GEN 1:1 Nia mangkina wamna komag, yum-yum samenag Allahri sunulamogti, imap so'oap samenag sumbaog.
GEN 1:2 Imap so'oap sumbaog li mog so'o eraruk wamogpa, senerakna babe sunsunum kom wamog. Sik tapto inibin sogmondo aloamogpa, magti mog so'o nikniamog. Magti mog so'o nikniamogpa, ot Allah Yameog mag alip toman lebe alamog.
GEN 1:3 Mag alip toman Allah Yame lebe alamogpa, Allahri ik selek sum eneko yubu lelamogti, “Ae mog so'o tibin tae,” seog.
GEN 1:4 Tibin tae seogpa, tibin taogpa, kembaogti, walia uan sembaog. Walia uan sembaogti, “Tibin mo inibin mo wamdik,” aro tibin aneko “Ae yo'obi,” engero pibogti, inibin aneko “Ae inipna” engero pibog.
GEN 1:6 Imbaogti, inipna selekne taogpa, kwelekaogpa, ik phendep sum eneko Allah yubu lelamogti, “Mag mombolag sip longop tangkamlangeap, paliag sip longop tangkamlangeap, a'ero-a'ero longop tangkamdik,” aro irikna phela wengero pibog.
GEN 1:8 Wengero pibogti, irikna phela wengero pibogne neneko “Im” si engkaogpa, imbaog.
GEN 1:9 Imbaogti, inipna phendepne taogpa, kwelekaogpa, ik wilindip sum eneko Allahri yubu lelamogti, “Mag im mombolag sip wamlange mo longop taleba, mog so'o mektopne lag tale,” seogpa, mag mo longop taogti, so'o mektopne lag taog.
GEN 1:10 Mag longop taogne neneko Allahri “mag sin longoropne mag nubunge laut” engkaogti, mog so'o mag sindi niknibaog komne so'o [nimi wamnebag] pibogti, “so'o mektopne” engkaogti, walia uan sembaog.
GEN 1:11 Walia uan sembaogti, Allahri yubu lelamogti, “So'o mektopne sumbanne neneri pongoroba kal wana maubalulneap nia mangkina wana pongop talulneap a'ero wamlulba pongop tale,” seog.
GEN 1:12 Pongop tale seogpa, mog so'o anekori nia mangkina pongoro yabiog. Pongoro yabiogpa, Allahri kembaogti, walia uan sembaog.
GEN 1:13 Walia uan sembaogpa, imbaog.
GEN 1:14 Imbaogti, inipna wilindi taogpa, ik tom sum eneko Allahri yubu lelamogti, “Mog so'o tibin nenenne imag warebale. Yo'obi sembe nhon inipnag sembe nhon, ae ik a'ilinne sembe nhon, heng kom tangom yag tangom anpa a'ilinne sembe babe nhon, Na Allah omeklamnikti awi uro wamikti a'ilinne sembe babe warebale,” seogne nene sik taog.
GEN 1:16 Tibin nenenne nubunge phende sunulamogti, yo'obi sembe heng sumbaogti, inipnag sembe wal sumbaogti, imberea babe sumbaog.
GEN 1:17 “Tibin mo inibin mo wamdik,” aro yo'obiap inipnaap sembe mog so'o tibin nenena abeneko Allahri imag mebirog. Mebirogti, kembaogti, walia uan sembaog.
GEN 1:19 Walia uan sembaogti, kembaogpa, ae inipna tom sum taog.
GEN 1:20 Inipna ik tom sum taogpa, ik lam sum eneko Allahri yubu lelamogti, “Maghag lebe aropneap winang im toman yabilulneap yag tale,” seog.
GEN 1:21 Seogti, Allahri maghag lebe aropneap, nubungeap, ologneap, winang im toman yabiropneap sumbaog. Sumbaogti, kembaogti, walia uan sembaog.
GEN 1:22 Walia uan sembaogti, Allahri yubu lelamogti, “Maghag wamukangneap winang im toman yabukangneap mangap taikti, so'oag maghag imag manga pilili sululom,” aro mikip nembahiog.
GEN 1:24 Ik lam sum taogpa, ik no'op sum eneko Allahri yubu lelamogti, “Nia mangkina lebe aroba, nimiri pia mo'oropneap, pia urop komneap, yan toman piropneap, mon magti yabiropneap a'ero wamukangpa, mog so'o aneri yag nenep tale,” seogne nene sik taog.
GEN 1:25 Nia mangkina lebe aroba sumbaogti, kembaogti, walia uan sembaog.
GEN 1:26 Walia uan sembaogti, nen Allahri yubu lelamogti, “Wene Na nong yameap seneragnaap sunsunum uro nimi sumbanun. Sindi nia mangkina lebe aroba nubunge ologne nimiri pia mo'osiropneap, pia mo'osirop komneap, maghag uropneap babe, mon magti yabiropne babe, winang babe sindi yae piamsukang,” seog.
GEN 1:27 Allahri nimi sunulamsiogti, Allah Eldamne nong yameap seneragnaap sunsunum uro nimi sumbahiogne abeneko nhon nengabo nhon kelabo sumbahiog.
GEN 1:28 Sumbahiogti, sin mikip nembahiogti, sinag aruklamsiogti, “A'unap a'unag agha nimi mangaro likto pilengeap mog so'o ane to'op taikti, saelbamukang. Sindi lebe aroba mog so'oag maghag im toman yabiropneap nia taneko pia yae wamsukang,” aro ambatsiog.
GEN 1:29 “A'undi telamneba, pongoroba wana mauropneap, kal wana mauropneap, nia mangkina yina togtopneap a'ero wamlange nari tarelamsin.
GEN 1:30 Pham, winang, mana, nimiri pia mo'osiropneap, pia mo'osirop komneap, pongoroba ma'al agha telamukang,” wene seogne nene sik taog.
GEN 1:31 Allahri nia taneko sumbaogti, kembaogti, walia uitna aro yeng sembaog. Yeng sembaogpa, imbaogti, kwelekaogpa, ae inipna no'opne taog.
GEN 2:1 Allahri undo imap so'oap nia mangkina sumbaogti, nia mangkina sumban aro sae saek sum eneko sae koupto tektek ebog.
GEN 2:3 Tektek ebiagha, Allahri, “Ik saek sum eneko wali sirik sum nemban,” aro mo wepto pibog. Allahri im so'o sumbaogne neneag palilamap.
GEN 2:4 Allah Nuni ponekori imap so'oap sumbaog li eneko sembe sarikto pibogne. Mag anam Allahri pelengelan komag pongoroba sa'a-sa'a nia mangkina orog wamogpa, nimi nhondi babe, Eden aneko yae uro awe wenne babe orog wamog.
GEN 2:6 Aghana mog so'o punag wamogneri iba yangkalamogti, mog so'o sukuplamog.
GEN 2:7 Sukuplamogpa, Allah Nuni ponekori so'o olog tobogti, nimi sumbaog. Nimi sumbaogti, ulom ina hain epna phoaro tobong kibogpa, nimi aneko lebe seog.
GEN 2:8 Lebe alamogpa, Allah Nuni ponekori heng walelingkirobag sip Eden nimi aingniro wamnebag awe so'o nembaogti, nimi sumbaogne neneko ambarog.
GEN 2:9 Allah Nuni ponekori, “Mog so'o aingniro wamnep so'o enekoag wana wali sao kal nhon sao nhon sao pongkale,” sembaogpa, pongkaog. Eden so'o anekoag nusamag kal phende pongkarek. Kal nhon neneko kal wana nimiri teropba nimi ya'ag kamag urop kal, nhon neneko kal wana nimiri teropba, “Malinge nene walinge nene,” aro el tangsirop kal wamog.
GEN 2:10 Eden aingniro wamnep so'oag aneko mog so'o sumbaogne sukupnange sembe, mag lu nhon neneko agha mag ele tombare abeneko phae saog uro mabek.
GEN 2:11 Mag nhon sina Pison nenekori Hawila so'oag kanero yabirop. Hawila so'oag aneko kamna kapna alikinag uro toroba, tingibom warebom aroba kirik kamongkai saonge emas, apna song wali kal, apna leng-leng arop kirik kamna kapna maiknoro torop kirik yogne pibog.
GEN 2:13 Mag si phendepne sina Gihon nenekori Kus so'o kanero yabirop.
GEN 2:14 Mag si wilindipne Tigris nenekori Asyur so'oag heng walelingkirobag sip yabirop. Mag si tomnena Efrat urop.
GEN 2:15 Allah Nuni ponekori nimi sumbaogne neneko, “Eden mog so'o yae wamleri, awe topleri, wamlul,” aro ambarog.
GEN 2:16 Nimi sumbaogne nenekoag Allahri yubu lelamogti, “Kal mog so'o eneag wamlange tane telamlulam, aghana kal wana nimiri teropba, 'Walinge nene, malinge nene,' aro el tangsirop kal eneogna tululam kom. Temen sum tepna anag agha lag taleba, tebalulam,” seog.
GEN 2:18 Wene seogti, Allah Nuni ponekori wanaag agha seneraghogti, “Nengaboog wamnaba sunsunum kom. El yeplamlulne nhon elap sunsunum uro sumbanun,” sembaog.
GEN 2:19 Wene sembaogti, so'o agha nia mangkina lebe aroba mog so'oag uropneap, im toman yabiropneap sumbaogne taneko ni poa nimi sumbaog nimi enekoag, “Si engkahilea kembanun,” aro pabiog. Pabiogpa, a'ero-a'ero si engkahiogpa, si engkahiogne taneko sunsunum uro amik babe engelamsiek.
GEN 2:20 Lebe aroba mog so'oag uropneap, im toman yabiropneap taneko ni si engkahiogpa, nimi aneko yepnange elap sunsunumne orog wamog.
GEN 2:21 Orog wamogpa, Allah Nuni ponekori, “Nimi aneko mangkhauk maple,” sembaogpa, malamog abeneko Nuni Allah ponekori nimi aneko ka'asik nhon lagto tobogti, lagto toboghag aneko sop agha nimbirog.
GEN 2:22 Ka'asik lagto tobogne nenekoag kelabo sumbaogti, nengabo anekoag pabiog.
GEN 2:23 Pabiogpa, nengabo anekori yubu lelamogti, “El neneog nanap sunsunum, el wamlangena yo'o nari yo'o, sop nari sop agha yag nembal. Ane sembe kelabo si engkanun,” seog.
GEN 2:24 Wene undo uro yabiogne ane sembe nengabori sikini sikinin laplobiagha, ela'angeri elkel tolamlaag agha sin nong nhon sop nhon nenep tangtop.
GEN 2:25 Ela'angeap elkelap abeneko kabeog wamdek, aghana sin ali sembamdek kom.
GEN 3:1 Allah Nuni ponekori nia mangkina sumbaogne taneko nusamag wana olog hektopne phae nhon wamog. Phae anekori kelabo anekoag hailamogti, “Allahri, 'Kal wana ni tane teheng kom,' aro ambatsil, te?” aro haibaog.
GEN 3:2 Wene seogpa, kelenekori, “Kom! 'Kal so'o eneag wamlange wana ni telamturom,' seo.
GEN 3:3 'Ot nusamag wamlange neneog salena babe saelbaheng kom, tena babe teheng kom. Tirumun sum a'unag agha tepna lag talul,' seo,” seog.
GEN 3:4 Wene seogpa, phae anekori, “A'unag agha tepna lag talul kom,” seog. Seogti, “Allahri leplange nene, 'Kal wana ane tirikti, Na Allah saog uro wamdikti, “Malinge nene, walinge nene,” aro wana hekahileag,' aro yubu orolena lepla,” seog.
GEN 3:6 Wene seogpa, kelenekori kal “Tururom kom,” seog kal eneko kemelamogpa, kal aneko wana wali wamogpa, kal wana wali wamla aro kembaogti, “Kal wana ane teneba wana hekto yabinilul,” sembaog. Wene sembaogti, kal wana aneko tagto teog. Teogti, ela'ange elkelap nhon wamdeka ela'ange tarogpa, teog.
GEN 3:7 Terekti, abeneko kemel talamdekpa, kabeog wamdek. “Kabeog wamnam,” aro wana hekahiogpa, kal ara ma'al wiptekti enekarek.
GEN 3:8 Ae sinag ae pho alamogpa, Allah Nuni poneko awe anekoag palamogha lilim ka'ebarekti, sin phende abeneko Nuniri ipsileag aro kal liliag toknol talamdek.
GEN 3:9 Toknop tarekti, wamdekpa, Allah Nuni ponekori nengabo anekoag, “Tala wamlam?” aro yobog.
GEN 3:10 Yobogpa, nengabo anekori, “An aweag yalamlama lilim ka'ebandi, kabeog wamna aro aliri toknol talan,” seog.
GEN 3:11 Wene seogpa, Allahri, “An kabeog wamlam aro etneri ambatkel?” seogti, “Kal wana teheng kom senne neneko telam, te?” aro haibaog.
GEN 3:12 Haibaogpa, nimi nengabo anekori lelamogti, “Kelabo anap wamturom aro tatneomne nenekori kal wana aneko tatnelba, tendi wamna.”
GEN 3:13 Seogpa, Allah Nuni ponekori kelabo aneko hailamogti, “Sa'a sembe kal wana ane telam?” seog. Wene seogpa, kelenekori, “Phae aneri yubu neplamneldi, 'Tululam,' selba ten,” seog.
GEN 3:14 Wene seogpa, Allah Nuni ponekori phae anekoag yubu lelamogti, “Andi yubu orolenange leplamba, tam nubunge anag palilamna. Nia mangkina lebe aroba taneko, ot an aghabog so'o ina mon moagti lelepto palapmendi, so'o leng-lenga aghabog tero wapmendi, tebalulam aro yo'olangken,” seog.
GEN 3:15 Yo'olangken seogti, “Nari salag lelamnari, anap keleneap aisa neneptangto wamturom aro salag palilamna. An anmaboap, kelene elmaboap isa orobog wamtumundi, andi, 'Keleneri elmabo nhon yan pubuag si sapsinun,' aro ulapmenba, eldi andi usog solapto olangkilul,” seog.
GEN 3:16 Wene seogti, Nuni nenekori kelabo anekoag yubu lelamogti, “An me monag poroapmenba, an me mon maikno telangkilul. Me mangaro anep peram me mon ogti indolamlulam. Andi ana'ange sembe wana maikno seneraglamlulam, aghana eldi arukna nembangkilul,” seog.
GEN 3:17 Wene seogti, Nuni nenekori nengabo anekoag, “Andi ankel yubu ka'ebalamdi, kal wana teheng kom senonge telamba, andi awe welapmenne mali talamlul aro yo'olangken. Andi awe kilim weyang alapmendi, welapmenne melapmenneog tero wamlulam.
GEN 3:18 Yo yoaba, kirikna, werengkel, lea pongkaleba, paiag mo pongoroba aghabog mo tero wamlulam.
GEN 3:19 Awe welapmendi, whin yangkalangkel ebog tero wapmendi, tebalulam. An nong so'o agha sumbahiana tebamendi, samoro so'o talulam,” seog.
GEN 3:20 Wene seogpa, kelabo aneko nimi ni sikinin talul aro ela'ange Adamdi Hawa engkaog.
GEN 3:21 Engkaogpa, Allah Nuni nenekori sin phende sembe lebe aroba kon agha ag wetnero enekitsiog.
GEN 3:22 Allah Nuni ponekori wanag agha seneragogti, “Wene sin phende nimi so'oag nimi agha Na saog uro wamdikti, “Malinge nene, walinge nene,” aro wana hekto yabihil. Sindi teban koma ya'ag kamag wamdikag aro, nimiri teropba nimi ya'ag kamag urop kal wana eneko turukang kom,” sembaog.
GEN 3:23 Sembaogti, Eden awe so'oag aneko yaglamsiogti, “Nari a'un sumbahisi so'o enekoag welamlulam,” aro Adam neneko ambarog.
GEN 3:24 “Nimiri teropba nimi ane ya'ag kamag urop kal peramag babe pirikag, tena babe tirikag,” aro Allah arukna malaikat Eden so'oag anekoa heng walelingkirobag sip sekitsiog. Sekitsiogne, yae ua unneap, mal tomeag auk pog taktak aropne lemeng-lamang aropne sekitsiog.
GEN 4:1 Wamdekti, Adam neneko elkel Hawaap mapdekpa, Hawa me monag taogpa me nengabo me mangaro aog. Me nengabo me mangaro aogti, Nani Allahri yeplamneldi me nengabo me tatnel aro me si Kain engkaog.
GEN 4:2 Kain mangaro aogti ilipsae Habel babe mangaro aog. Mangkahiogpa, me abeneko nubu tarekti, Habel neneko pham mo'oropne wamogpa, Kain neneko awe wenne wamog.
GEN 4:3 Wamdekti, Kain nenekori Nani Allah sembe mhong towaleng kimnun aro aweag mebogne nenne tobogti aukag tabog.
GEN 4:4 Tabogpa, Habel nenekori babe elenge pham domba taneko anabiagne samenagne mesah yagne nhon tobogti Ili Allah sembe tabog. Tabogpa, Ili Allahri, “Habeldi taplange wali,” aro Habel sembe awi sembaog.
GEN 4:5 Kaindi tabogne mali aro Kain sembe karong sembaogne sembe Kain yo sembaogti whing mali taog.
GEN 4:6 Whing mali taogpa, Allah El sam el taogti, Kainag, “Sa'a sembe yo talamdi whing mali talamlam?
GEN 4:7 Andi walia uahomdi whing sepsebek uro wamsom. Andi, 'Yonge uanun,' sembalamba, malinge an wanaag yanal. Malinge nenekori an wanaag aluklangkel ana malinge seneraglamlamne nene lipsiri hekto wame,” seog.
GEN 4:8 Wene seogpa, Kain nenekori ilipsae Habelag, “Aweag pununam,” seogpa, pirekti, aweag anekoa Kaindi ilipsae Habel ya'ag obog.
GEN 4:9 Obogpa, Allahri Kainag yubu lelamogti, “Anipsae Habel tala wamla?” seogpa, Kaindi, “Na ekon. Na sop-sop naipsae yae wamsene, te?” seog.
GEN 4:10 Wene seogpa, Allah yubu lelamogti, “Sa'a sembe tamna nene ualam? Anipsae eneng so'oag yingkilne nenekori nimi yubu saog uro Nanag lelamlange neneno. Anipsae eneng yingkilne andi babe toknobanep kom,” seog.
GEN 4:11 Wene seogti, “Anipsae ya'ag oblamne eneng mog so'oag yingkilana an so'o eneag wamlulam kom, wena babe weltolamlulam kom alamna. Andi awe weltolapmenne, sa'a-sa'a melapmenne, pongona babe pongkalul kom. Ane sembe aingniro wamna koma ina pu alapmendi, as nhonag pang yang ulamlulam,” seog.
GEN 4:13 Wene seogpa, Kain nenekori Ili Allahag ambarelamogti, “Nani, yaghe! Tam nanag piplamne nene ikin maiknori, nari pomnep kom saog wamla.
GEN 4:14 Andi, 'Na wahingag wamleag,' aro so'o walinge nene agha yag lambanelamba, aingniro koma wamneri as nhonag pang yang ulamneri wamneba, nimiri imnikti opnukang,” seog.
GEN 4:15 Wene seogpa, Allahri, “Wene selamba, Nari yubu lelamnari, 'Nimiri an opkikpa toro tipto Nari sindi nimi saekpare opsinun,' alamna,” seog. Wene seogti, “Nimiri talaba ibikti obikag,” aro Allahri Kainag kekneba pibog.
GEN 4:16 Kekneba pibogpa, Kain neneko Ili whingag agha lambaogti, Eden so'o mombolag sip laplobiagha heng walelingkirobag sip piogti, mog so'o Nod aro engerop so'oag pina wamog.
GEN 4:17 Kain neneko elkelap maptekpa, elkel neneko me monag taogpa, me nengabo me mangaro aogti si Henokh engkaog. Wamekti, Kain nenekori as nubunge nhon ya'aro kirik sengket piro warekto sobaogti, elme si sunsunum uro as Henokh si engkaog.
GEN 4:18 Henokh elme Irad, Irad elme Mehuyael, Mehuyael elme Metusael, Metusael elme Lamekh mangaro yabiog.
GEN 4:19 Lamekh nenekori kelabo phende topsiogne Adaap Silaap topsiog.
GEN 4:20 Ada nenekori Yabal mangaro aog. Yabaldi mangaroba mangarobari tanekori pham maikno pia ulamekti as nhonag tea ko'oa ulamek.
GEN 4:21 Yabal ilipsae taptoba si Yubal nenekori mangarobari mangaroba pingkong ona elnang wamekti, pingkong lilim nhon saogne lenne sununnang el wamek.
GEN 4:22 Lamekhti kel Sila neneko elme Tubal-Kain mangaro aogpa, eldi mangarobari mangaroba awena nhon sao nhon sao solamekti, yaeap, pisog karog sununneap el wamek. Besi agha nhon saogha nhon saogha sununna elnang wamek. Tubal-Kain elipsa'el si Naama wamog.
GEN 4:23 Lamekh neneko kelabo phende topsiogne abenekoag kibiang toalengep tangtop yubu lelamogti, “Adaap Silaap sepna lemnunne ka'eamturom,” seog. Seogti, “Kain aghabog yonge wamla kom, na babe yonge wamna,” aro sepna seplamogti, “Nimi nengabo nhon olog uro opneogha sembe nari ya'ag opsi. Meneng sisua ologha sembe me nengabo nhon ya'ag olopsi. Allahri, 'Kaindi nimi nhon obogne sembe, Kain opmun tanena Nari el sembe lunuro nimi saekpare opsinun,' seog. Ane sembe na opnik tanena lunuro opnik nimi eneko teng wilindi opsilul,” aro seplamog.
GEN 4:25 Adamap elkel Hawaap nikag maptekpa, kel enekori me nhon mangaro aogpa me aneko si Set engkaog. Me si Set engkaogne, “Kaindi Habel obogpa me mangaro hane komne agha Allahri Habel lunumna tatnel,” aro me si Set engkaog.
GEN 4:26 Set nenekori me nengabo me nhon mangaro aogti si Enos engkaog. Enos wamog li ko'o eneag agha “Nuni Allah mema singkikne,” aro si lena imbaek.
GEN 5:1 Adam yina nimi sisana ane. Allahri nimi samenag sunulamsiogti Eldamne yameap sunsunum uro nimi sumbahiog.
GEN 5:2 Kabuni kelabo sin sumbahiog. Sin mikip nembahiogti sin si “Nimi” engkahiog.
GEN 5:3 Adam el wamogne heng kun-kunne teng tombare eptopne no'op tarabare (130) wamogti, eldamnang yameap nongap sunsunum uro me nengabo me mangaro aogti, si Set engkaog.
GEN 5:4 Adamdi me nenneap kelmabo nenneap liksiogne nen heng kun teng-tengne (800) pin komag agha, liksiog.
GEN 5:5 Adam wamogti tebaogne heng kun-kunne teng-teng (930) wamogti tebaog.
GEN 5:6 Set wamogti heng kun-kunne teng wilindi eptopne tom tarabare (105) wamogti, me nengabo me sina Enos mangaro aog.
GEN 5:7 Setdi me nenneap kelmabo nenneap liksiogne nen heng kun 807 pin komag agha, liksiog.
GEN 5:8 Set wamogne heng kun-kunne 912 wamogti tebaog.
GEN 5:9 Enos wamogne heng kun-kunne teng wilindi eptopne supnabare (90) wamogti me si Kenan mangaro aog.
GEN 5:10 Enosti Kenan mangkaogti me nenneap kelmabo nenneap liksiogne nen heng kun 815 pin komag agha, liksiog.
GEN 5:11 Enos wamogne heng kun-kunne 905 wamogti tebaog.
GEN 5:12 Kenan wamogne heng kun-kunne teng phende eptopne ao tarabare (70) wamogti me si Mahalaleel mangkaog.
GEN 5:13 Kenandi Mahalaleel mangkaogti, me nenneap kelmabo nenneap liksiogne nen heng kun 840 pin komag agha, liksiog.
GEN 5:14 Kenan wamogne heng kun-kunne 910 wamogti tebaog.
GEN 5:15 Mahalaleel heng kun-kunne teng phende eptopne ko'olombare (65) wamogti me si Yared mangaro aog.
GEN 5:16 Mahalaleeldi me nenneap kelmabo nenneap liksiogne nen heng kun 830 pin komag agha, liksiog.
GEN 5:17 Mahalaleel wamogne heng kun-kunne 895 wamogti tebaog.
GEN 5:18 Yared wamogne heng kun-kunne teng no'opbare (162) wamogti me nengabo me si Henokh mangaro aog.
GEN 5:19 Yaredti me nenneap kelmabo nenneap liksiogne nen heng kun 800 pin komag agha, liksiog.
GEN 5:20 Yared wamogne heng kun-kunne 962 wamogti tebaog.
GEN 5:21 Henokh heng kun-kunne teng phende eptopne ko'olombare (65) wamogti me nengabo me Metusalah mangkaog.
GEN 5:22 Henokhti Metusalah mangkaogti Allahap sae tiptangto wamdekne heng kun teng ko'olombare eptopne wilindi (300) ulamdekti nen meap kelmaboap mangalamsiog.
GEN 5:23 Henokh wamogne heng kun-kunne teng naualbare eptopne mekpare (365) wamog.
GEN 5:24 Henokh Allahap sae tiptangto ulamdekti Allahri kiliro tobog.
GEN 5:25 Metusalah heng kun-kunne teng no'opbare eptopne phendeba tarabare (187) wamogti me nengabo me si Lamekh mangaro aog.
GEN 5:26 Metusalah Lamekh mangaro aogti me nenneap kelmabo nenneap liksiogne nen heng kun 782 pin komag agha, liksiog.
GEN 5:27 Metusalah wamogne heng kun-kunne 969 wamogti tebaog.
GEN 5:28 Lamekh heng kun-kunne teng no'opbare eptopne lin tarabare (182) wamogti me nengabo me mangaro aog.
GEN 5:29 Mangaro aogti si Nuh aro engkaogne, “Allahri so'o ene wabaogpa eraruk aghana nuri whin uro awe tolamebeag me eneri wana aingnilamsilul,” aro Lamekhti me si Nuh aro engkaog.
GEN 5:30 Lamekh nen wamogti me nenneap kelmabo nenneap liksiogne nen heng kun teng no'op tarabare eptopne selek (595) pin komag agha, liksiog.
GEN 5:31 Wamogha eldinge heng kun-kunne 777 taogpa Lamekh tebaog.
GEN 5:32 Nuh heng kun-kunne wamogha teng sa'o tarabare eptopne mekpare (500) taogpa eldinge me wilindi mangkahiog, sina: Sem, Yafet, apna Hamap.
GEN 6:1 Mog so'o sirikag-sirikag nimi maikno likto palamogpa, kelabo maikno mangalamsiek.
GEN 6:2 Allah Elmabo tanekori kemelamsiekpa, kelmabo saren walingeog wamek. Wamekpa, sindi wanari, “Toro aukap,” senelamekneog tolamsiek.
GEN 6:3 Undo unulamekpa, Nuni Allah ponekori yubu lelamogti, “Nimi ya'ag kamag wamikag, hain Nari tarelamsinne sinna nimi sop, ane sembe heng kun taibuka taubuka ulamlea teng lambareog wamukang,” seog.
GEN 6:4 Abene li nengabo si “Nefalim” engehiropne mog so'o eneag wamek. Wamekpa Allah Elmaboap kelabo tanekoapti nimi mangkahiekpa sindi mangaroba mangkahiropne yin sae yo nang wamek. Samenag sin taneko wamekti, log kom uro palisong uro nimi si lehinneog wamek.
GEN 6:5 Allahri nimi kemelamsiogpa, nimi so'oag nimiri wanaag agha malingeog seneraglamekti, malingeog ulameka kembahiog.
GEN 6:6 Kembahiogti, “Sa'a sembe sin sumbahisiri, 'So'o eneag wamlulom,' aro ambatsisi?” sembaogti, wana mali taog. “Na mane agha uahi,” aro wana-ag seneraghogti, “Nimi Nari sumbahisinge taneap lebe aroba so'oag wamangneap, imtoman yabiropneap, ni taneko ni Nari kom nembahinun.
GEN 6:8 Ot Nuh sembe aghabog Nari awi senelamnange limnun,” sembaog.
GEN 6:9 Nuh ponekori ulamogne ane: Nuh elmabo me nengabo me wilindi abeneko sina Sem, Yafet, Ham mangkahiog. Nimi so'oag nimi Nuh likog ko'oag wamekne tanekori malia aghabog ulamekpa, ot Nuh aghabog Allahap sae tipto wamogti, malia uan koma wamogti, nimi wamek nimiap se'el neneptangto koma wamek. Aghana nimi yogne ni tala-tala wamekne tanekori Allah whingag yoaba aghabog ulamekti, nimi olamsiek.
GEN 6:12 Allahri kemelamsiogpa, sindi uanep kom saogneog ulamekti, sik malinge aghabog ulamek.
GEN 6:13 Ulamekpa, Allahri Nuh ponekoag yubu lelamogti, “Nimi ni kom taukang aro karepto palilamna. Sindi malia ulamangne mog so'o to'op talamlaba, nimi niap nia mangkinaap orog nembanun.
GEN 6:14 Ane sembe kabong mag alip toman piroba nhon polbanep kom kal, kat kal agha sol tolamlulam. Kabong anekoag leka wilniro sobamendi, mag wa'ileag aro paiag simbik babe, aeag simbik babe wiri lelepto sobalulam.
GEN 6:15 Kabong aneko sunuro we uro sobalulamagna yan ingiro a'ilina saog tanena, selek teng, phendep teng eneko, teng tombareap epto wilindiba tarabareap sobalulam. Sabo uro sunuro sobalulamagna timbom agha no'op tarabare sobalulam. We uro tai solingkululamagna moromna nualbare saog uro solingkululam. Kabong aneko solapmendi, kabong lomag tika wilindi sobalulam.
GEN 6:16 Imagap peyaganoap solapmendi, anabiag keken nhon phobalulam. Kabong aneko paro tara sip ina siram nhon pa'abalulam.
GEN 6:17 'Hain eptoba ni orog taik,' aro Nari mag sin nubunge arukaneba, longoro walelamleri, niknibahileba, ni tebaukang.
GEN 6:18 'Ot an aghabog toro pipkinun,' aro anag salag lelamna. Andi kelap, anmabori kelaboap, kabongag wa'alulom.
GEN 6:19 Lebe aroba so'oag uropneap, im toman yabiropneap sin babe ni tebaikag, ane sembe si a'aero wamangne nene uro kelne nhon, yemne nhon anag yaikpa, kabong anekoag toro tobongkahilulam.
GEN 6:21 A'unap lebe aroba tanekoapti telamluloma maiknoro tobongkalulam,” aro ambarogha sunsunum uro uaog.
GEN 7:1 Olog wameka Nuni Allah ponekori Nuh ponekoag yubu lelamogti, “Nari an kemelangkenba, nimi wamangne anabiag ot an nhonog sikneog ulamlamba anag Nari wana piamna. Ane sembe wene anenge kelabo meap kabong sobaomne nenekoag wa'alulom.
GEN 7:2 A'un kabongag wa'alapmundi lebe aroba Allah sembe pimnep saogne so'oag yabiropneap, im toman yabiropneap, si a'ero wamlange kel nenge saekpare topsimendi tolongolamsimendi, Allah sembe pimnep kom saogne nhon sao nhon sao wamlange ot yemne nhon, kelne nhon topsimendi tobongkahilulam. Magdi niknibahileba ya'ag orog taikag amik sin babe maikno taukangba, ambatkenne nene sunsunum uro ualulam.
GEN 7:4 Ik saekpare wapmunba, 'Hain eptoba Nari sumbahisinge orog talul,' aro Nari mag nubunge pelengelaneba telamlea inipna teng nhon epto naualbare talul,” aro Nuni Allahri ambarogne sunsunum uro Nuh ponekori ulamog.
GEN 7:6 Allahri lebogne sunsunum uro lebe aroba so'oag yabiropneap, im toman yabiropneap, teropneap, terop komneap, Allah sembe pimnep saogneap, si sisa a'ero kabong anekoag yalamekpa, Nuh ponekori tobongkipsiog. Tobongki agha nen ik saekpare wamekpa, mag longolamog sumeneko Nuh, elkelabo, elmabo Sem, Yafet, Ham, sin kelaboap kabong anekoag “Magdi opsileag,” aro Nuh poneko kelabo meap, elmabori kelaboap kabongag wa'alamekti, lebe aroba nimiri pia mo'osiropneap, mo'osirop komneap, mon magti so'oag lelepto yabiropneap, im toman yabiropne ol yagneap, hain eptoba so'oag uroba kel nenge kabongag aneko yalamekpa, Allahri lebogne sunsunum uro Nuh ponekori tobongkipsiogpa, Allahri ina serekahiog. Ina serekahiogpa mag longoro walelamogti, mog so'o niknilamog sum Nuh poneko mangaro yabiogne heng kun taibuka taubuka ulamogha heng kun-kunne 600, wal phendepne, ae ik ko'olom tarabare sumeneko mag punguro walelamogpa, imag siba im kupto mag nubunge kuluklamog paghabog ae inipna teng nhon epto naualbare taog. Mag longoro walelamogti, mog so'o niknibaogne neneko li sumene Nuh mangkaekne heng kun-kunne 600 wamogpa uro yabiog.
GEN 7:17 Mag aneko longoro payangkalamog paghabog ae inipna teng nhon epto naualbare taogpa, kabong aneko pawalelamogti, mag alibag yingkiogpa, pol keaglamog.
GEN 7:19 Mag aneko maiknoro longolamogti, yim nubunge ta'aro niknilamogti, im ngang tamag walbaogpa, mog so'o wamloa abeneko ta'aro niknibaog.
GEN 7:21 Undo unulamogti, Nuni Allahri nia mangkina hain eptopne so'oag yabiropneap, im toman yabiropneap, nimiri mo'osiropneap, peret aro yabiropneap, kelero yabiropneap, nimiap ya'ag orog nenelamsiogti, ot Nuhap kabongag aneko wa'iekneog Allahri toro pipsiog.
GEN 7:24 Mag longoro walbaogne neneko lo'oe tan koma wamog paghabog ik teng lambare eptopne naual tarabare (150) taogpa, kabong aneko saignil ingkiog.
GEN 8:1 Kabong aneko saingnil ingkiogne sembe palilamap. Allahri Nuhap lebe aroba kabongag wa'iekne tanekoap sembe ekon tan koma seneraglamogti, phoana poghogpa, mag longoro walbaogne neneko lo'oe tangtang kuluklamog.
GEN 8:2 Mag so'oag agha punguro walelamogne taneko kom nenelamogti, imag agha kulukul alamogne taneko kom nenero lepto unulamog abeneko mag longkaogne taneko lo'oe tangtang kuluklamog. Mag aneko lo'oe taogne wal lambare agha lo'oe taog.
GEN 8:4 Wal saekne, ik ko'olom tarabare taog sum eneko kabong aneko Ararat sip yim tamag saingnil ingkiog.
GEN 8:5 Saingnil ingkiogpa, wal wilindi wamekpa, mag aneko lo'oe tangtang kuluklamogha wal sa'ongeag, ik selek sum eneko yim lag tangtang palamog.
GEN 8:6 Inipna teng nhon epto naualbare wamogti Nuh ponekori keken lepto soroba aneko kubogti winang hamale sae laplobog. Sae laplobogpa, piogha aneko yan kom paghabog mag aneko lo'oe tangtang kuluklamog.
GEN 8:8 Lo'oe talamogpa Nuh ponekori, “Mag aneko ya'ag lo'oe tal, to?” aro winang mem winang nhon sae laplobog, aghana mag aneko mog so'o ni nikniamogpa winang aneko puna-ag orogti nen samoro kabong anekoag pul aogpa, Nuh poneko sae la'aro winang aneko saelbaogti, nen kabong ae lomag toro pibog.
GEN 8:10 Toro pibogti, ik saekbare wamogha nen mem winang aneko sae laplobog.
GEN 8:11 Sae laplobog sum eneko ae sinag winang anekori kal zaitun ma'al erenne nhon singkamogti, payaogpa, Nuh ponekori, “Mag lo'oe tal,” aro el taog.
GEN 8:12 Nen ik saekpare wamogha Nuh ponekori winang aneko nen sae laplobogpa piogha aneko nen samoro yaog kom.
GEN 8:13 Nuh poneko mangkaeka heng kun taibuka taubuka ulamogha teng no'op tarabare eptopne saekpare (601), wal selekne, ik selek sum eneko mag aneko ya'ag lo'oe taogpa, Nuh poneko ae imag sobaogne neneko lelekto tilamogpa, mag lo'oe tangto mog so'o mektobag tibaog.
GEN 8:14 Ik teng phende eptopne wilindip sum taogpa, mog so'o ya'ag mekog.
GEN 8:15 Mekogpa Allahri yubu lelamogti,
GEN 8:16 “An anenge kelabo meap, anmabori kelaboap lambahut!
GEN 8:17 Lebe aroba so'oag yabiropneap, im toman yabiropneap, nubunge ologne mangap taikti, mog so'o tala-tala wamukangba ni poa lambalulam!” seog.
GEN 8:18 Wene seogpa, Nuh ponekori elkelap, elmaboap, elmabori kelaboap kabongag agha lanalamekti,
GEN 8:19 lebe aroba taneko sisa a'ero poa lambahiek.
GEN 8:20 Lambaekti abeneko Nuh ponekori, “Nuni Allah sembe mhong towalengkanun,” aro kirik yangkaogti, lebe aroba so'oag yabiropneap, im toman yabiropneap, Allah sembe pimnep saogne sisa a'ero uropne nhon-nhon obogti, aukag tabog.
GEN 8:21 “Nuhri taplange Na sembe wali sembaldi tapla,” aro Nuni Allah awi sembaogti, wanaag agha seneraghogti, “Amik, nimiri malia ulamikne sembe Nari so'o ane yo'obanun kom. Nimi ologhag nolamang liag agha wana malinge seneraglamangne sembe Na wana sesog, aghana hain eptoba ni amik nen kom nembahinun kom.
GEN 8:22 Mog so'o ane orog tan koma wamleba, wero mero tero, sonap boboap, ebare mag, inipna kwelekna wamlul,” seog.
GEN 9:1 Wene seogti, Allahri Nuh elmaboap mikip nenero aruklamsiogti, “A'unag agha nimi maikno mangaro pileba, mog so'o ane to'op talul.
GEN 9:2 Samenag magti nimi opsin komag nimiap lebe arobaap sin nikag wamek aghana magti opsiogpa, lebe aroba so'oag uropneap, im toman yabiropneap, maghag uropneap a'un sembe log uro wamukang. 'A'un mikip uro wapmundi, lebe aroba saelbamsululom' aro sin ni a'un saeag palilamna.
GEN 9:3 'So'oag agha pongoroba telamlulom,' aro Nari tatsisi saog uro wene, 'Lebe aroba taneko babe telamlulom,' aro wene ambarelamsin.
GEN 9:4 Ot enengag agha kamag wamnep, ane sembe lebe aroba enengap teheng kom.
GEN 9:5 Nari nimi Nandamne yameap sunsunum uro sumbahisi ana a'undi eneng, a'undi hain sembe Nari lumbanun. Lebe arobari opsilea babe Nari lumbanun, nimiri opsika babe Nari a'undi hain lumbanun. Nimi etneri nimi olamsile tanena el neneko nimi yogneri obukang.
GEN 9:7 A'unag agha nimi maikno mangkahimunneri mog so'o to'op talul,” seog.
GEN 9:8 Wene seogti Allahri Nuh elmaboap sin ambarelamsiogti,
GEN 9:9 “Wene anap anmaboapti mangkahimunneap, lebe aroba so'oag wamangneap, im toman yabiropneap, a'un ni kabong anekoag agha lambalomne, sikindi mangkahyikne sembe babe niag salag palilamnange ane:
GEN 9:11 'Nia mangkina hain eptopne ni wamlange nen mag agha opsunun kom,' aro salag ane palilamna. Nen mag nubunge longoro walelamleri, mog so'o ane mali nembalul kom.
GEN 9:12 Nari a'unap lebe aroba tanekoap a'unag salag palilamnange nene wamle paghabog wamlul. Salag palilamnange nene sembe kekneba Nari yin ene phae mano yame saog uro kokto imag wiriklamna.
GEN 9:14 Sop-sop toa pololong aropne payalamneba mano yame lag talamle tanena,
GEN 9:15 Nari, 'Nia mangkina hain eptoba nen opsunun kom,' aro salag palilamnange neneag seneraglamnun.
GEN 9:16 Nari yin mano yame saog uro lag talamleba Nari kemelamneri, a'unap lebe arobaap sembe salag lelamnange nene kom tanep komdi palilamnange nene sembe el uro wamnun.
GEN 9:17 Nari nia mangkina hain ua uropne niag salag lelamnange nene sik senelamlulomba, kekneba Nari yin phae mano yame ane wiriklamna,” seog.
GEN 9:18 Nuh elmabo kabong anekoag agha lambaekne taneko si Sem, Yafet, Ham lambaek. Ham elmena sina Kanaan.
GEN 9:19 Nuh elmabo wilindi abeneko nimi so'oag nimi ni sikinisang taog.
GEN 9:20 Nuh poneko awe weropne wamogti, haing anggur awe wenne alnibaog.
GEN 9:21 Haing anggur awe welamogti, ik nhon sum Nuh poneko haing anggur lolteroba mag yonge maikno teogti, nenek salehirop nang saog uro ulamog. Nenek salehirop nang saog uro ulamogti, ag enekto amogne komopto tobogahiogti, elenge ae kalun aeag aneko malamog.
GEN 9:22 Nuh poneko karebenang malamogpa Ham nenekori kembaogti, “Naro yabo ambatsineba og sobukap,” aro ambarel pihiog.
GEN 9:23 Ambarel pihiogpa, Semap Yafetapti ag nhon toptekti, sa'o tara-tara ag sirikag saelbamdekti, wail toman ko'ol palamdekti, “Nani kerebenang wamla imnunam kom,” aro wail tahip agha ag aneko niknibarek.
GEN 9:24 Niknibarekti wamdekpa, mag yonge teogne neneko wana peket taogpa, pukogti, “Hamdi nanag uanep kom saogne ual,” aro
GEN 9:25 Hamag yubu lelamogti, “Anme Kanaan seklebale! Elkabo arukna taleri seklenne wamle!
GEN 9:26 Name Sem Ili Allah omeknange wamlaba, nimiri babe Sem Ili Allah omeklamukang. Allahri Yafet elenge mog so'o yabto ambatleba, eldi mangaro mangkahilenge tanekori Sem elmaboap nikag wamukang. Aghana Kanaan neneko elkabo arukna talul,” seog.
GEN 9:28 Mag nubunge neneko longoro walelamogti nimi obsiogha Nuh heng kun-kunne teng no'op tarabare eptopne no'opbare (600) wamogpa, uro yabiog. Uro yabiog aneko nen Nuh heng kun-kunne teng aobare eptopne phendeba tarabare (350) wamog. Heng kun-kunne teng aobare eptopne phendeba tarabare (350) wamogti, Nuh mangkaeka heng kun-kunne 950 wamogpa tebaog.
GEN 10:1 Mag nubunge nenekori nimi opsiogpa Nuh elmabo tanekori nimi liksiekne ane.
GEN 10:2 Yafetdi liksiognena Gomer, Magog, Madai, Yawan, Tubal, Mesekh apna Tirasap.
GEN 10:3 Yafet elme me yandonge Gomer. Gomerti liksiogne Askenas, Rifat, apna Togarmaap.
GEN 10:4 Yafet elme Yawandi liksiogne Elisa, Tarsis apna Kitim nimiap Dodanim nimiap.
GEN 10:5 Yawandi mangkahiogne likto yabiogne sisa nimi ene mag longorop mag abomag urop nimi tala-tala likto mangaro yabiogti, sindi yubu babe yubu a'ero-aero lerop nimi wamek.
GEN 10:6 Ham elmabona Kush, Misraim, Put apna Kanaanap.
GEN 10:7 Hamdi me yandonge Kush. Kush elmabona Seba, Hawila, Sabta, Raema, apna Sabtekhaap. Kush elme Raema. Raema elmabona Syeba apna Dedanap.
GEN 10:8 Kushti me nen nhon mangaro aogne Nimrod. Nimrod samenag nimi nubunge so'oag wamogne Nimrod wamog.
GEN 10:9 Allahri Nimrod pone yeplamogpa, Allah whingag mana winang yin sae yonge wamog. Wamogpa nimi etne yin sae yo tanena nimiri, “El yonge Nimrod Allah whingag wamog saog uro wamla,” aropti nimiri si lerop.
GEN 10:10 Samenag saelbamsiog asna Babel, Erekh, Akad apna mog so'o ni Sinearap.
GEN 10:11 Nen aneko mog so'o eldi saelbamsinepne nubu nenero Asyur piogti Niniwe apna Rehobot-Ir apna Kalah apna
GEN 10:12 Resen sobaog. As tompare abene sobaog aghana as nubu sirikne Kalah sobaog.
GEN 10:13 Hamdi me nabinge Misraim. Misraimdi Ludim nimi mangaro, Anamim nimi mangaro, Lehabim nimi mangaro, Naftuhim nimi mangaro,
GEN 10:14 Patrusim nimi mangaro, Kaftorim nimi mangaro, Kasluhim nimi mangkahiogne nimi ene sisana Filistin nimi.
GEN 10:15 Hamdi elme Kanaan. Kanaandi me yandonge mangaro aogne Sidon, nabinge Het, apna Yebusi nimiap, Amori nimiap, Girgasi nimiap, Hewi nimiap, Arki nimiap, Sini nimiap, Arwadi nimiap, Semari nimiap, Hamati nimiap. Kanaandi mangaroba sisa as tala-tala likto piogti
GEN 10:19 as soro wamekne tane: Sidon, Gerar, Gaza, Sodom, Gomora, Adma, Zeboim apna Lasaap.
GEN 10:20 Anena Hamdi nimi sisa likto piogne sindi as babe mo, yubu babe mo likto piog.
GEN 10:21 Yafet eldo Sem. Sem elmabo mangaro piognena: Elam, Asyur, Arpakhsad, Lud apna Aramap. Aramdi mangkahiognena: Us, Hul, Geter apna Masap. Sem elme elabo me Arpakhsad. Arpakhsadti mangkaognena: Selah, Selahri mangkaognena Eber. Ane sembena Eber nimiri, “Nu Sem ilisang wamap,” senelamek.
GEN 10:25 Eberti me phende mangkahiognena samenagne Peleg. Nimi si Peleg anena, “Mog so'o tala-tala a'eptaek,” aro. Peleg ilipsaena Yoktam.
GEN 10:26 Yoktamdi mangkahiognena Almodad, Selef, Hazar-Mawet, Yerah, Hadoram, Uzal, Dikla, Obal, Abimael, Syeba, Ofir, Hawila, apna Yobabap. Sin nimi likna nenena Yoktamdi liksiogne. Sin wamekagna Mesa apna Sefar yim heng walelingkirobag sip.
GEN 10:31 Sem sisa-ag agha nimi mangaro likto piogne sin yubu babe a'ero, as babe a'ero, sindi mog so'o babe a'ero tangtang piog.
GEN 10:32 Aghana nimi si wamlange nenena Nuh sisaringe, mag nubunge longol langkalamogdi, opsiogpa, Nuhri me wilindi liksiog aghana sin wilindiri mangkahiekne mog so'o as tala-tala nimi aghabog taog.
GEN 11:1 Samen nimi so'oag wamekne taneko niri yubu ot nhonog yubuog lelamek.
GEN 11:2 Sin taneko yale heng walelingkirobag sip piekti mog so'o pulu nhon Sinear ibekti so'o eneag wamek.
GEN 11:3 Wamekti sin-sin yubu lelamekti, “Ae nhon sobaukap,” aro yubu lelamekti, “So'o winiro aukag tabebeba kirik saog taleba kirik pai so'obai ubu walelameberi sobukap,” seekti so'o winiro tabekti
GEN 11:4 lelamekti, “Nun sembe wamukapag as nhon ya'aro solameberi nusamag ae nhon mororo sopso im tamag solingkukap. Sobaberi nun tala-tala taukap kom. Sobabe ae ene nun dam nimi omektangto seneragtangto ka'aseptangto kom-kom wamukap.”
GEN 11:5 Wene aro seneraghekti solamekpa Nuni Allahri kemelingkihinun aro kulukulaog.
GEN 11:6 Kulukul aogti Nuni Allah ponekori, “Wene nimi mog so'o eneag wamangne yubu ot nhon, nimi mog so'o as eneag wamangne babe ot nhon, wene alnirobag alnibang, amik wamikti phelektopne ulamukang.
GEN 11:7 Ane sembe Na kulukaneri yubu yog-yog nembahineba nhondi nhon yubu ka'ebanep kom wamlul,” seog.
GEN 11:8 Wene seogti Nuni Allahri, “Sin unulamangne tanena mog so'oag tala-tala taik,” aro talup lambahiogpa, ae eneko soban koma laploa tala-tala taek.
GEN 11:9 Nuni Allahri nimi yubu mo-mo nenelamsiogti, talup lambahiogpa, tala-tala taekag aneko si “Babel” engkaog.
GEN 11:10 Sem elmabo ane. Sem heng kun-kunne teng wilindi epto ko'olom tarabare (98) wamogpa magti opsiog. Aneko nen heng kun phende wamogti Sem mangaro aogne teng wilindi epto supna tarabare (100) wamogpa el yandome si Arpakhsad mangaro aog.
GEN 11:11 Mangaro aogti me nenneap kelmabo nenneap mangkahiogti, Sem wamogne heng kun-kunne teng no'op tarabare epto no'opbare (600) wamogti tebaog.
GEN 11:12 Sem elme Arpakhsad heng kun teng nhon epto linbare (35) wamogti me si Selah mangaro aog.
GEN 11:13 Selah mangaro aogti me nenneap kelmabo nenneap mangkahiogti Arpakhsad wamogne heng kun-kunne teng ao tarabare epto no'opbare (438) wamogti, tebaog.
GEN 11:14 Arpakhsad elme Selah heng kun teng nhon epto wilindi (30) wamogti me si Eber mangaro aog.
GEN 11:15 Eber mangaro aogti me nenneap kelmabo nenneap mangkahiogti Selah wamogne heng kun-kunne teng ao tarabare epto selek (433) wamogti, tebaog.
GEN 11:16 Selah elme Eber heng kun teng nhon epto saekpare (34) wamogti me si Peleg mangaro aog.
GEN 11:17 Peleg mangaro aogti me nenneap kelmabo nenneap mangkahiogti Eber wamogne heng kun-kunne teng ko'olom tarabare epto lambare (464) wamogti tebaog.
GEN 11:18 Eber elme Peleg wamogne heng kun teng nhon epto wilindi (30) wamogti me si Rehu mangaro aog.
GEN 11:19 Rehu mangaro aogti me nenneap kelmabo nenneap mangkahiogti Peleg wamogne heng kun-kunne teng linbare epto lam tarabare (239) wamogti, tebaog.
GEN 11:20 Peleg elme Rehu heng kun teng nhon epto lambare (32) wamogti Serug mangaro aog.
GEN 11:21 Serug mangaro aogti me nenneap kelmabo nenneap mangkahiogti Rehu wamogne heng kun-kunne teng linbare epto lam tarabare (239) wamogti tebaog.
GEN 11:22 Rehu elme Serug heng kun teng nhon epto wilindi (30) wamogti me si Nahor mangaro aog.
GEN 11:23 Nahor mangaro aogti me nenneap kelmabo nenneap mangkahiogti Serug wamogne heng kun-kunne teng linbare epto mekpare (230) wamogti, tebaog.
GEN 11:24 Serug elme Nahor heng kun teng nhon epto phende (29) wamogti me si Terah mangaro aog.
GEN 11:25 Terah mangaro aogti me nenneap kelmabo nenneap mangkahiogti Nahor wamogne heng kun-kunne teng lambare epto naualbare (148) wamogti tebaog.
GEN 11:26 Nahor elme Terah heng kun-kunne teng phende epto ao tarabare (70) wamogti me si Abramap, Nahorap, Haranap mangkahiog.
GEN 11:27 Terah elmabo si tane wamla. Terahri me wilindi mangkahiogne Abram, Nahor, apna Haranap. Harandi Lot mangaro aogti nen elme si nhon Yiska mangaro aog.
GEN 11:28 Haran neneko ili kamag wamogpa elenge as Ur-Kasdima tebaog.
GEN 11:29 Abram nenekori elkel Sarai toro aogpa Nahor nenekori Haran elmangkel Milka toro aog.
GEN 11:30 Sarai neneko ibili talamogti me nhon mangaro an koma wamog.
GEN 11:31 Terah nenekori elme Haran mangaro aogne Lotap, Abram elkel Saraiap, enero, “Ur-Kasdim so'o eneko laplobiagha as Kanaan pukap,” sembaek aghana as Kharan piekti wamek.
GEN 11:32 Pina wamekti Terah mangkaekne heng kun teng saekbare eptopne ao tarabare (205) wamogti Terah mog so'o Kharan agha tebaog.
GEN 12:1 Wamekpa Nuni Allahri Abramag yubu lelamogti, “Anenge asap, ankaboap, anenge so'oap laplobiagha Nari mog so'o ambatkenenge nhonag pululam,” seogti,
GEN 12:2 “Andi mangarobari mangkahyikne tanekori mangkahyikne maikno talamikti, 'Nimi sisa nubunge wamle,' aro mikip nembahineba an si paliag wamleba an pere agha nimi maikno Nari walingena tatsinun.
GEN 12:3 Nimiri an yeplangkiikne Nari sin yepsinun. Nimiri an walangkiikne nari sin wabahinun. An pere agha nimi mog so'oag tala-tala wamikne ni walingena tatsinun,” seog.
GEN 12:4 Abram mangkaekne heng kun taibuka taubuka ulamogha teng phende epto saek tarabare (75) wamogpa Nuni Allahri ambarogne sunsunum uro, “Kanaan so'oag pukap,” aro as Kharan laplobiagha palamekti elkel Saraiap, ilipsari me Lotap, eldi aruknap, sikininge sae agha wamoghap toro aekti palamek.
GEN 12:6 Palameka Kanaan so'oag piekti Sikhem peramag kal nubu kal bari tamag More so'oag piek. Piekag aneko Kanaan nimi wamekag piek.
GEN 12:7 Wamekpa Nuni Allah poneko Abram whingag lag taogti, “Mog so'o nene andi mangarobari mangaroba tatsinun,” aro ambarog. Ambarogpa Abram nenekori, “Nani Allah na whingag lag talne sembe mhong towalengkimnun,” aro kirik yangaro pibog.
GEN 12:8 Kirik yangaro pibogti, “Mag kwasag sip punun,” aro piogti heng walelingkirobag as Ai anabi as Betel heng purukul pirobag anabiag ae kalun ae soro wamog. Aneko wamogti, “Nuni Allahag mili molona lemnun,” aro mhong towalengenag nhon yangaro sobaog.
GEN 12:9 Wameka nen lamba palamekti Negeb so'o mektopneag kulukul palamek.
GEN 12:10 Negeb so'oag aneko pina wamekpa, kwaneng yo nubunge wamogpa, “Kwaneng erarukti Mesir pukap,” aro palamek.
GEN 12:11 As Mesir peramag piekti elkel Sarai ambarelamogti, “An saren haing elel wamlamba
GEN 12:12 Mesir nimiri kembaghiikti, “Kelene Abram elkel wamla,” aro seneraghikti an lililangkiikti na opnukang.
GEN 12:13 Ane sembe andi, 'Na Abram ilipsa'ael wamna,' semenba sindi an sembe na opnukang kom. Sindi an sembe, 'Ilipsa'ael wamla,' aro nanag walia ulamukang,” aro ambarog.
GEN 12:14 “Walia ulamukang,” aro Sarai ambarogpa, Mesir piekpa Mesir nimiri kemelamekpa Sarai saren kemerop wamog.
GEN 12:15 Mesir nimi sembe yubu sia leropne Firaun wamog. Firaundi yubu eptopnang tanekori babe ibekti, “Saren walinge yal,” aro sikini ambarel piek. Ambarel piekti Sarai poa Firaundi aeag pelepto payaek.
GEN 12:16 Payaekpa Abram sembe, “Sarai eldo wamla,” aro Firaundi walia Abramag ulamogti Firaun eldamnang arukna-ap, pham domba, kambing, sapiap, popsirop pham keledai, untaap pogto tatsiog.
GEN 12:17 Firaundi Abramdi kel tobogne sembe Nuni Allahri Firaundi ae lomap, ilipsaboap sembe nikna nubunge Allahri elag pibog.
GEN 12:18 Nikna nubunge pibogpa Firaundi Abram yobogti, “Andi sa'a sembe, 'Sarai nari kel,' sen koma orolenange ambatneom?
GEN 12:19 Sa'a sembe, 'Naipsa'ael,' aro orolena lebomba nari tomno? An kel ane wamlaba toro agha pululam,” seog.
GEN 12:20 Seogti, “Abram elkelap elenge aba ni toro agha as eneag agha lambaukangpa enero pabhululom,” aro Firaundi eldi arukna tanekoag arukahiog.
GEN 13:1 Abram babe Lot babe sikinenge aba sikin kelabo toro agha Mesir so'oag agha Negeb sip palamek.
GEN 13:2 Sin pina wamekti, pham Abramdinge maikno taogpa, wali-walia leng-leng aroba kirik emas perak wamogpa, tupne wamog.
GEN 13:3 Inaghag maba palamogti, Negeb so'oag agha Betel piog. Piogti Betelap Aiap anabiag samenag, “Allahag mhong towalengkanun,” aro kirik yangaro piboghag aneko wamogti, Nuni Allah omeklamog.
GEN 13:5 Abramap Lotap palamdekne abeneko Lotdinge aruknaap, pham domba, kambing, sapiap, ae kalun aeap maikno wamog.
GEN 13:6 Wamogpa, abene li Kanaan nimiap Feris nimiap mog so'o aneag babe wamek. Undo wamekti, sindinge pham maikno wamogpa sindinge pham pia unag sunsunum kom wamog. Sin nikag wamnep kom saog wamog. Abramdi pham yae ua urop nimiap Lotdi pham yae ua urop nimiap ol dalamekpa
GEN 13:8 Abram nenekori Lotag yubu lelamogti, “Anap nanap andi phamap, nari phamap, pia yae ua urop nangap tana sunsunum komdi nunna elkae-elkae.
GEN 13:9 Ane sembe mog so'o ane sabo wamlaba an babe mo tamenba na babe mo tanun. An waneng sip tanamen tanena na sirik sip tanun. An sirik sip tanamen tanena na waneng sip tanun,” seog.
GEN 13:10 Wene seogpa Lot whing kanebom agha tilamogpa Yordan sip Zoar ina agha mag lu wali wamogti samen Allahri Eden so'o walinge sumbaogne neneko saog wamogha tibog aog. Nene unu arekne nene anam Nuni Allahri Sodom nimiap Gomora nimiap opsin komag uarek. Mog so'o unu arekne nene samen Mesir mog so'oag sukuptopne walinge sa'a nia mangkina wamogne saog mog so'o wamog.
GEN 13:11 Undo wamogpa Lotti tibaogti, “Mag Yordan sip so'o pulu waliag na ngai tanun,” aro Abram laplobiagha heng walelingkirobag sip piogti wamog.
GEN 13:12 Abram Kanaan so'oag wamogpa Lot mag Yordan pulu waliag wamogti ae soro Sodom peramag wamog.
GEN 13:13 As Sodom wamek nimi tanekori Nuni Allah wail ibarelamekti yonge aghabog maikno ulamek.
GEN 13:14 Lot neneko, “A'ero wamnunam,” aro piogpa Allah Nuni ponekori Abramag yubu lelamogti, “Sekamlamag anea mog so'o tibalulam, heng walelingkirobag sip, purukul pirobag sip, mag luag sip, kwasag sip wali uro tibogalulam.
GEN 13:15 Mog so'o tibalama ane, anap anmabo amik mangaro pululneap sembe ya'ag an saeag pimnun.
GEN 13:16 Nari andi mangaroba maikno nembahineba so'o lenglenga saog uro mog so'o to'opto pulul. Andi mangaroba taneko so'o lenglenga saog taleba nimi etneri babe so'o lenglenga a'elbanep kom saog wamleba andi mangaroba taneko babe a'elbhukang kom.
GEN 13:17 Nari mog so'o nene anag pimnundi wene sekmendi mog so'o kemeroa yabululam. Sabo wamla do, kom do?” seog.
GEN 13:18 Wene seogpa, Abram nenekori ae aneko kwerekaogti as Hebron peramag Mamre kal bari nubu kal wamoghag ae kalun ae sol piogti, Nuni Allah sembe mhong towalengenag sobaog.
GEN 14:1 Wamekti Babilonia nimi sikindo yubu sia leropne Amrafelap, Elasar nimi sikindo Ariokhap, Elam nimi sikindo Kedorlaomerap, Goyim nimi sikindo Tideal, sin tombare ma'aptaekpa
GEN 14:2 Sodom nimi sikindo Beraap, Gomora nimi sikindo Birsyaap, Adma nimi sikindo Syinabap, Zeboim nimi sikindo Semeberap, mog so'o Bela si nhon Zoar nimi sikindoap, sin lambareap taekpa sin mal talamek.
GEN 14:3 Mal tabaekne tam ane sembe sarikto lelamap. Nimi nubunge Kedorlaomer nenekori sin lambare abeneko saelbamsiog paghabog heng kun taibuka taubuka ulamogha aobare taog. Aobare taogpa heng kun nhonag sin lambare nangeneri, “El mombolag wamukap komdi sae lipsilul,” aro ma'aptaekti sikindo yabo yin saleropnangdi as Sidim puluag poloro wimbahiek. Poloro wimbahiekag aneko wene “Mag Teptop Mag” aro engerop.
GEN 14:5 Heng kun phendepneag nimi nubunge Kedorlaomer neneko elkabo mal taropnang elag sip taeknangdi, “Mal tabaukap,” aro yaekti as Asyterot-Karnaim anekoag as Refaim nimi oro luknulamsiekti as Ham anekoa Zuzim nimi olamsiekti as Syawe-Kiryataim anekoa Imim nimi opsiekti
GEN 14:6 Hori nimi yim Edom tamag wamekne sarenelepto olamsiekti pai aldesag as El-Paran peramag pilbhiek.
GEN 14:7 Pilbhiekti samoro yalamekti as En-Mispat yaek. Yaekti Amalek nimiringe so'o ni pin wa'iogti ni mali nembaogti Amori nimi as Hazezon-Tamar taneko wamekne babe olamsiekti oro luknu-luknu phiek.
GEN 14:8 Sin taneko oro luknu pahiekpa Sodom, Gomora, Adma, Zeboim, Bela nimi sikindoyabo lambare a'ero wamekne tanekori sikinipsabo yin saleropnang longkitsiekti
GEN 14:9 Elam, Goyim, Babilonia, Elasar nimi sikindoyabo a'ero uropne tombare abenekoap mal talamek.
GEN 14:10 So'o Sidim puluag aneko pensal waronne saogne longoroba maikno longo-longo piamekpa Sodom Gomora nimi sikini yabo phendeap sikinipsabo yin saleropnangap logti mal talamekag laplobiagha merero palamekti sin yin saleropnang nimi maikno pensal waronne saogne longorobag aneko selengag eba timbaek. Timbaekpa nenne yimag sip piek.
GEN 14:11 Piekpa nimi nubunang tombare abenekori Sodom Gomora nimiri sikiningeaba tenaba tanekoap haogha toro agha piek.
GEN 14:12 Abram Ilipsae elme Lot neneko babe Sodom wamogpa nimi isa nimi tanekori sae kaupto pabalamsiekti elenge aba babe toro aek.
GEN 14:13 Undo unu aekpa nimi nhon laniptaogne nenekori mal tabekne sembe Ibraninge Abramag ambarel piog. Abram neneko kal bari nubu kal Amoringe Mamre ponekori kal tamag wamog. Mamre poneko elkabo Eskolap Anerap Abrahamap ma'aptangto wamek.
GEN 14:14 Ilipsae elme Lot neneko sae kaupto poroa piang ana Abramdi ka'ebaogti eldi mabo mal yo uro taropnang teng ko'olombare eptopne saek tarabare (318) poloro wimbahiogti nimi tombare abeneko sarekerepto as Dan pilphiek.
GEN 14:15 As Dan aneko poloro wimbahiogti inipnag nimi isa nang eneko sarenelebom-nelebom agha olamsiekti as Damsyik phibom agha mag luag sip as Hoba peramag pilphiek.
GEN 14:16 Undo unulamekti nia mangkina haogha tobeka tanekoap Lotap kelaboap nimi orange sae kaupto paphiekne tanekoap Abramdi taulpahiog.
GEN 14:17 Abram nenekori Elam nimi sikindo Kedorlaomerap yubu sia leropnang elag sip taekneap taneko oro pabalamsiekti oro luknubahiekti samoro yalamekpa Sodom nimi sikindo poneko as Syawe puluag Abram whingag piog. Sodom nimi sikindo Abramap haiptarekagna nen si nhon “Yubu Sia Lerobag” engerop.
GEN 14:18 Salem nimi sikini nubunge Melkisedek Allah Mikip Phelektopne arukna wamogti, memne Allahap nimiap sembe anabiag uropne wamog. Wamogne ponekori babe kwaneng rotiap mag anggur magap Abram sembe poa piogti
GEN 14:19 wali aro kiplamogti, “Allah Mikip Phelektopne imap so'oap sumbaogne nenekori o'ona sembangkeldi yeplangkelul.
GEN 14:20 Allah Mikip Phelektopne nenekori nimi isa nimi wamangne an saeag piboba El omeklamukap,” seog. Wene seogpa Abramdi nimiri saeagha talupto tobogne taneko palu sa'obare wimbaogti “Allah yeplamnelba, oro luknubahin,” aro Melkisedek palu nhon tarog.
GEN 14:21 Tarogpa Sodom nimi sikindo ponekori Abramag yubu lelamogti, “Naringe Kederlaomerdi toboa nen andi el sae agha talupto tobomne an talapmendi ot nimi naipsabo saelbahiomne nen samoro nandamne tatnululam,” aro molbaog.
GEN 14:22 Wene aro ambarogpa Abramdi yubu lelamogti, “Nuni Allah Mikip Phelektopne imap so'oap sumbaogne whingag ot sik uro lemnunne ane:
GEN 14:23 Andi amik lelapmendi, 'Nia mangkina tatsiba Abram tupne taog,' semenag ane sembe andinge wet sop olog babe na olog babe toro anun kom.
GEN 14:24 Ot Naipsabori teongne aghabog tatkenep kom saog wamla. Nangkabo Aner, Eskol, Mamre nanag sip taongne sin saeag taongeog toro aukang,” seog.
GEN 15:1 Wamogpa Abram nenekori haing uamna kwelekamna senenag agha uro yabinepne kemelamogpa Nuni Allahri Abramag yubu lelamogti, “Abram, log sembaheng kom! 'Malinge anag taleag,' aro Nari an piangkeneri kamna nubunge tatkinun,” seog.
GEN 15:2 Wene seogpa Abramdi yubu lelamogti, “Nani Allah sa'a aba agha Andi na tatnululam, Nani na me nhon tatneom komba na me koma tebaneba naringe sae agha nari arukna Eliezer Damsyikne ponekoag talul,” seog.
GEN 15:4 Wene seogpa Allahri yubu lelamogti, “Nimi etneag babe andinge sae agha elag talul kom. Ot andi me taptopneag andinge sae agha elag talul,” seogti
GEN 15:5 Abram enero asag poa lambaogti ambarelamogti, “Imag tiwalengkipmendi imberea tiwalengkiplulam! Imberea a'ilbanep kom wamla saog uro andi mangarobari mangkahyikne taneko maikno taukang,” seog.
GEN 15:6 Allahri lebogne nene sembe Abramdi, “Ot sik uro lepla,” aro seneraglamogpa, Nuni Allahri Abramag wana piamog.
GEN 15:7 Kwelekaogpa, nen Abramag Allahri yubu lelamogti, “Na Nani Allah wamna. 'So'o ane an ngai talulam,' aro Nari Ur-Kasdim so'oag agha enero payaghai,” seog.
GEN 15:8 Wene seogpa Abramdi Allahag hailamogti, “Nani Allah nubunge, Andi, 'Mog so'o ane tatkinun,' selam aghana, kekneba uamenba 'Sik uro lepla,' sembanun,” aro haibaog.
GEN 15:9 Haibaogpa Nuni Allahri, “Pham sapi kelne nhon, kambing kelne nhon, domba yemne nhon heng kun wilindi ubu piamangneap winang mem winang ologne nhon, nubunge nhon tarel anululam,” seog.
GEN 15:10 “Tarel anululam,” seogpa payaogti pham taneko usoghag agha amuag serelingkiogti lelero palilamogti winang abeneko ningki oro pibog.
GEN 15:11 Pibogti wamogpa winang pham kalerop winang yingkina tukap aro ulamekpa Abramdi yaglamsiog.
GEN 15:12 Heng purukanep peram ulamogpa Abram kwhaingti mangkhauk mabog abeneko inipna tuka'ag aropne logne niknilaog.
GEN 15:13 Tuka'ag seog abeneko Allah yubu lelamogti, “El uro wamlulam, andi mangarobari mangkahyikne taneko heng kun teng naual tarabare ane ni wamikpa nimiri asag agha sekelanan nimi aro arukna maikno aruklamsiikti olamsukang.
GEN 15:14 An anisag yabo arukna nembamsiikti olamsiik nimi taneko sindi ulamikne sembe Nari lumbahineba anisag yabo lanalamikti nia mangkina poro agha lambaukang.
GEN 15:15 An aghabogna anenge nimi sisa likna pimenba, hong kul wangkeleba, wana aingniro tebamenba, so'oag sikkukang.
GEN 15:16 Aghana nimi sisa andinge nimi likna tomne neneko samoro ane yaukang. Amori nimi mog so'o ngai nimi yonge aghabog ulamangne Na wana sesog wamnel kom. Wana sesog uanele sum lumbanun,” seog.
GEN 15:17 Heng purukaogti imbaogpa Abramdi kemelamogpa auk una-ap whea-ap pham kalero phendeag piroba anabiag auk una mhong yarut alamogpa whea auk pog tagtag alamogpa yabalamog.
GEN 15:18 Undo unulamog abeneko Allahri sumene Abramag salag lelamogti, “Andi mabo mangaroba-ag mog so'o nene anag Mesira yalamlari mag nubunge Efrat neneag. Keni nimiri so'oap, Kenas nimiri so'oap, Kadmon nimiri so'oap, Het nimiri so'oap, Feris nimiri so'oap, Rafaim nimiri so'oap, Amori nimiri so'oap, Kanaan nimiri so'oap, Girgasi nimiri so'oap, Yebus nimiri so'oap andi mangaroba-ag tatsinun,” seog.
GEN 16:1 Abram elkel Sarai neneko me mangaroan koma wamog. Wamekti Mesir kel nhon si Hagar el arukna wamog.
GEN 16:2 Wamekti Sarai nenekori Abramag ambarelamogti, “Nuni Allahri nanag, 'Me mangaro alul kom,' senelamlaba an nari arukna aneap maptumunba eldi me nhon mangkatnelul senelamna,” aro ambarogpa Abramdi, “Wali leplam,” seog.
GEN 16:3 Wene seogpa Sarai nenekori, “Na arukna toro alulam,” aro Abram tarog. Tarog li eneko Abram Kanaan wamog paghabog heng kun taibuka taubuka ulamogha heng kun sa'obare taog.
GEN 16:4 Abram neneko Hagarap maptekpa me monag wamogpa, “Me monag wamnel,” aro Hagar el taogti Hagar neneko omektangto, nongkotno aro Sarai mombolag nenelamog.
GEN 16:5 Mombolag nenelamogpa Sarai nenekori Abramag yubu lelamogti, “Nari arukna Hagar neneko nari tatkenoba me monag taonge neneko el taori na mombolag nenelamnel. Andi uaomne neneri na mali nenelamnel. Ane sembe tam nun phendeag wamlange nene Nuni Allahri og tam karebalul,” seog.
GEN 16:6 Wene seogpa Abramdi, “El neneko an arukna wamlaba an saeag wamla. Andi sembamlamne wali elag ualulam,” aro ambarogpa Sarai nenekori Hagar nenekoag yonge maikno ulamogpa logti lambaog.
GEN 16:7 Lambaogti palamogti mog so'o Syur pirobag aldesag mag lu pirobag piogti wamogpa Nuni Allahri Ilipsae arukna malaikat nhon poghogpa Hagarag yaogti
GEN 16:8 yubu lelamogti, “Sarai arukna Hagar, an talaba yalamdi, 'Tala punun,' aro ulamlam?” aro haibaogpa, Hagar nenekori, “Na logti Sarai neneko laploa yalamna,” seog.
GEN 16:9 Wene seogpa Allah arukna anekori, “Samoro elag pimendi wamlulam, wali an eldi mombolag nenelangkilul,” aro wene seogti nen yubu lelamogti,
GEN 16:10 “Nari an mikip nembahineba andi mangarobari mangkahyikne taneko maikno taikpa nimiri a'ilbahinep kom wamlul.
GEN 16:11 Olog wapmena me nengabo me mangaro alulam. Mangaro amendi, 'Na mali uro wamnaba Nani Allahri ka'ebaneori me nengabo me tatnel,' aro me si Ismael engkalulam.
GEN 16:12 An anme neneko pham pai pham saog uro haing whi wamleri elkaboap ni aisa neneptangto wamikpa eldi, 'Nimi opsinun,' aro ulamleba sindi babe, 'El obukap,' aro ulamukang,” aro ambarog.
GEN 16:13 Ambarogpa Hagar neneko wana-ag agha hailtalamogti, “Allah kemelamnelne neneko sumene imna, welaro amik el si engkanun?” aro “El-roi” aro engkaog.
GEN 16:14 Ane sembe mag so'o waliropne Kades anabi Bered anabiag mag so'o waliropne neneko sina, “Beer-lahai-roi,” engkaog.
GEN 16:15 Nen Saraiag sambaogti, olog wamogha Hagar nenekori me nengabo me mangaroaogpa Ili Abram ponekori me si Ismael engkaog.
GEN 16:16 Me si Ismael engkaog li eneko Abram heng kun mangaro yabiogne teng wilindi eptopne lambare (86) wamog.
GEN 17:1 Abram mangaptaogne heng kun taibuka taubuka ulamogha teng wilindi eptopne sa'o tarabare (99) wamogpa, Nuni Allah Abram el whingag lag taogti yubu lelamogti, “Na Na'uni Allah Imap So'oap Saelbamnange. Andi Nari yubuog ka'elapmendi, 'Uaho,' senelamnangeog ulamlulam.
GEN 17:2 Nari anag salag palilamnari, 'Anmabo anisag yabo maikno taukang,' aro salag palilamna,” seogpa,
GEN 17:3 Abram neneko whing tahip yabu sanukto pulingkiogpa Allahri yubu lelamogti,
GEN 17:4 “Nari anag salag lelamnange nene: Nimi sisa nubunge mog so'o a'ero-a'ero wamik nimi sikinisang an talulam. Ane sembe an si samenne Abram alangkeapne nene kom wamleba wene wendog si, 'Abraham wamlulam,' aro engelangkeken.
GEN 17:6 Nari anag nimi likna pimneba, andi mangarobari mangkahyikne taneko maikno taikti, as nubu tangto a'ero-a'ero wamikti yubu a'ero-a'ero lelamukang. Sin taneko anabiag agha yubu sia leropnang raja babe seklamukang.
GEN 17:7 Nari anap anmabo amikneap, 'Na Na'uni Allah Na wamnun,' aro salag palilamnange nene ya'ag wamlebog ekon tan koma wamlulom.
GEN 17:8 So'o Kanaan ane an nimi sekelanan nang saog uro wamlam aghana, an anisag yabo sembe so'o ane 'Ngai taukang,' aro tatsineri, sin sembe Sikini Allah Na wamnun,” aro lelamogti,
GEN 17:9 “Nari salag palilamnange nene anap, anmaboap, anmabo amikneap sae mikip uro saelbamlulom.”
GEN 17:10 Allahri lelamogti, “Nari salag palilamnange nene ekon tan koma el uro wamlulom aro anap, anmaboap nengabo niap nengabo kon karebel talamlulom.
GEN 17:11 Me nengabo me mangalamsimunne ik lin sum talamle tanena kon kareplamsululom. Andamne, arukna anenge asag agha mangap taikneap, as yoghag agha kamna kapto tolamsimunneap, me nengabo me ni kon kareplamsululom. Nari anag salag palilamnange nene ya'ag wamlulne sembe el uro wamlulomba, kon karepnange nene kekneba a'unag wamlul.
GEN 17:14 Kon kareptop kom nimi taneko, 'Allahri lebogne irikna phibaek,' aro a'un, Na, Namabo anabiag agha iksibitsululom,” aro ambarog.
GEN 17:15 Ambarogti nen yubu lelamogti, “An ankel Sarai alamangne neneko si samenne lipsimendi si wendogne Sara engkalulam.
GEN 17:16 Elag walinge pimneri Nari el mikip nembaneba me nengabo me mangkatkilul. As nubu tangto a'ero-a'ero wamikne sikinin el wamlul. Eldi mangaroba mangarobari mangkahyikne anabiag nimi nubunang raja yubu lennang babe seklamukang,” seog.
GEN 17:17 Wene seogpa Abraham neneko whing tahip yabu sanukto pulingkina seneraglamogti, “Nimi ya'ag sabal tangto heng kun teng wilindi eptopne supna tarabare undo pinneri me mangaro anep te? Sara neneko babe ya'ag sabal taori heng kun teng wilindi eptopne supnabare tao. Huro me mangkalulne sembe?” aro wana-ag ogsolamog.
GEN 17:18 Wene senero Allahag yubu lelamogti, “Andi leplamne nene, 'Ot Ismael aghabog Abraham lunumna wamla,' aro ulamlulam,” seogpa
GEN 17:19 Allahrina, “Wene sembaheng kom! Ankel Sara nenekori me nengabo me mangkatkeleba si Ishak engkalulam. Nari anag salag lelamnange nene sunsunum uro anme Ishakti mangkahilenge babe Nariog saelbamsineba wamukang.
GEN 17:20 Ismael sembe babe andi molbalamne nene sunsunum uro ulamnun. Nari el mikip nembaneba eldi mangaroba mangarobari mangkahyikne maikno taukang. Ismael elmabo nengabo aobare mangkahileba yubu lennang wamukang. Elag agha nimi likto pilenge Nari as nubu nene-nene pihinun.
GEN 17:21 Aghana, heng kun amikne nonoag andi kel Sara me nengabo me mangatkilul. 'Sara me mangatkilulne Ishak sembe salag anag pipsinge neneko el saeag talul,' aro nen salag palilamna,” seog.
GEN 17:22 Wene aro ni ambarogti Abraham laplobiagha piog.
GEN 17:23 Laplobiagha piogpa sumeneko sum Abraham nenekori Allahri ambarogne sunsunum uro elme Ismaelap eldi aeag agha kaubuni mangkahiekneap kaubuni agha kamna kapto topsiogneap sumeneko sum ni kon karebahiog.
GEN 17:24 Abraham ya'ag sabal taogti heng kun teng wilindi eptopne sa'o tarabare (99) wamogpa Ismael heng kun naualbare wamog heng kunag agha sin phende babe kareplamsiekti ae enekoag kaubuni wamekneap ni kon karebahiek.
GEN 18:1 Wameka Abraham neneko kal bari Mamre ponekori nubu kal tamag peramag wamogpa, Nuni Allah el whingag lag taog. Ae sumeneko sum ae siro heng pobori ae tomae ina siramag pukamogti
GEN 18:2 whing ebom agha kemelamsiogpa nimi wilindi el whingag sekamek. Sekamekpa tibahiogti Abraham neneko sekom agha sinag merero piogti yabu sanukto sin whingag pulingkina,
GEN 18:3 “Nani yabo, a'undi na sembe o'ona sembamnelomdi yalomba a'epihibom agha peneheng kom. Na a'un arukna wamnari
GEN 18:4 mag tebarel ahineba yan a'elbamundi kal tamag anea tektek eplulom.
GEN 18:5 A'un tektek eplapmunba na kwaneng roti toarel ahinenge timundi mikip tahileba pululom. Nani yabo, nanag yalom ana tektek epna koma pululom kom,” seogpa sindina, “Wah naba nangkae, andi leplamne nene ualulam,” seek.
GEN 18:6 Wene seekpa Abraham neneko elamag-elemag aeag wa'iogti Sara ambarelamogti, “Kwaneng wilindinang maiknoro tukanga sembe sae etparero topmendi winiro taplulam,” aro ambarogti
GEN 18:7 merero pham mo'orobag piogti pham sapi me walinge mesa yagne nhon tobogti, “Elemag oro yobalulam,” aro eldi arukna-ag tarel aogpa elem-elem yobaog.
GEN 18:8 Elem-elem yobaogpa pham sop yobaogne taneko nimi yaek nimi tanekoag pham sop yorobap kwaneng rotiap pham mum mag lolteropneap pham mum agha likto teropneap tarebihiogpa telamekpa el kal eneko tamag sekamog.
GEN 18:9 Sekamogpa sindi yubu lelamekti, “An kel Sara tala wamla?” aro haibaekpa, “Aeag wamla,” aro ambatsiog.
GEN 18:10 Ambatsiogpa sin taneko nhondi yubu lelamogti, “Heng kun nonoag an kel Sara nenekori me mangaro aleri wamleag na samoro anag yanun,” seog. Wene alamdek abeneko Sara neneko ina siram mombolag sip sin wailag wamogti ka'eamsiog.
GEN 18:11 Abene wamdek li Abrahamap Saraap ya'ag sabal wamdekti Sara babe eneng wal yalamog kom.
GEN 18:12 Undo wamdekti Sara nenekori, “Na na'angeap ya'ag sabal tanomo, na kon babe halo seneo aghana huro na'angeap mapnunamne sembe?” aro wanag ogsolamog.
GEN 18:13 Ogsolamogpa Nuni Allahri Abrahamag hailamogti, “Sa'a sembe Sara wana-ag agha seneraglamlari, 'Na sabal tanori huro me mangkanun?' aro ogsobal?
GEN 18:14 A'uni Allahri uanep komne nhon wamla, te? Nari lemna saog uro heng kun nonoag an kel Sara nenekori me nengabo me mangaro aleba wamtumunag samoro yanun,” aro ambarog.
GEN 18:15 Wene aro ambarogpa Sara nenekori logti, “Ogsoban kom,” aro keneno seog. Keneno seogpa Nuni Allahri, “Andi sik uro ogsobalam,” aro ambarog.
GEN 18:16 Wene aro nimi wilindi abeneko nimi nhondi ambarogpa sin wilindi abeneko lambaekti palamekpa Abrahamdi, “Ina-ag pil pihinun,” aro nhon palamek. Palamekti as Sodom tirobag piekti
GEN 18:17 Nani Allahri eldi wana-ag agha seneraglamogti, “Nari, 'Uanun,' senenne Abraham whingag yubu kom tanun kom.
GEN 18:18 Eldi mangkahirobari mangkahyikne maikno taikti, as nubu tangto wamukang. El pere agha Nari nimi sisa ni tala-tala wamikne walingena tatsinun.
GEN 18:19 'Eldi maboap sindi mangkahyikneap ambahileba Na yubuog ka'elamikti, sikneog ul palamukang. Sikneog ul palamukang aghana tam waelbaelba, sik uro kareplamukang,' aro Abrahamog Nari wepsi. Sindi walia aghabog ul palamik tanena Nari salag el neneag pimnonge saog uro ul palamukang,” sembaogti
GEN 18:20 Abrahamag yubu lelamogti, “Sodom Gomora nimiri Na wail ibarelamneangdi yonge aghabog ulamangpa nimi orangeri yubu yanga alamangne Nari ka'elamsin.
GEN 18:21 Ane sembe, 'Ot sik uro yonge aghabog ulamang to?' aropne agha kemelingkhinun,” aro ambarog.
GEN 18:22 Ambarogpa nimi yaek nimi abeneko phende Sodom sip pirekpa Nuni Allah aghabog Abrahamap wamdek.
GEN 18:23 Wamdekti Abraham neneko Nuni Allah peramag piogti ambarelamogti, “Nani, Andi, 'Nimi wali aghabog ulamangneap malia ulamangneap ma'aro opsunun,' senelamlam?
GEN 18:24 Nimi teng phende malia urop komne wamik tanena as nene Andi mali nembanep saog, te? 'Sin tane yo uro wamik,' aro Sodom nimiri malia ulamangne wailag nenelapmendi mali nembahilulam kom, te?
GEN 18:25 Nimi walia ulamangneap malia ulamangneap ma'aro opsululam kom te? Malia uropnangdi ulamangne agha nimi niag taleag. Nani, Andi 'uanun' sembalamne ualulam kom. Andi nimi so'oag wamangne ni sinag tam ua ulamlaba o'olamlamne anekona, sin nimi taneag babe ot sik uro karebalulam, te!” seog.
GEN 18:26 Wene seogpa Nuni Allahri, “As Sodom ane nimi walia ulamangne teng phende wamikpa ipsine tanena, 'Sinne abene el uro wamik,' aro Sodom nimiri malia ulamangne wailag nenelamneri mali nembahinun kom,” seog.
GEN 18:27 Seogpa Abraham nenekori nen yubu lelamogti, “Nani, na nimi so'oagne so'o lenglenga saog uro wamnari Anag na yubu lemnep kom saog wamla aghana na yubu paliag uro lemnari wene lemnunne sembe babe yareag sembane.
GEN 18:28 Nimi walia uropne teng phende abeneko lambare orog wamikpa teng nhon eptopne no'op tarabare wamik tanena lambare abeneko sembe as ni ane opsululam te?” seogpa Nuni Allah ponekori, “Nimi walia urop nimi teng nhon eptopne no'op tarabare wamikpa ipsine tanena lambare abeneko sembe opsunun kom,” seog.
GEN 18:29 Wene seogpa Abraham nenekori nen yubu lelamogti, “Nimi walia uropne teng nhon eptopne naualbare wamik tanena huro senelamlam?” aro haibaogpa Nuni Allahri, “Nimi teng nhon eptopne naualbare wali wamik aro, 'Uanun,' sembanenge lipsinun,” seog.
GEN 18:30 Wene seogpa nen Abrahamdi, “Nani, nen nhon lemnunne sembe wabaneheng kom! Nimi walia uropne nimi teng nhon eptopne wilindi wamik tanena wela ualulam?” seogpa Nuni Allahri, “Sin teng nhon eptopne wilindiog wamikpa ipsine tanena nari, 'Uanun,' sembanena uanun kom,” seog.
GEN 18:31 Wene seogpa Abrahamdi nen ambarelamogti, “Nani, Anag yubu lemnep kom saog wamla aghana yubu pam keyagman menanga lemnari nen lemnunne sembe yo sembaneheng kom. Nimi walia uropne lin tarabareog wamik tanena huro ualulam?” seogpa Nuni Allahri, “Nimi ot lin tarabareog wamikpa ipsine tanena as ane orog nembanun kom,” seog.
GEN 18:32 Wene seogpa nen Abrahamdi ambarelamogti, “Nani, wana mali sembaheng kom! Ot nhon babe lemnun. Ot nimi sa'obareog wamik tanena as ane mali nembalulam te?” aro ambarogpa Nuni Allahri, “Ot nimi sa'obareog wamikpa ipsine tanena as ane orog nembanun kom,” seog.
GEN 18:33 Yubu komopto leptekti Allah babe piogpa Abraham elenge aeag piog.
GEN 19:1 Allah Ilipsabo malaikat phende samenag pirekne abeneko inipnag as Sodom pirek. Palamdekpa Lot neneko leka as Sodom kanero toropne ina siramag pukamogti, tilamsiogpa, nimi phende abeneko yalamdeka tibogahiogti, sekom agha sin whingag piogti, yabu sanukto so'oag pulingkiogti,
GEN 19:2 Sin kiplamsiogti, “Nani yabo, naringe aeag piberi, yan mag aelbarumunba, nari aeag nhon mabukap. Mabeberi ambhum 'Pununam,' sembaromag pururom,” aro ambatsiog. Wene aro ambatsiogpa sindi, “Nangkae, wali leplam aghana nu asag tane mamnunam,” serek.
GEN 19:3 Wene serekpa Lot nenekori yubu mikip uro pukap aro ambatsiogpa, nhon eldi aeag piek. Aeag piekti Lot nenekori kwaneng yobarelamsiogti, roti walerop komne babe tabatsiogpa telamdek.
GEN 19:4 Terekti abeneko anam mamna komag kabuni nongnangap kabuniap meap ni longoro yaekti ae neneko kanelamek.
GEN 19:5 Ae eneko kanero wamekti Lotag yubu lelamekti, “Inipnag kaubuni anag yarangne abeneko tala wamdang? Poa la'imbarelahi. Nuri labaghaukapti,” alamek.
GEN 19:6 Wene alamekpa Lot neneko lambaogti ina serekna paiag siba sobaogti
GEN 19:7 Sodom nimiag yubu lelamogti, “Nangkabo, a'undi yonge ualulom kom!” aro ambarelamsiogti,
GEN 19:8 “Namangkelabo phende nimiap yabirop komne wamdang. Ane sembe tatsineba a'undi, 'Uaukap,' sembalomne ualulom aghana, nimi phende abenekoog nari aeag yarangba, sae lopsinep komdi, a'undi yoaba sinag ualulom kom,” aro ambatsiog.
GEN 19:9 Wene aro ambatsiogpa, Sodom nimi tanekori Lot ponekoag lelamekti, “An nimi sekelananne wamlam ane sembe welaro 'O'obatsinun,' senelamlam? An pi! Pimen kom tanena nimi abeneko olog uro olamsiberi an agha maiknoro opkukap,” aro ambarelamekti, Lot wepto palamekti, “Ina serekna kupto wa'ukap,” aro ulamek.
GEN 19:10 Undo unulamekpa nimi phende abenekori sae lanaro Lot neneko kiliro tobongkarekti, ina serekna aeag agha serekarek.
GEN 19:11 Serekarekti Sodom nimi asag wamek nimi taneko ni haing ulopsirekpa, “Ina siram aneko ala wamla?” aro elamekti, ibek kom.
GEN 19:12 Undo unulamekpa nimi phende abenekori Lot ambarelamdekti, “Sodom nimi tane malia aghabog ulamangpa, nimi orangeri mog so'o ene sembe lelamangne Nuni Allah ka'ebaori, 'Sodom nimi mali nembahilulom,' aro nu pogsio. Ane sembe an anmabo kelmeap an yamal yaboap ankabo yogne as eneag wamang tanena, poa lambahilulam,” aro ambatek.
GEN 19:14 Wene aro ambatekpa, Lot neneko elmangkelabo phende abeneko topsurukang senen nang abenekoag ambarelamsiogti, “Na yamal yabo, Nuni Allahri as nene mali nembalulba elemag-elemag lambaukapti yahut!” aro ambatsiogpa, kabuni abenekori, “Leldepna yubu lelamla,” aro ka'ebarek kom.
GEN 19:15 Ka'ebarek komba mabekti, lukunap malaikat phende abenekori yubu mikip uro Lot ambarelamdekti, “As ane mali talamleri opsileba, tebamunag an kelap anmangkel yaboap elemag-elemag as eneag agha lambalulom,” aro ambatek.
GEN 19:16 Wene aro ambatekpa, Lot nenekori wanag agha, “Pinun to, kom to?” aro seneragto nemen ulamogpa, Nuni Allahri el sembe o'ona aro “Yepnun,” sembaogpa, malaikat phende abenekori Lot elkelap elmangkelabo phende abenekoap sae kiliro as enekoag agha poa lambahiek.
GEN 19:17 As Sodom anekoag agha poa lambahirekti, palamekti, malaikat abeneko nhondi, “A'un tebamunagti elemag-elemag palapmundi, puluag tektek epto koma, wailag sip tisamoro koma yimag pululom,” aro ambatsiog.
GEN 19:18 Wene aro ambatsiogpa, Lot nenekori, “Nani, Andi na o'ona sembamnelamdi, tebaleag aro taulbanelamba, yim neneko we maiknori na anam pin komag as eneag ualulne nenekori na omneleba tebaneag.
GEN 19:20 As ologne peramag wamlange nene tibogae, nu kamag wamukapti, 'As eneag pululom,' aro wene aro ambatsi,” aro molbaog.
GEN 19:21 Wene aro molbaogpa malaikat anekori, “Hae, nangkae, andi wali leplamba, as ologne nene nari mali nembanun komdi
GEN 19:22 elemag-elemag pululom! A'un as enekoag pin komag nari sa'a-sa'a uanun kom,” seog. Lot nenekori, “As ologne nene tibogae,” seogne sembe as eneko si Zoar engerop taog.
GEN 19:23 Heng tingilamogpa, Lot as Zoar wa'iog.
GEN 19:24 Wa'iogpa Nuni Allahri as Sodomap Gomora-ap abeneko pere auk poghap song malia-ap pelengel aogpa,
GEN 19:25 as pulu phende abeneko kabuni kelabo as ologne nubunge olamsiogti, pongoroba mog so'o mali nembaog.
GEN 19:26 Olamsiog abeneko Lot elkel neneko wailag sip samoro tilamogpa kikipto ua kirik sektopne saog taog.
GEN 19:27 Lukunapne Abrahamdi, “Nani Allahag ambhum yubu lemnoag punun,” aro piogti,
GEN 19:28 as Sodom Gomora puluag Yordan sip tilamogpa, nimi awe auk tolongoropba mhong polesog aropne nene saog ulamog.
GEN 19:29 Allahri as Mag Yordan peramag as Lot wamoghag aneko mali nenelamogti, Abraham sembe ekon taog kom. Ekon taog komdi, Lot sembe Abraham ilipsae Haran elme wamlaba, tebaleag aro seneraghogti sae kiliro tobog.
GEN 19:30 Undo unuaogpa, wamekti, Lot nenekori, “As Zoar wamneba tebaneag,” aro log sembe lambaogti, elmangkelabo phende abenekoap yim kirik arameag pina wamek.
GEN 19:31 Wamekti ik nhon sum elmangkel yandonge nenekori ilipsa'elag ambarelamogti, “Nuni sabal tao anekona nai eneng lununne orogti, nu babe nengabo toltonne orogti,
GEN 19:32 nuni mag yonge tebatnemeba, wana loba tanaleba, elap mabebeba, eldi likna lag taukang,” seog.
GEN 19:33 Wene seogti, inipna sumeneko sikini mag yonge tebatekpa, teogti malamogpa elmangkel yandonge neneko iliap maptek. Maptekpa ili nenekori, “Welaro uan,” aro ekon uro wamog.
GEN 19:34 Wamekti lukunapne neneko elmangkel yandonge nenekori ilipsa'elag ambarelamogti, “Inipnag Naniap na mamna anekona sumene nen mag yonge tebatnemeba, malamle abeneko naiap maplulam. Mapmenba nuni sembe nundi mangkanemeba, nuni sembe nimi likna wamlul,” aro ambarog.
GEN 19:35 Ambarog aneko imbaogpa, sikini Lot neneko mag yonge tebatekpa, teogti malamogpa, elmangkel amikne neneko iliap maptek. Lot neneko ya'ag ekondi ekon uro wamog.
GEN 19:36 Elmangkelabo phende abeneko iliap maptekpa, sin phende me monag wamog.
GEN 19:37 Wamekti elmangkel yandonge nenekori me nengabo me mangaro aogti, si Moab engkaog. El neneko Moab nimi wene wamangne sikinisa taog.
GEN 19:38 Elmangkel amikne nenekori babe me nengabo me mangaro aogti, si Ben-Ami engkaog. El neneko Amon nimi sisa sikini taog.
GEN 20:1 Abraham neneko as Mamrea lanaro palamogti, Negeb so'oag as Kadesh anabi mog so'o Syur anabiag palamog abeneko pere as Gerar nimi sekelingkiropne saog uro wamog.
GEN 20:2 As Gerar wamogti Abrahamdi elkel sembe, “Ane nari naipsa'el,” seogpa nimi nubunge Gerar wamogne Abimelekti, “Sara tol pimundi, nanag payalulom,” seog.
GEN 20:3 Wene seog sumeneko inipnag lenda roman Allahri Abimelekhag yubu lelamogti, “Nari lelamna an tebanualam, kelabo andi toplamne neneko ela'ange wamla,” alamog.
GEN 20:4 Wene alamogpa, Abimelekh Saraap mamdek komdi lelamogti, “Nani, Andi nimi as malia uan komne opsinep te?” seog.
GEN 20:5 Wene seogti nen lelamogti, “Eldamne Abrahamdi agha lelamori, 'El naipsa'el,' seo. Apna eldangkel Sarari lelamori, 'Abrahamna, Naro,' seo. Ane sembe nene uanonge nene sindam nimiri leptongneag agha wana wali uro uano, nari sae loba uro uano kom,” seog.
GEN 20:6 Undo wene seogti, lenda mamogpa, Allahri yubu lelamogti, “Nene uaomne nene sindam nimiri leptongag agha wana wali uro uaom. Ane sembe nari anag ulamnonge andi Nanag sembenga pipmenag aro 'Kel eleneag saelbaleag,' senelamnoa wene ambarelangken”, seog.
GEN 20:7 Seogti, “Ane sembe wene kelene ela'ange saeag nembalulam. Ela'ange Na pam silimu tiptopne wamla ane sembe, elkel samoro tatmenba, eldi an sembe Nanag molbatkelenge pere agha an wali nembaghelul. Ela'ange saeag nembamen kom tanena, anap andi asag nimi wamangneap tebalulom,” aro Allahri yubu lelamogha lenda mabog.
GEN 20:8 Lenda undo mabogti, lukunap abeneko nimi nubunge Abimelekh nenekori nimi el umag wamekti, awe welamekne taneko ambatsiogpa, ka'ebaekti log sene-sene palamek.
GEN 20:9 Undo unuaogti Abraham yobogti hailamogti, “Sa'a sembe tamna nunag uaom? Nari anag tam malia uanoba, andi nanag tamna nene uaomba, nanap nari mog so'o nimi wamangneap loba nembahisom te? Andi nanag tam uanep komne uaom,” aro wene seog.
GEN 20:10 Wene seogti, nen lelamogti, “Tamna sa'a seneraghomdi uaom?” aro haibaog.
GEN 20:11 Wene aro haibaogpa, Abrahamdi samoro Abimelekhag lelamogti, “Nari seneragnonge, 'Tane Allahag wana seneragtop kom nimi wamang. Nari kelene toro habe senen nimiri omnikag,' aro uano,” seog.
GEN 20:12 Wene seogti nen lelamogti, “Elna sik naipsa'el aghana nuri nai ot nhon bana, elna ka'in nhondinge agha toptanomo,” seog.
GEN 20:13 Seogti, “Allahri, 'Lambalulam' seoba, naniri aeag agha lanalamnomori nari kelag lemnongena, 'Nanag seneraglamnemen tanena as tala yabalamneme nimiag, “Elna naro,” alamlulam,' seno,” seog.
GEN 20:14 Wene seogpa Abimelekhti Sara eldamne Abrahamag nembaogti, pham dombaap sapiap tarog. Tarogti nen eldi arukna nengaboap kelaboap tarog.
GEN 20:15 Tarogti Abimelekhti Abrahamag yubu sia lelamogti, “Mog so'o ane naringe, andi, 'Wamnun,' sembamenag wamlulam,” seog.
GEN 20:16 Abimelekhti Saraag yubu lelamogti, “Andoag kamna kal ma'al maiknoro tarelamnange nene na sae loba pinori kamna nimi whingag agha tarelamna. 'An mali uaom kom,' aro tatna,” seog.
GEN 20:17 Abimelekhti Abrahamdi kel Sara tobogpa, Allahri Abimelekhti kelaboap eldi aruknaap ibili nene-nene phiog. Allahri ibili nene-nene phiog aneko, sumeneko sum Abrahamdi Allahag moloro yubu lebogpa, Allahri Abimelekh whero eldi kelabo babe whebhaiogpa me mangal tolamek.
GEN 21:1 Wamekti Nuni Allahri samenag lebogne sembe o'ona aro Sara sembe seneraglamog.
GEN 21:2 Seneraglamogpa Abraham neneko sabal taog aghana, Allahri seneropneag agha elkel Sara me monag taogpa Allahri, “Sumene sum mangaro alul,” seogne sunsunum taog sumeneko me nengabo me mangaro aog.
GEN 21:3 Mangaro aogpa, Abraham nenekori me si Ishak engkaog.
GEN 21:4 Engkaogti Ishak neneko mangaro aogne ik lin sum taogpa, Allahri lebogne sunsunum uro Abrahamdi kon karebaog.
GEN 21:5 Abraham neneko mangkaekne heng kun taibuka taubuka ulamogha teng wilindi eptopne supna tarabare (100) taogpa, Ishak mangaro aog.
GEN 21:6 Mangaro aogti Sara nenekori yubu lelamogti, “Allahri nanag ualne sembe ogsolamna. Nimi yog nimiri ka'ebahikti nari ogsolamna saog uro sindi babe ogsobaukang,” alamog.
GEN 21:7 Nen yubu nhon lelamogti, “Nari anam me mangaro an komag nimi etneri nari na'ange ambarelamsengdi, 'An andi keldi anmabo maum timbahilul,' aro ambatnep kom. Na'ange ya'ag sabal tao aghana nari me mangkatna,” alamog.
GEN 21:8 Wamekti Sara elme Ishak nubu talamogti, ilin maum lipsiog sum eneko Abrahamdi sani nubunge yobaog.
GEN 21:9 Yobaogpa Hagar nenekori Abraham mangkarogne Ismael neneko yubu nepto ogsolamog. Yubu nepto ogsolamogha kembaogti,
GEN 21:10 Sara nenekori Abrahamag ambarelamogti, “An tebamenba, andinge na name Ishakap, an arukna elmeap sin ngai tarikag, an arukna ilin elme yag lambahilulam,” aro ambarog.
GEN 21:11 “Yag lambahilulam,” seogpa Abraham nenekori, “Ismael babe nari me aghana sa'ambe lepla?” aro wana mali taog.
GEN 21:12 Wana mali taogpa Allahri Abrahamag yubu lelamogti, “An arukna Hagar elmeap sembe wana ikin sembaheng kom. Nari, 'An anisag yabo maikno taukang,' aro salag pimnonge neneko Ishak siba uro pilul ana Sarari leplange nene saog uro ualulam.
GEN 21:13 Hagar elme babe an mangkatkeonge wamla aro el babe mikip nembaneba, eldi mangaroba mangarobari mangkahyikne maikno taikpa, as nubu nene-nene phinun,” seog.
GEN 21:14 Wene seogpa mabeka lukun Abraham nenekori kwanengap mag ma'i terobap Hagarag pobirogti, “Anmeap palamturom,” aro ambatsiog. Ambatsiogpa Hagar neneko pirekti, Bersyeba aldesag “Tala pinun,” aro wana eka'uk alamogpa, yang pang ulamog.
GEN 21:15 Yang pang ulamogpa, mag pabiogne abeneko orog taogpa Hagar nenekori elme yoaba nusamag pilobogti,
GEN 21:16 “Name si taraplamlea imnun kom,” aro olog weag pina pukamogti engelamog.
GEN 21:17 Me Ismael nenekori mag yori hain taknep ulamogti, “Na mag,” alamogha Allahri ka'ebaogpa, Allah ilipsae arukna malaikat nenekori imag agha yubu lelamogti, “Hagar, sa'a sembe wana ikin uro wamlam? Allahri anme yubu ka'ebalba, log sembaheng kom!
GEN 21:18 An me peramag pimendi pukitmendi, sae lomoro saelbalulam. Ilisag yabo maikno nembahineba, maikno taikti, as nubunge sopso pukang,” aro ambarog.
GEN 21:19 Ambarogti, “Mag sembe so'o walirobag kembalul,” aro Hagar haing tibin nembaogpa, ibogti mag ma'iag tero tel piogti, elme tarel aogpa teog.
GEN 21:20 Teogti wamogpa, Allahri Ismael neneko piamog paghabog nubu taogti, aldesag Paran wamog. Paran wamogpa, ilindi Mesir kel nhon tarogpa, toro aogti yin sae yonge wamog.
GEN 21:22 Ik nhon sum Abimelekhap, Pikhol yin saleropne sikindoap Abrahamag yubu lelamdekti, “Nuri lag ia ulangkeap. Nia mangkina Allahri yeplangkelne,” serek.
GEN 21:23 Serekti, “Ane sembe nanag nen orolenange leplulam komba, sik uro Allah siag leplulamne, nari mabo sembe babe, nari mangarobari mangkahyikne sembe babe, mog so'o ene sembe babe, nari anag ulamna saog uro, anna sekelananne anekona,” seog.
GEN 21:24 Wene seogpa Abrahamdi, “Yo nangkae, nen orolenange lemnun kom,” seog.
GEN 21:25 Wene seogti Abraham elmaboringe mag waliroba longoropne Abimelekh ilipsabori taulbaekne sembe Abrahamdi, “Yaghe, welaro,” seogpa
GEN 21:26 Abimelekhti, “Na ekon: Etneri uaonge sembe apna samenag ambatneom kom aghana sumeneog ka'eban,” seog.
GEN 21:27 Wene seogpa Abraham nenekori eldi pham domba eldi pham sapi tobogti, Abimelekh tarogpa, yubu salag nikne leptek.
GEN 21:28 Leptekti Abraham nenekori pham domba me kelne aghabog saekbare poloro nikag pibogha sembe Abimelekhti, “Sa'a sembe neabenena nikag poloro piplam?” seog.
GEN 21:30 Wene seogpa Abrahamdi, “Pham me saekbare abene nari saeri tatkinun. 'Pham abene kekneba mag ane naba nari saeri wailbano,' aro an el ua unne sembe tatkinun,” seog.
GEN 21:31 Wene aro salag leptekti, yubu nikne leptek ane sembe mag aneko Bersyeba engkaek.
GEN 21:32 Yubu Bersyeba aneko nikne leptekti, Abimelekhap yin saleropne sikindo Pikhol ponekoap nen samoro Filistin so'oag pirek.
GEN 21:33 Pirekpa Abraham nenekori kal yangkal saog kal Bersyeba peramag aneko mebogti, “Allah ya'ag kamagne poneko” si lero yoplamog.
GEN 21:34 Abraham neneko ik maiknoro Filistin so'oag aneko wamogti, nimi sekelananne wamog.
GEN 22:1 Olog wameka Allahri, “'Abraham neneko Na yubu ka'ebalul to?' aro mipnun,” sembaogti, “Abraham,” yobog. Yobogpa, “Nani, na wamna,” seog.
GEN 22:2 Allahri ambarelamogti, “An me ot nhonogne an wanaagne Ishak nenekoap Moria mog so'oag pururom. Pirumundi Nari yim nhon ambatkenengeag an me 'Na sembe mhong towalengkalulam,' aro oro aukag taplulam,” aro ambarog.
GEN 22:3 Ambarogpa mabogha lukunap Abraham nenekori, “Allah sembe mhong towalengkanundi kal poa pukap,” aro kal werero sin popsinep pham keledai alibag towalengkibekti Ishakap eldi arukna phendeap Allahri ambaroghag aneko piek.
GEN 22:4 Palamek paghabog inipna phende taogpa ik wilindip sumeneko palamekti, Abrahamdi tilamogpa, Allahri leboghag aneko olog we uro wamogpa tiboghaogti,
GEN 22:5 Abraham nenekori eldi arukna phende abenekoag ambarelamsiogti, “A'un keledai aneap ane wamturom. Na nameapti Allah omekanunamdi tani yingkinemeri yanunam,” aro ambatsiog.
GEN 22:6 Ambatsiogti, “Allah sembe mhong towalengkanun” aro kal werebaekne taneko elme Ishakti sa'oag saobirogti, eldamneri auk unaap, pisoghap saelbaogpa palamdek.
GEN 22:7 Palamdekti Ishak nenekori, “Naiong,” seogpa, Abraham nenekori, “Name, sa'a?” seog. Seogpa Ishak nenekori, “Aukap kalap tomnam aghana, pham domba aukag tamnunamne tala wamla?” aro haibaog.
GEN 22:8 Haibaogpa, Abraham nenekori, “Name, Allahri tatsilenge tamnunam,” seogpa palamdek.
GEN 22:9 Palamdeka Allahri ambaroghag aneko pirekti, Abraham nenekori, “Allah sembe mhong towalengkimnun,” aro kirik yangkaogti, kal alibag pibog. Pibogti Ishak haing sae yan kaubiagha kal paliag mambirogti,
GEN 22:10 pisog kiliro “Omnun,” aro ulamogpa,
GEN 22:11 NUNI Allah Ilipsae malaikat nenekori imag agha, “Abraham, Abraham,” aro yobogpa, Abraham nenekori, “Wa,” seog.
GEN 22:12 “Wa,” seogpa, Allah arukna malaikat anekori, “Anme wali uro wamlulba, opseng kom. Andi Na sembe log uro wamlamdi yubu ka'elamnelamne wene Na eltanel. 'Anme me ot nhonogne tatnululam,' senaba o'ona aro toro piro alam kom,” seog.
GEN 22:13 Seogpa Abraham neneko tangaom agha tilamogpa, pham domba yemne pinu yagne yoabaag kekhaektangtoba wamogpa, ibogti pham aneko tolbina elme lunumna oro aukag tabog.
GEN 22:14 Taboghag aneko Abrahamdi si, “NUNI Allahri teko senenna tatsirobag,” engkaog. Engkaogha sunsunum uro wene babe nimiri lelamangdi, “NUNI Allahri yim eneag agha teko senenna tatsilul,” alamang.
GEN 22:15 Malaikat anekori nen imag agha yubu lelamogti,
GEN 22:16 “Na Nandamne Allah Siag yubu sik uro lemnunne ane: Nari, 'Anme ot nhonog agha tatnululam,' senoba, 'Name o'ona,' aro toro piro aom komba,
GEN 22:17 Nari an mikip nembagheneba, andi mangarobari mangkahyikne taneko maikno taukang. Maikno taikti, imberea nimiri a'ilbahinep kom saog uro, kirik a'angkea mag abolag lalaptoba a'ilbanep kom saog taikpa, nimiri a'ilbahinep kom wamukang. Nimiri a'ilbahinep kom wamikpa, andi mangarobari mangkahyikne maikno taikti, nimi mog so'o wamikne oro luknulamsiikti, sindi isa nimi, sindi so'o sin ngai taikti saelbamukang.
GEN 22:18 Andi Na yubu ka'ebalamba, andi mangarobari mangkahyikne pere agha Nari nimi sisa ni tala-tala wamikne walingena tatsinun,” aro ambarog.
GEN 22:19 Ambarogpa Abraham neneko eldi arukna phende pipsioghag aneko samoro yarekba, sin ma'aptaekti, as Bersyeba pina ya'ag wamek.
GEN 22:20 Abraham neneko ilipsae Nahorti kel Milka sembe ka'elamogpa, me linbare wamsil ana ka'ebaog. Nahorti mabo sina ane: Us me yandonge, Bus me nabinge, tanena Nahor elme wilindipne Kemuel mangaro aog. Kemuel poneko Aramnang sikini taog. Nahor elme tomne Kesed, lamne Hazo, no'opne Pildasi, saekne Yidlap, elabome ane Betuel. Betuel ponekori Ribka mangaro aog.
GEN 22:24 Nahor elmabo tognoro pia urop kel Reumaag agha me tombare. Sina: Tebah, Gaham, Tahas apna Maakhaap likitsiog.
GEN 23:1 Sara neneko mangkaekne heng kun taibuka taubuka ulamogha teng tombare eptopne supna tarabare (127) taog.
GEN 23:2 Kanaan so'oag as Kiryat-Arba anekoa tebaog. Tebaogpa ela'ange Abraham yingkina engelamog.
GEN 23:3 Yingkina engelamogti, Abrahamdi elkel teptoba aneko aeag piogha Het nimi as Hebron so'o ngai nangag piogti, ambarelamsiogti,
GEN 23:4 “Na a'un anabiag na sekelanne wamnari, 'Nari kel siknunag sembe so'o olog ambatnemunba, kamna tatsinun,' aro mololamsin,” aro ambatsiog.
GEN 23:5 Wene aro ambatsiogpa sindi lelamekti,
GEN 23:6 “Nani, an nimi nubunge nu anabiag Allahri mikip nenelangkelba wamlamne kiplangkeap. Nu nununge so'o nimi teptopne siklamsiabag tapto walingeag siklulam. Nimi siklamsiabag nu nimi a'erodinge taneko anabiagne nhonag ankel siklulamne sembe nu niri wali sembamap,” aro ambarek.
GEN 23:7 Wene aro ambarekpa sin whingag yabu sanukto pulingkiogti,
GEN 23:8 yubu lelamogti, “A'un nari kel, 'Wali tanea siklul,' sembalomba, 'As Magbela kirik arame Zohar elme Efrondi sirikag wamlange neneko kamna kapto tomnundi ambatlulom,' aro mololamsin. Eldi kamna kapna molbanelenge sunsunum uro a'un whingag agha tatnundi, so'o kamna kapto tomnunag aneko nari kel sikneba, so'o naringe talul,” aro ambatsiog.
GEN 23:10 Sumeneko Efron neneko Het nimi nusamag leka as kanero torop ina siramag pukamogti, Abrahamdi lebogne neneko ka'ebaogti, nimi wamekne taneko whingag lelamogti,
GEN 23:11 “Nani, na nangkabo ni ka'eamangpa, yubu lemnuandi ka'eamnululam. Nani, so'o siklulamag ane babe kirik arame ane babe tarelangken. Andi kamna kapnululam kom,” seog.
GEN 23:12 Wene seogpa, Abraham neneko Het nimi whingag yabu sanukto pulingkiogti,
GEN 23:13 sin whingag agha Efronag yubu lelamogti, “Nari lemnunne nene ka'eamne. So'o aneko nari kel siknundi, kamna tatkinunne sembe, 'Saelbalulam,' aro mololangken,” aro ambarog.
GEN 23:14 Wene aro ambarogpa, Efron nenekori,
GEN 23:15 “Nani, ankel so'oag siklulamba, kamna maikno toplulam kom aro kal ma'al kirik wana solomne teng naual tarabare mololangkenne sembe wana ikin sembaheng kom,” aro ambarog.
GEN 23:16 Wene aro ambarogpa Abrahamdi, “Wali lepla,” sembaogti, Efrondi nimi Het nimi taneko whingag molbaogne abeneko sunsunum uro, “Sunurop to?” aro sumbongkia torobag kirik wana solomne ikin sununna kembaogti, Efron ponekoag tarog.
GEN 23:17 Tarogpa, so'o Mamre heng walelingirobag sip Makhpela wamog so'o Efrondi aneko Abraham ngai taog. So'o nenekoag awe wenag babe, kirik arame babe, kal wamogne ni taneko babe,
GEN 23:18 “Abraham saeag tal,” aro Het nimi ina siram peramag wamek nimi taneko ni el taek.
GEN 23:19 Nimi ni el taekpa, Abraham nenekori Kanaan so'oag as Hebron wamoghag Makhpela arameag elkel Sara tebaogne neneko sikog.
GEN 23:20 Undo ulamogti samenag Het nimiri so'o saelbamekne kirik arameap abeneko Abrahamdi, “Nari kel siknun,” aro ngai taog.
GEN 24:1 Abrahamdi so'o as Hebron toboghag aneko ngai taogti, wamogpa, NUNI Allahri elag walia ulamog pahabog, nong sabal taog.
GEN 24:2 Sabal taogti ik nhon sum eldi arukna elenge aba ni pia ulamsiogne ponekoag yubu ambarelamogti, “Name, Andi sik uro ambatnululamne el tanundi, na yan kwagha mombolag sae tobong kiplulam.
GEN 24:3 Tobong kipmendi NUNI Allah Imagne im so'o saelbamlange nenekori ka'eamleba, name Ishak sembe andi, 'Kanaan so'o eneag wamang kelabo ebanun kom,' aro yubu sik uro leplulam.
GEN 24:4 Na mangkaneekag Ur-Kasdim pimendi, na nangkabo naipsabo sikin mangkelabo nhon el pululam,” aro ambarog.
GEN 24:5 Wene aro ambarogpa, eldi arukna anekori Abrahamag yubu lelamogti, “Kelabo Ishakti toplul sembanenge nenekori, 'Anap Kanaan pununam kom,' sele tanena anme Ishak eneko enel aneba, andi laploa yalumag pununam te?” aro haibaog.
GEN 24:6 Haibaogpa Abrahamdi, “Kom, na name tane wamlul. Enero pabululam kom!
GEN 24:7 NUNI Allah imag wamlange nenekori na naniri asag agha poa lambaneog. Poa lambaneogpa, nangkabo laplobiagha lambahiba, Allahri, 'So'o Kanaan ane otsik an anisag yabo tatsinun,' aro salag pibog. El nenekori, 'An yepkulul,' aro El Ilipsae malaikat poghol aleba, andi na name Ishak sembe kelabo aneko enero poa yalulam.
GEN 24:8 Kelabo anekori, 'Anap Kanaan so'oag pununam kom,' sele tanena wene salag palilamnange sembe seneragna koma wana keyagman uro an mo yalulam. Ane sembe name enero poa pululam kom!” aro ambarog.
GEN 24:9 Wene aro ambarogpa, eldi arukna anekori ili Abrahamdi kwagha mombolag sae tobongkibogti, Abrahamdi lebogne sunsunum uro salag pibog.
GEN 24:10 Salag pibogti, eldi arukna anekori wali-walia iliringe tobogti, popsirop pham unta sa'obareag towalengkaogti, Abraham ilipsae Nahor samen wamoghag Aram mog so'o mag luag sip piog.
GEN 24:11 Piogti ae sinag kelabo mag tel alamekag, “Pham unta taneko tektek eplamik,” aro mag sembe so'o wailbaekag aneko tektek eplamog.
GEN 24:12 Tektek epto wamekpa, Abrahamdi arukna aneko Allahag yubu lero mololamogti, “Na nani Abraham Ili Allah wamlamne, Nani Abraham sembe o'ona sembame. Nani Abrahamdi sembao saog uro uanundi yepnululam!
GEN 24:13 Na wene mag waliroba peramag sekamna. Olog wamneba as eneag kelmabo mag telaukang.
GEN 24:14 Sin yaikne taneko nhon elag mololamneri, 'Mag ma'iag teropne na mag olog tunundi,' seneba, eldi, 'Nani an temenba, anenge pham unta babe tebatsunun,' selenge neneko sembe, 'NUNI Allahri Ishak sembe kelabo nene weplange ane,' sembanun. Nari pham unta babe mag tebatsile tanena, 'Nani Abraham Allahri o'ona sembamlari, eldi seneragtopne sunsunum uro ual,' aro el tan unulul,” aro Allahag molona molorop yubu lebog.
GEN 24:15 Allahag yubu molona lelamog abeneko kel saren nubu walinge nhon si Ribka mag ma'i teroba mag tebogti, walel alamog. Ribka neneko Betuel elmangkel. Betuel poneko Abraham ilipsae Nahor elme Milkari mangaro aogne. Ribka nengabo tomna koma wamogti yaog. Mag sembe wailbaekag aneko kulukaogti, mag ma'iag tebogti walel alamogpa,
GEN 24:17 Abraham arukna aneko elemag-elemag keleneko peramag piogti, “Namangkel, mag olog tebatne,” aro molbaog.
GEN 24:18 Molbaogpa kelenekori, “Nani, tululam,” aro mag ma'i aneko elemag-elemag sa'oag agha toro pibogti mag tero tarogpa teog.
GEN 24:19 Teogpa kelenekori, “Andi pham unta babe mag tebarel phineba mag tukang,” seog.
GEN 24:20 Seogti mag teroba aneko elemag-elemag pabiogti, pham unta mag teroba anekoag ikatsiogti, nen samoro telbina ikatsiogpa, pham taneko mag ni teek.
GEN 24:21 Undo unulamogpa Abraham arukna anekori, “NANI Allahri nari semban saog uro yepneldo,” aro yubu koma keleneko kembamogti wamog.
GEN 24:22 Pham taneko mag mon og uro teekpa, Abraham arukna anekori wali-walia leng-leng aroba kirik emas agha sunuroba kamna alikinag uro kamna kapto toroba tobogti, kelenekori uramag u pong saog uro tobongkibogti, sae no'obag babe sae supnagha saog uroba phende no'obag tobongkibog.
GEN 24:23 Tobongkibogti hailamogti, “Anina sina etne? Aniri aeag nari maboap mabukapti, olog kolo wamlare?” aro haibaog.
GEN 24:24 Haibaogpa, Ribka nenekori, “Na nani Nahorap Milkaapti mangkaekne Betuel wamla,” seogti,
GEN 24:25 “Nu nununge ae an sembe kolo wamla. Anenge pham mamnebag babe wamlaba, anenge phamdi tena babe wamla,” seog.
GEN 24:26 Wene seogpa Abraham arukna aneko so'oag yabu sanukto pulingkiogti, Allahag yubu omekto towalengelamogti,
GEN 24:27 “Na nani Abraham ILI Allah omeklangken. Andi Nani Abraham ekon tan koma o'ona senelamlamdi, ambarom saog uro ualam. Na nani ilipsaeringe mangaroba wamangag peket enero poa yanelam,” seog.
GEN 24:28 Wene seogpa Ribka neneko ilindi aeag piogti, Abraham arukna anekori lebogne sembe eldi ae lomag nimi ambarelamsiogpa, Ribka eldo Laban nenekori babe ka'ebaog.
GEN 24:29 Ka'ebaogti kemelamogpa, ilipsa'el uramag babe, saeag babe kirik emas agha sunuroba leng-leng aroba tobongkiamogpa, Laban kembiagha elem-elem lambaogti, tilamogpa Abraham arukna elenge phamap mag waliroba peramag sekamogpa, Labandi tibog aogti, piog.
GEN 24:31 Piogti, Abraham aruknaag, “Nani, an NUNI Allahri o'ona sembe yeplangkelne wamlamba, ipken. Paiag tane wamlulam kom. Anap anenge phamap mamnebag o'obandi, aeag pukapti yae,” seogti,
GEN 24:32 enero poa aeag piog. Piogti Laban nenekori arukahiogpa pham unta alibag payaogne taneko toro pelengkaekti, pham mamnebag o'ol aba karebaekne usa yangaro uaekti, tena pham sembe babe tatsiek. Tatsiekti Abraham arukna yan mag a'elbaukang aro mag tebatsiek.
GEN 24:33 Kwaneng yoro sin whingag pil aekpa, Abraham arukna anekori lelamogti, “Kwaneng anam ten komag na yanne sembe ambatsineri, na kwaneng tunun,” seogpa, Laban nenekori, “Nani, ambatsi!” seog.
GEN 24:34 Seogpa, “Na Abraham arukna yan,” seogti,
GEN 24:35 “Na nani neneko NUNI Allahri mikip nenelamogti, pham domba, sapi, unta, keledaiap, wali-walia leng-leng aroba kirik emas, perakap, elenge me kelmabo aruknaap maiknoro tarogpa, el neneko tupne taog.
GEN 24:36 Na nani elkel Sara neneko ya'ag sabal taog aghana me nengabo me mangkarogpa, naniri, 'Na tebane tanena naringe tane name meneri ngai taho,' senelamlari wamla.
GEN 24:37 Eldi ambarelamneori, 'Na name sembe Kanaan kelabo ebaheng kom aro sik uro leplulam.
GEN 24:38 Na nani samenag wamoghag pimendi, na nari naipsae anabiagne kelabo nhon ipmendi, enero poa yalulam,' aro ambatneo.
GEN 24:39 Ambatneoba narina, 'Kelabo anekori, “Anap Kanaan so'oag pununam kom,” sele tanena welaro uanun?' aro haibanoba
GEN 24:40 eldina, 'Undo kom. Nani Allah yubu ka'elamnaba Nani Allah ponekori, “An yepkilul,” aro Ilipsae malaikat poghol aleba, na name sembe naipsae anabiagne kelabo nhon iplulam.
GEN 24:41 Nangkabo tanekori kelabo nhon tatkik komba, ipmen taneogna, wene salag palilamnange sembe seneragna koma wana aingniniro nongog yalulam,' aro ambatneo.
GEN 24:42 Ambatneoba sumene mag sembe so'o walirobag yingkina wanaag agha molona Allahag yubu lelamnari, 'NANI, Abraham ILI Allah wamlamne, Abrahamdi sembao saog uro uanundi, yepnululam.
GEN 24:43 Wene wamneba, kelme nhon mag na wamnaag ane tel tol alengeag, “Mag tebatne,” aro molbaneba,
GEN 24:44 kelabo nhon yalengeri, “Nani mag tebatkenun,” sele tanena el neneko Allahri weplange kom sembanun. Kelabo nhon yalengeri, “Nani, mag tebatkeneri, anenge pham unta babe tebarel phinun,” selenge neneko sembe Nuni Allahri Abraham elme Ishak sembe kel weplange ane sembanun,' aro Allahag molona molban.
GEN 24:45 Allahag yubu lelamna abeneko Ribka neneko mag ma'i sa'oag sa'oro poplari, mag telengkilba, nari, 'Mag tebatne,' aro mag molban.
GEN 24:46 Mag molbanba, mag ma'i elem-elem toro piplari, 'Nani, mag temenba, anenge pham babe tarel phineba tukang,' selba ten. Tenba nanenge pham babe mag tarel phil.
GEN 24:47 Tarel phildi yalba nari, 'An ani etne?' aro haibanba, 'Nani Nahorap Milkaapti mangaro arekne Betuel neneko wamla,' selba, emas agha u pong sunuropne ulomag tobongkipnari, supnagha leng-leng arobari emas agha wiropne saeag tobongkipna.
GEN 24:48 Tobongkipnari, nani Abraham ILI Allah omeklamnari, yabu sanukto pulingkina, 'Andi na nani ilipsaeri mangarobari mangaroba wamlaag payanelamba, nani elme sembe kelene imna,' Allah omekan.
GEN 24:49 Ane sembe a'undi na nani 'Nu sisa nhonog aneko,' sembamundi, o'ona sembamun tanena tibin nenero ambatnululom, kom sembamunne babe ambatnumunba, yog kelabo ebanun,” aro ambatsiog.
GEN 24:50 Ambatsiogpa Labaanap Betuelapti ambarelamtekti, ''NUNI Allahri seneropne sunsunum uro, uro yabilba, nuri sa'a senep kom.
GEN 24:51 Ribka nene anap pirumunba, NUNI Allahri sembao saog uro ani elmeri toplul,” serek.
GEN 24:52 Wene serekne ka'ebaogti, Abraham arukna aneko so'oag yabu sanukto pulingkiogti, NUNI Allah omekaog.
GEN 24:53 Omekaogti, ag eneknangeap, leng-leng aroba kirik perak emas agha wiroba saeag tobongkipnepneap, saramag langkanepneap Ribka tarogti, ilin babe eldo babe wali-walia tatsiog.
GEN 24:54 Tatsiogti, Abraham arukna anekoap ilipsaboap kwanengap magap teekti mabek. Mabeka kwelekaogpa, Abraham arukna anekori, “Na naniag punundi ambarelamsin,” aro ambatsiog.
GEN 24:55 Ambatsiogpa, Ribka eldoap ilinapti ambarelamdekti, “Ribka nunap ik sa'obare to undo wamebea pulul,” serek.
GEN 24:56 Wene aro ambatekpa Abraham arukna anekori, “NUNI Allahri yeplamneoba, naniri seneragtopne sunsunum uro uano anekona a'undi, 'Wamukap,' seheng kom. Naniag punun anekona, 'Elemag,' ambatnururom,” aro ambatsiog.
GEN 24:57 Wene aro ambatsiogpa, sindina, “Ribka neneko yobeberi haibaukap,” serekti,
GEN 24:58 Ribka yoptekti hailamdekti, “Nimi poneap pururom te?” aro haibarekpa, “Nhon pununam,” seog.
GEN 24:59 Wene seogpa, Ribka ologhag pia ulamog kelenekoap Ribkaap, “Nhon pururom,” aro ambarelamsirekti, “Abraham arukna ilipsaboap nhon pululom,” aro ambatsirekti,
GEN 24:60 Allah siag Ribka kiplamekti, “An nunipsa'el wamlamne nimi teng-tengne a'ilbanep kom saog uro wamukangne sikinin talulam. Andi mangarobari mangkahyikne tanekori nimi isanangdi as soro pin wa'alamikti, oro yaglamsukang,” aro kibek.
GEN 24:61 Kibekpa, Ribkaap eldi arukna tanekoap ag togto aekti, pham unta alibag waelbaekti, Abraham arukna anekoap nhon piek.
GEN 24:62 Abraham arukna palamog ko'o eneko Ishak neneko mag sembe wailbaekag, “Beer-lahai-Roi” engeropne neneko peramag piogti, wamog. Beer-lahai-Roi wamogha Kanaan so'o mag kwasag sip piogti, wamogha samoro yalamog.
GEN 24:63 Ik nhon sum sinag aweag, “Ina kemeroa yabunun,” aro elenge aeag agha lambaogti, tilamogpa pham untari nimi poamsiekpa, yalameka tibogahiog.
GEN 24:64 Ishakti tilamsiogpa, Ribka nenekori babe Ishak tibogaogti, pham unta alibag agha kuluka yingkiogti,
GEN 24:65 Ribkari Abraham aruknaag hailamogti, “Nimi nhon aweag siba nunag sip yalamlange nene etne?” seogpa, Abraham arukna anekori, “Na nani yalamla ane,” seog. Wene seogpa Ribka neneko ag agha whing liliptaog.
GEN 24:66 Wene Ishak yaghag yaekti, Abraham arukna anekori undo unuaogne sembe Ishakag ni ambarog.
GEN 24:67 Ambarogpa Ishak nenekori, “Ribka na kel,” aro toro aogti, ilin Sara samen wamog aeag poa wa'iog. Poa wa'iogti, wamekti, Ishak nenekori, “Nanin tebaoba, wana mali uro wamnaag agha na kel Ribka yanel,” aro Ribka sembe o'ona senelamog.
GEN 25:1 Abrahamdi yog kelabo Ketura nhon tobog.
GEN 25:2 Ketura tobogne nenekoag agha me mangkahiognena: Simiranap, Yogsanap, Medanap, Midyanap, Isibaghap apna Suaap mangkahiog.
GEN 25:3 Abraham elme Yogsandi mangkahiognena Siabaapna Dedanap. Dedan sisana Asyur nimiapna Letus nimiap Leum nimiap.
GEN 25:4 Abraham elme Midiandi mabona Epha, Epher, Henokh, Abida, apna Elda'aap mangkahiog. Mabo enekona ni Ketura elauyabo wamek.
GEN 25:5 Abrahamdi yog kelabo topsiogti, me pipsiogne sae agha olog-olog tatsiog. Me pilopsiogne tanekoag, “Heng walelingkirobag sip pimundi wamlulom,” aro yag lambahiogti, el sae agha nia mangkina Ishak saeag aghabog pibog.
GEN 25:7 Abraham mangkaeka heng kun taibuka taubuka ulamogha teng no'opbare eptopne naualbareag (175) wamogpa, sabal taogti, wana aingniro wamogti, hain kom taogpa, ilisag yaboag yame samen piog.
GEN 25:9 Tebaogpa, elmabo Ishakap Ismaelapti Makhpela kirik arameag so'o siktekag aneko Mamre peramag so'o samen Hetne Sohar elme ngai wamogpa,
GEN 25:10 Abraham nenekori kamna kapto tobogti, elkel Sara kirik arame so'o sikoghag aneko Abraham babe so'o siktek.
GEN 25:11 So'o siktekti, wamdekpa, Allahri Abraham elme Ishak neneko o'ona senelamogti, yeplamog. Li ko'o eneag Ishak neneko mag sembe so'o wailbaekag, “Beer-lahai-roi” so'o peramag wamog.
GEN 25:12 Abraham elme Ismaeldi elmabo liksiogne ane. Abraham elkel Sara arukna Hagar Mesir kel wamogti, Abrahamap maptekti, Ismael mangkaog.
GEN 25:13 Ismael elmabo likto piogha sunsunum uro sin sina ane: Ismael elme yandome Nebayor, nabime Kedar, tanena Adbeel, Mibsam, Misima, Duma, Masa, Hadad, Tema, Yetur, Nafis, apna elabome Kedmaap.
GEN 25:16 Ismaeldi mabo sin aobare nangene sindi sisa aobare taogpa, sin nimi nubunang as a'ero sin si nubu taog. Ismael elmabo as babe kalun ae longoro sorobag babe a'ero-a'ero solamekpa, ua ulamekag a'ero-a'ero elmabo si sunsunum uro alamek.
GEN 25:17 Ismael el mangkaekne heng kun-kunne teng lambare eptopne phende (137) wamogti, hain kom taogti, ilisagyaboag yame samen piog.
GEN 25:18 Tebaogpa, Ismaeldi mangaroba sin mog so'o wamekne Hawila inagha Syur inagha heng walelingkirobag sip Mesira Asyur simbik wamek. Sin wamekne sikin kaboap aisa neneptangto wamek.
GEN 25:19 Abraham elme Ishak nenekori ulamogne ane:
GEN 25:20 Ishak mangkaekne heng kun taibuka taubuka ulamogha teng nhon eptopne naualbare (40) taogpa, elkel Ribka toro aog. Ribka eldo Labanap sikini Betuel Aramneap Aram mog so'o nimi wamdek.
GEN 25:21 Ribka neneko me mangaro an koma wamogpa, Ishak nenekori Allahag molona yubu lelamogpa, NUNI Allahri ka'ebaogpa, Ribka me monag taog.
GEN 25:22 Me monag phende wamdekti, webeltalamdekpa, Ribka nenekori, “Sa'ambe tamna nene nanag ulamla?” aro wanag agha seneraghogti, “NANI Allahri tibin nenero ambatnilul,” aro hailbiog.
GEN 25:23 Hailpiogpa, NUNI Allahri yubu lelamogti, “Nimi sisa phende an monag wamdang. Sin-sin aisa neneptangkamtukang. Sin phende abeneko nhon agha mikipne wamleba, yandonge mombolag taleba, nabinge paliag talul,” aro ambarog.
GEN 25:24 Ambarogpa, wamogti, Ribka nenekori me phende mangkahiog.
GEN 25:25 Samenag mangaptaogne neneko kon uwong hong mana hong saog uro pongoropne mangaptaog. Undo pongkamogha sembe me si Esau aro engkaog.
GEN 25:26 Me amikne neneko mangaro kuluklamogti, eldori yan pubu saelbamogti, eldi, “Na sam,” aro yan saelbamogne sembe si Yakub engkaek. Ishak heng kun teng phende eptopne no'opbareag (60) wamogpa sin phende mangkahiog.
GEN 25:27 Me abeneko nubu tarekti, Esau neneko pham winang mana sae yonge wamogti, paiag pham winang mana onne yeng awi uro wamog. Yakub neneko wana aingniropne wamogti, aeag aghabog ua ulamog.
GEN 25:28 Ishakti winang mana sop tenne sembe awi yeng uro wamogti, elme Esau sembe agha wanaag uro ua ulamogpa, Ribka nenekori elme Yakub sembe wanaag uro ua ulamog.
GEN 25:29 Ik nhon sum Yakub nenekori kacang uwongne yolamogpa, Esau neneko paiag agha kwaneng yo uro yaog.
GEN 25:30 Yaogti Yakubag, “Nangkae, na kwaneng yori uwonga ane olog tatne!” aro molbaog. (”Uwonga ane,” seogne sembe si nhon Edom aro engkaek.)
GEN 25:31 Esau nenekori molbaogpa, Yakub nenekori ambarelamogti, “Wali molbanelam, ane sembe anna yandonge wamlama anekona, nimi yandoa na tatnemendi, anna nabinge tamenba, na yandonge tanun taneogna, molbanelama tatkinun,” seog.
GEN 25:32 Molbaogpa, Esauri, “Kwaneng yori tebanep saog ulamnari, sa'a sembe 'Na nimi yandoa wamna,' sunun?” seog.
GEN 25:33 Seogpa, Yakub nenekori, “'An nimi yandonge an wamlulam,' aro Allah siag sik uro leplulam,” aro ambarogpa, “Otsik uro lemna,” seogpa, Yakub neneko nimi yandoa aneko taog.
GEN 25:34 Undo unuaogpa, Yakub nenekori kwaneng rotiap kacang uwonga anekoap tarogpa, teogti, piog. Undo ulamdekti, “Na yandonge ua una karong,” aro lipsiog.
GEN 26:1 Ishak kelabo meap Beer-lahai-roi wamekpa, Abraham wamog li kwaneng yo nubunge wamog saog uro, sumene li ene babe kwaneng yo nubunge waelbaogpa, Filistin nimi nubunge Abimelekh ponekoag Ishak piogti, “Mesir palamapti, olog wamukap,” aro molbaogti, as Gerar pina wamog.
GEN 26:2 Pina wamogpa, Allah el wamoghag lag taogti, yubu lelamogti, “Mesir anna pheng kom, Nari ambatkeno saog uro tane wamlulam,” seogti, “Nari an piangkeneri yeplangkinun. Nari aniag salag samenag lepsinge neneko, mog so'o ene anapna anmaboabag pimnun,” seog.
GEN 26:4 Seogti, “Nari anag andi mangaroba imag imberea saog uro maikno nembahinun. Nari mog so'o ene andi mangarobag mog so'o ene tatsineri, andi mangarobari mangkahyikne pere agha Nari nimi sisa ni tala-tala wamikne walingena tatsinun,” seog.
GEN 26:5 Seogti, “Abraham Nari yubu ni lelamsinge ka'eamogti, nanag wana piamog ane sembe Nari an yepkinun,” seog.
GEN 26:6 Ane sembe Ishak Gerar wamog.
GEN 26:7 Taneko wamek nimiri eldi kel Ribka sembe haibaekpa, Ishakti, “Ribka saren kemerop wamogpa, Ribka toro habe senen nimiri omnikag,” sembaogti, “Ribkana nari kel kom, elna naipsae'el,” seog.
GEN 26:8 Gerar aneko Ishak pina ua ulamogha ik nhon sum Filistin nimi nubunge Abimelekh ae lomag wamogti, keken lom toman agha Ishakap Ribkaap tilamsioghag agha sin nebeldalamdek.
GEN 26:9 Nebeldalamdekpa, tiboghahiogti, Abimelekhti Ishak yobogti, “Ribkana ankel aghana sa'a sembe 'Naipsa'el,' seom?” seogpa Ishakti, “'Nari kel seneba, na omnikag,' aro lemno,” seog.
GEN 26:10 Wene, “Aro lemno,” seogpa, Abimelkhti, “Sa'a sembe nunag wene seom?,” aro wene seogti, nen lelamogti, “Andamneri wene seomba, nari mabo andi kelap mapseng, tanena tam andi kelap mapseng nenena andamneag agha tam ikinne nunag pipso,” seog.
GEN 26:11 Wene seogti, as eneko wamek nimiag yubu ambarelamsiogti, “Nimi etneri nimi eneag tam pipseng kom elkelag babe saelbaheng kom, tam sinag kaolbahik nimi eneko obukang,” seog.
GEN 26:12 Heng kun enekoag Allahri Ishak yeplamogpa, awe webaogti, meroba aweag aneko mebogha taneko nong pibogpa, maiknoro taghogti, el meroba tupne wamog.
GEN 26:13 Sae agha maikno tang-tang palamogpa, el tupne nubunge wamog.
GEN 26:14 Ishaktinge pham dombaap sapiap maikno wamogpa, eldi arukna babe maikno wamekne sembe Filistin nimi yo senelamek.
GEN 26:15 Yo senelamekti, samenag Abraham aruknari mag tena sembe so'o wailbaekne taneko ni so'o tolongoro leple piek.
GEN 26:16 Undo leple piekti, Abimelekhti yubu lelamogti, “Nununge so'oag agha lambalulam, an anea anenge sae agha nubu talamlambana,” aro ambarog.
GEN 26:17 Wene aro ambarogpa, Ishak as enekoag agha Gerar puluag piogti, ae soro wamog.
GEN 26:18 Pina wamogti, iliri mag waliroba agha Filistin nimiri so'o tolongoro lebeka taneko nen waliro lambaogti, iliri mag waliroba si enge-enge yabiogha sunsunum uro nen enge-enge piog.
GEN 26:19 Gerar puluag aneko Ishak aruknari mag walirop mag wailbaekti mag siriro la'anilamogha ibek.
