huꞌya hae “Yafaga yosale nili hetama asaigeno falino.” huꞌya tokiyaꞌage kegeꞌya hageno Pailatiꞌma hia kemona amakai kemoꞌa hefalaki-maine.
LUK 23:24 Keꞌamona hefalakigeno Pailatiꞌa haya ke haviteno Yisasifena “Yafaga yosale nili hetama asaigeno falino.” huno ati vayala hamapaimaine.
LUK 23:25 Palapasiꞌa vayafe “Kava vayaꞌene tu higetao.” huteno nago kanoa haegeno falimainea yateti avaleꞌya kina hutenaya kanoa tutu haya yafe Pailatiꞌa “Haꞌno hanagi vuo.” huno huteanagi mukiꞌa vayaꞌmoꞌya Yisasifena “Yafaga yosale nili hetama asaigeno falino.” huꞌya haya kemo akave malene.
LUK 23:26 Yisasina avaleꞌya katega neꞌuꞌya Sailini Saimoniꞌene mo fotu humainae. Saimoniꞌa hoyafinagati kate eneꞌvigeꞌya ati vayaꞌmoꞌya motafa huꞌya yafaga yosa aliꞌya ayoꞌnale kofiteteꞌya “Yisasi akave kofika vuo.” huꞌya hutenae.
LUK 23:27 Mukiꞌa veaꞌmoꞌya akave neꞌvageno aꞌnemoꞌya avi neꞌateꞌya hamau hume hume akave umainae.
LUK 23:28 Neꞌvageno Yisasiꞌa maiyahae huno amaketeno mage hie “Yelusalemu mainaya aꞌnemogatama nagaifene hutama avia oꞌateho. Avima ategahena tamakaitamihe neꞌatetama nafaꞌneyagatamimofeꞌene avia atemateho.
LUK 23:29 Haviho haenagaꞌa nago kana falote hisigeꞌya mage huꞌya hugahae ‘Namo aꞌnemogatama nafaꞌne oꞌatetama numa noꞌamisaya yafena tusiꞌa muse hutama maiho.’ huꞌya hugahae.
LUK 23:30 Ani kanafina aepa heꞌya ala agoꞌyamofena mage huꞌya hugahae ‘Kolilavika aiso hulato.’ huꞌya hugahae. Osi agoꞌyahena ‘Mehi alika aiso hulato.’ huꞌya hugahae.
LUK 23:31 Nagaya haegafa ata kana huꞌna mainoa kanoe. Kefo yana tamage huꞌna ohunoa kano mainogeꞌya mani kavala hunenatayanagi tamakaya avaifa ata kana hutama kefo kava nehaya veaꞌne mainayafe na kava hulamategahae?” huno humaine.
LUK 23:32 Yisasina haegahe avaleꞌya neꞌuꞌya tolea kefo yama humainaꞌa kanolataꞌene hanaegahe anavaleꞌya umainae.
LUK 23:33 Anu ayamufae huꞌya nehaya kumate avaleꞌya uteꞌya yafaga yosale nili haeꞌya asaimainae. Tole kefo yama humainaꞌa kanolatane nago kanoa Yisasina tamaga kaiyagaꞌa haeꞌya asaimaleꞌya nago kanoa haoga kaiyagaꞌa haeꞌya asaimaleꞌya humainae.
LUK 23:34 Yisasiꞌa Anumayamotega ke huno mage huno hie “Nenafagae mani vayaꞌmoꞌya kefo yama haya kavala ‘Naꞌa kava nehune.’ huꞌya havilama ohaya yafe aigeꞌamateka kefo yaꞌamia atalemato.” huno humaine. Higeꞌya ati vayaꞌmoꞌya kenaꞌa aligahe musufayama nehaya yokalo lageno amakaseno haiya kanomo alimaine.
LUK 23:35 Aligeꞌya veala alitalu huꞌya hetiꞌya aulu heꞌya mainageꞌya kava vayaꞌmoꞌya kamuge hatageꞌya vaineꞌateꞌya mage hae “Nagoꞌa veala amaugafa aligatimainea kanogi Anumaya Kotiꞌma hau ayamopafi nehaiya kanoa taugafa aligatigahie huno hutenea kanoma mainesiana agaiꞌa augafa aligatino.” huꞌya hae.
LUK 23:36 Anuteꞌma kaeꞌya malaya avomoꞌa mage huno hie “Mani kanoa Yuta veate ala Sauve kanoe.” huꞌya kaeꞌya malenae. Malenageꞌya ati vayaꞌmoꞌya aniꞌa huꞌya kamuge hatageꞌya vaineꞌateꞌya atuꞌage nofi alagafiti tina neꞌamiꞌya mage hae “Kagaya Yuta vayate sauve kanoꞌamima mainesanana kagaikaꞌa kaugafa aligatio.” huꞌya hae.
LUK 23:39 Nagola kefo yama humainea kanoa yafaga yosale nili heꞌya asaimalaya kanomoꞌa Yisasifena hu-haviya huteno mage huno hie “Anumaya Kotiꞌma taugafa aligatigane huno hugatenesia kanoma mainenuka kagaikaene taꞌagaiꞌene yosaleti ali hakao hugeta tavimano.” huno hie.
LUK 23:40 Higeno nagola kefo yama higeꞌya yafaga yosale nili heꞌya asaimalaya kanomoꞌa ani kea haviteno kemakino mage huno hie “Vae kagaya Anumaya Kotifena kolia nohuka ani kea nehano? Kefo yama humainoꞌa anonaꞌa nagopi taꞌagaila nilia laꞌahaeꞌya asailaꞌa-tenayanagitaꞌa faligahuꞌe.
LUK 23:41 Taꞌagaya kefo yatiꞌamo anonaꞌa fatago kava hayanagi ma kanoa nagola osi kefo yamaꞌa omalene.” huno hie.
LUK 23:42 Nehuno ani kanomoꞌa Yisasifena mage huno hie “Yisasiga kava yagaigahema esana kanafina nagaifena kagesa havi namio.” huno hie.
LUK 23:43 Higeno Yisasiꞌa kenonaꞌa mage huno hie “Tamagelafa huꞌna kahanepauve meni kanoꞌa nagaiꞌene kanale maige maige hisaya kumatela tokaetaꞌa umaigahuꞌe.” huno hapaiye.
LUK 23:44 Anile yagemoꞌa euno amuꞌnokaꞌno higeno halemainea yamoꞌa haꞌno higeno mukiꞌa kotega tusiꞌa hanikino viaꞌyamo une kanalega eteno ali halemaine.
LUK 23:45 Ani hanimo aguꞌafinaga ala mono nopima asaimalenaya kenagefamoꞌa* amuꞌnopiti aipa hulole humaine.
LUK 23:46 Aipa hulole higeno Yisasiꞌa ala kefiti mage huno hie “Nenafagae nagu nafaꞌnea kagai kayapi nemaloe” huno nehuno haimula atalegeno vigeno falimaine.
LUK 23:47 Faligeno ati vayate kava kanomoꞌa anile maineleti mukiꞌa yama hia kavala ageteno Anumaya Koti agi alisaga nehuno mage huno hie “Tamage mani kanoa kefo yana nohia kanoe.” huno humaine.
LUK 23:48 “Na kava hutesafi agetetae.” huꞌya melitalu humainaya veaꞌmoꞌya mukiꞌa humainea kavala ageteꞌya tusiꞌa hamau huneꞌateꞌya havi kafa yogime yogime noꞌamilega ataleꞌya umainae.
LUK 23:49 Vayanagi mukiꞌa veaꞌmoꞌyaene Kaliliti akave emainaya aꞌneyagaene aluꞌale hetiꞌya maineꞌya hutaya kavala agemainae.
LUK 23:50 Nagola fatago kanoa Yosefeꞌe, Yuta vayaꞌmogami Kanisolefi maineanagi “Yisasina haegahune.” huꞌya haya kehena “E, kanalele.” huno ohunea kanoa Yuta veaꞌmogami kotega Alimatiyae huꞌya nehaya kumate nemaiya kanogino Anumaya Kotiꞌma kava yagaisia kanahe muse huno agava nemaiya kanoe.
LUK 23:52 Ani kanomoꞌa Pailatite viaꞌyamo mage huno havige “Yisasina augafaꞌa aligahe nehue.” huno havige.
LUK 23:53 Havigegeno Pailatiꞌa “E” higeno yafaga yosaleti haino ali hakao hulino elavino memaleneno kenaleti augafalela aigalaki kalaki huno haꞌya kiteno alino viaꞌyamo he falageꞌya kafimalenaya yafa kane, anifina vayala hevai oꞌamatenaya yafakapima alino mo hevaitene.
LUK 23:54 Ani yupa Sapatihe haviꞌya talo tala hisaya kanagino Sapatia ago evaꞌyi hugahe higeno Yosefeꞌa ani kavala humaine.
LUK 23:55 Higeꞌya Kaliliti Yisasiꞌene tokaeꞌya emainaya aꞌneyaga Yosefe akave uꞌya yafakapima hevaitea yana mogemainae.
LUK 23:56 Mogeteꞌya ayaꞌamoꞌya augafaleꞌma faletesaya yana manaꞌage tiꞌene masaveꞌene talo tala nehageno Sapati kanamoꞌa evaꞌyi higeꞌya kahegi kemo akave maleꞌya maifalu huꞌya mainae.
LUK 24:1 Sota yupa kola otinegeꞌya ani aꞌneyaga ago talo tala humalenaleti manaꞌage masavena aliꞌya Yisasina hevaitenaya komulega umainae.
LUK 24:2 Uꞌya mogayana komumo avayaleꞌma aiso humalaya yafana ago alikeli-talenageno avayalela omalegeꞌya ani yafakapi hai faleꞌya mogayana Yisasi augafa omalegeꞌya mogemainae.
LUK 24:4 Omalea yafe “Hanate hane?” huꞌya tusiꞌa amakesa nehavigeno anile tole kanolatana efeꞌage huno alave alave hia kena failiꞌana evaꞌyi haꞌe.
LUK 24:5 Evaꞌyi haꞌageꞌya aꞌneyagamoꞌya ageteꞌya tusi koli huꞌya ape hageꞌana ani tole kanolatamogania mage huꞌana haꞌe “Naꞌa higetama afaꞌa mainea kanohena falimainaya vayaꞌmogami matimatipina ati neꞌayae? Mafina omaigi fali-mainefitila ago hetino umaine.
LUK 24:6 Kalili mainenoꞌma tamahapai-mainea kea tamakesa hinagetama haviho.
LUK 24:7 Mage huno humaineane ‘Ikapinagati emainoa kanoa vayaꞌmo natenea kanomonia kefo kava nehaya vayaꞌmoꞌya natafa huteꞌya yafaga yosale nili nahaeꞌya nasaisageꞌna faligahue. Falisugeꞌya komufi hevainatesageꞌna tole kana maiteꞌna fali-mainesufiti eteꞌna hetigahue.’ huno humaineane. Ani kehena tamakesa havitama havilama hutama haviho.” huꞌana haꞌe.
LUK 24:8 Haꞌageꞌya Yisasiꞌma humainea kehe amakesa haviteꞌya matimatila ataleꞌya vayaꞌamoꞌya agaya yaꞌene haviya kene Yisasina aleveniꞌa (11) anagaꞌamoꞌyaene nagoꞌa veaꞌene hamapai-mainae.
LUK 24:10 Magatala kumate Maliaꞌene Yohanaꞌene Yemesina itaꞌamoꞌa Maliaꞌene nagoꞌa aꞌneyagaene Yisasiꞌenema tokaeꞌya nemaiya anagala hamapai-mainae.
LUK 24:11 Hamapaiyanagi amakesa haviteꞌya “Afa ke nehae.” huꞌya nehuꞌya amakupi maleꞌya amametitia ohunae.
LUK 24:12 Amametitia ohayanagi Pitaꞌa hetino aiyayeno hevaitenaya yafakapi mope humaineno ageana Yisasina aye-gasagitenaya kenaꞌage mogeteno agesa havi havi huno nomaꞌalega eteno umaine.
LUK 24:13 Ani kanafina Yisasiꞌenema tokaeꞌana nemaiꞌa kanolatana Emeasi kumate ugahe katega vaꞌana anima vaꞌa kamoꞌa Yelusamuti Emeasi umainea kamoꞌa osiꞌa ayaꞌayaꞌa aleveniꞌa (11) kilomita hane.
LUK 24:14 Ani tole kanolatana katega neꞌuꞌana ani kanafima humainaya kavafe kea kea hume hume umainaꞌe.
LUK 24:15 Neꞌuꞌana ani yafe kea kea hume hume neꞌuꞌana agaila havigegeno agaila havigegeno hume neꞌvaꞌageno Yisasiꞌa evaꞌyi huno anakave eno anakaiꞌene tokaeꞌya umainae.
LUK 24:16 Neꞌuꞌya anakaya agaꞌanagi anaulaga alino aiso higeꞌana Yisasina agelama huꞌana oꞌagenaꞌe.
LUK 24:17 Agelama ohaꞌageno Yisasiꞌa mage huno hanavige “Naꞌafe kea kea hume hume neꞌvaꞌe?” huno hanavigegeꞌana anile hetiꞌana maineꞌana anaugosa ayegatule-taleꞌana mainaꞌe.
LUK 24:18 Nago kanomo agia Kaliopasiꞌa mage huno hie “Kagaya Yelusalemu kumate natu kano mainano? Mukiꞌa natu umainaya veaꞌmoꞌya ani kanafima falote humainea kavala ago agemainayanagi kagaikage oꞌagenano?” huno hie.
LUK 24:19 Higeno Yisasiꞌa mage huno hanavige “Na kavafe nehaꞌe?” huno hanavi-gegeꞌana mage huꞌana haꞌe “Nasaleti Yisasi kehena ohavino? Ani kanoa aune kano maineanagino Anumaya Koti aulagafiꞌene veaꞌmogami amaulagafiꞌene tusiya huno tokiyaꞌage yana talo nehuno tusiꞌa hetofa ke tahanepaiya kanoe.
LUK 24:20 Tahanepaiya kanogi tagai mono note kava vayaꞌene kava vayatiene atafa huꞌya kaiyeke huteteꞌya ‘Faligane.’ huꞌya yafaga yosale nili haeꞌya asaigeno falimaine.
LUK 24:21 Fali-maineanagi tagaya agaifena Anumaya Kotiꞌa taugafa aligatigahe hutegeno emainea kanoe huta tametiti nehune. Nago yana olaga kanoꞌa hae-mainayanagi menia tagaiꞌene nemaiya aꞌnemoꞌya natekefa hatilaviꞌya Yisasina hevaitenaya komulega mogayana Yisasina augafa omalegeꞌya mogeteꞌya eteꞌya eꞌya mage huꞌya me lahapaiye ‘Tagaya ensole kanolata agonageꞌana mage huꞌana tahapaiꞌe ‘Yisasiꞌa ago hetimaine.’ huꞌana haꞌa kea tahapaigeta neꞌone.’ huꞌya me hageta tagaya tusiya huta atalitalu humainone.
LUK 24:24 Atalitalu hunanagi nagoꞌa tagaiꞌene nemaiya vayaꞌmoꞌya ani komulega uꞌya mogayana aꞌneyagamoꞌyama haya kemoꞌa mukiꞌa tamage hae. Ani kavala humaineanagi Yisasina oꞌagenae.” huꞌana hapaiꞌe.
LUK 24:25 Hapaigeno Yisasiꞌa mage huno hie “Tanakaya tanakesa nohaviꞌe. Mukiꞌa kema Anumaya Koti amaune vayaꞌmoꞌyama kae-malenaya kea havilama hutana tanakupina omalenaꞌe.
LUK 24:26 Anima amaune vayaꞌmoꞌya mage huꞌya kae-malenayane ‘Anumaya Kotiꞌa taugafa aligatigahema hutesia kanomoꞌa tusiꞌa augafa agata aisia yana aliteno tokiya hale yamaꞌaene kumaꞌalega eteno ugahie.’ huꞌya kae-malenaya kea ohavinaꞌo?” huno hanavige.
LUK 24:27 Nehuno Moseseꞌma kae-malenea kemona aepa heno mukiꞌa Anumaya Koti amaune vayaꞌmoꞌya agaifema kae-malenaya kemo aepaꞌa hugafino hanapaiye.
LUK 24:28 Hanapaigeꞌana ugahema vaꞌa kumatela ago uvaꞌyi haꞌageno Yisasiꞌa nagoꞌene hume hume ugahe hianagi anakaya atafa huꞌana mage haꞌe “Taꞌagaiꞌene faegane. Yagemoꞌa ago tavifalesigeno aupaꞌa hani kigahie.” huꞌana haꞌageno anakaiꞌene faigahe noꞌanifinaga haifalemaine.
LUK 24:30 Haifaleno mopale maineno anakaiꞌene kave negahe kaihame kana maya alino nunamu huno muse huteno aposino neꞌanamigeno anile anaulagamoꞌa aigali higeꞌana Yisasina agelama nehuꞌana “Agayamagae.” huꞌana nehaꞌamaꞌa anile fanane higeꞌana nagoꞌene Yisasina noꞌagaꞌe.
LUK 24:32 Ani yafena anakaiꞌani mohu mehu huꞌana mage haꞌe “Vaeha taꞌagaya katega neꞌoꞌageno agaya kanale kea taꞌahapaino Anumaya Koti ke kae-malenaya autaꞌmafi hanea kemona aepaꞌa hugafino taꞌahapaigeno taꞌaipamoꞌa hetigeno taꞌaguꞌamoꞌa tusiꞌa muse hie.” huꞌana haꞌe.
LUK 24:33 Huteꞌana aupaꞌa hetiꞌana eteꞌana Yelusalemu vaꞌana Yisasina aleveniꞌa (11) anagaꞌamoꞌyaene nagoꞌa veaꞌyagaene alitalu huꞌya mainageꞌana momake-mainaꞌe.
LUK 24:34 Momakaꞌageꞌya mage huꞌya hanapaiye “Tamage Anumayatimoꞌa fali-mainefitila ago hetigeno Saimoniꞌa agemaine.” huꞌya hanapaiye.
LUK 24:35 Hageꞌana anakaya kategama humainea kavaꞌmo avagea hamapaiꞌana mage haꞌe “Kaihame maya alino aponesigeno anile taꞌaulagamoꞌa aigali higetaꞌa Yisasina agelama hutaꞌa agoꞌe.” huꞌana hamapaiꞌe.
LUK 24:36 Ani kea maiꞌana nehaꞌageno amuꞌnoꞌamifi mo hetimaineno mage huno nehie “Tamaipamoꞌa yasi nehinagetama maiho.” huno hamapaiye.
LUK 24:37 Hamapaigeꞌya amakaya tusiꞌa koli nehuꞌya atalitalu haya yafe Yisasifena “Hakalo emaine.” huꞌya tusiꞌa koli hae.
LUK 24:38 Koli hageno Yisasiꞌa mage hie “Naꞌa higeno tamaipamoꞌa kanaꞌage nehie? Naꞌa higeno tamakesamoꞌa tole-lole nehae?
LUK 24:39 Tamakaya nayaꞌene naiyaleꞌene ageho. Nagayamagae nagaiꞌniꞌa emainoe. Naugafalela navate hutama ageho. Hakaloꞌmona augafa ameꞌene ayamufaene omalenegi nagaila naugafa nameꞌene nayamufaene hanegi neꞌagao.” huno hamapaiye.
LUK 24:40 Ani kea nehuno aiya ayana amavelie.
LUK 24:41 Amaveligeꞌya ageteꞌya tusiꞌa muse nehuꞌya “Tamage nehifi havige nehie?” huꞌya tole amakesa haviꞌya amakesa havi havi nehageno mage hie “Nesua kavela haneo?” huno hamavige.
LUK 24:42 Hamavi-gegeꞌya atafi kaemale noyame aliꞌya amigeno alino amaulagafi mata mata huno nemaine.
LUK 24:44 Yisasiꞌa mage hie “Tamakaiꞌenema tokaeꞌna mainoa kanafina mage huꞌna tamahapai-mainoe ‘Mukiꞌa nagaifema Moseseꞌma kae-malenea kene Anumaya Koti amaune vayaꞌmoꞌya kaemalenaya kene Yagame Avopi kaemalenaya kene mukiꞌa anima kae-malenaya kemoꞌa falote huno tamage hugahie.’ huꞌna tamahapai-mainoane.” huno hie.
LUK 24:45 Huteno anima kae-malenaya kemoꞌa amakesa halenegeꞌya havilinae.
LUK 24:46 Havilinageno “Mage huꞌya kae-malenayane ‘Anumaya Kotiꞌa tamaugafa aligatigahema hutesia kanomoꞌa tusiya huno agata aisigeno falisigeꞌya hevaitetesageno tole kana augafamoꞌa komufinaga haneteno fali-mainesifitila eteno hetigahie.’
LUK 24:47 Hetisigetama tamakaya Yelusalemu aepa hetama mukiꞌa mopale kumaꞌyagalega ute ete hutama mage hutama hamapaiho ‘Yisasiꞌa tamaku tamamena ago aligatiafe tamakesa havitama kefo yatamihena tamakuꞌa aiyahae hisagenoꞌa Anumaya Kotiꞌa aigetamateteno kefo yatamia atalelamategahie.’ hutama hamapaisayafe kae-malenayane.
LUK 24:48 Mukiꞌa tamaulagafiti agemainaya kavafena hamapaiho.
LUK 24:49 Haviho nagaya Nenafaꞌma ‘Tamamigahue.’ huno humainea kanomona Alu Aotage Avamula tamakaite hutesugeno egahie. Egahianagi tamakaya mani ala kumate mainegeno eno anafinagati tokiya tamamisigetama alitetama nagaifena mo hamapaiho.” huno humaine.
LUK 24:50 Ani kea huteno amavaleno Petani kumate umaineno ayana alisaga huno mage huno hie “Anumaya Kotiꞌa tokiyaꞌaleti tamaya hisie.” huno nehigeno Anumaya Kotiꞌa avalegeno ikapinaga haimaine.
LUK 24:52 Haigeꞌya Yisasi agia alisaga nehuꞌya tusiꞌa muse hume hume Yelusalemu eteꞌya umaineꞌya muki kanafina efi efi huꞌya ala mono nopi maineꞌya Anumaya Koti agia alisaga humainae.
JOH 1:1 Eheꞌma Anumaya Kotiꞌma ma mopama taloma ohunea kanafina Yisasina nago agia Kemoꞌe huno maineane. Anumaya Kotiꞌene tokaeꞌana mainaꞌane. Ani Kemoꞌa, Yisasiꞌe, Anumaya Kotiꞌene nagoꞌya hu-mainaꞌane.
JOH 1:2 Mainaꞌageno ehe kanafina ani kanoa Anumaya Kotiꞌene tokaeꞌana mainaꞌane.
JOH 1:3 Anumaya Kotiꞌa hapaigeno Yisasiꞌa mukiꞌa yana talo hu-maleneane. Yisasiꞌa nago yana talo ohunea yana omalene.
JOH 1:4 Ani Yisasiꞌa mukiꞌa veala hamaimu neꞌamamia kano maineanagino ani haimuꞌamoꞌa veala aye hale-ma-te yamaꞌa hane.
JOH 1:5 Ani hale yamoꞌa haniki mainea yapina aye hale-mainegeno hani-ki-mainea yamoꞌa alino asu ohune.
JOH 1:6 Anumaya Kotiꞌa nago kanoa hu-tegeno emaine. Ani kanomo agia Yoniꞌe.
JOH 1:7 Ani kanoa hale yamo ke hama-paigahe emainegeꞌya agai keleti mukiꞌa veaꞌmoꞌya hale yafe “Tamage hane.” huꞌya agaife amakupi maleꞌya ametiti hisaya yafe emaine.
JOH 1:8 Yoniꞌa hale yamona aepaꞌa omainegi afaꞌa hale yamona aepaꞌa hanea kanomofe hama-paigahe emaine.
JOH 1:9 Ani tamage hale yamaꞌa ma mopale eno mukiꞌa veaꞌne aye hale-ma-tegahe emaine.
JOH 1:10 Ani Yisasiꞌa ma mopama talo hu-malenea kano emaineanagi ma mopafi veaꞌmoꞌya ageteꞌya aepaꞌa havilama huꞌya ohavinae.
JOH 1:11 Agaiꞌa talo hu-malenea mopale emaineamagi agaiꞌa veaꞌmoꞌya avaleꞌya falu fala huꞌya oꞌavalenae.
JOH 1:12 Avaleꞌya oꞌatageꞌya nagoke nagokeꞌmoꞌya falu fala huꞌya Yisasina avale-mainaya veaꞌmoꞌya Yisasife amakupi maleꞌya amametiti nehaya veaꞌmogamina Yisasiꞌa tokiyaꞌaleti “Anumaya Koti nafaꞌneyagae.” huno hu-neꞌama-te.
JOH 1:13 Ani veaꞌmoꞌya vayaꞌmo kolateti oꞌama-temagi Anumaya Kotiteti ama-tene. Vemo augafa ageno haꞌye hu yateti oꞌamatenegi Anumaya Kotiteti amatene. Veaꞌmoꞌya nafaꞌne atesaya amakesa haviya yateti oꞌamatemagi Anumaya Kotiteti amatene.
JOH 1:14 Yisasina nago agiꞌa Kemona atetegeno ve maineno tagaiꞌene mainegeta agaila alu aotage tokiya hale yamaꞌa neꞌagone. Ani kanoa Anumaya Kotina aiya nagoke nafaꞌneꞌa maineamagino nefaꞌa agaiꞌa alu aotage tokiya hale yamaꞌa amigeno ali falu huno kayoneꞌage yaꞌene tamageꞌage hu yaꞌene agai aguꞌafina hiya hu-maine.
JOH 1:15 Yoniꞌa keha keha nehuno agaife mage hie “Ma kanomofe nayona mage huꞌna tamaha-pai-mainoe haenagaꞌa nago kanoa nagaila onatenele mainea yafe nagaila ago nagase-mainea kanoa egahiema huꞌna tamaha-pai-mainoane.”
JOH 1:16 Ali falu huno kayone yamaꞌa hiya hu-mainefiti tagaila mukiꞌamogatina taya huno kanale manu tamiteno nagoꞌa kanale manuene nelamie.
JOH 1:17 Tamage Anumaya Kotiꞌa kahegi kema malenea kea Mosesena ayapi maleteno hapaigeno hama-pai-mainiamagi ali falu huno kayone yaꞌene tamage hu yaꞌene Yisasi Kalaisiteti neꞌalune.
JOH 1:18 Nagoke kanomoꞌa Anumaya Kotina oꞌagene. Tamage mukiꞌa veala oꞌagenae. Aiya nagoke nafaꞌneꞌamoꞌa Anumaya Kotiꞌene nagoꞌya huꞌana mainaꞌamagino ani kanomoꞌa Nefa avate maineleti Nefana agaiꞌage tave-nelino aepaꞌa hu-gafino taha-pai-maine.
JOH 1:19 Isaleli vayaꞌmoꞌya Yelusalemu mainaleti Livae nofi vayaꞌene mono note kava vayaꞌene hu-ma-tageꞌya Yonife “Kagaya tagae?” hutama havigeho huꞌya hama-pai-mainae. Hama-paigeꞌya mo havigageno Yoniꞌa ma ke huno hama-nepaiye.
JOH 1:20 Yoniꞌa ani ke fala-kino ohunegi ani kea hu falote huno mage huno hie “Nagaya Kalaisi, Anumaya Kotiꞌma taugafa ali-gatigahe hu-tenea kanoa nagaya omainoe.” huno hie.
JOH 1:21 Higeꞌya “Ani kanoa omaimagi kagaya tagae? Ilaiyaga mainapi?” huꞌya havigageno “Aꞌao nagaya ani kanoa omainoe.” Yoniꞌa make huno higeꞌya “Nagi Anumaya Koti aune kano mainapi?” huꞌya hageno “Aꞌao.” huno hie.
JOH 1:22 Higeꞌya “Taha-paiyo kagaya tagae? Hu-la-tenaya vayaꞌmogamina kenonaꞌamima hama-paisuna kea kagesafiti kagaika aliꞌyafe naꞌane ke nehane?” huꞌya havi-negae.
JOH 1:23 Nehageno Yoniꞌa kenonaꞌamilela mage huno hama-nepaiye “Nagaya ma kano mainoe. Nage aiꞌna kaꞌme kotegati keha keha hisua kano mainoe. Aisaiyaꞌa Anumaya Koti aune kanomoꞌa nayo hu-malenea kea mage huꞌna nehue ‘Anumaya visia kana alitama hilato hutama ali fatago hiho.’ huno hu-maineane.” huno hie.
JOH 1:24 Anima havigesia kema aliꞌya vaya vayala Falasia vayaꞌmoꞌya hu-ma-tenae.
JOH 1:25 Ani vayaꞌmoꞌya Yonife mage huꞌya havi-negae “Kalaisigaene Ilaiyagaene Anumaya Koti aune kanoenema omaineka naꞌa higeka tina fale neꞌamatane?” huꞌya havi-ge-mainae.
JOH 1:26 Havigageno Yoniꞌa kenonaꞌamilela mage hie “Ma nagaya titeti fale nelama-toamagi tamakaipina nagola oꞌagenaya kanoa he-ti-maine.
JOH 1:27 Heti-maineamagino ani kanomoꞌa haenagaꞌa egahie. Nagaya afa kano mainoamagiꞌna agai aiyalela ayesuana onategahie.” huno hu-maine.
JOH 1:28 Yoniꞌa Petani kumate Yotani timona atu kaiyaga maineno veaꞌne ti fale neꞌama-teno mani kea hu-mainea kehe mehavi-ge-mainae.
JOH 1:29 Faeteꞌya kotigeꞌya Yisasiꞌa Yonitega eneꞌegeno Yoniꞌa ageteno mage huno nehie “Ageho mani kanoa Anumaya Kotina Sipi sipi nafaꞌneꞌae. Haenagaꞌa haesageno falisia yateti ma mopale veaꞌmogamina kefo yaꞌamia ali-talesia yafe emaine.
JOH 1:30 Ani kanomofe nayona mage huꞌna tamaha-pai-mainoe ‘Haenagaꞌa esia kanomoꞌa nagaila onatenele mainea yafe nagaila ago nagase-mainea kano egahie.’ huꞌna tamaha-pai-mainoane.
JOH 1:31 Nagaya agaila aepaꞌa oꞌagenoanagi Isaleli veaꞌmogamina Yisasina amave-ligahe tina mo fale-ma-tesoe huꞌna emainoane.” huno hie.
JOH 1:32 Yoniꞌa mage huno hama-pai-maine “Anumaya Kotina Alu Aotage Avamuꞌamoꞌa nama kana huno ikapinagati elavino eaꞌyamo augafalela emainegeꞌna age-mainoe.
JOH 1:33 Nagaya agaila oꞌagenoanagi Anumaya Kotiꞌa ti fale-ma-to yate hu-natenea kanogino mage hie ‘Kagaya agegane nagaiꞌni Alu Aotage Avamuꞌmoꞌa elavino nago vemo augafaleꞌma emaisigekama agesana vemoꞌa veaꞌmogamina Alu Aotage Avamuꞌaleti fale-ma-tegahie huka havigane.’ huno higeꞌna havi-mainoane.
JOH 1:34 Nagaya ani kema hia yana ago age-mainoleti tamaha-nepauve ma kanoa Anumaya Kotina neꞌamo maine huꞌna nehue.” huno hie.
JOH 1:35 Faeteꞌya kotigeꞌya Yoniꞌene agaiꞌaene tokaeꞌana nemaiꞌa kanolataꞌene eteꞌya he-tiꞌya mainae.
JOH 1:36 Yisasiꞌa neꞌvigeno Yoniꞌa ageke huno ageteno mage hie “Anumaya Koti Sipi sipi nafaꞌnea atu maine.” huno higeꞌana Yoniꞌene tokaeꞌana nemaiꞌa kanolatana ani kea haviteꞌana Yisasina akave neꞌvaꞌe.
JOH 1:38 Akave neꞌvaꞌageno Yisasiꞌa mai-yahae huno anaketeno ke huno hana-vige “Naꞌafe neꞌaꞌe?” huno higeꞌana anakaya mage haꞌe “Lapaiga hanate nemaine?” huꞌana nehaꞌe. Lapai tagai kefina hu-mave-lina kanoe huno hie.
JOH 1:39 Yisasiꞌa mage huno hie “Etana megeꞌo.” huno hana-paigeꞌana agaiꞌene neꞌvaꞌageno une kigeꞌana nomaꞌa mogeteꞌana ani kanalela agaiꞌene mainaꞌe.
JOH 1:40 Yoni kema haviteꞌana Yisasi akaveꞌma umainaꞌa kanolatapitila nago kanomo agia Etaluꞌe ani kanoa Saimoni Pitana aganaꞌamoꞌe.
JOH 1:41 Etaluꞌa hagoteno nepuꞌamona Saimonife mo atiyeno mogefalote huteno mage huno hapaiye “Anumaya Kotiꞌma taugafa ali-gatigahema hu-tegeno emainea kanoa Kalaisina nagaya ago agoe.” huno hie.
JOH 1:42 Huteno Saimonina avaleno Yisasite neꞌvaꞌageno Yisasiꞌa ageke huno ageteno mage hie “Kagaya Saimoniga Yonina nemofogae kagai kagia mage huꞌna nemaloe Sifasigae Pitagae.” huno nehie. Ani agilatamogania nagoꞌya hu-mainaꞌe. Tagai kefina yafaꞌmogae huno malene.
JOH 1:43 Faeteꞌya kotigeno Yisasiꞌa Kalili visia agesa havino vilegati Filipina mogeteno mage huno hapaiye “Kagaya nakave eno.” huno hapaiye.
JOH 1:44 Filipiꞌa Petesaita kumate kanoe. Ani kumala Etalugani Pitagani kumale.
JOH 1:45 Filipiꞌa Nataniolona moge-falote huteno mage huno hapaiye “Nago kanomofe Anumaya Koti amaune vayaꞌene Moseseꞌene mono autaꞌmafi kae-malenaya kanoa tagaya ago age-falote hunana agaya Nasaleti Yisasiꞌe Yosefena nafaꞌneꞌamo maine.” huno hie.
JOH 1:46 Higeno Natanioloꞌa mage huno hie “Nasaleti kanale yana falote hisifi? Falote ohugahie.” huno higeno Filipiꞌa mage huno hie “Eka mego.” huno hapaiye.
JOH 1:47 Hapaigeꞌana neꞌaꞌageno Yisasiꞌa Nataniolona ageteno mage hie “Ageho Isaleliti tama kanolafane. Mani kanoa nagola havigeꞌa omalenea kano maine.” huno hie.
JOH 1:48 Higeno Natanioloꞌa mage huno havinege “Nagai aepaꞌa na yu havimainanane?” huno havigegeno Yisasiꞌa mage hie “Filipiꞌa kagaila moge ohunegeka kagaya fiki yosamo aepale mainanageꞌna nagaya ago kage-mainoe.” huno hie.
JOH 1:49 Higeno Natanioloꞌa mage hie “Hulaveli kanomoga Anumaya Koti nafaꞌne mainane. Kagaya Isaleli kotega ala sauve kano mainane.” huno hie.
JOH 1:50 Higeno Yisasiꞌa Nataniolofe mage hie “Fiki yosamo aepale mainanageꞌna nagaya kage-mainoafe tamage nehane huka kagupi maleka kametiti nehano? Haenagaꞌa tusiꞌa ala kavaꞌyaga efalote hinageka agegane.” huno hapai-maine.
JOH 1:51 Yisasiꞌa amakaife mage hie “Tamagelafa huꞌna tamaha-nepauve tamakaya ikamoꞌma ai-halenagetama neꞌagetama ikapinagati emainoa kano vayaꞌmo natenea kanomonilela Anumaya Kotina ensole anagaꞌamoꞌya naugafalela haiteꞌya laviteꞌya nehisagetama agegahae.” huno hama-nepaiye.
JOH 2:1 Tole kana maiteꞌya Kalili hanea kumala Kenae nehaya kumate nago kanomoꞌa a aligahe higeno Yisasina itaꞌamoꞌa anima aꞌma aligahema hia nopi umaine.
JOH 2:2 Umainegeꞌya “Yisasiga kagaiꞌenema tokaeꞌya nemaiya anagakaene eho.” huꞌya ke hageꞌya umainae.
JOH 2:3 Umaineꞌya nenageno nofi alagamo tina haꞌno higeno Yisasina itaꞌamoꞌa Yisasina mage huno hapaiye “Nofi alagamo tina haꞌno hie.” huno hanepaiye.
JOH 2:4 Higeno Yisasiꞌa mage hie “Aꞌoko ‘Naꞌa maꞌa huo.’ huka nahaꞌopaiyo kagai yana omalene. nagaya tokiyaꞌniꞌa amavelisua kanaꞌa falote ohune.” huno nehie.
JOH 2:5 Nehigeno Yisasina itaꞌamoꞌa kaveꞌma talo talaꞌma huꞌya amamiya veaꞌnehe mage huno hama-paiye “Nago kema hinagetama agai ke akave maleho.” huno hama-nepaiye.
JOH 2:6 Yuta vayaꞌmogami mono kemoꞌa mage humaine “Mukiꞌa kanalela mukiꞌa yana sese hutama ti faleho.” huno humaineane. Ani yafe sikisiꞌa (6) yafa ti keꞌayola vani hataletiꞌa (100) lita hanea keꞌayola anilela hane.
JOH 2:7 Hanegeno Yisasiꞌa kaveꞌma talo talaꞌma huꞌya neꞌamamiya veaꞌnehe mage huno hama-paiye “Mani li keꞌayoꞌyakafina hefitama havateho.” huno hama-paigeꞌya hefi havate-mainae.
JOH 2:8 Havatageno “Kaveteꞌma kava yagai-mainea kanole osiꞌa hefitama alitama momiho.” huno higeꞌya hefiliꞌya umainae.
JOH 2:9 Hefiliꞌya momigeno ani kaveteꞌma kava yagai-mainea kanomoꞌa ani lina hagotenoꞌa titafa haniamagi haenagaꞌa eteno nofi alagamo ti hapaegeno neno akekeana higeno ani lina ea kamaꞌa oꞌageneamagi hefiꞌyama aliꞌyaꞌma aya veaꞌnemoꞌyage havimainae. Kaveteꞌma kava kanomoꞌa aꞌma alia kanohe ke huno mage huno hapaiye.
JOH 2:10 “Mukiꞌa vayaꞌyaga hagote kanalela hagaꞌage tina amamigeꞌya mageno amamu higeꞌya haviyama hia tina neꞌamamiya yamagi kagaya hagote kanalela afa li tamiteka haenaga hagaꞌage tina nelamine.” huno nehie.
JOH 2:11 Manima taloma hia tokiya avame yana Yisasiꞌa hagote kanale Kalili hanea kumala Kenae huꞌya nehaya kumate ani kavala talo nehuno tusiꞌa ala tokiya hale yamaꞌaene amaveligeꞌya agaiꞌenema tokaeꞌya nemaiya anagaꞌamoꞌya ageteꞌya aliꞌya amakupi maleꞌya amametiti hu-mainae.
JOH 2:12 Naꞌa hu-maletegeꞌya Yisasiꞌene itaꞌamoꞌene aganaꞌamoꞌyaene agaiꞌenema tokaeꞌya nemaiya anagaꞌamoꞌyaene Kapaneamu laviꞌya osi kanaꞌa anile mainae.
JOH 2:13 Nago ala imua Anumaya Kotiꞌma Yuta veayaꞌmogami amakinagomogami amaugafama aligatimainea kanahe amakesa havi havi nehaya imu negiya kana evaꞌyi hugahe higeno Yisasiꞌa Yelusalemu haimaine.
JOH 2:14 Yisasiꞌa ala mono nopi haino mogeana vayaꞌyagamoꞌya pulumaka afuma sipi sipi afuma namama malenageꞌya veaꞌmoꞌya miya hisaya yafe malenageno Yisasiꞌa mokemaine. magi nagoꞌa vayaꞌmoꞌya alu kotega nehanea monea neꞌaliꞌya ani kumateꞌma nehanea monea anonaꞌa amamisaya yafe folomole maleꞌya mopale mainageno momakemaine.
JOH 2:15 Momaketeno nofiteti alifagagi maleneno mukiꞌa vayaꞌma sipi sipima pulumaka afuyakaene mono nopiti ali helafi neꞌataleno monema ayeyahaeꞌma nehaya vayaꞌmogami folomoꞌamiene moneꞌamiene ali helafi-talene.
JOH 2:16 Namayagama miya nehaya vayafe mage huno hamapaiye “Alitama eviho. Mafina nenafa nona tamakaya alitama maketi kumala talo ohiho.” huno nehie.
JOH 2:17 Nehigeꞌya agaiꞌaenema tokaeꞌya nemaiya anagaꞌamoꞌya avopima hanea kehe amakesa nehaviye. Ani kea mage huno haneane “Anumaya Koti nofena mukiꞌa kanale magesa havi havi huꞌna nokaꞌa kanaleꞌya huno hanesia yafe aluya huꞌna muse nehue.” huno kaemalenegeꞌya havimainayane.
JOH 2:18 Havimainayamagiꞌya Yuta vayaꞌmoꞌya eteꞌya havinegae “Aniꞌama hana kavala ta tokiyaleti nehane? Tokiyakaꞌa hane huta havisuna yafe nagola oꞌagenona tokiya avame yana hugeta agamano.” huꞌya nehae.
JOH 2:19 Nehageno Yisasiꞌa kenonaꞌamia mage huno hama-paiye “Ma ala mono nona alitama lagape aitaletesageꞌna taliꞌa (3) kanale eteꞌna ani nona aliꞌna hetigahue.” huno nehie.
JOH 2:20 Higeꞌya Yuta vayaꞌmoꞌya mage huꞌya hapaiye “Kekamoꞌa kanale ohia ke nehane taliꞌa (3) kanale ani nona aliꞌna hetigahue huka nehanamagi vayaꞌyagamoꞌya foti sikisiꞌa (46) kafufi mani nona kimalenaya none.” huꞌya nehae.
JOH 2:21 Huꞌya hageno Yisasiꞌa ani avame kea hiamagi ani mono nofema hiana agaiꞌa augafahe nehie.
JOH 2:22 Yisasiꞌma falitenoꞌma he-ti-mainea kanafina agaiꞌenema tokaeꞌya nemaiya anagaꞌamoꞌya ani kema humainea kehena amakesa havimainae. Avopima hanea kene Yisasiꞌma humainea kene “Tamage humaineane.” huꞌya amakupi maleꞌya amametiti humainae.
JOH 2:23 Imuma negiya kanale Yisasiꞌa Yelusalemu maineno oꞌagenaya tokiya avame yana higeꞌya ageteꞌya mukiꞌa veaꞌnemoꞌya “Tamage nehie.” huꞌya amakupi maleꞌya amametiti humainae.
JOH 2:24 Hayamagi Yisasiꞌa mukiꞌa veaꞌnemogami amakuꞌa ago amakea yafe aguꞌa noꞌamamie.
JOH 2:25 Naꞌafene amakupima hanea yana ago age-mainea yafe Yisasiꞌa mukiꞌa veaꞌmogamife “Tamakupima hanea yana naha-paiyo.” huno ohune.
JOH 3:1 Nago Falasia kanoa Yuta vayate ala kava kanoꞌamimo agia Nikotimasiꞌe.
JOH 3:2 Nago kegela ani kanomoꞌa Yisasite eno mage huno hie “Humave-nelina kanomoga tagaya ago havimainone kagaya humaveli hama-veli nehana kanomoga Anumaya Kotiꞌa hu-gategeka emainane. Kagaya oꞌagenaya tokiya avame yana nehane. Anumaya Kotiꞌa kagaiꞌene omaineleꞌasina aniꞌa kavala ohateꞌasine. Ani yafe tagaya ago havimainone Anumaya Kotiꞌa hu-gategeka emainane.” huno hie.
JOH 3:3 Higeno Yisasiꞌa mage huno hie “Tamage-lafa huꞌna kaha-nepauve anafinaga kanomoꞌma nago kanoma haegafa huno oꞌatesiana Anumaya Kotiꞌma kava yagai-mainea kumala oꞌagegahie.” huno hie.
JOH 3:4 Higeno Nikotimasiꞌa mage huno hie “Alopa kanomona hanaꞌa huno ateleꞌasine? Itaꞌamo aipafinaga eteno hai falesigeno nagoꞌene eteno atesie huka nehapio?” huno havinege.
JOH 3:5 Havigegeno Yisasiꞌa mage huno hie “Tamage-lafa huꞌna kaha-nepauve titetiꞌene Anumaya Koti Alu Aotage Avamuꞌmotetiꞌene oꞌatesiana Anumaya Kotiꞌma kava yagai-mainea kumatela oꞌugahie.
JOH 3:6 Amaugafama hanea veaꞌmoꞌya augafa hanesia nafaꞌne amategahayanagi Anumaya Kotina Alu Aotake Avamuꞌmoteti atesia kanomona Alu Aotage Avamuꞌmoꞌa haimula amigahie.
JOH 3:7 Nagaya mani kema hua kea ‘Nagoꞌene eteka nato huka huo.’ huꞌna hua kehena havika kamaꞌyoa aika atali ohuo.
JOH 3:8 Yasimoꞌa agaiꞌa hau yate alino visia yana kaulagamoꞌa oꞌagene. Afaꞌa uhuhu uhuhu hia keꞌa haviteka hanategatiꞌma aepa heno falote hia kaꞌene vaiyea kaꞌene oꞌagenane. Yasimoꞌma hia avamete huno Anumaya Kotina Alu Aotake Avamuꞌmoꞌa nago kanomona neꞌateana noꞌagone.” huno hie.
JOH 3:9 Higeno Nikotimasiꞌa mage huno havige “Ani yana hanaꞌa huno falote hugahie?” huno havinege.
JOH 3:10 Havigegeno Yisasiꞌa mage huno hie “Kagaya Isaleli veaꞌne hu-maveli hamaveli nehana kano mainanagi naꞌa higeka ohavinane?
JOH 3:11 Tamage-lafa huꞌna kaha-nepauve age-mainona yafe kaha-nepauve havilinona yafe kaha-nepauvanagi mani kea tamakaveꞌno hu-neꞌatae.
JOH 3:12 Nagayama ma mopale yafe ago kaha-nepauvanagi ‘Tamage nehane.’ huka havika kagupi maleka kametiti nohanagi ikapinaga yafema kaha-paisugeka hanaꞌa huka havika kagupina maleka kametitia hugane?
JOH 3:13 Nago kanomoꞌa ikapinaga ohainegi nagaya ikapinagati emainoa kanoa vayaꞌmo natenea kanomoꞌna nagaiꞌniꞌage ikapinagatila ma mopafina elavi-mainoe.
JOH 3:14 Moseseꞌa kaꞌme kotega maineno osifaꞌvea talo huteno yosale malegaꞌmaeno alisaga hu-mainea kavala menia aniꞌa huꞌya ikapinagati emainoa kanoa vayaꞌmo natenea kanomonina navaleꞌya alisaga hugahae.
JOH 3:15 Alisaga hisageno mukiꞌa veaꞌmoꞌya ‘Tamage nehie.’ huꞌya amakupi maleꞌya amametiti hisaya veaꞌmoꞌya agola maige maige hisaya hamaimula aligahae.”
JOH 3:16 Anumaya Kotiꞌa aiya nagoke nafaꞌneꞌa maineanagi ma mopafi veaꞌnehe tusiya huno hau ayamopafi haigeno ani aiya nagoke nafaꞌneꞌa hu-tegeno elavino emaine. Emainegeta tagaya nagoke nagokeꞌmogata agaife tagupi maleta tametiti hisunana haniki-mai yapi tegelege nehia atafina oꞌugahunanagita agola maige maige hisuna tahaimula aliteta maigahune.
JOH 3:17 Anumaya Kotiꞌa nafaꞌneꞌamona mopale veaꞌne kaiyeke hu-mateno nofi hu-matesia yatela hu-tegeno omenegi mopafi veaꞌne amaku amamemaꞌa ali-gatisiafene huno hu-tegeno emaine.
JOH 3:18 Emaineanagi nagoꞌa veaꞌmoꞌya Yesasifena amakupi maleꞌya amametiti haya veala Anumaya Kotiꞌa kaiyeke huno nofila hu oꞌama-tegahianagi nagoꞌa veaꞌmoꞌya Anumaya Kotina aiya nagoke nafaꞌnehe haviꞌya amakupi omaleꞌya amametiti nohaya yafe Anumaya Kotiꞌa ago kaiyeke hu-ma-teteno ago nofi hu-ma-tene.
JOH 3:19 Kaiyekema hu-mate yamo aepaꞌamoꞌa maꞌa hu-maine, aye hale-ma-te kanoa ma mopafina ago emainegeꞌya veaꞌmoꞌya kefo yana nehuꞌya hani yapi maisaya yafe muse huꞌya hale yafena nohamaiya yafe Anumaya Kotiꞌa ago kaiyeke hu-ma-tene.
JOH 3:20 Mukiꞌa kefo kava huge huge nehaya veaꞌmoꞌya hale yafena nohamaigeꞌya “Hale yapima visunageꞌya kefo yatia age-falote hugahae.” huꞌya hale yapina nomae.
JOH 3:21 Tama kava nehaya veaꞌmoꞌya hale yapima neꞌeya mage nehae “Anumaya Kotiꞌa taya higeta kanale yana hu-mainonafe mukiꞌa veaꞌmoꞌya agesae.” huꞌya nehae.
JOH 3:22 Naꞌa hu-maleteno Yisasiꞌene agaiꞌaenema tokaeꞌya nemaiya anagaꞌene Yutia umaineꞌya nagoꞌa kana umaiteꞌya veaꞌnea mono tina fale-ma-tenae.
JOH 3:23 Fale-ma-tegeno Yoniꞌa Ainonie nehaya kumate maineno aniꞌa huno veaꞌnea fale-ma-tene. Ainoni kumala Salimie nehaya kumaꞌmo aupate hane. Kasagoꞌya tiꞌyaga anilega haneanagiꞌya veaꞌmoꞌya ete ete hageno tina fale-ma-tene.
JOH 3:24 Yonina avaleꞌya nofipina oꞌatenageno ani lina fale-ma-tene.
JOH 3:25 Yonienema tokaeꞌya nemaiya anagaꞌene nago Yuta kanoene mono tima fale yamo auꞌava yafe mohu mehu huꞌya ke vai-mainae.
JOH 3:26 Ke vai-maleꞌya Yonitega mage huꞌya mo hane-paiye “Hulave nelina kanomoga Yotani limona ame haupalega kagaiꞌenema mainegeka agaifema taha-pai-mainana kanomoꞌa menia agaiꞌa tina fale neꞌa-ma-tegeꞌya mukiꞌa veaꞌmoꞌya agaitega utele nehae.” huꞌya hae.
JOH 3:27 Hageno Yoniꞌa mage huno hie “Anumaya Kotiꞌa nagoꞌa veaꞌmogamina nago yana oꞌamamineleꞌasina oꞌalileꞌasine.
JOH 3:28 Tamakaya agoꞌma hu-mainoa kea havilinae. Mage huꞌna hu-mainoe ‘Nagaya Anumaya Kotiꞌma taugafa ali-gatigahe hu-tenea kanoa omainogi nagaya uhagoteꞌna neꞌvisugeno agaya haenaga egahie.’ huꞌna hu-mainoe.
JOH 3:29 Nago vemoꞌa aꞌma aliana agaiꞌa a maineanagi ayama hu-mainea kanomoꞌa agava huno aꞌma ali-mainea kea haviteno tusiꞌa muse nehie. Aniꞌama hia avamete huꞌna Yisasitega veaꞌma neꞌvaya yafena nagaya tusiꞌa muse nehue.
JOH 3:30 Yisasi agimoꞌa nagaila nagaseno ala huno haigahianagi nagai nagimoꞌa afete tavigahie.” huno hie.
JOH 3:31 Yoniꞌa mage huno hie “Anafinagati elavi-mainea kanomoꞌa mukiꞌa yana amakase-maineanagi ma mopaletiꞌma efalote hu-mainea kanomoꞌa ma mopale kano maineno mopale yafeke kea nehie. Ikapinagati elavi-mainea kanomoꞌa mukiꞌa yana amakase-maine.
JOH 3:32 Ikapinagati elavi-mainea kanomoꞌa age-mainea yafeꞌene havimainea yafeꞌene hama-nepaiyanagi nagoꞌa veaꞌmoꞌya ani kea haviꞌya amakupina nomalae.
JOH 3:33 Nomalagi nagoke nagoke veaꞌmoꞌya hu-mainea kea haviꞌya amakupima malaya yafe ‘Anumaya Kotiꞌa tamageꞌage kano maine.’ huꞌya hu-lokiya neꞌvaiye.
JOH 3:34 Anumaya Kotiꞌa hu-tenea kanomona Anumaya Kotiꞌa Alu Aotage Avamula nago haupa nago haupa huno oꞌaminegi mukiꞌa hiya huno aminegeno Anumaya Koti kea nehie.
JOH 3:35 Higeno nefaꞌa nafaꞌneꞌamofena tusiꞌa muse nehuno mukiꞌa kava yagaisia yana ayapi malene.
JOH 3:36 Nagoꞌa veaꞌnemoꞌya nafaꞌneꞌamofema ‘Tamage nehie.’ huꞌya amakupi maleꞌya amametitima hayana agola maige maige hisaya hamaimula ago ali-mainayanagi nagoꞌa veaꞌmoꞌya nafaꞌneꞌamoꞌma hia kema akaveꞌma omalesayana ani hamaimula oꞌaligahae. Anumaya Kotiꞌa ani veaꞌmogamina aipa haviya hu-mateno kaiyeꞌkea ago hu-neꞌamate.”
JOH 4:1 “Yisasiꞌa Yonina agaseno mukiꞌa veaꞌmogamina tina fale-ma-teno hai-maine.” huꞌya haya ke Falasia vayaꞌmoꞌya havimainae. Yisasiꞌa agaiꞌa tina fale oꞌama-tenegi agaiꞌaenema tokaeꞌya nemaiya anagaꞌamoꞌya fale-ma-tenae.
JOH 4:3 Falasia vayaꞌmoꞌya ago ani kea haviya yafe Yisasiꞌa haviteno Yutia neꞌataleno Kalili eteno ugahe amuꞌno kola mogaseno via kotega Samelia mo vaiyatete hu-maine.
JOH 4:5 Nago Samelia kumaꞌmo agia Sika. Ani kumala Yekopuꞌa Yuta vayaꞌmogami amakinagomoꞌa nafaꞌneꞌamona Yosefe aminea hoya hanelega hane. Yisasiꞌa ani kumate evaꞌyi hu-maine.
JOH 4:6 Yekopuꞌa ti he-nefia kagemuyola hanegeno yagemoꞌa amuꞌno-kaꞌno higeno Yisasiꞌa kama vaiye-mainea yafe kasalo haegeno ani kagemuyo ti avayale eno mopale maine.
JOH 4:7 Mopale emainegeno nago Samelia aꞌmoꞌa ti he-figahe neꞌegeno Yisasiꞌa mage hie “Tina namigeꞌna nano.” huno hie.
JOH 4:8 (Yisasienema tokaeꞌya nemaiya anagaꞌmoꞌya anile omainagi kave miya hugahe ala kumatega umainae.)
JOH 4:9 Yuta vayaꞌene Samelia vayaꞌene amakoꞌya huꞌya amahaote amahaote huꞌya nemaiya yafe ani Samelia aꞌmoꞌa mage huno hie “Kagaya Yuta kano mainanagi nagaya Samelia a mainogi naꞌa higeka nagaifena tina namigeꞌna nano huka nehane?” huno havinege
JOH 4:10 Higeno Yisasiꞌa mage huno hie “Kagaya Anumaya Kotiꞌma amuse yama kamisia yafema havimainateꞌasina tifena nagaila nahavi-gateꞌasine. Tima namio hia kanoma nagemainateꞌasina tifena nahaviganageꞌna maige maige hisana tina kamuleꞌasine.” huno hie.
JOH 4:11 Higeno ani aꞌmoꞌa mage huno hie “Ala kanomoga ani li komua afe yapi hanegi tima he-fisana keꞌayola omalegi hanateti ani maige maige hisua tina he-fika namigane?
JOH 4:12 Yekopuꞌa, taginagomo ani kagemuyola tamineane. Yekopuꞌa nafaꞌneyagaꞌaene agaiꞌa afuyagaene ani komufitila ne-mainae. ‘Agaila agase-mainoe.’ huka nehapio?” huno hie.
JOH 4:13 Higeno Yisasiꞌa mage huno hie “Mukiꞌa veala ma lipiti nesayana eteꞌya lifena amakegahianagi nagoke nagoke veaꞌmogamima amamisua timoꞌa amakusafinaga kapae nehagea ti kana huno lavige lavige hisigeꞌya maige maige hisaya hamaimula amamigahie.” huno hie.
JOH 4:15 Higeno ani aꞌmoꞌa mage huno hie “Ala kanomogae ani lina namigeꞌna nano. Namisanageꞌna nagoꞌene onahaugahianagiꞌna malela tima he-figahena eteꞌna omano.” huno hie.
JOH 4:16 Higeno Yisasiꞌa mage huno hie “Negavena mo ke hu-lika male eno.” huno hie.
JOH 4:17 Higeno ani aꞌmoꞌa mage hie “Nenaveꞌa omaiye.” huno higeno Yisasiꞌa “Nenaveꞌma omaiyema hanana tamage nehane.”
JOH 4:18 “Kagaya faefuꞌa (5) negaveꞌya mainayane meni kanafina nago vene mainananagi miya hu-ga-tenaya negaveꞌa omaine. Mani kea tamage huka naha-nepaine.” huno hie.
JOH 4:19 Higeno ani aꞌmoꞌa mage huno hie “Ala kanomogae nagaya ago havimainoe kagaya Anumaya Kotina aune kanoꞌa mainane.
JOH 4:20 Taginagomoꞌya ma agoꞌyale* Anumaya Koti agia alisaga nehayanagi tamakaya Yuta vayaꞌmogatama ‘Yelusalemu Anumaya Koti agia alisaga nehaya kumala hane.’ hutama nehae.” huno hie.
JOH 4:21 Higeno Yisasiꞌa mage huno hie “Ma aꞌmoga nagayama tamage huꞌna kaha-paisua ke havika kagupi ai-maleteka kametiti huo. Nago kana falote hinageno ma agoꞌyaleꞌene Yelusalemuene Anumaya Koti agia alisaga ohugahagi alu kumateti kumateti agia alisaga hugahae.
JOH 4:22 Tamakaya Samelia veaꞌmogatama agima alisaga nehaya kanomona age-lama hutama oꞌagenae. Tagaya Yuta veaꞌmogata agima alisaga nehuna kanomofe havilama hu-mainona yafe agia alisaga nehune. Tamaugafa ali-gatisia kanoa Yuta vayapiti falote nehie.
JOH 4:23 Nago kana falote hugahie. Ani kana ago falote hu-maine. Nenafa agima alisaga hisaya veaꞌmoya tamage huꞌya amaku amamemaꞌafiti Nenafa agi alisaga hisaya kanamoꞌa ago falote hu-maine. Nenafana amaku amamemaꞌafiti agima alisaga hisaya veaꞌnehe ati neꞌaye.
JOH 4:24 Anumaya Kotiꞌa augafa omalenea avamula mainea yafe agai agima alisaga hugahena veaꞌmoya amaku amamemaꞌaleti tamage huꞌya agia alisaga hiho.” huno hie.
JOH 4:25 Higeno ani aꞌmoꞌa kenonaꞌa mage huno hie “Kalaisiꞌa, Anumaya Kotiꞌma taugafa ali-gatigahie huno hu-tesia kanoma esia kea nagaya ago havimainoe. Esiana mukiꞌa yafena taha-paigahie.” huno hie.
JOH 4:26 Higeno Yisasiꞌa kenonaꞌa mage hie “Nagaya nevayaꞌna kakaiꞌenema maineꞌna kema nehua kanoa mani kano mainoe.” huno hie.
JOH 4:27 Mani kea nehigeꞌya agaiꞌaenema tokaeꞌya nemaiya anagala eteꞌya neꞌeꞌya Yisasiꞌma aꞌmoꞌenema kea kea haꞌaꞌyafe ageteꞌya tusi amakesa havi havi hayanagi nagoꞌamoꞌya “Naꞌafe nehane?” huꞌya aꞌmofena haviokenae. “Naꞌa higeka ma aꞌene kea kea nehane?” huꞌya Yisasina haviokenae.
JOH 4:28 Ani aꞌmoꞌa ti kena neꞌataleno ala kumatega uno anifima mainaya veaꞌnehe mage huno hama-paiye “Mukiꞌa nayoma hu-mainoa yama naha-paiya kanoa etama megeho. Ani kanoa Anumaya Kotiꞌma taugafa ali-gatigahema hu-tenea kanofi?” huno hie.
JOH 4:30 Higeꞌya kumala neꞌataleꞌya Yisasitega emainae.
JOH 4:31 Yaufa neꞌageꞌya Yisasiꞌenema tokaeꞌya nemaiya anagaꞌamoꞌya Yisasifena mage hae “Hulave-nelina kanomoga nesana yana hanegi no.” huꞌya nehae.
JOH 4:32 Nehageno Yisasiꞌa mage huno hie “Nagaya oꞌagenaya kaveꞌnia hane.” huno hie.
JOH 4:33 Higeꞌya ani anagaꞌamoꞌya amakaiꞌami huge havige huꞌya mage hu-mainae “Nago kanomo nesia kavela ago alino me mainefi?” huꞌya hae.
JOH 4:34 Hageno Yisasiꞌa mage huno hie “Nesua kavela ma hane hu-na-tenea kanomoꞌma haisia kavaꞌma huꞌna naminea aliꞌyana alivaya ayesua yana kaveꞌniꞌa hane.
JOH 4:35 Veaꞌmoꞌya nehaya ke mage hutama nehae ‘Foꞌa (4) ika maitesunageno afuma nelea kana falote hugahie.’ hutama nehafi? Nagaya tamaha-nepauve tamakaya hoyafina age-lama hutama ageho. Ani hoyafina ago afu-le-maine. Anima hia kava huꞌya veaꞌmoꞌya nagai kema haviꞌyama amakupi maleꞌya anametiti hisaya yafe ago afu-le-mainae.
JOH 4:36 Afuma leana Anumaya Koti kema havisaya yafe ayama hisia kanomoꞌa anonaꞌa aligahianagi aya hu-mainaya vayala amakupi maleꞌya amametiti hisayana agola maige maige hisaya hamaimula aligahae. Aligahayanagi ani hoyafima avina yama negalia kanomoꞌene afumalegeno ayama huno neꞌalia kanomoꞌene nagoꞌya huꞌana musena hugaꞌe.
JOH 4:37 Manima agoꞌma hu-mainaya kea ‘Nago kanomoꞌa kali-malegeno nago kanomoꞌa nenaꞌa neꞌalie.’ huꞌya haya kea tamage nehae.
JOH 4:38 Nehagi nagoꞌa veaꞌmoꞌya kasageke huꞌya anima nagai kema ohavinaya veaꞌmogamina Anumaya Koti ke ago hama-pai-mainagi tamakaya ayama hugahena ani vayate ago hu-lama-togetama hama-pai-mainayanagiꞌya amakupi malesagetama afaꞌa nenaꞌage aligahae.” huno hie.
JOH 4:39 Ani aꞌmoꞌma hu-mainea kehe mukiꞌa Samelia veaꞌmoꞌya Yisasife haviꞌya amakupi maleꞌya amametiti nehae. Ani aꞌmoꞌa mage huno hu-maine “Mukiꞌa hu-mainoa yana ago naha-pai-maine.” huno hu-mainea kehe haviꞌya amakupi maleꞌya amametiti hu-mainae.
JOH 4:40 Yisasite evaꞌyi huꞌya mage huꞌya hae “Tagaiꞌene maisane.” huꞌya havigageno Yisasiꞌa amakaiꞌene tole kana maine.
JOH 4:41 Mainegeꞌya kasagoꞌya veaꞌmoꞌya agai kema haviya yafe amakupi maleꞌya amametiti nehae.
JOH 4:42 Amametiti nehuꞌya ani aꞌmofe mage huꞌya hapaiye “Menima kagai kema havuna yafe Yisasina taguꞌa amita tametiti nohunagi tagayama agai kema tagaiti haviteta tagupi maleta tametitia nehune. Menia nehavune mani kanoa ma mopale veaꞌmogati taugafa ali-gatigahe emaine.” huꞌya nehae.
JOH 4:43 Anile tole kana maiteno Yisasiꞌa ataleno Kalili umaine.
JOH 4:44 Yisasiꞌa agaiꞌa nayona mage huno hu-maineane “Nago mono ke hama-nepaiya kanomoꞌa agaiꞌa vayaꞌamogamipi maineana vayaꞌamoꞌya ‘Ala kanomo kegi havigetao.’ huꞌya nohae.” huno hu-maineane.
JOH 4:45 Hu-maineanagi Kalili evaꞌyi higeꞌya ani kumate veaꞌmoꞌya hu falu fala huteꞌya muse-kase hu-mainae. Naꞌafene ani veaꞌmoꞌya Yelusalemu ala imu ki-mainaya kanale Yisasiꞌma mukiꞌa yama hu-mainea yama moge-mainaya yafe hu falu fala huteꞌya musena hu-tenae.
JOH 4:46 Musena hutetageno Yisasiꞌa eteno Kalili hanea kumala Kena kumate uvaꞌyi hu-maine. Ani kumatela Yisasiꞌa tifena higeno nofi alagamo ti hapae-mainea kumale. Yisasiꞌa anile umainegeno nago kamani kava kanoa, Kapaneamu kumate kanogino, neꞌamoꞌa kali ali-maine.
JOH 4:47 Kali neꞌaligeno nefaꞌa “Yisasiꞌma Yutiati ago Kalili emaine.” huꞌya haya kea haviteno aupaꞌa nafaꞌneꞌa neꞌataleno Yisasite eno mage huno hie “Nafaꞌneꞌniꞌa falisia kava nehigi melika kanale huto.” huno hie.
JOH 4:48 Higeno Yisasiꞌa mage huno hie “Tamakaya tokiya avame yama oꞌagenutamahena nagaifena tamakuꞌa havi onamitama tamametitia ohugahae.” huno hie.
JOH 4:49 Higeno ani kamani kava kanomoꞌa mage huno hie “Ala kanomogae nafaꞌneꞌniꞌa ago faligahe nehigi afaꞌa kaiyayeka nagaiꞌene eno.” huno hie.
JOH 4:50 Higeno Yisasiꞌa mage hie “Kagaya afaꞌa vuo. Nafaꞌnekamoꞌa ofaligahigi afaꞌa maigahie.” huno higeno Yisasiꞌma hia kea havino akuꞌafi maleteno ametiti nehuno umaine.
JOH 4:51 Emainea kate eteno maitagifeno neꞌvigeno aliꞌya nafaꞌneꞌamoꞌya me fotu huteꞌya mage huꞌya hae “Kagaila nafaꞌnekamoꞌa ago kanale hu-tegeno maine.” huꞌya me-hae.
JOH 4:52 Me hageno “Na kanale aepa heno kanale hu-tene?” huno hamavi-gegeꞌya “Ega yagemoꞌa ali tagifeno nagokete evigeno ani amuko-nakoma haiya kalimoꞌa kanale hu-tene.” huꞌya hae.
JOH 4:53 Hageno nefaꞌa agesa haviteno mage hie “Tamage yagemoꞌa ani kanaꞌale eneꞌvigeno Yisasiꞌa ‘Nafaꞌneka ago kanale maine.’ huno naha-pai-maine.” huno nehuno agaiꞌaene mukiꞌa anagaꞌaene Yisasife haviꞌya amakupi maleꞌya amametiti hu-mainae.
JOH 4:54 Yisasiꞌa Yutiati eteno Kalili emaineno aniꞌama hia kavala napa tu (2) kanale tokiya avame yana hu-maine.
JOH 5:1 Haenagaꞌa Yuta veaꞌmoꞌya ala imu Yelusalemu negiya kana falote higeno Yisasiꞌa anilega hai-maine.
JOH 5:2 Yelusalemu kegiꞌyafi nago fiana sipi sipi afuyagamo fiana hane. Ani fiama hanelela ti kotuna male-maine. Ani li kotumo agia Yuta vayaꞌmogami* kefina Petesaitae. Ani kotutela faefuꞌa (5) fugagiꞌeta nona hane.
JOH 5:3 Mukiꞌa kali veala aulaga asu hu-mai anagaꞌene aiya avayu hu-mainea anagaꞌene aiyaꞌaya api hu-mai anagaꞌene ani fugagiꞌeta noꞌyagafi alitalu huꞌya fae-mainae.
JOH 5:5 Nago anile nemaiya kanomona kaliꞌamoꞌa teti eitiꞌa (38) kafu hu-maine.
JOH 5:6 Yisasiꞌa anima faeno mainea kanoa mogeteno “Mani kanoa ayaꞌaya kana kalia alino maine.” huno huteno mage hie “Kalikamoꞌma haꞌnoma hisia yafena muse nehapio?” huno havige-maine.
JOH 5:7 Havigegeno kali kanomoꞌa Yisasife mage hie “Humave-nelina kanomoga tima aikalafuꞌma nehia kanaleꞌma naya huno navaleno tipi natesia vayala omaiya yafe nagaiꞌnige oanagi nagaila ago nagaseꞌya tipi aupaꞌa neꞌvae.” huno hie.
JOH 5:8 Higeno Yisasiꞌa mage hie “Hetika fae omanakaꞌa neꞌalika ka vuo.” huno hu-maine.
JOH 5:9 Higeno aupaꞌa kaliꞌamoꞌa kanale hu-tegeno hetino fae omanaꞌa neꞌalino ka umaine. Kanaleꞌma hu-tenea kana Sapati kanalele.
JOH 5:10 Ani yafe Yuta vayaꞌmoꞌya kaliꞌama haꞌno hutea kanomofe mage hae “Meni kana Sapati kanalele. Naꞌa higeka faesana omanaka alika neꞌvane? Tagaiꞌma kahegi kemoꞌa Sapati kanalela ani kavala ohuo huno hu-maineane.” huꞌya hae.
JOH 5:11 Hageno kenonaꞌamia mage hie “Kaliꞌniꞌa alino kanaleꞌma hu-na-tea kanomoꞌa mage huno naha-pai-maine ‘Fae omanakaꞌa neꞌalika vuo.’ huno hu-na-tene.” huno hie
JOH 5:12 Higeꞌya mage huꞌya havigae “Mani kanoa hana kanomo kaha-paigeka faesana omanaka alika neꞌvane?” huꞌya hae.
JOH 5:13 Hayanagi mukiꞌa veaꞌma anile alitaluma hagenofena Yisasiꞌa aluꞌale ago umainegeno anima kaliꞌama haꞌnoma hutea kanomoꞌa mage hie “Oꞌagoa kanomo ani kea hu-natene.” huno ha-mapaiye.
JOH 5:14 Haenagaꞌa Yisasiꞌa kanale hu-tenea kanomona mono nopi mainegeno mogeteno mage hie “Kagaya ago menia kalikaꞌa haꞌno hu-ga-tegeka kanale huka mainanagi kefo kavala nagoꞌene ohuo. Kefo kavaꞌma hisanana nagoꞌa kana ya aligane.” huno hie.
JOH 5:15 Higeno mani kanomoꞌa viaꞌyamo Yuta vayafena mage huno hama-paiye “Yisasiꞌa alino kanale hu-natenea kanoe.” huno nehie.
JOH 5:16 Hianagi Yisasiꞌma Sapati kanaleꞌma kaliꞌama alino kanaleꞌma hu-tenea yafena Yuta vayaꞌmoꞌya aepa heꞌya amaipa kafa heteꞌya Yisasina aliꞌya haviꞌya hu-neꞌatae.
JOH 5:17 Yisasiꞌa mage huno hama-nepaiye “Nenafaꞌa mukiꞌa kanalela aliꞌyana neꞌaligeꞌna nagaiꞌenena aniꞌa huꞌna aliꞌyana neꞌalue.” huno hie.
JOH 5:18 Mani kehena Yisasiꞌa “Anumaya Kotiꞌa nagai Nenafaꞌe.” huno nehuno “Nagaya Anumaya Kotiꞌene nago kana kana hutaꞌa mainoꞌe.” hunoꞌma nehia kene Sapati kanale kahegi kema atagae-mainea yafeꞌene Yuta vayaꞌmoꞌya nagoꞌene ke vaiteꞌya “Haegahune.” huꞌya hu-mainae.
JOH 5:19 Yisasiꞌa mage huno hie “Tamage-lafa huꞌna tamaha-nepauve Nafaꞌneꞌamoꞌa agaiꞌage nagoke kavala nohianagi Nenafaꞌma nehia kavala age-maineafe ani kavala nehie. Nenafaꞌma nehia kavala Nafaꞌneꞌamoꞌa ani kavala nehie.
JOH 5:20 Nenafaꞌa Nafaꞌneꞌamofena aguꞌafina nehaigeno agaiꞌma mukiꞌa nehia kavala ave-nelie. Ave-ligeno ala kavaꞌma ago hu-mainea kavala agaseno haenagaꞌa tusiꞌa ala kavakefa ave-linegetama agetama atali atalu hugahae.
JOH 5:21 Nenafaꞌa fali-mainea vayala ali he-ti-mateno hamaimuꞌa neꞌamamianagino Nafaꞌneꞌamoꞌa aniꞌa huno haiya veaꞌmogamina hamaimula neꞌamamie.
JOH 5:22 Nenafaꞌa nago kanomona fako hu noꞌateanagi mukiꞌa veala fako hu-ma-tesia tokiya yana Nafaꞌneꞌamona ago amine.
JOH 5:23 Aminea yafe Nenafafema mukiꞌa veaꞌmoꞌya agima alisaga hayana aniꞌa huꞌya Nafaꞌneꞌamo agia alisaga hisae. Nagoꞌa veaꞌmoꞌya Nafaꞌneꞌamo agima alisaga ohisayana aniꞌa huꞌya hu-tenea Nenafa agiene alisaga nohae.
JOH 5:24 Magi nagaya tamage-lafa huꞌna tamaha-pauve nagoꞌa veaꞌmoꞌya keꞌniꞌa haviꞌya hu-natenea kanomofe ‘Tamage nehie.’ huꞌya amakupi maleꞌya amametiti hisayana ani veaꞌmogamina agola maige maige hisaya hamaimula ago ali-mainae. Ani veala hagoteꞌya fali-mai vaya kana huꞌya mainafiti hetiꞌya hamaimuꞌamia ali-mainae. Haenagaꞌa Anumaya Kotiꞌa kaiyeꞌkea hu oꞌama-tegahie.
JOH 5:25 Tamage-lafa huꞌna tamaha-nepauve nago kanamoꞌma agoꞌma falote hisiana amaku amamemaꞌamoꞌa fali-mainaya veaꞌmoꞌya Anumaya Koti nafaꞌnemo ke haviteꞌya akave malesayana he-tiꞌya agola maigahae. Ani kana ago falote hu-maine.
JOH 5:26 Nenafana agaiꞌafi haimuꞌmo aepa haneanagi aniꞌa huno Nafaꞌneꞌamofena ‘Hamaimuꞌmona aepaꞌa maiyo.’ huno hu-tene.
JOH 5:27 Nafaꞌneꞌamofena ikapinagati emainea kanoa vayaꞌmo atenea kanoginofe kaiyeꞌkema hu-ma-teno fako hu-ma-tesia tokiyaꞌa amine.
JOH 5:28 Mani kehena atali ohiho. Nago kana falote hisiana mukiꞌa agoꞌma faligeꞌyama komufi he-vai-matenaya veaꞌmoꞌya Yisasini nagea havigahae.
JOH 5:29 Haviteꞌya ani komufinagati he-tiꞌya hati-lavisageꞌya kanale kava hu-mainesaya veaꞌnea hetiꞌya agola maigahayanagi kefo kava hu-mainesaya veaꞌnea he-tisageno Anumaya Kotiꞌa kaiyeꞌkea hu-ma-teteno kina hu-ma-tenageꞌya haviya hugahae.
JOH 5:30 Nagaiꞌnige nago kavala nohuanagi Anumaya Kotiꞌa nahapai-mainea keleti kea fako hu-neꞌama-toe. Ani yafe fatago hulama huꞌna kea fako hu-neꞌama-toe. Nagaiꞌniꞌa nagesafiti ani kavala nohuanagi hu-na-tenea kanomoꞌa agaiꞌa huo hea kavaꞌage nehua yafe fatago hu-lama huꞌna kea fako hu-neꞌama-toe.” huno hie.
JOH 5:31 “Nagaiꞌnigeꞌma hu-haleꞌna aepaꞌaꞌnima tamaha-paisugenoꞌa keꞌnimoꞌa haviya hugahianagi nago kanomoꞌma nagaifema hu-haleno tamaha-nepaiyana nagaya ago havimainoe agayama nagaifema hia kea tamage nehie.
JOH 5:33 Tamakaya vayala hu-matageꞌya Yonitega vageno Yoniꞌa nagaifena ke tamage tamaha-pai-maine.
JOH 5:34 Nagayama vayaꞌmoꞌya nagaifema hu-mainaya kea ‘Afa ke nehae.’ huꞌna huanagi tamakaya ani kea havisageno tamaugafa ali-gatisia yafe tamaha-nepauve.
JOH 5:35 Yoniꞌa kaꞌni kana huno maineno hanagaligenoꞌma leana osi kanafi tamakaya agai kaꞌniꞌmoꞌma lea yafena musena hu-mainae.
JOH 5:36 Muse hu-mainayanagi nago tusiꞌa kanale yaꞌaene nagai aepaene tamave-li-maine. Ani yana ali-mainoa aliꞌyaniꞌae. Nenafa naminea aliꞌyama aliꞌna avaya-yesua yana Yoniꞌa nagaife hu-mainea kemo agase-mainegetama agetetama nagaifena havimainae. Ani aliꞌyaꞌniꞌa Nenafa hu-na-tenea yafe tamave-li-maine.
JOH 5:37 Hu-na-tenea Nenafaꞌa nagaifena ago tamaha-pai-maineanagi tamakaya agaila ageꞌa ohavitama agai aufina oꞌagetama hu-mainae.
JOH 5:38 Hu-tenea kanomofena ‘Tamage nehane.’ hutama tamakupina maletama tamametiti nohaya yafe Anumaya Koti kea tamakupina alitama nomalae.
JOH 5:39 Anumaya Koti kea nayo kae-malenaya avopi hapalitama ati-yetama ago age-mainae. ‘Ani avopitila agola maige maige hisuna tahaimula aligahune.’ hutama tamakesa havimainae. Ani avona nagaife huꞌya tamaha-pai-mainayanagi nagaitega esaya tamakesa nohaviye. Agola maige maige hisaya tamahaimula tamamisua yafena nagaitega nomae.
JOH 5:41 Veala muse hu-na-teyafene huꞌna nohuanagi tamakaifena nagaya ago havimainoe. Tamakaya tamakuꞌafina Anumaya Kotifena notama-haikeꞌna neꞌagoe.
JOH 5:43 Nagaya Nenafa agile emainoanagi navaletama falu fala hutama nonatayanagi alu kanomoꞌa agaiꞌa agile esigetama afaꞌa avaletama ali falu fala hutegahae.
JOH 5:44 Tamakaya ‘Alu vayatimo alu vayatimoꞌya muse hu-lateꞌya ala tagi lamisae.’ hutama nehayanagi Anumaya Kotiꞌa agaiꞌage mainegi alu Anumaya Kotiꞌa omaineanagitama Anumaya Kotiꞌa muse hu-lama-tesia yafena notamahaiye. Naꞌa nehayanagi hanaꞌa hutama nagaifena tamakupina maletama tamametitia hugahae?
JOH 5:45 Tamakaya nagaife ma ke hutama ohaviho ‘Nefate kaiyekea hu-la-tegahie.’ hutama tamakesa ohaviho. Aꞌao, nagaya kaiyekea hu otama-tegahuanagino tamakayama taya hugahiema hutama nehaya kanomo, Moseseꞌma tamaha-paiya kemoꞌa kaiyekea hu-lama-tegahie.
JOH 5:46 Mosese kema havitama tamakupi maletama tamametitima haleꞌasina nagai kene aniꞌa hutama tamametitia haleꞌasine. Moseseꞌa nagaife huno kae-maleneafe aniꞌa haleꞌasine.
JOH 5:47 Tamakaya Moseseꞌma kae-malenea kema havitama tamakupi maletama tamametitia ohunayanagitama hanaꞌa hutama nagai ke havitama tamakupi maletama tamametiti hugahae?” huno hamavi-nege.
JOH 6:1 Haenagaꞌa Yisasiꞌa tipi kalefi uno Kalili* li kotuna takaeno umaine. Ani li kotumona nago agia Taipiliasie.*
JOH 6:2 Mukiꞌa veaꞌmoꞌya kaliꞌamima alino kanale hu-ma-teno tokiya avame yama higeꞌyama agaya yafe akave umainae.
JOH 6:3 Vageno Yisasiꞌene agaiꞌaenema tokaeꞌya nemaiya anagaꞌaene agoꞌyale haiꞌya mopale mainae.
JOH 6:4 Yuta vayaꞌmoꞌya Anumaya Kotiꞌma amakinagomogami amaugafama ali-gati-mainea yafe amakesa havisaya imu* kisaya kanaꞌa ago aupa hu-maine.
JOH 6:5 Yisasiꞌa ageno ataleno ageana mukiꞌa veaꞌmoꞌya agaitega neꞌageno amaketeno Filipife mage hie “Hanateti ani veaꞌmoꞌyama nesaya kavela miya hugahune?” huno hie.
JOH 6:6 Yisasiꞌa Filipina ayevataga huno mani kea nehuno agayama hugahema hia yana ago havimaineno hu-maine.
JOH 6:7 Filipiꞌa mage hie “Nago kanomoꞌa tu hataletia (200) kanale aliꞌyana aliteno miya alino ani monea ataleno kaveꞌma miya hisiana ma mukiꞌa veakefafina osi osi huꞌya kavela alite alite hugahae.” huno hie.
JOH 6:8 Higeno nago kanoa agaiꞌaenema tokaeꞌya nemaiya anagaꞌamogamipitila, Saimoni Pitana aganaꞌamoꞌa Etaluꞌa, mage huno hie “Nago nafaꞌnemoꞌa faefuꞌa (5) mayagi tole noyamegi huno ali-lino maine. Veakefamo alino ala higeno mani kavela osi kanoꞌa haneanagi hanaꞌa huno taya hisie?” huno hie.
JOH 6:10 Higeno Yisasiꞌa agaiꞌaenema tokaeꞌya nemaiya anagaꞌamofe mage hie “Mukiꞌa veakefa ‘Mopale maiho.’ hutama hama-paiho.” huno hama-paiye. Ani kumala mukiꞌa apeꞌage hanea kumalagiꞌya mukiꞌa veakefa mopale mainae. Ani veala faefu tauseniꞌa (5,000) veneꞌne mainae.
JOH 6:11 Yisasiꞌa ani maya alino Anumaya Kotitega muse huno havigeteno mukiꞌa mopale mainaya veaꞌmogamina fako huno amamite amamite hu-maine. Noyamene ani kava higeno mukiꞌa veaꞌmoꞌya ani kavela nageno amamu hu-maine.
JOH 6:12 Nemamu hu-male-tageno Yisasiꞌa agaiꞌaenema tokaeꞌya nemaiya anagaꞌamofena mage hie “Mukiꞌa atupa-tapa kavela alitalu hu-tama maleho. Nagoꞌa osi osi atupa vitali vitali ohiho.”
JOH 6:13 Amakaya mukiꞌa veala faefuꞌa (5) maya kanoꞌafiti neteꞌya atalaya atupayaga alitalu huꞌya tuelufuꞌa (12) kula ai-havate-mainae.
JOH 6:14 Anifiꞌma mainaya veakefamoꞌya Yisasiꞌma hu-mainea tokiya avame yana ageteꞌya mage hae “Tamage huno Anumaya Kotina aune kanoꞌa hu-tesigeno ma mopafima egahiema huno hu-mainea kanoa mama ago emaine.” huꞌya hae.
JOH 6:15 Hageno Yisasiꞌa vayaꞌmoꞌyama hisaya kavala aguꞌafinaga mage huno havimaine “Mani vayaꞌmoya nagaila sauveꞌami maisua yafe navalegahe nehae.” huno nehuno neꞌamataleno agaiꞌage agoꞌyafi hai-maine.
JOH 6:16 Yagemoꞌa lavi-falegeno une avamemaꞌa agaiꞌaenema tokaeꞌya nemaiya anagaꞌamoꞌya ala ti agegayalega uteꞌya tipi kalefi asaga hu-maiꞌya Kapaneamu vayana Yisasiꞌa amakaiꞌenena oꞌune. Oꞌvigeꞌya yaufa uge uge huꞌya neꞌvageno hani ki-ma-tene.
JOH 6:18 Ala yasigefamoꞌa eno tina melino mo ai-yahae me ai-yahae huno tusiya hu-maine.
JOH 6:19 Tusiya higeꞌya tipi kalefima mainaya vayaꞌmoꞌya yosaleti vailagai-liꞌya vayana nagoꞌa ayaꞌayaꞌa sikisiꞌa (6) kilomita ti kotuꞌmona amuꞌnopi neꞌuꞌya agayana Yisasiꞌa ti avoyale aiya ayeme ayeme tipi kalema hanelega neꞌegeꞌya ageteꞌya tusiya huꞌya kolia hu-mainae.
JOH 6:20 Koli nehageno Yisasiꞌa mage huno hama-paiye “Kolia ohiho mamona nagayae.” huno hama-nepaiye.
JOH 6:21 Hama-paigeꞌya vayaꞌmoꞌya Yisasina tipi kalefi haisaga hu-maisia yafe muse nehuꞌya tipiti avalesaga nehae. Ani tipi kalemoꞌa visaya kumatela aupaꞌa uvaꞌyi hu-maine.
JOH 6:22 Faeteꞌya kotigeꞌya tikotuꞌmona atu kaiyaga mainaya veaꞌmoꞌya ageteꞌya mage hae “Nagoke tipi kaleꞌage hanegeta age-mainone. Yisasiꞌenema tokaeꞌya nemaiya anagaꞌage ani lipi kalefi vayanagi Yisasiꞌa oꞌunegi ani vayala amakaiꞌamige umainae.” huꞌya hae.
JOH 6:23 Ani kumala Yisasiꞌa Anumayamotega nunamu huno muse huteno kavela amamigeꞌya ne-mainaya kumate nagoꞌa lipi kaleyaga Taipiliasi kumateti anile neꞌae.
JOH 6:24 Neꞌeꞌya mukiꞌa veaꞌmoꞌya megayana Yisasiꞌenema tokaeꞌya nemaiya anagaꞌene omainageꞌya megeteꞌya tipi kalefi asaga hu-maiꞌya Kapaneamu Yisasife mo atiye-mainae.
JOH 6:25 Atiyeme valegati atu kaiyaga umaineꞌya Yisasina mogeteꞌya mage hae “Hulave-nelina kanomoga na yu ma kumala meli-mainane?” huꞌya havinegae.
JOH 6:26 Havigageno Yisasiꞌa mage hie “Nagaya tamagelafa huꞌna tamaha-nepauve tamakaya kaveꞌma tamamugetama nageno tamamuꞌma hu-mainea yafe natia neꞌayayanagi nagaila tokiya avame yama hugetama age-mainaya yafena natia noꞌayae.
JOH 6:27 Tamakaya kasalisia kavefena maitama ati oꞌayeho. Maige maigema hisaya kavefeꞌke maitama atiyeho. Nagaya Nenafaꞌa, Anumaya Koti hu-na-tenea kanomoꞌna ikapinagati emainoa kanoa vayaꞌmo natenea kanomoꞌna mani kavela tamamigahue.” huno hie.
JOH 6:28 Higeꞌya mage huꞌya havinegae “Tagaya hanaꞌa huta Anumaya Koti aliꞌyana alisune?” huꞌya havinegae.
JOH 6:29 Hageno Yisasiꞌa mage hie “Mani aliꞌyana Anumaya Kotiꞌa muse nehia aliꞌyane. Agayama hu-tegeno emainea nafaꞌnemofe tamakupi maletama tamametiti hisaya yafe muse nehie.” huno hie.
JOH 6:30 Higeꞌya mukiꞌa veaꞌmoꞌya mage hae “Hana augafa tokiya avame yana tave-lisanageta ageteta tagupina maleta tametiti hisune?
JOH 6:31 Nayona taginagomoꞌya vaya omai kotega maineꞌya nago kavela agia manae nehaya kave ne-mainayane huno kae-maleneane ‘Ikapinagati maya amamigeꞌya ne-mainae.’ huno kaemaleneane.” huꞌya nehae.
JOH 6:32 Hageno Yisasiꞌa mage hie “Nagaya tamage-lafa huꞌna tamaha-nepauve ikapinagati elavi-mainea maya Moseseꞌa agaiꞌa oꞌamaminegi Nenafaꞌa ikapinagati tama maya menia nelamamie.
JOH 6:33 Anumaya Kotiꞌma tamamia mayamoꞌa maꞌa hu-maine nago kanoa ikapinagati ea maya mainea yafe ma mopale mainaya veala hamaimula amamine.” huno hie.
JOH 6:34 Higeꞌya mage huꞌya hae “Ala kanomogae mukiꞌa kanalela ani maya tamige lamige huo.” huꞌya hae.
JOH 6:35 Hageno Yisasiꞌa mage huno hama-nepaiye “Nagaya hamaimu amamisua maya mainoe. Nagaitegama esia veaꞌmoꞌya nagoꞌene amakala otegahae. Nagayama hu-lama-tesua yafe amakuꞌafi maleꞌya amametiti hisaya veaꞌmoꞌya tifena oꞌamakegahae.
JOH 6:36 Nagaya ago tamaha-paugetama nagaila ago nagemainayanagi nagaya hu-lama-tesua yafena tamakupina maletama tamametitia nohae.
JOH 6:37 Mukiꞌa Nenafaꞌma naminea veaꞌmoꞌya nagaitega egahae. Nago kanomoꞌma nagaitegama esigeꞌnahena ‘Eteka vuo.’ huꞌna hu oꞌategahue.
JOH 6:38 Hu-na-tenea kanomoꞌma haisia kavaꞌma hisua yafe ikapinagatila hu-nategeꞌna emainoe. Nagaiꞌniꞌa nagesafiti kavala hugahe omenoe.
JOH 6:39 Hu-na-tenea kanomoꞌma haisia kavaꞌma hisuana maꞌa hu-maine naminea veaꞌnefitila nagoke kanoꞌa fanane ohisageꞌna ma mopama haꞌnoma hisia kanafina mukiꞌa fali-mainesafiti ali he-ti-matesugeꞌya agola maige maige hugahae.
JOH 6:40 Nenafaꞌa maꞌa yafe musena nehie mukiꞌa veaꞌmoꞌya nafaꞌneꞌamona neꞌageꞌya agayama hu-matesia yafe havilama huꞌya amakupi maleꞌya amametiti hisayana agola maige maige yana aligahae. Alitesageꞌna ma mopama haꞌno hisia kanafina nagaya fali-mainesafitila ali he-ti-ma-tesugeꞌya agola maige maige huꞌya maigahae.” huno hu-maine.
JOH 6:41 Yisasiꞌma “Nagaya ikapinagati elavi-mainoa maya mainoe.” huno hu-mainea kehe Yuta veaꞌmoꞌya Yisasifena ke vaiꞌya kasagoꞌya ke hu-tenae.
JOH 6:42 Mage huꞌya nehae “Ma kanoa Yisasiꞌa, Yosefe nafaꞌnefi? Nefaꞌene itaꞌamoene ago age-mainone. Naꞌa higeno menia ‘Ikapinagati elavi-mainoa kano mainoe.’ huno nehie.” huꞌya hae.
JOH 6:43 Hageno Yisasiꞌa kenonaꞌamia mage huno hie “Tamakaya tamakaitamifima kasagoꞌya kema hatagaya kea ataleho.
JOH 6:44 Nago kanomoꞌa nagaitega agaiꞌa nomegi hu-na-tenea Nenafa avayu hinageno nagaitega enageꞌna nagaya ma mopama haꞌno hisia kanafina fali-mainesifiti ali he-ti-tesugeno haimula aligahie.
JOH 6:45 Anumaya Koti aune vayaꞌmoꞌya mage huꞌya kae-malenayane Mukiꞌa veaꞌmogamina Anumaya Kotiꞌa hu-maveli hamaveli hugahie huꞌya kae-malenayane. Mukiꞌa veaꞌmoꞌya Nenafaꞌma hu-mavelia kea haviteꞌya akave malenaya veaꞌmoꞌya nagaitega neꞌae.
JOH 6:46 Nago kanomoꞌa Nenafana oꞌageneanagi Anumaya Kotitegati emainea kanomoꞌa agaiꞌage Nefana age-maine.
JOH 6:47 Tamage-lafa huꞌna tamaha-nepauve nagaifema haviꞌya amakupi maleꞌya amametiti hu-mainaya veaꞌmoꞌya agola maige maige hisaya hamaimula ago ali-mainae.
JOH 6:48 Nagaya nagaiꞌniꞌa hamaimu amamisua maya mainoe.
JOH 6:49 Ani tamakinagomoꞌya vaya omai kotega maineꞌya nago kaveꞌmo agia manae huꞌya nahaya kave ne-mainayanagi ago fali-mainae.
JOH 6:50 Fali-mainayanagi maꞌa augafa ikapinagati elavia maya nesaya veaꞌmoꞌya ofaligahae.
JOH 6:51 Nagaya Ikapinagati elavi-mainea maya mainoe. Ani mayamona haimuꞌa hane. Nagoꞌa veaꞌmoꞌya mani mayama nesayana agola maige maige hugahae. Ani maya nagaiꞌniꞌa naugafae. Ma mopaleꞌma mainaya veala agola maige maige hisaya yafe naugafa ataleteꞌna faligahue.” huno hie.
JOH 6:52 Higeꞌya Yuta vayaꞌmoya mani kehena ke vaiꞌya mage huꞌya hae “Mani kanomoꞌa hanaꞌa huno augafaꞌa taminegeta nesuna yafe nehie?” huꞌya hu-mainae.
JOH 6:53 Nageno Yisasiꞌa mage hie “Nagaya tamage-lafa huꞌna tamaha-nepauve tamakayama ikapinagati emainoa kano vayaꞌmo na-tenea nafaꞌnemoni naugafaene kolaniꞌaenema onesayana maige maige hisaya tamahaimula tamakupina omalegahie.
JOH 6:54 Nagoꞌa veaꞌmoꞌya naugafaene kolaniꞌaenema nesayana agola maige maige hisaya hamaimula ago ali-mainayanagiꞌna ma mopama haꞌno hisia kanafina fali-mainesafitila ali he-ti-ma-tegahue.
JOH 6:55 Nagai naugafa, kave tama hane. Kolaniꞌaenena tama li hane.
JOH 6:56 Nagoꞌa veaꞌmoꞌya naugafaene kolaniꞌaenema nesayana nagai nagupi mainageꞌna nagaya aniꞌa huꞌna amakai amakupina mainoe.
JOH 6:57 Nenafaꞌa haimuꞌaene kanomoꞌa hu-nateneanagino nahaimula namigeꞌna mainoe. Nagoꞌa veaꞌmoꞌya nagai naugafama nesayana nagai tokiyafiti hamaimula aliteꞌya maigahae.
JOH 6:58 Ikapinagati elavi-mainea maya maꞌa augafa maya hane. Yuta vayaꞌmogami amakinagomoꞌya ne-mainaya maya kana ohune. Ani maya neteꞌya ago fali-mainayanagi nagoꞌa veaꞌmoꞌya ikapinagati elavi-mainea mayama nesayana agola maige maige hugahae.” huno hie.
JOH 6:59 Yisasiꞌa mani kea Kapaneamu mono nopi huno hama-pai-mainea ke.
JOH 6:60 Mukiꞌa akaveꞌma neꞌvaya veaꞌmoꞌya ani kea haviteꞌya mage huꞌya hae “Manima hu-mave-lia kemoꞌa tusiꞌa kana nelahaiye. Hana kanomo mani kea haviteno akave malesia amukoꞌa hane?” huꞌya hae.
JOH 6:61 Hageno Yisasiꞌa ani kehena akaveꞌma neꞌvaya veaꞌmoꞌya kasagoꞌya kema haya kea ago aguꞌafinaga haviteno mage huno hie “Mani kemoꞌa otamahaifi? Natalesaya tamakesa nehavifio?” huno hamavi-nege.
JOH 6:62 Nagayama, ikapinagati emainoa kanoa vayaꞌmo natenea kanomoꞌna, eteꞌnama hagoteꞌna nemauva kumateꞌma visugetama nagesayana hanaꞌa hugahae?
JOH 6:63 Anumaya Koti Avamuꞌmoꞌa maige maige hisaya tamahaimula nelamianagi tamakai tamaugafamoꞌa nagola kanale yana notamamie. Nagaya Anumaya Koti Avamuꞌmoꞌa naminea ke tamaha-pai-mainoe. Ani kemoꞌa maige maige hisaya tamahaimula nelamamie.
JOH 6:64 Mani kea tamaha-pai-mainoanagi “Nagoꞌamogatama ani kehena tamakupina alitama nomalae.” huno nehuno nayoma aepa he-mainea kanafina Yisasiꞌa amakupi maleꞌya amametiti ohisaya veaꞌene agaiꞌama agesi huno kame ya hu-tesia kanoene ago haviline.
JOH 6:65 Yisasiꞌa nagoꞌene mage hie “Ani yafe mage huꞌna tamaha-pai-mainoane nagoke veala amakaiꞌamia nagaitega omegahagi Nenafa esaya amaku amakesa amamisigeꞌya nagaitega egahae.” huno hie.
JOH 6:66 Mani kema higeꞌya kasagoꞌya akaveꞌma umainaya veala eteꞌya mai-yahae huꞌya ataleꞌya umaineꞌya nagoꞌene agaiꞌenena me vai-oꞌayenae.
JOH 6:67 Yisasiꞌa tuelufuꞌa (12) anagaꞌamogamife mage huno hamavi-nege “Tamakaya aniꞌa hutama nagaila natalegahao?” huno hamavi-nege.
JOH 6:68 Hamavi-gegeno Saimoni Pitaꞌa kenonaꞌa mage hie “Anumayamoga hana kanomote visune? Kagai kemoꞌa maige maige hisuna tahaimula nelamie.
JOH 6:69 Tagaya ago havilinone kagaya alu aotage kavaꞌage kanoa Anumaya Kotiꞌa hu-gategeka emainananagita kagaifena tagaya tagupi maleta tametitia ago hu-mainone.” huno hie.
JOH 6:70 Higeno Yisasiꞌa mage hie “Tamakaya tuelufuꞌa (12) anagaꞌnimogatamina nagaya ago hapali-lama-tenoamagi tamakaipina nago kanomoga Kefo Avamuꞌene mainane.” huno hie.
JOH 6:71 Mani kema hiana Yutasife hu-maine. Yutasiꞌa Saimoni Isakaliotina nafaꞌneꞌamoꞌe. Tuelufuꞌa (12) anagapiti Yisasina agesi huno kame ya hu-tesia kanohe hu-maine.
JOH 7:1 Ani kanafina Yutia kotega vayaꞌmoꞌya haesaya amakesa haviya yafe Yisasiꞌa Yutia vai-oꞌayeno Kalili kotega ute ete huno maine.
JOH 7:2 Ala kana, fugagiꞌeta nopi maineꞌya imu negiya kana aupa nehie.
JOH 7:3 Aupa higeꞌya Yisasina aganaꞌamoꞌya mage huꞌya hapaiye “Ma kumala neꞌataleka Yutia kotega ugeꞌya kakaveꞌma nehaya veala kagayama tokiyakaletiꞌma alina aliꞌyana ageho.
JOH 7:4 Nago kanomoꞌa ‘Mukiꞌa veaꞌmoꞌya nagesae.’ huno kesi aliꞌyana noꞌalia yane. Kagaya ani tokiya aliꞌyana mukiꞌa ma mopale veaꞌmogami amaufi aligeꞌya ani aliꞌyakaꞌa ageho.” huꞌya hae.
JOH 7:5 Hayanagi ani aganaꞌamoꞌya agaifena haviꞌya amakupi maleꞌya amametitia ohunaya yafe ani kea hu-mainae.
JOH 7:6 Yisasiꞌa mage hie “Aliꞌyaniꞌa amave-lisua kanaꞌniꞌa falote ohunegi tamakaya mukiꞌa kanalela tamakaiꞌma tamahaisia kavala hisaya kanatamilelagi afaꞌa haiho.
JOH 7:7 Nagai ke nohaviya veaꞌmoꞌya tamakaifena musetami nehagi nagaya ‘Ase ohu kava nehae.’ huꞌna hama-pauva yateti nagaila amaipa kafa he-nenatae.
JOH 7:8 Tamakaya Yelusalemu imulega viho. Nagaya aliꞌya kanaꞌniꞌa falote ohuneanagiꞌna ani yafe menia imulega oꞌugahue.” huno hie.
JOH 7:9 Ani kea hama-paiteno oꞌuno afaꞌa Kalili kotega maine.
JOH 7:10 Aganaꞌamoꞌya imulega ago utageno Yisasiꞌa haenaga anilega hai-maine. Vaya amaulela oꞌunegi kesi fala-kino umaine.
JOH 7:11 Falakino umainegeꞌya Yuta vayaꞌmoꞌya agayama imuleꞌma esiafene huꞌya moge mege hugetayana higeꞌya mage huꞌya hae “Ani kanoa hanate maine?” huꞌya hamavi-gageꞌya anifima alitalu hu-mainaya veaꞌmoꞌya Yisasifena sumi sumi huꞌya nagoꞌamoꞌya “Kanale kanoe.” huꞌya nehageꞌya nagoꞌamoꞌya “Vaya aye-mavataga hugeno omai kanoe.” nehageꞌya huꞌya hae.
JOH 7:13 Hayanagi Yuta vayaꞌmogamife koli haya yafe ani kea ala kea ohunagi osi kefiti sumi sumi huꞌya hu-mainae.
JOH 7:14 Ani imu kanamo amuꞌnopinaga Yisasiꞌa ala mono nopi haino hu-mave-li-maine.
JOH 7:15 Hu-mave-neligeꞌya Yuta veaꞌmoꞌya tusiꞌa amamaꞌyo neꞌaiꞌya mage huꞌya hae “Mani kanoa hana avo nopi uno age-mainea kanomo avopitila taha-nepaiye? Avo nopina oꞌunea kanomoꞌa hanateti ani kea haviline?” huꞌya hae.
JOH 7:16 Hageno Yisasiꞌa kenonaꞌamia mage huno hama-paiye “Hu-mave-nelua yana nagesafiti tamaha-nopaugi nevaꞌyaꞌma hu-na-tegeꞌna emainoa kanomo naha-pai-mainea ke tamaha-nepauve.
JOH 7:17 Nagoꞌa veaꞌmoꞌya ‘Anumaya Kotina haisia kava hugahune.’ huꞌyama hisaya veaꞌmoꞌya ma ma hu-lamave-nelua kea nagesafiti tamaha-nepaufi Anumaya Kotiꞌa naha-pai-mainea ke tamaha-nepaufi havigahae.
JOH 7:18 Havigahayanagi nago kanomoꞌa agaiꞌa agesafiti kema hisia kanomoꞌa ‘Nagai nagi alisaga hisae.’ huno nehianagi nago kanomoꞌma ‘Nevaꞌyaꞌma hu-na-tenea kanomo agi alisaga hisae.’ huno hisia kanoa kanale agu agesaene kano mainea yafe havigea ohugahie.
JOH 7:19 Moseseꞌa kahegi kea ago tamaha-pai-mainea ke tamakaitamifina nago kanomoga ani kemona akavela nomalane. Naꞌa higetama menia nagaila nahaegahena nehae?” huno hie.
JOH 7:20 Higeꞌya melitalu hu-mainaya veaꞌmoꞌya mage huꞌya hae “Kefo avamuꞌmo kagaila kagusafina maineno kavale-liteno nehie. Taꞌya kahaegahena nehageka nehane?” huꞌya hae.
JOH 7:21 Hageno Yisasiꞌa mage huno hama-paiye “Nagaya nago tokiya aliꞌyama Sapati kanaleꞌma alua aliꞌyafe tamamaꞌyoa neꞌaiye.
JOH 7:22 Moseseꞌa nayona ‘Nafaꞌnetamimona agoya amega augafaꞌa taga hu-taleho*.’ huno hama-pai-maine. Ani kavala agaiꞌa alino aepa ohenegi Mosesena aginagomoꞌya ani yana aliꞌya aepa he-mainae. Neꞌmoꞌma agoya anoꞌyaꞌa tagama hayana Sapati kanale taga hu-mainae.
JOH 7:23 Tamakaya Moseseꞌma kahegi kema oꞌatagaesaya yafe Sapati kanalela neꞌmo agoya anoꞌyaꞌa taga nehayanagi naꞌa higetama nagayama Sapati kanalema nago kanoma mukiꞌa augafama aliꞌna hilatoma hua yafena tamahaiya vai-nena-tae?
JOH 7:24 Havigu ke nehae. Afaꞌa amega yate agetetama ‘Kefo kava nehane.’ hutama nehagi tama kava hisigetama agetetama kaiyekea hu-teho.” huno nehie.
JOH 7:25 Nagoꞌa Yelusalemu mainaya veaꞌmoya Yisasiꞌma hia ya ageteꞌya mage hae “Ma kanoa ala vayaꞌmoꞌyama haegahunema haya kanofi?
JOH 7:26 Ageho vaya amaulagafina kea nehianagi nago yana hu noꞌatae. Kava vayaꞌmoꞌya ma kanomofe Anumaya Kotiꞌa veaꞌmogati taugafa ali-gatigahie huno hu-tegeno emainea kanoa mainea yafe havimainafi?
JOH 7:27 Anumaya Kotiꞌa taugafama ali-gatigahema hu-tegeno emainea kanomofena ‘Hana kumateti emaine?’ huꞌya hugahayanagi ma kanoma ea kumala ago age-mainone.” huꞌya hae.
JOH 7:28 Hageno Yisasiꞌa ala mono nopi haino maineno hu-mave-nelino ala kefiti mage huno hie “Tamakaya nagaifena ago havilama hutama nage-mainafi? Nagayama emainoa kumaꞌenefe havimainafi? Nagaya nagaiꞌni nagesafiti omenogi nagaiꞌma hu-natenea kanomoꞌa tokiyaꞌage kano maineanagitama tamakaya agaila oꞌagenae.
JOH 7:29 Oꞌagenayanagi nagaya agaiꞌene mainoleti hu-nategeꞌna emainoafenagiꞌna ago age-mainoe.” huno hie.
JOH 7:30 Higeꞌya agaila atafa hugahe hayanagi falisia kanaꞌa yaufa falote ohunea yafe augafalela nago kanomoꞌa atafa ohune.
JOH 7:31 Ohunayanagi mukiꞌa anifima mainaya veaꞌmoꞌya agaifena haviꞌya amakupi maleꞌya mage hae “Anumaya Kotiꞌma taugafa ali-gatigahema hu-tenea kanoma esiana ma mainea kanomoꞌma tokiya avame yama hu-mainea kavala agasesifi? Aꞌao oꞌagasegahie. Ma kanoa Anumaya Kotiꞌma taugafa ali-gatigahema hu-tegeno emainea kano maine.” huꞌya hae.
JOH 7:32 Nehageꞌya Falasia vayaꞌmoꞌya agaifema sumi sumiꞌma haya kea haviteꞌya mono note kava vayaꞌene Falasia vayaꞌene ati vayaꞌmogamina hu-ma-tageꞌya Yisasina me haesaya malesaya kava huꞌya avalegahe neꞌae.
JOH 7:33 Neꞌageno Yisasiꞌa mage huno hie “Osi kana kanoꞌa tamakaiꞌenena maiteꞌna hu-nategeꞌna emainoa kanolega ugahue.
JOH 7:34 Tamakaya nagaifena natiyegahayanagi nagaila onagegahae. Visua kumatela tamakaya oꞌugahae.” huno hie.
JOH 7:35 Higeꞌya Yuta vayaꞌmoꞌya amakaiꞌamifi huge havige huꞌya mage hae “Agayama ‘Nagaila onagegahaema.’ hia kumala hanamaꞌalegafiga hanegeno nehie? Agaya Kaliki kotega Yuta vayaꞌmogatina tataleꞌya umainaya kotega umaineno Kaliki vea hu-mave-li hamaveli hugahe nehifi?
JOH 7:36 Agayama hia kea ‘Tamakaya nagaila natiyegetesayana onagegahae. Visua kumatela oꞌugahae.’ hunoꞌma hia kemo aepaꞌa naꞌane huno nehie?” huꞌya hae.
JOH 7:37 Imu kime haiꞌya mogi haꞌnoma haya kana tusiꞌa ala kanae. Ani kanale Yisasiꞌa he-tino ala kefiti mage hu-maine “Nagoꞌa veaꞌma tifema amakesia veala nagaite eꞌya tina me neho.
JOH 7:38 Nagoꞌa veaꞌmoꞌya nagaife haviꞌya amakupi maleꞌya amametitia hisayana Anumaya Koti autaꞌmafina ani veaꞌmofe mage hu-maineane ‘Ofali tina kasagoꞌya timo aguꞌafina hava-te-maineno vali-lavino tavigahie.’ huno hu-maineane.” huno nehie.
JOH 7:39 Yisasiꞌa anima hia kea “Alu Aotage Avamuꞌamofe hu-maine.” Ani Alu Aotage Avamula Yisasifema haviꞌya amakupi malesaya vaya amamite amamite hugahe nehie. Ani kema hia kanafina Yisasiꞌa yaufa ikapinaga ohainea yafe Alu Aotage Avamuꞌamoꞌa yaufa omenegeno hu-maine.
JOH 7:40 Nagoꞌa alitalu hu-mainaya veaꞌmoya ani kea haviteꞌya mage hae “Tamage-lafa huno mani kanoa Anumaya Koti aune kano emaine.” huꞌya hae.
JOH 7:41 Hageꞌya nagoꞌa veaꞌmoꞌya “Anumaya Kotiꞌa taugafa ali-gatigahe hu-tenea kano maine.” nehageꞌya nagoꞌa veaꞌmoꞌya “Anumaya Kotiꞌa taugafa ali-gatigahe hu-tenea kanomoꞌa Kalilitila falote ohugahie.
JOH 7:42 Anumaya Koti autaꞌmafina mage huno kae-maleneane ‘Anumaya Kotiꞌa taugafa ali-gatigahema hu-tenea kanoa Tevitina aginagomo egahie. Tevitiꞌma Petelehemu nemaiya kumate ategahie.’ huno kae-maleneane.” huꞌya nehae.
JOH 7:43 Ani veaꞌmoꞌya agaifena tolefi ali fako huꞌya alu ke alu ke nehae.
JOH 7:44 Hageꞌya nagoꞌamoꞌya “Agaila atafa hiho.” huꞌya hayanagi nago kanomoꞌa augafalela atafa ohune.
JOH 7:45 Ati vayala eteꞌya mono note kava vayateꞌene Falasia vayateꞌene vageꞌya mage huꞌya hamavigae “Naꞌa higetama avaletama nomae?” huꞌya hae.
JOH 7:46 Hageꞌya ati vayaꞌmoꞌya mage huꞌya hae “Yisasiꞌma hia kea nayona nago kanoꞌmoꞌa aniꞌa augafa kea ohigeta ohavinona yafe avaleta nomone.” huꞌya hae.
JOH 7:47 Hageꞌya Falasia vayaꞌmoꞌya mage hae “Tamakaiꞌenena ago aye-lamavataga hu-mainefi?
JOH 7:48 Ifi nagoꞌa kava vayapi Falasia vayapi ‘Yisasifena haviꞌya amakupi maleꞌya amameti hu-mainae.’ huꞌya haya kea havimainafi?
JOH 7:49 Aꞌao kava vayala aniꞌa ohunagi kahegi kema ohaviꞌyama alitaluma hu nemaiya veaꞌmogamina Anumaya Kotiꞌa hai vai-ma-teno haniki-mainesia yapina hu-mategahie.” huꞌya hae.
JOH 7:50 Hageno Nikotimasiꞌa nayoma Yisasiteꞌma emainea kanomoꞌa amakaipi maineanagino mage hie “Tagai mono kemoꞌa mage huno hie ‘Hagotetama nofiꞌma hu-tesaya kanomona ‘Naꞌa maꞌa humainoe.’ huno hisia kea havitetama kefo kavaꞌma hu-mainesia kanomona nofila huteho.’ huno hu-maineane.” huno nehie.
JOH 7:52 Nehigeꞌya “Kagaya kagaiꞌenena Kaliliti kano mainapi? Anumaya Koti ke kae-malenaya kefina hapalika havilama huteka kagaiꞌenena havio Kaliliti nagola aune kano omegahie.” huno hu-maineane huꞌya nehae.
JOH 7:53 Nehageꞌya mukiꞌa veaꞌmoꞌya atagu-feꞌya ataleꞌya kumaꞌamilega ute ete hu-mainae.
JOH 8:1 Mukiꞌa veaꞌmoꞌya kumaꞌamilega ute ete hageno Yisasiꞌa Olivi yosa hanea agoꞌyafi hai-maine.
JOH 8:2 Kegeꞌafiti Yisasiꞌa he-tino ala mono nopi umainegeꞌya veaꞌmoꞌya melitalu hageno Yisasiꞌa mopale maineno mono kea hama-nepaiye.
JOH 8:3 Hama-nepaigeꞌya kahegi kema havilinaya anagaꞌene Falasia vayaꞌene nago ala alu vene moli nehigeꞌya ageteꞌya avaleꞌya alitalu hu-mainaya veaꞌmogami amaufi me he-ti-tenae.
JOH 8:4 Me he-ti-teteꞌya Yisasife mage huꞌya nehae “Hu-maveli kanomoga ma aꞌmoꞌa alu vene moli nehigeta ageteta avaleta neꞌone.
JOH 8:5 Moseseꞌma kahegi kema taminea kemoꞌa maꞌa hu-maine ‘Ani kavaꞌma hisia aꞌmona yafateti haetama he-vai-teho.’ huno hu-mainegi ‘Kagaya naꞌane huka nehane?’ huꞌya nehae.
JOH 8:6 Agaifema mani kema hayana aye-vataga huꞌya nagoꞌa havige hisigeta atafa huta kaiyeke hu-tegahune.” huꞌya hayanagi Yisasiꞌa ape huno mopafi maineno aginagoleti avo negae.
JOH 8:7 Avo negaegeꞌya anileꞌma he-tiꞌya maineꞌya mani kema havige havigema haya vayafe Yisasiꞌa he-tino mage hie “Tamakaipitiꞌma nago osi kefo yakaꞌa omalenesia kanomoga hagoteka yafana hagaꞌyu huka mani aꞌmo augafalela aiko-lio.” huno hie.
JOH 8:8 Mage huteno eteno ape huno mopafi avo negae.
JOH 8:9 Mani kema higeꞌya mukiꞌa atagu-feꞌya ute ete hageꞌya hagoteꞌya vayatamamoꞌya ataleꞌya vageꞌya haenaga mukiꞌamoꞌya ataleꞌya ute ete hageno Yisasiꞌa ape huno mainegeno ani aꞌmoꞌa aule he-tino maine.
JOH 8:10 Mainegeno Yisasiꞌa he-tino ani aꞌmofena mage huno hie “Ma aꞌmogae mani vayala hanatega vae? Nago kanomoꞌa kagaila kaiyekema hu-gatesia kanoa omainefio?” huno hie.
JOH 8:11 Higeno mani aꞌmoꞌa mage hie “Aꞌao, ala kanomogae, nago kanoa omaine.” huno higeno Yisasiꞌa mage hie “Nagaya nagaiꞌenena kaiyekea hu okategahugi afaꞌa ugananagi eteka nagoꞌene kefo yana ohuo.” huno nehie.
JOH 8:12 Haenagaꞌa Yisasiꞌa mono nopi alitalu hu-mainaya vayaꞌyagahe mage hu-maine “Nagaya ma mopafi veala aye hale-ma-tesua kano mainoe. Nagai nakaveꞌma malesaya veaꞌmogatama maige maige tamahaimula hanea hale yana alitetama haniki yapina ute ete ohugahae.” huno hie.
JOH 8:13 Higeꞌya Falasia vayaꞌmoꞌya Yisasifena mage huꞌya hae “Kagaya kagaikaꞌa kehe hu-falote nehananagi kekahena havita tametiti ohugahune.” huꞌya hae.
JOH 8:14 Hageno Yisasiꞌa mage huno hie “Tamage nagaya nagaiꞌniꞌahe kea nehuanagi hua kehena havitama tamameti hiho. Naꞌafene nagaya aepama heꞌnama emainoa kumaꞌene visua kaꞌene age-mainoanagitama tamakaya nagayama emainoa kumaꞌene visua kaꞌene oꞌagenae.
JOH 8:15 Tamakaya ma mopafi veaꞌmogamina no maiyateti fako nehayanagi nagaya nago kanomo no maiyana fako nohue.
JOH 8:16 Fako nohuanagi nagaya nago kanomoma fako hu neꞌa-tesugenofena kema hua kelela havitama tamameti hiho. Nagaya nagaiꞌnige fako nohuanagi hu-natenea Nenafaꞌa nagaiꞌene tole huno aliꞌyana neꞌalino fako nehie.
JOH 8:17 Tamakai mono kemoꞌa mage huno nehie ‘Tole kanolatamoganima keꞌanimoꞌma nagoke kateꞌma visiana keꞌanimoꞌa tamage hugaꞌe.’ hutama nehayane.
JOH 8:18 Nagaya nagaiꞌniꞌahena kea hu-falote huꞌna nehugeno nagaiꞌma hu-nategeꞌna emainoa Nenafaꞌa nagaifena aniꞌa huno hu-falote nehie.” huno nehie.
JOH 8:19 Higeꞌya haviteꞌya Falasia vayaꞌmoꞌya mage huꞌya havigae “Negafaꞌema hana kanoa hanate maine?” huꞌya havigageno Yisasiꞌa mage hie “Tamakaya nagaiꞌma onagenayana Nenafana aniꞌa hutama oꞌagenae. Nagaiꞌma nage-mainaleꞌasipa Nenafana aniꞌa hutama age-mainaleꞌasine.”
JOH 8:20 Yisasiꞌa mani kea ala mono nopina muse yama nemalaya kaiyaga maineno mani kea hu-mave-lianagi agayama falisia kanaꞌamoꞌa aupa ohunea yafe nago kanomoꞌa agaila atafa ohune.
JOH 8:21 Yisasiꞌa eteno nagoꞌene mage hu-maine “Nagaya ago visugetama nagaifena natiyegahayanagi tamakaitami kefo yatamia oꞌataletama hanesigetama faligahae. Nagayama visua katela tamakaya oꞌugahae.” huno hie.
JOH 8:22 Higeꞌya Yuta vayaꞌmoꞌya amakaiꞌamifina mage huꞌya hae “Nagayama visua katela tamakaya oꞌugahae hunoꞌma hia kemona aepaꞌa agaiꞌa augafa hae-faligahe nehifi?” huꞌya hae.
JOH 8:23 Hageno Yisasiꞌa mage huno hie “Tamakaya afetegati emainayanagi nagaya anafinagati emainoe. Tamakaya ma mopafiti emainayanagi nagaya ma mopafiti omenoe.
JOH 8:24 Naꞌafene nagaya tamakaila ago tamaha-pai-mainoe ‘Tamakaitami kefo yatamia oꞌatalesageno hanesigetama faligahae.’ huꞌna hu-mainoane. Tamakaifema nagaya ‘Maꞌa kano mainoe.’ huꞌna hu-mainoa kehe havitama tamakupi maletama tamametitima ohisayana kefo yatamia oꞌataletama hanesigetama faligahae.” huno hie.
JOH 8:25 Higeꞌya “Kagaya tagae?” huꞌya havigageno Yisasiꞌa mage hie “Nagaya laꞌnae huꞌna tamakaila hagoteꞌna tamaha-pai-mainoane.
JOH 8:26 Tamakaifema kasagoꞌya kema, hu-lamateꞌna fako hisua kea hane. Nagaiꞌma hu-na-tegeꞌnama emainoa kanomoꞌa tamage keꞌage kano mainegeꞌna agaitegati nagaya havimainoa ke ma mopafi veaꞌmogatamina tamaha-nepauve.” huno nehie.
JOH 8:27 Ani kea Nefafema nehigeꞌyagi amakaya haviꞌya aepaliꞌya ohavinae.
JOH 8:28 Ohavinaya yafe Yisasiꞌa mage hie “Tamakayama ikapinagati emainoa kanoa vayaꞌmo natenea kanomoꞌnina yafaga yosale alisagama hisaya kanafina tamakaya nagayama ‘Ani kano mainoe.’ huꞌna hu-mainoa yafe havilama hutama havigahae. Nagaya nagaiꞌni nagesafitila nago yana nohue. Aꞌao nagaila Nenafama hu-mainea keꞌage nehugetama nehavie.
JOH 8:29 Nagaiꞌma hu-natenegeꞌna emainoa Nenafaꞌa nagaiꞌene maineno mukiꞌa kanalela agayama museꞌma hia kavaꞌma huafenagino nagaila nonatale.” huno hie.
JOH 8:30 Higeꞌya kasagoꞌya veaꞌmoꞌya Yisasiꞌma hia ke haviteꞌya amakupi maleꞌya amametiti nehae.
JOH 8:31 Yisasiꞌa amakupima maleꞌya amametitima haya Yuta vayafena mage hie “Tamakaya nagai kema mukiꞌa kanafima akaveꞌma malesayana nagai ke havisaya anagaꞌniꞌa maigahae.
JOH 8:32 Nagayama tamagema hua kema havilama hutama havisagenoꞌa ani ke-lamagemoꞌa tamakaila kanama lamahaiya yamoꞌa nofi hu-lama-tenaya yana haꞌno hisigetama afa vea maigahae.” huno hie.
JOH 8:33 Higeꞌya kenonaꞌa mage hae “Tagaya Apalahamu nofi vaya mainona yafe nagoꞌa vayaꞌmoꞌya nofila hu-la-tageta miya oꞌali aliꞌyana oꞌalinone. Naꞌa higeka tagaifena nofila hu-lama-tagetama miya oꞌali aliꞌyapi mainaya vea ali haꞌno hisugetama afa vaya kana hutama maigahae huka nehane?” huꞌya hae.
JOH 8:34 Hageno Yisasiꞌa kenonaꞌamia mage hie “Tamage-lafa huꞌna tamaha-nepauve mukiꞌa veaꞌma kefo kavaꞌma taloma hisayana kefo yaꞌamimoꞌa nofi hu-ma-tegeꞌya miya oꞌali aliꞌya veaꞌne kana huꞌya mainae.
JOH 8:35 Nagi miya oꞌali aliꞌya veala nagoꞌa afamopina agola omaigahayanagi atenea nafaꞌneꞌamoꞌa agola ani afamopi maigahie.
JOH 8:36 Anumaya Koti Nafaꞌnemoꞌa kefo yatamimoꞌma tamatafa hu-mainea nofila alino lagama hu-taleana tamage huno ago alino laga hu-talegetama kanale hutama mainae.
JOH 8:37 Nagaya ago havimainoe tamakaya Apalahamu nofi vaya mainayanagi nagai kemoꞌa tamakupina omalenea yafe nagaila nahaegahena nehae.
JOH 8:38 Nagayama nehuana Nenafaꞌma nave-li-mainea yaꞌyagahe nehuanagi tamakaya tamakaitami nelamafa tamaha-pai-mainea kava nehae.” huno nehie.
JOH 8:39 Yisasiꞌa higeꞌya Yuta vayaꞌmoꞌya haviteꞌya mage hae “Nelafaꞌa Apalahamu maine.” huꞌya hageno Yisasiꞌa mage hie “Tamagema tamakaya Apalahamu nafaꞌneyagama mainaleꞌasina agayama nehia kavala talo haleꞌasine.
JOH 8:40 Talo haleꞌasinagi menia nagaya tamage kema Nenafategati havimainoa ke tamaha-pauva kanomonia naꞌa higetama nagaila nahaegahena nehae. Apalahamuꞌa naꞌa kavala ohunea yane.
JOH 8:41 Tamakaya nelamafa nehia kava nehae.” huno higeꞌya “Itatimoꞌa moli hu-liteno huno otateneane. Tagaila Anumaya Kotiꞌa agaiꞌage nagoke nelafa maine.” huꞌya hae.
JOH 8:42 Hageno Yisasiꞌa mage hie “Tamagema Anumaya Kotiꞌa nelamafaꞌma maineleꞌasina nagaya Anumaya Kotitegati emainoa yafe nagaifena tamahaileꞌasine. Nagaiꞌniꞌa nagesafitila omenogi Anumaya Kotiꞌa agaiꞌa hu-na-tegeꞌna emainoe.
JOH 8:43 Naꞌa higetama kema hua kea havilama hutama nohaviye? Mani kemona aepaꞌamoꞌa maꞌa hu-maine tamakaya havisaya tokiyatamia omaleanegitama nagai kea ohavigahae.
JOH 8:44 Tamakaila Sataniꞌa lama-tenea nelamafa agu agesa tokiyaꞌage hutama nelamafa akave nemalae. Aepama he-mainelegati vaya hamaeno fali-ma-tegeno omai kanoe. Ani kanomo agupina tamage kemoꞌa omalenegeno havigema hiana mukiꞌa kanale nehia kava nehie. Ani kanoa havigeꞌage kanoe. Mukiꞌa havigema hu yana Sataniꞌa agaiꞌafiti havigeꞌage kemona aepaꞌa maine.
JOH 8:45 Nagaya lamakaifena tamageꞌage ke nehua yafe havilama hutama tamakupi maletama tamametitia nohae.
JOH 8:46 Hana veaꞌmoga nageteka nagaifena ‘Kefo yakaꞌa hane.’ huka fako hu-nena-teka hu-falote hunategane? Aꞌao, aniꞌa ohugahae. Nagaya lamageꞌage kea huꞌna tamaha-nepauvanagi naꞌa higetama nagaifena tamakupina havi nomalae?
JOH 8:47 Nagoꞌa veala Anumaya Koti nafaꞌneyaga maineꞌya Anumaya Koti kea nehaviyanagi tamakaya Anumaya Koti nafaꞌneyaga omainaya yafe nagai kea nohaviye.”
JOH 8:48 Yuta vayaꞌmoꞌya kenonaꞌa Yisasifena mage huꞌya hae “Tagaya kagaifena tamage nehune ‘Samelia kano mainane. Kefo Avamuꞌmoꞌa kagupina tamage maine.’ huta nehune.” huꞌya hae.
JOH 8:49 Hageno Yisasiꞌa mage hie “Nagaipina Kefo Avamula omaine. Aꞌao nagaya Nenafa agi alisaga nehugetama lamakaya nagai nagia alitama afepinaga nemalae.
JOH 8:50 Nagaya nagia alisaga nohuanagi nagoke kanomoꞌa nagai nagia alisaga hisia kano maine. Ani kanoa, Anumaya Kotiꞌe, kaiyekea hu-ma-tesia kano maine.
JOH 8:51 Tamage-lafa huꞌna lamaha-pauve nagai kema akaveꞌma malesamoꞌya ofaligahae.” huno hie.
JOH 8:52 Higeꞌya Yuta vayaꞌmoꞌya mage hae “Ani kema hana yafena tagayama havunana kagaikaꞌa kagupi Kefo Avamula maine. Apalahamuꞌene nayona mainaya Anumaya Koti amaune vayaꞌmoꞌya fali-mainagi kagaya ‘Nagai ke akave malesamoꞌya ofaligahae.’ huka nehano?
JOH 8:53 Apalahamuꞌa taginagomona ‘Agase-mainoa kano mainoe.’ huka nehano? Apalahamuꞌa faligeꞌya Anumaya Koti aune vayala ago fali-mainae. Kagaya hanaꞌa augafa kano mainoe huka nehane?” huꞌya hae.
JOH 8:54 Hageno Yisasiꞌa mage hie “Nagaya nagima alisaga hisuana afa ya kana hugahianagi Nenafa tamakaya ‘Anumaya Kotitimo maine.’ hutama nehaya kanomoꞌa nagai nagia alisaga nehie.
JOH 8:55 Alisaga nehianagi tamakaya agaila oꞌagetafa hu-mainae. Nagaya agaila ago age-mainogi ‘Agaiꞌma oꞌagenoe.’ huleꞌasina tamakai kana huꞌna havigeꞌage kano mauleꞌasinagi nagaya ago agaila age-mainoanagiꞌna agai kea akave nemaloe.
JOH 8:56 Apalahamuꞌa tamakinagomoꞌe nagayama ma mopaleꞌma falote hisua kanahe agesia yafena musena hu-maineanagi agetenoꞌa tusiꞌa muse hu-maine.” huno hie.
JOH 8:57 Higeꞌya Yuta vayaꞌmoꞌya kenonaꞌa mage hae “Kagaya fifitiꞌa (50) kafua ohunanagi kagaya vayatama omainane. Apalahamuna age-mainano?” huꞌya hae.
JOH 8:58 Hageno Yisasiꞌa mage hie “Tamage-lafa huꞌna tamaha-nepauve Apalahamuna oꞌatenele nagaya hagoteꞌna monafinaga mainoane.” huno nehie.
JOH 8:59 Ani kema hia yafe yafa kaꞌyoteti aliꞌya aiko-ligahe nehageno Yisasiꞌa fala-kino amataleno ala mono no kategati hati-lavino umaine.
JOH 9:1 Yisasiꞌa katega neꞌuno nago kanoa atenea kanalegati aulaga asu humai kano moge-maine.
JOH 9:2 Mo neꞌagegeꞌya agaiꞌaenema tokaeꞌya nemaiya anagaꞌmoꞌya mage huꞌya havige-mainae “Hula-ve-nelina kanomoga ta hia kefo yamo alino aulaga asu hu-maine akaiꞌafi itaꞌafoꞌamoꞌa kefo ya haꞌa yamo aulagamoꞌa asu hu-mainefi?” huꞌya havigae.
JOH 9:3 Havigageno Yisasiꞌa mage hie “Mani kanomo itaꞌafoꞌamoꞌa akaiꞌaene kefo yama hia yamo alino aulaga asu ohunegi Anumaya Kotiꞌa tokiya yamaꞌa alino kanale hu-tesigeꞌya mukiꞌa veaꞌmoꞌya agesaya yafe aulagamoꞌa asu hu-maine.
JOH 9:4 Menima yagema hanesiamaꞌaene hu-natenea kanomo aliꞌyana alige alige huta maisune. Hanima kisiana nago kanomoꞌa aliꞌyana oꞌaligahie.
JOH 9:5 Menima ma mopaleꞌma mainoa-maꞌahena nagaya ma mopafina kaꞌni aye-halesua kano mainoe.” huno hu-maine.
JOH 9:6 Mani kea huno nehuno avetuꞌna mopafi heteno mopaene ayegakalifeno aulagama asu hu-mainea kanomo aulagale malegaꞌmaetene.
JOH 9:7 Malegaꞌmaeteteno mage huno hapaiye “Kagaya Siloamu ti kotute mo sese huo. Ani li kotumo agia tagai kefina ‘Hu-tene.’ huꞌya nehae. Ani li kotute kaugosa mo sese huteka eteka eno.” huno higeno mo seseꞌma hiana aulagamoꞌa kanale higeno neꞌageno nomaꞌalega emaine.
JOH 9:8 Nomaꞌalega egeꞌya agaiꞌa kumate vayaꞌene nayoma mani kanomoꞌa monehema aukaꞌya nehigeꞌya neꞌagaya veaꞌmoꞌyaene mage huꞌya hu-mainae “Ma kanoa nayoma felu maineno monehema aukaꞌya nehia kanofi alu kanoe?” huꞌya nehae.
JOH 9:9 Nehageꞌya nagoꞌa veaꞌmoꞌya “Ani kanoe.” nehageꞌya nagoꞌa veaꞌmoꞌya “Alu kanogi vuohe ani augafa kanomo nehigi.” huꞌya hageno agaiꞌa nehuno “Nagaya mani kano mainoe.” huno hu-maine.
JOH 9:10 Nehigeꞌya mukiꞌa veaꞌmoꞌya havige-mainae “Hanaꞌa hanageno kaulagamoꞌa kanale hu-maine?” huꞌya havigae.
JOH 9:11 Havigageno mage hie “Nago kanoa, Yisasiꞌe kanomoꞌa, hapa talo huteno alino naulagale maleteno ‘Siloamu ti kotutega kaugosa mo sese huo.’ huno higeꞌna naugosa mo sese huteꞌna agoana aupaꞌa naulaga age-mainoe.” huno nehie.
JOH 9:12 Higeꞌya veaꞌmoꞌya “Ani kanoa hanate maine?” huꞌya hageno “Nagaya oꞌagenoe.” huno hu-maine.
JOH 9:13 Aulagama asu hu-mainea kanomona Falasia vayatega avaleꞌya umainae.
JOH 9:14 Yisasiꞌa hapama ali gakalifeteno ani kanomo aulagama alino kanaleꞌma hu-teneana Sapati kanae.
JOH 9:15 Falasia vayaꞌmoꞌya nagoꞌene mage huꞌya havigae “Hanaꞌa hanageno kaulagamoꞌa kanale hu-maine?” huꞌya hageno “Hapa ali gaꞌmaeno naulagale malegeꞌna mo sese hugeno naulagamoꞌa kanale higeꞌna age-mainoe.” huno nehie.
JOH 9:16 Higeꞌya nagoꞌa Falasia vayaꞌmoꞌya mage hae “Ani kavaꞌma hia kanoa Sapati kanamona akave omalea yafe Anumaya Kotiꞌa ani kanoa hu-tegeno omene.” huꞌya nehageꞌya nagoꞌa vayaꞌmoꞌya mage hae “Kefo yamaꞌa hanesia kanomoꞌa ani tokiya avame yana talo ohileꞌasine.” huꞌya nehageꞌya huteꞌya tolefi ali fako hu-mainae.
JOH 9:17 Naꞌa huteꞌya aulagama asu hu-mainea kanoa eteꞌya havige-mainae “Ani kanoma kaulagama alino lamama hu-gatea kanohena naꞌane hu-mainane?” huꞌya hageno mage hie “Anumaya Koti aune kanoe.” nehie.
JOH 9:18 Higeꞌya Yuta vayaꞌmoꞌya “Mani kanoa aulagamoꞌa asu hu-maineanagi menia aulaga ago agegali hu-maine.” huꞌyama haya kehena “Havige nehae.” huꞌya haviꞌya amakupina maleꞌya amametitia ohuꞌya aulagama asu hu-mainea kanomona itaꞌafoꞌamoganifeꞌene ke hageꞌya emainaꞌe.
JOH 9:19 Aꞌageꞌya itaꞌafoꞌamoganife mage huꞌya hana-vigae “Mani kanoa atenaꞌa kanafi aulagamoꞌa asu hu-mainea nafaꞌnetani maineano? Naꞌa higeno menia aulaga neꞌage?” huꞌya hana-vigae.
JOH 9:20 Hanavi-gageꞌana itaꞌafoꞌamogania mage haꞌe “Taꞌagai nafaꞌne maineanagitaꞌa taꞌagaya ago age-mainoꞌe. Aulagama asu hu-mainea nafaꞌnema atenoꞌamaꞌa ago age-mainoꞌanagi aulagama age-maineamaꞌa oꞌagenoꞌe. Tapiga aulaga alino kali hu-teneafe tamakaya agai havigeho. Alopa ve maineanagino agaiꞌa tamaha-paigahie.” huꞌana nehaꞌe.
JOH 9:22 Itaꞌafoꞌamogania Yuta vayafe koli huꞌana mani kea hu-mainaꞌe. Yuta vayaꞌmoꞌya kea hu-lokiya vaiꞌya mage hu-mainae “Nagoꞌa veaꞌmoꞌya ‘Yisasina Anumaya Kotiꞌa taugafa ali-gatigahema hu-tenea kanoa ma maine.’ huꞌya hisaya veaꞌmogamina agola mono nopitila amati-talegahune.” huꞌya hu-mainaya kehe koli nehuꞌana “Agaya alopa ve mainegi agai havigeho.” huꞌana hu-mainaꞌe.
JOH 9:24 Nagoꞌene eteꞌya aulagama asu hu-mainea kanohe ke hageno egeꞌya mage hu-mainae “Kagaya Anumaya Koti aufi tamage-lafa huka kea huo. Tagaya agonana ani kanoa kefo kavaꞌage nehia kanoe.” huꞌya hae.
JOH 9:25 Hageno kenonaꞌamia mage huno hie “Nagaya oꞌagenogi agaya kefo kava nehia nepi nohia nepi oꞌagenogi nagokeꞌya kanoꞌama agoana hagotenoꞌa naulagamoꞌa asu humaineanagi menia naulaga agegali nehue.” huno hie.
JOH 9:26 Higeꞌya mage huꞌya havigae “Naꞌa hu-ga-tene? Hanaꞌa huno kaulaga alino kali hu-ga-tene?” huꞌya havige-mainae.
JOH 9:27 Havigageno “Nagaya agoꞌma tamaha-nepauvana tamakaya keꞌniꞌa nohaviye. Naꞌa higetama etetama nahavi-negae? Tamakaiꞌenena agaiꞌaene tokaeꞌya nemaiya anagaꞌmogamipi maigahe nehao?” huno havige-maine.
JOH 9:28 Higeꞌya amakaya huꞌya akaya ateꞌya mage hae “Kagaikage Yisasienema tokaeka nemaina kanoa mainanagi tagaya Mosese kema nehavuna vayala anale haita mainone.
JOH 9:29 Tagaya ago havimainone Anumaya Kotiꞌa Mosesena kea hapai-maineanagi ma kanomoꞌa hanategati emainenoꞌe tagaya agaila noꞌagonane.” huꞌya hae.
JOH 9:30 Hageno aulagama asu hu-mainea kanomoꞌa mage hie “Avo namaꞌyo neꞌaiye. Tamakaya alu kegefa nehae. Tamakaya hanategatipiga emainea ke ohavinayanagi naulagama alino kali hu-na-tenea kano afa kanoa omaine. Anumaya Kotitegati emaine.
JOH 9:31 Tagaya ago havimainone Anumaya Kotiꞌa kefo kava nehaya veaꞌmogami kea nohavie. Nagoꞌa veaꞌmoꞌya Anumaya Koti agi alisaga nehuꞌya agaiꞌma haiya kavaꞌma hisaya veaꞌmogami kea Anumaya Kotiꞌa havigahie.
JOH 9:32 Eheꞌma fusa kanafima ma mopama taloma hu-malenelegatiꞌma emaineana nago atenea kanalegati aulaga asu hu-mainea kanoa alino kali hu-tene huꞌya haya kea ohavinonane.
JOH 9:33 Anumaya Kotiꞌma mani kanoma hu-tegenoꞌma omeneleꞌasina nago yana agaya ohisine.” huno hie.
JOH 9:34 Higeꞌya kenonaꞌa mage hu-mainae “Kagaya kefo yapiti falote huka emainananagika tagaila menia hu-lave-ligahe nehano?” huꞌya nehuꞌya mono nopitila avaleꞌya kumatega hagaꞌyu hu-talenae.
JOH 9:35 Yisasiꞌa mono nopitiꞌma anati-talaya kea haviteno ani kanoa atiyeno mogeteno mage hie “Kagaya ikapinagati emainea kanoa vayaꞌmo atenea kanomofena havika kagupi maleka kametitia nehano?” huno havige.
JOH 9:36 Havigegeno ani kanomoꞌa mage hie “Ani kanoa taꞌe? huka nehapi? Nagaila naha-paigeꞌna haviꞌna nagupi maleꞌna nametiti hano.” huno hie.
JOH 9:37 Higeno Yisasiꞌa kenonaꞌa mage hie “Kagaya agaila ago neꞌagane. Ani kanoa menima kagaiꞌenema maineno kea kea nehaꞌane.” huno hie.
JOH 9:38 Higeno ani kanomoꞌa mage huno hie “Ayeꞌnio Alamogae menia kagaifena haviꞌna nagupi maleꞌna nametiti nehue.” huno muse nehuno aiyafi aleꞌya aye-maineno Yisasi aiyale ali-soso nehuno agi alisaga nehie.
JOH 9:39 Yisasiꞌa mage hie “Nagaya ma mopale veaꞌmogami fako hu-ma-tesua yafe emainoe. Ali fako hisugeꞌya amaulaga asu humai veaꞌmoꞌya amaulaga agesageno amaulagama hanea veaꞌmoꞌya amaulagama asu hugahie.” huno hie.
JOH 9:40 Higeꞌya nagoꞌa avate maiya Falasia vayaꞌmoꞌya anima hia kea nehaviꞌya agaifena mage huꞌya havigae “Tagaifena tamaulaga asu hu-maine huka nehano?” huꞌya havigae.
JOH 9:41 Havigageno Yisasiꞌa mage huno hie “Tamaulagamoꞌa asuma hu-mainesina kefo yatamia omalesinagi tamakaya ‘Taulagamoꞌa kali kali hu-maine.’ hutama haya yafe kefo yatamimoꞌa hane.” huno hu-maine.
JOH 10:1 Yisasiꞌa mage huno hie “Nagaya tamage-lafa huꞌna tamaha-nepauve nagoꞌa vayaꞌmoꞌya sipi sipi kegiꞌyamo fiatetiꞌma hai ofaleꞌya afalegatiꞌma asaga hu-maiꞌya hai falesaya vayala musufa vaya mainae.
JOH 10:2 Nago kanomoꞌma fiatetiꞌma hai nefalea kanoa sipi sipileꞌma kava neꞌyagaiya kano maine.
JOH 10:3 Fiateꞌma yagai-mainea kanomoꞌa ani kanoa ageteno yaki-tegeno fiateti hai falegeꞌya sipi sipiyagamoꞌya alenaga agea havimainaya yafe agaiꞌa sipi sipimogamina amakia hanete hanete hu-maineanagino amakia ayete ayete huno amavaleno kumatega neꞌvie.
JOH 10:4 Amavalenoꞌma kumatega neꞌunofena uhagoteno neꞌvigeꞌya ani kanomona alenaga agema havimainaleti lagiꞌya ani sipi sipimoꞌya akave neꞌvae.
JOH 10:5 Nagi oꞌagenaya vayaꞌmogami amakavela oꞌugahae. Nagi ani kanomona alenaga agema ohavinaya yafe faleꞌya alulega ugahae.” huno hie.
JOH 10:6 Yisasiꞌa mani avame kea hama-paiyanagi amakaya havilama huꞌya ohavinae.
JOH 10:7 Ohaviyanagi Yisasiꞌa nagoꞌene eteno mage hu-maine “Tamage-lafa huꞌna tamaha-nepauve nagaya sipi sipimoꞌyama hai falesaya fiana nagaiꞌnige mainoe.
JOH 10:8 Mainoanagi hagoteꞌyama emainaya vayala vayaꞌma nehamaeꞌya musufa yama nehaya vayalagiꞌya sipi sipiyagamoꞌya kema haya kea ohavinae.
JOH 10:9 Ma nagaya fia mainoe. Mainoanagitama nagoꞌa veaꞌmogatama etama nagaipi ehai falesageꞌna tamaku tamamena ali-gatisugetama hai faletama mainetama elavitetama haitetama nehutama nesaya yana aligahae.
JOH 10:10 Musufa kanomoꞌa musufa yana nehuno veala nehamaeno ali haviya hu-ma-tegahe neꞌeanagi nagaya kanaleꞌnale tamahaimu tamamigahe emainoe. Agola haꞌno ohu tamahaimula tamamigahe emainoe.
JOH 10:11 Nagaya kanaleꞌnale sipi sipi kava kano maineꞌna sipi sipiꞌniꞌamogamina amaku amamemaꞌa ali-gatisua yafe faligahue.
JOH 10:12 Nago kanomoꞌa yagaiteno mone neꞌalia kanoa sipi sipimona nefaꞌa omaine. Omaigeno afela kalamoꞌma egenoꞌa ani kanomoꞌa ataleno falegeno ani afela kalamoꞌa sipi sipimogamina akafu amanino mo hamae me hamae higeꞌya faleꞌya atagufeꞌya alulega ute ete nehae.
JOH 10:13 Ani sipi sipileꞌma yagaino maineno monema neꞌalia kanomoꞌa sipi sipiyagahena agesa ohavino amataleno faleno umaine.
JOH 10:14 Nagaya kanale sipi sipi kava kano mainoe. Nenafaꞌa aguꞌa namigeꞌna nagaya naguꞌa amugetaꞌa nehuꞌe. Naꞌa hu-mainoꞌa kava huꞌna sipi sipiyagaꞌnimoꞌya amakuꞌa namigeꞌna nagaya naguꞌa neꞌamamue. Nagaya sipi sipiꞌniꞌamogami amaku amamemaꞌa ali-gatisua yafe faligahue.
JOH 10:16 Nagoꞌa sipi sipiyagaꞌniꞌa amahaote mainae. Mani sipi sipi kegiꞌyaꞌnifina omainayanagi ani afuyaga amavaleꞌnama esuana alenaga nage nehaviꞌya nagokeꞌage afuyakama maisayana nagokeꞌmoꞌna ani sipi sipiyagalela kava kano maigahue.
JOH 10:17 Nagaya ‘Afaꞌa faligahue.’ huꞌna hua kehena Nenafaꞌa tusiya huno hau ayamopafi nehaiye. Naꞌafene? Nahaimula atalesugeno eteno namisigeꞌna he-tisuaꞌyafe nahaimula afaꞌa atalegahue.
JOH 10:18 Nagoꞌa vayamoꞌya nahaimula naha-ofalegahae. Nagaya nagaiꞌniꞌage nahaimula atalegahue. Nahaimuꞌma atalesua tokiyaꞌniꞌaene ataleteꞌna eteꞌna alisua tokiyaꞌniꞌaene hane. Aniꞌama hisua kavaꞌmo kea Nenafaꞌa ago naha-pai-maine.” huno hie.
JOH 10:19 Mani kema hia kea Yuta vayaꞌmoꞌya haviteꞌya tolefi ali fako hu-mainae.
JOH 10:20 Kasagoꞌyamoꞌya mage hae “Kefo Avamuꞌmo agupi hai-mainegeno aifoꞌnafo nehigi naꞌa higetama keꞌa maitama havimainae?” huꞌya hae.
JOH 10:21 Hageꞌya nagoꞌamoꞌya mage hae “Kefo Avamuꞌmoꞌa agupima maineleꞌasina maniꞌa augafa kea ohileꞌasine. Kefo Avamuꞌmoꞌa aulagama asu hu-mainea kanomo aulaga aligali hu-oꞌateleꞌasine.” huꞌya hae.
JOH 10:22 Nayona mono no kimaleteꞌya fita yaki-mainaya kanahe muse nehaya imu Yelusalemu ki-mainae. Ani imua yasi neꞌalia kanale negiyanagino ani kanalela Yisasiꞌa Anumaya Koti nopi umaineno Solomoni yasi neꞌalea nona aye-nagali-malenea kaiyaga neꞌvie.
JOH 10:24 Mukiꞌa Yuta veaꞌmoꞌya meliꞌya amuꞌno huteꞌya maineꞌya mage hae “Tagu tagesamoꞌa tole-lole nehuno taipamoꞌa kanaꞌage nehigi. Menia hu-falote huka taha-paiyo kagaya Anumaya Koti hu-ga-tegeka emainana kano mainano?” huꞌya hae.
JOH 10:25 Havigageno Yisasiꞌa mage huno hie “Nagaya agoꞌma tamaha-pai-mainogi nagaifena havitama tamakupi maletama tamametiti nohae. Nenafa naminea tokiya yateti aliꞌyana alugetama agayana ani yana nagaya Anumaya Koti hu-na-tegeꞌna emainoa kano mainoa yafe tama-ve-lianagi nagai sipi sipima omaiya yafe havitama tamakupina nomalae.
JOH 10:27 Nomalayanagi nagai sipi sipiyagamoꞌya nagaila alenaga mage haviteꞌya nakave malageꞌna nagaya amakaila ago amake-mainoe.
JOH 10:28 Amaketeꞌna maige maige hisaya hamaimula ago amaminoanagiꞌya ofaligahae. Nagaila ago nayapi mainayanagino nago kanomoꞌa memavayu ohugahie.
JOH 10:29 Nenafaꞌa ani sipi sipiyaga naminea kanogino mukiꞌa yana amakase-mainea kano mainea yafe alu kanomoꞌa Nenafa ayapitila haofalegahie.
JOH 10:30 Nenafaꞌene nagaiꞌniene nagoke mainoꞌe.” huno hie.
JOH 10:31 Higeꞌya Yuta vayaꞌmoꞌya nagoꞌene yafa kaꞌyo aliꞌya haesaya kava nehae.
JOH 10:32 Nehageno Yisasiꞌa mage huno hama-paiye “Nagaya mukiꞌa Nenafa naminea tokiya avame yana tamakai tamaulagafina ago hu-mainogi nagoke avameꞌyana hana avameꞌya hua yamo notamahaigetama nagaila yafatetila nahaegahena nehae?” huno hama-vige.
JOH 10:33 Hama-vi-gegeꞌya “Tokiya avame yama hu-mainana yafene huta yafatetila okahaegahunagi kagaya ma mopafi afa kano mainekagi ‘Anumaya Kotiꞌene nagoke mainoꞌe.’ hukama hanana Anumaya Kotina kalana ategana kema hana yateti kagaila yafa kaꞌyotetila kahaegahena nehune.” huꞌya hae.
JOH 10:34 Hageno Yisasiꞌa mage hie tamakaitami mono kema kae-malenaya kemoꞌa mage hu-maineane “Anumaya Kotiꞌa mage hie ‘Tamakaitami Anumaya Kotigatama mainae.’ huno hie.” huꞌya kae-malenayane.
JOH 10:35 Ani Anumaya Koti kea kae-malenaya ke hanege hanege huno tamageꞌage hugahie. Anumaya Koti kema agoꞌma hama-paiya vayafena “Anumaya Kotigatama mainae.” huno hu-maineana nagaya Nenafafena “Nenahaiya kano mainane huno hu-na-tegeꞌna ma mopafina emainoema.” huꞌna nehuana naꞌa higetama “Nagaya Anumaya Kotina neꞌamoꞌnae.” huꞌnama hua kehena “Anumaya Kotina hu-haviya hu-neꞌatane.” hutama hu-nena-tae?
JOH 10:37 “Nagaya Nenafa aliꞌyama oꞌaluleꞌasina nagaifena havitama tamakupi maletama tamametiti ohaleꞌasinagi kanale kava haleꞌasine. Nagaya kema hu-mainoa kehema havitama tamakupima omalenutamahena aliꞌyama ali-mainoa aliꞌyafena havitama tamakupi maletama tamametiti hiho. Naꞌa hisayana Nenafaꞌa nagaiꞌene maigeꞌna nagaya aniꞌa huꞌna agaiꞌene mainoꞌema huꞌna hua kea havilama hutama havigahae.” huno nehie.
JOH 10:39 Higeꞌya nagoꞌene atafa huꞌya nofi hu-tegahe hayanagi amakaseno ago umaine.
JOH 10:40 Uteno Yisasiꞌa eteno Yotani lina mo lakaeno Yoniꞌma lima fale-ma-tenea kumate mo maine.
JOH 10:41 Mo mainegeꞌya mukiꞌa veaꞌmoꞌya melitalu huꞌya maineꞌya mage hae “Yoniꞌa keꞌama alino lokiya vaisia yana nagola malegeta oꞌagenonagi ma kanomofena mukiꞌa kema hu-mainea kemoꞌa tamage-lafa hu-maine.” huꞌya hae.
JOH 10:42 Mukiꞌa ani kumate veaꞌmoꞌya Yisasifena haviꞌya amakupi maleꞌya amametiti hu-mainae.
JOH 11:1 Nago kanomo agia Lasalusiꞌe kali ali-maine. Ani kanoa Petani kumate kanoe. Mataꞌene aganaꞌamoꞌa Maliagani kumale.
JOH 11:2 Ani Maliaꞌa nago yupa manaꞌage masavena Yisasina aiyale takino fale-teneno ayolagefaleti ali hau hu-teneane. Ani munaꞌmona asaꞌamoꞌa Lasalusi kali ali-maine.
JOH 11:3 Kali alino mainegeꞌana ani tole nanukana-latamogania Yisasitega nago kano hu-taꞌageno mage mo hie “Alatimogae kagaikama kahau kayamopafima negahaiya kanoa kali neꞌalie.” huno hapaiye.
JOH 11:4 Hapaigeno Yisasiꞌa ani kema nehavinoꞌa mage hie “Lasalusiꞌa kali alino fae-maineanagi falisia yafe oꞌalinegi mani kalimoꞌa Anumaya Koti agi alisaga hisayafene huno ali-maine. Ani kalia Anumaya Koti nafaꞌnemo agi alisaga hisaya yafe falote hu-maine.” huno hie.
JOH 11:5 Yisasiꞌa Mataꞌene aganaꞌamoꞌene Lasalusiꞌene ani anagafena tusiya huno hau ayamopafi nehaiya anagale.
JOH 11:6 Yisasiꞌa Lasalusiꞌma kalima alia kea havianagi oꞌuno tole yupa afaꞌa nemaiya kumate maiteno agaiꞌaenema tokaeꞌya nemaiya anagaꞌahe mage huno hama-paiye “Yutia kotega eteta visune.” huno hu-maine.
JOH 11:8 Higeꞌya agaiꞌaenema tokaeꞌya nemaiya anagaꞌmoꞌya mage hae “Hu-lave-nelina kanomoga menia Yuta vayaꞌmoꞌya yafateti aliꞌya kahaegahema haya kotega kagaya ani kotega nagoꞌene ugahe nehano?” huꞌya havinegae.
JOH 11:9 Havigageno Yisasiꞌa mopafi mainea kanaꞌamoꞌa haꞌno ohunea yafe kenonaꞌamia avame kea mage huno hie “Tuelufuꞌa (12) auva nagoke yagefina omalenefi? Veaꞌmoꞌyama yagefima vai-yesayana ma mopafi yagemoꞌa ai vasa humainea yafe asaga hu otavigahayanagi veaꞌmoꞌya kegeꞌma vaiyatete hisayana aye-vasa hu yamaꞌa amakupina omaleanagino vailino hamaegahie.”
JOH 11:11 Yisasiꞌa mani kea huteno nago kea mage huno hu-maine “Tagaila kanapatia Lasalusiꞌa faeno maineanagiꞌna nagaya visuaꞌamoꞌna mogafa huꞌna avale he-ti-tegahue.” huno hama-paiye.
JOH 11:12 Higeꞌya agaiꞌaenema tokaeꞌya nemaiya anagaꞌmoꞌya mage hae “Alatimogae agayama kalima alino fae-mainesiana afaꞌa kanale hu-tegahie.” huꞌya hu-mainae.
JOH 11:13 Hageno Yisasiꞌa mani avame kema hiana Lasalusiꞌa ago fali-maine huno nehianagi agaiꞌaenema tokaeꞌya nemaiya anagaꞌmoꞌya ohavinaya yafe “Afaꞌa faeno mainegeno nehie.” huꞌya hu-mainae.
JOH 11:14 Hageno Yisasiꞌa ani avame kea neꞌataleno hu-falote huno hama-paiye “Lasalusiꞌa ago fali-maine.
JOH 11:15 Tamakaya nagaifena havilama hutama ‘Tamage nehie.’ hutama tamakupi maletama tamametiti hisaya yafe omainogeno fali-maineanagiꞌna nagaya muse nehugi menia aligeta mogamano.” huno hie.
JOH 11:16 Higeno Tomasina, nago agia Titimasiꞌe, tagai kefina kuyave nafaꞌne, Yisasienema tokaeꞌya nemaiya anagafe mage hie “Mukiꞌamogata vigetao. Nagopi neꞌvisunageꞌya tahaesageta faligahune.” huno hie.
JOH 11:17 Lasalusina foꞌa (4) yupa komufi he-vai-tenageno Yisasiꞌa uvaꞌyi higeꞌya he-vai-tenaya kanahe hapaimainae.
JOH 11:18 Petaniti Yelusalemua tagufa (3) kilomita aupate hanea yafe mukiꞌa Yuta veaꞌmoꞌya Yelusalemutila etele huꞌya Matagani Maliaganina anasaꞌanimoꞌma fali-mainea yafe hamau hu-nateꞌya emainae.
JOH 11:20 Emainageno Mataꞌa Yisasife “Neꞌe.” huꞌya haya kea haviteno katega viaꞌyamo mo fotu hu-mainegi Maliaꞌa nomaꞌafi maine.
JOH 11:21 Mainegeno Mataꞌa Yisasife mage hie “Alanimoga kagayama maleꞌma mainateꞌasina nasaꞌnimoꞌa ofalileꞌasine.
JOH 11:22 Ago havimainoe menia kagayama Anumaya Kotitega nago yafema havigesanana afaꞌa kamigahie.” huno hie.
JOH 11:23 Higeno Yisasiꞌa mage huno hapaiye “Kasakamoꞌa fali-maineanagi eteno haimula alino he-tigahie.” huno hie.
JOH 11:24 Higeno ani munaꞌmoꞌa mage hie “E, nagaya ago havimainoe ma mopama haꞌnoma hisia kanafina mukiꞌa fali-mainaya veaꞌma he-tisaya kanafina eteno he-tino haimula aligahie.” huno hie.
JOH 11:25 Higeno Yisasiꞌa kenonaꞌa mage hie “Nagaya fali-mainaya veala amavale he-tiꞌna hamaimula amamisua kano mainoe. Nagaya maige maige hisaya hamaimu amami yamona aepaꞌa mainoe. Nagoꞌa veaꞌmoꞌya nagaife haviꞌya amakupi maleꞌya amametiti hisayana faliteꞌya hetiꞌya agola maige maige hisaya hamaimula aligahae.
JOH 11:26 Nagoꞌa veaꞌmoꞌya afaꞌa maineꞌya nagaifena haviꞌya amakupi maleꞌya amametiti hu-mainaya veala maige maige hugahayanagiꞌya ofaligahae. Kagaya mani kea ago havilama huka kagupi maleka kametiti nehapi nohane?” huno havige.
JOH 11:27 Havigegeno ani munaꞌmoꞌa mage hie “E, Alanimoga nagaya nehaviꞌna ago nagupi maleꞌna nametiti hu-mainoe. Tamage nehae kagaya Kalaisigae* Anumaya Kotiꞌa hu-ga-tegeka taugafa ali-gatigahe ma mopafi elavisana kano emainane. Anumaya Koti nafaꞌne mainane.” huno hie.
JOH 11:28 Mataꞌa mani kea huteno eteno viaꞌyamo aganaꞌamona Maliana sumi sumi huno mage huno hapaiye “Hu-mave-nelia kanoa ago emaineno kagaife ke nehie.” huno hapaiye.
JOH 11:29 Hapaigeno Maliaꞌa ani kea haviteno aupaꞌa he-tino Yisasi mogegahe umaine.
JOH 11:30 Neꞌvigeno Yisasiꞌa kumatela omenegi Mataꞌene fotuma huꞌana kea keama haꞌalega maine.
JOH 11:31 Mainegeꞌya Yuta veaꞌmoꞌya Maliaꞌene nopi maineꞌya hanauma hu-nateꞌyama emainaya veaꞌmoꞌya Maliaꞌa aupaꞌa he-tino kumatega via yafe agayana higeꞌya “Vae Maliaꞌa asaꞌamo komulega avitegahe neꞌvie.” huꞌya akave umainae.
JOH 11:32 Akave vageno Maliaꞌa Yisasi mainelega mogeteno aiyafi mope hu-maineno mage hie “Alanimogae kagayama maleꞌma mainateꞌasina nasaꞌnimoꞌa ofalileꞌasine.” huno hapaiye.
JOH 11:33 Hapaiteno avi neꞌategeno agaiꞌenema emainaya Yuta veaꞌmoꞌya aniꞌa huꞌya neꞌatageno Yisasiꞌa Maliana neꞌagegeno aipamoꞌa tusiya huno haviya hu-maine.
JOH 11:34 Aipamoꞌa haviya hu-mainefiti hama-vigeno mage hie “Hanate he-vai-tenae?” huno higeꞌya “Alatimoga eka mego.” huꞌya hae.
JOH 11:35 Nehageno Yisasiꞌa avi-te-maine.
JOH 11:36 Neꞌategeꞌya Yuta veaꞌmoꞌya mage hae “Ageho Lasalusifena tusiya huno hau ayamopafi nehaiye.” huꞌya hae.
JOH 11:37 Hageꞌya nagoꞌa veaꞌmoꞌya mage hae “Ma kanoa amaulagama asu hu-mainea veaꞌma aligali hu-neꞌamatea kanogi naꞌa higeno Lasalusina kaliꞌa alino kanale hu-tegeno ofalino afaꞌa maiyanagi fali-maine.” huꞌya hae.
JOH 11:38 Yisasina aipamoꞌa nagoꞌene haviya higeno he-vai-tenaya komulega umaine. Ani komua yafa kapi he-vai-teteꞌya komumo avayalela ala yafateti aliꞌya ai-lile-malenae.
JOH 11:39 Ai-lile-malenageno Yisasiꞌa mogeteno mage hie “Mani komumo avayaleti yafana ali-taleho.” huno higeno fali-mainea kanomo asaꞌamoꞌa, Mataꞌa, mage huno hie “Alaniꞌamogae mani kanoa ago he-vai-tageno foꞌa (4) yupa komufinaga haneanagino tusiꞌa hiꞌmana hugahie.” huno hie.
JOH 11:40 Higeno Yisasiꞌa mage hie “Nagaya ago kaha-pai-mainofi? ‘Kagayama nagaifema tamage nehane huka kagupi maleka kametitima hisanana Anumaya Koti agi alisaga hisaya tokiya yana agegane huꞌna kaha-pai-mainofi?’ huno havinege.”
JOH 11:41 Ani yafana ali-taletageno Yisasiꞌa anafinaga agesaga huno age-maineno mage hie “Nenafaga nunamuniꞌa ago havimainana yafe musekaꞌa nehue.
JOH 11:42 Havimainanagiꞌna nagaya mukiꞌa kanalema kahavi-goa kea nehavinagi afaꞌa menia manileꞌma mainaya veaꞌmoꞌya kagayama hu-na-tanageꞌna emainoa yafema ‘Tamage nehane.’ huꞌya amakupi maleꞌya ametiti hisaya yafe kahavi-negoe.” huno hie.
JOH 11:43 Mani kea huteno ala kegefafiti mage hie “Lasalusiga he-tika elavio.” huno hie.
JOH 11:44 Higeno Lasalusiꞌa, fali-mainea kanoa, eteno he-tino elavigeꞌya aiyafima ayapima augosafima kenaletiꞌma aye-gasagi-malea kanoa elavigeno Yisasiꞌa mage huno hama-paiye “Kalu hetama atalegeno vino.” huno hama-paiye.
JOH 11:45 Mukiꞌa Maliaꞌenema emainaya Yuta veaꞌmoꞌya Yisasiꞌma hia kavala ageteꞌya amakupi maleꞌya amametiti hu-mainae.
JOH 11:46 Amakuꞌa amiyanagi nagoꞌa vayaꞌmoꞌya ataleꞌya Falasia vaya mainalega uꞌya Yisasiꞌma hia kavafena mo hama-pai-mainae.
JOH 11:47 Hama-paigeꞌya Falasia vayaꞌene ala mono note kava vayaꞌene Kanisole vayafe ke hageꞌya ageꞌya mage huꞌya hae “Ma kanoa kasagoꞌya tokiya avame yaꞌyaga nehigi naꞌa hisune?
JOH 11:48 Afaꞌama atalesunagenoꞌa mukiꞌa kanalela aniꞌageꞌyama hisigeꞌya mukiꞌa veaꞌmoꞌya ‘Tamage nehie.’ nehuꞌya haviꞌya amakupi maleꞌya amametiti hisageꞌya kava vayatia, Lomu vayaꞌmoꞌya eꞌya mukiꞌa veaꞌnene ala mono notiene ali haviya hugahae.” huꞌya hae.
JOH 11:49 Hageno Kaiyafasiꞌa ani kafufina ala mono note hagote kava kano maineanagino ani vayapiti he-tino mage hie “Tamakaya tamaku tamakesa nomale.
JOH 11:50 Tamakaya ohavinafi na ya kanale tamaya hisia yana hane? Mukiꞌa veati ali haviya hisafi nagoꞌke kanomoꞌa mukiꞌa veaꞌamogami anonaꞌa falisie?” huno hama-vige.
JOH 11:51 Ani kafufina Kaiyafasiꞌa ala mono note hagote kava kanogino mani kea Anumaya Kotiꞌa hapaigeno aune laga huno hu-maine. Agaiꞌa agesafiti ohune. Ani aunema laga hia aepaꞌamoꞌa mage hu-maine “Yisasiꞌa Yuta veaꞌmogamife huno faligahie.
JOH 11:52 Amakaiꞌamigetefena huno ofaligahigi alu kumate kumate mainaya Anumaya Koti nafaꞌneyaga amavaleno nagoke anaga hu-ma-tesigeꞌya maisaya yafe Yisasiꞌa faligahie.”
JOH 11:53 Ani kanaleti aepa heꞌya Yuta vayaꞌmogami kava vayaꞌmoꞌya Yisasina haesaya kea huꞌya haviteꞌya huge havige hu-mainae.
JOH 11:54 Ani yafe Yisasiꞌa nagoꞌene Yuta veaꞌmogami amaulagafina vai oꞌayenegi nago kumala Efalaimie huꞌya nehaya kumala vaya omai kola aupa hu-mainegeꞌya agaiꞌaenema tokaeꞌya nemaiya anagaꞌene anilega uꞌya mo mainae.
JOH 11:55 Yuta veaꞌmoꞌya kafuꞌahe kafuꞌahena Anumaya Kotiꞌma amakinagomogami amaugafama ali-gati-mainea yafe haviꞌya alitalu huꞌya imu negiyane. Ani imuma kisaya kanamoꞌa aupa higeꞌya mukiꞌa veaꞌmoꞌya mukiꞌa kumateti haiꞌya kahegi kemo hama-paiya kava huꞌya amaugafaene amakuꞌaene sese hugahe Yelusalemu umainae. Ago mo sese huteꞌya ani imuꞌamia nenae.
JOH 11:56 Ala mono nopi molitalu huꞌya maineꞌya Yisasife moge mege huꞌya ati-yegetayana higeꞌya amakaiꞌamifi mo hama-vige me hamavige huꞌya mage hae “Naꞌane tamakesa nehaviye? Kaveꞌma nesutela egahifi omegahie?” huꞌya hae.
JOH 11:57 Hageꞌya ala mono note kava vayaꞌene Falasia vayaꞌene Yisasina atafa hugahe mage hu-mainae “Maꞌa hiho. Yisasiꞌma faesia kumaꞌma agenutamahena aupaꞌa ani kea alitama me laha-paiho.” huꞌya hu-mainae.
JOH 12:1 Yisasiꞌa Petani kumate, Lasalusiꞌa faligeꞌya he-vai-tenageno Yisasiꞌa molino he-ti-tenea kanomo kumate, uvaꞌyi hu-maine. Uvaꞌyi hiana ani kanafina Anumaya Kotiꞌma amakinagomogami amaugafama ali-gati-mainea yafe amakesa haviꞌya imuma kisaya kana sikisiꞌa (6) yupa maiteꞌya kigahe nehae.
JOH 12:2 Hageno Yisasina musekase kave talo tala hu-teteno Mataꞌa alino amamite amamite nehigeno Lasalusiꞌa Yisasiꞌene siale mainae.
JOH 12:3 Mainageno Maliaꞌa nago kilo* manaꞌage masave hanea keꞌayola, tusiꞌa mone hanea masavemo agia natie nehaya masavena alino Yisasina aiyale taki haꞌno hu-teteno ayolagefaleti ali hau hu-neꞌa-tegeno ani masavemo manamoꞌa ani nopi haino hiya higeꞌya manaꞌa havimainae.
JOH 12:4 Nago kanoa, Yisasiꞌenema tokaeꞌya nemaiya anagapiti kanomo, agia Yutasi Isakaliotiꞌe. Ani kanomoꞌa haenagaꞌa Yisasina agesi huno kame ya hu-tesia kanomoꞌa mage hie “Naꞌa higeno mani manaꞌage masavena afaꞌa neꞌatale? Atalegeno nago kanomoꞌma miya hileꞌasipa tali hataleti (K300) kina aliteta mani masaveteti monea afenoꞌamima omalenea veaꞌne amamuteꞌasine.” huno hie.
JOH 12:6 Mani kea moneꞌamima omalenea veafena hauma hu-neꞌa-matea yafena nohigi mukiꞌa kanalela monema hanea kutela agaiꞌa yagai-maineno musufa yama nehia yafe mani kea hu-maine.
JOH 12:7 Yisasiꞌa mage hie “Ma munala afaꞌa atalegeno ma masavena afaꞌa ali-lineno nagayama falisugeꞌya he-vai-natesaya kanalela mani masaveteti fale-na-tegahie.
JOH 12:8 Moneꞌamima omalenea veaꞌmoꞌya mukiꞌa yupa tamakaiꞌene maigahayanagi nagaya tamaikaiꞌenena mukiꞌa yupa omaigahue.” huno hie.
JOH 12:9 Mukiꞌa Yuta veaꞌmoꞌya “Yisasiꞌa Petani kumateꞌma emaine.” huꞌya haya kea haviteꞌya ani kumate umainae. Yisasina agaiꞌage agegahe oꞌunagi Lasalusiꞌa fali-mainegeno ali he-ti-tenea kanoene anakegahe umainae.
JOH 12:10 Lasalusiꞌa fali-mainefiti he-ti-mainea yafe mukiꞌa Yuta veaꞌmoꞌya nayoma nehaya monola neꞌataleꞌya Yisasina amakuꞌa amitafa huꞌya amametitima haya yafe ala mono note kava vayaꞌmoꞌya Lasalusiꞌene haesaya kea hu-mainae.
JOH 12:12 Faeteꞌya kotigeꞌya mukiꞌa veaꞌmoꞌya Anumaya Kotiꞌma amakinagomogami amaugafama ali-gati-mainea yafe imuma ki-malenale emaineꞌya “Yisasiꞌma Yelusalemu kumate egahie.” huꞌya haya kea havi-mainae.
JOH 12:13 Haviteꞌya Yisasiꞌene katega mo fotu hugahe tofe yosamona haisaꞌa kofa-nafa huꞌya aliꞌya umaineꞌya ala kefiti mage huꞌya hae “Tusiꞌa yate taugafa ali-gatisana kanoa kanaleꞌya huka neꞌane. Anumayamo aliꞌya alisana yafe hu-ga-tegeka emainana kanomoga Anumaya Kotiꞌa kanale manu kamiteno kaya hu-maine. Isaleli kotega yagai-ma-tenana sauve kanomoga Anumaya Kotiꞌa kaya hu-maine.” huꞌya hae.
JOH 12:14 Yisasiꞌa nago hosi kana afumo agia tokie nehaya afua age falote huteno agupifi haino maine. Aniꞌama hia kavala nayona Anumaya Koti kefina mage huꞌya kae-malenayane.
JOH 12:15 “Yelusalemu veaꞌmogatama kolia ohutama ageho. Menia tamakaila sauve kanotamia yaufa tokimo agupifi haino maiteno egahie.” huno kae-maleneane.
JOH 12:16 Yisasiꞌma aniꞌama hu-mainea yupa agaiꞌenema tokaeꞌya nemaiya anagaꞌmoꞌya anima kae-malenea kea ohavianagi haenagaꞌage Yisasiꞌma faliteno he-tino tokiya hale yamaꞌama hanea kumate haitegeꞌya amakesamoꞌa ai-kalo higeꞌya anima kae-malenea kene veaꞌmoꞌya ani yupama hu-tenaya kavafeꞌene havi-mainae.
JOH 12:17 Yisasiꞌa Lasalusifema “Komufitila he-tio.” huno higeno fali-mainefitiꞌma he-ti-mainea yupa anileꞌma mainaya veaꞌmoꞌya ani kanafina “Yisasiꞌa naꞌa maꞌa kavala hu-maine.” huꞌya kea aliꞌya ute ete huꞌya hama-pai-mainae.
JOH 12:18 Hama-paigeꞌya haviteꞌya anima tokiya avame yama hu-mainea kema haviya yafe mukiꞌa veaꞌmoꞌya katega Yisasiꞌene mo fotu hu-mainae.
JOH 12:19 Hageꞌya Falasia vayaꞌmoꞌya amakaiꞌami amuꞌnoꞌamifina ani kehena mohu mehu huꞌya mage hu-mainae “Ageho mukiꞌa mopafi veaꞌmoꞌya Yisasina akave neꞌvayanagita atafa ohugahune.” huꞌya hu-mainae.
JOH 12:20 Nagoꞌa Kaliki veaꞌmoꞌya, Anumaya Koti agi alisaga hugahe, ani imu kaveꞌma nalega Yelusalemu hai-mainae.
JOH 12:21 Ani Kaliki veaꞌmoꞌya Filipite umainae. Filipiꞌa Kalili hanea kumala Petesaita kumateti kano mainelega uꞌya mage hae “Musekaꞌa nehunagi tagaya Yisasina agegahe neꞌone.” huꞌya hu-mainae.
JOH 12:22 Hageno Filipiꞌa viaꞌyamo Etaluna hapaiteꞌana ani lolemogani Yisasina mo hapai-mainaꞌe.
JOH 12:23 Hapaiꞌageno Yisasiꞌa mage huno hana-paiye “Menia Ikapinagati emainoa kanoa vayaꞌmo natenea kanomonia tusiya huꞌya nagai nagia ali-saga hisaya kanamoꞌa ago evaꞌyi hu-maine.
JOH 12:24 Tamage huꞌna tanaha-nepauve nagoke viti avinamoꞌma asaga hu-lavino mopafima ofalinunofena nagoke viti avinaꞌage hanegahigi nagi falinunofena ai-falo huno hageteno kasagoꞌya viti alagayaga aye helafigahie.
JOH 12:25 Naꞌa hugahianagi nagoꞌa veaꞌmoꞌyama mukiꞌa ma mopafi yafema amaugafama aliꞌya haiteꞌya hamaimuꞌamima atafa hisaya veaꞌmoꞌya faligahae. Faligahayanagi nagoꞌa veaꞌmoꞌyama ma mopale mainaya amaugafama aliꞌya haisaya yafema ‘Afa yanema.’ huꞌya hisaya veaꞌmogami hamaimuꞌmoꞌa haꞌno ohugahianagiꞌya maige maige huꞌya maigahae.
JOH 12:26 Nagoꞌa veaꞌmoꞌyama nagaifema huꞌya aliꞌya alisayana nakave ege ege hisae. Nakaveꞌma esaya veaꞌmoꞌya maisua yate nagaiꞌene mainesageno Nenafaꞌa nagai aliꞌyama neꞌaliya veaꞌmogamina ala amaki amamigahie.”
JOH 12:27 Yisasiꞌa mage huno nehie “Nagai naguꞌamoꞌa tusiya huno kanaꞌage nehigeꞌna kasagoꞌya nagesa nehavugi naꞌane huꞌna hisue? ‘Nenafaga menia nagai naugafaleꞌma faloteꞌma hugahema nehia yana ali-talo.’ hisufi? Aꞌao nagaya ani nagata aisia yapi maigahe emainoe.
JOH 12:28 Nenafaga kagaika kagi alisaga huo.” huno nehigeno anile ikapinagati age aino mage huno hie “Nagia ago alis-aga hu-mainoane eteꞌna nagoꞌene nagia ali-saga hugahue.” huno hie.
JOH 12:29 Higeꞌya melitalu hu-mainaya veaꞌmoꞌya agema aiya kea haviteꞌya nagoꞌamoꞌya mage huꞌya hae “Ikapinagati akali kalu nehie.” huꞌya hageꞌya nagoꞌa veaꞌmoꞌya mage huꞌya hae “Nago ensole kanomoꞌa ke me hanepaiye.” huꞌya hae.
JOH 12:30 Hageno Yisasiꞌa mage huno hie “Ani agema aiya agea nagai naya hisia yafe nohigi mani kea tamakai tamaya hisia yafe nehie.
JOH 12:31 Menia ma kanafina Anumaya Kotiꞌa ma mopale veaꞌmogamina kaiyeke hu-ma-tegahie. Meni kanafima ma mopaleꞌma kava yagai-mainea kanoa, Satanina* ago anati-talegahie.
JOH 12:32 Anati-talegahigi ma mopaleti navalesaga huꞌya* nahaesageꞌya mukiꞌa veaꞌmoꞌya amakuꞌa namisaya yafe amavayu huꞌna nagaiꞌnilega amategahue.” huno hie.
JOH 12:33 Ani avame kema huno hia kemoꞌa mage hu-maine “Ma yateti, yafaga yosale nahaesageꞌna faligahue.” huno hama-pai-maine.
JOH 12:34 Hama-paigeꞌya veaꞌmoꞌya kenonaꞌa mage huꞌya hapai-mainae “Tagai monoꞌmoꞌa mage huno taha-pai-maine ‘Anumaya Kotiꞌma taugafa ali-gatigahema hu-tesia kanoa mukiꞌa kanafina maige maige hugahie.’ huno taha-pai-maineanagi naꞌa higeka ‘Ikapinagati emainoa kanoa vayaꞌmo natenea kanomonia yafaga yosale navalesaga hugahae.’ huka nehane? Anima ikapinagati emainea kanoa vayaꞌmo atenea nafaꞌnea ta maine?” huꞌya havigae.
JOH 12:35 Havigageno Yisasiꞌa kenonaꞌamia mage huno hie “Hale yamaꞌaene kanomoꞌa tamakaipina osi kana kanoꞌa maine. Hani kisia yana vaꞌyi huno aiso hu-lama-tesia yafe hale yama hanea kanale vaiyatete hiho. Hani-ki-mainea yapima mainaya veaꞌmoꞌya visaya kana oꞌagenae.
JOH 12:36 Hale yamaꞌama hanea kanafina hale yamaꞌaene kanohe ‘Tamage nehane.’ hutama havitama tamakupi maletama tamametiti hiho. Aniꞌama hisayana hale yamo nafaꞌneyaga maigahae.” huno hama-pai-maine. Yisasiꞌa mani kea huteno neꞌamataleno mo fala-ki-maine.
JOH 12:37 Mukiꞌa tokiya avameꞌyamo amaulagafi alianagi agaifena haviꞌya amakupina maleꞌya amametitia nohae.
JOH 12:38 Ani yafe Anumaya Kotina aune kanoꞌa, Aisaiyaꞌa, hu-mainea kea falote huno tamage nehie. Mage huno hu-maineane “Anumayamoga manima hu-mainona kea taꞌya haviꞌya amakuꞌafina maleꞌya amametitia nehae? Anumayamoꞌa tokiya avame yamaꞌa amave-ligeꞌya hana veaꞌmoꞌya havilama nehae?” huno kae-maleneane.
JOH 12:39 Higeno amuha ohunayanagiꞌya Yisasifena haviꞌya amakupina maleꞌya amametitia ohunaya yafe Aisaiyaꞌa nagoꞌene mage huno humaineane
JOH 12:40 “Amaulaga oꞌagesaya yafe Anumaya Kotiꞌa amaulaga ago alino asu hu-ma-tene. Amaku amakesa havilama ohisaya yafe ‘Yafa kana amanuꞌene veaꞌne maiho.’ hu-ma-tene. Havigu amakuꞌa ai-yahae huꞌya nagaitega eyafenagiꞌna ali hilato hu oꞌama-tegahue.” huno hu-maineane.
JOH 12:41 Aisaiyaꞌa Yisasina tokiya hale yamaꞌa ageteno Yisasife mani kea hu-maineane.
JOH 12:42 Hu-maineanagi Yuta kava vayaꞌyagafitila kasagoꞌya vayaꞌmoꞌya Yisasife haviꞌya amakupi maleꞌya amametitia hayanagi Falasia vayaꞌmoꞌya mage hae “Mani kavaꞌma hisayana mono nopina omegahae huta nagalu hu-lama-tegahune.” huꞌya hu-mainaya yafe “Yisasina taguꞌa neꞌamune.” huꞌya hu-falote ohunae.
JOH 12:43 Ani veamoꞌya Anumaya Kotiꞌa “Kanale kava nehae.” huno amakima alisaga hisia yafena nohamaigi veaꞌmoꞌya “Kanale kava nehae.” huꞌya amaki alisaga hisaya yafeke nehamaiye.
JOH 12:44 Yisasiꞌa tokiyaꞌage ke hu-haleno mage hu-maine “Nagoꞌa veaꞌmogatama nagaifema tamage nehie hutama tamakupi maletama tamametitima hisayana nagaiꞌnigefena tamakupina maletama tamametitia hu-nona-tagi hu-na-tenea kanomofeꞌene hu-neꞌa-tae.
JOH 12:45 Nagoꞌa veaꞌmoꞌyama nagaiꞌma nenagayana Nenafaꞌa hu-na-tenea kanoene age-mainae.
JOH 12:46 Nagayama ma mopaleꞌma emainoana hale ya kana huꞌna emainoe. Nagoke nagoke veaꞌmoꞌya nagaifeꞌma haviꞌya amakupima maleꞌya amametitima hisayana haniki-mainea yapina omaigahae.
JOH 12:47 Nagoꞌa veaꞌmogatama nagai kema havitetama nakaveꞌma omalesayana nagaya tamakaila kaiyekea hu otama-tegahue. Ma mopale veaꞌmogamina kaiyekea hu-ma-tegahue huꞌna omenogi ma mopale veaꞌmogamina amaugafa ali-gatigahue huꞌna emainoe.
JOH 12:48 Nagoꞌa veaꞌmoꞌya nagaifeꞌma amakaveꞌnoma huꞌya nagai kema amakupima aliꞌya omalesayana hu-mainoa keꞌnimoꞌa fako hu-ma-tegahie. Ma mopama haꞌno hisia kanama evaꞌyima hisiana hu-mainoa keꞌnimoꞌa fako hu-ma-tegahie.
JOH 12:49 Mani kea nagesafitila ali falote huꞌna tamaha-nopaugi hu-na-tenea Nenafa ‘Nage mage huka huo.’ huno naha-paiya keꞌage tamaha-nepauve.
JOH 12:50 Nagaya ago havilinoe agai kema havitama tamakupima maletama tamametitima hisayana ofalitama agola maige maige hisaya tamahaimula aligahae. Nani yafe Nenafaꞌa naha-pai-mainea kea tamaha-nepauve.” huno nehie.
JOH 13:1 Anumaya Kotiꞌma amakinagomogami amaugafama ali-gati-mainea yafe ala imu kigahe nehae.* Ani imu kisaya kanaꞌamimoꞌa aupa hugahe nehigeno Yisasiꞌa ma agesa havimaine “Ma mopa ataleꞌna Nenafatega visua kanamoꞌa ago evaꞌyi nehie.” huno nehuno mukiꞌa kanaleꞌma ma mopale maineꞌyama agai kema nehaviya veaꞌmogamifena tusiya huno hau ayamopafi nehaino agola haume haume haino mo fali-maine.
JOH 13:2 Yisasiꞌenema tokaeꞌya nemaiya tuelufuꞌa (12) anagaꞌaene unena kavela nenageno Sataniꞌa Yutasifena “Havisigi huka agesi huka hama-pai-sanageꞌya Yisasina haesae.” huno agu agesa amine. Ani Yutasiꞌa nago agiꞌa Isakaliotiꞌa Saimonina nemofoꞌe.
JOH 13:3 Sataniꞌa aniꞌama hisia agu agesa amigeno Yisasiꞌa ma agesa havimaine “Nenafaꞌa mukiꞌa tokiya ago nayapi maleneanagiꞌna Anumaya Kotiꞌa hu-na-tegeꞌna emainoafe eteꞌna Anumaya Kotitega haigahue.” huno hu-maine.
JOH 13:4 Nehuno kaveꞌma neneletila neꞌataleno he-tino ayaꞌaya kenaꞌa hateno nemaleno taulia alino amupi ai-gagino fai-line.
JOH 13:5 Fai-lineno tina alino yopafi taki-maleneno aepa heno agaiꞌa tuelufuꞌa (12) anagaꞌamogami amaiya agupia sese hu neꞌama-teno ai-gagi-linea taulileti alino hau hu-neꞌamate.
JOH 13:6 Ali hau hu-ma-teme Saimoni Pitate vigeno Saimoni Pitaꞌa Yisasife mage hie “Alaniꞌamoga naigai naiya sese hu-na-tegahe nehano? Sese hu ona-tegane.” huno hu-maine.
JOH 13:7 Higeno Yisasiꞌa mage hie “Kagaya nagayama nehua kavala menia ohavinanagi haenagaꞌa havilama huka havigane.” huno hapaiye.
JOH 13:8 Ha-paigeno Pitaꞌa Yisasifena mage hie “Kagaya naiya sese ohutafa huka sese ohugane.” huno higeno Yisasiꞌa kenonaꞌa mage hie “Kaiyama seseꞌma ohisuana nagaiꞌenena omaitafa huka omaigane.” huno hapaiye.
JOH 13:9 Hapaigeno Saimoni Pitaꞌa mage hie “Alaniꞌamoga naꞌama hinageka naiyaꞌagela sese hu ona-teka nayaꞌene nanuꞌene sese hu-nato.” huno hapaiye.
JOH 13:10 Ha-paigeno Yisasiꞌa kenonaꞌa mage huno hapaiye “Nagoꞌa veaꞌmoꞌya mukiꞌa amaugafama sese hu-malenaya veala amaugafalela oniꞌyaꞌamia omaleno haigafaꞌage hamau-maineanagiꞌya amaiyaꞌage sese hugahae. Tamakaila kefo yama haya oniꞌyatamia omaleno haigafananamaꞌage hu-mainagi nagoke kanomona oniꞌyaꞌage hau-maine.” huno hama-paiye.
JOH 13:11 Hama-paiteno Yisasiꞌa agaiꞌma agesiꞌma huno haegahema hia kanoa ago age-mainea yafe “Tamakaya mukiꞌamogatamina oniꞌyatamia omalene huꞌna nohue.” huno nehie.
JOH 13:12 Amaiya sese hu-ma-teteno kenaꞌa alino vai-lino mopale maineno mage huno hama-vige “Nagayama hu-lama-toa kavala ago havilama nehafio?
JOH 13:13 Tamakaya nagaifema ‘Hulave-nelina kanomogae.’ nehutama ‘Alatimogae.’ hutamama nehayana tamage hutama nehae. Nagaya ani kanoema hutama haya kano mainoe.
JOH 13:14 Nagaya Alatamimoꞌna hu-lama-ve-neloa kanotamimoꞌna tamaiya sese hu-nelama-toe. Tamakaya aniꞌa hutama nelamafugami amaiya sese hu-ma-teho.
JOH 13:15 Nagaya hisaya kavala ago tamave-neluafe tamakaya nagayama hu-lama-toa kavala aniꞌa hu-ma-teho.
JOH 13:16 Nagaya tamagelafa huꞌna tamaha-nepauve aliꞌya kanoꞌamoꞌa kava kanoꞌamona agaseno omainegi kayo kayo kanoꞌamoꞌa hu-tenea kanomona agaseno omaine.
JOH 13:17 Tamakaya mani kema havilamama hutetama mani kavaꞌma hisayana kanaleꞌya hutama maigahae.
JOH 13:18 Nagaya ‘Kanaleꞌya hutama maigahaema.’ huꞌnama hua kea mukiꞌamogatamifena nohugi nagayama nahaigeꞌna huyo-gi-malenoa-maꞌamogamife nehaviꞌna mani kea nehue. Anumaya Koti kema nayoma kae-malenaya kemoꞌa mage hu-maineane ‘Nagaiꞌenema maineno kaveꞌma nenea kanomoꞌa aiya alisaga huno nagaila aye-nalata-pegahie.’ huno kae-maleneane. Kae-maleneanagi meni kanafina mani kemoꞌa efalote huno tamage hugahe nehie.
JOH 13:19 Haenagaꞌa mani kemoꞌma efalote hisigetama nagaifena mage hugahae ‘Agaya Anumaya Koti nafaꞌne maine.’ hutama havitetama tamakupima maletama tamametitima hisaya yafe menia ani kana yaufa falote ohunea kanafi tamaha-nepauve.
JOH 13:20 Tamage-lafa huꞌna tamaha-nepauve nagoꞌa veaꞌmoꞌya nagayama hu-ma-tesua veaꞌma amavaleꞌya falu falama hu-ma-tesayana nagaila aniꞌa huꞌya navaleꞌya falu fala hu-nena-tae. Nagaiꞌma navaleꞌyama falu fala hu-natesayana hu-na-tenea kanomona aniꞌa huꞌya avaleꞌya falu fala hu-neꞌatae.”
JOH 13:21 Yisasiꞌa mani kea hama-paitegeno aipamoꞌa kanaꞌage higeno agu agesama havia agesamoꞌa hivi huno talavate oꞌategeno mani kea hu-falote nehie “Lamage huꞌna tamaha-nepauve tamakaipitila nago kanomoga vayaꞌmo havisigi huka nagesi huka kame ya hu-na-tegane.” huno hie.
JOH 13:22 Higeꞌya agaiꞌa tuelufuꞌa (12) anagaꞌamoꞌya oꞌaufi aꞌaufi hugetayana higeꞌya “Tafepiga nehie?” huꞌya mani kanomofena ohavinae.
JOH 13:23 Ohavigeꞌna nagaya Yoniꞌna agaiꞌaenema tokaeꞌya nemaiya anagapi nemauvanagino hau ayamopafi nagaifena hau-mainea kanogiꞌna avate tokaetaꞌa mainoꞌe.
JOH 13:24 Mainogeno Saimoni Pitaꞌa anuteti avameꞌname huno “Havigo.” huno naha-paino “Tafe nehane huka havigo.” huno nehie.
JOH 13:25 Higeꞌna nagaya Yisasina avaꞌale mime uꞌna maineꞌna mage huꞌna havigoe “Alaniꞌamogae tafe nehane?” huꞌna havigoe.
JOH 13:26 Havigogeno Yisasiꞌa mage huno hie “Nagayama kaveꞌma aliꞌnama supufi ayeteꞌnama aliꞌna amisua kanoa nagesiꞌma hisia kano maine.” huno nehuno ani kavela alino supufi ayeteno Yutasiꞌa, Saimoni Isakaliotina nemofo amine.
JOH 13:27 Ani kavela amigeno alitegeno Sataniꞌa aguꞌafinaga mo hai-faleno mainegeno Yisasiꞌa mage huno hapaiye “Kagaya aupaꞌa hisuema hisana kavala ago huo.” huno hie.
JOH 13:28 Higeꞌya anileꞌma mopale mainaya vayaꞌmoꞌya Yisasiꞌa Yutasife hianagi ani kemona aepaꞌa nohaviye.
JOH 13:29 Ohavinagi Yutasiꞌa mone pokisiꞌamile yagaino nemaiya kanogiꞌya nagoꞌa vayaꞌmoꞌya mage huꞌya amakesa nehaviye “Yisasiꞌa agaifena ‘Ala imule mo nesuna yana molika eno.’ huno nehifi ifi ‘Moneꞌamima omalenea vaya nagoꞌa mone molika amamio.’ huno nehifi?” huꞌya amakesa havimainae.
JOH 13:30 Havigeno Yutasiꞌa ani kavela aliteno aupaꞌa kumatega hati-laviana tusiꞌa hani ki-mainea yapi umaine.
JOH 13:31 Yutasiꞌa ago utegeno Yisasiꞌa mage huno hie “Menia ikapinagati emainoa kanoa vayaꞌmo natenea kanomoni nagia ali-saga hugahae. Nagaiꞌma nahaesageꞌna falisugenoꞌa Anumaya Kotiꞌa ala agi aligahie.
JOH 13:32 Nagaya falisua yafe Anumaya Koti agima ali-saga hisayana Anumaya Kotiꞌa navalesigeꞌna agaiꞌene maigahue. Aupaꞌa navaleno tokiya hale yapi ala nagi namigahie.
JOH 13:33 Nafaꞌneyagaꞌnia tamakaiꞌenena nagaya osi kana kanoꞌa maiteꞌna visugetama nagaifena natiyegahayanagi amuha ohunayanagitama visua kumatela oꞌugahae. Mani kea Yuta veaꞌmogami hama-pai-mainoanagiꞌna menia tamakaila tamaha-nepauve.
JOH 13:34 Menia nagola ohavinaya kahegi kea tamaha-paigahugi haviho. Nelama-fugamifena tamahau tamayamopafi tamahaino. Amakaya aniꞌa huꞌya tamakaifena hamaisie. Nagayama tamakaifema nahau nayamopafima nahaiya kava hutama nelama-fugamifena tamahau tamayamopafi tamahaino. Amakaya aniꞌa huꞌya tamakaifena hamaisie.
JOH 13:35 Nagi tamakaya mukiꞌa nelama-fugamifena tamahau tamayamopafima lamahaisiana muki veaꞌmoꞌya tamakaila lamaketeꞌya tamakaifena mage huꞌya hugahae ‘Yisasiꞌenema tokaeꞌya nemaiya anaga mainae.’ huꞌya hugahae.” huno hie.
JOH 13:36 Saimoni Pitaꞌa mage huno havige “Alaniꞌamogae hanatega ugane?” huno havigegeno Yisasiꞌa mage huno hie “Visua kumatela menia nakavela oꞌuganagi haenagaꞌage nakavela ugane.” huno hie.
JOH 13:37 Higeno Pitaꞌa mage huno hie “Alaniꞌamogae nagaya na ya hinageꞌna menia kakavela oꞌugahe hugeka nehane? Nagaya kagaifene huꞌna nahaimula atalegahue.” huno hie.
JOH 13:38 Higeno Yisasiꞌa mage huno havige “Kagaya nagaifene huꞌka kahaimula atalegano? Tamagelafa huꞌna kaha-nepauve hagoteno kokolemoꞌa agea oꞌainesigeka kagaya tagufa (3) kanale avane huka nagiꞌa alika fala-kigane.” huno hie.
JOH 14:1 Yisasiꞌa mage huno hu-maine “Mukiꞌa veaꞌmogatama tamaipamoꞌa kanaꞌage huno tamakesa kuꞌmoꞌa ohino. Anumaya Kotife havitama tamakupi maletama tamametiti haya kava nehutama nagaifena havitama tamakupi maletama tametiti hiho.
JOH 14:2 Nenafa nopina veala maisaya nona kasagoꞌya hane. Ani yama omalesina nagaya mani kea ohuleꞌasine. Nagaya kumatamia moliꞌna talo tala hu-lama-tegahe ugahue.
JOH 14:3 Nagaya kumatamia mo lalo tala hu-maleteꞌna eteꞌna me lamavalesugetama visua kumatela visageta nagaiꞌene mo lokaeta maigahune.
JOH 14:4 Tamakaya nagayama visua kumaꞌmo kana ago age-mainae.” huno hie.
JOH 14:5 Higeno Tomasiꞌa mage huno hie “Alatimogae tagaya visana kumala oꞌagenone. Hanaꞌa huta ani kana agesune?” huno hie.
JOH 14:6 Higeno Yisasiꞌa mage huno hapaiye “Nagaya ikapinaga visaya kamona Nefaꞌnae. Nagaya ke-lamage kemona aepaꞌa mainoe. Nagaya agola maige maige yamo hamaimula aepaꞌa mainoafe nagoꞌa veaꞌmoꞌya Nenafatega visayana alu katetila oꞌugahagi nagaiteke esae.
JOH 14:7 Tamakaya nagaiꞌma havimainaleꞌasipa Nenafafena aniꞌa hutama havileꞌasine. Tamakaya menia aepa hetama Nenafana ago havitetama age-mainae.” huno hie.
JOH 14:8 Higeno Filipiꞌa mage huno hapaiye “Alanimogae negafana taveligeta agesunageno tagu tamemoꞌa tamu hisie.” huno hie.
JOH 14:9 Higeno Yisasiꞌa mage huno hapaiye “Filipigae ayaꞌaya kanale tamakaiꞌenena maime emainoana kagaya nagaila onagenano? Nagoꞌa veaꞌmoꞌya nagaiꞌma nage-mainayana aniꞌa huꞌya Nenafana age-mainae. Naꞌa higeka ‘Negafana lave-lio huka nehane?’
JOH 14:10 Nagaya Nenafa aguꞌafina maugeno Nenafaꞌa aniꞌa huno nagai naguꞌafina mainea yafena havika kagupina nomalano? Tamaha-pai-mainoa kea nagesafiti kea tamaha-opainoe. Aꞌao. Nenafaꞌa nagai nagupi maineno agaiꞌa aliꞌyamaꞌa neꞌalie.
