MAT 1:1 येसु ख्रीस अब्राहाम स़ोनो दाऊदनी निथोनी ज़ हुके। नोराए यामिनर आवर ज़,
MAT 1:2 अब्राहामए ओज़ा इसहाक, इसहाकए ओज़ा याकूब, याकूबए ओज़ा यहूदा, यहूदाए छुत ओदाज्‍यु भाइर मनी याल्‍यो।
MAT 1:3 यहूदाए ओज्‍या तामार बातनी दुई भाइ ताकिनी। तोबोए उमिन फारेस, तोबोए उमिन जाहेर। फारेसए ओज़ा हेस्रोन, हेस्रोनए ओज़ा आराम,
MAT 1:4 आरामए ओज़ा अम्‍मीनादाब, अम्‍मीनादाबए ओज़ा नहसोन, नहसोनए ओज़ा सल्‍मोन,
MAT 1:5 सल्‍मोनए फरी ओज्‍या राहाबनी बोअजलाई दैक्‍यो। बोअजए मनी ओज्‍या रूथनी ओबेदलाई दैक्‍यो। ओबेदए ओज़ा यिसै,
MAT 1:6 यिसैए ओज़ा दाऊद राजा। दाऊदए उरियाए ओज्‍या बातनी सोलोमनलाई दैक्‍यो।
MAT 1:7 सोलोमनए ओज़ा रहबाम, रहबामए ओज़ा अबिया, अबियाए ओज़ा आसा,
MAT 1:8 आसाए ओज़ा यहोसापात, यहोसापातए ओज़ा यहोराम, यहोरामए ओज़ा उज्‍जिया,
MAT 1:9 उज्‍जियाए ओज़ा योताम, योतामए ओज़ा आहाज, आहाजए ओज़ा हिजकिया,
MAT 1:10 हिजकियाए ओज़ा मनस्‍से, मनस्‍सेए ओज़ा अमोन, अमोनए ओज़ा योसिया,
MAT 1:11 योसियाए ओज़ा यकोनियास। यकोनियासए छुत ओभाइर मनी याल्‍यो। नो बेलाक ज़ इस्राएलीरालाई बेबिलोनदा क्‍योःद यारालाँकेर।
MAT 1:12 बेबिलोनल ज़ यकोनियासए ओज़ा सालतिएल जर्मिके। नकिन सालतिएलए ओज़ा यरूबाबेल,
MAT 1:13 यरूबाबेलए ओज़ा अबिउद, अबिउदए ओज़ा एल्‍याकीम, एल्‍याकीमए ओज़ा आजोर,
MAT 1:14 आजोरए ओज़ा सादोक, सादोकए ओज़ा आखिम, आखिमए ओज़ा एलिउद,
MAT 1:15 एलिउदए ओज़ा एलाजार, एलाजारए ओज़ा मत्तान, मत्तानए ओज़ा याकूब,
MAT 1:16 याकूबए ओज़ा योसेफ, योसेफए ओज्‍या मरियमनी ज़ येसु जर्मिके। नोलाई ज़ ख्रीस है दोज़्‍यार।
MAT 1:17 है जैद अब्राहामकिन दाऊद राजा पै चौध प़िरी ताके। दाऊद राजाकिन बेबिलोनदा क्‍योःद यारालाँवक पै ब चौध प़िरी ज़ ताके। नकिन ख्रीस ओजर्मिउक पै ब चौध प़िरी ज़ ताके।
MAT 1:18 येसु ख्रीस उजर्मिउ इतावनी ज़ — येसुए ओआमा मरियमलाई भर्ज़ा योसेफत ऩिद यानैज़्‍याव। नोनी बिह्‍या निमादोद ज़ मरियम परमेस्‍वरए छैंव उपुरूसनी ज़ा दैन्‍या ताद उलिज़्‍याव।
MAT 1:19 नो मरियमलाई ऩिज़्‍याव योसेफ धर्मी मिँ ओतावए मरियम ज़ा दैन्‍या ताद उलिज़्‍याव सैंद ओपाहा झाःद मायाद अलगज़ा ऱासो ओपैंज़्‍याव।
MAT 1:20 निताव जैव ओपैंज़्‍याक ज़ तछा उमँल परमेस्‍वरए ओचाकर्‍या हुद, “नँ दाऊदए ओथोलाव योसेफ, मरियमलाई रैन्‍या ताछे·नी। नो उफूलाव ज़ा ते परमेस्‍वरए छैंव उपुरूसनिकाव ची।
MAT 1:21 नो ओज़ा खेपा तारिज़्‍या। नोए उमिन ‘येसु’ नैदियो, काराव ल्‍यो ताकिन नोए उमींरालाई यादोव पापनी याऱास्‍रिज़्‍याव।”
MAT 1:22 आव भरी परमेस्‍वरए अगमबक्तालाई सरो उपरींव मिताव ज़ यो·के। नोए अइ लिद सर्द ओनैज़्‍याव,
MAT 1:23 “तोबो कन्‍या ल़ुज़ा गर्बवती ताद खेपा ज़ा तोबो दैरिज़्‍याव। होए उमिन इम्‍मानुएल नैद्यान्‍या लेर।” होए ओअर्थ — परमेस्‍वर गेस ज़ लिज़्‍या।
MAT 1:24 है जैद योसेफ सैंसिद परमेस्‍वरए ओचाकर्‍याए है ओदोव मिताव ओज्‍या मरियमलाई रैक्‍यो।
MAT 1:25 खाली मरियमए ज़ा ओमादैवा पै निक्‍याँ मासदैकिनी। ओदैवत फरी नो भाउज़ाए उमिन येसु नैदिक्‍यो।
MAT 2:1 राजा हेरोदए ओपालाक येसु यहूदिया खन्‍दलाव बेथलेहेम नाखारल ज़ जर्मिके। उजर्मिउ छींनी जैंसीर पुर्ब त॰नी यरूसलेमल हुद,
MAT 2:2 “जर्मिउ यहूदीराए याराजा काङ्क उलिज़्‍याव? नोलाई सरेस्‍न्‍या सोरो पुर्बल गेरँःके। है जैद नोलाई धो गेदोया लिद हुद गेले,” है यारादोकेर।
MAT 2:3 नो पाँ राजा हेरोदए थैद उयुँर आँचा पाँचा ताके। हिताव ज़ यरूसलेमलाव लिज़्‍याव भरी ब राजाए उयुँ स्‍यासो ज़ ताके।
MAT 2:4 है जैद राजा हेरोदए ओदेसलाव लिज़्‍याव घेप्‍पा घेप्‍पा पुजारीर स़ोनो सास्‍त्री भरी ब दुप्‍द, “नो धर्मसास्‍त्रलाव सर्सिउ ख्रीस जर्मिन्‍या पो काङ्क उलिज़्‍याव?” है लिद यासुधिक्‍यो।
MAT 2:5 नोराए, “यहूदियालाव बेथलेहेमल ज़ ताव परिन्‍या। अगमबक्ताए ब अइ लिद सर्द नैव,
MAT 2:6 ‘अ यहूदिया खन्‍दलाव बेथलेहेम, नँ यहूदिया भरिलाव घेप्‍पारानी नँ नमिन ज़िम्‍ज़ा माले। नँनी ज़ तोबो याङ़ैताव हुद ङामीं इस्राएलीराए यार्गे गावला तान्‍या ले।’ ”
MAT 2:7 राजा हेरोदए आव भरी थैद जैंसीरालाई अलगज़ा खुल्‍द, “नो सोरो खाक जेरँःव?” है दाद थ·रैद,
MAT 2:8 नोरालाई, “बाचिकेदा, नो जर्मिउ भाउज़ालाई बनै चावस खिम्च्‍यो। जेदैवत ङालाई मनी है दाव ताके। ङा ब बाद नोलाई धो ङादोरिज़्‍या,” है दाद बेथलेहेमदा यापरींक्‍यो।
MAT 2:9 नोर राजाए ओपाँ भैंःद याबाज़्‍याक फरी नो पुर्बलाव यारँःव सोरो याङ़ा याङ़ा बाद नो भाउज़ा जर्मिद उलिज़्‍याव पोक ज़ अदिके।
MAT 2:10 नो सोरोलाई रँःद बनै रेंए रेंए,
MAT 2:11 नो झ़िमल ज़ पसिकेर। नल नो भाउज़ालाई ओआमा मरियमस उलिज़्‍याव दैद ओङ़ाक फुलुप्‍सिद धो दाद यासुन्‍दुसर फैद सुनर धुपर बनै चाव चाव यासी ङरोर ब चरैःकेर।
MAT 2:12 हाः बेलाक ज़ तछा यामँल परमेस्‍वरए, “जे हेरोदए ल्‍योदा फरी ओल्‍द ताबाच्‍यो,” है ओरादोज़्‍याव रँःकेर। है जैद नोर हेरोदए ओल्‍योलाव घ्याँ माबाद तँनिकाव घ्याँ यादेसदा ओल्‍द बाकेर।
MAT 2:13 नो जैंसीर याबाव छींनी तछा योसेफए उमँल मनी परमेस्‍वरए ओचाकर्‍या हुद, “नँ सोद हतप्‍त ज़ भाउज़ा स़ोनो ओआमालाई लाँद इजिपदा धोंःचिके। फरी ‘हुचिके’ है ङामादाचिवा पै होङ ज़ लिच्‍यो। हेरोद राजाए नो भाउज़ालाई खिम्‍द सैःव पैंज़्‍याव,” है दोक्‍यो।
MAT 2:14 हाःत ज़ योसेफ सैंसिद रील ज़ नो भाउज़ालाई ओआमास इजिपदा निलाँक्‍यो।
MAT 2:15 हेरोद ओमासिवा पै होङ ज़ लिकेर। है जैद नत ज़ परमेस्‍वरए अगमबक्तालाई सरो उपरींव पाँ यो·के। नोए ओसरो आव ज़, “ङाज़ा इजिपनी खुल्‍द रैद ङानै।”
MAT 2:16 नो जैंसीर याबाव छींनी, ‘जैंसीराए ते याछकैनाव ची ओल्‍यो’ लिन्‍या सैंद हेरोद बनै रसिद बेथलेहेम स़ोनो नजीलाव खेपा ताद लिज़्‍याव भाउज़ार ऩेरिमकिन मेदाङाव भरी ओपो·स ज़ सैःव यापरींक्‍यो। नो ओरासैःव, जैंसीराए ङ़ादा सोरो यारँःव गोइँनी ज़।
MAT 2:17 नत ज़ यर्मिया अगमबक्ताए ओसरो पाँ यो·के। नोए ओसरो आव ज़,
MAT 2:18 “रामाल चिर्लनी बिर्ल थास्‍ज़्‍या। राहेल ओज़ाराए जूँनी घरो ज़ लिज़्‍या। प़ाइँ यासिधुवए सभैंःद ब मासभैंःधुर।”
MAT 2:19 हेरोद राजा उसिउ छींनी योसेफ इजिपल उलिज़्‍याक ज़ तछा उमँल परमेस्‍वरए ओचाकर्‍या फरी हुद,
MAT 2:20 “नँ सोद भाउज़ालाई ओआमास लाँद इस्राएलीराए जेपोदा ओल्‍द बाचिके। भाउज़ालाई सैःव पैंज़्‍याव ओल ज़ सिधुके,” है ओदोव प़ाइँना ज़,
MAT 2:21 योसेफ सैंसिद भाउज़ालाई ओआमास इस्राएल देसदा ज़ निलाँक्‍यो।
MAT 2:22 होङ ओकेसोत हेरोदए ओपोल ओज़ा अर्खिलाउसए यहूदीराए यादेस ओचलैज़्‍याव सैंद योसेफ नल लिन्‍या ओछे·ज़्‍याव। है जैद तछा उमँल, ‘गालील खन्‍दल बाद तोबोक लिन्‍के’ लिद परमेस्‍वरए है ओदोव रँःक्‍यो।
MAT 2:23 है जैद गालीललाव नासरत यादोज़्‍याव सहरल लिनाकेर। नो भरी ब अगमबक्ताराए यासरो मिताव ज़ यो·के। नो सर्सिउ आव ज़, “नोलाई नासरतलाव है दान्‍या लेर।”
MAT 3:1 नकिन तछा ऱील सछैंज़्‍याव यूहन्‍ना यहूदियालाव बनल अइ लिद यासथैहुक्‍यो,
MAT 3:2 “स्‍वर्गताव राज्‍या सो हुरिके। जेपापलाई ऱास्‍द परमेस्‍वरए ल्‍योदा जेयुँ फर्कैचिके।”
MAT 3:3 आव ऱील सछैंज़्‍याव यूहन्‍नाए उजूँनी यसैया अगमबक्ताए अइ लिद सर्द ओनैज़्‍याव, “तोबोए ओर्गा बनल अइ लिद उक़िज़्याव थास्‍रिज़्‍या, ‘हुरिज़्‍याव प्रभुए ओयेम बनैद गाँत्‍या गुँतीलाई सदाँचिके।’ ”
MAT 3:4 यूहन्‍ना ऊँतए ओसनए क्‍वा ओक्‍वाइसिज़्‍याव, ओवाँःत स्‍यालोए वाँःफो ओपो·सिज़्‍याव। नोए स॰ल॰र कोस्‍योर ओराकैज़्‍याव, ज़ेंराए राप उज़्‍युज़्‍याव।
MAT 3:5 नोए ओल्‍योक यरूसलेमलावर, यहूदिया खन्‍दलावर स़ोनो यर्दन भै जीदाङावर ओपो·स ज़ ओपाँ थैना याहुज़्‍याव।
MAT 3:6 नोराए सु सु यादोव यापाप यूहन्‍नालाई है यादोक ते यूहन्‍नाए यर्दन भैल यासछैंक्‍यो।
MAT 3:7 फरिसीर स़ोनो सदुकीर यासछैंसिहुज़्‍याव रँःद यूहन्‍नाए नोरालाई, “ए घुलए ओथोर, जे परमेस्‍वरए उरिसनी धोंःन्‍या सुए है ओदाचिउ?
MAT 3:8 जे साचो ज़ परमेस्‍वरए ल्‍योदा जेयुँ फर्कैन्‍या ल्‍यो ताकिन साचो हो मिताव य़ेन ब दाव ताके।
MAT 3:9 जे फरी, ‘गेपुर्खा अब्राहामनी ज़ परमेस्‍वरए ओज़ार ताद गेले,’ है जेमालिदी ब ताए। ङा साचो है ङादाचिज़्‍या, परमेस्‍वरए सींर लुँरानी तादी ब अब्राहामए ओथोर याजैधुव।
MAT 3:10 किताव तोबो मिँए चाव सै माझाःज़्‍याव सींर धलैद मेंःल ओराख्‍याज़्‍याव, हिताव ज़ परमेस्‍वरए ब धलैन्‍याए जूँनी ओरोवा सींए ओजराक झाःद नैव।
MAT 3:11 ङा ते परमेस्‍वरए ल्‍योदा जेयुँ जेफर्कैवनी ऱील ङासछैंचिज़्‍या। खाली ङा ङाछींनी ङाकिन ओसक्ती ल्‍यो तोबो हुरिज़्‍या। ङा होए ओपोला हाइद्यान्‍या स्‍यासो ब ङामाले। होए परमेस्‍वरए छैंव उपुरूस स़ोनो मेंःनी सछैंचिरिज़्‍याव।
MAT 3:12 होए गेदा भरी नाङलील च्‍याप्‍द चाव भरी धन्‍सारल झाःद पुल भरिलाई खर्क ज़ माजिप्‍तिन्‍या मेंःल म़ुन्‍या ले,” है लिद यासथैक्‍यो।
MAT 3:13 हाःत ज़ येसु ब गालीलनी हुद यर्दन भैल यूहन्‍नाए ल्‍योक सछैंसिहुके।
MAT 3:14 यूहन्‍नाए येसुलाई भैंःद मायाद, “ङानी माःक, बुरू ङा ची नँनी सछैंसिउ परिन्‍या,” है ओदोक ते,
MAT 3:15 येसुए, “आख पै नँनी ज़ जैव ताके। परमेस्‍वरए ओपैंज़्याव मिताव प़ाइँ य़ेन गिन सयो·द्याव ज़ परिके,” है ओदोक ते, यूहन्‍ना भैंःके।
MAT 3:16 येसु सछैंसिद ऱीनी उपुलुसो प़ाइँना ज़ नम फैसिद परमेस्‍वरए उपुरूस कुइतम मिताव भुर्हुद ओक्‍याँत उच़ुसिज़्याव रँःक्‍यो।
MAT 3:17 हाःत ज़ नमतिन तोबो गा अइ लिद थास्‍के, “आव ङायुँलाव ङाज़ा ज़। आवलाई रँःद ङायुँ होलाँ ताज़्‍या,” है लिके।
MAT 4:1 येसु ननी पुलुस्‍द ओबाज़्‍याक ‘येसुलाई सैतानए घजाँचिउक’ लिद परमेस्‍वरए छैंव उपुरूसए तोबो साइँसुइँव पोङ लाँक्‍यो।
MAT 4:2 नल चालीस दिन, चालीस रात भरी काता ज़ माज़्‍याद ओल्‍योए ओकरेए माधुनाक्‍यो।
MAT 4:3 हाःत ज़ सैतानए येसुलाई झुकैन्‍याए जूँनी ओल्‍योक हुद, “नँ साचो ज़ परमेस्‍वरए ओज़ा ताकिन आव लुँरालाई भरेस याजैके,” है ओदोक ते,
MAT 4:4 येसुए, “धर्मसास्‍त्रल अइ लिद सर्सिउ लिज़्‍या, ‘मिँलाई ज़्‍यावए वाज़ माङाव। ङाज़्‍याव परमेस्‍वरए ओयाःनी पुलुस्‍ज़्याव पाँए ची,’ ” है दोक्‍यो।
MAT 4:5 नकिन सैतानए येसुलाई यरूसलेमल लाँद ध्‍यान झ़िमए उतुपात बैद,
MAT 4:6 “नँ साचो ज़ परमेस्‍वरए ओज़ा ताकिन आतिनी मेल ज़ो·निके। धर्मसास्‍त्रल अइ लिद सर्सिउ लिज़्‍या, ‘नँलाई बाँचैन्‍याए जूँनी परमेस्‍वरए ओचाकर्‍यार परींदींरिज़्‍याव। नोराए नँलाई छींद नखँ लुँत बजारिउ यान्‍या मालेर,’ ” है दोक्‍यो।
MAT 4:7 नकिन येसुए सैतानलाई, “धर्मसास्‍त्रल आव मनी सर्सिउ लिज़्‍या, ‘नप्रभु परमेस्‍वरलाई जाँचिन्‍या माताए,’ ” है दोक्‍यो।
MAT 4:8 फरी सैतानए येसुलाई तोबो झेंःव गोंत लाँद संसारलाव राज्‍या भरी ज़गै मगैवस सतैंद्याद,
MAT 4:9 “नँ ङाखँत फुलुप्‍सिद धो नदाँकिन नो नरँःव भरी नमीं ज़ जैद ङाईंरिज़्‍या,” है दोक्‍यो।
MAT 4:10 नाःत ज़ येसुए, “ए सैतान, ङानी पुलुस्‍द बान्‍के। धर्मसास्‍त्रल इताव सर्सिउ लिज़्‍या, ‘नप्रभु परमेस्‍वरए ओङ़ाक फुलुप्‍सिद होए ओसेवा वाज़ दान्‍या ताए,’ ” है ओदोक ते,
MAT 4:11 सैतानए येसुलाई ऱास्‍द बाके। हाःत ज़ परमेस्‍वरए ओचाकर्‍यार हुद येसुए ओसेवा दोकेर।
MAT 4:12 हो बेलाक ज़ ‘ऱील सछैंज़्‍याव यूहन्‍नालाई क्‍योःकेर दी’ लिन्‍या येसुए थैद ननी हाइसिद गालीलदा बाके।
MAT 4:13 है जैद येसु उलिज़्‍याव नासरतलाई ऱास्‍द जबूलून स़ोनो नप्‍तालीनी निथोराए यापो लापकाव, गालील दह छ्योकाव कफर्नहुम सहरल लिनाके।
MAT 4:14 नो भरी यसैया अगमबक्ताए ओसरो मिताव ज़ यो·के। होए ओसरो आव ज़,
MAT 4:15 “यर्दन भै होफताव दह छ्यो जीकाव जबूलून स़ोनो नप्‍तालीनी निपो लापकाव गालील खन्‍दलाव चुम चुमोल लिज़्‍याव छुत जातलावराए बनै घ्‍योःव ज़गै रँःद नैर। सिन्‍या सजाल परिउरालाई नम ज़राँः ज़राँः उसँनाव मिताव ताद ले।”
MAT 4:17 है जैद येसु गालीलल ओबावकिन ज़ परमेस्‍वरए ओपाँ अइ लिद यासथैक्‍यो, “स्‍वर्गताव राज्‍या सो हुरिके। है जैद जेपापलाई ऱास्‍द परमेस्‍वरए ल्‍योदा जेयुँ फर्कैचिके।”
MAT 4:18 तछा येसु गालील दह छ्यो छ्यो ओबाज़्‍याक पत्रुस है यादोज़्‍याव सिमोन स़ोनो ओभाइ अन्‍द्रियासनी दहल जाल निरैःसिज़्‍याव निरँःक्‍यो। नोनी ङाँःर क्‍योःज़्‍यावनी निल्‍यो।
MAT 4:19 येसुए नोनिलाई, “ङास हुचिन्‍के, जिनलाई ङाँःर जिन्‍राखिम्‍ज़्‍याव मिताव मिँर खिम्‍न्‍या ङाजैचिन्‍रिज़्‍या,” है उनिदोव प़ाइँना ज़,
MAT 4:20 नोनी निजालर ख्‍यानैद ओलस ज़ बाकिनी।
MAT 4:21 जाँ होकसै याबावत फरी जब्‍दियाए ओज़ानी ओदाज्‍यु याकूब स़ोनो ओभाइ यूहन्‍नानी निबाबु जब्‍दियास दोङ्गात च़ुसिद जालर यारातालिज़्‍याव रँःद नोनिलाई मनी “ङास हुचिन्‍के,” लिद निखुल्‍क्‍यो।
MAT 4:22 नोनी बेहार ज़ निबाबुलाई दोङ्गात ख्‍यानैद येसुस बाकिनी।
MAT 4:23 येसु गालील खन्‍द भरिल यहूदीराए धर्मसास्‍त्र झ़िम झ़िमक बाद ‘स्‍वर्गताव राज्‍या हुरिके’ लिन्‍या चाव था सथैद भाँती भाँतिलाव रोगनी याजोरो हुवरालाई ब ओरासगराँज़्‍याव।
MAT 4:24 है जैद ‘येसुए निताव य़ेन दोक्‍यो दी’ लिन्‍या सिरिया खन्‍द भरी फींजिद याजोरो हुवर, याक्‍याँत माचाव पुरूस ल्‍योर, पुल्‍ज़्‍यावर स़ोनो याक्‍याँ सिउरालाई मनी येसुए ल्‍योक यारारैक सगराँद याएक्‍यो।
MAT 4:25 नो य़ेनर थैद गालील खन्‍दलावर, देकापोलिसलावर, यरूसलेमलावर, यहूदिया खन्‍दलावर स़ोनो यर्दन भै होफताव जीलावर बनै माहोल्‍या ज़ येसुए उछीं उछीं याबाज़्‍याव।
MAT 5:1 येसुए नो माहोल्‍यारालाई रँःद तोबो दाँदात बाद उच़ुसिक उछींत हुज़्‍याव भरी ब ओल्‍योक ज़ हुकेर।
MAT 5:2 हाःत ज़ येसुए अइ लिद यासथैक्‍यो,
MAT 5:3 “धन्‍या, यायुँल मासघ्‍योःसिज़्‍यावर, स्‍वर्गताव राज्‍या नितावराए जूँनी ज़ लिज़्‍या।
MAT 5:4 धन्‍या, आज्‍याल सोगोल लिज़्‍यावर, यायुँ होलाँ तान्‍या ले।
MAT 5:5 धन्‍या, परमेस्‍वरए ओक्‍याँत ख्‍यासिद यातहस लिज़्‍यावर, आव मानुवाताव हक दैन्‍या लेर।
MAT 5:6 धन्‍या, परमेस्‍वरए ओपैंज़्‍याव मिताव सयो·न्‍याए जूँनी यास॰ तरा चींज़्‍यावर, यापैंज़्‍याव भरी यो·न्‍या ले।
MAT 5:7 धन्‍या, छुतए ल्‍योदा यायुँ नाज़्‍यावर, याल्‍योदा मनी परमेस्‍वरए उयुँ नान्‍या ले।
MAT 5:8 धन्‍या, आज्‍याल यायुँ छैंवर, परमेस्‍वरलाई रँःन्‍या लेर।
MAT 5:9 धन्‍या, माखैज़्‍यावरालाई सखैज़्‍यावर, यामिन परमेस्‍वरए ओज़ाल गनिसिन्‍या ले।
MAT 5:10 धन्‍या, परमेस्‍वरए उयुँलाव मिताव य़ेनत याखिरी पसिद दुखर दैज़्‍यावर, स्‍वर्गताव राज्‍या नोराए जूँनी ज़ लिज़्‍या।
MAT 5:11 “ङा ङामिनत जेलाई अऩाकलाव पाँर ससैद, जेखिरी पसिद, उल्‍ली गिल्‍ली दाद जेमिन बले·द यायाचिक धन्‍याकावर ज़ जेताज़्या।
MAT 5:12 जेयुँर मासतेद रेंच्‍यो, काराव ल्‍यो ताकिन स्‍वर्गताव घ्‍योःव इनाम दैन्‍या जेले। अगमबक्ता भरिरालाई मनी जेकिन ङ़ादा निताव दुखर याव ज़ यारानैज़्याव।”
MAT 5:13 “जे आव मानुवात सापी मितावर जेलिज़्‍या। सापीए ओदार ओमालिकिन नोलाई कै जैद ची ओदार ल्‍यो जैन्‍या? है जैद नो काम मालागिउ ओतावए नोलाई ख्‍याद मिँराए छिल्‍सी ऩिन्‍या वाज़ ताज़्‍या।
MAT 5:14 “जे आव मानुवाताव ज़गै स्‍यासो ब जेलिज़्‍या। झेंःवताव जैसिउ सहर ब माम़ोंसिए।
MAT 5:15 स़ोनो मिँराए ल़ोसै तैंःद जाए माकपर, दिउ बाल्‍न्‍यात ची झाःर। हुनी वाज़ झ़िमल लिज़्‍यावरालाई पलाँ ताज़्‍या।
MAT 5:16 हिताव ज़ जे मनी मिँराए याङ़ाक जेज़गै ओरैंःक। हो ताकिन ची चाव जेय़ेन रँःद स्‍वर्गताव जेबाबुए उमिन ब सघ्‍योःद्यान्‍या लेर।”
MAT 5:17 “जे ङालाई ‘मोसाए ओकानुन स़ोनो अगमबक्ताराए याय़ेन सम़ैना उहुव’ है तालिच्‍यो। सम़ैना माःक, सयो·ना ङाहुव ची।
MAT 5:18 ङा साचो है ङादाचिज़्‍या, आव नाम नम ओमाखेमा पै, धर्मसास्‍त्रलाव सर्सिउ पाँ ओमायो·वा पै, तोबो ब खेर बान्‍या माले।
MAT 5:19 है जैद जोए धर्मसास्‍त्रलाव पाँ तकेज़ा तादी ब ओबले·किन स़ोनो छुतलाई तँनी ओपैकिन नोए उमिन स्‍वर्गताव राज्‍याल प़ाइँरानी ज़िम्‍ज़ा तान्‍या ले। फरी नो भरी ओल माबिरैद ओदोकिन छुतलाई ब दान्‍या ओपैकिन नोए उमिन स्‍वर्गताव राज्‍याल घ्‍योःव ज़ तान्‍या ले।
MAT 5:20 है जैद ज़ ङा साचो है ङादाचिज़्‍या, सास्‍त्रीर स़ोनो फरिसीराए यादोज़्‍याव धर्मकिन जे कोसै जेमादोकिन, स्‍वर्गताव राज्‍याल पसिउ दैन्‍या जेमाले।”
MAT 5:21 “जे ब थैद जेनैज़्‍याखेहो, भाःकाव जेसाखा पुर्खारालाई ‘मिँ मासैःन्‍या,’ स़ोनो, ‘जोए मिँ सैःज़्‍याव, होए सजा ब दैव ज़ परिके’ है लिद सथैव ज़ यारानैज़्‍याव।
MAT 5:22 ङा ते झन जेलाई इतावनी है ङादाचिज़्‍या, जोए ओभाइलाई रसिद वाज़ ओएकिन नोलाई ब सजा दैन्‍या ओछ्यास लिज़्‍या, स़ोनो जोए छुतलाई, ‘नँ कान्‍ल ज़ काम मालागिउ भोकोता,’ है दोज़्‍याव, नोलाई झन घ्‍योःव कचरील लाँन्‍या ओछ्यास लिज़्‍या। फरी जोए छुतलाई, ‘मुर्ख नफ्या·हुव,’ है दोज़्‍याव, नोलाई नर्गलाव मेंःए ओज़्‍यास तान्‍या ओछ्यास लिज़्‍या।
MAT 5:23 है जैद नँ ध्‍यान झ़िमल परमेस्‍वरए उमिनत कातार चरैःना नबाक ननैंए उयुँल नउपर्त कातार उलिज़्याव नसैंकिन,
MAT 5:24 नो चरैःना नरैवलाई होक ज़ ख्‍यानैद ङ़ादा नो ननैंस सखैसिद वाज़ चरैःयो।
MAT 5:25 “नजगर्‍याए अदालतदा मुद्दा झाःनाद उईंकिन होङ ओमाकेस्‍द येमक ज़ खैनानी, म़ानी नोए न्‍याधिसए उकुइत सूँपिद, न्‍याधिसए फरी पुलिसए उकुइत सूँपिद झ्यालखानाल झाःनिरिज़्याव।
MAT 5:26 साचो ज़, नल नपरिकिन तपैसा तादी ब ओपो·स ज़ नमाफो·वा पै पुलुसो दैन्‍या नमाले।”
MAT 5:27 “जे आव ब थैद जेनैज़्‍याखेहो, ‘अर्काए ओज्‍याए ल्‍योदा माबान्‍या।’
MAT 5:28 ङा ते झन है ङादाचिज़्‍या, जोए तोबो मेंमालाई चाव रँःद उयुँल बले·व ओपैंकिन होए पाखात ब ओबले·धुव मिताव ज़ लिज़्‍या।
MAT 5:29 है जैद तँनिकाव नमीए माचावल ओपारैनिकिन नोलाई कोला·द ख्‍याके। नक्‍याँ भरी नर्गल ओबाज़्‍याव देखा बुरू तोबो ओमाल्‍यो पाथ लिज़्‍या।
MAT 5:30 हिताव ज़ तँनिकाव नकुइए माचावल ओपारैनिकिन नोलाई च़म्‍द ख्‍याके। नक्‍याँ भरी नर्गल ओबाज़्‍याव देखा बुरू तोबो च़म्‍द ख्‍यान्‍या पाथ लिज़्‍या।
MAT 5:31 “फरी कानुनलाव आव मनी जेसैंज़्‍याखेहो, ‘जोए ओज्‍यालाई ऱासो ओपैंकिन होए ऱास्‍न्‍या कागत सर्द ओऱासोक।’
MAT 5:32 ङा ते झन है ङादाचिज़्‍या, जोए ओज्‍या ओरेए ओसतत उलिज़्‍यावत ब ओरेए ओऱास्‍किन, फरी नो मेंमाए छुत रे ओदोकिन, नो ऱास्‍ज़्‍याव ओरेए नो मेंमालाई जारी य़ेन ज़ दाव परींक्‍यो। फरी जोए नो ऱास्‍सिउ मेंमालाई रैज़्‍याव, होए मनी जारी य़ेन ज़ दोक्यो।”
MAT 5:33 “आव ब थैद जेनैज़्याखेहो, भाःकाव जेसाखा पुर्खारालाई, ‘धुत किर्‍या झाःन्‍या माताए,’ स़ोनो, ‘परमेस्‍वरए उमिनत काताराल किर्‍या जेझाःकिन नोलाई जुनी ब सयो·व ज़ परिए’ है लिद सथैव ज़ यारानैज़्‍याव।
MAT 5:34 ङा ते झन है ङादाचिज़्‍या, किर्‍या झाः ज़ ताझाःच्‍यो। नम छुद तादी ब ताझाःच्‍यो, नत परमेस्‍वरए उसिंहासन लिज़्‍या।
MAT 5:35 नाम छुद ब ताझाःच्‍यो, नाम परमेस्‍वरए उखँ नैन्‍या पो ची। यरूसलेमए उमिननी ब ताझाःच्‍यो, नो राजाराए याराजाए ओसहर ची।
MAT 5:36 जेङ़ै छुद ब ताझाःच्‍यो, जेङ़ैताव चेमलाई पालो ब जेमाजैधुइ, मोलो ब जेमाजैधुइ।
MAT 5:37 है जैद जे हैज़लाई हैज़, माःकलाई माःक ज़ है लिच्‍यो। नोकिन आगल्‍या भरी ओचाहित माल्‍यो ज़ लिज़्‍या।”
MAT 5:38 “आव ब थैद जेनैज़्‍याखेहो, ‘छुतलाई ओहा केःद ओएकिन, उमी पा·द ओएकिन, हाए ओपोल हा, मीए ओपोल मी ताव ज़ उपरिज़्‍याव।’
MAT 5:39 ङा ते झन जेलाई है ङादाचिज़्‍या, माचाव य़ेनत खिस ताफेरैच्‍यो। काताकावए तँनिकाव नगालात लप्‍तैद उईंकिन, तँनिकाव नगाला ब थाँदियो।
MAT 5:40 स़ोनो काताकावए नचूबन्‍दी नैंन्‍याए जूँनी मुद्दा झाःद उईंकिन नफुतु ब हाइद एयो।
MAT 5:41 फरी काताकावए करस ज़ तकिलोमितर लाँव ओपैंकिन नोस अझ ऩेकिलोमितर पै बानी।
MAT 5:42 नँस ऩिज़्‍यावलाई एयो, नँस कातार लोसो ओपैंकिन ‘माले’ है मादाद लोइयो।”
MAT 5:43 “आव ब थैद जेनैज़्‍याखेहो, ‘नैं मेंलाई समारिन्‍या, सुतुरलाई सोन्‍या।’
MAT 5:44 ङा ते झन जेलाई है ङादाचिज़्‍या, जेसुतुररालाई मनी यारासमारिच्यो, जेखिरी पसिज़्‍यावराए याजूँनी पोंखारिच्‍यो।
MAT 5:45 हो ताकिन ची स्‍वर्गताव जेबाबुए ओज़ार तान्‍या जेले। होए चाव माचाव प़ाइँलाई निमी ब पले·द याएज़्‍याव, धर्मीर स़ोनो अधर्मीरालाई नम ब सवाद याएज़्‍याव।
MAT 5:46 जेलाई समारिज़्यावरालाई वाज़ जेरासमारिकिन स्‍वर्गताव जेजुँ कातानी जेदैरिज़्‍याव? नाःवाकाव य़ेन ते पापी है यारादोज़्‍याव सिर्मा स्‍यो·ज़्‍यावराए मनी दोज़्‍यार।
MAT 5:47 जेक्‍याँदाङावरालाई वाज़ मानस जेरासुम्‍किन नो काता ज़ माःक। नाःवाकाव ते परमेस्‍वरलाई मासरेस्‍ज़्‍यावराए ब दोज़्‍यार।
MAT 5:48 है जैद स्‍वर्गताव जेबाबु किताव ओखत माल्‍यो छैंव लिज़्‍या, जे ब हिताव ज़ ताव परिके।”
MAT 6:1 “मिँराए याङ़ाक वाज़ सतैंसिन्‍या धर्मनी जोगोइसिद लिच्‍यो, म़ानी स्‍वर्गताव जेबाबुए ल्‍योनी काता ज़ दैन्‍या जेमाले।
MAT 6:2 है जैद जे मायो·व माथैंवरालाई जेराएक नो कैफतीराए याराएज़्‍याव मिताव माःक। नोर मिँराए ङ़ाक चाव धर्मी सरैंःसिन्‍याए जूँनी धर्मसास्‍त्र झ़िम जीदा, बजार जीदा भोंकरर तप्‍द दुलिज़्‍यार। जेलाई साचो है ङादाचिज़्‍या, नोराए याइनाम नाः ज़।
MAT 6:3 है जैद जे मायो·व माथैंवरालाई जेराएक वोर्फताव जेकुइए जेभाःव दाबर्‍याफताव जेकुइए तासैंवक।
MAT 6:4 सुए ज़ यामासैंद जेभाःव मिताव ओताक। हो ताकिन ची म़ोंसिउलाव रँःज़्‍याव परमेस्‍वर जेबाबुए नो जेदोव रँःद स्‍वर्गताव जेइनाम यान्‍या ले।”
MAT 6:5 “परमेस्‍वरलाई जेपोंखारिक ब नो कैफतीराए यापोंखारिज़्‍याव मिताव पोंखारिन्‍या माःक। नोर धर्मसास्‍त्र झ़िम जीदा, येम खार जीदा ‘प़ाइँए घरँःसिरक’ लिद च्‍याँःसिद पोंखारिन्‍या युँ दोज़्‍यार। साचो है ङादाचिज़्‍या, नोराए याइनाम नाः ज़।
MAT 6:6 बुरू जे ते परमेस्‍वरलाई जेपोंखारिक तोबो कुन्‍तील पसिद य़ाम गल्द सुए ज़ यामारँःद स्‍वर्गताव जेबाबुलाई पोंखारिच्‍यो। हो ताकिन ची म़ोंसिउलाव रँःज़्‍याव परमेस्‍वर जेबाबुए स्‍वर्गताव इनाम यान्‍या ले।
MAT 6:7 फरी जे जेपोंखारिक परमेस्‍वरलाई मासरेस्‍ज़्‍यावराए माँःती पर्बख्‍यान तालिच्‍यो। नोराए ‘कुधु ख्यो·व गेपोंखारिकिन थैद्यासिवा’ लिन्‍या सम्‍जिज़्‍यार।
MAT 6:8 जे ते नितावर ताताच्‍यो। जे जेमापोंखारिद ज़ परमेस्‍वर जेबाबुए ‘आव आव चाहिज़्‍या’ लिन्‍या ङ़ादा ज़ सैंज़्‍याव।
MAT 6:9 जे जेपोंखारिक इतावनी पोंखारिच्‍यो, ‘अ स्‍वर्गत लिज़्‍याव गेबाबु, नँ नमिन प़ाइँए ज़ छैंव ओथ·रैरक।
MAT 6:10 स्‍वर्गताव नराज्‍या आव नामल उहुक, स्‍वर्गताव है नलिज़्‍याव मिताव आव मानुवाल ब ओताक।
MAT 6:11 गेलाई चाहिज़्‍याव ज़्‍याव दिनकाव ज़ जोरैद्यासियो।
MAT 6:12 नउपर्त गेदोव पापरानी ऱास्‍सियो। हो मिताव ज़ गे ब मिँराए गेउपर्त यादोव पापरानी गेराऱास्‍ज़्‍या।
MAT 6:13 गेलाई माचाव चेतैन्यारानी जोगोइद माचाव भरिनी पले·द पाथस नैसियो। [खर्क ज़ माखेम्‍न्‍या राज्‍या ब नमीं ज़, सक्ती ब नमीं ज़, ज़गै मगै ब नमीं ज़। आमेन।’]
MAT 6:14 जे जेङ़ैताव पाप दोज़्‍यावलाई जेऱास्‍किन, स्‍वर्गताव जेबाबुए जेलाई मनी ऱास्‍न्‍या ले।
MAT 6:15 फरी जे जेङ़ैताव पाप दोज़्‍यावलाई ऱासो जेमाभैंःकिन स्‍वर्गताव जेबाबुए जेलाई ब ऱास्‍न्‍या माले।”
MAT 6:16 “जे जेउपासिक कैफतीराए यादोज़्‍याव मिताव तादोच्‍यो। नोर, ‘हत्‍या गेकातिज़्‍याव प़ाइँए घरँःसिरक’ लिद याङाःर ब हुली हुली च्‍या·व जैसिज़्‍यार। जेलाई साचो है ङादाचिज़्‍या, नोराए याइनाम नाः ज़।
MAT 6:17 जे ते जेउपासिक ‘मिँराए तासरेस्‍सिरक’ लिद जेङाःर हुर्सिद म़ासर थीसिद ल्‍यो ताके।
MAT 6:18 हो ताकिन ची म़ोंसिउलाव रँःज़्‍याव स्‍वर्गताव जेबाबुए ओल ज़ सैंद स्‍वर्गताव जेइनाम नैद्यान्‍या ले।”
MAT 6:19 “जे आव मानुवात जेजूँनी धन सम्‍पती तादुप्‍च्‍यो। आव मानुवाताव धन भरी घुनराए ब ज़्‍युज़्‍यार, खैए ब कैज़्‍याव, चोरराए ब झ़िम पा·द कुज़्यार।
MAT 6:20 है जैद जे जेसम्‍पती स्‍वर्गत दुप्‍चिके। नल घुनए ब माज़्‍युव, खैए ब माकैव, चोरराए ब मालाँर।
MAT 6:21 काराव ल्‍यो ताकिन जोङ जेधन लिज़्‍या, जेयुँ ब होङ ज़ तान्‍या ले।
MAT 6:22 “जेक्‍याँताव बत्ती जेमी लिज़्‍या। है जैद जेमी चाव उलिकिन जेक्‍याँ भरी पलाँव ज़ ताज़्‍या।
MAT 6:23 फरी जेमी माचाव उलिकिन जेक्‍याँ भरी चुम चुमोल ज़ ताज़्‍या। है जैद नो जेक्‍याँताव पलाँव ताव परिन्‍या चुम चुमो ओताकिन झन ज़ छाम छाम तान्‍या ताज़्‍या।
MAT 6:24 “तोबो बाँदाए ऩेब्‍लो साहुनी निय़ेन मादोधुव। दाव उपरिकिन नोए तोबोलाई सोद तोबोलाई चाव रँःन्‍या ले, कितर तोबोए ओपाँ भैंःद तोबोलाई ओलेखा नैद्यान्‍या माले। हिताव ज़ जे मनी परमेस्‍वरए ओसेवा स़ोनो पैसाए ओसेवा तखेप्‍त जेमादोधुइ।”
MAT 6:25 “है जैद ङा जेलाई है ङादाचिज़्‍या, जे जेक्‍याँए उजूँनी ‘काता ङाज़्‍युके, काता ङाओके, काता ङाक्‍वाइसिके’ लिद व़ीनी फुइ तालिच्‍यो। आव गेजिउ ज़्‍यान्‍या क्‍वाइसिन्‍याए जूँनी वाज़ माःक।
MAT 6:26 नमताव बाज़ारालाई याराचिऊचिके। नोराए धुर ब माझाःर, क्‍या·न्‍या ब माक्‍या·र, ज़्‍याव ब मादुप्‍र। हितावत ब नोरालाई चाहिज़्‍याव भरी स्‍वर्गताव जेबाबुए याएज़्‍याव। परमेस्‍वरए जेलाई झन बाज़ाराकिन घेप्‍पा रँःचिज़्‍याव।
MAT 6:27 जेनी सुए ची सोगो दाद जेजिउत तघन्‍ता जेचा·धुरिज़्‍याव?
MAT 6:28 “है जैद काताए जूँनी क्‍वाइसिन्‍या क्‍वारात सोगो जेदोज़्‍याव? बुखीताव वासर याराचिऊचिके। नोराए धामा दाद माखल्‍र।
MAT 6:29 हितावत ब सोलोमन राजा बनै तह महौ ओजैसिदी ब वास तकल माताए।
MAT 6:30 परमेस्‍वरए आछिम वैद पराःती मेंःल बाज़्‍याव छीर नाः चाव याजैज़्‍याव ल्यो ताकिन जेलाई झन कै जैद माक्‍वाइचिउके? काता नाः जेयुँ माहुबोर जेलिज़्‍याव!
MAT 6:31 “है जैद जे ‘काता ङाज़्‍युके, काता ङाओके, काता ङाक्‍वाइसिके’ लिन्‍यादा जेयुँ थू जैद व़ीनी फुइ तालिच्‍यो।
MAT 6:32 आव भरी ते परमेस्‍वरलाई मासरेस्‍ज़्‍यावराए याध्‍यावना ची। जे जेजूँनी चाहिज़्‍याव भरी ते स्‍वर्गताव जेबाबुए ज़ सैंज़्‍याव।
MAT 6:33 बुरू जे प़ाइँरानी ङ़ात परमेस्‍वरए ओराज्‍या खिम्‍द उयुँलाव मिताव य़ेन दान्‍या जैसिचिके। हो ताकिन ची जेलाई चाहिज़्‍याव भरी ओल ज़ जोरैद्याचिरिज़्‍याव।
MAT 6:34 है जैद जे पराःतीकावए जूँनी सोगो तादोच्‍यो। पराःतीकाव सोगो हो छ्याम ज़ खेम्‍ज़्‍या। काताए जूँनी आछिमकाव सोगोत झन होलाई ब चा·व जेपैंज़्‍याव?”
MAT 7:1 “जे अर्काए ओखत पले·द ताएच्‍यो, म़ानी परमेस्‍वरए जे जेखत ब पले·द्यान्‍या ले।
MAT 7:2 जे छुतलाई कितावनी जेथ·रैज़्‍या, जे मनी हितावनी ज़ जेथ॰रिरिज़्‍या। स़ोनो किताव गोइँनी जेगोइँज़्या, जे मनी हिताव गोइँनी ज़ दैन्‍या जेले।
MAT 7:3 फरी कै जैद ननैंए उमीलाव तकेज़ा सींका नरँःज़्‍याव, नँ नमीलाव नाःल्‍दिउ मुँदा ताकितर नमारँःज़्‍याव?
MAT 7:4 नमीलाव नाःल्‍दिउ मुँदा लिज़्‍यावत कै जैद ननैंलाई, ‘नमीलाव सींका हाइद ङाईं’ है नदोधुरिज़्‍याव?
MAT 7:5 ए निताव पाँज़्‍याव कैफती, ङ़ादा नमीलाव मुँदा हाइकेदा, ननैंए उमीलाव सींका नहाइक छर्लङ्ग रँःन्‍या नले।”
MAT 7:6 “छैंव पाँर काः स्‍यासोरालाई ताराएच्‍यो, म़ानी नोर जेल्‍योदा हुद छुपिहुन्‍या लेर। स़ोनो हिरामुती स्‍यासोर ऊ स्‍यासोराए याङ़ाक ताख्‍याच्‍यो, म़ानी नोराए हिलाल छिल्‍न्‍या लेर।”
MAT 7:7 “फरी ब तोबो है ङादाचिज़्‍या, परमेस्‍वरस जेऩिकिन जेलाई यान्‍या ज़ ले, जेखिम्‍किन दैन्‍या ज़ जेले, य़ाम कोतो कोतो जेजैकिन जेजूँनी फैसिन्‍या ले।
MAT 7:8 जोए ऩिज़्‍याव होलाई यान्‍या ले, जोए खिम्‍ज़्‍याव होए दैन्‍या ले, जोए कोतो कोतो जैज़्‍याव होए उजूँनी फैसिन्‍या ले।
MAT 7:9 फरी तोबो ज़िम्‍ज़ा ल़ुज़ाए ओबाबुस भरेस उऩिकिन लुँ ते मायो,
MAT 7:10 ङाँः उऩिक घुल ते मायो।
MAT 7:11 है जैद जे निताव पापल लिज़्‍याव मिँराए जेज़ारालाई निताव चाव चाव यान्‍या जेसैंकिन, स्‍वर्गताव जेबाबुए झन ओलस जेऩिकिन चाव चाव कै जैद मायाचिउके?
MAT 7:12 है जैद जे छुतए ल्‍योनी किताव जेपैंज़्‍या, जे ब छुतए ल्‍योदा हितावनी ज़ दोचिके। मोसाए ओकानुन स़ोनो अगमबक्ताराए यासरो ब नत ज़ तुपिज़्‍या।”
MAT 7:13 “चूव य़ामनी ज़ पसिच्‍यो। नासदा बान्‍या येम ते राँव, पसिन्‍या य़ाम ब बनै वैःव लिज़्‍या। नो येमनी बाज़्‍यावर बनै कुधु ज़ लिज़्‍यार।
MAT 7:14 खाली अजम्‍बरी जुनीदा बान्‍या येम स़ोनो य़ाम चूव, धो पसिउ ओतावए नो येमल बान्‍यार छ्या ज़ ताज़्‍यार।”
MAT 7:15 “परमेस्‍वरए ओपाँ बले·द तँनी पैज़्‍यावराए ल्‍योनी जोगोइसिद लिच्‍यो। नोर पाखात बगाललाव बेधा स्‍यासोर जैसिज़्‍यार, यायुँल ते छे छे ङम्‍सिउ प़र स्‍यासोर लिज़्‍यार।
MAT 7:16 किताव सींरालाई यासैनी जेरासरेस्‍ज़्‍या, हिताव ज़ नोरालाई मनी याय़ेननी ज़ सरेस्‍न्‍या जेले। कारज़ुत जोम्‍परसै मासैए, ज़ुसैत कोराली ब मासैए।
MAT 7:17 हिताव ज़ चाव सींए चाव सै ज़ झाःज़्याव, माचाव सींए माचाव सै ज़ झाःज़्याव।
MAT 7:18 फरी चाव सींए माचाव सै माझाःव, माचाव सींए चाव सै ब माझाःव।
MAT 7:19 जो सींए चाव सै माझाःव नो सीं पल्‍द मेंःल ख्‍यान्‍या वाज़ ताज़्‍या।
MAT 7:20 है जैद जे हो तँनी पैज़्‍यावरालाई याय़ेननी ज़ सरेस्‍न्‍या जेले।
MAT 7:21 “जोए ओयाःए वाज़ ङालाई ‘प्रभु, प्रभु’ है दाँज़्‍याव, नो स्‍वर्गताव राज्‍याल पसिधुन्‍या माले। जोए स्‍वर्गताव ङाबाबुए उयुँलाव मिताव य़ेन दोज़्‍याव, हो वाज़ पसिन्‍या ले।
MAT 7:22 नो छ्याम कुधुए ङालाई, ‘अ प्रभु, अ प्रभु, गे नमिननी परमेस्‍वरए ओपाँ ब गेरासथैके, माचाव पुरूसर ब गेरापले·के, अचम्‍बलाव सरेसर ब गेरासतैंके,’ है यादाँकिन,
MAT 7:23 ङा नोरालाई, ‘जेलाई खर्क ज़ ङामासरेस्‍चिए, जे निताव परमेस्‍वरकिन तँदाङाव य़ेन दाज़्‍यावर, आनी पुलुस्‍द बाचिके,’ है दान्‍या ङाले।”
MAT 7:24 “है जैद जोए आव ङापाँ थैद दोज़्‍याव, नो तोबो ओगहक ल्‍यो मिँए झ़िम ओजैक पतालल लुँ तर्त गज ओथाँज़्‍याव स्‍यासो लिज़्‍या।
MAT 7:25 नम बनै वाद, ल्‍यो माल्‍यो बतासर भलर उहुक नो झ़िम लुँ तर्त ओतावए माधलिके।
MAT 7:26 हो मिताव ज़ जोए आव ङापाँर थैद ओमादोकिन तोबो ओगहक माल्‍यो मिँए झ़िम ओजैक बालुवा तर्त ओजैव स्‍यासो ज़ लिज़्‍या।
MAT 7:27 बतासर दाद, नमर वाद, भलर हुद नो झ़िमलाई धलैद प्‍याःपी जैद लाँज़्‍याव।”
MAT 7:28 येसुए आव पाँर सथैद उतुपैवत, नो माहोल्‍यार येसुए ओपाँ थैद अचम्‍ब ताकेर,
MAT 7:29 काराव ल्‍यो ताकिन होए यासास्‍त्रीराए यारापैज़्याव मिताव माताद बनै हकस ओरापैज़्याव।
MAT 8:1 नाःत ज़ येसु नो दाँदातिन झरिके। उछींत बाज़्‍याव मिँर बनै माहोल्‍या यालिज़्‍याव।
MAT 8:2 नो बेलाक ज़ तोबो कुऱी ओल्‍योक हुद उखँत फुलुप्‍सिद, “अ प्रभु, ङाल्‍योदा नयुँ ओताकिन ङालाई सगराँन्‍या नले,” है ओदोक ते,
MAT 8:3 येसुए नोलाई उकुइए छाप्‍द, “नल्‍योदा ङायुँ लिज़्‍या ज़, गराँनिके,” है ओदोव प़ाइँना ज़ नो ओक्‍याँताव कुऱीए ऱास्‍द सोजोकाव ज़ ताके।
MAT 8:4 येसुए नो गराँवलाई, “आव नक्‍याँताव ङादोव य़ेन सुलाई ज़ है तारादोयो। बुरू नगराँव साचो ज़ ओल्‍यो लिन्‍या थ·रैव परींन्‍याए जूँनी पुजारीए ल्‍योक सतैंसिनाद मोसाए ओकानुनलाव मिताव चरैःन्‍यार चरैःनाके,” है दोक्‍यो।
MAT 8:5 फरी येसु कफर्नहुमल ओकेस्‍नावत तोबो रोमी कप्‍तान ओल्‍योक हुद,
MAT 8:6 “अ प्रभु, तोबो ङानोकोर ओजोरो हुद उखँ उकुइ माचलिद झ़िमक ज़ घ्याँसिद ले,” है ओदोक ते,
MAT 8:7 येसुए, “ताए, ङा हुद सगराँन्‍या ङाले,” है दोक्‍यो।
MAT 8:8 नो कप्‍तानए फरी, “अ प्रभु, ङा इतावए ङाझ़िमक नँलाई लाँन्‍या स्‍यासो ङामाले। बुरू आकिन ज़ ‘गराँनिके’ है नलिकिन ङानोकोर गराँन्‍या ले।
MAT 8:9 ङा ब छुतए ओहक धूँलाव मिँ ज़, ङा ङाधूँल मनी कुधु सिपाईंर लिज़्‍यार। नोरालाई ‘बाचिके’ है ङारादोक बाज़्‍यार, ‘हुचिके’ है ङारादोक हुज़्‍यार। ङाबाँदालाई ब ‘इताव दोके’ है ङादोक दोज़्‍याव,” है दोक्‍यो।
MAT 8:10 येसुए नो कप्‍तानए ओपाँ थैद अचम्‍ब ताद ओलस बाऱिज़्‍यावरालाई, “ङा जेलाई साचो है ङादाचिज़्‍या, इस्राएलीराए खार्ल मनी आव मिताव ङाल्‍योदा उयुँ हुबो सु ज़ ङामादैताए।
MAT 8:11 आदा थैचिके, स्‍वर्गताव राज्‍यालाव भत्‍यारल पुर्ब-पछ्युँनी छुत जातलाव मिँर ब बनै कुधु ज़ हुद अब्राहाम, इसहाक, याकूबरास सिप ज़ च़ुसिन्‍या लेर।
MAT 8:12 इस्राएली राज्‍यालाव ताव परिन्‍याकावर ते नल मापसिद चुम चुमोल परिरिज़्‍यार। नल याहार ङर ङर कैद चिर्लनी बिर्ल घर्न्‍या लेर,” है दाद,
MAT 8:13 फरी नो कप्‍तानलाई, “बानिके, ङालाई किताव नयुँ उहुबो हिताव ज़ तान्‍या ले,” है दोक्‍यो। नो कप्‍तानए ओनोकोर येसुए है ओदोव बेलाक ज़ होङ ओगराँधुव ओल्‍यो।
MAT 8:14 नकिन येसु पत्रुसए उझ़िमक ओबाक पत्रुसए उमुइँज्‍यु ओजोरो हुद घ्याँसिद उलिज़्‍याव रँःक्‍यो।
MAT 8:15 येसुए नोलाई उकुइ छाप्‍द ओयो प़ाइँना ज़ ओजोरोए ऱास्‍क्‍यो। नो सोद बेहार ज़ येसुलाई ज़्‍यावर ब जैदिक्‍यो।
MAT 8:16 ऱिमदा ऱिमदा मिँराए याजोरो हुवर, माचाव पुरूसराए क्‍योःद यारानैज़्‍यावरालाई येसुए ओल्‍योक यारारैकेर। येसुए ओपाँए ज़ नो माचाव पुरूसर पुलुस्‍द धोंःकेर, याजोरो हुवर ब गराँकेर।
MAT 8:17 नो ओदोव य़ेन यसैया अगमबक्ताए सर्द ओनैज़्‍याव मितावनी ज़ ताके। नोए ओसरो आव ज़, “गेदुखर ब पले·द्यासिक्‍यो, गेजोरोर ब सगराँद्यासिक्‍यो।”
MAT 8:18 येसुए ल्‍योक तछा मिँर ल्‍यो माल्‍यो याछुइसिहुवए दोङ्गाल पसिद उसिसरालाई, “दह होफत गेबाया,” है यादोक्‍यो।
MAT 8:19 हाःत ज़ तोबो सास्‍त्री येसुए ल्‍योक हुद, “गुर्बा, नँ जोदा नबाज़्‍या, ङा ब नँस ज़ ङाबाया,” है ओदोक ते,
MAT 8:20 येसुए, “स्‍यालर लिन्‍या कुँ ब लिज़्‍या, बाज़ार लिन्‍या सिप ब लिज़्‍या। ङा मिँ मिन्‍सिद हुवलाई ते ङ़ै कप्‍न्‍या पो ब माले,” है दोक्‍यो।
MAT 8:21 फरी तोबो ओलस बाज़्‍यावए, “अ प्रभु, ङ़ादा ङाबाबुलाई ङागादैदा, नँस ङाबाया,” है ओदोक ते,
MAT 8:22 येसुए, “सिउरालाई सिउ स्‍यासोराए घरागादैज़्‍यारक, नँ ते ङास घुहुनी,” है दोक्‍यो।
MAT 8:23 नकिन येसु दोङ्गाल उपसिउत उसिसर ब ओलस ज़ बाकेर।
MAT 8:24 दह माँजल याबाज़्‍याक उमँःजानी ल्‍यो माल्‍यो बतास हुद ऱीए ओछल्‍कार दोङ्गाल पसिद दोङ्गालाई गदैवा गदैवा जैक्‍यो। हो बेलाक येसु ङ़ल्‍द उलिज़्‍याव।
MAT 8:25 उसिसराए येसुलाई सोचोइद, “प्रभु, गेलाई बाँचैसिके, खदम ज़ गेतारिके,” है यादोक ते,
MAT 8:26 येसु सोद, “जे काराव जेछे·ज़्‍याव? जेयुँ नाः माहुबोर,” है दाद बतास स़ोनो ऱीनिलाई उनिसिङारो प़ाइँना थपक ज़ अदिके।
MAT 8:27 निताव रँःद उसिसर अचम्‍ब ताद, “आव किताव मिँ ओताव? बतासर ऱीराए ब ओपाँ यादोज़्‍याव,” है लिकेर।
MAT 8:28 येसु उसिसरास दह होफताव गदरिनीराए यापोङ याकेसो प़ाइँना ज़ माचाव पुरूसराए क्‍योःद यारानैज़्‍यावनी ऩेब्‍लो खादर पोनी पुलुस्‍द नोस दैसिहुकिनी। नोनी बनै निछ्यास ल्‍योनी निल्‍यो, नलाव घ्याँ सु ज़ आदा होदा यामालिधुज़्‍याव।
MAT 8:29 नोनी बनै चोइस अइ लिद क़िकिनी, “अ परमेस्‍वरए ओज़ा, गिनस नखै काता उलिज़्‍याव? परमेस्‍वरए गोइँद ओनैज़्‍याव बेला ओमाहुद ज़ गिनलाई दुख याना नहुव रो?” है दोकिनी।
MAT 8:30 नो बेलाक जाँ होकसैक ऊर तबगाल यालाज़्‍याव।
MAT 8:31 नो माचाव पुरूसराए, “गेलाई पले·न्‍या ताकिन नो ऊराए क्‍याँत बाव यासिके,” है यादोक ते,
MAT 8:32 “ताए, नोनी निक्‍याँनी पुलुस्‍द बाचिके,” है ओरादोक ते, नोर पुलुस्‍द ऊराए याक्‍याँत यापसिउ प़ाइँना ज़ ऊर ओपो·स ज़ बूलिद दाँदातिन सुइँःकिनाद दहल ज़ो·द प़ाइँ ज़ स़ुद सिकेर।
MAT 8:33 निताव रँःद नो ऊ गावलार ननी धोंःनाद सहर जीदा बाद प़ाइँलाई ज़ ‘माचाव पुरूसराए क्‍योःद यारानैज़्याव मिँनिलाई इताव इताव ताके’ है यारादोकेर।
MAT 8:34 नो याथैव प़ाइँना ज़ सहरलावर ओपो·स ज़ येसुए ल्‍योक बाद, “आनी पुलुस्‍द बान्‍के,” है दोकेर।
MAT 9:1 हाःत ज़ येसु उसिसरास दोङ्गाल पसिद ङ़ादाङाव यालिज़्‍याव कफर्नहुमल ज़ बाकेर।
MAT 9:2 नल तोबो उखँ उकुइ सिउलाई झेलोङ्गाल झाःद येसुए ल्‍योक रैकेर। येसुए नोराए यायुँ उहुबो रँःद नो उखँ उकुइ सिउलाई, “अ कान्‍छा, नयुँ होलाँ जैके, नपाप क्‍याल्‍सिके,” है दोक्‍यो।
MAT 9:3 नो है ओदोव सास्‍त्रीराए थैद या याल, “आव मिँए काराव ब्‍याँ इताव परमेस्‍वरए उमिन ओबले·ज़्याव?” है लिकेर।
MAT 9:4 येसुए नोराए यायुँलाव पाँ सैंद, “जे काराव जेयुँल आव ङापाँ माचाव जेथ·रैज़्‍याव?
MAT 9:5 नो मिँलाई ‘नपाप क्‍याल्सिके’ है दान्‍या सैं ‘सोद बान्‍के’ है दान्‍या काताकाव सजालो उलिज़्याव?
MAT 9:6 अब ङा मिँ मिन्‍सिद हुवए आव मानुवात पाप क्‍याल्‍न्‍या ङाकुइत उलिज़्‍याव सैं ओमालिज़्‍याव, चिऊचिके,” है दाद नो उखँ उकुइ सिउलाई, “नँ सोद नझेलोङ्गार घुर्द नझ़िमदा बान्‍के,” है ओदोव प़ाइँना ज़,
MAT 9:7 नो उखँ उकुइ सिउ थर च्‍याँःसिद ओझेलोङ्गार घुर्द उझ़िमदा बाके।
MAT 9:8 नो रँःज़्‍याव माहोल्‍याराए निताव य़ेनर रँःद छे·द, “परमेस्‍वरए मिँरालाई ब इताव अचम्‍बलाव सक्तीर ओराएज़्‍याव ओल्‍यो,” लिद परमेस्‍वरए उमिन सघ्‍योःदिकेर।
MAT 9:9 येसु ननी ओबाज़्‍याक तोबो मत्ती यादोज़्‍यावलाई सिर्मा स्‍यो·न्‍या अद्दाक च़ुसिद उलिज़्‍याव रँःद नोलाई, “ङास हुन्‍के,” है ओदोव प़ाइँना ज़ नो च्‍याँःसिद येसुए उछींत बाके।
MAT 9:10 येसु उसिसरास होए उझ़िमक बाद ज़्‍यान्‍याए जूँनी च़ुसिकेर। नो बेलाक ओलस सिप ज़्‍युज़्‍यावर सिर्मा स्‍यो·ज़्‍यावर स़ोनो पापी है यारादोज़्‍यावर बनै कुधु ज़ यालिज़्‍याव।
MAT 9:11 फरिसीराए निताव रँःद येसुए उसिसरालाई, “जेगुर्बाए कै जैद निताव सिर्मा स्‍यो·ज़्‍यावर स़ोनो पापीरास सिप उज़्‍युज़्‍याव?” है यारादोकेर।
MAT 9:12 येसुए नो यापाँ थैद, “याजोरो माहुज़्‍यावरालाई सगराँन्‍या मिँ माचाहिए, याजोरो हुज़्‍यावरालाई वाज़ चाहिज़्‍या।
MAT 9:13 हिताव ज़ ङा मनी ‘गे धर्मी’ है लिज़्‍यावराए जूँनी ङाहुव माःक, ‘गे पापीर ज़’ है लिज़्‍यावराए जूँनी ङाहुव ची। आव धर्मसास्‍त्रलाव पाँए ओअर्थ ब सैंच्‍यो, ‘पाथा पल्‍द चरैःज़्यावरास माःक, यादया ल्‍योरास ङायुँ होलाँ ताज़्‍या।’ ”
MAT 9:14 हो बेलाक ज़ ऱील सछैंज़्‍याव यूहन्‍नाए उसिसर येसुए ल्‍योक हुद, “गे स़ोनो फरिसीर गेउपासिज़्‍या, नँ नसिसर काराव यामाउपासिज़्‍याव?” है यादोक ते,
MAT 9:15 येसुए नोरालाई, “जन्‍तीर ब्‍याहोल्‍यास यालेवा पै सोगोल यालिज़्‍याव रो? खाली जो छ्यामकिन ब्‍याहोल्‍यालाई छुतैर, हो छ्यामकिन वाज़ उपासिन्‍या लेर,” है दाद,
MAT 9:16 फरी घर्ती झाःद याएक्‍यो, “सुए ज़ ओरे छिबो क्‍वालाई साःरो क्‍वाए मातालिउ, ओतालिकिन नो साःरोए पुराँदोलाई ओल्‍योदा स़ेल्‍द झन ज़ चीज़्‍याव।
MAT 9:17 स़ोनो, साःरो दाखमद्य पुराँदो प़िर्गुलल सुए ज़ माझाःर। म़ानी उस॰ए प़िर्गुललाई सुफुद दाखमद्य ब भोन्‍या ले, प़िर्गुल ब खेर ज़ बान्‍या ले। है जैद साःरो दाखमद्य साःरो प़िर्गुलल झाःकिन वाज़ ऩेथो ज़ खेर बान्‍या मालिनी।”
MAT 9:18 येसुए नो पाँर ओरासथैज़्‍याक ज़ धर्मसास्‍त्र झ़िमलाव याघेप्‍पा तोबो हुद येसुए उखँत फुलुप्‍सिद, “मेंमा ङाज़ा भर्ज़ा ज़ सिद ले। नँ हुद नोए ओक्‍याँत नकुइ नैद नएकिन नो सैंसिन्‍या ले,” है ओदोक ते,
MAT 9:19 येसु ननी च्‍याँःसिद उसिसरास नोस बाकेर।
MAT 9:20 येमत याबाज़्‍याक तोबो बाह्र बर्स भरी ओक्‍याँतिन झी भोन्‍या बेथाए क्‍योःद ओनैज़्‍याव मेंमा येसुए उछींनी हुद ओक्‍वाए उतुपात छाप्‍दिक्‍यो।
MAT 9:21 नो मेंमाए उयुँल उयुँल ‘येसुए ओक्‍वा वाज़ छापो ङादैकिन आव बेथानी गराँन्‍या ङाले’ है लिद ओखामिज़्‍याव।
MAT 9:22 येसु उछींदा फर्किद नोलाई रँःद, “अ माँज़ा, नयुँ होलाँ जैके, ङालाई नयुँ नसुहुबोनी ज़ नगराँके,” है ओदोव प़ाइँना ज़ नो मेंमा गराँके।
MAT 9:23 हाःत ज़ येसु उसिसरास नो धर्मसास्‍त्र झ़िमलाव याघेप्‍पाए उझ़िमक याकेस्‍क नो सिउए उजूँनी सहन यातप्‍ज़्‍याव, चिर्लनी बिर्ल याघर्ज़्‍याव रँःद,
MAT 9:24 येसुए नोरालाई, “लाँःदा बाचिके, ल़ुज़ा मासिए, अइज़ ङ़ल्‍द ले,” है यादोक्‍यो। येसुए ओपाँ थैद हसैकेर।
MAT 9:25 येसुए नोरालाई लाँःदा पुलुसो परींद ओल झ़िमल पसिद नो सिउ ल़ुज़ालाई उकुइनी ओक्‍योःव प़ाइँना थर च्‍याँःसिके।
MAT 9:26 निताव अचम्‍बलाव पाँ नो खन्‍द भरिदा ज़ थास्‍नाके।
MAT 9:27 येसु ननी पुलुस्‍द ओबाज़्‍याक ऩेब्‍लो निमी मारैंःवनी उछीं उछीं बाद, “अ दाऊदए ओथोलाव, गिनलाई नयुँ ओनाक,” लिद बनै चोइस क़िकिनी।
MAT 9:28 येसु झ़िमल उपसिउत नो निमी मारैंःवनी ब ओल्‍योक ज़ हुकिनी। येसुए नोनिलाई, “ङालाई ‘नसगराँसिन्‍धुया ज़’ लिद जिनयुँ माहुप्‍ज़्‍या?” है उनिदोक ते, “गिनयुँ हुप्‍ज़्‍या, प्रभु,” है दोकिनी।
MAT 9:29 हाःत ज़ येसुए नोनिलाई निमीत छाप्‍द्याद, “जिनयुँ उहुबो मिताव ज़ ओताक,” है उनिदोव प़ाइँना,
MAT 9:30 रँःधुन्‍या ताकिनी। येसुए नोनिलाई फरी, “आव जिनक्‍याँताव ङादोव य़ेन सुए ज़ तासैंरक,” है दाद निअर्थैक्‍यो।
MAT 9:31 नोनी झन ननी बाद येसुए ओदोव भरी प़ाइँङ ज़ है यारादोनाकिनी।
MAT 9:32 नोनी निबाव छींनी फरी माचाव पुरूसए क्‍योःद ओनैज़्‍याव तोबो लातालाई येसुए ल्‍योक रैकेर।
MAT 9:33 येसुए नो माचाव पुरूस पले·द ओयो प़ाइँना ज़ नो लाता पाँधुन्‍या ताके। नो य़ेनर रँःद नक लिज़्‍याव माहोल्‍याराए, “इताव य़ेनर ते इस्राएलीराए गेपोल खर्क ज़ गेमारँःए!” लिद अचम्‍ब ताकेर।
MAT 9:34 फरिसी भरिए ते, “आवए माचाव पुरूसराए याघेप्‍पाए उमिननी माचाव पुरूसर यापले·ज़्‍याव,” है लिकेर।
MAT 9:35 येसु सहर सहर, नाखार नाखार यादुप्‍सिज़्‍याव धर्मसास्‍त्र झ़िम झ़िमक बाद परमेस्‍वरए ओराज्‍यालाव चाव था ब ओरासथैज़्‍याव, भाँती भाँतिलाव रोगनी याजोरो हुवरालाई मनी ओरासगराँज़्‍याव।
MAT 9:36 नो ओल्‍योदा हुज़्‍याव माहोल्‍यारालाई यागावला माल्‍यो यार्च्‍या सिद थलिउ बेधा स्‍यासोरालाई रँःद, येसुए उयुँ नाद,
MAT 9:37 उसिसरालाई है यादोक्‍यो, “तामर चिकार यामींःनाव मिताव, परमेस्‍वरए ओराज्‍याल हुन्‍यार कुधु ज़ ताद लेर। खाली नोरालाई रैन्‍या बाहोर्‍यार ते छ्या ज़ ताकेर।
MAT 9:38 है जैद नोरालाई रैन्‍या मिँर ओरापरींवक लिद परमेस्‍वरलाई पोंखारिच्‍यो।”
MAT 10:1 येसुए बाह्र जना उसिसरालाई खुल्‍द माचाव पुरूसर पले·न्‍या स़ोनो भाँती भाँतिलाव रोगनी सगराँन्‍या सक्तीर ब याएक्‍यो।
MAT 10:2 नो बाह्र जना ओसाचीराए यामिनर आवर ज़ — प़ाइँरानी ङ़ाताव उसिस पत्रुस यादोज़्याव सिमोन, नकिन नोए ओभाइ अन्‍द्रियास, जब्‍दियाए ओज़ानी याकूब स़ोनो यूहन्‍नानी।
MAT 10:3 नकिन फिलिप, बारथोलोमाइ, थोमा, सिर्मा स्‍यो·ज़्‍याव मत्ती, अल्‍फयसए ओज़ा याकूब, थेदियस,
MAT 10:4 देसभक्ता सिमोन स़ोनो छींनी येसुलाई धोका याज़्‍याव यहूदा इस्‍करियोत।
MAT 10:5 नो बाह्र जनारालाई येसुए अइ लिद यापरींक्‍यो, “जे जेबाक यहूदीराकिन छुत जातलावराए ल्‍योदा ताबाच्‍यो, स़ोनो सामरीराए यासहरल ब तापसिच्‍यो।
MAT 10:6 बुरू एकसब्‍द्या ज़ इस्राएली जातलाव ङोइव बेधा स्‍यासोराए ल्‍योङ ज़ बाच्‍यो।
MAT 10:7 नङ बाद पो पोङ, ‘स्‍वर्गताव राज्‍या सो हुरिके’ है लिद यारासथैच्‍यो।
MAT 10:8 याजोरो हुवरालाई ब यारासगराँच्‍यो, सिउरालाई याराजागैच्‍यो, कुऱीरालाई सोजोकाव ज़ याराजैच्‍यो, माचाव पुरूसर यारापले·च्‍यो। आव सक्ती भरी अइज़ जेदैके, अइज़ याराएच्‍यो।
MAT 10:9 जेवाँःफोत सुन चाँदीर पैसार तालाँच्‍यो।
MAT 10:10 येमत जेबाक झ़ैं ब तालाँच्‍यो, फेरैसिन्‍या क्‍वा ब तालाँच्‍यो, छुत पोला ब तालाँच्‍यो, झुइ ब तालाँच्‍यो। जो य़ेनत तादी ब य़ेन दाज़्‍यावए ज़्याव दैव ज़।
MAT 10:11 “फरी जो नाखारल जो सहरल तादी ब जेबाक जे लिन्‍या स्‍यासो सोजो मिँए उझ़िमक लिच्‍यो। ननी जेमापुलुसा पै नक ज़ लिच्‍यो।
MAT 10:12 नो झ़िमल जेपसिक, ‘आव झ़िमलाई असिक ओताक,’ है लिच्‍यो।
MAT 10:13 है जैद नो झ़िमलावराए जेलाई नैन्‍या स्‍यासोर यालिकिन नो जेदोव असिक नोरास ज़ ओताक। फरी नोर जेलाई नैन्‍या स्‍यासोर यामालिकिन नो जेदोव असिक नोरास ताताक।
MAT 10:14 जोराए जेलाई ल्‍यो मायाद जेपाँ ब थैव यामाभैंःकिन नो झ़िमनी तादी ब सहरनी तादी ब जेपुलुस्‍क नो पोलाव जेखँताव गालो धुइरो नल ज़ थरैद ख्‍यानैद याराएच्‍यो।
MAT 10:15 ङा जेलाई साचो है ङादाचिज़्‍या, परमेस्‍वरए फाल्‍न्‍या छ्याम नो सहरलाव मिँराकिन बुरू सदोम स़ोनो गमोरालावरालाई सहिधुन्‍या तारिज़्‍या।”
MAT 10:16 “जे फरी जोगोइसिद बाच्‍यो। जेलाई प़र मितावराए खार्ल बेधा पाथा मितावर जैद ङापरींचिज़्‍या। है जैद जे सैंन्‍यात घुल मिताव बाथो, दान्‍यात कुइतम मिताव लातो ताच्‍यो।
MAT 10:17 है जैद माचाव मिँराए ल्‍योनी जोगोइसिच्‍यो। नोराए जेलाई अदालतदा लाँद सूँपिचिरिज़्‍यार, धर्मसास्‍त्र झ़िम झ़िमल रीःचिरिज़्‍यार।
MAT 10:18 स़ोनो ङा ङाजूँनी हाकिमर राजाराए ङ़ाक सच्‍याँद खोले·चिरिज़्‍यार। ननी ज़ जे नोरालाई स़ोनो छुत जातलावरालाई ङासाची यान्‍या जेले।
MAT 10:19 है जैद नोराए जेलाई यासूँपिचिक, ‘ङा कै लिन्‍या, काता पाँन्‍या ओताव’ लिद जेयुँ आँचा पाँचा ताजैच्‍यो। नो बेलाक जे पाँव परिन्‍या भरी परमेस्‍वरए ल्‍योनी ज़ दैन्‍या जेले।
MAT 10:20 नो बेलाक पाँन्‍यार जे माःक, परमेस्‍वर जेबाबुए छैंव उपुरूस जेयाःत च़ुसिद पाँन्‍या ले।
MAT 10:21 “हो बेलाक ओभाइए ओदाज्‍युलाई, ओबाबुए ओज़ालाई सैःन्‍या सजाल यारापारैरिज़्‍यार। याबाबु याआमाकिन तँदा जैसिद याज़ाराए सैःन्‍या सजाल यारापारैरिज़्‍यार।
MAT 10:22 जे ङामिनतावर जेतावए जेलाई प़ाइँए सोन्‍या लेर। खाली जो आव भरी ओमाखेमा पै थ॰रिज़्‍या, होए अजम्‍बरी जुनी दैन्‍या ले।
MAT 10:23 जो नाखारल जेबाज़्‍या होल जेखिरी यापसिकिन ननी हाइसिद छुत नाखारल धोंःच्‍यो। साचो है ङादाचिज़्‍या, जे इस्राएलीराए यासहर भरिल आव य़ेन जेमातुपैद ज़ ङा मिँ मिन्‍सिउ हुन्‍या ङाले।”
MAT 10:24 फरी, “उगुर्बाकिन उसिस घेप्‍पा माताए, ओय़ेन दाज़्‍याव ब ओघरपतीकिन घेप्‍पा माताए।
MAT 10:25 उसिस उगुर्बा ओतावक पै वाज़ ताज़्‍या, ओनोकोर मनी ओघरपतीए ओहक भरी ओदैदी ब ओघरपती ओतावक पै वाज़ ताज़्‍या। है जैद ङा झ़िमए ओर्गेलाई ज़ माचाव पुरूसराए याघेप्‍पा ‘बालजिबुल’ है यादाँकिन झन जे ङाझ़िमलावरालाई कै जैद है मादाचिरके?”
MAT 10:26 “है जैद जे नोरालाई रँःद ताछे·च्‍यो। नो बेलाक कप्‍सिउल लिज़्‍याव भरी प़ाइँए सैंन्‍या लेर, म़ोंसिउल लिज़्याव भरी ब छर्लङ्ग ज़ रैंःरिज़्यार।
MAT 10:27 है जैद जेलाई म़ोंसिउलाव है ङादाचिउ भरी जे पाखाङ ज़ यारासथैनाच्‍यो। ङाल्‍योनी जेर्नाल खुस खुसनी जेथैव भरी ब थालातिन यारासथैच्‍यो।
MAT 10:28 जेक्‍याँलाई वाज़ सैःद्याज़्‍यावर जेपुरूसलाई कैज़ माजैधुज़्‍याव मिँर रँःद ताछे·च्‍यो। बुरू जेपुरूस जेक्‍याँलाई नर्गल ख्‍याद चुयाप जैधुज़्‍याव परमेस्‍वरलाई रँःद वाज़ छे·च्‍यो।
MAT 10:29 “ऩेब्‍लो बिङर्‍या तपैसाल ओमाबिकैज़्याव रो? बिङर्‍या नाः सोङ्गो ओतादी ब स्‍वर्गताव जेबाबुए ओमासैंद तोबो ब नामल तेन्या माले।
MAT 10:30 होए जेङ़ैताव जेचेम आः लिज़्‍या लिन्‍या ब सैंज़्‍याव।
MAT 10:31 है जैद काताल ज़ ताछे·च्‍यो। कुधु बिङर्‍याराकिन होए जेलाई घेप्‍पा रँःचिज़्‍याव।
MAT 10:32 “है जैद जोए मिँराए ङ़ाक ओलाज माहुद ‘ङा येसुसकाव ज़’ है लिज़्‍या, ङा ब नोलाई स्‍वर्गताव ङाबाबुए ओङ़ाक ‘ङासकाव ज़’ है दान्‍या ङाले।
MAT 10:33 हो मिताव ज़ फरी जोए मिँराए ङ़ाक ‘ङा येसुसकाव माःक’ है लिज़्‍या, ङा मनी स्‍वर्गताव ङाबाबुए ओङ़ाक ‘आव ङासकाव माःक’ है दान्‍या ङाले।”
MAT 10:34 “जे ङालाई ‘आव मानुवाताव मिँरालाई सखैना हुव लिज़्‍या’ है तालिच्‍यो। ङा ते झन जेखार्ल तरवाली रैद ङाहुव मिताव लिज़्‍या।
MAT 10:35 आव ङापाँए ज़ा बाबुनिलाई माखैव निजैरिज़्‍याव। हिताव ज़ ज़ा-मा तादी ब, फुबु भदै तादी ब माखैव याजैरिज़्‍याव,
MAT 10:36 स़ोनो यासुतुर याझ़िमल ज़ तान्‍या ले।
MAT 10:37 जोए ङाकिन ओबाबु ओआमानी निल्‍योदा उयुँ थू ओजैकिन नो ङासकाव तान्‍या स्‍यासो माले। स़ोनो ङाकिन ओज़ाराए ल्‍योदा उयुँ थू ओजैकिन हो ब हिताव ज़ ताज़्‍या।
MAT 10:38 है जैद जोए क्रुसत सिन्‍या मिताव दुखर सहिउ माभैंःद ङाछींत ओमाहुकिन नो ङासकाव तान्‍या स्‍यासो माले।
MAT 10:39 जोए आव उजिउत ओललाई तान्‍या वाज़ खिम्‍ज़्याव, होए उजुनीलाई सम़ैज़्‍याव। फरी जोए आव उजिउत उजिउए मया मादाद ङा ङाजूँनी दोज़्याव, होए जुनी दैरिज़्‍याव।”
MAT 10:40 “जे परमेस्‍वरए ओपाँ जेरासथैनाक जोए जेलाई ल्‍यो याचिज़्‍याव, होए ङालाई ब ल्‍यो ओयाँव मिताव ज़ लिज़्‍या। नो ङालाई वाज़ माःक, ङालाई परींज़्‍यावलाई मनी ल्‍यो ओयो मिताव ज़ ताज़्‍या।
MAT 10:41 जोए अगमबक्तालाई ओय़ेन सरेस्‍द उझ़िमक ल्‍यो एज़्‍याव, नोए मनी नो अगमबक्ताए ओदैरिज़्‍याव मिताव ओल ब दैन्‍या ले। हो मिताव ज़ जोए धर्मी मिँलाई ओय़ेन सरेस्‍द उझ़िमक हुव एज़्‍याव, होए मनी नो धर्मीए ओदैरिज़्‍याव मिताव ओल ब दैन्‍या ले।
MAT 10:42 ङा जेलाई साचो है ङादाचिज़्या, जोए ज़िम्‍ज़ारालाई तादी ब ङासकावर याल्‍यो लिद सरेस्‍द तुखुरी स़ोमो ऱी वाज़ ओराएदी ब नोए उइनाम जुनी ब दैन्‍या ज़ ले।”
MAT 11:1 येसुए बाह्र जना उसिसरालाई आव पाँ भरी है दाद ओरापरींवत ओल मनी नलाव सहर सहर, नाखार नाखार जीदा परमेस्‍वरए ओपाँ यासथैनाक्‍यो।
MAT 11:2 ऱील सछैंज़्‍याव यूहन्‍ना झ्यालखानाल उलिज़्‍याक ज़ ख्रीसए ओय़ेन भरी थैद तोबो ऩेब्‍लो उसिसरालाई येसुए ल्‍योक,
MAT 11:3 “नो धर्मसास्‍त्रलाव सर्सिउ ‘हुरिज़्‍या’ है यालिज़्‍याव नँ ज़ रो, सैं छुतलाई कींन्‍या?” है दोनाव यापरींक्‍यो।
MAT 11:4 येसुए नो है यादोव थैद नोरालाई, “आव ङादोव जेरँःव जेथैव भरी यूहन्‍नालाई है दोच्‍यो।
MAT 11:5 ‘यामी मारैंःवरालाई सरैंःद याएज़्‍याव, माबाधुन्‍यारालाई बाधुन्‍या याजैज़्‍याव, कुऱीरालाई यासगराँज़्‍याव, यार्ना माथासोरालाई थैधुन्‍या याजैज़्‍याव, सिउरालाई याजागैज़्‍याव, गरीबरालाई ब परमेस्‍वरए ओपाँ यासथैज़्‍याव,’ है दोनाच्यो।
MAT 11:6 ङालाई रँःद यायुँ माकेःज़्‍यावर असिक दैवर लिज़्‍यार,” है दाद यापरींक्‍यो।
MAT 11:7 नोर याबाव छींनी येसुए माहोल्‍यारालाई यूहन्‍नाए उजूँनी अइ यादोक्‍यो, “जे यूहन्‍नाए ल्‍योक बनल जेबाक नोलाई किताव जेरँःया? बतासए आदा फुलुपनी होदा फुलुप ओजैज़्‍याव छी स्‍यासो ते जेमारँःखेहो।
MAT 11:8 हिताव ओमालिकिन किताव जेरँःया? सैं बनै चाव चाव क्‍वा क्‍वाइसिउ मिँलाई जेरँःव? निताव क्‍वा क्‍वाइसिज़्‍यावर ते दरबारल वाज़ लिज़्‍यार सानी।
MAT 11:9 है जैद ओल्‍योक जेबाक नोलाई किताव जेरँःया? अगमबक्ता ज़ जेरँःखेहो सानी। ङा फरी है ङादाचिज़्‍या, अगमबक्ताकिन झन घेप्‍पालाई ज़ जेरँःके।
MAT 11:10 नो यूहन्‍ना धर्मसास्‍त्रलाव सर्सिउ मिँ ज़। नोए उजूँनी सर्सिउ आव ज़, ‘ङाकत्‍वाल्‍यालाई नङ़ा नङ़ा परींद ङाईंज़्‍या। नजूँनी नोए नङ़ादा ज़ नयेम तयार जैदींरिज़्‍याव।’
MAT 11:11 है जैद ङा जेलाई है ङादाचिज़्‍या, मिँनी जर्मिउ भरिरानी ऱील सछैंज़्‍याव यूहन्‍नाकिन घेप्‍पा सु ज़ माले। हैदी ब स्‍वर्गताव राज्‍यालाव गोइँनी ताकिन ते प़ाइँरानी ज़िम्‍ज़ा नोकिन घेप्‍पा लिज़्‍या।
MAT 11:12 है जैद ऱील सछैंज़्‍याव यूहन्‍नाए ओरासथैहुवकिन आक पै ज़ मिँर स्‍वर्गताव राज्‍याल पसिन्‍याए जूँनी याजिउ च्‍यो च्‍यो झाःद काला मुलु छुइसिनाज़्‍यार। फरी तँदा जैसिज़्‍यावर नोलाई हारैद वैंन्‍या बनै धामा दोज़्‍यार।
MAT 11:13 मोसाए ओसरो कानुनलाव स़ोनो अगमबक्ताराए यापालाकिन यूहन्‍नाए ओपाला पैकाव यापाँव भरी ब हुज़्‍याव ख्रीसए उजूँनी ज़ ओल्‍यो।
MAT 11:14 स़ोनो आव ब जेमातीधुरिज़्‍या, नो ख्रीसकिन ङ़ादा हुरिज़्‍या है यालिज़्‍याव एलिया ते नो यूहन्‍ना ज़।
MAT 11:15 आव पाँ जोए थैन्‍या उयुँ लिज़्‍या, चावस ओथैवक।”
MAT 11:16 येसुए फरी, “आव बेलाकाव मिँर कितावर यालिज़्‍याव लिक ते, बजार खार्ल रैःसिज़्‍याव ल़ुज़ा स्‍यासोर लिज़्‍यार।
MAT 11:17 नोर यानैंरास गन्गनैद, ‘बाँसुली तप्‍द गेयाचिक ब जेमास़्‍याके, लँसिद गेयाचिक ब जेमाघर्के।’
MAT 11:18 हो मिताव ज़ ऱील सछैंज़्‍याव यूहन्‍नाए ज़्यान्‍यार ओमाज़्युक, ओन्‍यार ओमाओक नोलाई ‘दैनी परिद ले’ है दोज़्‍यार।
MAT 11:19 ङा मिँ मिन्‍सिद हुवए फरी ज़्‍यान्‍यार ङाज़्‍युक, ओन्‍यार ङाओक, ‘चिऊचिके, काता ज़ मानैज़्‍याव ज़्‍यास्‍ती, दाखमद्य ओए ओए बाऱिज़्‍याव, सिर्मा स्‍यो·ज़्‍याव पापीराए यानैं’ है दाँज़्‍यार। हैदी ब ङा ङागहक थ॰रिउ लिज़्‍या लिन्‍या ङाय़ेनए ज़ थ·रैज़्‍याव।”
MAT 11:20 नकिन येसुए अचम्‍बलाव ओय़ेन सतैंद ओरायो सहरलाव मिँराए यायुँ यामाफर्कैवनी नोरालाई अइ लिद यासिङार्क्‍यो,
MAT 11:21 “जे खोराजीन स़ोनो बेथसेदालावरालाई थैए माँतकन ज़ लिज़्‍या। जे जेरँःव परमेस्‍वरए ओसक्तीलाव य़ेनर तुरोस स़ोनो सीदोनलावराए यारँःव ताकिन आः झरी यापापए जूँनी यायुँ माचाव दाद बर्ला सुर्सिद धुलील च़ुसिद यायुँ फर्कैद यापापर ऱास्‍धुखेरहो।
MAT 11:22 है जैद परमेस्‍वरए फाल्‍न्‍या छ्याम जेकिन बुरू तुरोस स़ोनो सीदोनलावरालाई सहिधुन्‍या तारिज़्‍या।
MAT 11:23 “हिताव ज़ फरी जे कफर्नहुमलाव मिँर, स्‍वर्गत केसो मितावर जेङम्सिज़्‍या, झन नर्गल ज़ बान्‍या जेले। जेल्‍योङाव अचम्‍बलाव य़ेनर सदोम सहरल सतैंद ङारायो ताकिन नो सहर आःपै रहिन्‍या ओल्‍यो।
MAT 11:24 है जैद जेलाई है ङादाचिज़्‍या, परमेस्‍वरए फाल्‍न्‍या छ्याम जेकिन बुरू सदोमलावरालाई सहिधुन्‍या तारिज़्‍या।”
MAT 11:25 नाःत ज़ येसुए परमेस्‍वरलाई, “अ बाबु, नाम नमलावराए याङ़ैताव, नँलाई धन्‍याबाद ङाचरैःनिज़्‍या। नँ नपाँर सैंन्‍या जैसिज़्‍यावर, याबुद्धी ल्‍यो जैसिज़्‍यावरालाई सतैंद मायाद, भाउज़ा मितावरालाई सतैंद नराएके।
MAT 11:26 हैज़ बाबु, नल्‍योदा बान्‍या येम नो ज़ चाव नथ·रैके,” है लिद पोंखारिक्‍यो।
MAT 11:27 नकिन येसुए, “ताव भरी ङाबाबुए ङाकुइत ज़ याद नैनाव। किताव परमेस्‍वरए वाज़ ओज़ालाई सरेस्‍ज़्‍याव, हिताव ज़ ओज़ाए वाज़ परमेस्‍वरलाई सरेस्‍ज़्‍याव। है जैद ङा छुतलाई सतैंद ङाएकिन वाज़ होए परमेस्‍वर ङाबाबुलाई सरेस्‍धुज़्‍याव।
MAT 11:28 जे व़ीनी फुइ ताद थलिद लिज़्‍यावर, ङाल्‍योक हुद जेर्सा नैचिके, ङा जेयुँर होलाँ जैद्यान्‍या ङाले।
MAT 11:29 ङाकुम नधेंल झाःद ङास सिऊसिन्‍के। ङा ङायुँ य़ालो स़ोनो ङायुँ नाज़्‍याव ङालिज़्‍या। है जैद जे ङाल्‍योक जेहुकिन जेस॰ होलाँ तान्‍या ले।
MAT 11:30 ङाकुम ब सजालो लिज़्‍या, ङागुर ब बोमो लिज़्‍या,” है यादोक्‍यो।
MAT 12:1 हो बेलाक तछा ऩासिन्‍या छ्याम येसु उसिसरास एँः खार्लाव घ्याँ याबाज़्‍याक उसिसर याकरेए बाला फ्या·द याकैज़्‍याव।
MAT 12:2 फरिसीराए निताव रँःद येसुलाई, “चिऊके, नसिसराए ऩासिन्‍या छ्याम मादान्‍या य़ेन ज़ दोज़्यार,” है यादोक ते,
MAT 12:3 येसुए, “धर्मसास्‍त्रलाव सर्सिउ दाऊद राजा ओनैंरास याकरेकाव यादोव य़ेन जेमाप़रिए रो?
MAT 12:4 दाऊद ध्‍यान झ़िमल पसिद परमेस्‍वरलाई चरैःसिउ भरेस हाइद ओनैंरास भाःद ज़्‍युकेर। नो भरेस पुजारीराए वाज़ ज़्‍यान्‍या ओताज़्‍याव, दाऊद ओनैंरास ज़्‍यान्‍या ओमाताज़्‍याव।
MAT 12:5 काता मोसाए ओकानुन जेमाप़रिए रो? ऩासिन्‍या छ्याम ध्‍यान झ़िमल पुजारीराए य़ेन दाद कानुनलाई बले·ज़्यार। कानुननी फरी नोराए याखत ते माले।
MAT 12:6 ङा फरी जेलाई साचो है ङादाचिज़्‍या, ध्‍यान झ़िमकिन घेप्‍पा तोबो आक लिज़्‍या।
MAT 12:7 जे धर्मसास्‍त्रलाव सर्सिउ ‘पाथा पल्‍द चरैःज़्यावरास माःक, यादया ल्‍योरास ङायुँ होलाँ ताज़्‍या’ परमेस्‍वरए है ओल्‍यो पाँर जेथ·रैधुव ताकिन जे ब जेदया ल्‍योर तान्‍या जेल्‍यो।
MAT 12:8 ङा मिँ मिन्‍सिद हुव ऩासिन्‍या छ्यामकिन ब घेप्‍पा ज़ ङालिज़्‍या,” है यादोक्‍यो।
MAT 12:9 येसु ननी पुलुस्‍द नोराए याधर्मसास्‍त्र झ़िमल बाके।
MAT 12:10 नल उकुइ थँव मिँ तोबो उलिज़्‍याव। नल लिज़्‍यावराए येसुए ओपाहा झाःद्यान्‍याए जूँनी येसुलाई, “ऩासिन्‍या छ्याम ओजोरो हुवलाई सगराँन्‍या ओताज़्‍याव सैं ओमाताज़्‍याव?” है यादोक ते,
MAT 12:11 येसुए, “जे सुवाराए तोबो जेबेधा ऩासिन्‍या छ्याम भल्‍खादाल ओतेकिन होल ज़ जेमानैज़्‍याखेहो, जेहाइज़्‍याखेहो सानी।
MAT 12:12 बेधाराकिन मिँर घेप्‍पाल गनिसिउर लिज़्‍यार। है जैद ऩासिन्‍या छ्याम कानुनलाव सर्सिउ मिताव मिँए जूँनी चाव दाव परिके,” है दाद,
MAT 12:13 नो उकुइ थँवलाई, “नकुइ तङ्गैके,” है दोक्‍यो। नोए उकुइ ओतङ्गैव प़ाइँना तँनिकाव उकुइ स्‍यासो सोजोकाव ज़ ताके।
MAT 12:14 नो फरिसीराए निताव रँःद लाँःदा पुलुस्‍द, ‘आवलाई कै जैद सैःन्‍या ओताव?’ लिद गुमुस्‍ता दोनाकेर।
MAT 12:15 येसुए नो सैःव यापैंज़्‍याव सैंद ननी हाइसिद छुतङ बाके। ओलस बावर ब बनै माहोल्‍या ज़ यालिज़्‍याव। नलाव याजोरो हुव भरिलाई ब यासगराँक्‍यो।
MAT 12:16 फरी नोरालाई, “आव जेक्‍याँताव ङादोव य़ेन सुलाई ज़ है तारादोच्‍यो,” है यादोक्‍यो।
MAT 12:17 ननी ज़ यसैया अगमबक्ताए ओसरो ब यो·के। नोए ओसरो आव ज़,
MAT 12:18 “आव छाँतिद ङानैज़्‍याव ङायुँलाव ङानोकोरलाई चिऊचिके। नोलाई रँःद ङायुँ होलाँ ताज़्‍या। नोए ओक्‍याँत ज़ ङापुरूस ङानैरिज़्‍या, नोए प़ाइँ जातलाव मिँरालाई सतलाव पाँ सथैन्‍या ले।
MAT 12:19 नो सुस ज़ इ़सिन्‍या माले, बजार जीदा ब स्‍याप स्‍याप ख्‍यान्‍या माले।
MAT 12:20 बुरू कान्‍ल ज़ मागनिसिउरालाई यायुँ केःद्यान्या माले, यायुँ स्‍यासे तेवरालाई ब यायुँ होलाँ जैद्यान्‍या ले। सतलाव ओय़ेन ओमासझेंःवा पै नो य़ेन दाव ज़ नैन्‍या ले।
MAT 12:21 है जैद प़ाइँ जातलाव मिँराए होए ओक्‍याँत ज़ आस दान्‍या लेर।”
MAT 12:22 हाः बेलाक ज़ माचाव पुरूसए क्‍योःद ओनैज़्याव तोबो मिँलाई येसुए ल्‍योक रैकेर। नो मिँ उमी मारैंःव लाता उलिज़्याव। येसुए नोलाई ओसगराँवत उमी ब रैंःके, पाँधुन्‍या ब ताके।
MAT 12:23 नो य़ेन रँःद माहोल्‍यार अचम्‍ब ताद, “आव ज़ सा, दाऊदए ओथोलाव ‘हुरिज़्‍या’ है यालिज़्‍याव ख्रीस?” है यालिज़्‍याव।
MAT 12:24 फरिसीराए थैद, “आव ते झन माचाव पुरूसराए याघेप्‍पा बालजिबुलए उमिननी माचाव पुरूसर पले·ज़्‍याव ची,” है यारादोकेर।
MAT 12:25 येसुए नोराए यायुँलाव पाँ सैंद, “तोबो राज्‍यालाव मिँर या या यामाखैकिन राज्‍याए उमिन ज़ म़ाज़्या। हो मिताव ज़ तोबो सहरलावर तादी ब तोबो झ़िमलावर तादी ब या या यामाखैकिन चितराँ पुतराँ तान्‍या लेर।
MAT 12:26 है जैद सैतानए ओराज्‍यालावर ब या या माखैद तोबोए तोबोलाई ओपले·किन होए ओराज्‍या कातानी उरहिरिज़्‍याव?
MAT 12:27 ङा बालजिबुलए उमिननी माचाव पुरूसर ङारापले·ज़्‍याव ताकिन जेसकावराए कातानी यारापले·ज़्‍याव? है जैद नो जेपाँ जेसकावराए ज़ जेङ़ैत फुलुप्‍द्यान्‍या लेर।
MAT 12:28 खाली ङा परमेस्‍वरए उपुरूसनी ङारापले·ज़्‍याव ताकिन परमेस्‍वरए ओराज्‍या जेखार्ल ज़ हुद ले।
MAT 12:29 फरी तोबो ओर्सा ल्‍यो मिँलाई ङ़ादा यामाकिवा पै उझ़िम पा·द ओजा-यार हाइद मालाँधुर।
MAT 12:30 “जो ङास माखैए नो ङाकिन तँदाङाव ज़ लिज़्‍या। हिताव ज़ फरी जोए ङाल्‍योदा मारारैव, होए ङाकिन तँदा ज़ याख्‍यानाज़्‍याव।
MAT 12:31 है जैद ङा जेलाई साचो है ङादाचिज़्‍या, मिँराए जो पाप यादोदी ब, परमेस्‍वरए उमिन याबले·दी ब नोराए यापाप क्‍यालो दैसिए। खाली जोए परमेस्‍वरए छैंव उपुरूसए उमिन बले·दिज़्‍याव, होए ओपाप क्‍यालो मादैसिए।
MAT 12:32 हो मिताव ज़ जोए ङा मिँ मिन्‍सिद हुवए ङाङ़ैत माचाहिउ पाँर झाःद ङामिन बले·ज़्‍याव, होए ओपाप क्‍यालो दैसिए। खाली जोए परमेस्‍वरए छैंव उपुरूसए उमिन बले·द ओएकिन, नो पाप आव जुनील तादी ब अजम्‍बरी जुनील तादी ब क्‍यालो मादैसिए।”
MAT 12:33 “गराँव सीं ताकिन ओसै ब गराँव ज़ ताज़्‍या। काना सीं ताकिन ओसै ब काना ज़ ताज़्‍या। है जैद सींलाई ओसैनी ज़ सरेस्‍सिए।
MAT 12:34 हिताव ज़ जे घुलए ओथोर, माचाव जेयुँनी कातानी ची चाव जेपले·धुरिज़्‍याव? युँल किताव लिज़्‍या याःनी ब हिताव ज़ हुज़्‍या।
MAT 12:35 चाव मिँए उयुँनी चाव वाज़ हुज़्‍या, माचाव मिँए उयुँनी माचाव वाज़ हुज़्‍या।
MAT 12:36 ङा साचो है ङादाचिज़्‍या, मिँराए यापाँव माचाहिउ पाँ भरी तछा परमेस्‍वरए ओङ़ाक फाल्‍सिन्‍या छ्याम नो भरी थ·रैव परिरिज़्‍या।
MAT 12:37 है जैद हो छ्याम धर्मी थ॰रिन्‍या सैं पापी थ॰रिन्‍या जेसाची जेपाँ ज़ तारिज़्‍या।”
MAT 12:38 हाःत ज़ नक लिज़्‍याव सास्‍त्रीर स़ोनो फरिसीराए, “अ गुर्बा, गेलाई नसरेस तोबो सतैंद्यासिके,” है यादोक ते,
MAT 12:39 येसुए, “जे आव जुकलाव जेयुँ माहुबो पापीराए सरेस वाज़ जेखिम्‍ज़्‍या। खाली जेदैरिज़्‍याव सरेस ते योना अगमबक्ताए ओक्‍याँत ताव सरेस वाज़ जेदैरिज़्‍या।
MAT 12:40 किताव योना नो घेप्‍पा ङाँःए उफूल स़ोंला स़ोंरी ओल्‍यो, हिताव ज़ ङा मिँ मिन्‍सिउ मनी नाम जींल स़ोंला स़ोंरी ङालिरिज़्‍या।
MAT 12:41 निनवे सहरलाव मिँराए योनाए ओरासथैव पाँर थैद परमेस्‍वरए ल्‍योदा यायुँ फर्कैकेर। खाली जे ते झन जेखार्ल हुद लिज़्‍याव योनाकिन घेप्‍पाए ओसथैचिक ब परमेस्‍वरए ल्‍योदा जेयुँ जेमाफर्कैके। है जैद परमेस्‍वरए मिँरालाई ओराफाल्‍रिज़्‍याव छ्याम नो ङ़ादाङाव मिँराए यायुँ याफर्कैवनी ज़ जेगल्‍ती थ॰रिरिज़्‍या।
MAT 12:42 हिताव ज़ नो दखिन देसलाव रानीए परमेस्‍वरए ओपाँ सोलोमनए ओयाःनी थैना बनै तादानी हुके। जे जेखार्ल हुद लिज़्‍याव ते सोलोमनकिन झन घेप्‍पा लिज़्या। है जैद परमेस्‍वरए ओराफाल्‍रिज़्‍याव छ्याम आव बेलाकाव मिँराए यागल्‍ती नो रानीए ओक्‍याँनी ज़ थ॰रिरिज़्‍या।”
MAT 12:43 “मिँनी पले·सिउ माचाव पुरूस नो मिँए ओक्‍याँनी उपुलुसोत ऱी माल्‍यो साइँसुइँवक ऩासिन्‍या पो खिम्नाज़्याव। लिन्‍या पो ओमादैकिन,
MAT 12:44 फरी ओल्‍द ङ़ादाङाव उपुलुसोए ओक्‍याँत ज़ पसिउ पैंज़्‍याव। नल ओबाक स्‍यासी जैद थिक थाक जैसिउ खाली पो रँःद,
MAT 12:45 ओलकिन माचाव पुरूसर सात गोता ओलस रैद नल पसिद नो मिँलाई ङ़ादाङावकिन झन ज़ माचावए क्‍योःज़्‍याव। आज्‍यालकाव पापी मिँर ब हिताव ज़ जेतारिज़्‍या।”
MAT 12:46 येसु नो माहोल्‍यारास ओपाँज़्‍याक ज़ ओआमा स़ोनो ओभाइर हुद लाँःक च्‍याँःसिद येसुलाई क़िउ यारापरींकेर।
MAT 12:47 ननी येसुए ल्‍योक तोबो बाद, “लाँःक नआमा स़ोनो नभाइर नँस दैसिना हुद लेर,” है ओदोक ते,
MAT 12:48 येसुए नो है दाना हुवलाई, “ङाआमार ङाभाइर कितावर?” है लिद,
MAT 12:49 उकुइ उसिसराए ल्‍योदा छों जैद, “चिऊके, ङाआमार ङाभाइर आवर ज़।
MAT 12:50 जोराए स्‍वर्गताव ङाबाबुए ओपाँ थैद दोज़्‍यार, होर ज़ ङाआमार ङाभाइ बैंनीर ताज़्‍यार,” है लिके।
MAT 13:1 हो छ्याम येसु नो झ़िमनी पुलुस्‍द दह छ्योक बाद च़ुसिद उलिज़्‍याक,
MAT 13:2 ल्‍यो माल्‍यो मिँर ओल्‍योक छुइसिहुकेर। है जैद येसु दोङ्गाल च़ुसिद दोङ्गालाई ऱील छ्यावा होकसै लाँक्‍यो। माहोल्‍या भरी ओङ़ाक दह छ्योक च्याँःसिकेर।
MAT 13:3 येसुए नोरालाई ओपाँ घर्ती झाःद यासथैक्‍यो। तोबो ओरासथैव आव ज़, “तोबो मिँ ओएँःल धुर वास्‍ना बाके दी।
MAT 13:4 धुर ओवास्ज़्याक ख्‍वा येम जीदा परिके दी। नो येमलाव परिउ बाज़ाराए ज़्‍युकेर दी।
MAT 13:5 ख्‍वा धुर गम छ्या छ्या ल्‍यो ओदादरत परिके दी। नत गम छ्या छ्या वाज़ ल्‍यो ओतावए हतप्‍त ज़ परीके दी।
MAT 13:6 खाली निमी ओसोराक उहुवत ओजरा नाम जींल ओमाल्‍योए च्‍याकराप चिकुरूप थँके दी।
MAT 13:7 फरी ख्‍वा धुर ज़ुर ऱमराए खार्ल परिके दी। नोलाई ज़ुर ऱमराए गाल्‍क्‍यो दी।
MAT 13:8 फरी ख्‍वा धुर ते चाव गमस्‍याल परिके दी। नो ओसै बनै झाःद ख्‍वात तीस, ख्‍वात साथी, ख्‍वात सय दोबोर यासै झाःकेर दी।
MAT 13:9 आव पाँ जोए थैन्‍या उयुँ लिज़्‍या, चावस ओथैवक।”
MAT 13:10 येसुए उसिसर ओल्‍योक हुद, “काराव मिँरालाई घर्ती झाःद वाज़ नरासथैज़्‍याव?” है यादोक ते,
MAT 13:11 येसुए, “जेलाई वाज़ स्‍वर्गताव राज्‍यालाव कप्‍सिउ पाँर छर्लङ्ग सतैंसिउ लिज़्‍या, उपुर्कावरालाई ते म़ोंसिउ मिताव लिज़्‍या।
MAT 13:12 है जैद जोए परमेस्‍वरए ओपाँ रैद नैव, होए झन ज़ तीधुन्‍या ले। जोए परमेस्‍वरए ओपाँ माभैंःए, होए ओरैव ब ओपो·स ज़ म़ान्‍या ले।
MAT 13:13 होए उजूँनी ज़ घर्ती झाःद ङारासथैज़्‍याव। नोराए रँःज़्‍यावत ब मारँःधुर, थैज़्‍यावत ब मातीधुर।
MAT 13:14 नितावराए जूँनी ङ़ादा ज़ यसैयाए धर्मसास्‍त्रल अइ लिद सर्द नैद यायो, ‘थैन्‍या ते जेथैज़्‍या, जेमातीधुइ। रँःन्‍या ते जेरँःज़्‍या, जेमासरेस्‍धुइ।
MAT 13:15 आवराए यायुँ काता ज़ मातीधुन्‍या भुत्‍यासो ताद ले। यार्ना ब सूइसिउ मिताव ताद ले। यामी ब च़िम जैद यानैज़्‍याव मिताव लिज़्‍या। निताव यामाताव ताकिन आः झरी यामीए रँःधुखेरहो, यार्नाए थैधुखेरहो, यायुँल तीधुखेरहो। ङाल्‍योदा यायुँ ते फर्कैधुखेरहो। सोजोकावर ब ङाराजैधुखेहो।’
MAT 13:16 जे ते परमेस्‍वर दाइनो तावर जेलिज़्‍या, जेमीए ब जेरँःधुज़्‍या, जेर्नाए ब जेथैधुज़्‍या।
MAT 13:17 जेलाई साचो है ङादाचिज़्‍या, अगमबक्तार, घेप्‍पा धर्मी मिँराए ब आव जे जेरँःव पाँर रँःन्‍याए जूँनी यायुँ थू जैद ब रँःव मादैकेर, थैन्‍या युँ दाद ब थैव मादैकेर।”
MAT 13:18 “है जैद जे नो धुर वास्‍सिउ घर्तीए ओअर्थ थैचिके।
MAT 13:19 जोए परमेस्‍वरए ओराज्‍यालाव पाँ थैद ओमाबुझिधुकिन, सैतान ओल्‍योक हुद उयुँलाव वास्‍सिउ पाँ भरी स्‍याप सिप जैद लाँदिज़्‍याव। नो ज़ नो येमलाव परिउ धुर।
MAT 13:20 फरी नो ओदादरताव परिउ आव ज़, जोए परमेस्‍वरए ओपाँ थैद बेहार ज़ तीद खुसी ब ताज़्‍या।
MAT 13:21 खाली नो मिँ परमेस्‍वरए ओपाँत उयुँल ओजरा माल्‍यो मिताव ओतावए नो पाँ छ्यावा पै वाज़ रहिज़्‍या। नो पाँनी नोए ओक्‍याँत खिरीर उपसिकिन दुखर ओदैकिन नो पाँत उयुँ क़्याज़्‍या।
MAT 13:22 फरी नो ज़ुर ऱमराए खार्लाव परिउ धुर आव ज़, जोए परमेस्‍वरए ओपाँ ते थैज़्‍याव, खाली धन सम्‍पतीदा उयुँ थू जैद ‘आव ङाजिउत कै तान्‍या ओताव’ लिद व़ीनी फुइ ब लिज़्‍या। है जैद नितावराए परमेस्‍वरए ओपाँलाई यागालोए नो पाँ ओसै माझाःज़्याव ताज़्‍या।
MAT 13:23 फरी नो चाव गमस्‍याल परिउ धुर आव ज़, जो मिँए परमेस्‍वरए ओपाँ थैद चावस उतीकिन नो मिँ परमेस्‍वरए ओराज्‍याल ख्‍वात तीस, ख्‍वात साथी, ख्‍वात सय दोबोर ओसै झाःज़्याव धुर स्‍यासो ज़ ताज़्‍या।”
MAT 13:24 नकिन येसुए फरी तोबो घर्ती झाःद अइ लिद यासथैक्‍यो, “स्‍वर्गताव राज्‍या किताव उलिज़्‍याव लिक ते, तोबो मिँए ओएँःल बनै चाव धुर ओवासो मिताव लिज़्‍या।
MAT 13:25 नो ओवासोत तछा रील ओल स्‍याँद उलिज़्‍याक उसुतुर हुद ओएँःलाव ओवासो धुर खार्ल खु वास्‍द ख्‍यानैदिक्‍यो दी।
MAT 13:26 छींनी नो धुर परीद ओबालार ओझाःवत नल खुर ब रैंःकेर दी।
MAT 13:27 नो एँःए ओर्गेए ओय़ेन दाज़्‍यावर याघरपतीए ल्‍योक हुद, ‘आव नएँःल ते चाव धुर वाज़ नवास्‍ज़्‍याव सानी, आव खुर कातानी याहुव ओताव?’ है यादोक ते,
MAT 13:28 नो याघरपतीए, ‘काताकाव ङासुतुर हुद खु ओवासो ताखेहो,’ है यादोक्‍यो दी। ओय़ेन दाज़्‍यावराए फरी, ‘कै नलिज़्‍या? नो खुर गेराखुल्‍कैना रो?’ है यादोक ते,
MAT 13:29 ‘खुल्‍कैन्‍या माःक, नोलाई जेखुल्‍कैक कसाराक तामर ब जेराखुल्‍कैया।
MAT 13:30 क्‍या·न्‍या बेला ओमातावा पै निताव ज़ घलिज़्‍याक, सिप सिप ज़ घमींःरक। यामींःवत क्‍या·ना बाज़्‍यावरालाई ङ़ादा खु भरी खुल्‍कैव परींद पोला पोला जैद मेंःल म़ुव ङारापरींरिज़्‍या। ताम भरिलाई ते सिम्‍द दहरा बुमल झाःव ङारापरींरिज़्‍या,’ है यादोक्‍यो दी।”
MAT 13:31 नकिन येसुए फरी तोबो घर्तीनी अइ लिद यासथैक्‍यो, “स्‍वर्गताव राज्‍या तोबो मिँए बाजीए उधुर बारील ओझाःव मिताव लिज़्‍या।
MAT 13:32 नो धुर प़ाइँरानी तकेज़ा ओतादी ब, परीद ओघ्‍योःवत नो बारीलाव ङ़ैंराकिन प़ाइँरानी घेप्‍पा ताद नोए ओखारत नमताव भुर्ज़्‍याव बाज़ार सिपर जैद बासिज़्‍यार।
MAT 13:33 “हिताव ज़ फरी स्‍वर्गताव राज्‍या भरेस सोगोइन्‍या वासः स्‍यासो ब लिज़्‍या। सोंःसेमे मुछिसिउ कनेल तोचोप झाःदी ब प़ाइँ सरालिज़्‍याव।”
MAT 13:34 येसुए माहोल्‍यारालाई ओपाँ ओरासथैक घर्ती ओमाझाःवा पै ओमारासथैज़्‍याव।
MAT 13:35 ननी ज़ अगमबक्ताए धर्मसास्‍त्रलाव ओसरो यो·के। नोए ओसरो आव ज़, “ङापाँ भरी घर्तीर झाःद ङारासथैरिज़्‍या। नाम नम ओतावकिनकाव कप्‍सिउ पाँर ब सतैंद्यान्‍या ङाले।”
MAT 13:36 नकिन येसुए नो माहोल्‍यारालाई ख्‍यानैद झ़िमल बाके। उसिसर ओल्‍योक हुद, “गुर्बा, नो आछ्याकाव नझाःव एँःलाव खुए ओअर्थ गेलाई पलास्‍द्याव ताके,” है यादोक ते,
MAT 13:37 येसुए, “नो चाव धुर वास्‍ना बाज़्‍याव मिँ मिन्‍सिउ ख्रीस ज़।
MAT 13:38 एँः आव मानुवा ज़। नो चाव धुर परमेस्‍वरए ओराज्‍यालाव मिँर ज़। नो खु फरी, सैतानए उमींर ज़।
MAT 13:39 नो खु वास्‍ज़्‍याव उसुतुर ओल सैतान ज़। नो क्‍या·न्‍या बेला आव जुक खेम्‍न्‍या बेला ज़। नो क्‍या·ना बाज़्‍यावर परमेस्‍वरए ओचाकर्‍यार ज़।
MAT 13:40 किताव नो एँःए ओर्गेए खु भरी खुल्‍कैद मेंःल म़ुज़्‍याव, हिताव ज़ आव जुक ओखेमोत,
MAT 13:41 ङा मिँ मिन्‍सिद हुवए स्‍वर्गताव ङाचाकर्‍यारालाई ङारापरींरिज़्‍या। नोराए बले·ज़्‍यावर, अधर्म दाज़्‍यावरालाई दुप्‍द परमेस्‍वरए ओराज्‍यानी पले·द,
MAT 13:42 मेंःए मुल्‍काल याराख्‍यारिज़्‍यार। नल याहार ङर ङर कैद चिर्लनी बिर्ल घर्न्‍या लेर।
MAT 13:43 धर्मी भरी ते परमेस्‍वर याबाबुए ओराज्‍याल निमी मिताव झ़ार झ़ारोर तारिज़्‍यार। आव पाँ जोए थैन्‍या उयुँ लिज़्‍या, चावस ओथैवक।”
MAT 13:44 “फरी, स्‍वर्गताव राज्‍या तोबो एँःल गादैसिउ गदान्‍त मिताव ब लिज़्‍या। नोलाई तोबो मिँए ओदैकिन नो एँःए ओएः ओमासुदुमा पै पाखात मापले·द नल ज़ नैज़्‍याव। नो बनै रेंए रेंए उझ़िमदा बाद ओलसकाव लिज़्‍याव भरी यो·द नो गदान्‍त ल्‍यो एँःलाई लँःज़्‍याव।”
MAT 13:45 “फरी, स्‍वर्गताव राज्‍या तोबो बेपारीए असली हिरामुती उखिम्‍ज़्‍याव मिताव लिज़्‍या।
MAT 13:46 नोए बनै ओएः ल्‍यो ओदैकिन ओलसकाव लिज़्‍याव भरी यो·द तादी ब लँःज़्‍याव।”
MAT 13:47 “फरी, स्‍वर्गताव राज्‍या तोबो जाल रैःसिज़्‍यावए दहल जाल ओख्‍याव मिताव लिज़्‍या। नो ओजाल ओस़ेल्‍क चाव माचाव ङाँः भरी स्‍याप सिप जैद यारैज़्‍याव।
MAT 13:48 नो जाल दहनी ओहाइवत च़ुसिद चाव भरी ओजाल झाःद माचाव भरी याख्‍याज़्‍याव।
MAT 13:49 आव जुक खेम्‍न्‍या बेला ब हिताव ज़ तारिज़्‍या। परमेस्‍वरए ओचाकर्‍यार हुद धर्मीराए खार्लाव लिज़्‍याव पापीरालाई स़ेल्‍द,
MAT 13:50 मेंःए मुल्‍काल याराख्‍यारिज़्‍यार। नल याहार ङर ङर कैद चिर्लनी बिर्ल घर्न्‍या लेर।”
MAT 13:51 नकिन येसुए उसिसरालाई, “आव ङापाँव भरी जेमातीया?” है ओरादोक ते, “गेतीके,” है दोकेर।
MAT 13:52 येसुए फरी, “चाव ताके। धर्मसास्‍त्रलाव पाँ सैंज़्‍याव सास्त्री स्‍वर्गताव राज्‍यालाव पाँर ब उसिऊसिकिन तोबो बनै धनी मिँ स्‍यासो ताज़्‍या। नोए उझ़िमनी बनै याएः ल्‍योर, साःरोर पुराँदोर पुलुस्‍न्‍या लेर।”
MAT 13:53 येसुए आव घर्तीलाव ओपाँ भरी तुपैद ननी पुलुस्‍द,
MAT 13:54 ओल ओनाखारल बाद नलाव धर्मसास्‍त्र झ़िमल ब परमेस्‍वरए ओपाँ यासथैक्‍यो। नलावर येसुए ओपाँ थैद अचम्‍ब ताद, “आवए इताव ग्‍यानर, अचम्‍बलाव सक्तीर कातानी ओरैव?
MAT 13:55 काता, आव नो सीं त़ुज़्‍यावए ओज़ा माःक रो? आवए ओआमा ब गेसकाव लिज़्‍याव मरियम ज़ सानी। ओभाइर ब याकूब, योसेफ, सिमोन, यहूदार ज़ सानी।
MAT 13:56 ओबैंनीर ब गेस ज़ लिज़्‍यार सानी। नितावए इताव पाँर कातानी ओरैव ओताव?” है लिद,
MAT 13:57 जाँ सोव माँःती जैकेर। येसुए नो यापाँ सैंद, “अगमबक्तालाई ओल ओनाखारलावर स़ोनो ओक्‍याँदाङावराए वाज़ ओमान नैद माएर, उपुर्कावराए ते नैदिज़्‍यार,” है यादोक्‍यो।
MAT 13:58 नोर येसुलाई यायुँ ओमाहुबोए नल अचम्‍बलाव ओय़ेनर कोसै मादोक्‍यो।
MAT 14:1 हाः बेलाक राजा हेरोदए येसुए अचम्‍बलाव ओय़ेनर थैद,
MAT 14:2 ओय़ेन दाज़्‍यावरालाई, “आव ते ऱील सछैंज़्‍याव यूहन्‍ना ची जन्‍द उहुव सा। है जैद ज़ ताखेहो नाः सक्तीलाव य़ेनर ओदोज़्‍याव,” है यादोक्‍यो।
MAT 14:3 नो हेरोदए ङ़ादा ओभाइ फिलिपए ओज्‍या हेरोदियासए ओपाँनी यूहन्‍नालाई क्‍योःद किद झ्यालखानाल झाःद ओनैज़्‍याव।
MAT 14:4 नो यूहन्‍नाए ङ़ादा नो राजालाई, “नँ नभाइए ओज्‍यालाई रैन्‍या माताए,” है ओदोवए,
MAT 14:5 राजाए नोलाई सैःन्‍या युँ दाद ओनैज़्याव। खाली जनता भरिए ‘यूहन्‍ना अगमबक्ता ज़ लिज़्‍या’ लिद याथ·रैवए हेरोदए नोलाई सैःन्‍या जाँ ओछे·ज़्‍याव।
MAT 14:6 तछा राजा हेरोद उजर्मिउ मानिन्‍या छ्याम उहुवत हेरोदियासए मेंमा ओज़ा नो भत्‍यार ज़्‍युना हुवराए याङ़ाक बाद स़्याद याएक्‍यो। राजा हेरोद बनै खुसी ताद,
MAT 14:7 नो ल़ुज़ालाई, “नँ जो नपैंज़्‍या, हो ज़ ङायाँ” लिद किर्‍या झाःक्‍यो।
MAT 14:8 नो ल़ुज़ाए फरी, ओआमाए ओपैव मिताव ज़, “ङालाई ऱील सछैंज़्‍याव यूहन्‍नाए ओङ़ै च़म्‍द ताथील झाःद आक ज़ रैद्याँके,” है ओदोक ते,
MAT 14:9 राजाए उयुँर स्‍यासे सतेक्‍यो। खाली ओपाहुनाराए ङ़ाकाव ओझाःव किर्‍या ओमाख्‍याधुवए,
MAT 14:10 झ्यालखानाल लिज़्‍याव यूहन्‍नाए ओङ़ै च़मो यापरींक्‍यो।
MAT 14:11 नोर बाद यूहन्‍नाए ओङ़ै च़म्‍द ताथील झाःद नो ल़ुज़ालाई एकेर। नो ल़ुज़ाए फरी ओआमालाई लाँदिक्‍यो।
MAT 14:12 छींनी यूहन्‍नाए उसिसराए ओमोरोलाई च़िहुद लाँद यागादैवत येसुलाई है दोनाकेर।
MAT 14:13 येसुए नो पाँ थैद दोङ्गाल पसिद तोबो साइँसुइँव पोक ओबातङ बाके। नो माहोल्‍यार ओबाज़्‍याव सैंद सहररानी पुलुस्‍द याखँनी ज़ दह छ्यो छ्यो ओल्‍योदा ज़ बाकेर।
MAT 14:14 येसु दोङ्गातिन उझरिउ प़ाइँना मिँर बनै माहोल्‍या रँःद उयुँ नाद याजोरो हुवरालाई यासगराँक्‍यो।
MAT 14:15 जाँ ऱिमदा ऱिमदा उसिसर ओल्‍योक हुद, “गे इताव साइँसुइँवक गेलिज़्‍या, नम ब नुप्नाके। आव माहोल्‍यारालाई नाखार जीदा यापरींके, ज़्‍यावर लँःद घज़्‍युरक,” है यादोक ते,
MAT 14:16 येसुए, “आवर आनी यामाबादी ब ताए। जे ज़ ज़्‍यावर याव ताके,” है ओरादोक ते,
MAT 14:17 उसिसराए “गेस भरेस पाँच गोता, ङाँः ऩेब्‍लो वाज़ लिज़्‍या,” है यादोक ते,
MAT 14:18 येसुए “जेस लिज़्‍याव भरेस स़ोनो ङाँः ङालाई रैद्याँचिके,” है दाद,
MAT 14:19 नो माहोल्‍यारालाई बाँल च़ुसिउ परींद नो पाँच गोता भरेस ऩेब्‍लो ङाँः उकुइत रैद स्‍वर्गदा भाल्‍सिद, असिक ऩिद भरेसर केःद उसिसरालाई नो माहोल्‍यारालाई भाःद्याव यापरींक्‍यो।
MAT 14:20 नोर प़ाइँए याफू तसी ज़्‍युकेर। नो यासय़ेलोर यादुप्‍क बाह्र झुर्नु ताके।
MAT 14:21 नो भरेस ज़्‍युज़्‍यावर, मेंमार स़ोनो ल़ुज़ार माझाःद, खेपार वाज़ पाँच हजारा याल्‍यो।
MAT 14:22 हाःत ज़ येसुए उसिसरालाई दोङ्गाल पसिउ परींद दह होफत ओलकिन ङ़ादा ज़ यापरींक्‍यो। ओल येसुए ते नो माहोल्‍यारालाई याझ़िमदा याझ़िमदा ओरापरींज़्‍याव।
MAT 14:23 नोरालाई ओरापरींधुव छींनी ओल तोबो दाँदात बाद पोंखारिनाक्‍यो। नो बेलाक नम झ्यानाद उलिज़्‍याव, नो दाँदात ओबातङ ज़ उलिज़्‍याव।
MAT 14:24 फरी उसिसर यालिज़्‍याव दोङ्गा दहल कुधु होङ ज़ केस्‍द उलिज़्‍याव। नो बेलाक ज़ बतास उसिसराए ल्‍योदा बनै चोइस हुद ऱीए ओछल्‍काए नो दोङ्गालाई आदानी होदा ओजैज़्‍याव।
MAT 14:25 हाःत ज़ रीलाव तीन बजेवाक येसु ऱी तर्त तर्त याल्‍योदा ज़ बाके।
MAT 14:26 उसिसराए ऱी तर्त तर्त उहुज़्‍याव रँःद, “आव ते झ़्या ची सा!” है लिद याछ्याचेए बनै क़िकेर।
MAT 14:27 हाःत ज़ येसुए, “ताछे·च्‍यो, जेयुँ होलाँ जैचिके, ङा ची,” है ओरादोव प़ाइँना,
MAT 14:28 पत्रुसए, “प्रभु, साचो नँ ज़ ताकिन, ङालाई ब ऱी तर्त तर्त नल्‍योदा हुव याँके,” है दोक्‍यो।
MAT 14:29 येसुए, “ताए, हुन्‍के,” है ओदोव प़ाइँना पत्रुस दोङ्गातिन झरिद ऱी तर्त तर्त येसुए ल्‍योदा ओबाज़्‍याक,
MAT 14:30 ऱीए ओछल्‍का उहुज़्‍याव रँःद छे·द ऱील गदिउ ओपैंज़्‍याक, “दे प्रभु, ङालाई जोगोइनाके,” है ओदोव प़ाइँना,
MAT 14:31 येसुए नोलाई उकुइनी क्‍योःद, “नँ किताव मिँ नल्‍यो, नयुँ माथ॰रिद आःपै ङालाई नयुँ ओमाहुप्‍ज़्‍याव,” है दोक्‍यो।
MAT 14:32 नोनी दोङ्गाल निपसिउ प़ाइँना ज़ बतास ब थकनिके।
MAT 14:33 नो दोङ्गाल लिज़्‍यावराए फरी, “नँ साचो ज़ परमेस्‍वरए ओज़ा नल्‍यो,” लिद उखँत फुलुप्‍सिकेर।
MAT 14:34 दह होफताव गनेसरेत यादोज़्‍याव पोङ याकेसोत,
MAT 14:35 नलाव लिज़्‍याव मिँराए येसुलाई सरेस्‍द नजीदाङाव याजोरो हुव भरिरालाई दुप्‍द ओल्‍योक यारारैकेर।
MAT 14:36 नोराए, “नक्‍वाए उतुपा वाज़ छापो गेदैक,” है दाद छापो भरी ओपो·स ज़ गराँकेर।
MAT 15:1 तछा यरूसलेम सहरनी फरिसीर स़ोनो सास्‍त्रीर येसुए ल्‍योक हुद,
MAT 15:2 “नसिसराए काराव गेसाखा पुर्खारानी हुव चलन यामादोज़्‍याव? आवराए याकुइ माचोखोइद ज़ ज़्‍युज़्‍यार,” है यादोक ते,
MAT 15:3 येसुए नोरालाई, “जे ते झन जेसाखा पुर्खाराए याचलननी परमेस्‍वरए ओकानुनलाई जेबले·ज़्‍या।
MAT 15:4 परमेस्‍वरए, ‘बाबु आमाए ओमान नैद्याव ज़ परिए,’ स़ोनो, ‘जोए ओबाबु ओआमाए उमिन बले·दिज़्‍याव, होलाई सैःव ज़ परिए’ है लिज़्या।
MAT 15:5 जे ते झन, ‘जोए ओबाबु ओआमानिलाई, ‘जिन ङानिकाव दैव परिन्‍या भरी परमेस्‍वरए उमिनत ची नैद ङानै,’ है उलिकिन,
MAT 15:6 नो मिँलाई ओबाबु ओआमानी निभार मालागिए,’ है जेलिज़्‍या। है जैद जे निताव जेय़ेननी ज़ जेचलनलाई सघ्‍योःद परमेस्‍वरए ओपाँलाई अऩाकलाव जेजैज़्‍या।
MAT 15:7 जे मिताव कैफतीराए जूँनी यसैयाए ङ़ादा ज़ थिक सर्द नैद्याचिउ। नोए ओसरो आव ज़,
MAT 15:8 ‘आवराए यायाःए वाज़ ङामान नैद्याँज़्‍यार। यायुँ ते ङाकिन तादाङ लिज़्‍या।
MAT 15:9 मिँराए याससैव चलनलाई सघ्‍योःद, अऩाकल ज़ ङासेवा दोज़्‍यार,’ ” है यादोक्‍यो।
MAT 15:10 नकिन येसुए नक लिज़्‍याव माहोल्‍यारालाई ओल्‍योदा खुल्‍द, “आव ङापाँ चावस थ·रैच्‍यो,
MAT 15:11 पाखानी याःल पसिज़्‍यावए मिँलाई माछैंव माजैव। मिँलाई माछैंव जैज़्‍याव ते याःनी पुलुस्‍ज़्यावए ची,” है लिद यासथैक्‍यो।
MAT 15:12 उसिसराए नो ओपाँ थैद येसुलाई, “प्रभु, आव नपाँए फरिसीराए यायुँ कोला कोला जैद नरायो नमासैंए रो?” है यादोक ते,
MAT 15:13 येसुए, “स्‍वर्गताव ङाबाबुए ओमारारूपिउ भरी तछा भोस्‍रिज़्‍यार।
MAT 15:14 हैज़ घताज़्‍यारक, नोर तोबो उमी मारैंःवए उमी मारैंःवलाई दोरैद ओलाँज़्‍याव मितावर लिज़्‍यार। नितावनी दोरैसिद निबाक ऩेब्‍लो ज़ भल्‍खादाल तेन्‍या लिनी,” है यादोक्‍यो।
MAT 15:15 हाःत ज़ पत्रुसए फरी, “ङ़ादाङाव नपाँए ओअर्थ गेलाई पलास्‍द्याव ताके,” है ओदोक ते,
MAT 15:16 येसुए, “जे किताव मिँर जेल्‍यो, आःपै ङापाँ जेमातीधुज़्‍याव।
MAT 15:17 जो ज़्‍याव ज़्‍युदी ब नो ज़्‍याव अइज़ फूल पसिद छींनी पुलुस्‍द बाज़्‍या लिन्‍या जेमासैंए रो?
MAT 15:18 मिँलाई बले·ज़्याव ते युँल सिर्जैद याःनी पुलुस्‍ज़्‍याव पाँए ची।
MAT 15:19 युँलाव माचाहिउ पाँर आवर ज़ — माचाव चेतैन्‍या, मिँ सैःन्‍या, अर्काए ओज्‍याए ल्‍योदा बान्‍या, पातर्‍या पातर्नी जैसिन्‍या, कुन्‍या, धुत गोहाई यान्‍या, अर्काए उमिन बले·द्यान्‍या,
MAT 15:20 आवर ज़ मिँलाई बले·न्‍या पाँर। निताव कुइ माचोखोइद ज़्‍यान्‍याए काता ज़ माबले·व।”
MAT 15:21 येसु ननी पुलुस्‍द तुरोस सीदोन जीदा बाके।
MAT 15:22 नलाव तोबो कनानी मेंमा येसुए ल्‍योक हुद, “अ प्रभु, दाऊदए ओथोलाव येसु, ङाल्‍योदा नयुँ ओनाक। मेंमा ङाज़ालाई माचाव पुरूसए क्‍योःद बनै हत्‍या याद नैव,” है लिद उक़िक,
MAT 15:23 येसुए घाइ ज़ मादोक्‍यो। उसिसराए फरी, “आव मेंमा बनै झ्याउँ झ्याउँ लिज़्‍या, हतप्‍त ज़ पले·के,” है यादोक ते,
MAT 15:24 येसुए नो मेंमालाई, “ङा इस्राएली जातलाव म़ाव ङोइव बेधा स्‍यासोराए जूँनी वाज़ ङाहुव ची,” है ओदोक ते,
MAT 15:25 नो मेंमाए येसुए उखँत फुलुप्‍सिद, “जेरो ङाप्रभु, ङाल्‍योदा नयुँ ओनाक,” है दोक्‍यो।
MAT 15:26 येसुए फरी, “ल़ुज़ाराए याज़्‍युज़्‍याव ज़्‍याव नैंद काःरालाई यान्‍या माताए,” है ओदोक ते,
MAT 15:27 नो मेंमाए, “हैज़ प्रभु, हैदी ब यार्गेराए तेबलतिन यासतेव ज़्‍याव काःराए मनी ज़्‍याव दैर सानी,” है ओदोक ते,
MAT 15:28 येसुए, “अ माँ, नँ बनै नयुँ हुबो मेंमा नल्यो। है नल्‍यो भरी यो·न्‍या ले,” है ओदोव प़ाइँना होङ ओज़ा ओगराँधुव ओल्‍यो।
MAT 15:29 येसु ननी पुलुस्‍द गालील दहलाव घ्याँ बाद तोबो दाँदात पुलुस्‍द च़ुसिके।
MAT 15:30 नत च़ुसिद उलिज़्‍याक नजीलाव माहोल्‍याराए काना दूँदार, लुला लङरार, लाता भैरार, याजोरो हुवरालाई ब येसुए ल्‍योक रैद ओङ़ाक यारानैकेर। येसुए नो भरिलाई ओपो·स ज़ यासगराँक्‍यो।
MAT 15:31 नो माहोल्‍याराए निताव मापाँधुन्‍यार पाँधुन्‍या याताव, यामी मारैंःवर रँःधुन्‍या याताव, माबाधुन्‍यार बाधुन्‍या याताव रँःद नोर बनै अचम्‍ब ताद इस्राएलीराए यापरमेस्‍वरलाई बनै घ्‍योःव ज़ थ·रैद उमिन ब सघ्‍योःदिकेर।
MAT 15:32 नकिन येसुए उसिसरालाई ओल्‍योदा खुल्‍द, “आव माहोल्‍यार रँःद ङायुँ नाज़्‍या। आवर ङास याल्‍यो आछिम स़ोंला ताकेर। याज़्‍याव भरी ब खेम्‍के। आवरालाई करे ज़ परींन्‍या ङायुँए माभैंःए, अइज़ परींकिन येमत याकरेए माधुन्‍या लेर,” है ओरादोक ते,
MAT 15:33 उसिसराए, “इताव साइँसुइँवक आःकाव माहोल्‍यारालाई गे कातानी ज़्‍यावर रैद सव़ाँन्‍या की?” है यादोक ते,
MAT 15:34 येसुए, “जेस भरेस खागोता उलिज़्‍याव?” है ओरादोक ते, “भरेस सात गोता, ङाँःजुँर ऩेबरेंवा लिज़्‍यार,” है दोकेर।
MAT 15:35 नकिन येसुए नो माहोल्‍यारालाई नामक च़ुसिउ परींद,
MAT 15:36 नो सात गोता भरेस स़ोनो ङाँःजुँर उकुइत रैद धन्‍याबाद चरैःद नो भरेसलाई केःद उसिसरालाई नो माहोल्‍यारालाई भाःद्याव ओरापरींक ते, भाःद याराएकेर।
MAT 15:37 नोर प़ाइँए याफू तसी ज़्‍याद यासय़ेलो यादुप्‍क सात झुर्नु ताके।
MAT 15:38 नो ज़्‍युज़्‍यावर, मेंमार स़ोनो ल़ुज़ार माझाःद, खेपा भरी वाज़ चार हजारा याल्‍यो।
MAT 15:39 नकिन नो माहोल्‍यारालाई याझ़िमदा याझ़िमदा परींद येसु दोङ्गाल पसिद मगादान खन्‍द जीदा बाके।
MAT 16:1 नल फरिसीर स़ोनो सदुकीराए येसुलाई जाँचिन्‍याए जूँनी ओल्‍योक हुद, “गेलाई स्‍वर्गताव नसरेस तोबो सतैंद्याव ताके,” है यादोक ते,
MAT 16:2 येसुए, “जे ऱिमदा नम घाव जेरँःकिन ‘पराःती बेल्‍न्‍या ले’ है लिन्‍या जेसैंज़्‍या।
MAT 16:3 छकाल्‍न्‍या नम घाव जेरँःकिन ‘आछिम नम वान्‍या ले’ लिन्‍या ब जेसैंज़्‍या। है जैद जे निताव नमताव सरेसर थ·रैधुज़्‍यावराए कै जैद बेलाए ओसरेसर ताकितर जेमाथ·रैधुज़्‍याव?
MAT 16:4 आव जुकलाव यायुँ माहुबो पापीराए सरेस वाज़ खिम्‍ज़्‍यार। खाली यादैरिज़्याव सरेस ते योनाए ओक्‍याँत ताव सरेस वाज़ दैरिज़्यार,” है दाद याख्‍यानैक्‍यो।
MAT 16:5 नकिन येसु उसिसरास दह होफत याबाक उसिसराए यास भरेस लाँन्‍या यामेंःव ओल्‍यो।
MAT 16:6 नक याकेसोत येसुए उसिसरालाई, “जे फरिसीर स़ोनो सदुकीराए भरेसल याझाःज़्याव वासःनी जोगोइसिद लिच्‍यो,” है ओरादोक ते,
MAT 16:7 नोराए या याल, “भरेस रैन्‍या गेमेंःवए नै ओदासिज़्‍याव ताक्‍या,” है यालिज़्‍याव।
MAT 16:8 येसुए थैद, “ए जेयुँ माहुबोर, काराव जे ङापाँलाई झन भरेस त॰दा जेथ·रैनाज़्‍याव?
MAT 16:9 आःपै जेमातीधुइ रो? पाँच गोता भरेसए पाँच हजारए याफू तसी ज़्‍यादकाव यासय़ेलो कुधु झुर्नु ओताव माःक रो? काता घरी जेमेंःधुव।
MAT 16:10 स़ोनो सात गोता भरेसए चार हजार मिँए याफू तसी ज़्‍यादकाव यासय़ेलो कुधु झुर्नु ओताव माःक रो?
MAT 16:11 कै जैद जेमाबुझिधुज़्याव? ङा ते भरेसए जूँनी ङापाँव माःक। फरिसीर स़ोनो सदुकीराए जूँनी ङापाँव ची,” है ओरादोक ते,
MAT 16:12 बल्‍ल, “भरेसए जूँनी ते माःक ची ओल्‍यो, फरिसीर स़ोनो सदुकीराए यापाँनी जोगोइसिद लिच्‍यो है ओदासिउ ची ओल्‍यो,” है लिकेर।
MAT 16:13 नकिन येसु कैसरिया फिलिप्‍पी खन्‍द जीदा ओबावत उसिसरालाई, “ङा मिँ मिन्‍सिद हुवलाई मिँराए सु है दाँज़्‍यार?” है ओरादोक ते,
MAT 16:14 उसिसराए, “ख्‍वाराए ऱील सछैंज़्‍याव यूहन्‍ना है दींज़्‍यार, ख्‍वाराए एलिया है दींज़्‍यार, ख्‍वाराए फरी यर्मिया ताक्‍या, सैं काताकाव अगमबक्ता ताक्‍या है दींज़्‍यार,” है यादोक ते,
MAT 16:15 येसुए, “जे ङालाई सु है जेदाँज़्‍या नी?” है ओरादोक ते,
MAT 16:16 सिमोन पत्रुसए, “नँ जींदो परमेस्‍वरए ओज़ा ख्रीस ज़,” है दोक्‍यो।
MAT 16:17 येसुए नो थैद पत्रुसलाई, “धन्‍याकाव, योनाए ओज़ा सिमोन पत्रुस, नल्‍योदा परमेस्‍वर दाइनो ताव। आव पाँ मिँए बुद्धीनी नथ·रैव माःक, स्‍वर्गताव ङाबाबुनी नथ·रैव ची।
MAT 16:18 है जैद ङा नमिन पत्रुस जैद ङाईंज़्‍या। नो पहर तर्त ज़ ङामन्‍दली ङाजैरिज़्या, स़ोनो नर्गलाव सक्तीराए नोलाई पल्‍तैधुन्‍या मालेर।
MAT 16:19 स्‍वर्गताव राज्‍यालाव साँचार ब नँलाई ङाईंरिज़्‍या। है जैद नँ आव मानुवात जो नथ·रैज़्‍या, स्‍वर्गत ब हो ज़ थ॰रिन्‍या ले। फरी, आव मानुवात जो य़ेन मादान्‍या नथ·रैज़्‍या, स्‍वर्गत मनी हिताव ज़ थ॰रिन्‍या ले,” है दोक्‍यो।
MAT 16:20 नकिन उसिस भरिरालाई, “ङा ख्रीस ज़ लिद सुलाई ज़ है तारादोच्‍यो,” है यादोक्‍यो।
MAT 16:21 हो बेलाकिन ज़ येसुए यरूसलेमल ओक्‍याँत हुरिज़्‍याव दुखर उसिसरालाई है यादोनाक्‍यो। “ङा यरूसलेमल ङाकेसोत गेदेसलाव स़ेरर, मुख्‍या पुजारीर स़ोनो सास्‍त्रीराए ल्‍योनी बनै धो सहिउ दुखर ङादैरिज़्‍या। नोराए यासैःनाव स़ोंलात सिउनी सैंसिद ङासोरिज़्‍या,” लिद उसिसरालाई है ओरादोक ते,
MAT 16:22 पत्रुसए येसुलाई तँदा लाँद सिङार्द, “प्रभु, परमेस्‍वरए निताव ताव तायोक, नक्‍याँत निताव खर्क ज़ ताताक,” है ओदोक ते,
MAT 16:23 येसु पत्रुसए ल्‍योदा भाल्‍सिद, “ए सैतान, ङाङ़ाकिन पुलुस्‍निके। नँ ते ङालाई परमेस्‍वरए ओय़ेनत ङायुँ केःद्यान्‍या ची नपैंके। नँ नयुँ परमेस्‍वरए ल्‍योदा माझाःद मिँराए याझाःज़्‍यावदा ची नझाःके,” है दोक्यो।
MAT 16:24 उसिस भरिरालाई येसुए, “जोए ङास हुन्‍या युँ दोज़्‍याव, होए उजिउए मया मादाद क्रुसत सिन्‍या मिताव दुखर सहिद ङाछींत उहुक।
MAT 16:25 जोए आव उजिउत ओललाई तान्‍या वाज़ खिम्‍ज़्याव, होए उजुनीलाई सम़ैज़्‍याव। फरी जोए आव उजिउत उजिउए मया मादाद ङा ङाजूँनी दोज़्याव, होए जुनी दैरिज़्‍याव।
MAT 16:26 जोए आव मानुवात लिज़्‍याव भरी दुप्‍द उजुनीलाई ओसम़ैकिन नोलाई काता फाइदा ची तायादा? नोए उजुनीए ओपोल काता यान्‍या?
MAT 16:27 ङा मिँ मिन्‍सिउ तछा स्‍वर्गताव ङाबाबुए ओज़गै मगैरास ओचाकर्‍यारास आव मानुवात फरी तखेप हुद मिँराए यादोव याय़ेनए ओजेला ङाराएरिज़्‍या।
MAT 16:28 ङा जेलाई साचो है ङादाचिज़्‍या, आकाव च्‍याँःसिद लिज़्‍यावरानी जे ख्‍वा ख्‍वाराए ङा मिँ मिन्‍सिउलाई ङाराज्‍यास ङाहुज़्याव जेमारँःवा पै सिन्‍या जेमाले,” है लिद यासथैक्‍यो।
MAT 17:1 नकिन छ दिनत येसुए पत्रुस, याकूब स़ोनो होए ओभाइ यूहन्‍नारालाई याबातङ तोबो झेंःव गोंत ओलस यालाँक्‍यो।
MAT 17:2 नक याकेसोत येसुए ओक्‍याँर त़ोसिद, ओङाःर ब निमी स्‍यासो झ़ार झ़ारो ताके, ओक्‍वार ब तक तकौ मी झीःन्‍या ताके।
MAT 17:3 नाःत ज़ मोसा स़ोनो एलियानी नक ज़ सरैंःसिद येसुस पाँकिनी।
MAT 17:4 नो रँःद पत्रुसए येसुलाई, “अ प्रभु, गे आक लिन्‍या बनै चाव लिज़्‍या। नयुँ ओताकिन, ङा जेलाई स़ोम्‍लो पाल तङ्गैद ङायाच्‍यो, तोबो नँलाई, तोबो मोसालाई, तोबो एलियालाई,” है लिद,
MAT 17:5 ओपाँज़्‍याक ज़ तोबो बनै धोइ धोइव बादल हुद नोरालाई याकप्‍क्‍यो। नो बादल जींनी तोबो गा अइ लिद थास्‍के, “आव ङायुँलाव ङाज़ा ज़, आवलाई रँःद ङायुँ होलाँ ताज़्‍या। जे आवए ओपाँ थैच्‍यो,”
MAT 17:6 है उलिज़्‍याव नो स़ोम्‍लोए थैद नोर याछ्याचेए फुलुपसिकेर।
MAT 17:7 हाःत ज़ येसु हुद नोरालाई छाप्‍द, “सोचिके, ताछे·च्‍यो,” है ओरादोवत,
MAT 17:8 आदा होदा याभाल्‍सिक येसुलाई वाज़ रँःकेर।
MAT 17:9 नो गोंतिन याझरिज़्‍याक येसुए नोरालाई “आव जेरँःव भरी ङा मिँ मिन्‍सिउ सिद ङामासैंसिवा पै सुलाई ज़ है तारादोच्‍यो,” है ओरादोक ते,
MAT 17:10 नो स़ोम्‍लोए, “सास्‍त्रीराए काराव ख्रीसकिन ङ़ादा एलिया हुन्‍या ले है यालिज़्‍याव?” है यादोक ते,
MAT 17:11 येसुए, “हैज़, एलिया ङ़ादा ज़ हुद प़ाइँलाई ताव परिन्‍या मिताव जैन्‍या ले।
MAT 17:12 खाली ङा जेलाई आव मनी है ङादाचिज़्या, एलिया ते ङ़ादा ज़ हुधुके। आलाव मिँराए झन नोलाई मासरेस्‍द यामन लागिउ ज़ जैकेर। हिताव ज़ ङा मिँ मिन्‍सिउलाई मनी दुखर याद सैःनारिज़्यार,” है यादोक्‍यो।
MAT 17:13 हाःत ज़ नो स़ोम्‍लोए एलियाए ओय़ेन ऱील सछैंज़्‍याव यूहन्‍नाए ओक्‍याँत ची ओताव ओल्‍यो लिन्‍या थ·रैकेर।
MAT 17:14 येसु नो स़ोम्‍लोरास नो गोंतिन झरिद माहोल्‍याराए ल्‍योक याबाक ननी तोबो हुद येसुए उखँत फुलुप्‍सिद,
MAT 17:15 “अ प्रभु, ङाज़ालाई नयुँ ओनाक, नोलाई पुल्‍न्‍या बेथाए क्योःद बनै दुख याद नैव। कैताक मेंःल ब परिज़्या, कैताक ऱील ब परिज़्या।
MAT 17:16 नोलाई नसिसराए ल्‍योक ङारैक सगराँद मायाँधुकेर,” है ओदोक ते,
MAT 17:17 येसुए, “ए जेयुँ माहुबोर, परमेस्‍वरस माखैवर, ङा जेस खा ची ङालिरिज़्‍याव, खा ङासहिचिके!” है दाद नो छोर्‍याए ओबाबुलाई, “नज़ालाई आदा रैके,” है दाद,
MAT 17:18 नो माचाव पुरूसलाई ओहप्कैव प़ाइँना ओक्‍याँतिन पुलुस्‍द बाके। नो छोर्‍या ब हो प़ाइँना ज़ गराँके।
MAT 17:19 नकिन जाँ छ्यावाक उसिसराए येसुलाई सुए ज़ यामासैंद, “गे कै जैद नो माचाव पुरूसलाई गेमापले·धुव?” है यादोक ते,
MAT 17:20 येसुए, “परमेस्‍वरए ओल्‍योदा जेयुँ ओमाहुबोए ज़ जेमापले·धुव। ङा जेलाई साचो है ङादाचिज़्‍या, परमेस्‍वरए ओल्‍योदा बाजीए ओसै हावालिउ तादी ब जेयुँ जेसुहुप्‍किनी तोबो हाँलाई ‘भोस्‍निके’ है जेदोकिन भोस्‍न्‍या ज़ ले। है जैद जे मादाधुन्‍या काता ज़ माले।
MAT 17:21 [हैदी ब इताव पुरूसलाई पले·न्‍या ते उपासिद मापोंखारिवा पै मापले·सिधुइ।”]
MAT 17:22 छींनी तछा येसु उसिसरास गालीलल यादुप्‍सिक उसिसरालाई, “ङा मिँ मिन्‍सिउलाई तछा मिँराए याकुइत सूँपिनारिज़्‍यार।
MAT 17:23 नोराए ङालाई सैःनारिज़्‍यार। हैदी ब स़ोंलात परमेस्‍वरए सोचोइनारिज़्‍याव,” है यादोक्‍यो। नो थैद उसिसराए यायुँ माचाव जैकेर।
MAT 17:24 छींनी कफर्नहुमल याबावत ध्‍यान झ़िमलाव सिर्मा स्‍यो·ज़्‍यावर हुद पत्रुसलाई, “जेगुर्बाए ध्‍यान झ़िमलाव सिर्मा ओफो·ज़्‍याव सैं ओमाफो·ज़्‍याव?” है यादोक ते,
MAT 17:25 “फो·ज़्‍याव ज़,” है दाद पत्रुस झ़िमल उपसिउत येसुए, “अ सिमोन, नँ कै नलिज़्‍या? आव मानुवाताव राजाराए सिर्मा स़ोनो दोरो सुरालाई याराहाइज़्‍याव? याझ़िमलावरालाई सैं छुतङावरालाई?” है ओदोक ते,
MAT 17:26 सिमोनए, “छुतङावरालाई,” है दोक्‍यो। येसुए, “हो ताकिन ते गे नो झ़िमलावराए ते माफो·व परिन्‍या।
MAT 17:27 हैदी ब नोरालाई सभैंःन्‍याए जूँनी बल्‍छी लाँद दहल रैःसिनान्‍केदा, प़ाइँरानी उस॰कताव नहाइव ङाँःए ओयाः नफैक गिन फो·न्‍या चाँदीए सिक्‍का नोए ओयाःल दैन्‍या नले। हो ज़ लाँद गिनजूँनी फो·नायो।”
MAT 18:1 हो बेलाक ज़ येसुए उसिसर ओल्‍योक हुद, “स्‍वर्गताव राज्‍याल प़ाइँरानी घेप्‍पा सु गेलिज़्‍याव?” है यादोक ते,
MAT 18:2 येसुए तोबो ज़िम्‍ज़ा ल़ुज़ालाई रैद याङ़ाक सच्‍याँद,
MAT 18:3 “जेलाई साचो है ङादाचिज़्‍या, जे जेयुँर त़ोद ल़ुज़ा मिताव जेमातावा पै स्‍वर्गताव राज्‍याल पसिउ दैन्‍या जेमाले।
MAT 18:4 जो आव ल़ुज़ा मिताव मासघ्‍योःसिद सज़िम्‍सिज़्‍या, हो ज़ स्‍वर्गताव राज्‍याल घेप्‍पा ताज़्‍या।
MAT 18:5 फरी जोए ङामिनत आव मिताव ज़िम्ज़ारालाई यासुम्‍ज़्‍याव, होए ङालाई ब सुम्‍नाज़्‍याव।
MAT 18:6 फरी जोए आव मिताव ङालाई यायुँ हुबो ज़िम्‍ज़ारालाई पापल ओरापारैकिन, नितावलाई ते बुरू ओधेंल राँथै सुर्द्याद समुन्‍द्रल ख्‍यान्‍या पाथ लिज़्‍या।
MAT 18:7 पापल पारैज़्‍याव पाँराए जूँनी आव मानुवालाई थैए माँतकन ज़ लिज़्‍या। निताव पाँर ते जुनी ब हुन्‍या ज़ लेर, खाली निताव पाँर पले·ज़्यावलाई थैए माँतकन ज़ लिज़्‍या।”
MAT 18:8 “नखँए तादी ब नकुइए तादी ब माचावल ओपारैनिकिन च़म्‍द ख्‍याके। नो नखँ नकुइए माजिप्‍तिन्‍या मेंःल ख्‍याव ओदोज़्‍याव देखा बुरू अजम्‍बरी जुनील थूँद्यासो पसिन्‍या पाथ लिज़्‍या।
MAT 18:9 हो मिताव ज़ नमीए माचावल ओपारैनिकिन, नो नमीलाई कोला·द ख्‍याके। नो नमीए नर्गलाव मेंःल ख्‍याव ओदोज़्‍याव देखा बुरू परमेस्‍वरए ओराज्‍याल काना ताद पसिन्‍या पाथ लिज़्‍या।
MAT 18:10 है जैद जे आव मिताव ज़िम्‍ज़ारालाई सुए ज़ तारासोच्‍यो। नोरालाई समारिज़्‍याव परमेस्‍वरए ओचाकर्‍यार एकतार ज़ स्‍वर्गताव परमेस्‍वर ङाबाबुए ओङ़ाक ज़ लिज़्‍यार,” है यादोक्‍यो।
MAT 18:11 [“है जैद ङा मिँ मिन्‍सिद हुवए म़ाव ङोइवरालाई साप्‍द परमेस्‍वरए ल्‍योदा लाँन्‍याए जूँनी ङाहुव ज़।]
MAT 18:12 जे कै जेलिज़्‍या? तोबोए ओबेधार तसय यालिकिन ननी तोबो फातिद ओङोइकिन नो उनान्‍सयरालाई बनल ज़ ख्‍यानैद नो ङोइवलाई खिम्‍नाज़्‍याखेहो सानी।
MAT 18:13 ङा साचो है ङादाचिज़्‍या, नोलाई ओदैकिन नो माङोइव उनान्‍सयराकिन नो तोबोए ल्‍योदा झन उयुँ होलाँ ताद रेंज़्‍या।
MAT 18:14 हो मिताव ज़ स्‍वर्गताव जेबाबुए ब इताव ज़िम्‍ज़ा तादी ब ‘तँदा बाद ताङोइक’ लिद उयुँ थू जैज़्‍याव।”
MAT 18:15 “तोबो ननैंए मादान्‍या ओदोज़्‍याव नरँःकिन ङ़ादा नोलाई अलगज़ा ओखत सतैंदियो। नोए नपाँ थैद ओभैंःकिन नोलाई नबाँचैव मिताव ज़ ताके।
MAT 18:16 फरी नोए नपाँ थैव ओमाभैंःकिन छुतर ब तोबो ऩेब्‍लो बाद सम्‍जैव ताके। धर्मसास्‍त्रल ब नोए उजूँनी इताव सर्सिउ लिज़्‍या, ‘छुतए ओङ़ैताव पाँ ऩेब्‍लो स़ोम्‍लोए यासाची ओखैकिन नो पाँ ज़ थ॰रिउ ताज़्‍या।’
MAT 18:17 नोए नोराए यापाँ ब ओमाभैंःकिन नोलाई परमेस्‍वरए उमिनताव भरिराए ङ़ाक ज़ है दाव ताके। नोराए यापाँ ब ओमाभैंःकिन नो मिँलाई परमेस्‍वरकिन तँदाङावरासकाव स़ोनो सिर्मा स्‍यो·ज़्यावरासकाव गनिउ ताके।
MAT 18:18 है जैद ङा जेलाई साचो है ङादाचिज़्‍या, जे आव मानुवात जो जेथ·रैज़्‍या, स्‍वर्गत ब हो ज़ थ॰रिन्‍या ले। फरी, आव मानुवात जो य़ेन मादान्‍या जेथ·रैज़्‍या, स्‍वर्गत मनी हिताव ज़ थ॰रिन्‍या ले।
MAT 18:19 फरी ङा जेलाई है ङादाचिज़्या, आव मानुवात ऩेब्‍लोए वाज़ तयुँ जैद काताराए जूँनी जेपोंखारिकिन, नो जेपाँ स्‍वर्गताव ङाबाबुए सयो·द्यान्‍या ले।
MAT 18:20 है जैद जोक तादी ब ङामिनत ऩेब्‍लोकिन यादा जेदुप्‍सिकिन ङा ब जेस ज़ ङातारिज़्‍या।”
MAT 18:21 नकिन पत्रुस येसुए ल्‍योक बाद, “प्रभु, तोबोए ङाउपर्त मादान्‍या ओदोकिन, नोलाई ङा खापाला ऱास्‍न्‍या, सात पाला सैं खापाला?” है ओदोक ते,
MAT 18:22 येसुए, “ङा नँलाई सात पाला वाज़ है ङामादींए। नोकिन झन सत्तरी दोबोर सात पाला ऱासो ताके है ङादींज़्‍या।
MAT 18:23 “है जैद स्‍वर्गताव राज्‍या तोबो राजाए ओनोकोररास हिसाप ओसखैज़्‍याव मिताव लिज़्‍या।
MAT 18:24 नो राजाए निताव हिसाप ओसखैज़्‍याक तोबोए ओलाँव दस हजार सुनए सिक्‍कालाव तुम्‍सुक पुलुस्‍के दी। नोए उरिन ओमाफो·धुवए राजाए ओय़ेन दाज़्‍यावराए ओललाई ज़ राजाए ल्‍योक रैकेर दी।
MAT 18:25 राजाए नोरालाई, ‘आवलाई ओज्‍या ओज़ारास स़ोनो ओलसकाव लिज़्‍याव भरी यो·द तादी ब जुनी ब सयो·द रैचिके,’ है यादोक्‍यो दी।
MAT 18:26 नो नोकोरए आव थैद राजाए उखँत फुलुप्‍सिद, ‘जेरो प्रभु, ङालाई नयुँ ओनाक, छ्यावा पै कींनाके। तछा जुनी ब ङाफो·या ज़,’ है ओदोक ते,
MAT 18:27 नो राजाए उयुँ नाद उतुम्‍सुक चीद्याद अइज़ ऱास्‍क्‍यो दी।
MAT 18:28 नो नोकोर ते झन ननी पुलुस्‍द बाद, ओलस य़ेन दाज़्याव तोबो ओनैंए ल्‍योक तसय चाँदीए सिक्‍का ओकाछ थाँनाक्‍यो दी। नोलाई ओधेंनी क्‍योःद, ‘ङाकाछ नमाफो·रिज़्‍या?’ है ओदोक ते,
MAT 18:29 नो ओनैं उखँत फुलुप्‍सिद, ‘जेरो ङानैं, ङालाई नयुँ ओनाक। छ्यावा पै कींनाके, तछा प़ाइँ ज़ ङायाँ,’ है ओदोक ते,
MAT 18:30 माभैंःद, ‘हुकी नमासयो·वा पै झ्यालखानाल ल्‍यो ताके’ लिद झ्यालखानाल झाःक्‍यो दी।
MAT 18:31 “ओनैंलाई नै ओजैव राजाए ओय़ेन दाज़्‍यावराए रँःद यायुँ बनै नाद राजाए ल्‍योक पैंनाकेर दी।
MAT 18:32 नो पाँ थैद राजाए नो ओऱासो नोकोरलाई खुल्‍द, ‘ए हरामी, नँ ङास बिन्‍ती नदोक नङ़ैताव रिन भरी ख्‍याद ङाईंके।
MAT 18:33 ङा किताव नँलाई ङायुँ नाद ङाऱास्‍निउ, नँ कै जैद नो नँस य़ेन दोज़्याव ननैंलाई नयुँ नाद नमाऱासो?’ है दाद,
MAT 18:34 नो राजा रसिद ओऱासो रिन भरी फरी ब सुघुर्द प़ाइँ ओमाफो·वा पै झ्यालखानालाव हाकिमए उकुइत सूँपिक्‍यो दी।
MAT 18:35 है जैद ङा जेलाई साचो है ङादाचिज़्‍या, हो मिताव ज़ स्‍वर्गताव ङाबाबुए मनी जे जेउपर्त मादान्‍या दोज़्‍यावलाई जेयुँल नैद जेमाऱास्‍किन जेलाई मनी हिताव ज़ जैचिरिज़्‍याव।”
MAT 19:1 येसुए आव पाँर ओरासथैवत गालीलनी पुलुस्‍द यर्दन भै होफताव यहूदिया खन्‍दल बाके।
MAT 19:2 नल ब मिँर बनै माहोल्‍या ओल्‍योक याहुज़्‍याव। नो हुवरानी याजोरो हुवरालाई यासगराँक्‍यो।
MAT 19:3 फरिसीराए येसुलाई जाँचिन्‍याए जूँनी ओल्‍योक हुद, “जुनी तादी ब ज्‍यालाई ऱासो दैसिए सैं मादैसिए?” है यादोक ते,
MAT 19:4 येसुए, “भाःङ स्रिस्‍तील परमेस्‍वरए मिँ ओजैक खेपा स़ोनो मेंमानी निजैक्‍यो लिन्‍या प़रिद जेमाले?
MAT 19:5 है जैद ज़ खेपाए ओबाबु ओआमालाई ऱास्‍द ओज्‍यास सिप ताद, नोनी तक्‍याँ ज़ ताज़्‍यानी।
MAT 19:6 हाःकिन नोनी ऩेब्‍लो माःक, तक्‍याँल गनिसिज़्‍यानी। है जैद जोनिलाई परमेस्‍वरए जोरैद निनैव, होनिलाई मिँराए ताराभाःरक,” है ओरादोक ते,
MAT 19:7 नोराए फरी, “हिताव ताकिन कै जैद मोसाए ओकानुनल ऱास्‍न्‍या कागत तोबो सर्किन ऱासो दैसिए लिन्‍या सर्सिउ उलिज़्‍याव?” है यादोक ते,
MAT 19:8 येसुए, “जेदिउदी ल्‍योर जेतावए ज़ मोसाए निताव कानुन ओरायो, म़ानी ङ़ादाकिन ते हिताव ओमाल्‍यो।
MAT 19:9 है जैद ङा जेलाई है ङादाचिज़्‍या, जोए ओज्‍या ओरेए ओसतत उलिज़्‍यावत ब नो ओज्‍यालाई ऱास्‍द छुतलाई ओरैकिन नोए जारी य़ेन ज़ दोक्‍यो। [फरी जोए नो ऱास्‍सिउ मेंमालाई रैज़्‍याव, होए मनी जारी य़ेन ज़ दोक्यो,”] है यादोक्‍यो।
MAT 19:10 हाःत ज़ उसिसराए, “निताव ज्‍यालाई ऱास्‍क पाप गेदोव उथ॰रिकिन बुरू ज्‍या मादान्‍या पाथ लिज़्‍या,” है यादोक ते,
MAT 19:11 येसुए, “बिनु ज्‍या, बिनु रे प़ाइँ ते मालिधुर। परमेस्‍वरए जोलाई बिनु ज्‍या, बिनु रे लिधुन्‍या जैद नैव हो वाज़ लिधुइ।
MAT 19:12 ख्‍वार जर्मननी ज़ सिङारू ताज़्‍यार, ख्‍वार फरी मिँराए सिङारू याराजैवए ज्‍या मादोर, ख्‍वार फरी या याखुसीनी ज़ स्‍वर्गताव राज्‍यालाव य़ेन दान्‍याए जूँनी ज्‍या मादोर। खाली निताव य़ेन ते जोए सहिधुज़्‍याव, होए वाज़ ओदोवक।”
MAT 19:13 नकिन नलाव मिँराए ज़िम्‍ज़ा याज़ारालाई ‘येसुए उकुइ नैद असिक घरायोक’ लिद ओल्‍योक यारारैकेर। नो रैज़्‍यावरालाई उसिसराए सिङार्द यारावैंकेर।
MAT 19:14 येसुए निताव रँःद उसिसरालाई, “नो ज़िम्‍ज़ा ल़ुज़ारालाई तारावैंच्‍यो, ङाल्‍योदा हुव याराएचिके। स्‍वर्गताव राज्‍या नितावराए जूँनी ज़ लिज़्‍या,” है दाद,
MAT 19:15 नो ल़ुज़ाराए याक्‍याँत उकुइ नैद असिक याद येसु ननी पुलुस्‍द बाके।
MAT 19:16 येसुए ल्‍योक तोबो धापाज़ाकाव मिँ हुद, “अ गुर्बा, ङा अजम्‍बरी जुनी दैन्‍याए जूँनी चाव य़ेन किताव दान्‍या?” है ओदोक ते,
MAT 19:17 येसुए, “ङालाई काराव ‘किताव चाव उलिज़्‍याव’ है नदाँज़्‍याव? चाव तोबोका तोबो परमेस्‍वर वाज़ लिज़्‍या। नँ अजम्‍बरी जुनील बान्‍या युँ नदोकिन नो धर्मसास्‍त्रलाव सर्सिउ दान्‍या मादान्‍या य़ेन दाव ताके,” है ओदोक ते,
MAT 19:18 “प्रभु, नो भरिनी ङा काताकाव दान्‍या?” है ओदोक ते, येसुए, “मिँ मासैःन्‍या, अर्काए ओज्‍याए ल्‍योदा माबान्‍या, माकुन्‍या, धुत गोहाई मायान्‍या,
MAT 19:19 बाबु आमाए ओमान नैद्यान्‍या, स़ोनो नक्‍याँलाई किताव नसमारिज़्‍या, छुतलाई ब हिताव ज़ समारिन्‍या,” है दोक्‍यो।
MAT 19:20 नोए नो पाँर थैद, “आव भरी ते दाव ज़ ङानैज़्‍या, फरी मायो·व काताकाव उलिज़्‍याव?” है ओदोक ते,
MAT 19:21 येसुए “नँ साचो सयो·न्‍या ताकिन नँस लिज़्‍याव भरी यो·द काता ज़ माल्‍योरालाई भाःद याएकेदा, नँ स्‍वर्गताव धन दैन्‍या नले। नो य़ेन भरी दाद नँ ङाछींत हुन्‍के,” है ओदोक ते,
MAT 19:22 नो धापाज़ाकावए नो पाँ थैद उयुँर स्‍यासे सतेद ओल्‍द बाके। नोए ओधन सम्‍पती बनै कुधु ज़ ओल्‍योए माऱास्‍धुक्‍यो।
MAT 19:23 नो ओबावत येसुए उसिसरालाई, “ङा जेलाई साचो है ङादाचिज़्‍या, धनी मिँ स्‍वर्गताव राज्‍याल पसिन्‍या बनै धो ताज़्‍या।
MAT 19:24 फरी ब ङा जेलाई है ङादाचिज़्या, गपए उकुँल ऊँत उछिरिज़्‍यावकिन धनी मिँ परमेस्‍वरए ओराज्‍याल पसिन्‍या झन धो ताज़्‍या,” है यादोक्‍यो।
MAT 19:25 उसिसर आव पाँत अचम्‍ब ताद, “इताव ताकिन ते सुए ची अजम्‍बरी जुनी ओदैधुरिज़्‍याव?” है यादोक ते,
MAT 19:26 येसुए, “मिँर यानी सु ज़ माबाँचिधुर, खाली परमेस्‍वरनी मातान्‍या काता ज़ माले,” है यादोक्‍यो।
MAT 19:27 हाःत ज़ पत्रुसए, “गे ते प़ाइँ ज़ ख्‍यानैद नछींत हुद गेले, गे काता दैन्‍या?” है ओदोक ते,
MAT 19:28 येसुए, “ङा जेलाई साचो है ङादाचिज़्‍या, आव जुक त़ोसिद प़ाइँ साःरो ओतावत ङा मिँ मिन्‍सिउ बनै ज़गै मगैव ङाराज्‍या ङाचलैहुवत जे ङाछींत हुद लिज़्‍यावराए बाह्र थर इस्राएलीराए याङ़ैतावर ताद याय़ेन फाल्‍द्यान्‍या जेले।
MAT 19:29 आव बेलाक जोए ङाजूँनी ओएँःर उझ़िमर, ओदाज्‍यु भाइर, ओनाना बैंनीर, ओबाबु ओआमार, ओज़ार ऱास्‍द याख्‍यानैज़्‍याव, होए आव उजिउत ज़ सय दोबोर ब दैन्‍या ले, अजम्‍बरी जुनी ब दैन्‍या ले।
MAT 19:30 खाली ख्‍वा ख्‍वा ङ़ातावर छींत तारिज़्‍यार, छींतावर ङ़ात तारिज़्‍यार।”
MAT 20:1 “है जैद स्‍वर्गताव राज्‍या तोबो एँःए ओर्गे स्‍यासो लिज़्‍या। नो मिँ छकाल्‍न्‍या घग ज़ ओएँःल य़ेन दान्‍या मिँर याखिम्नाज़्‍याव।
MAT 20:2 नोरास तला भरिकाव जेला यान्‍या कबल दाद ओय़ेन दाना यापरींक्‍यो दी।
MAT 20:3 नौ बजेवाक फरी नो एँःए ओर्गे बजार जीदा ओबाक याय़ेन माल्‍योरालाई रँःद,
MAT 20:4 नोरालाई, ‘जे अइज़ जेलिज़्‍याव देखा ङाएँःल य़ेन दोनाचिके, जेजेला ङायाच्‍या,’ है ओरादोक ते, नोर बाद य़ेन दोनाकेर दी।
MAT 20:5 नो एँःए ओर्गे फरी बाह्र बजेवाक तखेप, तीन बजेवाक तखेप फरी ब बाहोर्‍यार जैद यापरींक्‍यो दी।
MAT 20:6 पाँच बजेवाक फरी ब नो एँःए ओर्गेए तोबोक अइज़ च्‍याँःसिद लिज़्‍यावरालाई रँःद, ‘जे काराव बिनु य़ेन च्‍याँःसिद जेलिज़्‍याव?’ है ओरादोक ते,
MAT 20:7 नोराए, ‘गेलाई सुए ज़ य़ेन मायासिर,’ है यादोक ते, नोरालाई मनी ओय़ेन दाना यापरींक्‍यो दी।
MAT 20:8 “नम ओझ्यानाक नो एँःए ओर्गेए नो य़ेन दोज़्‍यावराए याङ़ैतावलाई खुल्‍द, ‘नो ङाय़ेन दाज़्‍यावरालाई दुप्‍द याजेला भाःद याएके, प़ाइँरानी छींनी हुवरालाई प़ाइँरानी ङ़ात याएयो,’ है ओदोक ते, नोए नो य़ेन दाज़्‍यावरालाई खुल्‍द,
MAT 20:9 पाँच बजे हुवरालाई ङ़ात याएक्‍यो। नोराए तछाकाव याजेला दैकेर दी।
MAT 20:10 नो छकाल्‍न्‍या हुवराए निताव रँःद ‘नोराकिन गे ते कुधु ज़ गेदैया,’ है यालिज़्‍याव। खाली छींनी ते या ब हाःज़ दैकेर दी।
MAT 20:11 नै ओतावए नोर एँःए ओर्गेए ल्‍योक बाद,
MAT 20:12 ‘नो प़ाइँरानी छींनी हुवर तघन्‍ता वाज़ य़ेन दोकेर, नोर कै जैद गे तला भरी घाम सोता सोता ताद दावरास सम सम नजैसिउ?’ लिद गन गन दोकेर दी।
MAT 20:13 है जैद नो एँःए ओर्गेए तोबोलाई, ‘ङानैं, नँस छकाल्‍न्‍या ज़ तला भरिकाव जेलाल गिन्कबलिसिउ माःक रो? ङा नउपर्त मादान्‍या ङामादोए।
MAT 20:14 नजेला तीद बानिके। आव छींनी हुवरालाई मनी नँसकाव जुँ ज़ याव ङापैंज़्‍या।
MAT 20:15 पैसा ङामीं ज़, ङापैसा जोलाई यान्‍या ङायुँ लिज़्‍या, होलाई यान्‍या ओमाताज़्‍याव रो? ङायुँ ओगराँव काराव नमी उतूज़्‍याव?’ है दोक्‍यो दी।
MAT 20:16 “हो मिताव ज़ ख्‍वा ख्‍वा छींतावर ङ़ात तारिज़्‍यार, ङ़ातावर छींत तारिज़्‍यार।”
MAT 20:17 नकिन येसु यरूसलेमदा ओबाज़्‍याक बाह्र जना उसिसरालाई याबातङ खुल्‍द,
MAT 20:18 “गे यरूसलेमदा गेपुलुस्‍नाज़्‍या। नल गेकेसोत ङा मिँ मिन्‍सिउलाई मुख्‍या पुजारीर स़ोनो सास्‍त्रीराए याकुइत सूँपिन्‍या ज़ लेर। नोराए ङालाई सैःन्‍या ज़ थ·रैद,
MAT 20:19 रोमी सरकारए उकुइत याझाःनावत नोराए फरी उल्‍ली गिल्‍ली दाद, रीःद, क्रुसत तङ्गैद सैःनारिज़्‍यार। हैदी ब स़ोंलात सिउनी सैंसिद सोन्‍या ङाले,” है यादोक्‍यो।
MAT 20:20 नकिन जब्दियाए ओज़ानी याकूब स़ोनो यूहन्‍नानी निआमास येसुए ल्‍योक हुद, निआमाए धो दाद, “जेरो प्रभु,” है ओदोक ते,
MAT 20:21 येसुए, “काता दाद्यान्‍या नपैंज़्याव?” है ओदोक ते, नो मेंमाए, “नराज्‍याल आव ङाज़ानिलाई तोबोलाई नवोर्दा, तोबोलाई नदाबर्‍यादा च़ुसिन्‍या निजैयो,” है ओदोक ते,
MAT 20:22 येसुए, “नँ नज़ारास आव जेऩिज़्यावए जूँनी जेमासैंए। ङा जाँवाक धो सहिउ दुखर ङासहिरिज़्‍याव नोनी मासहिधुरिज़्‍यानी?” है ओरादोक ते, नोनी, “गिन्सहिधुया ज़,” है दोकिनी।
MAT 20:23 हाःत ज़ येसुए, “हैज़, ङा ङादैरिज़्याव धो सहिउ दुखर जिन मनी दैन्‍या ज़ जिन्‍ले, खाली ङावोर्दा ङादाबर्‍यादा च़ुसिउ यान्‍या ते ङा ङाकुइत माले। निताव दैन्‍या स्‍वर्गताव ङाबाबुए जोलाई एज़्याव, होए उजूँनी वाज़ लिज़्‍या,” है निदोक्‍यो।
MAT 20:24 उपुर्काव दस जना उसिसराए नो पाँ थैद नोनिलाई रँःद यारिस चोके।
MAT 20:25 नाःत ज़ येसुए उसिस भरिरालाई ओल्‍योदा खुल्‍द, “जे ज़ जेसैंज़्‍याखेहो, आव मानुवाताव याघेप्‍पार याधूँलावराए ङ़ैत बनै अखत्‍यासोर ताद हाप हाप ख्‍याज़्‍यार।
MAT 20:26 जे जेल ते निताव जैसिन्‍या माताए। है जैद जेनी जो स़ेर जैसिउ जेपैंज़्‍या, हो प़ाइँए यासेवा दान्‍या ओजैसिक।
MAT 20:27 स़ोनो जेनी जो घेप्‍पा जैसिउ जेपैंज़्‍या, हो प़ाइँए याबाँदा ओजैसिक।
MAT 20:28 ङा मिँ मिन्‍सिउ ब ‘ङासेवा घदोरक’ लिद ङाहुव माःक, कुधुलाई बाँचैन्‍याए जूँनी ङाजिउ झाःद यासेवा ङादोहुव ची,” है यादोक्‍यो।
MAT 20:29 येसु उसिसरास यरीहो सहरनी पुलुस्‍द याबाज़्‍याक मिँर ब बनै माहोल्‍या यास ज़ याबाज़्‍याव।
MAT 20:30 येमक ऩेब्‍लो निमी मारैंःवनी च़ुसिद निलिज़्‍याव। नोनी ‘येसु आलाव घ्याँ हुज़्‍या दी’ लिन्‍या थैद, बनै चोइस, “अ दाऊदए ओथोलाव प्रभु, गिनलाई नयुँ ओनाक,” है लिद निक़िज़्‍याक,
MAT 20:31 नो माहोल्‍याराए ‘झ्याउँ तालिचिन’ लिद यारासिङार्केर। नोनी झन ज़ चोइस क़िद, “अ दाऊदए ओथोलाव प्रभु, गिनलाई नयुँ ओनाक,” है निलिक ते,
MAT 20:32 येसु नक च्‍याँःसिद नो निमी मारैंःवनिलाई ओल्‍योक खुल्‍द, “ङा जिनजूँनी काता दाद्यान्‍या?” है उनिदोक ते,
MAT 20:33 “प्रभु, गिन रँःधुन्या गिन्‍ताक,” है निदोक ते,
MAT 20:34 येसुए उयुँ नाद निमीत छाप्‍द उनियो प़ाइँना ज़ रँःधुन्या ताद उछींत बाकिनी।
MAT 21:1 येसु उसिसरास यरूसलेम छ्योकाव जैतून दाँदाकिन जाँ होकसैकाव बेथफागे नाखार याकेस्‍नावत येसुए ऩेब्‍लो उसिसनिलाई,
MAT 21:2 “जिन आव गेङ़ाकाव नाखारल बाचिन्‍केदा, नल तोबोक गधाहानी ज़ा-मा सुर्सिउनी दैन्‍या जिन्ले। नोनिलाई पला·द यारारैचिन्‍के।
MAT 21:3 सुवाराए, ‘काराव पला·द जिन्‍रालाँज़्‍याव?’ है यादाचिन्‍किन, ‘गिनप्रभुलाई चाहिज़्‍या,’ है जिन्‍रादोकिन नोराए हतप्‍त ज़ परींद्यान्‍या लेर,” है लिद निपरींक्‍यो।
MAT 21:4 नो पाँ भरी अगमबक्ताए ओसरो पाँ सयो·न्‍याए जूँनी ताके। नो सर्सिउ आव ज़,
MAT 21:5 “सियोनए ओज़ालाई है दोक्‍यो, ‘चिऊके, नराजा काता ज़ माल्‍यो मिताव जैसिद, गधाहाए ओज़ा बछेरालाई चेप्‍द जेल्‍योक हुज़्‍या।’ ”
MAT 21:6 है जैद नो ऩेब्‍लो उसिसनी येसुए है उनिदोव मिताव ज़ नाखारल बाद,
MAT 21:7 नो गधाहानिलाई दैद येसुए ल्‍योक रैद उसिसराए तोबो गधाहाए ओतर्त याक्‍वार झाःद्याद येसुलाई चेपो परींकेर।
MAT 21:8 नकाव लिज़्‍याव माहोल्‍याराए याक्‍वार येमल तैंदिकेर। ख्‍वाराए फरी नजीलाव स्‍यावलार रैद येमल तैंद्याद,
MAT 21:9 नो माहोल्‍यार ख्‍वा येसुए ओङ़ात ख्‍वा उछींत जैसिद अइ लिद क़िए क़िए बाकेर, “होसन्‍ना! दाऊदए ओथोलाव येसुलाई दाइनो दाइनो ओताक। परमेस्‍वरए उमिनत हुव राजा धन्‍याकाव ओताक, स्‍वर्गताव परमेस्‍वरए उमिन बनै ओघ्‍योःक।”
MAT 21:10 नोर यरूसलेमल याकेसोत नो सहरलाव मिँराए ‘आव सु ओताव?’ लिद काला मुलु ताकेर।
MAT 21:11 ओलस हुज़्‍याव माहोल्‍याराए, “आव गालीललाव नासरतनी हुव अगमबक्ता येसु ज़,” है यारादोकेर।
MAT 21:12 नकिन येसु ध्‍यान झ़िमल पसिद नलाव लँःज़्‍यावर यो·ज़्‍यावरालाई पले·द पैसा त़ोज़्‍यावराए यातेबलर पल्‍तैद्याद, कुइतम यो·ज़्‍यावराए याकुर्चीर ब ख्‍याद्याद,
MAT 21:13 “धर्मसास्‍त्रल परमेस्‍वरए ओपाँ इताव सर्सिउ लिज़्‍या, ‘ङा ङाझ़िम पोंखारिन्‍या झ़िम जैसिउ लिज़्‍या।’ जे ते झन आवलाई चोरराए पुप मिताव जैद जेनै,” है लिद याखेपैक्‍यो।
MAT 21:14 नकिन नलाव काना दूँदार ध्‍यान झ़िमल येसुए ल्‍योक याहुक नोरालाई यासगराँक्‍यो।
MAT 21:15 येसुए निताव अचम्‍बलाव य़ेनर ओदोव रँःद, स़ोनो ध्‍यान झ़िमलाव ल़ुज़ाराए ‘होसन्‍ना! दाऊदए ओथोलाव येसुलाई दाइनो दाइनो ओताक’ लिद याक़िज़्‍याव थैद नलाव मुख्‍या पुजारीर स़ोनो सास्‍त्रीर यारिस चोद,
MAT 21:16 येसुलाई, “आवराए याक़िज़्‍याव नँ ज़ नथैज़्‍याखेहो, काराव च़िम दाव नमारापरींज़्‍याव?” है यादोक ते, येसुए, “हैज़, ङा थैव ज़ ङालिज़्‍या। धर्मसास्‍त्रलाव सर्सिउ, ‘अ प्रभु, नँ नमिन सघ्योःन्‍या ल़ुज़ार स़ोनो नुइँ ओज़्‍याव भाउज़ाराए यायाःनी ज़ जैद ननै’ लिन्‍या जेमाप़रिए रो?” है दाद,
MAT 21:17 नोरालाई ख्‍यानैद सहरनी पुलुस्‍द बेथानिया नाखारल बासिनाके।
MAT 21:18 हो पराःती छकाल्‍न्‍या फरी यरूसलेमदा ओल्‍द ओबाज़्‍याक ओकरेए,
MAT 21:19 येम छ्योक ओख्‍यार ल़पलपौ तोबो नेभारा सीं रँःद ‘ओसैर ले सैं’ लिद उचिऊनाक ते ओसै तोबो ब मादैक्‍यो। ओख्‍यार वाज़ रँःद नो सींलाई, “आकिनी नसै काता ज़ ताताक,” है ओदोव प़ाइँना ज़ नो सीं थँके।
MAT 21:20 निताव रँःद उसिसर अचम्‍ब ताद, “आव सीं कै जैद बेहार ज़ उथँव?” है लिकेर।
MAT 21:21 येसुए फरी, “ङा जेलाई साचो है ङादाचिज़्‍या, युँ सुहुप्‍द तयुँ जैकिन आव नेभारा सींलाई ङाजैव मिताव वाज़ माःक, तोबो हाँलाई ‘नँ नतिन भोस्‍द समुन्‍द्रल ख्‍यासिन्‍के,’ है दाकिन, नो हैज़ तान्या ले।
MAT 21:22 है जैद जे जोत मनी जेयुँ हुप्‍द जेपोंखारिकिन नो दैन्‍या ज़ जेले।”
MAT 21:23 येसुए ध्‍यान झ़िमल ओपाँ ओरासथैज़्‍याक नलाव मुख्‍या पुजारीर स़ोनो यहूदीराए यास़ेरर हुद येसुलाई, “आव नदोज़्‍याव य़ेनर नँलाई सुए है उदींव, सुए हक उईंव?” है यादोक ते,
MAT 21:24 येसुए, “ङा ब जेलाई तोबो है ङादाचिदा, नोए ओजवाप जेयाँकिन ङा ब आव य़ेन दान्‍या हक सुए ओयाँव है ङादाचिया,” है दाद,
MAT 21:25 “ऱील सछैंज़्‍याव यूहन्‍नाए ओय़ेन परमेस्‍वरए ल्‍योनी ताव सैं मिँराए ल्‍योनी ताव?” है ओरादोक ते, नोर या याल, “ ‘यूहन्‍नाए ओय़ेन परमेस्‍वरनी ताव’ है गेद्या गेलिकिन, ‘हुकी काराव यूहन्‍नाए ओपाँ जेमाभैंःव?’ है दान्‍या ले।
MAT 21:26 फरी ‘मिँनी’ है गेद्या गेलिकिन मिँराए ल्‍योनी ओछ्यास लिज़्‍या। मिँ भरिए यूहन्‍नालाई अगमबक्ता ज़ है लिद थ·रैद नैर,” है लिद,
MAT 21:27 नोराए येसुलाई, “गेमासैंए,” है दोकेर। हाःत ज़ येसुए मनी, “हो ची ताकिन्‍दा ङालाई आव य़ेन दान्‍या हक सुए ओयाँव ङा ब है ङामादाच्‍यो।”
MAT 21:28 “जे आव पाँलाई फाल्‍चिके — तोबोए ओज़ानी ऩेब्‍लो निल्‍यो दी। नो निबाबु जेथाए ओल्‍योक बाद, ‘अ ङाज़ा, आछिम नँ ङाएँःल य़ेन दानाद्याव ताके,’ है ओदोक ते,
MAT 21:29 ‘ङा ङामाबा, बाबु,’ है दोक्‍यो दी। खाली छींनी ते उयुँ फर्कैद बाके दी।
MAT 21:30 हिताव ज़ फरी नो कान्‍छा ओज़ालाई है ओदोनाक, ‘ताए बाबु, ङा ङाबाया,’ है ते दोक्‍यो दी। खाली छींनी ते माबाके दी।
MAT 21:31 है जैद नो ऩेब्‍लोनी काताकावए निबाबुए ओपाँ दोन्‍या?” है ओरादोक ते, “ङामाबा है लिद बाव ज़ ताखेहो,” है दोकेर। नाःत ज़ येसुए, “ङा जेलाई साचो है ङादाचिज़्‍या, हिताव ज़ सिर्मा स्‍यो·ज़्‍याव पापीर स़ोनो पातर्नी मेंमार जेकिन ङ़ादा परमेस्‍वरए ओराज्‍याल बान्‍या लेर।
MAT 21:32 यूहन्‍नाए जेल्‍योक धर्मलाव येम सतैंना हुके, जे ते नोए ओपाँ जेमाभैंःके। झन सिर्मा स्‍यो·ज़्‍याव पापीर स़ोनो पातर्नी मेंमाराए नोए ओपाँ भैंःकेर। जे निताव रँःद ब जेयुँ जेमाफर्कैए, भैंःन्‍या ब जेमाभैंःए।”
MAT 21:33 “फरी आव ब तोबो थैचिके — तोबो धनीए ओएँः भरिल जोम्‍परसै झाःद प़ाइँनी भार्नाए घिरिद, जोम्‍परसै पीन्‍या कोलो ब तोबो झाःद, मिँ लिन्‍या खोपोरा ब तोबो जैद, नो एँःलाई अधियाल याद ओल तोबो तादा देसङ लिनाके दी।
MAT 21:34 नलाव जोम्‍परसैर किन्‍या बेला ओतावत ओय़ेन दाज़्‍यावरालाई उजुँ भरी च़ानाव यापरींक्‍यो दी।
MAT 21:35 नो अधिया कमैज़्‍यावराए झन नोरालाई क्‍योःद ख्‍वारालाई याराप़ोकेर दी, ख्‍वारालाई लुँ लुँराए याराझेःकेर दी, ख्‍वारालाई यारासैःकेर दी।
MAT 21:36 फरी छींनी जाँ माहोल्‍या ओय़ेन दाज़्‍यावर ओरापरींक होरालाई मनी हैज़ याराजैकेर दी।
MAT 21:37 “प़ाइँरानी छींत ओज़ालाई ‘आवलाई ताकिन ओमान नैदिर सैं’ लिद नोलाई परींक्‍यो दी।
MAT 21:38 खाली नो अधिया कमैज़्‍यावराए ओज़ा उहुज़्‍याव रँःद या या पाँसिद, ‘आव ते एँः दैन्‍या मिँ ची। नोलाई सैःद आव एँः गेमी ज़ गेजैया’ लिद,
MAT 21:39 नोलाई क्‍योःद नो एँःनी पाखाङ लाँद सैःकेर दी।”
MAT 21:40 नकिन येसुए नो मुख्‍या पुजारीर स़ोनो यहूदीराए यास़ेररालाई, “नो एँःए ओर्गेए अधिया कमैज़्‍यावरालाई कै याजैवके, है दाँचिके,” है ओरादोक ते,
MAT 21:41 नोराए, “निताव याफ्या·हुवरालाई सफ्या·द नो एँः बेला बेलाक ओल उजुँ यान्‍यारालाई यान्‍या ले,” है दोकेर।
MAT 21:42 हाःत ज़ येसुए फरी, “जे आव धर्मसास्‍त्रलाव पाँ जेप़रिखेहो, ‘भुलीराए कान्‍ल ज़ माज़्‍यासे लिद याख्‍याव लुँ नो ज़ झन भुयाँरलाव लुँ ताके। आव ओल परमेस्‍वरनी ताव पाँर ज़, इताव रँःद गे अचम्‍ब गेताज़्‍या।’
MAT 21:43 है जैद ङा जेलाई है ङादाचिज़्‍या, परमेस्‍वरए ओराज्‍या जेलाई नैंद उगुन मामेंःद ओय़ेन दाज़्‍यावरालाई यान्‍या ले।
MAT 21:44 फरी जो मिँ नो भुयाँरलाव लुँत पाज़्‍या ओल ज़ कुतु कुतु तान्‍या ले। नो लुँ फरी ओतर्त उहुकिन झन नप नप ज़ तान्‍या ले।”
MAT 21:45 नो मुख्‍या पुजारीर स़ोनो फरिसीराए येसुए ओपाँ थैद, “आव पाँ भरी ते गेङ़ैत झाःद ची पाँके,” है लिद,
MAT 21:46 येसुलाई क्‍योःव पैंकेर। खाली ओलस लिज़्‍याव माहोल्‍यारालाई रँःद छे·केर, काराव ल्यो ताकिन नो माहोल्‍याराए येसुलाई अगमबक्ता ज़ है यादोज़्‍याव।
MAT 22:1 येसुए नोर यारसिउ रँःद अइ लिद घर्ती तोबो झाःद याएक्‍यो,
MAT 22:2 “स्‍वर्गताव राज्‍या ते तोबो राजा स्‍यासो लिज़्या। नोए खेपा ओज़ाए उबिह्‍याए जूँनी भत्‍यार जैद,
MAT 22:3 ओनोकोररालाई नो भत्‍यारल हुन्‍या सोर ओरायोरालाई खुल्‍नाव यापरींक्यो दी। नो सोर दैवर झन हुव माभैंःकेर दी।
MAT 22:4 है जैद फरी ब छुत ओनोकोररालाई खुल्‍द, ‘जे नो सोर दैवराए ल्‍योक फरी ब बाद, ‘राजाए जेजूँनी सोइव सोइव मारर सैःद ज़्‍याव भरी जैधुक्यो दी, जे काचाबुल ज़ बान्‍या दी,’ है यारादोनाचिके,’ लिद यापरींक्‍यो दी।
MAT 22:5 नोर झन सोर माथैव मिताव जैसिद याय़ेन माऱास्‍द ख्‍वार याएँःदा, ख्‍वार बेपार दाना बाकेर दी।
MAT 22:6 ख्‍वाराए झन नो क़िना बाव ओनोकोररालाई क्‍योःद बीज्‍यात जैद यारासैःकेर दी।
MAT 22:7 “छींनी नो राजाए नो भरी थैद उरिस चोद उसिपाईंर परींद नो सैःज़्‍यावरालाई खदम जैद यानाखारलाई ब मेंः लैद याराएकेर दी।
MAT 22:8 नकिन नो राजाए ओनोकोररालाई खुल्‍द, ‘भत्‍यार भरी जैसिधुके, नो सोर दैवर भत्‍यार ज़्‍यान्‍या स्‍यासोर माताकेर।
MAT 22:9 है जैद जे येम जीदा बाद जो जोर जेरादैज़्‍या, हो होर ज़ भत्‍यारल यारारैच्‍यो,’ है दाद यापरींक्‍यो दी।
MAT 22:10 है जैद नो ओनोकोरर येम जीदा बाद चाव माचाव यारादैव भरी दुप्‍द भत्‍यारल यारारैकेर दी। नोर राजाए उझ़िमल तसी ज़ ब्‍याल्‍केर दी।
MAT 22:11 “नकिन राजा ओपाहुनारास दैसिना हुके दी। नल तोबोलाई बिह्‍यालाव क्‍वा माक्‍वाइसिउ रँःद,
MAT 22:12 राजाए नोलाई, ‘ङानैं, बिह्‍यालाव क्‍वा माक्‍वाइसिद कै जैद आल नपसिहुव?’ है ओदोक ते, नो मिँ लोलोतोःव ज़ ताके दी।
MAT 22:13 हाःत ज़ नो राजाए ओनोकोररालाई खुल्‍द, ‘आवलाई उखँ उकुइ किद लाँःकाव चुम चुमोल ख्‍यानाचिके। नल ओहार ङर ङर कैद चिर चिर क़िद गघर्क।’ ”
MAT 22:14 येसुए नो घर्ती नत ज़ तुपैद, “हिताव ज़ खुल्‍सिउर कुधु ज़ लिज़्‍यार, छाँतिसिउर ते छ्या ज़ लिज़्‍यार,” है यादोक्‍यो।
MAT 22:15 नो पाँर थैद फरिसीराए, “येसुए ओपाँ कान्‍नी क्‍योःद गेएके?” लिद गुमुस्‍ता दाद,
MAT 22:16 यासिसर स़ोनो हेरोद राजासकावरालाई येसुए ल्‍योक यारापरींकेर। नोर ओल्‍योक बाद, “गुर्बा, नँ गेस नपाँज़्याव भरी साचो वाज़ लिज़्‍या। परमेस्‍वरए ल्‍योदा बान्‍या येम ब साचोस नपैसिज़्या। मिँ रँःद ब नमादोए, सुए ल्‍योदा ब नमाजैसिए।
MAT 22:17 है जैद गेलाई तोबो पाँ है दाव ताके, माहाराजालाई गे सिर्मा यान्‍या सैं मायान्‍या?” है यादोक ते,
MAT 22:18 येसुए नोराए याचाल सैंद, “ए कैफतीर, ङालाई काराव जेजाँचिनाज़्‍याव?
MAT 22:19 सिर्मा फो·न्‍या पैसा ङालाई तोबो सतैंद्याँचिके,” है ओरादोक ते, पैसा रैदिकेर।
MAT 22:20 येसुए फरी, “आत सुए उसुरूप, सुए उमिन उलिज़्‍याव?” है ओरादोक ते,
MAT 22:21 “माहाराजाए उमीं ज़,” है दोकेर। नकिन येसुए, “हो ची ताकिन्‍दा माहाराजाए उमीं भरी माहाराजालाई ज़ एच्‍यो, परमेस्‍वरए उमीं भरी परमेस्‍वरलाई ज़ एच्‍यो,” है ओरादोक ते,
MAT 22:22 नोर अचम्‍ब ताद नोलाई ऱास्‍द बाकेर।
MAT 22:23 नकिन हो छ्याम ज़ सदुकीर ब येसुए ल्‍योक तोबो पाँ है दोहुकेर। सदुकी है यारादोज़्‍यावराए ‘सिउकिन सैंसिन्‍या माताए’ है यालिज़्‍याव।
MAT 22:24 है जैद नोराए, “गुर्बा, मोसाए ओकानुनल तोबो अइ लिद सर्सिउ लिज़्‍या, ‘तोबोए ज्‍या दाद ज़ार मादैद उसिकिन, ओभाइए ओदाज्‍युए ओथोर माफ्या·न्‍याए जूँनी ओमारूमलाई ओरैवक।’
MAT 22:25 किताव गेस तोबोए ओज़ार सात भाइ याल्‍यो। यादाज्‍युए ज्‍या दाद ज़ार मादैद ज़ सिके। ओज़ार यामाल्‍योए ओज्‍या ओभाइलाई ख्‍यानैदिक्‍यो।
MAT 22:26 फरी होए उधूँलावए नो ओमारूमलाई रैद नो मनी ज़ार मादैद ज़ सिके। नकिन साइँला मनी हिताव ज़ ताके। नितावनी ज़ नो मेंमालाई सात भाइए ज़ रैकेर। नोर प़ाइँ ज़ार मादैद ज़ सिकेर।
MAT 22:27 प़ाइँरानी छींनी नो मेंमा ब सिके।
MAT 22:28 है जैद नो मेंमा सात भाइए याज्‍या ओतावए अजम्‍बरी जुनील काताकावए याज्‍या तान्‍या?” है लिकेर।
MAT 22:29 हाःत ज़ येसुए, “जे धर्मसास्‍त्रलाव पाँ मातीद परमेस्‍वरए ओसक्ती ब जेमाथ·रैधुवए ज़ चबनै बिरैद जेनै।
MAT 22:30 अजम्‍बरी जुनील सुए ज़ ज्‍या ब मादोर, रे ब मादोर। प़ाइँ ज़ स्‍वर्गताव चाकर्‍या स्‍यासोर ताज़्‍यार।
MAT 22:31 है जैद जे ‘सिउकिन सैंसिन्‍या माताए’ है ल्‍यो पैंज़्‍यावर आव धर्मसास्‍त्रलाव परमेस्‍वरए ओपाँव पाँ थैचिके,
MAT 22:32 ‘ङा अब्राहामए ओपरमेस्‍वर, इसहाकए ओपरमेस्‍वर स़ोनो याकूबए ओपरमेस्‍वर ज़।’ है जैद मोरोराए यापरमेस्‍वर माःक, जींदो तावराए यापरमेस्‍वर ची,” है लिद यासथैक्‍यो।
MAT 22:33 नक लिज़्‍याव माहोल्‍यार येसुए ओपाँ थैद अचम्‍ब ताकेर।
MAT 22:34 येसुए सदुकीरालाई थाम थुम ओराख्‍याव थैद नक लिज़्‍याव फरिसीर दुप्‍सिद,
MAT 22:35 कानुनलाव तोबो यागुर्बालाई येसुलाई जाँचिना परींकेर। नोए येसुलाई,
MAT 22:36 “गुर्बा, कानुन भरिरानी प़ाइँरानी दान्‍या काताकाव उलिज़्‍याव?” है ओदोक ते,
MAT 22:37 येसुए, “ ‘जेयुँलाई आदा होदा मादुलैद, जेर्सा माम़ोंद, जेप्रभु परमेस्‍वरए ल्‍योदा युँ थू जैद ओललाई वाज़ मया दान्‍या।’
MAT 22:38 प़ाइँरानी ङ़ात दान्‍या य़ेन नो ज़।
MAT 22:39 होए उधूँलाव य़ेन ब हो मिताव ज़, ‘जेक्‍याँलाई किताव जेसमारिज़्‍या, छुतलाई ब हिताव ज़ समारिन्‍या।’
MAT 22:40 मोसाए ओकानुन भरी स़ोनो अगमबक्ताराए यासरो भरी ब आव ऩेब्‍लोत थोम्‍सिज़्‍या,” है दोक्‍यो।
MAT 22:41 नकिन नो दुप्‍सिद लिज़्‍याव फरिसीरालाई येसुए, “जे ङालाई है दाँचिके,
MAT 22:42 ख्रीस सुए ओथोलाव ओताज़्याव है जेलिज़्‍या?” है ओरादोक ते, “दाऊदए ओथोलाव ज़,” है दोकेर।
MAT 22:43 येसुए फरी, “दाऊदए ओथोलाव वाज़ ओताकिन कै जैद धर्मसास्‍त्रल ओल दाऊदए मनी परमेस्‍वरए उपुरूसनी ओपाँक ख्रीसलाई ‘ङाप्रभु ज़’ है ओदोज़्‍याव? नो धर्मसास्‍त्रलाव ओपाँव आव ज़,
MAT 22:44 ‘परमेस्‍वरए ङाप्रभुलाई, ‘नसुतुररालाई नखँ धूँल झाःद ङामाईंवा पै, ङावोर्दा च़ुसिद लिन्‍के,’ है दोक्‍यो।’
MAT 22:45 है जैद ओल दाऊदए ब ख्रीसलाई ‘ङाप्रभु ज़’ है ओदोकिन नो कै जैद दाऊदए ओथोल वाज़ उगनिसिज़्‍याव?” है ओरादोक ते,
MAT 22:46 येसुस सु ज़ मापाँधुकेर। हो छ्यामकिन ज़ सुए ज़ येसुस पाँन्‍या आँत मादोकेर।
MAT 23:1 नकिन येसुए उसिसर स़ोनो नल लिज़्‍याव माहोल्‍यारालाई अइ लिद यासथैक्‍यो,
MAT 23:2 “सास्‍त्रीर स़ोनो फरिसीराए मोसाए ओकानुन पैन्‍या हक दैद नैर।
MAT 23:3 है जैद नोराए है यादाचिज़्‍याव मिताव जेदोदी ब थिक ज़, खाली नोराए यादोज़्‍याव मिताव य़ेन ते तादोच्‍यो। नोराए यायाःए वाज़ दोज़्‍यार, याकुइए ते मादोर।
MAT 23:4 नोर सुए ज़ यामासयो·धुज़्‍याव कानुनर जैद छुतरालाई वाज़ दाव यारापरींज़्‍यार, या ताकितर तके ओछ्यो ब माछुर।
MAT 23:5 नोराए यादोज़्‍याव भरी ते मिँराए ङ़ाक सतैंन्‍या वाज़ लिज़्‍या। नोर परमेस्‍वरए ओकानुन सर्सिउ पत्रीलाई घेप्‍पा जैद याचाँदीत स़ोनो यापाखोरात पो·द बाऱिज़्यार। याक्‍वारात ब झुम्‍कार ता·द बाऱिज़्‍यार।
MAT 23:6 नोर स॰द घ्योःव घ्योःव भत्‍यारराल स़ोनो धर्मसास्‍त्र झ़िमराल प़ाइँराए रँःन्‍या पोक च़ुसिउ पैंज़्‍यार।
MAT 23:7 बजार जीदा ब ‘मिँराए गुर्बा लिद धो घदासिरक’ लिन्‍या युँ दाद बाऱिज़्यार।
MAT 23:8 “जे ते फरी ‘प़ाइँए गुर्बा है घदासिरक’ लिन्‍यार ताजैसिच्‍यो। जे जेगुर्बा ते तोबो वाज़ लिज़्‍या, जे ते दाज्‍यु भाइर ची।
MAT 23:9 जे आव मानुवाताव मिँरालाई ब कोभालाई बाबु है तारादोच्‍यो। जे जेबाबु ते स्‍वर्गत तोबो वाज़ लिज़्‍या।
MAT 23:10 फरी जे स॰द प़ाइँए याङ़ैताव मिताव ब ताजैसिच्‍यो। जे जेङ़ैत तोबो वाज़ लिज़्‍या, हो ख्रीस ज़।
MAT 23:11 है जैद जे जेल ते जो घेप्‍पा जेताज़्‍या, हो प़ाइँए यासेवा दान्‍या ओजैसिक।
MAT 23:12 जो ओलनी सघ्‍योःसिज़्‍या, हो ज़िम्‍रिज़्‍या। फरी जो ओलनी सज़िम्‍सिज़्‍या, हो घ्‍योःरिज़्‍या।”
MAT 23:13 “जे कैफती सास्‍त्रीर स़ोनो फरिसीरालाई थैए माँतकन ज़ लिज़्‍या। जे स्‍वर्गताव राज्‍याल बाज़्‍यावरालाई जेरावैंज़्‍या। नो राज्‍याल जे ते पसिउ जेमाभैंःके, झन पसिउ पैंज़्‍यावरालाई ब पसिउ जेमाराएए।
MAT 23:14 [“फरी ब सास्‍त्रीर स़ोनो फरिसीरालाई थैए माँतकन ज़ लिज़्‍या। जे कैफतीर राँदी मेंमारालाई तँनी छाम छुम जेराख्‍याज़्या, मिँराए ङ़ाक वाज़ बनै चाव चाव पोंखारिउ जेजैसिज़्‍या। जे ते प़ाइँरानी घ्‍योःव सजा ज़ जेदैरिज़्‍या।]
MAT 23:15 “जे कैफती सास्‍त्रीर स़ोनो फरिसीरालाई थैए माँतकन ज़ लिज़्‍या। जे तोबोलाई जेचलनल रैन्‍याए जूँनी समुन्‍द्र तरिद जेराखिम्‍नाज़्‍या, झेंःव झेंःव गोंर ब कातिद जेराखिम्‍नाज़्‍या। तोबोलाई जेदैकिन जेकिन झन ज़ नोलाई नर्गए ओथोलाव जेजैज़्‍या।
MAT 23:16 “जे उमी पा·वए येम पैन्‍या ओजैसिज़्‍याव मितावर जेलिज़्‍या। जे अऩाकलाव कानुनर जैद, ‘ध्‍यान झ़िम छुद किर्‍या झाःसिउ, नो किर्‍या माथ॰रिए,’ है जेलिज़्‍या। ‘ध्‍यान झ़िमलाव सुनलाई छुद झाःकिन वाज़ थ॰रिज़्‍या,’ है जेलिज़्‍या।
MAT 23:17 जे किताव जेमी मारैंःव भाँकात्‍यार जेल्‍यो, कै जैद नो सुनलाई चोखैज़्‍याव ध्‍यान झ़िमकिन नलाव लिज़्‍याव सुन घेप्‍पा ओताज़्‍याव?
MAT 23:18 जे फरी, ‘थानलाई छुद किर्‍या झाःसिउ, नो ब माथ॰रिए। नो थानल लिज़्‍यावलाई छुद झाःकिन वाज़ किर्‍या थ॰रिज़्‍या,’ है जेलिज़्‍या।
MAT 23:19 जे किताव जेमी मारैंःवर जेल्‍यो, कै जैद नो चरैःसिउलाई चोखैज़्‍याव थानकिन नलाव चरैःसिउ ओघ्योःज़्‍याव?
MAT 23:20 है जैद किर्‍या झाःज़्‍याव मिँए थानलाई छुद किर्‍या ओझाःकिन नलाव लिज़्‍याव भरी ब माहुइ रो?
MAT 23:21 हो मिताव ज़ ध्‍यान झ़िमलाई छुद झाःकिन नलाव लिज़्‍याव भरी ब हुज़्‍या। नलाव लिज़्‍याव परमेस्‍वर ब हुज़्‍या।
MAT 23:22 फरी नमलाई छुद किर्‍या झाःकिन परमेस्‍वरए उसिंहासनलाई छुद ओझाःव मिताव ब लिज़्‍या, ओल परमेस्‍वरए उमिन ज़ छुद ओझाःव मिताव ब लिज़्‍या।
MAT 23:23 “जे कैफती सास्‍त्रीर स़ोनो फरिसीरालाई थैए माँतकन ज़ लिज़्‍या। जे तके दँ जरार घोद दस भा जैद तभा भितील झाःन्‍या य़ेन ते जेमाबिरैए। झन प़ाइँरानी ओचाहित ल्‍यो कानुनलाव सर्सिउ पाँ, सतस दान्‍या, सतत लिन्‍या, छुतए ल्‍योदा युँ नान्‍या, नो भरी ते जेऱास्‍के। जे ते झन नो ओचाहित ल्‍योलाई ब ऱासो मापरिन्‍या।
MAT 23:24 जे किताव भाँकात्‍यार जेल्‍यो, तोबो ओभार भाँती ल्‍यो मिँए ऊँतलाई गाल्‍द, तकेज़ा ऱूइलाई उरँःक उयुँ माजाम्‍द हाइद ख्‍याज़्‍याव मिँ स्‍यासोर जेलिज़्‍या।
MAT 23:25 “जे कैफती सास्‍त्रीर स़ोनो फरिसीरालाई थैए माँतकन ज़ लिज़्‍या। जे ताथीर खुरीर जेराचोखोइज़्‍याव नो पाखाताव वाज़ लिज़्‍या। जेयुँल ते लोभ स़ोनो जोत ब युँ मानैधुन्‍या वाज़ लिज़्‍या।
MAT 23:26 जे भाँकात्‍या फरिसीर, ङ़ादा जेयुँलाई सछैंचिकेदा, पाखाताव जेक्‍याँ ब चोखो ज़ तान्‍या ले।
MAT 23:27 “जे कैफती सास्‍त्रीर स़ोनो फरिसीरालाई थैए माँतकन ज़ लिज़्‍या। जे सरा थीसिउ मथ स्‍यासोर जेलिज़्‍या। नो मथ पाखानी बनै चाव पोरो·व रैंःज़्‍या, उजींल ते चिची सी ङरो मिँराए ऱूसर वाज़ लिज़्‍या।
MAT 23:28 हिताव ज़ जे मनी मिँराए ङ़ाक बनै चाव धर्मी मिताव जेजैसिज़्‍या, जेयुँल ते कैफत स़ोनो अधर्म वाज़ लिज़्‍या।
MAT 23:29 “जे निताव कैफती सास्‍त्रीर स़ोनो फरिसीरालाई थैए माँतकन ज़ लिज़्‍या। अगमबक्ताराए याखादरर जेराबनैज़्‍या, यामिनताव नैर ब स्‍यासी जैद,
MAT 23:30 ‘गे गेसाखा पुर्खाराए याबेलाक यास गेल्‍यो ताकिन इताव अगमबक्तारालाई सैःन्‍या गेमाल्‍यो,’ है जेलिज़्‍या।
MAT 23:31 है जैद ननी ज़, ‘अगमबक्तारालाई सैःज़्यावराए याथोर गे ज़ गेल्‍यो’ लिन्‍या जे ज़ जेथ·रैज़्‍या।
MAT 23:32 है जैद जे मनी जेसाखा पुर्खाराए यादोज़्‍याव य़ेन घसयो·च्‍यो।
MAT 23:33 “ए घुलर, घुलए ओथोर! जे नर्गलाव सजानी कै जैद उस्‍किउ जेदैरिज़्‍याव?