GEN 26:20 Aghana pham pia yae ua uropnang Gerar nimiap Ishakti arukna pham yae ua urop nimiap, “Nununge mag,” aro lelamekti, “Mag ane nununge,” tam aro wene seekne sembe mag aneko si “Esek” aro Ishakti engkaog. Mag si Esek aro engkaogne nene nun yubuag, “Waptangtop Mag” aro engkaog.
GEN 26:21 Ishak arukna tanekori nen orange babe wailbaek. Aghana nen wailbaek mag taneko sembe babe waltalameka sembe Ishakti sin yubuag mag si, “Sitna” engkaog.
GEN 26:22 Nen anekoa nhonag nhon wailbaog aghana mag nene wailbaogne nene sembe sin waptan kom, ane sembe Ishakti, “Rehobot” aro engkaog. Rehobot aro engkaogne nene sembe, “Wene Allahri nun mog so'o ene tatsilba, me likto mangaro tero wamukap,” aro engkaog.
GEN 26:23 Anekoa Ishak Bersyeba piog.
GEN 26:24 Bersyeba aneko pina wamogpa, sumeneko inipnag Allah el whingag lag taogti, yubu lelamogti, “Na Allah, ani Abraham Ili. An log sembaheng kom, Nari yepto piangkenun. Nari salag Nari arukna Abrahamag lepsinge sunsunum uro mikip nembagheneba, andi mangaroba nimi maikno taukang,” seog.
GEN 26:25 Allah el whingag lag taogti, yubu leboghag aneko “Mhong towalengkanun” aro kirik yangaro sobaogti, “An Ya'ag Wamlamne” aro Allah si yoplamog. Ae kalun ae babe sobaogpa, eldi arukna tanekori babe mag so'oag walirop mag babe wailbaek.
GEN 26:26 Aneko ae sobaogti, wamogpa, ik nhon sum nimi nubunge Gerar wamogne yubu sia leropne Abimelekhap, el yubu amoropne Ahusatap, yin saleropne sikindo Pikholap “Ishak haiptaukap,” aro yaek.
GEN 26:27 Aghana Ishakti yubu lelamogti, “Sa'a sembe nanagna wenena yalom? Samen a'undi na sembe karong senelamnilumdi, a'ununge so'oag agha yagnilum kom te?” seog.
GEN 26:28 Wene seogpa, sindina, “Wene nuri kemelangkeapne, wene Allahri piangkel, ane sembe nuri lebapne: elap nunap yubu nikne ya'ag lebukap. Wene leplulamne andi nunag yoaba ualulam kom, nuri babe anag yoaba uaukap kom. Nuri anag walia uabori, lipkeboba, wali uro piom. Nunag tibin wamlange an Allahri yepto piangkilul,” seek.
GEN 26:30 Wene seekpa, Ishakti tenaba yobaogha ma'aptangto teek.
GEN 26:31 Tea mabeka kwelekaogne sindi “Salag lebukap” aro seneragto wamekne salag lero yubu sia lebek. Lebekti Ishakti, “Nangkabo, palamlulom,” aro kipsiogpa piek.
GEN 26:32 Sumeneko sum babe Ishak arukna tanekori, “Mag walilamapne neneko sumene mag ibab,” aro ambarel aek.
GEN 26:33 Ambarel aekpa, sumeneko mag sin wailbaekne aneko “Mag Siba” engkaogpa, as taneko sobaekne wene “Beerseba” engerop taog.
GEN 26:34 Mag ibekag Beerseba Ishak wamogti, elkelabo meap babe wamek. Wamekpa, Esau mangkaekne heng kun-kunne selek ta'om agha epto naual bare (40) piog. Piogpa, Ishak elme Esauri Het kelabo phende tolamsiogti, Beeri elmangkel Yudit nhonapna Elon elmangkel Basmatap topsiog.
GEN 26:35 Awi senerop kom kelabo phende topsiogne nene sembe Esau iliap ilinapti karong senelamdekti, wana mali talamsiog.
GEN 27:1 Ishak neneko ya'ag sabal taogti, haing mali taogpa, elme yandonge Esau nenekoag “Name, yae,” aro yobogpa, Esauri, “Yo, nani,” seog.
GEN 27:2 Seogpa Ishak nenekori ambarelamogti, “Na ya'ag sabal tanori, tepnange peram uro wamna.
GEN 27:3 Ane sembe yin pusap topmendi, paiag pham winang mana ol pina payalulam.
GEN 27:4 Payingkina sao wali uro yobamenba, teneri, na anam teban komag Allah siag an kipkenun,” aro ambarog.
GEN 27:5 Ishakti Esau ambarelamogha Ribkari ka'ebaogti, Esau paiag sip ol piogpa,
GEN 27:6 Ribka nenekori Yakub ambarelamogti, “Name, Aniri Esau ambarelamlaba, ka'ebanne ane ka'eapmen,
GEN 27:7 'Paiag ol pimendi, wali uro yobongkia tarelanemenba, teneri na anam teban komag NUNI Allah siag kipkenun,' selne ka'eban.
GEN 27:8 Ane sembe, name, nari ambatkinunne sunsunum uro ualulam.
GEN 27:9 Pham mo'olamabag pimendi, pham kambing me phende topmendi, na tarelanemenba, nari yobaneba, andi poa pimenba, ani awi yeng uro telul.
GEN 27:10 Poa pimenba, teleri, el anam teban komag Allah siag kipkelul,” aro ambarog.
GEN 27:11 Ambarogpa Yakub nenekori ambarelamogti, “Nanin, Esau neneko nong hong maikno, na nong hong orog aneno.
GEN 27:12 Na naniri na konag salelamneleri, 'Orolena lepla,' aro na Allah siag kipnen koma yo'obaneleag,” aro ambarog.
GEN 27:13 Wene aro ambarogpa, ilindi, “Name, yo'obahilulne nene nanag talulba, wanag keyagman uro nari lepnange sunsunum uro pham kambing abeneko tol pululam,” seogpa,
GEN 27:14 Yakub nenekori pham kambing abeneko tol piogti, ilin tarel aogpa, “Ishakti wali yeng uro tilul” aro ilindi wali uro yobaog.
GEN 27:15 Yobaogti Ribka nenekori aeag wa'iogti, ag Esauri eneka uropne walinge aeag piamsiogne tobogti, Yakub enekirog.
GEN 27:16 Enekirogti pham kambing kon logto pibogne tobogti, ni phende saeag enekto kaubirogti, ko'olomag enekto kaupto, “Iliri, 'Esauri hong,' sembalul,” aro enekto kaubirog.
GEN 27:17 Enekto kaubirogti, sao wali uro yobaogha tanekoap kwaneng roti werebaogha tanekoap Yakub tarog.
GEN 27:18 Tarogpa pabiogti, “Nani,” aro kibogpa, Ishak nenekori, “Name, anna Esauro Yakubto?” seog.
GEN 27:19 Wene seogpa Yakub nenekori, “Na anme yandonge Esau neneko yan. Andi ambatnelamne sunsunum uro pai pham oro yoro payandi, pukmendi telame! Temendi Allah siag kipnululam,” aro ambarog.
GEN 27:20 Ambarogpa Ishak nenekori, “Name, elemag oplamdi, yoro payalam,” seogpa Yakubti, “NUNI Allah nenekori whingag nembatnelba payan,” seog.
GEN 27:21 Wene seogpa Ishak nenekori Yakubag, “An nong kon salbitkeneri, 'Otsik uro Esau yal,' aro el tanululba, abene yae!” seog.
GEN 27:22 Wene seogpa Yakub neneko ili peramag piogpa, sae nong konag salelamogti, “Yubu Yakubti yubu saog ka'elamna agha sae Esauri sae saog salelamna,” seog.
GEN 27:23 Yakub sae pham kambing hong kauptopti, “Esauri sae hong pongoropne saog uro wamla,” aro Ishakti, “Esau yal,” sembaogti, “Allah siag kipnun,” sembaog aghana nen hailamogti,
GEN 27:24 “An otsik uro Esau yalam?” aro haibaogpa, Yakub nenekori, “Nani, otsik uro na Esau neneko yan,” seog.
GEN 27:25 Wene seogpa Ishakti, “Yoro payalama taneko tatnemenba, teneri, NUNI Allah siag kipkinun,” aro ambarogpa, sop yoroba anekoap mag anggurap tarel piogpa, teog.
GEN 27:26 Teogti, “Name, na peramag abene yamendi somoro saelbamnululam,” aro ambarogpa,
GEN 27:27 Yakub ili Ishak peramag piogti, nongag somoro saelbamogti, kiplamog. Kiplamogpa, Ishakti Esauri ag song uaogne sembe, “Esau name yandonge,” aro elme Allah siag kiplamogti, “Name, anag agha song yalamlange awe Nani Allahri sai nenelamla saog uro song anag agha yalamla.
GEN 27:28 Imag agha Allahri mag tum-tuma pelengel alamleba, so'o andinge sai talamleba, nia mangkina melapmenna so'o eneag maiknoro pongolamlul.
GEN 27:29 As mog so'o nubunge wamikne an yan mombolag amupto pulamikti, an arukna wamukang. Ankabo taneko sikini saog uro an wapmenba, an whingag yabu sanukto pulamukang. An yo'olangkiikne taneko sin loba nenel dalamukang. Nimi etneri kiplangkiikne taneko Allahri o'ona sembe yeplamsilul,” aro ambarog.
GEN 27:30 Ishak nenekori elme Yakub Allah siag kibogpa, lambaom agha palamog abeneko Esau neneko paiag agha yaog.
GEN 27:31 Eldi babe mana wali sao uro yobaogti, iliag payaogti, yubu lelamogti, “Nani, pukongkia an sembe payana tane telamlulam! Temendi Allah siag kipnululam,” aro ambarog.
GEN 27:32 Ambarogpa, Ishak nenekori, “An etneri lelamlam?” seogpa, Esau nenekori, “Na Esau anme samenne nenekori lelamna,” seog.
GEN 27:33 Seogpa Ishak neneko lo'om aro lagmag seogti, elek-elek alamogti, “An anam yan komag etne yaldi, pham yobarel anel? El nenekori payalne tendi, name yandonge 'Otsik uro yan,' selba, 'Otsik uro yal,' aro NUNI Allah siag kipto lemna anekona nen lemnep kom saog,” seog.
GEN 27:34 Ambarogpa Esauri ka'ebaogti, wanaag mali taogpa, yubu haum aro engelamogti, “Nani, na babe! Ani NUNI siag kipnululam,” aro molbaog.
GEN 27:35 Molbaogpa Ishak nenekori, “An anipsae neneko yaldi, yubu orolena leplaba, kipna anag ambatkehenenge neneko elag ambatna,” seog.
GEN 27:36 Wene seogpa, Esau nenekori yubu lelamogti, “Samenag eldi, 'An yandonge wamlulam kom,' aro yubu nepneori, sumene babe ik phendepne kipna na ambatnepne neneko toro agha pil. Eldamne si Yakub si ahaem engeroba sunsunum uro yubu orolenange lepla. Allahri yepkelul aro kipna nhon ambatnemenne wamla, te?” aro haibaogpa,
GEN 27:37 Ishak nenekori, “Nari anipsae nenekoag, anipsae ani wamlul sekitna. 'Ankabo an arukna wamikpa, an sembe nia mangkina melapmenne maikno talul,' sen. Ane ni ambatna anekona anag wene nari sa'a senep kom saog,” aro ambarog.
GEN 27:38 Ambarogpa Esau neneko nen yubu mikip uro hailamogti, “Andi Allah siag kipsinne ik nhon leplamdi, nen ik phende lenne orog te? Nani, na babe Allah siag kipnululam!” aro wene seogti, yubu haum aro engelamog.
GEN 27:39 Engelamogpa Ishak nenekori ambarelamogti, “An wamlulamag mag tum-tuma pelengel ananna orogti, so'o mesah uro sai wamlul kom.
GEN 27:40 Anenge yindi an piangkeleba, an mal taropne wapmendi, an anipsae arukna wamlulam. An anipsae arukna wamlulam aghana, Andi 'El tamag wamnun kom,' aro sae mikip peleptamendi, eldi arukna wamlulam kom” aro ambarog.
GEN 27:41 Esau nenekori, “Naniri Allah siag naipsae Yakubog kipla,” aro Yakub sembe karong sembaogti, “Olog wamebea nai tebaleba, Yakub omnun,” sembaog.
GEN 27:42 Esauri, “Naipsae omnun,” alamla ana ka'ebaogti, Ribka nenekori, “Name Yakub yobol phut,” seogpa, Yakub neneko yaogpa, yubu ambarelamogti, “Name, ando Esau neneko 'Wana mali nembaneonge sembe opkinun,' senero wamla.
GEN 27:43 Ane sembe na anindi lemnunne nene ka'eame: Tognop tangtang pimendi, naro Labanag as Kharan pululam.
GEN 27:44 Pimendi, elap wamtumunba, andori yo uro seneraglamlange kom talul.
GEN 27:45 Andi wana mali nembalumne ekon tale tanena, an enel aghukang aro nimi pogsinun. Ae ik nhon sum agha na namabo ni phende ka'asebel tananne mali senelamna,” seog.
GEN 27:46 Olog wameka Ribka nenekori Ishakag yubu lelamogti, “Na tungna sap-sabi Het so'o eneag wamang kelabo tane kembi ulamsin. Esauri Het kelabo topsioa saog uro name Yakubti babe Het kelabo topsileba, 'Imnun kom,' aro wali tebanun,” seog.
GEN 28:1 Ishak nenekori Yakub yobogti, Allah siag kibogti, ambarelamogti, “Name, andi Kanaan kelabo topsiseng kom!
GEN 28:2 Anin ili Betuelag Aram mog so'oag pimendi, anawang Laban elmangkelabo anabiagne nhon topsululam.
GEN 28:3 Allah Imap So'oap Saelbamlange nenekori an mikip nembagheleba, andi mangarobari mangaroba maikno taikti, nimi sisa nubu taukang.
GEN 28:4 NUNI Allahri Abraham o'ona senelamogti, yeplamog saog uro an anmaboap yeplamsileba, so'o an nimi yangkanne saog uro wamlamag ane Allahri Abrahamag, 'Anisag yabo tatsinun,' seogne sunsunum uro a'un ngai talulom,” aro ambarog.
GEN 28:5 “A'unin Ribka eldo Labanag Aram mog so'oag pululam,” aro ambarogne sunsunum uro Yakub neneko Aramne Betuel elme Laban wamoghag piog.
GEN 28:6 Ishak nenekori elme Yakub Allah siag kibogti, “Kanaan kelabo topsin koma Aram mog so'oag pimendi, Aram kelabo el phululam,” aro ambarog. Yakub neneko ili ilindi leptekne ka'ebaogti, Aram mog so'oag piogne sembe Esau nenekori ka'ebaog.
GEN 28:8 Ka'ebaogti, sikini Ishak nenekori, “'Kanaan kelabo tohinne sembe karong', senen,” aro Esau el taogti,
GEN 28:9 Abraham elme Ismaelag piogti, elkelabo phende abeneko babe wamdekpa, nen wilindipne Ismael elmangkel Nebayot ilipsa'el Mhalat tobog.
GEN 28:10 Yakub neneko as Bersyeba laplobi agha, “As Kharan punun,” aro piog.
GEN 28:11 Palamog pahabog heng puruk aogpa, pioghag anekoa kirik nhon tobogti, kirik aneko agha usog epto malamog.
GEN 28:12 Malamogti lenda malamogpa, moromna nhon so'oag agha sekamogpa, imap tibamogpa, Allah ilipsabo malaikat moromna aneko toman kululung walelem alameka ipsiog.
GEN 28:13 Kemelamsiogpa, NUNI Allah moromna aneko toman sekamogti, “Anisag Abrahamap, ani Isakap, Sikini Allah Na ane wamna,” seogti, “Nari, 'So'o an malamlamag ane an, anmaboapti ngai taukang,' aro tatsinun.
GEN 28:14 Andi mangarobari mangkahyikne taneko so'o lenglenga alirop kom wamla saog uro taikpa, sikininge so'o heng walelingkirobag sip, heng purukul pirobag sip, ople sip, tabo sip maikno talul. Anap anmaboap pere agha Nari nimi sisa ni tala-tala wamikne walingena tatsinun.
GEN 28:15 As tala-tala pimenag Na anap wamnemeri yepto piangkenun. Nari an sae lipken koma wamne pahabog anag Nari lemnange ni ulamneri, mog so'o eneag samoro payakenun,” aro ambarog.
GEN 28:16 Wene alamog abeneko Yakub neneko pukogti, yubu lelamogti, “NUNI Allah tane wamlange weneog el tanel!” seogti,
GEN 28:17 nen yubu lelamogti, “Na wamnaag ane nimiri loghag. As tane Allahri ae wamlaba, imag yangkanne ina siramag wamna,” aro log sembaog.
GEN 28:18 Nen mabogti, lukun Yakub seklamogti, “Allah wamlaag ane,” aro, “Kekneba pimnun,” sembaogti, kirik usog epto mabog kirik eneko so'oag mebirogti, kirik anekoag kal saitun wangka lolteroba mag ikog.
GEN 28:19 Ikogti, samen mog so'o ene Lus engeroba aneko Betel engkaog.
GEN 28:20 Engkaogti Yakub nenekori Allah whingag salag palilamogti, “NUNI Allah nanap nhon palamnemeri, terobap nanenge ag eneknangeap tarelamneleri, yeplamnele pahabog
GEN 28:21 wali uro naniri aeag samoro yane tanena, kekneba na sembe talul. Ni undo saog uro pinep tanena, 'El Allah aghabog nari ukuma wamlul,' aro omeklamnun.
GEN 28:22 Nia mangkina Eldi tarelamnelea taneko pogto sa'obare palu tobiagha, palu nhon nen samoro El tarelamnun. Kirik mebitnaag ane Allah wamlaag, Eldi ae saog uro talul,” seog.
GEN 29:1 Undo wene seogti, Yakub neneko Kanaan so'o laplobiagha heng walelingkirobag sip piog.
GEN 29:2 Palamogti, tilamogpa, mag sembe wailbaeka nhon peramag pham domba palu wilindi longoro wamekpa, tibogahiog. Ora sum babe pham pia uhirop nang taneko niri sikininge pham mag aneko peram ni yalamekpa, kembiag agha nubu kirik mag ina siram leptop kirik kupto pil pindogha pham taneko mag tebarelamsiekpa, ni telamek tanena sereklamek.
GEN 29:4 Yakub mag aneko peramag piogti, pham taneko pia uhirop nang tanekoag hailamsiogti, “Nangkabo, a'un tala nimi?” seogpa, sindina, “Nu Kharan nimi,” seek.
GEN 29:5 Seekpa Yakub nenekori, “Nahor ilisag Laban neneko olog ililamlom, te?” seogpa, sindi, “Ililamap,” seek.
GEN 29:6 Wene seekpa, Yakubti, “El welaro wamla?” seogpa, sindi, “Wali wamla,” seekti, “Elmangkel si Rahel pham domba kambing iliringe poa yalamsil ane tiboghamen,” seek.
GEN 29:7 Seekpa, Yakub nenekori, “Nangkabo, ae imbal komba ae siro wamap, aghana sa'a sembe a'ununge pham poloro pil ahilom? Mag aghabog tebatsimundi, 'Mo salik malik maneng telamukang,' aro poa phululom,” aro ambatsiog.
GEN 29:8 Ambatsiogpa, sindina, “Pham domba pia urop nimi taneko nenneri pham domba ni payahiikpa, mag ina siram kirik kubeberi, 'Mag tebatsukap,' aro tibogto wamap,” seek.
GEN 29:9 Yakub neneko sinap yubu lero wamekpa, Rahel neneko pham iliringe poa yalamsiog.
GEN 29:10 “Na nanin eldori kelmeri pham domba iliringe poa yalamla,” aro tibog aogti, Yakub neneko mag waliroba peramag piogti, kirik mag inasiram leptopne neneko toro ko'ol piogti, Labandi pham taneko mag tebatsiog.
GEN 29:11 Tebatsiogti, Rahel somoro kibogti, “Nari nawang elmangkelap haiptanam,” aro engelamog.
GEN 29:12 Engelamogti, “Na an ani ilipsa'el Ribka elme yan,” aro ambarog. Ambarogpa, Rahel neneko iliag merero piogti, “Anipsa'el Ribka elme yal,” aro ambarel piog.
GEN 29:13 Ambarogpa ka'ebaogti, Laban neneko elemag-elemag Yakubag piogti, somoro kibogti, eldi aeag enero poa yaog. Aeag yaekti, Yakub nenekori elag uro yabiogne sembe Laban ambarogpa,
GEN 29:14 Laban nenekori, “Otsik, nari enengdinge agha yalam,” seog. Yakub neneko wal nhon ningki wamogpa,
GEN 29:15 Laban nenekori Yakubag yubu lelamogti, “An na enengdinge wamlam ana, sa'a sembe nari awe mo webarelamnululam? Kamna etbare tatkenun sembamlam?” aro ambarog.
GEN 29:16 Laban elmangkelabo samenne Lea wamogpa, amikne Rahel wamog.
GEN 29:17 Lea haing pabo tolaktop saogpa, Rahel saren kemeroba wamogti, haing elela aneko wamog.
GEN 29:18 Undo wamdekpa, Yakubti Rahel sembe wana telamogti, “Nawang, an anmangkel amikne neneko toro anundi, nari andi awe welamne pahabog heng kun taibuka taubuka ulamleba heng kun saekbare talul,” aro ambarog.
GEN 29:19 Wene aro ambarogpa, Laban nenekori, “Name ane nimi orangeri toro aikagti an tatkinundi, an nanap tane wamnunam,” seog.
GEN 29:20 Wene seogpa, Yakub nenekori, “Rahel toro anun” aro awe welamogha heng kun saekbare taog. Yakubti “Rahel tomnun,” aro wana telamogpa, heng kun saekpare wamog aneko aghana, “Ik a'ilbanep saog uro wamna,” senelamog.
GEN 29:21 Wene senelamogha Yakub nenekori Laban ambarelamogti, “Nuri lemnomo saog uro heng kun saekbare awe webanori, anmangkel toro anundi, tatnululam,” aro molbaog.
GEN 29:22 Molbaogpa, Laban nenekori, “Namangkel Yakubti toplulne sembe sani yobanun,” aro nimi ni as eneko wamekne yopsiogpa, sani yobaogne teek.
GEN 29:23 Teekti, imbaogpa, Laban nenekori elmangkel toro anepne Rahel payan koma, Lea enero Yakub tarel piogpa, nikag maptek.
GEN 29:24 Undo unuaog sumeneko Laban nenekori eldi arukna Zilpaag, “Lea arukna wamlulam,” aro ambarog.
GEN 29:25 Lukun Yakub pukogti, kemelamogpa, “Leaap mamnam,” aro el taog. El taogti, Labanag piogti, ambarelamogti, “Sa'a sembe nanag nene saogne ualam? Andi, 'Rahel tatkenun,' seomba, anenge awe welamno aghana, sa'a sembe yubu neplamnelam?” aro ambarog.
GEN 29:26 Ambarogpa, Laban nenekori ambarelamogti, “As eneag wamlange agha uan. Eldo'el wamnaba, ilipsa'el samenag nengabori tomnep kom,” seogti,
GEN 29:27 “Ane sembe Lea tobomne sembe awi yeng uro seplamebe pahabog, ik saekbare taleba, namangkel Rahel babe tatkenun. Tatkeneba, el sembe kamna nen heng kun saekbare awe naringe welamlulam,” aro ambarog.
GEN 29:28 Ambarogne neneko sembe Yakubti, “Hae,” sembaogti, inipna kwelekna saekbare seplamek pahabog, wamekpa, Labandi elmangkel Rahel tarog.
GEN 29:29 Undo unuaog sumeneko Laban nenekori el arukna si Bilha nenekoag, “Rahel arukna wamlulam,” aro ambarog.
GEN 29:30 Yakub neneko Rahelap babe nikag maptek. Yakubti Rahel sembe agha wanaag uro wamogti, Lea sembe olog wana abolag wamog. Sin wamekti, Yakubti Labandi awe nen hengkun saekpare welamog.
GEN 29:31 Yakub neneko Lea wanaag olog abolag saogti, NUNI Allah kembaogti, “Lea nenekori me mangaro ale,” sembaogti, “Rahel me mangaro an koma wamle,” sembaog.
GEN 29:32 Wene sembaogpa, Lea me monag taogpa, me nengabo me nhon mangaro aog. Mangaro aogti yubu lelamogti, “Na wana mali uro wamnaba, NANI Allahri imnelba, na na'angeri na babe wanaag sembanele,” aro me aneko si Ruben engkaog.
GEN 29:33 Wameka nen Lea neneko me monag taogpa, me nengabo me nhon mangaro aog. Mangaro aogti, yubu lelamogti, “Na na'angeri o'ona sembamnel komne sembe NANI Allahri ka'ebaneori, me ane babe tatnel,” aro me aneko si Simeon engkaog.
GEN 29:34 Wamekti Lea nenekori me nengabo me nhon mangaro aogti, yubu lelamogti, “Me nengabo me wilindi mangkatnonge sembe na'angeri na sembe wanaag uro wamlul,” aro wene seogti, me si Lewi engkaog.
GEN 29:35 Wameka Lea neneko me monag taogpa, me nengabo me mangaro aogti, yubu lelamogti, “Wenenge nene agha Allahag 'NANI' aro kipto omeklamna,” aro me aneko si Yehuda engkaog. Yehuda mangaro yabiogne agha Lea me mangaro an koma wamog.
GEN 30:1 Lea me mangal dolamogpa, Rahel nenekori, “Naro'el me mangal dolamlaba, na me mangaro an koma wamna,” aro elto'elag wana mali uro seneraglamogti, Yakubag yubu lelamogti, “Me nhon tatnululam kom, tanena na tebanun,” seog.
GEN 30:2 Wene seogpa, Yakub neneko wanaag yo sembaogti, “Na Allah saog uro wamna kom. El nenekori seneraghogne sunsunum uro an ibili talamlam,” aro Rahel wabaog.
GEN 30:3 Wabaogpa, Rahel nenekori yubu lelamogti, “Na arukna Bilhaap maptumunba, eldi me mangaro na ilag pipleba, nari me talul,” aro eldi arukna Bilha aneko ela'ange Yakubag ambarogpa, Yakub elkel wilindipne taog. Yakub neneko Bilha anekoap maptekpa,
GEN 30:5 me monag taogpa, me nengabo me mangaro aog.
GEN 30:6 Mangaro aogpa, Rahel nenekori yubu lelamogti, “Nari Allahag mololamnoba, ka'ebaneori, nanag sip tangto me nengabo me tatnel,” aro me si Dan engkaog.
GEN 30:7 Wamekti, Bilha nenekori nen sap me nhon monag taogpa, Yakub elme nengabo me mangaro aog.
GEN 30:8 Mangaro aogpa, Raheldi yubu lelamogti, “Naro'elap talamnomori, na paliag neneptano,” aro me aneko si Naptali engkaog.
GEN 30:9 Wamekti, Lea nenekori, “Me mangaro anep kom saog wamna,” sembaogti, elenge arukna Silpa neneko “Yakub elkel tale,” sembaogti tarog.
GEN 30:10 Tarogpa, Silpa nenekori me nengabo me nhon Yakub sembe mangkarog.
GEN 30:11 Mangkarogpa, Lea nenekori yubu lelamogti, “Na wali neneptan,” aro me si Gad engkaog.
GEN 30:12 Wamekti, Silpa nenekori nen sap me nengabo me nhon mangaro aog.
GEN 30:13 Mangaro aogpa, Lea nenekori yubu lelamogti, “Na wali kel neneptan. Ora kelabori, 'El wali,' senelamnukang,” aro me aneko si Aser engkaog.
GEN 30:14 Wamekti, wal tomneag Ruben neneko paiag piogti, kal wana terobpa me yag tananne sembe terop kal wana tobogti, ilin Lea tarel aog. Ilin Lea tarel aogne Rahel el taogti, yubu lelamogti, “Kal wana anmeri payalne olog tatne,” aro Leaag molbaog.
GEN 30:15 Molbaogpa, Leari yubu lelamogti, “Andi na'ange tobomne sunsunum komdi, wene babe 'Kal wana ane babe tomnun,' aro ulamlam?” aro wabaog. Wabaogpa, Raheldi, “Hae, kal wana anmeri tol pildi, tarel aghelba, tatnemendi andi kamna saog uro inipna Yakubap mapturom,” aro ambarog.
GEN 30:16 Sinag Yakub aweag agha yalamogpa, Lea whingag piogti ambarelamogti, “Kal wana me yag tananne sembe terop kal wana nameri tol pildi, tarel anelba, nari Rahel tatnange sembe kamna saog uro 'Yakubap mapturom,' selba, sumene nanap mamnunam,” aro ambarog. Ambarogpa, sumeneko inipna Leaap nhon maptek.
GEN 30:17 Maptekpa, Leari Allahag mololamogne sunsunum uro me monag taogpa, Leah elme lamne Yakub sembe mangkarog.
GEN 30:18 Mangkarogti, yubu lelamogti, “Nanenge arukna aneko na'angeag ambatnonge sembe kamna Allahri tatnel,” aro me si Isakhar engkaog.
GEN 30:19 Wamekti, Lea neneko me monag nhon taogpa, Lea elme no'opne Yakub sembe mangkarog.
GEN 30:20 Mangkarogti, yubu lelamogti, “Allahri ya'ag tapto walia tatneoba, wene na'ange sembe me no'opne mangkatna anekona eldi na sembe wali sembamneleba, ya'ag ma'aro wamnunam,” aro me si Sebulon engkaog.
GEN 30:21 Wamekti Lea nenekori kel nhon mangaro aogti, kelme si Dina engkaog.
GEN 30:22 Olog wamekti, Allahri Rahel sembe ekon tan koma seneraghogpa, Raheldi mololamogne sunsunum uro me nhon monag taogpa, me nengabo me mangaro aog. Mangaro aogti, Rahel nenekori yubu lelamogti, “Na ali uro wamnonge neneko NANI Allahri kom nembaldi,
GEN 30:24 amik me nengabo me nhon tatnilul,” aro me aneko si Yusup engkaog.
GEN 30:25 Raheldi Yusup mangkaogpa, Yakubti Labanag yubu lelamogti, “Weneogna sae limnemenba, nanenge mog so'oag punun.
GEN 30:26 Nanenge kelabo phendeap, nanenge maboap, sin topsinonge, awang, an el wamlam. Na awe maikno welamnori, topsi. Ane sembe nhon pukap,” aro molbaog.
GEN 30:27 Molbaogpa Labandi yubu lelamogti, “Na lia peneheng kom, kekneba wene ulamlange iamnange nia mangkina nanag wamlange Allahri an pere agha yepneo.
GEN 30:28 Ane sembe, 'Kamna tatnoho,' sembamlamne etbare leplulam,” seog.
GEN 30:29 Wene seogpa Yakubti lelamogti, “Nawang, awe maikno tolamnange an el wamlam. Pham babe wene andinge maikno talamlange
GEN 30:30 nari pia ulamsinba. Na anam yan komag awangdinge sa'a-sa'a etbare wamo kom, aghana awang wene an nubu taom. NUNI Allahri yepkeonge babe nanag agha. Wene naringe kelabo me sembe awe wero tomnun,” seog.
GEN 30:31 Wene seogpa Labandi, “Wene selamba, sa'a agha tatkinun?” seogpa, Yakubti, “Awangdi, sa'a undoba tatneheng kom. Pham andinge nari piamsinun. Ot nari lepnunne nene sembe awangdi, 'Wali,' sululam:
GEN 30:32 Na sumene pham kambing domba anabi toman yabalamneri, pham domba me mirinneap, pham kambing domba ma'i ukum siptopneap ni kamna saogne topsunun,” seog.
GEN 30:33 Seogti, “Amik ik nhon nari pham kemelapmenba, pham domba kambing hong solomne undo nari pham anabiag wamikpa, ipmen tanena, 'Haogha tobo,' sembalulam. Aghana nari pham anabiag pham hong solomne orogtina, 'Yakub sik urop nimi wamla,' sembalulam” seog.
GEN 30:34 Wene seogpa Labandi, “Ot andi leplamne neneog uanunam,” seog.
GEN 30:35 “Uanunam,” seog, aghana Yakub anam toro pil phiog kom agha sumeneko babe Labandi, “Yakub mane ulamna,” aro eldi pham kambing yemne kelneap, parektopneap, hong yogto-yogto siriktopneap, ma'i ukum siptopneap, domba me mirinne babe, ni taneko toro Labandi elmaboag, “Weag pham yag lambahukap,” seog. Wene seogpa, Labanap elmaboapti tognoro yag lambahiekti, Yakub laploa palamekti, inaag inipna ik wilindi maro piek. Maro piekpa Yakubti pham Labandinge nen laplopsiekne yae uro wamog.
GEN 30:37 Yae uro wamogti, Yakubti ere saog kal tunguna sae erenne sae nhon tobogti, kon septo tobog. Kon septo tobogti, kal pun solomne kemelamog.
GEN 30:38 Kemelamogti, tunguna kon septo tobogne ane pabiog. Pabiognena, pham kwaneng mag terobag pham yaekti, lop phamap kel phamap nebel talamikti, yina tobukang senenag aneko tunguna ikog.
GEN 30:39 Tunguna ikoghag lop pham kel pham nebel talamekti, pham ma'i ukum siktopneap, parektopneap, yogto-yogto siriktopneap, mangal talamek.
GEN 30:40 Yakubti kemelamogpa, pham maikno taikpa, mangal talamekne Yakubti pham me pogto, Labandinge nenag palilamog, el damnangdinge nenag sip palilamog. Palilamsiogti, pham Labandinge ma'i ukum siptopneap, parektopneap, yogto-yogto siriktopneap wamekne ane yogto pabihiogti, “Nandam pham maikno taukang,” aro eldi pham whingag wimbahiog. Labandi pham nhonag Yakubti pham nhonag mo'olamsiog.
GEN 30:41 Mo'olamsiogti, pham me mangap taukang arobag kame aneko iklamog. Sikin kwaneng mag telamekti, “Anea mangal talamukang,” aro eldi kame tunguna palilamog. Mikipne whingag sip tunguna palilamog, aghana mikip komne sembe palilamog kom. Ane sembe mikipne mangal talamekne Yakub saeag talamogpa, mikip komne mangal talamekne Laban saeag talamog.
GEN 30:43 Unulamogti, Yakub pham tupne taog. Eldi aruknaap, kelaboap, nengaboap, maikno wamek. Eldi popsirop pham untaap, keledaiap babe maikno wamog.
GEN 31:1 Yakub tupne taogti, olog wamogpa, Laban elmabori yubu lelamekti, “Yakubti nuni yongdinge sae agha nia mangkina tolamlari, nia mangkina tup talamla,” alameka Yakubti ka'ebaog.
GEN 31:2 Ka'ebaogti, Laban whingag babe kemelamogpa, samenag wali ulamdek saog uro kom.
GEN 31:3 Unulamogpa NUNI Allahri Yakubag yubu lelamogti, “An sambamendi, aniri asag samoro ankabo wamangag pululam. Nari an yepto piangkinun,” seog.
GEN 31:4 Wene seogpa, Yakubti nimiag yubu palilamogti, “Rahelap Leaap na wamnaag aldes pham pia ulamsinag yarukang,” aro yopsiog.
GEN 31:5 Yopsiogpa, yarekpa, yubu ambarelamsiogti, “Nari wene a'uni whingag kemelamnaba, samenag wamnomo saog uro wali wamla kom. Aghana nari nai ili Allahri yepto piamnel,” aro ambatsiog.
GEN 31:6 Ambatsiogti, “A'un babe el wamdom. Samenag na awe tolamnori, a'uni sembe mikip uro welamno. Welamnoba, a'uniri, 'Kamna wali uro tatkinun,' seog, aghana kamna kapnen koma yubuog ik sa'obare lelobog. Ane sembe Allahri, 'Labandi Yakub opleag aro Nari piamnun,' sembaog.
GEN 31:8 A'uniri lelamori, 'Pham kambing ma'i ukum siptopne awe welamlamne sembe kamna an talulam,' alamo tanena ni phamdi ma'i ukum siptopne mangalamong. 'Pham hong yogto-yogto siriktopne an talulam,' alamo tanena ni phamdi hong yogto-yogto siriktopne mangalamong.
GEN 31:9 Undo wene aro ambarelamneoghag anekoa Allahri a'uniringe tolamori, nanag tatneo,” aro ambatsiog.
GEN 31:10 Nen ambatsiogti, “Ik nhon sum lenda maro kemelamsiba, pham taneko yina tomneba liag, yem pham taneko ma'i ukum siptopne phamap, hong yogto siriktop phamapti kel phamag walelamsiekpa, kembahisi.
GEN 31:11 Allahri babe eldi arukna malaikat pere agha lenda toman ambarelamneogti, 'Yakub,' seogpa nari, 'Ya Nani Allah,' sehiba,
GEN 31:12 Eldi yubu lelamogti, 'Nari Labandi anag ulamlange nene Nari kembamnaba, whing epmendi tibog amen. Pham yemne wamangneri kel pham kambing dombaag walelamangne hong yogto-yogto, ma'i ukum siptopne ubu piamang.
GEN 31:13 Na Allah Betel wamlumag lag tahinge poneko. Lag tahiba, kirik wepto mebitlumdi, kal saitun wangka lolteroba kirik alibag iklumdi, salag leplum. Ane sembe wene sekmendi, anenge aba wamlange togto amendi, mog so'o eneag agha lambamendi, ankabori so'oag pululam,' seog,” aro ambarog.
GEN 31:14 Wene aro Yakubti eldi kelabo Rahelap, Leaap ambatsiogpa, sindina, “Nun sembe nuniri saeagha poghatsinep kom, te?
GEN 31:15 Nuna nimi yanan nimi sembamsil. Nu, eldi kamna kapto toro aori ni abeneko ni teo.
GEN 31:16 Nia Allahri nuri nairi saeag agha tobonge nenena nu babe ngai apna numaboap sembe. Allahri ambatkeonge nene sunsunum uro 'Uanun,' sembalamne nenena ualulam. Nene sembe tamna orog,” aro ambatek.
GEN 31:17 Wene aro ambatekpa, Yakub kelabo meap pham unta alibag towalengkipsiogti, eldi pham longoro pabil ahiogti, nia mangkina Aram puluag agha el saeag taogne tobogti, Ili Ishak Kanaan wamoghag “Pukap,” aro ulamek.
GEN 31:19 Rahel sikini Laban pham domba hong karepto tol pilamogpa, elmangkel Raheldi haogha mema ae lomag phap tangtoba iliringe tol piog.
GEN 31:20 Iliringe tol piogpa, Yakubti elyamal Labanag ambatto koma mane ulamogti, Yakub kelabo meap sin tognop tangto piek.
GEN 31:21 Tognop tangto sikinengaba wamsiogha poro agha mag Efrat kauro yim Gilead sip piek.
GEN 31:22 Laban poneko ik wilindi wamogha Yakub pio ana ka'ebaog.
GEN 31:23 Ka'ebaogti eldi nimi poloro wimbahiogpa, Yakub sarekerepto palamekti, inaag ik saekbare maro palamekti, yim Gilead lambaek.
GEN 31:24 Lambaekti, pina mamekpa, lenda toman Allahri Labanag yubu lelamogti, “Andi Yakubag yubu kiki nhon babe, hakto aro yubu elag babe, lepseng kom,” seog.
GEN 31:25 Yakub samenag piogti, ae kalun ae yimag Gilead aneko sobaog. Laban ilipsaboap babe Yakub sarekerepto piogti, eldi babe yim enekoag agha nhonag ae kalun ae sobaek.
GEN 31:26 Piogti Labandi Yakubag yubu lelamogti, “Sa'a sembe andi haing kumbaneomdi, kelmabo naringe malag agha pelopto topsilo saog uaom?
GEN 31:27 Sa'a sembe yubu koma yaomdi, mane nembaneom? Sa'a sembe nanag ambatneom kom? Nanag ambatnhomba, sepna septo wana waliag pogkhene.
GEN 31:28 Nanag babe olog ambatnhomba, namangkelabo olog somoro kibitsiseneba, peheng. Andi uaomne nene olog mali uro uaom.
GEN 31:29 Na wanaag yo uaneoba, 'Nari opkenep' sembano, aghana ani Ili Allahri inipnag yubu lelamlari, 'Andi Yakubag yubu kiki nhon babe, hakto aro yubu babe, elag lepseng kom,' sel.
GEN 31:30 Ane sembe wene an aniri aeag panne sembe wana telangkelba, 'Punun,' sembalam, aghana sa'a sembe nanenge mema haogha tomneom?” seog.
GEN 31:31 Wene seogpa, Yakubti elyamal Labanag yubu lelamogti, “Na an yubu ambatken koma yanongena, anmangkelabo tane andi, 'Peheng kom,' aro, 'Salero pipsimenag,' aro yubu koma yano,” aro ambarog.
GEN 31:32 Ambarogti nen mema aneko sembe yubu ambarelamogti, “Na yamal, mema tane nu yalamobo nimiri haogha tobobori, payaboba, ipmen tanena el neneko oplulam. Kembalulam, andinge aba tane payaboa 'Nhon wamlaro,' ipmenba, wamle tanena toplulam. Nuri nimi tane kembamsikba, sindi haingag,” seog. Yubu wene aro lebogne nene Raheldi iliri mema tobogne neneko Yakub ekondi, lebog.
GEN 31:33 Wene seogpa, Laban neneko “Mema aneko ebanun,” aro Yakubti aeag samenag wa'iogti, sen-sena ebaogba, orog. Anea Leari aeag wa'iogti, sen-sena ebaogpa, orog. Yakubti kelabori arukna phende abenekori aeag wa'iogti, sen-sen agha ebaog aghana olog imna kom.
GEN 31:34 Imna komdi, “Raheldi aeag ebanun,” agha wa'iog aghana Raheldi ili Labanag, “Nani, wabaneheng kom. Na wal palamnari, puro seknange babe eraruk,” seog. Wene seog, aghana anam ili Raheldi aeag wa'in komag Raheldi mema aneko tobom agha pham unta alibag yangaro puroba aneko tosaelbom agha lilbiagha so'oag yangaro pukog. Yangaro pukogpa, Laban neneko sen-sen agha ebaogpa, olog ibog kom.
GEN 31:36 Olog ibog koma sembe Yakub wanaag yo taogpa, elyamalag walamogti, “Na yamal, sa'a yoaba uanoa sembe sarenelepto elamnelam?
GEN 31:37 Sa'a agha iplam? Nari tomnonge andala? Sa'a sembe sarenelepto yaomdi, ae naringe kwerekto sen-sen agha ebanelam? Na nimi yonge wamna kom. Wene andinge nari payanonge pilapmenba, andi nimiap nari nimiapti kembaikti, tam karebaukangpa,” aro walamog.
GEN 31:38 Walamogti, “Na anap nhon wamnomonge heng kun lintara bare wamnoa andinge pham domba kambing me mangal anahina babe orog, nari pham andinge tena babe orog.
GEN 31:39 'Si yoabari oro tenba, ane unual,' aro anag ambarel anaghenne babe orog. Undo si yoabari ten tanena, naba nari mo lumbanep. Nimiri haogha yo'obi tomnange babe, inipnag tomnange babe, yamal, 'Andi lumbalulam,' aro ambatnerop.
GEN 31:40 Pham yae ulamel no, yo'obi heng eneriba telamnelo, inipnag son eneba son sek lelamel no, kwahing ae mana ane babe puka malamel no.
GEN 31:41 Na yamal, anag pham yae seklero pia ulamsisia heng kun lin tarabare ane. Heng kun mekbare an mangkelabo kelabo topsinepne sembe topsi. Heng kun no'opbare pham andinge na tanepne sembe topsi. Andi, 'Kamna alikinag uro kamna kapkenun,' silum, aghana ik sa'obare ane yubu anda leloplum.
GEN 31:42 Nani Ishakap, ili Abrahamapti log sembamdekti, Si lelamdekne ponekori kembamnele komdi, lilomnhomba, sae agha koma waildam phene. Aghana seklelamnori, ulamnonge kembaneori, Allahri inipnag karepto pelengelal,” seog.
GEN 31:43 Wene seogpa, Labandi Yakubag yubu lelamogti, “Kelmabo abene namangkelabo, sindi mabo na namabo, pham tane babe naringe. Ane sembe wene ane sa'a agha nari kelmaboap nanisag mangaro arongneap sembe sa'a agha uanun?” seog.
GEN 31:44 Seogti, “Ane sembe, anap nanap yubu nikne ya'ag lero pimnemeri, 'Ekon tanemeag,' aro kekneba nhon karebanemeri, ya'ag el wamnunam,” seog.
GEN 31:45 Wene seogpa Yakubti kirik nhon tobom agha el ua una sembe mebirog.
GEN 31:46 Mebirogti, elmaboag yubu lelamogti, “Kirik wimbalulom,” seog. Wene seogpa, wimbaekpa, kirik wimbaekag aneko pukamekti, kwaneng teek.
GEN 31:47 Kwaneng teekti, Laban ponekori, “Sumene kirik wimbanama ane anap nanap el uro wamnunama,” seogti, kirik mero wimbarekag aneko “Yegar-Sahaduta” aro engkaogpa, Yakubti eldi yubuag “Galed” aro engkaog.
GEN 31:49 Nen Labandi, “An moag na moag wamnemeba, Nuni Allahri, 'Yubu nikne lemnamne sunsunum uro uanunam,' aro yae ua uamsilul,” aro sina “Mispa” engkaog.
GEN 31:50 Labandi nen nhon babe lelamogti, “Andi namangkelaboag malia ulapmendi, kelabo nenne tolamsimenba, nimiri iangkukang kom aghana seneragamlulam: Allahri haingdi kembamsilul,” seogti,
GEN 31:51 “Ane kirik poloroba nari pimna. Kirik ane sekiagha an anabi na anabiag irikna wamlul,” seog.
GEN 31:52 Seogti, “Kirik winiro pimnama aneap kirik memnama aneapti nu ambareamsilne nari kirik winiro pimnama ane phibom agha anag nari yoaba uanun kom, andi babe phibom agha nanag yoaba ulalulam kom.
GEN 31:53 Anisag Abraham Ili mem siap, nanisag Nahor mem siap, Sindi ukuma mem siap, mem si abenekori nunag tam karebaukangne nun anabiag wamlul,” aro seog. Ane sembe si “Mispa” engkaog. Seogpa, Yakubti ili Ishakti ukuma mem siag lero Labanag salag yubu lebog.
GEN 31:54 Salag yubu lebogti, pham nhon oro Allah sembe yimag aneko tabogti, elkabo eldi nimi poloro wimbahiogti, sin aneko tenaba tero yimag aneko mabek.
GEN 31:55 Mabeka kwelekaogpa, lukunapne neneko Labandi elmangkelabori kelmabo maboap somoro togtog aro kipsiogti, elmangkelabo babe kipsiogti, “Wali wamlulom,” aro pat pipsiogti, elengeag samoro piog.
GEN 32:1 Yakub neneko, “Nanengeag punun,” aro inaag palamogpa, Allah Ilipsabo malaikat elag yalamek.
GEN 32:2 Yalameka tibogahiogti, Yakub nenekori, “Allah Ilipsabo yin saleropnang longorobagna ane,” aro as aneko Mahanaim engkaog.
GEN 32:3 Yakub nenekori nimi etpare eldi aruknaag, “Naro Esau Seir mog so'o Edom wamlaag pululom,” aro pogsiog.
GEN 32:4 Poglamsiogti, “Pimundi ambatlulomne ane: 'Na Yakub, anme. Na wene wamnange nuri awang Labanap sekel anan nimi saog uro wamnori, wene og yalamna.
GEN 32:5 Wene wamnange arukna kabuniap kelaboap, pham sapi, keledai, domba, kambingap nari saeag wamlaba, wene yanunne sembe, “Nai, andi awi yeng sembalulam,” aro yubu ane palilamna. Nari nimi tane pogsinne na yanunne sembe an ambatkiikpa, wana sepsebek uro wamlulam,' aro ambatlulom,” seog.
GEN 32:6 Esauag pina samoro Yakubag yaekti, ambarelamekti, “Nani, ando Esau pina kemelamoboba, ando neneko 'Naipsaeap haiptanunam,' aro nimi teng naual tarabare (400) wimbahioba, elap yalamongba, kembitsibori yalamap,” aro ambarek.
GEN 32:7 Ambarekpa Yakub neneko log maikno sembaogti, wanaag senaraglamogti, “Namaboap nanenge pham ni tanekoap anabiag pogto palu phende a'ero pimne, tanena Esauri nhon palu olamsile, tanena palu nhon ka'eseptaukang,” sembaogti, palu phende poloro wimbahiog.
GEN 32:9 Undo unuaogti, Yakub nenekori molona lelamogti, “Nanisag Abrahamdi elme Ishakap Sikini Allah wamlamne, Nani, Andi ambarelamneomdi, 'Andinge as taptopne ankabo wamangag pululam. Nari an piangkeneba, wali uro wamlulam,' aro nanag salag lebom.
GEN 32:10 Na malinge wamna, aghana Andi na o'ona sembamlumdi, samen yepnelum saog uro yeplamnelum. Na nanenge as laplobiagha lambahi sum sa'a-sa'a toro an koma kame tunguna aghabog toro salero agha mag Yordan kauro pihi, aghana wene samoro yalamnari, namaboap nanenge phamap kong phende yalamap.
GEN 32:11 Naro Esau neneko yaleri, 'Naringe kelabo meap opsileag,' aro log uro wamap. 'An saeag agha taulbahilulam,' aro mololangken.
GEN 32:12 Andi na ambarelamnelumdi, 'Nari an piangkene pahabog anisag yabo mag kirik a'angkea mag abolag to'op tangkamla saog uro wamleba, ailbanep kom saog wamlul,' aro ambatnelumne neneko sembe seneraglulam!” aro ambarog.
GEN 32:13 Ambarogti wanag agha seneraglamogti, “Esau wana wali nenenne sembe, 'Naringe pham nenne pabululom,' aro naipsabo arukahineri, na tane wamnun,” sembaogti, pham kambing kelne teng linbareap, yemne lintarabareap, pham domba kelne teng linbareap, yemne lintarabareap, pham sapi kelne teng nhon epto naualbareap, yemne sa'obareap, nimi poahirop pham unta teng nhon epto wilindiri maum tinilamsiekne nongap meap, popsirop pham keledai kelne lintarabareap, yemne sa'obareap, ni ane tobogti,
GEN 32:16 aero-aero kerekto wimbahiog. Kerekto wimbahiogti, ilipsabo ambarelamsiogti, “Na tane mamnundi, nikag taikag aro a'undi aero-aero popsimundi, samenag pululom. Inaag aero-aero palapmundi, nenne samenag pumunba, nenne amik pukang,” aro ambatsiogti,
GEN 32:17 “Samenag pulul,” sembaogne neneko ambarelamogti, “Tonge Esauap haiptarumundi, eldi hailogkeleri, 'Anna anina etne? A'un tala palamlom? Etneri pham agha payalamlom?' aro haibaghaleba,
GEN 32:18 andi ambarelapmendi, 'Andi arukna Yakubtinge payalamna. “Nani Esau sembe pabululom,” selba, tarel alangkeap. Andi arukna Yakub neneko amik yalamla,' sululam,” seog.
GEN 32:19 Ilipsabo “Pham pabukang,” sembaog nang eneko ni wene aro ambatoba yabihiog. Yakub nenekori, “'Esau wana wali nembanun,' aro pham taneko poa naipsabo samenag arukahineri, na amik pineba, Esauri, 'Wali,' sembalul,” aro seneraghogha sunsunum uro
GEN 32:21 pham wepto tobeka taneko samenag poa palamekpa, el mo aghabog ae kalun aeag aneko mabog.
GEN 32:22 Yakub neneko inipnag pukogti, elkelabo phendeap, eldi arukna phende kelaboap, elmabo ko'olombareap samenne mag Yabog kauro tara sip pil phiogti, el neneko samoro yaogti, elenge phamap eldinge ni tanekoap, “Mag Yabog kauro tara sip pabululom,” aro pogsiogpa, pil phiekpa,
GEN 32:24 el mo wamog. El mo wamogpa, nimi nhon elag yaogti, Yakub saelbaogpa, sin phende ko'olomoghol talamdek pahabog ae kwelekaog.
GEN 32:25 Ae kwelekaogpa nimi neneko, “Yakub mikipti nari el oro luknubanep kom,” aro el taogti, Yakubti yan il su kopkop tiptobag wenelobog.
GEN 32:26 Wenelobogti, nimi nenekori yubu lelamogti, “Heng yanualba, na sae limne,” seogpa, Yakubti, “Allah siag kipnemen tanena sae lipkenun,” seog.
GEN 32:27 Wene seogpa, nimi enekori, “An sina etne?” aro haibaogpa, “Na Yakub,” seog.
GEN 32:28 “Na Yakub,” seogpa, nimi enekori ambarelamogti, “An si Yakub alamukang kom. Andi Allahap nimiap babe talamlamdi, mikip talamba, an si Israel alamukang,” aro ambarog.
GEN 32:29 Wene aro ambarogpa, Yakub nenekori, “An si lag phoro ambatne!” seogpa, nimi enekori, “Sa'a sembe na si lag phoro ambatkenun?” aro ambarogti, Yakub “Wali wamlulam,” aro kibog.
GEN 32:30 Undo unuaogpa, Yakub nenekori yubu lelamogti, “Nari Allah whing imna, aghana na teban kom,” aro undo unuarekag aneko Peniel engkaog.
GEN 32:31 Engkaogti heng yalamogpa, Peniel aneko laplobiagha palamogti, yan il komobaogne nenekori yan keamtiro palamog.
GEN 32:32 Nimi nenekori Yakub yan il komopto obog ane sembe, Israel nimi sumene babe pham yan tombarea il pangkal sop melmel telamang kom.
GEN 33:1 Palamekti, Yakubti tilamogpa, Esau eldi arukna nimi teng naual tarabareap (400) yalamek. Yalamekpa, tibogahiogti, Yakubti mabo ni tane wamekne pogto, nenne Leaag nembahiogti, nenne Rahelag nembahiogti, nenne eldi arukna phende kelabo abenekoag nembahiog.
GEN 33:2 Eldi arukna phende kelabo abeneko sikin maboap usoghag nembahiogti, Lea elmaboap nusamag nembahiogti, Rahel elme Yusupap amik nembahiogpa, palamek.
GEN 33:3 Yakub samenag menangkaogti, yabu sanukto pulingkiro palamogti, ik saek bare yabu sanukto pulingkiogti, eldo peramag piog.
GEN 33:4 Eldo peramag piogpa, eldori, “Naipsae,” aro merea somoro salel piogpa, kiptangto engeltalamdek.
GEN 33:5 Esauri Yakubti kelabo me kembahiogti, “Tane et nimi?” aro haibaogpa, Yakubti, “Tanena nari kelabo mabo. Allah wana waliri tatneonge,” seog.
GEN 33:6 Wene seogpa, eldi arukna eldi kelabo nembahiogne abeneko sikin maboap Esau whingag yabu sanukto pulingkiek.
GEN 33:7 Ane Lea elmaboap Esau whingag yabu sanukto pulingkiek. Ane Yusup ilin Rahelap Esau whingag yabu sanukto pulingkirek.
GEN 33:8 Pulingkiekpa Esauri yubu lelamogti, “Wela sembalamdi, nimiap phamap pogsilamne haiptaapne nene?” seogpa Yakubti, “Naro, andi o'ona sembahilulam,” aro seog.
GEN 33:9 Wene seogpa, eldo Esauri Yakubag, “Naipsae, nanag sae agha maikno wamla. Andi na nen tatneheng kom,” seog.
GEN 33:10 Wene seogpa Yakubti, “Undo kom. Andi o'ona sembanelamba, nari saeag agha tatkenne toro alulam. Haiptanamdi, andi whing kembaghendi, Allahri whing iplo saog uro an naro nari ipken. Ane sembe na wana wali,” seog.
GEN 33:11 Seogti, “Nari payandi, tatkenne nene nu kiptangto sembe tatkendi, toro alulam. Allah wana waliri nanag kwema senelamnonge maikno tatneo, ane sembe lipseng kom,” aro mikip lelamogha sembe tobog.
GEN 33:12 Wene alamogpa, tarogha taneko tobogti, yubu lelamogti, “Wene nhon togheberi, nhon palamukap,” seog.
GEN 33:13 Wene seog, aghana Yakubti lelamogti, “Naro, el wamlam, me tanena elemag pinep kom saog, apna pham me maum telamangneap. Ik nhon sum elemag pana babe pham tane tebanepti, an samenag palapmenba, na amik nemen-nemen meap phamap yan nginikom agha palamika sunsunum uro Seir mog so'o pina wapmenag yanun,” seog.
GEN 33:15 Wene seogpa Esauri, “Wene selam, tanena nari arukna me etbare undo piloa phinun,” seogpa, Yakubti, “Mo palamebea na sembe ikin sembaheng kom. Naro, na sembe awi senelamnelamba, ot an sembe na yeng,” seog.
GEN 33:16 Wene seogti, Esau sumeneko sum elsam Edom piog.
GEN 33:17 Esau Edom palamogpa, Yakub Sukot piogti, ae eldamne sembe soro eldi pham tanekoap sembe babe kalun ae sobaog. Ane sembe mog so'o si ane Sukot engerop.
GEN 33:18 Yakub Aram so'oag agha Kanaan so'oag as Sikhem piogha, wali uro piogti, as Sikhem peramag ae soro wamog.
GEN 33:19 Ae soro wamoghag aneko mog so'o aneko Hamor sisa nimiringe. Sikhem poneko babe Hamor elme wamog. Yakubti, “Mog so'o wene wamnaag aneko naringe ya'ag wamlul,” aro kamna kapto kirik wana solomne teng tombare (100) agha kamna kapto tobog.
GEN 33:20 Toboghag aneko Allah sembe si lero mhong towalengenag sobaogti, si “El Elohe Israel” engkaog.
GEN 34:1 As Sikhem peramag wamekti, Yakubap Leaap sikin mangkel Dinari, “As Sikhem kelabo kemel pihinun,” aro piog.
GEN 34:2 Palamogpa, mog so'o ene saelbamogne Hemor elme Sikhem, sin sisa Hewi nimi. Elme Sikhemdi Dina poa piogti, saelbaog.
GEN 34:3 Saelbaogti, Sikhemdi, “Yakub elmangkel topsene,” agha wana telamog, apna “Dinari wana nanag wamso,” senelamog.
GEN 34:4 Ane sembe elme Sikhemdi ili Hemorag yubu lelamogti, “Kel saren ene na-anme toatnululam, 'Na el topsene,' senalamna,” seog.
GEN 34:5 Yakub ka'elamogpa, “Sikhemdi elmangkel Dina saelbal,” seeka ka'ebaogti, “Namabo phamag yae wamanga yingkiamna komdi,” sembaogti, yubu koma wamog.
GEN 34:6 Yubu koma wamogpa, Sikhem ili Hemor “Yubu lemnunam,” aro Yakub wamoghag piog.
GEN 34:7 “Yubu lemnunam,” aro ulamdek abeneko, Yakub elmabo babe pham yae wameka yaekti, Sikhemdi sikinipsa'el saelbaogne sembe sin wanaag yo uahiog. Sikhemdi Yakub elmangkel saelbaogne nene uanep komne uaogne neneri Israel nimi ali nembahiogpa, sin wana sesog tahiog.
GEN 34:8 “Yubu lemnunam,” aro Hemorti Yakub elmaboapag yubu lelamogti, “Na name andi kelmeag wana telamlaba, andi lepmenne agha nari me andi kelme toplul,” seog. Seogti, “Nuri yubu saekag lero pimnunamne kelabo andi kelmabo nuri kelmabo tol talamukap.
GEN 34:10 Undo unuaberi, Nai, an nunap wali so'o eneag wameberi, anba andi, “Wamnun” senenag wamlulam. A'unba a'undi, “Wamukap” senenag soro wa'imundi, awe wero saeagha maikno neneptangto wamlulom,” seog.
GEN 34:11 Sikhemdi Dina iliap eldo yaboag ambarelamsiogti, “Na kel ane tatnululom. Tatnemunba, a'undi 'Kwema' simuna babe tatsineri, 'Kelabo sabogha abene,' aro molbanumuna babe tatsinun,” aro molbahiog.
GEN 34:13 Wene seogpa, Yakub elmabori sikinipsa'el saelbaogha sembe orolena yubu ili elme Hemorap Sikhemap samoro ambarelamsiekti, “Nunipsa'el kon teptop kom nengaboag nuri tatsina nu ali.
GEN 34:15 Nunipsa'el tomnep tanena nuri lebebenge sarenelebamun taneogna hae. A'un kabuni ni wamlomne kon teptamundi, nu saog tamun taneogna,
GEN 34:16 nuri kelmabo babe a'undi tolamsimunba, nuri babe a'undi kelmabo topsiberi, a'unap wameberi, nun as nhon taukap.
GEN 34:17 Wene seapne ka'ebamundi, kon teptamun kom, tanena nuri kelme toro aberi pukap,” seek.
GEN 34:18 Wene seekpa, ili elme Hemorap Sikhemapti, “Wali lebang,” sembarek.
GEN 34:19 Sembarekti, Sikhemdi “Dina toro hanne,” senenne wana lololamogpa, nimi sisa Sikhemdi nimi sisa el agha yubu lenne wamogti, “Elem-elem uaukap,” seog.
GEN 34:20 Ili elme Hemorap Sikhemap nimi yubu lero haiptangtobag ina siramag pirekti, as eneko nimi ambarelamsirekti,
GEN 34:21 “Nuri mog so'o ene sabo wamla, ane sembe nungkabo, Yakub poneko elmaboap agha yingkina wamangne nunap wamukap. Sin nunag walia ulamsiangba, mog so'o eneag wamikti, sinba sindi 'Uaukap,' senena uro wamukang. Nuri sindi kelmabo hae tolamsukap, sindi babe nuri kelmabo hae tolamsukang.
GEN 34:22 Israel nimiap nun nhon wameberi, nun as nhon taukapnena, sindi uropne nuri babe uaukapnena, 'Kabuni ni wamapne kon teptaukap.'
GEN 34:23 Undo unuabeba, sindi pham, sindi sae agha nun saeag talul. Sindi lebangneag sarekerebabeba, sin nunap wamukap,” aro ambatsirek.
GEN 34:24 Wene aro ambatsirekpa, nimi ni yubu lero haiptangtobag as ina siramag yaek nimi taneko ka'ebaekti, nimi kaubuni as eneko kon kareptangtang piek.
GEN 34:25 Kon kareptaekneri, ogti wamekpa, ik wilindip sum Yakub elmabo phende Dina eldo Simeonap Lewiap karog nhondi nhon nhondi nhon toptekti, as enekoag wa'irekti, kabuni ni opsirek.
GEN 34:26 Ili elme Hemorap Sikhemap babe opsirekti, sikinipsa'el aeag anekoa poa lambarek.
GEN 34:27 Sikinipsa'el saleroba sembe tiro opsirekpa, Yakub elmabo nenne wa'ina hohola nia mangkina talupto topsiek.
GEN 34:28 Yakub elmabo wa'ina lebekti, pham kambing, domba, sapi, keledai toro palamogpa, nia mangkina paiagneap aeagneap topsiek.
GEN 34:29 Kelabo me babe toro wimbahiek. Nia mangkina kamna alikinag uro toroba sa'a-sa'a ni aeag wamogha ane ni topsiek.
GEN 34:30 Topsiekpa, Yakubti Simeonap Lewiap sin phendeag lelamogti, “Namabo, a'undi na loba nembanerom. Wene Feris nimiap Kanaan nimiap as ene nimiapti nanag wana mali pipneang. Nunna nimi etbare kom. Sin ma'aptaikti, nu oro luknubahukang,” seog.
GEN 34:31 Wene seogpa, sindina, “Sa'a sembe nunipsa'el ina yabirop kel nembangpa?” serek.
GEN 35:1 Wamogpa Allahri Yakubag yubu lelamogti, “Ando Esau sembe logti palumba, Na Nani Allah an whingag lag tahinge nenekori lelamna. Lag tahiag aneko as Betel pimendi, wapmendi, Na sembe mhong towalengenag sobanululam,” aro ambarog.
GEN 35:2 Ambarogpa Yakub nenekori elkelabo elmabo nimi elap wamekne taneko ambarelamsiogti, “Na wana ikin uro wamsiba, Allahri yepneogti, tala palamsiag babe yeplamneogne sembe mhong towalengenag sobanundi, as ene lilobiagha Betel pukap. Ane sembe mema as yogneag piamlomne lipsimundi, sabol keptangto aleptalulom. Aleptamundi, ag wendogne poro alulom!” aro ambatsiog.
GEN 35:4 Ambatsiogpa mema tanekoap, aoag tolongoroba tanekoap Yakubag tarekpa, Yakubti as Sikhem peramag kal nubunge wamogne neneko tamag sikog.
GEN 35:5 Sikogti Yakub elmaboap lanalamekpa, Allahri nimi as kanero wamekne nimi taneko log nembhaiogpa, “Yakub elmaboap opsukap,” aro sarenelebahinep kom uaog.
GEN 35:6 Pinep kom wamogpa, Yakub elmaboap as Betel samenag as si Lus engerobag Kanaan so'oag ane piek.
GEN 35:7 Piekti Yakub nenekori Allahag mhong towalengenag sobaogti, wanag agha seneraglamogti, “Na naro sembe logti palamsiba, Allah lag taogti, El wamlaag ane,” aro si El Betel engkaog.
GEN 35:8 Engkaogti tane wamekag anekoa Ribka nong ologhag agha piamog pahabog wamog kel Debora neneko tebaogpa, as Betel aneko mombolag sip kal nubunge wamogha mombolag sip sikog. Kal nubunge wamogpa, sikogag wamog kal eneko si “Engena kal” engkaog.
GEN 35:9 Yakub neneko samenag Aram mog so'o laplobiagha yalamogha as Betel yaogpa, nen Allah el whingag lag taogti, kiplamogti,
GEN 35:10 “An si wene Yakub wamlamne Yakub alangkukang kom, wene Israel alangkukang,” aro engkaog.
GEN 35:11 Engkaogti, nen lelamogti, “Na Allah Imap So'oap Saelbamnange yubu lelamna. Andi mangarobari mangkahyikne maikno taikti, as nubunge yubu a'ero-a'ero leropne wamukang. Sin wamikne taneko anabiag agha nimi nubunge raja seklamukang.
GEN 35:12 'So'o anisag Abrahamap ani Ishakap tatsinun,' sehinge neneko an anmabori ngai taukangba, tatsinun,” aro ambarogti,
GEN 35:13 Yakub liloa piog.
GEN 35:14 Piogpa Yakub ponekori, “Allahri nanag yubu leplaag ane,” aro kekneba kirik nhon so'oag mebirogti, kirik anekoag anggur magap kal saitun wangka lolterobaap ikog.
GEN 35:15 Ikogti si Betel ya'ag engkaog.
GEN 35:16 Wameka Yakub elmaboap as Betel laplobiagha Efrata peramag palamekpa, Rahel neneko me mangal dona peram taogti, monag ta'ap alamogpa,
GEN 35:17 in tolamog abeneko el yeplamog kel enekori ambarelamogti, “Nen nengabo me nhon mangaro alulam. Ikin uro wamseng kom,” seog.
GEN 35:18 Seogpa Rahel neneko tebanep hain kom tanogpa, me aneko si Ben-Oni engkaog, aghana iliri Benyamin engkaog.
GEN 35:19 Rahel neneko tebaogpa, Efrata ina pirobag inaag sikog. Samenag as Efrata engeropne neneko wene Betlehem alamang.
GEN 35:20 Sikoghag aneko Yakob ponekori kekneba kirik nhon mebirogne neneko wene babe wamla.
GEN 35:21 Undo unuaogti, Yakub neneko ae wenge solingkirobag si Eder neneko phibom agha piogti, ae kalun ae soro wamog.
GEN 35:22 Wamogti Ruben nenekori iliri elkel nenero aogne Bilha nenekoap mabogne sembe Yakubti ka'ebaogti, wamog. Yakub nenekori elmabo nengabo mabo aobare mangkahaiog.
GEN 35:23 Elkel Lea nenekori elme samenagne Ruben mangaro aogti, Simeonap, Lewiap, Yehudaap, Isakharap, Zebulonap, mangkahaiog.
GEN 35:24 Elkel Rahel nenekori Yusubap Benyaminap mangkahaiog.
GEN 35:25 Rahel arukna Bilha nenekori Danap Naptaliap mangkahaiog.
GEN 35:26 Lea arukna Zilpa nenekori Gadap Asyerap mangkahaiog. Me taneko nina Aram so'oag agha mangkahiek.
GEN 35:27 Wamekti Yakub neneko ili Ishakag Hebron peramag as Mamre piog. Samenag as eneko Abrahamap Ishakap nimi sekelanan nang saog uro wamdek.
GEN 35:28 Ishak mangkaekne heng kun taibuka taubuka ulamogha teng no'opbare eptopne sa'o tarabare (180) taogpa, sabal taogti, wana aingniro wamogti, hain kom taogpa, ilisag yaboag yame samen piog. Tebaogpa, elmabo Esauap Yakubapti so'o siktek.
GEN 36:1 Esau si nhon Edom.
GEN 36:2 Esauri Kanaan kelabo phende topsiog. Selekne Hetne Elon elmangkel Ada tobog, phendepne Hewinge Ana elmangkel Oholibama tobog. Ana ili Sibeon. Nen nhon ma'aro wilindipne tobogne Ismael elmangkel Nebayot ilipsa'el Basmat tobog.
GEN 36:4 Adari Elifas Esau sembe mangkarogpa, Basmatti Rehuel mangkarog.
GEN 36:5 Oholibamari Esau sembe mangkarognena: Yeus, Yaelam apna Korahap. Esau Kanaan wamogha el kelabori mabo lambare ane mangkahiek.
GEN 36:6 Esauri ilipsae Yakub laplobiagha mog so'o nhon weag palamogti, Kanaan wamogti, saeag taoghaap, eldi kelaboap, eldi maboap, eldi kelmaboap, eldi aeag wamek nimiap, eldi phamap piek.
GEN 36:7 Esauri ilipsae laploa piognena, sindinge saeagha pham maikno wamogpa, sin ilipsaeap nhon nikag wamnep kom. Ane sembe eldori ilipsae laploa piog.
GEN 36:8 Ane sembe Esau, si nhon Edom, Seir yimag ko'oro piog.
GEN 36:9 Piogti, Esauri nimi likto Edom nimi yina liksiogne ane.
GEN 36:10 Esau, si nhon Edom, elmabona: Esauri kel Adari Elifas mangkaog. Esauri kel Basmatti Rehuel mangkaog.
GEN 36:11 Ada ela'ange Esau. Esauri me Elifas. Elifasti mabona: Teman, Omar, Sepho, Gaetam, apna Kenasap.
GEN 36:12 Elifasti kel Timna tognoro torop keldi mena Amalek. Si lepsiap nang ini sikinisag sikinauna Esauap Adaap.
GEN 36:13 Basmat ela'ange Esau. Esauri me Rehuel. Rehuelti mabona: Nahat, Serah, Siama apna Misaap. Anena Esau elkel Basmat elau yabo.
GEN 36:14 Esauri kel Oholibama ilisag Sibeon. Sibeon elme Ana. Oholibamana Ana elmangkel agha Esauri tobog. Oholibamari Esau sembe mangkahiogne: Yeus, Yaelam apna Korahap.
GEN 36:15 Esauri mangahirobari sikini yabo tangto piek sisana ane. Elifas Esauri me yandonge. Elifas pone sikini taog. Nimi sisa taeknena: Teman, Omar, Sefo, Kenas, Korah, Gaetam, apna Amalek nimi sisa sikini taek. Esauri kel Adari Elifas mangkaogpa, Elifasti liksiogne undo wamek.
GEN 36:17 Rehuel ponekona, Esau elkel Basmatti mangkarogne. Nimi sisa sikini yabo taek nimina: Nahat, Serah, Siama, apna Misaap nimi sisa sikini taek. Esauri kel Basmatti Rehuel mangkaogpa, Rehueldi liksiogne undo wamek.
GEN 36:18 Esauri kel Oholibama. Oholibama ilisag Sibeon. Oholibama ili Ana. Esauap Oholibamaapti liksirekne sindi mabo Yeus, Yaelam, apna Korah nimi sisa sikini taek.
GEN 36:19 Si lepsiap nang ini Esauri mabo sindam nimi si ahaem uro sikini yabo tangtang piek.
GEN 36:20 Esau ko'oro Seir pioghag aneko Hori nimi wamekag piog. Horingena Seir poneko elmabo ane: Lotan, Siobal, Sibeon, Ana,
GEN 36:21 Dision, Eser, apna Disianap. Edom so'oag Seir elmabo sikini yabo taek.
GEN 36:22 Lotan elmabona: Hori, apna Hemanap. Lotan ilipsa'elna Timna.
GEN 36:23 Siobal elmabona: Alwan, Manhat, Ebal, Siepho apna Onamap.
GEN 36:24 Sibeon elmabona: Aya apna Anaap. Ana poneri iliringe pham yae ua ulamsiogti, aldesag mag lu pobonge ibog.
GEN 36:25 Ana elmabona Dision apna elmangkel Oholibamaap.
GEN 36:26 Dision elmabona: Hemdan, Esiban, Yitran apna Keranap.
GEN 36:27 Eser elmabona: Bilhan, Saawan apna Akanap.
GEN 36:28 Disian elmabona: Us apna Aranap.
GEN 36:29 Ane wamlange nenena Hori nimi sikini yabo sisa taek nimi. Sikini yabo sisa taek nimi endana: Lotan nimi sikini, Siobal nimi sikini, Sibeon nimi sikini, Ana nimi sikini,
GEN 36:30 Dision nimi sikini, Eser nimi sikini, apna Disian nimi sikiniap. Hori nimi sikini yabo sisa ene Hori as mog so'o taneag likto piog.
GEN 36:31 Anam Israel yubu sia lerop nang raja wamna komag, Edom samenag yubu sia lerop nang wamek nangna: Beor elme Bela yubu sia leropne Edom mog so'oag wamek nimi sembe wamog. Eldi as Dinhaba.
GEN 36:33 Bela tebaogpa, Serah elme Yobab as Bosrange agha Bela lunumna waelbaog.
GEN 36:34 Yobab tebaogpa, lunumna Husiam waelbaogne Teman nimi sisa agha waelbaog.
GEN 36:35 Husiam tebaogpa, Bedad elme Hadad lunumna as Awitne agha waelbaog. Hadad poneri Midian nimiap Moab asag agha mal talamekti, oro luknubahiogne.
GEN 36:36 Hadad tebaogpa, Hadad lunumna as Masrekange Samla waelbaog.
GEN 36:37 Samla tebaogpa, Samla lunumna Rehobot mag abolagne Syaul waelbaog.
GEN 36:38 Syaul tebaogpa, Syaul lunumna Akhbor elme Baal-Hanan waelbaog.
GEN 36:39 Baal-Hanan tebaogpa, Baal-Hanan lunumna Hadar waelbaog. Hadarti asna Pahu. Eldi kel sina Mhetabe'el ili Matred. Mhetabe'el ilisag Mesa'ab.
GEN 36:40 Edom nimi sikinisang taognena Esau. Nimi sisana: Timna, Alwi, Yetet, Oholibama, Ela, Pinon, Kenas, Teman, Mibsar, Magdiel, apna Iram nimi sisaap. Sin si lepsiap nimi sisa ene ahaem uro, as mog so'o wameka ane babe, nimi si wamla ane saog uro engero piog.
GEN 37:1 Esau ilipsae Yakub neneko ili nimi sekelanan nang saog uro wamoghag Kanaan so'oag wamog.
GEN 37:2 El elmabori ulamekne ane: Yakub elme Yusup mangkaekne heng kun taibuka taubuka ulamogha timbom agha ko'olom tarabare taogpa, iliri elkelabo nembahiogne taneko Bilhaap Silpaap sikin mabo mangkahirekne tanekoapti pham kambing domba piamsiek. Yusubap nikag piamsiekti, eldo yabori yoaba ulamekne sembe Yusup nenekori ili ambarelamog.
GEN 37:3 Yakub nenekori elme Yusup sembe, “Sabalag agha mangaro ano me,” aro wanaag uro seneraglamogti, eldoyabo sembe wana abolag uro seneraglamsiog. Ik nhon sum Yakubti ag nhon ketkero yogto-yogto wibogti, “Enekel dolamlul,” aro tarog.
GEN 37:4 Yakub elmabo yogneri seneraglamekti, “Nuniri nunipsae Yusup sembe wanaag wamlari, nun wailag nenelamsil,” aro el taekti, sikinipsae Yusubag yubu wali uro lelamek kom.
GEN 37:5 Ik nhon sum Yusupti lenda mabogti, eldo yabo nebatsiog. Yusupti eldo yabo nebatsiogne ane, “Naro yabo, lemnunne nene ka'eamsut! Nari lenda malamnaba, nun ni aweag wamapti, roti wana mauroba yo'o kareptopne kaupto palilamapti, kemelamnaag agha nari kaupto pililamnange sek-sek yabiamangba, a'undinge yomoro naringeag kiniplamang,” aro ambatsiogpa, sindi el sembe, “Karong,” senelamek.
GEN 37:8 Wene aro ambatsiogpa, elag yubu lelamekti, “'Na yubu lenne taneri, nu mombolag nembahinun,' senelamlam?” aro wabaek. Lenda mabiagha nebarelamsiogne sembe eldo yabo taneko yo senelamek.
GEN 37:9 Undo unulamekpa, nen lenda nhon mabogti, eldo yabo nebarelamsiogti, “Nari lenda mamnaba, hengap, walap, imbrea ko'olombareap tanekori na saramag yabu sanukto kulukul alamangba, imna,” aro ambatsiog.
GEN 37:10 Lenda mabogne neneko ili babe ambarogpa, iliri walamogti, “Lenda nene wela saogne maplam? Na aniap, aninap, ando yaboap, 'Nanag yaikti, yabu sanukto pul aukang,' senelamlam?” seog.
GEN 37:11 Undo unulamogne sembe Yusup eldo yabo tanekori el sembe wana mali lelem karong uro seneraglamekpa, iliri lenda aneko el uro ua ulamogti, usoghag pia ulamog.
GEN 37:12 Wamekti, Yusup eldo yabori pham kambing domba sikiniringe taneko poa phiekti, as Sikhem peramag piamsiek.
GEN 37:13 Undo unuaekpa, Yakub nenekori Yusup ambarelamogti, “Ando yabori pham nuringe as Sikhem piamangdi, wamangag kemel philulam,” aro ambarogpa, Yusupti, “Nani, wali leplam,” seog.
GEN 37:14 Wene seogpa, Yakubti, “'Ando yaboap, pham naringeap, wali wamangdo,' aro kemel phimendi, ambarel anululam,” aro ambarogpa, Yusup neneko Hebron whaboghag agha “Sikhem punun,” aro palamog. “Sikhem punun,” aro palamoghag agha
GEN 37:15 “Tala wamang,” aro ekondi, paiag tangom ina ag tangom aba palamogpa, nimi nhon haiptarekti, “Sa'a elamlam?” aro haibaog.
GEN 37:16 Wene aro haibaogpa, Yusupti, “Nani, 'Naro yabori pham tala piamsiangdi, tala wamang,' aro elamsindi, an el wamlam tanena ambatnululam,” seog.
GEN 37:17 Wene seogpa, nimi enekori, “Ando yabo tane lambaongdi, palamongdi, 'As Dotan pukap,' aro wene alamonga ka'ebahino,” aro ambarogpa, Yusup neneko eldo yabo as Dotan wamekag piogti, tibog ahiog.
GEN 37:18 Yusup neneko weag yalamogha tibog aekti, “El nunag yalamle tanena obukap,” sembaekti,
GEN 37:19 sin mo-mo yubu lelamekti, “Lenda polan uro maropne poneko yalamlaba,
GEN 37:20 ya'ag oro mag longkanep kirik arameag pelengkaukap. Undo unuaberi, 'Si yoabari obo,' alamukap. Undo obebeba, eldi lenda malamonge welaro pulul kembaukap,” alamek.
GEN 37:21 Undo wene alameka Ruben nenekori ka'ebahiogti, “Welaro sin saeag agha taulbanun?” sembaogti, yubu lelamogti, “Naipsabo, ya'ag obukap kom.
GEN 37:22 El eneng yingkileag, nuri elag sa'a-sa'a uan koma mag longkanep kirik arameag ani pelengkaukap,” seog. Wene seogne nene, “Yusup neneko obikag pelebaneri, 'Aniag pululam,' sunun,” aro seneraghogti, lebog.
GEN 37:23 Yusup neneko eldo yaboag yaogpa, sindi saelbaekti, elenge ag walinge poro amogne neneko kuripto tobogahiekti,
GEN 37:24 sae kiliro pabiekti, mag longkanep kirik arameag aneko peleng lobol piek. Peleng lobol piekag aneko mag longorop komag peleng lobol piek.
GEN 37:25 Unuaekti kwaneng telamekti, tilamekpa, yog nimi Ismael sisa nimi mog so'o Gilead anekoa “Mesir pukap,” aro yalamek. Yalameka anekona, kal wea nimi whesinaap, teptop nimi song kom nenenna-ap, kwanengap ma'aro yonaap, “Nimi Mesir wamang nimiri kamna kapto tobukang,” aro pham unta alibag towalengkibekti, payalamek. Sindi payalameka tibogahiek.
GEN 37:26 Tibogahiekti, Yusup eldo Yehuda nenekori elkaboag yubu lelamogti, “Nangkabo, sa'a sembe nunipsae obeberi, eneng tognobaukap?
GEN 37:27 Yusup nunipsae ana, obukap kom semban. Ane sembe Ismael nang eneag kamna kapto tobukap,” aro ambatsiogpa, “Wali leplam,” seekti,
GEN 37:28 wamekag Ismael nimi yalamekpa, ipsiekti, “Midian nimi yalamangne ane,” sembaek. Midian nimi wali-walia kamna kapto tororo yabirop nimi yabaekpa, Yusup neneko eldo yabori mag longkanep kirik arame anekoa kiliro towalengkaekti, Ismael nimi taneko tatsiekpa, sindi kamna kapto kirik wana solomne lin tarabareag tobek. Tobekpa, Yusup neneko Mesir poa piek.
GEN 37:29 Poa piekpa, Yusup eldo Ruben mag longkanep kirik arame anekoag yaogti, tiplengelamogpa, Yusup neneko kom wamogpa, lo'om seogti, ag wangaro amogne kweldero epsiog.
GEN 37:30 Undo unuaogti, elkaboag piogti, ambarelamsiogti, “Me aneko orogti, wene wela uanun?” seog.
GEN 37:31 Seogpa, Yusup eldo yabo tanekori pham kambing nhon obekti, Yusupti ag eneko pham kambing enengag werebaekti,
GEN 37:32 nimi nhon ambarelamekti, “Ag ane nuri naiag pabimendi, ambarelapmendi, '”Ag ane nuri ibobori, anmeri ag to?” aro pebel alangken,' sululam,” aro ambarekpa, Yakub ya'aghag piog.
GEN 37:33 Piogti, ag aneko pebogpa, Yakub nenekori kembaogti, yubu lelamogti, “Ot sik uro nari nameri ag. Name Yusup neneko si yoabari oro kaelbaori, pelekto teo,” seogti,
GEN 37:34 wana maliri ag wangaro amogne kweldero epsiogti, kuripto tobogahiogti, “Amang ulamna,” aro ag kilikin ag malinge poro aogti, so'o liktangto elme sembe sana amang wamog.
GEN 37:35 Amang wamogti, wamogpa, elmabo elmangkelabo yingkina “Wana aingnibaukap,” aro yaek aghana, sikini wana aingnilamog kom. Elme sembe seneraglamogti, “Name sembe amang ulamneri tebanun,” seogti, engero aghabog ua ulamog.
GEN 37:36 Undo wamogti, ua ulamogpa, Midian nimiri Yusup neneko Mesir pabiekti, Potifar ponekoag tarel piekpa, eldi kamna tatsiog. Potifar neneko Mesirnang sikini yae wameknang sikindo wamog.
GEN 38:1 Yusup Mesir wamogpa, Yehuda elkaboap wamna koma laploa piogti, as Adulam wamogne sina Hira poneag piogti, wamog.
GEN 38:2 Aneko pina wamogti, kelabo nhon Kanaan nimi Suari kelme haiptarekti, salag lebogti, toptarekti, Yehuda elkelap nikag maptek.
GEN 38:3 Keleneko me monag taogti, me mangaro aogpa, ili Yehudari si Er aro engkarek.
GEN 38:4 Keleneko nen me monag taogti, me nengabo me mangaro aogti, me si Onan ilindi engkaog.
GEN 38:5 Nen keleneko me monag taogti, me nhon babe mangaro aogti, me si Siela engkaog. Ela'ange Yehuda Kesib pina wamogpa, me ane mangaro aog.
GEN 38:6 Yehudari elme yandonge Er sembe kelabo nhon Tamar tobog.
GEN 38:7 Tobog aghana, Er yonge aghabog ulamogha sembe NUNI Allahri ibogti, ya'ag obog.
GEN 38:8 Allahri obogpa, Yehudari elme Onan Er ilipsaeag yubu lelamogti, “Andori yauog laploa loba tao aneko maupmendi, nhon maptumunba, ando lunuro eldi sisa babe yag talul,” seog.
GEN 38:9 Aghana Onan el wamognena, “Na narori kelap mapneme tanena na sisa talul kom. Naro sisa talul anekona, malamnemea naringe eneng agha naro sisa talul kom,” aro nikag maptek aghana eldi eneng kel anekoag talamog kom.
GEN 38:10 “Naringe eneng keleneag nari pimnun kom,” seogne sembe NUNI Allahri ibogti, “Onan yonge ulamla,” aro Allahri ya'ag obog.
GEN 38:11 Allahri Onan obogpa, Yehudari elmabori yauog anekoag yubu lelamogti, “Namangkel, pimendi aniri aeag yauog uro wamlulam. Pimendi, wapmenba, name Siela nubu tale tagha,” seog. Yehudari seneraghognena, “Namabo tebarong saog uro Siela babe tebaleag,” aro lebog. Wene seogpa, Tamar lambaogti, iliri aeag pina yauog wamog.
GEN 38:12 Piogpa, wamekti, Sua elmangkel Yehudari kel tebaog. Tebaogpa, elkel tebaogha sembe amang wamogha elkae Hira as Adulam wamogne poneko enero agha as Timna piog. Piognena pham domba hong kareplamangpa, Yehudari, “Pham domba hong karebel ahinun,” aro sembaogti, piog.
GEN 38:13 Elmabori yauog Tamar anekori ka'elamogpa, elyamal Yehuda, “As Timna pham domba hong karebel ahinun,” aro yalamla ana ka'ebaog.
GEN 38:14 Ka'ebaogti, Tamar neneko 'yauog tandi enektop ag' kwiripto lilobi agha, ag yogne enekongkia whingag liliro pelengtoba lilbongkia Timna ina pirobag pukamog. Pukamoghagna as Enaim wa'ineba peramag. Tamar sik uro elel wamognena, “Yehuda elme Siela nabinge wene nubu tao aghana, wene toamnel kom,” senelamog.
GEN 38:15 Yehudari Tamar whingag liliroba lilbamogha sembe elyamal kel iamog koma “Ina yabirop kel pukamla,” sembaog. Wene sembaogti, Yehuda Tamar ina peramag aneko sekel piogti, lelamogti, “Yae, na an saelbaghenun,” seogpa, kelenekori, “Na saelbanemen tanena sa'aba agha tatnululam?” seog.
GEN 38:17 Seogpa, Yehudari, “Nari pham domba yemne nhon wendog nolamlange tatkinun,” seog. Wene seogpa, Tamarti, “Wali, aghana tatnululama ane sembe nang-nang aro wamnuna sa'agha tatnululam?” seog.
GEN 38:18 Wene seogpa, Yehudari, “Sa'a agha wene tatkinun?” seogpa, kelenekori, “Sae ma'alag tolongka uroba-ap, saramag langka uroba-ap, anenge kame tunguna saeag wamlange nang-nang uro wamnuna tatnululam,” seog. Wene aro molbaogha tarogti, saelbaog. Saelbaogpa, keleneko memon taog.
GEN 38:19 Tamar aeag piogti, ag wangka piogne kwiripto pibogti, yauog kelabori enektopne enekaog.
GEN 38:20 Enekaogti, wamogpa, Yehudari elkae Hira Adulamne poghogti, “Pham kambing ane pina tarel pimendi, naringe aba kelenekori toboa taneko payalulam,” seogpa, palamoghag agha kel eneko orog wamog.
GEN 38:21 Hirari Enaim nimiag hailamsiogti, “Ina yabirop kel inaag ua ulamla kel eneko ala wamla?” aro haibahiog. Wene aro haibahiogpa, sindina, “Tanena ina yabirop kelabo nhon wamang kom,” seek.
GEN 38:22 Wene seekpa, Hira samoro Yehudaag piogti, ambarelamogti, “Nari keleneko olog inma kom. Nimi wamang nimiri lebangnena, 'Tanena ina yabirop kelabo nhon wamang kom,' seang,” aro ambarog.
GEN 38:23 Wene aro ambarogpa, Yehudarina, “Naringe aba elsaeag tao anena wali elenge talul. Nimiri nu yubu lehinba, nu ali unne sembena, 'Pham ane tarel pululam,' sen aghana el kom wamlaba, payalam tanena andane,” seog.
GEN 38:24 Wal wilindiro undo wameka, Yehudari ka'elamogpa, “Anmabori yauog anyamalkel Tamarna ina yabirop kelabo saog uro yabalamori, memon tao,” ana ka'ebaog. Wene alameka ka'ebaogti, Yehudari yubu lelamogti, “Tol pimundi, payalulom. Kamag kekman auk tabukap,” seog.
GEN 38:25 “Tol pimundi, payalalulom,” seogpa, piekti, aeag agha Tamar poa lanalamekpa, Tamarti elyamal Yehudaag yubu piro lebognena, “Taneaba ngainge poneri memon nembaneo. Ane sembe na saeag wamla tane poa samenag pimunba, nimi sae saelbahilul,” seog.
GEN 38:26 Wene seogpa, poa piekpa, Yehudari kembaogti, el taogti, lebogti, “Kel enena malia uan koma wamla. Nari elag uanepne uano komnena, na name Sielaap ma'abahino kom,” seog. Yehuda nen kel enekoap man ana orog.
GEN 38:27 Tamar me mangal tona peram wamogpa, mangal tolamoghag agha me phende mangkahiog.
GEN 38:28 Me mangal tona peram wamogpa, me mangal tolamoghag agha me samenag yingkiogne neneko sae lanal aogpa, yepsiropneri sae no'obag saelbaogti, wet purum uwongne agha saeag kerekaog. Sae kerekaogti yubu lelamogti, “Mene samenag mangaro yingkil,”
GEN 38:29 alamoghag agha sae kiliro aog. Sae kiliro aogpa, me nhon amikne samenag yingkiog. Yingkiog meag yepsirop kel enekori yubu lelamogti, “An mikip talamdi, an samenag yingkilam,” seog. Ane sembe me samenag mangaro yingkiogne neneko me si Peres aro engkaek.
GEN 38:30 Peres samenag mangaro yingkiogpa, ilipsae amik sae no'obag wet purum uwongne kerektoba amik yingkiog. Ane sembe si Serah engkaekti, nene me yandonge sembaek.
GEN 39:1 Ismael nimiri Yusup neneko Mesir pabiekti, Potifar tarel piekpa, eldi kamna tatsiog. Potifar neneko Mesir nimi sikini yae wamek nang yin saleropne sikindo wamog.
GEN 39:2 Yusup neneko ili Mesirne ponekoap wamogpa, NUNI Allahri yeplamogpa, awe wali uro welamog.
GEN 39:3 Wamogne Potifar nenekori kemelamogpa, Ili Allahri me aneko yeplamogpa, “Awe ambarelamnange ni awe wali uro welamla,” aro kemelamog.
GEN 39:4 Undo ulamogha kembaogti, Potifar nenekori Yusup sembe o'ona senelamogti, “An agha na peramag wapmendi, yeplamnululam,” aro ambarelamog. Nen nhon ambarelamogti, “Na naringe aeag wamlange naringe saeag agha ni andi o'olamlulam,” aro sekirog.
GEN 39:5 Toro sekirogti, wamogpa, NUNI Allahri Yusubag seneraglamogti, Potifarti ae eneko wali nenelamogpa, Potifar ponekoringe aeag wamogne paiag wamogne ni wali uro tolamog.
GEN 39:6 Nia mangkina eldinge taneko Yusupti saeag pibogti, eldamneri olog uan koma, ot tena aghabog seneraglamog. Yusup neneko kabuni kemerop wamog.
GEN 39:7 Wamekti, Potifarti keldi Yusup kembiagha wana telamogpa, lebogti, “An nanap mamnunamdi yae,” seog.
GEN 39:8 Wene seogpa, Yusupti, “Karong,” aro yubu lelamogti, “Nanin, nani Potifar nenekori nia mangkina eldinge aeag wamlange, 'Andi piamlulam,' aro ambatneori, nia mangkina o'ol tolamla kom.
GEN 39:9 Naniri nia mangkina sembe ambarelamsilba, ka'elamang saog uro nari babe ambarelamsinba ka'ebanep. Nia mangkina ni ae eneag nari saeag pibog aghana, nanin, na nani elkel wamlam ana an sembe naniri ambatneo kom. An sembe ambatneo komba, welaro nari malia ulamneri, Allah wana loba nembanun?” aro ambarog.
GEN 39:10 Wene aro ambarogti, wamogpa, kelenekori sopsop yubu yangaro, “Nhon mamnunam,” alamog aghana Yusup ka'elamog kom.
GEN 39:11 Ik nhon sum ili arukna nenne oroghag Yusup aeag wa'iogti, aeag wamogha “O'obanun,” aro aeag wa'iog.
GEN 39:12 Aeag wa'iogti, aeag wamogha “O'obanun,” aro ulamoghag agha ili Potifar elkel wa'alulum agha Yusupti ag enekto amogneag saelbaogti, “Wene nhon mamnunam,” aro wene alamoghag agha Yusup, “Karong,” aro ag enekto amogne neneko kwiripto keleneko saeag tan aogha laplobiagha lahimbom seog.
GEN 39:13 Yusupti ag eneko el saeag taogha kembiagha
GEN 39:14 kelenekori eldi arukna yopsiogti, ambarelamsiogti, “Namabo, na na'angeri Ibraninge ae eneag tolongol aoba, yubu neplamsil. El neneko na marobag wa'ildi, 'Nanap mamnunam,' aro ulamlaba, na ngolol alamna.
GEN 39:15 Ngolol alamna sembe logti, lanalamlari elenge ag laplobiagha pilne kembahut!” aro ambatsiog.
GEN 39:16 Wene aro ambatsiogti, kelenekori ag aneko piamogti, wamogpa, ela'ange yaogpa,
GEN 39:17 ambarelamogti, “Ibraninge andi arukna payaomne ponekori aeag wa'ildi, na 'Saelbanun,' aro ulamnelag agha nari yubu ngolol aro, haum alamnange sembe log lelem palamlari, ag kwiripto liloa pilne ane,” aro ambarog.
GEN 39:19 Wene aro ambarogpa, ela'ange Potifar nenekori ka'ebaogti, wanaag yo sembaog.
GEN 39:20 Yo sembaogti, Yusup neneko salero Potifarti kop aeag tolongol piog. Kop ae tolongol pioghag aneko nimiri Mesir yubu sia leropneag malia uanba, tolongol pirob aeag tolongol piek.
GEN 39:21 Tolongol piekpa, NUNI Allahri Yusup yeplamogpa, kop ae yae ua uropne ponekori Yusup sembe o'ona senelamog.
GEN 39:22 O'ona senelamogti, “Nimi orange haing sae kaupto tolongolamsiekne andi kemelamsimendi, sa'a-sa'a kop aeag uropne andi o'olamlulam,” aro ambarog.
GEN 39:23 Ambarogti, kemelamogpa, Yusup neneko Ili Allahri yeplamogpa, awe eldi welamogne sikneog uro yabalamogpa, kembaogti, Yusup saeag awe pibogne taneko tolamoghag kemel palamog kom.
GEN 40:1 Wameka nimi phende yubu sia leropne Mesir wamogne Firaun yeplamdek nang abeneko, nhonna mag Firaun tebatnange sembe, nhonna kwaneng roti yoro tengenne wamdek nang abenekori Firaunag malia uarek.
GEN 40:2 Ane sembe Firaundi sin phende el yeplamdek nang abenekoag yo pipsiog.
GEN 40:3 Yo pipsiogti, sin neabeneko salero kop aeag yin saleropne sikini Firaun sembe yae ua uropneri aeag Yusup wamog ae kop aeag tobongkipsiog.
GEN 40:4 Sin phende abeneko kop aeag aneko ik maiknoro wamdek. Firaun yae ua uropne ponekori Yusupag, “Andi sin yeplamsululam,” aro elag tareamog.
GEN 40:5 Ik nhon sum nimi nubunge yeplamdek nang abenekori lenda maptek. Lenda maptek aneko lilimna a'ero maptek.
GEN 40:6 Maptekti wamdekpa, Yusup lukunap yaogti, kemelamsiogpa, sin wana ikin uro wamdek.
GEN 40:7 Undo wamdekpa, kembahiogti Yusupti, “Sa'a sembe wana ikin saog uro wamdom?” seog.
GEN 40:8 Wene seogpa sindina, “Inipnag lenda mamnam aghana nimi nhondi babe lenda mamnamne neneko 'Lelero ane sembe maptom,' aro ambatsinep kom,” serek. Wene serekpa Yusupti sinag lelamogti, “Allahri lenda maptoma lelbatsinep kom te? Na ka'eamnundi, welaro maptom?” seog.
GEN 40:9 Wene seogpa, mag nimi nubunge Firaun sembe yeptopne ponekori, “Lenda aneko malamnari, kemelamna-ag agha haing anggur na whingag wamla.
GEN 40:10 Haing anggur aneko wag wilindi uro pongolamla. Mog anam pongolamla aghana es momagamla. Aghana wana mauroba aneko yina lom-lom alamangpa imna.
GEN 40:11 Unu amangba, kembandi, kemelamnaag agha nimi nubunge Firaundi mag teroba na saeag wamla. Wamlaba, haing anggur wana aneko tagnari, nimi nubunge Firaundi mag ma'iag loltero pelengkandi, tarelamna,” aro nebog.
GEN 40:12 Wene aro Yusupag nebarogpa, Yusuptina, “Lenda maplamnena undo sembe maplam: Wag wilindi wamlange nenekona ik wilindi wamlulamne sembe. Ik wilindi wapmenba, Firaundi kop aeag anea lambitkeleri, 'Malia uaomne orog tal,' aro, 'Awe samen tolamomne saelbamlulam,' seleba, samen mag tebarelamom saog uro tebarelamlulam.
GEN 40:14 Lambamen tanena na sembe ekon taneheng kom. Tam na wamnange babe nimi nubungeag ambatmenba, na babe kop aeag anea lambitnelul.
GEN 40:15 Nana Ibrani so'oag wamsiag agha naro yabori Ismael nimiag nembaneekpa sindi poa Mesir nimiag kamna tol aneek aghana, Mesir tane babe nari tam malinge una babe ekon agha, kop aeag ane tobongkipneek,” seog.
GEN 40:16 Nimi nubunge sembe mag tebato yeplamogne ponekori lenda lelbarogha wali ka'ebaogti, kwaneng roti nimi nubunge sembe yoro ingkatopne ponekori babe Yusupag, “Lelbatnulul,” aro nebarelamogti, “Nari babe lenda mamnangena, kwaneng roti winiroba kau wiroba wilindi usoghag poamna.
GEN 40:17 Kau wilindi aneko wilindipne neneko kemelamnaag agha kwaneng roti wereroba yogne-yogne Firaun sembe wamla, aghana winang yingkina kau sirikagne alibag neneko telamang,” aro Yusupag nebog.
GEN 40:18 Nebogpa, Yusupti lenda aneko lelero ambarelamogti, “Lenda aneko undo sembe maplam. Kau wilindi maplamne neneko ik wilindi sembe maplam.
GEN 40:19 Ik wilindi wapmenba, Firaundi lambitkeleri, nimiag “Oplulom,” seleba, andi usog karepto kalag epto silbaghikpa, winang yingkina sop nong andinge tukukang,” aro lelero ambarog.
GEN 40:20 Lenda mapteka lelero ambatsiogpa, wameka ik wilindip sumneko nimi nubunge Firaun mangkaek sum wamog sumeneko, tenaba maiknoro yoro el mombolag wameknang awe tolamekne ni “Yalulom,” aro ambatsiog. Ambatsiogpa, yaekpa, ambarelamsiogti, “Nimi kop aeag wamdang nimi abeneko tolbina nimi wamangag na whingag payahilulom,” seog.
GEN 40:21 Nimi nubunge mag tebarelamog nimi enekoag seognena, “Samen pukamomag pukamlulam,” seogpa, pukamogti, mag nimi nubunge poneko mag tero tebarelamog.
GEN 40:22 Nimi nhonne kwaneng roti yoro yubu sia leropne sembe ingilamogne ponekona, usog karepto lenda Yusupti lelbarogne neneko sunsunum uro kalag silbaek.
GEN 40:23 Yusupti, “Na sembe ekon taneheng kom,” seog aghana, nimi enekori Yusup sembe seneragna koma el ekon taog.
GEN 41:1 Heng kun phende phibaogpa, Firaundi lenda malamogti, Mag Nil abolag sekamog.
GEN 41:2 Sekamogti, Mag Nil koag kemelamogpa, pham sapi saekpare hong alam-alam arop pham wali uro norop pham maghag agha walel aekti, mag abolag pongoroba telamek.
GEN 41:3 Nen babe kemelamogpa, Mag Nil lomag agha pham sapi yarirop-yarirop pham saekpare lamba walel aekti, wali uro norop pham peramag sekamek.
GEN 41:4 Kemelamsioghag agha, pham sapi yarirop-yarirop pham tanekori wali norop pham telamsiek. Undo telamsiekpa, Firaundi lenda maro haing kwelekaog.
GEN 41:5 Nen mabogti, lenda malamogti, kemelamogpa, roti mauroba yo'o nhonag agha wana mauroba korokto saekpare mauamogpa, whi ubu pilamekpa, mabog.
GEN 41:6 Nen tipto malamogti, kemelamogpa, roti mauroba yo'o nhonag agha nen wana mauroba korokto saekpare nika-nika uro mauamog. Nen saekpare mauamog aghana aldesag khaori kolalem-kolalem uro maurop saog uro whi ubu pilamek kom.
GEN 41:7 Kolalem-kolalem uro maubu piamekti, whi wamek kom aghana wali uro mauropne kolalem uro mauropneri telamsiekti, orog nembahiekpa, Firaundi lenda maro haing kwelekaogti, “Nia imna tane lenda mamna,” sembaogti, el taog.
GEN 41:8 Maboghag lukun kwelekaogne log sembaogti, “Etneri lenda mamnange nene lelbatnilul,” aro el umag yubu amorop nangap, haing ka'en nangap yopsiog. Yopsiogti, lenda mabogne nebatsiogpa, sin niri lenda mabogha aneko lelbarek kom.
GEN 41:9 Lelbarek komba, mag Firaun sembe tebatopne ponekori iliag, “Na sumene nari mali uanonge sumene lag phoro ambatkinun,” seog.
GEN 41:10 Wene seogti, “Samen taneko andi nanap nangkae kwaneng roti werero tengkatkeropneap yo sembahilumdi, wabahilumba, an sembe yae ua uahiropneri ae kop aeag tobongkipsiek.
GEN 41:11 Tobongkipsiekpa, wamnumuri, ik nhon sum lenda a'ero mamnumu. Lenda mamnumua aneko lelero eltananne ekon wamnumu aghana, kabuni Ibraninge samen Firaundi yae wamek nang yin saleropne sikindori aeag yepto wamog. Yepto wamog aghana salero kop aeag tobongkibekpa, ik nhon sum haiptaburi, elag lenda mamnumunge nebatnumuba, lenda mamnumua a'ero lelbatsiog.
GEN 41:13 Lenda mamnumua lelbatsiog aneko sik uro yabiog. Wene babe samen mag tebarelangkhi saog uro wene babe wamnaba, nangkae kwaneng roti werero tengkarelangkeogne poneko lenda mabogpa, lelbarogha sunsunum uro kalag epto silbaek,” aro nebarog.
GEN 41:14 Wene aro nebarogpa, ka'ebaogti, Firaundi, “Yusup kop aeag wamla tol pululom,” seogpa, Yusup kop aeag agha lambaogti, waba hong lero ag walinge enekaogti, Firaun whingag piog.
GEN 41:15 Yusup Firaun whingag piogpa, yubu sia leropne Firaundi, “Nari lenda mamna aghana, nimi nhondi babe lenda mamnange lelbatnenne orog. Aghana an sembe ka'ebannena, 'Lenda lilim ka'ebongkia abeneko pere lelbatsinep,' seangba, ka'eban,” seog.
GEN 41:16 Wene seogpa, Yusupti, “Nani, na kom. Allahri sikne lelbatkilul,” seog.
GEN 41:17 Wene aro ambarogpa, Firaundi, “Lenda malamnari kemelamnag agha Mag Nil abolag sekamna.
GEN 41:18 Sekamnari kemelamnaag agha Mag Nil lomag agha pham sapi saekpare wali uro norop pham hong alam-alam aro siriktop pham walelangti, mag abolag pongoroba telamang.
GEN 41:19 Telamangpa, kemelamsinag agha nen sap pham sapi saekpare yarirop-yarirop pham, nari babe Mesir so'o eneag undop pham ilihirop kom aghana sumene undo ipsin.
GEN 41:20 Undo kemelamsinag agha yarirop-yarirop pham tanekori pham samenag walelangne wali uro norop pham taneko tehiang.
GEN 41:21 Tehiang aghana yarirop-yarirop pham taneko mon olog yogholbana babe orog, ot nika yariroba taneko wamangba mamnari pukna.
GEN 41:22 Pukna aghana nen sap malamnari, kemelamnaag agha kwaneng roti sununa sembe meroba yo'o nhonag agha wana mauroba korokto saekbare mauamangba, yina ubu piamang.
GEN 41:23 Nen tipto malamnari, kemelamnaag agha kwaneng roti sununa sembe meroba yo'o nhon anekoag agha nen wana saekbare maubu piamang aghana aldesag khaori kolalem-kolalem ubu piamang.
GEN 41:24 Kolalem-kolalem ubu pilamangba, kemelamsinag agha kolalem-kolalem ubu pilamangne tanekori wana wali uro mauropne telamsiang. Undo mamnari, nimi lenda aneko peket lelbatnen nimiap, haing ka'en nimiap ambatsin aghana sindi tibin nenero lelbatneang kom,” aro Yusup nebarog.
GEN 41:25 Wene aro Yusup nebarogpa, Yusupti nimi nubunge yubu sia leropne Firaunnag, “Lenda phende maplamne abene ot nhonog tam sembe maplam. Allah Eldi, 'Uanun,' sembamlange ambatkel.
GEN 41:26 Wali uro norop pham saekpare iplamneap, roti wana wali uro mauroba korokto saekpare whi ubu pilamangpa, iplamneap ni abeneko tamna heng kun saekbare sembe maplam.
GEN 41:27 Nen mamlamdi, pham sapi yarirop pham saekpare ipsilamneap, roti wana mauroba aldesag khaori kolalem-kolalem ubu pilamangpa, ipsilamne abenena, kwaneng yo waelbaleri, heng kun saekpare wamlulne sembe maplam aro ambarog.
GEN 41:28 Nari nai, an lenda maplama ambatkenne sunsunum uro Allah Eldi, 'Uanun,' sembamlange sembe ambatkelba, lenda undo maplam.
GEN 41:29 Heng kun saekpare Mesir so'o eneag meroba polon tarag alamleba, kwaneng ten wamlul.
GEN 41:30 Aghana heng kun taibuka taubuka uroba saekpare talamleba, kwaneng yo nubunge waelbalul. Kwaneng yo waelbaleba, nimiri, 'Nari meroba maikno talba, naringe maikno wamla,' samen senenne ekon taukang. Kwaneng yo nubunge Mesir so'o eneag waelbaleba, mog so'o ene iklerebalul.
GEN 41:32 Allahri, 'Uanun,' sembamlange lenda ik phende, nai, andi maplamne abenena, Allahri, 'Uanun,' sembamlange nen phelekalul kom, Allahri, 'Uanun,' sembamlange abene uro yabinual,” aro ambarog.
GEN 41:33 Wene aro ambarogti, “Nari lenda maplama ambatkenne sembe sik uro seneragmendi, nari ambatkenenge sunsunum uro ualulam. Ane sembe nimi nhon ero wepmendi, 'Nimi eneri seneragna wali, saelbamsori wali uaho,' senenne nhon weplulam.
GEN 41:34 Ane sembe nimi nhon ero wepmendi, sekitmen tanena, nimi yogne el umag wamikti, kiliro ul palamukangne babe sekitsululam. Sekitsimenba ulamukangnena, heng kun saekpare Mesir nimiri meroba ten wamleba, Mesir nimiri tolamikti, palu lambare winilamukang. Aghana sin palu tombare telamikti, palu nhonna a'unag payalamukang. Ni asag kwaneng wipag pirop ae a'ero-a'ero sol tolamikpa, Mesir nimiri payalamikne taneko wip a'ero-a'ero palilamikpa, yae uro wamukang.
GEN 41:36 Tenaba wip-wipne palilamukangne nenena, kwaneng yo walel aleba, heng kun saekpare aneko tero une sembe wero palilamukang. Undo unuamik andarina kwaneng yo walel alenge neneko kwaneng yori Mesir nimi nhon tebaukang kom,” aro ambarog.
GEN 41:37 Yusupti lebogne sembe nimi nubunge yubu sia leropne Firaunap el umag wamek nangapti, “Wali lepla,” seek.
GEN 41:38 Wene seekpa, yubu sia leropne Firaundi el umag urop nangag hailamsiogti, “Nimi nhon Yusup saogne lunumna nhon wamla kom. Elna Allah yame elag to'opto wamla” seog.
GEN 41:39 Wene seogti, Firaundi Yusubag yubu lelamogti, “Anna Allahri ni ane ambarelangkelba, ni el wamlam ane sembe nimi orangeap sunsunum kom.
GEN 41:40 Ane sembe wene nari an sekel ilangkennena, Mesir andi saelbapmendi, yubu lelapmenba, ka'elamikti, neleplamukang. Ot nana agha andi babe paliag nembamnululam,” seog.
GEN 41:41 Wene seogti, Firaundi Yusubag lelamogti, “Nari towalengelangken nenena, andi mog so'o Mesir andi saelbamlulam,” seog.
GEN 41:42 Wene seogti, Firaundi sae ma'alag tolongka uroba Firaundi saeag agha olobaogti, Yusupti sae ma'alag tolongkaogti, ag wet sop walinge agha wirop ag agha enekirogti, ngangag leng-leng aro kirik emas agha sunuroba ngangag warekirog.
GEN 41:43 Warekirogti, “Na paliag wamna aghana Yusup phendepneag waelbalul” aro ambarelamogti, “Nari poa phiroba kereta phendepne waelbapmenba, nimi an whingag palamikti, 'Firaundi weplange Firaun sae sirik sip pukamlulne yalamla. Nuni!' alamukangba, waelbalulam,” seog.
GEN 41:44 Wene seogti, Yusubag ambarelamogti, “Na Firaun yubu sia leropne na ya'ag wamna. Aghana, an ekonagna nimiri awero nia uanepne Mesir so'oag ane sangsang uro ulamukang kom,” seog.
GEN 41:45 Wene seogti, Firaundi Yusup si Mesir yubuag agha engelamogti, “Saphnat-Pa'anea” aro si engkaog. Engkaogti, memne Potifera, On wamogne poneko elmangkel Asnat Firaundi tobogti, Yusup tarog. Undo unuaogpa, Yusupti Mesir nimi saelbamsiog.
GEN 41:46 Yusup mangkaekne eldinge heng kun selek ta'om agha epto wilindi wamogpa, el webek. Webekpa, Firaun umag awe tolamogti, Mesir as kanelamog.
GEN 41:47 Heng kun saekbare kwaneng ten wamogpa, Mesir nimi meroba pongoroba polon tarag alamogpa wamek.
GEN 41:48 Kwaneng ten wamogpa, Yusupti roti sumbaneba meroba pongoroba taneko poloro as kanero yabalamogti, as taneko meroba ni palilamog.
GEN 41:49 Kwaneng as pololamogne taneko wip maikno, mag yengkea lolaptoba mag abolag saog uro nimiri babe a'ilbanep kom saog ulamog.
GEN 41:50 Kwaneng yo yan komag Potifera as On memne poneko elmangkel Yusupti kel Asnatti me phende mangkahiog.
GEN 41:51 Me yandonge neneko Manasye aro engkaog. Yusupti Manasye aro engkaognena, “Allahri samen ua ulamsiri, seklelamsinge ekon nembaneogpa, naiap naro yaboap ekon tahisi,” aro engkaog.
GEN 41:52 Me phendepne Efraim aro engkaog. Efraim aro Yusupti engkaognena, “Seklelamna so'oag agha me Allahri tatnel,” aro Efraim engkaog.
GEN 41:53 Heng kun saekpare kwaneng ten wamogpa, meroba wamog heng kun saekpare eneko orog taogpa,
GEN 41:54 Yusupti samen Firaunag ambarogne sunsunum uro kwaneng yo waelbaog. Ni mog so'o Mesir kanero wamekne kwaneng yo wamek. Mesir nimiri babe “Kwaneng yo wamap,” aro Firaunag lelamekpa, Firaundi, “Yusubag pimundi, eldi yubu sunsunum uro ulamlulom,” aro ambarelamsiog. Mesir nimi babe kwaneng yo wamek aghana, samenag Yusupti kwaneng wero piboghag agha Mesir nimi ni kwaneng telamek.
GEN 41:56 Kwaneng yo ikinne wamogne anena, Mesir ni mog so'o babe mog so'o peramag ni babe kwaneng yo wamek. Mesir nimiap, ni as kanero wamek nimiap, weag nimiap babe kwaneng yo wamek. Aghana, Yusubag yalamekpa, Yusupti kwaneng poloro pia urop aeag agha tolamogti, kamna kaplamekpa, tarelamsiog.
GEN 42:1 Sikini Yakubti ka'elamogpa, “Kwaneng roti Mesir wamla,” seeka ka'ebaog. “Wamla,” seeka ka'ebaogti, elmaboag yubu lelamogti, “Sa'a sembe namabo aingniro ulamlom?” seog.
GEN 42:2 Nen yubu lelamogti, “Na yubu ka'ebanne 'Mesir kwaneng roti wamla,' seanga ka'eban. Kwaneng yo seklero tebabeag, ane sembe pimundi, kwaneng roti kamna toro payalulom,” seog.
GEN 42:3 Wene seogpa, Yusup eldo yabo sa'obare “Kwaneng roti tobukap,” aro Mesir piek.
GEN 42:4 Yakubti elme Benyamin Yusup ilipsae nhon “Pheng kom,” aro salero pibognena, “Inaag palamikpa, opleag” aro salero pibog.
GEN 42:5 Kanaan kwaneng yo waelbaogpa, nimi orange babe Mesir kwaneng kamna toro tol alamekpa, Yakub elmabo babe “Tobukap,” aro yaek.
GEN 42:6 Kwaneng roti mog so'o ni ane kamna tol alamekpa, tarelamsiognena Yusup. Mog so'o Mesir saelbamogpa, eldo yabo yaekti, sikinipsae Yusup whingag yabu sanukto pulingkina kibek.
GEN 42:7 Yusupti eldo yabo ipsiog aghana, maneri ipsin koma saog uaog. Yusupti, “A'unna tala nimi?” aro yubu yo uro haibahiog. Haibahiogpa, sindi, “Nu Kanaan mog so'oag wamap nimi agha, 'Kwaneng tobukap,' aro yaap,” seek.
GEN 42:8 Yusupti eldo yabo whingna iamsiog aghana, eldo yabori elna iamek kom.
GEN 42:9 Iamek komba, Yusup eldi lenda sin sembe malamogne seneraghogti, “A'un nimi tane yalom nena, haing toro nimi wea urop komag mog so'o eneag wamlange kemenelehin nimi yalom,” aro wene seog.
GEN 42:10 Wene seogpa, sindina, “Nuni, undo kom. Nun yaapnena, 'Kwaneng tobukap,' aro yaap,” seekti,
GEN 42:11 “Nani, nu yaap nang enena, nun kongap nang. Nai ot nhon. Nu wana porog nimi. Nu kemenelero haing tohirop nimi kom,” seek.
GEN 42:12 Wene seek, aghana eldi lelamogti, “Orolena. A'un yalomne mog so'o ene 'Yae ua unne sogna wamlaag kembaukap,' aro yalom,” seogpa,
GEN 42:13 Sindina, “Nu kongap nang aobare nang. Nu Kanaan so'oag wamap, nuri nai ot nhon. Nhonna loba taog pana, wenena elabome nen tagha iliap wamdang,” seek.
GEN 42:14 Wene seekpa, Yusupti, “Yo! Usaap taneko lemna, a'unna haing toro kemenelehin nang,” seogti,
GEN 42:15 “Wene selom aghana, a'un nari mipsinun. Nari sik uro nimi nubunge yubu sia leropne siag lelamnange, anam a'unipsae anam yan komag a'un nhon babe pululom kom.
GEN 42:16 A'un agha nhon wepmunba, pileri, a'unipsae tol pulul. Tol piamleba, nennena sae kaupto piamsinun. A'undi leplomne sik talul to? A'undi leplomne neneko orolena tanena, sik uro nimi nubunge Firaundi lepso saog uro nari lelamnangena a'unna kemenelehin nang,” seog.
GEN 42:17 Wene seogti, ni kop aeag tobongkipsiogpa, ik wilindi wamek.
GEN 42:18 Ik wilindip sum Yusupti sinag yubu lelamogti, “Na Allah sembe log uro wamnange. Nari a'un sae lipsinunne, ot ina nhon.
GEN 42:19 A'undi leplomne sik sembanepne sembe, a'un agha nhon kop aeag salero pibukap. Orangena kwaneng tobomne popmundi, a'undi kelabo me kwaneng yo seklelamangne sembe pabululom.
GEN 42:20 Pumun aghana, a'undi leplomne sik senena sembe a'unipsae elabome neneko payalulom. Kom tanena tam ikinne nari a'unag pimnun,” seog. Wene seogpa, “Yo,” seek.
GEN 42:21 Sin mamun yubu lelamekti, “Wene nunag tam talamlangena, samenag nuri nunipsaeag uabunge sembe, 'Naro yabo omneheng kom,' aro wene alamog aghana, nuri el sembe o'ona sembabu komdi, obubu. Aneko sembe wene tangoro nunag talamla tam nene seklelamap ane,” alamek.
GEN 42:22 Wene alamekpa, Rubendi ilipsabo tanekoag yubu lelamogti, “'Obukap,' alamlumba, nari 'Opseng kom moaba apmunagti,' aro ambatsisi kom te. Wene alamsi aghana, ka'ebanulum kom. Wene el tebaogne neneko eneng aneko sembe nun eneng lunup talul,” aro wene alamek.
GEN 42:23 Wene alameka Yusuptina ka'eamsiog aghana, eldoyabori seneragamek kom. Sindi lelamekne nhon meri Yusubag yubu tiplamog.
GEN 42:24 Wene alamekpa, Yusup sin laploa piogti, engel piogti, yaogti, “Simeon haing kauplulom,” aro ambatsiogpa, elkabo whingag agha salero haing kaupto pibek.
GEN 42:25 Simeon sae salero pibekpa, Yusupti eldi aruknaag ambarelamsiogti, “Sindi ag poa yaongneag kwaneng lilapmundi, kamna tobong kirik solomne samoro sindi aghag libahilulom, apna kwaneng inaag tenepneap,” seog.
GEN 42:26 Libaekpa, Yusup eldo yabo taneko kwaneng taneko popsirop pham keledai alibag towalengkibekti, palamek.
GEN 42:27 Mamnebag aneko piekti, sin taneko nhondi, “Pham keledai kwaneng tatnun,” aro ag ina siram kwhabia agha kemelamogpa, kirik solomne kwaneng kamna tobog kirik eneko ag ina siramag wamog.
GEN 42:28 Wamogpa, ibogti, elkabo nenneag ambarelamsiogti, “Nangkabo, nari aghag kembamun! Kirik solomne naringe samoro pibang,” seogpa, kembaekti, sin mamun kemeptaom agha log lelem pet-pet alamekti, “Nuni Allahri nunag sa'agha ulamla?” alamek.
GEN 42:29 Kanaan sikini wamoghag piekti, sinag uro yabiogne sikiniag ambarekti,
GEN 42:30 “Mesir so'o saelbamlange ponekori hagto walamsildi, 'A'unna mog so'o eneag wamlange haing toro kemenelen nimi,' alamsio.
GEN 42:31 Aghana nuri elag lelamobori, 'Nuna wana porog nimi, nuna haing toro mog so'o kemenelen nimi kom.
GEN 42:32 Nuna kongap nang aobare nang naina ot nhon. Nhonna ka'aseptaog bana, wenena nunipsae elabomeog iliap Kanaan wamdang,' sebo.
GEN 42:33 Wene seboba, mog so'o Mesir saelbamlange ponekori nunagna, 'Na a'undi leplomne sembe mipsinun. “A'un sik wana nhonog nimiro,” aro a'un sa'obare wamlom nang ene agha nhon nanag wamleba, kwaneng kelabo me si tarapnange sembe kwaneng pabululom.
GEN 42:34 Pabumundi, a'unipsae elabome neneko nanag payamun taneogna, nari a'un sembe, “Haing toro mipna nang kom, wana nhonog nang,” sembahineri, a'unkae lambatsine taneogna, mog so'o eneag hae pang yang ulamlulom,' aro wene seo,” aro sikiniag nebarek.
GEN 42:35 Nebarekti, pabieka taneko toro la'anilamekti, kemelamekpa, kirik solomne kwaneng sembe kamna kapto tobeka taneko ni nangdinge aghag ubu piamogha sikiniap kembaekti, log senelamek.
GEN 42:36 Kembaekti sikiniri lelamogti, “A'undi unulamlomdi, namabo ka'asebel talamang. Yusup orog taog, Simeon orog tao, wene Benyamin pabunualom. Nanagha sol olamnelomba, ulamnun,” aro wene alamog.
GEN 42:37 Sikiniri wene seogpa, Rubendi iliag yubu lelamogti, “Nani, wene selam aghana, Benyamin na saeag tatnululam. Samoro payane kom tanena, nari mabo me phende ya'ag opsululam,” seog.
GEN 42:38 Wene seogpa, iliri, “Name, elna anap nhon pulul kom. Eldona tebaogba, ilipsae ot nhonog wamla. Palamtumunba, inaag agha ople tanena, penelamnelomne sembe seneragto ulamneri, kul hong yabukom agha teplomnun,” seog.
GEN 43:1 Kanaan kwaneng yo nubunge waelbaogne aingnibaog komba wamek. Kwaneng Mesira tol aekne taneko orog taogpa, Yakubti elmaboag yubu lelamogti, “Kwaneng nuringe orog talbana, a'un Mesir pimundi, kwaneng tol pululom,” seog.
GEN 43:3 Sikiniri, “Tol pululom,” seogpa, Yehudari ili Yakubag, “Nimi enekorina yubu ambarelamsiori, 'A'unipsaeap nhon yamun kom tanena, na whingna imnululom kom,' seo,” seogti,
GEN 43:4 “Nai, andi agha, 'A'unipsaeap pululom,' semen tanena hae piberi, kwaneng toa yaukap,” seog.
GEN 43:5 Nen lebogti, “Nairi, 'A'unipsae Benyaminap pululom kom,' semen tanena, pukap kom. Nimi enekorina, 'A'unipsaeap yamun kom tanena, nanap haiptaukap kom,' seo,” seog.
GEN 43:6 Wene seogpa, Yakubti, “Namabo, a'undi na loba nenelamnelom. Sa'ambe nimi eneag, 'Nunipsae nhon wamla,' aro wene seom,” seog.
GEN 43:7 Wene seogpa, elmaborina, “Nimi enekorina haim-haim alamsio. 'A'uni kamag wamla te, a'unipsae nhon wamla te?' aro hailamsioag aneko ambarobo. Nunag ambatsiongena, 'A'unipsae payalulom,' seo ana nu babe ekon wamobori, ambarobo. Ambaroboag agha nuri eldi wene sulul sembamobo komne 'A'undi a'unipsae payalulom,' seo,” seek.
GEN 43:8 Wene seekti, Yehudari iliag lelamogti, “Nai, 'Mene anap pululom,' semenba, pukap. Tam uro yabineba, mene sembe nari o'obanun. Nun kwaneng yori, nhon si tarababeag.
GEN 43:9 Nari el o'obanun. Nai, nari saeag piplulam. Nari agha el samoro payane kom tanena, tam neneko nanag sembeng ana ya'ag nanag wamlul.
GEN 43:10 Nun ta'abamna koma phebeagti, ik phende pang yang uahabe,” seog.
GEN 43:11 Wene seogpa, sikini Israel ponekori, “Undo wene selom tanena, mog so'o eneag wamlea wali saogha a'undi ag nhonag libamundi, eldi wali senena nimi eneko tarel pululom. Pabalapmundi, nikna whesinna pelagtangtobap, pondog magap, kwaneng ma'al yonaap, teptop nimi song kom nenenneap, yalukap tarel pululom.
GEN 43:12 Kirik solomne kwaneng tonneap babe poa pululom. Samenag ag ina siramag wamoba, tobomne babe pabimundi, samoro tatlulom. Kirik solomne anena wanaag ogto uaong sembanorina.
GEN 43:13 A'unipsae babe poa pimundi, elemag Mesir yubu sia lenneag pululom.
GEN 43:14 Allah Imap So'oap Saelbamlangeri wana wali nembaleba, a'un o'ona sembahileri, 'Simeonap Benyaminap samoro nhon pabhululom,' aro a'un saeag tatsilul. Tagha nana wela uanun kom, namabo ya'ag ka'asebel talamang ane,” seog.
GEN 43:15 Wene seogpa, Yusup eldo yabo tanekori wali-waliaap, kirik solomne kwaneng kamna tomnepneap, sindi ag ina siramag wamogpa, tobekne “Samoro tarukap,” aropneap, Benyaminap elemag nhon Mesir piek. Mesir piekti, Yusup whingag wa'iek.
GEN 43:16 Kemelamogpa, Benyamin eldo yaboap nhon pieka kembiagha, eldi arukna aeag tolamogne yoplamogti, “Nimi tane nari aeag paphilulam. Sumene ae sironge nene kwaneng nanap nhon tukap. Ane sembe pham nhon opmendi, yoro tengelamlulam,” seog.
GEN 43:17 Eldi arukna anekori ka'ebaogti, enero poa Yusupti aeag poa phiog.
GEN 43:18 Yusupti aeag poa phiogpa, sin log sene-sene yabaeknena, “Nun ane, 'Paiag nang yaang,' aro nen samen sum yabonge neneko kirik solomne ag ina siramag wamoba, tobobonge neneko sembe payahiang. Neneko sembe nun saelbahiangdi, pham keledai nuringe toro agha sindi arukna nemban uahiang,” alamek.
GEN 43:19 Ane sembe Yusupti aeag wamekti, ina serekna peramag ae yae ua uropne ponekoag,
GEN 43:20 “Naiyong, nu yubu olog wamla. Nu ane kwaneng tobukap agha ane samenag yingkiamobo.
GEN 43:21 Ane yingkina palamobori, nu ae inaag mamnebag aneko pina, ag si kwaro kemelamoboag agha kirik solomne nuri kwaneng tobobonge ni aneko nuri kwaneng ag ina siramag wamo. Ane sembe nu babe ekon, etneri nuri aghag libao ane ekondi, wene nen sap samoro kwaneng tobukapne babe, kirik solomne kamna nuri aghag wamonge babe, 'Samoro tatkukap,' aro payaap,” seek.
GEN 43:23 Wene seekpa, nimi yeplamsiogne ponekori, “Nene sembe log sembaheng kom. A'uni mema si, aniri Ili Allahri a'undi aghag libao. Wene a'undi tatneomne kwaneng sembe anekona na tomno,” seog. Seogti, sikinkae Simeon lambirogti, elkaboag tatsiog.
GEN 43:24 Wene seogti, aeag poa wa'isiogti, yan a'elerona mag tebatsiogti, pham keledai sindinge taneko babe tenaba tatsiog.
GEN 43:25 Undo unu ahiogpa, sindi babe Yusup “Wana wali nenero tarukap,” sembaekti, pobeka taneko babe “Sironge nene yaleba, tarukap,” aro togto piamek.
GEN 43:26 Togto piamekti, wamekpa, Yusup yaogpa, yabu saknukto Yusup whingag pulingkina tarek.
GEN 43:27 Tarekpa, Yusupti, “A'un welaro wamlom?” aro hailamsiogti, “A'undi a'uni sembe nanag ambarelamneomdi, 'Nuni sabal uroba wamla,' seom aneko wali wamla te? Welaro wamla?” seog.
GEN 43:28 Wene seogpa, sindina, “Nu nuni wali wamlari, andi arukna wamla,” seek. Wene seekti, yabu sanukto pulingkina kibek.
GEN 43:29 Wene aro kibekpa, kemelamsiogti, ilipsae taptopne Benyamin sin anabiag wamogha kembaogti, “'Nunipsae elabome wamla,' seomdi, ambatneomne neneko te?” seogti, lebogti, “Name, Allahri yepto piangkilul,” seog.
GEN 43:30 Wene seogti, ilipsaeag kembiagha, “Na naipsae o'ona nuba maum nhonog,” aro kembiagha, “hailmag lagto pelengena mali,” ane sembe elem-elem eldi ae lomag piogti, engkaog.
GEN 43:31 Engkaogti, hailmag luptangom agha lamba yaogti, “Kwaneng yoro piplomne pil alulom,” seog. Wanaagna engelamogtiog.
GEN 43:32 Yusup elba mo kwaneng terobag pukamogti, teog. Eldo yaboap ilipsaeapna nhonag pukamekti, teek. Mesir nimi taneko wamek nimi elba sin nhonag teek. Mesir nimi Ibrani nimiap kwaneng nikag tena sin karong senen. Ane sembe Mesir nimi yog nimi tane wameknang eneko babe mo kwaneng telamekag pukamek.
GEN 43:33 Yusup babe elba mo nhonag pukogti, teog aghana, Yusup eldo yabo taneko sin pukeknena, Yusupti arukna anekori, “Yandonge pukleba, ane iklibagne undo puk-puk yabukang,” aro pukitsiog. Sin undo pukekti, kemep taekti, el taekti, lo'om seek.
GEN 43:34 Yusup eldo yabo tanekona kwaneng Yusupti kwariag agha tatsiek. Kwaneng telamekti, eldo yabo taneko etbarero undo tatsiekti, Benyamin agha ik lambare tarekpa, teog. Sumeneko agha kwanengap magap Yusubap nhon og soro teek.
GEN 44:1 Yusuptinge ae yae ua uropne ponekoag ambarelamogti, “Kwaneng sindi poa pineba, uro lilamsimendi, sindi kirik solomne kamna tobika aneko nen samoro sindi ag ina siramag libahilulam.
GEN 44:2 Naringe mag tena solomne agha sunuroba anena sikinipsae elabongeri ag ina siramag libalulam, apna kirik solomne kwaneng toplange kamna anekoap nen samoro eldi ag ina siramag libalulam,” seog. Wene seogha sunsunum uro Yusupti arukna aneko uaog.
GEN 44:3 Kwelekaogpa, lukunap ae tibin talamog abeneko Yusup arukna tanekori “Pululom,” aro sae lipsiekpa, poahirop pham keledai taneko alibag towalengkibekti, palamek.
GEN 44:4 Mesira lambaekti, anam we uro pin komag Mesir so'oag palamekpa, Yusupti eldi ae yae ua uropne ponekoag yubu lelamogti, “Elemag sarekarepto sin palamikag pululam. Sarekarepto sinag pimen tanena, sinag leplulamnena, 'Sa'a sembe nairi walia ulamlaba, a'undi naiag yoaba ulamlom?
GEN 44:5 Sa'a sembe nairinge mag tena solomne agha sunuroba haogha tobom? Mag tena anena, nai mag tero el amik unag sembe pom-pomoro el tan ana. A'undi yoaba nubunge uaom,' sululam,” seog.
GEN 44:6 Wene seogpa, Yusupti ae yae ua uropne poneko Yusup eldo yabo inaag palamekag piogti, Yusupti ambarogne sunsunum uro lebog.
GEN 44:7 Wene aro ambatsiogpa, Yusup eldo yabo tanekori, “Sa'a sembe nuniri undo lepla? Sa'a sembe elag nuri yoaba uahabe?
GEN 44:8 Samen sum eneko babe kirik solomne nuri ag ina siramag wamonge babe samoro payabonge an el wamlam. Welaro nuri nairinge aeag ua uroba kamna maiknoro toroba welaro topsebe?” seekti,
GEN 44:9 “Nuringe aghag etneri aghag agha mag tena ane ipmen tanena, wamleba, ipmen meneko tebalul apna nai arukna taukap,” aro ambarek.
GEN 44:10 Wene aro ambarekpa, Yusup arukna anekori, “Wali leplom aghana, etneri aghag wamle tanena, el neneko agha nai arukna talul. Wene nennena hae pululom,” seog.
GEN 44:11 Wene seogpa, sindinge ag pham keledai alibag agha pelengero so'oag pibekti, ag si kwha-kwha yabiek.
GEN 44:12 Ag si kwhabaekpa, Yusupti arukna ae yae ua ulamogne ponekori sen-sen agha yandongeri aghag samenag alnibaogti, eroba elabongeri aghag. Elabonge Benyamindi aghag elamogpa, mag tena Yusupdinge neneko Benyamindi aghag wamog.
GEN 44:13 Eldo yabo taneko sikinipsae sembe o'ona ua ahiogpa, sindinge ag enekto amekne saeri taepto unuaekti, pobeka taneko pham keledai alibag towalengkibekti, samoro Mesir piek.
GEN 44:14 Yehuda ilipsaboap Yusupti aeag palamekpa, Yusup aeag wamogpa, pina elemag yabu sanukto pulingkina kibek.
GEN 44:15 Kibekpa, Yusupti lelamogti, “Sa'a agha a'undi ualom? A'unna ekon te? Na saogne pone a'undi ulamlomne ag pom-pomoro yoaba ulamlomne ipsenep,” seog.
GEN 44:16 Wene seogpa Yehudari, “Nai, nuri anag yubu lemnep kom. Sa'a agha lebukap. Welaro agha nuri, 'Malia uan kom,' senep kom. Allahri nu anmabori ulamapne ane sel. Wene nu ni ane an arukna taukap. Mag tena eldi aghag wamlange neneko aghabog kom,” seog.
GEN 44:17 Wene seogpa, Yusupti, “Kom! A'un nenne a'uniag samoro wali uro pumunba, elba naringe eldi aghag wamlange nenekoog, nari arukna talul,” seog.
GEN 44:18 Wene seogpa, Yehuda sekom agha Yusup peramag piogti, “Nani, na nen olog yubu lemnun. Na wabaneheng kom, an nimi nubunge yubu sia leropne saog uro Mesir wamlam.
GEN 44:19 Samen yabonge neneko nai andi hailamsiomdi, 'A'undi nai babe a'unipsabo babe wamang te?' seom.
GEN 44:20 Wene seomba, nurina, 'Nuri nai sabal tao, elme olog me nhon wamsilnena, sabal taoag agha toro aonge. Sin phendena sikinin ot nhon. Eldona tebaog aghana, eldi maum tattopne agha wamsil, ane sembe iliri mene sembe wanaag uro ua ulamla,' sebo.
GEN 44:21 Nai, andi 'Payamunba, kembanun,' seoma sembe payabo.
GEN 44:22 Aghana nuri nai anag ambarelangkebori, 'Menena iliri sae limnep kom. Mene agha ili sae limna tanena, waba kaong senep saog,' seboba,
GEN 44:23 andi lelamomdi, 'A'unipsae elabonge neneko agha payamun kom tanena, na whingag yalulom kom,' seom.
GEN 44:24 Wene seomba, Kanaan mog soo ag pibori, nuri nai Yakub an yeplangkelne ponekoag ambarelamobori, andi lebomne abeneko ambarobo.
GEN 44:25 Ambaroboba, nairi 'Nen kwaneng tol pululom,' aro arukahio.
GEN 44:26 Aghana nuri naiag lelamobori, 'Nun mona pukap kom. Nunipsae nhon taneogna pukap. Nunipsaeap pibe kom tanena, nimi enekori whing ibukap kom,' sebo.
GEN 44:27 Wene aro nai ambaroboba, nairina nunagna, 'Namabo, a'un el wamlom. Nari kel Raheldi me phendeog yag nembitsio.
GEN 44:28 Me samenagne ka'aseptaog, yoabari teog to. Ka'aseptaog aneko olog haiptangtop kom.
GEN 44:29 Wene babe name elabonge nene na saeag agha topmunba, uro yabinep komne uro yabile tanena, na sabalag anda nanagha tipto loba nembanumunba, tebanun,' seo,” aro ambarog.
GEN 44:30 Nen tipto ambarelamogti, “Nani, ane sembe nanagha naipsae koma naiag pine tanena, andi arukna nuri nai loba talul. Eldi hainna meneag tiptangkamla, apna el ya'ag sabal taobana, nuri sap wana mali nembabe tanena, sap tipto loba nembaukap.
GEN 44:32 Apna nari naiag salag lelamnori, 'Na saeag piplamba, nari me ane o'obanun,' seno. Nari agha, 'Me ane samoro payane kom tanena, tam ualea nanagha sa'obanun,' seno.
GEN 44:33 Ane sembe nanagha mene lunumna an arukna taneri, tane wamnun. Me anena sae lipmenba, eldo yaboap nhon pukang.
GEN 44:34 Mene koma nanagha naiag panne sunsunum kom. Na mene koma na naiag panba, naiag uro yabinep komne uro yabanne nenena, na haingdi ilina mali,” seog.
GEN 45:1 Yusupti elkaboag kembiagha wanag seneraglamogne tognoamnep kom ulamogpa, nimi el umag wamekne tanekoag, “Lambalulom,” seog. “Lambalulom,” seogpa, lambaekpa, Yusup elkaboap mo wamek. Mo wamek aghana, Yusup neneko maiknoro engelamogpa, Mesir nimiri babe Firaundi aeag wamek nimi babe engena sembe ka'ebaek.
GEN 45:3 Yusupti elkaboag ambarelamsiogti, “Nana Yusup! Naina anam wamla te?” seog. Wene seogpa, sin kaebaekti, sin log sembe yubu samoro ambarek kom.
GEN 45:4 Yubu samoro ambarek komba, Yusupti elkaboag yubu lelamogti, “Na peramag abene yahut!,” seogpa, peramag yaekpa, ambarelamsiogti, “Na a'unipsae Yusup, a'undi Mesir nimiag kamna topnelumne poneko,” seog.
GEN 45:5 Nen lelamogti, “Aghana wenena, mane agha 'Yoaba uaburi, nuri nunipsae kamna toro tatsibu' aro waptangto wanaag seneragseng kom. Nana Allahri enero poa yaneognena, nimi tebaikag aro nimi wali nembahinepne sembe na samenag yahi.
GEN 45:6 Kwaneng yo waelbaoa heng kun phende uabori, heng kun wamukapne lambare nen wamukapneagna nimiri wero tenne orog wamlul.
GEN 45:7 Allahri na samenag enero payaneogpa, a'un amik yaomnena, a'un wali wapmundi, a'undinge nimi likna tipto pilul aro payaneogpa, yeplamsinun.
GEN 45:8 Ane sembe a'undi ulamnelumba, ane yahi kom, Allahri sembaogneag agha. Eldi na epneori, 'Firaun yubu amoropne wamleri, Firaundi awe yan sae awe toro saleropnang sikini, Mesir mog so'o ene sikini wamlul,' sembaogti, Allahri na paliag sekitneog.
GEN 45:9 Ane sembe elemag samoro nani Yakubag pumundi, 'Anme Yusupti undo lepla,' aro ambatlulomnena, 'Allahri anme Yusup sembe nimi nubunge mog so'o saelba unne nembaongena, mog so'o Mesir ni semberina, “Elemag yalulom,” seo,' aro ambatlulom.