JOH 14:11 Nagaya Nenafa aguꞌafi maugeno aniꞌa huno Nenafaꞌa nagaila naguꞌafina maigetaꞌa hu-mainoꞌema huꞌnama hua kea havitama tamakupina maletama tamametiti hiho. Mani kema ohavinutama tamakaya mukiꞌa aliꞌyama ali-mainoa aliꞌyama age-mainesayana nagaifena havitama tamakuꞌafi ali maletama tamametiti hiho.
JOH 14:12 Tamage-lafa huꞌna tamaha-nepauve nagoꞌa veaꞌmoꞌya nagaifema haviꞌya amakupi nemalaya veaꞌmoꞌya mukiꞌama ali-mainoa aliꞌyana aniꞌa huꞌya aligahae. Nagaya Nenafatega visua yafe anima alisaya aliꞌyamoꞌa ali-mainoa aliꞌyana agaseꞌya aligahae.
JOH 14:13 Nafaꞌneꞌamonife huꞌya Nenafaꞌa agima ali-saga hisaya yafe tamakaya nagai kema havitetama nagai nagi ayetama mukiꞌa yafena naha-vi-gesageꞌna aniꞌa hu-lama-tegahue.
JOH 14:14 Mukiꞌa yafema nagai nagima ayetama naha-vi-gesayana afaꞌa ani yana hu-lama-tegahue.” huno hu-maine.
JOH 14:15 Mani kea huteno mage hie “Tamakaya nagaifema tamahau tamayamopafima tama-haisigetamahena tamaha-pai-mainoa kemona akave malegahae.
JOH 14:16 Akave malesageꞌna Nenafatega havigesugeno tamaya hisia Avamula hu-tesigeno tamakaite eno agola tamakaiꞌene emaige maige huno maigahie.
JOH 14:17 Ani Alu Aotage Avamula tamageꞌage kemona aepaꞌa maineno hulama-ve-ligahie. Mukiꞌa ma mopale yafema amaugafama aliꞌya nehaiya veaꞌmoya Alu Aotage Avamula ageꞌya havilama ohunaya yafe oꞌavalegahagi tamakaya ago age-lama hutama age-mainaya yafe tamakaiꞌenena emaineno tamakupi haino maigahie.
JOH 14:18 Na yafe tama-talesugetama megusa nafaꞌne kana hutama omaigahayanagiꞌna tamakaitela eteꞌna egahue.
JOH 14:19 Okasi kanaꞌa ma mopale yafema amaugafama aliꞌya nehaiya veaꞌmoꞌya nagoꞌene onagegahayanagitama tamakaya nagegahae. Agola maige maige yamona aepaꞌa mainoafe tamakaya aniꞌa hutama maige maige hisaya tamahaimula alitama maigahae.
JOH 14:20 Mainesageno Alu Aotage Avamuꞌmoꞌma esia kanafina nagaya Nenafaꞌene mainoanagitama tamakaya aniꞌa hutama nagaiꞌenena maisageꞌna nagaya aniꞌa huꞌna tamakaiꞌenema mainoa yafena havilama hutama havigahae.
JOH 14:21 Nagoꞌa veaꞌmoꞌya nagai kema haviꞌya akave malenuꞌya nagaifena hamau amayamopafifna hamau-maine. Nagaifema hamau amayamopafima hamau-mainesia veaꞌmoꞌya Nenafaꞌa aniꞌa huno amakaifena hau ayamopafina nehaiye. Nehaigeꞌna nagaiꞌenena aniꞌa huꞌna nahau nayamopafina nenahaigeꞌna naguꞌa amamisugeꞌya nagaila nage-lama huꞌya nagegahae.” huno hie.
JOH 14:22 Higeno nago kanoa, Yutasi Isakalioti omagi, hamoꞌamoꞌa mage huno Yisasina havige “Alanimogae naꞌa higeka kagaya tagaila taulagafina kagaika aepakaꞌa tave-nelinagi mukiꞌa ma mopale yafema amaugafama aliꞌya nehaiya veaꞌmogami amaulagafina hu-falote huka ohunanane?” huno havinege.
JOH 14:23 Havigegeno Yisasiꞌa mage huno hie “Nagoꞌa veaꞌmoꞌyama nagaifema hamau amayamopafima hamaisigeꞌyahena nagai kemona akave malesagenofena Nenafaꞌa amakaifena aniꞌa huno hau ayamopafina haugahie. Nenafaꞌene nagaiꞌnienena amakaiꞌene emaigahuꞌe.
JOH 14:24 Nagoꞌa veaꞌmoꞌya nagaifema hamau amayamopafima ohamaisiana nagai kemona akavela nomalae. Manima tamaha-nepauva kea nagaiꞌnige kea omalegi hu-na-tenea Nenafa ke hane.
JOH 14:25 Tamakaiꞌenema maineꞌna mani kea ago tamaha-pai-mainoe.
JOH 14:26 Tamaha-pai-mainoanagino Nenafaꞌa nagai nagileꞌma hu-tesia kanomoꞌa, tamayama hisia Alu Aotage Avamulagino emaineno mukiꞌa yana hulamave-liteno mukiꞌa tamaha-pai-mainoa kea alino tamakesa hao hinagetama havigahae.
JOH 14:27 Tama-taleꞌna ugahe tamaipa falu hutama maisaya tamaku tamakesa nelamamue. Nagayama naipa falu huꞌna nemauva nagu nagesa nelamamue. Anima tamaipa falu hutama maisaya yama tamamua yana ma mopale veaꞌmoya amaipa falu nehaya ya kana ohunegi kanaꞌage tamaku tamakesa havitama kolia ohiho.
JOH 14:28 ‘Tamataleꞌna uteꞌna eteꞌna tamakaitega egahuema.’ huꞌna tamaha-pauva kea ago havilinae. Nagaifema tamahau tamayamopafima nelamahaisigetamahena Nenafa mainelega visua yafena muse haleꞌasine. Nenafaꞌa nagaseno ala kano mainea yafe Nenafa mainelega visua yafena muse haleꞌasine.
JOH 14:29 Tamataleꞌna visua kanafina nagaife havitama tamakupi maletama tamametitima hisaya yafe yaufa ani kana falote ohunea kanafi menia mani kea tamaha-nepauve.
JOH 14:30 Sataniꞌa, ma mopaleꞌma kava hu-mainea kanoa ago neꞌeanagiꞌna nagaya nagoꞌene kea ohugahue. Satanina tokiyaꞌamoꞌa nagaila onagaseneanagi Nenafa nahapai-mainea kava huꞌna faligahue.
JOH 14:31 Nagayama Nenafafema nahau nayamopafi nenagea kavala ma mopale veaꞌmoꞌya havisaya yafe Nenafa naha-pai-mainea kava nehue. Hai nehugi vigetao.” huno nehie.
JOH 15:1 Yisasiꞌa mage huno hie “Nagaya tamage huꞌna vaini alagamo nofi maugeno Nenafaꞌa ani vaini alagamo nofi hoyalela yagai-maine.
JOH 15:2 Agaya mukiꞌa nagai vaini nofi akopaꞌmoꞌa alagama oꞌayea akopaꞌyaga atagi neꞌataleno alagama ayea akopaꞌyaga ‘Nagoꞌene alaga ayesie.’ huno aiꞌa alino hagalo nehie.
JOH 15:3 Tamaha-pai-mainoa kemoꞌa tamakaila ago alino hagalo higeno oniꞌyatamia omalenegi kanale tamahau-maine.
JOH 15:4 Tamakaya nagaiꞌenema ai-gaꞌmaesayana nagaya tamakaiꞌenena ai-gaꞌmaeꞌna maigahue. Nago vaini alagamo nofiꞌmo akopamoꞌma nofiteꞌma ai-okaꞌmaesiana alaga oꞌayegahie. Naꞌa hu-maineafe tamakaya nagaila navaꞌaleꞌma ai-okaꞌmaesayana tamakaya alaga oꞌayegahae.
JOH 15:5 Nagaya vaini alagamo nofi maugetama tamakaya ani vaini alaga nofiꞌmo akopaꞌa mainae. Tamakaya nagaiꞌenema ai okaꞌmaesayana nagoꞌa kanale kavala ohugahae. Kanale kavaꞌma hinutamahena nagaiꞌene ai-kaꞌmaetama maiho. Nagoꞌa veaꞌmoꞌyama nagaiꞌenema ai-gaꞌmaeꞌya maisageꞌna nagayama amakaiꞌenema ai-kaꞌmaeꞌna maisuana kasagoꞌya nofi alagamo kaveꞌa ayegahae.
JOH 15:6 Nagoꞌa veaꞌmoꞌya nagaiꞌenema ai-okaꞌmaesayana oꞌayea vaini nofiꞌmo akopaꞌma atagiꞌya hagaꞌyu hu-talagenoꞌma hagage nehia kava nehae. Ani akopayaga alitalu huꞌya atafi kae-talenae.
JOH 15:7 Tamakaya nagaiꞌenema aigaꞌmaetama maisayana nagai kemoꞌa tamakupina hanesigetama nagoꞌa yafema naha-vi-gesayana naha-vi-gesaya yana hu-lama-tegahue.
JOH 15:8 Tamakayama kasagoꞌya nofi alagamo kaveꞌma aye-gasagoꞌma hisaya yateti Nenafaꞌa ala agia aligahie. Alinagetama-nagitama tamakaya nagaiꞌenema tokaeꞌya nemaiya anaga maigahae.
JOH 15:9 Nenafaꞌa nagaifena hau ayamopafi hau-mainea kava huꞌna tamakaifena aniꞌa huꞌna nahau nayamopafi nenahaiye. Nahau nayamopafima nenahaiya yamo aguꞌafinaga faletama maiho.
JOH 15:10 Nagaya Nenafaꞌma hu-mainea kahegi kema haviꞌnama akave maloa yafe Nenafaꞌa nagaifena hau ayamopafina nehaiye. Tamakaya aniꞌa hutama hu-mainoa kahegi kea havitama akave malesayana tamakaifema nahau nayamopafi nenahaiya yamo aguꞌafinaga faletama maigahae.
JOH 15:11 Nagai naguꞌafima muse yama hanea yana tamakai tamakupi male hava-telama-tesua yafe mani kea tamaha-pai-mainoane.
JOH 15:12 Nahau-mainea kavala mage huꞌna nehue ‘Nagaya tamakaifema nahau nayamopafima nahaiya kava hutama nelama-fugamifena tamahau tamayamopafi tamahainageno aniꞌa huꞌya amakaya tamakaifena hamau amayamopafina hamaino.’ huꞌna tamaumonola nemaloe.
JOH 15:13 Nago kanomoꞌma nefufema ‘Kagai kaugafama ali-gatisua yafene huꞌna nagaya faligahue.’ hunoꞌma hisiana mukiꞌa veaꞌmogami hamau amayamopafima nehamaiya kavala amakasegahie.
JOH 15:14 Nagayama nehua kema akave malenutamahena nagaiꞌni nenafugatama maigahae.
JOH 15:15 Nagaya tamakaifena ‘Aliꞌya vayaꞌnimogatama mainae.’ huꞌna nagoꞌene ohugahue. Nago aliꞌya kanomoꞌa kava kanoꞌamoma aliꞌyama alia aepaꞌa oꞌagenegi nagaya mukiꞌa yama Nenafaꞌma naha-pai-mainea kea ago tamaha-pai-mainoa yafe ‘Aliꞌya vayaꞌnimogatama mainae.’ huꞌna ohugahugi agoꞌma tamaha-nepauva yafe ‘Tamakaya nagai kanapa mainae.’ huꞌna nehue.
JOH 15:16 Tamakaya nagaila nagetama hu-yoꞌokinagi nagaya hagoteꞌna tamakaila tamakeꞌna hu-yogiteꞌna tamakaitami utama Anumaya Koti haisia kava hisaya yafe hu-yogilama-tenoe. Aniꞌama hisaya yapiti alagaꞌa falote huteꞌya agola mainesagetama nagai nagileꞌma Nenafatega havigesayana mukiꞌa havigesaya yana tamamigahie.
JOH 15:17 Kahegi kea mage huꞌna tamaumonola nemaloe nelama-fugamifena tamahau tamayamopafi tamahainageꞌya aniꞌa huꞌya tamakaifena hamau amayamopafi hamaino.”
JOH 15:18 “Ma mopale yafema amaugafama aliꞌya nehaiya veaꞌmoꞌya tamakaila kamema hu-lama-tesagetamahena tamakesa hao hinagetama haviho. Hagoteꞌya nagaila aniꞌa huꞌya kamea hu-na-tenayane.
JOH 15:19 Tamakaya ma mopale veaꞌmoꞌya nehaya kavaꞌma hutama mainaleꞌasipa mani mopale veaꞌnemoꞌya hamau amayamopafi tamakaifena hamaileꞌasinagi nagaya ma mopafi vayapiti tamakeꞌna hu-yogi-malenoafe tamakaya mani mopale vea kana veaꞌne omainae. Na yafe ma mopale yafema amaugafama aliꞌya nehaiya veaꞌnemoꞌya amakesa nehaviꞌya kamea hu-nelama-tae.
JOH 15:20 Nagaya mage huꞌna ago tamaha-pai-mainoe ‘Aliꞌya kanoꞌamoꞌa kava kanoꞌamona oꞌagasene.’ huꞌna hu-mainoane. Ani kehe tamakesa havitama maiho. Nagoꞌa veaꞌmoꞌya nagaiꞌma, tamakai kava kanotamimonima, aliꞌya haviyama hu-na-taya kava huꞌya aniꞌa huꞌya tamakaila aliꞌya haviya hu-lama-tegahayanagi nagoꞌa veaꞌmoꞌya nagai kema haviꞌya akave nemalesaya veaꞌmoꞌya tamakai kea aniꞌa huꞌya haviꞌya akave malegahae.
JOH 15:21 Hu-na-tenea kanomona havilama huꞌya ohavinaya yafe ani kavala hu-lama-tegahae. Tamakaya nagai veaꞌnema mainaya yafenagiꞌya ani kavala hu-lama-tegahae.
JOH 15:22 Nagaya eꞌnama kema hama-opauleꞌasina ‘Kefo katia hane.’ huꞌya ohaleꞌasine. Afaꞌa ago me hama-pauvanagi kefo yama hu-mainaya yafena kalagi aiteꞌya agasesaya katamia omalene.
JOH 15:23 Nagaiꞌma kamema hu-na-tesaya veaꞌnemoꞌya Nenafaꞌene kamea hu-neꞌatae.
JOH 15:24 Nagaya amakaipima maineꞌnama nagoꞌa veaꞌmoꞌyama tokiya kavaꞌma ohuleꞌasina ‘Kefo yatia hane.’ huꞌya ohaleꞌasinagi ago alugeꞌya ageteꞌya nagaiꞌene Nenafaꞌenena kamea hu-nelaꞌa-tae.
JOH 15:25 Amakai kahegi kema kae-malenaya kemoꞌa nagaifena mage hu-mainayane ‘Havi kavala ohunegeꞌya kamea afaꞌa hu-neꞌa-tae.’ huꞌya kae-malenayane. Mani kemoꞌa ago falote huno tamage hisia yafe nagaila kamea hu-nena-tae.
JOH 15:26 Nenafategati tamaya hisia vekaꞌa hu-tesugenoꞌma esiana tamageꞌage ke huno tamaha-paisia vekaꞌa, Alu Aotage Avamula Nenafategatiꞌma esiana nagaifena tamaha-paigahie.
JOH 15:27 Tamaha-paigahianagitama nagaya aliꞌyama aepa heꞌna ali-mainoa kanaleti tamakayama nagaiꞌenema mainaya yafe nagaifena veaꞌmogamina hama-paigahae.”
JOH 16:1 Yisasiꞌa mage huno hie “Nagaifema tamakupima ago malenaletiꞌma neꞌataletama alu kate oꞌvisaya yafe mani kea tamaha-pai-mainoe.
JOH 16:2 Amakaya tamakaila mono nopitila tamavaleꞌya tamanati-talegahae. Ani kanama esia kanafina nagoꞌa veaꞌmoꞌya tamakaila nelamahaeꞌya ma amakesa havigahae ‘Mani kavaꞌma nehunana Anumaya Kotina akave nemalone.’ huꞌya hugahae.
JOH 16:3 Nenafaꞌene nagaiꞌenema amakuꞌa otaꞌaminaya yafe ani kavala hu-lama-tegahae.
JOH 16:4 Ani kanama falote hisia kanafina tamaha-pai-mainoa kemoꞌa tamakesa ai-hagalo hinagetama havilama hisaya yafe menia mani kea tamaha-nepauve. Ehe kanafina tamakaiꞌenema mainoa yafe nayona ani kea tamaha-opainoane.
JOH 16:5 Nagaiꞌma hu-na-tegeꞌna emainoa kanolega menia eteꞌna ugahuanagitama nago vekamoga nagaifena ‘Hanatega neꞌvane?’ huka nahavi-nokane.
JOH 16:6 Nahavi-nokayanagi nagayama tamaha-pai-mainoa kehe tamakesa havitama tamahau nehae.
JOH 16:7 Tamahau nehayanagi tamage-lafa huꞌna tamaha-nepauve nagayama oꞌvisuana tamaya hisia kanoa omegahigi nagayake uteꞌna tamaya hisia kanoa hu-tesugeno tamakaitegama esiana kanale kanaꞌa falote hu-lama-tegahie.
JOH 16:8 Efaloteꞌma hisiana tamaya hisia kanomoꞌa mukiꞌa ma mopale veaꞌmogami kefo yama nehaya aepaꞌamiene kanale kavaꞌma nehaya aepaꞌamiene Anumaya Kotiꞌa kaiyekema hu-ma-tesia yamo aepaꞌaene hu-falote hisigeꞌya haviteꞌya agegahae.
JOH 16:9 Kefo yamo aepamofena tamaya hisia kanomoꞌa mage huno hugahie ‘Yisasifena havitama tamakupi maletama tamametiti nohaya yafe kefo yatamia hane.’ huno hugahie.
JOH 16:10 Nagaya Nenafa mainelega eteꞌna ugahuanagitama nagoꞌene nagaila onagesayafe tamaya hisia vekamoꞌa kanale kavaꞌma hisaya yamo aepaꞌa hu-falote hinagetama havitetama agegahae.
JOH 16:11 Anumaya Kotiꞌa ma mopale kava kanoa, Satanina, ago kaiyekea hu-tenea yafe tamaya hisia vekaꞌa Anumaya Kotiꞌma kaiyekema hu-ma-tesia yamo aepamoꞌa hu-falote hinagetama havitetama agegahae.
JOH 16:12 Nagaya kasagoꞌya kea tamaha-paigahe nehuanagi kanaꞌage hu-mainea yafe tamakaya havilama hutama ohavigahae.
JOH 16:13 Ohavigahayanagi Anumaya Kotina tamageꞌage nehia Avamuꞌamoꞌma esiana agaiꞌalegati mukiꞌa Anumaya Koti tamageꞌage kea tamaha-paigahie. Agesafiti kea tamaha-opaigahianagino nehavia keꞌageꞌene haenagama esia kanafima falote hisia yamo kene tamaha-paigahie.
JOH 16:14 Tamaha-painageno ani kanomoꞌa nagayama hu-mainoa kea tamakaila tamaha-paisia yafe nagai nagia tusiya huno ali-saga hugahie.
JOH 16:15 Hugahianagi mukiꞌa Nenafaꞌma malenea yana nagaiꞌniꞌa yamaꞌage fatago huno hanea yafe mage hu-mainoe ‘Alu Aotage Avamuꞌmoꞌa amisua kea alino tamakaila me lamaha-paigahie.’ huꞌna hu-mainoe.”
JOH 16:16 “Osi kana kanoꞌa nagoꞌene onagegahagi osi kana kanoꞌa maitetama etetama nagegahae.” huno hie.
JOH 16:17 Higeꞌya nagoꞌa agaiꞌaenema tokaeꞌya nemaiya anagaꞌamoꞌya amakaiꞌamifina mage hae “Osi kana kanoꞌa onagegahae huno nehuno etetama osi kana kanoꞌa nagegahae huno nehunoꞌma nehia kemona aepaꞌamoꞌa hanaꞌa hu-maine? ‘Nenafatega visua yafe nehue.’ huno nehia kemona aepaꞌa nohavune.
JOH 16:18 Osi kanaꞌaema hia kemona aepaꞌa naꞌane huno nehie? Tagaya agayama hia kea nohavune.” huꞌya nehae.
JOH 16:19 Nehuꞌya havigegahema haya kea Yisasiꞌa ago aguꞌafinaga haviteno mage huno hie “Hua kemoꞌa ‘Osi kana kanoꞌa nagaila onagegahagi etetama osi kanaꞌa maitetama nagegahaema.’ hua kehena tamakaya lamakaya tamakaitamifina mani kemona aepaꞌahe huge havige nehao?
JOH 16:20 Tamage-lafa huꞌna lamaha-pauve tamakaya tamataleꞌnama visua yafena avia ategahayanagi ma mopale veaꞌmoꞌya muse hugahae. Tamakaila hagoteno tamahau hu-tesigetama haenagaꞌa ai-yahae hutama muse hugahae.
JOH 16:21 Aꞌmoꞌma nafaꞌnema ategahema nehuno agatama aisia kana falote hisia yafe hauna hianagi nafaꞌnema ago atetenoꞌa ‘Nafaꞌnea ago atoe.’ huno muse nehuno agatama ai-mainea yafena age-kani-maine.
JOH 16:22 Ani kanamoꞌa tamakaipina hane. Menia tamakaya tamahau nehayanagi eteꞌna tamakesugenoꞌa tamakupina muse yamoꞌa hiya hinageno nago kanomoꞌa ani muse yana tamaha-ofalegahie.
JOH 16:23 Ani kanama evaꞌyima hisiana tamakaya nagaila nago yafena nahavi-okegahae. Tamage-lafa huꞌna tamaha-pauve nagaifema hutama nagai nagima ayetama nago yafema Nenafama havigesayana mukiꞌa havigesaya yana afaꞌa tamamigahie.
JOH 16:24 Nayoꞌene meniene nagaifena nehutama nagia ayetama nagoke yafena Nenafana haviokenayane. Nagi menia muse yatamimoꞌma tamakupina hiya huno hanesia yafena nahavigegeꞌna tamamino.”
JOH 16:25 “Mani kea tamakaila avame kefi hu-maleꞌna tamaha-nepauvanagi haenagaꞌa mani avame kea nagoꞌene ohugahuanagiꞌna hu-falote huꞌna Nenafafena tamaha-paigahue.
JOH 16:26 Hu-falote hisugetama ani kanafina nagai nagile havigegahagi nagaya ‘Tamakaifena Nenafana havigegahue.’ huꞌna ohunogi tamakaya nagaifena tamahau tamayamopafi nelamahaiya yafe Nenafaꞌa tamakaifena hau ayamopafi nehainageno havigesaya yana agaiꞌa tamamigahie. Nagayama Anumaya Kotitegati emainoa kema tamakupi malenaya yafe Nenafaꞌa tamakaifena hau ayamopafi nehaiye.
JOH 16:28 Nagaya Nenafaꞌene mainoleti ma mopafina emainoe. Menia nagaya mani mopa ataleꞌna Nenafatega ugahue.” huno hie.
JOH 16:29 Higeꞌya agaiꞌaenema tokaeꞌya nemaiya anagaꞌmoꞌya mage hae “E, avame kefiti menia nohanagi hu-falote huka nehane.
JOH 16:30 Menia tagaya havunana kagaya mukiꞌa yana havimalenane. Mukiꞌa veaꞌmoꞌya amakupima haviya yana ago havimainana yafe nago kanomoꞌa nago yafena kahavi-okesie. Mukiꞌa yana havimainana yafe tagaya kagaifena Anumaya Kotitegati emainane huta tagupi malenone.” huꞌya hae.
JOH 16:31 Yisasiꞌa kenonaꞌamilela mage huno hie “Meni tamakaya havitama tamakupina nemaletama tamametiti nehafio?
JOH 16:32 Haviho nago kanamoꞌa aupaꞌa egahema hia kanamoꞌa ago efalote hu-maine. Ani kanafina nagoke nagokeꞌmogatama nataletama kumatamile ute ete hugahae. Nataletama visageꞌna nagaiꞌnige maigahuanagi Nenafaꞌa nagaiꞌenena maine.
JOH 16:33 Tamakuꞌa namitetama tamaipa falu hutama hilato hutama maisaya yafe mani kea tamaha-pai-mainoe. Ma mopale mainesageno nago kanaꞌage yamoꞌa falote hugahianagi kolia ohiho. Nagaya ma mopafi auꞌava yana ago agaseꞌna kava yagai-mainoe.” huno hu-maine.
JOH 17:1 Yisasiꞌa mani kea huteno ikapinaga age-saga hu-maineno Anumayamotega mage huno hie “Nenafagae falisua kanaꞌnia ago efalote hie. Nekamoꞌna kagi ali-saga hisua yafe faliteꞌna he-tiꞌna kagaitega haisua yafe lokiya hale yania nekamonina namio.
JOH 17:2 Nekamonia mukiꞌama naminana veaꞌmogamina agola maige maige hisaya hamaimuꞌamima amamisua yafe mukiꞌa veaꞌmote kava yagaisua tokiyaꞌnia ago naminane.
JOH 17:3 Anumaya Kotiga kagaikage ala tokiya kanoa tamagemona tamaꞌa nagokeꞌage Anumaya mainanagi veaꞌmoꞌya kagaifema havilama huꞌya maisayana hu-tenana kanoa ‘Yisasiꞌa veaꞌmogami amaku amamemaꞌa ali-gatisia kanoa ikapinagati emainea kano maine.’ huꞌya havilama hisayana maige maige hisaya hamaimula aligahae.
JOH 17:4 Naminana tokiya hale yatetiꞌa ma mopalela kagia alisaga hu-mainoe. Naminana aliꞌyana ago aliꞌna avaya aye-mainoa yafe Nenafagae meni kanafina kagai kavate mainesugeka tokiya hale yaniꞌa namio. Ma mopama talo ohunana kanafina kagaiꞌene mainoanagiꞌna tokiya hale yania haneanagi menia eteka ani yana namio.
JOH 17:6 Ma mopafi veapitiꞌma naminana veaꞌmogamina ago aepakaꞌa hu-falote huꞌna hama-pai-mainoe. Ani veala kagaikaꞌa veaꞌnegika nagaila ago naminane. Naminanageꞌya ani veaꞌmoꞌya kagai kea atafa hu-linae.
JOH 17:7 Atafa hu-lineꞌya mukiꞌa naminana yana kagaikaꞌalegati emaine huꞌya menia ago havilinae.
JOH 17:8 Naminana kea ago amamugeꞌya ago atafa huꞌya havilama hulineꞌya nagayama kagaitegatiꞌma emainoa yafena tamage nehie huꞌya havilama hu-lineꞌya kagayama hu-na-tanageꞌna emainoa yafena amakupi maleꞌya amametiti nehae.
JOH 17:9 Amakaifena Nenafagale ke huꞌna kahavi-negoe. Ma mopale yafema amaugafa aliꞌya nehaiya veafe Nenafagale menia kahavi-nokogi kagaikaꞌama naminana veaꞌnea kagai veaꞌne mainaya yafe naminana veafe kahavi-negoe.
JOH 17:10 Nagai veala kagai veale. Kagai veala nagai vea mainageꞌya ani veaꞌnimoꞌyama nagai tokiyaleti haya kavala nehageꞌya mopale veaꞌmoꞌya ageteꞌya nagai nagia alisaga nehae.
JOH 17:11 Ali-saga nehageꞌna menia ma mopaletila ataleꞌna kagaitega ugahuanagi nagaifema amakupi nemalaya veala ma mopafi maigahagi alu aotage Nenafaga kagaika kagileti naminana nagileꞌma hanea tokiyaleti auꞌvai-ma-tesanana taꞌagaya nagoke kanolatama mainoꞌa ya huꞌya amakaya nagoke kate maleꞌya nagoke veaꞌne maisae.
JOH 17:12 Nagaya amakaiꞌene maineꞌna kagayama naminana nagileꞌma hanea tokiyaleti auꞌvai-ma-togeno nagoꞌmoꞌa hani-ki-mainea yapima tegelege nehia atafina oꞌugahagi Anumaya Koti kema kae-malenaya kemoꞌma efalote huno tamagema hisia yafe anima hani-ki-mainea yapima tegelege nehia atafima visia kanoa Yutasiꞌa agaiꞌage ugahie.
JOH 17:13 Menia eteꞌna kagaitega egahugi nagayama nehua muse yaniꞌamoꞌa amakai amakupina hava-tesia yafe ma mopale maineꞌna mani kea hama-nepauve.
JOH 17:14 Hama-nepaiꞌna kagai kea ago amaminogi nagaya ma mopafi kanoa omaiꞌnoe. Alu nagu nameꞌene kano mainogeꞌya amakaya nagayama hua kava huꞌya ma mopale veaꞌne kana vea omainae. Alu amaku amameꞌene veaꞌne mainaya yafe ma mopale veaꞌmoꞌya amakaife amaipa kafa he-ma-teꞌya kamea hu-neꞌama-tae.
JOH 17:15 Kamea hu-neꞌama-tayanagi nagaya veaꞌnimogamifena ‘Ma mopaleti amavalesaga huo.’ huꞌna kahavi-nokogi ‘Sataniꞌma aye-mavataga hu yafe auꞌvai-mateka amaugafa ali-gatisanageꞌya kaꞌyeꞌya maisae.’ huꞌna kaha-vi-negoe.
JOH 17:16 Nagaya ma mopale kanoa omaiꞌnoe. Alu nagu nameꞌene kano mainogeꞌya amakaya nagai kana huꞌya ma mopale veaꞌnea omainae. Alu amaku amameꞌene veane mainae.
JOH 17:17 Mainayafe kagaika ke-lamage kekaleti alu aotage veaꞌne maisaya amaku amakesa amamio. Kagayama hu-mainana kemoꞌa tamageꞌage nehie.
JOH 17:18 Kagaya ma mopafima nagaiꞌma hu-natanageꞌna emainoa kava huꞌna naminana veaꞌnea nagaya mopale veaꞌmogami amuꞌnopi ago hu-ma-tenoe.
JOH 17:19 Nagi tamage huꞌya amaku amamemaꞌamona kagaila kamisaya yafe nagaya nagu namemaꞌamona kagaila negamue.
JOH 17:20 Nagaiꞌenema mainaya veaꞌneꞌagefena kahavi-nokogi amakayama hisaya keleti nagaifema haviꞌya amakupi maleꞌya amametitima hisaya veafeꞌene kahavi-negoe.
JOH 17:21 Nenafagae mage huꞌna kahavi-negoe kagaya nagaiꞌenema mainageꞌna nagaya kagaiꞌenema maugetaꞌama huꞌa kava huꞌya nagaifema amakupi malenaya veala nagoke vea kanoꞌa taꞌagaiꞌene maisageꞌya mukiꞌa mopale veaꞌmoꞌya kagayama hu-na-tanageꞌnama emainoa yafema haviꞌya amakupi maleꞌya amametiti hisae.
JOH 17:22 Taꞌagayama nagoke taꞌaipaleꞌma mauꞌa kava huꞌya nagoke amaipale maisaya yafe naminana tokiya hale yaniꞌa ago amaminoe.
JOH 17:23 Amakaya nagoke vea kanoꞌa mai-lama huꞌya maisaya yafe nagaya amakaiꞌenena maugeka kagaya nagaiꞌenena mainane. Kagaya hu-na-tanageꞌna emainoa yafema mukiꞌa mopale veaꞌmoꞌya havisaya yafeꞌene nagaifena kahau kayamopafi negahaigeka aniꞌa huka ma mopale veafeꞌene kahau kayamopafi kahau-mainea yama havisaya yafe kagai kema havimalenaya veaꞌmoꞌya nagoke vea kanoꞌa maisae.
JOH 17:24 Nenafagae ma mopama taloma ohunana kanafina nagaifena kahau kayamopafi kahaigekama naminana tokiya hale yaniꞌa nagaiꞌma naminana veaꞌmoꞌya agesaya yafe nagaya maisua kumate maisae huꞌna nehue.
JOH 17:25 Kanaleꞌya huka fatago hu-mainana Nenafagae ma mopale yafema amaugafa aliꞌya nehaiya veaꞌmoꞌya kagaila okagenagi nagaya ago kagaila kage-mainoafe ma ma mainaya veaꞌmoꞌya nagaiꞌma hu-na-tanageꞌna emainoa yafena ago haviꞌya ageꞌya hu-mainae.
JOH 17:26 Nagaifema kahau kayamopafi kahau-mainea yana amakai amakupi malesana yafe aepakaꞌa hu-falote huꞌna hama-pai-mainoanagi nagoꞌene hama-paigahue. Nagaya amakupi maisua yafe aepakaꞌa ago hama-pai-mainoe.” huno hu-maine.
JOH 18:1 Yisasiꞌa ani kea Anumayamotega havigeteno tuelufuꞌa (12) anagaꞌaene hati-laviꞌya Kitaloni lina mo laꞌkaeꞌya umainae. Atu kaiyaga nago olivi yosa kali-malenaya hoya hanegeꞌya Yisasiꞌa agaiꞌaenema tokaeꞌya nemaiya anagaꞌamoꞌyaene ani hoyafinaga umainae.
JOH 18:2 Umainayanagi mukiꞌa yupa Yisasiꞌa tuelufuꞌa (12) anagaꞌamoꞌyaenena ani hoyafinaga molitalu huꞌya nemaiya yafe Yutasiꞌa, agesiꞌma huno Yisasina kamema hu-tesia kanomoꞌa, ani hoya ago age-maineane.
JOH 18:3 Age-maineanagino Yutasiꞌa viaꞌyamo ala mono note kava vayateꞌene* Falasia vayateꞌene vigeꞌya mono note ati vayaꞌene Lomu ati vayaꞌene amigeno amavaleno ani hoyafinaga kaꞌniꞌene lamu kaꞌniꞌene tu hisaya yaꞌene aliꞌya emainae.
JOH 18:4 Ayanagi Yisasiꞌa mukiꞌa augafaleꞌma falote hugahema hia yana ago haviteno amakaite viaꞌyamo mo hama-vige “Tamakaya tafe atineꞌayae?” huno hie.
JOH 18:5 Higeꞌya kenonaꞌa mage huꞌya hae “Nasaleti Yisasife ati-yeta neꞌone.” huꞌya hageno Yisasiꞌa mage hie “Nagaya ma mainoe.” huno higeno agesiꞌma huno Yisasina kamema hu-tea kanoa, Yutasiꞌa, ani vayaꞌene tokaeno maine.
JOH 18:6 Mainegeno Yisasiꞌa “Nagaya ma mainoe.” hunoꞌma hia yafe amakavelegati eteꞌya valega mo fae-laka-ti-mainae.
JOH 18:7 Fae-laka-ti-tageno Yisasiꞌa nagoꞌene eteno hama-vige “Tafe ati neꞌayae.” huno higeꞌya amakaya nehuꞌya “Nasaleti Yisasife ati neꞌayone.” huꞌya hae.
JOH 18:8 Hageno Yisasiꞌa kenonaꞌamia mage hie “Nagaya ago tamaha-nepauve nagaya ma mainoe huꞌna nehue. Tamakaya nagaifema nati neꞌayenutamahena ma ma nagaiꞌenema mainaya vayala amatalegeꞌya afaꞌa viho.” huno hie.
JOH 18:9 Yisasiꞌa agoꞌma hu-mainea kea mage huno hu-maineane “Naminana veala nagoke kanoꞌa ata-oꞌayegahie.” huno hu-maineane. Anima hu-mainea kemoꞌa falote huno tamagema hisia yafe Yisasiꞌa “Amatalegeꞌya viho.” huno hu-maine.
JOH 18:10 Higeno Saimoni Pitaꞌa ayaꞌaya naepeꞌa ali-lianagino alisagino ala mono note hagote kava kanomo aliꞌya kanoꞌa, Malakusina, ai-koligeno tamaga kaiyaga agesa aifa-kali-talegeno asaga hu-lavi-maine.
JOH 18:11 Ai-fakaligeno Yisasiꞌa Pitafena hapaino “Ayaꞌaya naepekaꞌa tafugepi vaiyo. Naugafaene nagu name nagata aisia yaniꞌa satuꞌage hia tima hanea masu keꞌayola Nenafaꞌa naminegi nagaife onesie huka nehano?” huno hie.
JOH 18:12 Lomu ati vayaꞌene ala kava kanoꞌamiene mono note ati vayaꞌene Yisasina atafa huꞌya nofi ki-mainae.
JOH 18:13 Nofi k-iteteꞌya hagoteꞌya Anasite avaleꞌya umainae. Anasiꞌa Kaiyafasina aꞌamona nefa maineanagino Kaiyafasiꞌa ani kafufina ala mono note hagote kava kano maineane.
JOH 18:14 Kaiyafasiꞌa Yuta vayafe mage huno hama-pai-maineane “Kanalele nagoke kanomo mukiꞌa veaꞌmogamitefe huno falisie.” huno hu-maineane.
JOH 18:15 Saimoni Pitaꞌene nagola Yisasiꞌenema tokaeno nemaiya kanoꞌene* Yisasina akave anatiꞌana umainaꞌe. Neꞌvaꞌageno mono note kava kanomoꞌa ani Yisasiꞌenema tokaeno nemaiya kanomona ago age-mainea yafe agaya Yisasiꞌene ala mono note kava kanomo no kegiꞌya kovefinaga hai-fale-maine.
JOH 18:16 Haigeno Pitaꞌa fiate he-tino mainegeno anima Yisasiꞌenema tokaeno nemaiya kanomoꞌa fiateꞌma yagai-mainea munaꞌmofena mo hanepaino Pitana avaleno emaine.
JOH 18:17 Neꞌegeno fiateꞌma yagai-mainea munaꞌmoꞌa Pitafena mage huno havige “Kagaya mani kanomona tuelufuꞌa (12) vayapiti kano mainano?” huno havigegeno “Aꞌao nagaya ani vayapiti kanoa omainoe.” huno hapaiye.
JOH 18:18 Tusiꞌa yasimo higeꞌya aliꞌya vayaꞌene ati vayaꞌene ata kae-taleꞌya he-tiꞌya tota huꞌya mainageno Pitaꞌa amakaiꞌene atale he-tino augafa tota huno maine.
JOH 18:19 Ala mono noteꞌma hagote kava kanomoꞌa Yisasifena “Kagaiꞌenema tokaeꞌya nemaiya anagakaheꞌene kagayama hu-ma-veli mainana keheꞌene naha-paiyo.” huno havinege.
JOH 18:20 Havigegeno Yisasiꞌa mage hie “Nagaya mukiꞌa veaꞌmogamina fufute hama-nepauvane. Mukiꞌa yupa Yuta veaꞌnea melitaluma haya mono nopiꞌene ala mono nopiꞌene hama-nepauvane. Fala-kiꞌna hama-opainoe.
JOH 18:21 Naꞌa higeka nagaila nahavi-negane? Nagai kema nehaviya vayafena hama-nepauva kehena hama-vigo. Nagayama hama-pai-mainoa kea ago havilinae.” huno hie.
JOH 18:22 Higeno nago ati kanomoꞌa he-tino maineleti Yisasiꞌma mani kema nehiana augosafi ai-ko-nelino mage hie “Naꞌa higeka kagaya ala mono note hagote kava kanomo aulagafina mani kea nehane?” huno hie.
JOH 18:23 Higeno Yisasiꞌa kenonaꞌa mage hie “Kefo kema hu-mainesugekahena nagaya kefo kema hua kea hu-falote huka naha-paiyo. Nagayama kanale kema hu-mainesugekahena naꞌa higeka nai-ko-neline?” huno hie.
JOH 18:24 Higeꞌya nofiꞌma kitaya nofila kalu he-oꞌa-teneꞌya Anasiꞌa ala mono note hagote kava kanoa, Kaiyafasitega hu-tegeꞌya avaleꞌya umainae.
JOH 18:25 Neꞌvageno Saimoni Pitaꞌa atale maineno ata lota huno mainegeꞌya agaife mage huꞌya hae “Kagaiꞌenena mani kanomona tuelufuꞌa (12) vayaꞌamopiti kano mainano?” huꞌya hageno Pitaꞌa avane huno mage hie “Aꞌao nagaya ani kanoa omainoe.” huno hie.
JOH 18:26 Higeno ala mono noteꞌma hagote kava kanomo aliꞌya kanoꞌamona, Pitaꞌma agesama ai-fakali-talegeno asaga hu-lavi-mainea kanomo anagapiti kanomoꞌa mage huno hie “Kagaya Yisasiꞌene hoyafina mainaꞌageꞌna kage-mainoe.” huno hie.
JOH 18:27 Higeno Pitaꞌa nagoꞌene avane huno “Aꞌao nagaila onagenane.” huno higeno aupaꞌa kokolemoꞌa age ai-maine.
JOH 18:28 Yisasina Kaiyafasi nopinagati Lomu kamanile ala kava kanomoꞌa kaiyekema hu-neꞌamatea note kegeꞌafiti avaleꞌya umainae. Yuta vayaꞌmogamina mono keꞌamimoꞌa mage huno hu-maine “Afa vayaꞌene tokaetama maisayana amakai kava hutama kefo vaya mainaya yafe ala imu kavela onegahae.” huno hu-mainea yafe Yuta vayaꞌmoꞌya ala imu kaveꞌma mo nesaya yafenagiꞌya ani nopina ohainae.
JOH 18:29 Kumatega mainageno Pailatiꞌa, Lomu kamanile ala kava kanomoꞌa, amakaite eno mage huno hama-vige “Tamakaya naꞌane keleti mani kanoa kaiyekea hu-tegahae?” huno hie.
JOH 18:30 Higeꞌya kenonaꞌa mage huꞌya hapaiye “Mani kanomoꞌma kefo kavaꞌma ohuneleꞌasipa avaleta kagaitela omoteꞌasine.” huꞌya hae.
JOH 18:31 Hageno Pailatiꞌa eteno mage huno hama-paiye “Tamakaya avaletama tamakaitami mono keleti kaiyekea hu-teho tamakaitami yane.” huno hie. Higeꞌya Yuta vayaꞌmoꞌya mage huꞌya hu-mainae “Kagaya kamanimoga huka taumono malenana kemoꞌa nago kanoa haegeno ofalino.” huka hu-mainane* huꞌya hae.
JOH 18:32 Nayona Yisasiꞌa mage huno hu-maine “Nagayama falisua yana yafaga yosale nahaeꞌya nasaesageꞌna faligahue.” huno hu-maineane. Lomu kamani vayaꞌmoꞌyage vayala yafaga yosalela hamaeꞌya asaigeꞌya fali-mainae. Yisasiꞌa agoꞌma hu-mainea kemoꞌa falote huno tamage hisia yafe Yuta vayaꞌmoꞌya mani kea hu-mainae.
JOH 18:33 Hageno Pailatiꞌa ataleno kaiyekema hu-neꞌama-tea nopinaga haino maineno Yisasife ke higeno vigeno mage huno havige “Kagaya Yuta veaꞌnogami sauve kano mainano?” huno havige.
JOH 18:34 Havigegeno Yisasiꞌa kenonaꞌa mage hie “Kagaya kagu kagesafiti mani kea nehapi ifi nagoꞌa vayaꞌmoꞌya nagaifena kaha-paigekahe nehano?” huno eteno havige.
JOH 18:35 Havigegeno Pailatiꞌa kenonaꞌa mage huno havige “Nagaya Yuta kano mainogeka nehano? Kagai nofi vayaꞌene ala mono note kava vayaꞌene kavaleꞌya nagaite neꞌaya yafena kagaya na havi kava hu-mainane huꞌna kahavi-negoe.” huno hie.
JOH 18:36 Higeno Yisasiꞌa kenonaꞌa mage hie “Nagaya kava yagaisua kumala ma mopafina omalene. Inagi ma mopafima kava yagaisua kumaꞌniꞌama haneleꞌasipa aliꞌya vayaꞌnimoꞌya kamea hageꞌya nagaila navaleꞌya Yuta vayaꞌmogami amayapina onataleꞌasine. Inagi nagaya kava yagaisua kumaꞌniꞌa ma mopafina omalene.” huno hie.
JOH 18:37 Higeno Pailatiꞌa mage huno hie “Ala sauve kano mainoe huka nehano?” huno higeno Yisasiꞌa kenonaꞌa mage hie “Kagaya nagaife ala sauve kano mainane hukama hana kea tamage nehane. Nagaya itaꞌnimoꞌma natenelegatiꞌma emaineana ke-lamaꞌage hu-falote hisua yafe ma mopafina emainogi ke-lamama haviꞌya amakupi malenaya veaꞌmoꞌya nagayama hua kea nehaviye.” huno hie.
JOH 18:38 Higeno Pailatiꞌa Yisasife mage hie “Ani ke-lamage kea naꞌane ke?” huno nehuno Pailatiꞌa hati-lavino kumatega viaꞌyamo Yuta vayate mage huno mo hama-paiye “Kefo kavaꞌma hia yana ati ayegetoana omalene.
JOH 18:39 Tamakaya mukiꞌa yupa ala imuma kigahena naha-vigageꞌna nago kanoa kina nopitila afaꞌa avaleꞌna nelamamuanagi na yafe nelamahaiye Yuta veaꞌmogatamina sauve kanotamia afaꞌa atalesugeno visio?” huno hama-vige.
JOH 18:40 Hama-vigegeꞌya ala kefiti mage huꞌya hae “Agaila neꞌataleka Palapasina tamisane.” huꞌya hu-mainae. Palapasiꞌa vaya nehamaeno musufa yamaꞌage hume hume nehaiya kano mainea kanohe hu-mainae.
JOH 19:1 Pailatiꞌa Yisasina avaleno “Nofi kaꞌyoteti haifu amiho.” huno hama-paigeꞌya haifu aminae.
JOH 19:2 Amiteꞌya ati vayaꞌmoꞌya avetaꞌnafa nofiteti tumano kula talo huteꞌya anute vai-teteꞌya ala kava kanomo fai-neꞌalia augafa haesa kena vai-teneꞌya Yisasiꞌma he-tino mainele eꞌya Yisasifena “Felugae. Yuta vayaꞌmogami ala sauve kanomogae.” huꞌya nehuꞌya augosafi amayateti ainagolapeꞌya nehaeꞌya hu-mainae.
JOH 19:4 Hageno Pailatiꞌa kumatega hati-lavino eaꞌyamo alitaluma hu-mainaya Yuta vayafe mage huno hie “Atiyeꞌna agoana nagoke kefo ya kanoꞌa omalegeꞌna tamakaya mani kea havisae huꞌna avaleꞌna tamakaite hati-laviꞌna neꞌoe.” huno hie.
JOH 19:5 Higeno Yisasiꞌa kumategama hati-lavino eana avetaꞌnafa nofitetiꞌma talo hu-malaya tumano kula anute vai-teteꞌya haesa kena fai-tetageno hati-lavino elavigeno Pailatiꞌa mage huno hie “Ageho mani kanoa ma maine.” huno hama-pai-maine.
JOH 19:6 Hama-paigeꞌya mono note kava vayaꞌmoꞌyaene ati vayaꞌene Yisasina ageteꞌya ala kegefafiti mage huꞌya hae “Yafaga yosale nili hetama asaigeno falino. Yafaga yosale nili hetama asaigeno falino.” huꞌya hae. Hageno Pailatiꞌa kenonaꞌamia mage huno hama-paiye “Tamakaitami avaletama yafaga yosalela nilia hetama asaiho. Nagaya nago kefo yamaꞌahena ati-yoana omaleanagiꞌna ohaegahue.” huno hie.
JOH 19:7 Higeꞌya Yuta vayaꞌmoꞌya kenonaꞌa mage huꞌya hapaiye “Yisasiꞌa agaiꞌahena mage huno hu-maine ‘Nagaya Anumaya Koti nafaꞌne mainoe.’ hunoꞌma hiana tagaipina kahegi kemoꞌa mage hu-maine ‘Maniꞌa augafa kema hisia kanomoꞌa falisie.’ huno hu-maineafe menia Yisasiꞌa mani kema hu-mainea yafe falisie.” huꞌya hae.
JOH 19:8 Hageno Pailatiꞌa ani kea haviteno tusiya huno amaꞌyoa neꞌaiye.
JOH 19:9 Amaꞌyo aigeno Pailatiꞌa eteno kaiyekema nehavia nopinaga hai-faleno maineno Yisasifena mage huno havige “Kagaya hanategati emainane?” huno havigeanagi Yisasiꞌa kenonaꞌa ohune.
JOH 19:10 Ohigeno Pailatiꞌa mage huno hapaiye “Kagaya naꞌa higeka nagelela noꞌaline? Nagaya tokiyaꞌniene kanogiꞌna ‘Kina nopitila atalegahae.’ huꞌnama hisuana afaꞌa katalegahae. ‘Yafaga yosale nili hetama asaigeno falino.’ huꞌnama hisuana aniꞌa hu-ga-tegahae. Kagaya mani kea nohavino?” huno havige.
JOH 19:11 Havigegeno Yisasiꞌa kenonaꞌa mage huno hapaiye “Anafinaga mainea Anumaya Kotiꞌa kagaiꞌma tokiyama okamineleꞌasipa nagaila natafa ohateꞌasinagi amakayama navaleꞌya kagai kayapima natenaya vayaꞌmogamina kefo yaꞌamimoꞌa kagai kefo yakamona agaseno kasagoꞌya kefo yaꞌami hane.” huno hie.
JOH 19:12 Higeno Pailatiꞌa anima hia kea haviteno “Hanaꞌa huꞌna atalesugeno visie?” huno kafe ati-neꞌayegeꞌya Yuta vayaꞌmoꞌya ala kegefafiti mage huꞌya hu-mainae “Nagoke kanomoꞌa Yisasiꞌma hia kava huno agaiꞌahe ‘Nagaya ala sauve kanoma mainoe.’ hunoꞌma hisia kanomoꞌa Sisana kameꞌa maine. Kagaya mani kanoma atalesanageno visiana kagaya tagaila ala sauve kanotia, Sisana, kanapaꞌa omainane.” huꞌya hae.
JOH 19:13 Hageno Pailatiꞌa ani kema haya kea haviteno Yisasina avaleno hati-lavino kumatega elavino eaꞌyamo ala kaiyekema havi kanomo siale emaine. Ani siama malenaya aupaligahena Yuta vayaꞌmogami kefina Kapatae huꞌya nehae. Ani aupaligahena tagai kefina amalagu aiꞌya yafa malenaya aupaligae huta hugahune.
JOH 19:14 Ani kanafina Anumaya Kotiꞌa amakinagomogami amaugafama ali-gati-mainea yafe Yuta veaꞌmoꞌya amakesa hao hinageꞌya havisaya yafe imu ki kanaꞌamimoꞌa aupa higeꞌya talo tala hisaya yafe yagemoꞌa euno amanutule evigeno Pailatiꞌa Yuta veaꞌmogamina mage huno hama-paiye “Ala sauve kanotamimona ageho.” huno hie.
JOH 19:15 Higeꞌya amakaya ala kegefafiti mage huꞌya hae “Aoteꞌyamaꞌae. Aoteꞌyamaꞌae. Yafaga yosale nili hetama asaigeno falino.” huꞌya hageno Pailatiꞌa mage huno hama-paiye “Nagaya tamakai sauve kanotamia yafaga yosale nili heꞌna asaisue hugetama nehao?” huno higeꞌya mono note kava vayaꞌmoꞌya mage hae “Tagaila nago ala sauve kanotia omaine. Sisaꞌa agaiꞌage nagoke maine.” huꞌya hae.
JOH 19:16 Hageno Pailatiꞌa “Yisasina yafaga yosale nili hetama asaiho.” huno avaleno amayapi amamine.
JOH 19:17 Yisasina avaleꞌya vageno haeꞌya asaisaya yafaga yosa agaiꞌa ko-fino anu ayamufae huꞌya nehaya agoꞌyalega umaine. Ani agoꞌyamo agia Yuta vayaꞌmogami kefina Kologotae huꞌya nehae.
JOH 19:18 Ani agoꞌyafi avaleꞌya vayaꞌamoꞌya yafaga yosale nilia heꞌya asai-malenae. Tole kanolataꞌene hanaote yafaga yosale aluga aluga atupale hanaeꞌya asai-maleneꞌya Yisasina amuꞌnoꞌanifi nilia heꞌya asai-malenae.
JOH 19:19 Asai-maletageno Pailatiꞌa nago avona kaeno Yisasina nilima he-malaya yafaga yosale asai-malene. Ani avomoꞌa mage hie “Nasaleti Yisasiꞌe, Yuta vayaꞌmogami sauve kanoa ma maine.” huno kae-malene.
JOH 19:20 Kae-malenegeꞌya Yisasiꞌma yafaga yosale asai-malenaya kaiyaga ala kumaꞌmo aupaꞌale haeꞌya asai-malayanagiꞌya mukiꞌa Yuta veaꞌmoꞌya ani avona hapaliꞌya havimainae. Pailatiꞌa tagufa (3) kefiti kae-malene. Yuta vayaꞌmogami kefitiꞌene Lomu vayaꞌmogami kefitiꞌene Kaliki vayaꞌmogami kefitiꞌene kae-malenegeꞌya hapaliꞌya havimainae.
JOH 19:21 Haviya yafe Yuta vayaꞌmogami mono note kava vayaꞌmoꞌya Pailatifena mage hae “Kagaya ‘Yuta vayaꞌmogamina ala sauve kanoꞌami ma maine.’ huka okaeka ma ke huka kao ‘Nagaya Yuta vayaꞌmogami ala sauve kanoꞌami mainoe hunoꞌma hia kanoa ma maine.’ huka kao.” huꞌya hae.
JOH 19:22 Hageno Pailatiꞌa mage hie “Kae-malenoa kea hai kae-malenoe.” huno hie.
JOH 19:23 Ati vayaꞌmoꞌya Yisasina yafaga yosale nili heꞌya asai-maleteꞌya kenaꞌa foꞌa (4) hetaꞌma vaiꞌya ali-mainae. Ayaꞌaya siotaꞌaene aligahe agayana mukiꞌa analegati afetegama lavi-maineana aye ohati siota hane.
JOH 19:24 Ohati siota hanea yafe ani ati vayaꞌmoꞌya kea mohu mehu huꞌya mage hae “Hatata ohuta afaꞌa musufa yama nehaya yokaloa kasi nelesunageno tagasesimoꞌa alisie.” huꞌya amakaiꞌami hu-mainae. Aniꞌama haya kavala Anumaya Koti kefima nayoma kae-malenaya kemoꞌa ago efalote huno tamage nehie. Anima nayoma kae-malenaya kemoꞌa mage humaineane “Kenaꞌniꞌa fako huꞌya neꞌaliꞌya nago kenaꞌniꞌa kasi yokalo-leꞌya amakasesimoꞌa aligahie.” huꞌya kae-malenayane. Kae-malenayanagiꞌya ati vayaꞌmoya mani kavala hu-mainae.
JOH 19:25 Hageꞌya Yisasima asai-malenaya yafaga yosamo avatela Yisasina itaꞌamoꞌene nunaꞌamoꞌene he-ti-mainaꞌe. Anakaiꞌene Kalopasina aꞌamoꞌa Maliaꞌene hamoꞌamoꞌa Magatala kumate Maliaꞌene he-ti-mainae.
JOH 19:26 He-ti-mainageno Yisasiꞌa itaꞌamona ageteno agaiꞌenema tokaeꞌya nemaiya anagapiti hau ayamopafima hau-mainea kanomoꞌna, Yoniꞌnae, itaꞌamo avate he-titaꞌa mainoꞌageno taꞌageteno itaꞌamofena “Aꞌmogae namona kagaikaꞌa nafaꞌnekaꞌae.” huno hie.
JOH 19:27 Huteno nagaifena “Namona itakamoꞌe.” huno higeꞌna nagaya ani yupa Maliana yagaigahe noniꞌalega avaleꞌna umainoe.
JOH 19:28 Ani kea huteno Yisasiꞌa “Mukiꞌa aliꞌyaꞌniꞌa ago aliꞌna haꞌno hue.” huno agesafinaga havimaine. Nayoma Anumaya Koti kema kae-malenaya kemoꞌa efalote huno tamagema hisia yafe mage hie “Life nenage.” huno hu-maine.
JOH 19:29 Higeꞌya nofi alagafiti falote hia tina nagola havate-mai keꞌayola aliꞌya havagoꞌyafa kana yana ani lipi ayeteꞌya kaꞌyote vaiꞌya ali-saga huꞌya Yisasina avayale malenae.
JOH 19:30 Malageno Yisasiꞌa mayu mayu huno neteno mage hie “Nenafagae naha-pai-mainana aliꞌyana ago aliꞌna haꞌno hue.” huno nehuno ageꞌya ainamagino agu nafaꞌneꞌamo atalegeno vigeno fali-maine.
JOH 19:31 Sapati yupahe talo tala hisaya yupagino ega ala Sapati kana falote hisia yafe Yuta vayaꞌmoꞌya anima yafaga yosaleꞌma hamae-malaya vayaꞌmogami amaugafamoꞌma Sapatileꞌma yafaga yosale hanesia yafena ohamaigeꞌya Pailatife mage huꞌya mo havigae “Ati vayaꞌmoꞌya amaiya ali kofa hisageꞌya aupaꞌa falisageꞌya hipoꞌya huꞌya aliꞌya visae.” huꞌya mo havigae.
JOH 19:32 Hageno Pailatiꞌa ati vaya hama-paigeꞌya mogayana Yisasiꞌenema yafaga yosale asai-malaya kanolatamogani anaiya meli kofa hu-mainae.
JOH 19:33 Ali kofa huteꞌya Yisasina megayana ago fali-mainegeꞌya megeteꞌya aiya ali kofa ohunae.
JOH 19:34 Ali kofa ohageno nago ati kanomoꞌa keveꞌaleti Yisasina haohipafi meyegeno aupaꞌa ani keve kapitila kolamoꞌene timoꞌene taki-lavi-maine.
JOH 19:35 Taki-lavigenoꞌma age-mainea kanomoꞌa tamaha-nepaiye. Tamaha-nepaiya kea tamageꞌage ke hanea yafe agaiꞌa havilama hu-lineno tamaha-nepaiyafe tamakayaenena Yisasifena havitama tamakupi maletama tamametiti hisaya yafe tamageꞌage ke tamaha-nepaiye.
JOH 19:36 Nayona Anumaya Koti kema kae-malenaya kemoꞌa mage hu-maineane “Amakaya nago ayamufaꞌa ali kofa ohugahae.” huꞌya kae-malenayane. Nagi nagola Anumaya Koti kema kae-malenaya kemoꞌa mage huno hu-maineane “Haohipafina keveletiꞌma aye-mainea kanomona agegahae.” huꞌya kae-malenayane. Kae-malenaya kemoꞌa falote huno tamagema hia yafe mani kavala hu-mainae.
JOH 19:38 Yosefeꞌa Alimatiyae huꞌya nehaya kumate nemaiya kanogino Yisasi ke havino akave nemalea kanogi Yuta vayafe koli huno Yisasifema ametiti nehia yana fala-ki-lineno mage huno Pailatina mo havige “Yisasina augafaꞌa aligahe nehue.” huno mo havige. Havigegeno Pailatiꞌa “E.” huno higeno Yosefeꞌa viaꞌyamo Yisasina augafaꞌa mo hipoꞌya huno alino emaine.
JOH 19:39 Nikotimasiꞌa hagoteno Yisasite hanipinaga emainea kanomoꞌa Yosefena mo ha-maegahe kule fuki kana manaꞌage tina tole yosafiti he-fino ali havigu higeno manaꞌage tina falote higeno sigelile mo malegeno tetiꞌa (30) kilo falote higeno alino emaine. Ani tole yosalatamogani anakia meaꞌene aloꞌene alino emaine.
JOH 19:40 Ani tole kanolatamogania vaꞌaꞌyamogani Yisasina augafaꞌa mo hipoꞌya huꞌana mopale maleneꞌana manaꞌage tina fale-teteꞌana kefe kana kenaleti augafalela ai-galaki galaki huꞌana haꞌya kiteꞌana aye-gasagi-malenaꞌe. Mukiꞌa yupa Yuta vayaꞌmoꞌya vayaꞌamima faligeꞌya aniꞌa huꞌya neꞌamataya kava hu-tenaꞌe.
JOH 19:41 Ani kaiyaga Yisasina yafaga yosale nilima heꞌya asai-malenaya kaiyaga nago hoya hane. Ani hoyafina nagola vayaꞌma he-vai-ma-tesaya yafa kana, yaufa kafi-malenayane. Anifina nago vayala he-vai-oꞌama-tenaya yafa kapi aliꞌya mo he-vai-tenae.
JOH 19:42 Ani yupa Sapatihe haviꞌya talo tala hisaya kanafinagiꞌana ani matimatila aupateꞌma hanea yafe ani tole kanolatamogania Yisasina augafaꞌa aliꞌana anifi mo malenaꞌe.
JOH 20:1 Sota yupa kola otinegeno Magatala kumate Maliaꞌa natemaꞌa Yisasina he-vai-tenaya komulega umaine. Uno mogeana komumo avayaleꞌma aiso hu-malenaya yafana ago alike-li-talenageno avayalela omalegeno moge-maine.
JOH 20:2 Mogeteno eteno aiya-yeno Yisasiꞌma nehaiya kanoene Saimoni Pitaꞌene mainaꞌale eno mage huno hana-paiye “Alatimona komufitila ago aliꞌya hanatepi atenae.” huno hana-paiye.
JOH 20:3 Hana-paigeꞌana haviteꞌana Pitaꞌene Yisasiꞌma nehaiya kanoene Yisasi komulega umainaꞌe.
JOH 20:4 Anaiya-yeꞌana ani komulega vaꞌaleti Yisasiꞌma nehaiya kanomoꞌa Pitana agaseno aupaꞌa komule hagoteno umaine.
JOH 20:5 Uteno mope hu-maineno ageana Yisasina aye-gasagi-tenaya kenaꞌage hanegeno ageanagi anifinaga hai-ofalene.
JOH 20:6 Hai-ofaleno mainegeno Saimoni Pitaꞌa akave eaꞌyamo ani komufinaga aupaꞌa hai-fale-maine. Haino mogeana nagoꞌa aye-gasagi-tenaya kena neꞌageno anuteꞌma ki-tenaya kenaene Yisasina augafaleꞌma aye-gasagi-tenaya kenaene nagopi tokaeno omalenegi aote kaiyaga aye-gafage-kino malenegeno haino moge-maine.
JOH 20:8 Neꞌagegeno Yisasiꞌma nehaiya kanomoꞌa komuleꞌma hagoteno umainea kanoa anifinaga hai-faleno mo neꞌageno komufitiꞌma he-ti-mainea yafe “Tamage nehie.” huno havino agupi maleno ametiti nehie.
JOH 20:9 Ani kanafina mukiꞌa anagaꞌamoꞌya Anumaya Koti kema kae-malenaya kea havilama ohunae. Ani kemoꞌa mage huno hu-maine “Yisasiꞌa fali-mainesifiti he-tigahie.” huꞌya kae-malenaya kemona havilama ohunae.
JOH 20:10 Anakaya Yisasiꞌenema tokaeꞌana nemaiꞌa kanolatana anifinagati hati-laviꞌana noꞌanilega eteꞌana umainaꞌe.
JOH 20:11 Maliaꞌa ani yafakamo avayale he-tino maineno avi neꞌateno ape huno ani komufinaga aulu heno neꞌage.
JOH 20:12 Ageana tole ensole kanolatana efeꞌage kenaꞌani failiꞌana Yisasi augafama malenaya yate mopale mainaꞌe. Nago kanoa anuma malenalega maigeno nago kanoa aiyama malenalega maigeno hu-mainaꞌageno anake-maine.
JOH 20:13 Neꞌanakegeꞌana Maliafe mage haꞌe “Aꞌmogae naꞌa higeka avia neꞌatane?” huꞌana havigaꞌageno Maliaꞌa mage huno hie “Alaniꞌamona aliꞌyama mo malaya kumala oꞌagenoa yafe avi neꞌatoe.” huno hie.
JOH 20:14 Nehuno mai-yahae huno ageana Yisasiꞌa he-ti-mainegeno ageanagi augosafina agelama ohune.
JOH 20:15 Agelama ohigeno Yisasiꞌa mage hie “Aꞌmogae naꞌa higeka avia neꞌatane? Tafe ati neꞌayane?” huno havigegeno Maliaꞌa agesafinaga mage huno hie “Ma kanoa hoyaleꞌma yagai-mainea kano maine.” huno agesafinaga nehavino mage huno hie “Musekaꞌa nehugi kagayama alika umainenukahena malenesana kumafena naha-paigeꞌna molino.” huno hie.
JOH 20:16 Higeno Yisasiꞌa mage huno hie “Maliao.” huno higeno ani aꞌmoꞌa maiyahae huno Yuta vayaꞌmogami kefiti mage huno hie “Laponae.” huno hie. Ani kemoꞌa takai kefina “Hu-lave-nelina kanomogae.” huno hie.
JOH 20:17 Higeno Yisasiꞌa mage hie “Nenafa mainelega ohainogi natafa ohuka naganaꞌnimogamina mage huka mo hama-paiyo ‘Nagaiꞌene tamakaiꞌene Nelafatega haigahe nehue. Nagai Anumaya Kotitegaene tamakai Anumaya Kotitegaene haigahe nehue.’ huꞌka mo hama-paiyo.” huno hie.
JOH 20:18 Higeno Magatala Maliaꞌa viaꞌyamo Yisasiꞌenema tokaeꞌya nemaiya anagaꞌamogamina mage huno hama-paiye “Nagaya Alaniꞌamona ago agoe.” huno nehuno “Nage mage huka hama-paiyo.” hunoꞌma hapaiya kea hama-pai-maine.
JOH 20:19 Yisasiꞌa fali-mainefitiꞌma he-ti-mainea Sotamona hanipinaga Yisasina aleveniꞌa (11) anagaꞌamoꞌya Yuta vayafena koliꞌami huꞌya fita kiꞌya tokiyaꞌage hu-maleteꞌya nopinaga alitalu huꞌya mainae. Mainageno Yisasiꞌa evaꞌyi huno amuꞌnoꞌamifi me he-ti-maineno mage hie “Tamaipamoꞌa falu nehinagetama maiho.” huno hama-paiye.
JOH 20:20 Hama-paiteno akaiꞌma ayapima nilima he-malenaya afuguꞌene haopafina kevema aye-mainaya afuguꞌene amave-neliye. Amave-ligeꞌya aleveniꞌa (11) anagaꞌamoꞌya Alaꞌamimona ageteꞌya amakuꞌamoꞌa tusiꞌa muse hia kava hae.
JOH 20:21 Hageno Yisasiꞌa nagoꞌene mage hie “Tamaipamoꞌa falu nehinagetama maiho. Nenafaꞌa hu-na-tenea augafa kava huꞌna nagaya tamakaila hu-nela-matoe.” huno hie.
JOH 20:22 Mani kema nehunoꞌa haimula fu huno neꞌamamino mage huno hie “Tamakaila Alu Aotage Avamula nelamamugi avaleho.
JOH 20:23 Nagoꞌa veaꞌmogamina ai-geꞌama-tetama kefo yaꞌamima atale-ma-tesayana Anumaya Kotiꞌa aniꞌa huno ani kefo yaꞌamia ai-geꞌama-teno atale-ma-tegahie. Kefo yaꞌamima ai-geꞌama-tetama atale oꞌamatesaya veaꞌmogamina Anumaya Kotiꞌa kefo yaꞌamia ai-geꞌama-teno atale oꞌama-tegahie.” huno hama-paiye.
JOH 20:24 Yisasiꞌma amakaite evaꞌyima hu-mainea yupa aleveniꞌa (11) anagaꞌafitila nago kanoa amakaiꞌenena omaine. Ani kanoa, Tomasiꞌe, nago agia Titimasiꞌe, tagai kefina kuyave nafaꞌne, ani kanoa omaine.
JOH 20:25 Omainegeꞌya amakaya “Tagaya Alatimona age-mainone.” huꞌya hane-paigenoꞌa Tomasiꞌa mage hie “Yisasina nilima he-malenaya afuguꞌma oꞌageꞌna, naginagoma nilimo kapima omaleꞌna haopafima keve honomuꞌma aye-malenaya afugupima nayama oꞌvainuꞌnahena mani kea aliꞌna nagupina maleꞌna nametitia ohugahue.” huno hie.
JOH 20:26 Seveniꞌa (7) kana maiteꞌya Yisasina aleveniꞌa (11) anagaꞌamoꞌya eteꞌya ani nopi mainageno Tomasiꞌa amakaiꞌene maine. Fita kiꞌya tokiyaꞌage hu-malayanagi Yisasiꞌa evaꞌyi huno amuꞌnoꞌamifi me he-ti-maineno mage hie “Tamaipamoꞌa falu nehinagetama maiho.” huno hie.
JOH 20:27 Tomasifena mage hie “Kaginagoa male me maleka nayapi nafugula ago. Kayana nahaopaleꞌma hanea nafugupina vaika ago. Ageteka tole kagesama havina kagesa neꞌataleka nagaifena havika kagupi maleka kametiti huo.” huno hie.
JOH 20:28 Higeno Tomasiꞌa mage hie “Kagaya Alaniꞌamogae Anumaya Kotiꞌnimoga mainane.” huno hie.
JOH 20:29 Higeno Yisasiꞌa mage hie “Kagaya agoꞌma nagana yafe kagupina maleka kametitia nehananagi onagenesaya veaꞌnemoꞌyama haviꞌya amakupi maleꞌya amametitima hisaya veaꞌmoꞌya tusiꞌa muse hugahae.” huno hie.
JOH 20:30 Yisasiꞌa aleveniꞌa (11) anagaꞌamogami amaulagafina aluꞌa aluꞌa tokiya avameꞌyaꞌyaga hu-maineanagi ani yana mukiꞌa mani autaꞌmafina okaenoe.
JOH 20:31 Okaenoanagi manima kae-maloa kea tamakaife huno Yisasiꞌa, Anumaya Kotina nafaꞌneꞌamoꞌa, tagu tamema ali-gatisia kano maine hutamama havitama tamakupi maletama tamametitima hisaya yafe kae-malenoane. Ani yafe havitama tamakupi maletama tamametiti hisayana Yisasi agileti agola maige maige hisaya tamahaimula aligahae huꞌna kae-malenoe.
JOH 21:1 Haenagaꞌa Yisasiꞌa eteno agaiꞌenema tokaeꞌya nemaiya anagaꞌamogami amaule ma kava huno Taipiliasi tikotumo agegayalega evaꞌyi hu-maine.
JOH 21:2 Saimoni Pitaꞌene, Tomasina nago agia Titimasiꞌe, tagai kefina kuyave nafaꞌne, Natanioloꞌa, Kalili hanea kumala Kena kumate kanoene, tole Sepeti nafaꞌnelataꞌa Yoniꞌene, aganaꞌamoꞌene, tole Yisasina aleveniꞌa (11) anagaꞌaene mainae.
JOH 21:3 Mainageno Saimoni Pitaꞌa mage huno hama-pai-maine “Nagaya noyame kuꞌya hugahe neꞌue.” huno higeꞌya mage hae “Kagaiꞌene ugahune.” huꞌya hapaiteꞌya tipi kalefi hai-saga humaiꞌya ani kegela vayanagi nagoke noyamea oꞌalinae.
JOH 21:4 Oꞌaligeno yagea hai vaꞌyi hugahe nehigeno Yisasiꞌa ti agegayalega he-ti-maiyanagi agaiꞌenema tokaeꞌya nemaiya anagaꞌamoꞌya Yisasiꞌe huꞌya agelama ohunae.
JOH 21:5 Agelama ohageno Yisasiꞌa mage huno hama-vige “Vae nafaꞌneꞌnimogatama nagoꞌa noyamea neꞌalifi noꞌaliye?” huno hamavi-gegeꞌya “Aꞌao noꞌalune.” huꞌya hapai-mainae.
JOH 21:6 Hapaigeno Yisasiꞌa mage huno hama-paiye “Tamakaya kukonagona tipi kalemona tamaga kaiyagamo haikanagati hagaꞌyu hutama malesayana noyamea aligahae.” huno hama-paigeꞌya kukonagona aniꞌa huꞌya hagaꞌyu hayana tusiꞌa noyame aligeno kanaꞌage higeꞌya alisaga hisaya yafena tusiꞌa ya hu-mainae.
JOH 21:7 Yisasiꞌenema tokaeꞌya nemaiya anagapiti nehaiya kanoꞌamoꞌa Pitana mage huno hapaiye “Agaya Alatimoꞌe.” huno hapaiye. Hapaigeno Saimoni Pitaꞌa anima hia kea nehavino aupaꞌa augafale anoꞌya asagi-taleno aliꞌyana neꞌalileti eteno aupaꞌa alino vai-lino tipina asaga hu-lavino Yisasitega neꞌvie.
JOH 21:8 Vigeꞌya ani tipi kalea aluꞌalelomagi vani hataleti (100) mita aupaꞌale maineꞌya nagoꞌa Yisasiꞌenema tokaeꞌya nemaiya anagaꞌamoꞌya kukonagona avayu huꞌya ti agegayalega emainae.
JOH 21:9 Ti agegayalega me maleteꞌya agayana ata nelegeno nago noyamene hame mayaene ani atafina hanegeꞌya age-mainae.
JOH 21:10 Neꞌagageno Yisasiꞌa mage huno hama-paiye “Menima aliya noyamefitila nagoꞌa alitama eho.” huno hama-pai-maine.
JOH 21:11 Hama-paigeno Saimoni Pitaꞌa tipi kalefi hai-saga hu-maino kukonagona avayu huno ti agegayalegama eana kasagoꞌya noyame, vani hataleti fifiti taliꞌa (153) noyameyaga ani kukonagopina hiya hu-maiyanagi ani kukonagomoꞌa ailagatoa ohune.
JOH 21:12 Yisasiꞌa mage huno hama-paiye “Tamakaya etama kavela me neho.” huno hama-paigeꞌya agaiꞌenema tokaeꞌya nemaiya anaga amamaꞌyoma aiya yafe “Kagaya lagae.” huꞌya haviokenagi “Alatimo maine.” huꞌyama amakesafinaga haviya yafe haviokenae.
JOH 21:13 Yisasiꞌa atale eaꞌyamo hame mayaene noyamene melino amamine.
JOH 21:14 Yisasina komufima he-vai-tageno etenoꞌma he-ti-maineana tole yupa age-mainaleti eteno mani kavaꞌma hiana napa tali (3) kanale evaꞌyi higeꞌya agaiꞌenema tokaeꞌya nemaiya anagaꞌamogata taulagafiti age-mainone.
JOH 21:15 Kavela netageno Yisasiꞌa Saimoni Pitana mage huno havige “Saimonigae Yoni nafaꞌnemoga kagaya ma vayala amakaseka nagoꞌene kaguꞌa nenamino?” huno havige. Havigegeno Pitaꞌa mage huno hie “E, Alaniꞌamogae kagaya ago nehavine kagaifena nenahaiye.” huno higeno Yisasiꞌa mage huno hapaiye “Kagaya nagai sipi sipi nafaꞌneyaga kavela amamio.” huno hapai-maine.
JOH 21:16 Hanepaino nagoꞌene mage huno hie “Saimonigae Yoni nafaꞌnemoga kaguꞌa havika ago nenamino?” huno havigegeno Pitaꞌa mage huno hapaiye “Kagaya ago nehavine nagaya kagaifena nenahaiye.” huno higeno Yisasiꞌa mage huno hapaiye “Kagaya sipi sipiyagaꞌnilela kava yagaiyo.” huno hapaiye.
JOH 21:17 Hapaiteno nagoꞌene napa tali (3) kanale mage huno havige “Saimonigae Yoni nafaꞌnemoga nagaifena negahaiyo?” huno higeno napa tali (3) kanaleꞌma “Kagaya nagaifena negahaiyo?” hunoꞌma havigea yafe Pita aipamoꞌa kanaꞌage higeno mage huno hie “Alaniꞌamogae mukiꞌa yana ago havi-mainane. Nagaya kagaifema nenahaiya yafena ago nehavine.” huno hapaigeno Yisasiꞌa mage huno hie “Kagaya sipi sipiyagaꞌnia kavela amamio.” huno hapai-maine.
JOH 21:18 Hapaiteno mage hie “Tamage-lafa huꞌna kaha-pauve kagaya neyama maineka kamu nofila ki-takalo hu-maleteka ‘Visue.’ hukama hana kumatela neꞌvananagi haenagaꞌa kosunama lesanana kayana alisaga hu-linesanageꞌya nagoꞌa vayaꞌmoꞌya kenaka fai-ga-teteꞌya ‘Oꞌugahuema.’ hukama nehisana kumatela afaꞌa kavaleꞌya ugahae.” huno hie.
JOH 21:19 Anima hia kemona aepaꞌamoꞌa mage huno hu-maine “Haenagaꞌa kefo vayaꞌmoꞌya katafa huꞌya kahaesagekama falisana yateti Anumaya Kotina ala agi amigane.” huno aepaꞌa huteno Yisasiꞌa Pitafena “Nakave eno.” huno hu-maine.
JOH 21:20 Yisasiꞌene tokaeꞌya nemaiya anagapiti hau ayamopafima hau-mainea kanoa kaveꞌma ne-mainaya yupa Yisasina avaꞌale maineno mage huno havige-maineane “Alaniꞌamogae kagaila kagesiꞌma huno kamema hu-ga-tesia kanoa hana kanomoꞌe?” huno havigea kanomoꞌa Yisasiꞌene Pitagani anakave neꞌvigeno Pitaꞌa maiyahae huno age-maine.
JOH 21:21 Ageteno Pitaꞌa Yisasina mage huno havige “Alaniꞌamogae ani kanoa haenagaꞌa hana augafa kava hugahie?” huno havige.
JOH 21:22 Havigegeno Yisasiꞌa mage huno hapaiye “Nakaiꞌma nahaisigeꞌnama ma mopafima eteꞌna esua yupa afaꞌa mainesigeꞌnama esuana kagai yano? Kagaya nakave eno.” huno hapaiye.
JOH 21:23 Hapaiya kemoꞌa anagaꞌamogamipina mani kema hia kemoꞌa ute ete higeꞌya mage hae “Yoniꞌa ofaligahie.” huꞌya hayanagi Yisasiꞌa “Ofaligahie.” huno hu-oꞌa-tenegi “Nagaiꞌma nahaisigeꞌna ma mopafima eteꞌna esua yupa afaꞌa mainesigeꞌnama esuana kagai yano?” huno hu-maine.
JOH 21:24 Ani kema hayana Yoninihe hu-maine. Nagaya mukiꞌa Yisasiꞌma hu-mainea kavafena tamaha-nepaiꞌna avona kae-malenoe. Nagayama nehua kea tamage-lafa huꞌna havilinoa ke tamaha-nepauve.
JOH 21:25 Yisasiꞌa mukiꞌa alu ya alu yana hu-maineanagi nagoꞌa vayaꞌmoꞌya mani kema mukiꞌa nagoke nagoke avopima kayaleꞌasina mani avoꞌyagamoꞌa kasago higeꞌya malesaya kumaꞌmoꞌa mukiꞌa ma kotega nagesa havuana hiya hileꞌasine huꞌna nehue.
ACT 1:1 Tiofilasigae hagoteꞌna kaemalenoa autaꞌmafina Yisasiꞌma aepa heno ali-mainea aliꞌyaꞌene humaveli-mainea kene Anumaya Kotina Alu Aotage Avamuꞌmo tokiyaleti “Naꞌa maꞌa kava hiho.” huno Aposolo vayala* (agai kema nehavigeno humatenea vayala)* hamapaiteno ikapinaga haimainea yafeꞌene ago kaeꞌna kahapai-mainoe.
ACT 1:3 Yisasiꞌa tusiꞌa augafa agataiya alino faliteno hetino Aposolo vayaꞌmogami amaulagale efalote huno fali-mainefitiꞌma hetino mainea yafena havise huno kasagoꞌya tokiya kavaꞌage humaine. Fotiꞌa (40) yupa mopafina maineno efalote huno amaveliteno amataleno uteno eteno efalote huno Anumaya Kotiꞌma kava yagaisia yafena hamapai-maine.
ACT 1:4 Amakaiꞌenema mainea kanafina mage huno hamapai-maine “Tamakaya Yelusalemu kumala ataletama oꞌviho. Nenafaꞌma ‘Nago kanoa tamamigahue.’ hunoꞌma humainea kanoa avaletetama viho. Nagaya ani kanohena ago tamahapai-mainoane. Yoniꞌa titeti falelamateneanagi tamakaya aupa kana kanoꞌa maisayana Nenafana Alu Aotage Avamuꞌamoteti falelamategahie.” huno humaine.
ACT 1:6 Ani yupa Aposolo anagaꞌmoꞌya alitalu huꞌya maineꞌya Yisasifena mage huꞌya havinegae “Alatimogae menia ma kanafina Lomu kamani vayaꞌmogami amayapitila Isaleli vayaꞌmogati hafaleka kagaikaꞌa kava yagailatesanageno tokiyaꞌage hisifi?” huꞌya havinegae.
ACT 1:7 Havigageno Yisasiꞌa mage huno hie “Nenafaꞌa agaiꞌa tokiyaleti ‘Ma kanaene mukiꞌa kanafiꞌene maꞌa kava hugahue.’ huno huteno yagai-mainegi agayama hisia yana tamakaya havisaya yana omalene.
ACT 1:8 Omalenegi Anumaya Kotina Alu Aotage Avamuꞌamoꞌma tamakaiteꞌma esiana tokiyaꞌa tamamisigetama nagai kea Yelusalemuene mukiꞌa Yutia kotegaene Samelia kotegaene mukiꞌa ma mopamo atupale mainaya veaꞌnenena nagaifena hamapaigahae.” huno humaine. Yisasiꞌa ikapinaga haimaine.
ACT 1:9 Mani kea huno haꞌno huteno ageꞌya mainageno mopaleti haino haino haigeno nako siaꞌmoꞌa melino aiso hulino avaleno haimaine.
ACT 1:10 Haigeꞌya amakaya ikapinaga agesaga huꞌya ageꞌya maiya anayufi tole kanolatana efeꞌage kena failiꞌana efalote huꞌana amakaiꞌene anile heti-mainaꞌe.
ACT 1:11 Hetiꞌana mage huꞌana haꞌe “Kalili kumate veaꞌmogatama naꞌa higetama heti-mainetama ikatela aulula maitama nehae? Yisasiꞌa tamataleno ikapinaga ago haiyanagi manima ikapinaga haiya avamete huno eteno elavisigetama agegahae.” huꞌana hamapai-mainaꞌe.
ACT 1:12 Amakaya Olivi yosa hanea agoꞌyaleti taviteꞌya aupaꞌale lagiꞌya vani kilomita vayaꞌamoꞌya Yelusalemua uvaꞌyi humainae.
ACT 1:13 Uvaꞌyi huteꞌya nemaiya nona folamo huꞌya ana yapi kimale nopi haiꞌya mainae. Haiꞌya mainaya vayaꞌmogami amakia Pitaꞌe Yoniꞌe Yemesiꞌe Etaluꞌe Filipiꞌe Tomasiꞌe Patolomiuꞌe Matiuꞌe Alafiusi nafaꞌnea Yemesiꞌe Saimoniꞌe kanomona nako agia Selotiꞌe Yutasiꞌa Yemesi nafaꞌnene haiꞌya mainae.
ACT 1:14 Ani vayaꞌene aꞌneyagaene Maliaꞌa Yisasina itaꞌamoꞌene Yisasina aganaꞌamoꞌyaene nagoke amaku amakesale maineꞌya mukiꞌa yupa Anumayamotega muse huꞌya nunamu humainae.
ACT 1:15 Ani kanafina Yisasifema haviꞌya amakupi maleꞌya amametiti humainaya veala, vani hataleti tuetiꞌa (120) veaꞌne, mainageno Pitaꞌa amakai amuꞌnopi heti-maineno mage huno humaine.
ACT 1:16 “Nafuꞌnaganagatama Anumaya Kotina Alu Aotage Avamuꞌamoꞌa Teviti avayafiti hufalote huno nayona Yutasife humaine. Yisasima atafa hisaya kama amavelisia kanohe, aune laga humaine. Ani kemoꞌa ago falote huno tamage humaine.
ACT 1:17 Ani kanoa, Yutasiꞌe, Yisasiꞌenema tokaeta nemauna anagapi maineno Yisasi kea nehavigeno aliꞌyatela hutenea kano maine.
ACT 1:18 Ani kanoa, Yutasiꞌe, kefo yama hia yamo anonaꞌa mone aliteno mopa miya humaleteno ani mopafi agoꞌya faigeno aipamoꞌa aitalaga higeno mukiꞌa aipamoꞌa helafi lavi-maine.
ACT 1:19 Helafi lavigeꞌya mukiꞌa Yelusalemuma mainaya veaꞌmoꞌya ani kea haviteꞌya ani mopamo agia amakaiꞌami kefina ‘Akelatama.’ huꞌya humainae. Tagai kefina ani agia ‘Kolama lavi-mainea kumale.’ huꞌya humainae.
ACT 1:20 Tevitiꞌma yagamema humainea autaꞌmafina, Samupina, mage huno kae-maleneane ‘Agaiꞌama nemaiya kumala vaya omaino yu kuma hapaesie.’ huno kae-maleneane. Ani kemoꞌa nago kaiyaga mage huno humaineane ‘Alu kanomoꞌa agai aliꞌyatela alisie.’ huno humaineane.
ACT 1:21 Ani yafe nago kanomoꞌma Yoniꞌa tima falematenea kanaleti aepa heno Anumayatia Yisasiꞌene tagaiꞌenema vaiyatete huno huno egenoꞌma Yisasiꞌa ikapinaga haimainea yupa tagaiꞌenema nemaiya vayapiti nago kanoa Yisasiꞌma fali-mainefitiꞌma heti-mainea kema hamapaisiafe ani aliꞌyatela alita hetitesune.” huno Pitaꞌa humaine.
ACT 1:23 Higeꞌya amakaya tole kanolafe “Anakayae.” huꞌya hageꞌana nago kanoa, Yosefe Pasapasiꞌe kanomona, nago agia Yasatusiꞌe, nago kanoa Matiasiꞌe huꞌya anakia ayemainae.
ACT 1:24 Ayeteꞌya Anumayamotega mage huꞌya havinegae “Anumayamoga kagaya mukiꞌa vayaꞌmogami amakuꞌafina ago age-mainane. Yutasiꞌma haiya kavaꞌma huteno tataleno havi kapi umainea yafe anonaꞌale alu kanomoꞌa hetino Aposolo kano maisie huta nehune. Kagaya ani kanolatapitila hana kano ago hapalika huneꞌatane? Huneꞌatana kanoa tavelio.” huꞌya havinegae.
ACT 1:26 Nunamuna huteꞌya anakia aote yate kaeteꞌya yopafi maleneꞌya nagoke avayu huꞌya agayana Matiasi agi avayu huteꞌya ani kanoa avaleꞌya hetitageno Aposolo vayapi maine.
ACT 2:1 Yisasiꞌa ago falitegeꞌya seveniꞌa (7) sota maiteꞌya vitimo afulea kanahe muse haya imu kiya kanafina mukiꞌa Yisasi veala nago nopi alitalu huꞌya mainae.
ACT 2:2 Mainageno aupaꞌa ikapinagati ala age neꞌaino ala yasimoꞌma huhu huhu nehia kava huno age neꞌaino anima mainaya nopina me hiya humaine.
ACT 2:3 Hiya higeꞌya agayana atamo anefe kana yamoꞌa hamaote hamaote amaugafale mo kaꞌmaemaine.
ACT 2:4 Mo kaꞌmae-mainegeno Alu Aotage Avamuꞌmoꞌa eno mukiꞌamogami amakupina me hiya higeꞌya amakaya aepa heꞌya Alu Aotage Avamuꞌmo hamapaigeꞌya amaku amakesafiti nohaviya kea alu ke alu ke humainae.
ACT 2:5 Nehageꞌya ani yupa kasagoꞌya Anumaya Koti kema nehaviya Yuta vayaꞌyaga mukiꞌa kotegati eꞌya Yelusalemu melitalu humainae.
ACT 2:6 Ani vayaꞌmoꞌya ikapinagatiꞌma ala agegefa aigeꞌya haviteꞌya melitalu huꞌya haviyana ani nopima mainaya veaꞌmoꞌya alu ke alu ke maiꞌya nehageꞌya alu kotegatiꞌma emainaya veaꞌmoꞌya mage hae “Nagai ke nehie. Nagai ke nehie.” huꞌya tusiꞌa amamaꞌyo aimainae.
ACT 2:7 Amamaꞌyo neꞌaiꞌya amakesa havi havi huꞌya mage hae “Mani kema nehaya vayaꞌmoꞌya Kalili vaya mainayanagi hanaꞌa huꞌya tagaiti itatimoꞌya nelafaꞌya nehageta nehavuna kefitila hageta nehavune.
ACT 2:9 Tagaya ma kumaꞌyagaleti emainone Patiaꞌene Mitiaꞌene Elamiene Mesopotemiaꞌene Yutiaꞌene Kapatosiene Potusiene Esiaꞌene Filigiaꞌene Pamafiliaꞌene Isipiene Sailinia aupaꞌale Lipia kotegatiꞌene Lomuene Kalitiene Alepiaꞌene naꞌa kotegati emainonagi Yuta vayaꞌene Yuta vayaꞌmogami Anumaya Kotiꞌamimo ke havilinaya vayaꞌene emainonagi tahaote tahaote ketifiti Anumaya Koti tokiyaleti humainea kavafe tahapai-mainae.” huꞌya hae.
ACT 2:12 Hageꞌya mukiꞌa veaꞌmoꞌya tusiꞌa amamaꞌyo neꞌaiꞌya tusiꞌa amakesa nehaviꞌya nagoꞌa veaꞌmoꞌya mage huꞌya hae “Ani kavaꞌmona aepaꞌa naꞌane?” huꞌya hayanagi nagoꞌa veaꞌmoꞌya havigu ke nehuꞌya mage hae “Amakaya havilina vaini nofi alagamo timaꞌa neteꞌya aneginagi nehae.” huꞌya humainae.
ACT 2:14 Pitaꞌa aleveniꞌa (11) Aposolo vayaꞌene heti-maineno ala kefiti mage huno humaine Yuta nafuꞌnaganagatamaene Yelusalemuma mainaya veaꞌnene nago ke tamahapaigahugi haviho.
ACT 2:15 Tamakaya tamakesa haviyana mani veaꞌmoꞌya havilina vaini li neꞌya aneginagi nehae hutama nehafi? Aꞌao menia natekefa naeni kiloki nehigi havilina onenae.
ACT 2:16 Onenagi menima agaya yafena nayona Anumaya Koti aune kanomoꞌa Yoeliꞌma humainea kemoꞌa mage huno humaineane.
ACT 2:17 Anumaya Kotiꞌa mage huno humaine “Mani kanamoꞌa aupaꞌama haꞌno hugahema hisia kanafina nagaya Alu Aotage Avamuꞌnimona mukiꞌa veaꞌnemogamina amamigahue. Amamisugeꞌya tamakai nafaꞌnemoꞌene munaꞌnemoꞌene Anumayamo avayafiti hamapai-mainea kea hisageꞌya neyaꞌvetamimoꞌya himona kana yaꞌyaga feluga neꞌagesageꞌya kosunatamimoꞌya himona agegahae.
ACT 2:18 He, nagaya Alu Aotage Avamula aliꞌya veaꞌnimogamina vene aꞌnene amamisugeꞌya Anumayamo avayafitiꞌma hamapai-mainea kea tamahapaigahae.
ACT 2:19 Nagaya ikateꞌene ma mopafiꞌene tokiya avameꞌyama hisua yana kolaꞌene ataene halinaene tamaveligahue.
ACT 2:20 Tamavelitesugeno yagemoꞌa ayesu hinageno ikaꞌmoꞌa kolamaꞌage hisigeno Anumayamoꞌma esia kanafina tusiꞌa tokiyaꞌaene hale yamaꞌaene efalote hugahie.
ACT 2:21 Efaloteꞌma hinageꞌya mukiꞌa veaꞌmoꞌya Anumayamo agi neꞌayeꞌya ‘Kalagi ailato.’ huꞌya nehisageno Anumaya Kotiꞌa amaku amamena aligatigahie.” huno kae-maleneane.
ACT 2:22 Isaleli vayaꞌmogatama nago kea tamahapaigahugi haviho “Nasaleti Yisasiꞌe, Anumaya Kotitegati emainea kano maine.” hutama havisaya yafe Anumaya Kotiꞌa aya higeno tusiꞌa tokiya avame yana tamakaipina ago ali falote higetama age-mainae.
ACT 2:23 Agayanagi Anumaya Kotiꞌa nayona havino “Naꞌa maꞌa hugahue.” huno haꞌya kimaleteno tamayapi ategetama Anumaya Kotiꞌa hutenea kava hutama ani kanoa, Yisasina, kefo vayaꞌene yafaga yosalela nilia hetama asaitetama hayageno fali-maine.
ACT 2:24 Falimaineanagi falimainea yamoꞌa atafa huno atakalo ohune. Anumaya Kotiꞌa anima agata yama alino falimainea yapitila kalu heno ali hetitene.
ACT 2:25 Nayona Tevitiꞌa Yisasiꞌma falimainesifitiꞌma alino heti-tesia yafena mage huno humaineane “Mukiꞌa kanafina Anumayaniꞌamoꞌa nagaiꞌene maineno tamaga nayategama mainea yafena kolia ohugahue.
ACT 2:26 Nagaiꞌenema nemaiya yafena nagu nafaꞌnemoꞌa tusiꞌa muse nehigeꞌna agia alisaga nehue. Yoka faliteꞌna hetigahue huꞌna nametitia nehue.
ACT 2:27 Anumaya Kotigae ‘Alu aotage kanoe.’ huka hunatenana kanomonia naugafa kasalisia yafe fali-mainaya veaꞌne mainaya kumatela natalesanageꞌna oꞌvisua yafe nametitia nehue.
ACT 2:28 Kagaya agola maige maige hisua kana ago navelinageꞌna age-mainoafe kagaiꞌenema maisua yafena aluya huꞌna musena hugahue.” Teviti mani kea humaineane.
ACT 2:29 Pitaꞌa nagoꞌene mage hie “Nenafugatama hufalote huꞌna tamahapaisue taginagomoꞌa Tevitiꞌa ago faligeꞌya hevaitenae. Hevaitenaya komua tagai amuꞌnopi hanegi akaiꞌahe mani kea ohuneane.
ACT 2:30 Ohunegi Anumaya Kotiꞌa agaife mage huno hulokiya vaino kea humaineane ‘Kagai kaginagomopiti nago kanomoꞌa hetino eteno kagai kumate veaꞌnea kava yagaimategahie.’ huno humaineane. Humaineanagi Tevitiꞌa Anumaya Koti aune kano maineanagino Kalaisiꞌa, Anumaya Kotiꞌma taugafa aligatigahe hutenea kanoa, fali-mainefiti hetigahie huno aune laga huno mage huno humaine. Kalaisife ‘Augafaꞌa kasalisia yafe fali-mainaya veaꞌne nemaiya kumatela oꞌategane.’ huno humaineane.
ACT 2:32 Ani kanoa, Yisasina, Anumaya Kotiꞌa fali-mainefiti eteno ago alino hetitegeta age-mainona yafe tamahanepaune.
ACT 2:33 Anumaya Kotiꞌa ali hetiteno avalesaga huno agaiꞌa tamaga aya kaiyagaꞌa uhagote mainaya vaya mainalega ateteno ‘Tamamigahue.’ hunoꞌma humainea kanoa, Alu Aotage Avamuꞌa, amigeno aliteno Yisasiꞌa ani Alu Aotage Avamula eteno lamigeta mani kavala hunagetama neꞌagae.
ACT 2:34 Tevitiꞌa mage huno humaineane Anumaya Kotiꞌa Anumayaniꞌamofena mage huno humaine ‘Tamaga nayatega uhagote mainaya vaya mainalega mopale emainesanageꞌna kame vayakaꞌa kaiyafi amatesugeꞌya ani kame vayaꞌmoꞌya kagaifena ago tagasane.’ huꞌya hugahae.” huno humaineane.
ACT 2:36 “Ani yafe Isaleli vayaꞌmogata havilama huta havisune. Ani Yisasina tamakayama yafaga yosalela nilia hetama asai-malenaya kanomofe Anumaya Kotiꞌa mage huno humaine ‘Ani kanomoꞌa Anumaya maineanagi nagaya hutogeno emainea kano maine.’ huno humaine.” huno nehie. Kasagoꞌya ve aꞌmoꞌya amakuꞌa aiyahae hageꞌya tina falematenae.
ACT 2:37 Pitaꞌma hia kemoꞌa amakupi ayegeꞌya haviteꞌya Pitaꞌene nagoꞌa Aposolo vayaꞌenefe mage huꞌya hae “Nelafugatama menia hanaꞌa hisune?” huꞌya hae.
ACT 2:38 Hageno Pitaꞌa mage huno hie “Tamakaya mukiꞌamogatama tamakuꞌa aiyahae hutama egeta Yisasi Kalaisi agile tina falelamatano. Aniꞌama hisagenoꞌa Anumaya Kotiꞌa aigetamateno kefo yatamia atalelamateno Alu Aotage Avamula tamamigahie.
ACT 2:39 ‘Tamamigahue.’ huno humainea kea tamakaife nehigi tamakayaene nafaꞌnetamiene Yuta vea omainaya veaꞌnenefe mani kea huno mukiꞌa Anumaya Kotiꞌa kema humatesia veaꞌmogamife ‘Tamamigahue.’ humaineane.” huno Pita mani kea humaine.
ACT 2:40 Pitaꞌa mani kea nehuno alu ke alu ke huno kanaꞌye kanaꞌye huno mage huno hie “Meni kanafima mainaya veaꞌmoꞌya tusiꞌa kefo kava maiꞌya nehagi havigu tamakaya kefo kava huyafenagi atalegeno Anumaya Kotiꞌa tamaku tamamena aligatino.” huno humaine.
ACT 2:41 Higeꞌya nagoꞌa veaꞌmoꞌya tali tauseniꞌa (3,000) veaꞌmoꞌya mani kea haviteꞌya aliꞌya amakupi maleꞌya amametiti hageꞌya ani yupa lina falematenae. Yisasife amakupi nemalaya veaꞌmoꞌya tokaeꞌya kanale kava nehae.
ACT 2:42 Lina falematageꞌya amakaya mukiꞌa yupa nago amaku amakesa haviꞌya Aposolo vayaꞌmogami kea haviꞌya hameꞌya maya kofa huꞌya nete nete nehuꞌya Anumayamotega muse huꞌya nunamuna nehae.
ACT 2:43 Nehageꞌya mukiꞌa veaꞌmoꞌya tusiꞌa amamaꞌyo neꞌaigeꞌya Aposolo vayaꞌmoꞌya kasagoꞌya tokiya avame yana nehae.
ACT 2:44 Mukiꞌa Yisasi kema haviꞌya amakupi maleꞌya amametitima humainaya veaꞌmoꞌya nagoke amaku amakesa haviꞌya mukiꞌa yaꞌyagaꞌamihena “Nagaiꞌnige yane.” huꞌya ohunagi “Mukiꞌa yana lagaiti ya hane.” huꞌya nehae.
ACT 2:45 Mopaene afenoꞌyaꞌamienema hanea veaꞌmoꞌya atalageno alu kanomoꞌa miya higeꞌya monea aliteꞌya fako hute hute huꞌya kaveꞌamima omalenea veala amaminae.
ACT 2:46 Mukiꞌa kanafina nagoke amaku amakesa haviꞌya ala mono nopina neꞌuꞌya alu nopina alu nopina uꞌya hameꞌya maya kofa huꞌya kaveꞌene nete nete nehuꞌya muse huꞌya Anumaya Koti agia alisaga nehageꞌya mukiꞌa veaꞌnemoꞌya ageteꞌya “Kanale kava nehae.” huꞌya nehageno Anumayamoꞌa nago kanafina nago kanafina nagoꞌa veaꞌnea amaku amamena aligatiteno “Nagai ke nehaviya veaꞌene maiho.” huno humatene.
ACT 3:1 Nago yupa une kanalega tali (3) kiloki Pitaꞌene Yoniꞌene nunamu hisaya kanamoꞌa aupa higeꞌana ala mono notega umainaꞌe.
ACT 3:2 Neꞌvaꞌageꞌya vayaꞌmoꞌya nagola kali kanoa, atenelegati aiyamoꞌa haviya humainea kanoa, avaleꞌya emainae. Mukiꞌa kanafina anima aiyama haviya humainea kanomoꞌa ala mono nomo fiate mopale nemaiyane. Ani fiamo agia koganali fiane huꞌya agia neꞌayaya fiate maineno ala mono nopima vaya veafena “Monea namiho.” huno ayana haꞌya hulineno aukaꞌya nehia kanoe.
ACT 3:3 Ani kanomoꞌa ageana Pitaꞌene Yoniꞌene ala mono nopi haigahe nehaꞌageno “Monea namitetanao.” huno aukaꞌya hunatene.
ACT 3:4 Hunategeꞌana Pitaꞌene Yoniꞌene tokiyaꞌage aulu hemaineꞌana Pitaꞌa mage hie “Taꞌagaila taꞌago.” huno humaine.
ACT 3:5 Higeno ani kanomoꞌa “Nago ya namigahe nehaꞌe.” huno anakaila anakeke huno anake-mainegeno Pitaꞌa mage huno hie “Moneꞌniꞌa omalegi nagaipima hanea yana kamigahue Nasaleti Yisasi Kalaisi agile kahanepauve hetika ute ete huo.” huno nehuno tamaga ayate alino hetitegeno aupaꞌa aiyamoꞌene aleꞌyamoꞌene kanale hutegeno tokiya hau-maine.
ACT 3:8 Tokiyaꞌage hautegeno hetino ute ete nehuno anakaiꞌene ala mono nopinaga nehaino haite asaga hulavite nehuno Anumaya Koti agia alisaga hume hume nehaiye.
ACT 3:9 Anumaya Koti agia alisaga huno haigeꞌya mukiꞌa veaꞌmoꞌya agayana higeꞌya “Vae mani kanoa mukiꞌa yupa ala mono nomona koganali fiate maineno aukaꞌya nehia kanogi.” huꞌya nehuꞌya alino kanaleꞌma hutenea yafena tusiꞌa amamaꞌyo aimainae.
ACT 3:11 Veaꞌmoꞌya amamaꞌyo neꞌaigeno ani kanomoꞌa Pitaꞌene Yoniꞌene anatafa huno ananukigeꞌya mukiꞌa veaꞌmoꞌya ala mono nomo haupale yasi alisia ya ayekalo humalenea nomo, agia Solomoni none huꞌya nehaya yate, amakaitega umainae.
ACT 3:12 Vageno Pitaꞌa ageteno mage huno humaine “Isaleli kumate vayaꞌmogatama naꞌa higetama atali talua nehae? Taꞌagaya taꞌagaitiꞌa tokiyaletiꞌene fatago humainoꞌa auꞌava yatetiꞌene ani kanoa alitaꞌa kanale hutoꞌageno ute ete nehie hutama taꞌagaila taꞌageneꞌasagalifi?
ACT 3:13 Aꞌao. Taginagomogami Anumaya Kotiꞌa, Apalahamuꞌene Aisakiꞌene Yekopuene Anumaya Kotiꞌamimoꞌa, agaiꞌa aliꞌya kanoꞌamona, Yisasi, tokiya hale ya amigahe ani kanomona alino kanale hutenegi tamakaya ani Yisasina avaletama kame vayaꞌmogami amayapi atageno Pailatiꞌa Yisasife ‘Afaꞌa atalegahue.’ huno nehiana tamakaya Pailati aulagafi ‘Tagai kava kanoa omaigi agaya falisie.’ hutama tamakaveꞌno hutenae.
ACT 3:14 Alu aotage kanoa fatago kavaꞌage nehia kanomona tamakaveꞌno huneꞌatetama vayaꞌma hamaeno fali neꞌamatea kanohe ‘Atalegeno eno.’ hutetama mukiꞌa veaꞌmogami hamaimuꞌmona aepaꞌa mainea kanomona hayageno falianagi Anumaya Kotiꞌa fali-mainefiti alino hetitegetaꞌa ago agetetaꞌa mani kea tamahanepauꞌe.
ACT 3:16 ‘Yisasiꞌa kanale hulaꞌatesia tokiya hane.’ hutaꞌa taꞌagupi malenoꞌa yafe manima neꞌagaya kanomona ago kanale hutetegeno aiyamoꞌa tokiya vaimaine. ‘Yisasiꞌa kanale hutesia tokiyaꞌa hane.’ hutaꞌa taꞌagupi malenoꞌa yateti tamakai tamaulagafi ago kanale hutegeno kanale huno maine.
ACT 3:17 Tamage nenafugatama nagaya havuana tamakai kava vayatamimoꞌyaene Yisasiꞌma emainea aepaꞌaene havilama ohunetama Yisasina hae-mainae.
ACT 3:18 Hae-mainaya yafe Anumaya Koti aune vayamogami amavayafitiꞌma humainaya kea mage humainayane ‘Nagaya tamaugafa aligatigahe hutenoa kanomoꞌa tusiꞌa agataya aliteno faligahie.’ huꞌya humainaya kemoꞌa efalote huno tamage humaine.
ACT 3:19 Ani yafe kefo yatamia neꞌataletama tamakuꞌa aiyahae hisageno Anumaya Kotiꞌa kefo yatamia aye haꞌmi-talegahie.
ACT 3:20 Aye haꞌmiteno agaiꞌalegati kanaleꞌma humatesia yana nelamamino Yisasina tamakaifema tamaugafa aligatigahie huno hutenea kanoa eteno tamakaitega hutenageno egahie.
ACT 3:21 Hutegahianagi meni kanafina Yisasiꞌa ikapinaga maineno Anumaya Kotiꞌma mukiꞌa yana eteno haegafa yamaꞌage talo hisia yafe agava-maine. Mukiꞌa Anumaya Kotiꞌma nayoma mainaya amaune vayaꞌmoꞌya humainaya kemoꞌa efalote huno tamage humaineafe Yisasiꞌa eteno egahie.
ACT 3:22 Moseseꞌa mage huno kaemaleneane ‘Anumaya Kotiꞌa tamakaipiti nagola aune laga hisia kanoa nagayama huaꞌya huno hisia kanoa ali hetitegahie. Hetitetenagenoꞌma agayama hisia kea haviho.
ACT 3:23 Ani aune kanomo kema ohavisaya veaꞌmogamina Anumaya Kotiꞌa hamaeno fali haꞌno hinageꞌya Isaleli veapina omaigahae.’ huno humaineane.
ACT 3:24 Mukiꞌa Anumaya Koti amaune vayaꞌmoꞌya Samueliꞌene agai akavelegatiꞌma falote humainaya amaune vayaꞌyagaene menima mainona kanahe haviꞌya kae-malenayane.
ACT 3:25 Tamakaya Anumaya Koti amaune laga nehaya vayaꞌmogami amakinagomogatama mainae. Anumaya Kotiꞌma Apalahamufe hulokiya vaino alino hagelafi lamatenea kea* huno tamakaiꞌenefe mani kea humaine. Anima hulokiya vaimalenea kemoꞌa mage huno humaineane ‘Nago tamakinagomoꞌa esiana mukiꞌa ma mopafi veaꞌmogamina kanale manua amamigahie.’ huno humaineane.
ACT 3:26 Mukiꞌa manima humainaya kemoꞌa falote huno tamage hisia yafe Anumaya Kotiꞌa agaiꞌa aliꞌya nafaꞌneꞌamona alino hetitegetama tamakaya kefo yatamihe tamakuꞌa aiyahae hisageno tamaya huno kanale manua tamamisia yafe hagoteno tamakaitela hutegeno emaine.” Pitaꞌa mage huno humaine.
ACT 4:1 Pitagani Yonigani yaufa mani kea hama-nepaiꞌageꞌya mono note kava vayaꞌene mono note ati kava kanoene nagoꞌa Satiusi vayaꞌene eꞌya menakayana anakayama “Yisasiꞌma fali-mainefitila ago ali hetiteneanagino mukiꞌa veaꞌnea aniꞌa huꞌya fali-mainesafitila eteꞌya hetigahae.” huꞌana hamapaiꞌa yafe amaipa haviya nehae.
ACT 4:3 Amaipa haviya huteꞌya anatafa hagi “Ago une kianagita ega kaiyekea hunategahune.” huꞌya kina nopi anavaleꞌya monatenae.
ACT 4:4 Monatayanagi kasagoꞌya veaꞌnemoꞌya anakai kea haviteꞌya amakupi maleꞌya amametiti nehae. Faefu tauseniꞌa (5,000) veaꞌmoꞌya Yisasiꞌma hulatenea yafena haviꞌya amakupi maleꞌya amametitia nehae.
ACT 4:5 Faeteꞌya koꞌma neliana kava vayaꞌene vayatamaene kahegi kema havilinaya anagaꞌene Anasiꞌa ala mono note hagote kava kanomoꞌene agaiꞌa anagaꞌene Kaiyafasiꞌene Yoniꞌene Alekasataꞌene mukiꞌamoꞌya Yelusalemu alitalu humainae.
ACT 4:7 Alitalu huteꞌya ani kanolatana anavaleꞌya amaufi hetinateneꞌya mage huꞌya hanavigae “Tanakaya hanaꞌa agimo tokiyaleti mani kavala humainaꞌe?” huꞌya hanavigae.
ACT 4:8 Hana-vigageno Alu Aotage Avamuꞌmoꞌa Pitana agupina hiya higeno mage huno humaine Kava vayaꞌmogatamaene vayatamaene haviho.
ACT 4:9 Mani aiyamoꞌa haviya humainea kanomona ali falu hutetana alitana kanale hutenaꞌe kea havisune hutama kaiyekea hulaꞌatetama na yateti mani kava nehaꞌe hutama taꞌahavi-negapi?
ACT 4:10 Taꞌa-havigayanagi mukiꞌamogatamaene mukiꞌa Isaleli veaꞌmoꞌyaene haviho. Nasaleti Yisasi Kalaisi agimoꞌa manima tamaufima heti-mainea kanomona alino kanale hutene. Ani Yisasina tamakaya yafaga yosale nilia hetama asaigeno fali-maineanagi Anumaya Kotiꞌa fali-mainefiti ago ali hetitene.
ACT 4:11 Anumaya Koti kemoꞌa autaꞌmafina mage huno humaine “Tamakaya yafa noma kiyana nago yafafena ‘Haviya hie.’ hutama atalayanagi menia ani yafamoꞌa tusiꞌa kanale yafane nomo ayetagenale ago malenae.” huno humaineane. Ani yafana Yisasife humaine.
ACT 4:12 Ani kanomoꞌa agaiꞌage tagu tamena aligatigahie. Mukiꞌa mopafi veapitila nago kanomo agileti tagu tamena aliokatigahigi Yisasina agaiꞌage agileti tagu tamena aligatigahie huno humaine.
ACT 4:13 Pitagani Yonigania tokiyaꞌage ke haꞌageꞌya haviteꞌya mage hae “Vae mani kanolatana afa kanolata maineꞌana avo nopina oꞌunaꞌa kanolanagi hanaꞌa huꞌana tusiꞌa kanale kea nehaꞌe?” huꞌya amakesa havi havi nehuꞌya “Vae mani kanolatana Yisasiꞌene nemaiꞌa kanolatane.” huꞌya humainae.
ACT 4:14 Hayanagi aliꞌana kanaleꞌma hutenaꞌa kanoa anakaiꞌene heti-mainegeꞌya agaya yafe nagoꞌa havige havagea huoꞌanatenae.
ACT 4:15 “Kanisole vaya nopitila ataletana viꞌo.” huꞌya hunateteꞌya amakaiꞌamifi kea huge havige humainae.
ACT 4:16 Mage huꞌya hae “Ani tole kanolatana hanaꞌa hunatesune? Mama tokiya avame yana haꞌageꞌya mukiꞌa Yelusalemu nemaiya veaꞌmoꞌya ago age-mainagi hanaꞌa huta ali fala-kisune?
ACT 4:17 Havigu mani kemoꞌa alu kote kotega ute ete huyafenagi aluya huta ‘Nagoꞌene mani agia oꞌayeꞌo.’ huta kahegi-natesune.” huꞌya humainae.
ACT 4:18 Anakaife ke hageꞌana aꞌageꞌya mage huꞌya anaumonola malenae “Yisasifena nagoꞌene veaꞌmogamina hamapaitana humaveotiꞌo.” huꞌya hae.
ACT 4:19 Hageꞌana Pitaꞌene Yoniꞌene kenonaꞌamia mage haꞌe “Na tamakesa nehaviye Anumaya Koti aulagafi mainoꞌagi ta kele akavela malesuꞌe? Tamakai kelepi Anumaya Koti kelele hutama nehafi na tamakesa nehaviye? Tamakaitami fako hutama haviho.
ACT 4:20 Taꞌagaya Yisasiꞌma humainea kavala agetaꞌa havimainoꞌa kavaꞌyaga fala okigahuꞌe.” huꞌana nehaꞌe.
ACT 4:21 Haꞌageꞌya anaikolisaya amakesa haviyanagi mukiꞌa veaꞌmoꞌya humainaꞌa kavala ageteꞌya Anumaya Koti agi alisaga nehageꞌya mage hae “Anaiko-lisunana veaꞌmoꞌya kelama-kigahae.” huꞌya nagoꞌene anaumonola maleteꞌya anatalageꞌana umainaꞌe.
ACT 4:22 Anima aiyama haviya humainea kanoma aliꞌana kanale hutenaꞌa kanomona kafuꞌa fotiꞌa (40) kafu humainea kanogiꞌya Anumaya Koti agi alisaga humainae. Yisasife amakupi malenaya veaꞌmoꞌya tokiya vaiꞌya Yisasi kema hufalote hisaya yafe Anumayamotega havige-mainae.
ACT 4:23 Anatalageꞌana anagaꞌanimoꞌya mainalega uteꞌana mukiꞌa ala mono note ala kava vayaꞌyagaene vayatamaene hanapaiya kea mo hamapai-mainaꞌe.
ACT 4:24 Mo hamapaiꞌageꞌya haviteꞌya nagoke amakesa haviꞌya Anumayamotega ke huꞌya mage huꞌya havige-mainae “Kava yagai Anumayatimogae mopaene ikaꞌene hage liꞌene mukiꞌa anifima hanea yaꞌyagaene talo humalenana kanomogae.
ACT 4:25 Kagaya kagai aliꞌya kanoa, tototimoꞌa Tevitiꞌma avayafiti Alu Aotage Avamukaletila mage huka humainanane ‘Naꞌa higeꞌya Isaleli nofiꞌma omainaya veaꞌmoꞌya ‘Anumaya Kotiꞌene tu hugahune.’ huꞌya havigu ke huꞌya amaipa kafa hemainae? Ma mopafi kava vayaꞌene vayatamaene Anumayamofeꞌene agaiꞌa tagu tamemaꞌa aligatigahe hutenea kanomofeꞌene amaipa haviya nehuꞌya kea neꞌvaiye?’ huno humaineane.
ACT 4:27 Mamona kelamage. Mani kumate alu aotage aliꞌya kanokaꞌa kagaikaꞌa taugafa aligatigahema hutenana kanomona kame hutesaya yafe Helotiꞌene Potiasi Pailatiꞌene Yuta vea omainaya vayaꞌyagaene Isaleli vayaꞌene alitalu huꞌya mainae.
ACT 4:28 Kagayama nayoma huka ‘Naꞌa maꞌa hugahae.’ hukama havimainana kagesa aniꞌa hugahe alitalu humainae.
ACT 4:29 Menia Anumayatimoga manima tagaifema hamae vainelateꞌya hu kolima latesaya kema haya kea nehavika tahaꞌmao. Tagaya kagai aliꞌya vaya mainonagi kagaya tahaꞌmaegeta kolia ohuta kagai kea tokiyaꞌage huta hamapaisune huta kahavinegone.
ACT 4:30 Kayana maleka kali veala alika kanale huneꞌamateka kagaikaꞌa alu aotage nafaꞌnekamo agile tokiya avame yama hisuna tokiyakaꞌa lamio.” huꞌya Anumayamotega havinegae.
ACT 4:31 Havigageno Anumaya Kotiꞌa amakayama mainaya nona alino kosi kosi hutegeno Alu Aotage Avamuꞌmoꞌa amakupina me hiya humainegeꞌya Anumaya Koti kema tokiyaꞌage huꞌya hamapaisaya yafena kolia ohunae. Mukiꞌa Yisasina amakuꞌama aminaya veaꞌmoꞌya nagoke amaipale maineꞌya amaipa oꞌami aꞌami huꞌya mainae.
ACT 4:32 Mukiꞌa Yisasi kema haviꞌya amakuꞌama aminaya veaꞌmoꞌya nagoke amaku amakesale maineꞌya nago kanomoꞌa agaiꞌage yafena ageteno “Nagaiꞌnige yane.” huno ohunegi “Mukiꞌa yana tagaiti yamaꞌage hane.” huꞌya humainae.
ACT 4:33 Hageno tusiꞌa tokiyaꞌa amamigeꞌya Aposolo vayaꞌmoꞌya “Yisasiꞌa fali-mainefitila ago heti-maine.” huꞌya hamanepaigeno Anumaya Kotiꞌa kayone hisaya yana neꞌamamino amaya humaine.
ACT 4:34 Amaya higeꞌya amakai amuꞌnoꞌamifina kavefena kafua ohu veaꞌne maineꞌya mopaꞌamia hanea veaꞌnene noꞌamia hanea veaꞌnene “Alu kanomo miya hisie.” huꞌya hageꞌya monea amamigeꞌya aliꞌya Aposolo vayaꞌmogamina momamigeꞌya kaveꞌamima omalenea veaꞌmogamina amaya huꞌya amamite amamite humainae.
ACT 4:36 Nago kanoa Yosefeꞌe, nago agia Aposolo vayaꞌmoꞌya mage huꞌya malenae Panapasiꞌe huꞌya malenae. Ani agimoꞌa tagai kefina mage hie “Amaipa falu hisia ke nehia kanoe.” Ani kanomoꞌa Livai nofi kano maine. Saipalusi kumateti kanomoꞌa agaiꞌa mopa alu kano amigeno monea eteno amigeno ani monea alino Aposolo vaya me neꞌamamiane.
ACT 5:1 Nago kanoa Ananaiyasiꞌe aꞌamo agia Safailaꞌe ani alavelatamogania nago mopaꞌania alu kano neꞌamiꞌana mone ali-mainaꞌe.
ACT 5:2 Aliteꞌana Ananaiyasiꞌa kesi nagoꞌa monea agaiꞌa alino fala-kigeno aꞌamoꞌa anima alia monea ago age-maine. Ananaiyasiꞌa nagoꞌa monea alino Aposolo vaya momamine.
ACT 5:3 Amamianagi Pitaꞌa agaifena mage hie “Ananaiyasigae Sataniꞌa* kefo kagu kagesa kamigeka kagaya ‘Mukiꞌa monea mama hane.’ huka nehanagi nagoꞌa monea ali fala-negika Alu Aotage Avamuꞌmofena havige huka ayevataga nehane.
ACT 5:4 Mani mopa kagaika mopagika ‘Alu kanomo alisie.’ huka monea neꞌalika aniꞌa huka kagaika monegi naꞌa higeka ‘Havigea huꞌna ayevataga hugahue.’ huka kagu kagesafinaga nehane? Vayaꞌmona ayevataga ohunanagi Anumaya Koti ayevataga humainane.” huno nehie.
ACT 5:5 Higeno Ananaiyasiꞌa ani kea haviteno ailakatino fali-maine. Faligeꞌya neyaꞌvemoꞌya nago kena moliꞌya haꞌya kiteteꞌya aliꞌya komufi mo hevaitenae. Hevaitetageꞌya ani kanoma fali-mainea kea mukiꞌa veaꞌmoꞌya haviteꞌya tusiꞌa lagi tagiꞌya amake-mainae.
ACT 5:7 Haenagaꞌa taliꞌa (3) aova haꞌnoma nehiana aꞌamoꞌa ani fali-mainea kea ohavino egeno Pitaꞌa agaife mage hie “Manima hanea monea mopaletila hai ani kanoꞌa ali-mainaꞌo?” huno higeno “Tamage ani kanoꞌa al-imainoꞌe.” huno humaine.
ACT 5:9 Higeno Pitaꞌa mage huno hie “Naꞌa higetana tanakaya tokaetana kea hutetana ‘Alu Aotage Avamuꞌmona ayevataga hugahuꞌe.’ hutana haꞌane? Agego anaukamoma agoꞌma aliꞌya mo hevaitaya vayala eteꞌya fiate me heti-maineꞌya kagaiꞌenena falisanageꞌya aliꞌya mo hevaigategahae.” huno humaine.
ACT 5:10 Nehigeno aupaꞌa ani aꞌmoꞌa Pita aiyafi ailakatino agoꞌya faiteno faligeꞌya neyaꞌveyagamoꞌya haiꞌya mogayana ani ala ago fali-mainegeꞌya moliꞌya anauꞌamoma hevaitale mo lokaeꞌya hevainatenae.
ACT 5:11 Hevainatageꞌya Yisasina amakuꞌama aminaya veaꞌene mukiꞌa ani kema haviya veaꞌmoꞌyaene tusiꞌa lagitagiꞌya amake-maine.
ACT 5:12 Aposolo vayaꞌmoꞌya mukiꞌa vea amuꞌnopi kasagoꞌya tokiya avame yaꞌyaga hageꞌya age-mainae. Ageteꞌya Yisasina amakuꞌama aminaya veaꞌmoꞌya nagoke amaku amakesale maineꞌya ala mono nomo haupale yasi alisia ya ayekalo humalenea nomo agia Solomoni none ani nopi mukiꞌa kanafina molitalu humai humai nehayane.
ACT 5:13 Nehageꞌya nagoꞌa veaꞌmoꞌya kolima haya yafe amakaiꞌenena mo lokaeꞌya uomainagi ani veaꞌmogami amaki alisaga humainae. Mukiꞌa veaꞌmoꞌya Yisasi kema haviꞌya amakupi maleꞌya amametitia huteꞌya amakaiꞌene mainae.
ACT 5:15 Tokiya avameꞌyama humainea yafe mukiꞌa kalima hamaeya veala amavaleꞌya kate amateꞌya hagifanale maineꞌya mage hae “Pitaꞌma esiana agai amemo me halatu hamaesigeno kanale humategahie.” huꞌya kate momatenae.
ACT 5:16 Amatageꞌya mukiꞌa veaꞌmoꞌya Yelusalemu aupateꞌma hanea kumaꞌyagaleti kalima hamaeya veaꞌnene Satani avamuꞌmoꞌma amakupi fale-mainea veaꞌnene amavaleꞌya ageno mukiꞌa ago alino kanale humatene.
ACT 5:17 Mono noteꞌma hagote kava kanomoꞌene agaiꞌenema lokaeꞌya mainaya vayaꞌene Satiusi vayaꞌmoꞌyaene amaipa haviya humateteꞌya Aposolo vayala amatafa huꞌya amavaleꞌya kina nopi momatenae.
ACT 5:19 Amatenageno ani kegela Anumayamo ensole kanomoꞌa eno fita me yakino anifiti amavaleno kumatega neꞌuno mage huno hie “Tamakaya utama ala mono nopi hetitama veaꞌmoꞌyama haegafa huꞌya agola maige maige hisaya hamaimula alisaya kea hamapaiho” huno humaine.
ACT 5:21 Higeꞌya haviteꞌya natekefafi hetiꞌya uꞌya ala mono nopi veaꞌmogamina mo hamanepaiye. Hamanepaigeno ala mono note hagote kava kanomoꞌene agaiꞌenema lokaeꞌya nemaiya vayaꞌene ani kea ohaviꞌya neꞌataleꞌya Kanisole vayafeꞌene Isaleli nofi vayatamaenefe moge hageꞌya ageno ati vayafe “Kinama humatenona vayala momavaletama eho.” huꞌya hamapaimainae.
ACT 5:22 Me hageꞌya ati vayala kina nopi mogayana omaigeꞌya neꞌataleꞌya eteꞌya mage mo hae “Tagaya mogonana fita tokiyaꞌage alokileti hemaleneꞌya vayala kava yagaiꞌya kumate hetimainageta fita mo yakiteta kina nopima mogonana omainae.” huꞌya me humainae.
ACT 5:24 Mehageꞌya ala mono note kava vayaꞌyagaene mono note ati kava kanoene mani kea haviteꞌya tusiꞌa amakesa havi havi huꞌya mage hae “Hanaꞌa huꞌya kina nopitila fanane humainae? Hanaꞌa humainea ya falote hugahie.” huꞌya hae.
ACT 5:25 Hageno nago kanomoꞌa mage huno me hamapaiye “Haviho kina nopima amataya vayala ala mono nopi hetiꞌya maineꞌya veaꞌmogamina humave-neliye.” huno me hie.
ACT 5:26 Me higeꞌya mono note ati kava kanomoꞌene ati vayaꞌaene uꞌya “Havigu amakai kema havimainesaya veaꞌmoꞌya yafateti tahaesageta falisunagi.” huꞌya amaikootiꞌya ako huꞌya amavaleꞌya emainae.
ACT 5:27 Amavaleꞌya ayaꞌamoꞌya Kanisole vaya amuꞌnopi me hetimatetageno ala mono note hagote kava kanomoꞌa mage huno hie.
ACT 5:28 “Tagaya Yisasife nagoꞌene veaꞌmogamina hamapaitama humaveotiho” huta tamakaila tamaumonola ago malonanagi tamakaya mukiꞌa Yelusalemu nemaiya veaꞌmogamina mani kea hamapaitama tagaifena ‘Ago Yisasina hae-malenaya vaya mainae.’ hutama hamapai-mainae.” huno hie.
ACT 5:29 Hianagi Pitaꞌa nagoꞌa Aposolo vayaꞌene mage huꞌya nehae “Ma mopafi vayaꞌmogami kemona akave omalegahunagi tagaya Anumaya Koti kemo akave malegahune.
ACT 5:30 Tamakaya Yisasina nagoke yafaga yosale asai-malageno fali-maineanagi Tototimo Anumaya Kotiꞌa fali-mainefiti ago ali hetitene.
ACT 5:31 Ali hetiteteno avalesaga huno tamaga ayatega ategeno hagote kava kanoa tagu tamema aligatimainea kanoene mainea yafe tagaya Isaleli veaꞌmogata taguꞌa aiyahae hisuna tagesa tamisigeta taguꞌa aiyahae hisunageno aigetateno kefo yatia atalelategahie.
ACT 5:32 Tagaya mani kea hisuna vaya mainonageno Alu Aotage Avamuꞌmoꞌa aniꞌa huno mani kea humaine. Mukiꞌa Anumaya Koti kema akave malenaya veaꞌmogamina Anumaya Kotiꞌa Alu Aotage Avamula ago amamine.” huno hie. Kamalieliꞌa kanisole vayaꞌmofe mage huno hie “Aposolo vayaꞌmogamina ako hutama amateho.” huno humaine.
ACT 5:33 Hageꞌyama mani kema haviya yafe amaipa amakata aiꞌya Aposolo vayala hamaesageꞌya falisaya amakesa nehaviye.
ACT 5:34 Hamaegahayanagi nagola Falasia kanomo agia Kamalieliꞌe* mono humave-nelia kanogino Yuta vayaꞌmogami Kanisolefi mainegeꞌya mukiꞌa veaꞌmoꞌya agima alisaga nehaya kanogino ani kanomoꞌa hetino mage huno hie “Tahaote kea hugahunagi Aposolo vayala humategeꞌya kumatega hati-lavisageta kea hisune.” huno hie.
ACT 5:35 Higeꞌya hati-laviꞌya vageno mage huno Kanisole vayaꞌmogamife hie “Isaleli vayaꞌnimogatama mani vayaꞌmogamina nago yama humategahunema hinutama tamakesa havilama hutetama aniꞌa hiho.
ACT 5:36 Nayona nago kanomo agia Teutasiꞌe evaꞌyi huno ‘Nagaya tokiyaꞌniꞌa hanea kano mainoe.’ huno higeꞌya fo hataletiꞌa (400) vayaꞌmoꞌya akavela vayanagi kamani kava vayatimoꞌya ago hayageno faligeꞌya akaveꞌma neꞌvaya vayala atagufeꞌya ute ete hageno aliꞌyamaꞌamoꞌa afa ya kana humaine.
ACT 5:37 Agai akavelega amakima negayaya kanafina Yutasiꞌe Kalili kanomoꞌa evaꞌyi huno kea hamapaigeꞌya nagoꞌa vayala akave neꞌvageno kava vayatimoꞌya Yutasina ago hayageno faligeꞌya akaveꞌma neꞌvaya vayala atagufeꞌya ute ete humainae.
ACT 5:38 Naꞌa humainaya yafe menia tamahapauve mani vayala amatalegeꞌya viho. Anima nehaya kea amakaiꞌami mopale vayaꞌmogami kema hanesigenoꞌa afaꞌa haꞌno hugahianagi Anumaya Koti kema hanesigetama tamakayama ali haviyama hisaya amukotamia omalene. Havigu lamakaya Anumaya Kotina kame hutetama agaiꞌene tu hutesagi.” huno humaine.
ACT 5:40 Higeꞌya Kamalieli ke haviꞌya “Tamage hane.” huteꞌya Aposolo vayafe ke hageꞌya ageꞌya nofi kaꞌyoteti haifu amamiteꞌya amaumono nemaleꞌya mage hae “Yisasifena nagoꞌene veaꞌmogamina hamaopaiho.” huꞌya humateteꞌya amatalageꞌya umainae.
ACT 5:41 Ani Kanisole vayala amataleꞌya neꞌuꞌya “Anumaya Kotiꞌa ago tamatea kava nehae.” huno tagaifena nehuno “Yisasi agima neꞌayaya yafe tamakaye hisifa kavala hisagetama amukotamia hanegahie.” huno humainea yafe tusiꞌa muse hume hume umainae.
ACT 5:42 Mukiꞌa yupa ala mono nopiꞌene veaꞌmogami nopiꞌene mukiꞌa veaꞌmogamina Yisasifena hamapai-mainae. “Yisasina Anumaya Kotiꞌa taugafa aligatigahema hutenea kanoe.” huꞌya hamapai-mainae.
ACT 6:1 Kasagoꞌya veaꞌmoꞌya Yisasi kea haviꞌya amakupi maleneꞌya amaku aminaya kanafina nagoꞌa ani veaꞌmoꞌya Kaliki ke havilinaya vea mainagi nagoꞌa veaꞌmoꞌya Hipalu ke havilinae. Kaliki kema havilinaya veaꞌmoꞌya mage hae “Tagai megusa aꞌneyaga havi kava hutama osi kanoꞌa kavela neꞌamamiyanagi Hipalu amakema neꞌaiya megusa aꞌneyaga kasagoꞌya kave neꞌamamiye.” huꞌya amaipa haviya huꞌya ke vai-mainae.
ACT 6:2 Kema vaiya yafe Yisasina tuelufuꞌa (12) Aposolo anagaꞌamoꞌya mukiꞌa Yisasina amakuꞌama aminaya veafe ke hageꞌya ageꞌya mage huꞌya hae “Havigu tagaya Yisasi ke hamanepauna aliꞌyatia ataleta kaveꞌma fako faka hisunana haviya huyafenagi nafuꞌnaganagatama tamakaitami amuꞌnotamifi atiyetama seveniꞌa (7) kanale amaku amakesaene vayaꞌma, mainesigenoꞌma Alu Aotage Avamuꞌmoꞌa amakupima hiya humainenageꞌya veaꞌamimogami amaulagafima kanale kavaꞌma nehisaya vayafe atiyetama ani aliꞌyatela humatesune.
ACT 6:4 Humategahunanagi tagaya mukiꞌa yupa nunamu huta havige havige nehuta Yisasi kea hamapaige hamapaige huta maigahune.” huꞌya humainae.
ACT 6:5 Hageꞌya mukiꞌa veaꞌmoꞌya mani kea haviteꞌya muse nehuꞌya ani vayala hapaliꞌya humataya vayala Sitiveniꞌa, Yisasi kea aguꞌafi tokiyaꞌage huno malegeno Alu Aotage Avamuꞌmoꞌa agupina hiya humainea kanoene Filipiꞌene Polokolasiꞌene Nikanaꞌene Timoniꞌene Pamenasiꞌene Nikolasiꞌe. Nikolasiꞌa Atioku kanoa nayona Yuta nofi kanoa omaineanagi eaꞌyamo “Yuta vayaꞌmogami Anumaya Kotiꞌamimo ke aliꞌna nagupi malegahue.” huno Isaleli nofi vayapi maineane.
ACT 6:6 Ani vayala amavalageꞌya Aposolo vayatega ageꞌya ani vayaꞌmogami amanute amaya maleꞌya nunamuna humatenae.
ACT 6:7 Anumaya Koti kemoꞌa mukiꞌa kotega ute ete higeꞌya kasagoꞌya Yelusalemu nemaiya veaꞌmoꞌya Yisasi kea haviꞌya amakupina malenae. Kasagoꞌya mono note kava vayaꞌyagaene aniꞌa huꞌya Yisasi kea aliꞌya amakupi maleꞌya amametiti humainae.
ACT 6:8 Sitiveniꞌa tusiꞌa kanale kanogino kayone hisia yaꞌene tokiyaꞌaene agupina hiya humainegeno tusiya huno ani vayapina tokiya avame yana humaine.
ACT 6:9 Aniꞌa nehianagi nagoꞌa vayaꞌmoꞌya hetiꞌya Sitiveniꞌene ke neꞌvaiye. Ani vayala miya oꞌali vaya maiteꞌya eteꞌya afaꞌa maineꞌya nago mono nopi neꞌvaya vayale. Sailinia vayaꞌene Alekasatalia vayaꞌene nagoꞌa vayala Silisia vayaꞌene Esia vayaꞌene Sitivenina ke vaitenae.
ACT 6:10 Kea vaitayanagi Alu Aotage Avamumoꞌa haꞌmaegeno kanale agu agesaene kanomo kea amigeno humaine. Higeno amakai kemoꞌa Sitiveni kemona oꞌagasene.
ACT 6:11 Oꞌagasegeꞌya nagoꞌa vayafe “Sitivenifena havige hutesageta mone lamamigahune.” huꞌya hageꞌya ani vayala mage mo hae “Mani kanomoꞌa Mosesefeꞌene Anumaya Kotifeꞌene tusiya huno hu-haviya hunategeta havimainone.” huꞌya mo humainae.
ACT 6:12 Mani kema haya yafe mukiꞌa vayaꞌmoꞌyaene vayatamaene kahegi kema havilinaya anagaꞌmogamina amakuꞌamoꞌa haviya higeꞌya Sitivenina motafa huꞌya Kanisole vayate avaleꞌya umainae.
ACT 6:13 Uteꞌya nagoꞌa havigema nehaya vayala amavaleꞌya hetimatageꞌya ani vayaꞌmoꞌya mage hae “Mani kanomoꞌa mukiꞌa yupa tagaila alu aotage mono notiene kahegi kene huno haviya hie.
ACT 6:14 Higeta havunana Yisasiꞌa Nasaleti kanomoꞌa ma ala mono nona aliꞌna lagaꞌya vaineꞌataleꞌna ‘Moseseꞌma tahapai-mainea kahegi kea ataletama alu kava hiho.’ huno higeta havimainone.” huꞌya hae.
ACT 6:15 Nehageꞌya mukiꞌa Kanisolefi mainaya vayaꞌmoꞌya Sitivenina aulu hayana augosamoꞌa alave alave nehuno ensole vayaꞌmogami amaugosamoꞌma nehia kava higeꞌya age-mainae.
ACT 7:1 Ala mono note hagote kava kanomoꞌa Sitivenifena mage huno havige “Mani kema hugataya kea tamage nehao?” huno havige.
ACT 7:2 Higeno Sitiveniꞌa mage huno humaine nenafagatamaene naganaꞌni-mogatamaene haviho. Taginagomoꞌa Apalahamuꞌe yaufa Halani kotega oꞌuno Mesopotemia kotega mainegeno tokiya hale yamaꞌaene Anumaya Kotiꞌa Apalahamute efalote humaineane.
ACT 7:3 Efalote huteno mage huno hapaiye “Kagaika mopakaꞌaene vayakamogamiꞌenena neꞌamataleka kavelisua mopalega vuo.” huno humaineane.
ACT 7:4 Higeno Apalahamuꞌa anile Kalatia vayaꞌmogami mopa neꞌataleno Halani kotega umaineno anilega nefaꞌa falitegeno Anumaya Kotiꞌa eteno hutegeno tamakayama menima mainaya mopalela emaineane.
ACT 7:5 Emaineanagi Anumaya Kotiꞌa agaiꞌa atafa hisia mopa nago atupa kanoꞌa ani mopa nagoke aiya malesia mopa oꞌaminegi “Haenagaꞌa kamigahue. Ani mopa atafa hulinesanageꞌya kagaipiti falote hisaya nafaꞌneyagamoꞌya aligahae.” huno hianagi ani kanafina Apalahamuꞌa namo kano maineane.*
ACT 7:6 Maineanagino Anumaya Kotiꞌa agaifena mage humaineane “Kagaikaꞌa kaginagomoꞌya Isaleli nofiꞌma omainaya vayaꞌmogami mopale visageꞌya ani vayaꞌmoꞌya amatafa huꞌya ‘Aliꞌyatia aliho.’ huꞌya tusi yate ali haviya humatesageꞌya ani mopalela fo hataletiꞌa (400) kafu maigahae.*
ACT 7:7 Maigahayanagi amatafama huꞌyama ‘Aliꞌyatima aliho.’ huꞌya humainaya vayaꞌmogamina nagaya kaiyeke humateteꞌna aliꞌna haviya humatesugeꞌya kagai kaginagomoꞌya ani kotegatila eteꞌya ma mopale emaineꞌya nagai nagia alisaga hugahae.” huno humaineane.
ACT 7:8 Anumaya Kotiꞌa mage huno humaine “Nagai anagaꞌma maisaya yafe hagelafita maisuna kavala nafaꞌnekamogamina amakoya anoꞌya taga huo.” huno higeno Apalahamuꞌa Aisakina nafaꞌneꞌa ateteno napa eitiꞌa (8) kana maiteno agoya anoꞌya taga humaineane. Haenagaꞌa Aisakiꞌa nafaꞌneꞌa Yekopuna ategeno Yekopuꞌa haenagaꞌa tuelufuꞌa (12) nafaꞌneyaga tagai taginagomogamina amatene.
ACT 7:9 Ani Yosefena nepuꞌamoꞌya Yosefefe tusiꞌa amaipa kafa heteteꞌya avaleꞌya alu vayaꞌmogami neꞌamamiꞌya mone aligeꞌya Isipi kotega avaleꞌya vayanagi Anumaya Kotiꞌa agaiꞌene maineno kanama haiya yana alitaleno kanale agu agesa amigeno Isipi sauve kanoa, Felona, aulagale hetigeno Feloꞌa muse huno “Hagote kava kano maineka nagai noꞌyagaene mukiꞌa Isipi kotega kava yagaigane.” huno hutene.
ACT 7:11 Hutetegeno mainegeno Isipi kotegaene Kenani kotegaene nagola tusiꞌa kafu haya kana efalote higeꞌya tototimogamina kaveꞌamia omalegeꞌya tusiya huno amakala lemainae.
ACT 7:12 Amakala legeno Yekopuꞌa “Isipi koteꞌma kavela hanema.” huꞌya haya kea haviteno nafaꞌneyagaꞌa hagoteno humategeꞌya kaveꞌma hanelega umainae.
ACT 7:13 Haenagaꞌa eteꞌya anile vageno Yosefeꞌa “Nagayae tamakanatamimoꞌna mainoe.” huno higeno Feloꞌa Yosefe afamofena havimaine.
ACT 7:14 Havitegeno Yosefeꞌa nefafena Yekopufeꞌene mukiꞌa anagaꞌa seveti faefuꞌa (75) anagaꞌaene ke higeꞌya Isipi kotega umainageno Yekopuꞌa anile faligeꞌya nafaꞌneyagaꞌaene tototimoꞌya fali-mainayane.
ACT 7:16 Faligeꞌya eteꞌya aliꞌya Sekemu kumala, Apalahamuꞌa moneleti Hamolo nafaꞌneyagamogami mopa miya higeno amigeno ali-mainea mopafi mo hevaitenae.
ACT 7:17 Anumaya Kotiꞌa Apalahamufema hulokiya vai-malenea kemoꞌa fatago huno efalote hisia kanamoꞌa aupa higeꞌya tagai taginagomoꞌya Isipi kumatela falote huꞌya kasago humainageno alu sauve kanoa, Yosefefena oꞌagenea kanomo, eteno sauvea alino humaineane.
ACT 7:19 Falote huno maineno tagai nofi vayala ayemavataga huno huhaviya huneꞌamateno “Nafaꞌneya-gatamia hamaesunageꞌya faligahae.” huno tokiyaꞌage ke humaineane.
ACT 7:20 Higeno ani kanafina Mosesena itaꞌamoꞌa atetegeno Anumaya Kotiꞌa hau-mainea nafaꞌnegino itaꞌamogani nefagania taliꞌa (3) ikana noꞌanifinaga kava huꞌana ataꞌageno mainaꞌe.
ACT 7:21 Kava huteteꞌana kumate atenaꞌageno Felo munaꞌmoꞌa ani nafaꞌnea avaleno agaiꞌa nafaꞌne kana huno yagai-maine.
ACT 7:22 Yagaiteno avo nopi ategeno Isipi vayaꞌmoꞌyama havilinaya yana Mosesena huve-ligeno aliteno tusiya huno tokiyaꞌa haneteno kanale kea nehuno nehia kano maine.
ACT 7:23 Maineanagino fotiꞌa (40) kafu huteno mage hie “Isaleli vayaꞌnimogamina momakegahue.” huno agesa havimaine.
ACT 7:24 Haviteno mogeana nago Isipi kote kanomoꞌa Isaleli kanomona aiko-neligeno Moseseꞌa moli-neꞌataleno anonaꞌa ani Isipi kote kanoa haegeno fali-maine.
ACT 7:25 Faligeno Moseseꞌa ma agesa havimaine “Vayaꞌnimoꞌya mage huꞌya hugahae ‘Anumaya Kotiꞌa Mosese ayapiti taugafa aligatigahie.’ huꞌya hugahae.” huno agesa havianagi vayaꞌamoꞌya ani amakesa ohavinae.
ACT 7:26 Ohavigeno Moseseꞌa faeteno mogeana tole Isaleli kanolatana tu nehaꞌageno monaketeno moli-neꞌanataleno mage huno hie “Nenafugatanae tanakaya nagoke konagalata mainaꞌagi naꞌa higetana tua nehaꞌe?” huno hie.
ACT 7:27 Higeno anima tuma aepa henoꞌma aganaꞌamoma aiko-lia kanomoꞌa Mosesena ayetu-nefeno mage huno hie “Kagaila tagaite kava kano maika kaiyeke fatago hu kano maiyo kea ta kahapaigeka aniꞌa nehane?
ACT 7:28 Kagayama egama Isipi kanoma hayana kava huka nahaegahe nehano?” huno hie.
ACT 7:29 Higeno ani kema hia kehe Moseseꞌa faleno Mitiani kotega mo maineno ala aliteteno maineno haenagaꞌa tole ne nafaꞌnelata anatene.
ACT 7:30 Anilegama maiyana fotiꞌa (40) kafu maiteno Moseseꞌa kaꞌme kotega Sainai agoꞌyafi haino mainegeno nago osi yosalela ala ata anefela nelea yapiti nago ensole kanomoꞌa evaꞌyi higeno age-maine.
ACT 7:31 Ageteno amaꞌyo neꞌaino agelama hisue huno nehuno avate neꞌegeno Anumayamoꞌa anileti age aino mage huno hie “Nagaya kaginagomogamina Anumaya Kotiꞌami mainoe. Apalahamuꞌagi Aisakiꞌagi Yekopugami Anumaya Kotiꞌami mainoe.” huno higeno Moseseꞌa atali talu huteno ani yama nagoꞌene agesia yafena tusi koli huno oꞌagene.
ACT 7:33 Koli nehigeno Anumayamoꞌa mage huno hie “Mamona alu aotage mopa nagaiꞌniꞌa mopagika kaiya anona asagika maletekao.
ACT 7:34 Nagayama nagai nofi vayaꞌma Isipi nemaiya veaꞌnimoga-mina ali haviyama humataya kavala ago age-mainoe. Avima atayana ago havimaineꞌna amaugafa aligatigahe emainogi. Kagaya eno Isipi kotega hugategahue.” huno Mosesefena hapai-mainea ke huno Sitiveniꞌa hamapai-maine.
ACT 7:35 Mani Mosesefena nayona mage huꞌya humainae “Kagaila kava kano maineka kaiyekea ali fatago hugane huꞌya kea ta kahapaigeka aniꞌa nehane?” huꞌya amakaveꞌno hutenae. Anima amakaveꞌno hutaya kanomona osi yosaleꞌma vaꞌyima humainea ensole kanomoꞌa aya higeno Anumaya Kotiꞌa kava humateno amaugafama aligatisia yafe huteneane.
ACT 7:36 Hutegeno Moseseꞌa Isipi kotega umaineno ani kotegati amavaleno fotiꞌa (40) kafu Isipi kumateꞌene haesa titeꞌene kaꞌme kotegaene kasagoꞌya tokiya avame yaꞌyaga humaineane.
ACT 7:37 Ani Moseseꞌa Isaleli veaꞌmogamife mage huno hamapai-maine “Anumaya Kotiꞌa tamakai vayapiti nagayama huaꞌya huno aune laga hisia kanoa avaleno hetitegahie.” huno hamapai-maineane.
ACT 7:38 Ani Moseseꞌa kaꞌme kotega maineno mono kema havigahema melitalu humainaya taginagomoꞌyaene maiteno Sainai agoꞌyafi haitegeno nago ensole kanomoꞌa evaꞌyi huno Anumaya Kotina tahaimuꞌma lamisia mono kea Mosesena hapaigeno Moseseꞌa taginagomogamina hamapai-maineane.
ACT 7:39 Hamapai-mainegi taginagomoꞌya “Mosese kea akave omalegahune.” huꞌya amakaveꞌno huteteꞌya Isipi kotega eteꞌya visaya amakesa nehaviꞌya Elonife mage huꞌya humainae “Kategama lavaleno visia yana Anumaya Kotitima maisia yana talo hulato. Moseseꞌa, Isipi kotegatiꞌma lavalenoꞌma emainea kanoa hanatepi vigeta noꞌagone.” huꞌya humainae.
ACT 7:41 Mani kea huteꞌya nagola pulamakamo nafaꞌnea amayateti talo humaleteꞌya “Anumaya Kotitia ma maine.” huꞌya anima amayatetiꞌma talo humalaya yafena tusiꞌa muse huꞌya afua heꞌya kaeteꞌya aliꞌya mominae.
ACT 7:42 Ani kavaꞌma haya yafena Anumaya Kotiꞌa akaveꞌno humateteno amatalegeꞌya yagema kaꞌnefiꞌma ikama naꞌa yama hanea yate “Anumayati mainae.” huꞌya muse nehuꞌya amakuꞌa amitafa huꞌya ani yaꞌayagamogami amaki alisaga humainaya yafe Anumaya Kotina aune vayaꞌmoꞌya kae-malenaya autaꞌmafina mage huꞌya humainae “Tamakaya Isaleli nofi veaꞌmogatama fotiꞌa (40) kafu kaꞌme kotega umainetama pulamakaene sipi sipiene hetama kae salaꞌmana humainayanagi nagaifena muse hutama mani kavala nehafi alu kanomofe musena nehae?
ACT 7:43 Tamaꞌa omalenea Anumayamona agiꞌa Molekifena tusiꞌa muse hutama agai agi alisaga hisaya nona kitetama alitama utama tamaꞌa omalenea Anumayamona agia Lefanifena tusiꞌa muse hutama kaꞌnefi kana yana talo hutama ani augafa yaꞌyagale musena hutama tamakula amitafa hutama amakia alisaga nehae. Naꞌama haya yafe kame vayaꞌmoꞌya humatesugetama kotamilegatila tamavaleꞌya Papiloni kola agasetama ame kaiyaga umaigahae.” huno humaineane.
ACT 7:44 Taginagomoꞌya kaꞌme kotegama mainagenoꞌa Anumaya Kotiꞌa “Ma kava huka talo huo.” hunoꞌma Mosesena huveli-mainea kavala huno mono nona kenaleti talo humaleteno kimalenegeno Anumaya Kotiꞌa ani nopi eno amakaiꞌene me lokaeno kelamage kea hamapai-maineane.
ACT 7:45 Haenagaꞌa Moseseꞌa falitegeꞌya taginagomoꞌya ani yuguletiꞌma kimalenaya mono nona aliꞌya Yosuaꞌene Yuta vea omainaya veaꞌnene tua huteꞌya mopaꞌamia ali-mainae. Anumaya Kotiꞌa taginagomogami amaulagafima Isaleli nofiꞌma omainaya veaꞌmoꞌya ani mopaletila amanatigeꞌya ani yuguletiꞌma kimalenaya mono nona aliꞌya ani mopafi eꞌya me malageno anile hanegeno Tevitiꞌa falote humaineane.
ACT 7:46 Anumaya Kotiꞌa Tevitina kanaleꞌya huno haꞌmaegeno Tevitiꞌa mage humainene “Yekopu Anumaya Kotiga kanale nona kigatesue.” huno hianagi ani nona okinegi haenagaꞌa nafaꞌneꞌamoꞌa Solomoni ani nona kimaleneane.
ACT 7:48 Kianagi analeꞌma mainea Anumaya Kotiꞌa veaꞌmoꞌya amayatetiꞌma kimalenaya nopina nomaiye. Naꞌama humainea yafena nagola Anumaya Koti aune kanomoꞌa mage huno humaineane
ACT 7:49 “Anumaya Kotiꞌa mage hie ‘Ikapinaga nagaiꞌniꞌa kava yagaisua siaꞌnia hanegi maifaluma hisua yafe naiya maleꞌna maisua yana mopa hanegi hana augafa no kinategahae? Hana kumate maisue? Nagaya mukiꞌa yana ikapinagama hanea yaꞌene ma mopaleꞌma hanea yaꞌene talo humalenoe.’ huno humaine.” huno humaineane.
ACT 7:51 Tamakaya kea ohavi veaꞌne mainetama tamaku tamakesafinaga “Anumaya Koti kea ohavigahune.” hutama Alu Aotage Avamuꞌmona tamakaveꞌno hutetetama tamakinagomoꞌya nehaya kavaꞌage nehae.
ACT 7:52 Tamakinagomoꞌya mukiꞌa Anumaya Kotina amaune vayaꞌamogamina ali haviya humatenae. “Kanale Fatago Kanoa egahie.” huꞌya amaune vayaꞌmogamina tamakinagomoꞌya ago hamayageꞌya falimainayanagi tamakaya ani Kanale Fatago Kanomona ago agesi hutama hayageno fali-maine.
ACT 7:53 Ensole vayaꞌmoꞌya ayaꞌamoꞌya kahegi kea ago tamahapaiyanagi tamakaya tamage hutama akavela nomalae. Mani kea Sitiveniꞌa huno humaine.
ACT 7:54 Higeꞌya anileꞌma mainaya veaꞌmoꞌya Sitiveniꞌma hia kemona haviteꞌya amaipamoꞌa tusi amakata aiteno hamai-vaigeꞌya amavaya mumu mama humainae.
ACT 7:55 Naꞌa nehageno Sitiveni agupina Alu Aotage Avamuꞌmoꞌa hiya higeno ikapinaga aulu heno ageana Anumaya Kotina tokiya hale yamaꞌaene Yisasiꞌa Kotina tamaga ayatega heti-mainegeno age-maine.
ACT 7:56 Ageteno mage huno hie “Agegeho nagaya agoana ikamoꞌa ago aihalegeno ikapinagati emainea kanoa vayaꞌmo atenea kanomoꞌa Anumaya Kotina tamaga ayatega heti-mainegeꞌna nagaya neꞌagoe.” huno hie.
ACT 7:57 Huno hianagi melitaluma humainaya veaꞌmoꞌya agai kea ohavisaya yafe amayateti amakesa ailineleꞌya ala kenake nehuꞌya tusiꞌa ke neꞌvaiꞌya aiko-ligahe motafa humainae.
ACT 7:58 Motafa huꞌya avayu huꞌya kumategati malaga hagaꞌyu hutaleneꞌya yafa kaꞌyoteti hagaꞌyu huꞌya aiko-neliꞌya “Fatago kava nehune” huꞌya hisaya yafe siotaꞌamia asagiꞌya kava kanoa, Solo* aiyafi mo-malenae.
ACT 7:59 Maleteꞌya yafa kaꞌyoteti aiko-neligeno Sitiveniꞌa Anumayamotega havigeno mage huno hie “Anumayaniꞌamoga Yisasigae nagu namemaꞌa kagai kayapi nemaloe.” huno hu-maine.
ACT 7:60 Mani kea nehuno aleꞌya ayeno ala kegefafiti Anumayamotega mage huno hie “Anumayamogae mama kefo kavaꞌma nehaya yaꞌamimona anonaꞌamia hu-oꞌama-to.” huno nehuno anile fali-maine.
ACT 8:1 Sitivenima hayageno falia yafena Soloꞌa “Kanale kava hae.” huno tusiꞌa muse humaineanagi nagoꞌa veaꞌmoꞌya Anumaya Koti kema nehaviya veaꞌmoꞌya Sitivenifena tusiꞌa avi ateteꞌya aliꞌya mo hevaitetageꞌya ani kanaleti aepa heꞌya Yisasi kema haviꞌya amakuꞌama aminaya vayaꞌmogamina Yelusalemuma nemaiya veaꞌmogamina aliꞌya haviya humatageꞌya ani veaꞌmoꞌya faleꞌya Yutia kotegaene Samelia kotegaene ute ete hageꞌya Aposolo vayala amakaiꞌamige Yelusalemua mainae.
ACT 8:3 Mainageno Soloꞌa Yisasi kema haviꞌya amakupi malenaya veaꞌmogamina alino haviya humateno amakaiꞌami noꞌyagafi haino mukiꞌa veala amavaleno kina mo humatene.
ACT 8:4 Kinama humatageꞌya nagoꞌa umainaya veaꞌmoꞌya alu kote kote faleꞌya ute ete huꞌya Yisasina kanale mono keꞌa hamapai-mainae.
ACT 8:5 Filipiꞌa nagola Samelia hanea kumate tavino mage huno mo hamapaiye “Yisasina Anumaya Kotiꞌa taugafa aligatigahema hutenea kano emaine.” huno hamanepaiye.
ACT 8:6 Hamapaigeꞌya mukiꞌa veaꞌmoꞌya agai kea haviteꞌya agaiꞌama humainea tokiya avame yamoꞌa Satani Avamuꞌyaga veaꞌmogami amakupitila ala amake neꞌaiꞌya hatilaviꞌya neꞌvageno amaiya amaya avayu hulavi-mainea veaꞌnene amaiya haviya humainea veaꞌnene alino kanale humategeꞌya ageteꞌya nagoke amaku amakesa haviꞌya keꞌa aliꞌya amakupi malenae.
ACT 8:8 Amakupi maleteꞌya ani kumate veaꞌmoꞌya tusiꞌa muse humainae.
ACT 8:9 Muse hayanagi ani kumatela nago kanomo agia Saimoniꞌe “Nagaya tusiꞌa ala kano mainoe.” huno tokiya avame yana higeꞌya mukiꞌa Samelia veaꞌmoꞌya ageteꞌya tusiꞌa amamaꞌyo neꞌaiyane.
ACT 8:10 Amamaꞌyoa aiteꞌya ala amakima hanea veaꞌnene osi amakima hanea veaꞌnene agai kea haviteꞌya mage huꞌya humainae “Ma kanoa Anumaya Kotiꞌa ala tokiyaꞌa aminea kanoe.” huꞌya humainae.
ACT 8:11 Kasagoꞌya yupa tokiya avame yama higeꞌya agaya yafe tusiꞌa amamaꞌyo aigeꞌya agai ke havimainae.
ACT 8:12 Haviyanagi Filipiꞌa anile evaꞌyi huno Anumaya Kotiꞌma kava yagaisia kanale kene “Yisasina Anumaya Kotiꞌa taugafa aligatigahema hutenea kano emaine.” hunoꞌma hia kanale kene haviteꞌya Yisasina amakuꞌa amitafa hageno veala tina falematene.
ACT 8:13 Saimoniꞌenena Yisasina aguꞌa amitafa higeno tina faletetegeno Filipiꞌene vaineꞌayegeno Filipiꞌa tokiya avame yana higeno ageteno tusiꞌa amaꞌyo aimaine.
ACT 8:14 “Samelia nemaiya veaꞌmoꞌya Anumaya Koti kea haviꞌya amakupi aliꞌya malenae.” huꞌya haya kea Yelusalemuma nemaiya Aposolo vayaꞌmoꞌya haviteꞌya Pitaꞌene Yoniꞌene hunatageꞌana ani kumatela elavi-mainaꞌe.
ACT 8:15 Elaviteꞌana Anumaya Kotiꞌma ani veaꞌmogamima Alu Aotage Avamuꞌama amamisia yafe Anumayamotega havige-mainaꞌe.
ACT 8:16 Amakaya Yisasi agile ago tina falematayanagi Alu Aotage Avamuꞌmoꞌa amakaitela eotavine. Eotavinea yafe Pitaꞌene Yoniꞌene anaya amaugafale avate hulinaꞌageꞌya Alu Aotage Avamula avale-mainae.
ACT 8:18 Aposolo kanolatamogania anayama nemalaꞌageꞌya Alu Aotage Avamula avalageno Saimoniꞌa ageteno mage huno hie “Mone lanamisugetana tokiya yana nagaila namisaꞌageꞌna naya malesugeno veaꞌmoꞌya Alu Aotage Avamula avalesae.” huno hanavige.
ACT 8:20 Higeno Pitaꞌa mage huno hapaiye “Kagaya Anumaya Kotiꞌa afaꞌama neꞌamamia yafema miya hugahue hukama kagesa havina yamoꞌa monikaꞌaene kagaikaꞌaene Anumaya Kotiꞌa alino haviya hugatesie.
ACT 8:21 Anumaya Koti aulagafina kagai kagupina kanale ohunea yafe ani aliꞌyana kagai yana omaletafa huno omalene.
ACT 8:22 Menima kefo kavaꞌma hana yafena kaguꞌa aiyahae huka Anumayamotega havigesanageno ani kagu kagesafima havi kagesama havina yakaꞌa aigekateno kefo yakaꞌa atalegatesie.
ACT 8:23 Nagaya kagupima agoana kaipamoꞌa haviya humainea yafe atuꞌage nehigeno kefo yakamoꞌa nofi hugatene.” huno kenonaꞌa hapaiye.
ACT 8:24 Higeno Saimoniꞌa mage huno hapaiye “Nehana yamoꞌa nagai naugafalela falote ohisia yafe tanakaya nagaila nunamuna hunateꞌo.” huno hanapai-maine.
ACT 8:25 Pitaꞌene Yoniꞌene Anumayamo ke hamapaiꞌana mage huꞌana haꞌe “Taꞌagaya Yisasina agetetaꞌa agaifena taꞌagupi malenoꞌe.” huꞌana hamapaiteꞌana eteꞌana Yelusalemu ugahe kategama vaꞌana Samelia kola alu kumate kumate uꞌana Yisasifena kanale mono keꞌa hamapai-mainaꞌe.
ACT 8:26 Nago ensole kanomoꞌa Filipifena mage huno me hapaiye “Hetika Yelusalemuti Kasa kumateꞌma neꞌvaya katega vuo.” huno hapaiyana ani kana kaꞌme kotega umainea kane.
ACT 8:27 Higeno Filipiꞌa hetino ani katega viaꞌyamo mogeana nagola anupa kanoa Itiopia kotega kava kanoe mukiꞌa ala sauve aala, Kanatesiꞌe huꞌya agia neꞌayaya aꞌmo, mone afenoꞌyate kava neꞌyagaiyane. Ani kanoa Anumaya Koti agi alisaga hugahe Yelusalemu uteno ani yupa eteno nomaꞌalega ugahe hosi afumoꞌma avayu huno neꞌvia kalefi haino maineno Anumaya Kotina aune kanoꞌamoꞌa, Aisaiya, kae-malenea autaꞌmafi hapalime hapalime umaine.
ACT 8:29 Neꞌvigeno Alu Aotage Avamuꞌmoꞌa Filipife mage huno hapaiye “Kagaya ani kalefi mo haisaga humaika agaiꞌene tokaeka vuo.” huno hapaiye.
ACT 8:30 Hapaigeno Filipiꞌa aiyayeno avate neꞌuno mo haviana Aisaiyaꞌma kae-malenea autaꞌmafima hapalimema via kea mo haviteno mage huno hapaiye “Kagaya mani kemona aepaꞌa havilama nehano?” huno havige.
ACT 8:31 Havigegeno ani kanomoꞌa mage hie “Nago kanomoꞌma naveotisiana hanaꞌa huꞌna havigahue?” huno huteno Filipifena “Nagaya mainole ehaika nagaiꞌene emaiyo.” huno hapaiye.
ACT 8:32 Anima Anumaya Koti kema kae-malenea kema hapalia kemoꞌa mage huno humaine “Sipi sipi haegahema avaleꞌya neꞌvagenoꞌma avovoma ohuno ako huno nemaiya avameteꞌene sipi sipi nafaꞌneyagama ayolagefama laga hugahema hia kanomote mo hetiꞌya maineꞌya avovoma ohunaya avamete kava huno ke ohuno ako huno maine.
ACT 8:33 Ani kanomofena ‘Afa kano mainane.’ huꞌya agaye hisifa kava huteteꞌya fatagoma hia kaiyekea huoꞌatenagi afaꞌa hayageno fali-mainegeno agaiꞌa nafaꞌnema omainea yafe nagoꞌa veaꞌmoꞌya avageꞌa ohugahae. Ma mopaleꞌma mainea kanaꞌamoꞌa ago haꞌno humaine.” huno kaemalenea ke hapalime umaine.
ACT 8:34 Hapaliteno ani kava kanomoꞌa Filipife mage huno havige “Ani aune kanomoꞌa tafe mani kea huno humaine? Agaiꞌahe humainefi nago kanomofe mani kea humaine?” huno havige.
ACT 8:35 Havigegeno Filipiꞌa aepa heno mani kemo aepaꞌa hapaiteno Yisasina kanale mono keꞌa hapaimaine.
ACT 8:36 Hapaime hapaime katega neꞌuꞌana nago tite uvaꞌyi huteꞌana ani kava kanomoꞌa mage huno hapaiye “Tina ma hanegi ago kanale mani lina falenategano?” huno havige.
ACT 8:37 Havigegeno Filipiꞌa mage huno hapaiye “Mani kema havika kagupi malekama kametiti hisanana kanalelagiꞌna lina falegategahue.” huno higeno ani kanomoꞌa mage hie “Nagaya Yisasi Kalaisiꞌa Anumaya Koti nafaꞌne maine. Tagai taugafa aligatigahe hutenea kano maine huꞌna aliꞌna nagupi maleꞌna nametiti nehue.” huno humaine.
ACT 8:38 Nehuno hosi afumoꞌma avayu nehia kalemo talaiva kanomofe “Male atafa huo.” huno higeꞌana Filipiꞌene ani kava kanoene tipi taviteꞌana Filipiꞌa tina faletene.
ACT 8:39 Faletetegeꞌana tipitiꞌma ehaiꞌagenoꞌa Alu Aotage Avamumoꞌa aupaꞌa Filipina avaleno vigeno ani kava kanomoꞌa nagoꞌene Filipina oꞌageanagi katega tusiꞌa muse hume hume umaine.
ACT 8:40 Utegeno Filipiꞌa Asotasi evaꞌyi huteno Yisasina kanale mono keꞌa mukiꞌa kumate veaꞌmogamina hamapaime hamapaime uno Sisalia uvaꞌyi humaine.
ACT 9:1 Ani kanafina Soloꞌa aipafinaga tusiꞌa hai-vaiteno tokiyaꞌage ke huno “Anumayamo anagaꞌamogamina hamaesugeꞌya falisae.” huno huteno ala mono note hagote kava kanomote uno mage huno havige “Musekaꞌa nehugi nagaya Tamasigusi kumate uꞌna Yisasi anagaꞌamogamima amakenuꞌnahena amatafa huꞌna kina humateteꞌna Yelusalemu amavaleꞌna egahue. Ani kumate mono note kava vayaꞌmoꞌya nayama hisaya yafe avona kaeka namio.” huno humaine.
ACT 9:3 Ani kotega Soloꞌa viaꞌyamo Tamasigusi evaꞌyi hugahema nehiana aupaꞌa ikapinagatila tokiyaꞌage hale yamoꞌa tusiya huno agaite meyevasa humaine.
ACT 9:4 Meyevasa higeno Soloꞌa mopafi asaga hulavino fae-maineno havigeno nagola ala kemoꞌa mage huno hie “Sologae Sologae naꞌa higeka nagaila ali haviya nehane?” huno humaine.
ACT 9:5 Higeno Soloꞌa mage hie “Alamogae kagaya lagae?” huno higeno mage hie “Nagaya Yisasiꞌnae kagayama nagaiꞌma ali haviya hunenatana kanomoꞌnagi hetika ala kumate ugenoꞌo. Nago kanomoꞌa ‘Naꞌa maꞌa hugane.’ huno kahapaigahie.” huno hapai-maine.
ACT 9:7 Hapaigeꞌya Soloꞌenema vaiyaya vayaꞌmoꞌya hetiꞌya maineꞌya anima agema aiya agea haviyanagi vayaꞌma oꞌagaya yafena tusiꞌa amamaꞌyo aiteꞌya nagokela kea ohunae.
ACT 9:8 Solona mopafiti avaleꞌya hetitageno aulagama agegali hiana aulagamoꞌa haniꞌali koꞌali higeꞌya ayate aliꞌya Tamasigusi avaleꞌya umainae.
ACT 9:9 Vageno Soloꞌa taliꞌa (3) kanama maiyana aulagamoꞌa aniꞌa huno asu humaigeno kaveꞌene tiꞌene mosino afaꞌa oneno maine.
ACT 9:10 Ani Tamasigusia nagola Yisasi anagapiti kanoa, Ananaiyasiꞌe nehaya kanoa maineanagino Anumayamoꞌa himonafi mage huno hapaiye “Ananaiyasigae mainano?” huno higeno “E, ma mainoe Anumaya niꞌamogae.” huno humaine.
ACT 9:11 Higeno Anumayamoꞌa mage huno hapaiye “Hetika fatago kane huꞌyama nehaya katega uteka Yutasi nopi ufalekama agesanana nagola Tasusi kanomona agia Soloꞌe nehaya kanoa anifi maineno Anumayamotega nunamu maino nehianagika mogegane.
ACT 9:12 Ani kanomoꞌa himonafima ageana nago kanomoꞌa eno aulagama agegali hisia yafe anute aya me-malene. Anima himonafima agea kanoa kagayae. Kagaikaꞌa Ananaiyasigae huno himonafina age-maine.” huno hapai-maine.
ACT 9:13 Hapaiyanagi Ananaiyasiꞌa mage huno humaine “Anumayaniꞌamogae ani kanomofena mukiꞌa veaꞌmoꞌya mage huꞌya hageꞌna nehavuane Yelusalemuma kagai anagaꞌma mainaya veaꞌmogamina tusiya huno ali haviya huneꞌamate huꞌya hageꞌna havi-mainoe.
ACT 9:14 Ala mono note ala kava vayaꞌmoꞌya avona amigeno maleꞌma kagai kagileꞌma nunamu huta kahavinegona veaꞌnea kina hulategahe emaine.” huno hie.
ACT 9:15 Nage hianagi Anumayamoꞌa mage huno hie “Afaꞌa agaitega vuo. Ani kanoa nagaya ago hapaliꞌna hutenoa kanoe. Nagai kea alino visiaꞌyamo Yuta vea omainaya veaꞌmogamiꞌene sauve vayaꞌamiene Isaleli veaꞌmogamiꞌene nagai kea hamapaigahie.
ACT 9:16 Nagaifena huhaleno hamanepainageꞌya agata aisia yaꞌene kanama haisia yaꞌene evaꞌyi hutesia yafe aveligahue.” huno hapai-maine.
ACT 9:17 Hapaigeno Ananaiyasiꞌa viaꞌamo ani nopi haino Solo anute aya maleno mage huno hie “Naganaꞌnimoga Sologae Yisasiꞌa Anumayatiꞌamoꞌa emainana kateꞌma evaꞌyima hu-mainea kanomoꞌa kaulagama agegali hisana yafeꞌene Alu Aotage Avamuꞌmoꞌa kagupima hiya kahaisia yafeꞌene hunategeꞌna neꞌoe.” huno hie.
ACT 9:18 Higeno aupaꞌa aulagaletila haletiꞌna kana yamoꞌa asaga hulavigeno aulaga agetegeno mono tina faletene.
ACT 9:19 Kavela netegeno augafamoꞌa tokiya vaigeno Tamasigusi Yisasi anagaꞌma mainaya veapi uno nagoꞌa kanafina amakaiꞌene maine.
ACT 9:20 Tamasigusi maineno aupaꞌa mukiꞌa mono noꞌyagafi ute ete hia yamo mage huno hamapaiye “Yisasiꞌa agaiꞌage Anumaya Koti nafaꞌnea maine.” huno humaine.
ACT 9:21 Mani kema haviya veaꞌmoꞌya tusiꞌa amamaꞌyo neꞌaiꞌya mage huꞌya hae “Mani kanomoꞌa Yelusalemu maineno Yisasi agileꞌma nehaviya veala ago hamaeteno ma kumate eno aniꞌama nehaya veaꞌne kina humateno ala mono note kava vayate kaiyeke humatesia yafe amavalegahe emainea kanofi?” huꞌya hae.
ACT 9:22 Hayanagi Solona hamapaisia tokiyaꞌamoꞌa melino ala higeno “Yisasina Anumaya Kotiꞌa tagai taugafa aligatigahema hutenea kano emaine.” huno tusiya huno humavelia yafena anima Tamasagusi nemaiya Yuta veaꞌmoꞌya alu amakesa alu amakesa havimainae.
ACT 9:23 Amaipamoꞌa haviya higeꞌya ayaꞌaya kana maiteꞌya Yuta vayaꞌmoꞌya “Hanaꞌa huta Solona haesunageno falisie?” huꞌya huteꞌya haesaya yafe nateꞌene kegeꞌene ani kumaꞌmona fiatega yagaiꞌya maiyanagi Soloꞌa mani kea ago havimaine.
ACT 9:25 Haviteno mainegeꞌya nagoꞌa Yisasi anagaꞌmoꞌya nago kegela Solona avaleꞌya yafateti humalenaya tafile haiteꞌya ala kamagupi Solona asaga huꞌya aiteꞌya ani kegiꞌyafiti malaga atalageno tavimaine.
ACT 9:26 Soloꞌa Yelusalemu umaineno Yisasi anagapi umaigahe hianagi agaifena koliꞌa nehuꞌya Solofena “Yisasi kea nohavia kanoe.” huꞌya amametiti humainae.
ACT 9:27 Hayanagi Panapasiꞌa aya huno Aposolo anagate Solona avaleno viaꞌamo kategama Anumayamona agegeno kema hapai-mainea yafeꞌene Soloꞌa Tamasigusia kolima ohuno tokiyaꞌageꞌma huno Yisasi kema hamapai-mainea yafeꞌene Panapasiꞌa hamapai-maine.
ACT 9:28 Hamapaigeꞌya haviteꞌya Solona avalageno amakaiꞌene Yelusalemu kumate vaiyatete huno maineno kolia ohuno Yisasi kea tokiyaꞌage huno hamapai-maine.
ACT 9:29 Soloꞌa nagoꞌa Kaliki kema nehaya Yuta vayaꞌenema tokiyaꞌage kema vaiya yafe ke neꞌvaiꞌya haesagenoꞌma falisia kafe atiye-mainae.
ACT 9:30 Neꞌayageno Yisasina amakuꞌama aminaya veaꞌmoꞌya ani kema haya kea haviteꞌya Solona Sisalia kumate avaleꞌya taviteꞌya anileti hutageno kuma aepaꞌalega Tasusi umaine.
ACT 9:31 Yutiaꞌene Kaliliene Sameliaꞌenema Yisasifena haviꞌya amakupi malenaya veaꞌmogamina amaipamoꞌa falu hinageꞌya maineꞌya kanaleꞌya huꞌya alitalu huge huge huꞌya amakuꞌa ali lokiya vaiꞌya nemaiye. Anumaya Kotima haiya kateꞌma vaiyaya yafe Alu Aotage Avamuꞌmoꞌa amaya higeꞌya kanaleꞌya huꞌya nemaigeꞌya kasagoꞌya veaꞌmoꞌya ete ete huꞌya amakaiꞌene melitalu humainae.
ACT 9:32 Pitaꞌenena alu kumate kumate vaiyatete nehuno Lita kumatela Yisasifena haviꞌya amakupi malenaya veaꞌnene maine.
ACT 9:33 Maineno ageana nago kanoa aiya ayamoꞌa avayu hulavigeno nemaiya kanoa eitiꞌa (8) kafufina kaana vaiꞌoꞌayeno sipale faeno nemaiya kanoa mogemaine. Ani kanomo agia Ainiasiꞌe.
ACT 9:34 Pitaꞌa mogeteno mage huno hapaiye “Ainiasiga Yisasiꞌe, Anumayatimoꞌa, ago alino kanale hugategi hetika fae-nemaina sipakaꞌa alika hilato huo.” huno higeno aupaꞌa heꞌneligeno kanale hutene.
ACT 9:35 Kanaleꞌma hutegeno maiya yafe Lita veaꞌnene Saloni veaꞌnene ani kanomona ageteꞌya Yisasite amakuꞌa aiyahae humainae.
ACT 9:36 Yopa kumatega Yisasifena haviꞌya amakupi malenaya veapiti nago aala maine. Ani aꞌmo agia Tapitaꞌe. Kaliki kefina mage huꞌya ani aꞌmo agia neꞌayayane Tokasiꞌe huꞌya neꞌayaya aꞌmoꞌa tusiya huno kayoneꞌage a maineno mukiꞌa kanafina kaveꞌamiene afenoꞌamienema omalenea veala amaya huno neꞌamamia ale.
ACT 9:37 Pitaꞌa Lita mainegeno ani aꞌmoꞌa kali alino faligeꞌya ani aꞌmona augafa sese huteteꞌya aliꞌya hunalagi-malenaya note anale malenae.
ACT 9:38 Maleteꞌya Yisasifema haviꞌya amakupi malenaya anagaꞌmoꞌya Pitaꞌa Litama mainea kea haviteꞌya Lita kumala Yopa kumaꞌmona aupaꞌale hanea yafe tole kanolatana hunatageꞌana uꞌana mage huꞌana mo-hapaiꞌe “Musekaꞌa nehuꞌagi aupaꞌa taꞌagaiꞌene kumatiꞌalega eno.” huꞌana hapaiꞌe.
ACT 9:39 Hapaiꞌageno Pitaꞌa anakaiꞌene viaꞌamo uvaꞌyi higeꞌya anima hunalagi-malenaya nopima avaleꞌya haiyana kasagoꞌya megusa aꞌneyaga anile hetiꞌya maineꞌya avi neꞌateꞌya amakaiꞌamima fai-linaya kenaꞌamia Tokasiꞌa amakaiꞌenema afaꞌa mainea kanafi talo humalenea kenaꞌamia Pitana aveli-mainae.
ACT 9:40 Aveligeno Pitaꞌa ageteno mukiꞌama mainaya veaꞌmogamifena “Ma nopinagatila hati-lavitama viho.” huno higeꞌya hati-laviꞌya vageno aleꞌya aye-maineno nunamuna huteno ani aꞌma malenalega augosa humaineno mage huno hie “Tapitagae hetio.” huno higeno ani aꞌmoꞌa fali-mainefitila aulaga agegali huno Pitana neꞌageno hetino sipale maine.
ACT 9:41 Sipale mainegeno Pitaꞌa ayana amiteno avale hetiteteno Pitaꞌa Yisasima amakuꞌama aminaya veafeꞌene megusa aꞌneyagaenefe ke higeꞌya aageno fali-mainefitila hetino haegafa higeno avaleno amamine.
ACT 9:42 Aniꞌama hia kemoꞌa mukiꞌa Yopa kumatela ute ete higeꞌya kasagoꞌya veaꞌmoꞌya haviteꞌya Yisasifena haviꞌya amakupi maleꞌya amametiti humainae.
ACT 9:43 Pitaꞌa mukiꞌa yupa Yopa kumatela maineno nagola pulamakamo augafa taga huno talo nehia kanoene nemaiyane. Ani kanomo agia Saimoniꞌe.
ACT 10:1 Nago kanoa Koniliasiꞌe ati kava kanoa Sisalia maineno Itali kumateti vani hataletiꞌa (100) ati vayate kava yagai-maineane.
ACT 10:2 Ani kanoene anagaꞌaene Anumaya Koti kema nehaviꞌya nemaiya yafe “Agayama haiya kava hugahune.” huteꞌya afenoꞌamima omalenea veala monea amamite amamite nehuꞌya mukiꞌa kanafina nunamuna huꞌya muse huꞌya havinegayane.
ACT 10:3 Nago unena ani kanomoꞌa heti-maineno himona kana yana ageana nagola Anumaya Koti ensole kanomoꞌa agaite evaꞌyi huno mage huno humaine “Koniliasigae mainapio?” huno higeno Koniliasiꞌa aulu neheno tusiꞌa amaꞌyo neꞌaino mage huno hie “Ala kanomogae naꞌa higeka nehane?” huno higeno ensole kanomoꞌa mage huno hie “Kagayama Anumayamotega havinegana yaꞌene afenoꞌamima omalenea veala hamaꞌmaeka amamite amamite hana yaꞌene Anumaya Kotiꞌa ageteno kagaifena agesa nehavie.
ACT 10:5 Kagaya menia nagoꞌa vayala humategeꞌya Yopa kumateti Saimoni Pitana movaleꞌya eho.
ACT 10:6 Ani kanomoꞌa nago pulamakamo augafa laga huno talo nehia kanoene nemaiye. Ani kanomo agia Saimoniꞌe. Nomaꞌa hagelimo agegayalega hane.” huno hapaiye.
ACT 10:7 Ani kea hapaiteno ataleno vigeno Koniliasiꞌa tole aliꞌya kanolatamaꞌaene nagola Anumaya Koti kema nehavia ati kanoꞌamoꞌenefe ke higeꞌya ageno ani ensole kanomoꞌma evaꞌyi huno humainea kea hamapaiteno humategeꞌya Yopa umainae.
ACT 10:9 Katega mo-faeteꞌya kotigeꞌya hetiꞌya Yopa evaꞌyi hugahe hageno yagemoꞌa amuꞌno-kaꞌno higeno Pitaꞌa nunamu hugahe nomona amega agotofulega haino maine.
ACT 10:10 Mainegeno tusiꞌa agateanagi kavela yaufa talo tala nehageno nagola himona kana yana age-maine.
ACT 10:11 Ageana ikamoꞌa aihagalo higeno nagola tusiꞌa kena kana yana aluga aluga atupale nofi aye-maleteꞌya atalageno mopafi enelavigeno age-maine.
ACT 10:12 Ageana ani yapina mukiꞌa yaka kafa afua osifaꞌvea nama vayupala yagaene mainageno elavi-maine.
ACT 10:13 Elavigeno Pitaꞌa neꞌagegeno nagola age aino mage huno hapaiye “Pitagae hetika ani memeyana heka no.” huno hie.
ACT 10:14 Higeno Pitaꞌa mage huno hapaiye “Aꞌao, Alanimogae ma ma yaga kafa kagai kaufina oniꞌyaꞌage humainegeꞌna nagaluma humalenana yamofe tamage huꞌna onenoa yaꞌyaga hane.” huno humaine.
ACT 10:15 Higeno nagoꞌene agea aino mage huno humaine “Anumaya Kotiꞌa ago alino sese humalenea yafena ‘Oniꞌyaꞌagela ohunegi afaꞌa alika no.’ huno humainea kavefena nagoꞌene ‘Oniꞌyaꞌage humaineanagiꞌna onegahue.’ huka ohuo.”
ACT 10:16 Ani kavala taliꞌa (3) yupa huteno aupaꞌa ani kenamoꞌa ikapinaga eteno haimaine.
ACT 10:17 Haigeno Pitaꞌa maineno anima agea himonamo aepaꞌahe agesa havige havige huno nehavigeꞌya Koniliasiꞌma humategeꞌya aya vayaꞌmoꞌya Saimoni nofe hamavige hamavige hume hume uꞌya ani nona ageteꞌya fiate mehetiꞌya mainae.
ACT 10:18 Hetiꞌya maineꞌya ke huꞌya mage huꞌya hae “Saimoniꞌa nago agia Pitaꞌe kanoa mani nopina mainefi omaiye?” huꞌya hae.
ACT 10:19 Hageno Pitaꞌa himonahe agesa havige havige huno mainegeno Avamuꞌmoꞌa mage huno hapaiye “Havio taliꞌa (3) vayaꞌmoꞌya kagaife megatineꞌayae.
ACT 10:20 Mekatineꞌayagi hetika afepinaga lavika mogo. Nagaya humatogeꞌya emainagi tole kagesa ohavika afaꞌa amakaiꞌenena vuo.” huno humaine.
ACT 10:21 Higeno Pitaꞌa tavino mage huno hamapaiye “Atimaayaya kanoa nagayae. Naꞌa higetama neꞌae?” huno hama-vige.
ACT 10:22 Hamavigegeꞌya mage huꞌya hae “Nago kanoa Koniliasiꞌe ati vayate kava kanogino fatago kano maineanagino ‘Anumaya Kotina haiya kava hugahue.’ huno humainea kanomoꞌa hulategeta neꞌonageno ani kanomoꞌa Yuta vea omainea kano maineanagi Yuta veaꞌmoꞌya ‘Kanale kano maine.’ huꞌya hageno nemaiyane. Nago yupa nagola alu aotage ensole kanomoꞌa evaꞌyi huno mage huno hapaiye ‘Saimoni Pitafe ke hugeno kagai nopina eno nagola kea kahapaisigeka havigane.’ huno higeno hulategeta neꞌone” huꞌya hapai-mainae.
ACT 10:23 Hageno Pitaꞌa kenonaꞌamia mage huno hie “Nopi ehaitama emaiho.” huno higeꞌya haiꞌya mo faeteꞌya kotigeno Pitaꞌa hetino amakaiꞌene vigeꞌya nagoꞌa Yopa kumateti Yisasife haviꞌya amakupi malenaya vayaꞌmoꞌya amakaiꞌene tokaeꞌya umainae.
ACT 10:24 Katega nagoke no mo faeteꞌya ega Sisalia kumate evaꞌyi hageno Koniliasiꞌa esayafene huno amakava maineno agaiꞌa nofi vayaꞌene anagaꞌamoꞌyaenefe ke higeꞌya melitalu huꞌya mainae.
ACT 10:25 Mainageno Pitaꞌa ani nopi hai-falegeno Koniliasiꞌa avate eno aiyafi ape humaineno muse hutene.
ACT 10:26 Musena hutetegeno Pitaꞌa ali hetiteteno mage huno hie “Hetio nagaiꞌenena afa kano mainoe.” huno hie.
ACT 10:27 Pitaꞌa mani kea nehuno Koniliasiꞌene kea kea hume nopinaga haino mogeana kasagoꞌya veaꞌne melitalu huꞌya mainae.
ACT 10:28 Mainageno Pitaꞌa mage huno hie tamakaitamia ago havimainae Yuta veaꞌmoꞌya Isaleli vea omainaya veaꞌnene maineꞌya kea kea huyafena ago nagalu humalenaya kea ago havimainae. Anumaya Kotiꞌa nagaila navelino mage hie “Nago kanohena ‘Oniꞌyaꞌage kano mainane.’ huka ohuo.” huno naveligeꞌna ageteꞌna nagaifema ke hanageꞌna tole nagesa ohaviꞌna aupaꞌa emainogi naꞌa higeka nagaifena kea hanageꞌna emainoe? huno havige.
ACT 10:30 Havigegeno Koniliasiꞌa mage huno hapaiye “Taliꞌa (3) kana ago euno nagasegeꞌna une kanalega tali (3) kiloki noniꞌafi maineꞌna Anumayamotega nunamu huꞌna havinegogeno aupaꞌa nago kanomona kenaꞌamoꞌa efeꞌage nehuno alave alave nehigeno naule mehetigeꞌna agoe.
ACT 10:31 Agogeno ani kanomoꞌa nagaifena mage huno nahapaiye ‘Anumaya Kotiꞌa haavigana kea ago haviteno kagayama afenoꞌamima omalenea veala hamaꞌmaeka amamite amamite hana yana ageteno kagaifena agesa nehavie.
ACT 10:32 Nehaviafe kagaya Saimoni Pitatega vayala humatesanageꞌya Yopa visae. Ani kanomona hamoꞌamoꞌa Saimoniꞌe pulamakamo augafa taga huno talo nehia kanomo nona hageli agegayale hanegeno yoka unemaiye.’ huno humaine.
ACT 10:33 Higeꞌna nagaya aupaꞌa kagaitega vayala alimatalogeꞌya vageka kanaleꞌya huka emainanageta Anumayamoꞌa ‘Hamapaiyo.’ hunoꞌma kahapai-mainea kea havigahune huta Anumaya Koti aulagafi melitalu humainone.” huno humaine.
ACT 10:34 Pitaꞌa hetino aepa heno mage huno hie “Tamage, havuana Anumaya Kotiꞌa vayaꞌmo agiꞌahepi nofiꞌahepi agesa havino notamianagi mukiꞌa nofi vayaꞌyagafitila nagoꞌa veaꞌmoꞌya Anumaya Kotina amakuꞌa amiteꞌya ‘Agaila haiya kavala kanale kava humainaya veaꞌmoꞌya Anumaya Kotiꞌa ani veafe nahaiya veaꞌne mainae.’ huno hie.”
ACT 10:36 Huteno Anumaya Kotiꞌa Yisasi Kalaisina hutegeno kanale kea huno Anumaya Kotiꞌene alino nagoke taipa falu huta maisuna kea Isaleli veaꞌmogatina tahapaiya kea havimainae. Ani Yisasi Kalaisiꞌa mukiꞌa veaꞌmogatina Anumayatimo maine.
ACT 10:37 Yoniꞌa “Kefo yatamihena tamakuꞌa aiyahae hisageꞌna tina falelamategahue.” huno hamapaitegeno Yisasiꞌa Kaliliti aepa heno mukiꞌa Yutia kotega kema humainea kavafena tamakaya ago havimainae.
ACT 10:38 Anumaya Kotina Alu Aotage Avamuꞌamoꞌene tokiyaꞌaene Nasaleti Yisasina amigeno Anumaya Kotiꞌa agaiꞌaene tokaeno maineafene huno alu kumate kumate ute ete hiaꞌamo kanale kava huno Sataniꞌma amatafa higeꞌya kalima ali-mainaya veaꞌmogamina alino kanale humatene.
ACT 10:39 Kanale humategeta tagaya mukiꞌa Yuta veaꞌma mainalegaene Yelusalemuene humainea kavala taulagafiti age-mainona ke tamahanepaune. Ani kava higeꞌya yafaga yosale asaimalageno fali-maine.
ACT 10:40 Falianagi tole yupa maiteno nago kanalela Anumaya Kotiꞌa fali-mainefiti alino hetitegeno veaꞌmogati taule mo laveli-maine.
ACT 10:41 Mo lavelianagi mukiꞌa veaꞌmoꞌya agaila oꞌagenagi tagaya veaꞌma hamapaisunafene huno Anumaya Kotiꞌa tagaila ago hapalilategeta mainonafe tagaya fali-mainefiti ali hetitenea kanafina Yisasiꞌene tokaeta maineta tiꞌene kaveꞌene nemainone.
ACT 10:42 Nemainonanagino Yisasiꞌa veaꞌmogamina mage hutama hamapaiho huno humaine “Nagaya fali-mainesaya veaꞌnene afaꞌa mainesaya veaꞌnene kaiyeke humatesuafene huno Anumaya Kotiꞌa Yisasinia hunategeꞌna emainoe.” hutama hamapaiho. huno humaine.
ACT 10:43 Yisasifena mukiꞌa Anumaya Koti amaune vayaꞌmoꞌya mage huꞌya humainayane “Mukiꞌa veaꞌmoꞌya agaife haviꞌya amakupi maleꞌya amametiti hisageno agaiꞌa agileti kefo yaꞌamia aigeꞌamateno alitalemategahie. huꞌya humainayane.” huno hie.
ACT 10:44 Pitaꞌa mani kea yaufa hamanepaigeno Alu Aotage Avamuꞌmoꞌa elavino mukiꞌa mani kema maiꞌya nehaviya veaꞌmogami amakupina efalemaine.
ACT 10:45 Amakupi efalegeꞌya amaku amakesafiti nohaviya kea alu ke alu kefiti Anumaya Koti agia alisaga nehae. Ani kavaꞌma haya yafe Pitaꞌene emainaya veaꞌmoꞌya Yisasi kema havimainaya Isaleli veaꞌmoꞌya haviteꞌya Anumaya Kotiꞌa ago alu veaꞌmogamina Alu Aotage Avamuꞌama amamia yafena tusiꞌa amamaꞌyo aigeno Pitaꞌa mage huno humaine.
ACT 10:47 “Anumaya Kotiꞌa tagaila Alu Aotage Avamuꞌamona taminea kava huno mani veaꞌnene ago amamine. Tima falematesuna kaana ta nagalua hulategahie? Tina afaꞌa falemategahune.” huno humaine.
ACT 10:48 Huteno amakaife mage hie “Yisasi Kalaisi agile tina falelamatesue.” huno hamapaiteno tina falematetegeꞌya mage huꞌya hapaiye “Tagaiꞌene nagoꞌa kana tagaya maigane.” huꞌya humainae.
ACT 11:1 Aposolo vayaꞌene Yutia maineꞌya Yisasife haviꞌya amakupi malenaya vayaꞌene nagoꞌa Isaleli vaya omainaya veaꞌmoꞌya Anumaya Koti kea haviꞌya amakupi malenae huꞌya haya kea havimainae.
ACT 11:2 Havigeno Pitaꞌa Yelusalemu haino mainegeꞌya “Amakoya anoꞌyaꞌa taga hisaya yana tusiꞌa tokiya yane.” huꞌya haya Yuta vayaꞌmoꞌya Pitafena “Kagaya havi kava nehane.” huꞌya mage huꞌya humainae “Naꞌa higeka amakoya anoꞌya lagama ohunaya vayaꞌyagaenena kavela mo nenane.” huꞌya humainae.
ACT 11:4 Hageno Pitaꞌa aepa heno mukiꞌa yama faloteꞌma humainea yafena hufalote huno mage huno hie nagaya Yopa kumate maineꞌna nunamuna nehugeno nagu nagesamoꞌa aiyahae higeꞌna himonafi agoana nagola tusiꞌa kena kana yana aluga aluga atupale nofi aye-maleteꞌya atalageno nagaite mopafi elavigeꞌna age-mainoe.
ACT 11:6 Agoana ani yapina mukiꞌa yaga kafa afua osifaꞌvea nama vayupala yapavena anifi mainageno elavi-maine.
ACT 11:7 Elavigeꞌna neꞌagogeno nagola age aino mage huno nahapaiye “Pitagae hetika ani memeyana heka no.” huno hie.
ACT 11:8 Higeꞌna mage huꞌna hue “Aꞌao, Alanimogae ma ma yaga kafa kagai kaufina oniꞌyaꞌage humainegeꞌna nagaluma humalenana yamofe tamage huꞌna onenoa yaꞌyaga hane.” huꞌna hue.
ACT 11:9 Hugeno nagoꞌene agea aino mage huno humaine “Anumaya Kotiꞌa ago alino sese humalenea yafena ‘Oniꞌyaꞌagela humaine.’ huka ohuka afaꞌa alika no.” huno humainea kavefena nagoꞌene “Oniꞌyaꞌage humaineanagiꞌna onegahue huka ohuo.”
ACT 11:10 Ani kavala tagufa (3) yupa huteno aupaꞌa ani kenamoꞌa ikapinaga eteno hai-maine.
ACT 11:11 Haitegeꞌya ani kana kanoꞌale tagufa (3) vayala tagaya mainona note evaꞌyi humainae. Ani vayaꞌyaga Sisaliagati nagaitega humategeꞌya emainae.
ACT 11:12 Emainageno Alu Aotage Avamuꞌmoꞌa nagaifena mage huno hie “Tole kagesa ohavika amakaiꞌene tokaeka vuo.” huno higeꞌna uanagi manile mainaya sikisiꞌa (6) nafuꞌnagaꞌya nakaiꞌene umainae. Uteta ani kanomo note uvaꞌyi huta nomaꞌafi hai-mainone.
ACT 11:13 Haunageno agaya mage huno tahapaiye noniꞌafima ensole kanomoꞌma heti-mainegeꞌna agoana ensole kanomoꞌa mage huno nahapaiye “Kagaya menia nagoꞌa vayala humategeꞌya Yopa kumateti Saimoni Pitana movaleꞌya eho. Ani kanoma esiana kagaiꞌene mukiꞌa anagakaene Yisasiꞌa taaugafa aligatisia kea tamahapaigahie.” huno higeꞌna havue huno tahapaiye.
ACT 11:15 Tahapaitegeꞌna nagaya aepa heꞌna kea nehugeno Alu Aotage Avamuꞌmoꞌa hagoteno tagaiꞌma hulatenea kava huno elavino amakai amakupina fale-maine.
ACT 11:16 Nefalegeno nagesamoꞌa hao higeꞌna Anumayatimoꞌa humainea kele nagesa havimainoe. Ani kea mage huno humaine “Yoniꞌa titafateti falemateneanagi haenagaꞌa Alu Aotage Avamuteti falelamatesigeno tamakupina faleno maigahie.” huno humaineane.
ACT 11:17 Tagayama Yisasi Kalaisife havita tagupi maleta tametiti humainona yupa Anumaya Kotiꞌa Alu Aotage Avamula tamineanagino aniꞌa huno amakaiꞌenena Alu Aotage Avamula amamianagiꞌna nagaya taꞌna Anumaya Kotiꞌma aliꞌyama alia aliꞌyana tilesue? Nagaya maleli-otegahue huno hu-maine.
ACT 11:18 Higeꞌya haviteꞌya kea ohuꞌya maineꞌya Anumaya Koti agia alisaga nehuꞌya mage huꞌya humainae “Tamage Anumaya Kotiꞌa Isaleli vea omainaya veaꞌnenefe ‘Tamaipa aiyahae hisageꞌna agola maige maige hisaya tamahaimula tamamino.’ huno humaine.” huꞌya nehae.
ACT 11:19 Sitivenina hayageno falitegeꞌya Yisasife haviꞌya amakupi malenaya veaꞌmogamina ali-haviya humatageꞌya faleꞌya alu kote kote ute ete humainae. Nagoꞌa veala faleꞌya Fonisia umaigeꞌya nagoꞌa veala faleꞌya Saipalusi umaigeꞌya nagoꞌa veala faleꞌya Atioku kumate umaineꞌya Anumayamo kea Yuta veaꞌmogamike hamapai-mainagi alu veaꞌmogamina hamaopainae.
ACT 11:20 Hamaopaiyanagi amakai amuꞌnopitila nagoꞌa vayala Saipalusitiꞌene Sailinitiꞌene euꞌya Atioku maineꞌya Kaliki veaꞌmogamina Yisasiꞌa Anumayatimofena kanale kea mohamapai-mainae.
ACT 11:21 Hamanepaigeno Anumayamoꞌa tokiyaꞌaleti amaya higeꞌya kasagoꞌya veaꞌmoꞌya amakuꞌa aiyahae huꞌya Anumayamo ke haviꞌya amakupi maleꞌya amametitia humainae.
ACT 11:22 Amametitia hageꞌya Yelusalemu maineꞌya Yisasife haviꞌya amakupi malenaya veaꞌmoꞌya ani kea haviteꞌya Panapasina hutageno Atioku umaine.