MAT 23:34 ङा जेल्‍योदा अगमबक्तार, याबुद्धी ल्‍योर, स़ोनो ओल्‍योदा बान्‍या येम पैज़्‍यावर परींद ङायाचिरिज़्‍या। जे नोरानी ख्‍वारालाई जेरासैःरिज़्‍या, ख्‍वारालाई क्रुसत जेरातङ्गैरिज़्‍या, ख्‍वारालाई धर्मसास्‍त्र झ़िम झ़िमल जेराप़ोरिज़्‍या, ख्‍वारालाई सहर सहरदा जेराखेपैरिज़्‍या।
MAT 23:35 है जैद यारासैःव धर्मी भरी नो ओदाज्‍युए ओसैःव हाबिलए ओपालाकिन नो थान स़ोनो ध्‍यान झ़िमनी निखार्लाव जेसैःव बेरेक्‍याहए ओज़ा जकरिया पैकावराए याझी जेलाई ज़ लागिस्‍रिज़्‍या।
MAT 23:36 जेलाई साचो है ङादाचिज़्‍या, आव भरी आव बेलाकाव मिँराए ङ़ैत ज़ फुलुप्‍सिरिज़्‍या।”
MAT 23:37 “ए यरूसलेमलाव मिँर, कै जैद अगमबक्ता भरिरालाई जेरासैःज़्‍याव, जेल्‍योक परींसिउरालाई ब लुँ लुँए जेराझेःज़्‍याव? बामाए ओचर्ल्‍यानीर ओकर धूँल ओरादुप्‍ज़्‍याव मिताव, ङा ब जेलाई कुधु पाला ज़ ङाल्‍योदा पाथस दुपो ङापैंके, खाली जे ते जेमाभैंःके।
MAT 23:38 है जैद जेझ़िम रितो ज़ तारिज़्‍या।
MAT 23:39 ङा जेलाई है ङादाचिज़्‍या, आकिन ते ‘परमेस्‍वरए उमिनताव हुज़्‍याव धन्‍याकाव ओताक’ है जेमादाँवा पै ङालाई फरी रँःन्‍या जेमाले।”
MAT 24:1 नकिन येसु ध्‍यान झ़िमनी पुलुस्‍द ओबाज़्‍याक उसिसराए, “गुर्बा, आव ध्‍यान झ़िम काता आः चाव जैसिउ उलिज़्‍याव,” है यादोक ते,
MAT 24:2 येसुए, “हैज़, आव भरी चिऊचिके। खाली ङा जेलाई साचो है ङादाचिज़्या, छींनी तछा आव भरी तैःद लुँए तर्त लुँ ब रहिन्‍या माले,” है यादोक्‍यो।
MAT 24:3 नकिन जाँवाक येसु जैतून दाँदात च़ुसिद उलिज़्‍याक उसिसर याबातङ अलगज़ा ओल्‍योक बाद, “आव नपाँ भरी खर्क ओतारिज़्‍याव, नँ हुन्‍या बेला स़ोनो आव जुक खेम्‍न्‍या बेलाकाव सरेस किताव ओतारिज़्‍याव? गेलाई है दासिके,” है यादोक ते,
MAT 24:4 येसुए, “जेलाई सुवाराए झुकैचिर्‍या, जे सैंसिद जोगोइसिद लिच्‍यो।
MAT 24:5 मिँर ङा ङामिन कुद ‘ङा ज़ ख्रीस’ है लिद कुधु ज़ हुद कुधुलाई याराझुकैरिज़्‍यार।
MAT 24:6 स़ोनो ‘आङ लरैं ताज़्या, होङ लरैं ताज़्या’ है यालिज़्‍याव जेथैक जे ताछे·च्‍यो। आव जुनी ब ताव ज़ परिए, खाली नो खेम्‍न्‍या बेला माःक।
MAT 24:7 नोकिन ङ़ादा जात जात, राज्‍या राज्‍या लरैं दान्‍या लेर। पो पोल भोंचालोर अनिकालर ब तारिज़्‍या।
MAT 24:8 आव भरी मेंमाए ज़ा दैन्‍या बेलाक ओघर्लिज़्याव मिताव सुरूलाव दुख वाज़ लिज़्‍या।
MAT 24:9 “नो बेलाक जेलाई मनी जेखिरी पसिद सूँपिद सैःचिरिज़्‍यार। जे ङामिनतावर जेतावए प़ाइँ जातलाव मिँराए सोचिरिज़्‍यार।
MAT 24:10 नो बेलाक कुधुए ज़ यायुँ क़्याद ङालाई ऱास्‍नारिज़्‍यार। नोर ख्‍वा ख्‍वार या याल ब सोसिद धोका यासिरिज़्‍यार।
MAT 24:11 फरी कुधुए ज़ आव ङापाँ बले·द तँदा पैन्‍यार जैसिद कुधुलाई ज़ याराबले·रिज़्‍यार।
MAT 24:12 आव मानुवात अधर्मलाव य़ेन बनै ज़ उमचिउए कुधु मिँराए यामया खेस्‍रिज़्या।
MAT 24:13 खाली जो आव दुखर ओमाखेमा पै थ॰रिज़्‍या, होए ज़ अजम्‍बरी जुनी दैन्‍या ले।
MAT 24:14 परमेस्‍वरए ओराज्‍यालाव आव चाव था संसार भरिलाव काना कुनीङाव प़ाइँ जातलाव मिँराए थैद परमेस्‍वरए ओसाची यादैवत, बल्‍ल आव जुक ब खेम्‍न्‍या ले।
MAT 24:15 “है जैद आव ब सैंच्‍यो, जे दानिएल अगमबक्ताए ओसरो मिताव नो ध्‍यान झ़िमलाव चोखो पोल तोबो फुरी हुद ऩुल्‍पा ऩुल्‍मा ओजैहुव जेरँःक,
MAT 24:16 हो बेलाक यहूदियाल लिज़्‍यावर गों जीदा ओधोंःरक।
MAT 24:17 थालात लिज़्‍यावर ब याझ़िमलाव याआल मालर ताच़ानारक।
MAT 24:18 एँःल लिज़्‍यावर मनी याक्‍वार च़ाना याझ़िमदा ताबारक।
MAT 24:19 नो बेलाक याफूल याज़ा ल्‍योर स़ोनो नुइँ सवैज़्याव आमार युँ नावज़ार।
MAT 24:20 खाली धोंःन्‍या बेला ज़्‍यूँःव साहाक स़ोनो ऩासिन्‍या छ्याम ताताक लिद परमेस्‍वरलाई पोंखारिच्‍यो।
MAT 24:21 हो बेलाकाव दुख बनै धो सहिउ तारिज़्‍या। निताव दुख आव संसार सुरू ओतावकिन आःपै माहुताए, निताव दुख नोकिन छींनी ब तान्‍या माले।
MAT 24:22 निताव बेला तावका ताव ज़ उलिकिन सु ज़ रहिन्‍या मालेर। खाली ओल परमेस्‍वरए छाँतिद ओरानैज़्‍याव उमींराए जूँनी नो बेला सुतुईंद्यान्‍या ले।
MAT 24:23 “नो बेलाक जेलाई सुवाराए, ‘ख्रीस आङ हुद ले, होङ हुद ले,’ है यादाचिकिन नोरालाई तारापतिच्‍यो।
MAT 24:24 ख्‍वार ङा ङामिन कुद ख्रीस जैसिद हुन्‍या लेर, ख्‍वार परमेस्‍वरए उपुरूसनी पाँव जैसिद हुन्‍या लेर। नोराए अचम्‍ब अचम्‍बलाव सरेसर य़ेनर जैद कुधुलाई झुकैन्‍या लेर। परमेस्‍वरए ओराछाँतिउरालाई मनी झुकैन्‍या छ्यास लिज़्‍या।
MAT 24:25 है जैद आव पाँर जेलाई ङ़ादा ज़ है दाद ङानैचिए।
MAT 24:26 मिँराए जेलाई, ‘ख्रीस फलाना बनल हुद ले,’ है यादाचिक होदा ताबाच्‍यो, फरी ‘झ़िम जींल लिज़्‍या,’ है यादाचिकिन नोराए यापाँ ब तापतिच्‍यो।
MAT 24:27 ङा मिँ मिन्‍सिउ ङाहुन्‍या छ्याम किताव पुर्बङ बिजुली उमिल्‍किक पछ्युँङ पै ज़गै जैज़्‍याव, हिताव ज़ ङा मनी प़ाइँए रँःन्‍याक मी चिकलामत ज़ हुन्‍या ङाले।
MAT 24:28 किताव खरल ओताक वाज़ का गिद्दर हुज़्‍यार, हिताव ज़ तान्‍या ले।”
MAT 24:29 “हो बेलाकाव दुख ओखेमोत निमी ब चुम चुमो तारिज़्‍या, स़्यावैए ओज़गै ब म़ारिज़्‍या, सोरोर ब नमतिन तेरिज़्‍यार, नमताव भरी ब यासतर म़ाद थोनो·सिन्‍या लेर।
MAT 24:30 नाःत ज़ मिँ मिन्‍सिउ ङाहुन्‍या सरेस नमत रैंःरिज़्‍या। बनै ज़गै मगैव ङासक्तीरास बादलरास स्‍वर्गनी ङाहुज़्‍याव आव मानुवाताव प़ाइँ जातलाव मिँराए रँःद नोर यायुँर स्‍यासे सतेन्‍या लेर।
MAT 24:31 नाःत ज़ तोबो भोंकरए ओर्गात स्‍वर्गताव ङाचाकर्‍यार ङारापरींवत नोराए नाम नमलाव प़ाइँ काना कुनीलाव छाँतिद ङारानैज़्‍याव ङामींरालाई ङाल्‍योक यारादुप्‍रिज़्‍यार।”
MAT 24:32 “आव ब सैंच्‍यो, किताव नेभारा सीं ओमोम्‍नाक ‘उभ्‍याली उहुनाव ची ओल्‍यो’ है जेलिज़्‍या,
MAT 24:33 हिताव ज़ नो है ङादाचिउ पाँ भरी ओतानाज़्याव जेरँःक ‘ख्रीस उहुन्‍या बेला ओतानाव ची ओल्‍यो’ लिन्‍या सैंच्‍यो।
MAT 24:34 ङा जेलाई साचो है ङादाचिज़्‍या, आव भरी ओमातावा पै आव जुक खेम्‍न्‍या माले।
MAT 24:35 आव नाम नम ते खेम्‍न्‍या ले, ङा ङापाँ ते खर्क ज़ म़ान्‍या माले।”
MAT 24:36 “नो छ्याम, नो बेला सुए ज़ मासैंर। स्‍वर्गताव चाकर्‍याराए ब मासैंर, परमेस्‍वरए ओज़ाए ब मासैंव, स्‍वर्गताव ङाबाबुए वाज़ सैंज़्‍याव।
MAT 24:37 है जैद ङा मिँ मिन्‍सिउ ङाहुन्‍या बेला नोआए ओपालाकाव मिताव ज़ तारिज़्‍या।
MAT 24:38 नोआए ओपालाकाव मिँर ब ऱीए ओमारागदैवा पै ज़्‍याद ओद, ज्‍यार रेर ब दाव य़ेन ज़ यादोज़्‍याव। नोआ ऱी जहाजल ओमापसिवा पै नोर नो य़ेन दाव ज़ यानैज़्‍याव।
MAT 24:39 ऱीए साम सुम ओमारागदैवा पै ‘इताव गेतारिज़्‍या’ लिन्‍या मासैंकेर। ङा मिँ मिन्‍सिउ ङाहुन्‍या छ्याम ब हिताव ज़ तारिज़्‍या।
MAT 24:40 नो बेलाक एँःल य़ेन दाज़्‍यावनिलाई तोबोलाई लाँरिज़्‍याव, तोबोलाई ख्‍यानैरिज़्‍याव।
MAT 24:41 हिताव ज़ फरी राँथै हे·ज़्‍याव मेंमानिलाई तोबोलाई लाँरिज़्‍याव, तोबोलाई ख्‍यानैरिज़्‍याव।
MAT 24:42 “है जैद सैंसिद लिच्‍यो, जेप्रभु आव छ्याम हुरिज़्‍या लिन्‍या जेमासैंए।
MAT 24:43 आव ब सैंच्‍यो, तोबो झ़िमए ओर्गेए ‘चोर आछिम रील आः बेलाक हुरिज़्‍या’ लिन्‍या ओसैंकिन नो सैंसिद लिद उझ़िम पा·व माएखेहो।
MAT 24:44 हिताव ज़ जे मनी सैंसिद लिच्‍यो, काराव ल्‍यो ताकिन ङा मिँ मिन्‍सिउ मनी जेमासैंद उमँःजानी ज़ ङाहुरिज़्‍या।”
MAT 24:45 “किताव तोबो धनी मिँए सतस दाज़्याव ओतह ल्‍यो ओनोकोरलाई उझ़िमलाव य़ेन भरी उकुइत याद ओय़ेन दाज़्यावरालाई थिक बेलाक ज़्‍यावर यान्‍या जैद ओख्‍यानैक,
MAT 24:46 नो नोकोरए सतस य़ेन ओदोज़्‍याव ओघरपतीए ओदैहुकिन नो नोकोर असिक दैव ज़ तान्‍या ले।
MAT 24:47 ङा साचो है ङादाचिज़्‍या, नो ओघरपतीए प़ाइँ ज़ उकुइत यान्‍या ले।
MAT 24:48 फरी नो नोकोर माचाव ओताकिन, ‘ङाघरपती हतप्‍त माहु,’ लिद,
MAT 24:49 ओलस य़ेन दोज़्यावरालाई प़ोद, ओल ज़्‍याद ओद मँःए मँःए ओबाऱिज़्‍याक,
MAT 24:50 ओमासैंद ओघरपतीए ओदैहुकिन,
MAT 24:51 नोलाई चम चम जैद कैफतीर ओराख्‍याज़्‍याव पोल ख्‍यान्‍या ले। नल नलावरास याहार ङर ङर कैद चिर्लनी बिर्ल घर्न्‍या लेर।”
MAT 25:1 “हाः बेलाक स्‍वर्गताव राज्‍याल पसिन्‍यार कितावर तारके लिक ते, दस जना मुँद्याल्‍नीर सु सु याबत्तीस ओज्‍या च़ाना हुज़्‍याव ब्‍याहोल्‍यालाई कींद नैज़्‍याव मितावर तारिज़्‍यार।
MAT 25:2 नोर पाँच जना यासामा ल्‍योर, पाँच जना यासामा माल्‍यो मितावर लिज़्‍यार।
MAT 25:3 नो यासामा माल्‍यो पाँच जनाराए ते बत्ती वाज़ लाँकेर दी, बत्तील झाःन्‍या म़ास ते मालाँकेर दी।
MAT 25:4 फरी नो यासामा ल्‍योराए ते बत्तील झाःन्‍या म़ास ब लाँद यानैज़्‍याव दी।
MAT 25:5 नो मुँद्याल्‍नीर ब्‍याहोल्‍या हुन्‍या धिलो ओतावए यामीर पातिद होक ज़ स्‍याँकेर दी।
MAT 25:6 “आधा रील तोबोए, ‘दे सोचिके, ब्‍याहोल्‍या हुरिके, सु सु जेबत्ती तैंःद ब्‍याहोल्‍यास दैसिनाचिके,’ है ओरादोक ते,
MAT 25:7 प़ाइँ सोद याबत्तीर बनैद झाःसिकेर दी।
MAT 25:8 नकिन नो यासामा माल्‍योराए यासामा ल्‍योरास, ‘गेलाई जेम़ास तुपुरू याव ताके, गे ते गेबत्तीर सिरिकेर,’ है यारादोक ते,
MAT 25:9 नो यासामा ल्‍योराए, ‘जेलाई गेयाचिकिन गेलाई ब थैंन्‍या माले। बुरू जे पसलदा लँःनाचिके,’ है यारादोकेर दी।
MAT 25:10 नोर लँःना याबाव प़ाइँना ज़ ब्‍याहोल्‍या केस्‍हुके दी। हाःत ज़ नो ब्‍याहोल्‍याए यासामा ल्‍योरास बिह्‍यालाव भत्‍यारल पसिद य़ाम गल्क्‍यो दी।
MAT 25:11 “छींनी नो यासामा माल्‍योर म़ासर लँःद याहुवत य़ाम गल्सिउ रँःद य़ामत कोतो कोतो जैद, ‘प्रभु, गेलाई य़ाम फैद्यासिके,’ है यादोक ते,
MAT 25:12 ब्‍याहोल्‍याए नोरालाई, ‘साचो है ङादाचिज़्या, ङा जेलाई ङामासरेस्‍चिए,’ है यादोक्‍यो दी।
MAT 25:13 “है जैद जे ब सैंसिद लिच्‍यो। जे ‘आव छ्याम, आव बेलाक तारिज़्‍या’ लिन्‍या जेमासैंए।”
MAT 25:14 “फरी स्‍वर्गताव राज्‍या तोबो मिँए ओनोकोर भरिलाई खुल्‍द ओलसकाव लिज़्‍याव भरी नोराए यापासल झाःद तादा देसदा ओबाव मिताव ब लिज़्‍या।
MAT 25:15 नो ओबान्‍या बेलाक सु सु यागहक रँःद तोबोलाई पाँच तोला सुन, तोबोलाई ऩेतोला, तोबोलाई त़ोतोला याद याख्‍यानैक्‍यो दी।
MAT 25:16 नो ओबाव छींनी नो पाँच तोला दैवए बेहार ज़ खेलैसिद ओयाःत पाँच तोला हाइक्‍यो दी।
MAT 25:17 हिताव ज़ फरी नो ऩेतोला दैवए मनी खेलैसिद ओयाःत ऩेतोला हाइक्‍यो दी।
MAT 25:18 नो त़ोतोला दैवए ते ओघरपतीए उसुनलाई नामल गादैद म़ोंद नैक्‍यो दी।
MAT 25:19 “कुधु छींनी नो याघरपती हुद, ‘ङारायो सुन कै जैर्‍या’ लिद ओनोकोररालाई याखुल्‍क्‍यो दी।
MAT 25:20 नो पाँच तोला दैव हुद, ‘प्रभु, नयाँव पाँच तोला सुन खेलैसिद ओयाःत पाँच तोला हाइद ङानै,’ है ओदोक ते,
MAT 25:21 ओघरपतीए, ‘स्‍याबास सतस दाज़्‍याव ङानोकोर, ङायुँलाव मिताव मिँ नलिज़्‍या। तकेज़ा य़ेनलाई ब सतस नदोवए झन कुधु ज़ नकुइत जैद ङाईंरिज़्‍या। है जैद नयुँ होलाँ जैद ङास रेंनिके,’ है दोक्‍यो दी।
MAT 25:22 “नकिन फरी नो ऩेतोला दैव हुद, ‘प्रभु, नो नयाँव ऩेतोला सुन खेलैसिद फरी ओयाःत ऩेतोला हाइद ङानै,’ है ओदोक ते,
MAT 25:23 ओघरपतीए नोलाई मनी, ‘स्‍याबास सतस दाज़्‍याव ङानोकोर, ङायुँलाव मिताव मिँ नलिज़्‍या। इताव तकेज़ा य़ेनलाई सतस नदोवए झन कुधु ज़ नकुइत जैद ङाईंरिज़्‍या। नँ मनी नयुँ होलाँ जैद ङास रेंनिके,’ है दोक्‍यो दी।
MAT 25:24 “प़ाइँरानी छींत नो त़ोतोला दैव हुद, ‘प्रभु, नँ बनै कर्रा नतावए नँ ते नमाझाःव ब नसिम्‍ज़्‍या, नमानैव ब नलाँज़्‍या।
MAT 25:25 है जैद ङाछ्याचेए नो नयाँव सुन नामल गादैद ङानैके। किताव नयाँव हिताव ज़ लिज़्‍या,’ है ओदोक ते,
MAT 25:26 ओघरपतीए नोलाई, ‘ए मीसी, कान्‍ल ज़ काम मालागिउ ङानोकोर, ङालाई निताव ‘ओमाझाःव ब सिम्‍ज़्‍याव, ओमानैव ब लाँज़्‍याव’ है नदाँज़्‍याव ताकिन,
MAT 25:27 काराव नो सुन ब्याङ्कल नमाझाःव? नल नझाःव ताकिन ङाहुवत ओब्‍याजस दैन्‍या ङाल्‍यो,’ है दाद,
MAT 25:28 नक लिज़्‍यावरालाई, ‘नोलाई नो त़ोतोला नैंद दस तोला ल्‍योलाई एचिके।
MAT 25:29 जोए ओदैवलाई चावस चलैज़्याव, होलाई झन ज़ चा·सिद धोल पोगोल ज़ तारिज़्‍या। जोए ओदैवलाई चावस माचलैव, होस छ्या छ्या लिज़्याव ब नैंसिरिज़्या।
MAT 25:30 नो काम मालागिउ ङानोकोरलाई ते चुम चुमोल ख्‍याचिके। नल ओहार ङर ङर कैद धस धस गघर्क।’ ”
MAT 25:31 “तछा मिँ मिन्‍सिउ स्‍वर्गताव ओचाकर्‍यारास बनै ज़गै मगैवस हुद ओराज्‍या चलैरिज़्‍याव।
MAT 25:32 नो बेलाक प़ाइँ देसलाव, प़ाइँ जातलाव मिँरालाई ओल्‍योक दुप्‍द किताव बेधा गावलाए बेधा भरी तँदा बाकरा भरी तँदा ओराजैज़्‍याव,
MAT 25:33 हिताव ज़ नो राज्‍या चलैज़्‍यावए मनी नो बेलाक नोरालाई बेधा स्‍यासो भरी ओवोर्दा, बाकरा स्‍यासो भरी ओदाबर्‍यादा जैद,
MAT 25:34 नो राजाए ओवोर्दाङावरालाई है दान्‍या ले, ‘हुचिके ङाबाबुए उयुँलाव मिताव मिँर। नाम नम ओतावकिनकाव जेमिनत नैद ओयाचिउ राज्‍या जेकुइत रैचिके।
MAT 25:35 जे ङाकरेव बेलाक ङाकरे सैःद जेयाँके, ऱी ङाछोसो बेलाक ङाऱीछो सैःद जेयाँके, ङादुलिरिज़्‍याक ब बासिउ जेयाँके,
MAT 25:36 नाङग्‍या ङालिज़्‍याक ब जेक्‍वाइनाके, ङाजोरो उहुक ब जेसमारिनाके, झ्यालखानाल ङालिज़्‍याक ब जेचिऊहुनाके,’ है ओरादोक ते,
MAT 25:37 नो ओवोर्दाङाव धर्मीराए, ‘अ प्रभु, खर्क करे नल्‍योदा नकरे सैःद गेईंव, खर्क नऱीछो सैःद गेईंव,
MAT 25:38 खर्क नदुलिरिज़्‍याक बासिउ गेईंव, खर्क नाङग्‍या नल्‍योदा गेक्‍वाइनिउ?
MAT 25:39 खर्क नजोरो उहुक गेसमारिनिउ, खर्क झ्यालखानाल नलिक गेचिऊहुनिउ?’ है यादोक ते,
MAT 25:40 नो राजाए, ‘जेलाई साचो है ङादाचिज़्‍या, ङासकाव प़ाइँरानी ज़िम्‍ज़ा काता ज़ माल्‍योरालाई जेराचिऊव, नोरालाई माःक, ङालाई जेचिऊनाव मिताव ज़ लिज़्‍या,’ है दान्‍या ले।
MAT 25:41 “नकिन फरी राजाए नो ओदाबर्‍यादाङावरालाई, ‘ए जेफ्या·हुवर, जे ङानी पुलुस्‍द सैतान स़ोनो ओचाकर्‍याराए जूँनी जैसिउ नर्गलाव चुयाप मातान्‍या मेंःल बाचिके।
MAT 25:42 ङा ङाकरेव बेलाक ङाकरे सैःद जेमायाँके, ऱी ङाछोसो बेलाक ङाऱीछो ब सैःद जेमायाँके,
MAT 25:43 ङादुलिरिज़्‍याक ब बासिउ जेमायाँके, नाङग्‍या ङालिज़्‍याक ब जेमाक्‍वाइनाके, ङाजोरो उहुक स़ोनो झ्यालखानाल ङालिज़्‍याक ब जेमाचिऊनाके,’ है ओरादोक ते,
MAT 25:44 नो ओदाबर्‍यादाङाव पापीर, ‘प्रभु, खर्क करे नल्‍यो गेरँःनिउ, खर्क ऱी नछोसो गेरँःनिउ, खर्क नदुलिरिज़्‍याव गेरँःनिउ, खर्क नाङग्‍या नल्‍यो गेरँःनिउ, खर्क नजोरो उहुव स़ोनो झ्यालखानाल नल्‍यो गेरँःनिउदा गेमाचिऊनिउ?’ है यादोक ते,
MAT 25:45 राजाए नोरालाई, ‘ङा जेलाई साचो है ङादाचिज़्‍या, जे ङासकाव प़ाइँरानी ज़िम्‍ज़ा काता ज़ माल्‍योरालाई जेमाराचिऊवए, ङालाई जेमाचिऊनाव मिताव ज़ लिज़्‍या,’ है दान्‍या ले।”
MAT 25:46 नकिन येसुए, “है जैद जे आव ब सैंच्‍यो, नो ओदाबर्‍यादाङावर खर्क ज़ माउस्‍किधुन्‍या सजाल परिरिज़्‍यार, नो ओवोर्दाङाव धर्मी भरी ते अजम्‍बरी जुनील बारिज़्‍यार,” है यादोक्‍यो।
MAT 26:1 येसुए आव पाँ भरी ओखेमोत उसिसरालाई है यादोक्‍यो,
MAT 26:2 “आछिमकिन ऩेलात निस्‍तार पर्ब हुरिज़्‍या। नो बेलाक ज़ ङा मिँ मिन्‍सिउलाई क्रुसत तङ्गैद सैःनारिज़्‍यार,” है यादोक्‍यो।
MAT 26:3 येसुए है ओल्‍यो मिताव ज़ मुख्‍या पुजारीर स़ोनो यहूदीराए यास़ेरर तोबो कैयाफा यादोज़्‍याव प्रधान पुजारीए उझ़िमक दुप्‍सिद,
MAT 26:4 येसुलाई झुकैद क्‍योःद सैःन्‍या गुमुस्‍ता दोकेर।
MAT 26:5 खाली, “पर्ब बेलाक माता, मिँर मचिन्‍या ओछ्यास लिज़्‍या,” है लिकेर।
MAT 26:6 हाः बेलाक येसु बेथानिया नाखारल तोबो सिमोन यादोज़्‍याव कुऱीए उझ़िमक उलिज़्‍याव।
MAT 26:7 येसुए नो झ़िमक काँ उज़्‍युज़्‍याक तोबो मेंमाए बनै चाव ज़िम्‍ज़ा लुँ जाल उसी ङरो बनै ओएः ल्‍यो म़ास रैद येसुए ओङ़ैत ओपो·स ज़ थीदिक्‍यो।
MAT 26:8 येसुए उसिसराए निताव रँःद जाँ यारिस चोद, “आव मेंमाए काराव नाः ओएः ल्‍यो म़ास खेर ओझाःज़्‍याव?
MAT 26:9 बुरू नोलाई यो·द नो पैसाए काता ज़ माल्‍योरालाई भाःद ओराएकिन तान्‍या ओल्‍यो,” है यालिज़्‍याव।
MAT 26:10 येसुए थैद, “काराव आव मेंमाए उयुँ केःद जेएज़्याव? नोए ते ङाजूँनी बनै चाव य़ेन दोक्‍यो।
MAT 26:11 काता ज़ माल्‍योर ते जेस एकतार ज़ लिज़्‍यार, ङा ते जेस एकतार लिन्‍या ङामाले।
MAT 26:12 आवए ङाक्‍याँताव थीद ओयाँव म़ास, ङा मासिद ज़ गादैन्‍या छ्यामकावए जूँनी ङामोरोलाई थीद ओयाँव मिताव ज़ ताके।
MAT 26:13 है जैद ङा जेलाई साचो है ङादाचिज़्‍या, संसार भरिल जोङ जोङ आव चाव था यारासथैज़्यार, होङ होङ आव मेंमाए ओदोव य़ेन थास्‍द उमिन ब रहिन्‍या ले।”
MAT 26:14 नकिन बाह्र जना उसिसरानी यहूदा इस्‍करियोत मुख्‍या पुजारीराए ल्‍योक बाद,
MAT 26:15 “ङा येसुलाई जेकुइत पारैद ङायाचिकिन ङालाई काता जेयाँके?” है ओरादोक ते, नोर खुसी ताद चाँदीए पैसा तीस गोता एकेर।
MAT 26:16 हाःकिन नोए येसुलाई धोका यान्‍या मौका खिम्‍क्‍यो।
MAT 26:17 हाःत ज़ माँदा भरेस ज़्‍यान्‍या पर्ब सुरू ओतावत उस॰कताव छ्याम येसुए उसिसर ओल्‍योक हुद, “नँ कै नलिज़्या, आव पर्ब मानिन्‍याए जूँनी ज़्‍यावर काङ्क जैनान्‍या?” है यादोक ते,
MAT 26:18 येसुए, “नो सहरल बाचिकेदा, नक तोबो मिँस दैसिन्‍या जेले। नोलाई, ‘गेगुर्बाए है दींज़्‍याव, ओल बान्‍या बेला ताद ले दी। है जैद गे उसिसरास आव पर्ब नझ़िमक मानिउ पैंज़्‍याव,’ है दोच्‍यो,” है दाद यापरींक्‍यो।
MAT 26:19 येसुए है ओरादोव मिताव ज़ उसिसराए पर्बताव ज़्‍याव भरी जैकेर।
MAT 26:20 हो छ्याम ऱिमक येसु बाह्र जना उसिसरास नो झ़िमल दुप्‍सिद ज़्‍यान्‍याए जूँनी च़ुसिकेर।
MAT 26:21 ज़्‍यावर याज़्‍युज़्‍याक येसुए, “ङा जेलाई साचो है ङादाचिज़्‍या, जेनी तोबोए ङालाई धोका यान्‍या ले,” है ओरादोक ते,
MAT 26:22 उसिसर यागहरास, “ङा ते माताखेहो सा, प्रभु,” है लिद पालास है दोकेर।
MAT 26:23 नाःत ज़ येसुए, “जोए ङास भरेस चिपल छोइद ज़्‍युज़्‍याव, हो ज़।
MAT 26:24 ङा मिँ मिन्‍सिउए ते धर्मसास्‍त्रलाव सर्सिउ दुखर जुनी ब सयो·व ज़ परिए, खाली ङालाई धोका याज़्याव मिँलाई ते थैए माँतकन ज़ लिज़्‍या। निताव मिँ बुरू ओमाजर्मिकिन तान्‍या ओल्‍यो,” है ओरादोक ते,
MAT 26:25 नो धोका याव पैंज़्‍याव यहूदा ओल ज़ पर्सिद, “सैं ङा ओताव, गुर्बा?” है ओदोक ते, येसुए, “हैज़, नँ ज़ है नलिके,” है दोक्‍यो।
MAT 26:26 नकिन नो याज़्‍युज़्‍यावत ज़ येसुए उकुइत भरेस तोबो रैद, असिक ऩिद नो भरेसलाई केःद, “हाँ, आव ज़्‍युचिके। आव ङाक्‍याँ ज़,” है दाद भाःद याएक्‍यो।
MAT 26:27 हो मिताव ज़ फरी खुरी उकुइत रैद धन्‍याबाद चरैःद, “जे प़ाइँए आव खुरीनी ज़ ओचिके,” है लिद नोरालाई याद,
MAT 26:28 “आव जेओज़्‍याव कुधु मिँराए पाप क्‍याल्‍द्यान्‍याए जूँनी ङासोभोरिज़्‍याव ङाझी ज़। आनी ज़ परमेस्‍वरए जेस साःरो बाचा नैद्याचिरिज़्‍याव।
MAT 26:29 ङा जेलाई है ङादाचिज़्या, ङा स्‍वर्गताव ङाबाबुए ओराज्‍याल जेस सिप गेमातावा पै आव भत्‍यारलाव दाखमद्य आछिमकिन ओन्‍या ङामाले,” है यादोक्‍यो।
MAT 26:30 नकिन भजन तोबो गैद ननी पुलुस्‍द जैतून दाँदादा बाकेर।
MAT 26:31 नक याकेसोत येसुए उसिसरालाई, “जे आछिम रील ज़ ङालाई प़ाइँए ऱास्‍न्‍या जेले। धर्मसास्‍त्रल इताव सर्सिउ लिज़्‍या, ‘बेधाराए यार्गे गावलालाई प़ोद ङासैःवत, बेधार चितराँ पुतराँ तारिज़्‍यार।’
MAT 26:32 हैदी ब सिउनी सैंसिद जेङ़ादा ज़ गालीलल ङाबारिज़्‍या,” है यादोक्‍यो।
MAT 26:33 हाःत ज़ पत्रुसए, “उपुर्कावराए प़ाइँए याऱास्‍निदी ब ङा ते नँलाई खर्क ज़ ऱास्‍न्‍या ङामाले,” है ओदोक ते,
MAT 26:34 येसुए, “ङा नँलाई साचो है ङादींज़्‍या, आछिम रील ज़ भाल्‍या ओमाकोद ङालाई स़ोंखेप ‘ङामासरेसे’ है दान्‍या नले,” है ओदोक ते,
MAT 26:35 पत्रुसए फरी, “माःक, ङा नँस सिन्‍या ओतादी ब ङा नँलाई ङामासरेसे है लिन्‍या ङामाले,” है दोक्‍यो। उपुर्कावराए मनी हैज़ लिकेर।
MAT 26:36 नकिन येसु उसिसरास गेतसमनी यादोज़्‍याव बगैचाल बाद उसिसरालाई, “ङा जाँ होकसैकावक बाद ङापोंखारिवा पै जे आक ज़ लिच्‍यो,” है दाद,
MAT 26:37 पत्रुस स़ोनो जब्‍दियाए ओज़ानी याकूब स़ोनो यूहन्‍नारालाई ओलस यालाँक्‍यो। हाःत ज़ येसु उयुँर स्‍यासे सतेद धो थाइव तानाद,
MAT 26:38 नो स़ोम्‍लोरालाई, “ङायुँर स्‍यासे तेद सिवा सिवा ताद ङाले। जे आक ज़ लिद ङास सैंसिद लिचिके,” है दाद,
MAT 26:39 नोराकिन छ्यावा होकसै बाद नामक फुलुप्‍सिद अइ लिद पोंखारिक्‍यो, “अ बाबु, आव ङाक्‍याँत हुरिज़्‍याव धो सहिउ दुखर भर्सकी वैंद्याँके। खाली ङा ङायुँ माःक, नँ नयुँ ओताकिन वाज़,” है लिद,
MAT 26:40 नो स़ोम्‍लोराए ल्‍योक उहुवत नोर ङ़ल्‍द यालिज़्‍याव दैहुद पत्रुसलाई, “जे कै जैद ङास तघन्‍ता पै ब जेमालिधुज़्‍याव?
MAT 26:41 सैंसिद पोंखारिचिके, म़ानी दुखराल जेमाथ॰रिधुया। जेयुँए ते दान्‍या ज़ पैंज़्‍याव, खाली पाखाताव जेक्‍याँए ते मासहिधुन्‍या ओछ्यास लिज़्‍या,” है दोक्‍यो।
MAT 26:42 नकिन येसु फरी ब ङ़ादाङाव ओपोंखारिज़्‍याव पोक बाद अइ लिद पोंखारिक्‍यो, “ङाबाबु, आव ङाक्‍याँत हुरिज़्‍याव धो सहिउ दुखर ङा मासहिद ज़ मातान्‍या ओल्‍यो ताकिन, है नलिज़्‍याव मिताव ज़ ओताक,” है लिद,
MAT 26:43 नो स़ोम्‍लोराए ल्‍योक उहुक फरी ङ़ल्‍द यालिज़्‍याव ज़ यादैक्‍यो। नोराए यामीर बनै पातिद मासहिधुकेर।
MAT 26:44 है जैद नोरालाई ख्‍यानैद फरी ब ङ़ादाङाव पोक बाद ङ़ादाकिनकाव मिताव ज़ पोंखारिक्‍यो।
MAT 26:45 नकिन फरी नो स़ोम्‍लोराए याल्‍योक हुद, “आःपै जेमीर मायो·ताए रो? अब ते ङा मिँ मिन्‍सिउ पापीराए कुइत सूँपिसिन्‍या बेला हुके।
MAT 26:46 च्‍याँःसिचिके, गेबा। ङालाई धोका याज़्‍याव मिँ नक ज़ हुद ले,” है यादोक्‍यो।
MAT 26:47 येसु ओपाँज़्याक ज़ नो बाह्र जना उसिसरानिकाव यहूदा इस्‍करियोत बनै माहोल्‍या मिँरास तरवालीर खोंतार रैद हुकेर। नोर मुख्‍या पुजारीर स़ोनो यहूदीराए यास़ेरराए ल्‍योनी हुवर याल्‍यो।
MAT 26:48 नो इस्‍करियोतए ङ़ादा ज़ नो क्‍योःना हुज़्‍यावरालाई, “ङा जोलाई माइँ ङादोए, होलाई ज़ क्‍योःच्‍यो,” लिद सरेस याद ओरानैज़्‍याव।
MAT 26:49 है जैद बगैचाल याकेसो प़ाइँना इस्‍करियोत येसुए ल्‍योक बाद, “जेरो गुर्बा,” लिद माइँ दोक्‍यो।
MAT 26:50 हाःत ज़ येसुए, “अ ङानैं, ङाक्‍याँत नदान्‍या दोके,” है ओदोव प़ाइँना ज़ नो माहोल्‍यार हुद येसुलाई ताप तप क्‍योःकेर।
MAT 26:51 हाःत ज़ येसुसकाव तोबोए ओतरवाली हाइद प्रधान पुजारीए ओनोकोरलाई तँनिकाव ओर्ना पल्‍द सतेदिक्‍यो।
MAT 26:52 येसुए निताव रँःद, “नतरवाली उसिपल झाःके। तरवाली चलैज़्‍यावर तरवालीनी ज़ सिरिज़्‍यार।
MAT 26:53 ङा ङाबाबु परमेस्‍वरस ङाऩिकिन बाह्र पल्‍तन ओचाकर्‍यार तादी ब ङालाई परींद्यान्‍या ले, नो जेमासैंए रो?
MAT 26:54 खाली निताव ङाऩिकिन आव ङाक्‍याँत ताव परिन्‍या धर्मसास्‍त्रलाव सर्सिउ पाँर कातानी ओयो·रिज़्‍याव?”
MAT 26:55 नकिन येसुए नो क्‍योःना हुव माहोल्‍यारालाई, “काराव ङालाई दाँकालाई मिताव तरवालीर खोंतार दाद जेक्‍योःहुनाव? ङा जेलाई दिनकाव ज़ ध्‍यान झ़िमल परमेस्‍वरए ओपाँ ङासथैचिक जेमाक्‍योःनाके।
MAT 26:56 खाली अगमबक्ताराए धर्मसास्‍त्रल यासरो मिताव सयो·न्‍याए जूँनी ची इताव ताके,” है ओरादोव प़ाइँना उसिस भरी येसुलाई ऱास्‍द चितराँ पुतराँ धोंःकेर।
MAT 26:57 नकिन नो क्‍योःना हुवराए येसुलाई प्रधान पुजारी कैयाफाए ल्‍योक लाँकेर। नक सास्‍त्रीर स़ोनो यहूदीराए यास़ेरर दुप्‍सिद यालिज़्‍याव।
MAT 26:58 नो बेलाक पत्रुस जाँ तादाङ याछीं याछीं हुद नो प्रधान पुजारीए ओचतराक ज़ हुद ‘येसुलाई कै याजैज़्‍याव ब्‍याँ?’ लिद पाल्‍याराए छ्योक ज़ च़ुसिके।
MAT 26:59 नो झ़िमल मुख्‍या पुजारीर स़ोनो घ्‍योःव कचरीलाव स़ेर भरिए येसुए ओङ़ैत माचाहिउ पाँर झाःद सैःन्‍या कर याखिम्‍ज़्‍याव।
MAT 26:60 धुत गोहाई पाँन्‍यार कुधु ज़ ताकेर, खाली कर ते कान्‍त ज़ मादैकेर। बल्‍ल प़ाइँरानी छींनी ऩेब्‍लो हुद,
MAT 26:61 “आवए, ‘परमेस्‍वरए ओध्‍यान झ़िमलाई तैःद फरी स़ोंलात हिताव ज़ ङाजैरिज़्‍या,’ है ओल्‍यो गिन ज़ गिन्‍थैके,” है निरादोव प़ाइँना ज़,
MAT 26:62 प्रधान पुजारी च्‍याँःसिद येसुलाई, “नँ नपाँ काता ज़ ओमालिज़्‍याव रो? आवनी नङ़ैत झाःद निईंव पाँ किताव उलिज़्‍याव?” है ओदोक ते,
MAT 26:63 येसुए घाइ ज़ मादोक्‍यो। फरी प्रधान पुजारीए, “जींदो परमेस्‍वरए उमिननी है ङादींज़्‍या, नँ गेलाई है दासिके, नँ परमेस्‍वरए ओज़ा ख्रीस सैं माःक?” है ओदोक ते,
MAT 26:64 येसुए, “नँ है नलिज़्‍याव मिताव ङा साचो हो ज़। तछा ङा मिँ मिन्‍सिउलाई माहान परमेस्‍वरए ओवोर्दा च़ुसिद ङालिज़्‍याव ब रँःन्‍या जेले, स़ोनो स्‍वर्गतिन बादलरास ङाहुज़्‍याव ब रँःन्‍या जेले,” है यादोक्यो।
MAT 26:65 हो प़ाइँना ज़ प्रधान पुजारीए उरिसए ओक्‍वार चीए चीए, “जे ज़ जेथैके, आवए परमेस्‍वरए उमिन ओबले·ज़्याव। छुत गोहाई काता ओचाहिउ?
MAT 26:66 जे कै जेलिज़्‍या?” है ओरादोक ते, नोराए प़ाइँए, “आवलाई सैःन्‍या ज़,” है लिद,
MAT 26:67 ख्‍वाराए मुत्‍काए प़ोकेर, ख्‍वाराए लप्‍ताए प़ोकेर, ख्‍वाराए त़िल्‍केर।
MAT 26:68 नै जैज़्‍यावराए फरी, “नँ साचो ख्रीस ताकिन, गेलाई है दासिके, नँलाई प़ोज़्‍याव सु?” है लिद बरे·केर।
MAT 26:69 येसुलाई नै याजैज़्‍याक पत्रुस चतराक ज़ च़ुसिद उलिज़्‍याव। नो बेलाक ज़ तोबो नलाव य़ेन दाज़्‍याव मेंमा हुद पत्रुसलाई, “नँ मनी गालीललाव येसुस नल्‍यो सानी,” है ओदोक ते,
MAT 26:70 पत्रुसए प़ाइँए याङ़ाक, “नँ काता नपाँज़्‍याव इताव, ङा ते ङामासैंए,” है दाद,
MAT 26:71 साँबिलाक उच़ुसिनाक फरी छुत तोबो य़ेन दाज़्याव मेंमा हुद नक लिज़्‍यावरालाई है यादोक्‍यो, “आव मिँ ते नासरतलाव येसुसकाव ज़,” है ओरादोक ते,
MAT 26:72 पत्रुसए किर्‍या झाःद, “ङा नो है नलिज़्‍यावलाई सरेस ज़ ङामासरेसे,” है दोक्यो।
MAT 26:73 फरी छ्यावाक नक लिज़्‍यावर पत्रुसए ल्‍योक हुद, “नँ साचो उसिसरासकाव ज़, नपाँनी ज़ गेसरेस्‍निज़्‍या,” है यादोक ते,
MAT 26:74 पत्रुस बनै थल्‍सिद किर्‍या झाःद, “ङा नो मिँलाई सरेस ज़ ङामासरेसे,” है ओरादोव प़ाइँना ज़ भाल्‍या कोके।
MAT 26:75 नाःत ज़ ङ़ादा येसुए पत्रुसलाई, “भाल्‍या ओमाकोद ज़ ङालाई स़ोंखेप ‘ङामासरेसे’ है लिन्‍या नले,” है ओदोव पाँ ब चेतैक्‍यो। नो चेतैद पत्रुस लाँःक पुलुस्‍द धस धस घर्के।
MAT 27:1 छकाल्‍न्‍या घग ज़ मुख्‍या पुजारीर स़ोनो यहूदीराए यास़ेरराए येसुलाई सैःन्‍याए जूँनी सल्‍ला दोकेर।
MAT 27:2 येसुलाई किद रोमी सरकारलाव पिलातसए ल्‍योक लाँद सूँपिकेर।
MAT 27:3 नाःत ज़ येसुलाई धोका याज़्‍याव यहूदा इस्‍करियोतए येसुलाई सैःन्‍या ज़ याथ·रैव रँःद, ‘ङा ते मादान्‍या य़ेन ची ङादोव ओल्‍यो’ लिद उयुँर माचाव दाद मुख्‍या पुजारीर स़ोनो यहूदीराए यास़ेरराए ल्‍योक बाद नो यायो तीस गोता चाँदीए पैसा यालाई ज़ सोवोल्‍द्याद,
MAT 27:4 “ङा ते कान्‍त ज़ ओखत माल्‍योलाई अऩाकल ज़ धोका याद मादान्‍या ची ङादोव ओल्‍यो,” है ओरादोक ते, नोराए, “जो तादी ब ताधुके, गेलाई घाइ तादासियो,” है यादोव प़ाइँना ज़,
MAT 27:5 इस्‍करियोतए नो यायो चाँदीए पैसा याङ़ाक ज़ ध्‍यान झ़िमल ओदोइद ख्‍यानैद ननी पुलुस्‍द बाद ओल ज़ झुन्‍दैसिद सैःसिके।
MAT 27:6 मुख्‍या पुजारीराए ते नो ओख्‍याव पैसार तीद, “आव ते झीए ओएःलाव पैसा ची, ध्‍यान झ़िमलाव भितील थोम्‍न्‍या माताए,” लिद,
MAT 27:7 या याल सल्‍ला दाद नो पैसाए तादा तादानी हुव मिँरालाई यासिक गादैन्‍याए जूँनी तोबो कुमाल्‍याए ओएँः लँःकेर।
MAT 27:8 है जैद हो छ्यामकिन ज़ नो एँःए उमिन ‘झीए एँः’ ताके।
MAT 27:9 आनी ज़ यर्मिया अगमबक्ताए ओसरो मिताव यो·के। नोए ओसरो आव ज़, ‘इस्राएलीए ओथोराए नोए ओक्‍याँताव यामुलिउ ओएः चाँदीए पैसा तीस गोताए
MAT 27:10 परमेस्‍वरए है ओल्‍यो मितावनी ज़ कुमाल्‍याए ओएँः लँःन्‍या लेर।’
MAT 27:11 नाःत ज़ येसुलाई रोमी सरकारलाव पिलातसए ओङ़ाक यासच्‍याँक पिलातसए येसुलाई, “नँ साचो यहूदीराए याराजा ज़ रो?” है ओदोक ते, येसुए, “नँ ज़ नथ·रैनाके सानी,” है दोक्‍यो।
MAT 27:12 नाःत ज़ मुख्‍या पुजारीर स़ोनो यहूदीराए यास़ेरराए येसुलाई खत यालैज़्यावत ब येसुए घाइ ज़ मारादोक्‍यो।
MAT 27:13 निताव थैद पिलातसए येसुलाई, “काता नाः कुधु पाँर नङ़ैत झाःद याईंज़्‍याव नमाथैए रो?” है ओदोक ते,
MAT 27:14 झन ज़ घाइ मालिद तोबो ब मापाँके। निताव रँःद पिलातस बक्‍क ताके।
MAT 27:15 नोए सालकाव तखेप निस्‍तार पर्बत यहूदीराए जो कैदीलाई ‘ऱास्‍द्यासिके’ है लिज़्‍यार, होलाई ज़ ऱास्‍द ओराएज़्‍याव।
MAT 27:16 नो बेलाक तोबो बारब्‍बा यादोज़्‍याव बनै उमिन थासो कैदी झ्यालखानाल उलिज़्‍याव।
MAT 27:17 है जैद माहोल्‍यार यादुप्‍सिज़्याक पिलातसए, “झ्यालखानाल लिज़्‍याव बारब्‍बालाई ऱास्‍न्‍या सैं ख्रीस यादोज़्‍याव येसुलाई ऱास्‍द्यान्‍या? जे ज़ है लिचिके,” है यादोक्‍यो।
MAT 27:18 ओल पिलातसए ते ‘आवराए येसुलाई अऩाकल ज़ यामी तूद सूँपिद नैनार’ लिन्‍या सैंद ओनैज़्‍याव।
MAT 27:19 फाल्‍न्‍याए जूँनी उच़ुसिउत पिलातसए ओज्‍याए येसुए उजूँनी अइ लिद तोबो था परींक्‍यो, “नो सैःव यापैंज़्‍याव धर्मी मिँए उउपर्त नँ मादान्‍या तादोयो। आछ्या रीलाव ङामँल आव मिँए उजूँनी ङायुँर स्‍यासे तेद बनै धो थाइव ङाताके,” है लिद परींक्‍यो।
MAT 27:20 मुख्‍या पुजारीर स़ोनो यहूदीराए यास़ेरराए ते झन मिँरालाई प़ाइँ याल्‍योदा जैद नो झ्यालखानाल लिज़्‍याव बारब्‍बालाई ऱास्‍द येसुलाई सैःन्‍या है लिच्‍यो है दाद यारानैज़्‍याव।
MAT 27:21 पिलातसए फरी, “नोनी काताकावलाई ऱास्‍द्यान्‍या?” है ओरादोक ते, “बारब्‍बालाई ऱास्‍द्यासिके,” है दोकेर।
MAT 27:22 पिलातसए, “हुकी नो ख्रीस यादोज़्‍याव येसुलाई ङा कै जैन्‍या की?” है ओरादोक ते, नोराए प़ाइँए तपाँ जैद, “क्रुसत तङ्गैद सैःन्‍या,” है दोकेर।
MAT 27:23 पिलातसए फरी, “काराव? आवए मादान्‍या काता दाद ओनैज़्‍याव?” है ओरादोक ते, नोर झन ज़ मचिद, “क्रुसत तङ्गैद सैःन्‍या,” है लिद बनै ज़ क़िकेर।
MAT 27:24 नाःत ज़ पिलातसए, आवरालाई ते कै जैद ब माताके, झन ज़ मचिरिकेर लिद ऱी रैद नोराए याङ़ाक उकुइर हुर्सिद, “दे चिऊनाचिके, आव य़ेननी ङाछेसिके। आवए उझी ङालाई तालागिस्‍क, जेलाई ज़ ओलागिस्‍क,” है ओरादोक ते,
MAT 27:25 नो माहोल्‍याराए, “नोए उझी ओलागिस्‍किन गे गेक्‍याँत स़ोनो गेज़ाराए क्‍याँत ज़ ओलागिस्‍क,” है याल्‍यो प़ाइँना ज़,
MAT 27:26 पिलातसए बारब्‍बालाई ऱास्‍द्याद येसुलाई रीःद, क्रुसत तङ्गैद सैःन्‍याए जूँनी सिपाईंरालाई ज़ यासूँपिक्‍यो।
MAT 27:27 नकिन पिलातसए उसिपाईंराए येसुलाई दरबार जींल लाँद रोमी पल्‍तन भरी यारादुप्‍केर।
MAT 27:28 नोराए येसुए ओक्‍वार सिउःद्याद राजाराए याक्‍वाइसिज़्‍याव मिताव घ्यामो क्‍वा जास्‍द,
MAT 27:29 ज़ुए मुकुत तोबो ऱ॰द ओङ़ैत जास्‍द वोर्फताव उकुइत भाताए झुइ तोबो सक्‍योःद ओङ़ाक याघूँदानी तिकिसिद, “ए यहूदीराए याराजा, जय जय ओताक,” है लिद बरे·द,
MAT 27:30 त़िल्‍द, उकुइताव भाताए झुइए ज़ ओङ़ैत प़ोदिकेर।
MAT 27:31 गिल्‍लैद गिल्‍लैद च़िम यादोवत नो घ्यामो क्‍वा सिउःद्याद ङ़ादाङाव ओक्‍वार ज़ जास्‍द क्रुसत तङ्गैना लाँकेर।
MAT 27:32 येसुलाई सैःना यालाँज़्‍याक येमक तोबो कुरेनीलाव सिमोन यादोज़्‍यावस यादैसिक नोलाई येसुए ओलाँज़्‍याव क्रुस सुघुर्द,
MAT 27:33 गलगथा यादोज़्‍यावक केस्‍केर। नो पोए उमिन ‘खप्‍पर्‍या पो’ है ब यादोज़्‍याव।
MAT 27:34 नक येसुलाई काव वासः झाःसिउ दाखमद्य सवैकेर। येसुए दार्द ओव माभैंःके।
MAT 27:35 येसुलाई क्रुसत तङ्गैद ओक्‍वारात गोला झाःद भाःद,
MAT 27:36 नक ज़ च़ुसिद येसुलाई गुद नैकेर।
MAT 27:37 ओललाई तङ्गैद यानैज़्‍याव क्रुसए ओङ़ैत, “आव यहूदीराए याराजा येसु ज़” है लिद तोबो फल्‍यात ओखत सर्द चकेर।
MAT 27:38 हो छ्याम ऩेब्‍लो चोरनिलाई मनी, तोबोलाई ओवोर्दा तोबोलाई ओदाबर्‍यादा जैद क्रुसत तङ्गैद यारानैज़्‍याव।
MAT 27:39 आनी हुनी भाल्‍सिना हुवराए याङ़ैर ङ़त ङ़त जैद थल्‍द,
MAT 27:40 “नँ ध्‍यान झ़िमलाई तैःद स़ोंलात ङाजैरिज़्‍या है लिज़्‍याव मिँ, नक्‍याँलाई कै जैद नमाबाँचैधुज़्‍याव? नँ साचो ज़ परमेस्‍वरए ओज़ा ताकिन नो क्रुसतिन झरिद हुन्‍के,” है दोकेर।
MAT 27:41 हिताव ज़ मुख्‍या पुजारीर स़ोनो यहूदीराए यास़ेरर, सास्‍त्रीराए मनी येसुलाई गिल्‍लैद,
MAT 27:42 “आवए छुतरालाई ताकितर याबाँचैज़्‍याव, ओल ओक्‍याँलाई कै जैद ओमाबाँचैधुज़्‍याव? इस्राएलीराए याराजा है लिज़्‍याव नो क्रुसतिन झरिद उहुकिन वाज़ ओपाँ पतिन्‍या गेले।
MAT 27:43 आव मिँ परमेस्‍वरए ओक्‍याँत ख्‍यासिद लिज़्‍याव ओताव ताकिन परमेस्‍वरए ओल्‍योदा उयुँ थू जैद पला·हुखेहो। ओल कै जैद ‘ङा परमेस्‍वरए ओज़ा ज़’ है उलिज़्‍याव?” है लिकेर।
MAT 27:44 ओलस तङ्गैसिउ चोरनी मनी नोराए है याल्‍यो मिताव ज़ है लिकिनी।
MAT 27:45 नकिन अधमर लावाकिन तीन बजे पै देस भरी काल्‍या कले झ्याके।
MAT 27:46 तीन बजेवाक येसु बनै चोइस, “इलोई, इलोई, लामा सबखथनी?” है लिद क़िके। नोए ओसै, “अ ङापरमेस्‍वर, अ ङापरमेस्‍वर, ङालाई काराव नऱास्‍नाव?”
MAT 27:47 नक च्‍याँःसिद लिज़्‍यावराए नो पाँ थैद ख्‍वाराए, “आवए ते एलियालाई ची उखुल्‍ज़्‍याव सा,” है लिद,
MAT 27:48 तोबोए धोंःनाद भाताए उतुपात थाकना पो·द सिरो दाखमद्यल छिम्‍द येसुए ओयाःत झाःद्याद पिउ परींक्‍यो।
MAT 27:49 उपुर्कावराए ते, “अब ते चिऊद गेनैया, एलिया कातारानी हुद माहाइज़्‍याव?” है लिकेर।
MAT 27:50 नाःत ज़ येसु फरी ब बनै चोइस क़िद उस॰ सफ्या·क्‍यो।
MAT 27:51 हो प़ाइँना ज़ ध्‍यान झ़िमलाव बारिसिउ क्‍वा ब उतुपानी ओजराङ पै ओलनी ज़ ऩेपरा ताद चिस्‍के। नामर थोनो·सिद, हाँर पा·द,
MAT 27:52 सिउराए याखादरर ब फुकेर। सिउ धर्मी मिँर ब कुधु सैंसिद सोकेर।
MAT 27:53 खाली येसु सिउनी सैंसिद ओसोव छींनी वाज़ नोर याखादरनी पुलुस्‍द यरूसलेम सहरल याबावत कुधु मिँराए याङ़ाक सरैंःसिकेर।
MAT 27:54 नो येसुलाई गुज़्‍याव कप्‍तान स़ोनो ओलस लिज़्‍याव पाल्‍याराए निताव भोंचालोर, अचम्‍ब अचम्‍बलावर रँःद नोर बनै छे·द, “आव ते साचो ज़ परमेस्‍वरए ओज़ा ची ओल्‍यो,” है लिकेर।
MAT 27:55 हो बेलाक गालीलनी हुव मेंमार येसुस बाऱिद ओसेवा दाज़्‍यावर जाँ तादानी येसुलाई चिऊद यानैज़्‍याव।
MAT 27:56 नोरानी मरियम मग्‍दलिनी, याकूब स़ोनो योसेफनी निआमा मरियम, जब्‍दियाए ओज़ानी निआमा ब ओल्‍यो।
MAT 27:57 र्‍याम्‍या रिमी ओझ्यानाक तोबो अरिमाथियालाव धनी मिँ योसेफ यादोज़्‍याव हुके। नो मिँ ओल मनी येसुए ओपाँत बाज़्‍याव मिँ ज़ ओल्‍यो।
MAT 27:58 नोए पिलातसए ल्‍योक बाद येसुए ओमोरो ऩिक्‍यो। पिलातसए नोए ओपाँ थैद येसुए ओमोरो लाँव एक्‍यो।
MAT 27:59 है जैद योसेफए येसुलाई नो क्रुसतिन हाइद पालो क्‍वाए लुम्‍बैद,
MAT 27:60 ओल उजूँनी दावन खुपिद पुप जैद ओनैज़्‍याव साःरो खादरल झाःद ओय़ामक घ्‍योःव लुँए कद ख्‍यानैक्‍यो।
MAT 27:61 योसेफए येसुलाई खादरल ओझाःज़्‍याव बेलाक मरियम मग्‍दलिनी स़ोनो ओनैं मरियमनी नक चिऊद निनैज़्‍याव।
MAT 27:62 हो पराःती ऩासिन्‍या छ्याम ओतावत मुख्‍या पुजारीर स़ोनो फरिसीर दुप्‍सिद पिलातसए ल्‍योक बाद,
MAT 27:63 “हाकिम सायेब, नो छुल्‍या ओमासिद ज़, ‘स़ोंलात सैंसिद ङासोरिज़्‍या,’ है उलिज़्‍याव थैद गेनै।
MAT 27:64 है जैद नँ नो स़ोंला भरी ओमाखेमा पै गुन्‍या पाल्‍या खादरक नैद्याव ताके, म़ानी कातारानी उसिसर हुद ओमोरो हाइद लाँद मिँरालाई ‘सिउनी सैंसिद सोके’ है ल्‍यो ब पैंर्‍या। नै ओताकिन ङ़ादाङावकिन झन ज़ बलेस्‍न्‍या ले,” है यादोक ते,
MAT 27:65 पिलातसए, “सिपाईंर लाँद जे ज़ नोरालाई पाथस गुव यारापरींचिके,” है ओरादोक ते,
MAT 27:66 नोर ननी बाद नो खादर पोक सु ज़ माबाधुन्‍या जैद पाल्‍यार नैद नो कसिउ लुँत माफैन्‍या छाप ब झाःकेर।
MAT 28:1 ऩासिन्‍या छ्याम ओखेमोत सातालाव उस॰कताव छ्याम नम उसँनाक मरियम मग्‍दलिनी, ओनैं मरियमस खादर पोदा चिऊनाकिनी।
MAT 28:2 हाःत ज़ तोबो बनै घ्‍योःव भोंचालो हुद परमेस्‍वरए ओचाकर्‍या स्‍वर्गतिन झरिहुद नो कसिउ लुँलाई पल्‍तैद नो लुँत च़ुसिके।
MAT 28:3 नो चाकर्‍याए ओङाः बनै ज़ झिलिक झिलिको उलिज़्‍याव, ओक्‍वार ब पोम स्‍यासो तक तकौर यालिज़्‍याव।
MAT 28:4 नो गुज़्‍याव पाल्‍यार नोलाई रँःद याछ्याचेए भुम भुम गूद धलिद सिउ स्‍यासो ज़ ताकेर।
MAT 28:5 नो चाकर्‍याए नो मेंमानिलाई, “जिन ताछे·चिन, नो क्रुसत तङ्गैद यासैःव येसुलाई जिन्‍खिम्‍हुज़्‍याव ज़ ताखेहो।
MAT 28:6 नो आल माले। ङ़ादाकिनकाव है ओदाचिज़्‍याव मिताव नो सैंसिद सोधुके। अछादी आव यानैव पो चिऊचिन्‍केदा,
MAT 28:7 उसिसराए ल्‍योदा हतप्‍त ज़ बाद, ‘गेप्रभु सिउनी सैंसिद सोके। जेङ़ादा ज़ गालीलदा बाज़्या दी, होङ ज़ ओलस दैसिन्‍या जेले,’ है यारादोनाचिन्‍के,” है दाद फरी नोनिलाई, “आव भरी साचो ज़ है दाद ङानैचिने,” है उनिदोव प़ाइँना,
MAT 28:8 नोनी बनै छे·द निरेंतए चह चह ताद खादर पुपनी पुलुस्‍द धोंःनाद उसिसरालाई है यारादोनाकिनी।
MAT 28:9 निबाज़्‍याक येमक ज़ येसु उमँःजानी निङ़ाक च्‍याँःसिद, “जिनयुँ होलाँ जैचिन्‍के,” है उनिदोव प़ाइँना ज़, नोनी उखँ क्‍योःद धो दोकिनी।
MAT 28:10 नकिन येसुए नोनिलाई, “ताछे·चिन, नो ङाभाइरालाई, ‘जे प़ाइँ गालीलदा बाचिके दी, प्रभुस होङ ज़ दैसिन्‍या जेले दी,’ है यारादोचिन,” है निदोक्‍यो।
MAT 28:11 नोनी येमत निबाज़्‍याव बेलाक, येसुए ओमोरोलाई गुज़्‍याव ख्‍वा पाल्‍यार सहरल बाद नो यारँःव भरी प़ाइँ ज़ मुख्‍या पुजारीरालाई है यारादोकेर।
MAT 28:12 नो पुजारीराए पाल्‍याराए यापाँ थैद यहूदीराए यास़ेररास दुप्‍सिद सल्‍ला दाद नो पाल्‍यारालाई, कुधु पैसार याद,
MAT 28:13 “आव जेपाँ सुलाई ज़ है तारादोच्‍यो। बुरू जे, ‘गे रील ङ़ल्‍द गेलिज़्‍याक उसिसर हुद गेमासैंद हाइद यालाँव ओल्‍यो,’ है लिच्‍यो।”
MAT 28:14 फरी, “आव पाँर कैताराक हाकिमए ल्‍योक ओकेस्‍किन जे ताछे·च्‍यो, जेजूँनी पाँन्‍या गे ज़ गेलिज़्‍या,” है लिद यारापरींकेर।
MAT 28:15 है जैद नो पाल्‍याराए नो पैसार रैद नो है यारादोव मिताव ज़ है यारादोनाकेर। है जैद नो पाँ हो छ्यामकिन ज़ यहूदीराए खार्ल प़ाइँदा ज़ फींजिके।
MAT 28:16 नकिन एघार जना येसुए उसिसर गालील खन्‍दल बाद येसुए है ओरादोव दाँदात बाकेर।
MAT 28:17 नङ येसुस यादैसिउ प़ाइँना ज़ उसिसर उखँत फुलुप्‍सिद धो दोकेर। तोबो ऩेब्‍लोए फरी, ‘आव ओल ज़ सैं माःक ओताव’ लिद जाँ यायुँ ओमाहुप्‍ज़्‍याव।
MAT 28:18 नाःत ज़ येसुए, “नाम नमलाव हक भरी परमेस्‍वरए ङाकुइत ज़ याद नैनाव।
MAT 28:19 है जैद जे बाद प़ाइँ जातलाव मिँरालाई ङासिसर जैद ङाबाबु परमेस्‍वरए उमिननी, ङा ओज़ाए ङामिननी, छैंव पुरूसए उमिननी सछैंद,
MAT 28:20 ङा जेलाई किताव किताव ङापैचिउ, जे होरालाई मनी हितावनी ज़ यारापैच्‍यो। आव ब सैंच्‍यो, आव जुक ओमाखेमा पै ङा जेस ज़ ङातारिज़्‍या,” है यादोक्‍यो।
MAR 1:1 आलाव सर्सिउ परमेस्‍वरए ओज़ा येसु ख्रीसए चाव ओथा ज़।
MAR 1:2 यसैया अगमबक्ताए धर्मसास्‍त्रल किताव ओसरो हिताव ज़ ताके। होए ओसरो आव ज़, “ङाकत्‍वाल्‍यालाई नङ़ा नङ़ा परींद ङाईंज़्‍या। नजूँनी नोए नयेम तयार जैदींरिज़्‍याव।
MAR 1:3 नोए ओर्गा बनल अइ लिद उक़िज़्‍याव थास्‍रिज़्‍या, ‘हुरिज़्‍याव प्रभुए ओयेम बनैद गाँत्‍या गुँतीलाई सदाँचिके।’ ”
MAR 1:4 हिताव ज़ ऱील सछैंज़्‍याव तोबो यूहन्‍नाए बनल अइ लिद यासथैहुक्‍यो, “जेपापलाई ऱास्‍द जेयुँ परमेस्‍वरए ल्‍योदा फर्कैद ऱील सछैंसिचिके। हो ताकिन ची जेपापर क्‍याल्‍सिद परमेस्‍वरस खैवर तान्‍या जेले।”
MAR 1:5 नोए ओल्‍योक यहूदिया खन्‍दलावर स़ोनो यरूसलेम सहरलावर ओपो·स ज़ ओपाँ थैना याहुज़्‍याव। नोराए सु सु यादोव यापाप यूहन्‍नालाई है यादोक ते यूहन्‍नाए यर्दन भैल यासछैंक्‍यो।
MAR 1:6 यूहन्‍नाए ऊँतए ओसनए क्‍वा ओक्‍वाइसिज़्‍याव, ओवाँःत स्‍यालोए वाँःफो ओपो·सिज़्‍याव। नोए स॰ल॰र कोस्‍योर ओराकैज़्‍याव, ज़ेंराए राप उज़्‍युज़्‍याव।
MAR 1:7 नोए अइ लिद यासथैक्‍यो, “ङा ङाछींनी ङाकिन ओसक्ती ल्‍यो तोबो हुरिज़्‍या। ङा होए ओपोलाए ओच़ें घोम लिद पला·न्‍या स्‍यासो ब ङामाले।
MAR 1:8 ङा जेलाई ऱील ङासछैंचिज़्‍या, होए परमेस्‍वरए छैंव उपुरूसनी सछैंचिरिज़्‍याव।”
MAR 1:9 नो बेलाक येसु मनी गालील खन्‍दलाव नासरत सहरनी यूहन्‍नाए ल्‍योक हुके। नो ब यूहन्‍नानी यर्दन भैल सछैंसिके।
MAR 1:10 ऱीनी उपुलुसो प़ाइँना ज़ नम फैसिद परमेस्‍वरए उपुरूस कुइतम मिताव भुर्हुद ओक्‍याँत उच़ुसिज़्याव रँःक्‍यो।
MAR 1:11 हाःत ज़ नमतिन तोबो गा अइ लिद थास्‍के, “नँ ङायुँलाव ङाज़ा ज़। नँलाई रँःद ङायुँ होलाँ ताज़्‍या।”
MAR 1:12 येसु ननी पुलुस्‍द ओबाव प़ाइँना ज़ परमेस्‍वरए छैंव उपुरूसए तोबो साइँसुइँव पोङ लाँक्‍यो।
MAR 1:13 नल चालीस दिन पै बनलाव स्‍यारास उलिज़्‍याक सैतानए येसुलाई जाँचिउ ज़ नैक्‍यो। नाःत ज़ स्‍वर्गताव परमेस्‍वरए ओचाकर्‍यार येसुए ल्‍योक हुद समारिकेर।
MAR 1:14 छींनी तछा ऱील सछैंज़्‍याव यूहन्‍ना क्‍योःसिके। नोलाई याक्‍योःव छ्यामकिन येसु गालील खन्‍दल हुद परमेस्‍वरए चाव ओथा अइ लिद यासथैक्‍यो,
MAR 1:15 “बेला यो·के, परमेस्‍वरए ओराज्‍या सो हुरिके। परमेस्‍वरए ल्‍योदा जेयुँर फर्कैद चाव थात जेयुँ सुहुप्‍चिके।”
MAR 1:16 तछा येसु गालील दह छ्यो छ्यो ओबाज़्‍याक सिमोन स़ोनो ओभाइ अन्‍द्रियासनी दहल जाल निरैःसिज़्‍याव निरँःक्‍यो। नोनी ङाँःर क्‍योःज़्‍यावनी निल्‍यो।
MAR 1:17 येसुए नोनिलाई, “ङास हुचिन्‍के, जिनलाई ङाँःर जिन्‍राखिम्‍ज़्‍याव मिताव मिँर खिम्‍न्‍या ङाजैचिन्‍रिज़्‍या,”
MAR 1:18 है उनिदोव प़ाइँना ज़ नोनी निजालर ख्‍यानैद ओलस ज़ बाकिनी।
MAR 1:19 जाँ होकसै याबावत फरी जब्‍दियाए ओज़ानी ओदाज्‍यु याकूब स़ोनो ओभाइ यूहन्‍नानी दोङ्गात च़ुसिद जालर निरातालिज़्‍याव रँःद,
MAR 1:20 बेहार ज़ नोनिलाई ब निखुल्‍क्‍यो। नोनी निबाबु जब्‍दियालाई ओबाहोर्‍यारास दोङ्गात ख्‍यानैद येसुस बाकिनी।
MAR 1:21 नकिन येसु चार जना ओराखुलोरास कफर्नहुम सहरल बाकेर। ओल येसुए ऩासिन्‍या छ्याम ओतावत नलाव धर्मसास्‍त्र झ़िमल बाद परमेस्‍वरए ओपाँ यासथैक्‍यो।
MAR 1:22 नलावर येसुए ओपाँ थैद अचम्‍ब ताकेर, काराव ल्‍यो ताकिन होए सास्‍त्रीराए यारापैज़्याव मिताव माताद बनै हकस ओरापैज़्याव।
MAR 1:23 नो बेलाक धर्मसास्‍त्र झ़िमल माचाव पुरूसए क्‍योःद ओनैज़्‍याव तोबो मिँ ब उलिज़्‍याव। नो बनै चिर चिर क़िद,
MAR 1:24 “अ नासरतलाव येसु, गेस नखै काता उलिज़्‍याव? गेलाई खेम्‍ना नहुव रो? ङा नँलाई ङासरेस्‍निज़्‍या, नँ परमेस्‍वरए छैंव उमीं ज़,” है ओदोक ते,
MAR 1:25 येसुए नोलाई हप्‍कैद, “झ्याउँ तालिनी, आवए ओक्‍याँतिन पुलुस्‍द बान्‍के,” है ओदोव प़ाइँना ज़,
MAR 1:26 नो माचाव पुरूसए नो मिँलाई कारापनी कुरूप जैद चिर चिर क़िद पुलुस्‍द बाके।
MAR 1:27 निताव रँःद प़ाइँ ज़ अचम्‍ब ताद या याल, “आव काता ओताव इताव? आवए ते साःरो पाँर नाः हकस ची ओरापैज़्याव ओल्‍यो। माचाव पुरूसरालाई ओराहप्‍कैक मनी ओपाँर यादोज़्‍याव ची ओल्‍यो,” है लिकेर।
MAR 1:28 है जैद ‘येसुए निताव य़ेनर दोक्‍यो दी’ लिन्‍या गालील खन्‍द भरिल प़ाइँदा ज़ थास्‍नाके।
MAR 1:29 धर्मसास्‍त्र झ़िमनी यापुलुसो प़ाइँना ज़ येसु चार जना उसिसरास सिमोन स़ोनो अन्‍द्रियासनी निझ़िमक बाकेर।
MAR 1:30 नक सिमोनए उमुइँज्‍यु ओजोरो हुद घ्याँसिद उलिज़्‍याव। उझ़िमक याबाव प़ाइँना ज़ ‘ओजोरो हुज़्‍या’ लिद येसुलाई है दोकेर।
MAR 1:31 येसु नो ओजोरो हुज़्यावए ल्‍योक बाद उकुइनी क्‍योःद ओसोचोइव प़ाइँना ज़ ओजोरोए ऱास्‍क्‍यो। हाःत ज़ नोए येसु स़ोनो उसिसरालाई ज़्‍यावर जैद याएक्‍यो।
MAR 1:32 ऱिमदा ऱिमदा नम उनुपोत नलाव मिँराए याजोरो हुवर स़ोनो माचाव पुरूसराए क्‍योःद यारानैज़्‍यावरालाई येसुए ओल्‍योक यारारैकेर।
MAR 1:33 सहरलाव मिँ भरी य़ामक छुइसिद यालिज़्‍याव।
MAR 1:34 येसुए कुधु बेथाए क्‍योःद ओरानैज़्‍यावरालाई ब यासगराँक्‍यो, याक्‍याँत माचाव पुरूस ल्‍योरालाई ब याक्‍याँतिन माचाव पुरूसर पले·द्याद यासगराँक्‍यो। नो पुरूसराए येसुलाई यासरेस्‍ज़्‍यावए येसुए पाँव ज़ ओमाराएज़्‍याव।
MAR 1:35 छकाल्‍न्‍या ओमासँद ज़ येसु सोद झ़िमनी पुलुस्‍द साइँसुइँव पोक बाद परमेस्‍वरलाई ओपोंखारिज़्‍याव।
MAR 1:36 सिमोन स़ोनो ओलस लिज़्‍यावराए ‘काना ओबाव’ लिद खिम्‍नाकेर।
MAR 1:37 यादैक, “नँलाई प़ाइँए ज़ खिम्‍निज़्‍यार,” है यादोक ते,
MAR 1:38 येसुए, “परमेस्‍वरए ओपाँ आजीलावरालाई वाज़ ङारासथैहुव माःक, हुजीदाङावराए जूँनी पाला ज़। हुचिके, नदा ब गेरासथैना,” है यादोक्‍यो।
MAR 1:39 है जैद ननी बाद गालील खन्‍द भरिलाव यहूदीराए धर्मसास्‍त्र झ़िम झ़िमक बाद परमेस्‍वरए ओपाँ प़ाइँलाई ज़ यासथैक्‍यो। याक्‍याँत माचाव पुरूस ल्‍योरालाई ब माचाव पुरूसर पले·द याएक्‍यो।
MAR 1:40 हो बेलाक ज़ तोबो कुऱी येसुए ल्‍योक हुद उखँत फुलुप्‍सिद, “अ प्रभु, ङाल्‍योदा नयुँ ओताकिन ङालाई सगराँन्‍या नले,” है ओदोक ते,
MAR 1:41 येसुए उयुँ नाद नोलाई उकुइए छाप्‍द, “नल्‍योदा ङायुँ लिज़्‍या ज़, गराँनिके,”
MAR 1:42 है ओदोव प़ाइँना ज़, नो ओक्‍याँताव कुऱीए ऱास्‍द सोजोकाव ज़ ताके।
MAR 1:43 येसुए नो गराँवलाई अइ लिद अऱैद बेहार ज़ परींक्‍यो,
MAR 1:44 “आव नक्‍याँताव ङादोव य़ेन सुलाई ज़ है तारादोयो। बुरू नगराँव साचो ज़ ओल्‍यो लिन्‍या थ·रैव परींन्‍याए जूँनी पुजारीए ल्‍योक सतैंसिनाद मोसाए ओकानुनलाव मिताव चरैःन्‍यार चरैःनाके।”
MAR 1:45 खाली नो गराँवए झन ननी पुलुस्‍द ओक्‍याँत ताव भरी प़ाइँदा ज़ फींजैक्‍यो। है जैद येसुए उमिन बनै ओथासोए नजीलाव सहर नाखार जीदा बाव मादैद साइँसुइँवक लिनाके। हितावत ब मिँर प़ाइँनी ज़ ओल्‍योक दैसिहुकेर।
MAR 2:1 तछा छींनी येसु कफर्नहुम सहरल उहुवत, ‘येसु उलिज़्‍याव झ़िमक हुके दी’ लिन्‍या थास्‍के।
MAR 2:2 ओल्‍योक मिँर बनै सुइँः मासुइँः छुइसिहुद झ़िम भरी, मैरा भरी ब मासुइँःकेर। येसुए नोरालाई परमेस्‍वरए ओपाँ ओरासथैज़्‍याव।
MAR 2:3 नो बेलाक ज़ तोबो उखँ उकुइ सिउलाई चार जनाए घुर्द यारैज़्‍याव।
MAR 2:4 खाली येसुए ल्‍योक मिँर बनै माहोल्‍या यातावए ओल्‍योक बान्‍या येम मादैद नोर थालात बाद झ़िम कप्‍सिउ फल्‍यार जाँवा हाइद सघ्वाँःद नो उखँ उकुइ सिउलाई ओझेलोङ्गारास येसुए ओङ़ाक झरैदिकेर।
MAR 2:5 येसुए नोराए यायुँ उहुबो रँःद नो उखँ उकुइ सिउलाई, “अ कान्‍छा, नपाप क्‍याल्‍सिके,” है दोक्‍यो।
MAR 2:6 नो है ओदोव नक लिज़्‍याव सास्‍त्रीराए थैद यायुँल यायुँल,
MAR 2:7 “आव मिँ काराव ब्‍याँ इताव ओपाँज़्‍याव, परमेस्‍वरए उमिन ओबले·ज़्याव। मिँए ओपाप क्‍याल्‍न्‍या परमेस्‍वरकिन सु ची उलिज़्‍यावदा?” है लिकेर।
MAR 2:8 हाःत ज़ येसुए नोराए यायुँलाव पाँ सैंद, “जे काराव जेयुँल नै जेलिज़्‍याव?
MAR 2:9 नो घ्याँस्यालाई, ‘नपाप क्‍याल्सिके’ है दान्‍या सैं ‘सोद नझेलोङ्गार घुर्द बान्‍के’ है दान्‍या काताकाव सजालो उलिज़्याव?
MAR 2:10 अब ङा मिँ मिन्‍सिद हुवए आव मानुवात पाप क्‍याल्‍न्‍या ङाकुइत उलिज़्‍याव सैं ओमालिज़्‍याव, चिऊचिके,” है दाद नो उखँ उकुइ सिउलाई,
MAR 2:11 “ङा नँलाई है ङादींज़्‍या, नँ सोद नझेलोङ्गार घुर्द नझ़िमदा बान्‍के,” है ओदोक ते,
MAR 2:12 नो उखँ उकुइ सिउ थर च्‍याँःसिद ओझेलोङ्गार घुर्द याङ़ाकिन पुलुस्‍द बाके। निताव रँःद प़ाइँ ज़ अचम्‍ब ताद, “इताव ते खर्क ज़ गेमारँःए,” लिद परमेस्‍वरए उमिन सघ्‍योःदिकेर।
MAR 2:13 नकिन येसु फरी दह छ्योक बाके। ओल्‍योक मिँर बनै माहोल्‍या याहुज़्‍याव। नोरालाई परमेस्‍वरए ओपाँ यासथैक्‍यो।
MAR 2:14 ननी पुलुस्‍द ओबाज़्‍याक तोबो अल्‍फयसए ओज़ा लेबीलाई सिर्मा स्‍यो·न्‍या अद्दाक च़ुसिद उलिज़्‍याव रँःद नोलाई, “ङास हुन्‍के,” है ओदोव प़ाइँना ज़ नो च्‍याँःसिद येसुए उछींत बाके।
MAR 2:15 नकिन जाँवाक येसु उसिसरास लेबीए उझ़िमक बाद ज़्‍यान्‍याए जूँनी च़ुसिकेर। नो बेलाक यास सिप ज़्‍युज़्‍यावर सिर्मा स्‍यो·ज़्‍यावर स़ोनो पापी है यारादोज़्‍यावर बनै कुधु ज़ यालिज़्‍याव। निताव मिँर येसुस बाऱिज़्‍यावर कुधु ज़ यालिज़्‍याव।
MAR 2:16 नितावरास येसुए सिप उज़्‍युज़्‍याव फरिसीरासकाव सास्‍त्रीराए रँःद येसुए उसिसरालाई, “जेगुर्बा काराव निताव सिर्मा स्‍यो·ज़्‍यावर स़ोनो पापीरास सिप उज़्‍युज़्‍याव?” है यारादोज़्‍याव
MAR 2:17 येसुए थैद, “याजोरो माहुज़्‍यावरालाई सगराँन्‍या मिँ माचाहिए, याजोरो हुज़्‍यावरालाई वाज़ चाहिज़्‍या। हिताव ज़ ङा मनी ‘गे धर्मी’ है लिज़्‍यावराए जूँनी ङाहुव माःक, ‘गे पापीर ज़’ है लिज़्‍यावराए जूँनी ङाहुव ची।”
MAR 2:18 ख्‍वा मिँर ऱील सछैंज़्‍याव यूहन्‍नाए उसिसर स़ोनो फरिसीरासकावर याउपासिज़्‍याव रँःद येसुए ल्‍योक हुद, “यूहन्‍नाए उसिसर स़ोनो फरिसीर ते उपासिज़्‍यार, नँ नसिसर काराव यामाउपासिज़्‍याव?” है यादोक ते,
MAR 2:19 येसुए नोरालाई, “जन्‍तीर ब्‍याहोल्‍यास यालेवा पै याउपासिज़्‍याव रो? ब्‍याहोल्‍या यास ओलेवा पै माउपासिर।
MAR 2:20 खाली जो छ्यामकिन ब्‍याहोल्‍यालाई छुतैर, हो छ्यामकिन वाज़ उपासिन्‍या लेर,” है दाद,
MAR 2:21 फरी, “सुए ज़ ओरे छिबो क्‍वालाई साःरो क्‍वाए मातालिउ। ओतालिकिन नो साःरोए पुराँदोलाई ओल्‍योदा स़ेल्‍द झन ज़ चीज़्‍याव।
MAR 2:22 स़ोनो, साःरो दाखमद्य पुराँदो प़िर्गुलल सुए ज़ माझाःर। म़ानी उस॰ए प़िर्गुललाई सुफुद दाखमद्य ब भोन्‍या ले, प़िर्गुल ब खेर ज़ बान्‍या ले। है जैद साःरो दाखमद्य साःरो प़िर्गुलल वाज़ झाःर।”
MAR 2:23 हो बेलाक तछा ऩासिन्‍या छ्याम येसु उसिसरास एँः खार्लाव घ्याँ याबाज़्‍याक उसिसराए बाला फ्या·द याकैज़्‍याव।
MAR 2:24 फरिसीराए येसुलाई, “चिऊके, नसिसराए ऩासिन्‍या छ्याम मादान्‍या य़ेन काराव यादोज़्याव?” है यादोक ते,
MAR 2:25 येसुए, “धर्मसास्‍त्रलाव सर्सिउ दाऊद राजा ओनैंरास याकरेकाव यादोव य़ेन जेमाप़रिए रो?
MAR 2:26 दाऊद प्रधान पुजारी अबियाथारए ओपालाक ध्‍यान झ़िमल पसिद परमेस्‍वरलाई चरैःसिउ भरेस हाइद ओल मनी ज़्‍युक्‍यो, ओनैंरालाई मनी याएक्‍यो। नो भरेस पुजारीराए वाज़ ज़्‍यान्‍या ओताज़्‍याव।
MAR 2:27 जे आव ब सैंच्‍यो, मिँर ऩासिन्‍या छ्यामए जूँनी जैसिउ माःक, ऩासिन्‍या छ्याम मिँराए जूँनी ज़ जैसिउ ची।
MAR 2:28 है जैद ङा मिँ मिन्‍सिद हुव ऩासिन्‍या छ्यामकिन ब घेप्‍पा ज़ ङालिज़्‍या,” है यादोक्‍यो।
MAR 3:1 फरी तछा येसु धर्मसास्‍त्र झ़िमल बाके। नल उकुइ थँव मिँ तोबो उलिज़्‍याव।
MAR 3:2 नल लिज़्‍यावराए येसुए ओपाहा झाःद्यान्‍याए जूँनी ऩासिन्‍या छ्याम नो उकुइ थँवलाई मासगराँज़्‍याव ब्‍याँ लिद चिऊद यानैज़्‍याव।
MAR 3:3 नाःत ज़ येसुए नो उकुइ थँवलाई, “आक हुद च्‍याँःसिन्‍के,” है दाद,
MAR 3:4 नोरालाई, “ऩासिन्‍या छ्यामकाव य़ेन चाव जैन्‍या सैं माचाव जैन्‍या? मिँलाई बाँचैन्‍या सैं बले·न्‍या? कानुनए कै उलिज़्याव?” है ओरादोक ते, सुए ज़ घाइ मालिकेर।
MAR 3:5 येसुए, काता नाः यायुँ खावर यालिज़्‍याव लिद उयुँ माचाव दाद उरिसए प़ाइँलाई तछ्योनी चिऊद नो उकुइ थँवलाई, “नकुइ तङ्गैके,” है ओदोक ते, उकुइ ओतङ्गैव प़ाइँना सोजोकाव ज़ ताके।
MAR 3:6 नो फरिसीराए निताव रँःद लाँःदा पुलुस्‍द, ‘आवलाई कै जैद सैःन्‍या ओताव?’ लिद बेहार ज़ हेरोद राजासकावरास गुमुस्‍ता दोनाकेर।
MAR 3:7 येसु उसिसरास ननी हाइसिद गालील दह जीदा बाकेर। नल कुधु मिँर गालील स़ोनो यहूदिया खन्‍दनी उछींत याहुज़्‍याव।
MAR 3:8 येसुए ओय़ेनर थैद ख्‍वार यरूसलेम सहरनी, ख्‍वार इदुमिआ खन्‍दनी, ख्‍वार यर्दन भै होफतिन, ख्‍वार तुरोस स़ोनो सीदोन जीनी ब याहुज़्‍याव।
MAR 3:9 है जैद मिँर बनै काला मुलु ताद ओललाई बनै छिला छिला याजैवए उसिसरालाई दोङ्गा तोबो रैव यापरींक्‍यो।
MAR 3:10 मिँर बनै कुधु ओरासगराँवए याजोरो हुज़्‍याव भरिए येसुलाई छाप्‍न्‍याए जूँनी बनै याछुइसिहुज़्‍याव।
MAR 3:11 जोक ब माचाव पुरूसराए येसुलाई यारँःव प़ाइँना होक ज़ ओङ़ाक फुलुप्‍सिद, “नँ परमेस्‍वरए ओज़ा ज़,” है लिद याक़िज़्‍याव।
MAR 3:12 खाली येसुए नोरालाई, “ङा परमेस्‍वरए ओज़ा ज़ लिन्‍या सुलाई ज़ है तारादोच्‍यो,” है ओरादोज़्‍याव।
MAR 3:13 नकिन येसु तोबो दाँदात पुलुस्‍द उयुँलाव मिताव मिँ भरिलाई ओराखुल्‍क नोर ओल्‍योक हुकेर।
MAR 3:14 नो भरिरानी बाह्र जना ओलस लिन्‍या ओसाचीर जैद नोरालाई चाव था सथैन्‍या,
MAR 3:15 स़ोनो माचाव पुरूसर पले·न्‍या हक ब याएक्‍यो।
MAR 3:16 नो बाह्र जनाराए यामिनर आवर ज़ — सिमोन (छींनी होए उमिन पत्रुस जैदिक्‍यो),
MAR 3:17 जब्‍दियाए ओज़ानी याकूब स़ोनो यूहन्‍नानी (छींनी नोनी निपाँःच्‍या ‘बोअनर्गेस’ नैद निएक्‍यो। नोए ओअर्थ ‘गर्जिज़्‍यावनी’।)
MAR 3:18 नकिन अन्‍द्रियास, फिलिप, बारथोलोमाइ, मत्ती, थोमा, अल्‍फयसए ओज़ा याकूब, थेदियस, देसभक्ता सिमोन,
MAR 3:19 स़ोनो छींनी येसुलाई धोका याज़्‍याव यहूदा इस्‍करियोत।
MAR 3:20 येसु फरी उझ़िमक उहुक मिँर बनै काला मुलु याहुज़्‍यावए उसिसरास ज़्‍यावर ब ज़्‍युव मादैकेर।
MAR 3:21 ख्‍वाराए येसुलाई ‘दासानी बिसा ताज़्‍या’ है ब यादोज़्‍याव। ओक्‍याँदाङावराए फरी निताव पाँर थैद येसुलाई च़िहुकेर।
MAR 3:22 यरूसलेमनी हुव सास्‍त्रीराए मनी, “आवए ओक्‍याँत ते माचाव पुरूसराए याघेप्‍पा बालजिबुल च़रिद ले। होए उमिननी ज़ माचाव पुरूसरालाई ओरापले·ज़्‍याव ची,” है लिकेर।
MAR 3:23 येसुए नोरालाई ओल्‍योदा खुल्‍द अइ लिद घर्ती झाःद याएक्‍यो, “सैतानए ओल सैतानलाई कै जैद ओपले·ज़्‍याव?
MAR 3:24 तोबो राज्‍यालाव मिँर या या यामाखैकिन नो राज्‍या माथ॰रिए।
MAR 3:25 हो मिताव ज़ तोबो झ़िमलावर या या यामाखैकिन चितराँ पुतराँ तान्‍या लेर।
MAR 3:26 है जैद सैतानए ओराज्‍यालावर ब या या माखैद तँदा तँदा याजैसिकिन नोर मनी माथ॰रिद यामिन ज़ म़ान्‍या ले।
MAR 3:27 फरी तोबो ओर्सा ल्‍यो मिँलाई ङ़ादा यामाकिवा पै उझ़िम पा·द ओजा-यार हाइद मालाँधुर।
MAR 3:28 “ङा जेलाई साचो है ङादाचिज़्‍या, मिँराए जो पाप यादोदी ब, परमेस्‍वरए उमिन याबले·दी ब नोराए यापाप क्‍यालो दैसिए।
MAR 3:29 खाली जोए परमेस्‍वरए छैंव उपुरूसए उमिन बले·दिज़्‍याव, होए ओपाप क्‍यालो मादैसिए। नितावए ओपाप खर्क ज़ माखेमे,” है लिद यासथैक्‍यो।
MAR 3:30 नो सास्‍त्रीराए ‘येसुए ओक्‍याँत माचाव पुरूस च़रिद ले’ है यादोज़्‍यावए येसुए आव पाँ ओरासथैव।
MAR 3:31 हाःत ज़ येसुए ओआमा स़ोनो ओभाइर हुद लाँःक च्‍याँःसिद येसुलाई क़िउ यारापरींकेर।
MAR 3:32 झ़िमल येसुए ओलापक मिँर माहोल्‍या च़ुसिद यालिज़्‍याव। है जैद नो क़िउ यारापरींवराए, “लाँःक नआमा स़ोनो नभाइर नँस दैसिना हुद लेर,” है यादोक ते,
MAR 3:33 येसुए, “ङाआमार ङाभाइर कितावर?” है लिद,
MAR 3:34 ओलापक च़ुसिद लिज़्‍यावराए ल्‍योदा भाल्‍सिद, “चिऊचिके, ङाआमार ङाभाइर आवर ज़।
MAR 3:35 जोराए परमेस्‍वरए ओपाँ थैद दोज़्‍यार, होर ज़ ङाआमार ङाभाइ बैंनीर,” है लिके।
MAR 4:1 फरी तछा येसु दह छ्योक च़ुसिद परमेस्‍वरए ओपाँ ओरासथैज़्‍याव। ओल्‍योक मिँर बनै ल्‍यो माल्‍यो यातावए येसु दोङ्गाल च़ुसिद दोङ्गालाई ऱील जाँ होकसै लाँक्‍यो। माहोल्‍या भरी ओङ़ाक दह छ्योक च़ुसिकेर।
MAR 4:2 याच़ुसिउत येसुए नोरालाई ओपाँ घर्ती झाःद यासथैक्‍यो। तोबो ओरासथैव आव ज़,
MAR 4:3 “थैचिके, तोबो मिँ ओएँःल धुर वास्‍ना बाके दी।
MAR 4:4 धुर ओवास्ज़्याक ख्‍वा येम जीदा परिके दी। नो येमलाव परिउ बाज़ाराए ज़्‍युकेर दी।
MAR 4:5 ख्‍वा धुर गम छ्या छ्या ल्‍यो ओदादरत परिके दी। नत गम छ्या छ्या वाज़ ल्‍यो ओतावए हतप्‍त ज़ परीके दी।
MAR 4:6 खाली निमी ओसोराक उहुवत ओजरा नाम जींल ओमाल्‍योए च्‍याकराप चिकुरूप थँके दी।
MAR 4:7 फरी ख्‍वा धुर ज़ुर ऱमराए खार्ल परिके दी। नोलाई ज़ुर ऱमराए गाल्‍द ओसै माल्‍यो दाँथ्‍या ताके दी।
MAR 4:8 फरी ख्‍वा धुर ते चाव गमस्‍याल परिके दी। नो बनै चावस परीद झेंःद ओसै बनै झाःद ख्‍वात तीस, ख्‍वात साथी, ख्‍वात सय दोबोर यासै झाःकेर दी।
MAR 4:9 आव पाँ जोए थैन्‍या उयुँ लिज़्‍या, चावस ओथैवक,” है लिद यासथैक्‍यो।
MAR 4:10 नो माहोल्‍यार याबाव छींनी बाह्र जना उसिसर स़ोनो ओलस बाऱिज़्‍यावराए, “नो नझाःव घर्तीए ओअर्थ काता?” है यादोक ते,
MAR 4:11 येसुए, “जेलाई वाज़ परमेस्‍वरए ओराज्‍यालाव कप्‍सिउ पाँर छर्लङ्ग सतैंसिउ लिज़्‍या, उपुर्कावरालाई ते घर्ती मिताव ज़ लिज़्‍या।
MAR 4:12 है जैद ज़, ‘नोराए रँःन्‍या ते रँःज़्‍यार, मासरेस्‍धुर। थैन्‍या ते थैज़्‍यार, मातीधुर। नितावर यामाताव ताकिन परमेस्‍वरए ल्‍योदा यायुँ फर्कैद यापाप ब क्‍याल्‍सिखेहो।’ ”
MAR 4:13 नकिन येसुए नोरालाई है यादोक्‍यो, “काता जे मनी नो ङाझाःव घर्तीए ओअर्थ जेमासैंए रो? छुत झन कै जैद जेतीधुके?
MAR 4:14 धुर वास्‍ज़्‍याव, परमेस्‍वरए ओपाँ सथैज़्‍याव मिँ ज़।
MAR 4:15 नो येमलाव परिउ भरी जोए परमेस्‍वरए ओपाँ ओथैव प़ाइँना सैतान हुद उयुँलाव वास्‍सिउ पाँ भरी स्‍याप सिप जैद लाँदिज़्‍याव।
MAR 4:16 हो मिताव ज़ नो ओदादरताव परिउ भरी जोए परमेस्‍वरए ओपाँ थैद बेहार ज़ तीद खुसी ब ताज़्‍या।
MAR 4:17 खाली नो मिँ परमेस्‍वरए ओपाँत उयुँल ओजरा माल्‍यो मिताव ओतावए नो पाँ छ्यावा पै वाज़ रहिज़्‍या। नो पाँनी नोए ओक्‍याँत खिरीर उपसिकिन दुखर ओदैकिन नो पाँत उयुँ क़्याज़्‍या।
MAR 4:18 नो ज़ुर ऱमराए खार्लाव परिउ भरी आव ज़, नोराए परमेस्‍वरए ओपाँ ते थैज़्‍यार,
MAR 4:19 खाली धन सम्‍पतीदा यायुँ थू जैद ‘आव गेजिउत कै तान्‍या ओताव, कातानी थाँतस लिन्‍या’ लिद व़ीनी फुइ ब लिज़्‍यार। है जैद नितावराए परमेस्‍वरए ओपाँलाई यागालोए नो पाँ ओसै माझाःज़्याव ताज़्‍या।
MAR 4:20 नो चाव गमस्‍याल परिउ भरी आव ज़, जोए परमेस्‍वरए ओपाँ थैद चावस रैद ओसै झाःज़्‍याव धुर स्‍यासो ख्‍वात तीस, ख्‍वात साथी, ख्‍वात सय दोबोर झाःज़्‍याव।”
MAR 4:21 येसुए फरी तोबो घर्ती अइ लिद झाःक्‍यो, “सुए ज़ ल़ोसै तैंःद जाए माकबो, खात खँल माम़ोंव। दिउ बाल्‍न्‍यात ची झाःव।
MAR 4:22 हिताव ज़ मारैंःव भरी तछा रैंःन्‍या ज़ ले, कप्‍सिउ भरी ब पलाँवल तान्‍या ले।
MAR 4:23 आव पाँत जोए थैन्‍या उयुँ लिज़्‍या, ओर्ना घ्याँ जैद ओथैवक।”
MAR 4:24 फरी नोरालाई, “जेथैज़्‍याव भरी बनै धिद थैच्‍यो। किताव गोइँनी जेगोइँज़्या, जे मनी हिताव गोइँनी ज़ दैन्‍या जेले, झन कुधु ब दैन्‍या जेले।
MAR 4:25 है जैद जोए धिद थैज़्‍याव, होए झन ज़ तीधुन्‍या ले। जोए चावस माथैव, होए झन ज़ थैन्‍या युँ मादाद ङ़ादाङाव ओथैव ब ओपो·स ज़ म़ान्‍या ले।”
MAR 4:26 फरी, “परमेस्‍वरए ओराज्‍या तोबो मिँए ओएँःल धुर ओवासो मिताव लिज़्‍या।
MAR 4:27 नोए धुर ओवासोत स्‍याँन्‍या बेलाक स्‍याँज़्‍या, सोन्‍या बेलाक सोज़्‍या। उपुर काता य़ेन ज़ ओमादोदी ब नो धुर ओलनी ज़ परीद झेंःज़्‍या। कै जैद ओताज़्‍याव ओल ब मासैंव।
MAR 4:28 गमए ओल ज़ नो धुरलाई सपरीज़्‍याव। है जैद नो धुर ङ़ादा तआखला ऩेआखला ताद झेंःद से·ज़्‍या, नकिन ओबाला ब झाःज़्‍याव।
MAR 4:29 ओसै उमींःवत नो वासोए ओराँकासीस हुद ओएँःलाव अन भरी एन्‍ज़्‍याव।”
MAR 4:30 येसु फरी, “परमेस्‍वरए ओराज्‍या किताव उलिज़्‍याव, किताव अर्थनी पलास्‍द ङायाचिके लिक ते,
MAR 4:31 परमेस्‍वरए ओराज्‍या तोबो बाजीए उधुर स्‍यासो लिज़्‍या। नो धुर प़ाइँरानी तकेज़ा ओतादी ब बारील रूपिक,
MAR 4:32 परीद ओघ्‍योःवत नो बारीलाव ङ़ैंराकिन प़ाइँरानी घेप्‍पा ताद ओखारर ब झाःज़्‍याव। नत नमताव भुर्ज़्‍याव बाज़ार ओछैंयाल सिपर जैद बासिज़्‍यार।”
MAR 4:33 मिँराए परमेस्‍वरए ओपाँ घतीधुरक लिद येसुए इताव कुधु घर्तीर झाःद ओराएज़्‍याव।
MAR 4:34 घर्ती ओमाझाःवा पै ओमारासथैज़्‍याव। याबातङ याताक उसिसरालाई वाज़ ओअर्थ भरी पलास्‍द ओराएज़्‍याव।
MAR 4:35 हो छ्याम ऱिमक येसुए उसिसरालाई, “दह होफत गेबाया,” है ओरादोक ते,
MAR 4:36 उसिसर नो माहोल्‍यारास भाःसिद येसु च़ुसिद उलिज़्‍याव दोङ्गाल पसिद बाकेर। यास बाज़्‍यावर छुत दोङ्गार ब यालिज़्‍याव।
MAR 4:37 याबाज़्‍याक उमँःजानी घ्‍योःव हुरी बतास हुद ऱीए ओछल्‍कार दोङ्गाल पसिद नोलाई गदैवा गदैवा जैक्‍यो।
MAR 4:38 हो बेलाक येसु दोङ्गाए ओर्मेःत गुम जैद ङ़ल्‍द उलिज़्‍याव। उसिसराए येसुलाई सोचोइद, “गुर्बा, खदम ज़ गेतारिके, काराव घाइ नमालिज़्‍याव?” है यादोक ते,
MAR 4:39 येसु सोद बतासलाई सिङार्द ऱीलाई ब “च़िम दोके,” है ओदोव प़ाइँना ज़ बतास ब थकनिके, ऱी ब अदिके।
MAR 4:40 हाःत ज़ येसुए, “जे काराव जेछे·ज़्‍याव, कै जैद जेयुँ ओमाहुप्‍ज़्‍याव?” है ओरादोक ते,
MAR 4:41 नोर बनै छे·द या याल, “आव किताव मिँ ओताव? बतासर ऱीराए ब ओपाँ यादोज़्‍याव,” है लिकेर।
MAR 5:1 येसु उसिसरास दह होफताव गेरासेनस यादोज़्‍याव पोङ केस्‍द,
MAR 5:2 येसु दोङ्गातिन उझरिउ प़ाइँना ज़ माचाव पुरूसए क्‍योःद ओनैज़्‍याव तोबो मिँ खादर पोनी पुलुस्‍द येसुए ल्‍योक दैसिहुके।
MAR 5:3 नो मिँ एकतार खादर जीदा ज़ उलिज़्‍याव। नोलाई सुए ज़ साँगलए ब यामाकिधुज़्‍याव।
MAR 5:4 कुधु पाला साँगलए किद, हलाल याझाःदी ब, साँगलर पाता पत॰ ओराफ्या·ज़्‍याव, हलार ब कुतु कुतु केःद ओराख्‍याज़्‍याव। है जैद सुए ज़ यामाहारैधुज़्‍याव।
MAR 5:5 नो लाकनी रील खादर जीदा, हाँ जीदा चिर चिर क़िद लुँ लुँराए उरूम्‍सिज़्‍याव।
MAR 5:6 नोए येसुलाई तादानी उरँःव प़ाइँना ओल्‍योक धोंःहुद उखँत फुलुप्‍सिद,
MAR 5:7 बनै चोइस, “अ येसु, माहान परमेस्‍वरए ओज़ा, ङास नखै काता उलिज़्‍याव? परमेस्‍वरए उमिननी है ङादींज़्‍या, ङालाई दुख तायाँ,” है दोक्‍यो।
MAR 5:8 नो माचाव पुरूसलाई येसुए ङ़ादा ज़, “ए माचाव पुरूस, आव मिँए ओक्‍याँतिन पुलुस्‍द बान्‍के,” है दाद ओनैज़्‍याव।
MAR 5:9 येसुए फरी, “नमिन कै?” है ओदोक ते, “ङामिन फौजी, गे कुधु ज़ गेलिज़्‍या,” है दोक्‍यो।
MAR 5:10 नोराए, “गेलाई आव पोनी तापले·सियो,” है लिद बिन्‍ती दोकेर।
MAR 5:11 नो बेलाक ज़ नक तोबो दाँदात ऊर तबगाल यालाज़्‍याव।
MAR 5:12 नो माचाव पुरूसराए, “गेलाई बुरू नो ऊराए क्‍याँत बाव यासिके,” लिद बिन्‍ती यादोक ते,
MAR 5:13 येसुए भैंःद याएक्‍यो। है जैद नो माचाव पुरूसर नो मिँए ओक्‍याँतिन पुलुस्‍द ऊराए क्‍याँत बाकेर। हो प़ाइँना ज़ ऊ भरी बूलिद दाँदातिन सुइँःकिनाद दहल ज़ो·द प़ाइँ ज़ स़ुद सिकेर। नो ऊर ऩेहजाराकाव बगाल याल्‍यो।
MAR 5:14 निताव रँःद नो ऊ गावलार धोंःनाद सहर जीदा, नाखार जीदा बाद नो यारँःव भरी है यारादोकेर। नो पाँ थैव भरी कै ओताव लिद चिऊना हुवर,
MAR 5:15 येसुए ल्‍योक याबाक नो माचाव पुरूसराए याऱासो मिँ ओक्‍वार क्‍वाइसिद सोजोकाव ज़ च़ुसिद उलिज़्‍याव रँःकेर। निताव रँःद नोर छे·केर।
MAR 5:16 नो चिऊना हुवरालाई, नो य़ेन रँःव भरिए, “बूलिउलाई इताव इताव ताके, ऊरालाई इताव इताव ताके,” लिद है यारादोकेर।
MAR 5:17 है जैद नो गेरासेनस खन्‍दलाव मिँराए येसुलाई, “आनी पुलुस्‍द बान्‍के,” है लिद बिन्‍ती दोकेर।
MAR 5:18 येसु दोङ्गाल उपसिज़्‍याक नो माचाव पुरूसराए याऱासो मिँए, “ङालाई ब नँस लाँनाके,” है लिद बिन्‍ती ओदोक ते,
MAR 5:19 येसुए भैंःद मायाद, “बुरू नँ नझ़िमदा बाद ननैं नमेंरालाई, ‘परमेस्‍वरए ङालाई उयुँ नाद ङाजूँनी आःल्‍दिउ य़ेन दाद्याँक्‍यो,’ है लिद यासथैनाके,” है दोक्‍यो।
MAR 5:20 है जैद नो मिँ देकापोलिस खन्‍दल बाद ओल उजूँनी येसुए ओदोव य़ेन यासथैक्‍यो। थैज़्‍याव भरी अचम्‍ब ताकेर।
MAR 5:21 येसु दोङ्गाल ओल्‍द दह आफत उहुत मिँर बनै माहोल्‍या दुप्‍सिहुकेर। ओल दह छ्योक ज़ उलिज़्‍याव।
MAR 5:22 नाःत ज़ धर्मसास्‍त्र झ़िमलाव तोबो याघेप्‍पा याइरस यादोज़्‍याव नक हुद येसुलाई रँःद उखँत फुलुप्‍सिद,
MAR 5:23 “ज़िम्ज़ा मेंमा ङाज़ा सिउ पैंज़्‍याव। नँ हुद नोए ओक्‍याँत नकुइ नैद नएकिन नो गराँद बाँचिन्‍या ले,” लिद बिन्‍ती ओदोक ते,
MAR 5:24 येसु नोस ज़ बाके। मिँर बनै माहोल्‍या येसुए उछीं उछीं येमत बनै याछुइसिनाज़्‍याव।
MAR 5:25 नो माहोल्‍याराए याखार्ल तोबो बाह्र बर्स भरी ओक्‍याँतिन झी भोन्‍या बेथाए क्‍योःद ओनैज़्‍याव मेंमा ब उलिज़्‍याव।
MAR 5:26 नो मेंमा सगराँसिन्‍याए जूँनी वासः जैज़्‍याव कुधुराए ल्‍योक ओलसकाव लिज़्‍याव भरी ओपो·स ज़ खेम्‍द ब जात्त ज़ मागराँके, झन ज़ हया गती तानाद उलिज़्‍याव।
MAR 5:27 है जैद नोए येसुए ओदोव य़ेन भरी थैद माहोल्‍याराए खार्ल पसिद येसुए उछींनी हुद ओक्‍वात छाप्‍दिक्‍यो।
MAR 5:28 नो मेंमाए उयुँल उयुँल, “येसुए ओक्‍वा वाज़ छापो ङादैकिन आव बेथानी गराँन्‍या ङाले,” है उलिज़्‍याव।
MAR 5:29 ओछापो प़ाइँना नो झी भोन्‍या बेथा ब गराँके, ओगराँव ओक्‍याँत ब दार्सिके।
MAR 5:30 हाःत ज़ येसुए ओक्‍याँतिन सगराँन्‍या सक्ती पुलुस्‍द ओबाव दार्सिद नो माहोल्‍याराए खार्ल उछींदा फर्किद, “ङाक्‍वात सुए ओछापो?” है ओरादोक ते,
MAR 5:31 उसिसराए, “आः याछुइसिज़्‍यावल कै जैद ‘सुए ओछाप्‍नाव,’ है नलिज़्‍याव?” है यादोक ते,
MAR 5:32 येसुए झन ‘सुए ओछाप्‍नाव?’ है लिद आदा होदा याचिऊक्‍यो।
MAR 5:33 नो मेंमा ‘ङागराँके’ लिन्‍या सैंद ओछ्याचेए गूए गूए येसुए उखँत फुलुप्‍सिद ओक्‍याँत ताव पाँ भरी ओपो·स ज़ है दोक्‍यो।
MAR 5:34 येसुए नोलाई, “अ माँ, ङालाई नयुँ नसुहुबोनी ज़ नगराँके। चावस बानी। नबेथाए ऱास्‍निक्‍यो,” है दोक्‍यो।
MAR 5:35 येसु नो मेंमास ओपाँज़्‍याक ज़ धर्मसास्‍त्र झ़िमलाव याघेप्‍पा याइरसए उझ़िमनिकावर हुद याइरसलाई, “गुर्बालाई काराव हत्‍या यान्‍या, नज़ा सिधुके,” है दोकेर।
MAR 5:36 नोराए यापाँ येसुए माथैव जैसिद याइरसलाई, “नयुँ तासतेयो, नयुँ वाज़ उहुप्‍क,” है दाद,
MAR 5:37 छुतरालाई ओलस बाव मायाद पत्रुस, याकूब स़ोनो याकूबए ओभाइ यूहन्‍नारालाई वाज़ यालाँक्‍यो।
MAR 5:38 नो धर्मसास्‍त्र झ़िमलाव याघेप्‍पाए उझ़िमक याकेसोत मिँर बनै चिर्लनी बिर्ल याघर्ज़्‍याव रँःद,
MAR 5:39 येसु नो झ़िमल पसिद, “काराव इताव च्‍याउँनी म्‍याउँ लँःसिद जेघर्ज्याव? ल़ुज़ा मासिए, अइज़ ङ़ल्‍द ले,” है ओरादोक ते,
MAR 5:40 येसुलाई हसैकेर। हाःत ज़ येसुए मिँ भरी लाँःदा परींद नो ल़ुज़ाए ओबाबु ओआमानी स़ोनो ओलस लिज़्‍याव स़ोम्‍लो उसिसरालाई वाज़ लाँद ल़ुज़ाए उकुन्तील पसिद,
MAR 5:41 नो ल़ुज़ालाई उकुइनी क्‍योःद, “तालिता कूमी,” है दोक्‍यो। (तालिता कूमीए ओअर्थ — अ बुची, सोनिके।)
MAR 5:42 हो प़ाइँना ज़ नो ल़ुज़ा थर च्‍याँःसिद आदा होदा लिके। नो ल़ुज़ा बाह्र बर्सवाकाव ओल्‍यो। निताव रँःद नोर बनै अचम्‍ब ज़ ताकेर।
MAR 5:43 नकिन येसुए, “आव य़ेन सुलाई ज़ है तारादोच्‍यो,” है लिद अर्थैद, “आवलाई ज़्‍यान्‍यार जैदिचिके,” है यादोक्‍यो।
MAR 6:1 येसु ननी पुलुस्‍द ओल ओनाखारल ज़ बाके। उसिसर मनी ओलस ज़ यालिज़्‍याव।
MAR 6:2 ऩासिन्‍या छ्याम उहुवत धर्मसास्‍त्र झ़िमक बाद येसुए परमेस्‍वरए ओपाँ ओरासथैज़्‍याव। नो पाँ थैज़्‍यावर बनै अचम्‍ब ताद, “आवए इताव अचम्‍बलाव पाँर, अचम्‍बलाव सक्तीर कातानी ओरैव? आवए ओदैव किताव ग्‍यान ओल्‍यो!
MAR 6:3 काता, आव नो सीं त़ुज़्‍याव माःक रो? आव नो गेस लिज़्‍याव मरियमए ओज़ा ज़ सानी। आव ते याकूब, योसेफ, यहूदा स़ोनो सिमोनराए यादाज्‍यु ज़ सानी। ओबैंनीर मनी गेस ज़ लिज़्‍यार,” है लिद जाँ सोव माँःती जैकेर।
MAR 6:4 येसुए नो यापाँ सैंद, “अगमबक्तालाई ओल ओनाखारलावर स़ोनो ओक्‍याँदाङावराए वाज़ ओमान नैद माएर, उपुर्कावराए ते नैदिज़्‍यार,” है यादोक्‍यो।
MAR 6:5 है जैद येसु नक उलिज़्‍याक अचम्‍बलाव य़ेनर ब कोसै मादोधुक्‍यो, खाली तोबो ऩेब्‍लो याजोरो हुवरालाई वाज़ याक्‍याँत उकुइ नैद्याद यासगराँक्‍यो।
MAR 6:6 ओललाई यायुँ ओमाहुप्‍ज़्‍यावए येसु अचम्‍ब ताके। येसु ननी पुलुस्‍द नाखार नाखार बाद परमेस्‍वरए ओपाँ यासथैनाक्‍यो।
MAR 6:7 हाः बेलाक बाह्र जना उसिसरालाई ओल्‍योक खुल्‍द नोरालाई ऩेबरें ऩेबरें जैद माचाव पुरूसर पले·न्‍या सक्तीर याद यापरींक्‍यो,
MAR 6:8 “येमत जेबाक जेस काता ज़ तालाँच्‍यो। जेकुइताव झुइस वाज़ बाच्‍यो। अर्नी तादी ब, झ़ैं तादी ब, जेवाँःत पैसा तादी ब, काता ज़ तालाँच्‍यो।
MAR 6:9 जेखँताव पोला स़ोनो जेक्‍याँताव क्‍वास वाज़ बाच्‍यो,” है लिद याअर्थैक्‍यो।
MAR 6:10 फरी, “जो झ़िमक जेपसिज़्‍या नो नाखारनी जेमापुलुसा पै नक ज़ लिच्‍यो।
MAR 6:11 फरी जेबाव पोल जेलाई ल्‍यो मायाद जेपाँ ब थैव यामाभैंःकिन नो पोनी जेपुलुस्‍क नोरालाई चेतावनी यान्‍याए जूँनी जेखँताव गालो धुइरो ब नल ज़ थरैद ख्‍यानैद याराएच्‍यो,” है लिद यापरींक्‍यो।
MAR 6:12 है जैद नोर ननी पुलुस्‍द बाद प़ाइँलाई ज़, “मादान्‍या जेदोज़्‍याव भरी ऱास्‍द जेयुँ परमेस्‍वरए ल्‍योदा फर्कैचिके,” है लिद यारासथैकेर।
MAR 6:13 मिँराए याक्‍याँताव माचाव पुरूसर मनी कुधु ज़ यारापले·केर, याजोरो हुवरालाई ब परमेस्‍वरए उमिननी म़ास थीद नोरालाई यारासगराँकेर।
MAR 6:14 हाः बेलाक येसुए उमिन बनै ओथास्‍नावए हेरोद राजाए मनी ओय़ेनर थैक्‍यो। येसुए उजूँनी ख्‍वाराए, “आव ते ऱील सछैंज़्‍याव यूहन्‍ना जन्‍द ची उहुव सा। है जैद ज़ ताखेहो नाः सक्तीलाव य़ेनर ओदोज़्‍याव।”
MAR 6:15 ख्‍वाराए फरी, “आव ते एलिया ची सा।” ख्‍वाराए फरी, “भाःकाव अगमबक्ता मितावर फरी तोबो उपुलुसो ताखेहो,” है यालिज़्‍याव।
MAR 6:16 ओल हेरोदए फरी निताव पाँर थैद, “ओहो! ओङ़ै च़म्‍द ङासैःव यूहन्‍ना ते जन्‍द ची हुके काना,” है लिके।
MAR 6:17 नो हेरोदए ङ़ादा ओभाइ फिलिपए ओज्‍या हेरोदियासए ओपाँनी यूहन्‍नालाई क्‍योःद किद झ्यालखानाल झाःद ओनैज़्‍याव। हेरोदए हेरोदियासलाई ओरैवए,
MAR 6:18 यूहन्‍नाए नो राजालाई, “नँ नभाइए ओज्‍यालाई रैन्‍या माताए,” है ओदोक ते,
MAR 6:19 हेरोदियासए यूहन्‍नालाई रँःद उरिस चोद, ‘आवलाई कै जैद ङासैःके’ लिद उयुँल ओनैज़्‍याव। खाली सैःन्‍या मौका ओमादैताव।
MAR 6:20 ओल राजाए ते यूहन्‍नालाई बनै सतलाव धर्मी मिँ ज़ थ·रैद ओछे·ज़्‍याव। है जैद नोए यूहन्‍नालाई जोगोइद नैक्‍यो। यूहन्‍नाए ओपाँत फरी उयुँ आँचानी पाँचा ओताज़्‍यावत ब सर्बा थैन्‍या युँ ओदोज़्‍याव।
MAR 6:21 तछा राजा हेरोद उजर्मिउ छ्याम मानिन्‍या उहुवत ओज्‍याए मौका छुपिक्‍यो। नो छ्याम मानिन्‍याए जूँनी बनै घ्‍योःव भत्‍यार जैद घ्‍योःव घ्‍योःव ओकर्मचारीर, फौजीलाव ओअफिसरर स़ोनो गालीललाव घ्‍योःव घ्‍योःव मिँरालाई याखुल्‍क्‍यो।
MAR 6:22 नो बेलाक ज़ हेरोदियासए मेंमा ओज़ा नो भत्‍यार ज़्‍युना हुवराए याङ़ाक बाद स़्याद याएक्‍यो। राजा हेरोद स़ोनो ओपाहुनार बनै खुसी ताद राजाए नो ल़ुज़ालाई, “नँ जो नपैंज़्‍या ङास ऩिके, हो ज़ ङायाँ,” है दोक्‍यो।
MAR 6:23 फरी, “नँ नपैंकिन तभा ङाराज्‍या तादी ब ङायाँ,” है लिद किर्‍या झाःक्‍यो।
MAR 6:24 है जैद नो ल़ुज़ा ओआमाए ल्‍योक बाद, “आमा, ङा काता ङाऩिके?” है ओदोक ते, ओआमाए, “ऱील सछैंज़्‍याव यूहन्‍नाए ओङ़ै ऩिके,” है दोक्‍यो।
MAR 6:25 नो ल़ुज़ा बेहार ज़ राजाए ल्‍योक बाद, “ङालाई ऱील सछैंज़्‍याव यूहन्‍नाए ओङ़ै ताथील झाःद आख ज़ याँके,” है दोक्‍यो।
MAR 6:26 राजाए नो पाँ थैद उयुँर स्‍यासे सतेक्‍यो। खाली ओपाहुनाराए ङ़ाक किर्‍या ओझाःवए नो ल़ुज़ाए ओपाँ माख्‍याधुक्‍यो।
MAR 6:27 है जैद ओपाल्‍यारानी तोबोलाई खुल्‍द, “झ्यालखानाल लिज़्‍याव यूहन्‍नाए ओङ़ै च़म्‍द रैके,” है दाद परींक्‍यो। नो झ्यालखानाल बाद यूहन्‍नाए ओङ़ै च़म्‍द,
MAR 6:28 ताथील झाःद नो ल़ुज़ालाई रैदिक्‍यो। नो ल़ुज़ाए फरी ओआमालाई लाँदिक्‍यो।
MAR 6:29 छींनी यूहन्‍नाए उसिसराए नो पाँर थैद ओमोरोलाई च़िहुद लाँद गादैकेर।
MAR 6:30 येसुए नो ओरापरींव ओसाचीर ओल्‍द हुद ओल्‍योक दुप्‍सिद यादोव य़ेन भरी, यारासथैव पाँ भरी है दोकेर।
MAR 6:31 नकिन येसुए नोरालाई, “जे जाँवा पै ऩासिन्‍याए जूँनी ङास तोबो साइँसुइँवक हुव ताके,” है यादोक्‍यो। काराव ल्‍यो ताकिन हो बेलाक मिँर याल्‍योक बनै कुधु ज़ आदा होदा लिन्‍यार यातावए काँर ज़्‍यान्‍या ब यामाधाःज़्‍याव।
MAR 6:32 है जैद येसु उसिसरास दोङ्गाल पसिद तोबो साइँसुइँव पोक बाकेर।
MAR 6:33 खाली मिँराए याबाज़्‍याव रँःद, “नोर ज़ याल्‍यो,” लिन्‍या सरेस्‍द प़ाइँनी ज़ धोंःहुद दह छ्यो छ्यो बाद नोरालाई बलेंद याङ़ात ज़ केस्‍नाकेर।
MAR 6:34 येसु दोङ्गातिन उझरिउ प़ाइँना मिँर बनै माहोल्‍या यारँःक्‍यो। नोर यागावला माल्‍यो बेधा स्‍यासोर यातावए येसुए उयुँ नाद परमेस्‍वरए ओपाँर कुधु ज़ यासथैक्‍यो।
MAR 6:35 जाँ ऱिमदा ऱिमदा येसुए उसिसर ओल्‍योक हुद, “गे इताव साइँसुइँवक गेलिज़्‍या, नम ब नुप्नाके।
MAR 6:36 आव माहोल्‍यारालाई आजीलाव नाखार जीदा यापरींके, ज़्‍यावर लँःद घज़्‍युरक,” है यादोक ते,
MAR 6:37 येसुए, “आवरालाई ज़्‍यावर जे ज़ याव ताके,” है ओरादोक ते, उसिसराए, “हुकी आवरालाई ऩेसय तोला चाँदीए उमींवा भरेस रैद्यान्‍या है नलिज़्‍याव रो?” है यादोक ते,
MAR 6:38 येसुए, “जेस भरेस खागोता उलिज़्‍याव, चिऊनाचिके,” है ओरादोक ते, नोर चिऊनाद गनिद, “गेस भरेस पाँच गोता, ङाँः ऩेब्‍लो वाज़ लिज़्‍या,” है दोकेर।
MAR 6:39 हाःत ज़ येसुए उसिसरालाई नो माहोल्‍यारालाई पींव छी ल्‍यो बाँल ताना ताना जैद सोचोइँव यापरींक्‍यो।
MAR 6:40 नोर पचास पचास स़ोनो सय सयलाव ताना जैसिद च़ुसिकेर।
MAR 6:41 हाःत ज़ येसुए नो पाँच गोता भरेस ऩेब्‍लो ङाँः उकुइत रैद स्‍वर्गदा भाल्‍सिद, असिक ऩिद भरेसर केःद उसिसरालाई नो माहोल्‍याराए याङ़ाक याङ़ाक भाःद्याव यापरींक्‍यो। फरी नो ऩेब्‍लो ङाँःनिलाई मनी हिताव ज़ जैद भाःद याएक्‍यो।
MAR 6:42 नोर प़ाइँए याफू तसी ज़्‍युकेर।
MAR 6:43 नो यासय़ेलो भरेस स़ोनो ङाँःए उकुतुरार यादुप्‍क बाह्र झुर्नु ताके।
MAR 6:44 नो भरेस ज़्‍याज़्‍यावर खेपार वाज़ पाँच हजारा याल्‍यो।
MAR 6:45 हाःत ज़ येसुए उसिसरालाई दोङ्गाल पसिउ परींद दह होफताव बेथसेदा यादोज़्‍याव पोदा ओलकिन ङ़ादा ज़ यापरींक्‍यो। ओल येसुए ते नो माहोल्‍यारालाई याझ़िमदा याझ़िमदा ओरापरींज़्‍याव।
MAR 6:46 नोरालाई ओरापरींधुव छींनी ओल तोबो दाँदात बाद पोंखारिनाक्‍यो।
MAR 6:47 नम ओझ्यानाक उसिसर दोङ्गात दह माँजल ज़ यालिज़्‍याव। येसु ओबातङ पाखाक उलिज़्‍याव।
MAR 6:48 छींनी बतास उसिसराए ल्‍योदा बनै चोइस हुद नोर यादोङ्गालाई बनै धो धो यालाँज़्‍याव। येसुए नोरालाई रँःद रीलाव तीन बजेवाक ऱी तर्त तर्त याल्‍योदा ज़ बाके। यालापनिकाव घ्याँ बाव ओपैंज़्‍याक,
MAR 6:49 नोराए येसुलाई ऱी तर्त तर्त उहुज़्‍याव रँःद, “आव ते झ़्या ची सा!” लिद,
MAR 6:50 बनै छे·द चिर चिर क़िकेर। हाःत ज़ येसुए, “ताछे·च्‍यो, जेयुँ होलाँ जैचिके, ङा ची,” है दाद,
MAR 6:51 यास दोङ्गाल उपसिउ प़ाइँना ज़ बतास ब थकनिके। निताव रँःद उसिसर बनै अचम्‍ब ताकेर।
MAR 6:52 येसुए निताव भरेस ओसबा·व रँःद ब ओय़ेन चावस यामाथ·रैताव। यायुँ बनै खाव ओतावए मातीधुकेर।
MAR 6:53 दह होफताव गनेसरेत यादोज़्‍याव पोङ केस्‍द यादोङ्गालाई दह छ्योक सुर्द,
MAR 6:54 पाखाक यापुलुसो प़ाइँना नलाव मिँराए येसुलाई बेहार ज़ सरेस्‍द,
MAR 6:55 नजीलाव भरिल सरसाप बाद याजोरो हुव भरिरालाई याझेलोङ्गारास घुर्द येसु जोक जोक बाज़्‍या होक होक ज़ यारालाँकेर।
MAR 6:56 है जैद सहरल तादी ब, नाखारल तादी ब, पाखाङ तादी ब येसु जोक बाज़्‍या, होक ज़ मिँराए याजोरो हुवरालाई तोबोक यारादुप्‍ज़्‍याव। नोराए, “नक्‍वाए उतुपा वाज़ छापो गेदैक,” है दाद छापो भरी ओपो·स ज़ गराँकेर।
MAR 7:1 यरूसलेमनी हुव फरिसीर स़ोनो सास्‍त्रीर येसुए ल्‍योक यादुप्‍सिउत,
MAR 7:2 येसुए ख्‍वा ख्‍वा उसिसराए याकुइ माचोखोइसिद काँ याज़्‍युज़्‍याव यारारँःकेर।
MAR 7:3 फरिसीर स़ोनो उपुर्काव यहूदी भरिराए यासाखा पुर्खारानी हुव चलन दाद याकुइ यामाचोखोइसिवा पै काता ज़ यामाज़्‍युज़्‍याव।
MAR 7:4 फरी बजारनी याहुवत ब ऱीए यामाचोखोइसिवा पै काता ज़ यामाज़्‍युज़्‍याव। छुत भाःकिनकाव चलनर ब कुधु ज़ यादोज़्‍याव, कैताक जार याचोखोइज़्‍याव, कैताक खुरीर भोप्‍कार याचोखोइज़्‍याव।
MAR 7:5 है जैद नो फरिसीर स़ोनो सास्‍त्रीराए येसुलाई, “नसिसराए काराव गेसाखा पुर्खारानी हुव चलन यामादोज़्‍याव? आवराए याकुइ माचोखोइसिद ज़ ज़्‍युज़्‍यार,” है यादोक ते,
MAR 7:6 येसुए, “जे मिताव कैफतीराए जूँनी यसैयाए ङ़ादा ज़ थिक सर्द नैद्याचिउ। नोए ओसरो आव ज़, ‘आवराए यायाःए वाज़ ङामान नैद्याँज़्‍यार। यायुँ ते ङाकिन तादाङ लिज़्‍या।
MAR 7:7 मिँराए याससैव चलनलाई सघ्‍योःद, अऩाकल ज़ ङासेवा दोज़्‍यार।’
MAR 7:8 है जैद जे परमेस्‍वरए ओकानुनलाई ऱास्‍द झन मिँराए याजैव चलनलाई जेमानिज़्‍या।
MAR 7:9 निताव दान्‍यात बनै ज़ जेजम्‍कैज़्‍या — परमेस्‍वरए ओकानुनलाई ख्याद, जेचलनलाई जेसघ्‍योःज़्‍या।
MAR 7:10 अछादी परमेस्‍वरए ओकानुन सर्ज़्‍याव मोसाए इताव सर्द नैव, ‘बाबु आमाए ओमान नैद्याव ज़ परिए।’ स़ोनो, ‘जोए ओबाबु ओआमाए उमिन बले·दिज़्‍याव, होलाई सैःव ज़ परिए।’
MAR 7:11 जे ते झन, ‘जोए ओबाबु ओआमानिलाई, ‘जिन ङानिकाव दैव परिन्‍या भरी कुर्बान ताद ले,’ है उलिकिन, नो मिँलाई ओबाबु ओआमानी निभार मालागिद काता ज़ याव मापरिए,’ है जेलिज़्‍या। (कुर्बानए ओअर्थ — ङाधन भरी परमेस्‍वरए उमिनत नैसिउ लिज़्‍या।)
MAR 7:13 है जैद जे निताव जेसाखा पुर्खारानी हुव चलननी परमेस्‍वरए ओपाँलाई अऩाकलाव ज़ जेजैज़्या। हो मिताव य़ेन छुत मनी कुधु ज़ जेदोज़्‍या,” है यादोक्‍यो।
MAR 7:14 नकिन येसुए नक लिज़्‍याव माहोल्‍यारालाई ओल्‍योदा खुल्‍द, “आव ङापाँ जे भरिए थैद चावस थ·रैच्‍यो,
MAR 7:15 पाखानी क्‍याँल पसिज़्‍यावए मिँलाई माछैंव माजैधुव। मिँलाई माछैंव जैज़्याव ते क्याँनी पुलुस्‍ज़्‍यावए ची।
MAR 7:16 [आव पाँ जोए थैन्‍या उयुँ लिज़्‍या, चावस ओथैवक,”] है लिद यासथैक्‍यो।
MAR 7:17 हाःत ज़ येसुए नो माहोल्‍यारालाई ख्‍यानैद तोबो झ़िमल उपसिउत उसिसराए नो पाँए ओअर्थ सुधिकेर।
MAR 7:18 येसुए, “जे मनी अझ ङापाँ जेमातीधुज़्‍याव रो? याःनी पसिज़्‍याव ज़्यावए मिँलाई माबले·व लिन्‍या जेमासैंए रो?
MAR 7:19 नो ज़्‍याव युँदा माबाए, अइज़ फूल पसिद छींनी पुलुस्‍द बाज़्‍या।” नो पाँनी ज़ येसुए ज़्‍याव भरी चोखो ज़ थ·रैक्‍यो।
MAR 7:20 फरी, “मिँलाई बले·ज़्‍याव ते युँल सिर्जैद याःनी पुलुसज़्‍याव पाँए ची।
MAR 7:21 युँलाव माचाहिउ पाँर आवर ज़ — माचाव चेतैन्‍या, पातर्‍या पातर्नी जैसिन्‍या, कुन्‍या, मिँ सैःन्‍या, अर्काए ओज्‍याए ल्‍योदा बान्‍या,
MAR 7:22 अर्काए उमीं कोसै रँःन्‍या, माचाव य़ेन दान्‍या, धुत पाँन्‍या, जोत ब युँ मानैधुन्‍या, मी तून्‍या, अर्काए उमिन बले·द्यान्‍या, स॰द सघ्‍योःसिन्या, उर्ती माल्‍यो जैसिन्‍या,
MAR 7:23 आवर ज़ युँनी पुलुस्‍द मिँलाई बले·न्‍या पाँर।”
MAR 7:24 येसु ननी पुलुस्‍द तुरोस स़ोनो सीदोन खन्‍द त॰दा बाके। नल तोबो झ़िमल पसिद, ‘आल ङाहुव सुए ज़ यामासैंकिन ताखेहो,’ है उलिज़्‍यावत ब माम़ोंसिधुके।
MAR 7:25 बेहार ज़ तोबो मेंमाए, ‘येसु हुके दी’ लिन्‍या थैद ओल्‍योक हुद उखँत फुलुप्‍सिके। नोए मेंमा ओज़ालाई माचाव पुरूसए क्‍योःद ओनैज़्‍याव।
MAR 7:26 ओल मेंमा फरी ग्रीक जातलाव ओल्‍यो, उझ़िम सिरिया फोनिके खन्‍दल ओल्‍यो। नोए, “अ प्रभु, ङाज़ाए ओक्‍याँताव माचाव पुरूस पले·द एके,” लिद बिन्‍ती चरैःव ज़ ओनैज़्‍याव।
MAR 7:27 येसुए फरी, “ल़ुज़ाराए याज़्‍युज़्‍याव ज़्‍याव नैंद काःरालाई यान्‍या माताए। ङ़ादा ल़ुज़ार घवाँःरक,” है ओदोक ते,
MAR 7:28 नो मेंमाए, “हैज़ प्रभु, हैदी ब ल़ुज़ाराए यासय़ेलो ज़्‍यावर तेबल खँकाव काःराए मनी ज़्‍याव दैर सानी,” है ओदोक ते,
MAR 7:29 येसुए, “आव नपाँए ज़ नज़ाए ओक्‍याँताव माचाव पुरूस पुलुस्‍द बाधुके, नँ नझ़िमदा चावस बान्‍के,” है ओदोक ते,
MAR 7:30 नो मेंमा उझ़िमक ओबाक ओज़ालाई तैंत घ्याँसिद उलिज़्‍याव रँःक्‍यो। माचाव पुरूस ओबाधुव ओल्‍यो।
MAR 7:31 नकिन येसु तुरोसनी पुलुस्‍द सीदोन स़ोनो देकापोलिसलाव घ्याँ गालील दह छ्योक बाके।
MAR 7:32 नलाव मिँराए येसुए ल्‍योक तोबो ओर्ना माथासो स़ोनो मापाँधुन्‍यालाई रैद, “आवए ओक्‍याँत नकुइ नैद सगराँके,” है यादोक ते,
MAR 7:33 येसुए नोलाई माहोल्‍यारानी अछतङ लाँद ओआङुला ओर्ना कुँल झाःद्याद ओसेत उत़िल झाःद्याद,
MAR 7:34 नमदा परमेस्‍वरए ल्‍योदा भाल्‍सिद, ख्‍यो·व स॰ दोहोरैद नो मिँलाई, “इफ्‍फाता,” है दोक्‍यो। (इफ्‍फाताए ओअर्थ — नर्ना ओफैसिक।)
MAR 7:35 हो प़ाइँना ज़ नो मिँए ओर्ना फैसिद थैन्‍या ताके। ओसेर ब पलास्‍सिद चावस ज़ पाँके।
MAR 7:36 हाःत ज़ येसुए नक लिज़्‍यावरालाई, “आव ङादोव य़ेन सुलाई ज़ है तारादोच्‍यो,” है लिद याअर्थैक्‍यो। खाली नोराए खा ओराअर्थैव हाःज़ नो पाँलाई फींजैद यारासथैकेर।
MAR 7:37 नोर बनै अचम्‍ब ताद, “काता आः चाव य़ेन ओदोज़्‍याव। यार्ना माथासोरालाई ब थैन्‍या याजैज़्‍याव, मापाँधुन्‍यारालाई ब पाँधुन्‍या याजैज़्‍याव,” है यालिज़्‍याव।
MAR 8:1 फरी तछा येसुए ल्‍योक मिँर बनै माहोल्‍या दुप्‍सिहुद यालिज़्‍याव। यास ज़्‍यान्‍यार प़ाइँ खेम्‍द उलिज़्‍याव। है जैद येसुए उसिसरालाई ओल्‍योदा खुल्‍द,
MAR 8:2 “आव माहोल्‍यार रँःद ङायुँ नाज़्‍या। आवर ङास याल्‍यो आछिम स़ोंला ताकेर। याज़्‍याव भरी ब खेम्‍के।
MAR 8:3 आवरालाई अइज़ झ़िमदा परींकिन येमत याकरेए माधुन्‍या लेर। आवर ख्‍वा ख्‍वार ते तादानी हुवर लिज़्‍यार,” है ओरादोक ते,
MAR 8:4 उसिसराए, “इताव साइँसुइँवक आःकाव मिँरालाई कातानी ज़्‍यावर रैद सव़ाँन्‍या की?” है यादोक ते,
MAR 8:5 येसुए, “जेस भरेस खागोता उलिज़्‍याव?” है ओरादोक ते, “भरेस सात गोता लिज़्‍या,” है दोकेर।
MAR 8:6 नकिन येसुए नो माहोल्‍यारालाई नामक च़ुसिउ परींद नो सात गोता भरेस उकुइत रैद, धन्‍याबाद चरैःद नो भरेसलाई केःद उसिसरालाई नो माहोल्‍यारालाई भाःद्याव ओरापरींक ते, भाःद याराएकेर।
MAR 8:7 नोरास ङाँःजुँर ब ऩेबरेंवा यालिज़्‍याव। येसुए नोरालाई मनी उकुइत रैद, असिक ऩिद माहोल्‍याराए याङ़ाक याङ़ाक भाःद्याव यापरींक्‍यो।
MAR 8:8 नोराए याफू तसी ज़्‍याद यासय़ेलो यादुप्‍क सात झुर्नु ताके।
MAR 8:9 नो भरेस ज़्‍युज़्‍यावर चार हजारा याल्‍यो। नकिन येसुए नो माहोल्‍यारालाई याझ़िमदा याझ़िमदा यापरींक्‍यो।
MAR 8:10 ओल बेहार ज़ उसिसरास दोङ्गाल पसिद दलमनुथा खन्‍द जीदा बाकेर।
MAR 8:11 नल फरिसीर येसुलाई जाँचिन्‍याए जूँनी ओल्‍योक हुद खर्लेसिद, “गेलाई स्‍वर्गताव नसरेस तोबो सतैंद्याव ताके,” है यादोक ते,
MAR 8:12 येसु ओनालर क़्याद, “आव जुकलाव मिँराए काराव सरेस वाज़ याखिम्‍ज़्‍याव? ङा साचो है ङादाचिज़्‍या, आव जुकलाव मिँराए ङासरेस काता ज़ दैन्‍या मालेर,” है दाद,
MAR 8:13 नोरालाई ख्‍यानैद उसिसरास दोङ्गाल पसिद दह होफत बाकेर।
MAR 8:14 येसुए उसिसराए यास भरेस लाँन्‍या मेंःद यानैज़्‍याव। दोङ्गाल नोरास भरेस तोबो वाज़ उलिज़्‍याव।
MAR 8:15 याबाज़्‍याक येसुए नोरालाई सम्‍जैद, “जे हेरोद राजा स़ोनो फरिसीराए भरेसल याझाःज़्याव वासःनी जोगोइसिद लिच्‍यो,” है ओरादोक ते,
MAR 8:16 नोर, “भरेस रैन्‍या गेमेंःवए नै ओदासिज़्याव ताक्‍या,” है लिद या याल यापाँनाज़्याव
MAR 8:17 येसुए थैद, “काराव ङापाँलाई झन भरेस त॰दा जेथ·रैनाज़्‍याव? आःपै जेमातीधुइ रो? काता जेयुँ आः खाव उलिज़्‍याव?
MAR 8:18 जेमी लिज़्‍यावत ब जेमारँःधुज़्‍याव रो? जेर्ना लिज़्‍यावत ब जेमाथैधुज़्‍याव रो? काता घरी जेमेंःधुव,
MAR 8:19 पाँच गोता भरेसए पाँच हजारए याफू तसी ज़्‍यादकाव यासय़ेलो जेदुप्‍क खाझुर्नु ओताव?” है ओरादोक ते, “बाह्र झुर्नु ताके,” है दोकेर।
MAR 8:20 “फरी सात गोता भरेसए चार हजार मिँए याफू तसी ज़्‍यादकाव यासय़ेलो जेदुप्‍क खाझुर्नु ओताव?” है ओरादोक ते, “सात झुर्नु ताके,” है दोकेर।
MAR 8:21 येसुए फरी, “कै जैद आःपै जेमाबुझिधुज़्‍याव?” है यादोक्‍यो।
MAR 8:22 नकिन येसु उसिसरास बेथसेदा नाखारल बाकेर। नक मिँराए तोबो उमी मारैंःवलाई ओल्‍योक रैद, “आवलाई छुद सगराँके,” है यादोक ते,
MAR 8:23 येसुए नो उमी मारैंःवलाई उकुइनी क्‍योःद दोरैद नाखारनी अछतङ लाँद, उमीत त़िल्‍द्याद ओक्‍याँत उकुइ नैद्याद, “कातार नमारँःज़्‍या?” है ओदोक ते,
MAR 8:24 नोए आदा होदा भाल्‍सिद, “रँःन्‍या ते ङारँःज़्‍या, खाली मिँर ते सींर आदा होदा याबाज़्‍याव स्‍यासो ङारारँःज़्‍या,” है दोक्‍यो।
MAR 8:25 हाःत ज़ येसुए फरी नोए उमीत उकुइ नैद ओएक ते नो मिँए लँ लँ चिऊद प़ाइँ ज़ छर्लङ्ग रँःक्‍यो।
MAR 8:26 है जैद येसुए नोलाई, “नाखारल मापसिद ज़ नझ़िमदा बान्‍के,” है दाद परींक्‍यो।
MAR 8:27 नकिन येसु उसिसरास कैसरिया फिलिप्‍पी सहर लापजीकाव नाखार नाखार याबाज़्‍याक येमत येसुए उसिसरालाई, “ङालाई मिँराए सु है दाँज़्‍यार?” है ओरादोक ते,
MAR 8:28 उसिसराए, “ख्‍वाराए ऱील सछैंज़्‍याव यूहन्‍ना है दींज़्‍यार, ख्‍वाराए एलिया है दींज़्‍यार, ख्‍वाराए फरी काताकाव अगमबक्ता ताक्‍या है दींज़्‍यार,” है यादोक ते,
MAR 8:29 येसुए, “जे ङालाई सु है जेदाँज़्‍या नी?” है ओरादोक ते, पत्रुसए, “नँ ख्रीस ज़,” है दोक्‍यो।
MAR 8:30 नकिन येसुए नोरालाई, “ङा हो ज़ लिद सुलाई ज़ है तारादोच्‍यो,” है दाद याअर्थैक्‍यो।
MAR 8:31 हो बेलाक येसुए, “ङा मिँ मिन्‍सिउए कुधु दुखर दैद आव गेदेसलाव स़ेरर, मुख्‍या पुजारीर स़ोनो सास्‍त्रीराए ल्‍योनी सोसी ऩिन्‍या ङातारिज़्‍या। नोराए यासैःनाव स़ोंलात सिउनी सैंसिद ङासोरिज़्‍या,” है दाद,
MAR 8:32 उसिसरालाई ओक्‍याँत हुरिज़्‍याव दुखर ङ़ादाकिन ज़ छर्लङ्ग सतैंद याएक्‍यो। हाःत ज़ पत्रुसए येसुलाई तँदा लाँद उसिङार्क ते,
MAR 8:33 येसु उछींदा फर्किद उसिस भरिरालाई चिऊद पत्रुसलाई, “ए सैतान, ङाङ़ाकिन पुलुस्‍निके। नँ नयुँ परमेस्‍वरए ल्‍योदा माझाःद मिँराए याझाःज़्‍यावदा नझाःके,” है दोक्‍यो।
MAR 8:34 नकिन येसुए उसिसर स़ोनो नक लिज़्याव माहोल्‍यारालाई ओल्‍योक खुल्‍द प़ाइँलाई ज़, “जोए ङास हुन्‍या युँ दोज़्‍याव, होए उजिउए मया मादाद क्रुसत सिन्‍या मिताव दुखर सहिद ङाछींत उहुक।
MAR 8:35 जोए आव उजिउत ओललाई तान्‍या वाज़ खिम्‍ज़्याव, होए उजुनीलाई सम़ैज़्‍याव। फरी जोए आव उजिउत उजिउए मया मादाद ङाजूँनी स़ोनो चाव थाए उजूँनी दोज़्याव, होए जुनी दैरिज़्‍याव।
MAR 8:36 जोए आव मानुवात लिज़्‍याव भरी दुप्‍द उजुनीलाई ओसम़ैकिन नोलाई काता फाइदा ची तायादा?
MAR 8:37 नोए उजुनीए ओपोल काता यान्‍या?
MAR 8:38 जो आव पापी जुकलाव परमेस्‍वरकिन तँदाङाव मिँराए खार्ल ङा स़ोनो ङापाँत ओलाज हुज़्‍या, ङा मिँ मिन्‍सिउ ब फरी छैंव ङाचाकर्‍यारास ङाबाबुए ओज़गै मगैरास ङाहुक ङा ब नोलाई रँःद ङालाज हुन्‍या ले,” है लिद यासथैक्‍यो।
MAR 9:1 फरी, “ङा जेलाई साचो है ङादाचिज़्‍या, आकाव च्‍याँःसिद लिज़्‍यावरानी जे ख्‍वा ख्‍वाराए परमेस्‍वरए ओराज्‍या ओसक्तीरास उहुज़्‍याव जेमारँःवा पै सिन्‍या जेमाले,” है यादोक्‍यो।
MAR 9:2 नकिन छ दिनत येसुए पत्रुस, याकूब स़ोनो यूहन्‍नारालाई याबातङ तोबो झेंःव गोंत ओलस यालाँक्‍यो। नक याकेसोत येसुए ओक्‍याँर त़ोसिद,
MAR 9:3 ओक्‍वार बनै मी झीःन्‍या, तक तकौ ताके। आव मानुवात सुए ज़ जती छेदी ब निताव तक तकौ माजैधुर।
MAR 9:4 नाःत ज़ एलिया स़ोनो मोसानी नक ज़ सरैंःसिद येसुस पाँकिनी।
MAR 9:5 नो रँःद पत्रुसए येसुलाई, “गुर्बा, गे आक लिन्‍या बनै चाव ताके। गे जेलाई स़ोम्‍लो पाल तङ्गैद गेयाच्‍यो, तोबो नँलाई, तोबो मोसालाई, तोबो एलियालाई,” है दोक्‍यो।
MAR 9:6 बनै याछे·वए पत्रुसए काता पाँन्‍या लिन्‍या ब ओमासैंज़्‍याव।
MAR 9:7 नाःत ज़ बादल तोबो हुद नोरालाई याकप्‍क्‍यो। नो बादल जींनी तोबो गा अइ लिद थास्‍के, “आव ङायुँलाव ङाज़ा ज़, जे आवए ओपाँ थैच्‍यो,”
MAR 9:8 है उलिज़्याव याथैव प़ाइँना नोर आदा होदा याभाल्‍सिक उपुर सु ज़ यामाल्‍यो, येसुलाई वाज़ रँःकेर।
MAR 9:9 नो गोंतिन याझरिज़्‍याक येसुए नोरालाई, “आव जेरँःव भरी ङा मिँ मिन्‍सिउ सिद ङामासैंसिवा पै सुलाई ज़ है तारादोच्‍यो,” है ओरादोक ते,
MAR 9:10 नोराए सुलाई ज़ है मादाद या याल वाज़, “आव सिद सैंसिन्‍या है उलिज़्‍याव पाँ काता ओताव?” है यालिज़्‍याव।
MAR 9:11 नोराए येसुलाई फरी, “सास्‍त्रीराए काराव ख्रीसकिन ङ़ादा एलिया हुन्‍या ले है यालिज़्‍याव?” है यादोक ते,
MAR 9:12 येसुए, “हैज़, एलिया ङ़ादा ज़ हुद प़ाइँलाई ताव परिन्‍या मिताव जैन्‍या ले। हैदी मनी आव ब सर्सिउ लिज़्‍या — हो बेलाकाव मिँराए मिँ मिन्‍सिउलाई दुखर याद बीज्‍यात जैन्‍या लेर।
MAR 9:13 खाली ङा जेलाई आव मनी है ङादाचिज़्‍या, एलिया ते ङ़ादा ज़ हुधुके। आलाव मिँराए झन किताव सर्सिउ ओल्‍यो हिताव ज़ जैद नोलाई यामन लागिउ ज़ जैकेर।”
MAR 9:14 येसु नो स़ोम्‍लोरास उपुर्काव उसिसराए ल्‍योक याकेस्‍नाक बनै माहोल्‍या मिँराए याखार्ल घिरिद सास्‍त्रीर नोरास याखर्लेसिज़्‍याव यारारँःकेर।
MAR 9:15 हाःत ज़ नो माहोल्‍याराए येसु उहुज़्‍याव रँःद नोर बनै अचम्‍ब ताद ओल्‍योक धोंःनाद धो यादोक,
MAR 9:16 येसुए नोरालाई, “काताए जूँनी जेखर्लेसिज़्‍याव?” है ओरादोक ते,
MAR 9:17 माहोल्‍यारानी तोबोए, “गुर्बा, ङा नल्‍योक ङाज़ालाई रैद ङानै। नोलाई माचाव पुरूसए लाता जैद नैव।
MAR 9:18 नो पुरूस ओक्‍याँत उहुव बेलाक झन नामक पछारिसिद, ओहार सजम्‍द, ओयाःनी फुइ गज्‍या पले·द बनै ख्‍याङग्‍याँ खेङ्गे जैज़्‍याव। ङा नसिसरालाई, ‘माचाव पुरूसलाई पले·दिचिके,’ है ङारादोक ते मापले·धुकेर,” है दोक्‍यो।
MAR 9:19 हाःत ज़ येसुए, “ए जेयुँ माहुबोर, ङा जेस खा ची ङालिरिज़्‍याव, खा ङासहिचिके! नोलाई ङाल्‍योक रैचिके,” है ओरादोक ते,
MAR 9:20 नो छोर्‍यालाई ओल्‍योक रैदिकेर। हाःत ज़ नो पुरूसए येसुलाई उरँःव प़ाइँना ज़ नो छोर्‍यालाई बेहार ज़ खागरा खगर॰ जैक्‍यो। नो छोर्‍या नक ज़ गुधु धलिद फलीं फलीं पल्‍तैसिद ओयाःनी फुइ गज्‍या पले·क्‍यो।
MAR 9:21 येसुए छोर्‍याए ओबाबुलाई, “आव खर्किन अइ ओताव?” है ओदोक ते, ओबाबुए, “ज़िम्‍ज़ाकिन ज़,” है दोक्‍यो।
MAR 9:22 फरी, “आव ङाज़ालाई सैःन्‍याए जूँनी कैताक मेंःल ब ख्‍याज़्‍याव, कैताक ऱील ब ख्‍याज़्‍याव। नँ कातार नदोधुकिन गेल्‍योदा नयुँ नाद सगराँद्याव ताके,” है ओदोक ते,
MAR 9:23 येसुए, “नँ कै जैद ङालाई, ‘कातार नदोधुकिन,’ है नदाँज़्‍याव? उयुँ हुबोलाई मातान्‍या काता ज़ माले,” है ओदोक ते,
MAR 9:24 नो छोर्‍याए ओबाबुए, “अ प्रभु, ङायुँ हुबो ज़ लिज़्‍या, माहुबो ङायुँलाई सुहुप्‍द्याँके,” है लिद बनै चोइस ज़ है दोक्‍यो।
MAR 9:25 हाःत ज़ येसुए मिँर बनै काला मुलु याधोंःहुज़्‍याव रँःद नो माचाव पुरूसलाई सिङार्द, “ए लाता भैरा जैन्‍या पुरूस, नोए ओक्‍याँतिन पुलुस्‍द बान्‍के। फरी नल खर्क ज़ तापसिनी,” है ओदोव प़ाइँना ज़,
MAR 9:26 नो माचाव पुरूस बनै चिर चिर क़िद नो छोर्‍यालाई कारापनी कुरूप जैद पुलुस्‍द बाके। हाःत ज़ नो छोर्‍या चबनै सिउ स्‍यासो ओतावए नो भाल्‍सिज़्‍यावराए, “उसिउ ची ओल्‍यो,” है लिकेर।
MAR 9:27 खाली येसुए नोलाई उकुइनी क्‍योःद पोंला ओसोचोइक ते थर च्‍याँःसिके।
MAR 9:28 छींनी येसु उसिसरास झ़िमल याबातङ यातावत उसिसराए, “गे कै जैद नो माचाव पुरूसलाई गेमापले·धुव?” है यादोक ते,
MAR 9:29 येसुए, “इताव पुरूसलाई पले·न्‍या ते मापोंखारिवा पै मापले·सिधुइ,” है यादोक्‍यो।
MAR 9:30 येसु उसिसरास ननी पुलुस्‍द गालील खन्‍दलाव घ्याँ बाकेर। ‘आल गेलिज़्‍याव सुए ज़ तासैंरक’ है उलिज़्‍याव,
MAR 9:31 काराव ल्‍यो ताकिन उसिसरालाई वाज़ पैन्‍या ओपैंज़्याव। नोए, “ङा मिँ मिन्‍सिउलाई तछा मिँराए याकुइत सूँपिनारिज़्‍यार। नोराए ङालाई सैःनारिज़्‍यार। हैदी ब ङासिउ स़ोंलात सैंसिद ङासोरिज़्‍या,” है यादोक्‍यो।
MAR 9:32 नोराए नो पाँ यामाबुझिदी ब येसुलाई सुधिन्‍या छे·केर।
MAR 9:33 नकिन येसु उसिसरास कफर्नहुमल बाकेर। झ़िमल यापसिउत येसुए उसिसरालाई, “येमत जे काता खास खासनी खुस खुस जेपाँहुज़्‍याव?” है ओरादोक ते,
MAR 9:34 नोराए सुए ज़ घाइ मादोकेर, काराव ल्‍यो ताकिन नोर येमत, “गे सु घेप्‍पा गेलिज़्‍याव,” लिद याखर्लेसिहुज़्‍याव।
MAR 9:35 है जैद येसु नक च़ुसिद बाह्र जना उसिसरालाई ओल्‍योक खुल्‍द, “जो प़ाइँरानी ङ़ात जैसिउ पैंज़्‍याव, हो प़ाइँराए याधूँलाव जैसिद प़ाइँए यासेवा दान्‍या ओजैसिक,” है दाद,
MAR 9:36 तोबो ज़िम्‍ज़ा ल़ुज़ालाई रैद याङ़ाक सच्‍याँद, नो ल़ुज़ालाई ओघोइँल छींद,
MAR 9:37 “जोए ङामिनत आव मिताव ज़िम्‍ज़ारालाई यासुम्‍ज़्‍याव, होए ङालाई ब सुम्‍नाज़्याव। जोए ङालाई सुम्‍नाज़्‍याव, होए ङालाई वाज़ माःक, ङालाई परींज़्‍यावलाई ब सुम्‍ज़्‍याव,” है यादोक्‍यो।
MAR 9:38 यूहन्‍नाए, “गुर्बा, तोबोए नमिननी माचाव पुरूसर ओरापले·ज़्‍याव गेरँःके। नो गेस ओमाल्‍योए पले·व गेमाएके,” है ओदोक ते,
MAR 9:39 येसुए, “नोलाई तावैंच्‍यो, जोए ङामिननी सक्तीलाव य़ेन दोज़्‍याव, होए सिती मिती ङामिन बले·द मायाँव।
MAR 9:40 जो गेकिन तँदा माजैसिए, हो गेस ज़ लिज़्‍या।
MAR 9:41 ङा जेलाई साचो है ङादाचिज़्‍या, जोए जेलाई ख्रीसए उमींर जेल्‍यो लिद सरेस्‍द ङामिननी तुखुरी ऱी वाज़ ओयाचिदी ब नोए उइनाम जुनी ब दैन्‍या ज़ ले।”
MAR 9:42 फरी, “जोए आव मिताव ङालाई यायुँ हुबो ज़िम्‍ज़ारालाई पापल ओरापारैकिन, नितावलाई ते बुरू ओधेंल राँथै सुर्द्याद समुन्‍द्रल ख्‍यान्‍या पाथ लिज़्‍या।
MAR 9:43 फरी नकुइए माचावल ओपारैनिकिन नोलाई च़म्के। नो नकुइए नर्गलाव माजिप्‍तिन्‍या मेंःल ख्‍याव ओदोज़्‍याव देखा बुरू अजम्‍बरी जुनील थूँद्यासो पसिन्‍या पाथ लिज़्‍या।
MAR 9:44 [नर्गलाव ऱूइराए याभोगोन ब खर्क ज़ माखेमे, मेंः ब खर्क ज़ माजिप्‍तिए।]
MAR 9:45 फरी नखँए माचावल ओपारैनिकिन नोलाई ब च़म्के। नो नखँए नर्गल ख्‍याव ओदोज़्‍याव देखा बुरू अजम्‍बरी जुनील थूँद्यासो पसिन्‍या पाथ लिज़्‍या।
MAR 9:46 [नर्गलाव ऱूइराए याभोगोन ब खर्क ज़ माखेमे, मेंः ब खर्क ज़ माजिप्‍तिए।]
MAR 9:47 हो मिताव ज़ नमीए माचावल ओपारैनिकिन, नो नमीलाई कोला·द ख्‍याके। नो नमीए नर्गल ख्‍याव ओदोज़्‍याव देखा बुरू परमेस्‍वरए ओराज्‍याल काना ताद पसिन्‍या पाथ लिज़्‍या।
MAR 9:48 नर्गलाव ऱूइराए याभोगोन ब खर्क ज़ माखेमे, मेंः ब खर्क ज़ माजिप्‍तिए।
MAR 9:49 “मिँ भरी प़ाइँ ज़ मेंःनी सापी दार मिताव तान्‍या लेर।
MAR 9:50 सापी चाव ज़ लिज़्‍या, खाली ओदार ओमालिकिन नोलाई कै जैद ची ओदार ल्‍यो जैन्‍या? है जैद जे ब सापी मिताव ताद जे जेल खैद लिच्‍यो,” है यादोक्‍यो।
MAR 10:1 येसु ननी पुलुस्‍द यर्दन भै होफताव यहूदिया खन्‍दल बाके। नल ब मिँर बनै माहोल्‍या ओल्‍योक याहुज़्‍याव। येसुए पो पोक ओदोज़्‍याव मिताव नोरालाई मनी परमेस्‍वरए ओपाँ ओरासथैज़्‍याव।
MAR 10:2 नल फरिसीराए येसुलाई जाँचिन्‍याए जूँनी ओल्‍योक हुद, “ज्‍यालाई ऱासो दैसिए सैं मादैसिए?” है यादोक ते,
MAR 10:3 येसुए, “मोसाए ओकानुनल किताव सर्सिउ उलिज़्‍याव?” है ओरादोक ते,
MAR 10:4 नोराए, “मोसाए ओकानुननी ते ऱास्‍न्‍या कागत तोबो सर्किन ऱासो दैसिए,” है दोकेर।
MAR 10:5 येसुए फरी, “जेदिउदी ल्‍योर जेतावए ज़ मोसाए निताव कानुन सर्द ओयाचिउ।
MAR 10:6 भाःङ स्रिस्‍तील परमेस्‍वरए मिँ ओजैक खेपा स़ोनो मेंमानी निजैक्‍यो।
MAR 10:7 है जैद ज़ खेपाए ओबाबु ओआमालाई ऱास्‍द ओज्‍यास सिप ताद,
MAR 10:8 नोनी तक्‍याँ ज़ ताज़्‍यानी। हाःकिन नोनी ऩेब्‍लो माःक, तक्‍याँल गनिसिज़्‍यानी।
MAR 10:9 है जैद जोनिलाई परमेस्‍वरए जोरैद निनैव, होनिलाई मिँराए ताराभाःरक,” है यादोक्‍यो।
MAR 10:10 फरी झ़िमल उसिसराए नो पाँए उजूँनी फरी ब सुधिकेर।
MAR 10:11 है जैद येसुए, “जोए ओज्‍यालाई ऱास्‍द छुतलाई ओरैकिन नोए जारी य़ेन ज़ दोक्‍यो।
MAR 10:12 हो मिताव ज़ जो मेंमाए ओरेलाई ऱास्‍द छुतस ओरेस्‍किन हो ब हिताव ज़,” है यादोक्‍यो।
MAR 10:13 नकिन नलाव मिँराए ज़िम्‍ज़ा याज़ारालाई ‘येसुए उकुइ नैद असिक घरायोक’ लिद ओल्‍योक यारारैकेर। नो रैज़्‍यावरालाई उसिसराए सिङार्द यारावैंकेर।
MAR 10:14 येसुए निताव रँःद उसिसरालाई जाँ रसिद, “नो ज़िम्‍ज़ा ल़ुज़ारालाई तारावैंच्‍यो, ङाल्‍योदा हुव याराएचिके। परमेस्‍वरए ओराज्‍या नितावराए जूँनी ज़ लिज़्‍या।
MAR 10:15 ङा साचो है ङादाचिज़्‍या, जोर आव ल़ुज़ाराए माँःती परमेस्‍वरए ओराज्‍याल पसिन्‍या युँ मादोर, नोर खर्क ज़ पसिउ दैन्‍या मालेर,” है दाद,
MAR 10:16 नो ल़ुज़ारालाई ओघोइँल छींद याक्‍याँत उकुइ नैद असिक याएक्‍यो।
MAR 10:17 येसु ननी पुलुस्‍द येमत ओबाज़्‍याक तोबो मिँ धोंःहुद ओङ़ाक फुलुप्‍सिद, “अ धर्मी गुर्बा, ङा अजम्‍बरी जुनी दैन्‍या किताव दान्‍या?” है ओदोक ते,
MAR 10:18 येसुए, “ङालाई काराव धर्मी है नदाँज़्‍याव? परमेस्‍वरकिन धर्मी सु ज़ माले।
MAR 10:19 धर्मसास्त्रलाव सर्सिउ दान्‍या मादान्‍या य़ेन नँ ज़ नसैंज़्‍याखेहो — मिँ मासैःन्‍या, अर्काए ओज्‍याए ल्‍योदा माबान्‍या, माकुन्‍या, धुत गोहाई मायान्‍या, धुतैद माज़्‍यान्‍या, बाबु आमाए ओमान नैद्यान्‍या,” है ओदोक ते,
MAR 10:20 नोए नो पाँर थैद, “गुर्बा, आव भरी ते ज़िम्‍ज़ाकिन दाहुव ज़ ङानैज़्‍या,” है ओदोक ते,
MAR 10:21 येसुए नोलाई रँःद मया दाद, “अझ तोबो नमासयो·ताए। नँस लिज़्‍याव भरी यो·द काता ज़ माल्‍योरालाई भाःद याएकेदा, नँ स्‍वर्गताव धन दैन्‍या नले। नो य़ेन भरी दाद नँ ङाछींत हुन्‍के,”
MAR 10:22 है ओदोव भरी थैद ओङाः चुम चुमो जैद उयुँर स्‍यासे सतेद ओल्‍द बाके। नोए ओधन सम्‍पती बनै कुधु ज़ ओल्‍योए माऱास्‍धुक्‍यो।
MAR 10:23 नो ओबावत येसु उसिसराए ल्‍योदा भाल्‍सिद, “धनी मिँ परमेस्‍वरए ओराज्‍याल पसिन्‍या बनै धो ताज़्‍या,” है ओरादोक ते,
MAR 10:24 उसिसर नो पाँत बनै अचम्‍ब ताकेर। नकिन येसुए फरी, “साचो ज़ बाबुज़ार, परमेस्‍वरए ओराज्‍याल पसिन्‍या बनै धो ताज़्‍या।
MAR 10:25 गपए उकुँल ऊँत उछिरिज़्‍यावकिन धनी मिँ परमेस्‍वरए ओराज्‍याल पसिन्‍या झन धो ताज़्‍या,” है ओरादोक ते,
MAR 10:26 नोर झन ज़ अचम्‍ब ताद, “इताव ताकिन ते सुए ची अजम्‍बरी जुनी ओदैधुरिज़्‍याव?” है यादोक ते,
MAR 10:27 येसुए नोरालाई चिऊद, “मिँर यानी सु ज़ माबाँचिधुर, परमेस्‍वरनी वाज़ ताज़्‍या। परमेस्‍वरनी मातान्‍या काता ज़ माले,” है यादोक्‍यो।
MAR 10:28 हाःत ज़ पत्रुसए, “गे ते प़ाइँ ज़ ख्‍यानैद नछींत हुद गेले,” है ओदोक ते,
MAR 10:29 येसुए, “ङा जेलाई साचो है ङादाचिज़्‍या, जोए ङाजूँनी स़ोनो चाव थाए उजूँनी ओएँःर उझ़िमर, ओदाज्‍यु भाइर, ओनाना बैंनीर, ओबाबु ओआमार स़ोनो ओज़ार ऱास्‍द याख्‍यानैज़्‍याव,
MAR 10:30 होए आव उजिउत ज़ दुख दैज़्‍यावत ब एँःर झ़िमर, दाज्‍यु भाइर, नाना बैंनीर, आमार स़ोनो ज़ार सय दोबोर ब दैन्‍या ले। फरिकाव जुनील अजम्‍बरी जुनी ब दैन्‍या ले।
MAR 10:31 खाली ख्‍वा ख्‍वा ङ़ातावर छींत तारिज़्‍यार, छींतावर ङ़ात तारिज़्‍यार।”
MAR 10:32 नकिन येसु उसिसरास यरूसलेमदा याबाज़्‍याक ओल ङ़ात ओबाज़्‍याव। उसिसर अचम्‍ब ताद यालिज़्याव, उछीं उछीं हुज़्‍यावर फरी छे·द यालिज़्याव। येसुए बाह्र जना उसिसरालाई अछतङ लाँद ओललाई छींनी तान्‍या पाँ भरी है यादोक्‍यो —
MAR 10:33 “गे यरूसलेमदा गेपुलुस्‍नाज़्‍या। नल गेकेसोत ङा मिँ मिन्‍सिउलाई मुख्‍या पुजारीर स़ोनो सास्‍त्रीराए याकुइत सूँपिन्‍या लेर। नोराए ङालाई सैःन्‍या ज़ थ·रैद रोमी सरकारए उकुइत याझाःनावत,
MAR 10:34 नोराए फरी ङालाई उल्‍ली गिल्‍ली दाद, त़िल्‍द, यारीःनावत सैःन्‍या लेर। हैदी ब स़ोंलात सिउनी सैंसिद सोन्‍या ङाले,” है यादोक्‍यो।
MAR 10:35 नकिन जब्‍दियाए ओज़ानी याकूब स़ोनो यूहन्‍नानी येसुए ल्‍योक हुद, “गुर्बा, नँस जो गिन्‍ऩिज़्‍या हो ज़ नयासिने सैं है गिन्‍लिज़्‍या,” है निदोक ते,
MAR 10:36 येसुए, “ङा जिनजूँनी काता दाद्यान्‍या जिन्‍पैंज़्‍याव?” है उनिदोक ते,
MAR 10:37 नोनी फरी, “स्‍वर्गत नँस तोबो नवोर्दा, तोबो नदाबर्‍यादा च़ुसिउ गिन्‍दैक,” है दोकिनी।
MAR 10:38 येसुए फरी, “जिन आव जिन्ऩिज़्‍यावए जूँनी जिन्‍मासैंए। ङा जाँवाक धो सहिउ दुखर ङासहिरिज़्‍या। जिन जिन्‍मासहिधुरिज़्‍या नी? ऱीए ओरागदैज़्‍याव मिताव, ङा ब दुखल ङागदिरिज़्‍या। जिन जिन्‍मागदिधुरिज़्‍या नी?” है उनिदोक ते,
MAR 10:39 “गिन्‍धुया ज़,” है दोकिनी। हाःत ज़ येसुए, “हैज़, ङा ङादैरिज़्याव धो सहिउ दुखर जिन मनी दैन्‍या ज़ जिन्‍ले, दुखल ङागदिज़्याव मिताव जिन ब गदिन्‍या जिन्‍ले।
MAR 10:40 खाली ङावोर्दा ङादाबर्‍यादा च़ुसिउ यान्‍या ते ङा ङाकुइत माले। निताव दैन्‍या जोलाई यासिउ लिज़्‍या, होए उजूँनी वाज़ लिज़्‍या,” है निदोक्‍यो।
MAR 10:41 उपुर्काव दस जना उसिसराए नो पाँ थैद याकूब स़ोनो यूहन्‍नानिलाई रँःद यारिस चोके।
MAR 10:42 नाःत ज़ येसुए उसिस भरिरालाई ओल्‍योदा खुल्‍द, “जे ज़ जेसैंज़्‍याखेहो, आव मानुवाताव घेप्‍पा है यारादोज़्‍यावर याधूँलावराए ङ़ैत बनै अखत्‍यासोर ताद हाप हाप ख्‍याज़्‍यार।
MAR 10:43 जे जेल ते निताव जैसिन्‍या माताए। खाली जे ते जो स़ेर जैसिउ जेपैंज़्‍या, हो प़ाइँए यासेवा दान्‍या ओजैसिक।
MAR 10:44 स़ोनो जेनी जो घेप्‍पा जैसिउ जेपैंज़्‍या, हो प़ाइँए याबाँदा ओजैसिक।
MAR 10:45 ङा मिँ मिन्‍सिउ ब ‘ङासेवा घदोरक’ लिद ङाहुव माःक, कुधुलाई बाँचैन्‍याए जूँनी ङाजिउ झाःद यासेवा ङादोहुव ची,” है यादोक्‍यो।
MAR 10:46 नकिन येसु उसिसरास यरीहो सहरल बाकेर। छींनी ते बनै माहोल्‍यारास ननी पुलुस्‍द याबाज़्‍याक तोबो तिमैए ओज़ा बारतिमै उमी मारैंःव ऩिद ङासिज़्‍याव येमक च़ुसिद उलिज़्‍याव।
MAR 10:47 नोए ‘नासरतलाव येसु हुज़्‍या दी’ लिन्‍या थैद बनै चोइस, “अ दाऊदए ओथोलाव येसु, ङालाई नयुँ ओनाक,” है लिद उक़िज़्‍याक,
MAR 10:48 नो माहोल्‍याराए, “झ्याउँ तालिनी,” लिद सिङार्केर। नोए झन ज़ चोइस क़िद, “अ दाऊदए ओथोलाव, ङालाई नयुँ ओनाक,” है उलिक ते,
MAR 10:49 येसु नक च्‍याँःसिद, “नोलाई आदा रैचिके,” है ओरादोक ते, नो माहोल्‍याराए नो उमी मारैंःवलाई, “नयुँ सुहुप्‍द च्‍याँःसिन्‍के, प्रभुए खुल्‍निज़्‍याव,” है यादोव प़ाइँना ज़,
MAR 10:50 नो मिँ ओकाँःबुलर ह्‍या ह्‍यी ख्‍याद थर च्‍याँःसिद येसुए ल्‍योक बाके।
MAR 10:51 हाःत ज़ येसुए, “ङा नजूँनी काता दाद्यान्‍या?” है ओदोक ते, नो उमी मारैंःवए, “गुर्बा, ङा रँःधुन्या ङाताक,” है ओदोक ते,
MAR 10:52 येसुए, “बान्‍के, नयुँ उहुबोए ज़ नगराँके,” है ओदोव प़ाइँना नो मिँ रँःधुन्या ताद येमत येसुए उछीं उछीं ज़ बाके।
MAR 11:1 येसु उसिसरास यरूसलेम छ्योकाव जैतून दाँदाकिन जाँ होकसैकाव बेथफागे स़ोनो बेथानिया नाखार याकेस्‍नावत येसुए ऩेब्‍लो उसिसनिलाई अइ लिद ङ़ादा निपरींक्‍यो,
MAR 11:2 “जिन आव गेङ़ाकाव नाखारल बाचिन्‍केदा, नल जिन्‍पसिउ प़ाइँना तोबो आःपै सुए ज़ यामाचेप्‍ताव बछेरा दैन्‍या जिन्‍ले। नोलाई पला·द रैचिन्‍के।
MAR 11:3 सुवाराए, ‘काराव पला·द जिन्‍लाँज़्‍याव?’ है यादाचिन्‍किन, ‘गिनप्रभुलाई चाहिज़्‍या, बेहार ज़ फर्कैद याचिवा दी,’ है यारादोचिन,” है दाद, नोनिलाई निपरींक्‍यो।
MAR 11:4 है जैद नोनी नाखारल बाद येसुए है उनिदोव मिताव ज़ बछेरालाई येमक, झ़िम ङ़ाकाव साँबिलाक सुर्सिउ दैकिनी। नोलाई निपला·ज़्‍याक ज़,
MAR 11:5 नकाव च्‍याँःसिद लिज़्‍यावराए, “काराव पला·द जिन्‍लाँज़्‍याव?” है यारादोक ते,
MAR 11:6 नोनी येसुए उनिपैव मिताव ज़ है निरादोक ते भैंःद याराएकेर।
MAR 11:7 है जैद नोनी नो बछेरालाई येसुए ल्‍योक लाँद याक्‍वार ओतर्त याझाःवत येसुए नोलाई चेप्‍क्‍यो।
MAR 11:8 नकाव लिज़्‍याव मिँराए याक्‍वार येमल तैंदिकेर। ख्‍वाराए फरी पाखाजीलाव स्‍यावलार फूइँद तैंदिकेर।
MAR 11:9 नो माहोल्‍यार ख्‍वार येसुए ओङ़ात, ख्‍वार उछींत जैसिद अइ लिद क़िए क़िए बाकेर, “होसन्‍ना! परमेस्‍वरए उमिनत हुव राजा धन्‍याकाव ओताक।
MAR 11:10 गेपुर्खा दाऊद राजाए उमिनत हुव राज्या जय जय ओताक, स्‍वर्गताव परमेस्‍वरए उमिन बनै ओघ्‍योःक।”
MAR 11:11 है जैद नोर यरूसलेमल याकेसोत येसु ध्‍यान झ़िमल पसिद आदा होदा प़ाइँदा चिऊद जाँ कुबिला ओतावए ननी पुलुस्‍द बाह्र जना उसिसरास बेथानियादा बासिनाकेर।
MAR 11:12 हो पराःती बेथानियानी पुलुस्‍द याबाज़्‍याक येसु ओकरेक,
MAR 11:13 जाँ होकसै ओख्‍यार ल़पलपौ नेभारा सीं तोबो रँःद ‘ओसैर ले सैं’ लिद उचिऊनाक ओसै तोबो ब मादैक्‍यो। सैन्‍या बेला ओमातातावए ओख्‍या वाज़ उलिज़्‍याव।
MAR 11:14 निताव रँःद येसुए नो सींलाई, “आकिनी नसै सुए ज़ ज़्‍याव तादैरक,” है ओदोज़्याव उसिसराए थैकेर।
MAR 11:15 हाःत ज़ येसु उसिसरास यरूसलेमल केस्‍केर। ओल ध्यान झ़िमल पसिद नलाव लँःज़्‍यावर यो·ज़्‍यावरालाई पले·द, पैसा त़ोज़्‍यावराए यातेबलर पल्‍तैद्याद, कुइतम यो·ज़्‍यावराए याकुर्चीर ब ख्‍याद्याद,
MAR 11:16 सुलाई ज़ यासमानरास ध्‍यान झ़िमलाव घ्याँ आदा होदा बाव मायाद,
MAR 11:17 येसुए नोरालाई, “धर्मसास्‍त्रल परमेस्‍वरए ओपाँ इताव सर्सिउ ओमालिज़्‍याव रो? ‘ङा ङाझ़िम प़ाइँ जातलाव मिँराए जूँनी पोंखारिन्‍या झ़िम जैसिउ लिज़्‍या।’ जे ते झन आवलाई चोरराए पुप मिताव जैद जेनै,” है लिद यासथैक्‍यो।
MAR 11:18 नो पाँ नलाव मुख्‍या पुजारीर स़ोनो सास्‍त्रीराए थैद यारिस चोद, ‘आवलाई कै जैद गेसैःके?’ लिद निउँ खिम्‍केर। खाली माहोल्‍या भरी येसुए ओपाँत बनै अचम्‍ब ताद यालिज़्‍यावए नो सैःव पैंज़्‍यावर येसुलाई रँःद याछे·ज़्‍याव।
MAR 11:19 ऱिमदा ऱिमदा येसु उसिसरास सहरनी पुलुस्‍द बाकेर।
MAR 11:20 हो पराःती छकाल्‍न्‍या येसु उसिसरास नो नेभारा सीं लिज़्‍याव येमलाव घ्याँ याबाज़्‍याक नो सीं ओजरानी थँद उलिज़्‍याव रँःकेर।
MAR 11:21 पत्रुसए नो ङ़ादाङाव चेतैद, “गुर्बा चिऊसाँकी, सराप नयो नेभारा सीं ते उथँव ची ओल्‍यो,” है ओदोक ते,
MAR 11:22 येसुए उसिसरालाई, “परमेस्‍वरए ल्‍योदा जेयुँ उहुप्‍क।
MAR 11:23 ङा जेलाई साचो है ङादाचिज़्‍या, जोए उयुँ आदा होदा माजैद, ‘जुनी ब ङादैया ज़’ लिद उयुँ उहुप्‍किन, तोबो हाँलाई, ‘नँ नतिन भोस्‍द समुन्‍द्रल ख्‍यासिन्‍के,’ है ओदोकिन, नो हैज़ तान्‍या ले।
MAR 11:24 है जैद ङा जेलाई है ङादाचिज़्‍या, जोत जेयुँ हुप्‍द ‘ङादैया ज़’ है लिद जेपोंखारिकिन नो दैन्‍या ज़ जेले।
MAR 11:25 परमेस्‍वरलाई जेपोंखारिन्‍या बेलाक सुवारास माखैव काता पाँर जेयुँल जेनैकिन, ङ़ादा होलाई ऱास्‍द बल्‍ल पोंखारिच्‍यो। हो ताकिन ची स्‍वर्गताव जेबाबुए जेलाई मनी जेदोव पाप भरी ऱास्‍न्‍या ले।
MAR 11:26 [फरी नो मिँलाई ऱासो जेमाभैंःकिन स्‍वर्गताव जेबाबुए जेलाई ब ऱास्‍न्‍या माले,”] है यादोक्‍यो।
MAR 11:27 येसु उसिसरास फरी यरूसलेमल बाद ध्‍यान झ़िमल यालिज़्‍याक नलाव मुख्‍या पुजारीर, सास्‍त्रीर स़ोनो यहूदीराए यास़ेरर येसुए ल्‍योक हुद,
MAR 11:28 “आव नदोज़्‍याव य़ेनर नँलाई सुए है उदींव, सुए हक उईंव?” है यादोक ते,
MAR 11:29 येसुए, “ङा ब जेलाई तोबो है ङादाचिदा, नोए ओजवाप जेयाँकिन ङा ब आव य़ेन दान्‍या हक सुए ओयाँव है ङादाचिया,” है दाद,
MAR 11:30 “ऱील सछैंज़्‍याव यूहन्‍नाए ओय़ेन परमेस्‍वरए ल्‍योनी ताव सैं मिँराए ल्‍योनी ताव? है दाँचिके,” है ओरादोक ते,
MAR 11:31 नोर या याल, “ ‘यूहन्‍नाए ओय़ेन परमेस्‍वरनी ताव’ है गेद्या गेलिकिन, ‘हुकी काराव यूहन्‍नाए ओपाँ जेमाभैंःव?’ है दान्‍या ले।
MAR 11:32 फरी ‘मिँनी’ है गेद्या गेलिकिन मिँराए ल्‍योनी ओछ्यास लिज़्‍या,” है लिकेर। मिँ भरिए यूहन्‍नालाई अगमबक्ता ज़ है लिद थ·रैद यानैज़्यावए छे·द नै यालिज़्याव।
MAR 11:33 है जैद नोराए येसुलाई, “गेमासैंए,” है दोकेर। हाःत ज़ येसुए मनी, “हो ची ताकिन्‍दा ङालाई आव य़ेन दान्‍या हक सुए ओयाँव ङा ब है ङामादाच्‍यो,” है यादोक्‍यो।
MAR 12:1 येसुए घर्ती झाःद अइ लिद यासथैक्‍यो, “तोबो मिँए ओएँः भरिल जोम्‍परसै झाःद, प़ाइँनी भार्नाए घिरिद, खादर घोद जोम्‍परसै पीन्‍या कोलो तोबो झाःद, मिँ लिन्‍या खोपोरा ब तोबो जैद, नो एँःलाई अधियाल याद, ओल तोबो तादा देसङ लिनाके दी।
MAR 12:2 नलाव जोम्‍परसैर किन्‍या बेला ओतावत तोबो ओय़ेन दाज़्‍यावलाई उजुँ भरी च़ानाव परींक्‍यो दी।
MAR 12:3 नो अधिया कमैज़्‍यावराए झन नोलाई क्‍योःद प़ोद रितो ज़ खेपैकेर दी।
MAR 12:4 फरी छींनी छुत ओय़ेन दाज़्‍यावलाई उपरींक नोलाई मनी ओङ़ै पा·द्याद बीज्‍यात जैकेर दी।
MAR 12:5 छींनी फरी तोबोलाई उपरींक नोलाई ते झन सैःकेर दी। हिताव ज़ छुत ओरापरींवर ब ख्‍वारालाई याराप़ोकेर दी, ख्‍वारालाई यारासैःकेर दी।
MAR 12:6 “ओमापरींव जम्‍मा तोबो बनै उयुँलाव ओज़ा वाज़ रहिके दी। है जैद एँःए ओर्गेए, ‘आवलाई ताकिन ओमान नैदिर सैं’ लिद प़ाइँरानी छींनी नो ओज़ालाई ब परींक्‍यो दी।
MAR 12:7 खाली नो ओज़ा उहुज़्‍याव रँःद नो अधिया कमैज़्‍यावर झन या या पाँसिद, ‘आव ते एँः दैन्‍या मिँ ची, आवलाई गेसैःकिन आव एँः गेमीं ज़ तान्‍या ले,’ लिद,
MAR 12:8 नोलाई क्‍योःद सैःद पाखाङ ख्‍याकेर दी।”
MAR 12:9 नकिन येसुए नो मुख्‍या पुजारीर स़ोनो सास्‍त्रीरालाई, “नो एँःए ओर्गेए अधिया कमैज़्‍यावरालाई कै याजैवके लिक ते, नोर प़ाइँलाई ज़ सैःद नो एँः छुतरालाई यान्‍या ले,” है दाद,
MAR 12:10 येसुए नोरालाई फरी, “जे आव धर्मसास्‍त्रलाव पाँ जेप़रिखेहो, ‘भुलीराए कान्‍ल ज़ माज़्‍यासे लिद याख्‍याव लुँ नो ज़ झन भुयाँरलाव लुँ ताके।
MAR 12:11 आव ओल परमेस्‍वरनी ताव पाँर ज़, इताव रँःद गे अचम्‍ब गेताज़्‍या।’ ”
MAR 12:12 नकिन नो मुख्‍या पुजारीर स़ोनो सास्‍त्रीराए ‘आव घर्ती ते गेङ़ैत ज़ झाःद्यासिक्‍यो’ लिन्या सैंद येसुलाई क्‍योःव पैंकेर। खाली ओलस लिज़्‍याव माहोल्‍यारालाई रँःद छे·केर। है जैद कैज़ माजैद अइज़ बाकेर।
MAR 12:13 नोराए छींनी येसुए ओपाँ क्‍योःद्यान्‍याए जूँनी फरिसीर स़ोनो हेरोद राजासकावरालाई येसुए ल्‍योक यारापरींकेर।
MAR 12:14 नोर ओल्‍योक बाद, “गुर्बा, नँ गेस नपाँज़्याव भरी साचो वाज़ लिज़्‍या। परमेस्‍वरए ल्‍योदा बान्‍या येम ब साचोस नपैसिज़्या। मिँ रँःद ब नमादोए, सुए ल्‍योदा ब नमाजैसिए। है जैद गेलाई तोबो पाँ है दाव ताके, माहाराजालाई गे सिर्मा यान्‍या सैं मायान्‍या?
MAR 12:15 किताव दान्‍या?” है यादोक ते, येसुए नोराए याकप्‍तैं सैंद, “ङालाई काराव जेजाँचिनाज़्‍याव? पैसा तोबो रैद्याँचिकेदा, ङाचिऊरिज़्‍या,” है ओरादोक ते,
MAR 12:16 नोराए पैसा तोबो रैद याएक ते, येसुए, “आत सुए उसुरूप, सुए उमिन उलिज़्‍याव?” है ओरादोक ते, “माहाराजाए उमीं ज़,” है दोकेर।
MAR 12:17 “हो ची ताकिन्‍दा माहाराजाए उमीं भरी माहाराजालाई ज़ एच्‍यो, परमेस्‍वरए उमीं भरी परमेस्‍वरलाई ज़ एच्‍यो,” है ओरादोक ते, नोर नो पाँत बनै अचम्‍ब ताकेर।
MAR 12:18 नकिन ख्‍वा सदुकीर ब येसुए ल्‍योक पजैना हुकेर। सदुकी है यारादोज़्यावराए ‘सिउकिन सैंसिन्‍या माताए’ है यालिज़्‍याव।
MAR 12:19 है जैद नोराए, “गुर्बा, मोसाए ओकानुनल तोबो अइ लिद सर्सिउ लिज़्‍या, ‘तोबोए ज्‍या दाद ज़ार मादैद उसिकिन, ओभाइए ओदाज्‍युए ओथोर माफ्या·न्‍याए जूँनी ओमारूमलाई ओरैवक।’
MAR 12:20 है जैद तोबोए ओज़ार सात भाइ याल्‍यो। यादाज्‍युए ज्‍या दाद ज़ार मादैद ज़ सिके।
MAR 12:21 होए उधूँलावए फरी नो ओमारूमलाई रैद नो मनी ज़ार मादैद ज़ सिके। नकिन साइँला मनी हिताव ज़ ताके।
MAR 12:22 नितावनी ज़ सात भाइ भरिए ज़ नो मेंमालाई रैद ज़ार मादैद ज़ सिकेर। प़ाइँरानी छींनी नो मेंमा ब सिके।
MAR 12:23 है जैद नो मेंमा सात भाइए याज्‍या ओतावए अजम्‍बरी जुनील काताकावए याज्‍या तान्‍या?” है लिकेर।
MAR 12:24 हाःत ज़ येसुए, “जे धर्मसास्‍त्रलाव पाँ मातीद परमेस्‍वरए ओसक्ती ब जेमाथ·रैधुवए ज़ चबनै बिरैद जेनै।
MAR 12:25 सिउनी सैंसिद स्‍वर्गत बावर ते सुए ज़ ज्‍या ब मादोर, रे ब मादोर। प़ाइँ ज़ स्‍वर्गताव चाकर्‍या स्‍यासोर ताज़्‍यार।
MAR 12:26 फरी जे ‘सिउकिन सैंसिन्‍या माताए’ है ल्‍यो पैंज़्‍यावर धर्मसास्‍त्रलाव मोसाए ओसरोल झोपोरा ओचाँःज़्‍याव जेमाप़रिए रो? नो चाँःज़्‍यावनी परमेस्‍वरए ओपाँ अइ लिद हुके, ‘ङा अब्राहामए ओपरमेस्‍वर, इसहाकए ओपरमेस्‍वर स़ोनो याकूबए ओपरमेस्‍वर ज़।’
MAR 12:27 ओल ते मोरोराए यापरमेस्‍वर माःक, जींदोराए यापरमेस्‍वर ची। है जैद जे चबनै बिरैद जेनै,” है यादोक्‍यो।
MAR 12:28 येसु सदुकीरास याखर्लेसिज़्‍याव तोबो सास्‍त्रीए थैद, ‘येसुए थिक जवाप याएक्‍यो’ लिद येसुए ल्‍योक बाद, “गुर्बा, मिँए दान्‍या मादान्‍या य़ेन भरिनी प़ाइँरानी दान्‍या काताकाव उलिज़्‍याव?” है ओदोक ते,
MAR 12:29 येसुए, “सर्सिउ भरिनी प़ाइँरानी दान्‍या आव ज़, ‘अ इस्राएलीर थैचिके, जेप्रभु परमेस्‍वर तोबोका तोबो वाज़ लिज़्‍या।
MAR 12:30 जेयुँलाई आदा होदा मादुलैद, जेर्सा माम़ोंद, जेप्रभु परमेस्‍वरए ल्‍योदा युँ थू जैद ओललाई वाज़ मया दान्‍या।’
MAR 12:31 होए उछींताव दान्‍या य़ेन फरी आव ज़, ‘जेक्‍याँलाई किताव जेसमारिज़्‍या, छुतलाई ब हिताव ज़ समारिन्‍या।’ आव ऩेब्‍लोकिन घेप्‍पा काता ज़ माले,” है ओदोक ते,
MAR 12:32 नो सास्‍त्रीए, “साचो ज़ है नलिके गुर्बा, परमेस्‍वर तोबोका तोबो ज़ लिज़्‍या, छुत माले।
MAR 12:33 फरी नँ है नलिज़्‍याव मिताव युँलाई मादुलैद, सा माम़ोंद, परमेस्‍वरए ल्‍योदा युँ थू जैद ओललाई वाज़ मया दान्‍या, स़ोनो छुतलाई समारिन्‍या बनै ओचाहित ल्‍यो ज़ लिज़्‍या। निताव य़ेन दान्‍या मेंःनी चरैःन्‍या पुजा स़ोनो पाथा पल्‍द चरैःन्‍या पुजाकिन घेप्‍पा लिज़्‍या,” है ओदोक ते,
MAR 12:34 येसुए नोए नाः सैंद ओपाँव थैद, “नँ परमेस्‍वरए ओराज्‍याकिन तादाङ नमाले,” है दोक्‍यो। हाःकिन सुए ज़ येसुस पाँन्‍या आँत मादोकेर।
MAR 12:35 येसुए ध्‍यान झ़िमल लिज़्‍यावरालाई अइ लिद यासथैक्‍यो, “सास्‍त्रीराए ‘ख्रीस दाऊदए ओथोलाव’ कातानी है यालिज़्‍याव?
MAR 12:36 ओल दाऊदए मनी छैंव पुरूसनी अइ लिद पाँद ले, ‘परमेस्‍वरए ङाप्रभुलाई, ‘नसुतुररालाई नखँ धूँल झाःद ङामाईंवा पै, ङावोर्दा च़ुसिद लिन्‍के,’ है दोक्‍यो।’
MAR 12:37 है जैद ओल दाऊदए मनी ख्रीसलाई ‘ङाप्रभु ज़’ है ओदोकिन नो कै जैद होए ओथोलाव ओताज़्‍याव?” है यादोक्‍यो। माहोल्‍याराए येसुए निताव ओपाँ बनै थै थै ङम्‍सिउ याथ·रैज़्‍याव।
MAR 12:38 येसुए ओपाँ ओरासथैज़्‍याक अइ लिद यासथैक्‍यो, “सास्‍त्रीराए याय़ेननी जोगोइसिद लिच्‍यो। नोर रेरे बेन्बेनो क्‍वा क्‍वाइसिद ‘प़ाइँए धो घदासिरक’ लिन्‍या युँ दाद बजार जीदा दुलिरिज़्यार।
MAR 12:39 नोर फरी धर्मसास्‍त्र झ़िमराल, घ्योःव घ्योःव भत्‍यारल ब प़ाइँए रँःन्‍याक ओमान ल्‍यो पोल वाज़ च़ुसिउ पैंज़्‍यार।
MAR 12:40 नो सास्‍त्रीराए झन राँदी मेंमारालाई तँनी छाम छुम याराख्‍याज़्‍यार, मिँराए ङ़ाक वाज़ बनै चाव चाव पोंखारिउ जैसिज़्‍यार। नोराए ते प़ाइँरानी घ्‍योःव सजा ज़ दैरिज़्‍यार,” है लिद यासथैक्‍यो।
MAR 12:41 नल ध्‍यान झ़िमल येसुए भिती याचरैःज़्‍याव बाकस छ्योक च़ुसिद मिँराए भिती याचरैःज़्‍याव ओराचिऊज़्‍याव। धनी धनीराए बनै कुधु कुधु याझाःज़्‍याव।
MAR 12:42 नो बेलाक तोबो काता ज़ माल्‍यो राँदी मेंमा हुद ऩेब्‍लो पैसा चरैःक्‍यो। नो ऩेब्‍लो थोम्‍द तपैसावाकाव ओल्‍यो।
MAR 12:43 नो रँःद येसुए उसिसरालाई ओल्‍योक खुल्‍द, “ङा साचो है ङादाचिज़्‍या, आव काता ज़ माल्‍यो राँदी मेंमाए छुतराकिन कुधु चरैःक्‍यो।
MAR 12:44 धनीराए ते यासय़ेलोनी वाज़ चरैःकेर। नो राँदी मेंमाए ते ओललाई ओमाथैंज़्यावत ब ओलस लिज़्‍याव भरी प़ाइँ ज़ चरैःक्‍यो,” है यादोक्‍यो।
MAR 13:1 येसु ध्‍यान झ़िमनी पुलुस्‍द ओबाज़्‍याक तोबो उसिसए, “गुर्बा चिऊसाँकी, काता आः घ्‍योःव घ्‍योःव लुँर, आः चाव झ़िमर,” है ओदोक ते,
MAR 13:2 येसुए, “हैज़, आव भरी चिऊचिके। खाली छींनी तछा आव भरी तैःद लुँए तर्त लुँ ब रहिन्‍या माले,” है यादोक्‍यो।
MAR 13:3 नकिन जाँवाक येसु ध्‍यान झ़िम होफताव जैतून दाँदात च़ुसिद उलिज़्‍याक पत्रुस, याकूब, यूहन्‍ना स़ोनो अन्‍द्रियासराए अलगज़ा येसुलाई,
MAR 13:4 “आव नपाँ भरी खर्क ओतारिज़्‍याव? नोर तान्‍या सरेस किताव ओतारिज़्‍याव? गेलाई है दासिके,” है यादोक ते,
MAR 13:5 येसुए, “जेलाई सुवाराए झुकैचिर्‍या, जे सैंसिद जोगोइसिद लिच्‍यो।
MAR 13:6 मिँर ङा ङामिन कुद ‘ङा ज़ ख्रीस’ है लिद कुधु ज़ हुद कुधुलाई ज़ याराझुकैरिज़्‍यार।
MAR 13:7 स़ोनो ‘आङ लरैं ताज़्‍या, होङ लरैं ताज़्‍या’ है यालिज़्‍याव जेथैक जे ताछे·च्‍यो। आव भरी जुनी ब ताव ज़ परिए, खाली नो खेम्‍न्‍या बेला माःक।
MAR 13:8 नोकिन ङ़ादा जात जात, राज्‍या राज्‍या लरैं दान्‍या लेर। पो पोल भोंचालोर अनिकालर ब तारिज़्‍या। आव भरी मेंमाए ज़ा दैन्‍या बेलाक ओघर्लिज़्‍याव मिताव सुरूलाव दुख वाज़ लिज़्‍या।
MAR 13:9 “जे फरी सैंसिद लिच्‍यो। हो बेलाक जेलाई मनी अदालतदा लाँद सूँपिचिरिज़्‍यार, धर्मसास्‍त्र झ़िम झ़िमल जेलाई प़ोचिरिज़्‍यार। ङा ङाजूँनी हाकिमर राजाराए ङ़ाक सच्‍याँद खोले·चिरिज़्‍यार। ननी ज़ जे नोरालाई ङासाची यान्‍या जेले।
MAR 13:10 खेम्‍न्‍या बेला ओमाताद ङ़ादा चाव था प़ाइँ जातलाव मिँराए खार्ल थासो ज़ परिके।
MAR 13:11 है जैद नोराए जेलाई क्‍योःद यासूँपिचिक, ‘ङा कै लिन्‍या, काता पाँन्‍या ओताव?’ लिद जेयुँ आँचा पाँचा ताजैच्‍यो। नो बेलाक जो हुज़्‍या हो ज़ पाँच्‍यो। नो पाँज़्‍याव जे माःक, परमेस्‍वरए छैंव उपुरूस जेस लिद ओल ज़ पाँन्‍या ले।
MAR 13:12 हो बेलाक ओभाइए ओदाज्‍युलाई, ओबाबुए ओज़ालाई सैःन्‍या सजाल यारापारैरिज़्‍यार। याज़ाराए याबाबु याआमाकिन तँदा जैसिद सैःन्‍या सजाल यारापारैरिज़्‍यार।
MAR 13:13 जे ङामिनतावर जेतावए जेलाई प़ाइँए सोन्‍या लेर। खाली जो आव दुखर ओमाखेमा पै थ॰रिज़्‍या, होए ज़ अजम्‍बरी जुनी दैन्‍या ले।
MAR 13:14 “आव ब सैंच्‍यो, नो भाःकिनकाव सर्सिउ मिताव तोबो युँ माजामोए ध्‍यान झ़िमलाव चोखो पोल तोबो फुरी हुद ऩुल्‍पा ऩुल्‍मा ओजैहुव जेरँःक यहूदियाल लिज़्‍यावर गों जीदा ओधोंःरक।
MAR 13:15 थालात लिज़्‍यावर ब याझ़िमलाव याआल मालर ताच़ानारक।
MAR 13:16 एँःल लिज़्‍यावर मनी याक्‍वार च़ाना याझ़िमदा ताबारक।
MAR 13:17 हो बेलाक याफूल याज़ा ल्‍योर स़ोनो नुइँ सवैज़्‍याव आमार युँ नावज़ार।
MAR 13:18 निताव दुख ज़्‍यूँःव साहाक ताताक लिद परमेस्‍वरलाई पोंखारिच्‍यो।
MAR 13:19 हो बेलाकाव दुख बनै धो सहिउ तारिज़्‍या। निताव दुख आव संसार परमेस्‍वरए ओजैवकिन आःपै माहुताए, निताव दुख नोकिन छींनी ब तान्‍या माले।
MAR 13:20 निताव बेला तावका ताव ज़ उलिकिन सु ज़ रहिन्‍या मालेर। खाली ओल परमेस्‍वरए छाँतिद ओरानैज़्‍याव उमींराए जूँनी नो बेला सुतुईंद्यान्‍या ले।
MAR 13:21 “नो बेलाक जेलाई सुवाराए, ‘ख्रीस आङ हुद ले, होङ हुद ले,’ है यादाचिकिन नोरालाई तारापतिच्‍यो।
MAR 13:22 ख्‍वार ङा ङामिन कुद ख्रीस जैसिद हुन्‍या लेर, ख्‍वार परमेस्‍वरए उपुरूसनी पाँव जैसिद हुन्‍या लेर। नोराए अचम्‍ब अचम्‍बलाव सरेसर य़ेनर जैद कुधुलाई झुकैन्‍या लेर। परमेस्‍वरए ओराछाँतिउरालाई मनी झुकैन्‍या छ्यास लिज़्‍या।
MAR 13:23 है जैद जे सैंसिद लिच्‍यो। आव पाँर जेलाई ङ़ादा ज़ है दाद ङानैचिए।”
MAR 13:24 “हो बेलाकाव दुख ओखेमोत निमी ब चुम चुमो तारिज़्‍या, स़्यावैए ओज़गै ब म़ारिज़्‍या।
MAR 13:25 सोरोर ब नमतिन तेरिज़्‍यार, नमताव भरी ब यासतर म़ाद थोनो·सिन्‍या लेर।
MAR 13:26 हाःत ज़ मिँ मिन्‍सिउलाई बनै ज़गै मगैव ओसक्तीरास बादल जींल उहुज़्‍याव मिँ भरिराए रँःन्‍या लेर।
MAR 13:27 हाःत ज़ स्‍वर्गताव ओचाकर्‍या भरी परींद नाम नमलाव काना कुनीङ लिज़्‍याव चार चौकालाव छाँतिद ओरानैज़्‍याव उमींरालाई ओल्‍योक यादुप्‍रिज़्‍याव।”
MAR 13:28 “नेभारा सींनी आव अर्थ ब सैंच्‍यो, किताव सींर यामोम्‍नाक ‘उभ्‍याली उहुनाव ची ओल्‍यो’ है जेलिज़्‍या,
MAR 13:29 हिताव ज़ नो है ङादाचिउ पाँ भरी ओतानाज़्‍याव जेरँःक ‘ख्रीस उहुन्‍या बेला ओतानाव ची ओल्‍यो’ लिन्‍या सैंच्‍यो।
MAR 13:30 ङा जेलाई साचो है ङादाचिज़्‍या, आव भरी ओमातावा पै आव जुक खेम्‍न्‍या माले।
MAR 13:31 आव नाम नम ते खेम्‍न्‍या ले, ङा ङापाँ ते खर्क ज़ म़ान्‍या माले।”
MAR 13:32 “खाली नो छ्याम, नो बेला सुए ज़ मासैंर। स्‍वर्गताव चाकर्‍याराए ब मासैंर, परमेस्‍वरए ओज़ाए ब मासैंव, स्‍वर्गताव ङाबाबुए वाज़ सैंज़्‍याव।
MAR 13:33 है जैद जे सैंसिद लिच्‍यो। आव छ्याम हुरिज़्‍या लिन्‍या जे जेमासैंए।
MAR 13:34 आव भरी तोबो तादा देसदा बाज़्‍याव मिँ स्‍यासो लिज़्‍या। उझ़िम ओख्‍यानैज़्‍याव बेलाक ओलसकाव लिज़्‍याव भरी ओय़ेन दाज़्‍यावराए यापासल झाःद सु सु याय़ेन जैद्याद, य़ाम गुज़्‍याव पाल्‍यालाई, ‘सैंसिद लिनी,’ है दाद बाज़्‍या।
MAR 13:35 है जैद जे ब सैंसिद लिच्‍यो। जेघरपती हुन्‍या ऱिमक ताक्‍या, आधा रील ताक्या, भाल्‍या कोनादा ताक्‍या, नम उसँक ताक्या, जे जेमासैंए।
MAR 13:36 सैंसिद जेमालिकिन उमँःजानी उहुक जेलाई ङ़ल्‍द जेलिज़्‍याव दैहुन्‍या ले।
MAR 13:37 है जैद जेलाई है ङादाचिउ पाँ प़ाइँलाई ज़ है ङारादोज़्‍या — सैंसिद लिच्‍यो।”
MAR 14:1 निस्‍तार यादोज़्‍याव माँदा भरेस ज़्‍यान्‍या पर्ब ऩेलाए ओङ़ाल उलिज़्‍याव। हो बेलाक ज़ मुख्‍या पुजारीर स़ोनो सास्‍त्रीराए ‘येसुलाई कातानी झुकैद क्‍योःद सैःन्‍या ओताव?’ लिद गुमुस्‍ता यादोज़्‍याव।
MAR 14:2 नोर, “पर्ब बेलाक माता, म़ानी मिँर मचिन्‍या ओछ्यास लिज़्‍या,” है यालिज़्‍याव।
MAR 14:3 येसु बेथानिया नाखारल तोबो सिमोन यादोज़्‍याव कुऱीए उझ़िमक काँ उज़्‍युज़्‍याव। हो बेलाक तोबो मेंमाए बनै चाव ज़िम्‍ज़ा लुँ जाल उसी ङरो बनै ओएः ल्‍यो जतामसीए म़ास रैद जाए ओङ़ै केःद येसुए ओङ़ैत ओपो·स ज़ थीदिक्‍यो।
MAR 14:4 निताव रँःद नक लिज़्‍यावर ख्‍वा ख्‍वाराए यायुँ वा वा कैद, “आव मेंमाए काराव नाः ओएः ल्‍यो म़ास खेर ओझाःज़्‍याव?
MAR 14:5 बुरू नोलाई स़ोंसय चाँदीए सिक्‍काल यो·द नो पैसाए काता ज़ माल्‍योरालाई भाःद ओराएकिन तान्‍या ओल्‍यो,” है लिद नो मेंमालाई सिङार्केर।
MAR 14:6 हाःत ज़ येसुए, “घदोज़्‍यावक, काराव उयुँ केःद जेएज़्‍याव? नोए ते ङाजूँनी बनै चाव य़ेन दोक्‍यो।
MAR 14:7 काता ज़ माल्‍योर ते जेस एकतार ज़ लिज़्‍यार। नोरालाई जो बेलाक जेराएदी ब ताए। ङा ते जेस एकतार लिन्‍या ङामाले।
MAR 14:8 आव मेंमाए उधुवा भरी दाद्याँक्‍यो। ङा ङामासिद ज़ गादैन्‍या छ्यामकावए जूँनी ङामोरोलाई ङ़ादा ज़ थीद ओयाँव मिताव ज़ ताके।
MAR 14:9 है जैद ङा जेलाई साचो है ङादाचिज़्‍या, संसार भरिल जोङ जोङ चाव था यारासथैज़्‍यार, होङ होङ आव मेंमाए ओदोव य़ेन थास्‍द उमिन ब रहिन्‍या ले।”
MAR 14:10 नकिन बाह्र जना उसिसरानी यहूदा इस्‍करियोतए येसुलाई मुख्‍या पुजारीराए याकुइत पारैन्‍याए जूँनी याल्‍योक बाके।
MAR 14:11 नोर नोए ओपाँ थैद बनै रेंद नोलाई पैसा यान्‍या ब जैकेर। हाःकिन इस्‍करियोतए ‘येसुलाई कै जैद ङासूँपिके?’ लिद मौका खिम्‍क्‍यो।
MAR 14:12 हाःत ज़ नो माँदा भरेस ज़्‍यान्‍या पर्ब सुरू ओतावत पाथा पल्‍न्‍या छ्याम येसुए उसिसर ओल्‍योक हुद, “नँ कै नलिज़्या, आव पर्ब मानिन्‍याए जूँनी ज़्‍यावर काङ्क जैनान्‍या?” है यादोक ते,
MAR 14:13 येसुए ऩेब्‍लो उसिसनिलाई, “जिन सहरल बाचिन्‍केदा, नल तोबो ऱी गप्‍द ओघागरी छींद बाज़्‍याव मिँ दैन्‍या जिन्‍ले। नोए उछीं उछीं बाद,
MAR 14:14 जोल पसिज़्‍या होल ज़ पसिद नो झ़िमए ओर्गेलाई, ‘नँलाई गेगुर्बाए है दींज़्‍याव, पाहुना लिन्‍या कुन्‍ती काङ्क उलिज़्‍याव? आव पर्ब उसिसरास नल मानिरिज़्‍याव दी,’ है दोचिन।
MAR 14:15 है जिन्‍दोव प़ाइँना नोए ओतर्ताव तालल तोबो घेप्‍पा कुन्‍ती चावस सजैसिउ जिनलाई सतैंद्यान्‍या ले। गेज़्‍याव भरी नल ज़ जैचिन,” है दाद निपरींक्‍यो।
MAR 14:16 है जैद नोनी ननी पुलुस्‍द सहरल बाद है उनिदोव मिताव ज़ दैद पर्बताव ज़्‍याव भरी जैकिनी।
MAR 14:17 हो छ्याम ऱिमक येसु बाह्र जना उसिसरास नो झ़िमल दुप्‍सिहुकेर।
MAR 14:18 नोर च़ुसिद ज़्‍यावर याज़्‍युज़्‍याक येसुए, “ङा जेलाई साचो है ङादाचिज़्‍या, जेनी तोबोए ङालाई धोका यान्‍या ले, आख ङास सिप ज़्‍युज़्‍याव मिँ ज़,” है ओरादोक ते,
MAR 14:19 उसिसर यायुँ माचाव दाद, “ङा ते माताखेहो सा,” है लिद पालास पालास है दोकेर।
MAR 14:20 हाःत ज़ येसुए, “बाह्र जना भरिनी जोए ङास भरेस चिपल छोइद ज़्‍युज़्‍याव, हो ज़।
MAR 14:21 ङा मिँ मिन्‍सिउए ते धर्मसास्‍त्रलाव सर्सिउ मिताव दुखर जुनी ब सयो·व ज़ परिए, खाली ङालाई धोका याज़्याव मिँलाई ते थैए माँतकन ज़ लिज़्‍या। निताव मिँ बुरू ओमाजर्मिकिन तान्‍या ओल्‍यो,” है यादोक्‍यो।
MAR 14:22 नकिन नो याज़्‍युज़्‍यावत ज़ येसुए उकुइत भरेस तोबो रैद, असिक ऩिद नो भरेसलाई केःद, “हाँ, आव ज़्‍युचिके। आव ङाक्‍याँ ज़,” है दाद भाःद याएक्‍यो।
MAR 14:23 हो मिताव ज़ फरी खुरी उकुइत रैद धन्‍याबाद चरैःद नोरालाई याएक्‍यो। प़ाइँए ननी याओवत,
MAR 14:24 येसुए, “आव जेओज़्‍याव कुधु मिँराए जूँनी ङासोभोरिज़्‍याव ङाझी ज़। आनी ज़ परमेस्‍वरए जेस साःरो बाचा नैद्याचिरिज़्‍याव।
MAR 14:25 ङा साचो ज़ है ङादाचिज़्‍या, परमेस्‍वरए ओराज्‍याल साःरोनी ङामाओवा पै ङा आव भत्‍यारलाव दाखमद्य आछिमकिन ओन्‍या ङामाले,” है यादोक्‍यो।
MAR 14:26 नकिन भजन तोबो गैद ननी पुलुस्‍द जैतून दाँदादा बाकेर।
MAR 14:27 नकिन येसुए उसिसरालाई, “जे ङालाई प़ाइँए ऱास्‍न्‍या जेले। धर्मसास्‍त्रल इताव सर्सिउ लिज़्‍या, ‘बेधाराए यार्गे गावलालाई प़ोद ङासैःवत, बेधार चितराँ पुतराँ तारिज़्‍यार।’
MAR 14:28 हैदी ब सिउनी सैंसिद जेङ़ादा ज़ गालीलल ङाबारिज़्‍या,” है ओरादोक ते,
MAR 14:29 पत्रुसए, “प्रभु, उपुर्कावराए प़ाइँए याऱास्‍निदी ब ङा ते नँलाई ङामाऱास्‍नी,” है ओदोक ते,
MAR 14:30 येसुए, “ङा नँलाई साचो है ङादींज़्‍या, आछिम रील भाल्‍या ऩेकराँ ओमाकोद ज़ ङालाई स़ोंखेप, ‘ङामासरेसे,’ है दान्‍या नले,” है ओदोक ते,
MAR 14:31 पत्रुसए झन ज़, “माःक, ङा नँस सिन्‍या ओतादी ब ङा नँलाई ङामासरेसे है लिन्‍या ङामाले,” है दोक्‍यो। उपुर्कावराए मनी हैज़ लिकेर।
MAR 14:32 नकिन येसु उसिसरास गेतसमनी यादोज़्‍याव बगैचाल बाद उसिसरालाई, “ङा ङापोंखारिवा पै जे आक ज़ लिच्‍यो,” है दाद,
MAR 14:33 पत्रुस, याकूब स़ोनो यूहन्‍नारालाई ओलस यालाँक्‍यो। हाःत ज़ येसु उयुँर स्‍यासे सतेद धो थाइव तानाद,
MAR 14:34 नो स़ोम्‍लोरालाई, “ङायुँर स्‍यासे तेद सिवा सिवा ताद ङाले। जे आक ज़ लिद सैंसिद लिचिके,” है दाद,
MAR 14:35 नोराकिन छ्यावा होकसै बाद नामक फुलुप्‍सिद ओक्‍याँत हुरिज़्‍याव दुखर भर्सकी ताहुक लिद,
MAR 14:36 “अब्बा, बाबु, नँ नमादोधुव काता ज़ माले, आव ङाक्‍याँत हुरिज़्‍याव धो सहिउ दुखर वैंद्याँके। खाली ङा ङायुँ ते माःक, नँ नयुँ ओताकिन वाज़,” है लिद पोंखारिद,
MAR 14:37 नो स़ोम्‍लोराए ल्‍योक उहुवत नोर ङ़ल्‍द यालिज़्‍याव दैहुद पत्रुसलाई, “सिमोन, नँ ङ़ल्‍द नलिज़्‍याव रो? नँ कै जैद ङास तघन्‍ता पै ब नमालिधुज़्‍याव?
MAR 14:38 जे प़ाइँ ज़ सैंसिद पोंखारिचिके, म़ानी दुखराल जेमाथ॰रिधुया। जेयुँए ते दान्‍या ज़ पैंज़्याव, खाली पाखाताव जेक्‍याँए ते मासहिधुन्‍या ओछ्यास लिज़्‍या,” है यादोक्‍यो।
MAR 14:39 नकिन येसु फरी ब ङ़ादाङाव ओपोंखारिज़्‍याव पोक बाद हो मिताव ज़ पोंखारिद,
MAR 14:40 नो स़ोम्‍लोराए ल्‍योक उहुक फरी ब ङ़ल्‍द यालिज़्‍याव ज़ यादैहुक्‍यो। नोराए यामीर बनै पातिद यामासहिधुवए यालाजए येसुस काता ज़ मापाँधुकेर।
MAR 14:41 फरी तखेप छींनी ब नोरालाई ङ़ल्‍द यालिज़्‍याव ज़ दैहुद, “आःपै जेमीर मायो·ताए रो? ताया, अब बेला यो·के। ङा मिँ मिन्‍सिउ पापीराए कुइत ङासूँपिसिरिके।
MAR 14:42 च्‍याँःसिचिके, गेबा। ङालाई धोका याज़्‍याव मिँ नक ज़ हुद ले,” है यादोक्‍यो।
MAR 14:43 येसु ओपाँज़्‍याक ज़ नो बाह्र जना उसिसरानिकाव यहूदा इस्‍करियोत बनै माहोल्‍या मिँरास तरवालीर खोंतार रैद हुकेर। नोर मुख्‍या पुजारीर, सास्‍त्रीर स़ोनो यहूदीराए यास़ेरराए ल्‍योनी हुद यालिज़्‍याव।
MAR 14:44 नो इस्‍करियोतए ङ़ादा ज़ नो क्‍योःना हुज़्‍यावरालाई, “ङा जोलाई माइँ ङादोए, होलाई ज़ क्‍योःद लाँच्‍यो,” लिद सरेस याद ओरानैज़्‍याव।
MAR 14:45 है जैद बगैचाल याकेसो प़ाइँना इस्‍करियोत येसुए ल्‍योक बाद, “जेरो गुर्बा,” लिद माइँ दोक्‍यो।
MAR 14:46 हाःत ज़ नो माहोल्‍याराए येसुलाई ताप तप क्‍योःकेर।
MAR 14:47 नकाव च्‍याँःसिद लिज़्‍याव तोबोए ओतरवाली हाइद प्रधान पुजारीए ओनोकोरलाई तँनिकाव ओर्ना पल्‍द सतेदिक्‍यो।
MAR 14:48 नकिन येसुए नो क्‍योःना हुव माहोल्‍यारालाई, “काराव ङालाई दाँकालाई मिताव तरवालीर खोंतार दाद जेक्‍योःहुनाव?
MAR 14:49 जेलाई दिनकाव ज़ ध्‍यान झ़िमल परमेस्‍वरए ओपाँ ङासथैचिक जेमाक्‍योःनाके। खाली धर्मसास्‍त्रलाव सर्सिउ पाँ सयो·व ज़ परिके,” है ओरादोव प़ाइँना,
MAR 14:50 उसिस भरी येसुलाई ऱास्‍द चितराँ पुतराँ धोंःकेर।
MAR 14:51 हो बेलाक तोबो धापाज़ाकाव छोर्‍या नाङग्‍या ओक्‍याँत पालो क्‍वा वाज़ भिरिसिउ उलिज़्‍याव। होलाई मनी याक्‍योःव प़ाइँना,
MAR 14:52 ओक्‍वार ख्‍यानैद नाङग्‍या ज़ धोंःके।
MAR 14:53 नकिन नो क्‍योःना हुवराए येसुलाई प्रधान पुजारीए ल्‍योक लाँकेर। नक मुख्‍या पुजारीर, यहूदीराए यास़ेरर स़ोनो सास्‍त्रीर दुप्‍सिद यालिज़्‍याव।
MAR 14:54 हो बेलाक पत्रुस जाँ तादाङ याछीं याछीं हुद नो प्रधान पुजारीए ओचतराक ज़ हुद नलाव पाल्‍यारास च़ुसिद मेंः उमुइँसिज़्‍याव।
MAR 14:55 नो झ़िमल मुख्‍या पुजारीर स़ोनो घ्‍योःव कचरीलाव स़ेर भरिए सैःन्‍या कर याखिम्‍ज़्‍याव, कर ते कान्‍त ज़ मादैकेर।
MAR 14:56 धुत गोहाई पाँन्‍यार कुधु ज़ यातावए सु सु यापाँ ब माखैके।
MAR 14:57 बल्‍ल तोबो ऩेब्‍लो च्‍याँःसिद अऩाकलाव पाँर पले·द अइ लिकेर,
MAR 14:58 “आवए, ‘ङा आव कुइए जैसिउ ध्‍यान झ़िमलाई तैःद फरी स़ोंलात कुइए माजैसिउ ध्‍यान झ़िम ङाजैरिज़्‍या,’ है ओल्‍यो गे ज़ गेथैके,” है यादोक ब,
MAR 14:59 नोराए यापाँ ब माखैके।
MAR 14:60 हाःत ज़ नो प्रधान पुजारी याखार्ल च्‍याँःसिद येसुलाई, “नँ नपाँ काता ज़ ओमालिज़्‍याव रो? आवराए नङ़ैत झाःद याईंव पाँ किताव उलिज़्‍याव?” है ओदोक ते,
MAR 14:61 येसुए घाइ ज़ मादोक्‍यो। फरी नो प्रधान पुजारीए, “नँ माहान परमेस्‍वरए ओज़ा ख्रीस सैं माःक?” है ओदोक ते,
MAR 14:62 येसुए, “ङा साचो हो ज़। तछा ङा मिँ मिन्‍सिउलाई माहान परमेस्‍वरए ओवोर्दा च़ुसिद ङालिज़्‍याव ब रँःन्‍या जेले, स़ोनो स्‍वर्गतिन बादलरास ङाहुज़्‍याव ब रँःन्‍या जेले,” है ओदोव प़ाइँना ज़,
MAR 14:63 प्रधान पुजारीए उरिसए ओक्‍वार चीए चीए, “छुत गोहाई काता ओचाहिउ?