GEN 45:10 Na peramag Gosyen yingkina wamlul. '”Naiap ilisag yaboap pham domba, kambing, sapi apna saeagha wamlea niap,” seo,' aro ambatlulom.
GEN 45:11 Nai Gosyen yingkina wamle tanena nari piamnun. Kwaneng yo nen heng kun lambare wamukap, ane sembe naiap kelabo meap pham eldingeap tenaba yo uro wamukang kom.
GEN 45:12 Wene a'undi kembanelom ane. An Benyamin andi babe. Na sik tapto na Yusup.
GEN 45:13 Naiag ambatlulom, na Mesir sembe saelbamna. Elag babe ambatlulom, a'un kembalomdi iplomne ni ambatmundi, elemag-elemag payalulom,” aro ambatsiog.
GEN 45:14 Wene seogti, Benyamin somoro salero amogti engelamog. Benyamindi babe eldo salero amogti engkaog.
GEN 45:15 Yusup engelamogtiog eldo yabo nenne babe somoro kiplamsiogti, tog-tog aro kipsiog. Kipsiogpa yubu lero eldo yabo taneko aro wamek.
GEN 45:16 Yubu sia leropneri aeag agha ka'elamekpa, Yusup eldo yabo yang ana ka'ebaekti, yubu sia leropne babe el umag wamekne babe awi yeng sembaek.
GEN 45:17 Yubu sia leropne Firaundi Yusubag yubu lelamogti, “Ando yaboag ambatsululam: 'A'undi pham keledai alibag kwaneng towalengkamundi, poa Kanaan pululom,' sululam.
GEN 45:18 Andi naiap andi nairi kelabo meap kerero ane yananne sembena, nari so'o walinge mog so'o eneag wamlange tatsinun. Tatsineba so'o eneag agha wero tero wamukang.
GEN 45:19 Palamikti poa pukanga ambatsululamnena: Sikiniap sindi kelabo me ologneap yanana sembe phamdi kiliro poroba kereta etbarero poa pukang.
GEN 45:20 Sikininge aba sembe wana sesog uro seneragukang kom, 'Mesir so'oag ane babe walia ni so'o eneag wamla,' aro ambatsululam,” seog.
GEN 45:21 Yubu sia leropneri Yusup ambarogpa, Yusupti pham keledairi kiliro poa phiroba kereta kerektopne etbare yubu sia leropneri lebogha sunsunum uro tatsiogti, kwaneng inaag tenne babe Yakub elmabo taneko tatsiog.
GEN 45:22 Ag pol tona tarelamsiogti, eldo yabo taneko nongagneap yanagneap nhon-nhon tarelamsiogti, Benyamin agha kal ma'al kirik wana solomne teng ko'olombare tarogti, ag enekel tonne nongagne lambare yanagne lambare tarog.
GEN 45:23 Yusupti ili Yakub sembe palilamogti, pham keledai saobareag wali-walia Mesir so'oag wamogha towalengkaog. Pham keledai sa'obare alibagna, kwaneng roti wana mauroba erenneap, kwaneng roti aukag taropneap, apna kwaneng “Mesir yalamleri nani tulul,” aropneap pibog.
GEN 45:24 Eldo yabo tatsiogpa, palamekpa, Yusupti, “Inaag waptaheng kom,” aro wene seog.
GEN 45:25 Palamekti Mesir laplobiagha Kanaan so'oag sikini wamoghag piek.
GEN 45:26 Piekti sikini ambarelamekti, “Nai, Yusup Mesir so'oag kamag wamlari, eldi mog so'o Mesir saelbamla” seeka ka'ebaogti, “Orolena lelamang,” aro sik sembaog kom.
GEN 45:27 Aghana Yusupti ni lebogne ambarekpa, Yusupti, “Kereta poa pukang,” aro pibogne ibogti, Yakubti sik sembaogti, yeng sembaog.
GEN 45:28 Ibogti sikini ponekori lelamogti, “Yusup name kamag wamnel. Nene sembe wamna. Pineri imneriog tebanun,” alamog.
GEN 46:1 Wameka Yakub nenekori eldinge nia togto tobogti, “Mesir mog so'o punun,” aro as Bersyeba piogti, ili Ishakti Allah omeklamogne sembe pham obogti, mhong towalengkaog.
GEN 46:2 Mhong towalengkaogpa, imbaogpa, Yakubti haing uamna kwelekamna senenag agha Allahri yubu lelamogti, “Yakub, Yakub,” seogpa, Yakubti, “Nani na ane wamna,” seog.
GEN 46:3 Wene seogpa, Allahri, “Na Allah, ani Ishakti Omeklamneogne Na wamna. Mesir panne sembe log sembaheng kom! Mesir mog so'o anea anisag yabo maikno nembahineba, as nubu tangto wamukang.
GEN 46:4 Na anap Mesir nhon pinemeri, amik anisag yabo samoro payaghenun. An loba tamenba, anme Yusupti o'obaghelul,” aro ambarog.
GEN 46:5 Ambarogpa, Yakub elmabo tanekori sikiniap, sindi kelabo meap, pham kudari kiliro poa phiroba alibag Mesir nimi sikini yubu sia leropneri arukahiogpa, sin tol ahinep yaekne tanekoag waelbaek.
GEN 46:6 Sikininge phamap, sikininge aba Kanaan wamekpa, saeag taogneap, taneko poro agha mog so'o Mesir palamek. Palamekti Yakub sikinisag yabo nengabo me kelabo me toro agha Mesir ni palamek.
GEN 46:8 Eldamne Yakubap, elmaboap, sikinmaboap, kelaboap piekne sina tane: Ruben, Yakubti me yandonge.
GEN 46:9 Ruben elmabona: Henokh, Palu, Hezron, apna Karmiap.
GEN 46:10 Simeon, Yakubti me nabime. Simeondi mabona: Yemuel, Yamin, Ohad, Yakhin, Zohar, apna Kanaan keldi me Syaulap.
GEN 46:11 Lewi, Yakubti me Simeon iklibagne. Lewiri mabona: Gerson, Kehat apna Merariap.
GEN 46:12 Yehuda, Yakubti me Lewi iklibagne. Yehudari mabona: Syela,Peres, apna Zerahap. Yehudari mabo Kanaan so'oag agha tebaeknena: Er apna Onanap. Yehuda elme Peresti mabo nen phende mabona: Hesron apna Hamulap.
GEN 46:13 Isakhar, Yakubti me Yehuda iklibagne. Isakhar elmabona: Tola, Pua, Yasyub,apna Simronap.
GEN 46:14 Zebulon, Yakubti me Isakhar iklibagne. Zebulon elmabona: Sered, Elon, apna Yahleelap.
GEN 46:15 Ni ane Lea elmaboap elau yaboap. Aram mog so'oag wamekti, Yakub sembe mangkahiog. Ni nimi si palilamapne anena Yakub elmaboap ilisagyaboap nina teng nhon eptopne no'op bare (33). Yakubti kelmabona Dina wene babe palilamap.
GEN 46:16 Gad, Yakubap Silpaapti me amikne mangkahirekne. Gad elmabona: Sipyon, Hagi, Syuni, Esbon, Eri, Arodi, apna Areliap.
GEN 46:17 Aser, Yakubti me Gad iklibagne. Aser elmabona: Yimna, Yiswa, Yiswi, Beria, apna Serah sikinipsa'elap. Beriari mangkhaiognena: Heber, apna Malkielap.
GEN 46:18 Nimi ao tarabare anena Yakubap Silpaapti mangkahirekne. Silpa kelenena, Lea ili Labandi, “Lea arukna wamlul,” aro tarog keldi mangkahiog.
GEN 46:19 Raheldi mabona me phende Yusubapna Benyaminap.
GEN 46:20 Mesira Yusubap elkel Asnatapti me phende mangkahireknena: Manasyeapna Efraimap. Asnat ilina, Potifera memne poneko as On wamog.
GEN 46:21 Benyamin, Yakub elme elabonge. Benyamin elmabona: Bela, Bekher, Asbel, Gera, Na'aman, Ehi, Ros, Mupim, Hupin apna Aredap.
GEN 46:22 Anena Raheldi Yakub sembe mangkahiognena. Sin nina mekpare.
GEN 46:23 Yakubti kel taogne Bilha anekori elme amikne Dan mangkaog. Dan elmena Husim.
GEN 46:24 Naftali, Yakub elme Dan iklibagne. Naftali elmabona: Yahseel, Guni, Yeser, apna Syilemap.
GEN 46:25 Anena Bilhari Yakub sembe mangkahiogne. Bilha kel enena Labandi, “Rahel arukna wamlul,” aro tarog keldi mangkahiog. Sin ni anena saekbare.
GEN 46:26 Yakub elyamal yabo sikindi me wamla aghana Yakub elyamal sembe tane mome torop kom. Sin ni Yakub elmaboap Mesir so'oag pieknena teng phende eptopne aobare (66) piek.
GEN 46:27 Yusup elmabo Mesira mangkahiogne me phende abenekoap tanena sin teng phendeap eptopne ao tarabare (70) taog.
GEN 46:28 Mesir palamekti, Yakub nenekori elme Yehuda ambarelamogti, “An samenag pimendi, 'As Gosyen haiptukap,' aro Yusup ambatlulam,” seog. Wene aro poghogti, Yakub neneko as Gosyen pina wamogpa,
GEN 46:29 Yusup neneko “Nani whingag punun,” aro pham kudari kiliro pabiroba alibag waelbaogti, ili whingag yaogti, somoro saelbamogti, kiplamogti, engkaog.
GEN 46:30 Engelamogpa, Yakubti elme Yusubag yubu lelamogti, “Nari an ipkekendi, 'Name kamag wamla,' aro wana aingnibanelba, wali loba tanun,” seog.
GEN 46:31 Wene seogpa, Yusupti elkabonge tanekoag yubu lelamogti, “Na nari nai yubu sia leropneag pineri, 'Nari naiap nangkaboap Kanaan so'oag agha yaong,' sunun.
GEN 46:32 'Na nangkabo taneko pham dombaap, sapiap, yae uro mo'olamsiang-nang sikininge phamap, sikiningeaba ni poro agha yaong,' sunun.
GEN 46:33 Na nani nimi nubunge yubu sia leropne ponekori yopsileri, a'undi awe saelba weropne sembe haibahilul.
GEN 46:34 A'undi ambarelapmundi, 'Nuniyabori babe pham mo'olamek saog uro nuri babe nun ologhag agha pham mo'on nang wamap,' aro ambatlulom,” seogti, “Wene aro ambatmunba, 'A'un Gosyen so'oag wamlulom,' sulul,” seog. Wene aro ambatsiognena, Mesir nimiri pham pia urop nimiap, sin nikag ua unna sin karong senerop, ane sembe Yusup eldi elkaboag wene aro ambatsiog.
GEN 47:1 Wene seogti, eldo yabo lambare enero poa Mesir nimi sikini Firaun saramag poa phiogti, ambarelamsiogti, “Nari naiap, naro yabongeap, sindi pham kambing, domba, sapiap sikininge saeag agha wamlaap, Kanaana yaangdi, wenena Gosyen so'oag wamang,” aro ambatsiog. Wene aro ambatsiogti, elkabo lambare nhon piekne abeneko sindi si babe ambatsiog.
GEN 47:3 Wene aro ambatsiogpa, nimi nubunge Firaun ponekori, “A'undinge awe huropne?” seog. Wene seogpa sindina, “Nuna pham mo'oro yae ua urop nimi, samenag isang wamog saog uro,” seekti, “Nu yaapnena, Kanaan kwaneng yo waelbaoba, tena nuri pham sembe orog taoba, 'Mog so'o eneag wamukap,' aro yaap. Ane sembe, Nai, 'Mog so'o Gosyen wamukap,' aro mololangkeap,” seek.
GEN 47:5 Wene seekpa, nimi nubunge Firaundi Yusubag yubu lelamogti, “Wene aniap ankaboap ane wamang.
GEN 47:6 Mog so'o Mesir ane anenge mog so'o as sao tal. Sin mog so'o waliag Gosyen wamukang. Sin nusamag pham pia una etpare sol wali nimi wamikti, naringe pham babe wene sindi yae wamsukang,” aro ambarog.
GEN 47:7 Yusupti ili babe enero nimi nubunge Firaun whingag pabiog. Pabiogpa, Yakubti nimi nubunge poneko kibogpa,
GEN 47:8 nimi nubunge ponekori Yusup ili Yakub hailamogti, “An mangkageeka heng kun etbare wamlam?” aro haibaog.
GEN 47:9 Wene aro haibaogpa, Yakubti, “Nani, na nimi ina tongonne tahiri, sekel ananne saog uro ikin uro wamsiri, heng kun tom ta'om agha epto no'op tarabare (130) wamna. Samen Nanisang yabo ina tongoro tero heng kun tenghan-tenghanne palamog saog uro kom,” seog.
GEN 47:10 Wene seogti, Yakubti nimi nubunge yubu sia leropne poneko kibogti, lambaog.
GEN 47:11 Lambaogpa, Firaundina, “Yusup iliap elkaboap ane wamlulom,” aro Mesir so'oag so'o sukuptobag “Ngai talulom,” aro nimi nubunge yubu sia leropneri ambatsioghag as Ramses peramag wamek.
GEN 47:12 Ramses peramag wamekpa, Yusupti iliap, elkaboap, sikin maboap sembe kwaneng yeplamsiog.
GEN 47:13 Kwaneng yo Mesirap Kanaanap wamogne neneko sop-sop kwaneng yo aghabog palamogpa, kwaneng orog taogpa, nimi mog so'o anekoag wamek nimi ni pesa talamek.
GEN 47:14 Pesa talamekpa, Yusupti pongoroba kwaneng roti sumbaneba kamna kapto tolamek kal ma'al taneko nimi yubu sia leropneri aeag sop-sop poa pail palamogpa, nimi saeag kal ma'al orog taog.
GEN 47:15 Mesir wamek nimiri babe, Kanaan wamek nimiri babe, sindinge kal ma'al kwaneng kamna kapto tobiagha toro tena orog tahiogpa, Yusubag yingkina lelamekti, “Nununge kal ma'al orog tahio, nu kwaneng tatsululam. Nu tebabeagti lipsiseng kom,” alamek.
GEN 47:16 Wene alamekpa, Yusupti lelamogti, “A'ununge kal ma'al orog tahio tanena, pham tarel anumunba, nari kwaneng tatsinun,” alamog.
GEN 47:17 Wene alamogpa, sindi pham tarel alamekpa, kwaneng lunuro tarelamsiog. Sindi, “Kwaneng tatsilul,” aro kapto payalamek phamna kuda, domba, kambing, sapi, apna keledaiap. Heng kun enena phamag agha kwaneng kamna kapto tarelamsiog.
GEN 47:18 Nen nhon heng kunag yingkina lelameknena, “Nu lag phoro lelamap, kal ma'al nuringe orog tahio, pham nuringe andi toro aom. Nu wene an tatkenepne sa'a-sa'a saeag wamla kom. Wenena nu nongap, nununge awe so'oap aghabog.
GEN 47:19 Nu tebabeagti, lipsiseng kom! Nu nimi nong babe, nununge awe so'o babe kwaneng agha kamna tatsululam. Nu nimi nongap, nununge awe so'oap, nimi nubunge yubu sia leropneringe talul. Ot nununge awe so'o si mag komdi, iklerebaleag, yina aweag memneba tatsimenba, melamukap,” alamek.
GEN 47:20 Wene alamekpa, Mesir nimiringe awe so'o wamogne Yusupti yubu sia leropne Firaun sembe tobog. Kwaneng yo aneko maiknonge waelbaogpa, Mesir wamek nimiringe sindinge awe so'o yubu sia leropneri kwanengag kamna ni tobog.
GEN 47:21 Mesir mog so'o ni wamek nimi Yusupti arukna nembahiog.
GEN 47:22 Mesir mem nangdinge ogna Yusupti kamna tomna kom. Sin nang enena yubu sia leropneri nangena kamna tatto eldi saelbamsiog.
GEN 47:23 Yusupti Mesir nimiri so'o Firaun sembe kamna tobogti, yubu lelamogti, “Sumene nari a'un nongap, a'undi awe so'oap kamna topsinba, Firaun yubu sia leropneringe talom. Anena yina aweag memneba mepmunba, whi tale tanena, topmundi, palu lambare pogto nembatmundi, a'un kelabo meap tena sembe, yina sembe babe palu tombare tol tolapmundi, Firaun sembe pogtopne nhon tarelamlulom,” seog.
GEN 47:25 Wene seogpa, Mesir nimi tanekori lelamekti, “Andi nu tebahabe nimi aghana, toro pipsilamba, nurina 'Nani,' alamap. Nu wana waliag agha yubu sia leropne arukna wamukap,” seek.
GEN 47:26 Wene seekpa, Yusupti “Mem nangdi so'o Firaun saeag talul kom, aghana yog nimiri wero mero telamnepne, pogtopne lambare agha nhon yubu sia leropne sembe tarel alamlulom,” seogti, karepto pibogne neneko sunsunum uro yubu sia karepto pibogne, wene babe anam wamlaba, Mesir nimiri unulamang.
GEN 47:27 Israel nimi taneko Mesir so'oag wamekti, Gosyen aneko ngai taekti, wamekti, tup talamekpa, nimi likna maikno mangaro palamog.
GEN 47:28 Yakub Mesir aneko yingkina wamekpa, heng kun ko'olom tarabare piog. Yakub heng kun samenag wamogneap, ma'aro tanena, heng kun teng lambare eptopne aobare (147) wamog.
GEN 47:29 Yakub el, “Wene loba tanep peram wamna,” sembaogti, elme Yusup yobogti, ambarelamogti, “Name, andi na o'ona sembamnelam tanena, na yan kwagha mombolag sae tobongkiapmendi, sik uro salag leplulamnena, andi, 'Mesir so'oag ane sikkenun kom,' aro yubu salag leplulam.
GEN 47:30 Nanisag yaboag yame naringe pineleba, na wanaag 'So'o siknoho,' sembamnangena, nanisang yabo so'o siksiroba peramag 'So'o siknoho,' sembamna,” seog. Wene seogpa, Yusupti lelamogti, “Nani, wene selam tanena, anba andi, 'Leplamneag,' uanun,” seog.
GEN 47:31 Wene seogpa, Yakubti lelamogti, “Name, 'Sik uro uanun,' aro nanag leplulam,” seogpa, Yusupti “Sik uro uanun,” aro ili ambarogpa, Yakub ae usah usoghag sip yan sanukto pulpina Allah omekaog.
GEN 48:1 Olog wameka nimiri Yusubag, “Ani nikna niklamla,” aro ambarekpa, elmabo phende Manaseap Efraimap Yakub niklamoghag piek.
GEN 48:2 “Yusup yal,” seeka Yakub, el si nhon Israel ka'ebaogti, mamogha puknep kom agha mikip pukom agha pukogti,
GEN 48:3 Yusubag ambarelamogti, “Allah Imap So'oap Saelbamlange neneko na Kanaan so'oag as Lus wamsiba, whingag lag taogti, 'Mikip nembahinun,' aro ambarelamneogti,
GEN 48:4 'Nari an yepkeneri, anisag yabo maikno nembahineba, as nubu tangto wamukang. Nari mog so'o ene andi mangarobag tatsineba, sin ya'ag ngai wamukang,' seogne ka'ebahi,” seog.
GEN 48:5 Seogti, nen nhon babe lelamogti, “Name, anmabo Efraimap Manaseap na anam yan komag mog so'o Mesir anea mangap tarong. 'Mabo abene nari mabo tarong,' sembamna. 'Rubenap Simeonap nari mabo wamdang saog uro nanisag Manaseap Efraimap babe wamtukang,' senelamna.
GEN 48:6 Nen amik wapmendi, me amikne mangaro amenne tanena anenge, aghana me amikne taneag, 'Nari mabo,' sembanun kom. Amik lag taik mabo andinge tanena, Efraimap Manaseap sembe 'Nuni yabo,' alamikti, sin phende agha sisa wamikti, sindi saeag agha mog so'o tobukang.
GEN 48:7 Nari uanne nene, anin Rahel sembe. Inaag samoro Aram mog so'oa yalamsiag agha aninka Kanaan so'oag Efrata peramag agha loba taog. Loba taogpa, ina Efrata tara sip so'o siklopsi,” aro ambarog. Wenena Efrata ambarogha ane sembe, Betlehem alamangne nene agha el ua ulamsil.
GEN 48:8 Wene aro ambarogti, Yusup iliri elmabo abeneko kemelamsiogti, “Me abene etne-etne?” seog.
GEN 48:9 “Etne-etne,” seogpa, Yusupti, “Abene nari mabo. Me abene Mesir anea Allahri tatneonge,” seog. Wene seogpa, Israeldi, “Meabene na peramag yarukang. Nari sinag 'Nuni Allahri wali-walia tarelamsilul,' aro yubu kipto pipsinun,” seog.
GEN 48:10 “Sinag yubu kipto pipsinun,” seogpa, Israel sabal taogti, haing toa saogne lililamogpa, Yusupti elmabo sae salero ili Israel peramag nembahiogpa, somoro kipsiogti, togtog aro kipsiog.
GEN 48:11 Undo unu ahiogti, Israeldi Yusubag yubu lelamogti, “Name, na anap 'Haiptangto whing uram yo'o olog ipkinun kom,' senelamna agha, wene Allahri sembalne agha andi mabo babe ipsin,” seog.
GEN 48:12 Wene seogpa, Yusupti eldi mabo sikini ili Israeldi ilag agha topsiogti, Yusup ili whingag yabu sanukto pulingkina kibog.
GEN 48:13 Kibogti, me abeneko tobom agha, Yusupti sirik sae sip elnabime Efraim salelamogti, waneng sae sip elyandome Manase salelamogti, ili whingag nembahiog. Yusupti me nabinge Efraim ilisagti waneng sae sip nembaogti, eldo Manase ilisagti sirik sae sip nembaog. Aghana sikin isag Israeldi sae wanwan obi agha Efraim nabinge aghana sirik sae Efraimdi usoghag pibogti, waneng sae Manase yandongeri usoghag pibog.
GEN 48:15 Sin usoghag sae pipsiogti, Yusup pat palilamogti, “Nani Allah nanisangdi Abrahamap Ishakap omeklamdekne, me abene yepsilulam. Nani Allah samen wamsiag agha wene wamnaag pia yeplamnelamne me abene yepsululam.
GEN 48:16 Allah arukna malaikat na eraruk uro uropbaag yemneropne ponekori, me abene yepsilulam. Na siap nanisang si, Abrahamap Ishakap me abene pere wamlebog likna palamlul. Sindi me mangaroba likna me sindinge pileba, mog so'oag maikno talul,” seog.
GEN 48:17 Yusupti kemelamogpa, ili Israeldi sae Efraimdi usoghag piamogpa, kembaogti, “Undo mali,” aro iliri sae Efraimdi usoghag tobogti, “Manaseri usoghag pimnun,” aro ulamog.
GEN 48:18 Yusupti iliag yubu lelamogti, “Undo kom, nai. Me yandongena ane. Andi sirik saena me yandongeri usoghag piplulam,” seog.
GEN 48:19 Aghana iliri, “Kom,” aro wene seogti, yubu lelamogti, “Na el wamna, na name, na el wamna. Manase el mikip wamlul. Eldi mangaroba babe as mog so'o nubu tangto wamlul, el nimi nubunge babe wamlul. Aghana ilipsae agha mikip sirik wamleba, eldi mangaroba mog so'o as babe nubungeog wamlul,” seog.
GEN 48:20 Israeldi elmabori maboag sumeneko sum kipna walinge pipsiogti, lelamogti, “Na Israel wamna. Nanisag yabori nimiag kipna walinge palilamsiikti, a'undi si lelamsukang. Sindi a'undi si lelamikti, lelamukangnena, 'A'un Allahri wali nembahilulnena, Efraimap Manaseap saog uro,'” aro kipna walinge palilamsiogti, Efraim samenag nembaogti, eldo Manase amik nembaog.
GEN 48:21 Undo unu aogti, Israeldi elme Yusubag yubu lelamogti, “Wene iplam, na si tarapnange peram tal, aghana Allahri a'un yeplamsileba, samoro a'ununge mog so'oag samoro pululom.
GEN 48:22 Anap ankaboap a'unag tatsinunneag agha, nen nhon tatkenun. Samenag Amori nimi mal talamsiri, sikin mog so'o yim mog so'o nari saeag taonge aneko, an saeag tarelangken,” aro ambarog.
GEN 49:1 Wamekti Yakub, si nhon Israel nenekori elmabo ni yopsiogti, yubu ambarelamsiogti, “Namabo, amik a'unag talamlulne sembe ambatsinundi, winilahut!
GEN 49:2 Na Yakub na a'uni Israel yubu ka'eamlulom!
GEN 49:3 Ruben name, an me yandonge, na ani kabuni wamsiri, pipkehinge eneng samenagne an wamlam. An nong mikip wamlamdi, nimi maiknori maiplangkeong.
GEN 49:4 Mag nubunge mikipti ni pabinep saog uro wamlaba, andi babe naringe mali nembaom. An nari kel nembanongeap mabomdi, nari ae usah son nembaom. An samen paliag pat pipkehene, aghana wene, 'Ankaboap nika-nika uro wamlulom,' alamna.
GEN 49:5 A'un eldo ilipsae Simeonap Lewiap, a'undinge yin yonge abaltolneog piro amtom.
GEN 49:6 Na sin yubu saekag palilamikag palamnun kom, sin winil talamikag palamnun kom. Sin yo ulamsila sembe nimi olamsirangdi, pham sapi yan poltheng karep lolamsirang.
GEN 49:7 Sindi yoa ulamdangne nene sembe karong senelamna. Yoa ulamdangne sikin yo sirik wamdang. Yoaba ulamdangne nene kaupsile, yareag senelamsirang komba, nari na namaboag agha sin a'ebahineri, sindi wamtukangne nimi sekelanan nang saog uro Israel nimi anabiag wamtukang.
GEN 49:8 Yehuda, an ankabori kibiang towalenglangkiikti, yabu sanukto pulangkukang. Anna isa nang urongag lopnagha salelamsululam.
GEN 49:9 Yehuda kam singa me saog uro wamlulam. Tenaba opleri, teleri, mon taleba, nen kwanerobag yingkina ibog sengkelaglamleri, kwanelamlul. Unulamleba, palisong nimi nhondi babe logti, kaombalul kom.
GEN 49:10 Yehuda andi nimi nubu nangdi salerop kame tunguna saelbapmenba, andi mangaroba amik yalamlengeriba, ya'ag saelbamukang. Andi mangaroba pere agha nimi nubunge nhon yaleba, nimi mog so'o ni wamik nimi ni el umag wamikti, eldi yubu ka'elamukang.
GEN 49:11 Eldi anggur alonga uro mepleba, mauro yina tinilamleba Pham keledai me eldinge anggur yo'o walingeag kerekamlul. Ag enektopne anggur maghag a'alelamlul. Anggur lolteroba maghag agha eldi ag enektopne uwong talul ana eneng saog uro.
GEN 49:12 Haing eneng seret alamlulne sembena, anggur lolteroba mag telamle saog uro. Elag kembiag agha eldi sina kororop wamlul ana, maum kororop saog uro wamlul.
GEN 49:13 Zebulonna, mag longorop mag peramag wamleba, kabong ae soropne mag alip toman pol keaglamik nimiri, “Zebulondi mog so'oag pat pipsilul,” aro maikno yalamukang. Eldi mog so'o wilnirobagna Sidon simbik wamlul.
GEN 49:14 Isakhar sunumna, pham keledai yo'o mikipne saog wamleba, ikinaba porobari lingniamukang.
GEN 49:15 Eldi kemelamleba, 'So'o aneko wali wamlul. Mog so'o aneko sai wamleba, so'o aneko na tanun' aro, nimiri aruklamikpa, ikinaba maghan og uro polamlul.
GEN 49:16 Dan, andi mabo Israelnang anabiag wamikti, sisa nhon mo wamikpa andi tam ikinne sinag wamleba, wali uro kareplamlulam.
GEN 49:17 Name Dan phae inaag ma uropba palisong urop saog uro wamle. Phaeri pham kuda yanag saplamnaba, nimi kuda alibag walelem agha palamnange eba tinirop saog uro. Phae ane olog aghana yo wamla saog uro wamlulam.
GEN 49:18 Nani Allah, 'Andi taulbanululam' aro nang-nangaro wamna.
GEN 49:19 Gad, nimiri 'Anenge aba topkukap,' aro ulamikag agha, andi babe 'Tangoro sarekerepto yan pubuag saelbahinun,' aro ulamlulam.
GEN 49:20 Aser, andinge tenaba maikno wamleba, andi nimi nubunang sembe meneklamlulam.
GEN 49:21 Naftali, an pai pham rusa kel pham agha kobea loptangka pirop saog uro wapmendi, me walingeog mangalamsululam.
GEN 49:22 Yusup an wamlamne pai pham keledai me mikipne mag luag wamlange saog uro wamlamdi, yimag merero walerop pham keledai saog wamlam.
GEN 49:23 Nimiri isa nembangkeangdi, 'Yin maldi opkukap,' aro yinap malapti sarekereplangkeang.
GEN 49:24 Aghana an Yusup wamlamne, Allah pham yae ua uropne saog uro wamla. Ani Israeldi Kirik Sildiri lilbangkelul. Allah Mikipne Yakubti omeklamlangeri yeplangkeleba Yin mal andinge weapmendi, andinge sae lin kong mikip wamlulam.
GEN 49:25 Ani Israeldi Nai Allahri yeplangkelul. Allah Im So'o Saelbamlangeri mikip nenelangkelul. Mag imag agha kulukul alamleri, mag so'o lomag agha walel alamleri, mikip nembahileba me mangaro maum tinilamsukang.
GEN 49:26 Main samenag sekogne ane we wamla. yimag agha wali-walia maikno tomnepne wamla aghana, aniringe saeag agha nia mangkia Yusup saeag wali uro phelekto palilamnaba, elkabo nusamag agha sikini saog uro wamlul.
GEN 49:27 Benyamin an kam yonge serigala saog uro wapmendi, yo'obi inipna tenaba ol palapmendi, an telapmendi, ankabo poglamsululam,” seog.
GEN 49:28 Ni ambatsiogne ni ane sin aobare nangdi mangaroba likto pileba, sinag uro yabinepne ambarelamsiogti, kipsiog.
GEN 49:29 Yakubti ni yubu kopkop tagto elmaboag ambarelamsiogti, “Usa nuni yabo piek saog uro na babe punun. Sin piekpa, pil phiekag kirik arame Makhpela heng walelingkirobag sip Mamre Kanaan so'oag sikil punululom. So'o anena Abrahamdi kirik arameap so'o kanero wamla aneap Hetne Efron saeag agha tobog.
GEN 49:31 Anea Abraham eldamne babe, elkel Sara babe, elme Ishak babe, Ishakti kel Ribka babe, so'o siksiek. Anea babe a'unin Lea so'o siksi.
GEN 49:32 So'o wamla aneap, kirik arame wamla aneap, Het elmabori saeag agha kamna toro tobog. Kamna toboghag ane pil punululom,” aro ambatsiog.
GEN 49:33 Wene aro yubu kopkop tagto ambatsiogti, ae koloag yan togto winiptangom agha hain orog taogpa, ilisag yaboag yame samen piogpa, loba taog.
GEN 50:1 Tebaogpa, Yusup neneko ili whingag somoro saelbamogti, tog-tog aro kipto engelamog.
GEN 50:2 Engkaogti, “Nani olog piamnea,” aro nimi teptopne mektop nimiag “Meklulom,” aro el nimiag ambatsiog.
GEN 50:3 Nimi mekna meklameka anena ik teng nhonap epto naulbare sum agha mekek. Mesir nimi Yusup ili tebaogha sembe engel wa'alamek ana wal phende eptopne sa'obare sum agha engero libek.
GEN 50:4 Nimi amang piro uaekti, Yusupti yubu sia leropne eldi yan sae wamekne ambarelamsiogti, “Nangkabo, a'undi na sembe wali senelamnemundi, nari yubu lemununne nene nuni yubu sia leropneag ambatlulom.
GEN 50:5 Nari nai loba tanep peramag yubu lelamori, 'Nanag yubu sikne agha salag leplulam,' seo. 'Na siknebagna, so'o Kanaan walilopsiag siknululam,' seo. Wene seoba, 'Anba andi, 'Leplamneag,' Kanaan sikil pikenun,' seno. Ane sembe, ambatmunba, na kho olog tatnelul. Sikne tanena nen samol anun,” seog.
GEN 50:6 Wene seogpa, yubu sia leropne Firaundi lelamogti, “Wene selam tanena, anba andi salag lebom saog uro so'o sikil pululam,” seog.
GEN 50:7 Yusup ili “So'o sikil punun,” aro palamogpa, yubu sia leropneri aeag awe torop nangap, yubu sia leropneri yan sae yubu eptop nangap, Mesir so'oag nimi nubunang wamek nangap, Yusubap nhon piek.
GEN 50:8 Pieknena Yusupti ae lom nimiap, ili Yakubti ae lom nimiap, elkaboap piek. Piekpa, Gosyen so'oag wameknena me ologneapna phamap agha wamek.
GEN 50:9 Pham kudari alibagneap, kiliro poa ahiroba alibagneapti sin nimi tiriklameka mog so'o sanuklamog.
GEN 50:10 Palameka Haatad nimiri roti wana weptobag Mag Yordan kauro tara sip piekti, engelamek. Aneko maiknoro engero wamekpa, Yusup ili mali taogne sembe ik saekpare amang ulamog.
GEN 50:11 Kanaan so'oag aneko wamek nimiri Haatad nimiri roti wana weptobag Yakub amang piro ulamekne ipsiekti, lelamekti, “Nimi engenari agha mane agha engelamang,” aro wene alameka sembe Haatad aneko Abel-Misraim engkaek.
GEN 50:12 Sikini Yakubti ambatsiogha sunsunum uro uaekti, Yakub Kanaan poa piekti, Makhpela kirik arameag samenag Abrahamdi Efron Hetneri so'oag toboghag heng walelingkirobag sip Mamre peramag sikek.
GEN 50:14 Sikini so'o sikekti, Yusubap, elkaboap, nimi yogne “So'o sikukap,” aro piek nimiap, samoro Mesir yaek.
GEN 50:15 Yakub tebaogpa, Yusup eldo yabo tanekori yubu lelamekti, “Nuri Yusubag malia uabunge sembe tangoro obsilul te?” alamek.
GEN 50:16 Wene seekti, nimi nhon ambarelamekti, “Yusubag pimendi, ambatlulamne ane, 'Nuni loba taneba peramag ambarelamsiori, “A'unipsae Yusubag ambatlulomne, 'Ando yabori tam malia uakeekne wailag nembalulam,' aro molbanun,” aro ambatsiog. Ane sembe Allah nuniri omeklamogne arukna wamapti, nuri elag yoaba uabunge sembe wailag nembahilulba, mololamap,' aro wene seangdi, 'Ambarel pululam,' seang,” aro ambarek. Ambarekpa, Yusubag ambarel piogpa, ka'ebaogti abeneko Yusup engelamog.
GEN 50:18 Wameka Yusup eldo yabo tanekori “Nunipsae wamlaag pukap,” aro piekti, Yusup whingag yabu sanukto pulpina, “Nu an arukna wamap,” aro ambarek.
GEN 50:19 Wene aro ambarekpa, Yusupti ambarelamsiogti, “Na Allah lunumna wamna komdi, na sembe log uro wamseng kom!
GEN 50:20 A'undi na 'Obukap,' sembalum aghana, Allahri, 'Sindi uaikne neneag agha eldi nimi maikno yepsilul,' sembaogti, sembaogha sunsunum uro wene babe uro yabio,” aro ambatsiog. Wene aro eldo yabo taneko wana aingnibahiogti, nen ambarelamsiogti,
GEN 50:21 “Ane sembe log uro wamseng kom. A'un a'unmaboap nari piamsinun,” aro ambatsiog.
GEN 50:22 Yusup elkaboap Mesir wamek paghabog Yusup mangkaeka heng kun taibuka taubuka ulamogha teng tombare eptopne phende (110) taog.
GEN 50:23 Yusup neneko sabal wamogti, elme Efraim ilisag yabo mangkaeka wamogti, ipsiog. Yusup elme Manaseri me nhon mangkaogti, me aneko si Makhir engkaog. Makhir elmabo anena Yusup elmabo eldamneringe saog taek.
GEN 50:24 Yusup el wene “Tebanep peram wamna,” sembaogti, elkabo ambarelamsiogti, “Na tebaneba, a'un Allahri piamsile pahabog as eneag agha poa lambahileri, 'Abraham, Ishak, Yakubag tatsinun,' aro salag pibog so'o enekoag poa pil philul,” seog.
GEN 50:25 Seogti, “Enero poa pil phile sum na yo'o toa punululomba, yubu otsik uro leplulom,” aro ambatsiog.
GEN 50:26 Ambatsiogti, Yusup mangkaeka heng kun taibuka taubuka ulamogha teng tombare eptopne phende (110) wamogpa, tebaog. Yusup tebaogpa, “So'o sikukap kom,” aro nimi teptopba liktopba nimi teptoba polorop koma likekti, kabong soro lomag tobongol obek. Abenda.
RUT 1:1 Betlehem asag samenag nimi nubunang tam lelekto kareptopnangdi Israelnang saelbamsiekti, wamek li enekoag Kanaan so'oag kwaneng yo waelbaog. Kwaneng yo waelbaogpa kwaneng yo sembe nimi nhon elkabo eldi so'o laplobiagha eldi kelap eldi mabo phende abenekoap sindi as Betlehem laplobiagha Yehuda so'oag agha lambaek. Lambaekti, Moab so'oag piekti, nimi sekelengkirop nimi wamek. Nimi piek nimi sina Elimelek, eldi kel Naomi, eldi mabo phende abeneko sina Mahlonap Kilionap, sin nimi abene piek. Nimi abeneko nimi sisa Efrata nimi Betlehem ngai nimi wamek aghana kwaneng yo sembe mog so'o Moab piekti, wamek.
RUT 1:3 Wamekpa, Elimelek poneko tebaog. Elkel Naomi kel enekoap elmabo phende abenekoap wamek. Wamekti elmabo phende abenekori Moab kelabo topsirek. Rutap Orpaap topsirekti, wamekpa hengkun sa'obare taog. Hengkun sa'obare taogpa, sikini samenag tebaog saog uro elmabo phende abeneko Mahlonap Kilionap babe tebarekpa, sikinin Naomi yauog kel eneko mo wamog.
RUT 1:6 Mog so'o Moab wamekti Naomi kelenekori ka'elamogpa, “NUNI Allahri nu Israel nimi o'ona senelamsildi kwaneng tatsio,” alameka Naomi kelenekori ka'ebaog. Ka'ebaogti, Naomi keleneko elyamal kelaboap togto aekti, mog so'o Moab wameka laplobiagha mog so'o Yehuda Israel so'oag wamogne samoro palamek.
RUT 1:7 Naomi ela'angeri so'oag Yehuda sip pukap aro inaag palamek.
RUT 1:8 Inaag palamekti Naomiri elyamal kelabo phende abenekoag, “Na yamal kelabo a'un embahirong mabo abeneko wamserengba, wali nhon Israel so'oag samoro phebe aghana nanap a'unap nhon Israel so'oag wamebenge olog eraruk ane sembe, a'un samoro a'unindi aeag a'ero-a'ero pururom. A'un embahirongba a'undi sinap nanap o'ona sembamsirum saog uro NUNI Allahri a'un sembe babe o'ona sembahilul aro a'un sembe molbarelamsin. Sindi a'un embahairong aghana sin phende abeneko teng serongba nanap nhon palameberi, wamebenge olog sunsunum kom.
RUT 1:9 NUNI Allahri a'un o'ona sembamsileba, nengabo toro arumundi, a'ununge aeag yeng uro wamturom,” aro sin phende abenekoag yubu lelamogti, somoro kiplamsiog. Somoro kiplamsiogpa, sin phende abeneko yubu maiknoro wana ngik-ngok aro engelamdek.
RUT 1:10 Sin phende abenekori sin yamal kelag yubu lelamdekti, “Nun samoro pununam kom. Anap nhon angkabo wamangag pukap,” aro ambattekpa,
RUT 1:11 Naomi kel enekori, “Namangkelabo, nanap nhon pukap kom. Sa'a sembe nanap nhon pukap? Nari a'un topsinepne me nhon mangkanep saog kom wamna ane sembe, a'unungeag samoro pururom,” seog.
RUT 1:12 “Na nong sabal wamnarina, a'undi mog so'oag samoro pururom. Na sabal wamnarina, nari me nhon nen mangkanep kom wamna. Na nong saren wamsene tanena sumene babe nengabo nhon topsenenge ponekori me nengabo me mangkahenenge abeneko huro elelem agha nubu taherengdi, a'un topsisereng? A'undi sin nubu taherengne sembe nang-nang arurom, te? Elem me abeneko noban koma ulamserengne, wali kom, ane sembe nanap nayamal kelabo a'un phendeap pukap kom. NUNI Allahri nu niag tam ikinne paibo aghana nanag tam ikin sirikne paibo. Ane sembe nanap piberi nen mali uro wamebeagti a'unungeag pururom,” aro ambatsiog.
RUT 1:14 Wene aro ambatsiogpa Rutap Orpaap maiknoro engelamdekti, Orpa kel enekori, “Nanengeag saombanun,” aro el yamalkel somoro kibogti elengeag samoro piog. Elengeag samoro piogpa, Rut kel enekori “Nayamal kelap nhon pununam,” aro Naomi tamag ta'ap seogti, elag noropto saelbamog.
RUT 1:15 Rut Naomi tamag ta'ap seogpa Naomi kel enekori Rutag yubu lelamogti, “Namangkel, ankae kel kembamen! Ankae kel elenge asag elenge mema pharobag palamla pagha an ta'ap selamba, namangkel an babe el amik pululam,” seog.
RUT 1:16 Wene seog aghana Rut kel enekori, “Andina na laplobiagha pululam selam aghana nen andi nanag pululam seheng kom. Nari asag punun kom. An tala palapmenag na babe palamnun. An malapmenag na babe malamnun. Andi angkabo nari nangkabo taukang. Andi omeklamlam Allah nari Allah taleba, nari babe omeklamnun.
RUT 1:17 Nu phende nikag wamnemeri, teplamneme sum agha a'eptanunam. An tebalulamag na babe tebanun. An sekkukang so'oag na babe siknukang. Orolena lelamna tanena NUNI Allahri tam ikinne nanag piplul,” seog.
RUT 1:18 Rut yubu mikip uro “Nhonag pununam,” alamogpa, Naomiri “El saombalul kom,” aro el taogti, sa'a sunun komdi aro yubu kom taog.
RUT 1:19 Sin phende palamdekti, Betlehem palamdekpa, Betlehem wamek nimiri Naomi keleneko yalamla aro kololamek. Kololamekpa kelabo wamekneri, “Sik Naomi kelenekore?” alamek.
RUT 1:20 Wene alamekpa Naomi kelenekori, “Na Naomi seneheng kom. Si Naomi aro engehirop si enena wali kelabo aro engehirop. Na si Sek kel sunululom. Na si Sek kel sunululom nena Allah Mikip phelektopne ponekori na sae limneogpa mali uro ulamneldo agha yalamna. Tanea na palamsiri, saeag olog wamogpa wamneba sunsunum wamsiri pihi. NUNI Allahri nanag tam ikinne paibogpa, seklenneog seklero ulamneldoa, sa'a-sa'a koma yalamna. Allah Mikip phelektopne ponekori nanag malingeog palilamneloba, seklena seknelamneldo ane sembe a'undi na Naomi seneheng kom,” seog.
RUT 1:22 Undo uro yabiogne neneko sembe Naomi Moab piog aneko samoro elyamalkel Rut Moab kelenekoap samoro Betlehem yarek. Yarekne kwaneng roti karepto wendog wenam yongoro pololameka liag yarek.
RUT 2:1 Naomi ela'ange samenag tebaogne Elimelek elai sisa nik nimi nubunge nhon sina Boas tupne wamogpa,
RUT 2:2 Moab kel Rut kelenekori elyamalkel Naomiag ambarelamogti, “Na pineba, nimi nhondi o'ona sembanele tanena, nimi enekori yengag agha el aruknari kwaneng roti wana pololamika tinilamlenge polbanundi, punun,” seogba, Naomirina, “Namangkel, wali pululam,” seog.
RUT 2:3 Wene seogpa, Rut kel eneko elyamal Elimelek sisa nik nimi Boastingeag aro tapto el wamog kom aghana, Boasdi aweag piogti, Boas ilipsabori roti wana kareplameka tagto tinilamogne pololamog.
RUT 2:4 Pololamogpa Boas poneko as Betlehem simbika aweag yaogti, Boasti arukna kwaneng roti wana kareplamekag yaogti, wana kareplameknang tanekoag, “NUNI Allahri a'un paiamsilul,” aro kiplamsiogpa, sindi tangoro, “Nuni, an babe NUNI Allahri yeplangkilul,” aro kibek.
RUT 2:5 Kibekpa, Boasti arukna sikindo samenagneag, “Kelene etneri kel?” aro haibaog.
RUT 2:6 Haibaogpa, arukna sikindo anekorina, “Kel enena mog so'o Moab kel, el yamal Naomi kelenekoap tane yarong kel.
RUT 2:7 Rut kel enekori ambatsilne, 'Anmabo amik palamneri, kwaneng roti wana tagto tinilamlenge na poloro anun,' seldi, molbahilba ae lukun alnibaldi, tektek epna koma pololamla paghabog wene wamla. Olog tektek papnun aro kalun aeag ane pukamla,” aro ambarog.
RUT 2:8 Ambarogpa Boas ponekorina Rut kel enekoag yubu lelamogti, “Namangkel, nari anag lemnunne ane ka'eamlulam. Nari awe tane laplobi agha kwaneng roti yoghag polol peheng kom. Tane pololapmendi, na arukna kelabo kwaneng roti wana togtog palamikag ipsimendi, sin amik pululam. Sin nong laplobi agha pin koma sin peramag aghabog wamlulam. Mag yo ulangkele tanena mag ma'ina arukna nengabo me niri mag tero paliroba tel pululam. Nari naipsaboag, 'Kel enena saelbaheng kom,' aro wembahindina, log kom uro pululam,” aro ambarog.
RUT 2:10 Wene aro ambarogba, Rut kel enekori amupto so'oag malingkina Boas kiplamogti, “Na nimi aeag kel agha huroba sembe o'ona sembanelamdi, na yeplamnelam?” seog.
RUT 2:11 Wene seogpa, Boasti tangaro ambarelamogti, “Nimiri an sembe ambarelamsiangdi, 'Kel ane ela'ange tebaoba, elyamalkelag walia aghabog ulamo. Elyamalkelag walia ulamori, ilin ili laplobi agha el mangkaekag babe laplobiagha nimiri asag samen babe ipsiog kom nimi wamekag yao,' aro ambarelamneongba, ka'ebano.
RUT 2:12 Andi lebomne, 'Israel nangdi omeklamang Allah enekoag pineba, pelebaneleba, wana aingniro wamnun,' seomdi, an tane yaom. Ane sembe nari NUNI Allahag molbaralangkenne, nu Israel nimiri NUNI Allah omeklamapne ponekori kamna walinge tatkekeleba, walinge aghabog saelbapmendi, wamlulam aro an sembe molbarelangken,” aro ambarog.
RUT 2:13 Ambarogpa Rut kel enekorina, “Nani, na kelabo an arukna wamangne tane saog uro wamna kom aghana, andi na o'ona sembanelamdi, na wana ikin uro wamnaba, walia nanag lelamlamdi, wana keagman nembamnelam. Nani,” aro ambarog.
RUT 2:14 Kwaneng telamek pere, Boas ponekori Rutag, “Kwaneng tukapti, yae kwaneng roti wana anggur wana lolderoba agha pelengkiogha tululam,” aro ambarogpa, Rut keleneko Boasti arukna awe tolamekag aneko wamek nimiag peramag pulaog. Yaogpa kwaneng roti telamek abeneko Boas ponekori kwaneng roti sunuroba wana wali uro aukag tabekne babe tarogpa, teogti, mon ogti, nen phelektopne pogto Rut kelenekori aghag liro pibog.
RUT 2:15 Pibogti Rut keleneko kwaneng roti wana tinilamlenge togto anun aro piogpa, Boas ponekori eldi aruknag ambarelamsiogti, “Keleneri kwaneng roti wana olog-ologne tinilamlenge togto anun aro pil. Olog-ologne togto anun aro pil aghana a'undi kaongoro kaupto palilamlomne anabiagne keleneri walinge nubu uro toltolamle tanena waro ali nembaheng kom. Waro ali nemban koma liloapmundi, Rut kelenkori wali maiknoro togtoalul aro kiliro lebelaglopmundi pelengelolapmunne togtoalul,” aro ambatsiog.
RUT 2:17 Kwaneng roti sumbaneba kolopto tinilamogne pololamog paghabog ae sin taog. Imbaogba Rut keleneko kwaneng roti wana pololamogne keloplamogpa kolopto yangkalamogne taneko poloro agha libaogne ikinne sepuluh kilogram taog.
RUT 2:18 Ag nhon taogpa, Rut kel enekori aghag liro pobogti, asag pabiogti, elyamalkelag undo polbandi payana tane kembamen aro ambarog. Kembamen aro ambarogti, Rut kel enekori nen yogharogne taneko, el samen Boas nenekoap kwaneng telamdekne phelektoba aghag lilamogti, pogto payaogne yogharogti, elyamal kel Naomi tarog.
RUT 2:19 Tarogpa elyamal kel Naomi kel enekori ibogti lelamogti, “Sumene tala pilamdi, polbalamdi, kwaneng tane payalamlam? Etneri aweag agha an sumene awe toplamdi payalam?” seogti Naomi kelenekori tipto lelamogti, “Anag walia ual nimi sembe, 'Allahri walia elag ulamlul,' aro molbarelamna,” seog. Naomiri wene seogpa Rut kel enekorina, “Awe sumene kwaneng roti wana tognag ane ngaingena Boas,” aro ambarog.
RUT 2:20 Wene aro ambarogpa Naomi kel enekorina Rut kelenekoag, “Namangkel, nimi enena nuri nimi sisa nikne peramag nimi o'ona paibatsinepne wamla. Eldi nun paiamsulul. NUNI Allah nimi teptopneap, kamagneap laplopsin koma walia ulamsilne ponekori Boas babe yepto walia ulamlul aro molbarelamna,” seog.
RUT 2:21 Wene seogpa, Boasti samenag Rut ambarog yubu Rut kel enekori nen tipto Naomi ambarelamogti, “Boasti nanag, 'Ana nari arukna kwaneng roti wana kareplamik nimi peramag wapmendi, ik etpare kwaneng roti wana kareplamikag tane tinilamlenge pololapmen paghabog nari aweag komopto polbalulom,' seldi, ambatnel,” aro ambarog.
RUT 2:22 Wene aro ambarogpa, Naomi kelenekori elyamalkel Rut kelenekoag, “Wali nayamalkel, an wali Boasti aweag el arukna kelabo taneko peramag wapmendi, polol palamlulam. Andi eldi awe laplobi agha lepmendi, ora nimiri aweag pimen tanena nimiri kirik pupling oro saelbaghanep,” aro wembaog.
RUT 2:23 Wene aro wembaogti ambarogpa Rut kelenekori elyamalkel yubu ka'ebaog. Ka'ebaogpa, Boas ilipsabori samenag alnibaekti kareplamekne babe komoptobag kareplamekne babe Rut kelenekori neleplamsiog. Neleplamsiogti, Boas arukna kelabo peramag wamogti, kwaneng roti wana so'oag tinilamogne elap elyamal kelenekoap sembe ik wal phende saog pololtolamog paghabog komopto tobek. Undo pololamog ko'o ene Rut keleneko elyamalkel Naomiap nhon wamdek.
RUT 3:1 Wamdekti, ik nhon sum Naomi kel enekori el yamalkel Rutag yubu lelamogti, “Namangkel, an huro wamlulam? An amik wali uro wamnepne sembe nengabo an toltonne nhon ebatkinun sembamna.
RUT 3:2 Kelabo anap nikag a'un aweag pololamlomne Boasti aweag pololamlom. Boas ponena samenag toamneogne eldi sisa nik nimi nu o'ona sembahainepne wamla. Ane sembe ka'eamnululam! Sumene ae inipnag Boas poneko kwaneng roti wana poloro yo'oag agha kolopto yangkalul aro keloplamangag aweag pileri, roti wana nong wepto tolamlul.
RUT 3:3 Ane sembe, an kon maghag a'eleptamendi, song walia an nongag pelagtamendi, ag walinge enekamendi, kwaneng roti wana yo'oag agha koloptalul aro kelopto tolamikag pululam. Pina wapmendi Boas sembe nang-nangkapmenba kwanengap maghap tulul, aghana an pina wapmenne lag neneptaheng kom.
RUT 3:4 An ipken kombog Boas mal pulul. Mal pileag wali uro kembamendi, Boas malamleag peramag pimendi, son sembe kaluptangka malamlea yanag sip tengkongkia, yanag sip mal pululam. Mal pimenba, ipkeleri, nu o'ona sembahileri, maupkelul aro ulapmenne sembe Boas el uro wamlul. El uro wamleri, nu Ibrani nimiri uropne sunsunum uro andi amik uamenne sembe babe Boasti an ambatkelul,” aro ambarog.
RUT 3:5 Wene aro ambarogpa, Rut kel enekori, “Na yamalkel, wali ambatnelam. Ambatnelamne sunsunum uro nari uanun,” seog.
RUT 3:6 Wene seogti, Rut kel eneko kwaneng roti wana yo'oag agha wana koloplamekag aneko piogti, el yamal keldi lebogne sunsunum uro uaog.
RUT 3:7 Boas poneko kwanengap maghap teogti, wanaag yeng uro mamnun aro kwaneng roti wana erabalingkirobag peramag mal piogpa, Rut kel eneko nemen-nemen keleleng agha yaogti, Boas poneko son sembe kaluptangka maroba aneko ebiagha Boas yan peramag mal piog.
RUT 3:8 Mal piogpa, Boas poneko malamogha ae tomnusam taogpa lo'om seogti, pulingkiogti, peramag sale whilamogpa, yanag sip kel nhon malamogha el taog.
RUT 3:9 El taogti, hailamogti, “Anna etne?” seogpa, kel enekorina, “Nani, nana Rut, an arukna na malamna,” seog. Seogti, “Boasti na topnelul, to, kom, to?” aro, Ibrani nimiri ul palamekne sunsunum uro Rut kelenekori nen tipto ambarelamogti, “Anna nayamal tebaogne el sisa nik nimi nu o'ona paibatsinepne wamlam. Ane sembe andi na pelepto kaluptangka agha niknibatnululam,” aro ambarog.
RUT 3:10 Wene aro ambarogpa Boas ponekori, “Namangkel, NUNI Allahri anag walia aghabog ualul aro molbarelangken! An yamalkel Naomiag walia ulamomnena olog tamag wamlaba, sumene an yamal sisa nik nimi wamnange sembe o'ona sembanelamdi, nanag ualamnena ya'ag paliagne. Na olog sabal wamna ane sembe andi kaubuni toro anun aro ebahinep. An nimi anabiag kaubuni wamangne anabiag, saeag tupnang babe, saeag agha orog nang babe nimi anabiag kaubuni toro anun aro ebahinep aghana, yog kaubuni anabiag agha el palamlam kom.
RUT 3:11 Ane sembe namangkel, log sembaheng kom! Nimi as eneag wamangnena an sembe “Wali sirik kel wamlari walinge aghabog seneraglamlari ulamla,” alamang. Andi ni molona molbanelamne sunsunum uro nari babe anag uanun,” seog.
RUT 3:12 Wene seogti, “Sikne agha leplam. Nana an yamalkel nimi sisa nikne peramag wamna ane sembe, nari an wamnepne sembe nari tagha uanun. Aghana, nimi nhon an yamalkel nimi sisa nikne peram sirikne wamla. El wamlange nenekori paiamsulul, to, tibogamukap.
RUT 3:13 An sumene inipnag tane mapmenba, ambhum lukuna nimi anekoag pineba, 'Kel eneko na topnun,' sulul, to? Topnun sele tanena wali topkelul. Karong sele tanena nari topkenun. NUNI Allah kamag wamlange poneko whaingag agha sik uro lelamna,” seog. Wene seogti, “Namangkel, lukun pululam,” aro ambarog.
RUT 3:14 Ambarogpa, Rut kel eneko Boas yan simbik malamogpa, kwelekanep peramag Boas ponekori, “Kelabo kwaneng roti wana yo'oag agha kolopto palirobag malal aro nimi yog nimi el taikag,” aro pulul sembaogne sunsunum uro lukun ae kwelekan komag nimiri imna komag sekom agha Rut keleneko piog.
RUT 3:15 Punun aro ulamogpa, Boas ponekorina Rutag, “Ag ngang kwhena kwheamlama ane lopmendi ane sangaro yangkalulam!” Boasti wene seogpa, Rut kelenekori lopto sangaro yangkaogpa, kwaneng roti sumbaneba olog wali saogne to'opto 20 kilogram libarogti, Rutti usoghag pobirogti, Boas poneko as Betlehem asag piog.
RUT 3:16 Boas pal toghog abeneko Rut kel eneko babe elyamalkel Naomiag yaogpa, Naomi kel enekori, “Namangkel, welaro uro yabil?” aro haibaogpa, Rut kel enekori Boasti Rutag lebogneap uaogneap ni ambarog.
RUT 3:17 Nen babe ambarelamogti, “Boasti 'Anyamalkelag an nongog pululam kom,' seldi kwaneng roti sumbaneba ag teknero 20 kilogram libatnelba, payan,” aro ambarog.
RUT 3:18 Wene aro ambarogpa, Naomi kel enekori Rutag, “Namangkel, el Boas ponekori tam ane wali uro wepto paibukap aro elamlaba, ae sumene agha karepto paibukap aro tektek papna koma elamlaba, ae sumene agha karepto paibaukang. Ane sembe an tane pukapmendi, wapmenba, lebukangne el talulam,” aro ambarog.
RUT 4:1 Boas poneko leka as kota Betlehem kanero sobaeka ina siramag piogti pukamog. Pukamogti tilamogpa kabuni nhon yalamogha tibogaogti Boasti senenne “Elimelekh nimi sisa nik nimi peramag sirikne aneko yalamlare?” sembaogti tibogamogpa peramag yalamog. Peramag yalamogpa yobogti, “Naba nangkae, yamendi peramag abene pulae,” seogpa yaogti nimi eneko Boas peramag pulaog.
RUT 4:2 Pulaogpa, Boastina Betlehem nimi sikindo yabo saelba uahiropnang sa'obare yopsiogpa, sikin babe yubu lebukap aro el yaghag pulaek.
RUT 4:3 Nikag pukekti, Boasti yubu elkae samen yaogne ponekoag yubu lelamogti, “Naomi kel eneko as Moab piog aneko samoro yaori, so'o ela'ange Elimelekhti nun nunkaeri laplobog so'o eneko Naomiri, 'Nimi yog nimiri saeag nembaneba, sindi na kamna tatnukang,' senelamla.
RUT 4:4 Ane sembe nari seneraglamnange tam nene sembe an eltahom sembamna. 'So'o aneko nari tomnun,' sembamen tanena kembamsiang nimi whingag nimi nubunang pukamangag tanea lag phoro leplulam. Karong sembamenne babe lag phoro leplulam. So'o aneko ngai tanepnang ot nun phendeog wamnam agha, nari an phibom agha so'o aneko na tanep kom. Andi lepmenne na ka'ebanun,” seogpa, nimi enekori, “So'o eneko na tanun,” seog.
RUT 4:5 Wene seogpa, Boasti tangoro ambarelamogti, “Wali leplam, aghana so'o aneko Naomi saeag agha toplulam tanena sumeneko Naomi el mamne tebaonge Mahlon el kel Moab kel Rut kel eneko babe mauplulam. Maupmen tanena Rut ela'ange tebaog aneko lunumna elmabo mangkatsilenge tanekori so'o aneko saelbamukang. Andi so'oap kel enekoap toplulam,” aro ambarog.
RUT 4:6 Ambarogpa, nimi anekorina, “Undop agha tanena nari so'o eneko nari tomnenge olog ikin. So'o eneko tomneri, amik sum tebane tanena so'o eneko kelenekoap elmabo mangkahilengeap sikindinge taleba, na mabo taptopne wene wamangneri saeag talul kom. Ane sembe na Naomi ela'ange nimi sisa nikne peramag sirikne wamnari, so'o aneko tomnep aghana so'o aneko sae lililamna. So'o enekoap kel enekoap na kom. Andina 'Eldi toro alul to?' sembalam aghana an toro alulam,” aro ambarog.
RUT 4:7 Samenag Israel nimiri sindinge kamna toro tolamekti, “Yubu sam karepto paibapti, salagna ane palilamna,” aro ngainang tanekori yan wangana sandal enekamogne tara sip kwiripto, “Na ngai tanun,” senerop nimi enekoag tarelamek.
RUT 4:8 Samen unulamekne sunsunum uro nimi enekori Boasag lelamogti, “Andi toplulam,” aro Boas saeag nenelamogti yan wangana sandal enekamogne tara sip kwiripto Boas tarog.
RUT 4:9 Tarogpa, Boastina nimi nubunang pukamek nangap kemelamsiek nimi niap ambarelamsiogti, “Sumene a'un kemelamsilom nimi a'un whingag agha Elimelekap elmabo Mahlonap, Kilionapti ni laploa tebaek so'o ni aneko Naomi saeag agha sumene na tolamna.
RUT 4:10 Moab kel Rut keleneko Mahlondi yauog kel aneko maupto nari tomneri Mahlon tebaonge lunumna mangkanun. Mangkaneba, sindi so'o eneko ngai uro saelbamukang. Saelbamikpa, as eneag urop nimiap el sisa nhon nimiapti Mahlon si ekon taikag aro sumene a'un whingag agha eldinge tolamnari, el lunumna mangkanun aro ambarelamsin,” seog.
RUT 4:11 Boasti wene seogpa, nimi ina siram peramag winiro wamek nimi tanekoap, nimi nubunang tanekoapti yubu lelamekti, “Leplamnena nun ka'ebaap. Kel andi aeag wa'ile kel eneko sembe 'NUNI Allahri yeplamlul,' aro molbarelamsiap. NUNI Allahri yeplamsileba, nunisag Yakub elkelabo phende Leaap Rahelapti elmabo maiknoro Yakub sembe mangkattek saog uro, Rut kelenekori babe nimi maikno mangkatkelul. Mangkatkeleba, anna sisa sina Efrata nimi anabiag tupne wamle paghabog an si as Betlehem tane nubu talul.
RUT 4:12 NUNI Allahri an yeplangkeleba, kel saren kel enekori me maiknoro mangkatkeleba, mangkatkelenge neneko nunisag Yehuda elme Peresti me maikno likto yabahiogne saog uro wamukang. Nunisag Yehuda elkel Tamar kel enekori mangkarog mena Peresti maiknoro mangkahiog. Nunisag Peresti maiknoro mangkahiogne saog uro, Rut kelenekoriba me maiknoro mangkatkeleba, sisa nubu talul aro Nuni Allahag a'un sembe molbarelamsiap,” aro kibek.
RUT 4:13 Kibekpa Boasti Rut kel eneko maubogti, nikag maptekpa, NUNI Allahri mikip nembaogpa, Rut kel eneko me mon taogti, me nengabo me mangkaog.
RUT 4:14 Me mangaro aogne sembe as Betlehem kelabo enekori Naomikag yubu lelamekti, “NUNI Allahri sumene anau an piangkenepne me nengabo me tatsilba, anyamalkel enekori meneko mangkatsilba, NUNI Allah omekto kiplamap! Me aneko Israel nimiri si nubu nenelamukang.
RUT 4:15 Andi mabo kaubuni saekpare mangkahisomne abenekori, an yeplangkehengne olog tamag wamsoba, anyamalkeldi an o'ona sembagheori, me mangkaro alne ya'ag uro paliag wamla. Me anekori an wana yeng nenelangkeleri, an sabal tamenba, o'obaghelul,” aro kibek.
RUT 4:16 Kibekpa, Naomi kel enekori me aneko tobogti, saramag piamogti, me aneko mo'olamog.
RUT 4:17 Mo'olamogti, wamogpa, Naomi kelenekori ae peramag wamek kelabo tanekori, “Wene Naomi sembe me nengabo me nhon mangkal,” seekti, elau nengabo me aneko sina Obed engkaek. Obed el mamne Isai. Isai el mamne Daud amik mangap taog. Daud ilisag yabo sina tane palilamap:
RUT 4:18 Peres, el mamne Hesron.
RUT 4:19 Hesron el mamne Ram. Ram elmamne Aminadab.
RUT 4:20 Aminadab elmamne Nahason. Nahason elmamne Salmon.
RUT 4:21 Salmon elmamne Boas. Boas elmamne Obed.
RUT 4:22 Obed elmamne Isai. Isai elmamne Daud mangaro likto piog. Abenda
MAR 1:1 Yubu walinge Allah Elme Yesus Kristus sembe na Markusti mome palilamnange tamna ane.
MAR 1:2 Samenag Yesus anam yan komag, el mog so'oag yalulne sembe Allahri yubu ambarelamogti, Allah yubu silimu tiptopne Yesaya ponekori tipto mome toro pibog. Allahri samenag Elmeag lebogne Yesaya poneko el taogti, nen tipto mome tobogne ane: “Nari yubu ambatsirop nimi nhon pogneba, 'Eldi ina an pinepne sembe yarelamlul,' aro pognun.
MAR 1:3 Pognenge poneko pai aldesog urobag pileri, yubu haum aro nimi yoplamsileri, 'Ina nu saelbamsilulne yanepne sembe yarelamlulom. El yanep ina porog nenelamsut,' aro ambatsilul,” aro Allahri lebogne sunsunum uro Yesayari mome toro pibog.
MAR 1:4 Yesaya ponekori mome tobogne sunsunum uro Allahri yubu ambatsiropne poghogpa, Yohanes nimi maghag pelengahiropne poneko pai aldesog urobag yaog. Yaogti, Allah yubu ambarelamsiogti, “A'undi mali-malia wanaag seneragto ulamlomne lipsumunba, maghag pelengkipsinun. Pelengkipsineba, a'undi mali-malia ulamlomne Allahri wailag nembaleri, kom nembalul,” aro ambarelamsiogti, maghag pelengelamsiog.
MAR 1:5 Wene aro ambarelamsiogti, maghag pelengelamsiogpa, nimi maikno mog so'o Yudea wamek nimiap, as Yerusalem wamek nimiap, Yohanesag ka'el alamek. Ka'elamekti, “Nuri malia-malia undo-undo ulamubu” aro lag phoro ambarelamekpa, Yohanesti mag Yordan inaag pelengelamsiog.
MAR 1:6 Yohanesti pham unta hong agha wirop ag wangkamogne, Allah yubu silimu tiplameknangdi samenag wangkamekne sunsunum uro wangkamogti, uwoghag lebe aroba kon agha sunurop haing kauptangkamog. Kauptangkamogti, eldi tena whengap pondog maghap tero wamog.
MAR 1:7 Undo tero wamogti, nimiag yubu ambarelamsiogti, “Na sam yano aghana, amik nimi nubunge nhon, nanap sunum komne phelektopne mikipne nubunge nhon yalul. Na nimi ologne wamnaba, el mikip phelektopne wamlul ane sembe, eldi arukna tanunne na sunurop kom. El mikip sirikne yaleba, na kinipto pulingkina nari eldi yan wangana haing lopna babe nanap sunurop kom.
MAR 1:8 Nari mag mo aneag agha a'un maghag pelengelamsin aghana, El nubunge yalulne ponekori Allah Eldamne Yame Walinge a'unag pelengkatsilul,” seog.
MAR 1:9 Yohanesti nimi maghag pelengelamsiog abeneko Yesus as Nazaret, mog so'o Galilea wamogha laplobiagha, Yohanes wamoghag yaog. Yaogpa, Yohanesti Yesus mag Yordan inaag maghag pelengkaog.
MAR 1:10 Pelengkaogpa, Yesus maghag agha lambaog abeneko imag tiwalengelamogpa, im sangal naghogpa, Allah Yame Walinge mem winang saog uro elag kulukul alamogha ibog.
MAR 1:11 Elag kulukul alamogpa, imag agha yubu nhon lelamogti, “Anna name nari o'ona senero angkenne, na wana awi nenelamnelam,” al toghogha ka'ebaog.
MAR 1:12 Allah yubu lelamogha ka'ebaog abeneko pere, Allah Yame walinge anekori enero pabiogpa, Yesus pai aldesog urobag piog.
MAR 1:13 Piogti, wamogti, inipna ik teng nhon epto nualbareap (40) taog. Wamogpa, phia sikini nubungeri, “Allahri iriktop yubu phibalul to, kom to,” aro wana aluktop yubu agha yubu neplamog. Yubu neplamog paghabog Yesus winangap, manaap, pagheap ua urobag wamogpa, Allah arukna malaikat imagnang yinkina el yepto piamek.
MAR 1:14 Mog so'o saelba uropne nimi nubunge Herodesti, Yohanes haing sae kaupto salero kop aeag tobongkaogpa, Yesus mog so'o Galilea so'oag piog. Piogti, Allah yubu walinge ambarelamsiogti,
MAR 1:15 “Allahri samenag, 'Mog so'oag nimi wali uro paiamsineri saelbamsinun,' aro salag pibogne sunsunum uro wene undo uro yabinual. A'undi mali-malia ulamlomne lipsimundi, Allah yubu walinge aneko sik sembamundi, salero ul palamsut,” aro ambarelamsiog.
MAR 1:16 Yesus mag Galilea longorop mag peramag mag abol toman palamogti, tilamogpa, ikan oropnang phende wamdekne Simonap, ilipsae Andreasap tibogahiog. Tilamsiogpa, ikan oropnangdi ulamekne sunsunum uro ikan liptangop ag maghag talamteka tibogahiog.
MAR 1:17 Tibogahiogti, Yesusti sinag yubu lelamogti, “Nanag yarumunba, nanap nelepto nhon pukap. Wene a'un ikan aghag lilamsirom saog uro amik sum babe yepsineba, a'undi nimi ero yubu sikne ambarelamsirumundi, nanag payahirurom. Nanag yahut,” seog.
MAR 1:18 Yesusti wene seogpa, ta'ap sen koma sindinge ikan liptangtop ag laplobi agha Yesusag nelepto elap nhon palamek.
MAR 1:19 Nelebarekpa, olog we koma piekti, tilamogpa, Yesusti Zebedeus elmabo phende Yakobusap, elkae Yohanesap tibogahiog. Sikin kabong lomag wamtekti, sindi ikan liptangtop ag o'oro wetnel tolameka tibogahiog.
MAR 1:20 Tibogahiogti, ta'ap sen koma Yesusti, “A'un nanag nelepto nhon pukap,” aro sin yopsiog. Yopsiogpa, sindi sikini Zebedeusap eldi aruknaap kabong lomag wameka aneko lilobi agha Yesusag nelebarek.
MAR 1:21 Yesusap, Eldi yopsiognang abenekoap as Kapernaum piekti, wamek. Wamekpa, Yahudi nimiri poloro winiptangto Allah yubu lerop sum taogpa, Allah yubu lerop aeag wa'iekti, Yesusti Allah yubu ambarelamsiog.
MAR 1:22 Wali uro ambarelamsiogpa, nimi taneko ka'ebaekti, “Yaghe, el mo el uropne wamlari, mikipneag agha ambarelamsil. Musari samenag mome tobog yubu ambatsiropnangdi undo mikipneag agha ambarelamsiang kom,” senelamekti, lo'om seek.
MAR 1:23 Yahudi nimiri Allah yubu lerop ae as Kapernaum wa'iek nimi taneko anabiag agha phia yonge kulomag wa'iog nimi nhon wamog. Wamogpa, Yesusti ambarelamsiogha ka'elamekti, lo'om alamek abeneko, phia yonge kulomag wa'iog nimi enekori haum aro yubu lelamogti,
MAR 1:24 “Yesus, Nazaretneo! An nunag hualulam? Nu sembe 'Kom nembahinun,' aro yalam te? Anna etne na el wamna. Anna Allahri 'Pognun,' aro salag pibogne sunsunum uro Eldamneri wepto pogkeogne wamlam,” seog.
MAR 1:25 Wene seogpa, Yesusti phia yonge anekoag, “Yubu kom tae! Nimi eneag agha lambae!” aro arukaog.
MAR 1:26 “Lambae!” aro arukaogpa, phia yonge nenekori nimi eneko yo uro lologlamogti, yubu ngolol aro nimi kulomag agha lambaog.
MAR 1:27 Lambaogpa, nimi ni taneko kembaekti, “Yaghe, mane agha ual!” al talamek. “Huropne mikipne agha undo uro yabil? Nimi enekori yubu wendogne mikipneag agha ambarelamsil. Eldi phia yongeag, 'Lambae,' aro aruklamsilba, ka'elamangdi, lanalamang,” seekti, lo'om seek.
MAR 1:28 Lo'om seekti, sindi, “Yesusti unuro unual,” aro ambarelamsiekpa, ka'ebaek nimiri tipto ambarelamsiekpa, Galilea mog so'oag yubu eneko men phea sabo taog.
MAR 1:29 Sin nimi poloro winirop aeag aneko laplobi agha, Simonap, ilipsae Andreasap sindi aeag piekti, Yesusap, Yakobusap, Yohanesap sin lambare nhon piek.
MAR 1:30 Aeag yaekpa, Simon elyamal kel naikna bobo along wamogpa, ae lomag malamog. El yamalkel eneko naiklamogha sembe Yesusag peket ambarek.
MAR 1:31 Ambarekpa, Yesus kel enekoag piogti, sae kiliro yepto pukirog. Pukirog abeneko pere bobona orog taogpa, kel enekori sin tena yepto yobarelamsiog.
MAR 1:32 Heng puruklamog abeneko ae imbaogpa, nimi naiktopneap, nimi phia arukna yonge kulumag uropneap maikno Yesusag payahiek.
MAR 1:33 As aneko nimi ni yalonga saog uro ae aneko ina siramag longol aek.
MAR 1:34 Longol aekpa, Yesusti naikna yogne-yogne seklelamekne wali nenelamsiogti, phia arukna yonge babe nimiag agha yaglambahiog. Phia arukna taneko Yesus sembe “El etne wamla,” aro el uro wamek, ane sembe Yesusti sikinag, “A'un yubu lepseng kom,” aro irikahiog.
MAR 1:35 Kweleknag aneko ae anam wareban komag Yesus pukogti, ae aneko laplobi agha as peramag nimi oroghag piog. Piogti, anekoa Allahag moloro yubu lelamog.
MAR 1:36 Lelamog aghana Simonap elkaboap Yesus el piek.
MAR 1:37 Elamekti, ibekti, elag yubu lelamekti, “Nimi maiknori an elangkeangpa, nu nen samoro aeag pukap,” seek.
MAR 1:38 Aghana Yesusti samoro ambarelamsiogti, “Kom. Nana, 'Nimi niag Allah yubu sikne ambatsinun,' aro so'oag yahi ane sembe, nu yog as peramag wamang nimiag pukapti yahut!” seog.
MAR 1:39 Anea Yesus mog so'o Galilea as wamekne kanero wamek nimiag ambattoa tongolamsiog. Allah yubu lero poloro winirop aeag babe Allah yubu ambarelamsiogti, phia arukna yonge babe yag lanalamsiog.
MAR 1:40 Yesus mog so'o Galilea kanero wamek nimiag ambattoa tongolamsiog abeneko, nimi nhon konag naikna poloro telamogne, wali tanep komne, telamog nimi nhon yaog. Yaogti, Yesus whingag yabu sanukto pulingkiogti, wanaag agha mololamogti, “An wali nembahinepne wamlamdi, yeng sembamen tanena, andi na wali nembanululam, te?” seog.
MAR 1:41 Seogpa, nimi eneko o'ona sembamog. O'ona senelamogti, sae saelbamogti, yubu lelamogti, “Na yeng. Wali tae!” seog.
MAR 1:42 Lelamog abeneko pere naikna aneko orog taogpa, nimi eneko wali taog.
MAR 1:43 Wali taogpa, Yesusti elag iriklamogti, “Wali pululam!
MAR 1:44 Nari an wali nembaghenne sembe ora nimiag ambatsiseng kom! Aghana memne nimi sae agha Allah sembe pairopne nhonag peket pimendi, waliaba Allah sembe pimnepne elag pabululam. Waliaba pabululamnena, Musari samenag, 'Kon naikna urop nimi wali tale tanena, Allah sembe pimnepne payalul,' aro mome toro paibog yubu sunsunum uro pabululam. Pabimendi, memne Allah sembe pairopneag aghabog ambarel pimendi, 'Wali nembamnel,' aro ambatlulam. Ambarel pimenba, kembaghelenge pere agha an wali nembaghenne sembe el taleri, waliaba tarel pabimenne Allah sembe aukag taplul. Ni undo uro yabalamle pere agha, kekneba sinag uro yabileba, nimi el wamnep,” seog.
MAR 1:45 Wene aro irikaog aghana, nimi eneko anekoa laplobi agha Yesusti el wali nembaogne sembe nimiag salik-malik uro neplamog. Undop agha, Yesus as nhon tibin uro wa'inep komdi, El sop-sop nimi oroghag ua ulamogpog, sopsop tala-tala nimi elag yalamek.
MAR 2:1 Ae ik etbare Yesus undo wamogha nen samoro as Kapernaum yaogpa, “Yesus wene samoro aeag yal,” aro yubu sabo taogpa, nimi maikno ka'ebaek.
MAR 2:2 Ka'ebaekti, yalamekti, aeag babe nimi aghabog teknebaek. Teknebaekti, ina siramag babe asag sip nimi to'opto longolaekpa, kolo orog taog. Undo wamekpa, Yesusti sinag Allah yubu ambarelamsiog.
MAR 2:3 Ambarelamsiogpa, wamekag aneko nengabo tombareri lebe arop kom nimi nhon morea kalag keyapto, “Yesusag payaukap,” aro ulamek.
MAR 2:4 Payalamekti, kemelamekpa, nimi maikno longolaekne sembe Yesus peramag wa'inep kom. Wa'inep kom, ane sembe sikin imag alibag waelbaekti, Yesus wamogha alibag imag kwerekaekti, sikindi poneko morea kalap haingdi kerekto ae lomag pelengkaek.
MAR 2:5 Pelengkaekpa, Yesusti kembahiogti, el wamognena, “'Sik uro nungkae wali nembatsilul' aro seneraghangdi, payaang,” sembaog. “Sik uro wali nembatsilul,” sembaekne ipsiogti, lebe arop kom nimi enekoag yubu lelamogti, “Mele, andi mali-malia uaomne Nari kom nembanba, tam orog tal,” seog.
MAR 2:6 Wene seogpa, nubunang Musari samenag mome tobogne ambatsiropnang etpare pukamekne tanekori Yesus yubu ka'ebaekti, sindi wanaag mali senelamek. Senelamekti, “Sa'a sembe nimi ane, 'Andi mali-malia uaomne kom nemban,' alamla? Nimiri mali-malia uropne nimi nhondi babe kom nembanep kom. Eldi, 'Mali-malia uaomne kom nemban,' aro lemnepnena, Ot Allah Eldamneriog lemnep. Nimi eneri Allah san lepla,” aro wanaag seneraglamek.
MAR 2:8 Wene aro sindi wanaag seneraglamekne Yesus peket el taogti, ambarelamsiogti, “A'undi wanaag 'Lepso kom,' senelamlomne nene sa'ambe seneraglamlom?
MAR 2:9 Nari, 'Andi mali-malia uropne orog nemban,' sen tanena, 'Sik uro yabil to, kom to?' aro nimiri imnep kom. Aghana nari elag ambatneri, 'Seke! Andi morea kalap salero pululam,' sene tanena, nimiri 'Sik uro yabil to, kom to?' aro ibikti, el tanep. Ane sembe nelagha nimiri keyagman uro lemnep?
MAR 2:10 Aghana, a'undi Na sembe el tahom senelamnari, lag nembanun. Na imag agha, 'Mog so'oag nimi tanun,' aro yahinge wamna. Allahri nari saeag mikipne pibog andarina nimiri mali-malia uropne sembe nari wailag nenero kom nembanep. Kembamundi, el talulom,” seog. Seogti, lebe arop kom nimi enekoag yubu lelamogti,
MAR 2:11 “Seke! Andi morea kal saelba palame!” seog.
MAR 2:12 Wene seogpa, nimi ni taneko tiboglamekpa, lebe arop kom nimi enekori sekom agha morea kal aneko tobogti, lambaog. Lambaogpa, nimi niri ponekoag tibogaekti, “Yaghe, ane mane agha ual! Tam undopne nu olog irop komne uro yabil,” aro lo'om seekti, Allah omeklamek.
MAR 2:13 As Kapernaum laplobi agha Yesus samoro mag Galilea sin peramag piog. Piogpa, nimi maikno elag yalamekpa, Allah yubu ambarelamsiog.
MAR 2:14 Ambattoa yabalamsiogti, nimi nhon sina Lewi, Alfeus elme tilamog. Lewi poneko Kapernaum mog so'o saelba uhiropnang yubu eptopne wamog. Kapernaum nimiri awe tolamekti, kal ma'al kamna tolamekpa, Lewi ponekori sinag aruklamsiognena, “Kal ma'al tolamlomne agha saelba uhiropnang sembe pogto nanag palilamlulom,” aro aruklamsiog. Aruklamsiogpa, payalamekpa, kal ma'al tipto iliyabo saeag tarelamsiog. Lewi poneko awe torop aeag pukamogpa, Yesus yabalamogti, Lewi pukamogha ibog. Yesusti Lewiag, “Anna nanag neleplamnululam,” seogpa, Lewi sekom agha Yesus neleplamog.
MAR 2:15 Nelebaogpa, Yesusap Lewiri aeag piekti, kwaneng telamek. Lewiri aeag kwaneng telamek nimina, Lewi elkabo saelba uhiropnangdi yubu eptopnang “Kal ma'al paya,” aro aruksiropnang maikno babe wamek. Ora nimi sin sembe nimiri, “Sikin malia ulamang,” senehirop nimi babe, Lewiri aeag yaekti, Yesus yubu ka'ero neleptopnangap kwaneng nhon telamek. Lewi elkabo anabiag agha maiknori Yesus neleplamek ane sembe, sin babe Yesus nelepto kwaneng telamek.
MAR 2:16 Kwaneng telamekpa, Farisi nimi Musari samenag mome tobog yubu ambatsirop nimi taneko wamek. Wamekti, Yesusap nimi tanekoapti kwaneng nikag telameka tibogahiek. Yesus tibogaekti, Farisi nimi tanekori Yesusti yubu ka'ero neleptopnangag hailamsiekti, “Sa'a sembe Yesusap, sin Roma nimi kal ma'al poloro toropnangap, mali-malia urop nimi yogneap kwaneng nikag telamang?” aro haibahiek.
MAR 2:17 Haibahiekpa, Yesus ka'ebaogti, samoro ambarelamsiogti, “Nong wali nimiri wehesirop nimi sembe yepneho senelamang kom. Ot niktop nimiri aghabog wehesirop nimi sembe yepneho senelamang. Ane saog uro, na so'oag 'Yepsinun' aro yahinge nenena, nimiri, 'Na malia urop nimi,' aro el tahoba, nimi neneko 'Yopto yepsinun,' aro yahi. Ora nimiri 'Na walia aghabog ulamna,' sembaho tanena, nimi neneko sembe yopto yepsinun kom,” seog.
MAR 2:18 Yohanesti yubu ka'ero neleptopnangap Farisinangap sin tanekori, “Allahag moloro omeklamukap,” aro kwaneng ten koma omekto ulamek. Undo ulamekpa, nimi etpare Yesusag yaekti, hailamekti, “Sa'a sembe Yohanesti yubu ka'ero neleptopnangap Farisinangap sin nimi tanekori, 'Allah omeklamukap,' aro kwaneng ten koma ulamang aghana, andi yubu ka'ero neleptopnang tanekori kwaneng telamang?” aro hailamek.
MAR 2:19 Yesusti samoro ambarelamsiogti, “Na so'oag wamnaag abenena, nanag neleptopnang kwaneng tero kom-kom wamseng kom. Sunumna ambatsinun. Nimi nhondi kel torop tanena, elkaboap ma'ap tahengdi, kwaneng telamseng to, kom to? Kel torop nimi tanekoap, elkaboap kel torop sum eneko elenge nimi paliap wamangne sembe kwaneng tero kom-kom wamang kom. Ane saog uro nanap, na neleptopnangap nimi pali wamapti, nu nikag wamapne abeneko nu kwaneng ten koma wamnep kom.
MAR 2:20 Aghana ik nhon sum kel toropne poneko nimiri salero pabik tanena, elkabo kwaneng ten koma wamukang. Ane saog uro na wamna kom tanena, nari yubu ka'ero neleptopnang kwaneng ten koma wamukang,” seog.
MAR 2:21 Seogti, sunumna nhon babe ambarelamsiogti, “Ag samenag wirop ag wamsoba, ag eneko tilipto yabiho tanena, ag wiroba wendogne taebom agha nimiri ag samenne wetnelamang kom. Ag wendogne taebom agha leknero wetnebaheng tanena, wiroba wendogne nene samenne agha pulukto koloptanep. Undop agha ag samenne eneko taepto tinilamnari lom nubu tanep.
MAR 2:22 Nen sunumna nhon ambatsinun. Nimi nhondi anggur wana lolterop mag topsori, mag tero lina pham kambing kon agha wetnerop ag mag nene tero lirop. Anggur wana weneog lolterop mag tero lirop tanena, pham kambing kon agha wetnerop ag samenne ag tero lirop kom. Anggur lolterop mag neneko kon agha wetnerop ag tero lirop tanena, anggur mag nene agha ibya lanalamlori, kon agha wetnerop ag eneko nubu nenelamlo. Nubu nembaleba, kon agha wetnerop ag samenne pulugamsoba, kon serero langtukto phobaho tanena, kon agha wetnerop ag babe, anggur loloterop mag babe loba tanep. Ane sembe, nimiri anggur wana lolterop mag wendogne aghag tero lirop tanena, sop-sop kon eren kon agha wetnerop aghag tero lirop,” seog. Yesusti, “Wendogneap samenneap nikag pimnep kom,” seognena, likiptop yubuag agha lelamogti, “Nari wene ambarelamsinne neneap, a'undi samenag agha sop-sop kwaneng ten koma ul palamlomne neneap sunsunum urop kom,” aro likiptop yubu agha ambatsiog.
MAR 2:23 Olog wameka, Yahudi nimiri Allah yubu lerop sum taogpa, Yesusap eldi yubu ka'ero neleptopnangap palamekti, kwaneng roti wana sina gandum awe wero meroba nubungeag ina palamek. Palamek abeneko pere, Yesus eldi yubu ka'ero neleptopnangdi gandum wana tagto tobek.
MAR 2:24 Tagto tobekpa, Farisinangdi sin tibogahiekti, “Awe tomnep kom sum wamap aghana, gandum wana tagto tobang,” sembaek. Undo sembaekti, Yesusag hailamekti, “Kembamen! Musari samenag mome tobognena, Allah yubu lerop sumeneko awe tomnep kom aro mome tobog. Sa'a sembe an neleptopnangdi yubu nene ka'eban koma roti wana nene tagto tobang?” aro Yesusag haibaek.
MAR 2:25 Haibaekpa, Yesusti samoro ambarelamsiogti, “Nunisag nubunge Daud poneko samen wamogti, uaogne sembe a'un ekon, te? Abyatar memne poneko nimi sae agha Allah sembe pairopnang sikini nubunge wamog ko'oag Daud ponekori uaogne sembe mome toropneag agha kemerop kom, te? Memne Allah sembe pairopne nubunge Abyatar samen wamog ko'oag, Daudap elkaboap sindi kwaneng orog taog. Kwaneng orog taogpa, Daud poneko Allahri Mem Ae enekoag wa'iogpa, kwaneng roti Allah sembe pibekne taneko tatsiogpa, teek. Kwaneng roti teekne tanekona, Musari samenag mome tobogne sunsunum uro, 'Ot memnang Allah sembe pairopnangdi aghabog tenep,' seog. Aghana, Daudap elkaboapti kwaneng roti neneko teekne sembe Allahri, 'Malia uang,' seog kom.
MAR 2:27 Allahri nimi sam sumbahiog. Amiknena, Allah yubu lero tektek papto urop sumeneko nimi wali uro wamnepne sembe nembirogti tatsiog.
MAR 2:28 Allah yubu lero tektek papto urop sum babe nimi sembe tatsiog, ane sembe nimiri uanepne sembe na imag agha mog so'oag nimi tahingeri salelamnari, o'obanep,” seog.
MAR 3:1 Olog wamekpa, Allah yubu lerop sum taogpa, Yesus nen Yahudi nimi poloro winirop ae Allah yubu lerop aeag wa'iog. Wa'iogpa, nimi nhon sae tara malinge ae lomag wamog.
MAR 3:2 Wamogpa, Farisi nimi etpare babe ae lom neneag wamek. Sin Farisi nimi agha nenneri, “Yesusag tam pipsebe,” aro Yesusti uropne keme nenelamek. Sin Farisi nimi seneraglamekti, “Sumene Allah yubu lero tek-tek papto urop sum wamap. Musari samenag mome tobog yubu sunsunum uro nimiri awe tomnep kom aghana, Yesusti sumene nimi nene wali nembalul to, kom to?” aro Yesus kemelamek.
MAR 3:3 Kemelamekpa, Yesusti sae tara malinge ponekoag yubu lelamogti, “Yae, nimi ni whingag ane sekel ae,” seog.
MAR 3:4 Seogti, nimi ni wamekag ambarelamsiogti, “Wela sembalom? Allah yubu lero tek-tek papto urop sum wamapnena, Musari samenag aruktop yubu mome tobogha sunsunum uro nimiri huanep? Musari mome tobogne sunsunum uro nimiri walia uanep to, malia uanep to? Tek-tek papto urop sum wamapnena, nimi wali nembahinep to, nimi ya'ag opsinep to?” aro ambatsiog. Wene aro ambatsiog aghana, sin yubu koma wamek.
MAR 3:5 Yubu koma wamekpa, Yesusti el wamogti, “Farisinangdi sae malinge poneko sembe o'ona senelamang kom,” sembaogti, wanaag yonge waelbaog. Wanaag yonge waelbaogpa, wana mali sembaogti, ni wamekag kanero kembahiog. Kembahiogti, sae tara malinge ponekoag yubu lelamogti, “Sae nginikae,” seog. Seogpa, poneko sae nginikaogpa, sae wali taog.
MAR 3:6 Wali taogpa, tibogaekti Farisinang taneko nimi poloro winirop aeag agha lambaek. Lambaekti, “Welaro Yesus obukap?” aro Galilea mog so'o saelba uropne Herodesti nimiap ma'ap taekti, “Yesus obukap,” aro yubu nikne lebek. Lelamekpa, Yesusap eldi yubu ka'ero neleptopnangap ko'oro piek.
MAR 3:7 Yesusap eldi yubu ka'ero neleptopnangap wamekag laplobi agha mag Galilea sin abolag piek. Piekpa, Galilea nimi maikno nimi teng-tengne Yesusag nelepto piek.
MAR 3:8 Yesus amik nelepto piek nimina, as Yerusalem nimi babe, Yerusalem kanero mog so'o Yudea nimi babe yaek. Mag kwasag sip mog so'o Idumea nimi babe, mag Yordan kauro yale sip nimi babe, heng purukul pirobag sip as Tirusap as Sidonap kanero wamek nimi babe, nimi maikno teng-tengne yaek. Sin taneko yaekne, Yesusti ulamogne sembe ka'ebaekti, kemelaek.
MAR 3:9 Nimi maikno Yesusag kemelaekpa, Yesusti nimi maikno wali nenelamsiog. Wali nenelamsiogpa, naiktop nimi maikno tanekori, “Nu babe Yesus nongag saelbahabeba, wali nembahiso,” aro sendebel alamek. Ane sembe Yesusti eldi yubu ka'ero neleptopnangag ambarelamsiogti, “Nimi taneri na lingnilomniikagti, na mag alip toman pinunne sembe kabong nhon weamlulom,” seog.
MAR 3:11 Sendebel alamekpa, sin taneko wamek nimi anabiag agha phia yonge kulomag uahirop nimiri Yesus tibogaek tanena, Yesus whingag u amupto malangkalamek. Malingkina yubu haum aro lelamekti, “Anna Allah elme,” alamek.
MAR 3:12 Undo lelamek aghana, phia yonge tanekori, “Yesus Allah Elme wamla,” aro lag phoro lelamekne sembe karongdi, Yesusti sikinag aruklamsiogti, “A'un yubu kom tahut! Na Yesus etne wamnange sembe leplulom kom!” aro arukahiog.
MAR 3:13 Yesus yim nhonag waelbaogti, eldi wanaag agha, “Nimi neneap neneap wali yopsinun,” sembaogne sunsunum uro yopsiogpa, nimi taneko el yaghag yaek. Yaekpa, nimi aobare wepsiogti, sekitsiog. Wepto sekitsiog nimina: Simon, el si nhon Petrus aro Yesusti si engkaogne poneko webog. Zebedeus elmabo phende Yakobusap ilipsae Yohanesap wepsiogti, yubu maikno mikip uro lelamdekne sembe, “Boanerges,” aro si engkahiog. Yahudi nimiri yubuagna, “Limang elmabo,” aro engkahiog. Andreasap Filipusap Bartolomeusap Matiusap Tomasap Alfeus elme Yakobusap Tadeusap wepsiog. Simon, eldi “Yahudi nimi mo seksebe,” aro ulamogne ponekoap Yudas Iskariotne Yesus aisanangag pankhebaogne ponekoap babe wepsiog. Wepsiogti ambarelamsiogti, “Nari a'un wepsin. A'un nanap ma'aro wapmundi, nikag wamukap. 'A'undi phia yonge nimi kulomag agha yag lanalamsululom,' aro a'undi saeag mikipne pimnun. Nari a'un sembe, 'Phia yonge nimi kulomag agha yag lanalamsimundi, Allah yubu ambatto tongolamsululom,' aro pogsinun,” seog.
MAR 3:20 Yim aneko laplobi agha Yesus aeag samoro piog. Aeag piogti wamoghag, nimi maikno, “Yesus kemel pukap,” aro yaek nimi along nen ae anekoag longolaek. Undo longolaekpa, Yesusap eldi yubu ka'ero neleptopnangapti yeplamsiek paghabog kwaneng ologha babe tenep kom wamog.
MAR 3:21 Yesusti ulamogne sembe nimiri lel palamekpa, Yesus ilipsabo taptopneap ilinap ka'ebaekti, “El nenek saelbal,” sembaek. Ane sembe ka'ebaekti, enero tol pukap aro Yesus yaghag yalamek.
MAR 3:22 Anam enel an komag, Musari samenag mome tobog yubu ambatsiropnang Yerusalema Yesus wamoghag kulukulaekti, lelamekti, “Phia sikini nubunge si Beelzebul nenekori el mo Yesus kulomag wa'io. Wa'ionge nenekori Yesusag mikipne pibo andari, eldi phia yag lanalamsil,” seek.
MAR 3:23 Seekpa, Yesusti sin Musari mome tobogne ambatsiropnang taneko yopsiogti, sunumna etpare pere agha ambarelamsiog. Ambarelamsiogti, “'Phia sikini nubunge mikipne pere agha phia yag lanalamsil,' alamlom. Undop agha, 'Phia sikini nubunge Satanas nenekori nimi kulomag agha eldamne yag lanaptanep,' alamlom, te?
MAR 3:24 As nhon pogto mal talamnari, as aneko khaepto wali uro wamnep to, kom to?
MAR 3:25 Ae lom nhon nimi mamun aisa nenehiro mal tangkamna tanena, khaepto wali uro wamnep kom.
MAR 3:26 Ane saog uro phia sikini nubunge Satanas nenekori eldamne aisa neneptangto elkabo yag lanalamsisoba, sin leya pehengpa, el mikip uro wamso komdi, timbaho. Aghana phia sikini nubunge Satanas nenekori eldamne aisa neneptangtop komdi, el mikip wamla.
MAR 3:27 Mikip wamla aghana, nari phia yag lanalamsinne sembe sunumna ambatsinun. Nimi mikipneri ae wamsoba, nimi etneri babe ae aneko wa'iro nimi mikipne anekoringe haogha tomnep kom. Ot yog nimi, mikip phelektop nimiri ae ngainge mikipne neneko salero haing sae kaupso taneogna, ae anekoag wa'ina ae ngainge mikipneringe taluro tomnep. Sunumna nenena, nari mikip phelektopneag agha phia yag lanalamsinne sembe a'un ambatsin,” seog.
MAR 3:28 Wene aro lebogpa, Musari samenag mome tobogne ambatsiropnangdi, “Yesusti phia sikini nubungeri mikipneag agha ulamla,” seekne sembe, Yesusti nen tipto ambarelamsiogti, “Sikne agha nari ambatsineba, wali uro ka'ebalulom. Nia mangkina nimiri mali-malia uropneap nimiri san leropneap ni Allahri wailag nenero tam kom nembanep. Aghana nimi etneri Allah Eldamne Yame Walinge san lepseng tanena, Allahri tam nene orog nembanep kom. Nimi etneri Allah Yame Walinge sembe mali aro san lerop tanena, malia uropne neneko Allahri tam orog nemban koma tam ya'ag uropne wamlul,” seog.
MAR 3:31 Wene aro lebogpa, Yesus ilinap ilipsaboap yaek. Yaekag aneko nimi maikno Yesus peramag kanero pulaekti, longolamek ane sembe, ilinap ilipsaboap asag nangnangkamek. Nangnangkamekti nimi nhonag, “Yesus yobol wa'ilulam!” aro poghekpa, Yesus kanero pukamek nimi anekori tipto yubu lelamekti, “An aninap anipsaboap asag wamangdi, elangkeang,” seek.
MAR 3:33 Wene seekpa, Yesusti samoro ambarelamsiogti, “'An aninap anipsaboap,' selom aghana, naninap naipsaboap ane etne?” seog.
MAR 3:34 Seogti, el peramag kanero pukamek nimi kemelamsiogti, yubu lelamogti, “Kembahilulom. Na nanin naipsabo wamloa saogne tane wamang.
MAR 3:35 Nimi etneri Allahri seneropne sunsunum uro ul palamle tanena, nimi eneko sembe 'Naipsae, naipsa'el, nanin,' senelamsindi, o'ona senelamsin,” seog.
MAR 4:1 Yesusti nen Galilea mag sin abolag piogti, alniro yubu ambarelamsiog. Ambarelamsiogpa, nimi maikno sirik longowarekaekpa, el mag alip toman pirop kabong nhonag pulingkiog. Kabong lomag pulingkiogti, “Nimiri na tiboganeikpa, yubu ambatsinun,” aro mag alibag olog ko'oro piogpa, nimi maikno taneko mag abolag sekamek.
MAR 4:2 Sekamekpa, Yesusti likiptop yubu agha tam maikno sembe sunumna ambarelamsiog. Ambarelamsiogne undo eldi sikin ambarelamsiog:
MAR 4:3 “Ka'eamlulom! Nari ambatsinenge wali uro seneraglamlulom! Awe weropne nhondi so'oag wana togtoba maikno yamoro toghol palamog.
MAR 4:4 Yamoro toglamogba, wana nenne inaag timbaog. Inaag timbaogpa, winang yingkina wana togna toghogha taneko ni toro teek.
MAR 4:5 Wana nenne babe so'o ologhag kirik phalag timbaog. Anekoag timbaogti, so'o ologhari wana togna toghogha aneko elemag pongo saelbaog.
MAR 4:6 Pongo saelbaog aghana kirik phalag so'o ologhari, yareng weag wa'in kom. Ane sembe heng waelbaogti, bobori pongoraba taneko elemag halo aro ul taog.
MAR 4:7 Nenne babe pongoroba alog aba nusamag timbaogti, pongkaog aghana, alog aba tanekori niknibaogpa, aweag toghogne neneko wana mauamog kom.
MAR 4:8 Aghana nenne babe so'o mesaag sukuptobag timbaog. So'o mesaag ingkiogne wali uro pongkaogti, wana mauamog. Pongkaogti, yo'o nenneri wana teng nhon, nenneri wana teng phende, nenneri wana teng tombare maubaog,” seog.
MAR 4:9 Seogti, Yesusti ambarelamsiogti, “Nimi ni ao wamla ane sembe, sunumna wene ka'ebalom tanena, wali uro seneraglamlulom,” seog.
MAR 4:10 Seogti, el mo wamogpa, eldi yubu ka'ero neleptopnang aobare abenekoap, yog nimi elap wamek nimiap Elag hailaek. Sindi Yesusag hailamekti, “Likiptop yubuag agha sunumna etpare sunuro ambatsilamne neneko, tam huropne sembe ambatsilam,” aro haibaek.
MAR 4:11 Haibaekpa, eldi ambarelamsiogti, “Amik Allahri so'oag nimi maikno saelbamsilul. Allahri nimi maikno saelbamsilula welaro wamlulne sembe samenag tognoro wamog. Tognoro wamog aghana, na wene a'un sembe lag phoro ambarelamsin. Aghana sin nanag sikne aro seneragtop kom nimi sembe likiptop yubuag agha ni ambarelamsin.
MAR 4:12 Samenag Allah yubu silimu tiptop nimi nhondi sik uro yabilulne sembe mome toro pibog. Eldi Allah yubu tipto mome toro pibognena, 'Wanaag agha ka'ebahengdi, seneragsengdi, Allahag samoro yaheng tanena, Allahri sindi malia uropne tam orog nenero wailag nembalul. Aghana, sindi sop-sop 'Ipsene' aro haingdi ililamukang aghana, wanaag agha seneraghukang kom. 'Ka'ebahane' aro aori ka'elamukang aghana, wanaag agha ka'ebaukang kom,' aro mome toro pibog. Ane sembe nari sin undop saog nimiag likiptop yubuag agha sunumna sunuro ambarlamsin,” seog.
MAR 4:13 Wene seogti, Yesusti nen eldi yubu ka'ero neleptopnang ambarelamsiogti, “A'un sunumna wana yamoro togtoba sembe seneragnep kom tanena, sunumna orange ambatsinenge babe welaro seneraglulom?
MAR 4:14 Sunumna aneko tibin nembahinun: Wana aweag yamoro togtopne poneko Allah yubu walinge ambatto poa tongohirop nimi sembe lemna.
MAR 4:15 Wana toglamnaba, inaag yingkirop sennena, Allah yubu ka'erop nimi sembe lemna. Allah yubu ambatto poa tongohirop nimiri ambatsirop yubu ene nimi eneko ka'erop. Ka'erop aghana, ka'eamna abeneko pere phia sikini nubunge nenekori yingkina nimi wanaag tognange abeneko toltol yingkirop.
MAR 4:16 Wana toglamnaba, kirik phalag yingkirop sennena, Allah yubu ambarelamsinba, peket elemag yeng uro ka'erop nimi sembe lemna.
MAR 4:17 Elemag yeng uro ka'erop aghana, Allah yubu ambatsirop yubu eneko nimi enekori wanaag yareng pelengka urop komne saog wamla ane sembe, nimi eneko khaepto wamnep kom. Nimi undopnena, Allah yubu sunsunum uro ul piropne sembe eraruk tale tanena, Allah yubu saelban koma elem uro lilohirop. Allah yubu sunsunum uro ul piropne sembe ora nimiri malia ulamsiik tanena, elem uro Allah yubu sae limnep. Pongoroba yareng pelengka urop komne saog uro, nimi undopne khaepto wamnep kom.
MAR 4:18 Wana toglamnaba, pongoroba alog aba nusamag yingkirop sennena, nimi nenne Allah yubu ka'erop nimi sembe lemna.
MAR 4:19 Undop nimi anekona Allah yubu ka'erop aghana, sindi wanaag sop-sop, 'Wela wamnun,' aro wana ikin uro seneraglamang. Undo seneraglamangdi, 'Tup tahaneri, nia ni walinge nari saeag taho,' senenne sindi wanaag to'op tangtopneri, Allah yubu niknil orop. Niknilamlaba, sindi wanaag kolo orogti, Allah yubu pongoro wana maubanep kom saog wamla.
MAR 4:20 Wana toglamnaba, so'o mesa sukuptobag yingkirop sennena, sin Allah yubu ka'ero wali uro seneragto salerop nimi sembe lemna. Sindi wali uro Allah yubu saelbanne agha sindi wanaag Allah yubu pongoro wana maiknoro mauamla. Nenneri wana teng nhon maurop, nenneri wana teng phende maurop, nenneri teng tombare maurop saog uro sindi wanaag wamla,” aro Yesusti tibin nenero ambatsiog.
MAR 4:21 Seogti, Yesusti likiptop yubuag sunumna nhon babe ambarelamsiogti, “Nimiri whea timbom agha auk pok kau mombolag niknirop te? Kombagha tanena, auk pog mamneba mombolag tognorop te? Kom! Nimiri whea timbom agha 'Eptobag wareamlul,' aro laghag ikto pairop.
MAR 4:22 Allahri samenag salag lebogne whea saog uro wamla. Allahri yubu lebogne 'Ya'ag tognoro wamlul,' aro lebog kom. Nia tognoro wamlange, 'Lag taleba, el taukang,' aro lebog.
MAR 4:23 Nimi ni ao wamla ane sembe, nari yubu lelamnange wali uro ka'ebalulom,” seog.
MAR 4:24 Seogti, Yesusti nen tipto lelamogti, “Nari ambarelamsinne wene ka'elamlomdi, wali uro seneraglamlulom! A'undi ka'elamlom yubu nene sunuro seneraglamlomne sunsunum uro Allahri babe a'un sumbahileri, tam kemero karebi agha tatsilul. Abeneog kom aghana, nen phelekto tatsilul.
MAR 4:25 Nimi etneri, 'Na olog ka'eamnari, seneragna aghana, wali uro el tahane,' senelamle tanena, elag ma'aro tatlul. Aghana nimi etneri, 'Olog seneragnep komdi, limnun,' senelamle tanena, seneragna ologha elag wamlange babe kom talul,” seog.
MAR 4:26 Yesusti nen yubu lelamogti, “Amik Allahri mog so'oag nimi maikno saelbamsilul. Mog so'oag nimi saelbamsilulne nenena, nimi nhondi wana togna togtoba aweag meropne saog uro wamla.
MAR 4:27 Wana aweag toghi agha, inipnag mamnep. Kweleknag puknep. Mabom pukom alamnaba, wana togtoba taneko pongoro nubu tanep. Mabom pukom alamnari kemelamnaba, nubu tangtop aghana, pongoroba ane welaro pongorop anena, nimi togna merop nimi enekona ekon.
MAR 4:28 Wana so'oag wamlange mo pongorop. Mo pongoro towalengkandi, yo'o waelban tanena, es uandi, wana maurop.
MAR 4:29 Wana maubandi, whi tan tanena, ngainge poneko imnari, 'Yongorop li yan tanena tagnun,' sembanep,” aro sunumna Allahri mog so'oag nimi saelbamsilulne sembe Yesusti likiptop yubu ambatsiog.
MAR 4:30 Seogti, Yesusti nen lelamogti, “Allahri mog so'oag nimi saelba uhirop nimi wene ologha aghana, amik sum Allahri mog so'oag nimi maikno saelbamsilul. Maikno saelbamsilulne ane huropneag agha sunuro ambatsinep? Tam huropneag agha a'unag tibin nenero sumbatsinun?
MAR 4:31 Allahri amik ma'arop nimi maikno saelbahilulne nenekona, kwarang si so'oag togtopne saog uro wamla. Kwarang si nene sik uro olog sirik.
MAR 4:32 Nimiri kwarang si olog sirikne nene toro eldi aweag memna tanena, pongoro meroba nenne memnange anabiag agha, el agha alikin sirik uro pongoro waelbanep. Pongoro waelbandi, sae la'imbanba, winangdi kal sae tanekoag ae solanep,” aro sunuro ambatsiog.
MAR 4:33 Sunumna undo saogne maikno likiptop yubuag agha ambarelamsiog. Likiptop kom yubuag agha nimi maikno whingag ambarelamsiog kom. Ambarelamsiog yubu enena, nimiri wanaag seneragnepne sunsunum uro ambarelamsiog. Ambarelamsiog aghana, nimi maikno lambaekpa, Yesusap eldi yubu ka'ero neleptopnangap mo wamekti, likiptop yubu ambatsiog yubu eneko ni tibin nenero ambarelamsiog.
MAR 4:35 Sumeneko ae sin taogpa, Yesusti el neleptopnangag yubu lelamogti, “Yahut! Nun mag sin tara sip kauro pukapti,” seog.
MAR 4:36 Seogti, eldi yubu ka'ero neleptopnangap kabong nhonag wa'iek. Wa'iekpa, yog nimi babe, “Nhon pukap,” aro sindi kabong etpare lomag wa'iekpa, nimi mag abolag wamekne taneko laplobi agha, “Mag kauro tara sip pukap,” aro mag alip toman piek.
MAR 4:37 Palamekag abeneko, khao nubunge alniro ulamogti, mag kola'epto yalamogti, kabongag sibil alamog. Sibil alamogpa, mag saplukto kabongag wa'alamogpa, kabong anekoag mag teknebanep saog ulamog.
MAR 4:38 Undo unulamogpa, Yesus kabong pomaghag sip wamogha usog eptoba alibag malamog. Malamogpa, eldi yubu ka'ero neleptopnangdi kamolamekti, “Nai! Yubu ambatsiropne! Magti nu olamsilba, tebabeagti, an log semban koma mo malamlam, te?” seek.
MAR 4:39 Seekpa, Yesus pukogti, khao anekoag walamogti, mag kola'epto yalamogne anekoag, “Angnibae! Paplobe!” aro irikaog. Wene seogpa, khao aneko angnibaogpa, mag aneko babe paplobog.
MAR 4:40 Paplobogpa, Yesusti eldi yubu ka'ero neleptopnangag yubu lelamogti, “Sa'a sembe a'un log senelamlom? Sa'a sembe a'undi nanag 'Sikne,' aro seneraglamnelom kom?” seog.
MAR 4:41 Undo unuaogpa, sin log lelem, “Yaghe, mane agha ual,” sembaek. Sembaekti, sin mamun hail talamekti, “Nimi enena etne? Khaoap mag kola'epto yabiropneap eldi aruksirop yubu leplange ka'ebarangdi, angnibarang,” alamek.
MAR 5:1 Kabongag agha mag alip toman palamekti, Yesusap el neleptopnangap Galilea mag sin kauro mog so'o Gerasa piek.
MAR 5:2 Piekti, Yesus kabong lomag agha kuluka yangkalamogpa, kaubuni nhon phia kulomag wa'iog nimi nhondi Yesus yalamogha tiboghaog. Nimi enekona, Yesus anam yan komag phia el kulomag wa'iogpa, nimi teptop nimi kirik selenga lomag pail pirobag ua ulamog. Inipnag kweleknag nimi teptoba kirik lomag pail pirobag yim kongtenag taneko ua ulamogti, haum aro kirik agha nongag karebel dalamog. Yog nimiri “El yae wamukap,” aro ik sulu salero sae mamunap, yan mamunap haing kauplamek aghana, sop-sop pulpulukto eplamsiog. Yan sae haing kauplameknena, nimiri haing pulukanep kom haing besiag agha sunurop haing babe kogto puluklolamsiog. El kulomag phia ua ulamogneri mikipti, nimi nhondi babe saelbanep kom ulamog. Phia kulomag wamog nimi enekori Yesus yalamogha weag agha tiboghaogti, nimi teptopne kirik selenga lomag pail pirobag aneko laplobi agha merero Yesus wamoghag yingkiog. Yingkiogti, Yesus whingag yabu sanukto u amupto pulingkiog.
MAR 5:7 Yan sanukto u amupto pulingkiogpa, Yesusti phia kulomag wamog nimi anekoag lelamogti, “Phia yonge, nimi ane kulomag wamlamne, lambae!” seog. Seogpa, phia yonge yubu mikip uro haum alamogti, “Yesuso, Allah paliag uropne Elme wamlamne! Sa'a sembe na neplamnelam? Na 'Seklebale' aro na omneheng kom. Allah siag agha 'Opkenun kom,' aro nanag salag lero ambatnehom!” seog.
MAR 5:9 Seogpa, Yesusti phia yonge anekoag hailamogti, “An si etne?” seog. Seogpa, samoro lelamogti, “Nu phia maikno teknero nimi ane kulomag wamap. Ane sembe, na si Legion,” aro ambarog.
MAR 5:10 Ambarogti, Yesusag sarikto ko'oro mololamogti, “Andi mog so'o aneag agha nu yag lambahiseng kom,” aro mololamog.
MAR 5:11 Sin wameka peramag pham maikno main alunag so'o ero toro telamek.
MAR 5:12 Phia yonge tanekori Yesusag mololamekti, “Nu pham kulomag wa'al phukap. Andi nunag, 'Pham taneag wa'isut,' aro nu arukahisom,” aro mololamek.
MAR 5:13 Seekpa, Yesusti, “Hae, pululom,” seog. Seogpa, phia yonge taneko ponekoag agha lambaekti, pham taneko kulomag wa'iek. Wa'iekpa, pham taneko merelamekti, kwerenag eba timbom agha mag sinag tagpurukom seekti, tebaek. Purukom seek pham taneko teng-tengne (2.000) tagpurukom seekti, tebaek.
MAR 5:14 Mag sinag tagpurukom seekti tebaekpa, pham yae paia ulamsieknang taneko logti laplobi agha merebaek. As peramag wamek nimiag merebaekti, uro yabiogne sembe ambarel phiek. Ambarel phiekpa, nimi taneko sindi asag lambaekti, “Sa'a uro yabil,” aro kemelaek.
MAR 5:15 Yesusag yaekti, kemelamekpa, el samen phia maikno kulomag wamog nimi wali taogne poneko ane pukamog. Wali taogti, ag nongag wangkamogti, wana peket uro pukamog. Pukamogpa, ibekti, “Welaro uro yabil?” aro log tahiog.
MAR 5:16 Log tahiogpa, ni uro yabiogne ibek nimi tanekori sin kemelaek nimiag el nenelamsiek. El nenero ambarelamsiekti, “El phia kulomag wamo nimi agha Yesusti phia yag lambahilba, phia phamag wa'iangpa, mag sinag tagpurukom seangdi, tebang,” aro el nenero ambatsiek.
MAR 5:17 Wene aro ambatsiekpa, ka'ebaekti, mog so'o eneko nimiri Yesusag, “Nuri mog so'o eneag wamlulam kom. Pululam,” aro molbaek.
MAR 5:18 “Pululam,” seekpa, Yesus “Pinun” aro kabong lomag wa'alamog abeneko pere, phia kulomag wa'iogha wali taogne ponekori Yesusag mololamogti, “Nanap wali nhon pukap te?” seog.
MAR 5:19 Wene seog aghana, Yesusti, “Nanap nhon pukap kom aghana, andi aeag pululam. Im So'o Ngainge Ponekori anag yareag sembangkeldi, maiknoro yepkelba, wali talam. O'ona maikno senero yepkelne sembe angkaboag ambarel phululam,” seog.
MAR 5:20 Seogpa, piogti, nimi ponekori, “Yesusti na maiknoro yepneori, wali nembaneo,” aro ambarel phiog. Eldinge as aghabog ambarel phiog kom aghana, mog so'o si As Sa'obare nimiag babe ambarel phiog. Ambarelamsiogha ka'ebaekti, As Sa'obare mog so'o taneko nimi niri, “Yaghe, mane agha uao,” sembaek.
MAR 5:21 Yesus mog so'o Gerasa wamogha, nen kabong lomag wa'iogti, mag sin Galilea kauro tara sip piog. Piogti, kabong lomag agha kuluka yangkaogpa, nimi maikno mag sin abolag wamek nimi Yesus peramag warekto longolamek.
MAR 5:22 Yesus mag sin abolag wamogpa, nengabo nhon si Yairus yaog. Yaogne poneko elna, as taneko nimi sembe Allah yubu lero nimi poloro winirop ae saleropne poneko Yesus wamoghag yaog. Yesus ibogti, Yesus yan tamag yabu sanukto uamupto malangkina kibog.
MAR 5:23 Malingkina kibogti, Yesusag wanaag agha mololamogti, “Nani! Nari kelme tebanep saog wamla. El tebaleagti, an yamendi, 'Nanenge kelme tebaleag' aro sae pipmenba, wali talul,” aro molbaog.
MAR 5:24 Wene aro molbaogpa, Yesus babe Yairusap nhon pirek. Palamdekpa nimi maikno neleplamekti, nimi lingniptangto palamek.
MAR 5:25 Sin Yesus nelepto lingniptangto palamek nimi anabiag agha, kelabo nhon hengkun aobare eneng sopsop palamog kel sin nusamag wamog.
MAR 5:26 Eneng palamog kelenekona, samenag agha whesiropnang maiknori “Yebukap,” aro ulamekpa, kal ma'al tarelamsiog. Kal ma'al ni eldi saeag agha tarelamsiogpa, whesiropnangdi ulamekne pere agha maiknoro seklelamogpog, naikna aneko orog taog kom. Wenena, ot kal ma'al orog taog aghana, naikna luluro nubu taogpa, wamog.
MAR 5:27 Seklero naiklamog aghana, Yesusti nimi maikno wali nenelamsiogne sembe kel enekori ka'ebaogti, senelamogti, “Ot eldi ag nongag wangkamlange agha po'obahaneri, wali tanun,” sembaog. Ane sembe, Yesus nelepto palamek nimi anabiag agha kel eneko Yesus amik peram tang-tang yalamogti, eldi nongag enektop ag kel enekori po'obaog.
MAR 5:29 Aghag po'olamog abeneko pere eneng palamogne aneko pabog. Kel enekori, “Wene seklenne orog talba, sik uro wali tan,” sembaogti, el taog.
MAR 5:30 Kel eneko wali taog abeneko pere, Yesus el taogti, “Mikipne nanag wamlange agha nimi nhon weneog wali tal,” sembaog. Sembaogti, wailag sip taongkom agha hailamsiogti, “Etneri nari aghag po'obal?” aro haibahiog.
MAR 5:31 Yesusti haibahiogpa, eldi yubu ka'ero neleptopnang nhondi samoro ambarelamogti, “Nimi maikno lingnil talamanga iamsilam aghana andi, 'Etneri nari aghag po'obal?' aro haibahilam,” seog.
MAR 5:32 Wene seog aghana, Yesusti nen “Nari aghag po'obal nimi eneko imnun,” aro keme warekahiog.
MAR 5:33 Keme wareklamsiogpa, kel enekori senelamogti, “Yesusti mikipneag agha wali tan,” aro el uro wamog. Kel eneko logti pet-pet aro Yesus whingag yingkina uamupto malingkiogti, ni uro yabiogne sembe lag phoro Yesusag ambarog.
MAR 5:34 Lag phoro ambarogpa Yesusti, “Namangkel, Nanag, 'Wali nembanelul,' aro nanag sikne aro seneraglamnelamne agha wali talam. Anag naikna seklelamomne kom talba, ya'ag wali talam. Wana aingniro wapmendi, pululam,” seog.
MAR 5:35 Yesusti kelenekoag yubu lelamog abeneko, Allah yubu lerop ae saelbamogne poneko Yairusti arukna etpare yaek. Yaekti ambarelamekti, “Nai, kelme aneko tebal. Ya'ag loba talbana, yubu ambatsiropne poneri hualul kombana, enero poa peheng kom,” seek.
MAR 5:36 Seek aghana, sindi yubu lebekne sembe Yesusti ka'eban koma saog uaog. Ka'eban koma saog uaogti, Yesusti Allah yubu lerop ae saelbamogne poneko Yairusag yubu lelamogti, “Log sembaheng kom. Ot nanag 'sikne' aro seneraglamnululam,” seog.
MAR 5:37 Wene seogti, Yesus nen tipto palamog aghana, el nelepto palamek nimi ni tanekoag, “Ane wamlulom,” aro irikahiog. Ot Petrusap, Yakobusap, Yakobus ilipsae Yohanesap, sin nimi wilindi abenekoag, “Nhon pukap,” seogti Yesusap nhon Yairusti aeag piek.
MAR 5:38 Yairusti aeag peram palamekpa, Yesusti kemelamsiogpa, nimi engenari pinim kolomna alamekpa, yubu maiknoro lelamek.
MAR 5:39 Engenari pinim kolomna alamekpa, Yairusti aeag aneko Yesus wa'iogti, “Sa'a sembe engelamlomdi, yubu maikno lelamlom? Kelme anena mali tal kom. Elna mana agha malamla,” seog.
MAR 5:40 Yesusti wene seogne sembe nimi tanekori Yesusag ogsolamek. Ogsolamekpa nimi tanekoag, “A'un asag lambahut,” aro asag yag lambahiog. Yag lambahiogti, ot kelmeneko iliap ilinap, el neleptopnang wilindi yaekne abenekoap aghabog, kelme mali tangtobag aneko wa'iek.
MAR 5:41 Wa'iekti Yesusti kelme aneko sae saelbamogti, Yahudi nimiri samenag yubu lerop yubuag lelamogti, “Talita kum,” seog. Nun yubuag, “Namangkel, anag yubu lelamna. Puke!” seog.
MAR 5:42 “Puke!” seog abeneko pere, kelmeneko puka sekelingkiogti yabalamog. Kelmeneko mangkaekag agha heng kun aobare wamogpog tebaogpa, Yesusti kamag nembaog. Sindi kelmeneko kamag uro wamogha haingdi ibekti, “Yaghe manegha ual,” aro lo'om paibon alamek.
MAR 5:43 Lo'om paibon alamekpa, Yesusti iriktop yubu ambarelamsiogti, “Kelme ane nen kamag talne sembe nimi nhondi babe nimiag ambatsiseng kom,” aro mikip uro ambatsiog. Wene seogti, nen tipto lelamogti, “Kelme ane kwaneng tatmunba tulul,” seog.
MAR 6:1 As Kapernaum aneko laplobi agha Yesusap eldi yubu ka'ero neleptopnangap eldi asag Nasaret piek.
MAR 6:2 Piekti, Allah yubu lerop sum taogpa, Yahudi nimiri poloro winirop aeag wa'iekpa, Yesusti Allah yubu ambarelamsiog. Ambarelamsiogpa, eldi asag nimi maikno wamekne taneko Yesusti ambarelamsiogne ka'ebaekti, “Yaghe,” seek. Seek aghana, sindi wanaag karong senelamekti, sin mamun hailtalamekti, “El neneko etneri wana hekaoba, undo ambarelamsil? Mikip huropneag agha eldi sae pere agha nimiri uanep komne, Allah Eldamneri uanep saogne ulamla? Nimi enena, Mariam elme ae soropne neneko ane. Ilipsabo Yakobusap, Yosesap, Yudasap, Simonap wamangne nu el. Ilipsa'elabo babe tane wamang. Nimi eneko kom to?” aro karong senelamekti, eldi yubu wa'epto ka'elamek kom.
MAR 6:4 Karong senelamekti, ka'elamek komne sembe, Yesusti ambarelamsiogti, “Allahri yubu silimu tiptop nimi elenge asag agha lambahori, yog nimiri asag Allah yubu ambatsisoba, yog asag nimiri el kipto ka'erop. Ot Allahri yubu silimu tiptop nimiri elenge asag Allah yubu ambatsiso tanena, eldi ae lom nimi babe, elenge asag nimi babe el kipto ka'erop kom,” aro ambatsiog.
MAR 6:5 As aneko wamek nimiri elag “Sikne” aro seneraglamek komne sembe Yesusti eldi wanaag, “Yaghe, huro sik senelamang komba” sembaog. El sin Nasaret nimi nusamag wamogpa, elag sikne aro seneraglamek kombana, “Allahri Yesus pere agha ual,” senenne kekneba uanep kom saog wamog. Ot nimi etpare naiklamek nimi as anekoag wamekpa, Yesusti sinag sae pipsiogti, wali nembahiog. Nasaret nimiri sik senelamek komne sembe Yesusti, “Yaghe,” senelamogti, as kanero wamek nimi taneko “Ka'ebaukang,” aro nhon asag, nhon asag pina, Allah yubu ambatto poa yabalamsiog.
MAR 6:7 Allah yubu ambatto poa tongolamsiekti, eldi yubu ka'ero neleptopnang aobare abeneko “Yahut,” aro yopsiog. Yopsiogti, ambarelamsiogti, “A'un nimi aobare wamlomne tane phende-phende palamlulom. Nari a'un poglamsinnena, 'Palapmundi, phia nimi kulomag ulamsiangne yag lanalamsululom,' aro nari mikipne a'unag palilamsin,” aro pogsiog.
MAR 6:8 Poglamsiog abeneko pere aruklamsiogti, “Ot kame tunguna saelbapmundi pululom. Orange pabaheng kom. Kwaneng teroba babe, ag nubunge babe, kal ma'al babe pabaheng kom.
MAR 6:9 Palapmunne, yan sangag wangaropne enekalulom. Ag nongag wangkapmunne babe, hai pabalulom aghana, ag nongag wangkanepne lununne pabaheng kom.
MAR 6:10 As nhonag wa'al pimunba, ae ngainge nhondi, 'Nari aeag malamturom,' seleba, wapmundi, ae enekoag aghabog malamlulom. As anekoag ambarelamsimundi, nhon aeag mal pang, nhon aeag mal pang uaheng kom. Nimi nhondi aeag og malapmundi, as anekoag wamik nimi sembe komopto ambatsimun taneogna, ae aneko laplobi agha as anekoa lambamundi, wali pululom.
MAR 6:11 Aghana a'un as nhonag pimunba, nimi tanekori a'undi yubu ka'ebaik kom tanena, as aneko laplobi agha pululom. Laplobi agha palapmundi, so'o ubun yanag wamlenge po'oro pelengkalulom. Po'oro pelengkipmunne ane as aneko nimiri kembaikti, 'Malia lebobonge ane Allahri ipsildi, nu opsileagti,' sembaukang,” seog.
MAR 6:12 Seogpa, aobarenang aneko piekti, “A'undi mali-malia uropne lepsisut,” aro ambarelamsiek.
MAR 6:13 Ambarelamsiekti, Yesusti sinag mikipne pipsiogneag agha phia nimi kulomag ulamogne maikno yag lanalamsiek. Nimi niktop nimi maikno babe kemelamsiekti, kal saitun wana lolterop mag usoghag pelaglamsiekti, Yesus poneko mikipne pere agha wali nenelamsiek.
MAR 6:14 Undo unulamekpa, nimiri Yesusti ulamogne sembe a'ero-a'ero seneraglamek. Nenneri, “Allah yubu silimu tiplamek nimiri samenag ulamek saog uro, el babe Allah yubu silimu tiptopne wamlari ulamla,” senelamek. Nenneri, “Allah yubu silimu tiptopne Elia nen samoro yaori, el agha ane to?” senelamek. Nimi nhon-nhondi Yesus sembe senelamekti, “El Yohanes, nimi maghag pelengehiropne poneko wamla. Yohanes poneko samenag tebao aghana nen kamag tangka yao. El kamag tao ane sembe, nimiri uanep komne Allahri mikipne el pere agha ulamla,” aro lelamek. Nimiri Yesusti ulamogne sembe maiknoro lelamekpa, mog so'o Galilea nimi sembe yubu sia leropne Herodesti babe ka'ebaog.
MAR 6:16 Herodesti ka'ebaogti, el lobaro seneragto lelamogti, “Ane sik Yohanes. Samen nari arukahinoba, nimiri Yohanes ngang karebaongpa, tebao. Aghana, wene el nen samoro kamag tao,” seog.
MAR 6:17 Yubu sia leropne Herodesti Yohanes obogne undo uro yabiog. Samen Herodes ilipsae Pilipus wamog. Pilipus elkel Herodias wamogpa, yubu sia leropne Herodes ponekori ilipsaeri kel eneko pelepto aog. Pelebaogne sembe Yohanesti Herodesag yubu lelamogti, “An anipsaeri kel pelebaomne nene, Allahri yubu lebogne irikna phiro uaom,” aro wembaog. Wembaog ane sembe, Herodesti pelepto aog keleneko Herodiasti ela'angeag lelamogti, “Yohanes nene saelbamendi, haing sae kaupto kop aeag tobongkalulam,” seog. Seogpa, Herodesti nimi arukahiogpa, Yohanes salero haing sae kaupto tobongkibek.
MAR 6:19 Wembaogne sembe Herodes elkel Herodiasti, “Yohanes ya'ag omnun,” aro yo senelamog. Yo senelamog aghana, ela'ange Herodesti, “Yohanes poneko nimi sikne Allah Eldamneri poghogne wamlari, walia ulamla,” aro el wamog. Ane sembe Herodesti Yohanes yae urop nimiag, “Yohanes poneko wali uro piamlulom,” aro arukamsiogpa, elkel Herodias nenekori “Yohanes omnun,” sembaog aghana, omnep kom wamog. Wamogpa, yubu sia leropne Herodesti babe Yohanesti ambarelamog yubu ka'elamog abeneko pere, yeng uro ka'elamog aghana, elkel Herodias pelebaogne sembe “Huahane?” aro enhaun seog.
MAR 6:21 Olog wamekpa, ik nhon sum yubu sia leropne Herodesti, “Na mangkaneek sum kwelekto yabilbana sani yobatsinun,” aro nimi nubunang yopsiog. Eldi yubu eptopnangap, eldi yin saleropnang sikindoyaboap, mog so'o Galilea nimi nubunangap, “Na mangkaneek sum talbana, sani nikag tukap,” aro yopsiog. Yopsiog sumeneko elkel Herodiasti, “Sumene 'Yohanes omnun,' senelamnange pa'asea sumene agha,” sembaog.
MAR 6:22 Sembaogpa, sani nikag telamekne pere agha Herodias elmangkel wa'iogti, saren kelenekori nimi nubunang taneko whing toman kolapto seplamog. Kolapto seplamogpa, Herodesap elap nikag telamek nimiapti, “Saren kelene wali uro kolapto seplamla,” aro awi sembaek. Awi sembaekpa, yubu sia leropne Herodes ponekori saren kel enekoag, “Nanag molbane. Andi 'Sa'a-sa'a tatneho,' senelamlama tatkenun.
MAR 6:23 Nari saelbamna mog so'o molbanemena babe, naringe nhon andinge nhon pokto tatkenun. Sik lemna. Andi molbanemena tatkene kom tanena, Allah imnelne ponekori hae omnelul,” aro salag lebog.
MAR 6:24 Wene seogpa, saren kel enekori ilin Herodiasag hail palamogti, “Kain, na sa'a moloro anun?” aro haibaog. Haibaogpa, ilindi samoro ambarelamogti, “'Yohanes maghag pelengehiropne ngang karepto olopmenba, usog imnun,' aro Herodesag molbalulam” seog.
MAR 6:25 Wene seogpa, ta'ap sen koma saren kel eneko Herodes yaghag samoro piog. Piogti, mololamogti, “Nai, nari anag mololangkennena, Yohanes maghag pelengehiropne tebalul. Eldi usog ngangag agha karepto olobikti, usog yangkarobag paia tarelaikpa, imnun,' aro mololangken,” seog.
MAR 6:26 Molbaog yubu aneko ka'ebaogti, Herodes wana ikin taog. Wana ikin taog aghana, eldi wanaag seneraglamogti, “Tane wamang nimi whingag, 'Tatkene kom tanena hae Allahri omnelul,' aro salag pimna,” aro seneraglamogti aliri, “Kom senep komdi, hae tatnun,” sembaog.
MAR 6:27 Wene sembaogti, ta'ap sen koma yin salero nimi ohirop nimi nhonag, “Kelenekori, 'Yohanes maghag pelengehiropneri usog imnun,' selba karebel pimendi, payalulam,” aro arukaog.
MAR 6:28 Ane sembe nimi nenekori Yohanes piamekag aneko piogti, Yohanes usog ngangag agha karebel pina yangkarobag pibogti, Herodias elmangkel tarel aog. Tarel aogpa, saren kel enekori tipto ilinag 'Iplul' aro tarel piog.
MAR 6:29 Wene aro obekpa, Yohanesti yubu ka'ero neleptopnangdi ka'ebaekti, Yohanes nong teptoba tol aek. Tol aekti, Yohanes nong teptoba aneko pabiekti, kirik selenga lomag pail piek.
MAR 6:30 Yesusti wepto pogsiognang taneko nen samoro Yesus yaghag yaek. Yaekti sikindi nimi yepto ulamekneap, nimi Allah yubu ambarelamsiekneap sembe Yesusag ambarek.
MAR 6:31 Ambarekpa, nimi maikno “Yesus kemel pukap,” aro pang yang ulamekneri Yesusap el neleptopnangap kwaneng tenep kom wamog. Ane sembe el neleptopnang ambarelamsiogti, “Yahut! Nu nimi oroghag piberi, olog nu wali tektek papto wamukap,” seog.
MAR 6:32 Wene seogpa, sin kabong lomag wa'iekti, nimi oroghag sip mag alip toman piek.
MAR 6:33 Piek aghana, nimi maikno sikin palameka ipsiekti, “Tanetna Yesusap el neleptopnangap agha palamang,” aro el tahiog. El tahiogpa, mog so'o anekoag wamek nimi maiknori, “'Yesusap eldi yubu ka'ero neleptopnangap mag abolag anoko saingil pukap,' aro ulamangpana, so'o toman merero sin sam whing karepto pukap,” aro ulamek.
MAR 6:34 Yesus kabong lomag agha lambom agha tilamsiogpa, nimi teng-tengne longkamek. Longkamekpa kembahiogti, “Nimi taneko wana ophag aro wamangnena, pham domba paia uhirop nimi orogti, pham domba 'Tala pukap,' aro ophag alo saog uro wamang,” aro o'ona sembahiog. O'ona sembahiogti, yubu maikno ambarelamsiog.
MAR 6:35 Ambarelamsiogpa, ae sin taogpa, eldi yubu ka'ero neleptopnangdi Yesusag yubu lelamekti, “Ae imbalba, mog so'o ane ae sorop komag paiag wamap.
MAR 6:36 Kwaneng orogti, andi nimi taneag 'A'un koloptahut,' aro ambatsimenba, as kanero wamangneag kwaneng kamna kapto tol pukang,” seek.
MAR 6:37 Wene seekpa, Yesusti samoro ambarelamsiogti, “A'undi agha kwaneng tatsimunba, tukang,” seog. Wene seogpa, sindi, “Nunag kal ma'al ologha wamlangena, tane wamang nimi teng-tengne wamangneap sunurop kom. Nuri kal ma'al agha ni tane wamang nimi sembe sunuro kwaneng tenep uro kamna kapto topsebe tanena, nimi nhondi wal linbare awe topsoba, kamna tatnep saog urop kal ma'al maikno agha kwaneng kamna kapto topsebe. Andi nunag, 'Hae tol pululom,' selam, te?” aro Yesusag haibaek.
MAR 6:38 Wene seekpa, Yesusti hailamsiogti, “A'unag kwaneng roti etpare poamlom? Kemel pululom,” seog. Kemel piekti, “Kwaneng roti taroba lambareap, ikan phendeap wamla,” aro ambarek.
MAR 6:39 Wene aro ambarekpa, Yesusti el neleptopnangag ambarelamsiogti, “Nimi palu a'ero-a'ero nembia, 'O'olaba saiag puksut,' aro ambattoa yabihilulom,” seog.
MAR 6:40 Seogpa, ambattoa yabihiekpa, nimi taneko teng-tengne wamek aghana, palu nhonag nimi teng phende saog uro, nhonag nimi teng tombare saog uro longoro pul piek.
MAR 6:41 Pukekpa, Yesusti kwaneng roti lambareap, ikan phende abenekoap tobogti, imag tiwalengkia Nuni Allahag, “Wali tatsilam,” seog. Wene seogti, kwaneng roti taneko tobogti, eldi yubu ka'ero neleptopnangag, “Nimi taneko kwaneng tatsululom,” aro khepto-khepto tatsiog. Tatsiogti, ikan phende abeneko babe sop kelekto-kelekto tatsiog. Tarelamsiogpa, el neleptopnangdi nimi ni tanekoag pogto tarelamsiek.
MAR 6:42 Poglamsiekpa, sin ni teekpa, mon og tahiog.
MAR 6:43 Teekpa mon og tahiogpa, phelektopne babe wamog. Eldi yubu ka'ero neleptopnangdi kwaneng rotiap ikan sopap phelektopne poloro pibekti, haing agha kau saog uro wiroba nubunge aobare liro pibek.
MAR 6:44 Nimi kwaneng teekne taneko kaubuniog teng-tengne (5.000) wamek. Aghana kelabo me babe wamekti teekpa, mon og tahiogne a'ilbahin kom.
MAR 6:45 Wene kwaneng teekpa, ta'ap sen koma Yesusti eldi yubu ka'ero neleptopnangag, “A'un kabong lomag wa'imundi, na laplobi agha mag sin kauro as Betsaida sam pululom. A'un sam palapmunba, nari nimi maikno tanekoag 'A'ununge asag phut,' aro ambatsinun,” seog.
MAR 6:46 Mag sin kauro palamekpa, Yesusti nimi maikno tanekoag, “Pululom,” seog. Seogti, “Mo wamneri, Allahap yubu lemnunam,” aro main nhonag waelbaog.
MAR 6:47 Main nhonag yingkiogpa, imbaogpa, eldi yubu ka'ero neleptopnang kabongag agha mag sin nusamag palamekpa, Yesus el mo mag sin abolag wamog.
MAR 6:48 Mag abolag wamogti, tilamsiogpa, mikip uro mag kau karepto palamek aghana, khao sin whingag siba yalamogneri eka'uktina, nemen uro palamek. Mag sin nusamag eka'uk uro palamekpa, tibogahiogti, inipna tom nusam anabi, kwelekna anabiag, sikin wamekag mag alip toman yan ingiro piog. Palamogti, “Phibom agha pinun,” aro saog ulamog.
MAR 6:49 “Phibom agha pinun,” aro saog ulamogpa, tilamekpa, el mag alip toman yan ingiro palamogha tibogaek. Tibogaekti, inibin sembe sin kabong lomag wamekne taneko niri, “Phia yalamla,” aro log maikno seklebaekti, ngolol alamek. Logti ngolol alamek abeneko pere Yesusti sinag yubu lelamogti, “Nangkabo! Log sembaheng kom. Na Yesus a'unag yalamnari, wana aingniro wamsut!” seog.
MAR 6:51 Wene seogti, kabong lomag wamekneag wa'iogpa, khao aneko angnibaog. Eldi yubu ka'ero neleptopnang kabong lomag wamekne tanekori, “Yaghe, mane agha ual,” aro lo'om paibon seek.
MAR 6:52 Lo'om paibon seeknena, tam nene sembe. Yesusti kwaneng roti ologha tobogti, nimi teng-tengne kwaneng tatsiogpa, mon og uro teeka ibek aghana, anam wanaag seneraghek komdi, wana hekamsin koma wamek. Ane sembe, Yesus mag alip toman yan ingkiro mag sin nusamag yalamogpa, khao aingnibaogha ibekti, weneog, “Yaghe, Yesus poneko mikip sirikne wamla,” aro lo'om paibon seek.
MAR 6:53 Kabongag agha mag sin kauro tara sip piekti, mog so'o Genesaret saingnil ingkiekti, kabong mag abolag kerekaek.
MAR 6:54 Saingnil ingkiekti, kabong lomag agha lanalamek abeneko nimi maiknori sin tibogahiekti, “Yesus yal,” aro el tahiog.
MAR 6:55 El tahiogpa, nimi tanekori merero as nhonag pang, nhonag pang ulamekti, “Yesus yal,” aro el nenelamsiek. “Yesus tane yal,” ana ka'ebaekti, nimiri niklamek nimi taneko morea kalag keyapto poa, “Yesus wamla,” seekag payalamsiek.
MAR 6:56 Yesus as nubungeag to, ologneag to, tala-tala palamogpa, “Yesus yal,” ana ka'ebaekti, nimi niktopne poa “Yesus whingag nembaneba, wali nembalul,” aro nimi longorobag payalamsiek. Payalamsiekpa, nimi niktopne tanekori wanaag agha Yesusag mololamekti, “Ot andi ag nongag wangkamlamne ag po'obahane tanena, wali tanun,” aro sarikto-sarikto mololamek. Nimi etneri eldi aghag babe po'olongolamek tanena, wali talamek.