ACT 11:23 Anile umaineno ageana Anumaya Kotiꞌa kayone humatea yana ageteno muse huno mage huno hamapaiye “Tamaku tamakesamoꞌa tokiyaꞌage hinagetama efi efi hutama Anumayatimoꞌene tokaetama vaiyatete hiho.” huno hamapaige hamapaige huno maine.
ACT 11:24 Anima hamapaiya kanoa Panapasiꞌe. Ani kanoa kanale kanogino Yisasi kema havino agupi maleno ametiti higeno Alu Aotage Avamuꞌmoꞌa agupina hiya humainea kanogino Yisasifema hamanepaigeꞌya kasagoꞌya veaꞌmoꞌya amakuꞌa Yisasina amitafa humainae.
ACT 11:25 Amitafa hageno Panapasiꞌa Solofe atiyegahe Tasusi umaine.
ACT 11:26 Uno atiyeno ali-falote huteno Atioku avaleno haigeꞌana nago kafua Yisasi anagaꞌene mo lokaeꞌana maineꞌana kasagoꞌya veaꞌmogamina Yisasi kea hamapaiꞌageꞌya Atioku mainaya veaꞌmoꞌya hagote kanafi Yisasi anagafe “Kalisiteni veaꞌmogatamae.” huꞌya amakia malenae. Tagai kefitila ani amakimoꞌa Kalaisi akave malaya veaꞌmogatamae huꞌya humainae.
ACT 11:27 Ani kanafina nagoꞌa Anumaya Koti amaune vayala Yelusalemuti ataleꞌya Atiyoku hai-mainae.
ACT 11:28 Haigeno amakai amuꞌnopitila nago kanomo agia Agapusiꞌe heti-mainegeno Alu Aotage Avamuꞌmoꞌa hapaigeno aune laga huno mage huno humaine “Tusiꞌa kafu hisaya kana mukiꞌa mopale evaꞌyi hugahie.” huno humainea kemoꞌa ani kafuma efaloteꞌma hia kanafina Kolotiusiꞌa sauve kano maine.
ACT 11:29 Ani aunema Agapusiꞌa laga hia kea haviteꞌya Yisasife haviꞌya amakupi malenaya veaꞌmoꞌya mage hae “Yutia mainaya tafu-taganagamina amaya hisune. Mukiꞌamogata moneti hanesimogata monea alitalu hisune.” huꞌya huteꞌya alitalu huteꞌya ani monea aliꞌya Yisasi anagaꞌmogamite kava vayaꞌmogamina amamigahe Panapasigani Sologani hunatageꞌana ani monea aliꞌana umainaꞌe.
ACT 12:1 Ani kanafina Helotiꞌa ala sauve kanogino nagoꞌa Yisasife haviꞌya amakupi malenaya veala alino haviya humatene.
ACT 12:2 Humateteno Yemesiꞌa Yonina nepuꞌamona ayaꞌaya naepeleti ageꞌya fakaligeno fali-maine.
ACT 12:3 Falitegeno Helotiꞌa ageana aniꞌama hia kavafena Yuta veaꞌmoꞌya amaipa haviꞌya kanale haya yafe Pitana haegahe atafa humaine. Hale oki kaihame maya imu kiya kanafi ani kavala humaine.
ACT 12:4 Helotiꞌa Pitana atafa huno kina huteteno sikisitiniꞌa (16) ati vayamogamifena mage huno humaine “Foꞌa (4) maite maite hutama tokiyaꞌage hutama yagaiho.” huno humaine. Ala imua Anumaya Kotiꞌma amakinagomo amaugafama aligati-mainea yafe amakesa hao hisaya imu kitesageno vaya amaufi avaleno kaiyekea huteteno haegahe humaine.
ACT 12:5 Pitaꞌa kina nopi mainegeꞌya Yisasife haviꞌya amakupi malenaya veaꞌmoꞌya tusiya huꞌya Anumaya Kotiꞌma aya hisiafene huꞌya nunamupitila havigemainae.
ACT 12:6 Havinegageno Helotiꞌa “Ega avaleꞌna kaiyekea hutegahue.” huno nehigeno ani kegela Pitana tole ati kanolatamogani amuꞌnopi tole seni nofiteti aluga aluga ayatalapi ayeteꞌya tole ati kanolatamogani anayapiꞌene aye-maletageno faeno mainegeꞌya nagoꞌa ati vayaꞌmoꞌya hetiꞌya ani kina nomo fiate yagaiꞌya mainae.
ACT 12:7 Yagai-mainageno nagola Anumayamo ensole kanomoꞌa evaꞌyi higeno ani kina nomo agupinaga tusiya huno aivasa higeno ani ensole kanomoꞌa Pitana haopale kaꞌyo neꞌaino aligafa nehuno mage huno hapaiye “Aupaꞌa hetio.” huno higeno hetigeno ayapiti seni nofiꞌmoꞌa atuꞌmaelavi-maine.
ACT 12:8 Atuꞌmae-lavigeno ani ensole kanomoꞌa mage huno hapaiye “Kenakaꞌa nefaika kaiya noꞌene vaiyo.” huno higeno Pitaꞌa aniꞌa hutegeno mage huno hapaiye “Siotaka neꞌvaika nakave eno.” huno hie.
ACT 12:9 Higeno ani kina nopitila Pitaꞌa hati-lavino akave neꞌuno tole agesa haviteno aneginagi huno mage hie “Ensole kanomoꞌma hia kavala himona neꞌagofi afaꞌa falotega neꞌagoe?” huno humaine.
ACT 12:10 Anakaya vaꞌana hagotenoꞌma yagai-mainea ati kanoa agaseꞌana uꞌana nago ati kanomona mogaseꞌana uꞌana ala kumateꞌma neꞌvaya fiate uvaꞌyi haꞌana tokiyaꞌage aenileti talo humalenaya fitagino kitalako humalenaya fitamoꞌa agaiꞌa aiyaki-lavigeꞌana nago nona agaseꞌana osi kate vaꞌafiti ensole kanomoꞌa motaleno fanane humaine.
ACT 12:11 Fanane higeno Pitana agu agesamoꞌa aikalo higeno mage huno hie “Menia nagaya havilama huꞌna nehavue Anumayamoꞌa agaiꞌa ensole kanoꞌa hutegeno Heloti ayapitila melinatale. Yuta vayaꞌmoꞌya nagaila nagoꞌa kava hunategahe amakesa havi havi haya yapitilagi naugafa meligatie.” huno humaine.
ACT 12:12 Ani agesa havime havime Malia notega umaine. Ani Maliaꞌa Yoni Makina itaꞌamoꞌe. Ani nopi mukiꞌa veala melitalu huꞌya Anumayamotega havinegeꞌya mainae.
ACT 12:13 Mainageno Pitaꞌa kumategati ani nomo fitale mekalu kalu nehuno ke higeno nagola aliꞌya munaꞌmona agia Lotaꞌe yakigahe emaine.
ACT 12:14 Emaineno haviana Pitana alenaga agele haviteno aipamoꞌa havino muse huteno ani fita oꞌyakino ataleno aiyayeno nopinaga haino mage huno veaꞌmogamina hamapaiye “Pitaꞌa ago fiate me heti-maine.” huno hie.
ACT 12:15 Higeꞌya “Aifoꞌnafo ke nehane.” huꞌya hageno “Aꞌao, tamage nehue.” huno higeꞌya “Agaya omaigi ensole kanoꞌa emainegi mogeho.” huꞌya humainae.
ACT 12:16 Nehageno Pitaꞌa fitale akalu kalu maino huge huge nehigeꞌya fita yakiꞌya agayana higeꞌya ageteꞌya tusiya huꞌya atali talua humainae.
ACT 12:17 Amamaꞌyoa neꞌaigeno Pitaꞌa “Kea ohutama maiho.” huno hamapaisia yafe ayateti aigo-sigosi huteno Anumayamoꞌma nofi nopiti avaleno emainea yafena hamapaiteno mage huno hamapaiye “Ani kea Yemesiꞌene nagoꞌa tafu-taganagamina hamapaiho.” huno hamapaiteno hati-lavino aluꞌalega umaine.
ACT 12:18 Utegeno kola otinegeno yagea vaꞌyima nehiana ati vayaꞌmoꞌya atali talu huteꞌya “Pitaꞌa hanaꞌa huno hanate tataleno vie?” huꞌya ala ke nehuꞌya amamaꞌyoa tusiya huno aimaine.
ACT 12:19 Helotiꞌa haviteno “Pitafe atiyeho.” huno higeꞌya ati ayayana ali falote ohageno ati vayaꞌmogamina kaiyeke huneꞌamateno “Hamaegeꞌya faliho.” huno humaine. Huteno Yutiati tavino Sisalia mo maine.
ACT 12:20 Helotiꞌa kava yagai-mainea mopafiti kaveꞌamia neꞌaliya yafe Helotiꞌa Taiya nemaiya veaꞌnene Saitoni veaꞌnenefe tusiya huno aipa haviya humategeꞌya nago amaku amakesa haviteꞌya alitalu huꞌya Helotina hagote aliꞌya kanoꞌamote Palasatusite mage huꞌya me hae “Falu huta maisuna yafe kagaya Helotina hapaiyo.” huꞌya hageno agaya nago aipa ani veaꞌnene huteno Helotite emainae.
ACT 12:21 Ageno Helotiꞌa nago kanaꞌa amamiteno ani yupa sauve konagali kenaꞌa faiteno sauve kanomo siale maineno ayaꞌaya ke hamapaiye.
ACT 12:22 Hamanepaigeꞌya melitalu humainaya veaꞌmoꞌya mage huꞌya nehae “Mopale kanomo hia augafa kea nohanagi Anumaya Kotiꞌa kema nehia kava huka nehane.” huꞌya humainae.
ACT 12:23 Nehageno “Havige nehae.” huno ohuno Anumaya Koti agima alisaga ohia yateti aupaꞌa Anumayamo ensole kanomoꞌa me aikolino kalia amigeno hagifaꞌyagamoꞌya aipa laga hageno fali-maine.
ACT 12:24 Falitegeno Anumaya Koti kemoꞌa tokiyaꞌage huteno mukiꞌa kumate ute ete humainegeꞌya kasagoꞌya veaꞌmoꞌya haviteꞌya Yisasina amakuꞌa amitafa humainae.
ACT 12:25 Panapasiꞌene Soloꞌene ani monea Yelusalemu kumate aliꞌana momamiteꞌana Yoni Makina avaleꞌana Yelusalemuti Atioku kumate emainaꞌe.
ACT 13:1 Ani Atiokua Yisasi anagapiti nagoꞌa maineꞌya amaune laga huꞌya Yisasi ke hamanepaiya vayala mainae. Ani vayaꞌmogami amakia Panapasiꞌene Simioniꞌe kanomona nago agia Naisaꞌe. Tagai kefina ani agimoꞌa “Anupa kanoe.” huꞌya neꞌaya agie. Ani kanoene Lusiasiꞌa Sailini kanoene Soloꞌenena Manainiꞌe. Ani kanoa Helotiꞌa Kalili kava kanomona afaluꞌamoꞌe.
ACT 13:2 Nago yupa Yisasi anagaꞌmoꞌya kavela mosiꞌya maineꞌya Anumayamo agia alisaga nehuꞌya muse huꞌya havinegae. Havinegageno Alu Aotage Avamuꞌmoꞌa amakaifena mage huno humaine “Panapasigani Sologania anahaote aliꞌyate hunateho. Nagaya nago aliꞌyate ago hunatenoe.” huno humaine.
ACT 13:3 Higeꞌya kave mosiꞌya maineꞌya Anumayamotega havinegeꞌya ananute amaya maleꞌya hunatageꞌana umainaꞌe.
ACT 13:4 Alu Aotage Avamuꞌmoꞌa hunategeꞌana Selusia taviꞌana tipi kalefi haisaga humaiꞌana Saipalusi kotega umainaꞌe.
ACT 13:5 Salamisi vaꞌyi huꞌana Yuta vayaꞌmogami mono nopi haiꞌana Anumaya Koti kea hamapai-mainaꞌe. Anakaiꞌene Yoni Makiꞌa monaya humaine.
ACT 13:6 Ani Saipalusia ti amulagoyafi hanea kumaꞌyagale ute ete huꞌya Pafosi evaꞌyi humainae. Ani kumatela nago Yuta kanomoꞌa havige huno “Anumaya Koti aune kano mainoe.” huno nehia kanomo agia Payisasiꞌe nehaya kanoa maine. Ani kanomoꞌa tokiyaꞌage kavaꞌyaga talo huno veaꞌnea ayemavataga nehiane.
ACT 13:7 Ani kanomoꞌa mukiꞌa kanafina kava kanomo agia Sesiusi Polusiꞌene nemaiyane. Sesiusi Polusiꞌa kanale agu agesaene kanogino Anumaya Koti ke havigahe Panapasigani Sologanife ke higeꞌana eꞌana hapai-mainaꞌe.
ACT 13:8 Hapaiꞌageno ani havigeꞌage aune kanoma Payisasiꞌa tokiyaꞌage kavaꞌma nehia kanomona nago agia Kaliki kefiti Elimasiꞌe mage huno nehie “Mani kea havika kagupi omalo.” huno hefalaki-maine.
ACT 13:9 Hefalakeanagi Soloꞌa nago agia Poloꞌe agaiꞌa agupina Alu Aotage Avamuꞌmoꞌa hiya higeno Elimasina aulagafi age-maineno mage huno hapaiye “Kagaya Satani nafaꞌnemogae fatago humainea yamona kame kanoꞌa mainane. Savale savala keꞌage kano mainananagino kagai kagupina havi keꞌage yamoꞌa hiya humaine. Naꞌama hana kanomoga Anumaya Koti kamoꞌa fatago humainea kama haneanagi kagaya ‘Kayagimainea ka hanegi oꞌviho.’ huka hamanepaine. Na yu ani havi kavakaꞌa atalegane?
ACT 13:11 Oꞌatalenana anonaꞌa menia havio Anumayamona tokiyaꞌage ayatetila kahaesigeno kaulagamoꞌa osi kanaganoꞌa asu hisigeka yagea oꞌagegane.” huno nehigeno aupaꞌa aulagamoꞌa anile asu higeno ayate aliꞌya kama avelisaya kanohe atiye-maine.
ACT 13:12 Kava kanomoꞌa Sesiasi Polasiꞌa naꞌama hia kavala ageteno Yisasife hia kene tokiyaꞌaenefe ageteno tusiꞌa amaꞌyo aigeno ani kea alino aguꞌafi maleno ametiti humaine.
ACT 13:13 Poloꞌenema vaꞌa kanolatana Pafosi kumala ataleꞌya tipi kalefi haisaga humaiꞌya nagola Pamafilia hanea kumala Pega kumate evaꞌyi huteꞌya Yoni Makiꞌa neꞌanataleno Yelusalemu eteno lavi-maine.
ACT 13:14 Lavigeꞌana anakaya Pega kumala ataleꞌana nago Pisitia kotega kumaꞌmo agia Atioku kumate evaꞌyi huꞌana Sapati yupa Yuta vayaꞌmogami mono nopi haiꞌana mopale mainaꞌe.
ACT 13:15 Mopale mainaꞌageꞌya ani mono note soka vayaꞌmoꞌya Mosese kae-malenea kene Anumaya Koti amaune vayaꞌmoꞌyama kae-malenaya kene hapaliteꞌya nago kanoa hutageno uno ani kanolatafe mage huno humaine “Nelafugatana taguꞌamoꞌma tokiya vaisia kea tanakuꞌafima hanesigetanahena huhaleꞌageta havimano.” huno humaine.
ACT 13:16 Higeno Poloꞌa hetino ayana alisaga huno ke ohutama maiho huno amaveliteno mage huno humaine ‘Isaleli vayaꞌmogatamaene nagoꞌa Isaleli omainaya vayala Anumaya Kotina haiya kava haya vayaꞌmogatamaene haviho.
ACT 13:17 Isaleli veaꞌmogamina Anumaya Kotiꞌamimoꞌa taginagomogamife agaiꞌa veaꞌne maisayafene huno hapalimategeꞌya Isipi kotega yokala umaiyana Anumaya Kotiꞌa amaya higeꞌya tokiyaꞌage veaꞌne aitagufeꞌya kasago hageno agaiꞌa tokiyaꞌaleti Isipi kotegatila amavalegeꞌya ataleꞌya umainae.
ACT 13:18 Amavaleno vigeꞌya fotiꞌa (40) kafu amakaiꞌene kaꞌme kotega umaineno veganokano kavaꞌma haya kavaꞌamihe mailama huno maineno yagaino maine.
ACT 13:19 Anumaya Kotiꞌa seveniꞌa (7) nofi veaꞌmoꞌya Kenani nemaiya veaꞌmogamina hamae haꞌno higeꞌya faligeno amakai mopa Isaleli veaꞌmoꞌya maisaya yafene huno alino amamine.
ACT 13:20 Amamigeꞌya fo hataleti fifitiꞌa (450) kafu ani kumatela mainageno anile Anumaya Kotiꞌa kasagoꞌya uhagotematesaya vayala amamigeꞌya amakaya maime maime nehaigeno haenagaꞌa nagola Anumaya Kotina aune kanoꞌa Samueliꞌa evaꞌyi humaineane.
ACT 13:21 Evaꞌyi higeꞌya “Ala sauve kanotia lamio.” huꞌya hageno Anumaya Kotiꞌa Solona amamine. Ani kanomona nefa agia Kisiꞌe. Penisamini nofi kano maineanagino Soloꞌa fotiꞌa (40) kafu kava yagaimateneane.
ACT 13:22 Kava yagaimateno maineanagino Anumaya Kotiꞌa neꞌataleno Tevitina hutegeno ala sauve kanoꞌamia maineane. Anumaya Kotiꞌa Tevitifena mage huno humaineane “Yesi nafaꞌnea Tevitifena nagaiꞌene nagoke taꞌagu taꞌagesa haneanagino Tevitiꞌa mukiꞌa nagaiꞌma nahaiya kavala hugahie.” huno humaineane.
ACT 13:23 Anumaya Kotiꞌa nayona hulokiya vaino mage huno humaine “Tevitina aginagomopiti tamaugafa aligatisia kanoa falote hugahie.” huno humaineanagino ani kanoa Yisasiꞌe taugafa aligatisia kano emaine.
ACT 13:24 Yisasiꞌa falote ohunea kanafina Yoniꞌa Isaleli veaꞌmogamina “Kefo yatamihe tamakuꞌa aiyahae hutama tina faleho.” huno hamapai-maine.
ACT 13:25 Yoniꞌa aliꞌyamaꞌa alino avaya ayegahe nehuno mage huno humaine “Tamakaya nagaifena ‘Anumaya Kotiꞌa taugafa aligatigahe hutenea kano emaine.’ hutama nehayanagi nagaya ani kanoa omainogi ani kanoa aupaꞌa egahianagiꞌna nagaya afa kanogiꞌna agai aiyale ayesuana onategahie.” huno humaine.
ACT 13:26 Nafu-naganagatama Apalahamupiti anagaꞌmogatamaene nagoꞌa Isaleli omainaya vayala Anumaya Kotina haiya kava haya vayaꞌmogatamaene Anumaya Kotiꞌa tamaugafa aligatigahe humainea kea mukiꞌamogatile evaꞌyi humaine.
ACT 13:27 Yelusalemu mainaya veaꞌmoꞌya kava vayaꞌamiene Yisasina agelama ohunae. Mukiꞌa sapati kanafina amaune vayaꞌmoꞌya Yisasina kaiyeke huteteꞌya haesaya yafema kae-malenaya kea hapaliyanagi aepaꞌa havilama huꞌya ohavinae. Yisasina kaiyekema hutenaya yafe humainaya kemoꞌa ago falote huno tamage humaine.
ACT 13:28 Kaiyekea huteteꞌya haesageno falisia augafa kefo kavala ohuneanagi Pailatife “Afaꞌa haegeno falino.” huꞌya humainae.
ACT 13:29 Mukiꞌa amaune vayaꞌmoꞌya agaifema humalenaya kemoꞌa falote huno ago tamage higeꞌya yafaga yosaleti augafaꞌa aliꞌya yafakapi mo-hevaitenae.
ACT 13:30 Mo hevaitayanagi Anumaya Kotiꞌa fali-mainefiti alino hetitene.
ACT 13:31 Hetitegeno Yisasiꞌa agaiꞌaenema Kaliliti Yelusalemu hai-mainaya anagaꞌamoꞌya amaulagafiti kasagoꞌya yupa evaꞌyi higeꞌya age-mainayanagiꞌya menia agaifena mukiꞌa Yuta veaꞌmogamina hamanepaiye.
ACT 13:32 Hamapai-mainaya yafe tagayaene Anumaya Kotiꞌa tamakinago-mogamina hulokiya vaino hamapai-mainea kemona kanale ke tamakaila tamahapaigahe emainone.
ACT 13:33 Ani kemoꞌa falote huno tamagema hisiafene huno Anumaya Kotiꞌa tagaila amakinagomogati taulagafi Yisasina ago alino hetitene. Mani kea Yagame Avopi tu (2) molia sapta mage huꞌya kae-malenae “Kagaya menia nafaꞌneꞌnimoga mainane. Meni kanoꞌa nagaya Negafaꞌna mainoe.” huno kae-maleneane.
ACT 13:34 Yisasiꞌa fali-mainefiti ago ali hetiteneafe eteno falino komufinaga mo okasalisiafene huno nayona Anumaya Kotiꞌa mage huno humaineane “Tevitina ‘Haꞌno ohu manua kanale manu kamigahue.’ huꞌna humainoa manua tamakaila tamamigahue” huno humaineane.
ACT 13:35 Ani yafe nago kemoꞌa nago autaꞌmafina mage huno hu-maineane “Kagaya kanaleꞌya huka huyogi-malenana aliꞌya kanokamona Anumayamoga atalesanageno augafamoꞌa komufinaga okasaligahie.” huno humaineane.
ACT 13:36 Mani kea Tevitifena ohune. Tevitiꞌa ma mopale mainea kanafina Anumaya Kotina haiya kava humaineanagino faligeꞌya totoꞌamogami hevaimatenaya matimatipi augafamoꞌa kasali-maineanagi Anumaya Kotiꞌa Yisasina fali-mainefiti ali hetitenea kanomo augafamoꞌa okasaline.
ACT 13:38 Ani yafe nafuꞌnaganagatama havilama hutama haviho ani kanomoꞌma hulatenea kavafe Anumaya Kotiꞌa kefo yatamia aigetamateno atalelamatene huta tamahanepaune.
ACT 13:39 Moseseꞌma kahegi malenea kemona akave malesunageno Anumaya Kotiꞌa kefo yatia aigetateno atalelategahie hutama tamametiti hisayana aigetamateno ataleotamategahigi Yisasife havitama tamakupi maletama tamametiti hisageno Yisasiꞌma fali-mainea yateti Anumaya Kotiꞌa mukiꞌa kefo yatamia aigetamateno atale-lamategahie.
ACT 13:40 Amaune vayaꞌmoꞌya mage huꞌya kae-malenae “Tamakaya kamuge hatagetama vaineꞌamataya veaꞌmogatama tamakaya mainaya kanafina nagaya Anumaya Kotiꞌna tusiya huꞌna tokiyaꞌage avame yana hugahue. Ani yafe veaꞌmoꞌya tamahapaisagetama ‘Tamage nehae.’ hutama ohugahae ani yafe tamamaꞌyoa ainagetama faligahae.” huꞌya kae-malenayane. Mani amaune vayaꞌma kae-malenaya kea tamakaite evaꞌyi hugahigi kaꞌye ho. huno humaine.
ACT 13:42 Poloꞌa mani kea huteno Panapasiꞌene hati-laviꞌana ugahe nehaꞌageꞌya alitalu humainaya veaꞌmoꞌya mage hae “Nago Sapati yupa ani monola nagoꞌene me lahapaiꞌo.” huꞌya humainae.
ACT 13:43 Nehuꞌya monola haꞌno higeꞌya hati-laviꞌya mukiꞌa Yuta vayaꞌene Anumaya Koti kema nehaviya anagala Yuta vea omainaya veaꞌnene Pologani Panapasigania anakave neꞌvageꞌana mage huꞌana hamapaiꞌe “Tokiyaꞌage hutama Anumaya Kotiꞌa kayone hulamatesia yama tamaminea yapi maiho.” huꞌana humainaꞌe.
ACT 13:44 Nago Sapati yupa mukiꞌa ani kumate veaꞌmoꞌya Anumayamo ke havigahe melitalu humainae.
ACT 13:45 Melitalu huꞌya mainageꞌya Yuta vayaꞌmoꞌya ageteꞌya amaipamoꞌa haviya higeꞌya Poloꞌma hia kehena “Havige nehie.” huꞌya hu-haviya hutenae.
ACT 13:46 Hu-haviya hunatayanagi Pologani Panapasigania tokiyaꞌage kea mage huꞌana haꞌe “Tamakaya Yuta veaꞌmogatamina hagotetaꞌa Anumaya Koti kea tamahapaigahe huꞌanagi mani kemona tamakaveꞌno hutetama ‘Agola maige maige hisuna tahaimu alisuna yafena notahaiyanagita oꞌaligahune.’ hutama haya yafe tamakaila tamataletaꞌa Isaleli vea omainaya veaꞌmogamina mo-hama-paigahuꞌe.
ACT 13:47 Naꞌa hisuꞌafene huno Anumayamoꞌa mage huno lahapai-maineane ‘Isaleli vea omainaya veaꞌmogamina aye-halematesayafene huꞌna ago hulamatenoe. Mukiꞌa mopaene mopaene mainaya veaꞌmogamina amaku amamena aligatisuafene hutama hamapaigahae.’ huno humaineane.” huꞌana humainaꞌe.
ACT 13:48 Nehaꞌageꞌya Isaleli vea omainaya veaꞌmoꞌya mani kea haviteꞌya tusiꞌa muse huꞌya Anumayamo kea alisaga humainae. Naꞌa nehuꞌya Anumaya Kotina haigenoꞌma “Agola maige maige hisaya tamahaimula aligahae.” huno hapali-malenea veaꞌmoꞌya mani kea haviteꞌya aliꞌya amakupi maleꞌya amametiti humainae.
ACT 13:49 Amametiti hageno Anumayamo kemoꞌa mukiꞌa kotega ute ete humaine.
ACT 13:50 Ute ete humaineanagi Yuta vayaꞌmoꞌya ala amakima hanea aꞌneyaga mono kema nehaviya aꞌneyagamogami amaipaene kava vayaꞌmogami amaipaene huꞌya ali hetigeꞌya aepa heꞌya Pologani Panapasiganina ali haviya-hunateteꞌya ani kumategati ananati-talenae.
ACT 13:51 Ananati-talageꞌana anakaya “Mani kavala havi kava nehae.” huꞌana ani kumapiti kugukege yana anaiyafitila aifopo huneꞌataleteꞌana Aikoniamu umainaꞌe.
ACT 13:52 Vaꞌanagi Yisasi kema haviꞌya amakupi malenaya veaꞌmoꞌya tusiꞌa muse hageno Alu Aotage Avamuꞌmoꞌa amakupina hiya humaine.
ACT 14:1 Pologani Panapasigania Aikoniamu elavi-vaꞌyi huꞌana Yuta veaꞌmogami mono nopi haiꞌana kanale mono ke hamapaiꞌageꞌya kasagoꞌya Yuta veaꞌmoꞌyaene Kaliki veaꞌmoꞌyaene haviꞌya amakupi maleꞌya amametiti humainae.
ACT 14:2 Naꞌa haꞌanagi nagoꞌa Yuta veaꞌmoꞌya “Yisasi kelefena tametiti ohugahune.” huꞌya nehaya Yuta veaꞌmoꞌya havige huꞌya Isaleli vea omainaya veaꞌmogamina Yisasi anagafe “Kefo kava nehae.” huꞌya hu-atile-male huꞌya amaipa kafa hematenae.
ACT 14:3 Naꞌa hayanagi Pologani Panapasigania ayaꞌaya kana anile maineꞌana tokiyaꞌage huꞌana Anumayamo kea huhalaꞌageno Anumayamoꞌa anaya huno agaiꞌa kayone humatesia kea havisayafene huno tokiyaꞌa anamigeꞌana tokiyaꞌage avame yaꞌyaga humainaꞌe.
ACT 14:4 Ani kava haꞌageꞌya ani kumate veaꞌmoꞌya tolefi aliꞌya fako huꞌya nagoꞌa veaꞌmoꞌya mage hae “Yuta vayaꞌmoꞌya tamage nehae.” huꞌya hayanagi nagoꞌa veaꞌmoꞌya mage hae “Aꞌao, Aposolo vayaꞌmoꞌya tamagea nehae.” huꞌya humainae.
ACT 14:5 Huteꞌya Yuta vayaꞌene Isaleli vea omainaya vayaꞌene kava vayaꞌamiene mage hae “Pologani Panapasiganina ali haviya hunateteta yafa kaꞌyoteti hanaesunageꞌana faligaꞌe.” huꞌya humainae.
ACT 14:6 Hageꞌana mani kea haviteꞌana faleꞌana Likonia kotega hanea kumatalate Lisitala kumateꞌene Tepe kumateꞌene uꞌana anilega hanea kumaꞌyagalega umaineꞌana Yisasifena kanale mono kea hamapai-mainaꞌe.
ACT 14:8 Lisitala kumatela nago kanoa maine. Ani kanoa atenelegati aiya avayu humai kanoa vaiyatete nohia kanoa anile mopale maine.
ACT 14:9 Mopale maineno Poloꞌma hia kea maino nehavigeno Poloꞌa aulu heno ageana ani kanomoꞌa Yisasifema havino agupi maleno ametiti hia tokiyaꞌa hanegeno Poloꞌa agupinaga havia kea ago haviteno ala kegefafiti mage huno hie “Kaiya ayepi huka hetika maiyo.” huno higeno aupaꞌa halelako humaino hetino ute ete humaine.
ACT 14:11 Ute ete higeꞌya alitalu humainaya veaꞌmoꞌya Poloꞌma hutea kavala ageteꞌya ala kefiti ailalupeꞌya Likonia veaꞌmogami kefiti mage huꞌya hae “Tagai anumayatia vaya kana huꞌya tagaitela elavi-mainae.” huꞌya humainae.
ACT 14:12 Nehuꞌya Panapasife “Nago anumayati maine. Agia Susi maine.” huꞌya nehuꞌya Poloꞌa kasagoꞌya kema hia yafe “Nago anumayati maine. Agia Hemesi emaine.” huꞌya humainae.
ACT 14:13 Susi agima alisaga nehaya nona ani kumaꞌmo agegayalega hanegeno ani note kava kanomoꞌa ve pulumakaene taꞌmu vailinea auseꞌaene ani kumaꞌmo hiꞌonale alino mukiꞌa veaꞌnene ani tole kanomofe pulamaka heꞌya kae-salamana hunategahe humainae.
ACT 14:14 Hunategahe nehageꞌana Aposolo kanolatamogania Pologani Panapasigania mani kea haviteꞌana “Havi kava hugahe nehae.” huꞌana kenaꞌania ali hatata hutaleꞌana anima alitalu humainaya veaꞌmogami amuꞌnopi anaiyayeꞌana vaꞌaꞌyamogani ala kefiti mage haꞌe “Nelaꞌafugatamae naꞌa higetama mani kavala nehae? Taꞌagaya vayatafa mainoꞌagi tamakai kana hutaꞌa mopale vaya mainoꞌe. Kanale mono kea tamahapaigahe taꞌagaya emainoꞌe. Afa kava hutama haimula omale maniꞌmo agi alisaga nehagi ani kavala neꞌataletama tamakuꞌa aiyahae hutama Anumaya Kotina tamakuꞌa amitafa hiho. Ani Anumaya Kotiꞌa ofalisia kano maine. Ikaꞌene mopaene hageliꞌene talo humalene. Mukiꞌa ani lipi mainaya kafayagaene ikatega mainaya namaene mopale mainaya afuene veaꞌnene talo humaleneane.
ACT 14:16 Nayo kanafina alu nofi alu nofi veaꞌnemoꞌya amakaiꞌami hamaiya kate vaiyatete maiꞌya hageno Anumaya Kotiꞌa kahegi oꞌamatene
ACT 14:17 Kahegi oꞌamateneanagi ‘Nagaya ma mainoe.’ huno amaveligahe huno kanale kavala humateno ikapinagatila kola lamamino hoyafina kanale kavela lamamino tamaku tamamemoꞌa muse hisia yana male hiya hulamatene.” huꞌana nehaꞌe.
ACT 14:18 Mani kea haꞌanagi ani veaꞌmoꞌya anakaila afu heꞌya kae-salamana henategahe nehageꞌana “Aꞌao.” huꞌana tokiyaꞌage ke haꞌa yafe atalenae.
ACT 14:19 Nagoꞌa Yuta vayaꞌmoꞌya Atiokutiꞌene Aikoniamutiꞌene anile evaꞌyi huꞌya alitalu humainaya vayaꞌmogami amaipamona huꞌya ali hetimatageꞌya yafa kaꞌyoteti Polona haeteꞌya agayana higeꞌya “Ago fali-maine.” huꞌya amakesa haviteꞌya kumaꞌmona malaga avayu huꞌya mo talenae.
ACT 14:20 Mo talayanagi Yisasife haviya amakupi malenaya vayaꞌmoꞌya ayaꞌamoꞌya me maigagitageno anileti hetino kumatega mo faeteno kotigeno Panapasiꞌene Tepe kumala neꞌataleꞌana umainaꞌe.
ACT 14:21 Vaꞌaꞌyamogani ani kumate vayaꞌmogamina Yisasi mono kea hamapaiꞌageꞌya kasagoꞌya veaꞌmoꞌya Yisasife haviꞌya amakupi maleꞌya amametiti hageꞌana eteꞌana Lisitala kumate haiteꞌana Aikoniamu haiꞌana Atioku kumate evaꞌana anile maineꞌya Yisasife haviꞌya amakupi maleꞌya amametiti humainaya veaꞌmogami amaku amamema ali lokiya vaisaya kea mage huꞌana hamapaiꞌe “Tokiyaꞌage hutama tamakuꞌa Yisasina amitafa haya yana mukiꞌa kanafina ani katekeꞌya vaiyatete hiho. Anumaya Kotife ‘Kava yagailato.’ huꞌya nehaya veaꞌmoꞌya ma mopale mainageno kana yaꞌyagamoꞌa amaugafale falote hisianagi haenagaꞌa kanale kumatela ugahae.” huꞌana hamapaiꞌe.
ACT 14:23 Alu mono note alu mono note ute ete huꞌana kave mosiꞌya Anumayamotega havigeꞌya Yisasina amakuꞌama aminaya vayapiti kava yagaisaya soka vayala hapaliꞌana “Kagayae kagayae.” huꞌana humateteꞌana mage haꞌe “Tamakuꞌama amitafa haya Anumayamo ayapi tamaya hisia yafe nelamatoꞌe.” humateteꞌana amateteꞌana umainaꞌe.
ACT 14:24 Elaviꞌana Pisitia kola mogaseꞌana nago Pamafilia hanea kumala Pega kumate evaꞌyi humainaꞌe.
ACT 14:25 Pega kumate veaꞌmogamina Yisasi mono kea hamapaiteꞌana anileti neꞌamataleꞌana Atalia kumate tavi-mainaꞌe.
ACT 14:26 Anileti tipi kalefi haisaga humaiꞌageno anavaleno vigeꞌana Atioku kumate eteꞌana hai-mainaꞌe. Nayona ani kumate maineꞌya Yisasina amakuꞌa aminaya veaꞌmoꞌya “Anumaya Kotiꞌa tanaya hisigetana agai kea mohamapaiꞌo.” huꞌya hunatenaya kumatelagiꞌana ani aliꞌyana ali-vayayeteꞌana eteꞌana umainaꞌe.
ACT 14:27 Ago evaꞌyi huꞌana Yisasi anagafe “Melitalu hiho.” haꞌageꞌya ageꞌana Anumaya Kotiꞌa anakaiꞌene tokaeno mainegeꞌana mukiꞌama humainaꞌa kavafena hamapaiteꞌana Isaleli omainaya veaꞌnene Yisasife haviꞌya amakupi maleꞌya amametiti haya yafe Anumaya Kotiꞌa fita ago yakimatene huꞌana hamapaiꞌe.
ACT 14:28 Ani Atioku kumatela Yisasi kema nehaviya veaꞌnenena ayaꞌaya kanagefa anilega mainaꞌe.
ACT 15:1 Poloꞌene Panapasiꞌene Atioku kumate Yisasi anagaꞌene mainaꞌageꞌya nagoꞌa vayaꞌmoꞌya Yutiati elaviꞌya mage huꞌya hamapaiye “Moseseꞌma ‘Tamakoya anoꞌya taga hiho.’ huno humainea kea akave omalesayana Anumaya Kotiꞌa tamaku tamamena aliokatigahie.” huꞌya humainae.
ACT 15:2 Hageꞌana Poloꞌene Panapasiꞌene “Aꞌao, tamakaya havige nehae.” huꞌana amakaiꞌene tusiꞌa ke vaiteꞌya ani kema fatago hisaya yafe Poloꞌene Panapasiꞌene nagoꞌa vayaꞌene mo hamavigegahe Aposolo vayategaene mono note kava vayategaene humatageꞌya Yelusalemu haimainae.
ACT 15:3 Yisasi anagaꞌmoꞌya humatageꞌya katega vayana Fonisia kotegaene Samelia kotegaene alu kumate kumate ute ete huꞌya Isaleli veaꞌne omainaya veaꞌmoꞌya amakuꞌa aiyahae huꞌya Yisasina amakuꞌa aminaya kea amafuꞌamakanagamina hamapaigeꞌya haviteꞌya tusiꞌa muse humainae.
ACT 15:4 Muse hageꞌya Yelusalemu uvaꞌyi hageꞌya alitaluma humainaya Yisasi anagaꞌmoꞌyaene Aposolo vayaꞌene soka vayaꞌyagaene falu fala humatageꞌya mukiꞌa Anumaya Kotiꞌa anakaiꞌene tokaeno humainea kavafena hamapai-mainaꞌe.
ACT 15:5 Hamapaiꞌageꞌya nagoꞌa Falasia vayala Yisasina amakuꞌa aminaya vayaꞌmoꞌya mage huꞌya humainae “Isaleli veaꞌne omainaya veaꞌmoꞌya Yisasina amakuꞌama aminesayana aniꞌa hutama amakoya anoꞌya taga hiho. Mosese kahegi kemo akave maleho huta kahegi malesune.” huꞌya humainae.
ACT 15:6 Hageꞌya ani kema humainaya ke fako hugahe Aposolo vayaꞌene soka vayaꞌmoꞌyaene melitalu humainae.
ACT 15:7 Melitalu humaleteꞌya kasagoꞌya ke-yeso maiꞌya hutageno Pitaꞌa hetino mage huno humaine nafuꞌnaganagatama tamakaya havimainae nayona Anumaya Kotiꞌa tamakaipiti nagaifena “Kagayae.” huno “Isaleli veaꞌne omainaya veaꞌmogamina Yisasi kanale mono kea hamapaisanageꞌya haviteꞌya aliꞌya amakupi maleꞌya amametiti hugahae.” huno humaineane.
ACT 15:8 Anumaya Kotiꞌa taguꞌafina ago agelama huno agemainea kanogino ageana “Ani veaꞌmoꞌya amakuꞌa ago namitafa hageno tagaiꞌma Alu Aotage Avamuꞌmoꞌma taminea kava huno ani veala amamine.
ACT 15:9 Nagoꞌke avamete huno Alu Aotage Avamula amamine. Yisasifenema huꞌya haviꞌya amakupi malenayafene huno amakupima hanea kefo yaꞌamia ago aye haꞌmi-talene.
ACT 15:10 Ago aye haꞌmi-talenegi naꞌa higetama Anumaya Kotiꞌma humainea kavafena ‘Afa ya kana yane.’ hutama tusiꞌa kanaꞌage yana alitama Yisasina amakuꞌa aminaya veatela malegahe nehae. Nayona taginagomoꞌya Moseseꞌma taminea kea akavela omalenayane tagayaenena menia akave malesuna tagamula omalene.
ACT 15:11 Omaleneanagi ‘Anumayatimoꞌa Yisasi ali kayone hulateno kefo yatihe huno faliteno tagu tamena aligatimaine.’ huta tametiti nehunanagi ani yateti Isaleli veaꞌne omainaya veaꞌmogami amaku amamena ago aligatimaine.” huno humaine.
ACT 15:12 Pitaꞌa mani kea hianagi mukiꞌama alitalu humainaya vayaꞌmoꞌya nago ke kanoꞌa ohunae. Ohageꞌana Panapasiꞌene Poloꞌene Isaleli veaꞌne omainaya veaꞌmogami amuꞌnopi Anumaya Kotiꞌma anakai anayapima tokiyaꞌage avame yama humainea yafena hamapaiꞌaꞌageꞌya havimainae.
ACT 15:13 Nehavigeno Yemesiꞌa hetino mage huno humaine “Nafuꞌnaganagatama nagai kea haviho.
ACT 15:14 Anumaya Kotiꞌa ehe kanafima Isaleli veaꞌne omainaya veala amaya hugahe viaꞌyamo ani veapitila agaiꞌa veaꞌne maisaya yafene huno amavale-maine. Saimoni Pitaꞌa ago tahapaigeta havimainonagi ani kea Anumaya Koti amaune vayaꞌmoꞌya mage huꞌya nayona kae-malenayane
ACT 15:16 ‘Mani kanamoꞌa haꞌno hisigeꞌna nagaya Anumaya Kotiꞌna Teviti nofi anagala nago no kana hu-mainayanagiꞌya tagapema ailavisayana nagaya eteꞌna aliꞌna hetigahue. Ali-haviya hutalenaya nona eteꞌna kigahue.
ACT 15:17 Alisaga hugahuanagi mukiꞌa veaꞌnemoꞌya nagaifena natiyegahae. Isaleli veaꞌne omainaya veaꞌnemogamina nagaya ago hapali-malenoa veaꞌmoꞌya nagaife haviꞌya nati-yegahae. Nagaya Anumaya Kotiꞌna ago nayona tamahapaugetama havimainaya kavafe mani kea nehue.’ huno aune kanoꞌamoꞌa kae-maleneane.
ACT 15:19 Ani yafe nagayama havua nagesamoꞌa mage nehie Isaleli veaꞌne omainaya vayapiti Yisasina amakuꞌa amitafa humainaya veaꞌmogamina kana yana oꞌamamisune.
ACT 15:20 Avo kaeta ‘Mage hutama hiho.’ huta hamapaisune ‘Fali-mainaya veafe ‘Anumayati mainae.’ huꞌya amakisana neꞌvaiꞌya malenesaya kavela onesae. Aꞌne munaꞌne amavayu nehisaya kavala ataleho. Kolamoꞌa agusafinaga hanesia afuene kolaꞌenena oneho.’ huta hamapaisune.
ACT 15:21 Nayona aepa heꞌya mukiꞌa kotega Yuta vayaꞌmogami mono nopina mukiꞌa Sapati yupa Mosese kea hapaliꞌya nehaviyane. Nehaviyanagi haviteꞌya akaveꞌma malenuꞌyahena akave malegahae.” huno humaineane.
ACT 15:22 Aposolo vayaꞌene soka vayaꞌene Yisasi anagaꞌaene mukiꞌa alitalu humaineꞌya kea haviteꞌya “Kanalele.” huꞌya amakaipiti tole kanolatana hesaga huteꞌya hunatageꞌana Poloꞌene Panapasiꞌene Atioku kumate umainae. Anima hunataya kanolatana kava kanolataꞌami mainaꞌe. Anakia Yutasi Pasapasiꞌene Sailasiꞌene hunatageꞌana umainaꞌe.
ACT 15:23 Avona kaeteꞌya ani kanolatamogani anayapina maleteꞌya mage huꞌya kae-malenae. Tagaya Aposolo vayaꞌene soka vayaꞌene mani avona kaeta Isaleli veaꞌne omainaya vayapitiꞌma Yisasife havitama tamakupi maletama tamametiti nehaya tafu-taganagatama Atioku kotegaene Silia kotegaene Silisia kotegaene mainaya veaꞌmogatama “Felugae.” huta avona kaeta nelamamune.
ACT 15:24 Tagayama havunana nagoꞌa vayaꞌmoꞌya tagaipitila nagoꞌa tamakesa kuꞌmo hutama tole lamakesa havisaya augafa kea mo lamahapaiyanagi tagaya “Ani kea hiho.” huta hu-oꞌama-tenone.
ACT 15:25 Hu-oꞌamatenonafene huta melitalu hageta kea huta haꞌya kiteta tole kanolatana tagaipitila tahau tayamopafi nelahaiya kanolata hunatonageꞌana Anumayatimoꞌa, Yisasi Kalaisina agai ke hamanepaiꞌa yateti hanaesageꞌana falisaꞌa yafena anamaꞌyoa oꞌai kanolatane, Panapasiꞌene Poloꞌene tamakaitega ugahe nehaꞌe.
ACT 15:27 Yutasiꞌene Sailasiꞌene hunatesunageꞌana tamakaitega humainona kea anavayafiti mo lamahapaigaꞌe.
ACT 15:28 Alu Aotage Avamuꞌmoꞌa tagaiꞌene mainegeta kea kea huteta “Kanalele nagoꞌa kana yana amayoꞌnalela omalegahunagi ma yamaꞌage akave malesae. Fali-mainaya veafe amakisana vaiꞌya atupa kave alisaga huꞌya malesaya kavela oneho. Kolamoꞌa agusafinaga hanesia afuene kolaꞌenena onesae. Aꞌne munaꞌne amavayu nehisaya kavala ohisae. Ani kavaꞌma ohisayana kanaleꞌya huꞌya maigahae. Ketia male me haꞌno hie.” huꞌya kae-malenae.
ACT 15:30 Kae-maleteꞌya humatageꞌya Atioku laviꞌya Yisasi anagaꞌmogamina molitalu humateteꞌya mani avona amamigeꞌya hapaliꞌya haviteꞌya humainaya kehena tusiꞌa muse humainae.
ACT 15:32 Muse hageꞌana Yutasiꞌene Sailasiꞌene Anumayamo aune kanolata maineꞌana ayaꞌaya kea amaku amamema alilokiya vaisaya kea hamapai-mainaꞌe.
ACT 15:33 Ani kea huteꞌana ayaꞌaya kanagefa amakaiꞌenena maiteꞌana eteꞌana vaꞌageꞌya ali falu fala hunatetageꞌana hunatenaya vayatega eteꞌana umainaꞌe.
ACT 15:35 Vageꞌana Poloꞌene Panapasiꞌene Atioku maineꞌana nagoꞌa veaꞌnene ailokaeꞌana Yisasi kea hamanepaiꞌana mainaꞌe.
ACT 15:36 Nagoꞌa kana maiteꞌana Poloꞌa Panapasifena mage huno humaine “Etetaꞌa mukiꞌa kumate Yisasi mono ke hamapai-mainoꞌa kumate ute ete hutaꞌa tafu-taganaꞌya kanaleꞌya huꞌya mainafi haviya huꞌya mainafi utaꞌa mogesuꞌe.” huno humaine.
ACT 15:37 Higeno Panapasiꞌa “Yoni Maki avale-linetaꞌa ugahuꞌe.” huno hianagi Poloꞌa mage hie “Aꞌao, ani kanomoꞌa hagoteno taꞌagaiꞌenema viana Pamafilia kumate mo nelaꞌataleno aliꞌyana oꞌalino umaineane.” huno humaine.
ACT 15:39 Higeꞌana ani yateti tolefi aliꞌana fako huꞌana anahaote anahaote umainaꞌe. Panapasiꞌa Makina neꞌavaleno tipi kalefi haisaga humaiꞌageno Saipalusi anavaleno umaine.
ACT 15:40 Vaꞌageno Poloꞌa anonaꞌa Sailasina avalegeꞌya afuꞌaganaꞌya Anumayamotega havigeꞌya mage hae “Kategama visaꞌana Anumayamoꞌa kayone hulanateteno tanaya hisie.” huꞌya hageꞌana umainaꞌe.
ACT 15:41 Silia kotegaene Silisia kotegaene ute ete huꞌana Yisasi anagaꞌmogamina amaku amamena ali lokiya vaimateꞌana amaya humainaꞌe.
ACT 16:1 Poloꞌa Tepi kumate uno Lisitala kumate umaine. Ani kumatela nagola Yisasife havino agupi malenea kanoa maine. Agia Timotiꞌe. Ani kanomoꞌa Yuta aꞌmo nafaꞌne mainegi nefaꞌa Isaleli kanoa omainegi, Kaliki kano mainegeno, itaꞌamoꞌa Yisasina aguꞌa amitafa humainea alagino maine.
ACT 16:2 Ani Lisatalaene Aikoniamuenema maineꞌya Yisasi anagaꞌmoꞌya Timotifena “Kanale kano maine.” huꞌya humainae.
ACT 16:3 Hageno Poloꞌa Timotifena mage hie “Taꞌagaiꞌene tokaeta vaiyesune.” Visuna kotega mainaya Isaleli veaꞌmoꞌya kagaila negafaꞌa Isaleli kanoa omainegi, Kaliki kano maine, huꞌya ago havimainagi havigu ani yafe amaipa haviya huyafene huno nehuno Timotina avaleno Mosese kemo akave maleno agoya anoꞌya laga humaine.
ACT 16:4 Naꞌa huteꞌya alu kumate kumate neꞌuꞌya Yelusalemu mainaya Aposolo vayaꞌene soka vayaꞌene humalenaya kema akave malesaya yafe hamapai-mainae.
ACT 16:5 Hamapaigeꞌya Yisasi anagaꞌmogamina amametiti humainaya yamona tokiyaꞌage higeꞌya mukiꞌa yupa nagoꞌa veaꞌnea ete ete huꞌya egasago hageꞌya amakaiꞌenena tokaeꞌya mainae.
ACT 16:6 Alu Aotage Avamuꞌmoꞌa “Esia kotega* nagai ke hamaopaigahae.” huno nagalu humateneanagiꞌya Poloꞌagi Sailasiꞌagi Timotigamina Faligia kotegaene Kalesia kotegaene umainae.
ACT 16:7 Misia kotega uvaꞌyi huꞌya Pitinia haigahe hayanagi Yisasi Avamuꞌmoꞌa “Oꞌviho.” huno nagalu humatene.
ACT 16:8 Nagalu humategeꞌya Misia kola agaseꞌya Taloasi kumate elavi-mainae.
ACT 16:9 Ani kegela Poloꞌa nagola himona kana ya ageana nagola Masetonia kotega kanomoꞌa hetino maineno ke huno mage huno humaine “Kagaya hagelina lakaeka Masetonia me lahaꞌmao.” huno higeno Poloꞌa agetegeta Anumaya Kotiꞌa tagaife “Ani kotega utama veaꞌmogamina Yisasife kanale mono ke mo hamapaiho.” huno humaineanagita tagaya aupaꞌa Masetonia visuna kafe atineꞌayone.
ACT 16:11 Taloasiti tipi kalefi haisaga humaunageno tavaleteno aiyayeno fatago huno Samotalesia ti amuꞌnopi hanea kumate euvaꞌyi higeta mo faeteta natena ufatago huno haigeta Neapolisi hai vaꞌyi huteta mopafi euta Filipai kumate euvaꞌyi humainone. Filipai kumala Masetonia veaꞌmogamina ala kumaꞌamie. Nayona Lomu veaꞌnea eꞌya mainaya kumale. Tagaya ani kumate euvaꞌyi huta nagoꞌa kana mainone.
ACT 16:13 Maineta Sapati yupa ani kumaꞌmona kegiꞌyamo hiꞌyenale uteta titega lavita anilega Anumayamotega havinegaya kumala hane huta lavunanagi nagoꞌa aꞌneyaga alitalu huꞌya mainageta Yisasi kea mo hamapai-mainone.
ACT 16:14 Hamanepaunageno nagola ani kema maino havia aꞌmo agia Litiaꞌe. Tayataila kumateti alagino haesate oko kena talo huno mone aliꞌya neꞌalia alagi Isaleli veaꞌne omainaya veapiti a maineanagi aluya huno Anumaya Koti agia alisaga nehia alagino ani aꞌmoꞌa Poloꞌma hia ke maino nehavigeno Anumaya Kotiꞌa aguꞌa alino aiyahae huteno havisia agu agesa amine.
ACT 16:15 Amigeno haviteno haenagaꞌa mukiꞌa agaiꞌa anagaꞌaene tina fale-matenae. Tina fale-matetageno tagaila mage huno lahapaiye “Musetami nehue nagaifema ‘Yisasina aguꞌa amitafa hia a maine.’ hutama hinutamahena nagaila noniꞌafi emaiho.” huno tokiyaꞌage ke higeta agayama hia kea akave malenone.
ACT 16:16 Nago yupa Anumayamotega havinegona kumate ugahe katega neꞌunageno nago nofipi maineno miya noꞌalia aliꞌya neꞌalia munala katega fotu hunanagi Kefo Avamuꞌmoꞌa aguꞌafi mainegeno aune laga huno haenagama vaꞌyi hisia yafema havigagenoꞌa hufalote huno hamanepaiya munalagiꞌya kava vayaꞌamoꞌya humainea keletila tusiꞌa mone neꞌaliyane.
ACT 16:17 Ani munaꞌmoꞌa Poloꞌene tagaiꞌene takave neꞌeno keha keha huno mage hie “Ma vayala anafinaga mainea Anumaya Kotina aliꞌya vayaꞌamoꞌyae. Anumaya Kotiꞌma tamaku tamamema aligatisiafe kanale kate kea tamahanepaiye.” huno humaine.
ACT 16:18 Nehuno mukiꞌa yupa ani kegeꞌya maino higeno Polona aipamoꞌa haviya higeno maiyahae huno ani Kefo Avamuꞌmofe mage huno humaine “Yisasi Kalaisina agai agileti kahanepauve ani munaꞌmo agupitila hati-lavika vuo.” huno higeno aupaꞌa ani Kefo Avamuꞌmoꞌa ataleno umaine.
ACT 16:19 Vigeꞌya ani munaꞌmo kava vayaꞌamoꞌya agayana higeꞌya monema neꞌaliya kamoꞌa tilegeꞌya aepaꞌa ageteꞌya Pologani Sailasiganina anatafa huteꞌya anavayu huꞌya vea atagu nefaya kumapi kaiyeke hunatesaya vayate anavaleꞌya umainae.
ACT 16:20 Yasi vayate anavaleꞌya mage huꞌya mo hamapaiye “Ma kanolatana Yuta kanolatanagiꞌana tagai kuma alihaviya nehaꞌe.
ACT 16:21 Veaꞌne amavaya huꞌana ‘Maꞌa hiho.’ huꞌana hulaveli-neliꞌageta tagaya Lomu veaꞌmogata ani kavaꞌma hisunana tusiya huno haviya hugahie.” huꞌya humainae.
ACT 16:22 Hageꞌya melitalu humainaya veaꞌmoꞌya “Tamage nehae.” huꞌya hageꞌya Yasi vayaꞌmoꞌya mage hae “Kenaꞌania ali hatata hutalenetama hegi kaꞌyoteti hanaeho.” huꞌya hageꞌya hanae-mainae.
ACT 16:23 Hegi kaꞌyoteti tusiya huꞌya anamulo-nalo huꞌya hanaeteꞌya kina nopi nofi hunateteꞌya ani kina nopi kava kanomofe mage huꞌya hapaiye “Ma kanolatatela tokiyaꞌage huka yagaiyo.” huꞌya humainae.
ACT 16:24 Na ke hageno haviteno kava neꞌyagaiya kanomoꞌa anavaleno tole ayenalagi-male nopinaga anateteno anaiya nago yosa amuꞌnopi vaiteno aitalako hunatene.
ACT 16:25 Hunatayanagi anakaya ani kege amuꞌnona yagame nehuꞌana Anumayamotega nunamu huꞌana havinegaꞌageꞌya kina nopi mainaya vayaꞌmoꞌya haviꞌya mainae.
ACT 16:26 Mainageno anile aupaꞌa tusiꞌa imi neꞌalino ani kina note ayevasaga huꞌya kimalenaya yosa ali kanage kanagu higeno mukiꞌa fitayagamoꞌa aiyaki-lavigeꞌya mukiꞌa kina nopi mainaya vayaꞌmogami amayakopitila nofiꞌyagamoꞌa kaluhelavi-maine.
ACT 16:27 Aikalu-helavigeno kina vayate kava kanomoꞌa faeno maineleti hetino mogeteno mukiꞌa fitayagamoꞌa ago yaki-mainegeno mage huno agesa havimaine “Mukiꞌa kina vayaꞌmoꞌya ago falae.” huno ayaꞌaya naepe kaꞌyona alisagino agaiꞌa ageꞌya fakaligahe humaine.
ACT 16:28 Nehigeno Poloꞌa ala kefiti mage huno humaine “Kagaikaꞌa kaugafa ali haviya ohuo. Tagaya mukiꞌamogata afaꞌa mainone.” huno humaine.
ACT 16:29 Higeno ani kava kanomoꞌa vayafe “Kaꞌnila alitama eho.” huno hunemaleno aiyayeno ani nopinaga hai-faleno monaketeno kolia huno atali nehuno Pologani Sailasiganina anavate eno anaiyafi mesaga hulavi-maine.
ACT 16:30 Hu-laviteno ani nofipiti anavaleno kumatega viaꞌyamo anakaife mage huno hanavige “Musetani nehugi naꞌa hisugeno Anumaya Kotiꞌa nagu namena aligatigahie?” huno hanavige-maine.
ACT 16:31 Higeꞌana mage huꞌana hapaiꞌe “Anumayati Yisasife havika kagupi maleka kametiti hisanageno Anumaya Kotiꞌa kagu kamena ali-negatino anagakamogamiene ali-gatisigetama agai anaga maigahae.” huꞌana hapai-mainaꞌe.
ACT 16:32 Huteꞌana ani kanoene mukiꞌa agaiꞌa anagaꞌaene Yisasi mono kea huhaleꞌana hamapai-mainaꞌe. Hamapaitaꞌageno ani kegekeꞌya anavaleno amuna sese hunateteꞌya anile aupaꞌa ani kanoene agaiꞌa anagaꞌaene tina fale-matenaꞌe.
ACT 16:34 Tina falematetaꞌageno anavaleno nomaꞌafinaga umaineno kavela anamiteno tusiya huno agaiꞌaene agaiꞌa anagaꞌaene Anumaya Kotina amakuꞌa amiteꞌya amametiti haya yafe tusiꞌa muse humainae.
ACT 16:35 Muse hayanagi kotigeno Yasi kanomoꞌa ati vaya humategeꞌya eꞌya mage me hae “Ani kanolatana afaꞌa anatalegeꞌana viꞌo.” huꞌya humainae.
ACT 16:36 Hageno kina vayate kava kanomoꞌa ani kea mage huno Polona hapaiye “Yasi vayaꞌmoꞌya nagoꞌa vaya humatageꞌya eꞌya tanakaife mage hae tanakaya kina nopitila neꞌataletana tanaipamoꞌa kanale nehinagetana afaꞌa viꞌo.” huꞌya me hanapaiye.
ACT 16:37 Higeno Poloꞌa ati vayafe mage huno hamapaiye. “Taꞌagaya Lomu kanolata* mainoꞌagi haviya hulaꞌateꞌya taꞌagai kaiyekea haviteꞌya fatago huꞌya kaiyekea huotaꞌateꞌya vea amaulagafina hegi kaꞌyoteti tusiya huꞌya taꞌamulonalo huteꞌya nofila hulaꞌatenagi menia naꞌa higeꞌya falakiꞌya taꞌatalegahe nehae? Tamagelafa hutaꞌa kesila oꞌugahuꞌagi amakaya amakaiꞌami male eꞌya ‘Kina nopitila ataletana viꞌo.’ huꞌya hulaꞌatesae.” huno humaine.
ACT 16:38 Hageꞌya ati vayaꞌmoꞌya ani kea aliꞌya Yasi vayaꞌmogami mo hamapageꞌya “Lomu kanolata mainoꞌe.” huꞌana haꞌa ke haviteꞌya tusiꞌa koli humainae.
ACT 16:39 Koli huteꞌya kina nopi uꞌya amahau ke mo hunateteꞌya “Havi kava hunagetana haꞌe.” huꞌya kina nopitila anavale neꞌanataleꞌya mage hae “Musetani nehune mani no kumala neꞌataletana viꞌo.” huꞌya humainae.
ACT 16:40 Hageꞌana kina nopitila ataleꞌana Litia nopi mogaꞌana anafuꞌanakanagamina amaketeꞌana amaku amamena ali lokiya vaisaya kea hamapaiteꞌana ani kumala ataletana umainaꞌe.
ACT 17:1 Poloꞌene anagaꞌamoꞌyaene Amifipolisi kumala mogaseꞌya Apolonia kumala mogaseꞌya Tesalonaika kumate uvaꞌyi humainae. Ani kumatela nagola Yuta vayaꞌmogami mono nona hane.
ACT 17:2 Haneanagino Poloꞌa mukiꞌa kanafima nehia kava huno tagufa (3) Sapati yupa ani mono nopina haino Anumaya Koti kema kae-malenaya autaꞌmafitila aepaꞌa hugafino mage huno hamapaiye “Anumaya Kotiꞌma taugafa aligatigahema hutenea kanomoꞌa tusiꞌa agata aigeno fali-maine. Fali-mainefitila eteno heti-maine. Ani Yisasina Anumaya Kotiꞌa taugafa aligatigahema hutenea kanomofe tamahanepauve.” huno humaine.
ACT 17:4 Higeꞌya nagoꞌa Yuta vayaꞌmoꞌyaene kasagoꞌya Anumaya Koti agima alisaga nehaya Kaliki vayaꞌene amakima hanea aꞌneyagaene Yisasife haviꞌya amakupi maleꞌya amametiti huteꞌya Poloꞌene Sailasigani anakave tokaeꞌya umainae.
ACT 17:5 Tokaeꞌya umainaya yateti Yuta vayaꞌmogami amaipamoꞌa haviya nehae. Higeꞌya kefo kava nehuꞌya felu mailiteꞌya nehaya vayalagiꞌya vaya atagu nefaya kumapi mainae. Maineꞌya vayaꞌyaga amavaleꞌya melitalu humaleteꞌya ani kumate vayaꞌmogamina amaku amakesa huꞌya ali hetigeꞌya Yesoni note uꞌya nomaꞌa moyenafa huꞌya Pologani Sailasiganina anavaleꞌya alitalu humainaya veaꞌmogami amayapi anategahe haimainae.
ACT 17:6 Haiteꞌya atiyegetayana higeꞌya oꞌanakeꞌya Yesoniꞌene nagoꞌa Yisasi anagaꞌene amavayu huꞌya ani kumate kava vayate amavaleꞌya uvaꞌyi huꞌya mage huꞌya hae “Mani vayaꞌmoꞌya mukiꞌa kotega ute ete huꞌya veaꞌmogamina mono kea ali haviya hume hume menia tagai kumate emainae.
ACT 17:7 Emainageno Yesoniꞌa nomaꞌafi amavaleno amategeꞌya maineꞌya ala sauve kanotimoꞌa, Sisaꞌma humainea kea ali haviya nehuꞌya mage hae ‘Alu sauve kanoti maine. Ani kanomo agia Yisasiꞌe.’ huꞌya humainae.” huꞌya humainae.
ACT 17:8 Hageꞌya melitaluma humainaya veaꞌmoꞌyaene ani kumate kava vayaꞌmoꞌyaene ani kea haviteꞌya amakesa kuꞌmo huteꞌya “Kina nopima oꞌvisayafena monea tamitetama ugahae.” huꞌya hageꞌya Yesoniꞌene nagoꞌa vayaꞌene monea hageꞌya amamitageꞌya amatalageꞌya umainae.
ACT 17:10 Aupaꞌa ani kege kanoꞌa Yisasi anagaꞌmoꞌya Pologani Sailasiganina hunatageꞌana Pelia kumate vaꞌaꞌyamogani Yuta vayaꞌmogami mono nopi mo haifale-mainaꞌe.
ACT 17:11 Pelia mainaya veaꞌmoꞌya Tesalonaika kumate mainaya veala amakaseꞌya kanale amaku amakesaene veaꞌne mainageno Poloꞌa Yisasi kea hamapaigeꞌya haviteꞌya aluya huno nehamaiye. Haviꞌya amakupi maleteꞌya mukiꞌa kanafina “Tamage nehifi havige nehie?” huꞌya Anumaya Koti kema kae-malenaya kefina hapaliꞌya ati ayemainae.
ACT 17:12 Naꞌa nehuꞌya kasagoꞌya Yuta vayaꞌmoꞌyaene kasagoꞌya Kaliki aꞌneyaga amakima hanea aꞌneyagaene kasagoꞌya Kaliki vayaꞌyagaene Yisasifena haviꞌya amakupi maleꞌya amametiti humainae.
ACT 17:13 Amametiti hayanagi Tesalonaika mainaya Yuta veaꞌmoꞌya haviyana “Poloꞌma Anumaya Koti kema Pelia kumate veaꞌma hamapaiye.” huꞌya haya kea haviteꞌya anile evaꞌyi huꞌya alitalu humainaya veaꞌmogami amaku amakesa meli haviya humainae.
ACT 17:14 Ali haviya hageꞌya Yisasi anagaꞌmoꞌya aupaꞌa Polona hutageno hageli kahaepatega tavigeꞌana Sailasigani Timotigania anile Pelia mainaꞌe.
ACT 17:15 Mainaꞌageꞌya avagi huꞌya umainaya vayaꞌmoꞌya Polona Atenisi avaleꞌya umainageno Poloꞌa mage huno hamapaiye “Sailasigani Timotiganife ‘Tanakaya aupaꞌa hutana nagaitega eꞌo.’ hutama hanapaiho.” huno hamapaigeꞌya ataleꞌya umainae.
ACT 17:16 Vageno Poloꞌa anakava maineno ageana Atenisi kumatela kasagoꞌya yafateti talo humalenaya afa anumayayaga malenageno mogeteno aipamoꞌa tusiꞌa haviya humaine.
ACT 17:17 Aipamoꞌa haviya higeno Yuta vayaꞌmogami mono nopi haino Yuta veaꞌnene Anumaya Koti agi alisaga nehaya Yuta vea omainaya veaꞌnene Anumaya Koti kea huhaleno amakaiꞌene huge havige humaine. Mukiꞌa kanafina veaꞌne atagu nefaya kumapi maineno anifima mainaya veaꞌmogamina Anumaya Koti mono kea hamanepaino huge havige humainae.
ACT 17:18 Hamanepaigeꞌya nagoꞌa Epikuliaene* Sitoikiene* ala havi haviꞌya alilinaya vayaꞌamimoꞌyaene ke oꞌvai oꞌvai nehageꞌya alitalu humainaya veaꞌmoꞌya haviteꞌya nagoꞌamoꞌya Polofe mage huꞌya hae “Ma kanomoꞌa na ke huliteno nehie?” huꞌya nehageꞌya nagoꞌamoꞌya Poloꞌma Yisasifeꞌene fali-mainefiti hetimainea kanale mono kema hamapaiya kehe mage huꞌya humainae “Alu kumate anumayahe nehifi?” huꞌya humainae.
ACT 17:19 Huteꞌya agai ke havigahe Aleopagusi Kanisole vayate avaleꞌya uteꞌya Polofe mage huꞌya havigae “Kagayama haegafa kema hamapaina kea havigahe nehunagi tahapaiyo.
ACT 17:20 Kekaꞌama havunana aluꞌa augafa kema hanageta havuna kemo aepaꞌa havisune huta nehune.” huꞌya humainae.
ACT 17:21 Mukiꞌa Atenisi mainaya vayaꞌene yoka emainaya vayaꞌene mukiꞌa kanafina haegafa kema hisaya ke havisaya yafena tusiya huno nehamaiya vayalagiꞌya alu kavala ohisaya amakesa nehae.
ACT 17:22 Hageno Poloꞌa Aleopagusi kanisole vayaꞌmogami amuꞌnopi hetino mage huno humaine Atenisi mainaya vayaꞌmogatama nagaya agoana tamakaya aluya hutama afa anumayamo mono kea tokiyaꞌage hutama nehaya vaya mainae.
ACT 17:23 Mainageꞌna nagaya vaiyatete nehuꞌna agoana yafateti talo humalenaya afa anumayamogami amakima alisaga nehaya afa anumayatamimona ageteꞌna nago yafa folamole mogoana ani yafatela mage hutama kae-malenae “Oꞌagenona anumayamogae.” hutama kae-malenageꞌna agoa kanomofe “Oꞌagenona kanomo agima alisaga nehune.” hutama kae-malenaya kanomofe aepaꞌa hugafiꞌna tamahapaigahugi haviho.
ACT 17:24 Anumaya Kotiꞌa ma mopaene mukiꞌa mopafima hanea yaꞌene talo humalenea kanogino mukiꞌa ikapinaga yaꞌene mopafi yaꞌene kava yagai-mainea kanogino veaꞌmoꞌya amayateti kimalenaya nopina nomaiyane.
ACT 17:25 Tagaya tayapitila nago yana haꞌomaegahune. Agaiꞌa mukiꞌa veaꞌmogami hamaimuꞌene mukiꞌa yama amaminea kanogita hanaꞌa huno nago yamaꞌa omaleneanagita aya hugahune?
ACT 17:26 Anumaya Kotiꞌa nagoke tototimona hagoteno talo humaleteno ani kanofiti mukiꞌa ma mopale mainaya nofi veala ali falote humatene. Humateteno “Ma kote kote maiho.” huno amateteno kasagoꞌya vaya maisaya kanaꞌamiene agaiꞌa humatene.
ACT 17:27 Amakaya Anumaya Kotina amaku amigahena ati yege yege huꞌya Anumaya Koti aepaꞌa havisae huno ani kavala humaineane. Tamage agaya alulega omaigi tagaiꞌene nagoke nagokeꞌmogatiene tokaeno maine.
ACT 17:28 Maineanagita agaiꞌage tahaimula tamigeta vaiyatete huta mainone. Ani kehe nagoꞌa tamakai avoma agelinaya vayaꞌmoꞌya mage huꞌya humainae “Tagaiꞌenena agaiꞌa lategeta nafaꞌneyagaꞌa mainone.” huꞌya humainayane.
ACT 17:29 Higeta tagaya agaiꞌa latenea nafaꞌneyaga mainone. Havigu lagaya ma lagesa havisunagi “Anumaya Koti aepaꞌa tagesafitila yafatetiꞌene kapaletiꞌene kanileta yafatetiꞌene kanaleꞌya huta talo humalenaya augafa kanoe.” huta ohisune.
ACT 17:30 Nayona Anumaya Koti aepaꞌa mukiꞌa veaꞌmoꞌya ohavinayanagino Anumaya Kotiꞌa kasagoꞌya kea ohuneane. Nagi menia mukiꞌa ma mopale veafena tokiyaꞌage ke huno mage hie “Tamakuꞌa aiyahae hutama nagaitega eho.” huno humaine.
ACT 17:31 Anumaya Kotiꞌa mukiꞌa ma mopale veaꞌmogamina fatago huno kaiyekema humatesia kanafina ago hapalino ani kaiyekeleꞌma yagaisia vemona ago ali hetitene. Ani vemofe “Veaꞌmoꞌya havilama huꞌya havisae.” huno fali-mainefitila ali hetitene huno humaine.
ACT 17:32 Higeꞌya “Fali-mainefiti ago ali hetitenema.” hia kea haviteꞌya nagoꞌa veaꞌmoꞌya kigi huꞌya akaya atageꞌya nagoꞌa veaꞌmoꞌya mage hae “Nagoꞌene mani kea hugeta havimano.” huꞌya humainae.
ACT 17:33 Nehageno Poloꞌa neꞌamataleno umaineanagi nagoꞌa veaꞌmoꞌya agai akave neꞌuꞌya Yisasife haviꞌya amakupi maleꞌya amametiti hu-mainae. Amametiti humainaya veapitila nago kanomo agia Tionisiusiꞌe Aleopagusi kanisole kano maineane. Nago aꞌmo agia Tamalisiꞌene nagoꞌa veaꞌnene amametitia humainae.
ACT 18:1 Haenagaꞌa Poloꞌa Atenisi kumala ataleno Kolini kumate umaine.
ACT 18:2 Anile maineno nago Yuta kanoa age-maine. Ani kanomo agia Akuilaꞌe. Kuma aepaꞌa Potusi hanegi ani kanafina Palisilaꞌa aꞌamoꞌene Itali kumateti emainaꞌe. Itali kumate kava kanomoꞌa Kolotiusiꞌa mage huno kahegi malene “Mukiꞌa Yuta veaꞌmogatama Itali veaꞌmogami ala kumaꞌamia, Lomua, neꞌataletama viho.” huno humainea kehe Akuilaꞌagi Palisilaꞌagia ataleꞌana Kolini umainaꞌageno Poloꞌa anakaitega umaine.
ACT 18:3 Uno monakeana nagoke aliꞌyake hanegeno kena noma fakaꞌniꞌya mone neꞌaliya aliꞌya neꞌaliꞌageno monaketeno anakaiꞌene tokaeno maineno ani aliꞌyana ali-mainae.
ACT 18:4 Poloꞌa mukiꞌa Sapati yupa Yuta vayaꞌmogami mono nopi haino tokiyaꞌage kea huno Yuta vayaꞌene Kaliki vayaꞌene Yisasife amakupi malesayafe hamapai-maine.
ACT 18:5 Haenagaꞌa Sailasiꞌene Timotiꞌene Masetoniati evaꞌyi nehaꞌana Poloꞌa alu aliꞌya oꞌalino mukiꞌa yupa Yuta veafena “Yisasiꞌe Anumaya Kotiꞌa lamaugafa aligatigahe hutenea kano maine.” huno hamapai-maine.
ACT 18:6 Hamanepaigeꞌya agai kea hefalakiꞌya hu-haviya havaya hutageno Poloꞌa “Kefo kava nehae.” huno kenaꞌale hanea kugukege yaꞌyaga aifopo huneꞌataleno mage huno hamapaiye “Tamakaya Anumaya Kotitegati fananema hisayana tamakaitami yanagi nagai yana omalene. Menia nagaya tamataleꞌna Isaleli veaꞌne omainaya veapi mo hamapaigahue.” huno humaine.
ACT 18:7 Huteno amataleno nago kanoa Anumaya Koti agi alisaga nehia kanomo nopi uno maine. Ani kanomo agia Titiusi Yasatusiꞌe. Ani kanomo nona Yuta vaya mono nomo avate hane.
ACT 18:8 Ani mono note soka kanomoꞌa Kalisipusiꞌene mukiꞌa agaiꞌa anagaꞌaene Anumayamofe haviꞌya amakupi malageꞌya kasagoꞌya Kolini mainaya veaꞌmogamina Poloꞌa hamapaigeꞌya Yisasife haviꞌya amakupi maleꞌya amametiti hutageno tina fale-matene.
ACT 18:9 Nago kegela Anumayamoꞌa himonafi evaꞌyi huno Polofena mage huno hapaimaine “Kolia ohuka tokiyaꞌage huka kea hamanepaika oꞌatalo. Nagaya kagaiꞌene mainoe. Maigahuanagino nago kanomoꞌa hetino ali haviya huokategahayanagiꞌya nagaiꞌni veala kasagoꞌya mani kumatela mainae.” huno humaine.
ACT 18:11 Higeno Poloꞌa ani kumatela nago kafugi sikisiꞌa (6) ikanagi huno ani vayapi maineno Anumaya Koti kea hamapai-maine.
ACT 18:12 Hamapaiyanagi Kalioꞌa “Kaliki kumate kava yagaiyo.” huꞌya Lomu kava vayaꞌmoꞌya hutageno kava yagaino mainea kanafina Yuta vayaꞌmoꞌya alitalu huꞌya Polona atafa huꞌya Yasi kanomote avaleꞌya mage huꞌya mo hae “Ma kanomoꞌa tagaila Lomu vayaꞌmogami kahegi kea atagaeno veafe mage huno nehie ‘Maꞌa hutama Anumaya Koti agia alisaga hiho.’ huno humave-nelie.” huꞌya hae.
ACT 18:14 Hageno Poloꞌa kenonaꞌamia hamapaigahe hianagi Kalioꞌa mage huno hamapaiye “Yuta vayaꞌmogatama ani kanomoꞌa tusiꞌa kefo kava hileꞌasina kanale huꞌna namena mailava huꞌna maineꞌna havuleꞌasinagi tamakaya havige havage nehatagetama agilefe nehagi tamakaitami kahegi kehe nahavinegayanagi ani kea ohavigahue tamakaitami fako hiho. Nagaya naꞌa augafa kema haviyafena nonahaiye” huno humaine.
ACT 18:16 Ani kea huteno kaiyeke havi nopitila hemanati-talene.
ACT 18:17 Hemanati-talegeꞌya Yuta vayaꞌmogami mono note soka kanomona Sosetenesina atafa huꞌya kaiyeke havi kumaꞌmo avate aiko-neliyana Kalioꞌa “Aoteꞌyamaꞌae.” nehuno oꞌagene.
ACT 18:18 Naꞌama nehayana Poloꞌa mukiꞌa kanafima nemaiya afuꞌaganagamina amataleno Palisilaꞌene Akuilaꞌene anavaleno tipi kalefi haisaga humaiꞌya Senikalia uteꞌya Silia eneꞌuꞌya Poloꞌa Anumaya Koti aufima hulokiya vaino kema humainea yafe aiyolagefa laga humaine.
ACT 18:19 Huteno Efesusi uvaꞌyi huteꞌya Poloꞌa Yuta vayaꞌmogami mono nopi hai-faleno Yuta vayaꞌene huge havige nehigeꞌya mage hae “Mani kumatela ayaꞌaya kana maisane.” huꞌya hayanagi “Aꞌao.” nehuno amataleno ugahe mage huno hie “Anumaya Kotiꞌa haisigeꞌnahena haenagaꞌa eteꞌna tamakaitega egahue.” huno humateteno Palisilaꞌene Akuilaꞌene neꞌanataleno Efesusiti tipi kalefi asaga humaino elavi-maine.
ACT 18:22 Sisalia elavi-vaꞌyi huteno Yelusalemu haino Yisasi veaꞌne moli falu fala huneꞌamateno Atioku lavi-maine.
ACT 18:23 Anile ayaꞌaya kana maiteno neꞌamataleno Yisasi veaꞌne ali lokiya vaimatetele huno alu kumate kumate vaiyatete huno mukiꞌa Kalesia kumateꞌene Faligia kumateꞌene ute ete humaine.
ACT 18:24 Nagola Yuta kanomo agia Apolosiꞌe kuma aepaꞌa Alekasatalia kanogino Efesusi uvaꞌyi humaine. Ani kanoa kanaleꞌya huno kea nehavia kanogino maineno Anumaya Koti autaꞌmafi hanea kea havilama huno havilinea kanoe.
ACT 18:25 Apolosiꞌa Anumayamo kea havilama hulineno aya mukiki huno kanale kavaꞌage nehuno Yisasifena hamapaiyanagi Yoniꞌa tima falematenea yafeke havilinegi Yisasi agile ti falemate kavafena ohavine.
ACT 18:26 Yuta vayaꞌmogami mono nopi haino tokiyaꞌage kea hamapaigeꞌana Palisilaꞌene Akuilaꞌene haviteꞌana avaleꞌana vaꞌaꞌyamogani Anumaya Koti auꞌava yafena moli fatago huꞌana aveli-mainaꞌe.
ACT 18:27 Aveliꞌageno Apolosiꞌa Akaiya ugahe Yisasi anagaꞌamoꞌya aya huꞌya Akaiya maineꞌya Yisasi kema nehaviya veate avona kaeꞌya mage hae “Apolosina avaletama falu fala huteho.” huꞌya kae-malageno anile alino uvaꞌyi higeꞌya Anumaya Koti kayone yamaꞌaleti Yisasife haviꞌya amakupi maleꞌya amametiti humainaya veaꞌmogamina amaya humaine.
ACT 18:28 Mukiꞌa vea amaufina tokiyaꞌage kea huno Yuta veaꞌmoꞌya havilama ohunayafene huno Anumaya Koti autaꞌmafiti kea hapalino hamapaino “Yisasiꞌa Anumaya Kotiꞌma taugafa aligatigahe hutenea kano maine.” huno avopitila hapalino hamapaimaine.
ACT 19:1 Apolosiꞌa Kolini mainegeno Poloꞌa agoꞌyalega hanea kumaꞌyagale vaiyatete huno Efesusi uvaꞌyi huno nagoꞌa Yisasina amakuꞌa amitafa humainaya veaꞌnea amake-maine.
ACT 19:2 Amaketeno mage huno hamavike “Yisasife havitama tamakupi maletama tamametiti nehaya kanafina Alu Aotage Avamula ali-mainafi oꞌalinae?” huno hamavigegeꞌya “Aꞌao, ‘Alu Aotage Avamula maine.’ huꞌya haya kea ohavinone.” huꞌya hae.
ACT 19:3 Hageno Poloꞌa mage huno hamavige “Hanaꞌa li falelamatenae?” huno hamavigegeꞌya mage hae “Yoni ti falelatenae.” huꞌya humainae.
ACT 19:4 Hageno Poloꞌa mage huno hie “Yoniꞌa mage nehuno tina falematene ‘Kefo yatamihena tamakuꞌa aiyahae hisageꞌna tina fale-lamategahue.’ huno nehuno veala mage huno hamapai-maine ‘Nagai nakavelaga esia kanomofe, havitama tamakupi maletama tametiti hiho.’ huno humaineana Yisasife huno humaineane.”
ACT 19:5 Huno higeꞌya ani kea haviyanagino Efesusi veaꞌmogamina Anumayatimoꞌa Yisasi agile tina falematene.
ACT 19:6 Fale-mateteno Poloꞌa ayana amanute malegeno Alu Aotage Avamula amakaite elavino egeꞌya amaku amakesafiti nohaviya kea, alu amake alu amake aiꞌya Anumayamo avayafiti hamapaiya kea hufalote humainae.
ACT 19:7 Ani vayala tuelufuꞌa (12) vaya mainae.
ACT 19:8 Poloꞌa tagufa (3) ikana Yuta veaꞌmogami mono nopi ute ete huno tokiyaꞌage kea huno Anumaya Koti kava yagaisia yafe amakuꞌa ali hetino hamapai-maine.
ACT 19:9 Hamanepaiyanagi nagoꞌa vayaꞌmoꞌya amaku amakesa ailineleꞌya tokiyaꞌage ke huꞌya “Havige nehananagita tagupina ali omalegahune.” huꞌya mukiꞌa vea amaufi Yisasi kea hu-haviya hutageno Poloꞌa neꞌamataleno Yisasife haviꞌya amakupi malenaya veala amavaleno mukiꞌa kanafina efi efi huno Tilanusi humavenelia nopi mo huhaleno hamapai-maine.
ACT 19:10 Tole kafu aniꞌa huno hamanepaigeꞌya mukiꞌa Esia mainaya veaꞌnea Yuta veaꞌnene Kaliki veaꞌnene Anumayamo kea havimainae.
ACT 19:11 Anumaya Kotiꞌa Polo ayapi tokiya avame yana humaine.
ACT 19:12 Nehigeꞌya veaꞌmoꞌya akasipiene kenaene Polo augafale akasaseteꞌya kali vayate aliꞌya vageno kaliꞌamimoꞌa kanale humategeno amakusafiti Kefo Avamuꞌyaga hati-laviꞌya umainae.
ACT 19:13 Nagoꞌa Yuta vayaꞌmoꞌya Kefo Avamula veaꞌmogami amakusafinagati amanati neꞌatalaya vayaꞌmoꞌya Kefo Avamula amakusafima mainea veate Yisasi agi neꞌayeꞌya mage huꞌya humainae “Poloꞌma tahanepaiya kanoa, Yisasi, agile Kefo Avamuꞌmoga amakusafinagatila hati-lavika evuo huꞌna kahanepauve.” huꞌya humainae.
ACT 19:14 Ani kavaꞌma nehaya vayala seveniꞌa (7) ne nafaꞌneyaga ala mono nopi kava yagai-mainea kanomo nafaꞌneyaga Sikeva nafaꞌneyagamoꞌya ani kavala humainae.
ACT 19:15 Nago yupa ani kava nehageno Kefo Avamuꞌmoꞌa mage huno kenonaꞌamia humaine “Yisasina ago ageteꞌna Polona age-mainogi tamakaya tagatamae?” huno humaine.
ACT 19:16 Higeno Kefo Avamuꞌma agusafinaga mainea kanomoꞌa ani seveniꞌa (7) vayaꞌmogamite haiteno asaga hunelavino amakaseno nehamaeno amaugafa tusiya huno alihaviya humateteno kenaꞌamiene ali hatata hutalegeꞌya amaugafa alapaꞌage ani nopitila hati-laviꞌya falemainae.
ACT 19:17 Mani kea Efesusi mainaya veala Yuta veaꞌnene Kaliki veaꞌnene haviteꞌya koli nehuꞌya Anumayatimona Yisasi agia tusiya huꞌya alisaga humainae.
ACT 19:18 Hageꞌya kasagoꞌyamoꞌya Yisasifena haviꞌya amakupi maleꞌya amametiti nehuꞌya kefo kavaꞌma haya kavafena hufalote humainae.
ACT 19:19 Hufalote huteꞌya sesefe yaꞌamiene tusa huneꞌamataya yaꞌamiene analisa yaꞌamiene ani yaꞌyagahema kae-malenaya avoꞌyaga mukiꞌa vea amaufi atafi kaesagali-talenae. Kae-mainaya avoma miya humainaya monema hapaliyana fifiti tauseniꞌa (50,000) kina hapali-mainae.
ACT 19:20 Anima tokiyaꞌage kavaꞌma humainea kavafena mukiꞌa kotega mo hamanepaiꞌya Anumayamofena haviꞌya amakupi malageno tokiyaꞌage humaine.
ACT 19:21 Ani yaꞌyagamoꞌa haꞌno hutegeno Alu Aotage Avamuꞌmoꞌa Polona visia agu agesa amigeno mage huno hie “Masetonia umaigeꞌna Akaiya eteꞌna Yelusalemu uvaꞌyi hisuaꞌamoꞌna Lomu visua nagesa nehavue.” huno humaine.
ACT 19:22 Huteno tole haꞌnemayaꞌa kanolatana Timotiꞌene Elasatusiꞌene hunategeꞌana Masetonia vaꞌageno Poloꞌa agaiꞌage anile nagoꞌene Esia kotega maine.
ACT 19:23 Ani kanafina Yisasi kea nohaviya veaꞌmoꞌya Yisasi akave nemalaya kehena tusiya huꞌya hetiꞌya ke vaiꞌya amakoꞌya ke humainae.
ACT 19:24 Ani kotega vayaꞌmoꞌya yafateti nago akefa amayateti talo huꞌya “Anumayati maine.” huteꞌya agia Atemisiꞌe huꞌya nehae. Huꞌya hageno nago kanomo agia Temitiliusiꞌe efe mone atafi kaeteno ani moneleti ani akefamo agima alisaga nehaya nona, osi osi nona talo higeꞌya veaꞌmoꞌya miya hageꞌya taloma nehaya vayaꞌmoꞌya tusiꞌa mone neꞌaliyane.
ACT 19:25 Neꞌaliyanagino Temitiliusiꞌa mukiꞌa agaiꞌa aliꞌya vayaꞌene mukiꞌa osi osi Atemisina nomaꞌa taloma nehaya vayaꞌene ke higeꞌya melitalu hageno mage huno hama-paiye “Vemogatama tamakaya havimainae ani aliꞌyateti kanale monetia neꞌalune.
ACT 19:26 Neꞌalunanagi ani kanoa, Poloꞌe, mukiꞌa Efesusi nemaiya veaꞌnene mukiꞌa Esia kotega nemaiya veaꞌnenefe ‘Amayateti taloma haya anumaya afa yatafa hanegi Anumaya omainae.’ huno higeꞌya mukiꞌa veaꞌmoꞌya ‘Tamage nehane.’ huꞌya akave malaya kea ago havitama age-mainae.
ACT 19:27 Poloꞌma hia kemoꞌa tagai aliꞌyatimo agia alino haviya havaya hutegeꞌya Esia nemaiya veaꞌnene alu mopalega veaꞌnene agima alisaga nehaya Atemisina atalesageno lavisigeꞌya veaꞌmoꞌya ‘Anumayati maine.’ huꞌya agia alisaga ohisageno Atemisi agima alisaga nehaya nofena ‘Afa yatafa hane.’ huꞌya hugahae.” huno humaine.
ACT 19:28 Higeꞌya alitalu humainaya veaꞌmoꞌya ani kea havigeno amaipamoꞌa tusiya huno ata legeꞌya mage huꞌya hae “Atemisiꞌa Efesusi mainona vayaꞌmogatina tusiꞌa ala anumayati maine.” huꞌya humainae.
ACT 19:29 Hageꞌya mukiꞌa ani kumate veaꞌmoꞌya ala kenake nehuꞌya Poloꞌenema vaiyatete nehaꞌa kanolatana tolea Masetoniati kanolatane Kaiyusiꞌene Alisatakusiꞌene anavayu huꞌya alitaluma nehaya kumapi anavaleꞌya amaiyayeꞌya umainae.
ACT 19:30 Vageno Poloꞌa “Amuꞌnoꞌamifi kaiyeke mo hisue.” huno hianagi afuꞌaganaꞌya “Oꞌugane.” huꞌya atafa humainae.
ACT 19:31 Atafa hageꞌya nagoꞌa Polona kanapaꞌamoꞌya ani Esia kumate Lomu kava vayaꞌmoꞌya aniꞌa huꞌya agaitega kea atalageno egeꞌya mage huꞌya tokiyaꞌage kea hae “Kagaya veaꞌma alitalu haya kumapina oꞌvuo.” huꞌya humainae.
ACT 19:32 Hageꞌya alitalu humainaya veaꞌmoꞌya amaku amakesamoꞌa yagalegeꞌya nagoꞌa veaꞌmoꞌya nago kea hageꞌya nagoꞌa veaꞌmoꞌya alu kea hageꞌya tusiya huꞌya ala kenakea hageꞌya kasagoꞌya veaꞌnema alitalu humainaya yamona aepaꞌa ohavinae.
ACT 19:33 Ohavigeꞌya nagoꞌa Yuta veaꞌmoꞌya “Mage huka huo.” huꞌya Alekasatana ayetufageno amuꞌnoꞌamifi mo hetino ani kemo aepaꞌa hamapaigahe “Afaꞌa maiho.” huno ayana aligosi-gosi humaine.
ACT 19:34 Aligosi-gosi hianagi Yuta kanoma mainea yafe agelama huteꞌya nagoke amavayage ailalupeꞌya mage hae “Atemisiꞌa Efesusi mainona vayaꞌmogatina tusiꞌa ala anumayati maine.” huꞌyama maiꞌya hayana tole yagemo kanafi ani keꞌageꞌyana maiꞌya humainae.
ACT 19:35 Nehageno haenagaꞌa ani kumate avo kae aliꞌyate kanomoꞌa alitalu humainaya vayaꞌmogamina ali hakaꞌyufeno mage hie “Efesusi vayaꞌmogatama Atemisina anumayatimo agima alisaga nehaya nona Efesusi kumateꞌma kanaleꞌya huno kava neꞌyagaiya yafena hana veaꞌmoꞌya ohavinae? Ikapinagati elavi-mainea yafana nagaluma humalenaya yafafena kanaleꞌya huta kava yagai-mainonagi hana veaꞌmoꞌya ohavinae? Mukiꞌamoꞌya ago havimainae.
ACT 19:36 Havimainayanagiꞌya mani kea hefala okigahagi tamakaya afaꞌa maiho. Nagola aifoꞌnafo kavala ohiho.
ACT 19:37 Anavaletama aya kanolatamogania Atemisi agima alisaga nehuna nopitila nagaluma humalenona yana musufa yana ohunaꞌe. Tagaiti anumayatimona Atemisife huhaviyana hu-oꞌatenaꞌe.
ACT 19:38 Ala kaiyeke havisia kanomoꞌa nagoꞌa kanafi kaiyeke havi nopi maineno kaiyekea havigahigi Timitiliasiꞌene agaiꞌene aliꞌya neꞌaliya vayaꞌmoꞌya ‘Kema hane.’ hinuꞌyahena ani kanomote visae.
ACT 19:39 Ugahagi alu yafema hinutamahena kamani vayaꞌmoꞌyama alitalu hisagetamahena ani kea fatago hiho.
ACT 19:40 Ma yagefima hu-mainona yafena kamani vayaꞌmoꞌya ‘Tu nehae.’ huꞌya tahavigesagetahena hana kanomo hetino anima keha keha nehaya yamona aepaꞌa hamapaigahie?” huno humaine.
ACT 19:41 Avo kae aliꞌyate kanomoꞌa mani kea huteno “Notamilega ataletama viho.” huno hemanatigeꞌya umainae.
ACT 20:1 Kema ayeso haya kemoꞌa haꞌno hutegeno Poloꞌa Yisasina amakuꞌa amitafa humainaya veafe ke higeꞌya agaite ageno tokiyaꞌage huꞌya maisaya amaku amakesa alino hapaiteno hu falu fala humateteno amataleno Masetonia haigahe haimaine.
ACT 20:2 Ani kotega vai neꞌayeno mukiꞌa kanafina tokiyaꞌage huꞌya maisaya kea hamapaiteno Kaliki kotega elavi-maine.
ACT 20:3 Elavino tagufa (3) ika emaiteno Silia eugahe “Tipi kale alisue.” huno hiana Yuta vayaꞌmoꞌya agaila haesaya kema haya kea hageno haviteno agesa aiyahae huno tipi kalea neꞌataleno “Eteꞌna mopafi Masetonia kotega agaseꞌna haigahue.” huno humaine.
ACT 20:4 Agaiꞌenema tokaeꞌya haiya vayala Pilusi nafaꞌnemo agia Sopataꞌe Pelia kumate kanoene Tesalonaikati Alisatakusiꞌagi Sekutasigani Tepi kumateti kanoa Kaiyusiꞌene Timotiꞌene Esia kanolatana Tikikusigani Talofimusiganie naꞌa vayaꞌyaga Poloꞌene hai-mainae.
ACT 20:5 Ani vayaꞌyaga euhagoteꞌya Taloasi kumate tagava maigahe eumainae.
ACT 20:6 Euꞌya mainageta tagaya Filipai maineta hale oki kaihame nenaya imu kiꞌya naya kanamoꞌa haꞌno hutegeta tipi kalefi haisaga humaita faefuꞌa (5) tau faeta tina lakaeta amakaitega Taloasi euvaꞌyi huta seveniꞌa (7) yupa ani kumatela mainone.
ACT 20:7 Sota yupa Anumayamo agile kave negahe alitalu humainonageno Poloꞌa egama visia yafe huhaleno mono kea tahapaino hume hume neꞌvigeno kege amuꞌnokefa maino humaine.
ACT 20:8 Mainoꞌma hiana anafi kikalo humalenaya nopi maunanagino kasagoꞌya kaꞌniꞌyaga ayevasa humalageta mainone.
ACT 20:9 Mainonageno nago neyana Yutikusiꞌe akalogate mopale mainegeno Poloꞌa mono kea ayaꞌayate maino hume hume vigeno Yutikusina aukalo kalo higeno aula faeno fae latapalino fae-mainefiti anale tagufa (3) ayekalo huꞌya kimalenaya nopitilagino ani akalogapiti asaga hulavino mopafi tavino haegeno faligeꞌya molisaga huꞌya agayana ago fali-maine.
ACT 20:10 Fali-mainegeno Poloꞌenena lavino mo anu-kilineno mage hie “Atali talua ohiho. Ago fali-maineanagi eteno haimula neꞌalie.” huno humaine.
ACT 20:11 Huteno ani nopinaga eteno haino maineno kaihame maya kolino higeꞌya nenageno ani kavela neteno ayaꞌaya mono ke amakaiꞌene huge huge nehigeno kola ali halegeno neꞌamataleno umaine.
ACT 20:12 Vigeno ani neyana eteno haegafa huno maigeꞌya avaleꞌya notega neꞌuꞌya tusiꞌa muse nehuꞌya amaipamoꞌa kanale humaine.
ACT 20:13 Tagaya uhagoteta tipi kale alitonageno Poloꞌa “Mopafi Asosi utesugetama anileti tipi kalefina navalegahae.” huno higeta tipi kalefi Asosi mogava mainone.
ACT 20:14 Asosi agava maineta Polona avaleta tipi kalefi asaga humaita Mitilini kumate umainone.
ACT 20:15 Uteta anileti tipi kalefi mo faeteta Kiosi kumate uvaꞌyi huta ani lipi kalefi faeteta Samosi mo faeteta Miletusi evaꞌyi humainone.
ACT 20:16 Poloꞌa “Afulea kanahe muse hisaya imu kisaya kana Yelusalemu evaꞌyi hisuafene.” huno ayaꞌaya kana Esia kotega omaisia agesa haviteno “Efesusia ago agaseꞌna ugahue.” huno humaine.
ACT 20:17 Poloꞌa Miletusiti vaya humateno “Efesusi utama soka vayafe nagaitega esaya ke hamapaiho.” huno higeꞌya uꞌya mo hamapaigeꞌya agaitega ageno mage huno hamapaiye tamakaya ago agemainae nagaya hagoteꞌna Esia kotega evaꞌyima humainoa kanafina aepa heꞌna humainoa kavala ago agemainae.
ACT 20:19 Naugafa aliꞌna ohainogi Anumayamo aliꞌya neꞌalugeꞌya Yuta vayaꞌmoꞌya mukiꞌa kanafina hu-haviya hunatageꞌna tusiꞌa avite-mainoe.
ACT 20:20 Avia atoanagi atalia ohuꞌna mukiꞌa lamaku tamamema ali lokiya vaisaya kea atalutamifiꞌene notamifi notamifiꞌene Anumaya Koti kea huhaleꞌna tamahapai-mainoe.
ACT 20:21 Tamahapaiꞌna Yuta veaꞌnene Kaliki vayaꞌnenefe “Kefo yatamihe tamakuꞌa aiyahae hutama Anumayatimona Yisasife havitama lamakupi maletama tametiti hiho.” huꞌna huhaleꞌna tamaha-pai-mainoe.
ACT 20:22 Tamahapai-mainogi menia agegeho Alu Aotage Avamuꞌmoꞌa “Yelusalemu haiyo.” huno nahapaiyanagiꞌna anilega visugeꞌyama vayaꞌmoꞌya hunatesaya kavala nagaya ohavinoe.
ACT 20:23 Ohavinogi mukiꞌama umainoa kumatela Alu Aotage Avamuꞌmoꞌa mage huno nahapai-maine “Tusiꞌa kanaꞌage yama hugatesaya yana falote hugateno nofipina kategahae.” huno nahapai-maine.
ACT 20:24 Nahapai-maineanagi nagaya falisufi afaꞌa maisufi afa yatafa hane huꞌna nagesa nehavugi Anumayatimoꞌa Yisasi naminea aliꞌyama, veafe Anumaya Kotiꞌa tusiꞌa kayone hulatenea kanale mono kea huhaleꞌna hamapaisua aliꞌyana ali haꞌno hisua nagesa nehavue.
ACT 20:25 Tamakai amuꞌnopina vaiyatete huꞌna Anumaya Koti kava yagai-lamatesia kea tamahanepauvanagiꞌna menia lamahanepaugi haviho nagaya havimainoe haenagaꞌa nagaila naukipalela nagoꞌene onagegahae.
ACT 20:26 Ani yafe menia tamagelafa huꞌna tamahanepauve nagaya kolia ohuꞌna mukiꞌa Anumaya Koti agu agesafima hanea kea ago tamahapai-mainoafe nago kanomoga Anumaya Kotitegati fananema hisanana tamakaitami yane. Ani kemoꞌa nagaipina omegahie.
ACT 20:28 Omegahigi tamakaya tamaugafa kaꞌyetama maiho. Alu Aotage Avamuꞌmoꞌa “Kava yagai-mateho.” huno lamaminea vayala, Anumayamoꞌa agaiꞌa kolamaꞌaleti miya humalenea sipi sipilelela kava yagaiho.
ACT 20:29 Nagaya nehavue tamataleꞌnama visuana nagoꞌa vayala, kaveꞌage afela kalamo nehia kava huꞌya tamakai amuꞌnopi esayaꞌamoꞌya Yisasife haviꞌya amakupi malenaya sipi sipiyaga ali haviya hugahae.
ACT 20:30 Ali haviya hugahagi tamakai amuꞌnopitila nagoꞌa vayaꞌmoꞌya hetiꞌya havigea mohu haviya mehu haviya nehuꞌya Yisasife haviꞌya amakupi malenaya veala “Tagai takave eho.” huꞌya amavayu hugahae.
ACT 20:31 Ani kavaꞌma hisaya yafena kaꞌyeho. Nagaya tagufa (3) kafufina felugaene kegeꞌene kasaloꞌnahae huꞌna maifalua ohunoe. Avia neꞌateꞌna mukiꞌamogatamina tamaku tamakesa nagoke nagokemogatamina tamaumonola malogetama havimainagi ani yafe tamakesa ali hao hutama haviho.
ACT 20:32 Menia Anumaya Koti ayapi tamatogeno agaiꞌa kayone hulamatesia keꞌamoꞌa tamakaila alino tokiyaꞌage hulamateteno mukiꞌa agaiꞌa alu aotage veaꞌneꞌamogamima neꞌamatea kanale yana tamamigahie.
ACT 20:33 Nagaya nagoꞌa vayaꞌmogatama mone afenotamileꞌene kukenatamileꞌene ageꞌna nahaꞌyea nohuane.
ACT 20:34 Tamakaitamia agayana nayapiti aliꞌyana aliꞌna nesua yaꞌene nagaiꞌenema lokaeꞌya nemaiya vayaꞌmoꞌya nesaya yaꞌene ali falote hugetama age-mainae.
ACT 20:35 Naꞌa nehuꞌna mukiꞌa yana tamaveliꞌna mage huꞌna humainoe “Aliꞌya alitetama kalima neꞌaliya vayala amaya hiho.” Anumayatimoꞌa Yisasi humainea kea mage humaine “Veaꞌmoꞌya nago yama alisayana muse hugahagi afuꞌaganana nago yana amisiana tusiya huno musena hugahie. Aminea yamo muse yamoꞌa ali-mainea muse yana agase-maine.” huno humainea kea tamakesa havi havi hutama maiho huno humaine.
ACT 20:36 Mani kea huteno soka vayaꞌene Poloꞌa aleꞌya ayeno Anumayamotega ke huno havige-maine.
ACT 20:37 Havigetegeꞌya mukiꞌa soka vayaꞌmoꞌya tusiꞌa avi neꞌateꞌya Polona anukiꞌya atako ataka nehuꞌya haenagaꞌama agai aukipaleꞌma nagoꞌene oꞌagesaya yafe hamaumana halegeꞌya avia ateteꞌya tipi kale hanelega avaleꞌya umainae.
ACT 21:1 Amataleta tipi kalefi unaꞌamogata Kosi kumate mo faeteta lina takaeta Lotesi uvaꞌyi huta mo faeteta lina lakaeta Patala uvaꞌyi humainone.
ACT 21:2 Uvaꞌyi huta nagola hagelipi kalea agonana Fonisia kotega ugahe nehigeta ani lipi kalefi haisaga humaita umainone.
ACT 21:3 Neꞌuta Saipalusi mogonana haoga laya kaiyaga hanegeta neꞌataleta Silia uta tipi kalemoꞌa afenoꞌyaga atalegahe higeta Taiya limo agegayalega lavi-mainone.
ACT 21:4 Anile tatalegeta Yisasife haviꞌya amakupi malenaya anagafe momatiyeta ali falote huteta amakaiꞌene seveniꞌa (7) kana mainonageno Alu Aotage Avamuꞌmoꞌa hamapaigeꞌya haviteꞌya Polofena “Yelusalemua oꞌvuo.” huꞌya hapai-mainae.
ACT 21:5 Hapaitageta amakaiꞌenema mauna kanamoꞌa haꞌnoma nehiana katega ugahe nehunageꞌya mukiꞌamoꞌya aꞌneꞌamiene nafaꞌneꞌamiene tavaleꞌya kumala ataleꞌya vageta ti agegayalega hanea kahaepate mo latalegahe hageta taleꞌya moyeta nunamu humainone.
ACT 21:6 Nunamuna huteta hufalu fala humateta “Maiho.” humateteta tipi kalefi haisaga humaunageꞌya eteꞌya noꞌamilega emainae.
ACT 21:7 Taili kumala ataleta Tolemesi uvaꞌyi huta Yisasife haviꞌya amakupi malenaya anagala hu falu fala huneꞌamateta amakaiꞌenena nagoke kana kanoꞌa mainone.
ACT 21:8 Maita faeteta amataleta Sisalia uvaꞌyi huta Filipi nopi umainone. Ani Filipiꞌe kanomoꞌa Yisasi ke hamanepaiya kanogino Yelusalemu kave amamite amamite hisaya yafe hapaliꞌya humatenaya seveniꞌa (7) vayapiti kanogita ani kanoene umainone.
ACT 21:9 Umainonageno ani kanomoꞌa foꞌa (4) vele omainaya munaꞌneꞌa mainayanagino Anumaya Kotiꞌa avayafiti hamapaiya kea huꞌya amaune laga nehaya munaꞌneyaga mainae.
ACT 21:10 Mainageta lagaya anile tole lagufa kana mainonageno nagola Anumaya Koti aune kanoa Agapusiꞌe nehaya kanoa Yutiati elavi-vaꞌyi humaine.
ACT 21:11 Takaite evaꞌyi huno Polo amuꞌnofila melino agaiꞌa aiya ayate kisalu negino mage huno hie “Alu Aotage Avamuꞌmoꞌa mage huno nahapaiye ‘Yelusalemu mainaya Yuta vayaꞌmoꞌya ma kava huꞌya mani amuꞌnofiꞌmona nefana aiya ayate kisalu kiteꞌya vayaꞌmoꞌya haesageno falisiafe Yuta veaꞌne omainaya vayaꞌmogami amayapi ategahae.’ huno hikeꞌna haviteꞌna mani kavala me nehue.” huno humaine.
ACT 21:12 Higeta anima hia kea haviteta tagaiꞌene ani kumate veaꞌnene mage huta hapaune “Pologa museka nehunagi Yelusalemua ohaiyo.” huta hutenone.
ACT 21:13 Nehunana Poloꞌa mage huno humaine “Naꞌa higetama avia neꞌatetama nagu nagesa ali haviya nehae? Nagaya Anumayanimona Yisasi naguꞌa amitafa humainoafe nagaya nagesa talo tala huꞌna Yelusalemu haisugeꞌya natafa huꞌya nofipi nateteꞌya nahaesageꞌnama falisuana kanalele huꞌna nehue.” huno humaine.
ACT 21:14 Higeta haviteta kenonaꞌa haꞌopaita mage huta humainone “Anumayatimoꞌa havimaineanagino haisia kavala hisie.” huta humainone.
ACT 21:15 Ani kea huteta lagaya ali lalo tala nehuta Yelusalemu haimainone.
ACT 21:16 Haunana nagoꞌa Sisalia lafu-taganaꞌya tagaiꞌene haigeta Yelusalemua hai vaꞌyi hunageꞌya nagola Saipalusi kanomo agia Nasoniꞌe agai notega tavaleꞌya vageta umainone. Nasoniꞌa nayona Yisasi anagapi maineane.
ACT 21:17 Yelusalemua hai vaꞌyi hunageꞌya tafu-taganaꞌya tusi muse huꞌya ali falu fala hulateꞌya lavale-mainae.
ACT 21:18 Lavaleꞌya vageta mo faeteta Poloꞌa tagaiꞌene Yemesi agegahe neꞌunageꞌya mukiꞌa soka vayaꞌyaga anile emainae.
ACT 21:19 Ageno Poloꞌa “Mainafio.” huno hu falu fala huneꞌamateno Anumaya Kotiꞌma aya higeno Yuta vea omainaya veaꞌmogami amuꞌnopi ali-mainea aliꞌyafe hamapailama huno hamapaiye.
ACT 21:20 Poloꞌma hia kea haviteꞌya Anumaya Koti agia alisaga huꞌya Polofe mage huꞌya hae “Kasagoꞌya tauseniꞌa veaꞌmoꞌya Yisasife haviꞌya amakupi maleꞌya amametiti nehaya Yuta veapiti Yelusalemu mainaya veaꞌmoꞌya Mosese kahegi kema akave malesaya amaku amakesa humainae.
ACT 21:21 Nehuꞌya kagayama mukiꞌa Yuta vea omainaya veapi mainaya Yuta vayaꞌmogamife ‘Mosese kahegi kea neꞌataletama nafaꞌnetamimogami amakoya anoꞌya laga ohutama nayoma Yuta vayaꞌmoꞌya mainaya auꞌava yana atale ho.’ huka humainana kehena hamapaigeꞌya ago havimainae.
ACT 21:22 Havimainagi kagayama evaꞌyi humainana kema havinuꞌya hisageta na kava hugahune?
ACT 21:23 Nago yafe kahapaigahe hunagi kahapaisuna kavala akave huo. Foꞌa (4) vayala Anumaya Koti aulagafina hulokiya vaiꞌya kea humalenaya vayala manile mainae.
ACT 21:24 Mainayanagika mukiꞌa vayaꞌmoꞌya kagaifema agoꞌma havimainaya kehema ‘Havige nehae.’ huꞌya hisayafena kagaife ‘Anumaya Koti kahegi kemo akave nemale.’ huꞌya hu-gatesayafena ani foꞌa (4) vayala amavaleka amakaiꞌenena Anumaya Koti aulagafina oniꞌyaꞌage yama omalesia kavala huka kagaikaꞌa monea miya hisanageꞌya amayolagefa laga humatesae.
ACT 21:25 Yuta vea omainaya veaꞌma Yisasife haviꞌya amakupi maleꞌya amametiti nehaya veaꞌmogamife tagaya nayona avona kaeta huhaꞌya gi-malenona kea mage huta humainone ‘Fali-mainaya veafe amakisana vaiꞌya atupa kave alisaga huꞌya malesaya kavela oneho. Kolamoꞌa agusafinaga hanesia afuene kolaꞌenena oneho. Aꞌne munaꞌne amavayu nehisaya yana ataleho.’ huta ago avona kaeta hamapai-mainone.” huꞌya humainae.
ACT 21:26 Hageno Poloꞌa faeteno ani foꞌa (4) vayala amavaleteꞌya amaugafaene amakuꞌaene sese nehaya kava huteꞌya ala mono nopi haigeno Poloꞌa mono nopi mainaya kava vayafe mage huno humaine “Laugafaene taguꞌaene Anumaya Koti aulagafina oniꞌyaꞌage otahaisia kava huta sese huteta maineta ma yupa eta tahaote tahaote Anumaya Kotina sipi sipia heta amigahune.” huno humaine.
ACT 21:27 Ani seveniꞌa (7) kanamoꞌa haꞌno hugahe nehigeꞌya nagoꞌa Esiati Yuta vayala elaviyaꞌamoꞌya Poloꞌa ala mono nopi mainegeꞌya megeteꞌya mukiꞌa alitalu humainaya veaꞌmogami amaipa ali haviya huꞌya ali hetimateteꞌya Polona atafa humainae.
ACT 21:28 Atafa huteꞌya mage hae “Isaleli vayaꞌmogata laya hiho. Ma kanomoꞌa mukiꞌa kumate vayaꞌmogamina mage huno humave-nelie ‘Isaleli vayaꞌene Mosese kahegi kene mono noꞌamiene afa yaꞌyaga hane.’ huno nehuno nagoꞌa Yuta vea omainaya vayala Kaliki kotegati vayala ma ma nagalu humalenea nopina amavaleno egeꞌya mani nona ali haviya nehageno oniꞌyaꞌage nehie.” huꞌya humainae.
ACT 21:29 Naꞌafene nago yupa Poloꞌa Talofimusiꞌene ala kumapi vaiyateti nehaꞌageꞌya age-mainayanagiꞌya Talofimusiꞌa Efesusiti kano maineanagiꞌya amakesafinaga havige nehuꞌya “Poloꞌa ani Yuta vea omainea kanoa tagaila ala mono notifi avaleno haimaine.” huꞌya havige humainae.
ACT 21:30 Hageꞌya mukiꞌa ani kumate veaꞌmoꞌya ani kema haviya kemoꞌa amaipa ali hetigeꞌya amaiyayeꞌya molitalu huteꞌya Polona atafa huꞌya mono nopinagatila avayu vaye nehageꞌya ani mono nomo fitayaga mukiꞌa aliꞌya kimainae.
ACT 21:31 Polona ago maiꞌya nehayageno Lomu ati vayate kava kanomoꞌa mukiꞌa Yelusalemu veaꞌmoya ke vaiꞌya tusiꞌa lu maiꞌya nehae huꞌya haya kea havimaine.
ACT 21:32 Haviteno ati kava vayaꞌaene ati vayaꞌyagaene amavalegeꞌya amaiyayeꞌya amakaite elaviꞌya ageꞌya ani vayaꞌmoꞌya ala kava kanoene ati vayaꞌaene ageꞌya ageteꞌya Polona nagoꞌene ohaeꞌya ataleꞌya mainae.
ACT 21:33 Ataleꞌya mainageno ati vayate kava kanomoꞌa Polona metafa huno “Tole seni nofiteti aiya ayate kisalu kiho.” huno nehuno alitalu humainaya vayafe mage huno hamavige “Mani kanoa taꞌe? Hana augafa havi kava higetama ani kavala nehae?” huno hamavige-maine.
ACT 21:34 Hamavigegeꞌya nagoꞌa vayaꞌmoꞌya nagoꞌa kea nehageꞌya nagoꞌa vayaꞌmoꞌya alu kea nehageꞌya maiꞌya tusiꞌa keyeso haya kemona aepaꞌa havilama ohuno ati vayaꞌmogamife mage hie “Lagaiti lokiyaꞌage nopinaga avaletama viho.” huno humaine.
ACT 21:35 Higeꞌya mukiꞌa veaꞌmoꞌya amakave keyeso hume hume neꞌuꞌya mage hae “Haesageno falisie.” huꞌya hume hume neꞌvageꞌya ani nomo fiate avaleꞌya vageꞌya mukiꞌa vayaꞌmoꞌya tusiya huꞌya tu hisaya kava hayakehe ati vayaꞌmoꞌya Polona avalesaga huꞌya anale avaleliꞌya umainae.
ACT 21:37 Ati vayaꞌmoꞌya tokiyaꞌage nopinaga avaleꞌya haigahe nehageno Poloꞌa ati vayate kava kanomofe mage huno humaine “Nago kea kahapaigahe nehuana kanalepio?” huno havigegeno ati vayate kava kanomoꞌa mage hie “Kagaya Kaliki kea havilinano?
ACT 21:38 Kagaya Isipiti kanogika mukiꞌa vayafena ‘Kamani vayaꞌene tu hugahune.’ huka huteka tu huge huge nehaya vayala fo tauseniꞌa (4,000) vayala kaꞌme kotega amavaleka umainana kano mainane huꞌna nagesa nehavugi kagaya ani kano mainapio?” huno havige.
ACT 21:39 Higeno Poloꞌa mage huno humaine “Nagaya Yuta kano mainoe. Silisia kotega agi hanea kumala Tasusie kuma aepaꞌnia hane. Museka nehugi nagaya alitalu humainaya veaꞌmogamina nago kea hamapaisufio?” huno havige-maine.
ACT 21:40 Havigegeno “Kanalelagi hamapaiyo.” huno higeno Poloꞌa ani nomo fiate heti-maineno kema aepa hegahena “Afaꞌa maiho.” huno ayana alisaga higeꞌya alitalu humainaya vayaꞌmoꞌya kea ohuꞌya mainageno Poloꞌa amakaiꞌami kea Hipalu kefiti Yuta vayaꞌmogamina hamapai-maine.
ACT 22:1 Poloꞌa ati vayaꞌmogami tokiya nomo fiate heti-maineno mage huno hamapaiye “Nafuꞌnaganagatamaene nenafagatamaene haviho nagaya havi kavala ohunoa ke lamahapaigahe hugi haviho.” huno hie.
ACT 22:2 Higeꞌya Yuta vayaꞌmoꞌya amakaiꞌami kea Hipalu kefiti hia kea haviteꞌya ke ohuꞌya mainageno hamapaiye.
ACT 22:3 Nagaya Yuta kano mainoe. Itaꞌnimoꞌa natenea kumala ala kola Silisiae osi kumaꞌnia Tasusie nateneanagiꞌna manima mainona kumate Yelusalemu emaineꞌna ala huꞌna Kamalieliꞌa mukiꞌa taginago-vanagomogami kahegi kemo aepaꞌa hu-naveligeꞌna havimainoanagitama tamakaya meni kanafima Anumaya Koti kema akave malaya kava huꞌna tusiya huꞌna nagula amitafa humainoane.
ACT 22:4 Nagaya nayona Yisasi akave nehaya veala tusiya huꞌna ali haviya humateteꞌna hamaeꞌna fali-mategahe veneꞌnene aꞌnene amatafa huꞌna nofiteti kisalu kimateteꞌna nofipi amavaleꞌna amatenoane.
ACT 22:5 Ani kavaꞌma humainoa kea ala mono nopi uhagote mainea kava kanoene Kanisole vayaꞌene age-mainayanagiꞌya tamahapaigahae. Ani vayaꞌmoꞌya nago autaꞌma kaeꞌya namiteꞌya “Tamasigusi mainaya tafu-taganagamitega alika vuo.” huꞌya hageꞌna aliꞌna mage huꞌna hue “Yisasi akave neꞌvaya vayala Tamasigusi momatafa huꞌna nofiteti kisalu kimateteꞌna amakata aisia ya alisaya yafe Yelusalemu amavaleꞌna egahue.” huꞌna humainoane.
ACT 22:6 Yagemoꞌa amuꞌnokaꞌno higeꞌna Tamasigusi uvaꞌyi hugahe hugeno aupaꞌa ikapinagatila tusiꞌa hale yamo nagaitela meyevasa humaine.
ACT 22:7 Meyevasa higeꞌna mopafi asaga hu-laviteꞌna havugeno nagola ala kefiti mage huno hie “Sologae Sologae naꞌa higeka nagaila ali haviya hunenatane?” huno humaine.
ACT 22:8 Higeꞌna kenonaꞌa mage huꞌna hue “Alamogae kagaya tagae?” huꞌna hugeno nagaifena mage hie “Nagaya Nasaleti Yisasiꞌnae. Nagaila maika ali haviya hunenatane.” huno humaine.
ACT 22:9 Higeꞌya nagaiꞌenema mainaya vayaꞌmoꞌya hale yamaꞌa agayanagi nagaila kema nahapaiya agea ohavinae.
ACT 22:10 Ohavinagi nagaya mage hue “Alamogae naꞌa hisue?” huꞌna havigogeno mage huno hie “Hetika Tamasigusi ugenoꞌo. Visanagenoꞌa mukiꞌa aliꞌyama alisana kea nago kanomoꞌa kahapaigahie.” huno nahapaiye.
ACT 22:11 Nahapaigeꞌna nehavugeno hale yamaꞌamoꞌa tusiya huno aye vasa higenoꞌagino naulaga oꞌagogeꞌya nagaiꞌenema umainona vayaꞌmoꞌya nayate aligeta Tamasigusia umainone.
ACT 22:12 Unana nago kanomo agia Ananaiyasiꞌe anile nemaiyanagino tusiya huno Anumaya Koti kahegi kea akave nemalea kanogiꞌya mukiꞌa ani kumateꞌma mainaya Yuta veaꞌmoꞌya “Kanale kano maine.” huꞌya agia alisaga nehaiya kanoe.
ACT 22:13 Ani kanoa Ananaiyasiꞌe nagaila navate me heti-maineno mage huno humaine “Pologa nenafugae kaulagamoꞌa eteno aigali hisie.” huno higeno naulagamoꞌa aigali higeꞌna anile aupaꞌa ani kanoa age-mainoe.
ACT 22:14 Neꞌagogeno Ananaiyasiꞌa nagaifena mage huno nahapaiye “Taginagomoꞌya agima alisaga humainaya Anumaya Kotiꞌa agaiꞌa haiya yafema havisana yafeꞌene Fatagoma Humainea Kanomoma ageteka agai avayafiti kema havisanafene huno kagaila hapali-maine.
ACT 22:15 Hapali-maineanagika agaifena huhaleka hamanepaika age-mainana yafeꞌene havimainana yafeꞌene mukiꞌa vayaꞌmogamina hamapaigane.
ACT 22:16 Naꞌa higeka agava mainane? Hetika ugeꞌya Yisasi agile tina falegatesageno Anumaya Kotiꞌa kefo yakaꞌa aye haꞌmi-taleno.” huno humaine.
ACT 22:17 Higeꞌna nagaya eteꞌna Yelusalemu emaineꞌna ala mono nopi haiꞌna Anumayamotega havinegeꞌna nagola himona kana yana age-mainoe.
ACT 22:18 Agoana Yisasina agogeno nagaifena mage huno humaine “Male mainaya veaꞌmoꞌya nagaifema hisana kehena ‘Tamage nehane.’ huꞌya ohavigahagi Yelusalemua neꞌataleka kaiyayeka alu kumate vuo.” huno humaine.
ACT 22:19 Higeꞌna nagaya mage hue “Anumayanimogae nagaya mukiꞌa Yuta veaꞌmogami mono nopi falege falege huꞌna kagaifema haviꞌya amakupi malenaya veala amavaleꞌna kina nopi mo humateteꞌna kaꞌyona neꞌamamiꞌna humainoa kea mani vayaꞌmoꞌya ago havilinae.
ACT 22:20 Havilinagi Sitiveniꞌa kagaifema hamanepaiya kanoma hayagenoꞌma faligeꞌna nagaya avate heti-maineꞌna ‘Kanale kava nehae.’ huꞌna hayaya vayaꞌmogamina kenaꞌamile yagaiꞌna mainogeꞌya hayageno fali-maine.” huno hamapaiye.
ACT 22:21 Higeꞌya Anumayamoꞌa nagaifena mage huno humaine “Hetika vuo. Nagaya hugatesugeka ayaꞌaya kotega Yuta veaꞌne omainaya veapi hugategahue.” huno higeꞌna havimainoe huno humaine.
ACT 22:22 “Yuta vea omainaya veapi ugahuema.” hia keleti amaipa haviya nehuꞌya ala kegefafiti Polofena mage huꞌya hae “Haegeno falino. Naꞌa augafa kanomoꞌa afaꞌa omaigahigi ago haegeno falino.” huꞌya humainae.
ACT 22:23 Ala kenake nehuꞌya siotaꞌamia asagi neꞌataleꞌya kugukegeꞌya kateꞌya hagaꞌyu hu neꞌatageno ati vayate ala kava kanomoꞌa mage hie “Hailagi ataleho.” nehuno ati vayaꞌmogamife “Tokiya notifi Polona avaletama haiho. Vayaꞌyagamoꞌya ala kefitiꞌma Polona ‘Haegeno falino.’ huꞌya haya kemona aepaꞌama havisuafe hegi kaꞌyoteti Polona aikolisageno ani kemona aepaꞌa tahapaisie.” huno humaine.
ACT 22:25 Higeꞌya avaleꞌya hegi kaꞌyoteti haegahe nofiteti kineꞌatageno Poloꞌa ani aliꞌyate kava neꞌyagaiya ati kanomofena mage huno havige “Lomu kahegi kemoꞌa ‘Kanalelagi Lomu nofi kanomona* kaiyekeꞌa havitama fatago hutama kaiyekea huoꞌatenetama hegi kaꞌyotetila haeho.’ huno humainefi?” huno hamavige-maine.
ACT 22:26 Higeno ati vayateꞌma kava neꞌyagaiya kanomoꞌa anima hia kea haviteno anile ataleneno ala kava kanomote mage huno mo hie “Kagaya hanaꞌa hugane? Mani kanoa fatago huno Lomu nofi kano* maine.” huno hapaiye.
ACT 22:27 Higeno ati vayate ala kava kanomoꞌa Polote eno mage huno havige “Kagaya Lomu nofi kano mainano?” huno havigegeno Poloꞌa “E.” huno humaine.
ACT 22:28 Higeno ati vayate ala kava kanomoꞌa mage hie “Nagaya kamani vayala kasagoꞌya moneꞌniꞌa miyana amamiteꞌna Lomu nofi kano hapae-mainoe.” huno higeno Poloꞌa mage hie “Kagaya aniꞌa humainanagi nagaya itaꞌniꞌmoꞌa nategeꞌna Lomu nofi kano fatago huꞌna mainoe.” huno humaine.
ACT 22:29 Higeꞌya hegi kaꞌyoteti amigahema haya vayaꞌmoꞌya ani kea haviteꞌya anile aupaꞌa neꞌataleꞌya vageno ati vayate ala kava kanomoꞌa havigeno “Poloꞌa Lomu nofi kano fatago huno mainegeꞌna nofila hutenoe.” huno tusi yate kolia humaine.
ACT 22:30 Kolia nehuno mo faeteno egamaga Yuta vayaꞌmoꞌyama Polofe “Ma kava humaine.” huꞌya humainaya kemona aepaꞌa havigahe ayapiti nofila kalu heneꞌateno ala mono note kava vayaꞌene mukiꞌa Yuta vayaꞌmogami Kanisole vayaꞌenefe “Melitalu hiho.” huno higeꞌya melitalu humaletageno Polona avaleno elavino amuꞌnoꞌamifi me hetitene.
ACT 23:1 Poloꞌa Kanisole vaya amaulagafi agesagali-maineno mage huno humaine “Nafuꞌnaganagatamae nagaya kanale ka vai neꞌayeꞌna mukiꞌa kanafiꞌene meni kanafiꞌene Anumaya Koti aulagafina naguꞌamoꞌa nagola havi kavala ohune huꞌna nehue.” huno humaine.
ACT 23:2 Higeno mono noteꞌma uhagote mainea kava kanomo agia Ananaiyasiꞌe avateꞌma hetiꞌya maiya vayafena mage hie “Avayale kaꞌyo aikoliho.” huno humaine.
ACT 23:3 Higeno Poloꞌa agaifena mage huno hapaiye “Kagaya nagaifena ‘Haeho.’ huka nehananagi Anumaya Kotiꞌa kagaila kahaegahie. Kagaya haviya hia kegiꞌyamo agupile efe peni fale-malenea kana augafa kava nehuka kaguꞌafina havi omaleka amegati savale kanomogae. Kagaya kahegi kefiti kaiyeke hunategahe nehuka ‘Haehoꞌ huka nehananagi ani kea ali neꞌatagayane.” huno humaine.
ACT 23:4 Huno higeꞌya Polo avate hetiꞌya mainaya vayaꞌmoꞌya mage hae “Kagaya Anumaya Koti mono note uhagote mainea kava kanomofena kanale ohunea kea nehano?” huꞌya humainae.
ACT 23:5 Hageno Poloꞌa mage hie “Nafuꞌnaganagatama musetami nehugi nagaya havi kava hue. Agayama mono note hagote kava kano maine kema havimainoleꞌasina mani kea ohuleꞌasinagi. Anumaya Koti autaꞌmafina mage huno kae-maleneane ‘Kava kanotamimofena kanale ohunesia kea ohiho.’ huꞌya kae-malenageꞌna age-mainoane.” huno nehie.
ACT 23:6 Huteno Poloꞌa haviana nagoꞌa Kanisole vayala Satiusi* vayalagi nagoꞌa Kanisole vayala Falasia vayalagi huꞌya mainageno haviafene huno mage huno hamapaiye “Nagaya Falasia kanogiꞌna nenafaꞌa Falasia kanomo nateneanagiꞌna nagaya ‘Fali-mainaya vayala hetigahae.’ huꞌna nametiti nehua yateti kaiyekea hunategahe nehae.” huno humaine.
ACT 23:7 Mani kema higeꞌya haviteꞌya Falasia vayaꞌene Satiusi vayaꞌene amuꞌnoꞌamifi tusiꞌa ke vaiteꞌya ani Kanisolefitila tolefi ali fako faka humainae.
ACT 23:8 Naꞌafene? Satiusi vayaꞌmoꞌya mage huꞌya nehae “Vayaꞌyagama fali-mainesafitila heꞌotigahae.” huꞌya nehuꞌya “Ensole vayaꞌene avamuꞌene omainae.” huꞌya nehayangiꞌya Falasia vayaꞌmoꞌya ani yaꞌyagahena “Lamage mainae.” huꞌya nehayane.
ACT 23:9 Anileti ala kefiti tusiꞌa ke neꞌvaiꞌya nagoꞌa Falasia vayapiti nagoꞌa kahegi kema havilinaya vayaꞌmoꞌya hetiꞌya mage hae “Ma kanoma agonana havi kavaꞌma nehia yana omalene. Ensole kanofi avamuꞌmoꞌafi hapai-mainesia kea havigu Anumaya Kotiꞌene tu huyafenagita afaꞌa atalesune.” huꞌya humainae.
ACT 23:10 Nehageꞌya kasagoꞌya kema vaiya yateti ati vayate ala kava kanomoꞌa Polona aluga alugati avayu hisalega amuꞌnopiti aiya aya ali akalupeyafene huno ati vayaꞌmogamife “Lavitama amuꞌnoꞌamifiti Polona avalesaga hutama tokiyaꞌage notifinaga avaletama moteho.” huno higeꞌya movaleꞌya umainae.
ACT 23:11 Ani kegela Anumayamoꞌa Polo avate me heti-maineno Polofe mage huno hapaiye “Kolia ohuka kagu kamena ali lokiya vaika maiyo. Kagaya Yelusalemuma maineka nagaifema hamapai-mainana kava huka Lomua mo huhaleka hamapaigane.” huno humaine.
ACT 23:12 Faeteꞌya koꞌma neliana nagoꞌa Yuta vayaꞌmoꞌya alitalu huꞌya mage hae “Polona haesunageno falisie. Anumaya Koti aulagafina tamagelafa nehune menia tiꞌene kaveꞌene mosita maineta falisia yupa hataka huta negahune. Haesunagenoꞌma ofalisiana Anumaya Kotiꞌa ali-haviya hulatesie huꞌya hulokiya vai-mainae.”
ACT 23:13 Ani kema hulokiya vai-mainaya vayala fotiꞌa (40) vayaꞌmoꞌya humainae.
ACT 23:14 Ani vayaꞌyagamoꞌya mono note kava vayateꞌene soka vayateꞌene uꞌya mage huꞌya mo hamapaiye “Lagaya Polona haesunageno falisie huta menia tiꞌene kaveꞌene mosita maineta falisia yupa hataka huta negahune huta Anumaya Koti aufina hulokiya neꞌvaune.
ACT 23:15 Neꞌvaunafe menia tamakayaene Kanisole vayaꞌene ati vayate kava kanomofe ke hutama mage hutama hiho ‘Kaiyeke hutegahunagi Polona tagaite avaletama eho.’ hutama higeꞌya yaufa tamakaitega evaꞌyi ohuneꞌya katega avaleꞌya neꞌesageta hayamano.” huꞌya humainae.
ACT 23:16 Hageno Polona asaꞌamo nafaꞌnemoꞌa ani kea haviteno ati vayaꞌmogami nopinaga haino Polona hapai-maine.
ACT 23:17 Hapaigeno Poloꞌa nagoꞌa ati vayate kava kanomofena ke higeno egeno mage huno hapaiye “Ma nafaꞌnea mukiꞌa ati vayate kava kanomotega avaleka visanageno nago ke hapaisie huꞌna nehue.” huno humaine.
ACT 23:18 Hapaigeno mukiꞌa ati vayate kava kanomote avaleno vigeno mage huno mo hie “Nofipi kanoa, Poloꞌa, ke higeꞌna ugeno ‘Ma nafaꞌnehe nago ke kahapaigahigi kagaitefe avaleka vuo.’ huno higeꞌna avaleꞌna eneꞌoe.” huno hapai-maine.
ACT 23:19 Hapaigeno mukiꞌa ati vayate kava kanomoꞌa ani nafaꞌnea ayate alilino avaleno agegayalega anakaiꞌanige umaineꞌana mage huno havige “Naꞌane ke nahapaigahe emainane?” huno havige.
ACT 23:20 Havigegeno ani nafaꞌnemoꞌa mage huno hapaiye “Yuta vayaꞌmoꞌya ke huꞌya haꞌya kiteꞌya kagaifena mage huꞌya kahavi-gegahe nehae ‘Ega Polona Kanisolete avaleka esanageta nagoꞌene kemo aepaꞌa havisune.’ huꞌya kahavi-gegahe nehae.
ACT 23:21 Huꞌya hugahagi amakai kea havika akave omalo. Ani vayapiti fotiꞌa (40) vayaꞌene nagoꞌa vayaꞌene Polona haekahe kafo maleneꞌya mage huꞌya hae ‘Menia tiꞌene kaveꞌene mosita maineta falisia yupa hataka huta negahune. Haesunageno ofalisigenoꞌa Anumaya Kotiꞌa ali-haviya hulatesie.’ huꞌya Anumaya Koti aulagafina hulokiya vaiteꞌya menima kagaya avalekama visanafene huꞌya kagava mainae.” huno humaine.
ACT 23:22 Higeno mukiꞌa ati vayate kava kanomoꞌa ani nafaꞌnemofena mage huno hapaiye “Manima nagaiꞌma hufalote huka nahapaina kea nagoꞌa vayala hamaꞌopaiyo. Nagi kagaya nagaitegatila ago vuo.” huno hutegeno umaine.
ACT 23:23 Tole kanolatana ati vayate kava yagai-mainaꞌa kanolatafe ke higeꞌana aꞌageno mage huno hanapaiye “Talo tala hutana meni kegela naeni (9) kiloki tu hataletiꞌa (200) ati vayaꞌene sevetiꞌa (70) hosi agupifi neꞌvaya ati vayaꞌene tu hataletiꞌa (200) keve nehaya ati vayaꞌene Sisalia ugahae.
ACT 23:24 Poloꞌma maino visia hosi afuene talo tala hutetana aluya hutana kava yagaitana Polona fatago hutana avaletana ala Kamani kava kanomo ayapi moteꞌo. Ani kanomo agia Filikisiꞌe.” huno humaine.
ACT 23:25 Huteno avona kaeno mage huno humaine “Nagaila nagia Kolotiusi Lisiasiꞌnae tusi kanale Kamani kava kanomoga Filikisigale mani avona kaeꞌna hu falu fala hunegatoe.
ACT 23:27 Yuta vayaꞌmoꞌya mani kanomona atafa huꞌya hae falisaya kava hayanagi agaya Lomu kanoma mainea ke haviteꞌna ati vayaꞌniene ani vayaꞌmogami amayapitila mo-vale-mainoe.
ACT 23:28 Kaiyeke hutesaya kemo aepaꞌa havigahe Kanisole vayaꞌamile avaleꞌna lavimainoe.
ACT 23:29 Avaleꞌna lavi-maineꞌna havuana amakaiꞌami ‘Kahegi kea atagae-maine.’ huꞌya hayanagi falisia augafa havi kavala ohune. Nofi hutesua augafa kefo yaꞌenena tamage huno ohune.
ACT 23:30 Ohunegi nago kema havuana nagoꞌa vayaꞌmoꞌya ‘Kesi falakita haesunageno falisie.’ huꞌya haya ke me nahapaigeꞌna haviteꞌna aupaꞌa kagaitega hutogeno vie. Vigi kaiyekema hutesaya vayaꞌmoꞌya kagaitega mo hufalote huꞌya hu fatago hisageka havisane huꞌna hamapaugeꞌya neꞌvae. Keꞌnia male haꞌno hie nagaiꞌni nagia Kolotiusi Lisiasiꞌnae.” huno avopina kae-malene.
ACT 23:31 Ati vayaꞌmoꞌya kava kanomo ke akave maleꞌya kege Polona avaleꞌya Atipatalisi kumate umainae.
ACT 23:32 Mo faeteꞌya nagoꞌa ati vayaꞌmoꞌya eteꞌya ageꞌya hosimo agupifi nemaiya ati vayaꞌmoꞌya Polona avaleꞌya umainae.
ACT 23:33 Sisalia uvaꞌyi huꞌya ani avona ala Kamani kava kanomona mo-miteꞌya Polona agai aule avaleꞌya mo hetitenae.
ACT 23:34 Mo heti-mainegeno ala Kamani kava kanomoꞌa ani autaꞌma alino hapalino haviteno Polona mage huno havige “Kagaya hana kotega kano mainane?” huno higeno “Silisia kano mainoe.” huno humaine.
ACT 23:35 Higeno haviteno mage huno hie “Kaiyekema hugatesaya vayaꞌma evaꞌyi hisageꞌna kaiyekekaꞌa havigahue.” huno nehuno ati vayafe “Helotiꞌma kimalenea Kamani nopi avaletama kava mo yagaitegeno maino.” huno humaine.
ACT 24:1 Faefuꞌa (5) kanamoꞌa haꞌno higeꞌya mono nopi hagote kava kanomoꞌa Ananaiyasiꞌene nagoꞌa vayatamaene nagola ke havino fatago nehia kanoa Tetulusiꞌene Sisalia elaviꞌya emaineꞌya Polona kaiyekema hutegahe haya kea ala Kamani kava kanomona hapaimainae.
ACT 24:2 Hapaigeno haviteno Polofe ke higeno egeno Tetulusiꞌa aepa heno Polona kaiyekea huneꞌateno mage huno hie “Kanale Kamani kava kanomoga Filikisigae kagayama kava yagai-mainanafena tagaya kanaleꞌya huta yuna heta mainonageka kasagoꞌya kanale kavakeꞌya huka kasagoꞌya kumateꞌma laya hisana kea hanageta aluya huta musekaꞌa humainonane.
ACT 24:4 Nagoꞌa kene hugahe huanagi amusekaꞌa nehunagi menima kahapaisuna kea osi kea havio.
ACT 24:5 Tagayama agonana ma kanoa Poloꞌe tusiꞌa havi kavaꞌyaga nehuno mukiꞌa kumate Yuta veaꞌmogami amuꞌnoꞌamifina hetino ke vaino tu hisaya ke hamanepaino Nasaleti Yisasi kema nehaviya veaꞌmogami ala kanoꞌami maine.
ACT 24:6 Maineno tagaiti ala mono nopi hilato ohunea kava hugahe hianagi mo-tafa huta tagaiti kahegi keleti kaiyekea hutegahe hunanagi ati vayate ala kava kanoa Lisiasiꞌa eno tokiyaꞌaleti tayapiti mevaleno umaine.
ACT 24:8 Avaleno emainegi kagaya havigeteka kaiyekema hutesanana mukiꞌama humainona kea agaiꞌa avayafiti aepaꞌa hinageka havigane.” huno humaine.
ACT 24:9 Higeꞌya Yuta vayaꞌmoꞌyaenena “Tamage nehie.” huꞌya nagoꞌene Polona kaiyekea hutenae.
ACT 24:10 Ala Kamani kava kanomoꞌa Polofe “Kaiyeke huo.” huno ayateti avameꞌname higeno Poloꞌa mage huno humaine kagaya ayaꞌaya kafufima ani nofi vayatela kaiyekema humatenana yafena haviꞌna kolia nohue. Naipa kanale yapiti kenonakalela kahapaisue.
ACT 24:11 Hama-vigesanana kahapaisageka havigane nagaya ayaꞌaya kanagefa Yelusalemua haiꞌna omainogi tuelufuꞌa (12) kana kanoꞌa Anumaya Koti agi alisaga hugahe Yelusalemua haiꞌna mainoe.
ACT 24:12 Haiꞌnama mauvana nagaya ala mono nopi maineꞌna nagoꞌa vayaꞌenena kea oꞌvainoe. “Nagaitela veala melitalu hiho.” huꞌna ohunoe. Mono noꞌyagafiꞌene ala kumapiꞌenena ani kavala hugeꞌya onagenae.
ACT 24:13 Onagenagi menia kaiyekema hunenataya kemona ma vayaꞌmoꞌya “Tamage nehune. Age-mainonanagita aepaꞌa kahapaigahune.” huꞌya hisaya keꞌamia omalegeꞌya nehae.
ACT 24:14 Nehagi nago yafe kea hu-falote huꞌna kahapaisue. Amakayama “Alu kategae.” huꞌya nehaya kama, Yisasi kema nehaviya veaꞌmoꞌya akave nehaya kana, taginagomoꞌya neꞌvaya kate neꞌuꞌna Anumaya Koti agia alisaga nehuꞌna mukiꞌa kahegi kene Anumaya Koti amaune vayaꞌmogami kene haviꞌna nagupi malenoe.
ACT 24:15 Nagupi malenogi amakayama haya kea “Anumaya Kotiꞌa fatago huꞌya maineꞌya fali-mainesaya veaꞌnene kefo kava huteꞌya fali-mainesaya veaꞌnene ali hetimategahie.” huꞌna nametitia nehue.
ACT 24:16 Ani yafe Anumaya Koti aulagaleꞌene veaꞌmogami amaulagaleꞌene hilato ohunea kavala ohuꞌna fatago huꞌna maisua yafe kava yagaiꞌna nemauvane.
ACT 24:17 Mainoanagiꞌna ayaꞌaya kafua alule mainoanagi menia Yuta nafuꞌnaganagamina nagoꞌa mone amamisuafene huꞌna Anumaya Koti muse yaꞌene amigahe Yelusalemua hai-mainoe.
ACT 24:18 Naugafaene naguꞌaene sese huteꞌna ala mono nopi haiꞌna amiteꞌna mainogeꞌya nage-mainae. Nagaiꞌenena nagoꞌa vayala me-litalu huꞌya keyesoa ohageꞌna mainoe.
ACT 24:19 Mauvanagi nagoꞌa Esiati Yuta vayaꞌmoꞌya eꞌya me nage-mainae. Amakayake nagaifena “Havi kava nehie.” huꞌya humainaya ke kagai kaulagale me hunateho.
ACT 24:20 Omesageꞌyahena ma ma mainaya vayaꞌmoꞌya nagayama Kanisole vaya amauleꞌma heti-mainoa yupa “Havi kava humaine.” huꞌya humainesaya yafena me kahapaiho.
ACT 24:21 Kahapaigahagi nagaya ma yamaꞌage amakai amuꞌnoꞌamifina hetiꞌna humainoe “Veaꞌma fali-mainesafitila hetigahae.” huꞌna humainoa keleti meni kanafina kaiyekea hu-nenatae huno humaine.
ACT 24:22 Higeno Filikisiꞌa Yisasi kema nehaviya veaꞌmoꞌya haya kea havimaineanagino mage huno hie “Haile. Ati vayate ala kava kanoa Lisiasiꞌa elavino esigeꞌna kaiyeketamia fatago hulamategahue.” huno humaine.
ACT 24:23 Huteno ati vayate kava neꞌyagaiya kanomofe ke higeno egeno mage hie “Polona avaleka nofi nopina mo hutegananagi tokiyaꞌage huka nofila hu oꞌateka atalenegeꞌya nefuꞌya kavela afaꞌa memiꞌya aya hisae.” huno humaine.
ACT 24:24 Nagoꞌa kanamoꞌa haꞌno hutegeno Filikisiꞌene aꞌamoꞌa Yuta ale agia Talusilaꞌene aꞌageno Filikisiꞌa Polofe ke higeno eno Yisasi Kalaisife haviꞌya amakupima maleꞌya amametiti nehaya kea mehanapai-maine.
ACT 24:25 Mage huno hanapaiye “Fatago hutana mainetana tanaku tanakesale kava yagai hetofa hutana maiꞌo.” Anumaya Kotiꞌa haenagama kaiyeke humatesia ke nehigeno Filikisiꞌa koli nehuno mage huno humaine “Haile. Menia nenataleka eteka vuo. Haenaga aliꞌyaniꞌa omalesigeꞌna nagoꞌene kekaꞌa havigahue.” huno humaine.
ACT 24:26 Nehuno agesa mage huno havie “Poloma atalesugenoꞌa nagoꞌa mone namisifi?” huno agesa nehavino mukiꞌa yupa agaifena ke higeno egeꞌana kaiyekea huꞌana mainaꞌe.
ACT 24:27 Hume neꞌaꞌageno tole kafumoꞌa haꞌno hutegeno Filikisi aliꞌyateꞌma anonaꞌa alimainea kava kanomo agia Polisiusi Fesatusiꞌe. Filikisiꞌa masave ageꞌaino “Yuta vayaꞌmogamina hamaisia kava hugahue.” huno Polona nagoꞌene nofi nopina atalegeno maine.
ACT 25:1 Fesatusiꞌa yagaisia kotega ago evaꞌyi huno tagufa (3) kana maiteno Sisaliati Yelusalemu haimaine.
ACT 25:2 Haigeꞌya mono note kava vayaꞌene Yuta kava vayaꞌene Polofena “Havi kava humaine.” huꞌya hapaiteꞌya mage hae “Musekaꞌa nehunagi taya huka Polona hutegeno Yelusalemu eno.” huꞌya humainae. Amakaya katega kafo maleneꞌya haesageno falisia amakesaleti humainae.
ACT 25:4 Hageno Fesatusiꞌa mage huno humaine “Poloꞌa Sisalia nofi nopi mainegeꞌna nagaya osi kana kanoꞌa maiteꞌna anilega ugahe nehugi tamakaitami kava vayaꞌmogatama nagaiꞌene tavi-mainetama agaya havi kavaꞌma humainesiana kaiyekea mo hutegahae.” huno humaine.
ACT 25:6 Fesatusiꞌa eitiꞌa (8) kanao teniꞌa (10) kanafiga Yelusalemua maiteno eteno Sisalia lavino faeteno koꞌma neliana kaiyekema havi nopi umaineno mage hie “Polona avaletama eho.” huno humaine.
ACT 25:7 Kema higeno egeꞌya Yelusalemuti emainaya Yuta vayaꞌmoꞌya avaꞌale maigagi maineꞌya “Tusiꞌa havi kava humaine.” huꞌya kaiyekea hutayanagi nagoꞌa aepaꞌa tamage huꞌya hu falote huꞌya haopainae.
ACT 25:8 Haopaigeno Poloꞌa mage huno hie “Nagaya nagoꞌa Yuta veaꞌmogami kahegi kene ala mono nopiꞌenena Lomu ala kava kanoa Sisaꞌene ali-haviyana huoꞌatenoe. Tamage huꞌna nago kanomona havi kavala huoꞌatenoe.” huno humaine.
ACT 25:9 Hianagi Fesatusiꞌa masave age aino “Yuta vayaꞌmogamina hamaisifa kava hugahue.” huno Polofena mage huno havige-maine “Kagaya kanale Yelusalemu haisanageꞌna anilega haiꞌna kaiyekekaꞌa haviꞌna fatago hugatesufio?” huno havige-maine.
ACT 25:10 Higeno Poloꞌa mage huno hie “Menima Sisaꞌa kaiyeke nehavia nopi heti-mainesugeka anile kaiyekeꞌnia haviteꞌasine huꞌna nehue. Kagaya ago havilinane nagaya Yuta vayapina nago kanomona havi kavala huoꞌatenoe.
ACT 25:11 Nahaesageꞌna falisua kefo kavaꞌma humainoleꞌasina kanalelagiꞌna faluleꞌasinagi manima hunataya kaiyekemoꞌa tamage huno aepaꞌama omalesigekahena amayapina onateganagi ala kanoa Sisa ayapi natesanageno ani kaiyekea hunatesie huꞌna nehue.” huno humaine.
ACT 25:12 Higeno Fesatusiꞌa agaiꞌa Kanisole vayaꞌene kea kea huteno mage hie “Sisaꞌa kaiyekea hunatesie huka hanafe Sisatega ugane.” huno humaine.
ACT 25:13 Nagoꞌa kanamoꞌa haꞌno hutegeno ala sauve kanoa Agalipaꞌene asaꞌamoꞌa Peniasiꞌene Fesatusina hu falu fala hutegahe Sisalia evaꞌyi humainaꞌe.
ACT 25:14 Evaꞌyi huteꞌana ayaꞌaya kanagefa mainaꞌageno Fesatusiꞌa Polo kaiyekea sauve kanoa Agalipana hanepaino mage huno hie “Filikisiꞌma mainea kanafina nago kanoa nofi nopi mainegeno Filikisiꞌa anifi ataleno umaine.
ACT 25:15 Umaineanagiꞌna Yelusalemu haiꞌna mainogeꞌya mono note kava vayaꞌene Yuta kava vayaꞌene agaifena nahapaiꞌya ‘Kaiyekea huteteka hanageke yana amio.’ huꞌya humainae.
ACT 25:16 Hageꞌna mage humainoe ‘Tagaya Lomu vayaꞌmogata ma auꞌava kava nehunane. Nago kanomoꞌa kaiyeke hutesia vayala amaule mainesageꞌya kaiyekea hutetesageno anonaꞌamile ‘Kagaya kaiyekema hugataya kea huo.’ huta hagoteta hisunageno hinageta haviteta fatago hugahune huta humainonane.’ huꞌna hamapai-mainoe.
ACT 25:17 Hugeꞌya male melitalu huꞌya mainageꞌna faeteꞌna aupaꞌa kaiyeke humate nopi uꞌna ‘Polona avaletama eho.’ huꞌna humainoe.
ACT 25:18 Hugeꞌya kaiyekema hutaya vayala hetiꞌya aepa heꞌya agaila kaiyekea hutayanagi ‘Naꞌa kefo kavala humaine.’ huꞌna nagesama havua kefo kavafena ohunae.
ACT 25:19 Ohunagi amakaiꞌami monoꞌamihekeꞌya agaiꞌenena ke neꞌvaiꞌya nagola fali-mainea kanoa, Yisasiꞌe, kanomofe, Poloꞌa ‘Ani kanoa afaꞌa hetino maine.’ huno higeꞌya ke vai-mainae.
ACT 25:20 Higeꞌna ‘Hanaꞌa huꞌna ani kemo aepaꞌa haviꞌna fatago hisue?’ huꞌna huteꞌna mage huꞌna havige-mainoe ‘Kanale Yelusalemua haisanageꞌna kaiyekekaꞌa haviteꞌna fatago hugatesufio?’ huꞌna havige-mainoe.
ACT 25:21 Havigogeno Poloꞌa ‘Mainesugeno ala kava kanomoꞌa kaiyekeꞌnia havisie.’ huno higeꞌna ‘Kanalelagi nofi nopi atesugeno mainesigeꞌna Sisate hutegahue.’ huꞌna humainoe.” huno hie.
ACT 25:22 Higeno Agalipaꞌa Fesatusife mage huno humaine “Nagaya ani kanomo kea havigahue.” huno higeno “Kanalelagi egamaga keꞌa havigane.” huno humaine.
ACT 25:23 Higeꞌya mo faeteꞌya kotigeꞌya Agalipagani Penaisigania kanale konagali kena faiteꞌana kaiyeke havi nopi vaꞌageꞌya ati vayate kava vayaꞌmoꞌyaene ani kumate kava vayaꞌmoꞌyaene tokaeꞌya ani nopi hai-mainageno Fesatusiꞌa Polofe ke higeꞌya avaleꞌya emainae.
ACT 25:24 Ageno Fesatusiꞌa mage huno humaine “Ala Sauve kanomoga, Agalipagaene mukiꞌa melitalu humainaya vayaꞌene haviho. Ma ma agaya kanomofe mukiꞌa Yuta vayaꞌmoꞌya Yelusalemuene ma kumateꞌene maineꞌya tokiyaꞌage kefiti mage huꞌya nahapaiye ‘Mani kanoa kaiyeke huteka haegeno falino.’ huꞌya ala kefiti humainae.
ACT 25:25 Hageꞌna nagayama agoana mani kanomoꞌa nagola falisia kefo kavala ohune huꞌna hugeno Poloꞌa ‘Lomu ala Sauve kanomo kaiyekeꞌnia havigahie.’ huno higeꞌna ‘Kanalelagika ugane.’ huꞌna humainoe.
ACT 25:26 Huanagi ani kanomoꞌa falisia kefo kavaꞌma humainea kemoꞌa omalegeꞌna ‘Na keleti kaiyekea huto.’ huꞌna ala Sauve kanomotega autaꞌma kaesugeno visia keꞌnia omalegeꞌna tamakaite avaleꞌna neꞌogi ala kava kanomoga Agalipaga mani kanomo kaiyekea havilama huka havisanageꞌna avona kaeꞌna atalesue huꞌna tanakaite avaleꞌna neꞌoe.
ACT 25:27 Nagaya havuana nofi kanoa hutesugeno vinageꞌna kaiyekema hutesaya kema kaeꞌna oꞌamisuana haviya hugahie huꞌna nehue.” huno humaine.
ACT 26:1 Agalipaꞌa Polofe mage huno hapaiye “Kagaya kekaꞌa huo.” huno higeno Poloꞌa ayana haꞌya huno kaiyeke hutea kenonaꞌa mage huno humaine.
ACT 26:2 Agalipaga, ala sauve kanomogae, menia kagai kaule hufalote huꞌna Yuta vayaꞌmoꞌyama kaiyeke hunatenaya kemo anonaꞌa hisua yafena muse nehue.
ACT 26:3 Yuta vayaꞌmogatama nehuna kavaꞌene ke neꞌvauna aepaꞌa kagaya ago age-mainanafene huꞌna tusiꞌa muse nehue. Naꞌa humainanafe musekaꞌa nehugi kagaiteꞌma hisua kehena kasalola okahaenageka ako huka maineka havio.
ACT 26:4 Nafaꞌnema mainolegati Silisia mainoanagiꞌna haenagaꞌa Yelusalemuma elavi-mainoana ani nofi veamoꞌya kama vai-neꞌayoa yana Yuta veaꞌmoꞌya nage-mainae.
ACT 26:5 Nayona nagaya Falasia vayaꞌmogami kahegi kema akave malogeꞌya nage-mainaya yafema kahapaisugeꞌyahena ani kea kahapaigahae.
ACT 26:6 Kahapaigahagi nayoma taginagomogamifema Anumaya Kotiꞌa “Nago yana hulamategahue.” huno hulokiya vai-malenea keleꞌma nametiti hua yateti menia kaiyekea hunatageꞌna heti-mainoe.
ACT 26:7 Anima hulokiya vai-malenea kelefena mukiꞌa tuelufuꞌa (12) Yuta nofi veaꞌmoꞌya amametitia nateꞌene kegeꞌene ani yama hulatesiafene huꞌya Anumaya Koti agia ayeme ayeme neꞌvae. Neꞌvageꞌna Agalipaga, ala sauve kanomogae, nagaya aniꞌa huꞌna nametiti hua yateti Yuta vayaꞌmoꞌya kaiyekea maiꞌya hunenatae.
ACT 26:8 Naꞌa higetama nagaya “Anumaya Kotiꞌa fali-mainaya veala ali hetimatene.” huꞌnama hua kehena “Havige nehie.” hutama nehae?
ACT 26:9 Nayona nagaya “Nasaleti Yisasi agia aliꞌna mopafi atalesugeno lavisie.” huꞌna alu kava alu kavala humatenoe.
ACT 26:10 Mono note kava vayaꞌmoꞌya “Naꞌama huo.” huꞌya hunatageꞌna Yelusalemu maineꞌya Yisasina amakuꞌa amitafa humainaya veaꞌmogamina amavaleꞌna nofi mo humatenogeꞌya kaiyekema humataya yupa “Hamaegeꞌya faliho.” huꞌna humainoane.
ACT 26:11 Yisasi veaꞌmogamina “Kalaisifena kamuge hatagetama vaimateho.” huꞌna nehuꞌna kasagoꞌya mono nopi kaꞌyona mo neꞌamamiꞌna nahai-vaiꞌna Yuta veaꞌne omainaya vayaꞌmogami kumapina moli-haviya huneꞌamatoane.
ACT 26:12 Ani kava hisuafe ala mono note kava vayaꞌmoꞌya hunatageꞌna Tamasigusi ugahe umainoe.
ACT 26:13 Ala Sauve kanomogae, yagemoꞌa amuꞌnokaꞌno higeꞌna katega nehaugeno ikapinagati tusiꞌa vasa yamoꞌa, yagemona agaseno ala yakefa, huno aivasa higeꞌna age-mainogeꞌya nagaiꞌma navagi hageta hauna vayaꞌene aivasa lahau-maine.
ACT 26:14 Higeta lagaya mopafi asaga hu-lavita tagoꞌya aye-maineta havugeno Yuta vayaꞌmogami kefiti mage hie “Sologae Sologae naꞌa higeka nagaila ali haviya nehane? Aniꞌama hanana avela hanegeno kagaikaꞌa kagata neꞌaiye.” huno humaine.
ACT 26:15 Higeꞌna mage huꞌna hue “Ala kanomogae kagaya lagae?” huꞌna hugeno mage hie “Nagaya Yisasiꞌnae ali-haviya maikama hunatana kanomoꞌnagi hetio. Kagaila hugatesugeka nagai aliꞌyana alika nagaiꞌma nagana yafeꞌene haenagama kavelisua yafeꞌene hamapaisanafene huꞌna kagaitela evaꞌyi nehue.
ACT 26:17 Nehuafe Yuta veaꞌne omainaya veaꞌmogamitega hugategahugi haenagama ali haviya hugatesaya Yuta vayapitiꞌene Yuta veaꞌne omainaya vayaꞌmogami amayapitiꞌene kavaleꞌna kaugafa aligatigahue.
ACT 26:18 Yuta veaꞌne omainaya veaꞌmogamina asuma humainea amaulaga alika kaligali humatesanageꞌya haniki-mainea yapima mainaya yana neꞌataleꞌya amakuꞌa aiyahae huꞌya vasa yapi maisaya yafe hunegatoe. Satani kava yagai-mainea yapina neꞌataleꞌya amakuꞌa aiyahae huꞌya Anumaya Koti kava yagai-mainea yapi maisaya yafe hunegatoe. Nagaife haviꞌya amakupi maleꞌya amametiti hisageꞌna kefo yaꞌamia aigeꞌamateꞌna atalemateteꞌna alu aotage anagaꞌniene amavaleꞌna amatesugeꞌya maisae huꞌna hunegatoe.” huno humaine.
ACT 26:19 Agalipaga, ala Sauve kanomogae ani kema higeꞌna ikate age-mainoa yafenagiꞌna akave malenoe.
ACT 26:20 Hagoteꞌna Tamasigusi uteꞌna anileti Yelusalemua uaꞌyamoꞌna anileti mukiꞌa Yutia kotega ute ete huꞌna Yuta veaꞌne omainaya veateꞌene mage huꞌna hamapai-mainoe “Kefo yatamia neꞌataletama tamakuꞌa aiyahae hutama Anumaya Kotitega etama kanale auꞌava yana hisageꞌya tamakuꞌama aiyahae hisaya yana agesae.” huꞌna hamapai-mainoe.
ACT 26:21 Mani kema hamapai-mainoa keleti ala mono nopi mainogeꞌya Yuta vayaꞌmoꞌya natafa huꞌya nahaesageꞌna falisua kavala hunatenae.
ACT 26:22 Hunatenagi Anumaya Kotiꞌa mukiꞌa yupa naya higeꞌna menia hetiꞌna maineꞌna ala kava vayaꞌene osi vayaꞌenena tamahanepauve. Moseseꞌene Anumaya Koti aune vayaꞌene “Naꞌa yana maꞌa yana falote hugahie.” huꞌya humainaya keꞌage hamapai-mainoe.
ACT 26:23 Mage huꞌya humainayane “Anumaya Kotiꞌma taugafa aligatigahema hutenea kanomoꞌa augafa agata aisigeno faligahie. Fali-mainesifiti mukiꞌa veala amakaseno uhagote-lamateno hetiteno hale yamaꞌa hanesia kea Yuta veaꞌnene Yuta veaꞌne omainaya veaꞌnene hamapaigahie.” huꞌya humainayane huno humaine.
ACT 26:24 Poloꞌa na ke higeno Fesatusiꞌa ala kefiti mage huno hie “Pologae aifoꞌnafo ke maika nehanagi alu avo alu avoma maika nehapalina yaꞌyagamo aifoꞌnafo kavala hugatene.” huno humaine.
ACT 26:25 Higeno Poloꞌa mage huno hie “Fesatusigae, ala kava kanomogae, aifoꞌnafo kea nohugi kelamage nehue.
ACT 26:26 Nehugi nagayama hua kemoꞌa ala Sauve kanomoga Agalipagae havilinanageꞌna hufalote huꞌna nehue. Nagaya havuana mukiꞌa ani kavala falakiꞌya ohunagi ani kavala ago age-mainane.
ACT 26:27 Ala Sauve kanomoga, Agalipagae, kagaya Anumaya Koti amaune vayaꞌmogami kea ago havika kagupi maleka kametiti nehano? E, kagupina ago alika malana yana nagaya ago havilinoe.” huno hapaiye.
ACT 26:28 Higeno Agalipaꞌa mage huno hie “Menima hana keleti aupaꞌa nagaya Yisasife haviꞌna nagupi malegahue huka nehano?” huno humaine.
ACT 26:29 Higeno Poloꞌa mage huno hie “Aupa kana kanoꞌafi ayaꞌaya kana mainesanano nagaya hua augafa kava huka Yisasife havika kagupi malesanafe Anumayamotega ke huꞌna havi-negoe. Kagaifekeꞌya mani kea nohugi mukiꞌa ma kanaleꞌma maineꞌya nagai kema nehaviya veaꞌnenefe nagaya mainoa augafa kava huꞌya maisae huꞌna Anumayamotega havinegogi nofipi maisaya yafena nonahaiye.” huno humaine.
ACT 26:30 Higeꞌya ala Sauve kanoa Agalipaꞌene nago kava kanoa Fesatusiꞌene Penaisiꞌene amakaiꞌenema mainaya veaꞌnemoꞌya hetiꞌya alule umaineꞌya kea kea mohu mehu huteꞌya mage hae “Mani kanomoꞌa nofila huteteꞌya haesageno falisia augafa kefo kavala ohune.” huꞌya humainae.
ACT 26:32 Hayanagi Agalipaꞌa Fesatusina mage huno hapaiye “Mani kanoa, Poloꞌe, ‘Sisaꞌa kaiyekeꞌnia havisie.’ hunoꞌma ohuneleꞌasina ‘Nofipitila atalegeno vino.’ huꞌna huleꞌasine.” huno humaine.
ACT 27:1 Polofe “Lomu kumate tipi kalefi ugane.” huꞌya huteꞌya avaleꞌya nagoꞌa nofipi mainaya vayaꞌene amavaleꞌya ati vayate kava kanomo ayapi amatenae. Ani ati kanomo agia Yuliusiꞌe. Ani kanoa Sisaꞌa, Sauve kanomo, ati kanoꞌa maineane.
ACT 27:2 Nagaya Lukuꞌnae Alisatakusiꞌene Poloꞌene umainone. Alisatakusiꞌa Masetoniati kanoe. Osi kumaꞌamo agia Tesalonaika kanogino tagaiꞌene vigeta nago Atalamitiumu kumate tipi kalefi haisaga humaunageno tipi kalemoꞌa Esia koꞌmo haopalega haigahe higeta hai-mainone.
ACT 27:3 Nehaunageno kotigeta ega Saitoni kumate hai vaꞌyi hunageno Yuliusiꞌa Polona ali kayone huneꞌateno “Kanalelagika vayakamogamitega visanageꞌya ali kanale hulamatesae.” huno tatalegeta umainone.
ACT 27:4 Umaigeta Saitoni kumala neꞌataleta yasimoꞌa tusiya huno alino halage higeta yasimoꞌa osiꞌma hisiafe nago hagelimo amuꞌnopi hanea kumaꞌmo aupate eumainone. Ani kumaꞌmo agia Saipalusie.
ACT 27:5 Hagelipi Silisiaene Pamafilia kumaꞌene mogaseta Maila euvaꞌyima hunana ani kumaꞌmona ala agiꞌa Lisia eumainone.
ACT 27:6 Maila mainonageno kava humainea ati kanomoꞌa nago Alekasatalia tipi kalea ageteno ani tipi kalemoꞌa Lomu ugahe higeno tavalegeta ani tipi kalefi haisaga humaita eumainone.
ACT 27:7 Tipi kalefima unana aiyayeno oꞌunegi kasagoꞌya kanagefa hako hako huno vigeno osi yasi kanoꞌa aligeta Nitusi umainone. Yasimoꞌa osi higeno nagola timo amuꞌnopi hanea kotega Kaliti koꞌmo aupate unana Salamone kumala aupaꞌale hane.
ACT 27:8 Kaliti limo agegayalega hako hako huta unana nago kumaꞌmo agia Kanale Ti kahaepatele huꞌya nehaya ti agegayalega euvaꞌyi humainone. Ani agegayalega ala kumaꞌmo aupate Lasie huno hane.
ACT 27:9 Hako huta una yafe ayaꞌaya kanagefa katega neꞌunageno Yuta vayaꞌmoꞌya kave monesiya kanamoꞌa ago falote hianagi timoꞌa ayamufa aigeno Poloꞌa ani vayafe mage huno hamapaiye,
ACT 27:10 “Nagaya nagesa havuana tipi kalefina kasageke huta neꞌvisunageno afenoꞌyatiene tipi kalene tagaitiene tusiya huno alihaviya tahaugahie.” huno hamapaiye.
ACT 27:11 Hamapaiyanagi ati vayate kava kanomoꞌa ani kea havino agupina omaleanagi tipi kalemo kaꞌyomaꞌaleꞌma neꞌalia kanomo kene tipi kalemo nefa kene havino akave malenegi Poloꞌma hia kea havino akave omalene.
ACT 27:12 Akave omalegeꞌya ani kumala tusiꞌa yasima alia kanafinagiꞌya kanale huꞌya maisaya kumala omalegeꞌya tipi kalema neꞌaliya vayaꞌmoꞌya ke huge havige huteꞌya “Ani kumala neꞌataleta Finikisia, Kaliti kumaꞌmo haupalega nagola tipi kalema malesuna kumafe avame huta visune. Ani kumatela yasima alisia kanalela mo maigahune.” huꞌya humainae.
ACT 27:13 Amuko yasimoꞌa ako huno aligeꞌya “Kanalelagita ugahunagi afaꞌa vigetao.” nehuꞌya tipi kalema atafa hulino nemaiya yana alisaga huteꞌya ani lipi kalea Kaliti limo agegayalega eumainae.
ACT 27:14 Eneꞌvageno Kaliti kumateti tusiꞌa yasimoꞌa alino egeta “Eteta ani kumate ugahune.” huta hunanagi ani yasimoꞌa tipi kalea melino haviya huno aiyahae huno atalegeno ani yasimoꞌa ayetufegeta emainone.
ACT 27:16 Onana nagola hage limo amuꞌnopi hanea kumala osi kumaꞌmo avate eumainone. Ani kumaꞌmo agia Kautae. Neꞌonageno yasimoꞌa osiꞌa alino laga higeta tusi aliꞌya aliyaꞌamoꞌya hevayu huꞌya osi tipi kalea alisaga huꞌya ala tipi kalefi maleneꞌya ani ala tipi kalemoꞌma kofa-nafa ohiseafene huꞌya nomo aiyafi nofila kitafa humalenae. “Yasimoꞌa ayetufesigeta Afelika koꞌmo ti kahaepatega mo haviya hugahune.” huteꞌya anale asai-malenaya kena yasimoꞌma ayetu-nefea kena kalu heꞌya afepi maletageno yasimoꞌa ayetu-fegeta emainone.
ACT 27:18 Neꞌeta mo faonageno koꞌma neliana timoꞌa ayamufaꞌage higeꞌya ani lipi kalefima hanea afenoꞌyaꞌyaga aliꞌya kalemoꞌa yoꞌyo huno visiafene huꞌya hage lipi hagaꞌyu hagaꞌyu hu-talenae.
ACT 27:19 Tagufa (3) kanale tipi kalemo aliꞌya yamaꞌa amakaiꞌami amayapiti aliꞌya tipi hagaꞌyu hagaꞌyu hutalenae.
ACT 27:20 Kasagoꞌya kanagefa yagene kaꞌnefiꞌenena oꞌagogeno limoꞌa tusiya huno ayamufa aigeta taugafa aligatisia yafema tametiti nehuna yana ago ataleta “Ani lipi fanane hugahune.” huta maita humainone.
ACT 27:21 Nehuꞌya vayaꞌyaga ayaꞌaya kanagefa kavela oneꞌya maigeno Poloꞌa amuꞌnoꞌamifi hetino mage huno hie “Nafuꞌnaganagatama tamakaya havi kava hutama hagoteꞌnama tamahapauva kea ‘Kaliti kumala oꞌatalesune.’ huꞌna hua kea ohavinae. Tamakayama havileꞌasina ma ma ali haviyama hulatea yana falote ohigeno afenoꞌyatienena oꞌvaꞌyagileꞌasine.
ACT 27:22 Nagi menia tamahanepauve kolia ohutama tokiya vaitama maiho. Tagaipitila nago kanoa ofaligahigi tipi kaleꞌage haviyana hugahie.
ACT 27:23 Nagaya Anumaya Koti nafaꞌne mainoanagiꞌna mukiꞌa kanafina agia alisaga hume hume neꞌogeno meni kegela agaiꞌa ensole kanomoꞌa navate me heti-maine.
ACT 27:24 Heti-maineno mage huno nahapaiye ‘Pologae kolia ohuo. Kagaya Sisa aulela mo hetigananagino Anumaya Kotiꞌa mukiꞌa mani lipi kalefi kagaiꞌenema neꞌvaya vayaꞌmogamina amaugafa aligatigahie.’ huno nahapaiye.
ACT 27:25 Nahapaiyafe tamakaya mukiꞌamogatama kolia ohiho. Anumaya Kotiꞌa nahapaiya avamete huno ani kate hugahie huꞌna nagupi maleꞌna nametiti nehue.
ACT 27:26 Nehuanagi yasimoꞌa ali haviya hisigeta nagola ti amuꞌnopi hanea kumate vailagailita ugahune.” huno humaine.
ACT 27:27 Ani tipi kalefina tole sota onageno timoꞌa ayamufaꞌage higeta Metiteleniani hage li amuꞌnopi onageno kege amuꞌno higeꞌya tipi kalefi aliꞌya vayaꞌmoꞌya “Kumate uvaꞌyi hugahe aupa nehune.” huꞌya humainae.
ACT 27:28 Huteꞌya augelifipi amegafi huꞌya nofiꞌmo atupale tumo tumo yana kanaꞌage ya ayeteꞌya atalageno tipinaga lavitegeꞌya alisaga huꞌya agayana augelimoꞌa ayaꞌayaꞌamoꞌa fotiꞌa (40) mita humaine. Nagoꞌene osiꞌa utonageꞌya aniꞌa huꞌya tipinaga ani nofila ataleteꞌya agayana ti augelimoꞌa tetiꞌa (30) mita humaine.
ACT 27:29 Higeꞌya “Havigu yafa agupifi visunageno yafamoꞌa tahaiyafene.” huꞌya koli huteꞌya foꞌa (4) tipi kalema atafa hulino maisia yana tipi kalemo aiꞌa kapiti tipi atalageno lavi-mainegeno yagemoꞌa aupaꞌa evaꞌyi hisiafene huꞌya nunamuna humainae.
ACT 27:30 Nehuꞌya tipi kalefi aliꞌya vayaꞌmoꞌya koli huꞌya “Faleta ugahune.” nehuꞌya osi tipi kalea ali-talageno lipi lavigeꞌya mage huꞌya vayala ayemavataga hae “Tagaya kalema atafa hulino maisia yana agosisinapalega atalenone.” huꞌya ayemavataga humainae.
ACT 27:31 Hageno Poloꞌa ati vayafeꞌene amakaiꞌami kava kanomofeꞌene mage huno hamapaiye “Mani vayaꞌyagama ala tipi kalefima omaisayana tamakaila tamaugosamoꞌa fanane hugahie.” huno humaine.
ACT 27:32 Nage higeꞌya ati vayaꞌmoꞌya osi tipi kalema atafa hulinea nofila taga hutalageno osi tipi kalea tipina umaine.
ACT 27:33 Yagemoꞌa evaꞌyi hugahe aupa higeno Poloꞌa mukiꞌa vayaꞌmogamife mage huno hie “Tole sotana koli hutama kavela mositama onenagi menia kavela neho.
ACT 27:34 Lokiyaꞌage ke nagaya tamahanepauve ‘Kavela neho.’ huꞌna nehue. Kavela netetama tokiya aligahae. Tamage lamahanepauve mukiꞌamogatama kanale hutama uvaꞌyi hugahae. Nagoke kanoa fanane ohugahae.” huno humaine.
ACT 27:35 Mani kea nehuno maya alino amaulagale Anumayamotega muse nunamu huno havigeteno kolino nemaine.
ACT 27:36 Negeꞌya ageteꞌya amaipamoꞌa kanale higeꞌya amakaiꞌenena aniꞌa huꞌya kavela ne-mainae.
ACT 27:37 Tagaya lipi kalefima mainona vayala tu hataleti seveti sikisiꞌa (276) vaya mainone.
ACT 27:38 Kavela nemamu huteꞌya tipi kalemoꞌa kanaꞌagela ohisie huꞌya viti avinayaga tipi aliꞌya atalenae.
ACT 27:39 Yagema vaꞌyi higeꞌya agayana noꞌagaya kotega uvaꞌyi huteꞌya agayana nagola timoꞌa moyetagena humainea yatela kanale ti kahaepa hanegeꞌya ageteꞌya “Lipi kalemoꞌa anile aupaꞌa visie.” huꞌya humainae.
ACT 27:40 Huteꞌya tipi kalema atafa hulino nemaiya nofila hekaꞌno hutaleteꞌya aliꞌya moli kagi meli kagi nehaya kaꞌyote kimalaya nofila aliꞌya kaleꞌyo humaleteꞌya yasi alisia kena anale maleꞌya atafa humalageno tipi kalemoꞌa aiyayeno ti agegayalega ugahe nehie.
ACT 27:41 Vianagi tipina kahaepamoꞌa agoꞌyagefa hai-mainea kahaepate haino anifi mo vailino agoꞌyamona atafa huno tokiyaꞌage huligeno kanagela ohuno hanegeno timoꞌa tokiyaꞌage huno aiꞌa katega aino kofanafa humaine.
ACT 27:42 Kofanafa higeꞌya ati vayaꞌmoꞌya nofiꞌma humatenaya vayafena “Hamaesunageꞌya falisae. Havigu nago kanomoꞌa tipiti faleno visigi.” huꞌya hayanagi ati vayate kava kanomoꞌa Poloꞌa ofalisia agesa nehavino “Naꞌa ohiho.” huno huneꞌama-teno mukiꞌa tipi nagosa neꞌaiya vayafe “Nagosa aitama ti agegayalega viho.” huno humaine.
ACT 27:44 Higeta mukiꞌamogata tipi kalemoꞌma haviya hia yosamo ayamufa alita agupile maiteta ayetufeta ti agegayalega umainone.
ACT 28:1 Tagaya kanale huta evaꞌyi hune. Evaꞌyi huna koꞌmo agia Malata kumale huꞌya tahapaigeta havimainone.
ACT 28:2 Ani kumate vayaꞌyagamoꞌya kanaleꞌya huꞌya ali kayone hulatageta mainonageno kola aiteno yasiꞌage higeꞌya ata kae-maleteꞌya me lavaleꞌya ata mo lota hulatenae.
ACT 28:3 Poloꞌa ata haefusa haꞌya alino ata kaeyana nagola vayaꞌma nehaeya osifaꞌvemoꞌa ata haefusa haꞌyafiti augafa leno amuko higeno hati-lavino Polo ayapi menilage-lage humaine.
ACT 28:4 Menilage-lage hulinegeꞌya anile maiya vayaꞌmoꞌya ageteꞌya mage hae “Mani kanoa vaya hamaeno hevai-neꞌamatea kanogino hage tipina ofalianagino fatago Anumayamoꞌa anonaꞌa alisiafe haeyanagino ago faligahie.” huꞌya hae.
ACT 28:5 Hayanagi Poloꞌa ani osifaꞌvea alino aye-tafaino atafi ataleteno agaila augafa alino haviya ohigeno afaꞌa maine.
ACT 28:6 Afaꞌa maigeꞌya anile maiya vayaꞌmoꞌya augafa halegino asaga hulavino falisiafene huꞌya ayaꞌayate agava maiyanagi nagola havi yamoꞌa agaitela falote ohigeꞌya eteꞌya alu amakesa haviꞌya mage hae “Agaya nago Anumaya maine.” huꞌya havimainae.
ACT 28:7 Vaꞌyima huna mopamona aupaꞌale hanea kumatela ti amuꞌnopi kotega kava kanomo mopae. Ani kava kanomo agia Pupiliusiꞌe. Ani kanomoꞌa lavaleno nomaꞌalega mo lateneno tagufa (3) kanafi kave yagita huno nelamino yagai-latene.
ACT 28:8 Yagai-lateneno Pupiliusina nefaꞌa amuko kaliene aiꞌamoꞌa tolo ya agea kaliene alino mainegeno Poloꞌa mo-geteno Anumaya Kotitega havigeno augafale aya malegeno ani kaliꞌamoꞌa falu hu-tene.
ACT 28:9 Falu hutegeꞌya nagoꞌa ani kumate kali vayaꞌmoꞌya ageno Poloꞌa kaliꞌamia alino kanale humatene.
ACT 28:10 Alino kanale humategeꞌya tagaila kanale kava hulatageta maineta haenagaꞌa ugahema hunageꞌya tagaila nesuna yama aupa huna yana tamiteꞌya tipi kalefi aliꞌya latenae.
ACT 28:11 Tagaya tagufa (3) ika ani kotega maiteta nago tipi kalea, ala yasima alia kanafinagiꞌya Malata kumate maiya tipi kalea, Alekasatalia kumateti emaiya tipi kalefi asaga humaita umainone. Ani tipi kalemo agoꞌyalela tole kuyave netalamogani anamena talo humalenae.
ACT 28:12 Ani tipi kalefima onana Sailakiusi kumate evaꞌyi huta tagufa (3) kana mainone.
ACT 28:13 Sailakiusi kumala ataleta kagita kagita Legiumi evaꞌyi huta faenonageno yasimoꞌa alino aepa hegeta nagoke taula mo faeteta Puteoli evaꞌyi huteta hati-lavita lipi kalea agola neꞌataleta mopafi emainone.
ACT 28:14 Puteoli nagoꞌa mainaya tafu-taganagamina amakonageꞌya mage hae “Tagaiꞌene nagoke sota maigahae.” huꞌya hageta anile maigeta Lomu kumatela umainone.
ACT 28:15 Katega neꞌonageꞌya Lomu kumate mainaya tafu-taganaꞌya “Katega neꞌae.” huꞌya haya kea haviteꞌya eꞌya nagola Apiusi maketie nehaya kumate me fotu hageꞌya nagoꞌa vayaꞌmoꞌya “Taliꞌa (3) Natu Vayaꞌmoꞌya Nefayaya Noꞌyaga Hane.” huꞌya haya kumate fotu hunageno Poloꞌa ani vayala amaketeno Anumayamotega muse nehigeno aguꞌamoꞌa tokiyaꞌage humaine.
ACT 28:16 Lomu kumateꞌma unana ala kava kanomoꞌa Polofe “Kanalelagika kagaikaꞌa nopi mainesanageno nago ati kanomoꞌa kava yagaigategahie.” huno humaine.
ACT 28:17 Poloꞌa tagufa (3) kana maiteno ani kumate mainaya Yuta soka vayaꞌyagahe ke higeꞌya melitalu hageno mage huno hamapaiye “Nafuꞌnaganagatama nagaya tagaiti nofi vayaꞌmogamiꞌene taginagomoꞌya humainaya kavaꞌene aliꞌna haviyana ohunoanagi Yelusalemu nofila hunateteꞌya Lomu vaya amayapi natenae.
ACT 28:18 Lomu vayaꞌmoꞌya keꞌnima haviyana nagaipina nagoꞌa nahaesageꞌna falisua keꞌnia omalegeꞌya natalegahe hayanagi Yuta vayaꞌmoꞌya ani kehena ‘Aꞌaoꞌ huꞌya haya yafe nagoꞌma visua kaniꞌa omalegeꞌna ‘Sisa kaiyekeꞌnia havisie.’ huꞌna humainoanagi nagaiꞌni nofi vayala kaiyeke humatesua yana omalene.
ACT 28:20 Mani kema tamahapaisuafene huꞌna ke hugetama ageꞌna tamahanepauve Isaleli vayaꞌmoꞌya amametiti huꞌya agava mainaya kanomofe haviꞌna nagupi malenoa yateti nofila hunatenae.” huno humaine.
ACT 28:21 Higeꞌya ani soka vayaꞌmoꞌya Polofe mage hae “Nagoꞌa Yutia vayaꞌmoꞌya kagaifena avona kaeꞌya tamigeta ohavinone. Nagoꞌa vayatimoꞌya tagaite eꞌya ke hageta nagola havi kavaꞌma humainana kea me lahaopainae.
ACT 28:22 Tahaopainagi mukiꞌa kotegati vayaꞌmoꞌya Yisasina amakuꞌa aminaya veaꞌmogamifena ‘Havi kava maiꞌya nehae.’ huꞌya hageta ago havimainonagi menia kagaikaꞌa kaguꞌafiti hisana ke havigahune.” huꞌya humainae.
ACT 28:23 “Na kanale havigahune.” huꞌya hapali-maleteꞌya ani kanalela mukiꞌa vayaꞌyaga Poloꞌma mainea nopi me-litalu hageno Poloꞌa natema aepa heno Anumaya Kotiꞌa kava yagai-matesia kea hamanepaino Anumaya Kotiꞌma Yisasina hutegeno emainea kanomo kea Mosese kae-malenea kefitiꞌene Anumaya Koti amaune vayaꞌmoꞌya kae-malenaya kefitiꞌene amakaila amakuꞌa alino hetisigeꞌya Yisasife haviꞌya amakupi maleꞌya amametiti hisayafene huno huge huge nehigeno yagemoꞌa lavi fale-maine.
ACT 28:24 Polo kea nagoꞌa vayaꞌmoꞌya haga neꞌya amakupi malenagi nagoꞌa vayaꞌmoꞌya amakupina ali omalenae.
ACT 28:25 Alu amaku amakesa haviꞌya mohu mehu huteꞌya ugahe nehageno Poloꞌa mage huno hamapai-maine “Alu Aotage Avamuꞌmoꞌa tamage huno Aisaiyana hapaigeno Aisaiyaꞌa, aune kanogino, taginagomogamina mage huno tamage hamapai-maineane.
ACT 28:26 Kagaya mage huka veaꞌmogamina mo hamapaiyo ‘Tamakaila tamakesamoꞌa havime havime haigahayanagi ani kemona aepaꞌa havilama hutama ohavigahae. Tamaulagamoꞌa kasagoꞌya yupa ageme ageme haigahayanagi nago yana agelama hutama oꞌagegahae.
ACT 28:27 Mani kemona aepaꞌama havisaya amaku amakesa omale veaꞌne mainae. Mani kema ohavisayafene huno amakesamoꞌa ago tile-maine. Amaulagamoꞌa aniꞌa huno ‘Oꞌagesae.’ huno ago asu humaine. Mani kea amakesamoꞌa havisigeno amaulagamoꞌa agesigeno amakuꞌa aiyahae huꞌya nagaitega esageꞌna ali hilato humateyafene.’ huno higeꞌya.” kae-malenayane.
ACT 28:28 “Anumaya Kotiꞌa mani kea tamakinagomogamiꞌene tamakayaenefe lamaha-pai-maineanagi tamakaya lamakaveꞌno hutenagi haviho Anumaya Kotiꞌa anima lamaku tamamema aligatisia kea Yuta veaꞌne omainaya veafe ago humateneanagiꞌya ani veaꞌmoꞌya havigahae.” huno humaine.
ACT 28:30 Poloꞌa nago nona miya huteno ani nopi tole kafu maineno agaitegama aya veala kanaleꞌya humatene.
ACT 28:31 Huneꞌamateno Anumaya Koti kava yagaimatesia kea huhaleno hamanepaino Anumayati Yisasi Kalaisi kanale mono kea huge amavelige huno kea hulokiya vaino higeꞌya nagoꞌa veaꞌmoꞌya “Na kea ohuo.” huꞌya kahegi oꞌatenae.
ROM 1:1 Nagaya Poloꞌnae Yisasi Kalaisi aliꞌya kanoꞌa maineꞌna Aposolo mainogeno Anumaya Kotiꞌa mukiꞌa vayapiti “Alu aotage kano maineka nagaila kanale mono keꞌnia huhaleka hamapaiyo.” huno hunatene.
ROM 1:2 Ani kanale mono kea Anumaya Kotiꞌa nayona “Kamigahue.” huno hulokiya vaigeꞌya agai aune vayaꞌmoꞌya huhaleꞌya Anumaya Kotina alu aotage autaꞌmaꞌafi kae-malenayane.
ROM 1:3 Ani kanale kea agaiꞌa Nafaꞌnemofe humaine. Ani Nafaꞌnemoꞌa velafa maisiafe Teviti nofi vayapiti falote humaine.
ROM 1:4 Falote huteno fali-mainefiti Anumaya Kotiꞌa tokiyaꞌaleti aliheti-maineafe Alu Aotage Avamuꞌmoꞌa “Ma kanoa tokiyaꞌa hanegeno Anumaya Kotina Nafaꞌneꞌa maine. Yisasi Kalaisiꞌa Anumayatimo maine.”
ROM 1:5 Mainegeꞌya agai agima alisaga hisayafe mukiꞌa kotega veaꞌmoꞌya Yisasife haviꞌya amakupi maleꞌya amametiti huꞌya agai kema ali hipoꞌya hisayafe Anumaya Kotiꞌa Yisasi ayapitila kayone yana namiteno “Aposolo kano maiyo.” huno hunatene.
ROM 1:6 Hunatenegi mukiꞌa kumate veaꞌnene tamakaiꞌene Lomu mainaya veaꞌnene Yisasi Kalaisi anaga maisayafe ago hapali-lamatene.
ROM 1:7 Anumaya Kotiꞌa hau ayamopafi haigeno hapali-lamategetama alu aotage veaꞌnea Lomua mainae. Anumaya Kotiꞌa, Nelafaꞌene Yisasi Kalaisiꞌa, Anumayatimoꞌene kayone hisaya yaꞌene tamaipa falu lamahaisia yaꞌene tamamisaꞌe.
ROM 1:8 Hagoteꞌna ma yafe tamahapaigahue. Mukiꞌa ma mopale veaꞌmoꞌya tamakaifena “Yisasife haviꞌya amakupi maleꞌya amametiti humainaya veaꞌne mainae.” huꞌya lamakaifena hageꞌna havimainoa yafena aluya huꞌna lamakaifena Yisasi Kalaisi hulatenea yateti Anumaya Kotiꞌnimotega musena nehue.
ROM 1:9 Anumaya Koti aliꞌyama aluana naya mukiki huꞌna agaiꞌa Nafaꞌnemo hulatenea yafe kanale mono kea hamanepaugeno Anumaya Kotiꞌa nage-maineanagiꞌna mukiꞌa kanafina nunamu huꞌna tamakai tamakia ayeꞌna havinegoe.
ROM 1:10 Notamakoafe menima tamakaitega visuafene huꞌna havinegoe “Kagaika visua yafema kahainageka kana valinato.” huꞌna havinegoe.
ROM 1:11 Tamakuꞌamoꞌa tokiyaꞌage huno maisia tokiya, Alu Aotage Avamuꞌmoꞌa tamaminegi nagoꞌa tokiyaene alisayafe tamaya hisue huꞌna tamakaiꞌma tamakesua yafena tusiya huno nenahaiye.
ROM 1:12 Mage nehue “Yisasife havitama lamakupi maletama tamametiti nehaya yatamimoꞌa nagaila naya hisigeꞌna nagaya aniꞌa huꞌna nagupima malenoa yanimoꞌa tamakaila tamaya hisie.” huꞌna nehue.
ROM 1:13 Nafuꞌnaganagatama ma yafe haviho nagayama Yuta veaꞌne omainaya veapina Yisasifena kanale mono kea hamapaugeꞌya aliꞌya amakupi malageno alagaꞌa ayeno falote humainea kavala tamakaipi “Aniꞌa hisue.” huꞌna mukiꞌa kanalela tamakaitega ugahe nehuanagi nagoꞌa yamo kaniꞌa maleno tilegeꞌna oꞌunoe.
ROM 1:14 Anumaya Kotiꞌa aliꞌya aligeꞌna mukiꞌa veaꞌmogamina kanale huꞌya nemaiya veaꞌnene, afa veaꞌnene, avoma nehapaliya veaꞌnene, avoma nohapaliya veaꞌnene “Yisasifena kanale mono kea hamapaiyo.” huno hunateneafene huꞌna tamakaitega, Lomu mainaya veate, me lamahapaisuafe naguꞌamoꞌa heꞌnelie.
ROM 1:16 Yisasi kanale mono kehena nagayea nohue. Ani kefi Anumaya Kotina kasagoꞌya tokiya yamaꞌa hanegeꞌya mukiꞌa ani kema haviꞌya amakupi maleꞌya amametiti humainaya veaꞌmogamina Anumaya Kotiꞌa amaku amamena aligatigahie. Yuta* anagala hagoteno amaku amamena aligatiteno haenaga Yuta veaꞌne omainaya veaꞌmogamina aligatigahie.
ROM 1:17 Ani kemoꞌa mage huno tavenelie Yisasife haviꞌya amakupi maleꞌya amametiti humainaya veaꞌmoꞌya kefo yana humainayanagi Anumaya Koti aulagafina fatago veaꞌne mainae. Ani yafena Anumaya Koti autaꞌmafina mage huno humaineane “Fatago veaꞌne mainae huno humatenea veaꞌmoꞌya Anumaya Kotife haviꞌya amakupi maleꞌya amametiti humainaya yateti mai kanale huꞌya maigahae.” huꞌya kae-malenayane.
ROM 1:18 Mukiꞌa veaꞌmoꞌya Anumaya Kotina amakaveꞌno hutaya kava huꞌya kefo yama hayafe kelamage kemona falaki-malenageno Anumaya Kotiꞌa ikapinagati haima vaiya yamaꞌa lavenelie.
ROM 1:19 Anumaya Kotiꞌa mukiꞌa veaꞌmogami amakusafinaga agaifema havisaya yana ago amaveli-maine.
ROM 1:20 Anumaya Kotiꞌa ma mopama talo humalenea kanaleti aepa heno talo humalenea yateti agaila oꞌagesuna alu aotage auꞌava yamaꞌaene agola maige maige hisuna tokiyaꞌaene amaveligeꞌya agelama huꞌya age-mainayanagi “Noꞌagona yafe nehane.” huꞌya hisaya kanaꞌamia omaleneafe Anumaya Kotiꞌa anonaꞌamia amamigahie.
ROM 1:21 Amakaya Anumaya Kotina agemaineꞌyagi agia alisaga nehuꞌya “Kanale yana tamine.” huꞌya agaila musena hu oꞌateꞌya afa amaku amakesale maineꞌya aneginagi haya amaku amakesamoꞌa hani yapi mainae.
ROM 1:22 Maineꞌya “Kanale tagu tagesaene veaꞌne mainone.” huꞌya nehayanagi aneginagi huꞌya mainae.
ROM 1:23 Maineꞌya agola maige maige tokiya hale yamaꞌa hanea Anumaya Koti agia alisaga ohuꞌya amakaveꞌno huteteꞌya aiyahae huꞌya faligahe humainaya vefi, namafi, kala yagafi, osifaꞌvefi, amamena amayateti talo huꞌya maleneꞌya ani yate “Anumayati maine.” huꞌya amakia alisaga humainae.
ROM 1:24 Naꞌa kava maiꞌya haya yafe Anumaya Kotiꞌa amatalegeꞌya amaku amakesafinaga age hamaꞌye huꞌya havigu havagu amakesamo amavayu higeꞌya kefo yamaꞌage tokaeꞌya nehuꞌya amakaiꞌami amaugafa ali haviya humainae.
ROM 1:25 Anumaya Koti kelamage kea amakaveꞌno huteteꞌya havigeꞌage ke nehaviꞌya Anumaya Kotiꞌma talo humalenea yate “Anumayati maine.” huꞌya muse-kase nehuꞌya amakia alisaga humainagi ani yaꞌyagama talo humalenea Anumaya Kotina amakaveꞌno hutenae. Mukiꞌa yupa agola Anumaya Koti agia alisaga hisuna kano maine. Tamage.
ROM 1:26 Anumayamona amakaveꞌno hutaya yafe Anumaya Kotiꞌa amatalegeꞌya tusi amakaye hisifa kava huꞌya age hamaꞌye haya kavala humainae. Aꞌneꞌamimoꞌya anauꞌamimoꞌyaene humo kavala neꞌataleꞌya amafaluꞌyaene havi kavaꞌyaga humainae.
ROM 1:27 Nehageꞌya vemoꞌyaenena aꞌamienama humo kavala neꞌamataleꞌya amaipafiti atamoꞌa hetigeꞌya nagoꞌa ve amafaluꞌyaene amaugafa age hamaꞌye huꞌya amakaye hisifa kavala humainayafe anonaꞌamia amakaiꞌami amaugafale alimainae.
ROM 1:28 “Anumaya Kotiꞌa afa kano maineanagita agaifena ohavigahune.” huꞌya haya yateti Anumaya Kotiꞌa amatalegeꞌya kefo amaku amakesa haviꞌya ase ohu kavala humainae.
ROM 1:29 Mukiꞌa kefo yana alu kava alu kavala humainae. Moli huliteꞌya nehuꞌya kumai he yane. Alu vayaꞌmogami yate age hamaꞌye hu yane. Vayaꞌamihe hu-haviya humate yane. Alu kanomo hia kavafe age hamaꞌye nehaya yane. Vaya hamaeꞌya falimate yane. Vayaꞌamimoꞌyaene tusi ke neꞌvaiya yane. Havigeꞌage savale kavale. Vayaꞌamimofe “Naꞌa kava nehae.” huꞌya huatifi mafi nehae.
ROM 1:30 Vaya amakia alihaviya nehae. Anumaya Kotina kame huneꞌatae. Veganokano huꞌya halakae halakau ke nehuꞌya amakaiꞌami amaugafa aliꞌya haiteꞌya amakaiꞌami amaki alisaga humainae. Haegafa kefo kavala aliꞌya falote nehuꞌya itaꞌafoꞌamimo kea hefalaꞌnegiye.
ROM 1:31 Aneginagi nehuꞌya “Naꞌa hugahune.” huꞌya haya kea neꞌatalae. Nagoꞌamogamifena amahau amayamopafina ohamaigeꞌya hamauna hu noꞌamatae.
ROM 1:32 Anumaya Kotiꞌa “Naꞌa yama nehaya veala anonaꞌamia amamisugeꞌya aliteꞌya agola faligahae.” huno humainea kea ani veaꞌmoya havilineꞌyagi ani kefo yana maiꞌya nehuꞌya naꞌa yamaꞌagelomagi kefo yama haya veaꞌmogami amakia alisaga nehuꞌya kefo yama haya yafena muse hu neꞌamatae.
ROM 2:1 Kefo yama nehaya yafena nagoꞌa veafena “Lamakaya naꞌa kava nehae.” hutama nehutama amakaila fako hu neꞌamatagi tamakaiꞌenena aniꞌa kefo kavala nehageno tamakaiꞌenena tamakaya nehie. Tamakaya kaiyeke humataya veamogatama aniꞌa kefo yana ago humainayafe kenonama hisaya kea omalene.
ROM 2:2 Tagaya ago havimainone Anumaya Kotiꞌa kelamage keleti kefo yama humainaya veaꞌmogamina kaiyekea fako humateteno anonaꞌamia alitagifeno neꞌamamie.
ROM 2:3 Neꞌamamianagi hanaꞌa tamakesa nehaviye tamakaya aniꞌa kefo yana nehaya veaꞌmogamife “Tamakaya naꞌa kava nehae.” hutama nehutama ani kefo yana nehayanagi “Anumaya Kotiꞌa kaiyeke hulamateteno anonaꞌa alitagifeno otamigahie.” hutama nehao? Aꞌao kefo yana ago humainaya anonaꞌa tamamigahie.
ROM 2:4 Ifi Anumaya Kotiꞌa tusiya huno kayone yamaꞌa tamamiteno aupaꞌa kaiyekea hu notamategi ayaꞌayate tamakava maime neꞌuno kefo yama haya yafena anonaꞌa aupaꞌa alitagifeno notamamigetama “Ani kefo yana afa ya kana yane.” hutama tamakesa nehaviyo? Havige nehagi kefo yatamihena tamakuꞌa aiyahae hutama “Nagoꞌene ohugahune.” hutama hisayafene huno Anumaya Kotiꞌa kayone hulamateno kaiyekema huotamatea yafena nohaviyo?