MAR 14:64 जे ज़ जेथैके, आवए परमेस्‍वरए उमिन ओबले·ज़्याव। जे कै जेलिज़्‍या?” है ओरादोक ते, प़ाइँए ज़ सैःन्‍या थ·रैद,
MAR 14:65 ख्‍वाराए येसुलाई त़िल्‍द, उमीर कप्‍द्याद मुत्‍काए प़ोकेर। नै जैज़्‍यावराए फरी, “नँलाई प़ोज़्‍याव सु,” है लिद बरे·केर। सिपाईंराए पाला येसुलाई प़ोए प़ोए लाँकेर।
MAR 14:66 पत्रुस मेल चतराक ज़ उलिज़्‍याव। नो बेलाक प्रधान पुजारीए ओय़ेन दाज़्‍याव तोबो मेंमा हुद,
MAR 14:67 पत्रुसलाई मेंः उमुइँसिज़्‍याव रँःद, नोलाई लँ लँ चिऊद, “नँ मनी नासरतलाव येसुस नल्‍यो सानी,” है ओदोक ते,
MAR 14:68 पत्रुस माभैंःद, “नँ काता नपाँज़्‍याव इताव, ङा ते काता ज़ ङामासैंए,” है दाद ननी पुलुस्‍द साँबिलाक बाके। हो प़ाइँना ज़ भाल्‍या कोके।
MAR 14:69 नकिन जाँ छ्यावाक नो मेंमाए फरी पत्रुसलाई रँःद नक लिज़्‍यावरालाई, “आव ते साचो होसकाव ज़ ओल्‍यो,” है ओरादोक ते,
MAR 14:70 पत्रुस फरी ब माभैंःके। फरी छ्यावाक नक लिज़्‍यावराए, “नँ ब साचो उसिसरासकाव ज़, नँ ते गालीललाव ज़ ची,” है यादोक ते,
MAR 14:71 पत्रुस बनै थल्‍सिद किर्‍या झाःद, “नो है जेलिज़्‍याव मिँलाई सरेस ज़ ङामासरेसे,” है ओरादोव प़ाइँना ज़,
MAR 14:72 भाल्‍या ऩेकराँ कोके। नाःत ज़ ङ़ादा येसुए पत्रुसलाई, “भाल्‍या ऩेकराँ ओमाकोद ज़ स़ोंखेप ङालाई, ‘ङामासरेसे’ है लिन्‍या नले,” है ओदोव पाँ ब चेतैक्‍यो। नो चेतैद पत्रुस बनै घर्के।
MAR 15:1 छकाल्न्या घग ज़ मुख्‍या पुजारीर, यहूदीराए यास़ेरर, सास्‍त्रीर स़ोनो घ्‍योःव कचरीलाव भरी यासल्‍ला खैद येसुलाई किद पिलातसए ल्‍योक लाँद सूँपिकेर।
MAR 15:2 है जैद पिलातसए येसुलाई, “नँ साचो यहूदीराए याराजा ज़ रो?” है ओदोक ते, येसुए, “नँ ज़ नथ·रैनाके सानी,” है दोक्‍यो।
MAR 15:3 नाःत ज़ मुख्‍या पुजारीराए येसुलाई कुधु ज़ खतर लैकेर।
MAR 15:4 पिलातसए, “काराव घाइ नमालिज़्‍याव? नाः कुधु पाँर नङ़ैत झाःद याईंज़्‍याव नमाथैए रो?” है ओदोक ब,
MAR 15:5 येसु झन ज़ तोबो ब मापाँके। निताव रँःद पिलातस अचम्‍ब ताके।
MAR 15:6 पिलातसए ओपालाक सालकाव तखेप निस्‍तार पर्बत यहूदीराए जो कैदीलाई ‘ऱास्‍द्यासिके’ है लिज़्‍यार, होलाई ज़ ऱास्‍द ओराएज़्‍याव।
MAR 15:7 हो बेलाक तोबो बारब्‍बा यादोज़्‍याव ओनैंरास झ्यालखानाल यालिज़्‍याव। नोर सरकारकिन तँदा जैसिद मिँरालाई मचैद तोबो ऩेब्‍लोलाई सैःद यारानैज़्‍याव।
MAR 15:8 है जैद माहोल्‍याराए पिलातसए ल्‍योक बाद, “सालकाव तखेप तोबो कैदीलाई ऱास्‍द नयासिज़्‍याव मिताव आथ पाला ब तोबोलाई ऱास्‍द्याव ताके,” है यादोक ते,
MAR 15:9 पिलातसए, “हुकी यहूदीराए याराजालाई ऱास्‍द ङायाच्‍यो रो?” है यादोक्‍यो।
MAR 15:10 ओल पिलातसए ते ‘आवराए येसुलाई अऩाकल ज़ यामी तूद सूँपिद नैनार’ लिन्‍या सैंद ओनैज़्‍याव।
MAR 15:11 मुख्‍या पुजारीराए झन मिँरालाई मचैद, “माःक, नो बारब्‍बालाई ऱास्‍द्यासिके,” है दाव यारापरींकेर।
MAR 15:12 नो पाँ थैद पिलातसए फरी, “हुकी नो यहूदीराए याराजा जेदोज़्‍यावलाई ङा कै जैन्‍या की?” है ओरादोक ते,
MAR 15:13 नोर, “क्रुसत तङ्गैद सैःन्‍या,” है लिद क़िकेर।
MAR 15:14 पिलातसए फरी, “काराव? आवए मादान्‍या काता दाद ओनैज़्‍याव?” है ओरादोक ते, नोर झन ज़ मचिद, “क्रुसत तङ्गैद सैःन्‍या,” है लिद बनै ज़ क़िकेर।
MAR 15:15 है जैद पिलातसए माहोल्‍यारालाई सभैंःन्‍याए जूँनी बारब्‍बालाई ऱास्‍द्याद येसुलाई रीःद, क्रुसत तङ्गैद सैःन्‍याए जूँनी सिपाईंरालाई ज़ यासूँपिक्‍यो।
MAR 15:16 हाःत ज़ सिपाईंराए येसुलाई प्रेतोरियन यादोज़्याव दरबार जींल लाँद रोमी पल्‍तन भरी यारादुप्‍केर।
MAR 15:17 नोराए येसुलाई घ्यामर्‍यासो क्‍वा जास्‍द, ज़ुए मुकुत ऱ॰द ओङ़ैत जास्‍द,
MAR 15:18 “ए यहूदीराए याराजा, जय जय ओताक,” है लिद बरे·द,
MAR 15:19 ओङ़ैत भाताए प़ोद्याद, त़िल्‍द, ओङ़ाक याघूँदानी फुलुप्‍सिद धो दाद ओमान नैद्याव मिताव जैसिकेर।
MAR 15:20 गिल्‍लैद गिल्‍लैद च़िम यादोवत नो घ्यामर्‍यासो क्‍वा सिउःद्याद, ङ़ादाङाव ओक्‍वार जास्‍द क्रुसत तङ्गैना लाँकेर।
MAR 15:21 यालाँज़्‍याक तोबो नाखारनी हुज़्‍याव कुरेनीलाव सिमोनलाई येसुए ओलाँज़्‍याव क्रुस सुघुर्केर। नो मिँ अलेक्‍जेन्‍दर स़ोनो रूफसनी निबाबु ओल्‍यो।
MAR 15:22 येसुलाई गलगथा यादोज़्‍यावक सकेस्‍केर। नो पोए उमिन ‘खप्‍पर्‍या पो’ है ब यादोज़्‍याव।
MAR 15:23 नक येसुलाई वासः झाःसिउ दाखमद्य यासवैक ते येसुए ओव माभैंःके।
MAR 15:24 हाःत ज़ येसुलाई क्रुसत तङ्गैकेर। यातङ्गैवत ओक्‍वारात गोला झाःद भाःकेर।
MAR 15:25 क्रुसत यातङ्गैव बेलाक नौ बजिद उलिज़्‍याव।
MAR 15:26 ओललाई तङ्गैद यानैज़्‍याव क्रुसए ओङ़ैत, “आव यहूदीराए याराजा ज़” है लिद तोबो फल्‍यात ओखत सर्द चकेर।
MAR 15:27 नो छ्याम ऩेब्‍लो चोरनिलाई मनी तोबोलाई ओवोर्दा तोबोलाई ओदाबर्‍यादा जैद क्रुसत तङ्गैद यारानैज़्‍याव।
MAR 15:28 [है जैद धर्मसास्‍त्रलाव सर्सिउ पाँ ब नत ज़ यो·के। नलाव सर्सिउ आव ज़, “नो अपराधीरास गनिसिरिज़्‍या।”]
MAR 15:29 आनी हुनी भाल्‍सिना हुवराए याङ़ैर ङ़त ङ़त जैद थल्‍द, “हाइ! हाइ! नँ ‘ध्‍यान झ़िमलाई तैःद स़ोंलात ङाजैरिज़्‍या’ है लिज़्‍याव मिँ,
MAR 15:30 नँ क्रुसतिन झरिद हुद नक्‍याँलाई बाँचैके,” है दोकेर।
MAR 15:31 हिताव ज़ मुख्‍या पुजारीर स़ोनो सास्‍त्रीराए या याल येसुलाई गिल्‍लैद, “आवए छुतरालाई ताकितर याबाँचैज़्‍याव, ओल ओक्‍याँलाई कै जैद ओमाबाँचैधुज़्‍याव?
MAR 15:32 इस्राएलीराए याराजा ख्रीस जैसिज़्‍याव नो क्रुसतिन झरिद उहुकदा, गे नो रँःद ओपाँ पतिन्‍या गेले,” है लिकेर। ओलस तङ्गैसिउ चोरनी मनी हैज़ लिकिनी।
MAR 15:33 नकिन बाह्र बजेकिन तीन बजे पै देस भरी काल्‍या कले झ्याके।
MAR 15:34 तीन बजेवाक येसु बनै चोइस, “इलोई, इलोई, लामा सबखथनी?” है लिद क़िके। नोए ओसै, “अ ङापरमेस्‍वर, अ ङापरमेस्‍वर, ङालाई काराव नऱास्‍नाव?”
MAR 15:35 नक च्‍याँःसिद लिज़्‍यावराए नो पाँ थैद ख्‍वाराए, “थैचिसाँ, आवए ते एलियालाई ची उखुल्‍ज़्‍याव सा,” है लिद,
MAR 15:36 तोबोए धोंःनाद भाताए उतुपात थाकना पो·द सिरो दाखमद्यल छिम्‍द येसुए ओयाःत झाःद्याद पिउ परींद, “अब ते चिऊद गेनैया, एलिया कातारानी हुद माहाइज़्‍याव?” है लिके।
MAR 15:37 नाःत ज़ येसु बनै चोइस क़िद उस॰ सफ्या·क्‍यो।
MAR 15:38 हो प़ाइँना ज़ ध्‍यान झ़िमलाव बारिसिउ क्‍वा ब उतुपानी ओजराङ पै ओलनी ज़ ऩेपरा ताद चिस्‍के।
MAR 15:39 येसुए ओङ़ाक च्‍याँःसिद लिज़्‍याव कप्‍तानए निताव उस॰ ओफ्या·व रँःद, “आव ते साचो ज़ परमेस्‍वरए ओज़ा ची ओल्‍यो,” है लिके।
MAR 15:40 हो बेलाक ख्‍वा मेंमाराए ब जाँ तादानी येसुलाई चिऊद यानैज़्‍याव। नोरानी मरियम मग्‍दलिनी, ज़िम्‍ज़ा याकूब स़ोनो योसीनी निआमा मरियम, स़ोनो नोनिस सलोमी ब ओल्‍यो।
MAR 15:41 येसु गालीलल उलिज़्‍याव बेलाक नोर ओलस ओलस बाऱिद ओसेवा यादोज़्‍याव। यरूसलेम पै ओलस हुव छुत मेंमार ब कुधु ज़ याल्‍यो।
MAR 15:42 ऩासिन्‍या छ्यामए ओङ़ालाव तयारीलाव दिन ओल्‍यो। हो छ्याम र्‍याम्‍या रिमी ओझ्यानाक,
MAR 15:43 तोबो अरिमाथियालाव योसेफए घ्‍योःव युँस पिलातसए ल्‍योक बाद येसुए ओमोरो ऩिक्‍यो। नो घ्‍योःव कचरीलाव घेप्‍पा मिँ ओल्‍यो। ओल मनी परमेस्‍वरए ओराज्‍यालाव येम खिम्‍ज़्‍याव मिँ ज़ ओल्‍यो।
MAR 15:44 पिलातसए येसु ङ़ादा ज़ उसिधुव पाँ थैद अचम्‍ब ताद कप्‍तानलाई ओल्‍योक खुल्‍द, “येसु साचो उसिधुव रो?” है लिद सुधिक्‍यो।
MAR 15:45 है जैद नोए ओल्‍योनी येसु सिके लिन्‍या ओथैवत ओमोरो योसेफलाई लाँव एक्‍यो।
MAR 15:46 योसेफए फरी पालो क्‍वा लँःद येसुए ओमोरोलाई क्रुसतिन हाइद, नो क्‍वाए लुम्‍बैद दावन खुपिद पुप जैद ओनैज़्याव खादरल झाःद ओय़ामक घ्‍योःव लुँए कक्‍यो।
MAR 15:47 मरियम मग्‍दलिनी स़ोनो योसीए ओआमा मरियमनी नो ओझाःज़्‍याव पो चिऊद निनैज़्‍याव।
MAR 16:1 ऩासिन्‍या छ्याम ओखेमोत मरियम मग्‍दलिनी, याकूबए ओआमा मरियम, नोनी निनैं सलोमीरास येसुए ओमोरोलाई थीद्यान्‍याए जूँनी चाव सी ङरो म़ासर अतरर लँःद,
MAR 16:2 सातालाव उस॰कताव छ्याम घग ज़ घाम पले·क नोर खादर पोदा याबाज़्‍याक,
MAR 16:3 नोराए, “गेलाई नो कसिउ लुँ सुए पल्‍तैद्यासिउके?” है लिद,
MAR 16:4 खादरदा याभाल्‍सिक ते नो बनै घ्‍योःव लुँ पल्‍तैसिउ उलिज़्‍याव रँःकेर।
MAR 16:5 नोर फरी खादर पुपल पसिद नल उजींल तोबो पालो क्‍वा क्‍वाइसिउ धापाज़ाकाव मिँ खादरए ओवोर त॰दा च़ुसिद उलिज़्‍याव रँःद बनै ज़ अचम्‍ब ताद यालिज़्‍याक ते,
MAR 16:6 नोए, “अचम्‍ब ताताच्‍यो, नो जेखिम्‍ज़्‍याव क्रुसत यासैःव नासरतलाव येसु आल माले, सैंसिद सोधुके। अछादी आव यानैव पो चिऊचिकेदा,
MAR 16:7 जे पत्रुस स़ोनो उपुर्काव उसिसराए ल्‍योदा बाद, ‘येसु जेङ़ादा ज़ गालीलदा बाज़्‍या दी। ओल है उलिज़्‍याव मिताव, होङ ज़ ओलस दैसिन्‍या जेले,’ है यारादोनाचिके,” है ओरादोव प़ाइँना,
MAR 16:8 नोर ननी धोंःद याछ्याचेए बनै भुम भुम गूद सुलाई ज़ नो पाँ है मारादोधुकेर।
MAR 16:9 [सातालाव उस॰कताव छ्याम छकाल्‍न्‍या घग ज़ येसु सिउनी सैंसिद ओसोवत प़ाइँरानी ङ़ादा मरियम मग्‍दलिनीए ओल्‍योक सरैंःसिके। नो मेंमाए ओक्‍याँतिन येसुए ङ़ादा सात गोता माचाव पुरूसर पले·द ओरानैज़्‍याव।
MAR 16:10 है जैद नोए उसिसराए ल्‍योक बाद उरँःव भरी है यादोक्‍यो। नो बेलाक नोर यायुँ बनै माचाव दाद घरो ज़ यालिज़्‍याव।
MAR 16:11 खाली नोराए, ‘येसु सैंसिके, ङा ज़ रँःद ङानै,’ है ओल्‍यो पाँ याथैज़्‍यावत ब मापतिकेर।
MAR 16:12 फरी छींनी येसुए उसिसनी नाखारदा निबाज़्‍याक येमत येसु छुत सुरूप जैसिद निङ़ाक सरैंःसिके।
MAR 16:13 नोनी ओल्‍द बाद उपुर्कावरालाई है निरादोक ते, नोनी निपाँ ब मापतिकेर।
MAR 16:14 नकिन छींनी एघार जना उसिसर काँ याज़्‍युज़्‍याक येसु नोराए याङ़ाक ब सरैंःसिके। नोराए खाव यायुँए जूँनी येसु सिउनी ओसैंसिउत ओललाई रँःज़्यावराए यापाँत यायुँ ओमाहुबोए येसुए नोरालाई यासिङार्क्‍यो।
MAR 16:15 स़ोनो, “जे आव संसार भरिल प़ाइँदा ज़ बाद चाव था प़ाइँलाई ज़ यारासथैनाच्‍यो।
MAR 16:16 जोए उयुँ हुप्‍द परमेस्‍वरए उमिनत सछैंसिज़्‍या, हो बाँचिन्‍या ले। फरी जोए उयुँ माहुबे, होए परमेस्‍वरए ओसजा दैन्‍या ले।
MAR 16:17 यायुँ हुप्‍ज़्‍यावराए याक्‍याँत इताव सरेसर ब तान्‍या लेर — ङा ङामिननी माचाव पुरूसर ब पले·न्‍या लेर, साःरो साःरो खामनी ब पाँन्‍या लेर,
MAR 16:18 घुलरालाई याराक्‍योःदी ब, तुन्‍यार याज़्‍युदी ब कैज़ तान्‍या मालेर। याजोरो हुवराए याक्‍याँत याकुइ नैद याराएक नोर गराँन्‍या लेर।”
MAR 16:19 है जैद प्रभु येसुए ओपाँ भरी है ओरादोवत याङ़ाकिन ज़ स्‍वर्गदा छींसिद परमेस्‍वरए ओवोर्दा च़ुसिनाके।
MAR 16:20 उसिसर ते ननी बाद परमेस्‍वरए ओपाँर प़ाइँदा ज़ यारासथैनाकेर। प्रभु यास यास ज़ लिद नो यारासथैज़्‍याव पाँत अचम्‍बलाव सरेसर जैद्याद नो यापाँ थैज़्‍याव भरिरालाई साचो ज़ थ·रैद याएक्‍यो। आमेन।]
LUK 1:1 प़ाइँए गेखार्लाव ताव भरी कुधुए कागतत चरैःन्‍या उदिम दाद नैर।
LUK 1:2 नोराए यासरो भरी ङ़ादाकिन ज़ येसुस लिद ओय़ेन रँःवर ओपाँ सथैज़्‍यावराए ल्‍योनी ज़ सर्द नैर।
LUK 1:3 गेङ़ैताव थियोफिलस, ङा ब ङ़ादाकिन ज़ बनै चावस तहकैद प़ाइँ पाँ भरी खिम्‍द ङानै, स़ोनो नजूँनी तोबो ओमेलास ताव पाँ सर्न्या युँ ङादोके।
LUK 1:4 हो ताकिन नँलाई है दासिउ पाँर साचो ज़ ओल्‍यो लिन्‍या सैंन्‍या नले।
LUK 1:5 यहूदियालाव राजा हेरोदए ओपालाक अबिया थरलाव तोबो पुजारी जकरिया यादोज़्‍याव उलिज़्‍याव। नोए ओज्‍या ब हारून पुजारीए ओखलकलाव ज़, उमिन एलीसिबा ओल्‍यो।
LUK 1:6 नोनी ज्‍या-री ज़ परमेस्‍वरए ओङ़ाक धर्मलाव य़ेन दाद निजुनी निझाःज़्‍याव, परमेस्‍वरए ओकानुन ब माबिरैद ज़ निदोज़्‍याव।
LUK 1:7 खाली एलीसिबा जर्मननी ज़ थारी ओल्‍योए नोनी निज़ार तोबो ब यामालिज़्‍याव। नोनी ऩेब्‍लो ज़ निबेला बाद सेर्द जूचास्‍द निलिज़्‍याव।
LUK 1:8 तछा जकरिया परमेस्‍वरए ओङ़ाक पुजारी य़ेन ओदोज़्‍याव। हो साता भरिल ध्‍यान झ़िमलाव सेवा दान्‍या नोए ओखलकराए यापाला ओल्‍यो।
LUK 1:9 पुजारीराए याचलन मिताव परमेस्‍वरए ओध्‍यान झ़िमल धुप झाःन्‍याए जूँनी गोला याझाःक जकरिया परिके।
LUK 1:10 नो उजींल पसिद धुप ओझाःज़्‍याक उपुर्काव मिँ भरिए लाँःक पोंखारिउ ज़ यानैज़्‍याव।
LUK 1:11 नल उलिज़्‍याक परमेस्‍वरए ओचाकर्‍यालाई धुप ओझाःज़्‍याव पोए ओवोर्दा च्‍याँःसिद उलिज़्‍याव रँःक्‍यो।
LUK 1:12 नोलाई रँःद जकरियाए उयुँ स्‍यासे सतेद बनै छे·के।
LUK 1:13 नाःत ज़ परमेस्‍वरए ओचाकर्‍याए, “नँ ताछे·नी जकरिया, नपोंखारिज़्‍याव परमेस्‍वरए थैक्‍यो। है जैद नज्‍या एलीसिबाए ज़ा तोबो दैरिज़्‍याव। नँ नोए उमिन यूहन्‍ना नैदियो।
LUK 1:14 नो उजर्मिक नयुँ बनै होलाँ ताद रेंन्‍या नले। छुतर ब रेंन्‍या लेर,
LUK 1:15 काराव ल्‍यो ताकिन नो परमेस्‍वरए ओङ़ाक घेप्‍पा मिँ थ॰रिन्‍या ले। नोए ज़िम्‍ज़ाकिन ज़ मद छोकोरा जात्त ज़ ओन्‍या माले। नो ओआमाए उफूल ज़ छैंव पुरूस दैरिज़्‍याव।
LUK 1:16 नोए इस्राएलीरालाई याप्रभु परमेस्‍वरए ल्‍योदा कुधुलाई ज़ यायुँ फर्कैद याएरिज़्‍याव।
LUK 1:17 नोए एलियाए ओसक्ती ओगेर रैद हुरिज़्‍याव ख्रीसए ओङ़ादा बाद होए उजूँनी मिँरालाई तयार याजैरिज़्‍याव। बाबुरालाई याज़ारास यासखैरिज़्‍याव, पापीरालाई ब धर्मलाव येमल याझाःरिज़्‍याव,” है दोक्‍यो।
LUK 1:18 हाःत ज़ जकरियाए परमेस्‍वरए ओचाकर्‍यालाई, “आव भरी ङा कै जैद पतिन्‍या? ङा ङासेरधुके, ङाज्‍या ब जूचास्‍धुके,” है ओदोक ते,
LUK 1:19 परमेस्‍वरए ओचाकर्‍याए, “ङा एकतार परमेस्‍वरए ओङ़ाकाव च्‍याँःसिज़्‍याव गब्रिएल ज़। नल्‍योदा आव चाव था सथैना परींद नैनाव।
LUK 1:20 ङालाई नमापतिनाव प़ाइँना आव है ङादींव य़ाका भरी ओमातावा पै नँ लाता ताद मापाँधुन्‍या तान्‍या नले। ङा है ङादींव पाँ थिक हो बेलाक ज़ यो·न्‍या ले,” है दोक्‍यो।
LUK 1:21 हाः बेलाक नो लाँःकाव लिज़्‍यावराए ‘काता ओदोव?’ लिद जकरियालाई कींद यानैज़्‍याव।
LUK 1:22 बल्‍ल बल्‍लङ नोराए ल्‍योङ पुलुस्‍द नोरास काता ज़ मापाँधुद उकुइए सान दाद ओरायोए नोराए, “आवए ते ध्‍यान झ़िमल परमेस्‍वरए ओदर्सन ओदैव ची ओल्‍यो,” है लिकेर।
LUK 1:23 जकरिया ध्‍यान झ़िमलाव सेवा दान्‍या ओपाला ओयो·वत उझ़िमदा बाके।
LUK 1:24 नाःकिन ज़ ओज्‍या एलीसिबा ज़ा दैन्‍या ताद पाँच मैना भरी आदा होदा माबाद उझ़िमल ज़ लिद,
LUK 1:25 “मिँराए ङालाई अइज़ फ्या·के है यादाँदी ब परमेस्‍वरए ङालाई उयुँ नाद ज़ा दैन्‍या जैनाक्‍यो,” है उलिज़्‍याव।
LUK 1:26 एलीसिबा छ मैना ओतावत परमेस्‍वरए फरी ओचाकर्‍या गब्रिएललाई ज़ गालील खन्‍दलाव नासरत सहरल
LUK 1:27 तोबो कन्‍या ल़ुज़ाए ल्‍योक परींक्‍यो। नो ल़ुज़ालाई भर्ज़ा दाऊदए ओथोलाव योसेफ यादोज़्‍यावत ऩिद यानैज़्‍याव। नोए उमिन मरियम ओल्यो।
LUK 1:28 परमेस्‍वरए ओचाकर्‍या ओल्‍योक बाद, “जेरो प़ाइँरानी असिक दैव मेंमा, परमेस्‍वर नँस ज़ लिज़्‍या,” है ओदोक ते,
LUK 1:29 ‘आव काता ओपाँव ओताव?’ लिद उयुँ काता माँःती जैक्‍यो।
LUK 1:30 नो चाकर्‍याए फरी, “ताछे·नी मरियम, परमेस्‍वरए उयुँ नल्‍योदा गराँद ले।
LUK 1:31 नँ गर्बवती ताद खेपा ज़ा तोबो नदैरिज़्‍या। नोए उमिन येसु नैदियो।
LUK 1:32 नो बनै घ्‍योःव मिँ ताद माहान परमेस्‍वरए ओज़ा ज़ लिद थ·रैरिज़्‍यार। नोलाई परमेस्‍वरए, ओल उपुर्खा दाऊदए ओराज्‍या चलैन्‍या जैरिज़्‍याव।
LUK 1:33 है जैद याकूबए ओथोलावराए याङ़ैताव ज़ ताद नोए ओराज्‍या खर्क ज़ खेम्‍न्‍या माले,” है दोक्‍यो।
LUK 1:34 हाःत ज़ मरियमए, “आव भरी कै जैद तान्‍या? ङा आःपै कन्‍या ज़ ङालिज़्या,” है ओदोक ते,
LUK 1:35 नो चाकर्‍याए, “नँ नक्‍याँत परमेस्‍वरए छैंव उपुरूस हुद माहान परमेस्‍वरए ओसक्तीनी ज़ा नदैरिज़्‍या। है जैद नो छैंव पुरूसनिकाव भाउज़ालाई परमेस्‍वरए ओज़ा ज़ है दान्‍या लेर।
LUK 1:36 अछादी नँ नक्‍याँदाङाव एलीसिबाए पाला जूचास्‍द ब ज़ा दैन्‍या ताद ले। नो खर्क ज़ ज़ा मादैव है यादोज़्‍याव एलीसिबाए उफूलाव ओज़ा छ मैना ताधुके।
LUK 1:37 परमेस्‍वरए ओमादोधुव काता ज़ माले,” है ओदोक ते,
LUK 1:38 मरियमए, “ङा परमेस्‍वरए ओबाँदानी ज़। है नलिज़्‍याव मिताव ज़ ओताक,” है ओदोव प़ाइँना ज़ परमेस्‍वरए ओचाकर्‍या पुलुस्‍द बाके।
LUK 1:39 तछा छींनी मरियम झाःसिद लाला लुलु यहूदियालाव गोंल जकरियाए ओनाखारल बाके।
LUK 1:40 जकरियाए उझ़िमल पसिद मरियमए एलीसिबालाई जेरो है ओदोज़्याव
LUK 1:41 ओथैव प़ाइँना एलीसिबाए उफूलाव ओज़ा ज़ो·के। हाःत ज़ एलीसिबा छैंव पुरूसए ब्याल्‍द,
LUK 1:42 बनै रेंद, “मेंमा भरिरानी नँ असिक दैव ज़ नलिज़्‍या। नफूलाव नज़ा ब असिक दैव ज़ तारिज़्‍या।
LUK 1:43 काता ङालाई आः परमेस्‍वर दाइनो ओताव, ङाप्रभुए ओआमा ङाल्‍योक नहुव।
LUK 1:44 नँ नयाःनी जेरो है नल्‍यो प़ाइँना ज़ ङाफूलाव ङाज़ा रेंद ज़ो·के।
LUK 1:45 नँ परमेस्‍वरए है उलिज़्‍याव भरी सयो·द्यान्‍या ज़ ले लिद नयुँ हुबो मेंमा धन्‍याकाव नलिज़्‍या,” है लिद पाँके।
LUK 1:46 मरियम नो भरी थैद है लिके, “ङा ङाप्रभु परमेस्‍वरए उमिन बनै सघ्‍योःद ङाएज़्‍या।
LUK 1:47 ङालाई बाँचैज़्‍याव परमेस्‍वरस बनै रेंद ज़ ङापाँज़्‍या।
LUK 1:48 नोए ङा इताव ज़िम्‍ज़ा ओबाँदानीलाई मामेंःद ङाल्‍योदा उयुँ य़ाल्‍के। ननी ज़ मिँराए ङालाई प़िरी प़िरी पै असिक दैव थ·रैनारिज़्‍यार।
LUK 1:49 ङाजूँनी आःल्‍दिउ य़ेन दाद्याज़्‍याव माहान परमेस्‍वरए उमिन बनै छैंव लिज़्‍या।
LUK 1:50 परमेस्‍वरलाई रँःद छे·ज़्‍यावरालाई ओल प़िरी प़िरी पै उयुँ नाज़्‍या।
LUK 1:51 नोराए जूँनी उकुइए बनै सक्तीलाव य़ेन दाद्याव ज़ नैज़्‍याव। यायुँल सघ्‍योःसिज़्‍यावरालाई ते चितराँ पुतराँ जैद यामिन सम़ैद याएज़्‍याव।
LUK 1:52 घेप्‍पारालाई यासिंहासनतिन स़ेल्‍द नल ज़िम्‍ज़ारालाई याझाःज़्‍याव।
LUK 1:53 करेज़्‍यावरालाई चाव चाव याद याकरे सैःद याएज़्‍याव। साहुरालाई ते रितो ज़ याजैज़्‍याव।
LUK 1:54 ओय़ाकार मामेंःद ओसेवा दोज़्याव इस्राएली उमींरालाई सघैव ज़ यानैज़्‍याव।
LUK 1:55 है जैद अब्राहाम स़ोनो ओथोरालाई है ओरादोव मिताव याल्‍योदा एकम्‍न्‍या उयुँ गराँव ज़ लिज़्‍या।”
LUK 1:56 मरियम एलीसिबाए उझ़िमक ओल्‍यो स़ोंमैना ओतावत उझ़िमदा ओल्‍द बाके।
LUK 1:57 एलीसिबाए ज़ा दैन्‍या ओमास ओयो·वत खेपा ज़ा दैक्‍यो।
LUK 1:58 ‘परमेस्‍वरए उयुँ य़ाल्‍द अचम्‍बलाव य़ेन दोदिक्‍यो दी’ लिन्‍या थैद ओलापजीकावर स़ोनो ओक्‍याँदाङावर बनै रेंकेर।
LUK 1:59 नो भाउज़ा उजर्मिउ आथ दिनत याचलन मिताव क्‍याल्‍न्‍या सरेस जैन्‍याए जूँनी प़ाइँ दुप्‍सिद उमिन ब ओबाबुए उमिन स्‍यासो ‘जकरिया’ नैद्याव पैंकेर।
LUK 1:60 खाली ओआमाए भैंःद मायाद, “माःक, आवए उमिन यूहन्‍ना तारिज़्‍या,” है ओरादोक ते,
LUK 1:61 नोराए, “नथोल इताव मिन ते माले सानी,” है दोकेर।
LUK 1:62 फरी नोराए ओबाबु जकरियालाई सान दाद्याद, “नो नज़ाए उमिन काता नैद्याव नपैंज़्‍याव?” है यादोक ते,
LUK 1:63 जकरियाए फल्‍या तोबो रैव परींद नत, ‘आवए उमिन यूहन्‍ना’ लिद सर्द याएक्‍यो। नोराए निताव रँःद प़ाइँ ज़ अचम्ब ताकेर।
LUK 1:64 हो प़ाइँना ज़ जकरियाए ओसेर पलास्‍सिद पाँधुन्‍या ताद परमेस्‍वरलाई धन्‍या धन्‍या है ल्‍यो ज़ लिके।
LUK 1:65 नो हुद लिज़्‍यावर नो भरी रँःद अचम्ब ताद छे·द नो पाँ भरी यहूदिया गों जीदा प़ाइँदा ज़ थास्‍के।
LUK 1:66 ‘नो भाउज़ा ओघ्‍योःक किताव तान्‍या ओताव?’ लिद थैज़्‍याव भरिए यायुँल है लिकेर। नोए ओक्‍याँत परमेस्‍वरए बास दाद ओनैज़्‍याव ओल्‍यो लिन्‍या थ·रैकेर।
LUK 1:67 ओबाबु जकरिया छैंव पुरूसए ब्याल्‍द अइ लिद पाँके,
LUK 1:68 “इस्राएलीराए याप्रभु परमेस्‍वरए उमिन बनै ओघ्‍योःक। गे उमींराए गेल्‍योक हुद बाँचैसिक्‍यो।
LUK 1:69 ओनोकोर दाऊद राजाए ओथोल गेलाई जोगोइद बाँचैन्‍या तोबो झेंःस्‍या उथैद नैद्यासिउ।
LUK 1:70 नोए उजूँनी परमेस्‍वरए भाःकिन ज़ छैंव उमीं अगमबक्ताराए यायाःनी पाँव ज़ उलिज़्‍याव।
LUK 1:71 नोराए यापाँ आव ब लिज़्‍या — ‘गेसुतुरराए ल्‍योनी जोगोइद, गेलाई सोज़्‍यावराए याकुइनी ब पाथस पले·न्‍या ले।’
LUK 1:72 है जैद गेसाखा पुर्खाराए ल्‍योदा उयुँ गराँद, नोरालाई ओरायो छैंव बाचालाई सयो·द्याव ज़ नैज़्‍याव।
LUK 1:73 नो बाचा गेपुर्खा अब्राहामलाई तोबो किर्‍या झाःद —
LUK 1:74 ‘गेलाई गेसुतुरराए ल्‍योनी पले·न्‍या, स़ोनो गेजिउ भरी ओलस लिद उयुँलाव मिताव छैंव य़ेन सुलाई रँःद ब माछे·द ज़ दान्‍या जैद नैद्यासिउ।’
LUK 1:76 अब ते नँ ङाज़ा यूहन्‍ना, नँलाई माहान परमेस्‍वरए अगमबक्ता थ·रैनिरिज़्‍यार। नँ हुरिज़्‍याव प्रभुए ओङ़ा ओङ़ा बाद ओयेम बनैद्यान्‍या नले।
LUK 1:77 स़ोनो परमेस्‍वरए उमीं इस्राएलीरालाई ‘जेपाप क्‍याल्‍द याचिरिज़्‍याव’ लिद अजम्‍बरी जुनील बान्‍या येम सतैंद्यान्‍या नले।
LUK 1:78 गेल्‍योदा परमेस्‍वरए उयुँ ओगराँवनी स्‍वर्गताव झ़ार झ़ारो ज़गै ब गेल्‍योक ज़ हुरिज़्‍या।
LUK 1:79 नो उहुवत सिन्‍या सजालाव चुम चुमोल लिज़्‍यावराए याक्‍याँत पलाँव जैद्याद गेलाई मनी परमेस्‍वरए ल्‍योदा खैन्‍या येम सरैंःद्यासिरिज़्‍याव।”
LUK 1:80 नो भाउज़ा यूहन्‍ना ओघ्‍योःनावत ओसक्ती ल्‍यो तानाके। इस्राएलीराए याङ़ाक ओमासतैंसिवा पै बनङ ज़ लिके।
LUK 2:1 हो बेलाक तछा रोमी माहाराजा अगस्‍तसए रोमी राज्या भरिलाव जनसंख्‍या सर्न्‍या हुकुम याएक्‍यो।
LUK 2:2 नो उस॰कताव यासरो जनसंख्‍या सिरिया खन्‍दलाव हाकिम कुरेनियसए ओपालाक ओल्‍यो।
LUK 2:3 यामिन सर्सिना प़ाइँ ज़ सु सु यासाखा पुर्खार याजर्मिउ सहर सहरदा ज़ बाकेर।
LUK 2:4 है जैद योसेफ पाला उलिज़्‍याव गालील खन्‍दलाव नासरतनी यहूदिया खन्‍दलाव बेथलेहेम यादोज़्याव दाऊद राजाए ओनाखारल उमिन सर्सिना बाके, काराव ल्‍यो ताकिन योसेफ दाऊदए ओथोलाव ज़ ओल्‍यो।
LUK 2:5 ऩिद यानैज़्‍याव ओज्‍या मरियमलाई ब ओलस ज़ लाँक्‍यो। नो बेलाक मरियम गिसो क्‍याँस उलिज़्‍याव।
LUK 2:6 बेथलेहेमल निलिज़्‍याक ज़ सुत्‍क्‍याल्‍नी तान्‍या बेला ताद,
LUK 2:7 जेथा ज़ा दैक्‍यो। नो उजर्मिउ प़ाइँना ज़ दालए दाल्द बाछाराए छी ज़्‍यान्‍या पोल नैक्‍यो। भत्तील लिन्‍या पो निमादैवए गोथल निलिज़्‍याव।
LUK 2:8 हो छ्याम रील नो नाखारकिन पाखाङ तोबो बाँल गावलाराए बेधार तबगाल खर्कैद यारानैज़्‍याव।
LUK 2:9 हाः बेलाक ज़ परमेस्‍वरए तोबो ओचाकर्‍या उमँःजानी गावलाराए याल्‍योक सरैंःसिहुद परमेस्‍वरए ओज़गै ब प़ाइँदा ज़ ज़गै जैक्‍यो। नो रँःद बनै छे·केर।
LUK 2:10 हाःत ज़ नो चाकर्‍याए, “जे ताछे·च्‍यो, ङा जेलाई बनै चाव था रैद नैद ङायाचिए। नो थात मिँ भरी बनै रेंन्‍या लेर।
LUK 2:11 आछिम दाऊदए ओनाखारल इस्राएलीरालाई बाँचैन्‍या तोबो जर्मिद ले। नो जर्मिउ प्रभु ख्रीस ज़।
LUK 2:12 जे नोलाई सरेस्‍न्‍या सरेस, नो भाउज़ालाई बाछाराए छी ज़्‍यान्‍या पोल दालए दाल्‍सिउ सेप्‍सिउ दैन्‍या जेले,” है यादोक्‍यो।
LUK 2:13 हाःत ज़ नो चाकर्‍याए ओनैंर बनै माहोल्‍या हुद परमेस्‍वरए ल्‍योदा बनै खुसी ताद है लिकेर,
LUK 2:14 “स्‍वर्गताव परमेस्‍वरलाई ज़गै मगै ओताक, मानुवाताव उयुँलाव मिताव मिँराए यायुँ ब होलाँ ओताक।”
LUK 2:15 नो परमेस्‍वरए ओचाकर्‍यार स्‍वर्गदा याबाव छींनी नो बेधा गावलाराए या याल, “दे, गे बेथलेहेमदा गेबा, प्रभुए है ओदासिउ गेचिऊना,” है लिद,
LUK 2:16 लाला लुलु नाखारल धोंःनाद मरियम स़ोनो योसेफनिलाई यारादैकेर। नो भाउज़ालाई ब बाछाराए छी ज़्‍यान्‍या पोल सेप्‍सिउ दैकेर।
LUK 2:17 है जैद आव रँःद नो भाउज़ाए उजूँनी परमेस्‍वरए ओचाकर्‍याए है ओरादोव भरी है यारादोकेर।
LUK 2:18 नो गावलाराए यापाँ थैव भरी प़ाइँ ज़ अचम्‍ब ताकेर।
LUK 2:19 मरियम ते नो पाँ भरी उयुँल नैद खामिक्‍यो।
LUK 2:20 नो गावलाराए नो चाकर्‍याए है ओरादोव मिताव याथैव यारँःवए परमेस्‍वरए उमिन सघ्‍योःद्याद ओल्‍योदा बनै खुसी ताद रेंए रेंए ओल्‍द बाकेर।
LUK 2:21 नो भाउज़ा उजर्मिउ आथ दिनत क्‍याल्‍न्‍या सरेस जैन्‍या छ्याम उमिन ब येसु नैदिकेर। नो मिन ओआमाए उफूल ओमासिर्जिद ज़ परमेस्‍वरए ओचाकर्‍याए नैद ओयो मिन ज़।
LUK 2:22 मोसाए ओकानुनलाव मिताव मरियम सुत्‍क्‍याल्‍नी चोखोइसिन्‍या बेला ओयो·वत यरूसलेमलाव ध्‍यान झ़िमल बाद येसुलाई परमेस्‍वरए उमिनत नैकिनी।
LUK 2:23 परमेस्‍वरए ओकानुनलाव सर्सिउ मिताव, “ङ़ाताव जर्मिउ खेपा भरी परमेस्‍वरए उमिनत नैव ज़ परिए।”
LUK 2:24 हो छ्याम ज़ फरी ओआमा चोखोइसिन्‍याए जूँनी परमेस्‍वरए ओकानुन मिताव, कुइतम तादी ब परिवा तादी ब तोजोर लाँद चरैःव उपरिज़्‍याव। हो मिताव ज़ नोनी लाँद चरैःकिनी।
LUK 2:25 हो बेलाक यरूसलेमल तोबो सिमियोन यादोज़्‍याव उलिज़्‍याव। नो मिँ चाव धर्मी मिँ ओल्‍यो। इस्राएलीरालाई बाँचैना हुन्‍यालाई कींव ज़ ओनैज़्‍याव। नोस परमेस्‍वरए छैंव उपुरूसए बास दाद ओनैज़्‍याव।
LUK 2:26 नोए ‘परमेस्‍वरए ओज़ा ख्रीसलाई ङामारँःवा पै सिन्‍या ङामाले’ लिद परमेस्‍वरए छैंव उपुरूसनी सैंद ओनैज़्‍याव।
LUK 2:27 है जैद तछा नोलाई परमेस्‍वरए उपुरूसए ध्‍यान झ़िमल लाँक्‍यो। हो बेलाक ज़ येसुलाई ब ओबाबु स़ोनो ओआमानी कानुन मितावनी परमेस्‍वरए उमिनत नैन्‍याए जूँनी ध्‍यान झ़िमल हुद यालिज़्‍याव।
LUK 2:28 सिमियोनए नो भाउज़ालाई उरँःव प़ाइँना ज़ नोलाई ओघोइँल छींद अइ लिद परमेस्‍वरलाई धन्‍याबाद चरैःक्‍यो,
LUK 2:29 “अ परमेस्‍वर, अब ते है नदाँव मिताव ताके। अब ते आव संसारनी ङा ननोकोरलाई खुसीस बिदा नयाँदी ब ताए।
LUK 2:30 संसारलाई बाँचैन्‍याए जूँनी नपरींव मिँलाई आव ङामीए ज़ ङारँःके।
LUK 2:31 नोलाई प़ाइँ मिँराए याङ़ाक तयार जैद नराएके।
LUK 2:32 छुत जातलावरालाई आवए ओक्‍याँनी ज़ नय़ेन सतैंद नराएरिज़्‍या। स़ोनो नमीं इस्राएलीरालाई ब आवए ओक्‍याँनी ज़ याइज्‍यात नैद नराएरिज़्‍या।”
LUK 2:33 येसुए ओबाबु ओआमानी सिमियोनए ओपाँ भरी थैद बनै ज़ अचम्ब ताकिनी।
LUK 2:34 नकिन सिमियोनए नोरालाई असिक याद ओआमा मरियमलाई, “इस्राएलीराए याखार्ल आव भाउज़ाए ओपाँत कुधुए यायुँ त़ोल्‍रिज़्‍या, कुधुए यायुँ थ॰रिरिज़्‍या। परमेस्‍वरए आव भाउज़ालाई ओल ओसरेस मिताव जैद नैव। नोलाई कुधुए यामाभैंःज़्‍यावए,
LUK 2:35 यायुँलाव पाँ भरी ननी ज़ रैंःरिज़्‍या। नयुँलाई पाला तरवालीए आनी हुनी सफेर्सिउ मिताव जैदींरिज़्‍याव,” है दोक्‍यो।
LUK 2:36 हो बेलाक ज़ ध्‍यान झ़िमल आसेरए ओथोलाव फनुएलए ओज़ा बनै जूचासो तोबो हन्‍ना यादोज़्‍याव मनी उलिज़्‍याव। नो ब अगमबादिनी ज़ ओल्‍यो। नोए रे ओदोव सात बर्सत ज़ ओरे सिद,
LUK 2:37 चौरासी बर्स पै बिनु रे ज़ ध्‍यान झ़िमल लिद उपासिद लाकनी रील परमेस्‍वरलाई पोंखारिउ ज़ ओनैज़्‍याव।
LUK 2:38 नोए ब येसुलाई उरँःव प़ाइँना परमेस्‍वरलाई धन्‍याबाद चरैःद यरूसलेम सहरलाव ‘गेलाई बाँचैज़्याव हुरिज़्‍या’ लिद कींद नैज़्‍यावरालाई येसुए उजूँनी हो छ्यामकिन सथैव ज़ यानैक्‍यो।
LUK 2:39 योसेफ स़ोनो मरियमनी परमेस्‍वरए ओकानुनलाव ध्‍यान झ़िमलाव याय़ेन भरी ओखेमोत निझ़िम गालीललाव नासरतदा निज़ा लाँद बाकिनी।
LUK 2:40 नो भाउज़ा घ्‍योःनाद ओर्सा ब ज़्‍यास्‍नाके, उबुद्धी ब छिप्‍नाके। परमेस्‍वरए ओअसिक ब ओक्‍याँत ज़ उलिज़्‍याव।
LUK 2:41 येसुए ओबाबु ओआमानी यरूसलेमलाव निस्‍तार पर्ब मानिन्‍याए जूँनी सालकाव तखेप निबाज़्‍याव।
LUK 2:42 तछा येसु बाह्र बर्स ओतावत सालकाव याबाज़्‍याव मिताव ज़ फरी ब बाकेर।
LUK 2:43 नो पर्ब भरी ओखेमोत याझ़िमदा याबाज़्‍याक येसु यरूसलेमल ज़ उरहिउ ओल्‍यो। ओबाबु ओआमानी मासैंकिनी।
LUK 2:44 नोनी ‘गेनैंरास हुज़्‍याखेहो’ लिद तछाकाव येम भरी ज़ बाकिनी। छींनी यानैंराए ल्‍यो जीदा साप्‍द,
LUK 2:45 निमादैक ते सापे सापे यरूसलेमदा ज़ ओल्‍द बाकिनी।
LUK 2:46 स़ोंलात ध्‍यान झ़िमल घेप्‍पा घेप्‍पा धर्मगुरूराए खार्ल च़ुसिद यापाँ थैद ओअर्थ ल्‍यो पाँ तीद पलासो ओरापरींज़्‍याव रँःकिनी।
LUK 2:47 नलाव थैज़्‍याव भरी येसुए उबुद्धीसकाव ओपाँर थैद प़ाइँ ज़ अचम्ब ताकेर।
LUK 2:48 ओबाबु ओआमानी ब निताव रँःद अचम्ब ताद ओआमाए, “काराव ङाज़ा आः दुख नयासिनो? गिन नँलाई साप्‍द गिन्‍च्‍या सिके,” है ओदोक ते,
LUK 2:49 येसुए, “जिन काराव ङालाई जिन्‍साप्‍नाज़्‍याव? ङा ङाबाबुए उझ़िमल ल्‍यो परिए लिन्‍या जिन्‍मासैंए रो?” है निदोक्‍यो।
LUK 2:50 नोनी है उनिदोव पाँए ओअर्थ मातीधुकिनी।
LUK 2:51 येसु ओबाबु ओआमानिस नासरतल बाद नोनी निपाँल ज़ लिके। ओआमाए आव पाँ भरी उयुँल खामिउ ज़ नैक्‍यो।
LUK 2:52 येसुए ओर्सा ब छिप्‍नाके, उबुद्धी ब झन ज़ पुलुस्‍नाके। परमेस्‍वरए स़ोनो मिँराए बनै चाव ज़ रँःकेर।
LUK 3:1 माहाराजा तिबेरिअसए राज्‍या ओदोव पन्‍ध्र बर्स ओतावत पन्‍तियस पिलातस यहूदियालाव हाकिम उलिज़्‍याव। नो बेलाक हेरोद गालील खन्‍दलाव राजा उलिज़्‍याव। ओभाइ फिलिप ईतुरिया स़ोनो त्राखोनितिस खन्‍दलाव राजा उलिज़्‍याव, फरी लुसानियास अबिलेने खन्‍दलाव राजा उलिज़्‍याव।
LUK 3:2 हन्‍नास स़ोनो कैयाफानी फरी ध्‍यान झ़िमलाव पुजारीराए याघेप्‍पानी निलिज़्‍याव। नो बेलाक ज़ परमेस्‍वरए ओपाँ जकरियाए ओज़ा यूहन्‍नाए ओक्‍याँत हुके। नो मिँ बनल उलिज़्‍याव।
LUK 3:3 हो बेलाकिन ज़ नोए मिँरालाई, “जेपापलाई ऱास्‍द, जेयुँ परमेस्‍वरए ल्‍योदा फर्कैद ऱील सछैंसिचिके। हो ताकिन ची जेपापर क्‍याल्‍सिद परमेस्‍वरस खैवर तान्‍या जेले,” है लिद सथैए सथैए यर्दन भै याक प़ाइँदा ज़ हुके।
LUK 3:4 किताव यसैया अगमबक्ताए ओसरो, हो मिताव ज़ ताके। होए ओसरो आव ज़, “बनल तोबोए ओर्गा अइ लिद यासथैरिज़्‍याव, ‘हुरिज़्‍याव प्रभुए ओयेम बनैद गाँत्‍या गुँतीलाई सदाँचिके।
LUK 3:5 झेंःवर तैःद घैराल सब्‍याल्‍चिके, गाँत्‍या गुँतीलाई सदाँद काँ काँ कुँ कुँर सरिप्‍चिके।
LUK 3:6 हाःकिन मिँ भरिए परमेस्‍वरनी बाँचैना हुवलाई रँःन्‍या जेले।’ ”
LUK 3:7 हो मिताव ज़ यूहन्‍नाए ल्‍योक ऱील सछैंसिना हुव माहोल्‍यारालाई, “ए घुलए ओथोर, जे परमेस्‍वरए उरिसनी धोंःन्‍या सुए है ओदाचिउ?
LUK 3:8 जे साचो ज़ परमेस्‍वरए ल्‍योदा जेयुँ फर्कैन्‍या ल्‍यो ताकिन साचो हो मिताव य़ेन ब दाव ताके। जे फरी, ‘गेपुर्खा अब्राहामनी ज़ परमेस्‍वरए ओज़ार ताद गेले’ है जेमालिदी ब ताए। ङा साचो है ङादाचिज़्‍या, परमेस्‍वरए सींर लुँरानी तादी ब अब्राहामए ओथोर याजैधुव।
LUK 3:9 किताव तोबो मिँए चाव सै माझाःज़्‍याव सींर धलैद मेंःल ओराख्‍याज़्‍याव, हिताव ज़ परमेस्‍वरए ब धलैन्‍याए जूँनी ओरोवा सींए ओजराक झाःद नैव।”
LUK 3:10 हाःत ज़ नो माहोल्‍याराए, “हिताव ताकिन ते गे कै लिन्‍या ओताव?” है यादोक ते,
LUK 3:11 यूहन्‍नाए, “जे जोस ऩेब्‍लो क्‍वा उलिकिन माल्‍योलाई तोबो ओयोक, स़ोनो ज़्‍याव उलिकिन माल्‍योलाई ब ओयोक,” है यादोक्‍यो।
LUK 3:12 सिर्मा स्‍यो·ज़्‍यावर मनी सछैंसिना हुद, “गुर्बा, गे कै लिन्‍या?” है यादोक ते,
LUK 3:13 यूहन्‍नाए, “जेलाई खा स्‍यो·न्‍या है दाद नैचिर, हाःज़ स्‍यो·च्‍यो, आगल्‍या ताराहाइच्‍यो,” है यादोक्‍यो।
LUK 3:14 फरी सिपाईंराए पाला, “गे कै लिन्‍या?” है यादोक ते, यूहन्‍नाए, “जे कोभालाई सचे·द धुत खत लैद हाइद ताराज़्‍युच्‍यो। जेतलब खा लिज़्‍या हाःत ज़ लिच्‍यो,” है यादोक्‍यो।
LUK 3:15 हाः बेलाक प़ाइँ मिँराए यूहन्‍नाए ओपाँ थैद, “आव ते आस दाद कींद गेनैज़्‍याव ख्रीस ची सा,” है लिकेर।
LUK 3:16 यूहन्‍नाए नो यापाँ थैद, “ङा जेलाई ऱील सछैंज़्‍याव वाज़ ची। ङा ङाछींनी ङाकिन ओसक्ती ल्‍यो तोबो हुरिज़्‍या। ङा होए ओपोलाए ओच़ें पला·न्‍या स्‍यासो ब ङामाले। होए परमेस्‍वरए छैंव उपुरूस स़ोनो मेंःनी सछैंचिरिज़्‍याव।
LUK 3:17 होए गेदा भरी नाङलील च्‍याप्‍द चाव भरी धन्‍सारल झाःद पुल भरिलाई खर्क ज़ माजिप्‍तिन्‍या मेंःल म़ुन्‍या ले।”
LUK 3:18 इताव अर्थर कुधु ज़ झाःद यूहन्‍नाए मिँरालाई परमेस्‍वरए ओपाँ यासथैक्‍यो।
LUK 3:19 हाः बेलाक राजा हेरोदए, ओभाइए ओज्‍या हेरोदियासलाई रैद ओनैज़्‍याव। यूहन्‍नाए, “नभाइए ओज्‍या नँ रैन्‍या माताए। नँ प़ाइँल ज़ माचाव य़ेन नदोज़्‍या,” है ओदोवए,
LUK 3:20 यूहन्‍नालाई झ्यालखानाल झाःक्‍यो। है जैद हेरोदलाई पापए तर्त पाप चा·सिके।
LUK 3:21 यूहन्‍ना झ्यालखानाल ओमाबाद मिँ भरी प़ाइँ यूहन्‍नानी यासछैंसिज़्‍याक येसु पाला सछैंसिके। येसु ऱील सछैंसिद ओपोंखारिज़्‍याक नम फैसिद,
LUK 3:22 परमेस्‍वरए छैंव उपुरूस कुइतम मिताव भुर्हुद येसुए ओक्‍याँत च़ुसिके। हाःत ज़ नमतिन तोबो गा अइ लिद हुके, “नँ ङायुँलाव ङाज़ा ज़। नँलाई रँःद ङायुँ होलाँ ताज़्‍या।”
LUK 3:23 येसु ओय़ेनत उथूसिज़्‍याक तीस बर्सवाकाव ओल्‍यो। नोलाई मिँराए योसेफए ओज़ाल यागनिज़्‍याव। योसेफए ओबाबु एली,
LUK 3:24 एलीए ओबाबु मत्तात, मत्तातए ओबाबु लेबी, लेबीए ओबाबु मल्‍की, मल्‍कीए ओबाबु यान्‍ना, यान्‍नाए ओबाबु योसेफ,
LUK 3:25 योसेफए ओबाबु मत्ताथियास, मत्ताथियासए ओबाबु आमोस, आमोसए ओबाबु नहूम, नहूमए ओबाबु इसली, इसलीए ओबाबु नग्‍गै,
LUK 3:26 नग्‍गैए ओबाबु माथ, माथए ओबाबु मत्ताथियास, मत्ताथियासए ओबाबु सेमैन, सेमैनए ओबाबु योसेख, योसेखए ओबाबु योदा,
LUK 3:27 योदाए ओबाबु योआनन, योआननए ओबाबु रेसा, रेसाए ओबाबु यरूबाबेल, यरूबाबेलए ओबाबु सालतिएल, सालतिएलए ओबाबु नेरी,
LUK 3:28 नेरीए ओबाबु मल्‍की, मल्‍कीए ओबाबु अद्दी, अद्दीए ओबाबु कोसाम, कोसामए ओबाबु एलमादम, एलमादमए ओबाबु एर,
LUK 3:29 एरए ओबाबु यहोसू, यहोसूए ओबाबु एलीएजर, एलीएजरए ओबाबु योरीम, योरीमए ओबाबु मत्तात, मत्तातए ओबाबु लेबी,
LUK 3:30 लेबीए ओबाबु सिमियोन, सिमियोनए ओबाबु यहूदा, यहूदाए ओबाबु योसेफ, योसेफए ओबाबु योनान, योनानए ओबाबु एल्‍याकीम,
LUK 3:31 एल्‍याकीमए ओबाबु मलेआ, मलेआए ओबाबु मिन्‍ना, मिन्‍नाए ओबाबु मत्ताथा, मत्ताथाए ओबाबु नातान, नातानए ओबाबु दाऊद,
LUK 3:32 दाऊदए ओबाबु यिसै, यिसैए ओबाबु ओबेद, ओबेदए ओबाबु बोअज, बोअजए ओबाबु सल्‍मोन, सल्‍मोनए ओबाबु नहसोन,
LUK 3:33 नहसोनए ओबाबु अम्‍मीनादाब, अम्‍मीनादाबए ओबाबु आराम, आरामए ओबाबु हेस्रोन, हेस्रोनए ओबाबु फारेस, फारेसए ओबाबु यहूदा,
LUK 3:34 यहूदाए ओबाबु याकूब, याकूबए ओबाबु इसहाक, इसहाकए ओबाबु अब्राहाम, अब्राहामए ओबाबु तेरह, तेरहए ओबाबु नाहोर,
LUK 3:35 नाहोरए ओबाबु सरूग, सरूगए ओबाबु रऊ, रऊए ओबाबु पेलेग, पेलेगए ओबाबु एबेर, एबेरए ओबाबु सेलह,
LUK 3:36 सेलहए ओबाबु केनान, केनानए ओबाबु अर्पसद, अर्पसदए ओबाबु सेम, सेमए ओबाबु नोआ, नोआए ओबाबु लेमेख,
LUK 3:37 लेमेखए ओबाबु मतूसेलह, मतूसेलहए ओबाबु हनोक, हनोकए ओबाबु येरेद, येरेदए ओबाबु महलालेल, महलालेलए ओबाबु केनान,
LUK 3:38 केनानए ओबाबु एनोस, एनोसए ओबाबु सेत, सेतए ओबाबु आदम, आदम फरी परमेस्‍वरनिकाव ओल्‍यो।
LUK 4:1 येसु यर्दन भैल ओसछैंसिउत छैंव पुरूसए ब्याल्‍द ननी पुलुस्‍द ओबाज़्‍याक नो पुरूसए तोबो साइँसुइँव पोङ लाँक्‍यो।
LUK 4:2 नल चालीस दिन भरी सैतानए येसुलाई झुकैन्‍याए जूँनी जाँचिउ ज़ नैक्‍यो। नाः भरिल येसु काता ज़ माज़्‍याद लिके। चालीस दिन ओतावत ओकरेए माधुनाक्‍यो।
LUK 4:3 हाःत ज़ सैतान ओल्‍योक हुद, “नँ साचो ज़ परमेस्‍वरए ओज़ा ताकिन आव लुँलाई भरेस जैके,” है ओदोक ते,
LUK 4:4 येसुए, “धर्मसास्‍त्रल अइ लिद सर्सिउ लिज़्‍या, ‘मिँलाई ज़्‍यावए वाज़ माङाव,’ ” है दोक्‍यो।
LUK 4:5 नकिन सैतानए तोबो झेंःव पोत लाँद संसारलाव राज्‍या भरी तोचोइत ज़ सतैंद्याद,
LUK 4:6 “नो नरँःज़्‍याव राज्‍या भरी ज़गै मगैवस नमीं ज़ जैद ङाईंरिज़्‍या। आव भरी ङाकुइत ज़ लिज़्या, जोलाई ङा याव ङापैंज़्‍या होलाई ज़ ङाएधुइ।
LUK 4:7 है जैद नँ ङाङ़ाक फुलुप्‍सिद धो नदाँकिन नो भरी नमींर ज़ तान्‍या लेर,” है दोक्‍यो।
LUK 4:8 नाःत ज़ फरी येसुए, “धर्मसास्‍त्रल अइ लिद सर्सिउ लिज़्‍या, ‘नप्रभु परमेस्‍वरए ओङ़ाक फुलुप्‍सिद होए ओसेवा वाज़ दान्‍या ताए,’ ” है दोक्‍यो।
LUK 4:9 सैतानए फरी येसुलाई यरूसलेमल लाँद ध्‍यान झ़िमए उतुपात बैद, “नँ साचो ज़ परमेस्‍वरए ओज़ा ताकिन आतिनी मेल ज़ो·निके।
LUK 4:10 धर्मसास्‍त्रल अइ लिद सर्सिउ लिज़्‍या, ‘नँलाई बाँचैन्‍याए जूँनी परमेस्‍वरए ओचाकर्‍यार परींदींरिज़्‍याव।
LUK 4:11 नोराए नँलाई छींद नखँ लुँत बजारिउ यान्‍या मालेर,’ ” है ओदोक ते,
LUK 4:12 येसुए, “धर्मसास्‍त्रल आव ब सर्सिउ लिज़्‍या, ‘नप्रभु परमेस्‍वरलाई जाँचिन्‍या माताए,’ ” है दोक्‍यो।
LUK 4:13 सैतानए येसुलाई प़ाइँनी ज़ जाँचिद छुत मौका ओमादैवा पै ऱास्‍द ख्‍यानैक्‍यो।
LUK 4:14 हाःत ज़ येसु छैंव पुरूसए ओसक्ती दैद गालीलदा ज़ ओल्‍द बाके। हाःकिन येसुए ओय़ेन नयाल प़ाइँदा ज़ थास्‍नाके।
LUK 4:15 धर्मसास्‍त्र झ़िम झ़िमक बाद परमेस्‍वरए ओपाँ ब प़ाइँलाई ज़ यासथैक्‍यो। नो पाँ थैद प़ाइँए ज़ येसुए उमिन सघ्‍योःदिकेर।
LUK 4:16 नकिन येसु ओल ओघ्‍योःव नाखार नासरतल ज़ हुके। एकतारकाव ओदोज़्‍याव मिताव ज़ ऩासिन्‍या छ्याम धर्मसास्‍त्र झ़िमल बाद परमेस्‍वरए ओपाँ प़रिन्‍याए जूँनी च्‍याँःसिके।
LUK 4:17 नलावराए यसैया अगमबक्ताए ओसरो पोस्‍तोको एकेर। येसुए नो पोस्‍तोको फैद नल ओल उजूँनी सर्सिउलाई पले·क्‍यो। नलाव सर्सिउ आव ज़,
LUK 4:18 “परमेस्‍वरए उपुरूस ङाक्‍याँत लिज़्‍या। गरीबरालाई चाव था सथैन्‍या ङालाई खतैद नैनाव। कैतल लिज़्‍यावरालाई पुलुस्‍न्‍या येम आव ज़ लिद सथैन्‍याए जूँनी, मारँःज़्‍यावरालाई यामी फैद्यान्‍याए जूँनी, दुखल लिज़्‍यावरालाई ऱास्‍न्‍याए जूँनी,
LUK 4:19 स़ोनो परमेस्‍वरए ओल उमींरालाई ओराबाँचैरिज़्‍याव था सथैन्‍याए जूँनी परींद नैनाव।”
LUK 4:20 हाःत ज़ येसुए नो पोस्‍तोकोलाई बन जैद नो याज़्‍यावलाई सोवोल्‍द्याद च़ुसिके। नलाव दुप्‍सिद लिज़्‍याव भरिराए यामी येसुए ओक्‍याँत ज़ उलिज़्‍याक,
LUK 4:21 येसुए नोरालाई, “आछिमकाव प़रिद ङायाचिउ धर्मसास्‍त्रलाव पाँ जेथैज़्‍याक ज़ यो·के,” है यादोक्‍यो।
LUK 4:22 नलाव लिज़्‍याव भरिए येसुए ओपाँ बनै चाव थ·रैद अचम्‍ब ताद, “काता आव योसेफए ओज़ा माःक रो?” है लिद जाँ मापतिकेर।
LUK 4:23 है जैद येसुए नोरालाई, “जे ङालाई प़ाइँए याझाःज़्‍याव घर्ती स्‍यासो जेजैनाज़्‍याखेहो। नो घर्ती आव ज़ — ‘ए सगराँज़्‍याव, ङ़ादा नक्‍याँलाई नसगराँधुज़्‍याव सतैंके।’ जे कफर्नहुमल ङादोव जेथैव मिताव ‘आव ननाखारल ब दोके,’ है जेदाँज़्‍याखेहो।
LUK 4:24 है जैद ङा जेलाई साचो है ङादाचिज़्‍या, अगमबक्तालाई ओल ओनाखारलावराए खर्क ज़ ओमान नैद माएर।
LUK 4:25 जे आव ब चेतैच्‍यो, एलियाए ओपालाक ब स़ोंरिम छ मैना पै नम मावाद बनै घ्‍योःव अनिकाल उलिज़्‍याक ओल उलिज़्‍याव इस्राएल देसल राँदी मेंमार कुधु ज़ याल्‍यो।
LUK 4:26 हितावत ब परमेस्‍वरए एलियालाई नोराए ल्‍योक मापरींद झन सीदोन खन्‍दलाव सारपत नाखारलाव राँदी मेंमाए ल्‍योक वाज़ परींक्‍यो।
LUK 4:27 फरी एलीसा अगमबक्ताए ओपालाक ब इस्राएल देसल कुऱीर बनै ज़ याल्‍यो। हितावत ब नोरालाई सुलाई ज़ मासगराँद झन सिरिया देसलाव नामानलाई वाज़ सगराँक्‍यो,” है यादोक्‍यो।
LUK 4:28 नो धर्मसास्‍त्र झ़िमलाव मिँराए येसुए ओपाँर थैद बनै ज़ रसिद,
LUK 4:29 थर च्‍याँःसिद नोलाई नाखारनी पले·द यानाखारलाव दाँदातिन हाँदा ख्‍याव पैंकेर।
LUK 4:30 खाली येसु नोराए खार्नी सिउःसिद बाके।
LUK 4:31 छींनी येसु फरी गालीललाव कफर्नहुम सहरल झरिद ऩासिन्‍या छ्याम मिँरालाई परमेस्‍वरए ओपाँ ओरासथैज़्‍याव।
LUK 4:32 नलावर येसुए ओपाँ थैद अचम्‍ब ताकेर, काराव ल्‍यो ताकिन होए बनै हकस ओरापैज़्याव।
LUK 4:33 नो बेलाक ज़ दुप्‍सिद यालिज़्‍याव धर्मसास्‍त्र झ़िमल बो·लैज़्‍याव पुरूसए क्‍योःद ओनैज़्‍याव तोबो मिँ उलिज़्‍याव। नो पुरूस बनै चोइस क़िद,
LUK 4:34 “अ नासरतलाव येसु, गेस नखै काता उलिज़्‍याव? गेलाई खेम्‍ना नहुव रो? ङा नँलाई ङासरेस्‍निज़्‍या। नँ परमेस्‍वरए छैंव उमीं ज़,” है लिके।
LUK 4:35 हाःत ज़ येसुए नोलाई हप्कैद, “झ्याउँ तालिनी, आवए ओक्‍याँतिन पुलुस्‍द बान्‍के,” है ओदोव प़ाइँना ज़ नो माचाव पुरूसए नो मिँलाई याखार्ल पछारिद कैज़ माजैद पुलुस्‍द बाके।
LUK 4:36 निताव रँःद नलावर अचम्‍ब ताद या याल, “आवए ओपाँ किताव ओताव? नाः ओसक्ती ल्‍यो, नाः ओहक ल्‍यो। माचाव पुरूसरालाई ओराहप्‍कैक मनी ओपाँर यादोज़्याव ची ओल्‍यो,” है लिकेर।
LUK 4:37 हाःकिन येसुए ओदोव य़ेन भरी नजीलाव पो पोङ प़ाइँदा ज़ थास्‍नाके।
LUK 4:38 नकिन येसु नो धर्मसास्‍त्र झ़िमनी पुलुस्‍द सिमोनए उझ़िमक बाके। नल सिमोनए उमुइँज्‍यु ओजोरो हुद घ्याँसिद उलिज़्‍याव। नलावराए नो ओजोरो हुवए उजूँनी येसुलाई है दोकेर।
LUK 4:39 है जैद येसु नो ओजोरो हुज़्‍यावए ल्‍योक बाद नो जोरोलाई उसिङारो प़ाइँना ज़ जोरोए ऱास्‍द नो मेंमा सोद नोरालाई ज़्‍यावर जैद याएक्‍यो।
LUK 4:40 निमी ओफेरनाव बेलाक नजीलाव याजोरो हुज़्‍याव भरी येसुए ओल्‍योक यारारैकेर। येसुए नोरालाई उकुइए छाप्‍द प़ाइँलाई ज़ यासगराँक्‍यो।
LUK 4:41 कुधु मिँराए याक्‍याँतिन माचाव पुरूसर ब चिर चिर क़िद, ‘नँ परमेस्‍वरए ओज़ा ज़’ लिद पुलुस्‍द बाकेर। नोराए येसुलाई ‘ख्रीस ज़’ लिद यासरेसोए येसुए नोरालाई हप्कैद पाँव ज़ ओमाराएज़्‍याव।
LUK 4:42 हो पराःती नम उसँवत येसु तोबो साइँसुइँव पोक बाके। माहोल्‍याराए येसुलाई खिम्‍द दैद यास नैन्‍याए जूँनी छुतदा बान्‍या वैंव पैंकेर।
LUK 4:43 येसुए फरी नोरालाई, “ङा परमेस्‍वरए ओराज्‍यालाव पाँ छुत नाखार नाखार, सहर सहरल ब सथैव ज़ परिके। नोए उजूँनी ज़ परमेस्‍वरए उपरींनाव,” है यादोक्‍यो।
LUK 4:44 है जैद येसुए यहूदिया खन्‍द भरिलाव धर्मसास्‍त्र झ़िम झ़िमक परमेस्‍वरए ओपाँ यासथैनाक्‍यो।
LUK 5:1 तछा गनेसरेत दह छ्योक च्‍याँःसिद येसुए परमेस्‍वरए ओपाँ ओरासथैज़्‍याक माहोल्‍यार येसुए ओपाँ थैन्‍याए जूँनी बनै याछुइसिहुज़्‍याव।
LUK 5:2 हो बेलाक दह छ्योक ऩेब्‍लो दोङ्गानी निरँःक्‍यो। नो दोङ्गा चलैज़्‍यावर ङाँः क्‍योःज़्‍यावर याल्‍यो। नोर दोङ्गानी हाइसिद याजालर याछेज़्‍याव।
LUK 5:3 येसु सिमोनए ओदोङ्गाल पसिद ऱील जाँ होकसै लाँव परींद ननी ज़ परमेस्‍वरए ओपाँ माहोल्‍यारालाई यासथैक्‍यो।
LUK 5:4 ओपाँ ओखेमोत सिमोनलाई, “नदोङ्गा उर्जीं ल्‍योदा लाँद ङाँःर यान्‍न्‍याए जूँनी नजाल ख्‍याके,” है ओदोक ते,
LUK 5:5 सिमोनए, “तुबुरी ज़ धामा दाद गेनाल क़्‍याके गुर्बा, तोबो ङाँः ज़ गेमादैए। हैदी ब नँ है नलिकिन नँ नपाँनी ज़ ङाख्‍या,” है दाद,
LUK 5:6 ओजाल ख्‍याक्‍यो। ओख्‍याव प़ाइँना ज़ ङाँःर बनै कुधु परिद जाल ज़ चीवा चीवा जैकेर।
LUK 5:7 है जैद ओलापकाव छुत दोङ्गात लिज़्‍याव यानैंरालाई ‘सघैहुसिचिके’ लिद सान दाद यारायो प़ाइँना ज़ नोर हुकेर। नो ऩेब्‍लो दोङ्गाल ङाँःर ब्‍याल्‍द दोङ्गानी ब गदिवा गदिवा ताकिनी।
LUK 5:8 है जैद सिमोन पत्रुसए नो रँःद येसुए उखँत फुलुप्‍सिद, “अ प्रभु, ङा इताव पापी नङ़ाक लिन्‍या स्‍यासो ङामाले। नँ ङानी बाव ताके,” है दोक्‍यो।
LUK 5:9 ङाँःर बनै ल्‍यो माल्‍यो यापरिउए सिमोन ओनैंरास अचम्‍ब ताद यालिज़्याव।
LUK 5:10 हो बेलाक सिमोनस य़ेन दोज़्‍यावनी जब्‍दियाए ओज़ानी याकूब स़ोनो यूहन्‍नानी निल्‍यो। नोनी ब अचम्‍ब ताकिनी। हाःत ज़ येसुए सिमोनलाई, “ताछे·नी, अबकिन नँलाई ङाँःर माःक, मिँर खिम्न्‍या ङाजैनिरिज़्‍या,” है दोक्‍यो।
LUK 5:11 है जैद नोर यादोङ्गार पाखाक यारारैव प़ाइँना ज़ यादोङ्गार याजालर ऱास्‍द येसुस बाकेर।
LUK 5:12 तछा येसु नजीलाव तोबो नाखारल उलिज़्‍याक तोबो कुऱीए येसुलाई रँःद ओङ़ाक फुलुप्‍सिद, “अ प्रभु, ङाल्‍योदा नयुँ ओताकिन ङालाई सगराँन्‍या नले,” है लिद बिन्‍ती ओदोव प़ाइँना ज़,
LUK 5:13 येसुए नोलाई उकुइए छाप्‍द, “नल्‍योदा ङायुँ लिज़्‍या ज़, गराँनिके,” है ओदोव प़ाइँना ज़ नो कुऱीए ओबेथा चक चक ज़ म़ाके।
LUK 5:14 येसुए फरी नोलाई, “आव नक्‍याँताव ङादोव य़ेन सुलाई ज़ है तारादोयो। बुरू नगराँव साचो ज़ ओल्‍यो लिन्‍या थ·रैव परींन्‍याए जूँनी पुजारीए ल्‍योक सतैंसिनाद मोसाए ओकानुनलाव मिताव चरैःन्‍यार चरैःनाके,” है दोक्‍यो।
LUK 5:15 हितावत ब येसुए ओबयेन झन ज़ तादा तादाङ थास्‍नाके। है जैद ओपाँ थैन्‍याए जूँनी स़ोनो याजोरो हुवर सगराँसिन्‍याए जूँनी मिँर ल्‍यो माल्‍यो याहुज़्‍याव।
LUK 5:16 ओल कैताक याल्‍योनी अलगज़ा हाइसिद साइँसुइँवक बाद ओपोंखारिनाज़्‍याव।
LUK 5:17 तछा येसुए परमेस्‍वरए ओपाँ ओरासथैज़्‍याक फरिसीर स़ोनो कानुनलाव यागुर्बार नल च़ुसिद यालिज़्‍याव। नोर ख्‍वार गालील स़ोनो यहूदिया खन्‍दलाव नाखार नाखारनी हुवर यालिज़्‍याव, ख्‍वार यरूसलेमनी हुवर यालिज़्‍याव। हो बेलाक परमेस्‍वरए सगराँन्‍या ओसक्ती येसुए ओक्‍याँत उलिज़्‍याव।
LUK 5:18 फरी नो बेलाक ज़ तोबो उखँ उकुइ सिउलाई झेलोङ्गाल झाःद येसुए ल्‍योक यारैज़्‍याव।
LUK 5:19 खाली मिँर बनै माहोल्‍या यातावए येसुए ल्‍योक बान्‍या येम मादैद नोर थालात बाद झ़िम कप्‍सिउ फल्‍यार जाँवा हाइद सघ्वाँःद नो उखँ उकुइ सिउलाई ओझेलोङ्गारास येसुए ओङ़ाक झरैदिकेर।
LUK 5:20 येसुए नोराए यायुँ उहुबो रँःद नो उखँ उकुइ सिउलाई, “अ कान्‍छा, नपाप क्‍याल्‍सिके,” है दोक्‍यो।
LUK 5:21 नो थैद नलाव हुव सास्त्रीर स़ोनो फरिसीराए या याल रूम्‍रूमैद, “आव मिँए कै जैद परमेस्‍वरए उमिन ओबले·ज़्याव? मिँए ओपाप क्‍याल्‍न्‍या ते परमेस्‍वरकिन सु ची उलिज़्‍यावदा?” है लिकेर।
LUK 5:22 येसुए नोराए यायुँलाव पाँ सैंद, “जे काराव जेयुँल नै जेलिज़्‍याव?
LUK 5:23 नो मिँलाई ‘नपाप क्‍याल्सिके’ है दान्‍या सैं ‘सोद बान्‍के’ है दान्‍या काताकाव सजालो उलिज़्याव?
LUK 5:24 अब ङा मिँ मिन्‍सिद हुवए आव मानुवात पाप क्‍याल्‍न्‍या ङाकुइत उलिज़्‍याव सैं ओमालिज़्‍याव चिऊचिके,” है दाद नो उखँ उकुइ सिउलाई, “ङा नँलाई है ङादींज़्‍या, सोद नझेलोङ्गार घुर्द नझ़िमदा बान्‍के,”
LUK 5:25 है ओदोव प़ाइँना ज़ नो उखँ उकुइ सिउ याङ़ाकिन ज़ सोद ओझेलोङ्गार घुर्द परमेस्‍वरए उमिनर सघ्‍योःद्याद रेंए रेंए उझ़िमदा बाके।
LUK 5:26 नो रँःव भरी बनै अचम्‍ब ताद छे·द, “आछिम काता गेरँःव इताव?” लिद परमेस्‍वरलाई बनै घ्‍योःव ज़ थ·रैकेर।
LUK 5:27 येसु ननी पुलुस्‍द ओबाज़्‍याक तोबो सिर्मा स्‍यो·ज़्‍याव लेबी यादोज़्‍यावलाई सिर्मा स्‍यो·न्‍या अद्दाक च़ुसिद उलिज़्‍याव रँःक्‍यो। येसुए नोलाई, “ङास हुन्‍के,” है ओदोव प़ाइँना ज़,
LUK 5:28 नो च्‍याँःसिद ओय़ेन भरी ऱास्‍द येसुए उछींत बाके।
LUK 5:29 नकिन लेबीए येसुलाई उझ़िमक लाँद बनै घ्योःव भत्‍यार जैक्‍यो। नो भत्‍यारल लेबीए ओनैंर स़ोनो सिर्मा स्‍यो·ज़्‍यावर ब कुधु ज़ याल्‍यो।
LUK 5:30 फरिसीर स़ोनो यासकाव सास्त्रीराए नोरालाई येसुस सिप याज़्‍युज़्‍याव रँःद येसुए उसिसरालाई, “जे कै जैद निताव सिर्मा स्‍यो·ज़्‍यावर स़ोनो पापीरास सिप जेज़्‍युज़्‍याव?” है लिद गन गन यारादोकेर।
LUK 5:31 नो है यारादोज़्‍याव येसुए थैद, “याजोरो माहुज़्‍यावरालाई सगराँन्‍या मिँ माचाहिए, याजोरो हुज़्‍यावरालाई वाज़ चाहिज़्‍या।
LUK 5:32 हो मिताव ज़ ङा मनी ‘गे धर्मीर’ है लिज़्‍यावरालाई परमेस्‍वरए ल्‍योदा बान्‍या ङाराखुल्‍हुव माःक, ‘गे पापीर’ है लिज़्‍यावरालाई ङाराखुल्‍हुव ची,” है यादोक्‍यो।
LUK 5:33 ख्‍वा ख्‍वा मिँराए येसुलाई, “ऱील सछैंज़्‍याव यूहन्‍नाए उसिसर स़ोनो फरिसीराए यासिसर एकतार ज़ उपासिद पोंखारिज़्‍यार। नँ नसिसर ते माउपासिद ज़्‍याद ओद लिज़्‍यार,” है यादोक ते,
LUK 5:34 येसुए, “जन्तीर ब्‍याहोल्‍यास यालेवा पै कै जैद याउपासिज़्‍याव?
LUK 5:35 खाली जो छ्यामकिन ब्‍याहोल्‍यालाई छुतैर, हो छ्यामकिन वाज़ उपासिन्‍या लेर,” है यादोक्‍यो।
LUK 5:36 फरी घर्ती तोबो झाःद याएक्‍यो, “ओरे छिबो क्‍वालाई तालिन्‍याए जूँनी सुए ज़ साःरो क्‍वा चीद मातालिउ, म़ानी साःरो क्‍वा ब बलेस्‍ज़्‍या, पुराँदोत साःरो तालिसिउ ब माखैए।
LUK 5:37 “हो मिताव ज़ पुराँदो प़िर्गुलल साःरो दाखमद्य सुए ज़ माझाःर, म़ानी उस॰ए प़िर्गुललाई सुफुद दाखमद्य ब भोन्‍या ले, प़िर्गुल ब खेर बान्‍या ले।
LUK 5:38 है जैद साःरो दाखमद्य साःरो प़िर्गुलल वाज़ झाःर।
LUK 5:39 पुराँदो दाखमद्य ओद बानी परिउए ‘आव ची ङमो लिज़्‍या’ लिद साःरो दाखमद्य ओव माभैंःए।”
LUK 6:1 ऩासिन्‍या छ्याम येसु उसिसरास एँः खार्लाव घ्याँ याबाज़्‍याक उसिसराए बाला फ्या·द ज़ुद याकैज़्‍याव
LUK 6:2 फरिसीराए रँःद येसुलाई, “ऩासिन्‍या छ्याम मादान्‍या य़ेन काराव जेदोज़्याव?” है यादोक ते,
LUK 6:3 येसुए, “धर्मसास्‍त्रलाव सर्सिउ दाऊद राजा ओनैंरास याकरेकाव यादोव य़ेन जेमाप़रिए रो?
LUK 6:4 दाऊद ध्‍यान झ़िमल पसिद परमेस्‍वरलाई चरैःसिउ भरेस हाइद ओल मनी ज़्‍युक्‍यो, ओनैंरालाई मनी याएक्‍यो। नो भरेस पुजारीराए वाज़ ज़्‍यान्‍या ओताज़्‍याव।”
LUK 6:5 नकिन येसुए फरी, “ङा मिँ मिन्‍सिद हुव ऩासिन्‍या छ्यामकिन ब घेप्‍पा ज़ ङालिज़्‍या,” है यादोक्‍यो।
LUK 6:6 फरी हुकिनकाव ऩासिन्‍या छ्याम येसुए धर्मसास्‍त्र झ़िमल परमेस्‍वरए ओपाँ ओरासथैज़्‍याक नल तोबो वोर्फताव उकुइ थँव मिँ ब उलिज़्‍याव।
LUK 6:7 हो बेलाक सास्‍त्रीर स़ोनो फरिसीराए येसुए ओपाहा झाःद्यान्‍याए जूँनी ऩासिन्‍या छ्याम सगराँन्‍या य़ेन मादोज़्‍याव ब्‍याँ लिद चिऊद यानैज़्‍याव।
LUK 6:8 येसुए नोराए यायुँलाव यापाँ सैंद झन नो उकुइ थँवलाई, “आक हुद च्‍याँःसिन्‍के,” है ओदोक ते, नो प़ाइँए याङ़ाक च्‍याँःसिके।
LUK 6:9 येसुए नो सास्त्रीरालाई, “दे, ङालाई है दाँचिके, ऩासिन्‍या छ्यामकाव य़ेन चाव जैन्‍या सैं माचाव जैन्‍या? मिँलाई बाँचैन्‍या सैं बले·न्‍या? कानुनए कै उलिज़्याव?” है दाद,
LUK 6:10 प़ाइँलाई तछ्योनी चिऊद नो उकुइ थँवलाई, “नकुइ तङ्गैके,” है दोक्‍यो। नोए उकुइ ओतङ्गैव प़ाइँना सोजोकाव ज़ ताके।
LUK 6:11 नो सास्त्रीर स़ोनो फरिसीराए येसुए ओदोव य़ेनलाई रँःद यारिस बनै चोद ‘आवलाई कै जैन्‍या ओताव?’ लिद सल्‍ला दोकेर।
LUK 6:12 हाः बेलाक तछा येसु तोबो दाँदात पोंखारिना बाके। नत परमेस्‍वरलाई तुबुरी पोंखारिद ज़ झाःक्‍यो।
LUK 6:13 हो पराःती छकाल्‍न्‍या ओलस बाऱिज़्‍यावरालाई ओल्‍योदा खुल्‍द, हो भरिनी बाह्र जनालाई छाँतिद ओसाचीर याजैक्‍यो।
LUK 6:14 नोराए यामिनर आवर ज़ — ङ़ादाकिनकाव उमिन सिमोन (छींनी होए उमिन पत्रुस जैदिक्‍यो), होए ओभाइ अन्‍द्रियास, नकिन याकूब, यूहन्‍ना, फिलिप, बारथोलोमाइ,
LUK 6:15 मत्ती, थोमा, अल्‍फयसए ओज़ा याकूब, देसभक्ता है यादोज़्‍याव सिमोन,
LUK 6:16 याकूबए ओज़ा यहूदा स़ोनो छींनी येसुलाई धोका याज़्‍याव यहूदा इस्‍करियोत।
LUK 6:17 नकिन नोरास दाँदातिन झरिद येसु तोबो बाँक च्‍याँःसिके। नक ओलस ओलस बाऱिज़्‍याव माहोल्‍यार ब यालिज़्‍याव। यहूदिया खन्‍दलाव मिँर, यरूसलेम सहरलाव मिँर, समुन्‍द्र छ्योकाव तुरोस स़ोनो सीदोन खन्‍द जीदाङाव मिँर ब बनै माहोल्‍या यालिज़्‍याव।
LUK 6:18 नोर ख्‍वा ओपाँ थैना हुवर, ख्‍वार याजोरोनी सगराँसिना हुवर, ख्‍वार याक्‍याँताव माचाव पुरूस पले·ना हुवर यालिज़्‍याव।
LUK 6:19 येसुए ओक्‍याँताव अचम्‍बलाव ओसक्तीए प़ाइँलाई ओरासगराँज़्‍यावए ओललाई छाप्‍न्‍याए जूँनी नो माहोल्‍यार ओल्‍योक बनै याछुइसिहुज़्‍याव।
LUK 6:20 नकिन येसुए ओलस बाऱिज़्‍यावरालाई चिऊद अइ लिद पाँके, “धन्‍या, जे गरीबर, परमेस्‍वरए ओराज्‍या जेमीं ज़।
LUK 6:21 धन्‍या, जे आज्‍याल करे लिज़्‍यावर, जेकरे सिन्‍या ले। धन्‍या, जे आज्‍याल घर्ज़्‍यावर, रेंन्‍या ज़ जेले।
LUK 6:22 ङा मिँ मिन्‍सिद हुवए ङाजूँनी जेलाई सोद, याखार्नी पले·द, बीज्‍यात जैद, जेमिन बले·द यायाचिक धन्‍याकावर ज़ जेताज़्या।
LUK 6:23 हो छ्याम जेरेंतए ज़ो·चिके, काराव ल्‍यो ताकिन स्‍वर्गताव घ्योःव इनाम दैन्‍या जेले। नो जेखिरी पसिज़्‍यावराए यासाखा पुर्खाराए ब अगमबक्ता भरिरालाई ब हैज़ याराजैकेर।”
LUK 6:24 “जे धनीरालाई थैए माँतकन, आव जेजिउत वाज़ जेयुँ होलाँ ताद जेलिरिज़्‍या।
LUK 6:25 जे आज्‍याल द॰ द॰ सव़ाँसिज़्‍यावरालाई थैए माँतकन, करे ज़ जेतारिज़्‍या। स़ास्‍द रेंद लिज़्‍यावरालाई थैए माँतकन, पाँकी पाँ घर्न्‍या जेले।
LUK 6:26 जे प़ाइँ मिँराए यासघ्‍योःचिज़्‍यावर थैए माँतकन, नो सघ्‍योःज़्‍यावराए यासाखा पुर्खाराए तँनी पैज़्‍यावरालाई ब हिताव ज़ यारासघ्‍योःज़्‍याव।”
LUK 6:27 “जे थैज़्‍यावरालाई है ङादाचिज़्‍या, जेसुतुररालाई यारासमारिच्‍यो, जेलाई सोज़्‍यावरालाई चाव य़ेन दाद याराएच्‍यो।
LUK 6:28 जेलाई थल्‍ज़्‍यावरालाई असिक याराएच्‍यो, जेलाई बले·व पैंज़्‍यावराए जूँनी पोंखारिच्‍यो।
LUK 6:29 तँनिकाव नगालात प़ोद याईंकिन फरी तँनिकाव नगाला ब थाँद याएयो। नफुतु यानैंनिकिन नकमेस ब सिउःद याएयो।
LUK 6:30 नँस ऩिज़्‍यावरालाई याएयो, नमीं हाइद लाँज़्‍यावरास फरी ताऩियो।
LUK 6:31 जे छुतए ल्‍योनी किताव जेपैंज़्‍या, जे ब छुतए ल्‍योदा हितावनी ज़ दोचिके।
LUK 6:32 “जेलाई समारिज़्‍यावरालाई वाज़ जेरासमारिकिन नो ते काता ज़ माताके। नाःवाकाव य़ेन ते पापीराए ब दोज़्‍यार।
LUK 6:33 फरी जेलाई चाव य़ेन दाद्याज़्‍यावरालाई वाज़ चाव जेराजैकिन नो ब काता ज़ माताके। निताव ते पापीराए ब दोज़्‍यार।
LUK 6:34 सोवोल्‍धुन्‍यारालाई वाज़ जेरालोइकिन नो ब काता ज़ माताके। निताव ते पापीराए ब ‘ङालाई सोवोल्‍द्याँवा ज़’ लिद यारालोइज़्‍यार।
LUK 6:35 “है जैद जे ते जेसुतुररालाई चाव य़ेन दाद यारासमारिच्‍यो। रिन जेराएक ‘खर्क सोवोलोके’ लिद आस मादाद याराएच्‍यो। हो ताकिन ची माहान परमेस्‍वरनी घेप्‍पा इनाम दैन्‍या ताद ओज़ार ब तान्‍या जेले। ओल ब उगुन माचेतैज़्‍याव पापीराए ल्‍योदा उयुँ य़ालो ज़ लिज़्‍या।
LUK 6:36 किताव स्‍वर्गताव जेबाबुए उयुँ जेल्‍योदा नाज़्‍या, हिताव ज़ जे ब छुतए ल्‍योदा जेयुँ ओनाक।”
LUK 6:37 “जे अर्काए ओखत पले·द ताएच्‍यो, म़ानी परमेस्‍वरए जे जेखत ब पले·द्यान्‍या ले। अर्कालाई ‘इताव हिताव’ है दान्‍या ब माःक, म़ानी परमेस्‍वरए जेलाई मनी है दान्‍या ले। जेउपर्त मादान्‍या दोज़्‍यावलाई जेऱास्‍किन परमेस्‍वरए जेलाई मनी ऱास्‍न्‍या ले।
LUK 6:38 है जैद जे छुतलाई जेएकिन जे मनी जेदैरिज़्‍या। किताव गोइँनी जेगोइँज़्या, जे मनी हिताव गोइँनी ज़ दैन्‍या जेले, झन हर्लैद छुइए छुइए ज्‍याल्‍द जेघोइँल ब भोन्‍या ले।”
LUK 6:39 नकिन येसुए फरी अइ लिद घर्तीरानी यासथैक्‍यो — “उमी मारैंःवए उमी मारैंःवलाई दोरैद ओलाँकिन नोनी ऩेब्‍लो ज़ भल्‍खादाल तेन्‍या लिनी।
LUK 6:40 “फरी, उगुर्बाकिन उसिस घेप्‍पा माताए। प़ाइँ उतीधुवत वाज़ उगुर्बा स्‍यासो ताज़्‍या।
LUK 6:41 “हिताव ज़ फरी, कै जैद ननैंए उमीलाव तकेज़ा सींका नरँःज़्‍याव, नँ नमीलाव नाःल्‍दिउ मुँदा ताकितर नमारँःज़्‍याव?
LUK 6:42 नमीलाव नाःल्‍दिउ मुँदा मारँःद कै जैद ननैंलाई, ‘नमीलाव सींका हाइद ङाईं’ है नदोधुरिज़्‍याव? ए निताव पाँज़्‍याव कैफती, ङ़ादा नमीलाव मुँदा हाइकेदा, ननैंए उमीलाव सींका नहाइक छर्लङ्ग रँःन्‍या नले।”
LUK 6:43 “चाव सींए माचाव सै माझाःव, माचाव सींए चाव सै ब माझाःव।
LUK 6:44 है जैद जो मिताव सीं तादी ब ओसैनी ज़ सरेस्‍सिज़्‍या। ज़ुसैत कोराली मासैए, कारज़ुत जोम्‍परसै ब मासैए।
LUK 6:45 हो मिताव ज़ चाव मिँए उयुँनी चाव वाज़ हुज़्‍या, माचाव मिँए उयुँनी माचाव वाज़ हुज़्‍या। युँल किताव लिज़्‍या याःनी ब हिताव ज़ हुज़्‍या।”
LUK 6:46 “जे ङापाँ जेमादोकिन ङालाई ‘प्रभु, प्रभु’ है जेमादाँदी ब ताए।
LUK 6:47 जोए ङाल्‍योदा हुद ङापाँ थैद दोज़्‍याव, नो मिँ किताव उलिज़्‍याव सतैंद ङायाचिरिज़्‍या।
LUK 6:48 नो तोबो झ़िम जैज़्‍याव मिँए गज बनै पतालल लुँ तर्त ओझाःव स्‍यासो लिज़्‍या। नो झ़िम बनै पक्‍कास जैसिउ ओतावए घ्‍योःव भल उहुदी ब कैज़ माजैधुव।
LUK 6:49 फरी जो मिँए ङापाँ थैद ओमादोकिन नो गज माखालिद झ़िम जैज़्‍याव मिँ स्‍यासो लिज़्‍या। नो झ़िमलाई भल उहुक तैःद प्‍याःपी जैद लाँद उमिन ज़ सम़ैदिज़्‍याव।”
LUK 7:1 येसुए नो ओपाँ भरी मिँरालाई ओरासथैवत फरी कफर्नहुमदा बाके।
LUK 7:2 हाः बेलाक नल तोबो रोमी कप्‍तानए उयुँलाव मिताव ओनोकोर ओजोरो हुद सिउ ओपैंज़्‍याव।
LUK 7:3 नो कप्‍तानए येसुए ओबयेन थैद ओनोकोरलाई सगराँन्‍याए जूँनी यहूदीराए यास़ेरर ऩेबरेंवा परींद येसुलाई क़िनाव यापरींक्‍यो।
LUK 7:4 नोर येसुए ओल्‍योक बाद बिन्‍ती दाद, “नो कप्‍तानए नँ नसाएता दैन्‍याकाव ज़ लिज़्‍या।
LUK 7:5 नोए गेजातलाव मिँराए ल्‍योदा उयुँ ताद गेजूँनी धर्मसास्‍त्र झ़िम ब जैद्यासिक्‍यो,” है दोकेर।
LUK 7:6 है जैद येसु नोरास बाके। याबाज़्‍याक कप्‍तानए नोर झ़िमकिन सर्बा तादाङ याहुज़्‍याव रँःद तोबो ऩेब्‍लो ओनैंरालाई येसुए ल्‍योदा, “ ‘अ प्रभु, ङाजूँनी आः दुख तादैयो। ङा इतावए ङाझ़िमक नँलाई लाँन्‍या स्‍यासो ङामाले।
LUK 7:7 ङा नङ़ाक सतैंसिन्‍या स्‍यासो ब ङामाले। बुरू ननी ज़ ‘गराँनिके’ है नलिकिन ङानोकोर गराँन्‍या ले।
LUK 7:8 ङा ब छुतए ओहक धूँलाव मिँ ज़। ङा ङाधूँल मनी कुधु सिपाईंर लिज़्‍यार। नोरालाई ‘बाचिके’ है ङारादोक बाज़्‍यार, ‘हुचिके’ है ङारादोक हुज़्‍यार। ङानोकोरलाई ब ‘इताव दोके’ है ङादोक दोज़्‍याव’ है दोच्‍यो,” है लिद यापरींक्‍यो।
LUK 7:9 येसुए कप्‍तानए ओरापरींवराए यापाँ थैद कप्‍तानस अचम्‍ब ताद ओलस बाज़्‍याव माहोल्‍याराए ल्‍योदा भाल्‍सिद, “ङा जेलाई है ङादाचिज़्या, इस्राएलीराए याखार्ल मनी आव मिताव ङाल्‍योदा उयुँ हुबो सु ज़ ङामादैताए,” है यादोक्‍यो।
LUK 7:10 नकिन नो कप्‍तानए ओरापरींवर ओल्‍द झ़िमक याबाक नो ओजोरो हुज़्‍याव गराँद उलिज़्‍याव रँःकेर।
LUK 7:11 येसु नकिन फरी जाँवाक नाइन यादोज़्‍याव नाखारदा बाके। नो बेलाक उसिसर स़ोनो माहोल्‍यार ब ओलस कुधु ज़ याबाज़्‍याव।
LUK 7:12 नाखार ङ़ाक याकेसोत तोबो मोरो घुर्द यालाँज़्‍याव यारँःक्‍यो। नो सिउ छोर्‍या तोबो राँदी मेंमाए ओज़ा नाः तोबो ज़ ओल्‍यो। नो लाँज़्‍याव मलामीर सर्बा कुधु ज़ याल्‍यो।
LUK 7:13 प्रभुए नो राँदी मेंमालाई रँःद उयुँ नाद ओल्‍योक बाद, “ताघर्नी,” है दाद,
LUK 7:14 मोरो झाःसिउ बाकसलाई ओछापोत नो मोरो बैज़्‍यावर ब च्‍याँःसिकेर। याच्‍याँःसिक येसुए नो मोरोलाई, “अ बुचा, सोनिके,” है ओदोव प़ाइँना
LUK 7:15 नो सिउ छोर्‍या सैंसिद च़ुसिद पाँके। है जैद येसुए नो छोर्‍यालाई ओआमाए ओजिम्‍बाल झाःक्‍यो।
LUK 7:16 निताव रँःद मलामीर बनै छे·द परमेस्‍वरलाई बनै घ्‍योःव थ·रैद, “माहान अगमबक्ता ज़ गेखार्ल हुद ले, ओल परमेस्‍वर ज़ उमींरास दैसिहुद ले,” है लिकेर।
LUK 7:17 है जैद ‘येसुए इताव य़ेन दोक्‍यो दी’ लिन्‍या यहूदियाल स़ोनो नजीलाव खन्‍द भरिल प़ाइँदा ज़ थास्‍नाके।
LUK 7:18 ऱील सछैंज़्‍याव यूहन्‍नाए उसिसराए ब आव भरी यूहन्‍नालाई है दोकेर।
LUK 7:19 है जैद यूहन्‍नाए ऩेब्‍लो उसिसनिलाई खुल्‍द प्रभुए ल्‍योक, “नो धर्मसास्‍त्रलाव सर्सिउ ‘हुरिज़्‍या’ है यालिज़्‍याव नँ ज़ रो, सैं छुतलाई कींन्‍या?” है दोनाव निपरींक्‍यो।
LUK 7:20 है जैद नोनी येसुए ल्‍योक बाद, “गिनलाई ऱील सछैंज़्‍याव यूहन्‍नाए उपरींसिनो। होए नँलाई है दींज़्‍याव — नो धर्मसास्‍त्रलाव सर्सिउ ‘हुरिज़्‍या’ है यालिज़्‍याव नँ ज़ रो, सैं छुतलाई कींन्‍या?” है दोकिनी।
LUK 7:21 नो बेलाक येसुए याजोरो हुवरालाई, माचाव पुरूसराए क्‍योःद यारानैज़्‍यावरालाई स़ोनो यामी मारैंःवर कुधुलाई ओरासगराँज़्याव।
LUK 7:22 है जैद येसुए नोनिलाई, “आव ङादोव जिन्‍रँःव जिन्‍थैव भरी यूहन्‍नालाई है दोचिन। ‘यामी मारैंःवरालाई सरैंःद याएज़्‍याव, माबाधुन्‍यारालाई बाधुन्‍या याजैज़्‍याव, कुऱीरालाई यासगराँज़्‍याव, यार्ना माथासोरालाई थैधुन्‍या याजैज़्‍याव, सिउरालाई याजागैज़्‍याव, गरीबरालाई ब परमेस्‍वरए ओपाँ यासथैज़्‍याव,’ है दोनाचिन्‍के।
LUK 7:23 ङालाई रँःद यायुँ माक़्‍याज़्‍यावर असिक दैवर लिज़्‍यार,” है निदोक्‍यो।
LUK 7:24 यूहन्‍नाए उनिपरींवनी निबाव छींनी येसुए माहोल्‍यारालाई यूहन्‍नाए उजूँनी अइ यादोक्‍यो, “जे यूहन्‍नाए ल्‍योक बनल जेबाक नोलाई किताव जेरँःया? बतासए आदा फुलुपनी होदा फुलुप ओजैज़्‍याव छी स्‍यासो ते जेमारँःखेहो।
LUK 7:25 हिताव ओमालिकिन किताव जेरँःया? सैं बनै चाव चाव क्‍वा क्‍वाइसिउ मिँलाई जेरँःव? निताव क्‍वा क्‍वाइसिद थाँतस लिज़्‍यावर ते दरबारल वाज़ लिज़्‍यार सानी।
LUK 7:26 है जैद ओल्‍योक जेबाक नोलाई किताव जेरँःया? अगमबक्ता ज़ जेरँःखेहो सानी। ङा फरी है ङादाचिज़्‍या, अगमबक्ताकिन झन घेप्‍पालाई ज़ जेरँःके।
LUK 7:27 नो यूहन्‍ना धर्मसास्‍त्रलाव सर्सिउ मिँ ज़। नोए उजूँनी सर्सिउ आव ज़, ‘ङाकत्वाल्‍यालाई नङ़ा नङ़ा परींद ङाईंज़्‍या। नजूँनी नोए नङ़ादा ज़ नयेम तयार जैदींरिज़्‍याव।’
LUK 7:28 है जैद ङा जेलाई है ङादाचिज़्‍या, मिँनी जर्मिउ भरिरानी यूहन्‍नाकिन घेप्‍पा सु ज़ माले। हैदी ब परमेस्‍वरए ओराज्‍यालाव गोइँनी ताकिन ते प़ाइँरानी ज़िम्‍ज़ा नोकिन घेप्‍पा लिज़्‍या,” है यादोक्‍यो।
LUK 7:29 नो पाँ थैज़्‍याव मिँर स़ोनो सिर्मा स्‍यो·ज़्‍याव पापीर यातादी ब जाँकोसै यूहन्‍नानी यासछैंसिउए नोराए ङ़ादाकिन ज़ ‘परमेस्‍वरए ओय़ेन साचो ज़ लिज़्‍या’ लिद याथ·रैज़्‍याव।
LUK 7:30 फरिसीर स़ोनो कानुनलाव यागुर्बार ते यूहन्‍नानी मासछैंसिद नोराए जूँनी परमेस्‍वरए ओदोज़्‍याव य़ेन माभैंःकेर।
LUK 7:31 है जैद येसुए, “आव बेलाकाव मिँर कितावर यालिज़्‍याव, किताव अर्थनी है ङादाचिके, है लिक ते,
LUK 7:32 आव बेलाकाव मिँर बजार खार्ल रैःसिज़्‍याव ल़ुज़ा स्‍यासोर लिज़्‍यार। नोर यानैंरास गन्गनैद, ‘बाँसुली तप्‍द गेयाचिक ब जेमास़्‍याके, लँसिद गेयाचिक ब जेमाघर्के।’
LUK 7:33 हो मिताव ज़ ऱील सछैंज़्‍याव यूहन्‍नाए ज़्‍यान्‍यार ओमाज़्युक, दाखमद्य ओमाओक नोलाई ‘दैनी परिद ले’ है जेदोज़्या।
LUK 7:34 ङा मिँ मिन्‍सिद हुवए फरी ज़्‍यान्‍यार ङाज़्‍युक, ओन्‍यार ङाओक ‘चिऊचिके, काता ज़ मानैज़्‍याव ज़्‍यास्‍ती, दाखमद्य ओए ओए बाऱिज़्‍याव, सिर्मा स्‍यो·ज़्‍याव पापीराए यानैं’ है जेदाँज़्‍या।
LUK 7:35 हैदी ब परमेस्‍वरए ओगहक थ॰रिउ लिज़्‍या लिन्‍या ओल उबुद्धी दैवराए ज़ थ·रैज़्‍यार,” है यादोक्‍यो।
LUK 7:36 तोबो फरिसीए येसुलाई उझ़िमक काँ ज़्‍यान्‍या खुल्‍क्‍यो। येसु नोए उझ़िमक बाद च़ुसिद काँ उज़्‍युज़्‍याक,
LUK 7:37 नो सहरलाव तोबो पातर्नी मेंमाए ‘येसु फरिसीए उझ़िमक काँ ज़्‍युना बाद ले दी’ लिन्‍या थैद नो मेंमाए बनै चाव ज़िम्‍ज़ा लुँ जाल उसी ङरो बनै ओएः ल्‍यो म़ास लाँद येसुए ल्‍योक बाके।
LUK 7:38 नक उछींक बाद घर्द उप़िलए उखँलाई सचिऊद्याद ओचेमए सीद नो ओरैव म़ास थीद्याद उखँलाई माइँ दोदिक्‍यो।
LUK 7:39 नो येसुलाई काँ याज़्‍याव फरिसीए नो मेंमाए ओदोव य़ेन रँःद उयुँल उयुँल, “आव साचो अगमबक्ता ओताव ताकिन नो उखँ छाप्‍ज़्‍याव मेंमा माचाव पापीनी ओल्‍यो लिन्‍या सरेस्‍खेहो,” है लिके।
LUK 7:40 हाःत ज़ येसुए नो फरिसीए उयुँलाव पाँ सैंद, “अ सिमोन, नँलाई तोबो पाँ है ङादींरिज़्‍या,” है ओदोक ते, “ताए गुर्बा, है दाँके,” है दोक्‍यो।
LUK 7:41 नकिन येसुए, “तोबो साहुए उरूप्‍या रिन लाँवनी ऩेब्‍लो निल्‍यो। नोनी तोबोए चाँदीए सिक्‍का पाँच सय, तोबोए पचास लाँद निनैज़्‍याव।
LUK 7:42 नोनी नो रिन निमाफो·धुवए साहुए ऩेब्‍लोलाई ज़ निऱास्‍क्‍यो। नोनी साहुए उगुन काताकावए कोसै चेतैनिके? है दाँके,” है ओदोक ते,
LUK 7:43 नो सिमोनए, “नो कुधु ओऱासोए ज़ ताखेहो,” है ओदोक ते, येसुए, “थिक ज़ है नदाँके,” है दाद,
LUK 7:44 नो मेंमाए ल्‍योदा भाल्‍सिद सिमोनलाई है दोक्‍यो, “आव मेंमाए ओदोव नरँःखेहो। ङा नझ़िमक ङाहुक ङाखँ हुर्न्‍या ऱी ब नमायाँके, आवए ते उप़िलए ङाखँ हुर्द्याद ओचेमए सीद्याँक्‍यो।
LUK 7:45 नल्‍योक ङाहुक माइँ ब नमादाँके, आवए ते ङाहुवकिन ज़ ङाखँत माइँ दाव ज़ नैज़्‍याव।
LUK 7:46 नँ फरी ङाङ़ैत म़ास ब थीद नमायाँके, आवए ते झन ङाखँत चाव सी ङरो म़ास ब थीद्याँक्‍यो।
LUK 7:47 है जैद ङा नँलाई है ङादींज़्‍या, आव मेंमाए ओपाप कुधु ज़ उलिदी ब ओपो·स ज़ ओक्‍याल्‍सिउए ङागुन कुधु ज़ चेतैक्‍यो। फरी छ्या ऱास्‍सिउए छ्या गुन ज़ चेतैज़्‍याव,” है लिद,
LUK 7:48 येसुए नो मेंमालाई, “नपाप प़ाइँ ज़ क्‍याल्‍सिके,” है दोक्‍यो।
LUK 7:49 ओलस काँ ज़्‍युज़्‍यावराए नो पाँ थैद, “आव मिँ कै जैद पाप क्‍याल्‍धुन्‍या ओजैसिज़्‍याव?” है लिकेर।
LUK 7:50 येसुए फरी नो मेंमालाई, “ङालाई नयुँ उहुबोए नबाँचिके, नझ़िमदा चावस बानी,” है दोक्‍यो।
LUK 8:1 नकिन जाँवाक येसु सहर सहर, नाखार नाखार भरी ब परमेस्‍वरए ओराज्‍यालाव चाव था ओरासथैज़्‍याव। बाह्र जना उसिसर ब ओलस ज़ यालिज़्‍याव।
LUK 8:2 येसुए ङ़ादा माचाव बेथारानी, माचाव पुरूसरानी ओरासगराँव मेंमार ब तोबो ऩेब्‍लो ओलस ज़ यालिज़्‍याव। नोरानी तोबो मरियम मग्‍दलिनी, नोए ओक्‍याँतिन सात गोता माचाव पुरूसर पले·द ओयो।
LUK 8:3 फरी राजा हेरोदए उझ़िमलाव य़ेन चलैज़्‍याव खुजासए ओज्‍या योअन्‍ना, स़ोनो सुसन्‍ना, नोराकिन छुतर ब याल्‍यो। नो भरिए या याझ़िमनी ज़ येसुलाई उसिसरास माथैंव मायो·वल सयो·द याराएज़्‍याव।
LUK 8:4 नजीलाव नाखार नाखारलाव मिँर येसुए ओल्‍योक बनै माहोल्‍या याहुज़्‍याव। नोरालाई अइ लिद घर्ती तोबो झाःद याएक्‍यो,
LUK 8:5 “तोबो मिँ ओएँःल धुर वास्‍ना बाके दी। धुर ओवास्ज़्याक ख्‍वा धुर येम जीदा परिके दी। नो येमलाव परिउ ख्‍वा मिँराए छिल्‍केर दी, ख्‍वा बाज़ाराए ज़्‍युकेर दी।
LUK 8:6 फरी ख्‍वा धुर गम छ्या छ्या ल्‍यो ओदादरत परिके दी। नत उझी ओमाल्‍योए उपरीव प़ाइँना ज़ थँके दी।
LUK 8:7 फरी ख्‍वा धुर ज़ुर ऱमराए खार्ल परिके दी। नो ज़ुर ऱमरास सरा भरी परीद ज़ुर ऱमराए गाल्‍क्‍यो दी।
LUK 8:8 फरी ख्‍वा धुर ते गमस्‍याल परिके दी। नो बनै चावस परीद सय गुना सैके दी।” येसुए निताव पाँर सथैद माहोल्‍यारालाई है ओरादोज़्‍याव, “आव पाँ जोए थैन्‍या उयुँ लिज़्‍या, चावस ओथैवक।”
LUK 8:9 येसुए उसिसराए ओललाई, “आव नझाःव घर्तीए ओअर्थ काता?” है यादोक ते,
LUK 8:10 येसुए, “जेलाई वाज़ परमेस्‍वरए ओराज्‍यालाव कप्‍सिउ पाँर छर्लङ्ग सतैंसिउ लिज़्‍या, उपुर्कावरालाई ते घर्ती मिताव ज़ लिज़्‍या। है जैद, ‘नोराए रँःद ब मारँःधुर, थैद ब मातीधुर।’
LUK 8:11 “है जैद नो आछ्याकाव ङाझाःव घर्तीए ओअर्थ आव ज़ — धुर परमेस्‍वरए ओपाँ ज़।
LUK 8:12 नो येमलाव परिउ धुर आव ज़, जोए परमेस्‍वरए ओपाँ ओथैक सैतान हुद ‘आव ते परमेस्‍वरए ल्‍योदा बाद अजम्‍बरी जुनी दैवा’ लिद उयुँलाव पसिउ पाँ ब स्‍याप सिप जैद लाँदिज़्‍याव।
LUK 8:13 फरी नो ओदादरताव परिउ आव ज़, जोए परमेस्‍वरए ओपाँ ओथैव प़ाइँना रेंद ज़ भैंःज़्‍या। खाली ओजरा माल्‍यो मिताव ओतावए नो पाँत जाँवा पै बाद कातारानी दुखर खिरीर उपसिकिन ह्‍वाँ हों ऱास्‍ज़्‍याव।
LUK 8:14 फरी नो ज़ुर ऱमराए खार्लाव परिउ आव ज़, जोए थैन्‍या ते थैज़्‍याव, खाली नोए ‘आव ङाजिउत कै तान्‍या ओताव, कातानी कोसै जैद थाँतस लिन्‍या?’ लिद व़ीनी फुइ उलिज़्‍यावए नो परमेस्‍वरए ओपाँत ओसै माझाःज़्याव ताज़्‍या।
LUK 8:15 फरी नो गमस्‍याल परिउ आव ज़, जोए परमेस्‍वरए ओपाँ थैद जात्त ज़ माऱास्‍द चाव साचो युँस दोज़्‍याव, नो परमेस्‍वरए ओपाँत थ॰रिद ओसै झाःज़्याव चाव धुर स्‍यासो ज़ ताज़्‍या।”
LUK 8:16 “सुए ज़ ल़ोसै तैंःद जाए माकबो, खात खँल ब माम़ोंव। बुरू ‘झ़िमल पसिज़्‍यावरालाई पलाँ घताक’ लिद दिउ बाल्‍न्‍यात झाःज़्‍याव।
LUK 8:17 हिताव ज़ मारैंःव भरी तछा रैंःन्‍या ज़ ले, कप्‍सिउ भरी ब फैसिद पलाँवल तान्‍या ले।
LUK 8:18 है जैद जे नो पाँलाई पाथस थैच्‍यो। जोए धिद थैज़्‍याव, होए झन ज़ तीधुन्‍या ले। जोए चावस माथैव, होए झन ज़ थैन्‍या युँ मादाद ङ़ादाङाव ओथैव ब ओपो·स ज़ म़ान्‍या ले।”
LUK 8:19 छींनी तछा येसुए ओआमा स़ोनो ओभाइर येसुस दैसिना याहुक मिँर बनै माहोल्‍या यातावए ओल्‍योक बान्‍या येम मादैकेर।
LUK 8:20 नलाव तोबो ऩेब्‍लो मिँराए येसुलाई, “लाँःक नआमा स़ोनो नभाइर नँस दैसिना हुद लेर,” है यादोक ते,
LUK 8:21 येसुए, “जोराए परमेस्‍वरए ओपाँ थैद दोज़्‍यार, होर ज़ ङाआमार ङाभाइर,” है यादोक्‍यो।
LUK 8:22 तछा येसु उसिसरास दोङ्गाल पसिद नोरालाई, “दह होफत गेबाया,” है दाद नो यालिज़्‍याव दोङ्गास बाकेर।
LUK 8:23 याबाज़्‍याक येसु उमीर हुद ङ़ल्‍द उलिज़्‍याव। नाःत ज़ दहल ल्‍यो माल्‍यो बतास हुद ऱी बनै छल्‍किद दोङ्गाल पसिद नोरालाई गदैवा गदैवा याजैक्‍यो।
LUK 8:24 उसिसराए येसुलाई सोचोइद, “गुर्बा, गुर्बा, खदम ज़ गेतारिके,” है यादोक ते, येसु सोद बतास स़ोनो ऱीनिलाई निसिङार्क्‍यो। हो प़ाइँना ज़ बतास ब थकनिके, ऱी ब अदिके।
LUK 8:25 हाःत ज़ उसिसरालाई, “खैकी जेयुँ उहुबो?” है ओरादोक ते, नोर छे·द अचम्‍ब ताद या याल, “आव किताव मिँ ओताव? बतासर ऱीराए ब ओपाँ यादोज़्‍याव,” है लिकेर।
LUK 8:26 येसु उसिसरास गालील दह होफताव गेरासेनस यादोज़्‍याव पोङ केस्‍केर।
LUK 8:27 दोङ्गानी यापुलुसोत नलाव सहरनी बो·लैज़्‍याव पुरूसए क्‍योःद ओनैज़्‍याव तोबो मिँस दैसिकिनी। नो मिँ क्‍वार ब ओमाक्‍वाइसिज़्‍याव, झ़िमक मालिद रील ब खादर जीदा ज़ उलिज़्‍याव।
LUK 8:28 नोए येसुलाई उरँःव प़ाइँना बनै चिर चिर क़िद येसुए उखँत फुलुप्‍सिद बनै चोइस, “अ येसु, माहान परमेस्‍वरए ओज़ा, ङास नखै काता उलिज़्‍याव? नँस ङाबिन्‍ती लिज़्‍या, ङालाई दुख तायाँयो,” है दोक्‍यो।
LUK 8:29 नो माचाव पुरूसलाई येसुए ङ़ादा ज़ “पुलुस्‍नी” है दाद ओनैज़्‍याव। नो माचाव पुरूसए नो मिँलाई घरी पाला ज़ ओक्‍योःज़्‍याव। कैताक मिँराए झँए साँगलए किद गुन्‍या मिँर यारानैदी ब साँगलर फ्या·द नो माचाव पुरूसए साइँसुइँवक ओलाँज़्‍याव।
LUK 8:30 येसुए फरी, “नमिन कै?” है ओदोक ते, “ङामिन फौजी,” है दोक्‍यो। नोए ओक्‍याँत माचाव पुरूसर कुधु याल्‍योए ज़ ‘फौजी’ है ओदोव।
LUK 8:31 फरी नोराए, “गेलाई नो नर्गलाव भल्‍खादाल ताझाःसियो,” लिद बिन्‍ती यादोज़्‍याव।
LUK 8:32 नो बेलाक ज़ नक तोबो दाँदात ऊर तबगाल यालाज़्‍याव। नो माचाव पुरूसराए, “गेलाई बुरू नो ऊराए क्‍याँत बाव यासिके,” लिद बिन्‍ती यादोक ते, येसुए भैंःद याएक्‍यो।
LUK 8:33 है जैद नो माचाव पुरूसर नो बूलिउ मिँए ओक्‍याँतिन पुलुस्‍द ऊराए क्‍याँत बाकेर। हो प़ाइँना ज़ ऊ भरी बूलिद दाँदातिन सुइँःकिनाद दहल ज़ो·द प़ाइँ ज़ स़ुद सिकेर।
LUK 8:34 निताव रँःद नो ऊ गावलार धोंःनाद नाखार जीदा, सहर जीदा बाद नो यारँःव भरी है यारादोकेर।
LUK 8:35 नो पाँ थैव भरी साचो सैं माःक लिद चिऊना हुवर येसुए ल्‍योक याबाक नो माचाव पुरूसराए याऱासो मिँ ओक्‍वार क्‍वाइसिद येसुए उखँक सोजोकाव ज़ च़ुसिद उलिज़्‍याव रँःकेर। निताव रँःद नोर छे·केर।
LUK 8:36 नो चिऊना हुवरालाई, नो य़ेन रँःव भरिए, “बूलिउ इतावनी ज़ गराँके,” लिद है यारादोक ते,
LUK 8:37 नो गेरासेनस खन्‍द जीलाव मिँराए याछ्याचेए येसुलाई, “आनी पुलुस्‍द बान्‍के,” लिद बिन्‍ती दोकेर। है जैद येसु दोङ्गाल पसिद ओल्‍द बाव ओपैंज़्‍याक,
LUK 8:38 निताव रँःद नो माचाव पुरूसराए याऱासो मिँए, “ङालाई ब नँस लाँनाके,” है लिद बिन्‍ती ओदोक ते, येसुए अइ लिद परींक्‍यो,
LUK 8:39 “नँ नझ़िमदा बाद ‘परमेस्‍वरए ङाजूँनी आःल्‍दिउ य़ेन दाद्याँक्‍यो’ है लिद सथैनाव ताके।” है जैद नो मिँ बाद सहर भरी ओल उजूँनी येसुए ओदोव य़ेन यासथैक्‍यो।
LUK 8:40 आफताव मिँर बनै माहोल्‍या दुप्‍सिद ‘येसु खर्क हुके’ लिद कींद यानैज़्‍याव। येसु ओल्‍द उहुवत नोराए सुम्‍केर।
LUK 8:41 नोरास तोबो याइरस यादोज़्‍याव धर्मसास्‍त्र झ़िमलाव याघेप्‍पा उलिज़्‍याव। नो मिँ येसुए ल्‍योक हुद उखँत फुलुप्‍सिद, “ङाझ़िमक तखेप बाद्याव ताके,” लिद बिन्‍ती दोक्‍यो।
LUK 8:42 नोए तोबोका तोबो बाह्र बर्सकाव मेंमा ओज़ा ओजोरो हुद सिउ ओपैंज़्‍याव। है जैद येसु नोस ओबाज़्‍याक मिँर बनै माहोल्‍या ओलस याछुइसिनाज़्‍याव।
LUK 8:43 नो माहोल्‍याराए याखार्ल तोबो बाह्र बर्स भरी ओक्‍याँतिन झी भोन्‍या बेथाए क्‍योःद ओनैज़्‍याव मेंमा ब उलिज़्‍याव। नो मेंमालाई सुए ब यामासगराँधुज़्‍याव।
LUK 8:44 है जैद नो मेंमा माहोल्‍याराए खार्ल छुइसिनाद येसुए उछींनी हुद ओक्‍वाए उतुपात छाप्‍दिक्‍यो। ओछापो प़ाइँना नो झी भोन्‍या बेथा गराँके।
LUK 8:45 हाःत ज़ येसुए, “ङालाई सुए ओछाप्‍नाव?” है ओरादोक ते, प़ाइँए ज़ “ङा माःक” है दोकेर। पत्रुसए फरी, “प्रभु, माहोल्‍यार बनै छुइसिहुज़्‍यार सानी,” है ओदोक ते,
LUK 8:46 येसुए, “ङालाई तोबोए छाप्‍द ज़ नैनाव। ङाक्‍याँतिन सगराँन्‍या सक्ती पुलुस्‍द ओबाव दार्सिद ङाले,” है दोक्‍यो।
LUK 8:47 हाःत ज़ नो मेंमाए ‘ङा ङामाम़ोंसिधुके ब’ लिद ओछ्याचेए गूद येसुए उखँत फुलुप्‍सिद प़ाइँराए ङ़ाक येसुलाई, “ङा सुए ज़ यामासगराँनाधुज़्‍याव बेथाए उजूँनी ज़ ङाछाप्‍निउ। ङाछाप्‍निउ प़ाइँना ज़ ङागराँके,” है ओदोक ते,
LUK 8:48 येसुए, “अ माँज़ा, ङालाई नयुँ नसुहुबोनी ज़ नगराँके। चावस बानी,” है दोक्‍यो।
LUK 8:49 येसु नो मेंमास ओपाँज़्‍याक ज़ धर्मसास्‍त्र झ़िमलाव याघेप्‍पा याइरसए उझ़िमनी तोबो मिँ हुद याइरसलाई, “गुर्बालाई काराव हत्‍या यान्‍या, नज़ा सिधुके,” है दोक्‍यो।
LUK 8:50 नोए ओपाँ थैद येसुए याइरसलाई, “नयुँ तासतेयो, नयुँ वाज़ उहुप्‍क। नो नज़ा बाँचिन्‍या ले,” है दाद,
LUK 8:51 याइरसए उझ़िमक याकेसोत छुतरालाई ओलस बाव मायाद पत्रुस, यूहन्‍ना, याकूब स़ोनो नो ल़ुज़ाए ओबाबु ओआमानी वाज़ लाँद झ़िमल पसिकेर।
LUK 8:52 नल नो ल़ुज़ाए उजूँनी मिँर बनै याघर्ज़्‍याव रँःद येसुए, “ताघर्च्‍यो, ल़ुज़ा मासिए, अइज़ ङ़ल्‍द ले,” है ओरादोक ते,
LUK 8:53 नो घर्ज़्‍यावराए ‘सिधुव ज़’ लिन्‍या यासैंवए येसुलाई हसैकेर।
LUK 8:54 हाःत ज़ येसुए नो ल़ुज़ालाई उकुइनी क्‍योःद, “अ बुची सोनिके,” है ओदोव प़ाइँना ज़,
LUK 8:55 उपुरूस ओल्‍द हुद सोके। नकिन येसुए, “आवलाई ज़्‍यान्‍यार जैदिचिके,” है यादोक्‍यो।
LUK 8:56 येसुए ओय़ेन रँःद नो ल़ुज़ाए ओबाबु ओआमानी अचम्ब ज़ ताकिनी। खाली येसुए, “आव य़ेन सुलाई ज़ है तारादोच्‍यो,” है यादोक्‍यो।
LUK 9:1 येसुए तछा बाह्र जना उसिसरालाई खुल्‍द माचाव पुरूसर पले·न्‍या स़ोनो याजोरो हुवरालाई सगराँन्‍या सक्तीर याद,
LUK 9:2 परमेस्‍वरए ओराज्‍यालाव पाँ सथैना स़ोनो याजोरो हुवरालाई सगराँना अइ लिद यापरींक्‍यो,
LUK 9:3 “येमत जेबाक जेस काता ज़ तालाँच्‍यो। झुइ तादी ब, झ़ैं तादी ब, अर्नी तादी ब, पैसा तादी ब, फेरैसिन्‍या क्‍वा तादी ब काता ज़ तालाँच्‍यो।
LUK 9:4 जो नाखारल जेबाज़्‍या, जेमापुलुसा पै तोबो झ़िमक वाज़ लिच्‍यो।
LUK 9:5 फरी जेबाव नाखारल जेलाई ल्‍यो यामायाचिकिन ननी जेपुलुस्‍क नोरालाई चेतावनी यान्‍याए जूँनी जेखँताव गालो धुइरो नल ज़ थरैद ख्‍यानैद याराएच्‍यो,” है लिद यापरींक्‍यो।
LUK 9:6 है जैद नोर येसुए ल्‍योनी पुलुस्‍द नाखार नाखारल चाव था सथैए सथैए, याजोरो हुवरालाई सगराँए सगराँए बाकेर।
LUK 9:7 गालील खन्‍दलाव राजा हेरोदए येसुए ओदोज़्‍याव य़ेनर थैद उथुपुल ताके। येसुए उजूँनी ख्‍वाराए, “ऱील सछैंज़्‍याव यूहन्‍ना जन्‍द हुद ले,” है यादोज़्‍याव।
LUK 9:8 ख्‍वाराए, “एलिया फरी हुद ले,” है यादोज़्‍याव। ख्‍वाराए फरी, “काताकाव भाःकाव अगमबक्ता सिउनी सैसिद उहुव सा,” है यादोज़्‍याव।
LUK 9:9 हेरोदए है लिके, “यूहन्‍नालाई ते ङा ज़ ओङ़ै च़म्‍द सैःव ङारापरींव ची। आव इताव य़ेन दाज़्‍याव सु ओताव?” लिद नोलाई तखेप सरेसो ओपैंज़्‍याव।
LUK 9:10 येसुए नो ओरापरींव ओसाचीर ओल्‍द हुद, यादोव य़ेन भरी है दोकेर। नकिन येसुए नोरालाई सुए यामासैंद बेथसेदा यादोज़्‍याव नाखारदा यालाँक्‍यो।
LUK 9:11 छींनी माहोल्‍याराए ओबाव सैंद ओल्‍योदा ज़ बाकेर। याहुज़्‍याव रँःद येसुए नोरालाई ओल्‍योक हुव याद परमेस्‍वरए ओराज्‍यालाव पाँ यासथैक्‍यो स़ोनो याजोरो हुवरालाई ब यासगराँक्‍यो।
LUK 9:12 जाँ ऱिमदा ऱिमदा बाह्र जना उसिसर ओल्‍योक हुद, “आव माहोल्‍यारालाई यापरींके। गे इताव साइँसुइँवक गेलिज़्‍या। हो ताकिन आजीलाव नाखार जीदा बासिन्‍या बासर खिम्‍द ज़्‍यावर लँःद घज़्‍युनारक,” है यादोक ते,
LUK 9:13 येसुए, “आवरालाई ज़्‍यावर जे ज़ याव ताके,” है ओरादोक ते, उसिसराए, “गेस भरेस पाँच गोता, ङाँः ऩेब्‍लो वाज़ लिज़्‍या। सैं ज़्‍यावर लँःद रैद्यान्‍या है नलिज़्‍याव?” है दोकेर।
LUK 9:14 नो माहोल्‍यार खेपार वाज़ पाँच हजारा याल्‍यो। नकिन येसुए उसिसरालाई नो माहोल्‍यारालाई पचास पचासलाव ताना जैद सोचोइँव यापरींक्‍यो।
LUK 9:15 नोराए हैज़ जैद प़ाइँलाई यारासोचोइँकेर।
LUK 9:16 नकिन येसुए नो पाँच गोता भरेस स़ोनो ऩेब्‍लो ङाँः उकुइत रैद स्‍वर्गदा भाल्‍सिद, असिक ऩिद भरेसर ङाँःर केःद, उसिसरालाई माहोल्‍याराए याङ़ाक याङ़ाक झाःद्याव यापरींक्‍यो।
LUK 9:17 नोर प़ाइँए याफू तसी ज़्‍याद यासय़ेलोर यादुप्‍क बाह्र झुर्नु ताके।
LUK 9:18 छींनी तछा येसु उसिसरास बाद ओबातङ ज़ ओपोंखारिज़्‍याव। पोंखारिद ओखेमोत उसिसरालाई, “माहोल्‍याराए ङालाई सु है दाँज़्‍यार?” है ओरादोक ते,
LUK 9:19 उसिसराए, “ख्‍वाराए ऱील सछैंज़्‍याव यूहन्‍ना है दींज़्‍यार, ख्‍वाराए एलिया है दींज़्‍यार, ख्‍वाराए फरी काताकाव भाःकाव अगमबक्ता सिउनी सैंसिउ ताखेहो है दींज़्‍यार,” है दोकेर।
LUK 9:20 येसुए फरी, “जे ङालाई सु है जेदाँज़्‍या नी?” है ओरादोक ते, पत्रुसए, “नँ परमेस्‍वरनी हुव ख्रीस ज़,” है दोक्‍यो।
LUK 9:21 नकिन येसुए, “आव पत्रुसए है ओल्‍यो पाँ सुलाई ज़ है तारादोच्‍यो,” लिद नोरालाई अर्थैद,
LUK 9:22 “ङा मिँ मिन्‍सिउए कुधु दुखर दैद आव गेदेसलाव स़ेरर, मुख्‍या पुजारीर स़ोनो सास्‍त्रीराए ल्‍योनी सोसी ऩिन्‍या ङातारिज़्‍या। नोराए यासैःनाव स़ोंलात सिउनी सैंसिद ङासोरिज़्‍या,” है यादोक्‍यो।
LUK 9:23 नकिन फरी माहोल्‍याराए ल्‍योदा भाल्‍सिद प़ाइँलाई ज़, “जोए ङास हुन्‍या युँ दोज़्याव, होए उजिउए मया मादाद दिनकाव ज़ क्रुसत सिन्‍या मिताव दुखर सहिद ङाछींत उहुक।
LUK 9:24 जोए आव उजिउत ओललाई तान्‍या वाज़ खिम्‍ज़्याव, होए उजुनीलाई सम़ैज़्‍याव। फरी जोए आव उजिउत उजिउए मया मादाद ङा ङाजूँनी दोज़्याव, होए जुनी दैरिज़्‍याव।
LUK 9:25 जोए आव मानुवात लिज़्‍याव भरी दैद उजुनीलाई ओसम़ैकिन नोलाई काता ची ता?
LUK 9:26 जो आव बेलाक ङा स़ोनो ङापाँत ओलाज हुज़्‍या, ङा मिँ मिन्‍सिउ ब फरी छैंव ङाचाकर्‍यारास ङाबाबुए ओज़गै मगैरास ङाहुक ङा ब नोलाई रँःद ङालाज हुन्‍या ले।
LUK 9:27 ङा साचो है ङादाचिज़्‍या, आकाव च्‍याँःसिद लिज़्‍यावरानी जे ख्‍वा ख्‍वाराए परमेस्‍वरए ओराज्‍या जेमारँःवा पै सिन्‍या जेमाले,” है यादोक्‍यो।
LUK 9:28 नो है ओरादोव छ्यामकिन तसातावाक येसुए ओलस पत्रुस, यूहन्‍ना स़ोनो याकूबलाई लाँद तोबो गोंत पोंखारिनाक्‍यो।
LUK 9:29 नक येसुए ओपोंखारिज़्‍यावत ज़ ओङाःर चबनै त़ोसिद ओक्‍वार ब तक तकौ ताद मी झीःन्‍या ताके।
LUK 9:30 हाःत ज़ फरी मोसा स़ोनो एलियानी हुद येसुस पाँकेर।
LUK 9:31 नोनी ब बनै ज़गै ज़गैवनी निरैंःज़्‍याव। स़ोनो येसुए यरूसलेमल उजिउ ओझाःरिज़्‍यावए जूँनी यापाँज़्‍याव।
LUK 9:32 पत्रुस ङ़ादा ओनैंनिस यामीर पातिद ङ़ल्‍द यालिज़्‍याव। यासैंसिउत येसु ओज़गै मगैस नो मिँनिस ओपाँज़्‍याव यारारँःकेर।
LUK 9:33 नकिन मोसा स़ोनो एलियानी येसुस भाःसिद निबाज़्‍याव रँःद पत्रुसए येसुलाई, “अ गुर्बा, गे आक लिन्‍या बनै चाव लिज़्‍या। गे जेलाई स़ोम्‍लो पाल तङ्गैद गेयाच्‍यो, तोबो नँलाई, तोबो मोसालाई, तोबो एलियालाई,” है दोक्‍यो। पत्रुस ओछ्याचेए काता पाँन्‍या लिन्‍या ब ओमासैंज़्‍याव।
LUK 9:34 ओपाँज़्याक ज़ बादल तोबो हुद नोरालाई याकप्‍क्‍यो। उसिसर बनै छे·केर।
LUK 9:35 नो बादल जींनी तोबो गा अइ लिद थास्‍के, “आव ङा ङाछाँतिउ ङाज़ा ज़, जे आवए ओपाँ थैच्‍यो।”
LUK 9:36 नाः ओपाँवत नक येसुलाई वाज़ रँःकेर। नो स़ोम्‍लोराए फरी नो यारँःव भरी हाः बेलाक सुलाई ज़ है मारादोकेर।
LUK 9:37 हो पराःती नो गोंतिन याझरिउत मिँर बनै माहोल्‍या येसुस दैसिना हुकेर।
LUK 9:38 नो माहोल्‍यारानी तोबोए, “अ गुर्बा, नँस ङाबिन्‍ती लिज़्‍या। ङाज़ा तोबोका तोबो ज़ लिज़्‍या, नोलाई नयुँ नाद चिऊद्याँके।
LUK 9:39 नोलाई कैताक माचाव पुरूसए क्‍योःद, चिर चिर क़िउ परींद, उमँःजानी ख्‍याङग्‍याँ खेङ्गे जैद ओयाःनी फुइ गज्‍या पले·द बनै दुख ओमाएवा पै माऱासो।
LUK 9:40 नसिसरालाई ‘पले·दिचिके’ है ङारादोक ते मापले·धुकेर,” है दोक्‍यो।
LUK 9:41 नकिन येसुए नक लिज़्‍यावरालाई, “ए जेयुँ माहुबोर, परमेस्‍वरस माखैवर, ङा जेस खा ची ङालिरिज़्‍याव, खा ङासहिचिके!” है दाद छोर्‍याए ओबाबुलाई, “नज़ालाई आदा रैके,” है दोक्‍यो।
LUK 9:42 ओबाबुए ओरैज़्‍यावत ज़ नो पुरूसए छोर्‍यालाई नक ज़ पछारिद खागरा खगर॰ जैक्‍यो। है जैद येसुए नो माचाव पुरूसलाई हप्कैद पले·द्याद सोजोकाव जैद ओबाबुलाई एक्‍यो।
LUK 9:43 नकाव लिज़्‍यावर परमेस्‍वरए अचम्‍बलाव ओसक्तीर रँःद अचम्‍ब ज़ ताकेर। नोर अचम्‍ब ताद यालिज़्‍याक ज़ येसुए उसिसरालाई,
LUK 9:44 “आव ङापाँ जेर्ना घ्याँ जैद थैच्‍यो। ङा मिँ मिन्‍सिद हुवलाई मिँराए याकुइत सूँपिनारिज़्‍यार,” है यादोक्‍यो।
LUK 9:45 नोराए नो पाँ यामाबुझिदी ब येसुलाई सुधिन्‍या छे·केर। नो पाँए ओअर्थ कप्‍सिउ उलिज़्‍यावए माबुझिधुकेर।
LUK 9:46 नकिन येसुए उसिसर या याल, “गे सु घेप्‍पा गेलिज़्‍याव?” लिद याखर्लेसिज़्‍याव।
LUK 9:47 नोर याखर्लेसिज़्‍याव सैंद येसुए तोबो ज़िम्‍ज़ा ल़ुज़ालाई रैद ओलापक सच्‍याँद,
LUK 9:48 उसिसरालाई है यादोक्‍यो, “जोए ङा ङामिनत आव मिताव ज़िम्‍ज़ारालाई यासुम्‍ज़्‍याव, होए ङालाई मनी सुम्‍नाज़्‍याव। ङालाई सुम्‍ज़्‍यावए फरी ङालाई वाज़ माःक, ङालाई परींज़्‍यावलाई ब सुम्‍ज़्‍याव। है जैद जे जेखार्ल जो सज़िम्‍सिज़्‍या, हो ज़ घेप्‍पा लिज़्‍या।”
LUK 9:49 फरी यूहन्‍नाए, “गुर्बा, तोबोए नमिननी माचाव पुरूसर ओरापले·ज़्‍याव गेरँःके। नो गेस ओमाल्‍योए नोलाई पले·व गेमाएके,” है ओदोक ते,
LUK 9:50 येसुए, “नोलाई तावैंच्‍यो। जो जेकिन तँदा माजैसिए, हो जेस ज़ लिज़्‍या,” है दोक्‍यो।
LUK 9:51 येसु स्‍वर्गदा बान्‍या बेला उहुनावए यरूसलेमदा बान्‍या पक्‍का युँ दाद,
LUK 9:52 उजूँनी पोर जैन्‍याए जूँनी तोबो ऩेब्‍लो उमींर ङ़ादा ज़ यापरींक्‍यो। नोर सामरिया खन्‍दलाव तोबो नाखारल बन्‍दोबस्‍त जैनाकेर।
LUK 9:53 नो नाखारलावराए फरी, येसुए यरूसलेमदा बान्‍या उयुँ थू ओजैवए नल ल्यो माएकेर।
LUK 9:54 निताव रँःद उसिसनी याकूब स़ोनो यूहन्‍नानी येसुलाई, “अ प्रभु, सैं आवरालाई नमतिन मेंः सवाद्याद चुयाप जैन्‍या?” है निदोक ते,
LUK 9:55 येसुए, “निताव जैन्‍या माःक,” है दाद नोनिलाई सिङार्द,
LUK 9:56 छुत नाखारदा बाकेर।
LUK 9:57 याबाज़्‍याक येमक येसुस तोबो दैसिद, “नँ जोदा नबाज़्‍या, ङा ब होदा ज़ ङाबाया,” है ओदोक ते,
LUK 9:58 येसुए, “स्‍यालर लिन्‍या कुँ लिज़्‍या, बाज़ार लिन्‍या सिप ब लिज़्‍या। ङा मिँ मिन्‍सिद हुवलाई ते ङ़ै कप्‍न्‍या पो ब माले,” है दोक्‍यो।
LUK 9:59 फरी येसुए तोबोलाई, “ङास हुन्‍के,” है ओदोक ते, नोए, “अ प्रभु, ङ़ादा ङाबाबुलाई ङागादैदा,” है दोक्‍यो।
LUK 9:60 येसुए फरी, “सिउरालाई सिउ स्‍यासोराए घरागादैज़्‍यारक, नँ भन्‍या परमेस्‍वरए ओराज्‍यालाव पाँ सथैना बान्‍के,” है दोक्‍यो।
LUK 9:61 फरी छुत तोबो हुद, “प्रभु, ङा ते नँस ज़ ङाबारिज़्‍या, खाली ङ़ादा ङाझ़िमलावरास तखेप बिदा ङाऩिनारिज़्‍या,” है ओदोक ते,
LUK 9:62 येसुए नोलाई, “एँः कीक घोर क्‍योःद उछींदा भाल्‍सिज़्‍याव मिँ परमेस्‍वरए ओराज्‍याल पसिन्‍या स्‍यासो माताए,” है दोक्‍यो।
LUK 10:1 नकिन जाँवाक प्रभुए उसिसराकिन छुतर सत्तरी जनालाई खतैद ऩेबरें ऩेबरें जैद ओल ओबारिज़्‍याव पो पोङ ङ़ादा बान्‍या याजैक्‍यो।
LUK 10:2 नोरालाई दुप्‍द है यादोक्‍यो, “तामर चिकार यामींःनाव मिताव, परमेस्‍वरए ओराज्‍याल हुन्‍यार कुधु ज़ ताद लेर। खाली नोरालाई रैन्‍या बाहोर्‍यार ते छ्या ज़ ताकेर। है जैद नोरालाई रैन्‍या मिँर ओरापरींवक लिद परमेस्‍वरलाई पोंखारिच्‍यो।
LUK 10:3 जे फरी जोगोइसिद बाच्‍यो, जेलाई प़र मितावराए खार्ल बेधा पाथा मितावर जैद ङापरींचिज़्‍या।
LUK 10:4 जेबाक पैसा ब तालाँच्‍यो, झ़ैं ब तालाँच्‍यो, पोला ब तालाँच्‍यो। काङ्क ज़ ताँपै तोंपै मालिद ज़ बाच्‍यो।
LUK 10:5 “जो झ़िमक जेपसिज़्‍या, ङ़ादा ‘आव झ़िमलाई चाव ओताक’ है लिच्‍यो।
LUK 10:6 नल घच सहिन्‍या मिँर यालिकिन, नो जेरायो असिक नोराए याक्‍याँत ज़ रहिरिज़्‍या। फरी नलावर घच मासहिन्‍यार यालिकिन, जेअसिक याक्‍याँत रहिन्‍या माले।
LUK 10:7 फरी जो झ़िमक ल्‍यो याचिज़्‍यार, हो झ़िमकिन आदा होदा माबाद जो याचिज़्‍यार हो ज़ ज़्‍याद ओद लिच्‍यो। जो य़ेनत तादी ब य़ेन दाज़्‍यावए ओजेला दैव ज़।
LUK 10:8 “फरी जो नाखारल जेबादी ब जेलाई ल्‍यो यायाचिकिन, जो मिताव ज़्‍याव याचिज़्‍यार हो ज़ ज़्‍युच्‍यो।
LUK 10:9 नलाव याजोरो हुवर ब यारासगराँच्‍यो। नोरालाई ‘परमेस्‍वरए ओराज्‍या सो हुरिके’ है यारादोच्‍यो।
LUK 10:10 फरी जो नाखारल जेलाई ल्‍यो यामायाचिकिन, दोहाक बाद,
LUK 10:11 ‘जेनाखारलाव गेखँताव गालो धुइरो ब आल ज़ थरैद ख्‍यानैद गेयाचिज़्‍या। खाली आव ब सैंच्‍यो, परमेस्‍वरए ओराज्‍या सो हुरिके,’ है यारादोच्‍यो।
LUK 10:12 ङा जेलाई है ङादाचिज़्‍या, परमेस्‍वरए फाल्‍न्‍या छ्याम नो नाखारलाव मिँराकिन बुरू सदोमलावरालाई सहिधुन्‍या तारिज़्‍या,” है यादोक्‍यो।
LUK 10:13 “हिताव ज़ जे खोराजीन स़ोनो बेथसेदालावरालाई थैए माँतकन ज़ लिज़्‍या। जे जेरँःव परमेस्‍वरए ओसक्तीलाव य़ेनर तुरोस स़ोनो सीदोनलावराए यारँःव ताकिन आः झरी यापापए जूँनी यायुँ माचाव दाद बर्ला सुर्सिद धुलील च़ुसिद यायुँ फर्कैद यापापर ऱास्‍धुखेरहो।
LUK 10:14 है जैद परमेस्‍वरए फाल्‍न्‍या छ्याम जेकिन बुरू तुरोस स़ोनो सीदोनलावरालाई सहिधुन्‍या तारिज़्‍या।
LUK 10:15 हिताव ज़ फरी जे कफर्नहुमलाव मिँर, स्‍वर्गत केसो मितावर जेङम्सिज़्‍या, झन नर्गल ज़ बान्‍या जेले।”
LUK 10:16 नकिन येसुए उसिसरालाई, “जोए जेपाँ थैज़्‍याव होए ङा ङापाँ ब थैज़्‍याव। हिताव ज़ जोए जेलाई मासुम्चिउ, होए ङालाई ब मासुम्नाव। फरी जोए ङालाई मासुम्नाव, होए ङालाई परींज़्‍यावलाई ब मासुमो,” है लिद यापरींक्‍यो।
LUK 10:17 छींनी नो सत्तरी जना बाद ओल्‍द याहुवत येसुए ल्‍योक बनै रेंए रेंए बाद, “प्रभु, नँ नमिननी माचाव पुरूसर ब गेपाँ धूँल ज़ ताकेर,” है यादोक ते,
LUK 10:18 येसुए, “सैतानलाई बिजुली मिताव नमतिन ओतेहुज़्‍याव ङारँःके।
LUK 10:19 ङा सैतानए ओसक्ती भरी जेधूँल ज़ जैद नैद ङायाचिए। है जैद ज़ निताव घुल स्‍यासोर बिछी स्‍यासोर जेराछिल्‍क कै मै ज़ जेमाताके।
LUK 10:20 हैदी ब ननी जे तारेंच्‍यो, बुरू स्‍वर्गत जेमिन सर्द नैसिउ उलिज़्‍यावनी रेंच्‍यो,” है यादोक्‍यो।
LUK 10:21 नाःत ज़ येसु छैंव पुरूसनी बनै रेंद, “अ बाबु, नाम नमलावराए याङ़ैताव, नँलाई धन्‍याबाद ङाचरैःनिज़्‍या। नँ नपाँर सैंन्‍या जैसिज़्‍यावर, याबुद्धी ल्‍यो जैसिज़्‍यावरालाई सतैंद मायाद, भाउज़ा मितावरालाई सतैंद नराएके। हैज़ बाबु, नल्‍योदा बान्‍या येम नो ज़ चाव नथ·रैके,” है लिद पोंखारिक्‍यो।
LUK 10:22 नकिन येसुए, “ताव भरी ङाबाबुए ङाकुइत ज़ याद नैनाव। किताव परमेस्‍वरए वाज़ ओज़ालाई सरेस्‍ज़्‍याव, हिताव ज़ ओज़ाए वाज़ परमेस्‍वरलाई सरेस्‍ज़्‍याव। है जैद ङा छुतलाई सतैंद ङाएकिन वाज़ होए परमेस्‍वर ङाबाबुलाई सरेस्‍धुज़्‍याव,” है यादोक्‍यो।
LUK 10:23 नकिन येसुए उसिसरालाई अलगज़ा है यादोक्‍यो, “जे जेरँःव भरी रँःज़्‍यावर असिक दैवर ज़।
LUK 10:24 ङा जेलाई है ङादाचिज़्या, अगमबक्तार, घेप्‍पा राजाराए ब आव जे जेरँःव पाँर रँःन्‍याए जूँनी यायुँ थू जैद ब रँःव मादैकेर, थैन्‍या युँ दाद ब थैव मादैकेर।”
LUK 10:25 येसुलाई जाँचिन्‍याए जूँनी, तछा कानुनलाव तोबो यागुर्बा हुद, “अ गुर्बा, ङा अजम्‍बरी जुनी दैन्‍या किताव दान्‍या?” है ओदोक ते,
LUK 10:26 येसुए, “मोसाए ओकानुनल किताव सर्सिउ उलिज़्‍याव, नोए ओअर्थ किताव नथ·रैज़्‍याव?” है दोक्‍यो।
LUK 10:27 नो कानुनलाव यागुर्बाए फरी, “ ‘जेयुँलाई आदा होदा मादुलैद, जेर्सा माम़ोंद, जेप्रभु परमेस्वरए ल्‍योदा युँ थू जैद ओललाई वाज़ मया दान्‍या,’ स़ोनो, ‘जेक्‍याँलाई किताव जेसमारिज़्‍या, नैं मेंलाई ब हिताव ज़ समारिन्‍या,’ ” है दोक्‍यो।
LUK 10:28 येसुए, “थिक ज़ है नदाँके। आव भरी नदोकिन ननी ज़ अजम्‍बरी जुनी दैन्‍या नले,” है ओदोक ते,
LUK 10:29 नो कानुनलाव यागुर्बाए ओल थिक उलिज़्याव सतैंन्‍याए जूँनी, “ङानैं ङामेंर कितावर तार?” है दोक्‍यो।
LUK 10:30 है जैद येसुए अइ लिद घर्ती तोबो झाःदिक्‍यो, “तोबो मिँ यरूसलेमनी यरीहोदा ओबाज़्‍याक चोरराए फेला पारैद, प़ोद, ओक्‍वार हाइद लाँद, ओललाई येमक ज़ लल्‍यातोरो जैद ख्‍यानैकेर दी।
LUK 10:31 कातानी तोबो पुजारी नो येम हुद नो याप़ोव मिँलाई रँःद झन तँनिकाव घ्याँ बाके दी।
LUK 10:32 फरी तोबो लेबी थरलाव मिँ हुद नोए पाला नोलाई रँःद तँनिकाव घ्याँ ज़ बाके दी।
LUK 10:33 बल्‍ल तोबो तादादा बाज़्‍याव सामरियालाव मिँ हुद, नो याप़ोवलाई रँःद, उयुँ नाद,
LUK 10:34 ओल्‍योदा बाद, ओघाइर छेद्याद, वासःर झाःद, क्‍वाराए पो·द्याद, गधाहा तर्त झाःद तोबो भत्तीक लाँद पाथस नैक्‍यो दी।
LUK 10:35 हो पराःती नो भत्ती वालालाई, ‘आव मिँलाई पाथस नैयो,’ है दाद चाँदीए सिक्‍का ऩेब्‍लो याद, ‘आवकिन आगल्‍या ओलागिकिन फरी ङाहुक ङायाँ,’ है दाद ख्‍यानैक्‍यो दी।”
LUK 10:36 नकिन येसुए नो कानुनलाव यागुर्बालाई, “नो स़ोम्‍लोरानी नो चोरराए याप़ोवए ओनैं काताकाव ताया?” है ओदोक ते,
LUK 10:37 नो कानुनलाव यागुर्बाए, “नो उयुँ नाज़्‍याव ज़,” है दोक्‍यो। येसुए फरी, “नँ ब बाद हिताव ज़ दोयो,” है दोक्‍यो।
LUK 10:38 येसु उसिसरास यरूसलेमदा याबाज़्‍याक येमक तोबो नाखारल पसिकेर। नो नाखारल मार्था यादोज़्‍याव तोबो मेंमाए येसुलाई बनै मानस उझ़िमक लाँक्‍यो।
LUK 10:39 मार्थाए ओबैंनी मरियम ब नल ज़ उलिज़्‍याव। नो येसुए उखँक च़ुसिद ओपाँ बनै धिद ओथैज़्‍याव।
LUK 10:40 मार्थाए ते ज़्‍यावर काता कातार ओजैज़्‍यावए नो पाँ थैव मादैक्‍यो। है जैद मार्था येसुए ल्‍योक बाद, “प्रभु, ङाबैंनीए आव य़ेनत ओमासघैनाज़्‍याव नरँःज़्‍याखेहो। नोलाई नँ तखेप है दाद्याव ताके,” है ओदोक ते,
LUK 10:41 प्रभुए, “अ मार्था माँज़ा, नँ काताए जूँनी प़ाइँत व़ीनी फुइ नताज़्‍याव?
LUK 10:42 खास तोबोए ओचाहित वाज़ लिज़्‍या। नो ओचाहित ल्‍यो मरियमए रैद ओनैज़्‍याव पाँ ज़। है जैद नो रैद ओनैज़्‍याव नोनी सुए ज़ मालाँधुव।”
LUK 11:1 येसुए तछा पोंखारिद ओखेमोत, उसिसरानी तोबोए, “प्रभु ऱील सछैंज़्‍याव यूहन्‍नाए उसिसरालाई पोंखारिन्‍या ओरासिऊव मिताव गेलाई ब पोंखारिन्‍या सिऊसियो,” है ओदोक ते,
LUK 11:2 येसुए, “जेपोंखारिक इतावनी पोंखारिच्‍यो, ‘परमेस्‍वर बाबु, नमिन प़ाइँए ज़ छैंव ओथ·रैरक। स्‍वर्गताव नराज्‍या आव नामल उहुक।
LUK 11:3 गेलाई चाहिज़्‍याव ज़्‍याव दिनकाव ज़ जोरैद्यासियो।
LUK 11:4 नउपर्त गेदोव पापरानी ऱास्‍सियो। हो मिताव ज़ गे ब मिँराए गेउपर्त यादोव पापरानी गेराऱास्‍ज़्‍या। स़ोनो गेलाई माचाव चेतैन्यारानी जोगोइसियो,’ है लिच्‍यो,” है यादोक्‍यो।
LUK 11:5 फरी येसुए उसिसरालाई है यादोक्‍यो, “जेनी तोबोए जेनैं लिज़्याखेहो। आधा रील नो जेनैंए ल्‍योक बाद, ‘अ ङानैं, भरेस स़ोम्‍लो लोइव ताके।
LUK 11:6 तोबो ङानैं बनै तादानी हुद ले, ङा नोलाई यान्‍या काता ज़ माले,’ है जेदोकिन,
LUK 11:7 नो झ़िमलावए, ‘ङालाई दुख तायाँ, य़ामर ङागल्‍धुके, ङाज़ारास स्‍याँद गेले। ङा सोद नँलाई ङामाईंधुइ,’ है उलिकिन,
LUK 11:8 नोए नैं नैं नितावए ओमाएदी ब फरी ओनैंए ‘मायाद माताए’ लिद जात्त ज़ ओमाऱासोए करनी वाज़ उऩिउ भरी एक्‍यो।
LUK 11:9 “हिताव ज़ ङा जेलाई है ङादाचिज़्‍या, परमेस्‍वरस जेऩिकिन जेलाई यान्‍या ज़ ले, जेखिम्‍किन दैन्‍या ज़ जेले, य़ाम कोतो कोतो जेजैकिन जेजूँनी फैसिन्‍या ले।
LUK 11:10 जोए ऩिज़्‍याव होलाई यान्‍या ले, जोए खिम्‍ज़्‍याव होए दैन्‍या ले, जोए कोतो कोतो जैज़्‍याव होए उजूँनी फैसिन्‍या ले।
LUK 11:11 जेनी किताव बाबु लिके? [ओज़ाए भरेस उऩिकिन लुँ यान्‍या?] ङाँः उऩिकिन घुल यान्‍या,
LUK 11:12 बाज़ुरी उऩिकिन बिछी यान्‍या?
LUK 11:13 है जैद जे निताव पापल लिज़्‍याव मिँराए जेज़ारालाई निताव चाव चाव यान्‍या जेसैंकिन, स्‍वर्गताव जेबाबुए झन ओलस जेऩिकिन छैंव पुरूस कै जैद मायाचिउके?”
LUK 11:14 फरी तछा येसुए तोबो मिँए ओक्‍याँनी माचाव पुरूस पले·दिक्‍यो। नो पुरूस मापाँधुन्‍या लाता जैज़्‍याव पुरूस ओल्‍यो। नो पुरूस उपुलुसो प़ाइँना नो मिँ पाँधुन्‍या ताके। निताव रँःद नक लिज़्‍याव माहोल्‍यार अचम्‍ब ताकेर।
LUK 11:15 ख्‍वा ख्‍वाराए, “आवए ते माचाव पुरूसराए याघेप्‍पा बालजिबुलए उमिननी ओरापले·ज़्‍याव ची,” है लिकेर।
LUK 11:16 ख्‍वाराए फरी येसुलाई जाँचिन्‍याए जूँनी, “स्‍वर्गताव नसरेस तोबो सतैंके,” है यादोज़्‍याव।
LUK 11:17 येसुए नोराए यायुँलाव पाँ सैंद, “तोबो राज्‍यालाव मिँर या या यामाखैकिन नो राज्‍याए उमिन ज़ म़ाज़्‍या। हो मिताव ज़ तोबो झ़िमलावर या या यामाखैकिन चितराँ पुतराँ तान्‍या लेर।
LUK 11:18 हिताव ज़ सैतानए ओराज्‍यालावर पाला या या यामाखैकिन नोराए यामिन कातानी ओरहिरिज़्‍याव? जे ते झन ङालाई ‘बालजिबुलए उमिननी माचाव पुरूसर यापले·ज़्‍याव’ है जेदाँज़्‍या।
LUK 11:19 ङा ननी ङारापले·ज़्‍याव ताकिन जेसकावराए कातानी यारापले·ज़्‍याव? है जैद नो जेपाँ जेसकावराए ज़ जेङ़ैत फुलुप्‍द्यान्‍या लेर।
LUK 11:20 खाली ङा परमेस्‍वरए ओसक्तीनी ङारापले·ज़्‍याव ताकिन परमेस्‍वरए ओराज्‍या जेखार्ल ज़ हुद ले।
LUK 11:21 “तोबो ओर्सा ल्‍यो मिँए ओहत्‍यारर रैद उझ़िमलाई उगुकिन नोए उझ़िमलाव भरी सुए ज़ मालाँधुर।
LUK 11:22 नोकिन ओर्सा ल्‍यो हुद खप्‍द ओहारैधुकिन वाज़ ओहत्‍यारर नैंद उझ़िमलाव जा-यार हाइद लाँद भाःन्‍या ले।
LUK 11:23 “जो ङास माखैए, हो ङाकिन तँदाङाव ज़ लिज़्‍या। फरी जोए ङास मादोव, होए ज़ ङापाँ बले·ज़्‍याव।
LUK 11:24 “मिँनी पले·सिउ माचाव पुरूस नो मिँए ओक्‍याँनी उपुलुसोत ऱी माल्‍यो साइँसुइँवक ऩासिन्‍या पो खिम्नाज़्‍याव। लिन्‍या पो ओमादैकिन फरी ओल्‍द ङ़ादाङाव उपुलुसोए ओक्‍याँत ज़ पसिउ पैंज़्‍याव।
LUK 11:25 नल ओबाक स्‍यासी जैद थिक थाक जैसिउ पो रँःद,
LUK 11:26 ओलकिन माचाव पुरूसर सात गोता ओलस रैद नल पसिद नो मिँलाई ङ़ादाङावकिन झन ज़ माचावए क्‍योःज़्‍याव,” है यादोक्‍यो।
LUK 11:27 येसुए नाः ओपाँवत नो माहोल्‍यारानी तोबो मेंमाए येसुलाई, “नँलाई जर्मैद नुइँ सवैव मेंमा असिक दैव लिज़्‍या,” है ओदोक ते,
LUK 11:28 येसुए, “नोकिन बुरू परमेस्‍वरए ओपाँ थैद ओपाँ दोज़्‍यावर असिक दैवर लिज़्‍यार,” है दोक्‍यो।
LUK 11:29 माहोल्‍यार झन ज़ माहोल्‍या यातावत येसुए है यादोक्‍यो, “आव जुकलाव मिँर बनै पापीर लिज़्‍यार। ङासरेस वाज़ खिम्‍ज़्‍यार। खाली यादैरिज़्‍याव सरेस ते योनाए ओक्‍याँत ताव सरेस वाज़ दैरिज़्‍यार।
LUK 11:30 किताव योनाए ओक्‍याँत ताव पाँर निनवे सहरलाव मिँरालाई सरेस ओताव, हिताव ज़ ङा मिँ मिन्‍सिद हुवए ङाक्‍याँत हुरिज़्‍याव पाँर ब आव जुकलाव मिँरालाई सरेस तारिज़्‍या।
LUK 11:31 नो दखिन देसलाव रानीए परमेस्‍वरए ओपाँ सोलोमनए ओयाःनी थैना बनै तादानी हुके। जे जेखार्ल हुद लिज़्‍याव ते सोलोमनकिन झन घेप्पा लिज़्या। है जैद परमेस्‍वरए ओराफाल्‍रिज़्‍याव छ्याम आव बेलाकाव मिँराए यागल्‍ती नो रानीए ओक्‍याँनी ज़ थ॰रिरिज़्‍या।
LUK 11:32 हो मिताव ज़ नो निनवे सहरलाव मिँराए योनाए ओरासथैव पाँर थैद परमेस्‍वरए ल्‍योदा यायुँ फर्कैकेर। जेखार्ल हुद लिज़्‍याव ते योनाकिन ब घेप्‍पा लिज़्‍या। है जैद परमेस्‍वरए ओराफाल्‍रिज़्‍याव छ्याम नोराए याक्‍याँनी ब आव बेलाकाव मिँराए यागल्‍ती थ॰रिरिज़्‍या।”
LUK 11:33 “सुए ज़ ल़ोसै तैंःद मारैंःवल ब मानैव, जाए ब माकबो। बुरू ‘झ़िमल पसिज़्यावरालाई पलाँ घताक’ लिद दिउ बाल्‍न्‍यात झाःज़्याव।
LUK 11:34 हिताव ज़ जेक्‍याँताव बत्ती जेमी लिज़्‍या। नो जेमी चाव उलिकिन जेक्‍याँ भरी पलाँव ज़ ताज़्‍या। फरी नो जेमी ज़्याज़्या ज़िझ़िव उलिकिन जेक्‍याँ भरी ओपो·स ज़ चुम चुमोल ताज़्‍या।
LUK 11:35 है जैद नो जेक्‍याँताव पलाँव ताव परिन्‍या चुम चुमो ताताक।
LUK 11:36 पलाँवल लिज़्‍याव मिँ चुम चुमोल माताद दिउ बाल्‍न्‍या ङ़ाकाव ज़गैवल उलिज़्‍याव मिताव लिज़्‍या।”
LUK 11:37 येसुए नो पाँ भरी ओरासथैवत तोबो फरिसी हुद येसुलाई काँ यान्‍याए जूँनी खुल्‍क्‍यो। येसु नोए उझ़िमक बाद,
LUK 11:38 उकुइ माचोखोइद ज़ ज़्‍यान्‍यात थूसिके। नो फरिसीए निताव रँःद बनै हार मानिक्‍यो।
LUK 11:39 प्रभुए नोलाई, “जे फरिसीर, ताथीर खुरीर जेराचोखोइज़्‍याव नो पाखाताव वाज़ लिज़्या। जेयुँल ते लोभ स़ोनो माचाव वाज़ जेनैज़्‍या।
LUK 11:40 ए जेर्ती माल्‍योर, परमेस्‍वरए पाखाताव जेक्‍याँ वाज़ जैद ओयाचिउ माःक, जेयुँ ब जैद्याचिक्‍यो।
LUK 11:41 जेयुँनी माथैंव मायो·वरालाई जेराचिऊकिन जेयुँ ब चोखो तान्‍या ले।”
LUK 11:42 “जे फरिसीरालाई थैए माँतकन ज़ लिज़्‍या। जे तके दँ जरार घोद दस भा जैद तभा भितील जेझाःज़्‍या। नो जेदोज़्‍याव ते चाव ज़, खाली नत वाज़ जेयुँ थू जैद झन ओचाहित ल्‍यो सतस दान्‍या स़ोनो परमेस्‍वरए ल्‍योदा युँ थू जैन्‍या भरी जेऱास्‍के। जे झन नो ओचाहित ल्‍योलाई ब ऱासो मापरिन्‍या।
LUK 11:43 “फरी ब जे फरिसीरालाई थैए माँतकन ज़ लिज़्‍या। जे सघ्‍योःसिद धर्मसास्‍त्र झ़िमराल प़ाइँराए रँःन्‍या पोक च़ुसिउ जेपैंज़्‍या। बजार जीदा ब ‘मिँराए धो घदासिरक’ लिद जेदुलिरिज़्‍या।
LUK 11:44 “जेलाई थैए माँतकन ज़ लिज़्‍या, जे मारैंःव खादर स्‍यासोर जेलिज़्‍या। जेल्‍योदा हुज़्‍यावर मासैंद ज़ बलेस्‍ज़्यार,” है यादोक्‍यो।
LUK 11:45 आव भरी थैद कानुनलाव तोबो यागुर्बाए येसुलाई, “गुर्बा, इताव नपाँए ते गेइज्‍यात ब खुलिद नयासिके,” है ओदोक ते,
LUK 11:46 येसुए, “जे कानुनलाव यागुर्बारालाई ब थैए माँतकन ज़ लिज़्‍या। जे सुए ज़ यामासयो·धुज़्‍याव कानुनर जैद छुतरालाई वाज़ दाव जेरापरींज़्‍या, जे ताकितर तोबो ओछ्यो ब जेमाछुए।
LUK 11:47 “जेलाई थैए माँतकन ज़ लिज़्‍या, जेसाखा पुर्खाराए अगमबक्ता भरिरालाई यारासैःकेर। जे फरी नोराए याखादरर जेराबनैज़्‍या।
LUK 11:48 है जैद जेसाखा पुर्खाराए यादोव य़ेन जे ज़ जेथ·रैज़्‍या। यारासैःवराए यापो जेबनैक फरी नोरास झन खदेप ब जेलिज़्‍या।
LUK 11:49 है जैद जे मितावराए जेजूँनी परमेस्‍वरए ङ़ादा ज़ थिक है लिद ले। नो पाँ आव ज़, ‘ङा नोराए ल्‍योदा अगमबक्तार स़ोनो ङापाँ सथैन्‍यार ङारापरींज़्‍या। नोरानी ख्‍वारालाई यारासैःरिज़्‍यार, ख्‍वारालाई याखिरी पसिद्यान्‍या लेर।’
LUK 11:50 “है जैद आव संसार सुरू ओतावकिनकाव अगमबक्तारालाई यारासैःव भरिराए याझी आज्‍यालकाव मिँराए याक्‍याँत ज़ तारिज़्‍या।
LUK 11:51 ओदाज्‍युए ओसैःव हाबिलए ओपालाकिन, नो थान स़ोनो ध्‍यान झ़िमनी निखार्लाव यासैःव जकरिया पैकावराए याझी आव बेलाकाव मिँराए याक्‍याँत लागिस्‍रिज़्‍या।
LUK 11:52 “जे कानुनलाव यागुर्बारालाई थैए माँतकन ज़ लिज़्‍या। जे धर्मसास्‍त्रलाव सर्सिउ परमेस्‍वरए ओराज्‍याल पसिन्‍या साँचा जेम़ोंके। है जैद जे ननी ज़ परमेस्‍वरए ओराज्‍याल पसिउ जेमाभैंःए, पसिउ पैंज़्‍यावरालाई ब जे ज़ जेरावैंके,” है यादोक्‍यो।
LUK 11:53 येसु ननी पुलुस्‍द ओबाज़्‍याक नो फरिसीर स़ोनो कानुनलाव यागुर्बार येसुकिन तँदा जैसिद बनै कुधु पाँर सुधिकेर।
LUK 11:54 नोराए यायुँल ‘ओल ओयाःनी पुलोसो पाँनी ज़ गेक्‍योःया’ लिन्‍या उलिज़्‍याव।
LUK 12:1 हाः बेलाक बनै माहोल्‍या मिँर येसुए ओपाँ थैन्‍याए जूँनी छिल्‍सिवा छिल्‍सिवा जैसिद बनै याछुइसिज़्‍याव। नो बेलाक ज़ उस॰कत उसिसरालाई इतावनी यासथैक्‍यो, “जे फरिसीराए यादोज़्‍याव मिताव कप्‍तैं य़ेननी जोगोइसिद लिच्‍यो। निताव य़ेन सरालिसिज़्‍याव वासः मिताव ताज़्‍या।
LUK 12:2 कप्‍सिउल लिज़्‍याव भरी तछा प़ाइँए सैंन्‍या लेर, म़ोंसिउल लिज़्याव भरी ब छर्लङ्ग ज़ रैंःरिज़्यार।
LUK 12:3 है जैद जे आज्‍याल म़ोंसिद जेपाँदी ब तछा पाखात थास्‍रिज़्‍या। झ़िमलाव खुस खुसनी जेपाँव भरी ब थालातिन यारासथैरिज़्‍यार।”
LUK 12:4 येसुए फरी, “जे ङानैंरालाई है ङादाचिज़्‍या, जेक्‍याँलाई वाज़ सैःद छुत काता ज़ माजैधुज़्‍यावर रँःद ताछे·च्‍यो।
LUK 12:5 बुरू जेक्‍याँलाई सैःद नर्गल ख्‍यान्‍या ओहक ल्‍योलाई रँःद वाज़ छे·च्‍यो। साचो है ङादाचिज़्‍या, नोलाई रँःद जुनी ब छे·व ज़ परिके।
LUK 12:6 आव ब चेतैच्‍यो। पाँच गोता बिङर्‍या ऩेपैसाल ओमाबिकैज़्याव रो? नाः सोङ्गो ओतादी ब परमेस्‍वरए तोबो ब मारामेंःव।
LUK 12:7 होए जेङ़ैताव जेचेम आः लिज़्‍या लिन्‍या ब सैंज़्‍याव। है जैद काताल ज़ ताछे·च्‍यो। कुधु बिङर्‍याराकिन होए जेलाई घेप्‍पा रँःचिज़्‍याव।
LUK 12:8 “है जैद ङा जेलाई है ङादाचिज़्‍या, जोए मिँराए ङ़ाक ओलाज माहुद ‘ङा येसुसकाव ज़’ है लिज़्‍या, ङा मिँ मिन्‍सिउए ब नोलाई परमेस्‍वरए ओचाकर्‍याराए याङ़ाक ‘ङासकाव ज़’ है लिन्‍या ङाले।
LUK 12:9 फरी जोए मिँराए ङ़ाक ‘ङा येसुसकाव माःक’ है दाँज़्‍याव, ङा ब परमेस्‍वरए ओचाकर्‍याराए याङ़ाक ‘आव ङासकाव माःक’ है दान्‍या ङाले।
LUK 12:10 जोए ङा मिँ मिन्‍सिद हुवए ङाङ़ैत माचाहिउ पाँर झाःद ङामिन बले·ज़्‍याव, होए ओपाप क्‍यालो दैसिए। खाली जोए परमेस्‍वरए छैंव उपुरूसए उमिन बले·दिज़्‍याव, नो पाप क्‍यालो मादैसिए।
LUK 12:11 है जैद जेलाई धर्मसास्‍त्र झ़िमलाव स़ेरर, घेप्‍पा घेप्‍पार स़ोनो हाकिमराए याङ़ाक यालाँचिकिन, नो बेलाक ‘ङा नोरास काता पाँन्‍या, काता जवाप यान्‍या ओताव?’ लिद जेयुँ आँचा पाँचा ताजैच्‍यो।
LUK 12:12 नो बेलाक परमेस्‍वरए छैंव उपुरूसए जे काता पाँन्‍या ओल ज़ पैन्‍या ले।”
LUK 12:13 हाःत ज़ नो माहोल्‍यारानी तोबोए येसुलाई, “गुर्बा, ङादाज्‍युलाई ‘नभाइस जिनबताहा भाःचिन्‍के’ है दाद्याँसाँ,” है ओदोक ते,
LUK 12:14 येसुए, “ङा जेत्याला जैसिद जिनबताहा भाःद्यान्‍या ङा ङाय़ेन माःक,” है दाद,
LUK 12:15 नकाव लिज़्‍यावरालाई प़ाइँलाई ज़, “प़ाइँनिकाव लोभनी जोगोइसिद लिच्‍यो। जती उलिदी ब मिँए उजिउलाई धनए साचो जुनी माएधुव,” है लिद,
LUK 12:16 घर्ती तोबो झाःद याएक्‍यो — “तोबो धनी मिँए ओएँःलाव ज़्‍यावर बनै सैद,
LUK 12:17 उयुँल उयुँल, ‘आःकाव ङाज़्‍यावर कान्‍ल ङाससुइँःके?’ लिद,
LUK 12:18 ‘बुरू ङादहरा बुम भरी उफारैद प़ाइँ नल ज़ झाःद,
LUK 12:19 ङाक्‍याँलाई, कुधु बर्स पै चाव चाव ज़्‍याद ओद थाँतस लिन्‍के, है दान्‍या ङाले,’ है लिके दी।
LUK 12:20 नो उयुँलाव पाँ परमेस्‍वरए सैंद, ‘ए मुर्ख, काता नपाँज़्‍याव इताव? आछिम रील ज़ नस॰ हाइद ङाईंरिज़्‍या। नो नदुपो भरी सुए उज़्‍युरिज़्‍याव?’ है दोक्‍यो दी।
LUK 12:21 “है जैद जोए ओधन सम्‍पती परमेस्‍वरए ल्‍योदा मादुप्‍द ओल उजूँनी वाज़ दुप्‍ज़्‍याव, नो आव घर्तीलाव मिँ स्‍यासो तान्‍या ले।”
LUK 12:22 नकिन येसुए उसिसरालाई है यादोक्‍यो, “है जैद ङा जेलाई ब है ङादाचिज़्‍या, जे जेक्‍याँए उजूँनी ‘काता ङाज़्‍युके, काता ङाक्‍वाइसिके?’ लिद व़ीनी फुइ तालिच्‍यो।
LUK 12:23 आव गेजिउ ज़्‍यान्‍या क्‍वाइसिन्‍याए जूँनी वाज़ माःक।
LUK 12:24 कारालाई याराचिऊचिके। नोराए धुर ब माझाःर, क्‍या·न्‍या ब माक्‍या·र, ज़्‍याव ब मादुपर। हितावत ब चाहिज़्‍याव भरी परमेस्‍वरए जोरैद याएज़्‍याव। परमेस्‍वरए जेलाई झन बाज़ाराकिन घेप्‍पा रँःचिज़्‍याव।
LUK 12:25 “जेनी सुए ची सोगो दाद जेजिउत तघन्‍ता जेचा·धुरिज़्‍याव?
LUK 12:26 निताव तकेज़ा य़ेन जेमादोधुकिन जे काराव व़ीनी फुइ जेलिज़्‍याव?
LUK 12:27 वासर ब याराचिऊचिके। नोराए धामा दाद माखल्‍र। हितावत ब सोलोमन राजा बनै तह महौ ओजैसिदी ब वास तकल माताए।
LUK 12:28 परमेस्‍वरए आछिम वैद पराःती मेंःल बाज़्याव छीर नाः चाव याजैज़्‍याव ल्यो ताकिन जेलाई झन कै जैद माक्‍वाइचिउके? काता नाः जेयुँ माहुबोर जेलिज़्‍याव!
LUK 12:29 हिताव ज़ जे ‘काता ङाज़्‍युके, काता ङाओके’ लिन्‍यादा जेयुँ थू जैद व़ीनी फुइ तालिच्‍यो।
LUK 12:30 आव भरी ते परमेस्‍वरलाई मासरेस्‍ज़्याव मिँराए याध्‍यावना ची। जे जेजूँनी चाहिज़्‍याव भरी ते परमेस्‍वर जेबाबुए सैंज़्‍याव।
LUK 12:31 है जैद जे परमेस्‍वरए ओराज्‍या खिम्‍चिके। हो ताकिन ची जेलाई चाहिज़्‍याव भरी ओल ज़ जोरैद्याचिरिज़्‍याव।
LUK 12:32 “है जैद जे ज़िम्‍ज़ा ङाबगालर, ताछे·च्‍यो। जेलाई जेबाबु परमेस्‍वरए ओल ओराज्‍या खुसीस यान्‍या युँ दाद नैव।
LUK 12:33 जे जेसम्‍पतीर यो·द माल्‍योरालाई भाःद याराएचिके। स्‍वर्गताव खर्क ज़ माचिस्‍न्‍या जेस्‍याकलर ऱूप्‍द नैचिके। नलाव जेदुपो धन कै मै ज़ माताए। चोरराए ब मालाँधुर, घुनराए ब माज़्‍युधुर।
LUK 12:34 काराव ल्‍यो ताकिन जोङ जेधन लिज़्‍या, जेयुँ ब होङ ज़ तान्‍या ले।”
LUK 12:35 “जे जेवाँःफोर पो·सिद बत्तीर तैंःद झाःसिद लिच्‍यो।
LUK 12:36 भत्‍यारल बाव तोबो धनी मिँए ओय़ेन दाज़्‍याव मितावर जैसिउ ताके। नोर जो बेलाक तादी ब याघरपती हुद य़ाम कोतो कोतो ओजैहुव प़ाइँना फैदिज़्‍यार।
LUK 12:37 सैंसिद लिद ओय़ेन यादोज़्‍याव याघरपतीए ओरादैहुकिन नोर असिक दैवर तान्‍या लेर। ङा साचो है ङादाचिज़्‍या, नो याघरपतीए ओल ज़ झन ओवाँःफोर पो·सिद ओय़ेन दाज़्‍यावरालाई सोचोइँद ज़्‍यावर भाःद्यान्‍या ले।
LUK 12:38 है जैद नो धनी मिँ आधा री उघर्किनावत उहुदी ब, उसँनाक उहुदी ब सैंसिद यालिज़्याव ज़ ओरादैहुकिन नोर असिक दैवर लिज़्‍यार।
LUK 12:39 “फरी आव ब सैंच्‍यो, तोबो झ़िमए ओर्गेए ‘चोर आः बेलाक हुरिज़्‍या’ लिन्‍या ओसैंकिन झाःसिद लिद उझ़िम पा·व माएखेहो।
LUK 12:40 हिताव ज़ जे मनी सैंसिद लिच्‍यो, काराव ल्‍यो ताकिन ङा मिँ मिन्‍सिउ मनी जेमासैंद उमँःजानी ज़ ङाहुरिज़्‍या।”
LUK 12:41 हाःत ज़ पत्रुसए येसुलाई, “प्रभु, आव नपाँ गेजूँनी वाज़ सैं प़ाइँए जूँनी की?” है ओदोक ते,
LUK 12:42 येसुए, “किताव तोबो धनी मिँए सतस दाज़्‍याव ओतह ल्‍यो ओनोकोरलाई उझ़िमलाव य़ेन भरी उकुइत याद ओय़ेन दाज़्‍यावरालाई थिक बेलाक ज़्‍यावर यान्‍या जैद ओख्‍यानैक,
LUK 12:43 नो नोकोर सतस य़ेन ओदोज़्याव ओघरपतीए ओदैहुकिन नो नोकोर असिक दैव ज़ तान्‍या ले।
LUK 12:44 ङा साचो है ङादाचिज़्‍या, नो ओघरपतीए प़ाइँ ज़ उकुइत यान्‍या ले।
LUK 12:45 “फरी नो नोकोरए, ‘ङाघरपती हतप्‍त माहु’ लिद उधूँलाव लिज़्‍याव बाँदा बाँदानीरालाई प़ोद, ओल ज़्‍याद ओद मँःए मँःए ओबाऱिज़्याक,
LUK 12:46 ओमासैंद ओघरपतीए ओदैहुकिन, नोलाई चम चम जैद यायुँ माहुप्ज़्‍यावर ओराख्‍याज़्‍याव पोल ख्‍यान्‍या ले।
LUK 12:47 “जोए ओघरपतीए ओय़ेन सैंद ब मादोव नो कुधु प़ोसिनिन्‍या तान्‍या ले।
LUK 12:48 जोए मासैंद प़ोसिनिन्‍या मिताव य़ेन दोज़्‍याव हो छ्यावा वाज़ प़ोसिरिज़्‍या। जोलाई कोसै यासिउ लिज़्या होए कोसै ज़ सोवोलो परिज़्या। फरी जोए कोसै जिम्‍बा दैद नैव होए कोसै ज़ बुझैव परिके।”
LUK 12:49 “ङा ङापाँए आव मानुवात मेंः लैना ङाहुव मिताव लिज़्‍या। नो ङाय़ेन चाँदो ज़ ओखेम्‍किन ताखेहो है ङालिज़्‍या।
LUK 12:50 खाली नोकिन ङ़ादा तोबो दुखल गदिउ परिन्‍या लिज़्‍या। नो ओमायो·वा पै ङायुँ धो थाइव ताज़्‍या।
LUK 12:51 जे ङालाई ‘आव मानुवाताव मिँरालाई सखैना उहुव ताखेहो’ है जेलिज़्‍याखेहो। आव ङापाँए झन मिँरालाई याफातैरिज़्‍याव।
LUK 12:52 अबकिन तोबो झ़िमलावर पाँच जना यालिकिन स़ोम्‍लो तँदा ऩेब्‍लो तँदा तान्‍या लेर।
LUK 12:53 ज़ा बाबुनी ब माखैद ओज़ा तँदा ओबाबु तँदा तान्‍या लिनी। हिताव ज़ ज़ा-मा तादी ब, फुबु भदै तादी ब, या याल माखैव तान्‍या लेर।”
LUK 12:54 येसुए माहोल्‍यारालाई ब है यादोक्‍यो, “जे आव गेपोल बादल पछ्युँनी उहुज़्‍याव जेरँःक ‘नम वान्‍या ले’ लिद जेथ·रैज़्‍या। हिताव ज़ ताज़्‍या।
LUK 12:55 दखिननी बतास उहुज़्‍याव जेरँःक ‘आछिम बनै घाम तारिज़्‍या’ है जेलिज़्‍या। हिताव ज़ ताज़्‍या।
LUK 12:56 ए कैफतीर, नाम नमलाव सरेसर ते जेथ·रैज़्‍या, कै जैद आखकाव बेला ताकितर जेमाथ·रैधुज़्याव?
LUK 12:57 “ओलेखा ल्‍योलाई झन कै जैद जेमाप़ाल्‍धुज़्‍याव?
LUK 12:58 नँलाई तोबो नजगर्‍याए अदालतदा ओलाँनिक होङ माकेस्‍द येमक ज़ नोस खैन्‍या उदिम दाव ताके, म़ानी नोए न्‍याधिसए ल्‍योक सकेस्‍निरिज़्‍याव। न्‍याधिसए पुलिसलाई सूँपिद, पुलिसए फरी झ्यालखानाल झाःनिरिज़्‍याव।
LUK 12:59 साचो ज़, नल नपरिकिन तपैसा तादी ब ओपो·स ज़ नमाफो·वा पै पुलुसो दैन्‍या नमाले।”
LUK 13:1 हो बेलाक तोबो ऩेब्‍लो हुद येसुलाई, “पिलातसए मार पल्‍हुज़्‍याव गालीललावरालाई सैःद होराए याझी मारए उझीस बरे·केर,” है यादोक ते,
LUK 13:2 येसुए नोरालाई, “नोर निताव दुखस यासिउए ‘यादेसलाव भरिरानी प़ाइँरानी पापीर ज़ याल्‍यो ओल्‍यो’ है जेलिज़्‍याखेहो।
LUK 13:3 ङा ते निताव ते माःक है ङादाचिज़्‍या। हैदी मनी जे परमेस्‍वरए ल्‍योदा जेयुँ जेमाफर्कैकिन फाल्‍न्‍या छ्याम जेलाई ब नो मिताव ओछ्यास लिज़्‍या।
LUK 13:4 हिताव ज़ फरी नो यरूसलेमलाव सिलोआम धरर धलिद अथार जना नल यासिक, नोरालाई ब ‘यरूसलेम भरिनी अपराधीर ज़ ताखेरहो’ है जेलिखेहो।
LUK 13:5 ङा फरी हिताव ते माःक है ङादाचिज़्‍या। हैदी ब परमेस्‍वरए ल्‍योदा जेयुँ जेमाफर्कैकिन फाल्‍न्‍या छ्याम जेलाई ब नो मिताव ओछ्यास लिज़्‍या,” है यादोक्‍यो।
LUK 13:6 नकिन येसुए नोरालाई तोबो घर्ती झाःद यासथैक्‍यो, “तोबोए ओएँःल कोराली तोबो रूपिद ओनैज़्‍याव। तछा ओसै उचिऊनाक ते मादैक्‍यो दी।
LUK 13:7 नकिन ओय़ेन दाज़्‍यावलाई, ‘आव कोरालीलाई धलैके। स़ोंरिम ताके सै ज़ मासैए, एँः वाज़ छ्याज़्‍याव,’ है ओदोक ते,
LUK 13:8 ओय़ेन दाज़्‍यावए, ‘थारे सायेब, आइँसी पै नैव ताके। ओजरा जीदा घोद मलर झाःद ङाएरिज़्‍या,
LUK 13:9 कसा मासैए। नाःत ब ओमासैकिन नधलैया,’ है दोक्‍यो दी।”
LUK 13:10 तछा येसुए ऩासिन्‍या छ्याम धर्मसास्‍त्र झ़िमक परमेस्‍वरए ओपाँ ओरासथैज़्‍याक,
LUK 13:11 नल तोबो थ॰ मालिधुज़्याव घोंत्‍यानिसो मेंमा उलिज़्‍याव। नोलाई माचाव पुरूसए नै ओजैव अथार बर्स ताद उलिज़्‍याव।
LUK 13:12 येसुए नोलाई रँःद ओल्‍योक खुल्‍द, “अ माँ आछिमकिन आव नदुखनी नऱास्‍सिके,” है दाद,
LUK 13:13 नोए ओक्‍याँत उकुइ नैद ओयो प़ाइँना सोजोकाव ज़ ताद परमेस्‍वरलाई बनै घ्‍योःव ज़ थ·रैद उमिन सघ्‍योःदिक्‍यो।
LUK 13:14 हाःत ज़ नो धर्मसास्‍त्र झ़िम चलैज़्‍यावए ऩासिन्‍या छ्याम येसुए नो मेंमालाई ओसगराँव रँःद बनै रसिद नक लिज़्‍यावरालाई, “य़ेन दान्‍या छ दिन जैसिउ लिज़्‍या। सगराँसिन्‍या ताकिन नाः भरिल ज़ सगराँसिहुच्‍यो। ऩासिन्‍या छ्याम माःक,” है ओरादोक ते,
LUK 13:15 प्रभुए नोलाई रँःद, “ए कैफतीर, जे ऩासिन्‍या छ्याम जेघें जेगधाहारालाई बँनी पला·द ऱी जेरासवैनाज़्‍याखेहो सानी।
LUK 13:16 झन आव अब्राहामए ओथोलाव सैतानए अथार बर्स पै किद ओनैज़्‍याव मेंमालाई कै जैद ऩासिन्‍या छ्याम मापला·न्‍या?” है यादोक्‍यो।
LUK 13:17 निताव ओपाँए ओलकिन तँदा जैसिउ भरी लाज मोर्नो ज़ ताकेर। माहोल्‍याराए ते येसुए अचम्‍बलाव ओय़ेन रँःद यायुँ होलाँ ताद रेंकेर।
LUK 13:18 है जैद येसुए नोरालाई, “परमेस्‍वरए ओराज्‍या किताव उलिज़्‍याव, कितावनी पलास्‍द ङायाचिके लिक ते,
LUK 13:19 परमेस्‍वरए ओराज्‍या तोबो बाजीए उधुर स्‍यासो लिज़्‍या। बारील झाःकिन परीद ओघ्‍योःवत नमताव भुर्ज़्याव बाज़ार सिपर जैद ओखारत बासिज़्‍यार।”
LUK 13:20 फरी येसुए, “परमेस्‍वरए ओराज्‍यालाई ङा कातास ङागोइँके ल्‍यो ताकिन,
LUK 13:21 परमेस्‍वरए ओराज्‍या भरेस सोगोइन्‍या वासः स्‍यासो ब लिज़्‍या। सोंःसेमे मुछिसिउ कनेल तोचोप झाःदी ब प़ाइँ सरालिज़्‍याव,” है लिके।
LUK 13:22 येसुए नाखार नाखार, सहर सहर जीदा परमेस्‍वरए ओपाँ सथैए सथैए यरूसलेमदा ओबाज़्‍याक
LUK 13:23 येमक तोबोए, “प्रभु, अजम्‍बरी जुनी दैन्‍यार छ्या वाज़ यालिज़्‍याव सा?” है ओदोक ते,
LUK 13:24 येसुए, “चूव य़ामनी पसिन्‍या जोर दोच्‍यो। कुधु पसिउ पैंज़्‍यावर पसिधुन्‍या मालेर।
LUK 13:25 झ़िमए ओर्गेए य़ाम ओगलो छींनी जेबाकिन लाँःक च्‍याँःसिद, य़ाम कोतो कोतो जैद, ‘प्रभु, गेलाई य़ाम फैद्यासिके’ है जेदोकिन, झ़िमए ओर्गेए, ‘जे काताङावर, ङा ङामासरेस्‍चिए,’ है दान्‍या ले।
LUK 13:26 जे फरी, ‘गे नँस ज़्‍युज़्‍यावर ज़, नसथैसिज़्‍याव नाखारलावर ज़,’ है जेदोकिन,
LUK 13:27 ओल फरी, ‘जे काताङावर, जात्त ज़ ङामासरेस्‍चिए। जे पापीर आनी पुलुस्‍द बाचिके,’ है दान्‍या ले।
LUK 13:28 हाः बेलाक जे अब्राहाम, इसहाक, याकूब स़ोनो अगमबक्ता भरी परमेस्‍वरए ओराज्‍याल यालिज़्‍याव रँःन्‍या जेले। जे फरी, ‘गे ते लाँःक लिन्‍यार ची गेताव ओल्‍यो’ लिद जेहार ङर ङर कैद चिर्लनी बिर्ल घर्न्‍या जेले।
LUK 13:29 हो छ्याम मिँर आव संसारलाव चार कोन्‍यानी हुद परमेस्‍वरए ओराज्‍यालाव भत्‍यारल च़ुसिन्‍या लेर।
LUK 13:30 नो भरिनी ख्‍वा ख्‍वा ङ़ात लिज़्‍यावर छींत तारिज़्‍यार, छींत लिज़्‍यावर ङ़ात तारिज़्‍यार।”
LUK 13:31 नाः बेलाक ज़ फरिसीर तोबो ऩेब्‍लो हुद येसुलाई, “हेरोद राजाए नँलाई सैःव पैंज़्‍याव, नँ आनी पुलुस्‍द बाव ताके,” है यादोक ते,
LUK 13:32 येसुए, “नो स्‍याललाई है दोनाचिके, ‘तछा ऩेला पै माचाव पुरूसर पले·द यासगराँरिज़्‍याव दी। नकिन ओय़ेन भरी तुपिन्‍या ले दी।’
LUK 13:33 जुनी तादी ब ऩेला स़ोंलात ङाबान्‍या पोङ माकेस्‍द माताए, म़ानी अगमबक्ता यरूसलेमल मासिद काङ्ङ उसिरिज़्‍याव?
LUK 13:34 “ए यरूसलेमलाव मिँर, कै जैद अगमबक्ता भरिरालाई जेरासैःज़्‍याव, जेल्‍योक परींसिउरालाई ब लुँ लुँए जेराझेःज़्‍याव? बामाए ओचर्ल्‍यानीर ओकर धूँल ओरादुप्‍ज़्‍याव मिताव, ङा ब जेलाई कुधु पाला ज़ ङाल्‍योदा पाथस दुपो ङापैंके, खाली जे ते जेमाभैंःके।
LUK 13:35 है जैद जेझ़िम रितो ज़ तारिज़्या। ङा जेलाई है ङादाचिज़्या, आकिन ते ‘परमेस्‍वरए उमिनताव हुज़्‍याव धन्‍याकाव ओताक’ है जेमादाँवा पै ङालाई फरी रँःन्‍या जेमाले।”
LUK 14:1 ऩासिन्‍या छ्याम येसु तोबो फरिसीराए याघेप्‍पाए उझ़िमक काँ ज़्‍युना बाके। नक छुत फरिसीर पाला येसुए उचिवार्‍या यालिज़्‍याव।
LUK 14:2 नल गोन्‍या बेथाए क्योःद ओनैज़्‍याव तोबो मिँ ब येसुए ओङ़ाक च़ुसिद उलिज़्‍याव।
LUK 14:3 हाःत ज़ येसुए नलाव लिज़्‍याव फरिसीर स़ोनो कानुनलाव यागुर्बारालाई, “ऩासिन्‍या छ्याम याजोरो हुवरालाई मासगराँन्‍या कानुन उलिज़्‍याव रो?” है ओरादोक ते,
LUK 14:4 सु ज़ यामापाँधुवए येसुए नो ओजोरो हुवलाई छाप्‍द याङ़ाक ज़ सगराँद ननी परींद,
LUK 14:5 नलाव लिज़्‍यावरालाई, “जे ऩासिन्‍या छ्याम जेज़ा तादी ब जेघें तादी ब भल्‍खादाल ओतेकिन होल ज़ जेनैज़्‍याव सैं जेहाइज़्‍याव?” है ओरादोक ते,
LUK 14:6 येसुस सु ज़ मापाँधुकेर।
LUK 14:7 नकिन येसुए नो भत्‍यारल खुल्‍सिउ पाहुनाराए ओमान ल्‍यो पो याखिम्‍ज़्‍याव रँःद अइ लिद घर्ती तोबो झाःद याएक्‍यो,
LUK 14:8 “बिह्‍यालाव भत्‍यारल जेलाई सुवाराए याखुल्‍चिकिन ओमान ल्‍यो पो ताखिम्‍च्‍यो। नँकिन घेप्‍पा मिँलाई ब खुल्‍द ओनैज़्‍याव ताकिन,
LUK 14:9 नो भत्‍यारल खुल्ज़्यावए, ‘नँ आवलाई पो ऱास्‍द्याव ताके,’ है दान्‍या ले। ननी मेकसै ओसारैनिकिन लाज मोर्नो तान्‍या नले।
LUK 14:10 बुरू ङ़ादा ज़ प़ाइँरानी ओछ्योङाव पोङ च़ुसिउ ताके। हो ताकिन ची भत्‍यारल खुल्ज़्यावए, ‘अ ङानैं, जाँ रोकसै हुन्‍के,’ है उदींकिन प़ाइँराए ङ़ाक नइज्‍यात रहिन्‍या ले।
LUK 14:11 है जैद जो ओलनी सघ्‍योःसिज़्‍या, हो ज़िम्‍रिज़्‍या। फरी जो ओलनी सज़िम्‍सिज़्‍या, हो घ्‍योःरिज़्‍या।”
LUK 14:12 नकिन येसुए ओललाई काँ ज़्‍युना खुल्‍ज़्‍यावलाई ब है दोक्‍यो, “नँ भत्‍यार जैद मिँरालाई नराखुल्‍क नक्‍याँदाङावर, नदाज्‍यु भाइर, ननैं मेंर स़ोनो घेप्‍पा मिँर वाज़ ताराखुल्‍यो। म़ानी नोराए फरी नँलाई ब भत्‍यारल खुल्‍द नलोइ फो·न्‍या लेर।
LUK 14:13 बुरू भत्‍यार नजैक काता ज़ माल्‍योर काना दूँदारालाई दुप्‍द याज़्‍यास्‍के।
LUK 14:14 नोराए नलोइ यामाफो·धुवए नोए ओपोल असिक दैन्‍या नले। धर्मीर सैंसिद यासोव छ्याम परमेस्‍वरए ल्‍योनी नलोइ दैन्‍या नले।”
LUK 14:15 हाःत ज़ नो भत्‍यारल लिज़्‍यावरानी तोबोए, “साचो ज़ प्रभु, परमेस्‍वरए ओराज्‍यालाव भत्‍यारल ज़्‍याव दैज़्‍याव ओभागी ल्‍यो ज़,” है ओदोक ते,
LUK 14:16 येसुए अइ लिद घर्ती तोबो झाःक्‍यो, “तोबो मिँए तछा बनै घ्‍योःव भत्‍यार जैद कुधुलाई याखुल्‍क्‍यो दी।
LUK 14:17 ज़्‍याव भरी ओतावत तोबो ओनोकोरलाई नो है ओरादोव भरिलाई खुल्‍नाव परींक्‍यो दी। नो बाद, ‘ज़्‍याव भरी ताधुके, हुचिके दी,’ है ओरादोक ते,
LUK 14:18 नोराए तोबो तोबो निउँ जैद, उस॰कतावए, ‘ङा एँः तोथो लँःद ङानै, नो एँः ङाचिऊनारिज़्‍या। है जैद ‘माधाःए दी’ है दोयो।’
LUK 14:19 हुकिनकावए, ‘ङा घेंर पाँच हल लँःद ङारानै, नोरालाई बिचारिना ङाबारिज़्‍या। है जैद ‘माधाःए दी’ है दोयो।’
LUK 14:20 प़ाइँरानी छींनीकावए, ‘ङा भर्ज़ा ज्‍या रैद ङानै, है जैद ‘माधाःए दी’ है दोयो।’
LUK 14:21 “है जैद नो ओय़ेन दाज़्‍याव ओघरपतीए ल्‍योक बाद किताव है यादोव हिताव ज़ है दोक्‍यो। नो घरपती रसिद, ‘हो ची ताकिन्‍दा नँ चाँदो बाद सहरलाव दोहा जीलाव गरीब गुरूवा, काना दूँदारालाई खिम्‍द यारैके,’ है ओदोक ते,
LUK 14:22 नो ओय़ेन दाज़्‍यावए ओघरपतीए है ओदोव मिताव मिँर रैद, ‘है नदाँव मिताव मिँर रैद ङारानै। हैदी ब पो लिज़्‍या,’ है ओदोक ते,
LUK 14:23 ओघरपतीए फरी, ‘येम जीलावर काना कुनी जीलावर काचाबुल घरारैयो, ङाझ़िमल घब्‍याल्‍रक,’ है दाद,
LUK 14:24 ‘ङ़ादाङाव खुल्‍सिउराए ङाभत्‍यारल तके ब दारो तादैरक,’ है दोक्‍यो।”
LUK 14:25 हाः बेलाक येसुस ल्‍यो माल्‍यो मिँर उछीं उछीं याबाज़्‍याव। येसु नोराए ल्‍योदा भाल्‍सिद अइ लिद यासथैक्‍यो,
LUK 14:26 “जो ङास हुव पैंज़्‍याव, होए ओबाबु ओआमा, ओज्‍या ओज़ा, ओदाज्‍यु भाइ, ओनाना बैंनीर स़ोनो उजिउलाई ङाकिन कोसै मया ओरादोकिन, हो ङासिस तान्‍या माले।
LUK 14:27 ङाजूँनी क्रुसत सिन्‍या मिताव दुखर सहिउ माभैंःद ङाछींत ओमाहुकिन हो ब ङासिस तान्‍या माले।
LUK 14:28 हिताव ज़ जे झ़िम तोबो जेजैक ‘आः लागिरिज़्‍या’ लिद ङ़ादा ज़ हिसाप जेदोज़्‍या।
LUK 14:29 हिसाप मादाद गज वाज़ थालिद ओमातुपैधुकिन मिँराए नोलाई हसैद,
LUK 14:30 ‘मातुपैधुन्‍यालाई ज़ काराव ओथालिउ?’ है लिन्‍या लेर।
LUK 14:31 हिताव ज़ तोबो राजाए ब छुत राजास लरैं ओताकिन ङ़ादा हुनी हुज़्‍याव बीस हजार मिँरालाई दस हजार मिँरास गेमाराखेपैधुके लिद, उधूँलाव घेप्‍पा घेप्‍पारास सल्‍ला दोज़्‍याव।
LUK 14:32 नोरालाई माहारैधुन्‍या मिताव ताकिन नोर तादाङ यालिज़्‍याक ज़ सखैन्‍या मिँर यापरींज़्‍याव।
LUK 14:33 है जैद जे ब जेस लिज़्‍याव भरी जेमाऱास्‍धुकिन ङासिस तान्‍या जेमाले।
LUK 14:34 “सापी चाव ज़ लिज़्‍या, खाली ओदार ओमालिकिन नोलाई कै जैद ची ओदार ल्‍यो जैन्‍या।
LUK 14:35 नोलाई एँःल झाःद ब माताए, मलल झाःद ब माताए, ख्‍यान्‍या वाज़ ताज़्‍या। आव ङापाँ जोए थैन्‍या उयुँ लिज़्‍या, चावस ओथैवक।”
LUK 15:1 येसुए ल्‍योक सिर्मा स्‍यो·ज़्‍यावर स़ोनो पापीर कुधु ज़ ओपाँ थैना याहुज़्‍याव।
LUK 15:2 हिताव रँःद नकाव फरिसीर स़ोनो सास्‍त्रीराए, “आवए कै जैद निताव पापीरालाई सुम्‍द नोरास उज़्‍युज़्‍याव?” है लिद रूम्‍रूमैकेर।
LUK 15:3 येसुए नोराए यापाँ थैद अइ लिद घर्ती तोबो झाःद याएक्‍यो,
LUK 15:4 “तोबोए ओबेधार तसय यालिकिन, ननी तोबो ओङोइकिन उनान्‍सयलाई बनल ज़ ख्‍यानैद नो ङोइवलाई ओमादैवा पै खिम्‍ज़्‍याखेहो।
LUK 15:5 नोलाई ओदैक रेंए रेंए ओधेंल छींद,
LUK 15:6 ओबासक रैद ओनैंरालाई खुल्‍द, ‘आव म़ाव ङाबेधालाई ङादैके। जे ब ङास रेंचिके,’ है दान्‍या ले।
LUK 15:7 ङा साचो है ङादाचिज़्‍या, परमेस्‍वरस खैव उनान्‍सयराकिन तोबो पापी ओपाप ऱास्‍द परमेस्‍वरए ल्‍योदा उहुकिन नोलाई रँःद स्‍वर्गत बनै रेंन्‍या लेर।”
LUK 15:8 “फरी हो मिताव ज़ तोबो मेंमाए चाँदीए सिक्‍का दस गोता उलिकिन, ननी तोबो ओसम़ैकिन नोलाई ओमादैवा पै मेंः तैंःद झ़िम सीद खिमो ज़ नैज़्‍याव।
LUK 15:9 ओदैवत ओनैंरालाई खुल्‍द, ‘ङा नो ङासम़ैव सिक्‍का ङादैके। जे ब ङास रेंचिके,’ है दान्‍या ले।
LUK 15:10 हो मिताव ज़ तोबो पापी परमेस्‍वरए ल्‍योदा उहुकिन परमेस्‍वर मनी ओचाकर्‍यारास बनै रेंन्‍या लेर।”
LUK 15:11 “हो मिताव ज़ फरी तोबो मिँए ओज़ानी दुई भाइ निल्‍यो दी।
LUK 15:12 ओभाइए ओबाबुलाई, ‘बाबु, ङालाई ङाबताहा भरी याव ताके,’ है ओदोक ते, ओबाबुए ओज़ानिलाई सु सु निबताहा निएक्‍यो दी।
LUK 15:13 “हुकिन जाँवाक नोए उजुँ भरी यो·द पैसा भरी दुप्‍द तादा देसदा बाके दी। होङ बाद ओमन लागिउ य़ेन दाद ओपैसा भरी ओदोइक्‍यो दी।
LUK 15:14 प़ाइँ ओखेमोत नो देसल बनै घ्‍योःव अनिकाल हुद नोलाई माथैंक्‍यो दी।
LUK 15:15 है जैद नो देसलाव तोबोए ल्‍योक बाद, ‘नँस य़ेनर मादैसिके’ है ओदोक ते, नोए ऊ गावला जैक्‍यो दी।
LUK 15:16 ऊ गावला उलिज़्‍याक ओकरेए माधुद ऊराए यापुल ब ज़्‍याव पैंक्‍यो दी। नोलाई सुए ज़ काता ज़ यामाएज़्‍याव दी।
LUK 15:17 “बल्‍ल बल्‍लङ ओचेतर फर्किद, ‘ङाबाबुए उझ़िमलाव ओनोकोरर ते याफू तसी ज़्‍याद ब सय़ेल्‍ज़्‍यार। ङा ताकितर करे करेए ङाघ्याज़्‍या।
LUK 15:18 माताके ब, ङाबाबुए ल्‍योदा ओल्‍द बाद ची, ‘जेरो बाबु, ङा परमेस्‍वरए उउपर्त स़ोनो नँ नउपर्त पाप ङादोके।
LUK 15:19 अब ते ङा नज़ा है लिन्‍या स्‍यासो ब ङामाले। तोबो ननोकोरल गनिनाके,’ है ङाद्या ब,’ लिद,
LUK 15:20 ननी पुलुस्‍द ओबाबुए ल्‍योदा बाके दी। “ओबाबुए झ़िमकिन जाँ तादाङ उहुज़्‍याव रँःद उयुँ नाद होङ ज़ धोंःनाद लाप्‍द माइँ दोक्‍यो दी।
LUK 15:21 ओज़ाए, ‘बाबु, ङा परमेस्‍वरए उउपर्त स़ोनो नँ नउपर्त पाप ङादोके। ङा फरी नज़ा है लिन्‍या स्‍यासो ङामाले,’ है दोक्‍यो दी।
LUK 15:22 हाःत ज़ ओबाबुए ओनोकोररालाई, ‘आवलाई चाँदो ज़ प़ाइँरानी चाव क्‍वा रैद जास्‍चिके, उकुइत कुइची, उखँत पोला ब जास्‍चिके।
LUK 15:23 प़ाइँरानी सोइव मार तोबो रैद सैःचिके। बनै चावस ज़्‍याद ओद गेरेंया।
LUK 15:24 आव ङाज़ा सिउल गनिसिउनी, बाँचिद हुके, म़ाव ङोइवलाई ङादैके,’ है दाद भत्‍यार जैद बनै रेंकेर दी।
LUK 15:25 “यामानिज़्‍याक ज़ जेथा ओज़ा एँःनी भर उहुज़्‍याव। झ़िमक ओकेस्‍हुक झ़िमल गित गैद यास़्याज़्‍याव थैद,
LUK 15:26 तोबो नोकोरलाई खुल्‍द, ‘आव काता याजैज़्‍याव इताव?’ है ओदोक ते,
LUK 15:27 ‘नभाइ हुद ले। सिउल गनिसिउनी बाँचिद उहुए नोए उजूँनी नबाबुए प़ाइँरानी सोइव मार सैःक्यो,’ है ओदोक ते,
LUK 15:28 नो बनै रसिद झ़िमल पसिउ माभैंःके दी। है जैद ओबाबु ओल ज़ ओल्‍योक बाद फकैनाक्‍यो दी।
LUK 15:29 ओज़ाए माभैंःद, ‘ङा आः बर्स भरी नबाँदा मिताव जैसिद नपाँ खर्क ज़ माख्‍याद नसेवा ङादोके। हितावत ब ङालाई ङानैंरास ‘तोबो बाकरा बाली ब सैःद कैचिके’ है नमादाँए।
LUK 15:30 झन निताव नसम्‍पती भरी पातर्नीरास ओदोइद हुव नज़ालाई ताकितर सोइव मार सैःद नएके,’ है ओदोक ते,
LUK 15:31 ओबाबुए, ‘अ ङाज़ा, नँ एकतार ङास ज़ नलिज़्‍या सानी। ङास लिज़्‍याव भरी नमींर ज़।
LUK 15:32 आछिम आव नभाइ सिउल गनिसिउनी बाँचिद हुव, म़ाव ङोइवनी दैसिउए उजूँनी कै जैद मामानिन्‍या, कै जैद मारेंन्‍या?’ है दोक्‍यो दी।”
LUK 16:1 नकिन येसुए फरी उसिसरालाई तोबो घर्ती झाःद है यादोक्‍यो, “तोबो धनी मिँए ओय़ेन चलैन्‍या मिँ तोबो ओनैज़्‍याव दी। नोए ओघरपतीए ओपैसा ओओदोइज़्‍याव छुतराए रँःद, धनीलाई है यादोक ते,
LUK 16:2 नो धनीए नोलाई खुल्‍द, ‘नय़ेन जाँ माचाव ङाथैज़्‍या, नँसकाव हिसाप भरी ङालाई याव ताके। आकिनी नँ आव य़ेन दाव दैन्‍या नमाले,’ है ओदोक ते,
LUK 16:3 नो य़ेन चलैज़्‍यावए, ‘ङाघरपतीए आव ङाय़ेननी पले·नारिक्‍यो, ङा कै लिन्‍या ओताव? कीन्‍या घोन्‍या ङार्सा माले, ऩिद ज़्‍यान्‍या ङालाज हुज़्‍या।
LUK 16:4 है जैद आनी ओपले·नावत मिँराए ङालाई याझ़िमक नैन्‍याए जूँनी तोबो बुद्धी पले·द अइ ची ङाजैया ब’ लिद,
LUK 16:5 ओघरपतीए उरिन लाँव भरिलाई तोबो तोबोनी खुल्‍द प़ाइँरानी ङ़ातावलाई, ‘ङाघरपतीए ओकाछ नँस खा उलिज़्‍याव?’ है ओदोक ते,
LUK 16:6 ‘म़ास तसय गाधु लिज़्‍या,’ है दोक्‍यो दी। ‘हुकी नतुम्‍सुक रैकेदा, तसयकाव पचास वाज़ गिन्‍जैया,’ है दोक्‍यो दी।
LUK 16:7 नकिन फरी छुतलाई खुल्‍द, ‘नँस ङाघरपतीए ओकाछ खा उलिज़्‍याव?’ है ओदोक ते, ‘गेदा तसय धु लिज़्‍या,’ है दोक्‍यो दी। ‘हुकी नतुम्‍सुक रैकेदा, तसयकाव असी वाज़ गिन्‍जैया,’ है दोक्‍यो।
LUK 16:8 “छींनी ओघरपतीए ओय़ेन भरी ओसैंवत, ओबाथैंनिकाव ओदोव सामा ते चाव ज़ रँःक्‍यो दी। है जैद परमेस्‍वरए ओपाँताव मिँराए अजम्‍बरी जुनीए जूँनी यादोज़्‍याव सामाकिन आव मानुवाताव मिँराए याजूँनी वाज़ यादोज़्‍याव सामा झन ज़ ओबाथैं ल्‍यो रैंःज़्‍या।
LUK 16:9 “है जैद ङा जेलाई है ङादाचिज़्‍या, जे ते आव मानुवाताव जेधनए बुरू जेनैंर याराजैचिके। हो ताकिन ची सिन्‍या बेलाक पैसाए ओचाहित भरी ओखेमोत स्‍वर्गताव एकम्‍न्‍या लिन्‍या पोल जेलाई सुम्‍न्‍या लेर।”
LUK 16:10 “जोए तकेज़ा य़ेनत सतस दोज़्‍याव, होए घेप्‍पा य़ेनत ब सतस दान्‍या ले। फरी जोए तकेज़ा य़ेनत असत दोज़्‍याव, होए घेप्‍पा य़ेनत ब असत दान्‍या ले।
LUK 16:11 है जैद जे आव मानुवाताव धन असतस जेचलैकिन, परमेस्‍वरए ल्‍योङाव साचो धन कातानी जेदैरिज़्‍याव?
LUK 16:12 जेलाई यासिउ छुतए उमींलाई चावस जेमाचलैकिन, जे दैव परिन्‍या सुए ची ओयाचिरिज़्‍याव?
LUK 16:13 है जैद तोबो बाँदाए ऩेब्‍लो साहुनी निय़ेन मादोधुव। दाव उपरिकिन नोए तोबोलाई सोद तोबोलाई चाव रँःन्‍या ले, कितर तोबोए ओपाँ भैंःद तोबोलाई ओलेखा नैद्यान्‍या माले। हिताव ज़ जे मनी परमेस्‍वरए ओसेवा स़ोनो पैसाए ओसेवा तखेप्‍त जेमादोधुइ।”
LUK 16:14 नकाव ओपाँ थैज़्‍याव फरिसीर, यायुँ जम्‍मा पैसा कमैन्‍यादा वाज़ ओतावए येसुस याः दोकेर।
LUK 16:15 है जैद येसुए नोरालाई, “जे फरिसीर मिँराए ङ़ाक वाज़ धर्मी जैसिज़्‍यावर, जेयुँलाव पाँ भरी परमेस्‍वरए सैंज़्‍याव। है जैद मिँराए घेप्‍पा यारँःचिदी ब परमेस्‍वरए ल्‍योनी ते जेय़ेन युँ माजामो ज़ लिज़्‍या,” है यादोक्‍यो।
LUK 16:16 “यूहन्‍नाए ओपालाक पै मोसाए ओकानुन स़ोनो अगमबक्ताराए यापाँ उलिज़्याव। हाःकिन परमेस्‍वरए ओराज्‍यालाव पाँ हुद नल पसिन्‍या मिँर बनै छुइसिज़्‍यार।
LUK 16:17 हैदी मनी नाम नम ओखेम्‍दी ब नो कानुनलाव पाँ तोबो ब खेर बान्‍या माले।
LUK 16:18 है जैद मोसाए ओकानुनलाव सर्सिउ मिताव, तोबोए ओज्‍यालाई ऱास्‍द छुतलाई ओरैकिन जारी य़ेन ओदोव ज़ गनिसिज़्‍या। फरी ओरेलाई ऱासो मेंमालाई ओरैकिन नो ब हितावल ज़ गनिसिज़्‍या।”
LUK 16:19 फरी ब येसुए घर्ती तोबो झाःद है यादोक्‍यो, “तोबो धनी मिँ चाव चाव ज़्‍याद चाव चाव क्‍वाइसिद दिनकाव ज़ बनै थाँतस उलिज़्‍याव।
LUK 16:20 तोबो ऩिद ज़्‍याज़्‍याव लाजरस यादोज़्‍यावलाई दिनकाव ज़ नोए ओसाँबिलाक यारैज़्‍याव। नोए ओक्‍याँ भरी खतेरा वाज़ उलिज़्‍याव।
LUK 16:21 नोए ओखतेरार काःराए लेप्‍हुद याएज़्‍याव। नोए ‘नो धनी मिँए ओसतेवर ज़्‍याव ङादैकिन ताखेहो’ लिद आस ओदोज़्‍याव।
LUK 16:22 “तछा नो ऩिद ज़्‍युज़्‍याव लाजरस सिके। उसिउ प़ाइँना ज़ परमेस्‍वरए ओचाकर्‍यार हुद छींद स्‍वर्गताव अब्राहामए ओल्‍योक लाँकेर। फरी नो धनी मिँ ब सिके। मिँर हुद लाँद गादैनाकेर।
LUK 16:23 नो मिँ नर्गल बाद नलाव मेंःए ओसचप्‍क नमदा ओभाल्‍सिक नो लाजरस अब्राहामस उलिज़्‍याव रँःद,
LUK 16:24 अइ लिद बनै चोइस क़िके, ‘अ अब्राहाम बाबु, ङालाई नयुँ ओनाक। नँस लिज़्‍याव लाजरसलाई ओआङुला ऱील झाःद ङासेत सथेप्‍द्यान्याए जूँनी परींद्याँके। आव मेंःए सचप्‍द धो सहिउ ताद ङाले,’ है ओदोक ते,
LUK 16:25 अब्राहामए, ‘अ बाबुज़ा, नँ मानुवात नलेवा भरी बनै थाँतस नलिके, अब ते नल दुखस नलिज़्या। लाजरस ते बनै दुखस लिके, अब ते सन्‍चस लिज़्‍या।
LUK 16:26 फरी नँस गेखार्ल बनै घ्‍योःव भल्‍खादा नैसिउ लिज़्‍या। है जैद गे नल्‍योदा हुव गेपैंदी ब गेमाहुधुइ, नँ ब गेल्‍योदा नमाहुधुइ,’ है ओदोक ते,
LUK 16:27 नो धनीए, ‘हो ची ताकिन्‍दा बाबु, नँस ङाबिन्‍ती लिज़्‍या। नोलाई ङाबाबुए उझ़िमदा परींद्याव ताके।
LUK 16:28 ङाभाइर पाँच जना लिज़्‍यार। नोरालाई घरासथैनावक, म़ानी आव ङापरिउल परिन्‍या ओछ्यास लिज़्‍या,’ है ओदोक ते,
LUK 16:29 अब्राहामए, ‘नोर नल मापरिन्‍याए जूँनी यास मोसाए ओकानुन ब लिज़्‍या, अगमबक्ताराए यासरो पोस्‍तोको ब लिज़्‍या। नो ज़ ओथैरक,’ है दोक्‍यो।
LUK 16:30 नो धनीए फरी, ‘हिताव ते माता, अब्राहाम बाबु। तोबो सिउनी बावए है ओरादोकिन वाज़ परमेस्‍वरए ल्‍योदा यायुँ फर्कैन्‍या लेर,’ है ओदोक ते,
LUK 16:31 अब्राहामए, ‘मोसाए ओकानुन स़ोनो अगमबक्ताराए यापाँ यामाभैंःकिन सिउनी सैंसिद बावए ओपाँ कातानी याभैंःरिज़्‍याव?’ है दोक्‍यो।”
LUK 17:1 येसुए उसिसरालाई, “पापल पारैन्‍या पाँर ते जुनी ब हुन्‍या ज़ लेर, खाली निताव पाँर पले·ज़्यावलाई थैए माँतकन ज़ लिज़्‍या।
LUK 17:2 जोए आव मिताव ज़िम्‍ज़ारालाई पापल ओरापारैकिन, नितावलाई ते बुरू ओधेंल राँथै सुर्द्याद समुन्‍द्रल ख्‍यान्‍या पाथ लिज़्‍या।
LUK 17:3 है जैद जे ननी जोगोइसिद ल्‍यो ताके। “ननैंए निताव पाप ओदोज़्‍याव नरँःकिन नोलाई सिङारो ताके। नसिङार्क ओपापनी ओओल्किन नोलाई ऱासो ताके।
LUK 17:4 फरी नँ नउपर्त तछात ज़ सात पाला मादान्‍या य़ेन दाव य़ेन नँस खैहुव य़ेन ओदोदी ब, नोलाई ब ऱासो ताके,” है यादोक्‍यो।
LUK 17:5 फरी येसुए ओसाचीराए ओललाई, “अ प्रभु, परमेस्‍वरए ओपाँत गेयुँलाई झन ज़ सुहुप्‍द्यासियो,” है यादोक ते,
LUK 17:6 येसुए, “परमेस्‍वरए ओल्‍योदा बाजीए ओसै हावालिउ तादी ब जेयुँ जेसुहुप्‍किनी तोबो बनै घ्‍योःव ऱूम्‍बू सींलाई ‘भोस्‍द समुन्‍द्रल रूपिसिनान्‍के,’ है जेदोकिन जेपाँ भैंःन्‍या ले।”
LUK 17:7 “जेनी सुए ची जेबाँदालाई एँः कीन्‍यानी तादी ब बेधा छोन्‍यानी तादी ब, उहुव प़ाइँना ज़्‍यावर जैद ओसेवा जेदोज़्‍यादा?