MAR 7:1 Ik nhon sum Farisinangap, Musari samenag mome tobog yubu ambatsiropnang etpareap Yerusalema Yesusag yaek.
MAR 7:2 Yaekti, kembamsiekpa, Yesus el neleptopnang etpare kwaneng telamek. Kwaneng telamekag aneko, Yahudi nimi sikinisag yabori “Allah whingag wali wamukap,” aro sae a'elero ul palamekne sunsunum uro uaek komdi, sae a'elban koma kwaneng telamek.
MAR 7:3 Tamna undo. Yahudi nimi sikinisag yabori samenag ambarelamsiekti, “Allah whingag sembenga pibebeagti, sae linag agha sae ma'alag wali uro a'alelamebe taneogna, kwaneng telamukap,” aro ambarelamsiekti, ul palamek. Ane sembe Farisi nimiap, ni Yahudi nimiap sop-sop sikinisag yabori ambarelamsiekne sunsunum uro ul palamekti, sae a'elban koma kwaneng telamek kom.
MAR 7:4 Sa'a-sa'a kamna kapto tol pina, nimi longorobag palamekti, samoro yalamek tanena, sae a'elban koma kwaneng telamek kom. Sae aghabog kom aghana, sikinisag yabori ul palamekne, mag ma'i ologne, nubunge babe, kwaneng ingiro tena babe, wali uro a'elban koma kwaneng telamek kom. Sikinisag yabori ul palamekne sunsunum uro Yahudi nimiri sop-sop ul palamek.
MAR 7:5 Ane sembe Yesusti yubu ka'ero neleptopnangdi sae a'elban koma kwaneng telamekpa, Farisinangap, Musari samenag mome tobog yubu ambatsiropnangap abenekori ipsiekti, Yesusag hailamekti, “Sa'a sembe andi yubu ka'ero neleptopnangdi sae linag agha sae ma'alag a'elban koma kwaneng telamang? Nunisagyabori, 'Allah whingag wali wamukap,' aro ul palamekti, 'Undo-undo unulamlulom,' aro ambatsiek yubu phibang,” seek.
MAR 7:6 Seekpa, Yesusti samoro ambarelamsiogti, “A'undi sop-sop senelamlomne, 'Nimiri na wali kembanukang,' aro walia uloa saog ulamlom. Aghana samenag Allahri yubu silimu tiptopne Yesaya ponekori a'un sembe mome toro pibog. Allahri yubu lebogpa, Yesayari tipto mome toro pibognena, 'Nimi tanekori pamag agha na omeklamneang aghana, sindi wanaag sik uro omeklamneang kom.
MAR 7:7 Sindi nimiag yubu ambarelamsiangnena, Nimiri senenneag agha 'Undo-undo unuaukang,' aro ambarelamsiang. Aghana Na Allahri aruksirop yubu sik uro ambarelamsiang kom. Ane sembe sindi Na omeklamneang yubu ka'elamna kom.' aro Allahri ambarogpa, Yesayari tipto mome toro pibog.
MAR 7:8 Nimiri, 'Undo-undo unualulom,' aro ambatsiropne mikip uro saelba ulamlom aghana, Allahri aruksirop yubu lilobi agha saelba ulamlom kom,” seog.
MAR 7:9 Yesusti Farisinangap, Musari yubu ambatsiropnangap tanekoag tipto ambarelamsiogti, “Yaghe, a'undina, 'Wali sirika ulamap,' senelamlom te? A'undi ul palamlomnena, 'Nunisagyabori “Undo-undo ul palamukap,” senenne saelba Allahri aruksirop yubu ingisaplamlom. Sik, wali ulamlom te?
MAR 7:10 Unulamlom aghana, tam nenena wela sembamlom? Samenag Allahri Musa ambarelamogpa, Musari tipto ambatsiognena, 'A'uni a'unin abeneko kipto o'ona senelamsululom,' seog. Seogne apna, 'Nimi etneri ili ilin yo'olamsile tanena, nimi eneko ya'ag oplulom,' seog.
MAR 7:11 Musari wene seog aghana, a'undi ul palamlomneap, Musari yubu ambatsiogneap olog sunsunum kom saog wamla. Sunumnana undo. Nimi nhondi eldi nong nimiag yubu lelamsori, 'Nai kaen, nari saeag wamlange agha yepsisene aghana, nari samenag “Allah sembe pimnun,” aro salag pimno. Salag pimno ane sembe, a'un yepsinep kom,' aro lemnep. Nimiri eldi nong nimiag undo ambatsiso tanena, Allahri aruksirop yubu, 'A'uni a'unin abeneko kipto o'ona senelamsululom,' aro lebogne sunsunum urop kom. Sunsunum kom aghana, a'un Farisinangap, Musari mome tobog yubu ambatsiropnangapti, 'Nong nimi yepsinep kom,' selenge ponekoag, 'Hae, andi saeag agha “Allah sembe pimnun,” aro salag pibom. Ane sembe andi nong nimi yepsululam kom,' aro nimiag ambarelamsilom.
MAR 7:13 Tam neneog kom. Tam nene saogne maikno ulamlom. A'undi amona nimiag ambarelamsilomdi, 'Nunisagyabori ul palamekne sunsunum uro ulamsebe,' aro ambarelamsilom abeneko pere, a'undam nimiri Allahri aruksirop yubu lilobi agha wail ibarelamlom,” seog.
MAR 7:14 Seogti, nimi maikno taneko yopsiogti, yubu ambarelamsiogti, “A'un ni wali uro ka'ebamundi, seneraglamlulom!
MAR 7:15 Nimiri sa'a-sa'a tenba, kulomag wa'in tanena, nimi eneko sembe Allahri, 'Loba,' senelamla kom. Nimiri wanaag agha seneraghongkia mali-malia lero ulamla tanena, wanaag agha malia lero uropne sembe Allahri, 'Loba,' sembanep.
MAR 7:16 Nimi ni ao wamla ane sembe, ka'eamlomne nene wali uro seneraglamlulom,” seog.
MAR 7:17 Wene seogti, Yesus nimi maikno taneko laplobi agha piogti, eldi yubu ka'ero neleptopnangap aeag wa'iek. Wa'iekti, eldi yubu ka'ero neleptopnangdi elag hailamekti, “Sunumna nimiri tenaba sembe ambatsilamne sa'a sembe leplam?” aro haibaek.
MAR 7:18 Haibaekpa, Yesusti sinag hailamsiogti, “A'un olog anam seneraglom kom te?” aro haibahiog. Yesusti wanaag seneraglamogti, “Nia mangkina nimiri tenaba tehonge sembe Allahri nimi eneko sembe, 'Loba,' sembalul komdi, nimiri tenaba ni tenep,” aro, “Tibin nenero ambatsinun,” sembaogti, tipto ambarelamsiog. Eldi yubu ka'ero neleptopnangag ambarelamsiogti, “Nimiri sa'a-sa'a tenba, kulomag wa'in tanena, nimi eneko sembe Allahri, 'Loba,' senelamla kom. Tam nenena, a'un wana hekto seneraglom kom te? Nimiri sa'a-sa'a tenaba terop tanena, nimi kulomag wa'irop aghana, wanaag ya'ag wa'irop kom. Nia mangkina nimiri tenaba tenba, monag tisirikag wa'irop aghana nen lambanep,” seog. Eldi yubu lebogne neneag agha, “Nia mangkina tenaba waliri, nimiri terop, tanena Allahri, 'Loba,' sembalul kom,” aro tam karepto pibog.
MAR 7:20 Wene seogti, nen ambarelamsiogti, “Nimiri wanaag agha lero uropne sembe Allahri, 'Loba,' sembanep.
MAR 7:21 Nimiri wanaag agha lero uropne nenena, 'Undo unuahane,' aro seneragtopne agha mali-malia lelamlari ulamla. Nimiri wanaag agha seneraghongkia mali-malia ulamangnena: kelabo nengabo toptangkamna komne salik-malik tektangtop, ora nimiri kelabo nengabo sembe, 'Naringe wamsoba saelbahane,' aro pelepsirop, nimiringe haogha torop, nimi ya'ag ohirop, aboapti, topsene senerop, yoaba uahane senerop, orolena lerop, nimiri wana bobongeag agha ali neneptangtopne urop, yog nimiringe sembe naringeog wamso senerop, nimi san lerop, metmereng arop, wanaag seneragna koma ua urop,
MAR 7:23 Ni lemnange tanena, nimiri wanaag agha seneraghongkia unulamlange sembe undo unurop nimi eneko sembe Allahri, 'Loba,' sembahinep,” seog.
MAR 7:24 Wene seogti, Yesusti mog so'o Galilea laplobi agha mog so'o Tirus peramag piog. Piogti, “Tektek papto wamnun,” sembaogti, “Nimiri imneikag,” aro ae nhonag wa'iogti, wamog. Wamog aghana, nimiri el yal aro el taek.
MAR 7:25 Kelabo nhon elmangkel phia yonge kulomag wamog kel enekori ka'elamogpa, “Yesus yal,” ana ka'ebaog. “Yal,” ana ka'ebaog abeneko pere keleneko yingkina “Yesus kipnun,” aro el whingag yabu sanukto uamupto malingkiog.
MAR 7:26 Yesus sekamogpa, yanag malingkiogti, Yesusag mololamogti, “Namangkelag phia yonge wamlaba, yamendi, yaglambalulam,” aro wanaag agha sarikto-sarikto molbaog. Molbaog aghana, keleneko nimi sisa Yahudi kel kom. Mog so'o Siria as nhon Penisia peram wamogneag agha mangkaek kel wamogpog, Yesus whingag mololaog.
MAR 7:27 Molbaogpa, Yesusti kel enekoag lelamogti, “Nimiri sikinmabo sam kwaneng tarelamsiangdi, amik kam kwaneng tarelamang. Kwaneng me ologneri saeag agha pelepto kamag tobogsin tanena mali. Ane saog uro na yog asag nimi sam yebel phinep kom. Namabo Yahdudinang nari yubu ka'ero neleptopnang sam komopto yepsisene taneogna, nimi sisa Yahudi kom nimi amik yebel phinep,” seog.
MAR 7:28 Seogpa, kelenekori, “Mikip phelektopne wamlari, ologha sirikagne tatneho,” aro wanaag seneraglamogti, lelamogti, “Nai, otsik leplam. Aghana kwaneng meri telamnaba, ubun pelengloropne kam umag ua tokto toro tenep,” seog.
MAR 7:29 Seogpa, Yesusti elag lelamogti, “Andi samoro ambatnelamne wali leplam. Andi molbanelamne wene uro yabil ane sembe, hae pululam. Phia yonge andi kelme kulomag agha lambal,” seog.
MAR 7:30 “Lambal,” seogpa, keleneko eldi aeag piog. Piogti kemelamogpa, elmangkelag phia yonge kulomag wamogne neneko lambaogpa, keleneko tektek papto marobag malamog.
MAR 7:31 Wamogha Yesus Tirus mog so'o aneko laplobi agha, Sidon ina agha palamog. Palamogti, mag sin Galilea peramag phibom agha heng walelingkirobag sip mog so'o si As Sa'obare as anabi toman piog.
MAR 7:32 Piogti wamogpa, nimiri Yesusag nimi yubu lerop komne ao leptopne nhon payaek. Payaekti, “Sae elag pipmenba, wali talul,” aro molbaek.
MAR 7:33 Wene aro molbaekpa, Yesusti “Mo wamnunam,” aro yubu lerop komne ao leptopne poneko poa nimi oroghag pabiog. Pabiogpa mo wamdekti, Yesusti sae ma'al agha ao lom abenekoag tobongkibog. Tobongkibogti Yesusti sae ma'alag sulumag supto yubu lerop komne ponekori silimuag pelaghirog.
MAR 7:34 Silimuag pelaghirogti, imag tiwalengkia Yesusti hain nubu uro ebaogti, pho aro lelamogti, “Efata,” seog. Yahudi nimiri lerop yubuag “Efata,” seognena, nuri yubuag “Kube,” aro lebog.
MAR 7:35 Wene seog abeneko pere, ao kubogti, pam silimu lebe aro yubu lemnep wamogpa, peket uro yubu lelamog.
MAR 7:36 Nimi eneko wali taogti, peket uro yubu lelamogpa, Yesusti sin wamek nimi tanekoag, “Tam nene sembe nimiag ambatsiseng kom,” aro irikahiog. Irikahiog aghana, nimi tanekori Yesusti wali nembaogne sembe “Map, mane agha ual,” aro lo'om seekti, wana awiri ambatto poa yabalamsiek. Yesusti nen “Ambatsiseng kom,” aro sarikto-sarikto irikahiogpog, sindi yubu nubu nenero ambatto poa yabalamsiek. Ambatto tongolamsiekpa, ka'elamekti, “Nia mangkina wali ulamlari, nimi pam ao leptopne babe kuplamsilba, yubu lelamang,” aro yubu sabo nenero ambarelamsiek.
MAR 8:1 Sin taneko ik etpare wamekpa, nimi maikno Yesus wamoghag longol aek. Longoro ulamekpa, kwaneng orogti kwaneng yo ulamsiogpa, Yesusti ipsiog. Ipsiogti, Yesusti eldi yubu ka'ero neleptopnang yopsiogti, yubu lelamogti,
MAR 8:2 “Nimi maiknori nanag nelepto kemel aneongpa, wamap paghabog inipna ik wilindip sum tal. Ik wililindip sum talba, kwaneng orogti kwaneng yo sembamangdi, wamangba, yareag senelamsin.
MAR 8:3 Nari sinag 'A'ununge asag pululom,' aro ambatsisene aghana, sin tane wamang nimi weag nimi agha yingkina wamang. Ane sembe, 'Pululom,' sene tanena, 'Kwaneng yoapti mandu aro phukul piikag,' senelamnari, 'Pululom,' senun kom,” seog.
MAR 8:4 Seogpa, eldi yubu ka'ero neleptopnangdi samoro lelamekti, “Sik, nimi along tanekori kwaneng teheng aghana, kwaneng orogbana, pai aldesog urobag wamaptina, tala siba kwaneng roti sunuro tol pinep?” seek.
MAR 8:5 Wene seekpa, Yesusti, “Kwaneng roti etpare poamlom,” aro haibahiog. Haibahiogpa sindi, “Kwaneng roti saekpare wamla,” seek.
MAR 8:6 Wene seekpa, Yesusti nimi maikno wamek nimi tanekoag, “Puksut,” seogti, kwaneng roti saekpare abeneko tobogti, Allahag, “Nani, wali tatsilam,” seog. Seogti, kwaneng roti saekpare abeneko saeri khepto-khepto eldi yubu ka'ero neleptopnangag, “Tarel phululom,” aro tatsiog. Tatsiogpa, nimi maikno taneko pogsiek.
MAR 8:7 Sin wamekne anabiag nimiri ikan ologne etpare babe poamek. Ikan ologne abeneko babe Yesusti tobogti, Allahag, “Nani, wali tatsilam,” seog. Seogti, ikan abeneko babe el neleptopnangag, “Pogsululom,” aro tatsiogpa, pogto tarel phiek.
MAR 8:8 Pogto tarel phiekpa, nimi ni teekpa, mon og tahiog. Sumeneko teek nimi teng-tengne (4.000) mon og uro teek. Kwaneng rotiap ikan sopap phelektopne babe wamog. Eldi yubu ka'ero neleptopnangdi kwanengap ikan sopap phelektopne poloro pibekti, haing agha kau wiroba nubunge saekpare libaek. Wene teekpa, mon og tahiog taneogna, Yesusti nimi tanekoag, “A'undi asag pululom,” seog.
MAR 8:10 Seogti, ta'ap sen koma elap eldi yubu ka'ero neleptopnangap kabong lomag wa'iekti, mag sin Galilea kauro heng puruknag sip mog so'o Dalmanuta piek.
MAR 8:11 Piekpa, Farisi nimi etpare “Mibukap,” aro Yesusag yaekti, yubu leldalamek. Yubu lelamekti, “Allah Imagne ponekori sik uro an pere agha ulamla tanena, kekneba nhon ualulam,” seek.
MAR 8:12 Sindi elag sik semban koma wene aro ambarekpa, Yesusti hain nubu ebaogti, wana ikin senelamog. Wana ikin senelamogti, samoro ambarelamsiogti, “A'un wene wamlom nimiri na sembe ka'elamlomdi ililamnelom. Sa'a sembe nanag, 'Nen kekneba nhon ualulam,' alamlom? Sik uro lemnuan. Nari kekneba a'un sembe nen tatsinun kom,” seog.
MAR 8:13 Seogti, Farisi nimi taneko lilobiagha Yesus kabongag waelbaogpa, eldi yubu ka'ero neleptopnangap mag kauro tara sip piek.
MAR 8:14 Kabong lomag agha mag alip toman mag kauro palamek. Palamek abeneko pere, sin el taekti, “Kwaneng roti sembe ekon taapti, nhonog payaap,” aro el taek.
MAR 8:15 Sin kabong lomag agha mag alip toman palamek nimiag, Yesusti wenero ambarelamsiogti, “Farisi nimiap, nimi nubunge Herodesap sin abeneko wanaag 'Waelbalul,' aro yamoroba saog uro wamlange sembe, 'Nunag taleag,' aro haing whi uro togtangto yae wamlulom,” seog.
MAR 8:16 Wene seogpa, eldi yubu ka'ero neleptopnang taneko seneraghekti, sin mamun lelamekti, “Nu kwaneng roti payaap kom ane sembe, 'Roti waebalul,' aro yamoroba sembe undo lepla,” alamek.
MAR 8:17 Wene alamekne Yesusti ka'ebahiogti, hailamsiogti, “Sa'a sembe kwaneng roti orogne sembe tam nembalomdi yubu lelamlom? A'undi wanaag seneraglamlom komdi, a'undi seneragna sao kauplolamsil, te? Wana hekamsin komdi ekon wamlom, te?
MAR 8:18 A'undinge haing wamla aghana sa'a sembe ililamlom kom? A'undinge ao wamla aghana sa'a sembe ka'elamlom kom? Nari uanonge sembe ekon talamsil te?
MAR 8:19 Kwaneng roti lambare abeneko agha nimi teng-tengne (5.000) khebatsinoba, teongne sembe seneraglamlulom. Kwaneng teongba, mon og tahioba, kwaneng roti phelektopne poloro pibomne, kau wiroba nubunge etpare libaom?” seog. Seogpa, “Kau wiroba aobare libabo,” seek.
MAR 8:20 Wene seekpa, Yesusti nen hailamsiogti, “Nen amik sum kwaneng roti saekpare agha nimi teng-tengne (4.000) khebatsinoba, teongne sembe babe seneraglamlulom. Kwaneng teongba, mon og tahioba, kwaneng roti phelektopne poloro pibomne, kau wiroba nubunge etpare libaom?” seog. Seogpa sikindina, “Kau wiroba saekpare libabo,” seek.
MAR 8:21 Wene seekpa, Yesusti sinag samoro ambarelamsiogti, “Undop pogna, a'undi sumene babe anam seneraglamlom kom te?” seog.
MAR 8:22 Kabong lomag agha mag alip toman palameka as Betsaida piek. Piekpa nimiri as enekoag agha nimi haing uropne nhon Yesusag payaekti, “Elag sae pipmendi, wali nembalulam,” aro molbaek.
MAR 8:23 Molbaekpa, Yesusti nimi eneko sae kiliro as enekoag agha poa lambaog. Poa lambaogti, nimi aneko haingag sulumag likto sae ni phende pibog. Sae pibogti hailamogti, “Andi sa'a iplam?” seog.
MAR 8:24 Wene seogpa, nimi eneko whingag sip tibogaogti, yubu lelamogti, “Nimi yabalamangba, tibogamna aghana, tibin uro iamna kom. Yabalamangba ililamsinne kaldi lebe aro yabaloa saog ililamsin,” seog.
MAR 8:25 Wene seogpa, Yesusti nen ik phendep sum sae phende ponekori haingag pibog abeneko pere, nimi aneko haing kwelekaog. Kwelekaogpa, el nia mangkina tibin uro ililamog.
MAR 8:26 Tibin uro ililamogpa, Yesusti ponekoag aruklamogti, “Nimi asag ambatsin koma aeag pululam,” seog.
MAR 8:27 Tanena Yesusap eldi yubu ka'ero neleptopnangap as nubunge Kaisarea-Pilipi kanero wamek asag piek. Inaag palamekti, Yesusti sinag hailamsiogti, “Nimirina na sembe etne alamang?” seog.
MAR 8:28 Seogpa, samoro ambarelamekti, “Nimi nenneri an sembe, 'Yohanes maghag pelengehiropne poneko tebaog aghana, nen kamag taonge poneko ane,' senelamangdi, yubu lelamang. Nenneri, 'Elna, samenag Allah yubu silimu tiptopne Elia poneko samoro yaori wamla,' senelamangdi, yubu lelamang. Nenneri, 'Elia kom aghana samenag Allah yubu silimu tiptopne yogne kamag taonge wamla,' senelamangdi, lelamang,” seek.
MAR 8:29 Wene seekpa, Yesusti nen hailamsiogti, “Aghana a'un morina na sembe etne senelamnelom,” aro Yesusti haibahiog. Wene aro haibahiogpa, Petrusti samoro lelamogti, “Anna, Nuni Allahri samenag 'Pognun,' aro salag lero pibogne sunsunum uro, an 'Taulbahimendi, saelbamsululam,' aro wepto pogkeogne wamlam. Nuni Allahri an undo pogkeogne sembe, 'Kristus wamlam,' alamna,” seog.
MAR 8:30 Wene seogpa, Yesusti iriklamsiogti, “Na sembe, 'Kristus, Allahri wepto poghol aogne wamla,' aro nimi nhonag babe lag phoro ambatsiseng kom,” seog.
MAR 8:31 Wene seogti, lelamekne neneag agha Yesusti alnibaogti, eldi yubu ka'ero neleptopnangag el amik seklebalulne sembe ambarelamsiog. Ambarelamsiogti, “Na imag agha 'Mog so'oag nimi tanun' aro yahinge wamnabog, Yahudi nimi maiknori wa'ebanukang. Na wa'eplamniik nimina, sikiniyabo Yahudi nimi sembe wenehirop nimiap, memnang Allah sembe pairopnang sikinipsaboap, Musari samenag mome tobog yubu ambatsiropnangapti wa'ebanukang. Wa'ebaniikti, ya'ag omnukang. Ya'ag omnukang aghana, ik wilindip sum nen samoro kamag tanun,” aro alniro ambatsiog.
MAR 8:32 Eldi yubu ka'ero neleptopnang ambarelamsiogti, el seklero tebanepne sembe tognoban koma lag phoro ambatsiog. “Seklero tebanun,” aro ambatsiogpana, Petrusti Yesus sae kiliro kaeag sip pabiogti, “Undo lepseng kom,” aro wembaog.
MAR 8:33 Wene aro wembaogpa, Yesusti taongkom agha eldi yubu ka'ero neleptopnang yogne kembamsiog. Kembamsiogti, Yesusti Petrusag samoro wenelamogti, “Phia yubu leplam. An Na wailag sip pi! Andi leplamnena, Allahri seneropne kom. Nimiri seneropne agha leplam,” aro wembaog.
MAR 8:34 Wene aro wembaogti, Yesusti nimi maikno wamekne tanekoap eldi yubu ka'ero neleptopnangap “Yahut,” aro yopsiog. Yopsiogti, sinag yubu ambarelamsiogti, “Nimi etneri, 'Na Yesusag nelepto nhon palamnunam,' senelamle tanena, mo neleplamnelul kom. Eldi wanaag agha seneragtopne lipseleri, Allahri senenne sunsunum uro seneraglamle tanena, hae nanag neleplamnelul. Nimi enekori, 'Yesusag nelebel pinun,' senelamle tanena, eldi wanaag agha, 'Nimiri na yubu nepto kalag sipto ya'ag omneika babe, khaepto Yesusag neleplamnun,' senelamle taneogna, neleplamnelul.
MAR 8:35 Nimi etneri, 'Na wali wamnange eka'uk taneleagti, Yesusag nelebel pinun kom,' senelamle tanena, Allahri nimi eneko ya'ag kamag nembalul kom. Aghana nimi etneri na Yesus sembe seneraglamneleri, 'Allahri yubu walinge salag pibogne sunsunum uro Yesus sik uro wepto poghog. Ane sembe na wali wamnepne sae limneri, Yesusag nelebel pinun,' aro seneraglamle tanena, Allahri nimi eneko sembe ya'ag kamag nembalul.
MAR 8:36 Kamag uro unne nene nia mangkina agha kamna kapto lumbanep te? Nia mangkina mog so'oag wamlange nimiag tahoba, tebale sumeneko Allah ya'ag kamag uro unne elag tale kom tanena, el tupne wamla sembanep kom.
MAR 8:38 Wene wamang nimi tanekori Allah lai agha mali-malia maikno ulamang. Nimi etneri mog so'oag nimi whingag logti aliri, 'Yesusap ma'aptaukap kom,' sele tanena, Nari babe nimi eneko sembe, 'Elna nari nimi kom,' senun. Na imag agha mog so'oag nimi tahinge, amik samoro yalamne sumeneko, Allah Eldamneri arukna imagnang malaikatap yanun. Nani Allahringe imang warero libango aropne nanag wamleba yanun. Yalamne sumeneko nimi etne aliri nanap ma'aptangtop kom tanena, na amik yane sumeneko babe, nimi eneko Nani Allah whingag wamleba, 'Nari nimi kom,' senun,” seog.
MAR 9:1 Seogti, nen tipto yubu lelamogti, “A'un tane wamlom nimi sikne agha ambarelamsin. A'un tane sekamlom nimi anabiag agha nimi nhon-nhon anam teban komag, Allahri mog so'oag nimi maikno saelbamsilulne lag taleba, iplulom. Allahri mog so'oag nimi saelbamsilulne nenena, Eldamneri mikipneag agha lag nembaleba, anam teban komag a'un anabiag agha nimi nhon-nhondi iplulom,” seog.
MAR 9:2 Wene seogpa, ik no'opbare wameka, Yesusti Petrusap Yakobusap Yohanesap enero poa yim wenge nhonag waelbaekti, sin tombare mo wamek. Mo wamekpa, sikin whingag agha Yesus nong a'eropne taogpa, eldi ag wangkamogne haing omomne kororo yame warebaog. Eldi ag kororo warebaogne nenena, nimi mog so'oag nimiri ag a'elbanepne sunsunum wamog komdi, haing omomne kororo warebaog.
MAR 9:4 Kororo warebaogpa, ilipsabori tilamekpa, Yesusap nimi phendeap yubu lelameka ipsiek. Yesusap yubu lelamdek nimi abeneko ipsieknena, sikinisagyabo Allah yubu silimu tiptopnang Eliaap Musaap Allahri nen samoro payahiogpa, Yesusap yubu lelamekpa ipsiek.
MAR 9:5 Yubu lelameka ipsiekti, Petrusap, Yakobusap, Yohanesap sin wanaag lo'om seekti, logti Petrusti, “Sa'a senep,” sembaog. “Sa'a senep,” aro Yesusag yubu lelamogti, “Nai, amohiropne wamlamne! Nu tane wamapnena wali. Ane sembe ae wilindi soro kaluna kaulbaukap. An sembe nhon, Musa sembe nhon, Elia sembe nhon sobatsukap,” seog.
MAR 9:7 Wene seogpa, toa yaogti lililamsiog pere agha, Allahri imag agha yubu lelamogti, “Anena Na Name, wanaag wamnelne. Eldi yubu ka'eamlulom,” alamogha ka'ebaek.
MAR 9:8 Wene seog abeneko pere, kanero kemelamekag agha Eliaap Musaap nen tognop tarekpa, ot Yesus agha sinap nhon wameka ibek.
MAR 9:9 Undo unuaogpa, Yesusap el neleptopnang wilindi abenekoap yimag agha kuluklamekti, Yesusti irikto yubu ambarelamsiogti, “A'undi yimag agha wene iplomne sembe nimi nhonag babe ambatsiseng kom. Na imag agha mog so'oag nimi tahiri, wamna aghana, amik tebaneri, nimi teptopne anabiag agha nen samoro kamag tanun. Kamag tanun sumeneko tale taneogna, a'undi wene iplomne sembe nimi ambatsululom,” seog.
MAR 9:10 Wene seogpa, Yesusti yubu ka'ebaekne sunsunum uro nimi ambatsiek kom. Nimi ambatsiek kom aghana sin mamun hail talamekti, “Sa'a sembe Yesusti, 'Imag agha mog so'oag nimi tahinge amik nimi teptopne anabiag agha kamag tanun,' sel?” aro yubu hail talamek.
MAR 9:11 Sikin mamun yubu hail talamekti, Yesusag babe hailamekti, “Musari samenag mome tobogne ambatsiropnangdi ambarelamsiangnena, 'Allahri weptopne “Mog so'oag nimi saelbamsululam,” aro poglenge yalul. Aghana el anam yan komag, Elia sam yaleba, Allahri wepto poglenge amik yalul,' aro ambarelamsiang. Sa'a sembe sindi undo ambarelamsiang?” aro haibaek.
MAR 9:12 Wene aro haibaekpa, Yesusti samoro ambarelamsiogti, “Allahri wepto pogtopne anam yan komag, Elia ponekori sam yingkina, 'Allahri wepto poglenge poneko yanepne sembe ina yarebanun,' aro nia mangkina welingkirop. Ane sik uro ambarelamsiang. Aghana nari a'unag ambarelamsinne, Elia poneko nousap yaoba, nimiri el sembe karongdi, 'Malia uaukap,' senenne sunsunum uro ni uaong. Sikindi elag malia uaongne sembe anam uro yabin komag Allahri sam el wamogti, Eldi yubu mome toro pairopnangag ambatsiogha sunsunum uro mome toro pibeka wamla. Aghana tamna undo. Sindi Allah yubu tipto samenag mome toro pibek nangdi, 'Imag agha mog so'oag nimi talenge ponekona, nimiri wa'eplamikpa, seklebalul,' aro mome toro pibek. Wali uro seneraglapmundi, 'Sa'a sembe mome ane toro pibek?' aro seneraglamlulom,” seog.
MAR 9:14 Wene seogpa, Yesusap elkabo wilindi abenekoap nen samoro yimag agha kulukul alamekti, eldi yubu ka'ero neleptopnang yogne wamekag yaek. Yalamekti, kemelamsiekpa, nimi maikno longolaeka nusamag Musari mome toro pibog yubu ambatsiropnang etpareri Yesusti yubu ka'ero neleptopnang yogne aneko toraptangto lel talamekpa, ipsiek.
MAR 9:15 Ipsiekti yalamekpa, nimi longkamek nimi tanekori Yesus tibogaekti, “El yalamla,” aro awi maikno senelamekneag agha merero utol piek.
MAR 9:16 Utol piekpa, Yesusti sinag hailamsiogti, “Sa'a sembe tam nenero yubu lel talamlom?” aro haibahiog.
MAR 9:17 Wene aro haibahiogpa, nimi longolaekne anabiag agha nimi nhondi samoro ambarelamogti, “Nai, amohiropne wamlam. Nari me anag poa yanne, 'Wali nembalulam,' aro payan. Phia yonge el kulomag wa'iogti, yubu kom nembaog.
MAR 9:18 Phia yonge nenekori elag ulamlange, yamoro eplamlari, so'oag oro manalamla. Manalamlaba, me eneko si kelengtepto si ka'en toman kamola makel alamlari, nong ni kikiplamla. Ane sembe, payandi andi yubu ka'ero neleptopnangag 'Wali nembatnululom,' aro molbahin aghana, sumbangba eraruk tina, wali nembanep kom saog wamla,” aro Yesusag ambarog.
MAR 9:19 Wene aro ambarogpa, Yesusti sinag yubu lelamogti, “Eh, a'un nanag sikne aro seneraglamlom kom nimi. Na ko'o ik etbare a'un anabiag wamneri, 'Nanag sikne aro seneraglamseng,' aro wana palingkina wamnep? Me ane payahut,” seog.
MAR 9:20 Seogpa, me aneko Yesusag payaek. Payaekpa, phia yonge aneko Yesus ililamog abeneko pere, me anekoag uloghognena, konkonoro so'oag mambirogpa, so'oag pemaglamogti, si ka'en toman kamola makel alamog.
MAR 9:21 Si ka'en toman makel alamogpa, Yesusti iliag hailamogti, “Etsuma phia yonge el kulomag wa'iori ulamla,” aro haibaog. Haibaogpa, ili ponekori samoro ambarelamogti, “El olog wamoghag agha wa'iogti, phia yonge nenekori 'Omnun,' aro ik nhon-nhon aukag wepto talamlori, ik nhon-nhon babe maghag wepto talamlo. Nu sembe yareag sembahisomdi, yepsisom. Andi el wali nembanep to, kom to?” aro Yesusag molbaog.
MAR 9:23 Wene aro molbaogpa, Yesusti samoro ambarelamogti, “Sa'a sembe andi nanag, 'Yepsinep to, kom to,' aro haibanelam? Andi nanag seneragto, 'Allah mikipneri el pere agha sik uro ulamla,' aro nanag seneraglamnemen tanena, andi sa'a-sa'a nanag molbanemenne sunsunum uro uro yabinep,” seog.
MAR 9:24 Yesusti wene seog abeneko pere, me eneko ili ponekori yubu haum aro lelamogti, “Nari anag sik semban aghana, wana phende taneleagti, yepnemen andarina nari nubu uro anag 'Sikne' aro seneraglamnun,” seog.
MAR 9:25 Seogpa, Yesusti kemelamsiogpa, nimi maikno merero longol aek. Merero longolameka kembamsiogti, Yesusti phia yonge nenekoag aruklamogti, “An phiari me aneag pam lepto ao leplamlamne, nari anag 'Lambae!' aro yaglangken. Me eneag agha lambamendi, nen samoro wa'al alulam kom,” seog.
MAR 9:26 Wene “Lambae” seogpa, phia yonge me eneko kulomag wamogha haum aro lanalamogti, me eneko nong lolog murulamog pere agha lambaog. Lambaogpa, me eneko tebalo nimi saog uaogpa, nimi maikno tanekori, “Ya'ag loba tal,” alamek.
MAR 9:27 “Loba tal,” alamek aghana, Yesusti me eneko sae salero toro sekirogpa, me aneko sekog.
MAR 9:28 Me eneko wali taogti, sekogpa, Yesus eldi yubu ka'ero neleptopnangap ae lomag wa'ina, mo wamek. Sin Yesusap nhon mo wamekti, Yesusag hailamekti, “Nai, sa'a sembe nuri phia nimi kulomag ua ulamsilne neneko nuri yaglambahinep kom?” aro haibaek.
MAR 9:29 Wene aro haibaekpa, Yesusti samoro ambarelamsiogti, “Phia yonge nene saogne yag lambahinepnena, mo yubuag agha, 'Lambae,' arop tanena, yaglambanep kom. Ot Nuni Allahag molona mololapmunba, Allahri ka'ebom agha wali sele taneogna, El mikipne pere agha yag lambahinep,” seog.
MAR 9:30 Seogti, Yesusap eldi yubu ka'ero neleptopnangap mog so'o aneko laplobi agha mog so'o Galilea phiro piek. Palamekti Yesusti senelamogti, “Nari yubu ka'ero neleptopnangap mo wameberi, ot sin aghabog el nenero ambarelamsinun. Ane sembe nu tane wamapne sembe nimiri el taikag,” aro lag palamek kom. Yesusti eldi yubu ka'ero neleptopnang ambarelamsiogti, “Na imag agha mog so'oag nimi tahinge aghana, nimi nhondi na aisanang saeag nenero pankhebanelul. Pankhebaneleba, ya'ag omneik aghana, wilindip sum nen samoro kamag tanun,” aro ambatsiog.
MAR 9:32 Yesusti wene aro ambatsiogpa, yubu neneko sindi wali uro seneraghek kom aghana logti, elag haibaek kom.
MAR 9:33 Sin mog so'o Galilea palamekti, as Kapernaum yaek. Yaekti, aeag wa'iekti, Yesusti eldi yubu ka'ero neleptopnangag hailamsiogti, “Usa inaag yalamap abeneko tam huropne sembe yubu leple yalamlom?” aro haibahiog.
MAR 9:34 Wene aro haibahiogpa, samoro yubu lebek kom. Elag samoro ambarek komnena, inaag yalamekti, sin mamun “Nun anabiag agha etne agha nubunge?” aro yubu lep tang-tang yalamek. Ane sembe aliri, yubu lebek kom.
MAR 9:35 Ambarek komba, Yesus pukogti, eldi yubu ka'ero neleptopnang aobare aneko yopsiog. Yopsiogti, yubu ambarelamsiogti, “Nimi etneri, 'Na Allah whingag nubunge tanun,' senelamle tanena, nimi enekori, 'Whingagne tanun,' seneropne laipsileba, wana mamleba, nimi ni yeplamsile taneogna, Allah whingag nubu tanep,” seog.
MAR 9:36 Wene seogti me ologne nhon tobogti, sin anabiag piamogti, somoro saelbamog. Somoro saelbamogti, yubu lelamogti,
MAR 9:37 “Nimi etneri nanag sikne aro seneragtopne sembe me ologne nene saog nimi toro kipto piple tanena, nimi enekori na babe toro kipto pimneloa saog ulamlul. Na toro kipnelul nimi eneko na mo kiplul kom aghana, na kipnelenge pere agha na pogneogne poneko, Nani Allah babe kiplul,” seog.
MAR 9:38 Wene seogpa, Yohanesti Yesusag yubu lelamogti, “Nai, amohiropne wamlam! Nuri kemelamoboba, nunap nhon yabalamap kom nimiri an si lero phia yonge yaglamsioba ibobo. Ibobo aghana, nimi aneko nuri anag neleplangkeap saog uro anag sop nelepto yabalamla kom. Ane sembe, 'Yesus si lero phia yaglambahiseng kom,' aro irikabo,” seog.
MAR 9:39 Wene seog aghana Yesusti, “Nimi nhondi na si lero nanag sikne aro seneraglamlangeag agha kekneba ulamleri, 'Allahri mikipne el pere agha ulamla,' senenne kekneba wene uale tanena, nimi enekori na san tilibanep kom. Ane sembe nanag seneragto na si lero kekneba ulamle nimi irikahiseng kom. Nimi etneri nu aisa nembahile kom tanena, nimi eneko nungkae wamlari, na san tilibanelul kom.
MAR 9:41 Tam nene sembe sikne agha lemnuan. Nimi etneri a'un sembe, 'Allahri wepto poghogne Kristus poneko ma'aptangtop nimi wamlombana, a'un yepsisene,' sembaleri, a'un yepto mag babe tebarelamsile tanena, Allahri nimi eneko sembe ekon tan koma kamna tatlul,” seog.
MAR 9:42 Wene seogti, Yesusti sunumna yubu etpare nen lelamogti, “A'undi usa 'Etne nubunge,' aro leptalom aghana, sin olog nimi agha nanag sikne aro seneraglamneangne nenena wali. Wali aghana, olog nimiri nanag seneraglamneangpog, nimiri sindi wana toro na wail ibukang agha ekel ina toman pabihiik tanena, Allahri sin pabihirop nimi enekoag tam ikinne pipsilul. Olog nimi pabihirop nimi eneko ngangag kirik ikinne kerekto mag longorop mag nubunge lautag talobol pinepne ane olog keyagman saog. Allahri elag ikinne piplulne aghabog ikin sirik.
MAR 9:43 A'undi wanaag agha seneraglapmundi, 'Sae tarari malia uahane,' sembamun tanena, 'Mali-malia uaneag aro sae aneko karepto tobogahane,' aro wanaag seneraglamlulom. 'Nelagha wali?' aro seneragsut! Sae ni phende wamsoba, mali-malia ulapmenne sembe Allahri tam ikinne anag pelengero, ebek sop-sop mahan ektobag auk nubunge sarangtop komag an tobogagheho tanena, wali sembahom to, kom to? Sae tara karepto toboghahom andarina, mali-malia uan koma Allah ua urobag kamag wamsom, taneogna wali.
MAR 9:45 A'undi wanaag agha seneraglapmundi, 'Yan tarari malia uahane,' sembamun tanena, 'Mali-malia uaneag aro yan aneko karepto tobogahane,' aro wanaag seneraglamlulom. 'Nelagha wali?' aro seneragsut! Ni yan mamun wamsoba, mali-malia ulapmenne sembe Allahri tam ikinne anag pelengero, ebek sop-sop mahan ektobag auk nubunge sarangtop komag an tobogagheho tanena, wali sembahom to, kom to? Yan tara karepto toboghahom andarina, mali-malia uan koma Allah ua urobag kamag wamsom, taneogna wali.
MAR 9:47 A'undi wanaag agha seneraglapmundi, 'Haing tarari kembi agha malia uahane,' sembamun tanena, 'Mali-malia uaneag aro haing aneko kwhero tobogahane,' aro wanaag seneraglamlulom. 'Nelagha wali?' aro seneragsut! Mali-malia uan koma haing tara kwhero toboghahomne agha, Allahri wali saelba uhiropne poneko umag ya'ag kamag wapmun, taneogna wali. Kombagha, haing ni phende wamsoba, mali-malia ulapmunne sembe Allahri tam ikinne a'unag pelengero a'un tobogahileba, ebek teban komag sop-sop mahan ektobag auk nubunge sarangtop komag ya'ag wapmunagti.
MAR 9:49 Nimiri garam yamolamloa saogne nimi niag auk kulukulalul.
MAR 9:50 Garam nenena sao wali aghana, emem arop kom tale tanena nimiri nen samoro garam sao wali nembanep komdi, teba'an sembanep. Ane saog uro, a'un mamun ma'aptangto wapmunneag agha garam sao walinge yamolamloa saog ulapmundi, waptan koma wali wamlulom,” seog.
MAR 10:1 Wene seogti, Yesus as Kapernaum laplobi agha mag Yordan kauro mog so'o heng walelingkirobag sip phibom agha mog so'o Yudea piog. Piogpa, nimi maikno mog anekoag wamek nimi Yesus peram longowarekaek. Longowarekaekpa, yog sum ambarelamsiog saog uro nimi tanekoag babe Allah yubu ambarelamsiog.
MAR 10:2 Ambarelamsiogpa Farisi nimi “Yesus mibukap,” aro yaekti hailamekti, “Meo! Nunisag Musari samen mome toro pibog yubu sunsunum uro, nengabori elkel toamna agha keleneko lipso tanena, hae te?” aro haibaek.
MAR 10:3 Haibaekpa, Yesusti “Ambatsinun,” aro samoro hailamsiogti, “Musari samenag, 'Undo-undo unulamlulom,' aro mome tobog yubuag tam nene sembe sa'a seog?” aro Yesusti tangoro haibahiog.
MAR 10:4 Wene aro Yesusti haibahaiogpa sindina, “Musari mome toro pibogne sunsunum uro nimi nhondi, 'Nari kel limnun,' sembaho tanena hae limnep. Ot anam limna komag mome nhon, 'Sumene nari kel ene limna,' arop mome kekneba topsori, kekneba aneko kelenekoag tatso abeneogna, eldi kel eneko limnep,” seek.
MAR 10:5 Seekpa, Yesusti nen lelamogti, “Sik, Musari undo mome tobog aghana, a'unag Nuni Allahri seneropne sembe wana hekamsin koma wamlom. Ane sembe Musari a'unisagyaboag, 'Mome kekneba topsori, elkelag tatsori limnep,' aro mome toro pibog.
MAR 10:6 Undo mome toro pibog aghana, anamag Allahri nia mangkina sumbaog sumeneko kaubuniap kelaboap sumbahiog.
MAR 10:7 Ane sembe nengabori iliap ilinap lilobi agha, ela'angeap elkelap toptarikti, ma'aptangkamtukang.
MAR 10:8 Sin abeneko nong nhonog saog neneptangtop. Sin abeneko nong phende kom, aghana nong nhonog neneptangtop.
MAR 10:9 Allahri ela'angeap elkelap abeneko agha nong nhonog nenero ma'abahiog, ane sembe nimi nhondi babe ela'angeap elkelap a'eptaheng kom,” seog.
MAR 10:10 Wene seogti, sikin aeag wa'iekti, Yesus yubu ka'ero neleptopnangdi elag hailamekti, “Yubu nenekona sa'a sembe ambatsilam?” aro haibaek.
MAR 10:11 Haibaekpa, Yesusti sinag ambarelamsiogti, “Nimiri kelabo samenne laplobi agha wendogne toltolamle tanena, kelabo samenne wana mali nenero kelabo pelepto tohiropne saog uro ulamla.
MAR 10:12 Kelabori babe ela'ange samenne laplobi agha nimi kabuni nhonag wa'alamle tanena, kelabori nengabo pelepto tohiropne saog uro wamla,” seog.
MAR 10:13 Wamekpa, ik nhon sum nimiri me ologne Yesusag payalamsiek. Payalamsiekti Yesusag mololamekti, “Andi nuri mabo usog alibag sae pipmendi, Allahag molbatsimenba, nuri mabo wali wamukang,” aro moloro payalamsiek. Aghana Yesus yubu ka'ero neleptopnangdi nimi tanekoag, “Payahiseng kom,” aro nimi taneko wabahiek.
MAR 10:14 “Payahiseng kom,” aro el neleptopnangdi nimi walamsiekne Yesusti ipsiogti, el neleptopnang walamsiogti, “Me tane Nanag wali yaukang. A'undi irikahiseng kom. Nuni Allahri sin babe piamsildi, saelbamsil.
MAR 10:15 Nari a'unag sik uro lelamnange, olog mabori nong nimiag wana palilamang saog uro nimi etneri Allahag 'Sik uro piamsildi, saelbamsil,' aro seneraglamle tanena, Allah elme talul. Aghana nimi etneri me taneko saog uro Allahag 'Sikne' aro seneraglamle kom tanena, Allah elme tanep kom,” aro ambatsiog.
MAR 10:16 Wene seogti me ologne taneko somoro saelbahiogti, me ologne taneko usoghag sae piamsiogti, “Wali wamukang,” aro molona Allahag molbatsiog.
MAR 10:17 Sae pipsiogti Yesus inaag palamogpa, nimi nhon merero Yesusag yaog. Nimi eneko yaogti Yesus whingag yabu sanukto pulingkina, “Nani, an yubu ambatsiropne walinge wamlam! Yubu ambatnululam! Nari hulamnengeag agha ya'ag kamag uro unne nanag talul?” aro molbaog.
MAR 10:18 Wene aro molbaogpa Yesusti, “Nanag 'walinge' selamnena, nimi mog so'oagne nhon babe walinge wamla kom. Ot Allah mo aghabog walinge wamla. Andi sa'a sembe nanag walinge selam?” seog.
MAR 10:19 Wene seogti Yesusti nen tipto yubu ambarelamogti, “Allahri Musa pere agha aruksirop yubu ambatsiogne an el wamlam. Nimi ya'ag opsiseng kom. Nengabo kelabo toptangkamna komag nikag mapseng kom. Nimiringe haoghaba topseng kom. 'Nimiri unulamoba imno,' aro yubu orolena lepseng kom. 'Nimiringe sembe naringe taho,' aro haing kunulamsiseng kom. A'uni a'unindi yubu ka'ero kiplamsululom. Ni ane Allahri samenag ambarogpa, Musari tipto ambatsiogpa, ka'elamapne an babe el wamlam,” seog.
MAR 10:20 Yesusti wene seogpa nimi enekori, “Nai, yubu ambatsiropne, ni leplamne abenena na olog wamsiag agha saelbamsia kekman wene babe saelbamnari ulamna,” seog.
MAR 10:21 Nimi enekori wene seogpa, Yesusti o'ona senero kembaogti, “Ot nhonog andi ulamlam komne nhon wamla. Pimendi andi saeag agha ni wamlange nimiag kamna kapto topmendi, kamna tatkeikne nimi saeag agha orogne tatsululam. Tatsimen tanena, samoro nanag yamendi, nanag yubu ka'ero neleplamnululam. Undo tatsimen tanena, Allah imagne ponekori kamna ya'ag kamag uro unne anag tatkelul,” seog.
MAR 10:22 Yesusti wene seogpa, nimi enekori ka'ebaogti, “Nanenge saeag agha maikno wamlaba, huro uanun,” aro wana ikin taogpa piog.
MAR 10:23 Piogpa Yesusti el yubu ka'ero neleptopnang keme warekahiogti, “Allahri na wepto poghol aneog aghana, nimi saeag agha tup uro urop nimiri elsaeag uropne lipsisori, nanag nelepto 'Saelbamnululam,' aro ulamlenge eka'uk sirik,” seog.
MAR 10:24 Wene seogpa, el yubu ka'ero neleptopnang ka'ebaekti, yaghe sembaek. Yaghe sembaek aghana, Yesusti nen tipto ambarelamsiogti, “Mabo, Allahri na wepto poghol aneog aghana, nimiri eldamne wanaag agha nanag nelepto 'Saelbamnululam' aro mo uanep kom saog wamla. Mog so'oag nimi sembe tam nene ikin sirik.
MAR 10:25 Pham unta nhon imisti phoroba lom toman wa'ana eka'ukti, wa'inep kom saog. Wa'inep kom saog aghana, olog hae sembanep. Ot tup nimina, Allahri 'Saelbamsululam,' aro wepto pogtopne poneko sembe tup nimiri, 'El umag wamnun,' sembanep kom saog wamla. Pham unta imisti phoroba lom toman wa'ana hae, eka'uk kom sembanep. Ot tupne Allahri saelba uhirobag wa'inne eka'uk sirik wamla,” seog.
MAR 10:26 Yesusti wene seogne sembe eldi yubu ka'ero neleptopnang lo'om paibon seekti, sin mamun hail talamekti, “Undop tanena, Allahri nimi etne agha 'Ya'ag kamag uro wamukang,' aro taluro saelbahinep?” seek.
MAR 10:27 Wene seekpa, Yesusti sin kembahiogti lelamogti, “Nimiri wanaag agha uro yabinep kom aghana, ot Allahri yepsinneag agha uro yabinep. Nia mangkina Allahri 'Uanun,' senenne sunsunum uro ualeba, uro yabinep,” seog.
MAR 10:28 Wene seogpa Petrusti, “Nu kembahimen! Nuringe nia mangkina ni lipsibori, anag neleplangkeap,” seog.
MAR 10:29 Wene seogpa Yesusti, “Nari a'unag sikne agha lelamnange, nimi etneri na Yesusag nelepto 'Allah yubu walinge ambarelamsunun,' aro eldinge ae, eldi eldo ilipsae, eldi eldo'el ilipsa'el, eldi ili ilin, eldi elmabo elenge awe, nimi enekori laplopsilenge sembe wene wamap ko'oeneag Allahri lunuro nen ma'aro maiknoro phekletopneap tatlul. Nia mangkina laploplenge sembe tatleba, elag talulnena, nimiri aeap, eldi eldoyabo ilipsaboap, eldi eldo'elabo ilipsa'elaboap, eldi iliyabo ilinaboap, eldi elmaboap, elenge awe babe wene wamap ko'oeneag elag talul. Nen nhonna, ora nimiri el sembe, 'Yesus neleptop nimi seklebaukang,' aro olamsiikpa, seklenne babe elag talul. Aghana amik yalamle ko'oag Allahri ya'ag kamag uro unne neneko tatsilul.
MAR 10:31 Abene agha amik yalamle sumeneko nimi nubunge wene wamang nimi agha, nimi maikno ologne taukang. Nimi ologne wene wamang nimi agha, nimi maikno amik nubunge taukang,” seog.
MAR 10:32 Wamekpa Yesus el yubu ka'ero neleptopnangap, “Yerusalem waelbukap,” aro palamekti, Yesus samenag menangal piogpa palamek. Yesus samenag menangal piogpa, as Yerusalem palamekti, Yesus el yubu ka'ero neleptopnang tanekori senelamekti, “Yerusalem nimiri el obukang to kom to,” aro yaghe sembaek. Ora nimi Yesusag neleplamek nimi babe log tahiog. Samen uaog saog uro, nen babe Yesusti el yubu ka'ero neleptopnang aobare nang eneko yopsiogti, Yesusti elag uro yabinepne sembe nen alniro ambatsiog.
MAR 10:33 Ambarelamsiogti, “Ka'eamlulom! Nu wene Yerusalem sip palamap. Yerusalem wamebea na mog so'oag nimi tahinge sembe nimiri pangkhebanelul. Pangkhebanelenge, sin Allah sembe pairopnang sikindoyaboap Musari samenag mome toro pibog yubu ambatsiropnangap sikin saeag nenero pangkhebanelul. Sin Allah sembe pairopnangap Musa yubu ambatsiropnangap abenekori na sembe 'Ya'ag tebalul,' aro tam karepto pibikti, nimi sisa Yahudi kom nimi saeag nembanukang.
MAR 10:34 Sindi saeag nembaneikpa, nimi sisa Yahudi kom nimiri nanag yubu neplamneikti, sulu mag suplamneikti, taeplam-taeplam lopneikti, ya'ag omnukang. Ya'ag omneikpa, olog wamneri, ik wilindip sumeneko nen kamag tanun,” seog.
MAR 10:35 Wene seogpa, Zebedeus elmabo Yakobusap Yohanesapti Yesusag yarekti, “Nai, nu yubu ambatsiropne wamlam. Nuri 'Andi nu sembe uahom,' senelamnamne olog ambatkenemeba, nu sembe ualulam, te?” aro haibarek.
MAR 10:36 Wene serekpa Yesusti, “A'undi sa'a agha, 'Nu sembe undo-undo uatsulul,' senelamdom?” aro Yesusti sin haibahiog.
MAR 10:37 Yesusti wene aro sinag haibahiogpa sindi, “Andi 'Nimi so'oag nimi ni saelbahinun,' aro pukapmenba, an sembe kibiang towalengerop sumeneko, andi nun phende abenekoag, 'Nhon sae sirik sip pulae, nhon sae waneng sip pulae,' semenba nu anap nhondi saelbamsukap senelamnam,” serek.
MAR 10:38 Wene serekpa Yesusti, “A'undi molbaneromne ekonne agha molbanerom. Na seklebanun saog uro a'un babe na nelepto seklebanep to, kom to? Na tebanun saog uro a'un babe na nelepto tebanep to, kom to?” aro haibahiog.
MAR 10:39 Haibahiogpa, sindina, “Nuri babe unuanunam,” serek. Wene serekpa, Yesusti, “A'unna, nari seklero tebanunne saog uro seklebarurom.
MAR 10:40 Aghana a'un sembe, 'Nhon na sae sirik sip, nhon na sae waneng sip pularurom,' aro ambatsinun kom. Ot Nuni Allah Eldi wanaag agha na sae sirik sipap, sae waneng sipap puka urobag o'obaori, tatsilul,” seog.
MAR 10:41 Wene aro molbarekpa, Yesus el yubu ka'ero neleptopnang yogne sa'obare nang tanekori ka'ebaekti, Yakobusap Yohanesap alniro wabahiek.
MAR 10:42 Walamsiekpa Yesusti “A'un ni abene yahut,” aro yopsiogti ambarelamsiogti, “Nimi sisa Yahudi kom nimi Allah yubu ekon nimi tala-tala wamang nimi sembe saelba uhiropnangdi nimi luknuhiro salelamsiang. Sin anabiag agha sikiniyabori yo uro mikipne agha ulamsiang. Tam nene a'un el wamlom.
MAR 10:43 Unulamang aghana a'undi unuaheng kom! Nimi etneri a'un nusamag wamlomne, 'Na nubunge tanun,' sembale tanena, amik nimi yepsinne agha talul.
MAR 10:44 Nimi etneri na samenagne tanun sembale tanena, nimi ni sembe arukna talul.
MAR 10:45 Na mog so'oag nimi tahi aghana, nandamne yepnukang aro so'oag yahi kom. Nimi yepsinun aro yahi. Yahingena, mog so'oag nimi niri mali-malia ulamangpa, Nuni Allahri opsinep. Aghana 'Mog so'oag nimi anabiag agha nimi maiknori malia uroba sembe lunuro tebaneba, sikin ya'ag kamag uro wamukang,' aro yahi,” seog.
MAR 10:46 Yerusalem inaag palamekti, as Yerikho yaek. Yaekti, Yesusap el yubu ka'ero neleptopnangap as Yerikho phibom agha lanalamekpa, as aneko nimi maikno babe el nelepto nhon palamek. Palamekpa, nimi haing uropne nhon ina abolag puka kal ma'al mololamsiog. Mololamsiogne poneko sina Bartimeus ponekori mololamsiog.
MAR 10:47 Moloro pukamogti ka'elamogpa, “Yesus Nazaretne poneko palogla,” alameka ka'ebaog. Ka'ebaogti, Bartimeus ponekori yubu nubu uro yoplamogti, “Yesus Daud elme, na o'ona sembane,” aro yoplamog.
MAR 10:48 Yoplamoghag agha nimi maikno tanekori, “Yubu kom tae,” aro walamekpog, el nen ma'aro mikip uro haum aro, “Daud elme, na o'ona sembane,” aro yubu lelamog.
MAR 10:49 Wene alamogpa, Yesusti ka'ebaogti sekelabiogti, “El Yoplulom,” seog. “Yoplulom,” seogpa nimi tanekori haing urop nimi eneko yopto ambarelamekti, “Yesusti yoplangkelba, awi uro wamlulam! Sekelabi,” seek.
MAR 10:50 Wene aro ambarekpa, haing urop nimi Bartimeus nimi enekori ag alibagne kwiripto tobogahiogti elemag-elemag sekom agha Yesusag piog.
MAR 10:51 Piogpa Yesusti Bartimeusag yubu lelamogti, “Andi yopnelamnena, 'Yesusti nanag sa'a agha uanoho,' sembamlamdi yopnelam?” aro haibaog. Wene aro haibaogpa Bartimeus haing uropne ponekori, “Nai, yubu ambarelamsilamne, nari 'Haing ene kwelekanoho,' sembamnari yopken,” seog.
MAR 10:52 Wene seogpa Yesusti, “Andi Nanag wana saingniro seneragto wana sepsebek aro 'Wali kwelek anelul,' sembalamne nene sembe, wali nembaghenuan. Hae, wali pululam,” seog. Yesusti wene seog abeneko pere haing aneko kwelekaogpa, nimi eneko Yesus ina palamoghag neleplamog.
MAR 11:1 Yesus el yubu ka'ero neleptopnangap as Yerusalem peramag palamekti, yim Zaitun tamag as Betfageap Betaniaap piek. Piekti, Yesusti el yubu ka'ero neleptopnang phende pogto
MAR 11:2 aruklamsiogti, “A'un whingag as aneag pururom. Purumundi, pham keledai yemne haing kobea kerektop pham nhon ipturom. Pham keledai aneko nimi anam pulingkirop kom pham kerektoba iptumundi, pham ane kobea lopto payarurom.
MAR 11:3 Nimiri a'unag, 'Sa'a sembe a'undi kobea loplamtom?' aro hailogsikpana, a'undi ambatsururomnena, 'Nuni nu saelba uhiropne poneko teko sel tagha kobea lopnamdi, pabalamnam. Usa nuniri, 'Samoro paburorom' sele tanena, nen pham ene elem uro yalul,' sururom,” seog.
MAR 11:4 Wene seogpa, el yubu ka'ero neleptopnang phende abeneko pirekti, pham keledai yemne aneko ae ina siram peramag kerekameka iptek. Iptekti, pham keledai yemne aneko kobea loplamdekpa,
MAR 11:5 nimi taneko sekamek nimiri sinag hailamsiekti, “Sa'a sembe a'undi pham keledai ane loplamdom?” aro haibahiek.
MAR 11:6 Wene aro haibahiekpa, sikini Yesusti yubu ambatsiogha sunsunum uro ambatsirekpa, nimi tanekori, “Hae pabururom,” seek.
MAR 11:7 “Pabururom,” seekpa, pham keledai yemne neneko Yesusag pabirekti, sikinenge ag nongag enektop ag kwiripto pham keledai alibag yangkaekpa, Yesus pham keledai alibag pulingkiog.
MAR 11:8 Pulingkiogti, yalamog inaag aneko nimi tanekori, “Nimi nubunge yalamlaba, kibukap,” aro Yesus pinep ina yangalamek. Nimi nenneri sindi nongag enektop ag kwiripto inaag yangalamekpa, nenneri aweag agha kal ma'al kokto payingkina inaag yangalamek.
MAR 11:9 Ina yangaro palamekti, Yesus whingag sip palamek nimiap wailag sip agha neleplamsiek nimiap tanekori yubu mikip uro haum alamekti, “Nu Taluro Saelba Uhiropne kiplamsut! Nuni Allahri poglaba, yalamlange poneko paliag nenelamsut!
MAR 11:10 Nunisag Daud ponekori Israel nimi saelbamsiog saog uro amik yalamlange ponekori wali saelbamsilul. Im Paliagneri nu taluro saelbamsilne poneko omeklamsut!” seek.
MAR 11:11 Wene alamekpa, Yesus as soro kalurop as Yerusalem piogti, Allahri Mem Ae aramag wa'iogti, ni taneko wamogne keme warekaog. Keme warekaog aghana, inipna peram taogpa, el yubu ka'ero neleptopnang aobare nangap as Betania piek.
MAR 11:12 As Betania mabeka ae lukunap, “Yerusalem samoro pukap” aro as Betania lanaro palamekpa, Yesus kwaneng yo sembaog.
MAR 11:13 Kwaneng yo sembaogti, weag agha tilamogpa, kal ara kwarang saog kal eneko ma'al saroba tibogaog. Tibogaogti “Wana mauamla to kembanun,” aro piog. Piog aghana, kal ara wana maurop li kom ane sembe, kal wana orog wamogti, ot ma'al aghabog saroba wamog.
MAR 11:14 Ma'al aghabog saroba wamogpa, Yesusti ibogti, kal ara kwarang saog kal enekoag Yesusti walamogti, “Sumene agha alniro andi wana mauroba nimi nhondi babe tukukang kom,” aro walamogha elag neleptopnangdi yubu tam ane ka'ebaek.
MAR 11:15 Yesus el yubu ka'ero neleplamek nimiap Yerusalem piekti, Yesus Allahri Mem Ae aramag wa'iog. Wa'iogti kemelamsiogpa, nimi maikno wa'ina pail alameknena, “Nimiri Allah sembe tatnepne yingkirop nimiri kamna kapto tobukang,” aro pail alamekpa, kamna kapto tolamek. Sindi kamna kapto tolamekne sembe Allahri Mem Ae salerop nimi tanekori seneraglamekti, “Nimi niri kal ma'al tane sunsunum komdi, nun Yahudi nimiri kal ma'al agha kamna kapto tolamukang,” senelamek. Ane sembe, sin sunsunum urop kal ma'al salerop nimi kwaria soroba peramag pukamekpa, nimiri kal ma'al tatto tol alamekti, kamna kapto tolamekpa, Yesusti ipsiog. Ipsiogti, kal ma'al tarel talamek nimi pukamekag Yesusti kwaria yamoro epsiog. Nimi mem winang payalamek nimi puka urobag babe Yesusti yamoro epsiogti, sin kamna kapto payalamek nimiap tolamek nimiap yag lambahiog.
MAR 11:16 Yag lambahiogti, “Nimi nhondi babe Allahri Mem Ae aram toman kamna kapto toroba pailaheng kom,” aro irikahiog.
MAR 11:17 Wene aro irikahiogti, Yesusti nimi tanekoag yubu ambarelamsiogti, “Samenag Allahri yubu lebogne nimiri mome toro pibogne undo: 'Nari ae anena, nimi ni tala-tala wamangneri, “Imagne Ponekoag molona molba urop ae,” aro engkukang,' seog. Aghana a'undi ulamlomneag agha 'Haoghaba toro nimi ohirop nimi tognop tangtobag' saog nembaom,” aro Yesusti wabahiog.
MAR 11:18 Yesusti wene seogpa, memnang Yahudi nimiri sae agha Allah sembe pairopnang sikiniyaboap, Musari samenag mome toro pibog yubu ambatsiropnangap tanekori ka'ebaek. Ka'ebaekti log senelamekti, “Yesus nenekori yubu ambarelamsilne ka'elamang nimi niri el sembe 'Mane agha ambarelamsil' aro yeng senelamang,” aro Yahudi nimi sembe nubu nangdi log senelamek. Log senelamek ane sembe sin wana yo tahiogpa, “Yesus welaro obukap?” aro ina elamek.
MAR 11:19 Imbaogpa, Yesusap el yubu ka'ero neleptopnangap Yerusalem laploa piek.
MAR 11:20 Ae kwelekaogpa, lukunap Yerusalem samoro palamekti, Yesusti sam wabaog kal ara kwarang saog kal eneko tam toman kembi-kembi palamekti kemelamekpa, kal eneko yarengap ni ul taog.
MAR 11:21 Kal ul tangtoba Petrusti kembaogti, Yesusti kal ara wabaogha sembe seneraghogti, yubu lelamogti, “Nai, nu yubu amohinne wamlamne, kal ara ambuhum wabaom kal aneko ya'ag ul tal,” seog.
MAR 11:22 Wene seogpa Yesusti, “Allahag wana saingniapmundi, 'Sikne' aro seneraglamlulom!
MAR 11:23 Nari a'un ambarelamsinne wali ka'ebalulom. A'undi Allahag mololapmundi, wana nhonog uro mololamlulom. A'undi Allahag mololapmunneag agha 'Sik uro yabilul,' aro mololapmun tanena, sik uro yabilul. Sunumna nhon ambatsinun. Nimi etneri wana phende seneragna koma eldi wanaag, 'Nuni Allahri sik ualul,' senenneag agha yim eneag aruklamleri, 'Ko'oro mag longorop mag laut nubungeag tobogholtal pi,' aro arukale tanena, sik uro yabilul.
MAR 11:25 A'undi Nuni Allahag molona mololapmun aghana, a'undi wanaag ora nimi sembe wana mali sembamsimun tanena, nimi neneko sembe 'Malia uaneo,' sembamunne samenag orog nembamun taneogna, Allahag molona molbalulom. Tam orog nembamunne, 'Nani Allahri nari malia ulamnonge wailag nembalul,' aro ora nimiri a'unag malia ulamsiikne orog nenelapmun taneogna, Allahag molona mololamlulom.
MAR 11:26 Aghana ora nimiri a'unag malia uropne sembe a'undi tam wailag nemban koma Allahag molona molbamun tanena, Nuni Allahri babe a'undi malia uropne wailag nembalul kom,” aro ambatsiog.
MAR 11:27 Wene aro ambatsiogti, tipto palamekti, Yerusalem samoro piek. Yerusalem samoro piekti, Yesus Allahri Mem Ae aram toman kemeroa yabalamogpa, memnang Allah sembe pairop nang sikini yaboap, Musari “Undo-undo unulamlulom,” aro mome toro pibog yubu ambatsirop nangap, Yahudi nimi sikiniyabo wenehirop nangap Yesusag hailaek.
MAR 11:28 Sikin yaekti Yesusag hailamekti, “Andi ulamlamne, etneri mikipne anag pibori, 'Unualulam,' aro pogkeoba, ulamlam?” aro haibaek.
MAR 11:29 Wene aro haibaekpa Yesusti, “Nari babe a'unnag haibahinun. Haibahinenge sembe a'undiba lag phoro ambatnumun taneogna, nari babe, 'Etneri pogneoba, ulamna,' aro ambatsunun.
MAR 11:30 A'undi wela senelamlom? Yohanes maghag pelengehiropne ponekori ulamongena, elna etneri poghoba, nimi maghag pelengelamsio senelamlom? Nimiri to, Allah Imagne Poneri to?” aro haibahiog.
MAR 11:31 Haibahiogpa, sin mamun tognoro hailtalamekti, “Nuri elag samoro, 'Allahri Yohanes poghoba, yubu ambatto maghag pelengelamsio,' sebe tanena, Yesusti nunag haibahileri, 'Sa'a sembe Yohanesti yubu ambatsionge sembe sik sembaom kom?' seleag,” aro sin mamun yubu lelamek.
MAR 11:32 Sin nubunang tanekori Yohanesag sik sembaek kom aghana, yog nimi ni tanekori Yohanes sembe, “Nuni Allahri yubu silimu tiptopne wamo,” senelamek. Nimi maiknori undo senelamek ane sembe, sin nubunangdi Yesusag hailamek nimi tanekori, “'Nimiri Yohanes pogho,' sebeag,” aro nimi sembe log senelamek.
MAR 11:33 Nimi sembe log senelamekti, “Yohanes maghag pelengehiropne poghonge, etneri pogho nu ekon,” seek. Wene seekpa Yesusti, “Undop pagha tanena, nari babe a'unag, 'Eldi pogneoba ulamna,' aro phoro ambatsinun kom” seog.
MAR 12:1 Sin memnang Allah sembe pairopnang sikiniyaboap, Musari mome toro pibog yubu ambatsiropnangap, Yahudi nimi sembe sikiniyaboap tanekori, “Etneri Yohanes pogho nu ekon,” seekpa Yesusti samoro, “Undop pagha tanena, na pogneonge sembe babe ambatsinun kom,” seog. “Ambatsinun kom,” seog aghana, sunumna nhon alniro ambarelamsiogne ane. “Nimi nhondi awe wero haing anggur aweag mebog. Mebogti leka kanero tobogti, haing anggur wana mag loltero pelengenag wip nhon hoghaog. Wip nhon hoghaogti, yae ua unnang sembe ae mororo ae alikinag solingkiogti, awe yae ua unnangag 'Yae wamlulom,' seogti, laplobi agha weag sip piog.
MAR 12:2 Piogti wamogha haing anggur wana tagtop li yaogpa, awe ngainge ponekori eldi aruknaag, 'Awe wero yae ua urop nangag na sembenge tol pululam,' aro poghog.
MAR 12:3 Poghog aghana, awe wero yae ua urop nang tanekori eldi arukna aneko saelbaek. Salero olamekti, tatna koma 'Pululam,' seekpa, nongog mo yaog.
MAR 12:4 Nongog yaogpa, awe ngainge ponekori eldi arukna nen nhon poghog. Poghog aghana awe yae ua urop nang tanekori usoghag olamekti, yubu neplamekti, oro yaghekpa yaog.
MAR 12:5 Usoghag obekpa yaogpa, awe ngainge ponekori eldi arukna wilindipne babe poghog aghana, nimi eneko ya'ag obek. Ya'ag obekpa, awe ngainge ponekori eldi arukna maikno poglamsiog aghana, nenne mulog olamsiekti, nenne ya'ag olamsiek.
MAR 12:6 Undo olamsiekpa, wene etne agha awe ngainge ponekori pognep? Wene elme o'onange neneko ot nhonog wamla. Undop aghana, elme neneko babe awe yae ua urop nang tanekoag poghog. Awe ngainge ponekori, 'Awe ngainge elme yal sembaikti kiplamikti, elagna pogto tarukang,' aro elme poghog.
MAR 12:7 Poghog aghana, awe yae ua urop nimi tanekori, 'Awe ngainge elme, el amik awe ngai tanepne wene ane yalamla. Obeberi nun agha awe ngainang taukap,' seekti saelbaekti ya'ag obek. Obekti nimi teptoba aneko awe sirikag toboglopsiek,” aro Yesusti sunumna ambatsiog.
MAR 12:9 Sunumna ane wene aro ambatsiogti hailamsiogti, “Awe ngainge poneko yaleri awe yae ua urop nimi tanekoag huahilul? Yaleri awe yae urop nimi taneko luknuro ya'ag opsileri, awe aneko yog nimiag 'Welamlulom,' aro nimi saeag piplul.
MAR 12:10 Allah yubu samenag mome toro pibogneag kemelamlom aghana, ekon taom te? 'Ae sorop nangdi kirik nene mali aro toboghaek aghana kirik neneko yangan kirik o'omne yangap tao.
MAR 12:11 Yangan kirik o'omne nembaonge Allah mori uaoba, nuri awi sirik uro kemelamap,' aro mome toro pibog,” seog.
MAR 12:12 Sunumna nene wene aro ambatsiogpa, Yahudi nimi sikiniyaboap, Musari mome toro pibog yubu ambatsirop nangap, memnang Allah sembe pairopnangap tanekori ka'ebaek. Ka'ebaekti sindi karong senelamekti, “Nunag 'Undo-undo malia ulamlom,' aro yubu likipto lepla,” sembaekneag agha, “Welaro el salero haing sae kaubaukap?” aro ulamek. “Saelbaukap,” aro ulamek aghana, sindi “Nimi maikno tanekori nu wabhiikag,” aro logti, saelban koma Yesus liloa piek.
MAR 12:13 Wamekpa, Yahudinang sikiniyabori Farisi nimi etpareap, nimi nubunge Herodesag neleptop nimi etpareap, “Yesusag pimundi, monag aluktop yubu haibamunba, Yesusti yubu malinge leplea ka'ebalulom,” aro pogsiek.
MAR 12:14 Pogsiekpa, Yesusag yaekti hailamekti, “Nai, andi nimiag 'Ologne to, nubunge to,' aro kembahin koma wali yubu ambarelamsilam. Ane sembe nu el wamapne, 'Nimiri na sembe wali sembanukang,' semban koma Allahri seneropne sunsunum uro sik yubu ambarelamsilam. Ane sembe andi yubu ka'ebaukap. Roma nimiri nu luknuhiro saelba uhiropne nubunge Kaisar ponekori nunag, 'Kal ma'al a'undi saeag agha na sembe pogto tarelamnululom,' aro arukahiog. 'Tarelamnululom,' aro arukahiogpa, nuri wali el tarelamukap to, kom to?” aro monag aluktop yubu haibaek.
MAR 12:15 Wene aro haibaekpa, Yesusti seneraglamogti, “Sindi yubu lilim walingeag agha lebang aghana, 'Yesusti leplengeag agha haing sae kaupto saelbaukap,' sembangdi haibaneang,” aro Yesus el taog. El taogti, yubu lelamogti, “Sa'a sembe a'undi 'Selbel werobag sae kiliro pailbukap,' aro undo haibanelom? Kal ma'al kirik wanange nhon payamunba, nari kembanun,” seog.
MAR 12:16 Wene seogpa, sin kal ma'al kirik wana nhon tarekpa, Yesusti salero kemelamogti, “Kal ma'al kirik wana aneag etneri si wamla? Etneri yame sunumna wamla?” aro maneri haibahiog. Wene seogpa sindi, “Roma nimi nubunge Kaisarti yame sunumnaap eldi siap kal ma'al aneag wamla,” seek.
MAR 12:17 Wene seekpa Yesusti, “Kal ma'al aneag Kaisarti yame sunumnaap eldi siap pairop tanena, Kaisarti a'unag 'Pogto tatne,' sele tanena, 'Eldinge,' aro tarelamlulom. Aghana sa'a-sa'a Allahringe wamla tanena, Nuni Allahag tarelamlulom,” seog. Wene seogne ka'ebaekti, “Yaghe, eldi wana hektopne agha ambatsil,” seek.
MAR 12:18 Ik nhon sum Yahudi nimi Sadukinang etpare Yesusag yaek. Saduki nimiri seneraglameknena, “Nimi teptopne nimi nen amik kamag taukang kom,” aro seneraglamekti, “Yesusag hairo mibukap,” aro yaek.
MAR 12:19 Yesusag yaekti hailamekti, “Nangkae, wali yubu ambarelamsilam. Tam nhon ambatkebeba, andi lepmenne ka'ebukap. Samenag Musari mome toro pibog yubuag kemelamapnena, 'Kabuni nhon me koma tebale tanena, yauog kel eneko ilipsaeri maupto topleri, eldo sembe lumbanep me nhon piplul,' aro Musari mome tobog.
MAR 12:20 Tam nene sembe sunumna nhon ambatkukap. Sin saekbare nang wamnari, yandonge poneko kelabo toamna agha me koma tebanep.
MAR 12:21 Tebaho tanena, ilipsae phendepne ponekori, 'Naro lunumna me nhon wamso,' aro yauog kel eneko maupnep. Maupnep aghana el babe me koma tebanep. Tebanepba ilipsae wilindipne ponekori babe undo unuanep.
MAR 12:22 Ilipsae tomne, lamne, no'opne undobog nimi saekbare abenekori kel eneko maupnep aghana, me koma ni tebanep. Komopnag keleneko babe tebanep.
MAR 12:23 Nimi saekparenang enekori keleneko toamna ane sembe, amik nimi teptopne kamag tanep sumeneko keleneko etneri kel tanep?” aro monag alukto Yesusag haibaek.
MAR 12:24 Wene aro haibaekpa, Yesusti tangaro ambarelamsiogti, “A'un Sadukinang Allah yubu mome toropne seneraglamlom kom. Allahri mikibag agha nimi nen samoro kamag nenehiropne sembe babe sik senelamlom kom. Ane sembe a'un loba uro seneraglamlom.
MAR 12:25 Aghana nimi teptopne nen samoro kamag taukang sumeneko, nengabo kelabo toptangkamukang kom. Allah arukna imagnang malaikat saog uro wamikti, nengabo kelabo toptangto koma wamukang,” seog.
MAR 12:26 Wene seogti, Yesusti nen tipto ambarelamsiogti, “Nimi nen samoro kamag taukangne sembe olog ambatsinun. A'undi Allah yubu Musari mome toro pibog yubu olog kemelamlom kom te? Musari Allah yubu mome toro pibog yubuna, Musa alog kal peramag sekogpa, Allahri elag ambarog yubu sembe ekon te? Musa alog kal peremag sekoghag kal aneko auk pog libagloa saog uro wamog aghana, kal aneko telamog kom. Anekoa Allahri Musaag ambarelamogti, 'Nana Abrahamap, Ishakap, Yakubapti omeklamneekpa taulbahiropne wamna,' aro Allahri ambarog.
MAR 12:27 Wene seog aghana, Abrahamap, Ishakap, Yakubap sam tebaek. Tebaek aghana 'Sin nen kamag taukang,' aro Allahri seneraghogti, 'Nana Abrahamap, Ishakap, Yakubapti omeklamneekpa taulbahiropne wamna,' seog. Nuni Allah ponekona, 'Nimi ya'ag teptoba wamukang,' aro taulbahirop kom. Elna 'Nimi kamag wamukang,' aro taulbahiropne wamla. A'un Saduki nimiri loba uro seneraglamlom,” seog.
MAR 12:28 Yesusap Saduki nimiap yubu lelameka anekoag nimi nhon Musari samenag mome tobog yubu ambatsiropne nhon yaogti ka'ebaog. Musari samenag mome tobog yubu ambatsiropne ponekori ka'elamogpa, Yesusti Saduki nimi anekoag samoro ambatsiogpa, ka'ebaogti, “Yesusti wali lepla,” sembaog. “Wali lepla,” sembaogti, Musari yubu ambatsiropne ponekori Yesusag hailamogti, “Allahri ni 'Undo-undo ulamlulom,' aro aruksirop yubu nelagha nubu sirikne, o'omne wamla?” aro haibaog.
MAR 12:29 Wene aro haibaogpa, Yesusti samoro ambarelamogti, “Allahri 'Undo-undo ulamlulom,' aro aruksirop yubu ni agha, o'omnena ane. Musari samenag mome toro palilamogti, 'A'un Israel nimi ka'eamsut! Nuni Allah, nia mangkina Saelba Uhiropne poneko ot nhonog wamla.
MAR 12:30 Nuni Allah nu Saelba Uhiropne poneko sembe a'undi wana ningkiap nong ningkiapti o'ona senelapmundi, Elag to'opto seneraglapmundi, nong mikipneag agha El sembe sol wali uro awe tolamlulom,' aro mome toro pibog.
MAR 12:31 Allahri aruksirop yubu o'omne phendepnena, 'Andamnang nong ningki o'ona seneptangkamlam saog uro nimi orange babe o'ona sembamsululam,' aro mome toro pibog. Allahri aruksirop yubu orange babe wamla aghana, yubu o'omne paliag sirikne phende abene aghabog,” seog.
MAR 12:32 Yesusti wene seogpa, Musari mome toro pibog yubu ambatsiropne ponekori, “Andi sik yubu walinge ambatsilam. Nuni Allah ot nhonog wamlaba, mikip sirikne phendepne El saog uro wamla kom.
MAR 12:33 Nimiri 'Nuni Allah kibukap,' aro waliaba tatnepneap, lebe aroba oro Allah sembe aukag tamnepneap, ni ane wali. Ot phelektopnena, andi leplamne sunsunum uro nimiri unulamik abeneogna, phelektopne wali sirik wamla. Nimiri wana ningkiag agha Nuni Allah o'ona senero Elag to'opto seneraglamikti, nong mikipneag agha El sembe sol wali uro awe tolamik taneogna, wali sirikne phelektopne wamla. Neapna nimiri nong ningki o'ona seneptangkamap saog uro nimi orange babe o'ona sembamsibe tanena, ane babe wali sirik. Nuni Allah sembe waliaba tatnep aghana, paliag siriknena Allahap nimiap o'ona sembamsukap,” seog.
MAR 12:34 Wene seogpa, Yesusti ka'ebaogti, “Musa yubu ambatsiropne ponekori wana hektopneag agha wali uro lepla,” sembaog. “Wali lepla,” sembaogti, Musa yubu ambatsiropne ponekoag, “Andi leplamne ka'ebiagha, na el tan. Allahri wepto poghogne poneko lag taleri, nimi saelbamsile tanena, andi wana mapleba, elag nelebanep,” seog. Wene seogpa, yog nimiri, “Yesus sumbaukap,” aro logti, nimi nhondi babe elag hairo mibek kom.
MAR 12:35 Yesus Allahri Mem Ae aramag wamogti, tipto yubu ambarelamsiogti, “Sin Musari mome toro pibog yubu elnangdi ambarelamsiangne, 'Allahri “Saelbamsululam,” aro wepto poglenge Kristus poneko sembe “Daud elme” aro engeropne,' alamang. Sa'a sembe 'Daud elme' alamang?” aro yubu ambatto haibahiog.
MAR 12:36 Haibahiogti, Yesusti nen tipto ambarelamsiogti, “Kristus yalenge poneko sembe 'Daud elme' aro engelamang aghana, Daud eldamneri Kristus poneko sembe 'Na saelba uneropne' aro engero lebog. Allah Eldamne Yame Walingeri nunisag Daud ponekoag ambarogpa, sunsunum uro Daud eldamneri Kristus poneko sembe mome toro pibognena, 'Nuni Imagneri na saelba uneropne ponekoag yubu lelamogti, “Na sae sirik sip pulamen paghabog, andi aisanang andi yan mombolag pipsineba, nun niri saelbanunam,” seog,' aro Daudti mome toro pibog.
MAR 12:37 Undop agha, nunisag Daud eldamneri Kristus poneko sembe 'Na saelba uneropne' aro engelamog tanena, welaro nimiri Daud paliag nenero Kristus poneko sembe 'Daud elme' aro engero lemnep?” aro ambatsiog. Yubu ambarelamsiogpa, sin Allahri Mem Ae aramag wamek nimiri wana yeng uro ka'elamek.
MAR 12:38 Ka'elamekpa, Yesusti yubu tipto ambarelamsiogti, “Sin Musari yubu ambatsiropnang tanekori ulamangne saog uro a'undi babe unuaheng kom. Sin Musa yubu ambatsiropnang taneko sindamneri paliag neneptangka nubu nimiri enektop ag walinge agha nongag wangalamangdi, nimiri pail wa'ina torobag wa'alamangdi, 'Wali sembanehengdi, kipneheng,' aro nimi whing toman pang yang ulamang.
MAR 12:39 Nimi poloro Allah yubu lerop aeag babe, nimi haiptangto kwaneng yoro nikag terobag babe, 'Nimi nubunang purobag aghabog pukamsene,' aro pulamang.
MAR 12:40 Sin nimiri, 'Na kipneheng,' aro unulamang aghana, sae agha orog nimi sembe yareag sembahin koma, aboapti kaldam kelabori ae babe, sae agha uropne babe sin Musari yubu ambatsiropnang tanekori taluro tolamang. O'ona sembahin koma taluro tolamang aghana, sindi malia uropne sembe 'Niknip tanun,' aro Allahag molona we uro kiliro lelamang. Unulamangne nene sembe ni tam kemero karebalulne ponekori kemelamsildi, tam ikin sirikne sinag pipsilul,” seog.
MAR 12:41 Wene seogti, Yesus Allahri Mem Ae aramag palamoghag agha aneko nimiri sae agha kal ma'al Allah sembe pairobag wamogpa, peramag pul piog. Pukamogti kemelamsiogpa, nimi maikno tanekori kal ma'al Allah sembe palilameka kembamsiog. Palilamek nimina, tup nimi maikno tanekori kal ma'al maikno palilamek.
MAR 12:42 Palilamekpa kembamsiogag agha kaldam kel sae agha orog kel nhon yaogti, kamna kapto torop kirik wana ologne phende pibog. Kamna kapto torop kirik wana pibognena, si toro tona babe ologha tatsinepne pibog.
MAR 12:43 Pibogpa kembaogti, Yesusti el yubu ka'ero neleptopnang “Yahut,” aro yopsiog. Yopsiogpa, elag yaekpa, ambarelamsiogti, “Nari a'unag sik uro lelamnange, tup nimi maikno tanekori sikin saeag maikno wamlange agha pogto waliaba maikno palilamang. Maikno palilamang aghana, kaldam keleneri olog piplange, el saeag orog agha ni kwaneng toro tenne elag wamlange Allah sembe ni pipla. Tup nimi taneri pogto pibangne kembi agha, 'Olog pogto pibang,' sembanep. Aghana kaldam keleneri el saeag orog agha ni tatla ane sembe, nimi ni tane wamangne kembi agha 'Kaldam keleneri maikno phelektopne pipla,' sembanep,” seog.
MAR 13:1 Yesusap eldi yubu ka'ero neleptopnangap Allahri Mem Ae nubunge laplobi agha palamekti, eldi yubu ka'ero neleptopne nhondi, “Nai, yubu amohiropne, Allahri Mem Ae aram ane kembamen! Nubu kirik walingeag agha Allahri Mem Ae tipto sorop ae maikno ane babe, imag soroba babe kemerop sirik,” seog.
MAR 13:2 Wene seogpa Yesusti, “Nubu ae walinge maiknoa soroba ane tiboghamen. Amik sum ni ae aneap, imag soroba aneap nimiri ni kwerekto yamolobikpa, kirik nhon babe nen sorobag sekamlul kom,” seog.
MAR 13:3 Wene seogti, Yesusap eldi yubu ka'ero neneptopnangap Zaitun yimag yingkiekti, Yesus Allahri Mem Ae nubunge whingag sip tibogto pukamog. Pukamogpa, eldi yubu ka'ero neleptopnang tombare Petrusap, Yakobusap, Yohanesap, Andreasapti, “Yesusap mo yubu lepsebe,” aro Yesusag yaek.
MAR 13:4 Yaekti mololamekti, “Nai, andi usa leplamne neneko sembe olog tibin nebatsululam. Usa andi, 'Nimiri ni kwerekto yamolobukang,' aro leplamne nene etsum agha uro yabilul? Kekneba huropne agha lag taleba, 'Wene uro yabinep,' sembaukap?” aro eldi yubu ka'ero neleptopnang tombare abenekori Yesusag haibaek.
MAR 13:5 Wene aro haibaekpa, Yesusti sinag samoro ambarelamsiogti, “Nimiri a'unag, 'Orolenange ambatsikag,' aro haing whi uro wamlulom! Allahri samenag salag lero palilamogti, 'Nimi nhon “Nimi taluro saelbamsilul,” aro wepto pognun,' seogne sunsunum uro, na Yesus wepto pogneo. Na Yesus wepto pogneonge sembe lebog aghana, amik sum nimi maiknori orolenange leroa yalamikti, a'ero-a'ero lelamikti, 'Allahri nanagha “Saelbamsululam,” aro wepto pogneoba yan,' sukang. Sindi orolenange lelamikne sembe nimi maiknori sik sembaukang aghana, a'undi sik sembaheng kom.
MAR 13:7 A'undi ka'elapmunba, nimiri mog so'o aneag babe, weag urop mog so'oag babe mal talamikne sembe lelamikpa, ka'elapmun tanena, wanaag samsamoro log sembaheng kom. Mal talamikne ane sik uro yabilul aghana, Allahri tam karepto ikinne komopto pimnep sum anam elem uro yabinep kom.
MAR 13:8 Yubu sia leropne as nhonap nhonap aisa neneptangto mal talamikpa, nubu mog so'o nhonap mog so'o nhonap nimi teng-tengne mal talamukang. Mal talamikpa, mog so'o tala-tala sa'uma pot-porolamleba, kwaneng yo maikno walelamlul. Uro yabilul aghana, 'Allahri tam karepto ikinne pairop sum komobanual,' sembaheng kom. Allahri tam kareptop sum lag tanepne sembe sunumnana undo. Me anam mangaptan komag ilindi me mangaro anebag og alnilamsildi, og nubu tangtang og maikno uro seklero mangal tolamla tanena, 'Me manganuan,' sembanep. Ane saog uro, nari ambatsinne sunsunum uro nimi seklenne nubu tangtang uro yabilenge abeneko pere a'undi 'Wene Allahri tam karebalul to,' aro alniro seneragnep.
MAR 13:9 Aghana sumeneko anam lag tan komag a'un haing whi uro wamlulom! Nimiri a'un salero, 'Yesusag neleptopnang,' aro Yahudi nimi sembe tam kareptopnangag pabalamsiikti, Yahudi nimi poloro winiro yubu lerop aeag olamsukang. A'un salelamsiikti, 'A'un Yesusag neleptopnang,' aro nimi mog so'o saelba uhiropnangap yubu sia leropnangap sikin whingag pabalamsiikpa, a'undi na Yesus sembe 'Undo-undo wamori, ulamoba, ibobo,' aro lag phoro ambarelamsululom.
MAR 13:10 Allahri tam komopto karebalul sumeneko anam uro yabin komag, a'undi yubu walinge Allahri nimi wali saelba uhiropne sembe ambarelamsululom. Ambarelamsimunba, yubu tipto nimi mog so'oag tala-tala wamang nimiag ambatsiik taneogna, tam wali uro komopto karebanep sumeneko uro yabinep.
MAR 13:11 Yubu walinge ambarelamsimunba, nimiri a'un haing sae kaupto tam kemero kareptobag pabuhukang. Tam kemero kareptop nimi whingag pabihik tanena, 'Sa'a senun,' aro log sembaheng kom. Sin whingag wapmunag abeneko pere Allah Eldamne Yame Walingeri a'unag 'Undo-undo leplulom,' aro el nembahilul. Allah Yame Walingeri a'unag amolamsilenge a'un mori senenneag kom aghana, Allahri senenne sunsunum uro amolamsilul. Ane sembe log semban koma Allah Yame Walingeri a'unag amolamsilenge sunsunum uro lelamlulom.
MAR 13:12 Na sembe ambarelamsimunba, tipto ambarelamsiikne abeneko pere, nimiri karongdi, ilipsaeap eldoapti 'Nangkae' semban koma 'Yesusag neleplamlaba, ya'ag oplulom,' aro pan khebahileba, nimiri opsukang. Iliri babe elme sembe 'Name,' semban koma nimiri saeag nenero, 'Yesusag neleplamlaba, salero oplulom,' aro pan khebalul. Nimiri sikini sikinin 'Ya'ag opsukang,' aro pan khebahukang. A'un nanap ma'aptangto neleplamnelomne sembe nimi niri a'un sembe karong sembahukang. Karong sembahukang aghana, nimi etneri wana khaepto wamleri, nanag 'sikne' aro seneraglamle tanena, Nuni Allahri nimi eneko taluro wali nembalul,” aro Yesusti eldi yubu ka'ero neleptopnang tombare abenekoag ambatsiog.
MAR 13:14 Wene seogti, Yesusti nen ambarelamsiogti, “Ik nhon sum malia nhon Allahri 'Song mali,' senenne Allahri Mem Ae lomag wa'ina sekamleri, Allahri Mem Ae aneko mali nembalul. Mali nembaleba, Allahri Eldi Mem Ae sembe 'Karong' sembaleri, laplobi agha pileba, nimiri babe karongdi laplobi agha pukang,” aro Yesusti ambatsiog. (A'undi mome nene kemelamlom nimiri wali uro seneraglapmun tanena, Yesusti “Malia” seogne nene “Tam huropne sembe lebog,” aro wana hekahilul). Yesusti eldi yubu ka'ero neleptopnangag tipto ambarelamsiogti, “Malia aneko Allahri Mem Aeag wa'ina sekamle sumeneko nimi mog so'o Yudea wamik nimiri, 'Nu ya'ag opsikag,' aro merero yimag pinep.
MAR 13:15 Sumeneko nimi eldi ae imaghag tai waelbamle nimi elem uro kulukaleri, ae lomag wamlea 'Tomnun,' aro ae lomag wa'in koma elem-elem merero yimag pilul.
MAR 13:16 Nimi aweag wamle nimi eldi ag nongag enektoba kwiripto piplea samoro tol pin koma merero yimag pulul.
MAR 13:17 Undo uro yabalamle abene sin kelabo me mum tiniltolamik kelaboap, memon wamik kelaboap, sin sembe ikin sirikti, 'Yaghe' aro seklebaukang.
MAR 13:18 Ko'o neneag wamik nimi maiknoro seklebaukang. Undo uro yabalamleba, seklebaukangnena, Allahri samenag so'o sumbaog sumag agha nimi seklelameka kekman, wene babe seklelamang aghana, undo uro yabileba, ikin uro seklebaukangne sunsunum uro kom. Undo uro yabileba, seklelamikpa, amik wamukang nimi babe seklebanep aghana, undo saog uro seklebaukang kom. Ot ko'o neneag wamik nimi agha undo seklebaukang. Ni undo uro yabalamlulne nene mag telamle liag uro yabile tanena, yimag panne ekauk sirik, ane sembe Allahag mololapmundi, 'Nun seklebabeagti, mag telamle liag uro yabalamlul kom,' aro molona mololamlulom.
MAR 13:20 Ikin seklebaukang ko'o aneko Allahri peram nembaho komba, nimi ni tebaheng. Aghana anam uro yabin komag, Allahri o'ona senehiro, 'Na mabo taukang,' aro wepsiog nimi sembe yareag sembahiogti, 'Ko'o ane peram nembanun,' aro karebaogti, peram nembalul.
MAR 13:21 Ko'o anekoag nimiri a'unag yubu ambarelamsisengdi, 'Kembahut! Allahri wepto “Taluro saelbamsululam” aro poghogne Kristus yaldi, ane wamla,” sehengba, nimi orangeri, 'Ano wamla,' seheng tanena, a'undi sik sembaheng kom. Sinag nelebahin koma yimag merero pululom.
MAR 13:22 Nimi maiknori lero yalamikti, nenneri, 'Na Allahri “Saelbamsululam” aro wepto pogneoba, na Kristus yan,' aro orolena ambarelamsukang. Nenneri, 'Na Allah yubu silimu tipto lelamna,' aro orolena ambarelamsukang. Orolena ambarelamsiikti, nimiri uanep komne ulamikti, 'Yaghe! Imagneri mikipne pere agha mane agha ual,' senen kekneba ulamikpa, orolena lelamikne nimi maikno sirikti sik sembaukang. Nimi maikno sirikti sik sembaukang aghana, Allahri 'Namabo taukang,' aro wepsirop nimi sembe, 'Orolena sik sembaukang kom,' aro wana hekahileba, orolena lelamikne sembe sik sembaukang kom.
MAR 13:23 Nari wene a'unag ambatsinne nene anam uro yabin komag ni uro yabinepne sembe ambatsin. Ane sembe haing whi uro wamlulom,” aro Yesusti eldi yubu ka'ero neleptopnang tombare abenekoag ambatsiog.
MAR 13:24 Wene aro ambatsiogti, Yesusti nen tipto ambarelamsiogti, “Ikin seklelamik ko'o eneko uro yabileba, amik nen uro yabilulnena, Allah yubu samenag mome toro pibogne sunsunum uro uro yabilul. Samenag Allah yubu silimu tiptopne nhondi amik uro yabilulne sembe mome toro palilamogti, 'Heng babe tingkale komba, wal babe tingkalul kom.
MAR 13:25 Imberea babe lulupna agha imag agha tinilamikpa, imang wareroba imag wamlange babe ni lolog alul,' aro mome toro pibog.
MAR 13:26 Undo uro yabile tanena, na imag agha nimi mog so'oag nimi tahinge toa nusam toman yanun. Yalamneba, Allah Imagne ponekori mikipne pere agha imang warero lag taneba, nimi niri tiboganukang.
MAR 13:27 Imang warero mikipneag agha yaneri, nari Allah arukna imagnang malaikat poglamsineri, “Allahri 'Na mabo taukang,' aro wepsirop nimi mog so'o im tiptobag so'o tiptobag wamang nimi ni poloro wimbahilulom,” aro pogsunun.
MAR 13:28 Nari a'unag 'Undo-undo uro yabilul,' aro ambatsinne sunsunum uro uro yabalamleba, kemelapmundi el tahilul. Ni ane kembamundi seneraglapmundi, 'Yesusti nunag, “Nen amik uro yabilul,” aro ambatsiogne peram tanual,' aro el tahilul. Kekneba kemelamlulomne nene sembe, sunumna nhon kal sembe ambatsinun. Nu nimi taneri kal ara kemelamapba, kon eren ua ulamlari, mog towalengelamla tanena, 'Ebare li tanual,' senelamap. Ane saog uro, nari a'unag 'Undo-undo uro yabilul,' aro ambatsinne sunsunum uro uro yabalamle tanena, 'Nen amik uro yabinepne peram tanual,' senelamlulom.
MAR 13:30 Sik uro ambarelamsin. Nimi wene wamang nimi anam teban komag ni ambatsinne nene uro yabilul.
MAR 13:31 Imap so'oap orog talul aghana, nari yubu leropne orog talul kom. Ya'ag wamlul,” seog.
MAR 13:32 Wene seogti, nen tipto ambarelamsiogti, “Ni 'Undo-undo uro yabilul,' aro ambatsinne nenena, nimi nhondi babe, 'Etsum uro yabilul,' aro el wamla kom. Allah arukna imagnang malaikat babe, Allah Elme babe ekon. Ot Nuni Allah Eldamneog el wamla.
MAR 13:33 A'un babe 'Etsum uro yabilul,' aro ekon uro wamlom. Ane sembe tibogto weapmundi, haing whi uro wamlulom.
MAR 13:34 'Tibogto weamlulom,' sennena, sunumna nhon ambatsineba ka'eamlulom. Ae ngainge nhon 'Weag punun,' aro ulamla tanena, eldi ae lomag wamlange eldi aruknari saeag piplari, 'Yae wamlulom,' aro arukahil. Aruklamsildi, elme arukna nhonag, 'Awe nene tolamlulam,' seldi, nen nhonag, 'Awe nene saelbamlulam,' aro ambatsil. 'A'ero-a'ero saelbamlulom,' aro ambatsildi, ina siramag, 'Yae wamlulam,' sel nimi enekoag, 'Wali uro yae wamlulam. Na pineri, samoro yanunne sembe haing whi uro tibogamlulam,' sel. Wene aro arukahildi pil. Ane saog uro na anam pin komag a'unag, 'Weapmundi, haing whi uro tibogamlulom,' aro nari ambatsin.
MAR 13:35 Ae ngainge poneko pila 'Etsum samoro aeag yalul,' aro eldi arukna taneko ekon. Ae ngainge poneko sinag yalul to, tomnusam yalul to, kweleknag yalul to, heng lopwalengeleag yalul to, sin ekon. Ae ngaingeri arukna ae yae ua uropnang taneko ekon urop saog uro, na nimi so'oag nimi tahinge etsum samoro yanunne sembe a'un babe ekon uro wapmunba, yanun. Ane sembe haing whi uro tibogamlulom.
MAR 13:36 Ae ngainge poneko lo'om aro yalamleba, el arukna taneko malamikpa, ipsile tanena karong sembahilul. Ane saog uro na lo'om aro samoro yalamneba, a'un malapmunagti, haing whi uro tibogamlulom.
MAR 13:37 Nari a'unag lelamnange nene nimi niag wenero ambarelamsin. Haing whi uro tibogamlulom,” seog.
MAR 14:1 Yahudi nimi sembe nubu sum peramag wamekpa, nimi maiknori, “Nubu sum 'Paskah' amni taleba, as Yerusalem sani yoro telameberi, kwaneng walerop komne ik saekpare telamukap,” aro Yerusalem yalamek. Yalamekti wamekpa, memnang Yahudi nimi sae agha Allah sembe pairopnang sikindoyaboap, Allahri Musa pere agha “Undo-undo unulamlulom” aro mome toropne ambatsiropnangap tanekori, “Welaro Yesus haing kumbaberi, sae kaupto saelbaberi, ya'ag obukap,” senelamek. “Obukap,” senelamek aghana seneraglamekti, “Nubu sum Paskah taleba, ik saekpare sani yoro terop sum abeneko pere el sae kaupto saelbabe tanena, nimi maikno tane wamang nimiri nu walamsiikti, yanghang alamikag,” aro log senelamek.
MAR 14:3 Wene “Salero obukap,” senelamekpa Yesus Yerusalem peramag as Betania Simondi aeag wamog. Simon poneko samenag kon tena pololamogpa, wali taogne ponekori aeag Yesus wamogti, kwaneng telamog. Kwaneng telamogpa, kelabo nhondi aeag wa'iogti, nongag pelagtop mag song walinge payaog. Nongag pelagtop mag song walinge nene kirik agha sunurop ma'i nhonag ikto tobongkibekpa, kamna alikinag kapto tobogti payaog. Payaogti, “Ologha babe pimna koma ni ikto kipnun,” aro ma'i ina siram kobongkia Yesusti usoghag ikog.
MAR 14:4 Kamna alikinag kapto torop mag song walinge ikogpa, nimi etpare wamekne tanekori ibekti, wana yo senelamek. Yo senelamekti, sin mamun yubu lelamekti, “Sa'a sembe mag song walinge nene loba nenero iklopla?
MAR 14:5 Song wali mag enena, nimiri hengkun nhon awe welamnaba, kamna tatsiropneag saog uro kamna kapto torop mag ane. Keleneri saeag agha nimiri kamna kapto topsoba, kal ma'al ane nimi sae agha orog nimiag pogto tatsiso aghana iklopla,” aro keleneko wabaek.
MAR 14:6 Wene aro walamekpa, Yesustina, “Lipsisut! Sa'a sembe keleneag walamlom? Eldi nanag 'Nimi o'omne' sembaneldi, walia ual.
MAR 14:7 Sin nimi sae agha orogne sopsop a'un nusamag wamikpa, a'undi 'Wene yepsisebe,' sembamun tanena, sopsop yepsinep. Ot nana agha sopsop a'unap nhon wamukap kom.
MAR 14:8 Keleneri eldi saeag wamlangeag agha na sembe 'Nimi o'omne,' aro kipnel. Na amik tebahaneba, nari nongag nimiri song wali mag pelaganehengdi, so'oag sikitneheng saog uro ual. Na anam teban komag keleneri nanag song wali mag pelaghaneldi, na tebane sum sembe wero o'ona sembamnel.
MAR 14:9 Sikne agha ambarelamsin! Mog so'o tala-tala yubu walinge Allahri nimi saelbamsilne sembe nimiri ambarel palamsiikti, keleneri nanag walia ualne sembe ekon tan koma ambarelamsukang,” seog.
MAR 14:10 Wene “Kelenekori wali kipnel,” seogpa, Yesus eldi yubu ka'ero neleptopnang aobarenang agha nimi nhonna, Yudas Iskariotne nenekori, “Yesus pankhebanun,” aro piog. Yudas nenekori memnang Allah sembe pairopnangag piogti, “Yesus pankhebanun,” aro ambatsiogpa, wana awi sembamek. Awi senelamekti, “Yesus nunag pankhebamenba, kal ma'al kamna tatkukap,” aro salag lero pibek. Saekag lebekneag agha Yudasti “Etsum pa'asea wamlul,” aro weamogti, keme nelero seneraglamog.
MAR 14:12 Yahudi nimiri ik saekpare kwaneng roti walerop komne telamek ko'o alnirop sum, nubu sum Paskah sumeneko taog. Paskah sumeneko Yahudi nimiri sop-sop ul palamekne sunsunum uro “Pham domba me oro yobaukap,” aro ulamek. Yobaukap aro ulamekti, Yesusti yubu ka'ero neleptopnangdi Yesusag hailamekti, “Nai, nu sam piberi, kwaneng yobabeba, yamenba nhon tukap. Tala siba pham domba me oro yoro tukap?” aro haibaek.
MAR 14:13 Wene aro haibaekpa, Yesusti eldi yubu ka'ero neleptopnang phende arukto poglamsiogti, “As nubunge Yerusalem palamtumunba, nimi kabuni nhon mag tero poa yalamlenge pone haiptamundi, elag nelebarurom.
MAR 14:14 Elag nelepto palaptumundi, el wa'alogle ae eneag wa'arurom. Wa'arumundi ae ngainge ponekoag, 'Nuni, elag yubu ka'ero neleplamapne ponekori nun anag pogsilba, yanam. Anag hailangkeldi, “Nanap nari yubu ka'ero neleptopnangap Paskah sumeneko mo wameberi, andi ae lom nhonag telaukap. Ae lom nelag agha nanap nari yubu ka'ero neleptopnangap mo wameberi, pham domba me nhon tukap?” aro hailangkeldi, nu pogsilba, yanam,' sururom.
MAR 14:15 Wene surumunba, ae ngainge ponekori a'unag ae tika paliagneag ae lom nubunge ambatsilul. Ae lom nubunge anekoag ae usa puna babe, kwaneng palinag babe ni sunuro nu sembe wero wamla. Ae lom eneag agha nu ni sembe wero palilamturom,” aro Yesusti sin phende pogsiog.
MAR 14:16 Wene aro pogsiogpa, eldi yubu ka'ero neleptopnang phende abeneko as Yerusalem anekoag pirekpa, Yesusti sinag, “As anekoag ipturom,” seogne sunsunum uro iptek. Iptekti, ae lom anekoag wa'irekti, Paskah sum sembe tenaba yoro wero palilamdek.
MAR 14:17 Ae imbaogpa, Yesusap eldi yubu ka'ero neleptopnang aobareap wa'iek.
MAR 14:18 Wa'iekti kwaneng tero pukamekpa, Yesusti lelamogti, “Sik uro ambarelamsin. Wene nu ane kwaneng nhon tero pukamapnang anabiag agha nimi nhondi na pankhebanuanel,” aro eldi yubu ka'ero neleptopnangag ambatsiog.
MAR 14:19 Wene aro ambatsiogpa, ka'ebaekti wana mali tahiogpa, eldi yubu ka'ero neleptopnang ni tanekori a'ero-a'ero Yesusag lelamekti, “Nari komdiog,” alamek.
MAR 14:20 Wene alamekpa, Yesusti nen yubu lelamogti, “A'un aobarenang anabiag agha nhondi pankhelebanuanel. Nimi endana nanap nikag telamnamdi, kal wana lolterop maghap pelengenag, el babe nikag kwaneng roti pelengkia telamnam aghana, pankhebanelul.
MAR 14:21 Na mog so'oag nimi tahinge nanag uro yabilulnena, samenag Allah yubuag na sembe mome toro pibekne sunsunum uro tebanun. Ot el pankhebanele nimi sembe yaghe senero seklebalul. Na nimi mog so'oag nimi tahinge pankhebanele nimi nenekoag Allahri tam ikin sirikne piplul. Ilindi el mangkaho komba, elag ikinne wamso komba, seklebaho kom. Aghana, na pankhebanelul nimi sembe ikin sirikne elag pipleba, seklebalul,” seog.
MAR 14:22 Wene seogti, kwaneng telamekag agha Yesusti kwaneng roti tobogti, “Nani, wali tatsilam,” aro Allah kibog. “Wali tatsilam,” aro yubu lebogti, kwaneng roti aneko saeri khepto-khepto eldi yubu ka'ero neleptopnangag tarelamsiogti, “Na nong ane topsuri, tehut,” seog.
MAR 14:23 Wene seogti, mag anggur lolterop mag ma'i tobogti, “Nani, wali tatsilam,” aro Allah kibogti, sin tebatsiogpa, sin ni wamekne tanekori anggur lolterop mag ane teek.
MAR 14:24 Anggur lolterop mag ane telamekpa, Yesusti ambarelamsiogti, “Allahri samenag, 'Nimi maikno taulbahinun,' aro salag lero pibogne sunsunum uro nari eneng ene lambanual.
MAR 14:25 Sik uro ambarelamsinne ka'ebalulom. Allahri nimi mog so'oag nimi saelba uhin ko'o anam uro yabin komag, anggur lolterop mag nen tenun kom. Ot Allahri nimi mog so'oag nimi saelba uhin ko'o lag tale sumeneko og, weneogna anggur lolterop mag wendogne tenun,” seog.
MAR 14:26 Wene seogpa, Allah omektop sepna nhon sebekti, Zaitun yimag piek.
MAR 14:27 Zaitun yimag piekti, Yesusti eldi yubu ka'ero neleptopnang ambarelamsiogti, “Samen Allah yubu silimu toptopne nhondi mome toro pibogne ane: 'Nari pham domba yae ua uropne poneko omneba, pham domba taneko talupto tala-tala pukang,' aro mome toro pibog. Mome toro pibogne nene a'un sembe mome toro pibogpa, a'un ni tanekori na liloa taluptangka pululom.
MAR 14:28 Aghana omneikpa, nen samoro kamag taneri, na sam mog so'o Galilea pineba, a'un amik yalulom,” seog.
MAR 14:29 Wene “Na liloa taluptangka pululom,” aro Yesusti ambatsiogpa Petrusti, “Sin ni tanekori an liloa pikiikba, nanogna an liloa pikenun kom,” seog.
MAR 14:30 Petrusti wene seogpa Yesusti, “Yubu sikne ambarelamsinenge ka'ebamendi el uro wamlulam! Ae anam kwelekan komag winang ayam anam ik phende yubu lemna komag, andi ik wilindi na sembe, 'Nimi ene na ekonne,' sululam,” seog.
MAR 14:31 Wene seogpa, Petrusti nen mikip uro ambarelamogti, “Kom. Nana tapto anap ma'aro tebahenemea babe, nari an sembe, 'Ekonne,' senun kom,” seog. Seogpa Yesusti yubu ka'ero neleptopnang nenneri babe nika uro lebek.
MAR 14:32 Wene seekpa, Yesusap eldi yubu ka'ero neleptopnangap mog so'o sina Getsemani piek. Piekti Yesusti ambarelamsiogti, “Na Allahag molona molol pinundi, a'un ane pukamlulom,” seog.
MAR 14:33 Wene seog aghana, Yesusti Petrusap Yakobusap Yohanesap enero pabihiogti, olog ko'oro palamekag abenekoa Yesus wana samsamoro wana ikin taog.
MAR 14:34 Wana ikin uro ambarelamsiogti, “Na wana ikin sirik uanelba, tebanep saog uro wamna. Ane wapmundi, haing whi uro yae wamlulom,” seog.
MAR 14:35 Wene seogti, Yesus olog nen ko'oro piogti, wana ikindi so'oag malingkina Allahag molona mololamogti, “Naba naniong! Ot Andiog nia mangkina uanep. Nanag 'Seklero tebalulam,' aro pogneomne ikindi, kom nembahom. Ot nari 'Undo yaboho,' seneropne agha ualulam kom. Andi wanaag seneropne agha uro yabile,” seog.
MAR 14:37 Wene seogti eldi yubu ka'ero neleptopnang wilindi wamekag samoro yaogti, malameka ipsiog. Ipsiogti, Simon Petrusag, “Simon, meo! An malamlam, te? Heng ko'o nhonog wero yae wamnep kom, te?
MAR 14:38 Nimiri wanaag agha, 'Walia uahene,' sembanep aghana, nong mikip komdi walia uan koma uro yabileagti. Ane sembe haing whi uro yae wamsuri, Allahag mololamsut. 'Sa'a-sa'a uro yabileba, khaepto wamukap,' aro mololamlulom,” aro ambatsiog.
MAR 14:39 Wene aro ambatsiogti, nen samoro piogti, Allahag molona samen lel piogne saog uro nen lel piog.
MAR 14:40 Lel piogti, nen samoro yaogti kemelamsiogpa, sin nen malamek. Sin kwahingdi malamekne sembe aliri, “Sa'a sukap,” aro yubu koma wamek.
MAR 14:41 Yubu kom taekpa, Yesus nen samoro ik wilindip sum Allahag molona molol piog. Piogti, Allahag molona molbaogti, nen samoro yaog. Yaogti malameka kemelamsiogti, “A'un anam tektek papto malamlom, te? Abenda maplom! Puksuri, kembamsut! Na mog so'oag nimi tahinge pankhebanuanelba, mali-malia uropnangdi na sae kaupto saelbanukang. Wene palumukap! Na pankhebanelne neneko yalamla,” seog.
MAR 14:43 Yesusti anam yubu ambarelamsioghag agha kemelamekpa, eldi yubu ka'ero neleptopnang aobarenang abeneko agha Yudas neneko yalamogha ibek. Yudasap nhon yalamek nimina, nimi maikno “Yesus saelbaukap,” aro yaek. Sin Yudasap nhon yaeknang anekona, memnang Allah sembe pairopnang sikindoyaboap, Musari yubu ambatsiropnangap, Yahudi nimi sembe wenehiropnangap tanekori pogsiekpa, karogap kameap saelba, “Yesus haing sae kaupto saelbaukap,” aro Yudasag nelebel alamek.
MAR 14:44 Sin anam Yesusap haiptan komag Yudasti sinag kekneba nhon el nenelamsiogti, “Nari somoro togtogha kiplamne nimi endane, el agha saelbamundi, lambaleag aro wali yae uro pabululom,” aro ambatsiog.
MAR 14:45 Wene aro ambatsiogpa, Yudasag nelepto yaekti, Yudas yingkin togha abeneko pere Yesusag pintogha, “Nai, wali yubu ambatsiropne wamlam!” aro togtogha kibog.
MAR 14:46 Togtogha kiplamog abeneko nimi yaek nimi tanekori Yesus saelbom agha haing sae kaubek.
MAR 14:47 Haing sae kauplamek nimi anabiag agha memne Allah sembe pairop nang sikini nubunge arukna nhon babe wamog. Haing sae kauplamekpa, nimi nhon Yesus peramag sekamogne ponekori karog kilbom agha memne Allah sembe pairop nang sikini arukna wamogne ponekori ao pubom agha pelengelobog.
MAR 14:48 Pelengelobogpa, salelamek abeneko pere Yesusti nimi tanekoag lelamogti, “Sopsop Allahri Mem Ae aramag wa'alamnori, a'un whingag Allah yubu ambarelamsinobog, a'undina salelamneom kom. Na 'Mo sekukap,' aro mal tarop nimi sikini wamsene tanena, a'undi nanag yalamlomne, 'Nimi yonge ane oro saelbaukap,' aro karogap kameap payalamlomne sunsunum sembanep. Aghana, na mo sekukap aro mal taropne kom. Ane sembe a'undi nimi whingag yo kom uro na saelbanep aghana, samenag Allah yubu silimu tiptop nimiri mome toro pibogne sunsunum uro uro yabilul ane sembe, wene yalomdi undo salelamnelom,” seog.
MAR 14:50 Wene alamog abeneko, eldi yubu ka'ero neleptopnang ni el laploa tognoptang-tang merebaek.
MAR 14:51 Sin Yesusag neleptop nimi tognoptang-tang merebaek nimi agha kaubuni nhon ag sabonge agha nongag wangkamogti, Yesusag neleplamog. Sin Yesus haing sae kauplamek nimi tanekori, “Yesusag neleptopne eneko saelbaukap,” aro ulamekti saelbaekpa, ag aneko kologlobi agha kabeog merebaog.
MAR 14:53 Yesus saelbaekti, memne Allah sembe pairop nang sikiniri aeag poa palamekpa, memnang Allah sembe pairopnang sikindo yabo niap, Yahudi nimi sikini yaboap, Musari yubu mome ambatsirop nangap ni poloro winiptaekpa, sindi whingag Yesus poa piek.
MAR 14:54 Yesus salero pabalamekpa, Petrusna weag agha poro tiro palamogti, memne Allah sembe pairop nang sikiniri aramag wa'al piog. Wa'al piogti, memne Allah sembe pairop nang sikini yae ua urop nang anabiag auk lekto pukamog.
MAR 14:55 Auk lekto pukamogpa, memnang Allah sembe pairop nang sikini yaboap, ora nimi nubungeri Yahudi nimi sembe tam lelekto kemeropnangapti, “Yesus ya'ag obukap,” aro Yesusag tam palinne sembe kemelamek. Elag tam palinne kemelamekti, orolena lerop nimi yopsiekpa, nimi tanekori Yesus sembe, “Undo-undo malia uaori leboba, ibobori ka'ebabo,” aro lolorop yubu orolena ambatsiek. Lolorop yubu orolena yubu lelamek aghana, lelamekne nene olog tiptangtop komdi, nimiri sik sembanep kom ane sembe, ka'elamekneag agha Yesusag tam palinne olog ibek kom.
MAR 14:57 Yesusag tam palinne kemelamekti ibek komba, nen nimi etbare sekekti, yubu minirop yubu mangkaek. Yubu minirop yubu mangalamekti, “Nimi eneri yubu lelamoba ka'ebabongena, 'Allahri Mem Ae, nimi saeri sorop ae enena kwerekaneri, ik wilindiag agha mem ae wendogne nimi saeri sorop komne sobanun,' alamoa ka'ebabo,” seek.
MAR 14:59 Wene aro mangarop yubu lebekne nene babe olog tiptangtop komdi, nimiri sik sembanep kom.
MAR 14:60 Wene aro sik sembanep komne lebekpa, memne Allah sembe pairop nang sikini poneko sin ni wameka anabiag sekogti, Yesusag hailamogti, “Sindi wene an sembe 'Malia lelamo,' seangne sembe andi pelebeltanan yubu leplulam kom te?” aro haibaog.
MAR 14:61 Wene aro haibaog aghana, Yesus yubu lemna koma wamog. Yubu lemna koma wamogpa, memne Allah sembe pairopnang sikini ponekori nen hailamogti, “An Allah Paliagne Elme walinge wamlam to, kom to? Nuni Allahri an sembe 'Mog so'oag nimi taluro saelbamsilul,' aro wepto pogkeonge poneko Kristus wamlam to, kom to?” aro haibaog.
MAR 14:62 Wene aro haibaogpa Yesusti, “Wene leplamne pone wamna. Na imag agha mog so'oag nimi tahinge Allah mikipne poneko sae sirik sip pukamneri, toa nusam toman nen samoro mog so'o aneag yanea imnululom,” seog.
MAR 14:63 Yesusti wene seogpa, memne Allah sembe pairop nang sikini ponekori ka'ebaogti, yo lelem elenge ag wangkamogne taepto ebog. Elenge ag wangkamogne taepto ebogti, tam kareptopnangag lelamogti, “Eldamneri leplange wene ka'ebap. Yog nimiri 'Undo-undo lelamoa ka'ebano,' aro lenne nen ka'ebaukap kom. Allah san tilipto, 'Paliagne wamna,' aro leplange ka'ebalom. Wenena yubu ka'ebalomneag agha 'Huaukap,' aro seneraglamlom?” aro haibahiog. Wene aro haibahiogpa, nimi wamek nimi tanekori, “Allah san tiliptop yubu lepla ane sembe, ya'ag tebalulne sunsunum,” aro tam karebaek.
MAR 14:65 “Tebalul,” aro tam karebaekti, nimi etpareri sulu mag supto haing ubi agha olamekti, “Etneri olangkel nimi si lepmen,” aro yubu nepto olamek. Olamekpa, memne Allah sembe pairop nang sikini nubunge yae ua urop nang tanekori babe Yesus salero olamek.
MAR 14:66 Yesus olamekpa, memne Allah sembe pairop nang sikini ponekori ae aramag Petrus tau sip wamogpa, Allah sembe pairop nang sikini arukna kelabo nhon Petrus wamoghag yaog.
MAR 14:67 Yaogti Petrus auk leklamogha ibogti, wali uro whingag kembirogti, “An babe Yesus Nasaretne nenekoag neleplamomba ipkeno,” seog.
MAR 14:68 Wene seog aghana Petrusti, “Na ekon. Andi sa'a yubu agha lelamlam? Na seneragna kom,” seog. Wene seogti, sekom agha memne Allah sembe pairop nang sikini ponekori ae aram ina siramag piogpa, winang ayam yubu lebog.
MAR 14:69 Wene seogti, ae aram ina siramag aneko piogti sekamogpa, keleneko nen yaogti Petrus ibog. Ibogti nen sarikto nimi wamek nimi tanekoag alniro ambarelamsiogti, “Nimi ene babe Yesusag neleplamla,” aro ambatsiog.
MAR 14:70 Wene aro ambatsiogpa, ka'ebaogti Petrusti nen yubu lelamogti, “Yesusna na ekonne” seog. Wene seogpa, ko'o olog wameka nimi taneko nen yingkina Petrusag lelamekti, “An sembena, 'El Galileange,' aro el wamap. Undop agha nuri an sembe, 'Sik tapto Yesus nenekoag neleptopne wamla,' aro seneraglamap,” seek.
MAR 14:71 Wene seekpa, Petrusti samoro yubu ambarelamsiogti, “A'undi si lelamlom nimi ene na otsik tapto ekonne agha lelamlom. Orolena ambarelamsin tanena, imagne ponekori hae omnelul,” seog.
MAR 14:72 Wene alamog abeneko pere winang ayam yubu ik phendepne yubu lebog. Winang ayam ik phendepne yubu lebogpa, Yesusti samenag yubu lebogne sembe Petrus el taog. Yesusti samen Petrusag ambarelamogti, “Winang ayam yubu ik phende lemna komag andi ik wilindi na sembe 'Ekonne' aro yubu leplulam,” seogne sembe Petrusti seneraghogti, “Sik uro lepla,” aro engelamog.
MAR 15:1 Kwelekaogpa lukunap memnang Allah sembe pairop nang sikindoyaboap, Yahudi nimi sikiniri wenehirop nangap, Musa yubu mome ambatsirop nangap, ora nimi nubungeri Yahudi nimi sembe tam lelekto kemeropnangap sin ni tanekori “Huaukap,” aro yubu lelamek. Yubu lelamekti, “Yesus haing sae kaupto mog so'o aneag saelba uhiropne Pilatus saeag poa pukap,” aro yubu saekag lebekti, Yesus haing sae kaupto Pilatus saeag tarel piek.
MAR 15:2 Pabiekpa, Pilatus ponekori Yesusag hailamogti, “An sik Yahudi nimi sembe yubu sia leropne nubunge, te?” seog. Wene seogpa, Yesusti, “Yo, otsik leplam,” seog.
MAR 15:3 Wene seogpa, memnang Allah sembe pairop nang sikini yabo tanekori Yesus sembe “Malinge undo-undo ulamo,” aro lolorop yubu Pilatusag ambarelamek.
MAR 15:4 Ambarekpa, Pilatusti Yesusag nen hailamogti, “Andi yubu samoro ambatsululam kom, te? Kembamen! Andi malia uaomne nanag ambatneangne maiknori,” seog.
MAR 15:5 Wene aro haibaog aghana, Yesusti nen samoro yubu olog lebog kom. Yubu olog lebog komba Pilatusti, “Sa'a sembe peleptangtop yubu olog lepla kombae?” aro yaghe sembaog.
MAR 15:6 Wamek sumeneko Yahudi nimi sembe nubu sum Paskah yanuaog. Pilatus ponekori sop-sop ulamognena, Paskah sum talamogpa, Yahudi nimi haing sae kaupto kop aeag tobongolamsiog nimi agha Pilatus ponekori “Yahudi nimiri molona molbaneikne sunsunum uro nimi nhonog lambitnun,” aro ulamog.
MAR 15:7 Haing sae kaupto tobongkipsiek nimi taneko wameknena, Yahudi nimi nenneri seneraglamekti, “Roma nimiri nu saelbamsiangne karongdi, mo seksebe,” aro ulamek. “Mo seksebe,” aro ulamek nimi nenneri nimi ya'ag opsiekpa, Roma nimiri haing sae kaupto saelbamsiekti, kop aeag tobongkipsiek. Sin kop aeag tobongkipsiek nimi agha nimi ohiropne nhon si Barabas wamog.
MAR 15:8 Wamogpa, Yahudi nimi maikno tanekori Pilatusag yaekti, “Hengkun samenag ulamom saog uro sumene babe nimi nhon sae lobitlulam,” aro molona mololaek.
MAR 15:9 Wene aro molbaekpa, Pilatus ponekori el wamogti, “Memnang Allah sembe pairopnang sikindoyabori, 'Yesus si nubunge taleag,' aro wana mali senelamangdi, salero nanag poa yaang,' aro Pilatus ponekori el wamog. Ane sembe Pilatusti nimi maikno tanekoag hailamsiogti, “A'undi nanag mololamnelomne, a'un Yahudi nimiri, 'Saelbamsululam' aro lebomne Yesus pone agha sae lobitnunne, yeng te?” seog.
MAR 15:11 Wene “Yesus sae lobitnun,” aro haibahiog aghana, memnang Allah sembe pairop nang sikindo yabo tanekori wanaag nonogtop yubu lebek. Wanaag nonogtop yubu lelamekti, nimi maikno wana tolamsiekneag agha nimi maikno tanekori, “Barabas agha sae lobitlulam,” alamek.
MAR 15:12 Wene alamekpa Pilatusti, “Wene alamlom tanena, a'un Yahudi nimiri elag, 'Saelbamsululam,' aro lebomne pone Yesusag huanun?” seog.
MAR 15:13 Wene seogpa, nimi taneko yubu mikip uro lelamekti, “Yesus kalag siplobe!” alamek.
MAR 15:14 Wene alamekpa, Pilatus ponekori nen hailamsiogti, “Wene alamlom aghana sa'a sembe? Nimi eneri malinge huropne uaoba, kalag sipto omnun?” aro haibahiog. Wene aro haibahiog aghana, sindi yubu nen nubu nenero haum aro lelamekti, “Kalag siplobe!” seek.
MAR 15:15 “Kalag siplobe!” aro haum alamekpa, Pilatus ponekori nimi maikno taneko “Wana yeng nembahinun,” aro sindi molbaekne sunsunum uro Barabas agha sae loplobog. Barabas agha sae loplobogti, “Yesus taeplam-taeplamlopmundi, kalag sipto oplulom!” aro Pilatusti yin saleropnangdi saeag nembaog.
MAR 15:16 Yin saleropnangdi saeag nembaogpa, taeplam-taeplamlobekdi, mog so'o saelba uhiropne ae nubunge aramag Yesus pabiek. Pabiekti, sikinkabo yin saleropnang yogne yopsiekpa, ni longol aek.
MAR 15:17 Longoptaekti, “Yubu nebukap,” aro ag uwongne nimi nubunangdi enektop ag Yesus nongag wangkirek. Elag wangkirekti, alog aba agha mog so'o saelba uhiropnang usoghag kwiria elektoba saogne wibekti, yubu nepto usoghag nobek.
MAR 15:18 Uwong ag elag wangkirekti, alog aba nobekti, yubu nepto lelamekti, “Nuni! Yahudi nimi saelbamsilamne,” aro yubu neplamek.
MAR 15:19 Yubu neplamekti, Yesus usoghag kameri olamekti, silu mag suplamek. Silu mag suplamekti, nimi nubunge kiploa saog uro yabu sanukto pulingkina yubu neplamek.
MAR 15:20 Yubu neplamekti, “Abenda. Pukap,” sembaekti uwong ag nongag enektoba wangkirekne neneko el nongag agha kuribaekti, el samenag wangaro amogne wangkirek. Wangkirekti, “Yesus kalag sipto olobukap,” aro poa lambaek.
MAR 15:21 “Yesus kalag sipto obukap,” aro inaag poa palamekti, yin saleropnang tanekori nimi nhonag, “Yesus sipnep kal ane poplulam,” aro pobirek. Sindi elag pobirek nimi eneko sina Simon, Aleksanderap Rufusap sikini ponekoag kal pobirek. Simon pone as Kirene agha yalamogpa yobekti, “Kal ane poplulam,” aro yubu mikip uro arukaek.
MAR 15:22 Pobirekpa palamekti, Yesus mog so'o nhon sina Golgota mainag pabiek. Golgota aneko Yahudi nimiri lelamek yubuag, “Nimi usog ya'ol,” aro main ane si Golgota aro engero yabiog.
MAR 15:23 Golgota mainag poa piekti, Yesusag mag anggur lolterop maghap, uwong mag mur arop maghap ma'abaekti, elag tebarek. Mag tareknena, “Mag ane teleba, og seklelamlange olog keyagman talul,” aro tebarek aghana, Yesusti mag ten koma lipsiog.
MAR 15:24 Mag lipsiogpa, ag nongag wangkamogne kwiriplobekti, kal tam alikinag siptoba, pakuri Yesus sae yan kalag siplobek. Siplobek nimi tanekori, “Yesusti nongag wangarop ag etne-etne pogtaukang?” sembaek. “Etne-etne pogtaukang?” senelamekti, “Kekneba toboghabeba, po'obahile nimi enekori toro aukang,” aro kekneba toboglamek.
MAR 15:25 Yesus kalag pakuri siplobeknena, ae lukun heng ko'o supnangeag agha kalag siplobek.
MAR 15:26 Kalag sibekti, Roma nimiri, “Nimi ane kalag sipto obapnena tamna nene sembe,” aro mome toro pibek. Mome toro pibeknena: “Nimi ane Yahudi nimi sembe yubu sia lero saelbamsilne” aro mome toro pibekti, Yesus kalag sibek kal anekoag pibek.
MAR 15:27 Yesus kalag siplobekag nimi phende babe yoaba ulamdek nimi pabihiekti, Yesus sae sirik sip nhon, waneng sip nhon kalag siplopsiek.
MAR 15:28 [Samenag anam kalag siplopsin komag Allahri yubu silimu tiptop nimiri uro yabinepne sembe mome tolamogti, “Yoaba urop nimiag ulamsiangne saog uro elag babe uaukang,” aro mome toro pibog. Elap yoaba urop nimiap ma'aro siplopsinepne sembe samenag mome toro pibogne sunsunum uro uro yabiog.]
MAR 15:29 Kal sibeka peram toman palamek nimi taneko ngang kwa'arom-kwa'aroma Yesus san tiliplamekti, “Eh, andi samen yubu lelamomdi, 'Allahri Mem Ae nubunge kwereklopseneri, nen ik wilindiog agha wendogne sobahane,' seom. An sik uro mikip tanena, kalag agha kulukamendi, wali nenep talulam!” aro yubu nepto san tilibaek.
MAR 15:31 Yubu nepto san tiliplamekpa, memnang Allah sembe pairopnang sikindoyaboap, Musari samenag mome toro pibogne ambatsiropnangap tanekori babe Yesus yubu nepto sin mamun lelamek. Yubu nepto lelamekti, “Nimi orange wali nenelamsio aghana, eldamne wali neneptanep kom.
MAR 15:32 El neneko sik uro Allahri webogti, 'Israel nimi taluro saelbamsilul,' aro poghogne Kristus wamso tanena, hae kal aniag agha kulukaho. Kulukaho andarina ipseberi, wali elag sik sembahabe,” aro yubu neplamek. Yubu nepto san tiplamekpa, elap nikag kalag sipto opsiek nimi phende abenekori babe Yesus san tilipto yubu neplamdek.
MAR 15:33 Yesus kalag sibekpa, wamogpa, heng ik mol-mol seogti, siro turu alamog abeneko heng sanubom seogti, ae iniplobog. Ae iniplobogpa, wamek mog so'o eneko ni iniplobogha heng ko'o wilindi piog. Heng ko'o wilindi palamogha, kekman heng taolbaogti, ae sin taog.
MAR 15:34 Ae sin taogpa, Yesusti Yahudi nimiri yubuag yubu haum aro lelamogti, “Eloi! Eloi, lama sabakhtani?” seog. Seogne anena nuri yubuag, “Nani Allah! Nani Allah, sa'a sembe andi na laploamnelam?” aro lebog.
MAR 15:35 Wene seogpa, nimi etpare taneko wamek nimiri ka'ebom agha seneraghek komdi, “Ka'ebahut! Eldi Allah yubu silimu tiptopne Elia pone yoplamla,” seek.
MAR 15:36 Wene seekti, nimi nhondi elem-elem noghom-nesom saogne tol piogti, anggur lolterop maghag werebi agha kalag kolnoro, “Yesus mag yori mag telul,” aro towalengero Yesus pamag pibog. Towalengero pibogti, yubu lelamogti, “Olog mo wamleba, ta'abameberi kembamukap. Allah yubu silimu tiptopne Elia samenag wamogne poneko yaleri, kalag ania toro pelengkalul to, kom to?” seog.
MAR 15:37 Wene seogpa, Yesus yubu haum aro lelamogti hain kom taog.
MAR 15:38 Yesus tebaog sumeneko Allahri Mem Ae lomag “Mem usa ae lom aneag nimi wa'aukang kom,” aro ag wilnirop ag nubunge ina siramag siliplengkibekne wamog. Yesus teplamogti hain kom taongom alamog abeneko pere, ae lom wilnirop ag siliplengeroba pukama aneko serero payangkaogti, phende taog.
MAR 15:39 Yesus hain kom taog sumeneko, yin saleropnang sikindo nhon Yesus whingag sekamogti ni kembamog. Yesusti yubu mikip uro haum aro lelamogti, hain kom taongom alamogne ibogti, yin saleropnang sikindo ponekori, “Otsik, nimi ene Allah Elme,” seog.
MAR 15:40 Yesus hain kom taongom alamogpa, kelabo etbare weag agha sekamekti tibogamek. Kelabo tibogamek kelabo taneko anabiag agha wameknena: Maria Magdala kelenekoap Salome kelenekoap Yakobus amik mangkaekne ponekoap ilipsae Yosesap sikinin Maria kelenekoap Kelabo tanekori Yesus tebaogne weag agha tibogamek.
MAR 15:41 Kelabo tanekona, samen Yesus mog so'o Galilea wamogpa, kelabo tanekori “Yesusag teko ualeag,” aro yepto neleplamek. Yesus as Yerusalem palamogpa, kelabo tanekoap yog kelabo maiknoap abenekori Galilea mog so'o laplobi agha elag nelepto as Yerusalem yingkiekti, weag agha hain kom taongom alamogha tibogamek.
MAR 15:42 Tebaog sumeneko Yahudi nimi niri, “Ambhum tek-tek papto wameberi, Allah yubu lebukap,” aro menekna togtop sum wamek. Nimi nhon sina Yusup, as Arimateange ponekori Yesus tebaogne sembe el taog. Yusup Arimateange pone el babe Yahudi nimi sembe tam lelekto kemerop nimi Mahkamah Agama nimi agha nubunge wamog. Yusup ponekori Allah sembe yeng senelamogti, “Allahri nimi mog so'oag nimi saelbamsilulne imnun,” aro nang-nang alamog. Undo unulamogha Yesus tebaogne sembe el taogti, inipna peram taogpa, Yusup ponekori, “Yesus tebaogha o'obanun,” aro Pilatusag piogti, log kom uro “Yesus tebaogha aneko pabinun,” aro molol piog.
MAR 15:44 Wene aro molbaogpa, “Yesus tebal,” seogha ka'ebaogti, Pilatus ponekori, “Weneog kalag sibang aghana, el elem phea abene tebal, te?” aro lo'om seog. Lo'om seogti, “Yin saleropnang sikindo enel pululom,” aro nimi pogsiogpa, enel piekti payaek. Payekpa Pilatus ponekori yin saleropnang sikindo ponekoag, “Yesus usaap ya'ag tebal, te?” aro haibaog.
MAR 15:45 Wene aro haibaogpa, yin saleropnang sikindo ponekori, “Sik uro ya'ag tebal,” seog. Seogpa, Pilatusti Yusupag, “Wali teptoba aneko tol pululam,” aro ambarog.
MAR 15:46 Wene aro ambarogpa, Yusupti ag sabonge walinge nimi teptopne kelepsirop ag kamna alikinag uro tobogti, Yesus kalag sipto obeka aneko toro pelengkia ag sabonge tobogha anekoag kelebaog. Kelebongkia kirik lom hogtobag pail piog. Kirik lom hogtobag pail piogti, ina siramag kirik nubunge agha pemagto ina siramag maruklobongkia piog.
MAR 15:47 Yesus kirik lom hogtobag pibogpa, Maria Magdala kelenekoap, Yoses ilin Mariaap abenekori Yesus kirik lomag palilamogha tibogamsirek.
MAR 16:1 Yesus tebaog sumeneko Yusupti Yesus teptoba kirik lom hogtobag pibogpa, ae imbaog. Iniplamog abeneko pere Yahudi nimi sembe tek-tek papto Allah yubu lerop sum taogpa, ik nhon wamekpa, nen imbaog. Imbaogpa, sumeneko inipnag aneko Maria Magdala kelenekoap, Yakobus ilin Maria kelenekoap, Salome kelenekoap sin kelabo wilindi abenekori, “Yesus nong teptoba song taleagti, nong alip toman song wali mag ikil pukap,” sembamek. “Heng walelingkileba, ikil pukap,” aro inipnag aneko song wali mag kamna kapto tol piek.
MAR 16:2 Tol piekti, kweleknag aneko lukunap sin Yesus kirik lom hogtobag piboghag aneko piek.
MAR 16:3 Inaag palamekti, sin mamun hail talamekti, “Kirik nubunge ina siramag maruktoba aneko etneri yepto pemagto kolbatsilul,” aba palamek.
MAR 16:4 “Kirik aneko nubu sirikti,” aba palamekti, pina kemelamekag agha kirik aneko pemagto koloropba ina siram kuptoba ibek.
MAR 16:5 Ina siram kuptop wamogpa, wa'ina sae sirik sip kemelamekpa, kabuni me nhon ag siliro pelengka urop ag kororopne wangkamogti, pukamog. Pukamogpa ibekti, sin lo'om seek.
MAR 16:6 Lo'om seekpa, kaubuni me anekori sinag yubu lelamogti, “Log sembaheng kom! Na elwamnange Yesus Nasaretne amni kalag siplobongne poneko elamlom. El tane wamla kom. El nen kamag tal! A'undi babe kembalulom! El pibongagna ane.
MAR 16:7 Wene pimundi, yubu nene Eldi yubu ka'ero neleptopnangag ambatsumundi, Petrusag babe ambatlulom. Ambarelamsumundi, 'Yesus sam mog so'o Galilea palamlaba, a'un babe Galilea pululom. Eldi samenag ambarelamsio saog uro, Galilea pimundi haiptalulom,' aro ambarel phululom,” aro ambatsiog.
MAR 16:8 Wene aro ambatsiogpa, kirik lom hogtobag Yesus piboghag anekoa lambaekti, merero palamek. Sin logti nimi nhon babe ambatsin koma merero piek. [
MAR 16:9 Selek sum aneko lukunap Yesus tebaogha nen kamag taogti, samenagne Maria Magdala keleneko whingag lag taog. Maria Magdala kelenena, samenag Yesus anam teban komag phia saekpare el kulomag wamekpa, Yesusti keleneko wali nenero phia yag lambahiogpa, wali taog kel.
MAR 16:10 Magdala keleneko whingag Yesus lag taogpa, kelenekori sin samenag Yesusag nelepto elap nhon ul palamek nimi ambarel phiogpa, haiptaek. Haiptaekti, sikin engero amang ulamekag kelenekori, “Yesus nen kamag taldi, nanag lag talba imna,” aro ambatsiog aghana, sik sembaek kom.
MAR 16:12 Ambatsiogne sik sembaek kom aghana, sumeneko babe Yesus elkabo phende as nhonag palamdek. Palamdekpa Yesus sin whingag lag taog aghana, Yesus nong a'erop saogne agha lag taog.
MAR 16:13 Lag taogpa, sin phende sikinkabo wamekag saombarekti, ambarelamsirek aghana, sin phende abenekori yubu lelamdekne babe sinkabori sik sembaek kom.
MAR 16:14 Ambarelamsirekpa seneragto lelamekti, Yesusti wepto pogsiognang ko'olombarenang taneko kwaneng telamek. Kwaneng telamekpa, Yesus sin whingag lag taog. Lag taogti, sinag yubu lelamogti, “Nimi etpare anekori na sembe, 'Nen kamag talba, imna,' aro a'unag ambarelamsiang. Sa'ambe a'un usog mikipti sik senelamlom kom,” aro wembahiog.
MAR 16:15 Wene aro wembahiogti, tipto ambarelamsiogti, “Nimi tala-tala wamangneag pimundi, yubu walinge 'Allahri Yesus pere agha mog so'oag nimi taluro saelbamsil,' aro nimi niag ambarel phululom.