ROM 2:5 Kaguꞌamoꞌa tusiya huno tokiyaꞌage humainegeka “Kefo yaniꞌahena naguꞌa aiyahae ohugahue.” hukama nehana yafena Anumaya Kotiꞌa kagaila haima vai negatea yana halaꞌya humaleneanagino kaiyekema humatesia yupa agaiꞌa fatago huno fako hulamateteno tamaveligahie.
ROM 2:6 Anumaya Kotiꞌa mukiꞌa veaꞌmoꞌyama humainaya yateti anonaꞌamia alitagifeno amamigahie.
ROM 2:7 Nagoꞌa veaꞌmoꞌya “Anumaya Kotiꞌa muse huno tagia alisaga hisigeta tokiyaꞌaene hale yapi maisune.” huꞌya kanale kava huge huge nehaya veaꞌmogamina Anumaya Kotiꞌa agola maige maige hisaya hamaimula amamigahie.
ROM 2:8 Amamigahianagi nagoꞌa veaꞌmoꞌya amakaiꞌami amaugafahekeꞌya amakesa nehaviꞌya kelamage kemona akave omaleꞌya kefo yamo auꞌava kava akave nemalageno Anumaya Kotiꞌa tusiya huno haiya vaimateteno amakata aisia yana amamigahie.
ROM 2:9 Nagoꞌa veaꞌmoꞌya kefo kava maiꞌya huge huge nehaya yafe Anumaya Kotiꞌa tusi kana yaꞌene amaugafa amagata aisia yamoꞌene amakaila alino aiso humategahie. Hagoteno Yuta veaꞌmogami amamiteno anileti Yuta veaꞌne omainaya veaꞌnenena amamigahie.
ROM 2:10 Amamigahianagi fatago kavaꞌma nehaya veaꞌnea Anumaya Kotiꞌa halemainea tokiyaꞌaene ala amakiene amaipamoꞌa falu hisia yaꞌene amamigahie. Hagoteno Yuta veaꞌmogami amamiteno anileti Yuta vea omainaya veaꞌnenena amamigahie.
ROM 2:11 Anumaya Kotiꞌa mukiꞌa veafena nagoke agu agesale maineno neꞌamamie.
ROM 2:12 Mukiꞌa veaꞌnea kahegi kema hamaopaigeꞌya ohavineꞌya kefo yama maiꞌya humainesayana Anumaya Kotiꞌa ani kahegi keletila kaiyekea hu oꞌamategahigi fako hinageꞌya hanimo aguꞌafi agola amakata aisia no maigahae. Mukiꞌa veaꞌnea kahegi kema havilineꞌya kefo yama nehaya veaꞌnea Anumaya Kotiꞌa agaiꞌa kahegi keleti kaiyekea alino aye fako humategahie.
ROM 2:13 Nagoꞌa veaꞌmoꞌya kahegi kema haviteꞌya agoꞌma atalenesaya veafena Anumaya Kotiꞌa “Fatago veaꞌne mainae.” huno hu noꞌamategi kahegi kema akave nemalesaya veafe Anumaya Kotiꞌa “Fatago veaꞌne mainae.” huno humategahie.
ROM 2:14 Yuta veaꞌne omainaya veaꞌmoꞌya Anumaya Koti kahegi kea amakaipina omaleneanagi amakaiꞌami amaku amakesafima hanea kema akave malayana akave malenaya kemoꞌa amakaiꞌami amaku amakesafiti ani kahegi kea ali falote humainae.
ROM 2:15 Anumaya Kotiꞌa agaiꞌa kahegi kema amakuꞌafima kae-malenea kea amave-ligeꞌya amaku amakesamoꞌa nagoꞌma hia kanafina “Havi kava nehane.” huno kaiyekea hu neꞌamateno nagoꞌma hia kanafina “Kanale kava nehane.” huno humaineanagino taguꞌafina ago kae-malegeno haneagino tavenelie.
ROM 2:16 Nagaya Yisasiꞌma hulatenea kanale mono kema nehua kefiti ma kea hane, ma mopama haꞌno hisia yupa Anumaya Kotiꞌa Yisasi Kalaisi avayafitila mukiꞌa veaꞌmoꞌya falakiꞌya humainesaya yafena kaiyekea humateteno fako humategahie.
ROM 2:17 Kagaya “Yuta kano mainoe. Mosese kahegi kea haviꞌna akave nemaloanagino naya hugahie.” huka kagaikaꞌa kagi alisaga nehuka “Anumaya Koti nafaꞌne mainoe.” huka nehano?
ROM 2:18 Kahegi kea ago huge kavelige hageka havilinanafe “Anumaya Kotima nehaiya kavafena haviteꞌna fatago auꞌava yana ago havilinoa kano mainoe.” huka nehano?
ROM 2:19 Kagaya ma kagesa nehavine “Kahegi kemo aepaꞌa havilinogi aulaga asu humai kanomo visia kana aveligahue. Hani yapi mainaya veala ayevasa humategahue.” huka nehano?
ROM 2:20 “Kahegi kemo aepaꞌa havilinoafe nagoꞌa kema ohavinaya veaꞌmogamiꞌene osi osi nafaꞌneyagaene humaveli hamaveli hugahue.” huka nehano?
ROM 2:21 Alu veaꞌnea humave-nelinanagi naꞌa higeka kagaikaꞌahena ave notine? “Musufa yana ohiho.” huka huhaleka veala hamanepainanagi kagaikaꞌa musufa yana nehano?
ROM 2:22 “Kumai he yana ohiho.” huka veala hamanepainanagi kagaikaꞌa ani kumaiya nehano? Ago falimainaya veafe “Anumayati maine.” huꞌya amakisana neꞌvaiya yafena “Onahautafa huno onahaiye.” huka nehananagi ani veaꞌmogami mono nopitila musufa yana nehano?
ROM 2:23 Kagia alisaga nehuka “Kahegi kea havimainoe.” huka nehananagi ani kea ago alitagae-mainanafe Anumaya Koti agia ali haviya nehano?
ROM 2:24 E, Anumaya Koti kema kae-malenaya autaꞌmafina Yuta veaꞌmogatihena mage huꞌya humainayane “Tamakaitamia havi kavaꞌma nehaya yatamihena Yuta vea omainaya veaꞌmoꞌya tamaketeꞌya Anumaya Koti agihena kamuge hatageꞌya vai neꞌatae.” huno humaine.
ROM 2:25 Kahegi kema akave malesayana Yuta vayaꞌmoꞌya humainaya kava huꞌya amakoya anoꞌya laga hu yamoꞌa* tamaya hugahianagi kahegi kema alitama atagaesayana tamaugafa taga nehaya yana afa ya kana yane.
ROM 2:26 Amakoya anoꞌya taga ohunaya vayala Yuta vea omainaya veaꞌmoꞌya kahegi kemo akave malesayana Anumaya Kotiꞌa ani veafena mage huno hugahie “Nagaiꞌni nafaꞌneyaga maineꞌya amaugafa laga humalenaya vaya kana humainae.” huno humategahie.
ROM 2:27 Kahegi kea akave maletama tamaugafa laga nehagi ani kahegi kema ali neꞌatagaetama nagoꞌa vayaꞌmoꞌya, amaugafa laga ohunaya Yuta vea omainaya veaꞌmoꞌya, kahegi kema haviꞌya akave maleꞌya tamakaila tamakaseꞌya kanale kava nehaya yamoꞌa “Havi kava nehae.” huno hulamategahie.
ROM 2:28 Taꞌyafigae Anumaya Koti veaꞌnea, Yuta veala, tama veaꞌne mainae? Amegati amaugafaꞌage taga humalenayafe Anumaya Koti veala omainagi Anumaya Kotina amakuꞌama amitafa humainayafe Yuta veaꞌnelafa mainae. Ani veala kahegi kema akave malenayafe amakaiꞌami amaugafa taga ohunagi Alu Aotage Avamuꞌmoꞌa amakupi emaineno haegafa amaku amakesa amamigeꞌya mainae. Veaꞌmoꞌya naꞌama humainesaya veaꞌmogami amakia alisaga ohugahagi Anumaya Kotiꞌa agaiꞌage amakia alisaga hugahie.
ROM 3:1 Yuta veaꞌmoꞌya hanaꞌa huꞌya Yuta vea omainaya veala amakase-mainaya veaꞌne mainae? Amaugafa laga hu yamoꞌa na kanale ya amamine?
ROM 3:2 Tamage Yuta veaꞌmoꞌya kanale yana kasagoꞌya alimainae. Hagoteno Anumaya Kotiꞌa humainea kema kae-malenaya kea amayapi malene.
ROM 3:3 Maleneanagi nagoꞌa veaꞌmoꞌya haviꞌya amakupi maleꞌya amametiti ohunaya yateti Anumaya Kotiꞌa “Hulokiya vaimalenoa yana mukiꞌa veaꞌmogamina oꞌamamigahue.” huno hugahifi?
ROM 3:4 Aꞌao aniꞌa ohugahie. Mukiꞌa veaꞌmoꞌya havigeꞌage veaꞌne mainesayana Anumaya Kotiꞌa tamageꞌage kano maine. Anumaya Koti avopina mage huꞌya kae-malenayane “Anumaya Kotiga humalenana kemoꞌa ‘Fatago kano mainane.’ huno hugatene. Kaiyekema hugateleꞌasina amakasateꞌasine.” huꞌya kae-malenayane.
ROM 3:5 Tagaiti kefo yatimoꞌma Anumayamo fatago auꞌava kavaꞌma avelisigeta naꞌane hugahune? Anumaya Kotiꞌa kefo kava humainona yateti anonaꞌa haima neꞌvaiya yamaꞌa lamiana “Fatago ohia kava nehie.” huta hisuno? Nani kea ohisune. Mukiꞌa veaꞌmoꞌya nehaya ke nehue.
ROM 3:6 Fatago ohunea kavala nohie. Fatago kavaꞌma ohisiana hanaꞌa huno ma mopale veaꞌmogatina kaiyekea hulategahie?
ROM 3:7 Nagaya havigema nehua yateti Anumaya Koti kelamagemo auꞌava yana amave-lisigeꞌya agima alisaga hisayana naꞌa hinageno Anumaya Kotiꞌa nagaifena “Kefo kava nehana kano mainane.” huno hunenate?
ROM 3:8 Naꞌama hisiana “Kanale yama falote hisia yafena kefo ya higetao.” huta hisuno. Aꞌao, nagoꞌa veaꞌmoꞌya havige huꞌya nagaife “Mani kea humaine.” huꞌya haviꞌya haviya-hunatenae. Mani kema humainaya veaꞌmogamina Anumaya Kotiꞌa kaiyeke humateteno haima neꞌvaiya yana amamigahie.
ROM 3:9 Naꞌane hisune? Tagaya Yuta veaꞌmogata nagoꞌa veala ago amakase-mainono? Aꞌao, tamage huꞌna tamahapauve tagaya mukiꞌa veala Yuta veaꞌnene Yuta vea omainaya veaꞌnene kefo kava nehuna yamo alino aikagilatene.
ROM 3:10 Anumaya Koti autaꞌmafina mage huꞌya kae-malenayane “Fatago kanoa omaitafa huno omaine.
ROM 3:11 Nago kanomoꞌa Anumaya Kotina aepaꞌa ohavine. Nago kanomoꞌa Anumaya Kotifena atia noꞌaye.
ROM 3:12 Ago ataleꞌya kefo kavakeꞌya humainaya veakeꞌya mainagi nagokela fatago kanoa omaitafa huno omaine.
ROM 3:13 Amavayafitila vaya komufitiꞌma hia kava huno hiꞌmanaꞌage nehie. Amavefuꞌnamoꞌa havigeꞌage nehuno ani amavaya aguꞌafinaga osifaꞌvemoꞌa vayaꞌma amahaegeꞌya nefaliya augafa tina anifinaga hane.
ROM 3:14 Kamuge vai yaꞌene atuꞌage ke neꞌvaiya yaꞌene amavayafina havate-maine.
ROM 3:15 Amaiyayeꞌya veala hamaesageꞌya falisaya yategageꞌya age nemalae.
ROM 3:16 Mukiꞌa vea aliꞌya haviya nehuꞌya havi no maisaya yamaꞌage neꞌamamiye.
ROM 3:17 Amaipa falu huꞌya nagoke amaku amakesale akave malesaya yafena nohamaiye.
ROM 3:18 Anumaya Kotifena amamaꞌyoa aiꞌya kolia nohae.” huꞌya kae-malenayane.
ROM 3:19 Tagaya havunagenoꞌa Anumaya Koti kahegi kemoꞌa ani kahegi kemo aiyafi mainaya veaꞌmogamife humaine. Ani yafe nago kanomoꞌa “Nagaya kanale huꞌna fatago kano mainoe.” huno ohisie. Naꞌafenomagi mukiꞌa ma mopale veaꞌmogata Anumaya Koti aulagafina kefo kavakeꞌya nehuna veaꞌne mainonafe kaiyekea hulateno anonaꞌa tamigahie.
ROM 3:20 Anumaya Koti kema akave malenea yateti Anumaya Kotiꞌa nago kanomofena “Fatago kano mainane.” huno hu oꞌategahie. Kahegi kemoꞌa nagoke yamaꞌage tavenelie. “Kefo kava nehae.” huno tavenelie.
ROM 3:21 Menia Anumaya Koti aulagafina fatago veaꞌne maisuna yana ago tahapaigeta nehavune. Kahegi kema akave malenaya yateti ani yana falote ohunegi alu kateti falote humaineanagino Moseseꞌene Anumaya Koti amaune vayaꞌmoꞌyaene kae-malenaya kemoꞌa anima kanale ya huta fatago kavaꞌma hisunafe tahapaimainae.
ROM 3:22 Anima fatago huta maisuna kavala maꞌa humaine, nago kanomoꞌa Yisasi Kalaisi hulatenea yafe havino agupi maleno ametiti humainesia yateti Anumaya Kotiꞌa “Fatago kano mainane.” huno hutene. Alu kana omalene.
ROM 3:23 Mukiꞌa veaꞌmogata kefo kavaꞌageꞌya nehunanagita Anumaya Kotina haisia kava hisuna tokiyatia kosa he-otateneanagita ikapinaga ohaigahune.
ROM 3:24 Ohaigahunagi kefo yatimoꞌa tagaila aikagilateneanagi Yisasi Kalaisiꞌa tagaila lavayu hisia miyana atalesiafene huno me faligeno Anumaya Kotiꞌa agaiꞌa kayone yamaꞌaleti “Fatago veaꞌne mainae.” huno hulatene.
ROM 3:25 Tagaya kefo yama huna yafena Anumaya Kotiꞌa aipa haviya hulateno vea amaulagafi “Yisasiga faligane.” huno hutegeno me falitegeno kolamaꞌamoꞌa elavi-mainea yafema havita tagupi maleta tametiti hunageno Anumaya Kotiꞌa aigetateno kefo yatia atalelatene. Anumaya Kotiꞌa nayona kefo yama humainaya veala amakata aisia yana anonaꞌamia aupaꞌa oꞌamaminegi Yisasi Kalaisina hutegeno me falimainea yateti Anumaya Kotiꞌa agaiꞌa fatago kavaꞌma hia yana taveli-maine.
ROM 3:26 Menia ma mopafi mainona kanafina agaiꞌa fatago kavakeꞌyama nehia yana tavelisiafe Yisasina hutegeno me fali-maineafe mukiꞌa Yisasiꞌma hulatenea yafema haviꞌya amakupi maleꞌya amametiti humainaya veaꞌmoꞌya kefo kavala humainayanagi Anumaya Kotiꞌa “Fatago veaꞌne mainae.” huno huneꞌamate.
ROM 3:27 Naꞌa humainegi tagaiti lagima alisaga hisuna kaana hanate hane? Omaletafa huno omalene. Mukiꞌa kahegi kema akave nemalona yateti tagia alisaga hisuno? Aꞌao, tagaiti kanale kava huna yateti Anumaya Kotiꞌa “Fatago veaꞌne mainae.” huno huotatenegi Yisasiꞌa hulatenea yafe havita tagupi maleta tametiti huna yateti hunelate. Ani lagima alisaga hisuna kaana omalene.
ROM 3:28 Tagaya mage nehune Yisasiꞌa hulatenea yafe havita lagupi maleta tametiti humainona yateti Anumaya Kotiꞌa “Fatago veaꞌne mainae.” huno hulategahie huta nehune. Kahegi kema akave malesuna yateti hu otategahigi Yisasiꞌa hulatenea yafema havita tagupi malona yatetikeꞌya ani kea hulategahie.
ROM 3:29 Hanaꞌa humaine? Anumaya Kotiꞌa Yuta veaꞌmogami Anumaya Kotikeꞌya maineo? Ifi Yuta vea omainaya veaꞌmogamiꞌene Anumaya Kotiꞌami maineo? Aꞌao, mukiꞌa veala Yuta veaꞌnene Yuta vea omainaya veaꞌnene Anumaya Kotiꞌa Anumayaꞌami maine.
ROM 3:30 Anumaya Kotiꞌa nagoke agaiꞌage maineafe Yuta veaꞌmoꞌya Yisasiꞌma hulatenea yafema haviꞌya amakupi maleꞌya amametiti humainaya yateti Anumaya Kotiꞌa “Fatago veaꞌne mainae.” huno humateno Yuta vea omainaya veaꞌnene Yisasiꞌa hulatenea yafema haviꞌya amakupi maleꞌya amametiti humainaya yateti Anumaya Kotiꞌa “Fatago veaꞌne mainae.” huno humatene.
ROM 3:31 Ani kea ago humainonafe Yisasife havita lagupi malenona yateti “Anumaya Koti kahegi kemoꞌa afa ya kana ke hane.” huta nehuno? Aꞌao naꞌa ohutafa humainonagi kahegi kemona ali hetita ali lokiya neꞌvaune.
ROM 4:1 Apalahamuꞌa Yuta veaꞌmogati taginagomofena naꞌane hisune?
ROM 4:2 Apalahamuꞌa agaiꞌa aliꞌyateti mukiꞌa kahegi kemona akave maleneafe Anumaya Kotiꞌa “Fatago kano mainane.” huno hileꞌasina Apalahamuꞌa agaiꞌa agia alisaga hileꞌasinagi Anumaya Koti aufina naꞌa kavala ohune.
ROM 4:3 Anumaya Koti autaꞌmafina mage huno kae-malenayane “Anumaya Kotiꞌa Apalahamufena ‘Naꞌa hugategahue.’ huno hulokiya vai-malenea kehena ‘Lamage hanafe aniꞌa hunategane.’ huno agupi maleno ametiti hiafe Anumaya Kotiꞌa mage huno hutene ‘Fatago kano mainane.’ huno huteneane.” huꞌya kae-malenayane.
ROM 4:4 Veaꞌmoꞌya aliꞌya neꞌaliya yateti miyama alinuꞌyahena ani miyafena “Afaꞌa muse ya nelamie.” huꞌya nohagi “Aliꞌya alimainona anonaꞌa neꞌalune.” huꞌya nehae.
ROM 4:5 Nago kanomoꞌma “Kahegi kema mukiꞌa kanaleꞌma akave malesuafe Anumaya Kotiꞌa ‘Fatago kano mainane.’ huno hunategahie.” hunoꞌma ohisiana “Anumaya Kotiꞌa agaiꞌage kefo kava nehia kanomofena ‘Fatago kano mainane.’ huno hutenea kanomoꞌa nagaila ‘Fatago kano mainane.’ huno hunategahie.” huno ametiti humaineafe Anumaya Kotiꞌa anima agupi maleno ametiti humainea yana ageteno “Fatago kano mainane.” huno huneꞌate.
ROM 4:6 Yuta veaꞌmogatina taginagomoꞌa, Tevitiꞌa, mage humaine nagoꞌa veaꞌmoꞌya kahegi kea akave omaleꞌya Anumaya Kotife haviꞌya amakupi malesayana Anumaya Kotiꞌa amakaifena “Fatago veaꞌne mainae.” huno humatesia veaꞌmoꞌya tusiꞌa muse hugahae.
ROM 4:7 Tevitiꞌa amakaifena mage huno Anumaya Koti avopina humaineane “Veaꞌmogatama kefo kavaꞌma haya kavala Anumaya Kotiꞌa ago aigetamateno atalelamateneafe muse hiho. Kefo yama haya kavala ago ayehaꞌmi-taleneafe muse hiho.
ROM 4:8 Anumayamoꞌa nago kanomo humainea kefo yafena havino oꞌamino age kanitesiana ani kanomoꞌa muse hugahie.” huno humaineane.
ROM 4:9 Amaugafa laga humainaya Yuta vayafekeꞌya ani musena hisae huno nehio? Aꞌao, amaugafa laga ohunesaya veaꞌnene aniꞌa huꞌya musena hugahae. Apalahamufe tagesa havisune. Anumaya Kotiꞌa Apalahamufena “Naꞌa kavala hugategahue.” huno hulokiya vaimalenea kehena “Tamage hananagika aniꞌa hunategane.” huno agupi maleno ametiti humainea yateti Anumaya Kotiꞌa “Fatago kano mainane.” huno hutene.
ROM 4:10 Apalahamuꞌa hanaꞌa huno mainegeno Anumaya Kotiꞌa “Fatago kano mainane.” huno hutene? Agoya anoꞌya laga hutegeno huteneo? Aꞌao, laga ohunea kanafi ani kea huteneane.
ROM 4:11 Hagoteno augafa laga ohuneno Anumaya Koti kea havino agupi maleno ametitia humainea yateti Anumaya Kotiꞌa “Fatago kanoa mainane.” hunoꞌma hutenea yafema veaꞌmoꞌya havisaya yafe augafa laga humaine. Ani yafe mukiꞌamoꞌya amaugafa laga ohuneꞌya Apalahamuꞌma humainea kava huꞌya Anumaya Kotife haviꞌya amakupi maleꞌya amametiti humainaya yateti “Fatago veaꞌne mainae.” huno humatenesia veaꞌmoꞌya Apalahamuna aginagomoꞌya mainae.
ROM 4:12 Mainagi nagoꞌa veaꞌmoꞌya amaugafa laga humainayanagi ani kavakeꞌyama ohayana Apalahamuꞌma augafa laga ohunea kanafima humainea kava huꞌya Anumaya Kotife haviꞌya amakupi malenaya kavaꞌene humainaya veaꞌmogami totoꞌamimo maine.
ROM 4:13 Anumaya Kotiꞌa Apalahamuꞌene aginagomoꞌenefe mage huno humaineane “Mukiꞌa ma mopagefa kava yagaisayafe tamamigahue.” huno hulokiya vaimalene. “Kahegi kemona akave maletesageꞌna tamamigahue.” huno ohunegi “Tamakaya Anumaya Kotife havitama lamakupi malageꞌna ‘Fatago veaꞌni mainae.’ huꞌna hulamatoafe tamamigahue.” huno humaineane.
ROM 4:14 Kahegi kema akave nemalaya veaꞌmoꞌya alileꞌasina haviꞌya amakupi nemalaya yamoꞌa afa ya kana higeno hulokiya vai-malenea kemoꞌa falote ohileꞌasine.
ROM 4:15 Kahegi kemoꞌa Anumaya Kotina hai vaigeno anonaꞌa nelamianagi kahegi kema omalesina “Ago ali neꞌatagaune.” huꞌya ohaleꞌasine.
ROM 4:16 Anumaya Kotiꞌa hulokiya vai-malenea kemoꞌa kayone nehia yamaꞌaleti falote hisiafeꞌene mukiꞌa Apalahamuna aginagomoꞌya alisaya yafeꞌene “Agaife haviꞌya amakupi maleꞌya amametiti humainaya yateti aligahae.” huno humaine. Kahegi kema akave nemalaya veaꞌmoꞌyage oꞌaligahagi taginagomoꞌa, Apalahamuꞌma, ametiti humainea kava hisuna veaꞌmogatina Apalahamuꞌa neꞌalafa maine.
ROM 4:17 Mage huꞌya Apalahamufena kae-malenayane “Kagaya mukiꞌa kotega veaꞌmogamina totoꞌamimoga maigane.” huꞌya kae-malenayane. Apalahamuꞌa Anumaya Kotife havino agupi maleno ametiti humaineafe Anumaya Koti aulagalela tototimo maine. Anumaya Kotiꞌa falimainaya veala eteno hamaimula neꞌamamino falote ohunea yamofena “Falote huo.” huno higeno falote humainea kano maine.
ROM 4:18 Apalahamuꞌa ani kehena havino ametitia hianagi nafaꞌnema atesia kanaꞌamoꞌa ago haꞌno humainea yafena agesa ohavinegi “Mukiꞌa kotega veaꞌmogamina totoꞌamimoga maigane.” huno humainea kele ametiti humaine.
ROM 4:19 Ani kanafina Apalahamuꞌa vani hataletiꞌa (100) kafu ago haꞌno hutegeno kolamoꞌa ago hau higeno nafaꞌne atesia tokiyaꞌa omalegeno aꞌamoꞌenena namo a mainea yafena tole agesa ohavinegi tokiyaꞌage huno Anumaya Kotife havino agupi maleno ametitia humaine.
ROM 4:20 Anumaya Kotiꞌa “Hugategahue.” huno humainea kehena “Namisio onamisio?” huno tole agesa ohavinegi Anumaya Koti agia alisaga nehuno havino agupi maleno ametiti hia yamoꞌa alakefa humaine.
ROM 4:21 “Hugategahue huno humainea yana namigahie.” huno agesa havilama humaine.
ROM 4:22 Naꞌa humaineafe Anumaya Kotiꞌa “Fatago kanoa mainane.” huno hutene.
ROM 4:23 “Anumaya Kotiꞌa ‘Fatago kanoa mainane.’ huno hutene.” huno kae-malenea kea agaiꞌagefekeꞌyana ohunegi tagaiꞌenefe mani kea humaineane. Tagaya “Anumaya Kotiꞌa Yisasi Kalaisina falimainefiti alino hetitenea kano maine.” huta havita lagupi maleta tametiti hunageno “Fatago veaꞌnea mainae.” huno hulatene.
ROM 4:25 Anumaya Kotiꞌa Yisasina kefo yatia ayehaꞌmi-talesiafe hutegeno me falimaine. Faliteno tagaifena “Fatago veaꞌneꞌniꞌae.” huno hulatenea kemona tokiyaꞌage huno hanesiafe Anumaya Kotiꞌa Yisasina fali-mainefitila ali hetitene.
ROM 5:1 Tagaya Yisasiꞌa hulatenea yafema havita tagupi maleta tametiti humainonafe Anumaya Kotiꞌa “Fatago veaꞌne mainae.” huno hulatene. Anumayatimoꞌa, Yisasi Kalaisi, ani kavala hulateneafe Anumaya Koti tokiya hale yapi maigahune.
ROM 5:2 Yisasi Kalaisiꞌa agaiꞌa hulatenea yateti ka valilategeta Anumaya Kotina kayone yamaꞌafi umaineta Anumaya Kotina tokiya hale yamaꞌafi mo lokaeta maisunafe tametitia huta musena nehune.
ROM 5:3 Ani yafekela musena nohunagi kana yapiti tokiya vaisuna yatimoꞌa falote hisiafene huta kana yama vaꞌyi hiana ani yafena muse nehune.
ROM 5:4 Tokiya vaisuna yatimoꞌma hanesigenoꞌa Anumaya Kotiꞌa muse hulatesia auꞌava yatimoꞌa falote hisigeno Anumaya Kotiꞌa tagu tamena aligatisiafe tametitia nehuta agava mainone.
ROM 5:5 Anumaya Kotiꞌa Alu Aotage Avamula ago tamigeno lagupi mainegeno ani Avamuteti aluya huno hau ayamopafi nehaiya yana tamineafe tametiti hisuna yana afa ya kana ohugahigi taya hugahie.
ROM 5:6 Nayona tagayama kanale kava hisuna amukotima omalenea kanafina, Anumaya Kotiꞌma malenea kanafina, Kalaisiꞌa tagayama kefo yama nehuna veaꞌmogatilefene huno me falimaine.
ROM 5:7 Nago kanomoꞌa fatago kanomona aya hisuafene huno ofalileꞌasine. Tamage nagoke kanomoꞌa kayoneꞌage kanomona aya hisuafene huno falileꞌasino?
ROM 5:8 Ohavinonagi tagaya kefo kavakeꞌya huta maunageno Kalaisiꞌa tagaifene huno me falimainea yateti Anumaya Kotiꞌa tagaifena hau ayamopafi nehaiya yana taveli-maine.
ROM 5:9 Agaiꞌa kolamaꞌaleti kefo yama humainona anonatia aligeno Anumaya Kotiꞌa “Fatago veaꞌne mainae.” huno hulateteno nagoꞌene taya huno kefo yama nehuna yana Anumaya Kotiꞌa hai vaino anonatia tamigahe hianagi Yisasiꞌma falimainea yateti tagai anona ago alimaineafe tagu tamena aligatigahie.
ROM 5:10 Tagaya Anumaya Kotina kame huteta mainona kanafina agaiꞌa nafaꞌnemo falimainea yateti Anumaya Kotiꞌa “Afaꞌa maiho.” huno ali falu hulategeta nagoke taipale maineta Anumaya Kotiꞌene taipamoꞌa falu higeta mainonageno Yisasiꞌa fali-mainefiti heti-mainea haimuꞌaene maineanagino nagoꞌene taya huno tagu tamena aligatigahie.
ROM 5:11 Nagi nago yana Anumayatimoꞌa, Yisasi Kalaisiꞌma hulatenea yafena Anumaya Kotife aluya huta musena nehune. Yisasi Kalaisiꞌa ago lavaleno Anumaya Kotiꞌene nagopi ailokaelategeta nagoke taipale mainone.
ROM 5:12 Atamuꞌa, nagoke kanomo, kefo yana higeno ani kefo yama humainea yamoꞌa ma mopafina falote hutegeno kefo yama humainea kumiꞌamoꞌa haneafe veaꞌma fali yana alifalote higeno mukiꞌa veaꞌmoꞌya kefo yama hayafe anonaꞌamia fali yamoꞌa mukiꞌa veapina emaine.
ROM 5:13 Kahegi kemoꞌa omenegeno kefo yana haneanagino kahegi kema omalesina Anumaya Kotiꞌa nagoke nagokeꞌmogati kefo yatihena ohavisine.
ROM 5:14 Atamu mainea kanaleti aepa heꞌya veala falimainae. Falime falime uꞌya Mosese mainea kanafina aniꞌa huꞌya mukiꞌa falimainae. Nagoꞌa veaꞌmoꞌya Atamuꞌma atagae-mainea kava huꞌya oꞌatagaenayanagi afaꞌa falimainae. Haenagama esia kanoa Yisasi Kalaisi amemaꞌa kana huno Atamuꞌa taveli-maine.
ROM 5:15 Atamuꞌma humainea kefo yaꞌene Anumaya Kotiꞌa kayone hulatenea yamoꞌene nago avamete ohunegi aluꞌa luꞌa humainaꞌe. Tamage nagoke kanomoꞌa kefo yama humainea yateti mukiꞌa veala nefaliyanagi Anumaya Kotiꞌa tusi ya huno kayone yamaꞌafiti nagoke kanoa, Yisasi Kalaisiꞌa, kanale yama hulatenea yana afaꞌa lamigeno tusiya huno fali yamona agaseno kasagoꞌya veala ali kayone humatene.
ROM 5:16 Anumaya Kotiꞌa kayone hulatenea yaꞌene Atamuꞌa kefo yama humainea anonaꞌaenena nago avamete ohunegi aluꞌa luꞌa humainaꞌe. Nagoke kanomoꞌa kefo kavaꞌma humaineafe Anumaya Kotiꞌa mukiꞌa veaꞌmogamina kaiyekea humateteno “Hanimo aguꞌafi agola tamakata aisia no maigahae.” huno humateneanagi kasagoꞌya veaꞌmoꞌya kasagoꞌya kefo yana humainayanagi kayone humatenea veaꞌmogamina “Fatago veaꞌne.” huno humatene.
ROM 5:17 Tamage nagoke kanomo kefo yana humainea yateti faliyamoꞌa falote hu-maineanagiꞌya mukiꞌa veaꞌmoꞌya nefaliyanagi nagoke kanomoꞌa, Yisasi Kalaisi, hulatenea yateti kasagoꞌya veaꞌmoꞌya Yisasiꞌa kanale ya huno kayone hulatenea yafema haviꞌya amakupi malaya veaꞌmogamife Anumaya Kotiꞌa “Fatago veaꞌne mainae.” huno hu-matesigeꞌya agola maige maige hisaya hamaimula aliteꞌya Kalaisiꞌa hulatenea yateti tokiya vaiꞌya maigahae.
ROM 5:18 Naꞌa humaineafe nagoke kanomo kefo yana humainea yateti mukiꞌa veaꞌmogamina Anumaya Kotiꞌa kaiyekea humateteno “Hanimo aguꞌafi agola tamakata aisia no maigahae.” huno hulateanagi nagoke kanomo fatago kava hu-maleneafe Anumaya Kotiꞌa agaife havino neꞌamino kasagoꞌya veaꞌmogamifena “Fatago veaꞌne mainae.” huno humatenea yateti agola maige maige hisaya hamaimula ago alimainae.
ROM 5:19 Nago kanoa, Atamuꞌe, Anumaya Koti kea akave omaleafe mukiꞌa veaꞌmoꞌya kefo yamaꞌagela nehaya veaꞌne mainagi nagoke kanomoꞌa, Yisasiꞌa, Anumaya Koti kea akave maleneafe Anumaya Kotiꞌa kasagoꞌya veaꞌmogamifena “Fatago veaꞌne mainae.” huno humategahie.
ROM 5:20 Hu-mategahianagi Anumaya Kotiꞌa kahegi kema amamiana tusiya huꞌya alitagae-mainae. Kefo yama haya yamoꞌa alakefa hianagi Anumaya Kotiꞌa kayone hulatenea yamoꞌa ani kefo yamona agaseno tusiꞌa yakefa hane.
ROM 5:21 Kefo yama humainaya anonaꞌa mukiꞌa veaꞌnea nefaliyanagi kayone hulatenea yamaꞌa tusiya huno haneafe Anumayatimoꞌa, Yisasi Kalaisi falimainea yateti Anumaya Kotiꞌa kayone hulateno “Fatago veaꞌnea mainae.” huno hulateteno agola maige maige hisuna tahaimula lamine.
ROM 6:1 Tagaya na ke hugahune? Tagaya kefo yama hisunagenoꞌa Anumaya Kotiꞌa kayone hisuna yamaꞌa tagaipina ala huno havatelatesie huta hisuno?
ROM 6:2 Na kea ohutafa huta ohisune. Kefo kava nehuna yana ago ataleta falimainea augafa veaꞌne mainone. Falimainaya veaꞌmoꞌya kefo yana ohugahae.
ROM 6:3 Yisasi Kalaisiꞌene alino tategeta aigaꞌmaeta agaiꞌene falimainageꞌya tima fale-latenaya kea ohavinao?
ROM 6:4 Tamage tima fale-latenaya yamoꞌa Yisasi Kalaisiꞌene aigaꞌmaeta agaiꞌene falunageno komufina hevailategeno Nelafaꞌa tokiya hale yamaꞌaleti Kalaisina komufitila alino hetitenea kava huno tagaiꞌenena ali hetilateteno haegafa tahaimula tamigeta ali-mainonafe kanaleꞌya huta haegafa auꞌava yapi vaiyesune.
ROM 6:5 Tagaya agaiꞌene aigaꞌmaeta agayama humainea kava huta faliteta aniꞌa huta agaiꞌene aigaꞌmaeta fali-mainefiti hetimainea kava huta hetigahune.
ROM 6:6 Tagaya havimainone kefo yamo tokiya ago fali haꞌno hisiafe nayoma nehavuna atafa lagu tagesa Yisasi Kalaisiꞌene aigaꞌmaeno yafaga yosale ago fali-maineanagita tagaya kefo yamo aliꞌya veaꞌne nagoꞌene omaisune.
ROM 6:7 Fali-mainesia kanomona kefo yamoꞌa nagoꞌene atafa ohugahie. Hai falimaine.
ROM 6:8 Tagaya Kalaisiꞌene aigaꞌmaeta fali-mainesunana aniꞌa huta agaiꞌene fali-mainesupitila hetita maigahune huta tagupi havita malenone.
ROM 6:9 Tagaya ago nehavune Yisasi Kalaisiꞌa fali-mainefiti ago heti-maineafe nagoꞌene eteno ofaligahie. Fali yamoꞌa tokiyaꞌa omaletafa huno omaleneafe kava yagai oꞌategahie.
ROM 6:10 Nagoke yupa kanoꞌa kefo yamo tokiya hegaseno fali-maineafe nagoꞌene eteno ofaligahie. Haegafa haimu alino Anumaya Kotina haiya kava hisiafe maine.
ROM 6:11 Naꞌa humaineafe tamakaiꞌenena ani lamakesa havi havi hutama maiho, “Kalaisi falimainea avamete nagaya ago fali-mainoanagino kefo yamo tokiyamoꞌa nagoꞌene kava huonategahie. Yisasi Kalaisiꞌene aigaꞌmaeꞌna Anumaya Kotina haisia kava hisue.” hutama hiho.
ROM 6:12 Na yafe kefo yamoꞌa “Ala kavatami mainoe.” huno falisia tamaugafamoꞌa “Age haꞌye hisia kava huo.” huno kava oꞌyagaisie.
ROM 6:13 Kefo kava hisaya yafena tamaiya, tamayana, tamaulaga, kefo yamote aliꞌyafena tamakuꞌa oꞌamiho. Mukiꞌa Anumaya Kotina agaiꞌage amiho. Tamakaya falimainafiti hetimainaya veaꞌne mainagi tamaugafamoꞌa mukiꞌa kanale auꞌava yama alisiafe Anumaya Kotina amiho.
ROM 6:14 Tamakaya kahegi kemoꞌa tamaku tamamena aligatisiafe tamametitia nohagi “Anumaya Kotiꞌa kayone hulateteno ago aligati-maine.” hutama nehae. Ani yafe kefo yamoꞌa tamakaila “Na kava hiho.” huno ala kavatamia omaitafa huno omaisie.
ROM 6:15 Tagaya naꞌane hugahune? Kahegi kemo akave malesune huta tametitia nohunagi Anumaya Kotiꞌa kayone hulatenea yafe havita tametitia nehuta kefo yana kanalelagita hisuno? Aniꞌa ohutafa huta ohugahune.
ROM 6:16 Tamakaya ohavinao? Nago kanoma mukiꞌa lamaku tamakesa hakitama amitetama agai avaya ali hipoꞌya hutama maisayana ani kanomo aliꞌya veaꞌa maigahae. Kefo yama hu yamo aliꞌya veaꞌnema mainutamahena ani kefo yama nehaya anonaꞌa alitetama falitama agola Anumaya Kotiꞌenena omaileꞌasinagi tamakaya Anumaya Koti kea akave male yamo aliꞌya veaꞌnema mainutamahena ani kema akave malaya anonaꞌa alisageno Anumaya Kotiꞌa “Fatago veaꞌne mainae.” huno hulamategahie.
ROM 6:17 Tamage nayona tamakaya kefo yamo aliꞌya veaꞌne mainageno Anumaya Koti kea huhalagetama havilama hutama ago akave malenae. Naꞌa humainayafe Anumaya Kotina musena huneꞌatone.
ROM 6:18 Kefo yamoꞌma nofi hulamatenea yapitila Anumaya Kotiꞌa ago alino kalu helamategetama fatago yamo aliꞌya veaꞌne mainae.
ROM 6:19 Kema havi yatamimoꞌa yaufa akavi ohuneafene huꞌna veaꞌmogata tagu tagesafiti nehuna kea tamahanepaugi haviho hagotetama tamaiya, tamayana, mukiꞌa yatamia “Kefo yamo aliꞌya nafaꞌne maiho.” hutama hu-mainayanagi menia tamaiya, tamayana, mukiꞌa yatamia fatago hisia yamo aliꞌyate aminutamahena Anumaya Kotina alu aotage veaꞌneꞌa maigahae.
ROM 6:20 Hagotetama kefo yamo aliꞌya veaꞌneꞌa mainetama fatago kavala ohisaya tamakesa havimainayane.
ROM 6:21 Kefo yamo aliꞌya veaꞌne mainetama ani kavala humainayafe anonatamia hana augafa kanale ya alimainae? Menia ani yafena tamakaye hisifa yamaꞌage hanegi anonaꞌa kanale yana oꞌalinae. Ago falitetama Anumaya Kotiꞌenena omaisaya yamaꞌage ali falote humainae.
ROM 6:22 Kefo yamoꞌma nofi hulamatenea yapitila menia Anumaya Kotiꞌa ago alino kalu helamateteno “Aliꞌya veaꞌnimogatama maiho.” huno higetama mainageno ani aliꞌyamo anonaꞌa “Tamakaya alu aotage veaꞌneꞌniꞌa agola maige maige hisaya tamahaimula aligahae.” huno humaine.
ROM 6:23 Kefo yamo aliꞌya veaꞌmoꞌya anonaꞌamima alisaya yana fali yane. Faligahagi Anumaya Kotiꞌa nagola muse yana afaꞌa nelamie. Anumayatimoꞌa Yisasi Kalaisiꞌene ailokaeta mainonafe agola maige maige hisuna tahaimula ago tamine.
ROM 7:1 Nafuꞌnaganagatama, kahegi kema havilama hulinaya veaꞌne, tamahanepauve veaꞌma ofaliꞌya afaꞌa mainaya kanafina kahegi kea akave maleꞌya aiyaꞌafinaga mainagi falisayana ani kemo aiyaꞌafinaga omaigahae. Ani yafena lamakaya havimainafi ohavinae?
ROM 7:2 Nagola avame kea tamahapaigahugi haviho. Nago aꞌmoꞌa vele mainesigenoꞌa kahegi kemoꞌa neveꞌene kino anatafa hulisigeꞌana mainesaꞌanageno neveꞌma falisigenoꞌa kinoꞌma anatafa huligeꞌana nemaiꞌa kemoꞌa nagoꞌene atafa hulino omaigahianagi afaꞌa alu velela maigahie.
ROM 7:3 Neveꞌma ofalino afaꞌa mainesigenoꞌma alu vele visiana ani aꞌmofena “Kumai a mainane.” huꞌya hugahagi neveꞌma ago falisigenoꞌa kahegi kemoꞌa nofiꞌma kitenea yana ago kalu hemaineafe nago kanoma alisiana “Kumai he a mainane.” huꞌya ohugahae.
ROM 7:4 Nafuꞌnaganagatama hagotetama kahegi kemote tamametitia humainagi Kalaisi augafaene ailokaetama Kalaisiꞌene fali-mainayafe kahegi kemona ago ataletama Anumaya Kotite kanale auꞌava ya alitama falote hisayafe alu kanomoꞌene, faliteno komufiti ago eteno heti-mainea kanomoꞌene, ailokaetama mainae.
ROM 7:5 Hagoteta tagaya atafa lagu tagesaene mainonageno kahegi kemoꞌa “Naꞌa kavala ohiho.” huno higeta ageta lahaꞌye hisuna kefo tagu tagesa alino helafigeno mukiꞌa taugafamoꞌa aniꞌa huno kefo yama hiafe fali yamaꞌagela ali falote humaine.
ROM 7:6 Humaineanagi meni kanafina tagaya Kalaisiꞌene falunageno tatafama hulinea kahegi kea ago alino kalu hetalegeta menia haegafa lagu tagesa Alu Aotage Avamuteti Anumayamo kea akave nemalone. Nayoma hanea avopima kae-malenaya kahegi kemo akaveꞌma malenona augafa kavala nohune.
ROM 7:7 Naꞌane hisune? “Kahegi kemoꞌa havi yane.” huta hisuno? Naꞌa ohutafa huta ohugahune. Kahegi kemoꞌa kefo yama naveꞌotileꞌasina “Kefo yana nehue.” huꞌna ohavuleꞌasine. Ani kemoꞌa “Alu kanomo yatela ageka kahaꞌyea ohuo.” huno ohileꞌasina nagaya alu kanomo yatela ageꞌna nahaꞌyema nehua yafena nagayea ohileꞌasine.
ROM 7:8 Kahegi kemoꞌa kefo kavala naveligeno kefo kavala falote huno mukiꞌa age nahaꞌyema hua yana naguꞌafi falote nehie. Kahegi kema omaleleꞌasina kefo yaꞌmoꞌa fali-mainea augufa kava higeꞌna kefo yafena nagayea ohuleꞌasine.
ROM 7:9 Hagoteꞌna kahegi kema ohavinoa kanafina afaꞌa mainoanagi kahegi kema falote higeꞌna ageteꞌna “Kefo yana nehuafe faligahue.” huꞌna humainoane. “Tamahaimu tamamigahue.” huno humainea kahegi kemoꞌa eteno kefo yama humainoafe nahaegeꞌna fali-mainoe.
ROM 7:11 Kahegi kemoꞌa “Naꞌa kavala ohuo.” huno higeꞌna havuanagi ani kefo yamoꞌa ayenavataga higeꞌna ani kefo yama humainoafe nahaegeꞌna fali-mainoe.
ROM 7:12 Kahegi kemoꞌa alu aotage ke, tusiya huno fatago humainea keꞌage hane.
ROM 7:13 Haneanagi ani kanale yamoꞌa nagaila nahaegeꞌna falimainofi? Naꞌa ohutafa huno ohunegi kefo yamoꞌa ani kanale keleti nagaila nahaegeꞌna falimainoe. Kefo yamoꞌa fufu yate efalote hutegeno kahegi kemoꞌa “Tusiꞌa havi kefo ya hane.” huno aepaꞌa naveligeꞌna ageteꞌna “Tamage ani kefo yana ase ohu yane.” huꞌna nehue.
ROM 7:14 Tagaya ago nehavune Anumaya Kotiꞌa kahegi kea ago tamineanagi nagaya mopale kanoa atafa nagu nagesaene kano mainogeno kefo yamoꞌa nofi hunategeꞌna agai aliꞌya neꞌalue.
ROM 7:15 Nagayama nehua yamo aepaꞌa ohavinoe. “Nenahaiya yama hisue.” huꞌna hua yana nohuanagi “Onahaiya yane.” huꞌna hua yamaꞌage mukiꞌa kanafina maiꞌna nehue.
ROM 7:16 “Onahaiye.” huꞌnama hua kavala huge huge maiꞌna nehue “Kahegi kemoꞌa fatago humainea ke hane.” huꞌna nehue.
ROM 7:17 Menia ago havilinoe nagaiꞌniꞌa ani kavala maiꞌna nohugi kefo yamoꞌa nagupi maineno ani kavala nehie.
ROM 7:18 Nagaya havuana atafa naipafina nago kanale yana omalegeꞌna “Kanale kava hisua yafena nenahaiye.” huꞌna nehuanagi ani kanale kavala hisua tokiyaꞌnia omalene.
ROM 7:19 “Nahaiya kanale kavala hugahue.” huꞌna nehuanagi ani kavala nohugi kefo yafema “Onahaiye.” huꞌna nehua yamaꞌage maiꞌna nehue.
ROM 7:20 “Onahaiyema.” huꞌna hua yafema hisuana ani kavala nakaiꞌniꞌa nohugi kefo yama nagupima hanea yamo ani kavala nehie.
ROM 7:21 Aniꞌa nehigeꞌna maniꞌa augafa kavaꞌma huana nagaya “Kanale kavakeꞌya hisue.” huꞌna huanagi kefo yamoꞌa nagaipina hanegeꞌna maiꞌna nehue.
ROM 7:22 Naguꞌamoꞌa Anumaya Koti haiya kavafena nehaiye.
ROM 7:23 Nehaigenoꞌagi naulaga, nagesa, nayamoꞌa mukiꞌa naugafamoꞌa kefo yama hisaya amakesa huteꞌya nagupima haneno Anumaya Kotifema nehaiya nagu nagesaene tu nehuꞌya naugafamona kefo yamoꞌya avaleꞌya nofipi haꞌyagiꞌya ateteꞌya “Tagai ke havio.” huꞌya nehae.
ROM 7:24 Avoꞌneo kefo kava nehua kano mainoe. Falisua naugafale mainoanagino hana kanomo naugafa alino katigahie?
ROM 7:25 Anumayati Yisasi Kalaisiꞌa nagu namena ago aligati-maineafe Anumaya Kotifena aluya huꞌna musena huneꞌatoe. Nagaiꞌniꞌa nagu nagesafiti Anumaya Kotina haiya kavala akave nemaloanagi atafa naipamoꞌa kefo yamo akave nemale.
ROM 8:1 Yisasi Kalaisiꞌene ailokaeta mainona veaꞌmogata Anumaya Kotiꞌa nagola kaiyekea hulateno kefo yama humainona anonaꞌa otamigahie.
ROM 8:2 Kefo yama huꞌna falisua yamo nofipi mainogeno Yisasi Kalaisiꞌa falimainea yateti haimu hanea Alu Aotage Avamuꞌmo tokiyaleti ali kalu heno natalene.
ROM 8:3 Kahegi kemoꞌa “Fatago veaꞌne mainae.” huno hulatesia tokiyaꞌa atafa tagu tagesamoꞌa ani kahegi kea akave malesia tokiyamoꞌa omalegeno ani kahegi kemoꞌa tagaila alino kanale kavala hu otategahigi Anumaya Kotiꞌa nafaꞌneꞌa hutegeno tagaya kefo veaꞌmogata mauna augafa avamete augafa kalimai kano emainegeno tagayama kefo yama humainona yateti tagata aisia yana anonatia Yisasina amigeno alino faligeno Anumaya Kotiꞌa kefo yatimo tokiyaꞌa alitalene.
ROM 8:4 Alitalegeta menia tagaya atafa lagu tagesalela tahanepaiya kavala huta vainoꞌayonagi Alu Aotage Avamuꞌmo tahapaiya kava huta vaiyatete nehuta kahegi kemo fatago auꞌava ya huta kaana vaineꞌayone.
ROM 8:5 Veaꞌmoꞌya atafa amaku amakesaleꞌma vaiyayana amaugafa age hamaꞌye hisaya yate amakesa havi havi huꞌya ani katega neꞌvayanagi nagoꞌa veaꞌmoꞌya Alu Aotage Avamuꞌmoꞌa “Vaiyeho.” huno hia kate vaiyatetema hayana Alu Aotage Avamuꞌmona haiya amakesa havi havi huꞌya mainae.
ROM 8:6 Veaꞌmoꞌya atafa amaku amakesale amaugafa age hamahaꞌye hisayana faligahagi veaꞌmoꞌya Alu Aotage Avamuꞌmo haisia yafema amakesa havi havi hisayana amaipamoꞌa falu higeꞌya agola maige maige hisaya hamaimula alimainae.
ROM 8:7 Atafa amaku amakesale amaugafa age hamaꞌye hisaya veaꞌmoꞌya Anumaya Kotina kame tagiꞌya kaeneꞌateꞌya Anumaya Koti kahegi kemona akave omaleꞌya ani kea akave malesaya tokiyaꞌamia omaletafa huno omalene.
ROM 8:8 Veaꞌmoꞌya atafa amaku amakesa akave malesayana Anumaya Kotima haiya kavala ohaleꞌasinagi tamakaya atafa tamaku tamakesa akave nomalagi Alu Aotage Avamuꞌmoꞌa tamakupi maineafe agai kea akave nemalae. Nagoꞌa veaꞌmoꞌya Kalaisina Alu Aotage Avamuꞌamoꞌma amakupinaga omainesiana Kalaisi nafaꞌnea omainae.
ROM 8:10 Kefo yama humainayafe tamaugafamoꞌa ago falimainegi Kalaisiꞌa tamakupi mainenageno Anumaya Kotiꞌa “Fatago veaꞌne mainae.” huno hulamateneafe tamaku tamamemoꞌa agola maige maige huno maine.
ROM 8:11 Anumaya Kotiꞌa, Yisasina fali-mainefiti ali hetitenea kanomo, Avamuꞌmoꞌa tamakai tamakupima mainesiana Yisasi Kalaisina fali-mainefiti ali hetitenea kanomoꞌa tamakupi mainea Avamuteti manima falisaya tamaugafa ali hetilamateno tamahaimula tamamigahie.
ROM 8:12 Nafuꞌnaganagatama Yisasiꞌa hulatenea yafena anonaꞌa amisuna yana hane. Atafa lagu tagesamoꞌa kanale yana huotateneanagino agaila amisuna anonaꞌa omaleanagita atafa lagu tagesa akave maleta taugafamoꞌa age haꞌye hisia kavala ohisune.
ROM 8:13 Aꞌao atafa lamaku tamakesaleꞌma vaiyesayana faligahagi Alu Aotage Avamuꞌmo tokiyaleti tamaugafa age haꞌye hisia yama hae falisayana agola maige maige hisaya tamahaimuꞌene maigahae.
ROM 8:14 Anumaya Koti Avamuꞌmo kema akave maleꞌya vaiyayana Anumaya Koti nafaꞌneyaga mainae.
ROM 8:15 Alu Aotage Avamuꞌmoꞌa etetama koli hisaya nofipina hulamatesiafe tamakupina omenegi tamakaila “Anumaya Koti nafaꞌneyaga maiho.” huno hulamatesiafe tamakupi emainegetama Anumaya Kotife “Tatao, Nelafao.” hutama nehae.
ROM 8:16 Nehageno Alu Aotage Avamuꞌmoꞌa agaiꞌa “Tamakaya Anumaya Koti nafaꞌne mainae.” huno lagupina tahanepaiye.
ROM 8:17 Tahapaigeta tagaya Anumaya Koti nafaꞌnema mainonana Nelafa yana Kalaisiꞌene tagai yatafa hapaegahie. He Kalaisiꞌene kana yama alisunana aniꞌa huta agaiꞌene tokiya haleꞌyamaꞌaene ala agiene aligahune.
ROM 8:18 Nagaya nagesa havuana haenagama Anumaya Kotiꞌa tokiya hale yamaꞌa fufu yate ali falote hinageno tavelisigeta agesuna yafe tagesa haviteta “Meni kanafima tagata aiya yama neꞌaluna yana afa ya kana humaine.” huta hugahune.
ROM 8:19 Mukiꞌa Anumaya Kotiꞌma talo humalenea yana agesaga huꞌya Anumaya Koti nafaꞌnemoꞌya falote hisigeꞌya agesaya yafe ageke huꞌya agava mainae.
ROM 8:20 Mukiꞌa Anumaya Koti talo humalenea yana kasaliꞌya haviya nehae. Amakaya hamaiya yateti ani kavala nohagi Anumaya Kotiꞌa “Haenagaꞌa kanale yama falote hugahie.” huno agaiꞌa anima kasalisaya nofipina humategeꞌya mainae.
ROM 8:21 Mainagi haenagaꞌa Anumaya Kotiꞌa kasalino haviya hisia nofipima mainaya yana ali-talesigeta tagaya, Anumaya Koti anagaꞌmogatina, nofipiti tavayu hinageta ali-mainona tokiya hale yapi tagima hanea yana aligahune.
ROM 8:22 Tagaya ago nehavune meni kanafina mukiꞌa Anumaya Koti talo humalenea yamoꞌya amakatama aiyana aꞌnemoꞌya nafaꞌnema ategahe hageno inamu yama alimatea augafa kava huꞌya hume hume haiꞌya meni kanafina neꞌae.
ROM 8:23 Neꞌagi amakaiꞌamigela ani kavala nohagi Anumaya Kotiꞌa tagaifena “Haenagaꞌa mukiꞌa yama tamamigahue.” huno hagoteno Alu Aotage Avamula ago tamigeta avale-mainonanagi aniꞌa huta tagupi “Avoꞌnio.” huta kasalisia taugafa aligatisigeno haegafa taugafa falote hisigeno Anumaya Kotiꞌa agaiꞌa “Nafaꞌneyagaꞌni mainae.” huno hulatesiafe tametitia nehuta agava mainone.
ROM 8:24 Anumaya Kotiꞌa tagu tamema aligati-mainea kanafina mage huno humaine “Tamaugafa aligatisuafe tamametiti hutama nagava maiho.” huno higeta agava mainone. Nagola veaꞌmoꞌya agoꞌma alimainaya yafena agava ohugahae.
ROM 8:25 Oꞌagenona yama “Aligahune.” huta tametitilafama hisunana tamena malelava huta agava maigahune.
ROM 8:26 Maigahunanagi fulu fulu veaꞌne mainonafe “Naꞌafe Anumayamotega nunamuna huta havigesune?” huta nehunanagi Alu Aotage Avamuꞌmoꞌa “Vaeha.” huno ohavunamaꞌa kea Anumayamotega taya huno havinege.
ROM 8:27 Nehigeno Anumaya Kotiꞌa veaꞌmogatina taguꞌafima hanea yana agelama huno neꞌageno Alu Aotage Avamuꞌmona agu agesafima hanea yaꞌene agemaine. Ani Avamuꞌmoꞌa Anumaya Kotima haiya yafena ago haviteno Yisasi anagala amaya hugahe nunamuna huno havinege.
ROM 8:28 Tagaya ago havimainone Anumaya Kotife hamau amayamopafi nehamaiya veaꞌmoꞌya, Anumaya Kotina agaiꞌma haisia kava hisayafe ke huno agaiꞌalega amavaleno amatenea veaꞌmogamite, mukiꞌa falote hisia yana kanale yaꞌene kana yaꞌene Anumaya Kotiꞌa alino kanale huneꞌamate.
ROM 8:29 Anumaya Kotiꞌa nayona ago amaketeno hapalimatenea veala agaiꞌa nafaꞌnemo avamete veaꞌne maisae huno amategeꞌya mukiꞌa veala mainagi Kalaisina nafaꞌneꞌa hagoteno* ategeno “Ala nepuꞌamimo maisiafene.” huno hutene.
ROM 8:30 Anima hapalimatenea veafena ke huno agaiꞌalega amateteno kefo yamaꞌage nehaya veaꞌne mainagi Yisasi humatenea yateti “Fatago veaꞌne mainae.” huno humateteno tokiya hale yamaꞌa amamine.
ROM 8:31 Naꞌa humaineafe tagaya naꞌane huta hisune? Anumaya Kotiꞌa tagaiꞌma laya hisiana ta tagaila kamea hulategahie?
ROM 8:32 Anumaya Kotiꞌa “Nafaꞌneꞌnia otamamigahue.” ohutafa huno ohunegi afaꞌa lagaife huno hutegeno emaineanagino mukiꞌa yama laya hisia yaꞌene tamigahie.
ROM 8:33 Anumaya Kotiꞌma hapali-malenea veaꞌnea ta kaiyekea humategahie? Anumaya Kotiꞌa agaiꞌa “Ago fatago veaꞌne mainae.” huno hulatene.
ROM 8:34 Hana kanomo kaiyekea hulateno “Tagata aisia yana aligahae.” huno hulategahie? Yisasi Kalaisiꞌa faliteno hetino haino Anumaya Kotina tamaga ayatega maineno taya hisia yafena Nefatega ke huno nunamupiti havinegeafe nago kanomoꞌa kaiyekea hulateno ali haviyana huotategahie.
ROM 8:35 Kalaisiꞌa tagaifena tusiya huno hau ayamopafi nehaiya yamaꞌa ta tahafalegahie? Tagaya kana yapi maisunano tusi lagata aisia yapino, veaꞌmoꞌya havi kavaꞌma hulatesaya yapino, kafu kana falote hisigeno tagatesia yapino, mukiꞌa yatima omalesia yapino, nagoꞌa havi kavaꞌmo tagaila alino haviya hisia yapino, tahaesageta falisuna yama falote hisia yapino? Ani yaꞌyaga hau ayamopafi nehaiya yana alino tahaofalegahianagino Kalaisiꞌa tagaifema hau ayamopafi nehaiya yamaꞌamoꞌa hanege hanege huno hanegahie.
ROM 8:36 Anima havi yaꞌyagama falote hisia yafena Anumaya Koti autaꞌmafina mage huꞌya kae-malenayane “Kagai nafaꞌneyaga mainonafe mukiꞌa yagefina tagaila tahaeꞌya fali haꞌno nehae. Tagaya sipi sipi afu kana huta mainonageꞌya tagaifena ‘Hamaesuna veaꞌne mainae.’ huꞌya nehae.” huꞌya kae-malenayane.
ROM 8:37 Mukiꞌa mani havi yaꞌyagahema “Aoteꞌyamaꞌae.” huta hisune. Kalaisiꞌa tagaifema hau ayamopafi haumainea kanomo tokiyaleti mukiꞌa ani yaꞌyaga amakaseta mainone.
ROM 8:38 Nagaya ani yafena havilama huꞌna nagupi malenoe. Anumaya Kotiꞌa tagaifena hau ayamopafi nehaiya yana nago yamoꞌa tahaofalegahie. Falisunano, mainesunano, ensole vayalo, Satani Avamulo, menima hanea yano, haenagama falote hisia yano Anumaya Kotiꞌa tagaifema hau ayamopafi nehaiya yana tahaofaletafa hugahae.
ROM 8:39 Ikate yano mopamona afete hanea yano nagoꞌa mukiꞌa Anumaya Koti talo humalenea yano Anumaya Kotina hau ayamopafima nehaiya yamaꞌa tahaofaletafa hugahae. Anumayatimoꞌa Yisasi Kalaisi hulatenea yateti agaiꞌene ailokaeta mainonafe Anumaya Kotiꞌa lagaifena hau ayamopafi agola hauge hauge huno nehaiye.
ROM 9:1 Kalaisiꞌene aigaꞌmaeꞌna mainoafe tamagelafa nehue. Havige nohue. Alu Aotage Avamuꞌmoꞌa nagupi mainegeꞌna naguꞌaleti tamage nehue.
ROM 9:2 Yuta anagaꞌnimoꞌya Yisasi kea ohaviyaꞌyafe mukiꞌa kanafina naipamoꞌa kanaꞌage nehuno nagata neꞌaiye.
ROM 9:3 Nagoke nofi anagaꞌnimoꞌya amakuꞌa aiyahae huꞌya Yisasi ke havisayafe Anumayamotega ke huꞌna havigesugeno “Hai vainateno natalenegeꞌna hani yapi nagaila nenateka ani veala amavalesane.” huꞌna havigesua nagesa nehavue.
ROM 9:4 Nagai nofi anagala Isaleli veaꞌnea Anumaya Kotina nafaꞌneyagaꞌa mainageno Anumaya Kotiꞌa agaiꞌa tokiya hale yamaꞌa amaveliteno alino hagelafi-matenea kea humateteno kahegi kea amamino agai agima alisaga hisaya aliꞌyana amamino “Maꞌa yama hulamategahue.” huno hulokiya vaimalenea kea hamapai-maine.
ROM 9:5 Ani nofipiti tokiyaꞌage taginagomoꞌya falote humainayanagino Kalaisiꞌa Anumaya Kotiꞌma tamaugafa aligatigahie huno hutenea kanoa ani taginagomoꞌyafiti velafa maisiafe falote humaine. Kalaisiꞌa mukiꞌa yana kava yagaino Anumaya Koti maineanagita mukiꞌa kanafina agola agia alisaga hisune. Tamage.
ROM 9:6 Anumaya Kotiꞌma hulokiya vaimalenea kemoꞌa falote huno afa ya kana nehie huꞌna nehuo? Aꞌao na kea nohugi Isaleli veafe tamage nehue mukiꞌa ani veaꞌmoꞌya Anumaya Kotina nafaꞌneyagaꞌa omainae.
ROM 9:7 Mukiꞌa Apalahamuna aginagomoꞌya nafaꞌneyagaꞌa omaitafa huꞌya omainagi nayona Anumaya Kotiꞌa Apalahamufena mage higeno autaꞌmafina kae-maleneane “Kagaika nafaꞌnemoꞌa Aisakiꞌma atesia nafaꞌneyaga kagai kaginagomoꞌya maitafa huꞌya maigahae.” huno humaineane.
ROM 9:8 Ani kemo aepaꞌa mage humaine mukiꞌa vealavemoꞌya nehaya kavateti Apalahamuꞌma atenea nafaꞌneyaga Anumaya Koti nafaꞌneyaga omainagi Anumaya Kotiꞌa hulokiya vai-malenea keleꞌma amametiti humainaya veafe “Apalahamuna nafaꞌneyagaꞌa mainae.” huno humateneane.
ROM 9:9 Anima hulokiya vaimalenea kemoꞌa mage huno humaine “Nagayama malenoa kanamoꞌma efalote hisigenoꞌa Selaꞌa ne nafaꞌne ategahie.” huno humaineane.
ROM 9:10 Ani yamaꞌagefeno-magi taginagomoꞌa Aisakiꞌa ko huteno aꞌama Lepekana alitenegeno aipa yama hiana kuyave nafaꞌnelata aipafina kanale yano havi yano huꞌana ohunaꞌa kanafinagino Anumaya Kotiꞌma humaineana agaiꞌa haiya yateti veala hapalilatenea kava huno Anumaya Kotiꞌa mage huno itaꞌanimofena hapaiye “Yage nafaꞌnekamoꞌa haenaga nafaꞌnekamo aliꞌya kano maineno akave malegahie.” huno humaineane. Ani yamofena mage huno humaine Anumaya Kotiꞌa veala kanale kavaꞌma humainayafene huno ohapaligahianagino haisia kanomofe ke hinageno agaitega egahie.
ROM 9:13 Anumaya Koti autaꞌmafina mage huno humaineane “Yekopuꞌa nahau nayamopafi nahaiya kanogi Isoꞌa onahaiya kano maine.” huno humaineane.
ROM 9:14 Naꞌa hu-maineanagita naꞌane huta hisune? “Anumaya Kotiꞌa fatago ohia kava humaine.” huta hisuno? Aꞌao naꞌa kea ohutafa huta ohugahune.
ROM 9:15 Mosesefena mage huno humaineane “Nago kanohema ‘Nahau huteꞌna kalagi aitegahue.’ huꞌnama hisua kanomona kalagila aitegahue.” huno humaineane.
ROM 9:16 Naꞌa humaineafe Anumaya Kotiꞌa kalagi aisia yana veaꞌmoꞌya “Namisie namisie.” huꞌya nehuꞌya veaꞌmoꞌya “Nayamufa aiꞌna aliꞌya alisuafe kalagila ainategahie.” huꞌya hisaya yatetila kalagila aioꞌamategahie. Anumaya Kotiꞌa “Ma kanomofe nenahaiyanagiꞌna kalagi aitegahue.” huno hisia kanomona hau huno kalagila aineꞌate.
ROM 9:17 Anumaya Kotiꞌa Isipi sauve kanoa Felofe mage huno higeꞌya kae-malenayane “Alihetigatenoa yafe mukiꞌa veaꞌmoꞌya tokiyaꞌniꞌa agesaya yafeꞌene navagemoꞌa mukiꞌa kumate ute ete hisia yafeꞌene ‘Kagaya ala kano maiyo.’ huꞌna ali hetigatenoe.” huno humaineane.
ROM 9:18 Anumaya Kotiꞌa haisia veaꞌmogamina hauna humateno kalagila aimatenegi agaiꞌa kema ohavisaya yafe nagoꞌa veaꞌmogamina amaku amakesa alino aililematene.
ROM 9:19 Nagoꞌamogatama nagaifena mage hutama nahavigegahae “Naꞌa nehianagi naꞌa higeno veaꞌmogamifena ‘Havi kava nehae.’ huno nehie? Agaiꞌama haisia agu agesa havisia yana ta ani yafena ‘Ohugane.’ huno hutegahie?” hutama hugahae.
ROM 9:20 Hugahagi kagaya mopale kanomoga hanaꞌa augafa kano maineka Anumaya Kotifena aka huka kea vaitegane? Mopaleti aye kakalifeno talo humalenaya yopamoꞌa talo hutenea kanomofena “Naꞌa higeka nagaila maꞌa huka talo hunatenane?” huno hugahio?
ROM 9:21 Aꞌao, naꞌa augafa kea ohugahie. Mopaleti aye kakalifeno talo humalenesia kanomoꞌa talo humalenesia yana agaiꞌa yane. Nagola mopamo alaga alino nagola kanale susufanea talo huteno ani alagaleti havi aliꞌyate susufanenema talo hisiana agaiꞌa yane.
ROM 9:22 Anumaya Kotiꞌa aniꞌa humaine. Tagaya agaiꞌa talo humalenea susufane kana huta mainone. Nago susufane kana veaꞌmoꞌya kefo yama humainayafe tusi hai vaimateno himamuꞌaleti “Amakata aisia yana amamigahue.” huno humaineanagi mailava huno amakava-maineno kaiyekea hu noꞌamate.
ROM 9:23 Amakava-maineafe tagaya Yuta veaꞌmoꞌyaene Yuta vea omainaya veaꞌmoꞌyaene agaiꞌalega visunafe ke hulatenea susufane kana veaꞌmogatihena, tusiya huno kalagila ailatenea veaꞌmogatina “Haenagama tokiya hale yaniꞌa tamamisugetama aligahae.” huno hulatene. Nayona tokiya hale yamaꞌa alisunafene huno talo hulatene.
ROM 9:25 Ani yafena Hoseaꞌa, Anumaya Koti aune kanomoꞌa Anumaya Koti humainea kea mage huno kae-maleneane “Yuta veapi omainaya veafena ‘Nagaiꞌni nofi anaga mainae.’ huꞌna hugahue. Naguꞌa oꞌamaminesua anagafena ‘Nahau nayamopafi nenahaiya anaga mainae.’ huꞌna hugahue.
ROM 9:26 Anumaya Kotiꞌa ‘Nagai anaga omainae.’ huno humainea kumatega Anumaya Kotiꞌa amakaifena mage huno hugahie ‘Tamakaya nahaimu hanea Anumaya Kotinina nafaꞌneyagaꞌniꞌa mainae.’ huno hugahie.” huno humaineane.
ROM 9:27 Aisaiyaꞌa Isaleli veafe mage huno kae-maleneane “Isaleli veaꞌmoꞌya nafaꞌneꞌamima ateꞌya atagufeꞌyama hage li kahaepa kana huꞌya kasagoꞌya veaꞌne maigahayanagi osi anaga kanoꞌa amaku amamena aligatigahue.
ROM 9:28 Anumayamoꞌa ma mopale mainaya veala kaiyekea humateteno ‘Naꞌa yama aligahae.’ huno humainea kemona ani kavala fatago huno aupa kanoꞌa humateteno ali haꞌno hugahie.” huno humaineane.
ROM 9:29 Aisaiyaꞌa hagoteno mage huno humaineane “Mukiꞌa tokiyaꞌa hanea Anumayamoꞌa osiꞌa anaga kanoꞌatihe kalagi aioꞌamateleꞌasina mukiꞌamogatina Sotomu mainaya veaꞌnene Komola mainaya veaꞌnene faliꞌya fanane humainaya kava huteꞌasine.” huno humaineane.
ROM 9:30 Naꞌa hu-maineanagita naꞌane huta hisune? Yuta veapi omainaya veala fatago veaꞌne maisayafe kasageke vokela ohunaya veaꞌmoꞌya afaꞌa Yisasiꞌa hulatenea yafe haviꞌya amakupi maleꞌya amametiti humainaya yateti Anumaya Kotiꞌa ani veaꞌmogamifena “Fatago veaꞌne mainae.” huno humatene huta hisuno?
ROM 9:31 Humateneanagi Isaleli veaꞌmoꞌya tusiya huꞌya kahegi kemona akave malesaya yafe kasageke vokela hayanagi ani kemona akave malelama ohunaya yafe fatago veaꞌnea omainae huta hisuno?
ROM 9:32 E, ani ke hisune. Naꞌa higeꞌya fatago veala omainae? “Tagaiti kasageke hisuna aliꞌyateti fatago veaꞌne maigahune.” huꞌya hayanagi “Yisasiꞌa hulatenea yafema havita lagupi maleta tametiti humainonafe ‘Fatago veaꞌne mainae.’ huno hulategahie.” huꞌya ohunayanagiꞌya fatago veaꞌnea omainae. Yisasiꞌa yafa kana humaineanagi agaifena haviꞌya amakupina omalenaya yafe ani haletoꞌna yafate ayalega amaiya aye-kaꞌyopeliꞌya asaga hulavi-mainae.
ROM 9:33 Anumayamo autaꞌmafina mage huꞌya kae-malenayane “Agegeho nagola aye hataga huliꞌya asaga hulavisaya yafana Saiyoni* malogeno hane. Asaga hulavigahayanagi agaifema haviꞌya amakupi malenaya veaꞌmoꞌya amakayea ohugahae.” huꞌya kae-malenayane.
ROM 10:1 Nafuꞌnaganagatama Anumaya Kotiꞌa Yuta veaꞌmogami amaku amamena aligatisiafe aluya huno nenahaigeꞌna mukiꞌa yupa ani yafena nunamuna nehue.
ROM 10:2 Amakayama nehaya kavala ageteꞌna mani kea nehue amakaya Anumaya Kotina haisia kavala aluya huꞌya hisaya amaku amakesa nehaviyanagi anima haiya yafena havilama nohuꞌya ani kavala nohae.
ROM 10:3 Anumaya Kotiꞌa veafema “Fatago veaꞌne mainae.” huno humatenea yafena nohaviꞌya “Ani kavala hulato.” huꞌya havinokagi amakaiꞌamima maiya auꞌava yaꞌamia “Anumaya Kotiꞌa ageteno ‘Fatago kava nehae.’ huno hugahie.” huꞌya nehayanagi amakaiꞌami humainaya yafe ani kea huoꞌamategahie.
ROM 10:4 Huoꞌamategahigi Kalaisiꞌa hulatenea yafema haviꞌya amakupi maleꞌya amametiti humainaya veaꞌmogamifena Anumaya Kotiꞌa “Ago fatago veaꞌne mainae.” huno humateteno ani yafena Kalaisiꞌa Mosese kahegi kemona alifatago huno ali haꞌno humaineane.
ROM 10:5 Kahegi kema akave malesayana Anumaya Kotiꞌa “Fatago veaꞌne mainae huno humategahie.” huno Moseseꞌa mage huno kae-maleneane. “Nagoꞌa veaꞌmoꞌya mukiꞌa kahegi kema akave malesayana ani keleti vaiyegahae.” huno hu-maineane.
ROM 10:6 Hu-maineanagi nagoꞌa veaꞌmoꞌya Yisasi hulatenea yafema haviꞌya amakupi maleꞌya amametiti humainayafe Anumaya Kotiꞌa “Fatago veaꞌne mainae.” huno humatenea yamofena mage huno hie tamakuꞌafitila mage hutama haviokeho “Ta ikapinaga haiteno Kalaisina avaleno elavigahie?” hutama ohiho.
ROM 10:7 “Ta falimainaya veaꞌne nelaviya kapina Kalaisina fali-mainefiti avalegahe tavigahae” hutama havi okeho.
ROM 10:8 Naꞌane hie? Ani kemoꞌa tamahanile haneteno tamavayale haneno tamakupi hane. Anima hu falote nehuna kea Yisasiꞌma hulatenea yafema havita lagupi maleta lametiti hisuna yafe humaine.
ROM 10:9 Tamakaya tamavayafiti “Yisasiꞌa Anumayaniꞌa maine.” hutama huhaneletama tamakuꞌafitila “Anumaya Kotiꞌa Yisasina fali-mainefiti ali hetitene.” hutama tamakupi maletama tamametiti hisageno Anumaya Kotiꞌa tamaku tamamena aligatigahie.
ROM 10:10 Taguꞌafina Yisasiꞌa hulatenea yafena havita tagupi maleta tametiti humainona yateti Anumaya Kotiꞌa “Fatago veaꞌne mainae.” huno hunelate. Tavayafiti “Yisasiꞌa hulatenea yafe haviꞌna nagupi malenoe.” huta hufalote nehuna yateti Anumaya Kotiꞌa tagu tamena alinegatie.
ROM 10:11 Anumaya Koti autaꞌmafina mage huno humaine “Nagoꞌa veaꞌmoꞌya Yisasife haviꞌya amakupi maleꞌya amametiti hisayana amakayea ohugahae.” huno humaineane.
ROM 10:12 Anumaya Koti aulagafina Yuta veaꞌnene Yuta veapi omainaya veaꞌnene nago avamete huꞌya mainageno Anumaya Kotiꞌa mukiꞌa veaꞌmogami Anumayaꞌami maineanagiꞌya mukiꞌa veaꞌmoya agaitega ke hisageno kanaleꞌya huno amaya hisia yana kasagoꞌya amamigahie.
ROM 10:13 Anumaya Koti autaꞌmafina mage huno humaineane “Mukiꞌa veaꞌmoꞌya Anumayamo agi ayeꞌya ke hisagenoꞌa amaku amamena aligatigahie.” huno humaineane.
ROM 10:14 Aligatigahianagi Yisasiꞌa hulatenea yafema haviꞌya amakupi omalesayana hanaꞌa huꞌya agia ayegahae? Yisasiꞌa hulatenea yafema ohavisayana hanaꞌa huꞌya agaifena haviꞌya amakupi maleꞌya amametitia hugahae? Nago kanomoꞌma Yisasiꞌa hulatenea yafema huhaleno hamaopaisiana hanaꞌa huꞌya ani kea havigahae?
ROM 10:15 Yisasiꞌa hulatenea yafema huhaleꞌya hisaya veaꞌma hu oꞌamatesayana hanaꞌa huꞌya ani kea huhaleꞌya hugahae? Anumaya Koti autaꞌmafina mage huno humaineane “Yisasife kanale mono kea, tamaipa falu hutama maisaya kema, alino esia kanoa kanale kano maineanagita muse hisune.” huno humaineane.
ROM 10:16 Mukiꞌa mani kema nehaviya veaꞌmoꞌya haviꞌya amakupina nomalae. Anumaya Koti autaꞌmafina Aisaiyaꞌa mage huno humaineane “Anumayamoga hana veaꞌmoꞌya hamapauva kea haviꞌya amakupi maleꞌya amametiti humainae?” huno havige-maineane.
ROM 10:17 Amakupi maleꞌya amametiti humainaya yamo havimainaya kefiti falote humaine. Anima havimainaya kea Kalaisife hamapaigeꞌya havimainae.
ROM 10:18 Nagaya maꞌa huꞌna tamahavi-negoe mani kanale kea ohavinao? Aꞌao tamagelafa huꞌna tamahapauve mukiꞌamoꞌya ago havilinae. Anumaya Koti avopina mage huno humaineane “Amake aiꞌyama haya kemoꞌa mukiꞌa kotega ute ete huno keꞌamimoꞌa mukiꞌa kumate umaine.” huno humaineane.
ROM 10:19 Nagoꞌene tamahavi-negoe mani kanale kea Isaleli veaꞌmoꞌya ohavinao? Tamage huꞌya ago havilinae. Hagoteno Moseseꞌa Anumaya Kotiꞌma humainea kea mage huno humaineane “Nagaya havigu veala, nago nofipi omainaya anagapiti amavalesugetama ani yafena tamaipa havi haviya humategahae. Nago nofi veala, kanaleꞌya huꞌya havisaya amaku amakesa omalenesia veala amavalesugetama ani yafena ke vaigahae.” huno humaineane.
ROM 10:20 Aisaiyaꞌa tokiyaꞌage huno Anumaya Kotiꞌma humainea kea mage huno humaineane “Nagoꞌa veaꞌmoꞌya nagaifena natia noꞌayesaya veaꞌmoꞌya ago nagemainae. Nagaifema nagoꞌa veaꞌnema hamavi-okenaya veaꞌmogami amaulagale ago fufute efalote hugeꞌya nagemainae.”
ROM 10:21 Isaleli veaꞌmogami-fena mage humaine “Ayaꞌaya kanagefa nayateti ‘Eho ehoꞌ huꞌna kea huanagi nagai kea akave omaletama ke vaige vaige nehaya veaꞌmogatamae.” huno humaineane.
ROM 11:1 Tamahavigoe Anumaya Kotiꞌa agaiꞌa anagaꞌa amanati-talenefi? Tamage naꞌa ohune. Nagayaenena Isaleli kano mainoe. Nagaya Apalahamu kola maineꞌna Penisamini nofi kano mainoe.
ROM 11:2 Mani anagala nayona Anumaya Kotiꞌa eheꞌma hapali-malenea anagaꞌa amanati-oꞌatalene. Ilaiya avagea Anumaya Koti avopima hanea kea ohavinao? Ilaiyaꞌa Isaleli anagafe nunamuna mage huno Anumayamotega havige-maineane.
ROM 11:3 “Anumayamogae veaꞌmoꞌya kagai amaune veaꞌmogamina hamaeꞌya falimateꞌya kagaife afu heꞌya kae-salamana hunegataya ata haluꞌya helagaꞌya vaineꞌatalageꞌya hageꞌna nagaiꞌnige nagoke mainogeꞌya nahaegahe tusiya huꞌya natineꞌayae.” huno humaineane.
ROM 11:4 Higeno Anumaya Kotiꞌa anonaꞌaleꞌma humainea kea havilinao? Agai avopina mage huno kae-maleneane “Kagaikage omainanagi Seveni tauseniꞌa (7,000) veaꞌmoꞌya onatalenae. Yafateti talo humalenaya Anumayamo agia Paliꞌe agia alisaga huꞌya amakuꞌa oꞌaminaya anagaꞌniꞌa mainae.” huno humaineane.
ROM 11:5 Anima humainea kate meni kanaene Anumaya Kotiꞌa agaiꞌa kayone yamaꞌaleti osi anagaꞌa agaiꞌa veaꞌne maisayafe ago hapali-malene.
ROM 11:6 Anumaya Kotiꞌa agaiꞌa kayone yamaꞌaleti hapalimatenegi kanale auꞌava yama nehaya yateti hapalimateleꞌasina agaiꞌa kayone yamaꞌamoꞌa afa ya kana hileꞌasinagi agaiꞌa kayone yamaꞌaleti hapalimatene.
ROM 11:7 Naꞌa humaineanagita naꞌane hisune? Isaleli veaꞌmoꞌya Anumaya Kotiꞌa “Fatago veaꞌne mainae.” huno humatesiafe kasageke huge hugetayana oꞌalitafa huꞌya oꞌaligeno Anumaya Kotiꞌa osi vea kanoꞌa hapalimatenea veafe ani kea humatenegi nagoꞌa veaꞌmoꞌya ohavisayafene huno amakuꞌa alino aitalako humalene.
ROM 11:8 Anumaya Koti avopina mage huno humaineane “Anumaya Kotiꞌa amakuꞌamona alino amaukalo kalo humateno amaulaga alino asu humateno amakesa alino aililemateno higeꞌya kea ohaviꞌya maime maime eꞌya meni kanaene ani kavakeꞌya huꞌya mainae.” huno humaineane.
ROM 11:9 Tevitiꞌa ani avopina mage huno humaineane “Ala imuleꞌma maisayana Anumaya Kotiꞌa kalifu hanagi-malesigeno amatafa hisigeꞌya vailiꞌya asaga hulaviꞌya havi yaꞌamimo anonaꞌamia aligahae.
ROM 11:10 Amaulagamoꞌa hanikoꞌmako hisigeꞌya oꞌagetafa hisae. Mukiꞌa kana yama alimainayafe amakaveꞌyamoꞌene agola fago-koko huꞌya vaiyesae.” huno humaineane.
ROM 11:11 Isaleli veaꞌmoꞌya Yisasi kea amakaveꞌno hutenayafe vailiꞌya asaga hulaviꞌya agola amakoꞌya faimainao? Aꞌao tamage huꞌya naꞌa ohunae. Yisasi kea amakaveꞌno hutenaya yateti Anumaya Kotiꞌa Yuta vea omainaya veaꞌmogami amaku amamena aligatisigeꞌya Isaleli veaꞌmoꞌya ageteꞌya “Tagaiꞌenena tagu tamena alilatisie.” huꞌya age hamaꞌye hugahae.
ROM 11:12 Tamage Isaleli veaꞌmoꞌya kefo kava huꞌya yagalaya yafe nagoꞌa ma mopafi veaꞌmoꞌya kanale yana alimainae. Isaleli veaꞌmoꞌya Yisasi kea amakaveꞌno hutenayafe Yuta veapi omainaya veaꞌmoꞌya kanale yana alimainae. Kasagoꞌya Isaleli veaꞌmoꞌya eteꞌya Anumayamo kea haviꞌya akave malesayana tusiꞌa kanale kanamoꞌa falote humategahie.
ROM 11:13 Nagaifena “Yuta vea omainaya veaꞌmogamite Yisasi kea huhaleka hamapaiyo.” huno higeꞌna Aposolo kano mainoafe muse nehuꞌna mani aliꞌyana neꞌalua yafe tamakaya Yuta vea omainaya veaꞌmogatama tamakaife nehue.
ROM 11:14 Manima nenahaiya aliꞌyaniꞌaleti nagaiꞌniꞌa anagala, Isaleli anaga, nagoꞌa alihetimatesugeꞌya age hamaꞌye hisageno Anumaya Kotiꞌa amaku amamena aligatisie huꞌna nehue.
ROM 11:15 Anumaya Kotiꞌa Isaleli anagala amanati-taleneafe mukiꞌa ma mopafi veafena mage huno humaine “Aigetamateꞌna yuna helamateꞌna nagoke taipa kalisune.” huno humaineanagi Anumaya Kotiꞌa eteno Isaleli veaꞌnema amavalesiana fali-mainafiti hetiya augafa kava hugahae.
ROM 11:16 Hagoteꞌya talo haya kai hamemo atupaꞌa Anumaya Koti neꞌamiyane mukiꞌa tamaꞌaenena Anumaya Koti yane. Nagi yosamo hafuꞌyama Anumaya Koti yama hanesiana mukiꞌa yosa akopaꞌyagae-nena Anumaya Koti yane.
ROM 11:17 Anumaya Kotiꞌa agaiꞌa hoyafi hanea Olivi yosamona akopaꞌa aye sasaeneꞌataleno tamakaila Yuta veaꞌne omainaya veaꞌmogatamina, afai Olivi yosamo akopa kana hutama mainageno tamavaleno fukiteti aye kaꞌmaelamateteno nofi kilamategetama mainetama ani yosafiti timaꞌa aitama nenae.
ROM 11:18 Ani yafe tamakaya aye sasaetalenea akopaꞌahena “Afa veaꞌne mainagi tagaya tamakaseta ala veaꞌne mainone.” hutama hu oꞌamateho. Tamakaya akopamogatama timaꞌa aitama tama yosamona amigeno nonegi hafuꞌyafiti timaꞌa aitama nenae.
ROM 11:19 Tamakaya mage hutama nehae “Tagaya kanale veaꞌne mainonafe tagai akopaꞌma aye gaꞌmae-malesia yafena Isaleli akopala ago aye sasaetalene.” hutama nehae.
ROM 11:20 Tamage Yisasife haviꞌya amakupi omalaya yateti aye sasae-talegetama tamakaya Yisasife havitama tamakupi maletama tamametiti humainayafe aye gaꞌmae-malene. Tamakaila naꞌa humaleneafe “Ala veaꞌne mainone.” hutama tamaugafa alitama ohaitama koli hutama tamakupi maletama tamametiti humainaya yama atalesayafe tamamaꞌyoa aino.
ROM 11:21 Anumaya Kotiꞌa agaiꞌa Isaleli veaꞌmogamina akopa-tafamaꞌa alino asasae-taleneanagino tamakaila ani kavaꞌma hisagenoꞌa tamayoa okigahianagino ani kava huno tamakaila alino asasae-talegahie.
ROM 11:22 Ani yafe Anumaya Kotiꞌa kayone hulate yamaꞌaene kaiyeke hulateno haviyama anonaꞌa tamisia yamaꞌaene agelama hisune. Agaiꞌa kanale auꞌava yamaꞌa neꞌatalaya veala kaiyeke humateno tusiya huno havi yana anonaꞌa amamiyanagi tamakaila kayone hunelamate. Tamakaila kayone hulamateneafe tamametiti hisageno Anumaya Kotiꞌa nagoꞌene kayone hulamategahigi naꞌa ohisagenoꞌa tamakaiꞌenena ago alino asasae-talegahie.
ROM 11:23 Nagi alinoꞌma asasae-talenea Isaleli veala akopaꞌyagamoꞌyama ke nohavia yaꞌamima atalesagenoꞌa Anumaya Kotiꞌa eteno alino aigaꞌmaematesia tokiyaꞌa hanegeno eteno amavaleno me maleno aigaꞌmaemategahie.
ROM 11:24 Tamakaya Yuta veaꞌne omainaya veaꞌmogatama hagotetama afai Olivi yosafiti falote humainea akopa mainageno Anumaya Kotiꞌa vayaꞌmoꞌya nohaya kava huno tamavaleno Isaleli veaꞌmogami Olivi yosale aigaꞌmaelamatene. Tamage mani akopaꞌyagamogamina tamaꞌamoꞌya Isaleli veaꞌmogamina amavaleno eteno hagote yosaꞌamile maleno aigaꞌmaemategahie.
ROM 11:25 Mukiꞌa nafuꞌnaganagatama nagola falaki-mainea kema havilama hutetama aneginagi ohisae huꞌna tamahanepauve. Nago kaiyagaꞌa Isaleli anagaꞌmoꞌya “Yisasi kea ohavigahune.” huꞌya tokiya vaimainagi ani kavala agola ohugahagi Anumaya Kotiꞌa hapali-malenea Yuta vea omainaya veaꞌmogatama mukiꞌa Anumaya Kotina tamakuꞌa amisageno hiyaꞌma hinagenoꞌa Isaleli veaꞌmoꞌya eteꞌya Yisasi kea havigahae. Havigu tamakaitamihe “Tagaya mukiꞌa ago havitafa huta havilinone.” hutama hisaya yafe mamona falaki-mainea ke tamahanepauve.
ROM 11:26 Anumaya Kotiꞌa mukiꞌa Isaleli veala amaku amamena aligatigahie. Anumaya Koti autamafina mage huꞌya kae-malenayane “Yelusalemuti nagola amaku amamema aligatisia kanamoꞌa falote huteno veaꞌmogamina kefo auꞌava yaꞌamia alitalegahie.”
ROM 11:27 Anumaya Kotiꞌa mage huno humaine “Mani kea amakaiꞌene aliꞌna nagokepi aliꞌna hagelafi nelamatoe. Mage huꞌna hugahue mukiꞌa kefo yatamia alitaleteꞌna aliꞌna hagelafilamategahue.” huno humaine.
ROM 11:28 Isaleli veaꞌmoꞌya Yisasiꞌa hulatenea yafena amakaveꞌno hutenayafe Anumaya Kotina kame veaꞌa mainae. Aniꞌa humainaya yateti tamakaila Yuta vea omainaya veaꞌmogatamina tamaya humainegi nayona Anumaya Kotiꞌa amakinagomogamife hamapaimaine. Isaleli veala hapalimateno amakaifena “Nahau nayamopafi nenagea veaꞌne mainae.” huno humaine.
ROM 11:29 Tamage Anumaya Kotiꞌa hagoteno nagoꞌa veala hapali-maleteno “Kanale ya hulamategahue.” huno huteno haenagaꞌa agu agesa eteno havino aiyahae ohugahie.
ROM 11:30 Hagotetama tamakaya Yuta vea omainaya veaꞌmogatama Anumaya Kotina tamakaveꞌno hutenagi menia Isaleli veaꞌmoꞌya aniꞌa huꞌya Anumaya Koti kea akave omalayafe Anumaya Kotiꞌa tamakaila kalagi ailamatene.
ROM 11:31 Tamakaila kalagi ailamatenageꞌya agesayafe menia Isaleli veaꞌmoꞌya Anumaya Koti kea akave omalenaleti eteꞌya kalagi ailamategetama alimainaya yana amakaiꞌene aligahae.
ROM 11:32 Anumaya Kotiꞌa mukiꞌa veaꞌmogamina kalagi aimatesiafe hagoteno mukiꞌa veala agai kema akave omalaya yateti nofila humatene.
ROM 11:33 Namaꞌyo Anumaya Kotiꞌa ala agu agesaene kano maineno mukiꞌa yana haviline. Veaꞌmoꞌya Anumaya Kotiꞌa “Naꞌa maꞌa hugahue.” huno hisia agu agesamo aepaꞌamoꞌa afe yapi tavimaineanagiꞌya ohavigahae.
ROM 11:34 Anumaya Koti autaꞌmamoꞌa mage huno humaineane “Hana veaꞌmoꞌya Anumayamo agu agesa havilinae? ‘Naꞌa huo.’ huno agu agesa ta Anumaya Kotina amileꞌasine?
ROM 11:35 Taꞌe ‘Nagaya Anumaya Kotina nago yana amisugeno Anumaya Kotiꞌa eteno anonaꞌa namigahie?’ huno humaine?”
ROM 11:36 Aꞌao Anumaya Kotiꞌa mukiꞌa yama talo humalenea kanogino aepaꞌa maine. Mukiꞌa yana agaiꞌa haumainea yamaꞌage haneanagita tagaya agola mukiꞌa kanaꞌaene kanaꞌaene Anumaya Kotina agaiꞌage agi alisaga hisune. Tamage.
ROM 12:1 Nafuꞌnaganagatama Anumaya Kotiꞌa kalagi ailatea yafena haviꞌna tokiyaꞌage ke lamahanepauve. Anumaya Kotife muse yaꞌamima sipi sipi heꞌya aminaya kava hutama tamahaimula hanenagetama muse yana tamaugafa Anumaya Kotina amiho. Agaila alu aotage veaꞌneꞌagitama Anumaya Kotina haisia kava hisayana fatago lamaku tamakesafiti Anumaya Koti agia alisaga hugahae.
ROM 12:2 Tamakaya ma mopafi veaꞌmoꞌya nehaya augafa kavala ohutama lamaku tamakesa aiyahae hageno Anumaya Kotiꞌa yaufa lamaku tamakesa tamamineafe agaiꞌma nehaiya kavafena havilama hutama havigahae. Ani kavala kanale yane. Mukiꞌa yamona ago agaseno kosa hetenea ya hane.
ROM 12:3 Anumaya Kotiꞌa agaiꞌa kayone yamaꞌaleti aliꞌyamaꞌa namineafe nagoke nagokeꞌmogatamina tamahanepauve “Anumaya Kotiꞌa naꞌa yama namine.” huka haviteka kagaika kaugafa alika ohaiyo. Anumaya Kotiꞌa agaiꞌalefe havitama tamakupi maletama tamametiti humainaya yana nagoke nagokeꞌmogatamina ala yano osi yano afaꞌa tamamineafe fatago lamaku tamakesa havitetama lamakaitami fako hiho.
ROM 12:4 Nagoke taugafamoꞌagi alagate alagate taugafa haneno alu aliꞌya alu aliꞌyana neꞌaliye.
ROM 12:5 Tagaya mukiꞌa veaꞌmogata ani kava huta Kalaisiꞌene aigaꞌmaeta agai augafa nagoke maineta afalu falu huta nagoke mainone.
ROM 12:6 Mainonageno Anumaya Kotiꞌa kayone hulateno muse yatia haote haote huno agaiꞌa aliꞌya alisuna tokiyatia ago tamine. Nagoꞌa veaꞌmogamina Anumaya Kotiꞌa avayafiti hamapai-mainea kea huhaleꞌya hisaya tokiya muse hunoꞌma amaminesiana Yisasife haviꞌya amakupi maleꞌya amametiti humainaya keꞌage huhaleꞌya hamapaisae.
ROM 12:7 Nagoꞌa veaꞌmogamima muse yama amafu-amakanagami amaya hisaya tokiyama amaminesia aliꞌyana aliꞌya tokiya vaisae. Nagoꞌa veaꞌmogamina veaꞌne humaveli hamaveli hisaya tokiyama amaminesiana ali lokiya vaiꞌya humaveliho.
ROM 12:8 Nagoꞌa veaꞌmogamina vea amaku amakesa ali hetimatesaya tokiyama amaminesiana ali tokiya vaiꞌya ani amaku amakesa ali hetimatesae. “Nafuꞌnaganagamima nago yama amamigahue.” huno humainesia tokiyama amaminesiana kasagoꞌya male kosa heꞌya amamiho. Kava aliꞌya alisaya tokiyama amaminesiana amakuꞌaleti ani kava aliꞌyana aliꞌya maiho. Hauma huteno afuꞌaganama ayama hisia tokiyama amaminesiana amaipa falu yapiti amaya hiho.
ROM 12:9 Tamafu-tamakanagamima tamakuꞌa amamigahena tamagelafa hutama amamiho. Kefo kavala tamakaveꞌno hutetama kanale kava hisaya yamaꞌage atafa hutama tokiya vaiho.
ROM 12:10 Tamafu-tamakanafema aluya huno tamahaisigetama tamakuꞌa amamiho. Nagoke nagokeꞌmogatama tamafu-tamakanagami amakia alisaga hutama “Hagoteho.” hutama humateho.
ROM 12:11 Mukiꞌa kanafina aliꞌyageꞌya neꞌalisagetama kasalo kasala kea ohiho. Tamakupina Alu Aotage Avamuꞌmo tokiyaꞌaleti tamakaila ali hetinagetama Anumayamo aliꞌyana aliho.
ROM 12:12 Muse nehutama Anumayamoꞌma hulatesia yafena tamametiti hutama agava maiho. Kana yama falote hisigetama hetitama tokiya vaiho. Mukiꞌa kanafina Anumayamotega havige havige hutama maiho.
ROM 12:13 Anumaya Koti anagaꞌmogamima nagoꞌa yaꞌamimoꞌma kosa heoꞌamatesigetamahena amaya hiho. Natu veaꞌma esagetama ali kayone hutama amateho.
ROM 12:14 Nagoꞌa veaꞌmoꞌya ali haviya hulamatesagetama “Ani veala alika kanale humato.” hutama Anumaya Kotitega havigeho. “Alihaviya humato.” hutama haviokeho.
ROM 12:15 Nagoꞌa veaꞌmoꞌya kigi yokalo huꞌya maisagetama tamakaiꞌenena aniꞌa hutama maiho. Nagoꞌa veaꞌmoꞌya avima atesagetama tamakaiꞌenena aniꞌa hutama avia ateho.
ROM 12:16 Tamafu-tamakanagamiꞌenena nagoke tamaku tamakesale maiho. “Ala vaya mainone.” hutama ohutama afa veaꞌnene vaiyatete hiho. “Nagaiꞌnige kanale nagu nagesa hane.” hutama ohiho.
ROM 12:17 Nagoꞌa veaꞌmoꞌya havi kavaꞌma hulamatesagetama anonaꞌa havi kavala hu oꞌamateho. Mukiꞌa veaꞌmogami amaufina kanale kavakeꞌya hiho.
ROM 12:18 Tamakaitamia tuma hisaya yafena tamakesa ohavitafa hutama mukiꞌa veaꞌnenena yuna hetama maiho.
ROM 12:19 Nahaumainea nafuꞌnaganagatama tamakaiꞌma havi yama hulamatesaya anonaꞌa “Ani kavala humategahune.” hutama ohiho. Anumaya Kotiꞌa ani yama haya kavala agaiꞌa anonaꞌa amamisiafe maitama haleho. Anumaya Koti avopina mage huꞌya kae-malenayane Anumayamoꞌa mage huno humaine “Havi kavaꞌma humatesaya anonaꞌa amakata aisia yana amamisua yana nagaiꞌni aliꞌyane.” huno humaineane.
ROM 12:20 Havi yamo anonaꞌa oꞌamamigahagi Anumaya Koti avopina mage huꞌya kae-malenayane Kame vayatamimogamima amakatesigetama kavela afaꞌa amamiho. Tifema amakesigetama tina afaꞌa amamiho. Na kava hutama ali kayonema humatesageꞌya amakaye hinageꞌya atalegahae huno humaineane.
ROM 12:21 Atalesanageno havigu havi yamoꞌa katafa huyafenagi kanale yamaꞌage hugeno ani havi yamona agaseno.
ROM 13:1 Mukiꞌa veaꞌmogatama Kamani vayaꞌmogami kea akave maleho. Nago Kamani kanoa agaiꞌa falote huno omainegi mukiꞌa Kamani aliꞌyana Anumaya Koti ayapiti alino falote humalegeꞌya yagai-mainae.
ROM 13:2 Kamani vayaꞌmogami kehena “Kahaoteꞌyakae.” huꞌya hisayana Anumaya Kotiꞌenefe “Kahaoteꞌyakae.” huꞌya nehae. Ani kavaꞌma hisaya veaꞌmoꞌya amakaiꞌami amakata aisia anonaꞌa aligahae.
ROM 13:3 Kanale kava nehisaya veaꞌmoꞌya Kamani vayafena kolia ohugahagi havi kavaꞌma nehisaya veaꞌmoꞌya koli hugahae. Kamani vayafe kolima ohinutama kanale kavakeꞌya hiho.
ROM 13:4 Kamani vayaꞌmoꞌya tamaya hisagetama kanaleꞌya hutama maisayafe Anumaya Koti aliꞌya vaya mainagi havi kavaꞌma hisayana tamahaesaya tokiyaꞌamia haneafe koli hiho. Havi kavaꞌma hisaya veaꞌmogamina havi yana anonaꞌa amakata aisia yama amamisayafe Anumaya Kotiꞌa humategeꞌya agai aliꞌyana neꞌaliye.
ROM 13:5 Kamani vayaꞌmoꞌya hamai vai yama tamisaya yafekela kolia huta amakai kea ohavisunagi tagaiti laguꞌamo “Naꞌa hiho.” huno hisia kavakeꞌya huta akave malesunafe Kamani vayaꞌmogami kea akave malegahune.
ROM 13:6 Kamani vayaꞌmoꞌya Anumaya Koti aliꞌya neꞌaliꞌya mukiꞌa kanafina ani aliꞌyatekeꞌya kava yagai lokiyaꞌage humainayafe tamakaya tamaugafale takesi monea neꞌatalae.
ROM 13:7 Anonaꞌa mukiꞌa kava vayala neꞌamamitama tamaugafaletiꞌma kanisole takesiene Kamani takesiene amamiho. Kava vayatamimogamina amaiyaꞌafinaga ako hutama mainetama amakia alisaga hisaya vayaꞌmogamina amakia alisaga hutama maiho.
ROM 13:8 Nago yana tamamitageꞌya “Haenagaꞌa tamamigahune.” hutama humainesaya yana aupaꞌa amamiho. Tamafu-tamakanagamina tamakuꞌa amamitama amaya hiho. Nagoꞌa veaꞌmoꞌya amafu-amakanama amakuꞌama amamisayana mukiꞌa kahegi kemona akave nemalae.
ROM 13:9 E, kahegi kemoꞌa mage humaine, Kumai he kavala ohuo. Veala haegeno ofalino. Musufa yana ohuo. Alu kanomo kuꞌafenotela ageka kahaꞌyea ohuo huno nagoꞌa kene humainegi mukiꞌa kahegi kemona aepaꞌamoꞌa nagoke mage huno hane, kagaika kaugafahema kahaiya avamete mukiꞌa veaꞌmogami amaugafahena kahaino huno humaineane.
ROM 13:10 Mukiꞌa veaꞌmogami amakuꞌama neꞌamamiya veaꞌmoꞌya alu veaꞌmogamina havi kavala huoꞌamategahae. Ani yafe veaꞌmoꞌya amakuꞌama neꞌamamiya veala mukiꞌa ani kahegi kemona akave nemalae.
ROM 13:11 Menima mainona kanafima nehaya kavala ago havilinayafe tamaula faetama omaitama hetitama maisaya kanamoꞌa ago falote humaine. Tagayama hagoteta Yisasife havita lagupi maleta tametiti humainona kanafina Anumaya Kotiꞌa tagu tamema aligatisia kanamoꞌa aluꞌale haneanagino meni kanafina ago eno aupa nehie.
ROM 13:12 Hanima kimainea kanamoꞌa ago haꞌno hugahe nehigeno koꞌma alino halesia kanamoꞌa ago falote hugahe nehiafe mukiꞌa hani yapima nemaiya auꞌava yana ataleteta tuma hisuna kenatia, hale yamo auꞌava kenatia failisune.
ROM 13:13 Kama vaiyesunana fatago huta veaꞌmoꞌya yagefima vaiyaya avamete huta vaiyesune. Alitalu huta havili neta hagifali kea ohatageta anegi-nagia ohisune. Ageta lahaꞌyea huta augafale maita yokalo oꞌateta moli huliteta ohisune. Alu kanomo yatela ageta lahaꞌyea ohuta tua ohisune.
ROM 13:14 Anumayatimona Yisasi Kalaisina kenatami kana hutama avaletama taugafale aigaꞌmaetama age lamahaye hisaya yafena tamakesa havi havi hutama omaiho.
ROM 14:1 Nagoꞌa tamafu-tamakanaꞌya Yisasiꞌa hulatenea yafena haviꞌya amakupi maleꞌya amametiti nehayanagi Anumaya Kotiꞌa “Ago fatago veaꞌne mainae.” huno humatenea yafena havilama ohuꞌya “Naꞌa kava hisunageno Anumaya Kotiꞌa ‘Fatago veaꞌne mainae.’ huno huotategahie.” huꞌya nehaya veala tamakaiꞌene nagopi maisayafe amavaletama amateho. Amategahagi amakaya amakesafiti alu ke hisaya yafena kea vaitama ani keletila tua hu omateho.
ROM 14:2 Nagoꞌa kafu-kaganaꞌa “Mukiꞌa kavela negahue.” huno agesa nehavianagi nagoꞌa kafu-kaganaꞌa Yisasife havino agupi maleneanagino Anumaya Kotiꞌa “Ago fatago kano mainane.” huno hutenea yafena havilama ohuno “Anumayamoꞌa fatago kano mainane huno hunatesiafe afumo amela onegahue.” huno humaine.
ROM 14:3 Mukiꞌa kaveꞌma nesia kafu-kaganaꞌa afuma nonesia afu-agananafena “Afa kano mainane.” huno huoꞌateno. Afumo ameꞌama nonesia afu-aganaꞌa mukiꞌa kaveꞌma nesia afu-aganafena “Naꞌa kano mainane.” huno huoꞌateno. Anumaya Kotiꞌa ani tole kanolatana ago anavale-maine.
ROM 14:4 Kagaya taga maineka nago kanomo aliꞌya kanohena “Naꞌa aliꞌya kano mainane.” huka huneꞌatane? Agayama ani kanomo aliꞌyateꞌma fatago huno alisiano havi aliꞌya alino maisiano agaiꞌa kava kanoꞌamo yane. Kagai yana omalene. Anumayamoꞌa agaiꞌa ali lokiya vaitesia tokiyaꞌa haneafe ali lokiya vaitesigeno maigahie.
ROM 14:5 Nagoꞌa tamafu-tamakanaꞌya ma amakesa nehaviye “Nagoke kanaleꞌma mauna yamoꞌa alu kanamona agase-maineanagita ani kanalekeꞌya alitalu huta Anumayamo agia alisaga hugahune.” nehageꞌya nagoꞌa tamafu-tamakanaꞌya “Mukiꞌa kanamoꞌa nagoke avamete humainea kanale nemaune.” huꞌya nehayanagi nagoke nagoke veaꞌmoꞌya amakaiꞌami amaku amakesa havilama hisae.
ROM 14:6 Nago tamafu-tamakanaꞌa agesa haviteno “Nagoke kanama mauna yamoꞌa nagoꞌa kanamona agase-maineanagita ani kanalekeꞌya alitalu huta Anumayamo agia alisaga hugahune.” huno hisia kanomoꞌa Anumaya Koti agia alisaga hisiafe ani kavala nehie. Nago tamafu-tamakanaꞌa “Mukiꞌa kavela negahue.” huno hisiana Anumayamotega nunamu huno muse hutenea yafenagino Anumayamo agia alisaga humainegi nago tamafu-tamakanaꞌa afumo ameꞌma monesia kanomoꞌa “Anumaya Koti agia alisaga hugahue.” huno monesie. Agaiꞌenena Anumaya Kotitega nunamu huno muse huno havinege.
ROM 14:7 Nago kanoa haegafa huno maisiana agaiꞌalefekeꞌya huno omaine. Nago kanoma falisiana agaiꞌalefekeꞌya huno ofaline.
ROM 14:8 Tahaimuꞌma hanesigeta maisunana Anumayamo agia alisaga hisunafe mainone. Falisunana aniꞌa huta Anumayamo agi alisaga hisunafe faligahune. Aniꞌa humaineafe tahaimuꞌene maisunano falisunano Anumayamo anaga mainone.
ROM 14:9 Fali-mainaya veateꞌene hamaimu hanegeꞌya mainaya veateꞌene Anumayaꞌamimo maisiafe Kalaisiꞌa faliteno eteno haimu alino heti-maine.
ROM 14:10 Nagoꞌa veaꞌmogatama naꞌa higetama tamafu-tamakanagami no maiyana fako huneꞌamatae? Nagoꞌa veaꞌmogatama naꞌa higetama tamafu-tamakanafena “Afa kano mainane.” hutama huneꞌamatae? Tagaya mukiꞌamogata Anumaya Kotiꞌa ala kaiyekema hulatesifina hetigahune.
ROM 14:11 Avopina mage huno kae-maleneane Anumayamoꞌa mage humaine “Tamagelafa huꞌna tamahanepauve mukiꞌa veaꞌmoꞌya nagaifena mage huꞌya hugahae ‘Kagai veaꞌne mainonagi kava hulato.’ huꞌya hugahae. Mukiꞌa veaꞌmoꞌya ‘Kagaya Anumaya Kotiti mainane.’ huꞌya nagia alisaga hugahae.” huno higeꞌya kae-malenayane.
ROM 14:12 Kae-malenageta tagaya ageteta havilinone mukiꞌa nagoke nagokeꞌmogata nemauna auꞌava yatimo aepatia Anumaya Kotina hapaigahune.
ROM 14:13 Tafu-taganagamifena “Naꞌa nehane.” huta fakoa humateta nagoꞌene havi tagesa havi oꞌamamisune. Naꞌa ohisunana tafu-taganaꞌya tageteꞌya asaga hulaviꞌya kefo kava hisaya yafenagita havi kavala ohisune.
ROM 14:14 Anumayanimoꞌa Yisasiꞌene ailokaeꞌna maineꞌna ago havilinoe nagoꞌa kaveꞌmoꞌa oniꞌyaꞌage ohune. Nago kanomoꞌma agaiꞌa agu agesafima “Oniꞌyaꞌage humaine.” huno havisia kaveꞌmoꞌa oniꞌyaꞌage haumaine.
ROM 14:15 Kagaya nagoꞌa kaveꞌma nenana yafena kafu-kaganana agu agesa alihaviya hutesanana kahau kayamopafi negahaiya kavala nohane. Kalaisiꞌa ani kafu-kaganana agu amena aligatisiafene huno fali-maineanagika nesana kavetetifene huka alihaviya huoꞌato.
ROM 14:16 Kanale kava hisaya yafena havigu veaꞌmoꞌya “Havi kava nehae.” huꞌya hulamateyafenagi kava yagaiho.
ROM 14:17 Kaveꞌma neneꞌya tima neneꞌya nehaya yamoꞌa Anumaya Kotiꞌa kava yagailatesia yamona aepaꞌa omaleneanagi Alu Aotage Avamuꞌmo taminea fatago kavaꞌene taipa falu hisia yaꞌene muse hisuna yaꞌene aepaꞌa hane.
ROM 14:18 Haneafene huꞌya nagoꞌa veaꞌmoꞌya ani kava huꞌya Kalaisi aliꞌyama alisayana Anumaya Kotiꞌa “Kanale kava haya veaꞌne mainae.” huno hulamatesigeꞌya nagoꞌa veaꞌmoꞌyaene “Kanale veaꞌne mainae.” huꞌya hulamategahae.
ROM 14:19 Ani yafe tagaya nagoke tagu tagesaleꞌma maisuna kavaꞌene tafu-taganagami amaya huta tokiyaꞌage huꞌya maisaya amaku amakesale maisaya kavala hisune.
ROM 14:20 Tamakaya kave nesaya yafekeꞌya nehutama Anumaya Koti aliꞌyana alihaviya ohiho. Mukiꞌa kave neyana kanale yanagi kagaya nana kavemoꞌa kafu-kaganaꞌya asaga hulavisaya kava humatesanana tusiꞌa havi kava nehane.
ROM 14:21 Afua nesano havilima nesano nagoꞌa kavaꞌma hisana yamo kafu-kaganana asaga hulavisia kavaꞌma hutesanana aniꞌama hisana kavala atalo.
ROM 14:22 Ani yafema havika kagupi malenana yana kagaikaene Anumaya Kotiꞌene tanakaitanigeꞌya hanesie. Nago kanomoꞌma nagoꞌa nesia yafeꞌene hisia kavaꞌenena agaiꞌa aguꞌamoꞌa kaiyekema huoꞌatesiana ani kanomoꞌa muse hugahie.
ROM 14:23 Muse hugahianagi nago kanomoꞌma nesia yafema tole agesa haviteno nesiana Anumaya Kotiꞌa “Havi kava nehane.” huno hutegahie. Ani kanomoꞌa “Kanale ya nenoe.” huno agupi omaleneafe havi kava nehie. Mukiꞌa yana “Maꞌa kavala kanale kavale.” huta lagupi omalenona yana kefo yane.
ROM 15:1 Yisasife tamametiti huta tokiya neꞌvauna veaꞌmogata amametiti yaꞌamimoꞌma tokiya oꞌvainea veaꞌmogami kana yaꞌamia “Tamakaitami aliho.” huta ohisunagi tagaya haꞌmaꞌmaeta alita tagaiti lagu tagesamoꞌma haisia kavala ohisune.
ROM 15:2 Ohisunagi mukiꞌamogata tahaote tahaote tagaya tavateꞌma mainesaya veala amaya hisunageꞌya kanaleꞌya huꞌya Yisasife haviꞌya amakupi malenesaya yaꞌamimoꞌa tokiya vaisie.
ROM 15:3 Tagaya ago havimainone Kalaisiꞌa agaiꞌa agu agesamoꞌma haiya kavala akave omalenea yafena Anumaya Koti avopina agaife mage huꞌya kae-malenayane “Veaꞌmoꞌya kagaiꞌma Anumaya Kotiga hu haviya hunegataya kemoꞌa nagaila melino aiso hunenate.” huno humaineane.
ROM 15:4 Nayoma kae-malenaya kemoꞌa meni kanafima tagesa alino akalo hisiafene huꞌya kae-malenayane. Anumayamo kema kae-malenaya kefiti tokiya vaisuna yaꞌene tagu tagesa ali heti-latesia yaꞌene haneafe tametiti yatimoꞌa tokiya vailategahie.
ROM 15:5 Anumaya Kotiꞌa veala tokiya vaisaya yaꞌene amaku amakesa ali hetimatesia yaꞌene aepaꞌagino tamaya hisigetama Yisasi Kalaisi humainea auꞌava yana akave maletafa hutama nagoke tamaku tamakesale maisae huꞌna Anumayamotega havinegoe.
ROM 15:6 Naꞌa hisayafe nagoke tamaipale maitama nagokete tamakuꞌa maletama Anumayatimona Yisasi Kalaisina Nefana Anumaya Koti agia alisaga hisae.
ROM 15:7 Veaꞌmoꞌya Anumaya Koti agima alisaga hisayafe Kalaisiꞌa tamakaila ali falu fala hulamateno tamavale-mainea kava hutama tamafu-tamakanagamina ali falu fala humatetama amavaletama nagoke tamaipale maiho.
ROM 15:8 Tamahapauve Anumaya Kotiꞌa Yuta veaꞌmogati taginagomogamife hamapai-mainea kemoꞌa falote huno fatago hinageꞌya “Anumaya Kotiꞌa tamageꞌage kano maine.” huꞌya hisayafene huno Kalaisiꞌa Yuta veaꞌmogamina amaya humaine.
ROM 15:9 Amaya higeꞌya Yuta vea omainaya anagaꞌmoꞌya Anumaya Kotiꞌa kayone hulamatenea yafe agia alisaga hisaya yafena Anumaya Koti avopina mage huꞌya kae-malenayane “Naꞌa hisigeꞌna Yuta veaꞌne omainaya veapina kagia alisaga huꞌna musena hugategahue. Mono yagamefitiꞌene kagia alisaga hugahue.” huno humaineane.
ROM 15:10 Aniꞌa huno nago kemoꞌa maꞌa humaine “Tamakaya Yuta vea omainaya anagaꞌmogatama agaiꞌa nofi anagaꞌaene ailalupetama muse hiho.” huno humaineane.
ROM 15:11 Aniꞌa huno nago kemoꞌa mage humaineane “Tamakaya Yuta vea omainaya anagala Anumaya Kotina agia alisaga nehigeꞌya mukiꞌa veaꞌmoꞌya aniꞌa huꞌya agia alisaga hiho.” huno humaineane.
ROM 15:12 Aniꞌa huno nago kea Aisaiyaꞌa Anumaya Koti aune kanomoꞌa mage humaineane “Yesi anagapiti aginagomoꞌa falote huno Yuta vea omainaya veaꞌmogatamina kava yagai-lamatesigetama agaifena ‘Tagu tamena aligatigahie.’ hutama tamametiti hugahae.” huno Aisaiyaꞌa humaineane.
ROM 15:13 Anumaya Kotiꞌa tametiti yatimo aepaꞌagino agaifema tamakupi malenaya yateti tusiꞌa muse yaꞌene tamaipa falu hisia yaꞌene tamamino havatelamatesigetama Alu Aotage Avamuꞌmo tokiyaleti tusiya hutama Yisasiꞌma hulamatenea yafena tamametiti hisae huꞌna nunamuna nehue.
ROM 15:14 Nafuꞌnaganagatama nagaiꞌniꞌa nametiti huana tamakaya kanale auꞌava yana kasagoꞌya nehae. Mukiꞌa ke havi yana tamakesaene veaꞌne mainae. Tamakaitami oꞌaya aꞌaya hutama hamapaisayana kanale amaku amakesa tamafu-tamakanagamina amamigahae.
ROM 15:15 Amamigahagi Anumaya Kotiꞌa kayone yamaꞌa namiteno Yuta vea omainaya veaꞌmogami amuꞌnopi Yisasi Kalaisi aliꞌya alisanafene huno hunateneafene huꞌna nagoꞌa kema kaemaloa kemoꞌa tamaku tamakesa aliꞌna hao huꞌna ali hagalo hugahe tokiya vaiꞌna negaove. Afaꞌa nokaogi mono note kava vaya kana huꞌna maineꞌna Anumaya Kotiꞌa hulatenea kanale mono kea huhaleꞌna hisugeꞌya Yuta vea omainaya anagaꞌmoꞌya aliꞌya amakupi malesageno Alu Aotage Avamuꞌmoꞌa “Alu aotage veaꞌne mainae.” huno humatesigeꞌna amavalesugeꞌya Anumayamo avate esageꞌna amisugeno Anumaya Kotiꞌa musena hugahie.
ROM 15:17 Naꞌa hisigeꞌna nagaya Yisasi Kalaisiꞌene ailokaeꞌna maineꞌna Anumaya Koti aliꞌyama neꞌalua yafena tusiꞌa muse nehue.
ROM 15:18 Kea nagoke yafeke huꞌna falote nehue. Yuta vea omainaya veaꞌma Anumaya Koti kema akave malesayafe Kalaisina agaiꞌa tokiyaleti nehue. Nagaiꞌni kanale auꞌava yatetiꞌene humainoa keletiꞌene tokiya avameꞌyama hua yaꞌene Alu Aotage Avamuꞌmo tokiyaletiꞌene hamanepauve. Yisasiꞌma hulatenea yafema kanale mono kema hulama huꞌna hamapauvana Yelusalemuti aepa heꞌna mukiꞌa kotega ute ete huꞌna Ililikumua uvaꞌyi humainoe.
ROM 15:20 Nagoꞌa mopalega Kalaisi agima ohavinaya haigilega ani aliꞌyana aliꞌna Kalaisiꞌma hulatenea yafena kanale mono kea hamapaisua yafekeꞌya nenahaiye. Havigu alu kanomo hagoteno Yisasi kea hamapaiteno ani kanomoꞌa posi ayemalenesia yosale no mo kisua yafena nonahaiye.
ROM 15:21 Anumaya Koti avopi kae-malenaya kate hugahe nehue. Mage huꞌya kae-malenayane “Agai avagema ohavinesaya veaꞌmoꞌya agegahae. Keꞌama ohavinesaya veaꞌmoꞌya aepaꞌa havigahae.” huno humaineane.
ROM 15:22 Mukiꞌa kanafina Lomu mainaya veaꞌmogatamalega ugahe huanagi visua kana ani aliꞌyamo tilegeꞌna oꞌunoe.
ROM 15:23 Oꞌunogi meni kanafina malega hanea aliꞌyaniꞌa alivaya ayoanagiꞌna ayaꞌaya kafugefa lamakaitega visue huꞌna nagesa havi havi humainoafe menia Sipeni visua katelagiꞌna osi kanalega tamakaiꞌenena mo faeꞌna hu falu fala hulamateteꞌna muse huꞌna mainesugetama naya hisageꞌna Sipenia ugahue.
ROM 15:25 Tamakaitega ugahuanagi hagoteꞌna Yisasina amakuꞌa aminaya veaꞌne amaya hisuafe Yelusalemu neꞌue.
ROM 15:26 Nagoꞌa yaꞌamima omalenea veala Yelusalemu maineꞌya Yisasife haviꞌya amakuꞌa aminaya veaꞌmogamifena Masetonia vealagi Akaiya vealagi amakesa haviteꞌya muse huꞌya monea amamigahe nehayanagiꞌna aliꞌna momamigahue.
ROM 15:27 Hagoteno Yuta veala Anumaya Kotiꞌa amaku amamema aligati-mainea kanale mono kema Yuta vea omainaya veaꞌma hamapaimainaya yate ani veaꞌmoꞌya anonaꞌamia haneanagiꞌya amaipamoꞌa kanaleꞌya higeꞌya “Amamigahune.” huꞌya Yuta veala amaugafale yana kanale humatesia yama amamisayana kanale yane.
ROM 15:28 Ani monea alitalu huꞌya namisageꞌna aliꞌna Yelusalemu mukiꞌa monea momamiteꞌna tamakaya mainalega uteꞌna Sipenia ugahue.
ROM 15:29 Tamakaitegama uvaꞌyi hisuana ago havuana Kalaisina kanale manuꞌamoꞌa havatenateneanagiꞌna tamakaitega egahue.
ROM 15:30 Mukiꞌa nafuꞌnaganagatama musetami nehugi Anumayatimoꞌa Yisasi Kalaisi hulatenea yafeꞌene Avamuꞌmoꞌma tahau tayamopafi nelahaiya yama taminea yafeꞌene lamahavi-negoe tokiya vaitama nagaifena ke hutama Anumayamotega havigegeno nagaila naya hino.
ROM 15:31 Mage hutama nunamuna hiho “Yutia mainaya veaꞌmoꞌya Yisasi kea nohaviya vealagiꞌya Polona atafa huꞌya ali haviya hutegahe nehagi kagaya Anumaya Kotiga augafa aligatio. Yelusalemu maineꞌya Yisasina amakuꞌa aminaya veala Poloꞌa amaya hisigeꞌya ma ma hamaꞌmaesia aliꞌyama neꞌalia yafena hamaisigeꞌya musena hisae.” hutama havigeho.
ROM 15:32 Naꞌa hutama havigesagenoꞌa Anumaya Kotiꞌa hainagenofena lamakaitega evaꞌyi huꞌna muse huꞌna tamakayaenena maifalu hugahue.
ROM 15:33 Anumaya Kotiꞌa taipamoꞌma falu hisia yamona aepaꞌagino tamakaiꞌene mukiꞌamogatamaene maisie huꞌna nehue. Tamage.
ROM 16:1 Fipiꞌa tusiꞌa kanaleꞌya huno Yisasina aguꞌa aminea tasatimoꞌe, Senikalia maineꞌya Yisasina amakuꞌa aminaya veaꞌmogamina kanaleꞌya huno amaya humaine.
ROM 16:2 Anumayatimoꞌene ailokaetama mainayafe Fipina avaletama amuꞌnotamifi atesageno maisie. Anumaya Koti nafaꞌnemogatama naꞌa hisunana kanale yane. Nagi nagoꞌa yamoꞌma kanama haisigetama kanaleꞌya hutama aya hiho. Fipiꞌa aniꞌa huno hagotenoꞌa nagayaene kasagoꞌya veaꞌnene taya humaineane.
ROM 16:3 Yisasi Kalaisi aliꞌyama nahaꞌmaeꞌana neꞌaliꞌa alavelafena Palisilagani Akuvilaganina hutama falu fala hunateho.
ROM 16:4 “Kagaiꞌma kahaesagetaꞌa faligahune.” huꞌana humainaꞌafe nagayake musena hunoꞌanatogi mukiꞌa Yuta vaya omainaya Yisasi anagaꞌmoꞌyaene huꞌya musena huneꞌanatae.
ROM 16:5 Anakai nopima Yisasi kema havigahe melitaluma nehaya veaꞌnene nagaila hu falu fala keꞌnia humateho. Epainetasina, Esia kotega mainaya veaꞌmogamina hagoteno amakaseno Kalaisi kea havino agupi malenea kanoa maineanagino nahau nayamopafi nenagea nenafuna nagaila hu falu fala keꞌnia huteho.
ROM 16:6 Aniꞌa hutama Maliaꞌa, tamakaiꞌenema mainenoꞌa tamaya hugahena tusi aliꞌya ali-mainea alagi hutama falu fala huteho.
ROM 16:7 Atalonikusigani Yuniasiganina aniꞌa hutama nagaila hu falu fala keꞌnia hunateho. Nagaya Yisasi kema ohavinoa kanafina ani kanolatana Yisasife haviꞌana anakupi maleteꞌana Aposolo vayaꞌmogami amuꞌnoꞌamifi anaki hanea kanolata maineꞌana nagaiꞌene Yuta nofi vaya mainonanagita nagaiꞌene Yisasi kema humainona yateti nofila hulatenayane.
ROM 16:8 Ampiliatusina Anumayamoꞌene ailokaeyaꞌageꞌna naguꞌa aminoa nenafuꞌagi nagaila hu falu fala keꞌnia huteho.
ROM 16:9 Tamakaya Upanusiꞌa Anumayamo aliꞌyana tokaetaꞌa neꞌaluꞌa kanoene Setakisina kanaleꞌya huꞌna naguꞌa aminoa nenafuꞌene nagaila hutama falu fala keꞌnia huneꞌanatetama hiho.
ROM 16:10 Apelesiꞌa Kalaisina akaveꞌma nemaliafe agia hanegi nagaila hu falu fala keꞌnia huteho. Alisitopulusi afamoꞌmogamina nagaila hu falu fala keꞌnia humateho.
ROM 16:11 Helotioniꞌa nagai nofi vayalagi nagaila hu falu fala keꞌnia huteho. Anumayamoꞌene ailokaeꞌya mainaya tafu-taganagamina Nasisusi afamoꞌmogamina nagaila hu falu fala keꞌnia humateho.
ROM 16:12 Talifinagani Talifosagania Anumayatimo aliꞌya tusiya huꞌana neꞌaliꞌa kanolatanagi nagaila hu falu fala keꞌnia hunateho. Pesisiꞌa nahau nayamopafi nenagea alagi Anumayatimo aliꞌyana ali-maineafe nagaila hu falu fala keꞌnia huteho.
ROM 16:13 Lufusiꞌa kanaleꞌya huno Yisasina akave nemalea kanoene itaꞌamoꞌenena nagaila hu falu fala keꞌnia hunateho. Lufusina itaꞌamoꞌa itaꞌnimo kana huno nahaꞌnemaeyane.
ROM 16:14 Asinakalitusiꞌma Falegoniꞌma Hemisiꞌma Patolopasiꞌma Hemasiꞌma amakaiꞌenema tokaeꞌya mainaya nafuꞌnaganagamina nagaila hu falu fala keꞌnia humateho.
ROM 16:15 Filologusiꞌene Yuliaꞌene Neleusiꞌene asaꞌamoꞌa Olipasiꞌene amakaiꞌene mainaya Yisasi anagaꞌene nagaila hu falu fala keꞌnia humateho.
ROM 16:16 Anumaya Koti anagaꞌmogatama nehuna kava hutama tamahaote tamahaote mukiꞌa tafu-taganagamina tamayana amamitama ali falu fala humateho. Mukiꞌa kumate maineꞌya Yisasi anagaꞌmoꞌya “Mainafio?” huꞌya hu falu fala hulamatae.
ROM 16:17 Mukiꞌa nafuꞌnaganagatama tamakesa alisua kea haviho. Nagoꞌa vayaꞌmoꞌya emaineꞌya tamahapai-mainoa kemona amakaveꞌno huteꞌya neꞌatagaeꞌya tamakaya mono kema havigahe alitaluma nehaya yapi melifako hisaya kema nehaya vayaꞌmogamifena kaꞌyetama mainetama ani kema nehaya vayaꞌmogamina tamakaveꞌno humateho.
ROM 16:18 Ani vayaꞌmoꞌya Anumaya Kalaisi aliꞌyafena amakesa ohaviꞌya amakaiꞌami age hamaꞌye hisaya yafekeꞌya akave malesaya amakesa nehae. Hagalama-haisifa ke huꞌya masave amake neꞌaiꞌya amaipafi ayegesageꞌya kanale amakesama nohaviya veaꞌnea ayemavataga huꞌya alihaviya humategahae.
ROM 16:19 Tamakaya Yisasiꞌma hulatenea yafena havitama tamakupi maletama atafa hulinaya kea mukiꞌa veaꞌmoꞌya ago havimainaya yafena haviteꞌna tusiꞌa muse nehue. Kanale auꞌava yamo aepaꞌa havilama hutama nagoꞌa kefo yamofe tamakesa ohavisae huꞌnahe nehue.
ROM 16:20 Anumaya Kotiꞌa, taipa falu hisia yamona aepaꞌagino, aupa kanafi Satanina taiyafinaga ayeno tatapegahie. Yisasiꞌa Anumayatimona kayone yamaꞌamoꞌa tamakayaene hanesie huꞌna nehue.
ROM 16:21 Nagaiꞌene aliꞌya neꞌalia kanoa, Timotiꞌa, huno falu fala hulamate. Aniꞌa huꞌya Lusiusiꞌma Yesoniꞌma Sosipataꞌma nagaiꞌni Isaleli nofi nafuꞌnagaꞌya “Mainafio?” huꞌya hu falu fala hulamatae.
ROM 16:22 Nagaya Tetiusiꞌna Polo avayafiti ke aliꞌna mani avona kaeꞌna Anumayamo agile “Felugae.” huꞌna hu falu fala hunelamatoe.
ROM 16:23 Kaiyusiꞌa “Felugae.” huno hu falu fala hunelamate. Nomaꞌafina kanaleꞌya huno yagainategeꞌna mainogeꞌya Yisasi anagaꞌmoꞌya Anumayamo kema havisaya yafena agai nopina melitalu humainae. Elasatusiꞌa ani kumaꞌalate Kamanimo kusi kusi kanoene Kavotusiꞌa tafu-taganaꞌene “Felugae.” huꞌana hu falu fala hunelamataꞌe.
ROM 16:25 Anumaya Koti agia tusiya huta alisaga higetao. Yisasiꞌma hulatenea kanale mono kema hu-haleꞌna nelamamua keleti Anumaya Kotiꞌa hetitama tokiya vaitama maisaya tokiya tamamigahie. Mani kea hagoteno ayaꞌaya kanagefa falakino haneanagino menia Anumaya Kotiꞌa ago alino falote humalene. Anumaya Kotiꞌa maige maige nehia kanomoꞌa mage huno humaine “Mani kea hufalote hiho.” huno humainea ke amaune vayaꞌmoꞌya kae-malenaya kefiti “Mukiꞌa alu nofi veaꞌmogamina hamapaisageꞌya haviteꞌya amakupi maleꞌya amametiti huꞌya nagaila nahaisia kava hisae.” huno humaineane.
ROM 16:27 Anumaya Kotiꞌa nagokeꞌmo mukiꞌa kanale havi haviꞌyaꞌami hanea veala amakase-mainea kano maineafe Yisasi Kalaisiꞌa hulateneafene huta agola mukiꞌa kanafina agia alisaga hisune. Tamage. Keꞌnia male haꞌno hie. Nagaiꞌni nagia Poloꞌnae.
1CO 1:1 Nagaya Poloꞌnae. Anumaya Kotina haigeno nagaila hapalinateno “Yisasi Aposolo kano maiyo.” huno humaineafe nagayaene taganatimoꞌa Sosetenesiꞌene mani avona kaetaꞌa Kolini mainetama Yisasi kea tamametiti hutama Yisasi Kalaisiꞌene ailokaetama mainayafe alu aotage veaꞌne mainae. Mukiꞌa kotega veaꞌnene Anumayatimo Yisasi Kalaisi agile nunamu nehaya veaꞌnene tamakaifeꞌenena agaiꞌa alu aotage veaꞌneꞌa maisayafene huno hapalilamatene. Yisasiꞌa amakaiꞌene tagaiꞌene Anumayatimo maine.
1CO 1:3 Anumaya Kotiꞌa, Nelafaꞌene Yisasi Kalaisi Anumayatimoꞌene kayone hisaya yaꞌene tamaipa falu hisia yaꞌene tamamisaꞌe.
1CO 1:4 Yisasi Kalaisiꞌene ailokaetama maigeno Anumaya Kotiꞌa agaiꞌa kayone yamaꞌa tamamineafene huꞌna nagaya mukiꞌa kanafina tamakaifena Anumayamotega muse huꞌna nunamuna nehue.
1CO 1:5 Kalaisi kea ago tamahapaugetama havilama hulinetama ani keleti Anumaya Kotifema havitama tamakupi malayana Yisasiꞌene ailokaetama maigeno Anumaya Kotiꞌa mukiꞌa tokiyaꞌa ago tamamineanagitama nagoꞌa veaꞌmogamina mani kea hamapaisaya tokiyatamia hane.
1CO 1:7 Haneanagi meni kanafina Anumayatimoꞌa Yisasi Kalaisiꞌma ikapinagati elavino fufu yateꞌma esiafe tamametitia hutama agava mainageno Alu Aotage Avamuꞌmoꞌa tokiya yamaꞌa kasagoꞌya tamamineana-gitama nago yafena aupa nohae.
1CO 1:8 Yisasiꞌa tokiya vaitama maisaya yana tamamisigetama tokiya vaitama mainetama ma mopama haꞌno hisia yupa kefo yatamia omalenageno Anumayatimoꞌa Yisasi Kalaisiꞌma kaiyeke hulamatesia yupa kanaleꞌya hutama hetigahae.
1CO 1:9 Anumaya Kotina nafaꞌneꞌamoꞌa Yisasi Kalaisiꞌe Alatimoꞌene nagoke tamaipale maisayafe tamakaila ke huno “Naꞌa hugahue.” huno hulamatenea kea oꞌatalegahianagino ani kavala hugahie.
1CO 1:10 Nafuꞌnagana-gatama Alatimoꞌa Yisasi Kalaisi agile tokiyaꞌage kea tamahanepauve. Nagoꞌa tamakesa havitama alu ke alu kea ohutama apaohetama mainetama nagoke tamaku tamakesale maiho huꞌna tamahanepauve.
1CO 1:11 Nafuꞌnagana-gatama Koloe anagaꞌmoꞌya tamakaifena mage huꞌya nahapaiye “Amakaya ke vaige vaige yate nemaiye.” huꞌya nahapaiye.
1CO 1:12 Tamakaya ani kema neꞌvaiya yana nagokeꞌmogatama “Tagaya Polo veaꞌne mainone.” hutama hageꞌya nagoꞌamogatama “Tagaya Apolosi veaꞌne mainone.” hutama hageꞌya nagoꞌamogatama “Tagaya Pita veaꞌne mainone.” hutama hageꞌya nagoꞌamogatama “Tagaya Kalaisi veaꞌne mainone.” hutama nehae.
1CO 1:13 Naꞌa higetama ani kea nehae? Kalaisi augafamoꞌa akalu kale-peno haote haote humaineo? Nagaila Polonina tamakaife huꞌna yafaga yosale nahaeꞌya asaigeꞌna fali-maino? Ifi nagaila Poloni nagile tina fale-lamatenao? Aꞌao tamakaya “Ma kanomo mono ke nehavuna veaꞌne mainone.” hutama ohiho.
1CO 1:14 Tamakai amuꞌnopina Kalisipusiꞌene Kaiyusiꞌene tina falenatenoe. Nagoꞌamogamina fale oꞌamatenoa yafena muse nehue.
1CO 1:15 Havigu nagoꞌa veaꞌmoꞌya “Polo agile tina falelatenae.” huꞌya hisagi.
1CO 1:16 Tamage nagaya Setefanasi nofi anagaꞌene tina falematenoe. Nagoꞌa veaꞌnenena falematenesuo fale oꞌamatenesuo nagesa ohavinoe.
1CO 1:17 Kalaisiꞌa tina falelamatesuafene huno hunategeꞌna omenogi agaiꞌa hulatenea yafe kanale mono kema huhaleꞌna tamahapaisuafene huno hunatene. Mani kea ma mopafima kanalehaviꞌyaꞌami hanea vayaꞌmoꞌya nehaya augafa kema hisuana Yisasi Kalaisiꞌa yafaga yosaleꞌma fali-mainea kemoꞌa afa ya kana hu yafenagiꞌna naꞌa augafa kea ohugahue.
1CO 1:18 Hani yapi, tegelege nehia atafi, visaya veaꞌmoꞌya Yisasiꞌa yafaga yosaleꞌma fali-mainea kehena “Havigu-nagu ke nehae.” huꞌya nehayanagi tagaya Anumaya Kotiꞌa tagu tamema ali negatea veaꞌmogata Yisasiꞌa yafaga yosaleꞌma fali-mainea kemoꞌa “Anumaya Kotina tokiyaꞌae.” huta nehune.
1CO 1:19 Anumaya Koti avopina mage huno kae-maleneane “Nagaya mukiꞌa kanale haviꞌyaꞌami hanea veaꞌmogamina havilinaya yana alitalesugeno fanane hugahie. Kanale amaku amakesama hanesia veaꞌmogamina amaku amakesa ali haꞌno hutalegahue.” huno Anumayamoꞌa humaineane.
1CO 1:20 Kanale haviꞌyaꞌamima hanea veafena naꞌane hisune? Kahegi kema havilinaya veafena naꞌane hisune? Ma mopale yafema amakemoꞌma nehaya veafena naꞌane hisune? Anumaya Kotiꞌa ma mopale yafe kanale haviꞌyaꞌamima hanea veaꞌmogamifena “Havigu-nagu ke nehae.” huno humaine.
1CO 1:21 Anumaya Kotiꞌa tusiꞌa kanale haviꞌyaꞌa hanea kanogino agaiꞌa haiya kava huno “Ma mopafi veaꞌmoꞌya amakaiꞌami haviꞌyaꞌamima hanea yateti nagaila nagelama huꞌya onagegahae.” huno huteno haiya agesa mage huno havimaine “Yisasiꞌa hulatenea yafena kanale mono kea, huhaletama hamapaiya kema haviꞌya amakupi maleꞌya amametiti humainaya veaꞌmogamina amaku amamena aligatigahue.” huno humaine.
1CO 1:22 Yuta veaꞌmoꞌya “Tokiyaꞌage avame yana hisanageta ageteta Kalaisife havita lagupina malegahune.” huꞌya hageꞌya Kaliki veaꞌmoꞌya “Mukiꞌa yana havita kanale haviꞌyatiene veaꞌne maisune.” huꞌya hae.
1CO 1:23 Hayanagi tagaya Kalaisiꞌa yafaga yosaleꞌma fali-mainea kema huhaleta hamanepaunana Yuta veaꞌmoꞌya tagaifena “Tayo hia ke nehae.” huꞌya amakaveꞌno hutageꞌya Yuta vea omainaya veaꞌmoꞌya “Ani kea havigu-nagu ke nehae.” huꞌya humainae.
1CO 1:24 Hayanagi tagaila Anumaya Kotiꞌma hapalilatenea veaꞌmogata, Yuta veaꞌnene Yuta vea omainaya veaꞌnenena, ago havimainone Kalaisiꞌa Anumaya Kotina tokiyaꞌagino kanale haviꞌyaꞌa hanea kano maine.
1CO 1:25 Anumaya Kotifena “Havigu-nagu agu agesa hane.” huꞌya nehayanagi mukiꞌa mopale veaꞌmogamina haviꞌyaꞌami amakase-maine. Anumaya Kotifena “Nagoꞌa fulu fulu yamaꞌa hane.” huꞌya nehayanagi ani fulu fulu yamaꞌamoꞌa ma mopafi veaꞌmogami tokiyaꞌamimona amakase-maine.
1CO 1:26 Nafuꞌnagana-gatama Anumaya Kotiꞌa tamakaila hapalilamatenea yupahe tamakesa havi havi hutama haviho. Tamakai amuꞌnopina ma mopale kanale haviꞌyaꞌami hanea veaꞌnene mopale tokiyaꞌamima hanea veaꞌnene amakima hanea veaꞌmogami nafaꞌneyagaene kasagoꞌya omainayane.
1CO 1:27 Omainagi haviꞌyaꞌami hanea veala amakaye hisiafe Anumaya Kotiꞌa ma mopale yafe haviꞌyaꞌami omalenea veaꞌnea hapalimatene. Tokiyaꞌamima hanea veaꞌmogamina amakaye hisiafe ma mopale fulu fulu nehaya veaꞌnea hapalimatene.
1CO 1:28 Ma mopafina amaki hanea veaꞌmogami tokiyaꞌamia heno fanane hugahe ma mopafina amaki omale veaꞌnene “Afa veaꞌne mainae.” huꞌya haya veaꞌnene hapalimatene.
1CO 1:29 Nago kanomoꞌa Anumaya Koti aufina augafa alino nehaino agaiꞌahena “Nagaya nagi hanea kano mainoe.” huno ohisiafene huno Anumaya Kotiꞌa aniꞌa augafa veala hapalimatene.
1CO 1:30 Anumaya Kotiꞌa agaiꞌa “Yisasi Kalaisiꞌene ailokaetama maiho.” huno nagopi alino ailokaelateneafe Yisasi Kalaisiꞌa tagaya havisuna tagu tagesamona aepaꞌa maine. Yisasiꞌa hulatenea yateti Anumaya Kotiꞌa havi yapitila ago miya hulateneno tagaifena “Fatago veaꞌne mainae.” huno hulateteno alu aotage auꞌava yama hisuna tokiyaꞌa tamine.
1CO 1:31 Ani yama hulatenea yafena Anumaya Koti avopina mage huno kae-maleneane “Nago kanomoꞌa agaiꞌa agima alisaga hisia agesama havinunoꞌa neꞌataleno Anumayamo agi alisaga huno musena hino.” huno humaineane.
1CO 2:1 Nafuꞌnagana-gatama nagaya nayona tamakaite Anumaya Koti kema me lamahapauvana haviꞌyaꞌami hanea veaꞌmoꞌya nehaya avamete huꞌna tamaipafinaga tamahaisifa kea tamahaopainoe.
1CO 2:2 Nagaiꞌnia naguꞌafinaga mage huꞌna havimainoe “Nagaya tamakai amuꞌnopima mainoana nagoꞌa yafena tamahaopaigahue. Nagaya Yisasi Kalaisiꞌa yafaga yosaleꞌma falimainea yafekeꞌya tamahapaigahue.” huꞌna humainoe.
1CO 2:3 Hagoteꞌna tamakaiꞌenema mainoa kanafina foli foli huꞌna koli nehuꞌna atali huꞌna mainoe.
1CO 2:4 Atali nehuꞌna Anumaya Koti tokiyahe havitama tamakupi maletama tamametiti hisae huꞌna ma mopafi haviꞌyaꞌami hanea veaꞌmoꞌya nehaya augafa kea ohunogi Avamuꞌmo tokiyaleti kea huhaleꞌna tamahapai-mainoane. Haviꞌyaꞌami hanea veaꞌmoꞌya nehaya kehena tamametitia ohisae huꞌna Yisasifena kanale mono kea humainoe.
1CO 2:6 Anumaya Kotina amakuꞌa amitafa huꞌya akave nemalaya veaꞌmogamifena tokiyaꞌage kea nehuanagi ma mopafi haviꞌyaꞌami hanea veaꞌmogami augafa kene, ma mopafi kava yagai-mainaya veaꞌmoꞌya nehaya augafa kene, fanane hisia kea nohue.
1CO 2:7 Aꞌao, tagaya Anumaya Koti agu agesamoꞌa falaki-mainea ke tamahanepaune. Anumaya Kotiꞌa ma mopama talo ohunenoꞌa hagoteno nago kea humainegeno falakino haneanagino menia lagaya Anumaya Kotitegati tokiya hale yamaꞌa alisunafe mani kemoꞌa falote humainone.
1CO 2:8 Ma mopafi kava vayaꞌmoꞌya mani kemona aepaꞌa ohavinae. Mani kema havimainasina tokiya hale yamo aepaꞌa hanea kanoa, Anumayamona, yafaga yosalela nilia heꞌya oꞌasaisine.
1CO 2:9 Anumaya Koti avopina mage huno kae-malenayane “Taulagamoꞌa oꞌagenea yaꞌene tagesamoꞌa ohavinea yaꞌene veaꞌmogami amaku amakesafiti omalenea yaꞌenena Anumaya Kotina amakuꞌama aminaya veaꞌmogamife talo tala humalene.” huꞌya kae-malenayane.
1CO 2:10 Veaꞌmoꞌya oꞌagageno falakino hanea kea Anumaya Kotiꞌa agaiꞌa Avamuꞌaleti taveli-maine. E, Alu Aotage Avamuꞌmoꞌa mukiꞌa yana atiyeno Anumaya Kotina falakino hanea agu agesaene agemaine.
1CO 2:11 Hana veaꞌmoꞌya nago kanomoꞌma agesama nehavia yana agemaine? Aꞌao oꞌagenagi agaiꞌa agupima mainea agu nafaꞌmokeꞌya agemaine. Ani kava huno nagoꞌa veaꞌmoꞌya Anumaya Kotiꞌa agu agesafima havia yana ohavinagi agaiꞌa Avamuꞌmokeꞌya agemaine.
1CO 2:12 Anumaya Kotiꞌa ma mopafi veaꞌmoꞌya nehaviya amaku amakesa notamigi tagaiꞌma Anumaya Kotiꞌa taminea kema havilama huta havisunafe ani Alu Aotage Avamula tamigeta avale-mainone.
1CO 2:13 Tagaya mani kea huhaleta nehune. Ma mopale kanale haviꞌyaꞌami hanea veaꞌmogami ke kana huta nohunagi Avamuꞌmo tahapaiya kegeꞌya tamahanepaunageno ani Avamuꞌma amakupi mainea veafekeꞌya sili huta hamanepaune.
1CO 2:14 Hamanepaunanagi Alu aotage Avamuꞌmoꞌma amakupi omainesia veaꞌmoꞌya ani Avamuꞌmo kea haviꞌya akave malesaya amukoꞌamia omaleneanagiꞌya “Mani kea havigu-nagu ke nehae.” huꞌya nehuꞌya Avamula oꞌavalenayanagiꞌya aepaꞌa havisaya amukoꞌamia omalene.
1CO 2:15 Alu Aotage Avamuꞌma amakupi mainea veaꞌmoꞌya mukiꞌa aepaꞌa haviya yamona fako hugahayanagi nagoꞌa veaꞌmoꞌya agaifena “Naꞌa kano mainane.” huꞌya fako hu oꞌategahae.
1CO 2:16 Anumaya Koti avopina mage huno kae-maleneane “Anumayamo nehavia agu agesa hanaꞌa veaꞌmoꞌya havilineꞌya Anumayamo aliꞌya alisia yafena hapaigahae?” huno humaineane. Naꞌa ohugahagi Kalaisiꞌa agai agu agesa ago tahapaino tamigeta agai kemo aepaꞌa havilinone.
1CO 3:1 Nafuꞌnagana-gatama tamakaiꞌene maineꞌna, Avamuꞌmoꞌma amakupi mainea veaꞌmoꞌya havisaya avamete kea ohunogi tamakaya atafa lamaipale, osi nafaꞌne kana hutama mainageꞌna Kalaisi humainea auꞌava yafema nohavinaya veaꞌmogami avamete kea tamahapai-mainoe.
1CO 3:2 Tamakaya tokiyaꞌage kema hisua kea ohavigahayanagiꞌna nu tamamisua avamete ke tamahapai-mainoe. Meni kanafiꞌenena aniꞌa huꞌna nu tamamisua avamete ke tamahanepauve.
1CO 3:3 Naꞌafene atafa lamaipamo akave maletama mainetama tamafu-tamakana-gamifena tamaipa haviya humatetama kema vaimatayana atafa lamaipa hanegetama ma mopafi veaꞌmoꞌya nehaya kavakeꞌya nehae.
1CO 3:4 Nagoꞌamogatama “Polo tahapaiya kele akave nehune.” hutama hagetama nagoꞌamogatama “Tagaila Apolosi tahapaiya kele akave nehune.” hutama nehae. Ani kavaꞌma nehayana ma mopafi veaꞌmoꞌya nehaya avamete kava nehae.
1CO 3:5 Apolosiꞌa hanaꞌa augafa kanoe? Nagaya Poloꞌna hanaꞌa augafa kanoe? Taꞌagaya aliꞌya kanolatake mainoꞌe. Anumaya Kotiꞌa alu aliꞌya lu aliꞌya taꞌamigetaꞌa neꞌaluꞌe. Ani aliꞌyateti tamakaya Yisasifena havitama tamakupina maletama lamametitia humainae.
1CO 3:6 Nagaya Yisasi kea tamakupina fai-maletogeno Apolosiꞌa timaꞌa hefino taki-maleneanagi Anumaya Kotiꞌa agaiꞌage alino aifalo higeno hagemaine.
1CO 3:7 Naꞌa humainegi avina yama fai-malenea kanomo agiene tima taki falu hu-malenea kanomo agienena omalegi avina yama alino aifalo higeno hage-mainea kanoa, Anumaya Koti agigeꞌya alisaga hisune.
1CO 3:8 Anumaya Koti kema faimalenea kanoene tima takino falu humalenea kanoene nago aliꞌya alimainaꞌe. Ani aliꞌyatetila tolemogania ali-mainaꞌa avamete anonaꞌania aligaꞌe.
1CO 3:9 Taꞌagaya Anumaya Kotiꞌene ailokaetaꞌa aliꞌya kanolatamaꞌa mainoꞌe. Tamakaya Anumaya Kotina hoyaꞌa kana hutama mainae. Tamakaya Anumaya Kotina nomaꞌa kana hutama mainae.
1CO 3:10 Tamakaya Anumaya Kotina nomaꞌa mainageꞌna Anumaya Kotiꞌa kayone yamaꞌaleti nagaya no ki aliꞌyate kava kano maineꞌna yafateti tunagea ago ayemalenogeꞌya nagoꞌa veaꞌmoꞌya nona negiye. Mukiꞌa veaꞌmoꞌya amakesa havilama huteꞌya kanaleꞌya huꞌya kiho.
1CO 3:11 Anumaya Kotiꞌa tokiyaꞌage no yosamoꞌma noma atafa nehia yosa Yisasi Kalaisina agaiꞌage ategeno maineanagiꞌya nagoꞌa veaꞌmoꞌya alu tokiya noma atafa hisia yosa oꞌayegahae.
1CO 3:12 Nagoꞌa veaꞌmoꞌya haya keleti ani nona tokiyaꞌage huno falu otesia yosaletiꞌene u yosaletiꞌene yafatetiꞌene negiyanagi nagoꞌa veaꞌmoꞌya hofaletiꞌene vitimo alapaletiꞌene aupaꞌa kasalisia yateti negiye.
1CO 3:13 Negiyanagino Anumaya Kotiꞌa kaiyekema hulatesia kanafina mukiꞌa veaꞌmogami aliꞌyamo aepaꞌa haote haote huno atamo anefeꞌmo avame humateno amakege amakege hutesigeꞌya aliꞌyama ali-mainesaya aliꞌyamo aepaꞌa fufu yate ali falote hugahie.
1CO 3:14 Nagoꞌa veaꞌmoꞌya tokiyaꞌage u yosaleti kimalenaya avamete huꞌya ki-malenesaya noꞌamimoꞌma atama otesigeno kanaleꞌma huno hanesiana ani veaꞌmoꞌya kanale miyana anonaꞌamia aligahae.
1CO 3:15 Aligahagi nagoꞌa veaꞌmoꞌya ki-malesaya noꞌamimoꞌma atama lesigenoꞌa mukiꞌa aliꞌyamaꞌamimoꞌa fanane hugahianagi atafiti veaꞌma ali vati huna avamete huno amakaiꞌami amaku amamena aligatisigeꞌya maigahayanagiꞌya anonaꞌamia oꞌaligahae.
1CO 3:16 Tamakaya Anumaya Kotina alu aotage nomaꞌa mainageno Anumaya Kotina Alu Aotake Avamuꞌamoꞌa tamakupina maine. Tamakaya ani yana havilama ohunao?
1CO 3:17 Nagoꞌa veaꞌmoꞌya Anumaya Kotiꞌma mainea nomaꞌama ali haviya hisayana Anumaya Kotiꞌa amakaina ali haviya humategahie. Anumaya Koti nomaꞌa alu aotage nona haneanagitama tamakaya ani nona mainae.
1CO 3:18 Havigu tamakaitamihe havige ayemavataga hisagi. Nagoꞌamogatama “Mopafi veaꞌmogami haviꞌyaꞌmiene veaꞌne mainone.” huꞌya hisayana naꞌa amaku amakesa ataleteꞌya amakesa nohaviya vea kana huꞌya maisayana kanale haviꞌyaꞌmiene veaꞌne maigahae.
1CO 3:19 Ma mopafi haviꞌyaꞌami hanea veaꞌmoꞌya Anumaya Koti aulagafina amakesa nohaviya veaꞌne kana humainae. Anumaya Koti avopina mage huno kae-maleneane “Ma mopale haviꞌyaꞌamiene veaꞌmoꞌya savaleꞌage nehageno Anumaya Kotiꞌa veaꞌmoꞌya kalifuma hanagi-maleneꞌya nehaꞌyafiya avamete huno amatafa nehie.” huno humaineane.
1CO 3:20 Nagoꞌene mage huno humaineane “Anumayamoꞌa haviana ma mopale haviꞌyaꞌamima hanea veaꞌmoꞌya nehaviya amaku amakesamoꞌa afa ya kana humaine.” huno humaineane.
1CO 3:21 Na yafe “Ma veala kanale veaꞌne mainae.” hutama amakia alisaga ohiho. Anumaya Kotiꞌa mukiꞌa yana tamamine.
1CO 3:22 Poloꞌnagi, Apolosiꞌagi, Pitaꞌagi, ma mopaene tamahaimuꞌene, fali yaꞌene, meni kanaene, haenagama falote hisia kanaene, mukiꞌa yana Anumaya Kotiꞌa tamamine.
1CO 3:23 Tamamigetama tamakaya Kalaisi ayapi maigeno Kalaisiꞌa Anumaya Koti ayapi maine.
1CO 4:1 Yisasi kema tamahanepauna vayaꞌmogatihena mage huꞌya hisae “Yisasi Kalaisina aliꞌya vayaꞌamoꞌya maineꞌya Anumaya Kotiꞌa nayoma falaki-malenea kea yagai-maineꞌya huhaleꞌya nehae.” huꞌya hisae.
1CO 4:2 Kavayagaisaya veafena “Efi efi hutama aliꞌyana aliho.” huno humaine.
1CO 4:3 Tamakayaene nagoꞌa veaꞌnene nagaiꞌma fako hutama nagaya kanaleꞌya huꞌna tamahanepauvo havi kava huꞌna tamahanepauvo hutama hisaya yafena kolia nohue. Nagaiꞌnia nehua yafena nagaiꞌniꞌa fakoa nohugi Anumayamoꞌa agaiꞌa fako hunategahie.
1CO 4:4 Nagaya agoana “Fatago aliꞌya kano mainoe.” huꞌna nehuanagi Anumaya Koti aulagafina fatago aliꞌya kano maino ifi omainoe huno Anumayamoꞌa agaiꞌage “Naꞌa humainane.” huno nagaila fako hunenate.
1CO 4:5 Kaiyekema hulatesia kanamoꞌa yaufa falote ohuneanagitama tamakaya veala alitama “Naꞌa kavala havi kava nehae.” hutama hu oꞌamateho. Anumayamo esia kanafina agava mainesageno mukiꞌa veaꞌmoꞌya kefo yama, hani yapi falaki-mainea yana, Anumaya Kotiꞌa hale yate alino falote hugahie. Anumayamoꞌa agaiꞌa amahaote amahaote amakuꞌa amaketeno “Kanale humainao kefo ya humainao.” huno agaiꞌa alino fako huteno veaꞌmogamina humainesaya avamete Anumaya Kotiꞌa agaiꞌa muse yana amamigahie.
1CO 4:6 Nafuꞌnagana-gatama tamakaya havisae huꞌna nagaiꞌene Apolosiꞌenema alitama fako ohisaya kea nehuꞌna kaana tamave-nelue. Anumayamo avopifena mage hie “Okaenesaya kea ohiho.” huꞌya humainaya kea havitama akave nehutama nagoꞌa veaꞌmogami amakia alisaga nehutama nago veaꞌmogami amakia ali haviya nehaya kavala ohiho.
1CO 4:7 Tamakaya mukiꞌa veaꞌma mainaya avamete hutama mainagi aluꞌa avametela hutama oꞌamakasenagi mukiꞌa yana Anumayamoꞌa tamamineanagi naꞌa higetama “Nagaiꞌniꞌa ani yana ali falote nehue.” hutama tamakesa havitama tamaugafa alitama nehaiye?
1CO 4:8 Tamakaya ma ke hutama nehao? “Tagaitigekeꞌya Yisasi kema havuna kea hai havimainone. Poloꞌene Apolosiꞌene mani kea tahapaiꞌageta ohavinonagi tagaitigeꞌya hai havilineta sauve veaꞌne mainone.” hutama nehao? Ani kavaꞌma humaineleꞌasina taꞌagaiꞌenena aniꞌa hutaꞌa sauve vaya kana hutaꞌa mainoꞌaleꞌasine. Tamage tamakaya ani avamete veaꞌnea omainae.
1CO 4:9 Nagaya ma nagesa nehavue Anumaya Kotiꞌa tagaila Aposolo vayala haenagalafa maisunafe hulatene. Nayoma kame vayaꞌma hamaegahe amavaleꞌya kumate emainageꞌya amaketeꞌya kigi hu neꞌamataya avamete kava nehageta tagaya haenagalafa vaya kana huta mainonageꞌya “Hamaesageꞌya falisae.” huꞌya hageꞌya veaꞌmoꞌyaene ensole vayaꞌene tagaila nelageꞌya kigi hunelatae.
1CO 4:10 Tagaya Yisasi Kalaisi aliꞌya neꞌalunanagita aifo vaya kana huta mainonagi tamakaya Kalaisiꞌene ailokaetama mainetama kanale havi haviꞌyatami hanea veaꞌne mainao? Tagaya tokiyatia omale vaya maunagetama tamakaya tokiyatami hanea veaꞌne mainao? Tamakai tamakia alisaga nehayanagi tagaifena “Otahaiya vaya mainae.” huꞌya nehae.
1CO 4:11 Yisasi kema hamanepaunafe nayoꞌene meni kanafiꞌene neyafena lagala neleno tifena nelageno nehie. Kenatia haviya nehuno faesuna noꞌenena omalegeta vaiyatete nehunageꞌya kaꞌyo kevea nelamiye.
1CO 4:12 Kaveti ali falote hisuna yafena tayapitila tusiꞌa aliꞌya neꞌalune. Vayaꞌmoꞌya tagaila hu-haviya hu nelatayanagi anonaꞌa kanale manua neꞌamamune. Tagaila tusiya huꞌya ali haviyana hulatayanagi tagaya tokiya vaita mainone.
1CO 4:13 Hu-haviya hu nelatayanagi anonaꞌamia ako huta falu hamaisifa ke huneꞌamatone. Nayoꞌene meniene vayaꞌmoꞌya tagaifena “Kasali-mainea yama halafi hutalaya avamete vaya mainae.” huꞌya nehae.
1CO 4:14 Mani kea havitama tamakaye hisie huꞌna nokaogi nagaila nahaiya nafaꞌneyagamo-gatama ali lamakafa hisue huꞌna mani kea kae-malenoe.
1CO 4:15 Kalaisima akave visaya kea teni tauseniꞌa (10,000) vaya hulamave-lisayana nagaya nagaiꞌnige nagoke nelamafaꞌna mainoe. Yisasi Kalaisi kanale mono kema tamahapaugetama havitama Anumaya Kotina tamakuꞌa amitafa hageno agaiꞌa nafaꞌneyaga lamateneafe nagaya nelamafaꞌna mainoe.
1CO 4:16 Mainoa yafe nagayama nemauva auꞌava kavala agetetama akave maletama maiho.
1CO 4:17 Ani yafe Timotina hutogeno tamakaite umaine. Timotiꞌa Anumayatimoꞌene ailokaeno maineno kanale aliꞌya neꞌalianagino nagaila nahau nayamopafi nenahaiya nafaꞌneꞌniꞌa maineafe nagayama Yisasi Kalaisiꞌene ailokaeꞌna maineꞌna vai neꞌayoa auꞌava yafena tamahapaiteno ani kate visaya kea huno tamakesa hugahie. Mukiꞌa kumate uvana Yisasife haviꞌya amakupi malenaya veaꞌmogamina mani kea hamanepauvane.
1CO 4:18 Nagoꞌamogatama nagaifena “Omegahie.” hutama nehutama tamakaitami tamaugafa alitama nehaiye.
1CO 4:19 Nehaiyanagi Anumayamoꞌa hainegenoꞌma “Vuo.” huno hunatesigeꞌna iva aupaꞌa ago egahue. Neꞌeꞌna amakaiꞌami amaugafa aliꞌya nehaiya vayala mo neꞌamakeꞌna nagaifema nehaya kea haviteꞌna tokiyaꞌamiene agegahue.
1CO 4:20 Anumaya Kotiꞌma kava yagai-mainea yamo aepaꞌa keꞌagela omalenegi Anumaya Kotina tokiyaꞌa alita maisuna yamoꞌenena aepaꞌa hane.
1CO 4:21 Tamakaila na kava hisuafe nelamahaiye? Kelama-kisua kema hisua yafe esuo? Ifi ako huꞌna tamakaifena aluya huno nahau nayamopafi nenahaiya kava hugahe esuo? Ani yafena lamakesa nehavitama etetama fatago hutama maisayana tamakaifena nahau nayamopafi nahau-mainenageꞌna evaꞌyi hano.
1CO 5:1 Nago kema falote higeꞌna havuana Yisasi kema nohaviya veaꞌmoꞌya nohaya kefo yana tamakai veapitila nago veaꞌmoꞌya maitama nehae. Nago kanomoꞌa nefa aꞌene kumai heno alitea tamavagea hageꞌna havi-mainoe.
1CO 5:2 Havuanagi naꞌa higetama tamaugafa alitama nehaiye? Naꞌa higetama tamahauna hutama tamakayea nohigetama tamakaipitila ani kanoa anati noꞌatalae.
1CO 5:3 Nagaya alule mainoanagi afaꞌa nagu namemoꞌa tamakaiꞌene mainegeꞌna ani kefo yama humainea kanomofena “Kefo ya nehie.” huꞌna Yisasi Kalaisi agile nehue.
1CO 5:4 Anumayatimoꞌa Yisasi agile alitalu hutama mainageno nagaila nagu namemoꞌene Yisasi Kalaisi tokiyamoꞌene tamakaiꞌena maigahie.
1CO 5:5 Maigahigi Anumayatimoꞌa kaiyekema hulatesia kanafina ani kanomo agu amena aligatisiafene hutama menia Satani ayapi ateho. Sataniꞌa augafaꞌage haesigeno age haꞌyema nehia yamaꞌa haꞌno hisigeno “Kefo ya nehue.” huno aguꞌa aiyahae huno eteno eno.
1CO 5:6 Tamakaya tamaugafama alitama nehaiya yana kanale ohunea kava nehae. Tamakaya ma yafena ohavinao? Taꞌnefaleti kai hame maya talo hageno osi kanoꞌamo halegisia yana maleteno alino havigu hinageno mukiꞌa taꞌnefafi ute ete hinageno haenaga mukiꞌa taꞌnefamoꞌa halenegie. Anima hale negia avamete huno osi kefo ya kanoꞌamoꞌagi mukiꞌa veapinaga ute ete hisigeno ala kefo yana ali falote hugahie.
1CO 5:7 Hugahigi kaihamema hale negia atafa yana kai hamepitila alitama hagaꞌyu hu neꞌatalaya avamete fatago kavakeꞌya huta maisunafene hutama tamakaipitila kefo yana alitama hagaꞌyu hutaleho. Nayona veaꞌmoꞌya kefo yaꞌamihe haviꞌya sipi sipi hemainaya avamete huno Yisasiꞌa tagayama fatago huta maisuna yafe fali-mainegeta kefo yana ohisuna veala maisune.
1CO 5:8 Ani yafe nayona veaꞌmoꞌya sipi sipia heꞌya muse humainaya avamete huta musena nehuta hale negia yana, vea ali haviya humatesuna kavaꞌene kefo yaꞌene neꞌataleta fatago huta tole lagesa ohavita kelamage kegeꞌya huta maisune.
1CO 5:9 Nagoꞌma kae-malenoa avopina mage huꞌna humainoe “Kumai nehesaya veaꞌnenena tokaetama omaiho.” huꞌna kae-malenoe.
1CO 5:10 Yisasi kema nohaviya veaꞌmoꞌya kumai nehaya veaꞌnene amakaiꞌamiꞌahekeꞌya amakesa haviꞌya “Nagaiꞌniꞌa mukiꞌa yana alisue.” huꞌya nehaya veaꞌnene havige huꞌya musufayama nehaya veaꞌnene ago fali-mainaya veafe “Anumayati mainae.” huꞌya amakisana neꞌvaiya veaꞌnene mukiꞌa mopale mainayafe ani veaꞌnene tokaetama omaiho huꞌna hisugetama hanate haote yatela maisae? Yisasi kema nohaviya veafena mani kea ohunoe.
1CO 5:11 Ohunogi nagaya Yisasina amakuꞌa amitafa humainaya tamafu-tamakanaꞌya kumai he kavaꞌene agaiꞌahe agesa havino “Mukiꞌa yana nagai ya hapaesie.” huno nehisia kavaꞌene ago fali-mainaya veafe “Anumayati mainae.” huꞌya amakisana neꞌvaiya kavaꞌene vayaꞌamihe hu-haviya humate kavaꞌene havili neꞌya aneginagi nehaya kavaꞌene musufayama nehaya kavaꞌenema tamafu-tamakanaꞌyama hisagetama amakaiꞌenena ailokaetama maitama kavela oneho huꞌna hulokiya vaiꞌna avona kae-malenoe.
1CO 5:12 Anumayamo akave nomalaya veala fako humatesia yana nagai aliꞌyana omalegi Anumaya Kotiꞌa agaiꞌa aliꞌyanagino kaiyekea humategahie. Tagaiꞌene maineꞌya Yisasina amakuꞌa amitafa humainesaya veala kanaleꞌya hutama fako hutama “Kefo yana ohiho.” hutama amaya hisaya aliꞌyatamia hanegeno Anumaya Koti avopina mage huno kae-maleneane “Tamakaiꞌene maineno kefo yama nehisia kanomona henati-taleho.” huno kae-maleneane.
1CO 6:1 Nagoꞌa nelamafuꞌyaene kema vaitetama agaiꞌma kaiyekema hutegahena naꞌa higetama Anumayamo kema akave nomalaya kava vayatela amavaletama neꞌvae? Ani kavala ohiho. Yisasina amakuꞌa amitafa humainesaya vayate vigeno ketamia alino kanale huno fatago hulamateno.
1CO 6:2 Yisasi anagaꞌmoꞌya haenagaꞌa ma mopale veaꞌmogamina kaiyekea humategahae huꞌya humainaya kea ohavinao? Mukiꞌa veala kaiyekea humategahagi osi kea fako hisaya tokiyatamia hane huꞌna nehue?
1CO 6:3 Tamakaya ohavinao? Haenagaꞌa tagaya ensole vayaꞌmogami kaiyekea humategahunagi ma mopale yana osi yanagitama tamakaya afaꞌa fako hugahae.
1CO 6:4 Nago yama falote hisia yupa kema fako hugahena naꞌa higetama Anumayamo akave nomaleꞌya mono nopi amaki omale vayatela kea alitama neꞌvae? Ani kavaꞌma hayana havi kava nehae.
1CO 6:5 Tamakaipina tole nelamafugania kema vaisaꞌagenoꞌa tamakaipina nagola kanale havi haviꞌyaꞌa hanea kanoa amuꞌnoꞌanifi hetino keꞌanima fako hisia kanoa omaineo? Mainegahie. Tamakaye hisifa kea nehue.
1CO 6:6 Naꞌa higetama ani kanomotela anavaletama oꞌutama nelamafuganina kaiyekema hunategahena Anumayamo akave nomalaya kanomotela anavaletama neꞌvae?
1CO 6:7 Ke vai yatamima falote higetama kaiyekema humategahe vayana havi kava nehae. Nago kanomoꞌa kagaila havi kavaꞌma hunegatesiana “Afa yane.” nehuka kaiyekea hu oꞌateka yuna heka maiteꞌasina kanale hileꞌasine. Nago kanomoꞌa kagaipiti musufayama higeka “Afa yane.” nehuka kaiyekea hu oꞌateka maiteꞌasina kanale hileꞌasine.
1CO 6:8 Kanaleꞌya hugahe hianagi ani kavala ohutama tamakaya havige hutama nelamafugamina havi kava huneꞌamatae.
1CO 6:9 Kefo yama nehaya veala Anumaya Kotiꞌa kava yagai-mainea kumatela ohaigahae huno humainea kea ohavinao? Ani kehena havilama hutetama havige hisaya kea ohaviho. Ani kefo yama nehaya veala Anumaya Kotiꞌa kava yagai-mainea kumatela ohaigahae moli huliteꞌya nehuꞌya kumai nehaya veaꞌnene ago fali-mainaya vayafe “Anumayati maine.” huꞌya amakisana neꞌvaiya veaꞌnene alu kanomo aꞌnema amavayu nehaya vayaꞌene ve amafaluꞌyaene moli nehaya vayaꞌene Anumaya Kotiꞌma kava yagai-mainea kumatela oꞌugahae.
1CO 6:10 Musufa yama nehaya veaꞌnene alu kanomo yateꞌma age hamaꞌye nehaya veaꞌnene havili neꞌya aneginagi nehaya veaꞌnene nagoꞌa veafe hu-haviya nehaya veaꞌnene havige huꞌya musufa yama nehaya veaꞌnene Anumaya Kotiꞌma kava yagai-mainea kumatela amaugosa tamage huno omalegahie.
1CO 6:11 Tamakaila nagoꞌatamimoꞌya nayona ani avamete kefo ya nehageno Anumayatimoꞌa Yisasi Kalaisi agiletiꞌene Anumaya Koti Avamutetiꞌene kefo yatamia ago aye haꞌmi-talegetama alu aotage veaꞌne maigeno Anumaya Koti aufina “Fatago veaꞌne mainae.” huno alino kanale hulamatene.
1CO 6:12 “Mukiꞌa yama hisuna kavala kahe-okineanagita afaꞌa hugahune.” huꞌya nehayanagi nagaya mage huꞌna nehue “Mukiꞌa yamoꞌa laya ohutafa huno laya ohugahie. Mukiꞌa yana afaꞌa hugahuanagi ani yamoꞌa nofi hunate yafenagiꞌna nagaya ani kavala ohugahue.”
1CO 6:13 “Anumaya Kotiꞌa kave nesunafene huno taipa talo huno nesuna kavela talo humaleneanagita afaꞌa negahune.” huꞌya nehayanagi Anumaya Kotiꞌa haenagaꞌa kaveꞌene taipaene alino fanane hugahie. Moli huliteta huta kumai hesunafene huno Anumaya Kotiꞌa veaꞌmogati laugafa talo ohunegi Anumayamoꞌene ailokaeta mainesunageno ani laugafa agaiꞌa kava yagaisiafene huno talo hulatenea yafe moli huliteta huta kumai he kavala ohisune.
1CO 6:14 Anumaya Kotiꞌa tokiyaꞌaleti Yisasina fali-mainefitila alino hetiteneanagino tagayama falisunagenoꞌa aniꞌa huno alino hetilategahie.
1CO 6:15 Nagi ohavinao Kalaisiꞌenema mai hapaita mainonageno tagai taugafamoꞌa Kalaisi aiya, aya, aulaga, agesa, kana huta mainone. Kalaisi augafa mainonagi hanaꞌa huta Kalaisi augafa kumai nehaya aꞌnenena alita mai hapaisune? Aꞌao aniꞌa ohisune.
1CO 6:16 Anumaya Koti avopina mage huno kae-maleneane “Alavema mainaꞌana nagoke anaugafa hane.” huno kae-maleneane. Naꞌa humaineanagi nago kanomoꞌa kumai nehea aꞌene noma faeyana agaiꞌene mai hapaiꞌageno nagoke anaugafa kali-mainaꞌe. Ani yafena ohavinao?
1CO 6:17 Nago anaugafa kali mainaꞌanagi Anumayamoꞌene mai hapaino mainea kanomoꞌa nagopi maineꞌana nagoke anamete mainaꞌe.
1CO 6:18 Nagi kumai heyafena kolia hutama ohutafa hiho. Mukiꞌa kefo yamoꞌa amega amaugafale yanagi kumai he yamoꞌa alino vea amaugafafina haviya nehia yafena tusiꞌa koli hutama ani kavala ohutafa hiho.
1CO 6:19 Anumaya Kotiꞌa agaiꞌa Alu Aotage Avamuꞌa ago tamamigeno tamakupina maineafe tamaugafamoꞌa Avamuꞌmona nomaꞌa haneanagino tamaugafa tamakaitami yana omalene. Ani kea ohavinao?
1CO 6:20 Anumaya Kotiꞌa ala miyateti tamakaila ago miya hulamateneafe tamaugafa kava yagaitama kanale auꞌava yakeꞌya hutama Anumaya Koti agia alisaga hiho.
1CO 7:1 Avoma kaetama nahavigaya kea tamahapaigahugi haviho. Nago kanomoꞌa aꞌnea ali oꞌatesiana kanaleꞌya huno maigahie.
1CO 7:2 Maigahianagi amaugafa age hamaꞌye huꞌya kumai he yamoꞌa ala nehiafe mukiꞌa vemoꞌya aꞌneꞌamia maitele hisigeꞌya aꞌnemoꞌya veꞌamia maitele hisie.
1CO 7:3 Alavemoꞌya nehaya yana vemoꞌa aꞌamona “Aꞌao.” hu oꞌateno aꞌmoꞌa aniꞌa huno anauꞌamona “Aꞌao.” hu oꞌatesie.
1CO 7:4 Aꞌmo augafa agaiꞌa augafa omalenegi anauꞌamo yagai-mainea augafa hane. Aniꞌa huno vemo augafa agaiꞌa augafa omalenegi aꞌamo yagai-mainea augafa hane.
1CO 7:5 Naꞌa humaineafe vemoga akamoꞌene humo kavafena “Aꞌao.” hu oꞌategeno aꞌmoga anaukamoꞌene humo kavafena “Aꞌao.” hu oꞌato. Nagote tokaetana mainetana tanakesa havitana “Osi kana kanoꞌa humo kavala ohutaꞌa afaꞌa mainetaꞌa nunamuna hugahuꞌe.” hutana hisaꞌana kanale hugahianagi mukiꞌa kanafina ve alave humo kavala oꞌataleho. Atalesaꞌana Sataniꞌa ayelana-vataga hinagetana alu veleꞌene alu ateꞌene age lanahaꞌye hu yafenagi osiꞌa maigetana hiꞌo.
1CO 7:6 Mage huꞌna nehua kea nagaiꞌniꞌa mani kea nehugi Anumaya Koti kahegi kea nohue.
1CO 7:7 Nagi nagaiꞌnige maineꞌna aꞌma oꞌalinoa yama huꞌya mukiꞌa vayala maisaya yafe nenahaiyanagi Anumaya Kotiꞌa agaiꞌa aluꞌa luꞌa mai yana nagoke nagokeꞌmogatina tamigeta tahaote tahaote auꞌavate nemaune.
1CO 7:8 Neyaꞌvene munaꞌnene keto aꞌnenefe mani kea nehue nagayama aꞌma oꞌaliꞌna mainoa avamete huꞌya maisayana kanaleꞌya hugahie.
1CO 7:9 Hugahigi age hamaꞌyema hisaya yatela yagaisaya tokiyaꞌamima omalesiana ata lamale-yafenagi aꞌnea alitesageꞌya vea alisageꞌya hisae.
1CO 7:10 Alavemogatama kahegi kea, nagaiꞌnia nagesafitila nohugi Anumayamo humainea kea tamahapaigahue. Aꞌnemogatama vetamia oꞌamataletama kanaleꞌya hutama maiho.
1CO 7:11 Maigahayanagi vetamima amataletama vinutamahena alu velela omaiho. Afaꞌa omaisaya tamakesa hisigetama etetama vetamile etama nagoke tamaipale emaiho. Vemogatama atamimona tamakaitamia hu oꞌamateho.
1CO 7:12 Nagoꞌamogatamihena Anumayamoꞌa ohunea kea nagaiꞌniꞌa mage nehue. Yisasite ametiti humainesia kanomoꞌa Anumayamote ametiti nohisia aꞌmoꞌa neveꞌenema maisia agesama havisigenoꞌa neveꞌa “Nenataleka vuo.” huno oꞌataleno.
1CO 7:13 Yisasite ametiti hu-mainesia aꞌmoꞌa Anumayamote ametiti nohisia veleꞌma mainesigeno ani vemoꞌa aꞌamoꞌene maisia agesama havisigenoꞌa “Nenataleka vuo.” huno nevena hu oꞌateno.
1CO 7:14 Nagi Yisasite ametiti hu-mainesia aꞌmoꞌa Yisasite ametiti nohisia neveꞌenema maisiana ailokaeꞌana maisaꞌa yamoꞌa oniꞌyaꞌagela ohunegi ani vemoꞌa Anumaya Koti kema havisia yafe alu aotage kano maine. Yisasite ametiti hu-mainesia vemoꞌma Yisasite ametiti nohisia aꞌenema maisiana ailokaeꞌana maisaꞌa yamoꞌa oniꞌyaꞌagela ohunegi ani aꞌmoꞌa Anumaya Koti kema havisia yafe alu aotage aꞌne maine. Anumaya Koti aufima alu aotage veatalama omaisaꞌana nafaꞌneꞌamimoꞌya aniꞌa huꞌya oniꞌyaꞌagela haleꞌasinagi tamage huꞌya Anumaya Koti kema havisaya yafe alu aotage nafaꞌneyaga maigahae.
1CO 7:15 Mainageno Yisasite ametiti nohia api vefi atalesayana afaꞌa atalegahae. Atalesayana Yisasite ametiti hunesia veaꞌnefi mainaꞌa nofila ago aigalu hetalegeꞌya afaꞌa mainae. Anumaya Kotiꞌa falu huta maisunafe ke higeta agaitega emainone.
1CO 7:16 Yisasite kametiti hu-mainana aꞌmoga agaiꞌene maineka aya hisanageno anaukamoꞌa aguꞌa aiyahae hinageno Anumaya Kotiꞌa agu amena aligatisio? huka kagaya ohavinane. Yisasite kametiti hu-mainana kanomoga akamoꞌene maineka aya hisanageno akamoꞌa aguꞌa aiyahae hinageno Anumaya Kotiꞌa agu amena aligatisio? huka kagaya ohavinane.
1CO 7:17 Anumaya Kotiꞌa mukiꞌa veala noma maisaya yana fako huno amamineanagitama mukiꞌamogatama Anumayamoꞌa hapali-lamatenea yapi maiho. Mani kea Anumayamo anagala alule alule mo hamapai-mainogi haviho.
1CO 7:18 Anumayamoꞌma hapalimatenea kanafina nagoꞌa Yuta vayaꞌmoꞌya amaugafa taga hu-malenaya amafugula hanegeꞌya eteꞌya ani amafugula aye hananeꞌya fala okisae. Nagoꞌa vayamoꞌya Anumaya Kotiꞌa hapali-matenea kanaleti amaugafa taga ohunaya vayaꞌmoꞌya menia laga ohisae.
1CO 7:19 Taugafa laga nehaya yano taga ohunaya yano ani tole yamoꞌa afa ya hanegi Anumaya Koti kema havita akave malesuna yana kanale yanagino aepaꞌa hane.
1CO 7:20 Nagi mukiꞌamogatama Anumaya Kotiꞌa agoꞌma hapali-lamatenea kanafina no maiyatamia oꞌataletama nagoꞌene anile maiho.
1CO 7:21 Anumayamoꞌa hapali-lamatenea yupa nofipi mainetama miya oꞌalisaya aliꞌya* neꞌalitama mainageno ani aliꞌyana afaꞌa aliho. Aligahagi kava kanotamimoꞌa “Menia nofila huotamategahugi afaꞌa lamatalegahue.” huno hisigetama muse nehutama afaꞌa ugahae.
1CO 7:22 Anumayamoꞌa hapali-lamatenea yupa nofipi mainetama miya oꞌalisaya aliꞌya* neꞌalitama Anumayatimoꞌene ailokaetama mainayafe Anumayamoꞌa kefo yatamimoꞌma alino nofi hulamatenefitila ago alino kalu he-taleneafe nofipina nagoꞌene omainae. Omainagi nagoꞌa veala afaꞌa mainageno Anumayamoꞌa hapali-lamateneafe Kalaisiꞌa miyana oꞌalisia aliꞌya veaꞌneꞌa* tamage hutama maigahae.
1CO 7:23 Anumaya Kotiꞌa ala miyateti miya hu-lamategetama agai veaꞌne mainagi ma mopafi veaꞌmogami aliꞌya veaꞌnea omaisae huꞌna nehue.
1CO 7:24 Nafuꞌnagana-gatama Anumayamoꞌma hapali-lamatenea kanafina no maiyatamia oꞌataletama nagoꞌene Anumaya Kotiꞌa tamakaiꞌene mainesigetama “Hai mainone.” hutama maiho.
1CO 7:25 Anumaya Kotiꞌa kalagi ainategeꞌna tamagegeꞌya hisua kanogiꞌna nago kea hugahe hue. Anumayamoꞌa mani kahegi kea ohunegi nagaya nagesafiti nehue. Vene ofaenesaya munaꞌnene aꞌnene ofaenesaya veyagahe nehue.
1CO 7:26 Meni kanafina tusiꞌa kana yana falote nehiafe nagesa mage huꞌna nehavue neyaꞌvene munaꞌneyagaene mainaya avamete hutama maiho.
1CO 7:27 Nagi aꞌma ago alitenesana vemoga akamofena “Kataloe.” huka hu oꞌato. Aꞌma oꞌalinesana vemoga aꞌnea oꞌalio huꞌna nehue.
1CO 7:28 Nehuanagi aꞌma ali-tenukahena kefo yana omaleneanagika afaꞌa aligane. Vene ofaenesaya munaꞌnemoꞌya vele maisayana kefo yana omalenegi ma mopafi mainesaꞌageno tanakaipina kasagoꞌya kana yamo falote huyafenagiꞌna mani kea nehue.
1CO 7:29 Nafuꞌnagana-gatama ma mopamoꞌa aupa kanafi haꞌno hisia yafe meni kanaleti aepa hetama aꞌma atenesia kanomoꞌa aꞌamofena agesa ohavino aꞌama omai kano kana huno maisie huꞌna nehue.
1CO 7:30 Nagoꞌamoꞌya avima neꞌatesaya veaꞌmoꞌya osi kanoꞌa avia ateho. Musema nehisaya veaꞌmoꞌya osi kanoꞌa musena hiho. Afenoꞌamima miya nehisaya veaꞌmoꞌya oꞌali vea kana huꞌya maiho.
1CO 7:31 Mama mainona mopa aupa kanafi fanane hugahigi mopafi aliꞌyama neꞌalisaya veaꞌmoꞌya mani mopale yafekeꞌyana amakesa havi havi huꞌya omaisae.
1CO 7:32 Ma mopale yafema tamakesa kuꞌmoꞌma haya yafena nagaila nonahaiye. Aꞌma oꞌalino mainea kanomoꞌa Anumayamona haisia yafeꞌene aliꞌyamaꞌaene agesa havi havi huno nemaiye.
1CO 7:33 Nemaiyanagi aꞌama mainea kanomoꞌa ma mopafi yafena, aꞌamoꞌa musema hisiafene agesa havi havi huno nemaiye.
1CO 7:34 Nago kaiyaga Anumayamofena agesa nehavino nago agesamoꞌa aꞌamofena agesa nehavianagi keto aꞌnene vele oꞌunaya munaꞌnene Anumayamo aliꞌyafekeꞌya amakesa haviꞌya “Mukiꞌa taugafaene taguꞌaene Anumayamona alu aotage nomaꞌa hane.” huꞌya kava yagaiꞌya mainayanagi vele mainaya aꞌnemoꞌya anauꞌamimoꞌya musema humatesayafene huꞌya mopafi yafe amakesa nehaviye.
1CO 7:35 Mani kemoꞌa katilelamatesua kea nohugi tamaya hisuafe nehue. Kanaleꞌya hutama Anumayamofena tamakesa havi havi hutama nago yamo tamavayu huno atifi mafi ohisie huꞌna nehue.
1CO 7:36 Nago kanomoꞌa hage-malenesia aꞌamofena hagoteno “Afaꞌa tokaetaꞌa omaigahuꞌe.” huno huteno haenagaꞌa tusi haꞌye hisigeno “Kanale kavala hu noꞌatoe.” huno haisia kava huno ani munala alitesie. Alitesiana kefo yana ohugahie.
1CO 7:37 Nago neyamoꞌa aguꞌa amino hage-malenea aꞌamofena “Anumayamo aliꞌya alisuꞌafe afaꞌa aote maigahuꞌe.” huno agesa haviteno augafa age haꞌye hisia agu agesa hinageno kanaleꞌya huno kava yagaino “Afaꞌa aote maigahuꞌe.” hisiana kanale kava hugahie.
1CO 7:38 Ani yafe nago kanomoꞌa hage-malenesia aꞌama alitesiana kanale kava nehianagi nago kanomoꞌa hage-malenesia aꞌama ali oꞌatesiana tusiꞌa kanale kava hugahie.
1CO 7:39 Aꞌneyaga veleꞌma faitesageno anauꞌamoꞌma ofalino afaꞌa mainesigenoꞌa nagopi mai hapaino maineno aꞌmoꞌa ataleno alu vele oꞌvisie. Anauꞌamoꞌma falitesigenoꞌma “Alu kanole maigahue.” huno hisiana kanale hugahianagi Anumayamoꞌene mai-lokaeno mainesia vea alisie.
1CO 7:40 Aligahianagi nagaya nagesa havuana afaꞌama maisiana tusiꞌa muse hugahie huꞌna nehue. Manima hua kea Anumayamo Avamuꞌmo nahapaigeꞌna nehue.
1CO 8:1 Ago fali-mainaya vayafe “Anumayati maine.” huꞌya amakisana vaiꞌya afu neꞌamamiya yamo kea nagaya hugahe nehue. Tagaya nagoꞌa yafena havilinonanagi ani kanale haviꞌyatimoꞌa tamaugafa alita haisuna yanagi alu veafe tahau-tamayamopafi nelahaiya yana amaya huta ali tokiya vaimategahune.
1CO 8:2 “Mukiꞌa yana havilama hulinoe.” huno agesa havisia kanomoꞌa mukiꞌa yafema havilama hisia himamuꞌa omaleneanagino ohavine.
1CO 8:3 Ohavinegi nagoꞌa veaꞌmoꞌya Anumaya Kotina amakuꞌa aminesaya veala Anumaya Kotiꞌa amakaila ago amakelama humaine.
1CO 8:4 Ago fali-mainaya veafe “Anumayati maine.” huꞌya amakisana vaiꞌyama neꞌamiya afuma nesaya yafe nehugi haviho. Tagaya havunana ago fali-mainaya veaꞌmoꞌya ma mopafina tokiyaꞌamia omalene. Anumaya Kotiꞌa agaiꞌage nagoke Anumaya maineanagiꞌya kasagoꞌya Anumaya omainae.
1CO 8:5 Omainagi mopaleꞌene ikapinagaene afa anumaya kasagoꞌyama mainaleꞌasina tagaya tamage huteꞌasinagi “Nelafaꞌa agaiꞌage Anumaya Kotiꞌa maineno mukiꞌa yana talo humalegeta mainone. Nagoke Anumayatimoꞌa Yisasi Kalaisiꞌa maineno mukiꞌa yana talo huteno tagaiꞌenena talo hulateneanagita agaiteti tahaimula neꞌalune.”
1CO 8:7 Nagoꞌa veaꞌmoꞌya mani kea ohavineꞌya “Afa anumayayaga tamage huꞌya mainae.” huꞌya nehae. Nagoꞌa veaꞌmoꞌya Yisasife haviꞌya amakupi malayanagi amakuꞌamoꞌa tokiyaꞌagela ohuneafe ani afa anumayamoma aminaya afua neneꞌya mage nehae “Afa anumayamo kave nenonageno ani kaveꞌmoꞌa taguꞌamona alino haviya higeno oniꞌyaꞌage nehie.” huꞌya amakesa havimainae.
1CO 8:8 Nehaviyanagi kaveꞌmoꞌa Anumaya Koti avatela tavaleno otategahie. Ani afuma onesunana Anumaya Koti aufina havi veala omaigahunagi nesunana Anumaya Koti aufina kanale veaꞌnea omaigahune.
1CO 8:9 “Afaꞌa anumayamogami amamiya afua negahune.” hutama hisaya yafena kaꞌyeho. Havigu Yisasifena amakuꞌamoꞌa tokiya oꞌvainesia veaꞌmoꞌya ageteꞌya nesayana “Kefo ya nehune.” huꞌya havigu asaga hulaviyafenagi kaꞌyeho.
1CO 8:10 “Afaꞌa anumayayaga tamage huꞌya omainae.” hutama havimainaya veaꞌmogatama anima afa anumayamo amiya afuma malenesaya nopi mo nenesageno nagola Yisasifena aguꞌamoꞌa tokiya oꞌvainesia kanomoꞌa tamaketeno “Negahue.” huno hu yafenagi kaꞌye ho.
1CO 8:11 Ani yafe tamakaya “Havilama humainone.” hutama nehaya yatamimoꞌa, nagoꞌma aguꞌamoꞌa tokiya oꞌvainea nelamafufe huno Kalaisiꞌa fali-maineanagitama tamakaya avaletama havi kate atesageno ali haviya huyafenagi kaꞌye ho.
1CO 8:12 Ani yafe aguꞌamoꞌa tokiya oꞌvainesia nelamafuna kefo ya hutesageno tokiyaꞌa omalesia agu nafaꞌnea agata aisia havi kava huteyafenagi kaꞌye ho. Tamafu-tamakanana kefo yaꞌma hutesayana Kalaisiꞌene kefo yana huneꞌatae.
1CO 8:13 Ani yafe kavela nenoanagiꞌna nafuꞌnaganana havigu neteno havi kapi asaga hulavino visia yafenagiꞌna nagaiꞌenena nagoꞌene afua onegahue. Havigu nafuꞌnaganaꞌa kefo yapi uyafenagiꞌna ani kavala ohugahue.
1CO 9:1 Nago kanomoꞌa “Naꞌa ohuo.” huno natafa nehio? Aꞌao natafa nohie. Aposolo kanoa maino? E, ani kano mainoe. Nagaya Anumayatimo Yisasina agemaino? E, tamage Anumayamoꞌene ailokaeꞌna maineꞌna agai aliꞌya ali-mainoa aliꞌyateti lamakaya tamakuꞌa aiyahae nehae.
1CO 9:2 Nagoꞌa veaꞌmoꞌya nagaifena mage nehae “Aposolo kanoa omaine.” huꞌya nehayanagi Yisasi kema tamahapaugetama havitama tamakuꞌa aiyahae hageꞌya veaꞌmoꞌya nelamakeꞌya nagaifena “Anumayamoꞌene ailokaeno Aposolo kanoa maine.” huꞌya nehae.
1CO 9:3 Nagoꞌa veaꞌmoꞌya auꞌavaꞌniꞌama fako hisageꞌna nagaya mage huꞌna hugahue.
1CO 9:4 “Anumayamo aliꞌyana neꞌaluanagiꞌna kaveꞌene tiꞌenena afaꞌa alisuo?
1CO 9:5 Nagoꞌa Aposolo vayaꞌene Yisasi aganaꞌamoꞌyaene Pitaꞌene nehaya kava huꞌna Yisasima aguꞌa aminesia aꞌma aliteneꞌna avaleꞌna vaiyesuana ani yamoꞌa havi kava hugahio?
1CO 9:6 Panapasiꞌene taꞌagaitiꞌage Anumayamo aliꞌyana neꞌalitaꞌa taꞌagaitiꞌa moneleti kavela miya hutaꞌa nenoꞌe. Naꞌa higetama taꞌaya nohae?
1CO 9:7 Nagi ati vayala kamele ugahena amakaiꞌami moneꞌamileti kaveꞌamia kenaꞌamia miya nehao? Aꞌao. Hana kanomo hoya vai-maleteno ani hoyafitila kavela alino onene? Hana kanomo pulumaka kava yagaiteno haenagaꞌa nutimaꞌa onene? Ani kavala ohugahagi afaꞌa aliꞌya negahae.”
1CO 9:8 Veaꞌmoꞌya nehaya kavakeꞌya akave maleꞌna mani kea nehuo? Aꞌao, Anumaya Koti avopiꞌene ani kea huno kae-maleneane.
1CO 9:9 Mosese kahegi kefina mage huno kae-maleneane “Pulumakamoꞌa aliꞌyamaꞌa neꞌalino vitimo avina ayeno hagage huno onesie hutama avayalela nofila okinegeno aliꞌyana neꞌalino kavela neno.” huno kae-maleneane. Mani kea Anumaya Kotiꞌa pulumakamofe humaineo?
1CO 9:10 Aꞌao, tagaife humaine. Nagi hoyama alino humalenea kanomoꞌa kave nesia yafena agesa haviteno negafie. Hoyafitiꞌma nena humainesia kaveꞌma neꞌalisia kanomoꞌenena “Aliꞌyatiꞌaleti kavela nagopi mainetaꞌa negahuꞌe.” huꞌana aliꞌyana neꞌaliꞌe.
1CO 9:11 Nagaya Anumayamo kea huhaleꞌna tamahapaiteꞌna Avamuꞌmo avina yana hoyafina kali-malenogi ani hoyamoꞌma nena hisigeꞌnahena tamakaipitila kenaꞌniene kaveꞌniene kanalelagiꞌna alisuo ifi oꞌalisue?
1CO 9:12 Nagoꞌa vayaꞌmoꞌya tamakaipitila neꞌaligi nagaya amakase-mainoa yafena tamakaipitila alisuo oꞌalisuana? Kanalelagiꞌna aligahuanagi havigu Yisasi Kalaisi kanale mono kema havisaya katamia kahea kiꞌotamatesuafene huꞌna kavela oꞌaliꞌna maineꞌna mukiꞌa kana yana aluanagi “Kavela namiho.” huꞌna nohue.
1CO 9:13 Mono nopi aliꞌya neꞌaliya vayaꞌmoꞌya ani nopiti kaveꞌamia neꞌaliye. Anumayamofe haviꞌya sipi sipi heꞌya kae-salamana nehaya aliꞌya vayaꞌmoꞌya ani sipi sipifiti kaveꞌamia ali-mainae. Ani kea ohavinao?
1CO 9:14 Naꞌama hayana Yisasi kanale mono kema hamanepaiya vayafena Anumayamoꞌa mage humaineane “Mono ketamima havisaya veaꞌmoꞌya anonaꞌa kenatamia kavetamia tamamisae.” huno humaineane.
1CO 9:15 Humaineanagi nagaya “Namiho.” huꞌna ohunananagi menia “Namiho.” huꞌna mani avona nokaove. Yisasi kema tamahapauvana tamakaipitila kavela afaꞌa oꞌalinoa yafena muse nehua yaniꞌa haneafe ago faligahema husina kavefena tamahavigesua nagesa ohavusine.
1CO 9:16 Yisasi kanale mono kema huhaleꞌna nehuafenagiꞌna nagaiꞌni naugafa aliꞌna ohaigahue. Anumaya Kotiꞌa “Naꞌa huo.” huno tokiyaꞌage ke huno hunategeꞌna huhaleꞌna nehue. Ohuleꞌasina Anumaya Kotiꞌa muse ohigeno kana yana namileꞌasine.
1CO 9:17 Nagaya nagesafiti ani aliꞌyana noꞌalugi Anumayamo hunategeꞌna mani aliꞌyama alua yafena miya yaniꞌa oꞌaligahue.