LUK 17:8 बुरू उहुव प़ाइँना नोलाई, ‘नँ नक्‍वार फेरैसिद ज़्‍यावर जैद ङालाई रैद्याँकेदा, ङा ज़्‍याद ङाखेमोत नँ ब नज़्‍युया,’ है ची जेदोज़्‍याखेहो।
LUK 17:9 है जैद नो जेबाँदाए है दासिउनी वाज़ ओदोवए नोलाई कातानी ची धन्‍याबाद जेएरिज़्‍याव?
LUK 17:10 हिताव ज़ जे ब परमेस्‍वरए है ओदाचिउ भरी जेदोदी ब ‘गे ते असिक दैन्‍या स्‍यासोर गेमाले। गे ते है ओदासिउ य़ेन दाज़्‍यावर वाज़ ची गेल्‍यो ओल्‍यो’ लिद य़ाका दोच्‍यो।”
LUK 17:11 येसु यरूसलेमदा ओबाज़्‍याक सामरिया स़ोनो गालीलनी निखार्लाव घ्याँ ओबाज़्‍याव।
LUK 17:12 तोबो नाखारल उपसिक कुऱीर दस जना येसुस दैसिहुकेर। नोर जाँ अछतङ च्‍याँःसिद,
LUK 17:13 “अ येसु गुर्बा, गेलाई नयुँ ओनाक,” है लिद याक़िक ते,
LUK 17:14 येसुए नोरालाई रँःद, “जे पुजारीराए ल्‍योक सतैंसिना बाचिके,” है ओरादोक ते, नोर येमत याबाज़्‍याक ज़ प़ाइँ गराँकेर।
LUK 17:15 नोर यागराँव सैंद तोबो वाज़ येसुए ल्‍योक ओल्‍द हुद, बनै चोइस क़िद परमेस्‍वरए उमिन बनै सघ्‍योःद्याद,
LUK 17:16 येसुए उखँत फुलुप्‍सिद धन्‍याबाद चरैःक्‍यो। नो मिँ सामरिया जातलाव ओल्‍यो।
LUK 17:17 येसुए नोलाई, “जे गराँवर दस जना माःक रो? नँसकाव नौ जना काना याबाव?” है दाद,
LUK 17:18 नकाव लिज़्‍यावरालाई, “काता, परमेस्‍वरलाई धन्‍याबाद चरैःन्‍या आव तोबो छुत जातलाव मिँ वाज़ उलिज़्‍याव रो?” है दाद,
LUK 17:19 नो गराँवलाई, “च्‍याँःसिद चावस बान्‍के। ङालाई नयुँ उहुबोए नगराँके,” है दोक्‍यो।
LUK 17:20 फरिसीराए येसुलाई, “परमेस्‍वरए ओराज्‍या खर्क उहुरिज़्‍याव?” है लिद यासुधिक येसुए, “परमेस्‍वरए ओराज्‍या रँःन्‍या सरेसरास माहुइ।
LUK 17:21 मिँराए फरी, ‘आङ लिज़्‍या, होङ लिज़्‍या,’ है ब लिन्‍या मालेर। है जैद जे ज़ सैंच्‍यो, परमेस्‍वरए ओराज्‍या जेयुँल ज़ ताज़्‍या,” है यादोक्‍यो।
LUK 17:22 नकिन फरी उसिसरालाई, “तछा मिँ मिन्‍सिउलाई फरी तखेप रँःव गेदैकिन ताखेहो है लिन्‍या बेला ब हुन्‍या ले। हैदी ब रँःव दैन्‍या जेमाले।
LUK 17:23 है जैद मिँराए ‘आङ लिज़्‍या, होङ लिज़्‍या’ है यालिज़्‍यावङ ताबाच्‍यो, नोराए यापाँ ब तापतिच्‍यो।
LUK 17:24 किताव नमत बिजुली उमिल्‍किक प़ाइँदा ज़ ज़गै ओजैज़्‍याव, हिताव ज़ ङा मिँ मिन्‍सिउ ब प़ाइँए रँःन्‍या जैद हुन्‍या ङाले।
LUK 17:25 खाली नोकिन ङ़ादा दुखर सहिद आव बेलाकाव मिँराए ल्‍योनी सोसी ऩिन्‍या ङातारिज़्‍या।
LUK 17:26 ङा मिँ मिन्‍सिउ ङाहुन्‍या बेला, नोआए ओपालाकाव मिताव ज़ तारिज़्‍या।
LUK 17:27 नोआए ओपालाकाव मिँर ज़्‍याव ज़ यालिज़्‍याव, ओव ज़ यालिज़्‍याव, ज्‍यार रेर ब दाव ज़ यानैज़्‍याव। हाःत ज़ नोआ ऱी जहाजल उपसिउ प़ाइँना ऱीर ज्‍याल्‍हुद प़ाइँलाई यागदैक्‍यो।
LUK 17:28 “लोतए ओपालाकाव मिँर ब हितावर ज़ याल्‍यो। नोर मनी ज़्‍याद ओद यालिज़्‍याव, लँःन्‍यार लँःव ज़ यालिज़्‍याव, यो·न्‍यार ब यो·व ज़ यालिज़्‍याव, धुर ब झाःव ज़ यालिज़्‍याव, झ़िमर ब जैव ज़ यालिज़्‍याव।
LUK 17:29 खाली लोत सदोमनी उपुलुसो प़ाइँना ज़ परमेस्‍वरए नमतिन मेंः सवाद याखेम्‍क्‍यो।
LUK 17:30 “मिँ मिन्‍सिउ उहुन्‍या छ्याम ब हिताव ज़ तारिज़्‍या।
LUK 17:31 है जैद जे हो बेलाक थालात लिज़्‍यावए ओधन सम्‍पती जोगोइन्‍याए जूँनी उझ़िमल तापसिक। हिताव ज़ एँःल लिज़्‍याव ब उझ़िमदा ओल्‍द ताबाक।
LUK 17:32 लोतए ओज्‍यालाई य़ाका दोच्‍यो।
LUK 17:33 है जैद जोए आव उजिउत ओललाई तान्‍या वाज़ खिम्‍ज़्याव, होए उजुनीलाई सम़ैज़्‍याव। फरी जोए आव जुनील उजिउए मया मादोव, होए उजुनीलाई बाँचैज़्‍याव।
LUK 17:34 ङा जेलाई है ङादाचिज़्‍या, हो बेलाक, रील तोबो तैंत स्‍याँद लिज़्‍यावनिलाई तोबोलाई लाँरिज़्‍याव, तोबोलाई ख्‍यानैरिज़्‍याव।
LUK 17:35 हिताव ज़ फरी राँथै हे·ज़्‍यावनिलाई तोबोलाई लाँरिज़्‍याव, तोबोलाई ख्‍यानैरिज़्‍याव।
LUK 17:36 [फरी एँःल य़ेन दाज़्‍यावनिलाई ब तोबोलाई लाँरिज़्‍याव, तोबोलाई ख्‍यानैरिज़्‍याव,”] है यादोक्‍यो।
LUK 17:37 नकिन उसिसराए, “प्रभु, निताव खा बेलाक, काङ्क ओतारिज़्‍याव?” है यादोक ते, येसुए, “किताव खरल ओताक वाज़ का गिद्दर हुज़्‍यार, हिताव ज़ तान्‍या ले,” है यादोक्‍यो।
LUK 18:1 तछा येसुए पोंखारिन्‍यात यार्च्‍या मासैःन्‍याए जूँनी अइ लिद घर्ती तोबो झाःद याएक्‍यो,
LUK 18:2 “तोबो सहरल परमेस्‍वरलाई रँःद ब माछे·ज़्‍याव, मिँरालाई ब उयुँ मानाज़्‍याव तोबो न्‍याधिस उलिज़्‍याव दी।
LUK 18:3 नो सहरल ज़ फरी तोबो राँदी मेंमा ब उलिज़्‍याव दी। नोए न्‍याधिसए ल्‍योक बाद, ‘तोबोए ङाउपर्त अन्‍याय दाद नैव। नो सखैद्याव ताके,’ लिद दिनकाव ज़ है ओदोनाज़्‍याव दी।
LUK 18:4 नो न्‍याधिसए जाँवा भरी घाइ ज़ मादोक्‍यो दी। छींनी ते उयुँल उयुँल, ‘ङा परमेस्‍वरलाई रँःद ब ङामाछे·ए, मिँरालाई ब ङायुँ मानाए।
LUK 18:5 खाली आव मेंमाए बनै ङार्च्‍या सैःद ओयाँवए आवलाई सखैद्याव ज़ ताके, म़ानी घरी पाला हुद ङार्च्‍या सैःद्यान्‍या ले,’ है लिके दी।”
LUK 18:6 प्रभुए नाः है दाद फरी ब है यादोक्‍यो, “जे नो अन्‍याय न्‍याधिसए है उलिज़्‍याव चेतैच्‍यो।
LUK 18:7 है जैद परमेस्‍वरए ओराछाँतिउरालाई धिलो मिताव ओरैंःदी ब लाकनी रील यापोंखारिज़्‍यावए कै जैद माराजोगोइवके?
LUK 18:8 साचो है ङादाचिज़्‍या, जुनी ब नोरालाई मामेंःद चाँदो ज़ सखैद्यान्‍या ले। हैदी ब ङा मिँ मिन्‍सिउ फरी ङाहुक आव मानुवात ङालाई यायुँ हुप्‍ज़्‍यावर ङामारादैहुरिज़्‍या ब?”
LUK 18:9 येसुए यानी धर्मी जैसिद ‘गे मिताव सु ज़ मालेर’ लिद स॰ज़्‍यावराए जूँनी घर्ती तोबो झाःद याएक्‍यो।
LUK 18:10 “ऩेब्‍लो मिँनी ध्‍यान झ़िमल पोंखारिना बाकिनी दी। नोनी तोबो फरिसी ओल्‍यो दी, तोबो सिर्मा स्‍यो·ज़्‍याव ओल्‍यो दी।
LUK 18:11 नो फरिसीए जाँ तँदा बैसिद, ‘अ परमेस्‍वर, ङा नँलाई धन्‍याबाद ङाचरैःनिज़्‍या। ङा छुतराए मिताव लुभी ब ङामाले, अन्‍याय ब ङामादोए, पातर्‍या ब ङामाजैसिए। ङा नकाव सिर्मा स्‍यो·ज़्‍याव मिँ स्‍यासो ब ङामाले।
LUK 18:12 साताकाव ऩेखेप ब ङाउपासिज़्‍या। ङास लिज़्‍याव भरिनी दस भानी तभा ब ङाईंज़्‍या,’ है लिद पोंखारिक्‍यो दी।
LUK 18:13 “नो सिर्मा स्‍यो·ज़्‍यावए ते जाँ तादाङ च्‍याँःसिद ओलाजए परमेस्‍वरए ल्‍योदा माभाल्‍सिधुद ओछाती तपे तपे, ‘अ परमेस्‍वर, ङा मिताव पापीलाई नयुँ ओनाक,’ लिद पोंखारिक्‍यो दी।
LUK 18:14 “ङा जेलाई है ङादाचिज़्‍या, नोनी ननी निपुलुसोत फरिसीकिन बुरू सिर्मा स्‍यो·ज़्‍याव ज़ परमेस्‍वरए ओङ़ाक धर्मी थ॰रिके। जो ओलनी सघ्‍योःसिज़्‍या, हो ज़िम्‍रिज़्‍या। फरी जो ओलनी सज़िम्‍सिज़्‍या, हो घ्योःरिज़्या।”
LUK 18:15 नकिन मिँराए ज़िम्‍ज़ा याज़ार ‘येसुए छाप्‍द असिक घरायोक’ लिद ओल्‍योक यारारैज़्‍याक उसिसराए नोरालाई सिङार्द यारावैंकेर।
LUK 18:16 येसुए निताव रँःद ल़ुज़ारालाई ओल्‍योदा खुल्‍द, “नो ज़िम्‍ज़ा ल़ुज़ारालाई तारावैंच्‍यो, ङाल्‍योदा हुव याराएचिके। परमेस्‍वरए ओराज्‍या नितावराए जूँनी ज़ लिज़्या।
LUK 18:17 ङा साचो है ङादाचिज़्‍या, जोर आव ल़ुज़ाराए माँःती परमेस्‍वरए ओराज्‍याल पसिन्‍या युँ मादोर, नोर खर्क ज़ पसिउ दैन्‍या मालेर,” है लिद उसिसरालाई है यादोक्‍यो।
LUK 18:18 हाःत ज़ तोबो यहूदीराए याघेप्‍पा हुद, “अ धर्मी गुर्बा, ङा अजम्‍बरी जुनी दैन्‍या किताव दान्‍या?” है ओदोक ते,
LUK 18:19 येसुए, “ङालाई काराव धर्मी है नदाँज़्‍याव? परमेस्‍वरकिन धर्मी सु ज़ माले।
LUK 18:20 धर्मसास्‍त्रलाव सर्सिउ दान्‍या मादान्‍या य़ेन नँ ज़ नसैंज़्‍याखेहो — अर्काए ओज्‍याए ल्‍योदा माबान्‍या, मिँ मासैःन्‍या, माकुन्‍या, धुत गोहाई मायान्‍या, बाबु आमाए ओमान नैद्यान्‍या,” है ओदोक ते,
LUK 18:21 नो याघेप्‍पाए, “आव भरी ते ज़िम्‍ज़ाकिन दाहुव ज़ ङानैज़्‍या,” है दोक्‍यो।
LUK 18:22 येसुए नो थैद, “अझ तोबो नमासयो·ताए। नँस लिज़्‍याव भरी यो·द काता ज़ माल्‍योरालाई भाःद याएकेदा, नँ स्‍वर्गताव धन दैन्‍या नले। नो य़ेन भरी दाद नँ ङाछींत हुन्‍के,” है दोक्‍यो।
LUK 18:23 नो पाँ थैद उयुँर स्‍यासे सतेक्‍यो, काराव ल्‍यो ताकिन नोए ओधन बनै कुधु ज़ उलिज़्‍याव।
LUK 18:24 येसुए नो ओबाज़्याव रँःद नक लिज़्यावरालाई, “धनी मिँ परमेस्‍वरए ओराज्‍याल पसिन्‍या बनै धो ताज़्‍या।
LUK 18:25 गपए उकुँल ऊँत उछिरिज़्‍यावकिन धनी मिँ परमेस्‍वरए ओराज्‍याल पसिन्‍या झन धो ताज़्‍या,” है ओरादोक ते,
LUK 18:26 नो पाँ थैज़्‍यावराए, “इताव ताकिन ते सुए ची अजम्‍बरी जुनी ओदैधुरिज़्‍याव?” है यादोक ते,
LUK 18:27 येसुए, “मिँर यानी सु ज़ माबाँचिधुर, खाली परमेस्‍वरनी मातान्‍या काता ज़ माले,” है यादोक्‍यो।
LUK 18:28 हाःत ज़ पत्रुसए, “गे ते प़ाइँ ख्‍यानैद नछींत हुद गेले,” है ओदोक ते,
LUK 18:29 येसुए प़ाइँलाई, “ङा साचो है ङादाचिज़्‍या, परमेस्‍वरए ओराज्‍याए जूँनी जोए उझ़िम, ओज्‍या ओज़ार, ओदाज्‍यु भाइर, ओबाबु ओआमार याऱास्‍ज़्‍याव,
LUK 18:30 होए आव उजिउत ज़ कुधु गुना दैज़्‍याव, फरिकाव जुनील अजम्‍बरी जुनी ब दैन्‍या ले,” है यादोक्‍यो।
LUK 18:31 नकिन येसुए बाह्र जना उसिसरालाई अछतङ लाँद, “गे यरूसलेमदा गेपुलुस्‍नाज़्‍या। नल ङा मिँ मिन्‍सिउए ङाजूँनी अगमबक्ताराए यासरो भरी यो·न्‍या ले।
LUK 18:32 है जैद ङालाई छुत जातलावराए याकुइत सूँपिद उल्‍ली गिल्‍ली दाद, बीज्‍यात जैद, त़िल्‍द,
LUK 18:33 यारीःनावत सैःन्‍या लेर। हैदी ब स़ोंलात सिउनी सैंसिद सोन्‍या ङाले,” है यादोक्‍यो।
LUK 18:34 खाली नो पाँए ओअर्थ भरी नोरालाई कप्‍सिउ मिताव ओतावए है ओरादोव भरी माबुझिधुकेर।
LUK 18:35 नकिन येसु यरीहो सहरल ओकेस्‍नाक नक उमी मारैंःव तोबो मिँ येम छ्योक च़ुसिद उऩिज़्‍याव।
LUK 18:36 नोए माहोल्‍यार याहुज़्‍याव थैद मिँरालाई, “आव काता याजैज़्‍याव?” है ओरादोक ते,
LUK 18:37 नोराए, “नासरतलाव येसु आलाव घ्याँ हुज़्‍या,” है यादोव प़ाइँना,
LUK 18:38 नो बनै चोइस क़िद, “अ दाऊदए ओथोलाव येसु, ङालाई नयुँ ओनाक,” है ल्‍यो ज़ उलिज़्‍याक,
LUK 18:39 नलावराए, “झ्याउँ तालिनी,” लिद सिङार्केर। खाली नो झन ज़ चोइस, “अ दाऊदए ओथोलाव, ङालाई नयुँ ओनाक,” है लिद क़िउ ज़ लिके।
LUK 18:40 येसु नक च्‍याँःसिद, “नोलाई आदा रैचिके,” है यादोक्‍यो। नोलाई यारैवत,
LUK 18:41 येसुए, “ङा नजूँनी काता दाद्यान्‍या?” है ओदोक ते, “प्रभु, ङा रँःधुन्या ङाताक,” है लिके।
LUK 18:42 हाःत ज़ येसुए, “रँःन्‍या तान्‍के, ङालाई नयुँ उहुबोए ज़ नगराँके,” है ओदोव प़ाइँना,
LUK 18:43 नो मिँ रँःधुन्या ताके। नोए फरी परमेस्‍वरलाई घ्‍योःव ज़ थ·रैद येसुए उछीं उछीं ज़ बाके। नकाव लिज़्‍यावराए मनी निताव रँःद परमेस्‍वरए ल्‍योदा बनै खुसी ताद उमिन सघ्‍योःदिकेर।
LUK 19:1 येसु यरीहो सहरल पसिद नलाव घ्याँ ओबाज़्‍याक,
LUK 19:2 नल तोबो जखायस यादोज़्‍याव सिर्मा स्‍यो·ज़्‍याव मुख्‍या उलिज़्‍याव। नो मिँ बनै धनी ब उलिज़्‍याव।
LUK 19:3 नोए नो हुज़्‍याव येसुलाई चिऊन्‍या ओपैंज़्‍याव। खाली बनै तेंक्‍यासो ओतावए माहोल्‍याराए खार्नी मारँःधुक्‍यो।
LUK 19:4 है जैद येसु ओबान्‍या येमदा ङ़ादा ज़ धोंःनाद येसुलाई चिऊन्‍याए जूँनी तोबो सींत पुलुस्‍के।
LUK 19:5 येसु नक ओकेसोत जखायस उलिज़्‍याव सींदा भाल्‍सिद, “अ जखायस, चाँदो झरिन्‍के। आछिम नझ़िमक ङाबासिरिज़्‍या,” है ओदोव प़ाइँना,
LUK 19:6 लाला लुलु झरिद बनै रेंए रेंए येसुलाई उझ़िमक लाँक्‍यो।
LUK 19:7 नलाव मिँराए निताव रँःद रूम्‍रूमैद, “कै जैद निताव पापीए ल्‍योक बासिउ ओपैंज़्‍याव ओताव?” है लिकेर।
LUK 19:8 जखायस ते येसुए ओङ़ाक च्‍याँःसिद, “अ प्रभु, ङास लिज़्‍याव भरी ऩेभा जैद तभा भरी माथैंव मायो·वरालाई ङाराएरिज़्‍या। हो वाज़ माःक, छुतरालाई हाइद ङाराज़्‍युव भरी चार दोबोर सोवोल्‍द ङाराएरिज़्‍या,” है ओदोक ते,
LUK 19:9 येसुए, “आव मिँ आछिमकिन उझ़िमलावरास परमेस्‍वरए ल्‍योदा बान्‍या येम ब दैक्‍यो, अब्राहामए साचो ओज़ाल ब गनिसिके।
LUK 19:10 ङा मिँ मिन्‍सिउ इताव म़ाव ङोइवरालाई खिम्‍द बाँचैना ङाहुव ज़।”
LUK 19:11 नलाव मिँराए नो पाँ याथैज़्‍याक येसु यरूसलेमल ओकेस्‍नावए नोराए ‘परमेस्‍वरए ओराज्‍या आव मानुवात बेहार ज़ ओरैरिज़्‍याव सा’ है यालिज़्‍याव। नोराए यापाँ सदाँद्यान्‍याए जूँनी येसुए घर्ती तोबो झाःद याएक्‍यो।
LUK 19:12 “तोबो राजाए ओथोलाव मिँ ओल उलिज़्‍याव पोङाव राज्‍या चलैन्‍याए जूँनी तादाङ राजाए ल्‍योक ओहक च़ानाक्‍यो दी।
LUK 19:13 ओमाबाद ङ़ादा दस जना ओय़ेन दाज़्‍यावरालाई खुल्‍द नोरालाई त़ोतोला त़ोतोला सुन याद, ‘ङा ङामाहुवा पै आव खेलैसिच्‍यो,’ है दाद याख्‍यानैक्‍यो दी।
LUK 19:14 खाली नलाव ख्‍वा ख्‍वा मिँराए नो राजा खलकलाव मिँलाई यासोवए, ‘आवलाई गेङ़ैताव जैद तायासियो,’ लिद राजाए ल्‍योदा मिँर यारापरींकेर दी।
LUK 19:15 “छींनी नो ओहक भरी दैद उहुवत नो ङ़ादाङाव सुन ओरायो ओय़ेन दाज़्‍यावराए ‘कै जैर्‍या’ लिद याखुल्‍क्‍यो दी।
LUK 19:16 उस॰कताव हुवए, ‘प्रभु, ङालाई नयाँव सुन खेलैसिद ओयाःत दस तोला हाइद ङानै,’ है ओदोक ते,
LUK 19:17 ओघरपतीए, ‘स्‍याबास, नँ चाव य़ेन दाज़्‍याव। तकेज़ालाई ब सतस नदोवए ङाराज्‍यालाव दस गोता सहरराए याङ़ैताव ङाजैनिरिज़्‍या,’ है दोक्‍यो दी।
LUK 19:18 फरी नोए उछींताव हुवए, ‘प्रभु, नयाँव सुन खेलैसिद ओयाःत पाँच तोला हाइद ङानै,’ है ओदोक ते,
LUK 19:19 ओघरपतीए, ‘नँलाई ब पाँच गोता सहरराए याङ़ैताव ङाजैनिरिज़्‍या,’ है दोक्‍यो दी।
LUK 19:20 “फरी नोए उछींताव हुद, ‘प्रभु, नयाँव सुन हिताव ज़ लिज़्‍या। रूमालल ज़ पो·द ङानै।
LUK 19:21 नँ ते नमाझाःव ब नसिम्‍ज़्‍या, नमानैव ब नलाँज़्‍या। है जैद निताव कर्रा नतावए नँलाई रँःद ङाछे·के,’ है ओदोक ते,
LUK 19:22 ओघरपतीए नोलाई, ‘नँ कान्‍ल ज़ काम मालागिउ ङाबाँदा, नँलाई नपाँनी ज़ ङाफाल्‍निरिज़्‍या। ङालाई ‘ओमाझाःव ब सिम्‍ज़्‍याव, ओमानैव ब लाँज़्‍याव, नाः कर्रा लिज़्‍या’ लिन्‍या नसैंव ताकिन,
LUK 19:23 काराव नो सुन ब्याङ्कल नमाझाःव? नल नझाःव ताकिन ङाहुवत ओब्‍याजस दैन्‍या ङाल्‍यो,’ है दाद,
LUK 19:24 नक च्‍याँःसिद लिज़्‍यावरालाई, ‘आवलाई नो सुन नैंद दस तोला ल्‍योलाई एचिके,’ है ओरादोक ते,
LUK 19:25 नोराए, ‘प्रभु, ओलस ज़ दस तोला लिज़्‍या सानी,’ है यादोक ते,
LUK 19:26 नो राजाए, ‘ङा जेलाई साचो है ङादाचिज़्‍या, जोए ओदैवलाई चावस चलैज़्याव, होए फरी ब दैरिज़्‍याव। जोए ओदैवलाई चावस माचलैव, होस छ्या छ्या लिज़्‍याव ब नैंसिरिज़्‍या।
LUK 19:27 फरी नो ङालाई याङ़ैताव तान्‍या माभैंःज़्‍याव ङासुतुररालाई आल रैद ङाङ़ाक ज़ याराखेम्‍चिके,’ है यादोक्‍यो दी।”
LUK 19:28 येसुए नो घर्तीलाव पाँर तुपैद ननी पुलुस्‍द यरूसलेमदा पुलुस्‍नाके।
LUK 19:29 नकिन जैतून दाँदा यादोज़्‍यावए उखँकाव बेथफागे स़ोनो बेथानिया नाखार जीदा ओकेस्‍नाक ऩेब्‍लो उसिसनिलाई अइ लिद ङ़ादा निपरींक्‍यो,
LUK 19:30 “जिन आव गेङ़ाकाव नाखारल बाचिन्‍केदा। नल तोबो सुए ज़ यामाचेप्‍ताव बछेरा सुर्सिउ दैन्‍या जिन्‍ले। नोलाई पला·द रैचिन्‍के।
LUK 19:31 सुवाराए, ‘काराव जिन्‍पला·ज़्‍याव?’ है यादाचिन्‍किन, ‘गिनप्रभुलाई चाहिज़्‍या,’ है यारादोचिन,” है लिद निपरींक्‍यो।
LUK 19:32 नोनी बाद है उनिदोव मिताव ज़ बछेरालाई दैकिनी।
LUK 19:33 नोलाई निपला·ज़्‍याक बछेराए ओर्गेर हुद, “काराव जिन्‍पला·ज़्‍याव?” है यारादोक ते,
LUK 19:34 “गिनप्रभुलाई चाहिज़्‍या,” है यारादोकिनी।
LUK 19:35 नोनी नो बछेरालाई येसुए ल्‍योक रैद, बछेराए ओतर्त याक्‍वार झाःद येसुलाई चेपो परींकेर।
LUK 19:36 येमत ओबाज़्‍याक मिँराए याक्‍वार येमल तैंदिकेर।
LUK 19:37 जैतून दाँदातिन सहरदा उझरिनावत नो माहोल्‍यार येसुए ओपाँत बाज़्‍याव भरिए अचम्‍ब अचम्‍बलाव ओय़ेनर यारँःवनी परमेस्‍वरए ल्‍योदा बनै रेंए रेंए अइ लिद याक़िज़्‍याव —
LUK 19:38 “परमेस्‍वरए उमिनत हुव राजा धन्‍याकाव ओताक, परमेस्‍वरए उयुँ ब होलाँ ओताक, स्‍वर्गतावर ब ओरेंरक।”
LUK 19:39 नोराए खार्नी ख्‍वा फरिसीराए नो पाँ थैद येसुलाई, “गुर्बा, नसिसरालाई च़िम दाव यापरींके,” है यादोक ते,
LUK 19:40 येसुए, “ङा साचो है ङादाचिज़्‍या, नोराए च़िम यादोकिन लुँर ब क़िन्‍या लेर,” है यादोक्‍यो।
LUK 19:41 येसु सहर छ्योक ओकेस्‍नाक सहरलाई रँःद उप़िलर ऱास्‍द अइ लिके,
LUK 19:42 “ए यरूसलेमलाव लिज़्‍यावर, जे आछिमकाव जेल्‍योक हुव परमेस्‍वरस खैन्‍या, युँ होलाँ दाव पाँर जेथ·रैव ताकिन तान्‍या ओल्‍यो। अब ते नो जेमारँःधुइ।
LUK 19:43 जेलाई छींनी तछा जेसुतुरर हुद गरर जैद प़ाइँनी घिरिचिरिज़्‍यार।
LUK 19:44 परमेस्‍वर जेल्‍योक उहुव जेमाथ·रैधुवए जेसुतुरराए जेसहरलाई तैःद लुँए तर्त लुँ ब नैन्‍या मालेर। जेलाई स़ोनो जेज़ारालाई ब पछारिद यारासैःरिज़्‍यार।”
LUK 19:45 नकिन येसु यरूसलेमलाव ध्‍यान झ़िमल बाद नलाव पसल्‍यारालाई पले·द,
LUK 19:46 नोरालाई, “धर्मसास्‍त्रल परमेस्‍वरए ओपाँ अइ लिद सर्सिउ लिज़्‍या, ‘ङा ङाझ़िम पोंखारिन्‍या झ़िम जैसिउ लिज़्‍या।’ जे ते झन चोरराए पुप मिताव जैद जेनै,” है यादोक्‍यो।
LUK 19:47 नकिन येसुए नो ध्‍यान झ़िमल दिनकाव ज़ परमेस्‍वरए ओपाँ ओरासथैज़्‍याव। खाली नलाव मुख्‍या पुजारीर, सास्‍त्रीर स़ोनो नलाव स़ेर स़ेरर झन येसुलाई सैःन्‍याए जूँनी यापाँसिज़्‍याव।
LUK 19:48 हितावत ब मिँ भरिए येसुए ओपाँ थैद घेप्‍पा यारँःवए सैःन्‍या येम मादैकेर।
LUK 20:1 हाः बेलाक तछा यरूसलेमलाव ध्‍यान झ़िमल येसुए चाव था ओरासथैज़्‍याक नलाव मुख्‍या पुजारीर, सास्‍त्रीर स़ोनो यहूदीराए यास़ेरर ओल्‍योक हुद,
LUK 20:2 “गेलाई है दासिके, आव नदोज़्‍याव य़ेनर नँलाई सुए है उदींव, सुए हक उईंव?” है यादोक ते,
LUK 20:3 येसुए, “ङा ब जेलाई तोबो है ङादाचिज़्या, नो पाँ है दाँचिके।
LUK 20:4 ऱील सछैंज़्‍याव यूहन्‍नाए ओय़ेन परमेस्‍वरए ल्‍योनी ओताव सैं मिँराए ल्‍योनी ओताव?” है ओरादोक ते,
LUK 20:5 या याल, “ ‘परमेस्‍वरए ल्‍योनी ओताव’ है गेद्या गेलिकिन, ‘हुकी काराव यूहन्‍नाए ओपाँ जेमाभैंःव?’ है दान्‍या ले।
LUK 20:6 फरी ‘मिँनी’ है गेद्या गेलिकिन, मिँ भरिए यूहन्‍नालाई अगमबक्ता ज़ याथ·रैवए गेलाई झेःद सैःन्‍या ओछ्यास ब लिज़्‍या,” है लिकेर।
LUK 20:7 है जैद नोराए येसुलाई, “यूहन्‍नाए ओय़ेन कान्‍नी ओताव गेमासैंए,” है यादोक ते,
LUK 20:8 येसुए, “हो ची ताकिन्दा ङालाई आव य़ेन दान्‍या हक सुए ओयाँव ङा ब है ङामादाच्‍यो,” है यादोक्‍यो।
LUK 20:9 नकिन नलाव मिँरालाई घर्ती तोबो झाःद अइ लिद यासथैक्‍यो, “तोबो मिँए ओएँः भरिल जोम्‍परसै झाःद मिँरालाई अधियाल याद, ओल जाँवा पै तोबो तादा देसङ लिनाके दी।
LUK 20:10 नो जोम्‍परसै किन्‍या बेलाक तोबो ओनोकोरलाई उजुँ च़ानाव परींक्‍यो। खाली नो अधिया कमैज़्‍यावराए झन नोलाई प़ोद रितो ज़ खेपैकेर दी।
LUK 20:11 फरी छींनी छुत ओनोकोरलाई उपरींक नोलाई ब प़ोद बीज्‍यात जैद रितो ज़ खेपैकेर दी।
LUK 20:12 छींनी फरी ब तोबोलाई उपरींक हिताव ज़ नोलाई ब प़ोद लल्‍यातोरो जैद ख्‍याकेर दी।
LUK 20:13 “नकिन छींनी नो एँःए ओर्गेए, ‘कै जैन्‍या ओताव? ङायुँलाव ङाज़ालाई ज़ परींव ताके। नोलाई ताकिन ओमान नैदिर सैं’ लिद नो ओज़ालाई परींक्‍यो दी।
LUK 20:14 खाली नो ओज़ा उहुज़्‍याव रँःद नो अधिया कमैज़्‍यावर झन या या पाँसिद, ‘आव ते एँः दैन्‍या मिँ ची, आवलाई गेसैःकिन आव एँः गेमीं ज़ तान्या ले,’ लिद,
LUK 20:15 नो मिँलाई एँःनी पाखाङ लाँद सैःकेर दी।” नकिन येसुए, “नो एँःए ओर्गेए अधिया कमैज़्‍यावरालाई कै याजैवके लिक ते,
LUK 20:16 नोर प़ाइँलाई ज़ सैःद नो एँः छुतरालाई अधियाल यान्‍या ले,” है ओरादोक ते, नो पाँ थैज़्‍यावराए यायुँ कैद, “निताव ते खर्क ज़ ताताक,” है लिकेर।
LUK 20:17 नकिन येसुए, “हिताव ताकिन आव धर्मसास्‍त्रलाव पाँए ओअर्थ किताव जेङम्‍सिज़्‍या? ‘भुलीराए कान्‍ल ज़ माज़्‍यासे लिद याख्‍याव लुँ नो ज़ झन भुयाँरलाव लुँ ताके।’
LUK 20:18 नो लुँत पाज़्याव भरी कुतु कुतु ज़ तान्‍या लेर। नो लुँ फरी यातर्त उहुकिन झन नप नप ज़ तान्‍या लेर।”
LUK 20:19 नाःत ज़ सास्‍त्रीर स़ोनो मुख्‍या पुजारीराए ‘आव घर्ती ते गेङ़ैत ज़ झाःद्यासिक्‍यो’ लिन्‍या सैंद येसुलाई हो प़ाइँना ज़ क्‍योःव पैंकेर। खाली मिँर रँःद छे·केर।
LUK 20:20 है जैद नोराए, ‘आवलाई ओपाँ क्‍योःद्याद हाकिमए उकुइत सूँपिउ ताके’ लिद मौका चिऊद, यासकावर ऩेबरेंवा येसुस खैव मिताव जैसिउ परींद येसुए ओय़ेन साँना यारापरींकेर।
LUK 20:21 नो साँना बावराए येसुलाई, “गुर्बा, नँ गेस नपाँज़्याव भरी साचो वाज़ लिज़्‍या। परमेस्‍वरए ल्‍योदा बान्‍या येम नपैसिक ब मिँ रँःद नमादोए, सोजोनी ज़ नदोज़्‍या।
LUK 20:22 है जैद गेलाई है दाव ताके, माहाराजालाई गे सिर्मा यान्‍या सैं मायान्‍या?” है यादोक ते,
LUK 20:23 येसुए नोराए याचाल सैंद,
LUK 20:24 “तोबो पैसा सतैंचिसाँकी। नत सुए उसुरूप, सुए उमिन उलिज़्‍याव?” है ओरादोक ते, “माहाराजाए उमीं ज़,” है दोकेर।
LUK 20:25 “हो ची ताकिन्‍दा माहाराजाए उमीं भरी माहाराजालाई ज़ एच्‍यो, परमेस्‍वरए उमीं भरी परमेस्‍वरलाई ज़ एच्‍यो,” है यादोक्‍यो।
LUK 20:26 है जैद नोराए मिँराए ङ़ाक येसुए ओपाँ क्‍योःव मादैद, झन अचम्‍ब ताद च़िम दाद लिकेर।
LUK 20:27 नकिन सदुकीराए ब येसुलाई पजैना हुकेर। सदुकी है यारादोज़्‍यावराए ‘सिउकिन सैंसिन्‍या माताए’ है यालिज़्‍याव।
LUK 20:28 है जैद नोर हुद, “गुर्बा, मोसाए ओकानुनल इताव सर्सिउ लिज़्‍या, ‘तोबोए ज्‍या दाद ज़ार मादैद उसिकिन, ओभाइए ओदाज्‍युए ओथोर माफ्या·न्‍याए जूँनी ओमारूमलाई ओरैवक।’
LUK 20:29 है जैद तोबोए ओज़ार सात भाइ याल्‍यो। यादाज्युए ज्‍या दाद ज़ार मादैद ज़ सिके।
LUK 20:30 होए उधूँलावए ओमारूमलाई रैद, नो ब ज़ार मादैद ज़ सिके।
LUK 20:31 नकिन साइँला मनी हिताव ज़ ताके। नितावनी ज़ सात भाइ भरिए ज़ नोलाई रैद ज़ार मादैद ज़ सिकेर।
LUK 20:32 प़ाइँरानी छींनी नो मेंमा ब सिके।
LUK 20:33 है जैद नो मेंमा सात भाइए याज्‍या ओतावए अजम्‍बरी जुनील काताकावए याज्‍या तान्‍या?” है लिकेर।
LUK 20:34 हाःत ज़ येसुए, “आव मानुवाताव मिँराए ज्‍या ब दोज़्‍यार, रे ब दोज़्‍यार।
LUK 20:35 अजम्‍बरी जुनी दैन्‍या तावराए ते स्‍वर्गत ज्‍या ब मादोर, रे ब मादोर।
LUK 20:36 नोर सिउनी यासैंसिउत परमेस्‍वरए ओज़ार ताद ओचाकर्‍या स्‍यासोर यातावए फरी खर्क ज़ सिन्‍या मालेर।
LUK 20:37 है जैद सिउकिन सैंसिन्‍या ओताज़्याव सैं ओमाताज़्याव मोसाए ओसरोनी ब सैंच्‍यो। नोए झोपोरा ओचाँःज़्‍यावनी परमेस्‍वरए ओर्गा थैद अइ लिद सर्क्‍यो, ‘ङा अब्राहामए ओपरमेस्‍वर, इसहाकए ओपरमेस्‍वर स़ोनो याकूबए ओपरमेस्‍वर ज़।’
LUK 20:38 ओल ते मोरोराए यापरमेस्‍वर माःक, जींदोराए यापरमेस्‍वर ची। है जैद ओलस लिज़्‍याव भरी जींदो ज़ ताज़्‍यार।”
LUK 20:39 नो पाँ थैद नलाव सास्‍त्रीराए येसुलाई, “थिक ज़ है नरादोके, गुर्बा,” है दोकेर।
LUK 20:40 हाःकिन सुए ज़ येसुस पाँन्‍या आँत मादोकेर।
LUK 20:41 नकिन येसुए है यादोक्‍यो, “मिँराए कै जैद ख्रीसलाई दाऊदए ओथोलाव है यादोज़्‍याव?
LUK 20:42 ओल दाऊदए ज़ ख्रीसए उजूँनी भजन पोस्‍तोकोल अइ लिद सर्द नैव, ‘परमेस्‍वरए ङाप्रभुलाई, ‘नसुतुररालाई नखँ धूँल झाःद ङामाईंवा पै, ङावोर्दा च़ुसिद लिन्‍के,’ है दोक्‍यो।’
LUK 20:44 है जैद ओल दाऊदए मनी ख्रीसलाई ‘ङाप्रभु ज़’ है ओदोकिन नो कै जैद ओल ओथोलाव ओताज़्‍याव?” है यादोक्‍यो।
LUK 20:45 मिँ भरिए येसुए ओपाँ याथैज़्‍याक उसिसरालाई,
LUK 20:46 “जे ते सास्‍त्रीराए यादोज़्‍याव मिताव य़ेन दान्‍या माःक। नोर रेरे बेन्बेनो क्‍वा क्‍वाइसिद ‘प़ाइँए धो घदासिरक’ लिद बजार जीदा दुलिरिज़्‍यार, स़ोनो धर्मसास्‍त्र झ़िमराल, घ्योःव घ्योःव भत्‍यारल प़ाइँए रँःन्‍याक ओमान ल्‍यो पोल वाज़ च़ुसिउ पैंज़्‍यार।
LUK 20:47 नो सास्‍त्रीराए झन राँदी मेंमारालाई तँनी छाम छुम याराख्‍याज़्‍यार, मिँराए ङ़ाक वाज़ बनै चाव चाव पोंखारिउ जैसिज़्‍यार। नोराए ते प़ाइँरानी घ्‍योःव सजा ज़ दैरिज़्‍यार,” है लिद यासथैक्‍यो।
LUK 21:1 नकिन येसुए यरूसलेमलाव ध्‍यान झ़िमल धनी धनीराए परमेस्‍वरलाई भिती याचरैःज़्‍याव ओराचिऊज़्‍याक,
LUK 21:2 तोबो काता ज़ माल्‍यो राँदी मेंमाए ऩेब्‍लो पैसा ओचरैःज़्‍याव रँःक्‍यो।
LUK 21:3 नो रँःद येसुए नलावरालाई, “ङा साचो ज़ है ङादाचिज़्‍या, आव काता ज़ माल्‍यो राँदी मेंमाए छुतराकिन कुधु चरैःक्‍यो।
LUK 21:4 धनीराए ते यासय़ेलोनी वाज़ चरैःकेर। नो राँदी मेंमाए ते ओललाई ओमाथैंज़्यावत ब ओलस लिज़्‍याव भरी प़ाइँ ज़ चरैःक्‍यो,” है यादोक्‍यो।
LUK 21:5 ध्‍यान झ़िमनी पुलुस्‍द याबाज़्‍याक ख्‍वा ख्‍वा मिँराए, ‘आव ध्‍यान झ़िमलाव लुँर काता आः चावर, काता आः चावराए सिङारैद यानैज़्‍याव’ है लिद या या यापाँज़्‍याव येसुए थैद,
LUK 21:6 “आव जेरँःज़्‍याव भरी तछा तैःद लुँए तर्त लुँ ब रहिन्‍या माले,” है ओरादोक ते,
LUK 21:7 नोराए, “गुर्बा, आव नपाँ भरी खर्क ओतारिज़्‍याव? नोर तान्‍या सरेस किताव ओतारिज़्‍याव?” है यादोक ते,
LUK 21:8 येसुए, “जे जोगोइसिद लिच्‍यो, म़ानी सुवाराए झुकैचिर्‍या। ङा ङामिन कुद ‘ख्रीस ङा ज़’ है लिज़्‍यावर स़ोनो ‘बेला हुके’ है लिज़्‍यावर कुधु ज़ हुन्‍या लेर। जे नोराए पाँत ताबाच्‍यो।
LUK 21:9 फरी ‘आङ लरैं ताज़्‍या, होङ लरैं ताज़्‍या’ लिन्‍या जेथैक जे ताछे·च्‍यो। नो भरी ङ़ादा ताव परिए, खाली नो खेम्‍न्‍या बेला माःक।
LUK 21:10 “नोकिन ङ़ादा जात जात, राज्‍या राज्‍या लरैं दान्‍या लेर।
LUK 21:11 घ्‍योःव घ्‍योःव भोंचालोर हुद, पो पोङ अनिकालर स़ोनो ऩुल्‍पा ऩुल्‍मार ताद, नमत ब बनै छे छे ङम्‍सिउ सरेसर तान्‍या लेर।
LUK 21:12 “खाली आव भरी ओमाताद ज़ ङाजूँनी जेखिरी पसिद क्‍योःद झ्यालखानाल झाःचिरिज़्यार। कचरील लाँद हाकिमर स़ोनो राजाराए ङ़ाक सच्‍याँचिरिज़्‍यार।
LUK 21:13 आव भरिनी जे नोरालाई ङासाची यान्‍या जेले।
LUK 21:14 नो बेलाक जेक्‍याँलाई जोगोइन्‍याए जूँनी ‘ङा कै लिन्‍या, काता पाँन्‍या ओताव?’ लिद जेयुँ आँचा पाँचा ताजैच्‍यो।
LUK 21:15 ङा ज़ जेलाई नो जेखिरी पसिज़्‍यावराए मापल्‍तैधुन्‍या पाँर स़ोनो बुद्धीर यान्‍या ङाले।
LUK 21:16 हैदी ब जे ख्‍वारालाई जेबाबु जेआमाराए, जेदाज्‍यु भाइराए, जेरला मेलाराए स़ोनो जेनैं मेंराए ब जेलाई सैःन्‍याए जूँनी सूँपिन्‍या लेर।
LUK 21:17 जे ङामिनतावर जेतावए जेलाई प़ाइँए सोन्‍या लेर।
LUK 21:18 हैदी ब तोबो जेचेम ब जेङ़ैतिन गलिन्‍या माले।
LUK 21:19 ङामिनत थ॰रिद जेलिज़्‍यावए साचो जुनी दैन्‍या जेले।”
LUK 21:20 “यरूसलेम सहर ओखेम्‍रिज़्‍याव बेला आव सरेसनी ज़ सैंच्‍यो। तछा आव यरूसलेमस लरैं दाना हुव फौजीराए घिरिरिज़्‍यार।
LUK 21:21 हो बेलाक यहूदियाल लिज़्‍यावर गों जीदा ओधोंःरक। सहरल लिज़्‍यावर ब पुलुस्‍द ओधोंःरक। फरी नाखारल लिज़्‍यावर यरूसलेमल ताबारक।
LUK 21:22 नो बेला नो धर्मसास्‍त्रलाव सर्सिउ मिताव परमेस्‍वरए ओराएरिज़्‍याव सजा ओसयो·ज़्‍याव बेला ज़।
LUK 21:23 नो बेलाक याफूल याज़ा ल्‍योर स़ोनो नुइँ सवैज़्‍याव आमार युँ नावज़ार। आव देसलाव मिँरालाई बनै छे छे ङम्‍सिउ धो सहिउ परमेस्‍वरए ओसजा हुरिज़्‍या।
LUK 21:24 कुधुलाई तरवालीराए याराफूइँरिज़्‍यार। कुधुलाई कैत जैद देस देसदा यारालाँरिज़्‍यार। छुत जातलाव मिँराए याबेला ओमायो·वा पै यरूसलेमलाई छिल्‍द नैन्‍या लेर।”
LUK 21:25 “नकिन निमीत, स़्यावैत, सोरोरात मनी सरेसर रैंःन्‍या लेर। आव नामल फरी समुन्‍द्रलाव ऱीर बनै छल्‍किद नम मिताव यागर्जिक मानुवाताव मिँर यायुँ आँचा पाँचा ताद बनै छे·न्‍या लेर।
LUK 21:26 नमतावर यासतर म़ाद याथोनो·सिज़्‍याव रँःद ‘आव मानुवा कै तान्‍या ओताव’ लिद मिँर याछ्याचेए मुर्छा परिन्‍या लेर।
LUK 21:27 हाःत ज़ मिँ मिन्‍सिउलाई बनै ज़गै मगैव ओसक्तीरास बादल जींल उहुज़्‍याव रँःन्‍या लेर।
LUK 21:28 है जैद जे ते इतावर ओतानाज़्‍याव जेरँःक, ‘परमेस्‍वरए गेलाई उस्‍कैन्‍या बेला हुके’ लिद जेयुँर सझेंःद रेंचिके,” है यादोक्‍यो।
LUK 21:29 नकिन तोबो घर्ती झाःद याएक्‍यो, “नेभारा सीं तादी ब, जो सीं तादी ब,
LUK 21:30 नोर यामोम्‍नाक ‘उभ्‍याली उहुव ची ओल्‍यो’ लिन्‍या जेसैंज़्‍या।
LUK 21:31 हिताव ज़ आव है ङादाचिउ पाँ भरी ओतानाज़्याव जेरँःक ‘परमेस्‍वरए ओराज्‍या उहुनाव ची ओल्‍यो’ लिन्‍या सैंच्‍यो।
LUK 21:32 ङा जेलाई साचो है ङादाचिज़्‍या, आव भरी ओमातावा पै आव जुक खेम्‍न्‍या माले।
LUK 21:33 आव नाम नम ते खेम्‍न्‍या ले, खाली ङा ङापाँ ते खर्क ज़ म़ान्‍या माले।”
LUK 21:34 “है जैद जे ते जेमन लागिउ य़ेनर दाद मँःए मँःए बाऱिन्‍या, स़ोनो ‘आव ङाजिउत कै तान्‍या ओताव?’ लिद व़ीनी फुइ लिन्‍या, निताव य़ेनरानी जोगोइसिद लिच्‍यो, म़ानी हो छ्याम झिबलाल परिउ मिताव जेताया।
LUK 21:35 हो छ्याम परमेस्‍वरए ओसजा आव मानुवाताव मिँ भरिराए याक्‍याँत तछ्योनी ज़ हुरिज़्‍या।
LUK 21:36 है जैद जे निताव छे छे ङम्‍सिउ सजारानी पुलुस्‍द मिँ मिन्‍सिउए ओङ़ाक माछे·द ज़ थ॰रिन्‍याए जूँनी अल्‍सैं मादाद पोंखारिउ ज़ नैच्‍यो।”
LUK 21:37 येसुए दिनकाव ज़ लाक लाक यरूसलेमलाव ध्‍यान झ़िमल परमेस्‍वरए ओपाँ ओरासथैज़्‍याव। ऱिमक ऱिमक ननी पुलुस्‍द जैतून दाँदा जीदा ओबासिनाज़्‍याव।
LUK 21:38 है जैद मिँर ओपाँ थैन्‍याए जूँनी छकाल्‍न्‍या घग ध्‍यान झ़िमल याहुज़्‍याव।
LUK 22:1 निस्‍तार यादोज़्‍याव माँदा भरेस ज़्‍यान्‍या पर्ब हुनाद उलिज़्‍याव।
LUK 22:2 नो बेलाक ज़ मुख्‍या पुजारीर स़ोनो सास्‍त्रीराए ‘येसुलाई कै जैद सैःन्‍या ओताव?’ लिद बुद्धी याकलैज़्‍याव। ‘मिँराए ङ़ाक सैःकिन मिँर मचिर्‍या’ लिद याछे·ज़्‍याव।
LUK 22:3 हाःत ज़ सैतान नो बाह्र जना उसिसरासकाव यहूदा इस्‍करियोतए ओक्‍याँत पसिके।
LUK 22:4 है जैद नो ननी पुलुस्‍द मुख्‍या पुजारीर स़ोनो ध्‍यान झ़िमलाव पुलिसराए ल्‍योक बाद ‘येसुलाई इतावनी जेकुइत जैद ङायाचिरिज़्‍या’ लिद पाँसिकेर।
LUK 22:5 नोर बनै रेंद नोलाई पैसा यान्‍या जैकेर।
LUK 22:6 इस्‍करियोत ब उचित बुझिद हाःकिन मिँर यामाल्‍यो बेलाक क्‍योःन्‍या मौका उखिम्‍ज़्‍याव।
LUK 22:7 हाःत ज़ नो माँदा भरेस ज़्‍यान्‍या पर्ब सुरू ओतावत पाथा पल्‍न्‍या छ्याम ताके।
LUK 22:8 है जैद येसुए पत्रुस स़ोनो यूहन्‍नानिलाई अइ लिद निपरींक्‍यो, “गे आव पर्ब मानिन्‍याए जूँनी जिन ज़्‍यावर जैनाचिन्‍के,” है उनिदोक ते,
LUK 22:9 “नँ कै नलिज़्या, गिन काङ्ङ बाद जैनान्‍या?” है दोकिनी।
LUK 22:10 येसुए फरी, “जिन सहरल जिन्‍पसिउ प़ाइँना तोबो ऱी गप्‍द ओघागरी छींद बाज़्‍याव मिँ दैन्‍या जिन्‍ले। नोए उछीं उछीं बाद उपसिज़्‍याव झ़िमक ज़ बाचिन।
LUK 22:11 नक बाद नो झ़िमए ओर्गेलाई है दोचिन, ‘नँलाई गेगुर्बाए है दींज़्‍याव, पाहुना लिन्‍या कुन्‍ती काङ्क उलिज़्‍याव? आव पर्ब उसिसरास नल ज़ मानिरिज़्‍याव दी,’ है दोचिन।
LUK 22:12 है जिन्‍दोव प़ाइँना नोए ओतर्ताव तालल तोबो घेप्‍पा कुन्‍ती चावस सजैसिउ जिनलाई सतैंद्यान्‍या ले। गेज़्‍याव भरी नल ज़ जैचिन,” है दाद निपरींक्‍यो।
LUK 22:13 है जैद नोनी बाद है उनिदोव मिताव ज़ दैद, पर्बताव ज़्‍याव भरी जैकिनी।
LUK 22:14 मानिन्‍या बेला ओतावत येसु ओसाचीरास नो कुन्‍तील दुप्‍सिद ज़्‍यावर ज़्‍यान्‍याए जूँनी याच़ुसिउत,
LUK 22:15 येसुए, “आव पर्ब ङाक्‍याँत हुरिज़्‍याव दुखर ओमाताद ज़ जेस मानिउ ङापैंज़्‍याव।
LUK 22:16 ङा जेलाई है ङादाचिज़्‍या, परमेस्‍वरए ओभत्‍यारल उमिनतावर यामादुप्‍सिवा पै ङा जेस फरी सिप ज़्‍यान्‍या ङामाले,” है यादोक्‍यो।
LUK 22:17 नकिन येसुए खुरी उकुइत रैद धन्‍याबाद चरैःद उसिसरालाई याद, “हाँ, आव भाःचिके।
LUK 22:18 ङा जेलाई है ङादाचिज़्‍या, परमेस्‍वरए ओराज्‍या ओमाहुवा पै दाखमद्य फरी ओन्‍या ङामाले,” है यादोक्‍यो।
LUK 22:19 नकिन येसुए उकुइत भरेस तोबो रैद, धन्‍याबाद चरैःद, नो भरेस केःद उसिसरालाई अइ लिद भाःद याएक्‍यो, “आव भरेस जेजूँनी झाःद ङायाचिरिज़्‍याव ङाक्‍याँ ज़। आकिनी ङालाई मामेंःन्‍याए जूँनी आव भत्‍यार दाव य़ेन ज़ दोच्‍यो,” है यादोक्‍यो।
LUK 22:20 हिताव ज़ फरी नो भरेस याज़्‍युवत येसुए खुरी उकुइत रैद, “आव जेजूँनी ङासोभोरिज़्‍याव ङाझी ज़। आनी ज़ परमेस्‍वरए जेस साःरो बाचा नैद्याचिरिज़्‍याव।
LUK 22:21 “ङालाई धोका याज़्याव मिँ जेखार्ल ज़ लिज़्‍या, ङास सिप ज़ ज़्‍युज़्‍याव।
LUK 22:22 मिँ मिन्‍सिउए ते गोइँसिउ मिताव सयो·व ज़ परिए, खाली नोलाई धोका याज़्याव मिँलाई ते थैए माँतकन ज़ लिज़्‍या,” है यादोक्‍यो।
LUK 22:23 नकिन उसिसर या याल, “गेनी निताव य़ेन दान्‍या सु ओताव?” है लिकेर।
LUK 22:24 नकिन जाँवाक उसिसर, ‘गे भरिनी सु घेप्‍पा गेलिज़्‍याव?’ लिद याखर्लेसिनाक,
LUK 22:25 येसुए, “आव मानुवाताव चलननी जोर राजा ताज़्‍यार, होर याधूँलावराए याङ़ैत बनै अखत्‍यासो ताज़्‍यार। याधूँलावराए फरी नोरालाई ‘गेधर्मीदातार’ है दाव ज़ परिज़्‍या।
LUK 22:26 खाली जे ते निताव जैसिन्‍या माःक, बुरू जेनी जो स़ेर ताज़्‍या, हो प़ाइँए याधूँलाव ओजैसिक। फरी जोए हक दैज़्‍याव, नो प़ाइँए यासेवा दान्‍या ओजैसिक।
LUK 22:27 भत्‍यारल च़ुसिज़्‍याव घेप्‍पा ओताज़्‍याव, सैं ज़्‍याव लाँज़्‍याव घेप्‍पा ओताज़्‍याव? नो च़ुसिज़्‍याव ज़ घेप्‍पा ताज़्‍या सानी सैं माःक? हैदी ब ङा झन जेसेवा दान्‍या ङाजैसिके।
LUK 22:28 “जे फरी आव मानुवाताव ङादुख भरिल ङास ङासतत लिन्‍यार जेतावए,
LUK 22:29 किताव ङालाई ङाबाबुए ओराज्‍या याद नैनाव, हिताव ज़ ङा ब जेलाई तोबो हक ङायाचिरिज़्‍या।
LUK 22:30 नो ङाराज्‍याल जे ङास ज़ तोबोल सिप ज़ ज़्‍यान्‍या जेले, स़ोनो बाह्र थर इस्राएलीराए याङ़ैतावर ताद याय़ेन फाल्‍द्यान्‍या ब जेले,” है यादोक्‍यो।
LUK 22:31 नकिन येसुए पत्रुसलाई, “अ सिमोन, सिमोन, किताव मनमलाई छिन्‍कैज़्यार, हिताव ज़ सैतानए नँलाई ब जाँचिन्‍या झाःसिद ले।
LUK 22:32 है जैद ङा नजूँनी ङाल्‍योदा नदोव सत ताऱासोक लिद पोंखारिद ङाईंज़्‍या। फरी तखेप नबादी ब ओल्‍द नहुवत नँ ननैंरालाई पाथ पारैव ताके,” है ओदोक ते,
LUK 22:33 पत्रुसए, “प्रभु, नँस झ्यालखानाल बान्‍या ब तयार ज़ ङालिज़्या, नँस सिन्‍या ब तयार ज़ ङालिज़्‍या,” है दोक्‍यो।
LUK 22:34 येसुए फरी, “पत्रुस, नँलाई है ङादींज़्‍या, आछिम रील भाल्‍या ओमाकोद ङालाई स़ोंखेप ‘ङामासरेसे’ है दान्‍या नले,” है दोक्‍यो।
LUK 22:35 नकिन येसुए प़ाइँलाई, “ङा नो ङ़ादा जेलाई पैसा, पोला, झ़ैंर मालाँद ज़ ङापरींचिक, काताराए खाँचो माताया?” है ओरादोक ते, “काताए खाँचो ज़ माताके,” है दोकेर।
LUK 22:36 नकिन फरी, “आकिन ते जेबाक हो मिताव तान्‍या माले। फरी जेबाक पैसाए ओचाहित ब तारिज़्‍या, जेझ़ैं लाँन्‍या ओचाहित ब तारिज़्‍या, स़ोनो जेस तरवाली ओमालिकिन जेक्‍वार यो·द तादी ब लँःद लाँन्‍या बेला हुके।
LUK 22:37 नो ङाजूँनी धर्मसास्‍त्रलाव सर्सिउ पाँ ब यो·नारिके। नलाव सर्सिउ आव ज़, ‘नोलाई सिन्‍या सजा दैवरास तोबोल गनिरिज़्‍यार।’ नो पाँ ङाक्‍याँत जुनी ब यो·व ज़ परिके,” है यादोक्‍यो।
LUK 22:38 हाःत ज़ उसिसराए झन, “प्रभु, गेस ऩेब्‍लो तरवाली लिज़्‍या,” है यादोक ते, “ङापाँ जेमातीधुव प़ाइँना घलिज़्‍याक,” है यादोक्‍यो।
LUK 22:39 येसु ननी पुलुस्‍द एकतारकाव ओबाज़्‍याव जैतून दाँदादा बाके। उसिसर ब ओलस ज़ बाकेर।
LUK 22:40 नो पोत याकेसोत उसिसरालाई, “पोंखारिचिके, म़ानी दुखराल जेमाथ॰रिधुया,” है दाद,
LUK 22:41 ओल याकिन जाँ अछतङ लुँ झोमक केस्‍न्‍यावाक बाद नामक उघूँदानी तिकिसिद,
LUK 22:42 “अ बाबु, नयुँ ओताकिन आव ङाक्‍याँत हुरिज़्‍याव दुखर वैंद्याँके। खाली ङा ङायुँ माःक, नँ नयुँ ओताकिन वाज़,” है लिद पोंखारिक्‍यो।
LUK 22:43 हाःत ज़ स्‍वर्गनी परमेस्‍वरए तोबो ओचाकर्‍या हुद येसुलाई सघैक्‍यो।
LUK 22:44 उयुँर बनै धो थाइव ताद बनै धामास पोंखारिद ओक्‍याँतिन ओपस्‍योंर ब झी स्‍यासो हुद बाप बाप यातेज़्‍याव।
LUK 22:45 पोंखारिद ओखेमोत उसिसराए ल्‍योक ओबाक नोर प़ाइँ यासोगोए स्‍याँद यालिज़्‍याव रँःद,
LUK 22:46 “काराव जेस्‍याँज़्‍याव? सैंसिद पोंखारिचिके, म़ानी दुखराल जेमाथ॰रिधुया,” है यादोक्‍यो।
LUK 22:47 येसु ओपाँज़्‍याक ज़ मिँर तबगाल हुकेर। नोराए याङ़ा याङ़ा बाह्र जना उसिसरानिकाव यहूदा इस्‍करियोत उहुज़्‍याव। नो येसुए ल्‍योक हुद माइँ ओदोक,
LUK 22:48 येसुए, “अ यहूदा, मिँ मिन्‍सिउलाई माइँ दाव जैसिद धोका याव नपैंज़्‍याव रो?” है ओदोव प़ाइँना,
LUK 22:49 येसुस लिज़्‍यावराए, ‘याक्‍योःरिज़्‍याव ची ओल्‍यो’ लिन्‍या सैंद, “प्रभु, आवरालाई तरवालीए गेरापल रो?” है दाद,
LUK 22:50 तोबोए ते ओतरवाली हाइद प्रधान पुजारीए ओनोकोरलाई वोर्निकाव ओर्ना पल्‍द सतेदिक्‍यो।
LUK 22:51 नो रँःद येसुए, “च़िम दोके, अइ जैन्‍या माःक,” है दाद नो मिँए ओर्ना छाप्‍द्याद सोजोकाव ज़ जैदिक्‍यो।
LUK 22:52 नकिन येसुए ओललाई क्‍योःना हुव मुख्‍या पुजारीर, यहूदीराए यास़ेरर स़ोनो ध्‍यान झ़िमलाव पुलिसरालाई, “काता ङालाई दाँकालाई मिताव तरवालीर खोंतार दाद जेक्‍योःहुनाव?
LUK 22:53 ङा दिनकाव ज़ जेस ध्‍यान झ़िमल ङालिज़्‍याव बेलाक जेमाक्‍योःनाके। हैदी ब गोइँसिउ मिताव चुम चुमोए ओहक चलैन्‍या जेबेला आव ज़,” है यादोक्‍यो।
LUK 22:54 नकिन येसुलाई क्‍योःद प्रधान पुजारीए उझ़िमक लाँकेर। पत्रुस ब याछीं याछीं जाँ तादाङ ओबाज़्‍याव।
LUK 22:55 मिँर प्रधान पुजारीए ओचतराक मेंः दाद यामुइँसिज़्‍याक पत्रुस ब नोराए ल्‍योक ज़ च़ुसिनाके।
LUK 22:56 नलाव तोबो नोकोर्नी मेंमाए पत्रुस मेंःए ओपलाँक च़ुसिद उलिज़्‍याव रँःद नोलाई लँ लँ चिऊद, “आव ब येसुस उलिज़्‍याव,” है ओदोक ते,
LUK 22:57 पत्रुसए, “अ बुची, ङा ते नो है नलिज़्‍याव मिँलाई ङामासरेसे,” है दोक्‍यो।
LUK 22:58 नकिन जाँवाक फरी तोबोए पत्रुसलाई सरेस्‍द, “नँ ते होसकाव ज़ सानी,” है ओदोक ते, पत्रुसए फरी, “ङा ते होसकाव माःक ब्‍याँ,” है दोक्‍यो।
LUK 22:59 नकिन तघन्‍तावाक फरी तोबो हुद, “आव ब पक्‍का नोसकाव ज़, आव ते गालीललाव ज़ ची,” है दाव ज़ ओनैज़्‍याव।
LUK 22:60 पत्रुसए झन, “नँ काता नपाँज़्‍याव इताव, ङा काता ज़ ङामासैंए,” है ओदोव प़ाइँना भाल्‍या ब कोके।
LUK 22:61 हाःत ज़ येसु पत्रुसए ल्‍योदा भाल्‍सिके। पत्रुसए नो रँःद ङ़ादा प्रभुए, “भाल्‍या ओमाकोद ज़ ङालाई स़ोंखेप ‘ङामासरेसे’ है लिन्‍या नले,” है ओदोव चेतैद,
LUK 22:62 लाँःक पुलुस्‍द धस धस घर्के।
LUK 22:63 नकिन येसुलाई गुद नैज़्यावराए प़ोद बरे·द,
LUK 22:64 उमी कप्‍द्याद, “नँलाई प़ोज़्‍याव सु? है लिन्‍के,” है दोकेर।
LUK 22:65 फरी बनै उल्‍लिनी गिल्‍ली दाद ब थल्‍केर।
LUK 22:66 नम उसँव प़ाइँना यहूदीराए यास़ेरर, मुख्‍या पुजारीर स़ोनो सास्‍त्रीराए घ्‍योःव कचरी जैद प़ाइँ दुप्‍सिद, येसुलाई याङ़ाक सच्‍याँद,
LUK 22:67 “नँ नो धर्मसास्‍त्रलाव हुरिज़्‍याव ख्रीस ज़ रो? नँ साचो हो ज़ ताकिन गेलाई है दासिके,” है यादोक ते, येसुए, “है ङादाचिदी ब जे ङालाई पतिन्‍या जेमाले,
LUK 22:68 ङा जेलाई ङासुधिचिदी ब जे जवाप यान्‍या जेमाले।
LUK 22:69 खाली अबकिन मिँ मिन्‍सिउ माहान परमेस्‍वरए ओवोर्दा च़ुसिन्‍या ङाले,” है यादोक्‍यो।
LUK 22:70 हाःत ज़ नलाव भरिए, “हुकी नँ परमेस्‍वरए ओज़ा ज़ रो?” है यादोक ते, येसुए, “हैज़, जे है जेलिज़्‍याव मिताव ज़,” है ओरादोव प़ाइँना,
LUK 22:71 नोर झन, “अब ते गेलाई छुत साची माचाहिए, साची भरी ओयाःनी ज़ गेथैके,” है लिकेर।
LUK 23:1 नलाव दुप्‍सिउ भरिए येसुलाई पिलातसए ल्‍योक लाँकेर।
LUK 23:2 नक लाँद येसुलाई खत लैद नोराए, “आव मिँ ख्रीस जैसिद, गेराजा ब जैसिउ पैंद, रोमी सरकारलाई सिर्मा यान्‍या माःक लिद गेदेसलाव मिँरालाई यामचैज़्‍याव,” है दोकेर।
LUK 23:3 पिलातसए नोराए यापाँ थैद येसुलाई, “नँ साचो यहूदीराए याराजा ज़ रो?” है ओदोक ते, “नँ ज़ नथ·रैनाके,” है दोक्‍यो।
LUK 23:4 नकिन पिलातसए मुख्‍या पुजारीर स़ोनो नो माहोल्‍यारालाई, “आवए ओखत ते काता ज़ ङामारँःए,” है ओरादोक ते,
LUK 23:5 नोराए झन, “यहूदिया खन्‍द भरिल गालीलकिन आङ पै ज़ ओपाँर सथैद मिँरालाई यामचैज़्‍याव,” है दोकेर।
LUK 23:6 पिलातसए नोराए यापाँ थैद आव गालीललाव सैं माःक लिद सुधिद,
LUK 23:7 ‘आव ते हेरोदए उकुइताव ज़ ची ओल्‍यो’ लिन्‍या थ·रैद हेरोदए ल्‍योदा परींक्‍यो। हेरोद ब हाः बेलाक यरूसलेमल हुद उलिज़्‍याव।
LUK 23:8 हेरोदए येसुलाई रँःद बनै खुसी ताके। नोए ङ़ादाकिन ज़ येसुए उजूँनी थैद ‘ओदोज़्‍याव सरेसर ब रँःव ङादैकिन ताखेहो’ लिद दैसिउ ओपैंज़्‍याव।
LUK 23:9 है जैद हेरोदए येसुलाई बनै ज़ खोले·क्‍यो। खाली येसुए घाइ ज़ मादोक्‍यो।
LUK 23:10 हो बेलाक मुख्‍या पुजारीर स़ोनो सास्‍त्रीराए नक च्‍याँःसिद येसुलाई खत लैव ज़ यालिज़्‍याव।
LUK 23:11 हाःत ज़ हेरोदए उसिपाईंरास येसुलाई बनै हेलारी मिताव जैद बरे·न्‍याए जूँनी राजाए जासिन्‍या मिताव क्‍वा जास्‍द फरी पिलातसए ल्‍योदा ज़ लाँव यापरींक्‍यो।
LUK 23:12 हो छ्यामकिन ज़ हेरोद स़ोनो पिलातसनी नी नील खैद नैं नैं ब ताकिनी। नोनी ङ़ादाकिन निमाखैज़्‍याव।
LUK 23:13 पिलातसए मुख्‍या पुजारीर, मिँराए याघेप्‍पार स़ोनो माहोल्‍यारालाई फरी ब दुप्‍द,
LUK 23:14 “जे ते आव मिँलाई ‘मिँरालाई यामचैज़्‍याव’ लिद ङाल्‍योक जेरैके। नोलाई जेङ़ाक ङाफाल्‍क जे है जेलिज़्‍याव मिताव ओखतर ते काता ज़ ङामादैके।
LUK 23:15 हेरोदए मनी ओखत काता ज़ मादैद ङाल्‍योदा सोवोल्‍द्याँक्‍यो। है जैद आव मिँए सिन्‍या मिताव य़ेन ओदोव कान्‍नी ज़ मारैंःए।
LUK 23:16 है जैद ङा आवलाई तखेप सजा याद ङाऱास्‍रिज़्‍या,” है यादोक्‍यो।
LUK 23:17 [नोराए याचलनल पर्बत सालकाव तखेप तोबो कैदीलाई याऱास्‍ज़्‍याव।]
LUK 23:18 हाःत ज़ नलावराए, “आवलाई सैःद बारब्‍बालाई ऱास्‍द्यासिके,” है लिद बनै क़िकेर।
LUK 23:19 नो बारब्‍बा सरकारकिन तँदा जैसिद मिँरालाई मचैद तोबो ऩेब्‍लोलाई ओरासैःवनी झ्यालखानाल उलिज़्‍याव।
LUK 23:20 पिलातसए फरी येसुलाई ऱासो ओपैंज़्‍यावए माहोल्‍यारालाई फरी तखेप यासम्‍जैक्‍यो।
LUK 23:21 हितावत ब, “आवलाई क्रुसत तङ्गैद सैःन्‍या ज़,” लिद बनै क़िकेर।
LUK 23:22 हाःत ज़ पिलातसए फरी, “काराव? आवए मादान्‍या काता दाद ओनैज़्‍याव? ङा ते आवलाई सैःन्‍या मिताव ओय़ेन कान्‍त ज़ ङामादैए। है जैद ङा आवलाई तखेप सजा याद ङाऱास्‍रिज़्‍या,” है ओरादोक ते,
LUK 23:23 नोर झन बनै ज़ मचिद, ‘क्रुसत तङ्गैन्‍या ज़’ है लिद याक़िक पिलातसए ओपाँ ज़ सोङोइदिकेर।
LUK 23:24 है जैद पिलातसए यापाँ ज़ थ·रैद्याद,
LUK 23:25 नो याऩिउ झ्यालखानाल लिज़्‍याव मिँ सैःद मिँरालाई मचैव बारब्‍बालाई ऱास्‍द्याद येसुलाई ‘जेजैन्‍या जैचिके’ लिद यालाई ज़ यासूँपिक्‍यो।
LUK 23:26 येसुलाई सैःना यालाँज़्‍याक नाखारनी हुज़्‍याव कुरेनीलाव तोबो सिमोनलाई येसुए ओलाँज़्‍याव क्रुस सुघुर्द येसुए उछीं उछीं बाव परींकेर।
LUK 23:27 येसुए उछीं उछीं बाज़्‍यावर कुधु माहोल्‍या ज़ यालिज़्‍याव। नोरास मेंमार ब घरे घरे याबाज़्‍याव।
LUK 23:28 नोराए ल्योदा येसु उछींदा भाल्‍सिद, “अ यरूसलेमलाव मेंमार, ङाजूँनी ताघर्च्‍यो। बुरू जेजूँनी स़ोनो जेज़ाराए जूँनी घर्चिके।
LUK 23:29 तछा परमेस्‍वरए ओसजा उहुक आलाव मिँराए, ‘ज़ा मादैज़्‍याव थारी मेंमार, नुइँ सोवैन्‍या याज़ा माल्‍योर याभागी ल्‍योर ज़ लिज़्‍यार,’ है लिन्‍या लेर।
LUK 23:30 स़ोनो, ‘हाँरालाई ब ‘गेतर्त तेचिके’, गोंरालाई ब ‘गेलाई राल्‍सिके’ है दान्‍या लेर।’
LUK 23:31 ङा काचो सीं स्‍यासोलाई अइ याजैनाकिन, या थँव सीं स्‍यासोरालाई परमेस्‍वरए कै याजैवके?” है यादोक्‍यो।
LUK 23:32 येसुस तखेप्‍त सैःन्‍याए जूँनी ऩेब्‍लो अपराधीनिलाई ब यारालाँज़्‍याव।
LUK 23:33 नोर खप्‍पर्‍या पो यादोज़्‍यावक याकेसोत क्रुसत यारातङ्गैकेर। नो अपराधीनिलाई तोबोलाई ओवोर्दा, तोबोलाई ओदाबर्‍यादा याराजैकेर।
LUK 23:34 येसुए अइ लिद पोंखारिक्‍यो, “परमेस्‍वर बाबु, आवरालाई कैज़ ताराजैयो, यादोज़्‍याव य़ेन मासैंर।” नोराए फरी येसुए ओक्‍वारात गोला झाःद भाःकेर।
LUK 23:35 मिँर नक च्‍याँःसिद याभाल्‍सिज़्‍याव। याघेप्‍पाराए फरी, “आवए छुतरालाई ते याबाँचैक्‍यो, परमेस्‍वरए साचो ओछाँतिउ ख्रीस ज़ ताकिन ओक्‍याँलाई ब ओबाँचैवक,” है लिद बरे·केर।
LUK 23:36 सिपाईंराए ब गिल्‍लैद ओल्‍योक बाद सिरो दाखमद्य याद,
LUK 23:37 “नँ यहूदीराए याराजा ताकिन नक्‍याँलाई बाँचैके,” है दोकेर।
LUK 23:38 ओललाई तङ्गैद यानैज़्‍याव क्रुसए ओङ़ैत फरी, ‘आव यहूदीराए याराजा ज़’ है लिद तोबो फल्‍यात सर्द चकेर।
LUK 23:39 येसुस तङ्गैसिउ अपराधीनी ब तोबोए येसुलाई गिल्‍लैद, “नँ ख्रीस माःक रो? ख्रीस नताकिन नक्‍याँलाई मनी गिनलाई मनी बाँचैसिन्‍के,” है ओदोक ते,
LUK 23:40 ओनैंए नोलाई सिङार्द, “नँ सिन्‍या सजा दैद नैज़्‍यावत ब परमेस्‍वरलाई रँःद नमाछे·ए रो?
LUK 23:41 गिन ते गिनय़ेननी ज़ इताव सजा दैन्‍या गिन्ताके। आव मिँए ते मादान्‍या काता ज़ मादोव,” है दाद,
LUK 23:42 येसुलाई, “अ येसु, नँ नराज्‍याल नपसिक ङालाई ब तामेंःनायो,” है ओदोक ते,
LUK 23:43 येसुए, “नँलाई साचो है ङादींज़्‍या, आछिमकिन ज़ नँ ङास स्‍वर्गत नतारिज़्‍या,” है दोक्‍यो।
LUK 23:44 हो बेलाक बाह्र बजेवाकिन तीन बजे पै देस भरी काल्‍या कले झ्याद,
LUK 23:45 निमीए ओज़गै ज़ मारैंःके। थिक हो बेलाक ज़ ध्‍यान झ़िमलाव बारिसिउ क्‍वा ब ओलनी ज़ ऩेपरा ताद चिस्‍के।
LUK 23:46 हाःत ज़ येसु ब बनै चोइस अइ लिद क़िके, “अ परमेस्‍वर बाबु, आव ङापुरूस नपिछाल ज़ ङाईंज़्‍या,” है लिद उस॰ सफ्या·क्‍यो।
LUK 23:47 नक च्‍याँःसिद लिज़्‍याव कप्‍तानए नो भरी रँःद, “आव ते साचो धर्मी मिँ ज़ ची ओल्‍यो,” लिद परमेस्‍वरए उमिन सघ्‍योःक्‍यो।
LUK 23:48 नो भाल्‍सिना हुव माहोल्‍याराए नो भरी रँःद घरे घरे याझ़िमदा बाकेर।
LUK 23:49 ओल येसुस बाऱिज़्‍याव मिँर स़ोनो गालीलनी ओलस हुव मेंमार जाँ तादाङ च्‍याँःसिद याभाल्‍सिज़्‍याव।
LUK 23:50 यहूदिया खन्‍दलाव अरिमाथिया नाखारलाव तोबो योसेफ यादोज़्‍याव घ्‍योःव कचरीलाव मिँ ओल्‍यो। नो धर्मी, परमेस्‍वरए ओराज्‍या खिम्‍ज़्‍याव मिँ ओतावए येसुलाई सैःन्‍या यासल्‍लाल माखैद भैंःद ओमाराएज़्‍याव।
LUK 23:52 नोए पिलातसए ल्‍योक येसुए ओमोरो ऩिक्‍यो।
LUK 23:53 नो मोरोलाई क्रुसतिन हाइद, पालो क्‍वाए लुम्‍बैद सुलाई ज़ यामाराझाःताव दावन खुपिद पुप जैद ओनैज़्याव खादरल झाःक्‍यो।
LUK 23:54 हो छ्याम तयारीलाव दिन ओल्‍यो। ऩासिन्‍या छ्याम सुरू तानाद उलिज़्‍याव।
LUK 23:55 येसुए उछींताव हुव गालीललाव मेंमार योसेफए उछीं उछीं बाद नो मोरो ओझाःव खादर चिऊकेर।
LUK 23:56 नो मेंमार ओल्‍द बाद येसुए ओमोरोलाई थीन्‍याए जूँनी चाव सी ङरो म़ासर, अतरर सरजाम जैद हो पराःती ऩासिन्‍या छ्याम ओतावए कानुनलाई भैंःद ऩासिकेर।
LUK 24:1 सातालाव उस॰कताव छ्याम, नो मेंमार छकाल्‍न्‍या घग ज़ सोद नो सरजाम याजैव अतररास येसुए ओखादरदा बाकेर।
LUK 24:2 नक याकेसोत नो खादरलाई कसिउ घ्योःव लुँ पल्‍तैसिउ रँःकेर।
LUK 24:3 नल यापसिक प्रभु येसुए ओमोरो मादैकेर।
LUK 24:4 ‘आव कै ओताव’ लिद यायुँ आँचा पाँचा ओताज़्‍याक ऩेब्‍लो बनै तक तकौ क्‍वा क्‍वाइसिउनी उमँःजानी याङ़ाक निच्‍याँःसिहुव यारारँःकेर।
LUK 24:5 यारारँःव प़ाइँना बनै छे·द नामक याफुलुप्‍सिक, नो चाकर्‍यानी है यारादोकिनी, “जे जींदोलाई सिउराए पोल काराव जेखिम्‍हुज़्‍याव?
LUK 24:6 नो आल माले, सैंसिद सोधुके। जेस गालीलल उलिज़्‍याकाव है ओदाचिउ पाँर य़ाका दोच्‍यो।
LUK 24:7 ‘ङा मिँ मिन्‍सिउ पापीराए कुइत सूँपिनारिज़्‍यार। नोराए क्रुसत तङ्गैद यासैःनाव स़ोंलात ङासैंसिरिज़्‍या,’ है ओदाचिउ सैं माःक?” है निरादोक ते,
LUK 24:8 नो मेंमाराए नो पाँ चेतैद,
LUK 24:9 खादरनी ओल्‍द बाद एघार जना उसिसर स़ोनो ओलस बाऱिज़्‍याव छुतरालाई ब नो पाँ भरी है यारादोनाकेर।
LUK 24:10 नो पाँ सथैज़्‍याव मेंमार तोबो मरियम मग्‍दलिनी, तोबो योअन्‍ना स़ोनो तोबो याकूबए ओआमा मरियम याल्‍यो। यास बाव छुत मेंमाराए ब येसुए ओसाचीरालाई है यारादोज़्‍याव।
LUK 24:11 नोराए नो पाँ याथैक ओअर्थ माल्‍यो मिताव थ·रैद मारापतिकेर।
LUK 24:12 पत्रुस ते थर च्‍याँःसिद खादरदा धोंःनाद, खादरल घोम लिद उचिऊक येसुलाई लुम्‍बैसिउ क्‍वार वाज़ रँःक्‍यो। नलाव ताव भरी उयुँल खामिद ओल्‍द बाके।
LUK 24:13 हो छ्याम ज़ फरी ऩेब्‍लो ओलस बाऱिज़्‍यावनी यरूसलेमनी एघार किलोमितरवा तादाङ लिज़्‍याव इम्‍माउस यादोज़्‍याव नाखारदा निबाज़्‍याव।
LUK 24:14 निबाज़्‍याक ताव पाँ भरी नी नील निपाँनाज़्‍याव।
LUK 24:15 नोनी पाँए पाँए निबाज़्‍याक येसु कातानी हुद नीस नीस ज़ बाके।
LUK 24:16 येसुए नोनिलाई ओललाई मासरेस्‍न्‍या जैद उनिनैज़्‍याव।
LUK 24:17 हाःत ज़ येसुए, “जिन काता जिन्‍पाँहुज़्‍याव?” है उनिदोक ते, नोनी च्‍याँःसिद निङाः चुम चुमो जैद,
LUK 24:18 क्‍लेओपास यादोज़्‍यावए, “यरूसलेमल बाव भरिरानी नलाव आछिम पराःती ताव पाँ मासैंज़्‍याव नँ वाज़ नलिज़्‍याव सा,” है ओदोक ते,
LUK 24:19 येसुए, “यरूसलेमल किताव पाँ ओताव?” है उनिदोक ते, नोनी, “नासरतलाव येसु यादोज़्‍याव तोबो मिँ ओल्‍यो। नो अगमबक्ता ओतावए परमेस्‍वर स़ोनो मिँराए ङ़ाक सक्तीलाव य़ेन दाद चावस ओरापैज़्याव।
LUK 24:20 नोलाई मुख्‍या पुजारीर स़ोनो गेघेप्‍पाराए सिन्‍या सजाल सूँपिद क्रुसत तङ्गैद सैःकेर।
LUK 24:21 गे ते इस्राएलीरालाई बाँचैना हुव ज़ ताखेहो है ची गेल्‍यो। नो पाँर ओताव आख ते स़ोंला ताधुके।
LUK 24:22 हैदी ब गेसकाव ख्‍वा ख्‍वा मेंमाराए अचम्‍बलाव पाँ ज़ है दासिकेर। नोर आछ्या छकाल्‍न्‍या घग ज़ येसुए ओखादरक याबाक,
LUK 24:23 येसुए ओमोरो खादरल ओमालिज़्‍याव दी। नक परमेस्‍वरए ओचाकर्‍यानिलाई ब यारारँःकेर दी। नोनी फरी ‘येसु जींदो ज़ लिज़्‍या’ है ब यारादोकिनी दी।
LUK 24:24 है जैद गेसकाव तोबो ऩेब्‍लोए नो खादरक याबाक नो मेंमाराए है यालिज़्‍याव मिताव ज़ ताके। खाली येसुलाई ते मारँःकेर,” है दोकिनी।
LUK 24:25 हाःत ज़ येसुए, “जे अधमर, अगमबक्ताराए यासरो पाँ खर्क जेतीधुरिज़्‍याव?
LUK 24:26 नल, ‘ख्रीसए दुखर सहिद वाज़ बल्‍ल ज़गै मगैव ओराज्‍या दैरिज़्‍याव’ लिन्‍या सर्सिउ लिज़्‍या,” है दाद,
LUK 24:27 मोसाए ओसरोकिन अगमबक्ताराए यासरो पैकाव ओल उजूँनी धर्मसास्‍त्रलाव सर्सिउ पाँर पलास्‍द निएक्‍यो।
LUK 24:28 हाःत ज़ नो नाखार याकेस्‍हुवत येसु नोनिकिन जाँ ङ़ादा बाव ओपैंज़्‍याव मिताव ओजैसिक,
LUK 24:29 नोनी घलैद है दोकिनी, “नम झ्यानाके। आछिम गिनस ज़ लिन्‍के,” है निदोक ते, भैंःद नीस ज़ बाके।
LUK 24:30 नोनिस ज़्‍यान्‍याए जूँनी च़ुसिद, भरेस उकुइत रैद, असिक ऩिद, केःद निएक्‍यो।
LUK 24:31 उनियो प़ाइँना ज़ ‘आव ते येसु ची ओल्‍यो’ लिद सरेस्‍किनी। हाःत ज़ येसु ब नक ज़ सम़ैसिके।
LUK 24:32 नोनी फरी नी नील है लिकिनी, “येसु गिनस ज़ ओल्‍योए ची ओल्‍यो, नो येमत गिन्‍हुज़्‍याकाव धर्मसास्‍त्रलाव पाँर पलास्‍द ओयासिन्‍क गिनयुँर हाः होलाँ ओताव,” है लिद,
LUK 24:33 हतप्‍त ज़ च्‍याँःसिद यरूसलेमदा ओल्‍द बाद एघार जना उसिसर छुत यानैंरास दुप्‍सिद यालिज़्‍याव निरादैनाक,
LUK 24:34 नोनी निपाँ निमापाँद ज़ नोराए, “साचो ज़ ओल्‍यो, गेप्रभु जींदो ज़ उलिज़्‍याव ओल्‍यो। सिमोनए ओङ़ाक ब सरैंःसिके,” है यारादोकेर।
LUK 24:35 फरी नोनी ब नो येमताव पाँ भरी है दाद, “भरेस केःद ओभाःव प़ाइँना ज़ गिन्‍सरेस्‍के,” है यारादोकिनी।
LUK 24:36 निताव यापाँज़्‍यावत ज़ येसु उमँःजानी ज़ याखार्ल च्‍याँःसिहुद नोरालाई, “जेयुँर होलाँ ओताक,” है यादोक्‍यो।
LUK 24:37 नो यारँःव प़ाइँना तखँङरी छे·द, ‘आव ते झ़्या ची सा’ है लिद बनै याछे·ज़्‍याक,
LUK 24:38 येसुए, “जे कै जैद ‘हो ज़’ लिद जेयुँ माहुप्‍द जेछ्याचेए जेयुँर भुतु भुतु जेजैज़्‍याव?
LUK 24:39 आव ते ङा ज़ ची, ङाखँ ङाकुइताव घाइर चिऊद सरेस्‍नाचिके। जे है जेलिज़्‍याव मिताव झ़्या ङाताकिन ते ङास्‍या ङाऱूसर मालिखेहो। जेयुँ ओमाहुप्‍किन छाप्‍नाचिके,”
LUK 24:40 है दाद उखँ उकुइर सतैंद याएक्‍यो।
LUK 24:41 निताव रँःद बनै अचम्ब ताद यारेंतए, ‘आव गेमँच्‍यानी गेरँःज़्‍याव सैं साचो गेरँःज़्‍याव ओताव’ है यालिज़्‍याक, येसुए, “जेस ज़्‍यान्‍यार मालिज़्‍या?” है ओरादोक ते,
LUK 24:42 हिप्‍सिउ ङाँः तगेंदा याएक ते,
LUK 24:43 प़ाइँए याङ़ाक ज़ कैक्‍यो।
LUK 24:44 नकिन येसुए, “ङा जेस ङालिज़्‍याकाव मोसाए ओकानुनल, अगमबक्ताराए यासरोल स़ोनो भजन पोस्‍तोकोल ब ङा ङाजूँनी सर्सिउ भरी जुनी ब ङाक्‍याँत यो·व ज़ परिके लिद है दाव ज़ ङानैचिज़्‍याव,” है दाद,
LUK 24:45 धर्मसास्‍त्रलाव सर्सिउ पाँए ओअर्थ भरी पलास्‍द्याद,
LUK 24:46 “धर्मसास्‍त्रल ब ‘ख्रीस दुखर सहिद उसिउ स़ोंलात सैंसिरिज़्‍या’ लिद सर्सिउ लिज़्‍या।
LUK 24:47 स़ोनो यरूसलेमनी सुरू जैद प़ाइँ जातलाव मिँराए ल्‍योङ बाद, ‘जेयुँ परमेस्‍वरए ल्‍योदा फर्कैचिकेदा, जेपाप भरी ख्रीसए उमिननी क्‍याल्‍सिरिज़्‍या,’ है लिद प़ाइँदा ज़ यारासथैनाचिके।
LUK 24:48 जे आव पाँत ङासाचीर ताद जेले।
LUK 24:49 है जैद ङा ङाबाबुए ओय़ाकालाव छैंव पुरूस परींद ङायाचिरिज़्‍या। खाली जे नोए ल्‍योनिकाव सक्तीर जेमादैवा पै यरूसलेमल ज़ लिच्‍यो,” है यादोक्‍यो।
LUK 24:50 नकिन येसुए नोरालाई बेथानिया नाखारक पै ओलस ओलस ज़ लाँद उकुइर रा·द नोरालाई असिक याएक्‍यो।
LUK 24:51 नो असिक ओराएज़्‍याक ज़ नोराए ल्‍योनी छींसिद स्‍वर्गदा बाके।
LUK 24:52 नोराए उमिनर बनै सघ्‍योःद्याद रेंए रेंए यरूसलेमदा ओल्‍द बाद,
LUK 24:53 दिनकाव ज़ ध्‍यान झ़िमल परमेस्‍वरए उमिन सघ्‍योःद्याव ज़ नैकेर।
JOH 1:1 भाःङ पाँ उलिज़्‍याव ज़। नो पाँ परमेस्‍वरस उलिज़्‍याव। नो पाँ ओल परमेस्‍वर ज़।
JOH 1:2 नो ङ़ादाकिन ज़ परमेस्‍वरस उलिज़्‍याव।
JOH 1:3 ताव भरी ब नो पाँनी ज़ ताहुकेर। नो पाँनी माताहुव काता ज़ माले।
JOH 1:4 नो पाँनी ज़ पोहोन ब ताके। नो पोहोन ज़ मिँरालाई पलाँ जैद्यान्‍या ज़गै ब ताके।
JOH 1:5 नो ज़गैए चुम चुमोल पलाँ जैज़्‍याव। नो ज़गैलाई चुम चुमोए माहातैधुव।
JOH 1:6 तछा परमेस्‍वरए उपरींव यूहन्‍ना यादोज़्‍याव मिँ तोबो हुके।
JOH 1:7 नो मिँ परमेस्‍वरनी हुव ज़गैवलाई प़ाइँए सरेस्‍द यायुँ घुहुप्‍क लिद साचीए जूँनी हुके।
JOH 1:8 ओल ते नो ज़गै माःक, ज़गैवलाई मिँरालाई सरेसो परींन्‍याए जूँनी उहुव ची।
JOH 1:9 नो ज़गै साचो ज़गै ज़ ओल्‍यो। नो आव मानुवात हुद प़ाइँ मिँरालाई पलाँ जैद याएज़्‍याव।
JOH 1:10 नो मानुवात हुवए ज़ आव नाम नम जैक्‍यो। हितावत ब आव मानुवाताव मिँराए ओललाई मासरेस्‍धुकेर।
JOH 1:11 ओल नो उमींराए याल्‍योक ज़ हुके। खाली नोराए झन मासुम्‍केर।
JOH 1:12 हैदी मनी जो जोराए ओपाँर भैंःद यायुँ हुप्‍ज़्‍या, हो होरालाई परमेस्‍वरए ओज़ार तान्‍या हक याएज़्याव।
JOH 1:13 नोर परमेस्‍वरए ओज़ार याताव संसारलाव बाबु आमानी ब माःक, क्‍याँए ओपैंज़्यावनी ब माःक, मिँए गोहाईनी ब माःक, परमेस्‍वरनी वाज़ ताज़्‍यार।
JOH 1:14 नो पाँ ज़ मिँ मिन्‍सिद गेल्‍योक हुके। ओबाबुनी हुव तोबोका तोबो ओज़ाए ओज़गै गेरँःके। नत ज़ परमेस्‍वरए ओसत स़ोनो गेल्‍योदा उयुँ ओय़ालो ब रैंःके।
JOH 1:15 नोए उजूँनी यूहन्‍नाए चोइस क़िद, “आवए उजूँनी ज़ जेलाई ङ़ादाकिन है ङादाचिज़्‍याव, ‘ङाछींनी हुव ङाकिन घ्योःव लिज़्‍या, काराव ल्‍यो ताकिन नो ङाकिन ङ़ादाकिन ज़ उलिज़्‍याव,’ ” है लिद गोहाई याएक्‍यो।
JOH 1:16 होए ओक्‍याँनी ज़ गे परमेस्‍वरए उयुँलाव भरी दैद असिकए तर्त असिक गेदैके।
JOH 1:17 ङ़ादा मोसाए ल्‍योनी परमेस्‍वरए ओकानुन गेदैके, आज्‍याल फरी परमेस्‍वरए उयुँ ओय़ालो स़ोनो साचो ओपाँ येसु ख्रीसनी गेदैके।
JOH 1:18 परमेस्‍वरलाई खर्क ज़ सुए ज़ मारँःर, ओबाबुए उयुँ स्‍याताव तोबोका तोबो ओज़ाए ओक्‍याँत ज़ सतैंसिउ लिज़्‍या।
JOH 1:19 यरूसलेम सहरनिकाव यहूदीराए यासकाव पुजारीर स़ोनो लेबीरालाई यूहन्‍नालाई, “नँ सु?” है दानाव यारापरींक ते,
JOH 1:20 यूहन्‍नाए माम़ोंसिद, “परमेस्‍वरए उपरींज़्‍याव ख्रीस ङा माःक,” है ओरादोक ते,
JOH 1:21 “हुकी नँ सुकी, सैं एलिया रो?” है यादोक ते, “अहँ, ङा हो माःक,” है यादोक्‍यो। “हुकी नँ नो परमेस्‍वरए ‘अगमबक्ता तोबो ङापरींरिज़्या’ है उलिज़्याव मिँ रो?” है यादोक ते, फरी ब, “ङा हो ब माःक,” है यादोक्‍यो।
JOH 1:22 “हुकी नँ ज़ गेलाई है दाव ताके, नँ सु? गेलाई परींज़्‍यावरालाई नजूँनी गे है दाव ज़ परिके,” है यादोक ते,
JOH 1:23 यूहन्‍नाए, “ङा यसैया अगमबक्ताए सर्द ओनैज़्याव मिँ ज़। नोए ङाजूँनी ओसरो आव ज़ — ‘तोबोए ओर्गा बनल अइ लिद उक़िज़्याव थास्‍रिज़्या, हुरिज़्याव प्रभुए ओयेम गाँत्‍या गुँतीलाई सदाँचिके,’ ” है यादोक्‍यो।
JOH 1:24 नो पजैना हुवर फरिसीराए यारापरींवर याल्‍यो।
JOH 1:25 नोराए फरी ब यूहन्‍नालाई, “नँ ख्रीस ब माःक, एलिया ब माःक, नो अगमबक्ता ब माःक ताकिन, नँ काराव मिँरालाई ऱील नरासछैंज़्‍याव?” है यादोक ते,
JOH 1:26 यूहन्‍नाए, “ङा ते ऱील ङारासछैंज़्‍या, खाली जेखार्ल ज़ तोबो लिज़्‍या, होलाई जे जेमासरेसे।
JOH 1:27 नो ज़ ङाछींनी हुरिज़्‍या है ङालिज़्‍याव मिँ। ङा ते नोए ओपोलाए ओच़ें पला·न्‍या स्‍यासो ब ङामाले,” है यादोक्‍यो।
JOH 1:28 आव पाँ भरी यूहन्‍नाए ओरासछैंज़्‍याव यर्दन भै होफताव बेथानिया यादोज़्‍याव पोल ज़ ताके।
JOH 1:29 हो पराःती येसु ओल्‍योदा उहुज़्‍याव रँःद यूहन्‍नाए प़ाइँलाई है यादोक्‍यो, “चिऊचिके, नो ज़ आव मानुवातावराए यापाप हाइद ख्याद्याज़्‍याव परमेस्‍वरए ओपाथा।
JOH 1:30 नोए उजूँनी ज़ ङ़ादाकिन है ङादाचिज़्‍याव, ‘ङाछींनी तोबो हुरिज़्‍या। नो ङाकिन ङ़ादा ज़ उलिज़्‍यावए ङाकिन घ्‍योःव लिज़्‍या।’
JOH 1:31 नोलाई ङा मनी ङामासरेस्‍ताव। हितावत मनी नोलाई इस्राएलीराए खार्नी पले·द सतैंद्यान्‍याए जूँनी ऱील ङारासछैंज़्‍या।”
JOH 1:32 यूहन्‍नाए नोरालाई अइ लिद गोहाई याएक्‍यो, “ङा परमेस्‍वरए उपुरूस कुइतम मिताव नमतिन भुर्हुद ओक्‍याँत उच़ुसिज़्याव ङारँःके।
JOH 1:33 नोलाई ङानी ते ङामासरेस्‍ताव, खाली ङालाई ऱीनी सछैंव परींज़्‍यावए है दाँक्‍यो, ‘जोए ओक्‍याँत परमेस्‍वरए उपुरूस हुद उच़ुसिउ नरँःज़्‍या, होए ज़ परमेस्‍वरए छैंव उपुरूसनी मिँरालाई यासछैंरिज़्‍याव।’
JOH 1:34 है जैद आव ङामीए ङारँःवनी ज़ जेलाई आव ज़ परमेस्‍वरए ओज़ा लिद थ·रैद ङायाचिके।”
JOH 1:35 हो पराःती फरी यूहन्‍ना ऩेब्‍लो उसिसनिस हो पोक ज़ च्‍याँःसिद यालिज़्‍याक,
JOH 1:36 यूहन्‍नाए येसुलाई याङ़ालाव घ्याँ ओबाज़्‍याव रँःद उसिसनिलाई, “चिऊचिन्‍के, नो ज़ परमेस्‍वरए ओपाथा,” है उनिदोक ते,
JOH 1:37 नोनी नो पाँ थैद येसुए उछींत बाकिनी।
JOH 1:38 येसु उछींदा ओभाल्‍सिक नोनिलाई उछीं उछीं निहुज़्‍याव रँःद, “जिन काता जिन्‍खिम्‍ज़्‍याव?” है उनिदोक ते, नोनी, “गुर्बा, नँ काङ्क नलिज़्‍याव?” है निदोक ते,
JOH 1:39 येसुए, “हुद चिऊचिन्‍के,” है निदोक्‍यो। नोनी उछीं उछीं बाद उलिज़्‍याव पोक ज़ बाद हो छ्याम ओलस ज़ लिकिनी। नो याकेसो ऱिमदाङाव चार बजेवाक ओल्‍यो।
JOH 1:40 नो यूहन्‍नाए ओपाँ थैद येसुए उछींत बावनी तोबो सिमोन पत्रुसए ओभाइ अन्‍द्रियास ओल्‍यो।
JOH 1:41 नो ननी बाद ओदाज्‍यु सिमोनस दैसिद, “गिन मसीहलाई गिन्‍दैके,” है दोक्‍यो। (हिब्रू खामनी मसीहए ओअर्थ ‘ख्रीस’।)
JOH 1:42 नकिन ओदाज्‍युलाई ब येसुए ल्‍योक लाँक्‍यो। येसुए नोलाई लँ लँ चिऊद, “नँ यूहन्‍नाए ओज़ा सिमोन ज़, आकिनी नमिन केफास नैद ङाईंज़्‍या,” है दोक्‍यो। (ग्रीक खामनी केफासए ओअर्थ ‘पहर’।)
JOH 1:43 हुकिन हो पराःती येसु गालीलदा बान्‍या युँ दाद होदा ओबाज़्‍याक फिलिपलाई रँःद, “नँ ङास हुन्‍के,” है दोक्‍यो।
JOH 1:44 नो फिलिप, अन्‍द्रियास स़ोनो पत्रुसनी निलिज़्‍याव बेथसेदा नाखारलाव मिँ ओल्‍यो।
JOH 1:45 नो फिलिपए फरी नथानेलस दैसिद नोलाई, “गे मोसाए ओकानुनल स़ोनो अगमबक्ताराए धर्मसास्‍त्रलाव सर्द यानैज़्‍याव मिँस गेदैसिके — नो ते योसेफए ओज़ा नासरतलाव येसु ची ओल्‍यो,” है दोक्‍यो।
JOH 1:46 हाःत ज़ नथानेलए, “निताव नासरतनी सु ची चाव उहुरिज़्‍याव?” है ओदोक ते, फिलिपए, “नँ ज़ हुद चिऊके,” है ओदोक ते,
JOH 1:47 नथानेललाई ओल्‍योदा उहुज़्‍याव रँःद, येसुए नोए उजूँनी नक लिज़्‍यावरालाई, “चिऊचिके, नो साचो इस्राएली, ओखत माल्‍यो मिँ,” है ओरादोज़्‍याव
JOH 1:48 नथानेलए थैद येसुलाई, “ङालाई कै जैद नसरेस्‍नाव?” है ओदोक ते, येसुए, “फिलिपए नँलाई ओमाखुल्‍निद नेभारा सीं खँक नलिज़्‍याक ज़ ङारँःनिउ,” है दोक्‍यो।
JOH 1:49 हाःत ज़ नथानेलए, “गुर्बा, नँ साचो ज़ परमेस्‍वरए ओज़ा, इस्राएलीराए राजा ज़ नल्‍यो,” लिद है ओदोक ते,
JOH 1:50 येसुए, “काता नेभारा सीं खँक ङारँःनिउ है ङादींवए, ङालाई नयुँ उहुबो रो? साचो ज़ छींनी आवकिन घ्योःव घ्योःव ङाय़ेनर ब रँःन्‍या नले,” है दाद,
JOH 1:51 फरी प़ाइँलाई है यादोक्‍यो, “ङा जेलाई साचो है ङादाचिज़्‍या, जे तछा नम फैसिउ स़ोनो ननी परमेस्‍वरए ओचाकर्‍यार ङा मिँ मिन्‍सिउए ङाल्‍योक हुव य़ेन बाव य़ेन यादोज़्‍याव रँःन्‍या जेले।”
JOH 2:1 गालीलल याहुव स़ोंलात काना यादोज़्‍याव नाखारल तोबो बिह्‍या ओल्‍यो। येसुए ओआमा ब नक ज़ उलिज़्‍याव।
JOH 2:2 येसुलाई ब उसिसरास नो बिह्‍यालाव भत्‍यारल याराखुल्‍केर।
JOH 2:3 नो बिह्‍याल याओज़्‍याव दाखमद्य ओखेमोत येसुए ओआमाए येसुलाई, “नलाव याओज़्‍याव दाखमद्य खेम्‍द ले,” है ओदोक ते,
JOH 2:4 येसुए ओआमालाई, “अ माँ, आव य़ेनत ङालाई है तादाँयो, ङाबेला माताताए,” है दोक्‍यो।
JOH 2:5 नकिन येसुए ओआमाए नक लिज़्‍याव नोकोररालाई, “येसुए जो है दाचिज़्‍याव, हो ज़ दोच्‍यो,” है यादोक्‍यो।
JOH 2:6 हाः बेलाक नल यहूदीराए याचलन मिताव चोखोइसिन्‍या ऱी नैन्‍या दस पन्‍ध्र सेमे बाज़्‍याव लुँए घागरीर छ गोता यारानैज़्‍याव।
JOH 2:7 येसुए नलाव य़ेन दाज़्‍यावरालाई, “आव घागरी भरिल ऱी तसी तसी जैचिके,” है ओरादोव प़ाइँना नोराए घागरी भरी यारासब्‍याल्‍केर।
JOH 2:8 हाःत ज़, “आव ऱी आनी तुपुरू क्‍यो·द भत्‍यारलाव य़ेन चलैज़्‍यावलाई लाँदिचिके,” है ओरादोक ते, नोराए लाँदिकेर।
JOH 2:9 नो य़ेन चलैज़्‍यावए नो दाखमद्य जैसिउ ऱी ओदारक, आः ङमो दाखमद्य कातानी ओताव लिन्‍या मासैंक्‍यो। नो ताव ऱी गप्‍ज़्‍यावराए वाज़ यासैंज़्‍याव। है जैद नो य़ेन चलैज़्‍यावए ब्‍याहोल्‍यालाई खुल्‍द,
JOH 2:10 “उपुर्कावराए ते चाव दाखमद्य भरी ङ़ादा ज़ भाःज़्‍यार, ओपाहुनाराए कुधु याओवत वाज़ जाँ छ्यावाकाव याराएज़्‍यार। नँ ते प़ाइँरानी चाव छींङ पै साँचिद ननैज़्‍याव ओल्‍यो,” है दोक्‍यो।
JOH 2:11 येसुए आव प़ाइँरानी उस॰कताव ओसरेस गालीललाव काना नाखारल सतैंक्‍यो। निताव अचम्‍बलाव ओसक्तीर रँःद उसिसराए येसुलाई यायुँ हुप्‍के।
JOH 2:12 नकिन येसु ओआमा, ओभाइ स़ोनो उसिसरास कफर्नहुम सहरल बाद जाँवा पै लिकेर।
JOH 2:13 नाः बेलाक यहूदीराए निस्‍तार पर्ब हुनाद उलिज़्‍याव। नोए उजूँनी येसु यरूसलेमदा बाके।
JOH 2:14 यरूसलेमलाव ध्‍यान झ़िमल मिँराए घेंर, बेधार, परिवार यो·व ज़ यारानैज़्‍याव स़ोनो पैसा त़ोज़्‍यावर ब नल च़ुसिद यालिज़्‍याव रँःद,
JOH 2:15 येसुए उकुइत तोबो च़ें रैद कोर्रा जैद नो ध्‍यान झ़िमलाव लँःज़्‍यावर यो·ज़्‍यावरालाई रीःद याबेधा याघेंरास यापले·क्‍यो। पैसा त़ोज़्‍यावराए यातेबलर पल्‍तैद्याद यापैसार सोभोद याएक्‍यो।
JOH 2:16 परिवा यो·ज़्‍यावरालाई, “जे जेसमानरास आनी पुलुस्‍द बाचिके। आव ङाबाबुए उझ़िमलाई काराव जे पसल जेजैज़्‍याव?” है यादोक्‍यो।
JOH 2:17 हाःत ज़ उसिसराए नो धर्मसास्‍त्रलाव सर्सिउ पाँलाई चेतैकेर। नलाव सर्सिउ आव ज़, “अ परमेस्‍वर, नझ़िमए जूँनी ङादोज़्‍याव ध्‍यावनाए ङायुँल मेंः माँःती चाँःज़्‍या।”
JOH 2:18 नाःत ज़ यहूदीराए यास़ेरराए येसुलाई, “नँ इताव य़ेन दान्‍या परमेस्‍वरनी नदैव ताकिन गेलाई तोबो सरेस सतैंद्याव ताके,” है यादोक ते,
JOH 2:19 येसुए, “जे आव ध्‍यान झ़िमलाई तैःचिकेदा, ङा स़ोंलात सोचोइन्‍या ङाले,” है ओरादोक ते,
JOH 2:20 नोराए, “आव ध्‍यान झ़िमलाई छयालीस बर्सत गेजैके, कै जैद नँ स़ोंलात नसोचोइधुरिज़्‍याव?” है दोकेर।
JOH 2:21 खाली नो ध्‍यान झ़िम ते येसुए ओल ओक्‍याँए उजूँनी है ओरादोव ची।
JOH 2:22 येसु सिउनी ओसोवत वाज़ उसिसराए नो है ओरादोव भरी य़ाका दोकेर। ननी ज़ नो धर्मसास्‍त्रलाव सर्सिउ पाँ स़ोनो येसुए ओपाँव पाँ भरी थ·रैद पतिकेर।
JOH 2:23 निस्‍तार पर्ब उहुवत येसु यरूसलेमल उलिज़्‍याक, अचम्‍बलाव ओदोव य़ेनर रँःद नलाव मिँर कुधुए येसुलाई यायुँ हुप्‍के।
JOH 2:24 हैदी ब ओल येसुए मिँराए यायुँलाव पाँ भरी ओसैंज़्‍यावए नोराए याभर मादोक्‍यो।
JOH 2:25 सुए ज़ येसुलाई ‘आव मिँ इताव लिज़्‍या’ है दाव ओमापरिज़्‍याव, ओल ज़ प़ाइँए युँलाव पाँ ओसैंज़्‍याव।
JOH 3:1 यहूदीराए घ्योःव याकचरीलाव निकोदेमस यादोज़्‍याव फरिसी तोबो उलिज़्‍याव।
JOH 3:2 नो मिँ रील अलगज़ा येसुए ल्‍योक हुद, “गुर्बा, नँ परमेस्‍वरए ल्‍योनी गे मिँरालाई परमेस्‍वरए ओपाँ पैना हुव ज़ लिन्‍या गेसैंज़्‍या। नँस परमेस्‍वर ओमाल्‍यो ताकिन नँ निताव य़ेनर कातानी नदोधुरिज़्‍याव,” है ओदोक ते,
JOH 3:3 येसुए, “नँलाई साचो है ङादींज़्‍या, मिँ साःरोल ओमाजर्मिवा पै परमेस्‍वरए ओराज्‍या मारँःधुव,” है दोक्‍यो।
JOH 3:4 निकोदेमसए फरी, “मिँ सेर्द कै जैद फरी उजर्मिज़्याव? सैं फरी ओआमाए उफूल पसिद उजर्मिज़्‍याव?” है ओदोक ते,
JOH 3:5 येसुए, “फरी साचो है ङादींज़्‍या, जो मिँ ऱीनी स़ोनो परमेस्‍वरए उपुरूसनी माजर्मिए, नो मिँ परमेस्‍वरए ओराज्‍याल मापसिधुइ।
JOH 3:6 है जैद मिँनी जर्मिज़्‍याव मिँ ज़ ताज़्‍या, परमेस्‍वरए उपुरूसनी जर्मिज़्‍याव परमेस्‍वरए उमीं ज़ ताज़्‍या।
JOH 3:7 ङा नँलाई, ‘साःरोल जर्मिउ ताके,’ है ङादींवनी अचम्‍ब तातानी।
JOH 3:8 बतास मनी जोदा बान्‍या उयुँ लिज़्‍या, होदा ज़ बाज़्‍या। नोए ओर्गा ते थास्‍ज़्‍या, खाली कातानी उहुज़्‍याव, काना ओबाज़्‍याव लिन्‍या सुए ज़ मासैंर। परमेस्‍वरए उपुरूसनी जर्मिज़्‍यावर ब हितावर ज़ ताज़्‍यार,” है दोक्‍यो।
JOH 3:9 हाःत ज़ निकोदेमसए, “आव नपाँज़्‍याव कै जैद ओताज़्‍याव?” है ओदोक ते,
JOH 3:10 येसुए, “नँ इस्राएलीराए यागुर्बा ताद ब नाः कै जैद नमासैंज़्‍याव?
JOH 3:11 ङा नँलाई साचो है ङादींज़्‍या, गे जो गेसैंज़्‍या हो ज़ गेपाँज़्‍या, जो गेरँःज़्‍या हो ज़ गेरासथैज़्‍या। खाली ङा ङासैंव ङारँःव भरी है ङादाचिक जे जेमापतिनाए।
JOH 3:12 आव मानुवाताव पाँ है ङादाचिक जेमापतिनाकिन, स्‍वर्गताव पाँर है ङादाचिक झन कातानी जेपतिरिज़्‍याव?
JOH 3:13 स्‍वर्गनी हुव ङा मिँ मिन्‍सिउकिन आव मानुवानी स्‍वर्गत बाव सु ज़ माले।
JOH 3:14 किताव मोसाए बनल पितले घुल जैद तङ्गैद ओरायो, हिताव ज़ ङा मिँ मिन्‍सिउ ब तङ्गैसिउ परिरिज़्‍या।
JOH 3:15 है जैद जो जोराए ङालाई यायुँ हुप्‍ज़्या, हो होराए अजम्‍बरी जुनी दैन्‍या लेर।
JOH 3:16 “परमेस्‍वरए आव मानुवाताव मिँरालाई उयुँ नाद तोबोका तोबो ओज़ा ब याएक्‍यो। है जैद जोए नो ओज़ालाई उयुँ हुप्‍ज़्‍या, नो कै मै माताद अजम्‍बरी जुनी दैन्‍या ले।
JOH 3:17 परमेस्‍वरए ओज़ालाई मानुवाताव मिँरालाई खेम्‍न्‍याए जूँनी उपरींव माःक, बुरू मानुवाताव मिँरालाई बाँचैन्‍याए जूँनी उपरींव ची।
JOH 3:18 है जैद जोए ओज़ालाई उयुँ हुप्‍ज़्‍या, होए परमेस्‍वरए ओसजा दैन्‍या माले। फरी जोए परमेस्‍वरए ओज़ालाई उयुँ माहुबे, होए तोबोका तोबो परमेस्‍वरए ओज़ालाई उयुँ ओमाहुबोए ज़ परमेस्‍वरनिकाव सजाल परिधुके।
JOH 3:19 परमेस्‍वरए मिँरालाई ओराफाल्‍ज़्‍याव आनी ज़ तारिज़्‍या — आव मानुवाल ओज़ाए ओक्‍याँत ज़गै जैद नैव। मिँर ते झन याय़ेन माचाव ओतावए नो ज़गैलाई देखा चुम चुमोलाई यामन लागिके।
JOH 3:20 जोए माचाव य़ेन दोज़्‍याव, होए ज़गैवलाई सोद ‘ङापाहा बाया’ लिद ओछ्याचेए ज़गैवदा माहुइ।
JOH 3:21 फरी जोए साचो य़ेन दोज़्‍याव, होए ‘ङाय़ेन भरी परमेस्‍वरनी ज़ ताव घरैंःक’ लिद ज़गैवदा हुज़्‍या।”
JOH 3:22 आव भरी ओतावत येसु उसिसरास यहूदिया खन्‍दल बाद नोरास जाँवा पै नल ज़ लिद नलाव मिँरालाई ब ऱील यासछैंक्‍यो।
JOH 3:23 यूहन्‍नाए मनी सालीम छ्योकाव एनोन यादोज़्‍याव पोक ओरासछैंज़्‍याव, काराव ल्यो ताकिन नक ऱी सर्बा ज़ उलिज़्याव। मिँर ओल्‍योक हुद ऱील यासछैंसिज़्‍याव।
JOH 3:24 हाःक पै यूहन्‍नालाई झ्‍यालखानाल यामाझाःताव।
JOH 3:25 नो बेलाक ज़ यूहन्‍नाए उसिसर तोबो यहूदीस सछैंसिन्‍याए जूँनी याखर्लेसिज़्‍याव।
JOH 3:26 नोर यूहन्‍नाए ल्‍योक हुद, “गुर्बा, यर्दन भै होफताव नँस लिज़्‍याव सतैंद नयासिउ मिँए ब ऱील यासछैंज़्‍याव। झन प़ाइँ होए ओल्‍योक ज़ बाज़्‍यार,” है यादोक ते,
JOH 3:27 यूहन्‍नाए, “परमेस्‍वरए ओमाएकिन सुए ज़ काता ज़ मादैधुव।
JOH 3:28 नोए उजूँनी ङापाँव पाँ जे ब थैद जेनै। हाःक ज़, ‘ङा ख्रीस माःक, ङा ते होए ओङ़ा ओङ़ा परींसिउ मिँ,’ है ङादाचिउ ची।
JOH 3:29 किताव बिह्‍याल ल़ुज़ालाई लाँज़्‍याव ब्‍याहोल्‍या ताज़्‍या, स़ोनो ब्‍याहोल्‍याए ओलाप्‍क च्‍याँःसिज़्‍यावए ओनैं ब्‍याहोल्‍याए ओर्गा थैद रेंज़्‍या, हिताव ज़ ङा मनी आव पाँर थैद ङायुँ होलाँ ताज़्या।
JOH 3:30 ओल झन यादा ज़ तानाव परिज़्‍या, ङा ते मेदा ज़ तानाव परिज़्‍या।
JOH 3:31 “रूतिन हुव प़ाइँए तर्ताव ज़ ताज़्‍या। आव मानुवाताव मिँर ते मानुवानी ज़ ताद मानुवाताव पाँ ज़ दोज़्‍यार। स्‍वर्गनी हुव प़ाइँए ङ़ैताव ज़ लिज़्‍या।
JOH 3:32 नोए स्‍वर्गताव ओथैव उरँःव भरी प़ाइँलाई ज़ ओरासथैक ओपाँ सुए ज़ मापतिर।
JOH 3:33 ओपाँ भैंःज़्‍यावर ते परमेस्‍वर साचो ज़ लिज़्‍या लिद यासही छाप याझाःव मिताव ज़ लिज़्‍या।
JOH 3:34 काराव ल्‍यो ताकिन परमेस्‍वरए उपरींव मिँ परमेस्‍वरए ओपाँ वाज़ पाँज़्‍या। नोए ओक्‍याँत परमेस्‍वरए ओल उपुरूस मागोइँद धोल पोगोल ज़ थुदिज़्‍याव।
JOH 3:35 है जैद स्‍वर्गताव ओबाबुए ओज़ालाई मया दाद प़ाइँ उकुइत ज़ याद नैव।
JOH 3:36 जो जोराए ओज़ालाई यायुँ हुप्‍ज़्‍या, नोर अजम्‍बरी जुनी दैन्‍यार ताज़्‍यार। फरी जो जोराए ओज़ाए ओपाँ माभैंःर, नोराए अजम्‍बरी जुनी दैन्‍या मालेर, झन परमेस्‍वरए उरिस चोवर ताज़्यार,” है यादोक्‍यो।
JOH 4:1 ऱील सछैंज़्‍याव यूहन्‍नाकिन येसुए मिँर कुधु ओल्‍योदा जैद ऱील यासछैंज़्‍याव दी लिन्‍या फरिसीराए थैकेर।
JOH 4:2 हैदी ब सछैंज़्‍याव ओल येसुए ते माःक, उसिसराए ची।
JOH 4:3 है जैद येसुए निताव पाँ सैंद यहूदियालाई ऱास्‍द ङ़ादाङाव उलिज़्‍याव गालीलदा ज़ बाके।
JOH 4:4 नदा बान्‍या सामरिया खन्‍दलाव घ्याँ बाव उपरिज़्‍याव।
JOH 4:5 नलाव घ्याँ ओबाज़्‍याक सामरियालाव तोबो सुखार यादोज़्‍याव नाखारल हुके। नो नाखार याकूबए ओज़ा योसेफलाई ओयो पो छ्योक उलिज़्‍याव।
JOH 4:6 नक याकूबए ओघोव कुवा ब उलिज़्‍याव। है जैद येसु बाद बाद बनै उथलिउए अधमर लावाक नो कुवाक ऩासिके।
JOH 4:7 हाःत ज़ सामरियालाव तोबो मेंमा ऱी गप्‍ना हुके। येसुए नोलाई, “ङालाई ऱी तुपुरू ओन्‍या याव ताके,” है दोक्‍यो।
JOH 4:8 नो बेलाक उसिसर नाखार जीदा ज़्‍यान्‍यार लँःना बाद यालिज़्‍याव।
JOH 4:9 नो मेंमाए येसुलाई, “नँ यहूदी ताद कै जैद ङा सामरी मेंमाए ङाकुइताव ऱी ओव नपैंज़्‍याव?” है दोक्‍यो। हाः बेलाक यहूदीर सामरीरास काता सर्‍यो ज़ यामानैज़्‍याव।
JOH 4:10 येसुए नोलाई, “परमेस्‍वरए नँलाई याव ओपैंज़्‍याव ब नमासैंए, नँस ऱी ऩिज़्‍यावलाई ब नमासरेसे। होलाई नसरेसो ताकिन नँ ची होस ऩिन्‍या नल्‍यो। होए नँलाई जींदो ऱी यान्‍या ओल्‍यो,” है ओदोक ते,
JOH 4:11 नो मेंमाए, “प्रभु, नँस ऱी गप्‍न्‍या जा ब माले, कुवा ब बनै पतालल लिज़्‍या। कातानी नो जींदो ऱी नयाँरिज़्‍याव?
JOH 4:12 आव कुवा ते गेपुर्खा याकूबए ओघोव ची। आव कुवानी ज़ ओज़ार स़ोनो ओहार बेधाराए ऱी याओज़्‍याव। काता नँ याकूबकिन ब घ्योःव नलिज़्‍याव रो?” है ओदोक ते,
JOH 4:13 येसुए, “आव कुवानी ऱी ओज़्‍याव फरी ब छोस्‍न्‍या ले।
JOH 4:14 ङा ङाराएज़्‍याव ऱी ओज़्‍यावर ते खर्क ज़ छोस्‍न्‍या मालेर। बुरू नो ऱी नोए ओक्‍याँत परीज़्याव ऱीमुल स्यासो तान्‍या ले। नोए ज़ अजम्‍बरी जुनील सकेस्‍न्‍या ले,” है ओदोक ते,
JOH 4:15 नो मेंमाए, “हो ची ताकिन्‍दा प्रभु, ङालाई नो ऱी याव ताके। ङा फरी खर्क ज़ ऱी ब छोस्‍न्‍या ङामाले, गप्हुव ब परिन्‍या माले,” है दोक्‍यो।
JOH 4:16 नकिन येसुए नोलाई, “नँ नझ़िमक बान्‍केदा, नरेलाई खुल्‍द रैके,” है ओदोक ते,
JOH 4:17 नो मेंमाए, “ङा ङारे ज़ माले,” है ओदोक ते, येसुए, “ ‘ङारे माले’ है नलिज़्‍याव ते साचो ज़।
JOH 4:18 नरेर पाँच जना ताधुकेर। आज्‍याल नँस लिज़्‍याव ब नरे माःक। नो नपाँ ते साचो ज़,” है दोक्‍यो।
JOH 4:19 नो मेंमाए, “प्रभु, नँ ते अगमबक्ता ची नल्‍यो लिद ङासरेस्‍निके।
JOH 4:20 गे सामरीराए गेसाखा पुर्खाराए भाःकिन ज़ आव दाँदात पुजा दोहुकेर। जे यहूदीर ते ‘परमेस्‍वरए उपुजा यरूसलेमल वाज़ दान्‍या ताए’ है जेलिज़्‍या,” है ओदोक ते,
JOH 4:21 येसुए नोलाई, “अ माँ, ङालाई पतिनायो, तछा स्‍वर्गताव ङाबाबुए ओसेवा आव दाँदात स़ोनो यरूसलेमल वाज़ तान्‍या माले।
JOH 4:22 जे सामरीराए परमेस्‍वरए ओसेवा मासैंद ज़ जेदोज़्‍या, गे ते सैंद ज़ गेदोज़्‍या। बाँचिन्‍या येम यहूदीराए ल्‍योनी वाज़ ताज़्‍या।
JOH 4:23 खाली तोबो बेला हुज़्‍या, नो हुद ब ले। नो बेलाक साचोस परमेस्‍वर बाबुए ओसेवा दोज़्‍यावर साचो युँनी ज़ दान्‍या लेर। परमेस्‍वर बाबुए ओसेवा दान्‍यार नितावर ज़ याखिम्‍ज़्‍याव।
JOH 4:24 परमेस्‍वर ते पुरूस ज़। है जैद ओसेवा दोज़्‍यावराए साचो युँनी ज़ दोज़्‍यार।”
JOH 4:25 हाःत ज़ नो मेंमाए, “ख्रीस यादोज़्‍याव मसीह हुरिज़्‍या लिन्‍या ङासैंज़्‍या। हो हुद आव पाँ भरी ओपो·स ज़ गेलाई पलास्‍द्यान्‍या ले,” है ओदोक ते,
JOH 4:26 येसुए नोलाई, “नँस पाँज़्‍याव ङा हो ज़,” है दोक्‍यो।
JOH 4:27 हाःत ज़ येसुए उसिसर नाखारनी केस्‍हुकेर। येसु तोबो मेंमास ओपाँज़्‍याव रँःद अचम्‍ब ताकेर। खाली येसुलाई, “काता नखिम्‍ज़्‍याव, काताए जूँनी जिन्पाँज़्‍याव?” सुए ज़ है मादोधुकेर।
JOH 4:28 हुकिन नो मेंमाए ओघागरीर ख्यानैद नाखारदा बाद नलाव मिँरालाई,
JOH 4:29 “हुचिके, तोबो मिँलाई गेचिऊना। होए ङादोव य़ेन भरी ज़ है दाँक्‍यो। सैं ख्रीस नो ज़ ओताव?” है ओरादोक ते,
JOH 4:30 नो नाखारलाव मिँर ननी पुलुस्‍द येसुए ल्‍योक बाकेर।
JOH 4:31 नो मिँर येसुए ल्‍योक यामाकेस्‍हुद ज़ उसिसराए, “गुर्बा, आव गेरैव ज़्‍यावर ज़्‍युके,” है यादोक ते,
JOH 4:32 येसुए, “जे जेमासैंज़्‍याव ज़्‍यावर ङास ज़ लिज़्‍या,” है ओरादोक ते,
JOH 4:33 उसिसर या याल, “सुवाराए ओललाई ज़्‍यावर रैद यायो सैं?” है यालिज़्‍याव थैद,
JOH 4:34 येसुए नोरालाई, “ङा ङाज़्‍याव ते ङालाई परींज़्‍यावए उयुँलाव मिताव य़ेन दाद, ओय़ेन सयो·न्‍या ची।
JOH 4:35 जे है जेलिज़्‍या, ‘एँःलाव गेझाःव धुर चार मैना छींनी वाज़ क्‍या·न्‍या ताज़्‍या।’ ङा ते है ङादाचिज़्‍या, एँःदा भाल्‍सिचिके, क्‍या·न्‍या बेला ताद ले।
JOH 4:36 आख मनी नो क्‍या·ज़्‍यावए ओजेला दैज़्‍याव, ओदोव य़ेन मनी अजम्‍बरी जुनी पै रहिन्‍या ले। है जैद वास्‍ज़्‍याव स़ोनो क्‍या·ज़्‍यावनी तछा सिप ज़ रेंन्‍या लिनी।
JOH 4:37 याझाःज़्याव आहाती साचो ज़ थ॰रिज़्‍या — ‘तोबोए वास्‍ज़्‍याव, तोबोए क्‍या·ज़्‍याव।’
JOH 4:38 हिताव ज़ ङा मनी जेलाई जे काता ज़ जेमादोव पोल क्‍या·ना परींद ङानैचिए। छुतराए यादोव य़ेननी जेजुँ दैन्‍या जेले,” है यादोक्‍यो।
JOH 4:39 नो सामरी मेंमाए नो नाखारलाव मिँरालाई, “येसुए ङा ङादोव य़ेन भरी प़ाइँ ज़ पाँद्याँक्‍यो,” है ओरादोवए नलाव सामरीर कुधुए ज़ येसुलाई यायुँ हुप्‍के।
JOH 4:40 है जैद येसुए ओल्‍योक हुद, “नँ गेस ज़ ल्‍यो ताके,” है यादोक ते, येसु यास ज़ ऩेला लिके।
JOH 4:41 नोर येसुए ओपाँ थैद झन कुधुए ज़ यायुँ हुप्‍के।
JOH 4:42 नो मेंमालाई, “अब ते नँ नपाँ थैद वाज़ माःक, आव गेर्नाए ज़ ओपाँ थैद, ‘आव ज़ ओल्‍यो मानुवाताव मिँरालाई बाँचैना हुव ख्रीस’ लिन्‍या थ·रैद गेयुँ हुप्‍के” है दोकेर।
JOH 4:43 येसु नल ओल्‍यो ऩेला ओतावत ननी पुलुस्‍द गालीलदा बाके।
JOH 4:44 ओल येसुए मनी है उलिज़्‍याव, “अगमबक्तालाई ओनाखारलाव मिँराए सुए ज़ ओमान नैद माएर।”
JOH 4:45 येसु गालीलल उहुवत नलावराए ओमान नैद्याद चावस नैकेर। नलावराए ङ़ादा यरूसलेमलाव पर्बत येसुए ओदोव य़ेन भरी रँःद यानैज़्‍याव।
JOH 4:46 येसु फरी गालीललाव काना यादोज़्‍याव नाखारल हुके। नल ज़ ङ़ादा ऱीलाई दाखमद्य ओजैव। नाः बेलाक ज़ राजाए तोबो ओकर्मचारीए ओज़ा कफर्नहुम सहरल ओजोरो उहुज़्याव।
JOH 4:47 है जैद नो कर्मचारीए, ‘येसु यहूदियानी गालीलल हुद ले दी’ लिन्‍या थैद, येसुए ल्‍योक बाद सिउ पैंज़्याव ओज़ालाई सगराँन्‍याए जूँनी ओलस लाँव ओपैंज़्‍याक,
JOH 4:48 येसुए नोलाई, “जे सरेसर स़ोनो अचम्‍बलाव य़ेनर जेमारँःवा जेमापतिए,” है ओदोक ते,
JOH 4:49 नो कर्मचारीए, “प्रभु, ङाज़ा उस॰ ओमाफ्या·द तखेप हुद्याव ताके,” है दोक्‍यो।
JOH 4:50 नाःत ज़ येसुए नोलाई, “बान्‍के, नज़ा गराँधुके,” है ओदोव प़ाइँना नो मिँ उयुँ हुप्‍द उझ़िमदा बाके।
JOH 4:51 नो ओबाज़्‍याक ज़ ओनोकोरर झ़िमनी ओलस दैसिहुद, “नज़ा गराँधुके,” है यादोक ते,
JOH 4:52 होए, “नो खा बेलाकिन ओगराँव?” है ओरादोक ते, “आझ्‍यो लाकाव एक बजेकिन ओजोरोए ऱास्‍क्‍यो,” है दोकेर।
JOH 4:53 नाःत ज़ नो कर्मचारीए, “येसुए ङालाई ‘नज़ा गराँधुके’ है ओदाँव बेला ब नाःक ज़ ओल्‍यो,” लिन्‍या सैंक्‍यो। है जैद ओल स़ोनो उझ़िमलावरास येसुलाई यायुँ हुप्‍के।
JOH 4:54 येसु यहूदियानी हुद गालीलल अचम्‍बलाव य़ेन ओदोव आवस ऩेखेप ताके।
JOH 5:1 नकिन यहूदीराए पर्ब तोबो उलिज़्‍याव। होए उजूँनी येसु ननी पुलुस्‍द यरूसलेमदा बाके।
JOH 5:2 यरूसलेम सहर बारिसिउ भार्नानी पुलुस्‍न्‍या तोबो ‘बेधा य़ाम’ उलिज़्‍याव। होए ओङ़ाक तोबो दह उलिज़्‍याव। नोलाई हिब्रू खामनी ‘बेथेस्‍दा’ है यादोज़्‍याव। नो दह घ्वाँगिल पाँच गोता छान्‍या झाःसिउ उलिज़्‍याव।
JOH 5:3 नल याजोरो हुवर, याखँ याकुइ सिउर, काना दूँदाराए [ऱी खा बेलाक छल्‍किके लिद कींद यानैज़्‍याव।
JOH 5:4 नो दहल कैताक कैताक परमेस्‍वरए ओचाकर्‍या हुद ऱी ओचलैज़्‍याव। नो ऱी ओचलैव बेलाक जो ङ़ात नो दहल पसिज़्‍या, हो जो मिताव बेथा उलिदी ब ओगराँज़्‍याव।]
JOH 5:5 नल अरतीस बर्स भरी ओजोरो हुव तोबो मिँ उलिज़्‍याव।
JOH 5:6 येसुए नोलाई घ्याँसिद उलिज़्‍याव रँःद, ‘आव ते कुधु बर्स ची ताके’ लिन्‍या सैंद नोलाई, “नँ सगराँसिउ नपैंज़्‍याव रो?” है ओदोक ते,
JOH 5:7 नो ओजोरो हुवए, “प्रभु, सगराँसिउ ते ङापैंज़्‍या। खाली ऱी उछल्‍किक ङालाई दहल सुए ची झाःनाव केदा? ङा धो धो ङाबाज़्‍याक ज़ ङालाई बलेंद छुत पसिज़्‍या,” है ओदोक ते,
JOH 5:8 येसुए, “ङा नँलाई है ङादींज़्‍या, च्‍याँःसिद नतैंर सिम्‍द बान्‍के,” है ओदोक ते,
JOH 5:9 बेहार ज़ नो मिँ गराँद ओतैंर सिम्‍द बाके। नो छ्याम ऩासिन्‍या छ्याम ओल्‍यो।
JOH 5:10 है जैद यहूदीराए यास़ेरराए नो गराँवलाई रँःद, “आछिम ऩासिन्‍या छ्याम ची, नँ इताव गुर घुर्न्‍या माताए,” है यादोक ते,
JOH 5:11 नो गराँवए, “ङालाई सगराँज़्‍यावए ज़, ‘नतैंर सिम्‍द बान्‍के,’ है ओदाँव ची,” है ओरादोक ते,
JOH 5:12 “नँलाई निताव है दाज़्‍याव सु?” है दोकेर।
JOH 5:13 खाली नो गराँव मिँए ओललाई सगराँज़्‍यावलाई ब ओमासरेस्‍ज़्‍याव। नो बेलाक मिँर बनै काला मुलु यातावए येसु ङ़ादा ज़ ननी पुलुस्‍द ओबाधुव ओल्‍यो।
JOH 5:14 छींनी येसुए नो गराँवलाई ध्‍यान झ़िमल रँःद, “नँ आख ते नगराँके, आकिनी फरी पाप तादोयो, म़ानी झन ज़ माचाव तान्‍या नले,” है ओदोक ते,
JOH 5:15 नो मिँ झन ननी पुलुस्‍द बाद यहूदीराए यास़ेररालाई, “ङालाई सगराँव ते येसु ची ओल्‍यो,” है यादोनाक्‍यो।
JOH 5:16 येसुए ऩासिन्‍या छ्याम मनी निताव य़ेन ओदोवए यहूदीराए यास़ेरर नाःकिन ज़ उखिरी पसिनाकेर।
JOH 5:17 येसुए फरी नोरालाई, “ङाबाबुए आःपै ओय़ेन दाव ज़ नैज़्‍याव। है जैद ङा मनी ङादोज़्‍या,” है यादोक्‍यो।
JOH 5:18 नो पाँ थैद नोर झन ज़ मचिद, “आवए ‘ऩासिन्‍या छ्याम य़ेन दान्‍या माताए’ लिन्‍या कानुनलाई वाज़ ओख्याव माःक, परमेस्‍वरलाई ज़ ‘ङाबाबु’ है लिद ओल मनी परमेस्‍वरस सम सम जैसिज़्‍या। आवलाई ते सैःव ज़ परिए,” है लिकेर।
JOH 5:19 येसुए नोरालाई, “ङा जेलाई साचो है ङादाचिज़्‍या, ङा ओज़ाए ङाबाबुए ओदोज़्‍याव य़ेन ङामारँःवा पै ङानी काता ज़ ङामादोधुइ। ङाबाबुए जोनी दोज़्‍याव, ङा मनी हुनी वाज़ ङादोज़्‍या।
JOH 5:20 ङाबाबुए ङा ओज़ालाई मया दाँज़्‍याव। है जैद ओदोज़्‍याव य़ेन भरी ङालाई मनी सतैंद्याँज़्‍याव। जे आव जेरँःज़्यावकिन झन घेप्‍पा य़ेन सतैंद्यान्‍या ले। ननी झन ज़ अचम्‍ब तान्‍या जेले।
JOH 5:21 किताव ङाबाबुए सिउरालाई सोचोइद जींदो याजैज़्‍याव, हिताव ज़ ङा मनी जोलाई ङायुँ लिज़्‍या होलाई अजम्‍बरी जुनील बान्‍या ङाजैज़्‍या
JOH 5:22 है जैद, ङाबाबुए सुए ओय़ेन ज़ माफालो, नो फाल्‍न्‍या भरी ङा ओज़ाए ङाकुइत ज़ याद नैनाव।
JOH 5:23 ननी ज़ किताव ङाबाबुए ओमान नैद याएज़्‍याव, हिताव ज़ ङा ओज़ाए ङामान ब प़ाइँए नैद्यान्‍या लेर। जोए ङामान नैद मायाँव, होए ङालाई परींज़्‍याव ङाबाबुए ओमान ब नैद मायो।
JOH 5:24 “ङा जेलाई साचो है ङादाचिज़्‍या, जोए ङापाँ थैद ङालाई परींज़्‍यावलाई उयुँ हुप्‍ज़्‍या, नोए अजम्‍बरी जुनी दैद सजाल परिन्‍या माले। नो मिँ सिउल गनिसिउनी पुलुस्‍द साःरो जुनी दैन्‍याल गनिसिज़्‍या।
JOH 5:25 फरी ब जेलाई साचो है ङादाचिज़्‍या, नो बेला हुज़्‍या, हुद मनी ले, जोए परमेस्‍वरए ओज़ाए ओर्गा ओथैकिन, नो मिँ सिउ उलिदी ब साःरोल सैंसिन्‍या ले।
JOH 5:26 किताव ङाबाबुए ल्‍योनी पोहोन ताज़्‍या, ङा ओज़ालाई मनी नो पोहोन यान्‍या जैद नैनाव।
JOH 5:27 है जैद ङा ओलनी ज़ मिँ मिन्‍सिद ङाहुवए मिँरालाई फाल्‍न्‍या हक ब ङाकुइत ज़ याद नैनाव।
JOH 5:28 आव ङापाँत अचम्‍ब ताताच्‍यो। तछा इताव बेला हुरिज़्‍या, खादरल लिज़्‍यावराए मनी ङा ओज़ाए ङार्गा थैद,
JOH 5:29 सैंसिद खादरनी पुलुस्‍न्‍या लेर। नोरानी चाव य़ेन दाव भरी अजम्‍बरी जुनील बान्‍या लेर, माचाव य़ेन दाव भरी सजाल बान्‍या लेर,” है ओरादोज़्‍याव।
JOH 5:30 “ङा ङानी ते काता ज़ ङामादोधुइ। ङाबाबुए ल्‍योनी किताव ङाथैज़्‍या, हितावनी ज़ ङाफाल्‍ज़्‍या। नो ङाफाल्‍ज़्‍याव भरी न्‍यायस ङादोज़्या, काराव ल्‍यो ताकिन नो ङादोज़्‍याव ङा ङापैंज़्‍यावनी माःक, ङालाई परींज़्‍यावए ओपैंज़्‍याव मितावनी वाज़ ङादोज़्‍या।
JOH 5:31 ङाजूँनी ङा ज़ ङापाँकिन, नो पाँ साचो माथ॰रिए।
JOH 5:32 ङाजूँनी पाँद ङालाई थ·रैद्याज़्‍याव छुत ज़ लिज़्‍या। होए ङाजूँनी पाँद ओयाँज़्‍याव भरी साचो थ॰रिज़्‍या।
JOH 5:33 जे ऱील सछैंज़्‍याव यूहन्‍नाए ल्‍योक मिँर जेरापरींक मनी, नोए ब ङाजूँनी साचो थ॰रिउ पाँ ज़ पाँके।
JOH 5:34 हैदी ब मिँनी हुज़्‍याव पाँनी ते साचो ङामाथ॰रिए। अइज़ जे यूहन्‍नाए ओरायो गोहाई रैद बाँचिर सैं लिद होए उमिन तखेप ङाहाइज़्‍या।
JOH 5:35 यूहन्‍ना पलाँ जैज़्‍याव बत्ती स्‍यासो ओल्‍यो। जे नोए ओजैव पलाँवल जाँवा पै रेंद जेलिके।
JOH 5:36 खाली ङास लिज़्‍याव गोहाई यूहन्‍नाकिन ब घेप्‍पा लिज़्‍या। ङाबाबुए ङालाई दाव उपरींनाज़्‍याव य़ेन ङा ङादोज़्‍या, आव य़ेनरानी ज़ परमेस्‍वरए उपरींव ज़ ओल्‍यो लिद सरेस्‍नाज़्‍यार।
JOH 5:37 ङालाई परींज़्‍याव ङाबाबुए मनी ङाजूँनी ओल ज़ पाँद याँज़्‍याव। जे होए ओर्गा ब जेमाथैताए, ओललाई ब जेमारँःताए।
JOH 5:38 जे ते झन परमेस्‍वरए ओपाँ ब जेयुँल जेमानैए, उपरींव ओज़ालाई ब जेयुँ माहुबे।
JOH 5:39 जे अजम्‍बरी जुनी दैन्‍याए जूँनी धर्मसास्‍त्रल खिमो ज़ जेनैज़्‍या। नो जेखिम्‍ज़्‍याव धर्मसास्‍त्रए ज़ ङाजूँनी गोहाई याचिज़्‍याव।
JOH 5:40 हितावत ब नो जुनीए उजूँनी ङाल्‍योदा हुव जेमाभैंःए।
JOH 5:41 “ङा मिँराए ल्‍योनी घेप्‍पा मिन ते ङामाखिमे।
JOH 5:42 खाली जे परमेस्‍वरए ल्‍योदा जेयुँ ज़ माले लिन्‍या ङासैंज़्‍या।
JOH 5:43 ङा ङाबाबुए उमिननी ज़ हुद ङाले, जे ते झन ङालाई जेसोनाज़्‍या। छुत सुवार या यामिननी याहुकिन होरालाई ते झन यामानर नैद्याद जेरासुम्‍ज़्‍या।
JOH 5:44 जे तोबोका तोबो परमेस्‍वरए ल्‍योनिकाव दैन्‍या मान माखिम्‍द जे जेल मान खिम्‍ज़्‍यावराए कातानी ची परमेस्‍वरए उपरींवलाई जेयुँ उहुप्‍रिज़्‍याव?
JOH 5:45 है जैद तछा परमेस्‍वर ङाबाबुए ओङ़ाक जेगल्‍ती थ·रैद्यान्‍या ङा पाँव मापरिए। जे जेखत पले·द्यान्‍या जेयुँ जेसुहुप्‍ज़्‍याव मोसा ज़ तान्‍या ले।
JOH 5:46 जे मोसाए ओपाँलाई साचो जेयुँ उहुप्ज़्‍याव ताकिन ङालाई मनी जेयुँ हुप्‍न्‍या ओल्‍यो। होए ङा ङाजूँनी ज़ सर्द ओनैज़्‍याव।
JOH 5:47 खाली जे होए ओसरो पाँलाई जेयुँ ओमाहुबो प़ाइँना, ङा ङापाँत झन कातानी ची जेयुँ उहुप्‍रिज़्‍याव?”
JOH 6:1 आव पाँ भरी ओतावत येसु गालील दह होफत बाके। नो दहलाई तिबेरियास मनी है यादोज़्‍याव।
JOH 6:2 येसुए अचम्‍बलाव य़ेनर ओदोज़्‍याव, याजोरो हुवरालाई ओरासगराँज़्‍याव मनी यारँःज़्‍यावए ओल जोदा जोदा बाज़्‍या मिँर ब उछीं उछीं बनै माहोल्‍या ज़ याबाज़्‍याव।
JOH 6:3 हो बेलाक येसु उसिसरास तोबो दाँदात बाद च़ुसिकेर।
JOH 6:4 नो बेलाक यहूदीराए निस्‍तार पर्ब हुनाद उलिज़्‍याव।
JOH 6:5 येसुए ओल्‍योदा हुज़्‍याव माहोल्‍यार रँःद तोबो उसिस फिलिपलाई, “गे आव माहोल्‍यारालाई ज़्‍यावर कान्‍नी लँःद रैद्यान्‍या?” है दोक्‍यो।
JOH 6:6 खाली आव पाँ फिलिपलाई जाँचिन्‍याए जूँनी वाज़ ओल्‍यो। येसुए ओल दाव ओपैंज़्‍याव य़ेन ते ङ़ादा ज़ थ·रैद ओनैज़्‍याव।
JOH 6:7 हाःत ज़ फिलिपए, “आः कुधुलाई तके तके वाज़ गेराएदी ब चाँदीए सिक्‍का ऩेसयवाए ब थैंन्‍या माले,” है ओदोज़्‍याक ज़,
JOH 6:8 छुत उसिस सिमोन पत्रुसए ओभाइ अन्‍द्रियासए येसुलाई,
JOH 6:9 “आक तोबो छोर्‍यास पाँच गोता चिकाए भरेस स़ोनो ऩेब्‍लो ङाँः लिज़्‍या। खाली नाःकाव मिँरालाई काता ची ओतारिज़्‍याव?” है ओदोक ते,
JOH 6:10 येसुए उसिसरालाई, “नो माहोल्‍यारालाई बाँल च़ुसिउ यारापरींचिके,” है यादोक्‍यो। नल छी खार्ल च़ुसिन्‍या पो बनै चाव उलिज़्‍याव। नो माहोल्‍यारानी खेपार वाज़ पाँच हजारा यालिज़्‍याव।
JOH 6:11 नोर याच़ुसिउत येसुए नो पाँच गोता भरेस रैद धन्‍याबाद चरैःद ‘नो च़ुसिद लिज़्‍यावराए घज़्‍युरक’ लिद भाःद याएक्‍यो। फरी नो ऩेब्‍लो ङाँःनिलाई मनी हिताव ज़ जैद भाःद याएक्‍यो। नोराए याफू तसी ज़्‍युकेर।
JOH 6:12 नोर ज़्‍याद यावाँःवत उसिसरालाई, “नो ज़्‍यादकाव यासय़ेलोर तके ब माख्यानैद दुप्‍चिके,” है ओरादोक ते,
JOH 6:13 नोराए यासय़ेलो पाँच गोता चिका भरेसए उकुतुरार यादुप्‍क बाह्र झुर्नु ताके।
JOH 6:14 मिँराए येसुए इताव अचम्‍बलाव य़ेनर ओदोव रँःद, “आव मानुवात हुरिज़्‍या है यालिज़्याव अगमबक्ता साचो आव ज़ ची ओल्‍यो,” है लिकेर।
JOH 6:15 है जैद नोराए येसुलाई करस याराजा जैव यापैंज़्‍याव सैंद येसु ननी पुलुस्‍द ओबातङ ज़ तोबो दाँदात बाके।
JOH 6:16 नम ओझ्यानाक येसुए उसिसर दह छ्योक झरिद,
JOH 6:17 दोङ्गाल पसिद दह होफताव कफर्नहुमदा बाव यापैंज़्‍याव। खाली नम झ्याद चुम चुम ताद ब येसु ओमाहुवए या वाज़ दोङ्गाल पसिद बाकेर।
JOH 6:18 याबाज़्‍याक बनै घ्योःव बतास हुद ऱीलाई बनै ओहर्लैज़्‍याव।
JOH 6:19 हितावल ज़ यादोङ्गालाई छ किलोमितरवा यालाँवत येसु ऱी तर्त तर्त याल्‍योदा उहुज़्‍याव रँःद बनै छे·केर।
JOH 6:20 हाःत ज़ येसुए, “ताछे·च्‍यो, ङा ची,” है ओरादोक ते,
JOH 6:21 नोर यायुँर होलाँ ताद दोङ्गाल हुव एकेर। याकेस्‍न्‍या पोक ब बेहार ज़ केस्‍केर।
JOH 6:22 हो पराःती नो याराख्यानैव माहोल्‍याराए, ‘दह आफत दोङ्गा तोबो वाज़ ओल्‍यो, नो दोङ्गाल ओल येसु ते माबाए, उसिसर वाज़ याबाव’ लिन्‍या यासैंज़्‍याव।
JOH 6:23 येसुए धन्‍याबाद चरैःद मिँरालाई भरेस भाःद ओरायो पोक तिबेरियास सहरनी छुत दोङ्गार ब हुकेर।
JOH 6:24 नो मिँराए येसुलाई स़ोनो उसिसरालाई काङ्क ज़ यामारारँःवए नोर दोङ्गाल पसिद कफर्नहुमदा येसुलाई साप्‍नाकेर।
JOH 6:25 नोराए दह होफत येसुलाई यारँःव प़ाइँना, “गुर्बा, नँ खा बेलाक आङ नहुव?” है यादोक ते,
JOH 6:26 येसुए, “ङा जेलाई साचो है ङादाचिज़्‍या, जे ङालाई अचम्‍बलाव ङाय़ेनर रँःद जेसाप्‍नाज़्‍याव माःक, नो जेफू तसी भरेस ज़्‍याव जेदैवनी जेसाप्‍नाज़्‍याव ची।
JOH 6:27 निताव ज़्‍याद खेम्‍न्‍या भरेसलाई ताखिम्‍च्‍यो, बुरू अजम्‍बरी जुनील लाँज़्‍याव ज़्‍याव खिम्‍चिके। निताव ज़्‍याव ङा मिँ मिन्‍सिउए वाज़ यान्‍या ङाले। होए उजूँनी ज़ परमेस्‍वर ङाबाबुए ङालाई खतैद नैनाव।”
JOH 6:28 हाःत ज़ नो मिँराए, “हिताव ताकिन गे परमेस्‍वरए उयुँलाव मिताव य़ेन काता दान्‍या की?” है यादोक ते,
JOH 6:29 येसुए, “जे परमेस्‍वरए ओय़ेन दान्‍या आव ज़ — परमेस्‍वरए उपरींव ओज़ालाई जेयुँ सुहुप्‍चिके,” है यादोक्‍यो।
JOH 6:30 नोराए, “नँ गेलाई गेयुँ सुहुप्‍द्यान्‍या ताकिन, किताव नसरेस सतैंद नयासिरिज़्‍याव, किताव य़ेन नदोरिज़्‍याव?
JOH 6:31 भाःक गेसाखा पुर्खाराए नाङग्‍या पात्‍या बनल मन्‍न ज़्‍युकेर। धर्मसास्‍त्रल मनी इताव सर्सिउ लिज़्‍या, ‘मोसाए मिँरालाई स्‍वर्गनी हुव ज़्‍याव याएक्‍यो,’ ” है यादोक ते,
JOH 6:32 येसुए नोरालाई, “हैदी ब ङा जेलाई साचो है ङादाचिज़्‍या, जेलाई स्‍वर्गनी हुज़्‍याव साचो ज़्‍याव मोसाए ओयाचिज़्‍याव ते माःक, साचो ज़्‍याव याज़्‍याव ते परमेस्‍वर ङाबाबुए ची।
JOH 6:33 ङाबाबु परमेस्‍वरए ओराएज़्‍याव स्‍वर्गनी हुव ज़्‍याव नो ज़ मानुवाताव मिँरालाई बाँचैज़्याव,” है ओरादोक ते,
JOH 6:34 नोराए, “हो ची ताकिन्‍दा प्रभु, गेलाई मनी नो ज़्‍याव याव ताके,” है यादोक ते,
JOH 6:35 येसुए नोरालाई, “मिँरालाई बाँचैज़्‍याव ज़्‍याव ङा ज़। ङाल्‍योक हुज़्‍याव करेन्‍या माले, ङालाई उयुँ हुप्‍ज़्‍याव खर्क ज़ ऱी छोस्‍न्‍या माले।
JOH 6:36 खाली ङा जेलाई है दाद ङानैचिए, जे ङालाई रँःद ब जेयुँ ज़ माहुबे।
JOH 6:37 हैदी ब ङाबाबु परमेस्‍वरए ओयाँज़्‍याव भरी ङाल्‍योदा ज़ हुज़्‍यार। ङाल्‍योक हुज़्‍याव भरी ङा सुलाई ज़ ङामारासोवोले।
JOH 6:38 स्‍वर्गनी ङा ङापैंज़्‍याव मिताव सयो·न्‍याए जूँनी ङाहुव माःक, ङालाई परींज़्‍याव परमेस्‍वरए उयुँलाव मिताव सयो·ना ङाहुव ची।
JOH 6:39 ङालाई परींज़्‍यावए ओपैंज़्‍याव आव ज़ — ङालाई ओयाँज़्‍याव भरिरानी ङा सुलाई ज़ मासम़ैद परमेस्‍वरए ओराफाल्‍रिज़्‍याव छ्याम नोरालाई सिउनी सोचोइन्‍या ङाले।
JOH 6:40 है जैद परमेस्‍वर ङाबाबुए उयुँ आव ज़ — ङा ओज़ालाई रँःद यायुँ हुप्‍ज़्‍यावरालाई संसार खेम्‍न्‍या छ्याम ङा नोरालाई सिउनी सोचोइद अजम्‍बरी जुनील लाँन्‍या ङाले।”
JOH 6:41 येसुए ‘स्‍वर्गनी हुव ज़्‍याव ङा ज़’ है ओरादोवए यहूदीर झन रूम्‍रूमैद,
JOH 6:42 “आवए कै जैद ‘ङा स्‍वर्गनी हुव’ है उलिज़्‍याव? आवए ओबाबु ओआमानिलाई गे ज़ गेरासरेस्‍ज़्‍या। आव येसु ते योसेफए ओज़ा ज़ सानी,” है यालिक ते,
JOH 6:43 येसुए, “जे काराव जेरूम्‍रूमैज़्‍याव?
JOH 6:44 ङालाई परींज़्‍याव ङाबाबु परमेस्‍वरए ङाल्‍योदा हुन्‍या युँ जैद ओमाराएकिन सु ज़ ङाल्‍योक माहुधुर। ङाल्‍योदा हुज़्‍यावरालाई ते आव मानुवा ओखेमो छ्याम सोचोइन्‍या ङाले।
JOH 6:45 अगमबक्ताराए यासरोल मनी इताव सर्सिउ लिज़्‍या, ‘प़ाइँलाई ओल परमेस्‍वरए ज़ यापैरिज़्‍याव।’ जोए ङाबाबु परमेस्‍वरए ओपाँ थैद सिऊसिज़्‍या, हो ङाल्‍योक हुज़्‍या।
JOH 6:46 परमेस्‍वर ङाबाबुलाई सुए ज़ मारँःतार। खाली ओलनी हुव ङा ओज़ाए वाज़ रँःद ङानै।
JOH 6:47 ङा जेलाई साचो है ङादाचिज़्‍या, जोए ङालाई उयुँ हुप्‍ज़्‍या, होस अजम्‍बरी जुनी लिज़्‍या।
JOH 6:48 प़ाइँलाई बाँचैज़्‍याव ज़्‍याव ङा ज़।
JOH 6:49 जेसाखा पुर्खार ते बनल मन्‍न याज़्‍युदी ब सिद बाकेर।
JOH 6:50 स्‍वर्गनी हुव ज़्याव ज़्‍युज़्‍याव ते खर्क ज़ सिन्‍या माले।
JOH 6:51 नो स्‍वर्गनी हुव ज़्‍याव ङा ज़। आव ज़्‍याव ज़्‍युज़्‍याव मिँ खर्क ज़ सिन्‍या माले। आव मानुवाताव मिँरालाई बाँचैन्‍याए जूँनी याव ङापैंज़्‍याव ज़्याव आव ङाक्‍याँ ज़।”
JOH 6:52 आव पाँत यहूदीर या याल खर्लेसिद, “आव मिँए कै जैद गेलाई ओक्‍याँ याद सव़ाँव ओपैंज़्‍याव ओताव?” है यालिज़्‍याव थैद,
JOH 6:53 येसुए, “ङा जेलाई साचो है ङादाचिज़्‍या, जे परमेस्‍वरनी हुव मिँ मिन्‍सिउए ओक्‍याँत जेकरे जेमासैःकिन, उझीत जेऱीछो जेमासैःकिन अइज़ सिउ स्‍यासोर जेताज़्‍या।
JOH 6:54 जोए फरी ङाक्‍याँत ओकरे सैःज़्‍याव, ङाझीत उऱीछो सैःज़्‍याव, हो अजम्‍बरी जुनील गनिसिउ लिज़्‍या। खेम्‍न्‍या छ्याम नोलाई सोचोइन्‍या ङाले।
JOH 6:55 काराव ल्‍यो ताकिन आव ङाक्‍याँ साचो ज़्‍यान्‍या ज़्‍याव ज़, ङाझी साचो ओन्‍या ऱी ज़।
JOH 6:56 ङाक्‍याँत ओकरे सैःज़्‍याव, ङाझीत उऱीछो सैःज़्‍याव, हो ङास ज़ लिज़्‍या, ङा ओलस ज़ ङालिज़्‍या।
JOH 6:57 किताव ङालाई परींज़्‍याव ङाबाबुए ल्‍योनी बाँचिउ ज़ ङालिज़्या, हिताव ज़ ङाक्‍याँत ओकरे सैःज़्‍याव मनी ङानी ज़ बाँचिन्‍या ले।
JOH 6:58 है जैद ङा ज़ स्‍वर्गनी हुव ज़्याव। नो ज़्‍याव जेसाखा पुर्खाराए याज़्‍युव ज़्याव मिताव ते माःक। नोर नो ज़्याव ज़्‍याद माबाँचिर। आव है ङालिज़्‍याव ज़्याव ज़्‍युज़्‍याव ते खर्क ज़ सिन्‍या माले।”
JOH 6:59 आव पाँ भरी येसुए कफर्नहुमलाव धर्मसास्‍त्र झ़िमल ओरासथैज़्याक ज़ है ओल्‍यो।
JOH 6:60 आव पाँ थैद येसुए उछींत बाज़्‍यावर कुधुए, “आव पाँ बनै नाल क़्याव लिज़्‍या, सुए ची ओथैधुरिज़्‍याव?” है लिद
JOH 6:61 यागन्‍गनैज़्‍याव येसुए सैंद नोरालाई, “आव पाँए जेयुँ केःद ओयाचिज़्‍याव रो?
JOH 6:62 हिताव ताकिन ङा मिँ मिन्‍सिउ जुनी ङाहुव होदा ज़ तछा ओल्‍द ङाबाज़्‍याव जेरँःनाक झन हो छ्याम कै जेलिरिज़्‍याव?
JOH 6:63 क्‍याँलाई बाँचैज़्‍याव पाखाताव रैंःज़्‍यावए माःक, परमेस्‍वरए उपुरूसए ची। जेलाई है ङादाचिउ पाँल मनी उपुरूस उलिज़्यावए हो पाँए ज़ जेबाँचिज़्या।
JOH 6:64 खाली आव पाँ है ङादाचिदी ब जे ख्वार आव पाँत जेयुँ ज़ माहुबे,” है यादोक्‍यो। येसुए ओललाई यायुँ माहुप्‍ज़्‍यावर ङ़ादाकिन ज़ सरेस्‍द ओरानैज़्‍याव। ओललाई धोका याव पैंज़्‍यावलाई मनी ङ़ादाकिन ज़ सरेस्‍द ओनैज़्‍याव।
JOH 6:65 फरी नोरालाई, “है जैद ज़ जेलाई है ङादाचिउ, ङाबाबु परमेस्‍वरए सुवारालाई ङाल्‍योदा हुन्‍या युँ जैद ओमाराएकिन सु ज़ ङाल्‍योदा हुधुन्‍या मालेर,” है ओरादोज़्‍याव।
JOH 6:66 निताव ओपाँए येसुस बाज़्‍यावर कुधुए ज़ ओललाई ऱास्‍द ओल्‍द बाकेर।
JOH 6:67 हाःत ज़ येसुए बाह्र जना उसिसरालाई, “जे मनी बाव जेपैंज़्‍याव रो?” है ओरादोक ते,
JOH 6:68 सिमोन पत्रुसए, “प्रभु, गे नँलाई ऱास्‍द सुए ल्‍योदा बान्‍या? अजम्‍बरी जुनील बान्‍या पाँ ते नँस वाज़ लिज़्‍या।
JOH 6:69 परमेस्‍वरनी हुव छैंव ओज़ा मनी नँ ज़ लिद सरेस्‍द गेयुँ हुप्‍द ज़ ले,” है ओदोक ते,
JOH 6:70 येसुए नोरालाई, “जे बाह्र जनालाई छाँतिज़्‍याव ङा ज़। हैदी ब जेखार्ल तोबो ते सैतानसकाव लिज़्‍या,” है यादोक्‍यो।
JOH 6:71 येसुए आव पाँ सिमोन इस्‍करियोतए ओज़ा यहूदाए उजूँनी है ओरादोव। नो मिँ बाह्र जना उसिसरानी ओललाई धोका याज़्‍याव मिँ ज़ ओल्‍यो।
JOH 7:1 आव भरी ओतावत येसु गालील जीदा आदा होदा लिनाके। यहूदियालाव यहूदीराए यास़ेरराए ओललाई सैःव यापैंज़्‍यावए नजीदा नोराए ल्‍योनी ओतर्किज़्‍याव।
JOH 7:2 नो बेलाक यहूदीर सालकाव तखेप छापरा जैद यामानिज़्‍याव पर्ब हुनाद उलिज़्‍याव।
JOH 7:3 है जैद येसुए ओभाइराए, “नँ आव पोलाई ऱास्‍द यहूदियाल बान्‍के। हो ताकिन नसिसराए नङ मनी नदोज़्‍याव य़ेनर रँःन्‍या लेर।
JOH 7:4 उमिन सथासो पैंज़्‍याव मिँए मनी सुए ज़ ओय़ेन म़ोंद मादोव। नँ इताव य़ेनर दोव नपैंकिन मिँ भरिराए ङ़ाक सतैंसिउ ताके,” है दोकेर।
JOH 7:5 काराव ल्‍यो ताकिन नो ओभाइराए मनी ओललाई यायुँ ओमाहुप्‍ज़्‍याव।
JOH 7:6 येसुए नोरालाई, “ङा निताव य़ेन दान्‍या बेला माहुताए, खाली जे जेजूँनी ते बेला एकम्‍न्‍या लिज़्या।
JOH 7:7 जेलाई आव मानुवाताव मिँराए सुए ज़ मासोचिर। ङा फरी आव मानुवाताव मिँराए माचाव याय़ेन सतैंद ङाराएज़्‍यावए ङालाई सोनाज़्‍यार।
JOH 7:8 जे आव पर्ब मानिना बाचिके, ङा आख ङामाबा, ङाबेला माहुताए,”
JOH 7:9 है दाद ओल गालीलल ज़ लिके।
JOH 7:10 हैदी ब येसुए ओभाइर पर्ब मानिना याबाव छींनी ओल मनी सुए यामासैंद होदा ज़ बाके।
JOH 7:11 हो बेलाक पर्बत यहूदीराए यास़ेरराए, ‘येसु काङ्क उलिज़्‍याव?’ लिद सापो ज़ यालिज़्‍याव।
JOH 7:12 नो माहोल्‍याराए मनी येसुए उजूँनी कुधु ज़ यापाँज़्‍याव। ख्वाराए, “नो मिँ बनै चाव लिज़्‍या,” है यालिज़्‍याव, ख्वाराए फरी, “माःक, नोए ते झन मिँर तँदा ज़ यालाँज़्‍याव,” है यालिज़्‍याव।
JOH 7:13 हैदी ब यहूदीराए यास़ेरराए छ्याचेए सुए ज़ पाखात मापाँधुकेर।
JOH 7:14 नो पर्ब ऩेला स़ोंला ओतावत येसु ध्‍यान झ़िमल बाद परमेस्‍वरए ओपाँ ओरासथैज़्‍याव।
JOH 7:15 ओपाँ थैद यहूदीराए यास़ेरर अचम्‍ब ताद, “आव मिँ प़रि ज़ माप़रिउए कै जैद नाः ओसैंज़्‍याव?” है यालिज़्‍याव
JOH 7:16 येसुए थैद, “आव ङासथैचिज़्‍याव पाँ ङा ङापाँ माःक, ङालाई परींज़्‍यावए ओपाँ ची।
JOH 7:17 परमेस्‍वरए उयुँलाव मिताव य़ेन दोव पैंज़्‍यावए वाज़ आव पाँ परमेस्‍वरए ओपाँ सैं ङा ङापाँ ओताव लिन्‍या प़ाल्‍धुज़्‍याव।
JOH 7:18 ओलनी पाँज़्‍यावए ते ओल उमिन सथासो पैंज़्‍याव। ओललाई परींज़्‍यावए उमिन सथासो पैंज़्‍याव ते ओखत माल्‍यो सोजो मिँ ज़ लिज़्‍या।
JOH 7:19 जे परमेस्‍वरए ओकानुन मोसाए ल्‍योनी जेदैके, खाली जे नो कानुनलाव य़ेन ते जेमादोके। झन ङालाई सैःव जेपैंज़्‍या,” है ओरादोक ते,
JOH 7:20 नो माहोल्‍याराए, “नँ दासा बिसा ताद नले, नँलाई सुए सैःव ओपैंज़्‍याव?” है यादोक ते,
JOH 7:21 येसुए नोरालाई, “जे काराव ऩासिन्‍या छ्याम तोबो य़ेन ङादोक हार जेमानिज़्‍याव?
JOH 7:22 मोसाए जेलाई क्‍याल्‍न्‍या सरेस जैन्‍या कानुन याद नैचिउ। तान्‍या ते नो कानुन मोसाए ओयाचिउ ते माःक, जेसाखा पुर्खाराए यायाचिउ ची। नो सरेस जैन्‍या ऩासिन्‍या छ्याम उपरिकिन जे मनी ते हो छ्याम क्‍याल्न्‍या सरेस जेराजैज़्‍या।
JOH 7:23 निताव मोसाए ओकानुनलाई माबिरैन्‍याए जूँनी ऩासिन्‍या छ्याम क्‍याल्‍न्‍या सरेस जैन्‍या ओताज़्‍याव ताकिन, ऩासिन्‍या छ्याम ङा तोबो मिँलाई ङासगराँक जे काराव जेरिस ओचोज़्‍याव?
JOH 7:24 जे मिँ रँःद माःक, साचो युँनी फाल्‍नाच्‍यो।”
JOH 7:25 हाःत ज़ यरूसलेमलाव ख्वा ख्वा मिँराए, “नो सैःव यापैंज़्‍याव मिँ आव माःक रो?
JOH 7:26 झन निताव प़ाइँए ङ़ाक माम़ोंसिद ओपाँक ब सुए ज़ घाइ मादोर। सैं गेस़ेरराए मनी ‘गेलाई बाँचैना हुव ख्रीस आव ज़’ है लिद याथ·रैज़्‍याव ओताव?
JOH 7:27 साचो ख्रीस ओताव ताकिन ते आनी उहुव लिन्‍या सुए ज़ मासैंखेरहो। गे ते आवलाई आनी हुव ज़ लिन्‍या प़ाइँए गेसैंज़्‍या,” है लिकेर।
JOH 7:28 हाःत ज़ येसुए ध्‍यान झ़िमल ओर्गा बनै सघ्‍योःद अइ लिद यासथैक्‍यो, “जे ङालाई ब जेसरेस्‍नाज़्‍या, आनी उहुव लिन्‍या ब जेसैंज़्‍या। हैदी ब ङानी ङाहुव माःक, ङालाई परींव ओल साचो परमेस्‍वरए ज़। नोलाई ते जेमासरेसे।
JOH 7:29 ङा ते ङासरेस्‍ज़्‍या। ङा ओल्‍योनी ज़ ङाहुके, ङालाई परींज़्‍याव ब ओल ज़,” है ओरादोव प़ाइँना ज़,
JOH 7:30 नोराए क्‍योःव पैंकेर। खाली ओबेला ओमाहुतावए सुए ज़ हिउ माझाःधुकेर।
JOH 7:31 हितावत ब नलाव लिज़्‍यावर कुधुए ज़ येसुलाई यायुँ हुप्‍द, “नो हुरिज़्‍या है यालिज़्‍याव ख्रीस उहुवत, आव मिँकिन घेप्‍पा य़ेन ओदोधुरिज़्‍याव रो?” है लिकेर।
JOH 7:32 नो मोहोल्‍याराए येसुए उजूँनी इताव खास खासनी खुस खुस यापाँज़्‍याव फरिसीराए थैद नोर मुख्या पुजारीरास खैद ओललाई क्‍योःना ध्‍यान झ़िमलाव पाल्‍यार यारापरींकेर।
JOH 7:33 नो बेलाक ज़ येसुए, “ङा जाँवा पै वाज़ जेस ङालिरिज़्‍या, नकिन ङालाई परींज़्‍यावए ल्‍योदा ङाबारिज़्‍या।
JOH 7:34 हाःकिन ङालाई जेसाप्नादी ब दैधुन्‍या जेमाले, ङालिज़्‍याव पोल जे हुधुन्‍या ब जेमाले,” है ओरादोक ते,
JOH 7:35 यहूदीराए यास़ेरर या याल है लिकेर, “आव मिँ काताङ म़ोंसिनाव ओपैंज़्‍याव ब्‍याँ? ‘ङालाई दैधुन्‍या जेमाले’ है लिज़्‍या। सैं आव देसलाई ऱास्‍द ग्रीकराए खार्लाव चितराँ पुतराँ ताव यहूदीराए खार्ल लिनाद नोरालाई ओल्‍योदा ओराजैनारिज़्‍याव ओताव?
JOH 7:36 नोए, ‘ङालाई जेसाप्‍नादी ब दैधुन्‍या जेमाले, ङालिज़्‍याव पोल ब हुधुन्‍या जेमाले,’ है उलिज़्‍यावए ओअर्थ काता ओताव?” है लिकेर।
JOH 7:37 पर्ब स्‍यो·न्‍या, प़ाइँरानी घेप्‍पा छ्याम, येसुए प़ाइँराए ङ़ाक च्‍याँःसिद ओर्गा बनै सथास्‍द, “छोस्‍ज़्‍याव मिँ ङाल्‍योक हुद उऱीछो ओसैःहुवक।
JOH 7:38 धर्मसास्‍त्रलाव सर्सिउ मिताव, जोए ङालाई उयुँ हुप्‍ज़्‍या, होए उयुँनी जींदो ऱीमुल मिताव पुलुस्‍न्‍या ले,” है लिद यासथैक्‍यो।
JOH 7:39 नो जींदो ऱी है उलिज़्याव ओललाई यायुँ हुप्‍ज़्‍यावराए छैंव पुरूस यादैरिज़्‍यावए जूँनी ज़ ओपाँज़्‍याव। हाः बेलाक पै येसु स्‍वर्गदा ओमाबातावए छैंव पुरूस परमेस्‍वरए ओमाराएताव।
JOH 7:40 हाःत ज़ नो माहोल्‍यारानी ख्वा ख्वाराए येसुए ओपाँ चावस थैद, “साचो आव ज़ ओल्‍यो, हुरिज़्‍या है यालिज़्‍याव अगमबक्ता,” है लिकेर।
JOH 7:41 ख्वाराए फरी, “नो ते परमेस्‍वरनी बाँचैना हुरिज़्‍या है यालिज़्‍याव ख्रीस ज़,” है लिकेर। ख्वाराए फरी, “ख्रीस ताकिन गालीलनी ते हुव मापरिन्‍या।
JOH 7:42 ख्रीस दाऊदए ओथोल जर्मिद दाऊदए ओनाखार बेथलेहेमनी हुन्‍या ले लिद धर्मसास्‍त्रल सर्सिउ लिज़्‍या सानी।”
JOH 7:43 है जैद येसुए उजूँनी नो माहोल्‍यार यापाँ माखैद कुधु खर्लेसिकेर।
JOH 7:44 ख्वाराए ते ओललाई क्‍योःव यापैंज़्‍याव, खाली सुए ज़ हिउ माझाःकेर।
JOH 7:45 छींनी नो फरिसीर स़ोनो मुख्या पुजारीराए येसुलाई क्‍योःना यारापरींव ध्‍यान झ़िमलाव पाल्‍यार अइज़ ओल्‍द याहुवए फरिसीराए, “येसुलाई काराव क्‍योःद जेमारैव?” है यारादोक ते,
JOH 7:46 नो पाल्‍याराए, “नोए ओपाँज़्‍याव मिताव ते आःपै खर्क ज़ गेमाथैताए,” है यारादोक ते,
JOH 7:47 नो फरिसीराए, “जे मनी काता घरी नोए ओपाँ थैद तँदा जेबाधुव।
JOH 7:48 गे फरिसीर स़ोनो स़ेरर ते नोए ओपाँत तोबो ब गेमाबाए सानी।
JOH 7:49 इताव मोसाए ओपाँ मासैंज़्‍याव याफ्या·हुव माहोल्‍याराए वाज़ नोए ओपाँ थैज़्‍यार,” है लिद यारासिङार्केर।
JOH 7:50 हाःत ज़ नक लिज़्‍याव फरिसीरानी येसुलाई ङ़ादा तखेप दैना हुज़्‍याव नो निकोदेमसए,
JOH 7:51 “गे गेकानुनल जो मिँलाई तादी ब नोए ओपाँ माफाल्‍द ओय़ेनताव ओगल्‍ती माथ·रैद कै जैद नोलाई सजा यान्‍या ओताज़्‍याव?” है ओरादोक ते,
JOH 7:52 नोराए, “काता नँ मनी नोसकाव गालीललाव ज़ रो? अगमबक्ता गालीलनी सु ज़ हुन्‍या माले, अछादी नँ ज़ धर्मसास्‍त्रल चावस चिऊके,” है दोकेर।
JOH 7:53 [हाःत ज़ मिँ भरी सु सु याझ़िमदा बाकेर।
JOH 8:1 ओल येसु ते जैतून दाँदात बाके।
JOH 8:2 हो पराःती छकाल्‍न्‍या घग ज़ फरी ध्‍यान झ़िमल उहुवत मिँर बनै माहोल्‍या ओल्‍योक दुप्‍सिहुकेर। हाःत ज़ येसु च़ुसिद ओपाँ यासथैक्‍यो।
JOH 8:3 नो बेलाक ज़ सास्‍त्रीर स़ोनो फरिसीराए तोबो पातर्नी य़ेनल क्‍योःसिउ मेंमालाई रैद प़ाइँराए ङ़ाक सच्‍याँद,
JOH 8:4 येसुलाई, “गुर्बा, आव मेंमाए पातर्नी य़ेन ओदोज़्‍याक ज़ क्‍योःद नल्‍योक रैद गेनै।
JOH 8:5 मोसाए ओकानुननी ते निताव य़ेन दाज़्‍यावलाई लुँए झेःद सैःन्‍या लिज़्‍या, नँ कै नलिज़्‍या नी?” है दोकेर।
JOH 8:6 आव पाँ येसुलाई क्‍योःन्‍याए जूँनी अइज़ अखतैं थाँद यानैज़्‍याव। खाली येसुए नोरालाई घाइ मादाद घोम लिद ओआङुलाए नामक सर्क्‍यो।
JOH 8:7 नोराए घरी पाला यासुधिक येसु च्‍याँःसिद, “जेनी जोए काता पाप ज़ मादोव, होए ज़ आव मेंमालाई प़ाइँरानी ङ़ात लुँए ओझेःवक,” है दाद,
JOH 8:8 फरी ब घोम लिद नामक सर्क्‍यो।
JOH 8:9 नो पाँ थैद नोर यास़ेरनी यास़ेरनी तोबो तोबोनी ओपो·स ज़ बाकेर। नो भरी याबावत नो मेंमा स़ोनो येसुनी वाज़ रहिकिनी।
JOH 8:10 येसु फरी ब च्‍याँःसिद नो मेंमालाई, “अ माँ, नँलाई रैज़्‍यावर काना याबाव? सुए ज़ नपाहा झाःद यामाईंधुव रो?” है ओदोक ते,
JOH 8:11 नो मेंमाए, “हैज़ प्रभु, ङापाहा झाःद्यान्‍या सु ज़ मापुलुस्‍केर,” है दोक्‍यो। हाःत ज़ येसुए, “ङा ब नखत पले·द ङामाईंए, नझ़िमदा बान्‍के। आव माचाव नय़ेन फरी तादोयो,” है दाद परींक्‍यो।]
JOH 8:12 येसुए फरी मिँरालाई, “ङा ज़ आव मानुवाताव ज़गै। ङाछींत हुज़्‍याव मिँ चुम चुमोल बाव मापरिए, अजम्‍बरी जुनील लाँज़्‍याव ज़गैवल ताज़्‍या।”
JOH 8:13 हाःत ज़ नलाव फरिसीराए निताव पाँ थैद, “नँ नजूँनी नँ ज़ गोहाई नएज़्‍यावए नगोहाई अऩाकलाव ज़ लिज़्‍या,” है यादोक ते,
JOH 8:14 येसुए, “ङा ङाजूँनी ङा ज़ गोहाई ङाएदी ब नो पाँ अऩाकलाव माले, काराव ल्‍यो ताकिन ङा वाज़ कान्‍नी ङाहुव, काना ङाबारिज़्‍याव लिन्‍या ङासैंज़्‍या। जे ते नो भरी जेमासैंए।
JOH 8:15 जे ते मिँराए गोइँनी वाज़ छ्याप जेलैनाज़्या। ङा ते सुलाई ज़ छ्याप ङामारालैए।
JOH 8:16 खाली ङा निताव य़ेन ङादोदी ब नो साचो ज़ थ॰रिज़्‍या, काराव ल्‍यो ताकिन नो य़ेन ङा वाज़ ङामादोए, ङालाई परींज़्‍याव ङाबाबुए मनी ङास ज़ दोज़्‍याव।
JOH 8:17 जे जेकानुनल मनी ‘ऩेब्‍लोए निपाँ ओखैकिन वाज़ नो पाँ साचो थ॰रिज़्‍या’ लिद सर्सिउ लिज़्‍या।
JOH 8:18 हिताव ज़ ङा ङाजूँनी पाँज़्‍याव तोबो ङा ज़, तोबो ङालाई परींज़्‍याव ङाबाबु ज़,” है ओरादोक ते,
JOH 8:19 फरिसीराए, “हुकी, नबाबु काङ्ङ उलिज़्‍याव की?” है यादोक ते, येसुए, “जे ना ङालाई जेसरेस्‍नाज़्या, ना ङाबाबुलाई जेसरेस्‍ज़्या। जे ङालाई जेसरेस्‍नाव ताकिन ङाबाबुलाई मनी सरेस्‍न्‍या जेल्‍यो,” है यादोक्‍यो।
JOH 8:20 येसुए आव पाँ भरी ध्‍यान झ़िमलाव भिती याचरैःज़्‍याव पोक ज़ ओरासथैज़्‍याव। हितावत ब ओबेला ओमाहुतावए सुए ज़ माक्‍योःधुकेर।
JOH 8:21 येसुए फरी नोरालाई, “ङा जाँवाक आनी ङाबारिज़्‍या। हाः बेलाक ङालाई जेसाप्‍नादी ब जेपापल ज़ सिन्‍या जेले। ङा ङाबाज़्‍याव पोङ जे हुधुन्‍या जेमाले,” है ओरादोक ते,
JOH 8:22 यहूदीराए यास़ेरर या याल, “आवए काता ओपाँज़्‍याव इताव — ‘ङा ङाबाज़्‍याव पोङ जे हुधुन्‍या जेमाले,’ है लिज़्‍या? सैं ओलनी ज़ सैःसिउ ओपैंज़्‍याव ओताव?” है यालिज़्‍याव।
JOH 8:23 येसुए फरी, “जे मेलावर ज़, ङा रोताव ज़। जे आव मानुवातावर, ङा ते आव मानुवाताव माःक।
JOH 8:24 है जैद ज़ जेलाई है ङादाचिउ, जे जेपापल ज़ सिन्‍या जेले। ‘ङा हो ज़’ है दाद ब जेमापतिनाव प़ाइँना नो जेपापनी कातानी उस्‍किउ जेदैरिज़्‍याव?” है ओरादोक ते,
JOH 8:25 नोराए फरी ब, “हुकी, नँ सुकी?” है यादोक ते, येसुए, “ङाजूँनी जेलाई ङ़ादाकिन ज़ है दाव ज़ ङानैचिज़्या सानी।
JOH 8:26 ङानी ताकिन ते जेलाई है दान्‍या ब कुधु ज़ लिज़्‍या, जेखत पले·द्यान्‍या ब कुधु ज़ लिज़्‍या। खाली ङालाई परींज़्‍यावए ल्‍योनी ङाथैव भरी वाज़ आव मानुवाताव मिँरालाई ङारासथैज़्‍या। होए ओपाँ थ॰रिउ ज़ लिज़्‍या,” है यादोक्‍यो।
JOH 8:27 खाली येसुए नो भरी ओबाबु परमेस्‍वरए उजूँनी ओपाँव नोराए अझ मनी माबुझिकेर।
JOH 8:28 येसुए फरी ब है यादोक्‍यो, “जे ङा मिँ मिन्‍सिउलाई क्रुसत जेतङ्गैनारिज़्याव छ्याम वाज़ ‘ङा हो ज़’ लिन्‍या सरेस्‍न्‍या जेले। ङादोज़्‍याव भरी ङानी काता ज़ ङामादोए, ङाबाबुए ओपैनाव वाज़ ङापाँज़्‍या लिन्‍या ब सैंन्‍या जेले।
JOH 8:29 ङालाई परींज़्‍याव ङास ज़ लिज़्‍या। ङादोज़्‍याव य़ेन भरी ब उयुँलाव मिताव ओतावए ङालाई ङाबातङ मानैनाव।”
JOH 8:30 नो पाँत नक लिज़्‍यावर कुधुए ज़ येसुलाई यायुँ हुप्‍के।
JOH 8:31 येसुए ओललाई यायुँ हुप्‍ज़्‍याव यहूदीरालाई है यादोक्‍यो, “आव ङापाँत धिद जेलिकिन जे साचो ङासिसर ज़ जेताज़्या।
JOH 8:32 साचो पाँर सैंद, नो पाँए जे पला·सिउर जेतारिज़्‍या,” है ओरादोक ते,
JOH 8:33 नोराए, “गे ते अब्राहामए ओथोर ची, सुए उधूँल ज़ गेमालिताए। नँ कै जैद गेलाई ‘पला·सिउर जेतारिज़्‍या’ है नदासिज़्‍याव?” है यादोक ते,
JOH 8:34 येसुए, “जेलाई साचो है ङादाचिज़्‍या, पाप दाज़्‍याव मिँ पापए धूँल बाँदा मिताव लिज़्‍या।
JOH 8:35 बाँदा एकम्‍न्‍या झ़िमलाव माताए, झ़िमए ओर्गेए ओज़ा ते एकम्‍न्‍या झ़िमलाव ज़ ताज़्‍या।
JOH 8:36 है जैद ङा परमेस्‍वरए ओज़ाए जेलाई पला·द ङाऱास्‍चिकिन, जे ननी चबनै पला·सिउर ज़ जेताज़्‍या।
JOH 8:37 जे अब्राहामए ओथोर लिन्‍या ङा ज़ ङासैंज़्‍या। हितावत मनी ङा ङापाँए जेयुँल लिन्‍या पो ओमादैवए ङालाई सैःव जेपैंज़्‍या।
JOH 8:38 ङा ङापाँज़्‍याव भरी ङाबाबुए ल्‍योङाव ङारँःव वाज़ ङापाँज़्‍या। हिताव ज़ जे मनी जेबाबुए ल्‍योनी जेथैव वाज़ जेदोज़्‍या,” है यादोक्‍यो।
JOH 8:39 नोराए झन, “गे गेबाबु ते अब्राहाम ज़,” है लिकेर। येसुए, “जे साचो अब्राहामए ओज़ार जेताकिन जे मनी होए ओदोव मिताव य़ेन दान्‍या जेल्‍यो।
JOH 8:40 जे ते झन परमेस्‍वरनिकाव ङाथैव सतलाव पाँर जेलाई ङासथैचिक ङालाई सैःव जेपैंज़्‍या। अब्राहामए ते निताव य़ेन मादोव।
JOH 8:41 जे ते छुत जेबाबुए ओय़ेन जेदोज़्‍या,” है ओरादोक ते, नोराए, “गे नामर्‍यार माःक, गे गेबाबु तोबो ज़ लिज़्‍या, ओल परमेस्‍वर ज़,” है दोकेर।
JOH 8:42 हाःत ज़ येसुए, “साचो जे जेबाबु परमेस्‍वर ज़ ताकिन जे ङालाई मया दान्‍या जेल्‍यो। ङा ओल परमेस्‍वरनी हुव ज़। आव मानुवात ङानी ङाहुव माःक, ओल उपरींनाव ज़।
JOH 8:43 आव ङापाँ कै जैद जेमातीधुज़्‍याव? थैन्‍या युँ जेमादोज़्‍याक ज़ जेमातीधुइ।
JOH 8:44 जे जेबाबु सैतानए ओज़ार जेतावए होए उयुँलाव मिताव य़ेन दोव जेपैंज़्‍या। नोए ओय़ेन मनी भाःकिन ज़ सैःन्‍या उलिज़्‍याव। नोस साचो काता ज़ ओमाल्‍योए साचो पाँलाई मासहिधुव। नोए ओबानी धुत पाँन्‍या ओतावए धुत ज़ पाँज़्या। है जैद नो धुत पाँज़्यावराए याबाबु ज़।
JOH 8:45 खाली ङा साचो ङापाँज़्‍यावए ङालाई जेयुँ माहुबे।
JOH 8:46 जेनी ङालाई पापी थ·रैन्‍या सु उलिज़्‍याव? ङा साचो ङापाँकिन कै जैद ङापाँत जेयुँ ओमाहुप्‍ज़्‍याव?
JOH 8:47 परमेस्‍वरए उमींराए ते परमेस्‍वरए ओपाँ ज़ थैज़्‍यार। जे ते परमेस्‍वरए उमींर जेमातावए ओपाँ ब जेमाथैधुइ।”
JOH 8:48 हाःत ज़ यहूदीराए येसुलाई, “नँलाई प़ाइँए ज़ सामरी है यादींज़्‍याव ते साचो ज़ ओल्‍यो! नँलाई माचाव पुरूसए क्‍योःद ओनैनिज़्‍याव मिताव ब गेरँःनिज़्‍या,” है यादोक ते,
JOH 8:49 येसुए, “जे कै जैद ङाक्‍याँत माचाव पुरूस जेरँःज़्‍याव? ङा छैंव परमेस्‍वरए ओमान नैद ङाएज़्या। जे ते ङालाई ङापाहा झाःद जेयाँज़्या।
JOH 8:50 हैदी ब ङा ते ङामान ङामाखिमे। ङा ङाय़ेनर छ्यानिद ङालाई मान याज़्‍याव छुत तोबो लिज़्‍या — नो परमेस्‍वर ज़।
JOH 8:51 जेलाई साचो है ङादाचिज़्‍या, ङा ङापाँ भैंःद दोज़्‍याव मिँ खर्क ज़ सिन्‍या माले,” है ओरादोक ते,
JOH 8:52 नो यहूदीराए झन, “अब ते नक्‍याँत माचाव पुरूस च़रिद उलिज़्‍याव साचो ज़ गेथ·रैके। अब्राहाम गेपुर्खा ब सिके, अगमबक्ता भरी ब सिकेर। नँ कै जैद ‘ङापाँ भैंःद दोज़्‍याव मिँ खर्क ज़ सिन्‍या माले’ है नलिज़्‍याव?
JOH 8:53 काता, नँ सिद बाव गेपुर्खा अब्राहाम स़ोनो अगमबक्ताराकिन ब घ्योःव नलिज़्‍याव रो? नँ काता नसम्‍जिज़्‍याव?” है यादोक ते,
JOH 8:54 येसुए, “ङा ङानी ज़ सघ्‍योःसिउ ङापैंकिन ङामिन अऩाकलाव ज़ ताज़्या। खाली ङालाई सघ्‍योःज़्‍याव ङाबाबु परमेस्‍वरए ज़। नोलाई जे मनी ‘गेपरमेस्‍वर ज़’ है जेदोज़्‍या।
JOH 8:55 खाली जे परमेस्‍वरलाई ते खर्क ज़ जेमासरेसे, ङा ते ङासरेस्‍ज़्‍या। ङा होलाई ङामासरेसे है ङालिकिन, ङा मनी जे मिताव धुत पाँज़्‍याव ज़ थ॰रिन्‍या ङाले। ङा होलाई ब ङासरेस्‍ज़्‍या, ओपाँ ब भैंःद ङादोज़्‍या।
JOH 8:56 जेपुर्खा अब्राहाम मनी आव ङाबेलार सैंद उयुँर होलाँ ताके, रँःद खुसी ब ताके।”
JOH 8:57 हाःत ज़ यहूदीराए, “नँ पचास बर्स मायो·ताव मिँए कै जैद ‘अब्राहामलाई ङारँःके’ है नलिज़्‍याव?” है यादोक ते,
JOH 8:58 येसुए, “जेलाई साचो है ङादाचिज़्‍या, ङा अब्राहाम ओमाजर्मिद ङ़ादाकिन ज़ ङालिज़्‍या,” है ओरादोव प़ाइँना,
JOH 8:59 नोराए झन लुँर तीद येसुलाई झेःव पैंकेर। हाःत ज़ येसु ध्‍यान झ़िमनी अलगज़ा पुलुस्‍द बाके।
JOH 9:1 येसु येमत ओबाज़्‍याक तोबो जर्मननी ज़ उमी मारैंःवलाई रँःक्‍यो।
JOH 9:2 नाःत ज़ उसिसराए, “गुर्बा, आव उमी मारैंःव सुए ओदोव पापए अइ ओताव? ओल ओदोवए सैं ओबाबु ओआमाराए यादोवए अइ ओताव?” है यादोक ते,
JOH 9:3 येसुए, “आव ओल ओदोव पापनी ब माःक, ओबाबु ओआमाराए यादोव पापनी ब माःक। परमेस्‍वरए ओसक्ती ओक्‍याँत सरैंःन्‍याए जूँनी अइ ओताव ची।
JOH 9:4 आव पलाँव बेला उलिज़्‍याक ज़ ङालाई परींज़्‍यावए ओय़ेन गे दाव ताके। चुम चुमो ओतावकिन ते सुए ज़ य़ेन मादोधुव।
JOH 9:5 आव मानुवात ङालेवा भरी, मानुवाताव ज़गै ङा ज़,” है दाद,
JOH 9:6 येसुए नामक त़िल्‍द, गम मुछिद, नो उमी मारैंःवए उमीत थीद्याद,
JOH 9:7 “आव नमीताव हिला सिलोआम दहल च़्‍यानाके,” है दाद परींक्‍यो। (सिलोआमए ओअर्थ परींसिउ।) नो दहल बाद उमीताव हिला ओच़्‍याव प़ाइँना उमी रैंःके।
JOH 9:8 निताव रँःद ओनाखार जीलावर स़ोनो ङ़ादाकिन ऩिद ओङासिज़्‍याव रँःज़्‍यावराए, “आव ते नो ङ़ादाकिनकाव ऩिज़्‍याव मिँ ची सानी!” है लिकेर।
JOH 9:9 ख्वाराए फरी, “हैज़, आव हो ज़,” है लिकेर। ख्वाराए फरी, “आव हो माःक, नो उमी मारैंःवस जेसोबोरोल्‍ज़्‍याव ताखेहो,” है लिकेर। नो उमी मारैंःज़्‍यावए फरी नो यापाँ थैद, “ङा हो ज़ ब्‍याँ,” है ओरादोक ते,
JOH 9:10 नोराए, “हुकी, नँ नमी कै जैद ओरैंःव की?” है यादोक ते,
JOH 9:11 नोए, “येसु है यादोज़्‍यावए हिला जैद ङामीत थीद्याद सिलोआम दहल च़्‍यानाव परींनाक्‍यो। नल बाद ङाच़्‍याव प़ाइँना रँःधुन्‍या ङाताके,” है यादोक्‍यो।
JOH 9:12 नोराए, “आव है नलिज़्‍याव मिँ काना ओबाव?” है यादोक ते, “माँ, ङा ते ङामासैंए,” है यादोक्‍यो।
JOH 9:13 हाःत ज़ नोराए उमी गराँवलाई फरिसीराए ल्‍योक लाँकेर।
JOH 9:14 येसुए नोलाई उमीत हिला थीद्याद रँःधुन्‍या ओजैव ऩासिन्‍या छ्याम ओल्‍यो।
JOH 9:15 नो फरिसीराए मनी, “नँ कै जैद रँःधुन्‍या नताव?” है यादोक ते, नोरालाई मनी नो रँःधुन्‍या तावए, “होए ङामीत हिला थीद ओयाँव, ङाच़्‍याव प़ाइँना रँःधुन्‍या ङाताके,” है यादोक्‍यो।
JOH 9:16 नलाव फरिसीर ख्वा ख्वाराए नो ओपाँ थैद, “आव सगराँज़्‍याव मिँ परमेस्‍वरनी हुव ते माःक, म़ानी ऩासिन्‍या छ्यामकाव य़ेन मादान्‍या कानुनलाई माख्याखेहो,” है लिकेर। ख्वाराए फरी, “नो मिँ पापी ताकिन इताव अचम्‍बलाव य़ेन कै जैद ओदोधुरिज़्‍याव?” है लिद या याल माखैकेर।
JOH 9:17 नोराए उमी गराँवलाई, “नँ नमी सगराँद्याज़्‍यावलाई किताव नङम्‍सिज़्‍या?” है यादोक ते, नोए, “नो अगमबक्ता ज़,” है यादोक्‍यो।
JOH 9:18 नो यहूदीराए यास़ेरराए, “आव मिँ ते ङ़ादा उमी मारैंःव ओल्‍यो माताखेहो,” लिद नोए ओपाँ मापतिकेर। है जैद ओबाबु ओआमानिलाई याल्‍योक खुल्‍द,
JOH 9:19 “आव जर्मननी ज़ उमी मारैंःव है यादोज़्‍याव जिनज़ा रो? निताव ओल्‍यो ताकिन कै जैद रँःधुन्‍या ओताव?” है यारादोक ते,
JOH 9:20 ओबाबु ओआमानी, “हैज़, आव गिनज़ा ज़, जर्मननी ज़ उमी मारैंःव ओल्‍यो।
JOH 9:21 खाली कै जैद रँःधुन्‍या ओताव, सुए ओजैव गिन गिन्‍मासैंए। ओललाई ज़ है दोचिके, नो ल़ुज़ा माले, ओल ज़ पाँधुन्‍या ले,” है यारादोकिनी।
JOH 9:22 नोनी यहूदीराए यास़ेरराए छ्याचेए नितावनी निपाँव। नो स़ेरराए ङ़ादा ज़, “जोए ‘येसु परमेस्‍वरनी बाँचैना हुव ख्रीस ज़’ है लिज़्‍या, होलाई धर्मसास्‍त्र झ़िमनी पले·न्या,” है यालिज़्‍याव।
JOH 9:23 है जैद ज़ नो ओबाबु ओआमानी, “नो ल़ुज़ा माले, ओललाई ज़ है दोचिके,” है निरादोव।
JOH 9:24 नकिन नो यहूदीराए यास़ेरराए फरी ब नो उमी गराँवलाई याल्‍योक खुल्‍द, “नो मिँ ते पापी ची लिन्‍या गे गेसैंज़्या। कै जैद नँ ‘परमेस्‍वरए ओसगराँनाव’ है नमालिधुज़्‍याव?” है यादोक ते,
JOH 9:25 नोए, “ङा नो मिँ पापी उलिज़्‍याव सैं ओमालिज़्‍याव लिन्‍या ङामासैंए। तोबो वाज़ ङासैंज़्‍या, ङ़ादा मारँःधुन्‍या ङाल्‍यो, अब रँःधुन्‍या ङाताके,” है ओरादोक ते,
JOH 9:26 फरी ब नोराए, “नोए नँलाई कै कै जैद रँःधुन्‍या ओजैनिउ?” है यादोक ते,
JOH 9:27 नोए फरी, “है दाव ज़ ङानैचिज़्‍या सानी, जेमाथैधुइ रो? तोबो पाँलाई खा ची है दान्‍या, सैं जे मनी उसिसर जैसिउ जेपैंज़्‍याव?” है ओरादोक ते,
JOH 9:28 नोराए थल्‍द, “नँ ची होए उसिस ते, गे ते मोसाए उसिसर ची।
JOH 9:29 मोसास परमेस्‍वर ओपाँव ते गेसैंज़्‍या, आव मिँ सुए ल्‍योनी हुव गे गेमासैंए,” है दोकेर।
JOH 9:30 हाःत ज़ नो उमी गराँवए, “आव ते बनै अनवार्‍यासो पाँ ज़ जेपाँके। ङालाई रँःधुन्‍या ओजैनाज़्‍यावत ब कै जैद आनी हुव लिन्‍या जेमासैंज़्‍याव?
JOH 9:31 परमेस्‍वरए पापीराए यापाँ माथैव, ओमान नैद्याज़्‍याव उयुँलाव मिताव य़ेन दाज़्‍यावराए यापाँ वाज़ थैज़्‍याव लिन्‍या प़ाइँए गेसैंज़्‍या सानी।
JOH 9:32 आव संसार ओतावकिन जर्मननी ज़ मारँःधुज़्‍यावलाई रँःधुन्‍या जैक्‍यो लिन्‍या आःपै सुए ज़ गेमाथैताए।
JOH 9:33 नो मिँ परमेस्‍वरनी हुव ओमाताव ताकिन, कै जैद निताव य़ेन ओदोधुरिज़्‍याव?” है ओरादोक ते,
JOH 9:34 नोराए झन नोलाई, “नँ पापल जर्मिद नपाप भुगिउ प़ैक्‍याए गेलाई पैव नपैंज़्‍याव रो?” है लिद नोलाई धर्मसास्‍त्र झ़िमनी हुतैद पले·केर।
JOH 9:35 येसुए नोलाई पले·केर दी लिन्‍या थैद नोस दैसिनाद, “मिँ मिन्‍सिउलाई नयुँ माहुप्‍ज़्‍या?” है ओदोक ते,
JOH 9:36 “नो मिँ मिन्‍सिउ है नलिज़्‍याव सु ओताव, प्रभु? ङा नोलाई ङारँःकिन ङायुँ हुप्‍न्‍या ले,” है ओदोक ते,
JOH 9:37 येसुए, “नो मिँलाई रँःद ब ननै, ङा नँस पाँज़्‍याव ब हो ज़,” है ओदोव प़ाइँना,
JOH 9:38 नो मिँ ओङ़ाक फुलुप्‍सिद, “प्रभु, ङा नँलाई ङायुँ हुप्‍के,” है दोक्‍यो।
JOH 9:39 हाःत ज़ येसुए, “काता ज़ मासैंन्‍यार मारँःधुन्‍यार सैंन्‍या रँःधुन्‍या ओतारक, फरी ‘गेसैंज़्‍या गेरँःज़्‍या’ है लिज़्‍यावर काता ज़ मासैंन्‍या छाम छामोर ओतारक लिद आव मानुवाताव मिँरालाई ङाराछ्यानिहुव,” है लिके।
JOH 9:40 नक लिज़्‍याव फरिसीराए थैद, “हुकी, गेलाई मनी गेमी मारैंःव मितावर नजैसिज़्‍याव रो?” है यादोक ते,
JOH 9:41 येसुए, “जे साचो काता ज़ मासैंधुन्‍या मारँःधुन्‍यार जेताव ताकिन जेखत माल्‍योर तान्‍या जेल्‍यो। खाली जे ‘सैंद रँःद ज़ गेदोज़्‍या’ है जेलिज़्‍यावए जेखत ल्‍योर जेताके,” है यादोक्‍यो।
JOH 10:1 नकिन येसुए फरी, “ङा जेलाई साचो है ङादाचिज़्‍या, बेधा खोरल य़ामनी मापसिद तँनी पसिज़्‍याव ते चोर दाँका ज़ ताज़्‍या।
JOH 10:2 य़ामनी पसिज़्‍याव ते साचो बेधाराए यागावला ज़।
JOH 10:3 य़ाम गुज़्‍यावए नोलाई य़ाम फैदिज़्‍याव। नो गावलाए फरी ओबेधारालाई यामिन हाइए हाइए ओराक़िक नोर ओर्गा थैद ओल्‍योदा याहुवत खोरनी याहाइज़्‍याव।
JOH 10:4 प़ाइँ पाखात यापुलुसोत फरी ओल याङ़ा याङ़ा बाज़्‍या। बेधार फरी ओर्गा सरेस्‍द उछीं उछीं हुज़्‍यार।
JOH 10:5 नो बेधार यामासरेसो मिँए उछींत ते माबार। ओर्गा यामासरेसोए झन छे·द धोंःज़्‍यार,” है लिद यासथैक्‍यो।
JOH 10:6 येसुए आव बेधा गावलाए घर्ती झाःद ओरासथैव पाँ नो थैज़्‍यावराए ओअर्थ मातीधुकेर।
JOH 10:7 है जैद येसुए फरी है यादोक्‍यो, “ङा जेलाई साचो है ङादाचिज़्‍या, नो बेधाराए याखोरलाव य़ाम ङा ज़।
JOH 10:8 ङाकिन ङ़ादा हुव भरी जाँकोसै चोरर दाँकार वाज़ याल्‍यो। है जैद बेधाराए नोराए यार्गा माथैकेर।
JOH 10:9 साचो य़ाम ते ङा ज़। ङाल्‍योनी पसिज़्‍यावर प़ाइँ बाँचिन्‍या लेर। आदा होदा लिद चाव चरनल लाव ब दैन्‍या लेर।
JOH 10:10 चोरए ओय़ेन ते कुन्‍या, सैःन्‍या, खेम्‍न्‍या वाज़ लिज़्‍या। ङा ते ङाबगालराए बनै धोल पोगोल जुनी ओदैरक लिद ङाहुव ची।
JOH 10:11 “ङा ज़ बेधाराए चाव यार्गे गावला। चाव गावलाए ओबेधाराए जूँनी उजिउ झाःद्यान्‍या ब तयार ज़ ताज़्‍या।
JOH 10:12 बाहोर्‍या गावला ते, बेधार ओल उमींर यामातावए प़रर याहुज़्‍याव रँःद बेधार ऱास्‍द धोंःद बाज़्‍या। है जैद प़रर हुद बेधारालाई छुपिद चितराँ पुतराँ याराजैज़्‍यार।
JOH 10:13 नो बाहोर्‍या वाज़ ओतावए बेधाराए ल्‍योदा उयुँ ज़ माले।
JOH 10:14 ङा फरी चाव यार्गे गावला ज़। किताव ङा ङाबेधारालाई ङारासरेस्‍ज़्‍या, स़ोनो या ङालाई सरेस्‍नाज़्यार,
JOH 10:15 हिताव ज़ ङाबाबुए ङालाई सरेस्‍नाज़्‍याव, स़ोनो ङा मनी ओललाई ङासरेस्‍ज़्‍या। है जैद नो ङाबेधाराए जूँनी तछा ङाजिउ ब ङाझाःरिज़्‍या।
JOH 10:16 आव खोरल माल्‍यो छुत ङाबेधार ब लिज़्‍यार। नोरालाई मनी तछा ङारारैरिज़्‍या। नोराए मनी ङार्गा याथैवत, बगाल ब तोबो वाज़ तान्‍या ले, गावला मनी तोबो वाज़ तान्‍या ले।
JOH 10:17 ङाबाबुए ङालाई मया दाँज़्याव, काराव ल्‍यो ताकिन ङा ङाबेधाराए जूँनी ङाजिउ झाःद, नो ङापोहोन फरी रैन्या ङाले।
JOH 10:18 नो ङापोहोन ङानी सुए ज़ मालाँधुर, ङा ङायुँ स्‍यानी ज़ ङाझाःरिज़्‍या। झाःन्‍या, सोवोल्‍न्‍या ङा ङाकुइत ज़ लिज़्‍या। निताव य़ेन दान्‍या परमेस्‍वर ङाबाबुए ज़ ङालाई याद नैनाव।”
JOH 10:19 आव पाँत यहूदीर या याल माखैनाकेर।
JOH 10:20 ख्वाराए, “आवलाई माचाव पुरूसए क्‍योःद बो·लैद नैव। काराव नितावए ओपाँ जेथैज़्‍याव?” है लिकेर।
JOH 10:21 ख्वाराए फरी, “इताव पाँ कै जैद बूलिउ मिँए ओपाँ ओताज़्‍याव? माचाव पुरूसए सुलाई ज़ रँःधुन्‍या माराजैव,” है लिकेर।
JOH 10:22 हाः बेलाक यरूसलेमलाव ध्‍यान झ़िमलाई चोखोइन्‍या पर्ब हुद उलिज़्‍याव। नो पर्ब सालकाव तखेप य़ुँदाक ओताज़्‍याव।
JOH 10:23 नो बेलाक येसु ध्‍यान झ़िम जींलाव सोलोमन मैराल उलिज़्‍याक,
JOH 10:24 यहूदीर ओल्‍योक गुरिगाँ हुद, “नँ साचो ख्रीस ताकिन गेलाई छर्लङ्ग ज़ है दासिके। खा पै गेलाई आदा तान्‍यानी होदा तान्‍याल ननैसिरिज़्‍याव?” है यादोक ते,
JOH 10:25 येसुए, “जेलाई ङ़ादाकिन ज़ है दाव ज़ ङानैचिज़्‍या, हितावत ब जेयुँ ज़ माहुबे। ङाबाबुए उमिननी ङादोज़्‍याव य़ेनराए ज़ ‘ङा हो ज़’ लिद सतैंज़्‍यार।
JOH 10:26 खाली जे ङाबगाललावर जेमातावए ज़ ङालाई जेयुँ माहुबे।
JOH 10:27 ङाबगाललाव बेधाराए ते ङार्गा थैज़्‍यार। ङा नोरालाई ङारासरेस्‍ज़्‍या, नोर मनी ङाछींत हुज़्‍यार।
JOH 10:28 ङा नोरालाई अजम्‍बरी जुनी ङाराएज़्‍या। है जैद नोर खर्क ज़ कै मै तान्‍या मालेर। ङाल्‍योनी सुए मनी नैंद लाँधुन्‍या मालेर।
JOH 10:29 नोरालाई ङाकुइत याज़्‍याव परमेस्‍वर ङाबाबु बनै ओसक्ती ल्‍यो प़ाइँरानी घेप्‍पा लिज़्‍या। है जैद नोए ओल्‍योनी ब सुए ज़ नैंद लाँधुन्‍या मालेर।
JOH 10:30 ङाबाबुस गिन तोबो ज़ गिन्‍लिज़्‍या।”
JOH 10:31 यहूदीराए आव पाँ थैद यारिसए लुँर तीद येसुलाई झेःव यापैंज़्‍याक,
JOH 10:32 येसुए, “ङाबाबुए ल्‍योनी चाव य़ेनर जेङ़ाक कुधु ज़ सतैंद ङायाचिके, नो भरिनी काताकाव य़ेनए उजूँनी लुँए झेःव जेपैंज़्‍याव?” है ओरादोक ते,
JOH 10:33 यहूदीराए, “नँलाई चाव य़ेनए जूँनी झेःव गेपैंज़्‍याव माःक, परमेस्‍वरए उमिन नबले·ज़्‍यावए जूँनी ची। नँ मिँ ताद कै जैद परमेस्‍वरस सम सम नजैसिज़्‍याव?” है यादोक ते,
JOH 10:34 येसुए, “जेधर्मसास्‍त्रल परमेस्‍वरए है लिज़्या — ‘जे मिँर ईस्‍वर मितावर ज़।’
JOH 10:35 धर्मसास्‍त्रलाव सर्सिउ पाँ अऩाकलाव माले लिन्‍या जे मनी जेसैंज़्‍या। है जैद परमेस्‍वरए ओल ओपाँ दैवरालाई ईस्‍वर मितावर ज़ है ओरादोकिन,
JOH 10:36 ङाबाबुए ङालाई खतैद आव मानुवात उपरींनावए, ‘ङा परमेस्‍वरए ओज़ा ज़’ है ङादाचिक, जे कै जैद ‘परमेस्‍वरए उमिन नबले·ज़्या’ है जेदाँज़्‍याव?