MAR 16:16 Nimi etneri, 'Yesusag sikne aro seneraglamna ane sembe maghag pelengkipnululam,' aro ulamle tanena, nimi eneko Allahri taluro saelbalul. Ot nimi etneri na Yesusag sikne aro seneraglamla kom tanena, Allahri nimi enekoag tam ikinne pipleri, oplul.
MAR 16:17 Sin na Yesusag sikne aro seneraglamik nimiri kekneba ulamukang. Kekneba ulamiknena, Na Yesus mikipne sin pere agha ulamneba, phia yonge yag lanalamsukang. Sin ekon yubu ka'eptanep kom yubuag lelamukang. Sindi ya'ag ohirop phae saelbaika babe, nimi ya'ag ohirop mag telamika babe, sin tebaukang kom. Sindi nimi naiktopne nong alibag sae palilamsiikpa, Allahri nimi taneko wali nenelamsilul. Nanag sikne aro seneraglamik nimiri undo unulamik tanena, 'Yesusti mikipne sin pere agha ulamla,' aro el tanep,” seog.
MAR 16:19 Wene aro ambatsiogpa, Nuni Allahri imag agha nu Saelba Uhiropne Yesus kiliro tobog. Kiliro tobogpa, “Nikag nun niri saelbamsununam,” aro Allah sae sirik sip pulingkiogti wamla.
MAR 16:20 Nuni Allahri imag agha kiliro tobogpa, Yesusti yubu ka'ero neleptopnang tanekori as tala-tala nimiag yubu walinge Yesus sembe ambarel phiek. Ambarel palamsiekpa, nu Saelba Uhiropne Yesusti mikip nenelamsiogpa, kekneba maikno ulamek. Kekneba ulameknena, nimiri kembi agha, “'Imagne ponekori sin pere agha ulamla tanena, Imagneri yubu sikne ambarelamsiang,' sembaukang” aro kekneba maikno ulamekti ambarelamsiek. Abenda.]
ACT 1:1 Teofilus nani, samenag mome pipsinge ane. Yesusti alnibaogti, ulamogti ambarelamsiogti, imag yingkiogpa, ni ulamogne sembe mome toro pipsi. El neneko anam imag yingkin komag Allah Eldamne Yame Walinge Elag wamogpa, Yesusti nimi a'obare wepsiogti, pogsiog. Yesusti wepto pogsiognang tanekoag “A'undi nia mangkina undo-undo ulamlulom,” aro ambatsiogpa, Allah imagneri kiliro tobogha sembe mome topsi.
ACT 1:3 El obekpa, seklero tebaogti, kamag taogne, “Na kamag tanonge imniikti, 'Sik, kamag tao,' sembaukang,” aro kekneba maikno sin haingag ulamog. Ulamogti, “Allahri Eldamne yubu ka'erop nimi wali uro saelbahilulne,” sembe ambarelamsiogti, “Naipsabori imnukang,” aro lag tangom tognop tangom alamogha inipna teng nhon epto naualbare taog.
ACT 1:4 Ik nhon sum Yesusti wepsiogti, pogsiogneap kwaneng nhon telamekti ambarelamsiogti, iriklamsiogti, “Yohanesti samenag nimi maghag pelengelamsiogne mag moag pelengkipsiog aghana, olog wapmunba, Allahri Eldamne Yame Walinge a'unag pelengkipsilul. Ane sembe, as Yerusalem anea lamba pheng kom. Na Naniri, 'Nandamne Yame tatsinun,' aro salag lebogne Nari ambatsinonge neneko nang-nang aro wamlulom,” aro ambatsiog.
ACT 1:6 Yesusti wepto pogsiog nimi taneko ik nhon sum Yesusap winiro wamekti hailamekti, “Nai, samenag Roma nimiri nu Israel nimi saelbamsiek komag wamubu saog uro nu 'Israel nimi mog so'o nuringe ngai taukap aro paliag nembahinun,' aro leplam, te?” aro haibaek.
ACT 1:7 Wene aro haibaekpa Yesusti, “Allahri Israel nen samoro paliag nembahilulne etsum anena a'unna eltanep kom. Nani Allah el mo el wamlari saelbamlari, karebalul aghana,
ACT 1:8 Allah Eldamne Yame Walinge a'unag kulukul aleri, mikip nembahileba, Na wamnori ulamnoba imneomneap, Nanag uro yabilneap, amik uro yabilulneap sembe as Yerusalem, mog so'o Yudea, mog so'o Samaria, as tala-tala im tiptobag so'o tiptobag wamangneag pimundi, ambarelamsululom,” seog.
ACT 1:9 Wene aro ambarelamsiog abeneko imag agha Allahri Yesus kiliro tolamogpa, toari niknilamogpa, Eldi wepto pogsiognangdi tiwalengkamek.
ACT 1:10 El imag yangkalamogpa, Ilipsabori tiwalengkamekti, hain ebom alamekag agha nimi phende ag solomne enektopne sin peramag sekamdekne abenekori sin yubu ambarelamsirekti, “A'un mog so'o Galilea nimi. A'un sa'a sembe imag tiwalengkamlom? Yesus neneko a'un laplobiagha Allahri imag agha kiliro tolamlaba, tiwalengkamlomne nene saog uro amik kulukul alulne babe yangkalamlaba tiwalengkalomne saog uro kulukul alul,” aro ambatsirek.
ACT 1:12 Ambatsirekpa Yesusti Wepto Pogsiog nimi taneko yim Zaitun anekoa samoro as Yerusalem yaek. Zaitun yimag aneko Yerusalem ana we koma samoro Yerusalem yingkina nimiri ae agha sesog wamekag aneko ae tika alikinagneag waelbaekti, wamek. Sin wameknena: Petrus, Yohanes, Yakobus, Andreas, Filipus, Tomas, Bartolomeus, Matius, Alfeus elme Yakobus, Simon ponena “Roma nimi luknubahibeberi, mo sekukap,” aro yin saelbamogneap, Yakobus elme Yudasap sin wamek.
ACT 1:14 Sin ma'aptangto wamekti, sol wali,wali uro Allahag yubu moloro longoptangto wamek. Longoptangto wamekne taneko kelabo etbareap, Yesus Ilin Mariaap, Yesus ilipsabo taptopneapna, yogne agha Yesus sareneleplamek nimiap wamek.
ACT 1:15 Ik nhon sum Yesusag “Sikne” aro seneragtop nimi teng tombare eptopneap saog uro (120) longoro wamek sumeneko Petrus neneko, “Yubu lemnun,” aro sekog.
ACT 1:16 Sekogti yubu lelamogti, “Nangkabo, Allah Eldamne Yame Walinge nenekori samenag nunisang Daud pere agha lebog. Lebogne, Daudti Allah yubuag mome toroba buku nhonag mome toro pibog. 'Mome toro pibognena Yesus saleropnang poa yahionge sembe mome toro pibog,' aro el taap. Allahri samenag seneraghogti, 'Undo uro yabilul,' sembaogne toro pibogne kom tanep kom. Toro pibogne sunsunum uro Yudasti nimi topsiori, poa yahioba, Yesus saelbaong.
ACT 1:17 Samenag Yudas poneko babe nu nimi a'ilin wamobori, Yesus sembe nimi ambatto yeplamsibo,” seog.
ACT 1:18 Yudas neneko malia uaogne sembe kamna tarekpa, kamna anekoag agha so'o tobogti, so'o enekoag tinilamogti, mon serero tisirik langtukto tebaog.
ACT 1:19 Undo obogne neneko Yerusalem nimi niri el taekti, obog so'o eneko “Nimi eneng so'o,” alamekti, sindi yubuag si “Hakal Dama,” aro engkaek.
ACT 1:20 Petrusti lelamogti, “Allahri 'Undo uro yabilul,' sembaogne ane sembe nunisang Daud pere agha Allah yubu sepna wamlangena: 'El ua urobag langkop tale nimi nhon babe aneko wamukang kom.' Nen siplamogti: 'Wenehiropne nenekori awe toro saelbamonge nimi yog nimiag tale,' aro mome toro pibog.
ACT 1:21 Ane sembe Yudas lunumna nhon ebeberi, webukap. Webebeba, nimi nhon aneri, 'Yesus kamag taoba, ibo,' nunap nimi ambatsukap. Ambatsiropne webukapnena, samenag Yohanesti nu Salehiropne Yesus maghag pelengkiboghag agha, wamogti sop-sop nunap wamoba, Yesus nu nusamag ua ulamogha iboba, Allahri imag agha Yesus kiliro toboa babe ibori, nimi ane webukap. Webeberi, nunap ambarelamsukapti, 'Yesus kamag taoba, haingdi ibobo,' aro nimi ambatsukap,” seog.
ACT 1:23 Wene seogpa, nimi wamekne tanekori, “Nimi phende wepsukap,” aro Yusubap Matiasap towalengkaek. Yusup poneko si wilindi wamog. Si nhon Barsabas alamek, si nhon Yustus alamek.
ACT 1:24 “Sin phende abeneko wepsukap,” aro Allahag mololamekti, “Nai, Andi ni nimi wanaag kembamsilam. Samenag Yudas, 'Nari yubu ambarelamsululam,' aro webomdi, poghomne neneko eldamne sae pere agha apto aori, laplobi agha malia uaonge sunsunum urobag wamla. Naro, Andi, 'Nimi phende abene, Andi yubu pibomne wamsori, ambarelamsiso saog uro lunuro pukamlulne nene,' aro webatsi,” aro molbaek.
ACT 1:26 Wene aro Allahag molbaekti, “Kekneba ibukap,” aro kirik toboglamekpa, Matiasag po'obaogpa, Yesusti wepto pogsiogne ko'olombareog wamek aghana Matias aonge taog.
ACT 2:1 Yahudi nimiri ik nubu sum si Pentakosta taogpa, “Yesus otsik uro lebo” aro seneragtop nimi taneko ot nhonoghag poloro winiptangto wamek.
ACT 2:2 Poloro winiptangto wamekpa, imag agha khao yubu mu ana saog uro lelamogpa, lo'om alamekag agha, ae sin wamek ae anekoag mu aro tobonglamog.
ACT 2:3 Tobonglamogpa, nimi taneko toman a'ero-a'ero auk pog libang-libang arop saogne sinag pulamsiog.
ACT 2:4 Sinag pulamsiogti, Allah Eldamne Yame Walingeri sin nongag to'opto wa'isiogti, mikipne pipsiog. Mikipne pipsiogpa, sin ekon yubu ka'eptanep kom yubuag alnibaekti, a'erop-a'erop yubuag Allah Yame Walingeri tatsiogha sunsunum uro lelamek.
ACT 2:5 Wene aro lelamekti, as Yerusalem wamekpa, nimi sisa Yahudi nimi engeropnang Allahag yubu moloropne wamekpa, nimi sisa a'ero-a'ero nimi Allahag yubu moloropnang babe wamek. Allahag yubu moloropnang taneko wameknena, “Pentakosta sum uaukap,” aro anamag, mog so'o sirikag-sirikag agha yalamekti, yubu mo-mo lerop nimi Pentakosta sumeneko as Yerusalem wamek.
ACT 2:6 Yingkina wamekpa, Allah Eldamne Yame Walingeri tatsiogha sunsunum uro a'erop-a'erop yubuag lelameka yingkirop nimiri ka'ebaekti, Yahudi nimi maikno wamek nimi taneko longol alamek. Longol alamekti ka'elamsiekpa, “Yesusti otsik uro lebo” aro seneragtop nimiri yubu a'erop-a'erop yubuag lelamekpa, ka'elamsiek nimi tanekori, “Welaro lelamang? Nundam nimiri yubu ka'elamapti,” senelamek.
ACT 2:7 Ka'elamsiek nimi tanekori, “Welaro lelamang,” sembaekti, yubu lelamekti, “Sin nimi taneag mane agha uro yabil. Sin Yahudinang mog so'o Galilea nimi taneko kom te?
ACT 2:8 Ka'elamsiaba nununge yubuag lelamangba, welaro lelamang. Nununge as babe yubu babe a'ero lero urop nimi aghari.
ACT 2:9 Nunna mog so'o Partia agha, Media agha, Elam agha, Mesopotamia agha, Yudea agha, Kapadokia agha, Pontus agha, Asia agha, Frigia agha, Pamfilia agha, Mesir agha, Kirene peramag Libia agha, Kreta agha, Arab agha, Roma agha Yerusalem yingkiropnang Yahudi nimi wamap. Roma agha Yerusalem yingkirop nimi, nhon wamapne yangkan nimi aghana Roma nimi nhon-nhon Yahudi nimi saog uro taburi, sindi omeklamangneag omeklamap nimi aghari. Tam nubunge Allahri ualne sembe lelamangba, nu mog so'o sirikag-sirikag yingkiropnangdi ka'elamsiap,” alamek.
ACT 2:12 Sin wene alamek nimi tanekori, “Logti, mane agha sindi nun yubuag lelamang. Amik uro yabilulne welaro uro yabilul?” aro wene alamek.
ACT 2:13 Aghana sin nenneri lelamekti, “Mag yonge teangdi nenek saelbahilba lelamang,” aro og solamsiekti, pam kwereklamsiek.
ACT 2:14 Wene alamsiekti, pam kwereklamsiekpa, Petrus neneko elkabo ko'olombare nang eneko babe sekekpa, Petrusti yubu nubu uro ambarelamsiogti, “A'un Yahudi nimi nangkabo, Yerusalem wamlom nimi nangkabo, nari ambatsinunne nene a'un niri ka'eamsuri seneragsu.
ACT 2:15 Wene heng ot weneog tingil alba wamap ane sembe, mag yonge teang koma agha lelamang. A'undi lelamlomne nene saog uro nimi tane mag teangba, nenek saelbahilba, lelamang kom.
ACT 2:16 Sindi lelamangne nenena samenag Allahri ambarelamogpa, Allahri yubu silimu tiplamogne Yoel nenekori mome toro pibogha sunsunum uro lelamang,” seog.
ACT 2:17 Wene seogti, Petrusti nen tipto lelamogti, “Allahri lebogne Yoeldi mome toro pibogne ane: 'Ik komopnag li wamikag Nari Nandamne Yame Walinge nimi mog so'oag maiknoro pelengel anun. A'undi mabo kelmaboag Nari ambatsininge sindi a'un ambatsukang. A'undi mabo Nari, “Uro yabinepne ibukang,” sembaneri, uanea sunsunum uro ibukang. Nong nimi Nari, “Lenda mabukang,” sembaneri, el nembahinenge lenda mabukang.
ACT 2:18 Sumeneko li enekoag Na arukna kabuni babe, kelabo babe, Nandamne Yame Walinge sinag maiknoro pelengkahinun. Pelengkahineba Nari ambatsininge sunsunum uro ambarelamsukang.
ACT 2:19 Imag 'Undo uro yabilul,' senena kekneba uaneri, so'oag agha babe, 'Im So'o Ngainge yan ual,' aro el nenehinna kekneba pimnun. Amik enengap, auk apna, auk mhong luma kuktopneap wamlul.
ACT 2:20 Im So'o Ngainge yale sum eneko elel molel arop sum talul. Aghana, ik nubu sum eneko uro yabin komag, heng inibin sog mondo seleba, wal imag wamlange eneng saog taleba,
ACT 2:21 nimi etneri Im So'o Ngainge ponekoag molbale tanena Allahri nimi ane taulbalul,' aro Yoel pere agha ambarog.
ACT 2:22 Israel nimi nangkabo, a'unag yubu lemnunne nene ka'eamsu: Yesus Nasaretne poneko sembe, 'Yaghe, Allahri el pere agha ual' senenne kekneba nimiri uanep komne, Allah Eldamneri uanepne Yesus pere agha ulamo. Unulamoa a'undi babe ibom. Eldi ulamonge kekneba mikipne a'un haingag agha ulamo. Allahri El pere agha ulamori, Yesus Nasaretne sembe a'unag tibin nembahio.
ACT 2:23 Allah Eldamneri sembaogne sunsunum uro, 'Tebalea pere agha nimi mog so'oagne taulbahilul,' aro a'undi saeag Yesus tatsiogpa, Allah yubu ingisapsirop nimi saeag nembaom. Nimi saeag nembaomdi, kalag siplobomdi, obom.
ACT 2:24 Obom aghana 'El teptobag aneko ya'ag ua una sunsunum kom,' sembaogti, Allahri seklerobag nimi teptobag agha kamag nembaog.
ACT 2:25 Daud ponekori Yesusag uro yabinepne sembe lelamogti, mome toro pibogne ane, 'Im So'o Ngainge sinag kweleknag na whingag ua ulamla. Nari sae sirik sip ua ulamlaba, kemelamnari, na lagmag senep kom.
ACT 2:26 Im So'o Ngaingeri piamnelba, wana awi uro wamnari, pamag agha El omeklamna. Anenge Arukna Sol Wali Walinge neneko so'oag agha polbalul kom. Nanenge yame nimi teptobag limnululam komne, na el. Ane sembe nong aneag 'Salag lebomne kembanun,' aro tibogto wamnun.
ACT 2:28 Andi ina walinge ibatnulumba, kamag wamnundi, na An saramag wamneba, na awi yeng maikno teknebarelamnululam,' aro Daudti siplamog.”
ACT 2:29 Nen tipto Petrusti ambarelamsiogti, “Nangkabo, nunisag nubunge Daud neneko sembe nari lag phoro ambatsunun. Nunisag tebaogpa, el arameag sikekag aneko wene nuri babe ililamap.
ACT 2:30 Daud neneko Allahri yubu silimu tiptopne wamogti, ambarelamsiogne wamogpa, Allahri elag sik uro salag lelamogti, 'An anmabo mangarobari mangaroba mangkahyikne nhon an lunumna nimi salehiropne sunsunum urobag pukamlul,' aro ambarogne el wamog.
ACT 2:31 Wene aro ambarogpa, Daudti amik uro yabinepne sembe el wamogti, lebogne ane, 'Na nong so'oag agha polbaneag, “Nimi teptobag babe wamle,” aro limneheng kom,' seogne nene lunumna Allahri wepleri, alikinag nembalulne neneko Allahri kamag nembanepne sembe eldi lebog.
ACT 2:32 Yesus neneko Allahri kamag nembaonge nuri haingdi babe ibobo.
ACT 2:33 Kamag nembaori, Allahri kiliro tobori, Eldi sae sirik sip alikinag nembaori, Allah Eldamne Yame Walinge salag lebogne neneko Elag pibo. Elag piboba, Eldi maiknoro pelengel alba, aoag agha ka'ebalomdi, wene haingdi babe iplom ane.
ACT 2:34 Ane sembe, Daud poneko imag yingkiog kom aghana, Daudti lebogne ane: “Na Nani Allahri na ua urop mog so'oag nimi salehiropneag yubu lelamogti,
ACT 2:35 'An Nari sae sirik sip pulingkiapmendi, wapmenba, An aisa nemba uagherop nimi ingkisapsinun',” seog.
ACT 2:36 Nangkabo, ni ambatsinne ka'ebamundi, a'un ekon uro wamseng kom. Yesus a'undi kalag sipto olopsiomne poneko 'Mog so'oag nimi taulbahilul,' aro Allahri webogti, 'Saelbamsululam,' aro paliag pukirogne sembe a'un Israel nimi ni el uro wapmundi, seneraglamlulom,” aro ambatsiog.
ACT 2:37 Wene aro Petrusti ambatsiogpa, Yahudi nimi tanekori ka'ebaekti, wana ikin tahiogpa, Petrusap elkabo sin Yesusti wepto pogsiognang tanekoabag hailamsiekti, “Nangkabo, nuri hulamukap,” aro haibahiek.
ACT 2:38 Wene aro haibahiekpa, Petrustina, “'Allahri malia ulamlomne tam orog nembalul,' aro malia ulamlomne lipsululom. Lipsimundi, 'Mog so'oag nimi taulbahilul,' aro Allahri Webogne si Yesus engeropneag seneraglapmunne maghag pelengkipsibeba, Allahri Eldamne Yame Walinge tatsilul.
ACT 2:39 Allahri, 'Nandamne Yame Walinge tatsinun,' aro samenag salag pibogne nenena a'unap, a'un maboap, nimi weag wamangne babe Nuni Allahri yopsileba, yaukangneap sembe babe salag nene pibog,” aro ambatsiog.
ACT 2:40 Yubu yogne maikno haingdi ipsiogne sembe ambarelamsiogti, yubu yangaro yopto wana tolamsiogti, “Wene malia ulamang nimi taneko anabiag wamlomba, wail ibongkia yamunba, Allahri sin nusamag agha taulbahilulba, yahut,” aro ambatsiog.
ACT 2:41 Petrusti yubu ambarelamsiogpa, ka'ebaekne taneko “Maghag pelengkipsululom,” aro yaekne nimi teng-tengne (3000) yaekpa, maghag pelengelamsiek. Pelengkipsiekpa, Yesusag “sikne” aro seneragtop nimiap ma'al talamek.
ACT 2:42 Ma'al talamekti, Yesusti wepto pogsiognangdi yubu ambarelamsiekpa, sinag kweleknag sol wali uro yubu ka'elamsiekti, seneraglamekti, wana nhonog uro wamekti, Allahag molona lero kwaneng kheptangto tero wamek.
ACT 2:43 Yesusti wepto pogsiognang tanekori, 'Allahri sin pere agha ual' senenne kekneba maikno ulamekti, nimiri uanep komne, Allah Eldamneri uanepne ulamekpa, kemelamsiekti, “Nimiri uanep komne ulamang” aro nimi ni “Yaghe, logtie” alamek.
ACT 2:44 Nimi ni Yesusag “sikne” aro seneraglamek nimi taneko wana nhonog uro wamekti, “Andinge, naringe,” sen koma ot “Nuringeog,” senelamek.
ACT 2:45 Sae agha sikininge uropne tanekori kamna kapto tolamekti, tolameka taneko teko wamsiogha sunsunum uro tarelamsiek.
ACT 2:46 Sinag kweleknag ma'aptangto sol wali, wali uro Allah yubu sembe Allahri Ae aramag poloro winildal wa'alamekti, sikininge “Ae a'ero kwaneng khepto tukap,” aro nhon aeag tea, nhon aeag tea wana wali uro yeng uro wamekti,
ACT 2:47 Allah omeklamek. “Sin wana wali ulamang,” aro nimi niri yeng awi uro tilamsiek. Nuni Allahri, “Malia ulamangne sembe opsineag aro taulbahinun,” aro seneraghogti, nimi maikno tanekoag wana heklamsiogpa, “Yesus otsik uro lebo,” aro seneraglamek. Sik seneraglamekpa, sinag kweleknag Yesusag “sikne” aro seneragtop nimiap ma'al tan anag, ma'al talamekpa, maikno talamsiog.
ACT 3:1 Ik nhon sum heng sin tanep peram Yahudi nimiri sop-sop Allahag mololamek heng enekoag Allahri Ae aramag “Molona yubu lemnunam,” aro Petrusap Yohanesap palamdek.
ACT 3:2 Palamdekpa nimi nhon yan malia mangkaekpa, elkabori sop-sop keyapto pil pang yang pang ulamek saog uro sumene babe pil piek. Nimi yan malinge neneko, “'Allahri Ae aramag yubu lebukap,' aro wa'alamik nimiri saeag wamlea molbahilul,” aro leka Allahri Ae aramag kanero toropne ina siramag ina siram si “Ina siram Walinge” aro engeropne nenekoag elkabori pil palamek.
ACT 3:3 Petrusap Yohanesap, “Allahri Ae aramag wa'inunam,” aro yalamdeka yan malinge ponekori ipsiogti, “Kal ma'al nhon tatnururom,” aro molbahiog. Molbahiogpa, kembarekti, Petrusti, “Nangkae, nunag kembahi,” seog.
ACT 3:5 “Nunag kembahi,” seogpa nimi yan malinge ponekori, “Nanag olog tatnurukanga wamla,” aro kembamsiog.
ACT 3:6 Kembamsiogpa Petrustina, “Kal ma'al an tatkenne orog wamla. Ot an tatkununne wamlangena, Allahri 'Nia Mangkina Saelbamsululam,' aro webogne si Yesus Nasaretne engeropne ponekori wali nembaghelul. Wene anag ambarelangkennena, 'Sekmendi palame',” seog.
ACT 3:7 Wene seogti, Petrusti el neneko sae sirikneag agha toro sekirog. Toro sekirog abeneko pere el neneko yan nginikom agha pinep saog wamogpa, yan no'op mikip taog.
ACT 3:8 Mikip taogpa, lopnagha sekelingkiogti, yang pang ulamogti, sin phendeap Allahri Ae aramag wa'alamekti, awi yengdi sunukto Allah omeklamog.
ACT 3:9 El yan wali taogti, palamogti Allah omek-omek palamogpa, nimi ni tanekori el ibek.
ACT 3:10 Ibekti, “El yan maliri Allahri Ae aramag 'Ina Siram Walinge' peramag ua ulamlari, nimiag kal ma'al mololamsilba, ia ulamap nimi eneko,” aro kemelamekti, “Welaro yan wali tal,” aro, “Yaghe” senena wanaag lolbahiog.
ACT 3:11 Nimi yan malinge agha wali taogne ponekori Petrusap Yohanesap salelamsiogti, nhon palameka ipsiekti, nimi maikno tanekori, “Yaghe logtie” alamekti, Allahri Ae aramag “Salomo” engerobag sip imag agha solorobag aneko Petrusap Yohanesap wa'iekag aneko el babe wa'iogpa, “Yaghe logti mane agha ual,” aro teknel wa'alamek.
ACT 3:12 Teknel wa'alamekpa, Petrusti nimi maikno tanekoag yubu lelamogti, “Nangkabo a'un Israel nimi, sa'a sembe 'Mane agha uro yabil' aro log senelamlom? Sa'a sembe nunag kemelamsilom? A'undi senelamlomnena, 'Sin Allah yubu sunsunum uro sol wali uro walia aghabog urop nimiri, nimi ane wali nembarang,' senelamlom aghana, Allah Eldamneri seneragnari agha nimi ane wali nembal. A'undi sembamlomne, nimi yabalamlange sembe, 'Sindinge mikip monge, wamlaba,' sembamlom te?
ACT 3:13 Nunisag yabo Abraham, Ishak, Yakub Sikini Allah sindi omeklamekne ponekori Elme Yesus neneko Eldi paliag nembaog. Aghana El neneko Pilatus tarel piomba, eldi 'Sae lobitnun,' seo aghana Pilatus whaingag a'undi, 'Sae lobitlulam kom. Nu karong,' seom.
ACT 3:14 Allahri wepto aogne walinge sik uro lero uropne poneko sembe Pilatusti, 'Sae lopnun,' aro ulamo aghana 'Karong,' alamomdi, nimi ohiropne poneko sembe 'Sae lobatsululam,' seom.
ACT 3:15 Ya'ag kamag uro unne tam saleropne poneko a'undi olobomba, Allahri nimi teptopne nusamag agha El neneko kamag nembao. Undo unuaonge nuri ibobonge ambarelamsiap.
ACT 3:16 Nimi a'undi ililamlomne nene 'Mikipne si Yesus engeropneri wali nembahinep,' aro seneraglaba, nimi ane yan wali nembal. 'El sik uro mikipne' aro seneraglange neneri nimi ane a'un whingag agha wali tal,” seog.
ACT 3:17 Petrusti wene aro ambarelamsiogti, “Nangkabo, a'un saelbamsiang nangap, a'undi ulamlomneap, Allahri samenag, 'Undo uro yabilul,' aro seneraghogne sembe a'un ekondi, Yesus olobomne nene na el.
ACT 3:18 A'un ekon aghana ulamomne pere agha Allahri samenag el wamogti, 'Undo yabilul,' aro ambatsiogne sunsunum nembaog. Allahri 'Wepneri, Poghol anun,' seogne neneko 'Seklebalul,' aro Allahri samen Eldi yubu silimu tiplamek nang ni pere agha ambatsiogpa, 'Mome toro pibekne sunsunum tale' aro Allahri wanaag agha wene sembaogti, uaog.
ACT 3:19 Ane sembe 'Allahri malia ulamlomne kom nembalul,' aro malia ulamlomne lipsimundi, Allah yubu ka'ero wanaag piapmunba, a'undi malia uroba lupsilulba, wali uro seneraglamsu.
ACT 3:20 Wali uro seneragmunba, Nuni Allahri amik wana keakman nembahileri, Yesus samenag 'Taulbahimendi, saelbamsululam,' aro wero pibogne neneko a'unag nen poglul.
ACT 3:21 El neneko imag wamle pog Allahri nen poglul. Samenag Allahri Eldamneri yubu silimu tiptopnang sol walingeag ambatsiogpa, mome toro pibekne sunsunum uro, 'Nia mangkina Allahri wendog nembalul,' aro mome toro pibek. Allahri, 'Wene nia mangkina wendog nembanun,' sembale tanena Yesus samenag wero pibogne neneko nen poglul.
ACT 3:22 Samenag Musari ambarelamsiogti, 'Nuni Allahri a'un Israel nimi nusamag agha Allahri yubu silimu tiplamlulne na saog uro nhon sekitlul. Eldi ni yubu lelamlea a'undi wali uro ka'eamlulom.
ACT 3:23 Uro yabilulnena, nimi etneri Allahri yubu silimu tiptopne ponekori yubu lelamlea ka'eamle kom tanena, kom nembahinep,' aro ambatsiog.
ACT 3:24 Samenag Allahri yubu silimu tiplamek nang Samuelag agha, eldi lero amik wamek nangag agha, ni nangdi uro yabinepne sembe lebek. Yabinepne sembe lebekne anena, wene og Yesusag uro yabionge sembe lebek.
ACT 3:25 Samenag Allahri Eldamneri yubu silimu tiplamek nangag yubu salag nikne lero ambarelamsiogne a'un sembe. Samen a'unisangag agha salag pibogne Allahri Abrahamag pibognena: 'Andi mangarobari mangkahyikne pere agha Nari nimi sisa ni tala-tala wamikne walingena tatsinun,' seog. Salag nene a'un sembe lebog.
ACT 3:26 Ane sembe Elme nhon sekirogti, nu Yahudinangag poghogpa, nunag samenag yaognena 'Walia ulamsinun,' aro yaog. Eldi wali uahinepnena, samenag yoaba ulamlomne lipsululom aro mikip nembahinep,” aro Petrusti ambatsiog.
ACT 4:1 Petrusap Yohanesapti nimi maikno yubu ambarelamsirekpa, Yahudi nimiri sae agha memnang saeag neneropba, Allah sembe pairopnangap, Allahri Ae yae ua uropnang yin saleropnang sikindoap, Saduki nimiap sin phendeag yaek.
ACT 4:2 Yaekti ka'elamsiekpa, Petrusap Yohanesapti, “Nimi etneri, Yesusag 'sikne,' senelamleri, tebale tanena Yesus kamag tao saog uro kamag tanep,” aro nimi maikno ambarelamsirek. Ambarelamsirekpa, ka'ebaekti memnang Allah sembe pairopnangap, Allahri Ae yae ua uropnang yin saleropnang sikindoap, Saduki nimi tanekoap yo sembaek.
ACT 4:3 Yo sembaekti, “Sin phende abeneko tam kareptopnang whingag pabhukap,” sembaek aghana, imbaogpa, “Ambhum samoro yaberi, tam kareptopnang whingag pabhukap,” aro sae kaupto kop aeag tobongkipsiek.
ACT 4:4 Tobongkipsiek aghana, Yesus sembe ambarelamsirekne nimi maikno tanekori ka'elamek. Ka'elamekti seneraglamekti, “Sin phenderi ambarelamsirangne sembe sik uro ambarelamsirang,” aro seneraglamek. “Sik uro ambarelamsirang,” aro seneragtop nimi taneko wamekne, kabuni aghabog a'iliro agha teng-tengne (5.000) wamek.
ACT 4:5 Mabeka kwelekaogne memnang Yahudi nimi saelba uahiropnangap, Yahudi nong nimi nubunangap, Musari samenag mome tobogne ambatsiropnangap, memne Allah sembe pairopnang sikini nubunge Hanasap, eldi nimi sisa nhonne, Kayafas, Yohanes, Aleksander, ora nimiap, “Petrusap Yohanesap sembe tam karebaukap,” aro as Yerusalem winiptaek.
ACT 4:7 Winiptaekti Petrusap Yohanesap abeneko enero poa yahiekpa, nimi poloro winiptangkamek nang tanekori sinag hailamsiekti, “Nimi etne mikibag agha? Nimi etne siag agha ulamdomdi, nimi wali nenelamsirom?” aro haibahiek.
ACT 4:8 Wene aro haibahiekpa, Allah Eldamne Yame Walingeri Petrus wana salero el nongag wa'alamogti, mikipne piamogpa, haibahiekne sembe Petrus sekogti ambarelamsiogti, “Nani yabo nimi nubunangap, nani yabo nimi saelbamsilom nangap, wene na yubu lemnunne ka'eamlulom!
ACT 4:9 Sumene nimi yan malinge nhon yepnamne nene wali uanam aghana, 'Ambatsisereng,' aro hailamsilomdi, 'Nimi etne mikibag nimi nene yan wali nembarom?' aro nunag hailamsilom,” seog.
ACT 4:10 Wene seogti, “A'un Israel nimiap, a'un nimi ni wamlom nimi tane el tahile. Allahri 'Mog so'oag nimi taulbahilulam,' aro webogne Nasaretne poneko si Yesus engeropneag moloro ul tongolamnam. Yesus neneko a'undi kalag sipto olobom aghana, Allahri nimi teptobag agha nen kamag nembao. Kamag nembaonge ponekoag molbanamba, nimi nene wali nembalba, yan wali talne a'un whingag sekamlari wamla,” seog.
ACT 4:11 Nen ambarelamsiogti, “Samenag Yesus anam mangkaek komag Allahri yubuag Yesus sembe mome tobogne ane: 'A'un ae sorop nimiri, “Yangan kirik nubunge nene mali,” aro toboghailum, aghana yangan kirik katne nhonog sunuropne tao,' aro mome tobog. Israel nimi nubunang, ae sorop nimiri yangan kirik katne samenag toboghaiek saog uro Yesus wa'epto toboghaom aghana Yesus neneko Allahri, 'El mori nimi mog so'oag nimi taulbahinep,' aro Yesus yangan kirik katne saog uro wepto sekirog. Nimi mog so'oag nimi malia uroba sembe 'Allahri opsileag,' aro Yesusti taulbahinep. Im tamag mog so'o sirikag-sirikag nimi taulbahinepne ot nhonog si Yesus engeropne wamla. Elag mololamnaba, Eldi nu taulbahinep. Elap sunsunumne nhon wamla kom,” seog.
ACT 4:13 Wene seogpa, nimi yubu tam kareptopnang poloro winiptaek nimi tanekori Petrusap Yohanesap sembe, “Sin mome lerop kom nimi apna, kembiag agha el urop kom nimi sao wamdang. Nubunang ambarelamsirang aghana sin log kom uro lero ulamdang,” sembaekti, “Yaghe, mane agha ulamdang,” alamek. “Yesusap nhon yabalamdongne sin phende,” aro el wamsiog.
ACT 4:14 Nimi yan wali taogne neneko sin Petrusap Yohanesap peramag sekamogpa, ibekti, “Nuri sinag sa'a sukap kom,” aro yubu koma wamek.
ACT 4:15 Wameka, “A'un asag lambalulom,” aro wene seekpa, lambaekpa Yahudi nimi sembe yubu tam kareptopnang Mahkamah Agama nimi mo yubu lelamekti,
ACT 4:16 “Nimi phende abeneri Allah Eldamneri uanepne nimiri uanep komne uarongba, Yerusalem nimi ni el taongba, nuri, 'Sindi lelamdangne orolenange lelamdang,' aro orolenange nuri lemnep kom saog wamla. Ane sembe, nimi abeneag nuri sa'ange agha ambatsukap?
ACT 4:17 Sindi alnibarongne nene nimi maiknori ka'ebaikpa, nubu taleag, nimi abeneag walamsiberi, '”Allahri nia mangkina si Yesus poneko saeag nembao,” aro ambatsiseng kom,' aro yubu mikip uro wembahukap,” seek.
ACT 4:18 Wene seekti, sin abenekoag “Wa'al alulom,” aro yopsiekti, “Yesus sembe ambarelamsiromne sik komne ambarelamsirom. Nimiag yubu lelamtumundi, 'Allahri nia mangkina si Yesus poneko saeag nembao,' aro ambatsiseng kom,” aro wembahiek.
ACT 4:19 Wembahiek aghana Petrusap Yohanesapti, “A'undam nimiri wanaag agha senaragsu. Nelagha Allah whingag wali: A'un yubu mombolag wamukap to, Allah yubu mombolag wamukap to? Allah whingag uaukap sembalomne nelagha wali sembamlom?
ACT 4:20 Allahri uaonge sembe nimiag ambatsibe tanena Allah whingag wali. Ane sembe aoag agha ka'ebabori, haingdi babe ibobonge nene sembe nimi ambatsin koma wamnep kom,” serek.
ACT 4:21 Wene serekpa, tam kareptopnang taneko yubu lenne orog. Yubu mikip uro sin phende abeneko wembahiekti, “Pururom,” aro yag lambahiek. Nimi wali nembarekne neneko ibekti, nimi maiknori Allah omeklamek. Tam kareptopnangdi Allah omeklameka ipsiekti, sindi, “Sin phendeag huaukap,” alamek. Allah omeklameka ipsiekti, tam kareptopnangdi “Logti tam lolohinne orogti,” lipsiek.
ACT 4:22 Lipsieknena, nimi yan malinge wali nembarek nimi eneko mangkaekne heng kun yag tangom kom tangom alamogha teng nhon eptopne naualbare (40) taogpa, Allah Eldamneri uanepne saog uro wali nembarekpa, tam kareptopnangdi “Uaukap” sembaekne, “Tam lolohinne orogti,” lipsiek.
ACT 4:23 Petrusap Yohanesap “Pururom,” aro sae lipsiekpa, sikinkaboag pirekti, memnang Allah sembe pairopnang sikindo yaboap, Yahudi nimi sikini yaboapti lebekne “Nunag undo-undo wene seangdi, wembahiang,” aro sikinkaboag ambatsirek.
ACT 4:24 Ambatsirekpa sikinkabori ka'ebaekti, sin ma'aptangto Allah omekto mololamekti, “Nuni Allah nia mangkina saelbamlamne, Andi imap, so'oap, magap nia mangkina ni Andi sumbalum.
ACT 4:25 Andi Andamne Yame Walinge neneko Andi arukna nuni Daud pere agha elag piplumne ambatsiogne ane, 'Yahudi sisa kom nimi Allah omektop kom nimi tala-tala wamangneri sa'ambe yanghang alamsiang? Sa'a sembe as tala-tala wamangneri, “Undo-undo uaukap,” senelamangdi lelamang aghana, uro yabilul kom?
ACT 4:26 Nuni Allahri “Taulbahimendi, saelbamsululam,” aro wepto aogne ot nhon. Allahri wepto aog aghana mog so'oag yubu sia leropnang tanekoap, sikin tamag salehiropnangapti, “Karong,” aro poloro winilamang. Poloro winilamangdi, Nuni Allahap, Eldamneri wepto aogneap “Mal tabaukap,” aro yin singilamsiangdi, wamang,' aro Daudti samenag ambatsiog.
ACT 4:27 Samenag ambatsiogne sunsunum uro sik uro yabiog. Anme sol walinge Andi “Taulbahilulam” aro wepto alumne Yesus neneko 'Obukap,' aro Herodesap, Pontius Pilatusap, Yahudi sisa kom nimiri Allah omektop komnangap, Israel nimiap, as eneag poloro winiptaong.
ACT 4:28 Sin winiptaong nimi tanekori 'Uaukap,' sembaongdi, ulamongne, An Sae Mikipne nenekori samenag agha 'Wali undo uaukang,' sembalumne saog uro ulamong.
ACT 4:29 Wene Nuni Allah, Yahudi nimi tam kareptopnang taneri nu Yesusag 'Sikne' aro seneragtop nimi sembe 'A'un opsukap' alamang. 'Opsukap,' alamangdi, walamsiangba nu Andi kembahi. Nuri 'Anenge yubu log kom uro ambarelamsukap,' aro An arukna wamapne tane mikip nembahi.
ACT 4:30 Anme sol walinge si Yesus nenekoag mololamebeba, 'Yesus Allah Elmeag mololamangba, Allahri sin pere agha ual,' senenne kekneba nunag piplulam. An sae pelengkamendi yepsimenba, nimi niktopne wali nenelamseberi, nimiri uanep komne, Allah Eldamneri uanepne yogne ulamukap,” seek.
ACT 4:31 Wene aro Allahag omekto mololamekpa, sin poloro wamekag aneko sa'uma saog uro Allah Eldamne Yame Walingeri sindi wana salero nongag wa'isiogti, mikipne pipsiog. Mikipne pipsiogpa, Allah yubu log kom uro ambarelamsiek.
ACT 4:32 Yesusag “sikne” aro seneraglamek nimi taneko wana ot nhonog uro sin ma'aptangto wamek. Ma'aptangto wamekti, nimi nhondinge saeag agha ua ulamogha, “Andinge naringe” sen koma, “Nuringe aghabog” senelamek.
ACT 4:33 Allahri, “Nimiag lag pho'oro ambatsululom,” aro mikip nenelamsiogpa, Yesusti wepto pogsiognangdi, “Nu salehiropne, Nuro Yesus Allahri kamag nembaonge ibobo,” aro sol wali uro ambarelamsiek. Sin ni tanekori, “Allahri to'opto o'ona sembamsil,” senelamekti, o'ona senel talamek.
ACT 4:34 Senel talamekti, sin ni taneko nhon babe sae agha elenge orog uro wamek kom. Yesusag “Sikne” aro seneragtop nimi taneko anabiag awe ae ngai nimi wamek. Sikinenge awe ae ngai nimi tanekori nimi yogneag awe ae tarelamsiekti, kal ma'al tolamek. Kal ma'al tolamekne Yesusti wepto pogsiognangdi saeag aghabog nenelamsiek. Yesusti wepto pogsiognangdi saeag aghabog nenelamsiekpa, sindi nimi tipto kwema ua ulamsiogha uro tarelamsiek.
ACT 4:36 Nimi nhon si Yusup, Yesusti wepto pogsiognangdi Barnabas engkaekne, “Wana aingnihinne,” aro engkaek. Elna sisa Lewinge mog so'o Siprusne wamog.
ACT 4:37 El nenekori so'o eldamneringe nimiag kamna tobogti, so'o kamna kal ma'al tareka aneko Yesusti wepto pogsiognangdi saeag nenel aog.
ACT 5:1 Nimi kabuni nhon si Ananias, elkel Safiraap wamdek. Wamdekti so'o sindinge nhon nimiag tatsirek. So'o tatsirekne sembe kamna tatsiekpa, kal ma'al toptek.
ACT 5:2 Toptekti kal ma'al so'o kamna tatsiekne taneko sembe Ananias elkel Safiraag ambarelamogti, “Kal ma'al ane luluro piro anun,” aro ambarog. “Luluro piro anun,” aro ambarogpa, elkel sae saekag agha Ananiasti nenne luluro pil tolamogti, nenne pogto, “Yesusti wepto pogsiognangdi saeag nenel anun,” aro pil piog.
ACT 5:3 Pil piogpa, Petrus nenekori Ananiasag, “Ananias, phiari wana sao kauplangkelba, Allah Eldamne Yame Walinge whingag orolena sa'ambe ualam? Orolena lelamlamdi, so'o sembe tatkeangne pogto sa'a sembe tognoro pairo alam?
ACT 5:4 So'o anena anenge, anam kamna kapto tomna komagna. Kal ma'al babe anenge kamna kaplamdi, toplamag babe. Tam ane anba andi saeag wamla. Aghana sa'ambe an wanaag orolenange seneraglam? Nimiag orolenange ua alam kom, anena Allahag ua alam,” seog.
ACT 5:5 Wene alamogpa, Ananias ka'elamogti abeneko pere, so'oag malingkina Ananias tebaog. Tebaogne sembe nimi ni ka'ebaekti, log maikno senelamek.
ACT 5:6 Tebaogpa kabuni mabo etbarero yingkina nimi teptoba aneko kaupto poa lambaekti, so'oag sikil piek.
ACT 5:7 Sikil pina yalamek abeneko Ananias elkel ela'ange tebaogne ekon uro yaogti, wa'al aog.
ACT 5:8 Wa'al aogpa, Petrusti elag hailamogti, “So'o aneko sembe kamna kapto toptoma ana'angeri kal ma'al payalnena abene te? Andi babe ambatne,” seog. Seogpa kelenekori, “Otsik uro ni so'o kamna kal ma'al tatsiongne payal abene,” seog.
ACT 5:9 Wene seogpa, Petrusti, “A'un phende sa'a sembe 'Nuni Allah Yame Walingeag orolenange ambatnemeri, mipnunam,' aro yubu nikne leptom? Nimi ana'ange sikil piang nang taneko ina siramag yaangdi, an keyapto 'Poa lambaukap,' aro wamangba kembahi,” seog.
ACT 5:10 Wene alamog abeneko Petrus whingag malingkina tebaog. Nimi kabuni taneko aeag wa'iekti, keleneko teptoba kembaekti, keyapto poa lambaekti, ela'ange sikeka peramag aneko elkel babe sikek.
ACT 5:11 Undo unu aogne sembe nimi Yesus yubu ka'ero winiptangtop nimi ni log maikno senelamek. Tebarekne sembe ka'ebaek nimi yogne babe ni log maikno senelamek.
ACT 5:12 Yesusti wepto pogsiognang tanekori Allah Eldamneri uanepne nimiri uanep komne ulamekti, “Yaghe, Allahri sin pere agha ual” senenne kekneba maikno nimi maikno whingag ulamek. Undo unulamekpa, nimi Yesusag “Sikne” aro seneraglamekne taneko sin ma'aptangto wamekti, Allahri Ae aramag “Salomo” engerobag sip imag agha solorobag aneko haibil talamek.
ACT 5:13 Haibil talamekpa, nimi orange maiknori Yesusag “sikne” aro seneraglamek nimi sembe, “Wali,” aro maiplamsiek. “Wali,” aro maiplamsiek aghana, log uro seneraglamekne sembe, maiplamsiek nimi taneko agha, nhon babe Allahri Ae aramag ma'al tan anag yalamek kom.
ACT 5:14 Log uro seneraglamekti, yalamek kom aghana, kaubuniap kelaboap Yesus sembe el talamekti, Yesusag “Sikne” aro seneraglamekti, Elag “Saelbamsululam,” alamek. “Saelbamsululam,” alamekti, samen Yesusag “sikne” aro seneraglamek nimiap ma'al talamekpa, maikno talamek.
ACT 5:15 Yesusti wepto pogsiognangdi nimi maikno wali nenelamsiekne taneko sembe nimi tanekori nimi niklamekne Petrus ina palamoghag nimi niktopne ae usa yangal pina pia ulamsiek. “Petrus yabalogleri eldi yameri olog po'obahileba, wali taukang,” aro manal pina ulamsiek.
ACT 5:16 Manal pina ulamsiekpa, as Yerusalem kanero wamek nimiri niklamekneap, phiari loba nenelamsiog nimiap enero payalamsiekpa, sin ni Yesusti wepto pogsiognangdi whelamsiekpa, wali talamek.
ACT 5:17 Kemelamsiekpa Yesusti wepto pogsiognangdi “Yaghe” senenne maikno ulameka sembe memne Allah sembe pairopnang sikini nubungeap, el neleptop nang Saduki nangap, “Nubunang talamang,” aro sin wana yo senelamek.
ACT 5:18 Sin yo senelamekti, Yesusti wepto pogsiog nimi taneko salero kop aeag tobongkahiek.
ACT 5:19 Aghana inipnag Nuni Allahri Eldamneri arukna malaikat poghogpa, kulukul aogti, kop ae ina siram taneko kupto lanalamsiogti, “Pimundi, Allahri Ae aramag sekapmundi, Allah yubu nimi maiknoag ambarelamsimundi, 'Yesusag “sikne,” aro seneragtop nimi tebale tanena kamag tanep,' aro ambarelamsululom,” aro ambatsiog.
ACT 5:21 Sin wene aro ambatsiog yubu eneko ka'ebaekti, lukunap Allahri Ae aramag wa'iekti, Yesus sembe yubu ambarelamsiek. Ambarelamsiekti wamekpa, memne Allah sembe pairopnang sikini nubungeap, el neleptop nangapti Yahudi nimi sembe yubu tam kareptopnang Mahkamah Agama nong nimi nubunang poloro wimbahiek. Poloro wimbahieknang tanekona ni Israel nang sikini yabo poloro wimbahiek. Wimbahiekti, “Yesusti wepto pogsiognang abeneko kop aeag tol phululom,” aro arukahiek.
ACT 5:22 Wene aro arukahiekpa, Allahri Ae yae ua urop nang “Nimi tol phukap,” aro piek aghana, nimi tanekori kop aeag aneko kemelamsiekag agha sin orog wamek. Orog wamekpa, kembahiekti nen samoro Yahudi nimi sembe yubu tam kareptop nangag ambarel phiek.
ACT 5:23 Ambarelamsiekti, “Nu piapti, kop aeag pina kemelamabag agha ina serekna wali maupto serektop, nimi babe kop ae yae ua unnang ina siramag yae wamang. Wamangba ina serekna kubiagha wa'alamabag agha nimi nhon babe ae lomag una wamang kom,” seek.
ACT 5:24 Wene aro ambatsieka ka'ebaekti, Allahri Ae yae ua urop nang yin saleropnang sikindoap, memnang Allah sembe pairopnang sikindo yaboap wana sao kaupsiogpa, amik tanepne sembe log senelamek.
ACT 5:25 Amik tanepne sembe senelamekti wamekpa, nimi yubu poa yaogti ambarelamsiogti, “Nani yabo, Nimi a'undi kop aeag tobongkipsiom nimi abeneko wene Allahri Ae aramag nimi yubu ambarelamsiang,” aro ambatsiog.
ACT 5:26 Wene aro yubu poa piogne neneko ka'ebaekti, Allahri Ae yae ua uropnang sikindoap, el sembe yae ua urop nang yin saleropnangap piekti, Yesusti wepto pogsiognang abeneko Allahri Aeag aneko oro kom-kom wali uro tol phiek. Oro kom-kom wali uro tol phieknena, “Yesusti wepto pogsiognang olamsibe tanena, nimi wamang nimi taneri kirikti nu opsiikag,” aro log sembaekti, wali uro tol phiek.
ACT 5:27 Tol phiekti, Yahudi nimi sembe yubu tam kareptop nang Mahkamah Agama wimbahiekag poa wa'isiek. Wa'isiekpa memne Allah sembe pairopnang sikini nubunge ponekori tam sinag palilamsiogti, wenelamsiogti,
ACT 5:28 “'Yesus siag nimi yubu ambatsiseng kom,' aro mikip uro a'unag ambatsibo. Aghana wenena sa'a agha ulamlom? Wene, 'A'undi ambatsiseng kom,' sebo aghana Yesus poneko sembe ambarelamsilomdi, yubu eneko nubu nenero Yerusalem sabo tao. Wene a'un Yesusti wepto pogsiog nangdi nu Yahudi nimi nubunang sembe lelamlomne, 'A'undi ulamomba, Yesus eneko tebao,' alamlom,” seog.
ACT 5:29 Wene seogpa, Petrusap elkabo Yesusti wepto pogsiognangapti, “Allahri leropne agha sik sembanepti sarenelebel pinep. A'un Yahudi nimi nubunangdi leplomne nuri sarenelebanep kom.
ACT 5:30 Yesus a'undi kalag siplobomdi, ya'ag olobomba, tebaonge neneko Allah nunisangdi omeklamekne ponekori nimi teptopne urobag agha kamag nembao.
ACT 5:31 El neneko Allahri “Israel nimiri malia ulamangne lipsiikpa, tam orog nembanun,” aro Yesus paliag nembao. “Nandamne sae sirik sip nimi nubunge sunsunum urobag wamlulam,” aro paliag nembao. Allahri Yesus paliag nembaoba, Allah sae sirik sip wamla. Allahri, “Israel nimi salehiropne talulam,” aro Yesus toro sekiro. Toro sekiroba, 'Israel nimiri malia uroba sembe Allahri opsileag,' aro Yesus taulbahiropne tao.
ACT 5:32 Allahri uaonge sembe el tabori, nuri nimi ambarelamsiap. Allah Eldamne Yame Walinge neneko El yubu ka'ero ua urop nimiag tarelamsilne nenekori babe nimi ambarelamsil,” seek.
ACT 5:33 Wene aro Petrus elkaboapti ambarelamsieka ka'ebaekti, sin wanaag aluklamsiogpa, “Yesusti wepsiog nimi taneko opsukap,” aro ulamek.
ACT 5:34 Wanaag agha “Opsukap,” senelamekpa, Farisinge nhon si Gamaliel wamog. Gamaliel poneko Musari samenag mome tobogne sembe ambarelamsiog. Musari samenag mome tobognena, Allahri “Undo-undo tam kareplamlulom,” aro Musa ambatsiogpa, Gamaliel el wamogti, ambarelamsiog. Wamogti ambarelamsiogpa, nimi ni tanekori maiplamek. El neneko Yahudi nimi sembe yubu tam kareptopnang Mahkamah Agama anabiag wamogha sekogti, “Yesusti wepto pogsiognang poa lambahilulom,” seog.
ACT 5:35 Wene seogti, Gamalieldi, “Sae lobitsukap,” aro Yahudi nimi sembe yubu tam kareptop nimi wameka tanekoag ambarelamsiogti, “Israel nimi nangkabo, 'Nimi tane obsukap,' sembaloma wali uro tam o'obiagha ualulom.
ACT 5:36 Nimi phende samenag wamdekne sembe seneragsumundi, el talulom. Nimi nhon Teudas neneko, 'Na nubunge paliag wamna,' aro sekogne seneragsu. 'Na paliagne wamna,' alamogpa, nimi elag sare neleptopne teng-tengne (400) tanekori el yubu ka'elamek. El neneko nimiri obekpa, Teudas yubu ka'elamek nimi taneko tala-tala taekti, unulamekne neneko lipsiek.
ACT 5:37 Teudas neneko obekpa, tebaogpa, wamek. Wamekpa, nimi si tolamsiek liag Yudas Galileange poneko babe walel ingkiog. Yudas wamog liag babe nimi maikno elag sare neleptop nimi wamekne elag sip taekti, “Roma nimi mombolag wamukap komdi, sae lipsukang,” aro yin salelamek. Yin salelamek aghana, nimiri Yudas ya'ag ologhekpa, elag neleptop nimi taneko oro nelepto tala-tala nembahiek.
ACT 5:38 Ane sembe nari a'unag lelamnange, nimi taneag sa'a-sa'a ualulom kom. Teudasap Yudasap tebarekne sembe ambatsin. Sin abeneko saog uro, Yesus yubu ka'ero sareneleptop nimi mo seneragtopneag agha, 'Uaukap' sembamangdi, ulamang tanena, sa'a-sa'a ulamangne kom tanep. Aghana, sindi ulamangne nene agha Allahri seneropneag agha ulamang tanena a'undi nimi, tanena kom nembahilulom kom. Ane sembe sae lobitsululom. A'undi ulamlomne nene agha 'Allah luknubaukap,' aro ulapmunag wali uro kembiagha seneragmundi,” aro ambatsiog. “Gamalieldi wene seogne sik,” aro el yubu ka'ebaek.
ACT 5:40 Wene aro ambatsiogpa, “Yesusti wepto pogsiog nimi taneko wa'al aukang,” seekpa, wa'al aekpa, sae kaupto taeplam-taeplam lopsiekti, “A'undi, 'Allahri nia mangkina si Yesus poneko saeag nembao,' aro nimi ambatsiseng kom,” aro ambatsiekti, sae lipsiek.
ACT 5:41 Wene aro sae lipsiekpa, Yesusti wepto pogsiog nimi taneko yubu tam kareptobag anekoa lambaek. Lambaekti, Yesusti wepto pogsiognangdi seneraglamekti, “Yesusti nunag arukahiori, 'Pimundi, Nanag uro yabiogne sembe ambarelamsululom,' aro arukahiog. Nunag arukahionge sunsunum uro “Yesus si nubu talul,” aro sol wali, wali uro ambarelamsiapne sembe nimiri nu sae kaupto taeplam-taeplam lopsiangba, ali nembahiang. Ali nembahiangba, seklelamap aghana, Yesusti nunag arukahionge sunsunum uro sol wali, wali uro sik uro ambarelamsiapne sembe Allah nu sembe yeng senelamla. Ane sembe ali nembahiang aghana, Allahri nu kembamsilne sembe, nu babe yeng senelamap,” aro seneraglamek. Undo seneraglamekti, sin awi yeng uro lambaek.
ACT 5:42 Lambaekti sop-sop Allahri Ae aramag yubu ambatto, nimiri aeag ambatto, Allahri, “Mog so'oag nimi taulbahimendi, saelbamsululam,” aro Wepto Poghol aogne Yesus sembe Yubu Walinge ambarelamsiek.
ACT 6:1 Wamekti Yesus yubu ka'elamekne sunsunum uro ulamek nimi, nimi maikno talamek. Maikno talamekti, Yahudi nimi wamek aghana sin nusamag agha Yunani yubu lerop nimi babe wamek, Ibrani yubu lerop nimi babe wamek. Yahudi nimi Yunani yubu lerop nimi wamekneri Yahudi nimi Ibrani yubu lerop nimiag wana mali palilamsiek. Yunani yubu lerop nimi tanekori lelamekti, “Ibrani yubu lerop kelabo yauog taekne babe, Yunani yubu lerop kelabo yauog taekne babe kwaneng tatsinep. Aghana, kal ma'al yepna sop-sop yeplamsiloma kelabo kaldam kelabo nu Yunani yubu lerop nimiringe olog tarelamsilom kom,” alamek.
ACT 6:2 Wene aro Yunani yubu lerop nimiri lelamekne sembe, Yesusti wepto pogsiog nimi aobare nang enekori Yesus yubu ka'ero ulamek nimi poloro wimbahiek. Poloro wimbahiekti, yubu ambarelamsiekti, “Nu kwaneng tenaba sembe nimi o'olamsiberi, Allah yubu nimi ambatsin koma libeberi, tenaba sembe ulamebenge nenena mali.
ACT 6:3 Ane sembe nangkabo, nimi saekpare wepsululom. Wepsululomnena, Allah Eldamne Yameri seneragna sunsunum uro wanaag seneraglamangdi, wana maro hekto seneraglamangdi, walia ulamangba ililamsilomne, sin nusamag agha nimi saekpare wepsululom. Wepsimunba, 'Sol wali, wali uro kwanengap, kal ma'alap kelabo yauog taekne nika-nika uro tarelamsululom,' aro nimi saekpare abenekoag ambatsiberi wepsukap. Wepsibeba, sindi saelbamikti, nimi yeplamsukang.
ACT 6:4 Nimi saekpare wepsimunne tanekori nimi tenaba saelbamikpa, nu Yesusti wepto pogsiognangdi sop-sop Allahag molona lelameberi, Allah yubu tibin nenero ambarelamsukap,” seek.
ACT 6:5 Wene seekpa, nimi wamek nimi tanekori “Wali” seekti, nimi weplamsiek. Weplamsiekpa, nimi nhon sina Stefanus webek. Stefanus ponekona, Allah Eldamne Yame Walingeri Stefanus nongag mikipne to'opto piamogpa, Stefanusti wanaag seneraglamogti, “Yesus sik uro Allahri 'Taulbahilulam,' aro wepto poghogne,” aro mikip uro seneraglamog. Yesusag “sikne,” aro seneraglamogne Stefanus webekti, nen weplamsiekti, Filipusap, Prokhorusap, Nikanorap, Timonap, Parmenasapna, Nikolausap wepsiek. Nikolaus poneko samenag Allah omeklamog kom aghana Yahudi nimi saog uro taogti, Allah omeklamekne saog uro el babe Allah omeklamogne taog. Elna as Antiokhia agha, “Na babe Yahudi nimiri omeklamangne Allah omeklamnun,” aro yingkina wamog.
ACT 6:6 Nimi Yesusag “Sikne” aro seneragtop nimi taneko ni wamekneri nimi saekpare abeneko wepsiek. Wepsiekti, Yesusti wepto pogsiognang enekoag pil phiekpa, Yesusti wepto pogsiognang enekori “Allahri mikip nembahileba, kwaneng pogto kelabo yauog taekne yeplamsumuna sol wali, wali uro saelbamlulom,” aro Allahag molona lero usoghag sae pipsiek.
ACT 6:7 Wene aro tenaba sembe awe tona sin saekpare nangag pibekti, Yesusti wepto pogsiognangdi Allah yubuag agha Yesus sembe tibin nenero ambarelamsiek. Tibin nenero ambarelamsiekpa, yubu eneko tala-tala nubu talamogpa, Yesus yubu ka'ero ulamek nimi as Yerusalem maikno talamek. Memnang Allah sembe pairopnang babe maiknori Yesus sembe el talamek. El talamekti, “Yesus ponekona, Allahri 'Malia ulamangne sembe “Opsineag,” aro taubahilulam,' aro wepto poghogne,” aro seneraglamekti, ma'al talamekti.
ACT 6:8 Stefanus neneko Allahri mikipne elag to'opto palilamogpa, nimiag walia ulamsiogti, “Yaghe, Allahri el pere agha ual” senenne kekneba nimiri uanep komne, Allah Eldamneri uanepne nimi maikno whingag Stefanusti ulamog.
ACT 6:9 Stefanusti undo unulamogpa, Yahudi nimi nusamag agha Libertini aldalamek nimi babe wamek. Libertini aldalamek nimiri Allah yubu lerop ae nhonag ma'al dalamekti, sina Libertini Allah yubu lero omektop ae engel dalamek. (Libertini aldalamek nimi anena, “'Nu samenag nimi arukna wamubu aghana sae lobitsiekpa, wamap,' aro urop nimi,” aro engel dalamek. Sin tanekona, mog so'o Kirene nimiap, as Aleksandria nimiap, mog so'o Kilikia nimiap, mog so'o Asia nimiap babe wamek.) Libertini nimi tanekori, “Stefanusti Yesus sembe nimiag ambarelamsilul kom,” aro Stefanusap yubu yo uro lel talamek.
ACT 6:10 Stefanusap yubu yo uro lel talamek aghana, Stefanusag Allah Yameri mikipne piamogpa, wana hekto yubu lelamogti, tibin uro ambarelamsiogpa, sindi samoro elag yubu lemnep kom wamog.
ACT 6:11 Sindi samoro elag yubu lemnep kom wamogpa, Libertini nimi tanekori haing kunuro nimi orangeag wana tolamsiekti, “Stefanusti ambarelamsilne nu karong. Ane sembe, nimi ambarelamsululomne, 'Stefanusti Musa san tiliptop yubu lebori, Allah babe san tiliptop yubu lebo,' aro orolena yubu ambarelamsululom,” aro wana toro ambatsiek. Libertini nimiri wene aro wana toro ambatsiekpa, nimi orange tanekori, “Wali, ambarelamsukap,” seekti, “Nu aori ka'ebabongena, Stefanusti Musa san tiliptop yubu lebori, Allah babe san tiliptop yubu lebo,” aro orolena yubu lero ambarelamsiek.
ACT 6:12 Wene aro orolena yubu lerop nimi tanekori ambatsiekpa, nimi maiknori ambatsiekne ka'ebaekti, “Stefanusti mali ulamlaba, saelbaukap,” aro wanaag meso yalikahiog. Wanaag meso yalikahiogti, as Yerusalem wameknangap, Yahudi nimi nong nimi nubunangap, Musari samenag mome tobogne ambatsiropnang tanekoap piekti, Stefanus salel pina Yahudi nimi sembe yubu tam kareptop nimi Mahkamah Agama haiptangtobag payaek.
ACT 6:13 Yubu tam kareptop nangag payaekti, Libertini aldalamek nimi enekori yubu loloro lerop nimi babe pabiek. Libertini nimiri yubu loloro lerop nimiag ambarelamsiekti, “Ambatsululomne, 'Stefanus eneri nu haingag wene alamo,' sululom,” seek. Wene seekpa, yubu loloro lerop nimi tanekori orolena ambarelamsiekti, “Stefanus eneri sop-sop sinag kweleknag lelamori, 'Allah Eldamne Mem Ae loba tao,' seo. Apna, Stefanusti lelamori, 'Musari samenag Allahri “Undo ualulom,” aro ambarogne sembe mome tobogne babe loba tao,' seoba, aori ka'ebabo.
ACT 6:14 Stefanusti yubu lebonge nu ka'ebabongena, 'Yesus Nasaretne ponekori Allahri Ae ene kwerek alul. Tanena, Musari samenag ambatsiogpa, saelba ulamapne orog nembaleri, wendogne nhon lag nembalul' seo,” aro wene seek.
ACT 6:15 Wene aro orolena yubu lebekne sembe Yahudi nimi sembe yubu tam kareptop nimi Mahkamah Agama haiptangtobag wamek nimi tanekori Stefanusti whingag tilamek. Whingag tilamekpa, kembiag agha Stefanusti whing Allah arukna malaikatti whing saog taog.
ACT 7:1 Memne Allah sembe pairopnang sikini nubunge ponekori hailamogti, “Sindi lebangne sik te?” aro haibaog.
ACT 7:2 Haibaogpa Stefanusti, “Nangkabo, nani yabo ka'eamsu! Anam nunisang Abraham Kharan pin komag Mesopotamia wamogpa, Allah warero libango aropne Abraham wamoghag lag taog.
ACT 7:3 Lag taogti, Allahri yubu lelamogti, 'Anenge mog so'o asag agha lambamendi, ankabo laploa Nari mog so'o nhon ambatkenenge nhonag pululam,' seog.
ACT 7:4 Allahri Abrahamag wene seogpa, Kasdim nimi mog so'o laplobi agha as Kharan piogti wamog. As Kharan aneko wamogpa, Abraham ili tebaogpa, Allahri lebogha sunsunum uro nu Yahudinang wamap so'o eneag Allahri Abraham payaogpa, Abraham wamog.
ACT 7:5 'Pululam,' seogpa, yaoghag ane, 'So'o ologha babe an ngai talulam,' ana babe kom. 'Ot anap andi mangarobari mangaroba mangkahyikneap amik ngai talulom,' aro Allahri Abrahamag salag lero ambarog. Abene li elmabo babe nhon wamna komag, oroghag agha ambarog.
ACT 7:6 Ambarogti nen Allahri Abrahamag yubu lelamogti, 'Andi mangorabari mangaroba mangkahyikne nimiri so'oag nimi sekelanan nang saog uro nimiri so'oag wamukang. Wamikpa so'o eneko nimiri sinag heng tai buka tau buka ulamlea teng-tengne (400) wamikpa, so'o eneko nimiri olamsiikti, aruklamsiikpa, ikinaba maghan og uro polamukang.
ACT 7:7 Nimiri so'oag aneko arukna nembamsiikpa, “Olamsiik nimi taneko sindi ulamikne mali,” kembaneri, Nari tam karebiagha lunuro obahinun. Obahineba, anisag yabo lambaikti, mog so'o Yerusalem ane Na omekanukang,' aro Abrahamag Allahri ambarog.
ACT 7:8 Ambarogti, Allahri Abrahamap yubu nikne lero salag palilamogti, 'Nari salag palilamnange nene ekon tan koma el uro wamlulom aro anap, anmaboap nengabo niap nengabo kon karebel dalamlulom,' aro yubu nikne lero salag pibog. Abrahamdi elme Ishak mangaro aogti, 'Allahap nari mangarobari mangaroba mangkahyikneap ma'aptanumunge ekon taikag,' aro ae ik lin sum Allah ambarogne sunsunum uro elme Ishak nengabo kon karebaog. Abrahamdi Ishak mangkaogpa, Ishakti Yakub mangkaogpa, Yakubti kongap nang a'obare mangkahiogpa, sindi nimi sisa a'obare likto piekti, nunisa yabo nubunang taek,” Stefanusti ambarelamsiog.
ACT 7:9 Stefanusti nen tipto ambarelamsiogti, “Nunisa yabo a'obare nubunang enekori sikinipsae Yusup sembe, 'Nuni Yakubti nu sembe olog uro o'ona senelamsildi, elme Yusup sembe agha maikno o'ona senelamla,' aro wana mali senelamek. Wana mali senelamekti, 'Mesir nimi arukna talul,' aro eldoyabori kamna kapto tobek aghana, Allahri sikinipsae Yusup yepto piamog.
ACT 7:10 Yepto piamogti, tam malinge elag uaekne orog nembaogpa, Mesir nimi sembe yubu sia leropne Firaunag yaog. Elag yaogpa, Allahri Yusup yeplamogpa, wana seneragna heklamogpa, Firaundi Yusup sembe 'Wali uro awe tolamla,' aro awi senelamog. Yusup sembe awi senelamogti, Firaundi 'Mesir so'o saelbamlulam,' aro towalengkaogpa, Yusupti Mesir so'o saelbamog. Mesir so'o saelbamogpa, Firaundi aeag uropne babe, Firaun el tamag awe toro ulamekne babe, 'Pia ulamlulam,' aro Yusup saeag nembaog.
ACT 7:11 Towalengkaogpa wamekpa, Mesir so'oag babe, Kanaan so'oag babe, kwaneng yo nubunge waelbaogpa, kwaneng yo seklelamek. Kwaneng yo seklelamekpa, nunisa yabo Kanaan wamekne babe kwaneng telamek kom.
ACT 7:12 Unu amogpa, 'Mog so'o Mesir kwaneng telamang,' ana Yakubti ka'ebaogti, nunisa yabo nubunangag 'Mesir kwaneng tol pululom,' aro pogsiog. Pogsiogpa, sin sumene alnirop sum 'Kwaneng tobukap,' aro piekti, kwaneng samoro payaekti, olog wamek.
ACT 7:13 Nen ik phendep sum babe piekpa, Yusupti, 'Na a'unipsae wamna,' aro eldo yabo ambatsiogpa, Firaun babe Yusup ili eldo yabo wamekne sembe el taog.
ACT 7:14 El taogpa Yusupti iliap, eldo yabori maboap kelaboap, 'Na ya'aghag yalulom,' aro yopsiogpa, ili Yakubap nhon yaek nimi taneko teng phende eptopne saektara bare (75) yaek.
ACT 7:15 Mog so'o Mesir piekti wamekpa, Yakub tebaogpa, nunisa yabo nubunang babe wamekti tebaek.
ACT 7:16 Nunisa yabo nubunang teplameka Sikhem poa pina sikil palamsiek. Sikil palamsiekag samen Abrahamdi kamna kapto Hemor elmabo saeag agha kal ma'al kirik wana solomneap ag agha toboghag aneko Sikhem mog so'oag kirik arameag sikil palamsiek,” aro Stefanusti ambatsiog.
ACT 7:17 Stefanusti nen tipto ambarelamsiogti, “Allahri Abrahamag salag lebogne neneko, Israel nimi Mesir wamekne maikno tangto palamogpa, Allahri salag lebogne sunsunum uro pinepne peram talamog.
ACT 7:18 Peram talamogpa, Mesir nimi yubu sia leropne Yusupti uaogne ekonne nhon mog so'o Mesir saelbamsinepne waelbaog.
ACT 7:19 Waelbaogne ponekori nunisa yaboag orolenange lero unulamsiogti, 'Maikno taikag,' aro sin aruklamsiogti, 'A'undi mabo maghag tobogsiro sin ohiro ulamlulom,' aro aruklamsiog.
ACT 7:20 Undo unulamog li eneag Musa mangaptaogpa, Allahri Musa sembe 'Wali,' senelamog. Ili ilindi aeag wal wilindi tognoro mo'oro piamdek.
ACT 7:21 Wal wilindi taogpa, mag abolag pabiogti, pibog. Pibogpa, Firaun elmangkeldi me aneko ibogti, tobogti, eltangkeldi me saog uro mo'ol tolamog.
ACT 7:22 Musa neneko Mesir nimiri nia mangkina uropne ambarelamekpa, sindi uropne leropne el talamogti, wana heklamsiog. Musa nenekori yubu lenne babe, nia ua unne babe mikip uro ulamsiog.
ACT 7:23 El mangkaekne heng tai buka tau buka ulamogha teng nhon epto naual bare wamogpa, 'Nangkabo Israel nimi kemel phinun,' aro wanaag seneraghog.
ACT 7:24 Kemel phinun,' aro palamoghag agha Mesirne nhondi elkae Israelne nhon tam oroghag agha olamogha ibog. Ibogti, Musari elkae pelepto elkae Israelne ponekoag sip taogti, Mesirne poneko ya'ag obog.
ACT 7:25 Musa eldamne wanaag agha seneragamognena, 'Nangkabo Israel nimiri na sembe wali sembaukang. “Mesir nimiri Israel nimi olamsiangba, Allahri, 'Taulbahilulam,' aro poglange Musa ane,” sembaukang,' sembaog aghana, el sembe undo seneraglamek kom.
ACT 7:26 Mabogha kwelekaogpa, lukunap Israelnang phende talamdeka kembahiogti, 'Nari ma'abahinun,' aro piog. Sinag piogti, 'Nangkabo, a'unna sa'ambe ol talamdom? A'unna eldo ilipsae saog uro wamdom kom te?' seog.
ACT 7:27 Seogpa, talamdekti, elkae obogne ponekori Musa wepto pil piogti, yubu lelamogti, 'Etneri, “Nu saelbamsulul,” aro etneri towalengkakeo? Etneri, “tam kareplamlulam,” seori, etneri towalengkakeo?
ACT 7:28 Ambhum Mesirne obomne neneko saog uro wene na babe omnululam te?' aro haibaog.
ACT 7:29 Wene seogpa, Musa ka'ebaogti, log lelem laplobi agha mog so'o Midian piogti, nimi sekelingkiropne saog uro wamog. Aneko pina wamogti, me nengabo me phende mangkahiog.
ACT 7:30 “Mog so'o Midian wamogpa, hengkun tai buka tau buka ulamogha teng nhon epto naual bare taogpa, ik nhon sum Musa poneko Yim Sinai tamag yabalamogti, pai aldes saog urobag wamog. Yim Sinai tamag yabalamogti, kemelamogpa, Allahri El arukna malaikat poghogne yingkina kal werengkel alog saog kal anekoag auk pog tag-tag alamog.
ACT 7:31 Musari ibogti, 'Map, maneagha ulamla. Kembanun,' sembaogti, peramag piog. Peramag piogti, 'Kembanun,' aro ulamoghag agha Nuni Allah yubu lilim ka'ebaog.
ACT 7:32 Allahri Musaag yubu lelamogti, 'Na Allah, anisang yabori Allah omeklamekne Wamna. Abrahamap, Ishakap, Yakubapti omeklamekne Allah sikini Na wamna,' seogpa, Musa log lelem pet-pet alamogti, whing ebom agha kal werengkel alog kalag auk pog tag-tag alamogha anekoag tibog anep kom wamog.
ACT 7:33 Unuaogpa Nuni Allahri nen yubu lelamogti, 'Na whingag ane memag sekamlam. Memag sekamlam ane sembe yan wangana tobongkamlama ane olobalulam,' seog.
ACT 7:34 'Na Namabo Israel nimi mog so'o Mesir wamangne tiplengelamsinba, whin maikno seklelamangti, “Yaghe” alamangne Na ka'eamna. Na kulukulanne “Sin haing sae lopsinun,” aro kulukulan. Wene Nari an pogkeneba, samoro Mesir pululam,' seog.
ACT 7:35 Samenag Israel nimiri Musa sembe 'Nu karong,' aro wa'epto tobogaekne neneko, 'Etneri, “Nu saelbamsulul,” aro etneri towalengkakeo? Etneri, “Tam kareplamlulam,” seori, etneri towalengkakeo?' seek. Wene seek aghana Allahri El arukna malaikat poglamogti, 'Musaag pimendi, Nari yubu elag tiplulam,' aro poghogpa, Allah arukna malaikat neneko werengkel auk pog tag-tag alamoghag aneko lag taogti, 'Israel nimi saelbamsimendi, haing sae lopsululam' aro Musa poghog.
ACT 7:36 Musari ulamognena 'Yaghe, Allahri el pere agha ual,' senenne kekneba nimiri uanep komne Allah Eldamneri uanepne ulamog. Mesira, mag longorop mag Uwong Mag Sin agha, pai aldes saog urobag aneko babe ulamogpa, heng kun tai buka tau buka ulamogha teng nhon epto naual bare taog.
ACT 7:37 Musa nenekori Israel nimiag yubu lelamogti, 'Nimi nhon na saog uro Allahri yubu silimu tiplamlulne a'un Israel nimi anabiag agha Allahri sekitlul,' seog.
ACT 7:38 Wene seogti, Musa nenekoap nu Israel nimi nunisag yaboap pai aldes saog urobag nhon wamekpa, nunisag yabo poloro winilamekne yim tamag laplobi agha Musa Sinai Yimag waelbaog. Sinai Yimag waelbaogpa, Musa pere agha Allahri El arukna malaikat poghogne nenekori, “Yubu ambatsinne sunsunum uro unulapmundi, Allahap ma'aptangto kamag wamnep,” aro yubu ambarogpa, Musa nenekori nunisag yabo nen tipto ambarelamsiog.
ACT 7:39 Ambarogne ambatsiog aghana, nunisa yabo eldi lebogne sare nelebaek komdi, wanaag agha 'Karong' aro 'Mesir samoro pukap,' sembaek.
ACT 7:40 Wene senelamekti, Harunag yubu lelamekti, '”Musari nu saelbamsioba, Mesira lambabo aghana wela uaori, tala pio,” senelamap. Ane sembe an Harundi saeri sumbatsululama, Nuri phalamsibenge samenag menangal palamikti, nu yeplamsukanga saeri sumbatsululam,' alamek.
ACT 7:41 Wene alamekti, pham sapi me saog uro sunumna Harunapti sumbaekti, 'Nuni nundam nimiri sumbaba aneri nu piamsilul,' aro awi uro seplamekti, sani yoro telamek. Sani yoro telamekti, sumbaek mema anekoag pham oro aukag taro phalamek.
ACT 7:42 Undo mema phalamekpa, Allahri sinag wail ibatsiogti, lipsiogti, 'Sinba, tibin nenenne imag wareropneag phalamik,' aro lipsiog. Imag wareropneag phalamekne sembe babe, Allahri sin wail ibatsiogne sembe babe, Allahri yubu silimu tiptop nimiri mome tobognena: 'A'un Israel nimi hengkun teng nhon epto naual bare pai aldes saog urobag wamlumdi, “Allahag pham oro aukag taro Allah sembe tarelamap,” senelamlum.
ACT 7:43 “Allah sembe tarelamap,” senelamlum, aghana “Mema si Molokh omeklamukap,” aro mema pia urop ae kalun ae kwerekto poa pang-yang ulamlum. Apna “Mema Refan omeklamukap,” aro el kekneba imbrea saogne nimi saeri sunuropne babe poa pang-yang ulamlum. Ane sembe nari popsineri, toboghol pihinebag Babel kauro nimi saeag nenel phinun,' aro mome tobog,” aro Stefanusti ambatsiog.
ACT 7:44 Stefanusti nen tipto ambarelamsiogti, “Nunisag yabori anam mema Refanap Molokhap poa pang-yang ulamek komag agha, Mesira lambaekti, pai aldes saog urobag wamek. Wamekpa, Allahri Musaag ambarelamogti, '”A'un nusamag wamneri, piamsineba, omeklamnululom,” aro Allah omektop ae kalun ae nhon sobalulom. Sunumna ambatkenba, kembalam saog uro sunsunum uro sobalulom,' aro Allahri ambarogne sunsunum uro nunisa yabori pai aldesag saog urobag sobaekti, kwerekto poa kwaneng ero pang-yang ulamek. Israel nimiri Allah omektop ae kalun ae eneko kembiag agha, “Allahri Israel nimiap ma'al tanan yubu Musaag ambarogne saekag pibubu mome tobogne kalun ae eneag piameberi, Allahag 'Sikne' aro seneraglameberi, ulamebeba, piamsilul,” aro el taek. Allah omektop ae kalun ae eneko sobaekti, kwerekto poa kwaneng ero pang-yang ulamek. Israel nimi salehiropne Musa tebanep liag, Yosua Musa lunuro waelbaog. Yosuari saelbamsiog li eneko mog so'o wene wamabag payaekpa, mog so'o eneko nimi Allahri talup lambahiogpa, nunisa yabo lelnero wa'iek. Lelnero wa'iekti, sisa nhondi nhon, nhondi nhon pogto mog so'o tobekti, wamek paghabog Daud waelbaog.
ACT 7:46 Nunisa Daud poneko sembe Allahri sembaogne ane, “El wana lag phoropne,” aro awi sembaog. Daudti Allahag mololamogti, 'Ae nhon Yakubti omeklangkeogne poneko ua unag sembe sobaghenun,' aro molbaog.
ACT 7:47 Molbaogpa Allahrina, 'Molbanelam aghana andi sobalulam kom. Anme Salomori Nari ae sobalul,' seogpa, sobaog.
ACT 7:48 Sobaog aghana, nimiri saeag agha 'Allah tane wamlul,' aro sorop ae enekoag aghabog Mikip Phelektopne Imag wamlange wamnep kom. Samenag babe Allah Eldamneri yubu silimu tiptopneag ambarogpa, ambarogne sunsunum uro mome tobogne ane:
ACT 7:49 Nuni Allahri lelamognena, 'Na pukamneri, nimi ni saelbahinuna sunsunumag aneko im tiwalengka ulamlomne saog wamla. Imag pukamnari, Na yan pelengka unag aneko sao mog so'o ni wamla. Na ua ulamnaba, imap so'oap to'op tal ane sembe, a'undi, “'Allah wamlulaag,' aro ae soro pibukap,” sembamunne, welaro ae sobalulom? “Allah tane wamnebag,” sunsunum urobag tala wamlul sembamlom?
ACT 7:50 Na nadamne saeri nia sumbahi,' aro Allahri Eldi yubu silimu tiptopne pere agha ambatsiog,” Stefanusti wene aro ambatsiog.
ACT 7:51 Wene seogti, Stefanusti eldamne yubu agha nen tipto tam kareptopnangag ambarelamsiogti, “A'un usog mikip nimi. A'undi nengabo kon kareptop nimi aghana Allahri, “Ma'ap taukap,” aro lebogne ingkisaplamlom. Allahri samenag, “'Na Allahri Israel nimiap ma'ap tabunge ekon taikag,' aro nengabo kon kareplamlulom,” aro lebogne a'ori ka'ebalum aghana wanaag seneraglamlom komdi ekon talamlom. A'undi Allah Eldamne Yame Walinge sop wailag nenero wa'eplamlom. Nu Israel nimi nunisa yabori ulamek saog uro wene a'undi babe ulamlom.
ACT 7:52 Nunisa yabori Allahri yubu silimu tiptop nimi ni mali-malia nenero 'Seklebaik,' aro ulamsiek. Unulamsiekti, nimi sikne yanepne sembe ambarelamsiekne ya'ag olamsiek. Samen abonogho wene a'undi babe nimi sikne yaonge eldamne Yesusag wabe kolaglo saog uaomdi, obom.
ACT 7:53 Allahri el arukna malaikat pogsiogpa, nunisa Musaag yubu ambarekpa, el pere agha Allahri lebogne, 'Undo ulamlulom,' aro arukahiogne ka'ebaom aghana yubu arukto ambatsiogne ingisaplamlom.
ACT 7:54 Stefanusti wene aro ambatsiogpa, nimi nubunang wamek nang tanekori ka'ebaekti, wanaag yo maikno walelamsiogpa, si keleng tebongkia yo uro seneraglamek.
ACT 7:55 Wanaag yo uro seneraglamekpa, Allah Eldamne Yame Walingeri seneragna sunsunum uro Stefanusti wanaag seneraglamogti, imag tiwalengelamogpa, Allah ua urobag Allah warero libango aropne sae sirik sip, nimi nubunge sunsunum urobag sip Yesus sekamogha tiwalengkaog.
ACT 7:56 Tiwalengkaogti, “Nangkabo, im phoamlaba, El nimi so'oagne taogne neneko Allah sae sirikneag sekamlaba tiwalengkan,' seog.
ACT 7:57 Wene alamog abeneko sin ao leptangom agha sin yo lelem yanghang alamekti, Stefanusag merero niri saelbaek.
ACT 7:58 Niri saelbaekti, kiliro asag agha pabiekti, paiag simbik toboghol piekti, kirikti olamek. Kirikti olameka ipsiek nimiri, “Nu babe ag pibeberi, Stefanus kirikti ol pukap,” aro nongag enektop ag kwiriplamek. Ag kwiriplamekti, kabuni me nhon sina Saulusti yan umag, “Piamsululam,” aro pibek.
ACT 7:59 Stefanus kirikti olamek abeneko Stefanusti Yesusag yoplamogti, “Yesus Nia Mangkina Saelbamsilamne, nari yame anag yale tanena, 'Nanap wamnunam,' sululam!” aro mololamog.
ACT 7:60 Mololamogti, yabu sanukto pulingkiogti, nen yubu mikip uro mololamogti, “Yesus Nia Mangkina Salehiropne, 'Sindi undo malia ulamangba,' aro wailag nembamendi, lumbaheng kom!” seogti, tebaog.
ACT 8:1 Stefanus obekpa, tebaogne sembe Saulus awi sembaog. Awi sembaog aghana yog nimi Allah yubu ka'elamekti, ulamek nimi taneko wamekti, Stefanus obeka aneko keyapto so'oag sikekti, o'ona lelem engero wamek. Stefanus obek sum eneko Stefanus obek nimiri “Seklebaik” aro alnibaekti, Yesusag “Sikne” aro seneragtop nimi taneko maiknoro malia ulamsiek. Malia ulamsiekpa, Yesusag seneragtop nimi as Yerusalem laplobiagha mog so'o Yudeaap Samariaap tala-tala nimi wamekag piekti, a'ero-a'ero wamek. Yesusti wepto pogsiognang a'o bare abenekoog Yerusalem wamek.
ACT 8:3 Yerusalem wamekpa, Saulusti “Yesusag 'Sikne' aro seneragtop nimi opsunun,” aro ae taneko sen-senna elamsiog. Ae taneko sen-senna elamsiogti, kabuni kelabo aeag agha kiliro-kiliro kop aeag tobonglamsiog.
ACT 8:4 Yesusag “Sikne” aro seneragtop nimi kop aeag tobonglamsiekpa, “Nu Yesusag seneragtop nimi opsiikag,” aro as Yerusalema lambaekti, piekag anekoa nimi tala-tala nimiag yubu walinge Yesus sembe ambarelamsiek.
ACT 8:5 Ambarelamsiekti, Yerusalema lambaekne nhon Filipus neneko babe mog so'o Samaria as nubunge nhon wamogne nenekoag piog. Nubu as nenekoag piogti, Allahri “Taulbahimendi, saelbamsululam,” aro wepto poghol aogne Yesus sembe mog so'o Samaria nimiag ambarelamsiog.
ACT 8:6 Yubu ambarelamsiogti, Filipusti nimi whingag ulamognena, “Allah Eldamne mikipneri el pere agha ulamla” senenne kekneba ulamog. Phia nimi kulomag ulamsiogne yag lanalamsiogpa, haum alamekti lanalamek. Nimi yan malinge babe, nimi lebe arop kom nimi babe Filipusti wali nenelamsiog. Undo unulamogne kembiagha Samaria nimiri sol wali,wali uro ma'aptangto ambarelamsiogne ka'elamek.
ACT 8:8 Filipusti nimi maikno wali nenelamsiogti, yubu walinge Yesus sembe ambarelamsiogpa, nimi as eneko wamek nimiri awi maikno senelamek.
ACT 8:9 As eneko nimi nhon sina Simon mema mili lero phalamogne wamog. Samenag agha as enekoag mema phalamogne wamogpa, as enekoag wamek nimi niri, “Yaghe, mane agha ual,” senelamek. Undo senelamekpa, Simon ponekori, “Na maneagne pone nubunge wamna,” aro ambarelamsiogti, mema mili lero phalamog. Phalamogha sembe Samaria nimi ologne nubunge ni tanekori seneraglameknena, “Allah Eldamne mikipne Simon pone kulomag piamlaba, Simon pone 'Mikip Sirikne',” aro si lelamek. Simondi samenag agha heng kun taibuka taubuka ulamogha mema ulamogne kembiag agha Samaria nimi niri, “Yaghe, mane agha ulamla,” senelamek. “Mane agha ulamla” senena ulamogne sembe eldi yubu ka'elamekti, sindi babe ulamek.
ACT 8:12 Simondi yubu ka'elamek aghana Filipus mog so'o Samaria yaogti, yubu walinge Yesus sembe ambarelamsiogti, “Allahri 'Mog so'oag nimi taulbahimendi, saelbamsululam,' aro wepto poghol aogne si Yesus wamla. Mog so'oag nimiri Yesusag 'Sikne' aro seneraghikpa, Elag seneragtop nimi Allahri saelbamsilul,” aro Filipusti ambarelamsiog. Ambarelamsiogpa, Simondi yubu samen ka'elamek nimi mog so'o Samaria wamek nimi taneko Filipusti ambarelamsiogne ka'elamekti, “Sik uro ambarelamsil” aro seneraglamek. Nengabo kelabo Samaria wamek nimi “Sik” aro seneraglamekti, “Filipusti ambarelamsilne saelbamukap,” aro elag yalamekpa, maghag pelengelamsiog.
ACT 8:13 Simon poneko babe, “Yesus sembe ambarelamsilne sik,” aro seneraglamogpa, Filipusti maghag pelengkaog. Simon babe Filipus nelepto elap pang-yang ulamdek. Pang-yang ulamdekpa, Filipusti nimiri uanep komne, Allah Eldamneri uanepne, “Allah Eldamne mikipneri el pere agha ulamla” senenne kekneba mikip uro ulamogpa, Simondi, “Yaghe, mane agha ulamla,” alamog.
ACT 8:14 Yesusti wepto pogsiognang as Yerusalema ka'elamekpa, “Mog so'o Samaria wamang nimiri Allah yubu ka'elamangdi, Yesusag 'Sikne' aro seneraglamang,” ana ka'ebaekti, Petrusap, Yohanesap wepto pogsiek.
ACT 8:15 Petrusap Yohanesap anam yan komag agha, Filipusti ambarelamsiogti, “Si Yesus engeropneag 'Sikne' aro seneragmunba, Yesusti saelbamsilul,” aro Samaria nimi maghag pelengkipsiog. Maghag pelengkipsiog aghana Allah Eldamne Yame Walinge Samaria nimi nhonag babe pelengel aog kom. Ane sembe Petrusap, Yohanesap pogsiekpa, Samaria pirekti, Samaria nimi usoghag sae saelbamsirekti, Allahag mololamdekti, “Andamne Yame Walinge sin Samaria nimi taneag tatsululam,” aro molona molbarek. Wene aro molbarekpa, Allahri Eldamne Yame Walinge sin nongag palilamsiog.
ACT 8:18 Yesusti wepto pogsiognangdi nimi usoghag sae pipsiekpa, Allahri Eldamne Yame Walinge sin nongag palilamsiogpa, Simon ponekori kembahiog. Kembahiogti Yesusti wepto pogsiognangag kal ma'al payaogti, Simon ponekori yubu lelamogti, “A'undi nimi usoghag sae palilamsiromba, Allahri Eldamne Yame Walinge nimi tane nongag palilamsil. A'undi ulamdomne saog uro nari babe uanun. Kal ma'al ane tatsineba, mikipne ane tatnurumunba, nimi usoghag nari sae palilamsineba, Allahri Eldamne Yame Walinge nimi nongag palilamsilul,” seog.
ACT 8:20 Wene seogpa Petrusti, “Allahri, 'Mo tatsinun,' senelamlange nene andina 'Kamna kal ma'alag kapto tomnep,' senelamlam, te? Senelamlamne ane sembe anap anenge kal ma'al eneap tebalulam!
ACT 8:21 Andi wanaag Allahri seneragna sunsunum uro seneraglamlam kom. Ane sembe nuri sae nimi usoghag palilamsiapne, olog babe tam andinge tanep kom.
ACT 8:22 Allahri anap, andinge kal ma'alap kom nembaghenep ane sembe, malia ualamne nene wali uro seneragmendi lipsululam. Lipsimendi, 'Malia uanne tam orog nembalulam,' aro Nuni Allahag mololapmenba, 'Malia wanaag seneraglamlamne nene Allahri tam orog nembalul to, kom to?' aro mololame.
ACT 8:23 Andi wanaag seneraglamlamne sembe na el tan. Andi wanaag yonge meso pungkulamlaba, andi mali-malia ulamlamneri wana sao kauplangkelba, ulamlam,” seog.
ACT 8:24 Wene seogpa Simondi sin phendeag yubu lelamogti, “A'undi leptomne nanag taleagti, a'undi na sembe yepto A'uni Allahag molbarurom,” seog.
ACT 8:25 Seogpa, wameka, Petrusap Yohanesapti, “Allahri nimi el uro ua unne kekneba Yesus sembe maikno ulamogpa, ibubu,” aro Nuni Allah yubu ambarelamsirekti, as Yerusalem samoro yalamdek. Yalamdekti mog so'o Samaria as maikno wa'iro yubu walinge Yesus sembe ambare-ambare Yerusalem yarek.
ACT 8:26 Petrusap Yohanesap as Yerusalem yarekti, wamdekpa, sikinkae Filipus Samaria mog so'oag wamog. Wamogpa, Nuni Allahri Eldamneri arukna malaikat nhon poghol aogne Filipus Samaria mog so'oag wamoghag piog. Piogti, Filipusag yubu lelamogti, “Sekmendi, Yerusalem simbik pimendi, ina as Yerusalema as Gaza kuluptop ina waghag pululam. As Yerusalem anabi as Gaza anabiag ina pai aldes saoghag wamlange nene toman pululam,” seog.
ACT 8:27 Wene seogpa Filipus sekom agha piog. Piogti tilamogpa, Etiopiange nhon nimi nubunge yalamog. Mog so'o Etiopia nimi yubu sia lerop kel si Kandake arukna wamogti, Kandake kel eneringe sae agha piamogne yalamog. El neneko as Yerusalem Allah omekel piogti, samoro yalamog.
ACT 8:28 Samoro yalamogti, kereta alibag pukamogpa, pham kudari kiliro payalamog. Kereta alibag pukamogti, mome Yesaya Allahri yubu silimu tiptopneri mome tobogne Etiopiangeri eldi saeag saelbamogti, keme-keme yalamog.
ACT 8:29 Keme-keme yalamogpa, Allah Yame Walinge nenekori Filipusag, “Elem-elem pimendi, pham kudari kereta kiliro payalamla peramag ane pululam,” seog.
ACT 8:30 Wene seogpa, Filipus elem-elem kereta yalamogha peramag piogti, ka'elamogpa Allahri yubu silimu tiptopne Yesayari mome toro pibogne Etopiangeri kemero lelamogha Filipusti ka'ebaog. Ka'ebaogti, “Nani, yubu leple yalamlam yubu ene wanaag olog el talam te?” aro haibaog.
ACT 8:31 Haibaogpa nimi nubunge ponekori, “Nimi amoro el nenehin nang orog wamnaba, welaro el tanep?” seog. Wene seogti Filipusag, “Walel amenba, nhon pununam,” aro molbaogpa, Filipus neneko kereta alibag waelbaogti, Etopiange peramag pulingkiog.
ACT 8:32 Yesayari mome toro pibogne leple yalamogne lilimna ane: “'Pham domba obukap,' aro pabirop saog uro El babe pabiek. Nimiri pham domba hong kareplamangba, pham domba yubu lemna kom ua urop saog uro, El babe yubu koma wamogpa obek.
ACT 8:33 El nimiri ali nenero yubu lero loloroba lelamekpa, tam Elag taog. Elag tam pibekne wali uro kemban koma El ya'ag obekpa, tebaog. Tebaogne sembe, Nimi nhondi babe 'Eldi mabo tane wamang,' aro lemnep kom,” aro mome toroba leple yalamog.
ACT 8:34 Etiopiange ponekori Filipusag hailamogti, “Nari anag hailangkenne, Allahri yubu silimu tiplamogne poneri etne sembe mome toro pibogti lebog? Eldamne sembero, nimi orange sembero?” seog.
ACT 8:35 Wene aro haibaogpa, Filipusti leple yalamogne neneko Yesayari mome toro pibog yubu aneko sirik kiliro yubu walinge Yesus sembe tibin nenero ambare-ambare palamog.
ACT 8:36 Wene aro ambare-ambare palamogpa, inaag mag sinag wamoghag pirekti, nimi nubunge Etiopiange ponekori Filipusag, “Ane mag wamla ane. Tibogae. Tam olog wamla, te? Na andi maghag pelengkanei,” seog.
ACT 8:37 Wene seogpa Filipusti, “Andi Yesusag 'Sikne' aro wanaag seneraglamlam tanena, maghag pelengkaghenun,” seog. Wene seogpa Etiopiange ponekori, “Seneraglamnange, 'Allahri, “Mog so'oag nimi taulbahimendi, saelbamsululam,” aro Elme Yesus wepto poghog' aro sik uro seneraglamna,” seog.
ACT 8:38 Etiopiange poneko eldi arukna kereta pham kudari kiliro payalamogne ponekoag “Babitlulam,” seogpa, babogpa, “An ane wamlulam,” seog. Seogti sin mag sinag nhon yingkirekti, Filipusti Etiopiange poneko mag sinag pelengkibog.
ACT 8:39 Maghag pelengkibogpa, walel alamoghag agha Nuni Allah Yame Walingeri Filipus poa piogpa, Etiopiange ponekori Filipus ibog kom. Ibog komdi Etiopiange poneko awi yeng sene-sene elengeag sip palamog.
ACT 8:40 Allahri Filipus pabiogpa, as Asdod yaog. As enekoag agha, “Yesus sembe ambarelamsinun,” aro as Kaisarea anabi Asdod anabiag as ni wamekne yubu walinge ambare-ambare palamsiogti, Kaisarea piog.
ACT 9:1 Filipusti Yesus yubu walinge ambare-ambare palamsiog abeneko, Nia Mangkina Salehiropne Yesus yubu ka'ero ulamek nimi sembe Saulus nenekori karongdi, yo senelamog. “Ya'ag olamsinun,” aro yo senelamogti, Saulus nenekori memne Allah sembe pairopnang sikini nubungeag piogti,
ACT 9:2 “Na mome toatnemenba, na as Damsyik Yahudi nimiri Allah yubu lerop ae sale-sale pilamang nimiag tatsinun. Tatsineri, as Damsyik nimi anabiag agha Yesusti Ina pa'abaog Ina nelepto palamang nimi ipsine tanena haing kaupto saelbahineri, as Yerusalem payahinun,” aro Saulusti molbaog.
ACT 9:3 Mome molbaogpa, memne Allah sembe pairopnang sikini nubungeri el saeag mome tarogpa, Saulus as Damsyik inaag palamog. As Damsyik peramag palamogpa, imag agha libango aropne haing omomne elag warelobog.
ACT 9:4 Imag agha libango aropne haing omomne warelobogpa, so'oag malingkiogti ka'elamogpa, “Saulus! Saulus! Sa'a sembe 'Seklebale' aro ulamnelam?” seog.
ACT 9:5 Wene seogpa Saulusti, “Nani, anna etne?” seog. “Etne,” seogpa, nen lebog yubu enekori, “Na Yesus, andi 'Seklebale,' aro ulamnelamne ponekori lelamna.
ACT 9:6 Andi Na malia ulamnelam aghana, wenena sekmendi, as Damsyik pululam. Pimendi wapmenba, andi ulamlulamne nimiri ambatkukang,” seog.
ACT 9:7 Wene aro ambarelamogpa, Saulusap nhon palamek nimi taneko el peramag sekamekti, sindi babe yubu ka'ebaek. Yubu ka'ebaek aghana, nimi nong ibek komdi lo'om paibon seekti, yubu kom taek.
ACT 9:8 Yubu kom taekti wamekpa, Saulus neneko pulingkina sekogti, “Haing kwelekanun,” aro ulamoghag agha, haing kwelekna eraruk taogti, ya'ag taog. Haing aneko ya'ag ubaogpa, nimiri sae salero as Damsyik pabiek.
ACT 9:9 As Damsyik pabiekpa, ik wilindi haing uroba wamogti, kwaneng mag tero koma wamog.
ACT 9:10 As Damsyik Yesus yubu ka'ero ulamogne nhon si Ananias wamog. Wamogti haing uamna kwelekamna senenag agha kemelamogpa, Nia Mangkina Salehiropne Yesusti, “Ananias,” aro yoplamogha ka'ebaogti, “Nia Mangkina Salehiropne, na ane wamna,” seog.
ACT 9:11 Ananiasti, “Na wamna,” seogpa, Nia Mangkina Salehiropne Yesusti, “Tarsusne nhon si Saulusti haing uamna kwelekamna senenag agha amik uro yabinepne kembal. Kembalnena, nimi nhon si Ananias Saulus wamlaag wa'ildi, sae usoghag palilamlaba, haing ubaonge kwelekal. Haing uamna kwelekamna senenag agha kembaldi, wene Nanag mololamnel. Ane sembe, sekmendi ina piroba si Ina Peket pululam. Pimendi, Yudasti ae anekoag agha, 'Tarsusne si Saulus engeropne tala wamla,' aro nimi wamangneag haibahilulam,” seog.
ACT 9:13 Yesusti wene seogpa, Ananiasti, “Nia Mangkina Salehiropne, nimi ene sembe nimi maiknori yubu lelamangba ka'elamna. 'An Yesusag “Sikne” aro seneragtop nimi wepsilumne as Yerusalem wamangne Saulusti, “Seklebaik” aro olamsil,' alamangba ka'elamna.
ACT 9:14 Wene ane yingkina wamlangena, 'Nimi Yesusag “Sikne” aro seneragtop nimi sae kaupto saelbamsilul,' aro Yahudi nimi sembe memnang Allah sembe pairopnang sikindo yabori Saulusag yubu pibong. 'El nuri sae wamlari, undo unualul,' aro yubu pibongba, wene tane yaori wamla,” aro Ananiasti wene seog.
ACT 9:15 Ananiasti wene seogpa, Nia Mangkina Salehiropne Yesusti, “Pimenag anekoa, el Saulusna, 'Nari yubu nimi tala-tala wamangne ambatsulul,' aro webamnange wamla. Webamnangena, 'Nimi sisa Yahudi nimi komneap, mog so'o saelba urop nimi nubunangap, nimi sisa Yahudi nimi Israel nimi babe pileri, Na Yesus sembe yubu walinge sinag ambatsulul,' aro webamna,” aro Yesusti wene seog.
ACT 9:16 Seogti, nen tipto ambarelamogti, “Nari el ambatnunnena, Na yubu nimiag ambarelamsilenge sembe seklena seklelamlul. 'Na Yesus si nubu talul,' aro Saulus maiknoro seklelamlulne sembe elag ambatnun,” seog.
ACT 9:17 Wene seogpa, Ananias piogti, ae enekoag wa'al piog. Wa'al piogti Saulus usoghag sae palilamogti, “Saulus nangkae, Nia Mangkina Saelbamsilne Yesus, an inaag yalamomba, lag taonge ponekori nanag yubu ambatnel. Ambarelamneldi, 'Saulusag pimenba, an sae pere agha Saulusti haing kwelekaleba, Allah Eldamne Yame Walinge el kulomag teknero wa'ileri, mikip nembalul,' aro anag pognelba, yan,” seog.
ACT 9:18 Wene seog abeneko pere haing sikna lilbamlo agha eldi haingag agha seknagha timbaogpa, haing kwelekaog. Haing kwelekaogti, tibanep saog wamogpa, Ananiasti maghag pelengkaog.
ACT 9:19 Maghag pelengkaogpa, kwaneng teogti, nong mikip taogpa, wamog. Saulus poneko mikip taogti, Yesus yubu ka'ero ulamek nimiap ik etbare Damsyik wamog.
ACT 9:20 Wamogti, ta'ap sen koma Saulus nenekori Yahudi nimiri Allah yubu lerop aeag winil talamekag wa'ilamogti, “Yesus neneko Allah Elme,” aro lag phoro nimi ambarelamsiog.
ACT 9:21 Saulusti ambarelamsiogne sembe “Map, yaghe! Nimi eneko kom, te?” alamekti, “Saulus kom te! Eldi samenag, 'Yesusag “Sikne” aro seneragtop nimi Yerusalem wamangne orog nembahinun,' aro maiknoro olamsiori, wene babe tane yao. Tane yaongena, 'Yesusag sikne aro seneragtop nimi Damsyik wamangne babe oro saelbahineri, haing sae kaupto memnang Allah sembe pairopnang sikindo yaboag pabihinun,' aro yingkilamla aghari,” alamek.
ACT 9:22 Wene alamek aghana, Allahri Saulus mikip nenelamogpa, Yahudi nimi agha Damsyik wamek nimiag Yesus sembe tibin nenero ambarelamsiog. Ambarelamsiogti, “Yesus neneko Allahri, 'Nimi taulbahimendi, saelbamsululam,' aro wepto poghol aogne wamla,” aro kekneba maikno Yesus sembe tibin nenero ambarelamsiog. “Yesus Allahri wepto poghol aogne” aro ambarelamsiogne sembe nimi nhondi babe, “Orolena ambarelamsil,” senep kom wamog.
ACT 9:23 Wene aro ambarelamsiogti, ik maikno wamogpa, Yahudi nimiri, “Saulus obukap,” aro yubu nikne saekag lelamek.
ACT 9:24 “Obukap,” aro yubu nikne saekag lelamekne Saulus babe ka'ebaog. Yahudi nimiri, “Saulus obukap,” aro sinag kweleknag as leka kanero solingkirobag ina siram wa'albang yang pang uanebag taneko welamek.
ACT 9:25 “Obukap,” aro welameka sembe ik nhon sum ae inipnag Saulus kau saog uro haingdi piri wiroba lomag wa'iog. Lomag wa'iogpa, eldi yubu ka'erop nimiri kau saog uro wiropne nenekoag agha as kanero leka solingkiropne nenekoag Saulus paiag sip pelengkaek.
ACT 9:26 Saulus Yerusalem piogti, “Yesus yubu ka'ero ulamang nimiap ma'aptaukap,” sembaog aghana, Yesus yubu ka'erop nimi tanekori, “Paulus sik uro Yesusag wana seneraglamla kom. Yesus yubu ka'erop komne wamlari, maneri lelamla,” aro el sembe log senelamek.
ACT 9:27 Wene aro log senelamek aghana nimi nhon si Barnabasti, “Saulus yepnun” aro Saulus poa Yesusti wepto pogsiog nimi tanekoag payaog. Payaogti ambarelamsiogti, “Nimi ene 'Damsyik punun,' aro inaag palamoag agha Yesus el whingag lag taori, yubu lebo. Elag yubu leboba, Saulus as Damsyik wamoa Yesus sembe log kom uro Damsyik nimiag ambarelamsio,” seog. Saulus babe Yesusti wepto pogsiog nimi tanekoap nhon wamek. Wamekti, Saulus as Yerusalem nimi wamekne nusamag agha sop-sop pang yang ulamogti, log kom uro “Nia Mangkina Saelbamsilne si Yesusti pognel,” aro ambarelamsiog.
ACT 9:29 As Yerusalem Yahudi nimi wameknena, Yahudi nimiri ul palamekne sunsunum uro saelba ulamekpa, Yahudi nimi agha Yunani nimiri ul palamekne sunsunum uro saelba ulamek nimi babe wamek. Yahudi nimi agha Yunani yubu lelamek nimi tanekoap Saulusap Yesus sembe yubu lel talamek. Yubu lel talameka sembe Yunani yubu lelamek nimi tanekori, “Saulus obukap,” senelamek.
ACT 9:30 “Obukap,” senelameka elkabo Yesusag “Sikne” aro seneragtop nimi el taekti, sindi el poa Kaisarea pabiekti, “Tarsus pululam,” aro poghek.
ACT 9:31 Poghekti wamekpa, Yesusag “Sikne” aro seneragtop nimi mog so'o Yudeaap, Samariaap, Galileaap wamek nimi ni wana aingniro wamek. Nia Mangkina Salehiropne ponekori yubu sunsunum uro ul palamekpa, Allah Eldamne Yame Walingeri sin yeplamsiogpa, sin mikip talamekti, Yesusag “sikne” aro seneragtop nimi maikno talamek.
ACT 9:32 Wamekpa Petrus neneko as kanero wamekne kemero poa palamsiogti, Allahri wepsiog nimi Yesusag “Sikne” aro seneragtop nimi as Lida wamekag piog.
ACT 9:33 As Lida aneko palamogpa, nimi nhon si Eneas nong kikiplobogpa, heng kun tai buka tau buka ulamogha heng kun lin bare aeag taogti malamog.
ACT 9:34 Aeag taogti malamogpa, Petrusti Eneasag yubu lelamogti, “Eneas, nangkae. Allahri, 'Taulbahimendi, saelbamsululam,' aro wepto poghogne Yesus ponekori wali nemban uaghel. Pukmendi ae kolo togtoae,” seog. Wene seog abeneko pere wali taogti, pukogti, sekamog.
ACT 9:35 Wali taogpa, nimi as Lida wamekneap, as Saron wamekneap kembaekti, mali-malia ulamekne libekti, Nia Mangkina Saelbamsilne Yesus agha “Sikne” aro nimi niri seneraglamek.
ACT 9:36 Mog so'o eneag as nhon sina Yope babe wamog. As Yope kelabo nhon sina Tabita Yesus yubu ka'ero ulamog kel nhon wamog. Kel ene Yahudi yubuag sina Tabita, aghana Yunani yubuag sina Dorkas alamek. Eldi wali-walia nimiag ulamogti, nimi sae agha orogne yeplamsiog.
ACT 9:37 Yeplamsiog aghana, nikna niklamogti tebaog. Tebaogpa nimi teptoba aneko mag a'elero ae tika alikinagneag palingkiek.
ACT 9:38 Ae tika alikinagneag palingkiekti ka'elamekpa, “As Lida Yope peramag Petrus neneko yaldi wamla,” ana ka'ebaek. Ka'ebaekti Yesus yubu ka'ero ulamek nimi tanekori nimi phende pogsiekpa, Petrus wamoghag yarekti, “Elem-elem as Yope yalulam,” aro molbarek.
ACT 9:39 Petrus yubu ambattekne ka'ebaogti, elemag sekom agha nelebahiog. Nelebahiogpa, piekti Petrus enero ae tika alikinagneag poa waelbaek. Waelbaekpa yingkina kemelamoghag agha kelabo kaldam kelabo nimi teptoba kanero sekamek. Sekamekti, nongag enektop ag Dorkas kamag wamogti wibatsiog ag toro Petrusag pebarekti engelamek.
ACT 9:40 Engelamekpa Petrusti, “A'un ni lambalulom,” seogti, yabu sanukto pulingkina Allahag molona molbaog. Molbaogti nimi teptoba anekoag kembiagha, “Tabita, puke!” seogpa, haing kwelekaogti, Petrus kembaogti, pukog.
ACT 9:41 Pukogpa, Petrusti kel eneko sae saelbamogti, yepto toro sekirog. Sekirogti Allahri wepsiog nimi Yesusag “Sikne” aro seneragtop nimiap, kaldam kelabo tanekoap yopsiogti, Dorkas kamag taog kel eneko sin saeag tatsiog.
ACT 9:42 Sin saeag tatsiogpa, Dorkas kamag taog yubu eneko as Yope sabo taogpa, nimi maikno tanekori, “Yesus sik uro Nia Mangkina Saelbamsilne,” aro seneraglamek.
ACT 9:43 Petrus neneko as Yope wamogti, nimi nhon si Simon pham sapi kon logto mektopneap ik etbare undo wamdek.
ACT 10:1 As Kaisarea nimi nhon sina Kornelius wamog. Kornelius ponena, Roma nimi yin saleropnang kong-kongne wamek aghana, teng tombare yin saleropnang sembe sikindo wamog. Elap, elkaboap, el umag wamek nimiap sembe “Italia Nimi Yin Saleropnang” aro engelamsiek.
ACT 10:2 Elap eldi aeag wamek nimiap Allah yubu sunsunum uro ulamekti, Allah omeklamek. Eldi nimi sae agha orogne yeplamsiogti, sop-sop Allahag molona mololamog.
ACT 10:3 Ik nhon sum heng taolbaogti, sin tanep peram haing uamna kwelekamna senenag agha tibin uro kemelamogpa, Allahri Eldamneri arukna malaikat nhon poghol aogne yaogti, yubu lelamogti, “Kornelius, nangkae!” seog.
ACT 10:4 “Kornelius, nangkae!” seogpa, Allah arukna malaikat Korneliusti ibogti, logti, “Nani, anna tane sa'a sembe yalamdi,” seog. Wene seogpa, Allah arukna malaikat anekori, “Andi Allahag molona mololamlamne Allahri ka'elamlaba, andi nimi sae agha orogne yeplamsilamne babe Allahri iyangkeldi tiplengkangkel. Ni ulamlamne sembe Allahri kembangkeldi, 'Walia aghabog na sembe ulamla,' senelamla.
ACT 10:5 Wene nimi etbare undo pogsimenba, as Yope piikti, nimi si Simon, si nhon Petrus, pone enel pukang.
ACT 10:6 Simon Petrus poneko elkae Simon pham sapi kon logto mektopne poneri aeag mag longorop mag nubunge laut libunag sorop ae eneag wamla,” seog.
ACT 10:7 Ambarogti, Allah arukna malaikat aneko piogpa, Kornelius poneko arukna phendeap, yin saleropne el yae ua uropne Allah yubu sunsunum uro ulamogneap yopsiog.
ACT 10:8 Yopsiogti, “Allah arukna malaikat yaldi, yubu wene ane ambatnelne sunsunum uro, as Yope Simon si nhon Petrus wamlange enel pululom,” aro pogsiog.
ACT 10:9 Korneliusti pogsiogpa, sin wilindi abeneko as Yope peramag inaag palamek abeneko Petrus ae siro heng ik mol-mol aloghogpa, “Ae imaghag molona molbanun,” aro waelbaog.
ACT 10:10 Waelbaogti Allahag molona mololamoghag agha kwaneng yo uaogpa, “Kwaneng tehene,” sembaog. “Kwaneng tehene,” sembaogpa, kwaneng el sembe togto yoroba ingilamekpa, “Haing uamnaro, kwelekamnaro,” senenag agha kemelamoghag agha kekneba uaog.
ACT 10:11 Kekneba uaogpa, imag sip tiwalengelamoghag agha im phoro ag sangaroba ag ingkisag-ingkisag haing tombare kerekto saog urop ag pelengel alamog.
ACT 10:12 Pelengel alamogpa, lomag tao wamekpa, ipsiog ana lebe aroba yan tombareri yabiropneap, mon magti yabiropneap, winang im toman yabiropneap ipsiog.
ACT 10:13 Pelengel alamog pere ka'elamoghag agha yubu lelamogti, “Petrus pukmendi, lebe aroba tane oro yobamendi telamlulam,” alamog.
ACT 10:14 Wene alamogpa, ka'ebaogti, Petrusti, “Nani, samenag Allahri nunisa Musaag yubu ambarelamogti, 'Lebe aroba undop-undoba saogha a'un Yahudi nimiri oro tululom kom,' aro ambarog. Ane sembe, na ik nhon babe sop undoba saogha telamna komdi, wene babe mali sembandi, tunun kom,” seog.
ACT 10:15 Wene seogpa, yubu kaebaog yubu enekori nen lelamogti, “Allahri yubu, 'Wali nembandina, wene tululam,' sel ane sembe, 'Lebe aroba sop tane mali, nimiri tenep kom,' aro andi sap wene seheng kom,” seog.
ACT 10:16 Ag sangaro kekneba ulamogha ot sumeneko agha ik wilindi elag el nembaogti, imag nen waelbaog.
ACT 10:17 Undo unuaogpa, kembaogne ane sembe Petrusti, “Sa'a sembe ual?” aro seneragto pulamog abeneko, nimi Korneliusti, “As Yope pululom,” aro pogsiog nimi abeneko ae Simondi ae ibekti, ae leka kanero solingkirobag ina siramag sekamek.
ACT 10:18 Ina siramag sekel pina nimi nhon yobekti hailamekti, “Nimi asag nimi nhon sina Simon Petrus ae eneag yingkina ua unne no?” aro haibaek.
ACT 10:19 Wene aro hailamek abeneko pere Petrusag kekneba uaogpa, kembaogne ane sembe “Sa'a sembe ual?” aro seneraglamog. Seneraglamog pere Allah Yame Walingeri Petrusag yubu lelamogti, “Petrus nangkae, an nimi wilindiri an elangkeang.
ACT 10:20 Sekom agha kulukamendi, ta'ap sen koma sinap nhon pululam. Nari arukahinba, sinna yang,” seog.
ACT 10:21 Wene seogpa Petrus kulukaogti, nimi tanekoag yubu lelamogti, “Na a'undi elamnelomne nana ane. Sa'a sembe yalomdi elamnelom?” seog.
ACT 10:22 Wene seogpa sindina, “Nu nuni yin saleropnang teng tombare saelbamsilne sina Korneliusti nu pogsio. Elna Allah omektopne, Allah yubu sunsunum uro walia aghabog uropne wamla. Yahudi nimi niri el sembe 'walinge' sembamang. Allahri Eldamneri arukna malaikat nhon poghol aogne ponekori ambaroa sunsunum uro pogsioba, yabongena an enelaghukap aro yaap. Andi nunap nhon piberi, nuni Koreneliusti aeag wa'iberi, lepmenne nu nuni ka'ebalul,” aro ambarek.
ACT 10:23 Wene aro ambarekpa, Petrusti yubu lelamogti, “Wali, na wamna aeag mabukap,” aro ambatsiogpa, aeag wa'iek. Mabeka lukunap Petrusap el enel pieknangap nhon palamekpa, as Yope nimi Yesusag “Sikne” aro seneragtop nimi babe Petrusap nhon piek.
ACT 10:24 Sin inaag mabekti, palamekpa Kornelius ponekori eldi kelmabo meap, elkaboap, eldo yabo, ilipsabo yopsiogti, Petrus tibogto wamekag as Kaisarea Petrus piog.
ACT 10:25 Tibogto wamekag Petrus piogpa, Kornelius ponekori Petrus yanag amupto malingkina kibog.
ACT 10:26 Kornelius ponekori Petrus yanag amupto malingkina kiplamog aghana, Petrusti sae kiliro toro sekirogti ambarelamogti, “Nangkae sekelingki! Na babe an saog uro nimi agha yan,” seog.
ACT 10:27 Wene seogpa, Petrusap yubu leple aeag wa'alamdekpa, nimi maikno tekne amek.
ACT 10:28 Tekne amekpa, kembahiogti, Petrusti yubu ambarelamsiogti, “Nangkabo a'un el wamlom, na Yahudinge wamna aghana Yahudi nimi nubunangdi, 'Yahudi sisa kom nimiap hale nenep tangto, nimi pali nenep tangkamseng kom,' aro ambarelamsiek. Aghana Allahri seneropne na whingag lag taongena, Allahri seneropne, 'Nanag yaukang,' senelamlange nimi etneri karebanep kom,” seog.
ACT 10:29 “Ane sembe Nai andi moloro 'Yalulam,' seomba, na kom sen koma yan. Nai andi 'Yalulam,' seomne sa'a sembe?” seog.
ACT 10:30 Petrusti wene seogpa Korneliusti, “Ne sum eneko heng taolbaori, sin tanep peram, wene saog, na aeag agha Allahag molona mololamno. Mololamnori kemelamnoag agha kabuni nhon ag heng-henga tingiropne enekamori, na whingag sekamo.
ACT 10:31 Sekamori nanag yubu lelamori, 'Kornelius, andi nimi saeag agha orogne yeplamsilamdi, molona mololamlamne Allahri ka'elamlari, wamla.
ACT 10:32 Ane sembe nimi arukahimenba, Yope piikti, nimi si Simon Petrus enel pukang. El wamla aena pham sapi kon logtoba mektopne poneko sina Simondi aeag mag longorop mag libunag wamla,' aro Allah arukna malaikatti ambatneo.
ACT 10:33 Ane sembe nari elemag nimi pogsinoba, nai an tol pikeongba, an wana waliapti, an nanag yalam. Wene wali yalamba, nu babe Allah whingag longoro wamapti, Nuni Allahri 'Yubu ambatsululam,' aro pogkeonge nu babe ka'ebaukapti, nu babe lelero ambatsi,” aro Korneliusti Petrusag molbaog.
ACT 10:34 Wene seogpa Petrus nenekori, “Allahrina 'Nimi ane Yahudi sisa nimi to, kom to,' semban koma nimi ni sembe o'ona sembamsildi wamlange, sumeneog el tandi, sik semban.
ACT 10:35 Nimi ni sikininge as mog so'o a'ero-a'ero urop nimi Yahudi nimi sisa kom nimi aghana, Allah yubu sunsunum uro walia ulamnari wamnaba, Allahri o'ona sembamsildi wamla,” seog.
ACT 10:36 Petrusti nen tipto ambarelamsiogti, “Nangkabo, Yesus Nia Mangkina Saelbamsilne nu Israel nimiap nhon palamububa, Allahri el pere agha yubu ambarelamsiogpa, elag uro yabiogne sembe a'un ni el wamlom. Yubu walinge ambatsiognena, Allahri 'Nanap nimiap ma'ap taukap,' aro Yesus wepto poghog. Wepto poghogpa, Yohanesti 'Allahri, “Saelbamsululam,” aro wepto poghogne yan ual, ane sembe mali-malia ulamlomne lipsimundi, Allahag samoro yalulom,' aro nimi maghag pelengelamsiog. Yohanes ponekori, 'Allahri wepto poghogne yan ual,' aro maghag pelengelamsiogti, Yesus babe maghag pelengkaog abeneko pere Allahri 'Taulbahimendi, saelbamsululam,' aro Yesus Nasaretne poneko Allah Eldamne Yame Walingeap Eldamne mikipneap elag pibog. Elag pibogpa, Galilea so'oag agha Yudea so'oag tala-tala palamogti, wali-walia aghabog ulamog. Unulamogpa, Allahri el yeplamogpa, phiari saelba ulamsiogne wali nenelamsiog. Yesusti unulamogne nene sembe nu ni el wamsil.
ACT 10:39 Mog so'o Yudeap as Yerusalemap Eldi ulamogneap, ulamongeap Nu nang eneri haingdi ibobori, ambarelamsiap. Walinge aghabog ulamo aghana, nimiri kalag siplobongdi, ya'ag olobong.
ACT 10:40 Olobong aghana, ik wilindip sum teptobag agha Allahri kamag nembao. Kamag nembaoba, Allahri, 'Nimiag lag nenep talul,' sembaogne sunsunum uro lag nenel talamo.
ACT 10:41 El Allahri kamag nembaonge lag nenel talamoa nimi niag kom. Ot nu Allahri samenag wepsiog nimi abenekoriog haingdi babe ibobo, kwanengap magap babe nhon tebori, ambarelamsiap.
ACT 10:42 El nunap nhon wamoboa, nunag yubu lelamori, 'Nimiag ambarelamsumundi, “Yesus poneko Allahri wepto sekirog. Wepto sekirogpa, amik ualulne, nimi teptopneap, kamagneap, Yesusti nimi poloro wepsileri, tam karebalul,” aro ambarelamsululom,' aro Yesusti nu pogsio.
ACT 10:43 Pogsioba, wene yubu ambarelamsiapnena, samenag Allahri yubu silimu tiplamek nang ni wamekneri Yesus sembe ambarelamsiek. Yesus sembe ambarelamsieknena, 'Nimi etneri Elag “Sikne” aro seneraghikpa, Allahri kembahileri, “Nari wepto poghol ahinge ponekoag wali senelamang,” aro malia uroba tam orog nembalul,' aro yubu tiplamek,” aro Petrusti ambarelamsiog.
ACT 10:44 Wene aro Petrusti ambarelamsiogpa, Petrusti yubu ka'elamek nimi tanekoag Allah Eldamne Yame Walinge sin nongag kulukul aog.
ACT 10:45 Allah Yame sinag kulukul alamogpa, a'erop-aerop yubu Allah Eldamne Yame Walingeri tarelamsiog yubuag lero Allah omeklamek. Omeklamekpa, Yahudi nimi agha Yesusag “Sikne” aro seneragtop nimi Petrusap nhon yaeknang tanekori babe Allahri Eldamne Yame Walinge tarelamsiogha ibek. Ibek nang taneko Yahudi nimi nengabo kon karebel dalamek nang Yesusag “Sikne” aro seneragtop nang wamek. Wamekti ibekti, as Yope agha Petrusap nhon yaek nang tanekori, “Yahudi nimi kom aghana, sinag babe Allahri Eldamne Yame Walinge tarelamsil,” aro logti, “Yaghe,” alamek. Yahudi nimiri kemelamsiekpa, Yahudi sisa kom nimiri a'erop-a'erop yubu Allah Eldamne Yame Walinge tarelamsiog yubuag lelamekpa, Petrusti,
ACT 10:47 “Kembahimun. Nun saog uro nimi tane babe Allah Eldamne Yame Walinge sinag tahil. Ane sembe nimi tane Yesusag 'Sikne' aro seneraghik tanena, maghag pelengehinne etneri kom senep?” seog.
ACT 10:48 “Etneri kom senep?” seogti, Petrusti nen lelamogti, “Nimi tanekori Yesusag 'Sikne,' aro seneraglamekne sembe maghag pelengkipsululom,” seogpa, maghag pelengkahiek. Pelengkipsiekpa nimi tanekori Petrusag “Ik etbare nhon wamukap,” aro molbaekpa, Petrus wamog.
ACT 11:1 Petrus as Kaisarea wamogpa, Yesusti wepto pogsiog nimi Petrus elkabo yogne babe mog so'o Yudea wamek. Wamekpa, “Yahudi sisa kom nimi babe wene Allah yubu ka'elamangdi, Yesusag 'Sikne' aro seneraglamang,” alameka Yesusti wepto pogsiog nimi yogneap Yesusag “Sikne” aro seneragtop nimi mog so'o Yudea wamek nimi tanekoapti ka'ebaek.
ACT 11:2 Ka'ebaek aghana Yahudi nimiri senelamekne, “Allahri samenag ambatsiogha sunsunum uro nimi nengabo kon karebel talamik tanena, Allahap ma'ap tangtop nimi,” senelamek. Ane sembe, Petrus mog so'o Kaisarea laplobi agha as Yerusalem yingkiogpa, Yahudi nimi as Yerusalem wamekne Petrusag piekti, yubu lelamekti,
ACT 11:3 “An Yahudinge, Allahri samen arukahiogne sunsunum uro kon andinge karebaghaek aghana, Yahudi nimiri uaheng kom seneropne uaom. Sin Yahudi sisa kom nimi tanena nengabo aneko 'Nunap Allahap ma'ap taukap,' aro kon karep tangtop kom. Kon karep tangtop kom aghana, sindi aeag piomdi, kwaneng nikag teom. Sa'a sembe Yahudi nimiri uaheng kom seneropne nene uaom?” alamek.
ACT 11:4 Wene alamekpa, Petrusti, anam alniro yabioghag agha uro yabiogne ni ambarelamsiogti,
ACT 11:5 “Na as Yope Allahag molona lelamnori, 'Haing uamna kwelekamna' senenag agha kemelamnoag agha kekneba nanag uao. Nari kemelamnoag agha ag sangaroba ag ingkisag-ingkisag haing tombare kerekto saog urop ag imag agha na saramag pelengel alamoa imno.
ACT 11:6 Pelengel alamoba, lomag kemelamnoag agha lebe aroba yan tombareri yabiropneap, lebe aroba nimiri pia urop komneap, lebe aroba mon magti yabiropneap, winang sin im toman yabiropneap imno.
ACT 11:7 Kemelamnoag agha imag agha nanag yubu lelamori, 'Petrus sekmendi, wamlange tane oro yobamendi, telame,' alamoa ka'ebano.
ACT 11:8 Wene alamoa ka'ebanori, narina, 'A, Nani, lebe aroba taneko sembe samen Allahri, “Tululom kom,” seogpa, samenag babe nari pamdi tihi komdi, sumene babe 'Mali,' sembandi, tunun kom,' seno.
ACT 11:9 Wene senoba, nen ik phendepne imag agha yubu ka'ebano yubu enekori lelamori, 'Allahri yubu, “Wali nembandi, wene tululam,” alamla ane sembe, “Lebe aroba sop tane mali, nimiri tenep kom,” aro andi sap wene seheng kom,' seo.
ACT 11:10 Undo unuaonge nene ik wilindi unuaori, nen ag sangaroba ni lomag wamonge imag agha kiliro tobo,” aro Petrusti Yahudi nimiag ambatsiog.
ACT 11:11 Petrusti nen tipto yubu ambarelamsiogti, “Kiliro toboba, wamnoag agha nimi wilindi as Kaisarea agha na wamnoag pogsioba, yaongdi, na wamno aeag ina siramag sekamong.
ACT 11:12 Sin sekamongba, Allah Yame Walinge nenekori na ambarelamneori, '”Yahudi nimi to kom to,” semban koma, sinap nhon pululom,' seoba, nangkabo no'opbare tane wamang nangap nhon pibo. Nu nhon as Kaisarea pibori, nimi wilindi pogsionge ponekori aeag wa'ibo.
ACT 11:13 Wa'iboba, Kaisarea nimi enekori nunag ambarelamsiori, 'Allah arukna malaikat nari aeag wa'al aori, nanag yubu lelamori, “As Yope nimi nhon Petrus, nen si nhon Simon wamla. 'Simon Petrus poneko enel pukang,' aro nimi pogsululam.
ACT 11:14 Pogsimenba, enero poa yaikpa, Simon Petrusti a'unag yubu ambatsilul. Yubu ambatsilenge wali uro ka'eapmundi, 'Sik' aro seneragmunba, 'Mali-malia ulamlomne sembe opsileag,' aro Allahri wepto poghol aogne ponekori taulbahilul,” aro Allah arukna malaikatti nanag ambatneo,' aro Kaisarea nimi enekori nebatneo,” aro Petrusti ambatsiog.
ACT 11:15 Nen tipto Petrusti Yahudi nimi mog so'o Yudea wamek nimi ambarelamsiogti, “Kaisarea nimi enekori nebatneoba, nari yubu ambarelamsinoag agha Allah Eldamne Yame Walinge neneko samenag nunag kulukulaog saog uro, sinag babe kulukulao.
ACT 11:16 Kulukulaoba, Yesus Nia Mangkina Salehiropneri samenag lebogne ane, 'Yohanesti samenag nimi maghag pelengelamsiogne mag moag pelengkipsiog aghana, Allahri Eldamne Yame Walinge a'unag pelengkatsilul,' seogne nene el wamnori, wamno.
ACT 11:17 Nangkabo, nuri sik uro seneraglamapne, '”Mog so'oag nimi taulbahimendi, saelbamsululam,” aro Allahri wepto poghol aogne Yesus,' aro seneragoboba, Allahri Eldamne Yame Walinge nunag tatsiog. Nunag tatsiogne saog uro sin nimi taneko babe tatsio aghana nari welaro Allahag, 'Tatsiseng kom,' sehene?” aro Petrusti elkabo Yahudi sisa nimiag ambatsiog.
ACT 11:18 Ambatsiogpa, ka'ebaekpa, wana wali tahiogpa, Allah omeklamekti, “Yaghe! Allahri Yahudi sisa kom nimi babe yeplamsildi, 'Allahri opsileag,' aro sin Yahudi sisa kom nimiri malia ulamangne lililamsiang. Allahri yeplamsilba, malia ulamangne lililamsiangdi, Elag omeklamangba, Allahri opsulul kom. Ya'ag kamag wamukang,” alamek.
ACT 11:19 Petrusti “Yesus sembe ambarel phinun,” aro as Kaisarea anam pin komag, samenag Stefanusti Yesusag sikne aro seneraglamogne sembe Yahudi nimiri Stefanus ya'ag obek. Stefanus obekti, Yesusag “Sikne” aro senaragtop nimi yogne babe Yahudi nimiri sare nelepto olamsiek. Olamsiekpa, Yesusag “Sikne” aro seneragtop nimi taneko nimi anabi tang-tang piek. Nimi anabi tang-tang piekagna, nhon-nhon a'el talamekti, mog so'o Fenisia palamekpa, as Antiokhia inagha tang-tang piek. Nimi orange mag alip toman heng pulingkirobag sip palamekti, mag longo kanektop mog so'o Siprus piek. Piek abeneko pere yubu walinge Yesus sembe ambarelamsiek. Yesus yubu ambarelamsiek, aghana ot Yahudi nimiag aghabog yubu walinge ambarelamsiekti, Yahudi sisa kom nimiag ambarelamsiek kom. Undo unuaekpa, yog nimina, mog so'o Siprus nimiap, mog so'o Kirene nimiapti yubu walinge Yesus sembe ka'ebaekti, as Antiokhia piekti, Yahudi nimi agha Yunani nimiri saelba uropne ul palamek nimiag yubu walinge ane tipto ambarelamsiek. Yubu walinge ambarelamsiekne, “Allahri, 'Mog so'oag nimi taulbahimendi, saelbamsululam,' aro wepto poghol aogne Yesus nunag yaog,” aro ambarelamsiek.
ACT 11:21 Nia Mangkina Salehiropne ponekori sin yeplamsiogpa, nimi maikno Yesus sembe yubu ambarelamsiek. Ambarelamsiekpa, ka'elamek nimi tanekori mali-malia ulamekne lililamsiekti, Nia Mangkina Salehiropne Yesusag “Sikne,” aro wanaag seneraglamek.
ACT 11:22 As Yerusalem Yesusag “Sikne” aro seneraglemek nimiri ka'elamekti, “As Antiokhia Yahudi nimi agha Yunani nimiri saelba ulamangne sunsunum uro ul palamang nimi maiknori Yesusag wana seneraglamang,” alameka ka'ebaek. Ka'ebaekti, Yahudi nimi Yesusag “Sikne” aro seneragtop nimi Yerusalem wamekne tanekori, “As Antiokhia nimiag uro yabalamlange kemel phululam,” aro nimi si Barnabas poghek.
ACT 11:23 Barnabas neneko kulomag Allah Eldamne Yame Walingeri wa'iogti, teknero ua ulamogpa, Barnabasti wanaag Yesusag “Sikne” aro to'opto seneraglamogti, walia aghabog ulamog. As Yerusalem nimiri Barnabas poghekpa, as Antiokhia piogti, kemelamsiogpa, “Allahri sin sembe wali sembamsildi, Eldamne seneragna sunsunum uro walia tarelamsil,” aro Barnabas awi sembaog. Awi sembaogti, wenelamsiogti, “Wene Yesusag wana seneraglamlomne nene wali. Wana phende seneragseng kom. 'Yesusti ya'ag saelbamsilul,' aro a'ero-a'ero wanaag seneraglamlulom,” aro wembahiog. Barnabasti Antiokhia nimi wana wali uro wenelamsiogpa, nimi maiknori malia ulamekne lipsiekti, Nia Mangkina Salehiropne Yesusag “Sikne” aro seneraglamek nimi maikno tangto palamog.
ACT 11:25 Wameka Barnabas neneko, “Saulus ebanun,” aro as Tarsus piogti,
ACT 11:26 Saulus ibogti, samoro as Antiokhia enero payaog. Enero payaogti, as Antiokhia Yesusag “Sikne” aro seneragtop nimiap wamekpa, Saulusap Barnabasapti Allah yubu samenag ambatsiogne pere agha Yesus sembe tibin nenero nimi maikno ambarelamsirekpa, heng kun nhon taog. Yesus yubu ka'ero ulamek nimi sembe samenag yum-yum as Antiokhia asag anea sisa Kristen aro engelamsiek.
ACT 11:27 Wamekpa, Yerusalema Allahri yubu silimu tiptop nimi as Antiokhia yaek.
ACT 11:28 Yaek nimi taneko nhon sina Agabus Allah Yame Walingeri el pere agha yubu lelamogti, “Mog so'o Roma nimi saelbamsiek mog so'o niag kwaneng yo nubunge waelbalul,” aro ambatsiog. Ambatsiogne nene yubu sia leropne nubunge Kaisar sina Klaudius nimi saelbamsiog li kwaneng yo neneko waelbaog.
ACT 11:29 Kwaneng yo neneko waelbaogpa, Yesus yubu ka'ero ulamek nimiri, “Nungkabo Yesusag 'Sikne' aro seneragtop nimi Yudea wamangne kwaneng yo maiknori, nuri yepsukap,” aro yubu saekag lebek. Yubu saekag lebekti, Yesus yubu ka'ero ulamek nimi ni as Antiokhia wamekneri saeag phelekto wamogha sunsunum uro, “Yudea nimi tatsinun,” aro kal ma'al poloro palilamsiek.
ACT 11:30 Poloro palilamsiekpa, “Sikindoyabo wenehiropnang Yudea wamangneag tarel phululom,” aro Barnabasap Saulusap pogsiekpa, pabalamdek.
ACT 12:1 Kwaneng yo nubunge waelbaog li enekoag Roma nimi saelbamsiogne Kaisar Klaudius umag Yahudi nimi sembe yubu sia leropne nhon babe sina Herodes wamog. Yubu sia leropne Herodes nenekori “Yesusag 'Sikne' aro seneragtop nimi seklebaukang,” aro ilipsabo yin saleropnang pogsiro “Haing sae kaupto poa yalamsululom,” aro ambarelamsiogpa, elag poa yalamsiek.
ACT 12:2 Nimi elag poa yalamsiekne anabiag agha nimi nhon sina Yakobus, Yohanes eldo wamog. Herodesti el umag nimiag, “Yakobus neneko karoghag agha karepto oplulom,” aro arukahiogpa, ya'ag obek.
ACT 12:3 Obeka sembe Yahudi nimiri “Wali,” aro awi senelamekpa, Herodesti ipsiogti, “Petrus babe saelbalulom,” aro arukahiog. Herodes ilipsabori Petrus saelbaek sumenena, Yahudi nimiri kwaneng roti walerop komne tero ik etpare Allah omekto wameka, ik nhon sum eneko Petrus sae kaupto saelbaek. Petrus saelbaekti, kop aeag tolongolamekpa, Herodesti el umag yin saleropnang ao tara bare nangag ambarelamsiogti, “A'un ina siram sunuro nimi tombare-tombare yae wamlulom,” aro ambatsiog. Wene aro ambatsiogti, “Allah omekto kwaneng roti walerop komne terop li liogha Petrus tam ane nimi maikno whingag karebanun,” aro Petrus kop aeag tobongkibog.
ACT 12:5 Petrus neneko kop aeag aneko wamogpa, Yesusag “Sikne” aro seneragtop nimi tanekori sol wali, wali uro, “Petrus yeplulam,” aro Allahag molona mololamek.
ACT 12:6 Herodesti, “Ambuhum nimi maikno wamika haingag agha tam karebaukap,” aro wamogpa, Petrus neneko sae tara-tara yin salerop nangdi saeap a'amsuro kaubirekpa, Petrus malamog. Sindi sae a'amsuro kaubirek haing aneko besi agha sorop haingag agha kaubirek. Petrus malamog ae lom ina siramag yin salerop nang nenne babe yae wamek.
ACT 12:7 Yae wamekti, wamekpa, Nuni Allahri Eldamneri arukna malaikat poghogne neneko Petrus malamoghag wa'iogpa, Petrus wamog ae lom eneko warelobog. Allah arukna malaikat anekori Petrus malamogha kaombaogti, “Nangkae, elemag puke,” alamog abeneko besi agha sorop haing sae kaubamek haing eneko loptangka timbaog.
ACT 12:8 Loptangka timbaogpa, Allah arukna malaikat anekori Petrusag yubu lelamogti, “Anenge uoghag nopna noptoba nopto amendi, yan wangana wangaro alulam,” seogpa wangkaog. Wangkaogpa nen lelamogti, “Ag nongagne enekto amendi, nanag sarenelebanululam.” seog.
ACT 12:9 Wene seogpa, Petrus kop aeag anekoa lanaro Allah arukna malaikat nelepto lanalamogti, Petrustina, “Ot sik uro Allah arukna malaikati lobolanel,” semban koma, “Lenda malamna to,” senero Allah arukna malaikat nelepto lambaog.
ACT 12:10 Allah arukna malaikat nelepto palamogti, yin salerop nang ina siram tenap lomag tao weamekne phibom agha, nen tenap phendepne yae wamekne phioro asag lambanebag besiri soro lingnil oropneag palamdekpa, ina siram aneko mo kuptaog. Mo kuptaogpa, lanaro palamdekti, ina ingkisag anekoa palamdekti, Allah arukna malaikat anekori Petrus laploa piog.