1CO 9:18 Anumayamoꞌa hunategeꞌna huhaleꞌna nehua aliꞌyana afaꞌa neꞌaluanagiꞌna monema onamisaya yafena naipamoꞌa kanale nehie. Huhaleꞌna nehua yatetila miyaniꞌa alisua amukoꞌnia haneanagi oꞌalisua yatetila muse yaniꞌa hane.
1CO 9:19 Monema oꞌalua yafena nagoꞌa veaꞌmogami aliꞌya kanoꞌamia omainogi mukiꞌa veaꞌmoꞌya amakuꞌa aiyahae hisayafene huꞌna aliꞌya kanoꞌamia mainoe.
1CO 9:20 Yuta veaꞌmoꞌya Yisasi akave hisaya yafe amakaiꞌami nehaya kava huꞌna maineꞌna Yisasi kea hamanepauve. Kahegi kema haviꞌna akave malesugenoꞌa Anumayamoꞌa “Fatago kano mainane.” huno hunategahie huꞌna nohugi ani kema akave nemalaya veala Yisasi akave hisae huꞌna amakaiꞌene maineꞌna mani kemo akave maleꞌna Yisasi kea hamanepauve.
1CO 9:21 Kahegi kema ohavinaya veaꞌnene maineꞌna Yisasi akave hisae huꞌna amakaya haya avamete huꞌna Yisasi kea hamanepauve. Anumaya Koti kahegi kea akave maleꞌna Kalaisi akave nehuꞌna agai kea haviꞌna akave nemaloe.
1CO 9:22 Yisasife haviꞌya tokiya vaisaya amakuꞌa omalenesia veaꞌnene maineꞌna amakuꞌa ali lokiya vaimatesuafe tokiya nagu hanea kano omainoe. Nagoꞌa veaꞌmogami amaku amamena aligatisua yafe aluya huꞌna amakaiꞌamima amahaote amahaote nehaya kava huꞌna Yisasi kea hamanepauve.
1CO 9:23 Naꞌa nehisugeꞌya kasagoꞌya veaꞌmoꞌya Yisasi hulatenea kanale mono kea havitesageꞌna amakaiꞌene kanaleꞌya huꞌna maineꞌna musena hisue huꞌna nehue.
1CO 9:24 Ohavinao oꞌagase aꞌagase huꞌya amakasaya veaꞌmoꞌya neꞌaliya yana nagoke kanomoꞌa amakaseno agaiꞌage muse yana aligahie. Ani kava hutama tamaiyage tamaiyage nehigeno Anumayamoꞌa anonaꞌa tamamino.
1CO 9:25 Ani yokaloma nelaya veaꞌmoꞌya aluya huꞌya amaku amakesalela tokiya vaiꞌya kava neꞌyagaiye. Muse hisaya yama anonaꞌamia alisaya yafe kava yagaiꞌya mainageno amakasesia kanomoꞌa konagali yana aligahianagi ani yamoꞌa fanane hugahie. Fanane hugahianagi tagaya fanane ohisia kanale yana anonatia alisunafene huta tagu tagesalela tokiya vaita neꞌyagaune.
1CO 9:26 Ani yama alisua yafena naiyayege naiyayege nehuꞌna amakasesuafene huꞌna faitega moge mege nohue. Nayatetiꞌene amakasesua yokaloa neleꞌna nagaya faitega mo ai me ai nohugi nayatetila vaya amaugafale sili huꞌna amaikonelue.
1CO 9:27 “Fatago kate viho.” huꞌna veaꞌma hamanepaisuletila havigu nagaya havi kate visugeno Anumaya Kotiꞌa nagaila akaveꞌno hunatesigeꞌna kanale anonaꞌnia oꞌalisuafene huꞌna tusiya huꞌna “Naugafamo age haꞌye hia yana ohugahue.” huꞌna nagu nagesale kava yagaiꞌna mainoe.
1CO 10:1 Nafuꞌnagana-gatama Yuta taginagomo-gamifena tamakesa havisae huꞌna nehue. Mosese akaveꞌma umainayana nago siaꞌmoꞌa mukiꞌa aiso humateneno kana amaveligeꞌya kanaleꞌya huꞌya vayana mukiꞌamoꞌya Haesa tina lakae-mainayafe Moseseꞌene ailokaeꞌya maineꞌya siatetiꞌene hage litetiꞌene tima fale neamataya avame kavala humaine.
1CO 10:3 Mukiꞌamoꞌya ti omale kotega umaineꞌya nagoke ikapinagati kaveꞌene yafapiti falote hia alu aotage tiꞌene ne-mainae. Ne-mainagi ani yafana Kalaisiꞌe. Agaya maineno amakaiꞌene vaiyatete humaine.
1CO 10:5 Mukiꞌamoꞌya nayanagi kasagoꞌya veaꞌmoꞌya Anumaya Koti kea akave omalageno Anumaya Kotiꞌa musena hu oꞌamateno amatalegeꞌya nagoꞌa veala faligeꞌya amaugafa kaꞌme kopi atalegeno mopagopi haneme umaine.
1CO 10:6 Naꞌama humainaya kavala tagaiti hulamakesa hisunafe hu-mainayanagita amakaya humainaya avamete huta age lahaꞌye nehuna kavala ohisune.
1CO 10:7 Nagoꞌa veaꞌmoꞌya afa anumaya, amayateti talo humaleteꞌya amakuꞌa amiteꞌya Anumaya Koti kea atalenayane. Tagaya ani kavala ohisunafe Anumayamo avopina mage huno kae-maleneane “Afa anumayamofena muse huꞌya kaveꞌene tiꞌene neteꞌya amoa ayeꞌya aꞌnene yokaloa lemainae.” huno avopina kae-maleneane.
1CO 10:8 Nagoꞌa veaꞌmoꞌya kumai haya yateti nagoke yupa tueti tali tauseniꞌa (23,000) veaꞌne fali haꞌno humainae. Naꞌa humainayafe tagaya kumai kavala ohisune.
1CO 10:9 Anumayamofe “Ma kava huo.” huꞌya ayevataga hayafe osifaꞌvemoꞌya hamae haꞌno hageꞌya fali-mainagi aniꞌa huta Anumayamona ayevataga ohisune.
1CO 10:10 Nagoꞌa veaꞌmoꞌya “Anumayamoꞌa havi kava nehie.” huꞌya kalu kalu ke hutageno ensole kanomoꞌa nagoꞌa veala me hamaegeꞌya fali-mainayane. Tamakaya Anumayamofena kalu kalu kea vaioꞌateho.
1CO 10:11 Mukiꞌa anima falote humainea yana ageteta fatago huta maisunafene huno Anumaya Kotiꞌa avopina kae-maleneane. Tagaya menima mainona kanafina mopamoꞌa aupaꞌa fanane hugahe nehiafe mani kea haviteta kefo yana ohisunafene huno kae-maleneane.
1CO 10:12 Naꞌa humaineafe “Kanaleꞌya huta heti-mainone.” hutama nehisaya veaꞌmogatama havigu asaga hu laviyafenagi yagaitama maiho.
1CO 10:13 Yagaitama mainesageno kana yano “Havi yama hiho.” hunoꞌma ayelamavataga hisia yano falote hisiana ani yana tamakaitamige ayelamavataga nohigi mukiꞌa veala aniꞌa huno ayemavataga nehie. Naꞌa nehianagi Anumaya Kotiꞌa huno tokiya vaino humalenea kele tole agesa ohavinegi ani kele akave maleno tamaya hugahie. Ayelamavataga hisigetama “Tokiyaꞌnia omalene.” hutama hugahe hageno tokiya vaitama maisayafe Anumaya Kotiꞌa tusiya huno tamaya huno “Haegafa katela male viho.” huno tamave-ligahie.
1CO 10:14 Nahau-mainea nafuꞌnagana-gatama ago fali-mainaya veaꞌmogamife “Anumayati maine.” hutama amakisana neꞌvaiya yana ohiho. Anumaya Kotifekeꞌya muse huteho.
1CO 10:15 Tamakaya tamaku tamakesaene veaꞌne mainagi tamahapaisua kea havitama ali fako hiho.
1CO 10:16 “Kalaisiꞌa tagai kefo yafene huno fali-maine.” huta tagesa havi havi hisuna yafe nofi alagamo tina, Kalaisi kolanagita alita Anumayamotega muse hutama nonana Kalaisi kolana tokaeta nenone. “Kalaisiꞌa augafa agata aimainea yamo kefo yatia ago alitalene.” huta maya alita aposita nenona yamo Kalaisi augafa tokaeta nenone.
1CO 10:17 Nagoke maya haneanagi mukiꞌa veaꞌmogata nagoke mayafiti aposita nenonafe tagaya nagoke veaꞌne nagoke kanomo augafa kana huta mainone.
1CO 10:18 Tamakaya tamakesa haviho Yuta veaꞌmoya Anumaya Kotitega sipi sipi heꞌya kae-salamana heteꞌya tokaeꞌya anifiti aliꞌya neteꞌya Anumayamoꞌene nagopi ailokaeꞌya mainayane.
1CO 10:19 Manima hua kemo aepaꞌa haviho. Ago fali-mainaya veafe “Anumayati maine.” huꞌya afu heꞌya amakisana vaiꞌya amamiya yamoꞌa afa kava humainae. Anima fali-mainaya veaꞌmogamina tokiyaꞌamia omalene.
1CO 10:20 Tokiyaꞌamia omalenegi nagaya tamahanepauve Yisasi kema nohaviya veaꞌmoꞌya Kefo Avamuꞌmo kavela malenagi Anumaya Koti kavela omalenayane. Kefo Avamuꞌene ailokaetama omaisae huꞌna nehue. Ani kavela oneho.
1CO 10:21 Havigu tamakaya “Kalaisiꞌa tagai kefo yafe huno fali-maine.” hutama Anumayamo kapufiti nenetama Kefo Avamuꞌmogami neꞌamamiya tina mo neyafenagi ani kavala tamage hutama ohiho. Havigu tamakaya Anumayamo kave nenetama Kefo Avamuꞌmogami amamiya kaveꞌene neyafenagi ani kavala ohiho.
1CO 10:22 “Ani kava nehisunageno Anumaya Koti aipamoꞌa haviya hisie hutama nehao? Ifi tagai tokiyamoꞌa agai tokiya agase-maine.” hutama nehao? Aꞌao, naꞌa kavala ohune.
1CO 10:23 Nagoꞌa veaꞌmoꞌya mage huꞌya nehae “Mukiꞌa hisuna kavala kahe okineanagita afaꞌa hugahune.” huꞌya nehayanagi ani mukiꞌa yamoꞌa taya ohugahie huꞌna nehue. Mukiꞌa kavala kahe okineanagita afaꞌa hugahunanagi mukiꞌa ani yamoꞌa Yisasife havita tametiti humainona yamona alilokiya vai oꞌategahie.
1CO 10:24 Tagaiti laugafa haꞌmaesia yafekela tagesa ohavisune. Aꞌao, alu veaꞌmogami yafe tagesa havita amaya hisune.
1CO 10:25 Maketifiti afumo ameꞌa miya hugahema vinutamahena “Kefo Avamuꞌma amaminaya afuo? Nesunana haviya hulatesio?” hutama tamakuꞌafinaga havio-ketama afaꞌa miya hutama neho.
1CO 10:26 Anumayamo avopina mage huno kae-maleneane “Ma mopaene mukiꞌa mopafi hanea yaꞌenena Anumayamo yamaꞌage hane.” huno humaineane.
1CO 10:27 Yisasi kema nohavisaya veaꞌmoꞌya “Etama kavela me neho.” huꞌya hisagetama vinutamahena tamakesa ohavitama tamamisaya kavela afaꞌa neho. Havigu tamakuꞌamoꞌa “Havi kava nehae.” huno hisagetama havioketama afaꞌa neho.
1CO 10:28 Negahayanagi nago kanomoꞌa “Ma kavela Kefo Avamuꞌmo kae-salamana hutaya kavele.” huno hisigetamahena afaꞌa onetama ataleho. Tamakai tamakuꞌamoꞌa “Havi ya nehae.” huno hisia yafeꞌene kahanepaiya kanomo aguꞌa ali haviya huyafenagi ani kavela oneho. Ani kave nesuana nago kanomo aguꞌa ali haviya hu-yafenagiꞌna nagaya ani kavela nesuo ifi onesue?
1CO 10:30 Nagaya ani kavela Anumayamotega muse huteꞌna nesuana naꞌa hinageno nago kanomoꞌa nagaya anima muse huteꞌna noa yafena “Havi kavala nehane.” huno kea nenamake?
1CO 10:31 Kave nesao aliꞌya alisao mukiꞌa yama hinutamahena Anumayamo agia alisaga hisaya yafeke hiho.
1CO 10:32 Yuta vealo, Yuta vea omainaya vealo, Yisasife haviꞌya amakupi malenaya vealo, mukiꞌa veaꞌmogami amaufina kanale kavakeꞌya hiho. Havigu havi kava hisageno ani kefo yamoꞌa amaiyafi akoꞌya yamo ayea kava hinageꞌya asaga hu-lavisagi.
1CO 10:33 Nagaya mukiꞌa kavaꞌma nehuana nagai nahaisia yafe nagesa ohaviꞌna mukiꞌa Anumaya Kotiꞌa veaꞌmogamina amaku amamena aligatisiafene huꞌna hamaisifa kava nehue.
1CO 11:1 Nagaya Poloꞌnae Kalaisiꞌma humainea kava huꞌna akave nehugi nagaila nenagetama nagayama nehua kavakeꞌya nakave hutama maiho.
1CO 11:2 Kahegi maleꞌna tamahapaugetama tamakela okanitama kanale kava hutama akave nemalayafe “Kanale kava nehae.” huꞌna musena hu nelamatoe.
1CO 11:3 Ma ma hisua kea havilama hiho. Anumaya Kotiꞌa Yisasina ala kanoꞌa maiteno agenopa maigeno Yisasife haviꞌya amakupi malenaya veaꞌmogamina ala kanoꞌamia Yisasiꞌa maiteno amakenopaꞌamia maigeꞌya aniꞌa huꞌya vemoꞌya aꞌneꞌamimogamina ala kanoꞌamia maiteꞌya amakenopaꞌamia mainae.
1CO 11:4 Nagoꞌa vayaꞌmoꞌya Anumaya Koti kema huhaleꞌya nehuꞌyao nunamuma nehuꞌyao amanutela aiso ohisae*. Aiso hisayana Yisasina, amakenopamona agaye hisifa kava huneꞌatae.
1CO 11:5 Huneꞌatagi nagoꞌa aꞌnemoꞌya Anumaya Koti kema huhaleꞌya nehuꞌyao nunamuma nehuꞌyao hinuꞌya amanutela nago yatetila aiso ohisayana* amakenopamoꞌa, anauꞌamimona agaye hisifa kava huꞌya amayolagefa mukiꞌa laga hu-talenaya aꞌnemoꞌya* nehaya augafa kava nehae.
1CO 11:6 Nagoꞌa aꞌnemoꞌya amanuteꞌma aiso ohisayana afaꞌa amayolagefa mukiꞌa laga hu-talesae*. Tagama huꞌya aupa hisaya yamoꞌa amakaye hisifa kavaꞌma hanesigeꞌya neꞌataleꞌya amanutela aiso hisae.
1CO 11:7 Vemoꞌya Anumaya Kotina amemaꞌa “Anumayamo agi alisaga hisae.” huno vemogamina talo hu-maleneafe amanutela aiso ohisagi aꞌnemoꞌya anauꞌamimogami amaki alisaga hisayafe amanutela aiso hisae.
1CO 11:8 Anumaya Kotiꞌa aꞌnemogami amaugafaleti veneꞌnea talo ohunegi vemogami amaugafaleti aꞌnea talo humalene.
1CO 11:9 Anumaya Kotiꞌa aꞌnehe “Haꞌmao.” huno veneꞌnea talo ohunegi vehe “Haꞌmaesia yane.” huno aꞌnea talo hu-maleneane.
1CO 11:10 Talo hu-malenea yafeꞌene ensole vayaꞌmoꞌya neꞌagaya yafeꞌene aꞌnemoꞌya “Anautimo amaiyaꞌafi nemaune.” huꞌya amanutela aiso hulisae huꞌna nehue.
1CO 11:11 Nehuanagi Anumayamoꞌene ailokaetama maisayana aꞌmoꞌa haotela agaiꞌagela omaisie. Vemoꞌa aniꞌa huno haotela omaisie. Agaila aya nehisiana agaila aya nehisiana hutana maisaꞌe.
1CO 11:12 Hagoteno vefiti aꞌnea ali falote higeꞌya mainayanagi menia aꞌnemoꞌya veneꞌnea neꞌamatayanagi Anumaya Kotipiti mukiꞌa yamoꞌa falote hu-maineafe aepaꞌa maine.
1CO 11:13 Tamakaya tamakaitami haya kavala fako hutama ageho. Aꞌnemoꞌya amanutela aiso ohuneꞌya nunamuma hisayana kanale nehio?
1CO 11:14 Tamakaitami haya yamoꞌa tamaveli-maine vemoꞌya amayolagefa kuꞌma hanesiana amakaye hisaya yana hane.
1CO 11:15 Haneanagi “Aꞌnemogami amayolagefa kula muse hisaya konagali yaꞌami hane.” hutama nehae. Anumaya Kotiꞌa amanute aiso hisaya yafe amayolagefa kula amamine.
1CO 11:16 Nagoꞌa veaꞌmoꞌya ani yafema kema vaisayana ani kenonaꞌamihe mani kea nehue nagaiꞌene mukiꞌa Yisasife havita tagupi malenona veaꞌnene alu auꞌava kavala nohunagi nagoke kavakeꞌya nehune huꞌna nehue.
1CO 11:17 Menima tamahapaisua kea haviho tamakaya havi kava nehageꞌna haviꞌna musena hu notamatoe. Yisasi agima alisaga hugahe melitalu hutama maifina kanale kavala nohagi havi kava nehageꞌna nagaiꞌnia onahaiye huꞌna nehue.
1CO 11:18 Nagoꞌa veaꞌmoꞌya nahapaiyana tamakaya Yisasife havitama melitalu hutama maifina ke neꞌvaitama tolefi ali fako nehae huꞌya hayana tamage huꞌya nehao? E, tamage nehae huꞌna nagesa nehavue.
1CO 11:19 Tamakaiꞌene mainaya veapina nagoꞌa veala fatago huꞌya Anumaya Kotina haiya kavala nehae. Ani veala agetama falote hisaya yafe tolefi ali fako nehae huꞌna nehue.
1CO 11:20 Anumayamo kaveꞌma negahe melitalu hayanagi tolefima ali fako haya yatamia haneafe Anumayamo kave lama nonae.
1CO 11:21 Ani kaveꞌma negahema melitalu hayana nagoꞌa veafena amakava nohagi tamahaote tamakaitami alitama aya kavela nenageꞌya nagoꞌa veala amakala nelegeꞌya nagoꞌa veaꞌmoꞌya nofi alagamo tina ne haꞌno huteꞌya anegi vaya kana huꞌya nemaiye. Naꞌa havi kava nehutama Anumayamo kaveꞌmona aepaꞌa havilama ohutama afaꞌa nenae.
1CO 11:22 Naꞌa higetama naꞌa kavala nehae? Kaveꞌma lima nesaya notamia omaleo? Netetama eho. Anumaya Kotife haviꞌya amakupi malenaya veafena “Afa vea kana nehae.” hutama nehutama kaveꞌamima omalea veafena “Afa vea kana nehae.” hutama amakaye hisifa kavala nehao? Ani kavaꞌma hayana “Kanale kava nehae.” huꞌna hisuo? Aꞌao “Tusiꞌa havi kava nehae.” huꞌna nehue.
1CO 11:23 Anumayamotegati ali-mainoa kegiꞌna ago tamahapai-mainoa kemoꞌa maꞌa humaine Yutasiꞌa Yisasina agesi huno avaleno kame vaya amayapi atenea kegela Alatimoꞌa Yisasiꞌa kai hame kana maya alino Anumayamotega muse huno nunamu huteno aposino neꞌamamino mage huno hie “Mamona nagaiꞌni naugafae. Tamakai tamaya hisiafene huꞌna naugafa hakiꞌna nelamamugi nagaifena tamakesa havi havi nehutama nete nete hume hume haiho.” huno hamapaiye.
1CO 11:25 Higeꞌya ani kavela netageno aniꞌa huno nofi alagamo keꞌayola alino mage hie “Nagai kolama laki lavisia kanafina Anumaya Kotiꞌa haegafa alino hagelafi lamatesia kea ali fatago hisia yana havisaya yafe mukiꞌa kanafina mani keꞌayopiti nofi alagamo tina nenetama nagaifena tamakesa havi havi hutama maiho.
1CO 11:26 Ani mayaene nofi alagamo tiꞌene nenetamahena Anumayatimoꞌa tagaife huno fali-mainea aepaꞌa huhaletama hugahae. Aniꞌa hume neꞌvisageno Anumayatimoꞌa eteno esie.”
1CO 11:27 Nagoꞌa veaꞌmoꞌya kai hame kana mayaene nofi alagamo tifeꞌenena amakuꞌa fakoa ohuꞌya afaꞌa nesayana Anumayamo augafaene kolamaꞌaene alihaviya nehae. Anumayamo aufina kefo auꞌava kava nehae.
1CO 11:28 Ani yafe mukiꞌa veaꞌmogatama Anumayamo mayaene nofi alagamo tiꞌene nenutamahena hagotetama tamahaote tamahaote tamakuꞌa fako hutama agetetama “Kefo yana humaino?” hutama tamakesa havitetama tamakuꞌamoꞌma kanale hu-mainesigetamahena neho.
1CO 11:29 Nagoꞌa veaꞌmoꞌya kai hame mayaene nofi alagamo tiꞌene neneꞌya Yisasiꞌma tagaife huno augafa hakino fali-mainea aepaꞌahema ohaviꞌya afaꞌa nenesaya veaꞌmogamina Anumaya Kotiꞌa kaiyekea humateno anonaꞌamia amamigahie.
1CO 11:30 Naꞌa kavaꞌma humainea yafenagiꞌya tamakaipitila nagoꞌa veala amaugafamoꞌa fulu fulu higeꞌya kalia aligeꞌya nagoꞌa veala ago fali-mainae.
1CO 11:31 Tagaya hagoteta taguꞌa havita ali fako huteta noteꞌasina Anumaya Kotiꞌa kaiyekea hulateno anonaꞌa otamileꞌasine.
1CO 11:32 Anumayamoꞌa haenaga agai kema nohaviya veaꞌma kaiyekea humateno anonaꞌa amamisia kavala tagaila otamisiafe menia tagaya kefo yama nehunagenoꞌa fako hulateno mai fatago huta maisunafe kaꞌyona nelamie.
1CO 11:33 Nafuꞌnagana-gatama naꞌa humaineafe Anumayamo kaveꞌma negahena melitalu hutetama kanaleꞌya hutama nagoꞌa veafena amakava mainegeꞌya mukiꞌamoꞌya esagetama nagopi tamakoꞌya aye-mainetama ani kavela neho.
1CO 11:34 Havigu kefo yama nehutama Anumayamo kaveꞌma nesayana Anumaya Kotiꞌa kaiyeke hulamateno fako hulamateyafenagi nagoꞌa veaꞌmogamima tusiꞌa amakatesigeꞌyahena noꞌamifinagati neteꞌya esae. Nagoꞌa kea haneanagiꞌna tamakaitegama esua kanafina tamahapaigahue.
1CO 12:1 Nafuꞌnagana-gatama menia Alu Aotage Avamuꞌmoꞌa tokiya neꞌamamia ke havisae huꞌna nehue.
1CO 12:2 Nayona Yisasi kema ohavinaya kanafina Sataniꞌa tamavayu higetama agea oꞌaino ago fali-mainaya veafena “Anumayati mainae.” hutama amakisana neꞌvaitama havi kate umainaya yafena tamakaya ago havilinae.
1CO 12:3 Anumaya Koti Avamuꞌmoꞌa nago kanomo aguꞌafima mainesigenoꞌa mani kea ohugahie “Anumaya Kotiꞌa Yisasife hai vaiteno hani yapi maiyo huno hutesie.” huno Yisasina hu-haviya hu oꞌategahie. Nago kanomona Alu Aotage Avamuꞌma agupi omainesia kanomoꞌa “Yisasiꞌa Alaniꞌamo maine.” huno ohugahie.
1CO 12:4 Anumayamo aliꞌya aligahe aluꞌa luꞌa muse yamo tokiya nelamianagi nagoke Alu Aotage Avamuꞌmo nelamie.
1CO 12:5 Anumayamo aliꞌyana aluꞌa luꞌa aliꞌya hanegeta neꞌalunanagi nagoke Anumaya maine.
1CO 12:6 Mainegi aluꞌa luꞌa aliꞌya alisuna tokiyatia hanegeta neꞌalunagi nagoke Anumaya Kotiꞌa aliꞌyamaꞌa alisuna tokiya nelamianagino agaiꞌa aliꞌyana neꞌalie.
1CO 12:7 Mukiꞌa veaꞌne amaya hisunafe Avamuꞌmoꞌa tokiyaꞌa tave-nelino tahaote tahaote tamine.
1CO 12:8 Alu Aotage Avamuꞌmoꞌa nagoꞌa veaꞌmogamina Anumaya Kotina agu agesaene kea hamapaisia tokiya amamiteno nagoꞌa veaꞌmogamina falaki-mainea kemo aepaꞌa havisaya amaku amakesa amamine.
1CO 12:9 Ani Avamuꞌmokeꞌya nagoꞌa veaꞌmogamina Anumayamofe haviꞌya tokiyaꞌage amametiti hisaya amakuꞌa neꞌamamino nagoꞌa veaꞌmogamina kalima neꞌaliya veaꞌne aliꞌya kanale humatesaya tokiya nagoke Avamuꞌmokeꞌya amamine.
1CO 12:10 Nagoꞌa veaꞌmogamina tokiyaꞌage avame yama hisaya tokiya neꞌamamino nagoꞌa veaꞌmogamina Anumayamo kea amakupinaga humainea kea huhaleꞌya hisaya tokiya amamine. Nagoꞌa veaꞌmogamina havilama huꞌya fako hisaya tokiya amamigeꞌya “Mani kavala Anumayamo Avamuꞌmo nehio? Veaꞌmoꞌya amaku amakesafiti nehao? Kefo Avamuꞌmo nehio?” huꞌya havisaya tokiya amamine. Nagoꞌa veaꞌmogamina nohaviya kefiti alu amake alu amakefiti hisaya tokiya amamine. Ani kemona aepaꞌa hu yahae huꞌya hisaya tokiya nagoꞌa veaꞌmogamina amamine.
1CO 12:11 Haote haote tokiya nagoke Avamuꞌmokeꞌya tamine. Agaiꞌa haiya kava huno tahaote tahaote alu lokiya alu lokiya fako huno lamine.
1CO 12:12 Taugafafitila taiya, tayana, taulaga aote aote haneanagi taugafa nagoke yane. Aniꞌa huta Kalaisife havita lagupi malenona veala alu veaꞌne alu veaꞌne mainonanagi mukiꞌa veala Kalaisina nagoke augafa mainone.
1CO 12:13 Nagoke Avamuꞌmoꞌa tina falelamatea kava huno nagoke augafale alino aikaꞌmaelategeta Yuta vea omainaya veaꞌnene, Yuta veaꞌnene, nofipi maineꞌya mone oꞌali aliꞌya veaꞌnene, miyaꞌamima alisaya aliꞌya neꞌaliya veaꞌnene alino aigaꞌmaelategeta nagoke taugafa mainonageno nagoke Avamuꞌmona timoꞌma hia kava huno ani li nesunafe nelamie.
1CO 12:14 Taugafa nagoke yamaꞌagela omalegi taugafafitila taiya, tayana, taulaga hane.
1CO 12:15 Aiyamoꞌa “Nagaya ayana omainoafe mani augafafiti kanoa omainoe.” hunoꞌma hisiana havige afaꞌa ani augafafiti kano maine.
1CO 12:16 Agesamoꞌa “Aulaga omainoafe mani augafafiti kanoa omainoe.” huno hisiana havige afaꞌa ani augafafiti kano hane.
1CO 12:17 Mukiꞌa augafafima aulagaꞌageꞌma haneleꞌasina hanaꞌa huno agesa havileꞌasine? Mukiꞌa augafafima agesama haneleꞌasina hanaꞌa huno mana havileꞌasine?
1CO 12:18 Naꞌa ohunegi Anumaya Kotiꞌa agesa haviteno agaiꞌa haiya kava huno taulaga, taiya, tayana talo hulateteno aote aote yana nagoke taugafafina alino malete malete higeno hane.
1CO 12:19 Nagoke yamaꞌageꞌma hanesina mukiꞌa laugafa omalesine.
1CO 12:20 Alu tupa-tapama alino talo higenoꞌa taiya, tayana haneanagi nagoke taugafale hane.
1CO 12:21 Aulagamoꞌa ayafena “Kagayama omaiteꞌasina nagaya kanaleꞌya huꞌna mauleꞌasine.” huno ohugahie. Anumoꞌa aiyahena “Kagayama omaiteꞌasina nagaya kanaleꞌya huꞌna mausine.” huno ohugahie.
1CO 12:22 Naꞌa ohugahigi nago kaiyaga taugafamofema “Tokiyaꞌa omalene.” huta nehunanagi ani kaiyaga taugafamoꞌa tusiꞌa aliꞌyamaꞌa hane.
1CO 12:23 Nago kaiyaga taugafamofena “Afa ya kana humaine.” huta ali hilato huneꞌatonanagi tagaye hisuna kaiyaga falakita kena fai neꞌalune.
1CO 12:24 Fai neꞌalunagi kanaleꞌma humainea kaiyagatia afaꞌa kena nofaunagi Anumaya Kotiꞌa agaiꞌa agesa haviteno mukiꞌa laugafa talo humaleteno afa ya kana huno haviya humainea taugafamo kaiyaga kanaleꞌya huno agia alisaga nehie.
1CO 12:25 Mukiꞌa laugafamoꞌya ali fako ohisayafe ani kavala humalegeno “Nagoke taugafa hane.” nehuta nago avamete maineta kava yagai-mainone.
1CO 12:26 Nago kaiyaga taugafamoꞌa tagatama aiyana mukiꞌa laugafamoꞌa tagata neꞌaiye. Nago kaiyaga taugafamoꞌa ala agima aligenoꞌa mukiꞌa taugafamoꞌa muse nehie.
1CO 12:27 Lamakaya mukiꞌa Yisasina augafa aiya, aya, aulagaꞌa mainae.
1CO 12:28 Yisasife havita lagupi malenona veaꞌmogatama nagopima maunana alu aliꞌya alu aliꞌyana Anumaya Kotiꞌa agaiꞌa huyogino lamine. Hagoteno Aposolo vayala humateteno anile Anumayamo amakupi humainea kema huhaleꞌya hisaya veala humateteno anile Anumaya Koti ke huge amavelige hisaya veala humateteno anile tokiya avame yama hisaya veala humateteno anile kali vea ali hetimatesaya veala humateteno anile vea amaya hisaya veala humateteno anile kava veala humateteno anile amakesamoꞌa nohavia kefiti hisaya veaꞌnene alino hetimatene.
1CO 12:29 Mukiꞌa vayaꞌmogata Aposolo vaya mainao? Ifi mukiꞌa veaꞌmogata Anumayamo amakupi humainea kea huhaletama hisaya vea mainao? Ifi mukiꞌa veaꞌmogata huge amavelige aliꞌyana neꞌaliyo? Ifi mukiꞌa veaꞌmogata tokiyaꞌage avame yana nehao?
1CO 12:30 Ifi mukiꞌa veaꞌmogata kalima aliya veala ali kanale huneꞌamatao? Ifi mukiꞌa veaꞌmogata tagesamoꞌa ohavinea kefitila nehao? Ifi mukiꞌa veaꞌmogata ani amakema aiya kea hu yahae hutama nehao?
1CO 12:31 Aꞌao naꞌa nohunagi tamakaya Avamuꞌmo uhagote hanea muse yana alisayafe tokiyaꞌage huno tamahaisie huꞌna nehue. Menia nagaya nago yamoꞌa lamage huno uhagote hanea auꞌavafe tamahapaigahe hugi haviho.
1CO 13:1 Nagaya nohavua kefiti huꞌna mopale veaꞌmogami amakene Ensole vaya amakene aisuanagi veaꞌmogamife nahau nayamopafi onahaisigeꞌna yaveꞌyaene veloꞌene afaꞌa aiko nelugeno kema ayeso nehia avamete huꞌna afa kegefa nehue.
1CO 13:2 Anumayamoꞌa avayafiti nahapaiya kea huhaleꞌna nehuꞌna Anumaya Kotiꞌa falaki-malenea kemona aepaꞌa mukiꞌa havilama humainoanagi veafe nahau nayamopafi onahaisiana afa ya kana huꞌna mainoe. Anumayamofena haviꞌna nametitia huteꞌna “Agoꞌyamoga alule vuo.” hisugeno ani agoꞌyamoꞌa nagai ke havino visianagi veafena nahau nayamopafi onahaisiana afa ya kana huꞌna mainoe.
1CO 13:3 Veafema nahau nayamopafi onahaisigeꞌna mone afenoꞌami omalenesia veaꞌne mukiꞌa yaniꞌa amamisuana ani yamoꞌa naya ohugahie. Veafema nahau nayamopafi onahaisgeꞌna Anumayamo kema huhaleꞌna nehisugeꞌya hamai vainateꞌya navaleꞌya atafi natalesageno naugafa leno asagalisia yamoꞌa naya ohugahie.
1CO 13:4 Veafe hamau amayamopafi nehamaiya veaꞌmoꞌya haviyama humatesageꞌya mailava huꞌya maineꞌya anonaꞌamia huoꞌamateꞌya kayoneꞌage veaꞌne mainae. Alu kanomo yate age hamaꞌye huꞌya amaipamoꞌa haviyana ohigeꞌya amaugafa aliꞌya ohai veaꞌne mainae.
1CO 13:5 Amakaiꞌami amakia alisaga huꞌya veganokanola nohae. Amakaiꞌami yafekela amakesa havi havi nohae. Aupaꞌa hamaiya noꞌvaiye. Havi kavaꞌma humataya veafena amakesa ohaviꞌya afaꞌa neꞌatalae.
1CO 13:6 Veafe hamau amayamopafi nehamaiya veaꞌmoꞌya nago kanomoꞌa kefo yama hisia yafena muse ohugahagi tamage kelefe musena hugahae.
1CO 13:7 Veafe hamau amayamopafi nehamaiya veaꞌmoꞌya haviya humatesaya veaꞌmogamina oꞌamatalegahagi Anumayamo amaya hisiafe amametiti nehuꞌya agava maineꞌya mai lokiya vaiꞌya nemaiye.
1CO 13:8 Ma ma hamau amayamopafima nehamaiya yana hanege hanege huno hanegahianagi Anumayamo amakupi humainea kema huhaleꞌya hamapaiya kemoꞌa haꞌno hugahie. Amakesamoꞌa nohaviya kema nehaya yamoꞌa haꞌno hugahie. Falaki-mainea kemo aepaꞌama havilama nehaya yamoꞌa fanane hugahianagi hamau amayamopafi nehamaiya yana agola haꞌno ohugahie.
1CO 13:9 Haꞌno ohugahigi havimainona yamoꞌa nago kaiyagaꞌa havilama ohunone. Anumayamoꞌa lagupi humainea kea huhaleta nehunanagi nago kaiyagaꞌa havilama ohunone.
1CO 13:10 Havilama ohunonagi fatago kavakeꞌya nehisia kanomoꞌa, Yisasiꞌa, mukiꞌa yafena havilama hulineanagino esigeta havilama ohuneta nehuna yamoꞌa fanane hugahie.
1CO 13:11 Nagaya osi nafaꞌnema mainoa kanafina nafaꞌnemoꞌma nehia kea nehuꞌna nagesa havi havi humainoanagi ko huteꞌna ala kanoma mauvana nafaꞌnemoꞌya nehaya kavala ago atalenoe.
1CO 13:12 Meni kanafina tagaya hanikoꞌmako yapi maineta Anumaya Koti augosa galasifima tamema agona avamete kava nehuta agelama huta noꞌagonanagi haenagaꞌa Anumayamo augosa neꞌageta agelama hugahune. Meni kanafina Anumayamo kea havilama nohunanagi Anumayamoꞌa nagaila nagelama humainea kava huꞌna haenagaꞌa nagaya agaila agelama hugahue.
1CO 13:13 Anumayamofe havita lagupi maleta tametitima humainona yaꞌene “Anumayamoꞌa hulamategahue huno humainea yana hugahie.” huta lametiti nehuna yaꞌene veafe tahau tayamopafi nelahaiya kavaꞌene ani tagufa (3) yamoꞌa hanege hanege huno hanegahianagi tahau tayamopafi nelahaiya yamoꞌa uhagoteno mani tole yamona agaseno tama yatafa hane.
1CO 14:1 Hagotetama veafena tusiya huno tamahau tamayamopafi tamahaino. Anile Alu Aotage Avamuꞌmo lamamisia tokiya alisaya yafe musena nehutama tusiya huno tamahaino. Ani tokiya yapiti hagotetama Anumayamoꞌa tamakupima humainea kema huhaletama hisaya tokiyahena tusiya huno tamahaino.
1CO 14:2 Amakesamoꞌa nohavia kema hisia kanomoꞌa veala hamanopaigi Anumaya Kotina agaiꞌage hanepaiye. Veaꞌmoꞌya ani kea nohavigi falaki-mainea kea Avamuꞌmo hapaigeno humaine.
1CO 14:3 Humainegi Anumaya Kotiꞌa amakupi humainea kema huhaleꞌya nehaya veaꞌmoꞌya nagoꞌamogami amametitia ali lokiya vaimatesaya kene amaya hisaya kene huhaleꞌya humatenae.
1CO 14:4 Nohaviya kefiti nehaya veaꞌmoꞌya amakaiꞌami amakuꞌamo tokiya vaisia yana neꞌamiyanagi Anumayamoꞌa amakupi humainea kema huhaleꞌya hisaya veaꞌmoꞌya Yisasife haviꞌya mono nopi melitalu nehaya veaꞌmogamina amaya nehae.
1CO 14:5 Mukiꞌa veala amakesamoꞌa nohaviya kefiti hisageꞌnahena muse hugahe huanagi mukiꞌa veala Anumaya Kotiꞌa tamakupi humainea kema huhaletama hisageꞌna aluya huꞌna musena hugahue. Anumayamo kema huhaleno nehisia kanomoꞌa agesamoꞌa nohavia kefiti nehisia kanomona agase-maineanagi ani kea hu yahae hisigeꞌya Yisasife haviꞌya melitalu humainesaya veaꞌmoꞌya havisageno hamaꞌmaeno amametita ali lokiya vaigahie.
1CO 14:6 Ani yafe nafuꞌnagana-gatama tamakaya mainesalega uvaꞌyi huꞌna ohavinesua kefitiꞌma tamahapaisugetama ohavisayana ani kemoꞌa tamaya ohugahianagi Anumayamo aepaꞌa havilama huꞌna mani kene Anumayamoꞌa falaki-malenea kene Anumayamoꞌa nagupi humainea kene huge hamave-lige huꞌna huhaleꞌna hisugeno ani kemoꞌa tamaya hugahie.
1CO 14:7 Nagi veaꞌmoꞌya kepitiꞌene otofitiꞌene yagamema hufatago huꞌya ohisayana veaꞌmoꞌya havilama huꞌya ohavigahae.
1CO 14:8 Nago kumateꞌma tuma hugahe keha kehama hisageꞌya havilama ohisaya kema hisayana vayaꞌmoꞌya hanaꞌa huꞌya haviteꞌya kamea hugahae?
1CO 14:9 Tamakaya aniꞌa humainae tamakesamoꞌma ohavinesia kema hisageꞌya hanaꞌa huꞌya ani kea havigahae? Ani kemoꞌa yasimoꞌma hia kava huno fanane hugahie.
1CO 14:10 Ma mopafi veaꞌmoꞌya alu amake alu amake neꞌaiyanagi mukiꞌa ani kemoꞌa afa yana omalegi ani kema nehaviya veaꞌmogami aepaꞌaene ke hane.
1CO 14:11 Haneanagi nago kanomoꞌa alu kefiti, nohavisua kema hisigeꞌna “Ohavua ke nehianagiꞌna ani kanoenena tokaeꞌna omaigahue.” huꞌna hugahue.
1CO 14:12 Tamakaya Anumayamo aliꞌyama aligahena Avamuꞌmoꞌa tokiyaꞌama tamamisia yafena aluya hunoꞌma tamahaisiana Yisasife haviꞌya amakupi malenaya veala amaya hutama ali lokiya vaimatesaya aliꞌyamo tokiyahekeꞌya aluya huno tamahaisie.
1CO 14:13 Ani yafema ohavinesia kefitiꞌma hisia kanomoꞌa ani kea hu yahae hisia tokiya alisia yafena Anumayamotega havigesie.
1CO 14:14 Nagesamoꞌa ohavinesia kefiti Anumayamotega havigesuana ani kea nagesamoꞌa nohavianagi nagu nafaꞌnemoke ani kea huno havinege.
1CO 14:15 Ani yafena naꞌane hisue? Nagesamoꞌa nohavia kefiti nagu nafaꞌnemoꞌa Anumayamotega havigegeꞌna nagaiꞌniꞌa havua nagesaene Anumayamotega havigegahue. Mono yagamea nagesamoꞌa nohavia kefiti nagu nafaꞌnemoꞌa hugahianagino nagaiꞌniꞌa nagesa havimainoa mono yagamene hugahue.
1CO 14:16 Aniꞌa ohisanana kagu nafaꞌnemoke kagesamoꞌa nohavia kefitila Anumayamo agia alisaga hisigeꞌya nagoꞌa ani yafema ohavinesaya veaꞌmoꞌya kema hana kea nohaviyafe hanaꞌa huꞌya “Tamage nehie.” huꞌya Anumayamo agia alisaga hugahae?
1CO 14:17 Kagaya Anumayamofe muse huka kanaleꞌya huka agia alisaga nehananagi amakaya ohavisayana amakuꞌa ali lokiya vai noꞌamatane.
1CO 14:18 Nagaya mukiꞌa veala amakaseꞌna nohavua kefitila tusiya huꞌna nehua yafena Anumayamofena muse nehue.
1CO 14:19 Muse nehuanagi Yisasife haviꞌya mono nopi melitalu hisafina huhaleꞌna hisugetama havilama hisae huꞌna tagaiti kefitila faefuꞌa (5) ke kanoꞌa osiꞌa tamahapaisuana teni tauseniꞌa (10,000) kema nagesamoꞌa nohavisia kefiti hisua kemona agasegahie huꞌna nehavue.
1CO 14:20 Nafuꞌnagana-gatama kefo yama hisaya yafena nute nafaꞌnemoꞌya nehaviya amakesamo avamete hu havitama maiho huꞌna nehuanagi alopa veaꞌmoꞌya nehaviya amaku amakesamo avamete havitama kanaleꞌya hutama ma ma Alu Aotage Avamuꞌmoꞌa tokiyama tamamisia kema tamahapauva kea fako hutama nafaꞌnemoꞌya nehaviya avamete tamaku tamakesa ohaviho.
1CO 14:21 Anumayamoꞌa mage higeꞌya avopina kae-malenayane “Yuta veafe nayona mage huꞌna humainoane ‘Nagaiꞌni veafe alu veaꞌmogami kefiti hamapaisuanagi aniꞌa huꞌya veganokano nehuꞌya nagai kea haviꞌya akave omalegahae.’ huno humainayane.”
1CO 14:22 Naꞌa humaineafe ohavinesia kefiti nehisageꞌya Yisasina amakaveꞌno hutenaya veaꞌmoꞌya haviꞌya Anumaya Kotina tokiya avame yamaꞌa neꞌageꞌya “Anumayamo kea tamage nehie.” huꞌya hisayafe amave-lianagi Yisasife haviꞌya amakupi malenaya veafe ani avame kea nohigi Anumaya Kotiꞌa avayafiti humainea kema huhaleꞌya nehageno amaya nehie.
1CO 14:23 Yisasife haviꞌya melitalu hisafina mukiꞌa veaꞌmoꞌya nohavisaya kefiti kema hisageꞌya ani kavaꞌma oꞌagenesaya vealo Yisasina amakaveꞌno hutenaya vealo me havisayana hinageꞌya “Havigunagu kava nehae.” huꞌya hugahae.
1CO 14:24 Hugahagi mukiꞌa veaꞌmoꞌya Anumayamoꞌa amakupi humainea kema huhaleꞌya nehisageꞌya ani kavaꞌma oꞌagenesaya vealo Yisasina amakaveꞌno hutenesaya vealo hainefaleꞌya havinuꞌya Yisasife huhaleꞌya hisaya keleti amakaiꞌami “Kefo ya nehune.” huꞌya hisageno hisaya kemoꞌa amakaila kaiyeke humateteno fako humategahie.
1CO 14:25 Fako hamaisigeꞌya amakupima falaki-mainesia yana falote hisigeꞌya ageteꞌya Anumaya Kotite ape huꞌya Anumaya Koti agia alisaga nehuꞌya “Anumaya Kotiꞌa tamakaiꞌene maine.” huꞌya hugahae.
1CO 14:26 Nafuꞌnagana-gatama naꞌa hisaya yafena naꞌane hisune? Melitalu hisayana nago veaꞌmoꞌya yagamea hisageꞌya nago veaꞌmoꞌya Anumaya Koti kea hisae. Nago veaꞌmoꞌya Anumayamo falaki-malenea kea agupi hapaiya kea huhaleno hisayana nago veaꞌmoꞌya Avamuꞌmo aminea kea agesamoꞌa nohavia kefiti nehisageno nago veaꞌmoꞌya ani kea huꞌya aiyahae hisae. Ani kavakeꞌya hutama veala amakuꞌa ali lokiya vaisaya kea hiho.
1CO 14:27 Nagoꞌa veaꞌmoꞌya amakesamoꞌa nohaviya kefitiꞌma hinuꞌyahena tolemoganio tagufa veaꞌmoꞌyao amahaote amahaote hisageꞌya nagoꞌa veaꞌmoꞌya ani kea aiyahae hiho.
1CO 14:28 Ani kema aiyahae hisia kanoma omainesigeꞌya mono nopina ani kea ohuꞌya amakupinaga Anumayamofena ani kea hisae.
1CO 14:29 Tolemoganio tagufa veaꞌmoꞌyao Anumaya Kotiꞌa amakupi humainea kea huhaleꞌya hisageꞌya nagoꞌa veaꞌmoꞌya ani kehena amakesa havi havi huꞌya fako huꞌya haviho.
1CO 14:30 Nago kanomoꞌa Anumaya Koti kea huhaleno nehisigeno Anumayamoꞌa nago kanomona agupi kea nehisigenoꞌa hagote kanomoꞌa kea ohuno mainesigeno anile kanomoꞌa kea hisie.
1CO 14:31 Mukiꞌa vea amaya hisageꞌya haviꞌya kanaleꞌya huꞌya mai-lokiya vaisayafe mukiꞌamogatama tamahaote tamahaote Anumaya Kotiꞌa tamakupi kea higetama huhaletama hiho.
1CO 14:32 Anumayamoꞌa amakupi humainea kema huhaleꞌya hisaya veaꞌmoꞌya mani kea hisaya yafeꞌene ohisaya yafeꞌene amakaiꞌami amakuꞌale kava yagaiꞌya mainae.
1CO 14:33 Anumaya Kotiꞌa haviya havaya hisaya kavafena nohaigi ako hutama maisaya yafe nehaiye. Mukiꞌa Yisasife haviꞌya melitalu nehaya veaꞌmogami ani kava nehae.
1CO 14:34 Aꞌnemoꞌya mono nopina kea ohuꞌya ako huꞌya maiho. Kahegi kema akave maleꞌya anauꞌamimo amaiyafinaga maineꞌya mono nopina ke haviꞌya nago kea ohuꞌya maiho.
1CO 14:35 Nago kemoꞌa kanama hamaisigeꞌya noꞌamifinaga umaineꞌya anauꞌamimona ani kehena hamavigesae. Aꞌnemoꞌya mono nopina kea hisayana amakaye hisia kava hugahae.
1CO 14:36 Yisasi kanale mono kea hagoteno tamakaipiti falote humaineo? Aꞌao aniꞌa ohune. “Tagaitige havimainone.” hutama nehao? Aꞌao ani kemofena veganokanola ohiho.
1CO 14:37 Nago kanomoꞌa “Anumayamoꞌa nagupi kea higeꞌna huhaleꞌna hisua kano mainogeno Avamuꞌmo tokiya namigeꞌna mainoe.” huno hisia kanomoꞌa ma ma kae-malenoa kemona “Anumayamo kahegi kehe humaine.” huno hise.
1CO 14:38 Manima hua kema amakaveꞌno hutesaya veaꞌmogami kea ohaviho.
1CO 14:39 Nafuꞌnagana-gatama Anumayamo kea huhaletama hisaya tokiyahe aluya huno lamahaigahianagi amakesamoꞌa nohavia kefitiꞌma hisaya veafena “Aꞌao.” hu oꞌamateho.
1CO 14:40 Mukiꞌa kavaꞌma mono nopima melitalu hutama nehaya kavala kaliso oꞌatitama fatago hutama hisaya kavakeꞌya hiho.
1CO 15:1 Nafuꞌnagana-gatama Yisasiꞌa hulatenea kanale mono kema huhaleꞌna tamahapai-mainoa kea nagoꞌene huꞌna tamakesa ali hao hugahe nehue. Mani kea havitama tamakupi maletama tamametiti hutetama ago hetitama mainae
1CO 15:2 Ani kanale kea atafa hulinesageno Anumayamoꞌa tamaku tamamena aligatigahianagi afaꞌa amega tamaugafaletiꞌma “Yisasifena naguꞌa aminoe.” hutama hisayana tamaku tamamena aliokatigahie.
1CO 15:3 Anumayamoꞌa nahapaigeꞌna havimainoa kemoꞌa uhagoteno agase-mainea kea mage huꞌna tamahapai-mainoe Anumayamo avopi kae-malenea kate Kalaisiꞌa kefo yama humainona yatefene huno fali-maine.
1CO 15:4 Faligeꞌya hevaitageno tole yupa komufinaga hanetegeno tagufa (3) kanale avopima kae-malenea kate maleno Anumaya Kotiꞌa avale heti-maine.
1CO 15:5 Eteno hetiteno Pita aule evaꞌyi huteno haenagaꞌa agaiꞌa aleveniꞌa (11) anagatela vaꞌyi humaine.
1CO 15:6 Vaꞌyi higeꞌya faefu hataletiꞌa (500) alitalu humainaya tafu-taganate evaꞌyi humaine. Ani veala osiꞌa falitageno kasagoꞌya veala ofaliꞌya afaꞌa mainae.
1CO 15:7 Anile Yemesi mainele evaꞌyi huteno haenagaꞌa mukiꞌa Aposolo vayatela evaꞌyi higeꞌya age-mainae.
1CO 15:8 Naꞌa huteno haenagalafa nagaitela evaꞌyi humaine. Kalaisina akave nehaya veala nagaya tusiya huꞌna ali haviya humatenoafe Aposolo kano maisua yafena onatenegi mukiꞌa Aposolo vayala nagaila nagasegeꞌna osi vaya kana huꞌna maigeꞌna aꞌmoꞌa kanaꞌa omalegeno nafaꞌne atea kava huno Anumaya Kotiꞌa agaiꞌa nafaꞌne nategeno Kalaisiꞌa faliteno nagaitela evaꞌyi humaine.
1CO 15:10 Anumaya Kotiꞌa agaiꞌa kayone yamaꞌa namineafe Aposolo kanoa mainoe. Kayone yamaꞌa naya higeꞌna nagoꞌa Aposolo vayaꞌmoꞌya aliꞌyama ali-mainaya aliꞌyana amakaseꞌna neꞌaluanagi nagaya omagi Anumaya Koti kayone yamaꞌamo naya higeno nagaiꞌene haneafe ali-mainoa aliꞌyamoꞌa amakase-maine.
1CO 15:11 Nagoꞌa Aposolo vayaꞌmoꞌyao nagayao tamahapauna kea lagaya mukiꞌamogata nagoke kegeꞌya huhaleta humainona kele havitama tamakupina malenae.
1CO 15:12 “Kalaisiꞌa ago fali-mainefiti heti-maine.” huta nehunagi naꞌa higetama nagoꞌa veaꞌmogatama “Fali-mainaya veala eteꞌya heotigahae.” hutama nehae?
1CO 15:13 Fali-mainaya veaꞌma he-otinaleꞌasine Anumayamoꞌa Kalaisiꞌenena fali-mainefitila ali heti-oꞌateleꞌasine. Kalaisina fali-mainefitiꞌma ali heti-oꞌateleꞌasina nagayama nehua kea afa ke kana higetama tamakaya afa yafe tamakupina maletama tamametitia haleꞌasine.
1CO 15:15 Anumaya Kotiꞌa Kalaisina alino heti-oꞌatenesina tagaya “Anumaya Kotiꞌa Kalaisina alino hetitene.” huta nehuna kemoꞌa Anumaya Kotife havige huteꞌasine. Anumaya Kotiꞌa fali-mainaya veaꞌma alino heti-oꞌamateleꞌasina Kalaisiꞌenena alino heti-oꞌateneleꞌasine.
1CO 15:16 Tamage Anumaya Kotiꞌa veaꞌma fali-mainafiti ali heti-omateneleꞌasina Kalaisiꞌenena aniꞌa huno alino heti-oꞌateneleꞌasine.
1CO 15:17 Nagi Anumayamoꞌa Kalaisima ali heti-oꞌatenesina tamakupi maletama tamameti nehaya yamoꞌa afa ya kana higeno kefo yama nehaya yatamimoꞌa aigagilamateno lamatafa hileꞌasine.
1CO 15:18 Kalaisife haviꞌya amakupi maleteꞌya fali-mainaya veaꞌmoꞌya haniꞌmo aguꞌafi agola amakata aiya no maileꞌasine.
1CO 15:19 Kalaisife havita tagupi malona yana ma mopale mainona kanafikeꞌya taya hileꞌasina haenaga faliteta hetita ikapinaga ohauteꞌasina Kalaisife havita lakupi malenona yamoꞌa afa ya kana huleꞌasinagi haenagama vaꞌyima hisia yafe tamage huta lametitia nehune.
1CO 15:20 Tamage Anumayamoꞌa Kalaisina fali-mainefiti ago alino hetiteneane. Hoyafi kaveꞌmoꞌma hagoteno nena hia avamete huno Kalaisina hagoteno ali hetiteneanagino haenagaꞌa fali-mainaya veala alino hetimategahie.
1CO 15:21 Nagoke kanomoꞌa, Atamu, kefo yama humainea yateti fali yana ali falote humaineanagi nagoke kanomoꞌa, Kalaisiꞌa, fali-mainea yateti aniꞌa huno tagaya veaꞌmogata heti yana ali falote humaine.
1CO 15:22 Maꞌa humaine Atamu mukiꞌa nelafa maineafe mukiꞌamogata agayama humainea kava huta nefalunanagi Kalaisiꞌenema aigaꞌmaeta mainona veaꞌmogata agayama humainea kava huta eteta hetita haegafa veaꞌne maigahune.
1CO 15:23 Anumaya Kotiꞌa malenea kanaꞌale Kalaisiꞌa hagoteno heti-maineafe agayama eteno esia yupa mukiꞌa Kalaisife haviꞌya amakupi malenaya veaꞌmoꞌya fali-mainesafiti hetigahae.
1CO 15:24 Hetitesageno ani kanafi mukiꞌa yana haꞌno hisigeno Kalaisiꞌa mukiꞌa ma mopale kava vayaꞌene Anumaya Koti kame vayaꞌaene Kefo yamo tokiyama hanea Avamuꞌyagaene Kalaisiꞌa amakaseno ani vayaꞌmogamina ali haꞌno humaleteno Anumaya Kotina kava yagaisiafe Nefa ayapi mukiꞌa amategahie.
1CO 15:25 Kalaisiꞌa yagaime yagaime haino mukiꞌa kame vayaꞌa amakaseno aiyafinaga alino amategahie.
1CO 15:26 Kalaisiꞌa kame yana ali haꞌno humaleteno haenagalafa veaꞌma nefaluna yana heno fanane hutalegahie.
1CO 15:27 “Kava yagaisiafe mukiꞌa yana Anumaya Kotiꞌa Yisasi aiyafi malene.” huno kae-maleneane. Mani kea “Mukiꞌa yana malene.” huno humainea kea Anumaya Kotiꞌa, kava yagaisiafe mukiꞌa yana Yisasi aiyafi malenea kanomofe ohune.
1CO 15:28 Ani kavala humaleteno mukiꞌa yana agaseno kava yagai-mainea kano Kalaisina, Anumaya Kotiꞌa aiyaꞌafi ateteno Anumaya Kotiꞌa mukiꞌamoꞌya hagote kava kano maigahie.
1CO 15:29 Yisasiꞌa fali-mainefitila heotineleꞌasina nagoꞌa veaꞌmoꞌya fali-mainaya veafena amakesa haviꞌya mono tima nefalayana na kanale ya falote hugahie? Fali-mainaya veala heotisayana naꞌa hinageꞌya fali-mainaya veafena haviꞌya tina nefalae?
1CO 15:30 Tagaya Anumaya Koti kea huhaleta nehunageꞌya mukiꞌa kanafina kaꞌyo kevea lamigeta falisuna kavala nehune. Veaꞌma heotisayana naꞌa higeta ani hu nelataya kavala afaꞌa neꞌalune?
1CO 15:31 Nafuꞌnagana-gatama tamagelafa nehue mukiꞌa kanafina kaꞌyo keve namigeꞌna faligahe huanagi Yisasi Kalaisi Anumayatimoꞌene ailokaeꞌna maineꞌna agai kema tamahapaugetama havimainaya yafena aluya huꞌna musena nehue.
1CO 15:32 Ma mopafi yafekeꞌya nagesa nehaviꞌna Efesusi kumate mainaya vayala, kaveꞌage afela afu kana nehaya vayaꞌene keleti tua nehuanagiꞌya fali-mainesaya veaꞌma heotisayana ani kavaꞌma hunenataya yamo anonaꞌa hanaꞌa huꞌna alisue? Falimainesaya veala heotisayana veaꞌmoꞌya nehaya kea “Ega falisupi afaꞌa maineta tiꞌene kaveꞌene neta kanaleꞌya huta maigahune.” huꞌya nehaya kemona akave malegetao.
1CO 15:33 Havigema nehaya veaꞌmogami kea ohaviho. Fatago veaꞌmoꞌya kefo yama nehaya veaꞌnene maisayana ali haviya hulamategahagi kaꞌyetama maiho.
1CO 15:34 Tamakesa hao hinagetama kefo yama nehaya yana ataleho. Nagoꞌamogatama Anumaya Kotifema ohaviya yafena tamakaye hino huꞌna nehue.
1CO 15:35 Nagoꞌa veaꞌmogatama mage hutama nahavi-negae “Hanaꞌa huꞌya fali-mainesaya veala hetigahae? Fali-mainesaya veaꞌma hetisayana hana augafa amaugafa hanesigeꞌya evaꞌyi hugahae?” hutama nahavi-negae.
1CO 15:36 Nahavi-negaya veaꞌmogatama havigu ke nehae. Avina yama mopafi fai-malenageno falino numayu ohisigenoꞌa ohagegahie.
1CO 15:37 Hageno vaꞌyi higetamahena fai-malenaya avina kana ohunegi osi avina alaga kanoꞌa viti avinafi alu avina yapi osi kanoꞌa fai-nemalae
1CO 15:38 Fai-malenageno Anumaya Kotiꞌa agesa haviteno haiya kava huno avina yana alu augafa alu augafa amigeno nehage. Anima nehagea avamete huno Anumaya Kotiꞌa fali-mainesaya veala alu amaugafa amamiteno ali hetimategahie.
1CO 15:39 Mukiꞌa yamona nagoke augafa okaline. Veala alu laugafa kali-maigeno afu kalamogamina alu amaugafa kali-maigeno namayaga-mona alu amaugafa kali-maigeno noyameyaga alu amaugafa kali-maine.
1CO 15:40 Ikapinaga yana alu amaugafa kali-mainegi ma mopafi veala alu amaugafa kali-maine. Mopale veala konagali yaꞌamia haneanagi ikapinaga veala aluꞌa konagali yaꞌami hane.
1CO 15:41 Yagemoꞌa alu konagali yamaꞌa hanegeno ikamoꞌa alu konagali yamaꞌa hane. Kaꞌnefiꞌyagamona alu konagali yamaꞌa haneanagi nagoꞌa kaꞌnefiꞌmona alu konagali yamaꞌa haneanagi nagoꞌa kaꞌnefiꞌmoꞌya alu konagali yaꞌamiꞌa hane.
1CO 15:42 Fali-mainaya veala faligeꞌya hevaimataya amaugafa kasalisia amaugafa haneanagi eteꞌya hetisaya amaugafa agola hanege hanege huno fanane ohisia amaugafa hanegahie.
1CO 15:43 Hevaimatesaya amaugafa amakaye hisia amaugafa haneanagi eteꞌya fali-mainesafiti hetisayana tokiya hale yamaꞌa hanesia amaugafaene hetigahae. Hevaimatesaya amaugafamona tokiyaꞌa omalenea amaugafa haneanagi eteꞌya hetisaya kanafina tokiyaꞌa hanesia amaugafaene hetigahae.
1CO 15:44 Hevaimatesaya amaugafa mopa amaugafa hanegeno hetisaya amaugafa ikapinaga amaugafa falote hugahie. Mopale maisuna taugafama hanesiana ikapinaga maisuna taugafaene falote hugahie.
1CO 15:45 Naꞌa humainea yafe Anumaya Koti avopina mage huno kae-maleneane “Hagote kanoa, Atamuꞌe, haimula hanea kano falote humaine.” huno kae-maleneane. Kae-maleneanagi haenagama falote humainea Atamuꞌa, Yisasiꞌe, ikapinaga maige maige hisaya hamaimula amamisia kano maine.
1CO 15:46 Hagoteno ikapinaga maisuna taugafa falote ohunegi mopale taugafa hagoteno falote huteno haenaga ikapinaga maisuna taugafa falote hugahie.
1CO 15:47 Hagote kanoa, Atamuna, mopaleti aye kakali-feno talo huteneanagino haenaga falote humainea kanoa, Yisasiꞌa ikapinagati emaine.
1CO 15:48 Mopale mainaya veala mopaleti talo humalenea kanomo avamete huꞌya mainagi ikapinagama visaya veala ikapinagati emainea kanomo avamete huꞌya maigahae.
1CO 15:49 Menia mopaleti talo humalenea kanomo augafa kali-mai veaꞌne mainonanagi haenagaꞌa ikapinagati emainea kanomo augafa kali-mai taugafa hanegahie.
1CO 15:50 Nafuꞌnagana-gatama tamahanepauve mopafi taugafamoꞌa Anumaya Koti kava yagai-mainea kumatela oꞌugahianagino kasalino fanane hisia taugafamoꞌa agola maige maige nehaya kumatela oꞌutafa huno oꞌugahie.
1CO 15:51 Anumaya Koti kema falakino hanea kea tamahapaigahugi haviho. Mukiꞌa Yisasife haviꞌya amakupi malenaya veaꞌmogata ofalita afaꞌa mainesunageno aupaꞌa mukiꞌa laugafamoꞌa alino aluꞌa hu taugafa hapaegahie.
1CO 15:52 Aupaꞌa aulumaya koꞌnelia auꞌava kava huno haenagalafa kepiti ufe kalafa kemoꞌa nehigeno Yisasiꞌa ikapinagatila efalote hisigeno agoꞌma fali-mainaya veala hetiteꞌya agola maige maige hisaya amaugafa alitesageta ofalita afaꞌa mainesuna veala anile maige maige hisuna taugafa hapaegahie.
1CO 15:53 Mopafima mainona taugafamoꞌa negasalianagi haenagaꞌa okasalisia taugafa falote hugahie. Falisuna taugafa haneanagi haenagaꞌa ofalita agola maige maige hisuna taugafa falote hugahie.
1CO 15:54 Negasalia taugafamoꞌa fanane hutenageno okasalisia taugafa falote hugahie. Fali yamoꞌa fanane hinageno ofalisuna yana falote hisigeno ma ma Anumaya Koti humainea kemoꞌa falote huno tamage hugahie. Mage huno kae-maleneane “Maige maige hisuna yamoꞌa falisuna yamona agasetafa humaine. Nefaluna yamoga tagasesana tokiyakaꞌa hanate hane? Fali yamoga veala amaugafa akafu anika henefalina tokiyakaꞌa hanate hane?” huno kae-maleneane.
1CO 15:56 Kahegi kea akave omalonafe kefo yana nehune. Kefo yama nehuna yana akafu amanino veaꞌne hefalisia ya hane.
1CO 15:57 Haneanagi Anumayati Yisasi Kalaisiꞌa hulatenea yamo falisuna yana ago agase-maineafe Anumaya Koti agia alisaga huta muse hisune.
1CO 15:58 Nahau-mainea nafuꞌnagana-gatama Yisasifena tamakuꞌa ami hetofa hutama mai-lokiya vaitama etetama alu katela oꞌviho. Anumaya Koti aliꞌyamoꞌa afa ya kana ohuno kanale anonaꞌa alisaya aliꞌya haneafenagitama mukiꞌa kanafina Anumayamo aliꞌyana tokiyaꞌage vaitama aliho.
1CO 16:1 Yisasi anagala Yelusalemua mainageꞌna amaya hisaya mone amamisaya kea hugahe hue. Kalesia kotega mainaya veaꞌmogamina hamapaugeꞌya humainaya kavala tamakaya aniꞌa hiho.
1CO 16:2 Nagaya esua kanafina ani monema alitalu hisaya yafena nonahaigi Sotamaꞌahe Sotamaꞌahe alisaya monea ali fako hutama alu vaya amamisaya monea alitalu hute hute hiho.
1CO 16:3 Ani kava nehageꞌna esua yupa tamahaisia vayala hapalisageꞌna avo kaeꞌna amamiteꞌna humatesugeꞌya avoꞌene monene aliꞌya Yelusalemua ugahae.
1CO 16:4 Ugahagi nagaya visua nagesa hisugenofena amakaya nagaiꞌene ugahae.
1CO 16:5 Masetonia kotega mainaya anagaꞌmogamina mogeteꞌna tamakaitega egahue.
1CO 16:6 Neꞌeꞌna nago kanafina tamakaiꞌene yasima alisia ikatela maineꞌna alulegama ugahe hisugetama nagaila naya hutama ali kate nategahae.
1CO 16:7 Anumayamoꞌa kanalene hisigeꞌna nagayama visuana tamaketeꞌna aupaꞌa tamataleꞌna visua yafe onahaigi nagoꞌene ayaꞌaya kanagefa tamakaiꞌenena maisua nagesa nehavue.
1CO 16:8 Efesusi kumate maineꞌna kaveꞌma afulesia kanahe muse hisaya imu kisaya kanamoꞌa falote hutesigeꞌna ugahue.
1CO 16:9 Meni kanafina Anumaya Kotiꞌa agai kea hamapaisuafe fita yakinateno tusiꞌa aliꞌyana namigeꞌna neꞌalugeꞌya kasagoꞌya veaꞌmoꞌya ani kea nehaviyanagi ani kemona kame vayaꞌa kasagoꞌya vaya mainae.
1CO 16:10 Nagaya Anumaya Koti aliꞌya neꞌalua kava huno Timotiꞌa Anumaya Koti aliꞌya neꞌalianagino tamakaiteꞌma visiana tamakaife kolia ohuno aipamoꞌa falu nehinageno kanaleꞌya huno maino.
1CO 16:11 “Afa kano maine.” hutama hu-haviya hu-oꞌateho. Falu yapi mainesigetama aya hutama hutesageno nagaya mainolega kanaleꞌya huno eteno esie. Agayaene nagoꞌa nafuꞌnaganaꞌyaene esayafe amakava mainoe.
1CO 16:12 Apolosiꞌa nenafufe nehue nagoꞌa nafuꞌnaganaꞌyaene “Kolini kumate vuo” huꞌna hamapaite hamapaite nehuanagi “Menia oꞌvisua nagesa nehianagiꞌna oꞌugahugi haenagama visua kanaꞌniꞌama hanesigeꞌna ugahue.” huno humaine.
1CO 16:13 Kaꞌyetama mainetama Yisasife havitama lamakupi malenaya yana atafa hutama kolia ohutama lokiya vaitama maiho.
1CO 16:14 Nelama-fugamifena tamahau tamayamopafi nelahainage-tama mukiꞌa kavala hiho.
1CO 16:15 Tamakaya Setefanasifena havi-mainae. Kaliki kotega agaiꞌene agaiꞌa afamoꞌaene hagoteꞌya amakuꞌa aiyahae huteꞌya Yisasife haviꞌya amakupi malenayapiti mukiꞌa kanafina Yisasi anagala amaya humainae.
1CO 16:16 Naꞌa kava humaineꞌya Anumaya Koti aliꞌyana tusiya huꞌya neꞌaliya veaꞌmogami amaiyaꞌafi maiho.
1CO 16:17 Tamakaya alulega mainetama nahaꞌomaenayanagi menia Setefanasiꞌene Fotunatusiꞌene Akaikusiꞌene nagaitega ageꞌna nahaꞌnemaeyafe tusiꞌa muse nehue.
1CO 16:18 Amakaya tamakaifema me nahapaigeno naipamoꞌa kanaleꞌya higeꞌna muse nehue. Muse nehuafe tamakai tamaipamoꞌa aniꞌa huno kanaleꞌya humaine. Naꞌa kava nehaya vayafena tusiꞌa muse hutama amakia alisaga hiho.
1CO 16:19 Esia kotega alu kumate kumate maineꞌya Yisasife haviꞌya alitalu nehaya veala “Mainafio?” huꞌya hu falu fala hunelamatae. Akuvilaꞌene Palisilaꞌene anakai nopima Yisasife haviꞌya melitalu nehaya veala Anumayamoꞌene ailokaeꞌya maineꞌya “Mainafio?” huꞌya hu falu fala hu nelamatae.
1CO 16:20 Mukiꞌa mafi mainaya tafu-taganagaꞌya “Mainafio.” huꞌya hu falu fala hu nelamatae. Tamakaya Anumaya Koti anaga mainayafe nagoke nagokeꞌmogatama tamayana oꞌami aꞌami hutama maiho.
1CO 16:21 Nagoꞌa kea nago kanomona hapaugeno kae-maleneanagi nagaya Poloꞌna mamona atupa avona nagaiꞌni nayapiti kaeꞌna nelamamue.
1CO 16:22 Anumayamofe havino hau ayamopafi nomalea kanomona Anumaya Kotiꞌa ali haviya hutesie. “Anumayatimogae aupaꞌa eno.” huꞌna nehue.
1CO 16:23 Anumayati Yisasi kayone yamaꞌa tamakaiꞌene hanesie huꞌna nehue.
1CO 16:24 Yisasi Kalaisiꞌene aigaꞌmaeꞌna tamakaila naipa nelamamue. Tamage. Keꞌnia male haꞌno hie. Nagaiꞌni nagia Poloꞌnae.
2CO 1:1 Nagaila Polonia Anumaya Kotiꞌa hapalinateno Aposolo kano maiyo huno hunatene. Nelafuꞌa Timotiꞌene mani avona negaoꞌe. Tamakaife nehuꞌe. Tamakaya Anumaya Koti anagala Kolini kumate mainetama agai kema havigahe melitalu hutama nemaiya veafeꞌene Akaiya kotega maineꞌya Yisasife haviꞌya amakupi malenaya veaꞌnenefe hutaꞌa mani avona negaoꞌe.
2CO 1:2 Anumaya Kotiꞌa Nelafaꞌene Yisasi Kalaisi Anumayatimoꞌene kayone yamaꞌaene tamaipa falu hisia yaꞌene tamamisaꞌe huꞌna Anumayamotega havigeꞌna mani avona negaove.
2CO 1:3 Musena huneꞌateta Anumaya Koti agia alisaga nehuta maisune. Anumaya Kotiꞌa Yisasi Kalaisina Nefaꞌagino kalagi aimate yamona aepaꞌa maineafe mukiꞌa veaꞌmogatina taipamoꞌa kanale hisia yamona aepaꞌa nagoke maineanagino ani yana hunelate.
2CO 1:4 Tagaya mukiꞌa kana yama alunagenoꞌa Anumaya Kotiꞌa taipa kanale hulatesia yana nelamie. Tamineafe tagaya aniꞌa huta nagoꞌa veaꞌma kana yama falote humatesigeta Anumaya Kotiꞌa tayama hia kava huta veala amaipa alita kanale humatesunafe tagaiteꞌma falote humainea avamete kana yana falote humaine.
2CO 1:5 Yisasi Kalaisiteꞌma kasagoꞌya kana yama falote humainea avamete huno tagaipina kana yana falote nehiafe Kalaisiꞌene ailokaeta mainonanagino agaya tusiya huno taipamona alino kanale hunelate.
2CO 1:6 Tagaiteꞌma kana yama falote hisigeta tamakaifena, tagaya tamaipa ali kanale hulamatesuna yafe falote nehie. Tamakaila tamaku tamamema aligatisiafe falote nehie. Faloteꞌma hia kanafina Anumaya Kotiꞌa taipamona alino kanale hulatesigeta tagaya tamaya hisunafe taipa alino kanale hunelate. Tagaiteꞌma falote humainea avamete kana yana tamakaya aligeno Anumaya Kotiꞌa tamaya hinageno tamaipamoꞌa kanale hisigetama mailava hutama mai lokiya vaitama maigahae.
2CO 1:7 “Tokiyaꞌage huꞌya maigahae.” huta tamakaifena tusiya huta tametitia nehune. Tagaiteꞌenema kana yama folote hia kanafina Anumayamoꞌa tagaila taipa alino kanale hulatenea avamete huno tamakai tamaipa alino kanale hulamategahie huta nehune.
2CO 1:8 Esia kotega kana yama alimainona yafena nafuꞌnaganatama huꞌna lamakesa hugahe tamahapaigahue. Tusiya huno kana yana tagaipina falote higeta tokiya vaita maisuna tokiyatia omalegeta “Faligahune.” huta humainone.
2CO 1:9 Humainonanagi tagaya kanaleꞌya huta maisuna tokiyatia omaleneanagita ani lokiyahena tametitia ohisunagi Anumaya Kotiꞌa fali vayaꞌma alino heti-neꞌamatea kanomofe tametitia hisunafe ani avamete kana yana falote humaine.
2CO 1:10 Ani kotega tahaesageno tusi lagata aisigeta fali-mainesuna yapiti Anumaya Kotiꞌa taugafa aligatiteno haenagaꞌa eteno nagoꞌene taugafa aligatigahie huta tametitia nehune.
2CO 1:11 Tametitia nehunagi tamakaya laya hutama Anumayamotega ke hutama havigegeno laya hino. Taya hisigeꞌya mukiꞌa veaꞌmoꞌya anima tahaꞌmaesia yana ageteꞌya mukiꞌa veaꞌmoꞌya havigaya kema havisaya yafena Anumaya Kotina muse hutegahae.
2CO 1:12 Nagaya Yisasi kema nohaviya veaꞌnene tamakaiꞌene ailokaeꞌna maineꞌna alu aotage kano mainogeno Anumaya Kotiꞌa kayone yamaꞌa namigeꞌna fatago huꞌna maineꞌna ma mopale haviꞌyaꞌami hanea vayaꞌmogami ke kana kea nohue. Ani yafena nagesa havuana naguꞌamoꞌa “Havi kava nehane.” huno ohia yafena muse nehue.
2CO 1:13 Nagi menia hapalitama havilama hisaya kegeꞌya avopina negaove. Menia mukiꞌa aepaꞌnia havilama nohayanagi haenagaꞌa havilama hisae huꞌna nametitia nehue. Yisasi Kalaisiꞌma eteno esia yupa aepaꞌnia havilama hutetama tagaya tamakaifema muse nehuna avamete hutama tamakaya tagaifena musena hugahae.
2CO 1:15 Nagaifena muse hugahae huꞌna nametitia nehuꞌna Masetonia ugahe hagoteꞌna mainesalega mo lamavatagigeꞌna Masetoniatila eteꞌna egahe tole yupa tamaya hugahe me lamakeme evisuafe nagaila naya hisae huꞌna nagesa nehavue.
2CO 1:17 Ani kema huteꞌna oꞌuꞌnama mainoa yafena “Havige huno ayelavataga hie.” hutama tamakesa havimainao? Nagaya nagesa haviꞌna “Naꞌa maꞌa huꞌna aliꞌyana aligahue.” huteꞌna atafa naipamo haiya yafe “E.” huteꞌna haenaga “Aꞌao.” nehuo? Aꞌao naꞌa kavala nohue.
2CO 1:18 Anumaya Kotiꞌa agoꞌma humainea kea fatago huno hugahie. Nagaiꞌenena fatago huꞌna havigea ayelamavataga ohugahue. Tamahapai-mainoa kea nago yupa “E.” huteꞌna haenaga “Aꞌao.” huꞌna ohunoane.
2CO 1:19 Yisasi Kalaisiꞌa Anumaya Koti nafaꞌnemoꞌa havige huno ayelavataga hisia kanoa omaine. Nago yupa “E.” huteno haenaga “Aꞌao.” huno ohuneane. Fatago kegeꞌya huno “E.” nehia kano maine. Sailasiꞌene Timotiꞌene nagaiꞌniene tamakaipina Yisasi Kalaisi kea mo lamahapai-mainone.
2CO 1:20 Tamahapaunageno Anumaya Kotiꞌa “Hulamategahue.” huno hulokiya vai-malenea kemona aepaꞌa Yisasiꞌa agaiꞌa maineanagino ani kehena “E, hulamategahue.” huno agaiꞌa humaineafe Anumaya Kotifena “Tamage nehie.” huta nehuta agia alisaga nehune.
2CO 1:21 Agia alisaga nehunageno Anumaya Kotiꞌa agaiꞌa tavaleno tagaiꞌene tamakaiꞌene Kalaisiꞌene aigaꞌmaelateno “Tokiya vaitama maiho.” huno hunelate. Ani kema huhaleta hisunafe tagaila hapalilatene.
2CO 1:22 Hapalilateno “Tamakaya nagai anaga mainae.” huno humainea kema havisaya yafe agaiꞌa Avamula taguꞌafina faetene. Faetegeno taguꞌafina maineafe tagayama havunana “Haenagaꞌa kanaleꞌya huta maigahune.” huta nehune.
2CO 1:23 Nagaya kelamama-kisugeno tamaipamoꞌa haviya huyafene huꞌna Kolini kumatela nagoꞌene uvaꞌyi ohunoe. Anumaya Kotiꞌa nagesa havua yana ago havimaineanagiꞌna agai aufina tamage nehue.
2CO 1:24 Tamakaya Anumayamofena havitama lamakupi maletama tamametiti humainaya kemona atafa hutama tokiyaꞌage hulinayafe menia kahegi kea huta kava hu notamatonagi muse hutama tamaipa kanale yapi maisayafe mani kea nehune.
2CO 2:1 Tamakaitega eteꞌnama esuana kelamama-kisugetama tamaipa haviya huyafene huꞌna nagoꞌene oꞌugahue huꞌna humainoe.
2CO 2:2 Nagaya hisua kemo tamaipa ali haviya hisigeꞌya taꞌya nagaila muse yaniꞌa namigahae? Tamakai tamaipa haviya hisia yama tamamisua veaꞌmogatamage muse yana namisaya veaꞌnea mainae.
2CO 2:3 Tamakaitegama visua yupa kea otamama-kisuafe mani avona ago kaeꞌna tamaminoe. Tamakaya muse yama namisaya veaꞌne mainagi havigu kelamama-kisua yamo tamaipa haviya hisigeno naipamoꞌene haviya hu yafene huꞌna aupaꞌa omenoe. Tamahapai-mainoa kefo yana ago ali fatago hugahae huꞌna nagaya musema hisua yana ailokaeta nagopi musena hugahune huꞌna nehue.
2CO 2:4 Tusiya huꞌna tamakaifena nagesa nehavugeno naipamoꞌa kanaꞌage nehigeꞌna avi neꞌateꞌna ani avona ago kaeꞌna tamaminoe. Tamaipa haviya hisie huꞌna okaenogi “Tagaifena aluya huno haigeno mani avona lamie.” hutama hisayafene huꞌna ani avona ago kaeꞌna lamaminoe.
2CO 2:5 Tokaetama mainaya vayapiti nago kanomoꞌma kefo yama hia yafe naipa haviꞌna haviyama huana nagaiꞌnigelomagi tamakaiꞌene mukiꞌamogatamina tamaipamoꞌa tusiya huno haviya nehie. Haviya nehianagi ani yafena mukiꞌa kea ohisua nagesa nehie.
2CO 2:6 Tamaipamoꞌa haviya higetama ani kanomona “Kefo ya nehane.” hutama havi anonaꞌa hu neꞌatayafe ani kefo yamo anonaꞌa ago alimaine.
2CO 2:7 Ali-maineafe aigeꞌatetama kefo yamaꞌa ataletetama aipa alitama kanale huteho. Havigu agaye yamo kana ya amisigi kanale kava huteho.
2CO 2:8 Alitama kanale hu neꞌatetama “Kagaifena aluya huno nelahaiye.” hutama huteho huꞌna tokiyaꞌage ke nehue.
2CO 2:9 “Kanaleꞌya hutama mukiꞌa keꞌnia havitama akave nemalao ifi nomalao?” huꞌna nagaya tamakaila avame hulamateꞌna ani avona ago kaeꞌna lamaminoe.
2CO 2:10 Nago kanomona aigeꞌatetama kefo yamaꞌama ataletesayana nagaya aniꞌa huꞌna ani kanomona aigeꞌateꞌna kefo yamaꞌa ataleneꞌatoe. Nago kanomona aigeꞌateꞌnama kefo yamaꞌa ataletoana tamakaifene huꞌna Kalaisi aufina aniꞌa humainoe.
2CO 2:11 Naꞌa ohisugenoꞌa Sataniꞌa ayelavataga huno tatafa hugahie. Agaiꞌa havige huno ayelavataga hisia yafena ago havilinone.
2CO 2:12 Kalaisifena kanale mono kema huhaleꞌna hugahema Taloasi kumate uvaꞌyima hugenoꞌa Anumayamoꞌa anile mainaya veaꞌmogamina amakuꞌa alino aikalo higeꞌna kanaleꞌya huꞌna ani kea huhaleꞌna humainoe.
2CO 2:13 Huhaleꞌna huanagi nenafuꞌa Taitasiꞌa omaigeꞌna agaife nagesa kuꞌmo higeꞌna amataleꞌna atiyegahe Masetonia umainoe.
2CO 2:14 Kalaisiꞌa Satani ayapitila tavalegeta agaiꞌene ailokaeta mainonanagita mukiꞌa kefo yana agaseta mainona yafe Anumaya Kotife muse huta agia alisaga hisune. Agaya tagaila laya higeta alule alule vaiyeta Yisasi kema nehuna yafena ani kemona havilama hageno kanale manaꞌage yamo hia kava huno ute ete nehie.
2CO 2:15 Higeta lagaya Yisasi kema nehuna veaꞌmogata Kalaisiꞌene ailokaeta mainonafe kanale manaꞌage yamo hia avamete hunageno Anumaya Kotiꞌa muse nehie. Ani manaꞌamoꞌa ute ete huno mukiꞌa veapi vigeꞌya ani manaꞌage kea nehavigeno amaku amamema alinegatia veaꞌnene kefo yakeꞌya huꞌya hani yapima tegelege nehia atafi visaya veaꞌnene ani kea nehaviye.
2CO 2:16 Nehavigi nagoꞌamoꞌya ani kea haviꞌya “Akave omalegahune.” huꞌya nehaya veala hani yapi tegelege nehia atafi visaya veaꞌmogamife mani kemoꞌa fali-mai veaꞌmogami manaꞌamimo hia kava humaineanagi nagoꞌamoꞌya haviꞌya amakupi maleteꞌya “Maige maige hisuna yafe kanale manaꞌage nehie.” huꞌya nehae. Tusiꞌa aliꞌya neꞌalunanagi tagaitigela mani aliꞌyana oꞌaluteꞌasine.
2CO 2:17 Kasagoꞌya veaꞌmoꞌya Anumaya Koti aliꞌyateti “Miya alisune.” huꞌya nehagi tagaila Anumaya Kotiꞌa hulategeta fatago huta kelamagema huhaleta hunana Kalaisiꞌene ailokaeta maineta Anumaya Koti aufina mani kea huhaleta nehune.
2CO 3:1 Tagaya nagoꞌene tagaiti laugafa alita haisuna yafe mani kea nehuno? Aꞌao naꞌa nohune. Tagaifema ohaviya yafe mani kea nehuno? Nago kanomofe avopina “Kanale kano mainegi agai kea haviho.” huꞌya kae-malenaya kea aliꞌya vaiyatete nehagi tagaifena ago havimainaya yafe tagaya ani avamete avona alita vai noꞌayone. Tamataleꞌna visuana “Ani avamete avona namiho.” huꞌna ohugahue.
2CO 3:2 Ohugahugi tamakaya tagai kea havitetama tamakuꞌa ago aiyahae hageꞌya mukiꞌa veaꞌmoꞌya nelamakeꞌya tagaifena “Anumaya Koti kea fatago ke nehae.” huꞌya nehagetama tagai avo kana hutama mainageno tagupina hane.
2CO 3:3 Nagaya tamaya huꞌna Kalaisifena tamahapaugeno Kalaisiꞌa ani avona tamakaife huno veaꞌmogami amakupina kae-malene. Oko titetila yafamona amega okaenegi haimuꞌa hanea Anumaya Kotiꞌa agaiꞌa Avamuteti veaꞌmogatami amakupina ani avona kae-malegetama Kalaisi avo kana hutama mainayafe mukiꞌa veaꞌmoꞌya hapaliꞌya nehaviye.
2CO 3:4 Kalaisiꞌa tayama hia yafe Anumaya Kotifena tametiti nehuta mani kea nehune.
2CO 3:5 Nehunanagi “Mani aliꞌyana tagaitige alimainone” huta nohunagi Anumaya Kotiꞌa tokiya lamigeta mani aliꞌyana neꞌalune.
2CO 3:6 Anumaya Kotiꞌa kosa helatesia tokiyaꞌa tamineafe Anumaya Kotiꞌa haegafama alino hagelafi-latenea kema hamapaisuna yafe hulatene. Anumaya Kotiꞌa hagoteno kahegi kea yafate kae-malenegeꞌya veaꞌmoꞌya akave malesaya amakesa haviyanagi tokiyaꞌamia omalegeꞌya ago alitagae-mainaya yafe fali-mainae. Fali-mainagi Avamuꞌmoꞌa anima haegafama alino hagelafi-latenea kea tave-liteno haegafa yama alita maige maige hisuna tahaimula nelamie.
2CO 3:7 Nelamianagi hagote kahegi kema akave omalaya yafe ani kemoꞌa hamaegeꞌya fali-maine. Ani kahegi kea yafate kaeteno amaminea yupa Anumaya Kotitegati tokiya hale yamoꞌa falote huno Mosese augosafina tusiya huno aihalea yamo Isaleli veaꞌmogami amaulaga ayeno haviya higeꞌya Mosesena oꞌagageno ani tokiyaꞌage hale yamoꞌa osiꞌa maigeno fanane humaine.
2CO 3:8 Meni kanafina Alu Aotage Avamuꞌmoꞌma taya nehia aliꞌyamoꞌa nayo kahegi kemona agaseno tusiya huno tokiyaꞌage hale yamoꞌa falote humaine.
2CO 3:9 Hagote kahegi kema akave omalageno hefalimatenea kea tusiꞌa tokiyaꞌage hale yamaꞌaene kema hanesiana Anumaya Koti aufina fatago huta maisuna kea hagote kemo hale yamona ago agaseno tusiꞌa tokiya hale yamaꞌaene kea hane.
2CO 3:10 Tamage tusiꞌa tokiya hale yamaꞌama hanea kema falote humaineafe hagoteno falote humainea hale yamona agase-maineanagino menia hagote kahegi kemoꞌa aye hale olatene.
2CO 3:11 Fananema humainea kahegi kemoꞌa tokiya hale yamaꞌaene hagoteno falote humaineanagi menima agola maige maige hisuna kemoꞌa tusiꞌa tokiya hale yamaꞌa hanea ke hane.
2CO 3:12 Ani kemoꞌa “Agola hanege hanege hugahie.” huta tametitima nehuna yafe kolia huta fala okita ani kegeꞌya huhaleta nehune.
2CO 3:13 Nehuta falaꞌnokunagi Mosesena augosafima tokiya hale yama fanane hisigeꞌya Isaleli veaꞌmoꞌya oꞌagesayafene huno augosafina kenaletila alino fala kigeꞌya oꞌagenae. Oꞌagenayanagi tagaya Moseseꞌma humainea avamete huta Anumayamo kea fala nokune.
2CO 3:14 Fala nokunagi Moseseꞌa kenaleti augosafina alino aiso humalenea avamete huno Anumaya Kotiꞌa Isaleli veaꞌmogami amakuꞌamona alino haꞌyagino atalako higeꞌya havilama ohunae. Nagi nayoꞌene meniene Anumaya Koti avopima hapaliyana kenaleti aiso humalenea avamete huno amaku amamemoꞌa aiso humainegeꞌya havilama nohagi nagoꞌa veaꞌmoꞌya Kalaisiꞌene ailokaesayana ani amaku amamema aliꞌya aiso humalenaya yana Kalaisiꞌa alitalegeꞌya havilama huꞌya nehaviye.
2CO 3:15 Tamage menienema Mosese kahegi kema hapaliꞌyama haviyana amaku amamemoꞌa kenama Moseseꞌa alino augosafi aiso humainea avamete higeꞌya havilama nohae.
2CO 3:16 Havilama nohagi nagoꞌa veaꞌmoꞌya amakuꞌa aiyahae huꞌya Anumayamotega visayana aliꞌyama aiso humalenaya yana Kalaisiꞌa alitalenageꞌya havilama hugahae.
2CO 3:17 Nagi Anumayamoꞌa Alu Aotage Avamu maine. Anumayamo Avamula tagaiꞌenema mainesiana taguꞌama alino aiso hulateno aigagilatenea yana aligalu helateneafe nagoꞌene kahegi kemo akavela omalegeta nofipi mainaya vaya kana huta nagoꞌene omainone.
2CO 3:18 Taugosafi aiso humainea yana omalegeno Anumayamo tokiya hale yamoꞌa lagai taugosafi aye halegeꞌya veaꞌmoꞌya nelageꞌya Anumayamo tokiya hale yamaꞌa neꞌagae. Avamuꞌmoꞌa agai avamete veaꞌne maisunafe tagaila alino hapae-lategeta agaiꞌa tokiya hale yana alime alime nehaune.
2CO 4:1 Anumaya Kotiꞌa kalagi ailateno “Nagai kea huhaletama hiho.” huno hulateneafe “Kasalotahae.” huta nohune.
2CO 4:2 Aꞌao ani aliꞌyama alunana falakita tagaye hisifa kavala huta veala aye-mavataga huta Anumaya Koti kea alita aiyahae huta “Mage nehie.” huta havigea nohunagi hulama huta huhaleta nehune. Anumaya Koti aufina veaꞌmogamina kelamagea hamapaunageꞌya mukiꞌa veaꞌmoꞌya amakuꞌaleti “Lamage nehae.” huꞌya nehae.
2CO 4:3 Nehagi Yisasifena kanale mono kema huhaleta nehunageꞌya nagoꞌa veaꞌmoꞌya havilamama nohayana ani veaꞌmoꞌya hani yapima tegelege nehia atafi visaya veaꞌne mainae.
2CO 4:4 Sataniꞌa*, ma mopafi kava yagai-mainea kanomoꞌa, Yisasi kema nohaviya veala Kalaisiꞌa kefo yaꞌamia alino kanale humateno alino halematesia kea ohavisaya yafe Sataniꞌa amaku amakesa alino aye-lileno amaulaga alino asu humainea vea kana humatene. Humategeno Kalaisiꞌa agaiꞌa tokiya hale yamaꞌa hanea kano maineanagino Anumaya Kotiꞌenena nago avamete huꞌana mainaꞌe.
2CO 4:5 Mainaꞌageta lagaya tagaiti laugafa alita haisuna yafe mani kea huhaleta nohunagi Yisasina Anumaya Kotiꞌa taugafa aligatigahe hutenea kanoa “Anumayati maine.” huta tamaya hisunafe Yisasi aliꞌya vaya mainone.
2CO 4:6 Anumaya Kotiꞌa ikaꞌene mopaene talo humaleteno “Hani yapitila halo.” hunoꞌma humainea kanomoꞌa hani yama hanea taguꞌafina aye hale-lategeta maineta Yisasi Kalaisi augosafina Anumaya Koti tokiya hale yamoꞌa hanegeno tave-ligeta age-mainone.
2CO 4:7 Age-mainonanagi Anumaya Kotiꞌa agaiꞌage ani ala tokiyamona aepaꞌa maineafe “Veaꞌmogamina amave-lisue.” huno ani lokiya yamaꞌa tagaila, fulu fulu veaꞌmogati tagupina malenegeta agai aliꞌyana neꞌalunageꞌya veaꞌmoꞌya nelageꞌya “Amakaila tokiyaꞌamia omalene.” huꞌya Anumayamo agia alisaga nehae.
2CO 4:8 Mukiꞌa kanafina alu kana ya alu kana yana tagaitela falote nehigenoꞌagi tagaila alino haviyatafana nohie. Tagesa kuꞌmo nehianagi tagesa alino haviyatafana nohie.
2CO 4:9 Yisasi kema huna yateti ali haviya hulatayanagi Anumayamoꞌa otatalene. Mukiꞌa kanafina kaꞌyo kevema lamiyana ofalinone.
2CO 4:10 Nagi Yisasiꞌa fali-mainefiti heti-mainea haimuꞌmoꞌa tagai taugafale hanenageꞌya agesayafe “Yisasina haesunageno falisie.” huꞌya hutenaya kavala menia aniꞌa huꞌya tahaeꞌya faligahe nehae.
2CO 4:11 Yisasiꞌa fanane hisia taugafale maineno tokiyaꞌama nelamia yana amave-lisiafe tagaya ma mopafima mainona kanafina Yisasi kea huhaleta nehunageꞌya hamaiya vai-lateꞌya tahaegahena maiꞌya nehae.
2CO 4:12 Higeꞌya Anumaya Koti kema huhaleta huna yafe fali yamoꞌa tagaipina haneanagi agola maige maige hisuna haimuꞌmoꞌa tamakaipina aliꞌyana neꞌaliye.
2CO 4:13 Anumaya Koti avopina mage huno kae-maleneane “Tamage nehie huꞌna haviꞌna nagupi maleꞌna nametiti hu-mainoafe mani kea huhaleꞌna nehue.” huno higeꞌya kae-malenayane. Tagaya aniꞌa huta “Anumayamoꞌa lamage nehie.” huta tagupi malenonafe mani kea huhaleta nehune.
2CO 4:14 Tagaya ago havimainone Yisasiꞌene ailokaeta mainonafe Anumaya Kotiꞌa Anumayatimoꞌa Yisasina fali-mainefiti alino hetitenea kanomoꞌa tagaiꞌene tamakaiꞌenena aniꞌa huno fali-mainesupitila ali hetilateno agaiꞌa mainelega tavaleno lategahie huta tagesa havimainone.
2CO 4:15 Tamakai tamaya hisunafe tagaitela kana yana falote nehianagi kasagoꞌya veaꞌnele Anumayamo kayone yamaꞌamoꞌa falote higeꞌya neꞌagageno Anumayamoꞌa kasagoꞌya veala amaya nehianagiꞌa kasagoꞌya veaꞌmoꞌya Anumaya Kotifena muse huꞌya agia alisaga hugahae.
2CO 4:16 Nagi amega taugafamoꞌa haviya hugahe hianagi mukiꞌa kanafina Anumayamoꞌa taipamona alino haegafa hulategeta Anumayamo aliꞌyafena “Kasalo tahae.” huta noꞌatalone.
2CO 4:17 Tamage menima falote nehia kana yana afa ya kana huno fanane hugahie. Ani kana yama neꞌaluna yafe ikapinaga haita maisuna yamoꞌa, tusiꞌa ala yane, ohavunamaꞌa kanale tokiya hale yana falote huno hanege hanege hugahie.
2CO 4:18 Ikapinaga haita maineta alisuna yafena ago havimainonafe ma mopafi yafena tagesa havi havi nohunagi oꞌagenona yana, haenagama falote hisia kanale yafe tagesa nehavune. Ma mopafi hanegeta neꞌagona yana fanane hugahigi noꞌagona yana, haenagama falote hisia kanale yana afaꞌa agola hanege hanege huno hanegahie huta nehune.
2CO 5:1 Tagaya maꞌa huta nehavune ma mopafi mainona taugafa yugu no kana hu-mainegi falisunagenoꞌa ani nona fanane hisigeno Anumaya Kotiꞌa ikapinaga agola hanege hanege hisia no kana taugafa talo tala hulatene. Vayaꞌmoꞌya ani nona amayatetila okinagi Anumaya Kotiꞌa agaiꞌa kimalene huta ago havimainone.
2CO 5:2 Havimainonanagi menia ma mopafi taugafale mainonafe “Kasalo tahae.” huta ikapinaga maisuna taugafa tamisia yafe tusiya huno nelahaiye.
2CO 5:3 Nelahaiyanagi ani laugafa aliteta hakalo kana huta omaigahunagi taugafaene veaꞌne maigahune.
2CO 5:4 Maigahunagi ma mopafi mainona taugafalela kana yamo higeta “Avovo.” huta kalagila neꞌaita falisuna yafena notahaiyanagi maige maige hisuna taugafa alisuna yafena aluya huno nelahaiye. Maige maige hisuna tahaimuꞌmoꞌa esiaꞌamo haegafa kenama nefaiya avamete huno falino fananema hisia taugafa alino aiso hulatesigeta agola maige maige hisuna yafena aluya huno nelahaiye.
2CO 5:5 Anumaya Kotiꞌa tagaya agola maige maige hisunafene huno talo hu lateneanagita ani yafena “Tamage nehie.” huta havisuna yafe Alu Aotage Avamula lamine.
2CO 5:6 Tamineafe taguꞌamoꞌa kolia nohianagita havilama huta havilinone ma mopafi mainona kanafina ikapinaga Anumayamo avatela omainonane.
2CO 5:7 Omainonanagi Anumayamona oꞌagenona kanafina agaife havita lagupi maleta lametiti hu-mainona yateti ma mopafina vaineꞌayeta ma ma mainona taugafa neꞌataleta Anumayamo avatela agola umaisuna yafena aluya huno nelahaiye.
2CO 5:9 “Ma mopafi mainonano falisunano Anumayamona haisia kavala hugahune.” huta huna yafena aluya huno nelahaiye.
2CO 5:10 Tagaya mukiꞌa veala nagoke nagokeꞌmogata Kalaisi aule mo hetisunageno mopaleꞌma havi auꞌava yama humainesuna yafeꞌene kanale auꞌava yama hu-mainesuna yafeꞌenena agelama huno fako hulateno tagayama maita nehisuna avamete anonatia tahaote tahaote tamisiafene huta Anumayamona haiya kavala nehune.
2CO 5:11 Tagaya Anumayamofena “Koliꞌa hisuna kano maine.” huta havilineta veaꞌmoꞌya fatago huꞌya maisaya auꞌava yana amave-nelune. Anumaya Kotiꞌa lagupina nelageno “Kanale kava nehae.” huno nehio? Ifi tamakaya tamakuꞌafinaga tagaifena “Kanale kava nehae.” hutama nehao? huꞌna nehue.
2CO 5:12 Mani kea tagaiti lagi alita ala hisuna yafe nohunagi nagoꞌa veaꞌmoꞌya amega amaugafahe haviꞌya muse nehuꞌya “Fatago kavakeꞌya nehuna veaꞌne mainone.” huꞌya nehayanagi amakupina oꞌageneꞌya ani veaꞌmoꞌya tagaifema tamahavi-gesagetama tagaifena “Kanale kava nehae.” hutama muse nehutama kenonaꞌamia hamapaisayafene huta mani kea nehune.
2CO 5:13 Anumaya Koti aliꞌya neꞌalunageꞌya nagoꞌa veaꞌmoꞌya tagaifena “Aifo vaya mainae.” huꞌya nehayanagi ani aifo-nafo kavaꞌma hisunana Anumayamo agi alisaga hisuna yafe ani kavala nehune. Tamakai tamaya hisunafene huta kanale tagu tagesa nehavita Anumaya Koti aliꞌyana neꞌalune.
2CO 5:14 Kalaisiꞌa lagaifena hau ayamopafima nehaiya yamofe huta agai aliꞌyana neꞌalune. Neꞌalita nago yafema havunana nago kanomoꞌa mukiꞌa veafene huno fali-maine. Kalaisiꞌa tagaife huno fali-maineafe mukiꞌa veala agaiꞌene tokaeta ago fali-mainone.
2CO 5:15 Faliteta ago eteta hetita haegafa veaꞌne mainonafe tagaiti tahaisia kavala ohisunagi tagaifema huno faliteno heti-mainea kanomona taguꞌa amiteta agaiꞌma haisia kavakeꞌya hisunafene huno Yisasiꞌa fali-maine.
2CO 5:16 Nayona veaꞌmoꞌya nehaya kavafena ageteta amegati fako humainonagi menia Kalaisiꞌa tagaifema huno fali-mainea kema havuna yafe ani kea nago kanomofena nohune. Nayona Kalaisiꞌma humainea kavala ageteta fako hu-mainonagi menia ago havilama huteta ani kavala nohune.
2CO 5:17 Ani yafe nagoꞌa veaꞌmoꞌya Kalaisiꞌene ailokaeꞌya maiyaꞌamo haegafa veala hapaeꞌya mainageno atafa auꞌava amaipamoꞌa fanane higeno haegafa amaipa alino hapaematene.
2CO 5:18 Anumaya Kotiꞌa agaiꞌa ani yamona aepaꞌa maineanagino agaiꞌenena kame vayaꞌa mainonageno Kalaisina hutegeno eaꞌamo Anumaya Kotiꞌene melino taipa falu hulategeta agaiꞌene nago taipale mainone. Mainonageno Anumaya Kotiꞌa “Nagoꞌa veaꞌmogamina ani kavala humategahue.” huno humaineafe tagaya amaipa alita agaiꞌene falu humatesuna aliꞌyamaꞌa tagaila lamine.
2CO 5:19 Nelamino “Veala nagaiꞌene alitama amaipa falu hisia kea mage hutama hamapaiho.” huno mage humaine “Kalaisiꞌa tamakaifene huno fali-mainea yafe Anumaya Kotiꞌa kefo yatimo anonaꞌa otamisia agesa haviteno ma mopafi veaꞌmogami amaipa alino falu humateno agaiꞌene nagopi maiho.” huno hulatene.
2CO 5:20 Hulategeta Anumaya Kotiꞌa Kalaisi agile huhaleno tahapaigeta agai avayafiti kea mage nehune “Musetami nehunagi Kalaisiꞌa tamakaifene huno fali-maineafe Anumaya Kotina tamakoꞌya hute yana ataletama agaiꞌene tamaipa alitama falu hutama nagopi maiho.” huta tamahapai-mainone.
2CO 5:21 Nagi tagaila taya hisiafene huno hulateneafe nagola osi kefo yamaꞌa omalenea kanoa, Yisasiꞌe, tagayama kefo yama hu-mainona yana alino Yisasi agupile maleno kefo yatimo anonaꞌa amigeno kefo yama nehaya vaya kana huno fali-maineafe Anumaya Kotiꞌa tagaifena “Nagaiꞌniꞌa fatago veaꞌniꞌa mainae.” huno hulatene.
2CO 6:1 Anumayamoꞌene ailokaeta aliꞌyana neꞌalita mage huta ali lamakafa nehune. Anumaya Kotiꞌa kayone yamaꞌa ago tamamigetama ali-mainagi afa kavala ohutama akave maleme maleme haiho.
2CO 6:2 Anumayamoꞌa agaiꞌa avopina mage huno hu-maineane “Naguꞌamoꞌa kanale nehigeꞌna nahavigaya kea havuanagi tamaugafama aligatisua kanale tamaya hugahue.” huno hu-maineane. Hu-maineanagiꞌna tamahanepauve meni kanafina Anumaya Kotiꞌa aguꞌamoꞌa kanale nehigeno tamaku tamamena aligatisiafe nehaigi tamakuꞌa aiyahae hiho.
2CO 6:3 Aliꞌyatihena “Haviya hie.” huꞌya ohisaya yafe tagaya kefo yana nohune. Havigu kefo yama hisunana veaꞌmoꞌya nelageꞌya amakuꞌa aiyahae ohugahae huta lagaya tagu tametela kava neꞌyagaune.
2CO 6:4 Anumaya Koti aliꞌya vaya mainone huta mukiꞌa maꞌa kavala nehune. Vayamoꞌya aliꞌya haviyama hulatayana tokiya vaita mailava huta mainone. Kana yama falote higeta mailava huta mainonafe tamakaya “Kanale aliꞌya vayaꞌa mainae.” hutama hisaya yafe tagutela kava neꞌyagaune.
2CO 6:5 Neꞌyagaunageno maꞌa yana falote humaine kaꞌyoteti nelahaeꞌya nofi hulatenae. Mukiꞌa veaꞌmoꞌya alakenake huꞌya tahaegahe humainae. Tusiꞌa aliꞌya neꞌalita taula ofaonageno tusiꞌa tagate-maine.
2CO 6:6 Naꞌa hulatayanagi oniꞌyaꞌage kavala ohune. Anumayamo kea havilama hulineta mailava huta maineta veala ali kayone humateta amaya nehune. Alu Aotage Avamula taguꞌafi maineno laya higeta lamage huta veafena tahau tayamopafi nelahaiye.
2CO 6:7 Nelahaigeta kelamage kea huta Anumaya Koti tokiyaleti aliꞌyana neꞌalita vayaꞌmoꞌya ati kevema tamaga amayapina neꞌaliꞌya hauga amayapina halegula aye haiteꞌya kamema nehaya avamete huta fatago kavakeꞌya nehuta Sataniꞌenena tua nehuta Anumayamo aliꞌyana neꞌalune
2CO 6:8 Nagoꞌa veaꞌmoꞌya tagia alisaga nehayanagi nagoꞌa veaꞌmoꞌya tagia ali haviya hunelatae. Nagoꞌa veaꞌmoꞌya kamugea hatageꞌya vainelayanagi nagoꞌa veaꞌmoꞌya huꞌya kanale hunelatae. Tagaya tama kavakeꞌya nehunanagi tagaifena “Havige huꞌya ayelavataga nehae.” huꞌya nehae.
2CO 6:9 Nagoꞌa veaꞌmoꞌya tagaifena “Afa vaya kana humainae.” huꞌya nehayanagi Anumaya Kotiꞌene nagoꞌa veaꞌnene “Aꞌao amaki hanea vaya mainae.” huꞌya nehageꞌya nagoꞌa veaꞌmoꞌya tatafa huꞌya tahayayanagi ageho ofalinone. Anumaya Koti kema nehunafenagiꞌya hamai vailateꞌya tahayayanagi ofalinone.
2CO 6:10 Nagoꞌa yafena tahauna hunanagi mukiꞌa kanafina taipamoꞌa kanale nehigeta musena nehune. Afeno yatia omaleanagi Yisasi kema huhaleta nehunafenagita nagoꞌa veaꞌmogamina tusiꞌa kanale yana neꞌamamune. Nagoꞌa yatia omaleanagi afeno yaꞌamima hanea vaya kana huta mainone. Ani yamoꞌa tagaipina falote higeꞌya veaꞌmoꞌya tagaila nelagae.
2CO 6:11 Kolini kumate mainaya nelafugatama tamakaifena aluya huno nelahaigeta nago kea fala okinonagi fatago huta tamahapai-mainone.
2CO 6:12 Tamahanepaunageno tamakaifena lahaiyanagi tamakaya tagaifena otamahaiye.
2CO 6:13 Nagaiꞌni nafaꞌne kana hutama mainayafe tamakaila taguꞌama tamamuna avamete hutama anonatia tagaila tamakuꞌa tamiho.
2CO 6:14 Aliꞌya aligaheno aꞌnemoꞌya vema aligaheno vemoꞌya aꞌnema aligaheno naꞌama hinutamahena Anumaya Kotina amakaveꞌno huneꞌataya veaꞌnenena ailo okaeho. Ailokaetama maisayana hanaꞌa huno fatago humainea yaꞌene kefo yamoꞌenena ailokaeꞌana maigaꞌe? Hani yamoꞌa hale yamoꞌenena ailokaegaꞌo?
2CO 6:15 Ifi Yisasi Kalaisiꞌene Sataniꞌenena ailokaeꞌana nagoke anaipale maigaꞌo? Ifi Anumayamo akave nomalaya veaꞌnene Yisasife haviꞌya amakupi malenaya veaꞌnene ailokaeꞌya maisayana nagoke amaku amakesale omaigahae.
2CO 6:16 Ago fali-mainaya veafe “Anumayati maine.” huꞌya amakisana neꞌvaiya yaꞌene Anumaya Kotiꞌma mainea noꞌene aliꞌya nagopi malesayana kanale hugahio? Anumaya Kotiꞌa haimuꞌene kanoa tagai tagupi maineafe Anumaya Koti avopina mage huno hu-maineane “Nagaya amakupi maineꞌna amakaiꞌene vaiyatete nehuꞌna Anumaya Kotiꞌami maisugeꞌya nagai anaga maigahae.
2CO 6:17 Ani yafe kefo yana neꞌataletama alule mainetama oniꞌyaꞌage kefo yana ohisageꞌna nagaiꞌnilega tamavaleꞌna tamategahue.
2CO 6:18 Lamateneꞌna tamakaila nelamafaꞌna maisugetama nagai nafaꞌne munaꞌneyaga maigahae. Nagaya mukiꞌa tokiyamona aepaꞌagiꞌna mainoe. Anumayamoꞌna, mani kea nehue.” huno higeꞌya kae-malenayane.
2CO 7:1 Ani kema hulokiya vaino hulateneafe nahau nayamopafi nenahaiya nenafu-gatama taugafaene tagu tameꞌene ali haviya hisia kavala neꞌataleteta Anumaya Kotifema koli hisuna tagesa havita fatago kavakeꞌya huge huge nehuta alu aotage veaꞌne maisune.
2CO 7:2 Tagaifena tamaipa haviya ohutama tamakuꞌa lamiho. Nagoꞌa veala ali haviya hu noꞌamatone. Nagoꞌa veala havi katela amavaleta noꞌamatone. Nagoꞌa veala ayemavataga huta moneꞌamia noꞌalune.
2CO 7:3 Noꞌalunagi kelamama-kisuafene huꞌna mani kea nohugi “Nahau nayamopafi nenahaiye.” huꞌna ago tamahapai-mainoe. Afaꞌa maisunano falisunano tamakaiꞌene ailokaeta maigahune.
2CO 7:4 Tamakaya fatago hutama maigahae huꞌna nametitia nehuꞌna tamakia alisaga nehue. Mukiꞌa kana yana nagaipima falote higeꞌna ani yapima mauvanagi tamakaifena naipa haviꞌna tusiꞌa muse nehue.
2CO 7:5 Masetonia kotega uvaꞌyi hunanagi alu kumate kumatela kana yamoꞌa falote higeꞌya nagoꞌa veaꞌmoꞌya tagaiꞌene ke vaiꞌya tu hulatageno taguꞌamoꞌa koli hia kava higeta maifalua ohunone.
2CO 7:6 Ohunonagi Anumaya Kotiꞌa kana yama aliya veala amakuꞌa alino kanale huneꞌamatea kano maineanagino Taitasina hutegeno eaꞌamo taguꞌa melino falu hulatene.
2CO 7:7 Taitasiꞌma ea yafekela musena nohunagi Taitasina hutageno mage huno me lahapaiye “Amakaya Kolini kumate mainaya veaꞌmoꞌya kanale yama hunataya yafena naguꞌa alino kanale humaine.” huno huteno “Kagesaya yafena hamaigeꞌya kagayama hamapai-mainana kefo yaꞌamihena amakuꞌa aiyahae hayanagi neꞌataleꞌya ‘Nagoꞌa vayaꞌmoꞌya kagai kagia ali haviya hugahe hayanagita tagaya kaya hugahune.’ huꞌya hae.” huno hia yafena naipamoꞌa kanale higeꞌna tusiꞌa muse nehue.
2CO 7:8 Nehugi avoma kaeꞌna lamamuana tamaipamoꞌa haviya hie huꞌna nagesa havuanagi “Haviya huꞌna avona kaeꞌna amaminoe.” huꞌna hu-mainoanagi menia osi kanafina tamaipamoꞌa kana higetama etetama tamakuꞌa aiyahae haya yafena muse nehuꞌna “Kanaleꞌya huꞌna avona kaeꞌna amaminoe.” huꞌna nagesa havimainoe.
2CO 7:9 Haviteꞌna menia muse nehue. Tamaipa kanama haya yafena musena nohugi tamaipa kana hutetama etetama tamaipama aiyahae haya yafena muse nehue. Anumaya Kotiꞌa aniꞌa huno tamaipa kana hutetama etetama lamaipama aiyahae hutama agaitegama aya yafena muse nehigi tamaminoa avomoꞌa tamakaila alino haviyana ohunegi kanaleꞌya hulamatene huꞌna nehue.
2CO 7:10 Taguꞌa aiyahae hisunafe Anumaya Kotiꞌa kana yana taguꞌafina nelamie. Tamisigeta aliteta taguꞌa aiyahae hisunageno tagu tamena aligatisiafene huno nelamie. Ani yafe Anumaya Kotiꞌma tamia kana yafena “Otahaiye.” huta nohunagi ma mopafi yafema amakesa havi havi nehaya veaꞌmoꞌya kana yama falote hinageꞌya amakuꞌama aiyahae ohisagenoꞌa Anumaya Kotiꞌa amaya ohinageꞌya faliteꞌya hani yapi ugahae.
2CO 7:11 Tamakaipima mainea kanomoꞌa kefo yama higeꞌna osi avona kaeꞌna tamamugetama agetageno tamaipamoꞌa kana higeno Anumaya Kotiꞌma tamaminea kana yana tusiꞌa kanaleꞌya hulamatenegi haviho. Ani kefo yafena “Tagaye nehinagetama aupaꞌa alitalegahune.” hutama tamakuꞌa aiyahae humainagi koli hutama ani kefo yama humainea kanomofena tamaipamoꞌa kana higetama anonaꞌa aminayafe nagaiꞌma nagesaya yafena nelamahaiye. Anima mukiꞌa yama humainaya yafena tamakaya ani kefo yama ohunaya yana ago naveli-mainae.
2CO 7:12 Mani avoma kaovana ani kefo yama nehia kanomofeꞌene kefo yama hutaya veaꞌnenefe huꞌna okaenogi tamakaife huꞌna kae-malogetama tamakaya hapalitama Anumaya Koti aufina ani avopiti kea akave maletama “Polofe lahaigeta agai veaꞌne mainone.” hutama hisayafene huꞌna mani avona kaeꞌna tamaminoe.
2CO 7:13 Tamaminogi nagai kema haviya yafena naipamoꞌa kanaleꞌya nehie. Naꞌafenomagi aniꞌa hutama Taitasi aipama alitama kanale haya yafena nagoꞌene naipamoꞌa kanaleꞌya nehie.
2CO 7:14 Tamakaifena muse huꞌna tamakima alisaga huꞌna Taitasina hapaugetama kanale kavaꞌma hutaya yafena nagayea nohie. Tamakaila kelamagema tamahapai-mainoa avamete huꞌna Taitasina tamakaifema hapauva kea havigea huꞌna haꞌopainogi tamakaya hapauva avamete hutama kanaleꞌya humainae.
2CO 7:15 Tamakaya koli hutama atali hutetama agai kema haviya yafena Taitasiꞌa agesa havi havi huno tamakaifena aipamoꞌa aluya huno musena humaine.
2CO 7:16 Ani yafe tamakaya kefo yana ohiho. Fatago hutama maigahae huꞌna nametitia nehuꞌna tusiꞌa muse nehue.
2CO 8:1 Anumaya Kotiꞌa Masetonia maineꞌya Yisasina amakuꞌa aminaya veaꞌmogamina kayone yamaꞌa amamigeꞌya kanale yama haya yafe tamahapaigahe hue.
2CO 8:2 Ani veapina tusiꞌa kana yamo falote hianagi Anumayamofena muse nehuꞌya amakaipina osi kanoꞌa afeno yaꞌamia hanegeꞌya afa veaꞌne maiyanagi tusiya huꞌya alu veaꞌmogamima amaya hisaya yafena monea alitalu huꞌya kanale kavakeꞌya humatenae.
2CO 8:3 Tamahanepauve osi kanoꞌa afeno yaꞌamia hanegeꞌya “Nagoꞌa tagaitia malesune.” huꞌya amakesa ohaviꞌya havigu mainaya veaꞌmogamina monea amaminae. “Ani kava hiho.” huta hamaꞌopaunanagi “Tatalageta Yutia maineꞌya Yisasina amakuꞌa aminaya veaꞌmogamina amaya hamano.” huꞌya huteꞌya ani kavala humainae.
2CO 8:5 Hayanagita “Monea osiꞌa amamigahae.” huta hunanagi ala mone hageꞌya amaminae. Ani yamaꞌagelomagi Anumaya Kotifena hamaiya avamete huꞌya hagoteꞌya amakaiꞌami amakuꞌa Anumayamona amitafa huteꞌya aniꞌa huꞌya amakuꞌa tagaila taminae.
2CO 8:6 Naꞌa hayafe Taitasifena mage huta hapai-mainone “Hagoteka Kolini veaꞌnene umaineka ‘Nagoꞌa veaꞌmogami amaya hisia monea alitalu hiho.’ huka hamapai-mainanagi menia anima kayone hisaya aliꞌyana molivayayo.” huta hapai-mainone.
2CO 8:7 Tamakaya mukiꞌa yama haya yamoꞌa aluya huno kanale ya higetama Anumayamofena havitama lamakupi maletama lamametitima haya yamo tokiyaꞌagela hutama Yisasi kema hayana fatago kegeꞌya nehae. Kanale tamaku tamakesaene veaꞌne mainayafe tagaifena tamahau tamayamopafi nelama-hainagetama menia kayone hutama veaꞌmogamina amaya hisaya monema neꞌamamiya aliꞌyana aluya hutama aliho.
2CO 8:8 “Monea amamiho.” huꞌna kahegi kea nohugi nagoꞌa veaꞌmoꞌya kanaleꞌya huꞌya monea malageꞌna ageteꞌna fako hulamatogi hanaꞌa hugahae? Nagoꞌa veafe tamahau tamayamopafi nelahamaiya yana kanaleꞌya huno haneo? huꞌna nelamakoe.
2CO 8:9 Tamakaya Anumayati Yisasi Kalaisiꞌa kayonema hulatenea yafena ago havilinae. Tusiꞌa kanale yapi maineanagino tagaifene huno tagayama kanale noma maisunafene huno agaiꞌa kanale maiꞌyamaꞌa ataleteno ma mopafi eaꞌamo tusiꞌa havi noma mainea yateti tamakaya mukiꞌa kanale yana ali-mainae.
2CO 8:10 Ali-mainagi ani kanale kavala hiho huꞌna nagesa havua kea tamahapaigahugi haviho. Tamakaya ago haꞌno humainea kafufina hagotetama “Ani monea alitalu hisune.” hutetama aepa hetama alitalu hu-mainagi menia ani aliꞌyakeꞌya alitama alivayayeho.
2CO 8:11 “Monea amamigahune.” hutama hayanagi menia aniꞌa hutama amamisaya tamakesama havinutamahena malenesaya yapitila ali haꞌno hutama alitalu hutetama amamiho.
2CO 8:12 Nagi amakuꞌamoꞌa kanale higeꞌya malenaya monefiti amaminaya yafena Anumayamoꞌa muse humateanagi nagoꞌa veaꞌmoya nago yaꞌamima omalesayana Anumayamoꞌa “Amamiho” huno ohugahie.
2CO 8:13 “Amakaya kanale no maisaya yafe ala monea amamitetama monetamia omaleafe tamakaya havi no maigahae.” huꞌna nohugi menia monea tamakaipi haneafenagiꞌya omalegeꞌyama afaꞌa mainaya veaꞌmogamina amaya nehutama haenagaꞌa tamakaya omalesigetama afaꞌa maisageꞌyahena tamaya hugahae. Ani kavaꞌma hisayana mukiꞌamogatama nago avamete hutama maigahae.
2CO 8:15 Nayona Anumaya Kotiꞌa Isaleli veaꞌmogamina ikapinagati kave amaminea kanafina Anumaya Koti avopina mage huno hu-maineane “Kasagoꞌya ali-mainea kanomoꞌene osiꞌa ali-mainea kanomoꞌenena amamu hia kave nemainae.” huno avona kae-maleneane. Naꞌa humaineafe amaya hiho huꞌna nehue.
2CO 8:16 Tamaya hisua nagesa havua nagesa Anumaya Kotiꞌa Taitasina ago aminea yafena Anumayamofena muse nehue.
2CO 8:17 Muse nehugi “Kolini kumate vuo.” huta hutonana “E, muse nehue ani kumate visua nagesa nehavue.” huno agaiꞌa humaine.
2CO 8:18 Humainegi nago kanoa kanaleꞌya huno Yisasi kanale mono kea huhaleno higeꞌya mukiꞌa veaꞌmoꞌya muse humainaya kanoa hutesugeꞌana Taitasiꞌene ugaꞌe.
2CO 8:19 Ani yamaꞌagelomagi alu kumate kumate Yisasina amakuꞌa aminaya veapina tagaiꞌene vaiyeno taminaya monea alita momisunafe ani kanomona aliꞌya hetitenae. Hetitageta veafeke tahau higeta Anumayamo agima alisaga hisuna yafe “Monea alita momamisune.” huta nehune.
2CO 8:20 Ani tusiꞌa monema alitalu haya monehena havigu veaꞌmoꞌya tagaifena “Havi kava hae.” huꞌya hisaya yafenagita lagaya kava yagaita ani tafutaganaꞌene nagopi vaiyegahune.
2CO 8:21 Kava yagaita Anumayamo auleꞌene veaꞌmogami amauleꞌene kanaleꞌya huta aliꞌyana alisuna yafe nelahaiye.
2CO 8:22 Nelahaigeta nago tafu-taganaꞌa mukiꞌa kanafina alu aliꞌya alu aliꞌyana neꞌalianagita fako huta agonana tokiyaꞌage huno veaꞌmogamina amaya nehianagino menia aluya huno lamakaifena “Kanale kava hugahae.” huno hia yafe Taitasiganiene hunategahune.
2CO 8:23 Tamakaiꞌma tamaya hisia yafe Taitasiꞌa nagaiꞌene tokaeno maineno aliꞌyana neꞌaligeꞌya alu kumate kumate mono note veaꞌmoꞌya humatageꞌana agaiꞌene vaꞌa tafu-taganagania aliꞌyama neꞌaliꞌa yamoꞌa Kalaisi agia alisaga nehaꞌe.
2CO 8:24 Naꞌa nehaꞌafe tamakaya tamahau tamayamopafima nelahamaiya yafena tamakia alisaga huta hamapai-mainona yana amave-lisaya yafe anima esaya vayala amaya nehisageꞌya Yisasina amakuꞌa aminaya veaꞌmoꞌyama agesayana “Poloꞌa humainea kea tamage humaine.” huꞌya hugahae.
2CO 9:1 “Yutia maineꞌya Yisasina amakuꞌa aminaya veaꞌne amaya huta monea amamigahune.” hutama haya kea haviteꞌna Masetonia kotega mainaya veaꞌmogamina tamakaifena mage huꞌna hamapauve “Akaiya kotega mainaya veaꞌmoꞌya ago haꞌno hia kafufina anima amamisaya monea ago talo tala humalenae.” huꞌna hamapaugeꞌya nagoꞌa veaꞌmoꞌya tamakaya tokiyaꞌageꞌma hutama haya yafena haviteꞌya “Tagaya aniꞌa hugahune.” huꞌya nehae. Ani monema amamisayafene huꞌna nagoꞌene avoma kaesuana afa ya kana hugahie.
2CO 9:3 Tamakaifena “Ago talo tala humalenae.” huꞌna hamanepaugi havigu “Kagaya havige nehane.” huꞌya huyafenagi ani monea menima alitalu hisaya yafe nagoꞌa tafu-taganagamina humatesugeꞌya tamakaitega ugahae.
2CO 9:4 Ani monema alisuafe nagaya amakave visuaꞌamoꞌna Masetonia kotega mainaya veaꞌnenema visugeꞌya havigu monema alitalu ohunesageꞌna nagayaene tamakayaenena tagaye huyafene huꞌna nagoꞌa vayala hagoteꞌna humatesugeꞌya ugahae.
2CO 9:5 Ani monehena “Kasagoꞌya amamigahune.” hutama humainaya monea talo tala hisayafene huꞌna nagoꞌa tafu-taganagamina humatogeꞌya ugahe nehagi uvaꞌyima huteꞌya “Naꞌama tamiho.” huꞌya hisagetama amamiho. Oꞌamamisaya tamakesa ohavitama tamaipa kanale yapiti ala monea afaꞌa amamiho huꞌna nehue.
2CO 9:6 Ani monema amamisaya yafena tamakesa haviho. Osi avina kanoꞌa fai-malenesia kanomoꞌa kosa ohesia kave kanoꞌa aligahigi kasagoꞌya hoya vai-malenesia kanomoꞌa kasagoꞌya kaveꞌa aligahie.
2CO 9:7 Naꞌa hu-maineafe tamakaya tamahaote tamahaote tamaku tamakesa havitetama “Ma monea amamigahune.” higeno tamaipamoꞌa kanaꞌagela ohinagetama kanaleꞌya hutama amamiho. Aipa kanale yapiti vaya kaikai hisia kanomofena Anumaya Kotiꞌa hau ayamopafi nehaiye.
2CO 9:8 Anumaya Kotiꞌa kosa helamatesia yana kayone yamaꞌa tamamisia amukoꞌa haneanagino mukiꞌa kanafina tamakaila tamaya hisia yaꞌene mukiꞌa veaꞌmogamina amaya hisia yamaꞌaene kosa helamatesia yana alu ya alu yana tamamigahie.
2CO 9:9 Naꞌama hisia yafena Anumaya Koti avopina mage huno kae-maleneane “Nagoꞌa veaꞌmoꞌya afeno yaꞌamima omalenesia veaꞌmogamina amamite amamite hisageno fatago kavaꞌamimoꞌa hanege hanege huno agola hanegahie.” huno kae-maleneane.
2CO 9:10 Anumaya Kotiꞌa avina yana tamigeno anifiti nena hutegeno kavela falote higeno nelamino vayaꞌma kaitama amaya hisaya yana kasagoꞌya tamamisigetama tamahau hutama vayaꞌma kaisayana fatago kavatamimoꞌa ala hugahie.
2CO 9:11 Anumayamoꞌa mukiꞌa yana tamamisigetama mukiꞌa kanafina veala amamigahae. Amamisayafene hutama tagai tayapi malenesageta ani veaꞌmogamina amamisuna yateti Anumaya Kotina musena hutegahae.
2CO 9:12 Yisasina amakuꞌa aminaya veaꞌmogamina kosa heoꞌamatea yama amamiyanagi ani yamaꞌagelomagi ani kavaꞌma haya yafena tusiya huꞌya Anumaya Kotina musena hutegahae.
2CO 9:13 “Kalaisi kanale mono kea havita lagupi malenone.” hutetama ani kea kanaleꞌya hutama akave maletama vaya kaikai nehutama amakaiꞌene nagoꞌa veaꞌnene amaya hutama amave-lisageꞌya “Tamage Anumayamo akave nehae.” huꞌya Anumaya Koti agia alisaga hugahae.
2CO 9:14 Alisaga hisageno Anumaya Kotiꞌa tusiya huno kayone hulamatesia yafe amakesa haviꞌya tamakaifena aluya huno nehamainageꞌya “Anumayamoꞌa nagoꞌene tamaya hisie.” huꞌya nunamuna hugahae.
2CO 9:15 Anumaya Kotiꞌa tusiya huno kayone hulateno laminea kanohena hanaꞌa huta musena hisune. Ani yafe Anumaya Kotifena tusiya huta musena hutesune huꞌna nehue.
2CO 10:1 Nagoꞌa vayaꞌmoꞌya nagaifena mage huꞌya nehae “Poloꞌa aluleꞌma mainenoꞌa tagaifena tokiyaꞌage ke nehianagi tagai tauleꞌma emaiyana koli huno kea nohie.” huꞌya nehayanagi nagaya Poloꞌna musetami nehugi Kalaisiꞌa ako huno kayone humainea avamete huꞌna ako huꞌna kayone kefiti mage huꞌna tamahavi-negoe.
2CO 10:2 Tamakaya mainesaleꞌma uvaꞌyi hisuana tokiyaꞌage ke huyafenagi menima omenesule ali fatago hiho. Ali fatago ohisayana nagoꞌa veaꞌmoꞌya nagaifena “Mopafi veaꞌmoꞌya nehaya avamete kava nehie.” huꞌya haya veaꞌmogamina nagayama vinuꞌnahena ani veafena tokiyaꞌage ke hugahue huꞌna nehue.
2CO 10:3 Tamage tagaya mopafi vaya mainonanagi Sataniꞌene tuma hunana atafa laipa akave maleta tua nohune.
2CO 10:4 Mopafi mainaya veaꞌmoꞌya kame hugahe nehaya avamete huta ati kevea alita kamea nohunagi Anumaya Kotiꞌa agaiꞌa tokiya ago tamineanagita Satani tokiya yamaꞌa ali haviya huta neꞌagasone.
2CO 10:5 Satanina agaseta Anumaya Kotifena havigema huneꞌataya kemona ali haviya huteta veaꞌmoꞌya amakaiꞌami amaugafama aliꞌya haiteꞌya “Anumaya Koti kema ohavigahune.” huꞌya nehaya kemona agaseta hu-mainona keleti amakaiꞌami amaku amakesa Kalaisi aiyafinaga agai kema akave hisayafe amatenone.
2CO 10:6 Amatenonafe tamakaya tamakuꞌa aiyahae hutama mukiꞌa Kalaisi kea akave malesageta kema neꞌatagaya veala anonaꞌamia anamigahune.
2CO 10:7 Tamakaya amega yate neꞌagae. Nagoꞌa veaꞌmoꞌya “Tagaya tamage huta Kalaisi veaꞌne mainone.” huꞌya hisayana nagaiꞌenena aniꞌa huꞌna Kalaisina agai kano mainoa yafena lamakesa havi havi hutama maiho.
2CO 10:8 Tagaya kavatami mainonafe tamakuꞌa ali lokiya vailama-tesunafene huno Anumayamoꞌa tagaila hulatene. Tamakuꞌa ali haviya hisunafene huno huotatenegi Anumayamoꞌma hulatenea yafe tusiꞌa muse huꞌna veala hamanepauva yafena nagayea ohugahie.
2CO 10:9 Nagayama kae-maloa avona koliꞌniꞌa hisaya kea huꞌna avopina okaenoe.
2CO 10:10 Nagoꞌa veaꞌmoꞌya nagaifena mage nehae “Poloꞌa avoma kaeno lahapaiyana tokiyaꞌage huno keanelama-kianagi tagai tauleꞌma neꞌenoꞌa fulu fulu kano emaineno koliti huno afa ke maino nehie.” huꞌya nehae.
2CO 10:11 Naꞌa kema nehaya veala mani kea haviho. Avopitiꞌma hua kene navayafitiꞌma hua kenena nagoke augafa avamete ke haneanagiꞌna ani kavala hugahue.
2CO 10:12 Hugahuanagi ani veaꞌmoꞌya nagoꞌamogamina maiya auꞌavaꞌami ageteꞌya “Naꞌa nehaya veaꞌne mainagi nagai auꞌava yamoꞌa amakaila amakaseꞌna mainoe.” huꞌya nehayanagi kanale amaku amakesa omalene. Omaleneanagiꞌna nagaya “Amakaya maiya auꞌava yamona ago amakaseꞌna kanaleꞌya huꞌna mainoe.” huꞌna hisuo? “Ifi nagaila ago nagaseꞌya kanaleꞌya huꞌna mainae.” huꞌna hisue? Naꞌa avamete kavala ohugahue.
2CO 10:13 Anumaya Kotiꞌa alisuna aliꞌyana ago tamiteno ani aliꞌyate tavalegeta tamakaitegama onana anima taminea aliꞌyakeꞌya neꞌalita tagia alisaga hugahunanagi nagoꞌa aliꞌyafena tagia alisaga ohugahune.
2CO 10:14 Ohugahunagi nagoꞌa veaꞌnea omenageta tagaya hagoteta Kalaisifena kanale mono kea tamakaila tamahapai-mainonafe menia ani aliꞌyafena muse nehugi Anumaya Kotiꞌa otaminesia aliꞌyafena tagia alisaga ohugahune.
2CO 10:15 Alu vayaꞌmoꞌyama agoꞌma ali-mainesaya aliꞌyafena “Tagaiti ali-mainona aliꞌyane.” huta tagia alisaga nohunagi Yisasife havitama tamakupi malenaya yamoꞌa ala huno tokiyaꞌage hisigetama tamakaipina nagoꞌene Yisasi mono kea tamahapaisunageno aliꞌyatimoꞌa ala hisie huta tametitia nehune.
2CO 10:16 Naꞌa hisigeta kotamia agaseta alu kote kote vaiyeta Anumayamo kema ohavinesaya veaꞌmogamina mo hamapaisuna yafe nelahaiye. Alu vayaꞌmogami aliꞌyatela tagia alisaga hisuna yafena notahaiye.
2CO 10:17 Anumaya Koti avopina mage huꞌya humainayane “Nago kanomoꞌa agima alisaga hugahena Anumayamo agigeꞌya alisaga hino.” huꞌya kae-malenayane.
2CO 10:18 Nago kanomoꞌa “Kanale kavakeꞌya nehua kano mainoe.” huno hisia kanomona Anumayamo aulela agia omalenegi Anumayamoꞌa agaiꞌa nago kanomofena “Kanale kavakeꞌya nehia kanoe.” hunoꞌma hisigenoꞌa tamagelafa huno Anumayamo aulela agimoꞌa hanegahie.
2CO 11:1 Ako hutama natalenetama mani kea haviho. Afaꞌa osiꞌa aifo ke kana ke hugahugi ako hutama maiya avamete nagoꞌene maiho.
2CO 11:2 Anumayamoꞌa tamakaifema agesa nehavia avamete huꞌna havi kapi oꞌvisaya yafe nagesa kuꞌmoꞌa tusiya huno nehie. Nagi nagola hage-malenea munala alu vemoꞌa avayu hia yafe aꞌmona nefaꞌa tusiꞌa agaye nehia avamete huꞌna nagaya Kalaisina alu aotage veaꞌneꞌa maisae huꞌna kava yagainelamatoe.
2CO 11:3 Osifaꞌvemoꞌa savaleꞌma huno Ivina ayevataga humainea avamete huꞌya nagoꞌa vayaꞌmoꞌya ayelama-vatagama hisagetamahena tamakesa ali fatago hutama Kalaisi akaveꞌma neꞌvaletila agai katela neꞌataletama tole lamakesa havitama Kalaisina tamakaveꞌnoma hutesaya yafena nagaila tusiya huno nagesa kuꞌmoꞌa nehie.
2CO 11:4 Yisasifena ago tamahapai-mainoa kea nagoꞌa vayaꞌmoꞌya nohagi Yisasifena havigea alu kema me lamahanepaiyana tamakaya “Tamage nehae.” hutama aupaꞌa amakave nemalae. Nemalayanagi tagaya “Alu Aotage Avamula tamakupi emaigahie.” huta nehunanagi amakaya haya kemoꞌa mage hae “Alu kanomo avamula tamakupi emaine.” huꞌya hagetama aupaꞌa muse nehutama tusiꞌa havi kava nehae.
2CO 11:5 Anima havige huꞌya ayemavataga haya vayaꞌmoya tamage huꞌya nagaila onagasenae.
2CO 11:6 Aupa aupa kema hisua tokiyaꞌnia omalegi aluya huꞌna nagu nagesaene kano maineꞌna mukiꞌa kanafina kanale kava huꞌna mukiꞌa yana mukiꞌa veaꞌmogami amaufina kea huhaleꞌna nehugetama nehaviye.
2CO 11:7 Anumaya Koti kanale mono kema tamahapauvana “Nagoꞌa monea namiho.” huꞌna ohunoe. Tamavalesaga hisugetama tamakaya anale maisaya yafe nagaiꞌnia ako huꞌna mai kayone huꞌna nayapiti aliꞌyana ali-mainoe. Aniꞌama huana kefo ya humaino?
2CO 11:8 Tamakai tamaya huꞌna mono aliꞌyana neꞌalugeꞌya alu kumate maineꞌya Yisasina amakuꞌa aminaya veaꞌmoꞌya nagaila naya huꞌya monea naminae. Namigeꞌna ani monea aliꞌna musufayama nehia kanomo nehia auꞌava kavala humaino?
2CO 11:9 Tamakaipina aliꞌyama aluana nagoꞌa yaniꞌama omalegeꞌna “Monea namiho.” huꞌna tamahaviokenogi Masetoniati aya vayaꞌmoꞌya mukiꞌa yana naminae. Hagoteꞌnama havimainoa nagesa haenagaꞌa aniꞌa huꞌna tamakaifena “Monea namiho.” huꞌna ohugahue.
2CO 11:10 Kalaisi kelamage kemoꞌa nagupima haneafene huꞌna tamagea nehue. Monema oꞌaliꞌna afa aliꞌyama neꞌalua yafena tusiꞌa muse nehuafe nagola Akaiya kotega mainaya veaꞌmoꞌya ani musema nehua yamoꞌa kaniꞌa tileonategahae.
2CO 11:11 Naꞌa higeꞌna ani kavala nehue? Miya oꞌalua yafe tamakaifena nonahaiyo? Aꞌao tamakaifena nahau nayamopafima nenahaiya yana Anumaya Kotiꞌa ago age-maine.
2CO 11:12 Havigema tamahanepaiya vayaꞌmoꞌya amakima aliꞌya haigahena “Poloꞌma nehia kava nehune.” huꞌya hu-mainesaya kea ohavisaya yafe nagaya humainoa kavala huge huge huꞌna tamakaipitila monea oꞌaligahue.
2CO 11:13 Ani vayaꞌmoꞌya havigegeꞌya nehageꞌya veaꞌmoꞌya “Kalaisi Aposolo vaya mainae.” huꞌya hulatesayafene huꞌya Aposolo vaya kana nehuꞌya veala ayemavataga nehae.
2CO 11:14 Naꞌama hayana amakaiꞌami-omagi Sataniꞌa agaiꞌa hale yapima nemaiya ensole vaya kana huno ali hapaeteno veaꞌmogamina ayemavataga nehie.
2CO 11:15 Satani ani kavala nehigeꞌya agaiꞌa aliꞌya vayaꞌmoꞌya aniꞌa huꞌya fatago yamo aliꞌya vaya kana huꞌya aliꞌya hapaesayana tamakaya atalia ohiho. Haenagaꞌa ani kavaꞌma nehaya yamona kefo miyana anonaꞌamia aligahae.
2CO 11:16 Nagoꞌene tamahanepauve nagima aliꞌna hauva yafena nagoꞌa veaꞌmogatama nagaifena “Agaya aifo kano maine.” hutama ohiho. Ani kema hinutamahena natalegeꞌna osi kanoꞌa afaꞌa nagima aliꞌna haisua kea haviho.
2CO 11:17 Ani nagima aliꞌna haisua kea Anumayamoꞌa “Mage huka huo.” huno ohunea kea nagaiꞌniꞌa anegi neꞌna aifo vaya kana huꞌna mani kea nehue.
2CO 11:18 Mukiꞌa ma mopafi veaꞌmoꞌya havigu kema nehuꞌya amakaiꞌami amakima alisaga nehaya kava huꞌna nagaiꞌni nagia alisaga huꞌna mani kea tamahapaigahue.
2CO 11:19 Tamakaila kelamama-kiꞌna mage huꞌna nehue tamakaya kanale havi haviꞌyatamima hanea veaꞌmogatama naꞌa higetama aifoꞌnafo vayaꞌmogami kea nehaviye?
2CO 11:20 Ani vayaꞌmoꞌya “Tagai aliꞌya vaya maiho.” huꞌya hagetama amakavela nemalae. Tamakaipitila monea neꞌaliꞌya tamakaila aliꞌya haviya hu nelamateꞌya amakaiꞌami amaugafa aliꞌya nehaiꞌya tamakaifena “Afa vaya mainae.” huꞌya haya kehena kea ohutama amatalageꞌya ani kavala maiꞌya nehae.
2CO 11:21 Ani kavaꞌma haya kavala nagaya naꞌa nohuafe havi kava nehuo? Nagaifena “Tokiyaꞌa omale.” hutama nehao? Ani kema haya yafena nagayea nehugi nagoꞌa vayaꞌmoꞌya amakaiꞌami amaki alisaga hisaya kea nehayanagi nagayaenena aniꞌa augafa kea huꞌna aifo vaya kana huꞌna mani kea hugahue.
2CO 11:22 Ani vayala Hipalu* vayaꞌma maisayana nagayaenena aniꞌa huꞌna Hipalu kano mainoe. Amakaya Isaleli veaꞌmogami mono kema havisayana nagayaenena aniꞌa huꞌna Isaleli veaꞌmogami mono kea nehavue. Amakaya Apalahamu aginagomoꞌya mainesayana nagayaenena aniꞌa huꞌna Apalahamu aginagomoꞌna mainoe.
2CO 11:23 Amakaya Kalaisina aliꞌya vayaꞌama mainesayana nagaya amakaila amakaseꞌna tusiya huꞌna Kalaisi aliꞌyana neꞌalue. Avoꞌnio nagima alisaga hua kea aifo ke kana ke nehue. Amakaseꞌna nagaya tusiya huꞌna Anumayamo aliꞌyana neꞌalue. Amakaseꞌna kasagoꞌya kanafina kina nopina mainoane. Kasagoꞌya kanafina kaꞌyo kevea naminayanagi amakaila osiꞌa amaminae. Nagaya kasagoꞌya kanafi falisua kavala huanagi amakaya nagayama hua kavala aniꞌa huꞌya ohunae.
2CO 11:24 Yuta vayaꞌmoꞌya faefuꞌa (5) kanafi alu ikate alu ikate teti naeniꞌa (39) haifula naminae.
2CO 11:25 Tagufa (3) kanafi kaꞌyo kevea naminae. Nago kanafi yafa kaꞌyotetila nahae-mainae. Tagufa (3) kanafi tipi kalefina mainogeno timoꞌa ai kalato kalato huno nahaesia kavala humaine. Ani tipi kalemoꞌa kofa-nafa huno haviya higeꞌna nago yosa atupale atafa huliꞌna nago kanaene kegeꞌene felugaene tipina mainoane.
2CO 11:26 Mukiꞌa kanafina vaiyatete nehugeno nahaesia kavakeꞌya falote hunatene. Timoꞌa hogino nahaesia kavaꞌene musufaya nehaya vayaꞌmoꞌya nahaesaya kavaꞌene nagai anagaꞌmoꞌya, Yuta vayaꞌene, Yuta vea omainaya vayaꞌene nahaesaya kavakeꞌyana hunatenae. Ala kumate mainogeꞌyaene kaꞌme kotega mainogeꞌyaenena ali haviyana hunatenae. Tipi kalefima umainoana nahae-mainae. “Negafugata mainone.” huꞌya havige nehaya vayaꞌmoꞌyaene nahaegahena humainae.
2CO 11:27 Tusiꞌa aliꞌyama aluana nafia nelegeꞌna kasagoꞌya kanafina naula ofaeꞌna nagala neleno tifeꞌenena nage-maine. Kasagoꞌya kanafina kavefeꞌene kenaꞌnienefena omalegeno yasimoꞌa nahaigeꞌna havi no mainoe.
2CO 11:28 Amega naugafamo kana yaꞌene mukiꞌa kanafina Yisasife haviꞌya elitaluma nehaya veaꞌmogamina kava yagaisua yafena nagesa havi havi nehugeno nagesa kuꞌmoꞌa nehie.
2CO 11:29 Ani veapina nagoꞌa veaꞌmogamina hamao otage fatage higeꞌna amakaifena nahauna humatenoe. Nagoꞌa veaꞌmoꞌya veaꞌmogamifena “Kefo yana hiho” huꞌya hageꞌya Anumayamo katela neꞌataleꞌya kefo yama hageꞌna naipamoꞌa ata lemaine.
2CO 11:30 Nagia aliꞌna haisua nagesama havisugenoꞌa nago yafena fulu fulu kano mainoa yafe tamave-ligahue.
2CO 11:31 Anumayatia, Yisasina Nefaꞌa, Anumaya Kotina, vayaꞌmoꞌya agola agai agia alisaga huge huge hisaya kanomo aufina nagaya havigea huꞌna nohue.
2CO 11:32 Nagaya Tamasigasi kumate mainogeno sauve kanomo agia Aletasaꞌe kava kanoꞌamona hutegeno natafa hisaya yafe “Katela yagaiho.” huno higeꞌya yagaiꞌya maiyanagi vayaꞌnimoꞌya kupi nasaga huꞌya nateꞌya ani kumaꞌmona tokiyaꞌage kegiꞌya akalogapiti nofi aliꞌya ayeteꞌya ali kaleꞌyo nehageꞌna faleꞌna ayenefe huꞌna umainoe.
2CO 12:1 Nagaiꞌni nagima alisaga hisuana naya ohugahigi alu katela omaleneanagiꞌna nago kene tamahapaigahue. Anumayamoꞌa himona kana yapi naveli-mainea kea tamahapaisue.
2CO 12:2 Navelia yamoꞌa fotiniꞌa (14) kafu nagasetegeꞌna ani kavafena tamahapaigahe hue. Ani kanafina Kalaisiꞌene ailokaeꞌna mainoanagino Anumaya Kotiꞌa ikapinaga navalegeꞌna hauvana nagu nameꞌene haimainesuo naugafaene haimainesuo nagaya ohavinoe. Anumaya Kotiꞌa agaiꞌage havimaine.
2CO 12:3 Havimainegi ikapinaga navalegeꞌnama hai-mainoa yafena havilinoe. Nagu nameke hai-mainesuo ifi naugafamoꞌene hai-maineo ohavinogi Anumaya Kotike haviline.
2CO 12:4 Ikapinaga hai-vaꞌyi huteꞌna aluꞌa augafa avamete kea haviteꞌna ani augafa kea ma mopafi veaꞌmoꞌya ohaleꞌasinagi nagalu hu-malenea kea humaine.
2CO 12:5 Kanale muse yamaꞌa navelia yafena muse nehuꞌna mani kea hugahuanagi nagaiꞌniꞌa nagia aliꞌna ohaigahue. Tokiyaꞌnia omalegeno naya humaineafe muse nehuꞌna tamahanepauve.
2CO 12:6 Tamage nagaya nagia aliꞌna haisua kema hisua nagesama havuleꞌasina havigu-nagu kea ohugahuanagiꞌna tamage huꞌna huleꞌasinagi ani kea ohugahue. Veaꞌmoꞌya ani kea haviteꞌya “Naꞌa augafa kano maine.” huꞌya hisaya yafena nonahaigi nemauva auꞌavaꞌniene nagai kema havisaya yafeꞌene musena hisae huꞌna nehue.
2CO 12:7 Anumayamoꞌa tusiꞌa kanale yakeꞌyama naveligeꞌna agoa yafena Anumayamoꞌa mage hie “Havigu kaugafa alika haiyafene.” huno nekaꞌya akoꞌya kana yamoꞌa naugafafina malegeno nagata aiye. Ani kana yamoꞌa Satanipiti falote higeno namineanagiꞌna naugafa aliꞌna ohaisuafene huno nagata yana namine.
2CO 12:8 Nagatama aiya yamoꞌa fanane hisia yafe tagufa (3) yupa Anumayamotega havige-mainoe.
2CO 12:9 Havigogeno kenonaꞌnia mage huno nahapaiye “Ani yamoꞌa haꞌno ohugahie. Nagaya kayone yaniꞌaleti kaya hisugeno kosa hegatesigeka aliꞌyakaꞌa afaꞌa aligane. Kayamufa omaleneafe tusiꞌa tokiyaꞌnia falote hugategahie.” huno higeꞌna ani kema havuafena nayamufa omalegeno Kalaisiꞌa tokiya namigeꞌna musena humainoe.
2CO 12:10 Kalaisifena nagesa haviꞌna aliꞌyamaꞌa neꞌaluafe nayamufa omalegeꞌya nagai nagia hu-haviya nehao kana yama falote hunateo ifi Yisasi kema nehua yafe nagaila ali haviya hunenatao havi no maisuo ani yamoꞌma falote hia yafena naipamoꞌa haviya ohugahianagina afaꞌa muse hugahue. Nayamufa omalegeno Anumayamoꞌa tokiyaꞌama naminea yafena tusiꞌa muse nehue.
2CO 12:11 Tamakaya havi kava hutama nagai nagima alisaga ohayafene huꞌna nagaiꞌniꞌa nagia alisaga nehuꞌna aifo vaya kana nehue. Anima havigegeꞌyama huꞌya mono kema tamahanepaiya vayafena tamakaya “Kanale vaya mainae.” hutama nehayanagi nagaya afa ya kana kano mainoanagi ani vayaꞌmoꞌya tamage huꞌya nagaila onagasenae.
2CO 12:12 Onagasenagi tamage nagaya Aposolo kano mainoafe tamakaiꞌene maineꞌna ako huꞌna tokiyaꞌage avame yana hugetama “Tamage Aposolo kano maine.” hutama nage-mainae.
2CO 12:13 Nage-mainetamagi tamakaya mage hutama nehae “Alu Anumayamo anagaꞌma kava neꞌyagaiya avamete huno tagaila kava nohie.” hutama nehao? Aꞌao, nagoke avamete huꞌna kava yagainelamatoe. Tamakaipina nagoke yana alu kavala humainoe “Monea namiho.” huꞌna oꞌalinoa yafena “Havi kava hie.” hutama nehao? Ifi hanageke yama hu-mainesuana afaꞌa aigenatetama atalenateho.
2CO 12:14 Nagi tole kanale mo lamake-mainogi menia tagufa (3) molia kanale nagoꞌene mo lamakesuafene huꞌna nehuanagi tamakaipitila nagoꞌa yana oꞌaligahue. Tamakai monehena nonahaiye afaꞌa tamakayama Yisasina tamakuꞌa amisaya yafe nenahaiye. Nafaꞌnemoꞌya ita-afoꞌamimogamife huꞌya monea alitalu huteꞌya kave amamisaya aliꞌyana omalenegi ita-afoꞌamimoꞌyage nafaꞌneꞌamihena huꞌya monea halaꞌya huteꞌya kavela neꞌamamiya yane. Nagaya aniꞌa huꞌna nelamafaꞌna mainoanagiꞌna “Nafaꞌneꞌnimogatama monea namiho.” huꞌna ohugahue.
2CO 12:15 Nagaya tamaya hisugetama Yisasina tamakuꞌa amisayafene huꞌna mukiꞌa moneꞌniene tokiyaꞌniene atalegahue. Atalesuaꞌamoꞌma nafima lesiana kanalele. Tamakaifena tusiya huno nahau nayamopafina nenahaiyanagi tamakaya nagaifena tamahau tamayamopafina notamahaiyo? huꞌna nehue.
2CO 12:16 Nagoꞌa veaꞌmoꞌya nagaifena mage nehae “Tamage Poloꞌa fufu yatela tagai monea noꞌaligi savalekeꞌya huno havigegeꞌya nehuno falakino kesi monetia neꞌalie.” hutama nehae.
2CO 12:17 Nehayanagi nagaya hanaꞌa huꞌna ayelamavataga nehue? Nagoꞌa vayala humatogeꞌya ayelamavataga huꞌya tamakai monea aliꞌya me naminao? Aꞌao ani kavala ohunae.
2CO 12:18 Tamakaya mainalega Taitasiꞌene nago tafu-taganaꞌene “Viꞌo.” huꞌna hunatogeꞌana umainaꞌe. Taitasiꞌa mo ayelama-vataga huno tamakai monea ali-maineo? Aꞌao Taitasiꞌene nagaiꞌene nago avamete hutaꞌa kanale taꞌagesale mainetaꞌa aliꞌyana neꞌaluꞌe.
2CO 12:19 Tamakaya manima kae-maloa kehena mage hutama nehao? “Tagai taufina agi alisaga nehie.” hutama nehao? Aꞌao Anumaya Koti aufina Kalaisiꞌene ailokaeꞌna maineꞌna mani kea nehue. Nahau nayamopafi nenahaiya nenafugatama Yisasife huꞌna tamakuꞌa ali lokiya vailamatesua yafe mukiꞌa mani kea nehue.
2CO 12:20 Naꞌafene koli nehuꞌna ma nagesa nehavue havigu tamakaya mainesalega uvaꞌyi hisugetama onahaisia kavaꞌma hutama mainesayana naipa haviya huteꞌna kelamama-kisugetama nagaifena tamaipa haviya hinagetama havigu ke vaitama tamaipa ali haviya hisaya yamoꞌa tamahaivai yana falote hisigetama vaya okai yama hisagenoꞌa tamakaitami tamaugafahekeꞌya tamakesa havitetama alu kanomo agia ali haviya nehutama veafema havige nehaya kava hutama ala tamaki alitetama kefo yama hisaya yafenagiꞌna koli nehuꞌna mani avona kaeꞌna nelamamue.
2CO 12:21 Havigu tamakaya mainesalega uvaꞌyi hisugeꞌya oniꞌyaꞌage kefo kavaꞌene moli huliteꞌya nehuꞌya kumai he kavaꞌene age hamaꞌye huꞌya kumai nehaya kavaꞌenema nayoma nehaya veaꞌmoꞌya amakuꞌa aiyahae ohuꞌya ani kavakeꞌya nehisageꞌna me neꞌamakesugeno tamakai tamaufi Anumaya Kotiꞌa nagaye hisifa yana namisigeno naipamoꞌa haviya hisia yafena tusiya huꞌna koli nagesa nehavue.
2CO 13:1 Tole yupa tamakaya mainalega umainoanagi menia tagufa (3) molia kanale nagoꞌene visue huꞌna nehue. Nago kanomoꞌa kefo yama hisigeꞌna kaiyekema hutesuana tole (2) vayalo tagufa (3) veaꞌmoꞌyao humainesia yama ageteꞌya hufalote hisayana kanalelagiꞌna kaiyekea hutegahue.
2CO 13:2 Agoꞌma tamakaiꞌenema maineꞌna humainoa kea menia alule maineꞌna mani kea nagoꞌene hulokiya vaiꞌna lamahanepauve. Haenagama tagufa (3) molia kanale tamakaya mainesalegama esua kanafina kefo yama humainaya veaꞌnene nagoꞌa veaꞌmoꞌya kefo yama nehaya veaꞌnenena kaiyekea humateteꞌna anonaꞌamia amamigahue.
2CO 13:3 Tamakaya nagaifena “Kalaisi hapaiya ke nehio ifi agesafiti ke nehie?” hutama nehayanagi nagaya kefo yama nehaya vayafena tokiyaꞌage ke huꞌna me kemama-kisugetama nenagetama “Tamage Kalaisiteti tokiyaꞌage kea nehie.” hutama hugahae. Tamage Kalaisiꞌa tamakaipima aliꞌyama ali-maineana fulu fulu kanoa omainegi tokiyaꞌaleti aliꞌyamaꞌa ali-maineane.
2CO 13:4 Tamage Kalaisiꞌa fulu fulu veaꞌne mainaya avamete huno maigeꞌya yafaga yosalela nili heꞌya asaigeno fali-maineanagi menia Anumaya Koti tokiyaleti hetino maine. Tagayaenena fulu fulu veaꞌne mainonanagi Kalaisiꞌene ailokaeta mainonageno Anumaya Kotiꞌa tokiyaꞌa lamigeta agaiꞌene maineta agai tokiyaleti tamaya nehune.
2CO 13:5 Tamakaya tamakaitami lamakuꞌa agelama hutama lamakupi malenaya kea atafa hulitama mainao? Yisasi Kalaisiꞌa tamakupima mainea yafena havilinao? Tamakupima omainesiana agaiꞌa veala tamagelafa hutama omainae.
2CO 13:6 Tamakuꞌa agelama hutetama aniꞌa hutama tagaila tagelama hutama lageho “Kanale kava nehae.” hutama hisaya yafe nenahaiye.
2CO 13:7 Nenahaiyafe “Kefo yana ohisae.” huꞌna nunamuna nehue. Tamakaya kanale kava hisageꞌya nagoꞌa veaꞌmoꞌya nelamakeꞌya “Poloꞌa kanale aliꞌya neꞌalie.” huꞌya hisayafene huꞌna nunamuna nohugi tamakaitamia kanale kava hutama maisae huꞌna nunamuna nehue. Nagoꞌa vayaꞌmoꞌya tagaifena “Anumayamo kea nehuꞌya havi aliꞌya neꞌaliye.” huꞌya hisayana kanalele.
2CO 13:8 Anumaya Koti kelamage kemoꞌa “Ohiho.” huno humainesia kea ohugahunagi agai kea akave malesuna vaya mainone.
2CO 13:9 Tayamufa omalenagetama tamakaya mai lokiya vaitama mainesaya yafena muse nehune. Fatago hutama tokiyaꞌage hisae huta nunamuna nehune.
2CO 13:10 Tamakaya mainalega uvaꞌyima hisuana havigu Anumaya Kotiꞌma naminea tokiyaleti kelamama-kiyafene huꞌna menia alule maineꞌna mani avona kaeꞌna nelamamugi tamakuꞌa aiyahae hiho. Anumaya Kotiꞌma naminea tokiya tamakaila alino haviya hulamatesia yafe onaminegi tamakaila tamakuꞌa aliꞌna tokiya vailamatesuafe namine.
2CO 13:11 Nafuꞌnagana-gatama nagaya hua kemoꞌa haꞌno hugahe hue. Fatago hutama maisaya yafena tamakesa havi havi hutama nagayama nehua kea havilama hiho. Nagoke tamaku tamakesale kea oꞌvaitama tamaipamo falu nehinagetama maiho. Naꞌa nehisageno hau ayamopafi nehainageno kanale falu yamona aepaꞌamoꞌa Anumaya Kotiꞌa tamakaiꞌene maigahie.
2CO 13:12 Tamakaya nagoke nagokeꞌmo-gatama tamayana oꞌami aꞌami hutama maiho. Mukiꞌa Anumaya Koti anagala nagaiꞌene maineꞌya tamakaifena “Felugae.” huꞌya hu falu fala hunelamatae.
2CO 13:13 Anumayati Yisasi Kalaisiꞌa kayone hulamatesia yamaꞌa tamaminageno Anumaya Kotiꞌa tamakaifena hau ayamopafi nehainageno Alu Aotage Avamuꞌmoꞌa tamakaiꞌene tokaeno maisigetama nagopi maisae huꞌna nunamuna nehue. Keꞌnia male haꞌno hie. Nagaiꞌni nagia Poloꞌnae.
GAL 1:1 Nagaya Polonae Aposolo kanomona mani avona kae-malenoe. Yisasi aliya alisua yafe vayamoya hu onatenagi Yisasima fali-mainefiti ali hetitenea Anumaya Kotia, Nelafaene Yisasi Kalaisiene hunataagena Yisasi mono kea huhalena nehue.
GAL 1:2 Nagaienema tokaeya mainaya nafunaganayaene Kalesia kotega Anumaya Koti anagafe Felugae. huya hu falu fala hulamatagena mani avona negaove.
GAL 1:3 Anumaya Kotia, Nelafaene Yisasi Kalaisia, Anumayatimoene kayone yamaa tamamisaageno tamaipamoa falu hisie huna nehue.
GAL 1:4 Meni kanafina mukia veanemogata kefo kavama maita nehuna yamo nofila hulatenegeno ani kefo yapiti tagu tamena aligatisuafene huno Yisasia Anumaya Koti Nelafana haiya kava huno tagaya kefo yapi mainonageno Yisasia alino kalu helategahe agesa havino agaia augafa hakino falimaine.
GAL 1:5 Naama humaineafene huta Anumaya Koti agia alisaga hisunageno agaia tokiyaa hale yamaamoa hanege hanege huno haneme haisie. Tamage.
GAL 1:6 Kalaisia kayone yamaaleti agaitegama visaya yafene huno Anumaya Kotia ke higetama agaitega vayanagi aupaa agaila neataletama alu mono kema haviya yafena nagaila tusiya huno namayoa neaiye.
GAL 1:7 Tamage, mani kea alu Yisasife kanale mono kea omalegi nagoa vayamoya Yisasima hulatenea kanale mono kea aliya aiyahae huya huhaviya nehuya alu mono kema tamahanepaigeno tole tamaku tamakesama lamamiya ali haviya hunelamatae.
GAL 1:8 Huhaviya hunelamatagi Yisasia hulatenea kanale mono kema tamahanepauva kemoa tamageage nehigi haviho. Tagayafi ensole vayamoyafi tamahapaisaya kemoagi nago avamete ohisigeno alu mono kema tamahapaisayana Anumaya Kotia ani vayamogamina hai vaimateno haniki-mainea yapi amatesie huna nehue.
GAL 1:9 Nayoma tamahapai-mainoa kea etena nagoene menia tamahanepauve. Nagoa vayamoya Yisasima hulatenea kanale mono keama tamahapai-mainoa kanale mono kea ago alitama tamakupi malenaya kema tamahaopaiya alu mono kema tamahapaisaya vayala Anumaya Kotia hai vaimateno haniki-mainea yapi amatesie huna nehue.
GAL 1:10 Naane hutama tamakesa nehaviye mani kema nehua kea vayamoya haviya muse hunatesae huna mani kea nehufi? Ifi Anumaya Kotia havino Kanale ke nehane. huno muse hunatesiafene huna hugetama nehavifi? Nayoma humainoa kavala veamoya ageteya muse hisaya yafe nenahaigi menia Muse hugahae. huna nohue. Veamoya Kanale kava nehie. huya hunatesaya yafema nahaileasina nagaya Kalaisi aliya kanoa omauleasine.
GAL 1:11 Nafunagana-gatama tamahanepaugi haviho. Nayona Yisasima hulatenea kanale mono kema tamahapai-mainoana vayamogami amaku amakesafitila ali falote humainaya kea ohunoe.
GAL 1:12 Nagaya nagoa vayapitila mani mono kea oalinoe. Nagoa vayamoya hu naveligena mani mono kea oalinogi Yisasi Kalaisia agaia mani mono kea hu naveligena havitena tamahanepauve.
GAL 1:13 Nayona nagaya Yuta veamogami mono ke havitena akave malena Anumaya Koti anagala nahauna hu oamatena hamae hano hugahe aluya huna ali haviya hu neamatoa navagea ago havimainae.
GAL 1:14 Nagai aunale vayala ago amakasena Yuta veamogami monola ali hipoya huna tusia aliya nealina taginagomoyama humainaya auava kavala havilama hulinena akave malenoane.
GAL 1:15 Akave malenoanagi itanimoa onatenegeno Anumaya Kotia aliyamaa alisuafene huno agaia kayone yamaaleti nagaila ago hapali-nateneane.
GAL 1:16 Nagaila ago hapali-nateno Isaleli veane omainaya veamogamina Yisasi mono kema hamapaisanafene huno nafanea nagaini naulagale avaleno efalote higena aepaama agetena havitena hua yafe ma mopale veamogamina Naane ke havilinoe? huna mo hamavi-okenoe.
GAL 1:17 Hamavi-okenogi Yelusalemua hagoteya nagaseya Aposolo vaya mainaya vayatela mani kehena me hamavi-okenogi Alepia kotega umaigena etena Tamasigusia emainoe.
GAL 1:18 Emauvana tagufa (3) kafu mai hano hutena Yelusalemu haina Pitaene kea kea hugahe fifitinia (15) yupa agaienena mainoe.
GAL 1:19 Mainena Yisasina aganaamo agia Yemesie agaiage mainegena age-mainogi nagoa Aposolo vayala oamakenoe.
GAL 1:20 Nagaya mani kema negaova kea Anumaya Koti aulagafi tamage huna havigea nohue.
GAL 1:21 Yelusalemua neatalena alu kumate kumate faete faete hume vuaamona Silia kotegaene Silisia kotegaene haimainoe.
GAL 1:22 Ania huna neogeya Yutia kaiyaga Yisasi anaga mainaya anagamoya nagai naugosa onagenae.
GAL 1:23 Naugosa oageya nagaifena mage huya havimainae Nayona Yisasife havita tagupi maleta tametiti nehuna veamogatina kayo keve nelamia kanomoagi menia kanaleya huno Yisasima hulatenea kanale mono kea huhaleno nehie. huya hageya havimainae.
GAL 1:24 Ani kea haviteya Anumayamona naguama aminoa yafena Anumaya Koti agi alisaga humainae.
GAL 2:1 Fotinia (14) kafu maitena Yelusalemua Panapasiene etetaama elavuana nago kanomo agia Taitasie taavagi higetaa elavi-mainoe.
GAL 2:2 Anumayamoa nahapaigena elavina monote kava vayamoya kema hisua kehena havigu havige nehie huya hisagena kema hisua kemoa afa ya kana hu yafene huna Yisasima hulatenea kanale mono kea Isaleli vea omainaya veamogami hamanepauva yafena monote kava vayala amakaiamige mainalega mo hamapai-mainoe.
GAL 2:3 Nagayama avalena emainoa kanoa Taitasie kanomofe Yuta anagamo-gatama avame yatia huta tagoya anoya laga nehuna kava huta Taitasi augafa laga hiho. huya hayanagi Taitasia agaya Isaleli veane omainea kanoe Kaliki kanoma maineafene huya ani kea hayanagi mono kava vayamoya Ataleo huya hageta afaa mainone.
GAL 2:4 Nagoa vayamoya havige huya Tagaya Yisasi kea alita lagupi malenona vaya mainone. huya kesi ke huteya tagai amunopi hai faleya maineya Mosese kahegi kemo akave maleho. huya nehagi ani kahegi kemoa nofi hu nelataya kava huno haneanagi Yisasi Kalaisienema tokaeta mainona yafe ani nofima hulatenaya nofila ago alino kalu helategeta kanaleya huta mainonagi ani vayayagamoya Etetama ani nofipi maiho. huya hugahe emainae.
GAL 2:5 Hayanagi Yisasima hulatenea kanale mono kema havilama hutama akave malege malege hisayafene huta amakai kea tamage huta ohavitafa nehuta Taitasi augafa taga ohunone.
GAL 2:6 Ohunonagi ani kema hamapai-mainoa vayafena Kava vaya mainae. huya hayanagi anima haya kavala afa ya hane huna nagesa nehavue. Anumaya Kotia amega taugafahena agesa nohavigi taguahekeya agesa havi nelamie. Ani kava vayamoya kea nahapaiyanagi haegafa kea nahaopainae.
GAL 2:7 Naha-opainagi amakesa mage huya haviye Isaleli veane omainaya veapi Yisasima hulatenea kanale mono kea hamapaisie huno Anumayamoa Polona hutegeno umainegi Yuta veama Yisasia hulatenea kanale mono kea hamapaisiafene huno Anumayamoa Pitana hutegeno umaine. huya agemainae.
GAL 2:8 Anumaya Kotia tokiyaaleti Pitama Yuta vayapima Yisasi kema hamapaisiafene huno hamae-mainea kava huno Anumaya Kotia tokiyaaleti nagaila Isaleli vea omainaya veapi Yisasima hulatenea kanale mono kema hamapaisuafene huno nahanemaeye.
GAL 2:9 Monote ala kava vaya mainae. huya humatenaya vayala Yisasina aganaamoa Yemesiene Pitaene Yoniene mani kea haviteya Tamage nehane. Anumayamoa mani aliyana kamiteno kayone yamaaleti kaya nehie. huya hageta tagua ali nagopi maleneta Tanakaya Isaleli vea omainaya veapi aliyana molio. Tagaya Yuta vayapi aliyana aligahune. huya huteya amayana Panapasiene taaminae.
GAL 2:10 Naa huteya nago kea mage huya hae Yuta veamogami amunoamifima afenoamima omalenesia veala kanale kava hutana amaya hio. huya hayanagi nagaya mani yafena nagesa ago nehavina aluya huno nenahaigena tokiyaage aliya alimainoane.
GAL 2:11 Pitaa Atioku emaineno havi kavama humainea yafena vaya amaufi kea amaki-mainoe.
GAL 2:12 Yemesi anagala falote ohunageno hagoteno Pitaa Yisasina amakua aminaya veala, Isaleli vea omainaya veanene, kanaleya huno kavela neneno mainegeya Yemesi mainelegati nagoa vayala evayi hageno Pitaa ma agesa havie Aao humainaya yana neatalena Isaleli vea omainaya veanene, amakoya anoya taga ohunaya vayaene, kavela nenoa yafena ke namakisafi. huno Isaleli vea omainaya veala neamataleno aluale umaineno kavela nemaine.
GAL 2:13 Nenegeya mukia Yisasina amakuama aminaya Yuta veamoya ania huya amakuafina havi omaleya amegati nehaviya yafe amataleya amahaote mo nemainae. Naa nehageno Panapasia amegatima haya kavala ageteno agaienena ani kavakeya humaine.
GAL 2:14 Higena Yisasima hulatenea kanale mono kea, kelamage fatago huno hanea katela ovagena agetena ani yateti mukia veamogami amaufi Pitana hapauve Pitagae kagaya Yuta nofi kano mainananagi Isaleli vea omainaya veanemoya nehaya kava huka Isaleli vea omainaya veaenena kavela neneka Yuta vayamoya nehaya kavala nohane. Naa higeka menia kagaya Isaleli vea omainaya veafena Yuta vayamoya nehaya kavala hiho. huka kahegi nemalane?
GAL 2:15 Itatimoya Yuta anegiya latageta tagaya Yuta anaga mainone. Mainonagi Isaleli vea omainaya veala kefo kava nehaya veane omainone.
GAL 2:16 Omainonagi nagoa veamoya Mosese kahegi kemona akave malesaya yateti Anumaya Kotia neageno Fatago veane mainae. huno hu oamatenegi Yisasi Kalaisife haviya amakupi maleya amametiti nehisamogamife Anumaya Kotia Fatago veane mainae. huno hunelate. Tagayaenena Yuta anagamogata Yisasife havita lagupi maleta tametiti humainonafe Anumaya Kotia Fatago veane mainae. huno hulatene. Tagaya ago nehavune mani kavatetikeya Anumaya Kotia Fatago veane mainae. huno hulategahigi Mosese kahegi kemona akave malesaya yafe Anumaya Kotia nagoa veafe Fatago veane mainae. huno hu oamategahie.
GAL 2:17 Anumaya Kotia takaifena Fatago veane mainae. huno hulatesiafene huta Yisasi Kalaisiene ailokaeta maineta agaite tametitima hisunana nagoa veamoya tagaifena Kefo kava nehaya veane mainae. huya hisagenofena Yisasi Kalaisia alino Kefo kava hiho. huno hisifi? Aao ania augafa kavala ohutafa huno ohugahie.
GAL 2:18 Ohugahigi Mosese kahegi kema nayoma akave malenoa kavala ago neatalena menia Yisasife havina nagupi malenoe. huna nehuanagi nagaya etena maiyahae huna nayoma mainoa kate uleasina kefo kava huleasine.
GAL 2:19 Mosese kahegi kema ali hipoya hume hume nehauva yafena Fatago kanoe. huno hu onateleasine huna nehavugi fali-mainea kanomo augafa kava huna mani kehena nametitia nohue. Ani kahegi kemoa nahaegena falitogeno Anumaya Kotina haisia kava hisuafene huna kahema ki-malenea kehena nametitia nohue. Yisasia nagai kefo yamo anonaa aligahe higeya yafaga yosale heya asaigeno nagaifene huno fali-maineanagina nagaienena yafaga yosale nagaya asaina agaiene ago fali-mainoe.
GAL 2:20 Fali-mainoanagi nagoene nagainigela vaiyatete nohugi Yisasia nagupi mainegena ma mopale mainena Anumaya Kotina nafaneamoa nagaifena hau ayamopafi haigeno fali-maineafene huna havina nagupi malena nametiti nehuna haegafa huna vaiyatete nehue.
GAL 2:21 Mosese kahegi kemo akave malenona yafene huno Anumaya Kotia Fatago veala mainae. huno hulateleasina Yisasima fali-mainea yamoa afa ya kana hileasinagi Anumaya Kotia kayone hulatenea yateti Yisasia fali-maineanagina afa ya kana nehie huna nakavenona huoategahue.
GAL 3:1 Tamakaya aifonafo Kalesia veala tagaya Yisasina tamavelunagetama tamaulagafiti age-mainaya kava huno yafaga yosalela fali-mainea yafena tamakaila ago tamahapai-mainogi taya tamakaila aye lamavataga nehagetama Yisasi kea neatalae?
GAL 3:2 Nago yafe tamahavi-gegahugi nahapaiho Mosese kahegi kemo akave malaya yateti Alu Aotage Avamula tamakuafina emainefi ifi Yisasife havitama tamakupi maletama tamametiti haya yateti tamakuafina emaineo?
GAL 3:3 Ehema Yisasi kema havitama tamakupi malenaya kanafina Alu Aotage Avamumoa tamaya hianagi menia naa higetama anegi-nagia nehutama Tagaitigela Yuta veamoya nehaya kavaage nehuta fatago veane maigahune. hutama nehae?
GAL 3:4 Nayoma kana yama ali-mainayana afaa evayi humaine hutama nehafi? Aao afaa ali-mainae huna nagaya nagesa nohavue.
GAL 3:5 Mosese kahegi kemo akave malenaya yafe Anumaya Kotia agaia Alu Aotage Avamula lamamiteno tokiyaaleti avameyama humainea kavala alino falote humainefi? Ifi Yisasife havitama tamakupi maletama tamametiti haya yafe mani kavala hu-maineo? E, tamametiti hu-mainaya yafe humaine.
GAL 3:6 Anumaya Koti autamafina Apalahamufe mage huno humaine Apalahamua Anumaya Kotife havino aguafi maleno ametiti higeno Anumaya Kotia Kagaya fatago kano mainane. huno huteneane. huno humaineane.
GAL 3:7 Ani yafe ageho Apalahamuma humainea kava huya Anumaya Kotife haviya amakupi maleya amametiti nehaya veala Apalahamu nafaneyaga mainae.
GAL 3:8 Anumaya Kotia nayona mage huno agesa havimaine Haenagaa Isaleli vea omainesaya veanemoya nagaifena haviya amakupi maleya amametiti hisayafe Fatago veane. huna humategahue. huno agesa haviteno kanale mono kea Apalahamuna hapai-maineanagino Anumaya Koti autamafina mage huya kae-maleneayane Kagaitetifene huna mukia ma mopale veanea Anumaya Kotina muse yana amamitena ali kanale humategahue. huno higeya kae-malenayane.
GAL 3:9 Ani yafe Apalahamua Anumaya Kotife havino aguafi maleno ametiti higeno Anumaya Kotia ali kanale hutene. Nagoa veamoya Apalahamuma humainea kava huya Anumaya Kotife haviya amakupi malenaya veala Anumaya Kotia ali kanale hu neamate.
GAL 3:10 Anumaya Koti avopina mage huya kae-malenayane Nagoa veamoya mukia kahegi kema akave omaleya nagoke ke kanoama aliya atagaesayana Anumaya Kotia hai vaimateno haniki-mainesia yapi amategahie. huya kae-malenayane. Ani yafe nagoa veamoya mukiama Mosese kahegi kema akave omalesayana Anumaya Kotia havi kapi amavaleno amategahie.
GAL 3:11 Anumaya Koti avopina mage huya kae-malenayane Fatago veane mainae huno humatenea veamoya Anumaya Kotife haviya amakupi maleya amametiti humainaya yateti mai kanale huya maigahae. huya kae-malenayane. Ani kemoa maa huno fufute taveli-maine. Mosese kahegi kema akave malesagenofena Anumaya Kotia ageteno Fatago veane mainae. huno hu oamategahie.
GAL 3:12 Kahegi kemo akave malesuna yana Anumaya Kotife havita tametiti hisuna yana omalene. Aao, Anumaya Koti kefina mage huya kae-malenayane Mosese kahegi kema mukia haviya akave malesaya veamoya ani keleti mai kanale huya maigahae. huya kae-malenayane.
GAL 3:13 Anumaya Koti avopina mage huya kae-malenae Yafaga yosale asai-mainaya vayamoya Anumaya Kotia kayo keve amamisigeya faliteya haniki-mainea yapi ugahae. huya avona kae-malenae. Mosese kahegi kema mukia akave nomalonafe nofipi maineta haniki-mainea yapi ugahunagi tagaiti ani kefo kava nehuna anonaa Yisasia alino yafaga yosale faliteno mani nofi ali kalu hetalesia yafe miya hutalene. Yafaga yosale asai-malenaya yafe Yisasife mage huya nehae Anumaya Kotia kayo keve amigeno faliteno haniki-mainea yapi ugahie. huya hu-mainae.
GAL 3:14 Humainagi Yisasia fali-mainea yateti Anumaya Kotia nayoma Apalahamuna muse yana aminea kavala Isaleli vea omainaya veane menia ani muse yana amamigeta tagaya Yisasife havita tagupi maleta tametiti nehuna yafe Anumaya Kotia Tamamigahue. huno humainea Alu Aotage Avamua taguafi tategeno maine.
GAL 3:15 Nafunagana-gatama Anumaya Kotima hulokiya vai-malenesia kemona nagoamogata nehuna augafa kava humainegi aepaa havisae. Nago kanomoa agesama havinofena Falisua yupa ma yana nafanenimoga aligane. huno aulaga age-maineno hulokiya vaino avopi kae-maleteno fali-mainesia kemona nagoa veamoya ali oatagaegahayanagiya nago kea moliya ohugahae. Anumaya Kotima hulokiya vai-malenea kemoa ani augafa kava humaine.
GAL 3:16 Anumaya Kotia Maa huna kamigahue. huno hulokiya vaino Apalahamuene aginagomoenefe humaine. Anima Anumaya Koti avopima kae-malenea kemoa Kaginagomogamifena nehunagi mukia veafeene nehue. huno ohunegi Nagoke kaginagomona amigahue. huno humaine. Anima humainea kanoa Kalaisife humaine.
GAL 3:17 Ani kemona aepaamoa maa humaine. Hagoteno Anumaya Kotia Apalahamufena Ma yana kamigahue. huno hulokiya vaiteno fo hataleti tetia (430) kafu eutegeno Mosese kahegi kemoa evayi higeya havimainayanagi mani kemoa hagoteno alino hagelafi-matenea kemona tamage huno ayehananeno oagasene.
GAL 3:18 Anumaya Kotia Apalahamufe Ma yana hugategahue. huno hulokiya vai-malenea kavala humaineanagi tagaya Mosese kahegi kema alita hipoya hisunana Anumaya Kotia Fatago veane mainae. huno hulategahie hutama hinutamahena havige nehae. Takaiti nehuna kavateti mani kea hulatene. huta nehunanagi Anumaya Kotia Nagainiage afaa hulamategahue. huno humaine.
GAL 3:19 Anima Kamigahue. huno hulokiya vai-malenea kema humaineana naa higeno nago kene, kahegi kea, huno falote huno tahapai-maine? Aepaa mage huno humaine tagayama kefo kavama nehuna yana taveligahe kahegi kea tamine. Apalahamuna aginagomofe huno hulokiya vaimalenea kema amisia kanoa Kalaisima evayi hisiana ani kahegi kemoa hano hugahie. Ani kahegi kea ensole vayamogamina hamapaigeya amakaya amunopi kanoa Mosesena hapaigeno veamogamina hamapai-maine.
GAL 3:20 Hamapaiyanagi amunoamifi mainea kanomoa aote aote mainaya vayamogami amunoamifi maineanagi nayona Anumaya Kotia hulokiya vaimalenea kema Apalahamuna hapaigahena nagoke kano hutegeno me haopainegi tusia ala kema hanea yafe Anumaya Kotia agaia nagoke kano maineanagino avate uno hapaimaine.
GAL 3:21 Anumaya Kotia Apalahamuna hulokiya vai kema hapaitegenoa haenaga Mosese kahegi kemoa efalote huteno hagote kea agaseno ali haviya humainefi? Aao, ani kavala ohune. Kahegi kema ali hipoya hisunafena Anumaya Kotia maige maige hisuna tahaimula tamileasinagi Fatago veane mainae. huno hulatesia kavala kahegi keletila falote hileasine ani keamoa maige maige hisuna tahaimula tamisia tokiyaa omalene.
GAL 3:22 Omaleneanagino Anumaya Koti avopina mage huno haneane mukia ma mopafi veamoya kefo kava maiya hageno amatafa huno nofila humatenegeno Yisasi Kalaisife haviya amakupi maleya amametiti hisayana Aligahae. huno hulokiya vaimalenea kema alisagenoa nofima humainaya nofila alikalu hetalegahie.
GAL 3:23 Yisasife havita tagupi maleta tametiti hisuna kema falote ohunea kanafina kahegi kemoa tusiya huno nofila hulateno kava yagai-lateneane. Anumaya Kotia Yisasife havita tagupi maleta tametiti hisuna kea fufute taveligeta ageteta nofi hulatenaya yana ago atalone.
GAL 3:24 Yisasi Kalaisia falote ohunea kanafina kahegi kemoa Kalaisife havita tagupi maleta tametiti hisunafe kava hulategeta tametiti nehuna yateti Anumaya Kotia Fatago veane mainae. huno hunelate.
GAL 3:25 Yisasife havita tagupi maleta tametiti nehuna kemoa ago efalote humaineafe menia kahegi kemoa kava yagai-nolate.
GAL 3:26 Tamakaya Yisasi Kalaisife havitama tamakupi maletama tamametiti haya yateti mukiamo-gatama Anumaya Koti nafaneyaga mainae.
GAL 3:27 Yisasi Kalaisiene alino ailokae-lamatesiafene huya tina fale-lamatenaya veamogatama taugafale kenama nefauna kava hutama Kalaisi auava yana alitama ano vailiho.
GAL 3:28 Kalaisiene tokaetama mainaya veala nagoke avamete hutama mainae. Yuta veanene Yuta vea omainaya veanene, nofipi maineya miya oali aliya veanene afa veanene, anene vene nagoke avamete hutama mainae. Menia Yisasi Kalaisiene ailokaetama mainayafe nagokepi ali konaga ayetama nagoke avamete mainae.
GAL 3:29 Mainayanagitama Kalaisi veane maisayana Apalahamuna agehoamogatama mainageno Anumaya Kotia Apalahamufema Hugategahue. huno hulokiya vaitenea yana aligahae.
GAL 4:1 Kenia mage huna nehue nefaa nemofofena Afeno yania kamigahue. huno hapali-teneanagino mukia nefa yana agaia yamaage hanegi osi nafanema mainea kanafina ani afeno yamaa oalinegi nefa aliya vaya kana huno maineane.
GAL 4:2 Osi nafanema mainea yafe kava vayamogami amayapi maineno afaa maime maime haino nefama humalenea kanale afeno yamaa aliteno agaia kava yagaigahie.
GAL 4:3 Tagayaenena ania huta hagoteta osi nafanema mainona kanafina ma mopafi kava nehaya Kefo Avamumogami auava yapi mainonageya nofi hulatenae.
GAL 4:4 Nofi hu-latenayanagi Anumaya Kotia humalenea kanamoa ago efalote higeno Anumaya Kotia nafanea hutegeno ma mopafi egeno nago amoa ategeno kahegi kea ali hipoya huno maineane.
GAL 4:5 Maineanagita tagayama, kahegi kemo nofipi mainona veanea nofipitila kalu helatesia miyama atalesiafene huno Kalaisia fali-maine. Anumaya Koti nafaneyaga maisunafene huno Yisasina hutegeno ma mopafina elavi-maine.
GAL 4:6 Tamakaya Anumaya Kotina nafaneyagaa mainayafene huno nafaneamona Alu Aotage Avamula hutegeno tagaila taguafina emaineno Anumaya Kotifena Nelahaiya Nelafaga mainane. huta hisuna tagesa nelamie.
GAL 4:7 Humaineafe kagaya nofipina nagoene omaigane. Aao. Menia Anumaya Kotia kavaleno agaia nafane kategeka mainane. Anumaya Koti nafane mainanafe Kamigahue. huno hulokiya vaimalenea yana aligane.
GAL 4:8 Hagotetama Anumaya Kotina oagenayanagitama afa yafe Anumayatimoe. hutama agisana vaimainaya yamoa nofi hu-lamategetama mainayane.
GAL 4:9 Mainayanagitama menia Anumaya Kotina ago age-mainae huna hisufi ifi Anumaya Kotia ago tamakelama humaine huna nehue. Vaeha namayo neaigi naa higetama maiyahae hutama etetama nayoma tamakinagomogami agisanama vai yamona tokiyaa omalenegi afa yamogamifena Amakia alisaga hisune. hutama nehae? Nagoene ani yamo nofipi maisaya tamakesa nehavifi?
GAL 4:10 Nehavitama Tagaya tagaiti kanale kava hisuna yafe Anumaya Kotia Fatago veane mainae. huno hulategahie hutama Yuta veamoya maifalu nehaya kanaene haegafa ikateene kafuhe kafahe imuma negiya mono nehaya kavala akavela nemalae.
GAL 4:11 Ani kavama haya yafena nagesa kumo nehigena tamakaipi aliyama ali-mainoa aliyamoa afa ya kana nehie. huna nehue.
GAL 4:12 Nafunagana-gatama afaa musetami nehugi nagayama kahegi kemofena nametiti ohua kava hutama maiho. Nagaya Yuta kano mainoanagina tamakai kana kano mainoafe kahegi kehena nametitia ohunoane nayona havi kavala hu onatenae.
GAL 4:13 Tamakaya ago havimainae nago kalima alimainoa kanafina hagotena tamakaienena mo mainena Yisasima hulatenea kanale mono kea tamahapaugetama havi-mainayane.
GAL 4:14 Haviyanagi nagaya kalima alugenoa naugafamoa haviya huno tokiyania omalegetama nahamaetama Kasalo nelahaegi. Otahaiya kano maine. hutama tamakavenona hu onatenagi Anumaya Koti ensole kanoene Yisasi Kalaisiene anavalaya kava hutama navaletama nagaila ali falu fala hunatenae.
GAL 4:15 Falu fala hunatetama tamaipamoa tusia musema humainaya yamoa hanatega umaine? Hagote kanafina tamaulaga alilagatitama nagaima naya hutama namigahe humainagi menia naa higetama tamaipa haviyana hunenatae?
GAL 4:16 Menia kelamage kema tamahapauva yateti kame kanotami kana nehugetama keanenamakiyo? Inio?
GAL 4:17 Haviho mani vayamoya ayelamavataga hugahe ma kea nehae Mosese kahegi kea alitama hipoya hiho. huya nehuya tamaya hisayafe mani kea nohagi ani kemo akave malesayafe nagaila nenataletama amakai amakia alisaga hisayafe tusiya huno nehamaiye.
GAL 4:18 Kanale kavama humatesayafene huya tusiya huno hamaisiana kanale kava nehagi tamakaienema mainoa kanafikeya ani kavala ohugahagi nagayama tamatalena alulegama umaisua kanafienena ani kavala hiho.
GAL 4:19 Nakaini nafanemogatama nagoene anemoya inamu yama alimategeno amakata neaiya augafa kava huno tamakaya Yisasi Kalaisi aepaa kana hutama maisaya yafe nagaila tusiya huno nenahaigeno naipamoa kanaage nehie.
GAL 4:20 Vaeha menia tamakaiene maisua nagesa nehavugeno tamakaifena nagesa kumo nehigi. Tamakaiene nagokepima umainoteasina nagaya aiyahae huna kea otamamakina kanale keage tamahapauleasine.
GAL 4:21 Tamakaya Mosese kahegi kema alitama hipoya nehisaya veamogatama menia nahapaiho. Mani kahegi kea havilama hutama havilinafi?
GAL 4:22 Ani kemoa maa humaine. Apalahamua tole ne nafanema anateneana nago nafanea nofipi maineno miya oali aliya nealia amo ateno amigeno afaa mainea agihena aamoa nago nafanea atene.
GAL 4:23 Nofipi mainea amo agia Hagae nafanema ateana ve alavemogami auava kavateti atenegi afaama mainea agihena aamo agia Selae namo a maineanagino ago alekano le-maineanagi Anumaya Kotia Kamigahue. huno hulokiya vaimalenea keleti ani nafanea atene.
GAL 4:24 Atenaa kemoa Anumayamoa alino tole hagelafi-latenea yafe mani tole atalamoganite avame kea humaine. Hagaa nofipi maineno miya oali aliya a maineanagino Sainai agoyafiti eno Mosese kahegi kea taveli-maine. Nafaneamoya nofipi mainaya vaya kana huya mainae.
GAL 4:25 Hagaa Alepia kotega hanea agoya, Sainai agoyahe humaleno Yelusalemu kumate avame ke huno humaine. Ani Yelusalemu nafaneyagaenena nofi vaya kana huya mainae. Yuta veamoya menia ania huya Mosese kahegi kea akave nemalayafe nofipi mainae.
GAL 4:26 Mainagi ikapinaga hanea Yelusalemu nafaneyagaenena nofipina omainagi ani kumala itatimoe.
GAL 4:27 Ani yafe Anumaya Koti avopina mage huno kae-maleneane Inamu yana ali okateno kagata oai amoga nafane oateka, namo anema mainana yafena tusiya huka musena nehuka yagamea huo. Anaukamoa katalesigeka afaa mainesana amoga anauamoene maineno nafane neatesia anemogamina amakaseka kasagoya nafaneyakaa ateteka maigane. Ani yafe kaipamoa kanaleya nehisigeka muse nehuka maiyo. huno humaineane.
GAL 4:28 Ani yafe, nafunagana-gatama, Anumayamo hulokiya vaimalenea keleti Aisakina atenea augafa kava huno tagaila lategeta agaia nafaneyaga mainone.
GAL 4:29 Apalahamu aliya amoa ma mopafi veamoya neamataya augafa kava huno Isimelina ategeno Alu Aotage Avamumo humainea keleti agihena amoa Aisakina atene. Atetegeno nepuamoa Isimelia aganaamona Aisakina alino haviya hutene. Nagi menia ani augafa kavala maiya nehae.
GAL 4:30 Anumaya Koti avopina mani nafanehena mage huno humaineane Afaa mainea agihena amo nafanemofena nefaa Kanale hulamategahue. huno humainea yana aligahianagi nofipi maineno miya oali aliya amo nafanemoa tokaeana mani yana oaligahie. Ani yafe aliya amoene nafaneaene hunategeana vio. huno humaineane.
GAL 4:31 Na ke humaineafe nafunagana-gatama nofipi mainea aliya amo nafaneyaga tagaya omainonagi afaa mainea agihena amo nafaneyaga mainone. Ani yafe kahegi kemona ali hipoya huta nofipi vaya kana huta omaisune.
GAL 5:1 Yisasi Kalaisia kanaleya huta maisuna yafe nofipitila ago alino kalu helatenegi fatago hutama hetitama maiho. Nagoa veanemoya Kahegi kema akave maleho. huya nagoene nofi hu-lamatesagi Aao. hutama tokiya vaitama maiho.
GAL 5:2 Nagaya Polona mani kea nehugi haviho. Yuta veamoya nehaya avame yama hugahe Taugafa laga hulato*. hinutamahena Yisasi Kalaisima fali-mainea yamoa afa ya kana huno tamaya ohugahie.
GAL 5:3 Nagoene tamahanepauve nagoa vayamogatama Taugafa laga hulateho. hutama hinutamahena mukia Mosese kahegi kene akave malesaya aliyatamia hanegahie.
GAL 5:4 Mosese kahegi kea ali hipoya nehunageno Anumaya Kotia Fatago veane mainae. huno hulategahie. hutama ani kelema tamametiti nehaya veamogatama Yisasi Kalaisina tamakaveno hutetama alu kate neutama Anumaya Koti alino kayone hu-lamatesia yamaa ago tamakaveno hu neatayanagino ani yamoa tamaya ohugahie.
GAL 5:5 Tamaya ohugahigi tagaya ani kavala nohunagi Yisasife havita tagupi maleta tametiti hu-mainona yateti Alu Aotake Avamumoa tagaila taya hu-maineanagita Anumaya Kotia Fatago veane mainae. huno hu-latesiafe agava maineta tametitia nehune.
GAL 5:6 Yisasi Kalaisina tagua amiteta agaiene ailokaeta maineta Yuta vayamogami kava huta taugafa laga hisunapi taga ohisunapi ani augafa kavatalana afa ya haneanagino taya hutafa huno ohugahigi Yisasife havita lagupi maleta nelafugamife tahau tayamopafi nelahainageta amaya hisunana ani kavala tamage huno hagote yatafa hane.
GAL 5:7 Hagotetama kanaleya hutama Yisasi akave umainagi menia taya katamia tile-lamatagetama Yisasi kelamage kea ohavitama neataletama ani vayamogami kea ali hipoya nehae?
GAL 5:8 Ani kema akave malayana Anumayamoa agaia ke huno tamavale-mainea kanomoa ani kea ohunegi alu vayamoya tamakaila alihaviya nelamahayae.
GAL 5:9 Tamakesa haviho tanefa falauvateti kai hame maya talo nehuya osia halegisia yana aliya ali havigu hagenoa haenagaa mukia tanefamoa halegino alakefa humaine. Anima halegi-mainea augafa kava huya osi ke kanoa, havige hisaya kemoa mukiamogatamina ali haviya hu-lamateyafenagi kayetama maiho.
GAL 5:10 Nagaya Yisasi Kalaisiene ailokaena mainoanagina tamakaifena mage huna nagesa nehavue Nagai kea nehaviyanagitama alu kea ohavigahae. huna nagesa havine-lamamue. Tamakaima alino haviya tamahaisia kanoa hana augafa kano mainefi? Anumayamoa agaiage age-maineanagino ani vayamogamina haenagaa kayo kevea amamigahie.
GAL 5:11 Nafunaganagatama nagayama Tamaugafa laga hisageno Anumaya Kotia Fatago vaya mainae. huno hu-lamategahie. huna huleasina veamoya nagaila ali haviya hu onataleasinagi vayamoya nagaila ali haviya haya yana tagaila taveligeta age-mainone. Nagaya Yisasia yafaga yosale fali-mainea yateti Anumaya Kotia tagaifena Fatago veane mainae. huno hulatene. huna nehua yateti taveli-maine.
GAL 5:12 Tamakesa kumo hia kema tamahapaiya vayafena mage huna nehue Kanalelagi mukia amakayamoenema fayi-talesayana kanalele. huna nehue.
GAL 5:13 Nafunagana-gatama Mosese kahegi kefiti nofila humainageno Anumayamoa alino kalu he-lamateteno ago ke higetama agaialega emainagi tamakaya atafa lamaku tamakesamo nehaisia kavala hutama omaiho. Omaigahagi nelamafu-gamifena tamahau tamayamopafi nelama-haisigetama amaya hisaya kavakeya hiho.
GAL 5:14 Mukia Anumaya Koti kahegi kemo aepamoa maa humaine. Kagaika kaugafahema kahaiya avamete alu veamogami amaugafahena tama-hainagetama mai-hilato hutama maiho. huno humaine.
GAL 5:15 Hu-maineanagi havigu lamakaya afai afumoma hia kava hutama ke vaitama tuma hisayana apasetama mainesageno tamaugosamoene fanane hisigi kayetama maiho.
GAL 5:16 Nagaya mage huna tamahanepauve Alu Aotage Avamumofe Kava yagai-lato. hutama akave malesayana atafa lamaku tamakesale age lamahaye nehisia kavala ohutama kefo kavala ohugahae.
GAL 5:17 Alu Aotage Avamumoa Kanale kate eho. huno tamavaleno nevigeno atafa lamaku tamakesamoa age haye hisia yamoa tamakaifena Havi kapi eho. huno tamavaleno ugahe nehie. Naa kavamogania kame nehaagi tamahaisia kavala kanale kavaage hisaya yafena maitama ya nehae.
GAL 5:18 Ya nehayanagi Alu Aotage Avamumofema Kava yagai-lato. hutama akave malesayana Mosese kahegi kemo aiyafina omaigahae.