JOH 10:37 ङा ङाबाबुए ओय़ेन ङामादोज़्‍याव ताकिन जे ङालाई जेमापतिनादी ब ताए।
JOH 10:38 फरी नो य़ेन ङादोज़्‍याव ताकिन ङालाई जेमापतिनादी ब, ङादोज़्‍याव य़ेनत ते जेयुँ हुबो ज़ परिके। हो ताकिन ची परमेस्‍वर ङाबाबु ङास लिद तोबो ज़ गिन्लिज़्‍याव सैंद थ·रैन्‍या जेले,” है यादोक्‍यो।
JOH 10:39 नोर झन नो पाँ थैद फरी ब येसुलाई क्‍योःव पैंकेर। येसुए फरी नोराए ल्‍योनी छाँसिद याखार्नी ज़ पुलुस्‍द बाके।
JOH 10:40 नकिन येसु ननी पुलुस्‍द यर्दन भै होफताव यूहन्‍नाए ङ़ादा ऱीनी ओरासछैंज़्‍याव पोङ ज़ लिनाके।
JOH 10:41 नक मिँर येसुए ल्‍योक बनै माहोल्‍या हुद, “यूहन्‍नाए ते अचम्‍बलाव य़ेनर काता ज़ मादोव। हैदी ब आव मिँए उजूँनी ओपाँव पाँ भरी साचो ज़ ओल्‍यो,” है लिद,
JOH 10:42 नलावर कुधु ज़ येसुलाई यायुँ हुप्‍के।
JOH 11:1 नाः बेलाक बेथानिया नाखारल तोबो लाजरस यादोज़्‍याव मिँ ओजोरो हुद थलिद उलिज़्‍याव। नो मिँ मरियम स़ोनो मार्थानी निभाइ ज़।
JOH 11:2 नो मरियम ज़ छींनी येसुलाई उखँत म़ास थीद्याद ओचेमए सीद्याज़्‍याव। नो ओजोरो हुव लाजरस नोए ओभाइ ज़।
JOH 11:3 नोए ओनानानी येसुलाई, “प्रभु, नयुँलाव लाजरस ओजोरो हुद थलिद ले,” है लिद तोबो सोर परींकिनी।
JOH 11:4 येसुए नो सोर थैद, “आव जोरोए लाजरसलाई सिउका सिउ जैन्‍या माले, परमेस्‍वर ङाबाबुए उमिन झन ज़ सघ्‍योःन्‍याए जूँनी ची। ङा ओज़ाए ङामिन मनी झन ज़ घ्‍योःन्‍या ले,” है लिके।
JOH 11:5 येसुए मार्था, मरियम स़ोनो लाजरसरालाई बनै मया ओरादोज़्‍याव।
JOH 11:6 निताव ओजोरो उहुज़्‍याव सोर थैद ब हतप्‍त ज़ माबाद नो उलिज़्‍याव पोक ज़ अझ ऩेला लिके।
JOH 11:7 नकिन येसुए उसिसरालाई, “गे फरी यहूदियादा गेबा,” है ओरादोक ते,
JOH 11:8 उसिसराए, “गुर्बा, ताला नलाव यहूदीराए नँलाई लुँए झेःव यापैंज़्‍यावत ब काराव फरी नदा ज़ बाव नपैंज़्‍याव?” है यादोक ते,
JOH 11:9 येसुए, “तछात बाह्र घन्‍ता पलाँ ताज़्‍या। लाक बाज़्‍याव मिँ आव मानुवाताव ज़गै ओलस ओतावए कान्‍त ज़ मात़ुमे।
JOH 11:10 रील बाज़्‍याव ते, ओलस ज़गै ओमातावए त़ुम्द पाज़्‍या,” है यादोक्‍यो।
JOH 11:11 नकिन फरी, “गेनैं लाजरस घेप्‍पा ङ़लत बाद ले, ङा नोलाई ङासोचोइनारिज़्‍या,” है ओरादोक ते,
JOH 11:12 उसिसराए, “प्रभु, अइज़ घेप्‍पा ङ़लत उलिज़्‍याव ताकिन ते, जुनी ब गराँया ज़,” है लिकेर।
JOH 11:13 खास येसुए ते लाजरस उसिधुवए उजूँनी ज़ ओपाँज़्‍याव, उसिसराए माबुझिद साचो ङ़ल्‍द उलिज़्‍याव ज़ याजैज़्‍याव।
JOH 11:14 है जैद येसुए छर्लङ्ग ज़ है यादोक्‍यो, “लाजरस सिधुके।
JOH 11:15 खाली जे जेयुँ झन ज़ सुहुप्‍द्यान्‍याए जूँनी हतप्‍त ङामाबाव चाव ज़ ताके। अब ते हुचिके, लाजरसए ल्‍योदा गेबा,” है ओरादोक ते,
JOH 11:16 दिदुमस यादोज़्‍याव थोमाए ओलसकाव येसुए उसिसरालाई, “दे च्‍याँःसिचिके, गेबा। गेलाई मनी ओलस ज़ यासैःसिकिन्‍दा सैःसिकेर ब!” है यादोक्‍यो।
JOH 11:17 येसु उसिसरास लाजरसए ओनाखारल याकेस्‍नाक, लाजरसलाई खादरल याझाःव चार दिन ताके है लिन्‍या थैकेर।
JOH 11:18 लाजरस ओनाखार बेथानिया यरूसलेमकिन स़ोंकिलोमितरवा उलिज़्‍याव।
JOH 11:19 निभाइ उसिउए मार्था स़ोनो मरियमनिलाई यहूदीराए कुधुए याराचिऊहुज़्याव।
JOH 11:20 मार्थाए, ‘येसु हुज़्‍या दी’ लिन्‍या थैद मरियमलाई झ़िमक ज़ ख्यानैद येमङ ज़ दैसिनाद,
JOH 11:21 येसुलाई, “प्रभु, नँ नल्‍यो ताकिन ते ङाभाइ सिन्‍या ओमाल्‍यो।
JOH 11:22 हैदी ब आख मनी नँ परमेस्‍वरस जो नऩिज़्‍या हो ज़ यान्‍या ले लिन्‍या ङासैंज़्‍या,” है ओदोक ते,
JOH 11:23 येसुए, “नभाइ फरी ब सोन्‍या ले,” है ओदोक ते,
JOH 11:24 मार्थाए, “हैज़ प्रभु, परमेस्‍वरए मिँरालाई अजम्‍बरी जुनील ओरासोचोइव छ्याम नो मनी सैंसिद सोन्‍या ले,” है दोक्‍यो।
JOH 11:25 हाःत ज़ येसुए, “सिउरालाई सोचोइज़्‍याव ब ङा ज़, अजम्‍बरी जुनी याज़्‍याव ब ङा ज़। है जैद जोए ङालाई उयुँ हुप्‍ज़्‍या, हो उसिदी ब फरी सैंसिन्‍या ले।
JOH 11:26 ङालाई यायुँ हुप्‍द बाँचिन्‍यार ते खर्क ज़ सिन्‍या मालेर। आव ङापाँत नयुँ माहुप्‍ज़्‍या?” है ओदोक ते,
JOH 11:27 मार्थाए, “हैज़ प्रभु, नँ आव मानुवात हुरिज़्‍या है यालिज़्‍याव परमेस्‍वरए ओज़ा ख्रीस ज़ लिद ङायुँ हुबो ज़ लिज़्‍या,” है दाद,
JOH 11:28 उझ़िमदा बाद ओबैंनी मरियमलाई अलगज़ा खुल्‍द, “गुर्बा आल हुद ले, नँलाई साप्‍निज़्‍याव,” है ओदोव प़ाइँना,
JOH 11:29 मरियम हतप्‍त ज़ च्‍याँःसिद दैसिनाके।
JOH 11:30 हाःपै येसु नाखारल ओमाहुताव, मार्थाए ओख्यानैव पोक ज़ उलिज़्‍याव।
JOH 11:31 नो झ़िमक लिज़्‍याव चिऊना हुव यहूदीर मरियम थर च्‍याँःसिद ओबाज़्‍याव रँःद, ‘फरी खादरक ओघर्नाज़्‍याव ताक्‍या’ लिद उछीं उछीं बाकेर।
JOH 11:32 मरियम येसुए ल्‍योक केस्‍द उखँत फुलुप्‍सिद, “प्रभु, नँ नल्‍यो ताकिन ङाभाइ सिन्‍या ओमाल्‍यो,” है दाद,
JOH 11:33 घर्के। उछीं उछीं हुव यहूदीर मनी ओलस ज़ याघर्ज़्‍याव। येसुए निताव रँःद उयुँ बनै माचाव दाद,
JOH 11:34 “नोलाई काङ्क झाःद जेनैज़्‍याव?” है ओरादोक ते, “हुद चिऊके, प्रभु,” है दोकेर।
JOH 11:35 हाःत ज़ येसु मनी घर्के।
JOH 11:36 नो रँःद नलाव यहूदीराए, “लाजरस बनै उयुँलाव मिताव मिँ ओल्‍यो,” है लिकेर।
JOH 11:37 ख्वाराए फरी, “आव मिँ मारँःधुन्‍यालाई रँःधुन्‍या जैज़्‍यावए लाजरसलाई ओमाबाँचैधुव रो?” है लिकेर।
JOH 11:38 हाःत ज़ येसु उयुँर धो थाइव ताद खादरक बाके। नो खादर तोबो पुप ओल्‍यो, ओयाःत बनै घ्योःव लुँ कसिउ उलिज़्याव।
JOH 11:39 येसुए, “नो कसिउ लुँ हाइचिके,” है ओरादोक ते, लाजरसए ओनाना मार्थाए, “आवलाई गेगादैव चार दिन ताधुके, प्रभु। गेफैकिन उसी ङर्न्‍या ले,” है ओदोक ते,
JOH 11:40 येसुए, “नँलाई नयुँ उहुप्‍किन परमेस्‍वरए ओज़गै रँःन्‍या नले है ङादींव माःक रो?” है ओदोव प़ाइँना,
JOH 11:41 उपुर्कावराए नो कसिउ लुँ हाइकेर। हाःत ज़ येसुए नमदा परमेस्‍वरए ल्‍योदा भाल्‍सिद, “अ परमेस्‍वर ङाबाबु, नँलाई धन्‍याबाद लिज़्‍या, आव ङाबिन्‍ती नथैधुके।
JOH 11:42 ङापाँ भरी थैव ज़ ननैज़्‍या लिन्‍या ङासैंज़्‍या। खाली आक लिज़्‍याव मिँराए आव ङापाँ थैद नँ ज़ नपरींनाव घथ·रैनारक लिद है ङादींज़्‍या,” है दाद,
JOH 11:43 येसु बनै चोइस क़िद, “लाजरस, ननी पुलुस्‍द हुन्‍के,” है ओदोव प़ाइँना,
JOH 11:44 नो सिउ लाजरस ओङ़ैनी उखँङ पै लुम्‍बैसिउ क्‍वारास पुलुस्‍के। हाःत ज़ येसुए नक लिज़्‍यावरालाई, “ओक्‍वार पला·द्याद बाव एचिके,” है यादोक्‍यो।
JOH 11:45 निताव रँःद नो मरियमलाई चिऊना हुव यहूदीराए मनी कुधुए ज़ येसुलाई यायुँ हुप्‍के।
JOH 11:46 ख्वाराए फरी येसुए ओदोव य़ेन भरी रँःद फरिसीरालाई है यारादोनाकेर।
JOH 11:47 नो फरिसीर स़ोनो मुख्या पुजारीराए घ्योःव कचरी जैद, “गे कै लिन्‍या ओताव? आवए ते कुधु अचम्‍बलाव य़ेनर दोज़्‍याव।
JOH 11:48 नोलाई मावैंद दोव गेएकिन, मिँ भरी ओपो·स ज़ नोलाई यायुँ हुप्‍द ओल्‍योदा बान्‍या लेर। नदा याबाकिन रोमी सरकारए उसिपाईंर हुद गेध्‍यान झ़िमलाई तैःद्याद गे यहूदीरालाई मनी खेम्‍न्‍या ओछ्यास लिज़्‍या,” है लिकेर।
JOH 11:49 हाःत ज़ कैयाफा यादोज़्‍याव हो साललाव प्रधान पुजारीए, “जे काता ज़ मासैंन्‍यार जेलिज़्‍या।
JOH 11:50 गेदेस भरी उमिन ओम़ाज़्‍याव देखा बुरू प़ाइँए जूँनी तोबो मिँ सिन्‍या लेखा लिज़्‍या लिन्‍या जेमासैंए रो?” है लिके।
JOH 11:51 नोए निताव ओपाँव ओलनी ते माःक। येसुए यहूदी जातलाव मिँराए जूँनी उजिउ झाःद याएरिज़्‍याव लिन्‍या परमेस्‍वरए ङ़ादा ज़ नो प्रधान पुजारीए ओयाःत झाःद ओयोनी ज़ ओपाँव ची।
JOH 11:52 येसुए उजिउ ओझाःरिज़्‍याव यहूदीराए जूँनी वाज़ माःक, संसार भरिलाव काना कुनीङ लिज़्‍याव परमेस्वरए उमिनतावरालाई तोबो ज़ जैन्‍याए जूँनी ब ओल्‍यो।
JOH 11:53 हो छ्यामकिन ज़ येसुलाई कातानी सैःन्‍या लिद गुमुस्‍ता दोनाकेर।
JOH 11:54 है जैद हाःकिन येसु यहूदियाल मासरैंःसिद ननी पुलुस्‍द उसिसरास बन छ्योकाव एफ्राइम यादोज़्‍याव नाखारल लिनाकेर।
JOH 11:55 हाः बेलाक यहूदीराए यामानिज़्‍याव निस्‍तार पर्ब हुनाद उलिज़्‍याव। है जैद नो पर्बए जूँनी मिँर ङ़ादा ज़ नाखार नाखारनी यरूसलेमल बाद हुर्सिद याचोखोइसिनाज़्‍याव।
JOH 11:56 नोर ध्‍यान झ़िमल याहुवत येसुलाई मारँःद या याल ज़, “जे कै जेलिज़्‍या, नो मिँ आव पर्बल जाँ ओमाहुरिज़्‍याव सा,” है लिकेर।
JOH 11:57 फरिसीर स़ोनो मुख्या पुजारीराए येसुलाई क्‍योःन्‍याए जूँनी ङ़ादा ज़ नल हुवरालाई, “येसुलाई जेरँःकिन गेलाई है दासिच्‍यो,” है दाद यारानैज़्‍याव।
JOH 12:1 येसु निस्‍तार पर्बकिन छ दिन ओङ़ाल बेथानियाल बाके। नल नो सिउनी ओसोचोइव लाजरसए ओल्‍योक ज़ लिनाके।
JOH 12:2 नोराए येसुए उजूँनी ऱिमकाव ज़्‍यावर थिक थाक जैद मार्थाए ज़्‍यावर भाःद ओराएज़्‍याव। लाजरस फरी येसुस ज़्‍यान्‍याए जूँनी च़ुसिद उलिज़्‍याव।
JOH 12:3 हाः बेलाक मरियमए बनै ओएः ल्‍यो चाव सी ङरो जतामसीए म़ास तर्‍या·वा रैद येसुए उखँत थीद्याद ओचेमए सीदिक्‍यो। झ़िम भरी ज़ बनै चाव सी फाँ फाँ ङर्के।
JOH 12:4 नाःत ज़ छींनी येसुलाई धोका याज़्‍याव उसिस यहूदा इस्‍करियोतए,
JOH 12:5 “बुरू आव म़ास स़ोंसय चाँदीए सिक्‍काल यो·द काता ज़ माल्‍योरालाई भाःद ओराएकिन तान्‍या ओल्‍यो,” है लिके।
JOH 12:6 खाली नोए माल्‍योराए जूँनी उयुँ नाद है उलिज़्‍याव ते माःक, ओल कुन्‍याए जूँनी है उलिज़्‍याव ची। याखार्ताव पैसा ओल ज़ ओनैज़्‍याव, ननी कुव य़ेन ओदोज़्‍याव।
JOH 12:7 हाःत ज़ येसुए, “घदोज़्‍यावक। ङालाई गादैन्‍या छ्यामकावए जूँनी सामा दाद ओनैव ची।
JOH 12:8 काता ज़ माल्‍योर ते जेस एकतार ज़ लिज़्‍यार, ङा ते जेस एकतार लिन्‍या ङामाले,” है यादोक्‍यो।
JOH 12:9 येसु नक लिज़्‍या दी लिन्‍या थैद नजीलाव यहूदीर कुधु ज़ ओल्‍योक हुकेर। नोर येसुए उजूँनी वाज़ याहुव माःक, नो सिउनी ओसोचोइव लाजरसलाई चिऊन्‍याए जूँनी ब हुद यालिज़्‍याव।
JOH 12:10 है जैद ज़ मुख्या पुजारीराए लाजरसलाई ब सैःव पैंकेर।
JOH 12:11 काराव ल्‍यो ताकिन येसुए नोए ओक्‍याँताव ओदोव य़ेननी ज़ यहूदीर कुधु ज़ मुख्या पुजारीरालाई ऱास्‍द येसुलाई यायुँ हुप्‍नाके।
JOH 12:12 हो पराःती नो पर्बत हुव माहोल्‍यार ‘येसु यरूसलेमल हुज़्‍या दी’ लिन्‍या थैद,
JOH 12:13 नोराए खजुर सींए ओस्‍यावलार रैद येसुस दैसिनाद, “होसन्‍ना! परमेस्‍वरए उमिनत हुव इस्राएलीराए याराजा धन्‍याकाव ओताक,” है लिद क़िकेर।
JOH 12:14 येसु तोबो गधाहाए ओबछेरा चेप्‍द उहुज़्‍याव। नोए उजूँनी धर्मसास्‍त्रल इताव सर्सिउ उलिज़्‍याव,
JOH 12:15 “ताछे·नी सियोनए ओज़ा, नराजा गधाहाए ओबछेरा चेप्‍द हुज़्‍या।”
JOH 12:16 नो बेलाक येसुए उसिसराए नो पाँर माबुझिधुकेर। येसु स्‍वर्गत ओल्‍द ओबाव छींनी वाज़ नो धर्मसास्‍त्रलाव सर्सिउ पाँर चेतैद ‘नो पाँ गेसयो·धुव ची ओल्‍यो’ लिन्‍या सैंकेर।
JOH 12:17 नो माहोल्‍यारानी जो जोराए येसुए लाजरसलाई खादरनी क़िद सिउनी ओसोचोइव रँःद नैर, होराए प़ाइँलाई ज़ है यारादोज़्‍याव।
JOH 12:18 होए उजूँनी ज़ येसुए नाःल्‍दिउ य़ेन ओदोव ओल्‍यो लिन्‍या थैद निताव ल्‍यो माल्‍यो मिँर ओलस दैसिहुकेर।
JOH 12:19 निताव रँःद फरिसीर या याल, “आव मानुवाताव मिँ भरी ओपो·स ज़ नोए ओपाँत बाज़्‍यार, गे ते अबकिन नोस कातानी ज़ गेमाधुके ब,” है लिकेर।
JOH 12:20 नो पर्ब मानिना हुवर ख्वार ग्रीक यारादोज़्यावर मनी याल्‍यो।
JOH 12:21 नोर गालीललाव बेथसेदा नाखारलाव फिलिपए ल्‍योक बाद, “अ स़ेर, गे येसुस तखेप दैसिउ गेपैंज़्‍या,” है यादोक ते,
JOH 12:22 फिलिपए नो पाँ फरी अन्‍द्रियासलाई मनी है दोक्‍यो। है जैद नोनी ऩेब्‍लो ज़ येसुए ल्‍योक बाद नो पाँ है दोकिनी।
JOH 12:23 नाःत ज़ येसुए नक लिज़्यावरालाई, “अब ते परमेस्‍वरए ङा मिँ मिन्‍सिउए ङामिनलाई सघ्योःद्यान्‍या बेला हुके।
JOH 12:24 ङा जेलाई साचो है ङादाचिज़्‍या, तोबो तामए ओसै गमल बाद ओमासिवा पै हाःकाव ज़ लिज़्‍या। गमल बाद उसिउत वाज़ कुधु ओसै झाःज़्याव।
JOH 12:25 हिताव ज़ जोए उजिउए मया दोज़्‍याव, होए उजुनीलाई सम़ैज़्‍याव। फरी जोए आव जुनील उजिउए मया मादोव, होए उजिउलाई अजम्‍बरी जुनीए जूँनी जोगोइद नैज़्‍याव।
JOH 12:26 जोए ङासेवा दोव पैंज़्‍याव, हो ङाछींत उहुक। हो ताकिन ची ङा जोङ जोङ ङाताज़्‍या, नो ङासेवा दोज़्‍याव ब होङ ङास ज़ तान्‍या ले। जोए ङासेवा दोज़्‍याव, होलाई परमेस्‍वर ङाबाबुए मनी ओमान नैद्यान्‍या ले,” है यादोक्‍यो।
JOH 12:27 हाःत ज़ फरी, “ङा आख बनै धो थाइव ताद ङाले। ङा कै लिन्‍या? सैं ङाबाबुलाई, ‘अ बाबु, आव ङाक्‍याँत हुरिज़्‍याव दुखरानी जोगोइनाके,’ है दान्‍या ओताव? हिताव ते माता, ङा नो दुखर सहिद सयो·ना ङाहुव ची,” है लिद,
JOH 12:28 “अ बाबु, अब ते घ्‍योःव नमिन सरैंःके,” है लिद ओपोंखारिउ प़ाइँना नमतिन तोबो गाए, “ङामिन ते ङासरैंःधुके, फरी झन ज़ सरैंःन्‍या ङाले,” है उलिज़्याव थास्‍के।
JOH 12:29 नक लिज़्‍याव माहोल्‍याराए नो गा थैद ख्वाराए ‘नम गर्जिज़्‍या’ है लिकेर, ख्वाराए फरी ‘येसु परमेस्‍वरए ओचाकर्‍यास ओपाँज़्‍याव ची’ है लिकेर।
JOH 12:30 हाःत ज़ येसुए, “आव जेथैव गा ङा ङाजूँनी माःक, जे ङालाई सरेस्‍न्‍याए जूँनी ची।
JOH 12:31 अबकिन आव मानुवाताव मिँर फाल्‍सिरिज़्‍यार, यास़ेर सैतान मनी ख्यासिद उमिन म़ारिज़्‍या।
JOH 12:32 स़ोनो ङा आव नामनी छींसिद ङातङ्गैसिउत प़ाइँ मिँरालाई ङाल्‍योदा ङारारैरिज़्‍या,” है यादोक्‍यो।
JOH 12:33 नो है ओल्‍यो भरी ओल उसिरिज़्‍यावए जूँनी ज़ ओपाँव।
JOH 12:34 नो माहोल्‍याराए, “धर्मसास्‍त्रल गेचिऊक नो बाँचैना हुरिज़्‍या है यालिज़्‍याव ख्रीस खर्क ज़ सिन्‍या माले लिन्‍या लिज़्‍या। नँ कै जैद मिँ मिन्‍सिउ तङ्गैसिद सिरिज़्‍या है नलिज़्‍याव? नो मिँ मिन्‍सिउ सु?” है यादोक ते,
JOH 12:35 येसुए, “अझ छ्यावा पै वाज़ ङाज़गै जेखार्ल रहिरिज़्‍या। नो ज़गै जेखार्ल ओलेवा भरी नो बेला ताचुकैच्‍यो, म़ानी चुम चुमोल जेपरिया। नल जेपरिकिन ‘आदा ङाबाज़्‍या’ लिन्‍या ब सैंन्‍या जेमाले।
JOH 12:36 है जैद नो ज़गै उलिज़्‍याक ज़ ज़गैवलाई जेयुँ उहुप्‍क। हो ताकिन ची ज़गैवए ओथोर जेतारिज़्‍या,” है दाद येसु ननी पुलुस्‍द सम़ैसिनाके।
JOH 12:37 येसुए मिँराए ङ़ाक अचम्‍ब अचम्‍बलाव य़ेनर दाद ब नोराए यायुँ ज़ माहुप्‍के।
JOH 12:38 ननी ज़ यसैया अगमबक्ताए ओसरो यो·के। नोए ओसरो आव ज़, “प्रभु, गेरासथैव पाँत सुए यायुँ ज़ माहुप्‍के। परमेस्‍वरए सतैंद ओरायो ओसक्तीलाव य़ेनर ब सुलाई ज़ माताके।”
JOH 12:39 नितावनी ज़ नोराए यायुँ माहुप्‍के। यसैयाए फरी ब तोथोल अइ लिद सर्द नैव,
JOH 12:40 “परमेस्‍वरए नोरालाई मुन्‍दुक्‍यासो जैद यानैव, यायुँ ब बनै खाव जैद नैद यायो। है जैद ज़ यामी लिज़्‍यावत ब मारँःधुर, थैद ब यायुँल मातीधुर। ननी ज़ नोर ङाल्‍योदा यायुँ फर्कैद सगराँसिना माहुर।”
JOH 12:41 यसैयाए ङ़ादा ज़ ख्रीसए ओज़गै रँःद आव पाँ भरी ख्रीसए उजूँनी ज़ सर्द ओनैज़्‍याव।
JOH 12:42 हैदी ब यहूदीराए यास़ेरर कुधुए यायुँ हुप्‍के। खाली ‘धर्मसास्‍त्र झ़िमनी फरिसीराए पले·सिर्‍या’ लिद याछ्याचेए पाखात मापाँधुकेर।
JOH 12:43 नोराए परमेस्‍वरनिकाव दैन्‍या स्‍याबासकिन मिँनिकाव दैन्‍या स्‍याबास घ्‍योःव रँःकेर।
JOH 12:44 हाःत ज़ येसुए बनै चोइस अइ लिद यासथैक्‍यो, “जोए ङालाई उयुँ हुप्‍ज़्‍या, होए ङालाई वाज़ माःक, ङालाई परींज़्‍यावलाई मनी उयुँ हुप्‍ज़्‍या।
JOH 12:45 हिताव ज़ फरी ङालाई रँःज़्‍यावए ङालाई परींज़्‍यावलाई ब रँःज़्‍याव।
JOH 12:46 ङा आव मानुवाताव ज़गै ताद ङाहुके। ङालाई यायुँ हुप्‍न्‍यार चुम चुमोल तान्‍या मालेर।
JOH 12:47 फरी ङापाँ थैद माभैंःज़्‍यावरालाई ङा याखत पले·द्याव मापरिए। ङा आव मानुवाताव मिँरालाई याखत पले·द्याद सजा याना ङाहुव माःक, बाँचैना ङाहुव ची।
JOH 12:48 हैदी ब ङालाई सोद ङापाँ माभैंःज़्‍यावरालाई याखत सतैंद्यान्‍या ङापाँ ज़। नो ङापाँ ओमाभैंःवए, फाल्‍सिन्‍या छ्याम ननी ज़ फाल्‍सिरिज़्‍या।
JOH 12:49 नो ङापाँ ङानी सिर्जैद ङापाँव माःक, ङालाई परींज़्‍याव ङाबाबुए ‘आव पाँनिके’ है ओदाँव ची।
JOH 12:50 ओल ङालाई पाँव उपरींनाव भरी अजम्‍बरी जुनी यान्‍या लिज़्‍या। है जैद ङापाँज़्‍याव भरी परमेस्‍वर ङाबाबुए है ओदाँव वाज़ ङापाँज़्‍या।”
JOH 13:1 निस्‍तार पर्बए ओङ़ादा येसुए, ‘आव मानुवानी पुलुस्‍द परमेस्‍वर ङाबाबुए ल्‍योदा बान्‍या बेला ताके’ लिन्‍या सैंक्‍यो। ओमासिवा पै आव मानुवाताव ओल उमींरालाई मया दाव ज़ ओरानैज़्‍याव।
JOH 13:2 हो छ्याम ऱिमक येसु उसिसरास ज़्‍यावर याज़्‍युज़्‍यावकिन ङ़ादा ज़ सिमोनए ओज़ा यहूदा इस्‍करियोतए उयुँल सैतानए येसुलाई धोका यान्‍या युँ जैद नैद ओएज़्‍याव।
JOH 13:3 हाःत ज़ येसुए उयुँल, ‘परमेस्‍वर ङाबाबुए प़ाइँ ङाकुइत ज़ याद नैनाव, ओल्‍योनी ज़ ङाहुके, फरी ओल्‍योदा ज़ ङाबारिज़्‍या’ है लिन्‍या ओसैंज़्‍यावए,
JOH 13:4 उसिसराए याङ़ाक नो ज़्‍यान्‍यार याज़्‍युज़्‍याव बेलाक ज़ याखार्नी च्‍याँःसिद ओबर्की हाइद रूमाल भिरिसिद,
JOH 13:5 तोबो जाल ऱी झाःद, उसिसराए याखँर हुर्द्याद नो उभिरिसिउ रूमालए ज़ याखँर सीद ओराएज़्‍याव।
JOH 13:6 है जैद याखँर हुरे हुरे सिमोन पत्रुसए ल्‍योक उहुवत पत्रुसए, “प्रभु, नँ कै जैद इतावए ङाखँ हुर्द्याव नपैंज़्‍याव?” है ओदोक ते,
JOH 13:7 येसुए, “आव ङादोज़्‍याव य़ेन आख ते नमासैंए, छींनी नसैंया,” है ओदोक ते,
JOH 13:8 फरी ब पत्रुसए, “नँ ङाखँ खर्क ज़ हुर्द्यान्‍या माताए,” है ओदोक ते, येसुए, “नँ नखँ हुर्द्याव भैंःद नमायाँकिन नँ ङासकाव तान्‍या नमाले,” है दोक्‍यो।
JOH 13:9 हाःत ज़ सिमोन पत्रुसए, “हो ची ताकिन्‍दा प्रभु, ङाखँ वाज़ माःक, ङाकुइर ङाङ़ैर ब हुर्द्याव ताके,” है ओदोक ते,
JOH 13:10 येसुए, “हुर्सिउ मिँ ओक्‍याँ भरी छैंव ओतावए उखँ वाज़ हुर्द्याकिन ताए। जे भरी प़ाइँ छैंवर ज़ जेलिज़्‍या। हैदी ब जेखार्ल तोबो ते माछैंव लिज़्‍या।”
JOH 13:11 येसुए ओललाई धोका याव पैंज़्‍याव मिँलाई ङ़ादाकिन ज़ सरेस्‍द ओनैज़्‍यावए नो माछैंवए उजूँनी ज़ पाँके।
JOH 13:12 येसुए याखँ हुर्द्याद ङ़ादाङाव ओहाइव ओक्‍वार जासिद फरी यास ज़ ज़्‍यान्‍याल च़ुसिद है यादोक्‍यो, “आव जेखँ हुर्द ङायाचिउ य़ेनए ओअर्थ जेमासैंज़्‍याखेहो।
JOH 13:13 जे ङालाई ‘गुर्बा’ स़ोनो ‘प्रभु’ है जेदाँज़्‍याव, नो ते थिक ज़। है जेलिज़्‍याव मिताव ङा हो ज़।
JOH 13:14 खाली ङा जेप्रभु जेगुर्बा ताद जेखँ हुर्द ङायाचिज़्‍या ल्‍यो ताकिन जे मनी तोबोए तोबोलाई उखँ हुर्द्याव ताके।
JOH 13:15 ङा ङादोज़्‍याव मिताव य़ेन जे मनी ‘जेदोया’ लिद नो य़ेन जेङ़ाक सतैंद नैद ङायाचिए।
JOH 13:16 ङा जेलाई साचो है ङादाचिज़्‍या, छुतए ओय़ेन दाज़्‍याव मिँ ओसाहुकिन घ्योःव माताए। हिताव ज़ य़ेनदा परींसिउ मिँ परींज़्‍यावकिन घ्योःव माताए।
JOH 13:17 है जैद जे आव ङापाँर तीद ननी ज़ जेदोकिन असिक दैवर तान्‍या जेले।
JOH 13:18 “खाली आव पाँ प़ाइँए जेजूँनी ते माःक। हैदी ब ङाछाँतिचिउ भरिलाई ते ङा ज़ ङासरेस्‍चिज़्‍या। आव पाँ धर्मसास्‍त्रलाव सर्सिउ पाँ सयो·न्‍याए जूँनी लिज़्‍या। नलाव सर्सिउ आव ज़, ‘ङास सिप ज़्‍युज़्‍याव ज़ ङाकिन तँदा जैसिरिज़्‍या।’
JOH 13:19 आव पाँ भरी ओमाहुद ङ़ादा ज़ है दाद ङानैचिज़्‍या। हो ताकिन ची नो पाँ भरी ओतावत ङालाई ‘हो ज़ ची ओल्‍यो’ लिद सरेस्‍न्‍या जेले।
JOH 13:20 ङा जेलाई साचो है ङादाचिज़्‍या, जोए ङापरींव मिँलाई ओल्‍योक हुव एज़्‍याव, होए ङालाई मनी हुव याँज़्‍याव। ङालाई वाज़ माःक, ङालाई परींज़्‍यावलाई ब हुव एज़्‍याव।”
JOH 13:21 नाः है दाद येसुए उयुँर धो थाइव ताद ओपाँ भरी काता ज़ माम़ोंद उसिसरालाई, “ङा जेलाई साचो है ङादाचिज़्‍या, जेनी तोबोए ङालाई धोका याँरिज़्‍याव,” है ओरादोक ते,
JOH 13:22 ‘काताकाव गेताव’ लिद उसिसर या याल चिऊसिकेर।
JOH 13:23 नो बेलाक येसुए उयुँलाव मिताव तोबो उसिस ओक्‍याँत खदेप लिद उलिज़्‍याव।
JOH 13:24 सिमोन पत्रुसए नोलाई सान दाद्याद, “नो सु है दोसाँ,” है ओदोक ते,
JOH 13:25 नोए येसुए ओक्‍याँत कँ लिद, “प्रभु, नो सुकी?” है ओदोक ते,
JOH 13:26 येसुए, “आव भरेस जोलाई चिपल छोइद ङाएज़्‍या, हो ज़,” है दाद नो भरेसलाई केःद छोइद सिमोन इस्‍करियोतए ओज़ा यहूदालाई एक्‍यो।
JOH 13:27 भरेस ओक्‍योःव प़ाइँना ज़ सैतान उयुँल पसिके। है जैद येसुए नोलाई, “नँ दान्‍या नपैंज़्‍याव चाँदो ज़ दोके,” है दोक्‍यो।
JOH 13:28 नो ज़्‍यान्‍याल च़ुसिद लिज़्‍यावराए, ‘काताए जूँनी नै ओल्‍यो?’ लिन्‍या मासैंकेर।
JOH 13:29 ख्वा ख्वाराए, याखार्ताव पैसा यहूदाए ओक्‍याँत उलिज़्‍यावए, “पर्बए जूँनी कातार लँःनाव उपरींज़्‍याव ताक्‍या, सैं काता ज़ माल्‍योरालाई पैसार यानाव उपरींज़्‍याव ओताव,” लिन्‍या सम्‍जिकेर।
JOH 13:30 यहूदा नो भरेस ज़्‍याद बेहार ज़ पुलुस्‍के। नो बेलाक री ताद उलिज़्‍याव।
JOH 13:31 इस्‍करियोत उपुलुसो छींनी येसु ओल उजूँनी अइ लिद पाँके, “अब ते मिँ मिन्‍सिउए उमिन ब रैंःरिके, परमेस्‍वरए उमिन ब नोए ओक्‍याँनी झन ज़ रैंःन्‍या ले।
JOH 13:32 परमेस्‍वरए उमिन नोए ओक्‍याँत रैंःन्‍या ओतावए, ओल परमेस्‍वरए मनी नोस उलिज़्‍याव सरैंःन्‍या ले। नो य़ेन परमेस्‍वरए हतप्‍त ज़ दान्‍या ले।
JOH 13:33 अ ङाबाबुज़ार, अब ङा जेस कोसै लिन्‍या ङामाले। ङाबाव छींनी जे ङालाई खिम्‍न्‍या जेले। खाली यहूदीराए यास़ेररालाई है ङारादोव मिताव जेलाई मनी है ङादाचिज़्‍या, ङा ङाबाव पोङ जे हुधुन्‍या जेमाले।
JOH 13:34 ङा जेलाई तोबो साःरो कानुन ङायाचिज़्‍या — जे जेल मया दासिच्‍यो। किताव ङा मनी जेलाई मया ङादाचिउ, हिताव ज़ जे मनी जे जेल मया दासिच्‍यो।
JOH 13:35 निताव जे जेल मया जेदासिकिन, ‘ङासिसर ज़ जेल्‍यो’ लिन्‍या प़ाइँए सरेस्‍न्‍या लेर।”
JOH 13:36 हाःत ज़ सिमोन पत्रुसए, “प्रभु, नँ काना नबाज़्याव?” है ओदोक ते, येसुए, “आव बेलाक ते ङा ङाबाज़्‍यावदा नँ बाधुन्‍या नमाले, छींनी ते हुन्‍या ज़ नले,” है ओदोक ते,
JOH 13:37 पत्रुसए, “कै जैद प्रभु, ङा नँस माबाधुन्‍या? ङा नजूँनी सिन्‍या ब तयार ज़ ङालिज़्‍या,” है ओदोक ते,
JOH 13:38 येसुए, “हुकी, ङा ङाजूँनी नजिउ झाःद्यान्‍या तयार नलिज़्‍याव रो? ङा ते नँलाई साचो है ङादींज़्‍या, भाल्‍या ओमाकोद ज़ ङालाई स़ोंखेप ‘ङामासरेसे’ है दान्‍या नले,” है दोक्‍यो।
JOH 14:1 “जे जेयुँर तासतेच्‍यो, परमेस्‍वरलाई जेयुँ उहुप्‍क। ङालाई मनी जेयुँ उहुप्‍क।
JOH 14:2 परमेस्‍वर ङाबाबुए उझ़िमल लिन्‍या पो कुधु ज़ लिज़्‍या। हिताव ओमाल्‍यो ताकिन है मनी ङामादाचिखेहो। नो ङापाँ हैज़ ओतावए जेजूँनी जेपोर बनैनाद ङायाचिज़्‍या।
JOH 14:3 जेजूँनी पोर स्‍यासी ङाजैवत ङा फरी जेलाई च़ाना ङाहुरिज़्‍या। हाःकिन जे ङाल्‍योक ङास सिप ज़ तान्‍या जेले।
JOH 14:4 ङा ङाबाज़्‍याव येम जे ब जेसैंज़्‍याखेहो।”
JOH 14:5 हाःत ज़ थोमाए, “प्रभु, नँ काना नबाज़्‍याव गे गेमासैंए, झन नो नयेम कै जैद गेसैंरिज़्‍याव?” है ओदोक ते,
JOH 14:6 येसुए, “येम ब ङा ज़, साचो पाँ ब ङा ज़, अजम्‍बरी जुनी याज़्‍याव ब ङा ज़। ङाकिन छुतनी सु ज़ ङाबाबुए ल्‍योङ माकेस्‍धुर।
JOH 14:7 ङालाई जेसरेस्‍नाव ताकिन ङाबाबुलाई मनी सरेस्‍न्‍या जेल्‍यो। आकिन ते जे ङाबाबुलाई सरेस्‍न्‍या जेले, जेमीए ज़ जेरँःधुके।”
JOH 14:8 हाःत ज़ फिलिपए, “प्रभु, गेलाई परमेस्‍वर नबाबु सतैंद्यासिके, गेपैंज़्‍याव नाः ज़,” है ओदोक ते,
JOH 14:9 येसुए, “ङा आःपै जेस ज़ लिज़्‍यावत ब नँ कै जैद नमासरेस्‍नाज़्‍याव, फिलिप? ङालाई रँःवए परमेस्‍वर ङाबाबुलाई ब रँःक्‍यो। कै जैद नँ ङालाई रँःद मनी ‘नबाबु परमेस्‍वरलाई सतैंद्यासिके’ है नदाँज़्‍याव?
JOH 14:10 ‘ङा ङाबाबुस ङालिज़्‍या, ङाबाबु ङास लिज़्‍या’ लिन्‍या पाँत नयुँ माहुबे रो? ङा जेलाई है ङादाचिज़्‍याव पाँ भरी ङानी सिर्जैद ङापाँज़्‍याव माःक, ङाक्‍याँत लिज़्‍याव ङाबाबुए ओय़ेनर ङानी ओदोज़्‍याव ची।
JOH 14:11 ‘ङा ङाबाबुस ङालिज़्या, ङाबाबु ङास लिज़्या’ लिन्‍या पाँत जेयुँ उहुप्‍क। नो पाँत जेयुँ ओमाहुप्‍दी ब ङादोव य़ेननी ते जेयुँ सुहुप्‍चिके।
JOH 14:12 “ङा जेलाई साचो है ङादाचिज़्‍या, ङालाई उयुँ हुप्‍ज़्‍याव मिँए ङादोज़्‍याव मिताव य़ेनर दोरिज़्‍याव। ङा ङाबाबुए ल्‍योदा बाद नोस ङालिरिज़्‍यावए होए झन नोकिन घेप्‍पा य़ेनर ब दोरिज़्‍याव।
JOH 14:13 जे परमेस्‍वरलाई ङा ङामिननी जो है जेदोदी ब नो य़ेन ङा सयो·द्यान्‍या ङाले। ननी ज़ परमेस्‍वर ङाबाबुए ओज़गै ओज़ाए ङाक्‍याँत रैंःन्‍या ले।
JOH 14:14 जे ङामिननी ङालाई कातार है जेदाँकिन नो दान्‍या ज़ ङाले।
JOH 14:15 जे ङालाई मया जेदाँकिन ङा है ङादाचिउ पाँर दान्‍या जेले।”
JOH 14:16 “ङा ङाबाबु परमेस्‍वरलाई जेजूँनी तोबो है दाद ङायाचिरिज़्‍या। होए जेलाई सघैन्‍या तोबो परींद्याचिरिज़्‍याव। नो एकम्‍न्‍या जेस ज़ लिन्‍या ले।
JOH 14:17 नो सतलाव छैंव पुरूस ज़। नोलाई आव मानुवाताव मिँराए यामारँःव यामासरेसोए मादैधुर। जे ते जेस लिद जेक्‍याँत बास ओदोहुरिज़्‍यावए जेसरेस्‍ज़्‍या।
JOH 14:18 ङा जेलाई जेबाबु जेआमा माल्‍यो मितावर जैद ते ङामाख्यानैचिए। फरी जेल्‍योक ङाहुरिज़्‍या।
JOH 14:19 छ्यावाकिन आव मानुवाताव मिँराए ङालाई रँःन्‍या मालेर, जे ते रँःन्‍या ज़ जेले। हाःकिन ङा खर्क ज़ मासिन्‍या ङातावए जे मनी सिउका सिउ तान्‍या जेमाले।
JOH 14:20 हो छ्याम, ‘ङा ङाबाबुस ङालिज़्‍या, जे ङास जेलिज़्या, ङा जेस ङालिज़्‍या’ लिन्‍या सैंन्‍या जेले।
JOH 14:21 जोए ङापाँ थैद दोज़्‍याव, हो ज़ ङालाई मया दाज़्‍याव मिँ। जोए ङालाई मया दाँज़्याव, होलाई ङाबाबुए मनी मया दोज़्‍याव। ङा मनी होलाई मया दाद ओल्‍योक सरैंःसिन्‍या ङाले।”
JOH 14:22 यहूदा इस्‍करियोतए माःक, छुत उसिस यहूदाए, “प्रभु, काराव आव मानुवाताव मिँराए ल्‍योक मासरैंःसिन्‍या, गेल्‍योक वाज़ सरैंःसिउ नपैंज़्‍याव?” है ओदोक ते,
JOH 14:23 येसुए, “ङालाई मया दाज़्‍यावए वाज़ ङापाँ दोज़्‍याव। ङाबाबुए मनी नोलाई मया ओदोज़्यावए गिन नोए ल्‍योक हुद नोस बास गिन्‍दोरिज़्‍या।
JOH 14:24 ङालाई मया मादाज़्‍यावर ते ङापाँ माभैंःर। हैदी ब नो जेथैज़्‍याव ङापाँ ङानिकाव माःक, ङालाई परींज़्‍याव ङाबाबु परमेस्‍वरए ल्‍योनी हुव ची।
JOH 14:25 “आव पाँ भरी जेस ङालिज़्‍याक ज़ है दाद ङानैचिए।
JOH 14:26 छींनी परमेस्‍वर ङाबाबुए ङा ङामिननी जेलाई सघैन्‍या छैंव पुरूस परींद्याचिरिज़्‍याव। नो जेस लिद प़ाइँ पैचिरिज़्‍याव। आव ङापाँर मनी य़ाका दाव परींचिरिज़्‍याव।
JOH 14:27 युँ होलाँ तान्‍या ङाअसिक जेलाई याद ङाख्यानैचिरिज़्‍या। नो ङाअसिक आव मानुवातावराए यान्‍या मिताव ते माःक। जेयुँर सतेद ताछे·च्‍यो।
JOH 14:28 ‘ङा ङाबाज़्‍या, फरी ङाहुरिज़्‍या’ लिन्‍या ङापाँर थैव ज़ जेलिज़्‍या। जे ङालाई साचो मया जेदाँज़्‍याव ताकिन ङा ङाबाबुए ल्‍योदा ङाबारिज़्‍या है ङालिक जेरेंखेहो। नो ङाबाबु ङाकिन घ्योःव लिज़्‍या।
JOH 14:29 आव भरी ओमाताद ङ़ादा ज़ जेलाई है दाद ङानैचिए। नो ओताव जेरँःवत जेयुँ हुप्‍न्‍या ले।
JOH 14:30 अब ते ङा जेस कोसै पाँव दैन्‍या ङामाले। आव मानुवातावराए यास़ेर सैतान हुनाके। उहुदी ब ङाक्‍याँत ओहक ते माले।
JOH 14:31 खाली आव मानुवाताव मिँराए, ङा ङाबाबुलाई मया दाद है ओदाँव भरी ङादोज़्‍याव घसैंरक लिद सरैंःद्याव ताके,” है लिद उसिसरालाई, “च्‍याँःसिचिके, गेबा,” है यादोक्‍यो।
JOH 15:1 “ङा जोम्‍परसैए साचो ओजरा ज़, ङाबाबु जोम्‍परसैए ओर्गे ज़।
JOH 15:2 ङाक्‍याँताव यासै माझाःज़्‍याव खार भरी ङाबाबुए यालो·ज़्‍याव। फरी यासै झाःज़्‍याव खार भरी झन ज़ घझाःवक लिद नत ताज़्‍याव तके दँ जोखारीर ब याच़म्‍ज़्याव।
JOH 15:3 हो मिताव ज़ जे ते है ङादाचिउ पाँए जेक्‍याँताव माचाव भरी हाइद ख्याद छैंवर जेताधुके।
JOH 15:4 है जैद जे ङास ज़ लिचिके, ङा जेस ज़ लिन्‍या ङाले। किताव जोम्‍परसैए ओखार ओक्‍याँत जोरैसिउ ओमालिकिन ओसै ब माझाःव, हिताव ज़ जे मनी ङाक्‍याँत जेमालिकिन जेसै ज़ झाःन्‍या जेमाले।
JOH 15:5 “ङा जोम्‍परसैए ओजरा ज़, जे ओखारर ज़। जे नो खार माँःती ङाक्‍याँत जेलिकिन ङा मनी जेस ज़ तान्‍या ङाले। ननी ज़ बनै जेसै ल्‍योर तान्‍या जेले। ङा जेस ङामालिकिन जेनी काता ज़ दाधुन्‍या जेमाले।
JOH 15:6 ङाक्‍याँत मालिज़्‍यावर ते पल्‍द ख्यासिउ खार उथँव मिताव अऩाकलावर तान्‍या लेर। निताव खारर दुप्‍द मेंःल झाःद चुयाप जैन्‍या वाज़ ताज़्‍या।
JOH 15:7 खाली जे ङाक्‍याँत लिद ङापाँर भैंःद जेयुँल जेनैकिन, जो जेपैंदी ब दैन्‍या जेले।
JOH 15:8 जे बनै जेसैर झाःद ङासिसर तान्‍या मितावर जेताकिन परमेस्‍वर ङाबाबुए उमिन ननी ज़ घ्योःन्‍या ले।
JOH 15:9 “किताव ङाबाबुए ङालाई मया दाँज़्‍याव, हिताव ज़ ङा मनी जेलाई मया ङादाचिज़्‍या। है जैद जे ङामयाल ज़ लिच्‍यो।
JOH 15:10 ङापाँ भरी भैंःद जेदोकिन, जेल्‍योदा लिज़्‍याव ङामयाल ज़ लिन्‍या जेले। ङा मनी परमेस्‍वर ङाबाबुए ओपाँ भरी भैंःद दाद ङाल्‍योदा लिज़्‍याव ओमयाल ज़ ङालिज़्‍या।
JOH 15:11 ङाल्‍योनिकाव होलाँ तान्‍या युँ जेस ओताक, स़ोनो नो होलाँ तान्‍या प़ाइँत ओयो·क लिद आव पाँ भरी है दाद ङानैचिए।
JOH 15:12 “जेलाई ख्यानैद ङायाचिज़्‍याव दान्‍या य़ेन आव ज़, किताव ङा जेलाई मया ङादाचिउ, हिताव ज़ जे मनी तोबोए तोबोलाई मया दासिच्‍यो।
JOH 15:13 नैं मेंए ल्‍योदा मया उलिज़्‍याव आनी ज़ रैंःज़्‍या — जोए ओनैंए उजूँनी उजिउ झाःज़्‍याव, हो ज़ प़ाइँरानी घेप्‍पा मया।
JOH 15:14 जे है ङादाचिउ पाँल जेलिकिन, जे ङानैंर ज़ जेताज़्‍या।
JOH 15:15 आकिन ते जेलाई ङाबाँदार है ङामादाचिए। ओबाँदारालाई ते यासाहुए ओदाँजीं प़ाइँ सतैंद मारायो। ङा ते ङाबाबु परमेस्‍वरए ल्‍योनी ङादैव भरी ओपो·स ज़ सतैंद ङायाचिउए जेलाई ङानैंर है ङादाचिज़्या।
JOH 15:16 जे फरी ङालाई जे जेछाँतिनाव माःक, बुरू ङा जेलाई थ॰रिन्‍या सैर ओझाःनारक लिद छाँतिद ङाखतैचिके। है जैद जे परमेस्‍वर ङाबाबुस ङा ङामिननी जेऩिउ भरी यान्‍या ले।
JOH 15:17 फरी ब नो दान्‍या य़ेन ज़ ख्यानैद ङायाचिज़्‍या — तोबोए तोबोलाई मया दासिच्‍यो।”
JOH 15:18 “जेलाई आव मानुवाताव मिँराए यासोचिक नोकिन ङ़ादा ङालाई यासोनाव लिन्या य़ाका दोच्‍यो।
JOH 15:19 जे आव मानुवानी तावर जेताव ताकिन आव मानुवाताव मिँराए गेमींर लिद मया दाचिखेरहो। खाली ङा जेलाई आव मानुवानी ङाछाँतिचिउए जे आव मानुवातावर माःक। है जैद मानुवाताव मिँराए जेलाई सोचिज़्‍यार।
JOH 15:20 ङ़ादा है ङादाचिउ पाँ आःपै य़ाका जेदोज़्‍याखेहो। छुतए ओय़ेन दाज़्‍याव मिँ ओसाहुकिन घ्योःव माताए। है जैद नोर ङाखिरी यापसिकिन जे जेखिरी ब पसिन्‍या लेर। हिताव ज़ ङा ङापाँ याभैंःव ताकिन जे जेपाँ ब भैंःन्‍या याल्‍यो।
JOH 15:21 खाली नोराए ङालाई परींज़्‍यावलाई यामासरेस्‍ज़्‍यावए जे ङामिनतावर जेतावए जेलाई दुख यान्‍या लेर।
JOH 15:22 ङा आव मानुवात परमेस्‍वरए ओपाँ ङामारासथैहुव ताकिन नोराए याखत ब माताखेहो। खाली अब ते नोरालाई काता निउँ ज़ माले।
JOH 15:23 ङालाई सोज़्‍यावराए ङाबाबु परमेस्‍वरलाई ब सोज़्‍यार।
JOH 15:24 हिताव ज़ फरी सुए ज़ यामादोताव अचम्‍बलाव य़ेनर नोराए ङ़ाक ङामादोव ताकिन ननी ब याखत माताखेहो। खाली निताव य़ेनर रँःज़्‍यावत ब ङालाई यासोनाव प़ाइँना ङाबाबुलाई ब सोकेर।
JOH 15:25 नोराए निताव याय़ेननी धर्मसास्‍त्रलाव सर्सिउ पाँ सयो·ज़्‍यार। नलाव सर्सिउ आव ज़, ‘नोराए अऩाकल ज़ सोनाकेर।’
JOH 15:26 छींनी ङा ङाबाबु परमेस्‍वरए ल्‍योनी जेलाई सघैन्‍याए जूँनी सतलाव छैंव पुरूस परींद ङायाचिरिज़्‍या। नो पुरूस ङाबाबुए ल्‍योनी हुद ङा ङाजूँनी ताव पाँ भरिए गोहाई तारिज़्‍या।
JOH 15:27 जे मनी ङ़ादाकिन ज़ ङास जेल्‍योए जे ब ङागोहाईर जेतारिज़्‍या।”
JOH 16:1 “जेयुँर ताक़्याक लिद आव पाँर ङ़ादा ज़ ङासथैचिज़्‍या।
JOH 16:2 जेलाई इताव ब हुरिज़्‍या — यहूदीराए धर्मसास्‍त्र झ़िमनी पले·चिरिज़्‍यार। फरी जेलाई सैःन्‍या सजा याज़्‍यावर ‘परमेस्‍वरए ओय़ेन ज़ गेदोज़्‍या’ है लिन्‍या लेर।
JOH 16:3 निताव य़ेन नोराए ङाबाबुलाई ब यामासरेसोए, ङालाई ब यामासरेसनावए दान्‍या लेर।
JOH 16:4 आव पाँ भरी जेलाई ङ़ादा ज़ है ङादाचिज़्‍या। हो ताकिन ची जेलाई नितावर याहुक आव ङापाँर य़ाका दान्‍या जेले। नो पाँर आःपै जेस ज़ ङाल्‍योए है ङामादाचिताव।”
JOH 16:5 “अब ते ङालाई परींज़्यावए ल्‍योदा ङाबारिके, खाली ‘नँ काना नबाज़्याव?’ है जेमादाँए।
JOH 16:6 आव है ङादाचिज़्याव पाँए जेयुँर माचाव जैद नैद्याचिउ।
JOH 16:7 खाली ङा साचो ज़ है ङादाचिज़्‍या, ङा आनी बान्‍या जेलाई पाथ लिज़्‍या। ङा आनी ङामाबाकिन जेलाई सघैन्‍या छैंव पुरूस हुन्‍या माले। ङा ङाबावत वाज़ नोलाई परींद ङायाचिरिज़्‍या।
JOH 16:8 नो उहुवत आव मानुवाताव मिँरालाई यापाप सतैंद्याद, परमेस्‍वरए ओन्‍याय स़ोनो ओसजा आव ज़ लिद थ·रैद याएरिज़्‍याव।
JOH 16:9 नो सतैंद ओराएरिज़्‍याव यापाप ङालाई यायुँ ओमाहुबोनी ज़ ताके।
JOH 16:10 नो सतैंद ओराएरिज़्‍याव परमेस्‍वरए ओन्‍याय फरी ङा जेङ़ाकिन ङाबाबु परमेस्‍वरए ओल्‍योक ङाबावत रैंःरिज़्‍या।
JOH 16:11 नो सतैंद ओराएरिज़्‍याव परमेस्‍वरए ओसजा फरी ङा आव मानुवातावराए यास़ेर सैतानलाई ओपाहा झाःद्याद उमिन सम़ैद ङायोत रैंःरिज़्‍या।
JOH 16:12 “अझ ङा जेलाई है दान्‍या पाँर कुधु ज़ ओल्‍यो, खाली आवकिन कुधु ज़ है ङादाचिकिन जेयुँल नैधुन्‍या जेमाले।
JOH 16:13 नो छैंव पुरूस उहुवत वाज़ नोए ज़ साचो पाँर थ·रैव परींद पैचिरिज़्‍याव। नोए ओल उयुँ स्‍यानी सिर्जैसिउ पाँर पाँन्‍या माले, ओथैव वाज़ पाँन्‍या ले। नोए ज़ हुन्‍या पाँर ब सतैंद्यान्‍या ले।
JOH 16:14 नोए ङा ङाल्‍योनिकाव पाँर ओपो·स ज़ छर्लङ्ग सतैंद्याद ङामिन ब सघ्योःद्याँरिज़्‍याव।
JOH 16:15 ङाबाबु परमेस्‍वरस लिज़्‍याव भरी ङा ङामीं ज़। है जैद ज़ है ङादाचिउ, ‘नो पुरूसए जेलाई सतैंद ओयाचिरिज़्‍याव भरी ङा ङाल्‍योनी ज़ ङा ङाजूँनी ज़ तारिज़्‍या।’ ”
JOH 16:16 “आकिनी जाँवाक जे ङालाई रँःन्‍या जेमाले। नकिन फरी जाँवाक वाज़ रँःन्‍या जेले,” है ओरादोक ते,
JOH 16:17 उसिसर या याल, “आव काता ओपाँज़्‍याव इताव — ‘छ्यावाकिन जे ङालाई रँःन्‍या जेमाले, फरी छ्यावाक वाज़ रँःन्‍या जेले’ है लिज़्‍या? स़ोनो, ‘ङा ङाबाबुए ल्‍योदा ङाबारिज़्‍या,’ है मनी लिज़्‍या,” है लिकेर।
JOH 16:18 नोराए, “आव ‘छ्यावाक’ है ओल्‍यो काता ओताव? आव पाँ जाँ गेमाबुझिधुके,” है यालिज़्‍याव।
JOH 16:19 हाःत ज़ येसुए ‘नो पाँर ङालाई है दाव यापैंज़्‍याव ताखेहो’ लिद नोरालाई है यादोक्‍यो, “नो ‘छ्यावाक रँःन्‍या जेमाले, छ्यावाक फरी जेरँःनारिज़्‍या’ है ङादाचिउ पाँत काताए जूँनी उल्‍तानी पाल्‍ता जेताज़्‍याव?
JOH 16:20 नोए जूँनी साचो ज़ है ङादाचिज़्‍या, आव पाँत जे ते जेसोगोए चिर्लनी बिर्ल घर्न्‍या जेले, मानुवाताव मिँर ते बनै रेंन्‍या लेर। खाली नो जेसोगो रेंतल त़ोसिरिज़्‍या।
JOH 16:21 किताव तोबो ज़ा दैन्‍या मेंमाए ज़ा दैन्‍या बेलाक घर्लिद दुख दैज़्‍याव, फरी भाउज़ा उजर्मिउत नो मेंमा उदुखर मेंःद उयुँर होलाँ ताद रेंज़्‍या,
JOH 16:22 हिताव ज़ जे मनी छ्यावा पै वाज़ सोगो दान्‍या जेले। फरी जेस ङादैसिउत जेयुँर होलाँ ताद रेंन्‍या जेले। नो जेरेंत सुए ज़ जेनी नैद लाँधुन्‍या मालेर।
JOH 16:23 नो बेला उहुवत जे ङालाई सुधिउ परिन्‍या माले। ङा जेलाई साचो है ङादाचिज़्‍या, ङामिननी जो जेऩिदी ब ङाबाबुए नो याचिरिज़्‍याव।
JOH 16:24 आःपै ते जे ङामिननी काता ज़ जेमाऩिताए। अबकिन ते ऩिचिकेदा दैन्‍या जेले। हो ताकिन ची जेरेंत ब सयो·द्यान्‍या ले।”
JOH 16:25 “आःपै ते आव ङापाँर जेस बिन्‍ज़ा बिन मितावनी ज़ ङापाँके। तछा छींनी नो ङाबाबुए उजूँनी ङापाँव पाँर ओपो·स ज़ छर्लङ्ग तारिज़्‍यार।
JOH 16:26 हो छ्याम जे ज़ ङामिननी ऩिन्‍या जेले, ङा जेजूँनी ङाबाबुस ऩिद्याव मापरिए।
JOH 16:27 ङा ङाबाबुए ल्‍योनी ङाहुव लिद जेयुँ हुप्द ङालाई मया जेदाँवए ङाबाबुए मनी जेलाई मया दान्‍या ले।
JOH 16:28 ङा ङाबाबुए ल्‍योनी ज़ आव मानुवात ङाहुके, फरी आव मानुवालाई ऱास्‍द ङाबाबुए ल्‍योदा ज़ ङाबारिज़्‍या,” है यादोक्‍यो।
JOH 16:29 हाःत ज़ उसिसराए, “अब ते नपाँ बिन्‍ज़ा बिननी माजैद चावस ज़ पलास्‍द नयासिके।
JOH 16:30 अब ते गेसैंके, नँ प़ाइँ ज़ नसैंज़्‍या, आकिन गे नँलाई सुधिउ ब मापरिके। नँ परमेस्‍वरनी हुव ज़ लिद गेयुँ मनी हुप्‍के,” है यादोक ते,
JOH 16:31 येसुए, “ङालाई बल्‍ल जेयुँ जेसुहुबो रो?
JOH 16:32 आव मनी थैच्‍यो, तछा इताव बेला हुरिज़्‍या, नो बेला उहुधुव मिताव ब लिज़्‍या, जे जेछ्याचेए चितराँ पुतराँ ताद सु सु जेझ़िमदा बाद ङालाई ङाबातङ ज़ जेजैनारिज़्‍या। हैदी ब ङा ङाबातङ ङामाले, परमेस्‍वर ङाबाबु ङास ज़ लिज़्‍या।
JOH 16:33 आव पाँ भरी जे ङास लिद जेयुँ होलाँ ओताक लिद ङ़ादा ज़ है दाद ङानैचिए। जे आव मानुवात दुखर वाज़ दैन्‍या जेले। हितावत ब जेयुँर तासतेच्‍यो, ङा आव मानुवालाई हारैद ङानै,” है यादोक्‍यो।
JOH 17:1 येसु आव भरी पाँद नमदा भाल्‍सिद, “अ परमेस्‍वर ङाबाबु, बेला यो·हुके। ङा नँ नमिन सघ्‍योःद्यान्‍याए जूँनी ङा नज़ाए ङामिनलाई ब सघ्‍योःद्याव ताके।
JOH 17:2 किताव नज़ालाई मिँ भरिराए याङ़ैताव नजैनाव, आथ पाला मनी ङालाई नयाँव मिँ भरिरालाई अजम्‍बरी जुनी यान्‍याए जूँनी ङामिन सघ्‍योःद्याव ताके।
JOH 17:3 नोर अजम्‍बरी जुनी दैन्‍या इतावनी ज़ ताज़्या — नँ तोबोका तोबो साचो परमेस्‍वरलाई सरेस्‍न्‍या स़ोनो ङा नपरींनाव येसु ख्रीसलाई सरेस्‍न्‍यानी ज़।
JOH 17:4 ङालाई ‘दोयो’ लिद नपरींनाव य़ेन भरी सयो·द आव मानुवात नमिन ब सघ्‍योःद नैद ङाईंए।
JOH 17:5 अ बाबु, अब ते ङालाई नँस ज़ नैद आव नाम नम ओमाताद नँस गिन्‍लिज़्‍याकाव ङाज़गै फरी ङालाई याँयो,” है लिद पोंखारिक्‍यो।
JOH 17:6 “आव मानुवानी ङालाई नयाँव मिँरालाई नमिन सतैंद नैद ङाराएए। नोर नमींर ज़ याल्‍यो, नोर ज़ ङालाई नयाँके। नोराए नपाँर भैंःद ज़ लेर।
JOH 17:7 नँ ङालाई नयाँव पाँ भरी नँनी ज़ हुव लिद नोराए सैंद नैर।
JOH 17:8 नँ ङालाई नयाँव पाँ भरी नोरालाई याद ङारानै। नोराए नो पाँ भरी रैद ङा नल्‍योनी हुव ज़ लिद थ·रैद, नँ ज़ ङालाई नपरींनाव लिद यायुँ ब हुप्‍द ले।
JOH 17:9 नो ङालाई नयाँव मिँराए जूँनी ङा पोंखारिउ ज़ ङालिज़्‍या, नोर नमींर ज़। उपुर्कावराए जूँनी ते ङामादोए।
JOH 17:10 ङास लिज़्‍याव भरी प़ाइँ नमींर ज़, नँस लिज़्‍याव भरी ब प़ाइँ ङामींर ज़। नोराए याक्‍याँत ज़ ङाज़गै रैंःद ले।
JOH 17:11 अब ते ङा आव मानुवात कोसै ङामाले, नल्‍योदा ङाहुरिज़्‍या। नो नयाँवर ते आव मानुवात ज़ ङाराख्यानैरिज़्‍या। है जैद अ छैंव ङाबाबु, नोरालाई नमिनत पाथस ज़ यानैयो। नँस गिन तोबो ज़ गिन्‍लिज़्‍याव मिताव नोर मनी तोबो ज़ ओतारक।
JOH 17:12 ङा नोरास ङालेवा पै नोरालाई खेर बान्‍यानी जोगोइद नमिनत पाथस ज़ ङारानैके। खाली धर्मसास्‍त्रलाव पाँलाई सयो·न्‍याए जूँनी तोबो नर्गए ओज़ा वाज़ खेर बाके।
JOH 17:13 अब ते ङा नल्‍योदा ङाहुरिके। खाली आव नयाँवराए यायुँर होलाँ ताद रेंद लिन्‍या ओतारक लिद ङा आव मानुवालाई माख्यानैद ङ़ादा ज़ ङापोंखारिनिज़्‍या।
JOH 17:14 ङा नोरालाई नँ नपाँ ज़ ङाराएके। नोर ङा मिताव आव मानुवातावर यामातावए मानुवाताव मिँराए यारासोज़्‍यार।
JOH 17:15 नोरालाई ‘आव मानुवानी नल्‍योदा यालाँके’ लिद ते ङामापोंखारिए, खाली ‘झुकैज़्‍याव सैताननी पाथस यानैयो’ है ङादींज़्‍याव ची।
JOH 17:16 किताव ङा आव मानुवाताव माःक, हिताव ज़ नोर मनी आव मानुवातावर माःक।
JOH 17:17 नोरालाई साचो नपाँल सतस दान्‍या याखत माल्‍यो छैंवर याजैयो। नँ नपाँ सतलाव लिज़्‍या।
JOH 17:18 किताव ङालाई आव मानुवात नपरींनाव, हिताव ज़ ङा मनी नोरालाई मानुवात परींद ङारानै।
JOH 17:19 नोर साचो नपाँल याखत माल्‍यो छैंवर घतारक लिद ङा नोराए जूँनी नयुँलाव मिताव य़ेन दान्‍यात थाँसिद ङाले।”
JOH 17:20 “आव ङापोंखारिनिज़्‍याव नोराए जूँनी वाज़ माःक, नोराए यापाँ थैद ङाल्‍योदा यायुँ हुप्‍ज़्‍यावराए जूँनी पाला ज़।
JOH 17:21 अ परमेस्‍वर ङाबाबु, किताव ङा नँस ङालिज़्‍या, नँ ङास नलिज़्‍या, हिताव ज़ नोर मनी प़ाइँ तोबो ज़ ताद गिनस खैवर ओतारक। हो ताकिन ची आव मानुवाताव मिँराए ङालाई नँ ज़ नपरींनाव थ·रैन्‍या लेर।
JOH 17:22 गिन तोबो ज़ गिन्‍लिज़्‍याव मिताव नोर ब तोबो ज़ ओतारक लिद ङालाई नयाँव ज़गै नोरालाई मनी याद ङारानैए।
JOH 17:23 है जैद नोर प़ाइँ तोबो ज़ ओतानारक, ङा नोरास, नँ ङास ओताक। ननी ज़ आव मानुवाताव मिँराए ङालाई नँ ज़ नपरींनाव सैंन्‍या लेर। स़ोनो किताव ङालाई मया नदाँव, नोरालाई मनी मया नरादोज़्‍याव सैंन्‍या लेर।
JOH 17:24 अ बाबु, ङालाई नयाँव मिँर जोङ ङालिज़्‍या होङ ज़ ओतारक है ङालिज़्‍या। हो ताकिन ची ङालाई नयाँव ज़गै नोराए रँःधुन्‍या लेर। आव नाम नम ओमाताद ज़ ङालाई मया दाद नज़गैर नयाँके।
JOH 17:25 अ सतस न्‍याय दाज़्याव ङाबाबु, आव मानुवाताव मिँराए नँलाई यामासरेस्‍निदी ब ङा ते ङासरेस्‍निज़्‍या। आव नमींराए मनी ङा नल्‍योनी ज़ ङाहुव लिन्‍या सैंद नैर।
JOH 17:26 ङा नोरालाई नमिन ङारासथैके, फरी ब सथैन्‍या ज़ ङाले। हो ताकिन ची ङालाई नदाँज़्‍याव मया नोरास तान्‍या ले, ङा ब नोरास ज़ तान्‍या ङाले।”
JOH 18:1 येसुए आव भरी पोंखारिद उसिसरास किद्रोन घैरा होफताव बगैचाल बाकेर।
JOH 18:2 नो पो येसुलाई सूँपिज़्‍याव यहूदा इस्‍करियोतए मनी सैंद ओनैज़्‍याव। येसु उसिसरास एकतार नो पोक याबाज़्‍याव।
JOH 18:3 है जैद यहूदा इस्‍करियोतए फरिसीर स़ोनो मुख्या पुजारीराए यारापरींव ध्‍यान झ़िमलाव पाल्‍यार स़ोनो सिपाईंर लाँद नो बगैचाल बाकेर। नोरास हत्‍यारर, लाल्‍तिनर भाँर ब लाँद यानैज़्‍याव।
JOH 18:4 येसुए ओक्‍याँत हुरिज़्‍याव दुखर सैंद ओल ज़ नोराए याल्‍योक बाद, “जे सुलाई जेखिम्‍ज़्‍याव?” है ओरादोक ते,
JOH 18:5 नोराए, “नासरतलाव येसुलाई,” है दोकेर। नाःत ज़ येसुए, “हो ताकिन ते नासरतलाव येसु ङा ज़,” है यादोक्‍यो। येसुलाई धोका याज़्‍याव यहूदा इस्‍करियोत ब नोरास नक ज़ च्‍याँःसिद उलिज़्‍याव।
JOH 18:6 येसुए, “ङा हो ज़,” है ओरादोव प़ाइँना नोर प़ाइँ ज़ याछींदा सरिद पल्‍तिकेर।
JOH 18:7 येसुए फरी ब, “जे सुलाई जेखिम्‍ज़्‍याव?” है ओरादोक ते, “नासरतलाव येसुलाई,” है दोकेर।
JOH 18:8 येसुए, “जेलाई आछ्या ज़ ‘ङा हो ज़’ है ङामादाचिउ रो? साचो ङालाई वाज़ जेखिम्‍नाज़्‍याव ताकिन आव ङानैंरालाई बाव याराएचिके,” है यादोक्‍यो।
JOH 18:9 नो है ओरादोव ङ़ादाङाव ओपोंखारिकाव मिताव ‘तोबो ज़ कै मै तातारक’ है ओल्‍यो पाँ सयो·न्‍याए जूँनी ज़ है ओरादोव।
JOH 18:10 हाःत ज़ सिमोन पत्रुसए ओतरवाली हाइद प्रधान पुजारीए ओनोकोरलाई वोर्निकाव ओर्ना पल्‍द सतेदिक्‍यो। नो नोकोरए उमिन माल्‍खस ओल्‍यो।
JOH 18:11 येसुए पत्रुसलाई, “नतरवाली उसिपल झाःके। ङाबाबु परमेस्‍वरए गोइँद ओयाँव दुखर ङा कै जैद मासहिन्‍या?” है दोक्‍यो।
JOH 18:12 हाःत ज़ नक लिज़्‍याव कप्‍तान, उसिपाईंर स़ोनो यहूदीराए यास़ेरराए यारापरींव पाल्‍याराए येसुलाई क्‍योःद किद,
JOH 18:13 हन्‍नासए ओल्‍योक लाँकेर। नो हन्‍नास नो साललाव प्रधान पुजारी कैयाफाए ओबागे ओल्‍यो।
JOH 18:14 नो कैयाफाए ज़ ङ़ादा यहूदीराए यास़ेररालाई, “प़ाइँ यासिज़्‍याव देखा बुरू नोराए पोल तोबो सिन्‍या पाथ लिज़्‍या,” है दाद सल्‍ला याज़्‍याव मिँ।
JOH 18:15 हाः बेलाक पै सिमोन पत्रुस स़ोनो छुत तोबो उसिस येसुए उछीं उछीं निबाज़्‍याव। नो तोबो उसिस प्रधान पुजारीस ङ़ादाकिन ज़ निसरेस्‍सिज़्‍यावए नो उसिस प्रधान पुजारीए ओचतराक पै येसुस ज़ बाके।
JOH 18:16 सिमोन पत्रुस ते साँबिलाक च्‍याँःसिद उलिज़्‍याव। नो प्रधान पुजारीस सरेस्‍सिउ उसिस ओल्द बाद साँबिलाक पाल्‍या लिज़्‍याव ल़ुज़ालाई है दाद पत्रुसलाई ओलस ज़ चतराक लाँक्‍यो।
JOH 18:17 पत्रुस साँबिलाक उपसिज़्‍याक नो ल़ुज़ाए, “नँ ब नो मिँए उसिस ज़ सा?” है ओदोक ते, पत्रुसए, “अहँ, ङा माःक,” है दोक्‍यो।
JOH 18:18 नो चतराक नलाव य़ेन दाज़्‍यावर स़ोनो पाल्‍यार याज़्‍यूँःवए मेंः दाद यामुइँसिज़्‍याव। पत्रुस मनी नोराए ल्‍योक बाद मेंः मुइँसिनाके।
JOH 18:19 नकिन नो प्रधान पुजारीए येसुलाई ओरापैज़्याव स़ोनो उसिसराए जूँनी ओखोले·क ते,
JOH 18:20 येसुए, “ङा ङारासिऊज़्‍याव पाँर म़ोंसिद माःक, प़ाइँए रँःन्‍याक, प़ाइँए ङ़ाक ज़ ङारापैज़्‍या। यहूदीर यादुप्‍सिज़्याव धर्मसास्‍त्र झ़िम झ़िमक स़ोनो ध्‍यान झ़िमल ज़ ङारासथैके।
JOH 18:21 काराव ङालाई नखोले·नाज़्‍याव? ङापाँ थैवरालाई ज़ यासुधिके, नोराए ज़ नँलाई है दान्‍या लेर,” है ओदोव प़ाइँना ज़,
JOH 18:22 नक लिज़्‍याव तोबो पाल्‍याए, “नँ कै जैद नाःल्‍दिउ प्रधान पुजारीस याः नदोज़्‍याव?” लिद तखेप लप्‍तैक्‍यो।
JOH 18:23 हाःत ज़ फरी येसुए, “ङा मापाँन्‍या ङापाँव ताकिन ङागल्‍ती सतैंके, ङा थिक ज़ ङापाँज़्याव ताकिन काराव नप़ोनाज़्याव?” है दोक्‍यो।
JOH 18:24 नकिन हन्‍नासए येसुलाई किसिउ ज़ प्रधान पुजारी कैयाफाए ल्‍योदा परींक्‍यो।
JOH 18:25 नाःपै सिमोन पत्रुस लाँःक च्‍याँःसिद मेंः मुइँसिउ ज़ उलिज़्‍याव। नक लिज़्यावराए, “नँ ब नोए उसिस ज़ सा?” है यादोक ते, पत्रुस माभैंःद, “ङा हो माःक,” है यादोक्‍यो।
JOH 18:26 प्रधान पुजारीए तोबो ओनोकोर, ङ़ादा पत्रुसए ओर्ना पल्‍द सतेद ओएज़्‍यावए ओक्‍याँदाङाव ब नक उलिज़्‍याव। होए मनी पत्रुसलाई, “नँलाई आछ्याक येसुस बगैचाल नलिज़्‍याव ङारँःनिउ सानी,” है ओदोक ते,
JOH 18:27 पत्रुसए फरी ब माभैंःद, “ङा माःक,” है ओदोव प़ाइँना ज़ भाल्या कोके।
JOH 18:28 नकिन छकाल्‍न्‍या घग ज़ कैयाफाए उझ़िमनी येसुलाई रोमी हाकिमए ओमहलल लाँकेर। नो लाँज़्‍याव यहूदीर ते, ‘झुथो ताद निस्‍तार पर्बत भत्‍यार ज़्याव गेमादैया’ लिन्‍या छ्यासए महलल मापसिकेर।
JOH 18:29 है जैद हाकिम पिलातस ओल ज़ महलनी लाँःक पुलुस्‍द नोराए ल्‍योक बाद, “जे आव मिँलाई काता ओखत पले·द जेएज़्‍याव?” है ओरादोक ते,
JOH 18:30 प़ाइँए ज़ तपाँ जैद, “आवए ओखत ओमाल्‍यो ताकिनी, नल्‍योक काराव गेरैरिज़्‍याव?” है यादोक ते,
JOH 18:31 पिलातसए, “जे ज़ लाँद जे यहूदीराए जेकानुननी ज़ फाल्‍चिके,” है ओरादोक ते, यहूदीराए यास़ेरराए, “गे गेकुइत सैःन्‍या हक माले,” है दोकेर।
JOH 18:32 नो पाँत ज़ येसुए ङ़ादा ‘इतावनी ङासिरिज़्‍या’ है उलिज़्‍याव पाँ यो·के।
JOH 18:33 नकिन पिलातस महलल पसिद येसुलाई खुल्‍द, “नँ साचो यहूदीराए याराजा ज़ रो?” है ओदोक ते,
JOH 18:34 येसुए, “आव पाँ नँ ज़ नसैंव सैं ङाजूँनी सुवाराए है यादींव?” है ओदोक ते,
JOH 18:35 पिलातसए, “ङा काता ङासैंए, ङा यहूदी माःक। नँ नजातलाव मिँर स़ोनो मुख्या पुजारीराए ज़ ङाल्‍योक रैद नैनिर। नँ मादान्‍या य़ेन काता नदोव?” है ओदोक ते,
JOH 18:36 येसुए, “ङा ङाराज्‍या आव मानुवाताव माःक। ङाराज्‍या मानुवाताव ताकिन, आव ङालाई क्‍योःज़्‍याव यहूदीराए कुइनी जोगोइन्‍याए जूँनी ङाधूँलावर खप्‍सिना हुखेरहो। खाली ङा ङाराज्‍या आलाव माःक,” है दोक्‍यो।
JOH 18:37 हाःत ज़ पिलातसए फरी, “हुकी नँ राजा ज़ रो?” है ओदोक ते, येसुए, “ङा राजा ङालिज़्‍याव नँ ज़ है नदाँज़्‍या सानी। होए उजूँनी ज़ ङा आव मानुवात जर्मिद साचो पाँए ओगोहाई याना ङाहुके। है जैद सतलाव पाँल लिज़्‍याव भरी ङापाँ थैद दोज़्यार,” है ओदोक ते,
JOH 18:38 पिलातसए, “सतलाव पाँ काताकी?” है दाद लाँःक यहूदीराए ल्‍योक बाद, “ङा आव जेरैव मिँए ओखत कान्‍त ज़ ङामादैए।
JOH 18:39 जेकानुनल निस्‍तार पर्ब छ्याम तोबो कैदीलाई ऱास्‍न्‍या चलन लिज़्‍या। है जैद सैं आथ पाला आव यहूदीराए याराजालाई ऱास्‍द ङायाच्‍यो रो?” है ओरादोक ते,
JOH 18:40 नोराए, “आवलाई माःक, बारब्‍बालाई ऱास्‍द्यासिके,” लिद क़िकेर। बारब्‍बा तोबो चोर दाँका ओल्‍यो।
JOH 19:1 नाःत ज़ पिलातसए येसुलाई रीःन्‍याए जूँनी सिपाईंरालाई यासूँपिक्‍यो।
JOH 19:2 सिपाईंराए ज़ुए मुकुत ऱ॰द ओङ़ैत जास्‍द घ्यामर्‍यासो क्‍वा जास्‍द,
JOH 19:3 ओङ़ाक बाद बरे·द, “यहूदीराए याराजा, जय जय ओताक,” है ल्‍यो जैसिउ य़ेन ओङाःत लफरैदिकेर।
JOH 19:4 पिलातस फरी तखेप लाँःदा पुलुस्‍द नो माहोल्‍यारालाई, “दे आवलाई जेलाई ज़ रैद ङायाचिज़्‍या। ङा ङाल्‍योनी ते आवए ओक्‍याँत काता खत ज़ ङामादैए, जे ज़ सैंचिके,” है ओरादोव प़ाइँना,
JOH 19:5 येसु ओल ज़ नो ज़ुए मुकुत जासिसिउ, घ्यामो क्‍वार क्‍वाइसिसिउ याङ़ाक पुलुस्‍के। हाःत ज़ पिलातसए, “चिऊचिके, आव ज़ जेरैव मिँ,” है यादोक्‍यो।
JOH 19:6 हाःत ज़ नक लिज़्‍याव मुख्या पुजारीर स़ोनो पाल्‍यार येसुलाई यारँःव प़ाइँना ज़ बनै चोइस क़िद, “क्रुसत तङ्गैद सैःन्‍या!” है यादोक ते, पिलातसए, “हो ची ताकिन्‍दा जे ज़ लाँद क्रुसत तङ्गैचिके। ङा ते आवए ओखत काता ज़ ङामादैए,” है ओरादोक ते,
JOH 19:7 यहूदीराए, “आव मिँ ओलनी ज़ परमेस्‍वरए ओज़ा ओजैसिउनी गे यहूदीराए गेकानुननी सिन्‍या सजा दैव ज़ परिए,” है दोकेर।
JOH 19:8 पिलातस इताव पाँ थैद झन ज़ छे·द,
JOH 19:9 येसुलाई महलल लाँद फरी ब, “नँ काताङाव नताव?” है ओदोक ते, येसुए झन ज़ घाइ ज़ मादोक्‍यो।
JOH 19:10 पिलातसए फरी, “ङालाई काराव घाइ नमादाँज़्‍याव? नँलाई तङ्गैन्‍या तादी ब ऱास्‍न्‍या तादी ब ङा ङाकुइत उलिज़्‍याव नमासैंए रो?” है ओदोक ते,
JOH 19:11 येसुए, “परमेस्‍वरए नँलाई ओमाईंव ताकिन ङा ङाक्‍याँत नहक काता ज़ मालिखेहो। है जैद ङालाई क्‍योःद नँलाई याज़्‍यावर नँकिन घ्‍योःव पापल ज़ परिकेर,” है दोक्‍यो।
JOH 19:12 पिलातसए निताव ओपाँ थैद येसुलाई ऱास्‍न्‍या बनै धामा दोक्‍यो। हितावत ब यहूदीर झन ज़ क़िद, “आव मिँलाई नऱास्‍किन नँ माहाराजाए ओनैं ज़ माःक। यानी राजा जैसिज़्‍याव भरी माहाराजाकिन तँदाङावर ज़ ताज़्‍यार सानी,”
JOH 19:13 है यालिज़्‍याव थैद पिलातसए येसुलाई लाँःक रैद हिब्रू खामनी गब्‍बथा यादोज़्‍याव लुँ छापिसिउ चतराक लाँद ओल फाल्‍न्‍या पोल च़ुसिके।
JOH 19:14 नो छ्याम निस्‍तार पर्बए ओङ़ालाव तयारीलाव दिन लाकाव बाह्र बजेवाक ओल्‍यो। पिलातसए यहूदीरालाई, “चिऊचिके, आव ज़ जेराजा,” है ओरादोक ते,
JOH 19:15 नोराए झन, “आवलाई नैन्‍या माःक, क्रुसत तङ्गैद सैःन्‍या ची,” है लिद क़िकेर। पिलातसए फरी, “काराव जे जेराजालाई क्रुसत तङ्गैद सैःन्‍या है जेदाँज़्‍याव?” है ओरादोक ते, मुख्या पुजारीराए, “गेराजा रोमी माहाराजाकिन सु ज़ माले,” है यालिज़्याव
JOH 19:16 थैद पिलातसए येसुलाई क्रुसत तङ्गैद सैःन्‍याए जूँनी यहूदीरालाई ज़ याभीःक्‍यो। सिपाईंराए येसुलाई यापासल रैद,
JOH 19:17 नोराए येसुलाई उक्रुस ओललाई ज़ सुघुर्द गलगथा यादोज़्‍याव पोक लाँकेर। हिब्रू खामनी गलगथाए ओअर्थ ‘खप्‍पर्‍या पो’ ज़।
JOH 19:18 नक नोराए येसुलाई क्रुसत तङ्गैकेर। हो छ्याम ओलस छुत ऩेब्‍लोनिलाई मनी ओलस ज़ यारातङ्गैकेर। येसुलाई खार्ल जैद तोबोलाई ओवोर्दा, तोबोलाई ओदाबर्‍यादा जैद सु सु याक्रुसत यारातङ्गैकेर।
JOH 19:19 पिलातसए फरी फल्‍यात तोबो सर्द, “आव नासरतलाव येसु, यहूदीराए याराजा ज़” लिद येसुए उक्रुसत चदिक्‍यो।
JOH 19:20 नो सर्सिउ हिब्रू, ल्‍यातिन स़ोनो ग्रीक खामनी ब उलिज़्‍याव। येसु क्रुसत तङ्गैसिउ पो सहर छ्योक ओतावए यहूदीराए कुधुए ज़ रँःद,
JOH 19:21 यहूदीराए मुख्‍या पुजारीर पिलातसए ल्‍योक बाद, “नताव नसरो ‘आव यहूदीराए याराजा ज़’ है लिद सर्न्‍या माःक, बुरू ओल ज़, ‘ङा यहूदीराए याराजा ज़ है ओल्‍यो,’ सर्न्‍या ची,” है यादोक ते,
JOH 19:22 पिलातसए, “ताधुके, जो मिताव तादी ब ङासर्धुके,” है यादोक्‍यो।
JOH 19:23 नकिन येसुलाई तङ्गैद सैःज़्‍याव सिपाईंराए येसुए ओक्‍वार चार भा जैद सु सु याजुँ लाँकेर। ओतर्ताव ओक्‍वाइसिज़्‍याव ओक्‍वा ते तपाता ज़ काङ्क ज़ माऱूप्‍सिउ ओल्‍योए,
JOH 19:24 “आवलाई चीन्‍या माःक, जोए ओल्‍योदा ओबादी ब गोला झाःव ताके,” है लिकेर। नो पाँत ज़ धर्मसास्‍त्रलाव पाँ ब यो·के। नो पाँ आव ज़, “नोराए ङाक्‍वार भाःद लाँन्‍या लेर। ओतर्ताव ङाक्‍वात गोला झाःन्‍या लेर।” है जैद सिपाईंराए हैज़ जैकेर।
JOH 19:25 हो बेलाक क्रुसकिन जाँ होकसैक येसुए ओआमा, ओआमाए ओबैंनी, क्‍लोपासए ओज्‍या मरियम स़ोनो मरियम मग्‍दलिनीर च्‍याँःसिद यालिज़्‍याव।
JOH 19:26 येसुए ओआमा स़ोनो उयुँलाव उसिसनी नक च्‍याँःसिद निलिज़्‍याव रँःद ओआमालाई, “आमा, नज़ा आव ज़,” है दोक्‍यो।
JOH 19:27 नकिन फरी उसिसलाई, “चिऊके, आव नआमा ज़,” है दोक्‍यो। है जैद हो छ्यामकिन ज़ नो उसिसए येसुए ओआमालाई उझ़िमक लाँद ओलस ज़ नैक्‍यो।
JOH 19:28 हाःत ज़ येसुए, ‘अब ते ङाय़ेन भरी यो·के’ लिन्‍या सैंद धर्मसास्‍त्रलाव पाँ सयो·न्‍याए जूँनी, “ऱी ङाछोस्‍ज़्‍या,” है यादोक्‍यो।
JOH 19:29 हाः बेलाक नक तोबो जाल सिरो दाखमद्य झाःद यानैज़्‍याव। नक लिज़्‍यावराए भाताए उतुपात थाकना पो·द नो सिरो ऱील छिम्‍द ओयाःत पिउ परींकेर।
JOH 19:30 येसुए नो पिद, “अब ते ङाय़ेन भरी दुम्‍के,” है लिद ओङ़ै घोम जैद उस॰ सफ्या·क्यो।
JOH 19:31 हो छ्याम तयारीलाव दिन ओल्‍यो, स़ोनो घेप्‍पा पर्बए ओङ़ालाव छ्याम ब उलिज़्‍याव। यहूदीराए याकानुननी हो छ्याम नो यारासैःवरालाई क्रुसत नैन्‍या ओमाताज़्‍याव। है जैद नोराए नो क्रुसत तङ्गैसिउरालाई यास॰ सफ्या·द्यान्‍याए जूँनी ‘याखँर केःद्याद क्रुसतिन झरैव ताके’ है लिद पिलातसलाई बिन्‍ती दाद,
JOH 19:32 येसुए ओवोर्दाङाव मिँलाई उखँर केःदिकेर। नकिन ओदाबर्‍यादाङावलाई मनी उखँर केःदिकेर।
JOH 19:33 नकिन येसुए उखँर केःना याबाक उसिधुव रँःद उखँर केःद माएकेर।
JOH 19:34 हाःत ज़ नक लिज़्‍याव तोबो सिपाईंए ओज़लए येसुए ओकोखाल घोइदिक्‍यो। ओघोइव प़ाइँना ओकोखानी झी स़ोनो ऱी हुके।
JOH 19:35 आव पाँ भरी तोबो मिँए ओल ज़ उरँःव। नोए ओपाँ साचो थ॰रिउ ज़ लिज़्‍या। है जैद आव पाँत जेयुँ उहुप्‍क।
JOH 19:36 आव पाँ भरी धर्मसास्‍त्रलाव पाँ सयो·न्‍याए जूँनी ज़ ताके। नलाव सर्सिउ आव ज़, “नोलाई तके उऱूस ब केःद्यान्‍या मालेर।”
JOH 19:37 फरी तोथोल इताव मनी सर्सिउ लिज़्‍या, “नो ज़लए याघोइवलाई प़ाइँए ज़ रँःन्‍या लेर।”
JOH 19:38 आव भरी ओतावत अरिमाथियालाव योसेफ पिलातसए ल्‍योक बाद येसुए ओमोरो ऩिक्‍यो। नो मिँ मनी येसुए ओपाँत बाज़्‍याव मिँ ज़ ओल्‍यो। खाली नोए यहूदीराए यास़ेरराए छ्याचेए येसुए ओपाँ जाँ म़ोंसिद ओदोज़्‍याव। नोए पिलातसए ल्‍योनी हक रैद येसुए ओमोरो लाँक्‍यो।
JOH 19:39 नो ङ़ादा रील म़ोंसिद येसुए ल्‍योक हुज़्‍याव निकोदेमस मनी योसेफस उलिज़्याव। नोए बनै चाव सी ङरो जरार हे·सिउ बरे·द तुगुर ज़ घुर्द रैक्‍यो।
JOH 19:40 नोनी यहूदीराए याचलन मितावनी येसुए ओमोरोलाई नो उसी ङरो जरार झाःद क्‍वाए लुम्‍बैकिनी।
JOH 19:41 येसुलाई क्रुसत तङ्गैसिउ पोकिन जाँ होकसैक तोबो बगैचा उलिज़्‍याव। नो बगैचाल सुलाई ज़ यामाझाःताव साःरो खादर तोबो उलिज़्‍याव।
JOH 19:42 है जैद यहूदीराए तयारीलाव दिन ओतावए, नो नजिककाव लिज़्‍याव खादरल ज़ येसुए ओमोरोलाई झाःकिनी।
JOH 20:1 सातालाव उस॰कताव छ्याम छकाल्‍न्‍या ओमासँद ज़ मरियम मग्‍दलिनी बनै घग ज़ येसुए ओखादरक ओबाक नो खादर याःताव कसिउ घ्योःव लुँ हाइसिउ रँःक्‍यो।
JOH 20:2 निताव रँःद ननी धोंःनाद सिमोन पत्रुस स़ोनो येसुए उयुँलाव उसिसनी निल्‍योक बाद, “गेप्रभुलाई ते काताकावराए खादरनी हाइद यालाँव ओल्‍यो। काना यालाँव गेमासैंए,” है उनिदोव प़ाइँना,
JOH 20:3 पत्रुस स़ोनो येसुए छुत उसिसनी हतप्‍त ज़ खादर पोदा धोंःनाकिनी।
JOH 20:4 निधोंःनाज़्‍याक पत्रुसलाई बलेंद ओनैं ङ़ादा खादरक केस्‍के।
JOH 20:5 नो खादरल मापसिद घोम लिद उचिऊक येसुलाई लुम्‍बैसिउ क्‍वार वाज़ रँःक्‍यो।
JOH 20:6 नकिन छ्यावाक सिमोन पत्रुस मनी खादरक ओकेस्‍हुव प़ाइँना ज़ खादरल पसिद उचिऊक होए मनी येसुए ओमोरो लुम्‍बैसिउ क्‍वार वाज़ रँःक्‍यो।
JOH 20:7 नो ओङ़ैताव पो·सिउ क्‍वालाई फरी नो ओमोरो लुम्‍बैसिउ क्‍वाकिन जाँ अछतङ पतैद नैसिउ रँःक्‍यो।
JOH 20:8 हाःत ज़ नो ङ़ादा हुव येसुए छुत उसिस मनी खादरल पसिद प़ाइँ चिऊद येसु ओसोव ज़ ओल्‍यो लिद उयुँ हुप्‍के।
JOH 20:9 नोनी नोकिन ङ़ादा नो धर्मसास्‍त्रलाव सर्सिउ पाँ ‘येसु उसिदी ब सोन्‍या ले’ लिन्‍या निमाथ·रैताव।
JOH 20:10 नकिन नो उसिसनी निझ़िमदा ओल्‍द बाकिनी।
JOH 20:11 मरियम मग्‍दलिनी ते खादर छ्योक च्‍याँःसिद घरो ज़ उलिज़्‍याव। नाःत ज़ घोम लिद खादरल तखेप ओभाल्‍सिक,
JOH 20:12 परमेस्‍वरए ओचाकर्‍यानी ऩेब्‍लो पाल पालो क्‍वा क्‍वाइसिउनी निरँःक्‍यो। नोनी येसुलाई नैसिउ पोक तोबो उगुमदा, तोबो उखँदा च़ुसिद निलिज़्‍याव।
JOH 20:13 नोनी मरियमलाई, “अ माँ, नँ काराव नघर्ज़्‍याव?” है निदोक ते, नोए, “ङाप्रभुलाई काताकावराए आव खादरनी हाइद यालाँव ओल्‍यो। काना यालाँव ओताव ङामासैंए,” है निदोक्‍यो।
JOH 20:14 नाः है दाद नो मेंमा उछींदा ओभाल्‍सिक येसु नक च्‍याँःसिद उलिज़्‍याव रँःक्‍यो। खाली येसु ज़ लिन्‍या मासरेस्‍धुक्‍यो।
JOH 20:15 हाःत ज़ येसुए, “अ माँ, नँ काराव नघर्ज़्‍याव, सुलाई नखिम्‍ज़्‍याव?” है ओदोक ते, नो मेंमाए, आव ते बगैचालाव माली ची सा लिद, “अ दाज्‍यु, येसुलाई नँ आनी हाइद नलाँव ताकिन, ‘आक ङानैज़्‍या’ है दाव ताके। ङा होलाई ङालाँरिज़्‍या,” है ओदोक ते,
JOH 20:16 येसुए, “अ मरियम,” है ओदोव प़ाइँना नो मेंमा ओल्‍योदा फर्किद, “रब्बोनी!” है दोक्‍यो। (हिब्रू खामनी रब्बोनीए ओअर्थ ‘गुर्बा’।)
JOH 20:17 हाःत ज़ येसुए, “ङालाई ताछाप्‍नायो, ङा आःपै ङाबाबुए ल्‍योक ङामाबाताए। बुरू ङानैंरालाई, ‘ङाबाबु परमेस्‍वर स़ोनो जेबाबु परमेस्‍वरए ल्‍योदा ङाबारिज़्‍या’ है यादोनाके,” है दोक्‍यो।
JOH 20:18 हो प़ाइँना ज़ मरियम मग्‍दलिनी उसिसराए ल्‍योदा धोंःनाद प्रभुलाई उरँःव स़ोनो है ओदोव पाँ भरी ब है यादोक्‍यो।
JOH 20:19 हो छ्याम ऱिमक ज़ येसुए उसिसर यहूदीराए छ्याचेए य़ाम गल्द झ़िमल यालिज़्‍याव। नो छ्याम आइतबार ओल्‍यो। नाःत ज़ येसु उमँःजानी उसिसराए खार्ल च्‍याँःसिहुद, “जेयुँर होलाँ ओताक,” है लिद,
JOH 20:20 येसुए उकुइर ओकोखार सतैंद याएक्‍यो। याप्रभुलाई रँःद नोर यायुँर होलाँ ताद बनै रेंकेर।
JOH 20:21 येसुए फरी ब, “जेयुँर होलाँ ओताक। किताव ङाबाबुए ङालाई उपरींनाव, हिताव ज़ जेलाई मनी ङापरींचिज़्‍या,” है दाद,
JOH 20:22 नोराए ल्‍योदा उस॰ ह्‍वास जैद, “आख ते छैंव पुरूस दोचिके,” है यादोक्‍यो।
JOH 20:23 नकिन फरी, “जे मिँरालाई यापाप क्‍याल्‍द जेराएकिन, नोराए यापाप क्‍याल्‍सिद परमेस्‍वरस खैवर तान्‍या लेर। फरी यापाप क्‍याल्‍द जेमाराएकिन नोराए यापाप हिताव ज़ रहिरिज़्‍या।”
JOH 20:24 येसु उसिसराए ल्‍योक उहुव छ्याम दिदुमस यादोज़्याव थोमा नल ओमाल्‍यो।
JOH 20:25 छींनी उपुर्काव उसिसराए थोमालाई, “गे गेप्रभुलाई गेरँःके,” है यादोक ते, नोए, “ङा झँ किलाए उकुइ सघ्वाँःसिउ कुँ रँःद होल ङाआङुला ङामालुइवा पै स़ोनो ओकोखाल ङाकुइ ङामालुइवा पै ङायुँ ज़ माहुबे,” है यादोक्‍यो।
JOH 20:26 हुकिनकाव साताक फरी उसिस भरी य़ाम गल्‍सिद झ़िमल यालिज़्‍याव। हो छ्याम ते थोमा ब यास ज़ उलिज़्‍याव। हाःत ज़ निताव य़ाम गल्‍सिउ उलिज़्‍यावत ब येसु उमँःजानी याखार्ल च्‍याँःसिहुद, “जेयुँ होलाँ ओताक,” है यादोक्‍यो।
JOH 20:27 नकिन थोमालाई, “आव ङाकुइ सघ्वाँःसिउल नआङुला लुइके, ङाकोखाल ब नकुइ लुइद माहुबो नयुँलाई सुहुप्‍के,” है ओदोव प़ाइँना,
JOH 20:28 थोमाए, “अ ङाप्रभु, ङापरमेस्‍वर, नँ ज़ ची नल्‍यो,” है लिके।
JOH 20:29 हाःत ज़ येसुए, “थोमा, नँ ते ङालाई रँःद नयुँ हुप्‍के। खाली ङालाई मारँःद उयुँ हुप्‍ज़्‍याव ते झन धन्‍याकाव लिज़्‍या,” है दोक्‍यो।
JOH 20:30 येसुए उसिसराए याङ़ाक आव पोस्‍तोकोल मासर्सिउ छुत सरेसर मनी कुधु ज़ सतैंद याएक्‍यो।
JOH 20:31 खाली आलाव सर्सिउ भरी जे येसुलाई, परमेस्‍वरए ओज़ा गेलाई बाँचैज़्‍याव ख्रीस ज़ लिद जेयुँ सुहुप्‍द्यान्‍याए जूँनी सर्द ङायाचिके। हो ताकिन ची जे नोए ल्‍योदा जेयुँ जेसुहुप्‍किन होए उमिननी अजम्‍बरी जुनी दैन्‍या जेले।
JOH 21:1 फरी छींनी मनी तछा येसु उसिसराए याङ़ाक गालील खन्‍दलाव तिबेरियास दहक सरैंःसिके। नक इताव ताके —
JOH 21:2 नक लिज़्‍यावर सिमोन पत्रुस, दिदुमस यादोज़्याव थोमा, गालीललाव काना नाखारलाव नथानेल, जब्‍दियाए ओज़ानी स़ोनो छुत ऩेब्‍लो उसिसनी याल्‍यो।
JOH 21:3 नो बेलाक सिमोन पत्रुसए ओनैंरालाई, “ङा ते ङाँःर क्‍योःना ची तखेप ङाबारिज़्‍या,” है ओरादोक ते, ओनैंराए, “गे मनी नँस ज़ गेबारिज़्‍या,” है दाद नोर प़ाइँ दोङ्गाल पसिद ऱील तुबुरी लिद ब ङाँःर तोबो ब माताकेर।
JOH 21:4 नम ज़राँः ज़राँः उसँनाक येसु दह छ्योक च्‍याँःसिद उलिज़्‍याव। खाली उसिसराए येसु ज़ लिद मासरेस्‍धुकेर।
JOH 21:5 हाःत ज़ येसुए, “अ बाबुज़ार, ङाँःर खावा तार्‍या की?” है ओरादोक ते, “अहँ, तोबो ब मातार,” है दोकेर।
JOH 21:6 नकिन येसुए, “जेदोङ्गाए ओवोर्दा जेजाल ख्याचिके, नल ङाँःर दैन्‍या जेले,” है ओरादोक ते, याजालर याख्याक ल्‍यो माल्‍यो ङाँःर हुद याजाल ब मास़ेल्‍धुकेर।
JOH 21:7 हाःत ज़ येसुए उयुँलाव उसिसए पत्रुसलाई, “नो ते गेप्रभु ज़ ची ओल्‍यो,” है ओदोव प़ाइँना पत्रुस लाला लुलु हाइसिउ ओक्‍वार क्‍वाइसिद दहल ज़ो·द येसुए ल्‍योदा बाके।
JOH 21:8 उपुर्काव उसिसर ते दोङ्गाल ज़ लिद ङाँःर ल्‍यो जाललाई स़ेले स़ेले पाखात पुलुस्‍केर। नो ङाँःर याराक्‍योःव पो कोसै तादाङ ते ओमाल्‍यो, दह छ्योकिन तसय मितरवा वाज़ ओल्‍यो।
JOH 21:9 नोर दह छ्योक याहुवत मेंः दासिउ म़ुथाल येसुए भरेसर ङाँःर हिप्‍द ओनैज़्‍याव रँःकेर।
JOH 21:10 नाःत ज़ येसुए, “जेराक्‍योःव ङाँःर ऩेबरेंवा रैचिके,” है ओरादोक ते,
JOH 21:11 सिमोन पत्रुस दोङ्गाल पसिद नो ङाँःर लिज़्‍याव जाललाई पाखात स़ेल्‍द रैक्‍यो। नल घेप्‍पा घेप्‍पा ङाँःर तसय त्रिपन्‍न गोता यागैव ओल्‍यो। हितावत मनी नो जाल जात्त ज़ ओमाचिसो ओल्‍यो।
JOH 21:12 नकिन येसुए फरी नोरालाई क़िद, “जेयाः बितालिहुचिके,” है यादोक्‍यो। नोराए फरी येसुलाई यासरेस्‍दी ब सुए ज़ ‘नँ ते गेप्रभु ची सा’ है मादोधुकेर।
JOH 21:13 येसु हुद भरेसर ङाँःर उकुइत रैद नोरालाई भाःद याएक्‍यो।
JOH 21:14 येसु सिद सैंसिद ओसोव छींनी उसिसराए ङ़ाक आवस स़ोंखेप सरैंःसिके।
JOH 21:15 नोर यायाःर याबितालिउत येसुए सिमोन पत्रुसलाई, “अ यूहन्‍नाए ओज़ा सिमोन, नँ ङालाई आवराकिन कुधु ज़ मया नदाँज़्याव रो?” है ओदोक ते, पत्रुसए, “हैज़ प्रभु, नँलाई मया ङादींज़्याव नँ ज़ नसैंज़्‍या,” है ओदोक ते, येसुए, “हो ची ताकिन्‍दा ङापाथार छोद्याँके।”
JOH 21:16 नकिन येसुए फरी ब, “अ यूहन्‍नाए ओज़ा सिमोन, ङालाई साचो ज़ मया नदाँज़्याव रो?” है ओदोक ते, पत्रुसए, “हैज़ प्रभु, नँलाई मया ङादींज़्याव नँ ज़ नसैंज़्‍या,” है ओदोक ते, येसुए, “हो ची ताकिन्‍दा ङाबेधारालाई याचिऊयो,” है दोक्यो।
JOH 21:17 फरी ब येसुए, “अ यूहन्‍नाए ओज़ा सिमोन, है जैद ङालाई मया नदाँज़्याव ज़ रो?” है ओदोक ते, पत्रुसलाई नो पाँ स़ोंखेप है ओदोवए पत्रुसए उयुँ माचाव दाद, “प्रभु प़ाइँ युँलाव पाँ नसैंज़्‍या। नँलाई मया ङादींज़्याव मनी नँ ज़ नसैंज़्या सानी,” है ओदोक ते, येसुए, “हो ची ताकिन्‍दा ङाबेधार पाथस छोद्याँके।
JOH 21:18 ङा नँलाई साचो है ङादींज़्‍या, नर्सार उलिज़्‍याव बेलाक नवाँःफोर पो·सिद जोदा बान्‍या नयुँ लिज़्‍या होदा ज़ नबाज़्‍याव। खाली नर्सार खेम्‍द नसेरोत नकरर रा·द्याद नवाँःफोर छुतए पो·द्याद बान्‍या युँ नमादोज़्‍यावदा करस ज़ लाँन्‍या लेर,” है दोक्‍यो।
JOH 21:19 येसुए आव पाँर, ‘पत्रुस इतावनी सिद परमेस्‍वरए उमिन सघ्‍योःद्यान्‍या ले’ लिद ङ़ादा ज़ सतैंदिक्‍यो। है जैद येसुए पत्रुसलाई आव भरी है दाद, “ङाछींत हुन्‍के,” है दोक्‍यो।
JOH 21:20 नाःत ज़ पत्रुस उछींदा ओभाल्‍सिक येसुए उयुँलाव उसिस मनी उछीं उछीं उहुज़्‍याव रँःक्‍यो। नो उसिस ज़ ङ़ादाङाव नो भत्‍यारल येसुए ओछातीत कँ लिद, “प्रभु, नँलाई धोका याज़्‍याव सु?” है दाज़्‍याव मिँ।
JOH 21:21 पत्रुसए नोलाई रँःद येसुलाई, “प्रभु, आवलाई छींनी कै तान्‍या?” है ओदोक ते,
JOH 21:22 येसुए, “ङा फरी ङामाहुवा पै नो मिँलाई मासिन्‍या ङाजैदी ब नँ है लिन्‍या काता ओमेला ज़ माले, नँ ङाछींत घुहुनी,” है दोक्‍यो।
JOH 21:23 नो येसुए ओपाँनी ज़ नो उसिस सिन्‍या माले लिन्‍या यायुँ हुबोराए खार्ल फींजिके। खाली ओल येसुए ते ‘आव सिन्‍या माले’ है ओदोव ते माःक। ‘ङा फरी ङामाहुवा पै आव मिँ ओमासिदी ब नँ है लिन्‍या ओमेला माले,’ है वाज़ ओदोव ची।
JOH 21:24 आव पाँर ङामीए रँःद सर्ज़्‍याव ङा नो उसिस ज़। आव ङासरो पाँ भरी साचो थ॰रिउ ज़ लिज़्या।
JOH 21:25 आव ङासरोकिन येसुए छुत ब कुधु य़ेनर ज़ दाद नैव। खाली तोबो तोबोनी सर्न्‍या ताकिन सर्सिउ पोस्‍तोकोर आव मानुवात ब मासुइँःखेहो।
ACT 1:1 माननिय थियोफिलस ज्‍यू, ङ़ादाङाव ङासरो पोस्‍तोकोल, येसु ओय़ेनत उथूसिउकिन स्‍वर्गत ओबाज़्‍याव छ्याम पैकाव ओय़ेनर ओपाँर प़ाइँ ज़ सर्द नैद ङाईंए। हो छ्याम ज़ ओराछाँतिउ ओसाचीरालाई छैंव पुरूसए ओसक्तीनी ‘आव आव दोच्‍यो’ है दाद याख्यानैक्‍यो।
ACT 1:3 होकिन ङ़ादा ज़ बनै दुखस उसिउ छींनी येसु सैंसिद चालीस दिन भरी घरी पाला ज़ नोराए याङ़ाक सरैंःसिद, ‘आव ङा ज़’ लिद ओसरेसर ब सतैंद ओराएज़्‍याव, परमेस्‍वरए ओराज्‍यालाव पाँर ब ओरासथैज़्‍याव।
ACT 1:4 तछा नोरास ज़्यान्याए जूँनी दुप्‍सिद यालिज़्याक, “जे यरूसलेम माऱास्‍द ङाबाबु परमेस्‍वरए ओय़ाकालाई कींद नैचिके। ङा जेलाई नो ओय़ाकाए जूँनी ङ़ादाकिन ज़ है दाद ङानैचिए।
ACT 1:5 किताव यूहन्‍नाए जेलाई ऱील ओसछैंचिउ, हिताव ज़ जाँ छींनी छैंव पुरूसनी जेछैंरिज़्‍या,” है यादोक्‍यो।
ACT 1:6 नोर तछा दुप्‍सिद यालिज़्‍याक उसिसराए येसुलाई, “प्रभु, सैं आव बेलाक ज़ इस्राएलीराए गेराज्‍या रोमीरानी सोवोल्‍द नयासिरिज़्‍याव रो?” है यादोक ते,
ACT 1:7 येसुए, “बेला त़ोन्‍या, जुक त़ोन्‍या ङाबाबु परमेस्‍वरए उकुइत लिज़्‍या, जे सैंन्‍या ओमेला माले।
ACT 1:8 बुरू जे जेक्‍याँत छैंव पुरूस उहुक बनै घ्‍योःव सक्ती दैद यरूसलेमल, यहूदियाल, सामरियाल स़ोनो नामलाव काना कुनीङ पै ङासाचीर जेतारिज़्‍या,” है यादोक्‍यो।
ACT 1:9 हाःत ज़ येसु नोराए याङ़ाकिन ज़ याचिऊज़्‍याक ज़ नमदा छींसिद बादलए लुम्‍बैद मासरैंःक्‍यो।
ACT 1:10 नोराए नमदा लँ लँ याचिऊज़्‍याक होक ज़ उमँःजानी पालो क्‍वा क्‍वाइसिउनी ऩेब्‍लो याङ़ाक च्‍याँःसिहुकिनी।
ACT 1:11 नोनी, “अ गालीललाव मिँर, काराव नमदा भाल्‍सिद जेलिज़्‍याव? नो जेङ़ाकिन बाव येसु किताव नमदा उछींसिज़्‍याव जेरँःव, हिताव ज़ फरी तछा झरिहुरिज़्‍या।”
ACT 1:12 हाःत ज़ येसुए उसिसर जैतून दाँदातिन झरिद नजिककाव यरूसलेम सहरदा बाकेर। नो दाँदातिन आधा घन्‍तावाकाव येम उलिज़्‍याव।
ACT 1:13 सहरल केस्‍द नोर हाः बेलाकाव यालिज़्‍याव ओतर्ताव ताललाव कुन्‍तील बाकेर। नो कुन्‍तील पत्रुस, यूहन्‍ना, याकूब, अन्‍द्रियास, फिलिप, थोमा, बारथोलोमाइ, मत्ती, अल्‍फयसए ओज़ा याकूब, देसभक्ता सिमोन स़ोनो याकूबए ओज़ा यहूदास सिप ज़ यालिज़्‍याव।
ACT 1:14 नोरास नल येसुए ओआमा मरियम, येसुए ओभाइर स़ोनो येसुसकाव मेंमार दिनकाव ज़ दुप्‍सिद प़ाइँए तयुँ जैद पोंखारिउ ज़ यानैज़्‍याव।
ACT 1:15 तछा यायुँ हुबोर तसय बीसा दुप्‍सिद यालिज़्‍याक पत्रुस नोराए याङ़ाक च्‍याँःसिद अइ लिद पाँके,
ACT 1:16 “अ ङानैं ङामेंर, आदा थैचिके। येसुलाई सूँपिज़्‍याव यहूदा इस्‍करियोतए उजूँनी भाःकाव धर्मसास्‍त्रलाव सर्सिउ पाँ भरी यो·के। नो पाँ भरी छैंव पुरूसए ङ़ादा ज़ दाऊद राजाए ओयाःनी है लिद ले।
ACT 1:17 नो मिँ ङ़ादा गेस ज़ ओल्‍यो। आव गेय़ेनत मनी नोए उजुँ ब ओल्‍यो ज़।”
ACT 1:18 नो मिँ येसुलाई क्‍योःन्‍या घुस ज़्‍याद नो पैसाए एँः तोबो लँःक्‍यो। नो एँःल ज़ बाप तेद उभूँदीर पा·द च्याल्नी ब्याल ताद सिके।
ACT 1:19 यरूसलेम सहर भरिल नो पाँ थास्‍द नो एँःए उमिन या याखामनी आखेल्‍दामा नैदिकेर। नोए ओअर्थ ‘झीए एँः’।
ACT 1:20 पत्रुस फरी, “होए उजूँनी ङानैं ङामेंर, भजन पोस्‍तोकोल इताव सर्सिउ लिज़्‍या, ‘नोए ओपो रितो ओताक, नल बासिन्‍या सु ज़ तातारक।’ स़ोनो, ‘ओदैव य़ेन ब छुतए ओनैंवक।’
ACT 1:21 है जैद गेप्रभु येसुलाई रँःव, ङ़ादाकिन गेस गेस बाऱिउ मिँ नोए ओपोल तोबो जैव ताके — गे मिताव ज़ नो मनी येसु सिउनी सैंसिद ओसोव साची याधुन्‍याकाव ओताक। नो मिँ ऱील सछैंज़्‍याव यूहन्‍नाए ओपालाकिन येसु स्‍वर्गत ओबाज़्‍याव पै गेस गेस लिज़्‍याव मिँ ज़ ताव परिके,” है ओरादोक ते,
ACT 1:23 नोराए तोबो योसेफ बारसाबास यादोज़्याव (नोलाई युस्‍तस मनी है यादोज़्याव), स़ोनो तोबो मतियास यादोज़्‍याव, नोनी ऩेब्लोए निमिन हाइद,
ACT 1:24 अइ लिद परमेस्‍वरलाई पोंखारिकेर, “अ प्रभु प़ाइँए युँलाव पाँ सैंज़्याव, यहूदाए ते गेसकाव ओय़ेनलाई ऱास्‍द सराप दैन्‍या ओपोल ज़ बाके। है जैद नोए ओऱासो य़ेनत आव ऩेब्‍लोनी काताकावलाई नैन्‍या नपैंज़्याव, गेलाई सतैंद्याव ताके।”
ACT 1:26 नोनी निमिनत गोला याझाःक मतियासए उमिन परिके। है जैद नो एघार जनात चा·सिके।
ACT 2:1 पेन्‍तिकोस पर्ब हुद उलिज़्‍याव। हो छ्याम पोंखारिन्‍याए जूँनी येसुए उमिनतावर प़ाइँ दुप्‍सिद यालिज़्‍याक,
ACT 2:2 उमँःजानी नमतिन बुर बुर फर्लेसिहुज़्‍याव बनै घ्‍योःव बतासए ओर्गा मिताव थास्द नो दुप्‍सिद यालिज़्‍याव झ़िमल ज़ तसी ताके।
ACT 2:3 हाःत ज़ मेंःए मुल्‍का स्‍यासोर रैंःहुद नो मुल्‍कार आदा होदा रा·सिनाद प़ाइँए याक्‍याँत ज़ तोबो तोबो च़ुसिके।
ACT 2:4 नाःत ज़ नोर छैंव पुरूसए ब्याल्‍द नो पुरूसए ओरायो मिताव प़ाइँ ज़ छुत छुत खामनी पाँकेर।
ACT 2:5 नो बेलाक पर्बए जूँनी प़ाइँ राज्‍यानिकाव यहूदीर यरूसलेमल हुद यालिज़्‍याव। नोर परमेस्‍वरलाई रँःद छे·ज़्यावर याल्‍यो।
ACT 2:6 नो घ्योःव गा थैद मिँर बनै माहोल्‍या प़ाइँनी ज़ धोंःहुद नो झ़िमलाव दुप्‍सिउराए यापाँज़्‍याव सु सु याखामनी ज़ थैद अचम्‍ब ताकेर।
ACT 2:7 नोर बनै अचम्‍ब ताद, “आव पाँज़्‍यावर ते प़ाइँ गालीललाव मिँर ची सानी।
ACT 2:8 कै जैद आवराए यापाँ सु सु गेखामनी गेथैज़्‍याव?
ACT 2:9 गे ख्वार पार्थीया, मादी स़ोनो एलामीनी हुवर गेलिज़्‍या। ख्वार फरी मेसोपोतामियालावर, यहूदियालावर, कापादोकियालावर, पोन्‍तसलावर, एसियालावर,
ACT 2:10 फ्रिगियालावर, पामफिलियालावर, इजिपलावर स़ोनो लिबिया देसलाव कुरेनी जीदाङावर गेलिज़्‍या। ख्वार फरी रोमनी हुवर ब लिज़्‍यार।
ACT 2:11 (नोर ख्वार यहूदी जातलावर लिज़्‍यार, ख्वार यहूदी धर्म मानिज़्याव छुत जातलावर ब लिज़्‍यार।) ख्वार फरी क्रेत तापु स़ोनो अरब देसनी हुवर गेलिज़्‍या। कै जैद परमेस्‍वरए ओसक्तीलाव ओदोव य़ेनर सु सु गेखामनी ज़ यापाँज़्‍याव गेथैज़्‍याव?” है लिकेर।
ACT 2:12 है जैद नोर बनै अचम्‍ब ताद ‘आवए ओअर्थ काता ओताव?’ लिद या याल सुधिसिकेर।
ACT 2:13 ख्वाराए फरी ल़॰द, “आवर ते मँःवर ची सा,” है ब लिकेर।
ACT 2:14 हाःत ज़ पत्रुस स़ोनो एघार जना येसुए उसिसर च्‍याँःसिद पत्रुसए ओर्गा बनै सघ्‍योःद नो माहोल्‍यारालाई है यादोक्‍यो, “अ यहूदियालाव मिँर स़ोनो यरूसलेमल लिज़्‍यावर, आदा थैचिके। आव जेरँःव भरी पलास्‍द ङायाचिरिज़्‍या।
ACT 2:15 जे है जेलिज़्‍याव मिताव आवर मँःवर माःक। भर्ज़ा ज़ छकाल्‍न्‍याकाव नौ बजिद ले सानी।
ACT 2:16 आव जेरँःज़्‍याव भरी ते योएल अगमबक्ताए सर्द ओनैज़्‍याव पाँ ची। नोए ओसरो आव ज़,
ACT 2:17 ‘परमेस्‍वरए है लिज़्‍या, जुक खेम्‍न्‍या बेलाक ङा मिँ भरिराए क्‍याँत ङापुरूस थुद ङाराएरिज़्‍या। जे खेपा मेंमा जेज़ाराए ङापुरूसनी पाँन्‍या लेर। जेसकाव धापाज़ाकावराए दर्सनर रँःन्‍या लेर। जेसकाव सेरोराए मनी अचम्‍बलाव मँर मँन्‍या लेर।
ACT 2:18 हो बेलाक ङाय़ेन दाज़्‍याव ङाबाँदा ङाबाँदानीराए याक्‍याँत ङापुरूस थुद ङाराएक नोर ङापुरूसनी पाँन्‍या लेर।
ACT 2:19 रोताव नमत छे छे ङम्‍सिउर रैंःन्‍यार ङाराजैरिज़्‍या, उधूँलाव नामल मनी अचम्‍बलाव सरेसर ङासतैंरिज़्‍या — झी स्‍यासोर, मेंःए मुल्‍कार, सुम्‍ला सुम्‍ला म़िकुइर।
ACT 2:20 परमेस्‍वर बनै ज़गै मगैवस उहुरिज़्‍याव छ्याम ओमाताद ङ़ादा निमीए ओझ़ार ब चुम चुमो तारिज़्‍या, स़्यावै मनी झी स्‍यासो घ्याम घ्यामो तारिज़्‍या।
ACT 2:21 हो बेलाक जोए परमेस्‍वरए उमिन हाइद ओललाई खिम्‍ज़्‍याव, नो सजानी पुलुस्‍द बाँचिन्‍या ले।’
ACT 2:22 “जे इस्राएली ङानैं ङामें भरिए, आव ब सैंच्‍यो। नासरतलाव येसुए परमेस्‍वरए ओसक्ती दैद जे जेखार्ल ज़ अचम्‍बलाव य़ेनर स़ोनो सरेसर ओदोव जे ज़ जेरँःके। नो ओदोव ओय़ेननी ज़ परमेस्‍वरए, ‘ङा ज़ ङापरींव’ लिद जेलाई ज़ थ·रैव परींचिक्‍यो।
ACT 2:23 जे ते झन नो मिँलाई परमेस्‍वरए ङ़ादाकिन ज़ गोइँद ओनैज़्‍याव मितावनी ज़ नोलाई परमेस्‍वरए ओपाँ मासैंज़्‍यावराए कुइत सूँपिद क्रुसत तङ्गैद सैःव जेरापरींके।
ACT 2:24 परमेस्‍वरए फरी नोलाई सिउनी सोचोइद सिउका सिउ तान्‍यानी उस्‍कैक्‍यो। है जैद नोलाई खादरल काताए ब मानैधुक्‍यो।
ACT 2:25 नोए उजूँनी दाऊद राजाए मनी ङ़ादा ज़ धर्मसास्‍त्रल अइ लिद सर्द नैव, ‘ङाप्रभुलाई एकतार ङास ज़ उलिज़्‍याव ङारँःज़्‍या। ङावोर्दा च्‍याँःसिद धुरिद ओयाँज़्‍यावए, काताए ब ङायुँलाई काता माँःती माजैधुव।
ACT 2:26 है जैद ङायुँर बनै होलाँ ताद, ङायाःए ब रेंद ङापाँज़्‍या। ‘ङापुरूसलाई सिउराए याल्‍योल ख्यानैद्यान्‍या नमाले’ लिद, आव ङाजिउत ङायुँ हुबो ज़ लिज़्‍या। ङा, छैंव नमींलाई खादरल चिउ यान्‍या नमाले।
ACT 2:28 अजम्‍बरी जुनील बान्‍या येम ङालाई नपैनाके। है जैद नँ ङालाई नँस ज़ नैद, ङायुँर होलाँ जैद्यान्‍या नले।’ ”
ACT 2:29 हाःत ज़ पत्रुसए फरी ब है यादोक्‍यो, “अ ङानैं ङामेंर, साचो ज़ है ङालिज़्या — गेपुर्खा दाऊद ते ङ़ाङ ज़ सिद गमल बाके। ओखादर आःपै गेस ज़ लिज़्‍या।
ACT 2:30 खाली नो मिँ अगमबक्ता ओतावए छींनी हुन्‍या पाँर ब सैंद ओनैज़्‍याव। परमेस्‍वरए नोलाई ङ़ादा ज़ किर्‍या झाःद, ‘नँ नथोरानी ज़ ङाराज्‍या चलैन्‍या मिँ ङाउथैरिज़्‍या,’ है दाद ओनैज़्‍याव।
ACT 2:31 है जैद दाऊदए छींनी तान्‍या पाँर उरँःव मिताव ज़ ताद ख्रीस सिउनी ओसैंसिरिज़्‍यावए जूँनी ज़ ओपाँव। है जैद ङ़ादा है उलिज़्‍याव मिताव ज़ ख्रीस सिउराए ल्‍योल ब मारहिए, ओक्‍याँ ब खादरल माचिए।
ACT 2:32 नोलाई ओल परमेस्‍वरए ज़ सोचोइक्‍यो। नो पाँ रँःज़्‍यावर गे प़ाइँ गेलिज़्‍या।
ACT 2:33 ओबाबु परमेस्‍वरए येसुलाई मान याद ओवोर्दा च़ुसिउ परींद ओय़ाकालाव छैंव पुरूस एक्‍यो। येसुए नो पुरूसलाई ज़ आछिम गेक्‍याँत थुद्यासिक्‍यो। नो जेरँःज़्‍याव जेथैज़्‍याव भरी हो ज़।
ACT 2:34 स्‍वर्गत पुलुस्‍द परमेस्‍वरए ओल्‍योङ बाव दाऊद माःक। नोए उजूँनी ब ओल दाऊदए अइ लिद पाँके, ‘परमेस्‍वरए ङाप्रभुलाई, ‘नसुतुररालाई नखँ धूँल झाःद ङामाईंवा पै, ङावोर्दा च़ुसिद लिन्‍के,’ है दोक्‍यो।’
ACT 2:36 है जैद जे इस्राएली जातलाव प़ाइँ मिँराए आव सैंच्‍यो, नो क्रुसत जेसैःव येसुलाई ओल परमेस्‍वरए ज़ अजम्‍बरी जुनी यान्‍या ख्रीस ब थ·रैद्यासिक्‍यो, नाम स़ोनो नमतावराए गेप्रभु ब जैद्यासिक्‍यो।”
ACT 2:37 नो माहोल्‍याराए पत्रुसए ओपाँ थैद यायुँ माचाव दाद पत्रुस स़ोनो येसुए छुत ओसाचीरालाई, “ओहो! ङादाज्‍यु भाइर, हिताव ताकिन ते गे कै लिन्‍या ओताव?” है यारादोक ते,
ACT 2:38 पत्रुसए फरी, “जेपापलाई ऱास्‍द परमेस्‍वरस सखैसिन्‍याए जूँनी जेयुँर त़ोद येसु ख्रीसए उमिनत ऱील सछैंसिचिके। हो ताकिन ची छैंव पुरूस परमेस्‍वरए ल्‍योनी बरदान मिताव दैन्‍या जेले।
ACT 2:39 नो पुरूस दैन्‍या य़ाका जेलाई, जेज़ारालाई स़ोनो तादा तादा लिज़्यावर, जो जोलाई गेप्रभु परमेस्‍वरए ओल्‍योदा खुल्‍सिउर लिज़्यार, होराए जूँनी ज़ लिज़्‍या,” है यादोक्‍यो।
ACT 2:40 पत्रुसए कुधु पाँर सथैद, “आव जुकलाव पापी मिँराए ल्‍योनी पुलुस्‍द बाँचैसिचिके,” लिद यासम्‍जैक्‍यो।
ACT 2:41 हो छ्याम पत्रुसए ओपाँ भैंःद परमेस्‍वरए उमिनत चा·सिहुवर स़ोंहजारा याल्‍यो। नोर प़ाइँ ज़ ऱील सछैंसिकेर।
ACT 2:42 नोर हाःकिन येसुए ओसाचीरास प़ाइँ तोबो झ़िमलाव मिताव ताद, नोराए यापाँ पैसिद, प्रभु-भोजल दुप्‍सिद पोंखारिउ ज़ यानैज़्‍याव।
ACT 2:43 मिँ भरी प़ाइँ छे·वर यालिज़्‍याव। येसुए ओसाचीराए अचम्‍बलाव य़ेनर, अचम्‍बलाव सरेसर दाव ज़ यानैज़्‍याव।
ACT 2:44 येसुए ओपाँत हुव भरी ते प़ाइँ तोबो झ़िमलाव मिताव ताद यासकाव लिज़्‍याव भरी दुप्‍द याखार्त ज़ जैद यानैज़्‍याव।
ACT 2:45 याधन सम्‍पतीर यो·द या या माथैंव मायो·वल सघैसिउ ज़ यानैसिज़्‍याव।
ACT 2:46 दिनकाव ज़ ध्‍यान झ़िमल दुप्‍सिद ननी भाःसिद याबावत झ़िम झ़िमक यानैंरास दैसिद या याल बनै खैद रेंद काँर ब सिप याज़्‍युज़्‍याव।
ACT 2:47 परमेस्‍वरए ल्‍योदा खुसी ताद परमेस्‍वरए उमिन ब सघ्‍योःद याएज़्‍याव। मिँराए ब नोरालाई चाव ज़ यारारँःज़्‍याव। है जैद यायुँ हुप्‍ज़्यावर परमेस्‍वरए दिनकाव ज़ याबगालल चा·द ओराएज़्‍याव।
ACT 3:1 तछा पोंखारिन्‍या बेलाक तीन बजेवाक पत्रुस स़ोनो यूहन्‍नानी ध्‍यान झ़िमदा निबाज़्‍याव।
ACT 3:2 हो बेलाक तोबो जर्मननी ज़ घ्‍याँस्‍या ताव मिँलाई ओनैंराए ध्‍यान झ़िमदा घुर्द यालाँज़्‍याव। नो मिँ दिनकाव ज़ ‘चाव’ यादोज़्‍याव य़ामक च़ुसिद ध्‍यान झ़िमल पसिज़्‍यावरास पैसा उऩिज़्‍याव।
ACT 3:3 पत्रुस स़ोनो यूहन्‍नानी ध्‍यान झ़िमल निहुज़्‍याव रँःद नो मिँए नोनिस ब ऩिक्‍यो।
ACT 3:4 हाःत ज़ पत्रुसए, ओनैं यूहन्‍नास, नोलाई चिऊद, “आदा भाल्‍सिन्‍के,” है ओदोक ते,
ACT 3:5 नोए, ‘कातार याँनी सैं’ लिद उयुँ नदा ज़ झाःक्‍यो।
ACT 3:6 पत्रुसए फरी, “ङास सुन चाँदी ते माले, खाली जो लिज़्‍या, हो ज़ ङाईंरिज़्‍या। नासरतलाव येसु ख्रीसए उमिननी च्‍याँःसिद बान्‍के,” है दाद,
ACT 3:7 नोलाई वोर्फताव उकुइनी क्‍योःद ओसोचोइव प़ाइँना ज़ उखँर पलास्‍सिद,
ACT 3:8 नो फुतु ज़ो·द च्‍याँःसिद आदा होदा लिके। पत्रुस स़ोनो यूहन्‍नानिस ध्‍यान झ़िमल पसिद बनै ज़ो·द परमेस्‍वरए उमिन सघ्‍योःद ‘धन्‍या धन्‍या’ है ल्‍यो ज़ लिके।
ACT 3:9 परमेस्‍वरए उमिन निताव सघ्योःद ओबाऱिज़्याव रँःद ध्‍यान झ़िमल लिज़्‍याव मिँ भरिए नोलाई सरेस्‍द,
ACT 3:10 “ओहो! आव ते नो ‘चाव य़ामक’ च़ुसिद ऩिज़्‍याव घ्याँस्‍या ची सानी। कै जैद बाधुन्‍या ओताव?” लिद अचम्‍ब ताकेर।
ACT 3:11 हाःत ज़ मिँ भरी बनै अचम्‍ब ताद नो ध्‍यान झ़िमलाव सोलोमन मैरा यादोज़्‍यावल पत्रुस स़ोनो यूहन्‍नानी निल्‍योक धोंःहुकेर। हाःपै नो गराँव घ्याँस्‍या ओरेंतए नोनिलाई लाप्‍द उनिनैज़्‍याव।
ACT 3:12 पत्रुसए मिँर याहुज़्‍याव रँःद नोरालाई, “अ इस्राएली ङादाज्‍यु भाइर, काराव आवलाई रँःद अचम्‍ब ताद जेलिज़्‍याव? सैं गिनलाई, ‘नी निसक्ती नितपसनी ज़ सोजोकाव निजैव ताखेहो,’ है लिद जेचिऊसिज़्‍याव रो?
ACT 3:13 गेपुर्खा अब्राहाम, इसहाक स़ोनो याकूबराए यापरमेस्‍वर, ओल ज़ आज्‍याल ओज़ा येसुलाई ज़गै मगै जैक्‍यो। नो येसुलाई जे ते झन सूँपिद सैःन्‍या जेथ·रैके। पिलातसए नोलाई ऱासो ओपैंज़्‍यावत ब जे भैंःद जेमाएके।
ACT 3:14 है जैद ओखत माल्‍यो छैंव मिँलाई अऩाकल ज़ भीःद झन होए ओपोल मिँ सैःज़्‍यावलाई ऱासो परींद,
ACT 3:15 प़ाइँए गेस॰ झाःद्याज़्‍याव गेधर्मीलाई जेसैःके। नोलाई फरी परमेस्‍वरए सिउनी ओसोचोइव गे गेमीए ज़ गेरँःके।
ACT 3:16 नो है ङालिज़्‍याव येसुए उमिननिकाव सक्तीए ज़ आव जेरँःज़्‍याव जेसरेस्‍ज़्‍याव मिँ सोजोकाव ताद ले। नो येसुए उमिनत गिनयुँ गिन्सुहुबोनी ज़ आल जेङ़ाक ओक्‍याँर हालाँ होलों गराँद ले।
ACT 3:17 “आव ब ङासैंज़्‍या ङानैं ङामेंर, जेघेप्‍पाराए यादोव मिताव ज़ जे मनी येसुए ओक्‍याँताव जेदोव भरी मासैंद ज़ जेदोके।
ACT 3:18 हुनी ज़ अगमबक्ताराए यायाःनी ङ़ादा ज़ ‘ख्रीसए दुखर दैन्‍या ले’ लिद ओपाँव पाँर यो·के।
ACT 3:19 है जैद जेपापलाई क्‍याल्‍न्‍याए जूँनी जेयुँर त़ोद परमेस्‍वरए ल्‍योदा सखैसिचिके। हो ताकिन ची परमेस्‍वरए युँलाई होलाँ जैद्यान्‍या असिकर जेक्‍याँत जैद्याद,
ACT 3:20 जेजूँनी ङ़ादाकिन ज़ खतैद नैद ओयाचिउ येसु ख्रीसलाई फरी तछा परींद्यान्‍या ले।
ACT 3:21 खाली नोकिन ङ़ादा आव नाम नमलाव परमेस्‍वरए ओय़ेन भरी दाद ओमातुपैवा पै येसु स्‍वर्गत ज़ लिन्‍या ले। नो बेलाए जूँनी परमेस्‍वरए भाःकिन ज़ छैंव अगमबक्ताराए यायाःनी है ल्‍यो ज़ उलिज़्‍याव।
ACT 3:22 मोसाए मनी अइ लिद पाँके, ‘जेजातलाव मिँराए याखार्नी ज़ परमेस्‍वरए जेजूँनी तोबो ङा मिताव अगमबक्ता उथैद्याचिरिज़्‍याव। जे नोए ओपाँ भरित बनै धिद ल्‍यो ताके।
ACT 3:23 जोराए नोए ओपाँ माभैंःर होराए यामिन ओपो·स ज़ परमेस्‍वरए ओथोनी क्‍याल्‍सिन्‍या ले।’
ACT 3:24 “हो मिताव ज़ अगमबक्ता भरी, समूएलए ओपालाकिन छींनीकाव पाला पैकावर प़ाइँए आव बेलाए जूँनी ज़ पाँकेर।
ACT 3:25 नो अगमबक्ताराए याथोर जे ज़ जेतावए नो जेजिज्‍यु बाज्‍युरास परमेस्‍वरए ओनैव बाचालाव पाँ भरी जे जेक्‍याँत ज़ हुके। नो पाँ ङ़ादा परमेस्‍वरए अब्राहामलाई अइ लिद एक्‍यो, ‘नँ नथोरानी ज़ मानुवाताव प़ाइँ जातलाव मिँराए असिक दैन्‍या लेर।’
ACT 3:26 है जैद जेदोज़्‍याव पापरानी फर्कैद असिकर यान्‍याए जूँनी परमेस्‍वरए ओसेवा दान्‍या उथैद ओनैज़्‍याव येसुलाई उस॰कत जे जेल्‍योक ज़ परींद्याचिक्‍यो,” है यादोक्‍यो।
ACT 4:1 हाःत ज़ पत्रुस स़ोनो यूहन्‍नानी माहोल्‍यारास निपाँज़्‍याक ज़ ध्‍यान झ़िमलाव पाल्‍याराए कप्‍तान, नलाव पुजारीर स़ोनो सदुकीर नोनी निल्‍योक केस्‍हुकेर।
ACT 4:2 पत्रुस स़ोनो यूहन्‍नानी ‘येसु सिउनी ओसैंसिउए छुत सिउर ब सैंसिन्‍या लेर’ लिद थ·रैद निराएज़्यावए नोर बनै यारिस चोके।
ACT 4:3 है जैद नोनिलाई क्‍योःद जाँ ऱिमदा ऱिमदा ओतानावए हो पराःती खोले·न्‍याए जूँनी झ्यालखानाल यारानैकेर।
ACT 4:4 हैदी मनी नोनी निपाँ थैज़्‍यावरानी कुधुए भैंःद येसुए ओपाँत चा·सिहुकेर। नो ङ़ादाङाव भैंःज़्‍यावरास प़ाइँ जैद पाँच हजारा तानाकेर।
ACT 4:5 हो पराःती यहूदीराए याघेप्‍पार, यास़ेरर स़ोनो सास्‍त्रीर प़ाइँ यरूसलेमल दुप्‍सिद यालिज़्‍याव।
ACT 4:6 नोरास प्रधान पुजारी हन्‍नास ब उलिज़्‍याव। नोस फरी कैयाफा, यूहन्‍ना, अलेक्‍जेन्‍दर स़ोनो छुत नोए ओखलकलाव घेप्‍पा पुजारीर ब यालिज़्‍याव।
ACT 4:7 नोराए पत्रुस स़ोनो यूहन्‍नानिलाई घ्‍योःव कचरी ङ़ाक यारासच्‍याँक नो घेप्‍पाराए नोनिलाई खोले·द, “आव घ्याँस्‍यालाई काताए ओसक्तीनी, सुए उमिननी जिन्‍सगराँव?” है यारादोक ते,
ACT 4:8 पत्रुस छैंव पुरूसए ब्याल्‍द, “अ यहूदीराए याघेप्‍पार, यास़ेरर,
ACT 4:9 गिन आव घ्याँस्‍यालाई गिनयुँ नाद गिन्‍सगराँवए जूँनी जेखोले·सिज़्‍याव ताकिन, गिन नोलाई कै जैद गिन्‍सगराँव लिक ते,
ACT 4:10 जे स़ोनो इस्राएली भरिराए आव सैंच्‍यो — जे क्रुसत जेसैःव, परमेस्‍वरए सिउनी ओसोचोइव नासरतलाव येसु ख्रीसए उमिननी आव मिँ जेङ़ाक सोजोकाव ताद च्‍याँःसिद ले।
ACT 4:11 धर्मसास्‍त्रलाव आव पाँ होए उजूँनी ज़ सर्सिउ लिज़्या — ‘भुलीराए कान्‍ल ज़ माज़्‍यासे लिद याख्याव लुँ नो ज़ झन भुयाँरलाव लुँ ताके।’
ACT 4:12 है जैद पापए सजानी पुलुस्‍न्‍या उपुर सुए ओल्‍योनी ब माले। गे मिँरालाई अजम्‍बरी जुनी दैन्‍या मनी आव मानुवाताव मिन भरिरानी उपुर सुए उमिन ब यासिउ माले,” है यादोक्‍यो।
ACT 4:13 पत्रुस स़ोनो यूहन्‍नानी निलेखा प़री काता ज़ ओमालिदी ब नियुँ हुप्‍द पक्‍कास निपाँज़्‍याव रँःद नो कचरीलाव घेप्‍पार बनै अचम्‍ब ताद, ‘आवनी ते येसुसकावनी ज़ निल्‍यो’ लिन्‍या थ·रैकेर।
ACT 4:14 फरी नो निसगराँव मिँ ब याङ़ाक सोजोकाव ज़ च्‍याँःसिद उलिज़्‍याव रँःद कातानी ज़ मापाँधुद थाम थुम ज़ ताकेर।
ACT 4:15 है जैद नोनिलाई कचरीनी लाँःदा पले·द या याज़ जलफल दाद,
ACT 4:16 “आवनिलाई कै जैन्‍या ओताव? आवनी तोबो अचम्‍बलाव य़ेन निदोव यरूसलेम भरी प़ाइँए सैंज़्‍यार, नो पाँत ‘माःक’ है गेमालिधुइ।
ACT 4:17 खाली नो पाँ झन आदा होदा माफींजैन्‍याए जूँनी नोनिलाई हप्‍कैद, ‘येसुए उमिननी सुरास ज़ तापाँचिन’ है लिद अर्थैव ताके,” है लिन्‍या थ·रैकेर।
ACT 4:18 है जैद नोनिलाई कचरील फरी ब खुल्‍द रैद, “जिन अबकिन येसुए उमिननी सुलाई ज़ काता पाँर सथैन्‍या ब माःक, पैन्‍या ब माःक,” है लिद याराअर्थैकेर।
ACT 4:19 हाःत ज़ पत्रुस स़ोनो यूहन्‍नानी, “परमेस्‍वरए उयुँ किताव उलिज़्‍याव, जे ज़ सैंचिके — जे जेपाँ दान्‍या सैं ओल ओपाँ दान्‍या?
ACT 4:20 गिन ते गिन्थैव स़ोनो गिन्‍रँःव भरी कै जैद मापाँन्‍या?” है निरादोक ते,
ACT 4:21 नो घेप्‍पाराए फरी ब यारासिङार्केर। खाली मिँ भरिए नोनी निदोव य़ेनत परमेस्‍वरए उमिन बनै सघ्‍योःद यापाँज़्‍यावए नोनिलाई कैज़ माजैधुद याराऱास्‍केर।
ACT 4:22 निताव अचम्‍बलाव य़ेननी निसगराँव मिँ ते चालीस बर्सकिन यादाङाव ओल्‍यो।
ACT 4:23 पत्रुस स़ोनो यूहन्‍नानी निऱास्‍सिउ छींनी निनैंराए ल्‍योक बाद नो मुख्या पुजारीर स़ोनो यहूदीराए यास़ेरराए है यारादोव भरी है यारादोकिनी।
ACT 4:24 नोराए निपाँ भरी थैद प़ाइँए तयुँ जैद परमेस्‍वरलाई अइ लिद पोंखारिकेर, “अ गेप्रभु, आव नाम नम स़ोनो ऱीर जैज़्‍याव नँ ज़। नलाव लिज़्‍याव भरी जैज़्‍याव ब नँ ज़।
ACT 4:25 नँ छैंव नपुरूसनी ज़ ननोकोर गेपुर्खा दाऊद राजाए ओयाःनी अइ लिद नपाँके, ‘मानुवाताव मिँर काराव यारसिज़्‍याव? काराव अऩाकलाव य़ेनत बुद्धी याकलैज़्‍याव?
ACT 4:26 मानुवाताव राजार स़ोनो मिँराए याघेप्‍पार प़ाइँ दुप्‍सिद परमेस्‍वर स़ोनो छाँतिद ओनैज़्‍याव ख्रीसकिन तँदा जैसिकेर।’
ACT 4:27 साचो ज़ प्रभु, आव सहरल ज़ हेरोद स़ोनो पन्‍तियस पिलातसनी छुत जातलाव मिँर स़ोनो इस्राएलीरास खैद, छाँतिद ननैज़्‍याव छैंव नज़ा येसुकिन तँदा जैसिद,
ACT 4:28 नँ ङ़ादाकिन ज़ नयुँल गोइँद नरायो य़ेन ब दोनाकेर।
ACT 4:29 अब ते, गेलाई हप्‍कैद सचे·व यापैंज़्याव नँ ज़ चिऊके, प्रभु। स़ोनो गे ननोकोररालाई ब नपाँ सथैन्‍या माछे·द ज़ पाँन्‍या जैसियो।
ACT 4:30 नो गेरासथैज़्‍याव पाँत फरी नँ नसक्तीए ज़ छैंव नज़ा येसुए उमिननी याजोरो हुवर ब ओगराँरक, अचम्‍बलाव सरेसर, अचम्‍बलाव य़ेनर ब ओतारक,”
ACT 4:31 है लिद पोंखारिकेर। हो प़ाइँना ज़ नो दुप्‍सिद यालिज़्याव झ़िम बनै थोनो·सिद, छैंव पुरूसए ब्याल्‍द प़ाइँए परमेस्‍वरए ओपाँ माछे·द ज़ यारासथैनाकेर।
ACT 4:32 येसुए ओपाँत बाज़्‍यावर प़ाइँ खैद तोबो युँस ज़ यालिज़्‍याव। यासकाव लिज़्‍याव भरी ब प़ाइँ याखार्त जैद ‘आव ङामीं ज़’ है लिद सुए ज़ है यामालिज़्‍याव।
ACT 4:33 येसुए ओसाचीराए फरी बनै सक्तीस, ‘येसु सिउनी सैंसिद स्‍वर्गत बाके’ है लिद प़ाइँलाई ज़ सथैद प्रभुए ओसाची याराएज़्‍याव। उपुर्काव येसुए ओपाँत लिज़्‍यावरालाई मनी परमेस्‍वरए ओअसिक याक्‍याँत ज़ ओताज़्‍याव।
ACT 4:34 याखार्ल माथैंव मायो·व मिँर ब सु ज़ यामालिज़्‍याव। याझ़िम, याएँः ल्‍योर नो भरी यो·द ओएः भरी रैद,
ACT 4:35 नो पैसार येसुए ओसाचीराए ल्‍योक यादुप्‍ज़्‍याव। स़ोनो जोल चाहिज़्‍या होल नो पैसार भाःद याराएज़्‍याव।
ACT 4:36 हाः बेलाक नोरास तोबो साइप्रस तापुनी हुव लेबी थरलाव योसेफ यादोज़्‍याव उलिज़्‍याव। येसुए ओसाचीराए नोए उमिन बारनाबास नैदिकेर। (नोए ओअर्थ ‘युँ सझेंःद्यान्‍या’।)
ACT 4:37 नोए पाला तोबो ओएँःलाई यो·द ओएः भरी येसुए ओसाचीराए ल्‍योक लाँक्‍यो।
ACT 5:1 फरी तोबो हननिया यादोज़्‍यावए ओज्‍या सफीरास निएँः तोथो यो·द,
ACT 5:2 ओरेए नो एँःए ओएः ओज्‍यासकाव निसल्‍लाए तभा ओलस नैद उपुर्काव भरी येसुए ओसाचीराए ल्‍योक लाँक्‍यो।
ACT 5:3 ओसाचीराए ल्‍योक ओरैव प़ाइँना ज़ पत्रुसए, “ए हननिया, कै जैद सैतानए नयुँल पसिद छैंव पुरूसलाई धुतैव उपरींनिज़्‍याव? नो एँःए ओएः तभा नँस नैद ‘आःज़’ है नलिज़्याव।
ACT 5:4 नो एँः ङ़ादा नँ नमीं ज़ ओल्‍यो। यो·द ओएः भरी जो नजैदी ब नमाहाँ ज़ ओल्‍यो। कै जैद नयुँल इताव नचेतैव? नँ गेलाई नधुतैसिज़्‍याव माःक, परमेस्‍वरलाई नधुतैज़्‍याव ची,” है दोक्‍यो।
ACT 5:5 हननिया नो पाँ भरी ओथैव प़ाइँना नक ज़ धलिद सिके। नो थैवर प़ाइँ ज़ बनै छे·केर।
ACT 5:6 हाःत ज़ नक लिज़्‍याव धापाज़ाकावराए नोए ओमोरोलाई क्‍वाए लुम्‍बैद गादैनाकेर।
ACT 5:7 नो भरी ओताव स़ोंघन्‍ता छींनी हननियाए ओज्‍या सफीरा मनी नक हुके। ओरेलाई अइ ताके लिन्‍या काता ज़ ओमासैंज़्‍याव।
ACT 5:8 हाःत ज़ पत्रुसए, “नो जिन्‍यो·व एँःए ओएः आःज़ रो?” है ओदोक ते, नोए, “नाः ज़,” है दोक्‍यो।
ACT 5:9 नकिन पत्रुसए फरी, “जिन ज्‍या-रीए काराव परमेस्‍वरए उपुरूसलाई उयुँ कोला कोला जैद्यान्‍या बुद्धी जिन्कमैव? दे, नरेलाई गादैना बावर य़ामक ज़ हुद लेर। नँलाई मनी लाँद गादैनिरिज़्‍यार,” है ओदोव प़ाइँना ज़,
ACT 5:10 नो मनी होक ज़ धलिद उस॰ फ्या·के। हाःत ज़ नो ओरेलाई गादैना बाव छोर्‍यार खादरनी ओल्‍द हुद झ़िमल यापसिक ओज्‍यालाई मनी सिउ ज़ दैकेर। नोलाई मनी लाँद ओरेए ओलापक ज़ गादैकेर।
ACT 5:11 नो पाँनी ज़ मन्‍दली भरी स़ोनो उपुर्काव थैज़्‍याव मिँ भरी ब बनै छे·केर।
ACT 5:12 हाः बेलाक मिँराए याखार्ल येसुए ओसाचीराए याक्‍याँनी ज़ अचम्‍बलाव सरेसर ओताज़्‍याव। येसुए ओपाँत लिज़्‍यावर प़ाइँए तयुँ जैद ध्‍यान झ़िमलाव सोलोमन मैराल दुप्‍सिउ ज़ यालिज़्‍याव।
ACT 5:13 उपुर्काव मिँराए नोरालाई बनै घ्‍योःव यारामानिदी ब नोरास खदेप लिन्‍या याछे·ज़्‍याव।
ACT 5:14 हैदी ब कुधु मिँर, खेपा मेंमा प़ाइँ प्रभुए ओपाँत चा·सिहुव ज़ यालिज़्‍याव।
ACT 5:15 मिँराए, “याजोरो हुवराए याक्‍याँत पत्रुसए ओसाँ वाज़ उपरिदी ब गराँन्‍या ज़ लेर,” लिद नो याजोरो हुवरालाई याझेलोङ्गा यातैंरास पत्रुसए ओयेमक यारानैज़्‍याव।
ACT 5:16 यरूसलेम सहर लापजीकाव नाखार नाखारलाव मिँराए मनी याजोरो हुवर स़ोनो माचाव पुरूसराए क्‍योःद यारानैज़्‍यावरालाई येसुए उसिसराए ल्‍योक यारारैक नोर मनी यागराँज़्‍याव।
ACT 5:17 छींनी प्रधान पुजारी स़ोनो ओलसकाव सदुकी दललाव ओनैंराए येसुए ओसाचीरालाई रँःद यामी बनै तूद,
ACT 5:18 नोरालाई क्‍योःद झ्यालखानाल याराझाःकेर।
ACT 5:19 हो छ्याम रील परमेस्‍वरए ओचाकर्‍या हुद झ्यालखानालाव य़ामर फैद्याद नोरालाई पले·द,
ACT 5:20 “जे ध्‍यान झ़िमल बाद प़ाइँए याङ़ाक च्‍याँःसिद आव साःरो जुनीए जूँनी ओपो·स ज़ यारासथैचिके,” है दाद याख्यानैक्‍यो।
ACT 5:21 नोए है ओरादो पाँ भैंःद नोर नम उसँनाक ध्‍यान झ़िमल बाद मिँरालाई यारासथैकेर। हो छ्याम ज़ छकाल्‍न्‍या प्रधान पुजारी स़ोनो ओलसकाव लिज़्‍याव ओनैंराए इस्राएल देसलाव यास़ेररालाई घ्योःव कचरील दुप्‍द तोबो ऩेब्‍लो यासिपाईंरालाई नो झ्यालखानाल लिज़्‍याव येसुए ओसाचीरालाई च़ानाव यारापरींकेर।
ACT 5:22 नोर बाद झ्यालखानाल सुलाई ज़ यामारादैवए ननी ओल्‍द बाद नो घेप्‍पारालाई,
ACT 5:23 “गे झ्यालखानाल गेबाक प़ाइँत ज़ तालकुची झाःसिउ लिज़्‍या, पाल्‍यार मनी य़ामक च्‍याँःसिउ ज़ लिज़्‍यार। खाली य़ाम फैद नल गेराचिऊक ते सु ज़ मालेर,” है यारादोक ते,
ACT 5:24 नो ध्‍यान झ़िमलाव पाल्‍याराए याकप्‍तान स़ोनो मुख्या पुजारीराए नो पाँ थैद, “अब कै तान्‍या ओताव?” लिद यायुँ बनै आँचानी पाँचा ओताज़्‍याव।
ACT 5:25 हो प़ाइँना ज़ याल्‍योक तोबो मिँ हुद, “दे, नो झ्यालखानाल जेराझाःव मिँर ते ध्‍यान झ़िमल ची च्‍याँःसिद प़ाइँलाई ज़ येसुए ओपाँ यारासथैज़्‍यार,” है ओरादोक ते,
ACT 5:26 नो ध्‍यान झ़िमलाव कप्‍तान उसिपाईंरास लाला लुलु बाद नोरालाई ननी कचरी झ़िमल चावस ज़ यारारैकेर। “मिँराए गेलाई लुँराए प़ोसिर्‍या,” लिद जबरज्‍यास्‍ती क्‍योःन्‍या याछे·ज़्‍याव।
ACT 5:27 नो घ्योःव कचरील दुप्‍सिउ स़ेरराए याङ़ाक फरी ब यारासच्‍याँवत नो प्रधान पुजारीए,
ACT 5:28 “गे जेलाई ‘येसुए उमिननी काता पाँर ब तारासथैच्‍यो’ है गेदाचिउ सैं माःक? जे ते झन नोए ओपाँ यरूसलेम भरिल फींजैद, नोलाई यासैःव गल्‍ती ब गे गेङ़ैत झाःव जेपैंज़्‍या,” है ओरादोक ते,
ACT 5:29 पत्रुस स़ोनो येसुए छुत ओसाचीराए, “मिँराए यापाँकिन बुरू गे परमेस्‍वरए ओपाँ भैंःव ताके।
ACT 5:30 नो क्रुसत तङ्गैद जेसैःव येसुलाई गेजिज्‍यु बाज्‍युराए यापरमेस्‍वरए ज़ सिउनी सोचोइक्‍यो।
ACT 5:31 नोलाई ज़ फरी परमेस्‍वरए स्‍वर्गताव प़ाइँरानी ओमान ल्‍यो झेंःव पोल नैद गेराजा जैद्यासिक्‍यो, पापनी ऱास्‍न्‍या ब जैद्यासिक्‍यो। गे इस्राएलीरालाई गेयुँर त़ोद्याद गेपापर क्‍याल्‍द्यान्‍या ओल ज़ लिज़्‍या।
ACT 5:32 गे फरी नो पाँ भरित ओसाचीर गेलिज़्‍या। खाली गे वाज़ माःक, छैंव पुरूस ब लिज़्‍या। नो पुरूस गे परमेस्‍वरए ओपाँ भैंःज़्याव भरिरालाई गेक्‍याँत ज़ याद नैसिउ,” है यारादोकेर।
ACT 5:33 नो घ्‍योःव कचरीलाव मिँराए पत्रुसए ओपाँ भरी थैद यायुँर बनै कोला कोला ताद नो उसिसरालाई सैःव पैंकेर।
ACT 5:34 हाःत ज़ तोबो यासकाव गमलिएल यादोज़्‍याव नो कचरीराए याङ़ाक च्‍याँःसिके। नो मिँ बनै मान दैव फरिसीरासकाव कानुनलाव यागुर्बा ओल्‍यो। है जैद नोए येसुए उसिसरालाई तखेप लाँःदा पले·व परींद नो घेप्‍पारालाई है यादोक्‍यो,
ACT 5:35 “अ इस्राएली ङानैंर, आवराए याक्‍याँत जेदोरिज़्‍याव य़ेन बनै जोगोइसिद वाज़ दोच्‍यो।
ACT 5:36 नो तालाङाव थुदासए मनी तघरीत ज़ उमिन बनै सघ्‍योःद ओल्‍योदा चार सयवा मिँर याजैक्‍यो। छींनी नोलाई यासैःवत उमींर प़ाइँ चितराँ पुतराँ ताद उमिन ज़ म़ाके।
ACT 5:37 नकिन फरी नो गालीललाव यहूदाए मनी, जनसंख्‍या यासर्ज़्‍याव बेलाक, मिँरालाई सर्बा ज़ ओल्‍योदा याजैक्‍यो। नोलाई मनी यासैःक उमींर आदा बाकेर लिन्‍या ज़ माताके।
ACT 5:38 है जैद आछिम ङा जेलाई आव सल्‍ला ङायाचिज़्‍या — आव मिँरालाई कैज़ ताराजैच्‍यो, बुरू याराऱास्‍चिके। आवराए याबिचार याय़ेनर अइज़ मिँनिकाव हुव ताकिन नो ओलनी ज़ म़ान्‍या ले।
ACT 5:39 नो याय़ेन फरी परमेस्‍वरनिकाव हुव ताकिन जे वैंधुन्‍या जेमाले। झन परमेस्‍वरकिन तँदा जैसिद ओलस लरैं जेदोज़्‍याव मिताव तान्‍या ले,” है ओरादोक ते,
ACT 5:40 नोराए नोए ओपाँ भैंःद येसुए ओसाचीरालाई फरी ब याल्‍योक खुल्‍द, “येसुए उमिननी काता पाँर ब तारासथैच्‍यो,” लिद हप्‍कैद रीःद अइज़ याराऱास्‍केर।
ACT 5:41 नोर नो कचरीनी पुलुस्‍द, ‘परमेस्‍वरए गेलाई येसुए उमिनत दुख सहिन्‍या स्‍यासोर ओथ·रैसिउ ओल्‍यो’ लिद बनै रेंए रेंए बाकेर।
ACT 5:42 नकिन दिनकाव ज़ ध्‍यान झ़िमल स़ोनो मिँराए झ़िम झ़िमक दुप्‍सिद, “येसु परमेस्‍वरनी हुव ख्रीस ज़,” लिद च़िम मादाद सथैव ज़ यारानैकेर।
ACT 6:1 हाः बेलाक येसुए ओपाँत बाज़्‍यावर सर्बा याबा·नावत यासकाव ग्रीक पाँज़्याव यहूदीर हिब्रू पाँज़्याव यहूदीराए याङ़ैत जाँ यारूम्‍रूमैज़्‍याव। हिब्रू पाँज़्याव यहूदीराए माथैंव मायो·वरालाई दिनकाव ज़्‍यावर भाःद याराएक कैताक ग्रीक पाँज़्याव राँदी मेंमारालाई बलेंद याराख्यानैज़्‍याव।
ACT 6:2 है जैद बाह्र जना येसुए उसिसराए परमेस्‍वरए उमिनतावरालाई दुप्‍द, “गे परमेस्‍वरए ओपाँ सथैज़्‍यावराए नो गेध्‍यावनालाई ऱास्‍द ज़्‍यावर भाःद्यान्‍या जाँ माज़्‍यासे।
ACT 6:3 ङानैं ङामेंर, बुरू जे ज़ नो य़ेन चलैन्‍यात जे जेखार्नी ज़ सात जना यातह ल्‍यो छैंव पुरूसए ब्यालो यामान ल्‍योरालाई याराखतैचिके।
ACT 6:4 गे ते परमेस्‍वरलाई पोंखारिद ओपाँ सथैन्‍या ध्‍यावना वाज़ गेदोरिज़्‍या,” है यारादोक ते,
ACT 6:5 प़ाइँए ज़ भैंःद नोरालाई याराखतैकेर। उस॰कतावए उमिन स्‍तिफनस। नो मिँ परमेस्‍वरए ओपाँत बनै थ॰रिउ, छैंव पुरूस दैव मिँ ओल्‍यो। नकिन फिलिप, प्रखरस, निकनोर, तीमोन, पर्मिनास, स़ोनो एन्‍तिओखिया सहरनी हुद ङ़ादा ज़ यहूदी जैसिउ निकोलाउसलाई ब जैकेर।
ACT 6:6 आव भरिरालाई येसुए ओसाचीराए याल्‍योक यारारैक, नोराए पोंखारिद असिक ऩिद्याद याकुइ याङ़ैत झाःद याराएकेर।
ACT 6:7 परमेस्‍वरए ओपाँ झन ज़ फैलिद, यरूसलेमल येसुए ओपाँत हुज़्‍यावर बनै ज़ याबा·ज़्‍याव। पुजारीर मनी कुधुए ज़ यायुँ उहुप्‍ज़्‍याव।
ACT 6:8 नो स्‍तिफनसए परमेस्‍वरए ओअसिक स़ोनो ओसक्तीर ओक्‍याँत ओतावए, मिँराए खार्ल बनै अचम्‍बलाव य़ेनर ओदोज़्‍याव।
ACT 6:9 हो बेलाक ज़ यरूसलेम सहरल ‘फुर्सुल ताव’ है यारादोज़्याव यहूदीराए धर्मसास्‍त्र झ़िम तोबो जैद यानैज़्‍याव। नोर ख्वार कुरेनी स़ोनो अलेक्‍जेन्‍द्रिया सहरनी हुवर, ख्वार किलिकिया स़ोनो एसिया खन्‍दनी हुवर यालिज़्‍याव। नोर स्‍तिफनसकिन तँदा जैसिद नोस खर्लेसिउ ज़ यालिज़्याव।
ACT 6:10 खाली स्‍तिफनस परमेस्‍वरए उपुरूसनी ओदैव बुद्धीनी ओपाँवए नोराए ओपाँ जात्त ज़ मापल्‍तैधुकेर।
ACT 6:11 है जैद नोराए अऩाकलाव पाँर ससैद, “ ‘आव मिँ मोसाए उउपर्त स़ोनो परमेस्‍वरए उउपर्त माचाव ओपाँज़्‍याव गे ज़ गेथैके’ है लिचिके,” लिद मिँरालाई यारामचैकेर।
ACT 6:12 नोराए माहोल्‍यार, यहूदीराए यास़ेरर स़ोनो सास्‍त्रीरालाई मनी यारामचैकेर। नकिन प़ाइँ ज़ स्‍तिफनसए ल्‍योक हुद नोलाई क्‍योःद, नो घ्योःव कचरीलाव घेप्‍पाराए ङ़ाक लाँद सच्‍याँकेर।
ACT 6:13 नोए उजूँनी ख्वार धुत गोहाईर जैसिद, “आव मिँ एकतार ज़ गेध्‍यान झ़िम स़ोनो मोसाए ओकानुनए उउपर्त पाँव ज़ लिज़्‍या।
ACT 6:14 आवए ते झन, ‘नो नासरतलाव येसुए ध्‍यान झ़िमलाई तैःद, मोसाए ओयासिउ चलनर ब त़ोद्यान्‍या ले,’ इताव पाँर है उलिज़्‍याव ब गेथैके,” है लिकेर।
ACT 6:15 हाःत ज़ नो घ्योःव कचरील दुप्‍सिद लिज़्‍याव भरिए स्‍तिफनसलाई लँ लँ याचिऊक ओङाः परमेस्‍वरए ओचाकर्‍याए ओङाः मिताव ज़गै ज़गैव रँःकेर।
ACT 7:1 हाःत ज़ नो घ्योःव कचरीलाव प्रधान पुजारीए, “आव नङ़ैत झाःद याईंज़्‍याव पाँर साचो सैं माःक?” है ओदोक ते,
ACT 7:2 स्‍तिफनसए, “अ ङास़ेरर, ङादाज्‍यु भाइर, आव ङापाँ थैचिके। गेपुर्खा अब्राहाम हारानल ओमाबाद, ङ़ादा मेसोपोतामिया देसल उलिज़्‍याक ज़ ज़गै मगैव परमेस्‍वर ओङ़ाक सरैंःसिद,
ACT 7:3 ‘आव नलिज़्‍याव देस स़ोनो नक्‍याँदाङावरालाई ऱास्‍द नँलाई सतैंद ङाईंरिज़्‍याव पोङ लिनान्‍के,’ है ओदोक ते,
ACT 7:4 अब्राहाम ओल उलिज़्‍याव कल्‍दीराए यादेसलाई ऱास्‍द हारानल बाद नल ज़ जाँवा पै लिके। नकिन ओबाबु उसिउ छींनी परमेस्‍वरए आव गेलिज़्‍याव पोल ज़ सारैक्‍यो।
ACT 7:5 “खाली हो बेलाक आव देसल ओल लिन्‍या पो परमेस्‍वरए तके ब ओमाएताव, ओज़ार मनी तोबो ब यामाताताव। हितावत मनी परमेस्‍वरए नोलाई, ‘आव पो नँ नपो स़ोनो नथोर लिन्‍या पो जैद ङायाचिरिज़्‍या,’ है लिद य़ाका याद ओनैज़्‍याव।
ACT 7:6 खाली होए उजूँनी परमेस्‍वरए इतावनी ब पाँके, ‘नँ नथोर छुतराए यादेसल खासिद लिद नोराए याधूँल चार सय बर्स पै याबाँदार ताद दुख ब दैन्‍या लेर।
ACT 7:7 छींनी ङा ज़ नो बाँदा ताद यालिज़्‍याव देसलाई सजा ङाएरिज़्‍या। हाःकिन नो नथोर ननी पुलुस्‍द आव ङायाचिरिज़्‍याव पोल ङासेवा दाहुन्‍या लेर,’ है दोक्‍यो।
ACT 7:8 नकिन परमेस्‍वरए अब्राहामलाई बाचालाव क्‍याल्‍न्‍या सरेस एक्‍यो। है जैद अब्राहामए ओज़ा इसहाक उजर्मिउ आथ दिनत नो सरेस जैदिक्‍यो। नकिन इसहाकए ओज़ा याकूब ताके, याकूबए ओज़ार बाह्र जना बाह्र थरराए यापुर्खार ताकेर।
ACT 7:9 “याकूबए ओज़ा योसेफलाई छुत ओदाज्‍युराए यामी तूद इजिप देसदा यो·केर। हैदी ब परमेस्‍वर योसेफस ओल्‍योए,
ACT 7:10 उदुख भरिनी जोगोइद, नोलाई बनै अचम्‍बलाव बुद्धीर याद इजिपलाव राजा फारोलाई योसेफए ओल्‍योदा दाइनो जैक्‍यो। है जैद नो राजाए योसेफलाई इजिपलाव हाकिम जैद दरबार चलैन्‍या ब जैक्‍यो।
ACT 7:11 “छींनी इजिप स़ोनो कनान देस भरिल घ्‍योःव अनिकाल हुद प़ाइँलाई ज़ बनै दुख ताके। गेपुर्खाराए मनी ज़्‍याव मादैकेर।
ACT 7:12 है जैद याकूबए ‘इजिपल ज़्‍यावर दैसिज़्‍या दी’ लिन्‍या बयेन थैद ओज़ारालाई नदा तखेप ज़्‍यावर लँःनाव यापरींक्‍यो।
ACT 7:13 फरी छींनीकाव पालाकाव ओरापरींक योसेफ ओदाज्‍यु भाइराए याङ़ाक सरेस्‍सिके। हाःकिन राजा फारोए मनी योसेफए उझ़िमलावरालाई यासरेस्‍क्‍यो।
ACT 7:14 नाःत ज़ योसेफए, ओबाबु याकूब स़ोनो ओक्‍याँदाङाव भरिरालाई ‘आदा ज़ उहुरक’ लिद क़िनाव यापरींक्‍यो। नोर प़ाइँ जैद पचहत्तर जना याल्‍यो।
ACT 7:15 है जैद याकूब इजिपल बाद नल ज़ सिके। गेपुर्खार ब नल ज़ सिकेर।
ACT 7:16 खाली नोराए यामोरोर नल मानैद, अब्राहामए हमोरए ओज़ाराए याल्‍योनी उलँःव सकेम नाखार ङ़ाकाव खादर पुपल ज़ यारागादैनाकेर।
ACT 7:17 “हाःकिन ज़ परमेस्‍वरए अब्राहामलाई ओयो य़ाका सयो·न्‍या बेला उहुनावत नोए ओथोर इजिपल ज़ लिद बनै ज़ बा·नाकेर।
ACT 7:18 छींनी इजिपल योसेफए उमिन माथैव तोबो साःरो राजा पुलुस्‍के।
ACT 7:19 नो राजाए गेखलक भरिरालाई जाल दाद बनै दुख याएक्‍यो। याभाउज़ारालाई मनी सफ्या·न्‍याए जूँनी करस ज़ पाखादा पले·व ओरापरींज़्‍याव।
ACT 7:20 “होए ओपालाक ज़ मोसा जर्मिके। नो भाउज़ा परमेस्‍वरए उयुँलाव ज़ ओल्‍यो। नोलाई स़ोंमैना पै ओबाबु ओआमानी निझ़िमल ज़ म़ोंद ङाकेनी।
ACT 7:21 छींनी नोलाई पाला पाखाङ ख्‍याद यानैज़्याक राजाए मेंमा ओज़ाए नोलाई लाँद ओल ओज़ा ज़ जैद ङाक्‍यो।
ACT 7:22 है जैद मोसाए इजिपलाव प़ाइँ ग्‍यान सिऊसिद, सैंन्‍या स़ोनो दान्‍या भरित बनै ओगहक ल्‍यो मिँ ताके।
ACT 7:23 “चालीस बर्स ओतावत ओभेरा इस्राएलीरास दैसिन्‍या युँ दोक्‍यो।
ACT 7:24 है जैद तछा याल्‍योक ओबाक तोबो इजिपीए इस्राएलीलाई ओप़ोज़्‍याव रँःद नो प़ोसिउलाई धुरिद्याद उखिस फेरैद्याद, प़ोज़्‍यावलाई सैःदिक्‍यो।
ACT 7:25 ओल उयुँल ते, ‘ङाभेरारालाई यादुखरानी फुर्सुल जैन्‍या परमेस्‍वरए ङालाई जैद नैनाव। आव पाँ नोराए मनी सैंज़्‍याखेरहो,’ है उलिज़्‍याव। खाली नोराए मासैंकेर।
ACT 7:26 है जैद हो पराःती मनी याल्‍योक ओबाक ऩेब्‍लो इस्राएलीनी नी नी निखप्‍सिज़्‍याव रँःद, ‘अ ङानैंनी, जिन दाज्‍यु भाइनी काराव जिन जिन ज़ जिन्प़ोसिज़्‍याव?’ लिद नोनिलाई सखैव ओपैंज़्‍याक,
ACT 7:27 नो ङ़ादा छुपिउए मोसालाई हुतैद, ‘नँलाई गेङ़ैताव ताद पाँ फाल्‍न्‍या सुए ओजैनिउ?
ACT 7:28 काता नँ आझ्‍योकाव इजिपीलाई नसैःव मिताव ङालाई ब सैःव नपैंज़्‍याव रो?’ है ओदोक ते,
ACT 7:29 मोसाए नो पाँ थैद ओछ्याचेए धोंःद मिद्यान देसल खासिद लिनाके। नल ज़ ओज़ानी ब दुई भाइ ताकिनी।
ACT 7:30 “मोसा नल ओल्‍यो चालीस बर्स ओतावत सीनै खागरताव बनल झोपोरा चाँःज़्‍यावनी परमेस्‍वरए ओचाकर्‍या ओङ़ाक सरैंःसिके।
ACT 7:31 मोसाए नो झोपोरा ओलनी ज़ ओचाँःज़्‍याव रँःद बनै अचम्‍ब ताद जाँ ओल्‍योकसै बाद चिऊद ओनैज़्‍याक परमेस्‍वरए ओर्गाए,
ACT 7:32 ‘ङा जेजिज्‍यु बाज्‍युराए यापरमेस्‍वर, अब्राहाम, इसहाक स़ोनो याकूबराए यापरमेस्‍वर ज़,’ है लिन्‍या ओथैव प़ाइँना मोसा ओछ्याचेए बनै गूद माभाल्‍सिधुके।
ACT 7:33 हाःत ज़ परमेस्‍वरए, ‘नखँताव पोला हाइके, नँ च्‍याँःसिद नलिज़्‍याव पो चोखो लिज़्‍या।
ACT 7:34 इजिपल लिज़्‍याव ङामीं इस्राएलीराए धो सहिउ दुखर यादैज़्‍याव ङा ज़ रँःद ङानै। नोर यागहनिज़्‍याव ब थैद ङानै। है जैद नोरालाई जोगोइना हुद ङाले। दे नँ झाःसिन्‍केदा, इजिपदा ङापरींनिरिज़्‍या,’ है दोक्‍यो।
ACT 7:35 “है जैद नो ङ़ादा ‘नँलाई गेङ़ैताव ताद पाँ फाल्‍न्‍या सुए ओजैनिउ?’ है लिद यामाभैंःव मोसालाई ओल परमेस्‍वरए ज़ चाँःज़्याव झोपोरानी पाँज़्याव ओचाकर्‍यालाई ओल्‍योक परींद्याद झन यालाई जोगोइन्‍या याङ़ैताव जैद याएक्‍यो।
ACT 7:36 मोसाए नोरालाई ननी ओरासारैक इजिपल, लाल समुन्‍द्रल, स़ोनो चालीस बर्स पै याल्‍यो बनल अचम्‍बलाव य़ेनर सतैंद याएक्‍यो।
ACT 7:37 नो मोसाए ज़ फरी नोरालाई, ‘परमेस्‍वरए जेजातलाव मिँराए याखार्नी ज़ जेजूँनी तोबो ङा मिताव अगमबक्ता उथैद्याचिरिज़्‍याव,’ है ओरादोज़्‍याव।
ACT 7:38 नो मोसा मनी नोरास चालीस बर्स भरी बनल लिद सीनै खागरत परमेस्‍वरए ओचाकर्‍या स़ोनो गेसाखा पुर्खाराए याखार्लाव त्‍याला ताद नो बाँचिन्‍या पाँर गेलाई मनी यासिक्‍यो।
ACT 7:39 “खाली नोराए झन ओपाँर माभैंःद ओललाई ज़ भीःकेर। यायुँ जम्‍मा याऱासो पो इजिपदा वाज़ खोतोरो याजैज़्‍याव।
ACT 7:40 है जैद नोराए मोसाए ओदाज्‍यु हारूनलाई, ‘गेलाई इजिपनी पले·ज़्‍याव मोसा काना ओबाव सुए ज़ गेमासैंए। है जैद नँ ज़ गेलाई गेङ़ा गेङ़ा बान्‍या देवतार जैद्याव ताके,’ है दोकेर।
ACT 7:41 नो बेलाक बाछाए अङग्‍या तोबो जैद नो अङग्‍याए उमिनत मार सैःद चरैःद बनै घ्‍योःव जात्रा जैकेर। नो अङग्या याज़ याजैवए बनै रेंकेर।
ACT 7:42 “है जैद परमेस्‍वरए ओङाः तँदा फर्कैद, ‘आवरालाई कै जैद ब माताके’ लिद, ‘नमताव स़्यावै, निमी, सोरोरालाई ब पुजा घदोज़्‍यारक ते,’ है लिद याऱास्‍क्‍यो। होए उजूँनी अगमबक्ताराए यासरो पोस्‍तोकोल ब इताव सर्सिउ लिज़्‍या, ‘अ इस्राएललाव मिँर, नो चालीस बर्स भरी बनल जेलिज़्‍याकाव मारर सैःद जेचरैःव ङा ङाजूँनी माःक।
ACT 7:43 खास जे यासेवा दान्‍याए जूँनी जैद जेस जेरालाँव मोलोख देवता लिन्‍या पाल स़ोनो सोम्‍पा सोरोए ओअङग्‍यानी ची। है जैद ङा जेलाई जबरज्‍यास्‍तीस बेबिलोन देसदा ङालाँचिरिज़्‍या।’
ACT 7:44 “हो बेलाक ज़ गेसाखा पुर्खारास बनल यालिज़्‍याक परमेस्‍वरए ओध्‍यान दान्‍या पाल ब उलिज़्‍याव। नो पाल परमेस्‍वरए मोसालाई सतैंद ओयो गोइँनी ज़ जैसिउ उलिज़्‍याव।
ACT 7:45 छींनीकाव प़िरील मनी गेसाखा पुर्खाराए यहोसूस कनान देसल याबाक नो पाल यास ज़ यालाँज़्‍याव। हो बेलाक ज़ नो देसलाव छुत जातरालाई परमेस्‍वरए खेपैद ओरायोनी नो पो गेसाखा पुर्खाराए यामीं ज़ ताके। है जैद नोर नल लिद दाऊद राजाए ओपालाक पै नो पाल यास ज़ यानैज़्‍याव।
ACT 7:46 दाऊद परमेस्‍वरए उयुँलाव मिताव मिँ ओतावए नोए ‘नँलाई लिन्‍या पो तोबो झ़िम जैद गेईं रो’ लिद याकूबए ओपरमेस्‍वरलाई बिन्‍ती दोक्‍यो।
ACT 7:47 खाली नो झ़िम होए ओपालाक माताद ओज़ा सोलोमनए ओपालाक वाज़ ताके।
ACT 7:48 “हैदी ब ओल माहान परमेस्‍वर उलिन्‍या पो ते मिँए जैसिउ झ़िमल माःक। अगमबक्ताए मनी परमेस्‍वरए ओपाँ अइ लिद सर्द नैव,
ACT 7:49 ‘ङा ङासिंहासन स्‍वर्गत लिज़्‍या। ङाखँ नैन्‍या पो नामल लिज़्‍या। इतावए ङाजूँनी किताव झ़िम ची जैद जेयाँरिज़्‍याव? ङा ङाऩासिन्‍या पो काङ्क ची उलिज़्याव?
ACT 7:50 आव जेरँःज़्‍याव नाम नम भरी आव ङाकुइए ज़ ङाजैव माःक रो?’
ACT 7:51 “जे बनै मामुइलिउर, जेयुँ परमेस्‍वरए ओपाँ मासैंज़्‍यावराए यायुँ स्‍यासो लिज़्‍या। जेर्ना ब सूइसिउ मिताव ज़ ताद छैंव पुरूसनिकाव हुज़्‍याव पाँ भरी काता ज़ जेमाथैधुइ। जे जेय़ेन चबनै जेसाखा पुर्खाराए याय़ेन स्‍यासो ज़ लिज़्‍या।
ACT 7:52 नोरानी खिरी मापसिउ अगमबक्तार सु ची यालिज़्यावदा? नो ङ़ादा ‘परमेस्‍वरए छैंव उमीं गेल्‍योक हुरिज़्‍या’ है लिद सथैज़्‍याव भरिरालाई मनी ओपो·स ज़ यारासैःकेर। जे ते झन नो हुव ओज़ालाई ज़ धोका याद जेसैःके।
ACT 7:53 है जैद जे परमेस्‍वरए ओचाकर्‍यारानी परमेस्‍वरए ओकानुन दैवराए ते, जे ज़ झन नो कानुन जेमाभैंःके,” है यादोक्‍यो।
ACT 7:54 नो घ्योःव कचरीलाव घेप्‍पाराए स्‍तिफनसए ओपाँ याथैवत यारिसए बूलिवा ताद याहार ङर ङर कैकेर।
ACT 7:55 स्‍तिफनस ते छैंव पुरूसए ब्याल्‍द नमदा ओभाल्‍सिक परमेस्‍वरए ओज़गै ब रँःक्‍यो, परमेस्‍वरए ओवोर्दा येसु च्‍याँःसिद उलिज़्‍याव ब रँःक्‍यो।
ACT 7:56 हाःत ज़, “ओहो! नम फैसिउल मिँ मिन्‍सिउलाई परमेस्‍वरए ओवोर्दा च्‍याँःसिद उलिज़्‍याव ङारँःज़्‍या,” है ओल्‍यो प़ाइँना ज़,
ACT 7:57 नोर बनै चिर चिर क़िद यार्नार सूइद, प़ाइँ ज़ भोरो·सिनाद,
ACT 7:58 नोलाई लुँए झेःद सैःन्‍याए जूँनी सहरनी स़ेल्‍द पाखाङ लाँकेर। हो बेलाक नोरास बाव तोबो साऊल यादोज़्‍याव धापाज़ाकाव ब उलिज़्‍याव। नो छ्याप लैज़्यावराए याफुतुर हाइद नोए उजिम्‍बाल नैकेर।
ACT 7:59 नोलाई लुँ लुँए याझेःज़्‍याक स्‍तिफनसए परमेस्‍वरए उमिन हाइद, “अ प्रभु येसु, ङापुरूस नल्‍योदा लाँद्याँके,” है लिद,
ACT 7:60 उघूँदानी तिकिसिद बनै चोइस, “अ प्रभु, आवराए ङाक्‍याँत यादोज़्‍याव पाप याक्‍याँत ताताक,” है ओल्‍यो प़ाइँना ज़ उस॰ फ्या·के।
ACT 8:1 नो साऊलए मनी, ‘आवलाई सैःन्या ज़’ लिद नोरास तयुँ ज़ ओजैज़्याव। हो छ्यामकिन ज़ यरूसलेम सहरलाव मन्‍दलीए उखिरी बनै पसिनाकेर। हुनी ज़ नोर प़ाइँ यहूदिया स़ोनो सामरिया खन्‍दल धोंःद रा·सिनाकेर। येसुए ओसाचीर वाज़ यरूसलेमल रहिकेर।
ACT 8:2 हाः बेलाक फरी, धर्मी मिँराए स्‍तिफनसए ओमोरोलाई बनै घरे घरे लाँद गादैकेर।
ACT 8:3 साऊलए ते मन्‍दलीलावरालाई बनै ज़ हाप हाप ख्याद झ़िम झ़िमक बाद खेपा मेंमा प़ाइँलाई ज़ क्‍योःद स़ेले स़ेले लाँद झ्यालखानाल ओराझाःज़्‍याव।
ACT 8:4 नो यरूसलेमनी धोंःद बावर प़ाइँदा रा·सिद जोङ याकेस्‍दी ब येसुए ओपाँ यारासथैकेर।
ACT 8:5 फिलिपए सामरिया सहरल बाद परमेस्‍वरनी हुव ख्रीसए उजूँनी यासथैक्‍यो।
ACT 8:6 नलाव मिँराए नोए ओपाँर थैद अचम्‍बलाव ओदोव य़ेनर रँःद ओपाँ बनै चावस थैकेर।
ACT 8:7 माचाव पुरूसर कुधु मिँराए याक्‍याँतिन बनै चिर चिर क़िद पुलुस्‍द याबाज़्‍याव, स़ोनो याखँ याकुइ सिउर, दूँदार यागराँज़्‍याव।
ACT 8:8 है जैद नो सहरल मिँर बनै ज़ यारेंज़्‍याव।
ACT 8:9 नो सहरल तोबो सिमोन यादोज़्‍याव बनै उमिन थासो धामी ब उलिज़्‍याव। नो बनै सघ्‍योःसिद ओमन्‍तर तन्‍तरए सामरियालाव मिँरालाई ङ़ादाकिन ज़ अचम्‍ब जैद ओरानैज़्‍याव।
ACT 8:10 घेप्‍पा ज़िम्‍ज़ा मिँराए नोलाई बनै घ्‍योःव थ·रैद, “आव ज़ ची ओल्‍यो, परमेस्‍वरए ओसक्ती ल्‍यो मिँ,” है यालिज़्‍याव।
ACT 8:11 है जैद कुधु बर्स पै ओमन्‍तर तन्‍तरए अचम्‍ब ओराजैवए, प़ाइँए ज़ यामानिज़्याव।
ACT 8:12 हाःत ज़ फिलिप यासहरल हुद येसु ख्रीसए उमिननी परमेस्‍वरए ओराज्‍यालाव चाव था ओरासथैक खेपा मेंमार कुधु ज़ ओपाँर भैंःद ऱील सछैंसिकेर।
ACT 8:13 ओल सिमोन धामी मनी परमेस्‍वरए ओपाँत उयुँ हुप्‍द सछैंसिके। ओसछैंसिउ छींनी फिलिपस आदा होदा सिप सिप लिद फिलिपए ओदोज़्‍याव अचम्‍बलाव सरेसर य़ेनर रँःद बनै ज़ अचम्‍ब ताद उलिज़्‍याव।
ACT 8:14 छींनी यरूसलेमल लिज़्‍याव येसुए ओसाचीराए ‘सामरियालाव मिँराए मनी परमेस्‍वरए ओपाँ भैंःद लेर दी’ लिन्‍या याथैवत पत्रुस स़ोनो यूहन्‍नानिलाई नदा यारापरींकेर।
ACT 8:15 नोनी नङ बाद नोरालाई छैंव पुरूस दैन्‍याए जूँनी परमेस्‍वरस पोंखारिद ऩिद याराएकिनी।
ACT 8:16 हाःपै छैंव पुरूस याक्‍याँत ओमाहुताव, नोर प्रभु येसुए उमिननी वाज़ सछैंसिद यालिज़्याव।
ACT 8:17 है जैद नोनी निकुइ याक्‍याँत नैद्याद निपोंखारिक छैंव पुरूस दैकेर।
ACT 8:18 नो सिमोन धामीए अइज़ निकुइ नैद निरायोनी ज़ नो पुरूस उहुज़्‍याव रँःद, होक ज़ ओपैसार हाइद,
ACT 8:19 “दे ङास़ेरनी, निताव सक्ती ङालाई ब याव ताके। ङा मनी मिँराए याक्‍याँत ङाकुइ नैद ङाराएक छैंव पुरूस ओदैरक,” है उलिक ते,
ACT 8:20 पत्रुसए, “नो नपैसा नँस ज़ ओम़ाक। नँ है नलिज़्‍याव मिताव परमेस्‍वरए ओअसिक ज़ खर्क पैसाए लँःद ओदैसिज़्‍याव?
ACT 8:21 नँ नयुँ परमेस्‍वरकिन तँदा ओतावए आव पाँत नजुँ काता ज़ दैन्‍या नमाले।
ACT 8:22 आव दोव नपैंज़्‍याव माचाव य़ेननी नयुँर त़ोद परमेस्‍वरलाई पोंखारिद माफी ऩिके, कसा नपाप क्‍याल्‍द माईंव।
ACT 8:23 माछैंव य़ेनत नयुँ मानैधुद पापल सुर्सिउ मिताव नलिज़्‍या,” है दोक्‍यो।
ACT 8:24 हाःत ज़ सिमोन बनै छे·द, “जिन ज़ परमेस्‍वरलाई पोंखारिद्याव ताके। आव है जिन्‍लिज़्‍याव मिताव काता ज़ ङाक्‍याँत ताताक,” है लिद बिन्‍ती दोक्‍यो।
ACT 8:25 नकिन पत्रुस स़ोनो यूहन्‍नानी नो सहरल परमेस्‍वरए ओपाँ बनै चावस थ·रैद पलास्‍द निरायोत, फरी नोनी ननी पुलुस्‍द सामरियालाव नाखार याल चाव था सथैए सथैए यरूसलेमदा ओल्‍द बाकिनी।
ACT 8:26 हाःत ज़ परमेस्‍वरए ओचाकर्‍या फिलिपए ल्‍योक सरैंःसिद, “नँ आनी बाद नो दखिनलाव यरूसलेमनी झरिद नाङग्‍या पात्‍या बनलाव घ्याँ गाजा सहरदा बाज़्याव येमदा बान्‍के,” है ओदोव प़ाइँना ज़,
ACT 8:27 फिलिप च्‍याँःसिद बाके। नो येमत ओबाज़्‍याक नक तोबो इथियोपिया देसलाव सिङारू मिँ ब नदा ज़ ओबाज़्‍याव। नो मिँ इथियोपियालाव माहारानी कन्‍दाकीए ओपैसा चलैज़्‍याव मन्‍त्री ओल्‍यो। नो यरूसलेमल बाद ध्‍यान दाद,
ACT 8:28 उझ़िमदा ओल्‍द ओबाज़्‍याव। नो मिँ उगद्दील च़ुसिद यसैया अगमबक्ताए ओसरो पोस्‍तोको उप़रिज़्‍याव।
ACT 8:29 हाःत ज़ परमेस्‍वरए उपुरूसए फिलिपलाई, “नँ नो गद्दीलाई दैनाद नोस बान्‍के,” है ओदोक ते,
ACT 8:30 फिलिपए नोलाई धोंःनाद ओदैनाक नो मन्‍त्रीए यसैया अगमबक्ताए ओसरो पोस्‍तोको उप़रिज़्‍याव थैद, “नो नप़रिज़्‍यावए ओअर्थ नमाबुझिज़्‍या?” है ओदोक ते,
ACT 8:31 नो मन्‍त्रीए, “ङालाई पैन्‍या मिँ माल्‍यो। कै जैद ङाबुझिधुरिज़्‍याव?” है दाद, फिलिपलाई ओलस च़ुसिउ परींक्‍यो।
ACT 8:32 नो धर्मसास्‍त्रलाव उप़रिज़्‍याव खन्‍द आव ज़ ओल्‍यो, “पल्‍ना यालाँज़्‍याव बेधा माँःती नोलाई ब लाँकेर। याएन्‍ज़्‍याव पाथा ओमाक़िज़्‍याव मिताव नो मनी घाइ ज़ मालिके।
ACT 8:33 बिनु न्‍याय ज़ बीज्‍यात जैकेर। ओललाई ज़ यासफ्या·वए, ओथोर कातानी ची यारैंःरिज़्‍याव?”
ACT 8:34 नो मन्‍त्रीए फिलिपलाई, “ङालाई है दाँके, अगमबक्ताए आव पाँर ओल उजूँनी ओपाँव सैं छुतए उजूँनी ओपाँव?” है ओदोक ते,
ACT 8:35 फिलिपए, “आव भरी येसुए ओक्‍याँत ताव पाँर ज़,” लिद नो धर्मसास्‍त्रलाव खन्‍दनी ज़ येसुए उजूँनी चाव था पलास्‍दिक्‍यो।
ACT 8:36 येमत निबाज़्‍याक तोबो ऱी लिज़्‍याव पोक निहुवत नो मन्‍त्रीए, “दे आक ऱी लिज़्‍या, ङा नल सछैंसिन्‍या माताज़्‍या?” है ओदोक ते,
ACT 8:37 [फिलिपए, “नँ येसुए ओपाँत नयुँ उहुप्‍किन, ताए ज़,” है दोक्‍यो। हाःत ज़ नो मन्‍त्रीए, “येसु ख्रीस परमेस्‍वरए साचो ओज़ा ज़ लिद ङायुँ हुबो ज़ लिज़्‍या,” है दाद,]
ACT 8:38 नो गद्दी चलैज़्‍यावलाई अदैव परींद नोनी ऩेब्‍लो ऱील बाद फिलिपए मन्‍त्रीलाई होक ज़ सछैंक्‍यो।
ACT 8:39 नोनी ऱीनी निपुलुसो प़ाइँना परमेस्‍वरए उपुरूसए फिलिपलाई क्‍योःद छुतदा ज़ लाँक्‍यो। मन्‍त्री ते बनै रेंए रेंए उझ़िमदा बाद फिलिपस फरी मादैसिकिनी।
ACT 8:40 नकिन फिलिपए ओल ओक्‍याँलाई अस्दोद सहरल दैद नजीदाङाव नाखार नाखार भरिल बाद कैसरिया सहरक पै चाव था यासथैक्‍यो।
ACT 9:1 साऊलए हाःपै प्रभुए ओपाँत लिज़्यावरालाई यामिन सम़ैद्यान्‍याए जूँनी उसुनी बनै फों फों ओमोज़्‍याव। है जैद प्रधान पुजारीए ल्‍योक बाद,
ACT 9:2 दमस्‍कस सहरलाव धर्मसास्‍त्र झ़िमलाव घेप्‍पारालाई सतैंद्यान्‍याए जूँनी पुर्जी कागत ऩिद ओनैज़्याव। नोए येसुए ओपाँत बाज़्‍याव खेपा मेंमारालाई साप्‍द क्‍योःद, यरूसलेमदा लाँन्‍या ओपैंज़्याव।
ACT 9:3 येमत ओबाज़्‍याक दमस्‍कस केस्‍न्‍यावाक उमँःजानी बनै मी झीःन्‍या ज़गै नमतिन म्‍याल्‍याकनी मिलिक हुके।
ACT 9:4 साऊल होक ज़ धलिद कातानी तोबो गाए, “ए साऊल, ए साऊल, नँ काराव ङाखिरी नपसिज़्‍याव?” है लिद ओपाँज़्‍याव थैक्यो।
ACT 9:5 साऊलए फरी, “नँ सु प्रभु?” है ओदोक ते, नो गाए, “ङा नो ङाखिरी नपसिज़्‍याव येसु ज़।
ACT 9:6 नँ सोद सहरल बान्‍केदा, नङ ज़ नँ दान्‍या य़ेन भरी थैन्‍या नले,” है दोक्‍यो।
ACT 9:7 साऊलस बाज़्‍याव ओनैंराए ते नो गा थैज़्‍यावत ब सुलाई ज़ यामारँःवए नोर बनै तोतास्‍केर।
ACT 9:8 हाःत ज़ साऊल सोद च्‍याँःसिद आदा होदा ओभाल्‍सिक उमी ज़ मारैंःके। है जैद ओनैंराए उकुइनी दोरैद दमस्‍कसल लाँकेर।
ACT 9:9 स़ोंला भरी उमी मारैंःद, ज़्‍याव ब माज़्‍युक्‍यो, ऱी ब माओक्‍यो।
ACT 9:10 दमस्‍कसल येसुए ओपाँत बाज़्‍याव तोबो हननिया यादोज़्‍याव उलिज़्‍याव। नोलाई दर्सनल परमेस्‍वरए, “अ हननिया,” है ओदोव ओथैक, “काराव प्रभु?” है दोक्‍यो।
ACT 9:11 परमेस्‍वरए फरी, “नँ सोद बजारलाव दाँव येम यादोज़्‍याव दोहाल बाद यहूदाए उझ़िमल पसिद, ‘तार्ससलाव साऊल काङ्क उलिज़्‍याव?’ है यादोनाके। नो साऊलए भर्ज़ा ज़ पोंखारिज़्‍याव।
ACT 9:12 होए मनी दर्सनल नँलाई ज़ रँःनिज़्‍याव। नँ ओल्‍योक बाद, नकुइ ओक्‍याँत नैद उमी सरैंःद नएरिज़्‍याव ब सतैंद ङाएके,” है दोक्‍यो।
ACT 9:13 हाःत ज़ हननियाए, “ओहो प्रभु! आव है नलिज़्‍याव मिँए उजूँनी कुधु ज़ थैद ङानै। नोए यरूसलेमलाव छैंव नमींरालाई बनै ज़ दुख याएज़्‍याव दी।
ACT 9:14 झन आल मनी मुख्या पुजारीराए ल्‍योनी नमिन हाइज़्‍याव भरिरालाई क्‍योःन्‍या हक ब रैद नैव दी,” है ओदोक ते,
ACT 9:15 परमेस्‍वरए, “नँ घबानी, नो मिँलाई ङाय़ेनत छाँतिद ङानै। नोए ङामिन छुत जातलावर, इस्राएलीर स़ोनो राजाराए ल्‍योदा सथैन्‍या ले।
ACT 9:16 नोए ङामिनताव दैन्‍या दुख भरी नोलाई ङा ज़ सतैंद्यान्‍या ङाले,” है दोक्‍यो।
ACT 9:17 है जैद हननिया ननी पुलुस्‍द परमेस्‍वरए ओपैव झ़िमक बाद, साऊलए ओक्‍याँत उकुइ नैद, “अ भाइ साऊल, नँ आदा येमत नहुज़्‍याकाव नङ़ाक सरैंःसिउ प्रभु येसुए ङालाई नल्‍योदा नमी सरैंःद्यान्‍याए जूँनी स़ोनो छैंव पुरूसए घब्‍याल्‍क लिद उपरींनाव,” है ओदोव प़ाइँना ज़,
ACT 9:18 साऊलए उमीनी सींका मिताव कातार तेद उमी रैंःके। हाःत ज़ ननी च्‍याँःसिद ऱील सछैंसिनाद,
ACT 9:19 ज़्‍यावर ज़्‍याद ओर्सार पुलुस्‍के। साऊल येसुए ओपाँत लिज़्‍यावरास जाँवा पै दमस्‍कसल लिद,
ACT 9:20 धर्मसास्‍त्र झ़िम झ़िमल बाद, “येसु परमेस्‍वरए ओज़ा ज़,” लिद ओरासथैज़्‍याव।
ACT 9:21 ओपाँ थैज़्‍याव भरी बनै अचम्‍ब ताद, “आव ते नो यरूसलेमल येसुए उमिनत लिज़्‍यावरालाई खेमो पैंज़्‍याव मिँ माःक रो? आवए ते आल मनी नितावरालाई क्‍योःद, मुख्या पुजारीराए याकचरील स़ेले स़ेले लाँन्‍याए जूँनी हुव ची सानी,” है लिकेर।
ACT 9:22 खाली साऊलए ओसक्ती झन ज़ घ्‍योःनाद, “येसु परमेस्‍वरए ओज़ा ख्रीस ज़,” लिद थ·रैद ओरायोनी दमस्‍कसलाव यहूदीराए यायुँ बनै आँचानी पाँचा जैद याएक्‍यो।
ACT 9:23 छींनी सर्बा कुधु दिन ओतावत नलाव यहूदीराए साऊललाई सैःन्‍या बुद्धी कलैकेर।
ACT 9:24 खाली नो पाँ ओल साऊलए मनी थैद ओनैज़्‍याव। है जैद नोराए, ‘जुनी ब सैःन्‍या ज़’ लिद नो सहरनी पुलुस्‍न्‍या येम भरिल पाल्‍यार नैद लाकनी रील वैंसिद यालिज़्‍याव।
ACT 9:25 खाली ओनैंराए तछा रील साऊललाई भेल झाःद नो सहर घिरिसिउ भार्नातिन झरैकेर।
ACT 9:26 साऊल दमस्‍कसनी पुलुस्‍द यरूसलेमल बाद येसुए ओपाँत बाज़्‍यावरास तखेप सरेस्‍सिउ ओपैंज़्‍याव। खाली नोलाई यायुँ माहुप्द, “आव ते येसुए ओपाँत साचो लिज़्याव माःक सानी,” है लिद छे·केर।
ACT 9:27 बारनाबासए वाज़ साऊललाई पतिद येसुए ओसाचीराए ल्‍योक लाँद, “आव मिँ दमस्‍कसदा ओबाज़्‍याक प्रभु येसु ओल्‍योक सरैंःसिद, ओलस ज़ पाँके दी। दमस्‍कसल मनी येसुए उमिन माछे·द ज़ यासथैक्‍यो,” है यादोक्‍यो।
ACT 9:28 है जैद साऊल नोरास यरूसलेम सहरल आदा होदा लिद, नल ब प्रभुए उमिन माछे·द ज़ यासथैक्‍यो।
ACT 9:29 खाली नलाव ग्रीक खामनी पाँज़्‍याव यहूदीरास याखर्लेसिक ते नोराए झन साऊललाई सैःन्‍या निउँ याखिम्‍ज़्याव।
ACT 9:30 ओनैंराए नो पाँ थैद साऊललाई ननी पले·द कैसरिया सहरक पै सारैद, नकिन उझ़िम तार्सस सहरदा परींकेर।
ACT 9:31 हाः बेलाक यहूदिया, गालील स़ोनो सामरिया खन्‍दलाव मन्‍दली जाँवा पै रान छानस लिन्‍या ताके। येसुए ओपाँत बाज़्यावर परमेस्‍वरलाई यायुँल चेतैद, छैंव पुरूसनी यायुँर झेंःद, झन ज़ याबा·नाज़्‍याव।
ACT 9:32 पत्रुस नजीदा आदा होदा उलिज़्‍याक लुद्दा नाखारल परमेस्‍वरए उमिनत लिज़्‍यावरास दैसिनाके।
ACT 9:33 नल तोबो एनियास यादोज़्‍याव उखँ उकुइ सिउ, आथ बर्स भरी घ्याँसिद लिज़्‍याव मिँलाई दैक्यो।
ACT 9:34 पत्रुसए नोलाई रँःद, “अ एनियास, येसु ख्रीसए नँलाई सगराँनिज़्‍याव। नँ सोद नतैंर यारूल्‍के,” है ओदोव प़ाइँना ज़, नो मिँ थर च्‍याँःसिके।
ACT 9:35 नकाव लुद्दा स़ोनो सारोन नाखारल लिज़्‍यावराए निताव रँःद यायुँ हुप्‍द प्रभुए ओपाँत हुकेर।
ACT 9:36 फरी योप्‍पा सहरल तोबो तबीता यादोज़्‍याव परमेस्‍वरए ओपाँताव मेंमा ओल्‍यो। ग्रीक खामनी होए उमिन दोरकास है यादोज़्‍याव। नो मेंमा बनै उयुँ गराँद प़ाइँलाई सघैव ज़ ओरानैज़्‍याव।
ACT 9:37 तछा नो मेंमा ओजोरो हुद सिके। मिँराए ओमोरोलाई हुर्द ओतर्ताव ताललाव कुन्‍तील नैकेर।
ACT 9:38 हाः बेलाक पै पत्रुस योप्‍पाकिन नजिकक लिज़्‍याव लुद्दाल उलिज़्‍याव सैंद नलाव यायुँ हुबोराए ऩेब्‍लो मिँनिलाई, “जिन पत्रुसलाई, ‘हतप्‍त ज़ हुन्‍साँ दी’ है दोचिन,” है लिद क़िनाव यारापरींकेर।
ACT 9:39 है जैद पत्रुसए नो पाँर थैद नोनिस बाके। योप्‍पाल याकेसो प़ाइँना पत्रुसलाई नो सिउ मेंमालाई यानैज़्‍याव ओतर्ताव कुन्‍तील लाँकेर। नल नो नाखारलाव राँदी मेंमार दोरकासए जैद ओरायो क्‍वार सतैंद याघर्ज़्‍याव।
ACT 9:40 पत्रुसए नोरालाई लाँःदा परींद नो सिउए ओलापक उघूँदानी तिकिसिद परमेस्‍वरलाई पोंखारिद, सिउए ल्‍योदा भाल्‍सिद, “अ तबीता, सोनिके,” है ओदोव प़ाइँना नो मेंमा सैंसिद भाल्‍सिके। पत्रुसलाई उरँःव प़ाइँना सोद च़ुसिके।
ACT 9:41 हाःत ज़ पत्रुसए नोलाई उकुइनी क्‍योःद सच्‍याँद, नो लाँःक लिज़्‍याव परमेस्‍वरए उमिनताव राँदी मेंमारालाई खुल्‍द सिउनी बाँचिउलाई सतैंद याएक्‍यो।
ACT 9:42 नो पाँ योप्‍पा भरिल प़ाइँदा ज़ थास्‍द कुधुए प्रभुलाई यायुँ हुप्‍के।
ACT 9:43 नो भरी ओतावत पत्रुस कुधु दिन पै योप्‍पाल तोबो स्‍यालोए य़ेन दाज़्‍याव सिमोन यादोज़्‍यावए उझ़िमक ज़ लिके।
ACT 10:1 हाः बेलाक कैसरिया सहरल तोबो कर्नेलियस यादोज़्‍याव मिँ इतालिया फौजीलाव कप्‍तान उलिज़्‍याव।
ACT 10:2 नो मिँ बनै धर्मी ओल्‍यो, उझ़िमलावरास परमेस्‍वरए ओमान नैज़्‍याव मिँ ओल्‍यो। उयुँ गराँव ओतावए गरीबरालाई ज़्‍यावर पैसार ब याव ज़ उलिज़्‍याव, परमेस्‍वरलाई ब पोंखारिउ ज़ ओनैज़्‍याव।
ACT 10:3 तछा लाकाव तीन बजेवाक कर्नेलियस झजल्‍किद परमेस्‍वरए ओचाकर्‍या ओल्‍योदा उहुज़्‍याव रँःक्‍यो। नो चाकर्‍याए कर्नेलियसए उमिन ओहाइक ते,
ACT 10:4 कर्नेलियस बनै छे·द ओल्‍योदा लँ लँ चिऊद, “काराव प्रभु?” है दोक्‍यो। हाःत ज़ नो चाकर्‍याए, “परमेस्‍वरलाई नपोंखारिज़्‍याव स़ोनो गरीबराए ल्‍योदा नयुँ य़ाल्‍द नदोज़्‍याव य़ेनर परमेस्‍वरए ओल्‍योक केस्‍के।
ACT 10:5 नँ तोबो ऩेब्‍लो नमींरालाई योप्‍पाल तोबो सिमोन पत्रुस यादोज़्‍यावलाई च़ानाव यापरींके।
ACT 10:6 नो मिँ समुन्‍द्र छ्योकाव स्‍यालोए य़ेन दाज़्‍याव सिमोनए उझ़िमक लिज़्‍या,” है दोक्‍यो।
ACT 10:7 नो चाकर्‍या ओबाव छींनी, कर्नेलियसए ओय़ेन दाज़्‍याव भरिरानी ओसेवा दोज़्याव तोबो धर्मी उसिपाईं स़ोनो ऩेब्‍लो ओनोकोरनिलाई खुल्‍द,
ACT 10:8 नो चाकर्‍याए है ओदोव पाँ भरी नोरालाई है दाद योप्‍पादा यापरींक्‍यो।
ACT 10:9 हो पराःती लाकाव बाह्र बजेवाक नो स़ोम्‍लो योप्‍पाल याकेस्‍नाव बेलाक ज़ पत्रुस थालात बाद परमेस्‍वरलाई ओपोंखारिज़्‍याव।
ACT 10:10 पत्रुस बनै करेद काँ ज़्‍युव ओपैंज़्‍याव। खाली काँ ओमाताताव, भर याजैज़्‍याव। हाःत ज़ पत्रुस झजल्‍किद,
ACT 10:11 नम फैसिउ रँःक्‍यो। नमतिन तोबो घ्‍योःव फेरवा स्‍यासो चार चोंच्‍यानी क्‍योःसिउ उझरिहुज़्‍याव रँःक्‍यो।
ACT 10:12 नो फेरवाल जै जन्‍तुर, ऱूइज़ा वान्‍ज़ार स़ोनो बाज़ा बिज़ार यालिज़्‍याव।
ACT 10:13 हाःत ज़ तोबो गाए, “अ पत्रुस, नँ सोद आवरालाई सैःद याकैके,” है ओदोज़्याव थैद,
ACT 10:14 पत्रुसए, “माता प्रभु, निताव कैन्‍या माताज़्‍यावर खर्क ज़ ङामाकैए,” है दोक्‍यो।
ACT 10:15 नो गा फरी ब हुद, “जोलाई परमेस्‍वरए चोखो थ·रैद नैव, होलाई नँ माछैंव थ·रैन्‍या माताए,” है दोक्‍यो।
ACT 10:16 निताव स़ोंखेप ओतावत नो फेरवा नमदा छींसिद मारैंःके।
ACT 10:17 पत्रुस बनै अचम्‍ब ताद, “आव ङारँःवए ओअर्थ काता ओताव?” लिद उयुँल ओखामिज़्याक ज़ कर्नेलियसए ओरापरींव मिँराए, “सिमोनए उझ़िम काङ्क उलिज़्‍याव?” लिद पैसी पैसी साँबिलाक हुकेर।
ACT 10:18 साँबिलाक च्‍याँःसिद, “सिमोन पत्रुस यादोज़्‍याव आल मालिज़्‍या?” है लिद क़िकेर।
ACT 10:19 हाःपै पत्रुस थालात च़ुसिद दर्सनलाव पाँ ओखामिज़्‍याव। हाःत ज़ परमेस्‍वरए उपुरूसए, “स़ोम्‍लो मिँराए नँलाई खिम्‍निज़्‍यार।
ACT 10:20 नँ च्‍याँःसिद मेल झरिद नयुँ धुक्‍क जैद नोरास बान्‍के। नोरालाई ङा ज़ ङारापरींव,” है दोक्‍यो।
ACT 10:21 है जैद पत्रुस मेल झरिद नोरास दैसिद, “जेखिम्‍नाज़्‍याव मिँ ङा ज़, काताए जूँनी जेहुव?” है ओरादोक ते,
ACT 10:22 नोराए, “तोबो कर्नेलियस यादोज़्‍याव रोमी कप्‍तानए गेलाई उपरींसिउ। नो मिँ बनै धर्मी, परमेस्‍वरए ओमान नैद्याज़्‍याव मिँ ज़, यहूदी भरिराए बनै चाव थ·रैज़्‍यार। नोलाई परमेस्‍वरए ओचाकर्‍याए, ‘योप्‍पाल लिज़्‍याव पत्रुसलाई नझ़िमक रैव यापरींके। नो मिँए नँलाई तोबो पाँ सथैनिरिज़्‍याव’ है दोक्‍यो दी,” है यादोक ते,
ACT 10:23 पत्रुसए नोरालाई उलिज़्याव झ़िमक चावस नैद नल ज़ याबासैक्‍यो। हो पराःती येसुए ओपाँत लिज़्याव योप्‍पालाव ओनैंरालाई तोबो ऩेब्‍लो लाँद नो खुल्‍ना हुवरास बाके।
ACT 10:24 हो पराःती पत्रुस ओनैंरास कैसरिया सहरल केस्‍केर। ओल कर्नेलियसए ते ओनैंर स़ोनो ओक्‍याँदाङावरालाई उझ़िमक दुप्‍द पत्रुसलाई कींद यानैज़्‍याव।
ACT 10:25 पत्रुस हुद झ़िमल उपसिज़्याक कर्नेलियस ओल्‍योक दैसिनाद उखँत फुलुप्‍सिद धो दोक्‍यो।
ACT 10:26 पत्रुसए नोलाई सोचोइद, “ङालाई धो दान्‍या माःक, च्‍याँःसिन्‍के। ङा मनी नँ स्‍यासो मिँ ज़ ची,” है दाद,
ACT 10:27 पाँए पाँए झ़िमल निपसिक नल मिँर बनै कुधु दुप्‍सिद यालिज़्‍याव रँःद,
ACT 10:28 नोरालाई, “गे यहूदीर जे मिताव छुत जातलावरास सिप लिन्‍या ब माताए, जेझ़िमल पसिन्‍या ब माताए लिन्‍या जे ज़ जेसैंज़्‍या। हितावत ब परमेस्‍वरए ङालाई, ‘सु मिँ ज़ माछैंव माले, अछुत्‍या ब माले’ है लिन्‍या सतैंद्याँक्‍यो।
ACT 10:29 है जैद ङालाई जेखुल्‍नाक ‘माता’ है मालिद ज़ ङाहुके। अब काताए जूँनी जेखुल्‍नाव, है दाँचिके,” है ओरादोक ते,
ACT 10:30 कर्नेलियसए, “चार दिन ङ़ादा लाकाव तीन बजेवाक ङाझ़िमक परमेस्‍वरलाई ङापोंखारिज़्‍याक तक तकौ क्‍वा क्‍वाइसिउ परमेस्‍वरए ओचाकर्‍या ङाङ़ाक सरैंःसिहुद,
ACT 10:31 ङालाई, ‘अ कर्नेलियस, परमेस्‍वरलाई नपोंखारिज़्‍याव स़ोनो गरीबराए ल्‍योदा नयुँ य़ाल्‍द नदोज़्‍याव य़ेन परमेस्‍वरए रँःक्‍यो।
ACT 10:32 नँ योप्‍पाल लिज़्‍याव सिमोन पत्रुस यादोज़्‍यावलाई नमींरालाई क़िनाव यापरींके। नो मिँ समुन्‍द्र छ्योकाव स्‍यालोए य़ेन दाज़्‍याव सिमोनए उझ़िमक लिज़्‍या,’ है दाँक्‍यो।
ACT 10:33 है जैद ङा नँलाई हतप्‍त ज़ ङाथानिके। नँ ब नयुँ नाद हुद नयासिके। गे परमेस्‍वरए ओपैनिउ पाँर थैन्‍याए जूँनी आव ङानैंरास दुप्‍सिद गेले,” है दोक्‍यो।
ACT 10:34 हाःत ज़ पत्रुसए अइ लिद यासथैक्‍यो, “साचो ज़ ओल्‍यो ङानैं ङामेंर, परमेस्‍वरए जात रँःद ओमादोज़्‍याव ओल्‍यो, ङा मनी आछिमकिन ज़ ङासैंके।
ACT 10:35 जो जातल तादी ब, जो मिँए परमेस्‍वरए ओमान नैज़्‍याव, चाव य़ेन ब दोज़्‍याव, होलाई ज़ परमेस्‍वरए चाव रँःज़्‍याव।
ACT 10:36 गे उमीं इस्राएलीरालाई ओज़ा येसु ख्रीसनी सखैन्‍या येम ब सतैंद्यासिक्‍यो — नो प़ाइँ मिँराए गेप्रभु ज़ लिज़्‍या।
ACT 10:37 ऱील सछैंज़्‍याव यूहन्‍नाए ओय़ेन उतुपैवकिन गालील खन्‍दनी सुरू ताद, यहूदिया खन्‍द भरिल रा·सिनाव पाँर जे मनी थैद जेनैज़्‍याखेहो।
ACT 10:38 नो पाँर आव ज़ — परमेस्‍वरए नासरतलाव येसुए ओक्‍याँत छैंव पुरूस ब झाःद्याद ओसक्तीर ब एक्‍यो। परमेस्‍वर ओलस ज़ उलिज़्‍यावए येसु आदा होदा बाद चाव य़ेनर दाद याजोरो हुवर स़ोनो माचाव पुरूसए क्‍योःद ओरानैज़्यावरालाई ब ओरासगराँज़्‍याव।
ACT 10:39 गे उसिसर फरी नो यरूसलेमल स़ोनो यहूदीराए यादेसलाव ओदोव य़ेनरात ओसाचीर ताद गेले। नोलाई झन तछा क्रुसत तङ्गैद सैःकेर।
ACT 10:40 हैदी ब उसिउ स़ोंलात परमेस्‍वरए नोलाई सोचोइद गेल्‍योक सरैंःद्यासिक्‍यो।
ACT 10:41 सरैंःद ओरायो प़ाइँ मिँरालाई माःक, परमेस्‍वरए गे ङ़ादाकिनकाव रूजिद ओनैसिउ ओसाचीरालाई वाज़ ची। सैंसिद ओसोव छींनी गेस सिप ज़ ज़्‍युक्‍यो, सिप ज़ ओक्‍यो।
ACT 10:42 गेलाई ओसाचीर जैद, ‘जे प़ाइँ मिँरालाई ङापाँ सथैद, ‘सिउ मासिउरालाई यान्‍याय फाल्‍न्‍या ओल परमेस्‍वरए ज़ ङा ओज़ालाई जैद नैनाव’ लिद यारासथैनाच्‍यो,’ लिद गेलाई अर्थैसिक्‍यो।
ACT 10:43 अगमबक्ता भरिराए मनी नो हुरिज़्‍याव येसुए उजूँनी ज़ पाँकेर। नोराए यापाँल मनी, ‘जोए नोलाई उयुँ हुप्‍ज़्‍या, हो नोए उमिननी ज़ ओपापर क्‍याल्‍सिद परमेस्‍वरस खैरिज़्या,’ है लिद लेर।”
ACT 10:44 पत्रुस आव पाँर ओपाँज़्‍याक ज़ नो ओपाँ थैज़्‍यावराए याक्‍याँत छैंव पुरूस हुके।
ACT 10:45 नो पत्रुसस हुव येसुए ओपाँत बाज़्‍याव यहूदीराए, छुत जातलाव मिँराए याक्‍याँत मनी छैंव पुरूस उहुव रँःद,
ACT 10:46 “नोराए ते छुत छुत खामनी पाँद, परमेस्‍वरए उमिन ची सघ्‍योःज़्यार!” है लिद अचम्‍ब ताकेर। हाःत ज़ पत्रुसए ओनैंरालाई,
ACT 10:47 “आवरालाई गे काराव ऱील सछैंसिन्‍या भैंःद मायान्‍या? आवर मनी गे मिताव छैंव पुरूस दैवर ज़ लिज़्‍यार सानी,” है दाद,
ACT 10:48 येसु ख्रीसए उमिननी ऱील सछैंसिउ यापरींक्‍यो। नकिन कर्नेलियस ओनैंरास, “गेस जाँवा पै ल्‍यो ताके,” है यारादोक ते, नोर जाँवा पै लिकेर।
ACT 11:1 छींनी येसुए ओसाचीर स़ोनो यहूदिया खन्‍दलाव येसुए ओपाँत बाज़्‍यावराए, ‘छुत जातलावर मनी परमेस्‍वरए ओपाँत हुकेर दी’ लिन्‍या थैकेर।
ACT 11:2 है जैद पत्रुस यरूसलेमल ओल्‍द ओबाक नलाव येसुए ओपाँत हुव यहूदीराए ओदोव य़ेनर माभैंःद,
ACT 11:3 “नँ काराव छुत जातलावराए ल्‍योक बाद नोरास सिप नज़्‍यु?” है यादोक ते,
ACT 11:4 पत्रुसए नोराए यापाँए ओअर्थ ओजरानी ज़ अइ लिद पलास्‍द याएक्‍यो,
ACT 11:5 “ङा योप्‍पाल ङालिज़्‍याक तछा परमेस्‍वरलाई ङापोंखारिज़्याक, झजल्‍किद तोबो फेरवा स्‍यासो चार चोंच्‍यानी क्‍योःसिउ, नमतिन ङाल्‍योक उझरिहुज़्‍याव ङारँःके।
ACT 11:6 नोलाई लँ लँ चिऊद ङानैज़्‍याक नल जै जन्‍तुर, ऱूइज़ा वान्‍ज़ार स़ोनो स्‍यार बाज़ार ङारारँःके।
ACT 11:7 हाःत ज़ कातानी तोबो गाए, ‘अ पत्रुस, नँ सोद आवरालाई सैःद याकैके,’ है ओदाँज़्‍याव ङाथैके।
ACT 11:8 ङा फरी, ‘माता प्रभु, निताव कैन्‍या माताज़्‍यावर ङासेत खर्क ज़ ङामाझाःए,’ है ङादोक ते,
ACT 11:9 नो गा फरी ब नमतिन हुद, ‘जोलाई परमेस्‍वरए चोखो थ·रैद नैव, होलाई नँ माछैंव थ·रैन्‍या माताए,’ है दाँक्‍यो।
ACT 11:10 निताव पाँर स़ोंखेप ओतावत नो फेरवा नमदा स़ेल्‍सिद मारैंःके।
ACT 11:11 “हाःत ज़ ङालिज़्‍याव झ़िम ङ़ाकाव साँबिलाक स़ोम्‍लो मिँर हुद यालिज़्‍याव। नोर ङाल्‍योक कैसरियानी परींसिउर याल्‍यो।
ACT 11:12 परमेस्‍वरए उपुरूसए फरी, ‘आवरास माअन्‍कनिद घबानी,’ है दाँक्‍यो। है जैद आव ङास लिज़्‍याव छ जना ङानैंर लाँद नो परींज़्‍याव मिँए उझ़िमल गेपसिके।
ACT 11:13 हो प़ाइँना ज़ ङ़ादा उरँःव भरी गेलाई है दासिक्‍यो — नो मिँए उझ़िमल परमेस्‍वरए ओचाकर्‍या च्‍याँःसिद उलिज़्‍याव रँःक्‍यो दी। नो चाकर्‍याए फरी, ‘योप्‍पाल लिज़्‍याव सिमोन पत्रुसलाई च़ानाव यापरींके।
ACT 11:14 नो सिमोन आल हुद नझ़िमलावरास जेलाई अजम्‍बरी जुनी दैन्‍या पाँर सथैचिरिज़्‍याव,’ है दोक्‍यो दी।
ACT 11:15 “है जैद ङा नोरालाई परमेस्‍वरए ओपाँ ङारासथैज़्‍याक ज़ किताव ङ़ादा छैंव पुरूस गे गेक्‍याँत उहुव, हिताव ज़ नोराए याक्‍याँत मनी हुके।
ACT 11:16 हाःत ज़ गेप्रभु येसुए ङ़ादा गे उसिसरालाई है ओदासिउ पाँर य़ाका ङादोके — ‘यूहन्‍नाए किताव जेलाई ऱीनी ओसछैंचिउ, हिताव ज़ छींनी तछा छैंव पुरूसनी जेछैंरिज़्‍या।’
ACT 11:17 है जैद परमेस्‍वरए गेलाई गेप्रभु येसु ख्रीसलाई गेयुँ सुहुप्‍दकाव ओयासिउ असिकर नोरालाई मनी ओरायोए ङा परमेस्‍वरए ओय़ेनलाई कै जैद ङावैंधुरिज़्‍याव?” है लिद पत्रुसए है ओरादोक ते,
ACT 11:18 नोर सुए ज़ काता ज़ मापाँधुद परमेस्‍वरए उमिन सघ्योःद्याद, “परमेस्‍वरए छुत जातलाव मिँरालाई मनी यायुँ याफर्कैवनी अजम्‍बरी जुनी दैन्‍या असिक ओरायो ओल्‍यो,” है लिकेर।
ACT 11:19 स्‍तिफनसए ओपालाकिनकाव यरूसलेमलाव येसुए ओपाँत हुवरालाई याखिरी यापसिक ख्वार फोनिके खन्‍ददा, ख्वार साइप्रस तापुदा, ख्वार एन्‍तिओखिया सहरदा धोंःद खासिद लिनाकेर। नोराए नङ मनी येसुए ओपाँ यारासथैक यहूदीरालाई वाज़ यारासथैज़्‍याव।
ACT 11:20 खाली नोराए याखार्नी साइप्रस तापु स़ोनो कुरेनी देसनी हुवर तोबो ऩेब्‍लोए एन्‍तिओखियाल बाद छुत जातलाव मिँरालाई मनी प्रभु येसुए ओपाँ यारासथैकेर।
ACT 11:21 परमेस्‍वर नोरास उलिज़्‍यावए बनै कुधुए यायुँ हुप्‍द प्रभु येसुए ओपाँत हुकेर।
ACT 11:22 नो पाँर छींनी यरूसलेमलाव मन्‍दलील मनी थास्‍द बारनाबासलाई एन्‍तिओखियादा परींकेर।
ACT 11:23 बारनाबास होङ ओकेस्‍क परमेस्‍वरए नोराए याखार्ल ओदोव असिकर रँःद बनै खुसी ताके। नोरालाई, “प्रभुए ल्‍योदा जेयुँ थ·रैद ओसत ताऱास्‍च्‍यो,” लिद यायुँ सझेंःद याएक्‍यो।
ACT 11:24 बारनाबास धर्मी, उयुँ हुबो, छैंव पुरूसए ब्यालो मिँ ओल्‍यो। नोए ओपाँ थैद मिँर सर्बा माहोल्‍या ज़ येसुए ओपाँत चा·सिहुकेर।
ACT 11:25 नकिन जाँवाक बारनाबास तार्सस सहरल बाद साऊललाई खिम्‍नाक्‍यो।
ACT 11:26 ओदैवत नोलाई मनी एन्‍तिओखियाल रैक्‍यो। नोनी ऩेब्‍लो बर्सदिन पै नल ज़ लिद मन्‍दलीलाव मिँरास खैद परमेस्‍वरए ओयेम कुधुलाई यारापैकिनी। नो एन्‍तिओखियाल येसुए ओपाँत बाज़्‍यावरालाई हाःकिन यामिन ख्रीस्त्‍यान जैद याराएकेर।
ACT 11:27 हाः बेलाक यरूसलेमनी अगमबक्तार तोबो ऩेब्‍लो एन्‍तिओखियाल हुकेर।
ACT 11:28 नोरानी तोबो अगाबस यादोज़्‍यावए छैंव पुरूसनी, “संसार भरिल बनै घ्‍योःव अनिकाल हुरिज़्‍या,” है लिद ङ़ादा ज़ पाँके। थिक है ओल्‍यो मिताव ज़ नो पाँ रोमी माहाराजा क्‍लौदियसए ओपालाक यो·के।
ACT 11:29 है जैद एन्‍तिओखियालाव यायुँ हुबोराए यहूदिया खन्‍दल लिज़्‍याव यादाज्‍यु भाइरालाई सघैन्‍या युँ दाद याधुवा भरी सु सु यापैसार स्‍यो·द,
ACT 11:30 नो पैसा बारनाबास स़ोनो साऊलनी निकुइत यरूसलेम मन्‍दलीलाव स़ेररालाई परींद याराएकेर।
ACT 12:1 हाः बेलाक हेरोद राजाए मन्‍दलीलाव ख्वा ख्वारालाई क्‍योःद बनै दुख याएक्‍यो।
ACT 12:2 यूहन्‍नाए ओदाज्‍यु याकूबलाई ते झन खोर्च्‍योए पल्‍द सैःक्‍यो।
ACT 12:3 यहूदीर ननी बनै खुसी याताव रँःद हेरोदए पत्रुसलाई मनी क्‍योःव यापरींक्‍यो। नो बेलाक माँदा भरेस ज़्‍यान्‍या पर्ब ताद उलिज़्‍याव।
ACT 12:4 पत्रुसलाई क्‍योःद, झ्यालखानाल झाःद सोह्र जना सिपाईंराए याजिम्‍बाल नैद, ‘पर्ब ओखेमोत ची जनताराए याङ़ाक ङासतैंया ब’ है उलिज़्‍याव।
ACT 12:5 पत्रुस झ्यालखानाल उलिज़्‍याक मन्‍दलीए नोए उजूँनी परमेस्‍वरलाई बनै पोंखारिउ ज़ यानैज़्‍याव।
ACT 12:6 हेरोद राजाए जनताराए ङ़ाक पत्रुसलाई सतैंव ओपैंज़्‍याव ओङ़ालाव छ्याम रील, पत्रुस झ्‍यालखाना जींल ऩेब्‍लो सिपाईंनी निखार्ल साँगलए किसिउ स्‍याँद उलिज़्‍याव। य़ामक मनी पाल्‍यार च्‍याँःसिद गुद यानैज़्‍याव।
ACT 12:7 हाःत ज़ उमँःजानी परमेस्‍वरए ओचाकर्‍या सरैंःसिद ओज़गैए झ्यालखानाल पलाँ जैद, पत्रुसलाई कोतैद, “सोद घल्‍सिन्‍के,” है दाद ओसोचोइव प़ाइँना ज़ ओसाँगलर यानी ज़ पला·सिद तेकेर।
ACT 12:8 हाःत ज़ नो चाकर्‍याए, “नवाँःफोर पो·सिद नपोलार जासिन्‍के,” है ओदोक ते, पत्रुसए हैज़ जैक्‍यो। नकिन, “नबर्की क्‍वाइसिद ङाछींत हुन्‍के,” है ओदोक ते,
ACT 12:9 पत्रुस लाँःदा पुलुस्‍द उछीं उछीं ज़ बाके। खाली उयुँल ते, ‘आव भरी झजल्‍किद ङारँःज़्‍याव ज़ ताखेहो’ लिद नो साचो ज़ ओल्‍यो लिन्‍या ओमासैंज़्‍याव।
ACT 12:10 नोनी उस॰कताव पाल्‍यालाई बलेंद, फरी हुकिनकाव पाल्‍यालाई ब बलेंद सहरल बाज़्‍याव झँए य़ामक निकेस्‍क नो य़ाम ओलनी ज़ फैसिके। ननी पुलुस्‍द येमत निबाज़्‍याक नो चाकर्‍या उमँःजानी सम़ैसिके।
ACT 12:11 हाःत ज़ पत्रुसए ओचेत फर्किद, “साचो ज़ ओल्‍यो, परमेस्‍वरए ङाल्‍योक ओचाकर्‍यालाई परींद ओयाँव ची ओल्‍यो। नोए ङालाई राजा हेरोद स़ोनो यहूदीराए याजालनी जोगोइद ओपले·नाव ची ओल्‍यो!” है लिके।
ACT 12:12 है जैद आव पाँ भरी चेतैद पत्रुस मरियमए उझ़िमक बाके। नो मरियम मर्कूस यादोज़्‍याव यूहन्‍नाए ओआमा ओल्‍यो। नल हो बेलाक कुधु मिँर दुप्‍सिद परमेस्‍वरलाई यापोंखारिज़्‍याव।
ACT 12:13 पत्रुस य़ामक हुद कोतो कोतो ओजैक तोबो रोदा यादोज़्‍याव नोकोर्नी मेंमाए य़ामक चिऊनाक्‍यो।
ACT 12:14 रोदाए पत्रुसए ओर्गा ओसरेसो प़ाइँना ओरेंतए य़ाम माफैद झन झ़िमल धोंःनाद, “दे, पत्रुस हुद य़ामक च्‍याँःसिद ले,” है ओरादोक ते,
ACT 12:15 प़ाइँए, “काता नपाँज़्‍याव निताव स्‍यावदिनी ब्‍यावदी?” है यादोक ते, नो ल़ुज़ाए, “हो ज़ ब्‍याँ, हो ज़,” है यादोक्‍यो। नोराए झन, “उपुरूस नरँःव ताखेहो,” है दोकेर।
ACT 12:16 नाः भरिल पत्रुस य़ामक च्‍याँःसिद कोतोका कोतो जैव ज़ ओनैज़्‍याव। बल्‍ल नोराए य़ामक बाद याफैनाक पत्रुसलाई रँःद बनै अचम्‍ब ताकेर।
ACT 12:17 पत्रुसए ‘झ्याउँ तालिच्‍यो’ लिद उकुइए सान दाद परमेस्‍वरए झ्यालखानानी ओपले·काव पाँ भरी है यादोक्‍यो। नकिन, “आव पाँ भरी याकूब स़ोनो उपुर्काव गेनैंरालाई मनी है यारादोच्‍यो,” है दाद ओल ननी पुलुस्‍द छुतङ बाके।
ACT 12:18 हो पराःती झ्यालखानाल ‘पत्रुस काना ओबाव’ लिद पाल्‍याराए याखार्ल राउँनी झ्याउँ ताके।
ACT 12:19 हेरोदए उसिपाईंरालाई नोलाई सापो ओरापरींक यामादैवए नो पाल्‍यारालाई तोबो तोबोनी खोले·द, नोरालाई सैःन्‍या सजा याएक्‍यो। नकिन हेरोद राजा यहूदियानी पुलुस्‍द कैसरिया सहरल बाद नल ज़ उलिज़्याव।
ACT 12:20 हाः बेलाक तुरोस स़ोनो सीदोन सहरलाव मिँरास हेरोद बनै रसिद उलिज़्‍याव। खाली नोराए याज़्‍याव भरी हेरोदए ओपोनी उहुज़्‍यावए नोराए होस सखैसिउ यापैंज़्‍याव। है जैद याघेप्‍पार हेरोदए ल्‍योक हुद तोबो उयुँ हुबो ओकर्मचारी बलस्‍तसलाई याल्‍योदा जैद राजास पाँव यापैंज़्‍याव।
ACT 12:21 जलफल दान्‍या याथ·रैव छ्याम, हेरोद बनै तह महौ जैसिद उसिंहासनत च़ुसिद ओपाँ यासथैक्‍यो।
ACT 12:22 ओपाँ थैज़्‍यावराए, “आव पाँ ते मिँए ओपाँ माःक, ईस्‍वरए ओपाँ ची,” है लिद बनै ज़ क़िकेर।
ACT 12:23 हाःत ज़ हेरोद स॰द परमेस्‍वरलाई ओमान नैद ओमायोए प्रभुए तोबो ओचाकर्‍याए फार्लाप फुर्लुप ओख्याक ऱूइद सिके।
ACT 12:24 परमेस्‍वरए ओपाँ झन ज़ बा·द प़ाइँदा ज़ रा·सिनाके।
ACT 12:25 बारनाबास स़ोनो साऊलनी यरूसलेम मन्‍दलीलाव पैसा भाःन्‍या निय़ेन निखेमोत, यूहन्‍ना यादोज़्‍याव मर्कूसलाई ब नीस ज़ लाँद एन्‍तिओखियादा ओल्‍द बाकेर।
ACT 13:1 एन्‍तिओखियालाव मन्‍दलीए खार्ल अगमबक्तार स़ोनो परमेस्‍वरए ओपाँ पलास्‍ज़्‍यावर यालिज़्‍याव। नोराए यामिनर आवर ज़ — बारनाबास, काल्‍या यादोज़्याव सिमियोन, कुरेनीलाव लुकियस, साऊल, स़ोनो ज़िम्‍ज़ाकिन ज़ हेरोद राजास तोबो झ़िमल सिप हुर्किउ मनेन याल्‍यो।
ACT 13:2 नोर तछा दुप्‍सिद, उपासिद परमेस्‍वरलाई यापोंखारिज़्याव बेलाक छैंव पुरूसए, “ङा बारनाबास स़ोनो साऊलनिलाई ङाजूँनी ङानिउथैव य़ेनत जे ज़ नोनिलाई खतैद यारापरींच्‍यो,” है यादोक्‍यो।
ACT 13:3 है जैद नोर उपासिद पोंखारिद नोनी निक्‍याँत याकुइ नैद्याद हो य़ेनत यारापरींकेर।
ACT 13:4 है जैद बारनाबास स़ोनो साऊलनी छैंव पुरूसए उनिखतैव य़ेनत बाकिनी। सिलुकिया सहर पै झरिद, नकिन ऱी जहाजल पसिद साइप्रस तापुत बाकिनी।
ACT 13:5 नल सलामिस सहर निकेसोत यहूदीराए धर्मसास्‍त्र झ़िमल बाद परमेस्‍वरए ओपाँ यारासथैकिनी। नोनिलाई सघैन्‍या यूहन्‍ना ब उलिज़्‍याव।
ACT 13:6 नो तापु भरिल तछ्योनी ज़ दुलिद पाफोस सहर याकेसोत नल तोबो बार-येसु यादोज़्‍याव यहूदी धामीस दैसिकेर। नोए परमेस्‍वरए उमिन हाइद धुतनी ओरापैज़्याव।
ACT 13:7 नो धामी तापुताव हाकिम सर्गियस पौलुसए ओसेवात उलिज़्‍याव। नो हाकिम बनै ओगहक ल्‍यो मिँ ओल्‍यो। नोए परमेस्‍वरए ओपाँ थैन्‍याए जूँनी बारनाबास स़ोनो साऊलनिलाई ओल्‍योदा सथैना निखुल्‍क्‍यो।
ACT 13:8 खाली बार-येसु यादोज़्‍याव एलुमास धामीए (ग्रीक खामनी एलुमासए ओअर्थ ‘धामी’ ज़) नोनी निपाँलाई वैंद, हाकिमलाई नो पाँनी तँदा बले·व ओपैंज़्‍याव।
ACT 13:9 है जैद साऊल (छींनी उमिन पावल) छैंव पुरूसए ब्याल्‍द, नोलाई लँ लँ चिऊद,
ACT 13:10 “ए सैतानए ओज़ा, धुतैद ज़्‍याज़्‍याव, साचो पाँ भरी वैंज़्‍याव, नँ खा पै परमेस्‍वरए दाँव ओयेमलाई गाँत्‍या गुँती जैव नपैंज़्‍याव?