ACT 12:11 Ina ingkisag aneko pirekti, Allah arukna malaikat anekori Petrus laploa piogpa, wana hegkaogti, “Yahudi nimiri na 'Obukap,' sembamangdi wamang, aghana Allahri eldi arukna malaikat arukalba, Herodes saeag agha Nani Allahri taulbanelba, wene sik uro el tanel,” seog.
ACT 12:12 Undo wene seogti, seneraglamogti, Yohanes si nhon Markus ilin Mariari aeag piog. Ae neneko nimi maikno poloro tekne amekti, Petrus sembe Allahag molona mololamek.
ACT 12:13 Ae enekoag piogti, leka toroba ina siramag kaungkaogpa, “Etneri kaungulamla,” aro Maria arukna kelabo sina Rode nenekori kemel aog.
ACT 12:14 Kemel aogti Petrus yubu lelamogha ka'ebaogti, awi lelem ina kupna koma, “Nimi ambatsunun,” aro ae lomag piogti, “Petrus asag wamla,” aro nimi longoro tekne amekne ambatsiog.
ACT 12:15 Ambatsiogpa sindina, “Anna serem saelbamlamdi, lelamlam,” aro wene alamekpa, eldina, “Ot sik,” seogpa sindina, “Allah arukna malaikatti Petrus piamlange yalba lelamla,” alamek.
ACT 12:16 Yubu undo lelamekpa, Petrusti ina kaungu-kaungu palamogha sembe ina kupto kemelamekpa, Petrus ina siramag wamogha ibekti, “Logti, mane agha yal,” sembaek.
ACT 12:17 “Logti, mane agha yal,” sembaekpa, Petrusti, “Yubu kom talulom,” aro sae maubitsiogti, “Nuni Allahri eldi arukna malaikat poglaba, kop aeag agha enero poa lambitnelba yan,” aro ambatsiog. “Ambatsinne nene Yakobusap, nungkabo Yesusag 'Sikne' aro seneraglamang nimi yogneap ambatsululom,” seogti, lamba as oraag piog.
ACT 12:18 Lukunap yin salerop nang Petrus yae ulamekne tanekori, “Petrusag sa'a agha ualba, welaro lambal?” aro logti, sin mamun maikno haum aro lelamek.
ACT 12:19 Yin saleropnang taneko logti, sin mamun maikno haum aro lelamekti, wamekpa, Herodes nenekori, “Petrus ebalulom,” seogpa, sen-senna ebaek. Ebaekpa, orogti, Herodesti, “Yin salerop nang Petrus yae wamek nang payahilulom,” seogpa, payahiekpa, Herodesti hailamsiog. Hailamsiogti, “'Sindi saeag agha lambal,' aro opsululom,” seogpa, yin saleropnang orangeri, “Opsukap,” aro pabahiek. Undo Herodesti saeag agha Petrus Allahri lambirogpa, Herodes neneko mog so'o Yudea laplobi agha as Kaisarea piogti, wamog.
ACT 12:20 Herodesap mog so'o Tirus nimiap mog so'o Sidon nimiap sin iriktangto saog uro wamekti, Herodesti sin sembe yo senelamog. Yo senelamog aghana Herodesti mog so'oag agha sindi tisirik wamogpa, Tirus nimiap Sidon nimiap ma'aptaekti, “'Nimi nubunge Herodesap nunap tam wamlul kom,' aro elag yubu lel pukap,” aro piek. Elag piekti, nimi nhon si Blastus, yubu sia leropne Herodesti yubu eptopne ae lomag o'olamsiogne ponekoag, “Herodesap nunap ma'aptaukap,” aro samenag yubu yangaro lebekpa, Blastus sinag sip taog. Blastus sinag sip taogti, Herodesag yubu tipto ambarogpa,
ACT 12:21 Herodesti, “Sinag yubu lemnun,” aro yubu pibog. “Yubu lebukap,” seog sumeneko yaogpa, nimi nubu nimiri enektop ag enekaogti, elel molel aroba towalengkaogti, nimi nubunang salehiropnang purobag pulingkiogti, sinag yubu lebog.
ACT 12:22 Yubu lelamogpa, ka'eamek nimi tanekori “Nunag wali sembahilul,” aro kibiang towalengelamekti, “Nimiri yubu lelamla kom, phia phalamapne imag wamlange nimi saog taldi, lelamla,” alamek.
ACT 12:23 Wene alamekpa, Nuni Allahri “Mog so'oag nimiri Na mo omekaneheng aghana, Herodes omeklamang. Omeklamangba, Herodesti, 'Na omekaneheng kom. Allahag agha omekalulom,' senep aghana, 'Wali omeklamneang,' sembaldi wamla,” aro Allahri Eldamneri arukna malaikat, “Herodes oplulam,” aro poghog. Poghogpa, Herodes obogpa, kolagti tero tebaog.
ACT 12:24 Herodes tebaogpa, yubu kom taog aghana, Allah yubu nubu taogpa, nimi maiknori, “Allah yubu wali,” aro ka'elamek.
ACT 12:25 Barnabasap Saulusapti as Antiokhia nimiri sae agha pabireka taneko tatsirekti, Yerusalem laplobi agha samoro yalamdekti, Yohanes si nhon Markus neneko enero poa yarek.
ACT 13:1 Saulasap Barnabasap samoro yarek li as Antiokhia Yesusag “Sikne” aro seneragtop nimi haibil talamek nimi anabiag Allahri yubu silimu tiptop nimi Allah yubu tibin nenero ambatsirop nimi wamek. Allahri yubu tipto tibin nenero ambatsirop nimi taneko sina: Barnabasap, Simeon si nhon Nigerap, mog so'o Kirene nimi nhon si Lukiusap, Saulusap, Menahenap wamek. Menahen ponekona yubu sia leropne Herodesap nhon mo'obhaiekpa, Herodes elkae Menahen wamog. Sin Allahri yubu silimu tiptop nimi wamekti, as Antiokhia nimi Yesusag “Sikne” aro seneragtop nimiap nhon haibil talamek.
ACT 13:2 Ik nhon sum kwaneng ten koma Nuni Allahag omekto molona mololamekti, wamekpa, Allah Eldamne Yame Walinge nenekori sinag yubu lelamogti, “Nari samenag, 'Uanun,' sembanori, Barnabasap Saulusap, 'Nari sae tarikti, nari awe tolamtukang,' aro karepto wepto pipsinori, yoplamsin. Yoplamsinnena, a'un Antiokhia nimiri sinag ambatsumundi, 'Ot Allahri, “Undo-undo tolamturom,” selenge aghabog tolamturom,' aro sin phende wepsimundi pogsululom,” aro ambatsiog.
ACT 13:3 Wene aro Allahri ambatsiogpa, nen kwaneng tero koma Allahag molona yubu moloro wameka Saulusap Baranabasap usoghag sae pipsiekti, “Allahri 'Awe undo-undo tolamturom,' selenge tol pururom,” aro pogsiek.
ACT 13:4 Allah Eldamne Yame Walinge nenekori Barnabasap Saulusap pogsiogpa, pirekti, as Seleukia pin togha kabongag agha mag alip toman pirekti, mag laut longo kanektop mog so'o Siprus pirek.
ACT 13:5 Pirekti as Salamis anekoa Yahudi nimiri Allah yubu lerop aeag agha Allah yubu ambarelamsirek. Allah yubu ambarelamsirekti, wamdekpa, nimi nhon sina Yohanes Markus nenekori sin phende yeplamsiog.
ACT 13:6 As Salamisa heng walelingkirobag sip mag abolag wamdeka lambaekti, Siprus so'o inagha heng pulingkirobag simbik palamekti, as nhon mag abolag heng pulingkirobag sip si Pafos piek. As Pafos piekag aneko nimi nhon sina Baryesus Yahudinge haiptaek. Baryesus Yahudinge ponekori, “Allahri yubu ambatneonge tipto ambarelamsin,” aro orolena yubu lero mema mili lero phalamog.
ACT 13:7 Baryesus poneko elkae Siprus so'o saelbamogne nimi nubunge sina Sergius poneko wamog. Nimi nubunge mog so'o eneko saelbamogne sina Sergius, si nhon Paulus, neneko wana hekto wamogti, “Barnabasap Saulusapti Allah yubu tibin nenero ambarelamsirangne ka'ebanun. Enero payahilulom” aro nimi pogsiogba, Sergius Paulus wamoghag Barnabasap Saulusap payahiek.
ACT 13:8 Payahiekpa, Allah yubu ambarelamsirek aghana mema mili lero pharopne Baryesus, si nhon Elimas ponekori, “Sin phenderi ambarelamsirangne sembe karong,” senelamog. “Karong,” senelamogti, “Nimi nubunge mog so'o saelbamogne ponekori wana Yesusag seneraglul kom,” aro mema ulamogne ponekori Sergiusti seneragna sao kauplolamog.
ACT 13:9 Sao kauplolamogpa, Allahri Eldamne Yame Mikipne Saulus nongag to'opto piamogpa, mema ulamogne Elimas poneko yop-yoba kembaog. Yop-yoba kembaogti, Saulus, el babe si nhon Paulus nenekori, yubu lelamogti,
ACT 13:10 “Phia yonge saog uro wamlam. Wanaag malingeog seneraglamlamdi, yubu orolenangeog lelamlam. Nimi nhondi sik uro yubu leropne babe, porog uro toropne babe, 'Karong,' alamlamdi, 'Nari aisa,' aro iriklamlam. Nia Mangkina Salehiropne poneko sembe porog uro ambarelamsin aghana, sengkwanekto nenelamlam. Undo ulamlamne libe!
ACT 13:11 Nia Mangkina Salehiropne poneko saeri wene 'An opkunun,' aro yalamlange wene tiboghae, haing uroba wapmendi, heng olog imna koma wapmen paghabog ik etbare talul,” aro wabaog. Wene aro Paulusti walamog abeneko pere nimi eneko haing uro toa saogne marukul aogpa, “Nimiri sae saelbanukang,” aro sale wihi-wihi palamog.
ACT 13:12 Undo unuaogne sembe Siprus so'o wamekag saelbamogne nimi nubunge poneko kembaogti, “Barnabasap Paulusapti, 'Yesusti nia mangkina saelbamsil,' aro mane agha sik uro ambarelamsirang,” aro Yesusag “Sikne” aro seneraglamog.
ACT 13:13 Wameka Paulus elkaboap as Pafos laplobiagha mag alip toman agha piek. Mag alip toman agha piekne, ag kabongag kerekaekpa, “Phoanari ko'oro pabalamlul,” aro kerektop ag towalengkaekti, mag alip toman agha piekti, as si nhon Perga Pamfilia so'oag piek. Piekti, Yohanes Markus neneko sin Perga laplobiagha as Yerusalem samoro yaog.
ACT 13:14 Samoro yaogpa, sin taneko Perga phibom agha piekti, as Antiokhia Pisidia so'oag yingkiek. Yingiekti, wamekpa, Yahudi nimiri Allah yubu lerop sum taogpa, Allah yubu lerop aeag wa'iekti, pukamek.
ACT 13:15 Wa'iekti, pukamekpa, Allahri samenag Musa ambarog yubu mome toro pibekneap, Allahri yubu silimu tiptopnangdi yubu mome toro pibekneap sangkaekti, ambarelamsiek. Mome sangkaekti, ambatsiekti, wa'amogto pibekti, Allah yubu lerop ae saleropnang tanekori nimi nhon poghekpa, Paulusap Barnabasap hailamsiogti, “Nangkabo, a'undi nimi tane sembe 'Wana aingnibahununam,' senenne wamla tanena sektumundi yubu ambatsururom,” seog.
ACT 13:16 Wene seogpa, Paulus sekogti, sae la'abatsiogti, yubu lelamogti, “Israel nimi nangkabo, yog nimiri Allah yubu sunsunum uro ul palamlom nimi babe nangkabo, nari lemnunne nene ka'eamlulom.
ACT 13:17 Allahri samenag agha nu Israel nimi pia ulamsiogne ponekori nu Israel nimi nunisa yabo samenag wepsiogpa, mog so'o Mesira nimi yangkan nang saog uro wamek aghana, 'Maikno taukang,' aro nubu nembahiog. Maikno nembahiogti, El sae mikipne nenekori saelbamsiogti, mog so'o Mesira enero poa lambahaiog.
ACT 13:18 Poa lambahaiogpa, pai aldesag saog urobag wamogti, sindi malinge aghabog ulamek. Malinge ulamekpa, 'Opsinun,' sembaog aghana wana palingkiogti, wamog pahabog heng tai buka tau buka ulamogha heng kun selek ta'om agha epto naual bare (40) taog.
ACT 13:19 Selek ta'om agha epto naual bare taogpa, Allahri, 'Kanaan so'o Israel nimi sisa nimiag tatsinun,' aro Kanaan so'oag wamekne nimi sisa saekbare ene Allahri oro luknubahiog. Oro luknubahiogpa, Israel nimi lelnero ngai talamek.
ACT 13:20 Israel nimi sikinisag Israel poneko el maboap samenag Mesir yaekti, wamekti, Israeldi mangaroba mangarobari mangkahiekne Mesir so'o laplobiagha Kanaan so'o ngai taekne ni ane hengkun teng ao tarabare eptopneap (450) palamogpa, wamekti, Israel nimi Kanaan so'o lelnero ngai taek. Ngai taekti, nimi nubu nang tam lelekto kemero kareptop nimi Allahri sekililamsiogti poglamsiog. Israel nimi sembe tam lelekto kemero kareptop nimi komoptobagnena Samuel sekirog. Samuel ponekona Allahri yubu silimu tiptopne wamog.
ACT 13:21 Samuel wamog li enekoag Israel nimiri, 'Yubu sia leropne nubunge saelbamsilulne nhon sekitsimenba, towalengkibukapti,' alamek. Israel nimiri wene alameka ka'ebaogti, Israel elme Benyamin mangarobari mangaroba mangkahiek nimi agha nimi nhon Allahri webogti, Kis elme Saul poneko sekirogpa, towalengkibek. Towalengkibekpa, Israel nimi saelbamsiogti, hengkun tai buka tau buka ulamogha teng nhon epto naual bare taogpa, Saul tebaog.
ACT 13:22 Saul tebaogpa, el lunumna Daud Allahri sekirogpa, Israel nimiri, 'Nu saelbamsileri, yubu sia lelamlul,' aro towalengkibek. Daud sembe Allahri samenag lebogne ane, 'Na Allahri wanaag seneragna sunsunum uro Isai elme Daudti babe seneraglamla. Nari yeng senenne ni sunsunum uro ulamlulne, Na el,' aro Allahri wene seog.
ACT 13:23 Daud poneko sembe Allahri, 'Daudti mangaroba pere agha Israel nimi taulbahinepne nhon mangaptalul,' aro Allahri salag pibog. Salag pibogne neneko Yesus sembe lebog.
ACT 13:24 El anam yanep peramag Yohanesti Israel nimi, nimi ni ambarelamsiogti, 'A'un malia ulamlomne wali uro seneragmundi, lililamsimun tanena maghag pelengkipsinun,' alamog.
ACT 13:25 Yohanes nenekori Israel nimi komopto ambarelamsiogne peram taogpa, eldi yubu ambarelamsiogti, 'A'undi, “El yalul” senelamlomne poneko na kom. Na sam yano aghana El nenekona, olog amik yalul. El nubunge ponekori yan wangana nari haing lopna babe sunsunum kom,' aro Yohanesti samenag ambatsiog,” aro Paulusti ambarelamsiog.
ACT 13:26 Wene aro Paulusti ambarelamsiogti, “Nangkabo, Abrahamdi mangaroba wamapneap, Allah yubu sunsunum uro ul palamlom nimi yogne tane wamlomneap, samenag 'Nimi taulbahinepne yalul,' aro wene seogne poneko yaogpa, Allahri nunag salag pibogne sunsunum uro, uro yabiog.
ACT 13:27 Allahri salag lebogne nunag taogne uro yabiogne ambatsinun. Allahri 'Nimi taulbahinepne yalul' seogne poneko, 'Na Yesus. Na Allahri wepto pogholaneo,' seog aghana Yerusalem nimiap, sikini yabo saelbamsiek nang tanekori babe Yesus el nong babe yubu babe wa'eplamek. El neneko tam karebaekti, 'Tebalul,' seekne neneko samen Allahri, 'Sik uro yabilul,' aro el uro wamog. El uro wamogpa, Allahri yubu silimu tiplamek nangdi samenag Elag amik uro yabilulne sembe samenag mome toro palilamek. Mome toro palilamekpa, samenag agha wene babe Allah yubu lerop sum talamlaba, nu Yahudi nimi niri mome palilamekne sop-sop lelamapti, ka'elamap. Allahri yubu silimu tiptopnangdi mome toro palilamekne Yerusalem wameknangdi babe ka'elamek aghana, yubu tolamek komdi, Allah yubuag 'Uaukang,' aro ambatsiekne neneko sunsunum uro 'Tebalul,' aro karebaek.
ACT 13:28 'Tebalul,' aro karebaekpa, nimiri El sembe 'Sik eldi ane malia uao,' senep kom aghana, Roma nimi nubunge Yahudi nimi wamekag mog so'o salehiropne Pilatusag, 'Ya'ag oplulom,' aro molbaek.
ACT 13:29 Samenag El sembe Allahri yubu ambatsiogne mome toro pibeka sunsunum uro Elag uaekpa, kalag agha pelengkaekti, kirik arameag wirikil wa'iek.
ACT 13:30 Wirikil wa'iekti, piekpa, nimi teptobag wamog aghana, Allahri nimi teptopne nusamag agha El neneko kamag nembaog.
ACT 13:31 Kamag nembaogpa, Elap nhon Galilea agha Yerusalem palamek nimi taneko sae a'iliro wamekpa, sin haingag lag tangom tognop tangom alamogne sembe, 'Nuri haingdi ibubu,' aro nimi tane wene ane ambarelamsiang.
ACT 13:32 Wene ane nen tipto ambarelamsiapnena, 'Samenag nunisa yaboag Allahri salag pibogne neneko wene uro palamla,' aro yubu walinge neneko wene ane a'unag ambarelamsiap. Sindi mangarobari mangaroba mangkahiekne wene wamapne nuri haingag agha Allahri Yesus kamag nembaog. Undo kamag nembaogti, Allahri samenag, 'Uanun,' aro salag pibogne sunsunum uro wene nuri haingag agha uaog. Nunisagyabori samenag Allah omekto sepna siplamekti, sepna phendepneag Allahri yubu lebogne agha mome toro pibognena ane, 'Anna Na Name, Na sumene andi nai tan,' aro mome toro pibog.
ACT 13:34 Allahri Yesus nimi teptopne wameka anabiag agha kamag nembaogpa, 'So'oag agha ya'ag nong polbalul kom,' aro Allah yubu lemnunne nene mome toro pibogne ane: '”Nandamne wanaag agha Daud sembe walia uanun,” aro salag pipsinge sik uro uanun. Daud sembe salag lero pipsinge a'unag tipto tatsinun.' aro mome toro pibog.
ACT 13:35 Sepna nhon babe siplamogti, mome toro pibognena, 'Anenge Arukna Sol Wali Walinge neneko so'oag agha polbalul kom,' aro mome toro pibog.
ACT 13:36 'Polbalul kom,' aro mome toro pibog aghana, Daud poneko el uro wamogti, Allahri seneropne wali uro ulamogti, sabal taogti, tebaog. Tebaogpa, iliyabo teptoba pibekag aneko tobongol piekpa, polbaog.
ACT 13:37 Undo unuaog aghana Yesus neneko Allahri kamag nembaog. Daud polbaog saog uro polbaog kom,” aro ambarelamsiog.
ACT 13:38 Paulusti wene aro ambarelamsiogti, “Nangkabo, 'El Yesus neneko wamogti, ulamogha pere agha Allahri a'undi malia ulamlomne tam orog nembalul,' aro ambarelamsinne a'un ekon uro wamnep kom. Samenag Allahri 'Undo-undo ulamlulom,' aro Musaag yubu ambarelamogpa, mome toro pibog. Musa yubu mome toro pibogne salelamap aghana malia ulamap tanena Allahri nu sembe 'Porog urop nimi,' sembalul kom. Nu sembe 'Porog urop nimi,' sembalul kom aghana, nimi etneri Yesusag 'Sikne' aro seneraglamleba, sembenga uropne tam orog nembi agha, Allahri nimi ane sembe 'Porog urop nimi' sembalul alamna.
ACT 13:40 Ane sembe, samenag Allahri yubu silimu tiptopneri mome toro pibekne neneko saog uro a'unag uro yabileagti, wanaag el uro wamsuri, wamsut:
ACT 13:41 Allahri yubu silimu tiptopne nhondi mome tobogne ane, 'Wene wamlom ko'o ene, “Nari uanun,” sembanea uanun. A'unag tibin nenero ambatsiika babe a'undi sik sembalulom komne webanun. Allahri yubu seneragtop kom nimi, wali uro tibogamsut! “Yaghe! Mane agha ual,” sembamundi, Nari yubu ka'eapmun kom tanena tebalulom!' aro mome tobog,” aro Paulusti komopto ambatsiog.
ACT 13:42 Paulusti yubu ni ambatsiogti, Barnabasap lanalamdekpa, nimi tanekori, “Sumene yubu ambatsilamne nen tipto Allah yubu amik lebukap sumono babe yingkina ambarel ahirurom,” aro molbahiek.
ACT 13:43 Allah yubu lerop aeag haibil talamek nimi lambaekti, Yahudi sisa nimi maiknoap, Yahudi sisa kom nimi Allah omektop nimi taek nimiapti Paulusap Barnabasap nelepto palamek. Sin amik palamekpa, sin phenderi nimi taneko wenelamsirekti, “Allahri nimi so'oag nimi Yesusti uaogne pere agha talulamsilne ponekoag sinag kweleknag seneraglamlulom,” aro ambarelamsirek.
ACT 13:44 Wene aro ambarelamsirekti, wamdekpa, Allah yubu lerop sumeneko peram taogpa, as eneko nimi ni wa'al aloa saog uro, nimi maikno, “Nia Mangkina Salehiropne Yesus sembe Allah yubu pere agha ambatsurukangne ka'ebaukap,” aro yalamek.
ACT 13:45 Nimi maikno yalameka Yahudi nimiri ipsiekti, “Nimi maikno ambarelamsireka ka'el wa'alamang,” aro wana sek tahiogpa, u kwa'en pa'alamsiekti, “A'undi lelamdomne orolenange lelamdom,” aro Paulus san tiliplamek.
ACT 13:46 Wene aro san tiliplamekpa, Paulusap Barnabasapti log kom uro ambarelamsirekti, “Nangkabo, a'un Yahudi sisa nimiag samen Yesus sembe Allah yubu pere agha ambatsinomonge, ora sisa nimiag samen ambatsinep kom wamo. A'un samen yubu walinge ene ambatsinomo aghana a'undam nimiri, 'Karong,' aro lililamsilom. A'undi, 'Kamag nenehirop yubu ambarelamsilne nu seneraglamukap komdi, ya'ag kamag wamukap kom,' aro kareplamlom. A'un Yahudi nimi tane wamlomne yubu ene tolamlom kom ane sembe, nuri Yahudi sisa kom nimiag yubu walinge nene ambarel phukap.
ACT 13:47 'Undo ulamlulom,' aro Nuni Allahri nunag samenag yubu pibogne ane, '”Allah yubu ekon nang Yahudi sisa kom nimi sembe an whea walinge saog uro wamlulam,” aro sekitkehiba, andi nimi so'oag sirikag-sirikag wamangneag pimenba, el taikpa, sin taulbahinep,' aro mome toro pibog. Mome ane undo toro pibogne ane sembe, Yahudi sisa kom nimiag yubu walinge nene ambarel phukap,” aro Paulusti ambatsiog.
ACT 13:48 Wene aro ambatsiogpa, Yahudi sisa kom nimi tanekori ka'ebaekti, “Nia Mangkina Salehiropne Yesus sembe yubu ambarelamsirekne walinge” senelamekti, awi yeng senelamek. Allahri samenag “Ya'ag kamag wamlulom,” aro wepsiog nimi tanekori “Sik uro ambarelamsirang” aro Yesusag “Sikne” aro seneraglamek.
ACT 13:49 Nimi ni as kanero wamekne taneko Nia Mangkina Salehiropne Yesus sembe ambatsirop yubu nubu taogpa, ka'elamek.
ACT 13:50 Nimi taneko Yesus yubu ka'elamekpa, Yahudi nimiri “Paulusap, Barnabasap nu karongdi, nuri asag agha yag lambitsukap,” aro ulamek. As tanekoag kelabo sikininyabo saog uro wamek kelabo taneko Allah omeklamek kelabo Yahudi nimi tanekori yubu yangaro wana tolamsiekti, nimi nubu nang as tanekoag babe wana tolamsiek. Wana tolamsiekti, nimi maikno sikin sip tangto, “Paulusap, Barnabasap opsukap,” aro malia ulamsiekti, as enekoag agha yag lambahiek.
ACT 13:51 Yag lambahiekpa, Paulusap Barnabasap lanalamdekti, sindi yanag so'o ubun wamogne “As aneko Allahri opsinepne sembe el uro wamukang,” aro so'o ubun kepto pelengkia pirek. As Antiokhia laplobi agha pirek aghana, ambarelamsirekne ka'elamekti, sunsunum uro ulamek nimi, samenag Yesusag “Sikne” aro seneraglamek nimi taneko sin wana awi yeng uro wamek. Wamekpa Allahri Eldamne Yame Walinge sin nongag to'opto palilamsiogpa, wamek. Wamekpa, Barnabasap Paulusap as Ikonium pirek.
ACT 14:1 Paulusap Barnabasap as Ikonium pirekti, Yahudi nimiri Allah yubu lerop aeag wa'irekti, Yesus sembe Allah yubu pere agha tibin nenero wali uro ambarelamsirek. Ambarelamsirekpa, Yahudi nimiap Yunani nimiap nimi maiknori, “Sik uro ambarelamsirang,” aro wanaag seneraglamek.
ACT 14:2 Yahudi nimi nenneri, “Paulusap Barnabasapti yubu orolena ambarelamsirang,” senelamek nimi tanekori, “Yesusag 'Sikne' aro seneraglamang nimi ene mali,” aro wana aluktop yubu yangaro Yahudi sisa kom nimi taneko wana tolamsiek.
ACT 14:3 Wana tolamsiek aghana Paulusap Barnabasap ik maiknoro as Ikonium wamdekti, “Nuni Allahri Yesusti uaogne pere agha mog so'oag nimi talulamsil,” aro log kom uro ambarelamsirek. “Sindi yubu ambarelamsirangne nimiri sik sembaukang,” aro nia mangkina Saelbamsilne ponekori sinag mikip nenelamsiogpa, Allah Eldamneri uanepne nimiri uanep komne ulamdekti, “Yaghe, Allahri sin pere agha ual” senenne kekneba ulamdek.
ACT 14:4 Kekneba ulamdekpa, as eneko wamek nimi taneko as pogto nenne Yahudi nimiag sip talamekpa, nenne “Yesus sembe sik uro ambarelamsirang,” aro Barnabasap Saulusap sinag sip talamek.
ACT 14:5 Sin pogtaekti, Yahudi sisa komnangap, Yahudi nangap sin sikindo yaboap winiptaekti, “Paulusap Barnabasap oro saelbahiberi, kirikti ya'ag opsukap,” aro ulamek.
ACT 14:6 “Sin opsukap,” alamekne eltarekti, Paulusap Barnabasap as enekoag agha lambarekti, Likaonia so'oag pirekti, Likaonia so'o enekoag as Listraap Derbeap pirek. Pirekti, as eneko kanero wamek nimi wamekne yubu walinge Yesus sembe ambarelamsirek.
ACT 14:8 As Listra aneko nimi kabuni nhon mangaptangto yangkaoghag agha yan malia mangap taogha seka pana babe erarukne nhon wamog.
ACT 14:9 Pukamogha Paulusti Yesus sembe tibin nenero yubu ambarelamsiogne yan mali nimi enekori ka'ebaogpa, Paulusti whing ebom agha til talamdekti, Paulusti, “Nimi eneri 'Yesusti Nia Mangkina Saelbamsil' aro ambarelamsinne sik sembal. Ane sembe na sae pere agha Yesusti el yan wali nembalul,” sembaog.
ACT 14:10 Paulusti wene sembaogti, nimi enekoag yubu mikip uro lelamogti, “Yan mikip uro sekelabi,” seogpa, nimi eneko lopnagha sekelabiogti, pang yang ulamog.
ACT 14:11 Sekogti, pang yang ulamogha nimi maikno tanekori Paulus sae pere agha nimi taneko wali taogha ibekti, “Nimiri uanep komne uarang,” alamek. Alamekti ibek nimi tanekori Likaonia yubuag haum aro nimi ambarelamsiekti, “Phia phalamsiapne imag wamanga nimi saog tarangdi, so'oag yingkina ulamdang,” alamek.
ACT 14:12 “So'oag yingkina ulamdang,” alamekti, Barnabas sembe “Nuri phalamap phia,” aro si Zeus engkaekti, Paulus babe, “Yubu maiknoro ambarelamsildi, yubu tiplamla phia,” aro si Hermes engkaek.
ACT 14:13 Wene aro engkahiekpa, as Lystra leka kanero solingkirobag paiag sip ina peramag, Zeus pharobag mem ae soroba soropne wamog. Zeus pharobag mem ae wamoghag memne Zeus sembe pairopne ponekori as Likaonia nimiri wene alameka ka'ebaog. Ka'ebaogti, pham sapi yemneog tobogti, uwong-uwonga kal es agha lomoro pham sapi tanekoag kwiria elekahiogti, “Zeusap Hermesap pham sapi oro phalamsukap,” aro nimi maiknoapti as leka solingkirobag ina siram peramag yagto payalamsiek.
ACT 14:14 Undo unulameka Allah Eldamne Yame Walingeri wepto pogsiognang Barnabasap Paulusapti ka'ebarekti, eltarek. Eltarekti, “Sindi mema phalamangne nene uanep komne ulamang,” aro Barnabasap Paulusapti ag enekto amdekne taepto epsirekti, nimi maikno nusamag lopnagha wa'irek. Nimi nusamag wa'irekti, yubu lelamdekti,
ACT 14:15 “Nangkabo, nene sa'a agha ulamlom? Nu nimi a'un saog uro so'oag nimi wamnam. A'unag yanomonge, '”A'undi teba'en uroba lebe arop komne phalamlomne lipsumundi, wailag nembamundi, Allah ya'ag kamag wamlange im, so'o, mag nia mangkina wamlange sumbaogne ponekoag wanaag seneraglamlulom,” aro yubu walinge ambarel ahanunam,' aro yanomo.
ACT 14:16 Samen a'unisagyabo wamek ko'oag Nuni Allahri, 'Nimi niri mem pharoba a'ero ubu pilamlange mem phalamsik,' aro lipsiog.
ACT 14:17 Lipsiog aghana, mog so'o sukupnange imag agha mag pelengkarelamsildi, so'oag wamlange mauroba li tarelamsildi, a'un kwaneng tenaba tarelamsildi, wana yeng wali nenelamsildi, El wamlange tognop tan koma walia aghabog ulamla,” aro ambatsirek.
ACT 14:18 Wene aro ambatsirek aghana yubu ambatsirekne ingisaplobekti, “Sin phendeag mem phaphaukap,” aro ulamekpa, nen sap sarikto-sarikto “Karong,” alamdek.
ACT 14:19 Wamekpa, as Antiokhia nimiap as Ikonium nimiap Yahudi nimi wamekne as Listra yaekti, as eneko wamek nimi yubu yangaro wana tolamsiekti, limilamsiek. Limilamsiekpa, as enekoag wamek nimi sinag sip talamekti, Paulus kirikti obek. Obekti, “Ya'ag tebal,” aro kiliro asag poa lambaekti, paiag sip toltoghol piek.
ACT 14:20 Toltoghol piek aghana elkabo Yesus yubu ka'ero ulamek nimi taneko longoro kanekto sekamekpa, Paulus pukogti, sekogti, nen as enekoag samoro wa'iog. Wa'iogti, mabogha kwelekaogne elkae Barnabasap nhon Derbe pirek.
ACT 14:21 As Derbe pirekti, Paulusap Barnabasapti nimiag yubu walinge Yesus sembe ambarelamsirekpa, nimi maiknori sik uro seneraglamekti, Yesus yubu ka'ero ulamek nimi as Derbe wamekne maikno talamek. Maikno talamekpa, nen samoro as Listra inagha, as Ikonium phibom agha, Pisidia so'oag as Antiokhia palamdekag agha, Yesusag “Sikne” aro seneragtop nimi winil talamekag wa'alamdek. As a'ero-a'ero winil talamekag wa'alamdekag agha Paulusap Barnabasapti winil talamek nimi anabiag agha sikindoyabo wenehiropnang weplamsirekti, “Nimi taneko o'olamsululom,” aro sekililamsirek. Sekililamsirekti, kwaneng tero koma molona Yesusag mololamdekti, “Nuro Yesus, nu nimi ni saelbamsilam. Nimi wenehiropnang tanekori anag 'Sikne' aro seneraglamangba, andi arukna wamukangne, 'Wali sembamlulam,' aro ambatto mololangkeap” aro molbarek. Wenehiropnang weplamsirekne tanekoap Yesus yubu ka'ero ulamek nimiap wenelamsirekti, “Wene Yesusag 'Sikne' aro wanaag seneraglamlomne nene wali. Wana phende seneragseng kom,” aro nimi Yesus yubu ka'ero ulamek nimi wenelamsirek. Wenelamsirekti, “Maiknoro seklelameberi, wana nhonog uro wamebe tanena Allah Eldamneri wali uro paia saelbamsilul,” aro ambatsirek.
ACT 14:24 Undo unuarekti, palamdeka Pisidia so'o inagha mog so'o Pamfilia yarek.
ACT 14:25 Pamfilia yarekti, so'o eneko as Perga wamek nimiag Yesus yubu ambatsirekti, as Atalia mag laut longoropne abolag yarekti,
ACT 14:26 kabong nhonag wa'albarek. Wa'albarekpa, kabong pabiropnang tanekori ag kabongag kerekaekpa, “Phoanari ko'oro pabalamlul,” aro kerektop ag towalengkaekti, mag alip toman agha as Antiokhia Siria so'oag yarek. As Antiokhia nimiri, “Allah Wana Waliri piamsileba, Yesus yubu ambarelamsururom,” aro aneko samenag pogsiekpa, alnibarekti, ambatoba tongkahirek. Ambatoba tongkahirekti, Paulusap Barnabasapti, “Nunag 'Ambarel phururom,' aro pogsiongne neneko komopto uitnam,” aro nen sap alnibarekag aneko samoro yarek.
ACT 14:27 Yarekti Yesusag “Sikne” aro seneragtop nimi poloro winiptaekpa, ambarelamsirekti, “Allahri yeplamsiori, uabongena Yahudi sisa komnang sembe babe Allahri ina kupsioba, sin babe Yesusag sik uro seneraglamang,” aro ambarelamsirek.
ACT 14:28 Ambarelamsirekti wamdekpa, Yesus yubu ka'ero ulamek nimiap ma'aro wamekti, ik ko'o maiknoro wamek.
ACT 15:1 As Antiokhia Siria so'oag wamekpa, mog so'o Yudea nimi as Antiokhia piek. Piekti, sin Antiokhia nimi Yesusag “Sikne” aro seneragtop nimi taneko ambarelamsiekti, “Allahri samenag, 'Nengabo ni, “Allahap ma'ap taukap,” aro kon kareplamukang,' aro Allahri Musaag ambarogpa, yubu tipto mome toro pibog. Musari mome toro pibogpa, nu Yahudi nimiri salero ul palamapne sunsunum uro nengabo kon kareplamukang. Kon karebaik kom tanena Yesusti kon kareptop kom nimi taulbahilul kom,” aro ambarelamsiek.
ACT 15:2 Wene aro ambatsiekpa, Paulusap Barnabasapti, “A'undi lelamlomne nene orolena lelamlom,” aro Yudea so'o agha yaek nimiap yubu maiknoro leldalamek. “Nelagha sikne,” aro yubu maiknoro leldalamekpa, Yesusag seneragtop nimi as Antiokhia winil dalamek nimiri Paulusap Barnabasap Yesusag “Sikne” aro seneragtop nimi etpareap wepsiek. Wepsiekti, “A'un as Yerusalem pululom. Pimundi ualulomne ane, a'unap, Yesusti samen wepto pogsiognangap, Yesusag seneragtop nimi as Yerusalem winil talamang nimi sikindoyabo wenehiropnangap haiptamundi, 'Nengabo kon kareptanep tam ene karebaukap,' aro as Yerusalem pululom,” aro pogsiek.
ACT 15:3 Wene aro pogsiekpa, Paulusap, Barnabasap, sikin kabo nhon palamek nang tanekoapti as Antiokhia agha lambaekti, Fenisia so'o inagha Samaria so'o inagha palamek. Sin palamek abeneko pere nimi so'o eneag wamekne wana heklamsirekti, “Yahudi sisa kom nimi Allah yubu ekon aghana Yesus sembe ka'elamangdi, Elag 'Sikne' aro seneraglamang,” aro uro yabiogne sembe ambare-ambare palamsiek. Ambare-ambare palamsiekpa, Yesusag “Sikne” aro seneragtop nimi ina palamekag wamekne ka'ebaekti, “Sin Yahudi sisa kom nimi Allah yubu ekon nang wali Yesusag seneraglamang,” aro awi yeng maikno senelamek.
ACT 15:4 As Yerusalem piekpa, Yesusti samenag wepto pogsiognangap, Yesusag “Sikne” aro seneragtop nimi winil talamek nimiap, sikindoyabo wenehiropnangap, wamekne tanekori sin piekne enero poa wa'isiekti, kipsiek. Kipsiekpa, sindi ambarelamsirekti, “Allahri nu pere awe welamoboba, Yahudi sisa kom nimi Allah yubu ekon nimiri Yesusag 'Sikne' aro seneraglamang,” aro ambatsirek.
ACT 15:5 Wene aro ambatsirekpa, Yesusag sikne aro seneragtop nimi taneko ka'ebaek. Ambatsireka ka'ebaek nimi anabiag wameknena, seneragna nhon uro seneragtop nimi kong nhon ma'aptangtop nimi Yahudi Farisi nimi alameknang wamek. Farisi nimi taneko agha nimi etpare sekekti, yubu lelamekti, “Yahudi sisa kom nimi Allah yubu wali ka'ebaek aghana, Yesusag seneraglamang tanena, sindi babe nengabo kon karebel talamukang. Kon karebel talamikpa, aruklamsibenge, 'Samenag Allahri “Ualulom,” aro ambarogne Musari yubu tipto mome tobogne ni sunsunum uro ul palamsut,' aro ambatsukap,” seek.
ACT 15:6 Wene seekne sembe Yesusti samenag wepto pogsiognangap, wenehiropnang tanekoap winiptaekti, “Yahudi sisa kom nimiri nengabo kon karebel talamukang to, kom to? Musari Allah yubu tipto mome tobogne ni sunsunum uro ul palamukang to, kom to?” aro tam nene sembe yubu lelamek.
ACT 15:7 Yubu tam neneko sembe ko'o olog maiknoro sin mamun lero libekti, Petrus sekogti, ambarelamsiogti, “Nangkabo, Yesusag 'Sikne' aro seneragtop nimi wamap. Samenag wamububa, Allahri seneraghogti, 'Yahudi sisa kom nimiri yubu walinge Yesus sembe ka'ebaikti, Yesusag “Sikne” aro seneraglamukang,' aro Allahri a'un anabiag agha na wepneog. Wepneogpa, yubu walinge ane Yahudi sisa kom nimi tipto ambarelahisi. Samenag uro yabiogne ane sembe ni el wamlom.
ACT 15:8 Allahri nimi wana kemelamsilne ponekori Eldamne Yame Walinge nu tatsiog. Nu Yahudi nimi agha Yesusag seneragtop nimi tatsiog saog uro sin Yahudi sisa kom nimi babe tarelamsiogti, 'Namabo taukang,' sembaogne kembatsiogpa, nu eltabu.
ACT 15:9 Allahri 'Nimi tane Yahudi sisa nimi to, kom to?' semban koma, Yahudi sisa kom nimiri wanaag agha Yesusag “Sikne” aro seneraglameka Allahri kemelamsiog. Kemelamsiogti, sembenga sindi wanaag wamogne Allahri lupsiogpa, wanaag sik urop nimi taek.
ACT 15:10 Allah Eldamneri undo unuaogne sembe a'un ni el wamlom aghana, sa'a sembe a'undi, 'Allahri uaogne wali to, kom to?' aro miplamlom? Tam ikinne sin Yahudi sisa kom nimi Yesus yubu ka'ero ulamang nimi taneag palilamsilom. Nunisa yabori babe nuri babe wali uro ulbinep kom bog, sa'a sembe sin sa'oag ikinne palilamsilom?
ACT 15:11 Undo unuaheng kom. Nuri wanaag seneraglamapnena, 'Yesusti Nia Mangkina Saelbamsilne ponekori nu Yahudi sisa nimi wana waliri piamsildi, nu taulbahiog saog uro, sin Yahudi sisa kom nimi babe wana waliri piamsildi, talulamsil,' aro wanaag seneraglamap,” aro ambatsiog.
ACT 15:12 Wene aro ambatsiogpa, winil talamek nimi taneko yubu koma wamek. Wamekti, ka'eamekpa, Barnabasap Paulusapti, “Samenag Yahudi sisa kom nimi yog asag nimiap nhon wamoboba, Allahri nu yeplamsioba, 'Allahri sin pere agha ual,' senenne kekneba nimiri uanep komne Allah Eldamneri uanepne, undo-undo uanomo,” aro ambatsirek.
ACT 15:13 Abeneko komopto ambatsirekpa, Yakobusti sin winil talamek nimi anabiag sekogti, yubu lelamogti, “Nangkabo yubu lemnunne ka'eamlulom.
ACT 15:14 Yahudi sisa kom nimi Allah yubu ekon nimi o'ona sembamsiogti, 'Namabo taukang,' aro samenag Allahri wepsiogne sembe wene abeneko Simondi ambatsil.
ACT 15:15 Leplange nene samenag Allahri yubu silimu tiptopnang tanekori mome toro pibekne sunsunum uro ambatsil. Samenag Allahri yubu silimu tiptop nimiri mome toro pibekne pere agha, 'Allahrina,
ACT 15:16 “Na samoro yaneri, Daudti ae kalun ae kwerek taog ae eneko meneng ae ene agha ae soro ae walinge wendogne saog urop ae soro sekitnun.
ACT 15:17 Sekitneba, 'Yahudi nimi pogto wamikneap, Yahudi sisa kom nimiapti Na Im So'o Ngainge wamnange elamniikti, Nari si lero seneraglamnikpa, Naringe taukang,' aro Daudti ae kalun ae kwerek taogne nen ae soro sekitnun,” aro Allahri ambatsiog,' aro mome toro pibog. Undo mome toro pibogpa, samenag agha 'Undo uro yabilul,' aro nimiri ka'ebaekti, el taek.
ACT 15:19 Undo Allahri, 'Daudti ae kalun ae wendogne saog urop ae soro sekitnun,' aro ambatsiogne ane sembe, nari mo kareplamnange lemnuan. Yahudi sisa kom nimiri Allah yubu ka'elamekti, samenag Allahag seneraglamek kom aghana, wene Yesusag seneraglamang. Wene Yesusag seneraglamang nimi taneag tam ikinne pibukap kom sembamna.
ACT 15:20 Tam ikinne Yahudi sisa kom nimiag pibukap kom aghana, samenag agha nimi as ni wamek nimiri Musari mome toro pibogne sembe ambarelamsiekpa, ka'elamek. Wene babe Allah yubu lerop sum talamlaba, Yahudi nimiri sop-sop Allah yubu lerop aeag wa'alamangdi, Musari mome toro pibogne lelamang. Ane sembe, Yahudi sisa kom nimi Yesusag 'Sikne' aro seneragtop nimiag ambatsukapnena ane: '”Lebe aroba eneng la'imbaleag,” aro homamanga lepto oroba sopap, enengap telamlulom kom. Eneng lambaleba, sop agha telamlulom. Ora nimiri, “Phia sembe phabaukap,” aro lebe aroba sop palilamikti, mektop sop babe yoro tarelamsiikpa, telamlulom kom. Apna, nengaboap kelaboapti, “Yog nimiri kelabo nengabo sembe naringe og wamso,” aro wanaag seneragmundi, saelbahiseng kom,' aro mome toro pibeberi, yubu ambatsukap,” aro Yakobusti ambatsiog.
ACT 15:22 Yakobusti wene aro ambatsiogpa, Yesusti wepto pogsiognangap, Yesusag 'Sikne' aro seneragtop nimi as Yerusalem winil talamek nimiap, sikindoyabo wenehiropnangapti, “Yakobusti leplange wali,” sembaek. Wali sembaekti, “Paulusap Barnabasap nhon as Antiokhia piik nimi ebahukap,” aro yubu lebekti, Yudas si nhon Barsabasap, Silasap wepsiekti, pogsiek. Sin phende wepsiekne abeneko sembe Yesusag seneragtop nimi tanekori, “Nimi nubunge wamdang,” senelamek.
ACT 15:23 Sin phende abeneko poglamsiekti, mome toro sin saeag pibeknena ane: “Nun Yesusti wepto pogsiognangap, a'un kabo Yesusag seneragtop nimi Yerusalem wamapneap, sikindoyabo wenehiropnangapti, a'un kiplamsiap. Yahudi sisa kom nimi aghana Yesusag 'Sikne' aro seneraglamlomne as Antiokhia wamlomneap, mog so'o Siria wamlomneap, mog so'o Kilikia wamlomne sembe nuri a'un kiplamsiap.
ACT 15:24 Nun yubu ka'ebabongena, nu nungkabo anabiag agha samenag, nuri babe sin pogsin koma samenag a'unag yaongneri ambarelamsiongdi, a'un wana samsamolopsiongdi, tam ikinne pibong.
ACT 15:25 Ikinne pibongne ane sembe nuri ka'ebabori, nu ma'aro wamobori, yubu nikne lebobori, 'Nungkabo walinge Barnabasap Paulusap nhon pululom,' aro nimi phende ero wepsibori, poghol alamsiap.
ACT 15:26 Paulusap Barnabasap abeneri 'Allahri, “Saelbamsululam,” aro wepto poghol aogne poneko Yesus si nubu talul,' aro Yesus sembe ambarelamsirang. Ambarelamsirangne sembe ora nimiri, 'Ya'ag opsukap,' aro ulamsiong aghana, ta'ap sen koma Yesus sembe ambarelamsirang.
ACT 15:27 Samenag nimiri a'un wana samsamolopsiongne ane sembe, nuri nimi phende 'Barnabasap Paulusap nhon palamukang,' aro wepto poglamsiap nimina, Yudasap Silasap a'unag yarikpa, mome ane palilamapne kembamunne sunsunum uro sindi pamag agha babe yubu nikne ambatsurukang.
ACT 15:28 Ambatsurukangnena Allahri, 'Tam ikinne Yahudi sisa kom nimiag piplulom kom. Ot nimiri unuaukang kom senenne sembe ambatsululom,' aro Allahri Eldamne Yame Walingeri senelamlange nunag taoba, el tabori, yubu lelbang-bang mome ane palilamap. “Lebe aroba eneng la'imbaleag,” aro homamanga lepto oroba sopap, enengap telamlulom kom. Eneng lambaleba, sop ane telamlulom. Ora nimiri, 'Phia sembe phabaukap,' aro lebe aroba sop palilamikti, mektop sop babe yoro tarelamsiikpa, telamlulom kom. Apna, nengaboap kelaboapti, 'Yog nimiri kelabo nengabo sembe naringe og wamso,' aro wanaag seneragmundi, saelbahiseng kom. 'Teheng kom uaheng kom,' aro palilamapne nene saelba wapmunba, a'un wali wamlulom. Nangkabo ot abenda ambatsiap,” aro mome tobek.
ACT 15:30 Wene aro mome tobekti, “Wali pululom,” aro kipsiekpa, sin pogsiekne abeneko as Antiokhia piekti, Yesusag “Sikne” aro seneragtop nimi poloro wimbahiekti, mome aneko tatsiek.
ACT 15:31 Mome aneko tatsiekpa, kembaekti, “Wana aingnirop yubu nu sembe pipsiong,” aro as Antiokhia nimi taneko sin awi yeng sembaek.
ACT 15:32 Yudasap Silasap abeneko Allahri yubu silimu tiptop nang wamdekti, Yesusag “Sikne” aro seneragtop nimi taneko yubu ambatto wana aingniro poa tongolamsirek.
ACT 15:33 Sin phende abeneko Allah yubu ambarelamsiekti, as Antiokhia sae a'iliro wamekpa, as Antiokhia Yesusag “Sikne” aro seneragtop nimi tanekori wana wali uro lelamekti, “A'unkabo poghol ahiong nangag nen samoro pimundi, nuri sin sembe 'Nungkabo,' aro kiplamsiapne ambatsululom,” seek.
ACT 15:34 “Pululom,” seek aghana, Silas nenekori, “Na a'unap wamukap,” seogti, ta'ap seog.
ACT 15:35 Ta'ap seogpa, Paulusap Barnabasap abeneko babe as Antiokhia olog maiknoro wamdeka sinap nimi maikno orangeapti, yubu walinge Nia Mangkina Salehiropne Yesus sembe tibin nenero ambarelamsiek.
ACT 15:36 Ambatto wameka Paulusti, Barnabasag yubu lelamogti, “Nuri samenag Nia Mangkina Salehiropne Yesus yubu ambarelamsinumu asag nungkabo Yesusag 'Sikne' aro seneragtop nimi 'Wali wamang to, kom to?' aro kemeroa yabuhununam,” seog.
ACT 15:37 Wene seogpa, Barnabasti, “Nun kae Yohanes, si nhon Markus babe nhon pukap,” seog.
ACT 15:38 “Nhon pukap,” seogpa, Paulusti, “Yohanes Markus nimi enena samenag nunap nhon pibo aghana, as Pamfilia wamoboba, elna awe lilobi agha nu laplobi agha samoro yao. Ane sembe, nen elap nhon pukap kom,” seog.
ACT 15:39 Wene seogpa, Paulusap Barnabasap su'ahel yo uro leptekti, a'eptarekti, Barnabas nenekori Markus enero agha kabong mag alip toman inagha mog so'o Siprus pirek.
ACT 15:40 Paulus nenekori babe Silas enero agha “Pununam,” seogpa, elkabo Yesusag “Sikne” aro seneragtop nimi tanekori Nia Mangkina Saelbamsilne ponekoag mololamekti, “Wana wali uro piamsululam,” aro molbaek.
ACT 15:41 Wene aro molbaekpa, Paulusap Silasap lambarekti, mog so'o Siria inagha mog so'o Kilikia palamdekti, Yesusag “Sikne” aro seneragtop nimi winil talamek nimi mikip nenero poa palamsirek.
ACT 16:1 Paulus palamogha as Derbea nen as Listra piog. Ae Listra anekoa palamogpa, nimi nhon Yesus yubu ka'ero ulamog nimi nhon si Timotius wamog. Timotius ilinna Yahudi kel, Yesusag seneraglamog kel wamogpa, Timotius ili ponekona Yunaninge wamog.
ACT 16:2 Yesusag “Sikne” aro seneragtop nimi as Listra wamek nimiap as Ikonium wamek nimiapti, “Timotius wana wali” alamek.
ACT 16:3 Wene alameka Paulusti ka'ebaogti, “Timotius enero poa nhon pukap,” sembaog aghana, Yahudi nimi as enekoag wamek nimi tanekori, “Timotius neneko ili Yahudi sisa nimi komdi, Yunaninge wamla,” aro ni el wamek. Timotius ili Yunaninge wamogne sembe, Paulusti, “Timotius kon karebaikpa, nhon pukap,” seogpa, Timotius kon karebaek.
ACT 16:4 Paulus elkaboap as taneko ni kanero palamekti, Yerusalema Yesusti wepto pogsiognangap Yerusalem wamek nimi Yesusag seneragtop nimi wenehiropnangapti yubu tam karepto pibekne as taneko ambatto poa tongolamsiekti, “Undo ul palamlulom,” aro ambarelamsiek.
ACT 16:5 Ambatto poa tongolamsiekpa, Yesusag seneragtop nimi winil talamek nimi ka'elamekti, mikip uro Yesusag “Sikne” aro seneraglamekti, nimi maikno talamek.
ACT 16:6 Paulusap elkaboap palamekpa, Allah Eldamne Yame Walinge nenekori, “Asia so'oag wamang nimiag Yesus yubu ambatsiseng kom,” aro pat pibogpa, ina palamekne mog so'o Frigia Galatia so'oag piek.
ACT 16:7 Mog so'o Misia simbik palameka, “Mog so'o Bitinia pukap,” aro ulamek aghana, Yesus Eldamne Yame Walinge nenekori, “Bitinia peheng kom,” aro irikahiogpa, Misia so'o phiro as Troas piek.
ACT 16:9 Troas piekti, Paulus ae inipnag malamogti, haing uamna kwelekamna senenag agha lenda malamog abeneko pere nimi mog so'o Makedonia nimi nhon sekamogha tibog aog. Tibog aogpa, Makedoniange ponekori, “Mag alip toman kauro yamendi, nu Makedonia nimi yepsululam,” aro mololamogpa, lenda mabog.
ACT 16:10 Paulusti lenda undo mabogne sembe nu ambatsiogpa, tam kareplamuburi, “'Makedonia nimiag pimundi, yubu walinge Yesus sembe ambarel phululom,' aro Allahri ambatto nu yoplamsil,” sembabu. “Allahri nun yoplamsil,” aro seneraglamuburi, “Elem-elem mog so'o Makedonia pukap,” aro togna toglamubu.
ACT 16:11 Togna togto aburi, Troas laplobi agha kabong lomag agha palamubunge peket aro as sina Samotrake pina mabubu. Mabubua kwelekaogpa, Neapolis inagha as Filipi pibu. As Filipi as nubunge neneko Makedonia so'oag agha Roma nimiri samenag nimi taneko luknubahiekti, Roma nimiri ul palamekne sunsunum uro saelbamsiek. As Filipi anekoa sae a'iliro wamubu.
ACT 16:13 As Filipi wamuburi, Yahudi nimiri Allahag yubu lerop sum taogpa, “Yahudi nimiri mag abolag winil dalamangdi, Allahag molona mololamang, to,” aro el pukap sembabu. El pukap sembaburi, as Filipi leka kanero solingkirobag ina siram lambaburi, mag abolag palamububa, kelabo longoro wamekag piburi, pukubu. Pukamububa, kel nhon si Lidia as Tiatira kel wamog. Wamog kel enekori ag walinge nimi nubunge tupne sembe wirop ag uwong-uwonga likto ulamogti, kel eneko Yahudi kel kom aghana Allah omektop kel wamog. Elap kelabo tanekoap yubu saro wamubu. Yubu saro wamububa, Lidia kelenekori babe yubu ambatsibunge ka'eamsiog. Paulusti Yesus sembe yubu ambarelamsiog abeneko Nuni Allahri keleneko wana heklamogpa, Yesusag “Sikne,” aro seneraghogti, yubu ene saelbamog.
ACT 16:15 “Yubu ene sik,” sembaogti, saelbamogpa, kelenekoap eldi aeag wamek nimiap ni maghag pelengkahibu. Maghag pelengkahibuba, Lydia kelenekori nunag ambarelamsiogti, “Nia Mangkina Salehiropne Yesusag 'Sikne' aro seneraglamna. A'undi na sembe, 'Kel eneri sik uro Yesusag seneraglamla,' sembamun, tanena nanap nhon wamukap,” aro yubu mikip uro enero eldi aeag tobongkipsiog.
ACT 16:16 As Filipi wamubuag agha kel nhon el kulomag phia wamog kel wamog. Kel enekona, amik uro yabinepne ililamog kel, ili yabo arukna saog uro wamog. Wamogpa, nimiri kel enekoag yalamekpa, kel enekori, “Anag undo uro yabilul,” aro ambarelamsiogpa, el talamekti, kamna ili yabo tarelamsiekpa, ili yabo tup talamek. Ik nhon sum, “Yahudi nimiri mag abolag Allahag molona molorobag pukap,” aro palamububa, keleneko haiptaburi, nu Paulusap amik sare nelepto yalamogti, haum aro lelamogti, “Nimi tane Allah Mikip Phelektopne arukna wamang ane sembe, sindi yubu ambarelamsiangne ka'elapmunba, Allahri a'un taulbahilul,” aro yubu leple yalamog.
ACT 16:18 Undo yubu wene alamogha ane, nu pang-yang ulamububa, yubu wene alamog aneko sae a'ilin talamog. Ik nhon sum, yubu wene alamogha aneko sembe Paulusti wanaag yo uaogpa, samoro keleneko kembaogti, phia keleneko kulomag wamogha anekoag yubu lelamogti, “Allahri 'Saelbamsululam,' aro wepto poghol aogne Yesusti el mikipne nunag pipsiogpa, lemnuan. Phia kelene kulomag wamlama ane lambae!” seog. Wene seogpa, phia keleneko kulomag wamogha aneko lambaog.
ACT 16:19 Phia aneko kelenekoag wamogne neneko lambaogpa, ili yabo tanekori, “Phia aneko el kulomag ulamlari, 'Undo-undo uro yabilul,' alamlaba, kal ma'al maikno tarelamsiang aneko wene nen saelbaukap kom,” aro Paulusap Silasap sae salero, tam lelekto kemero kareptobag saelba uahirop nangag poa phiek.
ACT 16:20 Keleneko ili yabori tam lelekto kemero kareptobag poa phiekti, saelba uahirop nangag lolorop yubu ambarelamsiekti, “Sin Yahudi nimi taneri ambarelamsirangne nene, 'Ulamlulom,' alamdang aghana, nu mog so'o Roma nimi wamapti, ambarelamsirangne sunsunum uro uanep kom wamap. Nu as Filipi nimi Roma nimi umag wamapne wana mali nenelamsirangba, nimi taneri yanghang alamsiang,” aro lolorop yubu ambatsiek.
ACT 16:22 Wene aro ambatsiekpa, nimi maikno tanekori Paulusap Silasap sembe “Karong” alamsiekpa, nimi nubunang tanekori sikinipsabo saeag nembahiekti, “Sikininge ag enekto amtangne taepto epsimundi, nimi abene kameri opsululom,” aro ambatsiek.
ACT 16:23 Wene aro ambatsiekpa, kameri maiknoro taeplam-taeplam lopsiekti, kop aeag tolongkahiekti, kop ae yae uropne ponekoag, “Lambarikagtina, wali uro yae wamsululam,” aro ambarek.
ACT 16:24 Wene aro ambarekpa, kop ae yae ua uropne ponekori sin phende abeneko ae kolo lom nusamagneag nembahiogti, sindi yan kalag a'aruro kauplopsiog.
ACT 16:25 Yan kalag a'aruro kauplopsiogpa, wamekpa, ae inipna tomnusam taogpa, Paulusap Silasap abenekori Allahag molona mololamdek. Allahag molona mololamdekti, Allah omektop sepna seplamdekne nimi yogne kop aeag aneko wamekneri babe ka'eamsiek.
ACT 16:26 Allah omektop sepna seplamdekpa, ka'ebaekti, wamekpa, ae sa'uma nubunge nhon ulamog. Ae sa'uma ulamogti, ae eneko solamekti, yangkaek kirik maptopne pot-porolamog. Yangan kirik maptopne pot-porolamogpa, ina siram kuptangto palamogpa, kop aeag tobongkamsiek nimi yan sae haing kaubamsiekne loptangto palamog.
ACT 16:27 Ae sa'uma aneko ulamog abeneko kop ae yae ua uropne poneko malamogha pukog. Pukogti, kemelamogpa, ina serekna serekahiogne taneko ni kupto wamogha kembaogti, “Nimi ni tobongkahiongne lambang,” aro log sembaog. Log sembaogti, karog kilbaogti, “Ya'ag optanun,” aro ulamog.
ACT 16:28 “Optanun,” aro ulamogpa, Paulusti, yubu nubu uro lelamogti, “Optaheng kom. Nuna ni ae lomag ane wamap,” seog.
ACT 16:29 Undo wene seogpa, kop ae yae ua uropne ponekori, “Whea tarelanuhu,” aro ilipsabo arukahiogti, ae lom enekoag wa'iogti, pet-pet aro Paulusap Silasap sin whingag yabu sanukto pulingkiog.
ACT 16:30 Yabu sanukto sin whingag pulingkiogti, sekom agha Paulusap Silasap enero poa asag lambahiogti, hailamsiogti, “Nani yabo, malia ulamnange sembe, 'Allahri lunuro opneleag,' aro na huaneba taulbanelul?” aro haibahiog.
ACT 16:31 “Na huaneba, taulbanelul,” aro haibahiogpa, sindi samoro elag lelamdekti, “Nia mangkina Salehiropne Yesus ponekoag 'Sikne' aro seneraglapmunba, anap ankabo andi aeag wamangneap taulbahilul,” aro ambatek.
ACT 16:32 Wene aro ambatekti, elap ilipsabo eldi aeag wamekneap Nia Mangkina Salehiropne Yesus sembe yubu ambarelamsirek.
ACT 16:33 Ambarelamsirekpa, kop ae yae wamogne ponekori inipnag abeneko sin phende opsiek ina taneko mag a'elbahiog. Mag a'elbahiogpa, eldi kelabo me wamekneap eldi aeag wamekneapti Yesusag seneraglamekne sembe maghag pelengkipsirek.
ACT 16:34 Maghag pelengkipsirekpa, Paulusap Silasap abeneko enero poa kop ae yae wamogne ponekori aeag poa phiogti, kwaneng yobatsiog. Yobatsiogpa, teekti, wamekti, elap ilipsabo aeag wamekneapti, “Allah yubu ambatsirangba, sik senelamapti, salelamap,” aro awi yeng senelamek.
ACT 16:35 Kweleknag aneko as Filipi aneko nimi saelba uahiropnangdi sikinipsabo poglamsiekti, “Kop aeag nimi yae ua uropne ponekoag pimundi, ambarelapmundi, 'Nimi phende nang abeneko sae lopsululam,' aro ambatlulom,” aro pogsiek.
ACT 16:36 Pogsiekpa piekti, ambarekpa, kop ae yae wamogne ponekori nen sap tipto Paulus ambarelamogti, “Nangkabo, nimi saelba uahirop nimi tanekori nanag, 'Sae lopsimenba, yubu lepseng koma lambarukang,' seangba, wali lambarurom,” aro ambatsiog.
ACT 16:37 Wene aro ambatsiogpa, Paulus nenekori saelba uahirop nang sikinipsabo yaek nimi tanekoag, “Nu babe Roma nimi wamnam aghana, tam oroghag agha sa'a sembe tam lelekto kemero kareptop nimiri nunag haibahin koma nimi maikno haingag agha opsiongdi, kop aeag tolongkipsiong? Opsiongdi, tolongkipsiong aghana, wene sa'a sembe tognoro saog uro 'Pururom,' seang? Nu tognoro saog uro lambanunam kom. Sindam nimi yaikti, nu enero poa lambitsukang,” seog.
ACT 16:38 Paulusti, wene aro ambatsiogne sindi yubu poro agha sikini yaboag piekti, yubu tipto ambatsiek. Ambatsiekpa, ka'ebaekti, as taneko nimi saelba uahiropnangdi, “Paulusap Silasap, sin babe Roma nimi wamdang, aghana tam lelekto kemban koma sin opsibo,” aro el taekti, log sembaek.
ACT 16:39 Log sembaekti, as Filipi saelba uahirop nimi nubu nang taneko Paulusap Silasap sin wamdekag piekti, “Wana aingniro lambarukang,” aro yubu wali uro lelamekti, ae kop aeag anekoa enero poa lambahiekti, “Nangkabo, as eneag laplobi agha lambarurom,” seek.
ACT 16:40 Wene aro ambatsiekpa, sin phende kop aeag agha lambarekti, kel Lidia kelenekori aeag pirek. Pirekti, sikin kabo Yesusag “Sikne” aro seneragtop nimi wana aingnibahirekti, Paulus elkabo abenekoap as Filipi aneko laplobi agha palamek.
ACT 17:1 As Filipi laplobi agha Paulusap elkaboap as Amfipolis inagha as Apolonia inagha palamekti, as Tesalonika piek. As enekoag Yahudi nimiri Allahag yubu lerop ae nhon wamog.
ACT 17:2 Allah yubu lerop sum taogpa, Paulus nenekori ora asag ulamog saog uro as Tesalonika anekoa babe Yahudi nimiri Allah yubu lerop ae enekoag wa'alamog. Wa'alamogti, Allah yubu lerop sum ik wilindi tibin nenero ambarelamsiogti, “Allah yubu samenag toro pirop mome kembi agha Allahri, 'Mog so'oag nimi taulbahimendi, saelbamsululam,' aro wepto poghol aogne poneko sembe nu el taap. Samenag mome toro pibek nimiri saeag agha undo uro yabilulne sembe Allahri ambarelamsiogne, 'Na Allahri wepto poghol anunne poneko mog so'oag yaleba, nimiri ya'ag obikpa, seklero tebaleri, nimi ya'ag teptopne nusamag agha kamag talul,' aro Allahri ambatsiog. Allahri, 'Mog so'oag nimi taulbahimendi, saelbamsululam,' aro wepto poghol aogne Yesus ponekoag uro yabiogne sembe ambarelamsin,” aro Paulusti ambatto wana heklamsiogpa, sindi “El tahabe,” aro hailamekne eldi tibin nenero ambarelamsiog.
ACT 17:4 Paulusti wene aro ambarelamsiogpa, Yahudi nimi etbareri “Paulusti ambarelamsilne sik,” senelamekti, Paulusap Silasap sae tiptangto ma'altalamek. Ma'altalamek nimi ane Yunani nimi Allah omektop nimi maikno babe, kelabo as Tesalonika kelabo sikinin yabo saog uro wamek kelabo maikno babe sindi, “Sik” senelamekti, Paulus elkaboap ma'altalamek.
ACT 17:5 Sin ma'altalameka kembi agha, Yahudi nimiri, “Nimi maiknori sin phende maiplamsiang,” aro wana yo senelamsiek. Wana yo senelamsiekti, Yahudi nimi tanekori ulamekti, malia ulamek nimi awe weroan koma ambengka uro urop nimi etbare sae kiliro topsiekti, “Put-put ana ulamukang,” aro Yahudi nimiri “Unulamlulom,” aro arukahiek. Wene aro arukahiekpa, put-put alameknang anekori as aneko nimi wana bobo nenelamsiek. Wana bobo nenelamsiekpa, as taneko nimiri “Yanghang alamsiberi, yag lambahukap” aro poloro winiptaek. Poloro winiptaekpa, Yahudi nimiap put-put arop nimiap tanekori, “Paulusap Silasap ero saelbahiberi, poloro winiptaang nimi saeag nembahukap,” aro sikinkae Yasondi ae kwerekto wa'iek.
ACT 17:6 Kwerekto wa'iekti kemelamsiekpa, Paulusap Silasap orog wamdekpa, sikinkae Yasonap Yesusag “Sikne” aro seneragtop nimi etbareap saelbahiekti, kiliro so'oag lelepto poa palamsiekti, nimi nubu nang as eneko saelbamsiek nang saeag tarel phiek. Yubu haum aro poa palamsiekti, “Mog so'o as tala-tala tam palilamdangba, yubu talamla nimi taneko wene nuri asag yingkilamdang,” alamekti kiliro pabalamsiek.
ACT 17:7 “Yasondi Silasap Paulusap kiliro nuri asag palilamsil. Roma nimi sembe yubu sia leropne nubunge Kaisardi yubu tam karepto pibog aghana, yarek nimi anekoap, sikinkabo tanekoapti philamang. Roma nimiri mog so'o wamap ane sembe, yubu sia leropne nhonog Kaisar wamla aghana, sindi ambarelamsirangne, 'Yubu sia leropne nubunge nhon Yesus wamla,' aro ambarelamsirang,” alamek.
ACT 17:8 Wene alamekpa, nimi maikno tanekoap nimi nubu nang tanekoapti ka'ebaekti, wana samsamolopsiogpa wamek.
ACT 17:9 Wana samsamolopsiogpa, wamekti, nimi nubu nang tanekori Yasonap Yesusag seneraglamek nimi tanekoabag lelamekti, “Kal ma'al nunag tatsumundi, aghabogna pululom. A'unkabori Yesus poneko yubu ambarelamsirangne ane sembe, 'Nunkabori nen yubu ane ambatsin koma nuri asag agha lambarukang,' aro salag pipmundi, kal ma'al tatsululom,” aro nimi nubu nang tanekori wene seekpa, kal ma'al tatsiek. Tatsiekpa, tobekti, “A'unungeag pululom,” seekpa, lambaek.
ACT 17:10 Lambaek sumeneko inipnag Yesusag “Sikne” aro seneragtopnang tanekori “Nangkabo, pururom,” seekpa Paulusap Silasap as Berea pirek. Aneko pirekti Yahudi nimiri Allah yubu lerop aeag aneko wa'irek.
ACT 17:11 Yahudi nimi agha as Tesalonika wamek nimi taneko wana yo nimi wamek aghana, Yahudi nimi agha as Berea wamek nimi wana aingnirop nimi wamekti, wanaag sol wali, wali uro Allah yubu ka'elamek. Ka'elamekti, “Paulusti Allah yubu ambarelamsilne nene sik to, kom to,” aro seneraglamekti, Allah yubu samenag toro pirop mome sop-sop lelekto kemelamek.
ACT 17:12 Berea nimiri, “Sik to, kom to?” aro Allah yubu lelekto kemelamekti, Yahudi nimi agha as Berea wamek nimi maiknori Yesusag “Sikne” aro seneraglamekpa, Yunani nimi sikinin yabo saog uro wamek nimi taneko babe, Yunani nimi kelaboap nengaboap sin maiknori Yesusag “Sikne” aro seneraglamek.
ACT 17:13 As Berea nimi maiknori Yesusag seneraglamek aghana, “Paulusti as Berea nimi Allah yubu ambarelamsil,” ana Yahudi nimi agha Tesalonika wamek nimi tanekori ka'ebaekti, “Paulusti yubu ka'ebaukang kom,” aro as Berea aneko piek. Piekti, put-put aro wana aluktop yubu ambarelamsiekpa, ka'elamekti nimi maikno sikin sip tangto “Paulusti ambarelamsilne karong,” senelamek.
ACT 17:14 Wene alamekne sembe ta'ap sen koma Paulus elkabo Yesusag “Sikne” aro seneragtop nimi tanekori mag longorop mag laut abolag sip poghol piekpa, Silasap Timotiusap agha as Berea aneko wamdek.
ACT 17:15 Paulus neneko elkabori enero poa as Atena pil piekti, yalamekpa Paulus nenekori, “Silasap Timotiusap menag-menag na amik yarukang,” aro yubu pibog.
ACT 17:16 As Atena aneko piogti, Silasap Timotiusap sembe nang-nangaro tibogto wamsiogti, as enekoag nimi saeri sunurop mema phalamekne maikno wamogha kembaogti, Paulus wana ikin sembaog.
ACT 17:17 Wana ikin taogne sembe, Yesus sembe ambarelamsiogti, eldi yubu ka'elamek nimiap sop-sop haibildalamekti, “El tahabe,” aro hailamekne tibin nenero ambarelamsiog. Yahudi nimiri Allah yubu lerop aeag wa'alamekti, Yahudi nimiap Yahudi sisa kom nimi Allah omektop nimi tanekoap Yesus sembe ambarelamsiog. As Atena nimiri nia mangkina pail wa'ina tolamekag babe Paulusti sop-sop palamogti, nimi pangyang ulamek nimi taneko wamekne babe ambarelamsiog.
ACT 17:18 Nimi etbare mome ambatsirop nang Epikurosti seneragtopne saelbamek nangap, Stoari seneragtopne saelbameknangap, Paulusap alniro yubu saro haibil talamek. Haibil talamekti, Paulusti yubu walinge Yesus sembe ambarelamsiogti, “Nimi teptopne kamag tanep,” aro wene seogne sembe, nimi taneko etbareri, “Nimi ene el wamlare? Eldi seneragna olog aghana yubu pam andari lelamla,” alamekpa, nen nimiri, “Nimi eneri mema ora mog so'oag nimiri phalamangne nu ekonne ambarelamsil, te?” alamek.
ACT 17:19 Wene alamekti, Paulus neneko tam kareptobag Areopagus yimag poa piekti, “Andi yubu tam wendogne lelamlamne nene nu babe ka'ebaukapti, nen ma'aro ambatsi,” alamek.
ACT 17:20 “Andi lelamlamne nuri aoag olog ka'elamabag agha lelamlamne nene sembe, 'Sa'a agha lelamla,' senelamap. Ane sembe, lag phoro ambatsisom?” alamek.
ACT 17:21 (As Atena wamek nimiap nimi ora asag agha sekelingkirop nimi tanekoap oraba uan koma yubu tam wendogne sembe ngagto ka'elamekti, wamek.)
ACT 17:22 Wamekti, “Ambatsisom,” alamekpa, Paulus neneko Areopagus yimag aneko poloro winil talamek nimi whingag sekogti, yubu lelamogti, “Atena nimi nangkabo, a'undi mema phalamlomne sol wali uro ulamlomne kemelamsin.
ACT 17:23 A'undi mema phalamloma tane sembe ina yabalamnori, mema pharobag nhon kemelamno. Kemelamnoba, mome toro piplumne lilimna ane: “Mema nimiri ekon uropne sembe,” aro mome toplumdi, mema pharobag ane piplum. A'undi mema ekon urop mema phalamlomne poneko sembe wene nari a'unag ambatsinun.
ACT 17:24 Allahri nia mangkina so'oag wamlange sumbaogti, im so'o saelbamsil. Im So'o Saelbamsilne poneko nimi saeri mem ae soropneag ua urop kom.
ACT 17:25 Imap so'oap sumbaogne ponekori nimi ni kamag nenelamsildi, hain tarelamsildi, ni nuri saeag wamlangena tarelamsilba, nu nimi mog so'oag nimiri, 'Imap so'oap sumbaogne poneko el teko wamla,' sembanep kom. Nuri saeag agha el yepnep kom.
ACT 17:26 Yum-yum samenag nimi nhon sumbaogneag agha nimi maikno likto palamogpa, nimi mog so'oag nimi likto piek. Nimi likto piekne taneko 'Nimi tala-tala wamikti, mog so'o to'op taukang,' aro Allahri nimi sumbahiog. Sumbahiogti, kareplamogti, 'Nimi mog so'o a'ero-a'ero wamukangne, tane nhon, tane nhon wamukang,' aro karebaogti, pipsiog. Apna, 'Nimi ane ko'o eneag wamlul, nen nimi li ko'o nhon likto pilul,' aro karepto pibog.
ACT 17:27 Allahri karepto pibognena, 'Nimi Na whing ebaneikti, mololamniikti, “Yepsi,” aro Nanag ebanukang to kom to,' aro Allahri undo unuaog. A'uni yabo nimi nubu nangdi sepna siplamekti, 'Nu mog so'oag nimi Eldi mangaro likto pipsiogne wamap. Ot Eldi saeag agha hain eplamapti, senelamapti, lebe alamap,' aro siplamek. Nu mog so'oag wamapne el wamlange weag wamla kom ane sembe, sae nginikto ulamebeba, el nunag lag talul.
ACT 17:29 Nu mog so'oag nimi Allahri mangaro likto pipsiogne wamap ane sembe, nimiri 'El imag uropne hain tarelamsilne poneko sunumna sumbaukap,' sembaheng kom. Leng-leng arobaap, kororopneap, wali kirikap tobiagha nimi saeri walia sunuroba taneko El imag uropne hain tarelamsilne poneko sunumna sumbanep kom.
ACT 17:30 Nu mog so'oag nimi limituk uro wamuburi, 'Hain tarelamsiogne poneko sunumna sumbaukap,' aro lebe arop komne agha sunulamubu. Sunulamubunge neneko sembe samenag Allahri, 'Sin ekondi, ulamangba, unulamik,' sembaogti, lipsiog aghana, wene Eldi nimi ni tala-tala wamang nimiag lelamlangena, 'Samenag malia ulamlumne lipsimundi, Nanag yalulom,' aro aruklamsil.
ACT 17:31 Allahri yubu pibogne, '”Sumeneko uanun,” sembamsinge sunsunum uro, nimi nhon wepto sekitsinge sae pere agha nimi ni mog so'oag uropne tam ua uropne porog uro tam karebanun,' aro yubu pibog. Wene aro yubu pibogne sembe 'Samenag malia ulamlomne lipsimundi, Nanag yalulom,' aro aruklamsil. 'Nimi nhon wepto sekitsinge,' seognena, 'Nimi ni, “Allahri Yesus ane wepto sekirog,” aro el taukang' senenag agha Allahri nimi teptopne nusamag agha Yesus poneko kamag nembaog,” aro ambatsiog.
ACT 17:32 “Nimi teptopne nen kamag tanep,” aro Paulusti ambatsiogpa, ka'ebaek nimi taneko pogtaek. Nimi nenne tanekori Paulusag og sobaek aghana, nen nimiri, “Nangkae, wene selamne nene sembe nen lepmenba, nu ka'ebaukap,” seek.
ACT 17:33 Wene seekpa, Paulus yubu tam kareptop nimi winiltalamekag aneko laploa lambaog.
ACT 17:34 Wene alamekag agha ka'ebaek nimi etpare Paulusag sip talamekti, wene aro ambatsiogne sembe Yesusag “Sikne” aro seneraglamek. Sin Yesusag “Sikne” aro seneraglamek nimina, Areopagus yimag tam kareptopne nhon sina Dionisiusap, kelabo nhon Damarisap, nimi etbareap sin sik senelamek.
ACT 18:1 Paulusap Atena olog wamekpa, Paulus neneko as Atena laplobiagha as Korintus piog.
ACT 18:2 Korintus piogti, Yahudinge nhon si Akwila haiptarek. Akwila poneko mog so'o Pontusne wamogti, as Roma sekilingkiog. Aghana Roma nimi salehiropne sina Klaudius yubu sia leropne nubunge ponekori, “Yahudi nimi as Roma tane wamseng kom,” aro as Roma agha yag lambahiog. As Roma agha yag lambahiogpa, Akwila elkel Priskilaap as Roma negara mog so'o Italia laplobi agha as Korintus yarekti, Paulusap haiptaek.
ACT 18:3 Paulus neneko sin wamdekag piogpa, sin elkel ela'ange abeneko babe, “Nu awe nikne, pham kon mektopne agha kalun ae sona ag wetnero sorop nimi wamap,” aro sin phenderi aeag nhon wamekti, awe nhon tolamek.
ACT 18:4 Wamekti, awe nhon tolamekti, Yahudi nimiri Allah yubu lerop sum yalamog tanena Paulus nenekori sop-sop Allah yubu lerop aeag wa'alamogti ambarelamsiog. Ambarelamsiogti, Yahudi nimiap Yunani nimiap “Yesusag seneraglamlulom,” aro ambatto wana heklamsiogpa, sindi “El tahabe,” aro hailamekne eldi tibin nenero ambarelamsiog.
ACT 18:5 Allah yubu lerop sum yalamog sumeneko Paulusti Yesus sembe ambarelamsiogti, wamogpa, Silasap Timotiusap mog so'o Makedonia agha yarek. Makedonia agha Silasap Timotiusap Paulus wamoghag yarekpa, Paulus ponekori ag wetnero tolamogne libogti, “Allah yubu nimi ambatsinunne aghabog uanun,” aro sol wali, wali uro ambarelamsiog. Sop-sop Yahudi nimi ambarelamsiogti, “Allahri 'Mog so'oag nimi taulbahimendi, saelbamsululam,' aro wepto poghol aogne Yesus nunag lag taog,” aro ambarelamsiog.
ACT 18:6 Paulusti ambarelamsiog aghana Yahudi nimi tanekori, “Yesus sembe ambarelamsilne nimiri ka'ebaheng kom,” aro ulamekti, Paulusap Yesusap san tiliplamsiek. San tiliplamsiekpa, Paulusti ag enektopne leng-lenga wamogne po'oro pelengkaogti, sinag yubu lelamogti, “Allahri opsileba, a'ununge eneng a'ununge usoghag timbale! Allahri awe nari saeag nembaneogne tolamnari, Yesus sembe a'unag samen yubu ambarelamsin ane sembe nanag tam pimnep kom. Wene anea lambaneri, Yahudi sisa kom nimi mog so'o yog nimiag ambarel phinun,” seog.
ACT 18:7 Wene seogti, Yahudi nimiri Allah yubu lerop ae anekoa lambaogti, ae anekoap tipto sorobag ae wamogne palamog. Ae ngainge si Titius Yustus wamogne poneko nimi sisa Yahudinge kom aghana Allah omeklamogne wamog. Paulusti Allah yubu lerop aeap tipto sorobag ae aneko alniro wa'alamogti, Yesus sembe nimi ambarelamsiog.
ACT 18:8 Ambarelamsiogne ka'elamekag agha Allah yubu lerop ae saleropne poneko si Krispus wamogneap, eldi ae lom nimiap Yesusag “Nia Mangkina Saelbamsil,” aro seneraglamek. Paulusti ambarelamsiogne sik senelamekti, wamekpa, Korintus nimi Yahudi sisa kom nimi maikno Paulusti Yesus sembe ambarelamsiogne ka'elamekti, sik senelamek. Yesusag “Sikne” aro seneraglamek nimi maghag pelengkahiek.
ACT 18:9 Ik nhon sum inipnag malamogpa, Paulus lenda saog uro haing uamna kwelekamna senenag agha Nia Mangkina Salehiropne ponekori elag yubu lelamogti, “Log kom uro ambarelamsululam! Yubu kom taheng kom!
ACT 18:10 Nari an piangken. Nimi naringe as eneag nimi maikno wamang ane sembe, tane wapmenne nimi nhondi babe yo uro saelbaghukang kom. Ona babe opkukang kom,” seog.
ACT 18:11 Wene seogpa, Paulus neneko as Korintus wamogti, Allah yubu ambarelamsiogpa, heng kun nhon wal no'op bare taog.
ACT 18:12 Heng kun nhon wal no'op bare taog aghana, nimi nubunge si Galio, “Mog so'o Akhaya saelbamlul,” aro towalengkaek li sin Yahudi nimi taneko ma'aptaekti, “Paulusag tam ikinne pibukap,” aro yubu tam lelekto kemero kareptop nangag poa piek.
ACT 18:13 Poa piekti, lelamekti, “Nimi eneri ekel ina Allah yubu ambarelamsildi, 'Undo-undo Allah omeklamlulom,' aro ambarelamsil aghana, nu Yahudi nimi nunisag Musari toro pibog momeap sunsunum kom uro ambarelamsil,” alamek.
ACT 18:14 Wene alamekpa, Paulus yubu lemnun agha ulamoghag agha, Galio ponekori Yahudi nimiag yubu lelamogti, “A'un Yahudi nimi nangkabo. Tam payalomnena, nun saelbamsiang nangdi samenag yubu sia pibekne phibao aro lemnepne wamsoba, ologne to, nubunge to payahom tanena, 'Wali payaangba,' aro karebahane.
ACT 18:15 Aghana tam payalomne nene yubu kiki sembe, nimi si sembe, samenag a'unisag yabori mome tobekne saelba ulamlomne sembe yubu leplomdi, payalomba tam nene nari karebanep komdi, a'un mo karebalulom,” aro Yahudi nimi taneko yubu tam kareptop aeag agha yag lambahiog.
ACT 18:17 Yag lambahiogpa, nimi tanekori Yahudi nimi nhon sina Sostenes saelbaekti, yubu tam kareptop ae ina siramag agha olamek. Sostenes poneko Yahudi nimiri Allah yubu lerop ae saelba uropne wamog aghana Sostenes olameka ipsiogti, Galio ponekori yubu olog lebog kom.
ACT 18:18 Paulus ik maiknoro Korintus wamogha Yesusag “Sikne” aro seneragtop nimi tanekoag, “Mog so'o Siria simbik pinun,” seogti, mag alip toman agha palamog. “Mag alip toman punun,” aro as Kengkrea piogti, Yahudi nimiri ulamekne sunsunum uro “'Allah arukna sol wali walinge wamnun' aro keknep uro yabalamne abeneko hong kareptop koma wamnea, wal nenekoag hong karebanukang,” aro salag pibogne sunsunum uro hong karebaek. Hong karebaekpa, palamoghag agha Priskilaap Akwilaap nhon palamekti,
ACT 18:19 as Efesus piek. Piekti Priskilaap ela'ange Akwilaap abenekori, “Nu tane wamnunam,” serekpa, Paulus nenekori, “Nen tipto palamnun,” seog. “Palamnun,” seog aghana, as Efesus olog wamogpa, Yahudi nimiri Allah yubu lerop aeag aneko piogti, Yahudi nimiap aneko Yesus yubu ambarelamsiogti, sindi “El tahabe,” aro hailamekne eldi tibin nenero ambarelamsiog.
ACT 18:20 Tibin nenero ambarelamsiogpa, Yahudi nimi tanekori Paulusag mololamekti, “An nunap olog tane wamebea,” aro molbaeka Paulusti “Kom,” seog.
ACT 18:21 “Kom,” seog aghana, “Pinun,” aro kiplamsiogne, “Amik Allahri nanag, 'Wali saombalulam,' aro ambatnele tanena amik a'unag samoro yanun,” aro kipsiog. Kipsiogti, as Efesus aneko laplobi agha mag alip toman agha as Kaisarea sip piog.
ACT 18:22 As Kaisarea sip piogti, mag abolag sekel piogti, “Yesusag 'Sikne' aro seneragtop nimi Yerusalem wamangne kipsinun,” aro waelbaogti, kipsiogti, as Antiokhia Siria so'oag kulukul aog.
ACT 18:23 As Antiokhia aneko pina wamogha, lanaro kemeroa yabalamsiogti, mog so'o Galatia inagha mog so'o Frigia inagha ni kemelamsiogti, Yesus yubu ka'ero ulamek nimi wana sindinge mikip nenlamsiog.
ACT 18:24 Paulus as Antiokhia lambaogti, mog so'o Galatia inagha mog so'o Frigia inagha Yesus yubu ka'ero ulamek nimi kemelamsiogpa, Yahudinge nhon si Apolos as Aleksandria mangkaekne poneko as Efesus yaog. El yubu lenna babe Allah yubu mome toro piroba babe yabo telekto wali uro elne yaog.
ACT 18:25 Samenag Nuni Allahag samoro pirop Ina Yesusti pa'abaogne sembe nimiri Apolos tipto ambarekpa, wana sol wali, wali uro Yesus sembe yeng uro sik uro ambarelamsiog. Sik uro ambarelamsiog aghana, ot samen Yohanesti maghag pelengelamsioghag agha ambarelamsiogne sembe aghabog Apolos el uro wamog. Amik Yesusag “Sikne,” aro seneraglamog nimi maghag pelengelamsiekne sembe ekon wamog.
ACT 18:26 Yahudi nimiri Allah yubu lerop aeag aneko Apolosti log kom uro alniro nimi ambarelamsiogha Priskilaap Akwilaapti ka'ebarekti, sindi poa sindi aeag pirek. Pirekti, yubu kiki telekto ambarelamdekti, “Allahri Yesus poghol aogneri mog so'oag nimi enero poa Allahag samoro payalamsil Ina pa'abaogne undo,” aro ma'aro ambatek.
ACT 18:27 Apolos, “Mog so'o Akhaya punun,” aro ulamogpa, elkabo as Efesus wameknang Yesusag “Sikne” aro seneraglamek nangdi, “Wali leplam,” aro mome toro sikinkabo Yesus yubu ka'ero ulamek nimi mog so'o Akhaya wamek nangag, “Nungkae Apolos a'unag yaleba, wali kiplulom,” aro mome toro pibek. Akhaya so'oag pioghag Allah Wana Walingeri wana heklamsioghag agha samenag agha Yesusag “Sikne” aro seneraglamek. Yesusag seneraglamek nimi Akhaya wamekag Apolos yaogti, maiknoro yeplamsiog.
ACT 18:28 Apolos neneko Akhaya so'oag yaogti, Yesus yubu ambarelamsiog. Ambarelamsiog aghana Yahudi nimiri, “Yesus Allahri poghol aogne kom,” alamekpa, Yahudi nimi tanekoap Apolos ponekoap wana yo uro nimi whingag leldalamek. Sinap leldalamekag agha, Apolosti yubu ambarelamsiogne nimiri wali ka'elamek. Apolos ponekori Allah yubu mome toro pibogne lelekto lag nenero ambarelamsiogti, “Yesus poneko Allahri 'Taulbahimendi, saelbamsululam,' aro wepto poghol aogne yaog,” aro ambarelamsiog.
ACT 19:1 Apolos poneko as Korintus wamogpa, Paulus poneko yim kelero palamogha as Efesus yaog. Efesus aneko nimi etbare “Yesus yubu ka'ero ulamap” senerop nimiap haiptaek.
ACT 19:2 Sinap haiptaekti, Paulusti sin wamek nimi abenekoag hailamsiogti, “A'undi Yesusag 'Sikne' aro seneraghaomba, Allahri Eldamne Yame Walinge a'unag tatsio, te?” aro haibahiogpa, sindina, “Kom. 'Allah Eldamne Yame Walinge,' selamne nenena ik nhon babe ka'elamap kom yubu agha leplam,” seek.
ACT 19:3 Wene seekpa Paulusti, “A'un maghag pelengkipsieknena, etneri yubu ambatsiogne sik sembalumneag agha maghag pelengkipsiek,” aro haibahiogpa, sindina, “Yohanesti yubu ambarelamsiogne ka'ebaburi, sik sembabuba, ambarelamsiogne sunsunum uro maghag pelengkahiek,” seek.
ACT 19:4 Wene seekpa, Paulusti yubu ambarelamsiogti, “Yohanesti mag sinag pelengelamsiognena, '”Malinge ulamlomne lipsimunba, Allahri, 'El amik yalul,' seogne ponekoag 'Sikne' aro seneraglamlulom,” aro nari maghag pelengelamsin,' aro Yohanesti maghag pelengelamsiog. Yohanesti, 'Amik yalul,' seogne poneko Yesus yanepne sembe lebog,” aro Paulusti ambatsiog.
ACT 19:5 Paulusti wene aro ambarelamsiogti, “Allahri 'Amik yalul,' seogne poneko si Yesus engeropne sembe lebog,” aro ambarelamsiogpa, Yesusti Nia Mangkina Saelbamsilne ponekoag “Sikne” aro seneraglamekne sembe Paulusti maghag pelengkipsiog.
ACT 19:6 Maghag pelengkipsiog nimi taneko nimi kaubuni aobare saog uro wamek. Paulusti aobare wamek nang taneko usoghag sae pipsiogpa, Allah Eldamne Yame Walinge sin nongag tahiog. Allah Eldamne Yame Walinge sin nongag tahiogne ponekori pam keagman nenelamsiogpa, Allahri tarelamsiogti, el nenelamsiog yubuag ambarelamsiek. Ambarelamsiek, aghana yubu ambarelamsieknena, Allah Eldamne Yame Walingeri yeplamsiogpa, yog nimiri yubu el tangom agha sin ekon urop yubuag agha lelamekti, ambarelamsiek.
ACT 19:8 Wene aro ambatsiekti, wamekpa, Paulus neneko Yahudi nimiri Allah yubu lerop aeag aneko log kom uro wal wilindi wa'alamogti, “Allahri mog so'oag nimi saelbamsilnena, undo-undo saelbamsil,” aro ambarelamsiog. “Ka'ebahut. Sik uro lelamna,” aro ambarelamsiogti, sindi “El tahabe,” aro hailamekne eldi tibin nenero ambarelamsiog.
ACT 19:9 Aghana nimi etbare usog mikip talamekti, “Sik” senelamek komdi, nimi maikno whingag “Paulusti ambarelamsilne, 'Yesusti Allahag samoro pirop Ina pa'abaog,' aro ambarelamsil aghana, yubu nenena Yesusti orolena ambarelamsiog yubu agha Paulusti lelamla,” alamek. Wene alamekpa, Paulusti sin Yahudi nimi wene alamek nimi laplobi agha Yesus yubu ka'elamekne sunsunum uro ulamek nimi enero poa pabihiogti, Tiranusti yubu tam lelamog ae lomag sop-sop winil talamek. Winil talamekti, yog nimiag Yesus yubu ambarelamsiogpa, sindi “El tahabe,” aro hailamekne eldi tibin nenero ambarelamsiog.
ACT 19:10 Undo unulamekne nene heng kun phende yubu ambatto leldalamekpa, Yesusti Nia Mangkina Saelbamsilne poneko sembe ambarelamsiog yubu ane nubu talamogpa, Yahudi nimiap Yunani nimiap mog so'o Asia wamek nimi ni ka'ebaek.
ACT 19:11 Allahri mikipne Paulus nongag nembamogpa, nimiri, “Allahri el pere agha mane agha ulamla,” senenne kekneba Paulusti ulamog.
ACT 19:12 Allah mikipneri el pere agha ulamogpa, Paulusti nongag enektop ag babe, whin keptop ag babe tolamekti, nimi niktop nimiap, phia nimi kulomag urop nimiabag “Wali nembahilul,” aro pil palamsiek. Sinag pil palamsiekpa, malia nimi kulomag ua ulamsiogne lanalamekpa, wali talamek.
ACT 19:13 Wali talamekpa, Yahudi nimi mema mili lero nimi whesirop nang wamekne as mog eneko kanelamek. Kanelamekti, “Nimi phia kulomag uropne lambaukang,” aro Nia Mangkina Salehiropne Yesus si lelamekti, “Paulusti Yesus si ambarelamsilne neneko si lelamna. Lambahut!” aro whelamsiek.
ACT 19:14 Sin undo wheroba tongolamsiekne taneko anabiag agha wameknena, nimi saekpareri ambatto whero poa tongolamsiek. Nimi saekpare enena, memne Allah sembe pairopnang sikindo nhon, Yahudinge si Skewa neneko elmabo saekpareri ambatto whero poa tongolamsiek.
ACT 19:15 Wene aro whelamsiek aghana, phia nimi kulomag ua ulamsiogne taneko nhondi lelamogti, “Nana, Yesus na el, Paulus sembe babe ka'ebano, aghana a'unna etne?” alamog.
ACT 19:16 Wene alamogti, phia kulomag lekneamogne poneko wea sekogti, whesiropnang saekbare nang abeneko olamsiogpa, ae lom wamekag aneko lanalamekpa, sindi ag enekto amekne taepto unuahiogpa, kerebenang eneng laptiktoba piek.
ACT 19:17 Undo uro yabiogne neneko sembe ka'ebaekti, nimi as Efesus wamekne Yahudi nimiap Yunani nimiap sin log senelamekpa, Nia Mangkina Salehiropne Yesus si nubu talamog.
ACT 19:18 Yesusag “Sikne” aro seneraglamek nimi taneko maikno yaekti, “Samenag nuri malia undo-undo ulamobo,” aro nimi haingag lag phoro lebek.
ACT 19:19 Mema mili lero pharop nimi taneko maikno yaekti, mema uroba si mome toro piameka togto payaekti, nimi maikno haingag agha aukag talamek. Mema si pharop yubu mome toroba ni aukag talamekne tane samenag kal ma'al kamna kapto tolamekne kal ma'al teng-tengne agha kamna kapto tobek aghana, Yesusag “Sikne” aro seneraglamek nimiri sindinge phia si mome toroba aukag tabek.
ACT 19:20 Undo uro yabiogneag agha “Yesusti mikip uro Nia Mangkina Saelbamsil,” aro yubu ane nubu tangto sabo talamogpa, Yesusag seneraglamek nimi maikno talamek.
ACT 19:21 Ni unuaekpa, Paulusti el wanaag agha, “Makedonia so'o inagha mog so'o Akhaya pineri, as Yerusalem punun,” aro seneraghog. Seneraghogti, “As Yerusalem pineri, as Roma nimi babe kemel phinun,” seog.
ACT 19:22 “Na mog so'o Asia ane olog wamnea amik punun,” aro ilipsabo Timotiusap Erastusap “Samenag Makedonia pururom,” aro pogsiog.
ACT 19:23 Pogsiog abeneko Yesus yubu ka'erop nimi Efesus wamekneri, “Yesusti Allahag samoro yinkirop Ina pa'abaog,” aro ambarelamsieka sembe tam nubunge nembaek.
ACT 19:24 Nimi nhon si Demetrius wali-walia kirik leng-leng arop kirik perak aroba agha sunuro sorop nimi nhon wamog. Demetrius nenekori sunuro solamognena, Efesus nimiri sikinin phalamek kel Artemis mema pharoba sunuro solamog. Demetriusti sunuroba taneko Efesus wamek nimiri maiknoro tol tolamekag agha sunuro sorop nimi yogne as Efesus wamekne babe tup talamek.
ACT 19:25 Demetrius ponekori elkabo sunulamek nang poloro wimbahaiogti, yubu ambarelamsiogti, “Nangkabo, nuri sunulamapba, taneag kamna maikno tarelamsiangba, nu tup talamapne nangkabo a'un el wamlom.
ACT 19:26 Tup talamap aghana, a'undi haingdi iamlomdi, aori babe ka'eamlomne, wene ane Paulus pone yaori, ambarelamsildi, 'Nimiri saeri sunuropne nene, “Mikip imag wamangne saog uro wamang,” aro sunumna sunulamangne sikne kom,' alamlari, nimi tane ni ambatsioba ka'ebaong. Ambarelamsilne ka'ebaong nimina as Efesus nimi aghabog kom, aghana as ni Asia so'oag wamang nimi babe ka'ebaongdi, sik senelamang.
ACT 19:27 Nuri Artemis nunin phalamap kel wamlaba, Asia nimi taneap nimi mog so'oag nimi niapti elag mili lelamap aghana, Paulus ponekori undo ambarelamsilne nene, nuri nunin Artemis mema sunuro phalamap kel nimiri karong alamikti, teba'en nembaukang. Teba'en nembaukangne abeneog komdina, nuri Artemis nunin phalamap kelap eldi mem ae tane soropne nenekoap babe mali sembaukang,” aro ambatsiog.
ACT 19:28 Wene seogne neneko ka'ebaekti, yo lelem yubu haum aro lelamekti, “Nu Efesus nimi sembe nunin phalamap kel Artemis ya'ag paliag wamlul,” alamek.
ACT 19:29 As ene nimi wamek nimi tukom taghom agha longkaekti, Makedonia so'o agha Paulusap nhon palamdek nang Gayusap Aristarkhusap sae salero kiliro pabalamsiekti, as Efesus nimiri longorobag aneko poa phiek.
ACT 19:30 Poa phiekpa, Paulus ponekori, “Poa phiekag aneko punun,” sembaog aghana, Yesus yubu ka'ero ulamek nimi tanekori, “Pululam kom,” seek.
ACT 19:31 Mog so'o Asia saelbamek nang etpare babe sinap Paulusap nimi pali wamekti, elkabo wamekti, nimiag yubu palilamekti, “As Efesus nimiri longorobag aneko pulul kom,” aro yubu pairo molbaek.
ACT 19:32 Nimi maikno as Efesus nimiri longorobag longolamek aghana, nimi nhon-nhon aghabog tam nene sembe el uro wamek. As Efesus nimiri longorobag aneko nimi longol wa'alamek nimi tanekori haum aro lelamekti, “Longol wa'iapnena yubu tamna nene sembe lelamap,” alamekpa, ora nimiri, “Tam ene sembe kom, tamna nene sembe longol wa'iap,” alamek. Wene alamek aghana sinna tamna ekon wamsiog.
ACT 19:33 “Yubu tam nene sembe lelamap anena,” ekon wamsiogpa, Yahudi nimiri nimi nhon si Aleksander webekti, “Andi yubu tibin nenero ambatsululam,” aro sae kiliro sekirekpa, el nenekori, “Yubu ambatsinundi, yubu kom tahut,” aro sae kwarobatsiog.
ACT 19:34 Sae kwarobatsiogti, “Yubu ambatsinun,” aro ulamog aghana, nimi tanekori “Elna Yahudinge,” aro nimi maikno taneko sin el tahiogpa, yubu maikno haum aro lelamekti, “Nu Efesus nimi sembe nunin phalamap kel Artemis ya'ag paliag wamlul,” aro haum alamekpa, heng phende piog.
ACT 19:35 Heng phende piogpa, nimi nubunge Efesus nimi sembe yubu tam kareptop yubu mome toro pibogne poneko wamogti, sin whingag sekogti, “Yubu lemnun,” seog. “Lemnun,” seogpa nimi maikno taneko yubu koma wamekpa, ambarelamsiogti, “A'un Efesus nimi nangkabo. Samenag nu Efesus nimiag kirik imag agha timbalne nunin Artemis yame sunumna saog urop kirik nuri saeag taogpa, nubu kelene mem aeag wali paia ulamap. Nubu kel Artemis phalamap kel eneri kirikap el mem aeap nu Efesus nimiri wali uro paia ulamaba sembe nimi ni mog so'oag wamangne el uro wamang, te?
ACT 19:36 Ekon wamang komdi, nimi nhondi babe orolena senep kom ane sembe, wana aingnil talapmundi, wali uro seneraghongkia ualulom.
ACT 19:37 Nimi payahilomne abeneri nuri mem aeag ua uroba haogha tolamdang komdi, nuri phalamap kel nubu kel wamlange san tiliplamdang kom aghana payahilom.
ACT 19:38 Tam orog agha tane payahilomne sunsunum kom agha payahilom. Tam lelekto kemero kareptobag wamla. Ane sembe, Demetriusap elkabo awe nhon tolamang nimiapti 'Yubu tam nhon nimiag pibukap,' sembaik tanena tam neneko poa tam lelekto kemero kareptop nimiag payalamsinep. Yubu tam lelekto kemero kareptop aeag poa piikpa, nun saelba ulamsiang nimiri sop-sop tam kareplamangne sunsunum uro kareplamukang.
ACT 19:39 'Tam yogne yubu lebukap,' senelamlomne babe wamle tanena, nu saelba uahiropnangdi ambatsiekne sunsunum uro nimi ni poloro wimbahimunba, wali uro karebaukap.
ACT 19:40 Ot sumene tam orog aghana yubu haum aro leplomne nene agha nun saelbamsiang nangdi samenag yubu sia pibekne phibalom. Nun saelbamsiang nangdi nunag tam pibik tanena, nurina sinag samoro sa'a senep? 'Tamna nene sembe,' aro lepseberi, uahabe taneogna,” seog.
ACT 19:41 Wene aro ambatsiogti, nimi tanekoag “Pululom,” aro ambatsiog.
ACT 20:1 As Efesus nimiri yanghang alamsieka aneko ta'ap seekpa, olog wameka Paulus elkabo Yesus yubu ka'ero ulamek nimi taneko yopsiogti, wana aingnibahiogti, “Na Makedonia so'oag punun,” aro ambatsiogti piog.
ACT 20:2 Makedonia inagha palamogti nimi tanekoag yubu maiknoro ambare-ambare wana aingni-aingni palamsiogti, Yunani so'oag piog.
ACT 20:3 Yunani so'oag piogti, wamogpa wal wilindi taogpa, “Mog so'o Siria mag alip toman punun,” sembaog. “Mag alip toman punun,” sembaog aghana, Yahudi nimiri, “Paulus obukap,” aro saekag lebekne sembe el taogti, “Mog so'o Makedonia inagha samoro punun,” sembaog.
ACT 20:4 “Punun,” sembaogti palamogpa, elap nhon palamek nangna: Pirus elme Sopater Bereangeap; Tesalonika nimi, nimi phende Aristarkhusap Sekundusap; Derbenge Gayusap; Listrange Timotiusap; Asia nimi, nimi phende Tikikusap Trofimusap; sin nangene Paulusap nhon palamek.
ACT 20:5 Paulusap elap nhon palameknang taneko a'ep taekti, sin samenag as Troas piekti, nun sembe tibogamsiekti, as Troas wamek.
ACT 20:6 Allah omekto kwaneng roti walerop komne terop li tero liogha, mag alip toman as Filipi laplobi agha palamububa, ae inipna tombare taog. Ae inipna tombare taogpa, as Troas piburi, sin sam piekti, wameknangap haibtaburi, wamubu pahabog ik saek bare taog.
ACT 20:7 Sae kaupto ua urop sum taogpa, “Kwaneng roti khepto tukap,” aro winiptaburi, Paulusti nunkabo nunap nhon wamekne sinag, “Nu ambuhum pukap,” aro yubu maiknoro ambarelamsiog paghabog ae inipna tomnusam taog.
ACT 20:8 Ae tika alikinagne nu wamubuag aneko whea maikno tiniro ikik piek.
ACT 20:9 Paulus yubu kiliro-kiliro lelamog abeneko kabuni me nhon si Eutikus neneko keken phoro soro kuptopne ina siramag pukamogti, kabuni me eneko haing whi uro wamna koma kwhingdi tungum kanem alamogti, eba timbaog. Ae tika wilindipne nenekoag agha eba timbaogpa, nimiri salero kemelamekag agha ya'ag tebaog.
ACT 20:10 Ya'ag oroba wamogpa, Paulus poneko kulukaogti, kabuni tebaogha aneko somoro saelbamogti, nimi tanekoag, “Yubu maikno lero engkaheng kom. Me ane kamag wamla,” seog.
ACT 20:11 Wene seogti, Paulus nen samoro aeag tai waelbaogti, kwaneng khepto teekti, nen yubu lelamog paghabog ae kwelekaog. Kwelekaogpa Paulus neneko lambaogti palamog.
ACT 20:12 El palamogpa, nimi tanekori me kabuni aneko kamag wamogne elenge aeag pabiekti, sin ni wana aingniro awi yeng uro wamek.
ACT 20:13 “Pukap,” sembabuba, Paulustina, “A'un sam kabongag agha as Asos pimundi, wapmunag na yan toman agha ina toman yanun,” seogha sunsunum uro nu samenag kabongag mag alip toman agha as Asos piburi wamubu.
ACT 20:14 Wamububa, el nunap as Asos haiptaburi, kabongag Paulusap nhon waelbaburi, mag alip toman agha as Metilene pibu.
ACT 20:15 As Metilene mabubua lukunapne as enekoag agha mag alip tomanog palamuburi, mag longoro kanektop so'o Khios peramag piburi, inipnag nhon mamubu. Aneko mabubua kwelekaogne lukunap mag longoro kanektop mog so'o as Samos piburi, mabubua kwelekaogne as Miletus pibu.
ACT 20:16 Paulusti, “Nu anam Yerusalem pin komag agha Yahudi nimiri ik nubu sum Pentakosta uaikag,” sembaogne sembe “Mog so'o Asia ik maikno wamukap kom. As Efesus babe yan ingkan koma pukap,” aro karebaog.
ACT 20:17 As Miletus pina wamuburi, Paulustina, “As Efesus Yesusag 'Sikne' aro seneragtop nimi sikidoyabo wenelamsiang nang na as Miletus wamnaag yaukangba, enel phululom,” aro Miletus nimi pogsiog.
ACT 20:18 Enel phiekti yaekpa, Paulusti as Efesus nimi piamsiekti, wenehirop nangag yubu lelamogti, “Nangkabo, samenag Asia so'o eneag yahiri, yana alnina alnilamsiri, ulamsiri, ulamnange a'un elwamlom.
ACT 20:19 Yahudi nimiri nanag yo palilamneekti, “Obukap,” aro saekag lero ulamneekpa, wana pailangkalamsiri engelamsiri, Nia Mangkina Salehiropne Yesus ponekori awe tolamsinge seklero tolamsi.
ACT 20:20 Undop aghana ta'ap sen koma, “El uro wamikpa, yepsilul,” sembahi tanena, yubu eneko a'unag ni ambarelamsisiri, ologha babe tognobahi kom. Tognoban koma yubu ni amolamsisinge nimi ni whingag agha ambatsisiri, a'ununge aeag poloro winil talamlumag babe ambatsisi.
ACT 20:21 Yahudi nimiap Yunani nimiap ambarelamsisiri, 'Malia ulamlomne lipsimundi, Allahag wana seneraglapmundi, Nia Mangkina Saelbamsilne Yesusag “Sikne” aro seneraglamlulom,' aro ambatsisi.
ACT 20:22 Yerusalem pineba, nanag uaukangne ekon wamnari wamna. Allah Eldamne Yame Walinge nenekori sae kiliro pabalamneleba punun.
ACT 20:23 Nanag uaukangne ekon wamna aghana, na as nhonag pang nhonag pang ulamnaba, Allah Eldamne Yame Walinge nenekori, 'Nimiri haing sae kaupkikpa, seklebalulam,' aro lag phoro ambarelamnel.
ACT 20:24 'Seklebalulam,' aro ambarelamnel aghana, nari wana nong ene sembe seneraghal talamna kom. Nari seneraglamnangena, Nia Mangkina Saelbamsilne Yesusti awe na saeag pibogne sol wali, wali uro komopto tolamnun. Awe na saeag pibognena, '”Allahri nimi lunuro opsin koma wana waliri nimi talulamsil,” aro yubu walinge Yesus sembe ambarelamsululam,' aro na saeag pibog.
ACT 20:25 Wene aro na saeag pibogpa, as nhonag pang nhonag pang ulamnori, a'unag babe Allahri mog so'oag nimi saelbamsilne sembe ambarelamsino aghana, a'undi nari whing ene nen olog imnululom komne, na el wamna.
ACT 20:26 Ane sembe sumene ane yubu mikip uro a'unag lelamnangena, Allahri 'Yubu ane ambatsululam,' aro ambarelamneonge ta'ap sen koma a'unag tipto ni ambarelamsino. Ane sembe nimi nhondi nari yubu Yesus sembe ambatsinonge ka'ebaom kom tanena Allahri opsilea tam nanag nembaheng kom.
ACT 20:28 Na a'un laplobi agha pineba, pai kam yonge saog urop nimi yingkina saluro kilphaikagti, wali uro a'unkaboap a'un wenehirop nang a'undam nimi wanaapti haing whi uro yae wamsululom. Allah Eldamne Yame Walinge nenekori, 'A'unkabo pham domba saog uro wamang nimi taneko yubu amohiro paiamsululom,' aro sekitsio. Sekitsioba, pai kam yonge saog urop nimiri pham domba Allah Eldamne enengag agha toro topsio nimi taneko o'ona sembahin koma wea oro kilphaikagti, Yesusag 'Sikne' aro seneragtop nimi haing whi uro yae piamsululom.
ACT 20:30 A'un anabiag agha babe nimi sekelingkukang. Sekelingkikti, Allah yubu lero orolenange agha sikne nembukang. Orolenange agha sikne nembamikti, Yesus yubu ka'ero ulamang nimi wana tolamsikpa, sinag 'Sikne,' aro sare nelebahukang.
ACT 20:31 Orolenange agha sikne nembamikti, wana tolamsik nimi yaukangne sembe seneragto yae uptangkamlulom! Heng kun wilindi sinag kweleknag na olog ta'apsen koma nari wanaag agha engelamnoriog a'un ni ambarelamsinonge ekon taheng kom.
ACT 20:32 Wene, 'Allahri a'un piamsilul,' aro nari a'un Allah saeag nenelamsin. 'Allahri opsin koma wana waliri talulamsil,' aro Yesus yubu sembe ambarelamsinne salelapmunba, Allahri a'un mikip nenelamsileri, 'Yesusag “Sikne” aro seneraglamik nimi taneko Na namabo,' aro weplamsil nimi niag tatsilul. 'Na mabo,' senelamsildi, eldinge saeag agha tatsileba, ya'ag kamag wamukang.
ACT 20:33 Nari, 'A'undi saeagha leng-leng aroba emasto, perakto, enektop agto a'undi na tatneheng,' aro wanaag seneraglamno kom.
ACT 20:34 Nanap nangkabo nhon wamubungeap teko nunag wamogne sembe nadamne saeag agha kamna kapto tolamsinge a'un elwamlom.
ACT 20:35 Nari ulamnonge 'Sindi babe imniikti, ulamukang,' aro sunumna ulamno. Nia mangkina ulamnongena, 'Sol wali, wali uro welapmundi, nimi mikip komne yeplamsululom,' aro ulamnoba, imneom. Nia ni ulamnonge aneko, Yesusti yubu ambarelamsiogne seneragi agha ulamno. Nia Mangkina Salehiropne Yesusti ambarelamsiogti, 'Nimiri a'unag tatsiikne olog wali sembamlom aghana, nimiag tatsululomne sembe “Wali sirik,” alamna,' aro ambatsiog. Yesusti ambarelamsiogne seneragi agha nia mangkina a'un anabi agha ulamno,” aro Paulusti ambatsiog.
ACT 20:36 Ni ane Paulus nenekori ambatsiogti, yabu sanukto pulingkina sin Allahag molona molbaek.
ACT 20:37 Allahag molona lero molbaekti, sindi Paulus somoro togtog aro kiplamekti, “Wali pululam,” aro maiknoro engkarek.
ACT 20:38 Paulusti, “Nen amik whing imnululom kom,” seogne sembe, “Nen haiptaukap kom,” aro wana sapsiogpa, “Mag alip toman pulul,” aro kabong wamoghag mag abolag pil piek.
ACT 21:1 Nungkabo as Efesus Yesusag “Sikne” aro seneragtop nimi wenehirop nimiap wamuburi, wana ikin uro sae liptaburi, mag alip toman palamubua mag longoro kanektop so'oag as Kos peket pibu. Kos pina mabubua kwelekaogne, mag longoro kanektop so'oag as Rodos pibu. As Rodos pina mabubua kwelekaogne nen mag alip toman palamubua kabong pabalingkirobag aneko haing kerekaek as Patara pabalingkibu.
ACT 21:2 Patara piburi, kabong Fenisia so'oag piropne nhon ibuburi, phoanari ko'oro pabalamlul arop kabong anekoag waelbaburi pibu.
ACT 21:3 Palamuburi mag longoro kanektop mog so'o Siprus ibubu aghana, Siprus waneng sip nenelobiagha mog so'o Siria simbik palamubu. Palamuburi as nubunge Tirus pibuag anekoa kabongag nia mangkina pabalamogha taneko as enekoag yognepti, as enekoag saingnil pibu.
ACT 21:4 Saingnil piburi, as Tirus anekoa Yesus yubu ka'ero ulamek nimi wamekne kemeroa yabihiburi, ik saekbare wamubu. Tirus ane wamububa, Allah Yame Walingeri Yesus yubu ka'erop nimi tanekoag ambatsiogpa, yubu ane nen tipto Paulusag, “Yerusalem pheng kom,” aro ambarek.
ACT 21:5 Aneko wamubua nun ina panne peram taogpa, anekoa sin laplobi agha lambaburi palamubu. Anekoa lambaburi, “Yerusalem pukap,” aro palamububa, as enekoag nimi Yesus yubu ka'erop nimiap, sindi kelabo meapti nu poa kabong saingnilingkirobag pil phiekpa, mag abolag aneko yan yabu sanukto pukuburi, Allahag molona molbabu.
ACT 21:6 Aneko sae saleptaburi pogtabu. Nu kabongag walelamububa, sin sikininge asag samoro piek.
ACT 21:7 Tirus nimi sikininge asag piekpa, nu mag alip toman agha as Ptolemais piburi, nungkabo Yesusag “Sikne” aro seneragtop nimi as eneko nimi wamekne kipsiburi, ik nhon sum wamubu.
ACT 21:8 Mabubua kwelekaogpa, palamubua as Kaisarea pibu. As Kaisarea nimi nhon wamogne, samenag as Yerusalema nimi saekbare “Kwaneng pogto yauog kelabo o'oro tarelamsululom,” aro wepsiekne nhon sina Filipus wamog. Filipus samenag yauog kelabo sembe kwaneng pogto tarelamsiogti, el babe yubu walinge Yesus sembe ambarelamsiogne wamogpa eldi aeag wa'iburi, wamubu.
ACT 21:9 Filipus ponekori ae wamubuag wameknena, elmangkelabo saren tombare abeneko wamekpa, Allahri sin wanaag yeplamsiogpa, Allahri yubu silimu tipto ambarelamsiek kelabo wamek.
ACT 21:10 Yingkina aneko Filipus ponekori aeag ik etbare wamububa, Allahri yubu silimu tiptopne nhon sina Agabus mog so'o Yudea agha as Kaisarea wamubuag kulukul aog.
ACT 21:11 El nun peramag yaogti, Paulustinge enektop ag sembe uwoghag noptop haing lobogti, Agabus eldamneri sae yan kabuldalamogti, nunag yubu lelamogti, “Paulusti uwoghag noptop haing ane el uwoghag agha lopnari, kabuldalamna. Unuanne nene sembe Allah Eldamne Yame Walingeri nanag ambarelamneori, 'Nari unuanne saog uro Yahudi nimi as Yerusalem wamangneri haing ngainge poneko uanne nene saog uro kaubukang. Kaubikti, Allah omektop kom nimi Yahudi sisa kom nimi saeag nembaukang,' aro ambatneo,” seog.
ACT 21:12 Wene seogha ka'ebaburi, Yesus yubu ka'erop nimi taneko wamek nimiapti Paulusag “Yerusalem pheng kom,” aro yubu mikip uro molbabu.
ACT 21:13 Paulusag “Yerusalem pheng kom,” aro molbabu aghana, Paulustina, “Sa'a sembe engelamnelomdi, wana ikin nenelamnelom? Na haing sae kaupniikne tamna ikin kom senelamna. Yerusalem nimi Yesus sembe ambarelamsinenge sembe ya'ag omniikpa, tebanunne babe tamna ikin kom senelamna. Na sembamnangena, 'Yahudi nimiri Nia Mangkina Salehiropne Yesus yubu saelbamikpa, Yesus si nubu talul,' aro as Yerusalem palamna,” seog.
ACT 21:14 Nuri lebubunge ka'eban koma eldi wene seogpa, nurina, “Elba. Nuni Allah seneropne agha elag ualul,” seburi, yubu kom tabu.
ACT 21:15 Kaisarea aneko ik sulu wamubua nuringe togna toguburi, Kaisarea nimi Yesus yubu ka'ero ulamek nimi etbareap as Yerusalem palamubu. Yerusalem palamububa, sindi nu poa nimi nhon si Manasondi aeag poa phiek. Elna mog so'o Siprusne samenag agha Yesus yubu ka'elamogti, Elag seneraglamogne Manasondi aeag wamubu.
ACT 21:17 As Yerusalem pibuba, nungkabo Yesusag “Sikne” aro seneragtop nimiri sin wana awi yeng uro nu kiplamsiek.
ACT 21:18 Pina mabubua kwelekaogpa, nu ni Paulusap wamubunge Yakobus kemel pibuba, Yesusag seneragtop nimi Yerusalem wamek nimi wenehiropnang ni babe wamek.
ACT 21:19 Wamekpa Paulusti kipsiogti, yubu ambarelamsiogti, “Allahri na pere agha mikipne na tarelamneoba, Yahudi sisa kom nimi Yesusag 'Sikne' aro seneraglamang,” aro sin wamekne taneko yubu kiki lelekto ambatsiog.
ACT 21:20 Wene aro Paulusti ambatsiogne ka'ebaekne sembe sin ni Allah omeklamekti, Paulusag yubu lelamekti, “Paulus, nangkae! Kembahi, Yahudi nimi teng-tengne wene Yesusag 'Sikne' aro seneraglamangne as Yerusalem tane wamang. Yesusag 'Sikne' aro seneraglamang nimi taneko Yahudi nimi wamang ane sembe sol wali, wali uro Allahri samenag, 'Israel nimi noropto saelbamukang,' aro Musa ambarog yubu mome toro pibogne sunsunum uro ul palamang.
ACT 21:21 Sol wali, wali uro ul palamang aghana, nimiri an sembe sinag minirop yubu ambarel palamsiong. Minirop yubu ambarelamsiongnena, 'Paulusti Yahudi sisa nimi as tala-tala wamang nimi ambarelamsildi, “Musari samenag yubu pibogne sunsunum uro a'un Yahudi nimiri ul palamlomne lipsululom. Samenag agha a'un mabo kon kareplamsilomne babe lipsululom,” aro wene Paulusti ambarelamsil. Paulusti ambarelamsilne as tala-tala Yahudi sisa kom nimi urobag ambarel palamsil,' aro ambarelamsiong. Minirop yubu an sembe ambarelamsiongne tane nubu taoba, Yahudi nimi maikno tanekori ka'ebaong.
ACT 21:22 Ka'ebongdi, el uro wamangag an tane yalamne ka'ebaikti, anag uaukangne sembe huaukap?
ACT 21:23 Nuri lebebenge nene ka'ebamendi, ualulam. Nu anabiag tane nimi tombare samenag salag lebongdi, '”Allah arukna sol wali walinge wamukap,” aro keknep uro yabalameberi, hong karepto koma wamebea, wal nenekoag hong karebahukang,' aro salag pibong.
ACT 21:24 Sin tombare 'Hong karepto koma wamukap,' seong nang abenekoap palapmundi, samenag Musari 'Allah whingag sembenga pabeheng kom,' aro mome toro pibogne sunsunum uro alel talamlulom. Alel talapmundi, Allahri Ae aramag wa'imunba, sin hong karebahikne sembe kamna tatsimendi, Allah sembe pibukangne sembe babe tatsululam. Undo unulapmendi, anap sinap Musari mome toro pibogne sunsunum uro ul palapmunba, nimi taneri ipkikti, an sembe minirop yubu ka'ebaongne neneko, 'Sikne kom,' aro el taukang. Sindi el talamukangne, 'Paulusti babe samen Musari mome toro pibogne neneko sunsunum uro ul palamla,' aro el taikti, Yahudi nimi tanekori tam anag pibongne 'Kom talul,' senelamap.
ACT 21:25 Yahudi sisa nimi tanekori anag tam pibongne lero libapti, wene Yahudi nimi sisa kom nimi agha Yesusag 'Sikne' aro seneraglamang nimi taneko sembe mome toro sinag pibobonge ambatkenun. Sindi ul palamukangne sembe samenag yubu lebobori, karebabonge sunsunum uro mome toro pibobo. Sin sembe karebabongena, 'Lebe aroba eneng la'imbaleag,' aro homamanga lepto oroba sopap, enengap telamukang kom. Eneng lambaleba, sop ane telamukang. Ora nimiri, “Phia sembe phabaukap,” aro lebe aroba sop palilamikti, mektop sop babe yoro tarelamsiikpa, telamukang kom. Apna, nengaboap kelaboapti yog nimiri kelabo nengabo sembe, “Naringe og wamso,” aro wanaag seneragikti, saelbahukang kom,' aro karebabo. Karebobori, mome toro pibobo,” aro sindi Paulusag ambarek.
ACT 21:26 Wene aro ambarekpa, lukunap Paulusti nimi tombare “Hong karepto koma Allah arukna sol walinge wamukap,” seek nimi taneko enero pabihiogti, samenag Musari “Allah whingag sembenga pabeheng kom,” aro mome toro pibogne sunsunum uro wali uro sin nong mag a'aleptaek. Wali uro sin nong mag a'aleptaekti, Allahri Aeag palamekti, “Allahag salag pibobonge neneko taknep sum peram wamlaba, Musari yubu sunsunum uro ik etpare aleltalameberi wamebea, salag pibobonge taknep sumeneko Allah sembe a'ero-a'ero webabonge payaukap. Payabeba, Allah sembe nuri saeag agha lebe aroba oro paibatsululom,” aro Yahudi nimiri saeag agha Allah sembe pairopnang Paulusap nhon ambarel phiek.
ACT 21:27 “Hong karepto koma wamukap,” seek nimi tanekoap Paulusapti, “Allahag oro tarukapne 'Wali,' sembalul,” aro ik saekpare sum Musari mome toro pibogne sunsunum uro sin nong aleltalamek. Aleltalamekti, wamekpa, salag pibekne taktop sumeneko peram taogpa, Allahri Aeag piekti, wamek. Wamekpa, Yahudi nimi agha Asia so'oag urop nimi agha yaekti, kemelamekpa, Paulus Allahri Ae aramag wamogpa, ibek. Ibekti nimi orangeag wanaag aluktop yubu lebek. Wanaag aluktop yubu lebekpa, nimi maikno tanekoag sikin sip taekti, Paulus saelbaek.
ACT 21:28 Saelbanebag haum alamekti, “Israel nang yebelahisu! Nimi eneri tala-tala pina, nun Yahudi nimi san tilipto ambarelamsil. Samenag Allahri, 'Undo-undo ulamlulom,' aro Musaag ambarogpa, mome toro pibog. Musari mome toro pibogneap, Allahri Ae eneap babe mombolag nenero ambarelamsil. Wene ane iplulom! Eldi Yunani nimi poa Allah Eldamne Mem Ae aramag payalamsildi, sembenga nenelal,” alamekti, Paulus saelbaek.
ACT 21:29 Sindi wene alamekti saelbaeknena, Trofimus Efesusne poneko samenag inaag Paulusap nhon asag palamdeka ibekne sembe, “Allahri Aeag ane poa wa'alal,” senelamekti, yubu haum aro lelamek.
ACT 21:30 Haum alamekpa, nimi ni wamloa saog uro as enekoag wamekne tagto longolaekti, Paulus salero Allahri Ae aramag agha kiliro poa lanalamekpa, Allahri Ae aram leka ina siramag serekaek.
ACT 21:31 Ina serekaekpa, sindi “Paulus ya'ag obukap,” aro ulamek abeneko, “Yerusalem nimi niri haum alamang,” aro ka'ebaekti, yubu poa Roma nimi sembe yin saleropnang sikindoag yubu pabiek.
ACT 21:32 Wene aro ambarel piekpa, yin saleropnang sikindo ponekori el umag yubu eptopnang etbareap, ilipsabo yin saleropnang etbareap poloro winiptaek. Poloro winiptaekpa, topsiogti elemag Paulus olamekag aneko piek. Piekpa, Paulus olamekti, yin saleropnang palameka ililamsiekti, Paulus olameka libek.
ACT 21:33 Olameka libekpa, yin saleropnang sikindo poneko Paulus peramag sekel piogti, saelbaogti, “Besi agha sorop haing phende topmundi, el sae kauplulom,” aro ilipsabo arukahiog. Wene aro arukahiogti, Yahudi nimiri Paulus olamek nimi tanekoag hailamsiogti, “Nimi enena etne? Eldi hualba olamlom?” aro haibahiog.
ACT 21:34 Wene aro haibahiogpa, nimi tanekori yubu maikno lelamekti, nenneri “Undo sembe,” nenneri “Unuaoa sembe,” aro wene alamekne, tam ane sembe senen komdi, yin saleropne sikindo ponekori eldi aruknaag, “Nuri aeag pabululom,” aro arukahiog.
ACT 21:35 “Pabululom,” seogpa, pil palamek abeneko “Paulus obukap” senerop nimi maikno tanekori wanaag yo lelem “Toghitlulom,” alamek. Wanaag yo lelem “Toghitlulom,” alamekpa, yin saleropnangdi sindi ae alongag piekag aneko, “Paulus obukap,” aro maiknoro longolamekti, lingniltalamekpa, yin saleropnang tanekori Paulus keyapto ae alongag tai sip poa waelbaek.
ACT 21:37 Paulus neneko yin saleropnangdi asag poa, wa'inebag “Aeag poa wa'aukap,” aro ulamek abeneko Paulusti, “Na yubu olog ambatkinun!” seogpa, yin saleropnang sikindo ponekori, “Anna Yunani yubu el te?” seog.
ACT 21:38 “Wene selamba, anna Mesirne poneko kom te? Weneog aneko suknumna suknubaomdi, 'Roma nimi mombolag wamukap kom,' aro mal taropnang teng-tengne (4000) poro agha aldesag piomne poneko kom te?” aro haibaog.
ACT 21:39 Wene aro haibaogpa, Paulustina, “Nana Yahudinge, nari asna Tarsus, as nubunge Kilikia so'oag wamlange nenekoag wamna. Nimi maikno taneag yubu ambatsinundi, mololangken,” seog.
ACT 21:40 Wene seogpa, yin saleropne sikindo ponekori, “Wali andi ambatsululam,” aloghog abeneko Paulus ae alongag sekelingkiogti, sae la'abatsiogpa, yubu kom tanaek abeneko Paulusti Ibrani yubuag yubu ambarelamsiog.
ACT 22:1 “Yahudi nimi nangkabo, naniyabo, a'undi lolomnange nanag lolbitneomba, nari tibin nenero peleptangtop yubu ambatsinunne ka'eamlulom,” seog.
ACT 22:2 Undo wene seogpa, nimi maikno tanekori nimi poneri Ibrani yubuag ambarelamsil aro ka'ebaekti, yubu koma wamek. Yubu koma wamekpa, Paulusti, “Nangkabo, a'un Yahudi nimi wamlomne saog uro na babe Yahudinge wamna. Na mangkaneekag as Tarsus Kilikia so'oag wamlange nenekoag agha mangkaneekpa, as Yerusalem ane yahiri, nubu tahi. Nunisa Musa yubu elne Gamalielti, Musa yubu kop-koptagto ao mili kuruk aneogpa, wali uro el tahi. El tahiri, a'un wamlomne Allah sembe wana wali uro ulamlom saog uro, nari babe Allah sembe ta'ap sen koma sol wali uro ulamsi.
ACT 22:4 “Allah sembe sol wali uro ulamsi aghana Yesusag seneragna komag wamsi. Yesusag 'Sikne' aro seneraglamsi komdi, nari babe Yesusti Allahag samoro yingkirop Ina pa'abaog yubu ka'ero ulamek nimi sare nelepto ya'ag olamsisi. Ya'ag olamsisiri, nenne salero kabuniap kelaboap kop aeag tolongolamsisi.
ACT 22:5 Undo ulamsinge nene memne Allah sembe pairopnang sikini nubungeap, Yahudi nimi wenehirop nang nubunang babe, sindi nari uahinge el wamangdi, 'Sik lepla' aro lemnep. Sindi nanag, 'Yesus yubu ka'erop nimi ebahimendi, haing sae kaupto saelbahimendi, as Yerusalem samoro payahimenba, opsukap,' aro mome nanag pibatneek. Mome ane nanag pibatneekti, pogneekpa, palamsiri, 'Sikinkabo Yahudi nimi as Damsyik wamang nimiag mome ane tarel phineri, Yesus yubu ka'erop nimi saelbahinun,' aro palamsi. 'Saelbahinun,' aro palamsiri, as Damsyik peramag ae siro palamsiag agha heng yame saogne haing omomne imag agha nanag tingil omneog.
ACT 22:7 Tingil omneogpa, na so'oag malingkihiri ka'elamsiba, yubu nhon lelamogti, 'Saulus, Saulus! Sa'a sembe Na “Seklebale,” aro ulamnelam?' seog.
ACT 22:8 Wene seogpa, nari hailamsiri, 'Nani, Anna Etneri lelamlam,' sihiba, Eldina, 'Na Yesus Nasaretne andi “Seklebale,” aro ulamnelamne ponekori lemna,' seog.
ACT 22:9 Heng yame saogne nanag tingkaneogne nimi nanap palamubungeri babe ibekti, aoag agha yubu lilim ka'ebaek, aghana yubu nanag lelamogne sindi ka'ebaek kom.
ACT 22:10 Eldi yubu ka'ebaek kom aghana, nari lelamsiri, 'Nani, sa'a agha nari uanun?' sihiba, Eldina, 'Sekmendi Damsyik pululam. Damsyik pimenba andi ulamlulamne Allahri seneropne ambatkenep,' seog.
ACT 22:11 'Damsyik pimenba, ambatkenep,' seog aghana, na haing omomne warero libango aropne nenekori haing ubaneogpa, pinep komdi nangkabo nhon palamubu nangdi sae salero Damsyik poa pineek.
ACT 22:12 Poa piniekpa, as Damsyik aneko nimi nhon sina Ananias. Ananias ponekona, Musa yubu sunsunum uro sol wali uro ulamogpa, Yahudi nimiri as Damsyik anekoa el wamogne sembe walinge senelamek.
ACT 22:13 El neneko na peramag yaogti, yubu lelamogti, 'Saulus, nangkae. Haing kwelekae,' seog abeneko pere na haing kwelekahiri, nari elag kembahi,” seog.
ACT 22:14 “Elag kembahiba, nanag eldi yubu lelamogti, 'Allah nunisag yabori omeklamekne ponekori weplangkeldi, “Allah Eldamne seneropne walinge el taleri, Nimi Sikne yaogne poneko ipleri, Eldi yubu pamag agha lanaropne ka'ebanulul,” aro wepkel,' aro Ananiasti ambatneog.
ACT 22:15 Wene aro ambatneogti, nen lelamogti, 'An haing kwelekalamdi iplamne, ka'ebalamne Eldi ualne andi nimi ni ambarelamsululam.
ACT 22:16 Sa'a sembe wene nang-nangalamlam? Sekmendi Yesusag, “Malia uanonge tam orog nembanululam,” aro Yesusag yubu mololapmenba, maghag pelengkakukang,' aro Ananiasti ambatneog,” seog.
ACT 22:17 Paulusti nen tipto ambarelamsiogti, “Na samoro Yerusalem yahiri, Allahri Aeag wamsiri, Allahag yubu mololamsi. Allahag yubu mololamsiri, haing uamna kwelekamna senenag agha Nia Mangkina Salehiropne Yesus poneko ipsi. Ipsiri tilamsiag agha Eldi nanag yubu lelamogti, 'Na sembe yubu ambarelamsilamne ka'ebaukang komba, Yerusalem anea elem-elem lambalulam,' seog.
ACT 22:19 'Lambalulam,' seogpa, nari lelamsiri, 'Nia Mangkina Saelbamsilamne, sin elwamangne, nari Allah yubu lerop aeag agha nhonag wa'ang, nhonag wa'ang ulamsiri, An Yesusag “Sikne” aro seneraglamek nimi salero kop aeag tolongolamsisiri, olamsisinge sin el wamang.
ACT 22:20 Stefanus poneko, An Yesusti ulamluma ipkeogti, nimi ambarelamsiog. Yesus sembe ambarelamsiogne sembe ya'ag olamekpa, olamek sumeneko, 'Wali ya'ag olamang,' aro na wamsiri, sae saekag sembahi. Wene sembahiri, Stefanus olamek nimi tanekori sindi enektop ag pibekpa, nari yae piamsisi,' aro Yesusag ambatsi.
ACT 22:21 Wene aro ambatsiba, Nia Mangkina Saelbamsilne ponekori nanag lelamogti, 'Yerusalema lambamendi, pululam. Amik Nari an mog so'o weag wamang nimi Yahudi sisa kom nimiag poglangkenun,' aro ambatneog,” aro Paulusti ambatsiog.
ACT 22:22 Nimi Paulusti yubu ambarelamsiogne wali ka'elamek aghana, wene aro “Nia Mangkina Saelbamsilne ponekori, 'Mog so'o weag wamang nimi Yahudi sisa kom nimiag poglangkenun,' aro ambatneog,” aro Paulusti ambarelamsiog abeneko, Yahudi nimiri ka'ebaekti, wana yo senelamekti, “Nimi undopne ya'ag oplulom! Undop nimi wamnep kom,” alamek.
ACT 22:23 Wene alamekti, Yahudi nimiri sindinge ag siriro pelengerobag kwiripto tobog ahiekti, hao lopto alikinag towalengelamek.
ACT 22:24 Undo unulamekpa, yin saleropne sikindo ponekori, “Nimi maikno taneko yubu sa'a sembe lelamang, eltanundi,” aro, “Paulus aeag pabumundi, taeplam-taeplam lobalulom. Taeplam-taeplam lopmundi, wana aluktop yubu ambatsilne el talulom,” aro ilipsabo ambatsiog.
ACT 22:25 Yin salerop nang tanekori Paulus pabiekti, “Taeplam-taeplam lobukap,” aro yan sae kiliro haing kauplamek abeneko Paulusti, yin saleropnang sikindo nhon Paulus peramag sekamogne ponekoag hailamogti, “A'undi tam wali uro kembitna koma nimi Roma nimi opsinep te?” aro haibaog.
ACT 22:26 Wene aro haibaogpa, yin saleropne poneko Paulusti lebogne neneko ka'ebaogti, eldo yin saleropne ponekoag piogti, “Paulusti wene sel,” aro ambarelamogti, “Paulus pone babe Roma nimi wamlaba, sa'agha elag ualulam?” aro haibaog.
ACT 22:27 Wene aro haibaogpa, yin saleropne sikindo poneko Paulusag piogti, “An sik Roma nimi wamlam?” seogpa Paulusti, “Yo, ot andi leplam ane,” seog.
ACT 22:28 Wene seogpa, yin saleropne sikindo ponekori, “Na babe 'Romange tanun,' aro kal ma'al kamna alikinag Roma nimi sikini yabo tatsisi,” seogpa Paulusti, “Na kal ma'al tatsisi kom. Nani Romangeri mangkaneogpa, Romange wamna,” seog.
ACT 22:29 Wene seogpa, yin salerop nangdi “Taeplam-taeplam lobebeba, nu eltanepne ambatsilul,” aro haing kaubek nang tanekori babe ka'ebaekti, “Obukap kom,” aro log lelem elemag-elemag piek. Sin log lelem elemag piekpa, yin saleropne sikindo ponekori babe, “Romange agha mane agha, 'Besi agha sorop haing agha kauplulom,' sen,” aro log sembaog.
ACT 22:30 Yin saleropne sikindo ponekori, “'Yahudi nimiri Paulusag tam pairo ulamangne nene sa'a sembe ulamang?' aro sik wali uro eltahane,” senelamog. Wene senelamogti, mabogha kwelekaogne memnang Allah sembe pairopnang sikindo yaboap, Yahudi nimi sembe tam lelekto kemero kareptopnang Mahkamah Agama nangap yopsiog. Yopsiogti, poloro wimbahaiogpa, wamekag Paulus haing sae lopto enero poa sin wamekag payaek.
ACT 23:1 Paulusti, Yahudi nimi sembe ua tam lelekto kemero kareptop nimi Mahkamah Agama nimiag yop-yoba kembahiogti, lelamogti, “Nangkabo, samenag babe, wene babe, 'Allahri ililamnel,' aro ul palamnange nene nari wanari babe, tam malia uan kom sembamnari wamna,” seog.
ACT 23:2 Paulusti wene alamoghag agha memne Allah sembe pairopnang sikini nubunge Ananias ponekori ka'ebaogti, wana yo sembaogti, “Paulus pamag taeplam loplulom,” aro peramag wamek nimiag wene aro arukahiogpa, pamag taeplam lobek.
ACT 23:3 Pamag taeplam lobekpa, Paulusti memne Allah sembe pairopnang sikini nubunge ponekoag, “Andi, 'Na walinge malia urop komne,' senelamlamdi ulamlam aghana, Allahri an babe opkulul. Andi senelamlamne, 'Musari mome toropneag kembiagha sunsunum uro Paulusti tam ene karebanun,' sembalam aghana, 'Pam taepto oplulom,' selamne agha andi Musari yubu mome torop mome eneko philamlam,” seog.
ACT 23:4 Wene seogpa, Paulus peramag wamekti, ka'ebaek nimi tanekori, “Andi nimi nubunge memne Allah sembe pairopnang sikini nubunge san tiliplamlam,” seek.
ACT 23:5 Wene seekpa Paulusti, “Nangkabo, samenag Musari mome toro pibognena, 'A'uni yabo saelbamsiang nangag san tilipto yubu malinge lepseng kom,' aro mome toro pibognena na el wamna aghana, el poneko nimi nubunge memne Allah sembe pairopnang sikini nubunge wamlange na ekondi ogto lemna,” seog.
ACT 23:6 Wene seogti, “Nimi wamek nimi taneko Saduki nimiap Farisi nimiap winiltalamekag nhon wamang,” aro eltaog. Saduki nimiri senelamekti, “Nimi teptopne yame orogti, nimi teptopne kamag tanep kom. Allah arukna malaikat babe orog,” senelamek. Undo senelamekpa, Farisi nimiri, “Nimi yame wamangpa, nimi teptopne kamag tanep. Apna Allah arukna malaikat babe wamang,” senelamek. Sindi senelamekne sembe el uro wamogti, Paulusti tam kareptopnang Mahkamah Agama nimi tanekoag yubu ambarelamsiogti, “Nangkabo, na babe Farisinge wamna, nani babe Farisingeri mangkaneog. 'Nimi teptopne Allahri kamag nembahilul,' senelamnari, nang-nang aro ulamnange ane sembe na enero poa yaneangba, wene tane tam kareptobag wamna ane,” seog. Eldi wene seogne sembe nimi taneko yubu ka'ebaekti, Farisi nimiap Saduki nimiap sin waltalamekti, winil talamek nimi taneko nenne Farisi nimiag sip talamekpa, nennne Saduki nimiag sip taekti, sin sae saekag lero wamek kom.