GAL 5:19 Mopale vayamogata atafa lamaku tamakesamo auava yamoa maa humainegi haviho. Moli huliteya nehuya kumai he yane. Amaugafafi oniyaage kefo kavale. Amaugafa haga neya kumai he kava akave male yane.
GAL 5:20 Ago fali-mainaya veafe Anumayati mainae. huya amakisana nevaiya kavale. Hanageke ya huya veane hamae-fali yane. Kame hu kavale. Amakaiami kemo tu huya hamai vai yane. Alu kanomo yate ageya hamaye hu yane. Ke vaiya amaipafinaga ata nelea yane. Amakaiami amakiake alisaga hisaya yafe amakesa havi havi yane. Vaya apase yane.
GAL 5:21 Alu kanomo hia kavafe ageya hamaye nehaya yane. Havili neya aneginagi huya hagi fali ke hatage yane. Tagaiti atafa lagu tagesamoa mani kavayaga alino nagoa yayagaene alifalote nehie. Nayona ago tamahapai-mainoanagi menia nagoene tamahanepauve ani kavama maiya nehaya veanea Anumaya Kotima kava yagai-mainea yapina tamage huya omaigahae.
GAL 5:22 Nagi Alu Aotage Avamumoa nago kanomo agupima mainesiana maa yayagamo falote hugahie. Veafe hau ayamopafi haisigeno amaya hisia yane. Muse hisaya yane. Kanaleya huno amaipamoa falu hamaisia yane. Tamamena male-lava hutama maisaya yane. Ali kayone hisaya yane. Veane amaya hisaya yane. Ke ali hipoya huya fatago huya maisaya yane.
GAL 5:23 Ako hutama tamakaitami lamaugafa alitama ohaitama mai kayone hisaya yane. Tamaku tamakesale yagai lokiya vaitama lamahaisia yana neataletama Anumaya Kotina haisia kavakeya hisaya yane. Alu Aotage Avamumoa veamogami amakupima mainesigeno mani kavama hisiana kahegi kemoa Kefo ya nehane. huno ohugahie.
GAL 5:24 Yisasi Kalaisiene ailokaeta mainona veanea Yisasia yafaga yosale fali-mainea kava huta atafa laku takesaene age lahaye hisuna yaene ago fali lavata humainone.
GAL 5:25 Fali lavata hu-mainonageno Alu Aotage Avamumoa tagupi emaineno haegafa huta maineta Alu Aotage Avamumo ke akave nemaleta fatago kate vaiyesune.
GAL 5:26 Tagaiti tagia alita ohaisune. Tafu-taganaya humainesaya kavafena ageta lahaye nehuta taipa haviya huta tua ohisune.
GAL 6:1 Nafunagana-gatama nago kanomoma kefo kava huno asaga hu-lavisigetama agegetama tamakaya Alu Aotage Avamumo kea akave nemalaya veane kea oamakitama ako hutama ali hetigeno kanaleya huno maino. Ali hetitegahagi tamakaienena Satania tamavayu huno havi kapi tamateyafe aluya hutama tamaugafa kayetama maiho.
GAL 6:2 Kana yama alisia kanomona aya hutama aliho. Ani kavama hisayana Yisasi Kalaisina haegafa kahegi kea ali hipoya hugahae.
GAL 6:3 Afaa havigu nemaisia kanomoa Nagaya ala kano mainoe. huno hisia kanomoa agaia agua ayevataga nehuno augafa alino haisiafe agaiahe havige nehie.
GAL 6:4 Alu veala neamaketama Amakaila ago amakase-mainone. hutama ohutama mukiamogatama aliyatamia fako hutama Kanale yapi havi yapi? hutama agetetama kanale yama hanesigetamahena ani yafekeya muse hiho.
GAL 6:5 Muse hugahagi tagaya mukiamogata tahaote tahaote kana yama hane-latesigeta tagaiti alita vaiyesune.
GAL 6:6 Yisasi mono kema tamahapaisia kanomona kanale yama tamamefe malenesaya yapiti aye fako hutama amiho.
GAL 6:7 Avina yama kalunagenoa ani augafa avinaage falote humaine. Tagaya mukia yupa nehuna kavamoa ania augafa kavea falote hu lamisigeta agegahune. Tamakaitami tamaugafa havige hutama Anumaya Kotina ayevataga hugahune. hutama ohiho. Anumaya Kotina ayevataga hisuna kanoa omaine.
GAL 6:8 Mukia kanafina atafa agu agesahekeya nehuno age haye hisia kavafekeya hoyaafima nehakalesia kanomoa agaia ali nena hisia kavemo avaleno haniki-mainesia yapi tegelege nehia atafi atenageno agola maigahianagi Alu Aotage Avamumo kema haviya akave malesaya veamoya ani avinama hakale-malesageno nenama hisia kavemoa alino falote hisigeya maige maige hisaya hamaimula aliteya agola maigahae.
GAL 6:9 Naama hisiafe nagoa kefo kavala ohuta kanale kavakeya kasalola otahaesigeta oataleta nago kanama vayi hisigeta kanaleya huta ali nena hisunageno ala hinageta anonaa aligahune.
GAL 6:10 Aligahunagi menia kanale auava kavala hisuna katia hanegeta Yisasife haviya amakupi maleya amametiti nehaya anagala hagoteta kanaleya huta amaya huteta mukia veanene amaya hisune.
GAL 6:11 Nagi ageho. Menia atupale kea nakainia nayapiti ala avopitila mani avopi kaena nelamamue.
GAL 6:12 Nagoa veamoya amakaiami amaugafa aliya nehaiya Yisasia yafaga yosale tagai kefo yamo anonatia aliteno fali-maine huta hisunana Yuta veamogami amaipamoa haviya hisigeya hu-haviya hu-lategahae. huya haviya yafe mage huya mono kea tamahanepaiye Tamakoya anoya laga hiho. huya nehae.
GAL 6:13 Mosese kahegi kea ali hipoya huya amaugafama laga nehaya vayala amakaienena mani kea mukiamoya ali hipoya ohunagi. Amakaiami amaugafa aliya haigahe tamakaifena Tagai kema ali hipoya hisayafene huya amakoya anoya laga humainae. huya hisayafene mani kea humainae.
GAL 6:14 Nagaya nago yafena naugafa alina nohauvanagi Anumayatimoa Yisasi Kalaisi nagaifene huno yafaga yosale fali-maineafene huna nagaya agai agigeya alisaga nehue. Yafaga yosale fali-maineafe nagaya agaiene ania huna yafaga yosale fali-mainoanagina ma mopale veamoya haya yafena nagesa havina nagoene akave ohugahue.
GAL 6:15 Yuta vayamoya amaugafa laga nehaya yana afa yane. Amaugafa laga ohunaya yana afa yakeya hanegi Anumaya Kotia haegafa lagu tagesa laminea yana tusia tokiyaage kanale ya hane.
GAL 6:16 Ani kema ali hipoya hisaya veala Isaleli veanelafa mainageno Anumaya Kotia amaipa falu hisia yaene kayone humatesia yaene amamisie huna nehue.
GAL 6:17 Nagaya Yisasi aliya nealugeya nagoa veamoya nagaima nahae-mainaya nafugula hanegi menia nago kanomoa kana yana onamisie huna nehue.
GAL 6:18 Nafunagana-gatama Anumayati Yisasi Kalaisia kayone yamaa tamaminageno tamaku nafanene maisie huna Anumayamotega nunamuna huna havinegoe. Tamage. Kenia male hano hie. Nagaini nagia Polonae.
EPH 1:1 Nagaya Polonia Anumaya Kotia agaia agu agesafiti haiya kava huno Yisasi Kalaisi Aposolo kano maiyo. huno hunategena mainoane. Anumaya Koti alu aotage veamogatama Efesusi mainaya veala Yisasi Kalaisife havitama tamakupi malenetama efi efi hutama Anumayamo aliya alike alike nehaya veamogatamahe mani avona kaena nelamamue.
EPH 1:2 Nelafaa, Anumaya Kotiene Anumayatimoa, Yisasi Kalaisiene kayone hisaya yaene tamaipa falu lamahaisia yaene tamamisae.
EPH 1:3 Tagaya Kalaisiene aigamaeta mainonageno Anumaya Kotia ikapinagati mukia tagu nafane aya hisia yana ago tamineanagita tusiya huta Anumayati, Yisasi Kalaisina Nefaa, Anumaya Koti agia alisaga hisune.
EPH 1:4 Anumaya Kotia ehema ma mopama talo ohuneno tagayama Kalaisiene aigamaeta agai aulagafina agaia alu aotage anaga maineta mukia veamogami amaufina nagola kefo kavala ohu veane mai-fatago huta maisunafe tagaifena haigeno hapalilatene.
EPH 1:5 Tagaifena hau ayamopafi haigeno tagaila hapali-lateneafe Yisasi Kalaisia kefo yatimo anonaa alino fali-mainea yateti agaia nafane alino hapae-latene.
EPH 1:6 Hapae-lateteno agaia hau ayamopafi haumainea Kanoene aigamae-mainonageno fali-mainea yateti tusiya huno kayonea hu-lateneanagita muse huta tokiya hale yamaa hanea kanomo agia alisaga hisune.
EPH 1:7 Anumaya Koti ali kayone hu-latenea yaene kanale tagesa havi yaene tusiya huno hiya hutenegeno ali helafino nelamino kefo yatimoma alino hayagi-latenea yapitila tagaila lavayu hisia miyama atalesiafe kefo kavama nehuna anonatia aligahe Yisasia faliteno agaia kolana atalegeno lavi-maine. Tavi-mainea yateti tagayama humainona kefo kavala ago aigetateno atalelatene.
EPH 1:9 Atalelateno muse huno agaiama haisia kava havisunafe anima hagoteno falaki-malenea kea ago taveli-mainea kemofena Anumaya Kotia nayona mage huno humaine Kalaisina hutesugeno elavino veamogami amaku amamena aligatigahie. huno humaineane.
EPH 1:10 Anumaya Kotia agaia malenea kanamoa mukia mopale yaene ikapinaga yaene alitalu hu-maletesigeno Kalaisia ani yatela kava kanoami maigahie.
EPH 1:11 Anumaya Kotia Nago kava hugahue. huno agesama havimainea yateti mukia yamoa falote humaine. Agaia agu agesama havimalea yamo akave maleno tagayama Kalaisiene aigamaeta maineta Anumaya Kotina agai veane maisunafene huno tagaila ago hapali-latene.
EPH 1:12 Tagaila Yuta veamogatina hagoteno ehe kanafi Kalaisia hulatenea kanale mono kea alita tagupi maleta lametiti humainona veamogatina tokiya hale yamaa hanea kanomo agia alisaga hisunafene huno tagaila hapali-malene.
EPH 1:13 Tamakaienena kelamage kea, Yisasia tamaku tamame aligatisia kea ago havitama tamakupi maletama tamametiti hageno Nagaini veane mainae. huno hu-lamateneafe Anumaya Kotia agaia Alu Aotage Avamula Tamamigahue. huno humainea kanomona ago tamamigeno tamakupina maine.
EPH 1:14 Maineno Anumaya Kotia Haenaga nago ya hulamategahue. huno humalenea kema havisunafene huno Alu Aotage Avamula ago tamineanagita tagaya tagu tamema aligatisiafe agava mainone. Ani yafe tusiya huta tokiya hale yamaa hanea Anumaya Koti agia alisaga huta anale malesune.
EPH 1:15 Tamakaifema nagaya havuana Anumayatimoa, Yisasife havitama tamakupi maletama tamametitia hutetama mukia Yisasi veamogamina tamakua amaminaya kea ago havitena mukia kanafina nagela kani-otamatena tamakaifena Anumayamotega tusia muse huna havinegoe.
EPH 1:17 Nunamuna mage huna havinegoe Tokiya hale yamo aepamoga Anumayati, Yisasi Kalaisina Nefaga, Anumaya Kotigae, kanale amaku amakesa amamiteka kagaika aepakaa Alu Aotage Avamumoa amavelisigeya agelama huteya havisae huna kahavi-negoe.
EPH 1:18 Amakua alika halesanageya kagaikalega visaya kema humainana veamoya haenagama falote hisia yafena amametiti huya agava maisaya yamona aepaa havilama hisae huna kahavi-negoe. Kagaya Yisasife haviya amakupi malenaya veafe Nagaini veane mainagi musema nehaya yana alu aotage yanagina tamatenoe. huka humainana kehena havilama huya havisae huna kahavi-negoe.
EPH 1:19 Amakaya kagai tokiyamoa Yisasife tagupi maleta tametiti humainona veamogati lagupi haneno laya nehia yafe havisae. Ani lokiya yana tusia yakefagita tagaya hapalita ohugahune. Ani tokiyakaleti Kalaisia falitegeka Anumaya Kotiga fali-mainefiti ali hetiteteka avalesaga huka kaya tamaga kaiyaga ala kano mainelega atanageno ikapinaga kagaiene siale maine. Ani lokiyakahe havilama huya havisae. huna kahavi-negoe.
EPH 1:21 Kalaisia ikapinaga maineno mukia ala kava vayama ikapinaga mainaya vayaene mopale mainaya ala kava vayaene Kefo Avamuyagaene amaki hanea vayaene meni kanafima mainaya veanene haenagama falote hisaya veanene Kalaisia mukiamogamina amakaseno anale ala kano maine.
EPH 1:22 Mainegeno Anumaya Kotia mukia yana alino Kalaisia yagaisiafene huno aiyafi maleneno agaifema haviya amakupi malenaya veate Kava yagaiyo. huno hutene.
EPH 1:23 Yisasife haviya amakua aminaya veamoya Kalaisina augafaa mainageno Kalaisia tokaeno maineanagino agaia tokiyaamoa hiya humateteno mukia yapinaga havatematene.
EPH 2:1 Nayona kefo kava huge huge hutama mainaya yamoa tamahaegetama fali-mainageno Kalaisia ago fali-mainafiti ali hetilamatene.
EPH 2:2 Nayo kanafina tamakaya ma mopafi kefo auava kava hutama Satani* akave maletama vai neayageno ani Satania menia Anumaya Koti kema neatagayaya veamogami amakupi maineno aliyamaa nealie.
EPH 2:3 Nayo kanafina tagaya ani veanene tokaeta maineta atafa lagu tagesamo taugafa age lahaye hisuna kavafekeya akave maleta mainonageya mukia veama kefo kava humainayafe anonaamia amakata aisia yana alisaya kava huta mani anonaa aligahe hunanagi Anumaya Kotia laya humaine.
EPH 2:4 Tamage tagaitima kefo kavama huna yamo tahaegeta ago fali-mai veanelafa mainonageno Anumaya Kotia tusiya huno kalagi ailateteno tagaifena hau ayamopafi haigeno Kalaisia fali-mainefiti alino hetitenea kava huno tagaila agaiene alihetilateno haegafa tahaimula lamine. E, Anumaya Kotia kayone hulatenea yateti ago lagu tamena alino katimaine.
EPH 2:6 Alino katilateteno tavalesaga huno ikapinaga Yisasi Kalaisiene tokaetama siale maiho. huno alino ailokaelatene.
EPH 2:7 Alino ailokaelateteno haenagama mukia vea amaufi agaia tusiya huno kayone hulateneanagino Yisasi Kalaisia kefo yatimo anonaa alino fali-mainea yana ali fufute huno amave-lisiafene huno ani kavala humaine.
EPH 2:8 Anumaya Kotia kayone hulamatenea yateti tamakaya Yisasife havitama tamakupi maletama tamametiti hageno Anumaya Kotia tamaku tamamena aligati-maine. Tamakaitami kanale kava haya yateti aliokatinegi Anumaya Kotia agaia afaa lamamine.
EPH 2:9 Tamakaya kanale aliyama ali-mainaya anonaa tamaku tamamena aligati-mainea yana omaletafa huno omalegi havigu nago kanomoa Nagainige alimainoa aliyatetile. huno huyafenagi Anumaya Kotia agaia tamaku tamamena aligati-mainea yana afaa lamamine.
EPH 2:10 Kanale kava haenagaa hisunafene huno Anumaya Kotia tagaila Yisasi Kalaisiene alino ailokaelateneno haegafa veane alino hapae-latene.
EPH 2:11 Yuta veamoya amayateti amaugafa laga humalenaya yafena lamakaya Yuta vea omainaya veafe mage humainae Amaugafa laga ohunaya vayala, afa vaya, mainae. huya humainayane.
EPH 2:12 Ani kanafina tamakaya Kalaisi avatela omainagi aluale mainetama Yuta veanea omainageno Anumaya Kotia Isaleli vayala alino hagelafi-mateno Nago ya hu-lamategahue. huno hulokiya vaimalenea yana tamakaifena ani kea ohune. Tamakaya ma mopale mainetama Anumaya Kotifena ohavitama Haenagama kanale yana falote hugahie. hutama lamametiti hisaya yana omaletafa huno omalene. Nayoma mainaya yafe tamakesa alikalo hulinetama havi havi hiho.
EPH 2:13 Nayona tamakaya aluafinaga mainayanagino menia Kalaisia kolamaaleti tamavayu higetama Yisasi Kalaisiene ailokaetama Anumaya Koti avate mainae.
EPH 2:14 Kalaisia taipa falu huta maisuna yamona aepaa maine. Nayona Yuta veamoyaene Yuta vea omainaya veanene kame huya mainaya yamoa amunoamifina kegiya lafigefa humaleteya mainageno Kalaisia Mosesi kahegi kea agaia augafale aliteno fali-mainea yamo mani kahegi kea alino hano hutaleteno anima amunoamifima hanea kegiya lafia ago aye lagape aitalene. Aitaleteno tole nofi veanea ago alitalu humateteno Kalaisiene alino ailokaemategeya haegafa veane mainayafe nagoke amaku amakesale mainae.
EPH 2:16 Nayona tagaya Anumaya Kotiene kame huta mainonageno Yisasia yafaga yosale fali-mainea yateti kamema huta mainona yatia heno faliteteno Nagoke nofi veane maiho. huno hulatene.
EPH 2:17 Hu-lateneanagino Yisasia eaamo anima taipa falu lahaisia kea alino aluafima mainaya veaenefe agaia avatema mainaya Yuta veanenefe tahapai-maine.
EPH 2:18 Kalaisia hulatenea yateti tagaya tole nofi veanea mainonageno Alu Aotage Avamumoa Nelafatega visuna katia ago vali-latene.
EPH 2:19 Menia tamakaya nagoene mopatamia omalenea natu veane kana huta omainagi tamakaya Anumaya Koti nofi anaga mainetama Yisasina amakua aminaya veanene ailokaetama agaia nafaneyaga-lafamaa mainae.
EPH 2:20 Tamakaya Anumaya Koti kimalenea no kana hutama mainae. Hagoteno Anumaya Kotia Yisasi Kalaisina tokiyaage anumaya yosa aye-maleteno anile Aposolo vayamogatiene agaia amaune vayaene ani nomo no yosa kana huno latene.
EPH 2:21 Lateteno tamakaila ani nomo ayamufa kana alino hu-lamateteno Kalaisiene alino aigamae-lamategetama mukiamogatama tokiyaage hutama mainageno Anumaya Kotia ani nona tusiya huno alino ala hume hume nevigetama alu aotage nomaa mainae. Anumaya Koti Alu Aotage Avamumoa ani nopi maine. Ani nona tamakayae.
EPH 3:1 Nagaya Polona Yuta vea omainaya veamogatama lamaya hisuafe Yisasi Kalaisife lamahanepaugeya nofila hunatenagena Anumayamoa kanale hu-lateneafe nagesa havina nunamu nehue.
EPH 3:2 Anumaya Kotia Yuta vea omainaya veamogamina tamakaila agaia kayone yamaahe tamahapaisuafene huno hunatenegetama tamakaya ago havimainafi?
EPH 3:3 Hunateneno nayoma falaki-mainea kea Anumaya Kotia hu falote huno nahapaigena havitena aupaa avo kaena tamahapai-mainogi hapalitama havinutamahena Kalaisifema falakino hanea kea havilinoa aepaa havigahae.
EPH 3:5 Havigahagi nayoma mainaya veamoya anima falaki-mainea kea ohavinayane meni kanafina Alu Aotage Avamumoa Aposolo vayaene amaune vayaaene ago tahapai-maine.
EPH 3:6 Manima falaki-mainea kemoa mage huno humaine Yisasi kanale mono kea haviya amakupi malenayafe Yuta vea omainaya veamoya menia Yuta veanene nagoke veane maineya Yisasi Kalaisiene ailokaeya mainageno Anumaya Kotia Hulamategahue. huno hulokiya vai-malenea ya ali-mainae.
EPH 3:7 Anumaya Kotia nagaifena Yisasia hulatenea kanale mono kea hamapaiyo. huno hunateteno kayone yamaaene tokiyaaene mani aliya alisuafene huno namine.
EPH 3:8 Namineanagiya mukia Yisasina amaku aminaya veamoya nagaseya maigena nagayama osi nafane kana kano mainogeno Anumaya Kotia kayone hunateteno Kalaisina ohavunamaa kanale yamaa kanale taya hisia yafe Yuta vea omainaya veane hamapaisua-fene huno hunatene.
EPH 3:9 Anumaya Kotia mukia yana talo humaleteno Nago kavala maa hugahue. huno humainea kea falaki-maleneane. Mani falaki-malenea kea hufalote hisugeya mukia veamoya agayama hisia kea havisae huno hunatene.
EPH 3:10 Hunategeya Yisasi veamoya anima falaki-mainea kea ago havimainayafe mukia ikapinaga kava veanene ensole vayaene Kefo Avamuyagaene ageteya Anumaya Kotia tusiya huno alu kava alu kava hisia kanale agu agesa hane. huya havisae huno Anumaya Kotia anima falaki-mainea kea amaveli-maine.
EPH 3:11 Ani kavala Anumaya Kotia ehema ma mopama talo ohunea kanafina Ma kava huna Yisasi Kalaisina hutesugeno amaku amamena aligatigahie. huno hu-maineanagino Anumayati Yisasife havita tagupi maleta tametiti humainona yateti kolia ohuta Yisasiene aigamaeta maineta ke huta havinegone.
EPH 3:13 Ani yafe musetami nehugi tamakai tamaya hua yateti nagata aiya yana falote hunateneafe tamaipamoa haviyana ohinagetama Yisasi kea oataletama tamayama nehua yafena muse hiho.
EPH 3:14 Anumayamoa kanale hu-lateneafe nagesa nehavina nagaya Nenafatega naleya aye kofa huna havinegoe.
EPH 3:15 Ani Nenafa mukia agaia afamoyaga ikapinaga mainaya afamoene mopale mainaya afamoene tamagelafa amakia malene.
EPH 3:16 Mage huna Anumayamotega nunamuna nehue Tokiyaage hale yayagakaa kasagoya hanea yapiti Alu Aotage Avamukamona tamamisanageno amakupi maisia yafe amaku amakesa alilokiya vaimatesane.
EPH 3:17 Yisasife ago tamakupi malenaya yafe Kalaisia no aepagino tamakuafi maineanagitama yosamona hafuyaamoma mopafima taviteno atafa huno lokiya hulia kava hutama Anumaya Kotina hau ayamopafi nehaiya yapi hafuya kana tavitama atafa hutama maisae.
EPH 3:18 Mainetama mukia Yisasina alu aotage veanene Kalaisina hau ayamopafima nehaiya yana tusia ala yakefa hanea yafe tamaku tamakesa tokiyaage vaitama haviho. Ani yamoa ayaaya huno anale haiteno eteno afepi tavi-mainea yana tusia yakefa haneafe havisae huna Anumayamotega havinegoe.
EPH 3:19 Tamakaya Kalaisima hau ayamopafima nehaiya yafena havilama hisae huna havine-goanagi mani yana tusia ala yakefa haneafe ma mopale maineta mukia tama yafena havilama ohugahunagi havisae huna Anumayamotega havinegoe. Havisayana Anumaya Kotina aepaamoene tokiyaamoene tamakai tamakupi male havate-lamatesie huna Anumayamotega havinegoe.
EPH 3:20 Anumaya Kotina tokiyaamoa tagai tagupi aliyana nealia yateti tagesa havita havigesuna yaene alu ya alu yaene tusia ala yakefa hulategahie.
EPH 3:21 Tagayama Yisasi anagamogata Yisasi Kalaisiene aigamaeta Anumaya Kotiga kagia alisaga hume kanaaene kanaaene hanege hanege huno hanesie huta kahavi-negone. Tamage.
EPH 4:1 Nagaya Anumayamo aliya nealuafe nagaila nofila hunatenaya kanomona musetami nehugi Anumaya Kotia tamakaife ke higetama agaitega umainayafe tamakaya tamatea kava hutama kema hia kate neutama agai kea akave maleho.
EPH 4:2 Tamaugafa alitama ohaiho. Nago kanomo kema havinutamahena ako hutama kea oamakiho. Tamamena malelava hutama maiho. Nago kanomoa haviya hu-lamatesigetamahena tamakua neamitama tamamena male falu hutama maiho.
EPH 4:3 Alu Aotake Avamumoa nagoke tamakuale falu hutama maisaya tokiya ago tamamineanagitama mani kavama atafa hu-linesaya yana atafa hu lokiya vaiho.
EPH 4:4 Tamakaya tokaetama nagoke tamaugafa kalitama mainae. Ani lamaugafafina Alu Aotage Avamula nagoke maine. Anumaya Kotia haenagama efalote hisia yafena tamametiti hutama agava maisayafene huno ke higetama agaitega umainae.
EPH 4:5 Anumayatia nagoke maine. Nagoke kanomoma hulatenea yafena havita lamakupi malonageya tina nagoke titeti fale-latenae.
EPH 4:6 Anumaya Kotia nagoke maineanagino mukia veamogatina nelafa maineno mukia veate kava yagai-lateno amunotifina aliyamaa nealino taguafina maine.
EPH 4:7 Kalaisia kayone hulateno agaiama haiya kava huno tahaote tahaote alu aliya alu aliya alisuna tokiya tamine.
EPH 4:8 Tamineafe Anumaya Koti avopina Yisasife mage huno humaineane Agayama analega hai-mainea yupa Satanima nofi humatenea veala kasagoya amavaleno haiteno muse yaamia ago amamine. huno kae-maleneane.
EPH 4:9 Analega hai-maine huno hia kemo aepaa naane? Hagoteno ma mopamo agusafinaga fali-mainaya veamoya umainalega lavi-maine.
EPH 4:10 Anima lavi-mainea kanomoa kava yagaisia tokiyaamoa mukia kotega male havatesia yafe analega eteno haino umaineno mukia ikana agaseno anafinaga haimaine.
EPH 4:11 Anafinaga haino maineno aliya alisaya tokiya amamine. Nagoa veamoya Aposolo vaya maiho. huno huneamateno nagoa veafe Anumaya Kotina avayafiti tamahapaisia kea huhaletama hiho. huno hu neamateno nagoa veanemogatama Nagai kea alitama vaiyeho. huno hu neamateno nagoa veanehena Nagaifema haviya amakupi malenaya vayate kava yagaitama huge amavelige hiho. huno hu matetele humaine.
EPH 4:12 Kalaisia mani aliya alisaya tokiyaa agaila alu aotage veanea amamineanagiya amafuamakana-gamina amaya hisageya mukia Kalaisi anagaa tokiyaage huya aliya alakefa hulatesae huno lamine.
EPH 4:13 Lamineanagita ko hume hume haita mola huteta tagaya mukiamogata Anumaya Koti nafanemo hulatenea kanale mono kea havita lagupi maleneta nagoke tagu tagesale ko huteta vayatama maineta Kalaisima humainea auava kava huta velafa maigahune.
EPH 4:14 Maisunana tagaya nagoene osi nafane kana huta omainona yafe taipafi ayegesaya vaya eya havige huya ayelavataga hisaya kea ohavigetao. Ani havigeage vayamoya yasimo alino neea augafa kea aliya neagi havigu ani yasimo kemoa yasimoma hia kava huno tavaleno atifi mafi ohisigeta ko huta Kalaisi kana veane maisune.
EPH 4:15 Ani havigeage kemotela tamakesa kumoa ohutama tafu-tagana-gamina tagua neamamita tamage keage nehuta ko huta Kalaisiene aigamaeta agai kana veane maisunageno agaya tagaila tagenopa maineno kava hu-latesigeta tagaya mukiamogata agai augafa mainone. Tanuteti tokiya aliteta taganunamoa latafa hulinea kava huno mukia taiya taya taulagamo hia augafa kava huta veamogamina amaya huge huge nehuta nagopi aigamaeta maisunageno taugafamoa tusiya huno tokiyaage hisigeta tahau tayamopafima nelahaiya yateti tokiyaage huta maigahune.
EPH 4:17 Nagaya Anumayatimoene aigamaena mainena nago kea tokiyaage huna tamahapaigahe nehue. Tamakaya nagoene Yisasi kema ohavinaya veamoya afa yafe amakesa havi havi huya nemaiya kavala ohiho.
EPH 4:18 Amakaya amakaiami amaku amakesamoa hanimaage humainegeya kanale haviya alisaya amakuamoa atalako humainegeya kanale amaku amakesa omalegeya Anumaya Kotia amaminea hamaimula oalinae.
EPH 4:19 Oalineya nagoene amakayea nohigi amakuamoa oniyaage humainegeya amaugafa haga neya kumai he yana huge huge nehuya noatalae.
EPH 4:20 Mani augafa kavana Kalaisife hulamave-limainea kanafina ohavinae.
EPH 4:21 Kalaisife havitama mainaya yateti tamakaya Yisasi kelamage kemoa hane huya huge tamavelige hagetama havitetama agaiene ailokaetama mainetama ago havimainae.
EPH 4:22 Havimainagi ani kelamage kemoa mage humaine hagotetama tamakaya atafa lamaku lamakesafi mainetama vaiyatete nehageno ani atafa tamaku tamakesamoa havige huno tamaugafa age lamahaye huliteteno nehuno alino haviya hulamatesia kava humaineafe menia atafa lamaku tamakesa atalesageno Alu Aotage Avamumoma tamamisia haegafa lamaku tamakesa tamamisigetama aliho.
EPH 4:24 Anumaya Kotia haegafa lamaku tamakesa agaia agu agesamoma hia auava kava huno fatago huno talo humalenegi havi kavala ohuno alu aotage tamaku tamakesa talo huno tamaminegi alitama maleho.
EPH 4:25 Malelinetama havigema hisaya yana neataletama tagaya nagoke taugafa mainonafe mukia tamafu-tamakana-gamiene tamage keage hiho.
EPH 4:26 Tamakuamoa tamahai vaisigetama havigu kefo kava hisagi. Tamahai vaisia yamoa ayaayate ani tamahai ya ovaitama havigu yage lavi falesigi aupaa alifalu hiho.
EPH 4:27 Havigu ayaayate tamahai vaisaya yamoa Satani fita yakiteyafenagi aupaa ataleho.
EPH 4:28 Musufa yama nehisia kanomoa nagoene musufa yana ohuno agaia ayapiti aliyana alinegeno monea falote hisigeno nagoa yamaa omalesia kanomona aya hino.
EPH 4:29 Nagola kanale ohu kea tamavayafitila hati otavino. Kanale amaya hisia keage hutama hisageya havisaya veamogamina ali lokiya vaimatetama amaya hugahae.
EPH 4:30 Anumaya Kotia Haenaga tamaku tamamena aligatigahue. huno higetama Ania hugahie. hutama havisayafene huno Alu Aotage Avamula tamakupina tamamigeno mainegi ani Avamumona aipa agata aisia kavala huoateho.
EPH 4:31 Huoatesayafe tamakaya tamaipa haviya hisia yaene ala kefiti ke nevaiya yaene tamahai vai yaene kamuge vaimate yaene mukia veane havitama haviya humatesaya yaene tamakaipitila ataleho.
EPH 4:32 Ataletetama tamafu-tamakana-gamina kayone humatetama tamakua amamiho. Anumaya Kotia Yisasia hulatenea yateti kefo yatamihe aigetamateno atalelatenea kava hutama nagoa veamoya kefo kava hulamatesayana aigeamatetama atalemateho.
EPH 5:1 Anumaya Kotia agua lamamigetama agaia nafaneyaga mainagi agayama nehia kava hutama akave maleho.
EPH 5:2 Kalaisima tagaife hau ayamopafi haigeno agaia haimula tagaife ataleno fali-mainea yana Anumaya Kotitega manaage hia kava huno kae-salamana huteneafe tamakaya ania hutama nelamafu-lamifena tamahau tamayamopafi tamahainagetama tamakua neamamitama vaiyeho.
EPH 5:3 Vai neayetama munane ane amaugafale maiya vai neayaya kavaene moli huliteya nehaya kavaene mukia ani oniyaage kefo yaene alu kanomofe age lamahaye hisaya yaene ohiho. Tamakaya Anumaya Koti nafaneyaga mainagi havigu Na kava nehae. huya hulamateyafenagi ani kavala mukia yupa ohiho.
EPH 5:4 Moli huliteya hisaya yafena tamakesa ohavitama havi kigi humatesaya kea ohutama aifonafo augafa kea ohutama ani kavama hisaya kavamoa Anumaya Koti nafanemogami kavala omalene. Anumaya Kotia lamaminea yafe Anumayamotega nunamu kefiti muse higetao. hutama hiho.
EPH 5:5 Tamakaya ago havimainae amo augafale mai vayaene aguamoa oniyaage humai veanene alu kanomo yafe age haye hisaya veanene afa yafe Anumayati maine. huya agisana vaiya amakua neamiya Anumaya Kotina amakua oamisaya kava nehuya ani veamoya Anumaya Kotiene Kalaisiene kavama yagai-mainaa kumatela ovisaya kava nehayafe ougahae.
EPH 5:6 Havigu nago kanomoa tamavayu huno havigea nehuno Ani kefo kavala afaa maitama hiho. huno hisigetamahena agai kea ohaviho. Naa augafa kavama nehaya yamoa Anumaya Kotina agai kema neatagayaya vayamogamina aipa haviya hu neamateanagino hai vaimateno amakata aisia yana amamigahie.
EPH 5:7 Naa humaineafe tamakaya ani kavama nehisaya veanenena aigamaetama omaiho.
EPH 5:8 Hagotetama haniki mainea yapi mainayanagino menia Anumayamoa hale yapi tamavaleno tamategetama hale yapi mainagi hale yate vaiyeho.
EPH 5:9 Hale yate vaiyesageno hale yamoa kanale yaene fatago kava hisaya kavaene tamage hisaya kene alino falote hugahie.
EPH 5:10 Tamakaya Anumayamona haisia kavafema havinutamahena kasageke nehutama tamaula ofaeho.
EPH 5:11 Tamaula ofaetama kanale yana hanimaage yapitila falote ohugahie. Hanimaage yapiti vayi humainea kavala ohutama tamakaya veamoya ani kavama hisagetama Kefo kava nehae. hutama hamapaiho.
EPH 5:12 Yisasi kema nohaviya veamoya falakiyama nehaya kavafena kema hisunana tagaye hugahianagita ohugahune.
EPH 5:13 Hale yamoa mukia kefo auava yama falaki-mainea yamona aepaa alino fufute maleno lavenelie.
EPH 5:14 Ani kemofena mage huya humainayane Faetama mainaya veamogatama hetiho. Komufitila hetisageno Kalaisia hale yamaa lamamino. huno humaine.
EPH 5:15 Ani yafe tamakaya kama vaiyesalega kayetama vaiyeho. Menima mainona kanafina veamoya tusia kefo kava maiya haya kafi mainonagi veamoya havilama huya maineya vaineayaya augafa kava hutama vaiyeho. Kanale amaku amakesale mainaya veamoya nehaya kava vaiyeho. Maisuna kana kanoa aupaa hanegi havigu kavala ohutama kanale kavaage hiho.
EPH 5:17 Havigu havagu kavala ohutama Anumaya Kotina haisia kavafekeya havilama hutama akave maleho.
EPH 5:18 Havili netama anegi-nagia ohiho. Naa augafa kavamoa lamakaila alino haviya hulamategahigi tamakaya Alu Aotage Avamuamona avalegeno tamakupina hiya hino.
EPH 5:19 Tamafu-tamakanayaene kaiyekema hugahena Anumaya Koti ke kae-malenaya kemona hutama mainetama yagamefiti Anumaya Kotitega muse huteho. Tamakupiti Anumaya Koti kea yagamefiti hutama agia alisaga hiho.
EPH 5:20 Mukia kanafina tamakaya Anumayatimo, Yisasi Kalaisiene ali lokaetama agai agi neayetama Anumaya Koti, Nelafatega mukia yafena muse huteho.
EPH 5:21 Tamakaya Kalaisife alati maine hutama tamakesa nehavitama agima alisaga nehaya tamafu-tamakana-gamife amaiyaafi maiho.
EPH 5:22 Anemogatama Anumayamo aiyaafinaga mainetama kema akave nemalaya kava hutama anautamimo-gami kea akave maletama amaiyaafinaga maiho.
EPH 5:23 Kalaisia agaia anagamogami amaku amamena aligatiteno amakaitela amakenopa mainegeya amakaya agaila augafaa mainagi vemoya ania huya anemogatamina lamakenopa mainane.
EPH 5:24 Kalaisina anagamoya agai aiyafinaga maineya agai kema akave malaya kava hutama aneyaga-mogatama anautami-mogami amaiyafinaga mainetama mukia amakai kea akave maleho.
EPH 5:25 Kalaisia anagaamogamife hau ayamopafi tusiya huno hau humateno hamamaesia yafe fali-maine. Ani kava hutama vemogatama anetamimo-gamina amaya hutama tamahau tamayamopafi anetamihena tamahaino.
EPH 5:26 Kalaisia agaife amakupi malenaya veala titetiene agaia keletiene sese hu-lamateteno alu aotage veane maisayafene huno fali-maine.
EPH 5:27 Kalaisia agaife amakupi malenaya veamogamina agai aufi hetiya agaia haisia kava huya amakupi oniya omaleno nagoke kefo yaamia omaleno alu aotage veane maineya agai aufima hetisayafene huno fali-maine.
EPH 5:28 Kalaisia veafema hau ayamopafi hau-mainea kava hutama vemogatama tamakaitami tamaugafahe tamahaiya avamete anetamimo-gamifena tamahau humateho. Tamahauma hu-matesayana tamakaitami lamaugafahena nelamahaiye.
EPH 5:29 Tagaya ago havimainone nago kanomoa agaia augafamona kame yana hunoategi afaa kavela neamino kanaleya huno kava yagai neate. Kalaisia ania huno agaife amakupi malenaya veala agaia augafahe haiya kava huno aiya ayana aulaga kana hutama mainayafe kava hu nelamate.
EPH 5:31 Anumaya Koti autamafina mage huno kae-maleneane Ani yafe nago kanomoa itaamoene nefaene neanataleno aamoene ailokaegae. Ailokaesaana ani tolemogania nagoke anaugafa hapaegae. huno kae-maleneane.
EPH 5:32 Nagaya havuana Kalaisia agaife amakupi malenaya veaenene ailokaeno mainea yafe humaine huna nehue. Ani kea aupaa havisuna kea omalene.
EPH 5:33 Ani kehe humainoanagi nagoke nagoke veamogatama tamakaitami tamaugafahema tamahaiya avamete ania hutama anetamihena tamahau humateho. Anemogatama ania hutama anautami-mogami amakia alisaga nehutama amakave maleho.
EPH 6:1 Nafaneyakamogatama Anumayatimoene aigamaetama itaamimi-afoamimogamina keamia havitama akave maleho. Ani kavala fatago kavale.
EPH 6:2 Anumaya Koti avopi kahegi kea mage huno kae-maleneane Itaami-afoamimogami amakia alisaga hiho. Ani kavama hisayana kanaleya hutama ayaaya kanagefa ofalitama mani mopale kosuna alekano legahae. huno kae-maleneane. Mani kea hagoteno Kahegi ke akave malesaya yateti ma kavala hulamategahue. huno hulokiya vai-malenea kea haneane.
EPH 6:4 Tamakaya neamafagatama nafanetamimoya amaipa ali haviya huya hamai vaisaya kea huoamatetama Anumayamo aufima haisia kava hutama agai kea humavelitama yagai mateho.
EPH 6:5 Tamaugafa miya hu-malenage-tama nofipi mainetama miya oali aliya veamogatama* mopale mainaya kava vayatamimogami amaiyaafinaga mainetama koliami hutama keamia havitama akave maleho. Anumayamo aliya nealiya avamete hutama tole lamaku tamakesa ohavitama tamakuamoa fatago hinagetama aliyatela maiho.
EPH 6:6 Havigu Kava kanomoa nagaifena kanale kano maine huno hisie. hutama mainesale amaufikeya aliyamaage aliyafenagi alulega umainesia kanafiene aliho. Mukia kanafina kanale aliya alitama Kalaisina aliya veaa mainone. hutama amega tamaugafaleti ohutama tamakuafiti Anumaya Kotina haisia kavala hiho.
EPH 6:7 Vayamogamitekeya aliyana nealune hutama ohiho Anumayamoteene aliyana nealune hutama tamaipamoa kanaleya nehinagetama aliho.
EPH 6:8 Tamakaya ago havimainae nagoa veamoya amakai aliya nealiya veapi alu kanomo aliya nealiya veapi kanale aliya alisayana aliyateti Anumayamoa eteno kanale anonaa lamamigahie.
EPH 6:9 Tamakaya aliyate kava vayaamimogatama ania hutama Anumayamofe tamakesa nehavitama kanale auava kava humateho. Mukia kanafina kea oamamakitama tamakai kava kanomoene amakai kava kanomoene nagoke kanogino ikapinaga maineafe tamakaya ago havimainae. Agaya mukia veala nagoke avamete huno kava yagai nelamate.
EPH 6:10 Nagaya mani kea hu hano hugahe mage huna nehue. Tamakaya Anumayatimoene aigamaetama agaia tokiyaage ayamufa alitama tokiya vaitama maiho.
EPH 6:11 Lamakaya Satania havige havage me hunoma aye-lamavataga lamavatagoma hisia savale kemoa tamatafa ohisie mukia Anumaya Kotia tamaminea yana tuma hisaya halegula aye hailiho.
EPH 6:12 Tagaya veanenena tua nohunagi analema mainaya Satani Avamuyagaene ma mopale haniki maiyapi kava yagai-mainaya Satani Avamuyagaene mopaleene siapiene tokiyaage huno hanea Satani Avamuyagaene tua nehune.
EPH 6:13 Ani yafe tamakaya mukia Anumaya Kotima tamaminea haleguyaga ali-linesageno ala tuma falote hisia kanafina auvai-lamatesigetama hetitama tokiyaage hutama tuma hu-mainayafe mogasetama hetitama maigahae.
EPH 6:14 Tamakaya maa hutama hetiho. Amamu nofimaa aye-talako huya kiliya kava hutama Anumaya Koti kelamage kea lokiyaage hutama hulitama maiho. Hamaifiyafalema tokiyaage kapa siota vai-liya kava hutama fatago hisia kavala hulokiyaage hisayana tamakuamona auvaitegahie.
EPH 6:15 Tamakaya Anumaya Kotia Falu hutama kigi yokalo hutama maigetao. huno humainea kemoa tamaiya noma vailigeno atafa hulinea kava hutama mani kea ali-linetama huhaletama hisale talo tala hutama maiho.
EPH 6:16 Mukia mani yana alitetama Yisasife tamakupi malenaya yamoa halegu kana hinageno Satanima ata nelea kevema hesigeno esia katela tamakupi malenaya tamametitimoa halegu kana hu-maineafe maleno tilegahianagino anima ata nelesia kevema meye su hugahie.
EPH 6:17 Anumaya Kotia tamaku tamamema ago aligati-mainea yana kapale talo humale tumano ku kana hinagetama alitama tamakenopale vai-linetama Alu Aotage Avamumona ayaaya naepe kana huno avenene humainegi animona Anumaya Kotina kea hanegi alitama tokiyaage hiho.
EPH 6:18 Ali lokiya hulinetama Alu Aotage Avamumoene ailokaesageno lamaya hisigetama mukia kanafina nunamuna hutama Anumayamotega havigesaya yafe kava yagaitama mainetama havige havige nehutama Yisasife haviya amakupi malenaya veafe Hamamao. hutama havigesaya kehe tamakesa havi havi hutama maiho.
EPH 6:19 Naa nehutama nakaienema naya hisiafe Anumayamotega havigeho. Nagaya tokiyaage huna mainena atali huna kolia ohuna Anumaya Kotia agoma falakino malenea kea Yisasi hulatenea kanale mono kema huhalena hisuafe kea namisigena hisua yafe nunamupiti ke hutama havigeho.
EPH 6:20 Nagaya Kalaisi avayafiti kema huhalena hisuafene huno hunategena emainena ani kema hua yateti kina hunatenagi menienena kolia ohuna tokiyaage huna mainena mani kea huhalena hisuafe nagaila Anumayamoa nahamaese hutama nunamupiti havigeho.
EPH 6:21 Tamakayaenena nagayama naa huna nemauva kea havinutamahena Anumayamo aliyana kanaleya huno nealia kanoa nahau nayamopafi nenagea nenafu agia Tikikusina hutesugeno tamakaitega neuno nagaifena mukia kea alino tamahapaisigetama havitama tamaipa kanale hugahae. Ani yafe agaila hutesugeno ugahie.
EPH 6:23 Anumaya Kotia, Nelafaene Anumayatimoa, Yisasi Kalaisiene tamakaila tafu-tagana-gatamina tamaipa ali falu hulamatesia yaene Yisasife tamakupi malesaya tokiyaene tamahau tamayamopafi nelahamaiya yaene tamamisae huna nehue.
EPH 6:24 Anumayati Yisasi Kalaisite amakua agola amitafa humainaya veamogatamahe Anumaya Kotia tamakaila kayone hulamatesie huna nehue. Kenia male hano hie. Nagaini nagia Polonae.
PHI 1:1 Polonaene Timotiene taagaya Yisasi Kalaisina aliya kanolatamaa-mogataa Filipai mainetama Yisasi Kalaisi hulatenea yafe havitama tamakupi malenaya veanene tamakai soka vayaene amakaima amaya nehaya vayaene mani avona kaetaa nelamamue.
PHI 1:2 Anumaya Kotia, Nelafaene Anumayatimoa, Yisasi Kalaisiene kayone huge huge nehaa yaaniene tamaipa falu hisia yaaniene tamamisae.
PHI 1:3 Mukia kanafina tamakaife nagesa havi havi huna Anumayani-motega muse huna havinegoe.
PHI 1:4 Yisasia hulatenea kanale mono kema hagotetama havilinaya kanaleti tamakaya nagaiene ailokaetama ani kea hamapai-mainaya yafena tamakaifena muse huna Anumayamotega havinegoe.
PHI 1:6 Nagaya ago havimainoe Anumaya Kotia tamakupima kanale aliyama aepa hemainea aliyana alime alime haino Yisasi Kalaisi eteno esia yupa hano hugahie.
PHI 1:7 Tamakaya nagupima mainaya yafena tamakaifena nagesa havua nagesamoa fatago huno ani kate nevie. Nagaya kinafi mainoa kanafiene Yisasia hulatenea kanale mono kema huhalena hamapai-mainoa kanafienena tamakaya nagaiene Anumaya Kotia kayone hu-nelatea yapi mainone.
PHI 1:8 Anumaya Koti aulagafina lamage nehue Yisasi Kalaisima hau ayamopafi nehaiya yana nagupi hanegena tamakesua yafena aluya huna ha ha nehue.
PHI 1:9 Mukia kanafina Anumayamo-tegama havigoana maa nehue tamahau tamayamopafi nelamahaiya yamoa ala huteno kanale tamaku tamakesa hanesigetama mukia yana agetama Kanale yano havi yano? hutama ali fako hutama havisae. Havisageno Yisasi Kalaisima esia yupa tamakuamoa efeage nehisigetama mukia veamogami amaufina kefo yatamia omale veane maisae huna havinegoe.
PHI 1:11 Yisasi Kalaisia ali falote hinageno fatago auava yama hisaya yamoa tamakupina hiya hisigetama Anumaya Kotina agia alisaga hisae huna Anumayamotega havinegoe.
PHI 1:12 Nafunagana-gatama havisae huna nehue nagaitema falote humainea kana yateti Yisasima hu-latenea kanale mono kemona alino maleli otenegi alu kumate kumatela nagoene umaine.
PHI 1:13 Umainegi ala kava kanomo ati vayamoyaene mukia veamoyaene haviya nagaifena mage nehae Yisasi akavema nehia yateti kina nopina maine. huya havilinae.
PHI 1:14 Kina nopi mainoa yateti Yisasina amakua aminaya nafunaganaya tokiya vaiya koli hisaya amakesa neataleya Anumaya Koti kea nagoene ali lokiya vaiya hamapai-mainae.
PHI 1:15 Nagoamoya nagima haneafe amaipamoa haviya higeya nagima ali haviya hisaya yafena Kalaisi kea hamapaigeya nagoamoya kanale amaku amakesale maineya naya hisaya yafena Kalaisi kea hamapai-mainae.
PHI 1:16 Nagayama Yisasia hu-latenea kanale mono kema huna lokiya vai-malenoa yateti navaleya kina nopina natagena mainoafe nagoamoya haviteya amakua namiya Yisasima hulatenea kanale mono kea hamanepaiye.
PHI 1:17 Hamanepaiyanagi nagoa vayamoya fatago amaku amakesa omalegeya amakaiami amaki alisaga hisaya yafe kina nopima mainoa kana yafena Nagoene kana yana amisune. huya Kalaisia hu-latenea mono kea hamanepaiye.
PHI 1:18 Naa nehayanagi aoteyamaae. Mukia hamapaiya kea amegati kema nehaya kene tamagema nehaya kenena Kalaisia hulatenea kanale mono kea hamanepaiye. Ani yafena aluya huna musena nehue. Tamage nagaya nagoene musena hugahue.
PHI 1:19 Ago havimainoe tamakaya naya hugahema Anumayamotega havinegaya yamoene Yisasi Kalaisi Avamumoa nayama nehia yamoene ali haviyama hunatenaya yapiti naugafa aligatigahie huna musena nehue.
PHI 1:20 Ani yafena tusiya huna nametitia nehuna nagayea nohigi Kalaisina mukiama haisia kavala hugahue huna nagesa nehavina mukia kanafima humainoa kava huna menienena kolia nohue. Haegafama huna maisuo falisuo humainoa yateti mukia veamoya Kalaisi agia alisaga hisae huna nagesa nehavue.
PHI 1:21 Haegafama hunama mainoana Kalaisia nagaila aepania maineanagina falisuana tusia kanale yania aligahue.
PHI 1:22 Haegafama huna ma mopafima maisuana nagaini aliyamoa alagaa ayegahianagi hana kate visue huna havilama nohue.
PHI 1:23 Ani yafena kasageke-voke huna tole nagesa nehavue Kalaisiene umaisuana tusia kanaleya hugahie huna nagesa nehavuanagi tamaya hisuafene huna ma mopafi maisue huna nehue.
PHI 1:25 Ani yafe nagoke kate nagesa nemaloe. Yisasima hulatenea yafe havitama tamakupi maletama tamametiti humainaya yamo tokiya vaisigetama muse hisae huna tamakaienena maigahue huna nehue.
PHI 1:26 Ani yafe tamakaitega etena visugetama nagaifena muse hisaya yamoa ala hisigetama Yisasi Kalaisi agia alisaga hugahae huna nehue.
PHI 1:27 Falisuo maisuo Kalaisia hulatenea kanale mono kema tamahapai-mainoa kava hutama fatago kate vaiyeho. Mo lamakesuo afaa alule mainesuo tamakaifena mani kegeya havisue Nagoke amaku amakesale hetiya maineya Yisasia hulatenea yana haviya amakupi maleneya tokiyaage huya alu veamogamina huhaleya hamanepaiye. huya hisagenahena tusia muse hugahue.
PHI 1:28 Yisasi kema ohiho. huya nehaya veamogamifena kolima ohisayana tole yana amaveligahae. Amakaya agola hani yapi tegelege nehia atafi visaya veane mainaya yafeene Anumaya Kotia agaia tamaku tamamema aligatisia yafeene amaveligahae.
PHI 1:29 Ani yafe Kalaisima hulatenea yamo kea havitama lamakupi maletama tamametiti hisaya lamaku tamakesageya Anumaya Kotia otamaminegi Kalaisi agile tamaugafa lamakata aisia yaene tamamine.
PHI 1:30 Tamamineanagitama hagotena Yisasi kema hamanepaina Satanienena tua hugetama nage-mainayanagino menia nagoene ani kavala nehie huno higetama ago havilinae. Tamakaya nagaiene ani aliyatela Satanienena nagopi tua nehune.
PHI 2:1 Tamakaya Kalaisiene ailokaetama mainageno tamakuamoa muse huno tokiyaagela nehio? Ifi agaia hau ayamopafima nehaiya yamaa ago aligeno tamaipamoa falu nehio? Ifi Alu Aotage Avamumoene ailokaetama vaiyetama mainao? Ifi nagoamogamina tamahauna humatetama kalagila aineamatao?
PHI 2:2 Naama hayana nagaila muse yanimoa alama hisiafena nagoke tamaku tamakesale maiho. Nagoamogamifena tamahau tamayamopafi tamahaisigeya amakaya ania huya tamakaifena hamaisie.
PHI 2:3 Tamakaitami lamakia alitama haisaya yafena tamakesa ohaviho. Aao, mukia veafena Ago tagasetama mainae. hutama afete maiho.
PHI 2:4 Tamakaitami yamaagefena tamakesa ohavitama alu veamogami yateenena amaya hisaya yafena tamakesa haviho.
PHI 2:5 Yisasi Kalaisi agu agesamoma humainea avamete hutama maiho.
PHI 2:6 Yisasi Kalaisia Anumaya Kotiene nagoke avamete huana mainaanagi anima Anumaya Kotienema nago avamete huno mainea auava yamaa agaia atafa hulino maisia agesa ohavinegi ani auava yamaa ataletegeno vaya kana huno falote huteno aliya kanomo auava kava huno maine.
PHI 2:8 Maigeya veamoyama agayana velafa maineno augafa alino ohaino ako huno Anumaya Koti kea akave maleteno maime haino fali-maine. Afaa ofalinegi agaye hisifa kava huya yafaga yosale nili heya asaigeno fali-maine.
PHI 2:9 Naama higenofena Anumaya Kotia anale avalesaga huno ateteno nago agia malene. Ani agimoa mukia veamogami amakia amakase-mainea agia malene.
PHI 2:10 Maleneafe ikapinaga mainaya vayaene ma mopafi mainaya veanene fali-mainaya veanene Yisasi agile amaleya ayeya agia alisaga huya Kava hulato. huya hugahae.
PHI 2:11 Huteya mukia veamoya mage huya hufalote hugahae Yisasi Kalaisia Anumayatimo maine. huya nehuya Nelafana, Anumaya Koti agia alisaga hugahae.
PHI 2:12 Nahau-mainea nenafugatama Yisasima hulatenea yafena nehavitama mukia kanafina, nagaya tamakaienema mainoa kanafiene, menima tamatalena emainoa kanafienena tusiya hutama navayama ali hipoya humainaya kavakeya hiho. Tamaku tamamema aligati-mainea yana ali-talako hulisaya yafena kolia nehutama atali talu hutama tokiyaage hiho.
PHI 2:13 Anumaya Kotina agaima haisia kavama hisaya tamaku tamakesa tamamiteno ani yama alisaya tokiyatamienena agola tamamine.
PHI 2:14 Mukia aliyama alinutamahena kalugalu kema vaiya yaene ala kenakema nehaya yaenena neataletama aliyakeya aliho.
PHI 2:15 Naama hisayana mukia vea amaufina kefo yatamia omalesia veane mainesageno tamakuamoa efeage hisigetama kanale auava yama ohuya vegano-kano nehaya veapi mainetama Anumaya Koti nafaneyaga mainetama kani kana hutama maiho.
PHI 2:16 Maige maige hisaya hamaimu alisaya kea hamanepaigena nagaya Kalaisia kaiyekema humatesia yupa tamakaifena muse hulamatena Kasageke aliyama ali-mainoa aliyamoa afa ya kanala ohunegi anonaa ago falote humaine. huna hugahue.
PHI 2:17 Tamametitima nehutama aliyama nealiya yamoa maa humaine nayoma afu heya Anumaya Kotina muse yama neamiya avamete humaine. Humaineafe nagaima nahaesageno kolaniamoma taki-lavisigena Anumaya Kotina muse yama amisuana tamakaiene nagaiene muse hugahune.
PHI 2:18 Naa humaineafe tamakaya nagaiene musena hiho.
PHI 2:19 Anumayatimona Yisasima haisigenahena aupa kanafi Timotina hutesugeno tamakaitega ugahie. Uteno etenoma esiana tamakaifena me nahapaisigeno naguamoa tusi muse hugahie.
PHI 2:20 Timotia agaiage nagai nagu nagesamo nehia avamete kano mainea kano maineanagino hau hulamateno tamaya hisia yafe agesa nehavie.
PHI 2:21 Mukia veamoya amakaiami yatefekeya amakesa nehavigi Yisasi Kalaisi aliyatefena amakesa nohaviye.
PHI 2:22 Timotifena tamakaya ago havimainae. Kanale kano maineanagino Yisasima hulatenea yafema kanale mono kema hamapauva kemona maa nehie nafanemona nefaa aliyama aya huno alia kava huno naya nehiane.
PHI 2:23 Ani yafe nagaima mukia kavama hunatesaya kea havitena Timotina aupaa hutesugeno tamakaitega ugahie.
PHI 2:24 Visigena nagaya visua yupa Anumayamoa kania vali-nategahie huna nametitia nehuna nagaienena aupaa tamakaitega ugahue huna nehue.
PHI 2:25 Epafalotitusina hutesugeno tamakaitega eteno visie huna nehue. Ani kanoa nenafuagitama hutageno egetaa lokaetaa nagopi afalu-falu kana hutaa mainetaa Satanienena tua nehutaa Yisasi kea hamapai-mainoe. Tagai tagile taya huo. hutama hutageno me naya humaine.
PHI 2:26 Aguamoa tusiya huno tamakesia yafena avianeate. Tamakaya agayama kalima alia kea ago havimainayanagino aguamoa kanaagela nehie.
PHI 2:27 Tamage ala kali alino aupaa faligahe hianagi Anumaya Kotia kalagi aiteno alino falu hutene. Agaiagefena kalagila ai oatenegi nagaya nago kana yaene alisua yafena agesa nehavino kalagila ainateteno alino falu hutene.
PHI 2:28 Alino falu hu-teneanagitama tamakaya musema hisaya yafe hutesugeno eteno tamakaitega visia yafena aluya huno nenahaiye. Muse hisagena nagaya havina kanama hua yamoa hano hugahie.
PHI 2:29 Tamakaitegama vigetamahena Anumayamoene ailokaetama mainageno etenoma emainea yafena tusia muse hutama agia alisaga hiho.
PHI 2:30 Tamakaya naya hugahe hayanagi kosa he-otamategeno agaya eno maiyamaa atafa hu-talako ohuno tamakai tamakile Kalaisi aliyatela nagaila me naya huteno aupaa falisia kavala humaine. Naa yama nehia kanomo agia alisaga hiho.
PHI 3:1 Nafunagana-gatama nago kene tamahapaisue Anumayamona nafaneyagaa mainagi tusia muse hiho. Etena mani kema kaesua yafena kasalola nonahae. Ani kemoa tamaya hugahie.
PHI 3:2 Kefo aliyama nealiya vayamoya afai kala kana huya Tamaugafa hataga hiho. huya nehaya vayafena kayetama maiho.
PHI 3:3 Tagaya Anumaya Koti Avamuteti Anumaya Koti agia alisaga nehunafe Anumaya Kotina tama nafanea mainone. Yisasi Kalaisia hulatenea yafena aluya huta musena nehuta Taugafama laga hu-malenona yamoa taya ohugahie. huta tametitia nehune.
PHI 3:4 Nagoa veamoya Tagaiti laugafale hu-malenona yamoa taya hugahie. huya nehayanagi nagaya ago amakasena mainoe. Mainoafe nahaigena Nagaini naugafale hu-malenoa yamoa naya hugahie. huna hisua kania haneanagi ani kea ohugahue.
PHI 3:5 Natetenoa nagoke sota maiteya nagoya anoya laga hu-mainayanagina Isaleli kotega kano-lafana Penisamini nofipiti kano mainoe. Tole Hipalu alavelatamogani nataagena Hipalu kano mainoe. Falasia vayamogami kahegi kea akave nemaloane.
PHI 3:6 Anumaya Koti aliya nealue huna lokiyaage huna Yisasi veamogamina hamaena ali haviya humatenoanagi kahegi kema akave malenoafenagina fatago kano mainoanagino mukia veamogami amaufina kefo yania omalene.
PHI 3:7 Naa auava kavala humainoanagi Kalaisi nafanema maisuafene huna mukia nagima alisaga nehaya yamoa afa ya kana humaine huna neataloe.
PHI 3:8 Tamage Yisasi Kalaisienema ailokaena maisua yamoa mukia nagima alisaga hisua yamona agase-maine. Yisasi Kalaisina agelama hisua yafe mukia nagima alisaga nehaya yana afa ya kana hu-maineanagina afaa neataloe. Ani yayagamoa aifa kana hu-maineanagina Kalaisienema ailokaena maisuafene huna neataloe.
PHI 3:9 Ataletena Yisasiene ailokaena maisue huna Nagainima kahegi kema ali oatagaovafe fatago kano mainoe. huna nohugi Kalaisima hulatenea yafe havina nagupi malena nametiti hua yateti Anumaya Kotia Fatago kano mainane. huno hunenate. Yisasi Kalaisima hulatenea yafe haviya amakupi maleya amametiti humainaya yateti Anumaya Kotina fatago auavaamoa falote nehie.
PHI 3:10 Nagaila nago yafeke nenahaiye. Kalaisina agelama huna agetena fali-mainefitima heti-mainea tokiyaahena havina atafa hulisua yafe nenahaiye. Agaiene ailokaena augafa agatama aimainea yana alitena agaiene nagoke avamete huna falisua yafe nenahaiye.
PHI 3:11 Naa huna mainena falisugeno ali hetinategahie huna nametitia nehue.
PHI 3:12 Yisasi Kalaisi auava yana ago alina avaya-yetena tusiya huna kanale kavakeya nehua kano mainoe huna nohugi Yisasi Kalaisia navalegena agai nafane mainoafe nayamufa aina ani aliyana nealue.
PHI 3:13 Nafunagana-gatama ani auava yana ago ali-mainoe huna nohugi nagoke nagu nagesale mainoe. Nayoma humainoa yafena nagesa nohavugi haenagama Alime alime uka anile mo talo. huno humainele visuafene huna nayamufa aina naiyayena neue.
PHI 3:14 Anumaya Kotia Yisasi Kalaisi keleti Anale haiyo. huno humaineafe tusiya huna naiyayena Ani legana yate uka mo talo. huno humainele uvayi hutena muse yania alisue huna nehue.
PHI 3:15 Tametitima humainona yana tokiya vaita ani tametitilema alopa veama maisunana nagayama nehua kea alita tagu tagesale malesune. Nagoa veamogatama alu lamakesale mainesayana Anumaya Kotia ani lamaku tamakesa ali fatago huno tamave-ligahie.
PHI 3:16 Tamave-ligahigi kanale auava yama agoma atafa hutalako hulita mainona yamona akave maleta vaiyesune.
PHI 3:17 Nafunagana-gatama haviho mukia nagayama nehua auavanima ageteya akave nemalesaya veamogamina agelama hutama amakave maleho.
PHI 3:18 Mukia kanafina ago tamahapai-mainoa keagi menia nahaigena nagoene naunumoa nehigena tamahanepauve nagoa veamoya Kalaisia yafaga yosale fali-mainea kemona kame huteya mainae.
PHI 3:19 Ani veamoya amakaiami amaugafamo age haye hia yafena tusia muse nehuya Ani yamoa Anumaya Kotina agaseno kanale ya hane. huya amakaye hisifa kavafena musemaa hu neateya ma mopafi yafekeya amakesa havi havi huya nemaiye. Naama nehaya veamoya hani yapi tegelege nehia atafi ugahae.
PHI 3:20 Ugahayanagi tagaya ikapinaga anaga mainonanagino tagu tamema aligatisia kanomofena, Anumayati Yisasi Kalaisia, ikapinagatila ataleno elavisia yafe tametitia huta agava mainone.
PHI 3:21 Agava mainonanagino eteno esiana agaia tokiyaleti mukia yamoa agai akave malesaya yafe alino aiyafinaga nemaleno tagaima kana yama nelamia fulu fulu laugafa alino agaia augafamo tokiya hale yamaaene augafa kana huno talo hulatesigeta ani laugafale maigahune.
PHI 4:1 Nenahaiya nafunagana-gatama ania hutama Anumayatimote hetitama ailokaetama mai fatago hiho. Nagua lamamina tamakai tamaufima tamakesua yafena aluya huno nenahaiye. Aluya huna musetamia nehuna veamogamina tamakaifena hamanepaina tamakia alisaga nehue.
PHI 4:2 Yuotiagatana Sitikegatana Anumayatimote ailokaetana mainetana nagoke tanaku tanakesale maio huna nehue.
PHI 4:3 Nehuafe kagaya Anumaya Koti aliyama ailokaetaa nealua kanomoga ani atalana anaya huo. Ani atalamogania nagaiene Kalemeniene nagoa nagaienema aliya nealiya veanene ailokaeta Yisasima hulatenea kanale mono kema hamanepauna aliyana ali-mainae. Ani veamogami amakima agola maige maige hisaya hamaimuene veamogami amaki kae-malenea avopi amakia hanegi ani atalana anaya huo.
PHI 4:4 Mukia kanafina Anumayatimote ailokaetama mainetama muse hiho. Nagoene mani kea nehue musena hiho.
PHI 4:5 Anumayatimoa ago aupaa egahe nehiafe kayone humate veane mainegeya tamakeho.
PHI 4:6 Nago yafena tamakesa havi havi hutama kalagila oaiho. Muki yafena Anumaya Kotitega muse nehutama havigeho.
PHI 4:7 Havigesayana Yisasi Kalaisiene ailokaetama mainesageno tamaipa falu hisia yama tamamisiana mukia alu yamo amaipa falu yana agase-mainea falu yamaamoa tamaku tamakesalela yagailamategahie.
PHI 4:8 Nafunagana-gatama kenima hano hisia kea mage hugahe hue. Ma yafena tamakesa havi havi hutama haviho, tamageage kene, kanale agu agesafiti humainea yaene, fatago humainea kavaene, oniya ohunea kavafeene, tusia muse hisaya yafeene, nagoa kavama hisayana tamaki alisaga hisaya kavafeene, mukia fatago kavafeenena tamakesa havi havi hiho.
PHI 4:9 Nagaya mukia kavala huge tamave-ligema hugetama ali-mainaya auavafeene mukia tamahapaugetama havimainaya auavafeene, higetama age-mainaya auavafeenena mukia kanafina ani kavakeya hiho. Naama hisagenoa Anumaya Kotia taipa falu hisia yama taminea kanomoa tamakaiene ailokaeno maigahie.
PHI 4:10 Tamakaya etetama nagaifena tamakesa havi havi hutama ali heti-mainaya yafena Anumayamotega huna tusia muse nehue. Hagotetama nagaifena tamakesa havi havi hu-mainayanagi nayama hisaya katamia omalene.
PHI 4:11 Mani kema nehuana Mukia yania omalene. huna nohugi maa yafena havimainoe alu ya alu yamoa nagaitema falote higena mukia yafena naipa havina kanale huneamatoafe afenonia hanesiano omalesiano kanalele. Kavela nenamu hisuo nagatesiano kanalelagi. Mukia yama hanesiano omalesiano kanalele. Mukia kanafina naipa havina kanale huneamatoe.
PHI 4:13 Kalaisia nagaila nagu nagesa alino tokiya vainategena agaia tokiyaleti mukia kavala afaa huleasine.
PHI 4:14 Huleasinagi kana yamoa nagaitema falote higetama tamakaya kanaleya hutama ali kayone hunatetama naya humainae.
PHI 4:15 Tamakaya Filipai kumate veala ago havimainae ehema Yisasia hulatenea kanale mono kema tamahapai-mainoa kanafina Masetoniatima umainoa kanafina nagoa Yisasi anagamoya nahamaeya nagoa yana namigena oalinogi tamakaitamige naminae.
PHI 4:16 Tesalonaika mainogetama hagotetama naya hutetama haenagaenena ania hutama naya humainae.
PHI 4:17 Naya humainagi menia nagoa yana namisae huna nohugi naminaya yatetila Anumaya Kotia anonaa tamamisiafene huna nehue.
PHI 4:18 Kosa henatea yaene nagoa yaene ago namigena alugeno namu humaine. Tamakaya muse yama namiya yana Epafalotitusia ago alino me namigena ali-mainoe. Anima naminaya muse yana afu heya Anumaya Kotina muse yama neamiya avamete kava humainie. Nagaima namiya yana Anumaya Kotiene amigeno ageteno aipamoa tusia kanaleya humaine.
PHI 4:19 Anumayanimoa agaia tokiyaage hale yamaafina mukia kanale yakeya malenefiti tamakaya Yisasi Kalaisiene ailokaetama mainayanagino nagoa yamoma kosa he otamatesiana afaa tamamigahie.
PHI 4:20 Anumaya Kotina Nelafa agia tamagelafa huta alisaga nehisunageno mukia kanafina anale hanege hanege huno hanesie. Tamage.
PHI 4:21 Mukia veamoya, Yisasi Kalaisina amakuama neamiya veamogamifena huna falu fala hu neamatoe. Nagaiene mainaya tafu-taganaya ania huya hu falu fala hu nelamatae.
PHI 4:22 Sisa nopi aliya nealiya veanene nagoa Yisasina amakua aminaya veamoyaene tamakaila hu falu fala hu nelamatae.
PHI 4:23 Yisasi Kalaisia Anumayatimona kayone yamaamoa tamaku nafanene maisie. Kenia male hano hie. Nagaini nagia Polonae.
COL 1:1 Nagaya Poloꞌnae Anumaya Kotiꞌa agaiꞌa haiya avamete huno Aposolo kanoa hunatenegeꞌna mainoafe nagaiꞌene Timoti nenafuꞌene Kolosi kumate mainetama Yisasife havitama tamakupi malenaya neꞌafugatama mani avona kaetaꞌa nelamamuꞌe. Anumaya Kotiꞌa Nelafa kayone hisia yamaꞌaene tamaipa falu hisia yamaꞌaene tamamisie.
COL 1:3 Taꞌagaya mukiꞌa kanafina Yisasi Kalaisina Nefaꞌa, Anumaya Kotifena havinegeta tamakaifena tusiꞌa muse hutaꞌa havinegoꞌe.
COL 1:4 Taꞌagaya tamavagea ago havilinoꞌe. Anumaya Kotiꞌa tamagelafa humainea kemoꞌa, Yisasife kanale mono kea, tamahapaiya kea ago evaꞌyi higetama Yisasiꞌa hulatenea yafe havitama tamakupi maletama tamametiti hutama mukiꞌa Yisasife haviꞌya amakuꞌa amitafa humainaya veaꞌmogamife tamahau tamayamopafi nelamahaiye. Anumaya Kotiꞌa tamamisia yana ikapinaga talo tala humaleneafe tamametiti nehaya yapiti aniꞌama nehaya yamoꞌa falote hia yafena taꞌagaya Anumayamotega tamakaifena muse nehutaꞌa ke hutaꞌa havinegoꞌe.
COL 1:6 Anima Yisasiꞌa hulatenea kanale mono kea mukiꞌa kotega kagino ala huno veapina alino kanale auꞌava yana ali falote humaineafe tamakaite eaꞌamo Anumaya Koti kayone hisia yafema havilama haya kanafi aepa heno tamakaipina aniꞌa huno kanale auꞌava yana ali falote humaine.
COL 1:7 Epafalasiꞌa mani mono kea huhaleno higetama havilinae. Ani kanoa taꞌagaila taꞌaya huno Yisasi Kalaisi aliꞌyana alige alige nehia kanogino taꞌagaiꞌene nagopi aliꞌyana neꞌaluna kanogino agaifena aluya huno nenahaiye.
COL 1:8 Alu Aotage Avamuꞌmoꞌa veafema tamahau tamayamopafi nelahamaiya yana tamaminegetama aniꞌa kavaꞌma nehaya yafena Epafalasiꞌa ago taꞌahapai-maine.
COL 1:9 Ani yafe hagote kanafina taꞌagaya ani kea havitetaꞌa ani yupa aepa hetaꞌa tamaya hutaꞌa Anumaya Kotitega havigetaꞌa tamakaifena taꞌagela kaniotamatenoꞌe. Mage hutaꞌa havigoꞌe “Alu Aotage Avamuꞌmoꞌa kanale amaku amakesa amamino Anumaya Kotiꞌma nehaiya auꞌava yana hamapaisigeno amakupina hiya hinageꞌya havisae.
COL 1:10 Hiya hisigetama tamakaya kama vaiyesayana Anumayamo veaꞌne fatago hutama maisageno Anumayamoꞌa mukiꞌa maisaya auꞌava yatamihena ‘Nagai nafaꞌnemoꞌya amatea kava nehae.’ huno haisie. Mukiꞌama nehaya kavala kanale yakeꞌya falote hisigetama Anumaya Koti aepaꞌa aluya hutama agetetama agaifema havilinaya yatamimoꞌa ala hisie.
COL 1:11 Anumayamona tokiyaꞌage hale yamaꞌaleti aliꞌya tokiya vaimatesageꞌya hetofa veaꞌne maineꞌya mukiꞌa kana yama falote hisigenoꞌa amakuꞌamoꞌa atali talua ohinageꞌya tokiyaꞌage veaꞌne ako huꞌya amaipa muse yapi maisae.
COL 1:12 Tokiyaꞌage hale yapi mainaya veaꞌnene hetita maisuna tokiya taminageta tatesia kava huta anifi maisuna yafe Nelafatega tusiꞌa muse hisune.” hutaꞌa Anumayamotega havinegoꞌe.
COL 1:13 Hagoteno Satani kava hulategeta hani yapi mainonageno Anumaya Kotiꞌa ani yapiti tavaleno agaiꞌa hau ayamopafi nehaiya nafaꞌnemo kava yagai-mainelega tavaleno latene.
COL 1:14 Kefo yatimo aigagilategeta mainonageno Anumaya Koti nafaꞌnemoꞌa anifiti kalu he-talesiafe miya hulategeta mainonageno kefo yatia aigetateno atale-latene.
COL 1:15 Veaꞌmoꞌya Anumaya Kotina oꞌagegahe hayanagi agaiꞌa nafaꞌnea Yisasiꞌa Nefaꞌene nago avamete huꞌana mainaꞌanagino Yisasiꞌa Anumaya Kotina hagote nafaꞌneꞌagino* maineno mukiꞌa Anumaya Kotiꞌma talo humalenea yatela alaꞌami maine.
COL 1:16 Anumaya Kotiꞌa hapaigeno Yisasiꞌa agaiꞌa mukiꞌa yana talo humalene. Ikapinaga yaꞌene mopafi yaꞌene neꞌagona yaꞌene noꞌagona yaꞌene ensole vayaꞌene Satani Avamuꞌene ala kava vayaꞌenena agaiꞌa agima alisaga hisaya yafe Yisasiꞌa talo humalene.
COL 1:17 Yisasiꞌa hagoteno mainegeno mukiꞌa yamoꞌa agaiꞌa humainea keleti noꞌamile noꞌamile maime ute ete huꞌya mailama humainae.
COL 1:18 Yisasiꞌa agaife haviꞌya amakupi malenaya veaꞌmogami amakenopa maineno kava yagaimatene. Yisasiꞌa agaife haviꞌya amakupi malenaya veaꞌmogami aepaꞌa maineno mukiꞌa yamona kava yagaimateno ala kanoꞌami maisiafe uhagotemateno fali-mainefitila eteno heti-maine.
COL 1:19 Anumaya Kotiꞌa haigeno agaiꞌaene mukiꞌa tokiyaꞌaene kanale auꞌava yamaꞌaene nafaꞌneꞌamopi maleno hiya humalene.
COL 1:20 Naꞌa hu-maineafe Yisasiꞌa yafaga yosaleꞌma faligeno lavi-mainea kolateti Anumaya Kotiꞌa mukiꞌa yamaꞌa ma mopafi yaꞌene ikapinaga yaꞌene aigetateno falu hulateno “Nagoke taipale maisune.” huno humaine.
COL 1:21 Nayona tamaku tamakesamoꞌa kame hutesaya kava higetama kefo yana maitama nehutama Anumaya Kotiꞌenena kame hutenae.
COL 1:22 Hutayanagi Yisasiꞌa Nefatega tamavalesigetama kefo yatamia omalesigetama alu aotage veaꞌa maisaya yafeꞌene nagoke veaꞌmoꞌya “Kefo ya nehae.” huꞌya ohisaya yafeꞌene Yisasiꞌa augafa agata aigeno yafaga yosale fali-maine. Fali-mainea yateti ago aigetamateno falu hu-nelamateno nagoke taipale alino lamatene.
COL 1:23 Lamatenegi tamakaya Yisasiꞌma hulamatenea mono kema havitama tamakupi malenaya yana atafa hutama tokiya vaiho. Havigu nago yamo tamavayu hisigetama Yisasiꞌma hulamatenea kanale mono kema havilinetama tamametiti nehaya yana ataleyafenagi mai lokiya vaitama maiho. Ani kanale mono kea tamakaya havitageꞌya mukiꞌa mopale veaꞌmoꞌya havilinageꞌna nagaya Poloꞌna anima Yisasi hulatenea kanale mono kemo aliꞌya kano maineꞌna mani kea hamanepauve.
COL 1:24 Tamakai tamaya hisuafe naugafa nagata aiya nopima mainoa yafena aluya huꞌna musena nehue. Kalaisi augafamoꞌma tusiꞌa agata aimainea avamete huꞌna nagaya naugafa nagatama aiya yateti Yisasife haviꞌya amakupi malenaya veala agaiꞌa augafa maigeꞌna Yisasina agatama aimainea yana alivaya nehue.
COL 1:25 Anumaya Kotiꞌa “Yisasina amakuꞌa aminaya veaꞌnea amaya huo.” huno hunateneanagiꞌna mukiꞌa Anumaya Koti kea huhaleꞌna tamahapaisugetama havilama hisayafene huno hunatene.
COL 1:26 Hunatenegeno Anumaya Koti kea nayona falakino hanegeꞌya mukiꞌa veala hamaopainagi menia ago fufute evaꞌyi higeꞌya mukiꞌa Yisasina amakuꞌa aminaya veaꞌmoꞌya nehaviye.
COL 1:27 Nehaviyanagino Anumaya Kotiꞌa agaiꞌa haiya kava huno Yuta vea omainaya veaꞌmogami amuꞌnopi anima falaki-mainea kea, tusiꞌa kanale kea, taveligeta anima falaki-mainea kea mage huꞌya hageta havimainone “Yisasi Kalaisiꞌa tagupi maineanagita tagaya haenagaꞌa agaiꞌa tokiyaꞌage hale yamaꞌaene kumatela umaigahune.” huꞌya hageta haviteta tametitia nehune.
COL 1:28 Tagaya nagoke nagokeꞌmogami Kalaisifena huhaleta hamanepaita tamavaleta Anumaya Koti auleꞌma tamatesunana Kalaisiꞌene aigaꞌmaeꞌya tokiyaꞌage mono veaꞌne maisae huta kanale tagu tagesaleti huge tamaveligea nehuta mukiꞌa veafena “Kaꞌyetama maiho.” huta nehune.
COL 1:29 Nehugeno Kalaisiꞌa mukiꞌa tokiyaꞌama nagupi naminea tokiyaleti nagaya tusiꞌa kasageke yapiti himamu huꞌna aliꞌyana neꞌalue.
COL 2:1 Tamakaiꞌene Leotisia mainaya veaꞌnene mukiꞌa nagai naufima onagenaya veaꞌnene tamaya hisua yafe nagaya kasageke huꞌna aliꞌyana neꞌaluanagitama havisae huꞌna avona negaove.
COL 2:2 Tamakuꞌamona ali lokiya vailamatesigetama nelamafuꞌene nago tamaku tamakesa havitama tamahau tamayamopafi tama-haisigetama Anumaya Kotina falaki-mainea keꞌamo aepa Yisasi Kalaisiꞌa agaiꞌa mukiꞌa kanale agu agesa nehavia yaꞌene Anumaya Koti agesafi hanea yaꞌene havilama hisageno tamakupina hiya hisia yafe tusiya huno nenahaiye.
COL 2:4 Havigu nagoꞌa veaꞌmoꞌya tamaipa ayesaya ke huꞌya havige ayelamavataga hisaya yafe mani kea nehue.
COL 2:5 Tamakaiꞌenena tokaeꞌna omainoanagi nagu nagesamoꞌa tamakaiꞌene maineanagitama tamakaya Kalaisiꞌa hulatenea mono kema havitama tamakupi maletama tamametiti hutetama tokiya vaitama nagopima hetitama fatago hutama maiya yafe haviteꞌna tusiꞌa muse nehue.
COL 2:6 Tamakaya “Yisasi Kalaisiꞌa tagaite kava yagai-latesie.” hutama ago avale-mainayafe kava hutama agaiꞌene ailokaetama vaiyeho.
COL 2:7 Yisasiꞌma hulatenea mono kema huhaleꞌya hagetama havitama tamakupi malenaya kea atafa hutama yosa hafuꞌyamoꞌma mopafi taviteno itaꞌamoꞌma atafa huno hageno ala hume hume analeꞌma haiya avamete hutama Yisasi Kalaisiꞌene ailokaetama fatago hutama ala hutama mukiꞌa kanafina Anumaya Kotifena muse hiho.
COL 2:8 Havigu nagoꞌa veaꞌmoꞌya afa kema, yasimo alino esia kema, nehuꞌya havige ayelamavataga nehuꞌya tamavayu huꞌya havi kapi tamatesagi tamakaya kaꞌye ho. Naꞌa augafa veaꞌmoꞌya taginagomogami kavaꞌene ma mopafi havigu kene aliꞌya nehagi Yisasi Kalaisifena nohae.
COL 2:9 Nohagi mukiꞌa Anumaya Kotina tusiꞌa lokiya yamaꞌaene kanale auꞌava yamaꞌaene Yisasi Kalaisi agupina tusiya huno hiya humaine.
COL 2:10 Hiya humaineafe Kalaisiꞌene aigaꞌmaetama ani lokiya yamaꞌaene kanale auꞌava yamaꞌaene ali-mainageno hiya higetama mainae. Mainageno Kalaisiꞌa agaiꞌa mukiꞌa kava vayaꞌene ensole vayaꞌene Satani Avamuꞌyagaene kavaꞌami maine.
COL 2:11 Maineafe Kalaisiꞌene hagotetama aigaꞌmaetama mainaya kanafina Yuta vayaꞌmoꞌya amaugafa laga nehaya avamete huno kefo yama nehaya atafa lamaipa laga huno alitalene. Ani yana veaꞌmoꞌya amayatetila taga ohunagi Kalaisiꞌa agaiꞌa taga hu-talegeno kefo yamoꞌa menia yagai otatene.
COL 2:12 Yagai otamateneafe tima falelamatea kanala Kalaisiꞌenena aigaꞌmaetama maigeno agaiꞌene komufina hevailamatene. Anumaya Kotiꞌa komufitiꞌma Kalaisina ali hetitenea yafena havitama tamakupi malageno Kalaisiꞌene fali-mainafitila ago ali hetilamatene.
COL 2:13 Hagotetama age lamahaꞌye hutama kefo yama haya yamo tamahaegeno tamaku tamamemoꞌa fali-maine. Falianagi Anumaya Kotiꞌa tamakaila Yisasi Kalaisiꞌene fali-mainafitila ali hetilamateno haegafa tamahaimula tamamiteno mukiꞌa kefo yama haya yana aigetamateno atale-lamatene.
COL 2:14 Mukiꞌa nayo kahegi kema akave omalonafe kaiyekea hulatesia kemona Anumaya Kotiꞌa aye hanane-talene. Ani avomoꞌa kaiyeke hulatesia yate tatafa hu-linegeno Yisasina yafaga yosale maleꞌya nili hetafa hu-malenaya yateti ani kemo akavela nomalonafe anonaꞌa ali haꞌno hu-talene.
COL 2:15 Ali haꞌno hu-taleneafe Anumaya Kotiꞌa Yisasiꞌma yafaga yosale fali-mainea yateti mukiꞌa Satani Avamuꞌyagaene kavaꞌamiene tokiyaꞌamia amakaseno alihaviya hu-taleteno mukiꞌa veaꞌmogami amaulagafi Satani yaꞌyaga “Tokiyaꞌamia omalene.” huno amaveli-maine.
COL 2:16 Havigu nagoꞌa veaꞌmoꞌya nesaya kavefeꞌene tifeꞌene opa kanaene sapati kanaene maifalu hisaya kanaenefena “Naꞌa higetama ma kavala nehae.” huꞌya kaiyekea hu otamatesae.
COL 2:17 Ani kavaꞌyaga augafaꞌa omalenea yaꞌyaga amemaꞌamo hia avamete huꞌya haenagama falote hisia kanamofe tave-neligi Yisasi Kalaisiꞌa tama yatafana agaiꞌage maine.
COL 2:18 Nagoꞌa veaꞌmoꞌya himonama agaya yafena atafa amaipafiti tusiya huꞌya amaugafa aliꞌya haiteꞌya mage nehae “Taugafa alita nohauna veaꞌne mainone.” huꞌya amega amaugafafiti huteꞌya “Ensole vayaꞌmogami amakia alisaga hiho. Alisaga ohisayana Anumaya Koti nafaꞌnea omainae.” huꞌya nehaya yafe havigu amakai kema havisageꞌya fako huꞌya kanale anonatamia tamaha-falesagi kaꞌye ho.
COL 2:19 Ani vayaꞌmoꞌya Kalaisiꞌenena aigaꞌmaeꞌya omainae. Tamage Kalaisiꞌa tagai kava yagailatesia tagenopa maigeta augafaꞌa mainone. Ani tagenopamoꞌa mukiꞌa augafafina taleꞌya taganunaene nuna amigeno ayegaꞌmaesia yaꞌene amigeno Anumaya Koti tokiyaleti ani augafamoꞌa ko nehie.
COL 2:20 Tamakaya Kalaisiꞌene ago falitetama kefo yatamia ataletama mukiꞌa ma mopafi tamakinagomogami kefo yana ago atalenae. Naꞌa higetama Yisasi kea nohaviya veaꞌmoꞌya vaineꞌayaya kava hutama vaineꞌayae? Naꞌa higetama mani vayaꞌmo kahegi kea akave nemalae?
COL 2:21 Mage huꞌya nehae “Ma yatela atafa ohiho. Ma yana oneho. Ma yatela ameꞌamela ohiho.” huꞌya nehae.
COL 2:22 Ani kema nehaya yaꞌyagamoꞌa nesunageno fanane hugahie. Amakaiꞌami amaku amakesafiti mani kahegi kea tamahanepaiye.
COL 2:23 Nehageꞌya tamage ani kahegi kea kanale havi haviꞌya nehaya vayaꞌmogami kea kana nehagi amegale kea mage hae “Tagaitige Anumaya Koti agia alisaga nehuna yaꞌene laugafa alita ohaisuna yaꞌene laugafa aiko neluna kavaꞌene tahaꞌnemae.” huꞌya hagi ani nehaya kavala taugafa age tahaꞌye hisia yana atalesuna yafe taya ohugahie.
COL 3:1 Anumaya Kotiꞌa Kalaisiꞌene tamakaila ago alino hetilamateno haegafa tamahaimula ago tamamine. Tamamineafe tamakaya anafinagati alisaya yafe tamakesa havi havi hutama maiho. Anafinaga Yisasiꞌa Anumaya Kotina tamaga ayatega hanea siale maine.
COL 3:2 Maineafe mukiꞌa kanafina tamakaya anafinaga yafekeꞌya tamakesa havi havi hutama mainetama ma mopafi yafena tamakesa ohaviho.
COL 3:3 Tamakaya kefo yama nehaya atafa tamaipa ago falitegeno kanaleꞌya hutama maisaya yatamia ago falakino Kalaisiꞌene aigaꞌmae-maineanagino Anumaya Kotipi hane.
COL 3:4 Hanegeno Kalaisiꞌa tamahaimuꞌmo aepaꞌa fufuteꞌma evaꞌyi hisigetama tamakaiꞌene tokiya hale yamaꞌafi umaigahae.
COL 3:5 Tokiyaꞌage hale yamaꞌafi umaisaya yafe ma mopafi kefo yama nehaya yaꞌyaga hamaetama haꞌno hiho. Maꞌa auꞌavafe nehue munaꞌnene aꞌnene kumai he yane. Tamaugafamoꞌa oniꞌyaꞌage nehia kefo yane. Augafa haga neyane. Age lamahaꞌye nehaya yane. Alu kanomo yate age lamahaꞌye nehaya yamoꞌa ago fali-mainaya veaꞌmogamife “Anumayati maine.” huꞌya amakisana vaiꞌya amaku amisaya avamete huno Anumaya Kotina amaku oꞌaminaya avamete kava nehie.
COL 3:6 Mukiꞌa ani kavaꞌma nehaya veaꞌmogamina Anumaya Kotiꞌa aipamoꞌa haviya nehianagino haivaimateno anonaꞌamia amakata aisia yana amamigahie.
COL 3:7 Hagotetama tamakaiꞌenena ani veaꞌnene vaiyatete nehutama ani kavala hu-mainagi menia mukiꞌa ani kavala ataleho. Kema vaiyane. Tamaipafiti anumayayamo hai yane. Vaya havita haviya humatesaya yane. Veaꞌmogamife kamuge hatagetama vaimate yane. Age lamahaꞌye nehaya yamo avagema nehaya kea ataleho.
COL 3:9 Tamakaya atafa kenama asagitama hagaꞌyu hutalaya avamete hutama atafa lamaipaene humainaya yaꞌenena ago atalenagi nelamafu-gamifena havigema ayemavataga nehaya kea ataleho.
COL 3:10 Tamakaya yaufa kenama alitama nefaiya avamete hutama haegafa tamaku tamakesale ago mainageno Anumaya Kotiꞌa mukiꞌa kanafina agaiꞌa auꞌava yana tamave-ligetama havitetama ani haegafa lamaku tamakesamoꞌa nagoꞌene haegafa veaꞌne kana hutama Anumaya Koti mainea avamete hutama mainetama Anumaya Kotifena havilama hugahae.
COL 3:11 Ani haegafa vayala mainetama mukiꞌa veala nagoke avamete mainone Yuta veaꞌnene Yuta vea omainaya veaꞌnene, amaugafa laga hu-malenaya vayaꞌene taga ohunaya vayaꞌene haesa veaꞌnene anupa veaꞌnene nofipi aliꞌya neꞌaliya veaꞌnene afaꞌa maineꞌya miya neꞌaliya veaꞌnene nago avamete mainageno Kalaisiꞌa agaiꞌa hagote kanoꞌamia kasagoꞌya veaꞌmogami amakupina maine.
COL 3:12 Tamakaila Anumaya Kotiꞌa hapali-lamatenea veala agaila alu aotage veaꞌneꞌa mainageno tamakaifena hau ayamopafi nehaiya veaꞌne mainaya yafe kenama alitama nefaiya avamete hutama maꞌa kanale kavala failiho. Mukiꞌa veafe tamahau humatetama kayone humateho. Tamaugafa alitama ohaiho. Alu kanomo kema havisayana ako hutama kea oꞌamakiho. Tamamena mailava hutama maiho.
COL 3:13 Tamakai amuꞌnopima mainesia kanomoꞌa nefufena havigema hutesigenofena amena malelava huno maineno aigeꞌateno kefo yamaꞌa ataletesie. Anumayatimoꞌa kefo yatamia ago aigetamateno atalelamateneafe tamakaya aniꞌa hutama ani kavakeꞌya hiho.
COL 3:14 Tamahau tamayamopafima nelamahaiya yamoꞌa mukiꞌa mani kanale kavaꞌmona agaseno ala humaine. Kenatimona atafa hisia tamuꞌnofiꞌma kitama atalakoma huna avamete huno tahau tayamopafima nelahaiya yana aniꞌa huno mukiꞌa mani kanale kavala haꞌyagino hetofa huligahie.
COL 3:15 Kalaisiꞌa tamaipa falu hisia yana tamamineanagino kava hulamatesigetama keꞌa haviho. Nagoke tamaipale maisaya yafe Anumaya Kotiꞌa tamakaifena ke higetama ageno “Nagai naugafa nagoke mainae.” huno humaine. Mukiꞌa yafena mukiꞌa kanafina Anumaya Kotitega muse huteho.
COL 3:16 Kalaisi humainea kea tusiꞌa kanale kegi tamakuꞌafina tokiyaꞌage huno haneno. Mani kea nelamafuꞌya kefo yama hisagetama kanale havi haviꞌyatamileti hamapaitama ali fatago humateho. Tamakuꞌaleti yagamea hutama Anumaya Kotitega musena hutetama yagamefiti Anumaya Koti agia alisaga hiho.
COL 3:17 Mukiꞌama hisaya kavaꞌene kenema mukiꞌa ani yateti Anumayatimona Yisasi agia alisaga nehutama agaiꞌama hulatenea yafena Anumaya Kotitega musena hiho.
COL 3:18 Tamakaya aꞌnemogatama anautamimogami kea akave maleho. Naꞌama hisaya yamoꞌa Anumayamo aufina fatago kava nehie.
COL 3:19 Vemogatama aꞌnetamimo-gamifena tamahau tamayamopafi tamahaisigetama amaipa haviya hisia kea hu oꞌamateho.
COL 3:20 Nafaꞌnemogatama itatami-afotamimogami kea mukiꞌa havitama akave maleho. Naꞌama hisaya yafena Anumayamoꞌa aluya huno nehaiye.
COL 3:21 Nefagatama nafaꞌnetamimoꞌya haviꞌya amakaye hisifa kea hu oꞌamateho. Humatesayana amaipa haviꞌya haviya hugahae.
COL 3:22 Nofipi mainetama miya oꞌali aliꞌya veaꞌmogatama* mopale mainaya kava vayatamimogami kea mukiꞌa havitama akave maleho. Havigu “Nagaifena ‘Kanale kano maine.’ huno hisie.” hutama kava kanomo aulekeꞌya aliꞌyana neꞌalitama havigu alulegama visaya kanafina oꞌalisagi aꞌao Anumayamofena koli nehutama tamakuꞌamoꞌa fatago hinagetama mukiꞌa kanafina aliꞌyatekeꞌya maiho.
COL 3:23 Mukiꞌa yama hisaya yana alitama tokiyaꞌage hutama aliho. “Ma mopafi afa vayaꞌmogami aliꞌyana noꞌalunagi Anumayatimo aliꞌya neꞌalune.” hutama aliho.
COL 3:24 Tamakaya ago havimainae Anumaya Kalaisiꞌa tamakaila kava kanotami maineanagino haenagaꞌa aliꞌyatamileti anonaꞌa tamamigahie.
COL 3:25 Tamamigahigi veaꞌmoꞌya kefo yama nehisaya yatetila anonaꞌamia aligahae. Anumayamoꞌa mukiꞌa veaꞌmoꞌya humainesaya yateti nago avamete huno anonaꞌamia amamigahie.
COL 4:1 Tamakaya aliꞌyate kava vayaꞌmogatama aliꞌya vayatamimo-gamina fatago kavakeꞌya humateho. Tamakaya ago havimainae kava kanotamia ikapinaga nagoke maine.
COL 4:2 Tamakaya nunamuna atafa hutama tokiyaꞌage hu-linetama tamau kalo-kalola ohutama efi efi hutama tamakesa havitama musena hiho.
COL 4:3 Kalaisifena nayoma hu falakitenaya mono kea nagaya huhaleꞌna hua yateti nagaila navaleꞌya kina hunatageꞌna mainoanagino Anumaya Kotiꞌa kama yakinatesigeꞌna ani kema nagoꞌene huhaleꞌna hisua yafena nunamuna havigeho.
COL 4:4 Anumayamona haisia avamete kanaleꞌya huꞌna aepaꞌaene huhaleꞌna hisugeꞌya havisaya yafe Anumayamotega ke hutama havigeho.
COL 4:5 Tamakaya kanale havi haviꞌyaꞌamima hanea vea kana hutama Yisasi kema nohavisaya veapima mainutama fatago hutama mainetama afaꞌa omaitama Yisasi kea hamapaiho.
COL 4:6 Hamapaisaya kemoꞌa mukiꞌa kanafina hagageꞌya hamaisifa kegeꞌya nehutama mukiꞌa veapima kenonaꞌamima hugahena kanale kegeꞌya hutama hamapaisae.
COL 4:7 Tikikusiꞌa nagaya mukiꞌa navagea tamahapaigahie. Ani kanoa nagaila nenahaiya nenafuꞌe, Anumayamo aliꞌyatela efi efi huno kanale aliꞌya kanogita tokaetaꞌa aliꞌyana neꞌaluꞌane.
COL 4:8 Tamakaya tagayama nemauna tavagea tamaha-painagetama havitama muse hisageno tamaipamoꞌa kanale hisiafene huꞌna hutogeno tamakaitega umaine.
COL 4:9 Onesimusina agaiꞌene Tikikusiganina hunatesugeꞌana ugaꞌe. Onesimusiꞌa efi efi huno kanale aliꞌya alino maigeno nenahaiya nenafuꞌa, tamakai kumateti kanogino maleꞌma folote humainea yamo kea tamahapaigaꞌe.
COL 4:10 Alisatakusiꞌa nagaiꞌene nofipi mainea kanoene Makiꞌa Panapasina akuꞌamoꞌene Yisasiꞌa nago agia Yasatusiꞌene huꞌya falu fala hulamatae. Ani vayaꞌmoꞌyage Yuta vayapitila nagaiꞌenena Anumaya Kotiꞌma kava yagaisia yafena vaiyatete huꞌya hamanepaiꞌya nagaila aluya huꞌya naya hageno naipamoꞌa kanale humaineafe Makifena nagaya agoꞌma humainoa kele nehavianagitama tamakaiteꞌma uvaꞌyi hisigetama avaletama ali kayone huteho.
COL 4:12 Epafalasiꞌa tamakai kumate kanogino tamakaila huno falu fala hu nelamate. Ani kanoa Yisasi Kalaisi aliꞌya kanogino mukiꞌa kanafina tamaya hisia yafena Anumaya Kotitega mage huno havinege “Anumaya Kotina hau-mainea kavafena havilama huteꞌya hetiꞌya tokiyaꞌage veaꞌne fatago huꞌya maisae.” huno havinegeane.
COL 4:13 Havinegeno tamakayaene Leotisia veaꞌnene Hielapolisi veaꞌnene tamaya hisia yafena tusiya huno aliꞌyana aligeꞌna agelama huteꞌna tamakaitela huhaleꞌna nehue.
COL 4:14 Lukuꞌa tahau tayamopafi nelahaiya tota kanotiene Temasiꞌene huꞌana falu fala hulamataꞌe.
COL 4:15 Leotisia kumate mainaya tafu-tagana-gamiꞌene Nifaene agai nopi melitalu huꞌya Yisasife haviꞌya amakupi malenaya veaꞌnene hu falu fala humatogi hamapaiho.
COL 4:16 Tamakaya mani avoma hapalitama havitetama Leotisia maineꞌya Yisasife haviꞌya amakupi malenaya veate atalegeno vinageꞌya amakaiꞌene hapaliꞌya havisageꞌya amakaiꞌma amaminoa avona tamakaila tamamisagetama hapalitama haviho.
COL 4:17 Tamakaya Akipusina mage hutama hapaiho “Anumayamoꞌma kaminea aliꞌyana kava yagaika tokiyaꞌage huka mukiꞌa alio.” hutama hapaiho.
COL 4:18 Mani kea nago kanoa hapaugeno kae-maleneanagi nagaya Poloꞌna nagaiꞌniꞌa nayapiti “Kanaleꞌya hutama mainao?” huꞌna hu falu fala hulamate keꞌnia negaove. Nagaya nofipi mainogi tamakesa havitama namiho. Anumaya Kotiꞌa kayone hisia yamaꞌamoꞌa tamakaiꞌene hanesie. Keꞌnia male haꞌno hie. Nagaiꞌni nagia Poloꞌnae.
1TH 1:1 Polonagi Sailasiagi Timotiagi tagaya mani avona kaeta Tesalonaika kumatema mainetama Yisasifema havitama tamakupi malenaya veamogatamina kaeta nelamamune. Anumaya Koti, Nelafaene Yisasi Kalaisi, Anumayatimoene tokaetama mainaya veamogatamina mani avona kaeta nelamamune. Anumaya Kotia kayone hisaya yaene tamaipamoa falu tamahaisia yaene tamamisie.
1TH 1:2 Tagaya mukia yupa Anumaya Kotitega tamakaifena muse huta tamaki ayeta nunamuna nehune.
1TH 1:3 Tamakayama nehaya kavafe tamakaitamima tamakupima alitama malenaya yamoa kanale auava yatamia falote higetama aliyana nealitama nagoamogamifema tamahau tamayamopafi lamahaigetama hama nemaetama Anumayatimoa Yisasi Kalaisima esia kanahe tamametiti hutama tokiya vaitama mailama humainaya yafena tagela-okanita Nelafaa Anumaya Kotitega muse huta nunamuna nehune.
1TH 1:4 Nafunagana-gatama, Anumaya Kotia hau ayamopafima nehaiya tafutagana-gatama, Anumaya Kotia tamakayama agai veama maisaya yafe ago huyogi-malegeta tagaya ago havimainone.
1TH 1:5 Haviteta tagayama Yisasife mani kanale kema alitama emainonana Kelamage kea hane. hutama havilama hu-mainonafene huta tamakaitela keagela evayi ohunegi Alu Aotage Avamumo tokiyaleti tusiya huno ani kema tamakupi malesaya tamaku tamakesa tamamine. Tamakaila amunotamifima tamaya hisuna yafe tagayama fatago kavama huna kavala ago age-mainae.
1TH 1:6 Ago agetetama tagai auava yaene Anumayamo auava yaene akave maletama Anumayamo kea alitama tamakupi malenageya nagoa vayamoya alihavi ya hulamatageno kasagoya kana yamoa tamakaipima evayi higenoa Alu Aotage Avamumoa agaia tusia musema hisaya yana nelamamie.
1TH 1:7 Lamamigetama tamakaya Yisasifema haviya amakupi malenaya vayamogamina Masetonia mainaya veanene Akaiya mainaya veanene kanale kavaage hutama Naa maa hiho. hutama amave-limainae.
1TH 1:8 Anumayamo kemona tamakaya huhaletama hageno ani kemoa atifi mafi huno ute ete hia yamo Masetonia kotegaene Akaiya kotegaenekela ounegi mukia kotega tamakayama Anumaya Kotifema havitama tamakupima malaya kemona ago havimainayanagita tagaya nagoene hamapaisuna kea omalene.
1TH 1:9 Tagayama nayoma tamakaitegama uvayima hunageya amakaiami tamavagea mage huya hae Tamakayama amakaipima uvayima hageya agoma fali-mainaya veanemogamife Anumayati mainae. huya amakisana nevaiya kavala ago ataleya amakua aiyahae huya Anumaya Kotitega umainae. Agola maige maige huno hilato haimu hanea Anumaya Kotina aliyamaa alisaya yafe Anumaya Kotitega umainae.
1TH 1:10 Umaineya agaia nafanema ikapinagati eteno esia kanaahe amametiti huya agava mainae. Ani kanoa, Yisasia fali-mainefiti Anumaya Kotia alino hetiteneanagino haenagama Anumaya Kotima hai vaino kaiyekema hulatesia kanafina Yisasia tagu tamena aligatigahie. huya humainae.
1TH 2:1 Nafunagana-gatama tamakaitamia ago havimainae, tamakaipima umaineta kema tamahapai-mainona kemoa afa ya kana ohunegi ago tamakupina aliyamaa ali-maine.
1TH 2:2 Tagaila hagoteya Filipai kumatela tagaye hisifa ya tamigeno taugafamoa tusia tagata aimainegi Mukia vayapina ani kea ohutafa hutama ohiho. huya hageno Anumaya Kotitimoa eteno tokiya tagu tagesa tamigeta kolia ohuta afaa Anumaya Kotina kanale kea tamakaipina huhaleta tamahapai-mainone.
1TH 2:3 Tamahapai-mainona kea havigea omale. Taugafamoa oniyaage huno kefo kavala humainefitila veala aye-lamavataga hisuna kea nohunagi Anumaya Kotia taguamona ageteno keama hamapaisuna aliyana tayapi malegeta tamahanepaune. Veamoya muse hisayafene huta nohunagi Anumaya Kotia agaia muse hisia ke hunageno Anumaya Kotia agaia taguamona ali fako huno neage.
1TH 2:5 Tamakayaene Anumaya Kotienena havimainageta tagaya mani kea humainona kemoa tamaipafina ayegesia kea ohunone. Tamakai yate ageta tahaye huteta ani yatami ali fala-kisuna yafe mani kea tamahanopaune.
1TH 2:6 Tamakaienefe alu veanenefe tagi alisaga hisae huta mani kea tamahanopaune.
1TH 2:7 Tamage tagaya Aposolo vaya mainonanagita Tagia alisaga hutama taya hiho. huta hisuna amukotia haneanagi ani kea ohunone Tamakaienema mainona kanafina tagaya anemoyama nafaneamima ako huya amataya kavaage hu-mainone.
1TH 2:8 Tamakaifena aluya huno nelahaigeta Yisasina kanale mono kea tamahapaisune huta nehune. Ani yamaagela omalegi tamakaifena tusiya huno tahau tayamopafi nelahaigeta tamaya hisuna yafe Afaa faligahune. huta nehune.
1TH 2:9 Nafunagana-gatama tagayama tusiya huta tayapiti aliyama aluna yana ago age-mainae. Havigu kavete yagai-latesaya yamo kana ya tamamigahune huta tayapitila aliyana alita kave neyana alifalote hugahe kegeene felugaene nealita Anumaya Koti kea tamahanepaune.
1TH 2:10 Tamakayaene Anumaya Kotiene tagayama mauna auava yana tage-mainae. Yisasifema havitama tamakupi maletama tamametiti haya veamogatamilema fatago huta vaiyeta alu aotage auava yama nehuta nagola osi kefo kavala ohunone.
1TH 2:11 Anumaya Kotia agaia kava yagai-mainea yapina tokiya hale yamaaene hanea yapi maisaya yafe tamakaila ago ke hu-maineanagitama Anumaya Kotina haisia auava ya alitama vaiyeho. huta ali lamakafa nehune. Tamakaya ago havimainae, nefaa nafaneyagaama huge amave-ligema nehia kava huta tamakaila nagoke nagokemogatamina ani kava hisayana nagoke kate tamatesia tamakua maletama maisae huta ali heti-lamatenone.
1TH 2:13 Tamakaya Anumaya Koti kea tagai tavayafitila alitama Nagola afa kanomo ke hane. hutama ohunagi Anumaya Kotina tokiyaage kelamaa hane. hutetama alitama lamakupi malageno tamakuafina ani kemoa umaineno aliyamaa nealia yafena mukia kanafina muse nehuta nunamuna nehune.
1TH 2:14 Nafunagana-gatama Yuta vayamoya Yutia maineya Yisasife haviya amakupi malenaya veala ali haviya humataya kava huya tamakaila kumatamile vayayamoya ali haviya hu nelamatae. Tamakaya Yutia maineya Yisasife haviya amakupi malenaya veanene nago iyaya hutama tamaugafa lamakata yana ali-mainae.
1TH 2:15 Ani Yuta vayamoya Yisasia Anumayatimoene Anumaya Koti amaune vayaene hamayageya falitageya tagaila tanati-talenae. Ani vayamoya Anumaya Kotima nehaiya kavala ohuya mukia vayamogamina kame humatenae.
1TH 2:16 Naa nehageta tagaya Yuta vea omainaya vayapina Anumaya Kotia amaku amamena aligatisiafene huta Yisasi kea alita hamapaigahe nehunageya visunema huna kaana maleli nelae. Aniama haya kefo yaamima halaya hagenoa ago ala hu-mainegeno Anumaya Kotia hai vaimateno kaiyeke humatesia yamoa ago amavate emaine.
1TH 2:17 Nafunagana-gatama Yuta vayamoya tagaila tanatigeta aupa kana kanoa tamakaienena omainona yafe megusa nafanemoya haya kava huta mainone. Tamage tamaulagafina notamakonanagi taguamoa tamakaifena nelahaigeta tamakesuna yafena tusiya huno kalagi neaigeta tamakesuna kafena tusiya huta ati neayone.
1TH 2:18 Tamakaitega egahe nehunanagi nagaya Polona mukia kanafina tamakaitega egahue nehuanagi Satania kania malelile nenate.
1TH 2:19 Yisasima eteno esigeta agai aulela hetita maineta na yafene huta muse kea hapaisune? Hana vayafe tametiti nehune? Tamakayama agai kema havimainaya yafe Yisasia muse yana tamigahie.
1TH 2:20 He tamakaya Yisasina tamakuama aminaya yafe ala tagia aligahune. Tamakaifekeya musena nehune.
1TH 3:1 Tamakaifena havi havi nehuta nagoene maiyaaya ohugahune huta nagainige Atenisia maigahue huna Timotina tamakaitega hutenoe. Ani kanoa tafutaganae Anumaya Koti aliya kano maineno Yisasi Kalaisina kanale mono kea hamanepaiya kanogina tamakayama Yisasife havitama tamakupima malenaya yana atafa hutama tokiya vaisaya yafe tamaya hisie huna hutenoe.
1TH 3:3 Tokiya vaitetama tamakaitema kana yamoma tamakata neaiya yafe Yisasi kea oataletama tamaku tamakesa alino agafa hisie huna tamakaitega hutenoe. Tamakaitamia ago havimainae Anumaya Kotia Ani kana yana aligahae. huno hu-maineane.
1TH 3:4 Tamage nayona tagaya tamakaiene maineta mani kea ago tamahapai-mainone Haenagaa tagata aisia yana aligahune. huta hu-mainona yana menia ago vayi higetama age-mainae.
1TH 3:5 Ani yafe havigu Satania aye-lamavataga hisigetama tamakupi alitama malenaya yana afa ya kana huyafene huna ani kema havisua yafena aluya huno nenahaigena nago kanoa hutenoe. Tamakupi alitama malenaya yama atalesayana aliya ali-mainoa aliyamoa afa ya kana hugahie huna nehue.
1TH 3:6 Timotina hutogeno tamakaite uteno tamakaila nelama-taleno tagaitega evayi huno kanale ke alino tamakaifena mage huno melahapaiye Amakaya Yisasife haviya amakupi malenaya yana tokiyaage huya atafa hulineya mukia veafe hamau amayamopafi nehamaigeya mukia yupa tagaifena amakesa havi havi huya amaipa haviya kanaleya hu nelatae. Tagayama amakaila amakesuna yafema nelahaiya kava huya tagesaya yafena aluya huno nehamaiye. huno tahapaiye.
1TH 3:7 Tahapaigeta haviteta tamakaya nafunagana-gatama Yisasife havitama tamakupi maletama nemaiye huno higeta havuna yafena kanaagema tahaigeta mainonageno ani kema egeta havunagenoa taipamoa kanale hia ke alino me nelamie.
1TH 3:8 Tamakaya Anumayamoene tokaetama maitafa haya yafena tagaila maiyatimoa kanaleya higeta mainone.
1TH 3:9 Tagaya tamakaifena aluya huta Anumayamotega hetita musena hu neatonagi hanaa huta Anumayamotega tamakaifena muse huna yana amisune huta nehune.
1TH 3:10 Kegeene felugaene tamakai tamaufima agesuna yafena Anumaya Kotitega aluya huta nunamuna nehune. Tamaketeta Yisasife havitama tamakupi malenaya yamoma kosa he otamatesiana tagaya Nagoene kosa helamatesia yana tamamimano. huta nunamuna nehune.
1TH 3:11 Anumaya Kotia Nelafaene Yisasia Anumayatimoene anakaiani tamakaitega tavaleana visae huta havinegone.
1TH 3:12 Tagayama tamakaifena tahau tayamopafi nelahaiya kava hutama tamakayama tamafu-tamakana-gamifeene mukia veanenefe tamahau tamayamopafima tamahaisia yatamimoa ala hisia yafe Anumayamotega havinegone.
1TH 3:13 Ania hulamatesigeno tokiya vaisia tamaku tamamisigetama haenagaa Anumayatimoa Yisasia agaia alu aotage veaamoenema eteno esiana tamakaya kefo kava ohutama alu aotage veanea mainetama Anumaya Kotina, Nelafa aufina hetitama Nagola kefo yaamia omale veane mainae. huno hu-lamatesie huta Anumayatimotega havinegone. Tamage.
1TH 4:1 Nagaya mani kea huna hano hugahe mage nehue nafunagana-gatama musetami nehugi Yisasia Alatimoene tokaeta mainona yafe tamakaifena huna tokiyaage ke nehue. Anumaya Kotina haiya yama alinutamahena kaana ago tamave-lunagetama ani yana akave nemalagi nagoene akave maleme maleme haiho.
1TH 4:2 Alatimoa Yisasina agai agile tahapaigeta tamahapai-mainona kea ago havimainae.
1TH 4:3 Anumaya Kotima haiya agu agesamoa maa humaine Kefo kavala ohutama alu aotage vea mainetama lamaugafa age lamahaye hu kavala neataletama afaa maiho. huno humaine.
1TH 4:4 Tamaugafa age lamahaye hutama havi kava hisaya tamaku tamakesa ataletama kava yagaitama maiho. Anumaya Kotife nohaviya veamoya nehisaya kavala hutama kumai yama hisaya tamaku tamakesa ohavisae.
1TH 4:6 Tamakaitami ama alinutamahena tamafu-tamakana-gami anea amavayu hutama kefo kavala hu oamateho. Alatimoa ani augafa kavama haya veala anonaamia kana yana amamigahie huta nayona ani kavafena tamakesa ago huta hale-mainone.
1TH 4:7 Taguamoa oniyaage huno kefo yamo tagu tagesa havisunafene huno Anumaya Kotia tagaifena kea ohunegi kefo kavala ohuta alu aotage veaa maisunafene huno kea humaine.
1TH 4:8 Naa hianagiya veamoyama ani kemona amakavenoma hutenayana veamogamina amakaveno hu oamatenagi Anumaya Kotina Alu Aotage Avamuama tamaminea kanomona amakaveno hutegahae.
1TH 4:9 Yisasifema haviya amakupi malenaya tafu-tagana-gamifena tamahau tamayamopafima tamahaisia yafena Anumaya Kotia agaia ago tamave-limaineanagina nagaya nagoene ani yafena tamaha-opaigahue.
1TH 4:10 Tamage tamakaya mukia Masetonia mainaya nenafu-gamifena tamahau tamayamopafina ago tamahau-maineanagitama Nagoene ani kavala hume hume haiho. huna nenafu-gatamahena tokiya kenia nehue.
1TH 4:11 Tamakaya ako hutama tamaugafa kava hutama maiya tamamete maisaya yafe muse hutama nagoa veamoya hisaya kavafena tamakesa ohavitama tamakaitami tamayapiti aliyana alitama maiho huna nayona ago tamahapai-mainoane.
1TH 4:12 Ani kavama hisayana nagoa yatamihena omalesigetama nagoa veafe Tamiho. hutama ohisageya Yisasi kema nohaviya veamogami amaufina kanaleya hutama vaiyesageya tamakia alisaga hugahae.
1TH 4:13 Nafunagana-gatama fali-mainaya veama haenagama hisaya kavafe ohavisaya yafena onahaiyanagina tamahapaigahue. Yisasi kema nohaviya veamoya tusiya huya avia neataya kavala tamakaya ohutama tamahaumana ohaleno alava hino.
1TH 4:14 Tagaya Yisasima faliteno heti-mainea yafena tagupi ago malenone. Ania nehuta Yisasima eteno esia kanafina agaifema haviya amakupi maleteya fali-mainaya veanene amavaleno egahie huta ago havimainone.
1TH 4:15 Anumayatimo tahapai-mainea kea hufalote huta tamaha-nepaunagi haviho Anumayatimoma eteno esia kanafina tagaya tahaimuma hanegeta mainona veala analega aupaa uhagoteta ohaigahunagi fali-mainaya veamoya hagoteya hetiya haigahae.
1TH 4:16 Anumayamoa agaia hu lokiya vaino kea nehinageno uhagote mainea ensole kanomoa ke nehisigeno Anumaya Kotina kapufamaafitila ke nehinageno Anumayamoa ikapinagatila neataleno elavino egahie. Esigeya Yisasifema haviya amakupima maleteya fali-mainaya veamoya hagoteya fali-mainesafitila hetigahae.
1TH 4:17 Hetisageta tagayama tahaimuma afaa hanegeta mainesuna veala amakaiene tokaesunageno tavalesaga hisigeta siapi haita Anumayatimona mogeteta agola agaiene tokaeta maige maige hugahune.
1TH 4:18 Naa hisaya yafe kasagoya veala mani kea mo hamapai me hamapai hutama amaipa ali tokiya vaiho.
1TH 5:1 Nafunagana-gatama Anumayamoa elavisia kanahena Na kanafine ma kanafi elavigahie. huta kanaa maleta tamaha-opaigahune.
1TH 5:2 Tamakaitamia ago havimainae Anumayamoa enunofena kesima musufa kanoma ako huno hanipinaga kesima evayi nehia kava huno egahie.
1TH 5:3 Veamoyama Menia kanale yupagita ako huta maigahune. huya hisaya kana kanoafi aupaa amakata aino ali haviya humatesia yana vayi hugahie. Anemoya nafanema ategahe hageno aupaa amakata neaiya kava huno ani kana aupaa vayi hugahianagiya veamoya faleya falakiyama maisaya kaamia omalegahie.
1TH 5:4 Omalegahigi tamakaya nafunagana-gatama haniki-mainea yapina omainaya yafe ani kanafina musufa kanomo nehia kava huno esigetama atili-talua ohugahae.
1TH 5:5 Tamakaya mukiamogatama hale mainea yapiene yagele mainea yapiene mainaya veane mainagi tagaya kegepi haniki-mainea yapi mainaya veala omainone.
1TH 5:6 Nagoa kefo kava nehaya veamoya nehaya kavala huta havigua taula faeta omaigetao. Taulaga agegali huta ageta tagu tagesamona yagai lokiya vaita maisune.
1TH 5:7 Amauma nefayaya veala hanimo aguafi nefayae. Havilima neya aneginagi nehisaya veala hanimo aguafi maineya ani kavala nehae.
1TH 5:8 Nehagi tagayama yagelema mainona veala tagu tagesale kava yagaisune. Yisasife havita tagupi maleneta tametiti nehuna yaene nagoa anagatimogamife tahau tayamopafi nelahaisia yaene auvai-latesia yana alita aye hailita maisune. Anumaya Kotia tagu tamema aligatisia yafe tametiti huta tanutela tokiyaage tumano ku vailisune.
1TH 5:9 Tagaya Anumaya Kotia hai vaisia ya alisuna yafene huno huyo okinegi Yisasi Kalaisia tagu tamema aligatisia yafene huno Anumaya Kotia tagaila huyogi-malene.
1TH 5:10 Yisasi Kalaisia tagaifene huno fali-maineafe tahaimuene mainesuno fali-mainesuno agaienekeya tahaimula hanesigeta agola maige maige huta maigahune.
1TH 5:11 Ani yafe nagoke nagokemogatama nehaya auava kavala nagoene hutama tamafu-tamakana-gamina kanale fatago amaku amakesale maisaya kea hamapaiho.
1TH 5:12 Anumaya Kotia tamakaipina mono kava vayala amatete amatete higeya mainagi ani kava vayamoya ke huya fatago tamaku tamakesa alisagetama amaiyaafi mainetama keamia haviho.
1TH 5:13 Amaiyaafi mainetama aliyaamihena tamakesa havitama amamitetama Kanale kava nehae. hutama tamahau tamayamopafi aluya huno tama-hainagetama tamafu-tamakana-gamiene nagoke avamete tamaipa falu hutama maiho.
1TH 5:14 Nafunagana-gatama nagaya tamakaifena hu lokiya vaina tamahapauve aliyama oaliya haviguma nemaiya veafena tamakaya Naa hutama aliyana aliho. hutama humateho. Kolima nehaya veala Kolia ohiho. hutama amakua alitama oya humateho. Lokiyaamima omalesia veala amaya hiho. Mukia veamogamina ako hutama alilava hutama amateho.
1TH 5:15 Nagoa veamoya kefo kavama hulamatesagetama anonaamia etetama kefo kavala hu oamateho. Mukia yupa tamafu-tamakana-gamifeene mukia veamogamifeene kayone kavaage humateho.
1TH 5:16 Mukia kanafina muse hutama kigi yokalo hutama maiho.
1TH 5:17 Mukia kanafina nunamuna huge huge hutama maiho.
1TH 5:18 Mukia kanale yaene havi yaenema tamakaitema falote hulamatesigetama Anumayamotega muse hutama havigeho. Tamakayama Yisasi Kalaisiene tokaetama mainetama mani kavama hisaya yafena Anumaya Kotina nehaiye.
1TH 5:19 Anumaya Kotina Alu Aotage Avamuamoa tamakupima nelea ata tamakaya ayesua ohiho.
1TH 5:20 Anumayamo avayafiti amaune kema tamahanepaiya kemona tamakaya tamakavenona hu oateho.
1TH 5:21 Tamakaveno hu oategahagi mukia yana ali fako hutetama Kanale yapi havi yapi? hutama tamakesa havilama hutetama kanale yamaage tamakoya amupi ali-maletama mukia kefo yana tamakaveno huteho.
1TH 5:23 Anumaya Kotia taipamo falu hisia yamona aepaa agaiage mainea kanogino alu aotage auava kava hutama mai fatago hisaya tokiya tamamisie. Agaya mukia tamaku tamakesaene tamaugafaene kava yagai-lamatesigetama haenagaa Anumayatimoa Yisasi Kalaisima elavisia kanafina kefo yatamia omalesie huna Anumayamotega havinegoe.
1TH 5:24 Anumaya Kotia tamakaifema ke higetama agaialegama ageno fatago kanoma maineafe Naa hugahue. hunoma mukia humainea keamona fatago huno akave maleno hugahie.
1TH 5:25 Tafu-tagana-gatama tamakaya nunamuna hutama tagaila laya hiho.
1TH 5:26 Mukia tafutagana-gamina tamayana amamitama ali falu fala humateho.
1TH 5:27 Nagaya Anumayamo agile tokiyaage kea mage nehue Tamakaya ma avona hapalitama hamapaigeya mukia tafu-taganaya haviho.
1TH 5:28 Anumayatimoa Yisasi Kalaisia agaia ali kayone hulamatesia yana tamamisie. Kenia male hano hie. Nagaini nagia Polonae.
2TH 1:1 Tagaya Polonagi Sailasiagi Timotiagi huta mani autama kaeta Tesalonaika kumate Yisasi anagamogatamilega kaeta nelamamune. Tamakaila Anumaya Kotia, Nelafaene Anumayatimoa, Yisasi Kalaisiene tokaetama nemaiye.
2TH 1:2 Anumaya Kotia, Nelafaene Anumayatimo, Yisasi Kalaisiene kayone hu yaene tamaipa falu lamahaisia yaene tamamisae huta Anumayamotega havinegone.
2TH 1:3 Tafu-tagana-gatama tamakaya Yisasifema havitama tamakupi malenaya yamoa mai lokiya vaitama maiya yaenefe tamakayama tusiya hutama mukiamogatama nagoke nagokemogatama tamahau tamayamopafima lamahaiya yamoa via yamo alakefa hia yaenefe Anumaya Kotitega ke huta muse ya neamune. Mukia yupa tatea kava huta tamakaifena Anumayamotega ke huta muse yana neamune.
2TH 1:4 Aniama haya yateti Anumaya Kotina veamoya alitaluma huya maiya amunoamifina maineta tamakai tamakia alisaga nehuta mage huta nehune Yisasife haviya amakupi malenaya yafe Anumaya Kotina kame vayaamoya ali haviya humatayanagi tokiyaage huya amakupima malenaya kemona atafa huya tokiya hulinae. huta hamanepaune.
2TH 1:5 Anima kefo kava hulamataya kavateti Anumaya Kotia fatago huno fako nehia kavala tavelino tamakaife Nagai kea havimainafi ohavinafi? huno fako hisia yafe ani tamaugafa lamakata aisia yana vayi nehie. Vayi higetama tamakupi malenaya yatamimoa tokiyaage humainea yafe tamatea kava hageno Anumaya Kotia haenagama agaia kava yagai-lamatesia kumatema umaisayafe tamakua alino fatago hu nelamate.
2TH 1:6 Hu nelamateanagi Anumaya Kotia fatago kanogino tamakaima kana yama nelamamiya veamogamina anonaamia kana yana amamigahie.
2TH 1:7 Neamamino Yisasia agaia tokiyaage ensole vayaaene tusiya huno anefea hanea ataene ikapinagatila ataleya fufu yate esageno manima havi kavama hulamatenaya yana Anumaya Kotia alitaleteno tamakaiene tagaiene mai falu hisuna yana tamigahie.
2TH 1:8 Tamiteno Anumaya Kotina amakuama oaminesaya veanene Yisasina kanale keama haviya akave nomalaya veanene amakata aisia yana amamigahie.
2TH 1:9 Anima amagata aisia yama amamisiana Anumayamo aulela omaigahagi aluale maineya halesia yamaaene tokiyaage yamaaene oagetafa huya oagegahagi amakata aige aige hisia yapi agola maige maige huya maigahae.
2TH 1:10 Maigahayanagi mukia Anumayamona alu aotage anagaa Yisasife haviya amakupi maleya amametiti nehaya anagaa ani kanafina Yisasima tokiya halesia yamaale esigeya ageteya tusia muse nehuya Tamayo aiya kava nehane. huya agia alisaga hugahae. Tamakayaene Anumaya Koti kema tamakai amunopima tamahapaunagetama havitetama tamakupi maletama tamametiti nehutama agia alisaga hugahae.
2TH 1:11 Tagaya ani kanahe tagesa havita mukia kanafina Anumayamotega tamakaifena ke huta mage huta havinegone Nagainialega esae huka ke humainana veamoya amakaiamima fatago huya vaiyesaya yana kosa hematesia yana amamisanageya alisageno amatesie. Amakaila amaya huka tokiyakaa amamisanageya Yisasife haviya amakupi nemalaya yapina Kanale auava yana hugahune. huya haya yana ali hano hisae. huta havinegone.
2TH 1:12 Ani kavama hinutamahena Anumaya Kotiene Anumayatimoa Yisasi Kalaisiene kayone huta maisuna yana tamamisaagetama ani kanale kavama haya yafe Anumayatimona, Yisasi agima alisaga nehisageya veamoya ania huya tamakai tamakia alisaga hugahae.
2TH 2:1 Tafu-tagana-gatama Anumayatimoa, Yisasi Kalaisima eteno elavisigeta agaitega alitalu huta maisuna kanahe tamahapaigahe nehunagi haviho.
2TH 2:2 Nagoa veamoya Anumaya Koti nahapaigena havuana Anumayamoma kaiyeke hulatesia kanaa ago evayi humaine. huyama hisaya kene nagaifema Polo mani kea avopi kaegeno evayi humaine. huya hisaya kene havitama tamakesa kumoa ohinagetama atali talua ohutama mai-lanetama maiho.
2TH 2:3 Havigu nago kanomoa mani havigehena aye-lamavataga hisigi ani kanaa kahaoneno vayi ohugahigi hagoteya mukia veamoya vegano-kano huya Anumaya Kotina amakaveno hutetesageno Kefo Kanoa fufu yate evayi hugahie. Ani kanomoa hani kimainea yapi uno agola agata aige aige huno maisia kano maine.
2TH 2:4 Mukia yamona vayamoya agima alisaga nehuya Anumayati maine. huyama hisaya yafena ani Kefo Kanomoa Afa ya kana yane. huno kame humateteno ala mono nopi haino siale maineno Nagaya nagainia Anumaya Kotina mainoe. huno hugahie.
2TH 2:5 Nayona tamakaiene mainena mani yafena ago tamahapai-mainogi ago tamake-kanifi?
2TH 2:6 Kefo Kanoma esia kaana tile-mainea kanohena tamakaya ago havimainae. Agaia kanaama vayi hisigenoa fufu yatela evayi hugahie.
2TH 2:7 Kefo Kanomoa falakunaku humaineno aliyamaa menia nealianagi efufutema ataleno esia katema mailile-mainea kanoma avalenageno maime vinageno fufu yatela Kefo Kano evayi hugahie.
2TH 2:8 Evayima hisiana mani Kefo Kanoa Satani tokiyaleti veamogamina aye-mavataga hisia yafe ageati tokiya avame aliyana aligahianagi haenagaa Anumayatimoa Yisasia fufu yate evayi huteno avayafiti haimutetiene aye vasa hisia hale yamo himamuletiene mani Kefo Kanomona haesigeno faligahie.
2TH 2:10 Hagoteno Kefo Kanomoa tusiya huno kasagoya havi kavaage hinageya veamoya Anumaya Kotia amaku amamema aligatisia ke-lamage kehena nelahaiye huya ohuya amakaveno hutenaya veamoya Kefo Kanomo kea nehaviye. Mani kavala ageteya Tamage nehie. huya amakupina malesaya yafena Anumaya Kotia havigehekeya havisaya amaku amakesa amamigahie. Ani veamoya kelamage kemona haviya amakupina nomalayanagiya amakata yana aliya haniki-mainea yapi tegelege nehia atafina maigahae. Kelamage kemona haviya amakupima malaleasina Anumaya Kotia amaku amamena aligatileasine.
2TH 2:12 Aligatigahianagi mukia vemoya kelamage kemona haviya amakupi omaleya kefo kavaage hisaya yafekeya tusia muse huya nemaiya veamogamina Anumaya Kotia kaiyekea humatetenageno tusia amakata maino aisia anonaamia aligahae.
2TH 2:13 Tamakaya Anumayamoma hau ayamopafi nehaiya nafunagana-gatama mukia yupa nunamuna huta tamakaifena muse nehune. Nayona ehe kanafina Anumaya Kotia tamaku tamamena aligatisia yafe tamakaila agaialega tamavaleno tamatesie huno ago huyogi-maleneanagino Alu Aotage Avamua tamakaila ago tamamine. Anumaya Kotina alu aotage auava kavaama hisaya tamaku tamamena tamamigetama tamakaya Anumaya Koti kelamage kea havitama lamakupi maletama havilama nehayafe tamaku tamamena aligatigahie.
2TH 2:14 Anumayatimona, Yisasi Kalaisi tokiya halesia yamaa tamamisia yafe Yisasife kanale kema tamahapai-mainona yateti agaialega visaya yafena tamakaila ago ke humaine.
2TH 2:15 Ke humainea yafe nafunagana-gatama hetitama fatago hutama maiho. Mukia Anumaya Koti kema tavayafiti huge amave-lige nehuna yaene avopi kae-malenona kene atafa hutama akave maletafa hutama maleho.
2TH 2:16 Anumayatimoa, Yisasi Kalaisiene Anumaya Kotia, Nelafaene tagaifema hau ayamopafi maino haigeno kayone hisia yamaaleti mukia kanafina agola tagai tagupina falu huta maisuna yaene agaife agava hisuna tametiti yaene ago tamiteno tamaipa alino tokiya vailamatesigetama mukia kanale kavaage nehutama kanale kema hisaya yafe tamaya hisae huta Anumayamotega havinegone.
2TH 3:1 Tafu-tagana-gatama tagaya nago kene tamahapaigahune. Nunamuna mage hutama tagaifena havigeho Anumayamo kemoa tamakaipima humainea kava huno mukia kotega aiyage aiyage huno mukia veamogamite visigeya mani kehena muse huya agia alisaga hisae hutama havigeho.
2TH 3:2 Tamakaya nunamuna nehisageno havi vayamoya tagaima tatafa hugahema hisayana Anumaya Kotia taugafa aligatisigeta vamano. Tamakaya ago age-mainae mukia veamoya Yisasifena haviya amakupina maleya amametiti nohae.
2TH 3:3 Amametiti nohagi Anumaya Kotia Nagaya maa hugahue. huno humainesia kavala hugahie. Aniama nehia kanoa mainea yafe agaya tamaku tamakesa alino kanale tokiya vai-lamatesigeno Satania tamavayuma hisia kanafina tamahau vaigahie.
2TH 3:4 Anumayamoa tamakaila tamaya hisigetama tamahapai-mainona kea nehutama haenagaaenena ani kavala hugahae ani yafe havita tametiti nehune.
2TH 3:5 Anumayamoa tamakaife hau ayamopafi haiya yafeene Kalaisima kana yama falote hisia kanafina mai fatago huno mainea kavafeene tamaku tamakesa havilama hisayafene huta Anumayamotega havinegone.
2TH 3:6 Nafunagana-gatama Anumayatimoa, Yisasi Kalaisi agile tagaya tamakaifena tokiyaage ke huta tamahapaigahunagi haviho. Tamakaipitima nagoa tafu-taganaya aliyama oaliya havigu maineya agoma tamamigetama ali-mainaya kea akave nomalae. Aniama hisaya veanenena tamakaya tokaetama omaitama aluale maiho.
2TH 3:7 Tamakaya ago age-mainae tamakaienema maunana afaa felua omainonagi tagayama hunagetama age-mainaya kava hutama maiho.
2TH 3:8 Tagaya tamayapitila kavema aligahena afaa havigua oalinonagi tamakaipi kana ya maleyafene huta miya nehuta tagaya tusiya huta kegeene felugaene tayapiti kave nesuna aliyana tokiyaage huta nealita Yisasi kea tamahanepaune.
2TH 3:9 Kavela tamakaipitila kanale afaa aluteasinagi tamakayama hisuna kavafena agetetama mani kava akave maleyafene huta kavela afaa noalune.
2TH 3:10 Nayona tamakaienema maineta mage huta tamahapai-mainone Nago kanomoa aliyama oalisia kanoa kavela onegahie. huta humainone.
2TH 3:11 Tagaya havunana nagoa tamakaipi mainaya veamoya aliyana oaliya afaa feluami maineya ani veamoya alu kanomo hia yafe ke hu-liteya nehuya aliyaamia noaliye.
2TH 3:12 Naama haya veafena Anumayatimona Yisasi Kalaisi agile hulokiya vaita kea mage huta hamanepaune Tamakaya kanaleya hutama mainetama aliyama alisaya aliyateti kavela ali falote hutama neho. huta nehune.
2TH 3:13 Tagaya mukia tafu-tagana-gatama mage huta tamahanepaune kanale auava yamofena tamakaveno hutetama kasalo otamahaeno.
2TH 3:14 Mani avopima kae-malona kea nagoa veamoya akave omalesayana Ma kanomo mani kavala nehie. hutama amakaienena tokaetama omaitama aluale maigeya amakayea hino.
2TH 3:15 Tamakaya aniama hisia kanomofena Kefo kavaage hana kano mainane. hutama hu oatetama Taganatimoga mainane. hutama agu agesa amigeno agua aiyahae huno eteno kanale kate esie hutama hiho.
2TH 3:16 Anumayamoa tamaipa falu hisia yamona aepaa maineno mukia kanafina alu yana alu yana tamakaitema falote hisigenoa agaia tamaipa falu hisia yana tamamisie. Anumayamoa agola tamakaiene mukiamo-gatamaene tokaeno maisie.
2TH 3:17 Hapalitama nevaya avona alu kanomofe hugesa hugeno kae-malenegi nagaya Polona haenagalafa mani ke kanoa nagaini nayapiti kaena tamakaila hu falu fala hu nelamatoe. Mani avoma kaova augafa kea mukiama kae-malenoa avopina ania huna kae-malenoe.
2TH 3:18 Anumayatimoa Yisasi Kalaisia kayone hisaya yamaamona tamamisigeno tamakaienena maisie. Kenia male hano hie. Nagaini nagia Polonae.
1TI 1:1 Nagaya Polonae Timotigahe mani avona negaove. Anumaya Kotia tagu tamema aligati-mainea kanoene Yisasi Kalaisifema tametiti nehuna kanoene naumono maleteana nahapaiagena Aposolo kanoa mainoe.
1TI 1:2 Ani yafe Timotiga Yisasi kema kahanepauva yafe nagai nafane kana huka mainanageno Anumaya Kotia, Nelaafaene Yisasi Kalaisia, Anumayatiamoene hanau hugateana kayone hisana yaene kaipamoa falu kahaisia yaene kamisae huna nehue.
1TI 1:3 Masetoniama neuna kagaifena Efasusi kumate maiyo. huna hugatenoe. Anile maineka alu mono huge amave-lige nehisaya vayala mage huka hamapaiyo Mani kema haya kea ataleho. huka hamapaigeya ani havi monoamia nagoene ohuya atalesae huna ani kumatela katenoe.
1TI 1:4 Ani vayamoya manimo kea haviya amakesa havi havi nehuya Tamage nehie. huya nehuya amakinagomogami amakia ayeya ayaaya kegefa afa ke nehuya amakesa haviya mo hamavige me hamavige nehae. Aniama haya kavamoa Yisasifena havitama tamakupi maletama akavema malesaya yafena tamaya ohugahie. Ani yafe Ataleho. huka hamapaiyo.
1TI 1:5 Hamapaisanageya akave malesayana oniyama ohunea tamakupitila tamage hutama Yisasifena havitama tamakupi maletama tamametitima nehaya yana amegatila ohutama kanale yama humainea tamakuamoma hia kava hutama veamogamifena tamahau tamayamopafi tamahaino huna nehue.
1TI 1:6 Nagoa veamoya mani kea neataleya yagaleya neuya afaa havigu havagu havigeyaga aliya amakupi maleteya Anumaya Koti kea akave nomalae.
1TI 1:7 Ani vayamoya Anumaya Kotima kahegi kea huta falote hisuna veane maisune. huya hayanagi anima haya keyaga havilama huya nohavigi afaa Tamage nehune. huya nehae.
1TI 1:8 Anumaya Kotina kahegi keama havilama huta akavema malesunana kanale ke haneanagino taya hugahie huta ago havimainone.
1TI 1:9 Kanale yama huya fatagoma humainaya veanehe mani kahegi kemoa ohunegi kefo kavama maiya nehuyama mainaya veanene, ke ohavi veanene, veganokano veanene, Anumaya Koti kema akave nomalaya veanene, kefo kavaagema maiya nehaya veanene, Anumaya Kotina amakaveno huteya hu haviya hu neataya veanene, nefanagi itaamonagi huno hamaeno nefalino, alu veanene hamaeno nefalia vayaenefe mani kea humaine.
1TI 1:10 Moli yokalo teliliatete huya kumai kavama nehaya veanene, ve amafaluyaene moli yokalo nelaya vayaene, veama musufa yama huya vaya neamavalaya veanene, havigeage nehaya veanene, kaiyekema havi kanomote havigema hu neamataya veanene, Anumaya Kotina kanale keama neataleya kefo kava nehaya veamogamife kahegi malenea kea humaine.
1TI 1:11 Tusia musema hisuna Anumaya Kotia mani kea agaia avayafiti huno tokiya hale-mainea ke, Yisasifena kanale mono kea, nagaila nahapaino hunategena tamakaila tamahanepauve.
1TI 1:12 Yisasi Kalaisia, Anumayatimona aliyamaa alisua yafe tokiyaa namigena muse hu neatoe. Nagaifena Kanaleya huno aliyania aligahie. huno huteno nagaila huyoginateneafene huna musena huneatoe.
1TI 1:13 Nagaya nayona agai agia hu haviya huneatena kame kanoa mainena agaifena havilama huna nagupina omalenoa yafe agaya kalagi ainatene.
1TI 1:14 Kalagi ainateteno Anumaya Kotia kanaleya huno kayone hu yamaa tusiya huno namigena Yisasi Kalaisienena ailokaena mainena agaifena nagupi malena nametiti nehua yaene nahau nayamopafima nenagea yaene namine.
1TI 1:15 Tusia tokiyaage kea, mukia veamoya haviya amakupi malesaya kea mage huno humaine Yisasi Kalaisia kefo kavama nehaya veamogamina amaku amamemaa aligatigahe ma mopafina elavino emaine.
1TI 1:16 Emaineanagina nagaya kefo kavama nehaya vayala amakasena kasagoya kefo kava uhagotena humainoa yafe agaitega esaya vayamogamina kalagi ainatenea kavala agesaya yafe Yisasi Kalaisia ako huno tusia kalagi anategeya mukia veamoya Tagaiene ani kalagi ailategahie. huteya agaifena haviya amakupi maleya amametiti huteya agola maige maige hisaya hamaimula aligahae.
1TI 1:17 Anumayamoa mukia kanafina agola maige maige nehia Sauve Kanomoa ofaligahianagita tagaya agaila oagegahune. Anumaya agaiage mainea yafe veamogata agai agia alisaga huge huge nehisunageno mukia kanafina hale-mainea tokiya yamaa hanege hanege hisie huta hisune. Mani kea tamage.
1TI 1:18 Timotigae, nagai nafanemoga, nayona nagoamogamina Anumayamoa avayafiti kea kagaifena huno falotema humainea augafa ke menia ma avopima kaenama kamua kahegi kemoa hanegi ani kemona fatago huka akave malesanana ani keleti Satanienena tua hugane.
1TI 1:19 Anumayamofema havika kagupi malenana yana tokiyaage huka atafa hulisanageno Anumayamo aufina kaguamoa Kefo yania omalene. huno hinageka kaugafa kava hugane. Nagoa veamogamina amakuamoma Aao. huno hia kene Anumayamo kene amakaveno huteteya Anumayamofema amametitima nehaya yamona ali haviya nehae.
1TI 1:20 Ania humainaya veapitila tole kanolatamogani anakia Himeneusiene Alekasataene ani kavala haageno Satania kana hanaisia yana anamisigeana anakua aiyahae huana Anumaya Koti agia nagoene huana haviya ohisaa yafe Satani ayapi hunatenoe.
1TI 2:1 Nunamuna hagote yane. Tama yatafa hisaya yana hanea yafe Anumayamotega havinegetama tamakaima tamahaisia yafeene mukia veamogamima hamamaesia yafeene agai agi ayetama muse hutama havigesae.
1TI 2:2 Ala sauve vayaene mukia kamani kava vayaene amaya hisia yafe nunamuna hutama havigesageno kanale ya huno fatago kavaage humatesigeta falu yapi maineta Anumayamo nehaiya auava kava nehuta alu aotage vaya maisuna yafe nunamuna hiho.
1TI 2:3 Ani nunamuma hisaya yana Anumaya Kotia, tagu tamema ali negatia kanomo aufina tusia kanaleya huno tatesia kavale.
1TI 2:4 Anumaya Kotia mukia veamogami amaku amamena aligatisigeya kelamage kea havilama huya havisaya yafena tusiya huno nehaiye.
1TI 2:5 Anumaya Kotia nagoke kanoa agaiage maine. Mainegeno Yisasi Kalaisia, nagoke kanomoa ma mopafi veanemogatileene Anumaya Kotitegaene amunotifina heti-maineno nagopi alino ailokaelatene.
1TI 2:6 Mukia veamogamina kefo yaamimoa alino hayagimategeya mainageno Yisasia anifinagati amavayu hisiafe miya ataleno agaia augafa hakino fali-maine. Anumaya Kotia huyogi-malenea kanafi mani yana taveli-maine.
1TI 2:7 Taveliteno Yuta vea omainaya veamoya mani kea havisae huno Anumayamoa hamapaisua yafe huno nagaila yogi-malenea ne mainoe. Aposolo kano mainena manima kelamage kema hamapaisugeya haviya amakupi maleya amametiti hisaya yafe mani kea hu falote nehue. Mani kea havigea nohugi tamageage ke nehue.
1TI 2:8 Maa kavafe nenahaiye mukia kumatema nemaiya vayamoya kanaleya huya fatago huya maineya kea ovaiya amaipa havi yana ohuyama nemaiya vayamoya amayana alisaga huya Anumayamotega nunamu huya havigesaya yafe nagaila nenahaiye.
1TI 2:9 Anemoya maa huya maisaya yafe nenahaiye amakaiami amaugafa aliya ohaiya kenaage fai-lineya ako huya maineya vayamoya auluma hamaesaya yafena amaugafale konagali ya ali-malesaya yafena ohuya Anumayamo kema akave nemalaya veamogami auava kava huya maineya mai kayone huya maisae.
1TI 2:11 Anemoya amakaiami amaugafa aliya ohaiya Anumayamo keagema havisaya yafe ako huya maineya kanaleya huya havisae.
1TI 2:12 Vemoya anemogamina kavaami mainayanagiya anemoya Anumayamo kea huge amavelige hiho huna nohugi ako huya maineya ke haviya maisae huna nehue.
1TI 2:13 Haviho Anumayamoa hagoteno Atamuna talo huteno haenagaa aala Ivina talo hu-malenea yafe anemoya ako huya maisae.
1TI 2:14 Satania Ivina aye-vataga higeno Ivia Tamage nehane. huno nehuno hagoteno kefo kavala hu-maineanagi Atamua naa kavala ohune.
1TI 2:15 Ohunegi aneyagamoya Anumayamofe haviya amakupi maleya amametiti nehuya nagoamogamifena hamau amayamopafi hamaisigeya maineya nafaneamia amatesageno Anumaya Kotia amaugafa aligatisie.
1TI 3:1 Mani kemoa kelamage ke. Yisasife haviya amakupi malenaya veatema kava yagaisia aliyate Hagote kano maisue. hunoma nehia kanomoa kanale aliyafekeya haumaine.
1TI 3:2 Yisasife haviya amakupi malenaya anagatema hagote kava yagaisaya vayamoa maa augafa kava huya maisae. Kefo yamaama veamogami amaufima omalenesia kanoe. Aama nagoke atenesia kano. Agu agesale yagaino tokiyaage huno havi kavama hisia yafena aupa agesa nohavia kanoe. Natu veane alino kanale hu neamatesia kanoe. Kanaleyama huno Yisasi kema humave-nelisia kanoe.
1TI 3:3 Havili neno aneginagi nohisia kanoe. Vayala havigu mohae mehae nohisia kanoe. Ke vai yana alino falote ohuno aipa kanale yapi nemaisia kanoe. Monema alisia yafena hagaa nohaesia kanoe.
1TI 3:4 Ane nafanea kanaleya huno kava yagai-matesigeya agai agi alisaga nehuya agai ke ali hipoya hisageno kanale yama huno nemaisia kanoe.
1TI 3:5 Ane nafaneyagaama kanaleyama huno kava noyagaisia kanomoa Anumaya Koti anagamogamitela kanale huno kava oyagaigahie.
1TI 3:6 Meni kanoa Anumaya Koti nafanema haegafa emainesia kanomoa kava yagaisia aliyatela he otino. Havigu hetinunoa agaia augafa alino haisigeno Anumaya Kotia Satanina kaiyekema huteteno haeno fananema humainea kava huno ani kanomona ania augafa kava hutegahie.
1TI 3:7 Nagoa yaenefe nehue Yisasi kema nohaviya veanenema vaiyatete nehisigeya ageteya Ma kanoa kanale fatago kano maine. huya hutesaya vayapiti kava vayala ali hetite hetite huo. Kanale yama huno omainesia vayama ali heti-matesanageya veamoya hu haviya humatesageno Satanima hanagi-malenea kalifumoa aupaa hateno amatafa huno havi kate amavaleno amateyafe nehugi amaketeka ali hetimato.
1TI 3:8 Yisasife haviya amakupi malenaya vayate kava aliya vayamoya ania huya kanale vayaage maisae. Fatago huya nemaiya vayale. Vagala kea ohu vayale. Havi lina neya aneginagi ohu vayale. Moneamihe amakesa havi havi ohu vayale.
1TI 3:9 Anumaya Kotia Yisasifena falaki-mainea kemo aepaamofena haviya amakupi maleya atafa hu-lineya Anumayamo aufina amakuamoa kefo kavala nohisia vaya maisae.
1TI 3:10 Hagotetama amakaila avame humatetama amakelama hutetama kefo yaamima omalenesiana kanaleya huya aliya vayala maisae.
1TI 3:11 Aneamimoyaenena ania huya kanale ya huya maineya alumo kea aliya atifi mafi ohisae. Havi lina neya aneginagi ohuya efi efi huya fatago aliyamaage aliya maisae.
1TI 3:12 Yisasife haviya amakupi malenaya anagate kava aliya alisaya vayamoya nagokema aami mainesigeya ane nafaneamia kanaleya huya kava yagai-matesageya amakai ke ali hipoya hisae.
1TI 3:13 Yisasife haviya amakupi malenaya anagate kava huya kanale aliyama alisayana mukia veamoya amavagea haviteya kanaleya huya amakia alisaga hugahae. Alisagama hisayana Yisasi Kalaisife haviya amakupi maleya amametitima nehaya yafena kolia ohuya hetiya hu falote hugahae.
1TI 3:14 Mani avona nagaya negaena Aupaa mo kagesue. huna nagesaa havuanagi visua kaniama omalesigena aupaama ovisugeka ma avoma kaena kamua avopiti hapalika Anumaya Koti kema nehaviya anagama alitalu hisaya yupa kanaleya huya maisaya kavafe havisane huna mani avona kaena kahanepauve. Anumaya Kotia haimuaene mainegi tagaya agai anagaamogata alitaluma hisunagenoa tokiyaage tunage yosa kana hugahie. Mukia hanae yosama ali manu manu huno atafa hulinea kava hisigeta tagaya kelamage kea tokiyaage huta alisaga hugahune.
1TI 3:16 Anumaya Kotia hufalote huno tahanepaiya auava yana tusia lamayo aisuna yane. Yisasia ma mopafi vaya augafa kalino efalote huno mainegeno Alu Aotage Avamumoa Lamage huno Anumaya maine. huno tahapai-maine. Ensole vayamoya agaila agageya vayamoya avagea huya alu kote kote mo huya falote hageno ma mopale kasagoya veamoya haviteya aliya amakupi maleya amametiti hageno Yisasia eteno ikapinaga nehaino tokiyaage hale yamona ali-maine.
1TI 4:1 Alu Aotage Avamumoa huhaleno mage huno humaine Anumayamo esia kanamoa eaupama hisiana nagoa Kefo Avamumoya havigema huya ayemavataga hisaya yafe ani vayamogami ke haviteya akave nemaleya Yisasifema haviya amakupi malenaya kea neatalae.
1TI 4:2 Anima ayemavataga hisaya veala amakaiami amega amaugafafiti havigeage ke ali falote hageya kanale amaku amakesa akave omalegahae. Naama hisaya yafe amakuamoa Havi kavala nehae. huno kea ohuno maine.
1TI 4:3 Naa vayamoya mage huya nehae Vemoya anea ali oatesae. huya humategahae. Anumaya Kotia kavela agaia talo humaleteno agai kema aliya amakupi maleya amametiti nehaya veamogamifena Muse nehutama alitama neho. hunoma talo humalenea kavefena nagoa veamoya amakaiami Oneho. huya kahegi-mategahae.
1TI 4:4 Mukia yana Anumaya Kotia talo hu-malenea yana kanale yamaage hanegi nagoke ya kanoahena Oneho. huno ohuneanagita mukia yana muse nehuta alita nesune.
1TI 4:5 Anumaya Kotima humainea kemoene Anumayamotega nunamu huta muse hu neateta havinegona yamoene Anumaya Koti aufina ani kavela alino kanaleya nehie.
1TI 4:6 Timotigae kahapai-mainoa kema kafu-kagana-gamina hamapaisanana Yisasi Kalaisina kanale aliya kanoa maigane. Yisasifema havika kagupi maleka kametitima nehana kemoa hagaage hinageka akavema malesanana tokiyaage kano maigane.
1TI 4:7 Maigananagi Anumaya Kotina amaku amakesa haviya oaminaya veamoya nehaya manifena aneginagi kema hisaya kea ohavika Anumayamofekeya havika akave maleme maleme haiyo.
1TI 4:8 Taugafamoma tokiya vaisia yana yokaloma lesuna yana kanale ya haneanagino osia kanaleya huno lahamaegahie. Lahamaegahianagi tagayama Anumayamoma nehaiya kavama huta maisunana meniene haenagaene ikapinaga haita maisuna yafe lahamaegahie.
1TI 4:9 Mani kemoa tamagelafa huno nehiafe mukia veamoya havilama huya aliya amakupi maleya amametitia hisae.
1TI 4:10 Haimuaene mainea Anumaya Kotia mukia veamogata kefo kavaage nehuna yapiti alino kalu hetaleno tagu tamena aligatigahe nehigi agaifema haviya amakuafi maleya amametitima nehaya veamogamina amaku amamena ago aligati-maine. Ani yafekeya tametitia nehuta taya mukiki huta aliyana nealune.
1TI 4:11 Menima kahapauva kea hamanepaika Maa hiho. huka amavelio.
1TI 4:12 Nagoa vayamoya kagaifena Meni neya kanoa, afa kano maineanagita agai kea ohavisune. huya nahagi Ani kea ohiho. huka hamapaiyo. Anumaya Koti anagamogamina kaana amavene-lika fatago keage nehuka kanale kava huka vaiyatete nehuka vayakamogamina kagua neamamika hamamaeka Yisasifena havika kagupi maleka kametiti nehuka oniyaage ohunesia kagu kagesaene maiyo. Naa hisanageya kagai kakavela visae.
1TI 4:13 Nagaya aupaa hunama omesugekahena veamogamina Anumaya Koti avopiti kea hapalika hu haleka hamapaigeya haviho.
1TI 4:14 Mono note kava vayamoya kanute amayana maleya huyonegiya Anumaya Koti aliya kano maiyo. huya hugatageno Anumaya Kotia avayafiti hamapaigeya aune laga hageno Anumaya Kotia tokiya yamaa kaminegi ani yana oataleka aluya huka ani yateti aliyana alio.
1TI 4:15 Anima kahapauva aliyana aluya huka alige-lige nehuka ani yafeke kagesa havi havi huka kanale aliyama alisanana veamoya negageya Menia kanale ya nehie. huya hugategahae.
1TI 4:16 Kagaikaa maisana auava yakaaene Yisasi kema hamanepaina yaene atale yafenagi kava hume hume haiyo. Aniama hisanana Anumaya Kotia kagai kagu kamena alinegatino kagai kema nehaviya veamogami amaku amamena aligatisigeya kanaleya huya fatago kate ugahae.
1TI 5:1 Vayatamamo-gamina kea oamamakika negafama huneatana kava huka kanaleya huka ako humateka ania huka ali hetimato. Yaufa neyavemo-gamina kaganakamo-gamima hu neamatana kava huka ania humato.
1TI 5:2 Alekanomo-gamina itakamoma hu neatana kava huka ania humato. Yauva anemogamina kasakamo-gamima hu neamatana kava huka ania humateka havi kagu kagesa ohavika Anumaya Koti aulela fatago hisia kava humato.
1TI 5:3 Keto aneyaga hamamaesaya vayama omainesayana kanale auava kava hu neamateka amaki alisaga huo.
1TI 5:4 Nago keto amona agehoamopi nafaneamopi mainesayana ani anagamoya kanaleya huya hamaesae. Anumaya Koti kema nehaviya veamoya itaamoa nefaa nafaneyagaama hamamaenesia anonaa kanaleya huya hamaesae. Ani kavama hisagenoa Anumayamo aipamoa kanaleya hugahie.
1TI 5:5 Nafaneamima vayaamima omainesia keto aneyagama amakaiamige maisayana hamamao huna nehue. Ani keto anemoya kanaleya huya Anumayamofe amakesa haviya Laya hugahie. huya amametiti nehageno Anumayamoa amakaima hamamaesia yafena nateene kegeene Anumayamotega ke huya havinegagi tamakaya amaya hiho.
1TI 5:6 Amaya hugahayanagi nagoa keto anemoya Anumaya Kotifena amakesa ohaviya amakaiami amakuamoma nehaiya kavafe havi havima nehaya aneyaga hamaimuene mainayanagi fali-mainaya veamoya haya kava huya Anumayamo kea havilama huya nohaviye.
1TI 5:7 Alu veamoya Yisasina amakua aminaya veafe Kefo kava nehae. huya ohisaya yafe ani keto anemo-gamina kanaleya huya hamamaesae huna mani kea kahanepaugi hamapaiyo.
1TI 5:8 Nagoa veamoya amakaiami konaga afamoma kanale kava huya oamatesayana amakupima malenaya kea amakaveno huteteya tusia havi kava nehuya Yisasi kema ohavinaya vayamoyama havi kavama nehaya kavala agaseya tusia havi kavaage nehae.
1TI 5:9 Maa humainaya keto anemogami amakia kaetetama amaya hugahae sikisitia (60) kafu humainesaya alekanoa, nagoke ve kanoale fatago huya mainesagenoma fali-mainesia alekano-mogami amakiage kaeho.
1TI 5:10 Amavagemoma kanaleyama humainesia anegi, kanale kavaage nehisaya keto alekanoyagagi, nafaneami kanale kava huya kava nehuya natu vayaene kanaleya huya neamateya, Anumaya Kotina amakua neamiya veala kanaleya huya kava hu neamateya, kana yama amakaite evayi hinageya aliya kanale hu neamateya, mukia aliyana kanaleya huya ali-mainesaya keto alekanomo-gami amakiage kaeho.
1TI 5:11 Yauva keto anemogamina amakia okaeho. Haenagaa Kalaisi aliyana neataleya alu vele umaisaya amaku amakesa havigahae.
1TI 5:12 Ani kavama hisayana Kalaisi aliya aligahune. huyama hulokiya vai-malenaya kemona ago atalenaya yafe Havi kava humainone. huya amaipa haviya huyafenagi.
1TI 5:13 Nago yaenena aliyana oaliya afaa maineya nokuyate vaineayeya umaiya-hai emaiya-hai nehuya alu veamogami ke huya atile male nehuya kanale ohunea keyagaene amakesafitila hugahae.
1TI 5:14 Yauva keto anemoya alu ve aliteya nafaneami neamateya kanaleya huya kava yagai-maisaya yafe nagaila nenahaiye. Ania hisageya kame vayatimoya havigea tagaila hu otatesae.
1TI 5:15 Nagoa keto anemoya Yisasi kema havisaya kaana neataleya Satani akavema nevaya yafe nehue.
1TI 5:16 Nagoma Yisasife havino aguafi malenea amoa agaia tayamepima keto ama mainesiana kanaleya huno hamaeno kava yagaitesie. Havigu mono nopi malesaya monema omalesigenoa kana hamaugahigi vayaamima omainesaya keto anege alita amaya hisune.
1TI 5:17 Yisasina amakua aminaya vayate kava vayamoya kanale aliya nealiya Anumaya Koti ke huhaleya nehuya kanale keage hamapaisaya vayala Kanaleya huya amatesia kava nehae. hutama ani kavama haya anonaa amakia alisaga nehutama kanaleya hutama nagoene monea amamisae huna nehue.
1TI 5:18 Anumaya Koti avopima kaemalenaya kemoa mage huno humaine Pulumakamoa viti avina aiyaleti aye hagagema hisigetamahena amavayalela nofila okiho. Amatalegeya aliyaamia nealiya vaiyeya kavela neneya vaiyeho. Mani kea nehuno nago kene mage huno humaine Aliya veamoya aliyaamiletila anonaa miyana alisageno amategahie. huno humaineane.
1TI 5:19 Nagoke kanomoa Anumayamo aliya nealisia kanomofe Naa huno havi kava nehie. hunoma hisigetamahena kea ohaviho. Tolemoganifi tagufa vayamoyama tamahapaisagetamahena havitetama kaiyekea hutesae.
1TI 5:20 Anumaya Koti aliya nealisaya veamoya kefo kavama huge huge hisagetama mukia mono note veamogami amaufi amavale-matetama amaku amakesa alitama fatago hisageya mukia veamoya ageteya koli hisae huna nehue.
1TI 5:21 Anumaya Koti aufiene Yisasi Kalaisi aufiene huno yogi-malenea ensole vayaigami amaufiene mage huna kahanepauve Anima kahapauva kemona akave nehuka veala alika fako faka ohuka nago kana kana huka mukia veala kagesa havi neamamika aliyakaa alio.
1TI 5:22 Anumaya Koti aliya alisie. huka nehanafe nago kanomo anute kaya maleka ani aliyatela aupaa alika heti oato. Agelama huteka ali hetito. Havigu nagoa vayamogami kefo yaamimo kagaipi eyafenagi kagaya fatago kavakeya huka maiyo.
1TI 5:23 Mukia kanafina kaipa kagata neaigeka kali vaya kana nehanafe titafakeyamaagela oneka nofi alagamo tina osia negeno kaipamoa kanale hino.
1TI 5:24 Nagoa veamoya kefo kavakeya nehageno kefo yaamimoa ago efufute higeya kaiyekele umainagi nagoa veamoya falakiya kefo kavala maiya nehaya veanea haenagaa kefo yaamimoa efufute huno falote hugahie.
1TI 5:25 Naa augafa kava huya kanale kava nehaya kavala mukiamogatamina fufu yate nelamakone. Fufutema nohia kanale kavamoa nagola fala okigahianagino mukia falotekeya huno fufu yate hugahie.
1TI 6:1 Yisasina amakuama aminaya veamoya, nofi humatageya afa aliyama nealiya veamoya, amatesia kava huya kava vayaamimo-gami amakia alisaga hisae. Alisaga nehuya keamia ali hipoya ohisageya veamoya neamakeya Anumaya Koti agia ali haviya nehuya Anumaya Kotiamimo kea akave nomalae. huya hugahae.
1TI 6:2 Kava vayatamimoya Yisasina amakuama aminaya veama mainaya yafe Afaa nafunagana maineafe agai kea ali hipoya ohugahue. hutama ohiho. Ani kema ohisayana Yisasina amakuama aminaya vayatela afa aliya veane mainetama tamakuama aminayafe tamakaila kanaleya hutama amaya hisaya aliyaamia aliho. Manima kahapauva kea kagaya Timotiga hamapaiyo.
1TI 6:3 Nagoa veamoya alu ke hisayana Anumayatia Yisasi Kalaisina kelamage keamona akave ohuya Anumaya Kotina haiya kava hiho. huya nohaya veala amakaiami amaugafa aliya nehaiya kanale amaku amakesa amakai amakupina tamage huno omalene. Omalenea yafe kema hisaya yafena ati neayeya Yisasi kehe ke vaiya nemaiye. Kema vaiya yapiti nago yana falote nehigeya mage huya nehae Agima haneafe ali haviya hugahe nehune. huya amakaiami keamimo tua hu neamategeya amakia hu haviya nehuya Havi kavala nehae. huya humatenayane.
1TI 6:5 Kelamage kemoa ago amakekani-mainegeya kea vaige vaige maiya nehae. Ani veamoya amakesafiti mage huya nehae Anumaya Koti kemona akave malesunana kuafenotimoa ali kasago hinageta kanaleya huta maigahune. huya tusi yate havi amakesa havimainae.
1TI 6:6 Havi amakesa nehaviyanagi tamage tagaya Anumaya Koti ke akave nemaleta ali-mainona yafeke muse nehuta Alu yaenena nagoene alisune. huta nohuna yafena tusia muse huta maigahune.
1TI 6:7 Ehema itatimoya latageta mainonana nago yana alita omenone. Tagaya falisuna yupa nago yana eteta alita ougahune.
1TI 6:8 Ani yafe Kenatiene kavetiene hai hane. Taipamoa kanale nehinageta kanaleya huta maigahune. huta hisune.
1TI 6:9 Kanaleya huta maigahunanagi Mone afenoti alita kasago hisunema. haya veala ani yamoa Kefo kava hiho. huno aye-mavataga hisigeya hanagimalenea kalifufi hemaleneya amaugafa ali haviya hisia yafe aneginagi yapi asaga hulaviya kefo kavaage hisaya yaamimo ayegeamategeya ali haviya humatesigeno amaugafa amakata aigahie.
1TI 6:10 Mukia monehema muse nehaya kavala mukia kefo kavamona aepaa hane. Ani kavamoa haga nehamaigeya nagoa veala Yisasife haviya amakupi malenaya kemona ago atalageno amaipamoa tusia kanaage hamau-maine.
1TI 6:11 Kagaya Timotigae Anumaya Koti kema akave nemalana kanomoga mukia ani kefo yana neataleka fatago kavaage hisana kagesa havika maineka Anumayamoma nehaiya kavaage nehuka Yisasife havika kagupi malenana yana atafa hulineka veafena kahau kayamopafi kahaino. Tokiya vaisana yana atafa nehuka mailava huka ako huka maiyo.
1TI 6:12 Aluya huka Yisasifema kagupi malenana kemona atafa hisanafe Satanienena kanaleya huka tua nehuka Anumaya Koti akave neuka agola maige maige hisana kahaimula atafa huo. Mukia veamogami amaufima Yisasifena havina nagupi malenoe. huka hu falotema humainana kanafina ani agolama maige maige hisana kahaimula aligane huno humainea yafe Anumaya Kotia kagaila ago huno yogi-malene.
1TI 6:13 Anumaya Kotia mukia yamogami hamaimu aepama mainea kanomo aufina hulokiya vaina kahanepauve. Ala kava kanomoa Potiasi Pailatia Yisasi Kalaisina kaiyekema hu neategenoa Yisasi Kalaisia kanaleya huno kelamage kea huno falote humainea kanomo aufina mage huna hulokiya vaina kahanepauve.
1TI 6:14 Anumaya-moma kahapai-mainea kea nehavika ani kavaageya veamogami amaufina hume hume haiyo. Aniama hisanageya veamoya Havi kava nehie. huya ohugahae. Ani kavakeya hume hume nevisanageno Anumayatimoa Yisasi Kalaisia esie.
1TI 6:15 Agaiama malenea kanama falote hisia yupa Anumaya Kotia Yisasina hutesigeno eteno elavisigeta agegahune. Tokiyaage huta tusia muse hutesuna Anumaya agaiage mukia yana kava yagaino maine. Anumaya Kotia mukiama uhagote mainaya sauve vayamo-gamina agaiage amakaseno ala sauve kanoamia maine. Ala vayamogamina agaiage amakaseno ala kanoamia maine.
1TI 6:16 Anumaya Kotia ofalino agola maige maige nehia kano maine. Agaya tusia hale yapi maineafe mopafi veala mo aupa ohuteasine. Nago kanomoa agaila oagenegi tokiyatia omaleneanagita agaila oagoteasine. Agaya agaia ala kava kano agola maige maige huno agola kava kano maisie huta agia alisaga hisune. Mani kea tamage.
1TI 6:17 Kuafenoamima kasagoya hanea veamoya ani yaamihe amaugafa aliya ohaisae. Fanane hisia kuafenoamihe amametiti ohisagi Anumaya Kotima mukia muse nehuna yama neamamia kanomofe haviya amametiti hiho huka amaumonola malo.
1TI 6:18 Mukia kuafenoamima hanesia veamoya kanale kava nehuya vayamogamina monene amaya hisae. Vayaamimofe hamau humateya vaya kaikai vea maisae.
1TI 6:19 Ani kavama hisayana kanale kavaage yayaga aliya halaya hu-maleneya haenagama ikapinaga haiya maisaya no avana huya tunage yosa neayeya kanale hamaimula atafa hu-lineya maige maige hugahae.
1TI 6:20 Vaeha Timotigae kaminea aliyana aluya huka aunevaika kava neyagaigeno Anumaya Kotia ohunea kea afa kegi ohavika kakaveno huto. Nagoa veamoya Tagaya ke havilama nehuna vea mainone. huya havige huya hisaya veamogami kea ohavika kakaveno huto. Naa augafa kemoa Anumaya Kotina kamea maine.
1TI 6:21 Nagoa veamoya amakaiami kema haviya akavema malaya yafe Anumaya Kotife havita tagupima malenona kea ago neatalae. Anumaya Kotia kayone hisia yamaa kaminageno kanaleya huno kaya hisie huna nehue. Kenia male hano hie. Nagaini nagia Polonae.
2TI 1:1 Nagaya Polonae Timotigahe aluya huno nenahaiya nafanenimogahe mani avona negaove. Yisasi Kalaisiene tokaetama maisunana Maige maige hisuna tahaimula tamamigahue. huno hulokiya vai-malenea kema havisaya yafene huno Anumaya Kotia haiya kava huno nagaila huyogi-maleteno Aposolo kanoa hunatene. Kagaya Timotiga Anumaya Kotia Nelafaene Yisasi Kalaisi Anumayatimoene kagaifena hanau hugateana kayone hu yaene kaipa falu kahaisia yaene kamisae.
2TI 1:3 Nagaila naginagomoya hu-mainaya kava huno naguamoa nahapaigena ani kate neuna Anumaya Koti aliyana nealina nateene felugaene kegeene kagaila kaya hisiafene huna Anumayamotega muse huna nunamuna huna havinegoe.
2TI 1:4 Kagaya avima atana yafene huna nagesa havinegamina kagaila kagesua yafena aluya huno nenahaigena kagesugeno naipamoa tusia musena hugahie.
2TI 1:5 Kagehokamoa, Loisiene itakamoa, Yunasiene Yisasife haviana anakupi maleana anametitia hu-mainaa kava kagaya ania huka Yisasife havika kagupi malenane huna nagesa havina negamue.
2TI 1:6 Naa hu-maineafe nagayama kagai kanute nayama malogeno Anumaya Koti aliyamona tokiya yamaa kamigeka ali-mainana tokiya yana fufu hisanageno kanale anefe tesigeka ani aliyana oataleka alige-lige huo.
2TI 1:7 Anumaya Kotima laminea Avamumoa koli hisuna tagu tagesa notamiafe tagaya tokiya yamaaene kanaleya huta veanea tagua neamamita tagu tagesalema kava yagaisuna tokiya ago tamine.
2TI 1:8 Anumayatimo ke huka falote hisana yafena kagayea ohinageka kolia ohuo. Nagaya keama huna falote nehugeya kina nopi natenaya yafena kagayea ohuo. Anumaya Kotia tokiyaa kaminegeka Yisasina kanale keama hana yafe kagaima kana yama kamisageka nakaiene tokaetaa aligahue.
2TI 1:9 Anumaya Kotia kefo kava huna yapiti tagu tamena alino katigeta alu aotage anagaa maisuna yafe tagaila huno yogi-malene. Tagayama kanale humainona yafene huno huyo okinegi agaia agesa haviteno haiya kava huno kayone hulategahe ani kavala humaine. Ikaene mopaene falote ohunegeno Yisasi Kalaisia Kayone hulamategahue. huno agesaa havimaineanagino menia Yisasia efalotema humainea yateti taveli-maine. Tagayama kefo kavama huna yamo anonaa Yisasi Kalaisia alia yafe tagu tamena aligatiteno fali yamo tokiyaa ago ali hano hu-taleteno ofalita agola maige maige hisuna tahaimula tamiteno umaige maige hisuna kaana ago taveli-maine.
2TI 1:11 Nagaya Yisasina kanale kea huna falote nehuna huge amavelige hisuafene huno Anumaya Kotia nagaila huyogi-malegena Aposolo kanoa mainoe.
2TI 1:12 Ani yafe nagaila ali haviya hunatayanagi nagaila lamage huno nagayehena ohuna Anumayamofe havina nagupi malena nametiti humainoa kanomofena ago havilama humainoe. Agaia naminea aliyanagino auvainenateno kanaleya huna alisua yafe Nagaila nahamaegahie. huna nagesa havimainoe. Ani kavala nehinageno Yisasia ikapinagatima eteno elavigahie huna nehue.
2TI 1:13 Naa huo huna hu-kavelina kahapai-mainoa kelamagea akave malo. Kagaya Yisasifena havika kagupi maleteka Yisasi Kalaisina kaipa amineka veafena kahau kayamopafi kahaisigeka kahapai-mainoa kea akave malo.
2TI 1:14 Kagaya Anumayamo kelamage kea fatago huka hamapaiyo. Alu ke ohisana yafe kava huo. Taguafima mainea Alu Aotage Avamuamoa kelamage kea kaminageka ani aliyamona kava hugane.
2TI 1:15 Kagaya ago havimainane Esia* kotega mainaya veamoya nagaila ago natalenae. Ani vayapitila tole kanolatamogani anakia Fiselasiene Hemosenisiene nagaila ago natalenaa kea ago havimainane.
2TI 1:16 Onesifolasia mukia kanafima kanale yama huno naipa ali falu humainea yafena Anumayamoa Onesifolasiene agaia afamoene kanaleya huno amaya hisie huna Anumayamotega havinegoe. Nagaya kina nopima mainoa kea haviteno agayea ohunegi afaa nahamae-maine.
2TI 1:17 Naa huteno Lomu kumate evayi huno tusiya huno nagaifena natiyemaino yemaino nageno ali falote humaine.
2TI 1:18 Naa kavama humainea yafena Anumayamotega mage huna havinegoe Yisasima esia kanafina agaifena hau huteteno kalagi aitesie. huna nehue. Efesusi kumatela kanaleya huno naya humainea yafena kagaya ago havimainane.
2TI 2:1 Nafanenimoga mukia yupa Yisasi Kalaisiene tokaeka mainana yafena atalegeno kayone yamaa kaminenageka mai lokiya vaika maiyo.
2TI 2:2 Maineka mukia veamogami amaufima huhalenama hamapai-mainoa kea nagoenema efi efi huya kanale aliya nealiya veamogamina hamapaisanageya ani veamoya alu veamogamina hamapaisae.
2TI 2:3 Kagaya Yisasi Kalaisina kanale ati kanoamoga aliya nealina yafema hu haviya hu negataya yafena mai lokiya vaika maiyo.
2TI 2:4 Ati vayamoya amakaiami kava kanoamimo muse humatesifa huya alu aliyana oaliya alu kehena nohamaiye.
2TI 2:5 Nago yaenena maa humaine oagase aagase huya yokalo nelageno nago kanomoa hagoteno agaseno umaineanagi ani yokalomo kahegi keama akave omalesiana kanale anona miyamaa oaligahie.
2TI 2:6 Nago yaenena maa humaine nagoamoya hoya aliyana tusiya huya nealigeno hoyaamifi kavemoa nena hutegeya hagoteya kanale nenaa aligahae. Aligahagi Anumayamoa ania huno anonatia tamigahie.
2TI 2:7 Tamigahigi mani kea havilama huka havisanageno Anumayamoa agaia ani mukia yamo aepaa kahapaigahie.
2TI 2:8 Yisasife kanale ke huna falote nehua kemoa Tevitina aginagomoa Yisasi Kalaisia fali-mainefitima heti-mainea yafena nagayama huhalena nehua kehena kagesa havi havi huka maiyo.
2TI 2:9 Ani kema huna falote hu-mainoa keleti nagaila aliya haviya hunateteya kefo kavama nehia kanomoma hutenaya augafa kava hunateya kina nopi natayanagi Anumaya Koti kemona kina nopina oategahayanagino mukia mopalega ute ete hugahie.
2TI 2:10 Ani yafe mukia Anumaya Kotima huno yogi-malenea veala Yisasi Kalaisiene tokaeya maisagenofena Anumaya Kotia amaku amamena aligatisigeya agola maige maige huya tokiya hale yapi maisaya yafe nagaya naugafa nagata neaigena mailava huna mai lokiya vaina mainoe.
2TI 2:11 Tamagema humainea kemoa mage huno humaine Yisasiene tokaeta fali-mainenutahena agaiene tokaeta hetita maigahune.
2TI 2:12 Huhaviya hulatesaya yapina afaa lokiyama vaita mailava huta mainuta haenagaa Yisasiene ala sauve vea talo huta kava yagaita maigahune. Tagaya agaima takavenoma hutesunana agaienena tagaila ania huno akaveno hulamigahie.
2TI 2:13 Tagaya agaiama humainea kea takavenoma huteta havita tagupi maleta tametitima ohisunagenoa agaiama hu-malenea kegino kelamage kano maineanagino ani kea oatalegahie.
2TI 2:14 Anima humainoa kehena amakesa huhagalo humateteka Anumaya Koti aufina mage huka humakesa huo. Anumaya Koti kehena kea ovaiho. Ani kehema kema nevaiya kemoa haviya veamogamina amaya nohigi amaku amakesa alino haviya nehie.
2TI 2:15 Anumaya Koti aufima hetisana yupa kagai aliyafena muse hugatesia yafena Anumayamona kanale kelamage kemona aepaa havi fatago huka kaya mukiki huka hu falote nehuka kagayea ohino.
2TI 2:16 Nagoa veamoya Anumaya Kotina nohaiya kea, afa keyagama, mohu mehu hisagekahena ani kavama hisalega ovuo. Ani kema nehaya veamoya Anumaya Koti kea amakaveno hutesaya kate amavaleya nevae.
2TI 2:17 Ani kema haya kemoa tusia havi amamumoma leno alakefama nehia kava huno ani keamimoa ali haviya nehamaiye. Ani kema hamanepaiya vayapitila tole kanolata mainae anakia Himeneusiene Filetasiganie.
2TI 2:18 Ani kanolata-mogania Anumaya Kotina kelamage keamo kaana neataleana mani havigea mage hae Agoma fali-mainaya vayala hetiya maisaya kanamoa ago vayi humaine. huana nehuana Nagoa veamoya fali-mainesafitila he otigahae. huana humainaa keleti nagoa veamoya Yisasife haviya amakupi maleya amametitima haya yamona ali haviya nehae.
2TI 2:19 Haanagi Anumaya Kotia mono nomaa kisia yafe tokiyaage anumaya yosa aye-malenea yosale mage huno kae-maleneane Anumayamoa agaia veamogamina ago amakelama huno amake-maine. huno humaine. Nago kene mage huno kae-maleneane Nagaya Anumayamona nafanea mainoe huya hisaya veamoya kefo kavala amakaveno hutesae. huno humaineane.
2TI 2:20 Nagola ala nopina alua augafa yopayaga hane. Nagoa kanileta yafateti talo humale yaene tokiya yafateti talo humale yaene yosaleti talo humale yaene mopaleti talo humale yayagaene hane. Nagoa yopa kanale aliya alisaya yafe talo hu-malenagi nagoa yopayaga tagaye hisuna augafa aliya alisaya yafe talo hu-malenae.
2TI 2:21 Ani yopayaga aliya alisayafene huya talo humalenaya kava huno tagaila kanale aliya alisuna yafe talo hulatene. Nago kanomoa agaye hisifa kefo kavaama ataleteno alu aotage kanoma maisiana Anumaya Kotia Kanale aliyania aligane. huteno talo tala huno ani aliyatega atene.
2TI 2:22 Neyavemoya haya kava huka age kahaye hisana kagu kagesa ohavika kakaveno huto. Maifalu ohuka fatago kavakeya nehisanageya oniyaami omalenesia amakualeti nunamu nehisaya veamoyaene Anumayamofena havitama tamakupi nemaletama tamafu tamakanafena tamahau tamayamopafi nelama-hainagetama tamaipa falu yapi maisaya yafe tamaya mukiki hiho.
2TI 2:23 Naa nehuka havi amakesa haviya aifonafo ke huya ke nevaiya mo hu me hu kema nehaya veanenena to okao. Ania augafa kefitila tu hisaya yana falote nehia yafena ago havimainane.
2TI 2:24 Anumayamo aliya anagamo-gatama kea ovaitama kanaleya hutama mainetama veamogamina kanaleya hutama ali kayonea humatetama mailama hutama mainetama kanale keage hamapaisae.
2TI 2:25 Ani kavama nehuya kekaama ohavisaya veamogamina ali kayone huka kanale kaana amave-lisanagenoa Anumayamoa veamoyama havisaya yafena amakua alino aiyahae hinageya kanale kelamage kea havisafi?
2TI 2:26 Satania agai kema akave malesae huno amatafa huno hanagi malenea kalifumoa ago hategeno Anumaya Kotia alino kalu hematesigeya ani veamogamina amakesamoma aihagalo hamaisigenoa kanaleya huya fatago kate ugahae.
2TI 3:1 Ma yafe tamakesa havi havi hutama maiho. Yisasia egahema hisigenoa tusia kanaage yayaga falote hugahie.
2TI 3:2 Ani kanafina maa hugahae. Veamoya amakaiamihekeya hamaugahie. Mone alisaya yafe aluya huno hamaugahie. Amakaiami amaugafa aliya haiteya Ala vaya mainone. huya hugahae. Anumaya Kotiene anagaamoyaenefena hu haviya humategahae. Itaamo-afoamogami kea ali hipoya ohugahae. Nagoa yafena huya musena ohuya kefo kavaage maiya hugahae.
2TI 3:3 Amakaiami anagaamimo-gamifena amakesa haviya oamamiya kefo kavaamia aige-amateya atale oamateya kea aliya atifi mafi huya amakia hu haviya hugahae. Amakaiami amaku amakesalela kava yagai lokiya ovaiya hamaye hu yana aupaa akave nemaleya fatago kavafena ohamaugahie.
2TI 3:4 Havigu ke nehatageya anagamimo-gamifena kame vayaamia hamapaigahae. Amakesa ohaviya aupaa kefo kavala nehuya tusiya huya amaugafa alisaga nehuya tusiya huya hamayema hisia yafena havime havime nehaiyanagi Anumayamofena nohamaiye.
2TI 3:5 Ani veamoya mage huya nehae Tagaya mono kea nehavune. huya nehayanagi havigea amegati nehuya Anumaya Kotina tusia tokiya yamaa amakaveno huteya aliya vai oayegahae. Ani kavaagema hisaya veanenena tokaeka omaika aluale maiyo.
2TI 3:6 Na kavama nehaya vayapitila nagoa vayamoya alu veamogami nopi haisageyahena ani nopi anemogamina kanale amakesa omaleno afaa havigu amakesale maineya kefo kava nehuya amatafama hayana kanaage nehamauno higeya maiyana alu kefo yaenefena amakesa nehaviya anene ke hageya aupaa amakaya Tamage nehae. huya ani keamia ali hipoya hageya ani vemoya ani anemo-gamina amatafa huya amaku amakesa ali haviya nehae.
2TI 3:7 Ani anemoya mukia kea havigu afaa nehaviya kelamage kea neataleya aliya amakupina omalenae.
2TI 3:8 Omalageya ani havi vayamoya nayona Isipiti kotega tole kanolatana Yanesiagi Yapalesigania humainaa augafa kava humainae. Ani kanolatana Mosesena aliana havi ya huana anakaveno hutenaa augafa kava huya mani havi amakesa hanea vayamoya kelamage kemona amakaveno huteya Anumayamofena amegati haviya amakupina omalageno Anumayamoa ago ama-taleneane.
2TI 3:9 Amatalegeana nayoma Isipiti kotega kanolatana havi auava kavala haageya anakelama humainaya augafa kava huya mani vayamo-gamina amakelama nehuya Kefo kavaage maiya nehae. huya humatesageno aliyaamimoa ala ohugahie.
2TI 3:10 Nagaya naa augafa kanoa omainogeka kagaya Timotiga mukiama humainoa kavala ago age-mainane. Nagayama hamanepauva kene nemauva auavaene mukiamo-gamifema nenahaiya yamona aepaaene Anumayamofe havina nagupi malena nametiti nehua yaene ago age-mainane. Nagaya kanaleya huna mainena veala ako huna mailama huna veafena nahau nayamopafi nenagea kavaene ago age-mainane.
2TI 3:11 Yisasi kema nehua yafene huya nagaila ali haviya hu-natageno nagata aiyanagi mai lokiya vaina mainoa yana ago age-mainane. Atiyoku kumateene Aikoniamu kumateene Lisitala kumateene nagaila aluya huya hu haviya hunatayanagi Anumayamoa nagaila naya huno naugafa ali-gatigena ofalina mainoe.
2TI 3:12 Ofalina afaa mainogi tamage mukia Yisasi Kalaisiene ali lokaeya fatago huya maisaya veamo-gamitela hu haviya hulamatesaya yamoa falote hugahie.
2TI 3:13 Falote hugahigi kefo kavama nehaya veanene vagala nehaya veanene tusiya huya havi kavala nagoene hugahagi Satania aye-mavataga hisia yateti veala aye-mavataga vatagoa hugahae.
2TI 3:14 Hugahagi kagaya aniama haya kavala ohuka kahapai-mainona veamogatina agoma tage-mainana yafena kava nehuka agoma kave-ligekama havika kagupi maletafa humainana kemofena kagesa havilama huka maiyo.
2TI 3:15 Osi nafane kanoama mainana kanafina Anumayamo avopima kae-malenaya kea ago havimainane. Ani kemona havika Yisasi Kalaisifema havika kagupi malesanana kagaila kagu kamena aligatigahie huya kae-malenaya kea kave-limainae.
2TI 3:16 Mukia Anumaya Koti avopima kae-malenaya kemoa Anumaya Kotia agaia veaamona hamapaigeya kae-malenayafe mukia mani kemoa kanaleya huno fatago kavala lave-nelino kefo kava hu yafene huno ke nelama-kino kayagi-mainea yana ali fatago hutama vaiyesayafene huno kanale kaana tave-nelie.
2TI 3:17 Tave-nelino Anumaya Koti aliyama nealisia kanomoa mani kea havino kanale huteno fatago huno talo tala huno mukia kanale aliyana aligahie.
2TI 4:1 Yisasi Kalaisia fali-mainaya veanene afaa mainaya veanene kaiyekema hulatesia yafeene Yisasia agaiama kava yagaigahema ikapinagati eteno elavisia yafeene Anumaya Koti aufiene Yisasi Kalaisi aufiene tokiyaage ke huna kahanepauve.
2TI 4:2 Kanale kanafiene havi kanafiene veamoya havisaya kanafiene ohavisaya kanafiene Anumayamo kea aluya huka kaula ofaeka huge huge huka hamapaiyo. Maigayetama maiho. Kefo kavama nehaya yamona anonaa aligahae. huka yuna kefiti vase huka hamapaiyo. Ani kavama hisana yafena kasalo okahaenageka mailava huka maineka kanale kea huhaleka hamapaiyo.
2TI 4:3 Nagi haenagaa veamoya kelamage kea ohavisaya amakesa haviya amakaveno huteteya amakaiami hamaisia kema havisaya yafe amakesa haga neneya kasagoya vayayaga kanale ohunea kema hamapaisaya yafe amavale-mainae. Aniama haya yafe menia kaula ofaeka aluya huka kanale keage hamapaiyo. amakaiamima hamaisia kema hisaya vayate alu vayamo ke alu vayamo ke haviya havigema haya amavagea havigahae.
2TI 4:5 Kagaya mukia kanafina kagu kagesale yagai lokiya vaika maiyo. Kana yama kagaipi falote hisigeka mailava huka maiyo. Yisasina kanale keama huhaleka hisana aliyana nealika mukia Anumaya Kotima kaminea aliyakaa mukia alivayayo.
2TI 4:6 Kagaya age-mainane nagaya Anumayamo aliya nealuanagiya nahaesageno kolania lavisigena ma mopa neatalena falina visua kania ago falote humaine.
2TI 4:7 Satanienena kanaleya huna ago tua hu-malenoe. Anumaya Koti naminea katela ago naiyage naiyage huna evayima huo hunoma humainelela ago evayi humainoe. Anumayamo aliya alina agai kema havina nagupi malena nametiti humainoa yania oatalenoe.
2TI 4:8 Oatalenoa yafe Anumaya Kotia kanale anona yania natene. Fatago huno kaiyeke hulatesia Anumayatimoa kaiyeke hulatesia kanafina Fatago kano mainane. huno hunateteno aliyamaa ali-mainoafe kanale anona yania namigahie. Ani anonaa nagainigela oaligahugi mukia veama Anumayamoa etenoma elavisia yafe muse nehuya agava nemaiya veanene ani anonaa aligahune.
2TI 4:9 Kaiyayeka nakaitega aupaa eno.
2TI 4:10 Nago kanomo agia Timasie ma mopafi yafe haigeno nagaila nenataleno Tesalonaika kumate umaine. Nako kanomo agia Kalesenie Kalesia kotega vigeno Taitasia ania huno Talamesi kotega nataleno umaine.
2TI 4:11 Nago kanomo agia Lukue agaiage nagaienena maine. Makia kanaleya huno naya hugahigi kagaya avale-lineka eno.
2TI 4:12 Nagaya Tikikusina ago hutogeno Efasusi kumate umaine.
2TI 4:13 Nagaya yasi siotania Taloasi kumate Kapasi nopi atalena emainogi nealika avoniaene yagamo augafaleti talo hu-malenea avofena aluya huno nenahaigi alika me namio.
2TI 4:14 Haesa kapale aliya nealia kanomo agia Alekasatae nagaila nagia alino haviya hunateanagi Anumayamoa anima humainea kava huno agaila anona yamaa havi yana amigahie.
2TI 4:15 Aluya hutama agaifena kaye ho. Tagayama humainona kehena tusiya huno hai vai-mainea kano maine.
2TI 4:16 Ehema kaiyeke hunatageya nagoa veamoya naya hisaya yafe nagaienena hetiya omaiya natalagena nagainige heti-mainoe. Nagaima nataleya ufuma humainaya yafena Anumayamoa anonaamia havi yana oamamisie huna nunamupiti havinegoe.
2TI 4:17 Vayamoya nagaila natalayanagi Anumayamoa naya huno nagaiene hetino tokiyaa namigena mukia Yuta vea omainaya veamoya havilama huya havisaya yafene huna Anumayamo kea huhalena hugeya ani kaiyekema hunataya vayamoya kaveage afua laiyonimoma hia kava huya naugafa anitaga huya negahe hayanagi Anumaya Kotia naugafa aligati-maine.
2TI 4:18 Anumayamoa ani kava huno mukia havi kava hugahe haya yapitilagi nagaila nau nevaino nagu namena aligatiteno agaia ikapinaga kavama hu-mainelega navaleno nategahie. Ani yafe Anumayamo agia alisaga nehuta agai agigeya agola alisaga hume hume haisune. Tamage.
2TI 4:19 Kagaya Palisilaene Akuilaene Onesifolasina agaila nomaafi mainaya anagaaene nagainia hu falu fala kenia humato.
2TI 4:20 Nago nafanemo agia Elasatusie Kolini kumate atalogeno mainegeno Talofimasia kali aligena Mailitusi kumate atalena emainoe.
2TI 4:21 Kagaya havigu mainesanageno yasiage ikana evayi huyafenagi evayi ohunesigeka kaiyayeka ago eno. Mukia lafu-taganayaene Yupulusiene Putenisiene Linusiene Kolotiaene felugae huya hu fulu fala hunegatae.
2TI 4:22 Nagi Anumayamoa kagaila kagu kagesafi maineno kayone hutama maisaya yana tamamisie huna havinegoe. Kenia male hano hie. Nagaini nagia Polonae.
TIT 1:1 Nagaya Polonae Anumaya Koti aliya kano mainoanagina Yisasi Kalaisina Aposolo kanoa mainena mani avona kaena Taitasiga negamue. Anumaya Kotia hapali-malenea veala agaife haviya amakupi maleya amametiti huya kelamage kea havilama huteya Anumaya Koti aulagafina fatago huya maisayafene huno hunatene.
TIT 1:2 Anima haviya amakupi maleya amametiti nehaya yafena kelamage kemona aepaamoa mage humaine Anumaya Kotia, havigea ohu kanoe, mukia yana talo ohuneno Agola maige maige hisaya tamahaimula lamamigahue. huno hu lokiya vaino hu-malene.
TIT 1:3 Hu-maleteno haenagaa agaia hu-malenea kanafi Anumaya Kotia, tagu tamena aligati-mainea kanogino, Mani kea hamapaiyo. huno nayapi maleneanagina mani kea huhalena hamapaitogeno efufute huno falote humaine.
TIT 1:4 Taitasiga, Anumaya Koti keleti katenoa nafanenimoga, taametiti nehua yatiamoa nagoya humaine huna mani avona kaena negamue. Anumaya Kotia Nelaafaene Yisasi Kalaisia, tagu tamema aligati-mainea kanoene, kayone hu yaene kaipamoa falu hisia yaene kamisae.
TIT 1:5 Kanale ohunea yama ali fatago hisanafeene mukia kumatefe kahapai-mainoa kava huka soka vayala mukia kumatela ali heti-matesanageya Yisasi anagatela yagaisayafe Kaliti kumatela katalogeka mainane.
TIT 1:6 Maama nehisaya vaya ali heti-mato. Kefo yamaama veamogami amaufima omalenesia kanoe. Aama nagoke atenesia kanoe. Nafaneyagaa Yisasife haviya amakupi nemaleya neamafagami kehe Aao. huya nohisaya nafaneyagaamima mainesia kanoe.
TIT 1:7 Soka kanomoa Anumaya Koti aliya alisiafe mukia veamogami amaufina kefo yamaa omale kano maisie. Kea ohavino agaia augafa alino ohai kano maisie. Aupaa hai ovai kano maisie. Havili neno aneginagi nohisia kano maisie. Veala mo hamae me hamae nehisia kanoa omaisie. Havige huno mone alisia yafema nohaisia kanoe.
TIT 1:8 Natu vaya alino kanaleya hu neamatesia kano maisie. Kanale auava yafema nehauno akave huno agu agesale yagai lokiya vaino maisie. Fatago kano alu aotage kanoa maineno augafa ageno hayea nohisia kano maisie.
TIT 1:9 Agaiama kelamage kema havilinesia kea atafa huno atalako hulineno nagoa veamogami amaku amakesa ali lokiya vaisiafe ani kea hamapaino kema naneka neaisaya veamogamina Havige nehae. huno ani kea hamapaisigeya havigeamihena amakaye hisae.
TIT 1:10 Tamage kasagoya veanea ke ohavi veane mainae. Ani veanemoya kemona aepaa ohuya afa keage maiya nehuya havigeage yaamileti mukia veamogamina aye-mavataga nehae. Aniama nehaya veala nagoa kasagoya Yuta vayamoya Tamaugafa laga hiho. huya humainae.
TIT 1:11 Nehagi mani kema nehaya vayala Naa kea ohiho. huka kahegi-mato. Ani vayamoya moneamia havige hamapaiya yateti nealiya nagoa veamogami afamoamiene amaku amakesafima hanea kea ali haviya nehae.
TIT 1:12 Nehagi nagola Kaliti kumate kanoa, aune laga nehia kanomoa, mage huno humaineane Kaliti kumate veamoya havigea tusiya huya nehuya afai afu kana huya ke ohavi veanea felu maineya kaveage nege nege nehaya veane mainae. huno hu-maineane.
TIT 1:13 Lamage hu-maineafe kemama-kisanageya amametiti humainaya kemona atafa huya ali-talako hisae.
TIT 1:14 Yuta vayamoya havigu-nagu kene nehuya kelamage kemona amakaveno nehaya veamogami kahegi kene ohavisae.
TIT 1:15 Amaku amakesamoa oniya ohunea veamogami amaulagafina mukia yamoa oniyaagela ohunegi Yisasife haviya amakupi maleya amametiti nohaya veamogami amakupina oniyaage hu-maineanagino mukia yana oniyaage hu-mainegeno amaku amakesamoa Ma kavala kanale yanagi atu yana havi yane. huya ohavinae.
TIT 1:16 Ani veamoya amavayaleti mage nehae Anumaya Kotina agelama hu-mainone. huya nehayanagi nemaiya auava kavaamimoa ani kehena Havige nehae. huno tahapai-maine. Anumaya Koti kea aliya neatagayageno kanale auava kava hisaya tokiyaamia omalegeno Anumaya Kotia amakaifena tusiyate nohaiye.
TIT 2:1 Kagaya Taitasiga akave malesayafe kelamage kea huhaleka hamapaiyo.
TIT 2:2 Vayatamamo-gamina mage huka hamapaiyo Havi lina netama aneginagia ohiho. Tamaku tamakesale yagaitama tokiyaage hiho. Yisasife havitama lamakupi malenaya yatela tokiya vaitama maiho. Veafena tamahau tamayamopafi nelamahaisia kavaage hiho. Kana yama falote hulamatesigetama tokiyaage hutama hetiho. huka huo.
TIT 2:3 Ania huka alekano-gamifena hamapaiyo Anumaya Kotina haisia kava nehutama alumo kea alitama atifi mafi ohiho. Havilina netama aneginagia ohutama kanale auava kavakeya amaveliho. huka huo.
TIT 2:4 Amave-lisageya yauva anemoya anauamimo-gamiene nafaneyagaa-miene amakuama amamisayafena havigahae.
TIT 2:5 Haviteya amaku amakesale yagai lokiya vaiya maineya alu velela ouya anauamimo-gami amaiyafinaga maineya no kumaamiene nafaneyagaamiene kanaleya huya yagaiya maisayana nagoa veamoya Anumaya Koti kemofe Afa kea havi ke hane. huya ohugahae.