ACT 13:11 नँ इताव नदोवए आछिमकिन परमेस्‍वरए ओसजा नक्‍याँत हुद जाँवा पै नमी लाम लुम ताद निमीए ओज़लाँ ब रँःन्‍या नमाले,” है ओदोव प़ाइँना ज़ उमी मारैंःद छाम छाम ताद दोरैन्‍या मिँ खिम्‍क्‍यो।
ACT 13:12 नो हाकिमए निताव रँःद परमेस्‍वरए ओपाँत अचम्‍ब ताद उयुँ हुप्‍के।
ACT 13:13 नकिन पावल ओनैंनिस ऱी जहाजल पसिद पाफोसनी बाद पामफिलिया खन्‍दलाव पर्गा सहरल केस्‍केर। नकिन ज़ यूहन्‍ना नोनिस भाःसिद यरूसलेमदा ओल्‍द बाके।
ACT 13:14 पावल स़ोनो बारनाबासनी ते पिसिदिया खन्‍दलाव एन्‍तिओखियाल बाद ऩासिन्‍या छ्याम ओतावए धर्मसास्‍त्र झ़िमल बाद च़ुसिकिनी।
ACT 13:15 नो झ़िमलाव घेप्‍पाराए मोसाए ओकानुन स़ोनो अगमबक्ताराए यापाँर यारासथैवत बारनाबास स़ोनो पावलनिलाई, “अ भाइनी, जिनस युँ सझेंःन्‍या काता पाँर उलिकिन गेलाई सथैव ताके,” है यारादोकेर।
ACT 13:16 हाःत ज़ पावल याङ़ाक च्‍याँःसिद उकुइए सान दाद, “अ इस्राएली ङानैंर स़ोनो परमेस्‍वरए ओमान नैज़्‍याव छुत जातलाव मिँर, आदा थैचिके।
ACT 13:17 इस्राएली जातलावराए गेपरमेस्‍वरए गेसाखा पुर्खारालाई छाँतिद, इजिपल खासिद यालिज़्‍याव बेलाक नोरालाई बनै ज़ सबा·द, ओल उकुइनी ननी पले·द दोरैद यालाँक्‍यो।
ACT 13:18 माचाव यादिउदीलाई ब चालीस बर्स भरी सहिद बनल पाथस यानैक्‍यो।
ACT 13:19 नोरालाई लिन्‍या पो जैद्यान्‍याए जूँनी कनान देसलाव सात राज्‍यारालाई यामिन सम़ैद्याद नो पो यामीं ज़ जैद याएक्‍यो।
ACT 13:20 नो भरी चार सय पचास बर्सवा लागिके। “नकिन समूएल अगमबक्ताए ओपालाक पै नोरालाई याराज्‍या चलैन्‍याए जूँनी परमेस्‍वरए न्‍याधिसर खतैद याएक्‍यो।
ACT 13:21 हाः बेलाक इस्राएलीराए, ‘गेलाई चलैन्‍या तोबो राजा जैद्यासिके,’ है यादोक ते, परमेस्‍वरए नोरालाई तोबो साऊललाई याराजा जैद याएक्‍यो। नो मिँ बेन्‍यामीन थरलाव कीसए ओज़ा ओल्‍यो। नो मिँए चालीस बर्स पै याराज्‍या चलैद याएक्‍यो।
ACT 13:22 छींनी परमेस्‍वरए नोलाई पले·द दाऊदलाई याराजा जैद याएक्‍यो। होए उजूँनी ओल परमेस्‍वर ज़ अइ लिद उलिज़्‍याव, ‘यिसैए ओज़ा दाऊदलाई ङायुँलाव मिँ ज़ थ·रैद ङानै। नोए ङाय़ेन भरी चावस ज़ दान्‍या ले।’
ACT 13:23 परमेस्‍वरए नो मिँए ओथोनी ज़ गे इस्राएलीरालाई ओय़ाकालाव पाँर सयो·द्याद गेलाई तोबो बाँचैज़्याव परींद्यासिक्‍यो। नोए उमिन येसु ज़।
ACT 13:24 खाली नो ओमाहुवा पै, ऱील सछैंज़्‍याव यूहन्‍नाए इस्राएलीरालाई, ‘जेपापलाई ऱास्‍द ऱील सछैंसिहुचिके,’ है लिद ओरासथैज़्‍याव।
ACT 13:25 नोए ओय़ेन ओखेम्‍नावत, ‘जे ख्वाराए ङालाई ख्रीस है जेदाँज़्‍याखेहो। ङा हो माःक, नो ङाकिन छींनी हुरिज़्‍या। ङा ते नोए ओपोलाए ओच़ें पला·न्‍या स्‍यासो ब ङामाले,’ है ओरादोज़्‍याव।
ACT 13:26 “जे ङादाज्‍यु भाइर, अब्राहामए ओथोर स़ोनो परमेस्‍वरए ओमान नैज़्‍याव छुत जातलाव मिँर, आव है ङादाचिज़्‍याव परमेस्‍वरनिकाव बाँचैन्‍या पाँर गे प़ाइँए गेजूँनी ज़ लिज़्‍या।
ACT 13:27 यरूसलेमलाव मिँर स़ोनो गेघेप्‍पाराए झन नो येसुलाई ज़ मासरेस्‍धुकेर। ऩासिन्‍या छ्याम साताकाव तखेप दुप्‍सिद अगमबक्ताराए यापाँर प़रिद ब नो पाँए ओअर्थ माप़ाल्‍धुकेर। है जैद झन येसुलाई सैःन्‍या थ·रैद, मासैंद ज़ नो पाँर सयो·केर।
ACT 13:28 नोलाई सैःन्‍या खत कान्‍त ज़ यामादैज़्‍यावत ब, ‘सैःन्‍या ज़’ लिद पिलातसलाई सूँपिकेर।
ACT 13:29 नोए उजूँनी धर्मसास्‍त्रलाव सर्सिउ पाँ भरी प़ाइँ ज़ यासयो·वत ओमोरोलाई क्रुसतिन हाइद खादरल झाःकेर।
ACT 13:30 खाली परमेस्‍वरए झन नोलाई सिउनी सोचोइक्‍यो।
ACT 13:31 सिउनी ओसोवत ओलस गालील खन्‍दनी यरूसलेमल हुव ओनैंराए ल्‍योक कुधु दिन पै सरैंःसिके। नोर ज़ आज्‍याल ओसाचीर लिज़्‍यार।
ACT 13:32 “है जैद गेसथैचिज़्‍याव चाव था आव ज़ — गेसाखा पुर्खारालाई ओरायो य़ाका भरी
ACT 13:33 येसुलाई सिउनी सोचोइद गे याथोराए गेक्‍याँत ज़ सयो·द्यासिक्‍यो। किताव भजन पोस्‍तोकोलाव दुईल सर्सिउ लिज़्‍या, हिताव ज़ यो·के। नलाव सर्सिउ आव ज़, ‘नँ ङाज़ा ज़, आछिम ज़ नँलाई ङाजर्मैनिके।’
ACT 13:34 फरी धर्मसास्‍त्रल परमेस्‍वरए येसुलाई सिउनी सोचोइद फरी ब सिउ यान्‍या माले लिन्‍या ङ़ादाकिन ज़ ओरैंःज़्‍याव। तोथो आव ज़, ‘दाऊदलाई ङायो य़ाकालाव थ॰रिउ छैंव असिकर, जे छींनीकावराए जेक्‍याँत ज़ सयो·द्यान्‍या ङाले।’
ACT 13:35 फरी तोथोल अइ लिद ब सर्सिउ लिज़्‍या, ‘अ परमेस्‍वर, नँ छैंव नज़ालाई, खादरल चिउ यान्‍या नमाले।’
ACT 13:36 “ओल दाऊद ते उप़िरील वाज़ लिद, परमेस्‍वरए ओय़ेनर सयो·द उजिज्‍यु बाज्‍युराए माँःती सिद खादरल बाद चिके।
ACT 13:37 खाली परमेस्‍वरए येसुलाई सिउनी ओसोचोइवए ओक्‍याँ माचिए।
ACT 13:38 है जैद ङादाज्‍यु भाइर, आव ब सैंच्‍यो — आव है ङादाचिज़्‍याव येसुनी, जेदोव पापए सजा क्‍याल्‍सिज़्‍या।
ACT 13:39 मोसाए ओकानुननी उस्‍किउ गेमादैवए जो मिँए येसुलाई उयुँ हुप्‍ज़्‍या, नो प़ाइँनी ज़ फुर्सुल ताद परमेस्‍वरस खैज़्‍या।
ACT 13:40 है जैद आव पाँत जोगोइसिच्‍यो, म़ानी अगमबक्ताराए यापाँ जे जेक्‍याँत ज़ तान्‍या ले। नो पाँ आव ज़,
ACT 13:41 ‘अ ङापाँलाई हसैद ल़॰ज़्‍यावर, अचम्‍ब ताद नास ताच्‍यो। जे जेपालाक ज़ अचम्‍बलाव य़ेन तोबो ङादोरिज़्‍या। नो य़ेन सुवाराए है यादाचिदी ब पतिन्‍या जेमाले।’ ”
ACT 13:42 पावल स़ोनो बारनाबासनी धर्मसास्‍त्र झ़िमनी पुलुस्‍द निबाज़्‍याक नो थैवराए, “आव जिनपाँ फरिकाव साताक मनी गेलाई सथैव ताके,” है यारादोकेर।
ACT 13:43 भाःसिद निबावत मनी कुधु यहूदीर स़ोनो छुत जातलाव यहूदी धर्म मानिज़्‍यावर नीस ज़ बाकेर। है जैद पावल स़ोनो बारनाबासनी, “आव जेथैव पाँत थ॰रिद परमेस्‍वरए ओयाचिउ असिकलाई ताऱास्‍च्‍यो,” है लिद यारासथैकिनी।
ACT 13:44 नो हुव साताकाव ऩासिन्‍या छ्याम सहरलाव लिज़्याव जाँकोसै मिँर परमेस्‍वरए ओपाँ थैना हुकेर।
ACT 13:45 यहूदीराए, मिँर नाः कुधु याहुज़्‍याव रँःद यामी तूद पावलए ओपाँ पल्‍तैद्याव पैंद नोलाई थल्‍केर।
ACT 13:46 नाःत ज़ पावल स़ोनो बारनाबासनी, निपाँ छत्‍कैद है यारादोकिनी, “परमेस्‍वरए ओपाँ थैन्‍या मौका ङ़ादा ते जे यहूदीरालाई ज़ याव ताके है गिन्लिज़्‍याव। खाली जे नो पाँलाई भीःद अजम्‍बरी जुनी दैन्‍या मौका जेमाभैंःवए, गिन ते छुत जातलाव मिँरालाई गिन्‍रासथैनारिज़्‍या।
ACT 13:47 आवए उजूँनी परमेस्‍वरए धर्मसास्‍त्रल मनी अइ लिद ले, ‘बाँचैन्‍या ङापाँ मानुवाताव काना कुनीङ पै जेनी ज़ ओकेस्‍क लिद, छुत जातलाव मिँराए ल्‍योदा ब ज़गै मिताव जैद ङानैचिए।’ ”
ACT 13:48 नो परमेस्‍वरए ओपाँ थैद नकाव लिज़्‍याव छुत जातलाव मिँर बनै रेंद नो पाँए उजूँनी धन्‍या धन्‍या है लिकेर। है जैद परमेस्‍वरए अजम्‍बरी जुनील बान्‍या थ·रैद ओरानैज़्‍याव भरिए नो पाँत यायुँ हुप्‍के।
ACT 13:49 है जैद परमेस्‍वरए ओपाँ नो खन्‍द भरिल प़ाइँदा ज़ ओरा·सिनाज़्‍याव।
ACT 13:50 खाली नलाव यहूदीराए माभैंःद याधर्म मानिज़्‍याव धनी मेंमार स़ोनो सहरलाव घेप्‍पारालाई मचैद पावल स़ोनो बारनाबासनी निखिरी पसिउ परींद यापोनी याराखेपैकेर।
ACT 13:51 है जैद पावल स़ोनो बारनाबासनी, माभैंःज़्यावरालाई परमेस्‍वरए ज़ न्‍याय ओदोवक लिद निखँताव गालो धुइरो ब सीद ख्यानैद्याद आइकोनियन सहरदा बाकिनी।
ACT 13:52 परमेस्‍वरए ओपाँत हुव भरी ते छैंव पुरूसए ब्याल्‍द रेंव ज़ यालिज़्‍याव।
ACT 14:1 आइकोनियन सहरल मनी पावल स़ोनो बारनाबासनी यहूदीराए धर्मसास्‍त्र झ़िमल बाद परमेस्‍वरए ओपाँ निरासथैक चावस पलास्‍द निरायोए यहूदीर स़ोनो छुत जातलावर बनै कुधु ज़ नो पाँत यायुँ हुप्‍के।
ACT 14:2 खाली माभैंःज़्‍याव यहूदीराए ते छुत जातलाव मिँरालाई मचैद, ‘नोनी निपाँ ताथैच्‍यो’ लिद यार्नाल झाःद याराएकेर।
ACT 14:3 हितावत मनी नोनी नो सहरल कुधु पै लिद प्रभुए ओक्‍याँत ख्‍यासिद माछे·द ज़ ओपाँर यारासथैकिनी। परमेस्‍वरए मनी थैज़्‍यावराए यायुँल य़ालो ओपाँर साचो ज़ थ·रैद्यान्‍याए जूँनी पावल स़ोनो बारनाबासनी निक्‍याँनी अचम्‍बलाव य़ेनर सरेसर ब दाव उनिएज़्‍याव।
ACT 14:4 है जैद नो सहरलाव मिँर ऩेभा ताकेर। तभा यहूदीराए ल्‍योदा यालिज़्‍याव, तभा पावल स़ोनो बारनाबासनी निल्‍योदा यालिज़्‍याव।
ACT 14:5 छींनी नलाव छुत जातलाव मिँर स़ोनो यहूदीर याघेप्‍पारास तोबो बुद्धी कलैद नोनिलाई बीज्‍यात जैद लुँए झेःव यापैंज़्‍याव।
ACT 14:6 नोनी था निदैवत ननी धोंःद लुकोनिया खन्‍दलाव लुस्‍त्रा स़ोनो दर्बी सहर जीदा बाकिनी।
ACT 14:7 नल मनी परमेस्‍वरए ओपाँ यारासथैकिनी।
ACT 14:8 लुस्‍त्राल तोबो मिँ जर्मननी ज़ उखँ सिउ च़ुसिद उलिज़्‍याव। नो मिँ खर्क ज़ ओमाबाधुज़्‍याव।
ACT 14:9 पावलए नल मनी परमेस्‍वरए ओपाँ ओरासथैज़्‍याक नो मिँए बनै धिद ओथैज़्‍याव। पावलए नोलाई रँःद सगराँसिन्‍याए जूँनी उयुँ उहुप्‍ज़्‍याव मिताव रँःद,
ACT 14:10 बनै चोइस, “नखँर पलास्‍द च्‍याँःसिन्‍के,” है ओदोव प़ाइँना नो मिँ थर च्‍याँःसिद आदा होदा लिके।
ACT 14:11 नलाव माहोल्‍याराए पावलए ओदोव य़ेन रँःद अचम्‍ब ताद, लुकोनिया खामनी, “देवतार मिँ जैसिद गेल्‍योक ज़ याहुव ओल्‍यो,” है लिद क़िकेर।
ACT 14:12 बारनाबासलाई ‘जिउस’ देवता है दोकेर, पावललाई परमेस्‍वरए ओपाँ सथैज़्याव मुख्‍या मिँ ओतावए ‘हर्मेस’ देवता है दोकेर।
ACT 14:13 जिउस देवताए ओथान सहर लापक उलिज़्‍याव। है जैद नो देवताए उपुजारीए माहोल्‍यारास खैद, वासर जास्‍सिउ बहरर सहरलाव य़ामक रैद, नोनिलाई पुजा दाव पैंकेर।
ACT 14:14 हाःत ज़ बारनाबास स़ोनो पावलनी ‘अइ ची याजैज़्‍याव ओल्‍यो’ लिन्‍या सैंद, हार मानिद निक्‍वार चीए चीए माहोल्‍याराए याखार्ल बाद,
ACT 14:15 “काता जेजैसिज़्‍याव इताव? गिन मनी जे स्‍यासो मिँनी ज़ ची। गिन गिन्सथैचिज़्‍याव चाव पाँनी ते इताव माचाहिउ पुजा दान्‍यालाई ऱास्‍द, नाम नम स़ोनो नलाव लिज़्‍याव भरी जैज़्‍याव, जींदो परमेस्‍वरलाई मानिन्‍या लिज़्‍या।
ACT 14:16 परमेस्‍वरए ङ़ादाकिन जे मिताव छुत जातलाव मिँरालाई जेमन लागिउदा बाव ओयाचिज़्‍याव।
ACT 14:17 हैदी मनी ओललाई सरेस्‍न्‍या सरेसर प़ाइँलाई ज़ याएक्‍यो। जेल्‍योदा मनी दाइनो ताद नम सवाद्याद, ज़्‍यावर सपरीद्याचिज़्‍याव। जेचाहिज़्‍याव भरी जोरैद्याद जेफू तसी जैद्याद जेयुँर होलाँ जैद्याचिज़्‍याव,” है लिद,
ACT 14:18 है निरादोज़्‍यावत मनी नो माहोल्‍यारालाई पुजा दान्‍यात धो वैंव ताकिनी।
ACT 14:19 छींनी एन्‍तिओखिया स़ोनो आइकोनियनलाव यहूदीराए लुस्‍त्राल हुद नलाव माहोल्‍यारालाई मचैद, पावललाई लुँ लुँए झेःद लल्‍यातोरो जैद, ‘उसिउ ची ओल्‍यो’ लिद सहरकिन पाखाङ ख्याकेर।
ACT 14:20 खाली नो सहरलाव येसुए ओपाँत बाज़्‍यावर पावलए ओल्‍योक गुरिगाँ यादुप्‍सिक, पावल सोद यास ज़ सहरदा बाके। हो पराःती बारनाबासस दर्बी सहरदा बाकिनी।
ACT 14:21 पावल स़ोनो बारनाबासनी दर्बील मनी चाव था सथैद येसुए ओपाँत हुन्‍यार कुधु ज़ याराजैकिनी। नकिन फरी ओल्‍द लुस्‍त्रा स़ोनो आइकोनियन सहरलाव घ्याँ पिसिदिया खन्‍दलाव एन्‍तिओखियादा बाद,
ACT 14:22 नलाव, परमेस्‍वरए ओपाँत हुवरालाई, “परमेस्‍वरए ओपाँ ताऱास्‍च्‍यो,” लिद यायुँर सझेंःद्याद, “परमेस्‍वरए ओराज्‍याल कुधु दुखर सहिद वाज़ केस्‍न्‍या गेले,” लिद यारासम्‍जैकिनी।
ACT 14:23 सु सु यामन्‍दलील सेवा चलैन्‍या स़ेरर खतैद्याद नोराए जूँनी उपासिद पोंखारिद यायुँ यासुहुबो परमेस्‍वरए ओपासल याराझाःकिनी।
ACT 14:24 नकिन पिसिदिया खन्‍दलाव घ्याँ बाद पामफिलिया खन्‍दल केस्‍किनी।
ACT 14:25 नल पर्गा सहरल बाद फरी ब परमेस्‍वरए ओपाँ यारासथैकिनी। ननी पुलुस्‍द अतालिया सहरल बाकिनी।
ACT 14:26 नकिन फरी ऱी जहाजल पसिद सिरिया खन्‍दलाव एन्‍तिओखियादा बाकिनी। ङ़ादा नो एन्‍तिओखियानी ज़ नोनिलाई परमेस्‍वरए ओपाँ सथैन्‍याए जूँनी नलाव यायुँ हुबोराए परमेस्‍वरए ओपासल झाःद परींद यारानैज़्याव। है जैद नो य़ेन सयो·द नल ज़ ओल्किनी।
ACT 14:27 पावल स़ोनो बारनाबासनी नल निकेसो प़ाइँना मन्‍दलीलाव मिँरालाई दुप्‍द परमेस्‍वरए नीस ओदोव य़ेन भरी है यारादोकिनी। “परमेस्‍वर गिनस गिनस बाद छुत जातलाव मिँरालाई पाला ओराज्‍याल पसिन्‍या येम फैद याएक्‍यो,” है लिन्‍या पाँर ब यारासथैकिनी।
ACT 14:28 नोनी नो सहरल यायुँ हुबो निनैंरास कुधु पै लिकिनी।
ACT 15:1 पावल स़ोनो बारनाबासनी एन्‍तिओखियाल निलिज़्‍याक यहूदिया खन्‍दनी तोबो ऩेब्‍लो मिँर हुद नलाव येसुए ओपाँत हुवरालाई, “जे मोसाए ओकानुननी क्‍याल्‍न्‍या सरेस जेमाजैसिवा पै अजम्‍बरी जुनी दैन्‍या जेमाले,” है यारादोज़्‍याव।
ACT 15:2 नो पाँत पावल स़ोनो बारनाबासनी नोरास माखैद बनै खर्लेसिकेर। छींनी नलाव यायुँ हुबोराए या यामींर तोबो ऩेब्‍लो जैद पावल स़ोनो बारनाबासनिस यरूसलेमदा बान्‍या थ·रैकेर। ‘होङ बाद येसुए ओसाचीर स़ोनो मन्‍दलीलाव स़ेररास दैसिद आव पाँए उजूँनी सल्‍ला दाव ताके’ लिद,
ACT 15:3 मन्‍दलीए नोरालाई यापरींक्‍यो। नोर ननी पुलुस्‍द फोनिके स़ोनो सामरिया खन्‍दलाव घ्याँ बाद, ‘छुत जातलाव मिँर मनी परमेस्‍वरए ओपाँत हुज़्‍यार’ है लिन्‍या थार यारासथैक, नलाव यादाज्‍यु भाइर बनै ज़ रेंकेर।
ACT 15:4 यरूसलेम याकेसोत नलाव मन्‍दलीलावर यास़ेररास स़ोनो येसुए ओसाचीराए नोरालाई यारासुम्‍केर। पावल स़ोनो बारनाबासनिस परमेस्‍वरए ओदोव य़ेन भरी है यारादोकिनी।
ACT 15:5 निताव पाँ थैद येसुए ओपाँत हुव फरिसीर ख्वा ख्वार जाँ माभैंःद च्‍याँःसिद, “छुत जातलाव मिँर मनी परमेस्‍वरए ओपाँत याहुव प़ाइँना क्‍याल्‍न्‍या सरेस जैसिद, मोसाए ओकानुन ब सयो·व ज़ परींव ताके,” है लिकेर।
ACT 15:6 है जैद नो पाँ थ·रैन्‍याए जूँनी येसुए ओसाचीर स़ोनो मन्‍दलीलाव स़ेरर दुप्‍सिद,
ACT 15:7 कुधु यापाँवत पत्रुस याङ़ाक च्‍याँःसिद अइ लिद यासथैक्‍यो, “अ ङादाज्‍यु भाइर, आदा थैचिके। छुत जातलाव मिँरालाई चाव था सथैद परमेस्‍वरए ओल्‍योदा जैन्‍याए जूँनी ङालाई जेखार्नी ङ़ादाकिन ज़ खतैद ओनैनाज़्‍याव जे ज़ जेसैंज़्‍या।
ACT 15:8 प़ाइँए यायुँलाव पाँ सैंज़्‍याव परमेस्‍वरए गेलाई ओयासिउ मिताव ज़ नोरालाई मनी छैंव पुरूस याद उमींर ज़ ओराजैव सतैंद याएक्‍यो।
ACT 15:9 स़ोनो परमेस्‍वरए जातए ओलेखा मानैद नोरालाई मनी यायुँ यासुहुबोनी ज़ यायुँर सछैंद याएक्‍यो।
ACT 15:10 है जैद काराव गेसाखा पुर्खाराकिन ज़ गेमासहिधुहुज़्‍याव चलनर झन नोरालाई दाव परींद परमेस्‍वरलाई जाँचिन्‍या?
ACT 15:11 नोराए मिताव, गे मनी प्रभु येसुए गेल्‍योदा उयुँ ओगराँवनी वाज़ अजम्‍बरी जुनी दैन्‍या गेताज़्‍या,” है ओरादोक ते,
ACT 15:12 नो पाँत प़ाइँ ज़ थाम थुम ताकेर। नकिन पावल स़ोनो बारनाबासनी निपाला ताद छुत जातलाव मिँराए याखार्ल नोनी निक्‍याँनी ज़ परमेस्‍वरए दाद ओरायो अचम्‍बलाव य़ेनर है निरादोक ते नोराए बनै ज़ धिद थैकेर।
ACT 15:13 नोनी निपाँ ओखेमोत याकूबए अइ लिद यासथैक्‍यो, “अ ङादाज्‍यु भाइर, आदा थैचिके।
ACT 15:14 सिमोन पत्रुसए ओयाःनी जे ज़ थैद जेनै — परमेस्‍वरए छुत जातलाव मिँराए याखार्नी मनी ओल उमींर ओराजैज़्‍याव ओल्‍यो।
ACT 15:15 नो पाँत अगमबक्ताराए यापाँ ब चबनै खैज़्‍या। नोराए यापाँ इताव सर्सिउ लिज़्‍या,
ACT 15:16 ‘नाः भरी ओतावत ङा फरी हुद, चितराँ पुतराँ ताव दाऊदए ओराज्‍या बनैद्यान्‍या ङाले। त़ाव ओभार्नारालाई फरी ऱिम्‍द, म़ाव उमिन फरी ब नैद्यान्‍या ङाले।
ACT 15:17 नाःत ज़ मानुवाताव मिँर प़ाइँए ज़ परमेस्‍वरलाई खिम्‍न्‍या लेर। ङामिनत ङाराछाँतिउ छुत जातलाव मिँर ब ङाल्‍योदा हुन्‍या लेर।
ACT 15:18 आव पाँर परमेस्‍वरए नाम नम ओजैवकिन ज़ गोइँद ओनैज़्याव।’
ACT 15:19 “है जैद ङादाज्‍यु भाइर, ङा ङाबिचार इताव लिज़्‍या — नो परमेस्‍वरए ल्‍योदा हुज़्‍याव छुत जातलाव मिँरालाई माचाहिउ वैंन्‍या मिताव पाँर झाःद्यान्‍या माःक।
ACT 15:20 बुरू नोरालाई गेल्‍योनी चिथी तोबो परींद, नो चिथील ‘खाली अङग्‍यालाई चरैःसिउ ज़्‍यावर ताज़्‍युच्‍यो, ओधें फर्लेद सैःसिउ स्‍याकरी ताकैच्‍यो, झी ताज़्‍युच्‍यो, पातर्‍या पातर्नी ब ताजैसिच्‍यो’ है लिन्‍या पाँर वाज़ सर्द परींव ताके।
ACT 15:21 नोरालाई मोसाए ओकानुन थैन्‍या मौका ते भाःकिन ज़ उलिज़्‍याव। नोए ओपाँ सहर सहरल धर्मसास्‍त्र झ़िम झ़िमक ऩासिन्‍या छ्याम सथैव ज़ यारानैज़्‍यार,” है लिद यासथैक्‍यो।
ACT 15:22 है जैद येसुए ओसाचीर, ओपाँत बाज़्‍याव स़ेरर स़ोनो मन्‍दलीलाव मिँर प़ाइँ तोबो पाँत खैद यासकाव ऩेब्‍लो मिँनिलाई पावल स़ोनो बारनाबासनिस एन्‍तिओखियादा बान्‍या याराखतैकेर। नोनी घेप्‍पा मान दैव मिँनी ज़ निल्‍यो, निमिन बारसाबास यादोज़्‍याव यहूदा, स़ोनो सिलासनी।
ACT 15:23 नोनी निकुइत इताव चिथी परींकेर, “गे येसुए ओसाचीर स़ोनो मन्‍दलीलाव लोम्‍बा जेदाज्‍यु भाइराए गेल्‍योनी, जे एन्‍तिओखिया, सिरिया स़ोनो किलिकियाल लिज़्‍याव छुत जातलाव गेदाज्‍यु भाइरालाई आव चिथी परींद गेयाचिज़्‍या।
ACT 15:24 गेल्‍योनी बाव तोबो ऩेब्‍लो मिँर जेल्‍योङ हुद यापाँए जेयुँलाई आँचा पाँचा जैद याचिकेर दी लिन्‍या गेथैके। निताव सल्‍ला गे गेल्‍योनी हुव माःक, यानी ज़ ची।
ACT 15:25 है जैद गे भरी दुप्‍सिद तोबो ऩेब्‍लो गेमींरालाई गेयुँलाव पावल स़ोनो बारनाबासनिस जेल्‍योदा परींन्‍या गेथ·रैके।
ACT 15:26 नो पावल स़ोनो बारनाबासनी गेप्रभु येसु ख्रीसए ओय़ेनत निक्‍याँलाई मया मारिद निजिउ ज़ थाँद नैनी।
ACT 15:27 है जैद नोनिस यहूदा स़ोनो सिलासनिलाई मनी गेरापरींज़्‍या। नोनी ज़ आलाव सर्सिउ पाँर साचो गेनी ज़ हुव लिद जेलाई है दान्‍या लिनी।
ACT 15:28 अब गे भरी दुप्‍सिद छैंव पुरूसनी जे दान्‍या य़ेन आव ज़ थ·रैद गेनै — उपुर काता कर ज़ माले, खाली आव खास पाँर भन्‍या भैंःव ताके —
ACT 15:29 अङग्‍यालाई चरैःसिउ ज़्‍यावर ताज़्‍युच्‍यो, झी ताज़्‍युच्‍यो, ओधें फर्लेद सैःसिउ स्‍याकरी ताकैच्‍यो, पातर्‍या पातर्नी ब ताजैसिच्‍यो। आव मादान्‍या य़ेनर जेमादोकिन जेलाई चाव तान्‍या ले। गेपाँ आःज़, जेरो।”
ACT 15:30 नो चार जना यारापरींवर एन्‍तिओखियाल बाद नलाव मन्‍दलीलाव मिँरालाई दुप्‍द नो चिथी याराएकेर।
ACT 15:31 नो युँ सझेंःन्‍या चिथी दैवराए प़ाइँलाई प़रिद यारासथैक यायुँ होलाँ ताद प़ाइँ ज़ बनै रेंकेर।
ACT 15:32 यहूदा स़ोनो सिलासनी मनी अगमबक्ता नितावए नोनी मनी नलाव मिँरालाई परमेस्‍वरए ओपाँर सथैद यायुँर बनै सझेंःद याराएकिनी।
ACT 15:33 नो सहरल सर्बा ज़ निल्‍योत नलाव यायुँ हुबोराए फरी यरूसलेमदा चावस यारापरींकेर।
ACT 15:34 [खाली सिलासए नल ज़ लिन्‍या चाव ङम्सिके।]
ACT 15:35 पावल स़ोनो बारनाबासनी ते एन्‍तिओखियाल ज़ लिद छुत कुधुरास खैद परमेस्‍वरए ओपाँ पैद यारासथैकेर।
ACT 15:36 छींनी तछा पावलए बारनाबासलाई, “गिन नो परमेस्‍वरए ओपाँ गिन्‍रासथैव पो पोङ बाद नलाव दाज्‍यु भाइर किताव यालिज़्‍याव फरी तखेप चिऊना गिन्बा,” है ओदोक ते,
ACT 15:37 बारनाबास मनी भैंःद निनैं यूहन्‍ना यादोज़्‍याव मर्कूसलाई ब लाँव ओपैंज़्‍याव।
ACT 15:38 खाली पावलए ते माभैंःद, “आव य़ेनत ओजाँगर माहुद गिनलाई पामफिलियाल ऱास्‍द ख्यानैव मिँलाई गिन काराव लाँन्‍या?” है दोक्‍यो।
ACT 15:39 है जैद नोए उजूँनी नोनी जात्त ज़ माखैद भाःसिकिनी। बारनाबासए मर्कूसलाई ओलस ज़ लाँद ऱी जहाजल पसिद साइप्रस तापुदा बाकिनी।
ACT 15:40 पावलए ते सिलासलाई रूजिद ओनैं जैक्‍यो। नलाव लिज़्याव दाज्‍यु भाइराए नोनिलाई उयुँ य़ाल्‍ज़्याव परमेस्‍वरए ओपासल झाःद चावस यारापरींकेर।
ACT 15:41 नोनी सिरिया स़ोनो किलिकिया खन्‍दल बाद नलाव मन्‍दलीलाव मिँरालाई पाथ पारैद यायुँर सझेंःद याराएकिनी।
ACT 16:1 नकिन पावल स़ोनो सिलासनी दर्बी स़ोनो लुस्‍त्रा सहरल बाकिनी। नल परमेस्‍वरए ओपाँत तोबो उयुँ हुबो तिमोथी यादोज़्‍याव उलिज़्‍याव। होए ओआमा पाला उयुँ हुबो यहूदिनी ओल्‍यो, ओबाबु ग्रीक जातलाव ओल्‍यो।
ACT 16:2 लुस्‍त्रा स़ोनो आइकोनियनलाव यायुँ हुबोराए तिमोथीलाई बनै चाव मिँ थ·रैद यानैज़्‍याव।
ACT 16:3 पावलए मनी नो मिँलाई ओलस बान्‍या ओनैं जैव ओपैंज़्‍याव। खाली नजीदाङाव यहूदीराए ग्रीक जातलाव ओबाबुलाई प़ाइँए ज़ यासरेस्‍ज़्‍याव। है जैद नोरालाई सभैंःन्‍याए जूँनी तिमोथीलाई क्‍याल्‍न्‍या सरेस जैदिक्‍यो।
ACT 16:4 हाःकिन नोनी सहर सहर, पो पोङ ‘यरूसलेमलाव येसुए ओसाचीर स़ोनो नलाव स़ेरराए याथ·रैव पाँर दोच्‍यो’ लिद याराअर्थैकिनी।
ACT 16:5 ननी ज़ मन्‍दलीर यायुँर झन ज़ हुप्‍नाद, या ब झन ज़ बा·नाकेर।
ACT 16:6 छैंव पुरूसए पावल स़ोनो सिलासनिलाई एसिया खन्‍दल परमेस्‍वरए ओपाँ सथैन्‍या उनिवैंवए फ्रिगिया स़ोनो गलातिया खन्‍दलाव घ्याँ बाकिनी।
ACT 16:7 नकिन माइसिया खन्‍द निकेसोत बिथिनिया खन्‍दल बाव निपैंज़्‍याक येसुए उपुरूसए फरी ब निवैंक्‍यो।
ACT 16:8 है जैद माइसियानी पुलुस्‍द त्रोआस सहरल बाकिनी।
ACT 16:9 नल निलिज़्‍याक तछा रील पावलए दर्सनल माकेदोनियालाव मिँलाई च्‍याँःसिद उलिज़्याव रँःक्‍यो। नोए, “जिन माकेदोनिया खन्‍दल हुद गेलाई ब परमेस्‍वरए ओपाँ सथैव ताके,” है लिद बिन्‍ती दोक्‍यो।
ACT 16:10 है जैद पावलए निताव दर्सन उरँःव छींनी, “परमेस्‍वरए गेलाई नदा मनी चाव था सथैना उपरींसिज़्‍याव ओल्‍यो,” लिन्‍या थ·रैद हतप्‍त ज़ बान्‍या गेझाःसिके।
ACT 16:11 त्रोआसकिन ऱी जहाजल पसिद एकसब्‍द्या ज़ सामोथ्राके तापुदा गेबाके। नकिन हो पराःती नियापोलिस सहरदा गेबाके।
ACT 16:12 नकिन बल्‍ल माकेदोनिया खन्‍दलाव तोबो फिलिप्‍पी यादोज़्‍याव मुख्या सहरल गेकेस्‍के। नलाव मिँर जाँकोसै रोमी जातलावर यालिज़्‍याव। नो सहरल सर्बा ज़ गेलिके।
ACT 16:13 ऩासिन्‍या छ्याम सहरलाव य़ामनी पुलुस्‍द, ‘भै छ्योक पोंखारिन्‍या पो लिज़्याखेहो’ लिद नदा ज़ गेबाके। नङ दुप्‍सिद लिज़्‍याव मेंमारालाई मनी परमेस्‍वरए ओपाँ गेरासथैके।
ACT 16:14 नोरास परमेस्‍वरए ओमान नैज़्याव थिआतीरा सहरनी हुव तोबो लिदिया यादोज़्‍याव मेंमाए बनै धिद ओथैज़्याव। नो मेंमाए घ्‍यामो क्‍वाए बेपार ओदोज़्‍याव। प्रभुए नोलाई पावलए है ओरादोज़्‍याव पाँर बुझिन्‍या युँ जैदिक्‍यो।
ACT 16:15 ओल स़ोनो उझ़िमलाव भरी ऱील सछैंसिद, “ङालाई परमेस्‍वरलाई उयुँ हुबो मेंमा जेथ·रैनाकिन ङा ङाझ़िमक हुद गेस ज़ ल्‍यो ताके,” है दाद गेलाई मालाँद मातान्‍या जैक्‍यो।
ACT 16:16 फरी तछा नो पोंखारिन्‍या पोदा गेबाज़्‍याक तोबो जोखना चिऊन्‍या पुरूस दैव बाँदानी ल़ुज़ास गेदैसिके। नो ल़ुज़ाए, ओल्‍योक हुज़्‍यावरालाई हुन्‍या पाँर पाँद्याद ओघरपतीरालाई कुधु पैसा कमैद ओराएज़्‍याव।
ACT 16:17 हो छ्याम नो मेंमा गेछीं गेछीं हुद बनै चोइस, “आवर माहान परमेस्‍वरए ओनोकोरर ज़। यासथैचिज़्‍याव पाँर अजम्‍बरी जुनील सकेस्‍न्‍या पाँर ज़,” है लिद उक़िज़्‍याव।
ACT 16:18 कुधु दिन पै निताव क़िउ ज़ उलिज़्‍याव। तछा पावलए उयुँ कोला कोला ताद नो मेंमाए ल्‍योदा भाल्‍सिद ओक्‍याँताव च़रिउ पुरूसलाई, “ङा नँलाई येसु ख्रीसए उमिननी है ङादींज़्‍या, नोए ओक्‍याँतिन पुलुस्‍द बान्‍के,” है ओदोव प़ाइँना ज़ पुलुस्‍द बाके।
ACT 16:19 नो ल़ुज़ाए ओघरपतीराए निताव रँःद, ‘गेपैसा हुन्‍या येम सूइद्यासिकिनी’ लिद पावल स़ोनो सिलासनिलाई क्‍योःद बजार खार्ल स़ेले स़ेले अदालतल लाँद,
ACT 16:20 हाकिमराए याङ़ाक सच्‍याँद, “आव यहूदीनी गेसहरलाव मिँरालाई गरबर याराजैज़्यानी।
ACT 16:21 गे रोमीराए गेकानुनस माखैव, गेमाभैंःज़्याव रितिथितीर यारापैज़्यानी,” है यारादोकेर।
ACT 16:22 हाःत ज़ नलाव माहोल्‍याराए नोनी निक्‍याँत भोरो·सिउ पैंकेर। है जैद हाकिमराए नोनी निक्‍वार सिउःद्याद स्याकोराए रीःव यारापरींकेर।
ACT 16:23 बनै ज़ प़ोद झ्यालखानाल झाःद पाल्‍यालाई बनै चावस गुव परींकेर।
ACT 16:24 है जैद नो पाल्‍याए नोनिलाई प़ाइँरानी उजींलाव कुन्‍तील झाःद, निखँत हला झाःद निएक्‍यो।
ACT 16:25 आधा रील पावल स़ोनो सिलासनी पोंखारिद परमेस्‍वरए उमिनत भजन निगैज़्‍याक, नीस लिज़्‍याव उपुर्काव कैदीराए याथैज़्‍याव।
ACT 16:26 हाःत ज़ उमँःजानी बनै घ्‍योःव भोंचालो हुद झ्यालखाना भरी बनै थोनो·सिद य़ामर ब यानी ज़ फैसिकेर। कैदीराए यासाँगलर ब पला·सिकेर।
ACT 16:27 हाःत ज़ नो पाल्‍या सैंसिद य़ाम भरी फैसिउ रँःद, “ओहो! कैदीर पुलुस्‍द याधोंःव ची ओल्‍यो,” लिद ओखोर्च्‍यो हाइद ओल ज़ सैःसिउ ओपैंज़्‍याव।
ACT 16:28 पावलए निताव रँःद बनै चोइस क़िद, “थारे थारे, तासैःसिनी। गे प़ाइँ आल ज़ गेलिज़्‍या,” है ओदोक ते,
ACT 16:29 नो पाल्‍याए ओनैंरालाई बत्ती रैव परींद, बनै भुम भुम गूद झ्यालखानाल धोंःनाद पावल स़ोनो सिलासनी निखँत फुलुप्‍सिके।
ACT 16:30 नोनिलाई ननी पले·द, “दे ङाधर्मीनी, ङा कै जैद बाँचिन्‍या ओताव?” है उनिदोक ते,
ACT 16:31 “प्रभु येसुलाई नयुँ सुहुप्‍द ओक्‍याँत नख्यासिकिन नँ स़ोनो नझ़िमलावरास बाँचिद अजम्‍बरी जुनी दैन्‍या जेले,” है दाद,
ACT 16:32 नो पाल्‍यालाई उझ़िमलाव भरिरास परमेस्‍वरए ओपाँ यारासथैकिनी।
ACT 16:33 निताव आधा रील मनी नो पाल्‍याए पावल स़ोनो सिलासनिलाई निघाइर छेद निएक्‍यो। हो प़ाइँना ज़ पाल्‍या उझ़िमलावरास ऱील सछैंसिद,
ACT 16:34 पावल स़ोनो सिलासनिलाई उझ़िमक लाँद, ज़्‍यावर जैद निएक्‍यो। उझ़िमलावरास परमेस्‍वरए ल्‍योदा यायुँ यासुहुबोए बनै रेंकेर।
ACT 16:35 नम छेलाला उसँक हाकिमराए, “पावल स़ोनो सिलासनिलाई निऱास्‍के,” लिद सिपाईंरालाई झ्यालखानादा है दानाव यारापरींकेर।
ACT 16:36 है जैद पाल्‍याए नो था दैद पावललाई, “हाकिमराए जिनलाई ‘ऱास्‍न्‍या’ लिद था परींद नैर। है जैद जिन आनी पुलुस्‍द चावस बाचिन्‍के,” है उनिदोक ते,
ACT 16:37 पावलए नो सिपाईंरालाई, “गिन रोमी नागरिकनिलाई मनी नाःकाव जनताराए ङ़ाक अऩाकल ज़ गिनलाई प़ोद गिनन्‍याय माफाल्‍द ज़ झ्यालखानाल झाःसिन्केर। अब कै जैद गिनलाई अलगज़ा पले·व यापैंज़्‍याव? माता। पले·न्‍या ताकिन याज़ ओपले·सिहुरक,” है ओरादोक ते,
ACT 16:38 नो सिपाईंराए हाकिमरालाई है यारादोनाकेर। नोराए नोनी रोमी नागरिकनी निल्‍यो लिन्‍या यामासैंज़्‍याव। है जैद नो पाँ थैद, हाकिमर बनै छे·द,
ACT 16:39 याज़ निल्‍योक बाद माफी ऩिद लाँःदा पले·द, “गेसहरलाई ऱास्‍द बाचिन्के,” है दाव ज़ यारानैकेर।
ACT 16:40 है जैद नोनी झ्यालखानानी पुलुस्‍द लिदियाए उझ़िमक बाद येसुए ओपाँत बाज़्‍यावरास फरी तखेप दैसिद यायुँर सझेंःद्याद बाकिनी।
ACT 17:1 नकिन पावल स़ोनो सिलासनी अम्‍फिपोलिस स़ोनो अपोल्‍लोनिया सहरलाव घ्याँ बाद थेसलोनिके सहरल केस्‍किनी। नल यहूदीराए धर्मसास्‍त्र झ़िम तोबो उलिज़्‍याव।
ACT 17:2 पावलए ङ़ादाकिनकाव ओदोज़्‍याव मिताव ज़ स़ोंसाता पै ऩासिन्‍या छ्याम नो याझ़िमल बाद धर्मसास्‍त्रलाव सर्सिउ पाँर पलास्‍द्याद,
ACT 17:3 “ ‘ख्रीस दुखर सहिद, सिद सैंसिउ परिन्‍या ज़’ लिद भाःकिन ज़ धर्मसास्‍त्रल सर्सिउ उलिज़्‍याव,” है दाद थ·रैद याएक्‍यो। फरी, “आव है ङादाचिज़्याव येसु ज़ नो ख्रीस,” है मनी यादोक्‍यो।
ACT 17:4 नो पाँत ख्वा ख्वा यहूदीर यायुँ हुप्‍द पावल स़ोनो सिलासनिस खैकेर। परमेस्‍वरए ओमान नैज़्याव कुधु ग्रीकर स़ोनो सहरलाव यामिन थासो मेंमाराए ब यायुँ हुप्‍के।
ACT 17:5 छुत यहूदीर ते यामी तूद बजार जीलाव अइज़ दुलिरिज़्‍याव सँधुवारालाई दुप्‍द नो सहरल खैलानी बैला जैव यारापरींकेर। नोर पावल स़ोनो सिलासनी निलिज़्‍याव तोबो यासोनए उझ़िमक बाद नोनिलाई पले·व पैंकेर।
ACT 17:6 खाली नोनिलाई मादैद झन यासोनलाई ख्‍वा ख्‍वा यायुँ हुबोरास क्‍योःद अदालतदा स़ेले स़ेले लाँद, “नो सहर सहर दुलिद खैलानी बैला जैज़्‍यावनी गे गेसहरल ब निहुवत,
ACT 17:7 यासोनए ओल्‍योक बासिउ निएक्‍यो दी। नोर माहाराजाकिन प़ाइँ तँदा जैसिद नोराए याराजा येसु ज़ है लिज़्‍यार,” है लिद क़िउ ज़ लिकेर।
ACT 17:8 नोराए यापाँ थैद सहरलाव मिँर स़ोनो याघेप्‍पार बनै ज़ मचिकेर।
ACT 17:9 है जैद यासोन स़ोनो ओनैंरालाई धरौतील याराऱास्‍केर।
ACT 17:10 नम ओझ्याक नलाव दाज्‍यु भाइराए पावल स़ोनो सिलासनिलाई हतप्‍त ज़ बेरिया सहरदा यारापरींकेर। नल निकेसोत फरी ब यहूदीराए धर्मसास्‍त्र झ़िमक बाकिनी।
ACT 17:11 बेरियालाव यहूदीर ते थेसलोनिकेलाव मिँराकिन यातह ल्‍योर यालिज़्‍याव। नोराए पावल स़ोनो सिलासनी निपाँत बनै ज़ धिद थैद, ‘आवनी निपाँ साचो मालिज़्‍या’ लिद दिनकाव ज़ धर्मसास्‍त्रल याचिऊज़्‍याव।
ACT 17:12 है जैद नोर येसुए ओपाँत कुधुए यायुँ हुप्‍के। नोरास यामान ल्‍यो ग्रीक खेपा मेंमार ब सर्बा ज़ याल्‍यो।
ACT 17:13 खाली थेसलोनिकेलाव यहूदीराए, ‘पावलए बेरियाल मनी परमेस्‍वरए ओपाँ यासथैज़्‍याव दी’ लिन्‍या थैद, नदा मनी माहोल्‍यारालाई यारामचैनाकेर।
ACT 17:14 है जैद नलाव यायुँ हुबोराए पावललाई जोगोइन्‍याए जूँनी समुन्‍द्र छ्योक पै सारैनाकेर। सिलास ते तिमोथीस नल ज़ लिकिनी।
ACT 17:15 है जैद पावललाई सारैना बावराए एथेन्‍स सहरक पै लाँकेर। ननी ओल्‍द बाव यापैंज़्‍याक पावलए नोराए कुइत सिलास स़ोनो तिमोथीनिलाई, ‘ओताकिन चाँदो ज़ हुचिन’ लिन्‍या था परींक्‍यो।
ACT 17:16 पावलए एथेन्‍स सहरल सिलास स़ोनो तिमोथीनिलाई कींद उनिनैज़्‍याक नलाव कुधु अङग्‍यार रँःद उयुँर माचाव दाद,
ACT 17:17 धर्मसास्‍त्र झ़िमल बाद नलाव यहूदीर स़ोनो परमेस्‍वरए ओमान नैज़्याव ग्रीकरास कुधु ज़ याखर्लेसिज़्याव। बजार जील आदा होदा लिज़्‍यावरास मनी दिनकाव ज़ ओपाँज़्‍याव।
ACT 17:18 तछा इपिक्‍युरी स़ोनो स्‍तोइकी यादोज़्‍याव धर्म मानिज़्‍यावर हुद ओपाँ थैद खर्लेसिनाकेर। पावलए येसुए ओपाँ सथैद, ‘सिउनी सैंसिके’ है लिन्‍या पाँर ओरासथैवए नोर ख्वा ख्वाराए, “काता ओपाँज़्‍याव, निताव त्‍यात्‍यानी तितिव?” है यालिज़्‍याव। ख्वाराए फरी, “काताङाव देवताराए यापाँ ओपाँज़्‍याव ताक्‍या?” है ब यालिज़्‍याव।
ACT 17:19 छींनी नोराए अरियोपागस कचरीक लाँद, “नो साःरो पाँए ओअर्थ खास काता उलिज़्‍याव? गेलाई है दासिके।
ACT 17:20 गे अनवार्‍यासो ज़ गेथैज़्‍या। ओअर्थ पलास्‍द्याद फरी ब तखेप थैव गेदैक,” है दोकेर।
ACT 17:21 नो एथेन्‍सलाव मिँर स़ोनो यासहरल छुतनी हुद लिज़्‍यावराए पाला जम्‍मा साःरो पाँर थैन्‍यात वाज़ लहर यादोज़्‍याव।
ACT 17:22 है जैद अरियोपागस कचरीक पावल प़ाइँए याङ़ाक च्‍याँःसिद, “अ एथेन्‍सलाव मिँर, जे धर्म खिम्‍न्‍यार जेलिज़्‍याव ओल्‍यो ङामीए ज़ रँःद ङानैचिए।
ACT 17:23 जेसहरलाव पुजा दान्‍या पोर आदा होदा ङालिक तोबो थानत, ‘सुए ज़ यामासरेस्‍ताव ईस्‍वर’ सर्सिउ उलिज़्‍याव ङारँःके। ङा है ङादाचिज़्‍याव परमेस्‍वर नो मासरेस्‍द जेमानिज़्‍याव ईस्‍वर ज़।
ACT 17:24 प़ाइँ जैज़्‍याव परमेस्‍वर नाम नमलावराए गेङ़ैताव ओतावए कुइए जैसिउ मन्‍दिरल मालिधुइ।
ACT 17:25 होलाई मिँए ल्‍योनी काता ज़ खाँचो ब माले। झन गेलाई चाहिज़्‍याव भरी होए ओल्‍योनी ज़ हुज़्‍या। आव गेजिउ ब होए ओल्‍योनी ज़, गेस॰ ब ओल झाःद ओयासिउ ज़।
ACT 17:26 तोबो मिँए ओक्‍याँनी ज़ आव मानुवाताव प़ाइँ जातलाव मिँरालाई याजैक्‍यो। नोरालाई सु सु लिन्‍या यापो, सु सु याबेला ब ओल ज़ थ·रैद याएक्‍यो।
ACT 17:27 है जैद ‘ङालाई छाम छाम जैद तादी ब कसा खिम्‍द मादैनार’ है लिद ओल ज़ इताव जैक्‍यो। हैदी ब परमेस्‍वर गेकिन तादाङ माले।
ACT 17:28 गे होए उकुइत ज़ ताद ओलनी ज़ गेबाँचिज़्‍या, ओलनी ज़ गेचलिज़्‍या। जेसकाव सैंन्‍याराए मनी, ‘गे ओल ओज़ार ज़ गेलिज़्‍या,’ है लिद लेर।
ACT 17:29 “है जैद गे परमेस्‍वरए ओज़ार गेताकिन, कै जैद ओल ते सीं लुँ ओताज़्‍याव? सुन चाँदीए जैसिउ अङग्‍या ते अइज़ मिँए युँ स्‍यानी जैसिउ ची।
ACT 17:30 ङ़ादाकिन परमेस्‍वरलाई मासरेस्‍दकाव अऩाकलाव गेदोव भरी ते आथ पाला पै गेचार ताके। आकिनी ते परमेस्‍वरए प़ाइँनिकाव मिँरालाई ‘निताव माचाहिउ य़ेन भरी ऱास्‍द ङाल्‍योदा हुचिके,’ है दासिज़्‍याव।
ACT 17:31 मानुवाताव मिँराए न्‍याय फाल्‍न्‍या ब ‘आव छ्याम ज़ तारिज़्‍या’ लिद थ·रैद नैव। सतस न्‍याय फाल्‍न्‍या मिँ ब ‘आव ज़’ लिद प़ाइँए याङ़ाक सिउनी सोचोइद थ·रैद याएक्‍यो,” है यादोक्‍यो।
ACT 17:32 ‘सिउनी ओसोचोइव’ है ओरादोव याथैक ख्वा ख्वार स़ास्‍केर। ख्वाराए फरी, “छींनी ब तछा नपाँ थैव गेदैक,” है दोकेर।
ACT 17:33 है जैद पावल ननी पुलुस्‍द ओबाक,
ACT 17:34 ख्वा ख्वार ओल्‍योदा जैसिद ओपाँत यायुँ हुप्‍के। नोरानी अरियोपागस कचरीलाव तोबो दियनुसियस ओल्‍यो, तोबो दामारिस यादोज़्‍याव मेंमा ब ओल्‍यो। नोनिस छुतर ब याल्‍यो।
ACT 18:1 नकिन पावल एथेन्‍स सहरलाई ऱास्‍द कोरिन्‍थ सहरदा बाके।
ACT 18:2 होङ बाद तोबो पोन्‍तस खन्‍दल जर्मिउ अकिलास यादोज़्‍याव यहूदीस दैसिकिनी। ओज्‍याए उमिन प्रिस्‍किला। माहाराजा क्‍लौदियसए यहूदी भरिरालाई रोम सहरनी ओरापले·वए नोनी ज्‍या-री भर ज़ इतालिया देसनी कोरिन्‍थल हुद निलिज़्‍याव।
ACT 18:3 नोनी निय़ेन ब पावलए ओय़ेन स्‍यासो पाल जैन्‍या ओतावए, पावल नोनिस लिद याय़ेन ब सिप ज़ दोकेर।
ACT 18:4 साताकाव तखेप ऩासिन्‍या छ्याम धर्मसास्‍त्र झ़िमल बाद यहूदीर स़ोनो ग्रीकरास खर्लेसिद सभैंःन्‍या ओपैंज़्याव।
ACT 18:5 छींनी सिलास स़ोनो तिमोथीनी पावलए ल्‍योक माकेदोनिया खन्‍दनी निहुवत पावलए ओध्‍यावना परमेस्‍वरए ओपाँ सथैन्‍या वाज़ जैद, यहूदीरालाई ‘येसु ज़ पापनी ऱास्‍ज़्याव ख्रीस’ लिद साची ओराएज़्‍याव।
ACT 18:6 नोर पावलए ओपाँर माभैंःद ओपाँलाई थल्‍द बीज्‍यात जैव यापैंवए पावलए ओक्‍वाताव गालो धुइरोर याङ़ाक थरैद्याद, “जेपाप भरी जे जेङ़ैत ज़ ओताक। जे नो पाँ जेमाभैंःव प़ाइँना फुर्सुल ङाताके। अबकिन ङा छुत जातलावरालाई ची ङारासथैनारिज़्‍या,” है दाद,
ACT 18:7 ननी पुलुस्‍द धर्मसास्‍त्र झ़िम लापकाव तीतस युस्‍तसए उझ़िमक बाके। नो मिँ ब परमेस्‍वरए ओमान नैज़्याव ज़ ओल्‍यो।
ACT 18:8 धर्मसास्‍त्र झ़िमलावराए याघेप्‍पा ब तोबो क्रिस्‍पसए उझ़िमलाव भरिरास परमेस्‍वरए ओपाँत यायुँ हुप्‍के। कोरिन्‍थलाव छुत छुतराए मनी परमेस्‍वरए ओपाँ थैद, यायुँ हुप्‍द ऱील सछैंसिकेर।
ACT 18:9 तछा रील पावलए दर्सनल प्रभु ओपाँज़्‍याव रँःक्‍यो। प्रभुए, “पावल, नँ माछे·द ज़ आव सहरल ङापाँ सथैव ज़ घरानैयो, च़िम दान्‍या माःक।
ACT 18:10 ङा नँस ज़ ङालिज़्‍या। सुए ज़ नँलाई कैज़ जैन्‍या मालेर। आव सहरल ङामींर कुधु ज़ तान्‍या लेर,” है दोक्‍यो।
ACT 18:11 है जैद पावल नो सहरल अथार मैना लिद परमेस्‍वरए ओपाँ पलास्‍द ओराएज़्‍याव।
ACT 18:12 अखैया खन्‍दल गलियोन हाकिम उलिज़्‍याव बेलाक, यहूदीर पावलकिन तँदा जैसिद पावललाई क्‍योःद अदालतदा लाँद,
ACT 18:13 “आव मिँए परमेस्‍वरए ओसेवा तँदा बङ्गैद मोसाए ओकानुनकिन छुत येम यापैज़्‍याव,” है लिकेर।
ACT 18:14 पावलए जवाप याव ओपैंज़्‍याक ज़ गलियोनए ओल ज़, “अ यहूदीर, आव मिँए मादान्‍या य़ेनर ओदोव ताकिन ङा जेपाँ सहिद ङायाचिखेहो।
ACT 18:15 खाली जे जेधर्म रोक मेक ताद, काता काताराए यामिनर ओत़ोसिक जे ते जम्‍मा इ़सिउ वाज़ जेपैंज़्‍या। ङा निताव पाँ कै जैद थैन्‍या? जे ज़ सैंच्‍यो,” है दाद,
ACT 18:16 अदालतनी यापले·क्‍यो।
ACT 18:17 हाःत ज़ झन नोराए धर्मसास्‍त्र झ़िमलाव याघेप्‍पा सोस्‍थेनेसलाई क्‍योःद अदालत ङ़ाक ज़ प़ोकेर। खाली गलियोनए घाइ ज़ मारादोक्‍यो।
ACT 18:18 पावल कोरिन्‍थ सहरल सर्बा ज़ लिद यायुँ हुबोराए ल्‍योनी बिदा ऩिद, ‘सिरिया खन्‍ददा ओल्‍द बान्‍या’ लिद ऱी जहाजल पसिके। ओलस अकिलास स़ोनो प्रिस्‍किलानिलाई ब निलाँक्‍यो। नोकिन ङ़ादा कोरिन्‍थ लापकाव किंक्रिया सहरल किर्‍या झाःद ओचेम ब एन्‍क्‍यो।
ACT 18:19 नकिन ऱी जहाजल एफिसस सहर पै बाद अकिलास स़ोनो प्रिस्‍किलानिलाई नल ज़ निख्यानैक्‍यो। ओल ते जाँवा पै वाज़ लिद धर्मसास्‍त्र झ़िमल बाद यहूदीरास खर्लेसिकेर।
ACT 18:20 नकिन नोराए, “गेस ज़ जाँवा पै ल्‍यो ताके,” है यादोक ते, पावलए माभैंःद,
ACT 18:21 “परमेस्‍वरए उयुँ ओताकिन फरी ङाहुया ज़,” है दाद ऱी जहाजल पसिद एफिससनी बाके।
ACT 18:22 सिरिया खन्‍दलाव कैसरियाल केस्‍द जहाजतिन झरिद यरूसलेम पै बाद नलाव मन्‍दलीस दैसिद एन्‍तिओखियादा बाके।
ACT 18:23 नल जाँवा लिद गलातिया स़ोनो फ्रिगिया खन्‍द जीलाव पो पोक लिज़्‍याव येसुए ओपाँत बाज़्‍याव भरिरास दैसिद परमेस्‍वरए ओपाँत यायुँ सझेंःद याएक्‍यो।
ACT 18:24 अलेक्‍जेन्‍द्रिया सहरलाव तोबो अपोल्‍लोस यादोज़्‍याव यहूदी एफिससल केस्‍हुके। नो मिँए ओपाँ बनै ङमो, धर्मसास्‍त्रलाव पाँ ब बनै ओसैंज़्‍याव।
ACT 18:25 प्रभुए ओपाँ ब सर्बा ज़ सिऊसिद बनै जाँगरस येसुए ओपाँर सथैद चावस ज़ पलास्‍द ओराएज़्‍याव। खाली यूहन्‍नाए ओरासछैंज़्याव वाज़ ओसैंज़्‍याव।
ACT 18:26 नोए धर्मसास्‍त्र झ़िमल बनै घ्‍योःव युँस परमेस्‍वरए ओपाँ ओरासथैज़्‍याव। अकिलास स़ोनो प्रिस्‍किलानी नोए ओपाँ थैद नोलाई निझ़िमदा लाँद येसुए उजूँनी ओमासैंज़्‍याव पाँ भरी पलास्‍दिकिनी।
ACT 18:27 नकिन अपोल्‍लोस अखैयादा बान्‍या युँ दोक्‍यो। है जैद नलाव यायुँ हुबोराए उयुँर सझेंःद्याद, ‘आव मिँलाई चावस नैच्‍यो’ लिद होङाव यायुँ हुबोरालाई तोबो चिथी परींद याराएकेर। अपोल्‍लोस होङ केस्‍द परमेस्‍वरए उयुँ ओगराँवनी यायुँ हुबोरालाई कुधु ज़ यासघैक्‍यो।
ACT 18:28 प़ाइँए याङ़ाक यहूदीराए यापाँ पल्‍तैद्याद, ‘येसु ज़ परमेस्‍वरए खतैद उपरींव ख्रीस’ लिद धर्मसास्‍त्रनी थ·रैद याएक्‍यो।
ACT 19:1 अपोल्‍लोस कोरिन्‍थल उलिज़्‍याक पावल रूनिकाव घ्याँ हुद एफिसस सहरल केस्‍हुके। नल ख्‍वा ख्‍वा येसुए ओपाँत बाज़्‍यावरास दैसिद,
ACT 19:2 “जे येसुए ओपाँत जेहुव बेलाक छैंव पुरूस दैद जेमानै?” है ओरादोक ते, नोराए, “छैंव पुरूसए उमिन आःपै गेमाथैताए,” है दोकेर।
ACT 19:3 नकिन पावलए, “हिताव ताकिन ते, जे काताए ओपाँनी जेसछैंसिउ की?” है ओरादोक ते, “गे ते यूहन्‍नाए ओपाँनी गेसछैंसिउ ची,” है दोकेर।
ACT 19:4 है जैद पावलए याबिरैव भरी चावस पलास्‍द्याद, “ऱील सछैंज़्‍याव यूहन्‍नाए मिँरालाई यादोव पापनी यायुँ फर्कैद्याद ओलकिन छींनी हुज़्‍याव येसुए ल्‍योदा यायुँ सुहुप्‍द्यान्‍याए जूँनी ओरासछैंज़्‍याव ची,” है ओरादोक ते,
ACT 19:5 नोराए निताव पाँ थैद प्रभु येसुए उमिननी ज़ सछैंसिकेर।
ACT 19:6 नकिन पावलए याक्‍याँत उकुइ नैद ओरायो प़ाइँना छैंव पुरूस याक्‍याँत हुद नोर छुत छुत खामनी ब पाँकेर, छैंव पुरूसनी अचम्‍बलाव पाँर ब पाँकेर।
ACT 19:7 नोर बाह्र जनावा याल्‍यो।
ACT 19:8 नकिन स़ोंमैना पै पावलए धर्मसास्‍त्र झ़िमल परमेस्‍वरए ओराज्‍यालाव पाँर सथैद नोरास खर्लेसिद नोरालाई सभैंःन्‍यात बनै ज़ धामा दोक्‍यो।
ACT 19:9 हितावत मनी ख्वा ख्वाराए परमेस्‍वरए ल्‍योदा यायुँ जात्त ज़ माफर्कैद, झन ज़ एकोहोर्‍यासो जैसिद माहोल्‍याराए याङ़ाक येसुए ओपाँ बले·व पैंकेर। है जैद पावल येसुए ओपाँत हुव भरिरास ननी भाःसिद हाःकिन तुरान्‍नस इस्‍कुलल यादुप्‍सिज़्‍याव।
ACT 19:10 ऩेरिम भरी नल दुप्‍सिद एसिया खन्‍द भरिल लिज़्याव यहूदीर स़ोनो छुत जातलाव मिँराए परमेस्‍वरए ओपाँ थैन्‍या मौका दैकेर।
ACT 19:11 परमेस्‍वरए पावलए ओक्‍याँनी अचम्‍बलाव ओय़ेनर सतैंद ओराएज़्‍याव।
ACT 19:12 क्‍वार रैद पावललाई छापो परींद याजोरो हुवर लाँद याराएक, नो याजोरो हुवर यागराँज़्‍याव, माचाव पुरूसर ब पुलुस्‍द याबाज़्‍याव।
ACT 19:13 यहूदीराए याखार्ल मनी माचाव पुरूसर पले·न्‍यार यालिज़्‍याव। नोराए माचाव पुरूसरालाई प्रभु येसुए उमिननी पले·न्‍या धामा दाद, “गे है गेदाचिज़्‍या, पावलए ओरासथैज़्‍याव येसुए उमिननी जे पुलुस्‍द बाचिके,” है यारादोज़्‍याव।
ACT 19:14 तोबो स्‍केवास यादोज़्‍याव यहूदी मुख्या पुजारीए सात भाइ ओज़ाराए मनी निताव य़ेन यादोज़्‍याक,
ACT 19:15 नो माचाव पुरूसए, “येसुलाई ङासरेस्‍ज़्‍या, पावललाई मनी ङासरेस्‍ज़्‍या, जेलाई ते ङामासरेस्‍चिए,” है दाद,
ACT 19:16 नो माचाव पुरूसए क्‍योःद ओनैज़्‍याव मिँए नोरालाई खप्‍द हारैद, नोर नो झ़िमनी नाङग्‍या पात्‍या, झीर्घ्यामनी मर्घ्यामोर ताद पुलुस्‍द धोंःकेर।
ACT 19:17 एफिससल लिज़्‍याव भरिराए, यहूदीर स़ोनो छुत जातलावर, आव पाँर थैद बनै ज़ छे·केर। है जैद प्रभु येसुए उमिन बनै घ्‍योःद ओमान ब रहिके।
ACT 19:18 प्रभु येसुए ओपाँत हुवर मनी कुधुए ङ़ादाकिनकाव माचाव याय़ेनर प़ाइँए याङ़ाक माम़ोंद ज़ यापाँज़्‍याव।
ACT 19:19 ङ़ादाकिन मन्‍तर तन्‍तर दाज़्‍यावराए ते यापोस्‍तोकोर रैद दुप्‍द प़ाइँए याङ़ाक ज़ याराम़ुकेर। नो याराम़ुव पोस्‍तोकोराए याएः याजाँचिक चाँदीए सिक्‍का पचास हजारा ओल्‍यो।
ACT 19:20 है जैद परमेस्‍वरए ओपाँ प़ाइँनी प़ाइँनी ज़ घ्‍योःद आदा होदा बनै ज़ उफींजिज़्‍याव।
ACT 19:21 आव भरी ओतावत पावलए उयुँल, माकेदोनिया स़ोनो अखैयालाव घ्याँ बाद फरी यरूसलेमदा बान्‍या थ·रैक्‍यो। ‘हुकिन छींनी रोम सहरदा मनी बाव ताके’ है उलिज़्‍याव।
ACT 19:22 है जैद ओसेवा दाज़्‍यावनी, तिमोथी स़ोनो इरास्‍तसनिलाई, ओलकिन ङ़ादा ज़ माकेदोनियादा निपरींक्‍यो। ओल ते जाँवा पै एसिया खन्‍दल ज़ लिके।
ACT 19:23 हाः बेलाक एफिसस सहरल येसुए ओपाँत छ्याल्‍दिउ खैलानी बैला माताके।
ACT 19:24 तोबो देमेत्रियस यादोज़्‍याव सोनारए, आर्तेमिस देबीए ज़िम्ज़ा ज़िम्ज़ा चाँदीए अङग्‍यार जैद सहरलाव तुप्‍न्‍यारालाई कुधु फाइदा जैद ओराएज़्‍याव।
ACT 19:25 तछा नोरालाई स़ोनो छुत नो मिताव य़ेन दाज़्यावरालाई दुप्‍द, “अ ङादाज्‍यु भाइर, जे ज़ जेसैंज़्‍या, आव गेय़ेननी ज़ चाव कमाइ ताज़्या।
ACT 19:26 नो पावलए झन आव गेसहरल स़ोनो एसिया भरिल, ‘कुइए जैसिउ अङग्‍यार काता देवतार ब माःक’ है दाद कुधु मिँरालाई तँदा ज़ याजैक्‍यो।
ACT 19:27 है जैद नोए ओपाँए ज़ आव गेय़ेन वाज़ माःक, झन आर्तेमिस गेदेवत्‍यानीए ओमन्‍दिर ब कान्‍ल ज़ गनिसिन्‍या माले। हिताव ओताकिन ते एसिया भरिल स़ोनो मानुवाताव मिँराए गेमानिज़्‍याव देवत्‍यानीए ओज़गै मगै ब म़ान्‍या ओछ्यास लिज़्या,” है ओरादोक ते,
ACT 19:28 प़ाइँ ज़ यारिस बनै चोद, “एफिससल लिज़्याव आर्तेमिस देवत्‍यानी जय जय,” है लिद बनै क़िकेर।
ACT 19:29 नो पाँत सहरलाव मिँर कुधु ज़ मचिद माकेदोनियानी हुव पावलए ओनैंनी गायस स़ोनो अरिस्‍तार्खसनिलाई क्‍योःद राम दान्‍या पोल स़ेले स़ेले यारालाँकेर।
ACT 19:30 पावलए नो पाँ थैद ओनैंनी निजूँनी राम दान्‍या पोदा बाव ओपैंज़्‍याव, नलाव यायुँ हुबोराए भैंःद माएकेर।
ACT 19:31 एसिया खन्‍दलाव सरकारए ओय़ेन दाज़्‍याव ख्‍वा ख्‍वा ओनैंराए मनी, “राम दान्‍या पोदा ताबानी,” लिद ओल्‍योदा था परींकेर।
ACT 19:32 नल बावर ख्वाराए ‘आव ज़’, ख्वाराए ‘हो ज़’ लिद बनै याक़िक सुए ज़ काता ज़ माथ·रैधुकेर। खाली कुधु मिँराए ‘काराव यादुप्‍सिउ’ लिन्‍या ब यामासैंज़्याव।
ACT 19:33 छींनी नलाव यहूदीराए तोबो अलेक्‍जेन्‍दरलाई जवाप याव परींकेर। है जैद नोए, ‘आदा थैचिके’ लिद उकुइए सान दाद याएक्‍यो।
ACT 19:34 खाली नोराए ‘यहूदी ज़ ओल्‍यो’ लिन्‍या सरेस्‍द प़ाइँए यार्गा तोबो जैद, “एफिससल लिज़्याव आर्तेमिस देवत्‍यानी जय जय,” है लिद ऩेघन्‍ता भरी क़िउका क़िउ ज़ लिकेर।
ACT 19:35 बल्‍ल बल्‍लङ नो सहरलाव प्रधानए नोरालाई चाप चुप जैद, “अ एफिससलाव मिँर, आदा थैचिके। नो नमतिन तेव माहान देवत्‍यानी आर्तेमिस स़ोनो होए ओमन्‍दिर आव गेसहरल गेमीं ज़ लिज़्‍या लिन्‍या प़ाइँए ज़ सैंज़्‍यार सानी।
ACT 19:36 ‘माःक’ लिन्‍या सु ज़ मालेर। जे काराव जेमचिज़्‍याव? च़िम दोचिके, मुर्खलाव य़ेन तादोच्‍यो।
ACT 19:37 आव स़ेल्‍द जेरारैव मिँनी ते गेमन्‍दिरनी काता ब माहाइनी, गेदेवताए उमिन ब बले·द मायासिर।
ACT 19:38 है जैद देमेत्रियस स़ोनो ओलसकाव ओनैंराए यामुद्दा कातार उलिकिन अदालतल बाद उजुर ओदोरक।
ACT 19:39 छुत यापाँ उलिकिन जनताराए कचरी मनी लिज़्‍या सानी।
ACT 19:40 खाली अऩाकलाव आछिमकाव जेदोज़्‍याव मिताव ते दान्‍या माःक, म़ानी रोमी सरकारए गेलाई गेगल्‍ती थ·रैद्यान्‍या ओछ्यास लिज़्‍या। मचिन्‍या निउँ काता ज़ ओमाल्‍योए गे काता जवाप यान्‍या?”
ACT 19:41 है दाद प़ाइँलाई भाःसिउ यापरींक्‍यो।
ACT 20:1 राउँनी झ्याउँ ओखेमोत पावलए नलाव यायुँ हुबोरालाई दुप्‍द परमेस्‍वरए ओपाँनी यायुँ सझेंःद्याद, बिदा ऩिद माकेदोनिया खन्‍ददा बाके।
ACT 20:2 नदाङाव यायुँ हुबोरालाई मनी परमेस्‍वरए ओपाँर सथैद यायुँ सझेंःद याएक्‍यो। नकिन ग्रीस देसदा बाद,
ACT 20:3 नल स़ोंमैना पै लिके। ननी ऱी जहाजनी सिरिया खन्‍ददा बाव ओपैंज़्‍याक, ‘यहूदीराए पावललाई सैःव पैंज़्‍यार दी’ लिन्‍या थैद नो येमनी माबाद फरी माकेदोनियालाव घ्याँ बान्‍या थ·रैक्‍यो।
ACT 20:4 ओलस छुत मिँर मनी बाकेर। नोराए यामिनर आवर ज़ — बेरिया सहरलाव पुरसए ओज़ा सोपात्रोस, थेसलोनिके सहरलाव अरिस्‍तार्खस स़ोनो सिकन्‍दसनी, दर्बी सहरलाव गायस, तिमोथी, स़ोनो एसिया खन्‍दलाव तुखिकस स़ोनो त्रोफिमसर ज़।
ACT 20:5 नोर गेकिन ङ़ादा बाद त्रोआस सहरल याकींसिज़्‍याव।
ACT 20:6 माँदा भरेस ज़्‍यान्‍या पर्ब ओमाखेमा पै फिलिप्‍पी सहरल गेलिके। पर्ब ओखेमोत ऱी जहाजल पसिद पाँच दिनत त्रोआसल केस्‍द ङ़ादा बावरास दैसिद, नल सात दिन गेलिके।
ACT 20:7 सातालाव उस॰कताव छ्याम ऱिमक त्रोआसलाव यायुँ हुबोरास दुप्‍सिद प्रभु-भोज गेमानिज़्‍याव। पावल हो पराःती बाव ओपैंज़्‍यावए आधा री पै परमेस्‍वरए ओपाँ ओसथैसिज़्‍याव।
ACT 20:8 नो दुप्‍सिद गेलिज़्‍याव ओतर्ताव तालल कुधु बत्तीर तैंःसिउ यालिज़्याव।
ACT 20:9 झ्यालत तोबो धापाज़ाकाव युतिकस यादोज़्‍याव च़ुसिद उउङ्गिज़्याव। पावलए ओपाँ बनै ओख्यो·वए नो छोर्‍या घेप्‍पा ङ़लत बाद स़ोंताल्‍यातिन तेके। नोलाई याच़ानाक सिउ दैकेर।
ACT 20:10 पावल रूतिन झरिद नो छोर्‍यालाई लाप्‍द प़ाइँलाई, “जेयुँ होलाँ जैचिके, उस॰ लिज़्या,” है दाद,
ACT 20:11 फरी रोत बाद येसुए उमिनताव भरेस केःद भाःद्याद, नम उसँवा पै परमेस्‍वरए ओपाँर सथैद ननी पुलुस्‍द बाके।
ACT 20:12 नो छोर्‍या मासिद ओबाँचिउए प़ाइँए यायुँ बनै होलाँ ताद झ़िमक लाँकेर।
ACT 20:13 पावल त्रोआसकिन अस्‍सोस सहरक पै उखँनी ज़ बान्‍या थ·रैद गेलाई ऱी जहाजल बाव परींसिक्‍यो। ओल अस्‍सोसकिन वाज़ ऱी जहाजल पसिन्‍या युँ ओदोवए,
ACT 20:14 नल ओल गेस दैसिद हाःकिन ऱी जहाजल गेस ज़ बाके। मितिलेने सहरल गेकेसोत,
ACT 20:15 हो पराःती खियस तापुए ओसोराक गेबाके। हुकिन सामोस तापुल बाद, हुकिनकाव हो पराःती मिलेतस सहरल गेकेस्‍के।
ACT 20:16 पावलए, ‘एसिया खन्‍दल गेबाकिन यरूसलेमलाव पेन्‍तिकोस पर्बदा गेमाताप्‍नाधुया’ लिद बनै घल्‍सिद एफिसस सहरदा माबान्‍या जैक्‍यो।
ACT 20:17 बुरू एफिससलाव मन्‍दलीलाव स़ेररालाई मिलेतसनी थार परींद ओल्‍योदा ज़ याथाक्‍यो।
ACT 20:18 एफिससलाव मन्‍दलीलाव स़ेरर पावलए ओल्‍योक याकेस्‍हुवत पावलए, “ङा एसियाल ङाकेस्‍हुव छ्यामकिन ङादोव भरी जे ज़ जेसैंज़्‍या। ङा जेस लिद,
ACT 20:19 यहूदीराए ल्‍योनी कुधु दुखर ङादैज़्‍यावत ब, जेजूँनी ङा सज़िम्‍सिद परमेस्‍वरए ओसेवा दाद ङाप़िलर ब ङाऱास्‍के।
ACT 20:20 जेलाई ओचाहित ल्‍यो पाँर सथैन्‍या माअन्‍कनिद ज़ जेदुप्‍सिज़्‍याव पो पोक, जेझ़िमक जेझ़िमक ब ङासथैचिके।
ACT 20:21 जेदेसलाव यहूदीर स़ोनो छुत जातलाव मिँरालाई, ‘जेपापलाई ऱास्‍द, परमेस्‍वरए ल्‍योदा सखैसिद, गेप्रभु येसु ख्रीसए ओपाँत जेयुँ सुहुप्‍चिके,’ लिद प़ाइँलाई ज़ ङारासथैके।
ACT 20:22 “अब ते छैंव पुरूसए है ओदाँव भैंःद यरूसलेमदा ङाबाज़्‍या। होङ केस्‍द ‘अइ ङातारिज़्‍या’ लिन्‍या ते ङामासैंए।
ACT 20:23 खाली जो सहरल ङाबादी ब छैंव पुरूसए, ‘नजुँ आव ज़ — दुखर दैन्‍या स़ोनो झ्‍यालखानाल लिन्‍या’ लिद है दाँज़्याव।
ACT 20:24 हैदी ब ङाजिउए मया माले, खाली ङाय़ेन भरी सुदुम्‍द, प्रभु येसुए ङालाई ओयाँव य़ेनलाई सयो·न्‍यात वाज़ ङायुँ थू ताज़्‍या। नो ओयाँव ङाय़ेन ते, ‘परमेस्‍वर गेल्‍योदा उयुँ ओगराँव’ है लिन्‍या चाव था सथैन्‍या ज़।
ACT 20:25 “अबकिन ते जे परमेस्‍वरए ओराज्‍यालाव पाँ जेल्‍योङाव ङासथैचिउ मिँराए फरी ङाङाः रँःव दैन्‍या जेमाले लिन्‍या ङासैंज़्या।
ACT 20:26 है जैद जे आछिम आव सैंचिके — जे सुवाराए तछा परमेस्‍वरए ओसजा जेदैकिन, नो ङा ङागल्‍ती तान्‍या माले।
ACT 20:27 परमेस्‍वरए ओगोइँ भरी ओपो·स ज़ जेल्‍योङ सथैद ङासयो·के।
ACT 20:28 “है जैद जे परमेस्‍वरए ओबगाललाव यालोम्‍बार, छैंव पुरूसए ओखतैचिउर, जेक्‍याँलाई जोगोइद ख्रीसए उझीए ओरालँःव परमेस्‍वरए ओमन्‍दलीलाई पाथस याराछोच्‍यो।
ACT 20:29 ङा ङाबाव छींनी जेबगालल छे छे ङम्‍सिउ प़र स्‍यासोर पसिद रन्‍दनी बन्‍द जैन्‍या लेर।
ACT 20:30 जेखार्लाव मिँराए मनी ख्वा ख्वार तँदा जैसिद परमेस्‍वरए ओपाँताव मिँरालाई याल्‍योदा जैन्‍याए जूँनी धुत पाँर ब पैन्‍या लेर।
ACT 20:31 है जैद जे सैंसिद लिच्‍यो। ङा जेल्‍योङाव स़ोंरिम भरी लाकनी रील परमेस्‍वरए ओपाँर तोबो तोबोनी पैद ङाप़िलर ङाऱासो ब तामेंःच्‍यो।
ACT 20:32 “अब ते ङा जेलाई परमेस्‍वरए ओपासल ङाझाःचिज़्‍या। गराँव ओपाँ ब जेस ज़ लिज़्‍या। नो पाँए जेलाई थ॰रिउ जैद, परमेस्‍वरए उमिनत लिज़्‍यावरास जेलाई मनी परमेस्‍वरनिकाव जुँ दैन्‍या जैचिरिज़्‍याव।
ACT 20:33 ङा जेस ङालिज़्‍याक सुए जेल्‍योनी ब पैसार क्‍वाराए लोभ ङामादोए।
ACT 20:34 जे ज़ जेसैंज़्‍या, ङा स़ोनो ङानैंरालाई ओचाहिज़्‍याव भरी आव ङाकुइए ज़ य़ेन दाद गेङासिके।
ACT 20:35 है जैद प़ाइँनी ज़ जेल्‍योङ मनी ङासतैंके — गेकुइए य़ेन बनै दाद माधुन्‍यारालाई मनी सघैव ताके। आवए जूँनी गेप्रभु येसुए ओपाँ ब तामेंःच्‍यो — ‘छुतए ल्‍योनी दैन्‍या देखा, छुतलाई यान्‍या पाथ लिज़्‍या।’ ”
ACT 20:36 पावल आव भरी पाँद उघूँदानी तिकिसिद नो भरिरास प़ाइँए पोंखारिकेर।
ACT 20:37 हाःत ज़ यायुँ माचाव दाद पावललाई लाप्‍द, माइँ दाद प़ाइँ ज़ घर्केर।
ACT 20:38 ‘जे ङाङाः फरी रँःव दैन्‍या जेमाले’ है ओल्‍योए, होए ज़ प़ाइँरानी यायुँ माचाव जैद ओरायो। हाःत ज़ पावललाई ऱी जहाजक पै सारैनाकेर।
ACT 21:1 गे नोरास भाःसिद पावलस ऱी जहाजल पसिद एकसब्‍द्या कोस तापुदा गेबाके। हो पराःती रोदस तापुल गेबाके। नकिन पतारा सहरल केस्‍द,
ACT 21:2 फोनिके खन्‍ददा बान्‍या ऱी जहाजलाई दैद होल ज़ गेबाके।
ACT 21:3 साइप्रस तापु रैंःन्‍याक केस्‍द, तापुकिन दखिनलाव घ्याँ बाद सिरिया खन्‍द पै सिधा गेबाके। नो जहाजलाव मालसामान हाइन्‍याए जूँनी तुरोस सहरल ज़ गेथकनिके।
ACT 21:4 नलाव यायुँ हुबोरास दैसिनाद नोरास सात दिन गेलिके। नाः भरिल नोराए परमेस्‍वरए उपुरूसनी पावललाई, “यरूसलेमदा बान्‍या माःक,” है दाव ज़ यानैज़्‍याव।
ACT 21:5 है यादोज़्‍यावत ब जहाज बान्‍या बेला ओतावत गे ननी पुलुस्‍द फरी गेबाके। नोर खेपा मेंमार याज़ारास ज़ गेलाई सहरनी जहाजक पै सारैसिहुकेर। समुन्‍द्र छ्योक गेघूँदानी तिकिसिद पोंखारिद,
ACT 21:6 प़ाइँलाई जेरो दाद जहाजल गेपसिके। नोर ओल्‍द याझ़िमदा बाकेर।
ACT 21:7 है जैद तुरोसनी तोलेमाइस सहरल बाद नलाव यायुँ हुबोरास दैसिद, तरी नोरास गेलिके।
ACT 21:8 नकिन हो पराःती फरी जहाजल बाद कैसरिया सहरल केस्‍द जहाजतिन हाइसिद नो सात जनारासकाव परमेस्‍वरए ओपाँ सथैज़्‍याव फिलिपए उझ़िमक बाद नोस ज़ गेलिके।
ACT 21:9 नोए ओज़ार चार जना रे मादोताव मेंमार यालिज़्‍याव। नोर प़ाइँ परमेस्‍वरए उपुरूसनी पाँज़्यावर यालिज़्‍याव।
ACT 21:10 फिलिपस गेल्‍यो स़ोंला चार दिन गेतावत तोबो अगाबस यादोज़्‍याव अगमबक्ता यहूदिया खन्‍दनी गेस दैसिहुद,
ACT 21:11 पावलए ओवाँःफो बैद ओल ज़ उखँ उकुइर किद, “छैंव पुरूसए है लिज़्‍या, ‘यरूसलेमलाव यहूदीराए आव वाँःफोए ओर्गेलाई अइ जैद किद, छुत जातलावरालाई सूँपिरिज़्‍यार,’ ” है लिके।
ACT 21:12 नोए ओपाँ थैद, पावललाई, “यरूसलेमदा ताबानी,” है लिद गे स़ोनो नलाव यायुँ हुबोराए है दाव ज़ गेनैके।
ACT 21:13 खाली पावलए झन, “जे काता जेजैसिज़्‍याव इताव, घर्द्याद नदा बान्‍या ङायुँ केःद जेयाँज़्‍याव? ङा किसिन्‍या वाज़ माःक, यरूसलेमल बाद प्रभु येसुए उमिनत सिन्‍या ब तयार ज़ ङालिज़्‍या,” है दासिक्‍यो।
ACT 21:14 है जैद गे कै जैद ब गेमासभैंःधुवए, ‘परमेस्‍वरए उयुँ ज़ ओताक’ लिद च़िम गेदोके।
ACT 21:15 हुकिन ते गे भरी झाःसिद यरूसलेमदा बान्‍या गेथूसिके।
ACT 21:16 कैसरियालाव यायुँ हुबोर मनी तोबो ऩेब्‍लो गेस ज़ बाद यरूसलेमदा मनासोनए उझ़िमक पै लाँसिकेर। नो मिँ साइप्रसनी हुव, ङ़ादाकिन येसुए ओपाँत हुव मिँ ज़ ओल्‍यो। है जैद नोए ओल्‍योक गेबासिके।
ACT 21:17 यरूसलेमलाव यायुँ हुबोराए गेलाई रँःद खुसी ताद चावस ज़ सुम्सिकेर।
ACT 21:18 हो पराःती गे पावलस याकूबए ल्योदा गेदैसिनाके। मन्दलीलाव स़ेरर मनी याकूबए ल्योक दुप्‍सिद यालिज़्‍याव।
ACT 21:19 पावलए नोरालाई जेरो दाद, परमेस्‍वरए ओय़ेननी ज़ छुत जातलाव मिँरालाई याक्‍याँताव ओदोव भरी तोबो तोबोनी है दाद यासथैक्‍यो।
ACT 21:20 नो पाँ थैद नोर परमेस्‍वरए ल्‍योदा बनै खुसी ताद धन्‍याबाद चरैःकेर। नकिन पावललाई, “भाइ, यहूदी जातलाव मिँराए मनी हजारका हजारए ज़ येसुए ओपाँत यायुँ हुप्‍के। खाली नोराए मोसाए ओकानुन ब बनै सघ्‍योःज़्‍यार।
ACT 21:21 नँ नजूँनी ब थैद नैर। ख्वा ख्वाराए नँलाई, ‘पावलए मोसाए ओपाँकिन तँदा जैसिद छुत देसल लिज़्याव यहूदीरालाई याचलन भरी ऱासो परींद याज़ारालाई मनी ‘क्‍याल्‍न्‍या सरेस जेमाराजैदी ब ताए’ है यादोज़्‍याव दी,’ है दींज़्‍यार।
ACT 21:22 गे कै लिन्‍या ओताव? अब ते ‘हुके दी’ लिन्‍या ब थैन्‍या लेर।
ACT 21:23 है जैद अइ जैव ताके — गेसकाव चार जना मिँराए मोसाए ओकानुन मितावनी किर्‍या झाःद नैर।
ACT 21:24 पुजारीराए ल्‍योक चोखोइसिद याचेम एन्‍न्‍या वाज़ बाँखी लिज़्‍या। है जैद नँ नोरास बाद यास ज़ चोखोइसिद नलाव खर्च भरी नँ ज़ फो·व ताके। हो ताकिन नो याथैव पाँ भरी ‘माथ॰रिउ ची ओल्‍यो’ है लिन्‍या लेर। ‘मोसाए ओकानुन ब ओदोज़्‍याव ओल्‍यो’ लिन्‍या ब सैंन्‍या लेर।
ACT 21:25 खाली छुत जातलाव यायुँ हुबोराए दान्‍या य़ेन ते आव ज़ थ·रैद सर्द गेनै — अङग्‍यालाई चरैःसिउ ज़्‍यावर माज़्यान्‍या, झी माज़्यान्‍या, ओधें फर्लेद सैःसिउ स्‍याकरी माकैन्‍या, पातर्‍या पातर्नी ब माजैसिन्‍या,” है दोकेर।
ACT 21:26 है जैद हो पराःती पावलए नो चार जना मिँरालाई ध्‍यान झ़िमक लाँद नोरास चोखोइसिद, ‘सात दिनत किर्‍या खेम्‍द मार ब चरैःन्‍या गेले’ लिद भकल दोकेर।
ACT 21:27 नो सात दिन ओयो·नावत एसिया खन्‍दनी हुव यहूदीराए पावललाई ध्‍यान झ़िमल रँःद नकाव मिँरालाई मचैद, पावललाई क्‍योःद,
ACT 21:28 “अ इस्राएली गेदाज्‍यु भाइर, चाँदो हुचिके। आकाव मिँए संसार भरी दुलिद गेजातलाई सज़िम्‍द, मोसाए ओकानुनलाव पाँलाई ख्याद, ध्‍यान झ़िमए उमिन ब बले·द्यासिज़्‍याव। झन ग्रीक मिँरालाई ध्‍यान झ़िमल रैद चोखो गेपो ब छुद्यासिक्‍यो,” है दाद यारामचैकेर।
ACT 21:29 नोर ङ़ादा सहरल त्रोफिमस यादोज़्‍याव एफिससलाव मिँलाई पावलस यारँःवए, ‘ध्‍यान झ़िमल मनी रैद नैज़्‍याखेहो’ लिन्‍या यासम्जिज़्याव।
ACT 21:30 है जैद सहरलाव मिँर बनै ज़ मचिद प़ाइँनी ज़ धोंःहुद, पावललाई क्‍योःद, ध्‍यान झ़िमनी स़ेल्‍द, य़ामर गल्केर।
ACT 21:31 नोलाई सैःव यापैंज़्याक ज़ नकाव रोमी सेनापतीए ‘यरूसलेम भरी बनै खैलानी बैला ताके दी’ लिन्‍या थैद,
ACT 21:32 हतप्‍त ज़ सिपाईंर स़ोनो कप्‍तानरालाई लाँद नो मचिज़्‍यावराए ल्‍योदा धोंःनाकेर। नो माहोल्‍याराए नोर याहुज़्‍याव रँःद पावललाई प़ोन्‍या च़िम दोकेर।
ACT 21:33 हाःत ज़ नो सेनापतीए पावललाई क्‍योःद ऩेब्‍लो साँगलए किव परींद, माहोल्‍यारालाई, ‘आव मिँ सु ओताव, काता य़ेन ओदोव?’ है लिद ओरासुधिक ते,
ACT 21:34 ख्वाराए ‘आव ज़’, ख्वाराए ‘हो ज़’ लिद बनै राउँनी झ्याउँ लिकेर। सुए यापाँ ब ओमाथ·रैधुवए उसिपाईंरालाई पावललाई थानाक लाँव यापरींक्‍यो।
ACT 21:35 थानालाव थप्‍काक याकेसोत माहोल्‍यार यारिसए बनै ज़ याछुइसिहुवए सिपाईंराए पावललाई छींद लाँकेर।
ACT 21:36 नो माहोल्‍यार थानाक पै याछीं याछीं ज़ हुद, “आवलाई खदम ज़ ख्यान्‍या,” है लिद बनै ज़ क़िकेर।
ACT 21:37 हाःत ज़ पावललाई थानाल लाँव यापैंज़्‍याक, पावलए सेनापतीलाई, “ङा नँस तोबो पाँव ङादैक,” है ओदोक ते, नो सेनापतीए, “नँ ग्रीक पाँ कातानी नसैंव?
ACT 21:38 ङा ते नँलाई छुत ची है ङाल्‍यो। नँ नो तालाङाव सरकारकिन तँदा जैसिद चार हजार गुन्‍दारालाई मचैज़्‍याव इजिपी माःक रो?” है ओदोक ते,
ACT 21:39 पावलए, “ङा हो माःक। ङा ते किलिकियालाव तार्सस सहरल जर्मिउ यहूदी ची। नो पो बनै उमिन थासो, छ्याल्‍ल्‍यु सहर ब माःक। नँस ङाबिन्‍ती तोबो लिज़्‍या — आव माहोल्‍यारास तखेप पाँव ङादैक,” है ओदोक ते,
ACT 21:40 नो सेनापतीए पावललाई भैंःदिक्‍यो। पावल थप्‍कात च्‍याँःसिद, ‘च़िम दोचिके’ लिद उकुइए सान दाद याएक्‍यो। प़ाइँ च़िम यादोवत पावलए हिब्रू खामनी अइ लिद पाँके,
ACT 22:1 “अ ङादाज्‍यु भाइर, ङास़ेरर, ङा ङापाँ ब तखेप थैद्याँचिके,” है ओरादोक ते,
ACT 22:2 हिब्रू खामनी ओपाँज़्‍याव थैद माहोल्‍यार झन ज़ चाप चुप ताकेर।
ACT 22:3 है जैद पावलए, “ङा यहूदी जातलाव मिँ ज़, किलिकियालाव तार्सस सहरल ङाजर्मिउ। ननी सरिद आल यरूसलेमल ङाङासिके। गमलिएलए उसिस ब ताद, गेजिज्‍यु बाज्‍युकिनकाव हुव चलन भरी माबिरैद ज़ पैसिद, जे माँःती परमेस्‍वरए ल्‍योदा बनै ध्‍यावना ङादोज़्‍याव।
ACT 22:4 येसुए ओपाँत बाज़्‍याव खेपा मेंमार यामासिवा पै याखिरी पसिद, ख्‍वा ख्‍वारालाई क्‍योःद झ्यालखानाल ब ङाराझाःके।
ACT 22:5 अछादी प्रधान पुजारी स़ोनो घ्योःव कचरीलाव स़ेररालाई यारासुधिचिके, याज़ सैंज़्‍यार। तछा नोराए ल्‍योनी दमस्‍कसलाव यहूदी दाज्‍यु भाइराए यामिनताव चिथील नलाव यायुँ हुबोरालाई मनी क्‍योःद सजा यान्‍याए जूँनी यरूसलेमदा किद रैन्‍या हक दैद नदा ज़ ङाबाके।
ACT 22:6 “येमत ङाबाज़्‍याक अधमर लाक दमस्‍कस ङाकेस्‍नाक, उमँःजानी बनै मी झीःन्‍या ज़गै नमतिन हुद ङाल्‍योक बनै म्‍याल्‍याकनी मिलिक ताके।
ACT 22:7 हाःत ज़ नामक ङाधलिउत, कातानी तोबो गा अइ लिद ओपाँज़्‍याव ङाथैके, ‘अ साऊल, अ साऊल, नँ काराव ङाखिरी नपसिज़्‍याव?’ है ओदाँक ते,
ACT 22:8 ‘नँ सु प्रभु?’ है ङादोके। नो गा फरी हुद, ‘ङा नो ङाखिरी नपसिज़्‍याव नासरतलाव येसु ज़’ है दाँक्‍यो।
ACT 22:9 नो ङास बाज़्‍याव ङानैंराए ते ज़गै वाज़ रँःकेर, ङास पाँज़्‍याव गा ते माथ·रैधुकेर।
ACT 22:10 हाःत ज़, ‘ङा काता य़ेन दान्‍या, प्रभु?’ है ङादोक ते, ‘नँ सोद दमस्‍कसल बान्‍केदा, नङ ज़ नँ दान्‍या य़ेन भरी थैन्‍या नले,’ है दाँक्‍यो।
ACT 22:11 नो ज़गैए ङालाई अन्‍दनी मुन्‍द ओजैनावए ङानैंराए ङाकुइनी दोरैद दमस्‍कसल लाँनाकेर।
ACT 22:12 “नल तोबो हननिया यादोज़्‍याव मोसाए ओकानुन माबिरैद दाज़्याव धर्मी मिँ उलिज़्‍याव। नलाव यहूदीराए नोलाई बनै चाव थ·रैद यानैज़्‍याव।
ACT 22:13 नो मिँ ङाल्‍योक हुद, ‘अ भाइ साऊल, नमी ओरैंःक,’ है ओदाँव प़ाइँना ङामी फैसिद रँःधुन्‍या ङाताके।
ACT 22:14 “हाःत ज़ नोए, ‘गेजिज्‍यु बाज्‍युकिनकाव गेपरमेस्‍वरए नँलाई उयुँलाव मिताव पाँर सतैंन्‍या जूँनी खतैद नैनिउ। छैंव ओज़ा नल्‍योक सरैंःद्याद, ओर्गा थैन्‍या ब जैनिक्‍यो।
ACT 22:15 है जैद आव नरँःव नथैव भरित प़ाइँ मिँराए ङ़ाक येसुए ओसाची तान्‍या नले।
ACT 22:16 है जैद मातेन्‍सिद ज़ नँ आख सोद नपापलाई छेन्‍याए जूँनी येसुए उमिन हाइद ऱील सछैंसिन्‍के,’ है दाँक्‍यो।
ACT 22:17 “नकिन छींनी यरूसलेमदा ओल्‍द बाद, तछा ध्‍यान झ़िमल ङापोंखारिज़्‍याक ज़ नल झजल्‍किद, येसुलाई ङारँःके।
ACT 22:18 नोए, ‘नँ चाँदो ज़ घल्‍सिद, यरूसलेमनी हाइसिद बान्‍के। आल ङाजूँनी नराएज़्याव गोहाई भैंःन्‍या मालेर,’ है ओदाँक ते,
ACT 22:19 ङा फरी, ‘काराव प्रभु? याज़ सैंज़्‍यार — ङा यासकाव ताद धर्मसास्‍त्र झ़िम झ़िमक बाद नपाँ दोज़्‍याव भरिरालाई साप्‍द क्‍योःद कैताक प़ोद झ्यालखानाल ब ङाराझाःज़्‍याव।
ACT 22:20 नसाची स्‍तिफनसलाई लुँए झेःद यासैःव बेलाक ङा मनी नोरास खैद नक च्‍याँःसिद नो झेःज़्‍यावराए याक्‍वार समारिद ङाराएज़्‍याव,’ है ङादोके।
ACT 22:21 “हाःत ज़ येसुए, ‘नँ घबानी। तादा तादाङ लिज़्‍याव छुत जातलाव मिँराए ल्‍योदा ङापरींनिरिज़्‍या,’ है दाँक्‍यो।”
ACT 22:22 नो माहोल्‍याराए नाःपै पावलए ओपाँ चावस ज़ थैकेर। खाली छुत जातराए यामिन ओहाइव प़ाइँना माहोल्‍यार बनै मचिद, “निताव मिँलाई काताए उजूँनी नैन्‍या? बुरू सैःकिन पाथ लिज़्‍या,” है लिद,
ACT 22:23 याक्वार सिउःद ख्याद, धुइरो ब सिमे सिमे नमदा ख्याद बनै क़िकेर।
ACT 22:24 है जैद सेनापतीए उसिपाईंरालाई पावललाई थानाल लाँव परींद, “काताए जूँनी नाः याक़िज़्‍याव? आवलाई रीःद खोले·व ताके, कसा मापाँए,” है दाद,
ACT 22:25 पावललाई किद रीःव यापैंज़्‍याक, नकाव च्‍याँःसिद लिज़्‍याव कप्‍तानलाई पावलए, “ङा रोमी नागरिकलाई ङागल्‍ती माथ·रैद अइज़ रीःन्‍या ओताज़्‍याव रो?” है दोक्‍यो।
ACT 22:26 नो कप्‍तानए नो पाँ थैद सेनापतीलाई, “कै जैन्‍या नपैंज़्याव? आव मिँ ते रोमी नागरिक ची ओल्‍यो, नमासैंए रो?” है ओदोक ते,
ACT 22:27 नो सेनापती पावलए ल्‍योक बाद, “साचो नँ रोमी नागरिक रो?” है ओदोक ते, “ङा रोमी नागरिक ज़,” है दोक्‍यो।
ACT 22:28 नकिन नो सेनापतीए, “ङा कुधु पैसार फो·द वाज़ नागरिक ङाताके,” है ओदोक ते, पावलए, “ङा ते रोमी नागरिक ज़ ङाजर्मिउ ची,” है दोक्‍यो।
ACT 22:29 हाःत ज़ पावललाई खोले·ना हुवर नो पाँ थैद याछींदा तेन्सिकेर। सेनापती मनी, ‘अऩाकल ज़ रोमी नागरिकलाई ची ङाकिउ ओल्‍यो’ लिद छे·के।
ACT 22:30 हो पराःती नो सेनापतीए पावललाई पला·द, ‘यहूदीराए काराव आवलाई खत यालैज़्याव’ लिद थ·रैन्‍याए जूँनी मुख्या पुजारीर स़ोनो घ्योःव कचरीलाव मिँरालाई दुप्‍द, पावललाई याङ़ाक सच्‍याँक्‍यो।
ACT 23:1 पावलए नो कचरीलाव मिँराए ल्‍योदा भाल्‍सिद अइ लिद जवाप याएक्‍यो, “दाज्‍यु भाइर, ङा आःपै परमेस्‍वरए ओङ़ाक छैंव युँस ज़ ङालिज़्‍या,” है ओरादोव प़ाइँना,
ACT 23:2 प्रधान पुजारी हननियाए नकाव च्‍याँःसिद लिज़्‍यावरालाई पावलए ओयाःत लफरैव यापरींक्‍यो।
ACT 23:3 हाःत ज़ पावलए उरिस चोद, “ए पाखात वाज़ चाव जैसिज़्‍याव, नँलाई तछा परमेस्‍वरए लफरैनिरिज़्‍याव। नँ मोसाए ओकानुननी फाल्‍न्‍या जैसिज़्‍यावए कै जैद नो कानुनलाई उल्‍तैद ङालाई प़ोव नरापरींज़्‍याव?” है ओदोक ते,
ACT 23:4 नकाव च्‍याँःसिद लिज़्‍यावराए, “नँ कै जैद नाःल्‍दिउ परमेस्‍वरनी खतैसिउ प्रधान पुजारीस याः नदोज़्‍याव?” है यादोक ते,
ACT 23:5 पावलए, “दाज्‍यु भाइर, नो प्रधान पुजारी ओल्‍यो लिन्‍या ङा ङामासैंए। धर्मसास्‍त्रल मनी इताव सर्सिउ लिज़्‍या, ‘राज्‍या चलैज़्‍याव घेप्‍पाराए याङ़ैत माचाव पाँन्‍या माताए।’ ”
ACT 23:6 नो घ्योःव कचरील तभा सदुकी दललावर, तभा फरिसीर यालिज़्‍याव सैंद, याङ़ाक च्‍याँःसिद प़ाइँलाई, “अ दाज्‍यु भाइर, ङा फरिसीए ओज़ा फरिसी ज़। ङा, ‘सिद मनी अजम्‍बरी जुनीए आस लिज़्‍या,’ है ङालिज़्‍यावनी ज़ आछिमकाव मुद्दाल ङापरिके,”
ACT 23:7 है ओरादोव प़ाइँना नलाव सदुकीर स़ोनो फरिसीर या या माखैद बनै खर्लेसिकेर।
ACT 23:8 सदुकीराए ते, ‘अजम्‍बरी जुनी ब माले, परमेस्‍वरए ओचाकर्‍यार ब मालेर, पुरूसर ब मालेर’ है यालिज़्‍याव। फरिसीराए फरी, ‘कै जैद ओमालिज़्‍याव? नो भरी लिज़्‍या ज़’ है यालिज़्‍याव।
ACT 23:9 है जैद नोर बनै राउँनी झ्याउँ जैद, फरिसीरासकाव यासास्‍त्रीर च्‍याँःसिद बनै रसिद, “आवए माचाव काता दाद ओनैज़्‍याव? है उलिज़्‍याव मिताव परमेस्‍वरए ओचाकर्‍या कितर परमेस्‍वरए उपुरूस हुद ओलस ज़ ओपाँव ताक्‍या,” है लिकेर।
ACT 23:10 है जैद या याज़ माखैद झन ज़ मचिनाद पावललाई हो ज़ स़ेल्‍न्‍या, हो ज़ छुइन्‍या जैकेर। निताव रँःद नो सेनापतीए सैःर्‍या लिद छे·द उसिपाईंरालाई पावललाई करस ज़ पले·व परींद थानाक लाँक्‍यो।
ACT 23:11 हो छ्याम रील ज़ प्रभु पावलए ओङ़ाक सरैंःसिद, “नयुँ तासतेयो, नयुँ होलाँ ओताक। किताव आल यरूसलेमल ङासाची जैसिद ङापाँ नरासथैव, हिताव ज़ रोमल मनी ङासाची नतानारिज़्‍या,” है दोक्‍यो।
ACT 23:12 हो पराःती छकाल्‍न्‍या यहूदीर दुप्‍सिद पावललाई सैःन्‍या बुद्धी कलैद, “नोलाई गेमासैःवा पै ज़्‍यान्‍या ब गेमाज़्‍यु, ओन्‍या ब गेमाओ,” लिद किर्‍या ब झाःकेर।
ACT 23:13 निताव किर्‍या झाःज़्यावर चालीसकिन यादा ज़ याल्‍यो।
ACT 23:14 नोर मुख्या पुजारीर स़ोनो स़ेरराए ल्‍योक बाद, “गे भरी पावललाई गेमासैःवा पै काता ज़ ज़्‍यान्‍या गेमाले लिद किर्‍या झाःद गेनै।
ACT 23:15 है जैद जे घ्योःव कचरी दाव जैसिद, सेनापतीए ल्‍योदा ‘पावललाई चावस फाल्‍न्‍याए जूँनी आदा रैके’ लिद था परींव ताके। हो बेलाक ज़ गे येमक वैंसिद नोलाई गेसैःरिज़्‍या,” है दाद सल्‍ला याराएकेर।
ACT 23:16 हाः बेलाक पावलए ओभान्‍जए यासल्‍ला भरी थैद, थानाक बाद ओबागे पावललाई है दोनाक्‍यो।
ACT 23:17 पावलए फरी कप्‍तानलाई खुल्‍द, “आव छोर्‍यालाई सेनापतीए ल्‍योक लाँद्याव ताके, होस तोबो पाँ पाँरिज़्‍या दी,” है ओदोक ते,
ACT 23:18 नोए नो छोर्‍यालाई सेनापतीए ल्‍योक लाँद, “आवए ओपाँ तोबो लिज़्‍या दी। कैदी पावलए ङालाई नल्‍योक सारैव परींनाक्‍यो,” है ओदोक ते,
ACT 23:19 नो सेनापतीए नो छोर्‍यालाई उकुइनी क्‍योःद तँदा अलगज़ा लाँद, “काराव, ङालाई है दाँके,” है दोक्‍यो।
ACT 23:20 नकिन नो छोर्‍याए, “पराःती यहूदीर घ्योःव कचरी दाव जैसिद, ‘पावललाई चावस फाल्‍न्‍याए जूँनी आदा रैके’ लिद नँस बिन्‍ती दोरिज़्यार दी।
ACT 23:21 खाली नँ नोराए यापाँ ताभैंःनी। चालीसकिन यादाङाव मिँर पावललाई सैःन्‍या लिद येमक वैंसिद लेर। नोराए, ‘पावललाई गेमासैःवा पै ज़्‍यान्‍या ब गेमाज़्‍यु, ओन्‍या ब गेमाओ,’ लिद किर्‍या झाःद नैर। नँ नपाँलाई वाज़ कींद नैर,” है ओदोक ते,
ACT 23:22 नो सेनापतीए, “आव पाँर ङालाई है नदाँव सुलाई ज़ है तारादोयो,” है दाद नो छोर्‍यालाई उझ़िमदा परींक्‍यो।
ACT 23:23 नो सेनापतीए ऩेब्‍लो कप्‍ताननिलाई खुल्‍द, “पते रील नौ बजेवाक, जिन पावललाई कैसरियादा लाँन्‍याए जूँनी खँनी बान्‍या सिपाईंर ऩेसय, घोरा चेप्‍द बान्‍यार सत्तरी स़ोनो ज़लरास बान्‍यार ऩेसय जना तयार याराजैचिन्‍के।
ACT 23:24 पावललाई मनी घोरात जोगोइद हाकिम फेलिक्‍सए ल्‍योदा पाथस सारैव ताके,” है निदोक्‍यो।
ACT 23:25 नो सेनापतीए फरी, हाकिमए ल्‍योदा तोबो चिथी अइ लिद सर्द परींक्‍यो,
ACT 23:26 “ङा क्‍लौदियस लुसियसए ङाल्‍योनी, नँ माननिय हाकिम फेलिक्‍सलाई जेरो लिज़्‍या।
ACT 23:27 आव नल्‍योदा ङापरींज़्‍याव मिँलाई यहूदीराए क्‍योःद सैःव यापैंज़्‍याव। रोमी नागरिक ज़ ओल्‍यो लिन्‍या सैंद ङा ङासिपाईंरास बाद नोलाई ङाजोगोइके।
ACT 23:28 ओगल्‍ती काता ओताव लिद थ·रैन्‍याए जूँनी यहूदीराए घ्योःव याकचरील ब ङालाँके।
ACT 23:29 नल याधर्मए उजूँनी वाज़ यामाखैज़्‍याव ओल्‍यो लिन्‍या ङाथ·रैके। नोलाई झ्यालखानाल झाःन्‍या स़ोनो सैःन्‍या सजा स्‍यासो ते काता ज़ ङामादैके।
ACT 23:30 हितावत ब यहूदीराए नोलाई सैःन्‍या बुद्धी याकलैज़्‍याव ओल्‍यो। निताव ङासैंवत हतप्‍त ज़ नल्‍योदा ङापरींके। ओङ़ैत पाँज़्‍यावरालाई मनी, ‘जेमुद्दा कातार उलिकिन हाकिमए ल्‍योदा लाँचिके,’ लिद हुकुम ङाराएके। ङापाँ आःज़, जेरो।”
ACT 23:31 है जैद नो सेनापतीए है ओरादोव मिताव ज़ सिपाईंराए हो छ्याम रील ज़ पावललाई एन्‍तिपात्रिस सहरक पै लाँकेर।
ACT 23:32 हो पराःतीकिन नो खँनी बाज़्‍यावर ओल्‍द, घोरा चेप्‍द बाज़्‍यावरालाई वाज़ पावलस यारापरींकेर।
ACT 23:33 नो घोरा चेप्‍द बाज़्यावर कैसरियाल केस्‍द हाकिमलाई चिथी बुझैद पावललाई मनी बुझैकेर।
ACT 23:34 है जैद नो हाकिमए नो चिथी प़रिद, पावलए उजिल्‍ला सुधिद किलिकियालाव ओल्‍यो लिन्‍या सैंद,
ACT 23:35 पावललाई, “नजगर्‍यार मनी याहुवत आव नमुद्दा ङाथैया,” है दाद पावललाई हेरोदए ओदरबारल नैव यापरींक्‍यो।
ACT 24:1 पाँच दिन ओतावत प्रधान पुजारी हननिया तोबो ऩेब्‍लो यहूदीराए यास़ेररास कैसरियाल हुद, हाकिमए ल्‍योक बाद पावलए उजूँनी उजुर दोनाकेर। नोरास तोबो तर्तुल्‍लस यादोज़्‍याव वकिल ब रैद यानैज़्‍याव।
ACT 24:2 है जैद मुद्दा चलैद पावललाई यारैवत तर्तुल्‍लसए अइ लिद पाँके, “माननिय फेलिक्‍स ज्‍यू, नँ गेपोङाव हाकिम ताद, नदयानी गेदेस बनैद नयासिउए गे प़ाइँङावरालाई बनै सन्‍च ताद फाबिउ ज़ गेलिज़्‍या।
ACT 24:3 होए उजूँनी गे प़ाइँनी ज़ नगुनर मामेंःद मानिउ ज़ गेलिज़्‍या।
ACT 24:4 खाली आछिम नर्च्‍या मासैःद गेल्‍योदा दया दाद आव तोबो ज़िम्‍ज़ा गेपाँ वाज़ थैद नयासिकिन ताखेहो है गेलिज़्‍या।
ACT 24:5 खास गेपाँ आव ज़ — आकाव नल्‍योक रैद यानैज़्‍याव मिँ ते बनै नाल क़्याव माचाव मिँ लिज़्‍या। नासरी दललाव यागुर्बा ताद संसार भरिल दुलिद यहूदीरालाई बनै ज़ यामचैज़्‍याव।
ACT 24:6 ध्‍यान झ़िमलाई झन झुथो जैव ओपैंज़्‍याक बल्‍ल गेक्‍योःके। [मोसाए ओकानुननी गे ज़ फालो गेपैंक ते,
ACT 24:7 कप्‍तान लुसियस हुद झन नोलाई गेल्‍योनी जबरज्‍यास्‍ती नैंद,
ACT 24:8 गे ओजगर्‍यारालाई मनी नँ नल्‍योदा हुव परींसिक्‍यो।] है जैद आवलाई नबिचारिक उजुर गेदोव पाँ भरी साचो ज़ ओल्‍यो लिन्‍या थ·रैन्‍या नले,” है दोक्‍यो।
ACT 24:9 नोस हुव यहूदीराए मनी ओपाँ जोर्दिकेर।
ACT 24:10 हाःत ज़ हाकिमए पावललाई सान दाद ओएक ते पावलए अइ लिद पाँके, “माननिय हाकिम, नँ आव राज्‍याल कुधु बर्सकिन ज़ मिँरालाई नराफाल्‍ज़्‍यावए ङा नङ़ाक ङायुँ हुप्‍द ज़ ङापाँज़्‍या।
ACT 24:11 ङा यरूसलेमदा परमेस्‍वरए ओध्‍यान दाना ङाबाव आछिम बाह्र दिन वाज़ ताके। आव ङापाँ साचो सैं माःक नँ ज़ थ·रैधुन्‍या नले।
ACT 24:12 नाः भरिल ङाकिन तँदाङावराए ना ङा सुरास ध्‍यान झ़िमल ङाखर्लेसिज़्याव यारँःनाव, ना धर्मसास्‍त्र झ़िमराल ना सहरल मिँरालाई ङारामचैज़्याव यारँःनाव।
ACT 24:13 है जैद आव ङाङ़ैताव झाःव यापैंज़्‍याव पाँर काता ज़ थ॰रिन्‍या माले।
ACT 24:14 खाली आव तोबो भन्‍या हैज़, गेजिज्‍यु बाज्‍युकिनकाव ओसेवा गेदोहुज़्‍याव परमेस्‍वरलाई ङा मनी साःरो येमनी ओसेवा ङादोज़्‍या। आवराए झन ‘तँनिकाव येम’ है दाँज़्‍यार। है यादाँदी ब मोसाए ओकानुन स़ोनो अगमबक्ताराए यासरो पाँ भरित ङायुँ हुप्‍ज़्या।
ACT 24:15 आवराए यादोज़्‍याव मिताव ङा मनी ‘तछा चाव माचाव दाज़्याव प़ाइँ मिँर परमेस्‍वरए ओङ़ाक च्‍याँःसिरिज़्‍यार,’ है लिद परमेस्‍वरए ल्‍योदा आस ङादोज़्‍या।
ACT 24:16 है जैद नो पाँर चेतैद ङा परमेस्‍वरए ओङ़ाक स़ोनो मिँराए याङ़ाक छैंव युँस दान्‍या वाज़ धामा ङादोज़्‍या।
ACT 24:17 “है जैद ङा छुत देस जीदा ऩेरिम स़ोंरिम भरी दुलिद, ‘ङादेसलाव दुखिरालाई सघैद परमेस्‍वरलाई मनी भिती चरैःन्‍या’ लिद फरी यरूसलेमल ङाहुके।
ACT 24:18 होए उजूँनी ध्‍यान झ़िमल ङालिज़्‍याव बेलाक यहूदीराए दैनाकेर। हो बेलाक ज़ भर चोखोइसिद ङालिज़्‍याव, ध्‍यान झ़िमल खैलानी बैला ब काता ज़ ओमालिज़्‍याव। हाःत ज़ एसिया खन्दनी हुव यहूदीराए ङालाई सरेस्‍द नलाव मिँरालाई यारामचैकेर।
ACT 24:19 नोराए ङाङ़ैत झाःन्‍या पाँ कातार ओल्‍यो ताकिन नोर याज़ आछिम हुद उजुर दाव परिन्‍या ओल्‍यो।
ACT 24:20 अथबा, यहूदीराए घ्योःव याकचरील काता ङागल्‍तीर यादैव ताकिन आकाव हुद लिज़्‍यावराए ओपाँरक ते।
ACT 24:21 सैं नो कचरीलाव सिउनी सैंसिन्‍याए जूँनी ङापाँवनी आछिमकाव मुद्दा याचलैज़्‍याव ओताव?” है यादोक्‍यो।
ACT 24:22 हाःत ज़ नो हाकिम फेलिक्‍सए नाः थैद, “ङा आव जेपाँ भरी कप्‍तान लुसियस उहुवत ङाबिचारिया,” है दाद भाःसिउ यापरींक्‍यो। ओल ते उपुर्कावराकिन येसुए ओपाँ सर्बा ज़ ओसैंज़्‍याव।
ACT 24:23 है जैद नोए पावललाई गुन्‍याए जूँनी सिपाईंराए याकमान्‍दरए उजिम्‍बाल नैद, “आवलाई जाँ आदा होदा ल्‍यो ब यान्‍या, दैसिना हुज़्‍याव ओनैंरालाई मनी तारावैंयो,” है लिद हुकुम एक्‍यो।
ACT 24:24 ऩेला स़ोंलावात फेलिक्‍स, यहूदी ओज्‍या द्रसिल्‍लास हुद, येसु ख्रीसनिकाव येम किताव उलिज़्‍याव लिद चावस थैन्‍याए जूँनी पावललाई खुल्‍द पलासो परींक्यो।
ACT 24:25 है जैद पावलए ओअर्थ भरी पलास्‍द्याद, परमेस्‍वरए उयुँलाव मिताव य़ेन दान्‍या, तहस लिन्‍या, स़ोनो परमेस्‍वरनिकाव फाल्‍न्‍या छ्यामए उजूँनी उनिसथैवत, फेलिक्‍सए उयुँल बनै छे·द, “आछिम नाःत ज़ नैकेदा बान्‍के। बुरू तछा फरी ङाधाःक ङाकिन्‍यादा नसथैना,” है दोक्‍यो।
ACT 24:26 हाःकिन, ‘पावलए ओल्‍योनी घुस ब ङादैए सैं’ लिद पावललाई घरी पाला ज़ खुल्‍द सिप सिप ज़ निपाँज़्‍याव।
ACT 24:27 ऩेरिम ओतावत फेलिक्‍सए ओपाला त़ोसिद तोबो पर्किअस फेस्‍तस हाकिम ताके। फेलिक्‍सए ते नो य़ेन ओऱास्‍क यहूदीरालाई खुसी जैन्‍याए जूँनी पावललाई माऱास्‍द कैतल ज़ नैक्‍यो।
ACT 25:1 साःरो हाकिम फेस्‍तस यहूदिया खन्दल उहुव स़ोंला ओतावत कैसरियानी पुलुस्‍द यरूसलेमदा बाके।
ACT 25:2 यरूसलेम ओकेसोत नलाव मुख्या पुजारीर स़ोनो यहूदीराए याघेप्‍पाराए पावलए ओङ़ैताव याझाःव पाँर सम्‍जैद,
ACT 25:3 ‘यरूसलेमल सारैन्‍या’ लिद बिन्‍ती दोकेर। नोर खास येमत वैंसिद सैःन्‍या बुद्धी कलैद यानैज़्‍याव।
ACT 25:4 फेस्‍तसए नोराए यापाँ भैंःद मायाद, “पावललाई कैसरियाल थुनाल थुनैद नैर, ङा मनी जाँवाक नदा ज़ ङाबारिज़्‍या।
ACT 25:5 है जैद जे नोए उजूँनी जेपाँ कातार उलिकिन तोबो ऩेब्‍लो जेस़ेररालाई ङास ज़ बान्‍या यारापरींच्‍यो। होए ओगल्‍ती कातार उलिकिन नोराए ज़ उजुर दोर्‍या,” है लिद यासम्‍जैक्‍यो।
ACT 25:6 हाकिम यरूसलेमल ओल्‍यो आथ दस दिन ओतावत कैसरियादा ओल्‍द बाके। ओकेसो हो पराःती अदालतल बाद पावललाई रैव यापरींक्‍यो।
ACT 25:7 पावल अदालतल उहुवत, यरूसलेमनी हुव यहूदीर प़ाइँ ओल्‍योक गुरिगाँ जैसिद घ्योःव घ्योःव माथ॰रिउ पाँर ओङ़ैत झाःदिकेर।
ACT 25:8 पावलए नोरालाई जवाप याद हाकिमलाई, “ङा यहूदीराए याकानुनलाई तादी ब, ध्‍यान झ़िमलाई तादी ब, माहाराजालाई तादी ब, काता ज़ बले·द ङामाराएए,” लिद है ओदोक ते,
ACT 25:9 फेस्‍तसए यहूदीरालाई ओल्‍योदा जैन्‍याए जूँनी पावललाई, “हुकी नँ यरूसलेमदा बान्‍केदा आव पाँर होङ ज़ फसेला ङाजैया, कै ताके?” है ओदोक ते,
ACT 25:10 पावलए, “ङा सरकारए अदालत ङ़ाक ज़ ङालिज़्या, आल ज़ फाल्‍सिउ परिए। यहूदीरालाई ते काता ज़ बले·द ङामाराएए है ङाल्‍यो ते नँ ज़ नसैंज़्‍याखेहो सानी।
ACT 25:11 ङा माचाव य़ेन दाद, ङालाई सैःन्‍या मिताव गल्‍ती कातार उलिकिन ते थिक ज़, ङालाई जेसैःनादी ब ताए ज़। खाली आवराए ङाङ़ैताव झाःद यायाँज़्‍याव पाँर ओमाथ॰रिउ ताकिन नँ ङालाई याल्‍योदा सूँपिन्‍या नहक ब माले। है जैद ङा आख ज़ माहाराजाए ल्‍योदा बिन्‍ती दान्‍या ङापैंज़्‍या,” है दोक्‍यो।
ACT 25:12 हाःत ज़ फेस्‍तसए ओलसकाव सल्‍ला याज़्यावरास जलफल दाद पावललाई, “नँ माहाराजाए ल्‍योदा बिन्‍ती दान्‍या नपैंव प़ाइँना नदा ज़ बान्‍या नले,” है दोक्‍यो।
ACT 25:13 ऩेला स़ोंला ओतावत तोबो अग्रिपास राजा ओबैंनी बरनिकीस कैसरियाल फेस्‍तसस दैसिना हुकिनी।
ACT 25:14 नोनी सर्बा कुधु दिन नल लिन्‍या बिचार निदोवए हाकिम फेस्‍तसए पावलए उजूँनी राजा अग्रिपासस सल्‍ला दाद, “ङाकिन ङ़ादाङाव हाकिम फेलिक्‍सए तोबो कैदीलाई ङा ङाजिम्‍बाल ख्यानैक्‍यो।
ACT 25:15 ङा तछा यरूसलेमल ङालिज़्‍याव बेलाक नलाव मुख्या पुजारीर स़ोनो यहूदीराए यास़ेरर ङाल्‍योक हुद नोए ओङ़ैत ओखत पले·द्याद होक ज़ सजा ब याव पैंकेर।
ACT 25:16 ङा फरी नोरालाई, ‘रोमी कानुननी बादी पर्तीनी जोरन जैद, नो पर्तीवालाए ओङ़ैत झाःद यायो पाँ भरिए ओजवाप याव ओमादैवा पै नोलाई अइज़ सूँपिन्‍या माताए,’ है ङारादोके।
ACT 25:17 है जैद नो मुद्दा याज़्‍यावर आल ज़ हुकेर। धिलो मादाद हो पराःती ङा कचरी जैद पावललाई मनी अदालतल रैव ङारापरींके।
ACT 25:18 नोर च्‍याँःसिद ओङ़ैत झाःद यापाँक ङा बनै अचम्‍ब ङाताके। अपराधी मिताव य़ेन ते काता ज़ ङामाङम्‍सिके।
ACT 25:19 अइज़ याधर्म रोक मेक ओतावए यामाखैज़्‍याव ओल्‍यो। तोबो सिउ येसु यादोज़्‍यावए उजूँनी पावलए ‘जींदो ज़ लिज़्‍या’ है ओरादोवनी बनै यारसिउ ओल्‍यो।
ACT 25:20 ङा याधर्मलाव पाँ जाँ मासैंद कातानी फाल्‍न्‍या ओताव लिद पावललाई, ‘आव पाँर फाल्‍न्‍याए जूँनी नँ यरूसलेमदा नमाबाके?’ है ङादोक ते,
ACT 25:21 पावलए झन, ‘ङा नदा ङामाबा, बुरू आव पाँर फाल्‍न्‍याए जूँनी माहाराजाए ल्‍योदा ङामाबावा पै आल ज़ ङालिरिज़्‍या,’ है लिके। है जैद ङा नोलाई माहाराजाए ल्‍योदा परींन्‍या मौका ओमाहुवा पै आल ज़ ङानैज़्‍या,” है दोक्‍यो।
ACT 25:22 अग्रिपासए नो भरी थैद, “ङा मनी नोए ओपाँ तखेप थैव ङादैक,” है ओदोक ते, फेस्‍तसए, “ताए, नोए ओपाँ पराःती ज़ नथैया,” है दोक्‍यो।
ACT 25:23 हो पराःती अग्रिपास स़ोनो बरनिकी बनै तह महौ जैसिद, सेनापतीर स़ोनो सहरलाव घेप्‍पारास सिप ज़ कचरी दान्‍या महलल हुकेर। प़ाइँ यादुप्‍सिउत फेस्‍तसए उसिपाईंरालाई पावललाई रैव यापरींक्‍यो।
ACT 25:24 हाःत ज़ फेस्‍तसए प़ाइँलाई, “राजा अग्रिपास स़ोनो आल हुद लिज़्‍यावर, आव ङापाँ थैचिके। आव जेङ़ाकाव च्‍याँःसिद लिज़्‍याव मिँए उजूँनी यरूसलेमलाव यहूदीर स़ोनो आलाव यहूदीर बनै रसिद ङाल्‍योक हुद, सैःन्‍या सजा याव यापैंज़्‍याव।
ACT 25:25 आवलाई ङाबिचारिक फरी सैःन्‍या सजा यान्‍या स्‍यासो ते काता ज़ ङामादैके। हाःत ज़ माहाराजाए ल्‍योदा बिन्‍ती दान्‍या ओपैंवए नदा ज़ परींन्‍या ङाथ·रैके।
ACT 25:26 खाली नदा ङापरींकिन माहाराजालाई आवए उजूँनी सर्द्यान्‍या मिताव पाँर ते काता ज़ माले। है जैद आछिम जे भरिए जेङ़ाक स़ोनो खास ते नँ राजा अग्रिपासए नङ़ाक आव मिँलाई सच्‍याँद ङानै, कसा आवए उजूँनी तोबो ऩेब्‍लो सर्न्‍या पाँर मापुलुस्‍रिज़्‍या।
ACT 25:27 म़ानी नाःल्‍दिउ राजाए ल्‍योदा बिनु गल्‍ती कै जैद परींन्‍या?” है यादोक्‍यो।
ACT 26:1 हाःत ज़ राजा अग्रिपासए पावललाई, “नपाँ काता उलिज़्‍याव, पाँनिके,” है ओदोक ते, पावलए उकुइए सान दाद अइ लिद जवाप एक्‍यो,
ACT 26:2 “ङालाई यहूदीराए ङाङ़ैत झाःद यायाँव खतए ओजवाप नँ राजा अग्रिपासए नङ़ाक पाँव ङादैवए, ङा आछिम बनै ङाभागी ल्‍यो ज़ ङालिज़्‍या।
ACT 26:3 नँ यहूदी चलन भरी बनै सैंन्‍या मिँ ज़ नलिज़्‍या। है जैद आछिम पै ङालाई सहिद ङापाँ भरी चावस थैयो लिद बिन्‍ती ङाचरैःनिज़्‍या।
ACT 26:4 “ङा ङाजर्मिउ पो स़ोनो यरूसलेम सहरल यहूदी जातलावराए याखार्ल ज़ ङाघ्योःके। है जैद यहूदी भरी प़ाइँए ज़ ज़िम्ज़ाकिन ङादोहुज़्‍याव य़ेनर चावस सैंज़्यार।
ACT 26:5 हाः बेलाक फरिसी ब ङाजैसिके। गेधर्म मानिज़्‍याव भरिरानी फरिसीराकिन कर्रा सु ज़ मालेर। है जैद ङालाई नो य़ेनत ङ़ादाकिन ज़ सरेस्‍द नैनार। नो पाँए उजूँनी है यालिकिन है लिधुन्‍या ज़ लेर।
ACT 26:6 नोराए झन आछिम ङा ‘गेसाखा पुर्खारालाई परमेस्‍वरए ओरायो य़ाका सयो·द्यासिक्‍यो’ है ङारादोवनी ज़ ङालाई सजा याव पैंज़्‍यार।
ACT 26:7 नो य़ाकाए उजूँनी ज़ गेमीं बाह्र थरलाव मिँराए आस दाद लाकनी रील ध्‍यान दाद खिमो ज़ नैज़्‍यार। अ राजा, ङा नो खिमो ज़ यानैज़्‍यावलाई थ·रैद ङारायोनी ज़ यहूदीराए माभैंःद आछिम नल्‍योक रैद नैनार।
ACT 26:8 ‘परमेस्‍वरए सिउरालाई यासोचोइज़्याव’ है ङालिज़्याव पाँत कै जैद अचम्‍ब ताद जेमापतिज़्‍याव?
ACT 26:9 “ङा मनी ङ़ादा नासरतलाव येसुए उमिन बनै सोद ओपाँलाई जुनी ब वैंव ङापैंज़्‍याव।
ACT 26:10 है जैद यरूसलेमल नोए उउपर्त बनै धामा दाद, मुख्या पुजारीराए ल्‍योनी क्‍योःन्‍या हक रैद येसुए छैंव उमीं कुधुरालाई झ्यालखानाल ब ङाराझाःके। सैःन्‍या याथ·रैक ङा मनी ‘हैज़’ लिद यापाँ जोर्द ङाराएज़्‍याव।
ACT 26:11 कैताक धर्मसास्‍त्र झ़िम झ़िमक बाद नोरालाई दुख याद, कसा माऱास्‍र लिद कर ब ङारालैज़्‍याव। ङारिस बनै माचाव ओतावए छुत देसलाव सहर जीदा मनी दुलिद नोरालाई सापे सापे याखिरी ङापसिज़्‍याव।
ACT 26:12 “अ राजा, तछा निताव य़ेनए जूँनी मुख्या पुजारीराए ल्‍योनी हक रैद दमस्‍कसदा ङाबाज़्‍याव बेलाक,
ACT 26:13 अधमर लाक निमीकिन ब ओझ़ार ल्‍यो ज़गै नमतिन हुद, ङानैंरास गेल्‍योक म्‍याल्‍याकनी मिलिक रैंःहुके।
ACT 26:14 गे भरी प़ाइँ नामक गेधलिउत तोबो गा हिब्रू खामनी ङास, ‘अ साऊल, अ साऊल, नँ काराव ङाखिरी नपसिज़्‍याव? नँ सैंज़्‍यावत ब ज़पत लातए थेंद ननैज़्‍याव मिताव ज़ नलिज़्‍या,’ है ओदाँक ते,
ACT 26:15 ङा, ‘नँ सु प्रभु?’ है ङादोके। प्रभुए फरी, ‘ङा नो ङाखिरी नपसिज़्‍याव येसु ज़।
ACT 26:16 नँ सोद च्‍याँःसिन्‍केदा, ङा नँलाई ङानोकोर जैन्‍याए जूँनी आछिम नल्‍योक ङासरैंःसिके। आछिम ङालाई नरँःनावए नँ ङासाची ताद, छींनी सतैंद ङाईंरिज़्‍याव पाँए ओसाची ब नतारिज़्‍या।
ACT 26:17 यहूदीराए ल्‍योदा स़ोनो छुत जातलावराए ल्‍योदा ङापरींनिक नोराए ल्‍योनी ङाजोगोइनिरिज़्‍या।
ACT 26:18 नँ होरालाई ङापाँ सथैद यामी फैद्यान्‍या नले। चुम चुमो सैतानए ओराज्‍यानी पले·द, ओज़गै ल्‍यो परमेस्‍वरए ओराज्‍याल लाँन्‍या नले। हुनी ज़ नोर ङालाई यायुँ हुप्‍द यापापर क्‍याल्‍सिद, परमेस्‍वरस खैवरास स्‍वर्गताव बताहा दैन्‍याकावर तान्‍या लेर,’ है दाँक्‍यो।
ACT 26:19 “है जैद, राजा अग्रिपास, ङा नो नमतिन हुव पाँकिन तँदा माबाद,
ACT 26:20 दमस्‍कसल येसुए ओपाँ सथैन्‍यात ङाथूसिके। नकिन यरूसलेमलावर, यहूदिया खन्‍द जीदाङावर, स़ोनो छुत जातलावराए याल्‍योदा मनी बाद, ‘जेपापलाई ऱास्‍द, परमेस्‍वरए ल्‍योदा जेयुँ फर्कैद, साचो हो मिताव य़ेन ब दोव ताके,’ लिद सथैव ज़ ङारानैज़्‍याव।
ACT 26:21 होए उजूँनी ज़ ङा ध्‍यान झ़िमल ङालिज़्‍याव बेलाक यहूदीराए ङालाई क्‍योःद सैःव पैंकेर।
ACT 26:22 खाली परमेस्‍वरए ङालाई पाथस ओनैनावए आछिम पै घेप्‍पा ज़िम्‍ज़ारालाई ओसाची याव ज़ ङालिज़्‍या। नो ङापाँल मोसा स़ोनो अगमबक्ताराए, ‘इताव इताव तारिज़्‍या’ है याल्‍यो पाँकिन ङा छुत काता ज़ चरैःद ङामापाँए।
ACT 26:23 होराए पाला, ‘ख्रीस दुखर सहिद, सिउनी सैंसिउ प़ाइँरानी ङ़ात ताद, यहूदीर स़ोनो छुत जातलाव मिँरालाई अजम्‍बरी जुनील बान्‍या येम सतैंद याएरिज़्‍याव,’ है लिद मिँरालाई यारासथैकेर।”
ACT 26:24 पावल निताव ओपाँज़्‍याक ज़ फेस्‍तस बनै चोइस क़िद, “पावल, नँ दासानी बिसा ताद नले। कुधु प़रिद चबनै बूलिउ स्‍यासो नताके,” है ओदोक ते,
ACT 26:25 पावलए, “माननिय फेस्‍तस ज्‍यू, ङा बूलिउ माःक। साचो थ॰रिउ पाँ ज़ ङापाँज़्‍याव ची।
ACT 26:26 आव पाँ भरी राजा अग्रिपासए मनी सैंज़्‍याखेहो लिद ओङ़ाक ङायुँ हुप्‍द ज़ ङापाँज़्‍या। आव म़ोंसिउलाव पाँ स्‍यासो ते माःक। है जैद ‘ओमासैंव ब काता ज़ मालिखेहो’ लिद ङायुँ हुप्‍द ले,” है दाद,
ACT 26:27 राजा अग्रिपासलाई मनी, “अ राजा, अगमबक्ताराए यासरो पाँ नमापतिज़्‍या? नपतिज़्‍याखेहो,” है ओदोक ते,
ACT 26:28 अग्रिपासए, “आव छ्यावा नपाँए ङालाई ब ख्रीस्‍त्‍यान जैव नपैंज़्‍याव रो?” है ओदोक ते,
ACT 26:29 पावलए फरी, “परमेस्‍वरए ओङ़ाक ङाबिन्‍ती आव ज़ लिज़्‍या — छ्यावानी तादी ब, कुधुनी तादी ब, जे आछिमकाव ङापाँ थैज़्‍याव भरिए, ङालाई सुर्सिउ साँगलराकिन बाहेक, ङा स्‍यासो जेताकिन ताखेहो है ङालिज़्‍या,” है यादोक्‍यो।
ACT 26:30 हाःत ज़ राजा अग्रिपास, हाकिम फेस्‍तस, बरनिकी स़ोनो यास च़ुसिद लिज़्‍याव भरी च्‍याँःसिद लाँःदा पुलुस्‍द,
ACT 26:31 या या पाँसिद, “साचो ज़ ओल्‍यो, आवलाई सैःन्‍या सजा अथबा झ्यालखानाल झाःन्‍या सजा यान्‍या स्‍यासो ते माले,” है लिकेर।
ACT 26:32 नकिन राजा अग्रिपासए फेस्‍तसलाई, “आव मिँए माहाराजाए ल्‍योदा बिन्‍ती दान्‍या ओमापैंव ताकिन गे नोलाई ऱास्‍न्‍या गेल्‍यो,” है दोक्‍यो।
ACT 27:1 पावललाई इतालिया देसदा लाँन्‍या याथ·रैवत छुत कैदीरास माहाराजाए ओफौजीलाव कप्‍तान युलियस यादोज़्‍यावए ओपासल ज़ झाःकेर।
ACT 27:2 है जैद गे तोबो एद्रामितेनोस सहरनी हुव एसियालाव समुन्‍द्र छ्योकाव पो पोक बाज़्‍याव ऱी जहाजल पसिद गेबाके। गेस माकेदोनिया खन्‍दलाव थेसलोनिके सहरनी हुव तोबो अरिस्‍तार्खस ब उलिज़्‍याव।
ACT 27:3 गेबाव हो पराःती सीदोन सहरल केस्‍द जाँवा पै गेलिके। युलियसए पावललाई दया दाद, “ननैंरास दैसिद नचाहिन्‍यार होराए ल्‍योनी रैयो,” है दोक्‍यो।
ACT 27:4 नकिन फरी ऱी जहाजल गेबाक गेङ़ानी बतास उहुवए, साइप्रस तापुए बतास ओथोरोलाव घ्याँ गेबाके।
ACT 27:5 नकिन किलिकिया स़ोनो पामफिलिया खन्‍द ङ़ाकाव घ्‍योःव समुन्‍द्रलाव घ्याँ बाद, लुकिया खन्‍दलाव माइरा सहरङ केस्‍द, नो ङ़ादाङाव जहाजनी झरिद,
ACT 27:6 गेसकाव कप्‍तानए तोबो अलेक्‍जेन्‍द्रिया सहरनी हुव इतालियादा बाज़्‍याव जहाज दैद नल झाःसिक्‍यो।
ACT 27:7 नो जहाजल मनी, बतास गेङ़ानी हुद कुधु दिनत बल्‍ल क्‍नीदस सहर नजिकक गेकेस्‍के। हुकिन होदा, गे बाव गेपैंज़्‍याव येमदा बतासए बाव ओमायासिउए फरी क्रेत तापुए बतास ओथोर्ज़्‍याव सालमोने यादोज़्याव पोलाव घ्याँ गेबाके।
ACT 27:8 नकिन बनै ज़ धो धो तापु छ्यो छ्यो बाद लासिया सहर लापकाव ‘चाव बन्‍दरगाह’ यादोज़्‍याव जहाज थकनैन्‍या पोल गेबाके।
ACT 27:9 नक पै केस्‍न्‍या कुधु दिन गेझाःधुवए ज़्‍यूँःव साहा हुनाद उलिज़्याव। नो साहाक बतास दाद समुन्‍द्रल बान्‍या बनै ओछ्यास ल्‍यो ओताज़्‍याव। है जैद पावलए नो जहाज चलैज़्यावरालाई,
ACT 27:10 “अ ङादाज्‍यु भाइर, गे आथ पाला गेबाकिन जहाजलाव सामानर स़ोनो जहाजलाई मनी कुधु नोक्‍सान तारिज़्‍या। गेजिउलाई मनी ओछ्यास ल्‍यो ज़ लिज़्‍या,” है ओरादोज़्‍यावत ब,
ACT 27:11 नोए ओपाँ कप्‍तानए काता माँःती माङम्‍सिद, बुरू जहाजए ओर्गे स़ोनो जहाज चलैज़्‍यावनी निपाँ कोसै भैंःके।
ACT 27:12 हो स़ोनो ज़्‍यूँःव साहाक नो जहाज थकनैन्‍या पोल लिन्‍या जाँ माज़्‍यासो उलिज़्‍यावए नो जहाजत बाज़्‍यावर जाँकोसैए नो क्रेत तापुत छ्यावा होकसैकाव फोनिक्‍स सहरदा बान्‍या जैकेर। नो सहर दखिन-पछ्युँ स़ोनो उतर-पछ्युँदा फर्किउ जहाज नैन्‍या पो थुमो उलिज़्‍यावए य़ुँदा भरी नक ज़ लिन्‍या थ·रैकेर।
ACT 27:13 हाःत ज़ दखिन त॰नी बनै चाव बतास स॰ स॰ हुद जहाज चलैज़्‍यावराए ‘अब ते गेकेस्‍या’ लिद नो जहाजलाई अदैज़्‍याव झँए साँगललाई ऱीनी स़ेल्‍द क्रेत तापु छ्यो छ्यो ज़ गेबाके।
ACT 27:14 हाःत ज़ उमँःजानी उतर त॰निकाव तापुनी ल्‍यो माल्‍यो बतास गेतर्त हुद,
ACT 27:15 जहाजलाई आदानी होदा ख्याक्‍यो। बतास त॰दा गेमालाँधुवए जहाजलाई गेऱास्‍क, बतासए झन समुन्‍द्र माँजल ज़ लाँसिक्‍यो।
ACT 27:16 बल्‍ल बतासलाई जाँ थोर्ज़्‍याव क्‍लौदा यादोज़्‍याव ज़िम्‍ज़ा तापु छींक गेकेस्‍नाक जहाजए ओर्मेःताव सुर्सिउ आदा होदा लिन्‍या दोङ्गालाई स़ेल्‍द बनै दुखस छींद जहाजल गेझाःके।
ACT 27:17 ‘ऱीए जहाजलाई मनी सुफुवा’ लिद घेप्‍पा तारए बनै ज़ कस्‍कैकेर। लिबिया छ्योकाव उर्जीं माल्‍यो बगरल गैन्‍या ओछ्यास ओतावए नो जहाजलाई स़ेल्‍ज़्‍याव क्‍वार सतेद्याद बतासए ओभरत ज़ ऱास्‍केर।
ACT 27:18 हो पराःती आँधीए जहाजलाई पा·वा पा·वा ओजैवए जहाजलाव सामानर ब हाइद ऱील याराख्याकेर।
ACT 27:19 हुकिनकाव हो पराःती जहाजए ओजार ब याराख्याकेर।
ACT 27:20 कुधु दिन पै आँधी बाबत ताद निमी सोरोर ब यामारैंःज़्‍यावए, ‘गेमारहिके ब’ लिद गेयुँर स्‍यासे गेसतेके।
ACT 27:21 ज़्‍यावर गेमाज़्‍युव कुधु दिन ओतावत पावल प़ाइँए ङ़ाक च्‍याँःसिद, “अ ङादाज्‍यु भाइर, ङा जेलाई है ङादाचिउ पाँर भैंःद क्रेत तापु जेमाऱासो ताकिन आः नोक्‍सान तान्‍या ओमाल्‍यो।
ACT 27:22 हैदी ब जेयुँ स्‍यासे तासतेच्‍यो — जहाज वाज़ खदम तारिज़्या, गे मिँर ते सु ज़ सिन्‍या गेमाले।
ACT 27:23 आछ्या रील ओसेवा ङादोज़्‍याव ङापरमेस्‍वरए ओचाकर्‍या ङाल्‍योक सरैंःसिद,
ACT 27:24 ‘पावल, ताछे·नी। नँ जुनी ब माहाराजाए ओङ़ाक नच्‍याँःसिरिज़्‍या। नँस बाज़्‍याव ननैंर मनी परमेस्‍वरए ओदयानी बाँचिरिज़्‍यार,’ है दाँक्‍यो।
ACT 27:25 है जैद ङानैंर, जेयुँ होलाँ जैचिके। परमेस्‍वरए है ओदाँव मिताव जुनी ब तान्‍या ज़ ले लिद ङायुँ हुबो ज़ लिज़्‍या।
ACT 27:26 खाली गे तोबो तापुत उर्जीं माल्‍योल गर्न्‍या गेले,” है दासिक्‍यो।
ACT 27:27 बतास ओदोव चौध रात ओतावत एद्रियास समुन्‍द्रल बतासए गेजहाजलाई आदा होदा उहुतैनाज़्याव। आधा रील ऱी छ्योदा गेहुव मिताव ङम्‍सिद जहाज चलैज़्‍यावराए,
ACT 27:28 ‘उर्जीं खा उलिज़्‍याव’ लिद यागोइँक चालीस मितर ताके। नकिन जाँ होकसैकावक फरी यागोइँक तीस मितर ताके।
ACT 27:29 ‘जहाज घ्‍योःव घ्‍योःव पहर जीदा थुकिसिया’ लिन्‍या छ्यासए जहाज अदैन्‍या झँए साँगलर ओर्मेःतिन चारता यारासतेकेर। हाःकिन ‘नम खर्क सँके’ लिद कींद ज़ गेझाःके।
ACT 27:30 हाःत ज़ नो जहाज चलैज़्‍यावराए धोंःन्‍या निउँ तोबो जैद, ‘जहाजए उसुनी धूँलाव झँर मनी पला·द सतेव ताके’ लिद नो आदा होदा लिन्‍या ज़िम्‍ज़ा दोङ्गालाई ऱील झरैकेर।
ACT 27:31 पावलए याचाल सैंद कप्‍तान स़ोनो सिपाईंरालाई, “आवर जहाजल गेस यामारहिकिन, गे भरी बाँचिन्‍या गेमाले,” है ओरादोक ते,
ACT 27:32 नो सिपाईंराए दोङ्गाए ओच़ेंर च़म्‍द बगैद याराएकेर।
ACT 27:33 नम उसँनाक पावलए प़ाइँलाई यायुँर सझेंःद्याद, “आछिम पै जेसोगोए काता ज़ माज़्‍याद जेल्‍यो चौध दिन जेताके।
ACT 27:34 है जैद आछिम जेर्सार सपरीन्‍याए जूँनी ज़्‍यावर ब ज़्‍युव ताके। गे सु ज़ मासिद तोबो गेम़ुल ब गलिन्या माले,” है दाद,
ACT 27:35 उकुइत भरेस रैद प़ाइँए याङ़ाक परमेस्‍वरलाई धन्‍याबाद चरैःद केःद ज़्‍युक्‍यो।
ACT 27:36 हाःत ज़ उपुर्काव भरिए पाला यायुँ होलाँ जैद या मनी ज़्‍युकेर।
ACT 27:37 नो जहाजल लिज़्‍यावर, गे भरी प़ाइँ झाःद, ऩेसय छयहत्तर जना गेल्‍यो।
ACT 27:38 है जैद गे भरी गेफू तसी ज़्‍याद, जहाजए उगुर सोबोम्‍न्‍याए जूँनी नो गेसय़ेलो गेदा भरी ऱील याराख्याकेर।
ACT 27:39 नम छेलाला उसँवत ‘आव काता पो ओताव?’ लिद सुए ज़ माथ·रैधुकेर। खाली तोबोक ओधाँद माल्‍यो छेरारा·व पो रँःद ‘गेधुवा पै जहाजलाई नङ ज़ लाँव ताके’ है लिद,
ACT 27:40 नो जहाजलाई अदैज़्‍याव सतेसिउ झँए साँगलर च़म्‍द ऱील ज़ ख्यानैद, जहाजए ओङ़ै आदा होदा दल्‍कैज़्‍याव दाबीलाई मनी चलैन्‍याए जूँनी पला·केर। नकिन बतासए फुलैद जहाजलाई स़ेल्‍ज़्‍याव क्‍वार तङ्गैद नो छेरारा·व पोदा यालाँज़्‍यावत ज़,
ACT 27:41 ऱी जींलाव बालुवा बोर्सिउत त़ोल्‍द जहाज होल ज़ गैके। ओङ़ै बनै चोइस उतूँसिउए कै जैद ब माहाइधुकेर। उछींनीकाव ऱीए छल्‍काए जहाजलाई बनै प़ोद पा·नाक्‍यो।
ACT 27:42 हाःत ज़ सिपाईंराए, ‘आलाव कैदीर हाइसिद धोंःर्‍या’ लिद सैःव पैंकेर।
ACT 27:43 खाली कप्‍तानए पावललाई जोगोइव ओपैंज़्‍याव। है जैद नोरालाई भैंःद मायाद, “जे ऱील चेल्‍न्‍या सैंज़्‍यावर ङ़ादा ऱील ज़ो·द पाखादा पुलुसचिके।
ACT 27:44 चेल्‍न्‍या मासैंज़्‍याव भरी जहाजलाव फल्‍यार, काता कातार हाइद नत ज़ बाचिके,” है लिद याअर्थैक्‍यो। है जैद तोबो ब कै मै माताद ज़ प़ाइँ पाखात गेपुलुस्‍के।
ACT 28:1 गे भरी कैज़ माताद पाखात गेपुलुसो प़ाइँना ‘आव तापुए उमिन माल्‍ता ची ओल्‍यो’ लिन्‍या गेसैंके।
ACT 28:2 नकाव लिज़्‍याव मिँराए गेलाई रँःद यायुँ नाद दया दासिकेर। नम फाइ फाइनी फुइ फुइ जैद बनै उज़्‍यूँःवए मेंःर दाद्यासिकेर।
ACT 28:3 पावलए सीं तकर रैद मेंःल ओझाःक मेंःए ओघम्‍काए घुल तोबो पुलुस्‍द पावलए उकुइ दा·दिक्‍यो।
ACT 28:4 नो तापुताव मिँराए उकुइत घुल उझुन्‍दिउ रँःद, “ओहो! आव मिँ ते ज्‍यानमारा ज़ ओल्‍यो ताखेहो। नाःल्‍दिउ ऱीनी उजुगिदी ब न्‍यायनी ते बाँचिउ मादैक्‍यो,” है लिकेर।
ACT 28:5 खाली पावलए उकुइ फरैद घुललाई मेंःल ख्याक्‍यो, ओल ते कैज़ माताके।
ACT 28:6 तापुताव मिँराए ते, ‘जुनी ब गोद सिए’ लिद चिऊद यानैज़्‍याव। कुधु पै चिऊद ब कैज़ ओमातावए, हाःकिन “आव मिँ ते देवता ची ओल्‍यो,” है लिकेर।
ACT 28:7 नो तापुताव याघेप्‍पा पब्लियसए ओएँःर उझ़िमर नजीदा ज़ यालिज़्‍याव। है जैद नोए गेलाई दया दाद स़ोंला पै बनै चावस ज़ नैसिक्‍यो।
ACT 28:8 नोए ओबाबु फू बान्‍या बेथाए ओजोरो हुद थलिद उलिज़्‍याव। पावलए नोलाई चिऊनाद परमेस्‍वरलाई पोंखारिद, ओक्‍याँत उकुइ नैद ओयोत, होक ज़ गराँके।
ACT 28:9 हाःकिन नो तापुताव मिँराए ‘पावलए अइ जैक्‍यो’ लिन्‍या थैद याजोरो हुवर प़ाइँ ओल्‍योक हुद यासगराँसिहुज़्‍याव।
ACT 28:10 है जैद गेलेवा भरी नो तापुताव मिँराए गेलाई बनै मानस ज़ नैद, गेबान्‍या छ्याम ओतावत येमताव गेज़्‍यावर ब झाःद्यासिकेर।
ACT 28:11 माल्‍ता तापुत स़ोंमैना गेतावत तोबो अलेक्‍जेन्‍द्रिया सहरनी हुव जहाजत गेबाके। नो जहाज य़ुँदा भरी नो तापुत नैसिउ उलिज़्‍याव, ओङ़ैत जोङोल्‍या देवता यादोज़्‍यावए ओअङग्‍या खुपिसिउ उलिज़्‍याव।
ACT 28:12 माल्‍ताकिन सुराकुसाई सहरक बाद स़ोंला पै नक ज़ गेलिके।
ACT 28:13 नकिन फरी बाद इतालिया देसलाव रेगियन सहरल गेकेस्‍के। नल तछा गेतावत दखिन त॰नी बतास चलिद ऩेलात ज़ पतिओली सहरल गेकेस्‍के।
ACT 28:14 नो सहरल येसुए ओपाँत बाज़्‍यावरास गेदैसिक, नोराए ‘गेस ल्‍यो ताके’ है यादासिक ते नोरास तसाता पै गेलिके। नकिन बल्‍ल रोम सहरदा ज़ गेबाके।
ACT 28:15 रोमलाव यायुँ हुबोराए ‘हुज़्‍यार दी’ लिन्‍या थैद ख्वार अप्‍पियस बजारक पै, ख्वार तीन-भत्ती बजारक पै गेलाई च़िहुसिकेर। पावलए नोरालाई रँःद उयुँर होलाँ ताद परमेस्‍वरलाई धन्‍याबाद चरैःक्‍यो।
ACT 28:16 रोम गेकेसोत पावललाई तोबो सिपाईंए ओपासल झ्यालखानाकिन अछतङ तोबो झ़िमल ल्‍यो एकेर।
ACT 28:17 पावल स़ोंला ओतावत नलाव यहूदीराए याघेप्‍पारालाई दुप्‍द अइ लिद यासथैक्‍यो, “अ ङादाज्‍यु भाइर, ङा गेजिज्‍यु बाज्‍युराए याचलन स़ोनो गेजातलाव मिँरालाई काता ज़ बले·द ङामाराएदी ब, यरूसलेमलाव यहूदीराए ङालाई क्‍योःद रोम सरकारए ल्‍योदा सूँपिनाकेर।
ACT 28:18 रोमीराए ङापाँ फाल्‍द ङालाई सैःन्‍या स्‍यासो काता ज़ मादैद ऱासो यापैंज़्‍याव।
ACT 28:19 ङामीं यहूदी दाज्‍यु भाइराए याउपर्त काता खतर लैन्‍या पाँ ज़ ओमाल्‍यो, खाली यहूदीराए ते झन ङालाई ऱास्‍न्‍या पाँलाई यामाभैंःवए माहाराजाए ल्‍योदा बिन्‍ती दान्‍या कर ज़ लागिके।
ACT 28:20 खास ङा इस्राएलीराए आस दाद यानैज़्‍याव ख्रीसए उजूँनी है ङारादोवनी ज़ ङालाई इताव साँगलए किद नैनार। है जैद नो पाँर जेलाई है दान्‍याए जूँनी आछिम ङाखुल्‍चिउ,” है ओरादोक ते,
ACT 28:21 नोराए, “गे आःपै यहूदिया देसनी नँ नजूँनी काता चिथी ज़ गेमादैताए। ननी हुज़्‍याव गेमींराए यायाःनी ब नजूँनी माचाव काता ज़ गेमाथैताए।
ACT 28:22 खाली प़ाइँङ ज़ जे ख्रीस्‍त्‍यानराए जेजूँनी ‘आवराए यापाँ थिक माले’ है यालिज़्‍याव वाज़ गेथैज़्‍या। है जैद जेपाँ किताव उलिज़्‍याव, गे मनी तखेप थैव ताके,” है दोकेर।
ACT 28:23 है जैद ‘आव छ्याम दुप्‍सिउ ताके’ लिन्‍या याथ·रैव छ्याम यहूदीर पावलए उझ़िमक ओपाँ थैना काला मुलु हुकेर। हो छ्याम छकाल्‍न्‍याकिन ऱिमक पै पावलए नोरालाई परमेस्‍वरए ओराज्‍यालाव पाँर पलास्‍द्याद, मोसाए ओकानुन स़ोनो अगमबक्ताराए येसुए उजूँनी यासरो भरिनी थ·रैद्याद यायुँ सुहुप्‍द्यान्‍या धामा दोक्‍यो।
ACT 28:24 नोर ख्वाराए ओपाँ चावस थैद नो पाँत यायुँ हुप्‍के, ख्वाराए ते माभैंःकेर।
ACT 28:25 है जैद या या माखैद ननी पुलुस्‍द याबाज़्‍याक पावलए आव तोबो पाँ याङ़ैत झाःद याएक्‍यो, “जेजिज्‍यु बाज्‍युरालाई छैंव पुरूसए है ओरादोव पाँ ते थिक ज़ ताद ले। नो पाँ यसैया अगमबक्ताए अइ लिद सर्द नैद यायो,
ACT 28:26 ‘आव मिँरालाई है यादोनाके, थैन्‍या ते जेथैज़्‍या, जेमातीधुइ। रँःन्‍या ते जेरँःज़्‍या, जेमासरेस्‍धुइ।
ACT 28:27 आवराए यायुँ काता ज़ मातीधुन्‍या भुत्‍यासो ताद ले। यार्ना ब सूइसिउ मिताव ताद ले। यामी ब च़िम जैद यानैज़्‍याव मिताव लिज़्‍या। निताव यामाताव ताकिन आः झरी यामीए रँःधुखेरहो, यार्नाए थैधुखेरहो, यायुँल तीधुखेरहो। ङाल्‍योदा यायुँ फर्कैधुखेरहो। सोजोकावर ब ङाराजैधुखेहो।’
ACT 28:28 है जैद आव ब सैंच्‍यो — आछिमकाव जेथैव परमेस्‍वरनिकाव हुव बाँचैन्‍या पाँर जेल्‍योङ मारहिद छुत जातलाव मिँराए ल्‍योदा बारिज़्‍या। नोराए ते झन थैन्‍या लेर।”
ACT 28:29 [पावलए आव पाँ है ओरादोवत यहूदीर या या खर्लेसिद पुलुस्‍द बाकेर।]
ACT 28:30 पावल रोम सहरल झ़िमए किराया फो·द ऩेरिम भरी नल ज़ लिके। उझ़िमक हुज़्‍याव भरिरालाई चावस सुम्द,
ACT 28:31 परमेस्‍वरए ओराज्‍यालाव पाँर सथैद, घ्‍योःव युँस प्रभु येसु ख्रीसए उजूँनी ब पलास्‍द ओराएज़्‍याव। नो य़ेनत सुए ज़ यामावैंज़्‍याव।
ROM 1:1 ङा पावल, येसु ख्रीसए ओनोकोर, परमेस्‍वरए चाव ओथा सथैन्‍यात ओसाची खतैसिउ ङालिज़्‍या।
ROM 1:2 नो चाव था परमेस्‍वरए ‘यान्‍या ङाले’ लिद अगमबक्ताराए यासरो धर्मसास्‍त्रल ङ़ादा ज़ य़ाका दाद ओनैज़्याव।
ROM 1:3 नो पाँ ओज़ा येसु ख्रीसए उजूँनी ज़। नो दाऊदए ओथोल ज़ मिँ मिन्‍सिद जर्मिके।
ROM 1:4 फरी छैंव पुरूसए ओसक्तीए गेप्रभु येसु ख्रीसलाई सिउनी ओसोचोइवए परमेस्वरए ओज़ा ज़ थ॰रिके।
ROM 1:5 है जैद ङा गेप्रभुए उमिननी ज़ यहूदीराकिन छुत जातलाव मिँरालाई ओल ओपाँत उघुरिउर जैद, यायुँ सुहुप्‍द्यान्‍याए जूँनी नोए ओल्‍योनी ज़ असिकर दैद ओसाची तान्‍या हक ब दैद ङानै।
ROM 1:6 जे मनी येसु ख्रीसए उमींर तान्‍या खुल्सिउर जेलिज़्‍या।
ROM 1:7 है जैद जे परमेस्वरए उयुँलाव मिताव रोमलाव छैंव उमींरालाई आव चिथी परींद ङायाचिज़्‍या। परमेस्‍वर गेबाबु स़ोनो गेप्रभु येसु ख्रीसनी जेल्‍योदा नियुँ गराँद जेयुँ होलाँ जैद ओयाचिरक।
ROM 1:8 प़ाइँरानी ङ़ात आव तोबो पाँ लिज़्‍या — जे परमेस्वरए ओपाँत जेयुँ जेसुहुबो संसार भरिल प़ाइँदा ज़ थास्‍द ले। है जैद ङा जेजूँनी परमेस्वरलाई पोंखारिद येसु ख्रीसनी धन्‍याबाद चरैःव ज़ ङानैज़्‍या।
ROM 1:9 ओज़ाए ओय़ेनत बनै जाँगरस ओसेवा ङादोज़्‍याव परमेस्वरए ओङ़ाक जेलाई मनी खर्क ज़ ङामामेंःचिए। आव पाँत ओल ज़ साची लिज़्‍या।
ROM 1:10 ‘परमेस्वरए उयुँ ओताकिन ङा आथ पाला जेल्‍योदा हुव ङादैक’ लिद परमेस्वरलाई बिन्‍ती चरैःव ज़ ङानैज़्‍या।
ROM 1:11 ङा जेल्‍योङ जेलाई थ॰रिउ जैन्‍याए जूँनी परमेस्वरनिकाव काता असिकर याव ङादैकिन ताखेहो लिद जेस दैसिन्‍या बनै युँ ङादोज़्‍या।
ROM 1:12 ङा जेल्‍योक हुद जेस दैसिउ ङादैकिन गे तखेप्‍त ज़ गेयुँर सझेंःसिन्‍या गेले — जे ङा ङाल्‍योनी, ङा जे जेल्‍योनी।
ROM 1:13 आव ब सैंच्‍यो ङानैं ङामेंर, ङा जेल्‍योदा कुधु पाला ज़ हुन्‍या ङापैंके, खाली काता काताराए माधाःद हुव ङामादैके। जेल्‍योङाव ङायुँ ते इताव ज़ ओल्‍यो — किताव पो पोङ छुत जातलाव मिँरालाई परमेस्वरए ल्‍योदा हुन्‍या ङाराजैके, हिताव ज़ जे जेल्‍योङ मनी तोबो ऩेब्‍लो ङाराजैधुकिन ताखेहो लिद बनै युँ ङादोज़्याव।
ROM 1:14 ङा घेप्‍पा ज़िम्‍ज़ार, सैंवर मासैंवर, जो मितावरालाई तादी ब चाव था सथैन्‍या कर ज़ लिज़्‍या।
ROM 1:15 है जैद ङा जे रोमल लिज़्‍यावरालाई मनी चाव था सथैन्‍या युँ ङादोज़्‍या।
ROM 1:16 ङा ख्रीसए चाव ओथा सथैन्‍या ङालाज माहुइ। यहूदीर तादी ब, छुत जातलावर तादी ब आव पाँत यायुँ हुप्‍ज़्‍यावरालाई परमेस्वरनिकाव साःरो जुनी दैन्‍या सक्ती लिज़्‍या।
ROM 1:17 ननी ज़ परमेस्वरए मिँरालाई ओलस ओरासखैज़्‍याव येम ब सतैंसिउ लिज़्‍या। नो येम ओजरानी उतुपाङ पै गेयुँ गेसुहुबोनी वाज़ लिज़्‍या। धर्मसास्‍त्रल मनी इताव सर्सिउ लिज़्‍या, “उयुँ हुप्‍द परमेस्‍वरस खैव मिँ वाज़ बाँचिज़्‍या।”
ROM 1:18 मिँराए यादोव पापत स़ोनो अधर्म यादोज़्‍याव य़ेन भरित परमेस्वरए ओसजा सरैंःसिउ लिज़्‍या। नोराए यायुँल माचाव वाज़ नैद परमेस्वरए साचो ओपाँलाई ब वैंज़्‍यार।
ROM 1:19 नोराए यायुँल परमेस्वरए उजूँनी ते ङ़ादाकिन ज़ सैंद यानैज़्‍याव, काराव ल्‍यो ताकिन ओल परमेस्वरए ज़ सतैंद नैद यायो।
ROM 1:20 परमेस्वरए आव संसार ओजैज़्‍यावकिन ज़ ‘ओगेर उगुनर स़ोनो खर्क ज़ माखेम्न्‍या ओसक्तीर आवर ज़’ लिन्‍या प़ाइँए ज़ सैंद नैर। ओललाई यामारँःधुदी ब ओदोज़्याव य़ेननी ज़ रैंःज़्‍या। है जैद सुलाई ज़ ‘आव भरी गेमासैंए’ लिन्‍या काता निउँ ज़ माले।
ROM 1:21 हिताव सैंज़्‍यावत ब परमेस्वरलाई नैद्याव परिन्‍या मान ब नैद माएर, धन्‍याबाद ब माचरैःर। नोराए झन अऩाकलाव पाँर ससैद यायुँनी काता ज़ माहुन्‍या तानाकेर।
ROM 1:22 नोर, ‘गे बनै सैंन्‍यार गेलिज़्‍या’ है यालिज़्‍यावत ब काता ज़ मासैंन्‍यार ताकेर।
ROM 1:23 बनै ज़गै मगैव, उजिउँनी लिज़्‍याव, खर्क ज़ माखेम्‍ज़्‍याव परमेस्वरए ओपोल झन जै जन्‍तु, बाज़ा बिज़ा, ऱूइज़ा वान्‍ज़ा, मिँराए अङग्‍या जैद, नोराए यासेवा दोज़्‍यार।
ROM 1:24 है जैद परमेस्वरए ‘आवर कै जैद ब माताके’ लिद यामन लागिउ य़ेनदा ज़ याऱास्‍क्‍यो। हाःकिन नोर झन या याल युँ माजामो य़ेनर वाज़ दाद याइज्‍यात याज़ झाःज़्‍यार।
ROM 1:25 सैंज़्‍यावत ब परमेस्वरनिकाव साचो ओपाँलाई ऱास्‍द, होए ओपोल झन धुतनी ताव पाँलाई रैद, हो ज़ साचो जैकेर। एकम्‍न्‍या ओमान नैद्याव परिन्‍या प़ाइँ जैज़्‍याव परमेस्वरलाई माभैंःद ओसेवा ब मादाद, झन ओल ओराजैवराए यासेवा ज़ दोनाकेर।
ROM 1:26 है जैद परमेस्वरए नोरालाई लाज मोर्नो य़ेनदा ज़ याऱास्‍क्‍यो। ननी ज़ मेंमाराए मनी दाव परिन्‍या य़ेनलाई ऱास्‍द या याल युँ माजामो य़ेन ज़ दोनाकेर।
ROM 1:27 हो मिताव ज़ खेपाराए मनी मेंमारास माताद झन या याल ज़ यायुँ मानैधुद युँ माजामो य़ेनर ब दोनाकेर। नितावराए यापाप याक्‍याँत याज़ भुगिरिज़्‍यार।
ROM 1:28 नोराए परमेस्वरए ओमान नैद्याव माभैंःद यायुँ बिप्‍यादा वाज़ याझाःवए परमेस्वरए नोरालाई ‘कुबानी याय़ेनदा ज़ घबाज़्‍यारक’ लिद बिप्‍यादा ज़ याऱास्‍क्‍यो।
ROM 1:29 है जैद नोराए याय़ेन जम्‍मा माचाव वाज़ लिज़्‍या — युँनी कुबातैं हुन्‍या, लोभ दान्‍या, छुतलाई सोन्‍या, प़ाइँत ज़ मी तून्‍या, मिँ सैःन्‍या, इ़सिन्‍या, धुतैद ज़्‍यान्‍या, छुलैं पुलैं दान्‍या, अर्काए उछींनी पाँन्‍या,
ROM 1:30 अर्काए उमिन बले·द्यान्‍या, परमेस्वरलाई सोन्‍या, स॰द सँ सँनी बँ बँ लिन्‍या, सघ्योःसिन्‍या, माचाहिउ बुद्धी कलैन्‍या, बाबु आमाए ओपाँ माभैंःन्‍या,
ROM 1:31 पत मुर्ख जैसिन्‍या, सतत मालिन्‍या, युँ मानान्‍या, सुए ल्‍योदा ब युँ माजैन्‍या।
ROM 1:32 निताव य़ेन दाज़्‍यावराए, ‘परमेस्वरए ओकानुननी सिन्‍या सजा ते दैव ज़ परिके’ लिन्‍या यासैंज़्‍यावत ब झन याजिउ नदा ज़ च्‍यो च्‍यो झाःज़्‍यार। छुत निताव य़ेन दोज़्‍यावरास मनी बनै रेंद यापाँ तप्‍द याराएज़्‍यार।
ROM 2:1 है जैद जे छुतलाई वाज़ ‘इताव हिताव’ है दाज़्‍यावर जेलाई मनी परमेस्वरए ओङ़ाक काता निउँ ज़ माले। जे नोरास जेय़ेन तोबो ज़ ओतावए नोराए यागल्‍ती थ·रैद जेराएक जे जेगल्‍ती ब जे ज़ जेथ·रैज़्‍या।
ROM 2:2 नितावराए याक्‍याँत परमेस्वरए ओसजा उहुरिज़्‍याव ते थिक ज़ है लिन्‍या गे गेसैंज़्‍या।
ROM 2:3 हिताव ताकिन जे छुतए ओगल्‍ती थ·रैद जेएज़्‍याव य़ेन जे ब जेदोज़्‍याव ताकिन परमेस्वरए ओसजानी कातानी उस्‍किउ जेदैरिज़्‍याव?
ROM 2:4 सैं परमेस्वरए ओदयानी जेगल्‍ती भरी कुधु ज़ सहिद ओयाचिज़्‍यावए, ‘गेलाई कैज़ ओमाजैसिज़्‍याव ओल्‍यो’ है जेलिज़्‍याव रो? परमेस्वरए ओदया ते बुरू, ‘कसा ङाल्‍योदा यायुँ माफर्कैर’ लिद कींद नैचिज़्‍याव लिन्‍या जे जेमासैंज़्याव रो?
ROM 2:5 जे ते झन माचाव जेदिउदीए ओल्‍योदा जेयुँ फर्कैव जेमाभैंःवए, परमेस्वरए मिँरालाई न्‍यायस फाल्‍द ओसजा ओसतैंरिज़्‍याव छ्यामकावए जूँनी उरिस दुपो ज़ जेनैज़्‍या।
ROM 2:6 परमेस्वरए हो छ्याम मिँरालाई सु सु यादोव मितावनी ज़ यान्‍या ले।
ROM 2:7 चाव य़ेनत थ॰रिद ज़गै मगैवलाव माखेम्‍न्‍या जुनी खिम्‍ज़्‍यावरालाई अजम्‍बरी जुनी याएरिज़्‍याव।
ROM 2:8 फरी यालाई वाज़ तान्‍या खिम्‍द साचो पाँलाई माभैंःद माचाव य़ेन दाज़्‍यावराए याक्‍याँत परमेस्‍वरए उरिस थुद याएरिज़्‍याव।
ROM 2:9 माचाव य़ेन दाज़्‍यावरालाई यहूदीर तादी ब, छुत जातलावर तादी ब बनै दुख तान्‍या ले।
ROM 2:10 चाव य़ेन दाज़्‍यावरालाई फरी, यहूदीर तादी ब, छुत जातलावर तादी ब असिक स़ोनो मान याद यायुँ ब होलाँ जैद्यान्‍या ले।
ROM 2:11 परमेस्वरए मिँ रँःद मादोव, य़ेन रँःद दोज़्‍याव।
ROM 2:12 है जैद परमेस्वरए ओकानुन सैंदकाव पाप दोव भरी हो कानुननी ज़ फाल्‍सिरिज़्‍यार। परमेस्वरए ओकानुन मासैंदकाव पाप दोव भरिए बिनु कानुननी ज़ सजा दैरिज़्‍यार।
ROM 2:13 परमेस्वरए ओकानुन थैद वाज़ परमेस्वरए ओङ़ाक सु ज़ धर्मी माथ॰रिए। ओकानुन दाद वाज़ धर्मी थ॰रिन्‍या ताए।
ROM 2:14 परमेस्वरए ओकानुन मादैव छुत जातलाव मिँराए मनी परमेस्वरए ओकानुनलाव मिताव य़ेनर यायुँ स्‍यानी याज़ दान्‍या यासैंवए नोराए मनी तोबो कानुन यादैव मिताव ज़ ताद ले।
ROM 2:15 परमेस्वरए ओकानुन ते यायुँल ज़ सर्सिउ लिज़्‍या। है जैद याज़ यायुँल छाप छाप दाद, ‘आव ते चाव ज़ ङादोके, आव ते माचाव ची ङादोके’ लिन्‍या याज़ सैंज़्‍यार।
ROM 2:16 आव भरी परमेस्वरए मिँरालाई येसु ख्रीसनी ओराफाल्‍रिज़्‍याव छ्याम ज़ तारिज़्या। ङा ङारासथैज़्याव चाव था मिताव ज़, नो छ्याम यायुँलाव म़ोंसिउ पाँ भरी फाल्‍सिरिज़्‍यार।
ROM 2:17 जे नलाव यहूदी तावर मोसाए ओकानुनत जेयुँ हुप्‍द, ‘परमेस्वरए गेलाई वाज़ चाव रँःसिज़्‍याव’ है ब जेलिज़्‍याखेहो।
ROM 2:18 नो कानुननी फरी चाव माचाव सैंद, परमेस्वरए उयुँलाव मिताव दान्‍या य़ेनर ब जेसैंज़्‍या।
ROM 2:19 ‘यामी मारैंःवरालाई दोरैज़्यावर ब गे ज़, चुम चुमोल लिज़्‍यावरालाई पलाँ जैद्याज़्‍यावर ब गे ज़।
ROM 2:20 साचो पाँ स़ोनो सैंन्‍या भरिए ओथालन परमेस्वरए ओकानुनल गेदैवनी मुर्खरालाई गेरासुधारैज़्‍या, मासैंज़्‍यावरालाई गेरापैज़्‍या,’ है जेलिज़्‍या।
ROM 2:21 है जैद जे छुतरालाई पैज़्‍यावर जे जेमापैसिज़्‍या नी? जे छुतरालाई ‘कुन्‍या माताए’ है दाज़्‍यावर जे जेमाकुज़्‍या नी?
ROM 2:22 जे ‘अर्काए ओज्‍याए ल्‍योदा बान्‍या माताए’ है दाज़्‍यावर जे जेमाबाज़्‍या नी? जे अङग्‍या पुजात जेयुँ माजाम्‍ज़्‍यावर मन्‍दिरलाव अङग्‍यार कुद जेमारायो·ज़्‍या नी?
ROM 2:23 जे मोसाए ओकानुन जेदैवनी सघ्योःसिज़्‍यावर नो कानुन माभैंःद परमेस्वरए उमिन जेमाबले·ज़्‍या नी?
ROM 2:24 जे मितावराए जेजूँनी धर्मसास्‍त्रल इताव ब सर्सिउ लिज़्‍या, ‘जे जेदोव हुनानी छुत जातलाव मिँराए खार्ल परमेस्वरए उमिन माचाव थ॰रिके।’
ROM 2:25 है जैद नो कानुनलाव पाँ जेदोकिन वाज़ नो यहूदी जैसिन्‍या क्‍याल्‍न्‍या सरेस ओलेखा ल्‍यो लिज़्‍या। कानुनलाव पाँ जेमादोकिन ते नो सरेस जैसिद ब माजैसिउ स्‍यासोर जेलिज़्‍या।
ROM 2:26 हो मिताव ज़ फरी, क्‍याल्‍न्‍या सरेस माजैसिउ छुत जातलाव मिँए कानुनलाव य़ेन ओदोकिन, नो मिँ सरेस माजैसिद ब जैसिउ स्‍यासो ज़ लिज़्‍या।
ROM 2:27 है जैद निताव क्‍याँताव सरेस माजैसिउ छुत जातलाव मिँए कानुनलाव य़ेन ओदोकिन, नोए ज़ झन जे मिताव सरेस जैसिउ यहूदी जातलाव कानुन सैंद ब मादोज़्‍याव मिँरालाई जेपाहा झाःद्यान्‍या ले।
ROM 2:28 पाखातावए वाज़ साचो यहूदी तान्‍या माताए। हिताव ज़ सतैंन्‍याए जूँनी वाज़ क्‍याल्‍न्‍या सरेस जैसिउ ब साचो सरेस माःक।
ROM 2:29 साचो यहूदी तान्‍या युँल ज़ ताज़्‍या। साचो क्‍याल्‍न्‍या सरेस ब युँल ज़ ताज़्‍या। नो सरेस ते पाखाताव कानुननी माताए, छैंव पुरूसनी ज़ ताज़्‍या। निताव मिँ मिँराए ल्‍योनी ओमागनिसिदी ब परमेस्वरए ल्‍योनी ते गनिसिज़्‍या।
ROM 3:1 जे ते, ‘हो ची ताकिन्‍दा, गे यहूदी गेताव स़ोनो क्‍याल्‍न्‍या सरेस गेजैसिउ अऩाकलाव ज़ ची ओल्‍यो’ है जेलिज़्‍याखेहो।
ROM 3:2 अऩाकलाव ते माले, ओलेखा ल्‍यो ज़ लिज़्‍या। प़ाइँरानी उस॰कताव आव ज़ — परमेस्वरए ओपाँर यहूदीराए यापासल ज़ नैक्‍यो।
ROM 3:3 नोर नो य़ाकाए ओसतत यामालिदी ब, यायुँ ओमाहुप्‍दी ब परमेस्वरलाई असतलाव माजैधुर।
ROM 3:4 मानुवाताव मिँ भरी ओपो·स ज़ असतलावर याथ॰रिदी ब, परमेस्वर ते सतलाव ज़ थ॰रिन्‍या ले। धर्मसास्‍त्रल मनी परमेस्वरए उजूँनी इताव सर्सिउ लिज़्‍या, “नपाँ भरिल नँ ज़ साचो थ॰रिन्‍या नले। नपाँलाई याफाल्‍दी ब नँ ज़ झेंःन्‍या नले।”
ROM 3:5 ख्वा ख्वाराए ते मिँराए बिचार मितावनी है लिज़्‍याखेरहो, “माचाव गेय़ेननी परमेस्वरए ओय़ेन झन ज़ ओसत ल्‍यो ओरैंःकिन कातानी गेलाई नो य़ेनत सजा ओयासिरिज़्‍याव?”
ROM 3:6 निताव ते माताए। परमेस्वरए ननी ज़ अन्‍याय ओदोव उथ॰रिकिन, कै जैद आव मानुवाताव मिँरालाई याफालोके?
ROM 3:7 ख्‍वा ख्‍वाराए फरी, “काता, गे माचाव गेय़ेनत परमेस्वरए उमिन झन ज़ ओघ्योःकिन काराव गेलाई पापी ओथ·रैसिज़्याव?
ROM 3:8 हिताव ताकिन चाव घताक लिद प़ाइँए पाप ज़ गेदोया,” है लिज़्याखेरहो। हिताव ते माताए। गेमिन बले·द्याव पैंज़्‍याव ख्वा ख्वाराए ते झन हो ज़ थ·रैद्यासिज़्‍यार। नितावराए सजा दैन्‍या ते थिक ज़।
ROM 3:9 है जैद गे यहूदीर छुत जातलाव मिँराकिन चावर गेमाले। ङा है ङादाचिज़्‍याव मिताव यहूदीर तादी ब, छुत जातलावर तादी ब प़ाइँ पापल ज़ लिज़्‍यार।
ROM 3:10 धर्मसास्‍त्रल मनी इताव सर्सिउ लिज़्‍या, “परमेस्वरए ओङ़ाक धर्मी तोबो ब माले।
ROM 3:11 परमेस्वरए ओपाँ तीज़्‍याव ब सु ज़ माले। परमेस्वरलाई खिम्‍ज़्‍याव ब सु ज़ माले।
ROM 3:12 प़ाइँ तँदा बाद काम मालागिउर ताद लेर। चाव य़ेन दाज़्‍यावर तोबो ब मालेर।”
ROM 3:13 “नोराए याभोंकोरा घ्वाँःव खादर स्‍यासो लिज़्‍या। यापाँ ब धुत वाज़ लिज़्‍या।” “यायाःत घुलए ओधास स्‍यासो लिज़्‍या।”
ROM 3:14 “यायाःनी हुज़्‍याव भरी गाल स़ोनो सराप वाज़ लिज़्‍या।”
ROM 3:15 “मिँ सैःन्‍यादा याखँ बनै गिल्‍ज़्‍या।
ROM 3:16 जोङ बाद ब दुख यान्‍या वाज़ सैंज़्‍यार।
ROM 3:17 छुतस खैन्‍या येमदा खर्क ज़ माबार।”
ROM 3:18 “परमेस्वरलाई रँःद ब माछे·र।”
ROM 3:19 जे ज़ जेसैंज़्या, जो कानुन तादी ब कानुन मादैवराए जूँनी ते माले, दैवराए जूँनी ज़ लिज़्‍या। है जैद मानुवाताव मिँ भरी परमेस्वरए ओङ़ाक पाँन्‍या येम ज़ माले, ओपो·स ज़ परमेस्वरए ओसजा दैन्‍यार ताद लेर।
ROM 3:20 कानुनलाव य़ेन दाद परमेस्वरए ओङ़ाक सु ज़ धर्मी थ॰रिन्‍या मालेर। नो कानुनए ओय़ेन ते गेपाप सतैंद्यान्‍या लिज़्‍या।
ROM 3:21 गे मिँरालाई परमेस्वरए ओङ़ाक गेखत माल्‍यो धर्मी थ॰रिन्‍या साःरो येम सतैंसिउ लिज़्‍या। हो येम कानुनलाव य़ेन दान्‍यानी माःक। हैदी ब नो येम ङ़ादाकिन ज़ मोसाए ओकानुन स़ोनो अगमबक्ताराए यासरो भरिल सतैंसिउ लिज़्‍या।
ROM 3:22 नो येम आव ज़ — जोए येसु ख्रीसलाई उयुँ हुप्‍ज़्‍या, नो उयुँ उसुहुबोनी ज़ परमेस्वरए ओङ़ाक धर्मी थ॰रिज़्‍या। है जैद यहूदीरालाई तादी ब, छुत जातलावरालाई तादी ब, हुनी वाज़ लिज़्‍या।
ROM 3:23 काराव ल्‍यो ताकिन प़ाइँए ज़ पाप दाद परमेस्‍वरए ओज़गैनी अछत ताकेर।
ROM 3:24 है जैद परमेस्‍वरए उयुँ गराँद मिँरालाई ओज़ा येसु ख्रीसनी ओलस सखैन्‍याए जूँनी यासजानी अइज़ यापले·क्‍यो।
ROM 3:25 ओज़ाए ओक्‍याँत यायुँ हुप्‍ज़्‍यावरालाई ओल परमेस्वरए ज़ यासजा भरी नोए उझीनी ज़ क्‍याल्‍द याएज़्‍याव। परमेस्वरए ओन्‍याय सतैंन्‍याए जूँनी येसु ख्रीस ओमाहुदकाव यादोव पाप भरी सहिद्याद ओज़ाए ओक्‍याँत ज़ सयो·द याएक्‍यो।
ROM 3:26 आज्‍याल मनी ओज़ा येसुलाई यायुँ हुप्‍ज़्‍यावरालाई हुनी ज़ यासखैज़्‍याव। परमेस्‍वरए न्‍यायस ज़ ओराफाल्ज़्‍याव मनी ननी ज़ रैंःज़्‍या।
ROM 3:27 है जैद मिँराए, ‘ङा ङादोव य़ेननी ज़ परमेस्वरए ओङ़ाक धर्मी ङाथ॰रिके’ है लिद मास॰धुर, युँ हुप्‍न्‍यानी वाज़ धर्मी तान्‍या ताज़्या।
ROM 3:28 कानुनलाव य़ेननी परमेस्वरए ओङ़ाक सु ज़ माथ॰रिधुर, युँ हुप्‍न्‍यानी वाज़ परमेस्वरए ओङ़ाक कानुन सयो·सिउ थ॰रिज़्‍या।
ROM 3:29 परमेस्‍वर काता यहूदीराए यापरमेस्‍वर वाज़ रो? छुत जातलावराए यापरमेस्‍वर माःक रो? नो छुत जातलावराए यापरमेस्‍वर पाला ज़ सानी।
ROM 3:30 परमेस्वर तोबोका तोबो वाज़ ओतावए, नो परमेस्वर यहूदीराए यापरमेस्वर वाज़ माःक, प़ाइँए यापरमेस्वर ज़ लिज़्‍या। है जैद यहूदीर तादी ब, छुत जातलावर तादी ब परमेस्वरए मिँरालाई उयुँलाव मिताव धर्मी ओरारँःज़्‍याव तोबोनी वाज़ — नो येसुलाई युँ हुप्‍न्‍यानी वाज़ लिज़्‍या।
ROM 3:31 है जैद परमेस्वरए ओङ़ाक धर्मी थ॰रिन्‍या येम युँ सुहुप्‍न्‍यानी वाज़ ओताकिन ‘कानुन ते अऩाकलाव ची ओल्‍यो’ है जेलिज़्‍याखेहो। हिताव ते माःक, बुरू गेयुँ गेसुहुबोनी परमेस्वरए ओकानुन झन ज़ गेसयो·ज़्‍या।
ROM 4:1 हो ताकिन यहूदीराए गेपुर्खा अब्राहामए उजूँनी काता पाँन्‍या?
ROM 4:2 अब्राहामए ओदोव य़ेननी परमेस्वरए उयुँलाव मिताव उथ॰रिउ ताकिन, ‘ङानी ज़ धर्मी ङाथ॰रिके’ है लिखेहो। खाली परमेस्वरए ओङ़ाक ते है मालिधुइ।
ROM 4:3 धर्मसास्‍त्रल ब नोए उजूँनी इताव सर्सिउ लिज़्‍या, “अब्राहामए परमेस्वरए ओपाँत उयुँ उसुहुबोनी ज़ परमेस्वरए नोलाई धर्मी ज़ थ·रैक्‍यो।”
ROM 4:4 य़ेन दाज़्‍यावए ओजेला ते दयानी मादैव, ओय़ेनए ओपाकैवनी वाज़ दैज़्‍याव।
ROM 4:5 ओय़ेननी काता ज़ मापाकैव मिँए ते यागल्‍ती क्‍याल्‍द्याज़्‍याव परमेस्वरलाई उयुँ उसुहुप्‍किन, नो ज़ झन परमेस्वरए ओङ़ाक धर्मी थ॰रिज़्‍या।
ROM 4:6 दाऊदए पाला परमेस्वरए याय़ेन चिऊद मायाद धर्मी ओराथ·रैव असिकए जूँनी अइ लिद सर्द नैव,
ROM 4:7 “मादान्‍या यादोव य़ेनलाई चिऊद मायाद, यापाप क्‍याल्‍द ओराएकिन, नोर याभागी ल्‍योर लिज़्‍यार।
ROM 4:8 परमेस्वरए यापाप ओलेखा नैद ओमाराएकिन, नोर ब असिक दैवर लिज़्‍यार।”
ROM 4:9 नो परमेस्वरए ओराएज़्‍याव असिक क्याल्‍न्‍या सरेस जैसिउरालाई वाज़ माःक, प़ाइँलाई ज़ यासिउ लिज़्‍या। परमेस्‍वरए अब्राहामलाई पाला क्याल्‍न्‍या सरेस ओमाजैसिद ङ़ादा ज़, उयुँ उसुहुबोनी वाज़ धर्मी थ·रैक्‍यो।
ROM 4:11 उयुँ सुहुप्‍द परमेस्वरए ओङ़ाक धर्मी उथ॰रिउ छींनी वाज़ परमेस्वरए, ‘ङामीं ज़’ लिद थामिन्‍याए जूँनी नो सरेस य़ाकाए जूँनी एक्‍यो। है जैद अब्राहाम क्‍याल्‍न्‍या सरेस माजैसिउ यायुँ हुप्‍ज़्‍याव छुत जातलाव मिँराए याबाबु मनी ज़। नोर मनी यायुँ यासुहुबोनी ज़ परमेस्वरए उयुँलाव मिताव उमींर ताज़्‍यार।
ROM 4:12 फरी क्‍याल्‍न्‍या सरेस जैसिउ यहूदीराए याबाबु मनी लिज़्‍या, खाली नोर मनी यापुर्खा अब्राहामए उसिलत बाद नोए ओदोव मितावनी ज़ यायुँ यासुहुप्‍किन वाज़ साचो नोए ओथोर ताज़्‍यार।
ROM 4:13 परमेस्वरए अब्राहाम स़ोनो ओथोरालाई, ‘आव मानुवाताव राज्‍या जेमीं ज़ जैद ङायाचिरिज़्‍या’ है ओरादोव य़ाका अब्राहामए कानुनलाव य़ेन ओदोवनी ओदैव माःक, उयुँ हुप्‍द परमेस्वरए उयुँलाव मिताव उथ॰रिउनी ओदैव ची।
ROM 4:14 परमेस्वरए नोरास ओनैधुव य़ाका, छींनी कानुनलाव य़ेननी दैन्‍या ओजैव ताकिन, युँ हुप्‍न्‍या भरी अऩाकलाव ज़ ताद परमेस्वरए ओय़ाका ब मातान्‍या ज़ ताखेहो,
ROM 4:15 काराव ल्‍यो ताकिन कानुननी ज़ मिँराए परमेस्‍वरनी सजा दैज़्यार। कानुन ओमालिकिन सजा ब माताखेहो।
ROM 4:16 है जैद ज़ परमेस्वरए ‘नो य़ाका ङायुँ गराँवनी ज़ ओताक’ लिद अब्राहामए ओथोरालाई नो य़ाका दैन्‍या यायुँ यासुहुबोनी ज़ जैद याएक्‍यो। ननी वाज़ नोरालाई दैन्‍या फिस्‍को माताए। नो य़ाका कानुन धूँलाव यहूदीराए जूँनी वाज़ माःक, प़ाइँए गेबाबु अब्राहामए ओदोव मितावनी ज़ यायुँ सुहुप्‍ज़्याव भरिराए जूँनी ब लिज़्‍या
ROM 4:17 धर्मसास्‍त्रलाव सर्सिउ मितावनी ज़, “परमेस्वरए अब्राहामलाई प़ाइँ राज्‍यालावराए याबाबु ज़ जैद नैद यायो।” नो य़ाका उयुँ उसुहुप्‍ज़्‍याव परमेस्वरए ओङ़ाक थ॰रिउ ज़ ताके। नो परमेस्वर सिउरालाई ब याजागैज़्‍याव, ताज़्‍याव भरी ब ओपाँनी ज़ यासिर्जैज़्‍याव।
ROM 4:18 आस मालिज़्‍यावत ब अब्राहामलाई, “नथोर मागनिसिधुन्‍या तारिज़्‍यार,” है ओदोव पाँत उयुँ हुप्‍के। है जैद अब्राहाम कुधु जातलावराए याबाबु ताके।
ROM 4:19 ज़ार मादैद सय बर्सवा ताद फ्या·न्‍याल गनिसिद उलिज़्‍यावत ब, ओज्‍या सारा जूचास्‍द ओबेथ रूःम्‍द उलिज़्‍यावत ब उयुँ मासतेद परमेस्वरए ओपाँत उयुँ हुप्‍के।
ROM 4:20 है जैद परमेस्वरनिकाव ओदैव य़ाकात अब्राहामए उयुँ आदा होदा माजैद, उयुँर झन ज़ हुप्द, परमेस्वरलाई ओमानर नैद्याद,
ROM 4:21 ‘ङालाई है ओदाँव भरी जुनी ब सयो·द्याँवा ज़’ लिन्‍या सैंक्‍यो।
ROM 4:22 ननी ज़ परमेस्वरए अब्राहामलाई धर्मी थ·रैक्‍यो।
ROM 4:23 खाली नोलाई धर्मी ओथ·रैव पाँ ओललाई वाज़ माःक,
ROM 4:24 गे गेजूँनी ब लिज़्‍या। गे ब गेप्रभु येसुलाई सिउनी सोचोइज़्‍याव परमेस्वरलाई गेयुँ गेसुहुप्‍किन नोए गेलाई मनी धर्मी ज़ थ·रैन्‍या ले।
ROM 4:25 परमेस्‍वरए गे गेपापए जूँनी येसुलाई ज़ सिउ एक्‍यो। फरी परमेस्‍वरए ओङ़ाक गे धर्मी थ॰रिन्‍याए जूँनी येसुलाई सिउनी सोचोइक्‍यो।
ROM 5:1 है जैद गेयुँ गेसुहुबोनी परमेस्‍वरए ओङ़ाक गेगल्‍ती माल्‍यो धर्मी गेथ॰रिउए, गेप्रभु येसु ख्रीसनी परमेस्‍वरस गेखैज़्‍या।
ROM 5:2 गेयुँ गेसुहुबोनी ज़ नो गेप्रभुए गेल्‍योदा उयुँ गराँद ओबाबु परमेस्‍वरस साःरो सर्‍यो जैद ओयासिउए गे नत ज़ गेलिज़्या। ननी ज़ गे स्‍वर्गताव आसत गेयुँ हुप्‍द रेंव ज़ गेलिज़्‍या।
ROM 5:3 नाः वाज़ माःक, जो मिताव दुख उहुदी ब गेयुँ गेमासतेए, काराव ल्‍यो ताकिन नो दुखराए गेलाई माबले·सिउ, झन थ॰रिउ ज़ जैसिज़्‍याव।
ROM 5:4 थ॰रिउ युँए फरी, पाखो जैव दोज़्‍याव। पाखो ताव मिँए ओआस झन घ्योःनाज़्‍या।
ROM 5:5 गे आव आसत निरास तान्‍या गेमाले, काराव ल्‍यो ताकिन परमेस्‍वरए छैंव उपुरूस याद नो छैंव पुरूसनी गेयुँल ओमया थुद नैद्यासिउ।
ROM 5:6 गेनी काता ज़ माजैधुन्‍यार गेलिज़्याक, थिक ओगोइँव बेलाक ज़ ख्रीसए गे पापीराए जूँनी उजिउ झाःद्यासिक्‍यो।
ROM 5:7 मिँराए ताकिन ते चाव मिँए उजूँनी ब सुए ज़ उजिउ झाःद मायो, खाली बनै घ्योःव उयुँ उलिकिन वाज़ कैताराक बनै चाव मिँए उजूँनी उजिउ झाःद्याव ब धुव।
ROM 5:8 खाली परमेस्‍वरए ते गेल्‍योदा उयुँ उलिज़्याव आनी ज़ रैंःज़्‍या — गे पापीर गेलिज़्‍याक ज़ ख्रीसए गेजूँनी उजिउ झाःद्यासिक्‍यो।
ROM 5:9 है जैद नो उझीनी ज़ परमेस्‍वरए ओङ़ाक उयुँलाव मिताव ओजैसिउए, नोए ओल्‍योनी ज़ परमेस्‍वरए ओसजानी ब पुलुस्‍न्‍या गेले।
ROM 5:10 गे निताव ओलकिन तँदा लिज़्‍यावराए गेजूँनी उजिउ झाःद्याद ओबाबु परमेस्‍वरस ओसखैसिउए, गे परमेस्‍वरस खैवराए गेजूँनी ते दाद ओमायासिज़्‍याव काता ची लिज़्‍यादा? काता ज़ माले। ओल सिउनी सोद परमेस्‍वरस उलिज़्‍यावए गेलाई मनी बाँचैसिज़्याव।
ROM 5:11 हो वाज़ माःक, गेप्रभु येसु ख्रीसनी परमेस्‍वरस गेखैवए, परमेस्‍वरए ओङ़ाक गेयुँर होलाँ ताद रेंव ज़ गेलिज़्‍या।
ROM 5:12 आव मानुवात तोबो मिँए ल्‍योनी ज़ पाप पसिके। ननी ज़ सिन्‍या ब ताके। हाःकिन प़ाइँए पाप यादोवए प़ाइँ सिन्‍या ताकेर।
ROM 5:13 मोसाए ओकानुनकिन ङ़ादा ज़ आव मानुवात पाप पसिद उलिज़्‍याव। खाली नो कानुन ओमातावा पै नो यादोव पापए ओहिसाप ब ओमालिज़्याव।
ROM 5:14 हितावत ब आदमए ओपालाकिन मोसाए ओपालाक पै सिउ ज़ यालिज़्‍याव। नोराए आदमए ओदोव पाप मिताव यामादोदी ब सिउ ज़ परिके। है जैद किताव आदमए ओदोव हुनानी प़ाइँलाई ताके, हिताव ज़ छींनी हुज़्‍याव ख्रीसए उहुनानी मनी प़ाइँलाई ज़ ताके।
ROM 5:15 खाली आदमए ओदोव पाप परमेस्‍वरए ओदया स्‍यासो ते माले। आदमए ओदोव पापनी कुधुए सिन्‍या सजा दैकेर। येसु ख्रीसए ओदोव हुनानी परमेस्‍वरए ओदया ताद प़ाइँए बाँचिन्‍या असिक दैकेर।
ROM 5:16 हो मिताव ज़ परमेस्‍वरए ओल्‍योनी गेदैज़्‍याव असिक आदमए उहुनानी गेदैज़्‍याव स्‍यासो माःक। आदमए उहुनानी परमेस्‍वरए ओसजाल प़ाइँ ज़ परिकेर। ख्रीसए उहुनानी ते नोराए कुधु पाप यादोव तादी ब परमेस्‍वरए उयुँ नाद उयुँलाव मितावर थ॰रिज़्यार।
ROM 5:17 तोबोए ओदोव पापए हुनानी प़ाइँ सिन्‍याल परिकेर। परमेस्‍वरए ओदयानिकाव असिक दैद ओङ़ाक धर्मी थ॰रिउराए ते होकिन झन येसु ख्रीसए उहुनानी अजम्‍बरी जुनी दैज़्‍यार।
ROM 5:18 है जैद तोबो पापनी प़ाइँ ज़ परमेस्‍वरए ओसजा दैन्‍या ताकेर। हो मिताव ज़ तोबो धर्मलाव य़ेननी प़ाइँए ज़ फुर्सुल ताद साःरो जुनी दैन्‍या ताकेर।
ROM 5:19 काराव ल्‍यो ताकिन किताव परमेस्‍वरए ओपाँ तोबोए ओमाभैंःवनी कुधु ज़ याखत ल्‍योर थ॰रिकेर, हिताव ज़ परमेस्‍वरए ओपाँ तोबोए ओभैंःवनी कुधु ज़ याखत माल्‍यो छैंवर थ॰रिकेर।
ROM 5:20 मिँ भरी प़ाइँ पापीर ज़ लिज़्यार लिन्‍या सतैंद्यान्‍याए जूँनी परमेस्‍वरए कानुन जैक्‍यो। हितावत ब नो पाप खा कुधु ओताव, नोकिन झन परमेस्‍वरए ओदया कुधु ज़ ताके।
ROM 5:21 किताव ङ़ादा प़ाइँ मिँर पाप धूँल ताद सिन्‍या सजाल परिकेर, हिताव ज़ परमेस्‍वरए ओदयानी नो भरी त़ोसिद, गेप्रभु येसु ख्रीसनी परमेस्‍वरस सखैसिद, अजम्‍बरी जुनी दैन्‍यार गेताज़्‍या।
ROM 6:1 जे ख्वाराए ते, ‘परमेस्‍वरए ओदया झन कुधु घताक लिद गे मनी झन पाप गेदोया की’ है जेलिज़्‍याखेहो।
ROM 6:2 हिताव ते माःक। गे पापस सर्‍यो फ्या·द पापए जूँनी सिधुवर काराव फरी पापल जन्‍न्‍या?