ACT 23:9 Undo wene alamekti, sin maiknoro yo piptangka leldalamek. Nimi etbare Farisi nimi Musari samenag mome tobogne ambatsiropnang sekelabiekti yubu lelamekti, “Nuri kembabag nimi eneag tam nenenne olog ibap kom. Nimi eneri yubu lelamlangena Allah arukna malaikattiro, nimi yameriro ambarogne agha lelamloa saog sembaap,” alamek.
ACT 23:10 Sin yubu haum hag aro lelamekpa, yin saleropne sikindo ponekori “Paulus kiliro pobikag, logti,” aro yin saleropne sikindo ponekori ilipsaboag, “Kulukamundi tolingkina nu yin saleropnangdi aeag pabululom,” seog.
ACT 23:11 Pabiekpa, kwelekaogne, inipnag Paulus malamogpa, Nia Mangkina Salehiropne Yesus el peramag yaogti, yubu lelamogti, “Wana keagman uro wamlulam. Na sembe andi Yerusalema lebom saog uro, Roma pimendi babe wene aro ambatsululam,” seog.
ACT 23:12 Wene seogpa, mabogha ae kwelekaogpa, nimi Yahudi nimi taneko tognorobag longoptaekti, “Paulus obukap,” aro yubu lelamekti, “El ya'ag obebe taneogna kwanengap magap tukap. Kom tanena Allahri nu opsinep,” aro salag yubu karebaek.
ACT 23:13 “El obeberi, kwaneng tukap,” seek nang taneko teng nhonap epto naual bare nangdi lelamekpa, nen ma'aropne wamekti.
ACT 23:14 “El obeberi, kwaneng tukap,” seek nang tanekori memnang Allah sembe pairopnang sikindo yaboap, Yahudi nimi sikindoyabo wenehiropnangap ambarel phiekti, “Nuna 'Paulus obebe taneogna kwanengap magap tukap. Kom tanena Allahri nu opsilul,' aro salag yubu karebap.
ACT 23:15 Wene aro karebap ana, a'unap Yahudi nimi sembe tam lelekto kemero kareptopnang Mahkamah Agama nangap poloro wapmundi, mome toro yin saleropne sikindoag mome pipmunba, 'Nen sap samoro tam wali uro kembaukap ane sembe Paulus payalulam,' aro maneri mome toro piplulom. Pipmunba, yin saleropnang sikindori mololapmunne ka'ebaleri, nuri 'Obaukap,' senelamapne ekondi, 'Paulus sin wamangag payalulom,' aro arukahilul. Arukahileba, payalamikpa, inaag anam a'unag Paulus payan komag nuri inaag webaberi obukap,” aro ambatsiek.
ACT 23:16 Wene alameka aghana Paulus ilipsa'eldi mangaroba me nhon wamog menekori sindi yubu lelamekne ka'ebahiog. Ka'ebaogti, meneko yin salerop nangdi aeag piogti, “Paulusap haiptanunam,” aro yin salerop nang yae wamek nang tanekoag ambatsiogpa, “Hae haiptarurom,” seekpa wa'iogti, sindi lelamekne ka'ebahiogne Paulusag ambarog.
ACT 23:17 Wene aro ambarogpa, Paulusti yin saleropne nhon yobogti, “Me ane poa lepmendi, a'undo yin salerop neag poa pululam. El a'undoag yubu olog leplul,” seog.
ACT 23:18 Wene seogpa yin saleropne ponekori me aneko poa lebogti, sikindo yin saleropneag poa piogti ambarelamogti, “Paulus ae kop aeag wamlange ponekori yopneldi, 'Me ane anag poa pululam,' sel. 'Meneri yubu olog elag ambatlul,' selba payan,” seog.
ACT 23:19 Wene aro ambarogpa, yin saleropne sikindo ponekori meneko sae kiliro saelba ae paroag sip piog. Ae paroag sip piogti, hailamogti, “Sa'a agha nanag 'Ambatnun,' aro leplam,” seog.
ACT 23:20 Wene seogpa menekori, “Yahudi nimiri saekag lelamangne ka'ebahinnena, nari nawang Paulus sembe 'Nen sap samoro ambuhum tam wali uro kembaukap. Nuri tam lelekto kemero kareptobag Mahkamah Agama winil talamikag payalulam,' aro anag molbaghukang.
ACT 23:21 Wene aro molbaghukang aghana, andi sindi yubu ka'ebahiseng kom. Nimi teng nhon epto naual bare phelekto abenekori, 'Paulus obukap,' aro inaag webaikti wamnuang. Sindi lebangnena, 'Nu Paulus ya'ag obebe taneogna kwanengap magap tukap. Kom tanena Allahri nu opsinep,' aro salag pibangdi, yubu karebangdi wamang. Sindi 'Nen payalulam,' aro maneri mome toro toatsinne sembe molbagha nuagheang, wenena andi yubu lenne sembe agha nang-nangaro wamang,” aro ambarog.
ACT 23:22 Wene aro ambarogpa, yin saleropne sikindo ponekori menekoag, “'Elag yubu undo ambatna,' aro nimiag ambatsiseng kom,” seogti, “Anenge aeag pululam,” seog.
ACT 23:23 Meneko elenge aeag piogpa, yin saleropne sikindo ponekori ilipsabo yin salerop nang phende yopsiogti ambarelamsiogti, “Yin salerop nang teng linbare saog nimiap (200), yin salerop nang pham kuda alibag pan nang teng wilindi saog nimiap (70), yin salerop nang kame lausiki saleropnang teng linbare saog nimiap (200) poloro webitsululam. Webitsimenba, heng purukaleba, olog inibin tanaleba, Paulus as ane agha poa lepmundi, as Kaisarea poa pululom.
ACT 23:24 Keledai Paulus alibag walenne babe webitmendi, poa mog so'o ane saleropne Feliks ya'aghag wali uro Kaisarea poa pululom,” seog.
ACT 23:25 Yin saleropne sikindo ponekori, mog so'o saleropne Feliks sembe mome tobogne lilimna ane:
ACT 23:26 “Na Klaudius Lisiasti nani nubunge walinge Feliks aro kiplangken.
ACT 23:27 Nimi ene Yahudi nimiri saelbaongdi, sindi 'Obukap,' aro ulamang. Aghana nimiri, 'Nimi ene Romange,' seongba, ka'ebanori na naipsaboapti Yahudi nimiri saeag agha taluro tomno.
ACT 23:28 Taluro tobobori, 'Sa'a sembe lelamang tam kembaukap,' aro Yahudi nimi sembe tam lelekto kemero kareptop nimi Mahkamah Agama nimiag poa pibo.
ACT 23:29 Poa piboba, eldi tam malia unneap sunsunum uro, tam elag 'Tebalul,' aro tininneap, kop aeag tolongonneap sunsunum uptao kom. Sindi elag tam yo'o saog nembaongnena, 'Musa yubu samenag mome toro piropne philamla,' aro undo agha lebong.
ACT 23:30 Apna na yubu ka'ebanonge, 'Yahudi nimiri, “El obukap,” aro yubu lelamang,' seongba ka'ebano. Ane sembe nari 'Elemag nai anag poa pululom,' sen. Sendina tam elag yubu lelamang nangagna, 'Tam a'undi lelamlomne poa elag poa pululom,' sen anekona an babe el uro,” aro mome pibog.
ACT 23:31 Mome undo pibogpa, sikindo yin saleropneri ambatsiogha sunsunum uro inipnag Paulus poa as Antipatris poa piek.
ACT 23:32 Kwelekaogpa lukunapne yin salerop nangap, kame lausiki salerop nangap aeag samoro Yerusalem yaekpa, yin salerop nang agha pham kuda alibag pan nang tanekori Paulus poa sin Kaisarea sip palamek.
ACT 23:33 As Kaisarea aneko piekti, sikindori mome pibogap, Paulusap mog so'o Kaisarea saelba uropne Feliks ponekoag tarek.
ACT 23:34 Mome tareka aneko kembaogti, Feliksti Paulusag, “Anna talange,” aro haibaog. Wene aro haibaogpa, Paulustina, “Na Kilikiange,” seogpa eltaogti,
ACT 23:35 Feliks ponekori, “Tam anag pibong nimi taneko yaik tanena tam anag pipkeongne kembaukap,” seogti, “Nimi nubunge yubu sia leropne Herodesti samenag sobaog aeag piapmundi, yae wamlulom,” aro ilipsaboag ambatsiog.
ACT 24:1 Ik lambare wameka memne Allah sembe pairopnang sikini nubunge sina Ananiasap, Yahudi nimi sikindoyabo wenehiropnangapti sindi, “Yubu tam Paulusag pibebenge sembe lelekto mog so'o wamabag saelba uropne ambatsilul,” aro nimi nhon sina Tertulus webekti, sin nhon piek. Piekti, “Paulusag tam wamla,” aro “Mog so'o saelba uropne Feliks ambarukap,” aro as Kaisarea piek.
ACT 24:2 Sin poloro wamekag Feliks ponekori el umag wameknangag, “Paulus payalulom,” seogpa payaek. Payaekpa, Tertulus neneko sekelabiogti, Yahudi nimiri Paulusag tam palilamekne sembe ambarelamsiogti, “Nani nubunge Feliks, an wamlamagna nununge mog so'o ene aingniamla. An wana hektopne wamlamdi, yubu lelamlamdi, mog so'o nununge tane wali uro o'obarelamsilamba, wali uro palamla.
ACT 24:3 Nani andi uaomne nu niri sop-sop ililamapti, salelamapti 'Wah, Feliks, Nani,' aro kiplangkeap.
ACT 24:4 An nimi nubunge tam maikno kemelamlamdi, ulamlamne na el wamna, ane sembe nani, 'Andi wana pailangkalapmendi, nari yubu olog lemnunne nene sembe ka'eame,' aro mololangken.
ACT 24:5 Nimi ene meneng singina salehiropne saog wamlaba, as mog so'o ni abeneko posaplamlaba, ililamap. Yahudi nimi as tala-tala wamangne eldi aghabog put-put ana tolongolamla. Nimi ene ekel ina ambatto Nasaretne yubu ka'elamang nimi sembe usog talamla.
ACT 24:6 Abeneog kom, aghana Allahri Mem Ae walinge eldi, 'Yahudi sisa kom nimi pabhineri, Yahudinang aghabog wamnebag tobongkipsineri, Allahri Ae Mem Ae loba nembanun,' aro ulamo. Undo ulamoba, kembabori, nuri 'Musa yubu saelba ulamapne sunsunum uro tam karebaukap,' aro Paulus saelbabo.
ACT 24:7 Wene sembabori, Paulus saelbabo aghana yin saleropnang sikindo Lisias neneko yaori, nu saeag agha yo uro nimi ene tolao.
ACT 24:8 Nimi ene pelepto tobori, nunag ambarelamsiori, 'Mog so'o salehiropne Feliksti tam kembalulba, elag pululom,' aro ambatsioba yaap. Nai andi haibamendi, nuri lebapne sembe 'Sik uro lebang,' aro el talulam,” seog.
ACT 24:9 Wene aro ambarogpa, Yahudi nimi taneko wamek nimiri babe “Sik lepla,” aro wene alamek.
ACT 24:10 Wene alamekpa, mog so'o Kaisarea saleropne Feliks ponekori Paulusag, “Andi babe yubu leplulam,” aro haing tibu nginikom seog. Haing tibu nginikom seogpa Paulusti, “Nani, na el wamnange, andi Yahudi nimi mog so'o eneag wamapne heng kun-kunne saelbamsilamdi, nuri ul palamapne sembe el ua ulamlamdi, tam kemero kareplamlamne na el wamna. Ane sembe na wana yeng wamnelne nanag tam palilamangne nene, nani, andi 'Kembaho,' sembamna.
ACT 24:11 Nani, andi nimiag haibahimenba, sindi lebikne agha el talulam. Na as Yerusalem, 'Allah omekel pinun,' aro pinori wamnoba, ik ao bare sum taoba, wene wamap.
ACT 24:12 Na Yerusalem wamnonge aneko Allahri Aeag babe, Allah yubu lerop aeag babe, inaag nimi ua urobag babe yabalamnari, nimi nhonap babe yubu wabahin koma nimiag 'Yubu talul,' aro suknunne babe orog.
ACT 24:13 Sindi babe, 'Tamna nene sembe lelamap,' alamang aghana, 'Malia uao,' senenne kekneba uanonge nhon anag lag nembanep kom saog wamla.
ACT 24:14 Nani, na an whingag agha lag phoro lemnun. Nari omeklamnange nunisari Allah omeklamekne poneko omeklamnari, Yesusti Allahag samoro yingkirop Ina pa'abaogne poneko omeklamna. Ina pa'abaogne poneko omeklamnange, 'Ekel ina ambarelamsilne,' alamang aghana, Musari samenag mome toro pibog yubuap, Allahri yubu silimu tiplamek nimiri mome toro pibek yubuap 'Sik' senelamna.
ACT 24:15 'Nimi malia uropne walia uropne Allahri kamag nembahilul,' aro nari babe seneraglamnari, wana piamnange nang-nangaro wamna. Nang-nang aro wamna saog uro 'Allahri nimi kamag nembahilul,' aro sindi babe nang-nangaro wana piamang.
ACT 24:16 Nimi malia uropne walia uropne Allahri kamag nembahilul ane sembe Allah whingag babe, nimi whingag babe wanaag agha nia mangkina ulamnange 'Walinge aghabog uahane,' senelamna. Undo unulamnange sembe 'Malinge ulamna,' seneldalamna kom.
ACT 24:17 Nangkabo urobag heng kun-kunne uldongolamneldoba, sindi wanari, 'Nungkabo Yahudi nimi sae agha orog nimiag yepsukap,' aro tatneongba, as Yerusalem payano. As Yerusalem yan komag agha, 'Allah sembe mhong towalengerobag wali-walia pimnun,' sembanori, 'Yahudi nimi as Yerusalem wamangne yepsinepne tarel phinun,' aro as Yerusalem samoro yanori payano.
ACT 24:18 Yanori, 'Allah whingag wali neneptanun,' aro Musari samenag mome toro pibogne sunsunum uro aleltalamnori, wamnoa Allahri aeag wa'ino. Wa'inori, unulamnoagna nimi suknubahin koma wamnori, nimi maikno nanap nhon wamobo kom. Nari yubu suknuna nimiag suknunne babe orog aghana, Yahudi nimi mog so'o Asia agha yaong nimi tanekori imneong. Sin Asia nangdi nari samen uldongolamnoag agha yaongdi, imneongdi, tam nembaong. Yahudi nimi Asia so'o agha nimiri tam nembaong nimi eneko yahengdi, nani an whingag lepseng tanena wali.
ACT 24:20 Yahudi nimi Asia so'o agha nimi taneko yaong komba, yaang nimi taneri samenag nu Yahudi nimi sembe tam lelekto kemero kareptobag Mahkamah Agama enero poa pineong. Mahkamah Agama enero poa pineongba, wene tamna nene sembe payaneang sembano kom aghana nen sap wene ane payaneang. Malinge uanonge sembe sindi wene ambatkukang sembamna.
ACT 24:21 Na Yahudi nimi sembe tam lelekto kemero kareptop nimi whingag Mahkamah Agama pabineongpa, yubu kiki leploa saogne lemnongena: '”Nimi teptopne kamag taukang,” senonge sembe tane pukitnelom,' senonge sembe na yubu tam nembaneong, to?” seog.
ACT 24:22 Wene aro Paulusti ambarogpa, Feliks poneko Yesusti yubu ina neleptop nimi sembe el uro wamog aghana, “Amik karebanun,” sembamog. Undo sembamogti, “Yin saleropnang sikindo Lisias yaleri, yubu ambatnelenge ka'ebaneri, tam nene karebanun,” aro wene seogti pibog.
ACT 24:23 Wene seogti, yin salerop nang sikindo ponekoag, “Paulus wali uro piapmendi, elkabori yebel alamikne sembe yag lambahiseng kom,” aro ambarog.
ACT 24:24 Ik etbare wameka Feliksap elkel Drusila Yahudi kelenekoap yaekpa, Feliksti, “Paulus tol pululom,” seogpa, payaekpa, Paulusti Yesus Allahri wepto poghol aogne ponekoag “Sikne” aro seneragnepne sembe Feliks lelekto ambarelamogpa, Feliksti aoag agha ka'eloamog.
ACT 24:25 Ka'elobongkia wamogpa, Paulusti Allah yubu tibin nenero porog uro ulpanneap, eldamneri wana pailangkanneap, Allahri amik tam karebelalulneap sembe Feliks ambarogpa, Feliks poneko log sembaogti, “Ot abene ambatnelamba pululam. Nen 'Ambatnelul,' sembane tanena yopkunun,” seog.
ACT 24:26 Feliks poneko wanaag seneraglamognena, “Kal ma'al tatneleba, sae loplambanun,” sembamogti, ik sulu Paulus yoplamogpa, yubu lelamdek.
ACT 24:27 Paulus aneko piamogne heng kun phende piogpa, Feliks lunumna sina Perkius Festus waelbaog. Aghana Feliksti “Yahudi nimi wana topsunun,” aro “Paulus kop aeag aneko wamlul,” sembamog.
ACT 25:1 Festus poneko “Yudea so'o saelbamlulam,” aro nimi nubunge towalengkaogpa, as Kaisarea ae inipna ik wilindi wamogha as enekoag agha Yerusalem waelbaog.
ACT 25:2 Yerusalem waelbaogti, wamog. Wamogpa, memnang Allah sembe pairopnang sikindo yaboap, Yahudi nimi sikini yaboapti tognoro saekag lelamekti, “Festus whingag piberi, 'Paulus Yerusalem poa pululom,' aro molbaukap. Molbabeba, Paulus inaag payalamikpa, Paulus obukap,” aro saekag lebek. Undo tognoro saekag lebekti, Festus poneko whingag piekti, “Paulusti undo-undo ulamo. Ane sembe nai Festus, andi nu sembe wali sembahimen tanena, 'Paulus as Yerusalem poa pululom,' sululam,” aro molbaek.
ACT 25:4 “Obukap,” aro tognoro saekag lebekti, Festus ponekoag, “Paulus as Yerusalem pabululam,” aro molbaek aghana Festus nenekori, “Paulus as Kaisarea kop aeag wamlaag wamlul. Wamleba, na babe olog wamnea as Kaisarea samoro punun sembamna.
ACT 25:5 A'un a'uni yabo 'Eldi uaonge sembe elag tam pibukap,' sembamun tanena nanap nhon as Kaisarea piberi, elag tam piplulom. Elag tam pimnepne wamle tanena, lelekto kembaberi, 'Malia uao to, kom to?' aro karebanun,” seog.
ACT 25:6 Undo wene seogti, Festus neneko ik linbarero ik saobarero undo as Yerusalem wamogha samoro Kaisarea kulukulaog. Wamogha lukunapne, “Yubu tam lelekto kembaberi, tam karebanundi, Paulus enel pululom,” aro ilipsabo ambatsiog.
ACT 25:7 Paulus sin poloro wamekag enero payaekpa, Yahudi nimi Yerusalema yaek nimi taneko el kanero sekek. Paulus kanero sekekti, yubu maikno lelamekti, “Malia undo-undo ulamo,” aro lolorop yubu lelamek aghana, “Malia uaonge undo-undo ulamo,” alamekne tiplamog komdi, nimiri sik sembanep kom saog wamog.
ACT 25:8 Wene alamekne tiplamog komdi, sik sembanep saog kom wamogpa, Paulusti, “Nandamne sembe peleptangtop yubu lemnun,” aro sekelingkiog. Sekelingkiogti, yubu lelamogti, “Nari ulamnangena, Musari samenag mome toro pibog yubu Yahudi nimiri salero ul palamang yubu phibano kom. Allahri Ae sembe babe, yubu sia leropne nubunge Kaisarag babe, nari tam malia unne babe san lenne babe orog senelamna,” seog.
ACT 25:9 Wene seogpa, Festus ponekori, “Yahudi nimi wana topsunun,” aro Paulusag hailamogti, “'Tam ane as Yerusalema karebaukapti, pukap,' senne sembe saekag senelamlam, te?” aro haibaog.
ACT 25:10 Wene aro haibaogpa, Paulusti, “Samenag yubu sia leropne nubunge Kaisardi anag, 'Yudea so'oag pimendi, saelbamsululam,' aro sekitkeo. Sekitkeoba, an whingag tane wamnari, tanea babe andi tam karebanep. Nari ologha babe Yahudi nimiag tam malinge uan komne nai an el wamlam.
ACT 25:11 Nari sik uro malia uahi tanena, malia uahinge sunsunum uro opnumunba, wali tebanun. Aghana tam nanag palilamangne orolenange lelamangdi, lolorop yubu lelamang tanena, nimi nhondi babe sin Yahudi nimi saeag nembanukang kom. Na Kaisar whingag waelbaneba, Kaisarti tam karebalul,” seog.
ACT 25:12 Wene seogpa, Festus poneko el yubu eptopnangap yubu nikne lebekti, Paulusag ambarelamogti, “'Kaisarag waelbanun,' selamba, elag pimenba, Kaisarti tam kemero karebalul,” seog.
ACT 25:13 Ae ik etpare wamekpa, nimi nubunge yubu sia leropne Agripaap, ilipsa'el Bernikeap abeneko “As Kaisarea Festus poneko kipnunam,” aro yarek.
ACT 25:14 Aneko sin ik etbare undo wamekti, Festus nenekori Paulusag tam pibekne sembe yubu sia leropne Agripa ambarelamogti, “Nimi sae kauptopne nhon Feliks saelbamsiog liag agha Yahudi nimiri tam 'Eldi malia ual,' aro salero Feliks whingag pabiekpa, sae kaupto kop aeag tobongkibog. Kop aeag tobongkibogti, tam kareban komdi, wene babe kop aeag wamla.
ACT 25:15 Kop aeag wamlange ponekona, na Yerusalem pinoba, memnang Allah sembe pairopnang sikindo yaboap, Yahudi nimi sikindoyabo wenehiropnangapti, tam malia uamonge ambatneongdi, 'Malia ualne sembe “Opsut,” sululam,' aro molbaneong.
ACT 25:16 Wene aro molbaneongba, nari ambarelamsinori, 'Yubu sia leropne nubunge Kaisardi ambarelamsiogne sunsunum uro salero ul palamapnena, nimi nhondi nimi nhonag tam palilamle tanena, tam elbina malia uropne poneko haiban koma nimiri tam karebanep saog wamla kom. Tam tangtopneap tam paliropneap nikag wamnaba, tam anabiag wamnari kemeropneri malia uropne poneko haibanep. Haibanba, tam tangtopneri eldamne sembe pelebeltanan yubu tibin talbin tanena, tam lelekto kemero kareptop nimiri, “Ualne sembe undo uaukap,” aro karebaleba, eldi yubu sunsunum uro tam tangtopneag uro yabilul,' aro wene seo.
ACT 25:17 Wene aro ambatsinoba, sinap nu nhon as Kaisarea tane yabori, maboboa kwelekaonge 'Ta'ap sen koma yubu tam lelekto kembaberi karebaukap,' aro 'El neneko enel pululom,' seno.
ACT 25:18 Elag tam palirop nimi taneko kanero sekamongdi, 'Eldi malia uaonge “Undo-undo uao,” aro lag phoro lebukang,' sembano. '”Undo-undo uao,” aro lebukang,' sembano aghana, nimi nhondi babe, 'Eldi malia uaonge ane,' aro lebongne, nari samenag sembanonge sunsunum uro lebong kom.
ACT 25:19 '”Tam ikinne ane,” aro lebukang,' sembanonge sunsunum uro lebong kom aghana, ot sindi omeklamongne sembe aghabog tam nembaongdi, yubu lelamong. Apna, nimi nhon samenag tebaogne si Yesus sembe Paulusti, 'El sik uro kamag taogti, wamla,' aro ambatsionge sembe yubu tam saog tao.
ACT 25:20 Sin undo yubu lelamongba, nari 'Yubu tam ane sembe lelamang,' aro karebelbana, enhaun seo. Ane sembe nari Paulusag hailamnori, 'An Yerusalem pimenba, Yahudi nimi ua urobag tam ane karebanundi, wali sembalam te?' aro haibano.
ACT 25:21 Wene aro haibanoba, Paulustina, '”Kaisarti tamna karebalul,” aro Kaisar nang-nang aro kop aeag ane wamnun,' seo. Ane wene seoba, nari 'Kaisarag pognun,' aro kop aeag piamna,” seog.
ACT 25:22 Wene seogpa, Agripa nenekori Festusag, “Nari babe, 'Nimi neneko eldamneri yubu lelamsoa ka'ebahane,' sembamna,” seogpa, Festus nenekori, “Ambhum el yubu leplenge ka'ebalulam,” seog.
ACT 25:23 Wene seogpa, mabeka lukunapne Agripaap ilipsa'el Bernikeap nimi nubu nimiri towalengeroba towalengkibtekpa, yin salerop nang sikini yaboap, as eneko wamek nimi sikini yaboap wa'alamek. Wa'iekpa, Festus ponekori, “Paulus tol pululom,” aro nimi arukahiog.
ACT 25:24 Paulus tolpina payaekpa, Festus nenekori yubu lelamogti, “Yubu sia leropne Agripa nuniap, nimi ni tane yalomne nangkabo! Yahudi nimi ni taneko Yerusalem wamangneap, Yahudi nimi kota Kaisarea tane wamangneapti, nimi pone sembe 'Malia ulamo,' aro yubu maikno lelamong. Yahudi nimiri nanag yingkina koloro, 'Nimi ene ik waro wamlul kom, tebalul,' aro haum alamong.
ACT 25:25 Undo wene alamong aghana, nari kembanori tam uaonge sunsunum uro tam elag palina babe orog uao. Ya'ag onna babe orog uaoba, eldamneri 'Kaisarti tam karebalul,' seoba, nari, 'Kaisar ya'aghag kota Roma pabiikpa, Kaisar whingag pulul,' aro yubu lemno.
ACT 25:26 Yubu lemno aneko agha 'Eldi tam malia uaonge Kaisarti kemero karebalul,' aro mome toro palina tam orog kembano. Na el wamnange, nimi nhondi malia uropne tam kembanba, 'Eldi uaonge tam nene sembe uao,' aro mome toro palinne oroghag agha, 'Kaisarti kembalul,' aro elag pognep kom sembamna. Ane sembe a'un ni wamlomne whingag el pailan. Nuni yubu sia leropne Agripa, an babe Yahudi nimiri omekto ul palamangne elne wamlam. Tam eldi uaonge kembabeba, tam wamleba, ibebe tanena, eldi uaonge sembe nari mome tomneri, Kaisarag pognun,” aro ambatsiog.
ACT 26:1 Wene aro ambatsiogpa, Agripa ponekori Paulusag, “Wene andi ulamlamne sembe pelebel tanan yubu leplulam,” seogpa, Paulusti, sae la'abatsiogti, yubu lelamogti,
ACT 26:2 “Yubu sia leropne Agripa nani, Yahudi nimiri lolorop yubu nanag lolbaneongne sembe sumene an whingag agha pelebel tanan yubu lag phoro lemnunne sembe awi yeng uro wamna.
ACT 26:3 Yahudi nimiri sikinisari ulamekne saelba ulamangneap, tam sin anabiag lag taongeap ni ane sembe an el wamlam. An el wamlamba, nari ambatkinunne andi wana palingkina wali ka'eamnululamba, mololangken.
ACT 26:4 Na nari asag agha mangkaneekpa, na kaubuniag agha Yahudi nimiri saelba ulamekti, ulamekne ambaneek. Ambaneekpa, as Yerusalem ane babe yahiba, nen anea ma'aro ambaneek. Ambaneekpa, na yabalamsiri, ulamsia Yahudi nimi as Yerusalem wamekneri imneekne sin el wamang.
ACT 26:5 Sin samenag agha na sembe sin ni el wamang. Sindi agha, na Farisinge wamsiri, Musari yubu toro pibogne sembe mikip uro saelbamsiri, yubu ane sunsunum uro ul palamsinge 'Hae lebukap,' sembaik, tanena ambarelamsinne sembe 'Sik lepla,' aro lebukang.
ACT 26:6 Na wene ane sekamnangena, 'Allahri nunisa yaboag “Undo uanun,” aro salag pibogne sunsunum uro sik talul,' senelamnari, nang-nang aro ulamna. 'Allahri, “Uanun,” seogne sik talul,' aro nang-nang aro ulamnange sembe nimiri saelbaneongdi, wene ane tam kareptop nang whingag payaneongba, sekamna.
ACT 26:7 Nu Yahudinang sisa aobare wamapne nene, 'Allahri samenag salag pibogne sunsunum uro sik talul,' aro nu niri sinag kweleknag sol wali, wali uro Allah omeklamekne saog uro nu babe nang-nang aro omeklamap. Nani Agripa, undo seneraglamekti, ulamekne sunsunum uro ulamnonge sembe Yahudi nimiri nanag, 'Tam malinge ulamlam,' alamangpa, na wene pelebeltanan yubu ambarelangken.
ACT 26:8 Nangkabo, sa'a sembe a'undina, 'Allahri nimi teptopne kamag nembanep kom,' aro seneraglamlom?
ACT 26:9 Samenag nari babe '”Yesus Nasaretne si nubu taleag,” aro yo uro ulamsinun,' senelamsi.
ACT 26:10 Lemnange nene Yerusalema unulamsisi. Memnang Allah sembe pairopnang sikindo yabo tanekori, 'Nuri sae wamla,' aro yubu nanag pibekpa, nimi Yesusag 'Sikne' aro seneragtop nimi maikno haing sae kaupto kop aeag tobonglamsisi. Kop aeag tobongolamsisiri, 'Ya'ag tepnange babe wali tebaik,' aro yubu lepsiri, Yahudi nimi nubunangap saekag lebubuag agha, Yesusag seneraglemek nimi ya'ag opsiek.
ACT 26:11 Yahudi nimiri Allah yubu lerop ae nhonag pang nhonag pang ulamsisiri, 'Yesusag seneraglamangne sembe opsukap,' aro sen-senna elamsisi. Elamsisiri, ililamsisiri, 'Yesus san tiliplopsisut,' aro ambarelamsisi. Yo maikno senelamsisiri, kota maikno weag wamekag babe el palamsisiri, 'Seklebaukang,' aro ul palamsisi,” aro Paulusti nimi nubunge Agripa whingag ambatsiog.
ACT 26:12 Paulusti nen tipto ambarelamsiogti, “Undo unulamsiba, memnang Allah sembe pairopnang sikindo yabo tanekori, 'Nuri sae wapmendi, as Damsyik pimendi, undo-undo ualulam,' aro ambatneekpa, 'As Damsyik punun,' aro palamsi.
ACT 26:13 Nani Agripa, yubu sia lelamlamne, inaag palamsiba ae siro heng ik molmol alamog abene heng tingirop saog komne tibin warerop sirikne imag agha nanap nangkabo palamubu nangag warelopsiog.
ACT 26:14 Warelamsiog abeneko nangkaboap nu so'oag malingkiburi, ka'elamsiba yubu nhon Ibrani yubuag lelamogti, 'Saulus, Saulus sa'a sembe “Seklebale,” aro Na ulamnelam? Eldi yagto pabalangkelne pheleptangka pululam kom. Pheleptangka palapmen tanena og seklebalulam,' alamogpa ka'ebahi.
ACT 26:15 Wene alamogpa ka'ebahairi narina, 'Nai, an etneri lelamlam?' sihiba, Eldina, 'Na Yesus andi “Seklebale,” aro ulamnelamne ponekori lelamna,' alamogha ka'ebahi.
ACT 26:16 Eldina, 'Wene pukmendi, sekelabi. An “Na arukna wapmendi, wene imnelamneap amik Nari 'Ualulam,' sununneap nimi ambarelamsululam,” aro Nari sekitkunundi, an haingag lag tan.
ACT 26:17 Nari an poglangkenne, “Yahudi nimiap, Yahudi sisa kom nimi as tala-tala wamang nimiap babe sin wamangag pululam,” aro poglangken. Poglangkenne saelbaghiikpa, Yahudi nimiri saeag agha babe, Yahudi sisa kom nimi mog so'o as tala-tala nimiri saeag agha babe, Nari sae lopkenun.
ACT 26:18 Poglangkenba, sin wamangag pimendi, sin nimi taneko haing uropne haing kwelekel palamsululam. Haing kweleklamsimenba, inibinag lilobiagha samoro tibinag yalamukang. “Haing kwelekamikti, phia sikini nubunge Iblis ponekori saeag agha sae loptangom agha Allahag samoro yalamikpa, Allahri saelbamsukang,” aro poglangken. “Sindam nimiri Na Yesusag 'Sikne' aro seneraglamik tanena, Allahri 'Naringe aghabog wamukang,' aro wepsirop nimi sembe sindi malia ulamangne tam orog nembaleba, Allah Eldamne mabo taukang,” aro poglangken,' aro Yesusti ambatneo.
ACT 26:19 Ane sembe, nani Agripa, yubu sia lelamlamne, Yesus imagne ponekori kekneba nanag uaori, yubu ambatneonge sunsunum uro ul palamno.
ACT 26:20 As Damsyika nimi Yahudi nimi wamekneag agha alnina alnibahiri, kota Yerusalem nimiap, Yudea so'oag urop nimiap, Yahudi nimiap babe, Yahudi sisa kom nimi babe Allah yubu ambarelamsisi. Sinag ambarelamsisiri, 'Malinge ulamlomne lilobiagha Allahag samoro yamundi, Allah Elag wanaag seneraglapmundi, Allahri “Walinge,” seneropne aghabog ulamlulom. Allahri “Walinge” seneropne aghabog undo unulapmunba, nimiri “Malinge ulamangne lilobiagha Allah Elmabo taang,” aro el tanep,' aro ambarelamsisi.
ACT 26:21 Undo wene aro ambarelamsisinge sembe Yahudi nimiri Allahri Ae aramag agha saelbaneekti, “Ya'ag obukap,” aro uaneek.
ACT 26:22 Undo “Obukap,” aro uaneek aghana, Allahri samenag agha yeplamneoa wene babe piamnelba, wamna. Wamnari wene ane sekamnari, nari haingdi ipsinge nimi ologne nubunge ambarelamsin. Nari ambarelamsinnena, samen Allahri yubu silimu tiplamek nangdi lebekne mome toro pibekneapna Musa yubuap agha ambarelamsin. Yogne agha ambarelamsin kom.
ACT 26:23 Samenag Musaap Allah yubu silimu tiplamek nangapti ambarelamsiekne nenena, 'Allahri “Mog so'oag nimi taulbahilulam,” aro wepto poghol aogne poneko seklero tebaleba, Allahri nimi teptopne ua urobag agha El samenag kamag nembalul. Kamag nembaleba, elkabo Yahudi nimi elap nikag wamangne babe, Yahudi sisa kom nimi babe, “Allahri Na pere agha taulbahilul,” aro wepto poghol aogne ponekori tibin nenero ambarelamsilul,' aro ambarelamsiekpa, nen tipto ambarelamsin,” aro Paulusti ambatsiog.
ACT 26:24 Paulusti, “Undo-undo ulamsi,” aro pelebeltanan yubu ambarelamsiog abeneko, Festus ponekori yubu mikip uro lelamogti, “Paulus, an serem ulangkelba, lelamlam. 'Nia mangkina el tahane,' aro el talamlam aghana senaragna maiknori serem ulamlam,” seog.
ACT 26:25 Wene seogpa, Paulusti samoro, “Na serem saelbanelba, lelamna kom. Festus nani walinge, na seneragna walinge sikne agha lelamna.
ACT 26:26 Nani Agripa, yubu sia lelamlamne, lelamnange tane an babe el wamlam. El wamlam ane sembe na log kom uro, nani, an whingag lag phoro lelamna. Na el wamnange ni lemnange tane, nani, an ekonne nhon lemna kom. Lemnange uro yabionge agha lemna. Nen tognorobag agha uro yabiogne agha lemna kom.
ACT 26:27 Nani Agripa, yubu sia lelamlamne, samen Allahri yubu silimu tiplamek nangdi lebekne sembe sik senelamlam, te? Na elwamnange, nani, andi babe sik senelamlam,” seog.
ACT 26:28 Wene seogpa Agripari, “Andi senelamlamne, 'Wene abene, nari olog yubu lemnange ka'ebiagha Kristen nimi talul,' senelamlam, te?” seog.
ACT 26:29 Wene seogpa Paulusti, “Na Allahag molona molbanun, wene babe to, olog wamebeba babe to, an aghabog kom. Anap ane nimi wamang nimiap sembe, 'Nari yubu ka'ebaneang nimi tane na saog taukang. Na saog taikpa, nimi tanena haing sae kaupto pipsiseng kom,' aro Allahag mololamna,” seog.
ACT 26:30 Wene aro Paulusti ambatsiogpa, nimi nubunge yubu sia leropne Agripaap, ilipsa'el Bernikeap, wamekag mog so'o saleropne Festusap, nimi ni sinap pukamekne tanekoap sekekti,
ACT 26:31 lanalamekti sin mo-mo yubu leple palamekti, “Nimi ene uaoa sunsunum uro kop aeag tolongoro babe, ya'ag onne babe, tamna orog wamla,” aba palamek.
ACT 26:32 Wene aba palamekpa, Agripa ponekori Festusag ambarelamogti, “Nimi eneri 'Kaisarag pinun,' sele kom tanena kop aeag agha sae lopto lambitsebe. Aghana, eldamneri 'Kaisarag punun,' seo ane sembe Kaisarag pabukap,” seog.
ACT 27:1 “Kaisar ya'aghag mog so'o Italia sip pululom,” aro wene Festusti seogti, Paulusap nimi yogne haing sae kaupto wamekne tanekoap Kaisar arukna yin saleropne nhon sina Yulius neneko saeag nembaog. El saeag nembahiogti, “Andi poa phululam,” aro ambarog.
ACT 27:2 Ambarekpa kabong nhon as Adramitium agha yaogne neneko “As Asia so'oag mag longorop mag laut abolag soropne tanekoag nhonag wa'albang, nhonag wa'albang uanun,” aro ulamogne nenekoag wa'iburi pibu. Aristarkhus so'o Makedoniange ponekori aeag as Tesalonika agha yaogne ponekoap nhon pibu.
ACT 27:3 Mabubua kwelekaogpa, as Sidon saingnilingkibu. Saingnilingkiburi, yin saleropne Yulius ponekori Paulus o'ona sembaogti, “Ankaboag andi kwema sembamlama tatkukang bana kemeroa yabhululam,” seog.
ACT 27:4 As Sidon aneko laplobiagha mag alip toman agha palamububa, khao nu kabong palamubua whingag siba yalamogha sembe mag longorop mag laut kanero longorobag mog so'o Siprus khao maruktobag sip pibu.
ACT 27:5 Siprus so'oag anekoa mag alip toman aghabog palamubua, mog so'o Kilikia sirik sip mag longorop mag laut abol toman agha palamubu. Nen tipto palamuburi, mog so'o Pamfilia sirik sip mag longorop mag laut abol toman agha laploplo as Mira Likia so'oag saingnilingkibu.
ACT 27:6 As enekoag agha yin saleropne poamsiogne ponekori kabong nhon as Aleksandria agha yaog kabong eneko “Mog so'o Italia punun,” aro ulamogha ibog. Ibogti yalamubu kabong enekoag agha laplobiagha “Mog so'o Italia punun,” aro ulamog kabong enekoag enero poa tobongkipsiog.
ACT 27:7 Tobongkipsiogpa mag alip toman palamububa, khao kabong whingag siba yalamogti, yalamubuag sip ko'oro poa phinep ulamogne nenekori kabong alibag ik etbarero undo mabuburi, eraruk uro as Knidus peramag pibu. Khaori kabongag wamubunge “Pukap” senenag ko'oro pabhinep kom ane sembe Kreta khao maruktobag sip inagha yim Salmone amusogti lilirobag khao aingnirobag sip pibu.
ACT 27:8 Opsinep saog ulamogpa nemen-nemen eraruk uro yim Salmone amusoghag anekoa mag alip toman palamuburi, kabong nenne babe saingnil pirobag as Lasea peramag “Saingnil Piroba Walinge” si engeropne nenekoag saingnil pibu.
ACT 27:9 Undo palamububa, “Italia sumene saingnilbukap,” sembabu sum eneko phibaogpa, Israel nimiri nubu sum kwaneng terop kom sum eneko uro libek. Undo libekpa, khao li taogne sembe “Magti yamoro tapsileag,” aro Paulusti yubu ambarelamsiogti,
ACT 27:10 “Nangkabo, nari kembanba, nu ina panne eraruk ulamlaba, iamnarina pukap kom. Kabongag poamaba babe, kabong babe, nu nimi ane babe opsinep iamna,” seog.
ACT 27:11 Wene seog aghana, yin saleropne ponekori Paulusti lebogne sembe sik sembaog komdi, kabong ngaingeap, kabong u o'oropneapti leptekne agha sik sembaog.
ACT 27:12 Kabong saingnilingkirobag ane, “Khao li wamnual,” aro kabong saingnia unne eraruk wamog. Mag kanero longorop so'o Kreta so'oag as nhon sina Feniks wamogpa, kabong saingnirobag heng pulingkirobag sip tibogto, waneng sip babe, sirik sip babe tibogtobag wamogpa, “Khaori opsinep komag aingnirobag wamla,” sembaek. Ane sembe kabong porop nang tanekori, “Anea lambaberi, khao li wamlange nene as Feniks pina wamukap,” aro wene seek aghana nen nimi nhon-nhon nimiri saekag lebek kom.
ACT 27:13 “Lambaukap,” aro wamek abeneko phoana nemenag yangaro-yangaro mag longorop mag laut siba mog so'oag sip yalamog. Mag longorop mag laut sip agha phoana yangaro-yangaro yalamogpa, “Hae phoana aneri Feniks asag pabil philul,” sembaekti, “Kabong saelbamlul,” aro kirik simbuk saogha maghag pelengeroba aneko toro kabongag towalengkaekti, ag kabongag kerekaekpa, “Phoanari kabong ko'oro pabalamlul,” aro kerektop ag towalengkaekti, mog so'o Kreta mag abol peram toman kabongag palamap.
ACT 27:14 Olog palamekpa, khao nubunge Krete so'oag ople siba mag longorop mag laut simbik pabirop khao yalamog.
ACT 27:15 Yalamogti nu palamubu kabong enekoag sibil alamog. Khao yalamogne neneko mikipti, “Mog so'o Krete mag abol toman palamukap,” aro ulamubu aghana, kabong aneko panne eraruk wamogpa, kabong aneko babe khao palamoghag sip mikip taog. “Elba eldi ualea,” aro pulobububa, mag longorop mag laut sip pabalamsiog.
ACT 27:16 Pabalamsiogti mag longo kanektobag as Kauda aneko maruktobag sip aneko pilphiogpa, eraruk uro kabong nubunge pomaghag sip kerektop kabong ologne haing kerekto kiliro toro pibubu.
ACT 27:17 Kabong ologne neneko kiliro towalengkaburi, nu pabalamsiog kabong aneko magti sibilalamleba, “Taongkaleag,” aro haing mikipne agha nu pabalamsiog kabong aneko wan-wanoro kaubek. Kaubekti, “Khaori mag longorop mag laut ingkisag Sirtis kirik a'angkeag meldal paphileag,” aro log senelamek. Log senelamekti, ag kabongag kerekaekne, “Phoanari ko'oro pabalamlul,” aro kerektop ag wamogne togto pibekpa, kabong aneko khao palamog ina nemen palamog.
ACT 27:18 Mabubua kwelekaogne neneko khao aneko olog paplamog komdi, opsinep ulamogpa, kabongag ikinne poameka taneko maghag talamsiek.
ACT 27:19 Mabubua ik wilindip sumeneko kabongag soroba taneko sinba kabong porop nimi tanekori maghag talamek.
ACT 27:20 Khao anekori unulamogpa, kabongag palamubunge nene heng babe imbrea babe olog ililamubu kom. Undo palamubua ik etpare imbrea babe heng babe ililamubu komdi, khao anekori sibil alamogpa, “Ot tebaukap aneog,” seneragamubu.
ACT 27:21 Nimi taneko ik maikno kwaneng tero koma wamekpa, Paulus sin anabiag sekogti, yubu ambarelamsiogti, “Nangkabo, Kreta wamoboa nandamneri lemnonge a'undi ka'ebanohomba, nuri poamaba tologlamsibongeap, kabong kwerekto maghag talamobongeap unuahabe kom.
ACT 27:22 A'un nari wembahino yubu ka'ebaom kom aghana, wene nari wenelamsinne, wana aingniro wamlulom. Nu kabong eneag agha nu ni tebaukap kom, ot kabong aneogna loba talul.
ACT 27:23 Nari lelamnange nenena undo. Na inipnag lenda mamnaba, Allah naringe omeklamnange poneko Eldamneri arukna malaikat nanag poghol aoba, yaldi na peramag sekamla.
ACT 27:24 Yaldi, na peramag sekamlari, leplangena, 'Paulus, log sembaheng kom. An Kaisar whingag pululam. Allahri an o'ona sembangkelba, nimi anap kabongag wamlomne tane nhon babe tebalulom kom,' aro wene malaikat nenekori ambatnel.
ACT 27:25 'Tebalulom kom,' aro ambatnelba, nangkabo, wana aingniro wamsu. Nanag ni ambatnelne nene ni uro yabilulba, na Allahag seneraglamna. Ane sembe nangkabo, wana aingniro wamsu.
ACT 27:26 Tebaukap kom aghana kabong aneri nu mag longo kanektobag pabalamsileri, meloptaleba, kabong ane kolabalul,” aro Paulusti ambatsiog.
ACT 27:27 Ik meke sumeneko khao anekori kabong ane pabalamog paghabog mag Adria laut longoropneag pabalamsiog. Pabalamsiogpa, inipna tomnusam talamogpa, inipnag kabong porop nimi tanekori, “Abolag payalamsil, te?” sembaek.
ACT 27:28 “Abolag payalamsil, te?” sembaekti, kirik haing kerekongkia peleng-peleng yalamekpa, mag longoroba we aneko haing kongkarekna yan kwagha tariro ingina teng nhon epto naul bare wamog. Nen olog pabalamsiogpa, pelengelamekpa haing kongkarekna yan kwagha tariro ingina teng nhon epto wilindi wamog.
ACT 27:29 “Kabong aneko kirik sildiag tipleag,” aro sin log lelem kirik simbuk tombare kabong pomaghag sip pelengkaekti, “Elemag kwelekale,” senero wamek.
ACT 27:30 “Elemag kwelekale,” senero wamekti, kabong porop nimi tanekori, “Magti kabong aneko kolabaleagti, kabong nubunge laplobiagha kabong ologne maghag pelengkaberi, mag alip toman tognoro pukap,” aro saekag lebek. Undo tognoro saekag lebekti, maneri ulamekti, seneraglamekti, “Ora nimi ekon wamukang. Kabong porop kom nimiri sembaukangnena, 'Kabong paiag sip saelba unna kirik simbuk whingag sip wamlange pelengelamang,' senelamikpa, mag alip toman kabong ologneag agha tognoro pukap,” aro kabong ologne kabong nubungeag wamogne neneko maghag pelengkaek.
ACT 27:31 Undo unulamekpa, Paulusti ipsiogti, el taogti, yin saleropne sikindoap ilipsaboap tibin nenero ambarelamsiogti, “Kabong porop nimi tanekori, 'Tognoro pukap,' aro ulamang aghana, kabongag wamna koma liloa piik tanena, nhon kamag wamlulom kom,” seog.
ACT 27:32 Wene seogpa, kabong nubunge porop nimiri “Tognoro pukap,” aro ulamekne sembe, yin saleropnang tanekori el taekti, kabong ologne kabong nubungeag haing kerekameka taneko haing karepto maghag talopsiek. Kabong ologne maghag talopsiekpa, kabong nubunge porop nimi tognoro piek kom.
ACT 27:33 Kwelekanep peram Paulusti “Kwaneng tululom,” aro wenelamsiogti, “'Khao kom taho,' senero wamomdi, ik mek bare kwaneng ten koma wamom.
ACT 27:34 A'un wali kamag wamlulomba, kwaneng a'un samenag tululom. A'un ni ane wamlomne a'undi usoghag hong pongoropne hong kiki nhon seknagha timbalul kom,” aro ambatsiog.
ACT 27:35 Wene aro ambatsiogti, Paulusti kwaneng roti tobogti, sin ni wamekne whingag agha Allahag “Nani, wah, walia tatsilam,” aro lelamogti, khepto-khepto tatsiogti, Paulus samenag teog.
ACT 27:36 Sin wana ikin wamsiogne wana aingnibahiogpa, sin babe awi yeng uro kwaneng telamek.
ACT 27:37 Nu kabong enekoag nimi yalamubungena, nimi teng sa'obare eptopneap (276) ane yalamubu.
ACT 27:38 Kwaneng tiburi, mon tahiogpa, kabongag kwaneng roti sumbaneba gandum wana poamekne taneko “Kabong keyagman talul,” aro maghag talolamsiek.
ACT 27:39 Kweleklamogpa kabong porop nimi tanekori tilamekpa, mog so'o kirik a'angkea ingkis sameptopne nhon tibog aek. Kabong porop nimi taneko mog so'o ene sin babe ekon aghana, kabongag agha tibogaekag aneko “Tibil pukap,” sembaek.
ACT 27:40 Anekoa “Kabong saelbamlul,” aro kirik simbuk pelengeroba taneko haing kaongoro maghag talopsiek. Haing kaongoro maghag talopsiek abeneko kabong u o'oroba “Nhonag sip pabileag,” aro kerektopne toro pibekti, “Pulul,” senenagne u o'obaek. Phoana mag laut longorop mag siba yalamogpa, “Mog so'o ingkisag tibil pukap,” aro ulamekti, ag kabongag kerekaekpa, “Phoanari ko'oro pabalamlul,” aro kerektop ag kabong whingag sip towalingkibekti, palamek.
ACT 27:41 Mag ingkisag palamek aghana, kabong eneko kirik a'angkeag malukaogpa, kabong whingag sip kirik a'angkeag wereloptaogpa, lebe senep kom uaog. Lebe senep kom uaogpa, pomaghag sipna mag kola'epto yalamogti, olamogne nenekori kolabaog.
ACT 27:42 Kolabaogpa, yin salerop nang kabongag wamek nang tanekori nimi sae kaupto pabalamsiek nimi taneko “'Maghag agha ya'aro abolag piikti, merebaikag,' aro opsukap,” aro ulamek.
ACT 27:43 Undo unulamekpa, yin saleropnang sikindo Paulus pabalamogne ponekori “Paulus obikag,” aro “Pelebanun,” aro irikahiog. Irikahiogti ambarelamsiogti, “Mag alip toman ya'aro pirop nimi samenag maghag taptaikti, ya'aro abolag pukang,” seog.
ACT 27:44 Mag ya'aro panne ekonnena kal la'asi agharo, kabong kwerektoba agharo salero mag alip toman agha mag abolag undo piburi, nimi nhon babe tebaek kom.
ACT 28:1 Magti opsiog komba, mag alip toman agha mag longo kanektop so'oag abolag piburi, wamububa Malta nimi tanekori, “Malta so'oag yalom,” aro ambatsiekpa, eltabu.
ACT 28:2 Malta nimi wamek nimi tanekori nu sembe o'ona maikno sembahiekti yeplamsiek. Mag telamogti, sondi habuklamububa, nimi tanekori auk lolbaek.
ACT 28:3 Auk lolbaekpa, Paulusti kal toro polbaogti, aukag tabogpa, auk ogti phae nhon lambaogti, Paulus saeag si sabog.
ACT 28:4 Saeag si singkamogpa, Malta nimiri kembaekti, “Nimi ene mag alip toman yalamlaba, magti opla kom aghana, phaeri si saplaba, tebalul. Nimi nhon samen opsiog tiog ane sembe nimi ene wamnep kom. Wene malia uaonge sembe memari lunuro yingkina elba opla,” alamek.
ACT 28:5 Wene alamekpa, Paulusti phae aneko saeag agha pelebom agha aukag tabog. Phaeri si sabog aneko nona babe olog nobaog kom.
ACT 28:6 Phaeri si sabog aneko sembe nimi wamek nimi tanekori, “Paulusti sae usa olog sae babe nobalul to, tepna babe tebalul to?” aro kemero wamek. Sindi wene sembamekti, kemero wamek aghana, sindi seneragamekti “Ualul,” sembamekne olog uro yabiog komba, sindi el sembe, “Elna nimi kom. Anena mema,” senelamek.
ACT 28:7 Malta so'oag wamubua peramag so'o enekoag mog so'o ngainge nubunge mag longo kanektop so'o saelbamogne sina Publius wamog. Publius ponekori nu eldi wana wali uro aeag topsiogpa, ik wilindi wamubu.
ACT 28:8 Wamububa Publius ili nong boboap, niknaap, ti haoapti niklamogti, aeag malamog. Malamogpa Paulus aeag wa'iogti, sae usoghag pairo Allahag molona lebogpa, Publius ili wali taog.
ACT 28:9 Neneko wali nembaogpa, nimi orange nikna niklamekne mag longo kanektop so'o enekoag wamekne yalamekpa, wali nenelamsiog.
ACT 28:10 Wali nenelamsiogpa, awi maiknoro kiplamsiekti, sindi nu sembe wali sembamsiekti, “Mag alip toman kabongag agha palamikti, tukang,” senena sindi nu sembe wero palilamsiek.
ACT 28:11 Mag longoro kanektop so'o Malta wamubu so'o tanekoag kabong as Aleksandria agha yaog kabong nhon wamogpa, khao li taogpa, Malta so'o kabong pabalingkirobag aneko haing kerekaekti, ta'ap wamog. Wamogpa, so'o anekoag yabuburi, wal wilindi wamubua khao aingniamogpa, as Aleksandria agha yaog kabong enekoag waelbabu. Kabong waelbabu kabong enekoag mema phende Kastorapna Poluksap usog yame sunuro kabong whingag sip sobaekpa, kabong enekoag yalamubu.
ACT 28:12 Yalamuburi, as Sirakusa aneko yingkina ik wilindi wamubu.
ACT 28:13 Aneko ik wilindi wamubua mag alip toman palamuburi, as Regium yabu. Mabubua kwelekaogne neneko phoana wali uro yalamubuag siba yangaro yalamogpa, ik nhon ningki palamubua, as Putioli yabu.
ACT 28:14 Putioli aneko pibuba, nungkabo Yesusag “Sikne” aro seneraglamek nimiri, “Nunap nhon wamukap,” aro nunag molbahiekpa, ik saek bare sinap nhon wamubu. Aneko wamubua nen as Roma palamubu.
ACT 28:15 Nungkabo Roma nimi Yesusag “Sikne” aro seneraglamek nimiri nu yalamubunge sembe yubu ka'ebaekti, nu wamubuag yaek. Roma agha nu wamubuag yalamek nimina, as si Pasar Apius wamubuag yaekpa, nen tipto palamuburi, as si Tres Taberne wamubuag babe nunag yalamek. Sin nunag yalamekne sembe Paulusti kembahiogti, wana aingnibaogpa, “Allah wah, Nani,” alamog.
ACT 28:16 Nu as Roma aneko piburi, Paulus kop aeag tolongoro koma el mo aeag wamogpa, yin saleropne nhondi yae wamog.
ACT 28:17 Wamubua ik wilindi wamuburi, Paulusti Yahudi nimi sikini yabo yopsiogpa, poloro winiptaek. Poloro winiptaekpa, Paulusti lelamogti, “Nangkabo, nu Yahudi nimi sembe suknuna suknubano kom. Nu Yahudi nimiri ul palamapne saelba uropne irikna sembe babe phibano kom, aghana na Yerusalem wamnoba saelbaneongdi, Roma nimi saeag nembaneong.
ACT 28:18 Saeag nembaneongdi, nanag tam pibongne sembe Roma nimiri kembaongba, tam nari unne sunsunum uro tam ikinne na tepnange palinne orogti, 'Sae libukap,' seong.
ACT 28:19 Undo wene seong aghana, Yahudi nimiri, 'Sae haing sae lopto lambaheng kom,' seongba, nari ambarelamsinori, 'Kaisarag pibeba, Yahudi nimiri tam sumbaneongne sembe Kaisarti karebalul,' seno. Wene senonge nene, 'Yahudi nimiri ulamangne sembe tam Kaisar whingag ambarel pinun,' aro lepno kom.
ACT 28:20 Ane sembe, 'A'unap haiptaberi, a'unag yubu lemnun,' aro yopsin. Nu Israel nimiri nang-nang alamapne neneko sembe na sae kaupto wamnange nene ililamnelom,” aro ambatsiog.
ACT 28:21 Wene aro ambatsiogpa, sindi elag yubu lelamekti, “Nun nungkabo Yudea wamangneri mome an sembe pibongne nunag yao kom. Nungkabo Yahudi nimi yogne babe nunag yaongneri andi malia ualumne sembe tam nhon babe ambatsiong kom.
ACT 28:22 Yahudi nimi tane yaong nimiri an sembe nunag ambatsiong kom aghana, nu ka'elamapne andi ambarelamsilam yubu ene sembe nimi tala-talari, 'Ekel uro seneragtop yubu ina ambatoba,' alamangba, ka'elamap. Ane sembe, andi seneraglamlamdi, ulamlamne nene nuri ka'ebaukapti, ik nhon sum ambatsululam,” seek.
ACT 28:23 Wene seekti, “Ik nhon longop taberi, yubu tam kembaukap,” aro Paulusap sinap yubu saekag lebek. Sumeneko sum Paulus ua ulamoghag aneko nimi maikno elag yaekpa, lukunap Allah yubu alnibaogti, ambarelamsiog paghabog ae sin taog. Ambarelamsiognena, samen Musari, “Undo-undo ualulom,” aro mome toro pirop yubuap, Allahri yubu silimu tiptop nangdi mome toro pibek yubuap agha kiliro ambarelamsiogti, “Allahri, 'Nimi ni mog so'oag nimi saelbahinun,' seogne Yesus sembe lelamogpa, mome toro pibek,” aro wana heklamsiog.
ACT 28:24 Wene aro wana heklamsiogpa, nimi nenneri Paulusti ambatsiogne sembe “Sik lepla,” aro seneraglamekpa, nimi nenneri “Orolena lepla,” aro eldi yubu seneraghek kom.
ACT 28:25 Wene aro seneraghek komne sembe Yahudi nimi taneko yubu leldalamekti, anam lamban komag sindi seneragna wana taongkwahiogne kembahiogti, Paulusti yubu kiki nene ambarelamsiogti, “Samen Allahri yubu silimu tiptopne Yesayaag Allah Eldamne Yame Walingeri sikne aghabog lebog. Sik andagha lebognena, yubu tipto a'unisag yabo Yesayari ambarelamsiogti,
ACT 28:26 'Israel nimi taneko usog mikip nimi talamek. Sin ao leptangkamekti, haing babe uptangkamek. Sindi ao leptan koma babe haing uptan koma babe haingdi ipnep, aori ka'ebanep, wanaag babe seneragnep tanena Nadamne Allahag samoro yaukang. Nadamne Allahag samoro yahengpa, wali nembahisene. Aghana usog mikip talamekne sembe Israel nimi eneag pimendi, lelapmendi, “A'undi sop-sop 'Ka'ebahane' aro a'ori ka'elamlulom aghana, wanaag agha ka'ebalulom kom. 'Ipsene' aro haingdi ililamlulom aghana, wanaag agha seneraglulom kom,” aro ambatsululam,' aro Allahri ambarogne Yesayari sik uro mome toro pibog.
ACT 28:28 Allahri a'un Yahudi nimi sembe 'Ka'ebaukang kom,' aro ambarogne sembe 'El wamlulom,' aro tibin nenero ambarelamsin. Allahri samenag 'Mog so'oag nimi taulbahinun,' aro salag pibognena, 'Yahudi sisa kom nimi ambarel palamsululom,' aro yubu ene poglamsiog. Poglamsiogpa, wene ambarelamsiapba, sin wali ka'elamukang,” seog. (
ACT 28:29 Wene aro ambatsiogpa, Yahudi nimi yaek nimi taneko palamekti, sin mo-mo yubu leldalamekti, yubu leple palamek.)
ACT 28:30 Piekpa Paulus neneko nimiri ae agha kamna toro ua ulamoghag anekoag heng kun phende wamogti, nimi elag yalamekne sembe wana yeng sembamogpa, nimi elag maiknoro yalamekpa, wali uro kiplamsiog.
ACT 28:31 Wali uro kiplamsiogti, hengkun phende as Roma wamogha log kom uro “Allahri, 'Nimi ni mog so'oag nimi saelbahinun,' seogne anena Eldamneri 'Saelbahimendi, taulbahilulam,' aro wepto poghol aogne Yesus sembe lelamog,” aro ambarelamsiog. Ambarelamsiogne nimiri iriknange orog wamogpa, to'onna kom uro yubu walinge Yesus sembe ambarelamsiog.
PHI 1:1 Nungkabo! Na Paulusap nangkae Timotiusap Yesustinge arukna wamnamdi, mome neneag agha kiplamsinam. Yesus poneko sembe Kristus alamapnena, Allahri el wepto “Mog so'oag nimi talulamsimendi, saelbamsululam,” aro poghogpa, Yesus yaogne sembe Kristus aro engelamap. Yesus Kristus ponekori arukna wamnamdi, a'un kiplamsinam. Allahri a'un sembe “Namabo taukang,” aro wepsiogpa, a'undi Yesusag “Sikne” aro seneragto Elap ma'aptaomdi, Allah Elmabo taom nimi as kota Filipi wamlom nimi ni “Nungkabo” aro kiplamsinam. Apna nungkabo as kota Filipi nimi sembe Allah Elmabo paia uhirop nangap, Allah Elmabo yepto tongohirop nangap sembe a'un kiplamsinam.
PHI 1:2 Nuri a'un sembe Allahag molbarelamsinam nenena, “Nuni Allah nuringeap Yesus Kristus nu Saelba Uhiropne ponekoapti wana walingeag agha a'un walia ulamsirikti, a'un aingnilamsurukang,” senelamnamdi, molona molbarelamsinam.
PHI 1:3 Nari sop-sop a'un sembe seneraglamsindi, nari wanaag agha, “Naba Nani walinge,” aro Allah kiplamna.
PHI 1:4 Nari a'un ni sembe sop-sop Allahag molbarelamsindi, nia a'un sembe molbarelamsinne, na wana yengag agha molona molbarelamsin.
PHI 1:5 Nari wana yengag agha a'un ni sembe Allahag kipto molona molbarelamsinnena, tam nene sembe. Na samenag Filipi so'oag yahiri, yubu walinge Yesus sembe a'un ambatsisiba, a'undi alniro Yesusag “Sikne” aro seneraglamlum sumag agha yeplamnelum. Alnirop sumag agha yeplamnelumba, a'unap sae kerektangto tolamuburi, wene babe awe nikne toro yubu walinge Yesus sembe nimiag ambarelamsiap.
PHI 1:6 A'unag uro yabiogne neneko, Allah Eldamneri a'un yepto alnibaogpa, Yesusag “Sikne” aro seneraglamlum. Nari wana to'opto sik sembamnarina, Eldi a'unag walinge alnibaogne ponekori a'un sae lipsin koma tipto walinge tolamle paghabog Yesus Kristus El nen samoro yalamle sumeneko agha a'unag tolamsilne komobalul.
PHI 1:7 A'un nari nimi wanaagne wamlom ane sembe, nari a'un ni sembe “Khaepto wamukang tiog,” senelamsindi, yeng sirik uro seneraglamsinne nene sunsunum. A'undi nanap sae kerektangto awe nikne tolamap ane sembe, a'un sembe undo yeng senelamsin. Allahri wana walingeag agha na yepto awe nene tatneori, a'un babe yepto tatsio andarina, Yesus yubu walinge nikne ambarelamsilom. Na wamnangena, Yesus yubu walinge sik senerop kom nimi whingag Yesus yubu walinge pelepto sikne lag nenelamsinneag babe, nimiri na haing sae kaupto salero piamneangneag babe, a'undi na sae limnen koma Allahri yeplamsilneag agha awe nikne tolamap. Ane sembe “A'un nari nimi wanaagne wamlom,” senelamsin.
PHI 1:8 Nari a'un sembe “Sik uro a'unap haiptahabe,” senenne nanag loloro wamlange sembe Allah Eldamneri el wamla. Yesus Kristus ponekori o'ona senelamsilneag agha a'un sembe o'ona senero, “Haiptahabe,” senelamna.
PHI 1:9 Nari a'un sembe molona Allahag molbarelamsinnena ane. Allahri a'undinge wana heksinne maikno nembamsileba, a'unag el wamsilulne babe maiktangto yabalamlul. Allahri undo a'un yeplamsilul andarina a'un mamun o'ona maikno ma'aro seneldalamlulom.
PHI 1:10 Allahri a'undinge wana heklamsileba, a'undi nia mangkina mipsinne agha, “Malinge nene, walinge nene,” aro el tamundi, walinge sirikne aghabog saelbalulom. Mipsinne agha walingeog saelbapmun tanena, Yesus Kristus nen samoro yale sumeneko tam lelekto kemero kareplamleri, a'undinge wanaag malinge nhon babe iplul kombana, nimi nhondi babe a'unag tam pimnep kom. “A'un undo wamsom,” sembamnangena, Allahri wepto poghogne Yesus Kristus ponekori a'unag ulamsileba, a'undi walia sikne ulbanne a'unag to'opto wamleba, wanaag malinge orogha a'unag tam pimnep kom uro wamlulom. Undo wapmun tanena, nimiri a'undi ulapmunne sembe Nuni Allah omektoba El sembe kibiang towalengkukang. Ni ane a'unag undo uro yabilultiog sembamnari, Allahag “Yepsululam,” aro molbarelamsin.
PHI 1:12 Nangkabo, a'un babe eltahiso sembamnangena, nanag uro yabalamlangeag agha yubu walinge Yesus sembe nimi maikno ka'elamangpa, Yesus yubu walinge nene sabo talamla.
PHI 1:13 Undo yabalamlaba, as kota eneag wamang nimi niri na sembe el uro wamangnena, sindi, “Paulus nenekori 'Yesus Kristus si nubu talul,' aro ambarelamsilne sembe nimiri el sae kaupto kop aeag tobongkibong,” aro na sembe ka'elamangdi, el uro wamang. As kota eneag wamang nimiri babe, Roma nimi sembe yubu sia leropne ponekori ae yae ua uro yin salerop nang babe ka'ebaongdi, el wamang.
PHI 1:14 Nungkabo Yesus Saelba Uhiropne ponekoag wana saingnia urop nimi as kota neneag wamang nimiri na sae kaupto kop aeag wamnange kembamneong. Kembamneongpog, na sae kaupto wamnange neneri sin Yesusag seneragtop nimiri wana mikip nenelamsil andarina, sin nimi agha maiknori Allah yubu Yesus sembe nen ma'aro log kom uro lag phoro nimiag ambarelamsiang.
PHI 1:15 Nimiri Yesus yubu sikne ambarelamsiangnena, nimi nhon-nhondi sindi, “Nimi nubunge tanun,” aro ambarelamsiangba, nhon-nhondi “Ora nimi luknubahineri, paliag tanun,” aro ambarelamsiang. Sin undop saog nimiri wana tapto seneragna koma, na sembe seneraglamneangdi, “Paulus haing sae kaupto kop aeag wamla. Undo wamlaba, Yesus sembe ambarelamsibenge agha nimiri nu omeklamsikpa, nubunang tabenge sembe Paulusti wana saplul,” aro Yesus yubu sembe ambarelamsiang. “Nimiri mipnukang,” aro ambarelamsiang aghana nenneri otsik uro o'ona senehinneag agha “Yepsinun,” aro Yesus sembe yubu sikne ambarelamsiang. Sin undop saog nimi el wamsilba, na haing sae kaupto kop aeag wamnange nenena, Allahri kop ae aneag sekitneo andarina, pelebeltanan yubu ambatsirop sumeneko sembe nang-nangkalamna abeneko pere Yesus yubu walinge babe sik uro ambarelamsindi, ambarelamsinun. Sin undop saog nimi el wamsilba, na wamnange sembe o'ona senelamneangdi, yubu walinge Yesus sembe tipto ambarelamsiang.
PHI 1:18 Nimi eneri wana walingeag agha Yesus yubu walinge ambarelamsiangpa, nenneri “Nubunge tanun,” aro Yesus yubu sikne ambarelamsiang. Tam nene nanag ikin kom. Na sembe o'omnena, sa'a-sa'a uro yabileba, nimiri Yesus sembe, “Allahri wepto poghogne Kristus wamla,” aro sik uro ambarelamsiik tanena, na yeng ulamnel. Na yeng ulamnelba, amikne babe yeng uro wamnun.
PHI 1:19 Na haing sae kaupto kop aeag wamnari, “Na yeng sirik uro wamnun,” senennena, tam nene sembe. Yesus Kristus ponekori nunag Yame Walinge tatsiogpa, a'undi na sembe Allahag molona molbarelamnelomne sembe, “Eldi Yameri na yepto paiamneleri, wali nembanelul,” aro na elwamna.
PHI 1:20 “Allah Yame Walingeri sik uro na yepto paimnelul,” senelamnari, yeng uro tiboglamnangena angaro yabinep komdi, ali sembamnun kom. Nari nongag sa'a-sa'a uro yabioba, nari nong ningkiri “Yesus Kristus poneko si nubu talul,” aro sop-sop ulamna. Wene babe, Allah Yame Walingeri yepneleba, kamag wamneag babe, ya'ag omneikag babe, “Yesus Kristus si nubu talul,” aro “Log kom uro ambarelamsisene,” senelamna.
PHI 1:21 Nari senelamnange, na kamag wamnangena, Allahri wepto poghogne Kristus ponekoringe wamna. Na tebanne babe, tebaneba, kamna walinge nanag talul.
PHI 1:22 Aghana na mog so'oag wene wamnange nenena, “Awe walinge wero nimi wali yepsinun,” senelamna. Ane sembe, “Yaghe, nela agha wepto whingag nembanun?” senelamnari,
PHI 1:23 na tara sip agha kilim, tara sip agha kilim aloa saog ulamnel. Nari wanaag agha senelamnangena, “Yesus Kristus saramag piheneri, nhon wamseneme,” senelamnange, nene agha wali sirik senelamna.
PHI 1:24 Aghana nari a'un wenehiro yepsisene senelamnange nenena, tebahane tanena a'un sembe eka'uktina, “Mog so'o neneag agha wamsene,” senelamna. Kamag wamneba, a'un sembe wali wamlul.
PHI 1:25 Tam nene sembe na sik uro el wamna. Ane sembe, “A'unap nhon na kamag wamnun,” aro wepto whingag nenelamna. Mog so'o neneag a'unap nhon wamnea andarina a'un yeplamsinun. Nari a'un yeplamsinnena, “Yesusag wana maiktangto saingnia wapmundi, awi senenne a'un wanaag nubu tangto yabalamlul,” aro yeplamsinun.
PHI 1:26 “Kamag wamnun,” aro wepto whingag nenelamna andarina, na a'un wamlomag samoro yane tanena, a'un Yesus Kristus ponekoag nhon ma'altalamlom nimi awi sembamlulom. Na a'unag samoro yanenge sembe a'undi, “Yesus Kristus ponekori Paulus tebanebag agha taulbaoba, yal,” senelamlulom tiog. Undo senelapmunneag agha, awi senenne siriro la'analamloa saog uro a'unag wamlul tiog sembamnari, “Nen haiptahabe,” senelamna.
PHI 1:27 “Nen haiptahabe,” senelamna aghana, a'un wamlomag yaneri, nari haingdi a'un ipsinun to, ya'ag a'eptabeba, nimiri a'un sembe yubu lena aghabog ka'ebanun, to, amik el taukap. Ot sa'a-sa'a uro yabileba, a'un wali wamlulom aro el tahane sembamnari, nari wanaag wamlange a'un ambatsinuan. A'undi sop-sop ulapmunnena, Yesus Kristusap ma'aptangtop nimiri unuaheng senenne sunsunum uro ulamlulom. Allah Eldamne Yame Walingeri a'un yeplamsileba, Yesus yubu sunsunum uro a'un seneragna nhonog khaepto wamlulom. Khaepto wapmundi, a'un mamun seneragna nhonog agha sae kerektangto kilim weang alapmundi, Yesus yubu sikne pelepto ambarelamsululom.
PHI 1:28 A'undi nia ulapmunneag a'un aisa nenelamsiik nimi sembe log semban koma khaepto sekamlulom. A'un log kom uro khaepto sekapmunne nene sindi kembongkia, “Allahri Yesusag wana saingnia pairop nimi taulbahileri, Yesus yubu ingisaptop nimi oro luknubahilul,” aro keknep uro yabilul.
PHI 1:29 Allahri a'unag walia tarelamsilne nenena, Yesusag “Sikne” aro seneragnange nene tarelamsildi, taulbahilul. Ot nunag tatsiogne nenena Yesusag seneragnange aghabog tatsiog kom aghana, Allahri wepto poghogne Yesus Kristus poneko sembe seklero ulbanne babe nunag tatsiog.
PHI 1:30 Nunag tatsiogpa, nari kilim weang aro ulamsinge neneko a'undi haingdi ililamnelum. Wene babe ikinne nanag uro yabalamlange sembe ka'elamlomdi, a'undi babe kilim weang aroba nikne seklelamlom.
PHI 2:1 Allahri wepto poghogne Yesus Kristus ponekoap ma'altalamlomne neneri a'undinge wana mikip nenelamsil. Yesus Kristus ponekori a'un o'ona senelamsilne neneri a'undinge wana aingnilamsil. Allah Yame Walingeri a'un yeplamsilneag agha a'un kabo Yesusag seneragtop nimiap sae kerektangto wali wamlomdi, a'undi wanaag agha yareag seneltalamlom.
PHI 2:2 Ane sembe a'undi na wana awi to'opto nembamnululom nena nenda nene: A'un seneragna nhonog uro wana nhonog agha a'un mamun o'ona seneldalamlulom. A'un mamun “Nari wanaagne” seneltalapmundi, seneragna nhonog agha ulpalamlulom.
PHI 2:3 Sa'a-sa'a ulpalapmunne nenena, “Na nimi nubunge tanun,” aro uaheng kom. Apna, na maiptangtop senenneag agha “Na ililamnukang,” aro uaheng kom. Ulamlulomnena ane. A'undi wanaag andamne mombolag neneptangto ora nimi sembe “Whingagne nembahinun,” aro ulamsululom.
PHI 2:4 A'undi “Teko uaneleag,” aro ulapmunneag, ot andamne sembe aghabog semban koma ora nimi sembe babe, “Teko uahileag” aro kembamsululom.
PHI 2:5 A'undi seneraglamlulomnena, Yesus Kristus ponekori wana seneragtopne sunsunum uro seneraglamlulom.
PHI 2:6 Allahri wepto poghogne Kristus ponekoap Allahap nika-nika uro nhon urop, aghana Kristus ponekori Eldamne sembe “Nanap Allahap nika-nika uroptina, nia mangkina salelamna aghana, sesog sembe sae limnun,” senelamog.
PHI 2:7 Wene Eldamne sembe seneragtan koma Allahringe mikipne sae libogti, mog so'oag nimi mangaptangtopne sunsunum uro mangaptaogti, nimi arukna neneptaog.
PHI 2:8 El mog so'oag nimi nongag mangaptaogti wamogha, Eldamne mombolag neneptangto Allahri Elag, “Mog so'oag nimi sembe lunuro tebel pululam,” aro aruktop yubu ka'elamogti, wail ibatna koma sunsunum uro ulamog paghabog tebaog. Tebaognena, haogha torop nimi wamloa saog obekti, aluktoba paku agha el kalag sibekpa, seklero tebaog.
PHI 2:9 Eldamne mombolag neneptangto Allah yubu sunsunum uro ulamog ane sembe, Allahri Yesus poneko kiliro paliag sirikne urobag nembaogti, Elag Allahri pibognena, nia mangkina saelba uhiropne si engero pibogti, mikipne ni aneko Yesus saeag pibog.
PHI 2:10 Ane sembe Nia Mangkina Saelba Uhiropne poneko si Yesus sembe, nia ni imag ua uropneap, mog so'oag ua uropneap, so'o punag ua uropneap, nia mangkina wamlangeri El whingag yabu sanukto amupto pulingkiberi, El kiplamukap.
PHI 2:11 Allahri wepto poghogne Kristus sembe nia mangkina wamlangeri, “Yesus nia mangkina Saelba Uhiropne wamla,” aro lag phoro lelamukap. Yesus paliag nenero lag phoro lelamebengeri Nuni Allah paliag nenero omeklamukap.
PHI 2:12 Nangkabo, nari a'un o'ona sembamsin nimi! Yesus eldamneri Allah yubu sunsunum uro ulamog ane sembe, a'undi babe Allah yubu ambarelamsinne ka'eapmundi, sunsunum uro ulamlulom. Samenag a'un anabiag wamnori nari yubu lelamnonge ka'elamomdi sop-sop sunsunum uro ulamom. Samenag ulamom saog uro, wenena a'unap nanap weag neneptangkamabag, nari yubu lero palilamnange sae limna koma saelbapmundi, sol wali uro ulamlulom. Allah El mori a'un taulbahiognena, a'undi wanaag awe tolamla andarina, Allahri wana yeng neneropne sunsunum uro yeng senelapmundi, sunsunum uro a'undi uanep. A'undinge wanaag tolamla ane sembe, Eldi walia ulamsionge sembe log lelem pet-pet aro a'unag tolamlange sunsunum uro lag nenero ulamlulom.
PHI 2:14 Sa'a-sa'a a'undi ulapmunne, seneraglapmundi, “Allah Elme wamnaba, nimiri nanag tam pimneikagti, malia uan koma walinge aghabog uanun,” aro a'un mamun wana mali paiptan koma, yubu neneptan koma ulamlulom. Undo unulapmun tanena, mog so'oag nimi anabiag wapmundi, mali-malia urop nimi, ekel ina inibinag pirop nimi anabiag wapmundi, yubu walinge Yesus sembe ambarelamsululom. Yubu walinge Yesus sembe nenekori nimi kamag nenerop yubu wamla. Malia uan koma wapmundi, Yesus yubu walinge ambarelamsimun tanena ekel ina inibinag pirop nimi anabiag wapmunne, a'un wap warerop saog urop nimi wamlulom. “Undo-undo unulamlulom,” aro ambarelamsinnena, amik Allahri wepto poghogne Kristus nen samoro yale sumeneko, El sembe nari kilim weanga awe wel tongahinne neneko “Teba'an sembaleag,” aro undo ambarelamsin. El nen samoro yale sumeneko a'un Filipi nimiri wali-walia ulapmunne neneko ipleba, nari babe, “Ali semban koma Elag ambatneri, 'Nari awe wel tongolamnange pere agha wali-walia unulamang,' aro ambatnun,” senelamnari, “Undo-undo unulamlulom,” aro ambarelamsin.
PHI 2:17 Nari awe wel tongolamnange pere agha a'undi Yesusag “Sikne” aro wana saingnia seneraglamlom. Ane sembe nari Allah sembe nhon tarelahane senelamnangena, Allah sembe awe wel tongolamnoba, a'undi sik senelamlomne neneko Allah whingag kipto palilamna. Na nimi sisa Yahudi nimiri “Allah sembe pham domba aukag tabukap,” aro palilamangdi, pham domba oropne nong alibag anggur lolderop mag ikto Allah kiplamang. Undo saog uro nari Yesus yubu walinge ambarelamsinne sembe nimiri ya'ag omneik tanena, “Nari eneng babe Allah sembe iknun,” aro wana awi uro tarelamna. A'unap nanap nhon Allah kipto palilamapne sembe nikag awi senelamukap.
PHI 2:18 Nuri Allah sembe paimnepne sembe a'undi babe nari awi senelamnange saog uro nanap nhon awi sembamlulom.
PHI 2:19 Nari sik uro seneraglamnange Yesus nu Saelba Uhiropneri yeplamneleba, nari Timotius elemag a'unag pogholanun. Pogholaneba eldi a'un sembe yubu ebel yalenge ka'ebane taneogna, wana aingnibanile andarina, wana mikip tanun.
PHI 2:20 Ot Timotius agha nari wana seneragnaap el agha sunsunumdi, ot eldi a'un wali wamnepne sembe sik uro seneragto o'obahinep.
PHI 2:21 Nimi orange ni kemelamsinba, Yesus Kristus si nubu talulne sembe seneragto ulbalamang komdi, ora nimi sembe seneragna koma sindam nimiringe sembe agha seneraglamangdi ulamang.
PHI 2:22 Elap nanap ili elme saog wamnomori, Yesus Yubu Walinge nubu nenero nimi ambatto tongolamsinomoa eldi sol wali uro yeplamneo. Yeplamneori, miplamongba, a'undi babe haingdi ibomdi, “Nimi sikne wamla,” aro el wamlom.
PHI 2:23 Ane sembe, tam nanag uro yabalamlange sembe “Lambanun to, kom to,” aro olog tibin talamle tanena, “Nari Timotius a'unag men phea pogholanun,” aro seneragamna.
PHI 2:24 Na mori babe sik uro seneragamnangena, nu Saelba Uhiropneri yeplamneleba, ko'o olog we uro pin komag men phea a'un kemelahinun sembamna.
PHI 2:25 Nungkae Yesusag seneragtopne Epafroditus a'undi “Na yeplamnilul,” aro pogholaomne poneko, nari sembamnange, nen sap a'unag wali pogholanun sembamna. El pogholaomne poneko nanap nhon awe nikne weltongolamnomoba, aisanangdi nu 'Luknubahukap,' aro ulamsiongba, Yesus yubu walinge pelepto sikne lag nenelamsinomo. El samen niklamoba, a'un eltahio. A'undi el sembe el uro wamlomba, “Log sembahengag,” aro el wana ikin uro a'un sembe “Wela wamangne sembe kemel phihene,” aro wana seneraglamla. Wenena, wali nen a'unag pogholanun.
PHI 2:27 El sik naikna mali uro naiklamori, tebanep wamo aghana, Allahri el sembe yareag sembaori, yeboba, wali tao. Allahri yareag sembaongena, el aghabog yareag sembao kom. Na sembe babe Allahri “Wana ikin along sembaleag,” aro yareag sembaneori, Epafroditus wali nembao.
PHI 2:28 Ane sembe maiknoro seneraglamnari, “El nen a'unag samoro 'Pululam,' sunun,” aro seneraglamna. Nen samoro a'unag pogholane andarina, a'un babe wana awi uahileba, na babe wana aingnibanilul.
PHI 2:29 Eldi yeplamneonge a'undi pogholaomne wamla. A'undi na yeplamnehom aghana, a'un weag a'eptabongeag agha eldi a'un lumbaori, nong sembe seneragtan koma na yeplamneo. Yeplamneori, elba, “Yesus Kristus si nubu talul,” aro Epafroditus ponekori awe tolamori, el tebanep wamo. Ane sembe “Nu Yesusag seneragtop nimi nikne wamap,” sembamunba, el samoro yaleba, a'undi wana yengag agha kipto paliag nembamlulom. Nimi etneri sindam nimi nong sembe seneragtan koma Yesus sembe awe tolamik tanena, undop saog nimi kipto paliag nembamsululom.
PHI 3:1 Wene nangkabo Yesusag wana saingnia seneragtop nimi, nari a'un sembe mome komoptopne palilamnarina, nu Saelba Uhiropne ponekoap ma'altalamapne sembe awi uro wamlulom. Tam nene mome toro pimna aghana, nari nen sarikto a'unag ambatsinenge na sembe ikin komdi, “A'un pelebahinun,” aro nen sap sarikto ambarelamsin.
PHI 3:2 A'un togtangto wapmundi, haing whi uro yae wamlulom. Sin Yahudi nimi agha nimiri ambarelamsiangdi, “Ot kon karepto kon teptangtop nimi aghabog Allahap ma'aptangtop nimi tanep,” aro ambarelamsiang nimi taneko sembe haing whi uro yae wamlulom. Sindi undo ambarelamsiangdi, nengabo kon karebiagha sisua nenehirop nimi tanekori malia sirikne ulamangdi, kam yonge saog urop nimi wamang. Sin sembe haing whi uro yae wapmundi, sindi ambarelamsiangne sik semban koma a'un togtangto wamlulom.
PHI 3:3 Sindi ambarelamsiangdi, “Kon karepto kon teptamun taneogna, Allahap ma'aptangtop nimi talulom,” alamang aghana, nunna Allah Yame Walingeri yeplamsilba, Allahri wepto poghogne Kristusag wana saingnia seneraglamapti, Allahap ma'aptangtop nimi wamap. Kristus Yesus ponekoag wana saingnia seneraglamapti, paliag nenelamapti, Allah Eldamne Yame Walingeri yeplamsilneag agha sik uro Allah omeklamap. Allahri wepto poghogne Kristusag wana saingnia seneraglamap aghana, nimiri nongag ul piropneag wana saingnia seneraglamap kom. Sin Yahudi nimi agha kon teptangtop nimiri ambarelamsiangdi, “Kon karepto kon teptamun taneogna, Allahap ma'aptangtop nimi talulom,” alamang. Aghana nuri, “Allahri wepto poghogne Kristus ponekori Allahap nunap ma'abahinep,” aro Elag wana saingnia seneraglamebe tanena, kon teptangtop nimi sikne wamap senep.
PHI 3:4 Nimi nhondi el wanaag sik senelamsori, “Nari nongag ul piropne sembe na Allah whingag wali wamna,” sembanep. Undo sembanep aghana, nari undo seneraglamna kom. Nimi nhondi, “Nimi nongag ul piropneri Allah whingag nimi wali nembahinep,” sembahoba, sik uro wamso tanena, nandamne sembe olog ambatsinun. Ora nimiri nongag ul piropne ologha wamlaba, na Paulusti nongag ul piropne maikno sirik wamla. Nari nongag ulpiropne maikno sirik wamlange sembe, “Nimi ni anabiag agha na nimi wali sirikne wamna,” sembahane. Ka'ebalulom!
PHI 3:5 Na Israel ponekori nimi sisa liktoba taptopne wamna! Israel poneko elmabo aobare agha, elme wanaagne Benyamin nimi sisa liktoba agha mangkaneek! Mangkaneekpa Allahri samenag Abrahamag babe, Musaag babe aruksirop yubu sunsunum uro na mangaptahia, ik lin sumeneko taogpa, nanag kere kon tepto karebaneek. Nu Yahudi nimi nunisag Abraham poneko Ibraninge alamek tanena, na Ibraninge taptopne wamna. Allahri aruktop yubu Musaag ambarogpa, Musari tipto mome toro pibog yubu sembe, sol wali uro el talamsiri, sunsunum uro ulamsi. Nari sik tapto Musari aruktop yubu mome toro pibogne sunsunum uro ul palamsinge sembe “Farisi nimi,” aro kiplamneek.
PHI 3:6 Na undo Musa yubu elwamsiri, sunsunum uro ulamsiba, nimi nhondi babe nari ulamsinge sembe Allah yubu takto tam nanag pimnep kom. Na Allah sembe wana maikno sembahingena, “Imagne sae tanun” aro yeng sirikne nanag loloro wamneog andarina, Yesus yubu neneko orolena yubu sembahiri, “Yesusag seneragtop nimi seklebaik,” aro olamsisi.
PHI 3:7 Undo wamsiri, ulamsiri, samenag nari, “Allah whingag wali neneptanepne maikno nanag poloptal,” sembanep aghana, wenena undo senelamna kom. Wenena, Allahri wepto poghogne Kristus poneko Yesus, “Si nubu talul,” aro ulamna, aghana nari samenag “Wali neneptanepne poloptal,” senelamsiri ulamsinge ni neneko teba'an senelamna.
PHI 3:8 Neabene aghabog kom. Wene na el wamnangena, Allahri samenag Kristus poneko sembe salag lebogti, “Nari wepto pognenge nhon yaleri, mog so'oag nimi anabiag agha taulbahileri, mog so'oag nimi saelbamsilul,” aro salag pibogne neneko “Yesus sembe lebog,” aro el taneo. Samenag Musari aruktop yubu sunsunum uro ulamsinge, Allahri “El yalul,” seog nimi Kristus poneko sembe nang-nang aro ulamsi. Nang-nang aro undo unulamsi aghana, “Yesus neneko el Kristus wamla,” aro el taneog kom. Ane sembe ni samenag ulamsinge neneri yepneog komdi, pham ti yaroba wamloa saog senelamna. Wali sirik phelektopne nhonogne anena, “Yesus sik uro Kristus wamla,” aro el taneoba, Yesus Kristus ponekori na Saelbamnel. Nia mangkina sae limno andarina, Yesus Kristus na Saelbamnelne ponekoap sae tiptangto wamnemeri,
PHI 3:9 sik tapto Elap nhon ma'aptangto wamnunam. Musa yubu mome toro pibog yubu saelbiagha nimi nhondi Allah whingag, “Malia uan komdi, sik urop nimi wamna,” senep kom. Nari babe samenag Musa yubu saelbamsiri, ulamsingeag agha “Nimi sikne wamna,” senun kom. Aghana nari Yesus sembe sik senelamnari, “Allahri wepto poghogne Kristus wamla,” aro seneraglamna andarina, nanap Yesus Kristus ponekoap ma'aptangto wamnam. Nari Yesusag “Sikne” aro seneragtopne nene sembe Allah Eldamneri nanag ililamneldi, nanap Kristusap ma'aptangto wamnamne ililamsildi, na sembe “Porog urop nimi,” senelamnel.
PHI 3:10 Ot nhonog nanag taho senelamnangena, Allahri wepto poghogne Kristus poneko el tahaneri, sae tiptangto wamseneme senelamna. Allah Eldamne Yame Walingeri Yesus Kristus teptobag agha kamag nembaonge mikipne neneko nanag babe taho. El samenag seklero tebaog saog uro na babe El sembe seklero tebahane andarina,
PHI 3:11 El samenag teptobag agha kamag taogne saog uro na babe kamag tahane senelamna.
PHI 3:12 Nari lemnange nenena, “Ni ane nanag uro yaboho senenne nanag taoba, Allahri nanag komopto tobitnel,” alamna kom. Aghana nari tipto ulamneba, “Yesus Kristus ponekori na sembe wero tatnilulne tomnun,” aro anam ultongolamna. Nene sembe na taluro tomneori Eldinge nembaneo.
PHI 3:13 Nangkabo a'un Yesusag seneraglamlomne, nari sik uro seneragamnangena, “Na sembe weroba wamlange tatnelulne neneko na saeag tal,” senelamna kom. Aghana ot nhonog nari uanunne wamla. Uanunne wamlangena, na wailag wamlange sembe limneri, saramag wamlange sembe mikip uro ulamnun senelamna.
PHI 3:14 Ane sembe, “Komobitneba na sembe weroba wamlange na saeag talul,” aro kilim weanga ambatto tongolamna. Na saeag tatnelulnena, “Allah imag ua urobag kamag uro nhon wamnunam,” aro Allahri Yesus Kristus pere agha na taluro yopneog.
PHI 3:15 Nangkabo, nu ni Yesusag wana saingniro wali uro seneragnep nimi wamap tanena, weneog lemnange sunsunum uro seneraglamukap. Aghana nangkabo, nari lemnange sembe saelbanep komdi, saekag kom tanena, hae, Allahri tam nene sembe a'un tibin nembatsilul.
PHI 3:16 Ot wenena, nunag tibin nembahioba, nunag wamlange sunsunum uro saekag wameberi, ulamukap.
PHI 3:17 Nangkabo, a'un Yesusag seneragtop nimi. A'undi babe nari ulamnaba kembamnelomne sunsunum uro ulamlulom. Nuri sikne agha ul palamoboa sunsunum uro ultongolamang nimi babe ipsimun tanena, sin sembe babe wailag nembahin koma kembamsimundi, sunsunum uro ulamlulom.
PHI 3:18 “Nuri ulamapne kembamsimundi, sunsunum uro unulamlulom,” aro ambatsinnena tam nene sembe. Samenag nimiri Yesus kalag sibekpa, nu sembe tebaog aghana, nimi maiknori ul palamangne pere agha nu sembe tebaogne poneko aisa nenelamang. Undo ul palamangneag agha nari wana saplamnelba, samenag ik sulu ambarelamsino saog uro wene babe hail mag tiniro ambarelamsin.
PHI 3:19 Sin undo urop nimi eneri mog so'oag nimi nongagne sembe wana to'opto seneraglamangdi, “Na mon sek,” senenne omekto tena aboap ulamang. Sindi ali nenero ul piropne sembe maibiltalamang. Undo ul palamangneag agha sirikagne seklero loba taukang.
PHI 3:20 Aghana nu Allah Elmabo wamapti, nuringe as singkiknena, El imag wamlange ponekoap nhon wamukabag wamla. Anikoa nu Taluro Saelba Uhiropne poneko Yesus Kristus amik yalul aro seneraglamapti, wana yeng uro tibogto El yalulne sembe nang-nang alamap.
PHI 3:21 El yalulne poneko saeag mikipne wamla andarina nia mangkina El umag nembahilul. Mikipne nenekoag agha nuri nong kon polbanepne nene El imang warero polbanep kom nong saog uro nembahileri, wendog nembahilul.
PHI 4:1 Nangkabo, a'undi Yesusag wana saingnia seneragtop nimi! A'un sik nari o'ona sembamsin nimi wamlomne, nari wanaag “A'unap sik uro haibiltahabe,” yeng uro senelamsin. A'unna na sembe, nari kilim weang ambarel tongolamnonge sembe kamna nubunge nanag tatneloa saog wamlom. Nangkabo nimi wanaagne wamlomne, nari wana a'unag yeng nubu sirikne nubu wamla. Ni Yesus nu Saelba Uhiropne sembe ambatsinne neneko seneraglapmundi, “Yesus nen samoro yaleba, Elap nhon El umag ya'ag wamukap,” aro nang-nangaro khaepto wamlulom.
PHI 4:2 Nuninyabo Euodiaap Sintikheap kelabo abeneko sembe a'undi yubu leptangtopne sembe mali semban. A'un abeneko Yesus nu Saelba Uhiropne ponekoap ma'aptangtop kelabo wamtom ane sembe, nari wenero mololamsinnena, “A'undi saekag lero wana aingnibarurom,” aro wenero mololamsin.
PHI 4:3 Nangkae Susugos, an wana wali uro sol wali uro nanap nhon tolamnam. Anag moloro ambarelangkennena, “Andi sin kelabo phende tipto a'eptaikagti, yeplamsululam,” aro mololangken. Sin kelabo abeneko nanap nhon Yesus Yubu Walinge sembe kilim weanga ambarel tolamobongena, nungkae Klemenap, nimi orangeapti nhon tolamobo saog uro sin kelabo abenekoapti babe tolamobo. Sin nanap nhon awe tolamobo nimi neneko, sindi si Allahri el wamsildi, “Na Allahap nikag wali urobag ya'ag uro kamag wamukap,” aro nimi si mome toro pibogneag sindi si wamla.
PHI 4:4 “A'un wana ikin uro wamna koma, sop-sop wana yeng uro wamlulom,” alamna! Nen sap sarikto lemnun. A'un Yesus nu Saelba Uhiropne ponekoap sae tiptangto wamlom ane sembe, “Wana yeng uro wamlulom,” alamna!
PHI 4:5 Yesus nu Saelba Uhiropne poneko yanepne peram wamla ane sembe, nimi niag ulamsimunne, a'undi wanaag agha win-win aro ulamsululom.
PHI 4:6 Nia mangkina sembe wana tai pailangkang tau pailangkang uan koma, kwema ulamsilea sembe Allahag molona mololamlulom. Nia mangkina a'undi wana seneragnaag wamlange sembe a'undi wanaag agha “Nuni Allahri nunag walia ulamsil,” aro lelapmundi, Allahag molona mololamlulom.
PHI 4:7 Undo Allahag mololapmun tanena, a'un Yesus Kristusap ma'altalamlomdi, sae tiptangto wamlomne sembe, Allahri a'un wana aingnilamsilul. Allahri wana aingnilamsilengeag agha a'undinge wanaap seneragnaap yae paiamsilul. Allahri nimi wana aingnibahinepne neneko sembe mog so'oag nimiri seneragnep kom aghana, Allahri a'un wana aingnibahileri, yae wamsilul.
PHI 4:8 Nangkabo, Yesusag wana saingnia seneragtop nimi. Komoptopne ma'aro pimnuan. A'undi seneraglapmunnena, tam nene sembe seneragamlulom. Nia sikne wamlange Nia sunsunum uro wamlange Nia porog uro wamlange Nia walinge aghabog malinge ma'aban koma wamlange Nia holno aropne wamlange Nia nimiri maipnepne wamlange Tam nene wali sirikne, nimiri wali aro paliag neneropne wamla tanena tam nene sembe wana to'opto seneraglamlulom.
PHI 4:9 Nari yubu a'unag ambarelamsinoba, ka'eamomdi, tolamomne sunsunum uro ul palamlulom. Nari ulamnoba, ililamneomdi, el taomne sunsunum uro ul palapmunba, Allahri wana aingnilamsileri, a'un yepto paiamsilul.
PHI 4:10 Nanap nu Saelba Uhiropne ponekoap ma'aptangto wamnari, na yeng sirik wamnelnena, ko'o maikno uro yabio aghana, wene a'undi na wamnange sembe seneraglamnelomdi, yeng sirik nembamnel. Nari lelamnange nene, “A'undi na sembe ekon taneom,” aro lelamna kom. A'undi na sembe elwamnelom aghana, a'un nanag whing pailanepne ekaukti, ko'o maikno uro yabioba, weneog pibom.
PHI 4:11 Nari lelamnange nene na kwema wamnelne agha lelamna kom. Nanag sa'a-sa'a kwema samenag ulamneogne agha “Nu Saelba Uhiropne ponekori yepto piamnel” aro eltalamsi. Ane sembe, naba nanag wamnenne abeneko agha “Mampul uro ua uanun,” aro lelamna.
PHI 4:12 Nari samenag na ua unne abene ni yambahi. Kwema uro unne to, na saeag kwema koma sa'a-sa'a wamnaba unne to, abenena tam nhon nanag lag tao. Samenag nimi maiknori ekonne tognoropne nhon nanag lag taoba, lag phoro ambatsinuan. Sa'a-sa'a nanag uro yabilenge, kwaneng yo babe, mon og teneba babe, tam ikinne babe, ikin komne babe nanag uro yabileba, nu Saelba Uhiropne ponekori mikip nenelamnelne agha nari sangsang ul palamneri, mampul uro wamnun. Tam nene nanag lag taoba, lag phoro ambarelamsin.
PHI 4:14 Tognoroba nene el tahiri, lag ambatsin aghana, a'undi na kwema wamnoag a'undi na yepneom. A'undi na yepto uaomne wali sirikne agha uaom.
PHI 4:15 Filipi nimi nangkabo! Samenag a'unag Yesus Yubu Walinge ambatsisiba, ka'ebalum sumeneko sembe a'undam nimi el wamlom. Samenag nari, “Yesus Yubu Walinge ambarel phunun,” aro a'un wamlomag Makedonia so'o agha lanaro palamsiba, Yesusag seneragtop nimi poloptangtop nimi yogneri yepto tatneek komne, a'un babe elwamlom. Ni Yesusag seneragtop nimi poloptangtop nimi agha, ot a'un nhonogti na yepneom.
PHI 4:16 Na as kota Tesalonika wamsiag babe, a'undi “Kwema elag ualeag,” aro na yepnenne ik etpare palilamnelum.
PHI 4:17 Nari sembamnangena, “A'undi na sembe pimnehengba, na toltoneog,” sembamna kom. Nari sembamnangena, “Kal wana maubaloa saog uro a'undi walia unne maupto palilamlomne wana yeng uro imnun,” senelamna.
PHI 4:18 Na kwema wamneonge sembe a'undi ni pimneomne tomno. Apna phelektopne babe pimneom. Na sembe ni pimneomne Epafroditusti payaonge tomno. Wenena nanag ni kwema wamneonge ni saeag taoba wamna. A'undi na sembe ni palilamnelomne nenena Allah sembe song walia taroba saogne wamla. A'undi na kwema wamneonge sembe pimneomne nenena, “Allah sembe tarukap,” aro wali pibomdi, Allahri wana yeng neneropne pibom.
PHI 4:19 A'undi “Allah sembe pibukap,” aro yepneomne sembe Allahri na yae piamnelne ponekori a'unag kwema ulamsilenge babe teknero yeplamsilul. Allahri saeag nia mangkina wamlaba, Yesus Kristus saeag maiknoro phelekto pibog. A'un Yesus Kristusap ma'altalamlomne sembe a'unag kwema uahinepne ni teknero yeplamsilul.
PHI 4:20 Nuba Nuniong Allahri nu yae piamsilne poneko ya'ag uro omeklamebe paghabog kiplamukap! Sikne agha saekag lebap.
PHI 4:21 Nangkabo! Allahri “Nari mabo taukang” aro werop nimi, sin Yesus Kristusap ma'aptangtop nimi ni sembe, nari kiplamsinne nene ambatsululom. Nangkabo Yesusag wana saingnia seneragtop nimi nanap nhon wamapne babe a'un kiplamsiang.
PHI 4:22 Yesusag seneragto Allah Elmabo taong nimi as kota eneag wamangne niri a'un kiplamsiang. Sin yubu sia leropne Kaisar ponekori ae yae ua urop nimi sin mori babe kiplamsiang.
PHI 4:23 Nangkabo, “Yesus Kristus nu Saelba Uhiropne ponekori a'un niag wana waliri ulamsileri nong ningki piamsilul,” aro a'un sembe molbarelamsin. Abenda.
1TH 1:1 Nare yabo nangkabo! Nuni Allah Elmabo taom nimi a'un as kota Tesalonika wamlom nimi Allahri, 'Taulbahimendi, saelbamsululam,' aro wepto poghogne Yesus ponekori taulbahaio. Allahri samenag Yesus webogti, “Mog so'oag nimi agha taulbahaimendi, saelbamsilulam,” aro poghogne Yesus yaogne sembe si Kristus aro engero yabiog. Yesus Kristus poneko mog so'oag yaogti, a'unap nunap taulbahiogpa, nu Paulusap Silasap Timotiusapti Allahag mololamapti, “Allah wana waliri a'un wana aingnilamsilba, wali uro wamlom,” aro Allahag molona mololamap.
1TH 1:2 Nuri a'un sembe ekon talamap komdi, sop-sop Nuni Allah nuringeag nuri “Wah Naniong” aro Allahag a'un ni sembe molona molbarelamsiap. A'un sembe ekon talamap komdi seneragha ulamsiapnena: A'undi unna ulamlomne sembe kemelamsibongena, a'undi Yesus ponekoag sikne aro seneraglamlom. A'undi Yesusag seneraglamlomneag agha, wali-walia ulamlomdi, a'undi nimi yogne sembe o'ona senelamsilomdi whin seklero yeplamsilomba, kemelamsibo. Apna a'un eraruk uro wamlom aghana seneragha ulamlomne, “Allahri wepto poghogne Yesus Kristus nu saelbamsilne ponekori nu yepsilul,” aro sik senelamlom ane sembe, mikip uro wana paia ulamlom. A'undi Yesusag sik senelamlomdi, wali-walia ulamsilomdi, mikip uro wana paia ulamlomne sembe ekon talamap komdi, a'un sembe molbarelamsiap.
1TH 1:4 Nangkabo, a'un sembe nu elwamapne, Allahri a'un sembe o'ona senelamsiori wepsio andarina eldamneringe aghabog taom.
1TH 1:5 Allahri “Taulbahinun,” aro a'un sik uro wepsiogne sembe nu el wamap. Allahri sik uro a'un wepsiogne sembe nu el wamapne tamna ane sembe. Nuri a'unag Allah Yubu Walinge Yesus sembe ambarelamsiapnena pamag yubu aghabog kom. Yesus sembe ambarelamsiapnena, sik uro seneraglamapti, Allah Eldamne Yame Walingeri mikipneag agha haingdi imnepne ulamapti ambarelamsiap. Allah Eldamne Yame Walinge mikipneri nu pere agha haingdi imnepne a'un whingag ulamog ane sembe, Allahri a'un sik uro wepsiog aro el wamap. Nu a'un anabiag wamobori, a'un sembe ulamobonge a'un ni elwamlom.
1TH 1:6 A'undi babe nuri ulamobonge ipsiomdi, nelepto ulamlom. Nuri ulamobongeap, Yesus nu saelba uhiropne ponekori ulamogneap saog uro a'undi nelepto ulamlom. Yesus Yubu walinge ambarelamsiapba, ka'elamlomba, seklenne a'unag lag talamlaba seklelamlom. Seklelamlom aghana Allah Eldamne Yame Walingeri a'un yeplamsioba, Yesus yubu walinge ambarelamsiapne nene wana yeng uro a'undi salelamlom. Wana yeng sirikne nene Allah Eldamne Yame Walingeri a'unag tarelamsil.
1TH 1:7 Wana yeng sirikne neneko Allah Eldamne Yame Walinge nenekori tarelamsilba, Yesus sembe ambarelamsiapne seklero salelamlom. Undo ulamlomba, Yesusag seneragtop nimi propinsi Makedonia wamang nimiap, propinsi Akhaya wamang nimiapti a'un ul palamlomne sembe ka'elamsiang. Ka'elamsiangdi sindam nimiri, “As Tesalonika Yesusag seneragtop nimiri ulamangne saog uro nuri babe nelepto ulamukap,” senelamangdi ulamang.
1TH 1:8 Akhaya nimiap Makedonia nimiapti a'un sembe ka'elamangdi, “Nuri babe nelepto ulamukap,” aro ulamangba, a'undi unulamlomne yubu eneko Makedoniaap Akhayaap sabo tangto palamoa wene babe palamla. Sabo tangto palamla yubu eneko abene aghabog kom. A'undi wana paia seklero ulamlomneag agha yubu lilim lonceng oleanne saog uro yubu nu saelba uhiropne poneko Yesus sembe yubu sabo tangto piog. Sabo tangto piogpa, nimiri ka'elamangdi, “Tesalonika nimiri Allahag sik uro seneraglamang,” alamangba, yubu eneko nen tipto tala-tala sabo tangto piog. Sabo tangto piogpa, nuri tala-tala Yesus sembe ambarelamsiboag nimi wamang nimiri ka'ebong. Nuri nimiag “Tesalonika nimiri ulamangne sembe ambatsukap,” aro ambarelamsibo aghana, “Ka'ebabo,” alamong.
1TH 1:9 El wamang ane sembe nuri a'undi ulamlomne sembe nen yubu tipto ambatsisebe koma babe hae sembamap. Nimiri a'un sembe el wamangdi lelamsiangne, nu a'unag yabuba, nu a'undi topsilumne sembe, “Wali kipsiek” aro a'un sembe nimiri lelamang. Nimiri a'un sembe yubu lelamangnena, “Tesalonika nimiri mem phalamekne laplobi agha samoro Allah ot nhonog kamagne ponekoag samoro yaekti, nimi yepsiro Allah omeklamang,” alamang.
1TH 1:10 Sindi babe yubu lelamangnena, a'un Tesalonika nimiri seneraglamlomdi, “Allahri Elme Yesus nimi teptobag agha kamag nembaogti, imag agha kiliro tobogpa, imag agha Yesus amik samoro yalul,” aro a'undi nang-nangaro ulamlomne sembe babe nimiri yubu lelamang. Yesus Allahri kamag nembaogne poneko, nu mog so'oag nimiri mali-malia ulamapne sembe Allahri, “Opsinun,” sembaog aghana, nu mog so'oag nimi pelebahainun aro Yesus nu lunuro tebaogti, kamag taogti, nu peleplamsil.
1TH 2:1 Nangkabo, nuri Yesus sembe a'unag ambarel ahibunge, teba'en uro amberal ahibu kom. A'undam nimi elwamlom.
1TH 2:2 Nu anam Tesalonika a'unag yan komag as Filipi wamububa, nun san tiliplamsiekpa seklero wamubunge sembe a'un elwamlom. Nimi maiknori san tiliplamsiekti iriklamsiek aghana, Nuni Allahri nu wanaag log kom nembahiog. Log kom nembahiogpa, Allah Eldamne Yubu Walinge Yesusti nimi talulamsilne sembe a'unag ambarelahibu.
1TH 2:3 Nuri a'un ambarelamsibungena, ogtopne agha kom. Apna liptop yubu mane yubu agha ambatto, “Nimiri saeag agha walinge topsukap,” aro orolena yubu ambarelamsibu kom.
1TH 2:4 Nuri ambarelamsibunge nimiri, “Nun dam nimi sembe wana wali sembaukang,” aro ambarelamsibu kom. Nuri ambarelamsibungena, “Allah nu wanaag miplamsilne wana wali yeng sembalul,” aro ambarelamsibu. Nunag Allahri sembamsiognena, “Wali. Hae Yesus yubu walinge sembe ambatto sol wali uro sik uro sabo nembaukang,” sembamogpa ambarelamsibu.
1TH 2:5 A'un babe elwamlom. Nuri pamag agha “Nimiri wana topsukap,” aro emem arop yubu lerop kom. Apna nuri aboaba sembe tognoro nhon lenne babe orog. Allah nun ipsiogne wamla.
1TH 2:6 Nuri ulamubungena, a'undi babe, nimi orangeri babe, “Nu kibiang towalengkipsiseng,” aro ero ulamubu kom. Allahri samenag Yesus wepto “Nimi so'oag nimi taulbahimendi saelbamsululam,” aro poghogpa, El yaogne ponekori nu wepto pogsiogti, nunag mikipne tatsiog. Mikipne nunag tatsiog ane sembe nunag kwema ulamsoba, “Tatsiseng,” aro nuri a'unag molbahinep. Aghana a'unag molbahibu komne a'un elwamlom.
1TH 2:7 Mikipne nunag tatsiogneag agha a'unag molbahainep aghana, nu a'un anabiag wamubunge ilindi elme win-winna pia uropne saog uro piamsibu.
1TH 2:8 Nu a'unap nhon wamuburi, ulamubunge Allahringe Yubu Walinge pamag aghabog ambarelamsibu kom. Pamag agha ambarelamsibu kom aghana, a'un sembe o'ona senehinne loloro wamogpa, nia nuri nong mikipneag agha “Yepsukap” aro a'un sembe ulamuburi, ambarelamsibu.
1TH 2:9 Nu whin seklero ulamubunge nene sembe a'un ni elwamlom. Allahringe Yubu walinge a'un ambarelamsibunge, “A'un nimi nhonag babe nu sembe saeagha seneragsukang kom,” aro sinag kweleknag whin seklero ulamubunge a'un elwamlom.
1TH 2:10 A'un Yesusag seneraglamlom nimi anabiag wamububa, a'undi haingdi babe iamsilumba, Allahri babe nu iamsiogpa ulamubu. A'un anabiag wamuburi, “Allahri uaukang senenne sunsunum uro uaukap,” senelamuburi sikne aghabog a'unag ulamsibu. Ane sembe nimi nhondi babe nuri a'un anabiag wamuburi, ulamubunge sembe “Malia-malia undo-undo ulamek,” senep kom.
1TH 2:11 Me ologne agha iliri yubu wenerop saog uro nuri a'un nimi nhon-nhon a'ero wenelamsiburi, a'un wana aingnilamsibu. Ane sembe nari “Sikne aghabog a'unag ulamsibu,” aro sik uro lelamnange sembe a'undi babe el wamlom. Eraruk uro wamlumba, yubu ambatto yeplamsibu. A'un wana ikin uro senelamlumba, wana aingnilamsibu. Sik komne salelamlumba, wenelamsiburi, “Nuri 'Unulamlulom,' aro ambarelamsibunge sunsunum uro ulapmundi, Allah wana yeng nembamlulom,” aro yubu mikip uro ambarelamsibu. Allahri a'un yoplamsildi, “Na Allahri yubu ka'ebamundi, Nandamne Yesus wepto pogsinge ponekoag sikne aro seneraglapmun tanena, Nari a'un wali uro saelbamsunun. Saelbamsineri, Nandamne imang wareropne ua urobag ya'ag nhon wamukap,” aro Allahri a'un yoplamsil. Ane sembe a'undi, “Allah wana yeng nenelamukap,” aro ulamlulom.
1TH 2:13 Tam nhon wamlange uro yabionge nenda sembe Allahag “Nuniong, wah” aro sop-sop molona lero kiplamap. Tam neneko uro yabiongena, nuri Allah Yubu a'unag ambarelamsiboba, yubu ambarelamsibonge neneko sembe “Nimiri yubu mo,” semban koma lipsiom kom. Nuri yubu ambarelamsibunge neneko sembe a'undi “Sik uro Allahri yubu ambarelamsiang,” aro ka'ebaomdi saelbaom. A'undi Yesusag “Nimi so'oag nimi taluro saelbahainepne,” aro seneraglamlomba, Allahri yubu enekori a'un nongag awe tolamla.
1TH 2:14 Nangkabo, Yahudi nimi mog so'o Yudea wameknang agha Yesus Kristus ponekoag seneraglamekpa, Yesus Eldamneringe taek. Eldamneringe taek nimi tanekoag samenag Yahudi nimi agha Yesusag seneragtop kom nimiri sinag malia ulamsiek. Yudea mog so'oag agha babe Yesus Eldamneringe taek nimi tanekoag Yahudi nimiri malia ulamsiek saog uro a'un Tesalonika nimiag babe Tesalonika nimiri malia ulamsiong. A'un seklena seklelamomnena, a'un sisa nimiri ulamsiongba, seklelamom saog uro sin Yudea Allah Elmabo taek nimi babe sin sisa nimi Yahudi nimiri “Seklebaik” aro ulamsiek.
1TH 2:15 Undo unulamsiek nimi tanekori nu Saelba uahiropne Yesus babe obekti Allah silimu tiptop nang babe olamsiekti nu babe seklelamukang aro olamsiek. Sindi nimi ni sembe aisa nembamsiekpa sin sembe Allahri babe karong sembahaiog.
1TH 2:16 Unulamsiekti nimi tala-tala uropne Yahudi sisa kom nimiag Yesus yubu ambatto taluro sae kilihin yubu ambatsinepne neneko iriklamsiek. Sindi undo ununa aghabog ulamsiekti Yesus yubu ambatsinne iriklamsiek ane sembe sin Yahudi nimiri malia ulamsiekne neneko leng-lenga langaro walelaori teknebaoba, wene Allahri sinag tam ikinne pelengenne aghabog wamla.
1TH 2:17 Nangkabo, a'un sembe “Nundam mabo,” senelamsiap pog, nimiri nunag malia ulamsiekne sembe nu sesog saog uro a'un laplobiagha yahiburi, haingdi ipsinep kom saog wamla. Haingdi ipsinep kom aghana, a'un sembe ekon tan koma wana to'opto o'ona senelamsiap. “Nu a'un wamlomag yaberi kemelahukap,” senelamobonge nu wanaag nubu uro lololtalamori, ngenohom alamsioba, otsik sol wali uro sunulamobo.
1TH 2:18 Nuri a'un kemelahukap sembabori, ik phende wilindi na yanun sembanori sumbano aghana, phia sikini nubunge ponekori nu ina irikahio.
1TH 2:19 A'un sik uro a'un nuri nimi wanaagne wamlomdi, nuri wana yeng sirikne nubu nembahaiomba, nuri wana a'unag wamla. Yesus nu saelba uahiropne poneko yalamle sumeneko a'un Yesus yubu mikip uro salelapmunne sembe wana yeng uro wamukap. El whingag nhon wameberi, a'un kembiagha, “Sol wali, wali uro ambatto tolamobonge wali uro tobirobo,” sembaukap. Ane sembe otsik uro a'un kemelahukap senelamobori sol wali uro sunulamobo.
1TH 2:20 A'undi nu wana yeng sirikne nubu nembahaiomba nuri wana a'unag wamlaba, a'un sembe seneraghi agha wali tolamobo senelamap.
1TH 3:1 Nuri wene sembabonge neneko ta'apsenep kom uao. Ane sembe nuri seneraghabori na Paulusap Silasap, “As Atena mo wamnemeri,
1TH 3:2 nunkae Timotius mo pognunam,” sembanomo. Nunkae Timotius nunap Allahringe awe tolamubunge poglamnomori, “Yesus Allahri wepto poghogne poneko sembe yubu walinge Timotiusti ambarel philul,” sembanomori pognomo. “A'un Tesalonika nimiag ambarelamsileri, a'undi wanaag Yesus sembe seneragnange wembahileri, mikip nembahailul,” sembanomori pogholanomo.
1TH 3:3 Nuri poghol anomongena a'un Tesalonika nimiri Yesusag wana seneraglamlomne sembe seklenna a'unag lag taoba, “Yesus sembe ambarelamsiapne libukang kom,” aro Timotius a'unag pogholanomo. Yesusag sikne aro seneragtop nimiag seklenne lag talamlenge sembe a'undam nimi el wamlom.
1TH 3:4 Nu a'unap nhon wamuburi, samen anamag, “Nuri Yesusag sikne aro seneraglamapne sembe ora nimiri malia ulamsiikpa, seklelamukap,” aro ambatsibunge neneko sik uro wene a'unag uro yabalamlaba a'undi haingdi babe ililamlom.
1TH 3:5 Ane sembe nari a'un sembe “Welaro wamang” senelamnori, ta'ap senep komdi, Timotius poghol anongena, “A'undi Yesusag wana seneragna kembahainun,” aro pogholano. Na log ulamneongena Yesus yubu saelbamlomne sembe nimiri a'un “Seklebaik,” aro ulamsiangba, phia sikini nubunge ponekori a'un sae kililamsileba, a'unag ambatsibunge “Libikag,” senelamnonge sembe Timotius pogholano.
1TH 3:6 Timotius pogholano aghana wene Timotius samoro yaori yubu walinge yeng sirikne a'undi Yesusag seneraglamlomdi nimi o'ona senero yepsinne ulamlomne sembe ambatsioba yeng senelamap. Wene senelamlomdi nu sembe wanaag uro seneraglamsilomba, “Nuri sinag pheberi, sinap nhon haiptahabe,” senelamap saog uro a'undi babe, “Sin nunag yahengba, haiptahabe,” senelamlom.
1TH 3:7 Ane sembe nangkabo, nimiri nunag malia ulamsiangba, nu ua unag erarukag seklena seklelamabag yubu a'undinge Yesusag seneraglamlomne neneri wana aingnilamsil.
1TH 3:8 A'undi Yesus nu Saelbamsilne ponekoag seneragna wamlaba, “Nuri ambatsibu yubu eneko ka'ero ulamangdi, Yesusap sae tiptangto seklamang,” aro nu babe wana aingniro kamag wamap senelamap. Ane sembe a'un otsik uro Yesusap sae tiptangto sekamlulom.
1TH 3:9 A'un Yesusap sae tiptangto wamlomne sembe nuri wana yeng along wamapti, nuri nongag mikipne ni wamlangeag agha a'un sembe Allah omeklamap aghana sunurop kom sembamap.
1TH 3:10 Sinag kweleknag a'un sembe nu nong ningkiri Allahag molona mololamap nena, “Yesusag wana to'opto seneraglamangne sembe ekon uro wamikagti, nen haiptangto ma'aro wamseberi, Yesusag wana seneragna sembe nen ma'aro ambatsisebe,” senelamap.
1TH 3:11 Nuni Allah Eldamneap Elme Yesus nu Saelbamsilne ponekoapti nu ina pa'abatsurukang aro mololamsiapti, wali sembarikpa, a'un kemelahukap.
1TH 3:12 Nari yeng senelamnangena, Yesus nu Saelba uahiropne ponekori a'unag nimi o'ona senehinne ma'aro sirilamleri tarelamsileba, nuri a'un sembe o'ona senelamsiap saog uro a'undi babe a'un-a'un wana piptangka o'ona seneldalapmundi, nimi orange babe wanaag o'ona sembamsululom.
1TH 3:13 A'un sembe molbarelamsiapnena, “Yesus nu taluro saelba uahiropneri a'undi seneragna wana mikip nenelamsileri, Yesusti 'Tam karebanun,' aro yalamle sumeneko Yesus Elag seneragtop nimiap nhon yaikpa, Nuni Allah whingag malia uan koma wali uro wamlulom. Nuni Allah whingag wapmunba, a'un sembe 'Namabo' sembahilulba, nimi nhondi babe a'un sembe malinge uaong aro tam pimnep kom,” aro a'un sembe molbarelamsiap.
1TH 4:1 Nangkabo, nuri ambarelamsibunge, “Allahri uaheng senenne sunsunum uro otsik uro ulamlulom” aro ambarelamsibu. Nuri ambarelamsibunge sunsunum uro ul palamik kom nimi Allah wana wali nembanep kom. A'un wene nuri ambatto ulamobonge sunsunum uro ul palamlomne wali. Nuri a'unag Yesus nu saelbamsilne mikibag agha a'unag mololamsiapnena nen ma'aro wali uro ulbalamlulom.
1TH 4:2 Yesus nu saelbamsilne mikibag agha a'un haingag agha “Ualulom-ualulom,” aro ambarelamsibonge ka'ebaomdi, el wamlom ane sembe nen sol wali uro ul palamlulom.
1TH 4:3 Allahri seneropne ane: “Na Namabori Na wana yeng neneropne aghabog ulamukang,” senenne a'undi ulamlulom. Unulapmundi, a'undi salik-malik kelaboap nengaboap mapseng kom. Nengabo eldamneri kelap aghabog nhon ma'al talamtukangba, kel eneko ela'angeap aghabog nhon ma'al talamtukang.
1TH 4:4 Kabuniri kelabo toamle tanena ela'angeriba elkeldiba kelabo nengabo orange sembe “Topsisene, saelbahaisene,” aro wana sesog uro seneragna koma Allah wana wali nenenneap sik uropne nimi wana wali nenehinneap agha seneraglamlulom. Undo seneraglapmundi, ela'angeap elkelap nikag wamturom aro ma'amsika uro wali uro wamlulom.
1TH 4:5 Allah sembe ekon uro urop nimiri kelabo nengabo sembe Allah senenne semban koma “Saelbahisene” aro sindi wana yorolamsilba salik-malik kelabo nengabo tolamsiang aghana a'un Allah elmabo wamlom. Ane sembe Allah ekon uro urop nimiri ulamangne saog uro ulamseng kom.
1TH 4:6 A'un Yesusag wana seneragtop nimi wamlom ane sembe a'un kabo nimi haing pesah iogha lepsimundi a'un kabo ingisapsilo saog uro a'un kabori kelaboro sa'a-sa'a topsiseng kom. A'un kaboag otsikne agha ualulom. Tam nene sembe otsikne agha uamun kom tanena, a'un kaboag malinge uamunne sembe amik Yesus tam karepto nu saelba uahiropne ponekori a'unag tam ikinne piplul aro wenero ambatsibunge a'un elwamlom.
1TH 4:7 Allahri nun nimi yopsiogne, “Mali-malia ulamukang,” aro nun yopsiog kom. Nun yopsiognena Allahri “Nadamneri seneropne sunsunum uro ulamikti, yeng nembanukang,” aro yopsiog. Ane sembe, Allahri seneropne sunsunum uro ulapmun komdi, a'unkabo ingisapsilo saog uro ulapmunba, Allahri a'unag tam ikinne piplul.
1TH 4:8 Nengaboap kelaboap salik-malik ma'aptaheng kom aro ambatsinne nene sik uro lemna. Nimi etneri yubu ene sembe karong sembaleri liple tanena nimi agha karong sembaikti wa'epto libukang kom, aghana Eldamne Yame Walinge a'un tarelamsilne neneko Allah waepto ebukang. Ane sembe wali uro ka'eapmundi, yubu ene saelbamlulom. Nengaboap kelaboap ma'aptanepne sembe komopto ambatsin.
1TH 4:9 Wene, a'undi o'ona seneltalamlomne sembe olog ambatsinun. A'undi a'un kabo Yesusag seneragtop nimi sembe wanaag agha o'ona seneptangka un yubu ene sembe Allahri a'un samenag elnembahaioba, wali uro ka'ebaomdi, yubu ene sunsunum uro ulamlom. Ane sembe o'ona seneptangka un yubu ene sembe a'unag nen sap mome toro pibukap kom.
1TH 4:10 Nimi wanaag agha o'ona senehinne yubu ene sembe a'un kabo Yesusag seneragtop nimi tala-tala mog so'o propinsi Makadonia wamang nimi sembe o'ona senelamsilomdi, uaom. Aghana nangkabo, nuri a'unag nen mololamsiapnena, “Nen tipto nimi o'ona senelamsumundi, walinge unne aghabog a'unag loloro wamleba ulamsululom,” aro mololamsiap.
1TH 4:11 A'undi “Uahabe,” ulomlulomnena, undo-undo ulamlulom. A'un aingniro wapmundi tam yogne ora nimiag uro yabalamlenge sembe salel wa'in koma, tam a'undinge ul palamlulom. Samenag nuri a'un ambatsibu saog uro, nimiri tisirikag agha a'un wamlulom kom aro ambatsibu. Ane sembe teko a'unag uahileagti, a'un dam nimi saeri ul piro wero mero tero wamlulom. Undo-undo unulapmunba, Yesus yubu ekon nimiri kembahikti a'un sembe sindi wali sembahaukang.
1TH 4:13 Nangkabo, nuri seneraglamapne nimi samenag tebaekne sembe a'un babe eltahom sembamap. Yesusag sikne aro seneragtop kom nimiri, “Teptop nimi nen kamag taukang kom,” aro amang ul palamang. “Kamag taukang kom,” aro amang ul palamang aghana a'un Yesus kamag taogne ponekoag seneragtop nimi wamlom. Ane sembe mog so'oag nimiri wene amang ul palamang saog uro ulamlulom kom. Sin samenag tebaekne sembe eltahom aro sik uro ambarelamsukap.
1TH 4:14 Nuri sik uro seneraglamapne Yesus tebaog aghana kamag taog aro seneraglamap. Ane sembe nuri seneraglamapnena Yesusag sikne aro seneragtop nimi tebaiik aghana nen amik Allahri kamag nembahaileba, Yesus nen samoro yalamle sumeneko Allahri embahaileba, Yesusap nhon yaukang.
1TH 4:15 Nimi nen amik kamag nembahailulne nene sembe Yesusti ambatsiogne nuri a'un ambarelamsiap. Nene sembe Yesus nu saelba uahiropne poneko amik nen yalamle sumeneko nu nimi kamag wamebengeri nimi teptopne amik nenelobiagha nun samenag Yesus whingag taukap kom.
1TH 4:16 Yesusti samenag yubu ambatsiogpa nen tipto ambarelamsinnena, Allah arukna malaikat sikindori Yesus yanepne sembe wene yalul anne el taukang aro yubu nubu uro yopsilul. Yopsileri, wa'en yubu lilim nubu uro ma'i saog uropne terompet phoalamlul. Terompet phoalamleba, mog so'o leksuluplamleba, Yesus nu taluro saelba uahiropne poneko Elmo imag agha kuluka yalul. Kuluka yalamleri, Yesusag seneragtop nimi samenag tebaek nimi samenag kamag nembahailul.
1TH 4:17 Tebaek nimi samenag kamag nembahileri, sinap nu li ko'o enekoag nu kamag wamebengeap toa nusam toman agha Allahri nu kiliro topsilul. Kiliro topsileba nu Saelba Uahiropne ponekoap imag haiptaberi, ya'ag elap wamukap.
1TH 4:18 Ane sembe a'un a'unkabo Yesusag seneragtop nimiap yubu nene elneneptangto nang-nang aro wapmundi, wana nubu neneptangkamlulom.
1TH 5:1 Nangkabo, a'un Yesusag senaragtop nimi wamlomne, Yesus nu Saelba Uahiropne poneko nen amik yalulne neneko sembe a'un tibin uro el wamlom. El samoro yan aloglulne neneko sembe hurop sum li ko'oag agha uro yabilul aro nimiri pimnep kom wamla. El yalul sumeneko nimiri, “Haoghaba tobukap,” aro inipnag nimiri aeag tognoro wa'irop saog uro wamlaba nimiri haing whi uro tibogto wamnep kom saog wamla. Haogha nimiri inipnag yingkirop saog uro Yesus samoro yaloglul ane sembe nuri a'unag nen tipto Yesus samoro yaloglulne neneko sembe, “Sumene li ko'oag agha uro yabilul,” aro mome toro pibaukap kom.
1TH 5:3 Nen amik yalul li ko'o eneko, nimiri lelamikti, “Wenena sa'a-sa'a yubu tananne orog wamlaba aingniro wamap,” alamik abene malia urop nimi kom nembahinep sum waleloglul. El yan aloglulne nenekona, kelabo me monag wamnaba, “Sumene sum mangaroanun,” sembamna komag agha lo'om alognari me mangaltoropne saog uro waleloglul sum Yesus nen yale sum eneko wamla. Yesus nen yale sum malia urop nimi kom nembahinep sum eneko walelogleba, Yesus yubu walinge ka'erop kom nimi el whingag agha la'aniptaukang kom.
1TH 5:4 Aghana nangkabo, a'unna inibinag urop nimi saog uro wamlom kom. Ane sembe a'un haing whi uro wapmundi, were tibog amlulom. Ae ngainge haogha nimi yalenge neneko sembe ekon uro wamleba, haogha nimi ae kwerekto wa'iro yaleri, ae ngainge yame yagsileba, lo'om sulul. Aghana a'un inibinag urop nimi saog komdi, Yesus yanepne sembe wali uro nang-nang aro tibogapmunba, Yesus nen yanalogleba, lo'om sululom kom.
1TH 5:5 A'un ni nimi tibinneog wamlomdi, walinge aghabog uro wareropneog ulamlomba, nunna nimi inibinne inipnagtinge kom.
1TH 5:6 Ane sembe nunna nimi inibinne inipnagne wamap komdi, nimi orange malamang saog uro malamukap kom. Nun mamna koma haing whi uro wamebeberi wero tibogto wamukap.
1TH 5:7 Nimi yoaba urop nimi taneko Yesus yanepne sembe wero wamna koma inipnag malamang. Ora nimiri inipnag mag yonge tero ulamangne sembe nenek saelbahirop.
1TH 5:8 Nunna nimi tibin nimi warerop nimi wamap ane sembe nuri seneragna babe tibin uro seneragtop nimi wamukap. Mal tarop nimiri, “Mal tabukap,” aro wero ulamikti, seng enekamikti, “Mal homamangag teklemna wapsikag,” aro ngang kwhena kwhelamang. Mal tarop nimiri wero ulamangne saog uro nuri babe wero tibogto wamebengena, Yesusag sikne aro seneraglameberi, Allahap nimiap o'ona senelamsibenge agha seng enektop nimi saog uro wali uro wero wamukap. Mal tarop nimiri ngang kwhena kwhelamang saog uro nun dam nimiri Yesusag seneraglamebengeag agha pelebel talamukap. Peleptanepne seneraglamukapnena, “Yesus yaleri, nu pelepto taulbahileba, Allahri nu opsilul kom,” aro tiboglamapneag agha nuri usoghag babe mal kaunguro timbaneba kalulamap. Undo seneragto o'ona senelamsiberi, Yesusag seneraglameberi, tibin uro seneragto Yesus yaleri, pelebahilulne sembe tibogto wamukap.
1TH 5:9 Allah nu wepsiogne ponekori nunag, “Tam ikinne pimnun,” aro nu wepsiog sembaheng kom. Allahri nu wepsiognena, Allahri Yesus wepto poghogpa, nunag yaogti, nu talulamsildi, saelbamsil. Nu saelba uahiropne Yesus pere agha Allahri nu “Yesusag seneragtop nimi taulbahinun,” aro wepsiog. Taulbahinun aro wepsiog nimi wamap, ane sembe Yesus yaleri, pelebahileba, Allahri nunag tam ikinne piplul kom aro tibogto wamukap.
1TH 5:10 Yesus El tebaogne nu sembe tebaog. El yalamle sum eneko nu kamag wamapneap nu teptopneap Elap nhon wamukap aro samenag tebaog.
1TH 5:11 Ane sembe wene ulamlom saog uro nen tipto a'un-a'un weneldalapmundi, mikip neneltalamlulom.
1TH 5:12 Nangkabo Yesusag seneragtop nimi wamlomne, nuri a'unag molorop yubu a'unag palilamapne ane. Nu saelba uahiropne Yesus ponekori a'un anabiag nimi etpare wamangne sinag mikipne palilamsilba, sin a'uniyabo saog uro wamang. Sinag mikipne palilamsil nimi tanekori a'unag Allah yubu wenehirop yubu ambarelamsiangdi, a'un sembe awe tolamang ane sembe, “Wali uro ka'eamsimundi, kiplamsilulom,” aro mololamsiap.
1TH 5:13 Sindi Allah yubu a'unag ambatto awe tolamang ane sembe, a'undi sin o'ona senero paliag nenero nimi wanaagne nembamsululom. A'un anabiag wamang nimiap wana aingniro nimi wanaagneog seneldalamlulom.
1TH 5:14 Nangkabo, nuri a'unag wenehin yubu olog wembahaukapnena ane. A'un anabiag sol mali aro awe torop kom nimi wamikne wenelamsululom. Wana ikin uro urop nimi wamikne wana keagman nenelamsululom. Mikip kom uro urop nimi wamikne yeplamsululom. Nimi niri ulamikne sembe wana palingkina wali uro ulamlulom.
1TH 5:15 Nimiri a'unag malia ulamsikpa, “Nuri babe taongoro malia uakap,” aro ulamseng kom. A'un-a'un walia aghabog ulapmundi ni nimiag babe walia aghabog ulamlulom.
1TH 5:16 Eraruk uro wapmunag, wali uro wapmunag Allahri a'unag ulamlange sembe, “Walinge aghabog ulamla,” aro awi sembamlulom. Awi sembapmundi, Allahag molona sop-sop sinag kweleknag ta'ap sen koma mololamlulom. A'un undo wapmundi ulapmun tanena Allahri a'un sembe wana awi sembamsilul. Sembamsilengena, “Nari weptopne Yesus mog so'oag pogsingeap sae tiptangtop nimi wamangdi, walia ulamang,” aro a'un sembe wana awi sembamsilul.
1TH 5:19 Allah Yame Walingeri nimi wanaag yubu elnenelamsilba, nen tipto yubu ambarelamsik tanena salero ka'eban koma yubu ene sembe teba'en sembaheng kom. Allah Yame Walingeri tarelamsil yubu eneko auk pok saog uro wamlaba, oro niknibaheng kom.
1TH 5:21 Allah Yame Walinge oro niknibaheng kom aghana, ka'eapmundi, nia ni wali uro seneragto, malinge sik urop komne, “Nunag taleag,” aro weag nembamlulom. Sa'a-sa'a ka'eapmundi, nelagha wali aro kemelbina walinge sik uropne aro seneraglapmun tanena walinge aghabog a'unag wamlul.
1TH 5:23 Nuri a'un sembe Allahag molbarelamsiapnena, Allah Eldamne nu wana aingnilamsilne ponekori a'un sik uro urop nimi nembahileba, Allah Eldamneri mabo wapmundi Eldi uaheng senenne sunsunum uro ulapmundi, wamlulom. Undo wapmunba Allahri a'un yae piamsileba, a'undi seneragnaap, a'undi wanaap, a'undi nong ningkiap yae piptangkamlulom. Allahri a'un yae piamsileba, yae piptangkapmunba, Allahri wepto poghogne Yesus nu saelbamsilne poneko yalamle sumeneko nimi nhondi babe a'un sembe “Malia uaong,” senep kom. Abene nuri a'un sembe Allahag molbarelamsiap.
1TH 5:24 Allahri “Naringe taukang” aro a'un yopsiogpa, Eldi salag pibogne neneko angaro yabinep komdi otsik uro ualul.
1TH 5:25 “Nu Yesusag seneragtop nimi wamap,” aro a'un-a'un eldo ilipsae saog neneptangka wapmundi, eldo ilipsae somoro kiptangtop saog uro kibiltalamlulom. Nangkabo, nu sembe Allahag molona lelamsululom.
1TH 5:27 Nari a'unag mololamsinnena Yesusti nanag “Ambatsululam,” aro mikipne nanag pimneongeag agha mololamsin. Mome nari palilamnange nene “Yesusag seneragtop nimi niri ka'ebaukang,” aro sin ni whingag agha mome lilim lelapmunba sindi babe ka'elamukang.
1TH 5:28 A'un sembe molbarelamsiapnena, Allahri wepto poghogne Yesus nu talulamsildi, saelbamsilne poneko wana waliri a'un yepto piamsilul aro molbarelamsiap. Abenda.
2TH 1:1 Nangkabo Nuni Allahri, “Mog so'oag nimi taulbahimendi, saelbamsululam,” aro wepto poghogne Yesus ponekoag a'un Tesalonika nimiri seneraglamlomdi, Allah Elmabo taomba, Yesusti nu talulamsildi saelbamsil. Ane sembe na Paulusti mome ane palilamnange neneag agha nu wilindi nang na Pauluasap, Silasap Timotiusapti kiplamsiap. Nuri a'un sembe molbarelamsiapnena, Nuni Allahap, El mori wepto poghogne Yesus nu saelbamsilne ponekoapti a'un sembe wana wali sembamsirangdi, wana aingniro yepto piamsurukang aro molbarelamsiap.
2TH 1:3 Nangkabo, a'undi Yesusag sikne aro seneraglamlomdi, samenag agha yubu ene saelba ulamlum aghana wene babe nen ma'aro mikip uro saelbamlom. Samenag a'un o'ona seneldalamlum aghana wene babe a'un maiknoro o'ona seneldalamlom. A'undi undo ul palamlomne sembe nunag yeng to'opto wamlaba Allahag “Wah, Nuniong,” aro kiplamebe kom tanena mali sembamap. Ane sembe nuri senelamapnena, “Allahag Nuni wah aro papna koma omeklamukap,” senelamap.
2TH 1:4 Ane sembe nuri Allah elmabo as yogneag ambatto poa tongolamsiapti a'undi ulamlomne sembe kekaghelbina ambarelamsiap. A'un Tesalonika nimi sembe “Wali sirik ulamang,” aro ambarelamsiapnena, a'undi Yesusag seneraglamlomne sembe nimiri a'unag seklebaik aro ulamsiangba ikin uro seklelamlom. Seklelamlom aghana Yesus nu taulbahainepne poneko limna koma Yesusag wana nhonog uro sikne aro seneraglamlom. A'undi wana nhonog uro Yesusag seneraglamlomne sembe nuri as yogneag ambatto poa tongolamsiapti, a'undi ulamlomne towalengkhiro ambarelamsiap.
2TH 1:5 A'undi undo unulamlomne neneri amik Allahri tam peket uro karebanepne lag wamla. Allahri tam peket uro karebahilulnena, a'undi Yesusag seneraglamlomdi seklenne sembe a'unag talamlaba, wana maulamlaba ulamlomne nene sembe Allahri, “Wali, Namabo taongba, saelbamsinne sunsunum uro urop nimi” sembamsilba, El Allahap a'un nhon wamnepne kekneltalamla.
2TH 1:6 A'un “Seklebalulom,” aro ulamsik nimiag amik Eldi tam porog uro kareplamleri, lumbahileba sin babe seklebaukangne wamla.
2TH 1:7 Wene a'un seklelamlomneap nu seklelamapneap sembe Allahri nu aingnibitsilul. Aingnibitsilenge anena, Nu Saelba Uahiropne poneko Yesus nen imag agha kulukul alamleri, Yesusap Allah arukna malaikat palisong nangap auk pog libang-libang arop saogneap lag talamukang. Lag talamik sumeneko Allahri nu aingnibitsulul.
2TH 1:8 El kulukul alulnena, Yesusti “Na mog so'oag nimi saelbamsin aghana mog so'oag nimi taulbahinep yubu Wali Yubu eneko Allah yubu karong arop nimiri ingisaplamang,” sembalul. “Ingisaplamang,” sembaleri, Yesusti “Allah sembe ekon uro urop nimi tanekoag tam ikinne pimnun,” aro kulukul alul.
2TH 1:9 Yesus yubu walinge ingisaptop nimi ni tanekoag “Tam ikinne pimnun,” aro kulukul alulne ya'ag seklero wamnebag Yesusti weag toro toboghailul. Toboghahileba nu Saelba Uahiropne Yesus Mikip Phelektopne Eldamne imang babe Yesus ua urobag babe olog ibukang kom.