TIT 2:6 Ania huka neyavemo-gamina tokiyaage kea mage huka hamapaiyo Tamakaitami tamaku tamakesale yagaitama tokiyaage hutama maiho. huka hamapaiyo.
TIT 2:7 Kagaya mukiama nehana auavakaa kanale kavaage hisanageya kakave maleya visae. Visageka fatago kavaage nehuka kanale mono kema hisanana afa kea ohuka kagesafima havilama hu-mainana keage huhaleka hamapaiyo.
TIT 2:8 Kelamagea hisanageya kame vayatimoya Havige nehane. huya hisaya keamia omalesigeya tusia amakaye hugahie.
TIT 2:9 Aliya veamo-gatama mukia kanafina kava vayaamimo-gami amaiyaafi maisageya kavaamimoya muse hu-mainaya kava hutama amakaifena amakavelaga kefo kea ohiho.
TIT 2:10 Haviva yaamiene monene musufayana ohutama efi efi hutama kanale kava hisageya kava vayatamimoya tagu tamema aligati-mainea Anumaya Koti kea alisaga huya havisaya amaku amakesa hanegahie. huka hamapaiyo.
TIT 2:11 Veamogami amaku amamema aligatisiafe Anumaya Kotina kayone yamaa ago efalote humaine.
TIT 2:12 Efalote humaineno Anumaya Koti auava ya akave omalesunafeene mopafi yafema age lahaye nehisuna kefo kavafeene takaveno hutesuna yafe lave-neliye. Menia ma kanafina lagu tagesale yagaita tokiyaage huta maineta fatago huta kaana vaiyesuna kavala lave-neliye.
TIT 2:13 Lagu tamema aligati-mainea Anumayati Yisasi Kalaisia hale yamo tokiyaaene efufute ataleno evayi hisiafene huta tametitia nehuta muse huta agava mainone.
TIT 2:14 Kefo kavama maita nehuna yamo nofila hulatenegeno tagu tamema aligatisiafene huno Yisasia agaia augafa hakino fali-maine. Ani kefo yapiti alino kalu helateno lavayu hisia miya ataleno fali-maine. Lavayu huteno mukia kefo yatia ago aye hami-lategeno taguamoa efeage higeta agaia veane mainonafe tagaya taya mukiki huta kanale aliya alisunafene huno fali-maine.
TIT 2:15 Manima hua kea tokiyaage huka veamogamina amaku amakesa alika amakafa hugeya haviya lokiyaage huya akave malesae. Havigu nagoa veamoya kagaife Afa kano mainane. huya hugateyafenagi kagaya tokiyaage huka maiyo.
TIT 3:1 Mukia veamoya ala Kamani kava vayamogami amaiyaafi maisayafe ali-makafa hisanageya amakai kea akave maleya kanale auava kavakeya hiho.
TIT 3:2 Nagoa veamogami amakia hu haviya hu oamatetama tamaipa falu yapi maiho. Tamaugafa alitama ohaitama mukia veamogamina ali kayone humateho. huka hamapaiyo.
TIT 3:3 Nayona tagayaenena aifonafo lagu tagesa havita Anumaya Koti kea akave omalonageno Satania aye-lavataga higeta lagaiti age lahaye huna kefo yaene taugafamo muse hia yamoene tatafa huno atalako higeta ani nofipi maineta veafe havita haviya humateta alumogami yatefe age lahaye hunageya veamoya lagaila tusiya huya kamea hu-latenayanagita ania huta kame huta mainone.
TIT 3:4 Naa huta mainonanagi lagu tamema aligati-mainea Anumaya Kotia kayone hisuna yamaaene tagaife hau ayamopafi hau-mainea yaene taveli-mainea kanamoa vayi higeno tagu tamena ago aligatimaine.
TIT 3:5 Tagayama fatago kavama humainona yateti tagu tamena ali okatinegi tagaifena agaia hauma hulatenea yateti kefo yatia aye hami-lategeno Alu Aotage Avamumoa haegafa tahaimula ago tamigeta haegafa veane mainone.
TIT 3:6 Mainonageno lagu tamema aligati-mainea Yisasi Kalaisia fali-mainea yateti Anumaya Kotia Alu Aotage Avamula ago ali helafino lamine.
TIT 3:7 Tamineafe Kalaisia agaia kayone hulatenea yateti tagaifena Nagaini fatago veane mainae. huno hu-lateteno maige maige hisuna tahaimula tamineanagita agaima agesunafe tametitia nehuta agava mainone.
TIT 3:8 Mani kemoa kelamagelafa haneafe nagaya musekaa nehugi Anumaya Koti veamogamife mani kea huhaleka hulokiya vaika huo. Anumaya Kotife amakupi malenaya veanea kanale auava ya huya hetiya tokiyaage hisayafe mani kea huhaleka huo. Ani yamoa kanaleya huno mukia veala amaya hugahie.
TIT 3:9 Amaya hugahigi keoke kaoke kene agili kene tototamimo-gami amakile kene kahegi kemofeene hatagetama ke ovai avai ohiho. Ani yamoa tagaila laya huno nago augafa kanale yana otamigahie.
TIT 3:10 Nagoa veamoya mono keleti ke ovai avai huya ali haviya nehisaya veamogamina amakesa alio. Aliteka tole kanalema hisanageya kekama ohavisageka afaa neamataleka kakaveno humato.
TIT 3:11 Naa veamoya Anumayamo kafena neataleya amakaiamima kefo kavama haya yafe amakaiami amakuamoa kaiyekea humatene huta ago havimainone.
TIT 3:12 Nagayama Atemasipi Tikikusipi hunatesugeana kagaitega uvayima hisaageka kagaya aupaa nagaitega Nikopolisi kumate eno. Nagaya Nikopolisi kumate tani kotisia kanafina maisua nagesa nehie.
TIT 3:13 Apolosiene kahegi kema havilinea kanoa Senasiene kava hunateka katema visaageka anaya hisanageana nago yafena ati oayeana visae.
TIT 3:14 Tagai veamogamina mukia yaamima omalenesia veala hamamaesayafe kanale aliya alisae. Na kavama hisayana kanale alagaa ayegahae.
TIT 3:15 Nagaienema mainaya veamoya Mainafio? huya hu falu fala hugatae. Anumaya Koti kema aliya amakupi malenayafenagiya tagaifema hamaiya veamo-gamifena Mainafio? huya hae huka hu falu fala humato. Anumaya Kotia kayone hisaya yamaa tamamisie. Kenia male hano hie. Nagaini nagia Polonae.
PHM 1:1 Nagaya Polonae Yisasi Kalaisi kema nehua yateti navaleya kina hunataya kanogina nagaiene Timoti nenafuene taagaya mani avona kaetaa Filemoniga nelamue taagaiene Yisasi aliyama nealina kanogino taahau taayamopafi laahaigetaa nehue.
PHM 1:2 Taagaya Apiyaga taasatiamogaleene Akipusigaene Yisasi keleti taagaiene ati vaya kana huta tuma nehuna kanomoga Yisasi kema havigahe kagai nopima melitalu nehaya veamogamifeene mani avona kaetaa nelamamue.
PHM 1:3 Anumaya Koti, Nelafaene Yisasi Kalaisi Anumayatimoene kayone hisaa yaene tamaipa alino falu hulamatesae.
PHM 1:4 Kagaifena Anumayatimoa Yisasina agua amitafa humainea kano maineno mukia Yisasina amakua amiya veafena hau ayamopafi nehaiye. huya nahapaigena havua yafena nagaya kagaifena nagesa havi havi huna Anumayamotega kagai kagia ayena havinegoe.
PHM 1:6 Kagaya Filemoniga Yisasife havika kagupi malenana nenafuga mainanagena nagaya Anumaya Kotitega mage huna havinegoe Kalaisia mukia yana kanale yama taminea yafena havilama huta havisune. huna havinegoe.
PHM 1:7 E, nenafugae mukiamoya Yisasina amakuama aminaya veafena kahau kayamopafima negahaiya yamoa ani veamogamina amaipamoa falu hisea yama amamina yafena nagaya tusia muse ani yafena nehuna naipamoa falu huno kanale nehie.
PHM 1:8 Nagaya ma nagesa nehavue nago kavala fatago yama hisana yana hanegi havio. Yisasi Kalaisiene ailokaena mainena tokiyaage kefiti Ani kavala huo. huna huleasinagi nahau nayamopafima nahaiya yafene huna yuna kelegati kahavi-negoe. E, nagaya Polona kosuna mainogeyagi Yisasi Kalaisi kema hua yateti navaleya kina hunatagena mainena mage huna kahavi-negoe.
PHM 1:10 Kagaya Filemoniga nagai nafanea Onesimusina Kahau huto. huna kahavi-negoe. Nagaya nofipi mainena Yisasife havino agupi malesia yafe hapaugeno havino agupi malenea yafe nagai nafane maine.
PHM 1:11 Nayona kanaleya huno aliyakaa oalinegi menia kagaiene nagaienena taayama hisia aliyana kanaleya huno menia aligahie.
PHM 1:12 Nagaya menia kagaitega etena hutogeno nevianagino name-kafamoa agaiene nevie.
PHM 1:13 Yisasi Kalaisifena kanale mono kema humainoa yateti nofipi mainoanagina Onesimusina atafa hisugeno nagaiene maineno kagai anonaa nahamaesie huna nehue.
PHM 1:14 Nehuanagi kagayama ani augafa kavafema E. huka ohisanagena agaifena Ouka male maiyo. huna ohuleasinagi kagayama nagaiene maisia yafe nenahaiye hukama hisanana kanalele.
PHM 1:15 Nagesa havuana eteno kagaiene agola maisia yafe osi kana kanoa Onesimusia kataleno umaine.
PHM 1:16 Umaineanagino nahau nayamopafi nenahaiya kanogino menia nofipi maineno miya oali aliya kanokaamoke omainegi Nahaiya nenafu maine huka nagua amisua aliya kano maine. huka kagesa havi neamika Yisasina agua aminea kano maine. huka nagoene kagua amigane.
PHM 1:17 Kagayama nagaifena Yisasi Kalaisi aliyate tokaetaa nealua nenafue. huka kagesama havinukahena nagaima navalesana avamete huka Onesimusina avalo.
PHM 1:18 Nagola havi yama hugateteno anonaama eteno kamisia yama omalesigekahena agai agia neataleka nagai nagile kaemalo.
PHM 1:19 Nagaya Polona nagainia nayapiti mani avona kae-maletena nagainia agai kemo anonaa negamue. Tamage Yisasi kema kahapai-mainoa keleti kagu kamena aligatea yafema havika namisana anonaama haneanagika ani yana Namio. huna kahavi-okegahue.
PHM 1:20 E, nenafugae Anumayamoene ailokaetaa mainoa yafe ani kavama hisanagena muse hisugeno naipamoa kanale hugahie. Afaa ani kavala hunato.
PHM 1:21 Kahapauva kema akave malesanana nagoene kahapauva kemona agaseno kanale yana hutegane huna nagesa havina mani avona kaena negamue.
PHM 1:22 Nago kene hanegi nagaya faesua nonia talo tala hunato. Anumaya Kotitega nagaifema havigana kema haviteno hunatesigena tamakaitega ugahue huna nametiti huna mainoe.
PHM 1:23 Epafalasia Yisasi Kalaisi kea humainoa yafe nagaiene kina nopi mainea kanomoa Mainano? huno hu falu fala hugate.
PHM 1:24 Makiene Alisatakusiene Temasiene Lukuene nagaiene aliya nealiya vayamoya ania huya hu falu fala hugatae.
PHM 1:25 Anumayatimoa Yisasi Kalaisi kayone hulamatesia yamaamoa tamakaiene hanege hanege huno hanesie. Kenia male hano hie. Nagaini nagia Polonae.
HEB 1:1 Nayona mukia kanaene mukia yatetiene Anumaya Kotia agaia aune vayamogami amavayafitila taginagomo-gamina hamapai-maineane.
HEB 1:2 Hamapai-maineanagino ani kanamoa hano higeno menia ma mopa hano hisia kanamoa aupa nehigeno Anumaya Kotia agaia nafanemo avayafiti hu falote huno tahapai-maine. Anumaya Kotia ma mopaene mukia ikate yaene mopafi yaenena nafaneamo ayapiti talo hu-maleteno mukia yana nafaneamo ayapi malene.
HEB 1:3 Nafaneamoa Anumaya Kotina tokiyaage hale yamaa agaia maineanagino Anumaya Kotiene nago avamete huana mainaageno tokiyaama hanea keleti ke huno mukia yana Male maiho. huno hu-mainele mainae. Kefo ya nehuna yatimo anonaa Yisasia aliteno ani kefo yama ali talesiafe faliteno hetino anafinaga mainea Anumaya Kotina aya tamaga kaiyaga, ala vaya mainalega, hanea siale maine.
HEB 1:4 Yisasia ensole vayala amakaseno ala kano maineanagino Nefama aminea agimoa tusia kanale agi haneno ensole vayamogami amakimona amakase-maine.
HEB 1:5 Nayona Anumaya Kotia agaifena mage higeya kae-malenayane Kagaya nagai nafane mainananagina nagaya menia Negafana mainoe. huno hu-maineane. huya kae-malenayane. Eteno nagoene mage huno hu-maineane Nagaya Nefana maisugeno agaya nagai nafane maigahie. huno hu-maineane. Anumaya Kotia nago kanafina hana ensole kanomote mani kea hu-maineane? Aao nafaneamoteke hu-maineane.
HEB 1:6 Agaia yage nafanea avaleno ma mopafi elavino egeno Anumaya Kotia mani kea huno hu-maineane Mukia nagai ensole vayamogatama agai agigeya ayetama agia alisaga hiho. huno higeya Anumaya Koti avopina kae-malenayane.
HEB 1:7 Kae-malenagi Anumaya Kotia ensole vayafena mage hu-maineane Ensole vayala yasimoene ata anefemoene hia avamete huya aliyaamia nealiye. huno hu-maineane.
HEB 1:8 Hu-maineanagi nafaneamofena mage hu-maine Anumaya Kotiga kagaya mukia kanafina agola kava yagaika maige maige huka maigane. Kagaikaa kavama yagaisanana fatago auavateti yagaigane.
HEB 1:9 Kagaya fatago auavafekeya negahaigeno kefo auavafena nokahaiyafe nagaya kagaikaa Anumaya Kotinia Negafugamina ago amakaseka ala kano mainane. huna masaveteti falegatogeka muse hugane.
HEB 1:10 Nagoene mage huno hu-maineane Anumayamogae ehe kanafina ma mopaene ikaene kayapiti talo hu-malenananagino ikaene mopaene fanane hugahianagi kagaya agola maige maige huka maigane. Ikaene mopaenena kenamoma falu-palegeya aye kafagegiya neataleya alu kenama aliya fai nealiya avamete huka ania huganagi kagaya alua augafa kanoa omaiganagi ania huka agola maige maige huka maigane. huno Anumaya Koti avopina kae-maleneane.
HEB 1:13 Nayona Anumaya Kotia nafaneamofena mage hu-maineane Kagaya tamaga nayatega, ala vaya mainalega, hanea siale mainesanagena kame vayakaa kaiyafi alitalu humategahue. huno higeya kae-malenayane. Anumaya Kotia nago ensole kanomona mani kea haopaitafa huno haopaine. Nafaneamoteke mani kea hu-maineane.
HEB 1:14 Ensole vayala avamu mainayanagino Anumaya Kotia agaia amaku amamema ali gatisia veamogamina amaya hisiafene huno humategeya aliyana mo nealiye.
HEB 2:1 Agoma havilinona kea oagaseta taguafi maleta tokiyaage huta atafa hulineta akave malesune.
HEB 2:2 Nayoma ensole vayamo-gami amavayafiti huhaleya hu-mainaya kea lokiyaage ke hu-mainayafe mukia taginagomoya ani kemona ali tagaeya amakaveno hutageno ani kema atagae-mainaya avamete anonaamia amakata aiya yana ali-mainae.
HEB 2:3 Naa hu-mainayafe meni kanafina Anumaya Kotia Tamaku tamamena aligatigahue. huno higeta havimainona veamogata Tamage nehie. huta hisune. Ani tagu tamema aligatisia kea Anumayamoa hamapaigeya haviteya tahapai-mainae. Ani yamoa tusia tokiyaage ya haneanagita takavenoma hisunana hanaa huta kefo yama hu-mainaya anonaa, tagata aisia yamona agaseta falesune? Falesuna katia omalene.
HEB 2:4 Omalegi Anumaya Kotia mani kea Tamage nehie. huya hisaya yafe alu kava alu kavala huno tokiyaage avame yana huteno agaia haiya veaamo-gamina Alu Aotage Avamumo tokiya amamite amamite humaine.
HEB 2:5 Tagayama nehuna kea haenagama falote hisia mopahe nehune. Anumaya Kotia ensole vayala ani kanahe Kava yagaisaya yatele. huno hu oamatene.
HEB 2:6 Hu oamatenegi Anumaya Koti avopina nago kanomoa Anumaya Kotifena mage huno kae-maleneane Vayala naane yaga mainonageka lagaifena kagesa nehavine? Afa ya kana vaya mainonagi naa higeka tagaifena kagesa nehavine? Vayamoya tatenaya nafanehenagi naane yaga mainae huka kava yagai nelatane?
HEB 2:7 Kagaya mage huka hutenane Aupa kanafi ensole vayamoya osia kagaseya maisageka kagaya osi kano kana huka maiyo. Maigananagi haenagaa tokiyaage hale yamoene ala kagiene kamisugeka ala kano maigane.
HEB 2:8 Ala kano maineka mukia yana kava yagaika maigane. huno higeno kae-maleneane. Tamage Anumaya Kotia Mukia yatela yagaigane. huno huteteno nagoke ya kanoa Kava yagaiyo. huno ohunegi mukia yatela Kava yagaiyo. huno hu-maineanagi tagaya meni kanafina mukia yatela kava yagaigeta noagone.
HEB 2:9 Noagonagi Yisasina agelama hu-mainone. Ensole vayamogami amaiyafinaga Yisasia osia kana kanoa maigeno Anumaya Kotia kayone yamaaleti mukia veamogatihe huno fali-maine. Fali-mainea yateti Anumaya Kotia agia alisaga huno tokiyaage hale yamaa ago amine.
HEB 2:10 Anumaya Kotia mukia yamona aepaa maineanagino mukia yana agaia yakeya hanesiafe talo humalene. Talo hu-malegeno Yisasia tagu tamema aligatisia kanomoa fatago huno ala kano maisia yafe Anumaya Kotia Yisasina tusia agata aiya yana amigeno aliteno ani agatama aiya yateti kasagoya nafaneyagaa amavaleno agaialega amateneanagiya tokiyaage hale yapi maigahae.
HEB 2:11 Naa hu-mainegi nagoa veafena Fatago veane mainae. huno humatenea kanoene agoma humatenea veanene nagoke neamafaa maineafe Yisasia agayea ohuno amakaifena Nagaini nagananimogatama mainae. huno humaine.
HEB 2:12 Anumaya Koti avopina mage huno hu-maineane Nagaya kagai kagia huhalena hamapaigahue. Veamoya melitalu hisaya amunopina yagamefiti kagia alisaga hugahue. huno hu-maineane.
HEB 2:13 Nagoene mage huno hu-maineane Nagaya Anumaya Kotife nametitia hugahue. huno hu-maineane. Nagoene mage huno hu-maineane Anumaya Kotima naminea nafaneyagaene mainogi nageho. huno kae-maleneane.
HEB 2:14 Anima nafaneyagama hiana ma mopale veafe hu-maineanagino Yisasia Faligahue. huno hu-maineafe agaiaenena vayatafa hapaeteno fali-maine. Fali-mainea yateti veama hamaeno fali neamatea tokiyaama hanea kanoa, Satani tokiyaa ago agase-maine.
HEB 2:15 Agaseno fali-mainea yateti mukia ma mopafi mainaya kanafina veamoya falisaya yafena kolima nehaya yaamimoa amakaila alino nofi humategeya mainageno Yisasia ani nofipiti alino kalu hematesia yafe fali-maine.
HEB 2:16 Tamage Yisasia ensole vaya amaya hugahe ani aliyana oalinegi Apalahamu anaga amaya hisiafe ani aliyana ali-maine.
HEB 2:17 Ani yafe aganaamoyaene nago avamete huno maineno mono notela hagote kava kano maineno Anumaya Kotiene veanene amunoamifi maineno amaipa ali falu hisia kano maineanagino Anumaya Koti aliyana nealino ani aliyateti veafena kalagi aimateteno fatago aliyana nealie. Anumaya Kotia tagaya kefo yama huna yafena havino aipa haviya hulateneanagi Yisasia kefo yatihe havino falitegeno Anumaya Kotia aigetateno kefo yatia atalelatene.
HEB 2:18 Yisasifena Kefo yama huo. huno ayevatagama higeno haumana hale-mainea yaene augafa agatama ai-mainea yaenema ali-maineafe veamoya kefo yama hisaya yamo aye-mavataga hisigenoa Yisasia amaya hugahie.
HEB 3:1 Kefo yama nohaya nenafugatama Anumaya Kotia ikapinagati agaialega visaya yafe tamakaila ago ke hu-mainegi tamakaya Yisasima hulatenea yafena tamakesa havi havi hutama maiho. Yisasina Anumaya Kotia hutenea kanogino mono notela hagote kava kanoe. Anumaya Kotiene veanene amunoamifi maineanagita havita lagupi maleta tametitima nehuna kanomofe huhaleta hisune.
HEB 3:2 Anumaya Kotia Yisasina ani aliyate ateneanagino Anumaya Kotima humainea kea akave maleme maleme haimaine. Mosesea nayona ania huno Anumaya Koti anagapi maineno Anumaya Koti humainea kea akave maleme maleme hai-maineane.
HEB 3:3 Veamoya nomo agia alisaga nehayanagi ani noma kimalenea kanomo agia tusiyate alisaga huya anale malenae. Naama haya yamoa Anumaya Koti anagamoya Mosese agia alisaga hu-mainayafe Yisasia ala neamafa maineanagino Anumaya Kotia Katea kano mainane. huno hutegeya tusiya huya agia alisaga humainae.
HEB 3:4 Nagoke nagokemoya nona negiyanagi Anumaya Kotia mukia yana agaiage talohu-malenea kano maine.
HEB 3:5 Mosesea Anumaya Koti aliya kano maineanagino Anumaya Koti veapi maineno Anumaya Kotima hu-mainea kea havino akave maleme maleme hai-maineafe aliyamaa nealino haenagama falote hisia kea huhaleno hamapai-maine.
HEB 3:6 Mosesea hamapaiyanagi Kalaisia Anumaya Kotina nafaneagino Anumayamo kea akave maleme maleme haino Anumaya Koti veatela kava yagaime yagaime hai-maineanagita tagaya mukia kanafina kolia ohisunagi agayama eteno evayima hisia yafena tametitima nehuta tokiya vaisunana tagaya Anumaya Koti veala fatago huta maigahune.
HEB 3:7 Alu Aotage Avamumoa mage huno hu-maineane Nayona Mosesema akave hu-mainaya veamoya kame kotega maineya amakaveno hunateteya nagai kea ohaviya avame hunateya aukaya hunatenaya kavala meni kanafina agai kema havinutama tamakavenona huonateho.
HEB 3:9 Kame kotega tamakinagomoya fotia (40) kafufima hu-mainoa avame yana agayanagi nagaila tusiya huya avamekeya hunatenayane.
HEB 3:10 Hunatenayafe nagaya ani veafena aluya huna naipa kafa hematetena mage humainoe Mukia kanafina amakuamoa nagai auavala oageya kenia alitagae-mainae.
HEB 3:11 Atagayagena nagaya naipa kafa hematetena tokiyaage kea mage humainoane Amakaya maifaluma hisaya yaniafina tamagelafa huya agola uomaigahae. huna nehue. huno hu-maineane.
HEB 3:12 Na yafe nenafugatama havigu nagoke nagokemogatama havitama tamakupi malenaya kea neataletama kefo ya hutama haegafa huno mainea Anumaya Kotina tamakaveno huteyafenagi kava yagaiho.
HEB 3:13 Kava neyagaitama Anumaya Kotia Meni kanae. huno malegeno ani kanamoa hanegi havigu nagokemogatama kefo yamofena Hagaage yane. huka hisanageno ayegavataga hinageka Anumaya Kotina kakaveno huteyafenagi mukia kanafina nelamafugamina amaku amakesa ali hetiya maisaya kegeya hamapaiho.
HEB 3:14 Tagaya Yisasife havita lagupi malenonanagi menia ania huta lagupi malenona yana atafa huta lokiyaage hulineta ani yaenema mo falinuta Kalaisiene ailokaeta maigahune.
HEB 3:15 Tagaya ago havimainone mani kehena mage huno hu-maineane Meni kanafima nagai kema havisayana nayona tamakina-gomoya amakavenoma hunatenaya avamete hutama lamakavenona hu onateho.
HEB 3:16 Nayona taya Anumaya Koti kea haviteya amakavenona hutenae? Mukia Isaleli veala Mosesea amavaleno vigeya Isipi kumala ataleya umaineya ani kavala hu-mainayane.
HEB 3:17 Fotia (40) kafufina Anumaya Kotia tagamife aipa kafa hemateneane? Anumaya Kotia mukia Isaleli veamoya kame kotega kefo yama huteya faligeno amaugafamoa ani kame kotegama hanea veaneahe aipa kafa humateneane.
HEB 3:18 Anumaya Kotia tagamife agaia lokiyaage kea huno Nagaila maifalu hisaya yaniafina agola uomaigahae. huno hu-maineane? Ani kema atagae-mainaya veafe hu-maineane.
HEB 3:19 Tagaya ago havimainone agaife haviya amakupi maleya amametitima ohunaya veala Anumaya Kotina maifalu hisaya yamaafina agola uomaigahae huno hu-maineane.
HEB 4:1 Anumaya Kotia Maifalu hisaya yaniafina uomaigahae. huno hu lokiya vai-malenea kemoa menia afaa hanegi havigu Anumaya Kotia tamakesigetama nagoa veala ani yapi maisaya yafena kosa he otamatesigetama omaisaya yafena koli hiho.
HEB 4:2 Tagaya nayoma Isaleli veamoya kema havimainaya avamete huta Yisasi kanale mono kea nehavunanagi amakaya kanale mono kea haviyanagi haviya amakupina omalageno ani kemoa amaya ohuneane.
HEB 4:3 Amaya ohunegi tagaya Anumaya Kotifena havita lagupi maleta lametiti hu-mainona veamogata maifalu hisuna yapina haigahune. Nayona Anumaya Kotina amakaveno hutenaya veafena mage huno hu-maineane Nahai-vaigena hulokiya vaina tamage nehue nagaya maifalu hisaya yama malenoa yapina agola omaitafa huya omaigahae. huno hu-maineane. Hu-maineanagi Anumaya Kotia nayona ma mopama talo hu-maletegeno aliyamaamoa hano hu-maineane.
HEB 4:4 Nago kaiyaga Anumaya Kotia agaia avopina seveni (7) molia kanahe mage higeya kae-malenayane. Anumaya Kotia mukia aliyamaa aligeno hano hutegeno seveni (7) molia kanale maifalu hu-maineane. huno hu-maineane.
HEB 4:5 Ani avomoa nagoene mage hu-maineane Amakaya maifalu hisaya yaniafina agola uomaitafa hugahae. huno hu-maineane.
HEB 4:6 Hu-maineanagi mukia nayo veamoya Anumaya Koti kanale mono kea haviteyagi akave omalenayafe maifalu hisaya yapina uomainagi menia nagoa veamoya umaigahae.
HEB 4:7 Umaisaya yafe Anumaya Kotia eteno nago kanaa maleneno ani kanahena Menima mainona kanae. huno malene. Kasagoya kafumoa euno amakasetegeno Anumaya Kotia Teviti avayafiti nayoma humainea avamete kea mage huno humaineane Meni kanafima agai kema havinutama tamakavenona hu oateho. huno hu-maineane.
HEB 4:8 Nayona Mosese anonaa Yosuaa hetinoma mainea kanafima maifalu hisaya yama amamineleasina Anumaya Kotia haenagaa Teviti avayafitila alu kanahena ohuneleasine.
HEB 4:9 Naa hu-maineafe Anumaya Koti kema nehaviya veala Sapati kanamo hia avamete huno hanea yapi maifalu hisaya yana hane.
HEB 4:10 Haneanagiya veamoya Anumaya Kotima amaminea yana maifalu hisaya yapima visayaamoa Anumaya Kotia nayona aliyama ali hano hu-maleteno maifalu humainea avamete huya amakaiami aliyana ataleya maifalu huya maigahae.
HEB 4:11 Anima maifalu hisuna yapima umaisuna yafena taula ofaeta tokiyaage huta visune. Havigu nayo veamoya hu-mainaya avamete kava huta Anumaya Koti kea akave omalesunana anima maifalu hisuna yapina uomaigahune.
HEB 4:12 Anumayamoa haimuene ke haneanagino tokiyaage huno aliyana nealie. Ani kemoa naepe kayomona avema aluga alugama nehanea naepemona agaseno aluya huno avenenela humaine. Anumaya Koti kema veamogata havunageno lagupima laviana amegati mopale yafema muse nehuna tagu tameene Anumaya Kotifema havita tametiti hu-mainona tagupiene tavino alipanese. Taiya auaene tayamufafi nehanea taunufiene tavino alipanese. Ani kema tagu tagesamoa nehavia yaene hayema nehia yaene kanale kava nehaagi kefo ya nehaagi huno ali fako nehie.
HEB 4:13 Mukia Anumaya Koti talo hu-malenea yamoa agai aufina fala okigahianagino mukia tagupima hanea yamoa Anumaya Koti aufina fufu yate hale-maineanagino tahavi-gesigeta tagaya mukia yama nehuna yamo aepaa hapaigahune.
HEB 4:14 Yisasia ala mono notela hagote kava kanogino, Anumaya Kotiene veamogatiene amunotifi maineno falu hu nelatea kanoa, Anumaya Koti nafanegino ikapinaga hai-maineanagita agaifena tametitima huta hu falote nehuna yana atafa huta tokiya vailisune.
HEB 4:15 Kefo yama ohisuna tokiyatia omalenegi tagai mono notela hagote kava kanotimoa hauna hulatesia kano maineanagino tagaitema mukia Kefo yana hiho. huno aye lavataga nehia yamoa hagoteno agaila ago ayevataga hu-maineanagi kefo yana ohutafa huno ohuneane.
HEB 4:16 Naa hu-maineafe tagaya kayone hisuna yamaa hanea Anumayamotegama havigegahena kolia ohisunagi avate visunageno kefo yama nehuna yafena kalagi ailateno kana yama tagaipima hanesiana kayone hisuna yamaa nelamino taya hugahie.
HEB 5:1 Mono notela hagote kava vayala maa huya ali hetimatae. Ani kanoa afa kano vayaamoyaene mainegeya veama hamamaesiafene huya ali hetitageno Anumaya Kotiene veanene amunoamifi maineno Anumaya Kotina muse yamaa neamino veamoya kefo yama hagenoa sipi sipi heno Anumaya Kotitega kae-salamana hu neateane.
HEB 5:2 Ani kanomoa kefo yama hisia tokiyaa omale kano maineno kema ohaviya veanene Anumaya Koti katema neatalaya veanenefena kea oamama-kino ako huno kea hamanepaiyane.
HEB 5:3 Agaia kefo yamaahe huno Anumaya Kotima ali-talesiafe sipi sipia heno kae-salamana huteteno anile mukia veamoya nehaya kefo yama alitalesiafene huno Anumaya Kotitega sipi sipia heno kae-salamana hu neateane.
HEB 5:4 Mono note hagote kava kanomona agi hanea aliyanagiya veamoya amakaiamige Ani aliyana aligahune. huya ohunagi nayona Anumaya Kotia hagoteno Elonina mono note kava aliya alisia yafe alino hetitenea avamete huno meni kanafima mainaya vayapitila alino heti neamate.
HEB 5:5 Alino hetineamatea kava huno Kalaisienena agaia Nagia anale hanea kano mainoanagina mono notela hagote kava kano maigahue. huno ohunegi Anumaya Kotia agaia Mono notela kava kano maiyo. huno ani aliyate aliheti neateno Anumaya Kotia mage huno hapaiye Kagaya nagai nafane mainanagena menia nagaya Negafana mainoe. huno humaineane.
HEB 5:6 Nagoene Anumaya Koti avopina mage huno hu-maineane Kagaya mono note kava kanoa, Melikisetekia nayona mono note kava kanomo hu-mainea avamete huka agola ani aliyate maige maige hugane. huno hu-maineane.
HEB 5:7 Yisasia ma mopafi maineno Anumaya Kotitega ke huno havige-maine. Augafama aligatisia tokiyaama hanea Anumaya Kotitega ala kefiti ke huno falisia yafena havinegeno tusiya avia neategeno aunumoa hu-maineanagi agaia haiya avamete kavala ohunegi Anumaya Kotina haisia kemona havina akave maletena aiyafinaga maigahue. huno hu-maineafe Anumaya Kotia havigea kea havimaine.
HEB 5:8 Havitegeno Yisasia Anumaya Koti nafane maineanagi augafa agatama aiya yateti Anumaya Koti kema akave malesia yana age-maine.
HEB 5:9 Ageteno akave malelea yamo ala kanoa hapae-maineanagiya agai kema akave maleya ali hipoya hisaya veamogamina agola maige maige hisaya yamoene amaugafa aligatisia yamoene aepaa maine.
HEB 5:10 Anumaya Kotia mage huno hutene Kagaya Melikisetekima humainea avamete huka mono notela hagote kava kano maigane. huno hutene.
HEB 5:11 Kasagoya kea haneanagi hanaa huta tamahapaisune? Tamakaila tamaku tamakesamoa havilama nohigetama none nane nehageta tagaya ya humaita humaita tamave-nelune.
HEB 5:12 Tamakaya huge amavelige hisaya veanema maisaya kanatamia ago falote hu-maineanagi tamaku tamakesamoa havilama ohia yafe nago kanomoa eteno nagoene Anumaya Kotifena avoya kea hagotetama tamakupi malenaya kea eteno huge tamave-lige hugahie. Tamakaya tokiya kavela onenagi numaage nenae.
HEB 5:13 Mukia veamoya numaage nesayana osi nafane kana huya maineya fatago kavama hisuna yafema tamahapauna kea nohaviye.
HEB 5:14 Nohavigi tokiyaage kavela ala veamogami kavele. Ani veamoya amakaiami kefo auava yafeene fatago auava yafeenena fako huya ageteya kanale auava yana akave nemalae.
HEB 6:1 Kalaisifema hagoteya huge huge hu-mainaya kehena neataleta ko hu-mainaya veane maisune. Havigu noma atafa nehia posiage ayete yete hu-maleta maisunana nona falote ohugahie. Ma augafa kea atalesune. Fali lavata hisuna kefo yana haneanagita neataleta tagua aiyahae huta Anumaya Kotife havita lagupi malenona kene amaugafale amaya maleya tima fale neamataya kene fali-mainaya veamoya hetisageno Anumaya Kotia kaiyekea humateteno nofi humatesigeya anifi agola amakata aisia no maime haigahae huno humainea kene ani keyagafina omaitafa huta omaisune. Ko huta ala veanema maisune.
HEB 6:3 Anumaya Kotia tayama hisigetahena ani kavala higetao. Ko huta ala veala maisune.
HEB 6:4 Nagoa veamoya Anumaya Koti hale yapina ago emaineya ikapinagati emainea muse yana ago aliteya tusia muse nehageno Alu Aotage Avamumoa amakupina ago emainegeya ani veamoya Anumaya Koti kema haviyana kanaleya huno hamamaegeya haenagama falote hisia kanamo tokiya yamaa ago neagae.
HEB 6:6 Ani yama age-mainaya veamoya Anumaya Kotina amakaveno huteteya mukia keama atalesayana eteya amakua aiyahae hisaya kaamia omaleneanagiya amakaiami Anumaya Koti nafenemofena Falisie. huya yafaga yosalela nagoene maiya haeya neasaiya agaye hisifa yana nagoene maiya nehae.
HEB 6:7 Mukia veala mopa kana huya mainageno ani mopamona Anumaya Kotia muse yana kola amigeno mukia kanafina aino ani mopafina lavigeno ani mopafima hu-malenea hoyafima hanea kavela mukia veane hamamaesia yafe hageanagi ani mopafima avetanafaage inoma hagesigenofena aupaa Havi mopae. huno ata kaeno asagaligahie.
HEB 6:9 Nahau nayamopafi nenahaiya nenafugatama menia manima hua kemoa tusia kana ya nelamamuanagi nagaya tamakaifena ago havimainoe Anumaya Kotina lamakavenoma hu neataya kavala ohugahagi Anumaya Kotia tamaya huno tamaku tamamema aligati-mainea avamete kava hugahae huna nehue.
HEB 6:10 Tamakaya Yisasina tamakuama amitafa hutetama agaia anagamogamima amaya humainaya yana menia nagoene ani kavala nehae. Anumaya Kotia fatago kano maineanagino ani aliyatamia neageno agela nokaneanagino anonaa tamamigahie.
HEB 6:11 Naama haya yafena nenahaigi mukia kanafina tamakaya aniageya hutama tamahaote tamahaote aliyana nealitama tamakupima malenaya yana atafa hu lokiya vai-linetama Anumaya Kotima tamavalesia yafena tamametitia huge huge nehisageno me lamavalesie.
HEB 6:12 Tamakaya alige atalegela ohiho. Anumaya Kotima tamavalesia yafena tamametitia hiho. Yisasife haviya amakupi malenaya veamoya nehaya avamete hutama akave maleho. Ani veamoya Yisasife haviya amakupi maleya amametiti huteya Naa yama hulamategahue. huno humainea yafena mailava huya maineya aliyana nealiyafe ani kavakeya hutama hiho.
HEB 6:13 Nayona Anumaya Kotia Apalahamufena Naa yama hugategahue. huno hulokiya vaitenea kanafina nago kanomoa Anumaya Kotina oagaseneanagino Anumaya Kotia agaia agile Nevayanae. huno tokiyaage kea mage huno hu-maineane Tamagelafa huna nehuanagina mukia kanale yana kagaila kamisugeya kagai kaginagomoya tusia vaya kahaeya aitagu-fegahae. huno hu-maineane.
HEB 6:15 Hu-maineanagino Apalahamua mailava huno agava maineno Anumaya Kotima Kamigahue. huno manuma aminea manua alimaine.
HEB 6:16 Nagoa veamoya Anumaya Koti aufinagita tamagelafa nehune. huya nehaya kemona amakaseno hai-mainea kanomo agilefe ani kea nehae. Veamoya kema nevaisageno nago kanomoa Anumaya Koti aufinagina tamagelafa nehue. huno hisigeyahena nagoa veamoya kea ohuya maigahae.
HEB 6:17 Anumaya Kotia Apalahamufeene Isaleli veanenefena hu lokiyama vai-malea kehena Etena alu kea ohugahue. huno hu-maineanagiya ani kema havisaya yafe Anumaya Koti aufina tamagelafa nehue. huno humaineane.
HEB 6:18 Ani lole kea, hu lokiyama vai-malenea kene Anumaya Koti aufina tamagelafa nehue. huno humainea kene oatalegahie. Ani kea hanenageno eteno alu kea ohugahie. Anumaya Kotia havigea ohugahiafe ani kemoa haneanagita Anumaya Koti avatema faleta umainona veamogatina tametitia atafa hulineta tamena male falu huta maineta haenaga taugafama aligatisia yafe agava maineta mailava huta tametitia nehune.
HEB 6:19 Anumaya Kotia Naa hulamategahue. huno humainea tametiti yamoa tagu tamena aligatisia yanagino nofi kana huno ikapinaga haitegeno nago kena asai-maleteya asama hu-malenafinaga alu aotage nopinagagino haino atafa huligeno tokiyaage humaine.
HEB 6:20 Hu-maineanagino Yisasia tagai taya hugahe hagoteno ani ikapinaga hanea nopinaga haifale-maineanagita tagaya haenaga haigahune. Yisasia Melikiseteki humainea avamete huno mono notela hagote kava kano maineanagino agola maige maige huno ani aliyatela aligahie.
HEB 7:1 Apalahamua kasagoya sauve vayayagaene tua huno hamaeno falimateteno kumaalega eteno ugahe vilegati Melikisetekiene katega mo fotu humaine. Ani Melikisetekia Salemu kumate sauve kano maineanagino, mukia yana amakaseno hai-mainea Anumaya Koti mono note kava kanogino Apalahamuene katega mo fotu huteno kanale manua amine.
HEB 7:2 Amitegeno Apalahamua tuma hifiti alia afenona alitalu huteno tenia (10) hetama vai-malefiti nago hetama Melikisetekina amine. Melikisetekie agimoa tagai kefina Fatago kavakeya nehia sauve kanoe. huno humaine. Salemu kumale haya agimoa tagai kefina Aipamoa falu humainea sauve kanoe. huya hu-mainayane.
HEB 7:3 Melikisetekina itaafoamogani anakiene aginagomogami amakiene atenea kanaene fali-mainea kanaheenena Anumaya Koti avopina okaenagi Anumaya Koti nafanemo avamete huno mono note kava kanogino agola maige maige huno nemaiyane.
HEB 7:4 Tamakaya tamakesa haviho ani Melikisetekia ala kano maineanagino Apalahamua hagote laginagomoa tuma hu-mainefiti ali-mainea afenona tenia (10) hetama vai-malefiti nago hetama Melikisetekina amineane.
HEB 7:5 Livai anagapiti mono note kava vayala ali hetimatageya mainaya vayamogamina Isaleli vayamoya kahegi kea akave maleya malenaya yapitila tenia (10) hetamafiti nagoke hetama neamafugamina amaminayanagi ani vayamoya Apalahamu nafaneyaga mainayanagiya amakaiami neamafuya mainayane.
HEB 7:6 Mainayanagino Melikisetekia Livai anagapitila falote ohunegi Apalahamua tenia (10) hetamafitila nagoke hetama amigeno Anumaya Kotia Kanale yama hugategahue. huno hu-teneanagino Apalahamuna Melikisetekia kanale manua amineane.
HEB 7:7 Amineanagita tagaya ago havimainone manuma aminea kanomoa anale haino maigeno manuma ali-mainea kanomoa agai aiyafinaga osi vaya kana huno maine. Naa hu-maineafe Melikisetekia Apalahamuna agaseno ala kano maine.
HEB 7:8 Tenia (10) hetama malenafitila nagoke hetama mono note kava vayamoya ali-mainaya vayala fali vayakeya mainagi Melikisetekia tenia (10) hetamafitima nagoke hetama kanoa ali-mainea konomofena Anumaya Koti avopina Agaya ofalino afaa maine. huno hu-maineane.
HEB 7:9 Melikisetekia Apalahamuene kategama mo fotu huteno tenia (10) hetamafitima nagoke hetama aminea kanafina Livaia falote ohunegi Apalahamuna augafafinaga mainea kanafinagita tagaya mage huta hugahune Livaia, nagoke hetama ali-mainea kanogino Apalahamuma nagoke hetama Melikisetekima amineana Livaia Apalahamu augafafinaga mainegeno amineane.
HEB 7:11 Anumaya Koti kahegi keleti Livai nofi vayala mono note kava vayale huya ali hetimatageya ani vayamoya mono note aliyana nealiya sipi sipia hageno kolamaamoa taki-lavia yateti Anumaya Kotia mukia veafena Fatago veane mainae. huno hu-maineleasina alu kava kanoa falote ohileasinagi Yisasia ago falote huno Melikiseteki avamete hu-mainegi Eloni nofi vaya avametela ohune.
HEB 7:12 Nagi hagote mono note kava vayamogamima amatalesayana kahegi keamienena neataleya alua kahegi kemo akave malegahae.
HEB 7:13 Mani kema humainea kanoa, Anumayatimoa alu nofi kano mainegi nagoa vayamoya agaia nofi vayapitila mono notela kava vayala omainayane.
HEB 7:14 Omainayanagita tagaya ago havimainone Anumayatimoa Yuta nofi vayapiti falote hu-maineanagino Mosesea ani nofi vayafena Mono notela kava vaya maiho. huno hu oamateneane.
HEB 7:15 Haegafa mono note kava kanoa, Yisasia, alu kanogino Melikisetekiene nago avamete huno falotema hiana Livai nofi vayala mono note kava aliyamona ago amakase-mainea yafena ago havilinone.
HEB 7:16 Kahegi kemo akave maleya Livai nofi vayapitila mono note kava aliyana ali-mainayanagi Yisasia hano ohisia haimumo tokiyaleti hetino mono note kava aliyana ali-maine.
HEB 7:17 Anumaya Koti avopina Yisasifena mage hu-maineane Kagaya mono note kava kanoa agola ani aliyatela maige maige huka Melikiseteki avamete huka maigane. huno hu-maineane.
HEB 7:18 Nayoma hanea kahegi kemoa tayama hisia tokiyaa omalegeno ago ali-talene. Veamoya ani kahegi kema mukia akave malesaya tokiyaamia omalegeya Anumaya Koti aufina fatago veanea omainayanagino Anumaya Kotia menia tusia kanale tametiti hisuna katia ago valilateneanagita ani kateti Anumaya Koti avatela neone.
HEB 7:20 Anumaya Kotia Yisasifena Mono note kava kano maiyo. huno afaa alino heti oatenegi Nagaya nevayanae tamagelafa huna ali heti negatoe. huno humaine. Hu-maineanagi nayona veamoya Mono note kava vaya maiho. huya ali hetimatenaya kanafina Anumaya Koti aufina tamagelafa huta ali heti nelamatone. huya ohunayane.
HEB 7:21 Ohunagi Anumaya Kotia agaia Nevayanae. huteno Yisasina mono note kava kanoa ali hetiteteno mage huno hapai-maineane Anumayamoa mage huno humaine Nevayanae tamagelafa huna kahanepauve kagaya mono note kava kanoa agola maige maige huka maigane. huno hu-maineanagino agu agesa aiyahae huno alu kea ohugahie. huno hu-maineane.
HEB 7:22 Hu-maineafe tagayama havisunana Yisasia kefo yatihe huno faliteno heti-mainea yateti Anumaya Kotia alino haegafa hagelafi-latenea kemoa nayoma alino hagelafi matenea kemona agase-maine.
HEB 7:23 Mono note kava vayala nayona kasagoya mainayanagiya ago falitageya alu vayamoya ani aliyaamia ali-mainayafe kasagoya ani aliya vayala mainayane.
HEB 7:24 Mainayanagi Yisasia agola ofaligahianagino haimuene kanogino mono note kava kanoa agola maige maige huno maigahie.
HEB 7:25 Maineno Anumaya Koti avatema neaya veanema hamamaesia yafena mukia kanafina Anumaya Kotitega ke huno havinegeafe mukiamoya agai agilema Anumaya Koti avatema neaya veamogamina amaku amamena ali negatie.
HEB 7:26 Yisasia mono notela hagote kava kanogino alu aotage kano maineanagino nagoke kanoa kefo yamaa omale kanoe. Aguafina oniya yamaa omaleneanagino kefo yama nehaya veala amakasegeno ame anale avaleno ategeno maineafe kanaleya huno taya nehie.
HEB 7:27 Nayona mono notela hagote kava vayamoya mukia kanafina sipi sipi heya kae-salamana huya Anumaya Kotina neamiyane. Neamiya hagoteya amakaiami kefo yaamima ali-talesiafene huya Anumaya Kotina amiteya anile mukia veamogami kefo yaamima ali-taleseafene huya haenaga aminayane. Aminayanagi Yisasia agaia kefo yamaa omaleanagi nagoke yupa kanoa veamogami kefo yafene huno yafaga yosale fali-mainea yupa agaia augafa hakino Anumaya Kotina amiteno kae-salamana huteneane.
HEB 7:28 Nayona kahegi kemoa mukia kanafina kefo yama ohisaya tokiyaamima omalenea veamogamifena Mono notela hagote kava vaya maiho. huno alino hetimateneanagi haenagaa Anumaya Kotia tamagelafa huno Nevayanae. huno hu lokiya vaiteno agaia nafanehena Mono notela kava kano maiyo. huno ali hetiteneanagino ani kanomo agupina fatago yamoa hiya huno kosa hetegeno maineanagino aniageya huno agola maige maige hugahie.
HEB 8:1 Manima hua kemo aepamoa maa humaine tagaila mono notela hagote kava kanotia, Anumaya Kotiene veamogatiene amunotifi maineno yuna helatesia kano maineanagino ikapinagama haiyana Anumaya Kotina tamaga kaiyagaa hanea siale kava vaya mainalaga maine.
HEB 8:2 Maineanagino Anumaya Kotina alu aotage nomaafi maineno aliyana nealie. Ani nona Anumaya Koti alu aotage notafamaa haneanagino veamoya okinagi Anumaya Kotia agaia kimalene.
HEB 8:3 Mono notela hagote kava vayala ali hetimatageya Anumaya Kotina muse yamaaene sipi sipiene heya kae-salamana hutenae. Hutayanagi Yisasienena nago muse yana amigahe higeya yafaga yosale nili heya asaigeno ani muse yana agaia augafa hakino amine.
HEB 8:4 Mono note kava vayala Livai nofi vayalagiya kahegi kea akave maleya Anumaya Kotina muse yaamia aminayanagino Yisasia ma mopafi maineleasina mono note kava kanoa omaileasinagi ikapinaga maineno ani aliyana maino nealie.
HEB 8:5 Mono note kava vayamoya mopafi maineya aliya aliyamoa Anumaya Kotina ikapinaga hanea mono nomona amemaa kana huya taveli-mainae. Ani yafe Mosesea kenaleti mono noma kigahema higenoa Anumaya Kotia mage huno hapai-maineane Kagaya agoyafima kaveli-mainoa yana agelama huteka mukia yana aniageya huka talo huo. huno hu-maineane.
HEB 8:6 Higeno Kalaisia aliyamoa mopafi maineya mono aliya vayamogami aliyana amakase-maine. Yisasia Anumaya Kotiene mopafi veanene amunotifi maineanagino Anumaya Kotiene alino hagelafi-latene. Ani haegafa kemoa nayoma alino hagelafi-matenea kemona agase-maine. Menia Anumaya Kotia Tusia kanale yama hulamategahue. huno huteno haegafama hulokiya vai-maleneanagino nayona Ma yama hulamategahue. huno humainea kemona ago agase-maine.
HEB 8:7 Hagotenoma alino hagelafi-matenea kemona veamoya akave malesaya tokiyaamima haneleasina Anumaya Kotia haegafama alino hagelafi-latesia kea ohileasine.
HEB 8:8 Ohileasinagi Anumaya Kotia veamoya kanale kavama ohaya kavaamia ali falote humateno mage huno hu-maineane Haenagaa nago kanafina Isaleli nofi veanene Yuta vea omainaya veanene haegafa alina hagelafi-matesua kea hugahue.
HEB 8:9 Isipi kotegati Isaleli veamogami amakinagomo-gamina amavalena uaamona nagola hagelafi-mate kea hamapauvanagi ani kea akave omalaya yafe Tamahaote yatamie. huna nakaveno humatenoane. Humatetena menia haegafa kema hisua kemoa nayo kemoma humainea avametela ohugahie.
HEB 8:10 Ani kanamoa hano hutesigena Isaleli veamogamina haegafa alina hagelafi-matesua kea amamigahue. Ani kemoa maa humaine kahegi kenia amakesafinaga maletena amakupinaga kae-maletena Anumaya Kotiami maisugeya nagai nafaneyaga maigahae.
HEB 8:11 Ani kanafina mukia veamoya osi veanene ala kava vayaene nagaifena havilama hugahayanagiya nagoke nagoke veamoya neamafuyaenefe amakanaamimoyaenefena Anumayamofena havilama hutama haviho. huya hamaopaigahae.
HEB 8:12 Na yafe nagaya kefo yaamia aigeamatena atalematetena nagoene ohavigahuanagina nagekani-talegahue. huno Anumayamoa hu-maineane.
HEB 8:13 Menima alino hagelafi-matenea kemofena Haegafa ke. huno humaineafe hagotenoma alino hagelafi-matenea kemoa ago atafa-lemaineanagino hano hutafa hugahie.
HEB 9:1 Anima hagoteno alino hagelafi-matenea kefina Anumaya Koti agima alisaga huya ayegeyege hisaya yafeene ma mopafi hanea alu aotage mono nofena kahegi kea maleneane
HEB 9:2 Ani yugu nomoa maa huno hane. Kumategati hai nefalaya nopina aivasa hisia alamuene Anumayamoma amisaya maya alu aotage kaihame kana maya nemalaya folamoene hanegeno ani nofena Alu aotage none. huya hu-mainayane.
HEB 9:3 Ani yugu nopina kenaleti anale maleya asa hu-maleneya nago kaiyaga hunalagi-maleneya ame kaiyagahena Tusiya huno alu aotage none. huya humainae.
HEB 9:4 Ani nopina kanileta yafana miyamaamoa hai-mainea yafateti talo hu-malenaya folamoa haneanagiya ani folamole kimamufa kana huno manaage yana negayaya folamoe. Anile Anumaya Kotia alino hagelafi-matenea kema hanea pokisia haneane. Ani pokisia kanileta yafateti talo hugagi-male pokisie. Ani pokisimo agupinaga Eloni ayopalema agusasi aye-mainea ayopaene Anumaya Kotia nayoma alino hagelafi-matenea kema kae-malenaya yafatalaene kanileta yafateti talo humale keayola haneane. Ani keayopina ikapinagati elavi-mainea kavemo agia manae huno haneane.
HEB 9:5 Ani pokisimo avayalela kafuahe kafuahena nagoke yupa veamoya Anumaya Kotia kefo yatima aye hami-latesiafene. huya hageno mono notela hagote kava kanomoa sipi sipimo kolana alino ailake-take hunemaleane. Ai-laketake hu nemalea avayalela tole kanileta yafateti talo hu-malenaya yana ensole vaya kana kanolatanagino Anumaya Koti tokiyaage hale yamaa tavelisia kanolatanagiana auvaiana mainaanagina menia ani yamona aepaa hufalote huna ohugahue.
HEB 9:6 Ani yayaga talo tala hu-maleteya mono note kava vayamoya mukia kanafina kumategati hai nefaleya nemaiya nopi haiya aliyaamia alimainae.
HEB 9:7 Alimainayanagi mono notela hagote kava kanomoa agaiage noagupinaga analema kenaleti asa hu-maleneya hunalagi-malageno ame kaiyaga kafuahe kafuahena nagoke yupa kanoa unefaleane. Havigua afaa novianagi sipi sipimo kolaene alino nehaiyane. Ani kolana agaiama kefo yama humainea yama aye hamisiafene huno pokisilela ailake-take hu-maleteno haenaga mukia veamogami kefo yaamima Anumaya Kotia aye hami-talesiafene huno ani kolana alino taki-maine.
HEB 9:8 Naama hu-mainea yafena Alu Aotage Avamumoa maa huno tave-nelie kenaleti anale asa hu-maleneya ame kaiyaga nopinaga afa vayamoya nohaiyanagino ani kanafina vayamoya Anumaya Koti avatela hai-falesaya kaamia yaufa ovalineane.
HEB 9:9 Naama humainea yamoa avame yanagino meni kanafima maineta havisuna kea taveli-maine. Veamoya muse yama neamiya kefo yaamima aye hami-talesiafene huya sipi sipia heya Anumaya Kotina aminayanagi mukia ani veamogami amakula alino fatago hu oamatenea yafena taveli-maine.
HEB 9:10 Taveli-maineanagi Anumaya Kotia haegafa kea yaufama ali falote ohunea kanafina hagotenoa ani kanafima hanea kahegi kemoa amega amaugafamofekeya huya kavema nenaya yaene tima nenaya yaene amaugafalema tima nefalaya yafeene humaine.
HEB 9:11 Kalaisia ago evayi huno mono notela hagote kava kano maisiafe ikapinaga hanea nona, tusiya huno alu aotage nona, nayo nomona agase-mainea nopinaga, haifale-maineno taminea kanale yatela yagai-maine. Ani nona ma mopafi nona omaleneanagiya mopafi vayamoya ani nona okinae.
HEB 9:12 Ani alu aotage nopina Yisasima haiyana mememo kolaene pulamaka nafanemo kolaene alino ohainegi agaia kolamaa nagoke yupa ailaki-maleteno hai-maine. Kefo yatimo aigagi-lateneanagi ani yapiti agola tavalesiafene huno miya hulateteno agaia kolana ailaki-maleno hai-maine.
HEB 9:13 Nayona Isaleli veala fali-mainaya veamogami amaugafaleene kele amamu amale-mainea veamogami amaugafaleene amatafa haya yamo Anumaya Koti aufina amaugafamona alino oniyaage humainae. Higeya mono note kava vayamoya mememo kolaene ve pulamakamo kolaene a pulamakaene heya kae-salamana huya atafi kaeteya tanefaene aliya anima oniyaage humainea amaugafale aihatali hatali humatageno Anumaya Koti aufina amega amaugafamoa kanale hu-maineane.
HEB 9:14 Ani yamoa amega amaugafamona alino kanale humateanagi Kalaisi kolamoa hulatenea yanagino tusiya huno agase-maine. Kalaisia kefo yamaa omaleneanagino agola maige maige nehia Alu Aotage Avamumoa aya higeno agaia augafa hakino Anumaya Kotina amine. Amineafe agaia kolamoa amega taugafaageya aye ohaminegi taguafima hanea kefo yamoa tahaeno falilatesia kefo yana, aye hami-talegeta tagaya menia maige maige huno mainea Anumaya Koti aliya veane mainone.
HEB 9:15 Mukia Anumaya Kotia kema higeya agaialegama umainaya veafena Anumaya Kotia Maa tamahaimu tamamigahue. huno hu-maineanagino maige maige hisaya hamaimu alisayafene huno Kalaisia Anumaya Kotiene veanene amunotifi maineno haegafama alino hagelafila-tenea kemona ali lokiya vai-malene. Nayoma alino hagelafi-matenea kema akave malenaya veamoya kefo yama hu-mainaya yaamimoa aigagimategeya mainaya nofipiti amavayu hisiafe miyana ataleno Kalaisia fali-maine.
HEB 9:16 Nago kanomoa faligahema nehunoa manua amino Falisugetamahena ma yania aligahae. huno hu lokiya vai-maleneanagi ani kanoma ofalisigeyahena oaligahae.
HEB 9:17 Oaligahagi veama falisageyahena hu lokiya vai-malenaya keamimoa tamage huno falote nehie. Anima hu lokiya vai-malenaya kema humalenesaya veama ofaliya afaama maisayana hu lokiya vai-malenaya keamimoa afa ya kana hugahie.
HEB 9:18 Ani yamo aepamoa maa humaine sipi sipia hegeno faligeno ani sipi sipimo kolamoa taki-lavigeno hagotenoma alino hagelafi-matenea kemoa falote huno tamage hu-maineane.
HEB 9:19 Nayona Mosesea mukia kahegi kea mukia veala hamapaiteno pulamaka nafanemo kolaene mememo kolaene titafaene ali havigu huteno nagola manaage inomo agia hisopua aliteno hisopulela sipi sipimo ayolagefa hiku kana huno maleno kiteno kahegi kemo avoene veanene hisopuleti kolapina ayeteno aihatali hatali humate humate hu-maineane.
HEB 9:20 Naa nehuno mage huno hu-maineane Ani kolamoa Anumaya Kotima alino hagelafi-lamatenea kemona alino tamagegeyama hisiafene huna takinelamatogi ani kemona akave maleho. huno hu-maineane.
HEB 9:21 Ania huno Mosesea kolana alino yuguletima kimale mono noteene ani nopima aliyama nealiya yayagaleene aihatali hatali hu-maleneane.
HEB 9:22 E, kahegi kemoa mage huno hu-maineane Kasagoya yamoa oniyaagema humainea yana kolateti alino aye haminageno oniya ohugahie. Kolamoa takema hu otavineleasina Anumaya Kotia kefo yatia aigetateno atale oatateleasine.
HEB 9:23 Ma mopafi yama ikapinaga hanea yamo avame ya kana hu-maineanagino ani yayagama aye hami-talesiafe sipi sipia hageno kolamaaleti aye hami-taleneanagi sipi sipi kolamoa ikapinaga hanea yana aye hami oatalegahigi nayo yamona agase-mainea yana Yisasi kolatetike ikapinaga hanea yana aye hami-talene.
HEB 9:24 Ikapinaga tama notafama tavelisia avame ya kana mono nona, ma mopafi veamoya amayateti kimalenaya mono nopina Kalaisia hai ofalenegi ikapinaga tama notafapi fatago huno hai fale-maine. Hai faleno maineno menia Anumaya Koti aufina tagaima taya hisia yafe maine.
HEB 9:25 Kafuahe kafuahena mono notela hagote kava kanomoa Anumaya Kotifema muse hutegahena kolana alino alu aotage nopina hai-maine. Ani kolana agaia kola nomagi Yisasia kafuahe kafuahema agaia fali-mainea kolana alino ikapinaga ohainegi nagoke yupa kanoa faliteno agaia kolana amine.
HEB 9:26 Kalaisia kafuahe kafuahema amileasina mukia kanafina ehema Anumaya Kotia ma mopama talo humalenea kanaleti aepa heno augafa agata aino falige falige hileasinagi. Aao menia ma mopama hano hisia kanamoa aupa nehigeno Kalaisia nagoke kana kanoale ma mopafina falote huno tagaila kefo yatima ali-talesia yafe agaia fali-maine.
HEB 9:27 Ania huno Anumaya Kotia Mukia veanea nagoke yupa kanoa falitesagena kaiyekea humategahue. huno humaine.
HEB 9:28 Ania huno Kalaisia nagoke yupa kanoa kasagoya veamogami kefo yaamima aye hami-talesia yafe faliteno agaia kolana Anumaya Kotina amine. Amineanagino haenagaama eteno enunofena kefo yatima ali-talesia yafena omegahigi agai agavama nemaisaya veamogami amaugafa aligatisia yafe egahie.
HEB 10:1 Mosese kahegi kemoa kanale yana haenagama falote hisia yamo avame ya kana huno laveli-maineanagi ani kahegi kemoa ani kanale yana omalene. Omaleneanagino kahegi kemoa Anumaya Kotifena kafuahe kafuahe nagoke augafa kava hutama sipi sipia hetama amiho. huno hu-maineanagi ani yamoa Anumaya Kotitegama neaya veamogamina alino kanale hu oamateneane.
HEB 10:2 Sipi sipima heya kolamaa takiyaamoma veamogamina alino kanale humateneleasina eteya nagoenena nago sipi sipia heya kolana ai otakileasine. Anumaya Koti agima alisaga nehaya veamogamina hagote kanafina sipi sipi heya ailakiya kolamo kefo yaamima ayehami-taleneleasina Ayenio nagupina kefo yania hanea yafe kana ya nenamie. huya ohaleasine.
HEB 10:3 Ohaleasinagi kafuahe kafuahena afuma heya kolamaa ailaki-mainaya kanafina Nagoene kefo yatia hane. huya hu-mainayane.
HEB 10:4 Aepaamoa maa humaine ve pulamakamo kolamoene mememo kolamoenena tamagelafa huno kefo yana aye hami oataleneane.
HEB 10:5 Ani yafena Kalaisia ma mopafima emainea kanafina Anumaya Kotifena mage huno hu-maineane Muse yaene afuma heya kolamaa takiya negamiya yafeenema okahainagenahena nago ya kamisua yafene huka nagai naugafa talo hu-malenane.
HEB 10:6 Afuyaga mukia atafi kaesagali-taleya negamiya muse yaene kefo yama aye hamisiafene huya afuma heya kolamaa takiya negamiya yaenefena kagaila okahaune.
HEB 10:7 Nagaya Yisasina anile mage huna nehue Veha Anumaya Kotiga nagaya ago emainoe. Nayona nagaife huya avopina kae-malenaya kemoa falote hisiafene huna nagaya kagaima kahaisia yana hugahe ago emainoe. huno hu-maineane.
HEB 10:8 Kahegi kemoa Maa hiho. huno humainea kehe Yisasia hagoteno mage humaine Anumaya Kotiga muse yaenema afuma heya kolamaa takiya negamiya kavafeene afuyagama mukia atafi kaesagaliya negamiya kavaenefena okahaigeka musena nohane. huno humaineane.
HEB 10:9 Hutenoagi nagoene mage humaine Anumaya Kotiga nagaya kagaima kahaisia kavala hugahe emainoe. huno hu-maineane. Ani kema humainea kemoa hagote auava yana ali neataleno haegafama falote hia yamona alino tokiyaage huno ali heti-malene.
HEB 10:10 Naa hu-maineafe Anumaya Kotina nehaiya yanagino, maa humaine Yisasi Kalaisia nagoke yupa kanoa agaia augafama hakino amiteno fali-mainea yateti tagaya ma mopafi veamogatina kefo yatia aye hami-talegeta tagaya agaila alu aotage veanea menia mainone.
HEB 10:11 Mukia mono note kava vayamoya kanaaene kanaaene hetiya aliyaamia nealiya afua heya kolana takime lakime hai-mainayanagi ani yamoa kefo yaamia ali oataleneane.
HEB 10:12 Ali oatalenegi Kalaisia nagoke yupa kanoa augafa hakino Anumaya Kotina amiteno fali-mainea kolamoa agola mukia kanafima nehaya kefo yana aye hamitalegeno Anumaya Kotina tamaga kaiyagaa ala vaya mainalega hanea siale haino maine.
HEB 10:13 Maineno Anumaya Kotia kame vayaama aiyafinaga amatesigeya Kame hugatonageka tagase-mainana kanomogae. huya hisayafe agava maine.
HEB 10:14 Nagoke yupa kanoa faliteno Anumaya Kotina kolamaa aminea yateti mukia alu aotage auava yama hisaya tokiyama amaminea veafena Fatago kavakeya hutama agola maige maige hisaya veane mainae. huno humatene.
HEB 10:15 Alu Aotage Avamumoa ani kelamage kea hagoteno mage huno tahapai-maine
HEB 10:16 Anumayamoa mage huno hu-maineane Haenagaa amakaila haegafa alina hagelafimatesua kea amamitena nagainia kahegi kea amakupinaga maletena amaku amakesafinaga kae-malegahue. huno hu-maineane.
HEB 10:17 Nagoene mage huno hu-maineane Kefo yaamiheene kema neatagayaya yaamienefena havina nagekani-talegahue. huno hu-maineane.
HEB 10:18 Anumaya Kotia kefo yatihema huno aigetateno atalelatenea yafena nagoene kefo yama aye hamitalesie huya afua heya kolamaa takisaya aliyana omalene.
HEB 10:19 Nayona vayamoya mono nopina kenaleti asa hunalagi-maleteya Ame kaiyaga alu aotage nopinagagitama ohaigahae. huya hu-mainayanagi Yisasia ani kena aye hatata huno hai fale-maine. Anima aye hatata humainea kenamoa maa humaine. Agaia augafagino ania huno aye hatata hu-maleteno katia vali-malene. Menia ani haegafa katia tahaimuma tamisia kapinagita Anumaya Kotitegama ke huta havigesunafe hai falegahune. Naa hu-maineafe nafunagana-gatama Yisasi kolamoa ayenalagi-malenaya kena ago ayehatata hu-maleneanagita Anumaya Kotima mainea alu aotage nopina kolia ohuta afaa hai falegahune.
HEB 10:21 Yisasia mono notela ala kava kanoti maineno Anumaya Koti veamogatia kava yagai nelate.
HEB 10:22 Na yafe tole lagesa ohavita Anumaya Kotife havita lagupi maleta tametiti hu-mainonafe taugafamona nunu alagaage humainea titeti sese hu-lateneanagita Anumaya Koti avatela umaigetao. Yisasi kolateti tagupina aihatali hatali hu-malegeno oniyaagela ohuneanagita tagupina Kefo yama huna yamoa hane. huta havita kana hisuna yana ago ali-talene.
HEB 10:23 Anumaya Kotia Maa yama hu-lamategahue. huno hu lokiya vai-malenea kemoa ani yana tamage huno hugahie. Tamage huno hu-maineafe tametitia nehune. huta hu falote nehuna kehena tole lagesa ohavisunagi tokiya vaita atafa hu-lisune.
HEB 10:24 Tagesa havi havi huta tafu-tagana-gamifena hamau amayamopafi hamaisia yafeene kayone kavama hisaya yafeene ali hetimatesunageya tagaila ania huya ali hetilatesae.
HEB 10:25 Yisasi kema havigahema tafu-taganayaene melitaluma nehuna yana oatalesune. Nagoa veamoya ago atalenayanagi tagaya oatalesune. Yisasia eteno kaiyekema me hulatesia kanamoa ago aupa hu-mainegi melitalu hutama Tamaku tamamena ali lokiya vaitama maiho. huta hamapaisune.
HEB 10:26 Anumaya Kotina kelamageama havilama hutetagi eteta neataleta Nahaiya kava hugahuema. nehuta kefo yama hume hume nevisunagenofena nago kanoa eteya haesageno falinageno kolamaamoa taki lavisia yamoa ani kefo yatia nagoene aye hamisia aliyana omalegi. Anumaya Kotia kame vayaamogamina tusia atafi amatesigeno teno fanane hisigeya hikanufa vaigahayafe Anumaya Kotia kaiyekema hulatesia yafena tusiya huta kolia hisune.
HEB 10:28 Nagoa veamoya Mosese kahegi kema ali tagayageyahena tole vayapi tagufa (3) vayamoyafi ageteyama hu falote hutayana ani veafena hamauna hu oamateya hamayageya fali-mainayane.
HEB 10:29 Fali-mainagi tamakaya na tamakesa nehaviye? Anumaya Koti nafanemofema amakaveno huteteya ali haviyama hutenaya veamoya alisaya anonaamia tusia kana yana haneanagiya aligahae. Kalaisima fali-mainea kolamoa alino hagelafi-latenea kemona aepaa hanea yafena nagoa veamoya alu aotage veale huya hu neamatayanagi ani veamoya ani kolafena Afa yane. huya huteteya kayonema hisuna yama nelamia Alu Aotage Avamumona hu-haviya hu neatayanagiya anonaamia aligahae. Mosese kahegi kema ali neatagayaya veamogamina amakaseya tusia havi kayo aligahae.
HEB 10:30 Anumaya Kotina tagaya age-mainonagino mage huno hu-maineane Kefo yama nehaya veamogamina anonaamia kayoma amamisua yana nagainia yane. Nagoene mage hu-maineane Anumayamona nagaini veamogamina nagainia kaiyekea humatetena alina fako hugahue. huno hu-maineane.
HEB 10:31 Haimua hanea Anumaya Kotia kaiyekea hulateno kayo kevema tamisia yafena tusia koli hisuna yana hane.
HEB 10:32 Nayona Yisasi kanale mono kema havitageno aye halelamategetama mainageno kana yama falote higetama tusia kana yana aliyanagi mai lokiya vaitama mainae. Ani kavama hu-mainaya yafena tamakesa ali hao hutama maiho.
HEB 10:33 Nagoa kanafina mukia veamogami amaufina tamakia hu-haviya nehuya tamakaila ali haviya hulamatenae. Naa nehuya nagoa kanafina ania huya havi kavama humataya nelamafu-gamima amaya hisaya yafena nagopi ailokaetama mainetama ani kana yana ali-mainae.
HEB 10:34 Ali-mainagi Yisasi kema havilinaya anagala amavaleya nofipi amatagetama amakaifena tamahau humatetama amaya nehageno kame vayamoya ayaamoya nagoa afeno yatamima musufayama hagetama mage nehae Afa yanagi tagaiti yana tusia yanagino ikapinaga hanege hanege hisia yatia hane. hutama muse yapi nemaiyane.
HEB 10:35 Nemaiyafe menia tamakupima malenaya yana oataletama tamakuamoa kolia ohisigetama tokiyaage hutama maiho. Naama hutama maisayana Anumaya Kotia muse huteno tusia muse hisaya yana tamamigahie.
HEB 10:36 Tamamigahianagi ako hutama mai lokiya vaitama mainetama Anumaya Kotina haisia kavakeyama hisayana Anumaya Kotia Ma yama hulamategahue. huno hu lokiya vai-malenea yana hulamategahie.
HEB 10:37 Ani yafena Anumaya Koti avopina mage huno kae-maleneane Anima esia kanomoa aupa kanafi ago egahie. Agava omaigahianagino aupa kanafi ago egahie.
HEB 10:38 Anumaya Kotia mage huno hu-maineane Fatago veane mainae. huna humatenoa veamoya nagaifema haviya amakupi maleya amametiti hu-mainaya yateti mai kanale huya maigahae. Maigahayanagi etenoma koli huno nagai kema atalesimofena musena hu oategahue. huno higeya avopina kae-malenayane.
HEB 10:39 Tagaya koli huta agai kea ataleta agola taugafa tagata aisia ata tegelege hisia kumate visuna veanea omainonagi Yisasife havita lagupi nemalonanagino tagu tamena aligatisigeta agola maisuna veane mainone.
HEB 11:1 Anumayamofema havita lagupi maleta lametiti hu-mainona yamoa maa humaine Tagaitima tametiti nehuna yana aligahune. Noagona yana haneanagita tamage agegahune. huno humaine.
HEB 11:2 Nayona veamoya haviya amakupi maleya amametiti hu-mainayateti Anumaya Kotia Kanale veane mainae. huno humateneane.
HEB 11:3 Havita lagupi maleta lametiti hu-mainona yamoa maa humaine Anumaya Kotia ke nehigeno ikaene mopaene falote humaine. huta ago havilinone. Oagetafa hu-mainona yateti menima neagona yana talo humalene huta tagupina malenone.
HEB 11:4 Epoloa Anumaya Kotife havino agupi maleno ametiti humainea yateti kanaleya huno Anumaya Kotina sipi sipia heno kae-salamana huno amigeno Anumaya Kotifema havino agupi malenea yafena Anumayamoa Kanale ya hane. Fatago kano mainane huna hu negatoe. huno hu-maineane. Epoloa nayona maineno fali-maineanagi Anumaya Kotife havino agupi malenea yamoa meni kanafina ani kehena tahanepaiye.
HEB 11:5 Inokua Anumaya Kotife havino agupi malenea yateti Anumaya Kotia Havigu faliyafene. huno avalegeno ikapinaga hai-maineane. Haitegeya mukia veamoya Inokufena atiyegetayana Anumaya Kotia ago avalegeno vigeya augafa oagenae. Inokua afaama mainea kanafina Anumaya Koti aufina haiya kavakeya hu-maineane. huya humainae.
HEB 11:6 Anumaya Koti avatema nevaya veamoya hagoteya ma kea haviya amakupi maleya amametitia hisae Tamage huno Anumaya Kotia maineanagino havigesuna yana tamigahie. huya hisae. Hugahayanagi agaifema haviya amametitima ohisaya veamogamifena musena nohie.
HEB 11:7 Anumaya Kotia Noana haenagama falote hisia yana, Noaa oagenea yafema hapaigenoa Tamage nehane. huno amayo aiteno havino agupi maleno ametiti huteno agaia afamo kanoa hamaoke hesiafene huno Anumaya Koti kea akave maleno tipi kalea talo humaine. Naa hu-maineafe Anumaya Kotifema havino ametitima hia yana Anumaya Kotia ageteno Fatago kano mainane. huno huteneane. Huteneanagino mukia ma mopafi mainaya veamoya Anumayamofema haviya amakupi omalaya auavaamia Noaa ali fufute maletegeno Anumayamoa ani veamogamifena Kefo ya humainae. huno anonaamia amamigeya fali-maine.
HEB 11:8 Anumaya Kotia Apalahamufena mage huno humaine Kumakaa neataleka kamisua mopalega vuo. huno higeno Apalahamua ani mopalegama visia kamona oageneanagi Anumayamo kea havino agupi maleno ametiti huteno akave maleno hetino umaine.
HEB 11:9 Anumaya Kotima Kamigahue. huno humainea kehena havino ametiti huteno ani mopale umaineno natu veamoya nehaya kava huno kanale nona kino omainegi yugu no kino maine. Anumaya Kotia Na mopa tamamigahue. huno hulokiya vai-malenea mopale nafaneamoa Aisakiene agehoamoa Yekopuene ania huya yugu no kimaleya mainayane.
HEB 11:10 Anumaya Kotia agesa haviteno tokiyaage noyaga hanege hanege hisia posileti ikapinaga kimalene. Ki-maleneanagino Apalahamua ani kumafena tusiya huno agesa havi havi huteno Ani noyagafi umaigahuanagina afaa menia yugu nopi maigahue. huno hu-maineane.
HEB 11:11 Higeno aamoa Salae namo a maineanagino Anumaya Kotia Nafanekaa ategane. huno hu lokiya vaino huteanagi Apalahamua kosuna leno maineanagi ani kehena Tamage hanafe hana yana afaa hugane. huno havino agupi maleno ametiti hu-maineafe nafanea atene.
HEB 11:12 Ategeno Apalahamua kosuna leteno ago faligahe hianagi agaipiti aginagomoya ohavunamaa veane ateya aitagu-fageno ikatema hanea kanefiyagamo hia avamete huteya ti kahaepamoma hia avamete huya ohavunamaa veane aitagufe-mainae.
HEB 11:13 Ani veamoya Anumaya Kotima hu lokiya vaino Tamamigahue. huno humainea yana oaliya afaa haviya amametitia nehuya fali-mainae. Ani yana oalinagi alualega hanegeya afaa maineya amakesa haviya musena humainae. Musena nehuya Natu veane kana huta afaa yoka ma mopalela mainone. huya nehuya mainae.
HEB 11:14 Ani kema humainaya veamoya mage huya humainae Haenagaa haegafa kumatile haita maisuna yafe tamametitia nehuta agava mainone. huya humainae.
HEB 11:15 Hayanagi Apalahamuma ataleno emainea mopa aepaahema mani kema hileasina eteya maiyahae huya valeasine.
HEB 11:16 Valeasinagi ani mopahena ohunagi ikapinaga visaya kanale kumafe tusiya huno hamaigeya humaine. Hamaigeya Anumaya Kotifena Anumayatimo maine. huya hageno Anumaya Kotia ani kehena havigeno aipamoa kanale higeno ikapinaga kanale kumaamia talo humatene.
HEB 11:17 Anumaya Kotia hulokiya vaino Apalahamufe mage huno humaine Aisakipiti kagai veala kasagoya veane falote hugahae. huno humaine. Nagi Anumaya Kotia Apalahamufena Hisua kea havisio? huno avame huteno mage hie Kagaikaa nafanea heka kae-salamana hunato. huno hapaiyanagi Anumaya Kotia Naa yama kamigahue. huno hu lokiya vai-malenea kea Apalahamua havino ametiti hu-maineafe Aisakina aiya nagoke nafaneamona heno kae-salamana hutegahe humaine.
HEB 11:19 Huteno Apalahamua mage huno agesa havie Anumaya Kotia tusia tokiyaaene kano maineanagino fali-mainesifitila ali hetitesia tokiyaa hane. huno huteno haegahe nehigeno Anumaya Kotia ke higeno atalene. Ataleneafe tagaya avame kema havisunana Aisakia ago fali-mainefiti ali hetitene huta hugahune.
HEB 11:20 Aisakia Anumaya Kotife havino ametitima hia yafe Yekopugani Isoganitema haenagaa falote hisia yafe huno manua anamine.
HEB 11:21 Yekopua kosuna leno faligahe hia kanafinagi Anumayamo kea havino ametiti hia yafe ayopaale aivasaga huno ape hu-maineno Anumaya Kotifena muse huteno aginagomogania, Yosefe nafanelatana, manua anamine.
HEB 11:22 Yosefea falisia kanamoa aupa higeno Anumayamo kea havino ametitima humainea yafe vayaamo-gamina mage huno hamapaiye Anumaya Kotia Isipiti Isaleli veama amavaleno visigeyahena nayamufama vati huya aliyama visayana Anumaya Kotima tamamisia mopale mo hevainateho. huno hamapai-maineane.
HEB 11:23 Mosesena ita-afoamogania kanale nafane ateteana muse haanagi Isipi sauve kanomoa Ne nafaneyaga hamaeho. huno hia kehena kolia ohuana Anumayamo kema haviana anakupi maleana anametiti hu-mainaa yafe tagufa (3) ikana ani nafanea fala-kiteana mainae.
HEB 11:24 Maiageno Mosesea maineno ko hutegeya mage hae Isipi Sauve kanomo munamo nafane maine. Felona agehoamoe. huya hisaya yafena ohaigeno Anumaya Kotifena havino agupi maleno ametitia humainea yafe mage huno humaine Nagaya agai nafanea omainoe. huno humaine.
HEB 11:25 Huteno agesa havigeno Isipi vayaene mainena kefo yamoa aupaa fanane hisia muse yana ohisue. huno hie. Huteno Nagaini anagala, Anumaya Koti anagaene umainesugeya Isipi vayamoya ali haviya humatesaya avamete huya nagaila ali haviyama hunatesayana kanalene huna hugahue. huno humaine.
HEB 11:26 Huteno Isipi vayamogamina mukia kanale-nale yaamia kasago haneanagi Mosesea ani yafena agesa ohavinegi Afa ya kana yane. huno neataleno Anumaya Koti anagaene mainena Kalaisima ali haviya hutesaya avamete kava huya nagaila ali haviya hu-natesagena kanalene huna hugahue. huno nehuno Anumaya Kotia haenagama kanale yama amisia yafe agesa havino maine.
HEB 11:27 Mosesea Isipitima ugahema hiana Anumaya Kotife havino ametiti humainea yafe kava kanomoa hai vaiteanagi kolia ohunegi tagaya taulagamoa oagenea Anumaya Kotina agemegeme haisia avamete huno kolia ohuno maineno tokiya vaino maine.
HEB 11:28 Anumaya Kotia Isaleli veafena mage huno hamapaiye Ensole kanomoa Isipi veamogami yage ne nafaneyagaamia hamaegahie. Tamakaila otamahaesia yafe sipi sipia hetama kolamaa fiate fale-malenegeno tamakai ne nafaneyaga amakaseno ohamaesie. huno higeno Mosesea ani kea havino ametiti huteno ani kemo akave maleno Isaleli veala hamapaigeya ania humainae.
HEB 11:29 Isaleli veamoya Isipi mopaleti ataleya Haesa titema ayana haviya amametiti hu-mainaya yafe Anumaya Kotia higeno ani limoa aluga luga heti-mainegeya hau hu-mainea mopa kana higeya ani lina afaa takaeya vayanagi Isipi vayamoya amanatiya Ani lina takaesune. huya hayanagi aluga lugama heti-mainea timoa eteno meli-nakaigeya fali hano humainae.
HEB 11:30 Isaleli veamoya Anumayamofe haviya amametiti haya yafe Yeliko kumate uvayima hayana sevenia (7) yupa kagi kagi nehageno yafatetima hu-malenaya kegiyamoa agaia tagape ailavi-maine.
HEB 11:31 Nagi Yeliko kumate veamoya Anumaya Koti kea haviya amakaveno hutenaya yafe Isaleli vayamoya amakasageya fali hano hayanagi nagola kumai yate vai neaya amo agia Lehapue ani yupa ofaline. Ani amoa Anumaya Koti kea havino agupi maleno ametiti hia yafe Isaleli vayamoya yaufa neeya tole kanolatana hunatageana amamata hugahe vaageno ani amoa anaya huno nomaafi anavaleno anategeana fayaa yafe Anumaya Kotia haoke hegeno ofaline.
HEB 11:32 Nagoa vayafena ayaayate kea ohugahue. Anumaya Kotife haviya amametiti humainaya kava vayamogami amakia Kiteonie Palakie Samusonie Yefatae Tevitie Samuelie naa vayala Anumaya Koti amaune vayafeenenagina ayaayate maina ani kema hisua kanania omalene.
HEB 11:33 Ani kasagoya vayamoya Anumaya Kotifena haviya amakupi maleya ametiti humainaya yafe kame vayaamia hamae hano humainae. Fatago kavakeya huya veatela kava yagai-mainae. Anumaya Kotia Tamamigahue. huno hu lokiya vai-malenea yana amamine. Nagi nagola kaveage afumo agia Laiyonie afugino Anumaya Kotife haviya amametiti haya vayala hamaeno nakai-talegahe hianagi avaya Anumayamoa alino tukiteneane.
HEB 11:34 Nagoamogamina tusia atafi amasaga huya takigahe hayanagi Anumaya Kotia ani ata alisu humaine. Kame vayaamimoya ayaaya naepeleti hamaegahe hayanagi Anumaya Kotia hamaoke hemaine. Amakaila amayamufa omalegeno Anumayamoa ali hetimateteno tokiyaage amayamufa amamigeya ati vayala amanati-mainae.
HEB 11:35 Nagoa anemoya Anumayamofe haviya amametiti humainaya yafe vayaamima faliyana Anumaya Kotia fali-mainafitila ali hetimategeya eteya amavale-mainae. Kame vayamoya nagoamo-gamina nehamaeya mage huya hae Anumaya Kotina tamakavenoma hutesayana otamahaeta afaa tama-talesunagetama notamilega ugahae. huya hayanagi mage hae Tamahaoteyatamigi tahaesageta faliteta haenaga hetita kanaleya huta maigahune. huya hageya hamayageya fali-mainae.
HEB 11:36 Nagoamoya Anumayamofe haviya ametiti humainaya yateti kame vayamoya kigi hu neamateya hegi kayoteti hamaeya aeni nofiteti kimateteya kinafina amatenayane.
HEB 11:37 Nagoamogamina yafa kayoteti hamayageya fali-mainae. Nagoamogamina tuteti hefatagi-lole hageya fali-mainae. Nagoamogamina ayaaya naepeleti amaugafafina aye kalo hageya fali-mainae. Nagoamogamina kenaamia omalegeya memene sipi sipiene augafaleti kenaamia hatiya fai-linae. Nagoamogamina kaveamiene faesaya noamiene afenoamiene omalegeya kame vayamoya ali haviyana humatenae.
HEB 11:38 Nagoamoya koli faleya agoyafinagaene yafa kapinagaene mopafi kafi-malenaya komufinagaene vaya omai kame kotegaene falageyama vayana tusia kanale veanegiya naa humainayafe nagoa ma mopafi veanea ania huya fatago veanea omainayanagiya ani kanale veanenema maisayana oamategahie.
HEB 11:39 Mukia ani veamoya kanale ya huya Anumayamofena haviya amakupina maleya amametitima humainaya kea nehavunanagi Anumaya Kotia Kanale yama hulamategahue. huno hu lokiya vai-malenea yana aupaa oamamigeya fali-mainae.
HEB 11:40 Nayona Anumaya Kotia kanale yama hulatesia yana ago talo tala hulateneanagi hagoteyama mainaya veamoya ago aliteya tagasesaya yafena Anumaya Kotia ohaigeno oamamine. Nagopi mai lokaetesunageno Fatago veane mainae. huno hulategahie.
HEB 12:1 Mukia veamoya Anumayamofe haviya amakupi maleya amametiti hu-mainaya yana tagaila ago taveliteya faliyanagi siamoma hia kava huya tagaila mai kove humaineya nelagae. Naa nehayafe Anumaya Kotia taiya-yeta visuna katia tamineanagita ma mopafi yafema tagesa havi havi nehuna yamoene kefo yamoma nofi hulatenea yamoene aya aya kenamoma hia kava nehianagita taga huta alita aupa huteta Anumaya Kotima tavelia katela tokiyaage huta taiya-yeta visune.
HEB 12:2 Taiya-yeta neuta mukia yatela moge mege ohisunagi Yisasitekeya agelita visune. Yisasife havita tametiti hu-mainona yamona aepaaene augafaaene kanogino mage huno humaine Naipamoa muse yama alisiafe yafaga yosalela nahaeya asaigena fali-mainofe nagayema hia yana kana yanagi afa ya hane. huteno fali-maine. Faliteno hetino Anumaya Kotina aya tamaga kaiyaga, kava vayamoya nemaiya siale haino mainegi ani kanomona ageme geme haiho.
HEB 12:3 Tamakaila kasalola otamahaeno. Yisasifena tamakesa havi havi hutama maiho. Kefo yama nehaya vayamoya Yisasina kame lagiya kaetayanagi agaya tokiyaage huno mainea yafena tamakesa nehavitama tamahaumanamoa faki faki ohino.
HEB 12:4 Kefo yama hiho. huya aye lamavataga hageno tamakuamoa kana higetama Aao, kefo yana ohugahune. hutama hageya tamahayageno kolatamimoa higetama ofalinae.
HEB 12:5 Anumaya Kotia tamavaleteno nafaneyagaahema humainea kemoa tamake-kanio? Mage huno hu-maineane Nafanenimoga Anumayamoa kaumonoma malesigekahena Afa yane. huka ohuo. Ke negama-kino kayoma kamisiana kagaila kavaleno ali fatago hugatesia yafe nehigi kaipamoa haviyana ohino.
HEB 12:6 Anumayamoa ayamopafima nehaiya veala amaumono maleno ali fatago hu neamateno. Nagai nafane maigahae. huno neamavalea veala kayona neamamie. huno humainea kea ohavinao?
HEB 12:7 Kana yama falote hisigetama Tamaumono malenoa kea havisae. huno Anumaya Kotia agaia nafanemogatama mainae huno ali fatago hu nelamategi tokiyaage hutama maiho. Mukia nafaneyaga neamafaya kayona amaumonola nemalaya yane.
HEB 12:8 Naa yanagino Anumaya Kotia tamakaila ani kavama hu otamateleasina agaia lamatenea nafane kana ohaleasinagi munamo nafanea, nefaa omai nafane kana hutama maileasine.
HEB 12:9 Ma mopafi nelamafaya tamaumono maleya kayo kevema lamamigeta amakima alisaga huta amakai kema ali hipoya nehuta nemaunanagi Anumaya Kotia tagu nafanemo nefa maineanagita agai kea tayamufaage huta ali hipoyama hinutahena kanaleya huta maigahune.
HEB 12:10 Ma mopafi nelafaya aupa kana kanoa amakaiami hamaiya avamete huya kayo kevea nelamiyanagi Anumaya Kotia kanale kava huno kava yagai-lateno agaia mainea avamete veala alu aotage veane maisuna yafe kayo kevea nelamie.
HEB 12:11 Nelamia yamofe Kana ya nelamigi muse yatia omalegeno otahaiye. huta nehunanagi haenagaa ali fatagoma hulatenea kanafina augafaaene yamoa falu hisia yana falote hinageta keama ali hipoya nehisumogata fatago huta ani falu yapi maigahune.
HEB 12:12 Tamayamoma kalake kisigetamahena alipi hu-linetama aliyana aliho. Tamaleya yama nelama-kesigetamahena ayepi hu-mainetama tokiyaage hutama vaiyeho.
HEB 12:13 Tole lamakesa ohavitama tamaiya aye fatago hutama vaiyesayana nago kanomoa tole agesama havisia kanomona kanale hutesigenofena nagoke agesale maigahie.
HEB 12:14 Mukia veanenena falu hutama maisaya yafe tamakesa nehavitama tamaya mukiki hutama alu aotage veane maiho. Fatago huya omaisaya veamoya Anumaya Kotina oagetafa huya oagegahae.
HEB 12:15 Anumaya Kotia kayone hisaya yamaa ago tamaminegi tamakaipiti nagoa veamoya ani yafema amakaveno humisaya yafena kayetama maiho. Nagoamoya kana ya amamigeno amaipamoa haviya higeno amaipafinaga atuage yosamoa hafuya ayeteno nenaamoa atuage hia kava huno mukia veapina kana yamoa falote huteno tamakua alino haviya huno oniyaage hugahigi kayeho.
HEB 12:16 Kayetama mainetama Isoa nayoma humainea kavala ohiho. Isoa nagoke yupa nesia kavefe haviteno mukia kanafima kanale yama alino maisia yama nefaa amisia yafena agesa ohavino Aoteyamaae. huno humainea kavala ohiho. Havigu nagoamogatama Anumaya Kotifena Haoteyamaae. hutama nehisagetama nagoamogatama alu kanomo anea amavayu ohiho.
HEB 12:17 Isoa haenaga agesamoa akalo higeno nefaa manuma amisia yafena tusiya huno avia ateanagi nefaa aganaamo ani manua ago amineanagino agua aiyahae huno Isona manuma amisia kamaa omalegeno manua oamine.
HEB 12:18 Nayona Isaleli veamoya kahegi kema aligahena Sinai agoyamo aiyafi haiya maineya neageya ani agoyamona tusia ata neleno tusia kumayu hani kigeno yasimoa tusiya humaine. Tamakaya Anumaya Kotitega visayana tamayana avate hisaya yate ougahagi Isaleli veamogamima humatenea kavala hu otamategahie.
HEB 12:19 Nehigeno ufe kemoene nagoa kema huhaleno higeya haviya kehena koli huya Mosesefena Nagoene havisuna yafena notahaiye. huya humainae.
HEB 12:20 Ani kemoa mage huno hu-maineane Veaneo afuo ani agoyafima haino aiyakama ayesigetamahena ayana avate hugahe yafa kayoteti hamaegeya faliho. huno hu-maineane. Na ke higeya haviteya tusia amamayo aimainae.
HEB 12:21 Mosesea ani amamayoma aiya yana ageteno mage hie Nagaienena ani yama neagogenoa namayo neaigeno tagi tagiyana nenage. huno hu-maineane.
HEB 12:22 Hu-maineanagi tamakaya haegafa huno mainea Anumaya Koti kumatela ago emainae. Ikapinaga hanea Saiyoni agoyale kimalenea Yelusalemua ago emainae. Ani kumatela ohavunamaa ensole vayamoya musena huya Anumayamo agia alisaga nehuya melitalu nehale ago emainae.
HEB 12:23 Anumaya Kotia yage nafaneamoya amakua aiyahae hageno Anumaya Kotia amakia ikapinaga ago kae-malenea anaga mainale emainae. Mukia veamogamina kaiyekema hu neamatea Anumaya Koti maineleene Anumaya Kotife haviya amakupi malageno Fatago veane mainae. huno humatenea veala hai ala veaneage maineya falitageno amaku nafanemoya ikapinaga haiya mainaleene ago emainae.
HEB 12:24 Yisasia haegafama alino hagelafi-latenea kema alino falote hu-malenea kanoene kefo yatima aye hami-talenea kolamaamoene mainele ago emainae. Nayona Kenia aganaamona haegeno Epoloa fali-mainea kolamoa Kenia kefo yama humainea anonaa aligahie. huno hu-maineanagi Yisasi kolamoa ani kolana agase-mainea kolanagino mage hie Kefo yatamia ago aye hami-talenoe. huno humaine.
HEB 12:25 Menima kema nehia kanomo kea, Yisasi kema, akavela omalesagi kayeho. Nayona Anumaya Kotia mopale kanoa Mosese avayafiti, kema higeya akavema omalaya veala kayo kevea amamineanagino menia ikapinagati ea kema nehia kanomo kea ohavinesamogatama tahaokela ohegahianagino tusia kayo tamigahie.
HEB 12:26 Nayona Sinai agoyafiti ke nehigeno tusia imila ali-maineanagi menia mage huno hu lokiya vai-malene Nagoene mopaagela alina kosia ohugahugi ikaene alina kosia hugahue. huno hu-maineane.
HEB 12:27 Nagoene. huno hia kemo aepaamoa maa humaine agaia talo hu-malenea yana alino kosi hinageno fanane hugahianagi fananema ohisia yamaa tokiyaage huno agola hanegahie.
HEB 12:28 Naama hisiafenagino lagaifena Kava yagai-lamategahue. huno humainea kea havita lagupi malenona yana kosi kosi huno fananema ohisia yafena tusia muse hisune. Anumaya Kotia kefo yafena aipamoa ata neleanagino ani atamoma mukia yama leno fanane nehia avamete kano maineanagita tamayoa neaita Anumaya Koti aipamoa kanale hisifa kavakeya huta agia alisaga higetao.
HEB 13:1 Yisasi kema haviya amakupi malenaya nelama-fugamina tamaipa amamiho.
HEB 13:2 Natu veala noamakesaya veanema, kumatamile esagetamahena kanaleya hutama kava humateho. Nagoamoya naa vayafena Afa vayale. huya hayanagi ikapinagati aya ensole vaya amavaleya kava humatenayane.
HEB 13:3 Kina nopima mainaya veala tamakaiene ani veanene nemaiya avamete hutama amaya hiho. Ali haviya humataya veafena ania huya tagaila ali haviya hulatageno amaugafa amakata aiya avamete huno tagata neaye hutama amaya hiho.
HEB 13:4 Alavemo-gatama maisaya yana kanale yanagi anene munanenena vemogatama amavayu ohigeya ane munanemo-gatama vemogamina amavayu ohiho. Ani kavama hisagenoa Anumaya Koti kaiyekea hulamateno kayo keve tamamigahie.
HEB 13:5 Monema alisaya yafena hagaa oalitama afaa maiho. Malenesaya yafena tamaipamoa kanale hinagetama Nagoene ani yana alisune. hutama ohiho. Anumaya Kotia mage huno hu-maineane Nagaya nagela kanina otama-talegahuanagina tamage huna tamaya hugahue. huno hu-maineane.
HEB 13:6 Hu-maineanagita tole lagesa ohavisunagi tokiyaage huta maineta mage hisune Kolia ohugahugi Anumayamoa kanaleya huno naya nehigeya veamoya ali haviya hu onategahae. huta hugahune.
HEB 13:7 Anumaya Koti kea tamahapai-mainaya mono kava vayafena tamakesa haviho. Anumaya Kotife haviya amakupi maleya kanaleya huya vaiyeyama nemaiya kavamo falote hia augafaaene yafena tamakesa havi havi nehutama Anumaya Kotife haviya amakupi maleya amametiti nehaya avamete hutama maiho.
HEB 13:8 Yisasi Kalaisia nayoene meniene nagoke avamete hume hume haino agola aniageya hugahie.
HEB 13:9 Naa nehiafe alu mono kema tamahapaisageya havi kate tamavaleya tamategahe hugahagi kayema ohaviho. Ma kavela neho ma kavela oneho. huya haya kema akave nemalaya kemoa tamaya ohugahae. Kavemo nesunafe kahegi kemoa tagu tamena alino kanale hu otategahigi Anumaya Kotia kayone yamaaleti kanaleya huno alino tokiya vai-lategahie.
HEB 13:10 Nayona mono note kava vayamoya sipi sipi heya kae-salamana hu-mainaya yamoa alu kate umainayafe Yisasi kolamoa amaya ohigeyahe onegahagi Yisasima yafaga yosalema fali-mainea yana tama yanagita tagaya nenone.
HEB 13:11 Mono note hagote kava kanomoa kefo yaamihe sipi sipia hageno kolamaa alu aotage nopinaga alino haiyaamo ailake hu-maleteno tamaa alino hati-lavino kegiyamoa malaga viaamo atafi mo kaeno fanane hu neataleane.
HEB 13:12 Naama humainaya avamete huno Yisasia fali-mainea kolateti kefo yati aye hamiteno alu aotage veane maisayafene higeya kegiyamona malaga avaleya agaye hisifa kavala mo hutageno agata neaigeno fali-maine.
HEB 13:13 Naa hu-maineafe tagayaenena ania huta kegiyamona malaga Yisasite vigetao. Agaima ali haviya hutenaya yana tagaienena tagaye hisifa kavala hulateya ali haviya hulatesae.
HEB 13:14 Tagaya agola maisuna kumala ma mopafina omalegi ikapinaga agola maige maige hisuna kumate haenaga haisuna yafe nelahaigeta agava mainone.
HEB 13:15 Yisasia tagaife huno fali-mainea yatetila Anumaya Kotina muse yama amigahena sipi sipia heta oamigahunagi mukia kanafina tavayafiti Agaife havina nagupi malenoe. huta hu falote nehuta Anumaya Koti agia alisaga huge huge higetao.
HEB 13:16 Nehutama veala ali kayone humatetama malenesaya yapitila veama amamisayana Anumaya Kotina muse ya amisageno aipamoa kanale hugahie.
HEB 13:17 Kava vayamogami kea havitama ali hipoya nehutama amakai amaiyaafi maiho. Anumaya Kotia tamaku tamamete kava hisaya yafe ali hetimateno aliyana amamineanagi haenagaa tamakaifena hamavi-gegahie. Hamavi-gesigeya tamakaila muse hisaya kema hisagetama tamakaienena muse hugahayanagi amaipamoa kanalema ohisiana tamaya ohugahie.
HEB 13:18 Tagu tagesa havunana kefo yatia omaleanagita Anumaya Koti agima alisaga hisuna yafene huta mukia kanafina kanale kavakeya huta hisuna yafene hutama Anumayamotega tagaifena nunamupiti havigeho.
HEB 13:19 Tamakayaene umaisuafene huna nehugi Anumayamoma naya hisiafe nunamupiti havigeho.
HEB 13:20 Anumaya Kotia taipa falu hisia yamona aepaa maineno alino hagelafi-latea kemoa tokiyaage huno hanege hanege hisia yafenagino Yisasima fali-mainea kolamoa ailaki-lavigeno Anumaya Kotia Yisasina fali-mainefiti alino hetitene. Ali hetitegeno sipi sipile kava kanoa tusia ala kava kanoti maine.
HEB 13:21 Maineanagina tamakaifena mage huna Anumayamotega havinegoe. Yisasi Kalaisima hulatenea yafena Anumaya Kotia tamakupina aliyamaa aliteno agaia haisia kavama hisaya tokiya tamamisie huna havinegoe. Yisasi Kalaisi tokiya hale yamo agia hanege hanege hanesia yafe alisaga higetao huna nehue. Tamage.
HEB 13:22 Nenafu-gatama tokiyaage hutama maisaya yafe ayaaya kea okaenogi musetami nehugi tamakaya havitama akave maleho.
HEB 13:23 Nelafua Timotina nofipiti kalu heya atalageno umainegena tamahanepauve. Aupaama nagaitega esiana tokaetaa mo lamakegahue.
HEB 13:24 Kava vayatamiene Anumaya Koti anagaaene hu falu fala kenia humateho. Itali kotegati ataleya aya veamoya tamakaila ania huya hu falu fala hu nelamatae.
HEB 13:25 Anumaya Kotina kayone yamaamoa mukiamo-gatamiene hanesie. Tamage.
JAM 1:1 Nagaya Yemesinae Anumaya Kotiene Anumayati Yisasi Kalaisiene aliya kanoanimona mani autama kaena kuma aepatamima ataletamama alu mopalega umainaya Isaleli veamogatamihe mani avona kaena nelamamina kanale mainafio huna hu falu fala hu nelamatoe.
JAM 1:2 Nafunagana-gatamae nagoa kana yama tamakaitema falote hisigetamahena ma lamakesa haviho Inamona musekase hisuna yane. hutama hiho.
JAM 1:3 Kana yama falote hulamateana Anumaya Kotia Tamametitima nehaya yana agola nehafi havige nehafi? huno tamakegahe ani kana yana tamakaitela falote hu nelamateafe tokiya vaisaya yamoa anifiti falote hugahie.
JAM 1:4 Mukia kanafina tokiya vaisaya yamoa tokiyaagema hisiana Anumaya Koti aufina Kosa helamatene. huno hinagetama ala veanegeya maigahae.
JAM 1:5 Nago kanomoa amunotamifitima kanale agu agesa havisia yafema ati yenunofena Anumaya Kotitega havigesigeno amino. Anumaya Kotia ayaaya ayaene kano maineanagino mukia veamogaminakea oamama-kigahianagino afaa mukia yana amamigahie.
JAM 1:6 Amamigahigi Anumaya Kotia agu agesamoma havisia kavala tamage huno hugahie. huno havino agupi maleneno havigesie. Maa agesa ohavisie Kema hisua yana namigahifi onamigahie? huno tolefina agesa ohavino. Tole agesama havisia kanomoa yasimoma hage lima alino vai-lagaitalea augafa kava humaine.
JAM 1:7 Tole agu agesama hanesia kanomoa nagoke katela novigi alu kapi alu kapi agoya mo vaige me vaige huno vai neayeno Afaa namigahie. huno agesa nehavianagi Anumaya Kotia naa veamogamina nagola osi ya kanoa oamamigahie.
JAM 1:9 Mone afenoamima omale veamoya Anumaya Kotifena haviya amakupi malenayafenagiya mage huya hisae Anumaya Kotia tavalesaga huno Nagai nafaneyagae. huno humaine. huya tusi muse hisae.
JAM 1:10 Muse hugahagi kasagoya moneamima hanesia veamoya yosa ausemoma heno hali hulavia ya kana huya aletesayafe Anumaya Kotia alime tavino amatesigeya afa vea kana huya maisayafe musena hisae.
JAM 1:11 Yagemoa evayi huno tokiyaage yagema leana ani tala yana leno mukia fayotegeno auseamoa asaga hu lavino haviya nehia avamete huya mukia moneamima nemalesaya veala ani mone alisaya yaamimo amunopi maineya faligahae.
JAM 1:12 Nagoa veamogamitema kana yama falote hisigeya tokiyama vaisayana anonaamia Anumaya Kotia hano ohuno agola maige maige hisaya hamaimula amamigahie. Ani muse yana Anumaya Kotia agaifema hamau ayamopafi nehamaiya veamogamina Amamigahue. huno hu lokiya vai-maleneafe musena hisae.
JAM 1:13 Havi kavala hiho. hunoma nagoa veamogamina amavayu hisigeyahena ani veamoya Anumaya Kotia aye lavataka higeta mani kavala nehune. huya ohiho. Kefo yamoa Anumaya Kotina avayu nohie. Anumaya Kotia nagoa veala avayu huno Kefo kavala hiho. huno nohie.
JAM 1:14 Nohianagi tagaiti nagoke nagokemogata age lahaye hu yana taipafiti falote huteno aye lavataga huno tavayu nehie.
JAM 1:15 Age lahaye hu yamoa amu maleteno aihefa nehea avamete humaine. Amu maleteno kefo yamoa falote huteno ala higeno kefo yama huge huge nehaya veamogamitela fali yana falote hu neamate.
JAM 1:16 Nahau nayamopafi nahau-mainea nafunagana-gatama havigu Anumaya Kotia aye lavataga higeta kefo yana nehune. hutama hisagi.
JAM 1:17 Mukia kanale yana hale yamona Nefaa ikapinagati nelamie. Yagemo amemoa molino ayaaya huteno melino aupa huteno nehia kavala Nelafa ohune. Alu kava alu kavaenena nohie. Nagoke avamete kavakeya nehia kano maine.
JAM 1:18 Anumaya Kotia mukia yama talo hu-malenea yapi uhagoteta maisunafe Anumayamoa agaia haiya kava huno kelamage kealeti tagaila agaia nafaneyaga ago alino latene.
JAM 1:19 Nahau nayamopafi nahau-mainea nafunagana-gatama kema hisaya kea aupaa haviho. Ke ohutama mainetama aupaa tamahaiya ovaino.
JAM 1:20 Veamogatama tamahaima vaisaya yatetila Anumaya Kotina aufina fatago ohugahie.
JAM 1:21 Ani yafe mukia kefo yana tamakaveno hutetama tamaugafa alitama ohaitama Anumaya Kotia kema tamakupima fai-malenea kea havilama hutama haviho. Ani kemoa tamaku tamamena aligatisia ke hane.
JAM 1:22 Kanale kema havitetama akave omalesayana afa ya kana nehagi afaama havitetama atalesayana tamakaitami tamaku nafanemona aye vataga nehae.
JAM 1:23 Nagoa veamoya Anumaya Koti kea haviteya akave omaleya atalesageya nagoa veamoyama galasifima amaugosa ageteyagi ago neataleya age hatayo hatayama nehaya avamete kava nehae.
JAM 1:25 Nehayanagi nagoa veamoya Anumaya Kotina kanale kealegama ageke huya nemaiya veamoya ani kea havigeya oataleya akave nemalaya veala naama haya yafe Anumaya Kotia musema hisaya amaku amakesa amamigahie. Ani kemoa fatago huno kefo yamoma haya kimainea yana ali kalu hetalenea ke hane.
JAM 1:26 Haneanagi Tagaya kanaleya huta tametitia nehune. huya hisayana veamoya amavefunamona kava oyagaiya amakaiami amakuamona havige ayevataga nehayanagino amametiti nehaya yamoa afa ya kana humaine.
JAM 1:27 Nehigi Anumaya Kotia Nelafa aufina nagola tusia kanale tametiti hisuna yana mage huno hane. Megusa anagala havi no nemaiyafe amaya nehuta kama vaiyesuna yatela kava yagaisune. Havigu ma mopafi kefo yama hisunana Anumayamo aufina taguamoa oniyaage hugahie.
JAM 2:1 Nafunagana-gatama tokiya hale-mainea yaaene kanoa, Anumayati Yisasi Kalaisife havitama tamakupi maletama tamametiti nehayafe amakima hanesia veamogamina kanaleya hu neamatetama afa veamogamina hu-haviyama humatayana havi kava nehae.
JAM 2:2 Yisasi kema havigahe melitalu nehisagenoma nagola monea kasago hu-mainesia kanomoa kanale kena fai-lino tamakaipi evayi hinageno nagola monea omaleno kenaamoa hatata hatatu hu-mainesia kanoma anile evayima hisigetamahena tamakaya moneama hanea kanomofena hutama kanale hutetama mage nehae Kagaya ma kanale siale emaiyo. hutama nehayanagi moneama omalenea kanomofena mage nehae Amuale hetika maiyo. nehutama Naiyafi mopale emaiyo. hutama hu neatae.
JAM 2:4 Ani kavama haya kavala tamakaitami havi tamaku tamakesa nehavitama tamafu-tamakana-gamina fako hu neamatae.
JAM 2:5 Nahau nayamopafi nenahaiya nafunagana-gatama haviho. Ma mopale veamogami amaufina afenoamima omale veamogamina Anumaya Kotia ago hapali-mateno agai kema haviya amakupi maleya amametiti hisaya yana kasagoya neamamino Nagaifema hamau ayamopafi nehamaiya veamoya visaya kumala, nagaya kava yagaisua kumate umaigahae. huno hu lokiya vaino hu-matene.
JAM 2:6 Hu-matenegi tamakaya afenoamima omale veamogamina amakaye hisafa kavala ago hu-matenagi afenoamima hanea veamoyage tamakaila aliya afepi nelamateya kaiyekema hulamatesaya yatela tamavaleya nelamatae.
JAM 2:7 Yisasia, tamakaila agaialega lamatenea kanomona kanale agia anima moneamima hanea veamoya hu-haviya hu neatae.
JAM 2:8 Anumaya Koti autamafina nagola kahegi kea mage huno haneane Kagaikaa kaugafahema kahaisia avamete negafu augafahena kahaino. huno hu-maineane. Tamakaya ani kahegi kema akave malayana kanale kava nehae.
JAM 2:9 Nehagi tamakaya nagoa veamogamina kanale kava hu neamatetama nagoa veamogamina tamakavenoma hu-matayana kefo kava nehageno kahegi kemoa mage nehie Kea ali tagaetama kefo kava nehae. huno nehie.
JAM 2:10 Nagoa veamoya mukia kahegi kema akave nemaleya nagoke ke kanoama aliya atagayayana mukia kahegi kea ago ali atagae-mainae.
JAM 2:11 Anumaya Kotia mage huno hu-maineane Anea amavayu hutama kumaiya oheho. huno nehuno nagi Nago kanoa hetama ofaliho. huno hu-maineane. Nagi anea amavayu hutama kumaiya ohenesayanagi nago kanoma hetama falitesayana Anumaya Koti kahegi kea ago alitama atagae-mainae.
JAM 2:12 Kefo yamoma nofi kilatenea yana ago alino kalu helatenea kemoa kaiyekea hulateno fako hugahie. Ani yafe mukia kanafina kema hisaya yaene maisaya auava yaene ani kemoene nagopi maiho.
JAM 2:13 Nagoa veamoya veafema kalagima ai oamatesayana Anumaya Kotia ani veamogamina kaiyekema humatesia yupa kalagila ai oamategahie. Kalagima ai neamatesaya veamoya ani kanafina keamimoa kanaleya hinageya kanaleya huya maigahae.
JAM 2:14 Nafunagana-gatama nagoa veamoya Tagaya Yisasife havita tagupi maleta ago tametiti hu-mainone. nehuya nagola kanale auava yama ohunesayana anima amametiti nehaya yaamimoa amaku amamena ali okatigahianagino afa ya kana hugahie.
JAM 2:15 Tamafu-tamakana-gamina kenaamima hoyaamima omalesigeya esagetama tamakai amunopitila nagoa veamogatama mage hutamama hamapaisayana Afaa viho. Yasi siota tamakaitami nealitama kavela tamakaitami negeno tamamu hino. hutama hisayana kaveene kenaamiene amaya ohunetama kegeyama hisayana ani kemoa amamu ohugahigi ani kegeyana hu oamatetama amaya hiho.
JAM 2:17 Yisasife havita tagupi maleta tametiti hu-mainone. hutama hu-mainayanagi afaa mainetama kanale kavama ohisayana tamakaila tamametiti yatamimoa afa ya kana hugahie.
JAM 2:18 Nagoa veamoya mage hugahae Kagaya Yisasife havika kagupi malenanagi nagaya kanale aliyania nealue. huno hisigena mage huna hugahue Kanale auava yama ohisanana hanaa huna Yisasife havika kagupi malenana yana agegahue? Nagaya kanale auava yama nehua yateti Yisasife havina nagupi malenoa yana kaveligahue.
JAM 2:19 Kagaya kanaleya huka Nagoke Anumaya Koti maine. huka kametiti nehananagi Kefo Avamumoya ania huya Anumaya Kotia maine. huya amakupi maleya atalia nehae.
JAM 2:20 Kagaya kagesa omale veamoga menia kavelisue. Nagoa veamoya Yisasife havita tagupi maleta tametiti hu-mainone. huya hisagenoma kanale auava yaamima falote ohisiana anima amakupi malenaya yamoa afa ya kana hugahie huna nagoene kaveligahue.
JAM 2:21 Nayona Apalahamu, taginagomoa, Anumaya Koti kea akave maleno muse yama amigahena nafanea, Aisakina, avaleno yafa folamole ateneno hegahe nehigeno Anumaya Kotia aniama hia yana ageteno Fatago kano mainane. huno huteneane.
JAM 2:22 Ani yafena ago havilinae Anumaya Koti kema havino agupi maleno ametiti humainea yamaamoene kanale aliyama ali-mainea yamaamoene ailokaeana ali-mainae. Ani kanale aliyamaamoa agupi maleno ametiti hu-mainea yamaamona alivaya aye-maine.
JAM 2:23 Anumaya Koti avopina mage huya kae-malenayane Apalahamua Anumaya Koti humainea kehe Tamage nehane. huno agupi maleno ametiti hu-maineafe Anumaya Kotia agaifena mage huno hutene Fatago kano mainane. huno huteneane. huno kae-maleneane. Apalahamua ani aliyama ali-mainea kanafi mani kea kae-malenea kemoa agola falote huno tamage humaine. Anumaya Kotia Apalahamufena Kagaya nagaila name kafa mainane. huno hu-maineane.
JAM 2:24 Tamakaya haviho Anumaya Kotia agaifema haviya amakupi maleya ametiti hu-mainaya yafekeya ageteno Fatago veane mainae. huno hu omategahigi kanale aliyaenema ali lokaeya alisayana Anumaya Kotia Fatago veane mainae. huno hu-mategahie.
JAM 2:25 Yosuaa Ko mogeho. huno Yuta vayala humategeya vageno Lehapua nomaafi amavaleno amateteno amaugafa aligatino alu kate hu-mategeya umainae. Naama humainea yafena Anumaya Kotia Lehapufena Fatago a mainane. huno huteneane.
JAM 2:26 Nagoa veamoya amaku nafaneamia atalageya Ago fali-mainae. huta nehunanagi nagoa veamoya Yisasife havita tagupi maleta tametiti hu-mainone. huya nehayanagi kanale aliyaamima falote ohisiana amakupi malenaya yamoa ago faliteno afa ya kana humaine.
JAM 3:1 Nafunagana-gatama havigu tamakai amunopiti kasagoya vayamogatama Hu-maveli ha-maveli hisuna vaya maisune. hutama huyafenagi ago havimainone Anumaya Kotia haenagaa tisa vayamogatina tusiya huno kaiyekea hulateno fako hu-lategahie.
JAM 3:2 Tagaya mukiamogata kefo kavala nehunanagino nago kanomoma havigema nohisia kanomoa ala kano maineno kanaleya huno agaia augafalela yagaigahie.
JAM 3:3 Inagi hosi afumo avayafina aeni nofiteti kitama hu-mataya yamoa Tagai tagu tagesa akave maleno vaiyesie. huta maleteta mukia augafa moli augosa meli augosa hunageno augosa huno alu kate katela nevie.
JAM 3:4 Nevianagi tamakaya tipi kalenefe tamakesa haviho. Tipi kalea tusia yakefa haneanagino tusia yasimoa fu huno ayetu-feno neunoma moli hao meli hao hunoma nevia kayomaa osi ya kanoa hanegeno tipi kalema nealia kanomoa ani kayote alino mo aiyahae me aiyahae higeno ani ala tipi kalemoa ani katega nevie.
JAM 3:5 Naa hu-maineanagi tavefunamoa osi ya kanoamoagi Alu kava alu kavala hugahue. huno ala kegefa nehie. Ageho osi ata kanoamoagi tusiya huno tala yaeneteno mukia yosayagaene neasagalie.
JAM 3:6 Tavayamoenena ata kana humaine. Taiya tayaene mukia laugafaene haneanagi tavefunamoa amakaseno tusia havi ya haneanagino mukia laugafamona avaleno kefo kapi neate. Haniki yapi tegelege nehia atamoa mani ata kae-maleneanagino nafane mainona kanaleti ani tavefunamoa ata kana huno tagaila ali haviya hu nelate.
JAM 3:7 Yaga, kafa, nama, osifavea, mukia tipima mainaya yaga kafa, nagoa veamoya atafa huya amatenageya yuna nehae.
JAM 3:8 Yuna nehayanagi nago kanomoa amuha ohuneanagino agaia avefunalela kava yagaino alino yuna ohegahie. Mukia kanafina atalenegeno tavefunamoa ase ohu kea nehatageafe tavefunafina kasagoya analisa kana ya hane.
JAM 3:9 Tavefunamokeya Anumaya Koti agia alisaga nehunoagi Anumaya Kotia agaia augafa kali-mainea veanema talo hulatenea veafenagi ani lavefunamoa hu-haviya hu neate.
JAM 3:10 Nagoke tavayafiti Anumaya Koti agia alisaga nehuta nagoa anagatimofena hu-haviya hu neamateta nehune. Nafunagana-gatama havigu ani kava huyafenagi ania ohiho.
JAM 3:11 Kapaima hagea timoa mopafitila falote nehianagi hagaage tiene atuage tienena nagoke yapitila falote nohiafe tamakaila ania huno nagoke tamavayafitila havi kene kanale kene falote ohisie.
JAM 3:12 Nafunagana-gatama, hagaage yosalagama neayea yosamoa atuage yosalaga oayegahie. Fulutu nofipitila atuage nofi alaga falote ohugahie. Ania huno hage lipitila kanale hagaage tina falote hileasino? Ania ohugahie. Tavefunamoa kanale kene havi kene ohisie.
JAM 3:13 Tamakai amunopima mainaya veapitila kanale agu agesaene veama mainesayana amaugafa aliya ohaiya kanale auava kavakeya huya vai neayeya kanale amaku amakesa tamave-liho.
JAM 3:14 Tamave-lisagetama nagoamogamife tamaipa haviya hisageno tamakaitami hisaya kemo tamahai vaisayana kanale kemona ali tagaetama havigegeya nehutama Kanale tagu tagesaene veane mainone. hutama ohiho.
JAM 3:15 Naa lamaku tamakesama haviyana ikapinagatila elavino omenegi ma mopafi ke hane. Alu Aotage Avamumoa ani kea nohigi ani yamona nefaa Satani maine.
JAM 3:16 Vayafena tamaipa haviya hu neamatetama tamakaitami keleti tu hutama tamahai vaitama ke ovai avai nehutama havi kavakeya hume hume nehaiye.
JAM 3:17 Nehaiyanagi nagoa veamoya Anumaya Kotitegati kanale amaku amakesa aliteya maa hugahae, Hagote yana amakuafina oniya omale amaku amakesa haviya maigahae. Anile yana nagoamoyaenena nagoke amaku amakesale maigahae. Amaipamoa kanale hinageya nago kanomoma hisia kegeya haviya maineya kalagi aiya kanaleya huya ali kayone humateya mukia veanenena nagoke amaku amakesale maineya amegatila havige havagea aye mavataga ohu veane mainae.
JAM 3:18 Tagayama nagoke tagu tagesalema maisunana yuna heta maisuna yana lagupina augafaaene alaga fai-malesunageno hanenageno Anumaya Kotia muse hisia auava yana kave kana huno falote hugahie.
JAM 4:1 Tuma nehaya yamoene kema nevaiya yatamimoenena hanateti falote nehie? Age lamahaye nehaya yamoene kanale tamaku tamakesamoenena tua nehayafe kema vai yatamimoa falote nehie.
JAM 4:2 Tamakaya nago yafena aluya hutama age lamahayea nehayanagi ani yama oaliya yafe ani yamona nefana hetama he vaitesaya tamakesale nemaiye. Nagoa veamogami yatela age lamahaye hutetamagi oaliya yateti kea vaitetama tu hu yamoa falote hu nelamate. Anumaya Kotitega ani yafema ke hutama havi okaya yateti noaliye.
JAM 4:3 Alisaya yafema Anumaya Kotitega ke hutama havigayana tamakuamoa havi lamaku tamakesa havitama tamakaitami age lamahaye hisaya yamaage alisaya yafema havigayana anima havigaya yana noaliye.
JAM 4:4 Tamakaya Anumaya Kotina ago ataletama ma mopale yafe age lamahayea nehae. Nagoa veamoya ma mopafi yafema age hamayema hisayana Anumaya Kotina kame lagiya kae neatae. Ani yafena ohavinao?
JAM 4:5 Anumaya Koti avopina mage huno kaemaleneane Anumaya Kotia Alu Aotage Avamua tagupina ago ategeno maineno ani Avamumoa Havi kavala ohiho. huno tokiyaage huno kava neyagaiye. huno kae-maleneane. Tamakaya ani kehena Afa ke nehie. hutama nehao?
JAM 4:6 Anumaya Kotia tagaila kayone hisuna yana kasagoya nelamiafe avopina mage huno kae-maleneane Anumaya Kotia amaugafa aliya nehaiya veanea kame lagino kae neamateanagi amakaiami amakuama aliya nohaiya veala kayone yamaa neamamie. huno kae-maleneane.
JAM 4:7 Ani yafe tamakua alitama ohaitama Anumaya Kotina aiyaafi mainetama Satanifena Kagai kea ohavigahunagi alulega vuo. hutama hisagenoa tamataleno ugahie.
JAM 4:8 Anumaya Koti avatema mime mime visagenoa tamakaienena mime mime eno me lokaeno maigahie. Kefo yama nehaya veamogatama kefo yatamia neataletama tamayana sese hu-taleho. Vagala veamogatama tole lamakesa nehaviya yana neataletama nagoke kanale tamaku tamakesale maiho.
JAM 4:9 Kefo yatamihe tamahaumana halesigetama aviteho. Kigima nehisaya yana neataletama kefo yatamihena ape hutama mainetama havi ya alige fataga huge hutama tamaipa haviya hutama maisae.
JAM 4:10 Anumaya Koti aufina Havi veane mainone. hutama maisayana tamavalesaga huno Ala veane maiho. huno hu-lamategahie.
JAM 4:11 Nafunagana-gatama nelamafu-gamifena hutama haviya hu oamateho. Nagoa veamoya nefugamifema Kagaya naa kava nehane. huya fako hutesayana kahegi kemona hu-haviya huteya ali fako hu neatae. Hu neatagi tamakaya Anumaya Koti kemona fako hutesayana ani kea akave omaletama kahegi kemona kaiyeke haviya fako humate veane mainae.
JAM 4:12 Mainagi nagoke kanomo kahegi kea ali falote hu-maleteno agaiage kaiyekema fako hu-matesia kanoa maine. Ani kanoa agaiage veamogami amaku amamena ali negatino nagoa veanea agola ali haviya humategahie. Kagaya hanaa augafa kano maineka negafugamifena Naa nehane maa nehane. huka fako hu neatane?
JAM 4:13 Nagoa veamogatama Menifi egafi nago ala kumatega ala mone aliyana nago kafufina moliteta ala monea aligahune. hutama nehayanagi nago kea tamahapaigahugi haviho.
JAM 4:14 Tamakaya egama vayi hisia yafena nohaviye. Tamahaimuma hanea yamoa hanaa kava humaine? Tamahaimumoa siamoma kiteno aupaa alino tagama hulino motalea kava hinagetama aupaa faligahae.
JAM 4:15 Mage hutama hiho Anumayamoa haisigetahena tagaya tahaimula hanesigeta ma aliyana nealita nagoa aliyaene aligahune. hutama hiho.
JAM 4:16 Hugahayanagi Tagaya na kava hugahune ma kava hugahune. hutamama hayana tamakaitami tamaugafa alitama haisaya ke nehae. Ani kavala tusia havi kavale.
JAM 4:17 Kanale auava yama hisaya yafema havilinesaya veamoya ani kanale yama ohisayana kefo ya nehae.
JAM 5:1 Tusia monetamima hanea veamogatama haviho. Tamakaitela hanageke yama vayi hugahema hisia yafena tamakaya kalagi aitama aviteho.
JAM 5:2 Mukia afenotamimoa ago kasaligeno havigafamoya mukia kenatamia ago neya hano humainae.
JAM 5:3 Halayama nehaya monetamia kalogalo hageno ago falute-maine. Anima faluteno kalogaloma hage-mainea yamoa kefo yama nehaya yana ali falote hulamateteno atama nelea kava huno tamaugafa tesagaligahie. Anumaya Kotia kaiyeke hu-lamatesia kanamoa ago aupaa falote hugahe nehigi tamakaya monea halaya maitama nehigenoo.
JAM 5:4 Haviho hoyatamifina aliya veamogami miyaamia nagoa miyaamia havige hu-matetama noamamiya miyaamimoa hu falote hu-lamateno ke nehie. Anima aliya vayatamimoya kema nehaya kemoa Anumaya Kotia, mukia yamona tusiya huno kava humainea kanomo, agesafina hai falegeno ago haviline.
JAM 5:5 Tamakaya ma mopafima mainaya kanafina kanaleya hutama tamahaiya yamaagela alitetama musena maitama nehagi Anumaya Kotia kaiyeke hu-lamatesia kanafina tamakaila tamaku tamamena tamahae falisiafenagitama kavela nenetama tusinasi vayala ko nehae.
JAM 5:6 Fatago veamoya tamakaila anonatamia hu otamataya veala, ago kaiyekea humatetama hamaeyageya fali-mainae.
JAM 5:7 Ani yafe nafunagana-gatama Anumayatimoma esiafe tamamena malelava hutama agava maiho. Hoyamona nefaa kanale kavemo nenaa vayima hisiafe amena malelava huno maineno hagoteno aisia kofeene haenaga kofeene agava mainegeno kanale kavea falote higeno ali-maine.
JAM 5:8 Anumayatimo esia kanamoa ago aupa hu-mainegi tamakaienena ania hutama tamamena malelava hutama Yisasife havitama lamakupi malenaya yana atafa hutama lokiya vai-litama maiho.
JAM 5:9 Nafunagana-gatama nagoa anagafena kalugalu kea vai oamateho. Ani kavama hisagenoa Anumaya Kotia kaiyeke hu-lamateno tamakaila ali haviya hu-lamateyafenagi ani kavala ohiho. Ageho anima kaiyeke hu-lamatesia kanomoa ago fiate hetino maine.
JAM 5:10 Nafunagana-gatama nayona Anumaya Koti amaune vayamogamina Anumayamo agile kea huhaleya hamanepaigeya ani kema nehaviya veamoya amakaila ali haviya hu-matayanagi amamena malelava huya mainayane. Tamakaya ania hutama ani ka kanoale akave hutama vaiyeho.
JAM 5:11 Nagoa veamogamilema kana yama falote higeya amamena malelava huya maineya tokiya vai-mainaya veamoya Kanale kava hu-mainayanagino muse yaamia hane. huta nehune. Tamakaya Yopu kea ago havimainae. Kana yama agaite falote higenoa amena malelava huno tokiya vaino mainegeno haenagaa Anumayamoa kanale yana huteneane. Tamage Anumayatimoa mukia kanafina hau hulateno kalagi ainelate.
JAM 5:12 Nafunagana-gatama hagote yana maa ohiho. Anumaya Koti aufina ikamo agiene mopamo agiene ayena nagoyafi naya atalena tamage nehue. hutama ohiho. E. hinutamahena ani keage hiho. Aao. hinutamahena ani keage hiho. Havigu Anumaya Koti aufina havigehe Tamage nehune. hutama hisagenoa Anumaya Kotia kaiyeke hu-lamategahie.
JAM 5:13 Nagoamo-gatamilema kana yama falote hisigetama Anumaya Kotitega ke hutama havigeho. Nagoamo-gamina amakuamoa musema hisigeya Anumaya Koti agia yagamefiti alisaga huya maisae.
JAM 5:14 Nagoamo-gatama kali alitama mainesagenoa mono kava vayafe ke hisageya ani kali veatela nunamu me huya Anumayamo agile masavena amaugafale fale-matesae.
JAM 5:15 Havigenuyahena tole amaku amakesa ohaviya Anumaya Kotifema havigesuna yana ago tamigahie. huya amakupi maleneya havigesayana ani kali veamogamina kaliamia alino hano huteno Anumayamoa ali hetimateteno kefo yama hu-mainesaya yama hanesiana Anumaya Kotia aigeamateno atalemategahie.
JAM 5:16 Ani yafe tamakaya nagoke nagokemo-gatama kefo yama humainesaya yafena nagoamo-gami amaule hu falote hisageya Anumaya Kotitega ke huya havigesageno falu lamahaisia yana lamamigahie. Fatagoma huya nemaisaya veamoya huya havigesaya nunamumoa tokiyaa haneanagino mukia veala amaya hugahie.
JAM 5:17 Ilaiyae kanomoa, tagai augafa kano maineanagino tusiya huno nunamuna mage huno havige-maine Kola ikapinagatila elavino omesie. huno havigegeno tagufa (3) kafugi sikisia (6) ikanagi huno kola oaine.
JAM 5:18 Oaigeno nagoa maigeno eteno nunamu higeno Anumayamoa kola amamigeno nagoa kavela mopafitila falote higeya ali-mainae.
JAM 5:19 Nafunaganagatama haviho nagoamo-gatama kelamage kema neataletama visageyama nagoa veamoya eteya tamavalesagetama kanale katema esayana anima tamavaleya tamatesaya veamoya kanale kava nehae. Nagoa veamoya kefo yapima mainesageya nagoa veamoya amavaleya Anumaya Koti katema amatesayana falisaya amaku amamena ago aligati-mainayanagino Anumaya Kotia kasagoya kefo yamaamia alitalegahie. Kenia male hano hie. Nagaini nagia Yemesinae.
1PE 1:1 Nagaya Pitanae Yisasi Kalaisi Aposolo kanomona Anumaya Kotia haigeno tamakaila hapali-malenea veamogatamahe mani avona kaena nelamamue. Tamakaya alu mopalega Potasima Kalesiama Kapatosiama Esiama Vitinia kotegama yoka umainaya yafene huna mani avona kaena nelamamue.
1PE 1:2 Anumaya Kotia Nelafae nayona ago tamakeno Nagai vea maigahae. huno huyogi-maleneafe Yisasi Kalaisina akave maletama avaya ali hipoya nehageno agaia kolamoteti kefo yatamia ago aye hami-talegeno Alu Aotage Avamumoa alu aotage veane maisaya tamaku tamakesa ago tamamine. Tamamigena mage huna hue Anumaya Kotia tusiya huno kayone hisaya yaene tamaipamoa falu hisia yaene tamamino hiya hu-lamatesie. huna nehue.
1PE 1:3 Tagayama Yisasi Kalaisia Anumayatimoe Nefana Anumaya Koti agia, tusiya huta alisaga hisune. Anumaya Kotia tusiya huno hau hulateno Yisasi Kalaisina hutegeno mefaligeno komufitila alino hetitene. Hetitenea yafe Anumaya Kotia tagaila lategeta agaia haegafa nafanea maineta agola maige maige hisuna tahaimula ago alisunafene huta tametitia nehune
1PE 1:4 Anumaya Kotia ikapinaga tahaimula alisuna yana ago latene. Ani yana haviya hulavino hano ohisia yane. Oniyaagela ohuno alena le otavisia yana tagai tamigahe atafa huno kava yagaino maine.
1PE 1:5 Yagai-maineno agaifema tamakupi maletama tamametiti haya yafe Anumaya Kotia agaia himamuleti tamakaienena kava yagai-lamateno ma mopama ali hano hisia kanafima tamaku tamamema aligatisia yana ago talo tala hu-maleneanagino evayi hinagetama agegahae.
1PE 1:6 Tamakaya mani yafena aluya hutama musena hayanagi menia osi kana kanoafi aye-lamavataga hisia kana yama vayi hiana tamagata aiya kana ya ali-mainae.
1PE 1:7 Koli yafana aliya Kanale Kolifi havi Kolifi? huya agesaya yafe atafi kaeya age-mainae. Aniama haya kavala Anumaya Kotia Nagaifena tamakupi malenaya yana tamage hutama malenafi? huno agesia yafe aye lamavataga lama-haisia kana yapina tamatene. Ani Koli yafana haviya hu-lavino hano hugahianagi Yisasife havitama tamakupi maletama tamametitima nehaya yamoa ago agaseno kanale ya hu-maineanagino kanalema hu-mainesiana Yisasi Kalaisia veamogatami tamaulagale evayi hisia kanafina tusia muse huno tamakia alisaga nehuno tokiya hale yamaa tamamigahie.
1PE 1:8 Tamakaya Yisasina oagenagi tamakua maitama neamiye. Meni kanafina agaila oagenagi aluya hutama agaifena havitama tamakupi maletama tamametiti hu-mainaya yafena muse yatamimoa ala hinagetama mage hutama nehae Muse huna kavala alumoni naguafi hanegi hanaa huna tamahapaisue? hutama nehae.
1PE 1:9 Naa hutama agaifema havitama tamakupi malenaya yafe Anumaya Kotia tamaku tamamena ago aligati-maine.
1PE 1:10 Ani tamaku tamame aligati-mainea yafena nayona Anumaya Koti amaune vayamoya tusiya huya ati yegeteya Anumaya Kotia tamakaila kayone hisaya yana tamamisia yafena amaune laga huya hamapai-mainayane.
1PE 1:11 Hamanepaiya Kalaisina Alu Aotage Avamuamoa amakupi mainegeya mage huya amaunea laga huya hamapainae Anumaya Kotima amaugafa aligatigahe hutenea kanomoa augafa agata aigeno faliteno tokiya hale yamaa alitesigeya agai agia alisaga hugahae. huya hamanepaiya amakaya kea huya havige havige nehuya mage hae Hana kanafi ani kavala falote hugahie? huya humainae.
1PE 1:12 Hayanagi Anumaya Kotia hu falote huno mage hamapai-maineane Tamakaitamihe mani kea ohunagi haenagama vayi hisaya veafe humainae. huno hu-maineane. Anima humainea kea tamakaife humainegi menia Anumaya Kotia Alu Aotage Avamuma hutegeno nagoa veane memaya higeya Yisasifena kanale kea ago tamahapaigetama havimainae. Havimainagi mani kea ensole vayamoya tusiya huya havisaya amaku amakesa haviyanagi ohavinae.
1PE 1:13 Ani yafe tamakaya tamaku tamakesa havilama hutama yagai lokiya vaitama mainetama Yisasi Kalaisima veamogami amaufima elavisia kanafina kayone hisaya yana tamamisia yafe aluya hutama tamametitia hutama maiho.
1PE 1:14 Tamakaya nafanemoya kema haviya akave nemalaya kava hutama maiho. Yisasi kema ohavinaya kanafina tamaugafa age tamahaye nehaya kavala hutama mainagi menia mani auava yapina nagoene maitama ohaiho.
1PE 1:15 Ohaitama agaitega visaya yafe kema hu-lamatenea kanomoa kefo kavala ohunea kanogino alu aotage kano mainegi tamakaya ania hutama kefo kavala ohutama alu aotage veane maiho.
1PE 1:16 Anumaya Koti avopina mage huya kae-malenayane Kefo kavala ohuna alu aotage kano mainoa yafe tamakaya ani kava hutama kefo kavala ohutama alu aotage anaga maiho. huya kae-malenayane.
1PE 1:17 Anumaya Kotia kaiyeke humatesia kanafina amakima hanea vayamogami amakile fako hu oamategahigi tagaiti agoma hu-mainona auava yatileti nagoke avamete huno kaiyekea hu-lategahie. Tamakaya ani kanomofena Nelafae hutama nunamupitila havinegayanagi ma mopalema mainaya mopa agola maisaya mopa omalenea yafe Anumayamofena kolia nehutama fatago hutama vaiyeho.
1PE 1:18 Tamakaya ago havimainae tamakinagomo-gamipitila afa ya kana hisaya auava kea alitetama mani kefo auava yapina mainageno Anumaya Kotia anifiti tamavalesia kava huno ago miya hu-lamatene. Hu hatiyama nenaya miyana haviya hu-lavino hano hisia miyatetila miya hu otamatene.
1PE 1:19 Miya hu otamatenegi tamakaila kefo yafe huno Kalaisia fali-mainea kolateti miya hu-lamatene. Kalaisia nagokela amu afugula omale Sipi sipi nafane avamete huno nagola kefo yamaa aguafina omale kanogino agaia kolamaa tayamopafi yanagino miya hu-lamatene.
1PE 1:20 Anumaya Kotia ma mopama talo ohunenoa Kalaisifena Mopale vayatefene huka faligane. huno hutetegeno tamakaima tamaya hisia yafe atupa kanafina evayi humaine.
1PE 1:21 Evayi hu-maineanagino Anumaya Kotia hevaitenaya komufiti alino hetiteteno tokiya hale yamaaene ala agiene ago amine. Naa hu-maineafe tamakaya Yisasi fali-mainea yateti Anumaya Kotife havitama tamakupi maletama tamametiti humainae.
1PE 1:22 Tamakaya tamagema hu-mainea kehena akave malaya yafe tamakuamoa efeage hu-maineanagitama tamafu-tamakanana tamakua kanaleya hutama neamamiyanagi amegatila tamakua oamamitama kanaleya hutama tamakua amamitafa hutama amamiho.
1PE 1:23 Anumaya Kotia lamategetama tamakaya ago haegafa nafane falote humainae. Anumaya Kotia vayamoya avina huya nafane alivina nehaya ya kana yateti otamatene. Tamakaya haviya hu-lavino hano hisia avina yatetila falote ohunagi Anumaya Koti keletilagino haegafa yamaa hanea kegino ani kemoa hanege hanege huno tamakaila tamatene.
1PE 1:24 Anumaya Koti avopina mage huya kae-malenayane Mukia veala tala ya kana huya mainageya mamu hekaleamimo agimoa tala yamo ausemoma hia kava humainae. Ani tala yana teno mukia fayotegeno ausemoa ali lavino haviya nehie.
1PE 1:25 Haviya nehianagi Anumayamo kemoa hanege hanege hugahie. huno kae-maleneane. Mani kemoa Yisasifena kanale mono kea hu falote huya tamahanepaiya ke.
1PE 2:1 Naa haya yafe tamakaya mukia kefo kavaene, vaya havi kema hu-matesaya yaene, vagala kavaene, alumogami yatefe agetama tamahaye nehaya yaene, nelamafu-gami hu-haviya humate yaene mukia ataleho.
1PE 2:2 Ataletetama yaufa nafanemoma nufema aluya huno nesia agesa nehia kava hutama Anumaya Kotina kanale kea nesaya tamakesa havitamama nesayana ko hisageno Anumaya Kotia tamaku tamamena aligatigahie.
1PE 2:3 Tamakaya ago avame hutama agagi Anumayamoa kanale kayone yama hu-lamatenea yamoa tusiya huno hagaage humaine hutama age-mainae.
1PE 2:4 Hagaage humainea yafe agaitega eho. Yisasi Kalaisia haimula hanea yafa kana kano mainegi veanemoya agaila amakaveno hutayanagi Anumaya Kotia ago agaila huyogino Nayamopafi nenagea kano mainane. huno hutene.
1PE 2:5 Tamakayaenena tamahaimu hanea yafa kana veane mainageno Anumaya Kotia tamakaila alino yafa nona Alu Aotage Avamumo maisia yafa nona maino negie. Negianagitama ani nopi mainetama kefo kavala huge huge ohugahayanagitama alu aotage mono note kava veane mainetama Yisasi Kalaisia tamakai kefo yatamihe huno fali-mainea yateti Anumaya Kotina haisia kava hisageno aluya huno musena hugahie.
1PE 2:6 Anumaya Kotia avopina Yisasife higeya mage huya kae-malenayane Ageho nago yafana nayamopafi hanea yafana ago huyogitena tokiyaage huno noma kisiafene huna Saiyoni agoyale* malogeno haneanagiya veamoya agaifema amakupi malesayana amakayea ohugahae. huya kae-malenayane.
1PE 2:7 Tamakayama agaife havitama tamakupi maletama tamametiti nehaya veamogatama ani yafa, Yisasia, tamayamopafi kano mainegi Yisasina amakaveno hu neataya veamogamifena Anumaya Koti avopina mage huya kae-malenayane. Vayamoya yafa noma negiyahena nago yafafena Haviya humaine. huya ali-talenagi haenagaa ani yafamoa tusia kanale yafane. Ani yafamoa nomona alino tokiya vaisiafe ayetagenale aye-malenae. huya kae-malenayane.
1PE 2:8 Nago kea Yisasife mage huya kae-malenayane Mani yafate hava vale-mainegeya aye kayo-pelaviya asaga hu-lavigahae. Ala yafakefa kapi aliya malenageno amaiyafima ayegeya takatiya asaga hu-nelaviya kava hugahae. huya kae-malenayane. Nagai kema ali atagaenuyahena asaga hu-lavigahae. Ani kavala hugahae. huna nagaya Anumaya Kotina ago hu-malenoe.
1PE 2:9 Ani kavala nehagi Anumaya Kotia tamakaila ago agaia nofi veane huno huyogi-lamategetama mainae. Ala Sauve kanomo aliya veanea mainetama agia alisaga nehutama musena hu neatae. Kefo kavala nohagi alu aotage veanea mainae. Anumaya Koti anagalagitama haniki mainea yapima mainaya yapitila ago tamavaleno tusia hale yapi lamatenegetama agaia tusia kanale auava yamaahema mukia veama hamapaisayafene huno Anumaya Kotia huyogi-lamategetama mainae.
1PE 2:10 Nayona tamakaya havigu yapi afa veane mainageno menia tamakaila tamavalegetama Anumaya Koti anaga mainae. Nayona tamakaifena Anumaya Kotia kalagila ai otamateneanagi menia tusiya huno kalagila ai nelamate.
1PE 2:11 Nahau-mainea nafunagana-gatama menia ali lamakafa huna tamahanepauve tamakaya ma mopalela aupa kana kanoama maisayafene tamaugafahema age lamahayema nehaya yana ataleho. Anima age lamahaye hisaya yamoa tamaku tamakesaene ke vaiana tu nehae.
1PE 2:12 Tamakaya Yisasi kema nohaviya veamogami amunopima kama vaiyegahena fatago hutama vaiyeho. Ani veamoya tamakaife Kefo kava nehae. huya hu-haviya hu-lamatesagetama tamakaya kanale auava yatamia nehisageya ageteya haenagaa Anumaya Kotima kaiyeke hu-mategahema esigeya Anumayamo agia alisaga hugahae.
1PE 2:13 Anumayatimona haisia kava hutama mukia ma mopale Kamani vayaigami kea akave nemaletama amakaseno ala sauve mainesia kanomo aiyaafi maiho.
1PE 2:14 Sauve kanomoa hu-mategeya tamakaitema mainesaya Kamani vayamogami kene havitama akave maleho. Ani Kamani vayamoya havi kavama humainaya veala anonaamia amamiteya kanale kavama humainaya veanemo-gamina amakia alisaga hugahe hu-mategeya emainae.
1PE 2:15 Tamakaya Anumaya Kotia aluya huno nehaiya kava hutama kanale auava yatamile kema ohavi veanemoya ageteya kea ohuya afaa maigahae.
1PE 2:16 Nayona kefo yama hu-mainaya yateti nofipina mainayanagi menia ago kalu he-lamatene. Nofipiti kalu he-lamatenaya kava hutama vaiyatete hugahagi Nofipiti kalu henateneanagina nagainia nahaiya kefo kavala hugahue. hutama ohutama Anumaya Koti aliya veanea mainone. hutama fatago veane maiho.
1PE 2:17 Mukia veamogamina tamaipa amamiho. Tamafu-tamakana-gamina kayone humamiho. Anumaya Kotife kolia hiho. Ala sauve kanomo agi alisaga hiho.
1PE 2:18 Tamakaya nofipi mainetama miya oali aliyama nealiya veamogatama* aluya hutama kava kanotamimo agia alisaga nehutama amakai amaiyaafinaga maiho. Ako huno kanale kava hu nelamatesia kava kanoene havi kava kanoene hisaya kea akave maleho.
1PE 2:19 Tamakayama kanale ya hutama kama vai neayesageno nago kanomoa havigu kema huno tamaiko-lisigetama Anumaya Kotife tamakesa havi havi nehaya yafe mailava hutama maisayana Anumaya Kotia aluya huno musetamia hugahie.
1PE 2:20 Tamakayama kefo kavama nehisageya kayoma lamamisagetama tamamena malefalu hutama tamagata yama alitetama maisayana ani yamoa afa ya kana hu-mainegi muse yana aligahafi? Aao oaligahae. Tamakaya kanale kavama nehisageya kayoma tamamisageno tamaku tamamemoa ako huno maisiana Anumaya Kotia ani kavafena tusia muse hu-lamategahie.
1PE 2:21 Ani kavama hisaya yafe Anumaya Kotia ago ke huno hu-lamatene. Tamakaya agai aiyakama maetama visaya yafe Kalaisia tamakaife huno agata yana ali-maine.
1PE 2:22 Agaya kefo kavala ohuno nago havigea avayafitila higeya ohavinae. huya kae-malenayane.
1PE 2:23 Kamuge hatageya kema vaitayana Yisasia kamugea eteno amakaila vai oamatene. Hayagenoa agata yana aleanagi ania huno Anonaamia amakata aisia yana amamigahue. huno ohunegi afaa mukia yana fatago huno kaiyeke hu-matesia kanomofe Kagaikaa kayapiti anonaamia hu-mategane. huno humaine.
1PE 2:24 Yisasia agaia augafale tagai kefo yana alino aigamaeteno ani kefo kavama hu-mainona anonatia agaia aligahe yafaga yosalela haino maineno tagaila mukia kefo yatimoa alino aigagi-latenea yana ali-galu he-taleneanagita tagaya mopale mainonana fatago kavaage huta vaiyesune. Agaia augafama ali haviya hutenaya afuguteti tagaila alino kanale hu-latene.
1PE 2:25 Tamakaya sipi sipimo nafanemoya kanale kama neataleya afai nehaya kava hutama mainagi menia tamakaya kefo yatamia neataletama kava yagai-mainea kanomote etetama emainegeno tamaku tamametela kava yagai-lamatesie.
1PE 3:1 Tamakaya velema mainesaya anemogatama anautamimo-gamina amaiyaafi maiho. Anautamimoyama Yisasife haviya amakupima omalesagetamahena ani yafena nago kea ohutama amaiyaafima mainaya kavafena ageteya Yisasifena haviya amakupi malegahae.
1PE 3:2 Naafene tamakaila anemo-gatamina Anumaya Kotife kolima hutama kanaleya hutama vai neayaya yana nelamakeya amakua aiyahae hugahae.
1PE 3:3 Tamakaya amega ko tamaugafale hu-lisaya yafena musena ohiho. Tamayolagefafi vaili yaene sesu konagalima ali yatamiene kenama fai-lisaya yafeenena nelagafi notagafi hutama musena ohiho.
1PE 3:4 Ani yafena musena ohutama tamakuafife tamakesa haviho. Tamakuafima alitamama malesaya yamoa amega tamaugafalema hu-linageno atalagama nehia augafa kavala huno atalaga ohutafa huno ohugahie. Anima tamakuafima alitamama malenaya yamoa tamaipamona mailava huno maisia yaene kanaleya huno kayone hisaya yaene hanesie. Ani yamoa tusia kanale kava hisageno Anumaya Kotia ageteno tusia muse hugahie.
1PE 3:5 Nayona Anumaya Kotife haviya amametiti hu-mainaya anemoya alu aotage aneyaga maineya mani kanale kavama haya kavamoa amakuafina hanegeya anauamimo-gamina amaiyaafi mainayane.
1PE 3:6 Salaa ania huteno Apalahamuma hia kea havino akave nemaleno Apalahamufena Alaniamogae. huno hu-maineanagitama tamakaya kanale auava kavaage nehutama nago yafena kolima ohisayana tamakaya Sala nafaneyaga maigahae.
1PE 3:7 Avemoga ania huka akamoene ako huka tokaeka maiyo. Amo augafamoa falu falu hu-maineafe agi alisaga nehuka tamakaya ako hutama amaya hiho. Anumaya Kotia kayone huno maige maige hisaa tanahaimula ago tanaminea yafe tokaetana kanaleya hutana mainetana Anumayamotega nunamuna hutana havigesaana nago yamoa katania maleli otegahie.
1PE 3:8 Menia nagaya mani kea hu hano hugahe mage huna nehue tamakaya mukiamogatama nagoke tamaipale mainetama nagoamoga-mina tamahauna hu-mateho. Tamafu-tamakana-gamina kayone humamiho. Ke ohavi yana neataletama kalagi ai-matetama tamamena malelava hutama ako hutama maiho.
1PE 3:9 Nagoa veamoya kefo kavama hu-lamatesagetama amakaila anonaamia havi kavala hu oamateho. Kamugema hatageya vai-lamatesagetama amakaila kamugea vai oamatetama Anumayamotega nunamu kefiti ke hutama Kanale yana amamio. hutama nunamu kefiti havigegeno amamino. Alu yafenomagi ani kava hisayafene huno Anumaya Kotia ke higetama umainayanagitama agaitegati kanale manua aligahae.
1PE 3:10 Aligahagi Anumaya Koti avopi mage huya kae-malenayane Nago kanomoma maiyamaahe Kanaleya huna mainena kanale kana vayima hisiana agegahue. huno hisia kanomoa avayaletila kamugea ovaino avefunamoa havigea ohisie. Havi auava yana akaveno huteno kanale auava kavaage hisie. Nagoamogamifena nagoke amaipa hisageno amaipamoa falu hisia yafe aluya huno tokiyaage aliya alino.
1PE 3:12 Naa fene? Anumayamo aulagamoa fatagoma huya vaiyaya veala neamakeno mukia kanafina agaitegama havigaya kelega agesa havino amaya nehigi Anumayamoa kefo kavama haya veamogamina anonaamia havi yama amamisia yafe neamake huya kae-malenayane.
1PE 3:13 Tamakaya kanale auava kava hisunafene hutamama hisayana ta tamakaila alino haviya hu-lamategahie? Ania ohugahae.
1PE 3:14 Tamakaya kanale auava kavama nehaya yateti ali-haviya hu-lamatesagenoa Anumaya Kotia muse yana tamamigahigi amakaifena koli hisaya tamakesa havitama atali talua ohiho.
1PE 3:15 Kolia ohugahagi Kalaisifena Agaiage taguafina Alatimo maine. hutama nehutama Yisasia eteno esia kanahema tamametiti hu-mainaya yafema tamahavi-gesagetamahena hamapaisaya kea talo tala hutama maiho.
1PE 3:16 Amakaife Ala vaya mainae. hutama tamametiti hu-mainaya kehena tamavayafiti ako hutama hamapaiho. Havi kavala ohutama Kalaisiene tokaetama mainetama kanale auava kavatamihe kamuge hatageya vai-lamatesayana tamakayama kefo kavala nohaya yafena haviya amakayea hugahae.
1PE 3:17 Tamakayama kanale auava yama nehisageno Anumaya Kotina haisigenoa vayamoya tamahaesa-getama tamaugafa tamakata yama alisayana kanalenagi tamakayama kefo yama nehisageya tamahaesayana havi yatafa hane.
1PE 3:18 Kalaisia fatago kanogino ania huno tagayama Anumaya Kotiene mo lokaeta maisunafene huno kefo kavama hu-mainona anonatia agaya alino fali-maine. Nagoke yupa kanoa fali-maineanagino nagoene eteno ofaligahie. Agaya afaa vayatafa mainegeya hayageno fali-maineanagi eteno heteana avamu maine.
1PE 3:19 Avamu maineno viaamo faliteya kina hu-mainaya amaku nafaneyagamogami avamula kanale mono kea mo hamapaimaine.
1PE 3:20 Ani avamula Noaa tipi kalemo noma kimainea kanafi maineya Anumaya Koti kea haviya amakupi omalageno Anumaya Kotia anima havi kavama haya anonaamia aupaa amamisia agesa ohavino amena malelava huno mainegeya mukia veamoya ohavigeno eitia (8) anaga kanoamoya ani kea haviteya ani tipi kalefina vayamaamo-gamina amaugafa alikati-maine.
1PE 3:21 Ani lipima vagenoma amaugafa aligati-mainea yamoa avame ya huno menima mono tima fale nelataya yafe laveli-maine. Mono tima fale nelataya yamoa amega tamaugafaleti oniya yayaga ayegalo-pelategahe ani lina fale notamatagi tamakuamoa Nago kefo kavala ohisie. huya hageno Yisasi Kalaisina fali-mainefiti eteno alihetitenea yafe tagu tamena alinegatie.
1PE 3:22 Ali hetitegeno ikapinaga haino Anumaya Kotina tamaga ayatega mainegeya ensole vayaene Satani Avamuyagaene mukia tokiya yama hanea yamoene mukiamoya agai aiyafinaga maineya agai kea alihipoya nehae.
1PE 4:1 Kalaisia agaia augafale agata yana ali-maineafene hutama Ania hisune. hutama tamaku tamakesa havitama tokiyaage hiho. Nagoa veamoya amaugafa amagata yama alisayana kefo kavama hisaya amaku amakesa ago atalenae.
1PE 4:2 Ago atalenayafe ma mopale mainaya kanafina amakaiami amaugafa age hamaye nehisaya kefo yana ohisaya amakesa haviya Anumaya Kotima nehaiya auava kavaage nehae.
1PE 4:3 Tamakaya nayona Yisasi kema ohavinaya veamoyama nehamaiya auava yana tusiya hutama hu-mainagi menia nagoene ania ohiho. Ani auava yamoya maa hu-mainae, Amaugafa haga neya kumai he kavaene alitalu huya ala kave neneya havili neya aneginagi huya hagifali kema nehatagaya yaene agoma fali-mainaya vayafe Anumayati mainae. huya amakisana nevaiya kavaene neataletama nagoene ohiho.
1PE 4:4 Tamakaya mani kefo kavala amakaienena nakoene ohutama agoma amatalaya yafe mage huya nehae Ohavuna kava nehae. huya amakesa nehaviya tamakaifena kamugea hatageya vai nelamatae.
1PE 4:5 Naa nehayanagi haenagaa ala kaiyekema hu-matesia kanole hetiya amakaiamia kefo kavama hu-mainaya yafena aepaamia hapaigahae. Ani kaiyekema hu-matesia kanomoa hamaimuma hanea veanene fali-mainaya veanene ali fako hisia aguamete maine.
1PE 4:6 Ani yafe Anumaya Kotina kanale mono kea agoma haviteya fali-mainaya veamogamite vigeno Anumaya Kotia ma veamogami kaiyekema hu-matesia kava huno fako hu-mategahie. Anumaya Kotia avamu mainea kava huya amaku amamena ofaligeya afaa mainae.
1PE 4:7 Mukia ma mopale yayaga ago hano hugahe nehiafe tamakesa havilama hutama tamaku tamakesale yagai lokiya vaitetama Anumayamotega nunamu hutama havigeho.
1PE 4:8 Uhagote kea mage huno nehie tamakaya tamafu-tamakana-gamina tamakuama amamisaya yana atafa hutama tokiyaage hiho. Kaguama aminesana kanomoma kefo kavama hisigeka aupaa aigeateka kefo yamaa ataletegane.
1PE 4:9 Anumayamo veama emainesageta-mahena kavela afaa amamiho. Ani kavama hisaya yafena tamaipamoa haviyana ohino.
1PE 4:10 Tamakaila nagoke nagokemo-gatamina Anumaya Kotima tamaminea kayone hisaya muse yana ago alimainayanagitama kanale muse aliya alisaya tokiya yamaa ago tamaminea yateti tama-futamakana-gamina alitama kanale hu-matetama hamamaeho.
1PE 4:11 Nago kanomoma Anumaya Koti kema hisia muse yama ali-mainenunofena ani keage hisie. Nago kanomoma veama amaya hisia muse yama ali-mainenunofena Anumaya Kotima aminea himamuleti ani aliyana alino. Yisasi Kalaisima ali-mainea aliyateti Anumaya Koti agimoa ala huno anale haisia yafe mukia ani aliyana alisae. Anumaya Koti agia alisaga nehuta tokiya hale yamaaene kava yagaisia tokiyaaene agaiafikeya mukia kanafina hanege hanege huno hanesie. Tamage.
1PE 4:12 Nenahaiya nafunagana-gatama Anumaya Kotia tamakaifena Tamakua namitafa hu-mainafi namitafa ohunafi? huno tamake-mainea augafa yana atamoma tamaugafama tesagalia augafa kava huno vayi hu-lamatesia yafena tamakesa kumoa ohino.
1PE 4:13 Ohutama Kalaisima augafa agata yama ali-mainea yana tokaetama nealiyafe muse nehutama agai agima alisaga hisia tokiya hale yamaa tamave-lisia kanama vayi hinagetama tusia muse nehutama tamaipamoa kanaleya hugahie.
1PE 4:14 Tamakaya Kalaisi nafaneyaga mainonema. hutama agima ayesaya yateti tamakaima ali haviya hu-lamatesagetama Anumaya Kotina tokiya hale yamaamoene Alu Aotage Avamuamoene tamakaienema mainea yafena tusia muse hiho.
1PE 4:15 Muse hugahagi havigu tamakaipiti nagoa vayamoya vea hamae-falisafi musufaya hisafi havigu-nagu kefo kava hisafi alu kanomo aliyate ageteno ali haviya hu neateno nehisigeya anonaa agata aisia yana amigahae. Yisasi agia ali haviya huyafenagi ani kavala ohiho.
1PE 4:16 Ohutama Yisasi nafane mainone. huya agai agima amakaite hanesia yateti amagata aisia yama amamisagenoa amakayea ohugahayanagino Yisasi nafanema mainaya yafene huno Anumaya Koti agia alisaga hisae.
1PE 4:17 Anumaya Kotia agaia veapima kaiyekema hu-matesia kanamoa ago aepa he-maine. Tagaima aepa heno kaiyekema fako hu-latetenunoa hanaa huno agai kema amakaveno hutenaya veamogamina kasagekela hu-maino kaiyekea fako hu-mategahie.
1PE 4:18 Anumaya Koti avopina mage huya kae-malenayane Anumaya Kotia kasageke humaino fatagoma huya mainesaya veamogami amaku amamena aligatisigeya agai kema amakaveno hutenaya veanene kefo kavama nehaya veanene hanaa hugahae? Havi kapi ugahae. huya kae-malenayane.
1PE 4:19 Ani yafe Anumaya Kotima hau-mainea yamaaletima nagoa veamoya amakata yama alisaya veamoya fatago huya vaiyeya amaku amamemaa Anumaya Koti ayapi kava yagaisia yafe malesae. Agaiama talo hu-latetenoa kanale kavaage efi efi huno yagai nelate.
1PE 5:1 Menia Yisasi anagamo-gamitema kava neyagaiya vayamo-gatamina tamahapaigahue. Nagaienena tamakaiene ania huna kava yagai-mainoa kano mainoe. Nagainia naulagafiti Kalaisima agata aimainea yana agetena haenagaama Kalaisia esigena nagaya agaiene tokiyaage hale yamafi maisuafene huna ali-lamakafa huna kea tamahanepauve.
1PE 5:2 Anumaya Kotife haviya amakupi malenaya veala sipi sipimo hia kava huya tamayapi mainagi anima mainaya veala kava yagai-mateho. Kava aliyatamihe nagoa vayamoya Naa hiho. huya hu-lamatafa hu-mainaya kehenomagi Tahaiya aliyanagita aligahune. hutama aliho. Miya alisaya yafena tamaku tamakesa ohavitama Tahaiya aliyanagita aligahune. hutama Anumaya Kotima nehaiya kava hutama aliyana aliho.
1PE 5:3 Nealitama tamakaya ala vaya kana hutama mainetama tamayapima mainesaya veafena kahegi omatetama amatalegeya aiyaka maeme maeme visayafe kanale auava yana alitama maiho.
1PE 5:4 Naama hisaya yateti sipi sipiyagale uhagote mainea kava kanoma evayi hinunofena tokiya hale yamaa hanea amuse yana agola hanege hanege hisia yanagino tamamigahie.
1PE 5:5 Neyavemo-gatama ala vayamogami amaiyaafinaga maiho. Mukia veamogatama tamaugafa alitama ohaitama tamafu-tamakana-gamienena mailava hutama maiho. Anumaya Koti avopfina mage huya kae-malenayane Anumaya Kotia amaugafama aliya nehaiya veamogamina kame lagino kae neamategi mailava huya yuna heya mainesaya veamo-gamina hau humateno kayone hisaya yana neamamie. huya kae-malenayane.
1PE 5:6 Ani yafe tamakaya Anumaya Kotima tokiyaaletima kavama yagaisiana agai ayapi maigahune. hutama nehutama tamaugafa alitama ohaitama ako hutama maisayana agaiama hu-malenea kanafina tamakaila alisaga lamahaugahie.
1PE 5:7 Anumaya Kotia tamakaifena hau ayamopafi nehaigeno aluya huno kava yagai nelamatea yafe tamakaya kana yatamia agai ayapi maleho.
1PE 5:8 Tamakaya tamaku tamakesalela yagai lokiya vaitama mainetama kayetama maiho. Kame kanotamia Satania kaveage afai kalamoma hau hau huno avima neatea kava huno veafena ati yeno hamaeno negahe vai neaye.
1PE 5:9 Vai neayeanagi tamakaya Yisasife havitama lamakupi maletama tamametiti nehutama tokiya vaitama Satanife Kagai kea ohavigahunagi alulega vuo. hutama hapaiho. Tamakaya ago havimainae mukia kotega tamafu-tamakanaya tamakaiene ania huya amakata yapi nemaiye.
1PE 5:10 Anumaya Kotia mukia kayone hisaya yamona aepaa maineanagino tamakaya Kalaisienema tokaetama mainaya yafe tokiyaage hale yapima agola maisayafene huno ke hu lamateneanagitama tamakaya aupa kana kanoafi tamaugafa tamakata yana alitesageno Anumaya Kotia agaia eteno tamakaila alino kanale hu-lamateno ali heti-lamatesigetama agaife havitama tamakupi malenaya yamoa ali lokiya vai-lamateno tamategahie.
1PE 5:11 Anumaya Kotia mukia tokiyaa agaiafikeya mukia kanafina tamage huno hanege hanege hisie. Tamage.
1PE 5:12 Sailasia aliya alige alige nehia tamafu-tamakanaagino mainegena nagaya Sailasina mo hugesa hugeno osi kea kaeno tamakaife humaine. Manima kae-malenoa kelamage kea Anumaya Kotima tamaminea yana hanegi ani kayone yapi tokiyaage hutama hetitama mai fatago hiho huna ali lamakafa nehue.
1PE 5:13 Anumaya Kotia tamakaienema huyogi-malenea anagamoya Papiloni* mainayanagiya tamakaifena hu falu fala hu nelamatae. Nagaini nafanemoa, Makia, ania huno hu falu fala hu nelamate.
1PE 5:14 Mukiamo-gatama tamafu-tamakana-gamifema tamahaisigetamahena tamayana oami aami hiho. Kalaisienema tokaetama mainaya yafe tamaipamoa falu nehinagetama maiho. Kenia male hano hie. Nagaini nagia Pitanae.
2PE 1:1 Nagaya Saimoni Pitana Yisasi Kalaisi Aposolo kano mainoanagina agai aliya kano mainena mani kea kaena nelamamue. Tagu tamema aligati-mainea kanoa, Yisasi Kalaisia, Anumaya Kotitia, fatago huno maineleti lamakaya tagaiene nago augafa kava hutama havitama lamakupi maletama tamametiti hisaya yana tamamineanagitama tamakua aminayafene huna mani avona kaena nelamamue.
2PE 1:2 Menia tamakaya Anumaya Kotifeene Anumayatimona Yisasifeene kanaleya hutama havimainae. Nagoene havisageno tamaipamoa falu lamahaisia yaene kayone hisaya yamaaene tusiya huno tamamisie.
2PE 1:3 Anumaya Kotia tokiya hale yamaaletiene agaia kanale kava humainea yatetiene tagayama agaitega visunafene huno kea hu-maineanagita ago neuta agaifena nehavune. Ago havunafe agaia tokiyaleti mukia lahaimuma alita maisuna yaene agaiama haiya auava kavama huta vaiyesuna yaene ago lamine.
2PE 1:4 Ani yateti tusiya huno hu lokiya vai-malenea kea ago tamigeta ani keleti tamakaya age lamahayema hu-mainaya yamoa ma mopale kasalino haviya hu-lavisia yana, neataletama Anumaya Kotina agaia haimuaene aepaaene aligahae.
2PE 1:5 Ani yafe tamakaya tamaya mukiki hutama Yisasifena havitama tamakupi maletama tamametitima hanesiana kanale auava kavala hiho. Kanale auava yama hanesiana Anumaya Kotina agelama hutama ageho.
2PE 1:6 Agelama hutama agesayana tamaku tamakesalela yagai lokiya vaiho. Tamaku tamakesalema yagai lokiya vaisayana kana yama lamakaite vayi hisigetamahena hetitama mai lokiya vaitama maiho. Hetitama lokiyaage hutama maisayana Anumaya Kotina haisia auava kava hugahae.
2PE 1:7 Anumaya Kotina haisia auava kavama hisayana tafu-tagana-gamina ali kayone hu-mateho. Ali kayone hu-matesayana tamahau tamayamopafina tamahaino.
2PE 1:8 Manima tamahapauva kemo auava kavama hisagenoma alama hisigetamahena tamakaya Yisasi Kalaisife havitama tamakuama aminaya yamoa afa ya kana ohugahigi alaga ayeno kasago huteno helafi-lavigahie.
2PE 1:9 Alaga ayeno helafigahianagi nagoa veanemoya ani augafa auava kavaamima omalesigeya amaulaga haviya huno asu humainea veanemoya nehaya augafa kava nehuya Anumaya Kotima kefo yaamima aye hami-talenea yafena ago amake-kanitenae.
2PE 1:10 Ani yafe nafunagana-gatama Anumaya Kotia tamakaife ago ke huno huyogi-malenea kemona atafa hisaya yafe tamakaya tamaya mukiki hutama tamahapai-mainoa auava kavala hiho. Tamakayama mani augafa kavama hisayana asaga hu otavigahae.
2PE 1:11 Asaga hu otavigahayanagino tagaima tagu tamema aligati-mainea kanoa, Anumayatimona Yisasi Kalaisi, kumala agola hanege hanege humainea kumate hai falesuna kamoa yaki-malenesigeta hai faleta maigahune.
2PE 1:12 Ani yafe mukia kanafina tamaku tamakesama vaikalo hisua kea hugahue. Tamakaya ani augafa yafena ago havitama kelamage kea ago alitetama kanaleya hutama ani kemo akaveyale heti-mainagi afaa mukia yupa tamahapaigahe nehue.
2PE 1:13 Nehuanagi nagaya nagesa havuana kanale kava huna mukia kanafina ofalinama ma naugafaenema mainena nagoene tamaku tamakesa vaikalo hugahe nehue.
2PE 1:14 Anumayatimoa Yisasi Kalaisia ago nahapaigena havi-mainogi aupa kanafi nagaya falitena naugafa atalegahue.
2PE 1:15 Atalesugetama Naa huno mani kea tahapai-mainea ke. hutama tamakesa havisayafene huna tokiyaage aliya alina tamahanepauve.
2PE 1:16 Tagaya Yisasi Kalaisina tokiyaaene esia avageaenema tamahapai-mainonana tagesafiti havigu-nagu ke akave nemalona kea tamaha-opainonagi tagaya alu aotage tokiya hale yamaa agaite hanegeta taulagafiti ageteta tamahanepaune.
2PE 1:17 E, Nefaa, Anumaya Kotia, agai agi alisaga huno tokiya hale yamaama aminea kanafina Anumaya Kotia tokiya hale yamaafi maineno Yisasife mage huno hapaiye Mamona nagaila nahaumanafi nahau-mainea nafanegina agaifena aluya huno nenahaiya nafane maine. huno hu-maineane.
2PE 1:18 Tagaya Yisasiene Anumayamo agoyale mainonageno ikapinagati age aino mani kea higeta tagesafiti havi-mainone.
2PE 1:19 Haviteta tagaya Anumaya Koti amaune vayamogami kemona tagupi maleta tametiti hu-mainonanagi mani kemoa kani kana huno hanima kimainea yapina aye ha nele. Ani yafe mani kehena tamakesa havi havi hutama mainegeno aiha-lesia kanafina kola ali haleno Yisasina, nago agia ehema ikate aye ha nelea kanefilagino tamakaila tamakuafinaga falote hugahie.
2PE 1:20 Hagotetama ma yafe haviho. Nayona nago kanomoa agaia agesafiti aunemena laga huno Anumaya Koti avopina okaenegi Anumaya Kotina Alu Aotage Avamuamoa agai agupi efalegeno Anumaya Kotima hapaiya kea hamapai-maineafe manima Anumaya Koti avopima hanegeya amaunema laga nehaya kea veamoya amakaiami amakuafitila huhaleya nohae.
2PE 2:1 Anumaya Koti amaune vayala mainagi havigeage amaune vayamoya veamogami amunopi vayi hu-maineya havigea hu-maveli ha-maveli hu-mainayanagiya ania huya tamakai amunopitila hetiya maigahae. Maineya kesi kava huya veala ali haviya hamaisaya havigeamia nehuya amaku amamema miya huno aligati-mainea Anumayamofena amakaveno huteteya amakaiami amaku amamena ali haviya hugahae.
2PE 2:2 Amakaya amaugafa amakeya hamaye hisaya yaamia maiya nehayanagiya mukia veamoya aniama hisaya kavala ageteya akave maleya kelamage kema hisaya kemona ali haviya hu-talegahae.
2PE 2:3 Ani havigeage kema hu-maveliya vayamoya monea age hamaye huya havigema lamahanepaiya yateti monetamia lamaha-falegahayanagi Anumaya Kotia kaiyekea hu-mateteno ali haviya hu-mateno hanageke ya amamisia yamoa nayona talo tala hu-malegeno aula ofaenegi aulaga ageno amakava-maine.
2PE 2:4 Nayona nagoa ensole vayamoya kefo kavama hagenoa Anumaya Kotia afaa amataleya omainagi haniki-mainea kina nopi nofi hu-mategeya mainayanagiya menia tusia haniki-mainea komufi maineya kaiyekema hu-matesia kanahe agava-mainae.
2PE 2:5 Nayoma mainaya veamoya Anumaya Kotina amakavenoma hutagenoa Anumaya Kotia afaa amatalegeya omainagi tusia li amamigeno ani limoa hogino ani veanea aye faluti-taleanagi Noaa Kanale kavaage hiho. huno huhalenoma nehia kanomona Anumaya Kotia ani kanoene sevenia (7) anaga kanoaene amaugafa alikati-maine.
2PE 2:6 Anumaya Kotia Sotomuene Komolaene kaiyeke hu-mateteno ani tole ala kumatalana ata kae-sagaligeno tanefaage hu-mainegi Anumaya Kotia ani ala kumatalapi mainaya veamogamina anonaamia humategeya ali-mainaya yafena meni kanafima havi kavama maiya nehaya veamoya ageteya amakaima kaiyekema humatesia yafena amakesa havisae.
2PE 2:7 Ani kumatela fatagoma huno nemaiya kanoa, Lotie, mukia veamoya age hamaye huya kumai nehaya yamona ageteno aipamoa havino kanaage humainea kanomo augafa Anumaya Kotia aligati-maine.
2PE 2:8 E, anima fatago kavama nehia kanomoa mani veamogami amunopi maineno amakayama kefo kavama maiya nehaya kavala neageno mukia kanafina ani kavaene kema haya kea havino maineno Anumaya Koti kema ali haviyama haya yafena fatago agu agesa hanegeno mainea kanogino tusiya huno aipamoa agata aimaine.
2PE 2:9 Naa hu-maineanagino meni kanafina Anumaya Koti kema akave nemalaya veanelema kana yama vayi hisigenoa Anumayamoa ani kana yapitila ali amatalegahigi kefo kavama nehaya veala ago neamakeanagino amakata aisia yana amamiteno ala kaiyekema hu-matesia kanahe amatafa hu-lineno amakava maine.
2PE 2:10 Ani veanemoya amaugafa age hamaye huya kumai he yaamimoa oniyaage hamaigeya tusia veganokano kava nehae. Amakaiami amaugafa aliya haiteya kolia ohuya ikapinaga uhagote mainaya ensole vayafena kamuge hatageya vai neamatae.
2PE 2:11 Vai neamatayanagi kefo kavama nehaya veamogami tokiyaamia ani ensole vayamogami tokiyaamimoa amakaseya mainayanagiya Anumayamo aulagafina kefo kavama nehaya vayafena kaiyekea hu-mateya kamugea vai-mateya nohae.
2PE 2:12 Ohunagi mani havigeage kema hu-mave-neliya vayamoya yaga kafamoma hia kava huya amaku amakesa omale vayalagiya amaugafa age hamaye hisaya kavaage nehaya vayamoya hamaesageya falisaya yafe itaamimoya amatenae. Agelama ohunaya yafena kamuge hatageya vai neamateya havi kavala nehayanagi anima amakaiami nehaya kavamo hamaesigeya faligahae.
2PE 2:13 Havi kavaage nehayanagino anonaamia amakaila alino haviya hu-mategahie. Yagema lea yapi alitalu huya maineya havili neneya hagifali kema hatagaya yafe muse nehuya tamakai amunopi emaineya kavela nenageno amaugafalegatila kanomanaamimoa tusi ya nehigeya tamakai tamakia ali haviya nehae.
2PE 2:14 Mukia kanafina amaulagamoa aneyagalegageya vigeya kumai hesaya amakesa haviteya kefo kava hisaya yaamia oatalenae. Yisasife haviya amaku amamena ali lokiya ovaiya mainaya veamogamina amavayu huya Kefo kava hiho. huya nehae. Alu kanomo yate age hamaye nehuya amaku amakesa havige havige nehae.
2PE 2:15 Fatago hu-mainea katema visaya yafena amakaveno huteteya afai heya mainae. Palamu nafanea Peoma humainea kavamo aiyaka nemayae. Ani kanoa Palamue kefo kavaage huteno mone alisia yafe aluya huno nehaiya kanoe.
2PE 2:16 Palamua kefo kavama maino nehia yafe nagola hosi kana afua, tokimoe, kea nohia afugino veamoyama nehaya kava huno age aino Palamuna aifonafo kavama maino hia kavafe ke-amakino kamaa maleno tiletene.
2PE 2:17 Ani havigeage kavama nehaya vayala timoma komufima omalenea komumoma hia kava huya mainae. Ala yasimoa siama alino aye hagagi-talea kava hugahae. Anumaya Kotia hanimaage humainea kumapi hu-matesigeya umaisayafe ani kumala talo tala hu-mategeno hane.
2PE 2:18 Ani veamoya amaugafa aliya haisaya kea afa keyagaage nehuya Yisasina amakua meni kanoama amiteya havi auava kavala agoma atalenaya veamogamina amavayu huya amaipa ayeya Tamaugafa age lamahaye hutama kumai he yana hiho. huya amavayu huya havi kapina neamatae.
2PE 2:19 Anima havigeage kavama humave-neliya vayamoya mage nehae Mukiama tamahaisia yamaagela afaa maitama hiho. huya nehayanagi amakayama kefo kavaamia atalesaya amakesa nehaviyanagi amakuamoa augafa haga neyafekeya higeya noatalae. Ani yamoa nofimo alino haya ki-matenea augafa kava maino higeya ani kefo kavala eteya maiya nehae.
2PE 2:20 Nagoa veamoya Yisasi Kalaisia tagu tamema aligati-mainea kanomofena haviteya ma mopalema kasalino haviya hulavisia yana ago atalenayanagi nagoene eteya ani havi kavama hisagenoa ani yamoa nofi hu-matesigeya aniageya maiya hugahae. Hagoteya ani augafa kavama hayana havi yapi mainayanagiya haenagaa ani kavakeyama maiya hisayana nagoene nagoene havi yatafapi agola maigahae.
2PE 2:21 Anumaya Koti kamoa fatago humainea kafema ohavinaleasina afaa kanale haleasinagi alu aotage kea agoma haviteya eteya amakavenoma hutayana tusiya huya havi kava maiya nehae.
2PE 2:22 Amakaya ani kavama haya yafena Anumaya Koti avopina mage huya kae-malenayane Kalamoa mua vali-taleteno eteno ani mua yogino nene. Afumoa tina faletenoagi eteno hapafina viayamo hapa negalie. huya hu-mainayane.
2PE 3:1 Nahau-mainea nafunagana-gatama anilema molia kea menia kaena nelamamue. Nayona kae-malenoa avopiene mani avoma nelamamua avopienena tamakuamofe aligafa huna tamakesamoa aihagalo hinagetama fatago kema havisayafene huna mani avona kaena nelamamue.
2PE 3:2 Anumaya Koti amaune vayamoya haenagama vayi hisiafene huya humainaya kene taugafa aligati-mainea Anumayatimo avayafiti Aposolo vayatamimo-gamina hamapai-mainea kahegi kene haviho. Mani kea ago hagetama havi-mainaya kehe tamakesa ali hao hutama havisae.
2PE 3:3 Hagotetama tamakaya ma kea havilama hiho. Mukia yama hano hugahema atupa kanama esigeya Yisasima egahema humainea kanahena nagoa veamoya hu-haviya hu neateya amakaiami amaugafa age hamaye hisaya yatega akave nemaleya mage huya hugahae.
2PE 3:4 Yisasia Etena egahue. hunoma hu-maineana hanate maine? Eteno nomegi. Anumaya Kotia ehema ma mopama taloma hu-malenelegatila tototimoya maime neeya fali-mainaya augafa kava huno haneanagita menia ania huta mainonagi mukia yana aniageya huno hane. huya hugahae.
2PE 3:5 Ehe kanafima Anumaya Kotia agaia hu-malenea kealeti ikana ali falote huteno tina eteno nealino mopa talo hu-malene.
2PE 3:6 Ani limoa mani mopafiti eteno tusia li vayi huno hogiteno mopamona ago alino fanane hu-talene.
2PE 3:7 Fanane hu-taleanagi ani Anumaya Koti kemokeya menima hanea ikamoene mopamoene Anumaya Kotima ala kaiyeke hunatesia kanahe agava mainaanagino ani yupama atamoma me leno anasagalisigeno Anumaya Kotia kefo kavama nehaya veanea kaiyekema hu-matesigeya haniki-mainea kumapi tegelege nehisia atafi agola umaigahae.
2PE 3:8 Nahau-mainea nafunagana-gatama mani kemoa tamakela okanino. Anumayatimoa maa huno agesa nehavie Nagoke yupa kanoamoa vani tausania (1,000) kafu kana humaine. Nagi vani tausania (1,000) kafumoa nagoke yupa kanoa kana huno nagoke avamete humainae. huno agesa nehavie.
2PE 3:9 Anumayatimoa nagoa veamoya maiya nehaya augafa kava huno vase vase huno hu lokiyama vai-malenea kemotela aliyana noalie. huta nehunagi agaya tagaife agesa nehavino Nagoa veala haniki-mainea yapi tegelege nehia atafina ovisae. huno agesa nehavino Mukiamo-gatama tamakua aiyahae hutama maiho. huno tagaifena ako huno tagava maine.
2PE 3:10 Tagava maineanagi Anumayatimoma enunofena musufa yatema nevaya kava huno egahie. Anima esia yupa ikamoa ala agegefa neaino fanane hinageno mukia yana atamo teno fanane hugahie. Ma mopaene mukiama mopalema talo hu-malegeno hanea yaenena atamo teno fanane hugahie.
2PE 3:11 Ani yayagama fanane hisia yafena menia tamakaya hana augafa kava hutama maigahae? Alu aotage veane mainetama kefo kavala ohutama Anumaya Koti auava kavaage akave maleho.
2PE 3:12 Anumaya Koti kanahe agava mainetama Aupaa vayi hisie. hutama nehutama anagatamimogamina amaku amakesa aliho. Anima vayi hisia kanafina ikamoa ata leno fanane hisigeno mukia yana tesagalino yeye huteno ti kana hugahie.
2PE 3:13 Naa hugahagi Anumaya Kotia ago hu lokiya vaino mage huno humaine Ani ikaene mopaene hanoma hisiana haegafa ikaene mopaene talo hisugeya fatago amaku amakesaene veaneage anilela maigahae. huno humaine. Ani yama falote hisiafe tagaya muse hisune.
2PE 3:14 Nahau-mainea nafunagana-gatama tamakaya ani yafema agava mainenutamahena tamaya mukiki hutama Anumayamo aufi nagoa kefo kavala ohutama ako hutama mainetama agaiene tamakuamoa falu nehinagetama maiho.
2PE 3:15 Anumayatimoa tagu tamema aligatisia yafe tagava maineno ako huno nelate. hutama tamakesa havi havi hutama maiho. Anumaya Kotia Polona tahau-mainea nelafuna kanale agu agesa amigeno ania huno nagayama hua kava huno avopina kae-malene.
2PE 3:16 Poloa mani kea Yisasima eteno esia yafe huno mukiama kae-malenea avopina ania huno kaeno tamahapai-maine. Nagoa agaiama kae-malenea avopina havilama huta ohavisuna augafa ke hanegeya ani kema haviyama hatayo hataya nehaya veanene havilama nohaya kene mukiama Anumaya Koti avopima kae-malenaya kene aliya aiyahae huya hu haviya huya neataleya alu kate kate nevae. Naa augafa kavama nehaya yafena haniki-mainea kumapima tegelege nehia atafi agola ugahae.
2PE 3:17 Naa hu-maineafe tamakaya nahau-mainea nafunagana-gatama haenagama vayi hisia yafena ago havimainagi kayetama maiho. Havigu kahegi kema aliya neatagayaya veanemoya havige huya tamakaila ali haviya hu-lamatesageno tamametitimoa tokiyaage huno fatago ohuyafenagi tamakaya kayeho.
2PE 3:18 Tamakai tamagu tamamema aligati-mainea kanoa, Yisasi Kalaisifena, ago havimainagi agaia kayone yamaafi mainetama nagoene kayonema hisaya yana alitetama Kalaisife tamakesa havi havi hutama havilama hutetama ko hiho. Anumaya Kotina alu aotage tokiya hale yamaamoa meniene haenagaaene agola akaiafikeya mukia kanafina hanege hanege huno hanesigeta tagaya mukia kanafina agai agia alisaga huge huge huta maisune. Tamage. Kenia male hano hie. Nagaini nagia Pitanae.
1JO 1:1 Ehema ma mopama talo ohunea kanafina Yisasie, nago agia Haimuma Hanea Kemoe, maineane. Maineanagina nagaya naulagafiti ani kanoa agelama huna agetena nayateti atafa hu-mainoanagina avona kaena tamahanepauve.
1JO 1:2 Anima hano ohu tahaimumona aepaamoa Nefaene tokaeno maineleti evayi higena age-mainoe. Hano ohu tahaimula agola alita maige maige hisuna kanoa aepaamona agetena tamagelafa huna tamahanepauve.
1JO 1:3 Tagaiene tamakaienena nagoke taipa huta maisuna yafe havitena agetena humainoa kanomofe tamahanepauve. Tagayama Anumaya Kotiene nafaneamoa, Yisasi Kalaisiene, nagoke taipale mainone.
1JO 1:4 Mani kema kaova kemoa tagaiti muse yatimoa tamagelafa huno havatesia yafe mani avopina kae-malenone.
1JO 1:5 Nagi Yisasima tahapai-mainea kea havitena tamahanepaugi haviho. Anumaya Kotia hale yamaaene kano mainegeno aguafina osi kanoa haniki mai yamaa tamagelafa huno omalene.
1JO 1:6 Omaleanagita tagaya Anumaya Kotiene taguamoa nagoke taipale mainone. nehuta haniki mai yapima ute etema hisunana havige nehuta kelamage kemona akave nomalone.
1JO 1:7 Nomalonanagi Anumaya Kotima hale yapima mainea ya huta hale yapima ute etema hisunana nelafuyaene nagoke taipale maisunagenoa Anumaya Kotina nafaneamoa, Yisasi kolamoa mukia kefo yatia aye hami nelate.
1JO 1:8 Aye nehami nelateanagi tagaya Kefo yatia omalene. huta hisunana tagaiti taipamona havige aye lavataga hisunageno kelamage kemoa taguafina omalegeta havigeage veane mainone.
1JO 1:9 Mainonagi tagayama kefo yama hu-mainona yafema hu falotema hisunana Anumaya Kotia aigetateno ani kefo yatia atalelategahie. Anumaya Kotia fatago auava yamaaene kano maineno tahapai-mainea kemona ani kate maleno hugahie. Mukia kefo kavama nehuna yana aye hami-talesigeno taguamoa efeage hugahie.
1JO 1:10 Tagayama Kefo yatia omalene. hutama hisunana Anumaya Kotifena Havigeage kano maine. huta nehunageno agai kemoa taguafina nomale.
1JO 2:1 Nagaini nafaneyagamo-gatama kefo kavala ohisaya yafe mani avona negaogi tagayama kefo yama hisunana Yisasi Kalaisia fatago agu agesaene kanogino tagaite maleno Nefatega ke huno havigegahie.
1JO 2:2 Anumaya Kotia tagayama kefo yama huna yafena havino aipa haviya hu-lateanagi Yisasia kefo yatihe falitegeno Anumaya Kotia aigetateno alino atalelatene. Tagaitige kefo yafena ani kavala ohunegi mukia ma mopafima mainaya veamogami kefo yafeene ani kavala huno fali-latene.
1JO 2:3 Hanaa huta Yisasina tagua amitafa hu-mainesuna yafena havisune? Anumaya Kotia kahegi malenea kema akave malesunana tamage huta Tagua amitafa hu-mainone. huta nehuta agaila ago age-mainone huta hugahune.
1JO 2:4 Nagoa veamoya Anumaya Kotina tagua amitafa hu-mainone. huya nehuya Anumaya Koti kahegi kea akave omalesayana havigeage veane mainageno kelamage kemoa amakuafina omalene.
1JO 2:5 Omaleneanagi nagoa veamoya Anumaya Koti kema akave malesaya yateti Anumaya Kotife hamau amayamopafi tusiya huno hamau-maine. Yisasiene tokaena mainoe. hunoma nehea kanomoa Yisasima hu-mainea kava huno ute ete hisie. Aniama hisunana Yisasiene tokaeta mainone. huta havilama hugahune.
1JO 2:7 Nahau nayamopafi nenahaiya nafunagana-gatama menima negaova kahegi malenea kea haegafa ohavinaya kea nokaogi nayoma ehe kanafima havilinaya ke negaove. Ani kea nayoma ago havimainaya ke hane.
1JO 2:8 Haneanagi menima negaova kahegi kemoa haegafa kelafa hane. Haniki-mainea yamoa ago fanane higeno tamage hale yama aye vasa hisia yana ago emaine. Yisasiene tamakaiene kanale kavama nehaya yafe mani kea Tamage nehie. hutama nehae.
1JO 2:9 Nagoa veamoya Hale yapi nemaune. huya nehuya amafuamakana-gamina amaipa kafama he neamatesayana haniki-mainea yapi mainae.
1JO 2:10 Amafuamakana-gamifema hamau amayamopafi hamauge hamauge nehia veamoya hale yapi maineya aye hataga huliya kefo yapina asaga hu otavigahae.
1JO 2:11 Otavigahayanagi amafuamakana-gamina amaipa kafa he neamataya veamoya haniki-mainea yapi maineya ute ete nehageno ani haniki yamo amaulaga ayesu nehigeya visaya kana agelama huya noagae.
1JO 2:12 Osi nafanenimogatama Yisasi agile Anumaya Kotia kefo yatamia ago aige-lamateno atale-lamatenea yafe mani avona negaove.
1JO 2:13 Vayatamamo-gatama Yisasia nayoma ehe kanafima mainea kanomona aepaa ago havilama hutama havimainaya yafe mani avona negaove. Neyavemo-gatama Satanienema tua hutama agase-mainaya yafe mani avona negaove.
1JO 2:14 Nafaneyagamo-gatama Nefafema havimainaya yafe mani avona kae-malenoe. Vayatamamo-gatama Yisasia nayoma ehe kanafima mainea kanomo aepaa havilama hutama havilinaya yafe mani avona kae-malenoe. Neyavemo-gatama tokiya neyave mainaya yafeene Anumaya Koti kemoma tamakupi hanea yafeene Satanienema tu hutama agasaya yafeene tamakaife huna mani avona kae-malenoe.
1JO 2:15 Ma mopaene mopale hanea yafeene tusia muse hutama agetama tamahayea ohiho. Nagoa veamoyama ma mopafi yafema tusia muse huteya age hamayema hisayana Nefana amakua noamiye.
1JO 2:16 Mukia mopafi hanea yana augafa haga neyaene aulaga age haye hu yaene augafa alino hai kava hu yaene Nelafategatila omenegi mani mopafima mainaya veamogami amaku amakesafiti falote humaine.
1JO 2:17 Ma mopaene mukia yama ageya hamaye hu yaene hano hugahianagi Anumaya Kotima haiya kavama nehia kanomoa hano ohu haimula alino agola maige maige hugahie.
1JO 2:18 Nafaneyaganimo-gatama ma mopama hano hisia kanamoa ago falote higeno Kalaisina kame kanoamoa ago egahie hu-mainea kea ago havimainae. Kasagoya Kalaisina kame vayaa ago evayi hu-mainaya yafena ageho ma mopama hano hisia kanamoa ago falote humaine huta havimainone.
1JO 2:19 Ani Kalaisina kame vayaa tagaiene mainaleti nelataleya tagayama havuna amakesa ohaviya alu anaga maineya tagaila nelataleya havigu nemaiye. Tagayama havuna amakesama havileasipa otatalaleasine. Mukia veamoya tagai anaga omainae huya havisaya yafe tataleya umainae.
1JO 2:20 Tamakaila Anumaya Kotia Alu Aotage Avamula tamamigetama kelamage kea havilinae.
1JO 2:21 Nagaya tamakaya Yisasifena kelamage kea ohavinaya yafe avona negaove huna nohugi tamakaya Yisasifena kelamage keama havilinaya yafe negaove. Ke-lamage kefitila havigema nehaya kemoa omene.
1JO 2:22 Havigeage kanoa ta maine? Nagoa veamoya Yisasina Anumaya Koti hutegeno emainea kanoa, Kalaisia omaine. huyama nehaya veamoya havigeage veane mainae. Ani veamoya Anumaya Kotiene nafaneamoene amakavenoma hutenayana veamoya Kalaisina kame veanea mainae.
1JO 2:23 Nagoa veamoya Yisasina amakavenoma hutesayana Anumaya Koti nafanea omaine. Omainagi nagoa vayamoya Yisasifema Anumaya Koti hutegeno emainea kano maine. huya hisayana Yisasia amakupi mainegeno Anumaya Kotia nefoamimo maine.
1JO 2:24 Tamakayama nayoma havimalenaya kea atafa hutakalo higeno kutamifi haneno. Ani kavama hisayana Nelafaene nafaneamoene tokaetama agola maigahae.
1JO 2:25 Maigahayanagi Kalaisia tagaifena hu lokiya vaino mage humaine Agola maige maige hisaya tamahaimula tamamigahue. huno hu lokiya vai-maineane.
1JO 2:26 Havigeage kema huya havi kapima tamavaleya visaya yafema aye lamavataga hisaya veamoya havisaya yafe mani avona ago nekaove.
1JO 2:27 Kaovanagi Anumaya Koti Alu Aotage Avamumona tamamineanagitama tamakaya ago avalageno tamakupi mainegi havigu alu kanomo havi ya tamave-liyafenagi Alu Aotage Avamumoa mukia yafena tamav nelino tamageage hugahianagino havigea ohugahie. Hulamavema-nelia yafena Yisasiene aigamaetama maiho.
1JO 2:28 Nagi osi nafanenimogatama Yisasiene aigamaetama maiho. Aigamaetama maisunana Yisasima ikapinagati esia kanama vayima hisigeta kolia ohuta agai augafima agesuna yafena tagayea ohugahune.
1JO 2:29 Tamakayama Yisasia fatago auava yamaaene kano maine. hutama havilama hu-mainaya yafe nagoa veamoya fatago kavama huge huge nehaya veamoya Anumaya Koti nafane mainae. hutama ago havilinae.
1JO 3:1 Vaeha Nelafaa tagaifema tusiya huno hau ayamopafima nehaiyanagino tagaifena Anumaya Kotia nafaneyagania mainae. huno humaine. Tamage agaia nafaneyagalafa mainone. Ma mopale yafema muse nehaya veamoya Anumaya Kotifema havilama huya ohaviya kava huya tagayama Anumaya Koti nafanema mainona yafena tagaienefena havilama nohae.
1JO 3:2 Nenahaiya nafunagana-gatama meni kanafina tagaya Anumaya Koti nafane mainonagi haenagaama maisuna aepaa ohavinonagi mani kemona ago havimainone. Yisasima esia kanafina agaila aepaama agesuna yafe agaienena nagoke avamete maigahune.
1JO 3:3 Ani yafe mukia veamoya Yisasima esigeya agesaya yafe amametitia nehuya amakua sese huge huge nehuya Yisasia kefo kavama ohuno agupima oniya yama omalenea kava huya kanale kavaage huya maisae.
1JO 3:4 Mukia kefo kavama huge huge nehaya veamoya Anumaya Kotina amakaveno huteteya agaiama kahegi malenea kea ali neatagae. Kefo yama nehaya yamona aepaamoa Anumaya Koti ke atagae ya hane.
1JO 3:5 Tamakaya ago age-mainae Yisasia tagai kefo yana ali talegahe ikapinagatila emaine. Agaila aguafina tamage huno kefo yamaa omalene.
1JO 3:6 Yisasiene aigamaeya nemaiya veamoya kefo kavala huge huge nohae. Kefo kavama huge huge nehaya veamoya Yisasina oageneyagiya agelama huya oagenae.
1JO 3:7 Osi nafaneyaganimoga-tama tamakaya kaye ho. Nagoa veamoya havi kapi visaya yafe aye lamavataga hugahae. Fatago kavama huge huge nehaya veamoya Yisasima fatago kanoma mainea ya huya ani veamoya fatago veane mainae.
1JO 3:8 Mainagi kefo kavama huge huge nehaya veamoya Satani nafaneyaga mainae. Satania nayona ehe kanaleti aepa heno kefo kavala hume hume neea kano mainegeno Anumaya Kotina nafaneamoa Satanima kefo kavama hu-malenea yana alino kofanafa huno ali hano hu-talesia yafe ma mopafina efalote humaine.
1JO 3:9 Anumaya Kotima amatenea veamoya kefo kavala maiya huge huge nohae. Anumaya Kotina haimuamoa amakupi hanegeya Anumaya Kotima amatenea yafe kefo kavala huge huge maiya nohagi amakaya Anumaya Koti nafaneyaga mainae.
1JO 3:10 Fatago huya nomaiya veamoyaene Yisasi kema nehaviya vayamofe hamau ayamopafima nohamaiya veamoyaene Anumaya Koti nafanea omainae. Ani auava yaamia ageteta Ma veamoya Anumaya Koti nafane mainayanagi atu veamoya Satani nafaneyaga mainae. huta agegahune.
1JO 3:11 Nayoma havimainaya kea mage huno humaine Yisasi kema nehaviya tamafu tamakana-gamifena tamahau tamayamopafi tamahaino. huno hu-maineane.