ROM 6:3 जे ज़ जेसैंज़्‍या, गे येसु ख्रीसए उमिनत गेसछैंसिक ओलस तोबो ताद, सिप ज़ गेसिके।
ROM 6:4 है जैद किताव ख्रीसए सिउ ओक्‍याँलाई खादरल याझाःव, हिताव ज़ गे मनी ख्रीसए उमिनत गेसछैंसिक ङ़ादाङाव गेक्‍याँ खादरल बाके। खाली हो वाज़ माःक, किताव ओबाबु परमेस्‍वरए ओसक्तीनी सिउनी ओसोव, हिताव ज़ गे मनी सोद साःरो येमल गेबाज़्‍या।
ROM 6:5 सिन्‍यात ओलस तोबो गेताकिन, साःरोल पुलुस्‍न्‍यात मनी ओलस तोबो ज़ गेताज़्‍या।
ROM 6:6 आव ब सैंच्‍यो, नो ङ़ादाङाव पाप दोज़्याव गेक्‍याँ ख्रीसस क्रुसत सिप ज़ सिके, हाःकिन पाप धूँल गेमाले।
ROM 6:7 काराव ल्‍यो ताकिन सिउ मिँ पापए उधूँल मालिद फुर्सुल ताज़्या।
ROM 6:8 गे ख्रीसस सिप गेसिउए, ‘ओलस साःरो जुनील पुलुसोर ब गेताके’ लिद गेयुँ हुप्‍द ले।
ROM 6:9 ख्रीस सिउनी ओसैंसिउत फरी खर्क ज़ सिन्‍या माले। होए ओक्‍याँत सिन्‍याए ओहक फरी तान्‍या माले।
ROM 6:10 नो तखेप उसिउ गेपापए उजूँनी ज़, नो सिउनी पुलुसो उजिउ ते परमेस्‍वरए उजूँनी ज़ बाँचिज़्‍या।
ROM 6:11 हिताव ज़ जे मनी ‘गे पाप दान्‍यात सिद, येसु ख्रीसनी जींदो ताद, आव गेजिउ परमेस्‍वरए उजूँनी बाँचिज़्‍या’ लिन्‍या चेतैव ताके।
ROM 6:12 है जैद जे आव जेजिउत कुबाना बानी धूँल लिद जेमन लागिउ य़ेनदा ताबाच्‍यो।
ROM 6:13 पाप दान्‍यादा जेखँ जेकुइलाई फरी बाव ताएच्‍यो। बुरू, ‘गेलाई सिउनी बाँचैज़्‍याव नँ ज़’ लिद जेक्‍याँ भरी परमेस्‍वरलाई चरैःद, उयुँलाव मिताव य़ेन दान्‍यादा जेक्‍याँर थाँच्‍यो।
ROM 6:14 जे कानुन धूँल माताद परमेस्‍वरए ओअसिक धूँल जेतावए, जे जेक्‍याँत पापए ओहक माताव परिके।
ROM 6:15 जे ख्वाराए ते, ‘कानुन धूँल माताद असिक धूँल गेलिज़्यावए पाप गेदोदी ब ओताज़्‍याव ची ओल्‍यो’ है जेलिज़्‍याखेहो। हिताव ते माःक।
ROM 6:16 काता जे, जोए ओपाँ भैंःद ओसेवा जेदोज़्‍या, होए ओनोकोरर जेताज़्‍याव जेमासैंए रो? मादान्‍या य़ेन दाद होत ज़ जेलिकिन सिन्‍या सजाल परिन्‍या जेले। फरी परमेस्‍वरए ओपाँ जेभैंःकिन ते ओङ़ाक उयुँलाव मितावर थ॰रिन्‍या जेले।
ROM 6:17 जे ङ़ादा मादान्‍या य़ेनर दाद पापए ओबाँदार जेल्‍यो। अब ते परमेस्वरए ओपाँ किताव जेथैव, हिताव ज़ नो पाँत लिद जेयुँ स्‍यानी ज़ जेदोज़्‍या। आवए उजूँनी परमेस्‍वरलाई धन्‍याबाद लिज़्‍या।
ROM 6:18 जे पापए ओसेवानी पुलुस्‍द चाव य़ेन दान्‍यादा परमेस्वरए ओसेवा दान्‍यार ताद जेले।
ROM 6:19 आव ङापाँ कसा मातीधुर लिद जेतीधुन्‍या पाँनी ज़ ङापाँज़्‍या। किताव ङ़ादाकिन जेखँ जेकुइए युँ माजामो माचाव य़ेन दावका दाव लिद होए ओबाँदा जेजैसिज़्‍याव, हिताव ज़ अबकिन ते नो जेखँ जेकुइलाई परमेस्वरए ओय़ेन दाव परींद होए ओसेवा दान्‍या जेजैसिकिन उमिनताव छैंवर जेतारिज़्या।
ROM 6:20 जे ङ़ादा मादान्‍या य़ेन दाद पापए ओबाँदा जेजैसिक, परमेस्वरए ओय़ेन दान्‍या जात्त ज़ जेमाचेतैज़्‍याव।
ROM 6:21 है जैद आज्‍याल ते नो ङ़ादाङाव जेदोव य़ेनलाई जेचेतैक जेलाज ब हुज़्‍या। नो ङ़ादाङाव जेदोव भरिए जेलाई यादा माजैचिक्‍यो, झन सिन्‍याल वाज़ ओझाःचिज़्‍याव।
ROM 6:22 अब ते जे नो पापए ओसेवा दान्‍यानी पुलुस्‍द परमेस्वरए ओसेवा दान्‍यार ताद जेले। ननी ओफाइदा ऩेथो लिज़्‍या — परमेस्वरए उयुँलाव मिताव छैंवर जेतानाज़्‍या, स़ोनो अजम्‍बरी जुनी ब जेदैरिज़्‍या।
ROM 6:23 पापए ओजेला नर्ग लिज़्‍या, परमेस्वरए ओयासिज़्‍याव बरदान ते गेप्रभु येसु ख्रीसनी अजम्‍बरी जुनी लिज़्‍या।
ROM 7:1 अ ङानैं ङामेंर, जे मोसाए ओकानुन भरी सैंद जेनै। है जैद आव ङापाँ ब चावस तीच्‍यो। जो मिताव कानुननी तादी ब नो कानुनए ओहक मासिवा भरी वाज़ लिज़्‍या।
ROM 7:2 किताव रे दाव मेंमा, ओरे ओमासिवा पै कानुन मितावनी ओरेए ओसतत लिन्‍या ज़ लिज़्‍या। ओरे उसिकिन वाज़ बल्‍ल फुर्सुल ताज़्‍या।
ROM 7:3 ओरे लिज़्‍यावत ज़ नो मेंमा छुतए ल्‍योदा ओरेस्‍किन नो मेंमाए जारी य़ेन ओदोव थ॰रिज़्‍या। खाली ओरे उसिकिन वाज़ नो कानुननी फुर्सुल ताज़्या। हाःकिन छुतस ओरेस्‍दी ब नोलाई काता खत ज़ माले।
ROM 7:4 ङानैं ङामेंर, हो मिताव ज़ गे मनी ङ़ादाकिन मोसाए ओकानुन धूँल गेलिज़्‍याव। खाली ख्रीसए उमिनत ओलस गेसिउ मिताव ज़ ओतावए नो ङ़ादाकिनकाव मोसाए ओकानुनलाव गेसर्‍यो भरी फ्या·द अबकिन ते सिउनी सोव ख्रीसस साःरो गेसर्‍यो ताके। हुनी ज़ परमेस्वरए उयुँलाव मिताव य़ेन ब सयो·धुन्‍या गेले।
ROM 7:5 ङ़ादा माचाव गेय़ेनए उधूँल गेलिज़्याक कानुनलाव ‘मादान्‍या’ सर्सिउए गेलाई झन मादान्‍या वाज़ खर॰ चेतैव उपरींसिज़्‍याव। है जैद सिन्‍या सजाल गेपरिके।
ROM 7:6 आज्‍याल ते नो सजात गेसिउ मिताव ज़ ओतावए नो कानुनए ओहकनी पुलुस्‍द गेले। है जैद हाःकिन गे परमेस्‍वरए ओसेवा कानुननी गेदोज़्‍याव माःक, गेयुँल लिज़्याव छैंव पुरूसनी ज़ गेदोज़्‍याव ची।
ROM 7:7 ङा परमेस्‍वरए ओकानुन माचाव है ङालिज़्‍याव ते माःक। कानुन ओमाल्‍यो ताकिन ‘पाप आव ज़’ लिद कातानी ङासैंरिज़्‍याव? कानुनल “लोभ दान्‍या माताए” लिद सर्सिउ ओमाल्‍यो ताकिन ङा लोभए उमिन ब ङामासैंखेहो।
ROM 7:8 खाली नो कानुनलाव ‘तादोच्‍यो’ लिन्‍या पाँत ज़ पापए ओमौका हुके। ननी ज़ ङायुँलाव प़ाइँ किसिमलाव लोभ ब सरैंःद्याँक्‍यो। है जैद कानुनल ‘तादोच्‍यो’ लिन्‍या ओमाल्‍यो ताकिन ङापाप ब मारैंःखेहो।
ROM 7:9 ङा ङ़ादा परमेस्‍वरए ओकानुन ङामासैंद, सन्‍चस ज़ ङालिज़्‍याव। हाःत ज़ ओकानुनलाव पाँर ङासैंवत ङापाप भरी रैंःद सिउल ङागनिसिके।
ROM 7:10 है जैद नो कानुनलाव बाँचैव परिन्‍या पाँए ज़ झन ङालाई सिन्‍याल झाःनाज़्याव लिन्‍या ङासैंके।
ROM 7:11 खास नो ङ़ादाकिनकाव ङादोव पापए ज़ कानुननी पल्‍तैन्‍या कर दैद ङालाई झुकैद नो कानुननी ओसैःनाव मिताव ताके।
ROM 7:12 हैदी ब परमेस्‍वरए ओकानुन माचाव माःक, छैंव ज़ लिज़्‍या। नलाव दान्‍या य़ेन ब परमेस्‍वर मिताव छैंव ब लिज़्‍या, सोजो ब लिज़्‍या, चाव ब लिज़्‍या।
ROM 7:13 है जैद ङालाई सिन्‍या सजाल नो चाव पाँए ओझाःनाव ते माःक, ङादोव य़ेनए ज़ ओझाःनाव ची। है जैद ङादोव य़ेनए परमेस्‍वरए नाः चाव ओकानुननी मनी सिन्‍याल ओझाःनावए, नो ङाय़ेन ‘पाप ज़’ रैंःके। है जैद परमेस्‍वरए ओकानुननी पाप भरी झन छे छे ङम्सिउ रैंःज़्‍या।
ROM 7:14 नो कानुन भरी परमेस्‍वरनी हुव, चाव ज़ लिज़्‍या लिन्‍या ते गेसैंज़्‍या। खाली ङा माचाव य़ेन दोज़्याव स़ोनो पापए ओबाँदा ङालिज़्याव ज़ रैंःज़्‍या।
ROM 7:15 निताव ङाय़ेनलाई रँःद ङा मनी बक्‍क ज़ ङाताज़्‍या। ङायुँए चाव य़ेन दाव ङापैंदी ब, नो य़ेन मादाद झन ङासोव य़ेनलाई ङादोज़्‍याव ओल्‍यो।
ROM 7:16 नो ङासोज़्याव माचाव य़ेननी ज़ ‘परमेस्‍वरए ओकानुन ते चाव ज़ ओल्‍यो’ लिन्‍या ङाथ·रैज़्‍या।
ROM 7:17 नो ङादोव य़ेन ङानी ज़ ङाखुसीनी ङादोव माःक, ङायुँलाव पापए ची ओदोज़्‍याव ओल्‍यो।
ROM 7:18 आव ङाक्‍याँत चाव काता ज़ माले लिन्‍या ङासैंज़्‍या। ङायुँल चाव य़ेन दाव ङापैंदी ब, ङाकुइए ते ङामासयो·धुइ।
ROM 7:19 ‘चाव य़ेन ङादोया’ है ङालिदी ब, नो य़ेन ज़ मापुलुसे। झन वैंव ङापैंज़्‍याव य़ेन, हो ज़ पुलुस्‍ज़्‍या।
ROM 7:20 ङायुँए ओमाभैंःव य़ेन ङादोज़्‍या ल्‍यो ताकिन, नो ङानी ङादोज़्‍याव माःक, ङायुँलाव पापए ची ओदोज़्‍याव ओल्‍यो।
ROM 7:21 ननी ज़ ङासैंज़्‍या — ङा चाव य़ेन दाव पैंज़्‍यावए ङाक्‍याँत पाप ङास ज़ लिज़्‍या।
ROM 7:22 ङायुँल ते परमेस्‍वरए ओकानुन चाव ज़ ङम्‍सिद खुसीस ङाभैंःज़्‍या।
ROM 7:23 खाली ङाखँ कुइए ते ङायुँलाव पाँकिन तँदा ज़ दोज़्‍याव। है जैद पापए ओसक्तीए ङायुँस लरैं दाद, पाप धूँल ङालाई कैदी जैद माचाव य़ेनदा ज़ लाँनाज़्‍याव।
ROM 7:24 ओहो! ङा इताव पापीलाई सिन्‍याल झाःज़्याव ङाक्‍याँनी सुए हाइनावके?
ROM 7:25 गेप्रभु येसु ख्रीसनी वाज़ पुलुसो ङादैज़्‍या। होए उजूँनी परमेस्‍वरलाई धन्‍याबाद लिज़्‍या। है जैद ङायुँए परमेस्‍वरए ओकानुनलाव य़ेन दोव ङापैंज़्‍या, खाली माचाव य़ेन दाज़्याव ङाक्‍याँए ते पाप दान्‍यादा वाज़ लाँनाज़्‍याव।
ROM 8:1 है जैद येसु ख्रीसए उमिनत लिज़्‍यावरालाई परमेस्‍वरनी काता सजा ज़ तान्‍या माले।
ROM 8:2 येसु ख्रीसनी साःरो जुनी याज़्याव छैंव पुरूसए ओसक्तीनी नो ङ़ादाङाव पाप दाद सिन्‍या सजाल झाःज़्‍याव गेय़ेननी ऱास्‍सिद गेले।
ROM 8:3 गे माचाव य़ेन दोज़्यावराए गेक्‍याँत परमेस्‍वरए ओय़ेन सयो·न्‍या काता सक्ती ज़ ओमाल्‍योए नो कानुनए सुलाई ज़ धर्मी माजैधुव। है जैद परमेस्‍वरए ओल ओज़ालाई गे स्‍यासो मिँ जैद, गेपापए उजूँनी परींद, गेक्‍याँताव पापए ओसक्ती भरी सम़ैद्यासिक्‍यो।
ROM 8:4 परमेस्‍वरए ओकानुनलाव पाँ भरी गे माचाव य़ेन मादाद छैंव पुरूसनी दाज़्यावराए गेक्‍याँनी ज़ ओयो·क लिद ननी ज़ दाद्यासिक्‍यो।
ROM 8:5 क्‍याँनिकाव माचाव य़ेन दोज़्यावर ते याक्‍याँए ओपैंज़्यावदा वाज़ यायुँ झाःज़्यार। छैंव पुरूसनी दोज़्यावर ते छैंव पुरूसए ओपैंज़्यावदा ज़ यायुँ झाःज़्यार।
ROM 8:6 माचाव य़ेन दोज़्याव क्‍याँए ल्‍योदा यायुँ झाःज़्‍यावर पापल सिज़्‍यार। छैंव पुरूसए ओल्‍योदा यायुँ झाःज़्‍यावर ते यायुँ होलाँ ताद साःरो जुनी दैज़्‍यार।
ROM 8:7 नो क्‍याँए ल्‍योदा झाःसिउ युँ ते परमेस्‍वरकिन तँदा ताद परमेस्‍वरलाई सोज़्‍याव। परमेस्‍वरए ओकानुन धूँल मालिधुइ।
ROM 8:8 है जैद क्‍याँए ओपैंज़्याव माचाव य़ेननी सुए ज़ परमेस्‍वरलाई खुसी माजैधुव।
ROM 8:9 खाली जेस ते परमेस्‍वरए उपुरूस जेयुँल बास ओदोवए माचाव य़ेन दोज़्याव क्‍याँए उधूँल माताद परमेस्‍वरए उपुरूसए उधूँल जेलिज़्‍या। जोस ख्रीसए उपुरूस माले, हो ख्रीससकाव माःक।
ROM 8:10 है जैद जेक्‍याँत ख्रीस उलिकिन, पाखाताव जेक्‍याँ पापए उहुनाए उसिदी ब, परमेस्‍वरस जेखैवए परमेस्‍वरए उपुरूसनी साःरो जुनी जेदैज़्‍या।
ROM 8:11 येसुलाई सिउनी सोचोइज़्‍यावए उपुरूस जेयुँल बास ओदोवए, येसु ख्रीसलाई सिउनी सोचोइज़्‍याव ओबाबुए जेलाई मनी तछा ओल उपुरूसनी ज़ जेक्‍याँलाई अजम्‍बरी जुनील सोचोइचिरिज़्याव।
ROM 8:12 है जैद ङानैं ङामेंर, गेक्‍याँए मादान्‍या उखिम्‍ज़्‍याव मितावनी दान्‍या गेलाई काता कर ज़ माले।
ROM 8:13 क्‍याँए उखिम्‍ज़्याव मितावनी माचाव य़ेनल ज़ जेलिकिन सिन्‍या जेले। छैंव पुरूसए ओसक्तीनी ते निताव क्‍याँनिकाव माचाव य़ेनरालाई जेरासम़ैकिन साःरो जुनी ज़ दैन्‍या जेले।
ROM 8:14 परमेस्‍वरए उपुरूसए ओरापैज़्‍याव मितावनी दोज़्‍यावर ज़ परमेस्‍वरए ओज़ार ताज़्‍यार।
ROM 8:15 परमेस्‍वरनिकाव जेदैव पुरूसए जेलाई छे·द ज़ लिन्‍या उधूँलाव बाँदा स्‍यासो माजैचिउ, बुरू ओल परमेस्‍वरस ज़ा बाबु ज़ तान्‍या जैचिज़्‍याव। ननी ज़ गे परमेस्‍वरलाई ‘अब्बा, बाबु’ है ब गेदोज़्‍या।
ROM 8:16 छैंव पुरूस गे गेपुरूस जोरैसिद ‘परमेस्‍वरए ओज़ार गेताके’ है लिन्‍या पाँत ओल ओसाची ब याद नो गेयुँलाव पाँलाई जोर्द्यासिज़्‍याव।
ROM 8:17 गे ओज़ार गेतावए ओबताहा दैन्‍यार ब गेताके — ओज़ा ख्रीसस सिप ज़ दैन्‍या गेले। है जैद ओल उमिनताव दुखर गेदैकिन ओलस ज़ सुख ब दैन्‍या गेले।
ROM 8:18 आव गेजिउताव गेदैज़्‍याव दुखर अजम्‍बरी जुनील गेदैरिज़्‍याव सुखकिन काता ज़ माले लिद ङायुँ हुप्‍द ले।
ROM 8:19 परमेस्‍वरए ओरासिर्जैव भरिए ब ‘परमेस्‍वरए ओज़ारालाई खर्क सतैंद अजम्‍बरी जुनी यायोके?’ लिद यायुँ थू जैव ज़ नैज़्‍यार।
ROM 8:20 नो ओरासिर्जैव भरी ते खेम्‍न्‍यादा म़ान्‍यादा बान्‍या ताकेर। नो यानी माःक, ओल परमेस्‍वरए ज़ नै याजैक्‍यो। खाली नोरालाई मनी तोबो आस लिज़्‍या —
ROM 8:21 परमेस्‍वरए ओज़ारालाई फुर्सुल जैद ओज़गै मगै ओराएरिज़्‍याव मिताव ज़ नो ओरासिर्जैव भरी तछा खेम्‍न्‍या म़ान्‍यानी बाँचिद साःरोल पुलुस्‍न्‍या लेर।
ROM 8:22 किताव ज़ा दैन्‍या मेंमा उघर्लिज़्याव, हिताव ज़ नो ओरासिर्जैव भरिए नो भरी ओमातावा पै ‘आव जुकलाव दुखर खर्क खेम्‍के?’ लिद उथुपुल ताद गहनिउ ज़ लिज़्‍यार।
ROM 8:23 खाली नोर वाज़ माःक, गे उपुरूस बैना दैवराए मनी ‘आव सिन्‍यानी खर्क पुलुस्‍द ओज़ार गेमिन्‍सिके?’ लिद गेयुँ थू जैद कींव ज़ गेनैज़्‍या।
ROM 8:24 निताव आसए जूँनी ज़ परमेस्‍वरए ओपाँत गेहुके। हुन्‍या पाँत वाज़ आस ताज़्‍या, ताधुवलाई आस गेमादोदी ब ताए।
ROM 8:25 खाली गेआस आःपै माहुताव पाँत ओतावए, नो पाँ ओमाहुवा पै गेयुँ थू जैद कींव ज़ गेनैज़्‍या।
ROM 8:26 हिताव ज़ गेनी गेमादोधुज़्‍याव य़ेनल छैंव पुरूसए गेलाई सघैसिज़्‍याव। परमेस्‍वरलाई पोंखारिन्‍या मनी गेनी ज़ गेमासैंए। ओल छैंव पुरूसए ज़ गे सुए ज़ गेमाहाइधुज़्‍याव पाँर गेयुँल पाँद्यासिज़्‍याव।
ROM 8:27 प़ाइँ युँलाव पाँ सैंज़्‍याव परमेस्‍वरए नो छैंव पुरूसए गेयुँलाव ओपाँव पाँए ओअर्थ भरी तीज़्‍याव। काराव ल्‍यो ताकिन गे परमेस्‍वरए उमिनत लिज़्‍यावराए गेजूँनी नो पुरूसए पाँद ओयासिज़्‍याव पाँ भरी ओल परमेस्‍वरए उयुँलाव पाँस खैव लिज़्‍या।
ROM 8:28 आव पाँत गेयुँ हुप्‍ज़्‍या — परमेस्‍वरए उमिनताव खुल्‍सिउर, ओल्‍योदा यायुँ थू जैद नैज़्‍यावरालाई ओल परमेस्‍वरए ज़ प़ाइँ यालाई तान्‍या ज़ सखैद याएज़्‍याव।
ROM 8:29 परमेस्‍वरए ङ़ादाकिन ज़ ‘ङामींर ज़ तारिज़्‍यार’ लिद सरेस्‍द ओरानैज़्‍यावरालाई, नोराए याक्‍याँत तोबोका तोबो ओज़ाए ओगे रैन्‍यार याथ·रैक्‍यो। है जैद ओज़ा ख्रीस छींनी ताज़्‍याव भरिराए यादाज्‍यु ताके।
ROM 8:30 नो ङ़ादाकिन ओराथ·रैवरालाई ओल्‍योदा हुन्‍या ब याखुल्‍क्‍यो। ओल्‍योदा हुन्‍या ओराखुलोरालाई ओलस खैवर ब याजैक्‍यो। ओलस खैव ओराजैवरालाई याज़गै ल्‍योर ब याजैक्‍यो।
ROM 8:31 आव पाँ भरिल गे कै लिन्‍या लिक ते — परमेस्‍वर गेल्‍योदा ओतावए गेलाई सुए ज़ कैज़ माजैसिधुर।
ROM 8:32 तोबोका तोबो ओज़ा ओलस मानैद, सिन्‍या गेपोल झाःद्याज़्‍याव परमेस्‍वरए, गेलाई ओज़ास ज़ चाहिज़्‍याव भरी कै जैद मायासिउके?
ROM 8:33 ओल परमेस्‍वरए ज़ छाँतिद ओराथ·रैवरालाई सुए ज़ खत मारालैधुर। परमेस्‍वरए ओल ज़ उयुँलाव मितावर ओराथ·रैवए,
ROM 8:34 नोरालाई सजा यान्‍या सुए ची ओराथ·रैधुरिज़्‍याव? येसु ख्रीसए गेपापए जूँनी उजिउ झाःद्यासिक्‍यो। हो वाज़ माःक, सिउनी सोद, परमेस्‍वरए ओवोर्दा च़ुसिद गेजूँनी परमेस्‍वरलाई बिन्‍ती दाव ज़ नैज़्‍याव।
ROM 8:35 है जैद गेलाई ख्रीसए ओमयानी सुए ओपले·सिधुरिज़्‍याव? गेलाई दुख उहुदी ब, धो सहिन्‍या उहुदी ब, गेखिरी यापसिदी ब, करे गेतादी ब, नाङग्‍या गेतादी ब, ऩुल उहुदी ब, लरैं उहुदी ब, गेलाई ओमयानी काताए ब मापले·सिधुव।
ROM 8:36 धर्मसास्‍त्रल इताव सर्सिउ लिज़्‍या, “नँ नजूँनी गे दिनकाव सिन्‍या मितावल गेबाज़्‍या। पल्‍ना यालाँज़्‍याव पाथा स्‍यासोर गेलिज़्‍या।”
ROM 8:37 हैदी ब गेल्‍योदा उयुँ थू जैज़्‍यावए ल्‍योनी गे आव भरिल झेंःस्‍याराकिन झेंःस्‍या ज़ गेलिज़्‍या।
ROM 8:38 आव पाँत ङायुँ हुप्‍द ले — गेसिदी ब, गेबाँचिदी ब, स्‍वर्गताव चाकर्‍यार तादी ब, मानुवाताव घेप्‍पार तादी ब, आज्‍यालकाव पाँरानी तादी ब, हुन्‍या पाँरानी तादी ब, सक्तीरानी तादी ब,
ROM 8:39 रोतावर तादी ब, मेलावर तादी ब, छुत कातारानी तादी ब, गेलाई गेप्रभु येसु ख्रीसनी ताज़्‍याव परमेस्‍वरए ओमयानी काताए ब मापले·सिधुव।
ROM 9:1 ङा जेलाई साचो है ङादाचिज़्‍या, धुत ङामापाँए, ख्रीस साची लिज़्‍या। आव पाँत छैंव पुरूसनी ब ङायुँ छैंव ज़ लिज़्‍या। ङापाँ आव ज़ —
ROM 9:2 ङाभेराराए जूँनी ङायुँ बनै घरो ज़ लिज़्‍या। ङा नोराए यापोल ख्रीसए ल्‍योनी ख्यासिद ओसराप धूँल ङापरिदी ब, नोर याबाँचिकिन खुसी ङाताखेहो।
ROM 9:4 नो इस्राएलीरालाई ङ़ादाकिन ज़ ओल परमेस्‍वरए, ओज़ार जैन्‍या थ·रैद, ओज़गैर सतैंद्याद, ओबाचा स़ोनो ओय़ाकार ब याएक्‍यो। ओकानुन ब याद, ओसेवार दान्‍या यापैक्‍यो।
ROM 9:5 अब्राहाम, इसहाक, याकूबर मनी नोराए यापुर्खार ज़। नोराए याथोल फरी ख्रीस ब मिँ मिन्‍सिद जर्मिके। नो प़ाइँराए ङ़ैत राज्या दान्‍या परमेस्‍वर ज़। नोए उमिन एकतार ज़ ओघ्‍योःक। आमेन।
ROM 9:6 परमेस्‍वरए नोरालाई ओय़ाका सयो·द ओमाराएज़्‍याव ते माःक। खाली इस्राएली भरी प़ाइँ याकूबए ओथोर यातादी ब परमेस्‍वरनी ते प़ाइँ मालेर।
ROM 9:7 हो मिताव ज़ अब्राहामए ओज़ार मनी प़ाइँ ओथोल ते मागनिसिर। धर्मसास्‍त्रल मनी परमेस्‍वरए अब्राहामलाई है दाद नैव, “इसहाकनिकावर वाज़ नथोल गनिसिन्‍या लेर।”
ROM 9:8 ननी ज़ रैंःज़्‍या, अब्राहामए ओक्‍याँ बातनिकावर माःक, परमेस्‍वरए अब्राहामलाई ओयो य़ाकानिकावर वाज़ परमेस्‍वरए ओज़ार ताज़्‍यार।
ROM 9:9 नो ओयो य़ाका आव ज़, “ङा फर्नी आः बेलाक फरी ङाहुरिज़्‍या। हो बेलाक नज्‍या साराए खेपा ज़ा दैरिज़्‍याव।”
ROM 9:10 खाली हो वाज़ माःक, गेपुर्खा इसहाकए ओज्‍या रिबेकाए पाला, जोङोल्‍या खेपानी निदैक्‍यो।
ROM 9:11 नोनी चाव ब मादाद माचाव ब मादाद, निआमाए उफूल ज़ परमेस्‍वरए मिँरालाई ओराथ·रैज़्‍याव मिताव,
ROM 9:12 निय़ेननी माःक, ओल उयुँ स्‍यानी ज़ नोनी तोबोलाई रूजिद, रिबेकालाई, “ओदाज्‍युए ओभाइए ओसेवा दान्‍या ले,” है दोक्‍यो।
ROM 9:13 परमेस्‍वरए है उलिज़्‍याव मिताव धर्मसास्‍त्रल आव मनी सर्सिउ लिज़्या, “याकूबए ल्‍योदा ङायुँ लिज़्‍या, एसावए ल्‍योदा ङायुँ माले।”
ROM 9:14 जे ख्वा ख्वाराए, ‘निताव ताकिन ते परमेस्‍वरए न्‍यायस ज़ ओमादोज़्‍याव ची ओल्‍यो’ है ब जेलिज़्‍याखेहो। हिताव ते माःक।
ROM 9:15 परमेस्‍वरए मोसालाई है दोक्‍यो, “जोए ल्‍योदा ङायुँ नान्‍या ङापैंज़्या, होए ल्‍योदा ङायुँ नाज़्‍या। जोए ल्‍योदा ङायुँ सय़ालो ङापैंज़्या, होए ल्‍योदा ङायुँ य़ाल्‍ज़्‍या।”
ROM 9:16 परमेस्‍वरए मिँराए ल्‍योदा उयुँ ओय़ाल्‍ज़्‍याव याय़ेननी ब माःक, या यापैंज़्‍यावनी ब माःक, ओल परमेस्‍वरए उयुँ स्‍यानी वाज़ ताज़्‍या।
ROM 9:17 धर्मसास्‍त्रल परमेस्‍वरए राजा फारोलाई मनी है दोक्‍यो, “नँ नक्‍याँत ङासक्ती सतैंन्‍याए जूँनी नँलाई राजा जैद ङानैनिए। ननी ज़ ङामिन संसार भरिल प़ाइँदा ज़ थास्‍न्‍या ले।”
ROM 9:18 है जैद जोए ल्‍योदा परमेस्‍वरए उयुँ नान्‍या पैंज़्याव, होए ल्‍योदा उयुँ नाज़्या। फरी जोलाई परमेस्‍वरए खाव जैन्‍या पैंज़्याव, होलाई खाव ज़ जैज़्‍याव।
ROM 9:19 जे ख्वाराए है जेलिज़्‍याखेहो, ‘ओल ज़ नै ओराजैव ताकिन ते कै जैद यागल्‍ती थ·रैद ओराएज़्‍याव? परमेस्‍वरए मिँरालाई गोइँद ओराएज़्‍यावकिन सुए ची तँदा ओलाँधुरिज़्‍याव?’
ROM 9:20 ङा ते झन है ङादाचिज़्‍या, ए निताव पाँज़्‍याव मिँ, नँ कै जैद परमेस्‍वरस याः नदोज़्‍याव? गम जाए ब ओक्‍याँ जैज़्‍यावलाई, ‘ङालाई काराव अइ नजैनाव?’ है मादोव।
ROM 9:21 नो गम जा जैज़्‍याव कुमाल्‍याए जो मिताव ओजैदी ब ओल ओमाहाँ ज़ लिज़्‍या। ख्वारालाई बनै घेप्‍पा, याएः ल्‍योर याजैज़्‍याव, ख्‍वारालाई अइज़ तके दँकावर याजैज़्याव।
ROM 9:22 परमेस्‍वरए ओय़ेन ब हिताव ज़। उरिस चोवराए याक्‍याँत उरिसलाव सक्ती सतैंन्‍या ब ओल ओमाहाँ ज़ लिज़्‍या। हैदी मनी नोर नास दैन्‍याकावर यालिदी ब नोराए याक्‍याँत उरिस थामिउ ज़ नैज़्‍याव।
ROM 9:23 है जैद निताव उरिस चोवरालाई मनी हैज़ ओराजैकिन, उयुँ नावरालाई झन कै जैद ओदया सतैंद मारायोके? नोरालाई ते ङ़ादाकिन ज़ ओज़गै दैन्‍यार ब जैद ओरानैज़्‍याव।
ROM 9:24 गे ओछाँतिसिउर ब उयुँ नावर ज़ गेलिज़्‍या — यहूदीर वाज़ माःक, जे छुत जातलावर ब जेलिज़्‍या।
ROM 9:25 अगमबक्ता होसेए मनी परमेस्‍वरए ओपाँ अइ लिद सर्द नैव, “ङामींर मातावर ङामींर ज़ ङाराजैरिज़्‍या। ङामन मालागिउरालाई ङामन लागिउर ङाराजैरिज़्‍या।”
ROM 9:26 स़ोनो, “ ‘जे ङामींर माःक’ है ओरादोव पोल झन नल ज़ ‘जींदो परमेस्‍वरए ओज़ार ज़’ है दान्‍या लेर।”
ROM 9:27 यसैयाए मनी इस्राएलीराए जूँनी अइ लिद सर्द नैव, “इस्राएलीर समुन्‍द्रलाव बालुवा स्‍यासो मागनिसिधुन्‍यार यालिदी ब, छ्या वाज़ परमेस्‍वरए ओङ़ाक थ॰रिन्‍या लेर।
ROM 9:28 परमेस्‍वरए आव मानुवात ओपाँ चाँदो ज़ छत्‍कैद सयो·रिज़्‍याव।”
ROM 9:29 फरी तोथोल यसैयाए किताव ओसरो, हिताव ज़ तान्‍या ले — “गेथोर माहान परमेस्‍वरए तोबो ऩेब्‍लो बाँचैद ओमायासिउ ताकिन, सदोम स़ोनो गमोरालाव स्‍यासोर तान्‍या गेल्‍यो।”
ROM 9:30 ङा है ङालिज़्‍यावए ओअर्थ आव ज़ — यहूदीकिन छुत जातलाव मिँराए परमेस्‍वरए ल्‍योदा बान्‍या येम यामाखिम्‍दी ब, परमेस्‍वरए ल्‍योदा यायुँ यासुहुबोनी झन, नो येम ज़ दैकेर।
ROM 9:31 यहूदीराए ते परमेस्‍वरए ल्‍योदा बान्‍या येम ङ़ादाकिन ज़ कानुन भैंःद दान्‍यानी याखिम्‍दी ब मादैकेर।
ROM 9:32 काराव यामादैव? काराव ल्‍यो ताकिन नोराए युँ हुप्‍न्‍यानी यामाखिम्‍ज़्‍याव, कानुनलाव य़ेननी वाज़ याखिम्‍ज़्‍याव। है जैद नोर धर्मसास्‍त्रलाव सर्सिउ ‘सुत़ुम्‍न्‍या लुँत’ पर्दप्‍द यापाव मिताव ज़ ताके।
ROM 9:33 नलाव सर्सिउ आव ज़, “ङा सियोनलाव ङाराज्‍याल मिँराए यायुँ केःद्यान्‍या सुत़ुम्‍न्‍या लुँ थाँद ङानै। नो लुँत यायुँ हुप्‍ज़्‍यावर लाज मोर्नो तान्‍या मालेर।”
ROM 10:1 अ ङानैं ङामेंर, ङा ङाभेरा यहूदीराए जूँनी पोंखारिद, ‘परमेस्‍वरनी बाँचिउ यादैकिन ताखेहो’ है ङालिज़्‍या।
ROM 10:2 नोर परमेस्‍वरए ल्‍योदा बान्‍या बनै धामा दोज़्‍यार लिन्‍या ते ङासैंज़्या। खाली चावस माबुझिद अऩाकल ज़ दोज़्‍यार।
ROM 10:3 परमेस्‍वरए मिँरालाई ओल्‍योदा ओरासखैज़्‍याव येम माप़ाल्‍धुद यानी ज़ सखैसिउ पैंद परमेस्‍वरए ओयेमल माहुकेर।
ROM 10:4 ख्रीसए ओय़ेन उसुदुमोए कानुननी बान्‍या येम तुपिके। है जैद ओललाई यायुँ हुप्ज़्‍याव भरी ते परमेस्‍वरस खैवर ताज़्यार।
ROM 10:5 कानुनलाव य़ेननी परमेस्‍वरस खैन्‍याए जूँनी मोसाए अइ लिद सर्द नैव, “कानुनलाव य़ेन माबिरैद दोज़्‍याव मिँ वाज़ बाँचिज़्‍या।”
ROM 10:6 युँ सुहुप्‍न्‍यानी परमेस्‍वरस खैन्‍याए जूँनी ते इताव सर्सिउ लिज़्‍या, “जे, ‘स्‍वर्गत बान्‍या सुए ची उधुरिज़्‍याव,’ है तालिच्‍यो।” (अथबा, ‘गे ख्रीसलाई स्‍वर्गतिन मेल गेमारैधुइ’ है ल्‍यो मापरिए।)
ROM 10:7 स़ोनो, “जे, ‘खादरल बान्‍या सुए ची उधुरिज़्‍याव,’ है ब तालिच्‍यो।” (अथबा, ‘गे ख्रीसलाई सिउनी गेमासोचोइधुइ’ है ब ल्‍यो मापरिए।)
ROM 10:8 बुरू ‘आव चेतैव ताके’ है लिन्‍या सर्सिउ लिज़्‍या, “ओपाँ जेकिन तादाङ माले। ओपाँ जेयुँल ज़ लिज़्‍या, जेयाःत ज़ लिज़्‍या।” नो पाँ फरी गे गेसथैचिज़्‍याव युँ सुहुप्‍न्‍या चाव था ज़।
ROM 10:9 जेयाःत ‘येसु ख्रीस ज़ गेप्रभु’ लिद जेपाँकिन, स़ोनो जेयुँल ‘परमेस्‍वरए ख्रीसलाई सिउनी सोचोइक्‍यो’ लिद जेयुँल जेपतिकिन बाँचिन्‍या जेले।
ROM 10:10 गेयुँए ज़ परमेस्‍वरए ओपाँलाई गेयुँ हुप्‍द ओलस गेखैज़्‍या, फरी नो गेयुँलाव पाँलाई गेयाःए पाखात पाँद गेबाँचिज़्या।
ROM 10:11 नो धर्मसास्‍त्रलाव ‘ओल्‍योदा उयुँ सुहुप्‍ज़्‍याव मिँ लाज मोर्नो तान्‍या माले’ है लिन्‍या पाँ
ROM 10:12 यहूदीरालाई मनी लिज़्‍या, छुत जातलावरालाई मनी लिज़्‍या। परमेस्‍वर तोबोका तोबो ओतावए प़ाइँए परमेस्‍वर ज़ लिज़्‍या। जो जातए तादी ब ओललाई खिम्‍ज़्‍यावरालाई ओअसिकर थुद याएज़्‍याव।
ROM 10:13 धर्मसास्‍त्रल मनी, “जोए परमेस्‍वरए उमिन हाइद परमेस्‍वरलाई खिम्‍ज़्‍याव, हो बाँचिन्‍या ले,” लिद सर्सिउ लिज़्‍या।
ROM 10:14 खाली परमेस्‍वरलाई यायुँ यामासुहुप्‍किन परमेस्‍वरलाई कातानी ची याखिम्‍रिज़्‍याव? स़ोनो, परमेस्‍वरए ओपाँ थैव यामादैकिन कातानी यायुँ यासुहुप्‍रिज़्‍याव? स़ोनो, सथैन्‍या मिँ याल्‍योदा ओमाबाकिन कातानी याथैरिज़्याव?
ROM 10:15 सथैन्‍या मिँलाई सुवाराए यामापरींकिन कातानी ओबाधुरिज़्‍याव? निताव बाज़्‍यावराए जूँनी धर्मसास्‍त्रल मनी अइ लिद सर्सिउ लिज़्‍या, “चाव था रैद हुज़्‍याव मिँलाई रँःद, प़ाइँए यायुँ होलाँ ताद रेंज़्‍यार।”
ROM 10:16 हितावत मनी इस्राएलीर जाँकोसैए चाव था थैन्‍या युँ ज़ मादोकेर। यसैयाए मनी अइ लिद सर्द नैव, “अ परमेस्‍वर, गेरासथैव पाँत सुए यायुँ ज़ माहुप्‍के।”
ROM 10:17 है जैद थैद वाज़ युँ हुप्‍ज़्‍या — नो थैन्‍या ते ख्रीसए ओपाँ ज़।
ROM 10:18 हितावत ब नो परमेस्‍वरए ओपाँत यायुँ माहुबो इस्राएलीराए ‘गेमाथैए’ लिन्‍या काता निउँ ज़ माले। धर्मसास्‍त्रल मनी इताव सर्सिउ लिज़्‍या, “परमेस्‍वरए ओपाँ सथैज़्‍यावराए यार्गा संसार भरिल थास्‍द ले। यापाँ ब काना कुनीङ पै केस्‍द ले।”
ROM 10:19 हिताव ताकिन इस्राएलीराए यामाबुझिउ ते माःक। नोराए जूँनी मोसाए ङ़ादा ज़ अइ लिद सर्द नैव, परमेस्‍वरए है लिज़्‍या, “छुत जातलाव मिँरालाई रँःद, जेमी तून्‍या ङाजैचिरिज़्‍या। ङामिन मासैंज़्‍यावराए याल्‍योनी जेरिस ब सोचोइद ङायाचिरिज़्‍या।”
ROM 10:20 यसैयाए ओपाँ झन ज़ कर्रा जैद इतावनी ज़ सर्द नैद यायो, “ङालाई खिम ज़ माखिम्‍ज़्‍यावराए ल्‍योक ङासरैंःसिके। पजै ज़ मापजैज़्‍यावरास ङादैसिके।”
ROM 10:21 खाली इस्राएलीराए जूँनी ते इताव ज़ लिज़्‍या, “जे बनै अखत्‍यासो मामुइलिउ मिँरालाई ‘हुचिके’ लिद ङाकुइ थाँद नैद ङायाचिक ब जेमाहुके।”
ROM 11:1 हितावत मनी उमीं इस्राएलीरालाई परमेस्‍वरए माराऱासो। ङा मनी इस्राएली ज़, अब्राहामनिकाव बेन्‍यामीनए ओथोलाव मिँ ज़।
ROM 11:2 परमेस्‍वरए ङ़ादाकिनकाव थ·रैद ओरानैज़्‍याव उमींरालाई माराऱासो। आवए उजूँनी धर्मसास्‍त्रलाव सर्सिउ एलियाए ओपाँ ब तखेप चिऊव ताके। नोए इस्राएलीरालाई रँःद बनै हार मानिद अइ लिद पाँके,
ROM 11:3 “अ परमेस्‍वर, नअगमबक्तारालाई यारासैःकेर। नँलाई चरैःन्‍या थानर ब यारातैःकेर। बाँचिउ ङा वाज़ ङालिज़्‍या। ङालाई ब सैःन्‍याए जूँनी खिमो ज़ नैनाज़्‍यार।”
ROM 11:4 परमेस्‍वरए ओजवाप फरी अइ लिद हुके, “माःक, बाल देवताए ओसेवा मादोज़्‍यावर सात हजार ङामींर लिज़्‍यार।”
ROM 11:5 हो मिताव ज़ आज्‍याल मनी इस्राएलीराए खार्ल परमेस्‍वरए ओदयानी ओराछाँतिउ उमींर अझ लिज़्‍यार।
ROM 11:6 खाली नोर या यादोव य़ेननी मातार, परमेस्‍वरए ओदयानी वाज़ ताकेर। हिताव ओमाताव ताकिन दया ते अऩाकलाव ज़ तान्‍या ओल्‍यो।
ROM 11:7 है जैद इस्राएलीराए यानी ज़ परमेस्‍वरए ओयेम खिम्‍द ते मादैकेर। याखार्लाव परमेस्‍वरए ओराछाँतिउराए वाज़ दैकेर। उपुर्कावर झन ज़ यायुँ खाव तानाके।
ROM 11:8 धर्मसास्‍त्रल मनी इतावनी सर्सिउ लिज़्‍या — “परमेस्‍वरए नोरालाई ङ़ल्‍द लिज़्‍याव मितावर ज़ याजैक्‍यो। यामी लिज़्‍यावत ब मारँःधुर, यार्ना लिज़्‍यावत ब माथैधुर। आज्‍याल पै ब हिताव ज़ लिज़्‍यार।”
ROM 11:9 हो मिताव ज़ दाऊद राजाए ब अइ लिद सर्द नैव, “नोराए याभत्‍यार ज़ याघुर्धुम ओताक, नोर नल ज़ तेद सजा ओदैरक।
ROM 11:10 यामी मारैंःद छाम छामोर ओतारक। नोराए यावाँः एकम्‍न्‍या घोंत्‍यासो ज़ उलिक।”
ROM 11:11 ङा जेलाई है ङादाचिज़्‍या, इस्राएलीर त़ुम्‍द धलिउका धलिउ याताव ते माःक। नोराए बुरू परमेस्‍वरए ओपाँ यामाभैंःवए परमेस्‍वरए ओपाँ छुत जातलाव मिँराए ल्‍योक ब हुके। ननी ज़ परमेस्‍वरए इस्राएलीरालाई यामी तून्‍या याजैक्‍यो।
ROM 11:12 नोराए परमेस्‍वरए ओपाँ माभैंःद तँदा याबावनी परमेस्‍वरए ओअसिक संसार भरिल रा·सिद छुत जातलाव मिँराए ल्‍योक ब ओबावए, नोर या मनी याभैंःवत प़ाइँलाई झन ज़ चाव ताया।
ROM 11:13 आव पाँ भरी जे यहूदीकिन छुत जातलाव मिँरालाई है ङादाचिज़्‍या। परमेस्‍वरए ङालाई जेल्‍योदा ओल ओपाँ सथैन्‍यात ओसाची परींद नैनाव। हो ताकिन कसा ङाभेरा यहूदीर जेस खिस्‍द यायुँ परमेस्‍वरए ल्‍योदा माफर्कैर लिद जेस ङादोज़्‍याव य़ेन नोराए याङ़ाक बनै ङासघ्योःज़्‍या।
ROM 11:15 परमेस्‍वरए नोरालाई ओराऱासोनी मानुवाताव मिँरालाई ओनैंर ओराजैवए, नो ओराऱासोरालाई फरी ओरारैकिन सिउनी ओरासोचोइव मितावर ज़ ताखेरहो।
ROM 11:16 मुछिसिउ कनेनी तोचोप परमेस्‍वरलाई चरैःकिन कने भरी प़ाइँ ज़ चोखो ताज़्या। हिताव ज़ सींए ओजरा चोखो ओताकिन ओखार भरी ब चोखो ज़ ताज़्‍या।
ROM 11:17 हितावत ब ख्‍वा यहूदीर जैतून सींए ओखारर च़म्सिउ मिताव ज़ लिज़्‍यार। जे छुत जातलावर फरी ज्‍याँलाव सीं स्‍यासोर जेल्‍यो। परमेस्‍वरए जेलाई रैद जैतून सींए ओक्‍याँत जोरैद ओरस दैन्‍या जैचिक्‍यो।
ROM 11:18 है जैद नो ङ़ादाङाव खारराकिन जे तास॰च्‍यो। जे खारराए जरालाई अदैद जेनैज़्‍याव माःक, जराए ची जेलाई अदैद नैचिउ।
ROM 11:19 जे है जेलिज़्याखेहो, “नो च़म्सिउ खारराए पोल परमेस्‍वरए गेलाई ची ओजोरैसिउ ओल्‍यो।”
ROM 11:20 नो ते साचो ज़, नोर यायुँ ओमाहुबोए परमेस्‍वरए सींतिन याच़म्क्‍यो। खाली जे ते जेयुँ उहुबोनी वाज़ जोरैसिउर जेताके। है जैद जे छे·द लिचिके, तास॰च्‍यो।
ROM 11:21 परमेस्‍वरए साचो ओखाररालाई बाँखी ओमारानैकिन जेलाई मनी बाँखी नैन्‍या माले।
ROM 11:22 ननी ज़ परमेस्‍वरए उरिस ब रैंःज़्‍या, ओदया ब रैंःज़्‍या। नो च़म्सिउरालाई उरिस ताके, जेलाई ओदया ताके। खाली जे ओदयाल ल्‍यो ज़ ताके, म़ानी जेलाई मनी च़म्‍न्‍या ओछ्यास लिज़्‍या।
ROM 11:23 नो च़म्सिउर फरी यायुँ उहुप्‍किन परमेस्‍वरए नोरालाई ङ़ादाङाव यापोल ज़ जोरैधुन्‍या ब ले।
ROM 11:24 जे छुत जातलाव ज्‍याँलाव सीं स्‍यासोरालाई रैद चाव सींए ओक्‍याँत ओजोरैचिउए, साचो ओखाररालाई झन या यासींत कै जैद माराजोरैवके?
ROM 11:25 अ ङानैं ङामेंर, जेलाई तोबो कप्‍सिउ पाँ सतैंद ङायाचिरिज़्‍या। नो पाँ जेसैंकिन यहूदीराकिन सघ्योःसिन्‍या जेमाले। नो पाँ आव ज़ — परमेस्‍वरए ओराज्‍याल छुत जातलाव मिँर यामादुमा पै वाज़ इस्राएलीर परमेस्‍वरए ओपाँकिन तँदा तान्‍या लेर।
ROM 11:26 हाःकिन इस्राएली भरिए परमेस्‍वरए ओयेम दैद बाँचिन्‍या लेर। धर्मसास्‍त्रल मनी इताव सर्सिउ लिज़्‍या, “बाँचैज़्याव सियोननी हुरिज़्‍या, याकूबए ओथोनी अधर्मलाव य़ेन भरी ब हाइद्यान्‍या ले।
ROM 11:27 ङा नोराए यापाप हाइद ङारायोत ङाबाचा भरी नत ज़ यो·न्‍या ले।”
ROM 11:28 आज्‍याल ते नो इस्राएलीर आव गेरासथैज़्‍याव चाव थानी ते परमेस्‍वरए उसुतुर मितावर ज़ लिज़्‍यार। ननी ज़ जेलाई फाइदा ब ताके। खाली यासाखा पुर्खारालाई परमेस्‍वरए ओरायो य़ाकानी ते उयुँ नावर ज़ लिज़्‍यार।
ROM 11:29 परमेस्‍वरए ओय़ाकालाई खर्क ज़ फिस्‍को माजैव, ओराछाँतिउ उमींरालाई ब माराऱासो।
ROM 11:30 ङ़ादा जे छुत जातलाव मिँराए परमेस्‍वरए ओपाँ जेमादोज़्‍याव। हितावत ब इस्राएलीराए परमेस्‍वरए ओपाँ यामाभैंःवए जे परमेस्‍वरए ओदया दैन्‍यार जेताके।
ROM 11:31 नोर मनी परमेस्‍वरए ओपाँ यामाभैंःदी ब, जे परमेस्‍वरए ओदया जेदैवए तछा नोराए मनी दैन्‍या लेर।
ROM 11:32 परमेस्‍वरए ओदया सतैंन्‍याए जूँनी प़ाइँलाई यामन लागिउदा तखेप याऱास्‍ज़्‍याव।
ROM 11:33 परमेस्‍वरए ओगहक उबुद्धी बनै अचम्‍बलाव लिज़्‍या। परमेस्‍वरए ओथ·रैव पाँलाई सुए ज़ मापल्‍तैधुर, ओदोज़्‍याव य़ेन ब सुए ज़ माथ·रैधुर।
ROM 11:34 धर्मसास्‍त्रल ब अइ लिद सर्सिउ लिज़्‍या, “परमेस्‍वरए उयुँलाव पाँलाई थ·रैन्‍या सु ची उलिज़्‍यावदा? नोलाई सल्‍ला यान्‍या सु ची उलिज़्‍यावदा?”
ROM 11:35 “परमेस्‍वरए सुए ल्‍योनी ची लोस्‍द लोइ धूँल उलिज़्‍यावदा?”
ROM 11:36 ताज़्‍याव भरी ओल ओल्‍योनी ज़ ताज़्‍या, ओल उजूँनी ज़ ताज़्‍या, ओल उमींर ज़ ताज़्‍या। है जैद परमेस्‍वरलाई खर्क ज़ माखेम्‍न्‍या ज़गै मगैव ओताक। आमेन।
ROM 12:1 है जैद ङानैं ङामेंर, परमेस्‍वरए जेलाई उयुँ नावर जैद ओदयार सतैंद ओयाचिउए आव तोबो पाँत ङाबिन्‍ती लिज़्‍या — जे परमेस्‍वरलाई ओज़्‍यास्‍ज़्याव मिताव य़ेन छैंवनी दाद, जेक्‍याँ भरी ओललाई चरैःचिके। परमेस्‍वरए साचो ओसेवा दान्‍या ननी ज़।
ROM 12:2 आव जुकलाव लन्‍थादा जेयुँ ताझाःच्‍यो। बुरू जेयुँलाई त़ोद साःरो जैचिके। हो ताकिन वाज़ परमेस्‍वरए काता ओपैंज़्‍याव हो सैंन्‍या जेले। है जैद काताकाव चाव उलिज़्‍याव, परमेस्‍वरलाई काताए खुसी ओजैज़्‍याव स़ोनो पक्‍का काता उलिज़्‍याव, हो ब चबनै सैंन्‍या जेले।
ROM 12:3 परमेस्‍वरए ङाल्योदा उयुँ ओगराँवए ज़ जे प़ाइँलाई है ङादाचिज़्‍या — जे तास॰च्‍यो। बुरू मासघ्योःसिद परमेस्‍वरए ओयाचिउ युँ हुप्‍न्‍या खावाकाव जेस उलिज़्‍याव हाःवाकाव ज़ जेक्‍याँलाई थ·रैच्‍यो।
ROM 12:4 किताव गेक्‍याँताव गेखँ गेकुइर छुत छुत ताद सु सु याय़ेन ब लिज़्‍या,
ROM 12:5 हिताव ज़ गे ख्रीसए उमिनतावर छुत छुत गेलिदी ब ख्रीसनी तक्‍याँ ज़ गेताज़्या।
ROM 12:6 है जैद परमेस्‍वरए ओयासिउ गोइँनी सु सु गेबरदान छुत छुत ओतावए हो मितावनी ज़ दोव ताके। परमेस्‍वरए उपुरूसनी पाँज़्‍यावए परमेस्‍वरए ल्‍योनी ओदैव गोइँनी ज़ ओपाँक।
ROM 12:7 सेवा दाज़्‍यावए सेवा ज़ ओदोवक। परमेस्‍वरए ओपाँ पैज़्‍यावए ओसैंव भरी ओरापैवक।
ROM 12:8 परमेस्‍वरए ओपाँत यायुँ सझेंःद्याज़्‍यावए झन ज़ सझेंःद ओरायोक। याज़्‍यावए उकुइ सघ्योःद ओरायोक। हक दैवए गहकस य़ेन ओचलैवक। उयुँ नाज़्‍यावए उयुँ माकैद ज़ ओदोवक।
ROM 12:9 जे जेल खैन्‍या साचो युँनी ज़ ओताक। माचाव पाँलाई सोद, चाव पाँत खदेप ल्‍यो ताके।
ROM 12:10 जे तोबो फूलाव मितावर जेतावए जे जेल समारिसिउ ताके। जे जेल क्‍याँकिन छुतए ओमान ब नैच्‍यो।
ROM 12:11 परमेस्‍वरए ओसेवा धेङ्गै मादाद छैंव पुरूसनी कलँ लिद दोच्‍यो।
ROM 12:12 परमेस्‍वरनिकाव जेदैव आसत रेंद ज़ लिच्‍यो, दुखलाई सहिच्‍यो, एकम्‍न्‍या पोंखारिउ ज़ नैच्‍यो।
ROM 12:13 परमेस्‍वरए उमिनताव जेनैं जेमेंरालाई माथैंव मायो·वल यारासघैच्‍यो। जेझ़िमक हुव पाहुनारालाई चावस यारानैच्‍यो।
ROM 12:14 जेखिरी पसिज़्‍यावरालाई ताराथल्‍च्‍यो, बुरू परमेस्‍वरए ल्‍योनी असिक याराएच्‍यो।
ROM 12:15 रेंज़्‍यावरास रेंचिके, घर्ज़्‍यावरास घर्चिके।
ROM 12:16 जे जे खैद लिच्‍यो। मासघ्योःसिद, ज़िम्‍ज़ारास मनी खदेप लिच्‍यो। ‘जे वाज़ बनै सैंन्‍या’ ताजैसिच्‍यो।
ROM 12:17 माचावलाई माचाव फर्कैद ताएच्‍यो। जेदोज़्‍याव भरिल जेपाँःच्‍या तापुलुस्‍क।
ROM 12:18 जेधुवा भरी प़ाइँ मिँरास खैद लिच्‍यो।
ROM 12:19 ङानैं ङामेंर, सुए ओक्‍याँत ज़ जेखिस ताफेरैच्‍यो। बुरू नो पाँ परमेस्‍वरलाई याद ओलस ज़ नैचिके। धर्मसास्‍त्रल मनी इताव सर्सिउ लिज़्‍या, “परमेस्‍वरए है लिज़्‍या, खिस फेरैद्यान्‍या ङा ङालिज़्‍या।”
ROM 12:20 “जे ते जेसुतुर ओकरेकिन ओकरे सैःदिचिके। ऱी ओछोस्‍किन उऱीछो सैःदिचिके। ननी ज़ ओङ़ैनी भुबुराए जेरालो मिताव तान्‍या ले।”
ROM 12:21 है जैद माचावलाई माचावनी हारैन्‍या माःक, माचावलाई बुरू चावनी हारैन्‍या ची।
ROM 13:1 प़ाइँ ज़ घेप्‍पा हक दैवराए धूँल उलिरक। हक भरी ओल परमेस्‍वरनी ज़ हुज़्‍या। हक दैवर मनी परमेस्‍वरए ओराखतैवर ज़।
ROM 13:2 है जैद हक दैवराकिन जो तँदा जैसिज़्‍या, हो परमेस्‍वरए ओपाँकिन तँदा ओजैसिउ मिताव ज़ लिज़्‍या। नितावराए परमेस्‍वरनी सजा दैन्‍या लेर।
ROM 13:3 चाव य़ेन दाज़्‍यावर हक दैवराए ल्‍योनी छे·व मापरिए, माचाव य़ेन दाज़्‍यावर वाज़ छे·व परिज़्‍या। है जैद हक दैवरालाई रँःद माछे·द लिन्‍या ताकिन चाव य़ेन ज़ दोव ताके। हो ताकिन ची सजाए ओपोल ‘स्‍याबास’ दैन्‍या जेले।
ROM 13:4 होए जेजूँनी परमेस्‍वरए ओखतैव य़ेन दोज़्‍याव। है जैद माचाव य़ेन दान्‍यात छे·च्‍यो। हक दैव मिँए ओतरवाली अइज़ सतैंद नैसिउ वाज़ माःक, परमेस्‍वरए ओय़ेन ज़ दोज़्‍याव। माचाव य़ेन दाज़्‍यावए ओक्‍याँत परमेस्‍वरए ओसजा सयो·दिज़्‍याव।
ROM 13:5 है जैद हक धूँल ल्‍यो ज़ परिके — खाली सजा रँःद वाज़ माःक, ‘आव य़ेन ज़्‍यासो ज़ लिज़्‍या’ लिद दोव ताके।
ROM 13:6 सरकारए ल्‍योदा सिर्मा जेफो·क ब नो पाँ चेतैव ताके। सरकारए ओय़ेन दाज़्‍यावराए प़ाइँए जूँनी परमेस्‍वरए ओय़ेन ज़ दोज़्‍यार।
ROM 13:7 है जैद याव परिन्‍यालाई एचिके। सिर्मा फो·न्‍याल सिर्मा फो·चिके, दोरो फो·न्‍याल दोरो फो·चिके, छे·व परिन्‍याल छे·चिके, मान नैव परिन्‍याल मान नैचिके।
ROM 13:8 काताए ओभार धूँल ब तालिच्‍यो। खाली जे जेल खैद समारिसिन्‍या भार वाज़ ओताक। छुतलाई समारिन्‍यानी परमेस्‍वरए ओकानुन ब यो·ज़्‍या।
ROM 13:9 परमेस्‍वरए ओकानुनल, “अर्काए ओज्‍याए ल्‍योदा माबान्‍या, मिँ मासैःन्‍या, माकुन्‍या, लोभ मादान्‍या,” लिद सर्सिउ लिज़्‍या। आव पाँर स़ोनो उपुर्काव कानुनलाव पाँ भरी ओपो·स ज़ आव तोबो पाँत थोम्‍सिज़्‍या — “जेक्‍याँलाई किताव जेसमारिज़्‍या, छुतलाई ब हिताव ज़ समारिउ ताके।”
ROM 13:10 छुतए ल्‍योदा उयुँ थू जैद समारिज़्‍याव मिँए सुलाई ज़ माबले·व। है जैद छुतलाई समारिन्‍यानी ज़ कानुन भरी यो·ज़्‍या।
ROM 13:11 है जैद बेला सैंद, है ङादाचिउ भरी दोचिके। ङ़ल्‍द लिन्‍या माःक, सैंसिद लिच्‍यो। परमेस्‍वरए ओपाँल गेहुव छ्यामकिन ख्रीस उहुन्‍या छ्याम नजिक हुद ले।
ROM 13:12 री कुधु बाधुके, नम सँन्‍या बेला हुके। है जैद चुम चुमोलाव य़ेन भरी ऱास्‍द ज़गैवलाव य़ेन दोव ताके।
ROM 13:13 पलाँवल ओसहिज़्‍याव मिताव ओतह ल्‍यो य़ेन दोव ताके — तुबुरी दुलिद राउँनी झ्याउँ लिन्‍या ब माःक, मँःन्‍या ब माःक, पातर्‍या पातर्नी जैसिन्‍या ब माःक, कोभादा बान्‍या ब माःक, मी तूद इ़सिन्‍या ब माःक।
ROM 13:14 बुरू नोए ओपोल गेप्रभु येसु ख्रीसए ओगे रैद, ङ़ादाङाव जेयुँ मानैधुद माचाव जेखिमो भरी वैंद उमिन सम़ैद्याव ताके।
ROM 14:1 चाव माचाव माछुतैधुज़्यावलाई सुम्‍च्‍यो, ओपाँलाई सज़िम्‍द्याद इ़सिन्‍या ताजैच्‍यो।
ROM 14:2 ख्वाराए ज़्‍यान्‍या भरित यायुँ हुप्‍द ज़्‍युज़्‍यार। ख्वाराए फरी यायुँ जाँ ओमाहुबोए स्‍याकरी माकैर।
ROM 14:3 नो प़ाइँ ज़्‍युज़्‍यावए माज़्‍युज़्‍यावलाई तासोवक। हिताव ज़ फरी माज़्‍युज़्‍यावए प़ाइँ ज़्‍युज़्‍यावलाई, ‘माज़्‍यान्‍या ज़्‍युक्‍यो’ है तादोवक। परमेस्‍वरए ऩेथोलाई ज़ उमींर जैद यानैव।
ROM 14:4 अर्काए ओबाँदालाई फाल्‍न्‍या नँ सु? नोए ओदोज़्‍याव य़ेन चाव सैं माचाव लिद फाल्‍न्या ओसाहुए ची। है जैद ओय़ेन थ·रैद्यान्‍या ओर्गे परमेस्‍वरए ची। होए ज़ नोलाई चाव य़ेन दान्‍यात सघैज़्याव।
ROM 14:5 ख्वाराए उपुर्काव छ्यामकिन तोबो छ्यामलाई घेप्‍पा जैज़्‍यार। ख्वाराए फरी प़ाइँ तोबो ज़ थ·रैज़्‍यार। जो मितावनी तादी ब सु सु युँल ज़ थ·रैव ताके।
ROM 14:6 नो तोबो छ्यामलाई घेप्‍पा मानिज़्‍यावए मनी परमेस्‍वरए उजूँनी ज़ दोज़्‍याव। प़ाइँ ज़्‍युज़्‍यावए मनी परमेस्‍वरलाई धन्‍याबाद चरैःद ज़ ज़्‍युज़्‍याव। स्‍याकरी माकैज़्‍यावए परमेस्‍वरलाई चेतैद ज़ माकैव। होए ब परमेस्‍वरलाई धन्‍याबाद चरैःज़्याव।
ROM 14:7 गे सु मनी गेजूँनी गेमाबाँचिए, सु मनी गेजूँनी गेमासिए।
ROM 14:8 गेबाँचिदी ब परमेस्‍वरए उजूँनी ज़ गेबाँचिज़्‍या, गेसिदी ब परमेस्‍वरए उजूँनी ज़ गेसिज़्‍या। है जैद जुनी ब उमींर ज़ गेलिज़्‍या।
ROM 14:9 ख्रीस सिउ मासिउराए गेप्रभु तान्‍याए जूँनी ज़ सिद सैंसिके।
ROM 14:10 हिताव ताकिन ते जेसकाव जेभाइए जाँ छुत य़ेन ओदोक काराव माचाव जेङम्सिज़्‍याव? काराव स॰द नोलाई जेसज़िम्‍ज़्‍याव? गे प़ाइँ ज़ परमेस्‍वरए ओङ़ाक च्‍याँःसिद तछा गेफाल्‍सिरिज़्‍या लिन्‍या चेतैच्‍यो।
ROM 14:11 धर्मसास्‍त्रल मनी अइ लिद सर्सिउ लिज़्‍या, “प्रभुए है लिज़्‍या, ङा साचो है ङालिज़्‍या, मिँ भरी प़ाइँ ङाङ़ाक फुलुप्‍सिन्‍या लेर। प़ाइँए परमेस्‍वरए उमिन सघ्योःन्‍या लेर।”
ROM 14:12 है जैद गे भरी प़ाइँ सु सु गेय़ेन परमेस्‍वरलाई है दाव परिरिज़्‍या।
ROM 14:13 है जैद जे तोबोए तोबोलाई ओय़ेन गल्‍ती थ·रैद ताएच्‍यो। बुरू छुतलाई उयुँ केःद्यान्‍या पाँ मादान्‍या थ·रैव ताके।
ROM 14:14 गेप्रभु येसुलाई ङायुँ उहुबोए ङा है ङालिज़्‍या, माज़्‍यान्‍या काता ज़ माले। हैदी ब जोए उयुँल, ‘आव ते माज़्‍यान्‍या ज़’ लिद थ·रैज़्‍याव, नोलाई माज़्‍यान्‍या ज़ लिज़्‍या।
ROM 14:15 है जैद नोलाई ज़्‍यावए जूँनी उयुँ केःद जेएकिन नोलाई मया जेमादोव मिताव ज़ ताके। है जैद ख्रीसए उजिउ झाःद ओयो मिँलाई जे ज़्‍यान्‍यानी परमेस्‍वरए ओपाँत ओजाँगर सैःद ताएच्‍यो।
ROM 14:16 है जैद जे जो चाव जेथ·रैज़्या, हो छुतए माचाव है ल्‍यो तादैवक।
ROM 14:17 परमेस्‍वरए ओराज्‍यालाव पाँ ज़्‍यान्‍या ओन्‍याए जूँनी माःक। नो पाँ ते आव ज़ — परमेस्‍वरए उयुँलाव मिताव य़ेन दान्‍या, खैद लिन्‍या, स़ोनो छैंव पुरूसनी युँ होलाँ दान्‍या।
ROM 14:18 जोए नितावनी ख्रीसए ओसेवा दोज़्‍याव, हो परमेस्‍वरए उयुँलाव मिताव ब ताज़्‍या, मिँराए याजाँगर हुव ब ताज़्‍या।
ROM 14:19 है जैद जे जेल खैद प़ाइँलाई सपारैन्‍यात उदिम दोचिके।
ROM 14:20 परमेस्‍वरए ओय़ेनलाई ज़्‍यान्‍यानी ताबले·च्‍यो। ज़्‍यान्‍या भरी प़ाइँ चोखो उलिदी ब जोए ज़्‍याद ओद ओभाइलाई उयुँ केःद ओएकिन, नोलाई माज़्‍यान्‍या ज़ पाथ लिज़्‍या।
ROM 14:21 नो जेभाइलाई जेबले·ज़्‍याव देखा बुरू स्‍याकरी माकैन्‍या, स़ोनो मद छोकोरा माओन्‍या पाथ लिज़्‍या।
ROM 14:22 है जैद दान्‍या जेथ·रैव भरी परमेस्‍वरए ओङ़ाक जेयुँल पक्‍का ज़ थ·रैव ताके। जोए ओथ·रैव पाँत उथुपुल ओमालिकिन नोलाई पाथ लिज़्‍या।
ROM 14:23 खाली जोए सङ्खा दाद उज़्‍युकिन ओलनी ज़ ओखत ल्‍यो थ॰रिज़्या। युँ माहुप्‍द दान्‍या भरी पाप ज़ लिज़्‍या।
ROM 15:1 गे परमेस्‍वरए ओपाँत थ॰रिउराए चाव माचाव माछुतैधुज़्यावराए यापाँ सहिद्याव ताके। क्याँलाई तान्या वाज़ दान्‍या माःक।
ROM 15:2 गे प़ाइँए छुतलाई सपारैन्‍याए जूँनी ओललाई तान्‍या य़ेन दाद्याद खुसी जैव ताके।
ROM 15:3 ख्रीसए मनी ओललाई तान्‍याए जूँनी मादोक्‍यो। हिताव ज़ धर्मसास्‍त्रल ब अइ लिद सर्सिउ लिज़्‍या, “नँलाई याथल्निउ भरी ङा ङाक्‍याँत ज़ हुद ले।”
ROM 15:4 नो भाःङाव धर्मसास्‍त्रलाव सर्सिउ भरी गेजूँनी ज़ लिज़्‍या। ननी ज़ य़ेन भरी पैसिद गेयुँर होलाँ ओताज़्‍यावए दुखर उहुदी ब ननी ज़ थ॰रिद गेआस लिज़्‍या।
ROM 15:5 है जैद युँ होलाँ जैद्याद थ॰रिउ जैज़्‍याव परमेस्‍वरए, येसु ख्रीसए उमींर जेतावए जेलाई तयुँ ओजैचिउक।
ROM 15:6 हो ताकिन ची जे प़ाइँए ज़ तयुँ तपाँ जैद गेप्रभु येसु ख्रीसए ओबाबु परमेस्‍वरलाई उमिन सघ्योःद्यान्‍या जेले।
ROM 15:7 है जैद जे परमेस्‍वरए उमिन सघ्योःद्यान्‍याए जूँनी किताव ख्रीसए गेलाई सहिद उसुम्‍सिउ, जे जेल ब सुम्‍सिचिके।
ROM 15:8 ङा जेलाई है ङादाचिज़्या, ख्रीसए मनी यासाखा पुर्खारालाई परमेस्‍वरए ओरायो य़ाका भरी साचो ज़ थ·रैद्यान्‍याए जूँनी यहूदीराए यासेवा दान्‍या जैसिहुके।
ROM 15:9 छुत जातलावराए मनी ‘परमेस्‍वरए ओदया गेलाई ब ताके’ लिद उमिन सघ्योःद्यान्‍या लेर। धर्मसास्‍त्रल मनी अइ लिद सर्सिउ लिज़्‍या, “ङा छुत जातलावराए याखार्ल मनी नमिन सघ्योःद्यान्‍या ङाले। नमिनताव भजन ब गैन्‍या ङाले।”
ROM 15:10 फरी तोथोल इताव मनी लिज़्‍या, “अ छुत जातलाव मिँर, परमेस्‍वरए उमींरास जे ब रेंचिके।”
ROM 15:11 फरी तोथोल इताव मनी लिज़्‍या, “अ छुत जातलाव मिँर, परमेस्‍वरए उमिन सघ्योःदिचिके। संसार भरिलाव मिँराए मनी उमिन ओसघ्योःरक।”
ROM 15:12 यसैयाए मनी अइ लिद सर्द नैव, “यिसैए ओथोनी तोबो हुरिज़्‍या। नो छुत जातलावराए याङ़ैताव ब तारिज़्‍या। नोए ओक्‍याँत छुत जातलावराए ब आस दान्‍या लेर।”
ROM 15:13 जेलाई मनी नो आस दाद जेनैज़्‍याव परमेस्‍वरए, ओललाई जेयुँ जेसुहुबोए जेयुँ होलाँ जैद रेंद लिन्‍या ओजैचिउक। हो ताकिन ची छैंव पुरूसए ओसक्तीनी जेआस ब झन ज़ घ्योःन्‍या ले।
ROM 15:14 अ ङानैं ङामेंर, जे परमेस्‍वरए ओपाँर सैंद, धर्मलाव य़ेनर दाद, जे जेल जेसुदारैसिज़्‍याखेहो लिद ङायुँ हुबो ज़ लिज़्‍या।
ROM 15:15 हितावत मनी परमेस्‍वरए ङालाई उयुँ नाद ओखतैनावए जेलाई सम्‍जैन्‍याए जूँनी तोबो ऩेब्‍लो जाँ नास्‍न्‍या मिताव पाँर सर्द नैद ङायाचिए।
ROM 15:16 नो ओखतैनाव य़ेन जे मिताव छुत जातलाव मिँरालाई येसु ख्रीसए ओपाँ सथैद ओसेवा दान्‍या ज़। है जैद नलाव ङाय़ेन पुजारी य़ेन स्‍यासो लिज़्‍या। जेलाई छैंव पुरूसनी जेखत माल्‍यो छैंवर जैद परमेस्‍वरए उयुँलाव मितावर ङाजैचिज़्‍या।
ROM 15:17 है जैद परमेस्‍वरए उजूँनी ङादोज़्याव ङाय़ेनत येसु ख्रीसए उमिनत ङासुनी च्याँःसिउ ज़ लिज़्‍या।
ROM 15:18 खाली ङा ङादोवत माःक, ख्रीसए ङाक्याँताव ओदोव य़ेनत वाज़ सघ्योःद ङापाँज़्‍या। है जैद ख्रीसए ङाक्याँताव ओदोव ङाय़ेननी स़ोनो ङापाँनी छुत जातलाव मिँराए मनी परमेस्‍वरए ओपाँ भैंःकेर।
ROM 15:19 नो पाँत छैंव पुरूसए ओसक्ती हुद अचम्‍बलाव सरेसर य़ेनर ब सतैंद याएक्‍यो। है जैद यरूसलेमकिन इल्‍लुरिकन खन्‍द पै ख्रीसए चाव ओथा प़ाइँनी ज़ सथैद ङारानै।
ROM 15:20 छुतए ओथालिउलाई पुरा जैद ङामीं ङामाजैए। बुरू जोल ख्रीसए उमिन माथासो लिज़्‍या, होल ज़ सथैन्‍या ङायुँ लिज़्या।
ROM 15:21 धर्मसास्‍त्रल मनी इताव सर्सिउ लिज़्‍या, “ओथा मादैतावराए मनी ओललाई रँःन्‍या लेर, ओपाँ माथैतावराए मनी बुझिन्‍या लेर।”
ROM 15:22 है जैद परमेस्‍वरए ओपाँ माथासो पो पोङ सथैन्‍या ङातावए जेल्‍योदा हुन्‍या ङामाताप्‍के।
ROM 15:23 अब ते नाः भरिल सथैन्‍या ङाय़ेन खेम्‍द ङानै। है जैद ङ़ादाकिन ज़ जेस दैसिन्‍या युँ ङादोज़्‍यावए,
ROM 15:24 ङा छींनी स्‍पेन देसदा ङाबाक जेल्‍योलाव घ्याँ हुद जेस दैसिन्‍या आस ङादोज़्‍या। हो बेलाक जाँवा लिद गेमयार सैःद ननी ङाबाक ङालाई जेसघैनाए सैं है ङालिज़्‍या।
ROM 15:25 खाली ङा आथ पाला यरूसलेमलाव परमेस्‍वरए छैंव उमिनतावराए जूँनी तखेप नदा ङाबाज़्‍या।
ROM 15:26 नलाव माथैंव मायो·वरालाई माकेदोनिया स़ोनो अखैयालाव मन्‍दलीराए ङाकुइत रूप्‍यार परींद याराएज़्‍यार।
ROM 15:27 नो य़ेन यायुँ स्‍यानी ब दोज़्‍यार, दाव परिन्‍यानी ब दोज़्‍यार। निताव छुत जातलाव मिँराए परमेस्‍वरए ओअसिक यहूदीराए ल्‍योनी यादैवए, नोराए मनी यहूदीरालाई माथैंव मायो·वल यान्‍या ज़्‍यासो लिज़्‍या।
ROM 15:28 है जैद ङा नो रूप्‍यार लाँद ङारायोत, स्‍पेनदा ङाबाक जेल्‍योलाव घ्याँ ङाहुरिज़्‍या।
ROM 15:29 हो बेलाक ख्रीसए ओयाँज़्याव कुधु असिकरास जेल्‍योङ हुन्‍या ङाले।
ROM 15:30 अ ङानैं ङामेंर, जेस ङाबिन्‍ती लिज़्‍या — गेप्रभु येसु ख्रीस स़ोनो छैंव पुरूसए ओयाचिउ मयानी ङा ङादुखराल सघैन्‍याए जूँनी परमेस्‍वरलाई पोंखारिद्याव ताके।
ROM 15:31 जेपोंखारिक, ङा यरूसलेमदा ङाबाक यहूदियालाव येसुए ओपाँ माभैंःज़्‍यावरानी कै मै ताताक, स़ोनो लाँद ङाराएज़्‍याव रूप्‍या नलाव परमेस्‍वरए छैंव उमींरालाई याचाहिज़्‍याव मिताव ज़ ओताक लिद पोंखारिद्याँच्‍यो।
ROM 15:32 हो ताकिन ची परमेस्‍वरए उयुँ ओताकिन ङा जेल्‍योङ ङाहुक सिप गेयुँर होलाँ जैद रेंन्‍या गेले।
ROM 15:33 युँ होलाँ जैद्याज़्‍याव परमेस्‍वर जेस ज़ बास ओदोवक। आमेन।
ROM 16:1 परमेस्‍वरए उमिनताव गेबैंनी फिबीलाई सरेसो ङापरींचिज़्‍या। नोए किंक्रियालाव मन्‍दलील परमेस्‍वरए ओय़ेनत यासघैज़्‍याव।
ROM 16:2 जे परमेस्‍वरए छैंव उमींराए दाव परिन्‍या य़ेन दाद, प्रभुए उमिनत चावस नैच्‍यो, नोलाई ओचाहिज़्‍याव भरिल सघैच्‍यो। ओल ब कुधुलाई सघैद यानैव, ङालाई मनी सघैद नैनाव।
ROM 16:3 ङास येसु ख्रीसए ओय़ेन दाज़्‍याव अकिलास स़ोनो प्रिस्‍किलानिलाई जेरो है दाद्याँच्‍यो।
ROM 16:4 नोनी ङाजूँनी कोज़ाइ म़ानी निजिउ ब झाःकिनी। नोनी निगुन ङा वाज़ माःक, छुत जातलाव मन्‍दलीराए ब प़ाइँए ज़ चेतैज़्यार।
ROM 16:5 नोनी निझ़िमकाव दुप्‍सिज़्‍याव मन्‍दलीलाई ब जेरो है दाद्याँच्‍यो। ङायुँलाव ङानैं इपेनितसलाई मनी जेरो लिज़्‍या। नो एसिया भरिल प़ाइँरानी उस॰कत ख्रीसए ओपाँत हुव मिँ ज़।
ROM 16:6 जेजूँनी सैःसिवा जैसिद जेय़ेन दोव मरियमलाई मनी जेरो लिज़्‍या।
ROM 16:7 ङास झ्यालखानाल ल्‍यो यहूदी ङानैं एन्‍द्रोनिकस स़ोनो युनियसनिलाई जेरो लिज़्‍या। नोनी निमिन येसुए ओसाचीराए खार्ल थासो लिज़्‍या। नोनी ङाकिन ङ़ादा ज़ ख्रीसलाई नियुँ हुबोनी निल्‍यो।
ROM 16:8 प्रभुए उमिनताव ङायुँलाव ङानैं एम्‍प्‍लीआतसलाई जेरो लिज़्‍या।
ROM 16:9 ख्रीसए जूँनी गेस य़ेन दोज़्‍याव उर्बानस स़ोनो ङायुँलाव ङानैं स्‍ताखुसलाई पाला जेरो लिज़्‍या।
ROM 16:10 ख्रीसए उमिनत थ॰रिउ अपेल्‍लेसलाई जेरो लिज़्‍या। अरिस्‍तोबुलसए उझ़िमलावरालाई ब जेरो लिज़्‍या।
ROM 16:11 यहूदी ङानैं हेरोदियनलाई जेरो लिज़्‍या। प्रभुलाई यायुँ हुप्‍ज़्‍याव नर्किससए उझ़िमलावरालाई जेरो लिज़्‍या।
ROM 16:12 प्रभुए ओय़ेन कुधु दाज़्‍याव त्रुफेना स़ोनो त्रोफोसा ङाबैंनीनिलाई ब जेरो लिज़्‍या। परमेस्‍वरए ओय़ेन सैःसिवा जैसिद दोज़्‍याव ङायुँलाव ङाबैंनी परसीसलाई ब जेरो लिज़्‍या।
ROM 16:13 प्रभुए उरूजिउ रूफसलाई स़ोनो ओआमालाई पाला जेरो लिज़्‍या। नोए ओआमा ङा ब ङाआमा स्‍यासो ज़।
ROM 16:14 असिंक्रितस, फ्लेगन, हर्मेस, पत्रोबास, हर्मास स़ोनो नोरास लिज़्‍याव गेदाज्‍यु भाइरालाई प़ाइँलाई ज़ जेरो लिज़्‍या।
ROM 16:15 फिलोलोगस, युलिया, ओलिम्‍पास, नेरियस, ओल ओबैंनी स़ोनो नोरास लिज़्‍याव परमेस्‍वरए छैंव उमींरालाई प़ाइँलाई जेरो लिज़्‍या।
ROM 16:16 आव जेरो जे जेल ब मयास है दासिच्‍यो। पो पोङाव ख्रीसए ओमन्‍दलीराए मनी जेरो है दाचिज़्‍यार।
ROM 16:17 अ ङानैं ङामेंर, जेस फरी ङाबिन्‍ती तोबो लिज़्‍या — फातैज़्‍यावरास जोगोइसिद लिच्‍यो। जेलाई पैसिउ परमेस्‍वरए ओपाँ तँदा बले·द जेयुँ जेसुहुबोलाई बले·द्याव पैंज़्यार। है जैद जे नितावरानी अछतङ लिच्‍यो।
ROM 16:18 नोराए गेप्रभु ख्रीसए ओसेवा मादोर, याभूँदीए ओसेवा वाज़ दोज़्‍यार। यायाःत रग रग जैद लातो गाँदोरालाई याराधुतैज़्‍यार।
ROM 16:19 खाली जे ते परमेस्‍वरए ओपाँ चावस जेदोज़्‍याव प़ाइँए ज़ थैद नैर। होए जूँनी जेस ङा बनै खुसी ङालिज़्‍या। है जैद जे चावत बनै सैंन्‍यार ताच्‍यो, माचावत जेखत माल्‍योर ताच्‍यो।
ROM 16:20 युँ होलाँ जैद्याज़्‍याव परमेस्‍वरए चाँदो ज़ जेसुतुर सैतानलाई जेखँ धूँल रूम्‍द्याचिरिज़्‍याव। गेप्रभु येसुए गराँव उयुँ जेस ओताक।
ROM 16:21 ङास य़ेन दोज़्याव तिमोथीए ब जेलाई जेरो है दाचिज़्‍याव। यहूदी ङानैंर लुकियस, यासोन स़ोनो सोसिपात्रोसराए मनी जेरो है दाचिज़्‍यार।
ROM 16:22 पावलए उजूँनी आव पाँ सर्द्याज़्‍याव ङा तर्तियसए मनी जे प़ाइँलाई ‘प्रभुए उमिननी जेरो’ है ङादाचिज़्‍या।
ROM 16:23 ङा ङालिज़्‍याव झ़िमए ओर्गे गायसए पाला उझ़िमलाव दुप्‍सिज़्‍याव मन्‍दलीरास जेलाई जेरो है दाचिज़्‍यार। सहरलाव कोस चलैज़्‍याव इरास्‍तस स़ोनो गेभाइ क्‍वार्तसनी पाला जेरो है दाचिज़्‍यानी।
ROM 16:24 [गेप्रभु येसु ख्रीसए गराँव उयुँ जेस ज़ ओताक। आमेन।]
ROM 16:25 ङा ङासथैचिज़्‍याव येसु ख्रीसए चाव ओथानी जेलाई परमेस्‍वरए ग्‍याल गिल मातान्‍या थ॰रिउ जैचिधुज़्याव। नो थात भाःकिनकाव कप्‍सिउ सुए ज़ यामाबुझिताव पाँर सतैंसिउ लिज़्‍या।
ROM 16:26 अजम्‍बरीलाव परमेस्वरए ओगोइँनी ज़ प़ाइँ जातलाव मिँराए यायुँ सुहुप्‍द्याद नो पाँ सभैंःन्‍याए जूँनी नो ङ़ादाङाव सर्सिउ धर्मसास्‍त्रलाव पाँए ओअर्थ भरी आज्‍याल छर्लङ्ग ज़ रैंःद याखार्ल थास्‍के।
ROM 16:27 है जैद प़ाइँ सैंज़्‍याव तोबोका तोबो परमेस्‍वरलाई येसु ख्रीसनी खर्क ज़ माखेम्‍न्‍या ज़गै मगै ओताक। आमेन।
1CO 1:1 परमेस्‍वरए ओखतैनाव येसु ख्रीसए ओसाची ङा पावल स़ोनो ङास लिज़्‍याव गेभाइ सोस्‍थेनेसस गिन्‍ल्‍योनी,
1CO 1:2 जे कोरिन्‍थलाव परमेस्‍वरए ओमन्‍दलीलाई आव चिथी परींद गिन्‍याचिज़्‍या। जे प़ाइँङाव गेप्रभु येसु ख्रीसए उमिन हाइज़्‍यावरास जे ब येसु ख्रीसनिकाव छैंव तान्‍या खुल्‍सिउर जेलिज़्‍या।
1CO 1:3 परमेस्‍वर गेबाबु स़ोनो गेप्रभु येसु ख्रीसनी जेल्‍योदा नियुँ गराँद जेयुँ होलाँ जैद ओयाचिरक।
1CO 1:4 जे येसु ख्रीसनिकाव परमेस्‍वरए ओअसिकर जेदैवए ङा जेजूँनी परमेस्‍वरलाई एकम्‍न्‍या धन्‍याबाद चरैःव ज़ ङानैज़्‍या।
1CO 1:5 जे पाँल तादी ब, ग्‍यानल तादी ब ख्रीसनी प़ाइँनी ज़ बनिउर ताद जेले।
1CO 1:6 ननी ज़ जेलाई गेसथैचिउ ख्रीसए ओपाँर जे जेक्‍याँत थ॰रिके।
1CO 1:7 है जैद ज़ गेप्रभु येसु ख्रीस ओमाहुवा पै जेयुँ थू जैद कींद जेनैज़्‍याव भरिल, ओल ओय़ेन दान्‍यात प़ाइँ बरदानर जोरैद नैद्याचिउ, कातानी ब कम्‍ती जेमाले।
1CO 1:8 है जैद गेप्रभु येसु ख्रीस उहुन्‍या छ्याम पै ओल परमेस्‍वरए ज़ जेलाई थ॰रिउर जेखत माल्‍योर नैचिरिज़्‍याव।
1CO 1:9 निताव य़ेनल परमेस्‍वरलाई युँ हुबो ज़ लिज़्‍या। ओज़ा गेप्रभु येसु ख्रीसस सिप लिन्‍या खुल्‍द नैचिउ।
1CO 1:10 अ ङानैं ङामेंर, गेप्रभु येसु ख्रीसए उमिननी ङाअर्थैचिज़्‍या, जे जेल सु ज़ माखैव ताताक, बुरू प़ाइँ तयुँ जैद खैद लिच्‍यो।
1CO 1:11 खाली आङ ते झन जे इ़सिउ ज़ जेलिज़्‍या दी लिन्‍या क्‍लोयए उझ़िमलावराए ल्‍योनी ङाथैके।
1CO 1:12 ङा है ङालिज़्याव आव ज़, ख्वाराए ‘गे पावलसकावर’, ख्वाराए ‘गे अपोल्‍लोससकावर’, ख्वाराए ‘गे पत्रुससकावर’, ख्वाराए ‘गे ख्रीससकावर’ है जेलिज़्‍या दी।
1CO 1:13 काता ख्रीस चिरा·सिउ उलिज़्‍याव रो? सैं ङा पावल क्रुसत तङ्गैसिद ङाजिउ झाःद ङायाचिउ रो? सैं ङा ङामिनत सछैंसिउर ब यालिज़्‍याव रो?
1CO 1:14 परमेस्‍वरलाई धन्‍याबाद लिज़्‍या, जे जेल्‍योङाव ङानिसछैंवनी क्रिस्‍पस स़ोनो गायसनी वाज़ लिज़्‍यानी। नो ऩेब्‍लोकिन छुतर ङामारासछैंवए,
1CO 1:15 ङा ङामिनत गेसछैंसिके लिन्‍या सुए ज़ है ल्‍यो दैन्‍या जेमाले।
1CO 1:16 ओहो, स्‍तिफनासए उझ़िमलावरालाई पाला ङारासछैंव ज़। नोकिन छुतर ते ङामारासछैंखेहो लिन्‍या मिताव ङाङम्‍सिज़्‍या।
1CO 1:17 ख्रीसए ङालाई मिँर सछैंन्‍याए जूँनी उपरींनाव माःक, चाव था सथैन्‍याए जूँनी उपरींनाव ची। नो पाँ ङारासथैक येसु ख्रीस क्रुसत उसिउ पाँए ओअर्थ ताम़ाक लिद बनै मोहोन्‍यालो जैद ङामापाँए, किताव उलिज़्याव हिताव ज़ ङापाँज़्या।
1CO 1:18 ख्रीस क्रुसत उसिउ पाँ नर्गलाव येमदा बाज़्‍यावरालाई ओलेखा माल्‍यो पाँ मिताव ज़ लिज़्‍या। खाली गे अजम्‍बरी जुनीदा बाज़्‍यावरालाई ते नो पाँत परमेस्‍वरए ओसक्ती लिज़्‍या।
1CO 1:19 काराव ल्‍यो ताकिन धर्मसास्‍त्रल इताव सर्सिउ लिज़्‍या, “बनै सैंन्‍याराए यापाँ ओअर्थ माल्‍यो अऩाकलाव ज़ ङाजैरिज़्‍या। ओगहक ल्‍यो मिँए ओगहक ब पल्‍तैद ङाएरिज़्‍या।”
1CO 1:20 यागहक ल्‍योर खैकी? सास्‍त्रीर स़ोनो आव जुकलाव सैंन्‍यार काङ्ङ यालिज़्याव? ओल परमेस्‍वरए ज़ आव मानुवातावराए याबुद्धी अऩाकलाव ज़ जैद याएक्‍यो।
1CO 1:21 परमेस्‍वरए ङ़ादाकिन ज़ अचम्‍बलाव ओगोइँनी आव मानुवाताव मिँरालाई या याबुद्धीनी यागहकनी ओललाई मासरेस्‍धुन्‍या याजैक्‍यो। बुरू गे गेरासथैज़्याव आव मानुवाताव मिँराए ओअर्थ माल्‍यो याथ·रैव पाँनी ज़ झन यायुँ हुप्‍ज़्‍यावरालाई परमेस्‍वरए अजम्‍बरी जुनी यान्‍या थ·रैक्‍यो।
1CO 1:22 यहूदीराए ते परमेस्‍वरए ओराज्‍यालाव सरेसर आव मानुवात यामारँःवा पै यायुँ ओमाहुप्‍ज़्‍याव। ग्रीकराए फरी बुद्धीलाव पाँ याखिम्‍ज़्याव।
1CO 1:23 गे ते ख्रीस क्रुसत उसिउ पाँर गेरासथैज़्‍या। नो पाँए यहूदीरालाई यायुँ केःद याएज़्‍याव, ग्रीकरालाई फरी ओअर्थ माल्‍यो ल़॰न्‍या मिताव पाँ ज़ लिज़्‍या।
1CO 1:24 परमेस्‍वरए ओराछाँतिउरालाई ते, यहूदीर तादी ब, ग्रीकर तादी ब, ख्रीसए ओक्‍याँत परमेस्‍वरए ओसक्ती ब लिज़्‍या, उबुद्धी ब लिज़्‍या।
1CO 1:25 काराव ल्‍यो ताकिन परमेस्‍वरए ओय़ेन मुर्ख मिताव ओरैंःदी ब मिँराए यागहकनी यादोज़्‍याव य़ेनकिन ओलेखा ल्‍यो लिज़्‍या। नत ओसक्ती माल्‍यो हार्‍या मिताव ओजैसिदी ब मिँराए यार्साकिन परमेस्‍वरए ओसक्ती नत ज़ रैंःके।
1CO 1:26 जे ब जेसैंज़्‍या ङानैं ङामेंर, जे परमेस्‍वरए उखुल्‍चिउ बेलाक मिँराए लेखानी जेबुद्धी ल्‍योर कोसै जेमाले, घेप्‍पा मिँर ब कोसै जेमाले, घेप्‍पा जातलावर ब कोसै जेमाले।
1CO 1:27 ननी ज़ रैंःज़्‍या, परमेस्‍वरए आव मानुवाताव बनै सैंन्‍याराए यागहक अऩाकलाव जैद्यान्‍याए जूँनी जे मिताव कान्‍ल ज़ मागनिसिउरालाई रूजिचिक्‍यो। घेप्‍पा मिन दैवरालाई लाज मोर्नो जैन्‍याए जूँनी जे मिताव ज़िम्‍ज़ारालाई छाँतिचिक्‍यो।
1CO 1:28 आव मानुवाताव यासघ्योःव पाँर अऩाकलाव जैन्‍याए जूँनी परमेस्‍वरए झन ज़िम्‍ज़ा, काम मालागिउ स़ोनो कान्‍ल ज़ मागनिसिउरालाई यारूजिक्‍यो।
1CO 1:29 है जैद परमेस्‍वरए ओङ़ाक यानी सु ज़ सघ्योःसिधुन्‍या मालेर।
1CO 1:30 जे ब परमेस्‍वरनी वाज़ येसु ख्रीसस सिप ताद जेले। नोए ज़ परमेस्‍वरलाई सरेस्‍न्‍या बुद्धी ब यासिक्‍यो, ओल उयुँलाव मिताव छैंवर ब जैसिक्‍यो, माचावनी रेंःद उमींर ब जैसिक्‍यो।
1CO 1:31 है जैद धर्मसास्‍त्रल सर्सिउ लिज़्‍या, “जो सघ्योःसिउ पैंज़्‍याव, प्रभुनी वाज़ ओसघ्योःसिक।”
1CO 2:1 ङानैं ङामेंर, ङा ङ़ादा जेल्‍योङ ङाहुव बेलाक परमेस्‍वरए म़ोंसिउलाव ओपाँ ङासथैचिज़्‍याक बनै सैंन्‍या मिँराए यापाँ मोहोन्‍यालो जैद यापाँज़्याव मितावनी ङामापाँए।
1CO 2:2 बुरू जेल्‍योङ माहुद ज़ येसु ख्रीसए उमिन स़ोनो क्रुसत उजिउ झाःद ओयासिउए जूँनी वाज़ ङारापैया है ङालिज़्‍याव।
1CO 2:3 झन जेल्‍योङ ङाहुक ते ङासक्तीर माल्‍यो ताद छे·व ज़ ङालिके।
1CO 2:4 है जैद जेयुँ मिँराए याबुद्धीनी हुव पाँत ताहुप्‍क, परमेस्‍वरए ओसक्तीलाव थ॰रिउ पाँत वाज़ ओताक लिद ङा जेलाई परमेस्‍वरए ओपाँर ङासथैचिक मिँराए याबुद्धीनी यारामोहोनैज़्‍याव मितावनी ङासथैचिउ माःक। बुरू नो ङापाँत परमेस्‍वरए उपुरूस स़ोनो ओसक्ती ओरैंःवनी वाज़ ङासथैचिउ।
1CO 2:6 हितावत ब परमेस्‍वरए ओपाँत पाखो तावरालाई अचम्‍बलाव बिचारनी हुव पाँर ब ङारासथैज़्‍या। खाली नो पाँर आव जुकलाव बुद्धीनी ब माःक, खेम्‍द बान्‍या घेप्‍पाराए यागहकनी ब माःक।
1CO 2:7 गे गेरासथैज़्‍याव परमेस्‍वरए ओपाँ ते बनै उबुद्धी ल्‍यो आःपै सुए ज़ यामाथ·रैताव कप्‍सिउ मिताव ज़ उलिज़्‍याव। खाली ओल परमेस्‍वरए ज़ नो पाँनी गेलाई ओज़गै मगैल लाँन्‍याए जूँनी नाम नम ओमाजैदकिन ज़ आव बेलाए जूँनी ज़ गोइँद ओनैज़्‍याव।
1CO 2:8 आव जुकलाव घेप्‍पाराए परमेस्‍वरए ओगोइँनी ओदोव य़ेन झन माथ·रैधुकेर। थ·रैद यासैंव ताकिन ज़गै मगैव गेप्रभुलाई क्रुसत मासैःखेरहो।
1CO 2:9 है जैद गे गेरासथैज़्‍याव पाँए उजूँनी धर्मसास्‍त्रल इताव सर्सिउ लिज़्‍या, “परमेस्‍वरए ओललाई मया दाज़्‍यावरालाई सुए ज़ यामारँःताव, सुए ज़ यामाथैताव, सुए ज़ यामासैंताव पाँर सतैंद याएरिज़्‍याव।”
1CO 2:10 नो पाँर फरी परमेस्‍वरए ओल उपुरूसए ज़ सतैंद्यासिक्‍यो। होए वाज़ पाँ भरी सैंज़्‍याव, परमेस्‍वरए उयुँलाव पाँर ब सैंज़्‍याव।
1CO 2:11 गे मिँर ब गेक्‍याँताव पुरूसए वाज़ गेयुँलाव पाँ भरी सैंज़्‍याव। हिताव ज़ परमेस्‍वरए उयुँलाव ओपाँर ब ओल उपुरूसए वाज़ सैंज़्‍याव, छुतराए मासैंधुर।
1CO 2:12 गेलाई ओल परमेस्‍वरए ओयासिउ बरदानर सैंव परींन्‍याए जूँनी उपुरूस याद नैसिउ। नो पुरूस आव मानुवाताव बुद्धी स्‍यासोनी माःक, परमेस्‍वरनी हुव ज़ लिज़्‍या।
1CO 2:13 है जैद गेरासथैज़्‍याव भरी मिँए बुद्धीनी हुव माःक, परमेस्‍वरए उपुरूसए ओपैसिज़्याव वाज़ गेपाँज़्‍या। परमेस्‍वरए ओपाँ ते परमेस्‍वरए उपुरूसनी वाज़ पलास्‍सिज़्‍या।
1CO 2:14 परमेस्‍वरए उपुरूस माल्‍यो मिँए परमेस्‍वरए उपुरूसनिकाव हुव पाँ माभैंःए। नोलाई ओअर्थ माल्‍यो पाँ मिताव ज़ लिज़्‍या। नो पाँर परमेस्‍वरए उपुरूसनी वाज़ सैंन्‍या ओतावए माबुझिधुव।
1CO 2:15 परमेस्‍वरए उपुरूस दैव मिँए ते पाँ भरी थ·रैधुज़्‍याव। छुतराए ते नोए ओपाँलाई माथ·रैधुर।
1CO 2:16 धर्मसास्‍त्रल ब इताव सर्सिउ लिज़्‍या, “परमेस्‍वरए उयुँलाव पाँलाई थ·रैद, ओललाई पैधुज़्‍याव सु ची उलिज़्‍याव?” खाली गे ते ख्रीसए उयुँलाव पाँ दैवर गेलिज़्‍या।
1CO 3:1 अ ङानैं ङामेंर, ङा जेस ङालिज़्याक परमेस्‍वरए उपुरूस दैवरास ङापाँज़्‍याव मिताव माताके। जे ख्रीसए ओबगाललाव माछिबो भाउज़ा स्‍यासोर वाज़ जेलिज़्‍यावए मानुवाताव मिँरास पाँज़्याव मिताव पाँव परिके।
1CO 3:2 हो बेलाक ङ़ादा ख्रीसए ओपाँ ङायाचिक ज़्‍याव माज़्‍युताव भाउज़ारालाई नुइँ याराएज़्‍याव मितावनी ज़ ङायाचिके, आःपै ब हाःवाकावर ज़ जेलिज़्‍या।
1CO 3:3 जे जेल सोसिन्‍या इ़सिन्‍या वाज़ ओतावए परमेस्‍वरए उपुरूस मादैव अइज़काव मिँ स्‍यासोर ज़ जेलिज़्‍या।
1CO 3:4 जे ख्वाराए ‘ङा पावलसकाव’, ख्वाराए ‘ङा अपोल्‍लोससकाव’ है जेलिकिन निताव जेपाँए परमेस्‍वरए ओपाँ मादैव स्‍यासोर ज़ जेलिज़्‍या।
1CO 3:5 अपोल्‍लोस सुदा? पावल सु? गिन परमेस्‍वरए सु सु गिनय़ेनत खतैद जेलाई परमेस्‍वरए ओयेमदा लाँज़्‍याव ओनोकोरनी वाज़ माःक रो?
1CO 3:6 ङा परमेस्‍वरए ओपाँत धुर वास्‍ज़्‍याव मिताव ङालिज़्‍या, अपोल्‍लोस ऱी यो·ज़्‍याव मिताव लिज़्‍या। सपरीद्याज़्‍याव ते ओल परमेस्‍वर ज़।
1CO 3:7 है जैद धुर वास्‍ज़्‍याव ब काता ज़ माःक, ऱी यो·ज़्‍याव ब काता ज़ माःक, सपरीद ओसै झाःद्याज़्‍याव परमेस्‍वर वाज़ लिज़्या।
1CO 3:8 धुर वास्‍ज़्‍याव स़ोनो ऱी यो·ज़्‍यावनी निलेखा तोबो ज़। सु सु निय़ेनए ओजेला दैरिज़्‍यानी।
1CO 3:9 गिन परमेस्‍वरए ओएँःल य़ेन दाज़्याव स्‍यासोनी गिन्लिज़्या। जे परमेस्‍वरए ओएँः स्‍यासोर जेलिज़्या, परमेस्‍वरए ओजैज़्याव झ़िम स्‍यासोर ब जेलिज़्या।
1CO 3:10 ङालाई परमेस्‍वरए ओखतैनाव य़ेनत ओल ओयाँव असिकनी ज़ पाखो भुली मिताव ङा उझ़िमलाव गज ङाथालिके। होए ओतर्त छुतए चा·ज़्‍याव, खाली होए जोगोइद ओचा·वक।
1CO 3:11 गज ते ताधुके — नो गज येसु ख्रीस ज़। परमेस्‍वरए ओराज्‍याल छुत गज माले।
1CO 3:12 नो गज तर्ताव याजैव सुन चाँदी तादी ब, ओएः ल्‍यो लुँर तादी ब, सींर छीर तादी ब,
1CO 3:13 परमेस्‍वरए फाल्‍न्‍या छ्याम मिँराए यादोव य़ेन भरी मेंःनी जाँचिन्‍या ले। नो याय़ेन चाव सैं माचाव लिन्या मेंःए ज़ सरैंःद्यान्‍या ले।
1CO 3:14 नो गज तर्ताव उऱिमो य़ेन उथ॰रिकिन नो मिँए इनाम दैन्‍या ले।
1CO 3:15 नो ओदोव य़ेन फरी मेंःए ज़्‍याद ओएकिन, ओय़ेन भरी अऩाकलाव तान्‍या ले, खाली ओल ते मेंःनी पुलुस्‍द ओबाँचिउ मिताव ज़ तान्‍या ले।
1CO 3:16 परमेस्‍वरए छैंव उपुरूस जेस बास दाद नैव लिन्‍या जेमासैंज़्याव रो? जे ते परमेस्‍वरए चोखो उझ़िम ताद जेले।
1CO 3:17 नो झ़िम छैंव ओल परमेस्‍वर लिन्‍या पो ओतावए जोए नो झ़िमलाई बले·ज़्‍याव परमेस्‍वरए नोलाई ब बले·न्‍या ले। नो झ़िम जे ज़।
1CO 3:18 है जैद जे सु ज़ ताझुकिच्‍यो। जोए आव मानुवाताव याथ·रैव गोइँनी “ङा प़ाइँरानी सैंन्‍या ङालिज़्‍या” है उलिकिन होए ओसघ्योःसिन्‍या ओऱासोक। हो ताकिन ची परमेस्‍वरनिकाव साचो बुद्धी दैव मिँ तान्‍या ले।
1CO 3:19 आव मानुवाताव बुद्धी परमेस्‍वरए ओङ़ाक ते काता ज़ माःक। नोए उजूँनी धर्मसास्‍त्रल इताव सर्सिउ लिज़्‍या, “परमेस्‍वरए याबुद्धी ल्‍योरालाई या यापाँनी ज़ याक्‍योःज़्‍याव।”
1CO 3:20 फरी तोथोल, “याबुद्धी ल्‍योराए याबिचार अऩाकलाव लिज़्‍या लिन्‍या परमेस्‍वरए सैंज़्‍याव।”
1CO 3:21 है जैद जे मिँरालाई तारासघ्योःच्‍यो, काराव ल्‍यो ताकिन प़ाइँ जेजूँनी ज़ लिज़्‍या।
1CO 3:22 पावल तादी ब, अपोल्‍लोस तादी ब, पत्रुस तादी ब, ताव भरी तादी ब, सिन्‍या तादी ब, बाँचिन्‍या तादी ब, आज्‍यालकाव पाँर तादी ब, हुन्‍या पाँर तादी ब, प़ाइँ जेजूँनी ज़ जैसिउ लिज़्‍या।
1CO 3:23 जे ते ख्रीसए उमींर ज़, ख्रीस फरी परमेस्‍वरए उमीं ज़।
1CO 4:1 है जैद इतावनी जे गेलाई, “आवर ख्रीसए ओसेवा दाज़्यावर, परमेस्‍वरए म़ोंसिउ ओपाँ पलास्‍ज़्‍यावर याल्‍यो” लिन्‍या सरेसो ताके।
1CO 4:2 सेवा दोज़्यावराए याय़ेन, यार्गे परमेस्‍वरए है ओल्‍यो भरित सतस दाद उयुँ होलाँ जैद्यान्‍या लिज़्‍या।
1CO 4:3 है जैद जे तादी ब, छुतराए तादी ब, जो मितावनी है जेदाँदी ब, जो मितावनी जेगोइँनादी ब ङा ग्‍याल गिल ज़ ङामाताए। ङानी ब ङा इताव ङालिज़्‍या है ङामालिधुइ।
1CO 4:4 खाली ङाचेतैक परमेस्‍वरए ओय़ेन ङाबले·खेहो सा लिन्‍या ङामासैंए। हैदी ब ङा है ङालिज़्‍यावनी माःक, ङालाई छ्यानिन्‍या ओल परमेस्‍वर ज़ लिज़्‍या।
1CO 4:5 है जैद जे ब थिक बेला ओमाहुद छुतर ताराछ्यानिच्‍यो। गेप्रभु फरी उहुक चुम चुमोलाव म़ोंसिउ भरी ओज़लाँए सरैंःरिज़्‍याव, प़ाइँ युँलाव पाँ ब सतैंरिज़्‍याव। हो छ्याम मिँरालाई “चाव जेदोव ओल्‍यो, माचाव जेदोव ओल्‍यो” लिन्‍या ओल ज़ है दान्‍या ले।
1CO 4:6 ङानैं ङामेंर, ङा आक पै ङासरोल जे अपोल्‍लोसस गिनलाई जेगोइँसिज़्‍यावनी गिन गिनमिन वाज़ हाइद ङानै। ननी ज़ जे गिनलाई रँःद ङा है ङालिज़्याव धर्मसास्‍त्रलाव पाँर य़ाका जेदोकिन जे जेल सुए उमिनत ज़ स॰द सघ्योःसिन्‍या जेमाले।
1CO 4:7 जे छुतए उमिननी नैं मेंराकिन कै जैद चाव जेलिज़्‍याव? जेसकाव लिज़्‍याव भरी परमेस्‍वरए ल्‍योनी अइज़ जेदैव माःक रो? है जैद जे काराव मादैवराए मिताव जैसिद जेस॰ज़्‍याव?
1CO 4:8 जे, “गेस प़ाइँ ज़ उलिज़्यावए धनी ताद परमेस्‍वरए ओराज्‍यालाव राजा ताद गेले,” है जेलिज़्‍या दी। इताव जेपाँए ते गिनलाई अपोल्‍लोसस ब बलेंद जेबाधुव ची ओल्‍यो! जे साचो निताव ज़ जेताव ताकिन ते तान्‍या ओल्‍यो। गिन ब जेस राजा तान्‍या गिन्‍ल्‍यो!
1CO 4:9 खाली चिऊक ते गे परमेस्‍वरए ओसाची खतैसिउर प़ाइँरानी छींताव सिन्‍या सजा दैव स्‍यासोर गेरैंःज़्‍या। नो गेलिज़्‍याव सजाल आव मानुवाताव मिँराए याङ़ाक स़ोनो परमेस्‍वरए ओचाकर्‍याराए याङ़ाक चिऊसी ऩिन्‍या मितावर ताद गेले।
1CO 4:10 गे ख्रीसए उजूँनी बरे·सी ऩिन्‍यार ताद गेले, जे ते ख्रीसए उमिनत बधा घ्योःवर ताद जेले। गे कान्‍ल ज़ मागनिसिउ मितावर ताद गेले, जे ते घेप्‍पा मिन खिम्‍न्‍यार वाज़ ताद जेले। गे मिँराए ङ़ाक प़ैक्‍यार ताद गेले, जे ते मान दैव स्‍यासोर जेजैसिज़्‍या।
1CO 4:11 आख मनी ज़्‍यान्‍या ओन्‍याए माथैंद, करे करे थाकना बुरूम ज़ गेबाऱिज़्या, लिन्‍या गेझ़िम ब माले, मुत्‍का लप्‍ता ब कैव ज़ गेनैज़्या।
1CO 4:12 परमेस्‍वरए ओपाँ गेरासथैक ब गेकुइए य़ेन दाद गेङासिके। गेलाई थल्‍ज़्‍यावरालाई असिक गेराएज़्‍या, गेखिरी यापसिक ब गेसहिज़्‍या,
1CO 4:13 गेमिन बले·द्याज़्‍यावरालाई ब चावनी ज़ गेरापजैज़्‍या। गे आःपै मानुवातावराए याङ़ाक कान्‍ल ज़ मागनिसिउ, युँ माजामो झ़िम्सी स्‍यासोर ताद गेले।
1CO 4:14 आव ङासरो भरी जेलाई लाज मोर्नो जैन्‍याए जूँनी माःक, याबाबुए उयुँलाव ओज़ारालाई ओराम·लैज़्‍याव मितावनी तखेप ङासिङार्चिके।
1CO 4:15 काराव ल्‍यो ताकिन जेलाई ख्रीसए ओपाँ पैज़्‍यावर बनै कुधु ज़ यालिदी ब जेबाबु ते तोबो ज़ लिज़्‍या। जेलाई येसु ख्रीसए ओपाँ ङासथैचिउए ङा ज़ जेबाबु मिताव ङाताके।
1CO 4:16 है जैद जेलाई है ङादाचिज़्‍या, ङा ङादोज़्‍याव मिताव जे मनी दोच्‍यो।
1CO 4:17 आवए उजूँनी ज़ तिमोथीलाई जेल्‍योदा परींद ङानै। नो मिँ परमेस्‍वरए ओपाँत ङायुँ हुबो ङायुँलाव ङाज़ा मिताव ज़ लिज़्‍या। नोए ङा पो पोङाव मन्‍दलीरालाई ङारापैज़्‍याव मिताव येसु ख्रीसए उमिनताव चलन दान्‍या जेलाई ब पैचिरिज़्‍याव।
1CO 4:18 ख्‍वा ख्‍वार ते ङा जेल्‍योङ खर्क ज़ माहुन्‍या मिताव ङम्‍सिद बनै स॰ज़्यार दी।
1CO 4:19 हैदी ब गेप्रभुए उयुँ ओताकिन ङा हतप्‍त ज़ जेल्‍योदा ङाहुरिज़्‍या। हो ताकिन नो स॰ज़्‍यावर यायाः वाज़ सैं साचो यासक्ती ब उलिज़्‍याव रँःन्‍या ङाले।
1CO 4:20 परमेस्‍वरए ओराज्‍यालाव मिँर तान्‍या याःए वाज़ माःक, परमेस्‍वरए ओसक्तीनी दान्‍या मनी ज़।
1CO 4:21 है जैद ङा जेल्‍योदा ङाहुक झुइस हुन्‍या सैं मया रैद चावस हुन्‍या जे ज़ सैंच्‍यो।
1CO 5:1 जे जेखार्ल तोबो बनै युँ माजामो माचाव य़ेन ताद ले दी लिन्‍या प़ाइँदा ज़ थास्‍द ले। निताव य़ेन परमेस्‍वरए ओपाँ मादैवराए खार्ल ब माले। जेनी तोबोए ओबाबुए कान्‍छी ओज्‍यालाई लाँद होस लिज़्‍यानी दी लिन्‍या ङाथैज़्‍या।
1CO 5:2 जेखार्ल निताव य़ेन लिज़्‍यावत ब जे कै जैद स॰द जेसघ्योःसिज़्‍याव? बुरू जेयुँ माचाव दाद नो मिँलाई जेखार्नी पले·न्‍या ओल्‍यो।
1CO 5:3 ङाक्‍याँ जेल्‍योङ ओमालिदी ब ङायुँ ते जेस ज़ लिज़्‍या। है जैद ङा जेल्‍योङ ङालिज़्याव मिताव नो मिँए ओय़ेन ङाफाल्‍धुके।
1CO 5:4 जे गेप्रभु येसुए उमिनत जेदुप्‍सिक, ङा ब गेप्रभु येसुए ओसक्तीस जेखार्ल ज़ ङालिज़्‍याव सम्‍जिद,
1CO 5:5 जे नो मिँलाई सैतानए उकुइत सूँपिचिके। हो ताकिन युँ माजामो ओय़ेनरानी निताव दुखर सहिद गेप्रभुए फाल्‍न्‍या छ्याम कसा उपुरूस माबाँचिए।
1CO 5:6 जे काताए जूँनी सघ्योःसिन्‍या? मुछिसिउ कनेल तकेज़ा सोगोइन्‍या वासः झाःकिन कने भरी सरालिज़्‍याव लिन्‍या जेमासैंए रो?
1CO 5:7 जे पुराँदो सरालिज़्‍याव वासःलाई हाइद ख्‍याव ताके। ख्रीसए निस्‍तार पर्ब छ्यामकाव पाथा जैसिद उजिउ झाःद ओयासिउए जेखत माल्‍यो साःरोर जेताज़्या।
1CO 5:8 है जैद जे नो पर्ब चावस मानिन्‍याए जूँनी जेखार्लाव पुराँदो सरालिज़्‍याव वासः मिताव जेयुँलाव पापर, बले·न्‍या य़ेनर ख्याद साःरो छैंव युँनी सतस दोव ताके।
1CO 5:9 ङ़ादाङाव ङापरींव चिथील, जे पातर्‍या पातर्नी जैसिज़्‍यावरास खदेप तालिच्‍यो लिद ङासरो।
1CO 5:10 नो है ङाल्‍यो आव मानुवाताव लुभीर, धुतैद ज़्याज़्यावर, अङग्‍या पुजा दाज़्‍यावरालाई माःक। नोराए ल्‍योनी पुलुस्‍न्‍या ताकिन आव मानुवाताव प़ाइँ मिँरानी ब अछतङ ल्‍यो परिखेहो।
1CO 5:11 खास है ङादाचिउ ते आव ची, जेसकाव यायुँ हुबो जैसिज़्यावर पातर्‍या पातर्नी जैसिज़्यावर, मँःए मँःए बाऱिज़्‍यावर, अङग्‍या पुजा दोज़्‍यावर, थल्‍ज़्‍यावर, लुभीर, धुतैद ज़्‍याज़्‍यावर यालिकिन, नितावरास सिप ब तालिच्‍यो, सिप ब ताज़्‍युच्‍यो।
1CO 5:12 गेकिन पाखाङावराए याय़ेन फाल्‍न्‍या गे माःक। गे गेराजाँचिज़्‍यावर ते गेसकावरालाई वाज़।
1CO 5:13 है जैद, “नो माचाव य़ेन दोवलाई जेखार्नी हाइचिके।” पाखाङावराए याय़ेन फाल्‍न्‍या ते ओल परमेस्‍वर ज़ लिज़्‍या।
1CO 6:1 जे जेल नैं मेंस माखैव पाँर ओताक कै जैद परमेस्‍वरए उमिनताव मिँरालाई फालो मापरींद एकसब्‍द्या अदालतङ जेबाज़्‍याव?
1CO 6:2 काता जे परमेस्‍वरए उमिनतावराए तछा मानुवाताव मिँरालाई याराफाल्‍रिज़्‍यार लिन्‍या जेमासैंए रो? मानुवाताव पाँर तछा जेनी ओफाल्‍सिकिन कै जैद इताव जेखार्लाव तकेज़ा पाँर जेमाफ्या·धुज़्‍याव?
1CO 6:3 हो बेलाक फरी परमेस्‍वरए ओचाकर्‍याराए याय़ेन ब गेफाल्‍रिज़्‍या। झन आव गेजिउताव पाँर कै जैद माफाल्‍न्‍या?
1CO 6:4 इताव फाल्‍न्‍या पाँर जेखार्ल उहुक काराव मन्‍दलीए कान्‍ल ज़ ओमारागनिउरालाई फालो परींन्‍या?
1CO 6:5 इताव पाँत जेलाज माहुज़्‍या? जे जेल जेपाँ फाल्‍धुन्‍याकावर तोबो ब जेमालिज़्‍याव रो?
1CO 6:6 झन जे नैं मेंरालाई परमेस्‍वरलाई यायुँ माहुबोराए ल्‍योक लाँद मुद्दा ब जेझाःनाज़्‍या।
1CO 6:7 खास दाद जे जेल मुद्दा जेझाःसिकिन हो ब लाज मोर्नो ज़ लिज़्‍या। बुरू निताव माखैन्‍या पाँर गाल्‍द कोरलैंर जेसहिकिन तान्‍या ओल्‍यो।
1CO 6:8 जे ते झन जेनैं मेंराए क्‍याँत ज़ लाँप चोंप दाद अन्‍याय जेदोज़्‍या।
1CO 6:9 अधर्मीर परमेस्‍वरए ओराज्‍याल माबाधुर लिन्‍या जेमासैंए रो? है जैद जे ताझुकिच्‍यो, नो अधर्मीर इतावर ज़ — पातर्‍या पातर्नीर, अङग्‍या पुजा दोज़्‍यावर, अर्काए ओज्‍या रैज़्‍यावर, खेपा-खेपास मेंमा-मेंमास पातर्‍या पातर्नी जैसिज़्यावर,
1CO 6:10 कुज़्‍यावर, लुभीर, मँःए मँःए बाऱिज़्‍यावर, थल्‍ज़्‍यावर, धुतैद ज़्याज़्यावर, आव भरी परमेस्‍वरए ओराज्‍याल बाधुन्‍या मालेर।
1CO 6:11 जे ब ख्वा ख्वार हिताव ज़ जेल्‍यो। आज्‍याल ते नो भरिनी परमेस्‍वरए छेद छैंवर जैद नैचिउ। झन गेप्रभु येसु ख्रीसए उमिननी स़ोनो परमेस्‍वरए उपुरूसनी जेखत माल्‍योर थ॰रिद जेले।
1CO 6:12 जे ख्वाराए है जेलिज़्‍याखेहो, “गेलाई कानुननी वैंसिउ य़ेन काता ज़ माले।” हैदी ब ङा फरी जेलाई है ङादाचिज़्‍या, प़ाइँ य़ेन क्‍याँए जूँनी माले। ङाकुइत प़ाइँ य़ेन उलिदी ब ङा कोभा य़ेनए ओबाँदा ङामाताए।
1CO 6:13 जे ते झन है जेलिज़्‍या, “ज़्‍याव भरी फूए उजूँनी जैसिउ लिज़्‍या, फू ब ज़्‍यावए उजूँनी जैसिउ लिज़्‍या।” खाली ङा ते है ङालिज़्‍या, परमेस्‍वरए ऩेथोलाई ज़ खेम्‍न्‍या ले। गेक्‍याँ युँ माजामो य़ेनए जूँनी माःक, प्रभुए जूँनी ची। फरी गेलाई चाहिज़्याव भरी प्रभुए ओल ज़ जोरैद यासिज़्याव।
1CO 6:14 परमेस्‍वरए गेप्रभुलाई किताव सिउनी ओसोचोइव, गेलाई ब नो ओसक्तीनी ज़ तछा अजम्‍बरी जुनील सोचोइसिरिज़्याव।
1CO 6:15 जे जेक्‍याँ ख्रीसए उखँ कुइर ताद लेर लिन्‍या आःपै जेमासैंए रो? हिताव ताकिन ख्रीसए ओक्‍याँ काराव पातर्नी मेंमाए ल्‍योदा लाँन्‍या? निताव सुए ज़ तादोवक।
1CO 6:16 जो पातर्नी मेंमास बाज़्‍या हो पातर्नीस तक्‍याँल ज़ गनिसिज़्‍यानी सानी। धर्मसास्‍त्रल ब नितावए उजूँनी अइ लिद सर्सिउ लिज़्‍या — “ज्‍या-री तावनी तक्‍याँ ज़ ताज़्‍यानी।”
1CO 6:17 खाली जो मिँ परमेस्‍वरए ल्‍योदा जोरैसिज़्‍या, नो परमेस्‍वरस तपुरूस ताज़्‍या।
1CO 6:18 पातर्‍या पातर्नी जैसिन्‍यानी अछतङ ल्‍यो ताके। उपुर्काव पाप भरी ते क्‍याँकिन पाखाङ ज़ ताज़्‍या। पातर्‍या पातर्नी जैसिज़्यावए ते ओल उउपर्त ज़ पाप दोज़्याव।
1CO 6:19 आव गेक्‍याँ परमेस्‍वरए छैंव उपुरूसए उझ़िम लिन्‍या जेमासैंए रो? नो परमेस्‍वरए ल्‍योनी गेदैव छैंव पुरूसए गेक्‍याँत बास दाद नैव। है जैद आव गेक्‍याँ गे गेमीं माःक,
1CO 6:20 गेलाई परमेस्‍वरए गेएः फो·द्याद उलँःसिउर ची। है जैद गे आव गेक्‍याँए परमेस्‍वरए उमिन सरैंःद्याव ताके।
1CO 7:1 अब ते ङालाई परींद जेयाँव चिथीनी तोबो तोबोनी है ङादाचिज़्‍या। खेपाए ज्‍या मादान्‍या चाव ज़ लिज़्‍या।
1CO 7:2 खाली पातर्‍या पातर्नी जैसिद बलेस्‍न्‍या ओताज़्‍याव देखा बुरू खेपाए ज्‍या ओदोवक, मेंमाए रे ओदोवक।
1CO 7:3 ज्‍या-री नितावत फरी खेपाए ओज्‍यालाई अछतङ तानैवक, मेंमा ब ओरेकिन अछतङ तालिक।
1CO 7:4 ओज्‍याए ओक्‍याँ ओल उजूँनी वाज़ माःक, ओरेए उजूँनी मनी ज़। ओरेए ओक्‍याँ ब ओल उजूँनी वाज़ माःक, ओज्‍याए उजूँनी मनी ज़।
1CO 7:5 मेंमाए ओरेलाई ओल्‍योदा हुन्‍या तावैंवक, खेपाए ब ओज्‍यालाई ओल्‍योदा हुन्‍या तावैंवक। खाली परमेस्‍वरलाई पोंखारिन्‍याए जूँनी जाँवा पै बातङ बातङ लिन्‍या निसखैदी ब निताव एकतार माःक, फरी सिप उलिनिक। निमालिकिन तोबोए उयुँ ओमानैधुकिन सैतानए बले·व पैंवा।
1CO 7:6 आव है ङादाचिउ पाँ मादाद माताए है ङालिज़्‍याव ते माःक, खाली इतावनी ताए सैं है ङालिज़्‍या।
1CO 7:7 ङा है ङालिज़्‍याव मिताव ताकिन ते प़ाइँ ङा मिताव ज्‍या मादोवर याताकिन चाव ताखेहो। खाली परमेस्‍वरए प़ाइँलाई छुत छुत किसिमलाव य़ेन दान्‍या बरदान याद नैसिउ, ख्वारालाई किताव, ख्वारालाई किताव।
1CO 7:8 ज्‍या मादावर स़ोनो रे मादावर, याज्या सिउर स़ोनो यारे सिउराए जूँनी है ङालिज़्‍या, ङा स्‍यासो बातङ लिधुकिन ते चाव ज़।
1CO 7:9 खाली उयुँ ओमानैधुकिन बिह्‍या ओदोवक। युँ झम माते·धुज़्याव देखा ज्‍या दान्‍या, रे दान्‍या ज़ पाथ लिज़्‍या।
1CO 7:10 फरी ज्‍या दावर स़ोनो रे दावराए जूँनी आव है ङालिज़्‍याव पाँ ङानी वाज़ माःक, गेप्रभुए है ओल्‍यो पाँ मनी ज़, रे दाव मेंमाए ओरेलाई ख्यानैद ताबाक।
1CO 7:11 ख्यानैद ओबाकिन छुत रे मादाद ज़ उलिक, अथबा ओरेस ओखैहुक। हो मिताव ज़ ज्‍या दाव खेपाए मनी ओज्‍यालाई ताऱासोक।
1CO 7:12 फरी जे छुतरालाई है ङादाचिज़्‍या। खास गेप्रभुए है ओल्‍यो पाँ ते माःक, ङानी ज़ है ङालिज़्‍या। जो उयुँ हुबो गेभाइए ओज्‍या उयुँ माहुबो उलिकिन फरी नो मेंमा ओरेस लिन्‍या खुसी ओताकिन नो खेपाए ओज्‍यालाई ताऱासोक।
1CO 7:13 हो मिताव ज़ उयुँ हुबो मेंमाए ओरे उयुँ माहुबो उलिकिन, फरी नो खेपा ओज्‍यास खुसी ओताकिन नो मेंमाए ओरेलाई ताख्यानैवक।
1CO 7:14 नो उयुँ माहुबो खेपा ओज्‍याए ल्‍योनी ज़ छैंव ताज़्‍या। हिताव ज़ उयुँ माहुबो मेंमा ब ओरेए ल्‍योनी ज़ छैंव ताज़्‍या। हिताव ओमाताव ताकिन निज़ार ब माछैंवर ताखेरहो, खाली नोर ते छैंवर लिज़्यार।
1CO 7:15 फरी नो उयुँ माहुबो, खेपा तादी ब मेंमा तादी ब ओभाःसिकिन्‍दा घभाःसिज़्याक। नो उयुँ हुबो ख्यानैसिउलाई ब फुर्सुल ताज़्या, काराव ल्‍यो ताकिन गेलाई खुसीस खैद लिन्‍याए जूँनी उखुल्‍सिउ ची।
1CO 7:16 तछा नरेलाई परमेस्‍वरए ओपाँत नरैधुज़्‍याक्‍या, नँ काता नसैंए? हिताव ज़ नँ खेपाए ब नज्‍यालाई तछा परमेस्‍वरए ओपाँत नरैधुज़्‍याक्‍या नँ नमासैंए।
1CO 7:17 खाली परमेस्‍वरए जो मितावल खुल्‍द खतैद नैचिउ, हो मितावल ज़ बाच्‍यो। पो पोङाव मन्‍दलीरालाई हैज़ ङारादोज़्‍या।
1CO 7:18 क्‍याल्‍न्‍या सरेस ताधुव मिँ परमेस्‍वरए ओपाँत उहुकिन नो मिँ क्‍याल्‍न्‍या सरेस माजैसिउ मिताव ताजैसिक। हो मिताव ज़ क्‍याल्‍न्‍या सरेस माजैसिउ मिँ उहुकिन नो मिँए क्‍याल्‍न्‍या सरेस ताजैवक।
1CO 7:19 नो सरेस जैसिन्‍या माजैसिन्‍या ओलेखा माले, परमेस्‍वरए ओपाँ दान्‍या वाज़ लिज़्‍या।
1CO 7:20 परमेस्‍वरए ओराखुलो बेलाक किताव याल्‍यो हिताव ज़ उलिरक।
1CO 7:21 परमेस्‍वरए ओपाँत उहुव बेलाक छुतए ओबाँदा ओल्‍यो ताकिन नोए उजूँनी सोगो तादोवक, नल ज़ उलिक। खाली नो मिँ ननी हाइसिउ ओदैकिन नो मौका ताऱासोक।
1CO 7:22 काराव ल्‍यो ताकिन परमेस्‍वरए ओपाँत जेहुव बेलाक छुतए ओबाँदा जेल्‍यो ताकिन परमेस्‍वरए ल्‍योनी ऱास्‍सिउर जेताज़्‍या। हो मिताव ज़ परमेस्‍वरए ओपाँत जेहुव बेलाक सुए उधूँल ज़ जेमाल्‍यो ताकिन अबकिन ख्रीसए उधूँल जेताके।
1CO 7:23 है जैद जेलाई ख्रीसए उजिउ झाःद ओलँःचिउर जेतावए छुतए ओबाँदा ताजैसिच्‍यो।
1CO 7:24 ङानैं ङामेंर, जे परमेस्‍वरए ओपाँत जेहुव बेलाक कितावल जेल्‍यो, होल ज़ लिद परमेस्‍वरए ओसेवा दोचिके।
1CO 7:25 ज्‍या मादोताव, रे मादोतावराए जूँनी है ङादाचिज़्‍या। आव पाँ गेप्रभुए ल्‍योनी ते माःक। हैदी ब ङा ङाल्‍योनी ज़ ङासम्‍जैचिज़्‍या। खाली परमेस्‍वरए ङाल्‍योदा उयुँ ओनावनी आव ङापाँ युँ हुबो पाँ ज़ लिज़्या।
1CO 7:26 आज्‍यालकाव इताव धो सहिउ दुखर गेक्‍याँत याहुरिज़्‍यावए बुरू जे किताव जेलिज़्‍याव हिताव ज़ जेलिकिन पाथ लिज़्‍या।
1CO 7:27 खाली बिह्‍या जेदोधुव ताकिन जेज्‍यारास ताभाःसिच्‍यो। जेमादोताव ताकिन बिह्‍या दाव तापैंच्‍यो।
1CO 7:28 हैदी ब जे खेपाराए ज्‍या जेदोदी ब पाप ते माले। हिताव ज़ बिह्‍या मादोताव मेंमाराए रे यादोदी ब पाप माले। खाली बिह्‍या दोज़्यावराए आव जिउत दुखर दैर सैं लिद ङा जेलाई ननी जोगोइव ङापैंज़्‍या।
1CO 7:29 आव तोबो पाँ ब है ङादाचिज़्‍या ङानैं ङामेंर, खेम्‍न्‍या बेला नजिक उहुवए आकिनी याज्‍या ल्‍योर याज्‍या माल्‍यो स्‍यासोर ओजैसिरक।
1CO 7:30 सोगो दोज़्यावर मादोज़्याव स्‍यासोर ओजैसिरक, रेंज़्यावर मारेंज़्याव स्‍यासोर ओजैसिरक, लँःज़्यावर यास काता ज़ माल्‍यो स्‍यासोर ओजैसिरक।
1CO 7:31 आव मानुवातावर याराचलैदी ब लन्‍था मादोज़्याव स्‍यासोर ओजैसिरक, काराव ल्‍यो ताकिन आव मानुवाताव जेरँःज़्‍याव भरी अइज़ खेम्‍न्‍या म़ान्‍यादा वाज़ बाज़्‍या।
1CO 7:32 जेलाई आव भरिए जेयुँ आँचा पाँचा घमाजैरक लिद है ङादाचिज़्‍या। ज्‍या मादाव खेपाए ‘परमेस्‍वरए उयुँ कातानी होलाँ जैद ङाएके’ लिद नदा वाज़ उयुँ थू जैज़्‍याव।
1CO 7:33 ज्‍या दावए ते ‘ङाज्‍यालाई कातानी खुसी ङाजैके’ लिद मानुवाताव लन्‍थाल ब लिज़्‍या।
1CO 7:34 नितावए उयुँ ऩेथोदा ज़ ताज़्‍या। हिताव ज़, रे मादाव मेंमाए ‘आव ङाक्‍याँ ङायुँलाई कातानी छैंव ङानैके’ लिद परमेस्‍वरए ल्‍योदा वाज़ उयुँ थू जैज़्‍याव। रे दाव मेंमाए ते ‘ङारेलाई कातानी खुसी ङाजैके’ लिद मानुवाताव लन्‍थाल ब लिज़्या।
1CO 7:35 आव भरी जेजूँनी ज़ है ङादाचिज़्‍या। आव पाँरानी जेलाई सुर्द ङानैचिज़्‍याव ते माःक, जेलाई तयुँ जैद्याद प्रभुए ओसेवा दान्‍यात पाथ पारैन्‍याए जूँनी ची।
1CO 7:36 फरी जेज़ा ल्‍योरालाई है ङादाचिज़्‍या, मेंमा जेज़ारालाई रे दाव मायाद करस नैन्‍या माःक। बैंस हुद रे दान्‍याकाव ओतावत, नो मेंमा रे मादाद मातान्‍या मिताव उलिकिन नोलाई तावैंच्‍यो, दाव एच्‍यो। आल पाप माले।
1CO 7:37 नो मिँए फरी ‘ङाज़ालाई रे दाव मायाद खुसीस ङानैधुया’ है लिद उयुँल ओथ·रैकिन स़ोनो कर लैन्‍या पाँर यामाहुकिन, उयुँलाव ओथ·रैव मितावनी ओज़ालाई ओनैधुकिन चाव ज़ लिज़्‍या।
1CO 7:38 ओज़ालाई रे जैद्याज़्‍यावए चाव ज़ दोज़्‍याव, ओज़ालाई रे जैद मायाज़्यावए झन चाव जैक्‍यो।
1CO 7:39 फरी मेंमा ओरे ओलेवा भरी ओरेए ओसतत ज़ ल्‍यो परिज़्‍या। ओरे उसिकिन वाज़ छुतस रे दान्‍या उखुसी ताज़्‍या। खाली नो छींनीकाव ओरे परमेस्‍वरए ल्‍योदा उयुँ हुबो मिँ ताव परिके।
1CO 7:40 खाली ङा ङाबिचारल ते नो राँदी मेंमा रे मादाद निताव ज़ उलिकिन झन खुसी तान्‍या ले। आव पाँत परमेस्‍वरए उयुँ ब लिज़्‍याखेहो ज़ है ङालिज़्‍या।
1CO 8:1 फरी अङग्‍यालाई चरैःसिउ ज़्‍यावए उजूँनी है ङादाचिज़्‍या। तान्या ते आव पाँए उजूँनी गे प़ाइँए ज़ गेसैंज़्‍या, खाली सैंन्‍या जैसिज़्‍याव मिँ ते स॰ज़्‍या। नैं मेंलाई चिऊन्‍यानी वाज़ प़ाइँलाई तान्‍या ताज़्‍या।
1CO 8:2 जोए ‘ङा ज़ बनै ङासैंज़्‍या’ है लिज़्‍या, नो मिँए आःपै सैंव परिन्‍या भरी काता ज़ मासैंताव।
1CO 8:3 जोए परमेस्‍वरलाई मया दोज़्याव, होलाई परमेस्‍वरए सरेस्‍ज़्‍याव।
1CO 8:4 है जैद फरी ब तखेप नो अङग्‍यालाई चरैःसिउ ज़्‍यावए उजूँनी है ङादाचिज़्‍या। गे गेसैंज़्या, नो अङग्‍या काता ज़ माःक। तोबोका तोबो परमेस्‍वरकिन छुत काता ज़ माले।
1CO 8:5 नाम नमल दै देवता यारादोज़्‍यावर, प्रभु यारादोज़्‍यावर बनै कुधु ज़ यालिदी ब,
1CO 8:6 गे गेपरमेस्‍वर ते तोबो वाज़ लिज़्‍या, नो गेबाबु परमेस्‍वर ज़। ताव भरी ब ओल ओराजैव ज़, गे ब ओल उजूँनी जैसिउर ज़। गेप्रभु ब तोबो वाज़ लिज़्‍या, नो येसु ख्रीस ज़। परमेस्‍वरए ओराजैव भरी नो गेप्रभुनी ज़ याजैक्‍यो। गे गेदैव अजम्‍बरी जुनी ब ओल गेप्रभुनी ज़।
1CO 8:7 खाली मिँ भरिए अङग्‍या काता ज़ माःक लिन्‍या चबनै माथ·रैतार। है जैद ख्वा ख्वाराए ङ़ादाङाव याचलननी अङग्‍यालाई साचो देवता याजैवए आःपै मामेंःधुर। है जैद अङग्‍यालाई चरैःसिउ ज़्‍याव याज़्‍युकिन ‘आव पाँ माचाव ज़’ थ·रैद याखत ल्‍योर याताव ङम्‍सिज़्यार।
1CO 8:8 नो ज़्‍याव गेज़्‍युदी ब गेमाज़्‍युदी ब परमेस्‍वरस खैव जैव मादोव, माखैव ब जैव मादोव।
1CO 8:9 हैदी ब ङा है ङादाचिज़्‍या, आव पाँरानी जोगोइसिद लिच्‍यो, म़ानी जे ‘जो गेज़्‍युदी ब ताए’ है जेलिज़्यावनी ‘आव चाव, आव माचाव’ लिन्‍या माछुतैधुज़्यावरालाई जेराबले·या।
1CO 8:10 निताव मिँए जे परमेस्‍वरए ओपाँत सैंन्‍या जैसिज़्‍यावराए अङग्‍यालाई याचरैःव ज़्‍यावर मन्‍दिरल जेज़्‍युज़्याव उरँःचिकिन, झन माज़्‍यान्‍या ओथ·रैवलाई फरी ब ज़्‍याद ओऱासो य़ेनलाई फरी ब दान्‍या ओछ्यास लिज़्या।
1CO 8:11 जे परमेस्‍वरए ओपाँत ‘गे ज़ सैंन्‍या गेलिज़्‍या’ है लिज़्‍यावराए ज़ चाव माचाव माछुतैधुज़्यावरालाई झन ज़ जेराबले·ज़्‍या। नो जेराबले·ज़्‍यावर मनी ख्रीसए उजिउ झाःद ओरायो जेभाइर ज़।
1CO 8:12 निताव जेभाइरालाई बले·द, मादान्‍या याथ·रैव य़ेनलाई फरी दाव जेरापरींवए ख्रीसए ओक्‍याँत ब पाप जेदोके।
1CO 8:13 है जैद ङाभाइलाई ज़्‍यावए ओबले·किन नोलाई ओबले·ज़्‍याव देखा बुरू ङा स्‍याकरी खर्क ज़ कैन्‍या ङामाले।
1CO 9:1 काता ङा फुर्सुल ताव माःक रो? काता ङा परमेस्‍वरए ओसाची खतैसिउ माःक रो? काता ङा गेप्रभु येसुलाई रँःव मिँ माःक रो? काता जेलाई गेप्रभुए ओपाँत सिर्जैज़्याव ङा माःक रो?
1CO 9:2 छुतराए ल्‍योनी परमेस्‍वरए ओखतैनाव ओसाची ङामारैंःदी ब जेनी ते ङालिज़्‍या ज़। परमेस्‍वरए ओपाँनी जेक्‍याँताव ङादोव भरी ओसरेस ज़ रैंःज़्‍या।
1CO 9:3 ङा ङाउपर्त पाँज़्यावराए जूँनी ङाजवाप आव ज़,
1CO 9:4 ङा ङाय़ेनए जूँनी ज़्‍यान्‍या ओन्‍यार दैन्‍या ओमाताज़्याव रो?
1CO 9:5 पत्रुस, गेप्रभुए ओभाइर स़ोनो उपुर्काव ओसाचीराए यायुँ हुबो याज्‍यार यास यास यारालाँज़्‍याव मिताव ङा ब ङामादैए रो?
1CO 9:6 गिन बारनाबासस वाज़ पो पोङ परमेस्‍वरए ओपाँर गिन्‍रासथैक गिन ज़ छुत य़ेनर दाद ङासिन्‍या रो?
1CO 9:7 सिपाईंए ब राजाए ओय़ेन ओदोक ओल ओज़्‍याव ज़्‍याद मादोव सानी। एँःलाव य़ेन दोज़्‍याव मिँए ब नलाव ओसै दैज़्‍याव सानी। बेधा गावलाए ब बेधाराए याहारनु ज़्‍याव दैज़्‍याव सानी।
1CO 9:8 आव ङापाँज़्‍याव भरी मिँए उबिचारनी वाज़ माःक, परमेस्‍वरए ओकानुनल ब लिज़्‍या।
1CO 9:9 धर्मसास्‍त्रलाव मोसाए ओकानुनल ब इताव सर्सिउ लिज़्‍या, “दाइ झाःज़्‍याव घेंलाई ओयाःत महला झाःद्यान्‍या माताए।” आव पाँ परमेस्‍वरए घेंए उजूँनी वाज़ ओपाँव रो?
1CO 9:10 नो पाँ गे मिँराए गेजूँनी ब सर्सिउ लिज़्‍या सानी। छुतए ओएँः कीज़्‍याव मिँए ब ‘याःथन ङादैया’ लिद कीज़्‍याव। छुतए ओबाला प़ोद्याज़्‍यावए ब याःथनए उजूँनी ज़ प़ोज़्‍याव।
1CO 9:11 है जैद गे ब जेखार्ल परमेस्‍वरए ओपाँ वास्‍ज़्‍यावरालाई चाहिज़्‍यावर जेल्‍योनी ज़ दैव परिन्‍या सानी।
1CO 9:12 गेकिन छींनी जेल्‍योङ परमेस्‍वरए ओपाँ सथैना हुवराए निताव दैन्‍या हक उलिकिन गे गेहक ब ल्‍यो परिन्‍या ज़। हैदी ब निताव हक खर्क ज़ गेमाचलैए। बुरू ख्रीसए चाव ओथा कातानी ब तावैंसिक लिद प़ाइँ गेसहिज़्‍या।
1CO 9:13 जे ब जेसैंज़्‍याखेहो, ध्‍यान झ़िमल परमेस्‍वरए ओसेवा दोज़्‍यावए मिँराए याचरैःव ज़्‍यावनी ओङासिज़्‍याव। पुजारीए ब मिँराए थानत याचरैःहुव मारनी उजुँ ओदैज़्‍याव।
1CO 9:14 हिताव ज़ गेप्रभुए ब ओल ओपाँ सथैज़्‍यावरालाई ननी ज़ ङासिन्‍या जैद याएक्‍यो।
1CO 9:15 हैदी मनी ङा ते आव हक भरी ङामाचलैए। ङा जेलाई, “काराव जेमायाँज़्‍याव” है ङालिज़्‍याव ते माःक। ङालाई परमेस्‍वरए ओय़ेनत सुवाराए तलब मिताव जैद कातार यायाँकिन ङासुनी कातानी उरहिरिज़्‍याव? हो देखा बुरू ङालाई सिन्‍या पाथ लिज़्‍या।
1CO 9:16 परमेस्‍वरए नो य़ेनत ङालाई ओखतैनावए ओपाँ सथैन्‍या ङासुनी नैन्‍याए जूँनी ते माःक, ओपाँ मासथैद माताए। परमेस्‍वरए ओपाँ ङामारासथैकिन कातानी ङायुँ होलाँ ओतारिज़्‍याव?
1CO 9:17 आव य़ेन ङानी ज़ ङारूजिउ ताकिन ते जेला रैदी ब ज़्यास्खेहो। खाली ङा ङाखुसीनी माताद परमेस्‍वरए ज़ आव य़ेनत ओखतैनावए ङा दाव ज़ परिज़्या।
1CO 9:18 है जैद ङा ङाजेला ते ङा दैन्‍या ङाहक भरी ऱास्‍द सुए ल्‍योनी काता ज़ मारैद अइज़ परमेस्‍वरए ओपाँ सथैन्‍या लिज़्‍या।
1CO 9:19 है जैद ङा प़ाइँ मिँराए ल्‍योनी फुर्सुल ताव ङालिदी ब, कुधु मिँरालाई ख्रीसए ल्‍योदा जैन्‍याए जूँनी प़ाइँराए याबाँदा मिताव जैसिद ङाले।
1CO 9:20 यहूदीरालाई ख्रीसए ल्‍योदा जैन्‍याए जूँनी यहूदी ब ङाजैसिके। मोसाए ओकानुन धूँल लिज़्‍यावरालाई ख्रीसए ल्‍योदा जैन्‍याए जूँनी नो कानुन धूँल ङामालिदी ब कानुन धूँलाव ङाजैसिके।
1CO 9:21 फरी मोसाए ओकानुन मासैंतावरालाई ख्रीसए ल्‍योदा जैन्‍याए जूँनी ङा परमेस्‍वरए ओकानुन स़ोनो ख्रीसए उधूँल ङालिदी ब कानुन माल्‍यो मिताव ब ङाजैसिके।
1CO 9:22 चाव माचाव माछुतैधुज़्यावराए या किताव याबिचारिज़्‍याव ङा ब हितावनी ज़ ङारासम्‍जैके। है जैद ङा जुनी ब परमेस्‍वरए ल्‍योदा तोबो ऩेब्‍लो जैन्‍याए जूँनी प़ाइँ मिँराए जूँनी प़ाइँ ज़ ङाजैसिके।
1CO 9:23 आव ङादोज़्‍याव भरी ख्रीसए चाव ओथाए उजूँनी ज़ ङादोज़्‍या। ननी ज़ परमेस्‍वरए ओपाँताव असिकर ङा ङाजुँ ब दैन्‍या ङाले।
1CO 9:24 जे ज़ जेसैंज़्‍याखेहो, धोंःन्‍यात दाँजिसिज़्‍यावर बाजी दैन्‍या ते तोबो वाज़ ताज़्‍या। है जैद जे ब बाजी दैन्‍या मितावनी ज़ दाव ताके।
1CO 9:25 फरी घेप्‍पा घेप्‍पा खेलल दाँजिसिज़्‍यावर ब झाःसिन्‍यात बनै कलँ लिज़्‍यार। नोराए खेम्‍न्‍या बाजी थाँसिउए जूँनी दोज़्‍यार, गे ते खर्क ज़ माखेम्‍न्‍या स्‍वर्गताव इनाम दैन्‍याए जूँनी गेदोज़्‍या।
1CO 9:26 है जैद ङा माताकिद धोंःज़्याव स़ोनो बतासत मुत्‍का झाःज़्याव मिताव ङार्सा सैःद ङामादोए।
1CO 9:27 बुरू ङा नो खेललाव झेंःस्‍याराए यादोज़्‍याव मिताव ङाक्‍याँलाई काबु जैद काचाबुल दाव ङापरींज़्‍या। है ङामाजैकिन ङा छुतरालाई परमेस्‍वरए ओपाँत रैज़्‍याव मिँ झन नोराकिन ङा ज़ काम मालागिउ तान्‍या ङाले।
1CO 10:1 अ ङानैं ङामेंर, जेलाई जोगोइन्‍याए जूँनी तोबो पाँ है ङादाचिज़्‍या। भाःक गेसाखा पुर्खार इजिपनी यापुलुस्‍ज़्‍याक नो धोइ धोइव बादलस समुन्‍द्र खार्लाव घ्याँ बाकेर।
1CO 10:2 नोर बादल स़ोनो समुन्‍द्रनी यापुलुसोत मोसाए उमिनत यासछैंसिउ मिताव ताके।
1CO 10:3 नोराए परमेस्‍वरए सवाद ओरायो तोबो ज़्‍याव ज़ प़ाइँए ज़्‍युकेर।
1CO 10:4 फरी परमेस्‍वरए सपरीद ओरायो बाँचिन्‍या ऱी ब प़ाइँए ज़ ओकेर। नो ऱी पो पोक परमेस्‍वरए जोरैद ओरायो पहरनी ज़ ओकेर। नो पहर ओल ख्रीस ज़ ओल्‍यो।
1CO 10:5 नाः चाव दैज़्‍यावत ब नोराए परमेस्‍वरए उयुँ कोला कोला जैदिकेर। है जैद परमेस्‍वरए नो बनल ज़ नोरालाई सोतोर्‍यान याख्याक्‍यो।
1CO 10:6 गे परमेस्‍वरए ओपाँत हुवरालाई आव पाँ भरी सतैंसिउ मिताव लिज़्‍या। है जैद गे मनी नोराए माँःती माचाव य़ेनदा युँ झाःन्‍या माःक।
1CO 10:7 नोर ख्‍वाराए अङग्‍या पुजा यादोव मिताव ब दान्‍या माःक। धर्मसास्‍त्रल ब नोराए जूँनी इताव सर्सिउ लिज़्‍या, “मिँर बनै थाँतस ज़्‍याद ओद, स़्‍याद धापा धामें जैसिनाकेर।”
1CO 10:8 गे ते नोरानी ख्वा ख्वाराए यादोव मिताव पातर्‍या पातर्नी जैसिन्‍या माःक। ननी ज़ नोर तछात ज़ तेईस हजार सिकेर।
1CO 10:9 नोरानी ख्वा ख्वाराए यादोव मिताव गेप्रभुलाई जाँचिन्‍या माःक। ननी ज़ कुधु मिँर घुलराए दा·द सिकेर।
1CO 10:10 फरी नोरानी ख्वा ख्वाराए परमेस्‍वरलाई गन गन यादोव मिताव ब दान्‍या माःक। ननी ज़ नो सैःज़्‍याव परमेस्‍वरए ओचाकर्‍या हुद यासैःक्‍यो।
1CO 10:11 नोराए याक्‍याँत ताव भरी गे आव संसार खेम्‍न्‍या बेला दैहुवरालाई चेतावनीए जूँनी सतैंद नैसिउ मिताव सर्सिउ लिज़्‍या।
1CO 10:12 है जैद “ङा ते परमेस्‍वरए ओपाँत बनै थ॰रिउ मिँ ची” है लिज़्‍याव मिँ जोगोइसिद उलिक, म़ानी धलिन्‍या ओछ्यास लिज़्‍या।
1CO 10:13 आःपै ते जेक्‍याँत मिँराए मासहिधुन्‍या जाँचर माहुताए। बुरू जेसहिधुन्‍या जाँचराकिन आगल्‍या जाँचर परमेस्‍वरए हुव मारायो। परमेस्‍वर युँ हुबो लिज़्‍या। फरी कैताराक जाँचर उहुकिन पुलुस्‍न्‍या येम याद नो जाँचराल सहिधुन्‍या ब जैचिरिज़्‍याव।
1CO 10:14 है जैद ङायुँलाव ङानैं ङामेंर, अङग्‍या पुजानी अछतङ लिच्‍यो।
1CO 10:15 जे पाँ माबुझिधुन्‍यार जेमाले। है जैद आव है ङादाचिज़्‍याव पाँ साचो सैं माःक जे ज़ जेयुँल खामिच्‍यो।
1CO 10:16 प्रभु-भोजल परमेस्‍वरलाई धन्‍याबाद चरैःद खुरीनी गेओक ख्रीसए उझीस तोबो झी ज़ गेताज़्‍या। फरी नो भरेस केःद गेज़्‍युक ब ख्रीसए ओक्‍याँस तोबो क्‍याँ ज़ गेताज़्‍या।
1CO 10:17 नो तोबो भरेसलाई प़ाइँए गेज़्‍युवए गे माहोल्‍या गेलिदी ब प़ाइँ तोबो क्‍याँ गेताज़्‍या।
1CO 10:18 इस्राएलीर ब हिताव ज़ यालिज़्‍याव। थानताव तोबो ज़्‍याव प़ाइँए याज़्‍युवए या भरी ब प़ाइँ खैद तोबो ज़ ताकेर।
1CO 10:19 नो है ङादाचिज़्‍यावए ओअर्थ आव ज़, अङग्‍या स़ोनो थानत चरैःसिउ ज़्‍याव काता ज़ माःक।
1CO 10:20 नताव चरैःसिउ ज़्‍याव भरी परमेस्‍वरलाई माःक, झ़्या मोंराए जूँनी ची। है जैद जे झ़्या मोंरास ताखैच्‍यो लिद है ङादाचिज़्‍या।
1CO 10:21 जे प्रभु-भोज स़ोनो अङग्‍यालाई चरैःसिउ ज़्‍याव ऩेथोनी कै जैद जेज़्‍युधुरिज़्‍याव? ऩेय़ेन सुए ज़ मादोधुव।
1CO 10:22 काता परमेस्‍वरए उयुँ कोला कोला जैद्यान्‍या रो? सैं ओलकिन घेप्‍पार गेलिज़्‍याव?
1CO 10:23 जे ख्वाराए है जेलिज़्‍याखेहो, “गेलाई कानुननी वैंसिउ य़ेन काता ज़ माले।” हैदी ब ङा फरी जेलाई है ङादाचिज़्‍या, प़ाइँ य़ेन क्‍याँए जूँनी माले। ङाकुइत प़ाइँ य़ेन उलिदी ब ख्वा य़ेनए नैं मेंलाई ब बले·ज़्‍याव।
1CO 10:24 जो य़ेनत तादी ब क्‍याँए तिर वाज़ दान्‍या माःक, नैं मेंलाई ब चिऊव ताके।
1CO 10:25 दोकानल थाँसिउ स्‍याकरी जेलँःक, “आव स्‍याकरी कैन्‍या ताके सैं माताकेमा?” है लिन्‍या मासम्‍जिद ज़ लँःच्‍यो।
1CO 10:26 काराव ल्‍यो ताकिन धर्मसास्‍त्रल इताव सर्सिउ लिज़्‍या, “नाम स़ोनो नलाव लिज़्‍याव भरी परमेस्‍वरए उमींर ज़।”
1CO 10:27 फरी परमेस्‍वरलाई उयुँ माहुबो मिँए ज़्यास्‍न्‍याए जूँनी उखुल्‍चिक, बान्‍या जेयुँ उलिकिन, जेङ़ाक झाःद ओयाचिउ ज़्‍याव भरी जेयुँल “आव ज़्यान्‍या ताके सैं माताकेमा?” है लिन्‍या मासम्‍जिद घाइ मालिद ज़ ज़्‍युच्‍यो।
1CO 10:28 खाली नो मिँए, “आव पुजाल चरैःसिउ ज़्‍याव,” है ओदाचिकिन नो मिँलाई चाव माचाव छुतैव परींन्‍याए जूँनी नो ज़्‍यावलाई छु ज़ ताछुच्‍यो।
1CO 10:29 नो ‘चाव माचाव छुतैन्‍या’ है ङालिज़्‍याव जे जेजूँनी माःक, नो है लिज़्‍याव मिँए उजूँनी ची। जे फरी है जेलिज़्‍याखेहो, “गे प़ाइँनी फुर्सुल तावर क्‍याँए माहाँत लिज़्‍यावरालाई कै जैद छुतए उयुँलाव पाँए गेलाई कैन्‍या माकैन्‍या ओजैसिज़्‍याव?”
1CO 10:30 जे ते झन, “नो ज़्‍याव धन्‍याबाद चरैःद गेज़्‍युकिन नो मिँए गेलाई कातानी गेमिन बले·द ओयासिरिज़्‍याव?” है जेलिज़्‍याखेहो।
1CO 10:31 ङा फरी है ङादाचिज़्‍या, जे नै तालिच्‍यो। बुरू जेदोज़्‍याव भरित, ज़्‍यान्‍यात तादी ब, ओन्‍यात तादी ब, ‘कातानी परमेस्‍वरए उमिन सघ्योःद ङाएके’ लिन्‍यानी वाज़ दोच्‍यो।
1CO 10:32 यहूदीरालाई तादी ब, ग्रीकरालाई तादी ब, परमेस्‍वरए ओमन्‍दलीलाई तादी ब, सुलाई ज़ जे यायुँ केःद्यान्‍या पाँ तादोच्‍यो।
1CO 10:33 बुरू ङा मनी ङालाई तान्‍यानी मादाद प़ाइँए अजम्‍बरी जुनी ओदैरक लिद प़ाइँलाई तान्‍याए जूँनी सेवा ङादोज़्‍या। जे मनी नितावनी ज़ दोच्‍यो।
1CO 11:1 किताव ङा ख्रीसए ओदोज़्‍याव मिताव ङादोज़्‍या, हिताव ज़ जे ब ङा ङादोज़्‍याव मिताव दोच्‍यो।
1CO 11:2 जे ङालाई प़ाइँनी प़ाइँनी जेचेतैनाज़्‍याव स़ोनो ङापैचिउ पाँर माऱास्‍द जेदोज़्‍यावए धन्‍याकावर है ङादाचिज़्‍या।
1CO 11:3 हैदी ब फरी तोबो पाँ ङासम्‍जैचिज़्‍या। खेपा भरिए गेङ़ै ख्रीस लिज़्‍या, मेंमा भरिए याङ़ै खेपा लिज़्‍या, ख्रीसए ओङ़ै परमेस्‍वर लिज़्‍या।
1CO 11:4 है जैद खेपाए ओङ़ै कप्‍द परमेस्‍वरलाई ओपोंखारिकिन, परमेस्‍वरए ओपाँ ओरासथैकिन, नो मिँए ओङ़ैलाई बीज्‍यात जैज़्‍याव।
1CO 11:5 हिताव ज़ फरी मेंमाए ओङ़ै माकप्‍द ओपोंखारिकिन, परमेस्‍वरए ओपाँ ओरासथैकिन, नोए ओरेए ओमान नैद ओमायोए ओचेम एन्‍द ओख्याव मिताव लिज़्‍या।
1CO 11:6 है जैद मेंमाए ओङ़ै माकप्‍द ज़ ओपोंखारिकिन, नोए ओचेम एन्‍द ओख्‍यादी ब ताए। खाली मेंमाए ओचेम ख्यान्‍या लाज हुव ओतावए बुरू ओङ़ै कप्‍द परमेस्‍वरलाई ओपोंखारिउक।
1CO 11:7 खेपा फरी परमेस्‍वरए उसुरूप स़ोनो उसिङार ओतावए परमेस्‍वरए ओपाँ ओरासथैक नोए ओङ़ै ताकबोक। मेंमा फरी खेपाए ओसोभा ज़।
1CO 11:8 खेपा मेंमानी सिर्जैसिउ माःक, मेंमा खेपानी सिर्जैसिउ ची।
1CO 11:9 स़ोनो परमेस्‍वरए खेपालाई मेंमाए उजूँनी ओजैव माःक, मेंमालाई खेपाए उजूँनी ओजैव ची।
1CO 11:10 है जैद परमेस्‍वरए ओचाकर्‍याराए ङ़ाक मेंमाए, “ङारेए ओपाँ धूँल ङालिज़्‍या” लिन्‍या सतैंन्‍याए जूँनी ओङ़ै ओकबोक।
1CO 11:11 हैदी ब प्रभुए ओङ़ाक खेपा ओमातावा मेंमा माताए, मेंमा ओमाताव खेपा माताए।
1CO 11:12 काराव ल्‍यो ताकिन स्रिस्‍तील मेंमा खेपानी ताव ज़, हाःकिन खेपा भरी नो मेंमानी ज़ ताज़्‍यार। हैदी ब गे भरी प़ाइँ परमेस्‍वरनी ज़ गेसिर्जिज़्‍या।
1CO 11:13 मेंमाए ओङ़ै माकप्‍द परमेस्‍वरलाई ओपोंखारिकिन नो किताव जेङम्‍सिज़्‍या? जे ज़ सैंच्‍यो।
1CO 11:14 किताव खेपाए ओचेम बनै ख्यो·व ओनैकिन लाज हुव लिज़्‍या लिन्‍या सुए ज़ है यामादाचिदी ब जेनी ज़ जेसैंज़्‍या,
1CO 11:15 हिताव ज़ मेंमाए ओचेम ख्यो·व ओनैकिन नोलाई ओसोभा हुव लिज़्‍या लिन्‍या ब जेसैंज़्‍या। नो ओचेम ओङ़ैलाई कप्‍न्‍याए जूँनी यासिउ लिज़्‍या।
1CO 11:16 खाली आव ङापाँर थैद सुवाराए माभैंःद खर्लेसिउ यापैंकिन गे स़ोनो परमेस्‍वरए ओमन्‍दलीरास आव चलन वाज़ लिज़्‍या है ङारादोज़्या।
1CO 11:17 आव तोबो पाँल ते ङा जेलाई ङामासर्मैचिधुइ, काराव ल्‍यो ताकिन जे परमेस्‍वरए उमिनत जेदुप्‍सिक सु ज़ माबनिद झन ज़ जेबलेस्‍नाके।
1CO 11:18 प़ाइँरानी जेलाई बले·ज़्‍याव पाँ आव ज़ लिज़्‍या, जे मन्‍दलील जेदुप्‍सिक माखैद ख्वा तँदा भेलेते ख्वा तँदा भेलेते जेजैसिज़्‍या दी लिन्‍या ङाथैज़्‍या। नो साचो मनी ताखेहो है ङालिज़्‍या।
1CO 11:19 जे जेखार्ल साचो मिँ सरेस्‍न्‍याए जूँनी निताव खर्लेसिन्‍या ब ताज़्याखेहो!
1CO 11:20 है जैद जे प्रभु-भोजल जेदुप्‍सिक प्रभुए उजूँनी ते साचो मारैंःके।
1CO 11:21 झन सु सु जेज़्‍याव रैद ज़्‍युना जेहुव मिताव जैद नैंलाई ब माकींद ङ़ादा ज़ कार्लानी कुर्लु जेखेम्‍ज़्‍या। है जैद ख्वार ते करे ज़ जेताज़्‍या, ख्वार ते ज़्‍याद ओद मँःद लोलोतोःव ब जेताज़्‍या।
1CO 11:22 काता, निताव ज़्‍यान्‍या ओन्‍या पो जेझ़िमक ओमालिज़्‍याव रो? सैं परमेस्‍वरए ओमन्‍दलीलाई सोद माथैंव मायो·वरालाई लाज मोर्नो जैना जेहुज़्‍याव रो? जे मितावरालाई ङा कै दान्‍या ओताव? कातानी ची जेलाई धन्‍याकावर है दान्‍या? इतावनी जेलाई धन्‍याकावर है ङामादाचिधुइ।
1CO 11:23 आव पाँए उजूँनी गेप्रभुए ल्‍योनी किताव ङादैव, हिताव ज़ जेलाई ब ङायाचिके। गेप्रभु येसु ओक्‍योःसिज़्याव छ्याम रील प्रभुए भरेस उकुइत रैद,
1CO 11:24 धन्‍याबाद चरैःद नो भरेसलाई केःद, “आव भरेस जेजूँनी झाःद ङायाचिरिज़्‍याव ङाक्‍याँ ज़। आकिनी जेजूँनी दाद ङायाचिउ य़ेन मामेंःन्‍याए जूँनी इताव ज़ दोच्‍यो,” है यादोक्‍यो।
1CO 11:25 नकिन नो भरेस याज़्‍युवत गेप्रभुए फरी खुरी उकुइत रैद, “आव ङाझी ज़। आनी ज़ परमेस्‍वरए जेस साःरो बाचा नैद्याचिरिज़्‍याव। है जैद आव खुरीनी जेओक जेजूँनी दाद ङायाचिउ य़ेन तामेंःच्‍यो,” है यादोक्‍यो।
1CO 11:26 जे नो भरेस जेज़्‍युक स़ोनो खुरीनी जेओक गेप्रभु फरी स्‍वर्गनी ओमाहुवा पै ज़ गेप्रभुए उजिउ झाःद ओयासिउ लिन्‍या जेसतैंज़्‍या।
1CO 11:27 है जैद जोए प्रभु-भोजल प्रभुए उगुन माचेतैद बिनु सोर उज़्‍युकिन ओओकिन, नो मिँए प्रभुए ओक्‍याँ उझीलाई बीज्‍यात ओजैवनी ओखत ल्‍यो थ॰रिज़्या।
1CO 11:28 है जैद जे सु सु जेयुँलाई जाँचिद वाज़ नो भरेस ज़्‍युच्‍यो स़ोनो खुरीनी ओच्‍यो।
1CO 11:29 जोए प्रभुए ओक्‍याँताव य़ाकार माथ·रैद नो भोज उज़्‍युकिन ओओकिन, नो मिँए ओक्‍याँत सजा रैज़्‍याव।
1CO 11:30 ननी ज़ जेखार्ल कुधु याजोरो हुव रूगीर लिज़्‍यार, ख्वार ते सिधुकेर।
1CO 11:31 बुरू गेक्‍याँलाई गे ज़ गेजाँचिकिन परमेस्‍वरए गेलाई ओजाँचिसिक निताव सजा यान्‍या माले।
1CO 11:32 खाली परमेस्‍वरए ल्‍योनी सजार गेदैक गेलाई ओलकिन तँदा लिज़्‍यावरास नास तातारक लिद गेजूँनी ज़ म·लैसिज़्‍याव।
1CO 11:33 है जैद ङानैं ङामेंर, प्रभु-भोजल जेदुप्‍सिक प़ाइँ जेमादुमा पै कींसिच्‍यो।
1CO 11:34 फरी सव़ाँसिन्‍याए जूँनी जेहुज़्‍याव ताकिन सु सु जेझ़िमक जेकरे सैःद हुच्‍यो, म़ानी नो सजाल परिन्‍या जेले। उपुर्काव पाँर ङा ङाहुवत वाज़ है दान्‍या ङाले।
1CO 12:1 अ ङानैं ङामेंर, परमेस्‍वरए छैंव उपुरूसए ओयासिज़्‍याव बरदानए जूँनी तोबो ऩेब्‍लो है ङादाचिज़्‍या।
1CO 12:2 जे ज़ जेसैंज़्‍या, परमेस्‍वरए ओपाँत जेमाहुद उमी मारैंःवलाई दोरैद यालाँज़्‍याव मिताव जेलाई ब आरा उरू मालिज़्‍याव मापाँज़्याव अङग्‍याए ल्‍योदा ज़ यालाँचिज़्‍याव।
1CO 12:3 है जैद जे मितावरालाई आव है ङादाचिज़्‍याव पाँ बनै ओचाहित ल्‍यो लिज़्‍या। परमेस्‍वरए छैंव उपुरूसनी पाँज़्‍याव मिँए खर्क ज़ येसुलाई ‘ओफ्या·हुव’ है मादोव। फरी परमेस्‍वरए उपुरूस मादैव मिँए खर्क ज़ येसुलाई ‘ङाप्रभु’ है मादोव।
1CO 12:4 परमेस्‍वरए ओयासिज़्‍याव बरदानर भाँती भाँतिलावर लिज़्‍यार। हैदी ब नो भरी तोबोका तोबो छैंव पुरूसनी ज़ ताज़्‍यार।
1CO 12:5 परमेस्‍वरए ओयासिज़्‍याव य़ेनर ब भाँती भाँतिलावर ज़ लिज़्‍यार। नो भरी ब तोबोका तोबो गेप्रभुनी ज़ ताज़्‍यार।
1CO 12:6 परमेस्‍वरए प़ाइँ किसिमलाव मिँराए खार्ल भाँती भाँतिलाव य़ेनर दोज़्याव। नो य़ेन भरी दोज़्‍याव ते ओल तोबोका तोबो परमेस्‍वर ज़।
1CO 12:7 परमेस्‍वरए उपुरूसए गेलाई ओयासिउ सु सु गेबरदानर जो मितावर यातादी ब नो भरी प़ाइँए जूँनी ज़ लिज़्‍या।
1CO 12:8 ख्वारालाई परमेस्‍वरए उपुरूसनी धो बुझिउ पाँर पलास्‍न्‍या यासिउ लिज़्‍या। ख्वारालाई नो पुरूसनी ज़ सुए ज़ यामासैंताव पाँर सतैंद्यान्‍या यासिउ लिज़्‍या।
1CO 12:9 ख्वारालाई अचम्‍बलाव युँ हुप्‍न्‍या सक्ती यासिउ लिज़्‍या। ख्वारालाई नो पुरूसनी ज़ याजोरो हुवरालाई सगराँन्‍या बरदान ब यासिउ लिज़्‍या।
1CO 12:10 ख्वारालाई फरी अचम्‍बलाव य़ेनर दान्‍या, ख्वारालाई परमेस्‍वरए उपुरूसनी ओपाँ सथैन्‍या, ख्वारालाई चाव माचाव पुरूस सरेस्‍न्‍या, ख्वारालाई परमेस्‍वरए उपुरूसनी छुत छुत खामनी पाँन्‍या, ख्वारालाई नो पाँए ओअर्थ बुझिद पलास्‍द्यान्‍या बरदानर याएज़्‍याव।
1CO 12:11 आव बरदानर तोबोका तोबो छैंव पुरूसए ओय़ेनर ज़। नो पुरूसए ज़ जो जोरालाई किताव किताव यान्‍या उयुँ लिज़्‍या, हो होरालाई ज़ याएज़्‍याव।
1CO 12:12 किताव मिँए ओक्‍याँत उखँ उकुइर, ओर्ना उमीर प़ाइँ ताज़्‍यार, हिताव ज़ गे ख्रीसए ओक्‍याँतावर ब कुधु गेलिदी ब तोबो क्‍याँ ज़ गेताज़्‍या।
1CO 12:13 गे यहूदी गेतादी ब, छुत जातलाव गेतादी ब, बाँदा गेतादी ब, माबाँदा गेतादी ब, प़ाइँ तोबो पुरूसनी सछैंसिद तोबो पुरूस ज़ गेदैवए प़ाइँ तक्‍याँ ज़ गेताके।
1CO 12:14 ख्रीसए ओक्‍याँतावर तोबो वाज़ माःक, कुधु ज़ गेलिज़्‍या।
1CO 12:15 किताव खँए, “ङा कुइ स्‍यासो ङामाल्‍योए ङा क्‍याँत गनिसिउ ङामाले,” है उलिदी ब निताव पाँए ते क्‍याँल मागनिसिउ माताए।
1CO 12:16 हिताव ज़ फरी नाए, “ङा मी स्‍यासो ङामाल्‍योए ङा क्‍याँत गनिसिउ ङामाले,” है उलिदी ब निताव ओपाँए ते क्‍याँल मागनिसिउ माताए।
1CO 12:17 क्‍याँत मी वाज़ उलिकिन कातानी थैन्‍या? क्‍याँत ना वाज़ उलिकिन काताए सङर्न्‍या।
1CO 12:18 खाली परमेस्‍वरए ओल उयुँनी ज़ मिँए क्‍याँताव भरी सु सु याय़ेन, सु सु यापो जैद याएक्‍यो।
1CO 12:19 क्‍याँतावर छुत छुत ओमाजैव ताकिन क्‍याँ कातानी ओतारिज़्‍याव?
1CO 12:20 है जैद तोबो क्‍याँत ज़ कुधु मिनर, कुधु य़ेनर लिज़्‍यार।
1CO 12:21 मीए कुइलाई, “ङालाई नँ नचाहित माले,” है मादोधुव। हो मिताव ज़ ङ़ैए खँलाई, “ङालाई नँ नचाहित माले,” है मादोधुव।
1CO 12:22 झन क्‍याँताव मागनिसिउ मितावर ज़ बुरू बनै याचाहित ल्‍योर लिज़्‍यार।
1CO 12:23 फरी क्‍याँताव माचावल गनिसिउरालाई गेरासमारिज़्या, लाज हुव गेराथ·रैज़्‍यावरालाई झन क्‍वाए क्‍वाइद समारस गेरानैज़्‍या।
1CO 12:24 क्‍याँताव यासोभा ल्‍योरालाई ताकितर निताव समारस गेमारानैए। खाली परमेस्‍वरए क्‍याँतावर ओराजैक लाज हुवल गनिसिउरालाई ज़ यामान नैद्यान्‍यार याजैक्‍यो।
1CO 12:25 परमेस्‍वरए घेप्‍पा ज़िम्‍ज़ार नितावनी ओरासखैवए क्‍याँतिन तँदा जैसिद लिन्‍या ओमेला ज़ माले। बुरू प़ाइँ सम सम समारिसिउ ताके।
1CO 12:26 तोबोए दुख ओदैकिन क्‍याँ भरी ज़ हुर्ज़्‍या। तोबोए इज्‍यात ओदैकिन क्‍याँ भरी ज़ होलाँ ताज़्‍या।
1CO 12:27 जे भरी ब ख्रीसए ओक्‍याँर ज़। है जैद सु सु जेपो, सु सु जेय़ेन ब लिज़्‍या।
1CO 12:28 परमेस्‍वरए मन्‍दलील ब सु सु याय़ेन जैद याएक्‍यो। प़ाइँरानी ङ़ात ओसाचीर याजैक्‍यो। हुकिन परमेस्‍वरए उपुरूसनी पाँन्‍यार याजैक्‍यो। हुकिन ओपाँ पैन्‍यार याजैक्‍यो। हुकिन अचम्‍बलाव य़ेनर दान्‍या, याजोरो हुवरालाई सगराँन्‍या, माथैंव मायो·वरालाई चिऊन्‍या, चाव सल्‍ला यान्‍या स़ोनो परमेस्‍वरए उपुरूसनी छुत छुत खामनी पाँन्‍यार ब याजैक्‍यो।
1CO 12:29 ओसाचीर प़ाइँ मातार, परमेस्‍वरए उपुरूसनी पाँन्‍यार ब प़ाइँ मातार, ओपाँ पैधुन्‍यार ब प़ाइँ मातार। हिताव ज़ फरी प़ाइँए ज़ अचम्‍बलाव य़ेन दान्‍या,
1CO 12:30 याजोरो हुवरालाई सगराँन्‍या, छुत छुत खामनी पाँन्‍या, नो पाँए ओअर्थ बुझिद पलास्‍द्यान्‍या प़ाइँ ज़ मातार।
1CO 12:31 खाली जे प़ाइँरानी चाव ओबरदानर खिम्‍न्‍यादा कलँ लिच्‍यो। अझ होकिन झन चाव तोबो येम सतैंद ङायाचिरिज़्‍या।
1CO 13:1 ङा नाम नमलावराए यापाँ भरी ङापाँधुदी ब, ङास मया ओमालिकिन ङापाँ भरी छ्यार्ल्‍यांनी छिर्लिङ ताज़्‍याव छेलामए ओर्गा स्‍यासो वाज़ ताज़्‍या।
1CO 13:2 परमेस्‍वरए उपुरूसनी ङापाँधुदी ब, सुए ज़ यामासैंताव माबुझिधुन्‍या पाँर ङासैंधुदी ब, ङायुँ हुबोनी हाँर ङाधलैधुदी ब, ङास मया ओमालिकिन ङा काता ज़ माःक।
1CO 13:3 ङास लिज़्‍याव भरी काता ज़ माल्‍योरालाई भाःद ङाराएदी ब, छुतराए जूँनी ङाजिउ ङाझाःदी ब, ङास मया ओमालिकिन ङालाई काता फाइदा ज़ माले।
1CO 13:4 ओमया ल्‍यो मिँए ते चाव माचाव प़ाइँ सहिज़्‍याव, उयुँ गराँव ब ताज़्‍या। ओलकिन ओनैंए ओदैवत उमी मातूए, सघ्योःसिद मास॰ए।
1CO 13:5 ओमया ल्‍यो मिँए ओसोर माल्‍यो जबरज्‍यास्‍तीलाव य़ेन ब मादोव, ओललाई तान्‍या वाज़ माखिमो, मिँराए जो है यादोदी ब माङैए, माचाव पाँर उयुँल मानैव।
1CO 13:6 असतलाव य़ेनर रँःद उयुँ माचाव दोज़्‍याव, फरी सतलाव य़ेनर रँःद उयुँ होलाँ ताज़्‍या।
1CO 13:7 निताव ओमया ल्‍यो मिँए उयुँ सुहुबो ज़ नैज़्‍याव, प़ाइँत आस दोज़्याव, प़ाइँ ज़ सहिज़्याव, मया दान्‍या खर्क ज़ माऱासो।
1CO 13:8 परमेस्‍वरए उपुरूसनी पाँन्‍या तादी ब, नो पुरूसनी छुत छुत खामनी पाँन्‍या तादी ब, पाँ भरी सैंन्‍या तादी ब, नो भरी ते तछा खेम्‍न्‍या लेर। खाली मया ते खर्क ज़ खेम्‍न्‍या माले।
1CO 13:9 आज्याल बनै गेसैंदी ब सैंन्‍या भरी गेमासैंताए। परमेस्‍वरए उपुरूसनी गेपाँदी ब नो पाँ प़ाइँ ते गेमाबुझिताए।
1CO 13:10 खाली खेम्‍न्‍या बेला उहुवत उपुर्काव पाँ भरी खेम्‍न्‍या लेर।
1CO 13:11 किताव ङा ङ़ादा ल़ुज़ा ङालिज़्‍याक ङापाँ भरी, ङाबिचार भरी ल़ुज़ाए युँ मिताव वाज़ उलिज़्‍याव, बल्‍ल स़ेर ङातावत वाज़ नो ल़ुज़ा पाँर ङाऱास्‍के।
1CO 13:12 हिताव ज़ झ़्यार्ल्‍या ज़िर्लिव धर्पन गेभाल्‍सिक चबनै गेङाः स्‍यासो मारैंःए। हो स्‍यासो ज़ गेप्रभुए ओगेर ब ओल ओमाहुवा पै झ़्यार्ल्‍या ज़िर्लिव वाज़ गेरँःज़्‍या। ओल उहुवत बल्‍ल गेलाई सरेस्‍द ओनैसिज़्‍याव मिताव गे ब हो छ्याम ज़ ओल ओङाः रँःद चबनै सरेस्‍न्‍या गेले।
1CO 13:13 है जैद युँ हुप्‍न्‍या, आस दान्‍या, मया दान्‍या, आव स़ोम्‍लो पाँ ते खर्क ज़ खेम्न्‍या माले। फरी नो स़ोम्‍लोरानी प़ाइँरानी घेप्‍पा ते मया ज़।
1CO 14:1 जे ब प़ाइँरानी ङ़ात छुतए ल्‍योदा मया दान्‍यात कलँ ल्‍यो ताके। हैदी ब परमेस्‍वरए उपुरूसए ओयासिज़्‍याव बरदानर ब खिम्‍न्‍यादा धामा दोच्‍यो। प़ाइँरानी ङ़ात परमेस्‍वरए उपुरूसनी पाँन्‍या खिम्‍च्‍यो।
1CO 14:2 परमेस्‍वरए उपुरूसनी छुत खामनी पाँज़्‍याव मिँ ते मिँरास ओपाँज़्‍याव माःक, परमेस्‍वरस पाँज़्‍या। नो मिँए खर्क ज़ यामाथैताव पाँर छैंव पुरूसनी ओपाँवए सु मिँए ज़ माबुझिधुर।
1CO 14:3 परमेस्‍वरए उपुरूसनी पाँज़्‍याव मिँए ते मिँराए जूँनी ज़ पाँज़्‍या। नो पाँए पाथ पारैव ब दोज़्‍याव, युँलाई सझेंःद्याव ब दोज़्‍याव, युँ होलाँ ब जैद्याव दोज़्‍याव।
1CO 14:4 नो छुत खामनी माबुझिसिउ पाँ पाँज़्‍याव मिँ ते ओललाई वाज़ बनैज़्‍याव। परमेस्‍वरए उपुरूसनी बुझिसिउ पाँ पाँज़्‍याव ते मन्‍दली भरिलाई ज़ बनैज़्याव।
1CO 14:5 जे परमेस्‍वरए उपुरूसनी छुत खामनी जेपाँज़्याव ते चाव ज़। खाली होकिन बुरू परमेस्‍वरए उपुरूसनी जेपाँधुकिन ताखेहो है ङालिज़्‍या। काराव ल्‍यो ताकिन नो पुरूसनी छुत खामनी पाँज़्‍यावए नो पाँए ओअर्थ पलास्‍द ओमाराएधुकिन मन्‍दलीलाई माबनैधुव। नोकिन बुरू परमेस्‍वरए उपुरूसनी पाँज़्याव मिँए ओचाहित घेप्‍पा लिज़्या।
1CO 14:6 है जैद ङानैं ङामेंर, ङा ब जेस निताव सुए ज़ माबुझिधुन्‍या पाँर ङापाँकिन जेलाई काता ची ओतारिज़्‍याव? बुरू परमेस्‍वरए ल्‍योनिकाव साःरो पाँ ङापलास्‍धुकिन, सुए ज़ यामासैंताव पाँर ङासतैंधुकिन, परमेस्‍वरए उपुरूसनी ङापाँधुकिन, जेलाई ङापैचिधुकिन वाज़ जेलाई तान्‍या लिज़्या।
1CO 14:7 किताव तप्‍न्‍या बाजार ब, बाँसुलीर सारङ्गर यातप्‍क यार्गा घेप्‍पा ज़िम्‍ज़ा यामाजैकिन आव गित ओल्‍यो लिन्‍या माथ·रैसिधुइ।
1CO 14:8 लरैं दान्‍या झाःसिन्‍याए जूँनी भोंकर तप्‍ज़्यावए चावस ओमातप्‍किन सिपाईंराए आवए उजूँनी ओल्‍यो लिन्‍या कै जैद यासैंरिज़्याव?
1CO 14:9 हो मिताव ज़ जेयाःनी प़ाइँए बुझिधुन्‍या पाँ जेमापाँकिन, ‘आव ज़ ओपाँज़्‍याव ओल्‍यो’ लिन्‍या सुए ची ओसैंरिज़्‍याव? नो जेपाँ ते बतासए ओलाँव मिताव ज़ ताज़्या।
1CO 14:10 आव मानुवाताव मिँराए सु सु याखामर कुधु किसिम ज़ लिज़्‍यार, खाली ओअर्थ माल्‍यो खाम ते माले।
1CO 14:11 हैदी ब ङा ङापाँ नोए ओमाबुझिकिन, नोए ओपाँ ङा ङामाबुझिकिन ओल काताङाव ङा काताङाव मिताव ज़ गिन्‍ताज़्‍या।
1CO 14:12 है जैद परमेस्‍वरए उपुरूसनिकाव बरदानर खिम्‍न्‍यादा वाज़ युँ जेदोज़्‍यावए जे ब प़ाइँरानी ङ़ात मन्‍दलीलाई बनैन्‍या बरदानर खिम्‍च्‍यो।
1CO 14:13 है जैद जोए परमेस्‍वरए उपुरूसनी छुत खाम ओदोकिन होए ‘नो पाँए ओअर्थ ब पलास्‍धुन्‍या बरदान ङादैक’ लिद परमेस्‍वरलाई ओपोंखारिउक।
1CO 14:14 ङा छुत खामनी ङापोंखारिज़्‍या ल्‍यो ताकिन नो ङापुरूसए पोंखारिज़्‍याव, खाली ङाबुद्धी ते माचलिए।
1CO 14:15 हिताव ताकिन कातानी दान्‍या लिक ते, ङापुरूसनी ङापोंखारिकिन ङाबुद्धीनी ब ङापोंखारिज़्या, ङापुरूसनी गित ङागैकिन ङाबुद्धीनी ब ङागैज़्या।
1CO 14:16 म़ानी जेपोंखारिक माबुझिधुन्‍या पाँनी धन्‍याबाद चरैःद परमेस्‍वरए उमिन बनै ज़ ओथास्‍क है जेलिकिन, नो पाँ माबुझिधुन्‍या मिँए कै जैद जेपाँ जोर्द्याद, “हैज़ ओताक,” है उलिरिज़्‍याव?
1CO 14:17 निताव जेपाँनी धन्‍याबाद चरैःन्‍या ते जेचरैःज़्‍याखेहो, खाली नो माबुझिन्‍या मिँलाई ते फाइदा माले।
1CO 14:18 निताव छुत खामनी पाँन्‍या बरदान जेकिन ङास झन कुधु लिज़्‍या। होए जूँनी परमेस्‍वरलाई धन्‍याबाद ब ङाचरैःज़्‍या।
1CO 14:19 हैदी ब मन्‍दलील यादुप्‍सिक माबुझिसिन्‍या खामनी दस हजार गोता पाँ पाँज़्‍याव देखा, पाँच गोता तादी ब प़ाइँए बुझिन्‍या खामनी ज़ ङापाँरिज़्‍या।
1CO 14:20 अ ङानैं ङामेंर, जे निताव पाँर सैंन्‍यात भाउज़ा स्‍यासोर ताताच्‍यो। माचाव य़ेनत वाज़ भाउज़ा मितावर ताच्‍यो, बुद्धीत फरी छिबोर ताच्‍यो।
1CO 14:21 धर्मसास्‍त्रल इताव सर्सिउ लिज़्‍या, परमेस्‍वरए है लिज़्या, “ङा जेलाई तादाङावराए यायाःनी, याखाम जेमाबुझिधुज़्‍यावराए ल्‍योनी, ङापाँ ङासथैचिरिज़्‍या। हितावत ब ङापाँ थैद ज़ यान्‍या जेमाले।”
1CO 14:22 निताव माबुझिधुन्‍या पाँर परमेस्‍वरए ओपाँ भैंःज़्‍यावराए जूँनी ते माःक, माभैंःज़्‍यावराए जूँनी सरेस लिज़्‍या। फरी परमेस्‍वरए उपुरूसनी पाँन्‍या ते ओपाँ माभैंःज़्‍यावराए जूँनी माःक, भैंःज़्‍यावराए जूँनी लिज़्‍या।
1CO 14:23 है जैद मन्‍दलील जेदुप्‍सिक जे प़ाइँए परमेस्‍वरए उपुरूसनी सुए ज़ माबुझिधुन्‍या पाँर जेपाँक, नो बेलाक परमेस्‍वरए ओपाँत माहुवर मासैंतावर नक यालिकिन, “आवर ते बूलिउर ची सा,” है मालेर रो?
1CO 14:24 खाली प़ाइँए परमेस्‍वरए उपुरूसनी जेपाँक परमेस्‍वरए ओपाँत माहुवर मासैंतावर नल याहुकिन नो जेपाँए याक्‍याँलाई जाँचिद, “गे ते पापीर ची गेल्‍यो,” लिन्‍या थ·रैन्‍या लेर।
1CO 14:25 हो ताकिन नोराए यायुँलाव पाँर छर्लङ्ग रँःद नामक फुलुप्‍सिद, “परमेस्‍वर ते आवरास ची उलिज़्‍याव ओल्‍यो,” लिद या ब परमेस्‍वरए ओसेवा दान्‍या लेर।
1CO 14:26 ङानैं ङामेंर, जेदुप्‍सिक जे कितावर ताव परिके लिक ते, जेस ख्वार भजन गैन्‍यार, ख्वार पाँ पैन्‍यार, ख्वार परमेस्‍वरनी साःरो पाँ सतैंसिउ पलास्‍न्‍यार, ख्वार परमेस्‍वरए उपुरूसनी छुत खामनी पाँन्‍यार, ख्वार नो पुरूसनिकाव पाँर पलास्‍न्‍यार जेलिकिन, नो जेपाँ भरी प़ाइँलाई तान्‍या ओताक।
1CO 14:27 परमेस्‍वरए उपुरूसनी छुत खामनी पाँन्‍यार यालिकिन ऩेब्‍लो स़ोम्‍लोराए वाज़ ओपाँरक, हो ब तखेप्‍त माःक, पालास पालास ओपाँरक। नोराए यापाँ फरी तोबोए पलास्‍द ओरायोक।
1CO 14:28 नो पाँए ओअर्थ पलास्‍धुन्‍यार यामालिकिन नो पाँज़्याव मिँ मन्‍दलील च़िम दाद उलिक। उयुँल उयुँल वाज़ परमेस्‍वरस ओपाँक।
1CO 14:29 परमेस्‍वरए उपुरूसनी पाँज़्‍यावर ब ऩेब्‍लो स़ोम्‍लोए वाज़ ओपाँरक। उपुर्कावराए नो पाँर थैद ओथ·रैरक।
1CO 14:30 नो थैज़्‍यावराए खार्नी फरी तोबोए परमेस्‍वरए उपुरूसनी साःरो ओचाहित ल्‍यो पाँ ओदैकिन नो ङ़ादाङाव पाँज़्यावए च़िम ओदोवक।
1CO 14:31 इतावनी ज़ परमेस्‍वरए उपुरूसनी पाँज़्‍यावर पालास पालास ओपाँरक। हो ताकिन ची नोराए यापाँ थैज़्याव भरिए परमेस्‍वरए ओय़ेनर सैंद यायुँर झेंःन्‍या ले।
1CO 14:32 परमेस्‍वरए उपुरूसनी पाँज़्याव मिँए परमेस्‍वरए उपुरूसनी मापाँद ज़ मातान्‍या ते माले।
1CO 14:33 काराव ल्‍यो ताकिन परमेस्‍वर अलमल जैज़्याव माःक, ओय़ेन भरी मेलास ज़ लाँज़्‍याव। पो पोङ परमेस्‍वरए उमिनताव लिज़्‍यावराए मन्‍दलील यादोज़्‍याव मिताव,
1CO 14:34 जे ब जेदुप्‍सिक जेसकाव मेंमार झ्याउँ झ्याउँ मालिद थैद ओनैरक। नोरालाई पाँन्‍या यासिउ माले। धर्मसास्‍त्रलाव सर्सिउ मिताव यारेराए पाँ धूँल उलिरक।
1CO 14:35 नलाव पाँर तोबो ऩेब्‍लो यामाबुझिधुकिन याझ़िमक यारेरालाई है ओरादोरक। मन्‍दलील मेंमार निताव झ्याउँ झ्याउँ लिन्‍या लाज हुव लिज़्‍या।
1CO 14:36 सैं परमेस्‍वरए ओपाँ जे जेल्‍योनी सुरू ओताव? सैं परमेस्‍वरए ओपाँ जे वाज़ दैद जेनैज़्‍याव?
1CO 14:37 जोए ‘ङा परमेस्‍वरए उपुरूसनिकाव बरदानर दैव ङालिज़्‍या, ओल उपुरूसनी ब ङापाँधुज़्‍या’ है उलिकिन नो मिँए आव ङासरो पाँ ब परमेस्‍वरए ल्‍योनी हुव ज़ ओल्‍यो लिन्‍या ओथ·रैवक।
1CO 14:38 ओमाथ·रैकिन ओललाई ब परमेस्‍वरए थ·रैन्‍या माले।
1CO 14:39 है जैद ङानैं ङामेंर, जे प़ाइँरानी ङ़ात परमेस्‍वरए उपुरूसनी पाँन्‍यात कलँ ल्‍यो ताके। फरी परमेस्‍वरए उपुरूसनी छुत छुत खामनी पाँन्‍या ब तावैंच्‍यो।
1CO 14:40 खाली जेदोज़्‍याव भरी तहस मेलास दाव ताके।
1CO 15:1 अ ङानैं ङामेंर, ङासथैचिउ परमेस्‍वरए चाव ओथा फरी ब तोबो ऩेब्‍लो दोहोरैद ङायाचिरिज़्‍या। जे नो पाँर तीद आःपै नत ज़ जेलिज़्‍या।
1CO 15:2 फरी नो ङासथैचिउ पाँ साचो ज़ जेयुँल जेरैव ताकिन नो पाँलाई माऱास्‍द ननी ज़ जेबाँचिरिज़्या। म़ानी ते अऩाकल ज़ जेयुँ जेसुहुप्‍के।
1CO 15:3 ङा जेलाई ङासथैचिक प़ाइँरानी ओचाहित ल्‍यो ङा ङादैव पाँर जेलाई ब ङायाचिके। नो पाँर आवर ज़ — धर्मसास्‍त्रल ङ़ादाकिन सर्द यानैज़्‍याव मिताव ख्रीसए गेपापए जूँनी उजिउ झाःद्यासिक्‍यो।
1CO 15:4 नकिन नोलाई यागादैव स़ोंलात सैंसिद सोके। नो ब धर्मसास्‍त्रल ङ़ादाकिन ज़ सर्सिउ उलिज़्‍याव।
1CO 15:5 ओसोव छींनी पत्रुसए ओङ़ाक सरैंःसिके। हुकिन बाह्र जना ओसाचीराए याङ़ाक ब सरैंःसिके।
1CO 15:6 नकिन तखेप्‍त ज़ पाँच सयकिन यादाङाव ओपाँत बाज़्‍यावराए याङ़ाक सरैंःसिके। नो रँःज़्‍यावर ख्वा ख्वार आःपै लिज़्‍यार, ख्वार सिधुकेर।
1CO 15:7 हुकिन याकूबए ओङ़ाक सरैंःसिके। हुकिन फरी ब तखेप ओसाचीराए याङ़ाक सरैंःसिके।
1CO 15:8 प़ाइँरानी छींत ङा ओमास मायो·द जर्मिउ मिँ मितावए ङाङ़ाक ब सरैंःसिके।
1CO 15:9 ओसाची भरिनी प़ाइँरानी ज़िम्‍ज़ा ङा ज़। परमेस्‍वरए ओमन्‍दलीए उखिरी पसिद दुख ङायोए ओसाची है लिन्‍या स्‍यासो ब ङामाले।
1CO 15:10 खाली ङाल्‍योदा परमेस्‍वरए उयुँ ओगराँवए ओल ओसाची ब जैनाक्‍यो। ङाल्‍योदा उयुँ गराँद ओयाँव य़ेनलाई फिस्‍को माजैद ज़ ङादोज़्‍या। उपुर्काव उसिसराकिन प़ाइँरानी धामा ङा ज़ ङादोके। खाली नो दोज़्‍याव ङा माःक, परमेस्‍वरए ङाक्‍याँताव ओयाँव ओल ओअसिकए ज़ ङादोके।
1CO 15:11 है जैद ङा तादी ब, नोराए तादी ब, गे गेसथैचिज़्‍याव पाँ तोबो ज़, जेयुँ हुप्‍द जेरैव मनी हो ज़।
1CO 15:12 तोबो गेसथैचिज़्‍याव पाँ आव ज़, ख्रीस सिउनी सैंसिद सोके। जे ख्वा ख्वाराए फरी कै जैद “सिद सैंसिन्‍या माताए,” है जेलिज़्‍याव?
1CO 15:13 सिद सैंसिन्‍या ओमाताकिन ख्रीस कै जैद सिद ओसैंसिउ?
1CO 15:14 ख्रीस सैंसिद ओमासोव ताकिन गे गेसथैचिज़्‍याव पाँ भरी ब अऩाकलाव ज़ ताखेहो, जे जेयुँ उहुबो मनी अऩाकलाव ज़ ताखेहो।
1CO 15:15 गे ते झन परमेस्‍वरए ओपाँताव साची गेय़ेनल पाजीर ज़ गेथ॰रिखेहो। जे जेपाँ मितावनी सिउर खर्क ज़ मासोन्‍या ताकिन ख्रीस ब मासोखेहो। निताव जेपाँए फरी ख्रीस ओमासोकिन गे परमेस्‍वरए ख्रीसलाई सिउनी सोचोइक्‍यो है गेलिज़्‍याव पाँ परमेस्‍वरकिन तँदाङाव पाँ ज़ ताखेहो।
1CO 15:17 फरी ख्रीस सिउनी ओमासैंसिउ ताकिन जे जेयुँ जेसुहुबो अऩाकलाव ज़ ताद आःपै जेपापए सजा धूँल ज़ जेलिज़्‍या।
1CO 15:18 ख्रीसए उमिनताव सिउर ब सिउका सिउ ज़ ताखेरहो।
1CO 15:19 गे ख्रीसए ल्‍योदा गेयुँ गेसुहुप्‍ज़्‍याव आस आव गेक्‍याँत वाज़ ओताकिन आव मानुवाताव प़ाइँरानी झुकिउर युँ नावज़ार गे ज़ गेताके।
1CO 15:20 खाली ख्रीस सिउनी मासैंसिए लिन्‍या सङ्खा ज़ माले। ख्रीस सिउनी सैंसिज़्‍याव भरिराए गेङ़ाताव ज़ ताके।
1CO 15:21 तोबो मिँए ल्‍योनी ज़ सिन्‍या सजाल बान्‍या ताके, फरी नो सजानी पुलुस्‍द अजम्‍बरी जुनील बान्‍या ब तोबो मिँए ल्‍योनी ज़ ताके।
1CO 15:22 किताव आदमए ल्‍योनी प़ाइँ सिन्‍याल परिकेर, फरी ख्रीसए ल्‍योनी प़ाइँ सैंसिन्‍या लेर।
1CO 15:23 खाली सु सु पाला लिज़्‍या। प़ाइँरानी ङ़ात ख्रीस सैंसिके। हुकिन ओल फरी उहुवत उमिनताव सिउ भरी ब सैंसिरिज़्‍यार।
1CO 15:24 नकिन प़ाइँ खेम्‍न्‍या बेला ताज़्‍या। हो बेलाक नाम नमलाव हकर सक्तीर ओपो·स ज़ खेम्‍द ओल ओराज्‍या वाज़ रहिन्‍या ले। नो राज्‍या ओबाबु परमेस्‍वरए उकुइत सूँपिन्‍या ले।
1CO 15:25 खाली उसुतुररालाई उखँ धूँल ओमाराझाःवा पै ओराज्‍या ओल ज़ चलैन्‍या ले।
1CO 15:26 प़ाइँरानी छींत ओखेम्‍रिज़्‍याव उसुतुर ते ‘सिन्‍या सजा’ ज़।
1CO 15:27 धर्मसास्‍त्रल ब इताव सर्सिउ लिज़्‍या, “परमेस्‍वरए प़ाइँ ख्रीसए उखँ धूँल यानैरिज़्‍याव।” खाली नो पाँल “प़ाइँ” है उलिदी ब ख्रीसए उखँ धूँल नैद्याज़्‍याव परमेस्‍वर ओल ते ख्रीसए उधूँल ते माले।
1CO 15:28 नो भरी प़ाइँ ख्रीसए उधूँल याताव प़ाइँना ओल ख्रीस ब ओबाबु परमेस्‍वरए उधूँल ज़ तारिज़्‍या। हाःकिन ओज़ाए धूँल प़ाइँ नैद्याज़्‍याव परमेस्‍वर ओल ज़ प़ाइँए ङ़ैताव तारिज़्‍या।
1CO 15:29 जे है जेलिज़्‍याव मिताव सिउ मिँ खर्क ज़ सैंसिद मासोए लिन्‍या साचो ज़ जेथ·रैज़्‍याव ताकिन ख्वा ख्वार काराव परमेस्‍वरए ओपाँ माथैदकाव सिउ मिँलाई परमेस्‍वरस सखैन्‍याए जूँनी नो सिउए उजूँनी यासछैंसिज़्‍याव?
1CO 15:30 सैंसिद सोन्‍या साचो ओमालिकिन, गे ओपाँ सथैज़्‍यावर काराव इताव ओछ्यास ल्‍यो य़ेनल लिन्‍या?
1CO 15:31 साचो ज़, ङानैं ङामेंर, गेप्रभु येसु ख्रीसए ओङ़ाक जे जेजूँनी ङासुनी च्‍याँःसिउ उलिज़्यावए है ङालिज़्या — ङा दिनकाव ज़ सिन्‍या स्‍यासो छ्यासल ङाबाज़्‍या।
1CO 15:32 ङालाई एफिससल ला मितावराए याज्‍याम्‍हुनाक ङा ङाय़ेन मिँए ओय़ेन मिताव वाज़ ताकिन ते निताव दुखर सहिद ङालाई काता ची ओतारिज़्‍याव? गेजूँनी सिउनी सैंसिद सोन्‍या ओमालिकिन काताए जूँनी निताव दुखर सहिन्‍या? बुरू, “ज़्‍याद ओद थाँतस लिकिन ताया, पराःतीदा सिन्‍या लिज़्या।”
1CO 15:33 इताव पाँरानी जोगोइसिद लिच्‍यो। निताव पाँ दोज़्‍यावरास जेबाऱिकिन जे ब बलेस्‍न्‍या जेले।
1CO 15:34 परमेस्‍वरए उमिनतावरालाई ज़्‍यास्‍न्‍या पाँर थ·रैद जे ब नो जेदोज़्‍याव पापर ऱासो ताके। जे ख्वा ख्वार आःपै परमेस्‍वरलाई मासरेस्‍ज़्‍याव मितावर जेलिज़्‍या। निताव य़ेनत जेलाज माहुज़्या?
1CO 15:35 जे ख्वा ख्वाराए है जेलिज़्‍याखेहो, “सिउ मिँ कै जैद फरी सैंसिद ओसोरिज़्‍याव? नो किताव क्‍याँस उहुरिज़्‍याव?” है ब जेलिज़्‍या।
1CO 15:36 काता जेपाँज़्‍याव निताव? जे ब धुर जेझाःक नो धुर ओमासिवा पै साःरो मापत्करिए।
1CO 15:37 फरी नो गम जींल जेझाःव धुर ताम तादी ब, जो तादी ब, नो साःरो हुन्‍याए ओक्‍याँ ते जेमाझाःए, नाङग्‍या ओगेदा वाज़ जेझाःज़्‍या।
1CO 15:38 परमेस्‍वरए नो धुरलाई किताव क्‍याँ जैद्याव ओपैंज़्‍याव हिताव ज़ जैज़्‍याव। सु सु याधुर सु सु याक्‍याँ ज़ जैद याएज़्‍याव।
1CO 15:39 क्‍याँताव स्‍या ब छुत छुत ज़ ताज़्‍या। मिँए ओस्‍या छुत ज़, बनलाव स्‍याराए स्‍या छुत ज़, बाज़ाराए स्‍या छुत ज़, ङाँःराए स्‍या ब छुत ज़ ताज़्‍या।
1CO 15:40 आव मानुवातावराए याक्‍याँ भरी छुत ज़ ताज़्‍या, स्‍वर्गतावराए याक्‍याँ ब छुत ज़ ताज़्‍या। याजोबन ब सु सु याजोबन ज़ ताज़्‍या।
1CO 15:41 हो मिताव ज़ निमीए ओज़गै ब छुत ज़, स़्यावैए ओज़गै ब छुत ज़ ताज़्‍या। सोरोराए याज़गै ब छुत छुत ज़ ताज़्‍या।
1CO 15:42 सिउनी सैंसिद सोवर ब हिताव ज़। चिन्‍या क्‍याँ गमल गेझाःज़्‍या, मासिन्‍या क्‍याँ परमेस्‍वरए सोचोइज़्‍याव।
1CO 15:43 ओजोबन माल्‍यो गमल बाज़्‍या, ओजोबन ल्‍यो हुज़्‍या। ओर्सा खेमो गमल बाज़्‍या, बनै ओर्सा ल्‍यो हुज़्‍या।
1CO 15:44 नो गमल बाज़्‍याव मानुवाताव क्‍याँ ज़, ननी हुज़्‍याव स्‍वर्गताव क्‍याँ ज़। गे किताव मानुवाताव क्‍याँ गेदैज़्‍या, हिताव ज़ स्‍वर्गताव क्‍याँ ब गेदैरिज़्‍या।
1CO 15:45 धर्मसास्‍त्रल ब इताव सर्सिउ लिज़्‍या, “प़ाइँरानी ङ़ाताव आदम उस॰ ल्‍यो मिँ ताके।” प़ाइँरानी छींताव आदम फरी अजम्‍बरी जुनी याज़्‍याव पुरूस ज़ ताके।
1CO 15:46 ननी ज़ रैंःज़्‍या, गमनिकाव क्‍याँ ङ़ात ताके, नकिन बल्‍ल परमेस्‍वरए उपुरूसनिकाव क्‍याँ ताज़्‍या।
1CO 15:47 उस॰कताव मिँ आदम गमनी जैसिउ मानुवाताव ताके, छींनीकाव मिँ ख्रीस स्‍वर्गनी हुके।
1CO 15:48 गमनी तावए ओथोर गम मितावर ज़ ताज़्‍यार, स्‍वर्गनी हुवए ओथोर स्‍वर्गताव मितावर ज़ ताज़्‍यार।
1CO 15:49 स़ोनो गे किताव गमनिकावए उसुरूप गेदैव, हिताव ज़ स्‍वर्गनिकावए उसुरूप ब गेदैरिज़्‍या।
1CO 15:50 अ ङानैं ङामेंर, आव पाँ ब सैंच्‍यो, गे आव मानुवाताव गमे गेक्‍याँस परमेस्‍वरए ओराज्‍याल गेमापसिधुइ। आव गेक्‍याँ खेम्‍न्‍या म़ान्‍याल वाज़ गनिसिउ लिज़्‍या। निताव क्‍याँस खर्क ज़ माखेम्‍न्‍या जुनील माबासिधुइ।
1CO 15:51 जेलाई तोबो म़ोंसिउ पाँ सतैंद ङायाचिरिज़्‍या — गे प़ाइँ गेमासिदी ब प़ाइँए गेक्‍याँ त़ोसिरिज़्‍या।
1CO 15:52 खेम्‍न्‍या बेलाकाव भोंकरए ओर्गा ओथासो प़ाइँना गे उमँःजानी मी चिकलामत ज़ गेक्‍याँर त़ोसिरिज़्‍या। नो भोंकरए ओर्गात सिधुवर ब खर्क ज़ मासिन्‍या जुनील सैंसिद सोरिज़्‍यार।
1CO 15:53 आव खेम्‍न्‍या म़ान्‍याल बाज़्याव गेक्‍याँ स़ोनो सिधुवराए याक्‍याँ ब खर्क ज़ मासिन्‍याल ओमात़ोसिवा पै माताए।
1CO 15:54 नो खेम्‍न्‍या म़ान्‍या भरी खर्क ज़ मासिन्‍याल ओत़ोसिउ प़ाइँना ज़ धर्मसास्‍त्रलाव सर्सिउ पाँ यो·न्‍या ले। नलाव सर्सिउ आव ज़, “ओल परमेस्‍वर ज़ झेंःसिद, सिन्‍यालाई हारैद नैव।”
1CO 15:55 “अब ते सिन्‍या सजा, नमिन ज़ फ्या·के, नसक्ती ब म़ाके।”
1CO 15:56 सिन्‍या सजा पापनी ज़ ओसक्ती ल्‍यो ताके। पाप फरी परमेस्‍वरए ओजैव कानुननी ज़ ओसक्ती ल्‍यो ताके।
1CO 15:57 हैदी ब परमेस्‍वरलाई धन्‍याबाद लिज़्‍या, ओल गेप्रभु येसु ख्रीसए ल्‍योनी ज़ निताव सजानी पुलुस्‍न्‍या येम ब जैद्यासिक्‍यो।
1CO 15:58 है जैद ङायुँलाव ङानैं ङामेंर, जे ग्‍याल गिल माताद थ॰रिद एकतार ज़ गेप्रभुए ओय़ेन दाव ज़ नैच्‍यो। जे ब जेसैंज़्या, गेप्रभुए उजूँनी जेदोज़्‍याव भरी जेलाई अऩाकलाव तान्‍या माले।
1CO 16:1 परमेस्‍वरए यरूसलेमलाव छैंव उमींरालाई भिती दुप्‍द्यान्‍याए जूँनी ङा गलातियालाव मन्‍दलीरालाई है ङारादोज़्‍याव मिताव जे ब दोच्‍यो।
1CO 16:2 साताकाव तखेप उस॰कताव छ्याम सु सु जेधुवाकाव दुप्‍द नैच्‍यो। ङा ङाहुवत स्‍यो·न्‍या ताताक।
1CO 16:3 ङा ङाहुवत नो जेदुपो भिती यरूसलेमदा लाँन्‍याए जूँनी सु सु जेराखतैरिज़्‍याव ङा नोरालाई कागतर सर्द्याद ङारापरींरिज़्‍या।
1CO 16:4 ङा ब बाव परिन्‍या स्‍यासो ओताकिन नोरास ङाबारिज़्‍या।
1CO 16:5 ङा जेल्‍योदा माहुद ङ़ादा माकेदोनियालाव मन्‍दलीरालाई दैना ङाबाज़्या। नोरास ङादैसिउत वाज़ जेल्‍योङ हुन्‍या ङाले।
1CO 16:6 ङाहुवत जाँवा जेस ङालिरिज़्‍या, ओताकिन य़ुँदा भरी ज़ ङालिरिज़्‍या। हो ताकिन ओल्‍द ङाबाक ङालाई जाँ जाँ जेसघैनाए सैं है ङालिज़्‍या।
1CO 16:7 फरी जेस निताव तछा ऩेलाए जूँनी काता दैसिन्‍या है ब ङालिज़्‍या। खाली परमेस्‍वरए जोरैद ओयाँकिन जाँवा पै जेस ल्‍यो ङादैकिन ताखेहो है ङालिज़्‍या।
1CO 16:8 खाली नो पेन्‍तिकोस पर्ब ओमाहुवा पै आल एफिससल ज़ ङालिरिज़्‍या।
1CO 16:9 आल परमेस्‍वरए ओपाँ वैंज़्‍यावर कुधु ज़ यालिदी ब ङालाई परमेस्‍वरए ओपाँ सथैन्‍या घ्योःव मौका जोरैद नैद्याँव।
1CO 16:10 ङा ङामाहुद ङ़ादा जेल्‍योङ तिमोथी उहुकिन नोलाई उयुँ आँचा पाँचा जैद मायाद पाथस नैच्‍यो। नो मिँ ङा स्‍यासो ज़ गेप्रभुए ओय़ेन चावस ज़ दोज़्‍याव।
1CO 16:11 है जैद नोलाई सुए ज़ तासोरक। बुरू नोलाई चावस सघैद ङाल्‍योदा परींद्याँच्‍यो। ङा नोलाई ओलस बाव ओनैंरास ओयेम चिऊव ज़ ङालिज़्‍या।
1CO 16:12 गेभाइ अपोल्‍लोसलाई नोरास जेल्‍योदा परींन्‍याए जूँनी बनै कर ङालैक ते आथ पाला भैंः ज़ माभैंःके। ओताबोत जुनी ब हुन्‍या ले।
1CO 16:13 जोगोइसिद लिच्‍यो, जेयुँ जेसुहुबो पाँत थ॰रिद लिच्‍यो, माछे·द घ्योःव युँ जैद लिच्‍यो।
1CO 16:14 जेदोज़्‍याव य़ेन भरी मयास दोच्‍यो।
1CO 16:15 अ ङानैं ङामेंर, ङा स्‍तिफनास स़ोनो उझ़िमलावराए जूँनी तोबो है ङादाचिज़्‍या। जे ब जेसैंज़्‍या, अखैया खन्‍दलाव प़ाइँरानी ङ़ात परमेस्‍वरए ओपाँत हुवर नोर ज़। नोराए परमेस्‍वरए छैंव उमींराए यासेवा दान्‍यात ज़ याजिउ यायुँ भरी झाःद नैर।
1CO 16:16 है जैद जे निताव मिँराए याधूँल लिद यापाँ भैंःच्‍यो। नोरालाई वाज़ माःक, परमेस्‍वरए ओय़ेन धामास दाज़्‍याव भरिलाई ब यामान नैद याराएच्‍यो।
1CO 16:17 स्‍तिफनास, फोर्तुनातस स़ोनो अखाइकसर जे जेल्‍योनी याहुक ङा बनै ङारेंके। जे जेमालिकाव स्‍याँब्‍या स्‍योंबे नोराए पुरा जैद्याँकेर।
1CO 16:18 जे जेयुँर होलाँ जैद यायाचिउ मिताव ङा ङायुँर ब होलाँ जैद्याँकेर। है जैद निताव मिँराए यागुन तामेंःच्‍यो।
1CO 16:19 एसिया खन्दलाव मन्‍दलीराए जेलाई जेरो है दाचिज़्‍यार। अकिलास स़ोनो प्रिस्‍किलानिस निझ़िमकाव दुप्‍सिज़्‍याव मन्‍दलीए ल्‍योनी ब ‘प्रभुए उमिननी बनै बनै जेरो लिज़्या’ है दाचिज़्‍यार।
1CO 16:20 आङाव दाज्‍यु भाइ भरिए ब जेरो है दाचिज़्‍यार। है जैद जे जेल ब मयास जेरो दासिच्‍यो।
1CO 16:21 आव चिथीत ङा पावलए ङाकुइनिकाव दस्‍कत ज़ झाःद ङानै, सरेस्‍च्‍यो।
1CO 16:22 जोए उयुँ गेप्रभुए ल्‍योदा माले, होलाई सराप ओलागिस्‍क। अ प्रभु, चाँदो ज़ घुहुनी।
1CO 16:23 गेप्रभु येसुए उयुँ जेल्‍योदा ओगराँक।
1CO 16:24 येसु ख्रीसनी मया ङादाचिज़्‍याव जेक्‍याँत ओरैंःक। [आमेन।]
2CO 1:1 ङा पावल, परमेस्‍वरए ओखतैनाव येसु ख्रीसए ओसाची, स़ोनो ङास लिज़्‍याव गेभाइ तिमोथीस गिन्‍ल्‍योनी कोरिन्‍थलाव परमेस्‍वरए ओमन्‍दलीलाई स़ोनो अखैया खन्दलाव छैंव उमीं भरिरालाई आव चिथी परींद गिन्‍याचिज़्‍या।
2CO 1:2 परमेस्‍वर गेबाबु स़ोनो गेप्रभु येसु ख्रीसनी जेल्‍योदा नियुँ गराँद जेयुँ होलाँ जैद ओयाचिरक।
2CO 1:3 गेप्रभु येसु ख्रीसए ओबाबु परमेस्‍वरए उमिन बनै ओघ्‍योःक। नो गेल्‍योदा उयुँ नाज़्‍याव गेबाबु ज़, गेयुँ होलाँ जैद्याज़्‍याव गेपरमेस्‍वर मनी ज़।
2CO 1:4 नोए गेदुख भरिल गेयुँर होलाँ जैद ओयासिज़्‍यावए गे मनी हितावनी ज़ छुतरालाई यादुखराल यायुँर होलाँ जैद्याद यायुँर सझेंःद्यान्‍यार ताव परिके।
2CO 1:5 गे ख्रीसए उमिनताव दुखर खा गेदैज़्‍या, हाःज़ ख्रीसए उमिननी परमेस्‍वरए गेयुँर होलाँ जैद यासिज़्‍याव।
2CO 1:6 गे परमेस्‍वरए ओपाँ सथैज़्‍यावराए उमिनताव गेदैज़्‍याव दुखर जेजूँनी ज़। जे ननी ज़ अजम्‍बरी जुनील बान्‍या येम ब जेदैके। हिताव ज़ नो गेदैज़्‍याव दुखराल परमेस्‍वरए गेलाई गेयुँर होलाँ जैद ओयासिज़्‍यावए जेलाई मनी निताव दुखर जेदैक जेयुँर सघ्‍योःद्याद सहिधुन्‍यार जैचिज़्याव।
2CO 1:7 है जैद गे ननी ज़ जेल्‍योदा गेयुँ हुबो लिज़्‍या। कैताराक जे मनी गे गेदैज़्‍याव मिताव दुखर जेदैक, गे किताव गेदुखराल गेयुँर होलाँ ओताज़्‍याव, जे मनी गेस सिप ज़ जेयुँर होलाँ ओताक।
2CO 1:8 जे ङानैं ङामेंर, ङासकाव लिज़्‍यावरास एसिया खन्‍दलाव गेदैव दुखर जे तखेप थैचिके। हो बेलाक नलावर गेखिरी यापसिक गे सही ज़ मासहिधुन्‍या दुखर दैद, ‘अब ते सिन्‍या ज़ गेताके ब’ लिद हार ज़ गेमानिके।
2CO 1:9 नो दुखर अब ते ङाथ·रैके, गे ननी पुलुस्‍न्‍या काताए आस ज़ ओमाल्‍योए, गे गेक्‍याँत माःक, सिउरालाई सोचोइज़्‍याव परमेस्‍वरए ओक्‍याँत ख्यासिद ल्‍यो परींन्‍याए जूँनी ची नै गेताव ओल्‍यो।
2CO 1:10 गे निताव सिउल गनिसिउरालाई परमेस्‍वरए जोगोइद निताव दुखरानी पाथस पले·सिक्‍यो। आकिनी ब पले·न्‍या ज़ ले लिद गेयुँ हुबो ज़ लिज़्‍या।
2CO 1:11 जे मनी गेलाई ‘परमेस्‍वरए पाथस ओरानैवक’ लिद पोंखारिद धुरिद्याव ताके। हो ताकिन जेपोंखारिउ परमेस्‍वरए थैद गेलाई असिक ओयासिज़्याव रँःद कुधुए गेजूँनी धन्‍याबाद चरैःन्‍या लेर।
2CO 1:12 आव तोबो पाँत गेसुनी च्‍याँःसिउ ज़ लिज़्‍या, जेस स़ोनो छुतरासकाव गेदोव य़ेन भरी छैंव युँनी सतस ज़ गेदोके लिद गेयुँ हुबो ज़ लिज़्‍या। नो भरी आव मानुवाताव मिँराए बुद्धीनी गेदोव माःक, परमेस्‍वर गेल्‍योदा दाइनो ओतावए गेदोव ची।
2CO 1:13 जे माप़रिधुन्‍या स़ोनो मातीधुन्‍या पाँर काता ज़ गेमासरे। है जैद ङाआस आव ज़,
2CO 1:14 जे गेलाई आःपै चबनै जेमाथ·रैसिदी ब तछा गेय़ेन भरी थ·रैद साचो ज़ ची ओल्‍यो लिद गेप्रभु येसु उहुन्‍या छ्याम गे जेलाई रँःद गेलाज ओमाहुज़्याव मिताव जे मनी गेलाई रँःद जेलाज माहुन्‍यार जेताकिन ताखेहो है ङालिज़्‍या।
2CO 1:15 ङापाँ भरी तीद ङालाई ब यायुँ हुप्‍खेहो ज़ लिद ङा माकेदोनियादा बान्‍या थ·रैद, ङ़ादा जेल्‍योक हुद जेल्‍योलाव घ्याँ बान्‍या ङाथ·रैके। हो ताकिन आनी ङाबाक ब, हुनी ङाहुक ब यास ऩेखेप दैसिउ दैन्‍या ङाले है ङालिके। फरी ननी यहूदियादा ओल्‍द ङाबाक मनी सघैनार्‍या है ब ङालिके।
2CO 1:17 खाली जेल्‍योदा हुव ङामादैवए उकिला माल्‍यो मिताव ब जेरँःनाज़्‍याखेहो। यातिर वाज़ दोज़्याव मिँराए होक ज़ हैज़ हैज़, होक ज़ माःक माःक है यालिज़्‍याव मिताव ब जेथ·रैनाज़्‍याखेहो।
2CO 1:18 है जेदाँदी ब ओल परमेस्‍वर सतस उलिज़्‍याव मिताव ङा ङापाँ ब जेजूँनी आव ताक्‍या, हो ताक्‍या है लिन्‍या स्‍यासो माले।
2CO 1:19 गे सिलास तिमोथीरास जेलाई परमेस्‍वरए ओज़ा येसु ख्रीसए ओपाँ गेसथैचिउ भरी ‘आव सैं हो सैं’ है लिन्‍या ओमेला ज़ माले, परमेस्‍वरए ओल्‍योनिकाव साचो थ॰रिउ पाँ ज़ याद गेनैचिए।
2CO 1:20 परमेस्‍वरए भाःकिनकाव मिँरालाई ओरायो य़ाका भरी ब ओज़ाए ओक्‍याँत ओयो·व साचो ज़। है जैद गे मनी नो ओपाँलाई ओज़ाए उमिननी ‘आमेन’ है गेलिज़्‍यावनी परमेस्‍वरए उमिन सघ्योःद गेएज़्‍या।
2CO 1:21 जेलाई गेस सिप ज़ छाँतिद ख्रीसए ओक्‍याँत थ॰रिउ जैज़्‍याव मनी ओल परमेस्‍वरए ज़।
2CO 1:22 फरी नोए गेलाई ‘ङामींर ज़’ लिद छाप झाःद बैनाए जूँनी गेयुँल छैंव उपुरूस ब याद नैसिउ।
2CO 1:23 खास ते जेलाई ङारिसनी जोगोइन्‍याए जूँनी कोरिन्‍थल जेल्‍योक हुन्‍या ङातेन्‍सिके। धुत ङामापाँए, परमेस्‍वर साची लिज़्‍या।
2CO 1:24 गे जेलाई परमेस्‍वरए ओपाँत कर गेमालैचिए, काराव ल्‍यो ताकिन जे ज़ ओपाँत थ॰रिउर जेलिज़्या। गे गेय़ेन ते जेस तोबो ताद जेयुँर होलाँ जैद्यान्‍या वाज़ लिज़्‍या।
2CO 2:1 है जैद ङा जेल्‍योङ हुद जेयुँर सुहुर्द ङायाचिज़्‍याव देखा बुरू माबान्‍या पाथ लिज़्‍या लिन्‍या ङाथ·रैके।
2CO 2:2 ङा जेलाई ङारिसए जेयुँर सुहुर्द ङायाचिकिन, नितावल जेकिन ङालाई सुए ची ङायुँर होलाँ जैद ओयाँरिज़्‍याव?