2TH 1:10 Ni undo ualulne nenena, El yalamle sumeneko agha ulamleba, elag sik senerop nimi niri paliag nenelamikti, “Yaghe! Mane agha ulamlari, wamla,” aro El omeklamukang. Sumeneko a'un babe nuri ambarelamsibu yubu sik senelamlom ane sembe, Yesusag sikne aro seneragtop nimi anabiag a'un babe wapmundi, El omeklamlulom.
2TH 1:11 Ane sembe nuri a'un sembe sop-sop molona Allahag molbarelamsiapnena, Allahri a'undi wanaag kembiagha, “Namabo taukang aro yoplamsin nimi taneko sunsunum uro urop nimi,” sembalul aro Nuni Allahag molbarelamsiap. Nen tipto molbarelamsiapti, a'undi Yesusag seneragto “El si nubu nembaukap aro undo-undo ulamukap,” senelapmunne sembe, Allah Eldamne mikipne agha yepsileba, “Wali-walia ulamukap,” senelapmunne sunsunum uro sik uro yabilul aro a'un sembe Allahag molbarelamsiap.
2TH 1:12 Nuri a'un sembe Allahag molbarelamsiapnena tam nene sembe. A'undi Yesusag seneraglapmundi, “El si nubu nembaukap,” aro wali-walia ulamlulom. Undo unulapmunba, nimiri a'un kemelamsikti, a'undi Yesus omeklamlom saog uro sindi babe, “Nu saelbamsilne poneko omeklamukap,” sembaukang. A'un kemelamsik nimiri “Yesus omeklamukap,” sembaikpa, Allahap Eldamneri wepto poghogne Yesus nu saelbamsilne ponekoapti a'un sembe wana wali sembahirukang. Ane sembe Yesus omeklamikne saog uro Yesus Eldamneri a'un babe towalenghiro paliag nembahilul.
2TH 2:1 Allahri Yesus nu saelbamsilne wepto poghogpa, yaogne poneko sembe si Kristus aro engero yabiog. Yesus Kristus nu saelbamsilne poneko nen amik yaleri nu poloro wimbahaileba elap nhon wamukap. Nangkabo, Yesusag seneraglamlomne, El nen amik yalamleri, nu poloro wimbahilul. Tam abeneko sembe nari a'unag otsik uro mololamsinne ane:
2TH 2:2 Nimiri a'unag mome to yubu to payaikti, tam Yesus nen yanepne sembe orolena ambatsinep. Ane sembe, sindi yubu sik to kom to aro wali uro ka'ebitsululom. Orolena ambarelamsiikti, “Paulusap elkaboapti amberelamsiong yubu eneko nu samen eltabori nuri wene nen tipto a'unag ambarelamsiap,” aro orolena ambatsinep. Sindi orolena ambarelamsiikti, “Allah Eldamne Yameri Paulusap elkaboabag yubu piboba nen tipto nunag ambarelamsiong. Wene nuri a'unag ambarelahiap,” alamik tane, sindi yubu sik to kom to aro wali uro ka'ebitsululom. Sindi lelamikti, “Yesus nu saelbamsilne poneko ik phendep sum nen samoro yaori, elag seneragtop nimi wimbahioba, tane wamap,” alamik tanena elemag-elemag men phea abeneko otsik sembaheng kom. Elemag-elemag otsik semban koma, wana ophag aro wana tung mai neneloptaheng kom.
2TH 2:3 Nimi yaikti, Yesus Eldamneri nimi winihiro yalamle sum eneko sembe orolena ambatsiikpa, sik to kom to aro ka'emlulom. Yesus nen amik yalenge sembe ambatsiikne eneko nari ambatsinne yubu sunsunum uro kom tanena, sik sembahiseng kom. Yesus el nen anam yan komag uro yabilulnena nene agha uro yabile tagha amik Yesus yalul. Nimi maikno Allahag wana seneragtop nimi taneko Allah sembe karong alamikti, Yesus yubu nimi taulbahainep yubu eneko lililamsukang. Lililamsiikpa, Allah yubu ingkisaptop nimi nubunge nhon lag tangto waelbaleri, ualulnena ane. Allah yubu ingkisaptop nimi enekori ora nimiri phalamikneap, ora nimiri Allah aro engero palilamikneap “Mombolag nembamsukap,” aro, Allah yubu ingkisaptop nimi eneko agha “Paliag wamna,” aro omekeltalamlul. Omekeltalamleri, Allahri Mem Ae nubunge kota Yerusalem wamlangeag babe wa'ileri, pukamleri, welmot lambitlulnena, “Nana agha Allah wamna,” aro welmot lambitlul. Undo unualul aghana Allahri nimi ene sembe samenag el wamogti, “Luknuro kom nembanun,” aro tam karepto pibog. Nen sap sarikto ambarelamsindi, Yesus nen amik yan komag nimiri Allah sembe karong alamikti, Yesus yubu lililamsikpa, Allah yubu ingisaptop nimi nubunge poneko lag taleba, amik Yesus nen samoro imag agha yalul. Ane sembe, nimiri a'unag yaikti, Yesus nen amik yanepne sembe orolena ambarelamsiik tanena elemag-elemag men phea otsik sembahiseng kom.
2TH 2:5 Na samenag a'unap nhon wamsiri tam nene sembe a'un ni ambatsisinge a'un ekon taom kom sembamna.
2TH 2:6 Allah yubu ingisaptop nimi nubunge neneko wene lag tanep aghana nhondi saelbamlari, iriklamlange neneko a'un elwamlom. Wene saelbamlari, iriklamla agha Allahri, “Nimi yonge yubu ingisaptopne lag talul,” sembaog sumeneko og lag tangto yabilul.
2TH 2:7 Lag tangto yabilul aghana wene babe nimi maiknori, “Na mori uanun senenne sunsunum uro uanun,” senelamangdi, ulamangdi, Allah yubu ingisaplamang. Sindi ulamangne sembe nu Yesusag seneragtop nimiri mali aro undo unulamap kom, aghana sindi seneragna wanaag ulamsilne ekondi undo unulamang. Wene undo Allah yubu ingisaplamang aghana, Allah yubu ingisaptop nimi nubunge neneko lag tanepne sembe, nhondi saelbamlari, iriklamlange neneko Allahri toro kolbitlul.
2TH 2:8 Toro kolbitle taneogna Allah yubu ingkisaptop nimi nubunge neneko lag talul. Lag taleba Yesus nu saelba uahiropne ponekori “Tam karebaneri malinge neneko kom nembanun,” aro Yesus nen yalamle sumeneko Eldamne imang warero kom nembaleri, malinge neneko Yesusti haindi phoaro oplul.
2TH 2:9 Allah yubu ingisaptop nimi nubunge yalenge neneko sembe phia sikini nubungeri nimi eneko nongag leknebaleba nimi eneko yalul. Phia sikini nubungeri mikibag agha yaleri, kekneba nimiri uanep komne maikno ulamlul. Phiari mikibag agha nimiri uanep komne maikno ulamleri, orolenange agha nimiri wana tohileba nimiri, “Yaghe, Allah Imagne mikipneri el pere agha ual” sembaukang.
2TH 2:10 Allah yubu ingkisaptop nimiri undo unulamleri, mali-malia maikno ulamleri, orolenange lelamlul. Nimi samenag Allahri “Loba taukang,” sembaog nimiri orolenange maikno lelamlenge neneko sik sembaukang. Sin Allahri “Loba taukang,” sembaog nimi anekori Allah Yubu sikne nimi taulbahinep yubu eneko karong senelamikti, sikne neneko wa'eplamukang. Sindi Allah yubu wa'eplamikti, Allah yubu ingisaptop nimiri orolenange lelamlenge sik sembaukangne sembe Allah samenag el taog. Samenag el taogti, “Taulbahinun komdi, loba taukang,” sembaog.
2TH 2:11 Sin Allahri “Loba taukang,” sembaog nimi tanekori Allah yubu sikne neneko sembe karong senelamikti malinge sembe wali senelamukang. Ane sembe nimi enekoag Allahri, “Tam ikinne karepto sinag pimnun,” sembalul. “Tam ikinne sinag pimnun,” sembaleri, Allah yubu sikne nimi wali nembahinep yubu eneko sik senelamik komne sembe Allahri nimiri seneragna loba nembahilul. Seneragna loba nembahileba, nimiri orolenange ka'esebeltanan yubu lelamikne sembe sik sembaikpa, Allahri tam ikinne karepto sinag piplul.
2TH 2:13 Nangkabo Yesus nu saelba uahiropne ponekori o'ona sembamsil nimi! Nuni Allahri a'un wepsiori, Eldinge nembamsil. A'unag uro yabalamlange sembe nuri senelamapnena, “Nuni Allahag sop-sop Naniong wah aro kibiang towalengelamukap,” senelamap. Eldi a'un sembe anam im so'o sumban komag a'un samenag “Toro pipsineba, Na mabo taukang,” aro wepsiog. Wepsiogti, Allah Eldamne Yame Walingeri malinge a'undi wana seneragnaag uropne yag lanalamsil. Eldamne Yame Walingeri malinge yag lanalamsilne pere agha a'undi Allah yubu walinge Yesus sembe sikne aro seneraglamlom. Allahri sik yubu eneko sikne aro seneraglamlomne pere agha talulamsilba, Allah Elmabo taomdi, wamlom.
2TH 2:14 Allahri a'un “Na Namabo taukang,” aro wepto talulamsilnena, Yubu Walinge Yesus sembe nuri a'un ambatsibunge pere agha a'un Allahri yopsiogti, talulamsil. Talulamsilba, Allahri Elme wepto poghogne Yesus paliag nembaog saog uro Yesusti nu saelba uahiropne ponekori nu kiliro paliag nembahilul.
2TH 2:15 Ane sembe, nangkabo a'un porog uro sekapmundi, nuri ambatsibunge pamag agha babe momeag agha babe ambatsibunge wali mikip uro saelbamlulom.
2TH 2:16 Nuni Allahap Elme Yesus Kristus nu saelbamsilne ponekoapti nu o'ona senelamsirang. O'ona senelamsirangdi, nunag wana waliri ulamsirangneag agha wana aignilamsirang. Wana aingniro mikip nenelamsirangba, ya'ag wana aingniro mikip wameberi, “Allahri nunag walinge aghabog uahilul,” aro tibogto wamapti, wamukap. Allahap Yesusapti wana waliri nunag ulamsirangne nene sembe, nuri Allahap Elme Yesusabag a'un Tesalonika nimi sembe Allahap Yesusabag molbarelamsiap. Allahap Yesusabag a'un sembe molbarelamsiapnena, “Nen ma'aro wana aingnilamsurumundi, mikip nenelamsururom,” aro molbarelamsiap. A'un Tesalonika nimi mikip nenelamsirikpa, “A'un Tesalonika nimiri yubu wali nenerop yubu ambarelamsimundi, walia aghabog ulamlulom,” aro molbarelamsiap.
2TH 3:1 Wene nangkabo, nuri a'un sembe mome komoptopne palilamaptina nu sembe Allahag molona lelamsululom. Allahag molona lelamsumunnena, Yesus yubu walinge elemag sabo tangto pileba samenag a'un Tesalonika nimiag uro yabiog saog uro wali uro ka'elamikti, saelbaukang aro Allahag molona molbarelamsululom.
2TH 3:2 Yesus sembe ambarelamsiap yubu nimi niri sik senelamang kom ane sembe karong senerop nimi yo nimiri nu yubu nepto opsikag tina nu sembe Allahag molona lelamsululom.
2TH 3:3 Undop aghana Yesus nun saelbamsilne ponekori nu ya'ag yae piamsileri, sae lipsilul kom. Eldi a'un mikip nembamsileri yongeri sae kiliro yubu nepsinebag agha Eldi yae wamsileri a'un taluro pelebahilul.
2TH 3:4 Nuri a'un sembe wana nong ningkiri Yesus nu saelbamsilne saeag palilamsiap. Nuri a'unag “Ualulom-ualulom” aro ambatsibunge sunsunum uro wene wali uro ulamlom. Wali ulamlomdi, nen amik babe ulamlulom aro el uro wamapti, a'un sembe Yesus nu saelbamsilne ponekori saeag palilamsiap.
2TH 3:5 Nuri nun saelbamsilne ponekoag a'un sembe molona molbarelamsiapnena, nu taluro saelbamsilne ponekori a'un yeplamsileba, Allahri nu o'ona sembamsilne saog uro a'undi babe wanaag agha o'ona seneptangkamlulom. Nu taluro saelbamsilne ponekori a'un yeplamsileba, Yesus Allah Elme wepto poghogne ponekori wana nhonog uro Allahag seneragto seklebaog saog uro, a'undi babe wana nhonog uro Allahag seneraglamlulom aro a'un sembe Allahag molbarelamsiap.
2TH 3:6 Nangkabo, Yesus nu saelbamsilne ponekori mikipne nunag pipsiogneag agha nuri a'unag aruklamsiapne ane. A'un Yesusag sikne aro seneragtop nimi wamlomne anabiag agha, nimi etne nuri ambatsibu yubu salero ulamang komdi, solmali uro urop nimi ipsimun tanena, sin undo urop nimiap ma'aptangto wamseng kom aro ambarelamsiap.
2TH 3:7 Nu a'un anabiag wamuburi nuri awe tolamubunge solmali semban koma solwali wali uro tolamubunge a'undi babe ipsilum. Nuri senelamuburi, “Nuri sol wali, wali uro tolamubunge sindi babe ipsikti nuri sol wali uro awe tolamap saog uro sindi babe sol wali uro tolamukang,” aro ulamubu ane sembe a'undi babe otsik uro sol wali uro tolamlulom.
2TH 3:8 Nu a'unap wamubungena kwaneng tena mo telolamsubu kom. Sinag kweleknag whin seklero awe tolamubungena, “Nimi nuri tenaba sembe a'un yubu nepsukap kom,” aro nuri saeri ero tolamubu.
2TH 3:9 Yesus nu saelba uahiropne ponekori nu wepto pogsiogti, nunag mikipne tatsiog. Mikipne nunag tatsiog ane sembe nunag kwema ulamogpa, a'unag molbahinep. Nuri a'unag kwaneng to, pakaian to, uang to molbahinep aghana nuri sembamubungena, “Sindi nu kemelamsiikpa, nuri ulamebenge sindi ipsikti, sindi babe nelepto ulamukang” sembamubu. Ane sembe a'unag molbahin koma nuri saeri ero tolamubu.
2TH 3:10 Nu a'un anabiag wamubuag yubu nene agha “Ulamukap,” aro karepto pibubungena, “Nimi etneri sop-sop, 'Awe tomna koma mo wamnun,' aro ulamle tanena, nimi eneko kwaneng telamlul kom,” aro karepto pibubu. Ane sembe, nen sap sarikto “Sol mali uro urop nimi awe toro uan kom tanena nimi enekoap ma'aptangto wamseng kom,” aro ambarelamsiap.
2TH 3:11 Nuri samenag, “Awe weroan kom nimiri kwaneng telamlul kom,” aro karebabu aghana wene ka'elamapba, a'un anabiag agha nimi etpare wamangdi, awe weroan koma toro kokto wamang. Toro kokto ulamangdi, sa'a-sa'a uan koma ulamang aghana, ora nimiri tam ua ulamla tanena urukag wa'ina salel wa'alamang” alamangpa, ka'elamap.
2TH 3:12 Nuri karepto pibubungena nen sap sarikto aruklamsiap. Yesus Kristus nu saelbamsilne ponekori mikipne nunag pipsiogpa, Eldamne mikipneag agha sin ora nimiri tam wa'iro sale-sale tongorop nimiag wenelamsiapti, yubu mikip uro aruklamsiap. “Sin undop nimi nimiringe tag sae tobongol wa'anne libikti, aingniro taikti, awe saeri weroaik taneogna tenaba telamukang,” aro wenelamsiap.
2TH 3:13 Aghana a'undi nimiag walia ulamlomne nenena sololamnari, ta'ap senun semban agha walia ulamlomne lipseng kom.
2TH 3:14 Nuri mome toro palilamapne neneag wamlange nene saelbamlulom. Nimi nhon a'un anabiag agha nuri mome eneko sembe sik sembale komdi, nelebale kom tanena, nimi enekoap sae tiptangto wamlulom kom. “Ali sembaleri, yubu eneko ka'ebalul,” aro a'un togtangto wapmundi, elap sae tiptangto wamseng kom.
2TH 3:15 Aghana nimi eneko a'undi aisa nemban koma yubu wali uro “Nungkae Yesusag seneragtopne,” aro yubu agha wenelamlulom.
2TH 3:16 Nu saelbamsildi, wana aingnilamsilne poneko Eldamneri sop-sop a'undi wana babe aingnilamsilul. Wali uro wapmunag, eraruk uro wapmunag, a'undi wana aingnilamsilul aro Elag molbarelamsiap. A'un saelbamsilne ponekori a'un yae piamsileba, Elap nhon wamlulom.
2TH 3:17 Na nadamne Paulusti mome abene tolamnari, nangkabo aro a'un kiplamsin. Nari sop-sop mome tolamnange saog uro mome nenneag babe nari sae kekneba na kekneltananne sembe undo palilamna. Ane sembe nimi etneri mome ene kembaikti, Paulusti tapto mome eneko tobog aro el taukang.
2TH 3:18 Nuri Allahag molona molbarelamsiapnena, '”Mog so'oag nimi taulbahimendi, saelbamsululam,' aro Allahri wepto poghol aogne Yesus ponekori wana waliri o'ona sembamsildi a'un ni yepto piamsilul,” aro molbarelamsiap. Abenda.
1TI 1:1 Timotius naba name. Nari samen Yesusag sikne aro seneraglamna saog uro andi babe Allahri, “Nimi mog so'oag nimi taulbahaileri, saelbamsilul,” aro wepto poghogne ponekoag seneraglamlam. Ane sembe, naba name taptopne saog wamlamba kiplangken. Samen Allahri Yesus wepto “Taulbahileri, saelbamsilul,” aro poghogne Yesus yaogne sembe Kristus aro engero yabiog. Yesus Kristus ponekori Allahri aruktop yubu sunsunum uro na Paulus wepto pogneogpa, Yesus sembe ambarelamsindi, mome ane an sembe toro palilamna. Allahri nu talulamsilne ponekori nu mog so'oag nimi sembe Yesus poghatsiogpa, “Nunap Allahap nhon wali wamukap,” aro Yesusag sikne aro seneragto nang-nangalamap. Nari an sembe molbarelangkenne, Nuni Allahap Eldi wepto poghogne Yesus Kristus nu saelbamsilne nenekoapti an sembe wana wali sembangkarukang. Wana wali sembangkirikti, yareagti yeplangkirikpa, wana aingniro wamlulam.
1TI 1:3 Name Timotius, na Makedonia so'oag palamnori, ambatkenonge sunsunum uro an as kota Efesus ya'ag wamlulam sembamna. An Efesus ya'ag wamlulam sembamnangena, “Nimi etbareri Allah yubu kilbiagha sik komne ambatsiong nimi tanekoag 'Undop yubu ambatsululom kom,' aro pat palirop yubuag wembahilulam,” aro ambatkenori, nen sap sarikto ambarelangkeken.
1TI 1:4 Sindi kom nepna neptop yubuap, nimi yan ana lelektop yubuap ambarelamsiong yubu ene sembe nimiri saekag lemnep komdi, sop-sop yubu ene sembe leldalamangne nene “Pabukang” aro wenelamsululam. Allahri awe Eldamneringe nuri sa'oag pipsiogti, “Nanag sikne aro seneraglamnemundi, Nari awe tolamlulom,” seog. “Awe tolamlulom,” seog aghana sindi ambarelamsiong yubu eneri nimi wana wag nenelamsiangba, Allahri “Awe tolamlulom,” seogne sunsunum uro ulamang kom.
1TI 1:5 Nari “Undo ambatsiseng kom,” aro iriklamsinnena tam nene sembe. Nari yeng senelamnarina, “Nimi wanaag sembenga orog nimi wamikti, malia uan koma wana aingniro senelamikti, Yesusag sikne aro seneraglamukang. Undo unulamik tanena, Allah o'ona senelamikti, sin mamun o'ona seneldalamukang,” senelamnari, yepsinep kom yubu ambatsiropnang nene wenero iriklamsin.
1TI 1:6 “Nia undo-undo wali uro ulamlulom,” aro wenelamsin aghana, nimi etbareri nari wenehirop yubu ene wail ibarelamongdi, Allahap nimiap o'ona seneptangtopne lipsiong. Sin mamun uro yabinep komne sik komne agha lelamang.
1TI 1:7 Sin nimi taneko, “Musari yubu mome toro piropne sembe ambatsin nimi tahabe,” aro ambarelamsiang. Sindi yubu kiki telekto el uro ambatsiropnang wamloa saog aghana, yubu tam sirikagne ekondi, yubu kiki pamag agha lanalamangne babe lomag wamlange sinna ekon.
1TI 1:8 El uro wamapnena, Allahri samenag Musa ambarog yubu mome toro pibogne nenena wali. Wali aghana, ot nimiri Musari yubu sik uro saelbamnari, Musari mome toro pibog yubu enekoog ulamna tanena, sik uro wali sembanep.
1TI 1:9 Nen nhon el wamapnena, Musari iriktop yubu mome toro pibog yubu enena nimi wali uro urop nimi sembe mome toro pibog kom. Musari iriktop yubu mome toro pibog yubu enena irikna phirop nimi sembe, Allah wail ibatop nimi sembe, Allah omektop kom nimi sembe, malia urop nimi sembe, Allahri senenne sunsunum uro seneragtop kom nimi sembe, nimiri tam so'oagne sembe wanaag somoro agha urop nimi sembe Musari iriktop yubu mome toro pibog. Sin undo urop nimiri nimi olamsiangdi, sikini sikinin ohirop nimi sembe iriktop yubu mome toro pibog.
1TI 1:10 Kelabo nengabo toptan komag agha waleptangto malia urop nimi wamang. Ora nimiri malia uropnena, sin mamun salik-malik uro “Uahaneme” senenneag agha kabuniap-kabuniap, kelaboap-kelaboap babe elkel ela'ange neneptangka wamloa saog uro marop nimi wamang. Nimi sae kaupto kamna tatsin koma yo uro aruksirop nimi wamangdi, nimi sindi saeag wamang nimi pham to, kam to nenelamsiloa saog uro kamna kapto tolamangdi, ora nimiri saeag tarelamsiang. Orolena lerop nimi wamang. Ipsin koma orolena lero, “Eldi undo unuaoba, imno,” arop nimi wamang. Nimi maiknori Allah yubu sikne ambatsirop yubu sunsunum uro uan koma malia ulamang. Ni undop nimi abini sembe Allahri iriktop yubu ambarogne sunsunum uro Musari mome toro pibog.
1TI 1:11 Allah omeklamapne ponekori Eldamneri yubu sikne neneko nanag ambatneogti, “Yubu walinge Allah nubu sirikne ponekori Yesus tatsiogne sembe ambarelamsululam,” aro nari saeag pibog. Nari saeag pibog, ane sembe Allah yubu sikne sunsunum uro yubu walinge sik uro tipto ambarelamsin.
1TI 1:12 Yesus Kristus nu saelbamsilne ponekori na sembe “Nari arukna sol walinge,” sembamneori, sekitneo. Eldi “Nari awe webatnilul,” aro sekitneori, nari nong mikip nenelamneoba, Eldi awe nari tolamna. Eldi na sembe wali senelamneoa sembe Yesus nu saelbamsilne ponekoag “Naba nani,” aro kiplamna.
1TI 1:13 Samenag nari Yesus san tilipto “Elag seneragtop nimi seklebaik,” aro ulamsiri, olamsisi. Undo ulamsiri, olamsisi aghana samenag na anam Yesusag “Sikne” aro seneragamsi komdi, nari ulamsinge na babe ekonne agha ulamsi, ane sembe Allahri yareag sembaneog.
1TI 1:14 Ulamsi aghana nana nu Talulamsildi Salelamsilne ponekori nanag to'opto o'ona sembamneog. O'ona sembaneogti, yepneogpa, Yesusag “Sikne” aro seneraglamna. Elag “Sikne” aro seneraglamnaba, Yesus Kristus ponekori na o'ona senelamnelne agha nari babe nimi o'ona senelamsin.
1TI 1:15 Yubu kiki otsikne agha lag phoro lemnuan. Nimi nenneri babe malia urop aghana, nanagha yonge mali sirikne ulamsinge poneko na wamna. Malia sirikne ulamsi aghana, Yesus Kristus yaognena, “Nimi malia urop nimi sae kiliro taulbahinun,” aro yaog. Nari otsikne agha ambatsin ane sembe, sik uro to'opto seneraglapmundi, saelbamlulom.
1TI 1:16 Ora nimiri malia ulamang aghana nari agha mali sirikne maikno ulamsi. Na Paulusti malia ulamsinge sembe Yesus Kristus ponekori samenag seneraglamneogti, “Malia maikno sirikne ulamlange sembe el Paulusag tam pimnep aghana, elag yareag sembanun. Elag yareag sembaneri, wana paiamneba, yog nimiri ibaukang. Ibik nimiri na Yesusti wana paiamnange sembe el taikti, sindi malia ulamangne sembe babe na Yesusag mololamnukang. Na Yesusag mololamnikti, 'Samenag Paulusti malia ulamogne sembe wana paiplum saog uro, nari malia ulamnange babe wailag nembalulam,' aro mololamnukang,” sembaog. Undo seneraglamogti, Yesus ponekori nari malia ulamsinge sembe tam pimnep aghana, el nong ningkiag agha na malia uropne pone sembe wana paiamogti, o'ona sembaneog. Nanag uro yabiogne nene nimi niri ibikti, sindi babe Yesusag “Sikne” aro seneraglamik tanena, sik uro ya'ag kamag uro wamukang.
1TI 1:17 El ya'ag wamlange ponekori samenag wamek nimiap nu wamap nimiap wamukang nimiap salero paiamsil. Nu mog so'oag nimiri ililamap kom aghana, El nu sembe yubu sia leropne Nuni Allah ot nhonogne wamla. El aghabog papna koma omeklameberi, “Nuni,” aro kiplamukap. Sikne agha saekag lebap. Abenda.
1TI 1:18 Naba name Timotius! Allah yubu silimu tiptopnangdi samenag andi whingag amik anag uro yabinepne sembe ambatkeong yubu sunsunum uro “Ulamlulam,” aro awe nene an saeag palilamna. Anag uro yabinepne sembe samenag ambatkeong yubu enekori mikip nembangkeleba, ekon talulam kom. Yubu ambatkeong yubu eneko sunsunum uro, “Orolena yubu lerop nimi yubu kom taukang,” aro ambarelamsululam. Ambarelamsimenne, yin saleropnangdi sikinkabo pelepto aisanangap maldaropne wamloa saog uro wana nhonog uro sikne aghabog ambarelamsululam.
1TI 1:19 Ambarelamsimendi, Yesusag “Sikne” aro seneraglapmendi, andi wanaag “Sikne aghabog uanun” seneropne sunsunum uro ulamlulam. Samenag nimi etbare Yesusag seneraghong aghana sindam nimiri wanaag agha seneragtopneri wa'epto poa phio. Wa'epto poa phioba sindi, “Sik uro uropne walinge aghabog uahane” aro seneraglamong komdi, sindi wanaag agha Yesusag seneragnange teba'en nembaong.
1TI 1:20 Sindi Yesusag seneragna teba'en neneptarong nimi abenekona Aleksanderap Himeneusap. Sin phende abeneko sembe nari tam pelengero “El taukang,” aro phia sikini nubunge saeag pipsino. Phia sikini nubunge saeag pipsinongena, “Sindi Allah san tilibanep kom,” aro el taukang sembanori, phia saeag pipsino.
1TI 2:1 Anamag ambarelamsinne o'omnena ane: Allahag molon yubu mololapmundi, teko wamsilea sembe molbarelamsululom. Mololapmundi, nimi ni sembe babe Allahag molona molbarelamsimundi, Allahri tarelamsilne sembe, “Naba Nani, wali tarelamsilam” aro omeklamlulom.
1TI 2:2 Yubu sia lerop nangap nimi nubu nang a'un sale-sale piamsiang nangap sembe babe molona Allahag molbarelamsululom. Molbarelamsimunne, “Tam yogne-yogne orog wamleba, aingniro wana wali uro wameberi, Allahri seneragna sunsunum uro malia uan koma wamukap,” aro molbarelamsululom.
1TI 2:3 Undo ulapmunne agha Allah nu taulbahiropne poneko wana wali nenelamukap.
1TI 2:4 Eldi yeng seneropnena, “Nimi ni sikne Yesus sembe el taheng. El taikti, Yesusag 'Sikne' aro seneraglamik andarina, sindi malia ulamangne agha taulbahinun,” aro yeng senelamla.
1TI 2:5 Tam nene sembe sik yubu lemnuan. Allah nhonog wamlaba, nunap Allahap sembe anabiag talamlari, nu Allahap ma'abahinepne ot nhonog wamla. El nhonog wamlange poneko Allahri “Nimi so'oag nimi taulbahileri, saelbahilul,” aro poghogne Yesus Kristus wamla.
1TI 2:6 El neneko “Nimi so'oag nimiri mali-malia uropne sembe kom nembahane,” aro kamna toptaogti, Eldi nimi taluro wali nembahinep. Yesusti undo unuaogne nenena, Allahri “Wene Nari wana kembaukang” senen ko'oag agha Yesusti uaogpa, Allahri “Yesusti uropne pere agha nimi ni Nanag saombanep,” aro yeng sembaogne lag taog.
1TI 2:7 Undo unuaogne nene sembe Yesusti na pogneog. Poglamneogti, “Yahudi sisa kom nimiag yubu walinge Yesus sembe lag phoro sik uro ambarelamsileba, sik seneraglamukang,” aro Yesusti na pogneog. Nari lemnange nene orolenange agha lemna kom, otsikne agha lemna.
1TI 2:8 Nari yeng senelamnangena, nimi kabuni tala-tala wamang nimi sindi wanaag, “Allahri senenne sunsunum uro ulamukap,” aro sae towalengero Allahag omekto molona mololamukang. Nari yeng senelamnange, “Allahri senenne sunsunum uro ulamikti, omekto mololamik andarina, nimiap-nimiap waptangkamna koma, nimiap se'el neneptangkamna koma wamukang,” senelamna.
1TI 2:9 Kelabo sembe babe nari yeng senelamnangena ane: Allah omektop nimiri ulamukangne sunsunum uro sindi nongag enektangkamukang. Ora nimiri a'un anabiag kelabori nongag enektoamikne kembahiikti, “Ot sunsunum uro enektoamla,” senelamukang. A'un anabiag kelabo kembahiik nimiri, “Yesusag seneragto wana marop kelabo wamangdi, sunsunum uro enektoamang” senelamikti, kiplamsiikne sembe na yeng. Allah omektop kelabori sindi hongag leng-leng aroba emas kamna maikno toropne agha kauplamikti, ag babe kamna maiknoro torop ag agha enektangkamikpa, nimiri haing phende wilindi tiboghahiikne nene mali. Allah omektop kelabori sindi wali-walia towalengeptanep saogne uanepnena, sa'a-sa'a walia ulapmunba, nimiri kembahiikti, “Walia maikno ulamangdi, wali kelabo wamang,” sembaukang.
1TI 2:11 A'un Yesusag seneragtop nimiap winiltalapmundi, kelabori Allah yubu sembe nengabo ambarelamsiseng kom. Kelabo yubu koma wamikti, ka'eamikpa, kaubuniri yubu ambarelamsiikne kelabori wana mamleba, ka'elamik tanena, el talamukang. Allah yubu lero winirobag nengabori Allah yubu ambarelamsiikpa, kelabori “Poneri yubu lelamlange ka'emnun kom,” aro ulamikne nene sunsunum kom.
1TI 2:13 “Kelabori nengabo amoro ambarelamsiseng kom,” aro ambatsinne nenena tam nene sembe. Allahri nimi sunulamsiogti, Adam samenag sumbaogti, Hawa amik sumbaog.
1TI 2:14 Allahri nimi sumbahiogpa, Adam poneko phaeri yubu orolena yubu sik sembaog kom. Sik sembaog kom aghana, Hawa keleneko phaeri yubu orolena yubu sik sembaogti, Allah yubu lebogne irikna phibaog. Adam poneko babe irikna phibaog aghana, phaeri yubu orolena yubu sik sembaog koma phibaog. Ane sembe Allahri kelabo sembe tam pipsiogne sunsunum uro nengabo umag wamukang.
1TI 2:15 Kelabo sembe “Nengabo umag wamukang,” alamna aghana, kelabori me mangalamsiangneri kelabo sembe wali nenelamsil. Me mangalamsiikti, Yesusag sikne aro seneraglamikti, nimi o'ona senelamsiikti, Allahri senenne sunsunum uro ulamikti, wana mamleba wamik tanena kelabo wali wamukang.
1TI 3:1 Yubu kiki nene sikne andagha ambarelangken. Nimi etneri, “Yesusag seneragtop nimi pia uhirop nimi tanun,” senerop nimi enekori “Awe saelbahane,” aro seneragtopnena, awe toro welbana wali sirikne “Saelbahane,” senerop.
1TI 3:2 Ane sembe nimiri yubu sikne agha “Malia ulamla” aro elag tam pimnep tanena, Yesusag seneragtop nimi pia uhirop nimi wamnep kom. Yesusag seneragtop nimi piamsinep nimi eneko kelabo ot nhonog toamnep. Yesusag seneragtop nimi pia uhiropne tanep nimina, undop nimi agha tanep. Eldi wana mamleba, “Malia uanun” senelamlenge lirop Eldi wana hekto seneragha urop Nimi orangeri el sembe “Wali nimi” aro kiptop Eldi aeag nimi wa'al ananne sembe ina kuptop Eldi wali uro el nenero ambatsinep
1TI 3:3 Mag yongeri wana torop kom Nimiap kame tarop koma “Nimiap-nimiap aigniro wamukap,” senerop Nimiap waptangtop yubu agha leptangtop kom Kal ma'aldi wana torop kom Undop saog nimi wamle tanena, “Yesusag seneragtopne pia uahirop nimi taho,” sembanep.
1TI 3:4 Yesusag seneragtopne pia uhiropne tanep nimiri eldi kel, eldi mabo kelmabo wali uro o'oamsilul. Wali uro o'oamsileba, eldi mabo kelmabori sikini yubu ka'eamikti, sikini sembe “Nuniong,” senero sunsunum uro ulamukang. Nimi nhondi eldi kel, eldi mabo kelmabo wali uro o'obahinep kom agha elag “Yesusag seneragtopne pia ulamsululam,” aro eldi saeag piamna tanena, welaro Allah Elmabo o'obahinep? Ane sembe eldi kelabo meap wali uro o'oamsile kom tanena, Allah Elmabo pia uahiropne wamlul kom.
1TI 3:6 Allah Elmabo pia uhinne tanep nimina, weneog Yesusag “Sikne” aro alniro seneraglamna nimi agha pia uhirop nimi tanep kom. Weneog Yesusag seneraglamna nimi agha Allah Elmabo pia uhiropne tan pagha tanena, el nenekori, “Na Allah Elmabo pia uhinne wamna,” aro metmereng senep. Samenag babe phia sikini nubungeri “Na nubunge wamna,” aro metmereng seogpa, Allahri phia sikini nubunge nenekoag tam ikinne pibog. Allahri samenag phia sikini nubungeag tam ikinne pibog saog uro, Allah Elmabo pia uhirop nimiri “Nubunge wamna,” aro metmereng seleba, Allahri elag babe tam ikinne pimnep.
1TI 3:7 Allah Elmabo pia uhinne tanepnena, Yesusag seneragtop kom nimiri babe eldi ul palamlange sembe “Nimi walinge,” senelamik tanena, el wali Allah Elmabo pia uhinne wamnep. Aghana Yesusag seneragtop kom nimiri Allah Elmabo pia uhin nimi sembe san tilipnange na karong. Ane sembe Yesusag seneragtop kom nimiri eldi ulamlange sembe mali alamik tanena, nimi eneko Allah Elmabo pia uhinne wamnep kom. Nimi undo urop saog nimi eneko “Phia sikiniri selbel werobag wa'ileag,” aro Allah Elmabo pia uhinne wamlul kom.
1TI 3:8 Allah Elmabo pia uhiropne tanep nimi sembe ambatsindi, nen tipto ambarelamsinnena, Yesusag seneragtop nimi longoro winiroba anabiag agha “Teko ulamsileag,” aro yepto tongohiropne tanep nimi sembe ambatsinuan. A'un Allah Elmabo anabiag agha nimi yepto tongohiropne tanep nimina, undop nimi agha tanep. Sindi lero ul palamangne agha ora nimiri maipsinep Sindi sikne andagha lero urop nimi Mag yongeri wana tohirop kom nimi Kal ma'aldi babe haing suruhirop kom nimi Undop nimi wamseng tanena, a'undi sin sembe, “Yesusag seneragtop winirop nimiri sae tahengdi, yepto tongohirop nimi taheng,” sembanep.
1TI 3:9 Sin yepto tongohirop nimi tanep nimina, “Walinge agha ulamnari, uanun,” aro yubu sikne Yesus sembe seneraglamangdi, salelamang nimi agha wepsiro sekitsinep. Yubu sikne Yesus sembe samenag tognoro saog wamog aghana wene el tabu. El taburi, Allah Elmabo yepto tongohinep nimiri yubu sikne wali uro seneraglamikti, kas mi agha saelbamik pagha tanena, “Nuri sae tahengdi, yepto tongohiropne taheng,” aro seneragnep.
1TI 3:10 Sin Allah Elmabo yepsin nimi anam wepsin komag sin mipsinba, nimiri sin sembe se'el nembahinep kom tanena, sin hae Allah Elmabo yepto tongohirop nimi wamnep.
1TI 3:11 Kelabo sikindinge babe sindi wana mamleba, “Malia uaukap,” senelamikne libikti, ora nimi sembe san tilipto lemna koma ulamukang. Undo ulamikpa, ora nimiri ililamsiikti, yepto tongohirop nimi sikin kelabo aneko sembe “Sikneog lero urop kelabo wamang,” aro maiplamsukang.
1TI 3:12 Allah Elmabo yepto tongohiropne eldi kel ot nhonog toamnari, eldi kelap kelmabo meap wali uro o'obahinepne agha wamlul.
1TI 3:13 Nimi etneri Yesusag seneragtop nimi sol wali, wali uro yeplamsiikpa, ora nimiri sin wali uro yeptop nimi sembe “Nimi walinge, nani,” aro maiplamsukang. Nimi wali uro yeplamsiikti, sindam nimiri wanaag Yesusag seneragnange nen ma'aro maikno talamlul. Yesusag seneragnange maikno talamleri, wana nong ningkiri Yesusag “Allahri wepto poghogne Kristus sik uro wamla,” aro seneraglamukang.
1TI 3:14 Nari an kemelaghenunne nen olog tane wamneri, an kota Efesus wamlamag men yanun. “Men yanun,” sembamna aghana men yane kom tanena, “A'un ekon wamnep kom,” sembamnari mome ane “El talulom,” aro palilamna. A'un Allah Elmabo saog uropne wamlom, ane sembe Allahri Eldamneri mabo sembe, “'Undo-undo ua ulamukang,' senenne el wamlulom,” sembamnari, mome ane toro palilamna. Allah ya'ag kamag uropne ponekori “Eldi yubu sikne mikip uro saelbamlulom,” aro a'un Yesusag seneragtop nimi poloro winilamsilba, wamlom. “Eldi yubu sikne salelapmundi, ambarelamsimunba, ora nimiri Yesus sembe 'Allahri wepto poghogne sikne wamla,' sembaukang,” aro Allahri a'un poloro winilamsildi, sekelilamsil.
1TI 3:16 Sikne Yesus sembe samenag tognoro wamog aghana wene lag taogpa, nu Yesusag seneragtop nimi niri El sembe saekag lelamapne wali nubu sirik wamla. Nuri Yesus sembe sikne aro seneraglamapne undo. El neneko nimi saog uro lag taogpa, Allah Yame Walingeri “El sikne,” aro lag nenelamogpa, Allah arukna malaikatti babe ibek. Nimiri yubu El sembe ambarel phiekpa, nimi sisa Yahudi kom nimi babe ka'elamek. Nimi mog so'oag nimi tala-tala wamangne agha El neneko sembe “Sikne” aro seneraglamang. Samenag nimi saog uro mog so'oag wamog aghana, Allahri El neneko sembe “Nimiri omeklamukang” aro imag agha kiliro tobogpa, wamla.
1TI 4:1 Allah Yame Walingeri tibin uro yubu lelamlangena, Yesus samoro yanep sum peram wamebeag, nimi Yesusag “Sikne” aro seneragtop nimi agha Yesus yubu lilobukang. Yesus yubu lilobikti, phia yubu orolena yubu agha “sikne” aro ka'elamikti, ina ka'eseptanep ina nelebaukang.
1TI 4:2 Phia yubu aneko orolena lerop nimi pere agha ambarelamsiang. Orolena yubu ambatsirop nimina sindi wana seneragnaag sikne ka'eban koma phia yubu ambarelamsiang.
1TI 4:3 Orolena yubu ambatsiropnang tanekori “Nengabo kelabo topsin koma mo-mo wamlulom,” aro ambarelamsiang. Tenaba sembe babe “Salik-malik ten koma, kwaneng neneap, neneap tululom,” alamang. “Nengabo kelabo toptaheng kom. Kwaneng teheng kom,” alamang aghana Nuni Allahri nia mangkina sumbaogne wali sumbaog. Nengabo kelabo sumbahiogti, kwaneng babe sumbaog. Nia mangkina Allahri sumbongkia seneraghogti, “Wali-walia sumbandi, tarelamsinne ibikti, el taukang. El taikti, seneraglamneikti, 'Naniong, walia tarelamsilam,' aro tolamukang,” sembaogti, nia mangkina sumbaog. Allahri nia mangkina sumbaogti, nimi sumbahiogti, “Mog so'oag nimiag tarelamsin,” aro ambatsiog. Ane sembe, Allahri sik uro walia tarelamsilne sembe el uro wameberi, nu Yesusag seneragtop nimiri tolameberi, “Nuba, Naniong,” aro kiplamebe tanena Allahri wali sembalul.
1TI 4:6 Ni ambatkenne nini, nunkabo Yesusag seneragtop nimiag ambarelamsimen tanena, anna Yesus Kristus ponekori awe wali uro toro ulpiro yeptopne wamlulam. Yesusap Allahap sembe yubu sikne samenag ambatkebonge sunsunum uro wene ulpalamlamdi, nen tipto yubu sikne wali uro toro ambarelamsululam. Yubu sikne ambatkebonge sunsunum uro ambarelamsimen tanena, yubu eneko andamne wanaag meptaleri, mikip nenelangkelul.
1TI 4:7 Yubu sik komne nuri seneragna inibin nembahinep yubu sembe babe, sabal kelabo nenek salehirop kelabori neplamloa saog yubu kamolange sembe babe ka'eamlulam kom. Yubu sik komne ka'ebahin koma koloptangkapmendi, “Andi wana seneragna Allahri seneragna sunsunum uro talul,” aro eltangkapmendi, seneraglapmendi, ulamlulam.
1TI 4:8 Nimiri seneraglamangne, “'Mikip nembamsilul,' aro topseng kom, teheng kom,” alamanga sunsunum uro ulamangneri nimi nong olog yepsinep. Nimi nong olog yepsinep aghana, Allahri senenne sunsunum uro ulpiropnena, wene ko'oag wamapne sembe babe, amik ko'oag sembe babe, nia mangkina ulpalamapne sembe babe, Allahri senenne sunsunum uro ulpalamebe tanena, wali wamukap. Allahri nunag salag lero ambatsiogti, “Nari seneragna sunsunum uro seneragto ulapmun tanena wali wamlulom,” aro salag lero pipsiog. Ane sembe amik Elap nhon ya'ag kamag uro wamebeag, nuri Eldi salag lero pibogne salero sunsunum uro ulamapne sembe teba'en sembaukap kom.
1TI 4:9 Yubu kiki otsikne agha lag phoro lemnuan, ane sembe wali uro ka'eapmundi, mikip uro saelbamlulom.
1TI 4:10 Nuri Allah ya'ag kamag uropne ponekoag seneraglamapnena, “Nimi ni mog so'oag nimiri malia ulamapne sembe Allahri opsinep. Allahri nu opsinep aghana Yesusag seneragto Elag wana saingnia piamebengeag agha Allahri nu taulbahilul,” aro nang-nangaro seneraglamap. Nimi etneri Allahri wepto poghogne ponekoag “Sikne” aro seneraglamleba, Allahri nimi eneko taulbalul. Ane sembe, nuri mikip uro whin seklero awe tolamap.
1TI 4:11 Nia ane ambarelamsimenne nene, “Ni Paulusti ambatsiropne saelbapmundi, sunsunum uro ulamlulom,” aro ambarelamsululam.
1TI 4:12 Ambarelamsimenba, nimi nhondi babe an sembe, “Me ane kabuni weneog me, el ekon bog lelamla,” aro an sembe teba'en sembaheng kom. Anna, “Sindi nari lelamnange sembe teba'en sapsabi na kembaneikag,” aro anna agha, “Sindi kembaniikti, sindi babe na ulamnange nelepto ulamukang,” senelapmendi, Yesusag seneragtop nimi whingag andi ulpalamlulam. Andi ulamlulamnena, yubu hekto lelapmendi, andi wanaag seneragto ulpalamlulam. Andi nimi ni sembe o'ona senelamsimendi, Yesusag “Nu Saelbamsilne sikne,” aro seneraglamlulam. Nia mangkina undo andi wanaag seneragtopne lag phoro ulpalapmendi, “Imnikti, nari ulamnange sindi babe nelepto ulpalamukang,” aro ulpalamlulam.
1TI 4:13 Undo ulpalapmendi, andi sol wali uro Allah yubu mome toro pairopneag agha kemero nimi whingag ambarelamsululam. Lero ambarelamsimendi, “Sindi babe saelbahengdi uaheng,” aro nimi elnenero wenelamsilulam. Undo Allah yubu ambarelamsimen paghabog na amik anag yanun.
1TI 4:14 “El nenehinne ambatto wenelamsululam,” aro ambatkennena, samenag Yesusag seneragtop nimi wenehinnangdi andi usoghag sae pipkeongdi, Allah yubu silimu tiptop yubu ambatkeong. Sindi Allah yubu silimu tipto ambatkeong pere agha Allah Yame Walingeri mikipne an nongag pipkeo. Mikipne an nongag pipkeonge salik-malik uro pipkeo kom ane sembe, anag tatkeonge sembe teba'en sembaheng kom.
1TI 4:15 Nia ane wana nhonog uro saelbapmendi, solwali wali uro sik uro tolapmenba, nimiri kembaghiikti, an sembe “Wana hekto el talamlari, wali uro ambarelamsil,” sembaukang.
1TI 4:16 Andamneri ulpalamlamne babe yae weptangkapmendi, andi pamag agha amolamsilamne nene babe “Sengkwanektop yubu ambatsineag” aro yae weapmendi amolamsilulam. Papna koma sik uro ulpalapmendi, solwali wali uro yubu sikne ambarelamsululam. Undo ambarelamsimen tanena andi yubu ka'erop nimi wali nenelamsimendi, andamneri wali neneptangkamlulam.
1TI 5:1 Andi nimi sabal saog nimi yubu mikip uro wembahin koma, yubu yangaro “Nani yabo,” aro wenehirop yubu lelamlulam. Kabuni maboag babe “Nangkabo” sembapmendi wembamsululam.
1TI 5:2 Kelabo sabal kelaboag “Nanin yabo,” sembapmendi, wembamsululam. Kelmaboap saren kelaboap “Naipsa'el yabo,” sembapmendi, “Saelbahane,” semban koma walinge aghabog ulamsimendi, wembamsululam.
1TI 5:3 Kelabo kaldam kelabo sin mo urop kelabo “Nanin yabo,” aro paliag nembamsilulam.
1TI 5:4 Aghana kaldam kelabo sikin maboro, sikinau yaboro wamik tanena sikin maboag samenag wembamsululam. Sikinin kaldam kel taonge sembe wenelamsimendi, “A'undi ae lomag nimi 'Teko wamikag,' aro o'ona senero kembamsimunne agha Allah wana yeng nembamlulom. A'uni a'unindi samenag sindi wana wali uro mo'olamsiong ane sembe, a'uni a'uninap tangoro walia ulamsimundi, yeplamsululom” aro wenelamsululam. Undo unulamikne nene agha Allah yeng sirik neneropne wamla.
1TI 5:5 Kelabo kaldam kelabo otsik uro kaldam kel elmo urop kelenekori, eldi seneragna wana Allahag paia uropti, teko elag ualne sembe sinag kweleknag “Allah yepnelul,” aro molona moloro ua urop.
1TI 5:6 Aghana kelabo kaldam kelabo agha wana sesog uro seneragto nia mangkina sembe “Naringe wamsori, yeng nembaneho,” senerop kelabo babe wamang. Kelabo undop saog kelabo hain epto kon kamag ua urop aghana, wana seneragna loba uro seneragtop.
1TI 5:7 Kaldam kelabo sembe “Undo-undo ualulom,” aro yubu tam ambarelangkennena, “Ora nimiri Allah Elmaboag tam paipsiikag,” aro ambatkinuanne nene, nen tipto Yesusag seneragtop nimi ambarelamsululam.
1TI 5:8 Yesusag seneragtop nimiri sindi ae lom nimi yepsin kom tanena, mali sirik urop nimi sembanep. Sunumna nhon ambatkenuan. Nu Yesusag seneragtop nimiri senelamapne, sin Yesusag seneragtop kom nimi sembe “Sindi malia ulamsiang,” senelamap. Aghana, sindi kelabo kelme mabo taptopneap, sikini sikinin yaboap yae paiamsiangdi, o'ona seneltalamangne walinge ulamang. Wali uro paia ulamangne nene Yesusag seneragtop nimiri unuaheng, aghana Yesusag seneragtop nimi nhondi ili ilinap, eldi kel kelmabo maboap wali uro yae piamsile kom tanena, nimi eneko agha sik mali sirik nimi sembanep. Undop saog nimiri pamag agha “Yesusag seneraglamna” lerop aghana, sindi ul piropne neneag agha Yesus wa'eploa saog urop.
1TI 5:9 “Kaldam kelabo yepsukap,” aro mome si tolapsimun tanena salik-malik uro si topsiseng kom. Kaldam kelabo agha mome siag tobongkipsinep kelabona, ela'ange ot nhonog torop kelabo agha, heng kun-kunne teng phende eptopneap saog (60) phiro wamik kelabo agha mome siag tobongolamsululom.
1TI 5:10 “Yepsukap,” aro mome siag tobongkiamsimunne, kaldam kelabori walinge maikno ulamikpa, nimiri iamsikti, “Walia ulamla,” aro ambatkiik tanena kaldam kel eneko mome siag tobongolamsululom. Kaldam kelabo agha mome siag tobongkipsinep kelabori wali-walia ulamangnena: elmabo wali uro mo'oamsil kel nimi yalamangne yeplamsildi, “Ae lomag aingniro wamlulom,” aro toro palilamsil kel Yesusag seneragtop nimi sembe wana mamleba yeplamsil kel nimi kwema wamsilne yeplamsil kel sol wali, wali uro nia mangkina walia ulamla kel Undo urop kaldam kelabo agha mome siag tobongkipsimundi, yepsululom.
1TI 5:11 Kaldam kelabo saren saog wamik kelabo sindi si momeag tobongkipsiseng kom. Saren saog wamik kelabo agha tobongkipsimun tanena, sindi “Nengabo nen nhon tomna koma, Yesustinge wamnun,” seheng. “Nengabo nen nhon toamna koma Yesustinge wamun,” seheng aghana amik sindi kon kemeptaikpa, sin kon eren wamsileri, ulogsilenge sembe “Nu nengabo toro aukap,” sukang. “Nengabo nhon tomnun kom,” selenge phibaleri, Yesus Kristus poneko laplobi agha nengabo tomnep. Salag leropne phibaleri, nengabo topleba, “Allahri elag tam ikinne pipleag,” aro, anamag sin kon eren wamsile kelabori si momeag topsiseng kom.
1TI 5:13 Apna saren saog wamik kelabo agha tobongkipsimundi, yepsimun tanena sindi saeri sa'a-sa'a uan koma, nimi yepsinep kom yubu agha tipto ambatto tongolamikti, sunsunum urop kom yubu agha lero ae nhonag wa'ang nhonag wa'ang ulamukang. Sindi ae eneag wa'ang, ae eneag wa'ang ulamikpa, ora nimiri tam ua ulamle tanena urukag wa'ina salel wa'alamukang.
1TI 5:14 Ane sembe nari sembamnangena, “Kaldam kelabo saren saog wamik kelabo agha 'Yepsukap,' aro mome siag tobongkipsiseng kom,” sembamna. Kaldam kelabo sin saren saog wamik kelabo wenelamsimenne, nengabo toro aikti, me mangaro sindi aeag wamikne “O'olamsululom,” aro wembamsilulam. Undo ambareamsimenba wamikti, walinge ulamik andarina nunag aisa nenelamsiang nimiri nu san tilibahinep kom.
1TI 5:15 Kaldam kelabo etpare phia sikini nubunge yubuag nelebaong ane sembe, kaldam kelaboag, “Undo-undo ulamlulom,” aro ambatsilulamne ambatken. Yesusag seneragtop nimiri ae lom nimi agha kaldam kelabo taik tanena, ae lom eneko wamik nimiri kaldam kel eneko yeplamukang. Yesusag seneragtop nimi poloro winiptangtop nimiri awe yogne uanepne wamla ane sembe, kaldam tale kel eneko ae lom eneko Yesusag seneragtop nimi wamik tanena sindi keleneko yeplamukang. Sindi el undo yeplamik tanena Yesusag seneragtop nimi poloro winiptangtop nangna sae laia agha kaldam kelabo sik uro mo urop kelabo yelamsukang.
1TI 5:17 Allah Elmabo wenehiropnangdi wali uro saelbamsindi, wali uro o'olamna tanena, “Nu wali uro saelbamsildi wali o'olamsil,” aro kamna kipto tatsimunne nene sunsunum wamla. A'un Allah yubu ambatto wenehiropnangdi a'un wenelamsiangdi, amolamsiang ane sembe, a'undi sin wenehiropnang sembe amik nembahin koma sin nimi whingagne nembamsimundi, tatsululom. Undopne agha sunsunum.
1TI 5:18 Kamna tatsiikne neneko sembe Allahri Yubu Momeag Musari sae pere agha mome toro pairopne wamla. Mome toro paibognena, “Nimiri awe torop nimiri pham sapi kerekamnari, 'Kwaneng roti sununa gandum wana kolopto yingkileba, poloro anun,' aro pham sapi yagto pabalamna. Pham sapi yagto pabalamnange abeneko pere, 'Yo'oag ingirop pham sapiri roti wana teleag,' aro pham ua'al aroro kauptop saog uro kaupseng kom,” aro mome tobog. Pham sapi sembe mome tobog aghana, “Nimi awe torop nimi el awe tomnange sembe kamna tatsiikne abenekoog sunsunum,” aro mome toro paibog.
1TI 5:19 Allah yubu amoro wenehirop nang kiplamsimunba, nimi nhondi a'un wenehiropnangag tam palilamsiikti, “Eldi malia undo unual,” aro ot nimi nhondi leplenge sembe sik sembaheng kom. Nimi phende wilindiri, “Eldi malia undo unuaoba, ibobo,” aro lebik taneogna “Sik to, kom to,” aro tam lelekto kembamlulom.
1TI 5:20 Nimi malia uropne sembe Allah yubu ka'erop nimi ni whingag agha wembahimenba, nimi orange babe “Malia ulamebeag,” aro log senelamikti, walinge aghabog ulamukang.
1TI 5:21 Ni tam lepnange sembe ambarelangkenne sunsunum uro sik uro ulpalamlulam. “Na nimi nhonag sip tanun,” semban koma anna agha nimi anabiag sikne agha ulamlulam. Nia “Undo-undo ulamlulam,” aro ambatkenne Allahap Kristus Yesusap Allah arukna malaikat walinge wepsiropneap whingag agha andi sa'oag palilamnaba, nimiag ulpalapmenne kemelangkukang.
1TI 5:22 “Allah Elmabo saelba uahiropne wamlul,” aro elemag abeneko nimi usoghag sae pipsiseng kom. Ekonne agha elemag nimi usoghag sae pipmendi, sekitmen tanena, nimi enekori malia ulamleba, anap elap sae tiptangto wamtumunne sembe andi babe malia ulamlam. Ane sembe “Eldi malinge ulamlenge na sa'oag taleag,” aro andi, “Allah Elmabo saelba uahiropne talul,” aro nimi elemag sekitsilulam kom.
1TI 5:23 An sop-sop mon og aghabog telangkelba, niklamlamdi pesa ulangkel ane sembe, mag salingeog tero wamseng kom. Anggur mag olog maghag ikto pelengkia telapmenba, an mon telangkelne nene yepkelul.
1TI 5:24 Nimi etbareri malinge uroba sembenga saogne paliropne anam tam lelekto kareptobag agha kemban kombog lag wamla. Aghana nimi etbareri malia uropne anam tognorop saog wamlaba, amik lag talul.
1TI 5:25 Undo saog uro babe nimiri walinge ulpiropne lag wamla. Nimiri walinge tognoro ulpiropne wene wamlaba, iamap kom aghana, walinge ulpiropne neneko tognorobag wamnep komdi, lag ua ulamlul.
1TI 6:1 Yesusag seneragtop nimi, nimi arukna sae kauploa saog uro awe ikinne torop nimi wamik tanena, sikini sikinin yabori aruktop yubu ka'elamsiikti, “Kipsunun,” aro sunsunum uro tolamukang. Tolamik abeneko pere sindi seneraglamikne, “Nimiri na kembaneikti, Yesus sembe ambarelamsiap yubu mali sembaikagti, Allah omeklamap poneko san tiliplamikag,” aro sol wali uro awe tolamukang.
1TI 6:2 Yesusag seneragtop nimi agha nimiringe awe toropne arukna wamleba, ili poneko babe Yesusag seneragtopne wamle tanena, arukna wamlenge ponekori, “Nu Yesusag seneragtop nimi wamnam,” aro ili poneko luknunne ualul kom. Undo luknuro ualul kombog arukna wamlenge ponekori ili poneko sembe “Naba nani Yesusag seneraglamlaba, Yesusti o'ona seneropne wamlaba, nari babe o'ona senero yepnun,” senelamlul. Undo senelamleri, “Wali uro yepnun,” aro ili poneko sembe awe tolamlul. Ni ambatkenne abene ambareamsimendi wembamsululam.
1TI 6:3 Nuri ambarelamsiap yubu neneko Allah wana wali neneropne sunsunum urop yubu ambarelamsiap. Nuri ambarelamsiap yubu nenekona, Allahri “Taulbahimendi, saelbamsululam,” aro weptopne Yesus Kristus ponekori yubu sikne sunsunum urop yubu ambarelamsiap. Nuri ambarelamsiapne sunsunum urop kom yubu agha nimi nhondi ambarelamsile tanena, nimi eneko metmereng arop nimi sa'a-sa'a ekon nimi wamla. Nimi undop nimi enena, naikna salehirop nimi saog wamlari, nimiap-nimiap loba neneptaheng arop yubu kikiag agha leleng-lelenga lelamla. Leleng-lelenga pan khelamsilba, nimiri ka'elbina sin yubu neneptangka sin waptangto leldalamnari, “Nu luknubahaikag,” aro waptangto loba neneptanep. Sindi yubu pan khero suknulamang yubu sembe waptangto leldalamangdi, “Nu luknubahaikag,” aro wana mali seneldalamang. Sinag yubu pan khelamsiangne yubu suknulamangne sindi ka'ebiagha “A'undi undo-undop,” aro waldalamangdi, wana mali neneldalamang.
1TI 6:5 Undo unuropne agha nimiri seneragna loba neneldalamangdi, Allah yubu sikne Yesus sembe seneragna koma yubu sik komne sembe nimiap-nimiap sop-sop waptangto yubu leldalamang. Undo unurop nimiri Allah yubu paliag nenero ambarelamsiseng aghana, Allah yubu sikne seneragtopne sinag ekon wamla. Sin elwamsilnena, “Allah yubu ambarelamsineba, ka'erop nimiri kal ma'al maikno tarelamnukang,” aro seneragtopne agha sinag wamla.
1TI 6:6 “Nimiri tarelamnukang,” senelamang aghana, nu mog so'o eneag mangaro yangkabu sum eneko nia mangkina saelba yingkibu kom. Amik mog so'o eneag agha lamba palamebe sumeneko babe sa'a-sa'a salero agha lambaukap kom. Ane sembe nuri saeag wamlange sembe, “Allahri sunuropne tarelamsil,” senelameberi, Allahri senenne sunsunum uro ul palamebe tanena, seneragto ul piropne nenena nu sembe tup tananne nubunge wamla.
1TI 6:8 Tenaba wamle tanena wamlenge agha telamukap. Ag konag lilinne wamle tanena wamlenge agha wangaroamukap.
1TI 6:9 Aghana sin “Tup tahabe,” senerop nimiri sin dam nimi loba neneptanep. Nimiri wanaag, “Nanag kal ma'al to'opto wamsoba, na tup tahane,” aro seneragtopne nenekori eldamne selbel weptangtopne wamla. Nimiri “Tup tahane,” aro wanaag seneraglamnange nenekori nimi eneko poa kwerenag eba timbanep. “Tup tahane” senenne nenekori nimi aneko eldamne wana telamlari, wana sao kauplamlaba, nimi aneko eldamne loba neneptanep.
1TI 6:10 Tam nimiri kal ma'alag wana somoropneri nimi wana tolamsilneag agha nimiri yoaba maikno malia ulamang. Nimi etbare babe sindi samenag Yesusag seneraglamong aghana, kal ma'aldi sin wana tolamsioba, Yesusag seneragtopne ulamongne liloa kal ma'al sembe sarekereplamangdi, wene sin “Yaghe,” senelamangdi, seklero wamang.
1TI 6:11 Aghana anna Allahringe wamlam, ane sembe ni malia uropneag agha an togtangkamlulam. An Allah whingag sikne aghabog ulapmendi, Allahri wana wali neneropne sunsunum uro ul palamlulam. Yesus ponekoag seneraglapmendi, Allahap nimiap o'ona sembamsululam. Nia undo papna koma ul palapmendi, seklelapmenag wana paiapmendi, “Nimi whingag arikal uro yubu lemneag,” senero wamlulam.
1TI 6:12 Andi ulapmenne sik uro Yesusag seneragto ulapmenba, Allahri saeag agha kamna tatkeleba, ya'ag kamag uro wamlulam. Allahap ya'ag kamag uro wamnepne nene sembe an Allahri an yopkeoba, andi nimi maikno whingag agha, “Na Yesus Kristus ponekoag 'Sikne' aro seneraglamnun,” seomba, ipkeong. Ane sembe sik uro Yesusag seneraglapmendi, yin saleropnangdi sikinkabo pelepto aisanangap maldaropne wamloa saog uro wana nhonog uro Allahri awe tolamlulam.
1TI 6:13 “Yesusag 'Sikne' aro seneraglamnun,” seomba, Yesus Kristus eldamneri samenag nimi nubunge Pontius Pilatus whingag wamogti, yubu sikne agha sik uro, “Na Allahri 'Saelbamsululam,' aro wepto pogneogne wamna,” seog. Wene ane Yesus Kristus poneko whingag agha, Allahri nia nimi hain tarelamsilne poneko whingag agha babe, nari anag “Ulamlulam,” alamnange ane:
1TI 6:14 “Nimiri an sembe tam pipkikag,” aro nari lemnange ni ane saelbapmendi, Yesus anam samoro yingkilamna komag agha malinge saelban koma ulamlulam. Nari lemnange papna koma sunsunum uro ulapmen paghabog Yesus Kristus nu Talulamsildi Saelbamsilne poneko amik yalul.
1TI 6:15 Yesus El nen amik yalulne neneko elba, Nia Mangkina Saelbamsilne Walinge poneko El mori “Sumene sum yalul,” seleri, karebale sum eneko yalul. El neneko nia mangkina saelbamlange El ot nhonog wamlaba, El aghabog omeklamap. El nimi nubunge, yubu sia lerop nang mog so'oag tane wamang aghana El ya'ag paliagne yubu sia leropne wamla. Nimi saelba ulamsiang nimi ubu piamang aghana El agha nimi nubunge nimi ni Saelbamsilne wamla.
1TI 6:16 El agha tepnari babe kaolbanep komne. El ua urobag libango aropne haing omomne warerobag neneko nimi nhondi babe sekel pinep kom. Mog so'oag nimiri haingag agha imnep komdi, nimi nhondi babe El wamlange ilirop kom. “El agha mikipne nia mangkina saelbamlange,” aro El aghabog omekanepne wamla pahabog wamlul! Sikne agha saekag lebap.
1TI 6:17 Nimi mog so'o eneag wamangdi, tup uro wamang nimiag el nenelamsilulamnena, sin metmereng aro sindi tuba ya'ag wamnep koma sembe metmereng aro wamukang kom. Sindi wana kal ma'alag wana tagto pimna koma, nia mangkina nu maiknoro tarelamsilne poneko Allahag agha wana paiamukang. Allahri nu sembe senelamsildi, “Nari tarelamsinne salelamikti, telamikti, wana awi uro wamukang,” aro nunag maiknoro tarelamsil. Ane sembe tarelamsilne poneko sembe ekon tan koma Elag aghabog saingniamukap.
1TI 6:18 Sin wene kal ma'al maikno salelamang nimiag “Walia ulamlulom,” aro ambarelamsimenba, sunsunum uro ulamik tanena, sindi nimiag walinge ulbana maikno pairo ulamikneag agha tupne tapto wamukang. Sindi wanaag agha sindi saeag agha “Yepsukap,” aro awi uro pogto tarelamsukang.
1TI 6:19 Yesusag “Sikne” aro seneragtop nimiri undo unuamikneri sin amik wali uro unne sembe tup tananne yan ana yagto Allah whingag pairo pololamikti, amik ya'ag kamag wamukang. Allah whingag pololamikne neneko wamleba, amik li ko'oag sin tup nimi taptopne wamikti, wana awi uro tapto ya'ag kamag uro wamukang.
1TI 6:20 Timotius mele, anag “Wali uro saelbamlulam,” aro anag ambarelangkebunge nene wali uro yae wapmendi saelbamlulam. Yubu kamolange Allah yubu sunsunum urop kom yubu sembe nimiap yubu lenag babe, yubu “Eltahabe” aro yubu kiliro-kiliro sik komne sembe yubu lenag babe togtangto wamlulam. Nimi etbareri samenag Yesusag “Sikne” aro seneraglamong aghana, yubu sik komne neneko ka'ebaongdi, sik senelamongdi, sindi babe nimi tipto ambatsiong. Undo unulamangneag agha Yesusag samenag seneraghong nimi abeneko nen sap amik ina wag lerekaong. Ane sembe anna, yae togtangkapmendi yubu ambatkebunge saelbamlulam. A'un sembe molbarelamsinne, “Allahri a'unag walia ulamsileri a'un yepto paiamsilul,” aro molbarelamsin. Abenda.
2TI 1:1 Timotius, naba name o'ona sembangkenne! Na Paulusti mome ane an sembe palilamna. Nari sembamnange Nuni Allahap, Allahri Yesus wepto “Nimi so'oag nimi taulbahaileri saelhailul,” aro poghogne nenekoapti, “Anag o'ona senero yeplangkirikti, walia ulangkirikti, aingniangkurukang,” aro molona mololamna. Allahri seneropne agha, Yesus nu talulamsildi, saelbamsilne nenekori na sekitneori wepto pogneoba, Yesus yubu walinge ambarelamsinne wamna. Yubu walinge ambarelamsinne, Allahri yubu salag lebogne neneko sunsunum uro Eldi wepto poghogne Yesusti nimi kamag nenehiropne poneko sembe ambarelamsindi, mome ane an sembe palilamna. Nu kamag uro wamapnena, Yesus “Nimi mog so'oag nimi taulbahaileri saelbahailul,” aro Allahri wepto poghogne neneko sembe “Kristus” alamap. Yesus Kristusap ma'altalamapne nenekori nu kamag nembamsilba, kamag wamap sembamnari, mome ane an sembe palilamna.
2TI 1:3 Samen nunisa yabo Yahudi nimiri Nuni Allah yepto tolamekti omeklamek saog uro, naba na wanaag “Allahri senenne sunsunum uro ulamna,” aro seneraglamnari, nari babe Allah yepto tolamnari omeklamna. Nuni Allahag molona mololamnari, sinag kweleknag an sembe seneraglangkendi, Allahag “Naniong, Andi naba name yeplulam,” aro Allahag moloro omeklamna.
2TI 1:4 Nu koloptanumu sumeneko an engkalumba, hail mag timbaghaeogne seneraglamnange nene sembe “Anap haiptahanemeba, na wana awi sirik uanoho,” senelamna.
2TI 1:5 An sembe ekon tan koma seneragamnangena, andi anau Loisap, anin Eunikeapti sam Yesusag “Sikne” aro seneraglamdek saog uro, andi babe Yesusag “Sikne” aro sik tapto seneraglamlam.
2TI 1:6 Ane sembe nari anag yubu ambarelangkenne ulamlulam. Samen Allahri an Timotius sembe, “Sae yan taleri Nari awe tolamlul,” sembaogpa, nari sae andi usoghag sae pipkeno pere agha Allahri anag mikipne pipkeo. Allahri nunag mikipne palilamsilne, Eldi “Log sembaukang” aro palilamsil kom. Eldi nunag palilamsilnena, “Mikip wamikti, o'ona seneldalamikti, wana hekto wamukang,” aro nunag palilamsil. Allahri mikipne auk pog saog uropne anag pipkeo ane sembe, nimiri “Auk pog nubu talul,” aro yae piro ulamang saog uro, andi babe “Allahri mikipne auk pog saog uropne nanag pipneonge oro niknibaneagti, nubu nembanun,” aro yae piro up tangkamlulam.
2TI 1:8 Mikipne pipkeo ane sembe, Yesus nu Saelba uahiropne poneko sembe ali semban koma lag phoro ambarelamsululam. Na babe yubu walinge Yesus sembe ambarelamsinoba, nimiri na sae kaupto kop aeag tobongkimneong aghana, wamnange sembe babe ali sembaheng kom. Nari yubu walinge Yesus sembe yubu ambarelamsinne sembe seklelamna aghana, Allahri an seklelapmenag mikip nenelangkeleba, andi babe Yesus yubu walinge ambarelamsululam.
2TI 1:9 Nuni Allah ponekori nuri mali-malia ulamubunge sembe ya'ag opsinep aghana, nu mog so'oag nimi sembe “Walia uahinun,” senelamsildi, “Nari mabo taikti, Nari senenne sunsunum uro ulamukang,” aro yoplamsil. Yoplamsilne agha nu Yesusag “Sikne” aro seneragtop nimi talulamsil. Nu yoplamsildi, talulamsilnena, nuri walia ulamapne agha yoplamsil kom aghana, Elba Eldi wana walingeag agha, “Undo uanun,” sembaogti, yoplamsil. Eldi anam imap so'oap sumban komag agha El el uro wamogti, wana waliri, “Nari wepto pognenge Yesus Kristus pere agha Nari mabo nembahinun,” aro karepto pibog.
2TI 1:10 Yum-yum samenag karepto pibog aghana, wenena Allahri Yesus Kristus wepto “Mog so'oag nimi taulbahilulam,” aro poghogpa, yaog andarina Allahri wana walingeag agha “Walia uahinun” senelamsilne lag taog. Yesus Kristus “Mog so'oag nimi taulbahinun,” aro yaogne pere agha nimi tepna mikipne neneko kom nembaog. Nimi tepna mikipne kom nembaogpa, nimi etneri yubu walinge Yesus sembe sik seneraglamleri, Yesusag wana piamle tanena ya'ag kamag wamleri, tebalul kom.
2TI 1:11 Yesus yubu walinge ambatsinne sembe, Allahri na toro sekitneoba Yesusti na wepto pogneoba, na nimi amohinne tanori, lag phoro ambarelamsin.
2TI 1:12 Yesus sembe yubu ambarelamsinba, nimiri “Karong,” aro malia ulamneangba, seklelamna. Seklelamna aghana, na sik uro naringe wana Yesusag paiamnari seneraglamna. Na el wamnangena, “Nari wana Yesusag paiamnaba, Eldi na yae wamnele paghabog nen phendep sum 'Tam karebanun,' aro yalul,” senelamnari seneraglamna. Ane sembe wene seklero wamnange sembe ali seneldalamna kom.
2TI 1:13 Nari sik uro an yubu walinge ambatkehinge sunsunum uro sik wali uro seneragto saelbapmendi, tipto ambarelamsululam. Ambarelamsimendi, Yesusag “Sikne” aro seneraglapmenba, Yesus Kristus nenekori nimi o'ona senelamsilne agha o'ona senero ambarelamsululam.
2TI 1:14 Nari yubu walinge Yesus sembe sik uro ambarelangkenori, andi saeag nembaghenoba, nu Yesusag seneragtop nimi sembe Allah Eldamne Yame Walinge nu nongag ua ulamla. Allah Yame Walinge nenekori yeplangkeleba, sik yubu anag ambatkeno yubu eneko yae paiapmendi,sik uro tipto ambarelamsululam.
2TI 1:15 An elwamlamne Asia so'oag wamang nimiri na laplopneong. Figelusap Hermogenesapti babe laplopnerong.
2TI 1:16 Laplopnerong aghana Onesiforusti ik etbare na wana awi sirik nenelamneo. Ora nimiri na sae kaupto kop aeag pimneongbog, wamnoag na sae kaupto wamnonge sembe ali sembao komdi, na wana awi nenelamneo. Unu aneoba nari sembamnange, nu Taluro Salelamsilne ponekori Onesiforus ponekoap el ae lomag nimiap o'ona senero yeplamsilul.
2TI 1:17 Roma wamnoag babe Onesiforus poneko piori, na elamneori, na wamnoag imneoba haiptanomo.
2TI 1:18 An babe elwamlam, eldi na Efesus wamnoag maikno yeplamneo. Maikno yeplamneoba, nu Taluro Salelamsilne ponekoag molbarelamnange, nia mangkina Saelba Uahiropne ponekori nimi ni sembe tam karebale sumeneko, “Onesiforus sembe yareag sembalulam,” aro molbarelamna.
2TI 2:1 Timotius, naba name! Nari yubu samenag sik uro amoro ambatkihiba, Yesus Kristus ponekori anag wana wali senelangkeldi, mikip nembaghelul. Ane sembe, ali semban koma log sembaheng kom. Yesusag seneragto winirop nimi anabiag agha sin kembahimenba, wana hekamikti, sol wali, wali uro nimi ambahinep nimi wamikpa, ipsimen tanena sin anabiag agha kabuni etbare wepsululam. Wepsimendi, amohiro ambatsululamnena, nari samenag nimi maikno whingag agha nari Allah yubu amohirop yubu ambatkihiba, ka'ebalum yubu eneko, nen andi tipto wepsimen nang enekoag amohiro ambatsululam. Ambatto sindi sa'oag paiapmendi leplulamnena, “Nari sik uro sol wali uro a'un ambarelamsinne sunsunum uro nen tipto sik uro nimi ambarelamsululom,” aro sindi saeag nembalulam.
2TI 2:3 Nu wene seklelamap saog uro andi babe “Yesus sembe nelepto seklebanun,” sembamendi, kahepto wamlulam. Likiptop yubu agha yin saleropnang sembe sunumna nhon sumbanun. Yin saleropnang “Mal tabaukang” aro pogna pogsiropba, sa'a nia mangkina eldamneringe sembe seneragna koma “Na saelbamnelne poneko wana awi nembanun,” senelamla. Andi babe yin saleropnangdi seneragtopne saog uro sunsunum uro, “Na saelbamnelne Yesus poneko wana awi nembanun,” aro seneraglapmendi, seklenne lag talamlea babe kahepto wamlulam.
2TI 2:5 Sunumna nhon nen sumbanun. Nimiri lelamnari, “Mipsukaptina a'un merero pimunne etne samenag talul,” aro wene senep. Wene senepti sinag yubu ambarelamsindi, “Inaag merero palapmunna ina wa'aghag sekel pululom,” sendi ambatsinep. Aghana nimi nhondi ina wa'ag lahabandi, nhonnag sip tan tanena, samenag talenge babe, nimi eneko sembe mikipne senep kom. Samenag yubu karepto pimnange nelebandi, sam sekel pin nimi eneko sembe el agha mikipne senep. El sam sekel pile nimi eneko sembe kwiria elektoba walinge nhon eldi usoghagag elekirukang.
2TI 2:6 Nen sunumna nhon ambatkenun. Awe sae mikip uro wero meltorop nimi eneko eldamne saeri samenag yongoro aleri, teleba, nimi orange amik tukang.
2TI 2:7 Nari ni lero palilamnange nene sembe imag agha nu Saelbamsilne ponekori elnenelangkeleba, an eltalamlulam. Ane sembe, nari ambatkenne sembe seneraghal pina eltalulam.
2TI 2:8 Ekon tan koma el uro wamlulamne ane: Yubu Walinge nari ambatto poa tongolamsinnena Allahri samenag salag pibognena, “'Mog so'oag nimi taulbahimendi, saelbamsululam,' aro Nari weptopne nhon pogneba, Daudti liksiog nimi anabiag agha lag talul,” seog. Wene seog nimi eneko sembe “Kristus” alamap. Seogpa Yesus Daudti liksiog nimi anabiag agha lag taogti, tebaogti, kamag taog. Undo uro yabiogpa, yubu walinge Yesus Kristus sembe ambatto poa tongolamsin.
2TI 2:9 Yesus yubu walinge ambatto poa tongolamsinne neneko sembe na seklelamnangena, na nimi yonge agha ulo saog uro nimiri saelbaneongdi, besi agha sunurop haingdi na sae kaupneong. Sae kaupto wamna aghana Allah yubu nimiri haing sae kaupnep kom.
2TI 2:10 Ane sembe ni ane seklelamnange wana paiamnari, ulamna. Seneraglamnangena “Allahri samenag agha wepsiog nimi ni Yesus Kristus sembe ka'ebaikti, Yesusap ma'aptangto sik senelamikpa, sin babe taulbahilul. Taulbahileba, Allah Eldamne imang warero ya'ag ua uropne nenekoag nhon wamukap,” aro seneraglamnari, Yesus sembe ambarelamsin.
2TI 2:11 Yubu kiki nene Yesus sembe sikne agha lebog, “Nun agha Elap tebabe pagha tanena, Elap babe nhon kamag wamukap.
2TI 2:12 Nun seklelamebenge wana paiameberi ulamebe tanena, El umag nhon wameberi, Elap nhon yubu sia lelamukap. Nuri El sembe ekonne alamebe tanena, Eldi babe nu sembe ekon sihilul.
2TI 2:13 Yesus Eldamne wanaag agha “Undo unuanun,” seogne sembe nimi haing Eldi kunulamsil kom. Ane sembe, nuri El sikne aro lelamebenge kom nembabe tanena, Eldamneri nunag lebogne sik uro yabilul.” Yubu kiki Yesus sembe samenag pibogne nene sikne andagha lebog.
2TI 2:14 Ni lelamnange nene sembe nimi ni ambarelamsilulam. Allah whingag agha sin wembamsimenba, sin mamun yubu kiki lelekto waptangtop yubu loba neneptaheng kom. Undo unulamikne neneri nimi yepsinep komdi, waptangtop yubu ka'erop nimi babe loba neneptaukang.
2TI 2:15 Anna, andi nia mangkina ul palapmendi, “Nari Allah yubu sik urop yubu eneko wali uro seneragto kareplamnari, sik uro ambarelamsinba, Allahri kemelamnel,” aro tolamlulam. Undo tolapmen tanena Allahri andi ul palapmenne ililangkeleri, Eldi an sembe, “Nari awe wali uro tolamla,” sembangkelul. Undo sembangkeleba, andi ali semban koma tolapmendi, Allah whingag wali wamlulam.
2TI 2:16 Nimiri yubu kamolange lero Allahri yubu sunsunum urop kom yubu lelamik tanena undop yubu lelamangne agha koloptangkamlulam. Yubu undo lelamikpa, nimiri nelepto ka'elamikpa, Allahri senenne wailag nembi agha yo maikno tangto ulamukang.
2TI 2:17 Nimi taneri undop yubu nimi ambarelamsiangne meneng nimiag singina singihinne saog talul. Sin neraneko lelamang nimi anabiagna Himeneusap Filetusap wamdang.
2TI 2:18 Sin abenekori ina sikne laplobi agha lerekarongdi, orolena yubu ambarelamsirangdi, yubu sik uro seneragtop nimiri seneragna loba nenelamsirang. Nimi teptopne nen kamag tanepne sembe ambarelamsirangne, “Yesusti Elag seneragtop nimi teptopne kamag nembahiori, wimbahiobog, tane wamap,” aro ambarelamsirang. Undo ambarelamsirangne sembe Yesusag seneragtop nimi wana ophag alolamsiangba, nimi etbare, “Tebaberi, kamag taukap kom,” aro Yesusag seneraglamongne laplopsiong.
2TI 2:19 Undo wene aro ambarelamsiang aghana, Allah yubu yangan kirik meptangtop kirik lebe senep komne saog wamla. Mebog kirik eneko alibag yubu sikne mome toro pibogne lilimna ane: “Nuni nu Saelba Uahiropne ponekori Eldi mabo elwamsildi wamla,” ane sembe, “Nimi etneri, 'Nana, nu Saelba Uahiropne ponekoringe wamna,' alamle tanena, nimi eneko malia uropne sae lililamlul,” aro mome toro pibog.
2TI 2:20 Ae walinge nubu uro sorop ae eneko lomag mag ma'i tero tena emas agha to, perak agha to sunuropne babe urop. Mag ma'i tena kal agha to, so'o agha to sunuropne babe urop. Aghana mag ma'i kal agha to, so'o agha to sunuropne neneko songag pil piropne aeag nen samoro pailanep komne babe urop. Emas agha to, perak agha to sunurop mag ma'i eneko nimi nubu nimi tebatsinepba, tenep mag ma'i, “Na omekto sembe tebatneang,” senen mag ma'i solabaleag aro maupto paia urop.
2TI 2:21 Allahri ae lomag urop nimi babe nhon sao nhon sao wamang. Yesusag seneragtop nimiri wanaag mali-malia senelamlari, ulamla tanena, el Saelbamlange ponekori nimi eneko sembe mali sembalul. Aghana mali-malia ulamla nimi enekori Yesusag seneraglamleri, malinge eldi wanaag wamlange sae liliro a'eleptaleba, el Saelbamlange ponekori nimi eneko sembe “Naringe tal,” sembalul. El Saelbamlange ponekori nimi eneko sembe, “Nimi eneko Naringe taori, wali-walia ulamlaba, nimiri kembaikti, Na sembe omekto wali sembanukang. Nari awe tomnepne sembe Nari arukna enekori 'Tomnun,' aro wea ulamla ane sembe, nimi eneko sembe na yeng sirik,” sembalul.
2TI 2:22 Name Timotius, kabuni mabori seneragna sunsunum uro “Kelene naringe kom aghana saelbahane,” aro andi seneragna ene andi wanaag waelbale tanena, elem uro togtangto koloptaongom sululam. Togtangto koloptaongom sululamba, nimi nu Saelba Uahiropneri seneragna sunsunum uro seneragtop nimi, Yesusag wana paia urop nimi enekoap nhon ma'al dalamlulom. Ma'al dalapmundi, seneraglapmundi, “Yesus poneko sikne wamla. Eldi wana yeng neneropne eldalameberi, sunsunum uro ulamukap,” aro o'ona seneldalamlulom. O'ona seneldalapmundi, nimiap aingniro wamlulom.
2TI 2:23 Ekon urop nimiri, “Yubu nembahabe,” aro yubu soro kware aro lelamik nimiag nelebahaiseng kom. An el wamlamne, ekon urop nimiri yubu soro kware aro lelamikneag agha nimiap-nimiap waptangtopne maikno waelbanep.
2TI 2:24 Yesus nu Saelba Uhiropne sembe awe torop nimina nimiap waptangto yubu neneptanep kom. El neneko tam samenne wanaag paia urop komne wamleri, nimi ni sembe “Nangkae,” aro ulamsileri, nimiag wali uro amoro el nenelamsilul.
2TI 2:25 El nenekori eldi yubu ambarelamsilba, nimiri eldi yubu ka'eban koma yubu leptangto ulamangne sembe sinag yo pimna koma, wana mamnaba ambatto el nenelamsilul. Sinag ambatto el nenelamsilenge, “Allahri sin sembe lag nenelamsileba, mali uropne lilobi agha Allahri seneragna sunsunum uro seneraglamikti, sikne el taukang,” aro el nenelamsilul.
2TI 2:26 Eldi ambatto el nenelamsileba, eldi yubu ka'eban koma yubu leptangto ulamang nimi sembe, phia sikini nubungeri wana toro sae kiliro sae kaubamsin nimi wamnep. Sindi unulamangne anena phia sikini nubungeri, “Undo-undo ulamukang,” senenne sunsunum uro ulamang. Phia sikini nubungeri wana torop nimi sembe nu Saelba Uhiropneri awe torop nimi enekori, “El nenelamsineba, el taikpa, phia sikini nubunge nenekori selbel weamsinag agha sae loptangka wamukang,” senelamsiso. Undo senelamsisori, waptangto koma ambatto el nenelamsilul.
2TI 3:1 Yesus nen samoro yalul sum eneko peram tale tanena, tam eraruk sirikne nhon saog nhon saog lag talul anekona an el uro wamlulam.
2TI 3:2 Undo uro yabinep sumeneko nimi wamikne tanekori sindam nimi sembe agha seneragtangkamukang. Kal ma'aldi haing surubahilul. “Na paliag wamna,” aro metmereng alamukang. Pamag agha minimna yubu minilamukang. Nimiag san tiliplamsukang. Sikini sikininag yubu ngelde arop yubu agha lelamukang. Nimiri sinag mo tarelamsiikne sembe babe teba'en aro ingkisaplobukang. Allahri senenne sunsunum uro seneraglamukang kom.
2TI 3:3 Nimi orange sembe o'ona senelamsukang kom. Nimiri sinag malia uahiikti, yaikti, malia uandi tam orog nembaukap aro uaikpa, kom nembaukang kom. Nimiag minirop yubu loloro ambarelamsukang. Sindamneri wana aignibanep koma wamukang. Yonge aghabog ulamukang. Walinge sembe karong sembamukang.
2TI 3:4 Sikinkabo sembe wanaag agha aisanang nenelamsukang. We uro seneragna koma ulamukang. Sindam nimi omektangtopneri nenek salehirop nimi saog neneldalamsukang. Allah sembe yeng semban koma “Uahabe,” senenne agha ulamukang.
2TI 3:5 Nimiri sindi ulpalamikne kembiag agha “'Allah yeng nembaukap,' aro unulamang,” sembanep aghana, sin nimi tanekori Allahri senenne sunsunum uro ulamang kom. Allahri senelamlange, “Undo unulamikpa, mikip nembahinun” senenne sunsunum uropne neneko saelba ulamang kom. Nimi undop nimiap nikag ma'al dalamseng kom.
2TI 3:6 Sin neneko anabiag agha ambatto poa tongolamsiangdi, nimi ni ae lomag wamang nimi haing kunulamsiangdi, ae lom-lom wa'ina ae lomag kelabori wana tolamsiang. Wana tolamsiangba, kelabo tanekona, limituka urop kelaborina, “Na mon sek nenelamnelne nari wanaag walelalne nene salero uahane,” senelamang. Wene senelamangdi, ulamangne sembe kelabo tanekori “Malia maikno ulamna,” aro sindi seneragnep aghana, sindi seneragnaap wanaap loba talamsil.
2TI 3:7 Kelabo tanekori sop-sop “El tahane,” aro ulamang aghana, yubu sikne sembe ililamang kom. Undop saog ae lomag wa'ina kelabori wana tolamsiang, ane sembe haing kunuro ambatto poa tongolamsiang nang nenekoap ma'al dalamseng kom.
2TI 3:8 Sindi wene ulamangne sembe, samenag babe Allahri yubu sikne Musaag ambarogpa, Musari yubu tipto nimi ambarelamsiog. Allah yubu ambarelamsiog li ko'o nenekoag, Yanesap Yambresapti “Musari yubu ka'ebaukap kom,” senelamdekti, yubu sikne wa'eplamdek. Yanesap Yambresapti yubu sikne wa'eplamdek saog uro, sin wene undo unulamang nimi taneko babe sindi usog seneragna ya'ag maliri, Allah sembe sikne aro seneragnep kom. Ane sembe, sindi Yesusag sikne aro seneraglamang komne kekneldalamla.
2TI 3:9 Sindi haing kunuro ambatto poa tongolamsiangba, nimiri sesogne sembe sik senelamsiang aghana, amik sum el taukang. Sindi haing kunuro ambarelamsiangne sembe amik sum eneko lag taleba, nimiri el taikti, “Sinna ekon aghana, el uro wamlori ambatsiloa saog uro amolamsiang aneko sinna ekon bog ambarelamsiang,” aro el taukang. Samenag Yanesap Yambresapti Musa yubu wa'eplamdekne sembe, “Limituk uro ulamdek,” aro el wamap. Wene babe sin ekon bog nimi ambatto poa tongolamsiang nang neneko sembe babe nimi niri el taukang.
2TI 3:10 Sinna unulamang aghana anna nari ambarelangkenneag nelepto ul palamlam. Nari ul palamnori palamnangeap, nari wanaag seneraglamnangeap imneomdi, nelepto ulamlam. Nari Yesusag “Sikne” aro seneraglamnori, nimi yogne sembe o'ona senelamsinori ulamnonge andi haingdi imneomdi, nelepto ulamlam. Nari sa'a-sa'a yubu seklenne yubu yalamoba, nari wana paiamnori, ta'ap sen koma ulamnonge babe imneom. Yesus sembe nimi ambarelamsinoba, nimiri as kota Antiokhia agha, as kota Ikonium agha, as kota Listra agha “Seklebale,” aro ulamneongba, seklelamnonge ni anena andi haingdi imneom. Seklelamno aghana, nu Saelba uhiropne ponekori sindi saeag agha taulbaneo.
2TI 3:12 Seklelamno aghana, na mo seklelamna kom. Nimi etneri Allahri weptopne Yesus Kristusap ma'aptangto, Allahri senenne sunsunum uro “Uahane,” aro seneraglamik tanena, mog so'oag nimiri sin sembe karongdi “Seklebaik,” aro ulamsukang.
2TI 3:13 Aghana nimi haing kunuro ambatsirop nimiap, yonge urop nimiap nen ma'aro yo taikti, mali-malia aghabog ulamukang. Undo unulamik nimi tanekori nimiag haing kunuro orolenange ambareamsukang aghana, nen sap tangoro nimiri sinag orolenange ambarelamsiikpa, sik senelamukang.
2TI 3:14 Haing kunuro ambarel dalamukang aghana, an Timotiusag Yesus sembe yubu sikne ambatkeek nimi sembe ekon tan koma el uro wamlulam. El nene langkeekti, yubu sikne ambatkeek ane sembe, sik sembalumne neneko sae mikip uro saelbamlulam.
2TI 3:15 An me olog wamlumag agha Allah yubu mome toro piropne eltalum. Allah yubu mome toro piropne nenekoag agha Allahri weptopne “Taulbahimendi, Saelbamsululam,” aro poghogne sembe ka'ebalum. Ka'ebalumdi, andi wana hekto yabalangkeogpa, Yesus poneko sembe “Allahri weptopne Kristus neneko wamla,” aro el talum. El talumba, nimi etneri Yesusag “Sikne” aro seneraglamikne sembe eldi mali-malia uropne agha talulangkel. Malia uropne agha taulbahiropne sembe Allah yubuag lag taog.
2TI 3:16 Allahri yubuag mome toro pairopne ni wamlange nenena, Allah Eldamneri haindi lag phoro ambatsiloa saog uro sikne wamlaba, nimi yeplamsil. Allah yubu sik yubu eneag agha orolenange wa'epto sikne ambatsinep; nimi wenero ambatsinep; tam wamnange nene “Sikne to, kom to,” aro yubu mibilpina karebanep; Allahri senenne sunsunum uro “Undo-undo ulamlulom,” aro nimi ambatsinep.
2TI 3:17 Allah yubu mome toro pairop mome eneri nu yepsileri, mikip nenelamsilul. Mikip nenelamsileba, nu Allah Elmabori sa'a-sa'a walinge “Unuahane,” sembabeba, el nenero yepsileba, Allahri senenne sunsunum uro ulamukap.
2TI 4:1 Allahri weptopne Yesus Kristus poneko nen amik mog so'oag El yalulnena, nimi saelba uahiropne yubu sia leropnang nubunge saog uro yaleri, nimi kamagneap teptopneap poloro wimbahaileri, “Tam karebanun,” aro yalul. Ane sembe nari Allah whingag agha, Yesus nu Talulamsildi, Saelbamsilne poneko whingag agha anag wenero ambarelangkennena:
2TI 4:2 “Andi Allahri Yubu walinge Yesus sembe nimiag ambarelamsululam,” aro ambarelangken. Andi yubu ambarelamsimenne sembe, nimiri “Ka'ebaukap,” sembaik babe, “Karong,” sembaik babe, andi “Allah yubu amoro ambarelamsinun,” aro wea ulamlulam. Allah yubu ambarelamsimenba, nimiri ulamangne sik kom tanena, lag phoro ambatto wenelamsululam. Wenelamsimen abeneko pere andi wana paiapmendi, “Sindi wana sesog urop nimi wana aingnibahinun,” aro yubu kiki telekto ambarelamsululam.
2TI 4:3 Amik sum andi yubu sikne Yesus sembe ambarelamsimenne sembe nimiri “Ka'ebaukap kom,” aro wa'epto ulangkukang. Yubu sikne ambarelamsimenne sembe ao leptaukang aghana, kom nepna malinge saogne sembe ao taongkaukang. Ambarelamsimenne neneko libikti, sinba sindi wanaag “Uaukap,” senenne sunsunum urop yubu sembe “Ka'ebaukap,” aro, ekel ina amohiropnang maikno sirik poloro wimbahukang. Ane sembe, “Wana paia uro yubu sikne Yesus sembe ambarelamsinun,” aro wea ulamlulam.
2TI 4:5 Sa'a-sa'a uro yabileba, wana whi uro wapmendi, seklelapmenag wana paiapmendi, wamlulam. Yubu Walinge Yesus sembe ambatto poa tongolamsimendi, Allah arukna wamlamne sunsunum uro sol wali uro awe tolamlulam.
2TI 4:6 Na sembe an ambatkennena na tepnange peram wamna ane sembe, Allah sembe awe sol wali uro tolamlulam. Yahudi nimiri “Allah sembe pham domba aukag tabukap,” aro pham domba oropne nong alibag mag iklamang saog uro, “Nari eneng babe Allah sembe iknun,” aro ulamna. Olog wamnea nun wamap mog so'o eneag agha laploa pinepne peram wamna.
2TI 4:7 Allahri samenag nanag ambatneogti, “Ina aneag merero ambarel phululam,” aro ambatneogne sunsunum uro seklero kilim weang alamnori, ambarel palamsinori, uitno. Allahri awe nari saeag pipneogne neneko tolamnori, yin saleropnangdi sikinkabo pelepto aisanangap maldaropne wamloa saog uro wana nhonog uro tobitnori, wamna.
2TI 4:8 Ane sembe nu Saelba Uahiropne ponekori na sembe, “Nimi nene taluro sikne nembahiba, naringe wamla,” aro ambatsilenge nene agha, kamna kwiria elektoba nari usoghag elekatnilul. Nu Saelba Uahiropne Yesus ponekori “Ni tam peket uro karebanun,” aro yalamle sumeneko kamna nene tatnelul. Yalamle sumeneko kamna nana aghabog tatnelul kom, aghana nimi etneri Yesusag “Sikne” aro seneraglamikti, “El nen samoro yalul,” aro yeng uro nang-nang alamik nimi sembe undop yubu lero kamna kwiria elektoba eneko sindi usoghag babe elekitsilul.
2TI 4:9 Demas neneko mog so'oag nimiri salero ua uropne sembe wana telamoba, na laploa lemneori, as kota Tesalonika pio. Kreskes neneko babe Galatia pioba, Titus neneko babe Dalmatia pio. Ane sembe elemag uro na wamnaag yalulam.
2TI 4:11 Ot Lukas aghabog nanap nhon wamnam. Markus neneko nari yubu ambarelamsinne sembe, “Wali uro yeplamnelul,” sembamna ane sembe, an yalapmen tanena Markus neneko enero poa yalulam.
2TI 4:12 Tikhikus neneko “Efesus pululam,” aro pogno.
2TI 4:13 An yalapmen tanena, naringe ag son sembero, mag telamnabaro wangan ag as Troas Karpus nenekori aeag laplopnoa ane payalulam. Nari mome toropne eldi aeag wamlange babe payalapmendi, pham domba kon agha wetnero sorop buku mome eneko ekon tan koma toro payalulam.
2TI 4:14 Aleksander, besi nhon sao agha sunuropne nenekori nanag yonge maikno ulamneo. “Nu Saelbamsilne ponekori eldi ulamneonge nene sembe lumbalul,” sembamna.
2TI 4:15 Eldi nuri ambarelamsiap yubu sembe “Ka'ebaheng kom,” aro iriklamsil. Ane sembe eldi anag ualulne sembe wana whi uro wapmendi, yae uptangkamlulam.
2TI 4:16 Na tam kareptobag ik alnirop sum eneko poa pineongba, tam kareptop nimi whingag pelebeltanan yubu lelamno aghana, nimi nhondi babe nanag sip tangto yubu lebong komdi, laplopneong. Sindi na pelebaneong komne nene sembe sinag tam pipsiseng kom.
2TI 4:17 Aghana nu imag agha Saelba Uhiropne ponekoap sae tiptangto seknomo. El na peramag sekori, mikip nembaneoba, Yubu Walinge ambatsinonge nimi sisa Yahudi kom nimi niri ka'ebaongba, na tebanebag agha pelebaneo.
2TI 4:18 Nimi maiknori na “Obukap,” aro ulamneang aghana, nu Saelba Uahiropne ponekori sin saeag agha sae komobi ulamnilul. Ya'ag omnika babe, El ya'ag ua urobag na payaneleba, El aghabog papna koma omeklameberi, wana aingniro Elap nhon ya'ag wamukap. Sikne agha saekag lebap.
2TI 4:19 Nari Priskilaap, Akwilaap, Onesiforus eldi kelabo meap kiplamsinne, ambatsululam.
2TI 4:20 Eratus as kota Korintus wamlaba, Trofimus naikna wamobog as Miletus liloa yanonge wamla.
2TI 4:21 An menag anam son li nene waelban komag yalulam. An sembe “Nangkae,” aro kiplangkeang nimi, Ebulusap, Pudesap, Linusap, Klaudiaap, nungkabo nu nikne Yesusag seneraglamap nimiri babe kiplangkeang.
2TI 4:22 “Nu Talulamsildi Saelbamsilne ponekori wana walingeag agha andi hain wana seneragnaap peleplangkelul,” aro an sembe Allahag molbarelangken. Abenda.
TIT 1:1 Titus naba name! Na Paulus Allah arukna wamnangeri mome ane an sembe palilamna. Na Allah arukna wamna alamnangena, Allahri samenag Yesus webogti, “Mog so'oag nimi taulbahaimendi, saelbamsilulam,” aro poghogne Yesus yaogne sembe si Kristus aro engero yabiog. Yesus Kristusti na weplamneogti, “Ambarelamsimenba, Allahri yum-yum samenag wepsiogti, yoplamsil nimiri sik sembaukang,” aro Yesusti na pogneog. Wene aro pogneogpa na Allah arukna wamnange alamna. Eldi pogneogpa ambarelamsinne pere agha sikne eltaikti, Allahri wana yeng nenerop nimi sunsunum uro urop nimi wamukang.
TIT 1:2 Allahri anam im so'o sumban komag ya'ag kamag uro un yubu eneko salag pibog. Salag pibogne neneko Allahri orolenange nimiag lemnep kom ane sembe ya'ag kamag wameberi wamukap aro nang-nangaro Yesus sembe ambarelamsindi, elap nhon ya'ag wamukap aro tibogto wamap.
TIT 1:3 Allahri samenag seneraghognena, “Li ko'o wepnange anekoag Yesus sembe ka'ebaikti, elag sikne aro seneraglamikpa, Nanap nhon ya'ag wamukap,” sembaog. Sembaogti, salag pibogti, yubu Yesus sembe yubu eneko Allah nu talulamsilne ponekori na sa'oag piboba ambarelamsin.
TIT 1:4 Name Titus, nari Yesusag sikne aro seneraglamna saog uro andi babe nari ambarelangkenne nelepto sik uro Yesusag seneraglamlam ane sembe an sik uro naba name senelamna. Naba name senelamnari, an sembe Nuni Allahag “yeplamlulam,” aro mololamnaba, wana waliri walia ulangkeleri, wana aingnilangkilul. Allah Elme Yesus Kristusti nu talulamsilne ponekori babe wana waliri walia ulangkeleri, wana aingnilangkilul aro an sembe molbarelangken.
TIT 1:5 Nari an mag kanero longorop mog so'o Kreta laploa yaghenongena andi nuri Yesusti awe tolamnomori sirikag wamlange komopto tolamlulam aro laploa yagheno. Ane sembe andi as ni Kreta mog so'oag ubu pilamlange sunsunum uro Yesusag seneragtop nimi ambatto wembahinep nimi ebahimundi, ambatkenonge sunsunum uro toro seki-seki yabihilulam.
TIT 1:6 Allah Elmabo wenehiro piamsinep nimi wepsilulam nimina: Malia uropne elag tam pimnep nimi agha kom. Kelabo phende toamsile nimi agha kom. Sikin mabo salik-malik ulpin koma sikini yubu ka'ebaikti, sikin mabori babe Yesusag Nu Talulamsildi saelbamsilneag seneraglamik nimi agha kembahaimendi, ambatkenonge sunsunum uro wepsululam.
TIT 1:7 Allah Elmabo piamsikti kemelamsikti saelbamsukang nangna Allahri awe torop nang ane sembe, malia uropne elag tam pimnep kom nimi, “Allahri awe saelbamna,” aro metmereng arop kom usog mikip kom nimi, men phea nimiag wahirop kom nimi, mag yongeri wana tohirop kom nimi, nimiap kame tarop kom nimi, kal ma'aldi haing suruhirop kom nimi agha wepsululam. Wamlange abini irikna phibom agha wepsinep kom.
TIT 1:8 Allahri mabo piamsileri Allahri awe tolamlul nimi sekitsululam nimina: Eldi aeag nimi wa'al ananne sembe ina kubamlul nimi, walinge ulamnaba yeng senero walinge uro yabanne sembe yeng uro wamlul nimi, wana hekto seneragha urop nimi, porog uro urop nimi, Allahri seneropne sunsunum uro urop nimi, salik malik urop kom nimi agha wamukang.
TIT 1:9 Wamnep nimi sekitsilulamnena, Yesus yubu sik uro ambarelamsiapne sunsunum uro sikne aro seneraglamikti mikip saelbamik nimi agha sekitsilulam. Sekitsimenba eldi nimi yubu walinge agha el babe elwamleri nimi wembamsilul. Wembamsileba orolena yubu lerop nimiri “Andi yubu sikne komne,” aro yubu lelamik nimiag babe tangoro ambatsileba, “Eldinge sikne agha lepla,” aro ali sembaukang.
TIT 1:10 Sa'a sembe el elwamleri nimi wembamsileri, elag, “Andi yubu sik komne,” aro yubu lerop nimiag tangoro ambatsilul sen, tamna ane sembe: Nengabo kon tepnange sembe mikip saelba urop nimi, nimi sisa Yahudi nimi taneko maikno orolenange agha lelamang. Orolena lelamangnena, “Paulusti Yesus sembe ambarelamsilne mombolag wamukap kom,” alamang. “Yesusag sikne aro seneragtop nimi nengabo kon karebel talamik taneogna, Yesusti sin taulbahilul,” aro yubu kamola parektop yubu lelamang. Ane sembe wepsululam nimi tanekori Allah Elmabo piamsikti, kemelamsikti, saelbamsukang. Allah Elmabo piamsikti, orolenange lelamik nimiag tangoro ambarelamsukang.
TIT 1:11 Sin kon tepnange sembe orolenange ambatsirop nimiri ora nimiri ae lomag taneko wa'ina “Kal ma'al tatsiseng” aro moloropne alinge ulamangdi, sik komne ambarelamsiang. Sindi orolena ambarelamsiangdi, “Yesusag sikne aro seneragtop nimi nengabo kon karebel talamik taneogna, Yesusti sin taulbahilul,” aro ambarelamsiangdi, wana samsamolamsiang. Orolena ambarelamsiangba, Yesusag seneragtop nimiri orolenange sembe sik senelamang ane sembe orolenange ambatsiropnang pam lepsilulom. Nen ekel ina ambatto wana samsamomna nenelopsukang kom.
TIT 1:12 Samenag nimi nubunge nhon sin Kreta nimi agha sindam nimi wameka sembe anabiag wamogneri babe sin Kreta nimi sembe lebognena, “Kreta nimi nimiag yubu orolenange lero, paikam yonge saog uro ua nia mangkina uan koma aboap sembe agha tena aboap uro urop nimi,” seog.
TIT 1:13 Kreta nimi eneri lebognena sik andagha lebog. Ane sembe andi sin yubu mikip uro wembamsilulam. Wembamsimenba sindi Yesusag seneragtopne sembe sikne agha saelbamikti seneraglamukang.
TIT 1:14 Wene Kreta nimiri orolenange seneraglamangne lipsukang aro ambarelangken. Yahudi nimiri nimi yana sembe lelero neplamangdi, unualulom-unualulom aro nimiri wanaag agha ambarelamsiangba, Kreta nimiri ka'elamangdi, sik senelamang. Sik senelamang aghana lelero neplamangneap, saelba ulamangneap yubu sikne sunsunum uro lelamang kom. Ane sembe sik komne Kreta nimiri lipsukang aro wembamsululam aro ambarelangken.
TIT 1:15 Nimi etneri Yesusag sikne aro seneraglamikne, Allah Eldamne Yame Walingeri malinge nimi enekori wanaag ua ulamlange a'elero yag lanalamsildi, nimi eneko Allah whingag wali nenelamsil. Ane sembe sa'a nia ulamnange, tenaba telamnange sembe Allahri nimi Yesusag seneragtop nimi wa'epto toboghainep kom. Aghana Yesusag anam sikne aro seneragtop kom nimina sindi wanaag Allah Eldamne Yame Walingeri malinge wamlange yag lanalamsil kom, ane sembe Allahri sindi ulamangne sembe nimi sikne sembahinep kom. Nimi undop nimi, sindi usoghag seneragna babe sindi wanaag seneragnange babe sindi malingeog uro seneragtop ane sembe sin sembe Allahri wali sembahainep kom.
TIT 1:16 Sindi lelamangdi, “Nu Allah sembe yabo telekto elwamapti, Elap sae tiptangto wamap,” alamang aghana sindi wanaag agha ulamangneri Allahap sae tiptangto wamang kom aro el nenelamsil. Sin sembe popmagha sirikti, sindi wanaag agha walinge nhon babe uanep kom saog wamlaba, Allahri senerop komneog ulamang.
TIT 2:1 Aghana an Titus, andina nimiag yubu walinge Yesus sembe ambarelamsiapne sunsunum uro yubu sikne agha ambarelamsilamdi, nen tipto ambarelamsilulam.
TIT 2:2 Andi kabuni sabal saog nimi ambatto wembamsimenba, sindi malia uaukap senelamikne libikti, wana hekto wamikpa, nimi orangeri sin wali uro wamang sembamikti, maiplamsukang. Ambatto wembamsimenba, sindi babe Allahri yubu sikne agha salero seneraglamikti, nimiag wanari o'ona sembamsikti, seneragna waliag agha seklenne lag talamlea babe kahepto wamukang.
TIT 2:3 Kelabo sabal saog kelaboag babe andi ambatto wembamsimenba, sindi wana seneragnari ul palamikne Allahri seneropneog sinag wamleba, sindi yubu salik malik nimiag lolorop yubu lelamukang kom. Mag yongeri wana to'ohirop kom kelabo wamikti, sindi saren kelaboap me yag kelabo agha sabal tan kom kelabo walinge agha ambamsukang. Sabal saog kelabori sabal tan kom kelabo ambamsikpa, sindi sikin na'ange yaboag o'ona sembamsikti, sikin mabo o'ona sembamsukang.
TIT 2:5 Sabal saog kelabori sin sabal tan kom kelabo ambatto wana hekamsileba sikin mangkelabo wana hekto el uro wamikti, Allahri wana yeng neneropne sunsunum uro ul palamukang. Sikin na'ange yabori yubu ka'eamikti, ae lomag unne o'oro walia uahiikti, sikin na'ange yabo umag wamukang. Undo wamikpa, kembasiikti, nimi nhondi babe Allah yubu mali aro san tiliplamukang kom.
TIT 2:6 Me kabuni mabo babe wana hekto el uro wamukang aro wembamsilulam.
TIT 2:7 Andi seneragna wanari sa'a-sa'a ulapmenag, “Sindi imnikti sindi babe uakang,” senenne agha walinge agahabog ulamlulam. Andi amona amolamsimenne sembe keagman uro sembaheng kom. Allah yubu amolamsimen tanena lendepna koma otsik neagha solwali wali uro amolamsilulam.
TIT 2:8 Yubu sikne wana hekahinepne agha wenelamsimenba nu aisa nenelamsiang nimiri babe ka'ebaikti, “Orolenange lepla komdi, walia ulamla,” sembaukang. Undo sembaikti, nuri yubu ambatto ulamapne sembe sindi nu yubu nepsinep komdi, ali sembaukang.
TIT 2:9 Nari yeng sembamnangena, Allahri nu Talulamsilne poneko sembe ambarelamsiapne nimiri ka'ebaikti, wali aro sik sembaukangne sembe na yeng wamna. Ane sembe nimi arukna wamang nimiag babe amolamsimunne, sikini yabo yubu ka'elamikti, sikini yabo umag agha ulamukang. Undo ulamikti, nimi arukna wamikneri sikini yabo wana wali nembamsukang. Sikini yaboag yubu pisagto lemna koma, haoghaba sikini yaboringe tomna koma wamukang, aro nimi arukna wamang nimiag amolamsululam. Amolamsimenba, undo ulamikpa, ora nimiri kemelamsikti, el uro wamikti, “Nimi arukna Yesusag sikne aro seneraglamang nimiri sol wali uro tolamang. Ni tam piamangne wali uro piamangdi, nimi sikne wamang,” sembaukang. “Nimi sikne” sembaikti, Allah nu Talulamsilne poneko sembe ambarelamsiap yubu wali senelamukang.
TIT 2:11 Ni undo-undo ualulom aro ambarelamsinne tamna ane sembe. Nuri Allahag walia ulamubu kom aghana Allahri, “Nimi niag walinge uanun,” sembaog. Walia uanun sembaogti, nu mog so'oag nimi malia ulamubunge sembe Allahri nu opsinep aghana, Allahri nu Yesusag sikne aro seneragtop nimi talulamsil. Allahri nu opsinep aghana, “Walinge uanun,” sembaogti, talulamsil yubu eneko sabo taoba, nimi mog so'oag tala-tala wamang nimiri ka'elamang.
TIT 2:12 Allahri walinge uanun sembaogti, talulamsil yubu eneko sabo tangto pioba, nimi tala-tala wamang nimiri ka'elamangba, el talamsil. Samenag nu mog so'oag nimiri Allahri, “Undo-undo ualulom,” seneropne laplobubu aghana Allahri nu mog so'oag nimi sembe “Walinge uahinun,” sembaogti, uaog. Ane sembe, wene ul palamapnena, Allahri wana sesog nembabeag aro ulamukap. Sa'a-sa'a mog so'oag wamlangeri nimiri mon sek nenelamsilba, saelbaukap senelamangba, Allahri seneropne sunsunum kom malinge pagha tanena wa'eplamukap. Malinge seneraglamapne libeberi, seneragna wali uro seneraghongkia wana hekto el uro wamukap. Allahri nunag walia ulamsilne seneraghongkia sik uropne Allahri seneragna sunsunum uro uropne agha ulamukap.
TIT 2:13 Wene nu wana yeng uro nang-nang alamapnena Yesus Kristus nu Talulamsilne poneko yalul aro salag pairopne poneko Allah nubu sirikne Eldamne Yame Imang warerop sirikneag agha Yesus yalulne ibaukap aro wana yeng uro nang-nangkamap.
TIT 2:14 Nuri malingeog ulamububa malingeri sae kaubamsiog. Sae kubamsiog aghana, “Sae lopsinun,” aro Yesusti Eldamne agha kamna toptaogti, nu Yesusag sikne aro seneragtop nimi sembe wana a'elbahiogti, Nandamneringe sembamsil. Nu Yesusag sikne aro seneragtop nimi sembe Nandamneringe sembamsil ane sembe, nu sop-sop walinge uanun senelamapti, wana yeng uro sol wali uro ul palamap.
TIT 2:15 Yesusti nu Eldamneringe nembahiogpa, walinge ulamukap aro ul palamukap ane sembe nia ane ambatkenne nen tipto ambarelamsululam. Ambarelamsimendi andi yubu ka'elamik nimi andamne imangapti wembamsimenba, nimi nhondi babe andamnang sembe taba'en sembaghik tanena yubu kom tan koma andi nimi abenekoag “Pabukang,” aro wembamsululam.
TIT 3:1 Andi Allah yubu ambatto wenelamsimenne ka'elamik nimi el nembamsimenba, nimi nubu nangap, mog so'o saelba urop nangapti yubu lelamikne Yesusag seneragtop nimiri ka'eamikti, noropto saelbamukang. Nen tipto ambarelamsimendi, “Nia ni walinge uanepne ulamukap aro weamlulom,” aro ambarelamsululam.
TIT 3:2 Andi sin ambareamsimenba nimiag salik malik lolorop yubu lepsukang kom. Nimi etneap babe waptan koma wamikti nimiap-nimiap wamap aro wana mamleba wamukang.
TIT 3:3 Samenag sa'a-sa'a walinge eltangto seneragna koma limituk uro wamuburi, yubu sia paliropne neleban koma ina selepneroman palamubu. Nun dam nimiri seneragnari nu arukna nembamsiogba, sa'a-sa'a sembe wana sesog uro seneraglamuburi, “Na wanaag bobo walelalne nene agto yaboho,” senelamuburi salelamsibu. Nimiringe babe naringeog wamso senelamuburi nimiag yo palilamsiburi, yonge aghabog ulamubu. Ora nimi sembe o'ona sembahin koma hausaog senelamsibuba, sindi babe nu sembe hausaog senelamsiek.
TIT 3:4 O'ona seneptan koma hausaog seneldalamubu aghana, Allahri nu mog so'oag nimi talulamsilne ponekori, “Walia uahineri, yepsinun,” aro o'ona senelamsiog. O'ona senelamsiogti, “Yepsinun” sembaogne sunsunum uro Yesus poghogne agha talulamsil. Yesus poghogti, talulamsilba, wene mog so'oag nimiri “Allahri nu mog so'oag nimi sembe wana waliri o'ona sembamsil,” aro el tanep.
TIT 3:5 Allahri nu taulbahaiognena nuri Elag walia ulamubunge sembe nu taulbahaiog kom, aghana elba Eldi nu yareag sembahaiogti nu taulbahaiog. Nu yareag sembahiogti, taulbahiognena, Allahri Eldamne Yame Walinge neneko maiknoro lo'oe tan koma siriro la'ainiropne saog uro nunag tarelamsildi, Yesus Kristus nu talulamsilne poneko pere agha tarelamsil. Allah Eldamne Yame Walingeri nu a'alero nu nimi kon wendogne nembahaiogti nu nimi wendogne nembahaiog.
TIT 3:7 Allahri Eldamne Yame Walinge tarelamsildi, nu a'alero nimi wendogne nembahiognena, “Nandamneri mabo taukang,” aro uahiog. Nu malia urop nimi aghana Allahri wana waliri nu Yesusag sikne aro seneragtop nimi sembe Allah Elmabo nenelamsildi, sik urop nimi engelamsil. Allahri nu sembe sik urop nimi engero Eldamneringe nenelamsilba, wene nuri seneraglamapti, Allahri Eldamneri maboag wali tatsilul. Allahri “Namabo tatsineba, ya'ag kamag wamukang,” aro salag pibogne neneko sembe nunag babe talul aro nang-nang alamap.
TIT 3:8 Yesus pere agha Allahri Eldamne Yame Walinge tarelamsildi, Nandamne taukang aro talulamsilba, Elap nhon ya'ag kamag wamukap aro ambarelamsinne sik uro lemna. Ane sembe nari sembamnange yubu so'opto ambareamsululamne ane. Allahag sikne aro seneraglamang nimiri otsik tapto saelbamikti sik walingeog ulamukang aro yubu so'opto ambareamsululam. Yubu so'opto ambatsimenba, nimi ni wali neneptanepne agha ulamikti, nimi maikno yepsiikpa, sin wali wamukang.
TIT 3:9 Yubu uro yabinep komne sembe leldalamika peramag sekelabeheng kom. Yahudi nimiri mangaroba yana lelelamekne sembe nimi waptangto talamikti Musari mome toro pirop momeag agha kiliro waltalamikne ni ane salik malik yepsinep komne sembe lelamukang. Ane sembe, nimiri tam ane sembe lelamik tanena Yesusag seneragtop nimiri nelepto lepseng kom.
TIT 3:10 Yepsinep komne waptangtop yubu ene suknulamlaba nimi taneko telekel talamang. Ane sembe suknulamla nimi ene ik nhon to ik phende to wembapmen pagha ka'ebale kom tanena an el peramag wamseng kom.
TIT 3:11 An elwamlamne nimi undop nimi ene nimiri kembiagha el ina selepneroman palamlari, malia ulamlange sembanep. Ina selepneroman palamlari, malia ulamla ane sembe, undop nimi peramag wamseng kom.
TIT 3:12 Na pineri, khao li wamlul kho'o enekoag as kota Nikopolis wamnun aro yubu karebano. Ane sembe nari Artemas to Tikhikus to anag pogholaneba anag yale tanena an men phea na wamneag yalulam.
TIT 3:13 Nungkabo phende, Apolosap Zenas nimiri samenag yubu sia lero pibek yubu wali uro elne ponekoap nen ina tipto palamtikag sin phende abenekoag kwema uahileagtina sik wali uro yepsululom.
TIT 3:14 Nuri nimi Allahri wepsirop nimi taneko Yesus yubu walinge ambatto elnembahin koma wamebeba sindi walinge ulbanne ekon uro wamikne nene olog sunsunum kom. Ane sembe ambatto wembamsimenba, “Kwema uahileag” aro sin dam nimi saeri ul piro wero mero tero wamikti, walinge agha uldalamukang.
TIT 3:15 Nun kabo tane nanap nhon wamang neri an sembe “Nungkae” aro kiplangkeang. Nun kabo tane wamang neri Yesusag seneragtop nimi an ya'aghag wamangne sembe kiplamsiangne ambatsululam. Nu talulamsildi, saelbamsilne ponekori wana waliri a'un ni yeplamsilul. Abenda.
PHM 1:1 Nangkabo! Na Paulus mome nene agha a'un kiplamsin. Na Paulusti nimiag ambarelamsinnena, Allahri Yesus wepto nu mog so'oag nimi “Talulamsileri Saelbamsilul,” aro poghogne poneko sembe ambarelamsin. Allahri wepto poghogne neneko sembe Kristus alamap. Yesus Kristus poneko sembe ambarelamsin aghana, nimiri karongdi na sae kaupto kop aeag piamneongba, mome nene a'un sembe palilamna. Nanap nungkae Yesusag “Sikne” aro seneragtopne Timotiusap wamnamdi, kiplamsinam. A'un kiplamsinam nimina, an Filemon sembe, “Nu babe awe nikne torop nimi wamap,” aro wanaagne wamlamba, kiplangkenam. Allah Elmabo andi aeag winiltalamang nimiap sembe babe kiplamsinam. Apna Yesusag “Sikne” aro seneragtop kel Apfia sembe “Nunipsa'el,” aro kiplamnam. Nungkae Arkhipus sembe “Awe nikne weltongolamapba, aisanangdi 'Seklebaik' aro ulamsiangba, nik nimi wamap” aro kiplamnam.
PHM 1:3 Nuri Allahag mobarelamsinamne, “Nuni Allah nuringeap, Yesus Kristus nu Saelbamsilne ponekoapti wana waliri a'undi wana aingnilamsirikpa, wali wamlulom,” aro molbarelamsinam.
PHM 1:4 Nari sop-sop Allahag molona mololamnari, an si lero Nani Allah kipto omeklamna. Nari an sembe ka'ebanoba, “Filemon ponekori Yesus nia mangkina Salelamsilne ponekoag sik uro seneraglamlari, Allah elmabo o'ona senelamsildi yeplamsil,” seongba ka'ebano. Ane sembe Allahag mololamnange abeneko pere andi ulamlamne sembe seneragto “Naniong wali uro yeplamlamba, ulamla,” aro Nuni Allah kipto omeklamna.
PHM 1:6 Nari Allahag an sembe molona molbarelangkennena, andi el talapmenba, Yesus Kristus ponekoap ma'ap tangtopneag agha nunag wali-walia ulamsilne sembe ni el talulam. El talapmenne pere agha Yesusag seneraglamlamne sembe nimiag ambarelamsululam. An sembe Allahag molbarelangkenne, “Yeng uro tibin nenero ambarelamsulul,” aro Allahag “Yeplulam” aro molbarelangken.
PHM 1:7 Filemon naba nangkae. Andi Allah Elmabo ni o'ona senelamsilamdi, yeplamsilamne neneri Allah Elmabo maikno wana mikip nenelamsilam. O'ona senero yeplamsilamne nene yubu ka'ebanori, wana awi yeng maikno uaneoba, nari babe ulbanne mikip nembaneo.
PHM 1:8 Ane sembe, na Yesus Kristusti wepto pogneogne wamnari, sangsanga “Andi unualulam,” senep.
PHM 1:9 “Unualulam,” senep aghana andi ulamlamne sembe nari babe “Nangkae,” aro o'ona sembamna, ane sembe nari anag molona agha Onesimus sembe mololangken. Na wene sabal wamna aghana, Yesus Kristus poneko sembe ulamnaba, nimiri salero na sae kaupto kop aeag tobongkimneongba wamna.
PHM 1:10 Na sae kaupto kop aeag ane wamnoag anea Onesimus pone sembe Yesusag wana saingniro seneraghoba, Onesimus ili saog tano. Ili saog tano ane sembe, wene nari name Onesimus sembe mologhenne nhon mololangken.
PHM 1:11 Samenag el Yesusag wana saingniro seneragna komag, el andi ae lomag awe toropne arukna sol malinge wamoba, el sembe teba'en senelamom. Undop aghana, wenena eldi babe Yesusag wana saingniro seneragnange wamlari, wanaag agha ulamlange neneri na sembe babe, an sembe babe wali yepsinep.
PHM 1:12 El neneko nari anag sae lipsene kom. Na Yesus yubu walinge ambatsinne sembe wene kop aeag tobongkiamneongag wamnari, “Na yepnenne nhon wamso,” senelamna. “Onesimus poneko nangkae Filemon lunumna wamso,” senelamna aghana, anam andi sae saekag lemna komag nari yubu karebanep kom. Na wana yengnena, anba andi “Uanun,” senenne agha undo tanep. Nari anag “Unualulam,” senun kom. Ane sembe el nimi na wanaag sirikne neneko anag samoro pogholaneba, “Andi ae lomag awe toplul, to, nen nanag pogholalulam, to,” aro anba, andi ualulam.
PHM 1:15 Wene abene Onesimus anap a'eptangto wamtom. Aghana, nari seneraglamnange nene, “Eldi samenag anag agha koloptaromba, Allahri yepsiori, Elba, 'Anag Onesimus samoro yaleba, a'un ya'ag ma'aptangto wamturom,' aro Allahri koloptaromne nene libo,” aro seneraglamna.
PHM 1:16 El samen an arukna wamo aghana, saombale sumeneko an arukna aghabog sembanep kom saog wamlaba, eldi Yesusag wana saingniro pibonge sembe “Naba nangkae walinge wanaagne,” sembamlulam. Elna na wanaag sirikne wamla aghana, an sembe nen ma'aro walinge wamla. Wene el wamlangena, an yepsirop nimi aghabog kom aghana, eldi Yesusag wana saingnia seneragtopne sembe anipsae taptopne wamloa saog wamla.
PHM 1:17 Nangkae, andi na sembe, “Nu Yesusag seneragtop nimiri awe nikne tolamnam,” sembamlam tanena, Onesimus nen anag samoro yaleba, na salero tomnhom saog uro, Onesimus yaleba toplulam.
PHM 1:18 Eldi anag loba uaori andinge kamna wamo agha laploa yao tanena, eldi kamna samoro tatkenne ni ane sembe nanag timbalul.
PHM 1:19 Andinge kamna elag wamlange nene sembe “Nari lumbanun,” aro na Paulus saeri mome ane anag palilamna. “Nari lumbanun,” aro salag palilangken aghana, nari yubu pere agha samenag Yesusag “Sikne” aro seneraghomdi, wene babe seneraglamlamdi, an nong ningki nanag tanepne sembe, “Hae tatnululam,” senun kom.
PHM 1:20 Ane sembe, Yesus Kristus nu talulamsildi, salelamsilne ponekoag agha, nu naro naipsae neneltalamapti, na yepto wana yeng nembanululam. “Onesimus yaleba, opna koma wali uro toplulam,” aro mololangken.
PHM 1:21 Nari mome ane palilamnange nene, “Nari wanaag babe kembaleri ualul,” sembamnari palilamna. Apna na el wamnangena, “Na molbaghen komne babe, nen phelekto walinge aghabog ualulam,” sembamna.
PHM 1:22 Nene sembe undo piamnarina, na kop aeag wamnange sembe, nangkabo, a'undi molona Allahag mololamlomba, sae lopneleri, andi aeag poa yanele sum eneko anag yanun. Ane sembe andi aeag na sembe ae lom nhon kolbamlulam.
PHM 1:23 Nungkae Epafras ponekori Yesus Kristus nu Talulamsildi Saelbamsilneag wanaag saingnia seneraglamlange sembe nimiri kop aeag tobongkibongpa, nanap nhon wamnam. Eldi babe a'unag “Nangkabo,” aro kiplamsil.
PHM 1:24 Na nangkabori awe nikne tolamap nimiri a'un sembe kiplamsiangnena: Markusap, Aristarkhusap, Demasap, Lukasapti kiplamsiap.
PHM 1:25 “Yesus Kristus nu Talulamsildi, Salelamsilne ponekori a'un nong ninkgi yepsilul,” aro kiplamsiap. Na Paulusti kiplamsindi, palilamna. Abenda.
JUD 1:1 Na Yudas, Yakobus ilipsae wamnange ponekori mome ane palilamna. Allahri samenag Yesus webogti, nu mog so'oag nimi sembe “Talulamsimendi, saelbamsilulam,” aro poghogpa, El Yesusti arukna wamnari, mome nene palilamna. Allahri samenag “Talulamsimendi, saelbamsululam,” aro wepto poghogne poneko sembe Kristus alamap. Yesus Kristus arukna wamnari, mome nene toro palilamnangena, Nuni Allahri o'ona sembamsildi wepto yopsio nimi, Yesus Kristus nenekori paiamsil nimi sembe mome toro palilamna.
JUD 1:2 Nuni Allahag a'un sembe molbarelamsinne, yareag sembamsileri, wana aingniro nenelamsileba, “A'un mamun nen ma'aro o'ona seneldalamlulom,” aro molbarelamsin.
JUD 1:3 Nangkabo nari “O'ona sembamsin nimi,” aro kiplamsin. Nari samenag seneraglamnori, “Nu mog so'oag nimiri malia ulamubunge agha Allahri a'unap nanap wepto talulamsilba, nunag uro yabionge sembe mome ane toro pipsisene,” senelamno. Senelamno aghana wenena na wanaag “A'un wembahisene,” senelamnange nenekori weplamnelba, mome aneag agha a'un wenero ambatsinuahin. Nuri samenag mali-malia ulamubunge agha Allahri nu sembe “Namabo taukang,” aro nu wepsiori, Eldi “Mog so'oag nimi taluro saelbamsululam,” aro weptopne Yesus poghogti, nu Yesusag seneragtop nimi talulamsil. Nu talulamsildi, “Namabori undo-undo unulamukang,” aro Yesus yubu sikne nene nu Elmabori saeag ya'ag uro piamsilba, sik senelamapti, yubu sikne nene yae paia ulamap. Nuri saeag piamsilba, wenero ambarelamsinnena, “Yubu sikne nene pelepto sik uro ambarelamsululom,” aro wenelamsin.
JUD 1:4 Nuri “Uro yabilul,” senero wamna komag agha nimi nenne nu nusamag tane yogholtalaong. Sin nimi taneko sindi seneragna sik mali uro Allahri senenne sunsunum uro seneragtop kom nimi. Nu mog so'oag nimiri mali-malia uropne sembe Allah wana waliri wailag nembahinep aghana, sindi seneraglamangne, “Mali-malia ulamebeba, Allahri mo wailag nembahilul ane sembe, mali-malia ulamukap,” aro seneraglamang. Wene aro seneraglamangdi, tingkim-tangkoma sinag bobo walelamsilne sembe “Agto yaboho,” aro peret aro nimi wa'alaong. Wa'alaongdi Yesus Kristus nu Talulamsildi Saelbamsilne El nhonogdi mog so'oag nimi Saelbamsilne poneko wa'epto naglamang. Sin unulamang nimi tane sembe Allahri tam ikinne sinag pimnepne samenag Allah yubu mome toro piropneag mome toro pibek.
JUD 1:5 Ni ambatnuahinne nene a'un ni elwamlom aghana, ekon tamunag aro nen sap sarikto el nenelamsinun. Nuni Allahri Israel nimi Mesir mog so'oag agha poa lambahaiog aghana, sin wameka anabiag agha Allahri lelamogne sembe sik senelamek kom nimina, Allah Eldamneri sin kom nembahiog.
JUD 1:6 Sin Israel nimi agha sik senelamek kom nimi kom nembahiogne saog uro, Allah arukna malaikat agha babe luknubahiog. Allahri samenag ni arukna malaikat sumbahiogti, “Saelbamlulom” aro sindi saeag awe pipsiog. Sindi saeag awe pipsiog aghana, sin anabiag agha malaikat arukna pogtopnena, phiro ulamekti, sindi ua urobag laploa piekne sembe Allahri sin luknubahiog. Luknubahiogti, Allahri sin loptanep kom haing agha ya'ag kauplopsiogti, inibin sogmondo arobag pipsiogpa, wamang. Sin wamangag aneko sin sae haing kaupto piamsil paghabog wamikpa, “Ni tam porog uro karebanun,” aro yalamle sumeneko sinag tam ikinne pelengkalul.
JUD 1:7 Tam ikinne pelengkahinepne sembe sunumna nen nhon wamla. Allahri nimi sumbahiog sumeneko, “Ela'angeap elkelap nong nhon sop nhon wamtukang,” aro kelabo nengabo sumbahiog. Wene aro sumbahiog aghana as kota Sodomap Gomoraap as kota peramag wamek nimiri Allahri senenne liagha irikna philamek. Sindi ulamekne sinag bobonge walelamsiogne sembe “Agto yaboho,” aro salik-malik uro kelabo, nengabo salelamsiekti, kabuniap-kabuniap, kelaboap-kelaboap kel nenge saog neneptangka waleltalamek. Sindi Allah yubu irikto philamekne sembe Allahri auk pog pelengero opsiogpa, nimi etneri sin opsiogne sembe el talamik tanena, “Allah yubu ingisaptop nimi sembe auk tebanep komneag seklero wamnebag pipsilul,” aro el uro senaraglamukang.
JUD 1:8 Sin samenag Allah yubu semban koma “Undo unuhane,” aro seneragto ulamek saog uro, nu nusamag yogholtalaong nimi aneko lenda polan uro malamangdi, mali-malia ulobiagha sindam nimi nongag sembenga piptangkamloa saog ulamang. Sin lenda polan uro malamangdi, haing irop nimi aghana mog so'oag nimi Saelba Uhiropne poneko wa'epto naglamangdi, Eldi arukna imag wamangne babe santilipto mombolag nenelamang.
JUD 1:9 Allah arukna imag wamangne sembe san tilipto mombolag nenelamang aghana, Allah arukna malaikat sikindo nubunge Mikhael sol walinge malaikat ponekori phia sikini nubungeap yubu tam kareplamdekti, leldalamdekneag agha phia imag wamangne sembe Mikhael ponekori metmereng aro san tiliplamog kom. Allah arukna malaikat sikindo Mikhaelap phia sikini nubungeapti lel dalamdeknena,”Yahudi nimi nubunge Musa nong teptoba taluro tobukap,” aro uldalamdeka sembe babe Mikhael eldamneri phia sikini ponekoag san tilipna koma tam ikinne pelengero karepto lebog kom. Mikhaeldi phia sikini san tilipto waban koma eldi lebognena, “Nani Allahri wabaghelul,” seog.
JUD 1:10 Undop aghana sin “Unuahabe,” aro wanaag seneragtop nimi tanekori mikipne ilirop komne sembe ekondi, san tiliplamsiang. Sin nimi tanekori ulamangnena, phamdi wanaag seneragtop komne saog uro ulamang. Seneragna koma ulamang aghana, sindi wanaag mo olog el uro wamangneag agha ulamangne neneri sindam nimi loba neneltalamang.
JUD 1:11 Sinag uro yabinepne sembe “Yaghe” sukang. Sindi ul palamangne Kain ilipsae obogne neneko nelepto ul palamang. Sindi ulamangne, Bileam nenekori samenag Allah Elmabo luknuro orolena ambatsiogne saog uro sin nimi tanekori babe “Kal ma'al saelbahabe,” aro wana yeng uro malia ulamang. Samenag Korah nenekori “Allah yubu Musa pere agha ambatsionge ka'ebanun kom,” seogpa, Allahri Korah elkaboap opsiog saog uro sin nimi taneko babe Allahri opsilul.
JUD 1:12 Sin nimi taneko a'unap ma'aldalamlomne kembiag agha kikleka malinge saog wamla. A'un Yesusag wana saingnia seneragtop nimiri kwaneng nhon telamlomne nimi o'ona senehinneag agha kwaneng tareldalamlom. Kwaneng tareldalamlomneag, sindi a'unap ma'aldalamangdi, nimi tebatto yepsinep aghana, nimi yepsin koma ali semban koma sindam nimi agha seneraghal dalamangdi, aboap uro kwaneng telamang. Sin ua ulamangnena, toa polamlaba, nimiri mag telul sembanep aghana khaori toa pabiropba, mag telamla komne saog uro wamang. Sin nimi taneko kal agha yarengap telban kal aneko ultangtopne saog wamangdi, kal wana mauropne yingkirop li aghana kal wana maurop komne saog uro wamangdi, teptop nimi saog wamang.
JUD 1:13 Mag lautti nimi tihiniba saog uro ku'ulahepto yalamlari kamola makel alamla ane saog uro sin nimi tanekori ulamangne babe kamola maklamlari, alinge ulamang. Sin nimi taneko imprea tapto nhonag ikamna koma uropne saog wamangba, Allahri sin wamnebag inibin sirikag ya'ag wamnebag weamla.
JUD 1:14 Adamdi mangkahiogne lik-lik nimi likna saekne nenekoag agha Henokh likto yabiog. Henokh likto yabiogpa, Allahri yubu Henokh wanaag pibogne sunsunum uro Henokh nenekori nimi tanekoag uro yabinepne sembe samenag yubu ambatto pibog. Henokhti yubu lero pibognena, “Kembamlulom, Nia Mangkina Saelba Uahiropne ponekoap Eldi arukna malaikat sol walinge teng-teng neap yaikti,
JUD 1:15 nimi ni sembe 'Tam karebanun,' aro yaukang. Nu Saelba Uahiropne ponekoap Eldi arukna imagnang malaikatap kulukulaikpa, mog so'oag nimiri Allahri senenne sembe karongdi, wana malingeag agha ulamang nimi ni wembahileri, tam karebalul. Sindi Allahri senenne semban koma malia ulamangneap, Nia Mangkina Saelba Uahiropne poneko san tilipto nimiri pamag agha lanaro sua'el lelamangneap nimiri whingag lag nembaleri, tam karebalul,” aro Henokhti undo uro yabinepne sembe yubu lero pibog.
JUD 1:16 Nimi tanekori sop-sop paksua yabiro warop yubu lelamangdi, nimi orange sembe mali alamsiang. Sin ua ulamangnena sindi wanari “Uahabe” senenneag agha seneraglamangdi, yongeap malingeap agha ulamang. Nimi tanekori sindi yubu miptangtopne agha lelamangdi, “Tup tananne nunag tatsiseng” aro nimi orangeag yubu lilim walinge agha nimiri wana toro lelamang.
JUD 1:17 Aghana nangkabo, nari o'ona sembamsin nimi, a'un el uro wamlulomnena Allahri weptopne Yesus Kristus nu Taluro Saelbamsilne poneko Eldamneri wepto pogsiog nangdi ambatsiek yubu amik uro yabinepne sembe ekon taheng kom.
JUD 1:18 Sindi a'un samenag ambarelamsiekti, “Amik mog so'o wamapne kom tanebag, nimi yaukangnena, a'undi Yesusag seneragtopne sembe pam kwerekto og sohirop nimi yaukang. Sin yaik nimi Allahri senenne semban koma sinba sindi wanari 'Uahabe,' aro seneragtopne sunsunum uro ulamukang.
JUD 1:19 Sin nimi tanekori ulamikneri nimi teleklamikti, a'un Yesusag seneragtop nimi wana nhon wamlomne agha a'epto nenelamsukang. Sin nimi tanekoag Allah Yame walinge wamsil kom aghana, seneragna koma sindi wanaag mo wamlange agha ulamang.
JUD 1:20 Aghana nangkabo, nari o'ona sembamsin nimi, a'un mamun yeptangto amoptangkapmundi, Yesus Allahri wepto poghogne ponekoag wana saingnia seneraglamlulom. A'undi Allahag molona mololapmundi, Allah Eldamne Yame Walingeri yubu a'undi wanaag piplenge sunsunum uro mololapmundi, Yesusag wana saingnia seneraglamlulom.
JUD 1:21 Nuni Allahri nu o'ona sembamsilne sembe wanaag seneraglapmundi, yae piptangkamlulom. A'undi nang-nangkamlulomnena, “Allahri weptopne Yesus Kristus nu Saelbamsilne ponekori nu yareag senelamsildi, nu Elap nhon ya'ag kamag uro wamnebag pabahilul,” aro nang-nangkamlulom. Undo nang-nangkapmundi, Allahri nu o'ona senenneag agha yae piptangkamlulom.
JUD 1:22 “Yubu nene sik to, kom to,” aro wana tai pailangkang tau pailangkang ulamang nimiag a'undi yareag agha ualulom.
JUD 1:23 Ora nimi sembe “Sindi malia ulamangne sembe aukti tehileag,” aro taluro toro lambitsiro ambarelamsululom. Nimi ora nimiri mali-malia along ulamangne sembe, “Sindi sa'a-sa'a salelamangne sindi loba nembahinep,” aro log sembamlulom. Ulamangne sembe logti, karong sembalulom aghana, sin sembe yareag senelamsimundi, ulamsululom.
JUD 1:24 Wene nu Allah omeklamaptina, El aghabog nu opsinebag agha taulba uahiropne omeklamap. Allahri a'un yae piamsileri, a'un eba timbanebag agha taulbahilul. Eldi wepto poghogne Yesus nu taluro saelbamsilne pere agha malinge nuri wanaag wamlange a'elbahileri, nu wana yeng nenlamsilul. Undo unualeri, nu poa Eldamne imang wareropne whingag nu sekitsileba, nimi nhondi babe a'unag tam pipsinep kom. Eldi wepto poghogne Yesus Kristus nu taluro saelbamsilne poneko pere agha wali nenelamsilne sembe, nuri Allah omekto lelamaptina, “Yum-yum samenag agha ot El aghabog imang yagne, nubu wali sirikne, mikip phelektopne, nia mangkina salehiropne wamlari, ya'ag uro wamlul,” aro omeklamap. Sikne aghabog lebap. Abenda.