1JO 3:12 Tagaya Kenima humainea kava ohisune. Kenia Satani nafanema mainea yafe aganaamona haegeno fali-maine. Naa higeno haegeno fali-maine? Aganaamoa fatago huno mainea yafe agaia kefo kavaage nehia kanogino aipa haviya huteteno aganaamona haegeno fali-maine.
1JO 3:13 Yisasina tamakuama aminaya nafunagana-gatama ma mopale yafema muse nehaya veamoya tamakaila kamea hu-lamatesaya yafena atali talua ohiho.
1JO 3:14 Yisasina amukuama aminaya tafu-tagana-gamifena tagaya tahau tayamopafima tahaisiana kefo kavama nehuna yana falimai yapiti ago hetita agola maige maige hisuna tahaimula hanea yapi mainona yafena ago havimainone. Neamafu-gamifema hamau amayamopafima nohamaiya veamoya falimai yapi mainae.
1JO 3:15 Nagoa veamoya neamafugamima amaipa kafa hematesayana amakeyama fakaliya augafa veane mainagetama tamakaya ago age-mainae. Veama amakeya fakaliya veamogami amakupina agola maige maige hisaya hamaimula omalene.
1JO 3:16 Yisasia tagaife huno fali-mainea yafe hau ayamopafima haiya yana taveligeta tagaya ago havimainonafe tagaya ania huta Yisasima taveli-mainea kavala nelafu-gamina amaya hisuna yafe falisune.
1JO 3:17 Faligahunanagi nagoa veamoyama ma mopalema kanaleya huya maisaya yana hanegeya nagoa yafema kafu huya nemaiya anagaamima amaketeya Tamahaote yatamie. huya nagola nesaya yana oamamisagenoa Anumaya Kotina hau ayamopafima nehaiya yana ani veamogamipina tamage huno omalene.
1JO 3:18 Osi nafaneyaganimo-gatama nelafu-gamifena tahau tayamopafina Tusiya huno tamakaifena nelahaiye. huta tavayafiti keagela ohisunagi tamagelafa huta amaya nehuta tagua amamigetao.
1JO 3:19 Ania hisunana Anumaya Kotina kelamage kea haviteta mainona veane mainone. huta nehavita tagaiti taguamona Kefo kava nehunanagino Anumaya Kotia kaiyeke hulategahie. hutama hisagenoa Anumaya Kotia tagai taguamona agaseno ala kano maineanagino mukia yafena ago havimainea kano maineafe Tagaila laya hugahie. nehuta agai aufina taipamoa falu hinageta maigahune.
1JO 3:21 Nenahaiya anaganimo-gatama taguamoa kaiyekema hu notatesiana tagaitihena Kefo kavala nohune. huno hisigeta Anumaya Kotifena kolia ohuta nunamuma huta havigesunagenoa keama akave nemalona yafeene haiya kavama nehuna yafeene havigesuna yana tamigahie.
1JO 3:23 Anima akave malesuna kahegi kemoa mage huno nehie Nagai nafanea Yisasi Kalaisia hulamatenea yafena havitama tamakupi maletama tamametiti hutetama mama Yisasima hu-mainea kea akave maletama nagoke nagokemo-gatama nelamafu-gamifena tamahau tamayamopafi tamahaino. huno hu-maineane.
1JO 3:24 Mukia Anumaya Kotia kahegi malenea kema akave nemalaya veamoya Anumaya Kotiene ailokaeya maigeno Anumaya Kotia ani veamoyaene ailokaeno maine. Ani yafema havisuna yafe Alu Aotage Avamula ago tamigeno tagai tagupi maine.
1JO 4:1 Nenahaiya anaganimogatama ma mopafina kasagoya havigeage amaune vayamoya Anumaya Koti kea alita neone. huya emainagi mukia vayamoya avamumo kema hisaya kea ohavitama hagotetama Anumaya Koti humategeya emainafi? Hanateti emainafi hutama agelama hutetama amakai kea haviho.
1JO 4:2 Maa hutama agelama hiho Yisasi Kalaisia ma mopafima eana velafa emaine. huyama humainaya veamogami agetetama Amakupina Anumaya Kotina Alu Aotake Avamuamoa maine. hutama agelama hugahae.
1JO 4:3 Yisasia ma mopafima eno velafa maine. huya hu falotema nohaya vayamogami amakupina Anumaya Kotina Alu Aotage Avamuamoa omainegi alu avamule Anumaya Kotitegatila omenea avamu amakupina mainegetama tamakaya inaa augafa vayama esaya kea ago havilinae. Ma mopafina Kalaisina kame hutesaya amaune vayala ago emainae.
1JO 4:4 Osi nafanenimogatama tamakaya Anumaya Koti nafaneyaga mainae. Ma mopafima mainea Satania osi kanoa mainegi Anumaya Kotina Alu Aotage Avamuamoa tamakupima mainea Avamumoa Satanina ago agaseno ala mainea yafe havigeage amaune laga nehaya vayala ago amakase-mainae.
1JO 4:5 Anima havigeage amaunema laga nehaya vayala ma mopafiti falote huteya mopale yafe kea nehageya mani mopafi yafe musema nehaya veamoya amakai kea nehaviye.
1JO 4:6 Nehaviyanagi tagaya Anumaya Koti nafaneyaga mainone. Anumaya Kotina agelama nehaya veamoya tagai kea nehaviyanagi Anumaya Kotia oamatenea veamoya tagai kea nohaviye. Ani kavama nehaya yafe ke-lamage Avamumoma nehia kene havigeage avamumoma nehia kene havilama huta ago havilinone.
1JO 4:7 Nenahaiya anaganimo-gatama tahau tayamopafima nelahaiya yana Anumaya Kotitegati efalote huno emaine. Ani yafe Yisasina amakuama aminaya anagatimo-gamifena tahau tayamopafi nelai-hainageta maigetao. Mukia anagatimo-gamifema hamau amayamopafi nehamaisia veamoya Anumaya Koti amatenea veane maineya Anumaya Kotina agelama nehae.
1JO 4:8 Anumaya Kotia tahau tayamopafima nelahaiya yamona aepaa maine. Ani yafe hamau amayamopafima nohamaiya veamoya Anumaya Kotina tamagelafa huya oagenae.
1JO 4:9 Anumaya Kotia maa huno tagaifena hau ayamopafina hau-mainea kavala tagaila taveli-maine. Anumaya Kotia agaia nafanea aiya nagoke nafaneamona hutegeno ma mopafina emaine. Emaineafe Yisasima fali-mainea yateti agola maige maige hisuna tahaimula aliteta kanaleya huta maisuna yafe hutegeno emaine.
1JO 4:10 Manima hau ayamopafima hau-mainea yana tagaya Anumaya Kotife tahau tayamopafi nelahaiya yanomagi agaia tagaifema hau ayamopafima hau-mainegeno agaia nafanea hutegeno emaine. Tagayama kefo yama huna yafena Anumaya Kotia havino aipa haviya hu-lateneanagi Yisasia kefo yatihe huno faligeno Anumaya Kotia aigetateno kefo yatia alitalesia yafe Yisasina hutegeno emaine.
1JO 4:11 Nenahaiya nafunagana-gatama haviho Anumaya Kotia ania huno tagaifena hau ayamopafima hau-mainea yafe tagaya ani kava huta nelafu-gamifena tahau tayamopafi tahaisie.
1JO 4:12 Nagoke kanomoa Anumaya Kotina oagenegi tagayama nelafu-gamifema tahau tayamopafima lahaisigenoa Anumaya Kotia tagaienena tokaeno mainegeno agaima hau ayamopafima hau-mainea yana tagupi tamigeno tokiyaage huno ala hu-maine.
1JO 4:13 Anumaya Kotia Alu Aotage Avamua ago taminea yafe Anumaya Kotia tagupi maigeta tagaya agai agupi mainone. huta havimainone.
1JO 4:14 Havuna yafe Anumaya Kotia agaia nafanea hutegeno ma mopafi veamogami amaku amamemaa aligatisia yafe emaineanagita agaila ago agelama humaineta tamakaila tamahanepaune.
1JO 4:15 Tamahanepaunanagi nagoa veamoya Yisasifema Anumaya Koti nafane maine. huya hisayana Anumaya Kotia amakaiene tokaeno maigeya ani veamoya Anumaya Kotiene tokaeya mainae.
1JO 4:16 Anumaya Kotima tagaifema hau ayamopafima nehaiya yana ago havilama huta tagupi malenone. Anumaya Kotia tahau tayamopafima nelahaiya yamona aepaa mainegi hamau amayamopafima nehamaiya veamoya Anumaya Kotiene tokaeya maigeno Anumaya Kotia amakaiene tokaeno maine.
1JO 4:17 Ani yafe Anumaya Kotife tahau tayamopafina tusiya huno tahau-mainesigeta tagaya ma mopafina maineta Yisasima hu-mainea kava huta maisuna yafe Anumaya Kotia kaiyekema humatesia yupa kolia huta lagayea ohugahune.
1JO 4:18 Anumaya Kotia hau ayamopafima nehaiya veamoya kolia nohaya yafe Anumaya Kotia hau ayamopafina tusiya huno nehaiya yamoa koli hisaya amakesa ago anati-talene. Kefo kavama nehuna yafe anonaa havi yana aligahune. huya amakesa nehavigeno kolia hu yana falote nehigi kolima nehaya veamoya Anumaya Kotima amakaifema tusiya huno hau ayamopafima nehaiya yamoa amakaipina tokiyaage huno ala ohune.
1JO 4:19 Anumaya Kotia hagoteno tagaifena hau ayamopafi hau-mainea yafe tagaya nelafu-gamifeene Anumaya Kotifeene tahau tayamopafina lahaisie.
1JO 4:20 Nagoa veamoya Anumaya Kotifena Tahau tayamopafima nelahaiye. huteya Yisasina amakuama aminaya aganaamo-gamifema amaipa kafama he neamatesayana havigeage veane mainae. Age-mainaya anagaamo-gamifema ohamaisiana ania huya Anumaya Kotina, oagenaya kanomofena, hamau amayamopafina nohamaiye.
1JO 4:21 Anumaya Kotia kahegi malenea kema taminea kemoa mage huno humaine Anumaya Kotifema hamau amayamopafima nehamaiya veamoya ania huya Yisasina amakuama aminaya veamogamina hamau amayamopafina hamaisie. huno humaine.
1JO 5:1 Mukia veamoya Yisasife Anumaya Kotima taugafa aligatigahe hutenea kanoa, Kalaisi maine. huyama haviya amakupi maleya amametitima hayana Anumaya Kotina nafaneyagaa mainae. Maineya Nelamafaa, Anumaya Kotifena, amahau amayamopafima hamaisigeya ania huyama Anumaya Kotina nafaneyagaahena hamaugahie.
1JO 5:2 Tagaya Anumaya Kotifema tahau tayamopafima tahaisigeta agai kema akave malesunana agai nafaneyagahe tahau tayamopafina nelahaiye huta havigahune.
1JO 5:3 Tagayama Anumaya Kotife tamagelafa huno lahaisiana agai kea akave malegahune. Agai kemoa kana ohuneanagita Anumaya Kotima latenea nafaneyagaa maineta ma mopale kefo kavala ago agase-mainone. Agaifema tagupi maleta tametitima hu-mainonana ma mopale kefo kavala ago ataleta agase-mainone.
1JO 5:5 Hana veamoya ma mopale kefo kavala ago ataleya agase-mainae? Yisasia Anumaya Kotina nafaneama maine. huya amakupi maleya amametitima hu-mainaya veamoya ma mopale kefo kavala neataleya ago agase-mainae.
1JO 5:6 Yisasi Kalaisia egeno tina faletetegeno fali-mainea kolamaamoa lavi-mainea yateti Anumaya Kotia tagu tamena aligatigahe hutegeno emainea kano maine. Ani kanoma emainea yafe titetikela lave-otinegi agaia kolamaaletiene taveligeta age-mainone. Anumaya Kotina Alu Aotake Avamuamoa kelamage kemona aepaa mainea yafe ania huno tave-nelie.
1JO 5:7 Yisasia Anumaya Kotima taugafa aligatigahema hutegeno emainea kanohena tagufa (3) yamo tahanepaiye, Anumaya Kotina Alu Aotake Avamuamoene timoene kolamaamoene tahanepaiya nagoke kate tahanepaiye.
1JO 5:9 Nehageta tagaya veamoyama hu falote haya kea nehavunanagi Anumaya Kotima hu-mainea kea Yisasia nagaini nafane maine. huno hu falote hunoma humainea kea veamogami kemona amakaseno ala humainea kegita havisune.
1JO 5:10 Anumaya Koti nafanehema haviyama amakupi maleya amametitima nehaya veamoya Yisasifena amakupi ago havimainagi Anumaya Kotifema haviya amakupi omaleya amametitima nohaya veanea Anumaya Kotia Yisasifema nagaini nafane maine. huno hu-mainea kema nohaviya yafe Anumaya Kotifena Havigeage kano maine. huya nehae.
1JO 5:11 Anumaya Kotia mage huno humaine Agola maige maige hisaya tamahaimula ago tamaminoe. hunoma hiana agola maige maige hisuna tahaimumona aepaa agaia nafane maine.
1JO 5:12 Nagoa veamoya Anumaya Kotina nafanehema Nagupi emaiyo. huyama hisayana agolama maige maige hisaya hamaimula ago ali-mainagi Anumaya Kotina nafaneamofema Nagupi emaiyo. huyama nohaya veamogamina Yisasia amakupina omainegeya agolama maige maige hisaya hamaimula oalinae.
1JO 5:13 Agola maige maige hisuna tahaimula ago ali-mainone hutama havilama hisaya yafe tamakaya Anumaya Koti nafanehe havitama tamakupi maletama tamametitima haya veamogatami mani avona kaena tamahanepauve.
1JO 5:14 Tagaya Anumaya Kotitegama nelahaisia yafema havigesunana havigahie. Havigahie huta havimainona yafe agaifena kolia ohuta agaite eupa huta havinegone.
1JO 5:15 Mukia yafema havigesunana havigahie. huta havilama hu-mainona yafe Havigesuna yana lamigahie. huta havimainone.
1JO 5:16 Nagola kefo kavala falisia augafa kefo kava haneanagi nago kanoa ania augafa kefo kavama hiseana ani kanomofe Anumaya Kotitega ke hutama havigeho huna nohugi nago negafuma agesanageno kefo kavama mainoma nehisia kanomofena Anumayamotega havigesanageno agola maige maige hisia haimula amigahie.
1JO 5:17 Mukia kefo kavala kefo yamaage hanegi kefo kavafema amakua aiyahaema hisayana ofaligahae.
1JO 5:18 Tagaya ago havimainone Anumaya Kotima atenea kanomoa kefo kavala maino huge huge nohie. Yisasie, Anumaya Kotima atenea nafanemoa, auvai neamatea yafe Satania melino haviya humategahena mematafa ohugahie.
1JO 5:19 Anumaya Koti nafaneyaga mainonagi mukia veanemoya Satani tokiyale aiyafinaga nemaiya yafe tagaya ago havimainone.
1JO 5:20 Yisasi Kalaisia, Anumaya Koti nafanemoa, eaamo aepaa agelama hisuna tagu tagesa ago tamineafe tamage Anumaya Kotina agelama nehuta agaiene nafaneamoene ailokaeta mainone. Ani kanoa tamage Anumaya Koti maineno agola maige maige hisuna tahaimumona aepaa maine.
1JO 5:21 Mainegi osi nafaneyaganimogatama kava yagaitama afaa Anumayamofena tamakesa havitama tamakua oamiho. Kaiyekenia male me hano hie. Nagainia nagia Yoninae.
2JO 1:1 Nagaya Yoninae Yisasina amakua aminaya vayate kava vayatamamonae mani avona kaogi haviho. Anumaya Kotima hapalino huyogi-katenea amogae kagaifeene nafaneyagakamofeene* kaena nelamamue. Tamage huna nagaya tamakaifena nahau nayamopafi nenahaiye. Nagainigela nonahaigi mukia veamoya Anumaya Kotia kelamage kema humainea kema havilinaya veamoya ania huya tamakaifena amahau amayamopafi nehamaiye.
2JO 1:2 Anumaya Kotina kelamage keamoa tagupi haneme uno agola hanesia yafe tagaya tamakaifena tahau tayamopafina nelahaiye.
2JO 1:3 Tamageage veane mainonafe nelafu-gamifena tahau tayamopafi tahaisigeno Anumaya Kotia, Nelafaene nafaneamoa Yisasi Kalaisiene kayone hu yamaaene kalagi aimate yamaaene taipa falu hisia yaene lamisae.
2JO 1:4 Nagaya nagoa nafaneyagaka-moya* Nelafama tagaifena Mani kema akave maleho. huno hu-mainea kate maleya Anumaya Kotina kelamage keama akave nemalaya yafe havitena tusia muse nehue.
2JO 1:5 Musekaa nehugi amogae menia mukia Yisasi kema nehaviya nelamafu-gamifema tamahau tamayamopafina tamahaisie. Nagaya ohavinana kea kahanopaugi nayoma havimainona ke kahanepauve.
2JO 1:6 Anumaya Kotifema tahau tayamopafima nelahaisiana agai kea akave malegahune. Nayoma havimainaya kemoa mage humaine Nelafu-gamifema tamahau tamayamopafima tamahaisia yana akave maleho. huno humaine.
2JO 1:7 Nesuya veamoya aye lamavataga huya havige nehuya ma mopafina vaiyatete huya havigea mage huya nehae Yisasi Kalaisia ma mopafina vea eno omaine. huya nehae. Mani kema hisaya veamoya havigelafa aye lamavataga hisaya vaya maineya Yisasina kame vayaa mainae.
2JO 1:8 Tamakaya aliyama alitetama ali-mainaya yana ataleyafenagi yagaitama tokiya hiho. Ania hisayana mukiamogatama anonaatamia kanale yatamia aligahae.
2JO 1:9 Nagoa veamoyama Yisasi kema atafa huya tokiya ovaiya haleyama alu kefima vayana Anumaya Kotina oavalenagi Yisasi kema atafa huyama tokiya vai-linaya veamoya Yisasiagi Nefaganiene ani veaene nemaie.
2JO 1:10 Nago kanomoma tamakaitema evayi hunoma mani Yisasi kema oalino alu ke alu kema alino esigetama tamakaya hu falu fala hu oatetama avaletama notamifina oateho.
2JO 1:11 Hu faluma hutesaya veamoya ani kanomona havi aliyamaa aya nehae.
2JO 1:12 Nagaya kasagoya ke kaegahe huanagi Afaa ani kemoa avopina okaesue. Afaa tamakaila mo lamakesugetama kea kea nehuta musekase hugahune. huna nehue.
2JO 1:13 Nunakamona Anumaya Kotia hapalino agaialega atenea amoene nafaneyagaaene* tamakaifena Felugae. huya hu falu fala hu nelamatae. Kenia male hano hie. Nagaini nagia Yoninae.
3JO 1:1 Nagaya Yoninae Yisasina amakuama aminaya veate kava vayatamamonae Kaiyusiga nafunaganagae tamagelafa huna kagaifena nahau nayamopafi nenahaiye huna mani avona negaove.
3JO 1:2 Nahau-mainea nafunaganaga kagaila kagu kamemoa kanaleya huno nemaiya kava huka mukia kaugafaene aliyama alisana yamoene kanaleya hisie huna nunamuna nehue.
3JO 1:3 Nagoa tafutaganaya kagayama Anumaya Kotina kelamage keama akave malekama kama vaiyana yafena Tamage huno fatago huno vai neaye. huya me nahapaigena havitena tusiya huna musekasena hu negatoe.
3JO 1:4 Nafaneyaganimoya fatago huya vai yesayana tusia musekase nehuanagi mani musema hua yamona nagola alu muse yama nehua yamona oagasene.
3JO 1:5 Nenahaiya nafunaga kanale kava nehuka katega oagenana kafukagana-gamina neageka amayama hu-mainana kavala kanale kava hu-mainane.
3JO 1:6 Nagoama amaya hu-mainana veamoya eteya mono nopi hetiya kagayama amakaima kayone humatenana kavafena me lahapaigeta haviteta tusia musekaa hugi menia Anumaya Kotina haisia kava huka katema visaya veala amaya huo.
3JO 1:7 Amakaya Yisasi kea hamapaigahe ayanagi Yisasi kema ohavinaya vayapitila nagola monema oalinaya yafena tagaya aniama hu-mainaya vaya amaya hinuta amakaiene tokaeta Anumaya Kotina kelamage kea ali lokaeta hamapai-mainone.
3JO 1:9 Nagaya nago kea ago kaena mono nopi vayate ago atalogeno umaineanagi nago kanoa Tiotalefesia uhagoteno maisia yafe nehaigeno Yonini kea ohavine.
3JO 1:10 Ohavianagina nagaya tamakaitega visuaamona ani kavama hia kavala mono nopima mainaya vaya mo hamapaigahue. Nagaifena havige huno Havi kava nehie. huno nehuno ani kavaagela nohigi tafuta-ganayama neayana amavaleno falu fala hu oamateno amatalegeya nagoa veamoya amavaleyama falu fala humategahema nehayana Ania ohiho. huno nehuno mono nopitila amavayu hu neamataleno nehie.
3JO 1:11 Nenahaiya nafuna-ganaga kefo kavala akave omalo. Kanalema humainesia kavaage akave malo. Kanale kavaage huge hugema nehaya veamoya Anumaya Kotina nafanea mainagi kefo kavaage huge hugema nehaya veamoya Anumaya Kotina oagenae.
3JO 1:12 Mukia veamoya Temitaliusifena Kanale kano maine. huya hageno Anumaya Koti kelamage kemoa Kanale kava nehie. huno higena nagaienena Kanale kava nehie. huna nehue. Kagaya nagayama kelamage keage kanoma mainoa yafena ago havimainane.
3JO 1:13 Nagaya kasagoya kea kaegahe huanagi ani kea nagoke omanafina okaegahue. Kagaila aupa kanafi mo kagesugetaa kea kea hugahue.
3JO 1:15 Kaipamoa falu huno maisie. Male mainaya kafuka-ganaya kagaifena Felugae. huya hu falu fala hu negatagena nagaya nalegama mainaya nafunagana-gamina ania huna Felugae. huna hu neamatogi amahaote amahaote amaki ayeka hamapaiyo. Kenia male hano hie. Nagaini nagia Yoninae.
JUD 1:1 Nagaya Yutinae Yisasi Kalaisi aliya kanomona Yemesina aganaamona mani avona kaena nelamamue. Tamakaya Anumaya Koti kema havitama agaitegama nevaya veamogatama Anumaya Koti, Nelafaa agua tamakaila nelamamigeno Yisasi Kalaisia kava hu nelamatea veamogatamale mani avona kaena nelamamue.
JUD 1:2 Anumayamoa kalagi ainelamatea yaene tamaipa falu hutama maisaya yaene nagoamogamifema tamaipa amamisaya yaene tamakaipi ala hisia yafe aluya huno nenahaiye.
JUD 1:3 Nenahaiya nafunagana-gatama Anumaya Kotia tamakaiene tagaiene tagu tamema ali negatia yafena mani avona kaena tamamisue huanagi nago yamoa falote higeno Anumaya Kotia alu nagesa namigena mage nehue. Yisasima hu-latenea yafena mukia kea ago tahapaigeta havimainona kanale mono kehena nagoa veamoya Ohaviho. huya nehagena ani kema hisaya vayaene Ke nevaitama maiho. huna mani avona negaove.
JUD 1:4 Nagoa Yisasi kema nohaviya vayamoya kesi ako huya tagaipima emaiya vayamoya mage huya hae Anumaya Kotia kayone hu-lateno kefo yatia aye hamigahigi afaa molia hu-liteta higetao. huya nehayanagi Anumayatimoa agaiage kava kanotia mainegeya Yisasi Kalaisina amakavenona hu neatae. Hu neatayanagino Anumaya Kotia kaiyekema humateteno kefo yamo anonaamima amamisia yafena nayona agaia avopina ago kae-maleneanagita havimainone.
JUD 1:5 Nayona ago tamahapaigetama ago havilinaya keagi menia huna lamakesa hao hisue huna nehue. Anumaya Kotia Isipi vea mopaleti mukia Isaleli veala hamamaeno amaugafa aligati-maineanagi haenaga Anumayamoa humatenea yafema haviya amakupi omalaya veala Anumaya Kotia hamaegeya fali-mainae.
JUD 1:6 Nagi Anumaya Kotia ensole vayafena Kava hiho. huno aliyana amamianagi ani aliyatela mailama huya omaigeno amatenea yapitila ataleya vageno Anumayamoa amavaleno seni nofiteti agola kimatafa hu-mategeya afepinaga haniki-mainea kumate maineya Anumaya Kotia tusiya huno kaiyekema humatesia yafena agava mainae.
JUD 1:7 Nagi Sotomu kumaene Komola kumaene aupatema hanea kumateene mainaya veamoya ani kava huya kumai kavala nehuya vemoya ve amafaluyaenena moli hu-liteya hu-liteya huya maiya hageno Anumaya Kotia kefo yamo anonaamia neamamino asua ohuno tegelege nehia atafi amatalegeno ani atamoa amaugafa tege sagalige nehigeya anifi agola mainayanagita ani yafena tagesa havi havi huta havisune.
JUD 1:8 Nehavita Yisasi kehena havigema nehaya vayala tagaiene maineya ani kavakeya nehageno himonama agaya yamoa amavaleno anegi-nagi yapi amategeya kumai yate nehuya kava vayamogami kea ohaviya ensole vayamo-gamifena hu-haviya hu neamatae.
JUD 1:9 Hu neamatayanagi Mosesema faligenoa hagote ensole kanomo agia Maikoloa Satanienena Mosesema falia augafaaletila Ta alisie. Ta alisie. huana kea vaianagi Maikoloa Satanina hu-haviya hute kea ohunegi Anumayamoa agaia kea kama-kisie. huno hu-maineane.
JUD 1:10 Naa hu-maineanagi Yisasi kehena havigegeyama nehaya vayamoya ani kavala nohagi amakesamoa havilama ohunea yamofena hu-haviya hu neamatae. Afu kalamoya amaku amakesa nohaviya avamete kava nehageno ani kavama haya yamo amaugafamona ali haviya hu-matene.
JUD 1:11 Avonio amaugafama alino haviya humatesia yafena kayeya maisae. Kenia havi kavama huno aganaamona Epolona haegeno fali-mainea kava huya tamakaienema nemaiya vayamoya ani kava maiya nehuya hilato ohunea katela nevae. Nevagi nago kanomo agia Palamue mone alisia yafe havigea maino nehianagiya ani vayamoya ani augafa kava huya mone alisaya yafe havigegeyana maiya nehae. Nehageno nago kanomo agia Kolae Anumayamona veganokano hutegeno Anumayamoa fali hano hutenea yafena nohaviyanagiya ani vayamoya ani kavakeya maiya nehuya Anumaya Koti kemona amakavenona hu neatayafe Anumayamoa Faliho. huno hinageya fali hano hugahae.
JUD 1:12 Tamakaya Yisasina tamakuama aminaya veamogatama agaife nehavitama kave negahema melitalu nehayana ani kefo vayamoya emaineya osagopu vayalagiya amakaiamihekeya amakesa havi havi huya neneya tamakaye hisifa kava huya ani kavema naya kavela ali haviya nehae. Naa vayamoya siamoma aye hani huteno kola oaino laga hulino ute ete higeno afa koma titalea kava higeya ani vayala afa ya kana vaya mainae. Yosamoa alagama ayesia kanamoa falote hianagi alagama noayea yosamoma hia avamete huya mainageno amakaipina nagola kanale yana falote ohune. Avinamoa omalegeya hafuyaene tagasi huya vakai-talageno fayote-mainea yosa kana huya maineya kanale kema tamaya hisaya kea omalegeya havi kavala maiya nehae.
JUD 1:13 Nehageno kefo yama nehaya yamoa timoma tusiya huno hogiteno ti valufama alino ti agegayalega mo talia kava huno kefo yaamimoa ania augafa kava hu-mainegeta neamakone. Kanefimoma ikatela alu katete katetema ute ete nehia avamete huya havige huya mainagi kanaleya huno fatago humainea kana tamave-notiye. Tamave-notigeno Anumaya Kotia kumayu haniki-mainea kumala afepinaga hanea kumate maisaya yafe kumaamia ago talo tala humateneanagiya agola anifinaga maigahae.
JUD 1:14 Maigahagi ani vayafena Atamupiti avinama huya maime emainaya vayapitila Inokue Atamupitila seveni (7) molia aginagomoagino falote huno mainea kanomoa anima kefo yama nehaya vayafena Anumaya Koti aune kea hamapaino mage huno hu-maineane Mama hisua kea haviho. Anumayamoa kasagoya tausenia ensole vayaaene elavino egahie.
JUD 1:15 Esiana mukia veanea kaiyekea humateteno agai kema neatagaeya kefo yama maiya nehaya veanene Anumaya Kotina kamugema hatageya vaiteya hu-haviya hu neataya veamogamina Anumaya Kotia tusia kefo yamo anonaamia amamigahie. huno hu-maineane.
JUD 1:16 Anima Anumayamo kehena havigegeyama nehaya vayamoya mukia yafe Otahaiya yane. huya kalu kalu kea nevaigeno amaipamoa haviya nehigeya amakaiami amaugafa age hamaye nehaya yaamihena maiya huge huge nehuya ala kenake nehuya amakaiami amakia alisaga nehuya tamakaiteti nagoa yama alisaya yafena tamakaifena Tahaiya veane mainae. huya tamaipafi ayegegahe nehae.
JUD 1:17 Tamakaya nahau nayamopafi nenahaiya veamogatama Aposolo vayamoya haenagama falote hisia yafema tamahapai-mainaya kehena tamakesamoa hao hinagetama haviho.
JUD 1:18 Mage huya tamahapai-mainayane Anumayamo esia kanamoa ago aupa nehisigeya nagoa veamoya Yisasima hulatenea yafe huya kigi huteteya amakaiamia amaugafamo age haye nehia kavakeya huya maigahae. huya hu-mainayane.
JUD 1:19 Hu-mainayanagi anima Yisasi kehena havigegeyama nehaya vayamoya Yisasina amakuama aminaya veamogamina ali-pasema-talageya mopafi yafekeya amakesa nehavigeno Alu Aotage Avamumoa amakaienena nomaiye.
JUD 1:20 Naa huya mainagi tamakaya nahau nayamopafi nenahaiya nafunagana-gatama naa kavala ohutama Yisasima hulatenea yafe tusiya huno alu aotage ke hanegi tamakupima malenaya kea atafa hutama tokiyaage higeno Alu Aotage Avamumoa tokiya tamamisigetama Anumayamotega kea hutama havigeho.
JUD 1:21 Anumaya Kotia tamakaifema huno aguama lamaminea yapi mainetama Anumayati Yisasi Kalaisia tamakaifema kalagima ainelamatea yafena kanaleya hutama agola maige maige hisaya tahaimu tamamisia yafena tamametitia hutama agava maiho.
JUD 1:22 Mainetama Yisasifema tole amakesa nehaviya veala tamahau humatetama alitama kanale humateho.
JUD 1:23 Ani veamoya nomoa atama nelea yapi mainaya veane kana huya havi kate uyafenagi ani veala amavayu hutama amaugafa aligatiho. Aligatitama nagoa vayamoya kefo yama nehaya kavafena Otahaiya kavale. hutama koli hutama kayetama mainetama tamahauna humateho.
JUD 1:24 Havigu kefo yapi asaga hu-lavi yafenagi Anumaya Kotia agaia tamau vaino tamavalesaga huno tamanu kisia kano maineanagitama asaga hu otavitama kefo yatamia omale veane mainesageno tusia muse huno tamavalesaga huno agaia tokiyaage hale yapina Anumaya Koti mainesilega tamategahie.
JUD 1:25 Anumaya Kotia agaiage tusia tokiyaa hanea Anumayati maineanagino Yisasi Kalaisi Anumayatimoa hulatenea yafe Anumaya Kotia tagu tamena ago aligati-maine. Naama hulatenea yafena tusiya huta tokiyaage hale yamaaene agia alisaga hisune. Agaya hagote ala kava kano maineanagino mukia yana kava yagaisia tokiyaa hanegeno yagaino maine. Agaya ehema ma mopama talo ohunea kanafina aepa heno ania hume hume eaamo menienena ani yakeya huno maine. Haenagaama maisuna kanaene menima mainona kanaene kava yagaimainea yana oataleno ani ya atafa hu-ligahianagiya mukia veamoya havilama huteya agia alisaga hisae. Mani kea tamage. Kenia male hano hie. Nagaini nagia Yutinae.
REV 1:1 Nagaya Yoniꞌnae Yisasi Kalaisiꞌa naveligeꞌna ageteꞌna mani kea kaeꞌna tamahapaigahe nehue. Nayona mani kemoꞌa fala-kino haneanagino Anumaya Kotiꞌa ani kanamoꞌa aupaꞌa falote hisia yana Yisasi Kalaisina agaiꞌa aliꞌya veaꞌne amave-lisiafene huno Yonina ave-ligeno kae-malene. Yisasiꞌa ensole kanoꞌa hutegeno nagaya agai aliꞌyama neꞌalua kanoa, Yoninile, eaꞌamo mani yaꞌyaga me naveli-maine.
REV 1:2 Me naveligeꞌna age-mainoa yafeꞌene Anumaya Koti kene Yisasi Kalaisi humainea kene aliꞌna tamage huꞌna tamahanepauve.
REV 1:3 Ma avopima kae-maloa kea ago aupaꞌa falote hisia yafe aune laga huno humainea kema hapaliꞌya havisaya veaꞌnene haviteꞌya akaveꞌma malesaya veaꞌnene tusiꞌa muse hugahae.
REV 1:4 Nagaya Yoniꞌnae Esia kotega seveniꞌa (7) mono noma hanea veaꞌmogatamale mani avona kaeꞌna nelamamue. Anumaya Kotiꞌa nayona maineanagino menienena maineanagino haenagaꞌa maisia kanogino agaiꞌa kava yagai-mainea siamo aulega seveniꞌa (7) Avamuꞌmoꞌya hetiꞌya mainayanagiꞌya kayone hisaya yaꞌamiene tamaipa falu hisia yaꞌamiene tamamisae.
REV 1:5 Tamamisageno Yisasi Kalaisiꞌa fatago huno Anumaya Koti kema hamapai-mainea kanomoꞌa fali-mainaya veapitila uhagote-lateno heti-maineanagino mukiꞌa veaꞌnema fali-mainesafiti hetisaya katia valilatene. Mukiꞌa mopafima mainaya sauve vayaꞌmogamina sauveꞌamimoꞌa agaiꞌage maineanagino kayone hisia yamaꞌaene tamaipamo falu hisia yamaꞌaene tamamisie. Tagaifena hau ayamopafi haigeno agaiꞌa kolamaꞌa ailaki-talenea yateti mukiꞌa kefo yatimoꞌa aigagilateneanagino agola ali kalu hetalene.
REV 1:6 He-taleneanagino Anumaya Kotiꞌa kava yagailatesia yapi tavaleno tategeta mainonanagita tagayama Nelafa Anumaya Koti aliꞌyama neꞌalita agima alisaga huta musema hutesunafene huno hulatene. Hulateneanagita mukiꞌa kanafina agai agia alisaga hisunageno tokiyaꞌage hale yamaꞌamoꞌa agola hanege hanege huno hanesie. Tamage.
REV 1:7 Ageho Yisasiꞌa siate maiteno egahigi mukiꞌa amakaveꞌnoma huteteꞌya augafafima kevema aye-mainaya veaꞌnene mukiꞌa ma mopafima mainaya veaꞌmoꞌyaene ageteꞌya tusiya huꞌya hamau huteꞌya avi tegahae. E, ani yana tamage huno falote hugahie. Tamage.
REV 1:8 Ala Anumaya Kotiꞌa mage huno humaine “Nagaya nagaiꞌniꞌa mukiꞌa tokiyamona aepaꞌa mainoanagiꞌna mukiꞌa yatela kava yagai-mainoafe alivayayesua kanoa tamage huꞌna mainoe. Nayo kanafina mainoanagiꞌna menia mainoanagiꞌna haenagaꞌa maigahue. Tusiꞌa tokiyaꞌnia hanea kava kano mainoe.” huno hu-maineane.
REV 1:9 Nagaya Yoniꞌnae neputamimoꞌna tamakaiꞌenena Yisasiꞌene ailokaeta mainona yafe tusiꞌa kana yaꞌene tagata aiya yaꞌene falote hianagi Anumaya Kotiꞌa kava yagailategeta mailava huta tokiyaꞌage huta mainone. Nagaya Anumaya Koti kene Yisasiꞌa tagaiꞌma hulatenea mono kene huhaleꞌna hua yateti navaleꞌya Patimosia ti amuꞌnopi hanea kumate kina hunatageꞌna mainoe.
REV 1:10 Mainogi nago Sotaꞌyupa Alu Aotage Avamuꞌmoꞌa tokiyaꞌage huno natafa higeꞌna nehavugeno nakavelagati nagola ala kegefamoꞌa ufema nehaya avamete huno agea aigeꞌna havimainoe.
REV 1:11 Ani kemoꞌa mage huno humaine “Mukiꞌa yama agesana yana avopi kaeteka atalegeno seveniꞌa (7) kumate hanea mono note veatega vino. Efesusiene Simenaene Pegamumuene Taiyatailaene Satisiene Filatelefiene Leotisiaꞌene vino.” huno humaine.
REV 1:12 Higeꞌna kema nahapaiya kanoma agesuafene huꞌna maiyahae huꞌna agoana seveniꞌa (7) lamua kanileta yafateti talo humale lamua hanegeꞌna age-mainoe.
REV 1:13 Agoa lamuyagamo amuꞌnopina nago kanoa, ikapinagati emainea kanoa vayaꞌmo atenea nafaꞌnemo augafa kana kanoa hetino mainegeno ayaꞌaya kenamoꞌa aiyalega vai-talegeno tavigeno kanileta yafateti talo humale amuꞌnofila aigagino haifiꞌyafale hu-malenegeꞌna agoe.
REV 1:14 Agogeno ayolagefamoꞌa efeꞌage huno sipi sipimo ayolagefaleti talo humale nofi kana huteno efeꞌage sia kana nehigeno aulagamoꞌa ata nefemoꞌma hia avamete humaine.
REV 1:15 Higeno aiyamoꞌa nagola atafima kae-malageno teno tokiyaꞌage huno hale yamaꞌaene kanileta yafa kana nehigeno agema aiya agemoꞌa paugegefa nehigeno ala timo agemoꞌma neꞌaiya avamete kava huno aimaine.
REV 1:16 Ayapina seveniꞌa (7) kaꞌnefi atafa hu-linegeno avayafitila tole kaiyaga aveꞌneꞌne naepe kaꞌyona anikofi-linegeno augosamoꞌa yagemoꞌma hia kava huno aigalu galu huno aivasa humaine.
REV 1:17 Aigalu galu higeꞌna neꞌageꞌna fali-mainea vaya kana huꞌna aiyafi nagoꞌya aye-mainogeno tamaga ayana naugafale maleno mage huno hie “Kolia ohuo nagaya mukiꞌa tokiyamona aepaꞌa mainoanagiꞌna nagaya uhagoteꞌna maiteꞌna haenagalafana maiteꞌna huꞌna mainoa kano mainoe.
REV 1:18 Nagaya nahaimuꞌene kano mainoe. Nayona ago fali-mainoanagi ago hetiꞌna haegafa huꞌna agola mukiꞌa kanafina maige maige huꞌna mainoanagiꞌna veaꞌma nefalia yaꞌene fali-mainaya veaꞌmoꞌya mainaya kumate ki nofitela ali-lineꞌna ani yapitiꞌma amavaleꞌna amatalesua himamuꞌnia hane.
REV 1:19 Haneafe kagaya menima falote higeka agana yaꞌene haenagama falote hisia yaꞌenena avopi kae-malo.
REV 1:20 Seveniꞌa (7) kaꞌnefiꞌene seveniꞌa (7) kanileta yafateti talo humalenaya lamuenena tamaga nayapima hanegeka agana yamoꞌa falaki-mainea yamo aepaꞌa kahapaigahue. Seveniꞌa (7) kaꞌnefiꞌmoꞌa maꞌa humaine seveniꞌa (7) kumateꞌma Yisasife haviꞌya melitalu nehaya veate kava vayafe* humaine. Seveniꞌa (7) lamumoꞌa ani seveniꞌa (7) mono noꞌyagafi Yisasife haviꞌya melitalu nehaya veafe humaine.”
REV 2:1 Efesusi mono note mainaya veate kava kanohena* mage huka kao nagaya tamaga nayapina seveniꞌa (7) kaꞌnefi atafa hulineꞌna seveniꞌa (7) kanileta yafateti talo humalenaya lamumo amuꞌnopi ute ete nehua kanomoꞌna mani kea tamahanepauve.
REV 2:2 Nagaya tamakai auꞌava yatamia ago age-mainoe. Tusiꞌa kasageke-voke hutama aliꞌyama neꞌaliya yafeꞌene mailava hutama tokiyaꞌageꞌma hutama nemaiya yaꞌenena ago age-mainoe. Kefo yama nehaya veafena “Havigegeꞌyama nehaya yamo otahaiya vayala mainayanagita tamakai kea ohavigahune.” hutama nehae. Nehageꞌya ani vayaꞌmoꞌya havige huꞌya “Tagayaenena Aposolo vaya mainone.” huꞌya nehayanagi tamakaya keꞌamia ago havitama fako hutama haviyana “Havigegeꞌya maiꞌya nehaya vaya mainae.” hutama nehae.
REV 2:3 Tamakaya nagai nagima alilinageꞌya ali haviyama hulamatayanagi kasalola otamahaenegi lokiya vaitama mainaya yafena ago tamake-mainoe.
REV 2:4 Naꞌa nehayanagi nagoꞌa kavala havi kava nehae. Hagotetama nagai kea havitama lamakupi maletama tamakuꞌa kanaleꞌya hutama namitetamagi menia ani yana ago neꞌataletama ali hataga huligeno osi nehie.
REV 2:5 Nayoma tamahau tamayamopafi tamahau-mainea yafena tamakesa havi havi hiho. Menia ago neꞌataletama asaga hulavi-mainagi tamakuꞌa aiyahae hutama nagoꞌene eheꞌma humainaya kavala etetama hiho. Tamakuꞌama aiyahae ohisageꞌna nagaya esuaꞌamoꞌna lamutamia meliꞌna atalegahue.
REV 2:6 Atalegahugi tamakaya nagola kanale auꞌava yana ago hageꞌna age-mainoe. Tamakaya Nikolasi mono kema nehaviꞌya amaugafa age hamaꞌyema nehaya yafena tusiꞌa lamaipa kafa he neꞌamatae. Nagayaenena aniꞌama nehaya kavaꞌamihena naipa kafa he neꞌamatoe.
REV 2:7 Nagi tamakesama hanesimogatama Avamuꞌmoꞌma Yisasi kema haviya melitaluma nehaya veaꞌmogamifema hia kea haviho. “Nagoꞌa veaꞌmoꞌya Sataniꞌene tuma huꞌya agasesayana Anumayamo kumate ikapinaga hanea yosa, agola maige maige hisaya hamaimu amamisia yosamo alaga ‘Neho.’ huꞌna amamisugeꞌya negahae.” huno humaine.
REV 2:8 Simena mono note mainaya veate kava kanohena* mage huka kao nagaya uhagoteꞌna maiteꞌna haenagalafana mainoe. Fali-mainofitila ago eteꞌna hetiꞌna mainoe.
REV 2:9 Tamakaya kana yapi mainetama mukiꞌa yatamia omale veaꞌne mainayanagi Anumaya Kotiꞌa kanale yana ago tamamigeꞌna nagaya ago age-mainoe. Nagoꞌa veaꞌmoꞌya “Tagaya Yuta veaꞌne mainone.” huꞌya nehayanagi Yuta veaꞌnea omainagi Satani anaga maineꞌya huhaviya hu-lamataya yana nagaya ago age-mainoe.
REV 2:10 Tamakata aisia yana aligahayanagi kolia ohiho. Haviho Sataniꞌa aye lamavataga hisigeꞌya nagoꞌa veaꞌmogatamina nofila hulamategahae. Teniꞌa (10) kanafi* ani kana yaꞌene tamakata aisia yaꞌenena aligahayanagi havitama lamakupi malenaya yana atafa hu-linetama falisageꞌna ani yateti kanale miyana anonatamia maige maige hisaya tamahaimula tamamigahue.
REV 2:11 Nagi tamakesama hanesimogatama Avamuꞌmoꞌma mono note mainaya veaꞌmogamifema hia kea haviho. “Sataniꞌenema tuma hutama agasesaya veaꞌmogatama tole yupama etetama falisaya yamoꞌa, hani yapima tegelege nehia atafina visaya yamoꞌa, ali haviya hu otamategahie huꞌna nehue.”
REV 2:12 Ma kemoꞌa Pegamumu mono note mainaya veate kava kanohena mage huka kao tole kaiyaga aveꞌneꞌne nehia naepe kaꞌyona alilinoa kanomoꞌna mage huꞌna nehue.
REV 2:13 Tamakaya Sataniꞌma mainea siamo hanea kumate mainageꞌna ago tamake-mainoe. Ani kumate mainayanagi nagai nagia atafa hulitama tokiyaꞌage hulinageno nago kanoa, Atipasiꞌa, tamakaiꞌene maineanagino kolia ohunegi mukiꞌa kanafina efi efi huno Yisasi kea huhaleno nehigeꞌya atafa huꞌya ani kumate hayageno fali-maineanagi ani kanafiꞌenena tamakaya nagia atafa hulinetama nagaifena havitama tamakupi malenaya yana oꞌatalenae.
REV 2:14 Oꞌatalenagi nagoꞌa kefo yana nehageno naipamoꞌa haviyana nehie. Tamakai amuꞌnopina nagoꞌa veaꞌmoꞌya Palamuꞌma humainea kea atafa huꞌya akave nemalae. Nayona Palamuꞌa Isaleli veaꞌmoꞌya asaga hu lavisae huno Palakina mage huno hapai-maine “Mage huka hamapaiyo ‘Amayateti talo humalenaya afa yafe ‘Anumayati maine.’ hutama amiya kavela nenetama kumai kavala hiho.’ huka amaipa ayesana kea hamapaiyo.” huno humaineane.
REV 2:15 Naꞌa hianagi tamakaipitila nagoꞌamoꞌya Nikolasiꞌma hia mono kemona akave nemalae. Ani kemoꞌa Palamuꞌma hia avamete humainea ke.
REV 2:16 Ani kefo yafena tamakuꞌa aiyahae hutama nagoꞌene ohisaya tamakesa haviho. Aiyahae ohisageꞌna nagaya osi kana kanoꞌa maiteꞌna tamakaitela esuaꞌamoꞌna navayafima hanea aveꞌneꞌne naepe kaꞌyoteti amakaiꞌenena tua hugahue.
REV 2:17 Nagi tamakesama hanesimogatama Avamuꞌmoꞌa mono noteꞌma neꞌvaya veaꞌmogamifema hia kea haviho. Sataniꞌenema tuma huꞌya agase-mainesaya veaꞌmogamina falakino hanea kavela, manae huꞌya nehaya kavela neꞌamamiꞌna nagola efeꞌage yafatela hamaote hamaote haegafa amakima kae-malenoa yafana amamisugeꞌya nagoꞌa veaꞌmoꞌya ani amakiyaga oꞌagegahagi agaiꞌa yafama alisimoꞌa agaiꞌage agegahie.
REV 2:18 Taiyataila maineꞌya mono noteꞌma neꞌvaya veate kava kanohena* mage huka kao nagaya Anumaya Koti nafaꞌnemonia naulagamoꞌa ata nefeꞌmo hia kava humainegeno naiyamoꞌa haesa yafamo vagaꞌyo vagaꞌyo hia kava humainegeꞌna tokiyaꞌage huꞌna heti-mainoa kanomoꞌna mani kea nehugi kao.
REV 2:19 Nagaya tamakai auꞌava yatamia ago age-mainoe. Nagaifena tamahau tamayamopafi nelamahaigetama havitama tamametiti hutetama nagai aliꞌyama aliyana mailava hutama tokiyaꞌage humainageꞌna tamake-mainoe. Menima nehaya yamoꞌa hagotetama humainaya yamona ago agasetama kanale kava nehae.
REV 2:20 Nehayanagi nagoꞌa kefo yama nehagenoꞌa naipamoꞌa haviya nehie. Nago aꞌmo agia Yesepeliꞌe mage huno humaine “Nagaya Anumayamo aune a mainoe.” huno havigea nagai aliꞌya veaꞌmogamina ayemavataga huno mage nehie “Kumai yana nehutama amayateti talo humalenaya afa anumayamoma amiya kavela neho.” huno humaine.
REV 2:21 Higeꞌna nagaya ani aꞌmofena “Kumai yakahena kaguꞌa aiyahae huka nagoꞌene ohisana kagesa havio.” huꞌna agava mauvanagi aguꞌa aiyahae nohie.
REV 2:22 Aiyahae nohiafe nagaya tusiꞌa agata aisia kalia neꞌamiꞌna ani aꞌenema kumaima nehaya veaꞌnene kefo yaꞌamihema amakaye huꞌya amakuꞌama aiyahae ohisageꞌnahena tusiꞌa kana yana amamigahue.
REV 2:23 Neꞌamamiꞌna ani aꞌmo kema akave nemalaya veaꞌmogamina hamaesugeꞌya faligahae. Falisageꞌya mukiꞌa Anumaya Koti anagaꞌmoꞌya ageteꞌya nagaya veaꞌmogami amaku amakesa tamagelegatiꞌma huꞌna fako nehua kano mainoa yafena havigahae. Mukiꞌa veaꞌmogatama nehaya kavala ageteꞌna agoꞌma humainaya yateti anonatamia tamamite lamamite hugahue.
REV 2:24 Hugahugi nagoꞌa Taiyataila mainaya veaꞌmogatama ani aꞌmo kea akave omaletama Satani kema falakino hanea kema ohavinaya veaꞌmogatama nagoꞌa kahegi kea tamahaopaigahue.
REV 2:25 Tamahaopaigahugi mukiꞌama atafa hulinaya kea atafa hutama tokiyaꞌage hu-linetama maime maime neꞌvigeꞌna nagaya eteꞌna ano.
REV 2:26 Sataniꞌene tuma huꞌya agaseꞌya nagai kema akave maleme maleme haisaya veaꞌmogamina nagaya tokiyaꞌnia amamisugeꞌya mukiꞌa veatela kava yagaigahae.
REV 2:27 Nenafaꞌa tokiya namigeꞌna kavama neꞌyagauva tokiyaꞌnia aniꞌa huꞌna tamamisugetama tokiyaꞌage hutama kava yagaigahae. Veaꞌmoꞌya mopa susufaneleꞌma aiko neligeno aposino yagi-yagipe nelavia avamete kava huꞌya yagaigahae.
REV 2:28 Kava yagai-mainesageꞌna natema evaꞌyi nehia kaꞌnefiꞌmoꞌa tusiya huno aivasa huno hale yamaene kaꞌnefila tamamigahue.
REV 2:29 Nagi tamakesama hanesimoga-tama Avamuꞌmoꞌa mono note neꞌvaya veaꞌmogamifema hia kea haviho.
REV 3:1 Satisi maineꞌya mono note neꞌvaya veate kava kanohena* mage huka kao nagaya seveniꞌa (7) Anumayamo Avamuꞌene seveniꞌa (7) kaꞌnefiꞌyagaene nayapina atafa hulinoa kanomoꞌna mani kea tamahanepauve “Nagaya tamakai auꞌava yatamia ago tamake-mainoanagiꞌya veaꞌmoꞌya tamakaifena ‘Agola maige maige hisaya hamaimu hanea veale.’ huꞌya nehayanagi tamakaya nagai kema atalaya yafena ago fali-mainae.
REV 3:2 Faligahe hayanagi tamauꞌma fae-maiya yana neꞌataletama hetitama kanale auꞌava yatamia ali lokiya vaiho. Nagaya agoana auꞌava yatamimoꞌa Anumayaniꞌamo aufina fatago ohunae.
REV 3:3 Ohuneanagitama agoꞌma havi-mainaya mono kehena tamakesamoꞌa hao hinagetama akave maletama kefo yatamihena tamakuꞌa aiyahae hiho. Fae-mainesaletiꞌma he otisayana nagaya ‘Omegahie.’ hutama hisaya kanafi musufa vaya kana huꞌna esuaꞌamoꞌna kefo yamo anonatamia me lamamigahue.
REV 3:4 Me lamamigahuanagi nagoꞌa Satisi mainaya veaꞌmoꞌya kanaleꞌya hageno amakuꞌamoꞌa oniꞌyaꞌagela ohunea veaꞌne mainayanagiꞌya efeꞌage kenaꞌamia faimatesugeꞌya amatesia kava huꞌya nagaiꞌene ailokaeꞌya vaiyegahae.
REV 3:5 Vai neꞌayesageꞌna Sataniꞌene tuma huꞌya agase-mainaya veala efeꞌage kena faimategahue. Maige maige hisaya hamaimu hanesia veaꞌmogami amakima kae-malenoa avopi ani veaꞌmogami amakia haneanagiꞌna aye ohananegahuanagiꞌna amakai amakia Nenafa auleꞌene ensole vea amauleꞌene huhaleꞌna hugahue.”
REV 3:6 Nagi tamakesama hanesimoga-tama Avamuꞌmoꞌa mono note neꞌvaya veaꞌmogamifema hia kea haviho.
REV 3:7 Filatelafia maineꞌya mono note neꞌvaya veate kava kanohena* mage huka kao nagaya Anumaya Kotiꞌna alu aotage kanogiꞌna tamagelafa nehue. Tevitiꞌma kava yagai-mainea ki nofila nagaya ago aliꞌna fita yaki-malenoanagino nago kanomoꞌa eteno alino fita okigahie. Nagaya fita ago aliꞌnama ki-malesugenoꞌa nago kanomoꞌa alino oꞌyakigahie.
REV 3:8 Nagaya mage nehue tamakai auꞌava yatamia ago age-mainoe. Ageho tamakai tamaufina fita ago yaki-malogeno visaya fiamoꞌa hane. Agoꞌma yaki-malenoa fita nago kanomoꞌa eteno alino okigahie. Tamakaya osi kanoꞌa tokiyatamia hanegetama nagai kea akave nemaletama nagai nagia ali fala okigeꞌna age-mainoe.
REV 3:9 Haviho nagoꞌa veaꞌmoꞌya mage nehae “Isaleli veaꞌne mainone.” huꞌya havigea nehayanagi Satani veaꞌne mainayanagiꞌna nagaya amakaila aliꞌna tamaiyafinaga amatesugeꞌya “Ago tagase.” huꞌya ape humaineꞌya nagaya tamakaifema nayamopafima nenahaiya yana amavelisugeꞌya agegahae.
REV 3:10 “Kana yapina tokiyaꞌage hutama mailava hutama maiho.” huꞌnama hu-mainoa kea ago akave malenagi mukiꞌa ma mopafi veaꞌmogamina avameꞌma humatesua yapina tusiꞌa kana yamo falote hugahianagiꞌna tamau vaisugetama tamakaya ani yapina omaigahae.
REV 3:11 Nagaya naiyayeꞌna aupaꞌa egahugi. Atafa hulinaya kea atafa hutalako hulisayana nagoꞌa veaꞌmoꞌya tamamisua kanale yana tamahaofalegahae.
REV 3:12 Atafa hulineꞌya Sataniꞌenema tuma huꞌya agase-mainaya veaꞌmoꞌya no yosamo avamete kana hageꞌna Anumayamo mono nopi ayeꞌna ali hetimatesugeꞌya maigahayanagiꞌya eteꞌya oꞌutafa huꞌya oꞌugahayanagiꞌna amaugafale Anumayaniꞌamo agiene Anumayaniꞌamona ikapinagati esia kumaꞌmo agia, haegafa Yelusalemu kumaꞌmo agiene nagaila haegafa nagiene amaugafale kaemategahue.
REV 3:13 Nagi tamakesama hanesimogatama Avamuꞌmoꞌa mono note neꞌvaya veaꞌmogamifema hia kea haviho.
REV 3:14 Leotisia maineꞌya mono note neꞌvaya veate kava kanohena* mage huka kao nagaya kelamage kemona aepaꞌa maineꞌna efi efi huꞌna mukiꞌa kanafina kea huhaleꞌna nehue. Nagaya mukiꞌa Anumaya Kotiꞌa eheꞌma taloma humalenea yamona aepaꞌa mainoanagiꞌna mani kea mage huꞌna tamahanepauve.
REV 3:15 Nagaya tamakai auꞌava yatamia ago age-mainoe. Nagai kemona tamakaveꞌnona ohunayanagi tamakupina yasiꞌage humainegeno amukoa nohie. Nagai kemoꞌa tamakupina amukoꞌageꞌma hu-maineleꞌasina musena huleꞌasinagi nagai kea osiꞌa tamakupina malenageno muvalisua naipa nehigeꞌna nagaitegatila tamavaleꞌna hagaꞌyu hu-lamatalesua nagesa nehie.
REV 3:17 Tamakaya mage hutama nehae “Kasagoꞌya afenoꞌyatia hai ali-mainone. Nago ya kanoꞌahena aupa nohune.” hutama nehayanagi tamakaya havige nehagi haviyatafa hutama mainayanagiꞌya veaꞌmoꞌya tamakeꞌya kalagi ai-lama-tesaya avamete hutama mukiꞌa yafena aupa hutama mainageno tamaulagamoꞌa asu hu-mainegetama tamaugafa alapaꞌage veaꞌne kana hutama mainaya yafena tamakaitamia noꞌagae.
REV 3:18 Naꞌa humaineafe mani kea tamahanepauve mone afenoꞌene veaꞌnema maisayafena nagaitegati kanileta yafana, atafi kae-malenaya yafana me miya hiho. Tamaugafa alapaꞌage mainageno tamakaye hisia yama aiso hisayafe efeꞌage kena me miya hutama failiho. Tamaulagafima falesaya masavena tamamisugetama falesageno tamaulagamoꞌa kanale hinagetama agegahae. Ani yaꞌyaga nagaiteti me miya hiho.
REV 3:19 Nagaya nayamopafima nahaiya veaꞌmoꞌya nagai kema haviꞌya akave malesaya yafena kaꞌyo kevea neꞌamamuafe aluya hutama lamakesa nehavitama kefo yatamihena tamakuꞌa aiyahae hutama “Nagoꞌene ohugahune.” hutama hiho.
REV 3:20 Ageho nagaya fiate heti-maineꞌna tamakaifena kea nehuanagitama ani kema nagoke nagokeꞌmogatama havitetama fitama yaki-natesayana haifaleꞌna tamakaiꞌene tokaeta maineta kavela negahune.
REV 3:21 Nagoꞌa veaꞌmoꞌya Sataniꞌene tuma huꞌya agasesaya veafena mage huꞌna humategahue “Nagaya Sataniꞌenena tua huꞌna agaseteꞌna Nenafaꞌma kava yagai-mainea sialela agaiꞌene me lokaeꞌna mainoa avamete hutama nagaiꞌene kava yagaigahae.” huꞌna humategahue.
REV 3:22 Nagi tamakesama hanesimoga-tama Avamuꞌmoꞌa mono note neꞌvaya veafema hia kea haviho.
REV 4:1 Yoniꞌa mage huno hie ani kemoꞌa haꞌnoma higeꞌna agoana ikapina nago fita yaki-malenea fiana age-mainoe. Neꞌagogeno hagoteꞌnama ufema nehia augafa agema aigeꞌna havua augafa kea nagoꞌene havuana mage huno hie “Male ehaigeꞌna mukiꞌa yama anileꞌma falote hisia yana kavelino.” huno hie.
REV 4:2 Higeno aupaꞌa Anumaya Koti Avamuꞌmoꞌa tusiya huno natafa higeꞌna agoana ikapinaga nago sia agogeno ani siale nago kanoa maine.
REV 4:3 Ani sialeꞌma mainegeꞌna agoa kanomo augafamoꞌa tusiya huno aihaesa huno alave alave huteno aihalegeꞌna age-mainoe. Agogeno nagoꞌma alave alave hiana yosa haisa fulagenaꞌmoꞌa sauve kanomo siale aigagi-maineno aihanelegeꞌna age-mainoe.
REV 4:4 Neꞌagogeno tueti foꞌa (24) sia ani sauve kanomo siale maigagi-mainageꞌya tueti foꞌa (24) kava vayaꞌmoꞌya ani siayagale mainae. Maineꞌya efeꞌage kenaꞌamia fai-lineꞌya amanutela sauve veaꞌmoꞌya kanileta yafateti talo humale tumano kuꞌma vai neꞌaliya avamete huꞌya vai-linae.
REV 4:5 Anumaya Koti sialeti aulumaya alino monagemo huno alu ge lu gema aiya yamoꞌa anifiti falote humaine. Anumaya Koti siamo aulega seveniꞌa (7) lamua aivasa humaine. Ani lamua Anumayamona seveniꞌa (7) Avamuꞌamoꞌya mainae.
REV 4:6 Mainageno Anumaya Koti siamo aulega nago tikotuna hanegeno telelalayamaꞌa tamage huno omalegeno galasimoꞌma alave alave hia avamete humaine. Foꞌa (4) hamaimuꞌene anagaꞌmoꞌya hetiꞌya ani siale maigagiꞌya mainageno amaulaga kasagoꞌya haneteno amaulegaene amakavelagaene alino anoꞌvai-maine.
REV 4:7 Hagote haimuꞌene kanomoꞌa kaveꞌage afua, laiyoni afu kana higeno anile haimuꞌene kanomoꞌa pulamaka kana higeno anile haimuꞌene kanomona vaya augosa kali-maigeno anile haimuꞌene kanomona anale haleno vai neꞌayea haki kana nama kana humaine.
REV 4:8 Ani foꞌa (4) hamaimuꞌene anagaꞌmoꞌya sikisiꞌa (6) amagekoꞌna hanegeno kasagoꞌya amaulagamo amaugafamona agupilegaene amagekoꞌnamona afepinagaene alino vai-maine. Vai-mainageno felugaene kegeꞌene mage huꞌya huge huge nehae “Anumaya Kotiꞌa mukiꞌa tokiyamona aepaꞌa maineno kefo yana nohigi tusiya huno alu aotage kano maine. Nayoꞌene meniene maineanagino haenagaꞌa maisia kano maine.” huꞌya humainae.
REV 4:9 Hamaimuꞌene anagaꞌmoꞌya sauve kanomo siale maiya kanoa, agola maige maige nehia kanomofena, mage huꞌya hae “Tokiyaꞌage hale yamaꞌa hanea kagia alisaga nehuta tusiꞌa muse nehune.” huꞌya nehageꞌya ani tueti foꞌa (24) kava vayaꞌmoꞌya sauve kanomo siale maiya kanoa agola maige maige nehia kanomo aule mope huꞌya agia alisaga hugahe ali-mainaya kanileta yafateti talo humale tumano kuꞌamia aliꞌya ani siamo aiyafi mo malae.
REV 4:11 Mo nemaleꞌya mage huꞌya hae “Vaeha tagai Anumaya Kotigae kagaya mukiꞌa yana ‘Naꞌa huꞌna talo hugahue.’ huka humainanafe mukiꞌa yana talo hu-malanageno haneafe tagaya tokiyaꞌage hale yamaꞌaene kagia alisaga nehuta tokiyaꞌage kano mainane huta kagia alisaga nehune.” huꞌya hae. Hageꞌna nagaya Yoniꞌna himona kana yapi age-mainoe.
REV 5:1 Nagaya Yoniꞌnae agoana ani sauve kanomo sialeꞌma maiya kanomona tamaga ayapina nagola avoma kae-male omana aye-gafage ki-malegeno hane. Ani omanamona amegaene agusafinagaene avona kae-maleteno veaꞌmoꞌya oꞌagesayafene huno atupale seveniꞌa (7) menimo fuki kana yateti aye kaꞌmae-malene.
REV 5:2 Aye kaꞌmae-malenegeꞌna agoana nagola tokiyaꞌa hanea ensole kanomoꞌa ala kegefafiti keha keha huno mage hie “Hana kanoa atesia kanomo anima menimo fukiteti aye kaꞌmae-malegeno hanea omana ali vaka yegahie?” huno hie.
REV 5:3 Higeꞌna agoana atiyeꞌyama agayana ikapinagaene mopafiꞌene mopamona afepinagaene nagola ani avoma ali vaka yesigeno atesia kanoa omaine.
REV 5:4 Nagola ani avoma kae-male omanama ali vaka yesigeno atesia kanoa omaigeꞌna ageteꞌna tusiya huꞌna avia ate-mainoe.
REV 5:5 Neꞌatogeno tueti foꞌa (24) kava vayapiti nago kanomoꞌa nagaifena mage huno hie “Avia oꞌateka havio nago kanoa Teviti aginagomoꞌa, kaveꞌage laiyoni afu kana humainea kanoa, Yuta nofipiti kanogino, Sataniꞌene tua huno ago agase-maineafe ani avoma kae-male omana seveniꞌa (7) menimo fukiteti aye kaꞌmae-malenea yana ali hakao huteno ali vaka-yegahie.” huno humaine.
REV 5:6 Ani sauve kanomo siamo amuꞌnopina nagola Sipi sipi nafaꞌnea heti-mainegeꞌya foꞌa (4) hamaimuꞌene anagaꞌyaene tueti foꞌa (24) kava vayaꞌmoꞌyaene agaila mai kagi-mainageꞌna age-mainoe. Agoana ani Sipi sipi nafaꞌnea maiyanagi hayagenoꞌma fali-mainea afu kana huno seveniꞌa (7) aveꞌene seveniꞌa (7) aulagaene hane. Ani aulagayaga seveniꞌa (7) Anumaya Kotiꞌa hutegeno mukiꞌa ma mopafi vaiyatete nehia Alu Aotage Avamulagiꞌya mainae.
REV 5:7 Ani Sipi sipimo nafaꞌnemoꞌa viaꞌamo sauve kanomo siale mainea kanomona tamaga ayapiti ani avoma kae-male omana ali-maine.
REV 5:8 Aligeꞌya foꞌa (4) hamaimuꞌene anagaꞌyaene tueti foꞌa (24) kava vayaꞌmoꞌyaene ani Sipi sipimo nafaꞌnea avate mope huꞌya mukiꞌamoꞌya gita kana yana yagame nehaya yaꞌene kanileta yafateti talo hu-malenaya yopaene atafa hulinae. Ani yopafina manaꞌage halinamo humainea taꞌnefamoꞌa havate-maine. Ani manaꞌage halinamoꞌa maꞌa humaine veaꞌmoꞌya nunamuma nehuꞌya Anumayamo agima alisaga nehageno Anumayamo avate vigeno havigeno aipamoꞌa kanale higeno hagaꞌage manama nehavia kava humaine.
REV 5:9 Ani anagaꞌmoꞌya Sipi sipi nafaꞌnemofena mage huꞌya yagamea humainae “Kagaila kahayageka fali-mainana kolateti ma mopafi veaꞌmogamina, alu kote kotega veaꞌnene, alu make alu make neꞌaiya veaꞌnene, alu amaugafa alu amaugafa kalimainea veaꞌnene, kefo yaꞌamimo alino haꞌyagimatenegeka kagayama fali-mainana kolateti anifiti aligalu heka amavayu huteka Anumaya Koti veaꞌne maisaya yafe mukiꞌa ago miya humatenane. Miya humatenanafe kagaila kanale ya huno katea kava hana kano mainananagika anima aye-gafage ki-maleteꞌya menimo fukiteti aye kaꞌmae-malenea avo omana alika ali hakao hisana tokiyakaꞌa hane.
REV 5:10 Anumaya Kotiꞌa kava yagai-lamatesia yapi ago amatanageꞌya Anumaya Koti agia alisaga nehuꞌya agai aliꞌyana neꞌaliꞌya ma mopafi veaꞌmogamina kava humategahae.” huꞌya yagamea hageꞌna havimainoe.
REV 5:11 Haviteꞌna agoana kasagoꞌya ensole vayala teni milioniꞌa (10,000,000) ensole vayaꞌmoꞌya hetiꞌya Anumaya Kotiꞌma nemaiya sialeꞌene foꞌa (4) hamaimuꞌene anagaene tueti foꞌa (24) kava vayaꞌmoꞌyaene maigagiꞌya maineꞌya ala kegefafiti mage huꞌya hageꞌna havimainoe.
REV 5:12 “Ani Sipi sipi nafaꞌnea hayageno faliteno heti-mainea kanogino tusiꞌa kanale kano maineanagino atesia napamaꞌa aliteno tusiꞌa tokiyaꞌa hanenageno mukiꞌa kanale yaꞌene kanale havi haviꞌyaꞌene hanea kanogino kava hisia tokiyaꞌaenena haneanagita tokiyaꞌage hale yamaene agia alisaga hisunageno anale hanesigeno mukiꞌa muse hisia yana alisie.” huꞌya hae.
REV 5:13 Hageꞌna havugeno mukiꞌama Anumaya Kotiꞌa talo humalenea yamoꞌa ikapinaga mainaya yaꞌene mopafima mainaya yaꞌene mopamo agusafinagama mainaya yaꞌene tipima mainaya yaꞌenena mukiꞌamoꞌya mage huꞌya hae “Sauve kanomo siale mainana Anumaya Kotigaene Sipi sipi nafaꞌnene agola mukiꞌa kanafina muse hisaꞌa yamoꞌa hanege hanege huno hanesie. Tokiyaꞌage hale yamaꞌaene tanakia haneanagita alisaga hisunageno anale hanesigetana kava hisaꞌa tokiyatanimoꞌa hanege hanege huno hanesie.” huꞌya hae.
REV 5:14 Hageꞌya foꞌa (4) hamaimuꞌene anagamoꞌya “Tamage huꞌya hae.” hageꞌya tueti foꞌa (24) kava vayaꞌmoꞌya ape huꞌya Anumayamo agia alisaga humainae.
REV 6:1 Nagaya Yoniꞌna agoana Sipi sipi nafaꞌnemoꞌa eaꞌamo nagola menimo fukiteti aye kaꞌmae-malenea fukina ago melino hakao higeꞌna havuana foꞌa (4) hamaimuꞌene anagapiti nagoꞌmoꞌa agea aigeꞌna havuana agema aiya agemoꞌa monagemoꞌma hia avamete huno mage hie “Male eno.” huno hie.
REV 6:2 Higeꞌna agoana nagola efeꞌage hosi afua agogeno nago kanomoꞌa ani afumo agupifi maineno ati kevea huno atafa hu-lineno tumano kula, vayaꞌmoꞌya kame vayaꞌamima tuma huꞌya amakase-mainaya vayaꞌmoꞌya vai neꞌaliya tumano kula amigeno nagoꞌene kame vayaꞌamienena tua huno amakasegahe umaine.
REV 6:3 Vigeno ani Sipi sipi nafaꞌnemoꞌa anile menimo fukiteti aye kaꞌmae-malenea fukina melino hakao higeꞌna havuana foꞌa (4) hamaimuꞌene anagapiti anile tu (2) molia kanomoꞌa mage huno hie “Male eno.” huno hie.
REV 6:4 Higeꞌna agoana nagola kolamaꞌage hosi afua agogeno nago kanomoꞌa ani afumo agupifi mainegeno ala aveꞌneꞌne naepe kaꞌyoꞌene mukiꞌa ma mopafi veaꞌnene tuma hisia tokiyaꞌaene amigeno aliteno ma mopafi veaꞌmoꞌya tuma huꞌya hamaesageꞌya falisaya amakesa ago amamineanagino amaipa falu huꞌya maisaya yamoꞌa mukiꞌa ma mopafina ago haꞌno humaine.
REV 6:5 Ani Sipi sipi nafaꞌnemoꞌa tagufa (3) molia menimo fukiteti aye kaꞌmae-malenea fukina melino hakao higeꞌna havuana foꞌa (4) hamaimuꞌene anagapiti tagufa (3) molia kanomoꞌa mage huno hie “Male eno.” huno higeꞌna agoana nagola anupa hosi afua agogeno nago kanomoꞌa ani afumo agupifi maiya kanomoꞌa sigelima nehaya yana ayapi alilino emaine.
REV 6:6 Alilino mainegeꞌna neꞌageꞌna havuana foꞌa (4) hamaimuꞌene anagapiti nago agema aigeꞌna havua agemoꞌa mage huno hie “Nago kanomoꞌa nagoke yupa nate aepa heno aliꞌyana alime alime visiaꞌamo unema haꞌno hisigeꞌya amisaya miyateti tole osi keꞌayopi laisimo alaga fako huka amamio. Ani avamete miyana kamisageka sikisiꞌa (6) maya aniꞌa huka amamio. Aniꞌa huka amamigananagi olivi yosama hanea yosamo alagafiti masavema neꞌaliya yosayagaene nofi alagamo timaꞌa aliꞌya tatiteꞌya nenaya nofiꞌene alika haviyana ohuo.” huno hie.
REV 6:7 Higeꞌna agoana Sipi sipi nafaꞌnemoꞌa foa (4) molia menimo fukiteti aye kaꞌmae-malenea fukina melino hakao higeꞌna havuana foꞌa (4) hamaimuꞌene anagapiti foa (4) molia kanomoꞌa mage huno hie “Male eno.” huno hie.
REV 6:8 Higeꞌna agoana nagola kanileta hosi afua agogeno ani afumo agupifi maiya kanomo agia “Vaya fali yamoꞌe.” huꞌya neꞌayaya kanomo akaveꞌma via kanomo agia “Fali-mainaya veaꞌne neꞌvaya kumale.” huꞌya agia neꞌayaya kanomoꞌa akave vigeꞌana vaꞌana ani tole kanolatamogania tusiꞌa tokiya anamigeꞌana mukiꞌa ma mopafi mainaya veala ali fako huꞌana foꞌafi (4) amatageꞌya maiya anagapiti nagoꞌa veaꞌmogamina he-falimatesia tokiyaꞌania ali-mainaꞌe. Aliꞌageꞌya nagoꞌamoꞌya tu huteꞌya fali-mainagi nagoꞌamoꞌya kafu huꞌya amakategeꞌya fali-mainagi nagoꞌamoꞌya alu kali lu kali aliꞌya fali-mainagi afai kalamoꞌya nagoꞌamogamina hamaesageꞌya falisaya tokiyaꞌania ali-mainaꞌe.
REV 6:9 Naꞌa higeno Sipi sipi nafaꞌnemoꞌa faefua (5) molia menimo fukiteti aye kaꞌmae-malenea fukina melino hakao higeꞌna agoana Anumayamofe amakesa haviꞌya sipi sipia heꞌya folamole kae salamana huꞌya nemalaya folamo kana folamoa ikapinaga hanegeꞌna agogeno ani folamomo aiyafina Anumaya Koti kema haviꞌya atafa hu-lineꞌya huhaleꞌya humainaya yatetiꞌma hamayageꞌya fali-mainaya veaꞌmogami amamena amake-mainoe.
REV 6:10 Agogeꞌya ani amamemoꞌya ala kegefafiti mage huꞌya hae “Tokiyaka hanea Anumayatimogae alu aotage kanomoga tamagegeꞌya nehane. Ma mopafi veaꞌmoꞌya tahayageta faliteta malela emainonanagika aniꞌama humainaya yatetila kagaya na yu kaiyekea hu-mateteka kefo yaꞌamimo anonaꞌamia amamigane?” huꞌya hae.
REV 6:11 Nehageno efeꞌage ayaꞌaya kenaꞌamia alino amamiteno mage huno hamapaiye “Maifalu hutama mainegeꞌya tamafu-tamakanaꞌya tamakaiꞌene Yisasi aliꞌyama neꞌaliꞌya agai kema huhaleꞌya nehaya yateti tamakaiꞌma hulamatenaya kava huꞌya hamaesageꞌya faliteꞌya esageꞌna kame vayatamia kaiyekea humategahue.” huno hie.
REV 6:12 Huteno Sipi sipi nafaꞌnemoꞌa sikisia (6) molia menimo fukiteti aye kaꞌmae-malenea fukina melino hakao higeꞌna agoana tusiꞌa imi aligeno yagemoꞌa asu huno hanimaꞌage higeno ikamoꞌa haesa ko tino kola kana humaine.
REV 6:13 Higeno yasimoꞌa yosamona mo lifagagi me lifagagi higeno afuma otenea yosa alagamoꞌa halali hulavia kava huno kaꞌnefiꞌyagamoꞌa ikapitila atafai-lavi-maine.
REV 6:14 Ikamoꞌa iva yuguma alitama aye kafage kitama haꞌyama negiya kava huno ikamoꞌa fanane higeno mukiꞌa agoꞌyaene ti amuꞌnopima hanea mopaene noꞌamia ataleꞌya nagoꞌene omalenae.
REV 6:15 Naꞌa higeno mukiꞌa ma mopafi mainaya sauve vayaꞌyagaene kava vayaꞌyagaene ati vayate kava vayaꞌyagaene miyaꞌamimo hai-mainea veaꞌnene tokiyaꞌamima hanea vayaꞌene nofipi maineꞌya miya oꞌali aliꞌya neꞌaliya veaꞌnene amakaiꞌami aliꞌyaꞌamile nemaiya veaꞌnene tusiꞌa amamaꞌyo aigeꞌya “Hanate maisune.” huꞌya huteꞌya yafakapiꞌene agoꞌyafi hanea ala yafakefamo akavelega faleꞌya mo falakiꞌya mainae.
REV 6:16 Fala kiꞌya maineꞌya keha keha huꞌya mukiꞌa agoꞌyaheꞌene yafafeꞌene mage huꞌya hae “Tagaya sauvemo siale mainea kanoa Anumaya Koti aule omaisuna tagesa nehune. Sipi sipi nafaꞌnemoꞌa tusiꞌa hai vai nelategeta koli nehunagi agoꞌyamogatama kofa hu-lavitama tagaila etama aiso hulateho.
REV 6:17 Ala kanolatamogania hanai vai-lateꞌana kaiyeke hulatesaꞌa kanamoꞌa ago falote hianagiꞌya hanaꞌa augafa veaꞌmoꞌya anaulela hetigahae?” huꞌya hageꞌna haenagama falote hisia yana himona kana yapi ageteꞌna havilinoe.
REV 7:1 Ani kema haviteꞌna agoana foꞌa (4) ensole vayaꞌmoꞌya foꞌa (4) ma mopamo atupalega heti-maineꞌya yasimona atafa huꞌya ali-talako huligeno yasimoꞌa taga higeno mopafima hanea yamoꞌene hagelimoꞌene yosayagamoꞌenena kanage kanagala ohunae.
REV 7:2 Ohageꞌna agogeno nago ensole kanomoꞌa yagemoꞌma evaꞌyi nehilegati eaꞌamo haimuꞌma hanea Anumaya Kotiꞌa agaiꞌa veaꞌmogami humatenea avona aigaꞌmaematesia yana ayapi atafa hulineno ani foꞌa (4) ensole vayala mopaene hageliꞌene ali haviyama hisaya tokiyaꞌamima amaminea ensole vayafe mage huno ala kegefafiti hamapaiye.
REV 7:3 “Tamakaya mopaene hageliꞌene yosayagaenema ali haviyama hisaya ensole vayaꞌmogatama neꞌataletama tagava mainegeta tagaya hagoteta Anumaya Kotitimo aliꞌya veaꞌmogami hamanilela Anumayamoꞌma humatenea avona aigaꞌmae-matetesunagetama ani yaꞌyaga ali haviyana hugahae” huno hie.
REV 7:4 Higeꞌna havugeno huyogino hamanile avoma kae-malenea veaꞌnea vani hataleti foti fo tauseniꞌa (144,000) Isaleli veaꞌnea alu nofipiti alu nofipiti huyogi-malenea veꞌnea agoe.
REV 7:5 Yuta nofipiti tuelufu tauseniꞌa (12,000) veaꞌnene Lupeni nofipiti tuelufu tauseniꞌa (12,000) veaꞌnene Kati nofipiti tuelufu tauseniꞌa (12,000) veaꞌnene huyogi-malene.
REV 7:6 Asa nofipiti tuelufu tauseniꞌa (12,000) veaꞌnene Napatalai nofipiti tuelufu tauseniꞌa (12,000) veaꞌnene Manase nofipiti tuelufu tauseniꞌa (12,000) veaꞌnene huyogi-malene.
REV 7:7 Simioni nofipiti tuelufu tauseniꞌa (12,000) veaꞌnene Livai nofipiti tuelufu tauseniꞌa (12,000) veaꞌnene Isaka nofipiti tuelufu tauseniꞌa (12,000) veaꞌnene huyogi-malene.
REV 7:8 Sepuluni nofipiti tuelufu tauseniꞌa (12,000) veaꞌnene Yosefe nofipiti tuelufu tauseniꞌa (12,000) veaꞌnene Penisamini nofipiti tuelufu tauseniꞌa (12,000) veaꞌnene huyogi-malene.
REV 7:9 Kasagoꞌya veaꞌnea ohavunamaꞌa veaꞌnea alu kotega alu kotega veaꞌnene, alu make alu make neꞌaiya veaꞌnene, alu amaugafa lu amaugafa kali-mainea veaꞌnene, mukiꞌa Anumaya Koti sauve kanomo siamo aulegaene Sipi sipi nafaꞌnemo aulegaene heti-maineꞌya efe kena ayaꞌaya kenaꞌamia failineꞌya faꞌnofamo haisa amayapi atafa huli huli hulinae.
REV 7:10 Hu-lineꞌya ala kegefafiti mage huꞌya hae “Sauve kanomo siale mainea Anumaya Kotitimoꞌene Sipi sipi nafaꞌnemoꞌene tagu tamema ago aligati-mainea yamona aepaꞌa mainaꞌe.” huꞌya hae.
REV 7:11 Nehageꞌya mukiꞌa ensole veaꞌmoꞌya hetiꞌya Anumaya Kotiꞌma mainea sialeꞌene tueti foꞌa (24) kava vayaꞌmoꞌyaene foꞌa (4) hamaimuꞌene anagaꞌmoꞌyaene maigagiꞌya maineꞌya mukiꞌamoꞌya ani siale ape huꞌya Anumaya Koti agia alisaga nehuꞌya mage huꞌya hae.
REV 7:12 “Tamage Anumaya Kotiꞌa mukiꞌa muse hisia yana alisie. Tokiyaꞌage hale yamaꞌaene agia haneanagino kanale havi haviꞌyamaꞌa hanea kano maineafe agia alisaga nehuta tusiꞌa muse hutesune. Agaiꞌa kava yagaisia tokiyaꞌamoꞌa agola hanege hanege huno hanesie. Tamage.” huꞌya humainae.
REV 7:13 Ani kea hu neꞌatageno nagola ala kava kanomoꞌa nagaifena mage huno nahavige “Nama ayaꞌaya efe kenama fai-linaya veala taꞌyae? Hanategati emainae?” huno nahavige-maine.
REV 7:14 Nahavigegeꞌna nagaya, Yoniꞌna, mage huꞌna hue “Musekaꞌa nehugi kagaya kagaikaꞌa havilinane.” huꞌna hugeno nagaifena mage huno hie “Mani veaꞌmoꞌya tusiꞌa kana yama hanea kanafi maineꞌya tokiyaꞌage huꞌya kefo yaꞌamihema haviꞌya fali-mainea Sipi sipi nafaꞌnemo kolateti kenaꞌamia agola sese hageno efeꞌage hu-maineanagiꞌya emainae.
REV 7:15 Ani yafe amakaya Anumaya Kotiꞌma mainea siamo aulega heti-maineꞌya felugaene kegeꞌene agai agia alisaga nehuꞌya agai aliꞌya neꞌaliyanagino Anumaya Kotiꞌa au vaimateno kava yagaimategahie.
REV 7:16 Yagai-mateneanagino nagoꞌene amakala otegahie. Tifena oꞌamakegahie. Yagemoꞌa amuko-nako huno amaleno oꞌamasagaligahie.
REV 7:17 Sipi sipi nafaꞌnemoꞌa Anumaya Koti mainea siamona aulega hanea amuꞌnopi hetino maineno sipi sipi kava kanoꞌami maineanagino kapaiꞌma nehagea tima hanea komulega amavaleno mo matenageꞌya maige maige hisaya tina nenesageno Anumaya Kotiꞌa amaunua alino haꞌmi-matesigeꞌya nagoꞌene avia oꞌategahae.” huno higeꞌna nagaya Yoniꞌna havimainoe.
REV 8:1 Ani Sipi sipi nafaꞌnemoꞌa haenagalafana menimo fukiteti aye kaꞌmae-malenea yana melino hakao higeꞌna agogeno mukiꞌa ikapinagama hanea yamoꞌa kanage kanagela ohuꞌya mukiꞌa yamoꞌa kea ohigeno vaniꞌagi hafu aovamoꞌa eumaine.
REV 8:2 Eutegeꞌna anile agoana seveniꞌa (7) ensole veaꞌmoꞌya Anumaya Koti aule hetiꞌya mainageno seveniꞌa (7) ufena amamigeꞌna age-mainoe.
REV 8:3 Agogeno nago ensole kanomoꞌa nagola kanileta yafateti talo hu-malenea yopa ayapi ali-linegeno afuma heꞌya folamole kae salamana huꞌya nemalaya folamo kana folamole* heti-mainegeno kasagoꞌya manaꞌage nehia taꞌnefamo halinamoꞌene Yisasina amakuꞌa aminaya veaꞌmoꞌya nunamuma huꞌya havigaya nunamuꞌene ani yopafina ali malesigeno ailokaenoꞌma haisiana Anumayamoꞌa kanale manaꞌa havisiafene huno sauve kanomo siamo aulega kanileta yafateti talo hu-malenea folamo hanea folamole mo malene.
REV 8:4 Momalegeno ani manaꞌage halinamoꞌene Anumaymona amakuꞌama aminaya veaꞌmogami nunamuꞌyagaene ani ensole kanomo ayapitila ataleꞌya Anumayamo aule haimainae.
REV 8:5 Haigeno ani ensole kanomoꞌa kanileta yafateti talo humale yopa alino folamole atama nelea ata ani yopafi maleno havateteno alino ani ata ikapinagati ma mopafi hagaꞌyu hu-talegeno elavigeno ikapinagatila akali kalu huno aulumayala neꞌaligeno nagola ala agegefa neꞌaigeno imila ali-maine.
REV 8:6 Seveniꞌa (7) ufema atafa hu-linaya ensole vayaꞌmoꞌya ani ufema hisaya yafe talo tala humainae.
REV 8:7 Hagote ensole kanomoꞌa agaiꞌa ufena higeno koꞌmopamoꞌene atamoꞌene kolamoꞌene atagufe-lavino mopafi tavigeno mukiꞌa ma mopa tagufale (3) ali fako hu-malageno anifiti nagokeꞌma ali fako hu-malaya haupa kaiyaga mukiꞌa mopafi hanea yaꞌene mukiꞌa yosayagaene mukiꞌa apeꞌene atamoꞌa teno asagali-talene.
REV 8:8 Asagali-talegeno tu (2) molia ensole kanomoꞌa agaiꞌa ufena higeno ala agoꞌya kana yana ata nelegeno hagelipi tavi-maine. Ani hagelimona tagufale (3) ali fako hu-malageno anifiti nago haupa kaiyaga hanea timoꞌa kolamaꞌage huno vali vali humaine.
REV 8:9 Kolamoꞌa vali vali higeno ani haupa kaiyagama mainaya noyameyagaene tipi yagaene fali haꞌno hageno ani haupa kaiyagama hanea tipi kaleyaga ali haviya hu-talageno anifima mainaya veala fali haꞌno humainae.
REV 8:10 Faligeno tali (3) molia ensole kanomoꞌa agaiꞌa ufena nehigeno kaꞌnefila ala kaꞌnefekefamo agia “Atuꞌage nehuno satuꞌage kaꞌnefile.” huꞌya nehayanaginoꞌa kaꞌniꞌmoma nelea avamete huno ikapinagatila elaviaꞌamo mukiꞌa ma mopamona tagufafi (3) melino fako hu-malageno anifiti nago haupa kaiyagama hanea tiꞌyagaene tima kapaiꞌma nehagea ti komufi hanea timoꞌene atuꞌage higeꞌya mukiꞌa ani lima ne-mainaya veaꞌnea fali-mainae.
REV 8:12 Faligeno fo (4) molia ensole kanomoꞌa agaiꞌa ufena nehigeno yagemoꞌa tagufafi (3) ali fako hu-malageno anifiti nago haupa kaiyaga asu humaine. Aniꞌa huꞌya ikana tagufafi (3) ali fako humalageno anifiti nago haupa kaiyaga aniꞌa huno asu humaine. Kaꞌnefiꞌyaga tagufafi (3) ali fako hu-malageno anifiti nago haupa kaiyaga aniꞌa huno asu humaine. Asu hu-maigeno felugama aye vasa nehia yaꞌamimoꞌa tagufafi (3) ali fako hu-malageno anifiti nago kanafina asu higeno kegela tagufafi (3) ali fako hu-malageno anifiti nago kanafina ikaꞌene kaꞌnefiꞌene asu higeno tusiꞌa haniki-maine.
REV 8:13 Nagaya Yoniꞌna agogeno nagola ala hakiki kana nama ikamo amuꞌnote haleno vigeꞌna age-mainoe. Neꞌagogeno ala kegefafiti mage huno hie “Avoꞌnio avoꞌnio tagufa (3) ensole anagaꞌmoꞌya ufena nehisageno tusiꞌa kana yamoꞌa ma mopafi mainaya veaꞌmogatamile falote hugahe higeꞌna tusiꞌa nahau hu nelamatoe.” huno higeꞌna havue.
REV 9:1 Faefu (5) molia ensole kanomoꞌa agaiꞌa ufena higeꞌna agogeno nago kaꞌnefimoꞌa ikapinagati atafai-lavino mopafi elavigeno ma mopafina nago komua afe yapi tavi-mainea komumona ayola omale komugefagino ani komumo ki nofila ani kaꞌnefimona amine.
REV 9:2 Amigeno aliteno ani ki nofiteti ani komua yakigeno ani komufitila tusiꞌa halinamo huno ehaiyana tusiꞌa atagefafiti hia halinamo avamete huno ehaiyaꞌamo yagene ikaꞌene ayesu higeno tusiꞌa hani kimaine.
REV 9:3 Kigeno kasagoꞌya keꞌnu kafamoꞌya ani halinafitila mopafina aitagu-fetageno veaꞌma akafu amanisaya tokiyaꞌamia amamigeꞌya akafuꞌma amani yana kulumale nehaya osifaꞌvemoꞌma neꞌamania avamete huno amanigeꞌya tusiꞌa amakata aimaine.
REV 9:4 Ani keꞌnufena mage huno hie “Apeꞌene talaꞌyaꞌene yosayagaenena oneho. Nagoꞌa veaꞌnege, Anumaya Kotiꞌa hapalimateteno agia hamanilela aigaꞌmae oꞌamatenea veaꞌmogamina akafu amanitama ali haviya humateho.
REV 9:5 Faefuꞌa (5) ikana amakata aisia yana amamite amamite hugahayanagi hamaegeꞌya ofaliho.” huno higeꞌya akafu amanigeꞌya amakata yama aliyana kulumale nehaya osifaꞌvemoꞌma veaꞌma akafu neꞌamania avamete huno amanigeꞌya tusiꞌa amakata aimaine.
REV 9:6 Ani yama alisaya kanafina veaꞌmoꞌya falisaya yafena tusiya huno hamaugahianagi ofaligahae. Amakatama aiya yafena tusiya huꞌya falisaya kafena ati yegahayanagi oꞌagegahae.
REV 9:7 Ani keꞌnumoꞌya tuma hugahema nehaya hosi afumo avamete huꞌya amanutela kanileta yafateti talo humale tumano kula vai-linageno amaugosamoꞌa veaꞌmogami amaugosa kali-maine.
REV 9:8 Kali-maigeꞌya ani keꞌnumoꞌya ayaꞌaya amayolagefa, haesa aꞌnemogami amayolagefa kana hu-mainegeno amaveꞌmoꞌa kaveꞌage laiyoni afumo ave kana humaine.
REV 9:9 Humainegeꞌya hamaifiꞌyafafina kapaleti talo humale halegu kana yana anoꞌvai-maleneꞌya amagekoꞌna agema aiyana tuma hugahe vaya hosimoꞌya avayu nehaya kalemo nehia kea ala kegefa huno neꞌaiya agemoꞌma hia kava huno agea aimaine
REV 9:10 Ani keꞌnumo amaigoꞌyafina avetaꞌnafaꞌage nekaꞌya, kulumale nehaya osifaꞌvemo akafu neꞌamania ave kana hia nekaꞌya, hanegeꞌya ani nekaꞌyaleti faefuꞌa (5) ikamo aguꞌafina veala akafu amaniꞌya ali haviya humategahae.
REV 9:11 Ani keꞌnumo sauve kanoꞌamia maineanagino ani kava kanoꞌamimoꞌa Sataniꞌe, ayoꞌa omale komugefale kava yagai-maineanagino agia Yuta veaꞌmogami kea, Hipalu kefina Apatonie huꞌya nehagi Kaliki kefina Apolionie huꞌya nehagi tagaiti kefina mage humaine “Vea alino haviya hinageꞌya fali haꞌno hu-matesia kanoe.” humaine.
REV 9:12 Keꞌnumoꞌya ali haviya humatesaya kanamoꞌa haꞌno hianagi avoꞌnio tolea tusiꞌa kana yatala falote hisaꞌa yafena nahau hulamatoe.
REV 9:13 Sikisi (6) molia ensole kanomoꞌa agaiꞌa ufena higeꞌna havugeno Anumaya Koti auleꞌma kanileta yafateti talo humale folamomo foꞌa (4) atupale hanea avela foꞌa (4) avepitila agea aigeꞌna havimainoe.
REV 9:14 Havugeno ufema atafa hulinea ensole kano sikisi (6) molia ensole kanomofena mage huno hie “Foꞌa (4) ensole vayala, Yufaletisi titegama nofiꞌma humatenaya ensole vayala kalu heka amatalegeꞌya viho.” huno hie.
REV 9:15 Higeno “Anumaya Kotiꞌa na kafufina na ikatela na kanafina na aovaꞌa ani foꞌa (4) ensole vayaꞌmoꞌya mukiꞌa ma mopafi veaꞌmogamina tagufafi (3) ali fako humalageno anifiti nago haupa kaiyagama mainesaya veala hamaesagetama faligahae.” huno huteno amatafa hu-lineane. Ani kanamoꞌa efalote higeno ani ensole vayala kalu heno amatalegeꞌya ani kavala nehae.
REV 9:16 Ani kavaꞌma nehisageꞌya amaya huꞌya hamaesaya ati vayaꞌamia tu hataleti milioniꞌa (200,000,000) hosimo agupifi mainaya ati vayala mainae huꞌya hageꞌna nagaya Yoniꞌna havimainoe.
REV 9:17 Haviteꞌna himona kana yapi amakoana ani hosimogami amakupifima mainaya vayaꞌmoꞌya hamaifiꞌyafafina halegula haesaꞌene okoꞌene kaniletaꞌene halegula aye hai-linageno hosimogami amanutela kaveꞌage afua laiyoni afumogami amanu kana hutegeno amavayafitila atamoꞌene halinamoꞌene hiꞌmanaꞌage atama nelea yafaꞌyagaene falote huno mukiꞌa ma mopafi veaꞌmogamina tagufafi (3) ali fako hu-malageno anifiti nago haupa kaiyaga veaꞌmogamina ani ataene halinamoꞌene hiꞌmanaꞌage atama nelea yafaꞌyagaletiꞌene hamayageꞌya fali-mainae.
REV 9:19 Hosimogamina hamaesaya tokiyaꞌamia amavayafiꞌene amaigoꞌyafiꞌene hanegeno amaigoꞌyamoꞌa osifaꞌve kana huno akafu amanisia amanuna hanegeꞌya veala akafu amanigeꞌya hamae-mainae.
REV 9:20 Anima tusiya huno ali haviya hia yamoꞌma ohamaenea veaꞌmoꞌya agayanagi kefo yama humainaya yafena amakuꞌa aiyahae nohae. Kanileta yafatetiꞌene siliva yafatetiꞌene haesa yafatetiꞌene afa yafatetiꞌene yosaletiꞌene talo hu-malenaya yafena “Anumayati mainae” huꞌya hayanagi ani yaꞌyaga amaulaga oꞌageꞌya kea ohaviꞌya kama vai oꞌayeꞌyama nehaya afa anumayamo-gamiene Kefo Avamuꞌmogami amakiene alisaga huꞌya “Anumayati mainae.” huꞌya nehaya kavala oꞌatalenae.
REV 9:21 Oꞌataleneꞌya veaꞌma hamae nefaliya yaꞌene analisama nehaya yaꞌene kumaima nehaya yaꞌene musufa yama hu-liteꞌya nehaya yaꞌenefena amakuꞌa aiyahae nohae.
REV 10:1 Anile nagaya Yoniꞌna agoana nagola tokiyaꞌage ensole kanoa ikapinagati elavino egeꞌna age-mainoe. Ani ensole kanomo augafamona siaꞌmoꞌa alino anoꞌvai-tegeno anutela fulagenaꞌmoꞌa maleno kagi-mainegeno augosamoꞌa yagemoꞌma hia kava huno aivasa nehigeno tole aiyamoꞌa ata anefeꞌmo nehia tunage yosa kana nehigeno emaine.
REV 10:2 Egeꞌna agogeno nagola osi avona ayapi hanegeno tamaga aiyamoꞌa hagelimo agupile ayegeno haoga aiyamoꞌa mopafi ayegeno huteno aye hala hale humaine.
REV 10:3 Humaineno agema aiyana laiyoni afumoꞌma vale vale nehia avamete huno keha keha nehigeno seveniꞌa (7) akali kalu ko nelino tusiya huno monagemoꞌa humaine.
REV 10:4 Seveniꞌa (7) akali kaluma hia kea haviteꞌna avopi ago kaegahe huanagi ikapinagati nago kea falote huno mage huno higeꞌna havue “Seveniꞌa (7) akali kaluma hia kea avopina okaeka fala-kilio.” huno higeꞌna havue.
REV 10:5 Havugeno timo agupileꞌene mopafiꞌenema aiya aye hala halema hu-mainegeꞌna agoa ensole kanomoꞌa tamaga ayana ikate alisaga hie.
REV 10:6 Huteno mage hie “Haimuꞌene kanogino Anumaya Kotiꞌa mukiꞌa kanafina maige maige huno ikaꞌene ikapinaga hanea yaꞌene mopaene mopafima hanea yaꞌene hageliꞌene hagelipima hanea yaꞌyagaene talo hu-malenea kanomo agile tamage nehue. Anumaya Kotiꞌa nagoꞌene agava omaigahigi seveni (7) molia ensole kanomoꞌa agaiꞌa ufena hugahe nehinageno Anumaya Kotiꞌa nayoma falakino hanea kea, agaiꞌa aliꞌyama ali-mainaya amaune vayaꞌma hamapai-mainea kemoꞌa falote huno tamage hugahie.” huno hie.
REV 10:8 Higeꞌna hagoteno ikapinagatiꞌma higeꞌna havua kemoꞌa eteno nagoꞌene mage huno hie “Hagelimo agupileꞌene mopafiꞌene aiyama aye hala hale huno heti-maiya ensole kanomo ayapima hanea ali vakaye-linea avona kagaya molio.” huno hie.
REV 10:9 Higeꞌna ani ensole kanomote vuaꞌamoꞌna mage huꞌna hue “Kagaya ani osi avo omana namio.” huꞌna hugeno mage huno nahapaiye “Kagaya alika no. Nesanana kavayafina tumemo timoꞌma hia kava huno hagaꞌage hugahianagi nakaisanana kaipafinaga atuꞌage hugahie.” huno hie.
REV 10:10 Higeꞌna ani osi avona ensole kanomo ayapiti aliꞌna nogeno navayafinaga tumemo timoꞌma hia avamete huno hagaꞌage hianagi neꞌnama nakauvana naipafinaga atuꞌage humaine.
REV 10:11 Higeꞌya Yoninia mage huꞌya nahapaiye “Kagaya nagoꞌene alu amaugafa kalimai veaꞌnene, alu kote kote mainaya veaꞌnene, alu make lu make neꞌaiya veaꞌnene ala sauve veaꞌnenefena kaune kea laga huka hamapaigane.” huno nahapaiye.
REV 11:1 Nago kanomoꞌa maleꞌna agege gege hisua ayopa kana kaꞌyona namiteno mage hie “Kagaya hetika Anumaya Koti mono noꞌene* kae salamana nehaya folamoleꞌene mo maleka agege gege huka hapalika ago. Ani nopina Anumaya Koti agima alisaga nehaya veala hapalika ago.
REV 11:2 Hapaligananagi malagama hanea mopa* maleka agege gege huka ohapalio. Ani kaiyaga Anumaya Koti kema nohavisaya veaꞌmogami amamineanagiꞌya tagufa (3) kafuene sikisiꞌa (6) ikaꞌene ani veaꞌmoꞌya Anumaya Koti kumala alu aotage kuma meli haviya hugahae.
REV 11:3 Nehisageꞌna nagaya tolea nagai kema huhaleꞌana hisaꞌa kanolatana tokiyaꞌnia anamisugeꞌana kayavo kena fai-lineꞌana tagufa (3) kafuene sikisiꞌa (6) ikaꞌene nagai kea huhaleꞌana hugaꞌe.” huno hie.
REV 11:4 Ani lole kanolatana ma mopafi kava humainea Anumayamo aule heti-mainaꞌana tole olivi yosa kana huteꞌana tole kaꞌni kana humainaꞌe.
REV 11:5 Nagoꞌa veaꞌmoꞌya ani kanolatana ali haviya hugahema hisagenoꞌa ani kanolatamogani anavayafitila atamo aikalu huno kame veaꞌania temasagalisigeꞌya faligahae. E, anakaiꞌma ali haviya hunatesaya veaꞌmoꞌya faligahae.
REV 11:6 Ani lole kanolatamo-gania tokiyaꞌanileti “Kola oꞌaiyo.” huꞌana hisaꞌageno kema huhaleꞌana hisaꞌa kanafina kola oꞌaigahie. Tifema “Kolamaꞌage huo.” huꞌana hisaꞌagenoꞌa aniꞌa hugahie. Anakesama havisaꞌa kanafina “Tusiꞌa kana yaꞌene kaliene falote huo.” huꞌana hisaꞌagenoꞌa ma mopafi veala nagoꞌene nagoꞌene huꞌana hamaegaꞌe.
REV 11:7 Hamaegaꞌanagi Anumaya Kotiꞌma anaminea kea hu haꞌno hutesaꞌageno kefo afai afumoꞌa ayola omaleno afepinaga tavi-mainea komufinagati ehaino me hanaesigeꞌana faligaꞌe.
REV 11:8 Falisaꞌageno anaugafamoꞌa ala kumaꞌmo kateꞌma, Anumayaꞌanimona Yisasina yafaga yosaleꞌma haeꞌya asai-malenaya kumaꞌmo, yegegate malegahae. Avame kefima hu-maleꞌya nehaya ala kumaꞌmo agia Sotomuene Isipienene huꞌya nehae.
REV 11:9 Falisaꞌa anaugafa yegegate tagufa (3) kanaene ani kanamo yagemoꞌa amuꞌnote eneꞌvigeꞌya nagoꞌa veaꞌnea alu kote kote veaꞌnene, alu make lu make neꞌaiya veaꞌnene, alu maugafa lu maugafa kalimai veaꞌneyagaene, ani kanolatamo-gani anaugafa ageme-geme vayanagi nagoꞌa veaꞌmoꞌya aliꞌya hevainategahe hayanagi ani veaꞌmoꞌya “Aꞌao.” huꞌya hageꞌya aliꞌya hevai oꞌanatenae.
REV 11:10 Hevai oꞌanatenagi ani kanolatamogania mukiꞌa kotega veaꞌma tusiya huꞌana ali haviyama hu neꞌamataꞌa kanolatama faliꞌa yafenagiꞌya tusiya huꞌya musena nehuꞌya muse yana amafaluꞌamimo-gamina momami memami hugahae.
REV 11:11 Hugahagi tagufa (3) kanaene ani kanamo yagemoꞌa amuꞌnote evia kanamoꞌa haꞌno hutegeno Anumaya Kotiꞌa ani kanolatamo-gani anaugafafi hanaimula huvainategeꞌana ani kanolatana eteꞌana hetiꞌageꞌya mukiꞌa veaꞌmoꞌya ani yana agageno amamaꞌyoa aigeꞌya kolia humainae.
REV 11:12 Koli nehuꞌya haviyana ikapinagati ala kegefafiti ani kanolatafena mage huno hie “Tanakaya ehaitana eꞌo.” huno higeꞌya kame veaꞌanimoꞌya age-mainageꞌana siapi hai-faleꞌana ikapinaga hai-mainaꞌe.
REV 11:13 Hai-mainaꞌa anayufina tusiꞌa imila aliteno ani ala kumakefa teniꞌafi (10) ali fako hu-malageno anifiti ani imiꞌmoꞌa nago kaiyaga ali haviya higeno seveni tauseniꞌa veaꞌne (7,000) hamaegeꞌya fali haꞌno humaine. Naꞌa hu-mainayafe ofaliꞌyama afaꞌa mainaya veaꞌmoꞌya tusiꞌa koli huteꞌya ikapinagama mainea Anumaya Koti agia alisaga humainae.
REV 11:14 Tole kana yana ago haꞌno hianagi avoꞌnio nagoꞌke kana yana aupa kanafi falote hugahe higeꞌna nahau hu nelamatoe.
REV 11:15 Anile seveni (7) molia ensole kanomoꞌa agaiꞌa ufena higeꞌna havugeno ikapinagati nagoꞌa veaꞌmoꞌya ala kegefafiti mage huꞌya humainae “Anumaya Kotiꞌene taugafama aligatisiafene huno hutenea kanoene ma mopafi kava veaꞌmogamina ago amakasaꞌageꞌya anaiyafinaga mainayanagino Anumaya Kotiꞌa agola maige maige huno kava yagaigahie.” huꞌya humainae.
REV 11:16 Anile Anumaya Koti aule hanea sialeꞌma mainaya vayala tueti foꞌa (24) kava vayaꞌmoꞌya mopafi asaga hu-laviꞌya amakoꞌya ye-maineꞌya Anumaya Koti agia alisaga huꞌya mage hae
REV 11:17 “Vae Anumaya Kotigae tusiꞌa tokiyakaꞌa haneanagika nayona mainananagika menia mainananagika tusiꞌa tokiyakaleti aepa heka mukiꞌa yatela kava neꞌyagaina yafe tagaya kagaifena tusiꞌa musekaꞌa nehune.
REV 11:18 Kagai kema nohavia veaꞌmoꞌya kagaifena amaipa kafa henegatayafe kagaya kaipa kafa hemateka mukiꞌa fali-mainaya veaꞌnema kaiyeke humateka kefo yaꞌamimo anonaꞌamia amamisana kanamoꞌa ago falote humaine. Ani kanafina kagai kema haviꞌya amakupi malenaya veaꞌnene kagai amaune veaꞌnene mukiꞌa kagai kagima alisaga huꞌya kaiyafinagama nemaiya veaꞌnene ala amakima hanea veaꞌnene osi amakima hanea veaꞌnene kanale anona yaꞌamia amamigane. Amamiteka nagoꞌa veaꞌmoꞌya ma mopafi veaꞌmogamima ali haviya huneꞌamataya veaꞌmogamina kefo yaꞌamimo anonaꞌamia kagaya ali haviya humategane.” huꞌya humainae.
REV 11:19 Hageno Anumaya Koti nona ikapinaga hanea mono nona yaki-talageno Anumaya Kotiꞌma alino hagelafimatenea kema hanea pokisia ani mono nopina fufu yate hanegeꞌya neꞌagageno anile ala agegefa neꞌaigeno monagemoꞌa tusiya nehigeno imila neꞌaligeno koꞌmopamoꞌa talagufe-lavino aimaine.
REV 12:1 Nagola tusiꞌa tokiyaꞌage avame yana ikapinaga falote hie. Nago aꞌmoꞌa mainegeno kenaꞌamoꞌa yege aumona ayeno auꞌvai-maigeno ikamoꞌa aiyafinaga hanegeno anutela tuelufuꞌa (12) kaꞌnefimoꞌya tumano ku kana huno vai-line.
REV 12:2 Ani aꞌmoꞌa aipaene maineno inamu ya alitegeno agata aigeno avovo humaine.
REV 12:3 Nehigeno nagola tokiyaꞌage avame yana ikapinaga falote hie. Nagola tusiꞌa haesa osifaꞌve mainegeno seveniꞌa (7) anuna hanegeno teniꞌa (10) aveꞌyaga anuꞌyagafina hanegeno seveniꞌa (7) ala sauve kanomo tumano kuꞌyaga ani avetela vai-line.
REV 12:4 Ani osifaꞌvemoꞌa ikateꞌma hanea kaꞌnefiꞌyaga tagufafi (3) ali fako hu-malageno anifiti nago haupa kaiyaga kaꞌnefiꞌyaga aigoꞌyaleti aye tafai-talegeno mopafi elavi-mainegeno ani osifaꞌvemoꞌa aꞌmo aule hetino nafaꞌneꞌama neꞌatesiana ani havi osifaꞌvemoꞌa haeno nesiafene huno agava maine.
REV 12:5 Mainegeno ani aꞌmoꞌa ne nafaꞌnema neꞌateana ani nafanemoꞌa haenaga ala kano maiteno aeni ayopaꞌa ali-lineno mukiꞌa ma mopafi veate tokiyaꞌage huno kava yagaisia nafaꞌnema neꞌateana ani nafaꞌnea aupaꞌa hafaleꞌya avalesaga huꞌya anafinaga Anumaya Koti siale atenae.
REV 12:6 Atageno ani aꞌmoꞌa nafaꞌnema atetenoꞌa faleno vigeno Anumaya Kotiꞌa maisia kumala talo tala hutegeno kaꞌme kotega viaꞌamo tagufa (3) kafuene sikisiꞌa (6) ikaꞌene Anumaya Kotiꞌa yagaitene.
REV 12:7 Naꞌa higeno ikatela tusiꞌa tua falote humaine. Ensolemo-gami kava kanoꞌamimo agia Maikoloe ensole vayaꞌyagaene tokaeꞌya havi osifaꞌvene agaiꞌa Kefo Avamuꞌyagaene tusiꞌa tua humainae.
REV 12:8 Tuma hayanagi havi osifaꞌvemo tokiyaꞌa omalegeꞌya asaga hu-mainageꞌya avaleꞌya ikapinagati avaleꞌya hagaꞌyu hu-talegeno nagoꞌene anile omaigahie.
REV 12:9 Ani nayoma nemaiya ala osifaꞌvemo agia Sataniꞌe nehaya kanomoꞌa ma mopafi veafena havigegeꞌya huno ayemavataga hugeno omai kanoene agaiꞌa avamuꞌyagaene ikapinagatila amavaleꞌya hagaꞌyu humatalageꞌya ma mopafina elavi-mainae.
REV 12:10 Elavi-mainageꞌna havugeno ikapinaga ala kegefafiti mage huno hie “Anima avaleꞌya hagaꞌyu hu-talaya kanomoꞌa tafu-tagana-gamina mukiꞌa kanafina humatege humatege huno mage hie ‘Ani kefo yana nehae.’ huno Anumaya Koti aufima hufalote nehia kanomona ikapinagatila ago avaleꞌya hagaꞌyu hu-talenaya yafe Anumayatimoꞌa tagu tamema aligatisia yamoꞌa ago falote humaine. Anumaya Kotiꞌa agaiꞌa tokiyaꞌa mukiꞌa veaꞌnea ago amave-liteno agaya ala sauve kava kano maine. Maineanagino agaiꞌa tamaugafa aligatisiafene huno hutenea kanomo kava yagaisia tokiyaꞌa hane.
REV 12:11 Haneanagino Sataniꞌa tafu-tagana-gamifena ‘Naꞌa kefo yana nehae.’ huno ali falotela hianagi tafu-taganaꞌya Yisasiꞌa, Sipi sipi nafaꞌnemo kolamoꞌma tavi-mainea kene Anumaya Koti kemoꞌene huhaleꞌya humainaya yateti Satanina agase-mainayanagi amakaiꞌami amaugafahena amakesa ohaviꞌya falisaya yafe kolia nohae.
REV 12:12 Naꞌa humainaya yafe ikamogaene ikapinaga mainaya veaꞌnene musena hiho. Musena hugahayanagi Satanina ikapinagatila avaleꞌya hagaꞌyu hu-talageno ma mopafina elavi-mainegeno ‘Aupa kana kanoꞌa maigahue.’ huno agesa havimainea yafenagino aipamoꞌa ata neleanagiꞌna avoꞌnio ma mopafiꞌene hagelipiꞌene mainaya yaꞌyagahena nahau hugi kaꞌyeho.”
REV 12:13 Ala osifaꞌvea ago avaleno hagaꞌyu hu-talegeno ma mopafi elavinoꞌma emainea yana ageteno ani ne nafaꞌnema atenea aꞌmona ali haviya hutesia yafe mo nati-maine.
REV 12:14 Mo natianagi Anumaya Kotiꞌa ani aꞌmona aluga aluga haopalega ala hakikimo agekoꞌna talo huno ategeno ani aꞌmoꞌa haleno kaꞌme kotega, Anumaya Kotiꞌa talo tala humalenea kumate umainegeno Anumaya Kotiꞌa tagufa (3) kafuene sikisiꞌa (6) ikaꞌene yagai-mainegeno ani havi osifaꞌvemoꞌa ali haviya hutesia tokiyaꞌa omalene.
REV 12:15 Omaleneno ani osifaꞌvemoꞌa avayafitila muvali-talegeno tavia timoꞌa tusiꞌa ti hogino aiyayeno laviaꞌamo ani aꞌmona asaga huno nakaino ali haviya hisie huno ani kavala humaine.
REV 12:16 Naꞌa hianagi ani aꞌmona aya hisia yafe mopamoꞌa eko alino avaya aka hu-mainegeno ani osifaꞌvemo avayafitiꞌma lavia timoꞌa ani eko kapi tavi fale haꞌno humaine.
REV 12:17 Tavi haꞌno hianagi ani osifaꞌvemoꞌa aꞌmofena aipa kafa heteteno ani aꞌmo aginagomoꞌyaene tua hugahe umaine. Ani veaꞌmoꞌya Anumaya Koti kahegi kema haviꞌya akaveꞌma nemaleꞌya Yisasi humainea kema atafa hu-linaya veaꞌnene tua hugahe umaine.
REV 12:18 Ani osifaꞌvemoꞌa hagelimo agegayalega hetino maine.
REV 13:1 Osifaꞌvemoꞌa hagelimo agegayalega hetino mainegeꞌna nagaya Yoniꞌna agogeno nagola kefo afai afua hage lipiti vaꞌyi higeꞌna age-mainoe. Ani kefo afai afumo anumoꞌa seveniꞌa (7) anuꞌyaga hanegeno teniꞌa (10) aveꞌyagamo anupitila hai-mainegeno ani aveꞌyagamotela ala sauve kanomo tumano kuꞌyaga teniꞌa (10) tumano ku vailine. Ani seveniꞌa (7) anutela kefo afai afumo agia hanegeno ani agiyagamoꞌa Anumaya Kotifena kamuge hatageꞌya vaiteꞌya hu-haviya hutaya agiyaga kae-malageno hane.
REV 13:2 Ani kefo afai afumona agoana maꞌa humaine. Nagola afai pusimo agia lepatie nehaya afu kana huno aiyamoꞌa nago ala afai kalamo agiꞌa peamo aiya kana humaine. Avayamoꞌa laiyoni afumo avaya kana hu-mainegeꞌna age-mainoe. Agogeno ani ala osifaꞌvemoꞌa agaiꞌa tokiyaꞌaene ala kava hisia siaꞌaene ani kefo afai afumona amine.
REV 13:3 Amigeno ani kefo afai afumona nago anuna ago hae-malenaya falitesea afugula haneanagi amuna ageno ago eteno kanale hutene. Kanale hutegeꞌya ageteꞌya mukiꞌa ma mopafi veaꞌmoꞌya ageteꞌya amamaꞌyo aigeꞌya ani kefo afai afumona akave umainae.
REV 13:4 Ala osifaꞌvemoꞌa agaiꞌa tokiya kefo afai afumona aminea yafe mukiꞌa veaꞌmoꞌya ani kefo afai afumofena “Alati maine.” huꞌya agia alisaga humainae. Kefo afai afumo agiene alisaga nehuꞌya mage huꞌya hae “Hana kanomoꞌa kefo afai afumo tokiyaꞌamoꞌma hia kavala huno hugahie? Ta agaiꞌenema tuma hisia tokiyaꞌa hane?” huꞌya hae.
REV 13:5 Hageno Anumaya Kotiꞌa mage huno hie “Atalegeno tagufa (3) kafuene sikisiꞌa (6) ikaꞌene kava yagaino.” huno higeno ani kefo afai afumoꞌa agaiꞌa agia alisaga huno Anumaya Kotifena tusiya huno kamugea hatageno vaitene.
REV 13:6 Ani kefo afai afumoꞌa avaya aka-naka huno Anumaya Kotina kamugea hu neꞌateno Anumaya Koti agiene nemaiya kumaꞌaene ikapinagama mainaya veaꞌaenena hu-haviya humatene.
REV 13:7 Hu neꞌamategeno Anumaya Kotiꞌa atalegeno Yisasina amakuꞌa aminaya veaꞌnene tua huno amakaseteno mukiꞌa alu kote alu kote veaꞌnene, alu make lu make neꞌaiya veaꞌnene, alu maugafa lu maugafa kalimai veaꞌnene, kava humatesia tokiya amigeno kava yagaino maine.
REV 13:8 Kava yagai-maineanagiꞌya mukiꞌa ma mopafi veaꞌmoꞌyama agia alisaga hugahayanagi maige maige hisaya hamaimuꞌma hanea veaꞌmogami amakima hanea avopi amaki kae-malenea veaꞌmoꞌya agia alisaga ohugahae. Ani avona Anumaya Kotiꞌa ma mopama taloma ohunea kanafina mage huno hu-maineane “Nagai Sipi sipi nafaꞌnea, Yisasiꞌa, faligahie.” huno hutenea kanomo avone.
REV 13:9 Nagi tamakesama hanesimo-gatama mani kea havilama hutama hiho.
REV 13:10 Anumaya Kotiꞌa “E.” huno hisigeꞌya nagoꞌa veaꞌmoꞌya kina nopina ugahae Anumaya Kotiꞌa “Naepe kaꞌyoteti haetama falimato.” huno hisigeꞌya nagoꞌa veaꞌmoꞌya naepeleti falilamategahae. Ani auꞌava yamoꞌma falote hisigetama Anumaya Koti kea haviꞌya amakupiꞌma malenaya veaꞌmogatama tokiya vaitama mani kea ali lokiya vaitama atafa hu-litama maiho.
REV 13:11 Nagaya Yoniꞌna agogeno nago kefo afai afumoꞌa* mopamo agusafiti evaꞌyi humaine. Ani kefo afai afumo anupina tole avela, sipi sipi nafaꞌnemo ave kana ave haneanagi agema aiyana tusiꞌa puku pukumo age kana huno agea aimaine.
REV 13:12 Neꞌaigeno hagote kefo afai afumoꞌa tokiyaꞌa amigeno ani himamuleti mukiꞌa ma mopafi veaꞌmogamitela kava humaineno anima nago kefo afai afumoꞌa mukiꞌa ma mopafi mainaya veaꞌmogamifena mage huno hie “Hagote kefo afai afumona anupina haeꞌya falitesaya kava hageno amuna ale-maineanagino eteno kanale hutenea afumo agia alisaga hiho.” huno humaine.
REV 13:13 Nehuno anima nago kefo afai afumoꞌa mukiꞌa aluꞌa augafa tokiyaꞌage avame yana nehuno atamofena “Ikapinagati elavio.” hunoꞌma hiana veaꞌmoꞌya neꞌagageno atamoꞌa ikapinagati mopafina elavi-maine.
REV 13:14 Elavigeno hagote kefo afai afumoꞌa “Naꞌa huo.” huno tokiya amigeno nago afai afumoꞌa tokiya avame yama nehia yateti veala aye mavataga hiaꞌamo ani veafena mage huno humaine “Tamakaya hagote kefo afai afua, naepeleti honomu ayageno faliteno eteno mainea afumo agia alisaga hisaya yafe yosaleti avameꞌname hutama amena talo hiho.” huno humaine.
REV 13:15 Higeꞌya taloma hayana Anumaya Kotiꞌa atalegeꞌya nago kefo afai afumo amena yosaleti talo humalaya kefo afai afumo amela haimula amigeno aepa heno nagoꞌa veaꞌmoꞌya agai agima alisaga nohageno haegeꞌya fali-maine.
REV 13:16 Ani kefo afai afumoꞌa mage huno hie “Mukiꞌa veaꞌmogamina, amakima omale veaꞌnene, amakima hanea veaꞌnene, miyaꞌami hanea veaꞌnene, miyaꞌamima omale veaꞌnene, nofipi maineꞌya miya oꞌali aliꞌya neꞌaliya veaꞌnene, amakaiꞌami miya alisaya aliꞌyama neꞌaliya veaꞌnene tamaga amayatelo hamanilelo ohananesia avona kaemateho.” huno higeꞌya kasagoꞌya veaꞌmo-gamina ani avomoꞌa hamanileti kae-male kae-male humaine.
REV 13:17 Higeꞌya ani avona hagote kefo afai afumo agio ifi ani agimo napamao amaugafaleꞌma ani alegana yama omalenesaya veaꞌmoꞌya nago yana alu veaꞌneletila miya ohigeꞌya amakaiꞌami yana alu veaꞌmoꞌya miya ohugahae.
REV 13:18 Nagoꞌa veaꞌma kanale havi haviꞌyaꞌami hanea veaꞌmoꞌya ani hagote kefo afai afumo napamaꞌa hapaliꞌya havilama hisae. Ani napana nago kanomo agimo napamaꞌa hane. Ani agimo napana sikisi hataleti sikisiti sikisiꞌa (666) napamaꞌa hane.
REV 14:1 Nagaya Yoniꞌna agogeno Anumaya Koti Sipi sipi nafaꞌnea Saiyoni* agoꞌyale hetino mainegeꞌya kasagoꞌya veaꞌmoꞌya vani hataleti foti fo tauseniꞌa (144,000) veaꞌmoꞌya agaiꞌenena ani agoꞌyale hetiꞌya mainae. Ani veaꞌmogami hamanilela Sipi sipi nafaꞌnemo agiene agaiꞌa Nefa agiene kae-malenae.
REV 14:2 Nagaya ikapinagati kanale age aiya agea havugeno ti anamoꞌma asaga hu-lavino nelavino agema neꞌaiya kava huno neꞌaino monagemoꞌma hia kava higeꞌna havimainogeno kasagoꞌya veaꞌmoꞌya gitama neꞌaigeno agema neꞌaiya kava higeꞌna havimainoe.
REV 14:3 Havugeꞌya ani veaꞌmoꞌya Anumaya Kotiꞌma mainea siamo auleꞌene foꞌa (4) hamaimuꞌene anagaꞌmo-gami amauleꞌene kava vayaꞌmo-gami amauleꞌene hetiꞌya maineꞌya haya yagamea nagoꞌa veaꞌmoꞌya ohavinaya yagamea, haegafa yagame humainae. Ani yagame haya veaꞌnea ma mopafi mainageno Anumaya Kotiꞌa amaku amamema aligati-mainea veala vani hataleti foti fo tauseniꞌa (144,000) veaꞌmoꞌya amakaiꞌamige ani yagame havimainae.
REV 14:4 Ani veaꞌmoꞌya aꞌnea amavayu huꞌya ofaeyageno amakuꞌamoꞌa oniꞌyaꞌagela ohigeno Sipi sipi nafaꞌnemoꞌa vai neꞌyageꞌya ani veaꞌamoꞌya akavela vai neꞌayaye. Anumaya Koti Sipi sipi nafaꞌnemoꞌa faliteno kefo yaꞌamimo aigagimatenea yapiti miya humateteno ma mopafi veaꞌmogami amuꞌnopiti hagoteno amaugafa aligati-mainegeno Anumaya Kotiteꞌene Sipi sipi nafaꞌnemoteꞌene amavaleno amate-maineane.
REV 14:5 Amategeꞌya ani veaꞌmoꞌya havige ohu vealagiꞌya nagoꞌa kefoꞌamia omaleneane.
REV 14:6 Nagaya agoana nago ensole kanomoꞌa ikaꞌmo amuꞌnote haleno vai neꞌayeno agola hanege hanege huno nehanea kanale mono kea alino mukiꞌa ma mopafi mainaya veaꞌmogamina alu kote alu kote veaꞌnene, alu make lu make neꞌaiya veaꞌnene, alu maugafa lu maugafa kalimainea veaꞌnene hamapaisia yafe vai neꞌaye.
REV 14:7 Vai-yeno ala kegefafiti mage huno hie “Anumaya Kotiꞌa veaꞌmogami alino kaiyekema humatesia kanamoꞌa ago falote hu-mainegi tamakaya koli nehutama Anumaya Koti agia alisaga hiho. Anumaya Kotiꞌa ikaꞌene mopaene hageliꞌene mopafitiꞌma kapai nehagea tiꞌene agaiꞌa talo hu-malegetama agai agia alisaga hiho.” huno humaine.
REV 14:8 Hume hume neꞌvigeno akavelega nago ensole kanomoꞌa neꞌeno mage huno humaine “Ala kumala Papiloni* kumala tusiya huꞌya ago aliꞌya tagape aitalae. Papiloni veaꞌmoꞌya mukiꞌa kotega veafena mage huꞌya humainae ‘Tagayama huna kava hutama kumai yana hagaꞌage huno havili kana humainegi afaꞌa neho.’ huꞌya hageꞌya ani kumai yana maiꞌya humainae.”
REV 14:9 Ani lole ensole kanolaꞌmogani anakavela nago ensole kanomoꞌa neꞌeno ala kegefafiti mage huno hie “Nagoꞌa veaꞌmoꞌya kefo afai afuene amayateti avave-name huꞌya talo hu-malenaya ameꞌeneꞌma agima alisagama nehuꞌya ‘Ani kanomo agia nayatelo nahanilelo agia aigaꞌmaelato.’ huꞌyama hu-mainaya veaꞌmogamina Anumaya Kotiꞌa haima neꞌvaiya yana aligahae. Anumaya Koti aipamoꞌa haviya hinageno hai vaimateno ata nelenageno atuꞌage huno havili kana higeno takino amamisigeꞌya ani veaꞌmoꞌya ani havilina negahae. Nesayana alu aotage ensole veaꞌmogami amauleꞌene Sipi sipi nafaꞌnemo auleꞌene hiꞌmanaꞌage ata nelea yafaꞌyaga hanea atafi mainesageno amaleno asagalisigeꞌya tusiya huꞌya amakata aigahie.
REV 14:11 Mukiꞌa kanafina ani amakatama aige aige hisia atamo halinamoꞌa taga ohugahianagino agola haige haige huno haigahie. Haigeꞌya ani veaꞌmoꞌya kefo afai afuleꞌene amayateti avame-name huꞌya talo hu-malenaya amemaꞌaene agia alisaga nehuꞌyama ani kanomo agima amaugafale hanesia veaꞌmoꞌya mukiꞌa kanafina agola kegeꞌene felugaene amaugafa amakata aige aige hinageꞌya haꞌno ohugahie.” huno humaine.
REV 14:12 Havisayana tamakaya Yisasina tamakuꞌama aminaya veaꞌmogatama Yisasife havitama tamakupi malenaya kea atafa hu-linetama Anumaya Koti kahegi kema akave maletama mailokiya vaitama maiho.
REV 14:13 Nagaya Yoniꞌna ikapinagati nago kea havugeno mage huno hie “Kagaya kea maꞌa huka kao mukiꞌa Anumayamoꞌene ailokaeꞌya nemaiya veaꞌmoꞌya menima aepa heꞌya falisaya veaꞌmoꞌya tusiꞌa muse hugahae.” huno humaine. Higeno Alu Aotage Avamuꞌmoꞌa mage hie “E, aliꞌya ali-mainaya yana neꞌataleꞌya maifalu hisageꞌya kanale kavaꞌma hu-mainaya yamoꞌa amakaiꞌene ugahae.” huno humaine.
REV 14:14 Nagaya agogeno nago efeꞌage siatela nago vemoꞌa ikapinagati emainea kanoa vayaꞌmo atenea kano avamete hia kanoa siate maineno anute kava vayaꞌmogami tumano kula, kanileta yafateti talo humale tumano kula vaiteno ayapina aveꞌneꞌne huno fagagi-mainea naepe kaꞌyona ali-line.
REV 14:15 Ali-linegeno nago ensole kanomoꞌa Anumaya Koti nopiti hati-lavino neꞌeno ani siateꞌma maiya kanohena ala kegefafiti mage huno hapaiye “Mukiꞌa ma mopafi kaveꞌmoꞌa afule-mainegeno ani kave alisuna kana haneanagika kagayama ali-linana naepe fagagi humainea naepe kaꞌyotetila nesateꞌma humainea kavela alio.” huno hie.
REV 14:16 Higeno siateꞌma maiya kanomoꞌa fagagi-mainea naepe kaꞌyotetila mukiꞌa ma mopafima afule-mainea kavela hataga humaine.
REV 14:17 Nehigeno nago ensole kanomoꞌa ikapinaga hanea mono nopiti hati-lavino elaviaꞌamo agaiꞌenena aniꞌa huno tusiꞌa kaꞌyona fagagino aveꞌneꞌne huno naepe kaꞌyona ali-lino emaine.
REV 14:18 Neꞌegeno nago ensole kanoa ataleꞌma kava nehia kanogino afuma heꞌya negaeyaya folamole maineleti neꞌataleno emaine. Eaꞌamo fagagino aveꞌneꞌnea naepe kaꞌyoma ali-lia kanomofena ala kegefafiti mage huno hie “Mukiꞌa mopafi nofi alagayagamoꞌa ago afule-maineafe kagaya ani naepe kaꞌyokaꞌa alika ani nofi alagayaga mo hataga huka halaꞌya huo.” huno humaine.
REV 14:19 Higeno ani ensole kanomoꞌa naepe kaꞌyomaꞌa ali-lino ape huno mukiꞌa mopafima hanea nofi alagayaga hataga huno helafi-lino viaꞌamo veaꞌmoꞌya amaiyaletiꞌma aye lata-pageno timaꞌamoꞌma nelavia yafa yopa, Anumaya Kotiꞌa kefo yafena tusiya huno aipa kafa huteno kefo yama nehaya veaꞌmogamina anonaꞌamima amamisia ala yafa yopafi mo malene.
REV 14:20 Mo malegeno ala kumaꞌmona malaga ani nofi alagama aye lata-pegenoꞌa anima aye latapea kolamoꞌa tusiya huno lavino lavino laviaꞌamo timoꞌa hogino veaꞌmogami amayoꞌnaleꞌma nehaiya avamete huno hogino ayaꞌaya kotega tali hataleti (300) kilomita tavigeꞌna age-mainoe.
REV 15:1 Nagaya Yoniꞌna nagola tusiꞌa tokiyaꞌage alegana avame yana ikapinaga falote higeꞌna agoana maꞌa humaine. Seveniꞌa (7) ensole vayaꞌmoꞌya anile maineꞌya seveniꞌa (7) havi yatafana veaꞌmogami haenagalafa falote hisia ali haviya humatesia yana atafa hulinae. Anima ali haviya humatesia yana haꞌno hisigeno Anumaya Kotina aipamoꞌma ata nelea yana agola haꞌno hugahie.
REV 15:2 Nagaya agoana nagola hageli kotuna galasi kana huno alave alave nehigeno amuꞌnoꞌafina ata nelegeꞌna age-mainoe. Ani kotute mukiꞌa veaꞌmoꞌya “Kefo afai afuene amayateti talo hu-malenaya amefeꞌenena agia alisaga ohugahunagi. Agiene napamaꞌaene taugafalega okaegahae.” huꞌyama ani afumona agase-mainaya veaꞌmoꞌya ani hagelimo agegayale heti-maineꞌya Anumaya Kotiꞌma amaminea yaveꞌya atafa hu-lineꞌya yagamea humainae.
REV 15:3 Ani veaꞌmoꞌya Moseseꞌa Anumaya Koti aliꞌya kanomo yagamene Sipi sipi nafaꞌnemo yagamene huꞌya maꞌa humainae “Ala Anumaya Kotigae tusiꞌa tokiyakaꞌa haneanagika mukiꞌa humainana yamoꞌa kanaleꞌya huka talo hanageta tagaya neꞌagonageno tamaꞌyoa neꞌaiye. Mukiꞌa mopafi veaꞌmogamina ala sauve kanoꞌami maineka kava neꞌyagaika kagaikaꞌa auꞌava yakamoꞌa tamagelafa huno fatago humaine.
REV 15:4 Ala kanomogae kagaikaꞌage nagokeꞌmoga kefo yana ohuka alu aotage kanoma mainana yafena hana kanomo kagaifena kolikaꞌa ohugahie? Hana kanomo kagai kagia alisaga ohugahie? Mukiꞌa mopafi veaꞌmoꞌya kagaya fatago huka mainana auꞌava yakaꞌa ago age-mainaya yafe kagaitega eaꞌamoꞌya kagia alisaga hugahae.” huꞌya yagamefitila humainae.
REV 15:5 Yagamea nehageꞌna ikapinaga eteꞌna agoana mono nopina, kelamagema ali falote nehia nona, alu aotage seli nona yaki-mainegeꞌna age-mainoe.
REV 15:6 Neꞌagogeꞌya seveniꞌa (7) ensole veaꞌmoꞌya seveniꞌa (7) yaꞌyaga veaꞌma ali haviya humatesaya yama atafa hu-linaya ensole vayaꞌmoꞌya mono nopitila hati-laviꞌya kumatega emainae. Ani veaꞌmoꞌya oniꞌya ohu kenamoꞌa alave alave huno efeꞌage humainea kena fai-lineꞌya kanileta yafateti talo humale nofila amaifiꞌyafale ayegalaki-lineꞌya emainae.
REV 15:7 Ageno foꞌa (4) hamaimuꞌene anagaꞌmogami amuꞌnopitila nago kanomoꞌa eaꞌamo seveniꞌa (7) yopa kanileta yafateti talo humale yopayaga ali-lino amamine. Ani yopayagafina Anumaya Kotiꞌa maige maige huno mainea kanomona haima vaigeno aipamoꞌa atama nelea yana ani yopafina havate-maine. Havate-mainegeno alino seveniꞌa (7) ensole veala ani yopayaga me mamine.
REV 15:8 Me mamigeꞌya Anumaya Kotina tokiya hale yamaꞌaene himamuꞌaene halina kana huno ani mono nopina havate-maine. Havate-maineanagiꞌya nagoꞌa veaꞌmoꞌya ani nopinaga haiꞌya ofalenae. Ofalenayanagiꞌya seveniꞌa (7) ensole veaꞌmoꞌya anima seveniꞌa (7) ali haviya humatesaya aliꞌyaꞌamia ali haꞌno hutesageꞌya veaꞌmoꞌya eteꞌya ani nopinaga hai-falegahae.
REV 16:1 Naꞌa higeꞌna havuana ikapinaga hanea mono nopiti nagola tusiꞌa agegefa aigeꞌna havugeno seveniꞌa (7) ensole vayafe mage huno hie “Tamakaya Anumaya Kotina haima vaigeno aipamoꞌa atama nelea yana seveniꞌa (7) yopafi hanegi alitama mopafi mo aitagu-feho.” huno hie.
REV 16:2 Higeno hagote molia ensole kanomoꞌa viaꞌamo ani yopaꞌafima hanea yana alino mopafi mo aitagu-fegeꞌya kefo afai afumo avoma amaugafaleꞌma kae-malenea veaꞌmoꞌya ani kefo afai afumo amefena “Anumayati mainane.” huꞌya agima alisaga nehaya veaꞌmogamina tusiꞌa kele amamu amale-maine.
REV 16:3 Amamuna amalegeꞌya mainageno anile molia ensole kanomoꞌa yopaꞌafima hanea yana alino hagelipi mo laki-talegeno ani hagelimoꞌa falimainaya veaꞌmogami kolamoꞌma hia kava huteno mukiꞌa tipima mainaya kafayaga faliꞌya faluti-mainae.
REV 16:4 Falutigeno anile tagufa (3) molia ensole kanomoꞌa yopaꞌafima hanea yana ala tima nelavia tipiꞌene kapaiꞌma nehagea tipiꞌene taki-talegeno ani liꞌyagamoꞌa kolamaꞌage ti hapae-maine.
REV 16:5 Naꞌa higeꞌna havugeno titeꞌma kava yagai-mainea ensole kanomoꞌa mage huno hie “Anumaya Kotiga nayona mainananagika menia aniꞌa huka maineka kefo yana nohana Alu aotage kanogika kaiyekema humateka kefo yamo anonaꞌama hu-matana yana fatago huka nehane.
REV 16:6 Ani veaꞌmoꞌya kagaikaꞌa alu aotage veaꞌnene amaune veaꞌnekaene hamayageꞌya fali-mainae. Faligeno ani veaꞌmogami kolamoꞌma takilavi-mainea yafe kagaya ani kefo yaꞌamimo anonaꞌamia neꞌamaminanagiꞌya ani kola tima nesayana kagaya kanale kava hu neꞌmatane.” huno humaine.
REV 16:7 Higeꞌna havugeno afuma heꞌya kae salamanama hu neꞌataya folamoleti nago kemoꞌa falote huno mage hie “E, tamage mukiꞌa tokiyakaꞌa hanea Anumaya Kotiga kaiyekea fatago hulama huka hu neꞌamatana kano mainane.” huno humaine.
REV 16:8 Higeꞌna agogeno anile fo (4) molia ensole kanomoꞌa yopaꞌafitila yagefi ailaki-talegeno Anumaya Kotiꞌa atalegeno yagemoꞌa tusiꞌa amukoꞌage huteno mukiꞌa veala teno amasagali-maine.
REV 16:9 Amasagaligeꞌyagi veaꞌma kefo yamo anonaꞌamima amamisia tokiyaꞌama hanea Anumaya Koti agia aye haviya nehayanagiꞌya amakuꞌa aiyahae huꞌya Anumayamo agia alisaga ohunae.
REV 16:10 Ohageno faefu (5) molia ensole kanomoꞌa yopaꞌafima hanea yana kefo afai afumo siale taki-talegeno mukiꞌa ani kefo afai afumoꞌma kava humatenea kaiyaga tusiꞌa hani kigeꞌya agai veaꞌmoꞌya amaugafa amakatama aiya yafe amakaiꞌami amavefuꞌnafi hataga hatago huꞌya akafula ani-mainae.
REV 16:11 Neꞌanigeno amaugafaleꞌenena amamuna amaleno amakatama aiya yafena ikapinaga mainea Anumaya Kotifena kamuge hatageꞌya vaitayanagi kefo yama humainaya yafena amakuꞌa aiyahae ohunae.
REV 16:12 Aiyahae ohageno sikisi (6) molia ensole kanomoꞌa yopaꞌafima hanea yana tusiꞌa lina Yufaletisi lima nelavia tipi taki-talegeno ani limoꞌa taꞌneno hau huteno ala kakefa falote humaine. Higeno yagema vaꞌyi nehilegati ala Sauve vayaꞌma esaya kamoꞌa falote humaine.
REV 16:13 Falote higeꞌna nagaya neꞌagogeno tagufa (3) Kefo Avamula utu kana avamula nagola osifaꞌvemo avayafiti vaꞌyi higeno nagola kefo afai afumo avayafiti vaꞌyi higeno nagola havigegeꞌyama nehia aune kanomo* avayafiti vaꞌyi humaine.
REV 16:14 Vaꞌyi huteꞌya ani taliꞌa (3) Kefo Avamuꞌmoꞌya haiꞌya maineꞌya tokiyaꞌage avame yana nehuꞌya mukiꞌa ma mopafi Sauve vayateꞌma vayana ani vayala amavaleꞌya alitalu humategahe umainae. Tusiꞌa tokiyaꞌama hanea Anumaya Kotiꞌa ala tuma hisia kanafina Anumaya Kotiꞌene tuma hisaya yafe melitalu humatenae.
REV 16:15 Yisasiꞌa mage huno humaine “Haviho ‘Omegahie.’ hutama nehaya kanafina musufa kanomoꞌa neꞌea avamete kava huꞌna egahue. Egahuanagi ani kanafina kenaꞌamia omalenageꞌya alapaꞌagela maisaya veala amakayea ohisaya yafe menia nagaifema amakesa nehaviꞌya amaula ofaeꞌya kenaꞌamia fai-lisayana musena hugahae huꞌna nehue.” huno humaine.
REV 16:16 Utu kana Kefo Avamuꞌmoꞌya mukiꞌa kotegati ala Sauve veaꞌmogamina amavaleꞌya ayaꞌamoꞌya Yuta veaꞌmogami kefina Amagetoni huꞌya nehaya kumate melitalu humatene.
REV 16:17 Aupaꞌa seveni (7) molia ensole kanomoꞌa yopaꞌafima hanea yana ikate hanea yasifi taki neꞌa-talegeno ikapinagama hanea mono nopitila ala kegefa falote huno mage hie “Mukiꞌa yana hai haꞌno hie.” huno humaine.
REV 16:18 Ani kea nehigeno aulumaya kotino ute ete higeno monagemoꞌa tusiya huno agea neꞌaigeno tusiꞌa imila ali-maine. Veaꞌmoꞌya ma mopafima mainaya kanafina aniꞌa augafa imila aligeꞌya oꞌagenayanagino mukiꞌa imila agaseno tusiꞌa imikefa ali-maine.
REV 16:19 Aligeno ala kumala Papilonia* ali haviya huno tagufafi (3) ali fako higeno mukiꞌa ma mopafi ala kumaꞌyagaene alino haviya humatene. Anumaya Kotiꞌa Papilonia ala kumapi maineꞌya kefo yama nehaya veafena agela okaninegi agesa havino haima neꞌvaiya yamoꞌa aipafina ata nelegeno kefo yaꞌamimo anonaꞌamia amamigeꞌya alimainae.
REV 16:20 Ala imikefa aligeno mukiꞌa hagelimo amuꞌnopima hanea mopaene agoꞌyagaene fanane humainae.
REV 16:21 Tusiꞌa koꞌmopa, yafa ku kana huteno, ala alaisi ku kana huno kanaꞌage huno ikapinagati asaga hulavi hulavi hiaꞌamo veamogami amaugafale taviaꞌamo ali haviya humategeꞌya Anumaya Kotifena “Otahaiya kano mainane.” huꞌya kamugea hatageꞌya vaitenae.
REV 17:1 Seveniꞌa (7) yopa atafa hulinaya ensole vayapiti nagoke ensole kanomoꞌa eaꞌamo nagaifena mage huno hie “Kagaya male egeꞌna kavelino. Ma kumai aꞌmoꞌa, timona avoyalega ala kumate mainea aꞌmoꞌa, kefo yamaꞌamo anonaꞌa alisia yafena nagaya kaveligahue.
REV 17:2 Mukiꞌa ma mopafima mainaya Sauve vayaꞌmoꞌya ani kumate mainaya veaꞌnenena tusiya huꞌya kumaiya heꞌya* vai neꞌayageꞌya ma mopafima mainaya veaꞌmoꞌyaenena ani kumate veaꞌnenena kefo yama nehaya kava huꞌya havilima neꞌya anegi-nagima nehaya kava humainae.” huno higeꞌna havi-mainoe.
REV 17:3 Nehavugeno Alu Aotage Avamuꞌmoꞌa nagaila Yoninia tokiyaꞌa namitegeno ani ensole kanomoꞌa navaleno vea omai kaꞌme kotega mo natene. Mo nategeꞌna nagaya nago akefa agoana haesa kefo afai afumo agupifi mainegeꞌna age-mainoe. Ani kefo afai afumo augafalela Anumaya Kotina kamugema hatageꞌya amakiya agia augafale kae-malenae. Ani kefo afai afumona seveniꞌa (7) anuꞌyaga hanegeno ani anuꞌyagalela teniꞌa (10) aveꞌyaga hane.
REV 17:4 Hanegeꞌna nagaya agoana ani akefamoꞌa oko kenaene haesa kenaene fai-lino maine. Miyamoꞌa hai-mainea seveliyaꞌene kanileta yafateti talo humale yaꞌene fai-linegeno augafalela aleꞌale nehigeno maiya akefa age-mainoe. Agogeno ayapina kanileta yafateti talo humale keꞌayola ali-linegeno kumai yama nehia yaꞌene havigu-nagu hiꞌmanaꞌage kefo yamaꞌaene ani keꞌayopina havate-maine.
REV 17:5 Ani aꞌmo hanilela agaiꞌa agia avame kea mage huꞌya kae-malenae “Papilonia ala kumateꞌma mukiꞌa kumai yama nehaya yaꞌene ma mopafima kefo yama nehaya yaꞌenena itaꞌamoꞌe.” huno kae-malene.
REV 17:6 Kaegeꞌnama agoana ani aꞌmoꞌa mukiꞌa Anumaya Kotina alu aotage veaꞌnene, Yisasiꞌma hulatenea mono kema hamanepaiya veaꞌnene hamaegeꞌya fali-mainaya veaꞌmogami kolana ani aꞌmoꞌa valu valu huno neteno havilima neteꞌya anegi-nagima nehaya kava higeꞌna ageteꞌna atali talu nehugeno namaꞌyoa aimaine.
REV 17:7 Neꞌaigeno ani ensole kanomoꞌa mage huno hie naꞌa higeno kamaꞌyoa neꞌaiye? Nagaya ani aꞌmofeꞌene agupifima mainea afua, seveniꞌa (7) anuꞌyaga hanegeno ani anuꞌyagalela teniꞌa (10) aveꞌyaga hanea afuenefena falakino hanea kea hu falote huꞌna kahapaigahue.
REV 17:8 Agana kefo afai afumoꞌa nayona maineanagino meni kanafina ago fali-maineanagino haenagaꞌa ayoꞌma omale komufitila hetino ataleno ehaisiaꞌamo hani yapima tegelege nehia atafina agola umaigahie. Umaigahianagi Anumaya Kotiꞌa ma mopa taloma ohunea kanafima hanea avopina, maige maige hisaya hamaimuꞌma hanea veaꞌmogami amakima kae-malenea avopina, ma mopafi mainaya veaꞌnea amakima okaenea veaꞌmoꞌya ani kefo afai afuma agesayana atali huꞌya tusiꞌa amamaꞌyo aigahie. Ani afua nayona maineanagino menia ago fali-maineanagino haenagaꞌa eteno evaꞌyi hisia afai afue.
REV 17:9 Kanale havi haviꞌyaꞌamima hanesia veaꞌmoꞌya mani yafena havilama huꞌya havigahae. Haviho. “Ani kefo afai afumona seveniꞌa (7) anumoꞌa seveniꞌa (7) agoꞌyale humaleno higeno ani kumai aꞌmoꞌa ani agoꞌyale maine.
REV 17:10 Naꞌa higeno ani anuꞌyagamoꞌa seveniꞌa (7) ala sauve kava vaya mainae. Maineꞌya ani sauve vayapitila faefuꞌa (5) ago faligeno nagoke menia mainegeno nagokela yaufa falote ohune. Haenaga evaꞌyima hisiana osi kana kanoꞌa maigahie.
REV 17:11 Maigahianagi kefo afai afumoꞌa nayona maineanagino menia ago fali-mainea afugino eiti (8) molia Sauve kano maineanagino seveni (7) molia Sauve anagapi maineanagino hani yapi visiaꞌamo tege-lege nehia atafi agola umaigahie.
REV 17:12 Agana teniꞌa (10) aveꞌmoꞌa teniꞌa (10) Sauve vaya maineꞌya menia yaufa kava aliꞌyana oꞌalinayanagiꞌya kefo afai afuene tokiyaꞌami aliteꞌya ani kava aliꞌyana aupa kana kanoꞌafi kava yagaiteꞌya atalegahae.
REV 17:13 Ani teniꞌa (10) Sauve vayaꞌmoꞌya nagoke amaku amakesale maineꞌya tokiyaꞌamia kefo afai afumona amigahae.
REV 17:14 Amiteꞌya ani Sauve vayaꞌmoꞌyaene kefo afai afuene ali nagopi ataleꞌya Sipi sipi nafaꞌnenema tuma hisayana Sipi sipi nafaꞌnemoꞌa, ala kava veaꞌmogamina kavaꞌami maineanagino ala Sauve veaꞌmogamina ala Sauve kanoꞌami mainea yafe ani luma hisayana amakaila amakasegahie. ‘Nagaitega eho.’ hunoꞌma huyogi-malenea veaꞌmoꞌya mukiꞌa kanafina efi efi huꞌya agai kema akave nemalaya veaꞌnene Sipi sipi nafaꞌnene ailokaeꞌya maineꞌya ani luma hisayana amakasegahae.” huno ani ensole kanomoꞌa higeꞌna havimainoe.
REV 17:15 Havugeno mage huno nahapaiye “Agana tiꞌyaga, kumai aꞌmoꞌa ani ti avoyaleꞌma mopale mainea timoꞌa, veafe humaine. Kasagoꞌya veaꞌmoꞌya alu kote alu kote veaꞌnene, alu make lu make neꞌaiya veaꞌnene, alu maugafa lu maugafa kali-mai veaꞌnene elitalu huꞌya maine.
REV 17:16 Anima teniꞌa (10) aveꞌyagama hanegeka agana teniꞌa (10) Sauve vayaꞌmoꞌyaene ani kefo afai afuene ali nagopi ataleꞌya ani kumai aꞌmona amaipa kafa huteteꞌya ali haviya hutegahae. Huteꞌya aluya huꞌya tua huteteꞌya kenaꞌa augafaletila hate-taleteꞌya augafa alagaꞌage mainesigeꞌya augafamona ameꞌa neteꞌya atafi kae-talegahae.
REV 17:17 E, Anumaya Kotiꞌa agaiꞌama humainea kemoꞌa tamage huno falote hisiafene huno ani amaku amakesa teniꞌa (10) Sauve vayaꞌmogamina amaminegeꞌya nagoke amakesageꞌya haviteꞌya ‘Ala kava kano maisie.’ huꞌya ani kefo afai afumona tokiyaꞌamia aminae. Amigeno kavama maisia yamaꞌa hanesigeno Anumaya Kotiꞌa hamapai-mainea kemoꞌma falote huno tamagema hisia kana ani kefo afai afumoꞌa haꞌno hugahie.
REV 17:18 Ani akefa aganana tusiꞌa ala kava yagai-mainea kumala, mukiꞌa Sauve vayaꞌmogamina ago amakaseno hai-mainea kumafe nehie.” huno higeꞌna havimainoe.
REV 18:1 Ikapinagati nago ensole kanoa elavigeꞌna nagaya Yoniꞌna agogeno ani ensole kanomoꞌa tusiꞌa tokiyaꞌa hanegeno elavinoꞌma eana yagemoꞌma aivasa nehia avamete huno konagali yamaꞌamoꞌa mopamona aivasa humaine.
REV 18:2 Hu-malegeno ani ensole kanomoꞌa ala kegefafiti mage huno hie “Papilonia ala kumakefamoꞌa tusiya huno ago haviya hu-mainegeꞌya menia Kefo Avamuꞌyagaene nagoꞌa fali-mai afuyaga aye laga-feꞌya neꞌvaiya namayagaene ani kumapina ali vai-mainae.
REV 18:3 Ani Papiloni veaꞌmoꞌya mukiꞌa kotega veafena ‘Tagayama nehuna kava hutama kumaima he auꞌava yamoꞌa hagaꞌage ti kana hu-mainegi neho.’ huꞌya hageꞌya ani kavaꞌma haya yamo ani kumala agola ali haviya humaine. Mukiꞌa ma mopafi Sauve vayaꞌene aniꞌa huꞌya agaiꞌene kumai yana hu-mainayagiꞌya ma mopafi miyana tusiꞌa miya alisaya aliꞌya neꞌaliya veaꞌmoꞌya tusiya huꞌya kumai yana hu-liteꞌya haya yateti ala miyakefa ali-mainaya yafe ani kumala agola ali haviya hu-talenae.” huno humaine.
REV 18:4 Nagaya havugeno nago kemoꞌa ikapinagati mage huno humaine “Mukiꞌa veaꞌnimogatama ani kumapitila neꞌataletama hati-lavitama malaga eviho. Havigu nagopi tamakaya afalu falu hutama mainesageno ani veaꞌmogami kefo yaꞌamimoꞌene huyafenagi ailokaetama ani veaꞌmogami kefo yamo anonaꞌami aliyafenagi hati-lavitama eviho.
REV 18:5 Ani veaꞌmoꞌyama humainaya kefo yaꞌamimoꞌa ala itugefamoꞌma hia kava huno maleme maleme ikapi nehaiyanagino Anumaya Kotiꞌa mukiꞌa ani kumate veaꞌmoꞌyama hu-mainaya kefo yafena agesa havino maine.
REV 18:6 Anumaya Kotigae neꞌaganageno agoꞌma kefo yama humainea yamaꞌamona alika tolegeꞌya ali lokaeka hu-mainea avamete masufina takika amigeno neno.
REV 18:7 Ani kumai aꞌmoꞌa agaiꞌa augafa alino nehaino ageno haꞌyema hia kavaꞌma hu-mainea yatetila kagaya aniꞌa huka augafa agata aisia yaꞌene tusiꞌa aviteno augafahema kalagi aisia yaꞌene amio. Ani aꞌmoꞌa agupinaga mage huno nehavie ‘Nagaya ala Sauve aꞌnemo siale mainoanagiꞌna megusa akefa omainoanagino nagaitela kana yamoꞌa falote hisigeꞌna nagaya avia oꞌategahue.’ huno agesa havimaine.
REV 18:8 Havianagi ani kefo yama humainea yateti aupaꞌa nagoke yupa anonaꞌa agata aisia yana falote hugahie. Ani kumate mainaya veaꞌmoꞌya kasagoꞌya kaliene amaka tesia yaꞌene aliteꞌya falisageꞌya mukiꞌa veaꞌmoꞌya amahau huꞌya avi tegahae. Atamoꞌa Papiloni kumala tesagali-talegahie. E, tusiꞌa tokiyaꞌa hanea Anumaya Kotiꞌa havino kaiyekea humateteno anima amaugafa amakata aisia yana tusi yate amamigahie.
REV 18:9 Mukiꞌa Sauve vayaꞌmoꞌya ani kumai akefaenena kumaima heꞌya mukiꞌa kefo yaꞌenema humainaya Sauve vayaꞌmoꞌyama ani kumateꞌma kae-malesageno ata halinamoꞌma ageteꞌya tusiya huꞌya hamauna huteꞌya avia ategahae.
REV 18:10 Ani veaꞌmoꞌya agatama aiya yama alia yafena tusiꞌa koli huteꞌya aluꞌale hetiꞌya maineꞌya mage huꞌya hugahae ‘Vaeha tahau hane tahau hane Papilonia ala kumala tokiyaꞌage kumaꞌmogagi nagoke yagefi kaugafa kagata yana anonakaꞌa ago ali-mainane.’ huꞌya hutegahae.
REV 18:11 Ma mopafima tusiꞌa miyama alisaya aliꞌya neꞌaliya veaꞌmoꞌya afeno yaꞌamima miya hisaya veaꞌnea omaigeꞌya ani kumafena amakesa havi havi huꞌya avia neꞌateꞌya amaipamoꞌa kanaꞌage hia yapi maigahae.
REV 18:12 Ani afeno yama miya hisageꞌya monea alisia afeno yana kanileta yafateti talo humale yaꞌene efe yoleti talo humale yaꞌene miyamaꞌamoꞌa hai-mainea seveliyaꞌene sesuyagaene haesa ohaesa kenaene kaꞌyogaꞌyo humainea kenaene oko kenaene mukiꞌa kanale manaꞌage yosaene afumo avete talo humale yaꞌene miyamaꞌamoꞌa hai-mainea yosale talo humale yaꞌene haesa yafateti talo humale yaꞌene kapaleti talo humale yaꞌene tokiyaꞌage yafaꞌene manaꞌage kimamufaene hagaꞌage higeꞌya nenaya yamoꞌene manaꞌage halinama nehia yaꞌene manaꞌage masaveꞌene vaini tiꞌene atafi negayaya masaveꞌene taꞌnefa falauvaꞌene vitimo alagaene pulamakaene sipi sipiene hosi afuene hosimo avayuma nehia kalene veaꞌmogami amaugafa mukiꞌa miya higeꞌya nofipi maineꞌya miya oꞌali aliꞌyama neꞌaliya veaꞌnene, aliꞌya vaiyatete nehaya afenoꞌami miya hisaya veaꞌnea omaigeꞌya avia neꞌateꞌya amaipamoꞌa kanaꞌage humainae.
REV 18:14 Humainageꞌya ani ala kumafena mage huꞌya hugahae ‘Mukiꞌa tamahaꞌyema higetamama neꞌaliya afenoꞌyana ago tamahafaleꞌya haꞌno hutalae. Kanale miya afenotamiene konagali yatamiene ago haꞌno hianagitama nagoꞌene oꞌaligahae.’ huꞌya hugahae.
REV 18:15 Huteꞌya ani veaꞌmoꞌya ani ala kumapitiꞌma afenoꞌyaꞌamileti monema hu-hatiꞌyama neꞌaliya veaꞌmoꞌya ani ala kumateꞌma mainaya veaꞌmoꞌya kefo yamo anonaꞌamia amakatama aiya yana aliya yafe tusiꞌa koli huteꞌya aluꞌale hetiꞌya maineꞌya avia neꞌateꞌya kalagila neꞌaiꞌya hamauna hugahae.
REV 18:16 Nehuꞌya mage huꞌya hugahae ‘Vaeha tusiꞌa tahau nehane tahau nehane. Nayona kanale kenakaꞌa haesa ohaesa kenaene oko kenaene fai-lineka konagalima ali-maleneka kanileta yafateti talo humale yaꞌene kanale miyamaꞌamo hai-mainea seveliyaꞌene kaugafale vai-lineka konagalia ali-maleka nemainane.
REV 18:17 Nemainanagi nagoke yagefi mukiꞌa ani ala mone afeno yakaꞌa mukiꞌa ali haviya hugatae.’ huꞌya hugahae. Nehisageꞌya ‘Mukiꞌa tipi kalefi kava vayaꞌene tipi kalema aliꞌya vai neꞌayaya vayaꞌmoꞌyaene ani tipi kalefima aliꞌya neꞌaliya yapiti miyamaꞌa ali-mainaya veaꞌnene aluꞌale heti-maineꞌya Papiloni kumala agegahae.
REV 18:18 Neꞌageꞌya Papiloni kumala atamoꞌma teno asagaligeno halinamoꞌma muti muti hia yana neꞌageꞌya mage huꞌya hugahae ‘Ani kumala mukiꞌa kumala agase-mainea kumalageno teno ali haviya nehie.’ huꞌya hugahae.
REV 18:19 Nehuꞌya taꞌnefa kateꞌya amanupi aiteꞌya avia neꞌateꞌya hamauna nehuꞌya mage huꞌya hugahae ‘Vaeha ala kumaꞌmogae tusiꞌa lahau nehane.’ Mukiꞌa tipi kaleyagamona amafaheꞌya anile visayaꞌamoꞌya miyaꞌamima ani kumategatila ala huꞌya neꞌaliyanagi nagoke yagefi haviya-tafana hane.’ huꞌya hugahae.
REV 18:20 Hugahayanagi tamakaya ikapinaga mainaya veaꞌmo-gatamaene Yisasina tamakuꞌa aminaya veaꞌmo-gatamaene Aposolo vayaꞌmo-gatamaene Anumaya Koti aune veaꞌmogatamaene ani kumaꞌma ali haviya hutalea yafena muse hiho. Ani ala kumaꞌmo tamakaila ali haviya hu nelamatea yafenagino Anumaya Kotiꞌa kefo yamaꞌamo anonaꞌa ago amine hutama hiho.” huno humaine.
REV 18:21 Higeno nagola tokiyaꞌage ensole kanomoꞌa nagola tusiꞌa yafakefa alisaga huteno hagelipi hagaꞌyu hu neꞌataleno mage huno hie ani ala yafakefama hagaꞌyu hutaloa yamoꞌa Anumaya Kotiꞌa ani avamete huno ani Papilonia ala kumala, alino tusiya huno ali haviya huteno alino hagaꞌyu hu-talenageno fanane hinageꞌya nagoꞌene veaꞌmoꞌya oꞌagegahae.
REV 18:22 Yaveꞌyamoꞌma agema neꞌaiya yaꞌene aluꞌa aluꞌa yagamema nehaya yaꞌene kapufama nehaya yaꞌene ufema nehaya yamoꞌenena nagoꞌenena agea aisigeꞌya ohavigahae. Veaꞌmoꞌya kagaipina nagoꞌene aliꞌyana oꞌaligahae. Talo tala huꞌya imuma kiya kanafima kema yeso nehisaya kea nagoꞌene ohavigahae.
REV 18:23 Nayona kagai veaꞌmoꞌya miyana hu hatisaya aliꞌyama neꞌaliya veaꞌmoꞌya ma mopafina ala veaꞌne mainagetama tamakaya aluꞌa aluꞌa hanageke yama humatenaya yamoꞌa mukiꞌa veala ayemavataga hu-mainayafe Anumaya Kotiꞌa tamakai kumala ali haviya hu-taleneanagino tamakai kumatela kaꞌniꞌmoꞌa nagoꞌene aivasa ohugahie. Aꞌnema aligahe hageno aꞌmoꞌa vema aligahe higeꞌya musema nehaya kemoꞌa tamakaipina nagoꞌene falote ohugahie.
REV 18:24 Anumaya Kotiꞌa ageana ani kumate mainaya veaꞌmoꞌya Anumaya Kotina amakuꞌa aminaya veaꞌnene agai amaune veaꞌnenena ma mopafina kasagoꞌya veaꞌnenena hamaeꞌya falimatenaya kolamoꞌa ani kumapina hanea yafe auhanageke yamaꞌamoꞌene hanea yateti Anumaya Kotiꞌa ali haviya hutegahie.
REV 19:1 Nagaya anile havugeno kasagoꞌya ikapinaga mainaya veaꞌmoꞌya ala kegefafiti mage huꞌya hae “Tagaya Anumaya Koti agia alisaga hisune. Anumaya Kotiꞌa kaiyekema humategahena kanaleꞌya huno kelamage keleti fatago huno kaiyekea hu neꞌamateno ani kumai aꞌmona tokiyaꞌama hanegeno mukiꞌa ma mopafi veafena ‘Kefo yama hiho.’ huno ali haviya hu neꞌamatea yatetila Anumaya Kotiꞌa ani kefo yamo anonaꞌa ago amine. Ani kumai aꞌmoꞌa Anumaya Koti aliꞌya veala hamaeno falimateneanagino ani yateti Anumaya Kotiꞌa kefo yamaꞌamo anonaꞌa ago amine. Amineanagita Anumaya Koti agia alisaga hisune. Anumaya Kotitimoꞌa agaiꞌage tokiyaꞌage hale yamo aepa maineanagino tagu tamena ago aligati-maineanagita agia alisaga nehune.”
REV 19:3 Eteꞌya ala kegefaleti nagoꞌene mage huꞌya hae “Tagaya Anumaya Koti agia alisaga hisune. Ani kumala atama leno asagali-talia yapiti halinamoꞌa agola haige haige huno nehaiya yafe Anumaya Koti agia alisaga hisune.” huꞌya humainae.
REV 19:4 Nehageꞌya tueti foꞌa (24) kava vayaꞌmoꞌyaene foꞌa (4) hamaimuꞌene anagaꞌmoꞌyaenena ala sauve kanomo siale mainea Anumaya Kotite asaga hulaviꞌya amakoꞌya yemaineꞌya agia alisaga nehuꞌya mage hae “Tamagelafa huꞌya nehayanagita Anumaya Koti agia alisaga hisune.” huꞌya humainae.
REV 19:5 Nehageno ala sauve kanomo sialeti nago kemoꞌa falote huno mage hie “Tamakaya Anumaya Koti aliꞌya neꞌalitama aiyafinagama mainaya veaꞌmogatamaene afa veaꞌnene tamakima hanea veaꞌnenena Anumaya Koti agi alisaga hiho.” huno humaine.
REV 19:6 Anile nago kea havuana kasagoꞌya veaꞌmoꞌya alitalu huꞌya maineꞌya ailalupeꞌya haya kemoꞌa, timoꞌma anama nelavino agema neꞌaiya avamete nehuꞌya, monagemoꞌma nehia avamete huꞌya ala kegefafiti mage huꞌya hae “Anumaya Koti agia alisaga hisune. Anumaya Kotiti mukiꞌa tokiyaꞌa hanegeno kasagoꞌya kava veaꞌmogamina amakaseno agaiꞌage ala kava kano maineanagita agia alisaga hisune.
REV 19:7 Sipi sipi nafaꞌnemoꞌa* aꞌma alisia kanamoꞌa ago falote higeno alisia aꞌmoꞌa ago talo tala huno maineafe tagaya tusiꞌa muse nehuta taipa kanale yapiti yagamea huta Anumaya Kotina tokiyaꞌage hale yamaꞌa hanea agia alisaga hisune.
REV 19:8 Anumaya Kotiꞌa oniꞌya ohuno efeꞌage humainea kena ani aꞌmona amigeno fai-line.” huꞌya humainae. Ani kenahema hiana Yisasina amakuꞌama amitafa huteꞌya alu aotage veaꞌnema fatago huꞌya nemaiya veaꞌmogami auꞌavafe humaine.
REV 19:9 Anile ensole kanomoꞌa Yisasina amakuꞌa aminaya veafena mage huno nahapaiye “Kagaya mani kea avopi kao. ‘Sipi sipi nafaꞌnemoꞌa aꞌma alisia imua ago kimalegeno ‘Ehoꞌ huno ke humalenagiꞌya esaya veaꞌmoꞌya tusiꞌa muse hisae.’ Mani kea Anumaya Koti kelamage kea hugeka nehavine.” huno humaine.
REV 19:10 Higeꞌna nagaya ani ensole kanomo agia alisaga hugahe aiyafi asaga hulaviꞌna nagoꞌya yemaugeno “Aꞌaogi kagaya naꞌa ohuo. Nagaya kagaiꞌene kafu-kaganaꞌyaenena, Yisasi kema havitama atafa hu-linetama huhaletama nehaya veaꞌmogatamaene nagoke aliꞌya neꞌaluna kano mainogi nagai nagia alisaga ohuganagi Anumaya Koti agiꞌage alisaga huo. Yisasiꞌma humainea kemoꞌa Anumaya Koti kema huhaleꞌya hisaya tokiya veaꞌmogami amamine.” huno nahapai-maine.
REV 19:11 Ikamoꞌa aihagalo higeꞌna agogeno nagola efeꞌage hosimoꞌa mainegeꞌna age-mainoe. Ani hosimo agupifima maiya kanomo agimoꞌa maꞌa humaine “Efi efi huno kanale aliꞌya neꞌalia kanoe. Kelamage kegeꞌya nehia kanoe.” huꞌya agia aye-mainae. Ani kanomoꞌa fatago huno kaiyekea humateno nagoꞌa veaꞌmoꞌyaenema tuma hisiana fatago yateti huno tua nehie.
REV 19:12 Aulagamoꞌa atamo kaꞌni kana huno aiha nelegeno anutela ala Sauve vayaꞌmogami tumano kuꞌyaga kasagoꞌya vai-linegeno augafalela nago agia kae-malegeno ani agia agaiꞌage havilinea agi haneanagiꞌya mukiꞌa veaꞌmoꞌya ani agia ohavinae.
REV 19:13 Agaiꞌama fai-linea kolamoꞌa ayaꞌaya kenaꞌale tusiya hu-mainegeno Anumaya Koti aepama hugafino humainea yafe agima ayayana “Anumaya Kotina keꞌae.” huꞌya agia ayemainae.
REV 19:14 Ikapinaga ati vayaꞌmoꞌya efe hosiyagamo agupifi maiteꞌya kanaleꞌya huno efeꞌage huteno oniꞌya ohu kena, faili faili huꞌya akavela umainae.
REV 19:15 Neꞌvageno mukiꞌa ma mopafi veaꞌnema hamaesia aveꞌneꞌne humainea naepea avayafina aniline. Ani-lineanagino amakaseno hagote Sauve kano maineno tokiyaꞌage huno mukiꞌa veaꞌmogamina kava humategahie. Humateneno veaꞌmoꞌya nofi alagayaga amaiyaletiꞌma aye lata-pageno timaꞌamoꞌma nelavia avamete kava huno ani kanomoꞌa tusiꞌa tokiyaꞌama hanea Anumaya Kotiꞌa haima vai neꞌamatea kame vayaꞌa kefo yamo anonaꞌamia amamigahie.
REV 19:16 Neꞌamamino kenaꞌaleꞌene aiya amoteꞌenema kae-malenea agimoꞌa maꞌa humaine “Ala Sauve vayaꞌmogamina ala Sauve kanoꞌamie. Ala kava veaꞌmogamina ala kavaꞌami mainea kanoe.” huno agia kae-malene.
REV 19:17 Kae-malenegeꞌna neꞌagogeno nago ensole kanomoꞌa yagemo aufi hetino mukiꞌa ikamo amuꞌnote haleꞌya vai-yayea namayagahena mage huno hie “Tamakaya Anumaya Kotiꞌa ala kaveꞌma taloma humalea kavetela melitalu hiho.
REV 19:18 Melitalu hutama fali-mainaya Sauve veaꞌnene ati veate kava veaꞌnene mai-lokiya vaiꞌya nemaiya veaꞌnene hosi afuyagaene ani hosimo agupifi nemaiya vayaꞌene, nofipi maineꞌya miya oꞌali aliꞌya neꞌaliya veaꞌnene afaꞌa mainaya veaꞌnene, ala amakiene veaꞌnene, osi amakima hanea veaꞌnene mukiꞌa falisagetama amakaila amaugafamo amamela negahae.” huno humaine.
REV 19:19 Higeꞌna nagaya agoana ani kefo afai afuene ma mopafi Sauve vayaꞌene ati vayaꞌamienena efe hosimo agupifima maiya kanoene ati vayaꞌaene tu hugahe melitalu humainae.
REV 19:20 Naꞌa hayanagi anima efe hosimo agupifima maiya kanomoꞌa kefo afai afuene havigegeꞌyama nehia aune kanoene alino nofi hunatene. Ani kefo afai afumoꞌa hapaigeno ani havigegeꞌyama nehia aune kanomoꞌa tokiyaꞌage avame yana humaine. Nehuno anima tokiyaꞌage avame-name yama humainea yateti amaugafalela kefo afai afumo agia kae-malenageꞌya kefo afai afumona amemaꞌamo agima alisaga nehaya veaꞌnena havige aye mavataga humaine. Anima aye mavatagama humainea kefo afai afuene havi aunema laga humainea kanoene hanaegeꞌana ofalinaꞌagi afaꞌa hanaimula hanegeꞌya anavaleꞌya tusiꞌa komugefa hiꞌmanaꞌage yafaꞌyagama hanegeno atama tegelege nehia komufi anasaga huno vai-talenae.
REV 19:21 Vai-taleteno efe hosimo agupifima maiya kanomoꞌa mukiꞌama melitalu humainaya ati vayaꞌmogamina ayaꞌaya naipea avayafina ani-lineanagino ani naipeleti hamaegeꞌya fali-mainae. Faligeꞌya mukiꞌa namayagamoꞌya ani veaꞌmogami amaugafa aye laga-feꞌya nageno tusiya huno amamupa-napa ayemaine.
REV 20:1 Nagaya Yoniꞌna agogeno nago ensole kanoa ikapinagati elavi-maine. Ani kanomo ayapina ayola omale komule ki nofiꞌene ayaꞌaya seni nofiꞌene hanegeno elavi-maine.
REV 20:2 Elaviaꞌamo ani osifaꞌvea metafa humaine. Ani osifaꞌvea ehe kanafima mainea osifaꞌvea kame kanotigino agia Sataniꞌe. Ani Satanina metafa huno tokiyaꞌage seni nofila kiteteno anima ayoꞌma omale komufina asaga huno vai-taleteno avaya tileno tokiyaꞌage hutegeno Sataniꞌa vani tauseniꞌa (1,000) kafu ani komufina nofipi maineanagino ani kanafina veaꞌmogamina havigea aye mavataga ohugahianagino vani tauseniꞌa (1,000) kafuma haꞌno hutesigenoꞌa ani komufitila atalesigeno aupa kana kanoꞌafi ute ete hugahie.
REV 20:4 Anile nagaya agoana nagoꞌa veala ala sauve vayaꞌmogami siale mainageno Anumaya Kotiꞌa kaiyekema humateꞌya ali fako hu-matesaya aliꞌyamo tokiya amamine. Ani veaꞌmoꞌya Yisasina amakuꞌa amiteꞌya agai kene Anumaya Koti kene hamapai-mainaya yatetiꞌma amakeꞌya hataga hageꞌya falimainaya veaꞌmogami amamena age-mainoe. Ani amamema agoa veaꞌmoꞌya kefo afai afuene talo hu-malenaya ameꞌene agiene alisaga ohuꞌya kefo afai afumo agienema hamanileꞌene amayateꞌenema omalene. Omalea veaꞌmoꞌya eteꞌya hamaimula aliteꞌya ala kava veaꞌne maineꞌya Kalaisiꞌene vani tauseniꞌa (1,000) kafua kava yagaiꞌya maigahae.
REV 20:5 Ani veaꞌnema heti-mainaya kana hagote-lamateꞌya fali-mainaya veala hetisaya kana hane. Haneanagi nagoꞌama fali-mainaya veaꞌmoꞌya ani kanafina heotigahagi vani tauseniꞌa (1,000) kafumoꞌa haꞌno hu-tesigeꞌya hetigahae.
REV 20:6 Anima hagoteꞌya hetisaya veala Anumaya Kotina alu aotage veaꞌneꞌa mainayanagiꞌya tusi muse hugahae. Anumaya Kotiꞌa tegelege nehia atafina amatesigeꞌya nagoꞌene eteꞌya tole molia kanalela ofaligahae. Ofaligahayanagiꞌya Anumaya Kotigani Kalaisigani anakia alisaga nehuꞌya aliꞌya veaꞌani maineꞌya vani tauseniꞌa (1,000) kafua Kalaisiꞌene sauve kava maigahae.
REV 20:7 Haenagaꞌa vani tauseniꞌa (1,000) kafumoꞌa haꞌnoma nehigenoꞌa Satanina nofiꞌma hutenea nopitila atalesigeno ehaigahie.
REV 20:8 Hati-lavino visiaꞌamo mukiꞌa mopaene mopaene mainaya veaꞌmo-gami amakia Kogi nofi veaꞌnene Magogi nofi veaꞌnene Sataniꞌa havige huno aye-mavataga hisiaꞌamo “Melitalu hutama tu hiho.” huno amavaleno melitalu hu-matesigeꞌya ani veaꞌmogami napamoꞌa ti kahaepa kana hu-maineanagiꞌya huyo okigahae.
REV 20:9 Ani veaꞌmoꞌya mukiꞌa kotega vai neꞌayeꞌya Anumaya Kotina amakuꞌa aminaya veaꞌmogami kumala, Anumaya Kotiꞌa muse nehia ala kumaꞌmona meli kagiꞌya amavayagigahayanagi ikapinagati atamoꞌa elavisiaꞌamo ani veaꞌmogamina tesagali haꞌno hugahie.
REV 20:10 Haꞌno hinageno Anumaya Kotiꞌa Satanina, havigema aye mavataga humainea kanomona, ata neleno hiꞌmanaꞌage nehia yafaꞌyagama tegelege nehia komufina asaga huno vaigahie. Ani komufina kefo afai afuene havigema nehia aune kanoene mainaꞌa komufinagino ani lagufa (3) vayala anifinaga maineꞌya kegeꞌene felugaene mukiꞌa kanafina agola amagata aige aige hisia yamoꞌa hanetafa huno hanemategahie.
REV 20:11 Anile nagaya Yoniꞌna himonafi kana yapi agoana ala efeꞌage ala Sauve kanomo sia hanegeno ani siale mainea kanoa age-mainoe. Agogeno mopamoꞌene ikaꞌmoꞌenena agai aulela faleꞌana fanane huꞌana nagoꞌene omaletafa humainaꞌe.
REV 20:12 Nagaya fali-mainaya veaꞌma agoana amaki hanea veaꞌnene, amakima omale veaꞌnene, ala Sauve kanomo aule heti-mainageno ensole vayaꞌmoꞌya avoꞌyaga ali vakaye-mainae. Nago avona, maige maige hisaya hamaimuꞌma hanea veaꞌmogami amakima hanea avoꞌene vakayeꞌya ani avopina agoꞌma humainaya auꞌava kavaꞌamimo kema kae-malenaya keleti fali-mainaya veala Sauve kanomo siale maiya kanomoꞌa kaiyekeꞌamia fako humatene.
REV 20:13 Hage lipima fali-mainaya veala ani limoꞌa amatalegeꞌya uvaꞌyi huꞌya mo heti-mainageꞌya fali yamoꞌene fali-mainaya veaꞌmoꞌya neꞌvaya kotegaene anakaipima mainaya veaꞌmogamina amatalaꞌageꞌya eteꞌya hetigeno Anumaya Kotiꞌa humainaya auꞌava yateti kaiyekeꞌamia fako humatene.
REV 20:14 Kaiyekea humateteno mukiꞌa veaꞌmogami amakimoꞌa maige maige hisaya hamaimuꞌma hanea veaꞌmogami amaki hanea avopima amakima okaenesaya veala Anumaya Kotiꞌa atama tegelege nehia komufi amavaleno hagaꞌyu huma-talegahie. Fali yaꞌene fali veaꞌmoꞌya unemaiya koꞌene ata tegelege nehia komufi anasaga huno vai-talesigeꞌana haꞌno hutafa hugaꞌe. Ani atama nelea komufima visayana tole (2) yupa eteꞌya faligahae.
REV 21:1 Nagaya Yoniꞌna agoana hagotenoꞌma hanea ikaꞌene mopaene hage limoꞌene fanane higeno haegafa ikaꞌene mopaene age-mainoe.
REV 21:2 Nagaya alu aotage kumala, haegafa Yelusalemu, Anumaya Kotiꞌa ikapinagati ataleno elavigeꞌna agoe. Agogeno aꞌmoꞌa vema aligahe kanale kenama fai-lineno kanale konagali ali-maleno veleꞌma neꞌvia augafa kava huno elavigeꞌna age-mainoe.
REV 21:3 Nagaya havugeno ala sauve kanomo sialeti nago ala kegefafiti mage huno hie “Menia Anumaya Kotiꞌa veaꞌnene tokaeno maigahie. Ani veaꞌmogami amuꞌnopi mainesigeꞌya mukiꞌa veala agaiꞌa veaꞌne maisageno Anumaya Kotiꞌami maigahie.
REV 21:4 Maineno amaunua aye haꞌmi-talesigeꞌya nagoꞌene veala ofaligahae. Amaipamoꞌa kana ohinageꞌya avia oꞌategahayanagino amakata aisaya yamoꞌenena haꞌno hugahie. Nayoma nemaiya augafa auꞌava yamoꞌa ani kanafina haꞌno hugahie.” huno hu-maine.
REV 21:5 Higeno ala Sauve kanomo sialeꞌma maiya kanomoꞌa mage huno hie “Haviho nagaya mukiꞌa yana ago aliꞌna haegafaꞌage hu-maluanagino haegafa huno hanegahie. Mani kea tamage nehue. Mukiꞌa veaꞌmoꞌya haviꞌya amakupi maleꞌya amametiti hisaya yafe mani kelamage ke nehugi kae-malo.”
REV 21:6 Mage huno nahapaiye “Mukiꞌa aliꞌyania hai alivaya aye-mainoe. Nagaya mukiꞌa tokiyamona aepaꞌa mainoanagiꞌna kava yagai-maineꞌna mukiꞌa yana ali vayayesoa kano mainogi uhagoteꞌna maiteꞌna haenagalafa mainoe. Veaꞌmoꞌya tifema amakesigeꞌya hamaimu alisaya tina kapaiꞌma nehagea tinagiꞌya miya ohugahagi afaꞌa amamisugeꞌya negahae.
REV 21:7 Veaꞌmoꞌya Sataniꞌene tuma huꞌya agasesayana nagaya mani kanale yaꞌyaga afaꞌa amamigahue. Amamiteꞌna nagaya Anumayaꞌami maisugeꞌya amakaya nagai nafaꞌneyaga maigahae.
REV 21:8 Maigahagi koli nehaya veaꞌnene, nagaifema haviꞌya amakupima nomalaya veaꞌnene, amakuꞌamo oniꞌyaꞌage humai veaꞌnene, veaꞌma hamaeꞌya falimate veaꞌnene, kumai heꞌya vai neꞌayaya veaꞌnene, hanageke kavaꞌma nehaya veaꞌnene, ago fali-mainaya veafe ‘Anumayati maine.’ huꞌya amakisana neꞌvaiya veaꞌnene, havigeꞌage veaꞌnene hiꞌmanaꞌage atama nelea yafaꞌyagamoꞌa atama tegelege nehia komufi hanea yate taviꞌya maigahae. Ani veaꞌmoꞌya hagoteꞌya fali-mainayanagiꞌya ani atama nelea komufima visayana tole (2) yupa eteꞌya faligahae.”
REV 21:9 Anile seveniꞌa (7) yopafi, haenagalafama Anumayamona hai vai-mateno ali haviya humatesia yamaꞌa hanea yopayagama atafa hu-linaya ensole veapiti nago kanomoꞌa nagaifena mage huno hie “Kagaya egeꞌna Sipi sipi nafaꞌnemoꞌa menima aꞌma alitesia aꞌnea kavelino.” huno hie.
REV 21:10 Higeꞌna Alu Aotage Avamuꞌmoꞌa tusiya huno natafa huteno navaleno nagola anayapi hai-mainea agoꞌyafi mo nateteno alu aotage kumala, Yelusalemua, Anumaya Kotitegati ikapinagati ataleno elavia kumala naveli-maine.
REV 21:11 Nave-ligeꞌna agoana Anumaya Kotina tokiyaꞌage hale yamaꞌamoꞌa ani kumatela aivasa humaine. Hale yamaꞌamoꞌa tusiya huno aluꞌa augafa kava huno ala miyamo hai-mainea yafatetiꞌma aivasa nehia avamete kava humaine. Ani yafamo agia yasipa taugosama neꞌagona galasimoꞌma nehia kava huno alave alave higeꞌna halegeꞌna age-mainoe.
REV 21:12 Neꞌagogeno ani ala kumatela kegiꞌya anayapi hu-malageno hane. Ani kegiꞌya kovefina tuelufuꞌa (12) fiana hane. Ani fiamo amete ametela ensole veala hetiꞌya maite maite humainae. Ani fitatela tuelufuꞌa (12) Isaleli nofi veaꞌmogami amakia kae-malenae.
REV 21:13 Ani kegiꞌyafima hanea fiana yagema vaꞌyi nehilega tagufa (3) fiane. Yagema tavi nefalea kaiyaga tagufa (3) fia hane. Aluga aluga haopalega nago haopalega tagufa (3) fia hanegeno nago haopalega tagufa (3) fia hanegeno humaine.
REV 21:14 Ani kegiꞌya ala kumateꞌma aye-govema huꞌya kegiꞌyama humalayana hagoteꞌya tuelufuꞌa (12) yafana amalaguma aimale yatela maleteꞌya kegiꞌya hu-malenae. Ani yafatela Sipi sipi nafaꞌnemona tuelufuꞌa (12) aposolo vayaꞌmogami amakia kae-malenae.
REV 21:15 Nagaiꞌenema kea kea hia ensole kanomoꞌa ani kumaꞌene kegiꞌyaene fiaꞌene maleno agege gege huno hapaligahe kanileta yafateti talo humale kaꞌyona ali-line.
REV 21:16 Ali-lino eaꞌamo me maleno ageana ani ala kumala ayaꞌayaꞌamoꞌene nago kaiyagaꞌamoꞌene anayafima hai-maineaꞌamoꞌenena nagotineno nago avamete tueti tu hataleti (2,200) kilomita higeno mukiꞌamoꞌa nago avamete humaine.
REV 21:17 Higeno maleno neꞌagea kaꞌyoteti ani kegiꞌyamona maleno ageana amegama hanemamoꞌa veaꞌmoꞌyama maleꞌyama neꞌagaya augafa kava huno vani hataleti fotifo (144) mita humaine.
REV 21:18 Ani kumate kegiꞌya Anumaya Kotiꞌma hu-maleana ala monemo hai-mainea yafana yasipae nehaya yafateti hu-malene. Hu-maleteno ani kumatela kanileta yafateti ki-malegeno aivasa huno alave alave hia yamoꞌa galasimoꞌma hia kava humaine.
REV 21:19 Ani ala kumateꞌma amalagu aimale yateꞌma hu-maleana kegiꞌyale malenaya yafana ala miyakefa hai-mainea yafateti malete malete huno humalene. Hagotenoꞌma malegaꞌmae-malenea yafamo agia yasipa. Anima tole molia yafana oko yafamo agia sapaiya malene. Anile tagufama (3) molia yafana nagola efeꞌage yafamo agia agetie huno malene. Anile foa (4) molia yafana yosa haisa yafamo agia emelalie huno malene.
REV 21:20 Anile faefu (5) molia yafamoꞌa efeꞌene haesaꞌene havigu humainea yafamo agia satonikisie huno malene. Anile sikisima (6) molia yafana haesa yafamo agia konilianie huno malene. Anile seveni (7) molia yafana kanileta yafamo agia kalisolaitie huno malene. Anile eiti (8) molia yafana yosa haisa yafamo agia pelie huno malene. Anile naeni (9) molia yafana nagola kanileta yafamo agia topasie huno malene. Anile teni (10) molia yafana yosa haisa kaliteno kaniletamaꞌa hanea yafamo agia kalisopelesie huno malene. Anile aleveni (11) molia yafana oko yafamo agia haiyasinie huno malene. Anile tuelufuma (12) molia yafana haesa yafamo agia ametisie huno malene.
REV 21:21 Ani kumaꞌmo kegiꞌyaleꞌma hanea fita tuelufuꞌa (12) fitmona miyamaꞌamoꞌa hai-mainea seveliyateti talo humale fita hane. Nagoke nagoke fitalela nagoke ala seveliyateti talo humalene. Ani kumateꞌma visaya katela kanileta yafateti talo hu-malenegeno alave alave nehigeno akalo kateꞌma he-nemalaya galasimoꞌma hia kava higeꞌya age hagalo huꞌya age-mainae.
REV 21:22 Agogeno ani kumatela nagola mono nona omalegeꞌna age-mainogi tusiꞌa tokiyaꞌa hanea Anumaya Kotiꞌene Sipi sipi nafaꞌnene ani kumatela mainaꞌageꞌya mukiꞌa veaꞌmoꞌya anakai anakima alisaga haya yafenagino mono no kana huꞌana mainaꞌageꞌna age-mainoe.
REV 21:23 Agogeno ani ala kumatela yagemoꞌene ikamoꞌene aivasa hisia aliꞌyaꞌania omalegi Anumaya Kotina tokiyaꞌage hale yamaꞌamo ani kumatela tusiya huno aivasa hu-maigeno Sipi sipi nafaꞌnemoꞌa ani kumate kaꞌnila maine.
REV 21:24 Mainaꞌageno ani kumateti hale yamo aivasa hu-mainegeꞌya mukiꞌa koteti veaꞌmoꞌya vai neꞌyesageꞌya mukiꞌa ma mopafi Sauve vayaꞌmoꞌya kanale-nale yaꞌamia aliꞌya ani kumate esaꞌyaꞌamoꞌya emaigahae.
REV 21:25 Mainesageno ani kumatela hanina okigahianagiꞌya ani kegiꞌyamo fita aliꞌya okigahae.
REV 21:26 Mukiꞌa veaꞌmoꞌya konagali yaꞌamiene ala amakiene aliꞌya ani kumatekeꞌya egahae.
REV 21:27 Egahayanagi kefo yamaꞌageꞌma nehaya veaꞌnene, amakuꞌamo oniꞌyaꞌage hu-mainea veaꞌnene, havigeꞌage veaꞌnenena ani kumatela ometafa huꞌya omegahae. Omegahagi Sipi sipi nafaꞌnemo avopima, maige maige hisaya hamaimuꞌma hanea avopima amakima kae-malenesia anagaꞌmoꞌya amakaiꞌamige ani kumatela ehaigahae.
REV 22:1 Anile ani ensole kanomoꞌa nagola ala tikefa, hamaimu neꞌamamia tina naveli-maine. Ani limona telelalayamaꞌa omalegeno galasifima age-hagalo nehia kava nehigeno ani limoꞌa Anumaya Kotiꞌene Sipi sipi nafaꞌnemogani mainaꞌa sialeti ani limoꞌa elavi-maine.
REV 22:2 Elavia timoꞌa aiyayeno ala kumaꞌmo kamona amuꞌnopi nelavigeno ani timona aluga aluga agegayale hamaimu neꞌamamia yosayaga hane. Ani yosayagamoꞌa nago kafumo aguꞌafina tuelufuꞌa (12) kanale ikamaꞌahe ikamaꞌahe ani alagamoꞌa afula neleane. Ani yosamo haisamoꞌa mukiꞌa kotega veaꞌma kali alisagenofena alino falu hu-matesia yosa haisa hane.
REV 22:3 Nagoꞌa Anumaya Kotiꞌa hinageno ali haviya humatesia yana omalegahigi Anumaya Kotiꞌene Sipi sipi nafaꞌnene nemaiꞌa sialatana ani kumatela hanesigeꞌya Anumaya Koti aliꞌya veaꞌmoꞌya agia alisaga nehuꞌya maigahae.
REV 22:4 Maineꞌya Anumaya Koti aufina neꞌagesageno agaiꞌa agia hamanilela kaemategahie.
REV 22:5 Ani kumatela nagoꞌene hanina okigahie. Anumaya Koti hale yamoꞌa aivasa humategahianagiꞌya nagoꞌene kaꞌnila hanagalisaya yaꞌene yagemoꞌenena aivasa ohugahie. Amaku amamema agigati-mainea veaꞌmoꞌya agola kava yagaiꞌya maigahae.
REV 22:6 Ani ensole kanomoꞌa mage huno hie “Manima nehavina kea kelamage kea hanegeka kagupi malesana ke hane. Anumaya Kotiꞌa amaune veaꞌneꞌahena ‘Naꞌa hutama hamapaiho.’ huno amaku amakesa neꞌamamia kanomoꞌa ensole kanoꞌamona agai aliꞌya veaꞌnele hutegeno eaꞌamo mukiꞌa yamoꞌa aupaꞌama falote hisia yana amave-lisiafene huno hutegeno umaine.”
REV 22:7 Haviho. Yisasiꞌa mage huno humaine “Nagaya aupa kanafi egahue.” huno higeꞌna nagaya mage hue “Nagoꞌa veaꞌmoꞌya Anumaya Kotiꞌa haenaga falote hisia yafe mani avopima hu-mainea kemo akave nemalesaya veaꞌmoꞌya tusiꞌa muse hugahae.”
REV 22:8 Nagaya Yoniꞌna ani yaꞌyaga ageteꞌna mani kea ago havimainoe. Mukiꞌa ani yana nave-ligeꞌna ageteꞌna havimaineꞌna ensole kanomo agia alisaga hugahe aiyaꞌafi ape humainoe.
REV 22:9 Huanagi ani ensole kanomoꞌa mage huno hie “Kagaya naꞌa ohuo. Nagaya kagaiꞌene amaune kafu-kaganaꞌyaene mukiꞌa mafima Anumaya Koti avopima hanea kemo akave nemalaya veaꞌnene aliꞌya amafaluꞌna mainoanagika nagai nagia alisaga ohuganagi nagoke Anumaya Kotina agaiꞌage agigeꞌya alisaga huo huno hie.”
REV 22:10 Huteno mage huno hie “Manima Anumaya Koti avopima hanea kemoꞌa aupaꞌa falote hisia yafe kagaya ani kea fala okio.
REV 22:11 Ani kanamoꞌa aupaꞌa falote hugahe nehiafe kefo yama nehisaya veala nagoꞌene ani kefo yana maiꞌya hisae. Kumai yama nehisaya veala ani kava maiꞌya hisae. Fatago kavakeꞌyama nehisaya veala ani kavakeꞌya maiꞌya hisae. Alu aotage auꞌava yapima nemaisaya veaꞌmoꞌya nagoꞌene ani kava nehuꞌya maisae.” huno humaine.
REV 22:12 Nehigeno Yisasiꞌa mage huno hie “Haviho nagaya aupaꞌa esuana mukiꞌa veaꞌmoya hu-mainesaya avamete amamisua anonaꞌamia aliꞌna egahue.
REV 22:13 Nagaya mukiꞌa yamona aepaꞌa maiteꞌna kava yagai-mainoanagiꞌna mukiꞌa aliꞌyana aliꞌna avaya-yesua kano mainoe. Uhagoteꞌna maitena haenaga-lafana mainoe.
REV 22:14 Kasagoꞌya veaꞌmoꞌya kefo yaꞌamihema haviꞌya amakuꞌama seseꞌma humalenesaya veaꞌmoꞌya musena hugahae. Amakuꞌa agoꞌma sese hu-malenayafe hamaimu amamisia yosamo alaga aliꞌya neneꞌya ala kumaꞌmo fiatela afaꞌa hai falegahae.
REV 22:15 Hai falegahayanagi kefo yamaꞌage veaꞌnene, hanageke kava nehaya veaꞌnene, kumai heꞌya vaineꞌayaya veaꞌnene, vea hamaeꞌya falineꞌamataya veaꞌnene, ago fali-mainaya veafe ‘Anumayati maine.’ huꞌya amakisana neꞌvaiya veaꞌnene havigehe muse huꞌya akave nemalaya veaꞌnene ani kumaꞌmona malaga maigahayanagiꞌya Anumayamo ala kumatela haiꞌya omaigahae.
REV 22:16 Nagaya Yisasiꞌna ensole kanoꞌnimona hutogeno tamakaitega eaꞌamo nagaifema havitama tamakupi malenaya veaꞌmo-gatamina mani kea hufalote huno tamahapaisie huꞌna hutenoe. Nagaiꞌnige Teviti nofipiti aginagomoꞌna maineꞌna Teviti nafaꞌneꞌa mainoe. Nagaya hale yamaꞌaene kaꞌnefila, natema hagoteno vaꞌyi nehia kaꞌnefi mainoe.” huno humaine.
REV 22:17 Higeno Alu Aotage Avamuꞌamoꞌene Yisasina amakuꞌa amitafa humainaya veaꞌnene Yisasife mage hae “Kagaya eno.” huꞌya hageꞌya mani kema havisaya veala Yisasife mage huꞌya hisae “Kagaya eno.” huꞌya hisae. Hisageꞌya tifema amakesia veaꞌmoꞌya etama Anumaya Kotiꞌma afaꞌa tamamisia timoꞌa maige maige hisaya tamahaimu tamamisia tinagi tamahaisigetama me neho.
REV 22:18 Nagaya manima Anumaya Koti kefima aune laga humale kema mani avopima hanea kema havisaya veaꞌmogatama mani kene alu kene moli lokaetama ayaꞌaya kea ohiho. Tokiyaꞌage ke tamahanepaugi naꞌama hisayana Anumaya Kotiꞌa mani avopima tamahanepaiya havi yama falote hulamatesia yamoꞌa tamakata aisia yanagino tamakaila tamamigahie.
REV 22:19 Tamamigahigi nagoꞌa veaꞌmoꞌya manima Anumaya Koti avopima hanea aune kema ali talesayana Anumaya Kotiꞌa mani avomoꞌma tamahapaiya kanale yana otamamigahianagitama ani veaꞌmogatama maige maige hisaya tamahaimu tamamisia yosamo alaga nesaya yana tamaha-falesigetama Anumaya Koti alu aotage kumatela oꞌugahae.
REV 22:20 Yisasiꞌa mani kema tahapaiya kanomoꞌa mage hie “Tamage nagaya aupaꞌa egahue.” huno humaine. Higeꞌna nagaya Yoniꞌna mage huꞌna nehue “E, tamage Anumayati Yisasiga eno.” huꞌna nehue.
REV 22:21 Anumayatimoꞌa Yisasiꞌa kayonema nehia yamaꞌamoꞌa mukiꞌa amakuꞌama amitafa nehaya veaꞌmo-gatamina tamamisie. Mani kea tamage. Keꞌnia male haꞌno hie. Nagaiꞌni nagia Yoniꞌnae.