2CO 2:3 है जैद जे ङालाई ङायुँ होलाँ जैद्याव परिन्‍याराए ‘ङाहुक ङायुँर माचाव जैद तायाँरक’ लिद आवकिन नो ङ़ादाङाव चिथी ङासर्क, ङायुँ होलाँ ओताकिन जे जेयुँ ब होलाँ ताया लिद ङायुँ हुप्‍द ओल्‍यो।
2CO 2:4 खाली नो चिथी ङापरींज़्‍याव बेलाक माचाव जेय़ेनत ङायुँर घर्द ङाप़िलर ऱास्‍द ङार्सार सैःद ङापरींके। नो ङापरींव जेलाई जेयुँर केःद्यान्‍याए जूँनी माःक, बुरू जेलाई खा मया ङादाचिज़्याव हो घसैंरक लिद ङापरींव ची।
2CO 2:5 जेसकाव नो माचाव य़ेन दोवए ङा ङायुँर माचाव जैद ओयाँकिन ङालाई वाज़ माःक, जेलाई ते झन जेयुँर ब सुहुर्द्याचिखेहो।
2CO 2:6 जे जाँकोसैए नोलाई जेयो सजा यो·के।
2CO 2:7 अब ते जे नोलाई ओगल्‍तीनी ऱास्‍द उयुँर होलाँ जैद्याव ताके, म़ानी ओसोगोए उयुँर क़्‍यान्‍या ओछ्यास लिज़्‍या।
2CO 2:8 है जैद जे नो मिँए ओल्‍योदा फरी जेयुँ ओनाव सतैंद्याव ताके लिद जेलाई ङाघलैचिज़्‍या।
2CO 2:9 नो ङ़ादाङाव चिथील ब ङापाँ यादोज़्‍याव सैं यामादोज़्‍याव लिद जेलाई जाँचिन्‍याए जूँनी ङापरींव।
2CO 2:10 नोलाई ओगल्‍तीनी जेऱास्‍किन ङा मनी ङाऱास्‍ज़्‍या। है जैद जेल्‍योङावर ऱास्‍सिन्‍या मितावर यालिकिन ङा मनी जेजूँनी ख्रीसए ओयाँव हकनी ङाराऱास्‍ज़्‍या।
2CO 2:11 म़ानी सैतान गेखार्ल पसिद बले·न्‍या ओछ्यास ब ओल्‍यो। नितावल गे सैतानए ओचाल मासैंधुन्‍यार ते गेमाले।
2CO 2:12 ख्रीसए ओपाँ सथैन्‍याए जूँनी त्रोआस सहरल ङालिज़्‍याक नलावरालाई ख्रीसए ओपाँ सथैन्‍या प्रभुए बनै चाव मौका जोरैद्याँक्‍यो।
2CO 2:13 खाली नल जेल्‍योनी हुन्‍या गेभाइ तीतसस गिन्‍मादैसिउए कै याताव लिद ङायुँ थू ताद नलावरास बिदा ऩिद माकेदोनियादा ङाबाके।
2CO 2:14 हैदी ब परमेस्‍वरलाई बनै धन्‍याबाद लिज़्‍या, गेलाई ओय़ेनत आदा होदा ओजैसिक झेंःस्‍याराए झेंःस्‍या ख्रीसलाई एकम्‍न्‍या गेस नैद्यासिज़्‍याव। है जैद पो पोङ गेनी परमेस्‍वरए ओपाँ चाव सी ङरो माँःती रा·सिनाज़्‍या।
2CO 2:15 गे ख्रीसए ओपाँ गेरासथैक अजम्‍बरी जुनील बाज़्‍यावराए खार्ल तादी ब, नर्गल बाज़्‍यावराए खार्ल तादी ब, गे परमेस्‍वरलाई चरैःसिउ सी ङरो स्‍यासोर गेलिज़्‍या।
2CO 2:16 नो नर्गल बाज़्‍यावराए जूँनी चिची सी ङरो स्‍यासोर गेलिज़्या। फरी नो अजम्‍बरी जुनील बाज़्‍यावराए जूँनी ते चाव सी ङरो स्‍यासोर गेलिज़्या। गेनी निताव अचम्‍बलाव य़ेन माबिरैद दान्‍यार सु ची गेलिज़्‍यावदा?
2CO 2:17 हैदी ब गे निताव य़ेन चबनै मासुदुम्‍धुन्‍यार गेतादी ब ख्वा ख्वाराए यादोज़्‍याव मिताव परमेस्‍वरए ओपाँ अइज़ दुलैज़्‍याव मितावर ते गेमाले। गे ते परमेस्‍वरनी परींसिउ मिताव जैसिद ओल ओङ़ाक छैंव युँस ख्रीसए ओसक्तीनी ओपाँ गेरासथैज़्या।
2CO 3:1 गे निताव गेपाँक, “गेङ़ाक अइज़ चाव जैसिद यासतैंसिज़्‍याव ताखेहो,” है तालिच्‍यो। गेलाई छुतराए माँःती जेल्‍योदा गेहुदी ब जेल्‍योनी गेबादी ब, “आव मिँ इताव ज़, ओय़ेनर ब इताव ज़ लिज़्‍या,” लिद काता चिथी सर्द याव उपरिज़्‍याव रो?
2CO 3:2 गेय़ेन सरैंःद्याज़्‍याव चिथी ते जेक्‍याँताव गेदोव य़ेन ज़ लिज़्‍या। नो चिथी भरी गेयुँल ज़ सर्सिउ लिज़्‍या, प़ाइँए प़रिधुन्‍या ब लिज़्‍या।
2CO 3:3 है जैद जे ज़ गेजूँनी गेसाची याज़्‍याव ख्रीसए सर्द ओयासिउ चिथी। नो चिथी मसीए सर्सिउ ब माःक, लुँए फल्‍यात खुपिसिउ ब माःक। जींदो परमेस्‍वरए छैंव उपुरूसनी युँत ज़ सर्द्याव दोज़्‍याव।
2CO 3:4 आव जेजूँनी है ङालिज़्‍याव पाँ भरी ख्रीसनी परमेस्‍वरए दाद्यासिवा ज़ लिद ङायुँ हुबो ज़ लिज़्‍या।
2CO 3:5 जो य़ेन तादी ब गेनी ताव है लिद गे है गेमालिधुइ, परमेस्‍वरए वाज़ ओय़ेन दाधुन्‍यार जैसिज़्‍याव।
2CO 3:6 गेलाई साःरो बाचालाव य़ेन दान्‍या स्‍यासोर जैज़्‍याव मनी ओल परमेस्‍वर ज़। नो बाचा पाखाताव सर्सिउ कानुन मिताव ते माःक, परमेस्‍वरए छैंव उपुरूसनी युँल ज़ ताज़्‍या। नो पाखाताव सर्सिउ कानुनए सिन्‍याल झाःज़्‍याव, छैंव पुरूसए ते अजम्‍बरी जुनी यासिज़्याव।
2CO 3:7 नो ङ़ादाङाव सिन्‍याल झाःज़्‍याव लुँए फल्‍याताव खुपिसिउ कानुनए मोसाए ओङाः बनै ज़गै ज़गै ओतावए नो ज़गै छ्यावा पै वाज़ उरहिदी ब इस्राएलीर मोसाए ओङाःत माभाल्‍सिधुकेर।
2CO 3:8 है जैद नो छैंव पुरूसनिकाव साःरो ओदोज़्‍याव ओय़ेन झन ज़ ज़गै मगैव कै जैद माताके?
2CO 3:9 निताव सिन्‍या सजाल झाःज़्‍याव कानुन उगुन ल्‍यो ज़गैव ओताकिन, परमेस्‍वरए उयुँलाव मिताव जैव दोज़्‍याव साःरो ते झन ज़ उगुन ल्‍यो ज़गै मगैव ताज़्‍याखेहो सानी।
2CO 3:10 नो साःरो बनै ज़ ज़गै मगैव ओतावए ङ़ादाङाव ज़गैलाई ओज़गै सम़ैदिक्‍यो।
2CO 3:11 नो ओज़गै म़ावलाई ओज़गै ल्‍यो है गेदोकिन, नो ओज़गै माम़ाज़्‍यावलाई झन ज़ ओज़गै ल्‍यो है ल्‍यो परिके।
2CO 3:12 है जैद नो गेरासथैज़्‍याव साःरो पाँ गेयुँ हुप्‍द माछे·द ज़ गेरासथैज़्‍या।
2CO 3:13 गे नो मोसाए ओङाःताव ज़गै ओखेम्‍नादी ब, “इस्राएलीराए आव ज़गैत माभाल्‍सिधुर,” लिद ओङाः कप्‍द ओराएज़्याव मिताव गे ते आव साःरो ज़गैव पाँ कबो मापरिए।
2CO 3:14 नोर यायुँ बनै खाव एकोहोर्‍यासोर यातावए मोसाए ओङाः कप्‍द याएक्‍यो। आःपै ब कानुनलाव पाँ याप़रिदी ब नोरालाई कप्‍सिउ मिताव ज़ लिज़्‍या। नो पाँ ख्रीसए ओक्‍याँत याथ·रैधुकिन वाज़ फैसिज़्‍या।
2CO 3:15 खाली नोर आःपै मोसाए ओसरो पाँ याप़रिक काता ज़ मासैंन्‍यार यायुँ कप्‍सिउ मितावर ज़ लिज़्‍यार।
2CO 3:16 प्रभुए ल्‍योदा युँ फर्कैकिन वाज़ नो युँलाई मासैंन्‍या जैज़्‍याव कप्‍सिउ फैसिज़्‍या।
2CO 3:17 प्रभु ते पुरूस ज़। जोए ओक्‍याँत प्रभुए उपुरूसए बास दाद नैव, नो मिँलाई प़ाइँ फैसिउ लिज़्‍या।
2CO 3:18 गे ख्रीसए उमिनतावर गेङाः माकप्‍सिउ मितावर गेतावए प्रभुए ओज़गै सरैंःज़्‍याव धर्पन मितावर गेलिज़्‍या। गेप्रभुए ओज़गै खा गेरँःज़्‍या, हाःज़ गे मनी ओल उपुरूसनी ओगेर सरैंःद्याद ओल मिताव ज़ तानाद ज़गैवर गेतानाज़्‍या।
2CO 4:1 है जैद गे परमेस्‍वरए उयुँ ओगराँवनी निताव य़ेन दान्‍यार गेतावए जो मितावराल तादी ब गेयुँ माकेःद ज़ गेदोज़्‍या।
2CO 4:2 गे म़ोंसी म़ोंसी दान्‍या लाज हुव य़ेनर गेऱास्‍के। परमेस्‍वरए ओपाँ गेरासथैक गेयाःत रग रग जैद ससैसिउ पाँर बरे·द गेमारासथैए। बुरू परमेस्‍वरए ओपाँ किताव उलिज़्‍याव, हितावनी ज़ सथैद परमेस्‍वरए ओङ़ाक ज़ गेदोज़्‍यावए प़ाइँ मिँराए साचो पाँ ज़ ओल्‍यो लिद यायुँल याज़ थ·रैधुज़्यार।
2CO 4:3 गे गेरासथैज़्‍याव पाँ ख्वारालाई कप्‍सिउ मिताव उलिकिन, नो पाँ नर्गलाव येमदा बाज़्‍यावरालाई वाज़ निताव ताज़्‍या।
2CO 4:4 आव मानुवा चलैज़्‍याव सैतानए परमेस्‍वरए ओपाँ माभैंःज़्‍यावरालाई मुन्‍दुक्‍यासोर याजैज़्‍याव। है जैद ज़ नोर ख्रीसए ओक्‍याँताव परमेस्‍वरए ओगेर सरैंःद्याज़्‍याव ज़गै मगैव परमेस्‍वरए ओपाँ थैन्‍या ब माथैधुर, रँःन्‍या ब मारँःधुर।
2CO 4:5 नो गेरासथैज़्‍याव पाँ गे सघ्योःसिन्‍याए जूँनी माःक। येसु ख्रीस ज़ गेप्रभु लिद गेरासथैज़्‍या। होए उमिननी जेय़ेन दान्‍यार जैसिद गेले।
2CO 4:6 किताव स्रिस्‍तील परमेस्‍वरए चुम चुमोलाई पलाँ जैक्‍यो, हिताव ज़ गे गेयुँलाई पाला पलाँ जैद ओल ओपाँनी ज़ सैंव परींसिज़्‍याव। ननी ज़ गे ख्रीसए ओक्‍याँताव सरैंःसिउ परमेस्‍वरए ओज़गैर ओगेर गेथ·रैज़्‍या।
2CO 4:7 ख्रीसए ओपाँ गेक्‍याँत ओतावए बनै ओएः ल्‍यो गदान्‍त गमे जाल झाःसिउ मिताव लिज़्‍या। है जैद परमेस्‍वरए अचम्‍बलाव ओय़ेनर ओसक्तीर इताव गमे गेक्‍याँत यारँःक, “आव ते यानी माःक, परमेस्‍वरनी ज़ ओताज़्‍याव ची ओल्‍यो,” लिद प़ाइँए थ·रैधुज़्‍यार।
2CO 4:8 गे काता दुखरानी गेधलिदी ब तैं मिताव ते गेमाताए, काताए आस माल्‍यो मितावर गेतादी ब गेयुँर ब गेमासतेए,
2CO 4:9 मिँर गेखिरी पसिद यासोसिदी ब परमेस्‍वर गेस ज़ लिज़्‍या लिद काता स्‍यासो ज़ गेमाङम्‍सिए, पछारिसिउ मितावर गेतादी ब खदम ते गेमाताए।
2CO 4:10 येसु सिउनी ओसोव ओसक्ती गेक्‍याँत छर्लङ्ग ज़ ओरैंःक लिद येसु उसिज़्‍याकाव ओदैव दुखर गे गेक्‍याँत ब एकम्‍न्‍या ताव ज़ लिज़्‍या।
2CO 4:11 गे येसुए ओय़ेनत आव गेक्‍याँत ज़ गेखिरी पसिद दिनकाव ज़ सैःना यालाँसिज़्‍याव मितावर गेलिदी ब झन ननी ज़ आव सिन्‍या म़ान्‍याल गनिसिउ गेक्‍याँत येसुनी ताज़्‍याव खर्क ज़ मासिन्‍या जुनी सतैंसिउ लिज़्‍या।
2CO 4:12 है जैद गे परमेस्‍वरए ओपाँ सथैज़्‍यावर नो सिन्‍या मितावल गेपरिदी ब नो जेजूँनी ज़ ताज़्‍या। ननी ज़ जे अजम्‍बरी जुनी जेदैज़्‍या।
2CO 4:13 किताव नो धर्मसास्‍त्रलाव तोबोए, “ङायुँ उहुबोए ज़ ङापाँज़्‍या,” है उलिज़्‍याव मिताव गे मनी गेयुँ उहुबोए ज़ गेपाँज़्‍या।
2CO 4:14 गेप्रभु येसुलाई सिउनी सोचोइज़्‍याव परमेस्‍वरए ज़ जे स़ोनो गेलाई मनी तछा सोचोइद येसुस सिप ज़ ओङ़ाक जैसिरिज़्‍याव लिन्‍या गेसैंज़्या।
2CO 4:15 नो गेक्‍याँताव ताज़्‍याव भरी प़ाइँ जेजूँनी ज़। ननी ज़ परमेस्‍वरए उयुँ ओगराँज़्‍याव झन कुधुलाई ज़ ओतानावए परमेस्‍वरए उगुनर चेतैद उमिन ब ज़गै मगैव ज़ रैंःनाज़्‍या।
2CO 4:16 है जैद गे खर्क ज़ गेयुँर गेमासतेए। पाखाताव गेक्‍याँ उख्यूदी ब, गेजींलाव गेयुँ ते दिनकाव ज़ साःरो तानाज़्‍या।
2CO 4:17 काराव ल्‍यो ताकिन आव गेजिउत जाँवा पै गेक्‍याँत दुख उहुदी ब झन खर्क ज़ माखेम्‍न्‍या स्‍वर्गताव ज़गै मगैव पो दैन्‍याकावर गेताज़्‍या।
2CO 4:18 है जैद गे आव गेजिउत पाखाताव गेमीए गेरँःधुज़्‍यावदा गेयुँ थू गेमाजैए, नो भरी ते तछा यामिन ज़ म़ान्‍या ले। गेमीए गेमारँःधुज़्‍यावलाई गेयुँ हुप्‍द गेयुँ थू जैद गेनैज़्‍याव ते खर्क ज़ खेम्‍न्‍या माले।
2CO 5:1 आव मानुवाताव गेसिप पाल उचिस्‍ज़्‍याव मिताव चिस्‍द ओखेम्‍दी ब कुइए माताद परमेस्‍वरनी जैसिउ खर्क ज़ माचिस्‍न्‍या गेझ़िम स्‍वर्गत लिज़्‍या लिद गेयुँ हुबो ज़ लिज़्‍या।
2CO 5:2 आव मानुवाताव गेसिपल गेलेवा भरी स्‍वर्गताव साःरो क्‍याँ दैन्‍याए जूँनी गेयुँ थू जैद गेनैज़्‍यावए गे गहनिउ ज़ गेलिज़्‍या।
2CO 5:3 नो साःरो क्‍याँ गेदैवत ओक्‍याँ माल्‍यो पुरूस स्‍यासो तान्‍या गेमाले।
2CO 5:4 आव मानुवाताव दुखरानी गेगहनिज़्‍याव नो ओपोर्‍याप क्‍याँलाई ख्याव गेपैंज़्‍याव ते माःक, स्‍वर्गताव साःरो क्‍याँ तान्‍याए जूँनी ची। है जैद आव सिन्‍यादा बाज़्‍याव गेक्‍याँलाई खर्क ज़ मासिन्‍याए ओसम़ैवक है गेलिज़्‍या।
2CO 5:5 इताव दैन्‍या ओल परमेस्‍वरए ज़ जैद नैद्यासिउ। नोए उजूँनी ङ़ादा ज़ बैना मिताव छैंव उपुरूस ब याद नैसिउ।
2CO 5:6 है जैद गेर्सार परीद गेयुँर झेंःव ज़ लिज़्‍या। आव मानुवाताव गेक्‍याँस प्रभुस सिप गेमातादी ब,
2CO 5:7 गेमीए गेमारँःवलाई गेयुँ उहुबोनी ज़ गेदोज़्‍यावए,
2CO 5:8 आव मानुवाताव क्‍याँस लिज़्‍याव देखा बुरू प्रभुस सिप लिन्‍या पाथ लिज़्‍या लिद गेयुँर सझेंःद गेदोज़्‍या।
2CO 5:9 है जैद गेयुँ इताव ब लिज़्‍या, आव मानुवाल गेलिदी ब, आनी पुलुस्‍द गेबादी ब, प्रभुए उयुँलाव मिताव कातानी तान्‍या लिद उदिम गेदोज़्‍या।
2CO 5:10 काराव ल्‍यो ताकिन गे भरी प़ाइँ तछा ख्रीसए ओङ़ाक च्‍याँःसिद फाल्‍सिउ परिरिज़्‍या। हो छ्याम आव गेजिउताव गेदोव, चाव तादी ब, माचाव तादी ब, सु सु गेदोव गेय़ेननी ज़ गेजेला गेदैरिज़्‍या।
2CO 5:11 है जैद गे परमेस्‍वरनिकाव हुज़्‍याव छ्यासर गेसैंज़्‍यावए नल तापरिरक लिद मिँरालाई सम्‍जैद गेरासथैज़्‍या। नो गेदोज़्‍याव भरी जेजूँनी ज़ लिज़्‍या लिन्‍या ओल परमेस्‍वरए ज़ सैंज़्‍याव। जे मनी जेसैंधुकिन ताखेहो है ङालिज़्‍या।
2CO 5:12 आव भरी जेङ़ाक चाव सतैंसिन्‍याए जूँनी माःक, जेलाई गेगुनर चेतैन्‍या मौका ङायाचिज़्‍याव ची। है जैद गे जेजूँनी गेदोज़्‍याव य़ेननी जे नो युँनी माताद पाखाताव चलननी यानी स॰द सघ्योःसिज़्‍यावरालाई थाम थुम जेराजैधुरिज़्या।
2CO 5:13 नो गेपाँत गेलाई दासा बिसाव मिताव जेथ·रैसिदी ब परमेस्‍वरए ओमान नैद्यान्‍याए जूँनी ज़ गेदोज़्या। फरी गेगहक ल्‍यो मितावर जेथ·रैसिदी ब नो जेजूँनी ज़ गेदोज़्‍या।
2CO 5:14 ख्रीसए मया ओदासिज़्यावए गेलाई मनी ओल ओदोव मिताव य़ेनत घलैसिज़्‍याव। काराव ल्‍यो ताकिन तोबोए प़ाइँए जूँनी उजिउ झाःद ओयासिउए प़ाइँ ज़ सिकेर।
2CO 5:15 फरी प़ाइँए जूँनी उजिउ झाःद ओयासिउए गेलाई वाज़ तान्‍या भरी ऱास्‍द गेजूँनी उजिउ झाःद सिउनी सैंसिज़्याव ख्रीसए उजूँनी बाँचिउ परिए।
2CO 5:16 है जैद गे पाखाताव रैंःन्‍यानी सुलाई ज़ गेमाराछुतैए। ख्रीसलाई ङ़ादा पाखाताव गेबिचारनी गेरँःक ज़िम्‍ज़ा ज़ गेथ·रैज़्‍याव, अबकिन ते छुतनी ज़ गेसरेस्‍ज़्‍या।
2CO 5:17 है जैद ख्रीसए ओक्‍याँत ख्यासिद लिज़्‍याव मिँ चबनै साःरो ताज़्‍या। नोए ङ़ादाङाव उबिचार भरी ओचलन भरी म़ाद, होए ओपोल उयुँल साःरो साःरो बिचारर हुज़्‍या।
2CO 5:18 आव भरी परमेस्‍वरनी हुव ज़। ओल ज़ ख्रीसनी गेलाई ओलस सखैसिक्‍यो। गेलाई ओयासिउ य़ेन मनी छुतरालाई परमेस्‍वरस सखैन्‍या ज़।
2CO 5:19 है जैद गे मिँरालाई गेरासथैज़्‍याव पाँ आव ज़ — परमेस्‍वर ख्रीसनी हुद आव मानुवाताव मिँरालाई यापापर चिऊद मायाद ओलस यासखैहुक्‍यो। नो पाँ सथैन्‍या फरी ओल परमेस्‍वरए ज़ गेलाई जैद नैसिउ।
2CO 5:20 है जैद गे मिँरालाई परमेस्‍वरए ल्‍योदा खुल्‍न्‍यात ख्रीसए ओकत्‍वाल्‍या मितावर गेलिज़्‍या। जेलाई ख्रीसए ल्‍योनी गेबिन्‍ती लिज़्‍या — जे परमेस्‍वरस खैहुचिके।
2CO 5:21 होए गेलाई ख्रीसनी, ओङ़ाक उयुँलाव मिताव गेखत माल्‍योर जैन्‍याए जूँनी गेदोव पाप भरी कान्‍त ज़ ओखत माल्‍यो ख्रीसलाई सुघुर्द्यासिक्‍यो।
2CO 6:1 गे परमेस्‍वरस सिप य़ेन दाज़्‍यावराए जेलाई है गेदाचिज़्‍या, जेल्‍योदा परमेस्‍वरए उयुँ ओगराँव अऩाकलाव ताजैच्‍यो।
2CO 6:2 धर्मसास्‍त्रल ब परमेस्‍वरए है लिज़्या, “ङायुँ ओनाव बेलाक ज़ जेपाँ ङाथैके, जेचाहित ओताव छ्याम ज़ ङासघैचिके।” है जैद ङा जेलाई है ङादाचिज़्‍या, परमेस्‍वरए उयुँ ओनाव छ्याम ब आछिम ज़, जेचाहित ओताव छ्याम ब आछिमकिन ज़।
2CO 6:3 गे परमेस्‍वरए ओय़ेन दान्‍यात ओपाँःच्‍या ल्‍यो कान्‍त ज़ ताताक लिद सुलाई ज़ यायुँ केःद्यान्‍या य़ेनर गेमादोए।
2CO 6:4 बुरू प़ाइँ सहिद परमेस्‍वरए ओसेवा दान्‍यात सतैंद नैसिउ मितावर गेजैसिज़्‍या। है जैद दुखल तादी ब, अखत्‍याल तादी ब, धो सहिउल तादी ब,
2CO 6:5 गेलाई यारीःसिदी ब, झ्यालखानाल याझाःसिदी ब, भोरो·सिद याझ्याम्‍सिदी ब, गेदोज़्‍याव य़ेनलाई माऱास्‍द कैताक मास्‍याँद तादी ब, तुर्द तादी ब, धामास ज़ गेदोज़्‍या।
2CO 6:6 है जैद गे बनै छैंव युँस, चाव माचाव सैंद, माचाव भरी गाल्‍द प़ाइँए जूँनी ज़ गेदोज़्‍या। परमेस्‍वरए उपुरूसनी प़ाइँए ल्‍योदा गेयुँ थू जैद,
2CO 6:7 परमेस्‍वरए ओसक्तीनी ओपाँ सतस गेरासथैज़्‍या। वोर्फताव गेकुइत स़ोनो दाबर्‍याफताव गेकुइत परमेस्‍वरए ओय़ेन दान्‍यात चाहिज़्‍याव हत्‍यार भरी रैद गेनै।
2CO 6:8 गे कैताक बीज्‍यात मनी गेताज़्‍या, कैताक इज्‍यात मनी गेदैज़्‍या। फरी कैताक चाव मिन ब हुज़्‍या, कैताक माचाव मिन ब हुज़्‍या। गेलाई छुल्‍यार है यादासिदी ब साचो ज़ गेथ॰रिज़्‍या।
2CO 6:9 कान्‍ल ज़ मागनिसिउर यारँःसिदी ब गनिसिउर ज़ गेलिज़्‍या, सिउ मितावर गेलिदी ब बाँचिउ ज़ गेलिज़्‍या, सजा धूँल यानैसिदी ब गेपोहोन ते माबाए।
2CO 6:10 फरी सोगो धूँल गेलिदी ब रेंव ज़ गेलिज़्‍या, काता ज़ माल्‍यो मितावर गेलिदी ब प़ाइँनी यो·वर ज़ गेलिज़्‍या, फरी गरीब मितावर गेतादी ब प़ाइँ मिँरालाई धनी मितावर गेराजैज़्‍या।
2CO 6:11 अ कोरिन्‍थलाव गेनैं गेमेंर, गेय़ेन भरी काता ज़ माम़ोंसिद गेदाँजीं ज़ सतैंद गेयाचिके।
2CO 6:12 खाली गेयुँर फैद गेयाचिदी ब जे ते जेयुँर फैव जेमाभैंःके।
2CO 6:13 ङा जेलाई ङाज़ा मितावर जैद ङासम्‍जैचिज़्‍या, गे गेदोज़्याव मिताव जे मनी गेलाई जेयुँर फैद्यासिचिके।
2CO 6:14 जे परमेस्‍वरलाई यायुँ माहुप्‍ज़्‍यावरास तोबो कुमत तानारिसिच्‍यो। धर्म स़ोनो अधर्मनी माखैनी, चुम चुमो स़ोनो पलाँवनी ब माखैनी।
2CO 6:15 हिताव ज़ फरी ख्रीस स़ोनो सैताननी ब माखैनी। है जैद परमेस्‍वरलाई उयुँ हुबो स़ोनो उयुँ माहुबोनी कातानी निखैरिज़्‍याव?
2CO 6:16 परमेस्‍वर लिन्‍या ध्‍यान झ़िम स़ोनो मिँए जैसिउ अङग्‍यानी ब कातानी निखैरिज़्‍याव? परमेस्‍वर लिन्‍या झ़िम ओललाई उयुँ हुप्‍ज़्‍यावए उयुँल ज़ ताज़्‍या। धर्मसास्‍त्रल ब परमेस्‍वरए है लिज़्‍या, “ङा जेक्‍याँत बास दाद जेस ज़ आदा होदा ङालिरिज़्‍या। ङा जेपरमेस्‍वर ज़ तान्‍या ङाले, जे ङामींर ज़ तान्‍या जेले।”
2CO 6:17 है जैद परमेस्‍वरए है लिज़्या, “नोराए खार्नी पुलुस्‍द जेबातङ लिचिके। अऩाकलाव माचाहिउर काता ज़ जेमाछुकिन, ङा जेलाई ङाल्‍योदा रैद,
2CO 6:18 ङा जेबाबु तान्‍या ङाले, जे ङाज़ार तान्‍या जेले। आव है लिज़्‍याव ङा माहान परमेस्‍वर ज़।”
2CO 7:1 है जैद ङानैं ङामेंर, गे परमेस्‍वरए निताव ओय़ाकार गेदैवए गेक्‍याँ गेपुरूसलाई झुथो जैज़्‍यावरानी चोखोइसिद परमेस्‍वरए उधूँल लिद सतलाव छैंव ओय़ेनदा बाव ताके।
2CO 7:2 गेलाई जेयुँल लिन्‍या पो जैद्याव ताके, तावैंसिच्‍यो। गे सुए याउपर्त ज़ मादान्‍या गेमादोए, सुलाई ब गेमाबले·चिए, सुलाई ब गेमाझुकैचिए।
2CO 7:3 आव है ङादाचिज़्‍याव भरी जेलाई जेखतर सतैंद ङायाचिज़्‍याव ते माःक। ङ़ादाकिन है ङालिज़्‍याव मिताव जे गेस ज़ गेयुँल सिप ज़ जेलिज़्‍या। है जैद गे गेसिदी ब, गेलिदी ब, गेयुँनी तँदा तान्‍या जेमाले।
2CO 7:4 जेलाई ङायुँ हुप्‍द ङासुनी च्‍याँःसिउ ज़ लिज़्‍या। है जैद जो मिताव ङादुखराल ब ङायुँर होलाँ ताद रेंव ज़ ङालिज़्‍या।
2CO 7:5 माकेदोनिया गेकेसोत गेदुखराए सन्‍चस ल्‍यो गेमादैके। प़ाइँनी प़ाइँनी गेर्च्‍या सिद पाखाताव गेक्‍याँ ब उरूम्‍सिज़्याव, गेयुँल छ्यास वाज़ उलिज़्याव।
2CO 7:6 हैदी ब यायुँ तेवरालाई यायुँ सझेंःद्याज़्‍याव परमेस्‍वरए तीतसलाई गेल्‍योक परींद्याद गेयुँर होलाँ जैद्यासिक्‍यो।
2CO 7:7 नो होलाँ गेताव अइज़ गेदैसिउनी वाज़ माःक, जे नोलाई उयुँर होलाँ जैद जेयोनी गे गेयुँ ब होलाँ ओताव ची। जे ङालाई मामेंःद जेचेतैनाज़्‍याव, ङ़ादा मादान्‍या जेदोवत सोगो जेदोज़्‍याव, स़ोनो ङापाँत धुरिद्याद ङास जेजैसिज़्‍याव, नो पाँर जेल्‍योनी हुव तीतसए ओयाःनी ङाथैक ङायुँर झेंःद झन ज़ ङारेंके।
2CO 7:8 आवकिन नो ङ़ादाङाव परींद ङायाचिउ चिथील जेय़ेनए जेयुँर जाँ माचाव जैद ङायाचिउनी, छींनी ‘नो यायुँर माचाव जैद्यान्‍या चिथी ङामापरींदी ब तान्‍या ओल्‍यो,’ है ब ङालिके। खाली ङापरींव पाथ ज़ ताके, नो जेयुँर माचाव जैद ङायाचिउ छ्यावाए जूँनी वाज़ ओताव ओल्‍यो लिन्‍या ङासैंके।
2CO 7:9 नो ङारेंज़्‍याव, जेयुँर माचाव जैद ङायाचिउनी माःक, जेयुँ माचाव जैद परमेस्‍वरए ल्‍योदा जेयुँ जेफर्कैवनी ङारेंज़्‍याव ची। माचाव जेय़ेनत जेयुँ माचाव जेजैव परमेस्‍वरए उयुँलाव मिताव ज़ ताके। नै ओतावए गेल्‍योनी ब जेलाई कै मै ज़ माताके।
2CO 7:10 परमेस्‍वरए ल्‍योनिकाव ताज़्‍याव सोगोए युँलाई त़ोद्याद ओल्‍योदा लाँव दोज़्‍याव। हाःकिन नो सुए ल्‍योदा ब मागोइसिए। आव मानुवाताव ताज़्‍याव सोगोए ते सिन्‍या म़ान्‍यादा लाँव दोज़्‍याव।
2CO 7:11 खाली जेलाई ते परमेस्‍वरए ल्‍योनिकाव ताज़्‍याव सोगोए काता नाः परमेस्‍वरए ल्‍योदा कलँ लिन्‍यार ओजैचिउ। नो सोगोए ङ़ादाङाव जेय़ेन भरिनी छेसिन्‍या ब जैचिक्‍यो, मादान्‍या जेदोवत हार मानिउ ब परींचिक्‍यो, सजानी छे·न्‍या ब जैचिक्‍यो, ङास खैन्‍या युँ ब जैद्याचिक्‍यो, चाव य़ेनत जेर्सा ब पले·द्याचिक्‍यो, जेलाई सतस दान्‍या युँ जैद्याचिक्‍यो। है जैद आव भरिनी जेखत माल्‍योर जेथ॰रिके।
2CO 7:12 नो ङ़ादाङाव जेखार्लाव मादान्‍या य़ेन दोवए उजूँनी ङापरींव चिथी होए उजूँनी स़ोनो जेलाई जेयुँ सुहुर्द ओयाचिउराए जूँनी वाज़ माःक। बुरू परमेस्‍वरए ओङ़ाक गेल्‍योदा जेयुँ थू जेजैज़्याव ओरैंःक लिद ङासर्के।
2CO 7:13 ननी गे गेस॰र ब होलाँ ताके। गेस॰र होलाँ ओताव नाः वाज़ माःक, जेल्‍योनी उयुँर होलाँ ताद रेंद हुव तीतसस गेदैसिक झन ज़ गेयुँर झेंःद गेस॰र होलाँ ताके।
2CO 7:14 ङ़ादा तीतस जेल्‍योङ ओमाहुद नोस जेजूँनी जेलाई सघ्योःद ङापाँव पाँ भरी अऩाकलाव माताके। किताव जेलाई गेसथैचिउ परमेस्‍वरए ओपाँ भरी थ॰रिउ पाँ ज़ ओताव, हिताव ज़ जेजूँनी तीतसलाई है ङादोव भरी ब जेक्‍याँत ज़ थ॰रिउ ताके।
2CO 7:15 तीतसए जेलाई मामेंःचिउ। जेल्‍योङ उहुक बनै मानस जेनैवए, ‘आवर ते परमेस्‍वरए ओपाँ दान्‍याकावर ज़ ताद यालिज़्‍याव ओल्‍यो’ लिन्‍या चेतैद जेलाई झन मया दाचिज़्‍याव।
2CO 7:16 है जैद जे प़ाइँनी प़ाइँनी ङायुँ हुबोर जेतावए ङा रेंव ज़ ङालिज़्‍या।
2CO 8:1 ङानैं ङामेंर, आव ब सैंच्‍यो। माकेदोनियालाव मन्‍दलीराए याक्‍याँत परमेस्‍वरए उयुँ ओगराँवनी यादोव य़ेनए जूँनी है गेदाचिज़्‍या।
2CO 8:2 नोराए याक्‍याँत धो सहिउ दुखर हुद उलिज़्‍यावत ब नोराए यायुँ मासतेद रेंद, माथैंव मायो·वल लिज़्‍यावत ब परमेस्‍वरलाई याकुइ सघ्योःद ज़ यान्‍यार ताकेर।
2CO 8:3 ङा जेलाई साचो है ङादाचिज़्‍या, नोराए यायुँ स्‍यानी ज़ याधुवा भरी ज़ दोकेर, रँःक ते झन मादासिधुन्‍या मिताव य़ेन ब दोकेर।
2CO 8:4 परमेस्‍वरए उमिनताव माथैंव मायो·वरालाई, ‘जुनी ब गेल्‍योनी गे गेजुँ ब लाँद्याव ज़ ताके’ लिद घलैनाकेर।
2CO 8:5 गे है ल्‍यो गेपैंज़्‍यावकिन नोराए झन कोसै ज़ दोकेर। नोराए ङ़ादा ज़ प्रभुलाई याजिउ ज़ याचरैःवए परमेस्‍वरए उयुँलाव मिताव य़ेन ज़ दाद गेलाई ब याजिउ ज़ यासूँपिसिउ मिताव ज़ ताके।
2CO 8:6 जे जेल्‍योङ मनी इताव चाव य़ेनर जे जेक्‍याँत ब घरैंःक लिद जेल्‍योङाव चाव य़ेनत थूसिद लिज़्‍याव तीतसलाई पुर्थस घुतुपैयो है गेदोज़्‍या।
2CO 8:7 है जैद जे प़ाइँ य़ेनत, युँ हुप्‍न्‍यात तादी ब, पाँन्‍यात तादी ब, सैंन्‍यात तादी ब, नो भरित कलँ लिद गेल्‍योदा जेयुँ थू जेजैज़्‍याव मिताव पो पोङाव माथैंव मायो·वरालाई स्‍यो·द गेराएज़्‍याव य़ेनत जे मनी उहिल हाइव ताके।
2CO 8:8 आव है ङालिज़्‍याव भरी जे मायाद माताए है ङादाचिज़्‍याव ते माःक, खाली छुतङावराए माथैंव मायो·वराए ल्‍योदा याजैज़्‍याव युँ स्‍यासो जे जेल्‍योङ ब मालिज़्‍या लिद ङासर्ज़्‍याव ची।
2CO 8:9 गेप्रभु येसु ख्रीसए उयुँ गेल्‍योदा ओगराँव जे ब जेसैंज़्‍याखेहो। नो ङ़ादा प़ाइँनी प़ाइँनी यो·व उलिदी ब गे गेजूँनी काता ज़ माल्‍यो जैसिद हुके। गेलाई प़ाइँनी यो·वर जैन्‍याए जूँनी गेजूँनी नाःल्‍दिउ य़ेन दाद्यासिक्‍यो।
2CO 8:10 ङा जेसकाव ङासल्‍ला इताव लिज़्‍या, नो ङासल्‍ला जेजूँनी ज़ लिज़्‍या। जे आःर्तानी निताव य़ेन दान्‍या भैंःन्‍यात तादी ब, यान्‍यात तादी ब, जे ज़ प़ाइँरानी ङ़ात जेल्‍यो।
2CO 8:11 अब ते नो जेभैंःव य़ेनलाई सयो·व ज़ परिके। किताव ङ़ादा दान्‍या युँ जेदोव, हिताव ज़ जेधुवा भरी दाद नो जेपाँ सयो·व ज़ परिके।
2CO 8:12 जे यान्‍या जेपैंकिन जेयुँ स्‍यानी याधुन्‍या वाज़ दोच्‍यो। परमेस्‍वरए नो जेदोधुज़्‍यावकिन कोसै मारैव।
2CO 8:13 आव य़ेन जेलाई दुख याद छुतलाई थाँतस नैन्‍याए जूँनी माःक, प़ाइँलाई सम सम जैन्‍याए जूँनी ची।
2CO 8:14 आज्‍याल जे प़ाइँनी यो·द धोल पोगोल ताद जेलिज़्‍यावए नो माथैंव मायो·वर ब यो·वर ताज़्‍यार। फरी नोर छींनी प़ाइँनी यो·द धोल पोगोल यातावत जे माथैंव मायो·वर जेताकिन जे मनी यो·वर ज़ तान्‍या जेले। है जैद प़ाइँस सम सम ओताक।
2CO 8:15 हो ताकिन ची धर्मसास्‍त्रलाव सर्सिउ पाँ मिताव ज़ तान्‍या ले। नो सर्सिउ आव ज़, “कुधु दुपोलाई अऩाकलाव तान्‍या माले। फरी छ्या ल्‍योलाई मायो·व तान्‍या माले।”
2CO 8:16 परमेस्‍वरलाई धन्‍याबाद लिज़्‍या। किताव जेल्‍योदा ङायुँ थू ओताज़्‍याव, हिताव ज़ परमेस्‍वरए तीतसलाई मनी जेल्‍योदा उयुँ थू जैन्‍या जैक्‍यो।
2CO 8:17 नो मिँ जेल्‍योदा गे है गेदोवनी वाज़ उहुज़्‍याव माःक, जेल्‍योदा उयुँ थू जैद उयुँ स्‍यानी ज़ हुज़्‍या।
2CO 8:18 नोस फरी परमेस्‍वरए ओय़ेन दान्‍यात प़ाइँ मन्‍दलीराए खार्ल उमिन थासो तोबो गेनैं ब गेपरींज़्‍या।
2CO 8:19 नो गेनैं, माथैंव मायो·वरालाई स्‍यो·द्यान्‍याए जूँनी पो पोङाव मन्‍दलीराए ल्‍योनी आव य़ेनत गेस सिप ज़ खतैसिउ लिज़्‍या। गे आव गेदोज़्‍याव य़ेन माथैंव मायो·वरालाई कुधु सघैव गेपैंज़्या लिन्‍या सरैंःद्यान्‍याए जूँनी स़ोनो परमेस्‍वरए उमिनलाई सघ्योःद्यन्‍याए जूँनी लिज़्या।
2CO 8:20 आव पो पोङाव गेस्‍यो·ज़्‍यावत कान्‍त ज़ गेखत तापुलुस्‍क लिद बनै पाथस प़ाइँए ङ़ाक ज़ गेदोज़्‍या।
2CO 8:21 आव य़ेन परमेस्‍वरए ओङ़ाक वाज़ माःक, प़ाइँ मिँराए ङ़ाक ब ओमान ल्‍यो माम़ोंसिन्‍या य़ेन ज़ गेदोज़्‍या।
2CO 8:22 नोनिस छुत गेभाइ ब जेल्‍योदा गेपरींज़्‍या। नो मिँ ब परमेस्‍वरए ओय़ेनत उयुँ सघ्योःद दोज़्‍याव मिँ ज़ गेरँःज़्‍या। आव य़ेनत फरी जेल्‍योङाव पाँर थैद उयुँ हुप्‍द चह चह ताद हुज़्‍या।
2CO 8:23 तीतस ते ङास जेखार्ल सिप य़ेन दोज़्‍याव ङानैं ज़। नोस हुज़्याव गेभाइनी फरी, पो पोनिकाव मन्‍दलीराए खार्नी परींसिउ, ख्रीसए ओमान नैद्याज़्यावनी ज़।
2CO 8:24 है जैद जे नो स़ोम्‍लोराए याङ़ाक माथैंव मायो·वराए ल्‍योदा जेयुँ उलिज़्‍याव सतैंद्याव ताके। हो ताकिन ची आङ जेल्‍योङाव सघ्योःद गेपाँव पाँ ब मन्‍दलीराए साचो थ·रैन्‍या लेर।
2CO 9:1 परमेस्‍वरए उमिनतावरालाई चिऊन्‍या ङा है ङामादाचिदी ब जे ज़ जेसैंज़्‍या।
2CO 9:2 जे अखैयालावर आःर्तानीकिन ज़ थूसिद आव य़ेन दान्‍यात अझ मनी युँ जेदोज़्यावए माकेदोनियालावराए ङ़ाक जेमिन सघ्‍योःद ज़ ङापाँज़्‍या। है जैद नोराए जाँकोसै जे जेदोज़्‍याव रँःद ज़ दोकेर।
2CO 9:3 खाली ङा आङ सघ्योःद ङापाँव पाँ भरी अऩाकलाव ताताक लिद आव ङानैंरालाई ङाकिन ङ़ादा ज़ आव चिथीस जेल्‍योङ ङारापरींके। हो ताकिन ची ङा नोरालाई है ङारादोज़्याव मिताव झाःसिद लिन्‍या जेले।
2CO 9:4 आलाव माकेदोनियालावर मनी जेल्‍योदा ङास याहुकिन जे नङ झाःसिद जेमालिज़्‍याव गेदैहुचिकिन आङाव जेजूँनी ङापाँव पाँ ओमाथ॰रिकिन लाज मोर्नो तान्‍या गेले, जे ब जेलाज हुन्‍या ले।
2CO 9:5 है जैद आव ङानैंरालाई ङ़ादा ज़ परींन्‍या ङाजैके। हो ताकिन ची किताव ङ़ादा, “स्‍यो·द धोल पोगोल ज़ गेजैरिज़्‍या,” है जेदाँव मिताव ज़ नोराए गे गेमाहुद ज़ थिक थाक जैन्‍या लेर। है जैद नो जेस्‍यो·ज़्‍याव भिती युँ कैद माःक, युँ स्‍यानी ज़ ओताक।
2CO 9:6 आव ब सैंच्‍यो, छ्या वासोए छ्या ज़ सिम्‍ज़्‍याव। कुधु वासोए कुधु ज़ सिम्‍ज़्‍याव।
2CO 9:7 है जैद जे मनी आःज़ ङाझाःरिज़्‍या लिद जेयुँल ज़ थ·रैच्‍यो। खाली नो करस ब ताताक, युँ कैद ब ताताक। उयुँ माकैद याज़्‍याव मिँलाई परमेस्‍वरए मया दोज़्याव।
2CO 9:8 परमेस्‍वरए जेल्‍योदा उयुँ गराँद जेलाई असिक दैवर जैन्‍या ओल उकुइत ज़ उलिज़्‍यावए, जेलाई एकम्‍न्‍या धोल पोगोल ताद माथैंवरालाई याधुन्‍यार तान्‍या जेले।
2CO 9:9 आवए उजूँनी धर्मसास्‍त्रल ब इताव सर्सिउ लिज़्‍या, “माथैंव मायो·वरालाई उयुँ माकैद आदा होदा भाःज़्‍याव, नोए उगुनर रहिद खर्क ज़ मामेंःसिए।”
2CO 9:10 वास्‍न्‍या धुर स़ोनो ज़्‍यान्‍या ज़्‍यावर जोरैद्याज़्‍यावए नो जेस्‍यो·रिज़्‍यावलाई धुर माँःती सबा·द्याद ननी ज़ धर्मलाव जेय़ेनर जेगुनर झन ज़ घ्योःन्‍या ले।
2CO 9:11 जेकुइर सघ्योःद यान्‍याए जूँनी परमेस्‍वरए जेलाई यो·वर जैचिज़्‍याव। ननी ज़ फरी नो गेल्‍योनी जेदोरिज़्याव य़ेनत परमेस्‍वरलाई धन्‍याबाद ब चरैःरिज़्‍यार।
2CO 9:12 है जैद आव जेदोज़्‍याव य़ेननी परमेस्‍वरए उमिनताव माथैंव मायो·वरालाई ओरासथैंज़्‍याव वाज़ माःक, परमेस्‍वरलाई ब कुधु ज़ धन्‍याबाद दैन्‍या जैज़्‍याव।
2CO 9:13 नो जेदोव य़ेन ज़ जेसाची तारिज़्‍या। जे ख्रीसए ओपाँ अऩाकलाव माजैद जेकुइ सघ्योःद जेस्‍यो·ज़्‍याव भिती नोराए यादैवत जेदोज़्‍याव य़ेन साचो थ·रैद जेजूँनी परमेस्‍वरए उमिन सघ्‍योःद्यान्‍या लेर।
2CO 9:14 जेक्‍याँताव परमेस्‍वरए ओअसिक नोराए ल्‍योङ ब ओतावए नोराए जेलाई मामेंःद जेजूँनी परमेस्‍वरलाई पोंखारिउ ज़ नैन्‍या लेर।
2CO 9:15 गेल्‍योदा उयुँ गराँद, गोइँद ब मागोइँसिधुन्‍या असिकर याज़्‍याव परमेस्‍वरलाई बनै धन्‍याबाद ओताक।
2CO 10:1 ङा पावलए ङाल्‍योनी जेस तोबो ङाबिन्‍ती लिज़्‍या, ङा ओल ख्रीस मिताव प़ाइँत सज़िम्‍सिद जेस चावनी वाज़ पाँव ङापैंज़्‍या। खाली जेनी ख्वा ख्वाराए, “पावल गेस उलिक सुस ज़ मापाँधुन्‍या छेपोवा स्‍यासो उलिज़्याव, होङ बाद ताकितर हाप हाप ख्‍यान्‍या स्‍यासो चिथीर परींज़्याव,” है लिज़्यार दी लिन्‍या ङाथैज़्या।
2CO 10:2 है जैद जेल्‍योङ ङाहुक ङारिसए हाप हाप ख्यान्‍या मिताव ताताक। नो जेल्‍योङावराए ङालाई, “आवए ओय़ेन परमेस्‍वरनिकाव हुव माःक, मिँए युँ स्‍यानी पले·सिउ य़ेन ची,” है दाज़्‍यावराए जूँनी ते तखेप ङारासिङार्के सैं है ङालिज़्‍या।
2CO 10:3 आव गेक्‍याँ मिँनिकाव ओतादी ब मिँए युँ स्‍यानी गेमाइ़सिए।
2CO 10:4 गे गेहत्‍यार फरी मिँए युँ स्‍यानी जैसिउ माःक, परमेस्‍वरए ओसक्तीनी जैसिउर ची। नो गेहत्‍यारनी ज़ छे छे ङम्‍सिउ गरर तैःन्‍या गेले।
2CO 10:5 ननी ज़ गे मिँए युँ स्‍यानी ससैसिउ पाँर स़ोनो परमेस्‍वरए ओपाँकिन तँदाङाव स॰व पाँर पल्‍तैद यामिनर सम़ैद्याद याबुद्धी यागहकरास ज़ ख्रीसए उधूँल गेराझाःज़्‍या।
2CO 10:6 जे परमेस्‍वरए ओपाँत उघुरिउर जेतावत माउघुरिउ भरिरालाई उघुरिउर जैन्‍यात झाःसिद लिज़्‍यावर गेताज़्‍या।
2CO 10:7 जे जेङ़ाकाव वाज़ रँःन्‍या माःक। नो जेखार्लाव, “ख्रीसए उमींर ते गे ची,” है लिज़्‍यावराए यापाँ साचो ज़ लिन्‍या याथ·रैज़्याव ताकिन गेलाई मनी या माँःती ख्रीसए उमींर ज़ लिन्‍या ओथ·रैसिरक।
2CO 10:8 ङा निताव ङापाँए प्रभुए ओयाँव हकनी सघ्योःसिद ङापाँज़्‍याव मिताव ओरैंःदी ब ननी ङालाज माहुइ, जेलाई बले·न्‍याए जूँनी माःक, जेलाई पाथ पारैन्‍याए जूँनी ची।
2CO 10:9 ङासर्ज़्‍याव पाँर ब जेलाई हाप हाप ख्यान्‍याए जूँनी माःक।
2CO 10:10 हैदी ब जेल्‍योङाव ख्वा ख्वाराए है लिन्‍या लेर, “ओचिथीरानी ते बनै छे छे ङम्‍सिउ कर्रा उलिज़्‍याव मिताव रैंःज़्‍या, खाली गेङ़ाक ते त्‍यात्‍या तितिव काम मालागिउ मिताव रैंःज़्‍या।”
2CO 10:11 निताव पाँज़्‍यावराए आव ब सैंद ओनैरक, गे आनी गेचिथील किताव गेपरींज़्‍या, नङ हुद गेय़ेन ब हिताव ज़ तारिज़्‍या।
2CO 10:12 खाली ख्रीसए ओपाँ सैंन्‍यात ‘गेकिन सु ज़ माले’ है लिज़्‍यावरास ते गे इताव कान्‍ल ज़ मागनिसिउर नाः घ्योःवरास गेमादाँजिसिधुइ! निताव याक्‍याँए याक्‍याँलाई गोइँद बा बा सोगोइसिज़्‍यावर ते झन काता ज़ मासैंन्‍यार ताज़्‍यार।
2CO 10:13 गे ते परमेस्‍वरए ओयासिउ गोइँकिन आगल्‍या ससैद ब गेमापाँए, सघ्योःसिद ब गेमापाँए। बुरू परमेस्‍वरए ओयासिउ गोइँ भरिल जे ब जेलिज़्‍या।
2CO 10:14 नो जेल्‍योङाव गेदोव य़ेन परमेस्‍वरए ओयासिउ गोइँकिन आगल्‍या माले। जेल्‍योङाव ख्रीसए ओपाँ सथैवर प़ाइँरानी ङ़ातावर गे ज़ गेल्‍यो।
2CO 10:15 जेल्‍योङाव गेदोव य़ेन परमेस्‍वरए ओगोइँकिन ङ़ाकसै बाद छुतराए याथालिउ पाँलाई तुपैद गेसघ्योःसिज़्‍याव ते माःक। खाली नो जेल्‍योङाव गेदोव य़ेनरानी जे जेयुँर झन ज़ हुप्‍द जेल्‍योनी नो पाँर प़ाइँदा रा·सिद परमेस्‍वरए ओयासिउ गोइँ ब जेनी झन ज़ ओघ्‍योःक लिद जेल्‍योङ आस गेदोज़्या।
2CO 10:16 निताव ओताकिन ची जेकिन होदाङाव पो भरिङ ब ख्रीसए ओपाँ सथैव दैन्‍या गेले। ननी ज़ छुतराए याथालिउलाई गे गेतुपैव मिताव ब तान्‍या माले, परमेस्‍वरए ओयासिउ गोइँकिन सघ्योःसिन्‍या ब तान्‍या गेमाले।
2CO 10:17 है जैद नो धर्मसास्‍त्रलाव सर्सिउ मिताव, “जो सघ्योःसिउ पैंज़्‍याव, प्रभुनी वाज़ ओसघ्योःसिक।”
2CO 10:18 ओलनी केर्घे जैसिज़्‍याव मिँलाई प्रभुए माभैंःए, ओल प्रभुए ओथ·रैव वाज़ ताज़्‍या।
2CO 11:1 यार्ती माल्‍योराए यापाँज़्याव मिताव ङापाँर तखेप सहिद्याव ताके। जेसहिया ज़ लिद ङायुँ हुबो ज़ लिज़्‍या।
2CO 11:2 किताव जेल्‍योदा परमेस्‍वरए उयुँ थू ओताज़्‍याव, ङा ङायुँ मनी हिताव ज़ ताज़्‍या। तोबो ल़ुज़ालाई ज़िम्‍ज़ात ज़ ऩिद यानैज़्‍याव मिताव ङा मनी जेलाई ख्रीसए उमिनत थामिद छैंवर जैद ख्रीसए तछा लाँन्‍यार जैद ङानैचिए।
2CO 11:3 खाली जेल्‍योङ तोबो पाँत ङायुँ माहुबो लिज़्‍या। किताव छुल्‍या घुलए प़ाइँरानी उस॰कताव मेंमा हब्बालाई उझुकैव, हिताव ज़ जे मनी कसाराक ख्रीसए ओसतत मालिद बलेस्‍द तँदा बार्‍या लिद ङायुँ थू ताद छे·व ज़ ङालिज़्‍या।
2CO 11:4 जेल्‍योङ गेकिन छुतर हुद गे गेसथैचिउ येसुकिन छुत येसुए उजूँनी यासथैचिक, स़ोनो जे जेदैव छैंव पुरूसकिन छुत पुरूस मितावर यारैंःक, स़ोनो परमेस्‍वरए ओपाँकिन छुत पाँर यासथैचिक नो भरी बेहार ज़ तीद बनै जेजम्‍कैज़्‍या!
2CO 11:5 खाली नो जेल्‍योङाव घेप्‍पा जैसिद परमेस्‍वरए ओपाँत सैंन्‍या जैसिज़्‍यावराकिन ङा ज़िम्‍ज़ा ते ङामालिखेहो।
2CO 11:6 पाँन्‍यात चावस ङामापाँधुदी ब सैंन्‍यात ते कान्‍ल ज़ कम्‍ती ङामाले। निताव ङाय़ेन जेल्‍योङ प़ाइँनी ज़ सतैंद नैद ङायाचिए।
2CO 11:7 जेल्‍योङ ङा सज़िम्‍सिद जेलाई सघ्योःन्‍याए जूँनी जेल्‍योनी काता ज़ मारैद परमेस्‍वरए ओपाँ जेलाई अइज़ ङासथैचिउए मादान्‍या ङादोव ते मालिखेहो।
2CO 11:8 हो बेलाक जेलाई पाथ पारैन्‍याए जूँनी छुत मन्‍दलीराए यासघैनाक नोरालाई ङारालुतिउ मिताव ज़ ताके।
2CO 11:9 ङा जेल्‍योङ ङालिज़्‍याव बेलाक ङालाई माथैंव मायो·वल जेलाई सुलाई ज़ ङामाघचैचिए। ङालाई नो माथैंव मायो·वल माकेदोनियानी हुव गेनैं गेमेंराए ज़ सयो·द्याँकेर। है जैद जेलाई नो बेलाक ब ङामाघचैचिए, आकिन ब घचैन्‍या ङामाले।
2CO 11:10 ख्रीसए साचो ओपाँ ङास उलिज़्यावए है ङादाचिज़्या, अखैया भरिल सुए ज़ आव सघ्योःसिद ङापाँवलाई वैंधुन्‍या मालेर।
2CO 11:11 नो जेल्‍योनी काता ज़ ङामारैज़्‍याव जेलाई मया मादाद ते माःक, जेल्‍योदा ङायुँ थू ङाजैज़्‍याव ओल परमेस्‍वरए ज़ सैंज़्‍याव।
2CO 11:12 ङ़ादाकिन ङादोज़्‍याव मिताव माऱास्‍द दाव ज़ नैन्‍या ङाले। हो ताकिन यानी सघ्योःसिद गे मिताव जैसिद लुइसिहुज़्‍यावराए यायेम ओलनी ज़ सूइसिद थाम थुम तान्‍या लेर।
2CO 11:13 नोर अऩाकल ज़ ख्रीसए ओसाची मितावर जैसिद मिँरालाई झुकैद परमेस्‍वरए ओपाँ बले·द पैज़्‍यावर ची।
2CO 11:14 आव पाँत अचम्‍ब ताताच्‍यो। सैतानए मनी मिँरालाई झुकैन्‍याए जूँनी कैताक ज़गैवलाव परमेस्‍वरए ओचाकर्‍या मिताव ब जैसिज़्‍या।
2CO 11:15 है जैद नोए ओबाँदार मनी मिँरालाई झुकैन्‍याए जूँनी परमेस्‍वरए ओय़ेन दाज़्‍याव मितावर याजैसिक धर्मी मितावर रैंःज़्‍यार नो काता अचम्‍बलाव पाँ ज़ माःक। नोराए यासजा यादोव य़ेननी ज़ दैरिज़्‍यार।
2CO 11:16 ङा ङ़ादा है ङादाचिज़्‍याव मिताव, इताव पाँर ङासम्‍जैचिक त्‍यात्‍या तितिव उर्ती माल्‍यो पाँज़्‍याव मिताव जेमाजैनाकिन ताखेहो है ङालिज़्‍या। खाली जो मिताव जेजैनादी ब ङालाई ते थिक ज़, जेलाई सम्‍जैन्‍याए जूँनी आथ पाला तखेप सघ्योःसिद ङापाँरिज़्‍या।
2CO 11:17 आव जेस ङापाँरिज़्‍याव पाँ प्रभुनिकाव हुव ते माःक, तोबो उर्ती माल्‍योए सघ्योःसिद ओपाँज़्‍याव मिताव ज़ ङापाँरिज़्‍या।
2CO 11:18 जेल्‍योङाव पाँज़्‍यावर नितावर यातावए ङा ब जेस नितावनी ज़ ङापाँरिज़्‍या।
2CO 11:19 खाली जे निताव सैंन्‍या जैसिज़्‍यावराए मासैंन्‍याराए यापाँ सहिद जेराएधुज़्‍याव मिताव आव उर्ती माल्‍यो ङापाँ ब सहिद जेयाँया ज़ है ङालिज़्‍या!
2CO 11:20 जे बनै सहिधुन्‍यार जेलिज़्‍या। जेलाई माचाहिउ चलन धूँल किद यानैचिज़्‍याव ब जेसहिज़्‍या, धुतैद याज़्‍युचिज़्‍याव ब जेसहिज़्‍या, सघ्योःसिद जेङ़ैताव याजैसिक ब जेसहिज़्‍या, मुत्‍का यासकैचिक ब जेसहिज़्‍या!
2CO 11:21 ङा निताव य़ेनराल नोराकिन काता ज़ मासैंन्‍या मिताव ङातावए जेङ़ाक भाल्‍सिउ ङाङाःर ब माले। है जैद ङा ब तखेप नोराए मिताव फदवाल्‍या जैसिद उर्ती माल्‍यो ङापाँज़्‍या।
2CO 11:22 नोर, “गे ते हिब्रू जातलावर ज़,” है लिज़्‍यार, ङा मनी हैज़ ङालिज़्‍या। नोर, “गे ते इस्राएलीर,” है लिज़्‍यार, ङा ब इस्राएली ज़। नोर फरी, “गे ते अब्राहामए ओथोलावर,” है लिज़्‍यार, ङा ब होलाव ज़।
2CO 11:23 नोर ख्रीसए ओय़ेन दोज़्‍यावर रो? ङा ते झन होराकिन ब ङादोज़्‍या। आव उर्ती माल्‍यो ङापाँ जेसहिधुया ज़ है ङालिज़्‍या। नोराए काता य़ेन ची दाद नैरदा, नोराकिन ङा ते कुधु य़ेन ज़ दाद ङानै। नोराकिन झ्‍यालखानाल ब कुधु पाला ङालिके, कुधु पाला मागनिसिधुन्‍या रीःसी ऩिन्‍या ब ङाताके, एकतार सिन्या मिताव छ्यासल ब ङालिज़्या।
2CO 11:24 यहूदीराए याकुइनी उनान्‍चालीस खेप पाँच पाला ङारीःसिके।
2CO 11:25 स़ोंखेप झुइए प़ोनाकेर, तखेप लुँए ब झेःनाकेर। ऱीलाव जहाजल ङाबाक ब जहाजर स़ोंखेप फुद तखेप तला तरी भरी ऱील ज़ ङालिके।
2CO 11:26 ङा एकम्‍न्‍या येमत ङाबाक कैताक भलए ओछ्यास ब ताके, कैताक चोरराए छ्यास ब ताके। कैताक हाप हाप ख्याज़्‍याव ङाजातलावराए खार्ल ब ङापरिके, कैताक छुत जातलाव मचिज़्‍यावराए खार्ल ब ङापरिके। नो ङापरिज़्‍याव छ्यास कैताक सहरल ब ताज़्‍या, कैताक साइँसुइँवक ब ताज़्या, कैताक समुन्‍द्रल ब ताज़्या, कैताक ख्रीसए उमिनताव मिताव जैसिज़्यावरास ब ताज़्या।
2CO 11:27 कैताक फरी बनै नाल क़्‍याव च्‍या·सिउ य़ेनर ङासहिज़्‍या। कुधु पाला ऱीर ओव मादैद करे ज़ लिद बिनु क्‍वा ज़्‍यूँःवए भुम भुम गूद ङाससँज़्‍या।
2CO 11:28 नोकिन झन पो पोङाव मन्‍दलीराए जूँनी ङायुँ थू ताद बनै घ्योःव सोगो ङादोज़्‍या।
2CO 11:29 नोर कैताराक परमेस्‍वरए उमिनत माथ॰रिधुद याधलिकिन नो ङा ङाधलिउ मिताव ज़ ताज़्‍या। कैताराक फरी नोर मादान्‍या य़ेनराल यापरिक ङायुँर स्‍यासे तेद वाल्‍सिवा वाल्‍सिवा ङाताज़्‍या।
2CO 11:30 ङा फदवाल्‍या जैसिन्‍या ताकिन ङादैव दुखराए ङालाई यासज़िम्‍नावनी वाज़ ङाजैसिखेहो।
2CO 11:31 आव पाँत धुत ङामापाँए, प्रभु येसुए ओबाबु गेपरमेस्‍वरए ज़ सैंज़्‍याव। नोलाई खर्क ज़ माखेम्‍न्‍या धन्‍याकाव ओताक।
2CO 11:32 ङा दमस्‍कसल ङालिज़्‍याक ब नलाव राजा अरितसए उधूँलाव हाकिमए ङालाई क्‍योःन्‍याए जूँनी सहरनी पुलुस्‍न्‍या येम येमक पाल्‍यार यानैक्‍यो।
2CO 11:33 नो बेलाक ङानैंराए ङालाई तोबो भेल झाःद नो सहरलाई बारिसिउ भार्नाताव झ्यालनी मेल झरैनाकेर। है जैद नो हाकिमए उकुइनी ङापुलुस्के।
2CO 12:1 ङा इताव सघ्योःसिद पाँन्‍या माचाहिउ य़ेन मिताव उलिदी ब आथ पाला ते जेजूँनी ओचाहित ल्‍यो ज़ तारिज़्‍या। है जैद प्रभुए ङाङ़ाक सरैंःद ओयाँव अचम्‍बलाव पाँर तोबो ऩेब्‍लो है ङादाचिज़्‍या।
2CO 12:2 ख्रीसलाई उयुँ हुबो तोबो मिँ चौध बर्स ङ़ादा प़ाइँरानी झेंःव पो स्‍वर्गत परमेस्‍वरनी ज़ छींसिद बाके। खाली ओक्‍याँस ओबाव सैं ओक्‍याँनी पुलुस्‍द ओबाव ओताव ङा ङामासैंए, परमेस्‍वरए वाज़ सैंज़्‍याव।
2CO 12:3 नल सुए खामल ज़ माल्‍यो अचम्‍बलाव पाँर थैक्‍यो। नो स्‍वर्गत बाव ओक्‍याँस ओबाव सैं उपुरूस ओबाव ओताव ङा ङामासैंए, परमेस्‍वरए वाज़ सैंज़्‍याव।
2CO 12:5 नो बाव मिँए उजूँनी वाज़ सघ्योःद ङापाँज़्‍या, ङानी ते ङामासघ्योःसिए। ङा ङाजूँनी ङापाँज़्‍याव ते ज़िम्‍ज़ा ङारैंःवनी वाज़ ङापाँज़्‍या।
2CO 12:6 सघ्योःसिद ङापाँदी ब नो पाँ थ॰रिउ ओतावए उर्ती माल्‍यो ङामाथ॰रिए। खाली मिँराए ङाक्‍याँताव याथैज़्‍याव यारँःज़्‍यावकिन चा·सिउ ताताक लिद आगल्‍या ङामापाँए।
2CO 12:7 नो ङ़ादा ङारँःव पाँर बनै अचम्‍बलावर यातावए, ङालाई नो पाँरानी तासघ्योःसिक लिद परमेस्‍वरए ङाक्‍याँलाई ख्यो·न्‍या तोबो ज़ु मिताव याद नैनाव। ननी ङालाई सैतानए ओचाकर्‍याए दिनकाव ज़ ओख्यो·नाज़्‍याव मिताव लिज़्या।
2CO 12:8 आव दुख ङाक्‍याँनी उपुलुस्‍क लिद प्रभुलाई स़ोंखेप बिन्‍ती ङाचरैःके।
2CO 12:9 खाली प्रभुए ङालाई, “ङायुँ नल्‍योदा य़ाल्द ङासघैनिज़्याव नँस धोल पोगोल ज़ ताज़्‍या। ङा ङासक्ती मिँराए यामादोधुज़्‍यावल ज़ रैंःज़्‍या,” है दाँक्‍यो। है जैद ख्रीसए ओसक्ती ङाक्‍याँत ज़ ओरैंःक लिद ङानी ङामादोधुज़्‍याव पाँलाई सघ्योःन्‍यात ङालाज माहुद खुसीस ङापाँज़्‍या।
2CO 12:10 है जैद ङा ख्रीसए ओय़ेनत ङार्सा ओमालिदी ब, ङालाई बीज्‍यात याजैनादी ब, ङाखिरी पसिद दुखर यायाँदी ब, उस्‍किउ मादैन्‍या मितावराल ङापरिदी ब नो भरिल रेंव ज़ ङालिज़्‍या। निताव ङार्सा माल्‍योल ज़ झन परमेस्‍वरए ओसक्तीर ङाक्‍याँत ज़ रैंःज़्या।
2CO 12:11 ङा निताव फदवाल्‍या ङाजैसिउ जे जेघलैनावनी ज़ सानी। खास नो ङापाँव पाँर थ·रैद ङादोव य़ेन सघ्योःद्याव परिन्‍यार ते जे जेल्‍यो। ङा कान्‍ल ज़ मागनिसिउ मिताव ङालिदी ब नो स॰द सघ्योःसिद ख्रीसए ओहक दैव जैसिज़्‍यावराकिन ङा कान्‍त ज़ ज़िम्‍ज़ा ङामाले।
2CO 12:12 ङा जेल्‍योङ ङालिज़्‍याक ब ख्रीसए साचो ओसाचीए सतैंव परिन्‍या अचम्‍बलाव य़ेनर, अचम्‍बलाव सरेसर बनै धामास ज़ ङादोके।
2CO 12:13 जे पो पोङाव मन्‍दलीराकिन कातार छ्या जेदैव मिताव जेङम्‍सिज़्याव? सैं जेल्‍योनी काता ज़ मारैद ङादोवनी जेयुँ उहुर्ज़्‍याव? हिताव ताकिन काराव ङालाई जेयुँल सिल्‍द जेनैनाज़्‍याव?
2CO 12:14 आथ पालाकाव हुव ङापैंज़्‍यावस जेल्‍योङ हुन्‍या स़ोंखेप तारिके। आथ पाला ब कान्‍त ज़ घचैन्‍या ङामाले। ङा जेस लिज़्‍याव जेसम्‍पतीर ङाखिम्‍हुज़्‍याव माःक, जेलाई वाज़ ङाखिम्‍हुचिज़्‍याव ची। याज़ाराए याबाबु याआमाराए जूँनी मादुप्‍र, याबाबु याआमाराए ची याज़ाराए जूँनी दुप्‍र।
2CO 12:15 है जैद ङा मनी जेजूँनी ङाजिउए मया मादाद ङास लिज़्‍याव भरी खेम्‍द तादी ब ङाक्‍याँलाई सख्यूद तादी ब रेंद ज़ ङादोज़्‍या। जेल्‍योदा ङायुँ थू ताद नाःकाव ङादोवनी जे ङागुन छ्या ज़ जेरँःज़्‍याव रो?
2CO 12:16 हैज़ जेलिकिन्‍दा हैज़ लिज़्‍याचिके, ङा दासर जेल्‍योनी खर्क ज़ कातार रैद ङामाघचैचिए जे ज़ जेसैंज़्‍या। सैं बाथो जैसिद तँनी झुकैद ङाहाइचिज़्‍याव जेथ·रैनाज़्‍याव?
2CO 12:17 नो जेल्‍योदा ङारापरींवर जेलाई हाइद ज़्‍यान्‍याए जूँनी ङारापरींव ते माःक।
2CO 12:18 ङा तीतसलाई ओनैंस जेल्‍योदा ङानिपरींक मनी जेलाई कातार हाइद माज़्‍युखिनिहो। तीतसस गिनयुँ तोबो ज़ लिज़्‍या, तोबो युँनी ज़ गिन्‍दोज़्‍या।
2CO 12:19 ङानैं ङामेंर, आव गेपाँर जे गेपाहा झाःद जेयासिउनी झेंःसिउ गेपैंज़्‍याव ते माःक, आव पाँर परमेस्‍वरए ओङ़ाक ख्रीसस लिद जेलाई पाथ पारैन्‍याए जूँनी गेपाँज़्‍याव ची।
2CO 12:20 खाली ङा जेल्‍योङ ङाहुक ङायुँलाव मितावर जेमाताए सैं लिद जाँ ङाछे·ज़्‍या। हिताव ताकिन ते ङा मनी जेयुँलाव मिताव ङामाताए सैं। जेखार्ल इ़सिन्‍या, अर्काए ओक्‍याँत मी तून्‍या, रिस चोन्‍या, क्‍याँलाई तान्या वाज़ खिम्‍न्‍या, अर्काए उछींनी पाँद उमिन बले·द्यान्‍या, स॰द सघ्‍योःसिन्‍या, सुस ज़ माखैव तान्‍या, नितावर जेले सैं लिन्‍या ङाङम्‍सिज़्या।
2CO 12:21 जेल्‍योङ ङाहुक परमेस्‍वरए ओङ़ाक जेलाई रँःद लाज मोर्नो ङाताए सैं लिन्‍या छ्यास ब लिज़्‍या। नो ङ़ादाकिनकाव जेल्‍योङाव फुरी य़ेन दाद पातर्‍या पातर्नी जैसिज़्यावर, जोत ब यायुँ मानैधुद मादान्‍या य़ेन दावर परमेस्‍वरए ल्‍योदा यायुँर माफर्कैद हिताव ज़ यालिकिन ङासोगोए भुतुक तान्‍या ङाले।
2CO 13:1 ङा जेल्‍योङ ङाहुव आथ पालाकावस स़ोंखेप ताज़्‍या। है जैद आव धर्मसास्‍त्रलाव पाँ ब सैंद नैच्‍यो, “काता गोहाईराल ऩेब्‍लो स़ोम्‍लोए यासाची ओखैकिन नो पाँ ज़ थ॰रिउ ताज़्‍या।”
2CO 13:2 आथ पाला जेल्‍योङ माहुद ज़ ङ़ादाङाव ङाहुकाव है ङादाचिउ मिताव फरी ब है ङादाचिज़्‍या, ङा जेल्‍योक ङाहुक नो ङ़ादाकिनकाव पाप दाज़्‍यावर स़ोनो छींनी दोवरालाई ब हिताव ज़ यालिकिन नोरालाई बाँखी नैन्‍या ङामाले।
2CO 13:3 हो ताकिन ची ङाक्‍याँताव जेखिम्‍ज़्‍याव मिताव ख्रीसए ओसक्तीलाव सरेसर रँःन्‍या जेले। नो बेलाक ज़ ङास लिद पाँज़्‍याव ख्रीस जेल्‍योदा ओर्सा माल्‍यो मिताव माताद, बनै ओर्सा ल्‍यो तान्‍या ले।
2CO 13:4 ख्रीस क्रुसत तङ्गैसिद ओर्सा माल्‍यो मिताव ताद उसिदी ब, ओसोवत परमेस्‍वरए ओसक्तीर दैद बाँचिउ ज़ लिज़्‍या। है जैद गे ख्रीसस लिज़्‍यावर मनी गेर्सा गेमिन माल्‍यो मितावर गेलिदी ब, गे ख्रीसस सिप ज़ परमेस्‍वरए ओसक्तीर दैद जेल्‍योदा गेहक गेचलैरिज़्या।
2CO 13:5 जे परमेस्‍वरए ओपाँत जेलिज़्‍याव सैं जेमालिज़्‍याव जे ज़ जाँचिसिउ ताके। निताव जेजाँचिसिक येसु ख्रीस जेस उलिज़्‍याव सैंव परिके। जेमासैंकिन परमेस्‍वरए ओपाँतावर जेमाताए।
2CO 13:6 गेलाई ते ‘परमेस्‍वरए ओपाँत काम लागिउर ज़’ जेथ·रैसिज़्‍याखेहो है गेलिज़्‍या।
2CO 13:7 जेल्‍योङ माचाव य़ेन काता ज़ तापुलुस्‍क लिद परमेस्‍वरलाई पोंखारिउ ज़ गेनैज़्‍या। जेल्‍योङाव गेय़ेन ओफाबिउ घरँःरक लिद गेपोंखारिउ ते माःक, गे सुए याङाः यामील गेमाहुदी ब चाव य़ेन घदोरक लिद ची।
2CO 13:8 गे जो मिताव गेरैंःदी ब परमेस्‍वरए साचो ओपाँलाई गेमाबले·धुइ, किताव लिज़्‍या हितावनी ज़ गेदोज़्‍या।
2CO 13:9 गे सुए याङाः यामील गेमाहुदी ब जे परमेस्‍वरए ओपाँत बनै थ॰रिउर चावर जेताकिन गे खुसी ज़ गेलिज़्‍या। या याल ज़ उसुधारैसिरक लिद जेजूँनी पोंखारिउ ज़ गेनैज़्‍या।
2CO 13:10 आव पाँर ङा ङामाहुद ङ़ादा ज़ सर्द ङापरींज़्‍या। हो ताकिन ची जेल्‍योङ ङाहुक प्रभुए ओयाँव हकरानी जेल्‍योदा कर्रा जैसिउ परिन्‍या माले है ङालिज़्‍या। नो प्रभुए ओयाँव हकर बले·न्‍याए जूँनी माःक, बनैन्‍याए जूँनी ची।
2CO 13:11 ङानैं ङामेंर, प़ाइँरानी छींनीकाव ङापाँ आव ज़ — बलेसोर थिक थाक जैद जेयुँर होलाँ जैच्‍यो। जे भरी प़ाइँ तयुँ जैद खैद लिच्‍यो। हो ताकिन ची गेल्‍योदा उयुँ थू जैद गेयुँर होलाँ जैद्याज़्‍याव परमेस्‍वर जेस ज़ तान्‍या ले।
2CO 13:12 जे जेल मयास जेरो दासिच्‍यो।
2CO 13:13 आङाव परमेस्‍वरए छैंव उमींराए मनी जेरो है दाचिज़्‍यार।
2CO 13:14 जे जेल्‍योदा गेप्रभु येसु ख्रीसए उयुँ ओगराँक, परमेस्‍वरए उयुँ जेल्‍योदा ओताक, गेलाई तोबो जैज़्‍याव छैंव पुरूस ब जेस ओताक।
GAL 1:1 ङा पावल परमेस्‍वरए ओसाची तान्‍या मिँराए ल्‍योनी ङादैव माःक, मिँराए यापरींनाव ब माःक। आव य़ेन ते गेप्रभु येसु ख्रीस स़ोनो ओललाई सिउनी सोचोइज़्‍याव गेबाबु परमेस्‍वरनी ङादैव ची।
GAL 1:2 ङा स़ोनो ङास लिज़्‍याव गेदाज्‍यु भाइरास, जे गलातियालाव मन्‍दलीरालाई आव चिथी परींद गेयाचिज़्‍या।
GAL 1:3 परमेस्‍वर गेबाबु स़ोनो गेप्रभु येसु ख्रीसनी नियुँ गराँद जेयुँ होलाँ जैद ओयाचिरक।
GAL 1:4 परमेस्‍वर गेबाबुए उयुँलाव मिताव य़ेन दान्‍या लिद गेलाई आव पापी जुकनी पले·न्‍याए जूँनी येसु ख्रीसए ओल उजिउ चरैःद्याद गेपापए सजा ओल ज़ घुर्द्यासिक्‍यो।
GAL 1:5 परमेस्‍वरलाई खर्क ज़ माखेम्‍न्‍या ज़गै मगै ओताक। आमेन।
GAL 1:6 ङा जेलाई रँःद बक्‍क ङाताज़्‍या। जे काता घरी ख्रीसए ओदयाल खुल्‍ज़्‍याव परमेस्‍वरलाई ऱास्‍द छुत थारादा जेबाज़्‍याव?
GAL 1:7 खास दाद छुत चाव था काता ज़ माले। खाली ख्वा ख्वाराए ख्रीसए ओपाँलाई बले·व पैंद जेलाई आदानी होदा जैचिज़्‍यार।
GAL 1:8 निताव गेसथैचिधुव चाव थाकिन जेलाई छुत पाँ सथैज़्‍यावलाई, गे तादी ब, स्‍वर्गनी हुव चाकर्‍या तादी ब, जो तादी ब, नोलाई परमेस्‍वरए ओसराप ओलागिस्‍क।
GAL 1:9 ङ़ादाकिनकाव है गेदाचिज़्‍याव मिताव फरी ब है ङादाचिज़्‍या, जेदैव चाव थाकिन जेलाई तँनी सथैज़्‍यावलाई परमेस्‍वरए ओसराप ओलागिस्क।
GAL 1:10 इताव ङापाँए मिँरालाई सभैंःन्‍याए जूँनी ङापाँज़्‍याव सैं परमेस्‍वरए उजूँनी ङापाँज़्‍याव? आःपै ङा मिँरास सर्‍या पुगिन्‍याए जूँनी ङादोज़्‍याव ताकिन ख्रीसए ओय़ेन दान्‍या ङामाजैसिखेहो।
GAL 1:11 ङा जेलाई है ङादाचिज़्‍या, ङानैं ङामेंर, जेलाई ङासथैचिउ चाव था भरी मिँए युँ स्‍यानी हुव पाँ माःक।
GAL 1:12 नो पाँ मिँराए याल्‍योनी ङादैव ब माःक, मिँरानी ङासिऊसिउ ब माःक। येसु ख्रीसए ओल ज़ सतैंद ओयाँवनी ङादैव ची।
GAL 1:13 ङा ङ़ादाकिन यहूदी धर्मल ङालिज़्‍याकाव ङादोव य़ेन भरी जे ब थैद जेनैज़्‍याखेहो। परमेस्‍वरए ओमन्दलीलाई उमिन सम़ैद्यान्‍याए जूँनी याखिरी पसिद क्‍योःए क्‍योःए बनै हत्‍या ङाराएज़्‍याव।
GAL 1:14 ङासाखा पुर्खाराए यादोहुव चलनल उपुर्काव यहूदी ङासवानीराकिन बनै उदिम ङादोवए नो धर्मल उपुर्कावराकिन हुप्‍धारी ब ङाताके।
GAL 1:15 खाली ङा निताव मिँलाई ब परमेस्‍वरए ङाल्‍योदा उयुँ य़ाल्‍द ङामाजर्मिद ज़ ओय़ेन दान्‍याए जूँनी खतैद ओनैनाज़्‍याव ओल्‍यो।
GAL 1:16 ओल ज़ ङानी छुत जातलाव मिँरालाई ओपाँ घरासथैवक लिद ओज़ालाई ङाक्‍याँत सतैंद्यान्‍या युँ दोक्‍यो। हाःत ज़ सुस ज़ मापाँसिद,
GAL 1:17 ङाकिन ङ़ादाङाव लिज़्‍याव येसुए ओसाचीरास दैसिना यरूसलेमदा माबाद अरब देसदा ङाबाके। छींनी फरी दमस्‍कस सहरल ज़ ओल्‍द ङाहुके।
GAL 1:18 स़ोंरिम ङातावत वाज़ बल्‍ल पत्रुसस सरेस्‍सिन्‍याए जूँनी यरूसलेमल बाद ओलस पन्‍ध्र दिन ङालिके।
GAL 1:19 प्रभुए छुत ओसाचीरास सुस ज़ ङामादैसिए, प्रभुए ओभाइ याकूबस वाज़ गिन्‍दैसिके।
GAL 1:20 ङा आव जेलाई सर्द ङायाचिउ पाँ भरी साचो ज़ लिज़्‍या, धुत माःक, परमेस्‍वर साची लिज़्‍या।
GAL 1:21 होकिन छींनी सिरिया स़ोनो किलिकिया खन्‍द जीदा ब ङाबाके।
GAL 1:22 हाः बेलाक पै यहूदिया खन्‍दलाव ख्रीसए उमिनताव मन्‍दलीराए ङालाई यामारँःनाताव।
GAL 1:23 नो परमेस्‍वरए ओपाँत यायुँ हुबोराए, “ङ़ादाकिन गेखिरी पसिद परमेस्‍वरए ओपाँ खेमो पैंज़्‍याव पावलए आज्‍याल ते ओल ज़ परमेस्‍वरए ओपाँ यासथैज़्‍याव दी,” लिन्‍या वाज़ याथैज़्‍याव।
GAL 1:24 नो पाँर थैद ङाजूँनी परमेस्‍वरलाई धन्‍याबाद याचरैःज़्‍याव।
GAL 2:1 ङा बल्‍ल चौध बर्स छींनी ङास बारनाबास स़ोनो तीतसनिलाई लाँद फरी यरूसलेमल ङाबाके।
GAL 2:2 नो ङाबाव ओल परमेस्‍वरए सतैंद ओयाँवनी ज़। होङ बाद नो छुत जातलावरालाई ङारासथैज़्‍याव परमेस्‍वरए ओपाँ ‘सिप्यानी ङारासथैज़्‍याव सैं बिप्‍यानी ङारासथैज़्‍याव?’ लिद नलाव मन्‍दलीलाव घेप्‍पाराए ल्‍योक अलगज़ा बाद ङाय़ेन भरी सतैंद ङाराएके।
GAL 2:3 नोराए मनी ङाय़ेनर भैंःद ङास बाव तीतसलाई छुत जातलाव ओतादी ब क्‍याल्‍न्‍या सरेस जैन्‍या कर मालैकेर।
GAL 2:4 खाली हो बेलाक नो दुप्‍सिद यालिज़्यावल तोबो ऩेब्‍लो ख्रीसए उमिनताव मिताव जैसिद, गेखार्ल पसिद साँना हुवर ब यालिज़्‍याव। नोराए गेलाई येसु ख्रीसए पला·द ओऱास्‍सिउनी फरी बाँदा मिताव जैव यापैंज़्‍याव।
GAL 2:5 गे फरी जेस लिज़्‍याव ख्रीसए साचो ओपाँ बले·र्‍या लिद नोराए यापाँ तोबो ब भैंःद गेमाराएके।
GAL 2:6 परमेस्‍वरए ओपाँताव घेप्‍पा मिन दैवराए ङा ङारासथैव परमेस्‍वरए ओपाँकिन छुत काता पाँ ज़ माचा·र। तान्‍या ते नोर जो मिताव यातादी ब ङालाई मतलब माले, परमेस्‍वए मिँ रँःद मादोव।
GAL 2:7 बुरू नोराए, किताव पत्रुसए यहूदीरालाई परमेस्‍वरए ओपाँ सथैन्‍या हक ओदैव याथ·रैव, हिताव ज़ ङालाई ब छुत जातलावरालाई परमेस्‍वरए ओपाँ सथैन्‍या हक ङादैव थ·रैनाकेर।
GAL 2:8 किताव परमेस्‍वरए ओल ओसक्तीनी पत्रुसलाई यहूदीरालाई ओपाँ सथैन्‍या ओसाची ओजैव, हिताव ज़ ङालाई ब ओल ओसक्तीनी छुत जातलावरालाई ओपाँ सथैन्‍या ओसाची जैनाक्‍यो।
GAL 2:9 आव य़ेनत परमेस्‍वरए ओअसिक ङादैव यासरेसोए परमेस्‍वरए ओपाँताव यामिन थासोर याकूब, पत्रुस स़ोनो यूहन्‍नाराए गिनलाई बारनाबासस यास सम समकाव य़ेनल गनिसिन्‍केर। है जैद गिनलाई छुत जातलावराए ल्‍योदा बान्‍या जैसिन्‍केर, या यहूदीराए ल्‍योदा बान्‍या थ·रैकेर।
GAL 2:10 नोराए गिनलाई तोबो पाँ वाज़ है दासिन्‍केर, नो यासकाव माथैंव मायो·वरालाई चिऊन्‍या। ङा ब नो पाँत खुसी ज़ ङाताके।
GAL 2:11 छींनी पत्रुस एन्‍तिओखियाल उलिज़्‍याक नोए मिँराए ङ़ाक ऩेय़ेन ओदोवए ओपाहा झाःद ङाएके।
GAL 2:12 नल पत्रुसए ङ़ादा याकूबए ओल्‍योङाव मिँर यामाहुवा पै छुत जातलाव मिँरास ज़्‍यान्‍यार सिप ज़ उज़्‍युज़्‍याव। खाली पत्रुस क्‍याल्‍न्‍या सरेस जैव पैंज़्यावरास ओछे·ज़्यावए याकूबए ओरापरींव मिँर याहुवत नोरालाई रँःद नो छुत जातलावराकिन जाँ तँदा जैसिद नोरास ज़्‍यान्‍यार ब सिप माज़्‍युक्‍यो।
GAL 2:13 हाःकिन नो सहरलाव परमेस्‍वरए ओपाँत हुव यहूदीराए ब ओल मिताव ज़ ऩेय़ेन दोनाकेर। छींनी झन बारनाबास ब नोराए याय़ेनदा ज़ खैनाके।
GAL 2:14 नोराए ख्रीसए ओपाँ साचोस यामादोज़्‍याव ङारँःवए ङा प़ाइँराए ङ़ाक च्‍याँःसिद पत्रुसलाई है ङादोके, “नँ यहूदी ताद ब यहूदी चलन ऱास्‍द छुत जातलाव मिताव नजैसिके। नँ निताव जैसिउ मिँए फरी कै जैद छुत जातलावरालाई झन यहूदी जैसिउ नरापरींज़्याव?”
GAL 2:15 नोलाई है ङादोवए ओअर्थ आव ज़ — ‘गे जर्मननी ज़ यहूदीर गेलिज़्या, छुत जातलाव मिताव पापीर गेमाले’ है गेलिदी ब,
GAL 2:16 मोसाए ओकानुननी सु ज़ परमेस्‍वरए उयुँलाव तान्‍या माताए, येसु ख्रीसलाई युँ हुप्‍न्‍यानी वाज़ ताज़्‍या लिन्‍या गेसैंज़्या। है जैद गे परमेस्‍वरए ओपाँत हुव यहूदीराए मनी नो पाँ साचो ज़ गेथ·रैवए गे मनी येसु ख्रीसलाई गेयुँ गेसुहुप्‍के।
GAL 2:17 गे ख्रीसनी धर्मी थ॰रिन्‍या धामा दाज़्याव यहूदीरालाई मनी छुत जातलावराए माँःती पापी याथ·रैसिज़्याव ताकिन, ख्रीसए माचाव य़ेन ओदोव रोकी? हिताव ते माःक।
GAL 2:18 बुरू गे फरी नो ङ़ादाङाव मिताव मोसाए ओकानुननी धर्मी जैसिन्‍या गेखिम्‍किन झन ननी ज़ पापीर गेगनिसिज़्‍या।
GAL 2:19 ङा परमेस्‍वरए उयुँलाव मिताव ङाताक लिद, ङालाई सिन्‍या सजाल झाःज़्‍याव मोसाए ओकानुननी ङामिन क्‍याल्‍द ङापुलुस्‍के।
GAL 2:20 है जैद ङा ख्रीसस क्रुसत तङ्गैसिद ओलस ङासिउ मिताव ज़ ताके। हैदी ब ङा ङामासिए, जींदो ज़ ङालिज़्‍या। खाली नो जींदो लिज़्‍याव ङा माःक, नो ङास लिज़्‍याव ख्रीस ज़। अबकिन आव ङाजिउ ङा ङाजूँनी माःक, ङालाई उयुँ नाद उजिउ झाःद्याज़्याव परमेस्‍वरए ओज़ाए उजूँनी ङायुँ हुप्‍द ज़ ङादोज़्या।
GAL 2:21 परमेस्‍वरए उयुँ गराँद, दाद ओयासिउ य़ेनलाई अऩाकलाव ङामाजैए। गे मोसाए ओकानुननी परमेस्‍वरए ओङ़ाक उयुँलाव मिताव गेताज़्‍याव ताकिन गेजूँनी ख्रीस उसिउ अऩाकलाव ज़ ताखेहो।
GAL 3:1 ए काता ज़ मातीधुज़्याव गलातीर, जे ङ़ादा परमेस्‍वरए ओपाँ जेथैक येसु ख्रीस चबनै जेङ़ाक क्रुसत उसिउ मिताव ब जेरँःके। आज्‍याल कै जेताव इताव, काताए ओमोहोनए नै ओजैचिज़्‍याव?
GAL 3:2 जे ङालाई तोबो पाँ है दाँचिके, जे मोसाए ओकानुनलाव य़ेन जेदोवनी छैंव पुरूस जेदैव सैं परमेस्‍वरए ओपाँ थैद जेयुँ जेसुहुबोनी जेदैव?
GAL 3:3 जे कै जैद इताव आः मातीधुन्‍यार जेताव? छैंव पुरूसनी जेयुँल साःरो थालिद जेनैज़्‍यावलाई कै जैद जेसक्तीनी सयो·व जेपैंज़्‍याव?
GAL 3:4 नो आक पैकाव जेक्‍याँताव जेसहिउ भरी अऩाकलाव ओतारिज़्‍याव सैं साचो ज़ उथ॰रिरिज़्‍याव?
GAL 3:5 जेलाई ओल उपुरूस जोरैद्याद जेखार्ल अचम्‍बलाव य़ेनर दोद्याज़्‍याव परमेस्‍वरए जेलाई मोसाए ओकानुन जेदोज़्‍याव रँःद ओदोज़्‍याव सैं ओल ओपाँ थैद जेयुँ जेसुहुबोनी ओदोज़्‍याव?
GAL 3:6 धर्मसास्‍त्रल ब गेपुर्खा अब्राहामए उजूँनी अइ लिद सर्सिउ लिज़्‍या, “परमेस्‍वरलाई उयुँ उसुहुबोनी ज़ परमेस्‍वरए नोलाई धर्मी थ·रैक्‍यो।”
GAL 3:7 ननी ज़ रैंःज़्‍या, जो जोराए परमेस्‍वरलाई यायुँ हुप्‍ज़्‍या, हो होर वाज़ साचो अब्राहामए ओथोर ताज़्‍यार।
GAL 3:8 धर्मसास्‍त्रल परमेस्‍वरए ङ़ादा ज़, ‘छुत जातलावर ब यायुँ यासुहुबोनी ज़ ङायुँलाव मितावर तारिज़्‍यार’ लिन्‍या सैंद अब्राहामलाई अइ लिद सतैंदिक्‍यो, “नँ नयेमनी ज़ प़ाइँ जातलाव मिँराए परमेस्‍वरए ओअसिक दैरिज़्‍यार।”
GAL 3:9 है जैद किताव अब्राहामए उयुँ उसुहुबोनी असिक ओदैव, हिताव ज़ यायुँ सुहुप्‍ज़्‍याव भरिए आज्‍याल ब परमेस्‍वरए ओअसिक दैज़्‍यार।
GAL 3:10 कानुननिकाव येमनी परमेस्‍वरए ल्‍योदा बाव पैंज़्‍यावर ते झन सजा दैरिज़्‍यार। काराव ल्‍यो ताकिन धर्मसास्‍त्रल इताव सर्सिउ लिज़्‍या, “कानुनलाव सर्सिउ य़ेन भरी मासयो·धुज़्‍याव मिँ सजाल परिरिज़्‍या।”
GAL 3:11 परमेस्‍वरए ओङ़ाक कानुनलाव य़ेननी सु ज़ परमेस्‍वरए उयुँलाव मिताव माताधुर। काराव ल्यो ताकिन धर्मसास्‍त्रलाव सर्सिउ मितावनी ज़, “उयुँ हुप्‍द परमेस्‍वरस खैव मिँ वाज़ बाँचिज़्‍या।”
GAL 3:12 कानुनलाव येम ते युँ हुप्‍न्‍यानिकाव येम मिताव माःक। धर्मसास्‍त्रल ब, “कानुनलाव य़ेन माबिरैद दोज़्‍याव मिँ वाज़ बाँचिज़्‍या।”
GAL 3:13 गे गेमासयो·धुज़्‍याव कानुननिकाव दैव परिन्‍या सजाल ओल ख्रीस थाँसिद क्रुसत तङ्गैसिद गेसजा भरी घुर्द नो सजानी पले·सिक्‍यो। धर्मसास्‍त्रलाव सर्सिउ मिताव ज़, “क्रुसत तङ्गैसिद सिज़्‍याव भरी परमेस्‍वरए ओसजा दैवर ज़।”
GAL 3:14 परमेस्‍वरए अब्राहामलाई ओयो असिक छुत जातलाव मिँराए मनी येसु ख्रीसए ओक्‍याँनी ज़ दैज़्यार। ननी ज़ फरी गे ओललाई गेयुँ हुप्‍ज़्याव भरिए परमेस्‍वरए है दाद ओनैसिज़्‍याव छैंव उपुरूस ब गेदैज़्‍या।
GAL 3:15 अ ङानैं ङामेंर, जेलाई गे मिँराए गेचलननी परमेस्‍वरए ओपाँ तोबो पलास्‍द ङायाचिरिज़्‍या। ऩेब्‍लो मिँनी निखार्ल तोबो बाचा नैद, सर्द निसही छाप झाःद निनैकिन नत सुए ज़ माचा·धुर, माघतैधुर।
GAL 3:16 हो मिताव ज़ परमेस्‍वरए अब्राहामलाई ओथोस य़ाका तोबो याद उनिनैज़्याव। धर्मसास्‍त्रलाव नो य़ाका अब्राहामए ओथो भरिरास माःक, तोबोए ओक्‍याँत वाज़ यो·के — नो ख्रीस ज़।
GAL 3:17 नो है ङादाचिज़्‍यावए ओअर्थ आव ज़, नो परमेस्‍वरए अब्राहामस ओनैव बाचाकिन चार सय तीस बर्स छींनी हुव मोसाए ओकानुननी ब नो ङ़ादा ओएधुव य़ाकालाई माख्याव।
GAL 3:18 परमेस्‍वरए नो असिक भरी अब्राहामलाई कानुननी ओयो माःक, य़ाकानी ओयो ची। काराव ल्‍यो ताकिन नो असिक परमेस्‍वरए छींनी कानुननी दैन्‍या ओजैव ताकिन अब्राहामलाई ओएधुव य़ाका अऩाकलाव ज़ तान्‍या ओल्‍यो।
GAL 3:19 जे फरी, “हिताव ताकिन ते परमेस्‍वरए मोसालाई नो कानुन काराव ओयो?” है जेलिज़्‍याखेहो। परमेस्‍वरए नो कानुन मिँराए यापाप सतैंद्यान्‍याए जूँनी अब्राहामए ओथोलाव ख्रीस ओमाहुवा पै वाज़ ओयो। नो कानुन परमेस्‍वरए ओचाकर्‍याराए ल्‍योनी थालिद मोसाए उकुइनी मिँरालाई याएक्‍यो।
GAL 3:20 परमेस्‍वरए अब्राहामलाई ओयो य़ाका ते त्‍यालाए ल्‍योनी माःक, एकसब्‍द्या ज़ ओल परमेस्‍वरए ल्‍योनी ज़ हुके।
GAL 3:21 हैदी ब मोसाए ओकानुन परमेस्‍वरए अब्राहामलाई ओयो य़ाकाकिन तँदा माले। नो कानुनए मिँरालाई परमेस्‍वरस सखैद साःरो युँ जैद ओरायो ताकिन मिँर नो कानुननी परमेस्‍वरए उयुँलाव मितावर ताखेरहो।
GAL 3:22 खाली कानुनए ओय़ेन ते मिँरालाई पापए उधूँल क्‍योःद ओरानैज़्‍याव मिताव सरैंःन्‍या लिज़्‍या। नो पापल क्‍योःसिद लिज़्‍यावरानी जो जोराए येसु ख्रीसलाई यायुँ सुहुप्‍ज़्‍यार, हो होराए ज़ परमेस्‍वरए अब्राहामलाई ओयो य़ाकालाव असिक दैज़्‍यार।
GAL 3:23 हैदी मनी परमेस्‍वरए ख्रीसनिकाव युँ हुप्‍न्‍या येम ओमासतैंवा पै कानुनए गेलाई घिरिद ओनैसिज़्‍याव मिताव गेल्‍यो।
GAL 3:24 है जैद ख्रीसलाई युँ हुप्‍द परमेस्‍वरए उयुँलाव मिताव तान्‍यादा लाँन्‍याए जूँनी कानुनए गेलाई ख्रीसए ल्‍योक ओसारैसिउ मिताव ज़ ताके।
GAL 3:25 है जैद युँ हुप्‍द परमेस्‍वरए उयुँलाव मिताव गेतावए हाःकिन गे नो कानुनए उधूँल गेमाले।
GAL 3:26 है जैद जे प़ाइँ येसु ख्रीसलाई जेयुँ उहुबोए परमेस्‍वरए ओज़ार ज़ जेताके।
GAL 3:27 जे ख्रीसए उमिनत सछैंसिउर परमेस्‍वरए ओङ़ाक ओल ख्रीस मितावर ज़ जेताके।
GAL 3:28 हाःकिन जे यहूदी मायहूदी है लिन्‍या ओमेला ब माले, बाँदा माबाँदा है लिन्‍या ब माले, खेपा मेंमा है लिन्‍या ब माले, प़ाइँ ज़ येसु ख्रीसनी तोबो ज़ जेताके।
GAL 3:29 ख्रीसए उमींर जेतावए जे ब अब्राहामए ओथोलाव य़ाकालाव असिक दैवर ब जेताके।
GAL 4:1 फरी मिँराए गेचलननी तोबो मिसाल झाःद ङायाचिरिज़्‍या। तोबो छोर्‍या ओमाछिप्‍द ज़ ओबाबु उसिकिन नोए ओबताहा ओल ओमाछिपा पै छुतए धानिदिज़्‍याव। नो बताहा छोर्‍याए उमीं ओतादी ब नो धानिदिज़्‍यावए उधूँल लिद ओबाबुए ओय़ेन दाज़्यावरास तोबो मिताव ज़ ताज़्‍या।
GAL 4:3 हिताव ज़ गे ब ङ़ादा मानुवाताव चाल चलनराए धूँल माछिप्‍तावर गेल्‍यो।
GAL 4:4 खाली बेला ओयो·वत परमेस्‍वरए ओज़ालाई परींक्‍यो। तोबो मेंमानी कानुनए उधूँल जर्मिद,
GAL 4:5 गे परमेस्‍वरए ओबताहा दैव ओज़ार तान्‍याए जूँनी कानुनए उधूँल लिज़्यावरालाई गेएः फो·द्याद ऱास्‍सिक्‍यो।
GAL 4:6 गे परमेस्‍वरए ओज़ार गेतावए ओज़ाए उपुरूस गेयुँल झाःद्याद, नो पुरूसए ज़ परमेस्‍वरलाई ‘अब्बा, बाबु’ है ल्‍यो ब परींसिज़्‍याव।
GAL 4:7 हाःकिन गे बाँदाल मागनिसिद, ओज़ार गेगनिसिके। ओज़ार गेतावए ओबताहा दैन्‍यार ब गेताके।
GAL 4:8 खाली जे ङ़ादा परमेस्‍वरलाई मासरेस्‍द देवताराए याबाँदा जेल्‍यो। नोर ते परमेस्‍वर माःक।
GAL 4:9 आज्‍याल ते परमेस्‍वरलाई जेसरेस्‍ज़्‍या, परमेस्‍वरए जेलाई ब सरेस्‍चिज़्‍याव। है जैद जे निताव ताव मिँर कै जैद जेछींदा ओल्‍द माथ॰रिउ ओर्सा माल्‍यो थालनलाव पाँदा ज़ बाव जेपैंज़्‍याव? नितावए ते फरी ब बाँदा ज़ जैसिउ जेपैंके।
GAL 4:10 जे नो कानुननिकाव अऩाकलाव पर्बर, बारर, मैनार स़ोनो बर्सर ब जेमानिज़्‍या दी।
GAL 4:11 जेक्‍याँताव ङादोव य़ेन ते अऩाकलाव ज़ ताए सैं लिद ङायुँ थू ताज़्‍या।
GAL 4:12 अ ङानैं ङामेंर, जेस ङापाँ तोबो लिज़्‍या। ङा कानुन धूँनी हाइसिद जे मिताव मायहूदी ङाजैसिके, जे मनी ङा मिताव जैसिचिके। जे ङालाई माचाव काता ज़ जेमाजैनाए।
GAL 4:13 जे ज़ जेसैंज़्‍या, जेल्‍योङ ङाजोरो हुद ङाथलिउए ङाल्‍योनी परमेस्‍वरए ओपाँ थैव जेदैके।
GAL 4:14 हाः बेलाक ङाबेथा बनै माचाव ओतावए जेलाई दुख ताद ओल्‍यो। हितावत ब जेयुँ जाम्‍द जेसुम्‍नाके। झन ङालाई परमेस्‍वरए ओचाकर्‍या मिताव रँःद येसु ख्रीस उहुव मिताव जेजैनाके।
GAL 4:15 हाः बेलाकाव निताव ङाल्‍योदा ल्‍यो जेमया आज्‍याल कै ओताव? ङा जेसाची ङालिज़्‍या, हो बेलाक ते जेधुकिन जेमी कोला·द ङालाई यान्‍याकावर ब जेल्‍यो।
GAL 4:16 आज्‍याल फरी साचो पाँ सतैंद ङायाचिउए जेसुतुर मिताव जेजैनाव रो?
GAL 4:17 नो जेल्‍योङाव तँनी पैज़्‍यावराए जेलाई याल्‍योदा जैन्‍याए जूँनी बनै उदिम दोज़्‍यार। नो यादोज़्‍याव चावनी माःक, जेलाई ङाल्‍योनी फातैद लाँव यापैंज़्‍याव वाज़ ची।
GAL 4:18 चाव य़ेनत उदिम यादोज़्याव ताकिन ते चाव ज़, खाली ङा जेल्‍योङ ङालिक वाज़ माःक, एकम्‍न्‍या निताव ओताक।
GAL 4:19 अ ज़िम्‍ज़ा ङाज़ार, जे ख्रीसए ओगे चावस जेमारैवा पै किताव ज़ा दैन्‍या मेंमा ओघर्लिज़्‍याव, ङा ब हिताव दुखल ज़ ङालिज़्‍या।
GAL 4:20 ङा जेस जाँवा पै सिप ल्‍यो ङादैकिन ताखेहो है ङालिज़्‍या। हो ताकिन इताव नासो पाँर जेलाई है दाव ब मापरिखेहो। खाली ङा आः तादानी जेस कै जैद पाँन्‍या, ङामासैंए।
GAL 4:21 जे मोसाए ओकानुन धूँल ल्‍यो पैंज़्‍यावराए आव धर्मसास्‍त्रलाव पाँ जेमाथैए रो?
GAL 4:22 नल सर्सिउ लिज़्या, अब्राहामए ओज़ानी ऩेब्‍लो निल्‍यो, तोबो बाँदानी बातनिकाव, तोबो फुर्सुल बातनिकाव।
GAL 4:23 नो बाँदानी बातनिकाव मिँए ओपैंज़्यावनी ज़ जर्मिके, फुर्सुल बातनिकाव फरी परमेस्‍वरए ओयो य़ाकानी ज़ जर्मिके।
GAL 4:24 नो मेंमानी निक्‍याँत ऩेब्लो बाचा रैंःज़्‍या। नो बाँदानी हागार सीनै खागरताव बाचा स्‍यासो लिज़्या। नल लिज़्‍यावर हागार बातनिकाव बाँदा मितावर लिज़्यार।
GAL 4:25 आज्‍यालकाव यहूदी धर्मलाव मिँर ब नो कानुन धूँल यालिज़्‍यावए अरब देसलाव सीनै खागरत हागारस यालिज़्‍याव स्‍यासो ज़ लिज़्‍या।
GAL 4:26 गे स्‍वर्गताव यरूसलेमलाव मिँर ते अब्राहामए ओज्‍या स्‍यासो फुर्सुल बातनिकावर गेलिज़्‍या।
GAL 4:27 धर्मसास्‍त्रल ब इताव सर्सिउ लिज़्‍या, “अ ज़ा मादैन्‍या थारी मेंमा, नयुँ होलाँ जैके। ज़ा दैन्‍या नक्‍याँत मापरिउ, नरेंतए स़ास्‍निके। काराव ल्‍यो ताकिन ओरेस लिज़्‍याव मेंमाए ओज़ाराकिन, नरे माल्‍योए नज़ार कुधु तान्या लेर।”
GAL 4:28 ङानैं ङामेंर, जे इसहाक स्‍यासो परमेस्‍वरए ओय़ाकानिकाव ओज़ार जेताके।
GAL 4:29 किताव ङ़ादा मिँए ओपैंज़्याव मितावनी जर्मिउ इस्‍माएलए परमेस्‍वरए उपुरूसनी जर्मिउ इसहाकलाई ओसोज़्‍याव, आज्‍याल ब हिताव ज़ लिज़्‍या।
GAL 4:30 है जैद धर्मसास्‍त्रल अइ लिद सर्सिउ लिज़्‍या, “नो बाँदानीलाई ओज़ास निखेपैके। नोए बताहा मादैव। फुर्सुल बातनिकावए वाज़ दैरिज़्‍याव।”
GAL 4:31 है जैद ङानैं ङामेंर, गे ब बाँदानीकावए ओज़ार माःक, फुर्सुलनिकावए ओज़ार गेलिज़्‍या।
GAL 5:1 ख्रीसए गेलाई फुर्सुल तावर जैन्‍याए जूँनी कानुनए उधूँनी पले·सिक्‍यो। है जैद जे फुर्सुल ताद जेलिज़्‍यावल थ॰रिद ल्‍यो ताके। फरी ब बाँदा मिताव जैसिन्‍या माःक।
GAL 5:2 ङा पावल जेलाई है ङादाचिज़्‍या, क्‍याल्‍न्‍या सरेस जेजैसिकिन, जेजूँनी ख्रीसए ओय़ेन ज़ माले।
GAL 5:3 फरी ब प़ाइँलाई है ङादाचिज़्‍या, जोए क्‍याल्‍न्‍या सरेस ओजैसिकिन नो मिँलाई मोसाए ओकानुन भरी सयो·न्‍या कर लिज़्‍या।
GAL 5:4 कानुननी परमेस्‍वरए उयुँलाव मिताव जैसिन्‍या ताकिन नो मिँ ख्रीसनी हाइसिद परमेस्‍वरए ओदयानी ब पुलुस्‍ज़्‍या।
GAL 5:5 गे ते ख्रीसलाई गेयुँ हुप्‍द छैंव पुरूस गेदैवनी परमेस्‍वरए ओङ़ाक उयुँलाव मिताव थ॰रिन्‍या गेकींज़्या।
GAL 5:6 है जैद क्‍याल्‍न्‍या सरेस जैसिउ तादी ब, माजैसिउ तादी ब, येसु ख्रीसनी ओलेखा ज़ माले। बुरू युँ थू जैद युँ सुहुप्‍न्‍या वाज़ लिज़्‍या।
GAL 5:7 जे ङ़ादा निताव येमल थिकस जेबाज़्‍याव, नो साचो येमनी सुए ओवैंचिउ?
GAL 5:8 निताव तँदाङाव येम बान्‍या, जेलाई ओल्‍योदा खुलो परमेस्‍वरए ओझाःचिउ ते माःक।
GAL 5:9 नो एकतारकाव गेझाःज़्‍याव आहातीनी सैंच्‍यो, “मुछिसिउ कनेल तकेज़ा सोगोइन्‍या वासः झाःकिन कने भरी सरालिज़्‍याव।”
GAL 5:10 आव है ङादाचिउ भरी जेभैंःया ज़ लिद प्रभुए ल्‍योदा ङायुँ हुबो ज़ लिज़्‍या। जोए जेलाई गरबर जैचिज़्‍याव, होए ओय़ेन भरी ओङ़ैत ज़ हुरिज़्‍या।
GAL 5:11 आव ब सैंच्‍यो, ङानैं ङामेंर, नोराए ङालाई है यादाँज़्‍याव मिताव, क्‍याल्‍न्‍या सरेस माजैसिद माताए लिद यास खैव पाँ ङारासथैज़्‍याव ताकिन नोर ङाखिरी कातानी यापसिरिज़्‍याव, मापसिखेरहो। खाली येसु ख्रीसए क्रुसत उजिउ झाःद ओयासिउनी परमेस्‍वरस गेखैज़्या है ङारादोज़्यावनी यायुँ कोला कोला ताद ङाखिरी पसिज़्यार।
GAL 5:12 जेलाई निताव क्‍याल्‍न्‍या सरेस जैसिउ परींज़्‍यावर बुरू याज़ याक्‍याँलाई ओजरानी याक्‍याल्‍दी ब तान्‍या ले।
GAL 5:13 अ ङानैं ङामेंर, जेलाई परमेस्‍वरए सुए उधूँल ब मानैद फुर्सुल तावर जैन्‍याए जूँनी उखुल्‍चिउ ची। खाली नो फुर्सुल ताद जेमन लागिउदा बान्‍या माःक, बुरू छुतए ल्‍योदा युँ थू जैद समारिसिउ ताके।
GAL 5:14 मोसाए ओकानुनलाव पाँ भरी तोबो पाँत थोम्‍सिज़्‍या। नो पाँ आव ज़, “जेक्‍याँलाई किताव जेसमारिज़्‍या, छुतलाई ब हिताव ज़ समारिउ ताके।”
GAL 5:15 जे इ़सिद हुनी होदा कैसिवा कैसिवा जेजैसिकिन परमेस्‍वरसकाव जेसर्‍यो फ्या·न्‍या ओछ्यास लिज़्‍या।
GAL 5:16 है जैद ङा है ङादाचिज़्‍या, जे छैंव पुरूसनी जेदोकिन मिँनिकाव माछैंव युँ स्‍यानी दान्‍या जेमाले।
GAL 5:17 मिँनिकाव माछैंव युँ स़ोनो छैंव पुरूसनिकाव युँ छुत छुत ज़ ताज़्‍यानी। नोनी निमाखैवए कैताक दोव जेपैंज़्‍याव य़ेन ब जेमादोधुइ।
GAL 5:18 खाली छैंव पुरूसनिकाव युँनी जेदोकिन जे कानुनए उधूँल जेमाले।
GAL 5:19 फरी मिँए माछैंव उयुँनी इताव हुज़्‍या — पातर्‍या पातर्नी जैसिन्‍या, युँ माजामो य़ेन दान्‍या, जोत ब युँ मानैधुन्‍या,
GAL 5:20 अङग्‍या पुजा दान्‍या, मन्‍तर तन्‍तर दान्‍या, माखैव तान्‍या, इ़सिन्‍या, मी तून्‍या, रिस चोन्‍या, क्‍याँलाई तान्‍या वाज़ खिम्‍न्‍या, फातैन्‍या, अर्काए उउपर्त तँदा जैसिन्‍या,
GAL 5:21 लोभ दान्‍या, मँःए मँःए रलामातल बाऱिन्‍या, नो स्‍यासो छुत माचाव य़ेनर ब हुज़्‍या। ङ़ादाकिन है दाद ङासम्‍जैचिज़्‍याव मिताव फरी ब है ङादाचिज़्‍या, निताव य़ेन दाज़्‍याव भरी परमेस्‍वरए ओराज्‍याल पसिधुन्‍या मालेर।
GAL 5:22 फरी परमेस्‍वरए उपुरूस ल्‍यो मिँए उयुँनी ते इताव य़ेनर हुज़्‍या — प़ाइँए ल्‍योदा युँ थू जैन्‍या, रेंद लिन्‍या, युँ होलाँ तान्‍या, सहिधुन्‍या, युँ नान्‍या, युँ य़ाल्‍न्‍या, सतस लिन्‍या,
GAL 5:23 प़ाइँत मुइलिउ तान्‍या स़ोनो थ॰रिउ युँ जैन्‍या। आव य़ेन भरी जो कानुननी तादी ब तँदा माले।
GAL 5:24 येसु ख्रीसए उमींर ते ङ़ादाङाव माछैंव यायुँलाई मादान्‍या यादोव याय़ेनरास ज़ क्रुसत तङ्गैद याख्यानैव मिताव ज़ लिज़्‍या।
GAL 5:25 गे छैंव पुरूसनिकावर गेतावए, दान्‍या भरी छैंव पुरूसनी ज़ दाव ताके।
GAL 5:26 गेखार्ल सघ्योःसिन्‍या, झेंःस्‍या जैसिन्‍या, छुतलाई सोन्‍या सु ज़ ताताक।
GAL 6:1 अ ङानैं ङामेंर, जेनी सुवाराए मादान्‍या य़ेन ओदोज़्‍याव जेरँःकिन, जे परमेस्‍वरए ओपाँताव थ॰रिउराए नो मिँलाई चावस सुधारैव ताके। खाली नोलाई जेसुधारैक कसाराक नो उपरिउल गे ब गेपरिया लिद जे जेक्‍याँलाई ब जोगोइव ताके।
GAL 6:2 जेस सुवार दुखराल परिन्‍या मितावर जेरारँःकिन, जे जे समारिसिउ ताके। ख्रीसए ओकानुन ननी ज़ यो·ज़्‍या।
GAL 6:3 जोए, “प़ाइँ ङा ज़ ङासैंज़्‍या, ङालाई सुए ज़ है दाव मापरिए” लिद ओसघ्योःसिकिन निताव मिँ ओलनी ज़ झुकिके।
GAL 6:4 जे ब जेय़ेन अर्काए ओगल्‍तीस गोइँन्‍या माःक। बुरू जेयुँलाव जेय़ेन जे ज़ थ·रैव ताके। हुनी वाज़ ‘ङाय़ेन आःकाव उलिज़्‍याव ओल्‍यो’ लिन्‍या सैंन्‍या जेले।
GAL 6:5 परमेस्‍वरए ओङ़ाक ब सु सु याय़ेन सु सु यागोइँ ज़ लिज़्‍या।
GAL 6:6 परमेस्‍वरए ओपाँ सिऊसिज़्‍याव मिँए सिऊज़्‍यावलाई ओसघैवक।
GAL 6:7 जे ताझुकिच्‍यो। जो य़ेननी तादी ब परमेस्‍वरलाई सुए ज़ माछकैसिधुइ। गे जो गेरूपिज़्‍या, हो ज़ सिम्‍न्‍या गेले।
GAL 6:8 जोए माछैंव उयुँनी हुव वाज़ दोज़्‍याव, नोए हो य़ेननी ज़ फ्या·न्‍या म़ान्‍यालाव सजा दैरिज़्‍याव। फरी जोए छैंव पुरूसनी हुव य़ेन दोज़्‍याव, होए नो उपुरूसनी ज़ अजम्‍बरी जुनी दैरिज़्‍याव।
GAL 6:9 चाव य़ेन दान्‍यात जेर्च्‍या तासैःच्‍यो। जेर्च्‍या मासैःद दाव य़ेन ज़ जेदोकिन गोइँसिउ बेलाक ओसै दैन्‍या जेले।
GAL 6:10 छुतराए जूँनी चाव य़ेन दान्‍या मौका गेदैक नो मौका ज़ छुपिउ ताके। निताव य़ेन दान्‍या फरी जाँकोसै परमेस्‍वरए ल्‍योदा यायुँ हुबो गेनैं गेमेंराए ल्‍योदा दाव परिके।
GAL 6:11 आकिन मेदाङाव भरी ङा ङाकुइए ङासरो ज़। घेप्‍पा घेप्‍पा ङाहरपनी ज़ सरेस्‍न्‍या जेले।
GAL 6:12 जेलाई क्‍याल्‍न्‍या सरेस जैसिउ परींज़्‍यावराए यहूदीराए ङ़ाक अइज़ चाव सरैंःसिन्‍याए जूँनी वाज़ दोज़्‍यार। नोर ख्रीसए क्रुसत उजिउ झाःद ओयासिउ है लिन्‍या पाँत यहूदीर गेखिरी पसिर्‍या लिद छे·ज़्यार।
GAL 6:13 नो क्‍याल्‍न्‍या सरेस पैज़्‍यावर या ते झन मोसाए ओकानुन ब मादोर। अइज़ जेलाई क्‍याल्‍न्‍या सरेस जैसिउ परींद यहूदीराए ङ़ाक सघ्योःसिउ पैंज़्‍यार।
GAL 6:14 खाली ङा ते गेप्रभु येसु ख्रीसए क्रुसत उजिउ झाःद ओयासिउ पाँकिन छुत पाँ ङासघ्योःज़्‍याव तारैंःक है ङालिज़्‍या। नो क्रुसताव दाद ओयासिउ य़ेननी आव मानुवाताव पाँ भरी ङा ङाक्‍याँत उसिउ मिताव ज़ ताके, ङा ब आव मानुवाताव पाँनी ङासिधुव मिताव ज़ ताके।
GAL 6:15 है जैद परमेस्‍वरए ओङ़ाक क्‍याल्‍न्‍या सरेस जैसिउ माजैसिउए ओलेखा माले, साःरो तान्‍याए ओलेखा वाज़ लिज़्‍या।
GAL 6:16 निताव साःरो येमनी बाज़्‍यावर साचो इस्राएलीर, परमेस्‍वरए ओथोर ज़ ताज़्‍यार। नोरालाई परमेस्‍वरए उयुँ ओगराँक, यायुँ ब होलाँ जैद ओरायोक।
GAL 6:17 अबकिन जे सुए ज़ ङार्च्‍या सैःद तायाँच्‍यो। निताव क्‍याँताव सरेसनी पाँन्‍या ताकिन ते येसुए ओय़ेनताव ङादैव दुखरानी ङाक्‍याँ भरित पात्‍यार ज़ लिज़्‍यार।
GAL 6:18 अ ङानैं ङामेंर, गेप्रभु येसु ख्रीसए गराँव उयुँ जेस ओताक। आमेन।
EPH 1:1 ङा पावल, परमेस्‍वरए ओखतैनाव येसु ख्रीसए ओसाचीए ङाल्‍योनी जे एफिससलाव येसु ख्रीसए ओसतत लिज़्‍याव, परमेस्‍वरए छैंव उमींरालाई आव चिथी परींद ङायाचिज़्‍या।
EPH 1:2 परमेस्‍वर गेबाबु स़ोनो गेप्रभु येसु ख्रीसनी जेल्‍योदा नियुँ गराँद जेयुँ होलाँ जैद ओयाचिरक।
EPH 1:3 गेप्रभु येसु ख्रीसए ओबाबु परमेस्‍वरए उमिन बनै ओघ्‍योःक। नोए गेलाई ओल ओज़ा येसु ख्रीसए ओक्‍याँत ज़ स्‍वर्गताव लिज़्‍याव अचम्‍बलाव असिकर गेपुरूसए उजूँनी ज़ जोरैद नैद्यासिउ।
EPH 1:4 ङ़ादा ओल ज़ गेलाई, ‘ङाङ़ाक याखत माल्‍यो छैंवर घतारक’ लिद नाम नम ओमाजैद ज़ ओज़ा येसु ख्रीसए ओदोव य़ेननी ज़ छाँतिद ओनैसिज़्‍याव।
EPH 1:5 निताव छाँतिद ओनैसिज़्‍यावराए गेल्‍योदा उयुँ थू जैद येसु ख्रीसनी ओज़ार जैन्‍या ब थ·रैद ओनैसिज़्‍याव। नो ओल ओपैंज़्‍याव मितावनी ज़।
EPH 1:6 परमेस्‍वरए गेल्‍योदा उयुँ गराँद तोबोका तोबो उयुँलाव ओज़ाए ओक्‍याँत निताव असिकर अइज़ जोरैद ओयासिउए उमिन ब सघ्योःद गेएज़्‍या।
EPH 1:7 नो ओज़ा येसु ख्रीसए उजिउ झाःद उझी सोभोद ओयासिउए गे गेदोव पापए सजा भरी फो·द्यासिक्‍यो, परमेस्‍वरए ओकानुन गेबले·व ब क्याल्‍द्यासिक्‍यो। परमेस्‍वरए नाःल्‍दिउ य़ेन दाद ओयासिउ ते घ्योःव ओदयानी ज़।
EPH 1:8 नो ओदया गेक्‍याँत थुद्याद अचम्‍बलाव उबुद्धी ब धोल पोगोल ज़ याद नैसिउ।
EPH 1:9 नो ओज़ानी ज़ अचम्‍बलाव ओगोइँनी ओल है उलिज़्‍याव मितावनी ज़ ङ़ादाकिनकाव कप्‍सिउ सुए ज़ यामासैंताव य़ेनर दाव ओपैंज़्‍याव ब सतैंद्यासिक्‍यो।
EPH 1:10 नो आज्‍याल सतैंद ओयासिउ ओय़ेनर आवर ज़ — ओल गोइँद ओनैज़्‍याव बेला ओयो·वत ज़ ओराजैव भरी, नामलावर तादी ब, नमतावर तादी ब, ओज़ा येसु ख्रीसए उधूँल याजैक्‍यो।
EPH 1:11 ओल ओबताहा दैन्‍या उमींर जैन्‍याए जूँनी गेलाई ख्रीसए ल्‍योनी ङ़ादाकिन ज़ छाँतिद ओनैसिज़्याव। परमेस्‍वरए ओय़ेन भरी ङ़ादा ओल उयुँल थ·रैद ओदोज़्‍यावए गे हुनी ज़ ताद गेले।
EPH 1:12 परमेस्‍वरए फरी गे ङ़ादाकिन ज़ ख्रीसलाई गेयुँ हुप्‍द ओक्‍याँत ख्यासिद लिज़्‍यावरालाई उमिन सघ्योःद्यन्‍याए जूँनी खतैद नैसिउ।
EPH 1:13 जे ब ख्रीसनिकाव अजम्‍बरी जुनी यान्‍या साचो ओथा थैद जेयुँर सुहुप्‍द ओपाँत जेहुके। ननी ज़ जे परमेस्‍वरए ओय़ाकालाव छैंव पुरूस दैद ओज़ाए उमिनत थामिद नैसिउर जेताके।
EPH 1:14 नो ओयासिउ पुरूस गे उमींरालाई चबनै फुर्सुल जैद ओराएरिज़्‍याव बताहा ओमायासिवा पै, ‘ङाज़ारालाई अजम्‍बरी जुनी यान्‍या ङाले’ लिद बैना याद नैसिउ। ननी ब ‘ङामिन सघ्योःद घयाँरक’ लिद परमेस्‍वरए निताव य़ेन दोद्यासिक्यो।
EPH 1:15 जे, गेप्रभु येसु ख्रीसलाई जेयुँ हुप्‍द परमेस्‍वरए छैंव उमींराए ल्‍योदा जेयुँ थू जैद नोरास खैद जेलिज़्‍या दी लिन्‍या ङाथैक,
EPH 1:16 जेजूँनी परमेस्‍वरलाई ङापोंखारिउ पती धन्‍याबाद चरैःव ज़ ङानैज़्‍या।
EPH 1:17 गेप्रभु येसु ख्रीसलाई परींज़्‍याव ज़गै मगैव परमेस्‍वर गेबाबुए ओललाई सरेस्‍धुन्‍या ओसक्तीर, ओल उबुद्धीर ब ओयाचिउक लिद ङापोंखारिज़्या।
EPH 1:18 स़ोनो परमेस्‍वरए उखुल्‍चिज़्‍याव अजम्‍बरी जुनी आः चाव उलिज़्‍याव ओल्‍यो लिन्‍या जेयुँल ज़ थ·रैधुन्‍यार ओतारक लिद ब ङापोंखारिज़्या। गे छैंव उमींरालाई बनै अचम्‍बलाव युँ होलाँ दाव पाँर थ·रैधुन्‍यार ब ओजैचिउक।
EPH 1:19 झन गे ओललाई गेयुँ हुप्‍ज़्‍यावराए जूँनी दाद ओयासिज़्‍याव ओसक्तीलाव य़ेनर आः चावर ची यालिज़्‍याव ओल्‍यो लिन्‍या थ·रैधुन्‍यार ब ओजैचिउक।
EPH 1:20 नो गेजूँनी दाद ओयासिज़्‍याव ओसक्ती, ख्रीसलाई सिउनी ओसोचोइव ओसक्ती ज़। हो ओसक्तीए ज़ फरी ख्रीसलाई स्‍वर्गताव ओमान ल्‍यो पोल नैक्‍यो।
EPH 1:21 ख्रीस नो पोल आव जुकल तादी ब, हुन्‍या जुकल तादी ब, नाम नमलाव लिज़्‍याव भरिराए याङ़ैताव ज़ ताके। है जैद घेप्‍पा मिन दैवर तादी ब, राजार तादी ब, दै देवतार तादी ब, स्‍वर्गताव चाकर्‍यार तादी ब,
EPH 1:22 परमेस्‍वरए प़ाइँ जात ज़ ओज़ाए उखँ धूँल झाःद ब एक्‍यो, मन्‍दलीए जूँनी ओज़ालाई प़ाइँए ङ़ैताव ब जैक्‍यो।
EPH 1:23 मन्‍दली ख्रीसए ओक्‍याँ ज़। है जैद नाम नमलाव प़ाइँ सयो·ज़्‍याव ख्रीस नो मन्‍दलीनी यो·व ज़ ताज़्या।
EPH 2:1 जे ङ़ादा परमेस्‍वरकिन तँदा ताद मादान्‍या य़ेनर दाद सिउल गनिसिउर जेल्‍यो।
EPH 2:2 हो बेलाक आव मानुवाताव मिँर याबाज़्‍यावदा ज़ जे मनी जेबाज़्‍याव। माचाव पुरूसराए याघेप्‍पाए उधूँल ब जेलिज़्‍याव। नोए परमेस्‍वरकिन तँदा लिज़्‍याव भरिरालाई चलैव ज़ यानैज़्‍याव।
EPH 2:3 गे ब ङ़ादा नोरास लिद जोत ब गेयुँ मानैधुद गेमन लागिउ य़ेनर गेदोज़्‍याव। है जैद गे ब नो उपुर्कावराए माँःती परमेस्‍वरए उरिस चोवर गेल्‍यो।
EPH 2:4 हितावत ब परमेस्‍वरए उयुँ बनै ओगराँवए गे निताव मिँरालाई ब उयुँ नाद गेलाई मया दासिक्‍यो।
EPH 2:5 ओल उयुँ ओगराँवनी ज़ गेलाई निताव पाप दाद सिउल गनिसिउनी हाइद ओज़ा येसु ख्रीसस अजम्‍बरी जुनील बान्‍या जैसिक्‍यो।
EPH 2:6 परमेस्‍वरए गेलाई येसु ख्रीसस सिउनी सोचोइद स्‍वर्गत सिप ज़ राज्‍या चलैन्‍या जैद नैसिउ।
EPH 2:7 आव भरी ते आव जुक ओखेमोत खर्क ज़ माखेम्‍न्‍या ओराज्‍याल ओल उयुँ गराँद ओज़ा येसु ख्रीसए ओक्‍याँत गेल्‍योदा ओदोव मागनिसिधुन्‍या ओदया सरैंःन्‍याए जूँनी ज़।
EPH 2:8 परमेस्‍वरए ल्‍योदा जेयुँ जेसुहुबोए उयुँ गराँद बाँचैद नैचिउ। नो जे जेदोवनी माःक, परमेस्‍वरए अइज़ ओयाचिउ बरदान ची।
EPH 2:9 गे गेदोवनी ताकिन ते सघ्योःसिन्‍या गेल्‍यो।
EPH 2:10 गे ओल उसिर्जैसिउर ज़। नो उसिर्जैसिउ फरी ओज़ा येसु ख्रीसनी ज़। गेलाई उयुँलाव मिताव य़ेन दान्‍याए जूँनी ङ़ादा ज़ थ·रैद ओनैसिज़्‍याव।
EPH 2:11 जे छुत जातलाव मिँर ङ़ादा अछतङ जेल्‍यो लिन्‍या तामेंःच्‍यो। जेलाई यहूदीराए भाःकिन ज़ ‘क्‍याल्‍न्‍या सरेस माजैसिउर’ लिद यासज़िम्‍चिज़्‍याव। खाली नो सरेस ते पाखाताव यहूदी चलन वाज़ लिज़्‍या।
EPH 2:12 हो बेलाक साचो नोराए है यादाचिज़्‍याव मिताव ब जेल्‍यो। जे ङ़ादा ख्रीसकिन अछतङ, इस्राएलीरास ब मागनिसिउर, परमेस्‍वरए ओय़ाकालाव असिकल ब माल्‍योर, आव मानुवात बिनु परमेस्‍वरलावर काताए आस ब माल्‍योर जेल्‍यो।
EPH 2:13 आज्‍याल ते जे येसु ख्रीसस सिप ज़ ताद जेले। जे ङ़ादा परमेस्‍वरकिन तादाङ ल्‍योरालाई येसु ख्रीसए उजिउ झाःद्याद उझी सोभोद ओयाचिउए जेलाई परमेस्‍वरए ल्‍योदा रैद नैचिउ।
EPH 2:14 ख्रीसए गे यहूदी मायहूदीरालाई मासखैद ऩेभा जैज़्‍याव गेखार्लाव पाँलाई खेम्‍द्याद सखैद तोबोल ज़ थोम्‍सिक्‍यो।
EPH 2:15 नो ऩेब्‍लोलाई थोम्‍द गेलाई ओल उमिनताव साःरो तक्‍याँ ज़ जैन्‍याए जूँनी उजिउ झाःद गेलाई मासखैज़्‍यावलाई उमिन सम़ैदिक्‍यो। नो गेलाई मासखैज़्‍याव पाँ पाखाताव मोसाए ओकानुनलाव सर्सिउ यहूदी चलनर ज़।
EPH 2:16 ख्रीस क्रुसत तङ्गैसिद ओल उजिउ झाःद ओयासिउनी मिँ भरिरालाई या याल मासखैज़्‍यावलाई खेम्‍द्याद तोबो ज़ जैद परमेस्‍वरस यासखैज़्‍याव।
EPH 2:17 ओल आव मानुवात हुद गे परमेस्‍वरस नजिक ल्‍यो यहूदीर स़ोनो जे परमेस्‍वरकिन तादाङ ल्‍यो छुत जातरालाई या याल सखैन्‍या पाँर यासथैक्यो।
EPH 2:18 ख्रीसए ल्‍योनी गे ऩेथोए तोबो छैंव पुरूस ज़ दैद परमेस्‍वर गेबाबुए ल्‍योल पसिउ गेदैज़्‍या।
EPH 2:19 है जैद जे आज्‍याल ते परमेस्‍वरकिन तादाङावल गनिसिउर जेमाले। परमेस्‍वरए छैंव उमींरास तोबोल ब गनिसिद जेले, परमेस्‍वरए उझ़िमलावर ब ताद जेले।
EPH 2:20 जे अगमबक्तार स़ोनो ओसाचीराए याथालिउ गज तर्त झाःसिउ मितावर ताद जेले। येसु ख्रीस फरी झ़िम अदैज़्‍याव गजलाव लुँ स्‍यासो लिज़्‍या।
EPH 2:21 झ़िम भरी होए ओतर्त अदिद जे लुँए तर्त लुँ जोरैसिउ मितावर ताद प्रभुए छैंव उझ़िम जेतानाज़्या।
EPH 2:22 ओलस तोबो ताद जे मनी छैंव पुरूसनी परमेस्‍वर लिन्‍या झ़िम जेतानाज़्‍या।
EPH 3:1 है जैद जे छुत जातलाव मिँरालाई येसु ख्रीसए ओपाँ ङासथैचिउनी झ्‍यालखानाल परिद लिज़्याव ङा पावलए जे जेजूँनी पोंखारिउ ज़ ङालिज़्या।
EPH 3:2 जेलाई परमेस्‍वरए याव ओपैंज़्‍याव असिकर सथैन्‍या ङाकुइत याद ओनैनाज़्याव जेसैंज़्‍याखेहो।
EPH 3:3 आकिन यादा जाँ जाँ सर्द ङायाचिउ मिताव परमेस्‍वरए ङ़ादाकिनकाव कप्‍सिउ पाँर सतैंद नैद ओयाँज़्याव।
EPH 3:4 नो पाँर चावस जेचिऊकिन ‘परमेस्‍वरए ख्रीसए ओक्‍याँताव ओदोव य़ेनर पावलए ओसैंज़्याव ची ओल्‍यो’ लिन्‍या थ·रैन्‍या जेले।
EPH 3:5 नो पाँ भरी गेकिन ङ़ादाङाव मिँरालाई आज्‍यालकाव मिताव चावस सतैंसिउ ओमालिज़्‍याव। आज्‍याल ते छैंव पुरूसनी नो पाँर येसु ख्रीसए छैंव ओसाचीर स़ोनो अगमबक्ताराए जूँनी ओपो·स ज़ सरैंःसिउ लिज़्या।
EPH 3:6 नो कप्‍सिउ पाँ आव ज़ — परमेस्‍वरए यहूदीरालाई वाज़ ओरायो य़ाकालाव असिक आज्‍याल ते जे छुत जातलाव मिँराए ब आव गेसथैचिज़्‍याव चाव थानी येसु ख्रीसए ओक्‍याँतिन यहूदीरास सिप ज़ दैन्‍या जेताके। जे नोरास तोबोए ओथोर ताद सिप ज़ परमेस्‍वरए ओराज्‍यालाव बताहा दैन्‍यार ब जेताके।
EPH 3:7 ङा फरी परमेस्‍वरए उयुँ ङाल्‍योदा गराँद ङाक्‍याँताव ओदोव ओसक्तीनी नो पाँ सथैन्‍यात ओसेवा दान्‍या ब ङाताके।
EPH 3:8 परमेस्‍वरए उमीं भरिरानी ङा प़ाइँरानी ज़िम्‍ज़ा कान्‍ल ज़ मागनिसिउ ङाल्‍यो। हैदी ब परमेस्‍वरए नाःल्‍दिउ असिक याद छुत जातलाव मिँरालाई ख्रीसए ओक्‍याँताव अचम्‍बलाव ओपाँर भाःन्‍या जैनाक्‍यो।
EPH 3:9 हो वाज़ माःक, प़ाइँ जैज़्याव परमेस्‍वरए ङ़ादाकिन ज़ आज्‍याल पै कप्‍द ओनैज़्‍याव पाँर इतावनी ज़ दोज़्‍याव लिद प़ाइँ मिँरालाई सतैंद्याव ब ङादैके।
EPH 3:10 गे ओमन्‍दलीए गेक्‍याँताव ओदोव य़ेननी स्‍वर्गताव घेप्‍पार स़ोनो यासक्ती ल्‍योराए परमेस्‍वरए अचम्‍बलाव उबुद्धीर घरँःरक लिद,
EPH 3:11 परमेस्‍वरए ङ़ादा ज़ थ·रैद ओनैज़्‍याव मिताव गेप्रभु येसु ख्रीसनी आव य़ेन दोक्‍यो।
EPH 3:12 अबकिन गे येसु ख्रीसस तोबो ताद ओललाई गेयुँ उहुबोनी ज़ परमेस्‍वरए ओल्‍योदा गेबाक गेलाई सुम्‍सिवा ज़ लिद गेयुँ हुबो ज़ लिज़्‍या।
EPH 3:13 है जैद जेस ङाबिन्‍ती लिज़्या, ङा जेजूँनी दैद ङानैज़्‍याव आव दुखर रँःद जेयुँ तासतेच्‍यो। आव भरी जेलाई तान्‍याए जूँनी ज़ लिज़्या।
EPH 3:14 है जैद ङा परमेस्‍वर गेबाबुए ओङ़ाक ङाघूँदानी फुलुप्‍सिद ङापोंखारिज़्‍या।
EPH 3:15 नो गेबाबुए ल्‍योनी नाम नमलाव ओथोराए यामिन नैसिउ लिज़्या।
EPH 3:16 जेजूँनी ङापोंखारिक, परमेस्‍वरए अचम्‍बलाव ओअसिकनी जेलाई छैंव पुरूस याद जेयुँल थ॰रिउर ओजैचिउक है ङालिज़्‍या।
EPH 3:17 परमेस्‍वरलाई जेयुँ जेसुहुबोनी फरी ख्रीसए जेयुँल बास ब ओदोवक। ननी ज़ नैं मेंरास स़ोनो परमेस्‍वरए ल्‍योदा मया जेदोकिन रामिउ जरा स़ोनो गज मिताव थ॰रिउ तान्‍या जेले।
EPH 3:18 है जैद ख्रीसए ओमया गेल्‍योदा खा ख्यो·व, खा राँव, खा झेंःव, खा उर्जीं ल्‍यो उलिज़्‍याव, हो छैंव उमींरास सिप ज़ घसैंरक लिद ब ङापोंखारिज़्या।
EPH 3:19 नो सुए ज़ यामासैंधुज़्‍याव ओमया सैंद वाज़ परमेस्‍वरए ओगे किताव उलिज़्याव हिताव ज़ जे जेगे ब तान्‍या ले।
EPH 3:20 परमेस्‍वरए गेयुँलाव ओचलैज़्‍याव ओसक्तीनी ओलस गेऩिज़्‍यावकिन स़ोनो गे है गेलिज़्‍यावकिन, झन ज़ कुधु दाद्यासिज़्‍याव।
EPH 3:21 निताव दाद्याज़्यावलाई मन्‍दली स़ोनो येसु ख्रीसए ओक्‍याँत प़िरी प़िरी पै खर्क ज़ माखेम्‍न्‍या ज़गै मगैव ज़ ओताक। आमेन।
EPH 4:1 है जैद ङा गेप्रभुए ओय़ेनए जूँनी झ्‍यालखानाल लिज़्‍याव कैदीए ङाल्‍योनी जेलाई है ङादाचिज़्‍या, जेलाई परमेस्‍वरए कितावनी खुल्‍द ओनैचिज़्‍याव, हितावनी ज़ दाव ताके।
EPH 4:2 मास॰द, तहस लिद, चाव माचाव गाल्‍द जे जेल युँ नैद सहिसिद ल्‍यो ताके।
EPH 4:3 स़ोनो जे जेल खैद परमेस्‍वरए उपुरूसनिकाव ताज़्‍याव तयुँ जैद लिन्‍यादा कलँ ब ल्‍यो ताके।
EPH 4:4 गे भरी तोबो क्‍याँ ज़ ताद, तोबो पुरूस दैद, प़ाइँ तोबो आसदा ज़ खुल्‍सिउ गेलिज़्‍या।
EPH 4:5 प़ाइँए गेप्रभु ब तोबो ज़, गेभैंःव पाँ ब तोबो ज़, गेसछैंसिउ ब तोबोनी ज़।
EPH 4:6 प़ाइँए गेबाबु परमेस्‍वर ब तोबो ज़ लिज़्या। नो प़ाइँए गेङ़ैत, प़ाइँए गेखार्ल, प़ाइँए गेयुँल ब लिज़्‍या।
EPH 4:7 हैदी ब ख्रीसए गे उमींरालाई ओल ओगोइँव मितावनी ज़ ओय़ेन दान्‍यात सु सु गेबरदान याद नैसिउ।
EPH 4:8 धर्मसास्‍त्रल ब अइ लिद सर्सिउ लिज़्‍या, “रोत उपुलुसोत ओराहारैव उसुतुर भरी कैत जैद, ओल उमींरालाई असिकर भाःद याएक्‍यो।”
EPH 4:9 रोत पुलुसोए ओअर्थ आव ज़ — ङ़ादा नामल झरिद नाम जींल मनी पसिउ ज़।
EPH 4:10 नो नामल झरिउ ते स्‍वर्गताव प़ाइँरानी झेंःवत पुलुस्‍द नाम नमलावराए याङ़ैताव ख्रीस ज़।
EPH 4:11 ख्रीसए भाःद ओरायो असिकर आवर ज़ — ओलस ओलस बाऱिउरालाई ओसाचीर याजैक्‍यो। ख्वारालाई फरी अगमबक्तार, ख्वारालाई ओपाँ फींजैन्‍या, ख्वारालाई मन्‍दलीलाव लोम्‍बा य़ेन दान्‍या स़ोनो परमेस्‍वरए ओपाँ सिऊन्‍या याजैक्‍यो।
EPH 4:12 आव बरदानर गे परमेस्‍वरए उमींरालाई ओय़ेन दान्‍यात पाखो जैद मन्‍दलीलाई पाथ पारैन्‍याए जूँनी यासिउ लिज़्‍या।
EPH 4:13 हो ताकिन ची गे युँ हुप्‍न्‍यात स़ोनो परमेस्‍वरए ओज़ा येसु ख्रीसलाई सरेस्‍न्‍यात खैवर तान्‍या गेले, स़ोनो पाखो ताद ओल ख्रीस किताव ओल्‍यो, गे ब हिताव ज़ तान्‍या गेले।
EPH 4:14 गे माछिप्‍ताव ल़ुज़ा बाँज़ा स्‍यासोर लिन्‍या माःक। निताव मिँए आदा होदाङाव पाँर थैद कैताक अऩाकलाव सिर्जैसिउ पाँरादा बाद बले·ज़्‍यावराए ल्‍योनी झुकिद नो मिँ बतासए आदानी होदा ओख्याज़्‍याव पुल स्‍यासो ज़ ताज़्‍या।
EPH 4:15 बुरू गे नैं मेंरास खैद साचो पाँर दाद प़ाइँल ज़ गेप्रभु येसु ख्रीसए ओदोव मिताव गे ब दोनाव ताके। ओल ज़ गेङ़ैताव लिज़्‍या।
EPH 4:16 गे ओक्‍याँर फरी ओक्‍याँत जोरैसिद सु सु गेय़ेन याद ओनैसिज़्‍याव मितावनी ज़ दाद प़ाइँ खैद ख्रीसए उमिनत लिज़्‍याव गेक्‍याँ छिप्‍द पाखो गेताज़्‍या।
EPH 4:17 है जैद ङा गेप्रभुए उमिननी है ङादाचिज़्‍याव पाँ चावस थैच्‍यो, जे परमेस्‍वरए ओपाँ मासैंज़्‍यावराए माँःती अऩाकलाव पाँरादा य़ेनरादा फरी ताबाच्‍यो।
EPH 4:18 नो अऩाकलाव य़ेन दाज़्‍यावर ते यायुँनी काता ज़ माहुवर परमेस्‍वरकिन तँदाङावर ताद परमेस्‍वरए ओल्‍योनिकाव जिउँनील मागनिसिउर ज़ ताज़्‍यार। है जैद काता ज़ मासैंन्‍यार, यायुँ बनै खावर,
EPH 4:19 यालाज माल्‍योर यातावए, नोर युँ माजामो य़ेन दान्‍यादा याजिउ च्‍यो च्‍यो झाःद प़ाइँत ज़ लोभ दोज़्‍यार, प़ाइँत ज़ फुरी य़ेन ब दोज़्‍यार।
EPH 4:20 जे ते ख्रीसए ओय़ेन नितावनी जेपैसिउ माःक।
EPH 4:21 परमेस्‍वरए ओपाँ जेथैक, येसु ख्रीसनिकाव साचो पाँ इताव ची ओल्‍यो लिन्‍या जेसैंखेहो।
EPH 4:22 ङ़ादाङाव जेयुँए मादान्‍या वाज़ खिम्‍द ओबले·चिज़्‍याव। आकिन ते नो मादान्‍या जेदोज़्याव य़ेनर ऱास्‍द,
EPH 4:23 साःरो युँ रैव ताके।
EPH 4:24 नो साःरो युँ ते छैंव सतलाव य़ेन दान्‍यात ओल परमेस्‍वरए ओगेनी ज़ जैसिउ लिज़्‍या।
EPH 4:25 है जैद धुत पाँ भरी ऱास्‍द छुतरास साचो पाँ वाज़ पाँव ताके, काराव ल्‍यो ताकिन गे प़ाइँ तक्‍याँ ज़।
EPH 4:26 कातारात जेरिस ओचोकिन मादान्‍या य़ेन तादोच्‍यो। नो जेरिस हो छ्याम ज़ उसिक।
EPH 4:27 जो य़ेनल तादी ब सैतानलाई येम ताएच्‍यो।
EPH 4:28 कुज़्‍याव मिँ फरी ताकुक। बुरू उकुइए साचो य़ेन दाद माथैंव मायो·वलाई ओयोक।
EPH 4:29 कोभा पाँर जेयाःनी ताहुक। बुरू थैज़्यावरालाई तान्‍या चाव पाँ वाज़ पाँव ताके।
EPH 4:30 परमेस्‍वरए छैंव उपुरूसए उयुँ सघर्द ताएच्‍यो। नो पुरूसनी ज़ परमेस्‍वरए गेलाई फाल्‍न्‍या छ्याम घबाँचिरक लिद थामिद नैसिउ।
EPH 4:31 जे जेल मासखैज़्‍याव युँ, रिस चोन्‍या, युँल नैन्‍या, थल्‍न्‍या, अर्काए उमिन बले·न्‍या, स़ोनो युँनी कुबातैं हुज़्‍याव भरी प्‍याःपी जैद ख्याव ताके।
EPH 4:32 बुरू किताव परमेस्‍वरए येसु ख्रीसए ओक्‍याँत मादान्‍या जेदोव ऱास्‍द ओयाचिउ, जे ब छुतलाई जेयुँ नाद जेउपर्त मादान्‍या ओदोव ऱासो ताके।
EPH 5:1 है जैद जे परमेस्‍वरए उयुँलाव ओज़ार जेतावए ओल ओदोज़्‍याव य़ेन स्‍यासो ज़ जे ब दाव ताके।
EPH 5:2 किताव ख्रीसए गेलाई उयुँ नाद परमेस्‍वरस सखैन्‍याए जूँनी उजिउ झाःद ओयासिउ, हिताव ज़ जे ब छुतए ल्‍योदा जेयुँ नाद दाव ताके। ख्रीसए गेजूँनी निताव य़ेन ओदोव परमेस्‍वरलाई चाव सी ङरो धुप ओचरैःव मिताव ज़ लिज़्या।
EPH 5:3 खाली पातर्‍या पातर्नी जैसिन्‍या, प़ाइँत लोभ दान्‍या, निताव फुरी य़ेनर जेल्‍योङ उमिन ज़ तारैंःक। निताव य़ेनर परमेस्‍वरए छैंव उमींरालाई मासहिउ।
EPH 5:4 उर्ती माल्‍यो माचाव ल़॰न्‍या पाँर ब ताताक, आव ब माचाहिउ ज़। बुरू परमेस्‍वरए उगुनर मामेंःद धन्‍याबाद याव ज़ नैच्‍यो।
EPH 5:5 जे ब जेसैंज़्‍या, युँ माजामो य़ेन दाज़्‍यावर, लोभ वाज़ दोज़्‍यावर परमेस्‍वर स़ोनो ख्रीसनी निराज्‍याल काता ज़ दैन्‍या मालेर। लोभ दान्‍या ते अङग्या पुजा दाज़्याव स्‍यासो ज़।
EPH 5:6 जेलाई निताव अऩाकलाव पाँरानी सुवाराए ताझुकैचिरक। परमेस्‍वरए आव पाँरानी ज़ ओलकिन तँदाङाव लिज़्‍यावरालाई उरिस चोज़्‍या।
EPH 5:7 है जैद जे निताव पाँ दाज़्‍यावरास खदेप ब तालिच्‍यो।
EPH 5:8 जे ब ङ़ादा चुम चुमोलाव य़ेन दाज़्‍यावर जेल्‍यो। अब ते प्रभुए ओपलाँलाव य़ेन दान्‍यार जेतावए हो मिताव ज़ दोनाच्‍यो।
EPH 5:9 पलाँवलाव य़ेनर आवर ज़ — साचो सतलाव चाव य़ेनर दाद,
EPH 5:10 ‘प्रभुए उयुँ कातानी होलाँ जैद ङाएके’ लिन्‍या लिज़्‍या।
EPH 5:11 जे चुम चुमोलाव अऩाकलाव य़ेनरानी अछतङ लिद, ‘नो य़ेन ते चाव माःक’ लिद सतैंद्याव ताके।
EPH 5:12 नो चुम चुमोलाव म़ोंसिद दाज़्‍यावराए याय़ेन याःनी हाइन्‍या ब लाज हुव लिज़्‍या।
EPH 5:13 खाली म़ोंसिद यादोदी ब पलाँवए सतैंद याएज़्‍याव। पलाँवए मारैंःवर ब यासरैंःज़्‍याव।
EPH 5:14 है जैद अइ ब लिज़्‍यार, “अ सिउ स्‍यासो ङ़ल्‍द लिज़्‍याव मिँ, सैंसिद सोनिकेदा, ख्रीसए ओज़गै नक्‍याँत ज़गै तारिज़्‍या।”
EPH 5:15 है जैद आव जेजिउत जोगोइसिद दाव ताके। मासैंन्‍याराए यादोज़्‍याव मिताव माःक, सैंसिद दाव ताके।
EPH 5:16 आव गेसमय बनै माचाव ओतावए परमेस्‍वरए ओय़ेन दान्‍यात मौका भरी छुपिउ ताके।
EPH 5:17 है जैद सैंसिद मालिज़्‍याव मितावर ताताच्‍यो। बुरू परमेस्‍वरए उयुँलाव य़ेनर सैंधुन्‍यार ताच्‍यो।
EPH 5:18 मद छोकोराए तासमँःसिच्‍यो। नोए मुर्ख य़ेन वाज़ पले·ज़्‍याव। बुरू छैंव पुरूसए सब्याल्‍सिद,
EPH 5:19 जे जेल खैद प्रभुए उमिनत भजनर गैद, जेयुँल उमिन सघ्योःद्यान्‍या गितर गैद रेंच्‍यो।
EPH 5:20 गेबाबु परमेस्‍वरलाई प्रभु येसु ख्रीसए उमिननी प़ाइँल ज़ धन्‍याबाद चरैःव ज़ नैच्‍यो।
EPH 5:21 किताव जे ख्रीसए उधूँल लिद ओमान नैद जेएज़्‍याव, हिताव ज़ जे जेल ब जेमान नैसिच्‍यो।
EPH 5:22 जे रे दाव मेंमार मनी जेरेराए यामान नैद्याद यापाँ धूँल लिच्‍यो। नो मनी ‘प्रभुए उजूँनी ज़ ङादोज़्‍या’ लिद सम्जिउ ताके।
EPH 5:23 ख्रीस गे उमिनतावरालाई बाँचैज़्याव ज़। किताव गे मन्‍दलीए गेङ़ैताव ख्रीस लिज़्‍या, हिताव ज़ जे जेङ़ैत जेरेर लिज़्‍यार।
EPH 5:24 है जैद किताव मन्‍दली ख्रीसए उधूँल उलिज़्‍याव, हिताव ज़ जे रे दाव मेंमार ब प़ाइँत ज़ जेरेराए यापाँ धूँल ल्‍यो ताके।
EPH 5:25 स़ोनो जे ज्‍या दाव खेपार किताव ख्रीसए ओमन्‍दलीलाई उयुँ नाद उजिउ झाःद ओयासिउ, हिताव ज़ जे ब जेज्‍यारालाई जेयुँ ओनाक।
EPH 5:26 गेजूँनी ख्रीसए उजिउ झाःद्याद ओपाँनी स़ोनो ऱील सछैंद गे ओमन्‍दलीलाई छैंव जैसिक्‍यो।
EPH 5:27 किताव ज्‍या दाज़्‍याव खेपाए ज्‍या ओरैक ओज्‍यालाई चाव चाव क्‍वार क्‍वाइद पाताला पुतुलु ओजैज़्‍याव, हिताव ज़ गेलाई ब ख्रीसए उच़िहुसिरिज़्‍याव छ्यामए उजूँनी छैंव, खत माल्‍यो स़ोनो ज़गै ज़गैव ओमन्‍दली जैसिज़्‍याव।
EPH 5:28 जे ज्‍या दाव खेपाराए जेक्‍याँलाई किताव जेसमारिज़्‍याव, हिताव ज़ जेज्‍यारालाई ब समारिउ ताके। जोए ओज्‍यालाई समारिज़्‍याव, होए ओक्‍याँलाई ओसमारिज़्‍याव मिताव ज़ लिज़्‍या।
EPH 5:29 क्‍याँए क्‍याँलाई सुए ज़ मासोव, बुरू किताव ख्रीसए गे ओमन्‍दलीलाई ओसमारिसिज़्‍याव, हिताव ज़ मिँए ओक्‍याँलाई समारिद पाथस नैज़्‍याव।
EPH 5:30 नो ख्रीसए ओसमारिसिज़्याव ते गे ओक्‍याँर गेतावनी ज़।
EPH 5:31 धर्मसास्‍त्रल ब इताव सर्सिउ लिज़्‍या, “खेपाए ओबाबु ओआमालाई ऱास्‍द ओज्‍यास सिप ताद, नोनी तक्‍याँ ज़ ताज़्‍यानी।”
EPH 5:32 आव पाँए ओअर्थ बनै घेप्‍पा लिज़्‍या। ङा फरी नो पाँए ओअर्थ आव ङासरोल जाँकोसै ख्रीस स़ोनो मन्‍दलीराए ल्‍योदा वाज़ झाःद ङानै।
EPH 5:33 हैदी ब जे ज्‍या दाव खेपाराए मनी, जेक्‍याँलाई किताव जेसमारिज़्‍याव, हिताव ज़ जेज्‍यारालाई समारिउ ताके। जे रे दाव मेंमार ब जेरेराए यामान नैद्याव ताके।
EPH 6:1 जे ल़ुज़ा बाँज़ार, प्रभुए उमींर जेतावए जेबाबु जेआमाराए यापाँल लिच्‍यो। निताव दान्‍या जेलाई ओचाहित ल्‍यो लिज़्‍या।
EPH 6:2 धर्मसास्‍त्रलाव दस पाँल इताव सर्सिउ लिज़्‍या, “बाबु आमाए ओमान नैद्याव ज़ परिए।” नो पाँत तोबो घ्योःव असिक ब जोरैसिउ लिज़्‍या।
EPH 6:3 नो असिक आव ज़, “निताव जेदोकिन चाव जिउँनी रैद कुधु बाँचिन्‍या जेले।”
EPH 6:4 जे याबाबुराए फरी जेज़ारालाई गनका गन दाद यायुँ केःद ताराएच्‍यो। बुरू परमेस्‍वरए ओपाँ सिऊद म·लैव ताके।
EPH 6:5 जे बाँदा लिज़्‍यावर, आव मानुवाताव जेसाहुराए यापाँ भैंःद, ‘ख्रीसए उजूँनी ज़ ङादोज़्‍या’ लिद छे·द यामान नैद्याद साचो युँस दोच्‍यो।
EPH 6:6 नो जेय़ेन मिँरालाई खुसी जैन्‍याए जूँनी वाज़ माःक, बुरू ‘ङा ख्रीसए ओनोकोर ज़’ लिद परमेस्‍वरए है उलिज़्‍याव मितावनी जाँगरस दाव ताके।
EPH 6:7 मिँराए यासेवा जेदोक, ‘आव ङादोज़्‍याव मिँराए जूँनी माःक, प्रभुए उजूँनी ङादोज़्‍या’ लिद रेंद ज़ दाव ताके।
EPH 6:8 चाव य़ेन दान्‍यात, बाँदा जेलिदी ब, माबाँदा जेलिदी ब, ‘किताव य़ेन गेदोज़्‍या, हिताव ज़ प्रभुए ल्‍योनी गेदैरिज़्‍या’ लिद सम्‍जिउ ताके।
EPH 6:9 जे साहुराए ब हितावनी ज़ सम्‍जिउ ताके। जेबाँदाराए ङ़ैत जेरिस चोद अखत्‍यासो जैसिन्‍या माःक। जेबाँदारास प़ाइँए जेर्गे स्‍वर्गत लिज़्‍या। नोए मिँ रँःद मादोव, य़ेन रँःद दोज़्‍याव।
EPH 6:10 जेस प़ाइँरानी छींनीकाव ङापाँ आव ज़ — प्रभुए ल्‍योनिकाव जेदैव ओसक्तीनी थ॰रिद ल्‍यो ताके।
EPH 6:11 सैतानए जेलाई झुकैव ओपैंज़्‍याव उबुद्धीलाई वैंद्याद ओङ़ाक थाँसिन्‍याए जूँनी परमेस्‍वरए ओयासिज़्‍याव हत्‍यारर भिरिसिउ ताके।
EPH 6:12 गे दान्‍या लरैं मिँरास माःक, चुम चुमोलावराए याघेप्‍पार, यासक्ती ल्‍योर, दै देवता झ़्‍या मोंर, स़ोनो नमताव माचाव पुरूसरास लिज़्‍या।
EPH 6:13 है जैद माचाव बेला उहुक नितावराए ल्‍योनी जोगोइसिन्‍याए जूँनी परमेस्‍वरए ओहत्‍यारर भिरिसिद नोरालाई थन थन अदैद छींङ पै थ॰रिद ल्‍यो ताके।
EPH 6:14 किताव लरैंदा बाज़्‍याव मिँए वाँःफोर पो·सिद झाःसिद बाज़्‍या, हिताव ज़ जे ब परमेस्‍वरए साचो ओपाँर रैद झाःसिद ल्‍यो ताके। नो मिँए फरी ओछातीलाई जोगोइन्‍याए जूँनी झँए पाता जासिज़्‍या। हिताव ज़ जे ब परमेस्‍वरए ओपाँत माधलिन्‍याए जूँनी परमेस्‍वरए ओपाँर सतस दाव ताके।
EPH 6:15 किताव नो मिँ उखँत पोला जासिद बाज़्‍या, हिताव ज़ जे ब युँ होलाँ दाव परमेस्‍वरए चाव ओथा प़ाइँदा सथैन्‍याए जूँनी झाःसिद बाव ताके।
EPH 6:16 फरी किताव लरैं दाज़्‍याव मिँए ओधालए ला म़ुइलाई सोतोइज़्‍याव, हिताव ज़ जे ब परमेस्‍वरलाई जेयुँ उहुप्‍किन सैतानए ल्‍योनिकाव हुज़्‍याव पाँर सोतोइधुन्‍या जेले।
EPH 6:17 फरी किताव नो मिँए ओङ़ै जोगोइन्‍याए जूँनी झँए तुपी जासिद बाज़्‍या, हिताव ज़ जे ब ‘परमेस्‍वरए जोगोइद अजम्‍बरी जुनील ज़ सकेस्‍नावा’ लिद जेयुँ सुहुप्‍द ल्‍यो ताके। फरी किताव नो मिँ तरवालीस बाज़्‍या, हिताव ज़ जे ब छैंव पुरूसए ओयासिज़्याव तरवाली रैव ताके। नो तरवाली परमेस्‍वरए ओपाँ ज़।
EPH 6:18 एकम्‍न्‍या ज़ परमेस्‍वरए उपुरूसनी पोंखारिच्‍यो। प़ाइँनी सैंसिद जेर्च्‍या मासैःद परमेस्‍वरए छैंव उमींराए जूँनी पोंखारिउ ज़ नैव ताके।
EPH 6:19 स़ोनो ङाजूँनी ब, ‘परमेस्‍वरए चाव ओथाए ओसै माछे·द ज़ सथैव ओदैवक’ लिद पोंखारिद्याव ताके।
EPH 6:20 नो चाव ओथा सथैन्‍याए जूँनी ओसाची ङातावए झ्यालखानाल ङापरिके। है जैद कितावनी पाँव परिन्‍या, हितावनी ज़ आल ब घ्योःव युँस ङापाँधुक लिद पोंखारिद्याव ताके।
EPH 6:21 ङा आल कितावस ङालिज़्‍याव, नो भरी प्रभुए ओय़ेन सतस दाज़्‍याव गेयुँलाव गेभाइ तुखिकसए ल्‍योनी थैन्‍या जेले।
EPH 6:22 होए उजूँनी ज़ नो मिँलाई जेल्‍योदा ङापरींज़्‍या। आङाव गेपाँ भरी नोए ओल्‍योनी थैद जेयुँर होलाँ तान्‍या ले।
EPH 6:23 जे परमेस्‍वरए ओपाँत बाज़्‍याव भरिरालाई परमेस्‍वर गेबाबु स़ोनो गेप्रभु येसु ख्रीसनी निल्‍योनी जेयुँ होलाँ जैद ओयाचिरक, जेयुँ हुप्‍द जे जेल खैवर ब ओजैचिरक।
EPH 6:24 गेप्रभु येसु ख्रीसए ल्‍योदा साचोस यायुँ थू जैद नैज़्‍यावराए ल्‍योदा ब परमेस्‍वरए उयुँ ओगराँक।
PHI 1:1 गिन येसु ख्रीसए ओय़ेन दोज़्‍याव ओनोकोरनी पावल स़ोनो तिमोथीनी गिन्‍ल्‍योनी, जे फिलिप्‍पीलाव येसु ख्रीसए छैंव उमींर स़ोनो जेलोम्‍बार जेस़ेररालाई आव चिथी परींद गिन्‍याचिज़्‍या।
PHI 1:2 परमेस्‍वर गेबाबु स़ोनो गेप्रभु येसु ख्रीसनी जेल्‍योदा नियुँ गराँद जेयुँ होलाँ जैद ओयाचिरक।
PHI 1:3 ङा जेलाई ङाचेतैचिउ पती परमेस्‍वरलाई धन्‍याबाद चरैःद,
PHI 1:4 जेजूँनी परमेस्‍वरलाई ङापोंखारिक एकतार रेंद ज़ ङापोंखारिज़्‍या।
PHI 1:5 काराव ल्‍यो ताकिन जे जेयुँ उहुबो छ्यामकिन ज़ परमेस्‍वरए चाव ओथा ङारासथैक ङालाई प़ाइँनी ज़ जेसघैनाके।
PHI 1:6 आव तोबो पाँत ङायुँ हुप्‍द ले — परमेस्‍वरए जेयुँलाव थूद ओनैज़्‍याव चाव ओय़ेन भरी येसु ख्रीस फरी उहुन्‍या छ्याम सयो·द तुपैद्यान्‍या ले।
PHI 1:7 जे ङालाई जेसघैनाज़्‍यावए जेगुनर ङा खर्क ज़ मामेंःन्‍या ज़्यासो लिज़्या। ङा झ्‍यालखानाल ङालिज़्‍याक ब, पाखात ङालिज़्‍याक ब, परमेस्‍वरए चाव ओथा ङारासथैज़्‍याक परमेस्‍वरए उयुँ ओय़ालोनी ज़ जे मनी ङादैव य़ेनत ङास सिप जेदोव मिताव ज़ ताके।
PHI 1:8 ङा जेस खर्क गेदैसिके लिद येसु ख्रीसए ओमयानी ङायुँ थू ङाजैज़्‍याव परमेस्‍वर साची लिज़्‍या।
PHI 1:9 जेजूँनी परमेस्‍वरलाई ङापोंखारिक, ‘या याल तयुँ ताद झन ज़ ओखैनारक’ लिद पोंखारिउ ज़ ङानैज़्‍या। नो जेखैज़्‍याव अइज़ माःक, परमेस्‍वर किताव उलिज़्याव लिद सरेस्‍द, चाव माचाव छुतैद खैच्‍यो।
PHI 1:10 हो ताकिन ची चाव पाँ भरी थ·रैद ख्रीस उहुक जेखत माल्‍यो छैंवर तान्‍या जेले।
PHI 1:11 येसु ख्रीसनी ताज़्‍याव चाव य़ेन भरी जेक्‍याँत झन ज़ ओरैंःनाक। ननी ज़ परमेस्‍वरलाई ज़गै मगैव ताद उमिन ब झन ज़ घ्योःन्‍या ले।
PHI 1:12 अ ङानैं ङामेंर, ङाक्‍याँत ताव माचावरानी चाव था झन ज़ थास्‍नाके।
PHI 1:13 ङालाई ख्रीसए ओय़ेननी झ्‍यालखानाल याझाःनाव दरबारलाव सिपाईं भरी स़ोनो छुत मिँराए ब थैद नैर।
PHI 1:14 इताव ङासहिज़्‍यावनी फरी उपुर्काव गेदाज्‍यु भाइराए मनी प्रभुए ओल्‍योदा यायुँ झन ज़ सुहुप्‍द ओपाँ माछे·द ज़ यारासथैज़्‍यार।
PHI 1:15 ख्वा ख्वाराए ते यामी जाँ तूद ङाकिन सघ्योःसिन्‍याए जूँनी ख्रीसए ओपाँ यारासथैज़्‍यार। ख्वाराए ते सोजोनी ज़ यारासथैज़्‍यार।
PHI 1:16 नो सोजोनी सथैज़्‍यावराए, ‘चाव था सथैन्‍यात पावल खतैसिउ लिज़्‍या’ लिन्‍या सैंद ङालाई मया दाद ज़ दोज़्‍यार।
PHI 1:17 नो ख्रीसए ओपाँलाई तँनी सथैज़्‍यावराए ते छैंव युँनी माःक, झ्यालखानाल ङालिज़्याक झन ङायुँ सुहुर्द्यान्‍याए जूँनी यातिर वाज़ दोज़्‍यार।
PHI 1:18 हैदी ब ख्रीसए ओपाँ जो मितावनी यारासथैदी ब ङायुँ माचाव मादोव, रेंव ज़ ङालिज़्‍या। सोजोनी तादी ब, सघ्योःसिन्‍यानी तादी ब, ख्रीसए उमिन ओथास्‍किन, हो ज़ प़ाइँरानी घेप्‍पा लिज़्‍या। हैज़, ङा रेंव ज़ लिन्‍या ङाले।
PHI 1:19 काराव ल्‍यो ताकिन जे ङाजूँनी पोंखारिद जेयाँज़्यावए स़ोनो येसु ख्रीसए उपुरूसए ब ङालाई ओसघैनाज़्‍यावए ङा तछा आनी पुलुस्न्‍या ज़ ङाले है ङालिज़्‍या।
PHI 1:20 हैदी ब आव तोबो पाँत वाज़ ङायुँ थू ताद आस ङादोज़्‍या — ङा कातानी ब लाज मोर्नो ङामाताक लिद आथ पाला मनी एकतारकाव ङादोज़्‍याव मिताव माछे·द ज़ ङादोधुक। हो ताकिन ची ङाबाँचिदी ब, ङासिदी ब, ख्रीसए उमिन ङाक्‍याँत घ्योःन्‍या ले।
PHI 1:21 ङाबाँचिदी ब ख्रीसए जूँनी ज़ ङाबाँचिज़्‍या। ङासिदी ब ङालाई झन पाथ ज़ लिज़्‍या।
PHI 1:22 खाली आव ङाक्‍याँत जाँवा पै लिद ओय़ेन दाव ङादैकिन हो ब चाव ज़ लिज़्‍या। आव ऩेब्‍लोनी काताकाव रूजिन्‍या ङा ङामासैंए।
PHI 1:23 ङायुँ ऩेथोदा ज़ लिज़्‍या। आव मानुवात लिज़्‍यावकिन ख्रीसए ल्‍योदा बान्‍या ङायुँ लिज़्‍या, नदा बान्‍या पाथ लिज़्‍या।
PHI 1:24 खाली जे जेजूँनी ङा आव मानुवात लिन्‍या ओचाहित लिज़्‍या।
PHI 1:25 नो पाँ ङा पक्‍का ङासैंज़्या। ङालिकिन जेलाई पाथ पारैद परमेस्‍वरलाई जेयुँ हुप्‍न्‍यात झन ज़ रेंद लिन्‍या ङाजैचिरिज़्‍या।
PHI 1:26 हो ताकिन ङा जेल्‍योक फरी ङाहुक जे येसु ख्रीसए ङाक्‍याँताव ओदोव रँःद जेसुनी झन ज़ च्‍याँःसिन्‍या ले।
PHI 1:27 खाली जे ख्रीसए ओपाँत लिज़्‍यावरालाई उसहिज़्‍याव मिताव दोच्‍यो। हो ताकिन ची जेल्‍योक हुद ङामीए ङारँःदी ब, आनी जेल्‍योक हुव ङामादैदी ब, ‘परमेस्‍वरए ओपाँत यायुँ हुप्‍द तयुँ जैद थ॰रिद लेर दी’ लिन्‍या थैन्‍या ङाले।
PHI 1:28 स़ोनो, ‘याखिरी पसिज़्‍यावरालाई रँःद माछे·द परमेस्‍वरए ओपाँए जूँनी धामा दाव ज़ नैज़्‍यार दी’ लिन्‍या ब थैन्‍या ङाले। नो खिरी यापसिज़्‍यावत ऩेथो सरेस लिज़्‍या — खिरी पसिज़्‍यावरालाई परमेस्‍वरनिकाव सजा दैन्‍या सरेस लिज़्‍या, जे मिताव सहिज़्‍यावरालाई फरी परमेस्‍वरनी बाँचिन्‍या सरेस लिज़्या।
PHI 1:29 ख्रीसलाई युँ हुप्‍न्‍या वाज़ माःक, जेलाई होए उजूँनी दुख सहिन्‍या असिक ब याद नैचिउ।
PHI 1:30 आव ङादुखल जे ब ङास ज़ जेलिज़्‍या। नो ङादुखर ङ़ादाकिन ब जेरँःज़्‍याव, आज्‍याल मनी जेथैज़्‍या।
PHI 2:1 जे ख्रीसस तोबो ताद जेयुँर झेंःद उलिकिन, जेल्‍योदा उयुँ ओझाःज़्यावनी जेस॰र होलाँ ओताव ताकिन, जेस छैंव पुरूस उलिज़्‍याव जेदार्सिउ ताकिन, जे जेल युँ नान्‍या उलिकिन,
PHI 2:2 जे जेल तोबो युँ तोबो क्‍याँ जैद प़ाइँए ज़ तोबो य़ेनत जेयुँ थू जैव ताके। हो ताकिन ची ङा मनी ङारेंतए ङायुँर होलाँ तान्‍या ले।
PHI 2:3 जे स॰द क्‍याँलाई वाज़ तान्‍या य़ेनर काता ज़ तादोच्‍यो। बुरू सज़िम्‍सिद क्‍याँकिन छुतलाई ओमान नैद्याव ताके।
PHI 2:4 क्‍याँए तिर वाज़ दान्‍या माःक, प़ाइँलाई तान्‍या य़ेन दाव ताके।
PHI 2:5 जे प़ाइँए जेयुँ येसु ख्रीसए उयुँ मिताव ओताक।
PHI 2:6 नो भाःकिन ज़ परमेस्‍वरस तोबो ज़ निलिज़्‍याव। ओहक परमेस्‍वरस तोबो ज़ उलिदी ब नो हकलाई माकमैद,
PHI 2:7 ओहकलाई ऱास्‍द, रितो ज़ जैसिद, मिँ मिन्‍सिद, परमेस्‍वरए ओसेवा दान्‍या जैसिके।
PHI 2:8 मिँ उमिन्सिउत झन ज़ सज़िम्‍सिद, सिन्‍याक पै परमेस्‍वरए ओपाँ भरी दोक्‍यो। बनै दुखस क्रुसत सिन्‍या ब सहिक्‍यो।
PHI 2:9 है जैद परमेस्‍वरए नोलाई सोचोइद, स्‍वर्गताव प़ाइँरानी ओमान ल्‍यो पोल नैक्‍यो। मिन भरिरानी प़ाइँरानी घ्योःव मिन नैदिक्‍यो।
PHI 2:10 है जैद स्‍वर्गतावर, आव नामलावर, तल्‍ना नामलावर प़ाइँ ज़ येसुए उमिनत याघूँदानी फुलुप्‍सिद,
PHI 2:11 येसु ख्रीसलाई प़ाइँए ज़ ‘प्रभु’ है दोरिज़्‍यार। ननी ज़ परमेस्‍वर ओबाबुए उमिन ब घ्योःन्‍या ले।
PHI 2:12 जे ङायुँलाव ङानैं ङामेंर, ङा जेस ङालिज़्‍याकाव जेदोज़्‍याव मिताव, ङा ङामालिक मनी झन ज़ नो दैद जेनैज़्‍याव साःरो जुनीलाई जेयुँ थू जैद सुदुमो ताके।
PHI 2:13 जेलाई उयुँलाव मिताव य़ेन दाव परींज़्‍याव ब ओल परमेस्‍वरए ज़, धामा दान्‍या युँ जैद्याद सुदुमो परींज़्‍याव ब ओल परमेस्‍वरए ज़।
PHI 2:14 है जैद जेदोज़्‍याव य़ेन भरित मारूम्‍रूमैद माइ़सिद चावस दोच्‍यो।
PHI 2:15 हो ताकिन ची जे परमेस्‍वरए ओज़ार जेखत माल्‍यो छैंवर थ॰रिन्‍या जेले। आव मानुवाताव यायुँ बिप्‍यादा ता·सिउराए खार्ल ब जेलाई सुए ज़ जेपाँःच्‍या पले·द्याधुन्‍या मालेर। बुरू नितावराए खार्ल चुम चुमोलाई ज़गै जैज़्‍याव सोरो मितावर रैंःन्‍या जेले।
PHI 2:16 जीवनलाव पाँलाई पक्‍कास क्‍योःद जेनैकिन ख्रीस फरी उहुव छ्याम जेक्‍याँताव ङादोव य़ेन भरी अऩाकलाव ओमाताव ओल्‍यो लिद ङासुनी च्‍याँःसिरिज़्‍या।
PHI 2:17 ङालाई यासैःनादी ब ङाजुनी अऩाकलाव तान्‍या माले। जेजूँनी ङादोव भरित परमेस्‍वरलाई ङाजिउ ङाचरैःव मिताव ज़ तान्‍या ले। ननी ज़ ङा खुसी ताद जेस ङारेंज़्या।
PHI 2:18 हिताव ज़ जे मनी आव पाँरात खुसी ताद, ङा किताव ङारेंज़्‍या, जे मनी ङास रेंचिके।
PHI 2:19 प्रभु येसुए उयुँ ओताकिन ङा तिमोथीलाई जेल्‍योदा चाँदो ज़ परींव ङापैंज़्‍या। जेस दैसिद जेथा ओरैकिन ङायुँ होलाँ तान्‍या ले।
PHI 2:20 जेल्‍योदा साचो उयुँ थू जैज़्‍याव तिमोथी स्‍यासो छुतर ङास सु ज़ मालेर।
PHI 2:21 उपुर्कावर ते येसु ख्रीसए ओय़ेनकिन याय़ेन वाज़ चिऊज़्‍यार।
PHI 2:22 तिमोथी ते उगुनर रैंःव, थ॰रिउ उलिज़्याव, जे ज़ जेसैंज़्‍या। ङास परमेस्‍वरए चाव ओथा सथैन्‍यात ज़ा बाबु स्‍यासो ज़ गिन्‍लिज़्‍या।
PHI 2:23 है जैद ङा आव क्‍योःसिद ङालिज़्‍यावल ‘ङालाई अइ तारिज़्‍या’ लिन्‍या ङासैंवत जेल्‍योदा हतप्‍त ज़ ङापरींरिज़्‍या।
PHI 2:24 प्रभुए उयुँ ओताकिन जेल्‍योदा चाँदो ज़ हुन्‍या ङाले लिन्‍या आस ब लिज़्‍या।
PHI 2:25 आव है ङालिज़्‍याव भरी ओमाताद ज़ इपाफ्रोदितसलाई जेल्‍योदा ङापरींज़्‍या। नो ङालाई चिऊना जेपरींव मिँ ङाभाइ स्‍यासो ब लिज़्‍या, परमेस्‍वरए ओय़ेनत ङानैं ब लिज़्‍या, ख्रीसए उधूँल ङास तोबो सिपाईं मिताव ब गिन्‍लिज़्‍या।
PHI 2:26 खाली नोए जेजूँनी ‘किताव लिज़्‍यार’ लिद उयुँ थू जैज़्‍याव। स़ोनो, जे ‘ओजोरो हुज़्‍या दी’ लिन्‍या जेथैवए ‘ङासोगोत लिज़्‍याखेरहो’ लिद आतिज़्‍या।
PHI 2:27 नो जेथैव मिताव ओजोरो ते उहुव ज़। नो ओजोरोए कोज़ाइ ज़ सिके। हाःत ज़ परमेस्‍वरए उयुँ नाद बाँचैक्‍यो। ओललाई वाज़ माःक, परमेस्‍वरए ङालाई मनी उयुँ नाके। नो उसिउ ताकिन ङालाई सोगोए तर्त सोगो तान्‍या ओल्‍यो।
PHI 2:28 है जैद ‘नोलाई रँःद जेयुँर होलाँ घताक’ लिद हतप्‍त ज़ जेल्‍योदा ङापरींज़्‍या। हो ताकिन ङा ङायुँ ब होलाँ तान्‍या ले।
PHI 2:29 नो मिँ प्रभुए उमिनताव ओतावए जेल्‍योङ उहुवत रेंद सुम्‍च्‍यो। आव मिताव मिँरालाई यामान नैद्याव ज़ परिए।
PHI 2:30 काराव ल्‍यो ताकिन जे ङाजूँनी दाव जेपैंज़्‍याव य़ेन सयो·द्यान्‍याए जूँनी नो मिँ उजिउए मया मादाद ख्रीसए ओय़ेनत कोज़ाइ म़ानी सिके।
PHI 3:1 ङानैं ङामेंर, गेप्रभुस तोबो ताद रेंद ज़ लिचिके। ङासरो पाँर दोहोरैन्‍यात ङार्च्‍या मासिए, जेलाई माचावनी जोगोइन्‍याए जूँनी ज़ लिज़्‍या।
PHI 3:2 नो परमेस्‍वरए ओपाँ बले·ज़्‍यावरास जोगोइसिद लिच्‍यो। नोर काः स्‍यासोर लिज़्‍यार। नोराए, ‘क्‍याल्‍न्‍या सरेस जैसिउर वाज़ परमेस्‍वरए ओथोल ताज़्‍यार’ है यारादोज़्‍यार।
PHI 3:3 खाली परमेस्‍वरए साचो ओसरेस दैवर ते गे ज़ गेलिज़्‍या। गे परमेस्‍वरए उपुरूस दैद उयुँलाव मिताव ओसेवा दाद येसु ख्रीसए ओक्‍याँत ख्यासिद गेलिज़्यावए गेलाई पाखाताव सतैंन्‍या सरेस माचाही।
PHI 3:4 हैदी ब ङा मनी, ‘ङानी ज़ परमेस्‍वरए ओथोलाव ङाताके’ है लिन्‍या ताकिन उपुर्कावराकिन ङा झन ज़ है ङालिधुखेहो।
PHI 3:5 ङा हिब्रू जातलाव, बेन्‍यामीन थरल जर्मिउ मिँ ज़। यहूदीराए याचलन मिताव ङाजर्मिउ आथ दिनत क्‍याल्‍न्‍या सरेस ब ताके। है जैद जातनी सघ्योःसिन्‍या ताकिन प़ाइँरानी घेप्‍पा जातलाव ङा ज़। मोसाए ओकानुन दान्‍यात फरिसी ज़ ङाल्‍यो।
PHI 3:6 ‘इतावनी ज़ परमेस्‍वर खुसी ताए सैं’ लिन्‍या ङम्‍सिद मन्‍दलीलावरालाई क्‍योःए क्‍योःए झ्यालखानाल ब ङाराझाःज़्याव। मोसाए ओकानुन भरी ब माबिरैद ज़ ङादोज़्‍याव।
PHI 3:7 हिताव य़ेन ङादोज़्‍यावत ज़ ख्रीसलाई दैन्‍याए जूँनी नो ङ़ादाङाव ङाकमैव धर्म भरी अऩाकलाव थ·रैद ङाऱास्‍के।
PHI 3:8 होकिन झन ङाप्रभु येसु ख्रीसस सरेस्‍सिद ओलस सखैसिन्‍याकिन उपुर्काव य़ेन भरी अऩाकलाव ज़ थ·रैद, नो ङ़ादाङाव ङाकमैव धर्म भरी की सीद याख्याज़्‍याव मिताव ज़ ङाख्याके।
PHI 3:9 ङा है ङालिज़्‍या, तछा परमेस्‍वरए ओङ़ाक ङाच्‍याँःसिक नो मोसाए ओकानुननी ङाकमैव धर्मनी तारँःनावक। बुरू ख्रीसलाई ङायुँ उहुबोनी ज़ उयुँलाव मिताव उरँःनावक।
PHI 3:10 ङा ङायुँ ख्रीसस सरेस्‍सिन्‍यादा वाज़ लिज़्‍या। ङा ङाजूँनी दुखस सिन्‍या पै सहिद ओयाँव मिताव ङा ब होए ओय़ेनत ङासहिधुक, स़ोनो, परमेस्‍वरए ओल ओसक्तीनी ख्रीसलाई सिउनी ओसोचोइव मिताव ङालाई ब साःरो ओजैनावक।
PHI 3:11 इतावनी ज़ ओल सिद सैंसिदकाव ओदैव जुनी ङा ब ङादैधुक।
PHI 3:12 ङा चबनै ख्रीस स्‍यासो साःरो ताद ङाखत माल्‍यो ङाताधुके है ङामालिधुइ। हैदी ब ङा येसु ख्रीसए ओपैंज़्‍याव मिताव कातानी ङासयो·के लिद सैःसिवा जैसिद ङादोज़्‍या।
PHI 3:13 ङानैं ङामेंर, परमेस्‍वरए ओपैंज़्‍याव मिताव आःपै ते ङामासुदुम्‍ताए। खाली आव तोबो वाज़ ङादोज़्‍या, ताधुव भरी मेंःद हुन्‍यादा वाज़ ङाताकिज़्‍या।
PHI 3:14 किताव बाजी दैन्‍याए जूँनी धोंःन्‍यात यादाँजिसिज़्‍याव, हिताव ज़ ङा मनी स्‍वर्गताव बाजी दैन्‍याए जूँनी परमेस्‍वरए येसु ख्रीसनी ओराखुल्‍ज़्‍यावदा धोंःनाव ज़ ङालिज़्‍या।
PHI 3:15 है जैद जे परमेस्‍वरए ओपाँत थ॰रिद लिज़्‍यावर मनी जेयुँ नदा ज़ थू जैव ताके। जेनी ख्वा ख्वार निताव युँ ओमालिकिन परमेस्‍वरए ओल ज़ जेलाई सम्‍जैन्‍या ले।
PHI 3:16 खाली गे परमेस्‍वरए ओय़ेन खा पै गेसैंज़्‍याव, हाःपै ज़ दाव ताके।
PHI 3:17 जे ङानैं ङामेंर, ङा ङादोज़्‍याव मिताव जे ब दोव ताके। गेपैचिउ मिताव य़ेन दोज़्‍यावराए ल्‍योनी मनी सिऊसिउ ताके।
PHI 3:18 कुधुए ख्रीस क्रुसत उसिउ है लिन्‍या पाँलाई सोद बाऱिज़्यार। निताव बाऱिज़्यावराए जूँनी ङ़ादाकिन ज़ है दाव ज़ ङानैचिज़्‍याव। फरी ब ङायुँ घर्द है ङादाचिज़्‍या।
PHI 3:19 नितावरालाई नोक्‍सान वाज़ तान्‍या ले। नोराए परमेस्‍वरए ओपोल झन जो यायुँनी हुज़्‍या, हो ज़ खिम्‍ज़्‍यार। लाज हुन्‍या य़ेनत झन ज़ खुसी ताज़्‍यार, आव मानुवाताव पाँरादा वाज़ यायुँ थू जैज़्‍यार।
PHI 3:20 खाली गे साचो गेझ़िम ते स्‍वर्गत लिज़्‍या। हुनी ज़ गेलाई बाँचैज़्‍याव कींद गेनैज़्‍याव गेप्रभु येसु ख्रीसए च़िहुसिरिज़्‍याव।
PHI 3:21 उहुव छ्याम नो नाम नमलाव लिज़्‍यावरालाई उधूँल ओराझाःव ओसक्तीनी ज़ आव गमे जैसिउ गेक्‍याँर मनी त़ोद्याद ज़गैव ओक्‍याँ मिताव ज़ जैद्यासिरिज़्‍याव।
PHI 4:1 है जैद ङानैं ङामेंर, हिताव दैन्‍या स्‍यासोर गेतावए परमेस्‍वरए ओपाँत थ॰रिद ल्‍यो ताके। जेस खर्क दैसिन्‍या लिद ङालाई जेमया बनै लागिज़्‍या। ङादोव भरी जेक्‍याँत ओरैंःवए ङायुँ होलाँ ताद ङासुनी च्‍याँःसिउ ज़ लिज़्‍या।
PHI 4:2 खाली जिन इयोदिया स़ोनो सुन्‍तुखेनिलाई है ङादाचिन्‍ज़्‍या, जिन प्रभुए ओपैंज़्‍याव मिताव खैद लिचिन्‍के।
PHI 4:3 नँ ङास नारिसिज़्याव साचो ङानैंलाई मनी है ङादींज़्‍या, आव मेंमानिलाई निसखैयो। चाव था सथैन्‍यात नोनी ङालाई कुधु सघैनाकिनी। नोनिस क्‍लेमेस ब ओल्‍यो। छुतर ब सर्बा ज़ याल्‍यो। आव भरिराए यामिन अजम्‍बरी जुनीलाव पोस्‍तोकोल सर्सिउ लिज़्या।
PHI 4:4 प्रभुस तोबो ताद एकतार रेंद ज़ लिच्‍यो। फरी ब है ङादाचिज़्‍या, रेंद ज़ लिच्‍यो।
PHI 4:5 जे बोमो युँनी जेदोज़्‍याव प़ाइँराए ओसरेस्‍चिरक। गेप्रभु चाँदो ज़ हुरिज़्‍या तामेंःच्‍यो।
PHI 4:6 जे व़ीनी फुइ ताताच्‍यो। बुरू प़ाइँत ज़ धन्‍याबाद चरैःद, जेचाहिज़्याव भरी पोंखारिद ओलस ऩिचिके।
PHI 4:7 हो ताकिन ची जे येसु ख्रीसस सिप जेतावए परमेस्‍वरनी हुज़्याव सैं ज़ मासैंधुन्‍या युँ होलाँनी ज़ जेयुँ जेबिचारलाई जोगोइद नैद्यान्‍या ले।
PHI 4:8 अब ते ङानैं ङामेंर, जो पाँ चाव लिज़्‍या, जो पाँ थ॰रिउ लिज़्‍या, जो पाँ साचो, छैंव, ओपाँःच्‍या माल्‍यो लिज़्‍या — नो पाँ असली, उगुन ल्‍यो उलिकिन जेयुँ होत ज़ थ·रैव ताके।
PHI 4:9 ङा ङाल्‍योनी पैसिद जेदैव पाँर स़ोनो ङा ङादोज़्‍याव भरी किताव जेरँःव, किताव जेथैव जे ब हितावनी ज़ दोच्‍यो। हो ताकिन ची गेयुँ होलाँ जैद्याज़्‍याव परमेस्‍वर जेस ज़ तान्‍या ले।
PHI 4:10 ङाल्‍योदाङाव खेसो जेयुँ फरी जेजागैवए ङायुँर होलाँ जैद परमेस्‍वरलाई धन्‍याबाद ङाचरैःज़्‍या। जे ङालाई मेंःनाकेर है ङालिज़्याव ते माःक, खाली ङालाई सघैन्‍या मौका जेमादैवए ची।
PHI 4:11 ङालाई कातार ओमाथैंनाज़्‍यावए है ङालिज़्‍याव ते माःक। जो मितावल तादी ब सोन्‍तोकोस लिन्‍या पैसिद ङाले।
PHI 4:12 ङा दुखल तादी ब, सुखल तादी ब, ज़्‍याद तादी ब, करे तादी ब, ल्‍योल तादी ब, माल्‍योल तादी ब, प़ाइँल ज़ ङालिधुइ।
PHI 4:13 जो मितावल तादी ब परमेस्‍वरए ओयाँज़्‍याव ओसक्तीनी प़ाइँ ज़ ङादोधुइ।
PHI 4:14 हितावत ब ङा ङादुखल जे जेचिऊनावए चाव ज़ ताके।
PHI 4:15 जे ज़ जेसैंज़्या, ङ़ादा जे फिलिप्‍पीरालाई परमेस्‍वरए चाव ओथा सथैद माकेदोनियानी ङाबाज़्याक ङालाई सघैन्‍या छुत मन्‍दलीर सु ज़ यामालिज़्‍याव, जे वाज़ जेल्‍यो।
PHI 4:16 ङा थेसलोनिकेल ङालिज़्‍याव बेलाक मनी ङालाई माथैंव मायो·वराल परींद्याव ज़ जेनैके।
PHI 4:17 खाली ङा जेल्‍योनी कातार दैन्‍या ङापैंज़्याव ते माःक, बुरू जेलाई झन ज़ असिक घताक है ङालिज़्याव ची।
PHI 4:18 अब ते ङालाई चाहिज़्‍याव भरी प़ाइँ ज़ लिज़्‍या, धोल पोगोल ब ताद ले। नो इपाफ्रोदितसए उकुइत परींद जेयाँव भरी ङादैके। ङालाई परींद जेयाँव भरी परमेस्‍वरए उयुँलाव मिताव ताद ओल परमेस्‍वरलाई चाव सी ङरो जेचरैःव मिताव ज़ ताके।
PHI 4:19 ङालाई सयो·द्याज़्‍याव परमेस्‍वरए जेलाई मनी माथैंव मायो·व भरिल येसु ख्रीसए स्‍वर्गताव ओधननी ज़ सयो·द्यान्‍या ले।
PHI 4:20 परमेस्‍वर गेबाबुलाई खर्क ज़ माखेम्‍न्‍या ज़गै मगै ओताक। आमेन।
PHI 4:21 येसु ख्रीसए उमिनत लिज़्‍यावरालाई जेरो है यारादोच्‍यो। ङास लिज़्‍याव ङानैंराए मनी जेलाई जेरो है दाचिज़्‍यार।
PHI 4:22 आव सहरलाव ख्रीस येसुए छैंव उमीं भरी स़ोनो प़ाइँरानी ते रोमी माहाराजाए उझ़िमलाव य़ेन दाज़्‍यावराए जेरो है दाचिज़्‍यार।
PHI 4:23 गेप्रभु येसु ख्रीसए उयुँ जेल्‍योदा ओगराँक, जेयुँल बास ओदोवक।
COL 1:1 ङा पावल, परमेस्‍वरए ओखतैनाव येसु ख्रीसए ओसाची स़ोनो ङास लिज़्‍याव गेभाइ तिमोथीस गिन्‍ल्‍योनी,
COL 1:2 जे कलस्‍सेलाव ख्रीसए उमिनताव छैंवर स़ोनो ओसतत लिज़्‍यावरालाई आव चिथी परींद गिन्‍याचिज़्‍या। जेल्‍योदा गेबाबु परमेस्‍वरए उयुँ गराँद जेयुँ होलाँ जैद ओयाचिउक।
COL 1:3 गिन परमेस्‍वर गेबाबु स़ोनो गेप्रभु येसु ख्रीसनिलाई गिन्पोंखारिक जेजूँनी धन्‍याबाद चरैःव ज़ गिन्‍नैज़्‍या,
COL 1:4 काराव ल्‍यो ताकिन जे येसु ख्रीसए ओल्‍योदा जेयुँ जेसुहुप्‍ज़्याव, स़ोनो छैंव उमींराए ल्‍योदा मया जेदोज़्याव गिन्‍थैके।
COL 1:5 नो जेयुँ हुबो स़ोनो जेमया ते स्‍वर्गताव जेजूँनी नैसिउलाई आस दाद जेनैज़्‍यावनी ज़। नो आस ते ङ़ादा साचो चाव थानी ज़ थैद जेनै।
COL 1:6 नो जेल्‍योदा हुव चाव था ज़ संसार भरिल रा·सिद प़ाइँङ ज़ फाबिद ले। है जैद जे मनी नो पाँर दैद परमेस्‍वरए उयुँ ओगराँव ते इतावनी ची ओल्‍यो लिन्‍या जेतीव छ्यामकिन ज़ जेल्‍योङ मनी परमेस्‍वरए ओपाँर फाबिद बा·नाकेर।
COL 1:7 नो पाँर ङ़ादा इपाफ्रासए ल्‍योनी जेदैके। नो मिँ गिनस सिप य़ेन दाज़्‍याव गिनयुँलाव गिननैं ज़। जे जेजूँनी ब ख्रीसए ओय़ेन फिस्‍को माजैद ज़ दोज़्‍याव।
COL 1:8 जे परमेस्‍वरनिकाव खैन्‍या पुरूस दैद नैं मेंरास खैद जेलिज़्‍याव ब नोए ओल्‍योनी ज़ गिन्‍थैके।
COL 1:9 है जैद नो पाँ गिन्‍थैव छ्यामकिन ज़ ‘परमेस्‍वरनी यादैव पुरूसनी याबुद्धीर छिप्‍नाद, परमेस्‍वरए ओपैंज़्‍यावलाई झन ज़ ओप़ाल्‍नारक’ लिद जेजूँनी परमेस्‍वरलाई पोंखारिउ ज़ गिन्‍नैज़्‍या।
COL 1:10 हो ताकिन ची जे गेप्रभुए उमिनतावरालाई ओरासहिज़्‍याव मितावर ताद, प़ाइँत ज़ उयुँलाव मितावर जेताज़्या, स़ोनो ओललाई झन ज़ सरेस्‍नाद चाव य़ेन दान्‍यात जेफाबिज़्या।
COL 1:11 जो मिताव दुखराल तादी ब थ॰रिउर, रेंद ज़ सहिधुन्‍यार जैन्‍याए जूँनी ओल परमेस्‍वरए ज़गै मगैव ओसक्तीनी जेयुँर सघ्योःद ओयाचिउक।
COL 1:12 प़ाइँत ज़ परमेस्‍वर गेबाबुलाई धन्‍याबाद ब चरैःच्‍यो। होए ज़ गेलाई उमींर जैद उमिनताव छैंवरास स्‍वर्गताव ओबताहा दैन्‍याकावर जैद नैसिउ।
COL 1:13 चुम चुमोलाव सैतानए ओराज्‍यानी हाइद उयुँलाव ओज़ाए ओराज्‍याल झाःसिक्‍यो।
COL 1:14 नो ओज़ाए ओल्‍योनी ज़ गेङ़ैताव रिन भरी फो·सिद गेदोव पापनी गेऱास्‍सिके।
COL 1:15 नो ख्रीस, गेमारँःधुज़्‍याव परमेस्‍वरए उसुरूप ज़। जैसिउ भरिरानी ङ़ादाकिन ज़ उलिज़्याव।
COL 1:16 ताज़्‍याव भरी ओलनी ज़ ताहुकेर — नमतावर तादी ब, नामलावर तादी ब, रैंःज़्‍यावर तादी ब, मारैंःज़्‍यावर तादी ब, यासक्ती ल्‍योर तादी ब, घेप्‍पार तादी ब, ङ़ैतावर तादी ब, हक दैवर तादी ब, प़ाइँ ओलनी ज़ ओल उजूँनी ज़ ताकेर।
COL 1:17 उपुर काता ज़ ओमाताद ओल वाज़ उलिज़्‍याव। ओराजैव भरी ब ओलनी वाज़ रहिज़्‍यार।
COL 1:18 ओल मन्‍दलीए ङ़ैताव ज़, मन्‍दली फरी ओल ओक्‍याँ ज़। प़ाइँनी ज़ ङ़ात ताद सिद ओसैंसिउए अजम्‍बरी जुनी दैन्‍याराए याङ़ात ब ताके। है जैद जुनी तादी ब ओल ज़ प़ाइँए ङ़ैताव लिज़्‍या।
COL 1:19 ओगे भरी ख्रीसए ओक्‍याँत झाःद्यान्‍या परमेस्‍वरए ओल ओमाहाँनी ज़ जैक्‍यो।
COL 1:20 माखैज़्याव भरी ओल्‍योदा सखैन्‍या ब ख्रीसनी ज़ जैक्‍यो। ख्रीसए क्रुसत उजिउ झाःद उझी सोभोद नमतावर तादी ब, नामलावर तादी ब, प़ाइँलाई परमेस्‍वरस यासखैक्‍यो।
COL 1:21 जे ङ़ादा माचाव य़ेनर माचाव बिचारर जेदोवए परमेस्‍वरकिन तादा ताद उसुतुरर जेल्‍यो।
COL 1:22 अब ते जे नितावरालाई ब परमेस्‍वरए ओङ़ाक छैंव जेखत माल्‍योर जैन्‍याए जूँनी ख्रीस मिँ मिन्‍सिद उजिउ झाःद्याद परमेस्‍वरस सखैद नैचिउ।
COL 1:23 जे दान्‍या भरी आव ज़ — परमेस्‍वरए ओपाँत ग्‍याल गिल माताद थ॰रिद लिच्‍यो। चाव थानिकाव जेदैव अजम्‍बरी जुनीए आस ब ताऱास्‍च्‍यो। नो पाँ संसार भरिल रा·सिद प़ाइँङ ज़ थास्‍द ले। ङा पावल आव पाँए ओसाची यान्‍यात ओनोकोर खतैसिउ ङालिज़्‍या।
COL 1:24 परमेस्‍वरए ओय़ेनत जे जेजूँनी दुख सहिन्‍या ब खुसी ज़ ङालिज़्या। किताव ख्रीसए गेजूँनी कुधु दुखर सहिद ओयासिउ, हिताव ज़ ङा मनी जे ख्रीसए ओक्‍याँ, अथबा ओमन्‍दलीए जूँनी मादुम्‍ताव ख्रीसए उदुखर ङासुदुम्‍ज़्‍या।
COL 1:25 ङा परमेस्‍वरए ओल्‍योनी हक दैद जेजूँनी ओपाँ भरी सथैन्‍यात मन्‍दलीए ओसेवा दान्‍या खतैसिउ ङालिज़्‍या।
COL 1:26 नो पाँए ओअर्थ जुक जुक स़ोनो प़िरी पुस्‍ताकिन ज़ कप्‍सिउ ओल्‍यो। आज्‍याल ते ख्रीसए छैंव उमींरालाई फैसिउ लिज़्‍या।
COL 1:27 नो ङ़ादाकिनकाव कप्‍सिउ अचम्‍बलाव उगुन ल्‍यो पाँ प़ाइँ मिँराए जूँनी लिज़्या लिन्‍या परमेस्‍वरए जे छैंव उमींरालाई सतैंद्यान्‍या युँ दोक्‍यो। नो पाँ आव ज़ — ख्रीस जेस लिज़्या। ननी ज़ अजम्‍बरी जुनीए आस ताज़्‍या।
COL 1:28 है जैद प़ाइँ मिँरालाई ख्रीसए उजूँनी गेरासथैज़्‍या। नोरालाई प़ाइँनी ज़ सम्‍जैद चावस अर्थैद ख्रीसए ओल्‍योदा कातानी पाखो गेराजैके लिद गेरापैज़्‍या।
COL 1:29 ङा मनी नो य़ेनत ङाक्‍याँत लिज़्‍याव ख्रीसए ओसक्तीनी बनै धामास ङादोज़्‍या।
COL 2:1 ङा जेजूँनी बनै धामा ङादोज़्‍याव ब सैंच्‍यो। खाली जेलाई वाज़ माःक, जे मिताव ङामादैसिताव लाउदिकिया सहरलावर स़ोनो छुत छुत नाखारलावराए जूँनी ब ङादोज़्‍या।
COL 2:2 ङा जेस ङापैंज़्‍याव भरी आव ज़ — जे जेल खैद जेयुँर झेंःव ओताक, स़ोनो परमेस्‍वरए कप्‍सिउ ओपाँए ओअर्थ भरी तीद नो पाँत यायुँर झन ज़ उहुप्‍नाक है ङालिज़्‍या। नो पाँए ओअर्थ भरी ओल ख्रीस ज़।
COL 2:3 परमेस्‍वरए उबुद्धी स़ोनो ओग्‍यान भरी ख्रीसए ओक्‍याँत ज़ दैसिज़्या।
COL 2:4 है जैद फसङ्गैन्‍या पाँर जती मोहोन्‍यालो उलिदी ब जे सु ज़ नो पाँरानी ताझुकिच्‍यो लिद ङा है ङादाचिज़्या।
COL 2:5 ङा आव ङाक्‍याँ जेस ओमालिदी ब ङायुँ ते जेस ज़ लिज़्‍या। है जैद ख्रीसए ओपाँत मुइलिउर थ॰रिउर जेलिज़्‍याव थैद ङायुँ रेंव ज़ लिज़्‍या।
COL 2:6 है जैद किताव ख्रीस येसुलाई प्रभु ज़ लिद जेभैंःव हिताव ज़ दोनाच्‍यो।
COL 2:7 स़ोनो नो जेपैसिउ पाँत जेयुँ थ·रैद ख्रीसए ओक्‍याँत पाथ परिद जेयुँ झन ज़ सुहुप्‍नाद धन्‍याबाद चरैःव ज़ नैच्‍यो।
COL 2:8 जेलाई सुवाराए फसङ्गैन्‍या बुद्धीनिकाव पाँर यासथैचिकिन ननी ताझुकिच्‍यो। नो अऩाकलाव पाँर मिँराए याथितीनी ससैसिउर वाज़ लिज़्‍यार। नो पाँ ख्रीसए उजूँनी माःक, अइज़ सिर्जैसिउ पाँर वाज़ लिज़्‍यार।
COL 2:9 परमेस्‍वरए साचो ओगे भरी मिँ मिन्‍सिउ ख्रीसए ओक्‍याँत ज़ लिज़्‍या।
COL 2:10 नो ख्रीस प़ाइँ सक्तीर स़ोनो घेप्‍पाराए याङ़ैताव लिज़्‍या। होस तोबो ताद वाज़ जे मनी यो·वर ताद जेले।
COL 2:11 जे मिँए उकुइनी क्‍याल्‍न्‍या सरेस जैसिउर माःक, ख्रीसनी जैसिउर ची। नो ख्रीसनिकाव सरेसनी ते पाप दाव परींज़्याव ङ़ादाकिनकाव जेक्‍याँनी फुर्सुल तावर जेलिज़्या।
COL 2:12 ख्रीसए उमिनत जेसछैंसिक नो ङ़ादाङाव जेक्‍याँलाई खादरल जेझाःके। ख्रीसलाई सिउनी सोचोइज़्‍यावए जेलाई मनी जेयुँ जेसुहुबोए साःरोल रैचिक्‍यो।
COL 2:13 जे ङ़ादा क्‍याल्‍न्‍या सरेस माजैसिज़्याव, मादान्‍या य़ेनर दोज़्याव छुत जातलाव मिँर जेतावए परमेस्‍वरनी सिउल गनिसिउर जेल्‍यो। हैदी ब ख्रीसस साःरो जुनील रैचिक्‍यो। परमेस्‍वरए गे प़ाइँए गेपाप क्‍याल्‍द्याद,
COL 2:14 नो ङ़ादाङाव मादान्‍या गेदोव गेङ़ैताव रिन भरी ख्रीसस क्रुसत तङ्गैद फो·द्यासिक्‍यो।
COL 2:15 नो क्रुसत ज़ सैतानलाई ओचाकर्‍यारास हारैद यासक्ती भरी हाइद्याद प़ाइँए रँःन्‍यात यापाहा झाःद याएक्‍यो।
COL 2:16 है जैद जेलाई ज़्‍यान्‍या ओन्‍याराए जूँनी स़ोनो बारिन्‍या बारर मानिन्‍या पर्बराए जूँनी जे जेखार्ल सुए सुलाई ज़ कर लैसिन्‍या ताताक।
COL 2:17 नो भाःकिनकाव चलनर हुन्‍या पाँए ओसाँए जूँनी वाज़ उलिज़्‍याव। नो साँए साचो ओक्‍याँ ख्रीस ज़।
COL 2:18 तँनिकाव यापाँरानी सुए ज़ जेलाई ख्रीसनिकाव जेदैव बाजीलाई चुकैव तादैरक। नोराए यापाँ आव ज़ — मुइलिउ मिताव जैसिन्‍या, नमताव चाकर्‍याराए यातपस दान्‍या स़ोनो झजल्‍किद कातार रँःन्‍या। ननी ज़ या ब सघ्योःसिद,
COL 2:19 प़ाइँराए ङ़ैताव ख्रीसलाई ऱास्‍ज़्‍यार। गे ओक्‍याँत लिज़्‍यावर ते ओल ख्रीसस जोरैसिद गेर्सा गेमिन भरी ननी ज़ ताद परमेस्‍वरए ओपैंज़्याव मिताव यादा ज़ गेतानाज़्‍या।
COL 2:20 जे भाःकिनकाव थालिसिउ पाँर ऱास्‍द ख्रीसस सिप ज़ जेसिउ ताकिन कै जैद नो मानुवाताव मितावर ताद नो ऱास्‍सिउ चलनदा फरी बान्‍या?
COL 2:21 नलाव पाँर ते जम्‍मा ‘ताज़्‍युच्‍यो, ताछुच्‍यो, ताचलैच्‍यो’ है लिन्‍यार वाज़ लिज़्‍यार।
COL 2:22 नोर अइज़ चिद खेम्‍न्‍यार वाज़ लिज़्‍यार। भाःकिनकाव मिँराए यादोहुव चलन वाज़ लिज़्‍या।
COL 2:23 नो चलनर मानिज़्यावर धर्म-कर्म दाव ज़ लिज़्‍यार, मुइलिउ मिताव जैसिउ ज़ लिज़्‍यार स़ोनो याक्‍याँलाई दुख याव ज़ लिज़्‍यार। रँःक ते नो मिँर यागहक ल्‍यो स्‍यासोर ज़ रैंःज़्यार। खाली निताव चलनराए ते यायुँए ओपैंज़्याव माचाव पाँलाई मावैंधुवर।
COL 3:1 जे ख्रीसस साःरोल जेपुलुसोए स्‍वर्गताव पाँर खिम्‍चिके। होङ ख्रीस परमेस्‍वरए ओवोर्दा च़ुसिद ले।
COL 3:2 आव मानुवाताव पाँरादा माबाद, स्‍वर्गताव पाँरादा जेयुँ थू जैचिके।
COL 3:3 ङ़ादाङाव जेक्‍याँ सिद साःरो जेजुनी ख्रीसस परमेस्‍वरए ओक्‍याँत म़ोंसिउ लिज़्‍या।
COL 3:4 जेलाई साःरो जुनी याज़्याव ख्रीस फरी ओसरैंःसिहुक जे ब ओलस मान दैन्‍यार जेतारिज़्‍या।
COL 3:5 है जैद जे माचाव य़ेन दान्‍यात जेक्‍याँताव जेखँ जेकुइर सिधुव मिताव सम्‍जिउ ताके। नो मादान्‍या य़ेनर आवर ज़ — पातर्‍या पातर्नी जैसिन्‍या, युँ माजामो य़ेन दान्‍या, युँनी कुबातैं हुन्‍या, जोत ब युँ मानैधुन्‍या, प़ाइँत भुरूस्‍न्‍या। निताव भुरूस्‍न्‍या अङग्‍या सेवा दाज़्याव मिताव ज़ लिज़्या।
COL 3:6 निताव य़ेननी ज़ परमेस्‍वरए ओसजा ब हुन्‍या ले।
COL 3:7 जे मनी ङ़ादा निताव य़ेन ज़ जेदोज़्याव।
COL 3:8 अब ते निताव मादान्‍या य़ेन भरी ऱासोका ऱासो ज़ जैव ताके। ऱास्‍न्‍यार नोर वाज़ माःक, आवर ब लिज़्‍यार — हतप्‍त रिस चोन्‍या, रिसलाई युँल नैन्‍या, खिस फेरैन्‍या, छींनी पाँन्‍या, याःनी माचाव पाँ पले·न्‍या, आव भरी ब ऱासो ताके।
COL 3:9 जे जेल धुतैसिन्‍या छकैसिन्‍या ब माःक। जे ङ़ादाङाव जेक्‍याँए ओदोव य़ेन भरी ऱास्‍द,
COL 3:10 साःरो ताद जेले। है जैद नो साःरोल रैज़्याव परमेस्‍वरए उयुँलाव मितावर प़ाल्‍नाद ख्रीसए ओगे रैन्‍यार ब जेताज़्‍या।
COL 3:11 नल यहूदी जात ब माले, ग्रीक जात ब माले, क्‍याल्‍न्‍या सरेस जैसिउ माजैसिउए ओलेखा ब माले, ‘नँ बन मिँ स्‍यासो’ है लिन्‍या ब माले, ‘नँ नग्‍यान माल्‍यो’ है लिन्‍या ब माले, बाँदा माबाँदा है लिन्‍या ब माले। ख्रीस प़ाइँस लिज़्या, हो वाज़ ओलेखा ल्यो लिज़्‍या।
COL 3:12 जे परमेस्‍वरए उमिनत छाँतिसिउ उयुँलाव छैंवर जेतावए जे जेल समारिसिद प़ाइँल ज़ खैच्‍यो। प़ाइँ सहिद मुइलिउर ताद जेयुँ ब गराँव ओताक।
COL 3:13 छुतरास माखैव पाँर उलिकिन जेयुँल मानैद सहिच्‍यो। प्रभुए जेलाई किताव मादान्‍या जेदोवनी ओऱास्‍चिउ, जे मनी हिताव ज़ छुतलाई ऱासो ताके।
COL 3:14 प़ाइँरानी दान्‍या य़ेन ते छुतलाई मया दाद समारिन्‍या। नो ज़ प़ाइँलाई सखैज़्‍याव।
COL 3:15 जे ख्रीसए ओयासिउ युँ होलाँनी प़ाइँत धन्‍याबाद चरैःद जे जेल खैद ल्‍यो ताके। नोए उजूँनी ज़ परमेस्‍वरए जेलाई ख्रीसए ओक्‍याँत खुल्‍द नैचिउ।
COL 3:16 ख्रीसए ओपाँ ब जेयुँल बास दाद ओफाबिक। ननी ताज़्‍याव बुद्धीनी जे जे पैसिद सुधारैसिच्‍यो। उगुनर मामेंःद युँनी ज़ भजन गितर गैद, परमेस्‍वरलाई जय जय ओताक है लिच्‍यो।
COL 3:17 जेपाँज़्‍याव, जेदोज़्‍याव भरित परमेस्‍वर गेबाबुलाई धन्‍याबाद चरैःद प़ाइँ गेप्रभु येसुए उमिनत ज़ ओताक।
COL 3:18 जे रे दाव मेंमार, प्रभुए ओपाँत उसहिज़्‍याव मिताव जेरेराए यापाँल लिच्‍यो।
COL 3:19 जे ज्‍या दाव खेपार मनी जेज्‍याराए याङ़ैत अखत्‍यासो माजैसिद मया यारादोच्‍यो।
COL 3:20 जे ल़ुज़ा बाँज़ार, जेबाबु जेआमाराए यापाँ धूँल लिच्‍यो। जे प्रभुए उयुँलाव मिताव य़ेन दान्‍या ननी ज़।
COL 3:21 जे याबाबुर, जेज़ारालाई गनका गन तारादोच्‍यो, म़ानी यायुँ क़्याया।
COL 3:22 जे बाँदार, आव मानुवाताव जेसाहुराए यापाँ भरी भैंःच्‍यो। जेदोज़्‍याव य़ेन नोराए ङ़ाक सतैंन्‍याए जूँनी वाज़ माःक, प्रभुलाई य़ाका दाद चाव युँस दोच्‍यो।
COL 3:23 जो य़ेन जेदोदी ब जेर्सा माम़ोंद दोच्‍यो। ‘नो य़ेन मिँलाई दाद गेएज़्‍याव माःक, प्रभुलाई दाद गेएज़्‍याव ची’ लिन्‍या य़ाका दोच्‍यो।
COL 3:24 जेय़ेनए ओजेला स्‍वर्गत लिज़्‍याव प्रभुए ल्‍योनी जेदैरिज़्‍या। जे जेर्गे प्रभु ख्रीस ज़।
COL 3:25 जोए माचाव य़ेन दोज़्याव, होए सजा दैरिज़्‍याव। परमेस्‍वरए मिँ रँःद मादोव, य़ेन रँःद ची दोव।
COL 4:1 जे साहुर फरी, जेबाँदाराए ङ़ैत सतस दोच्‍यो। ‘गे गेर्गे ब स्‍वर्गत लिज़्‍या’ लिन्‍या तामेंःच्‍यो।
COL 4:2 जे सैंसिद प़ाइँल ज़ धन्‍याबाद चरैःद पोंखारिउ ज़ नैच्‍यो।
COL 4:3 गे गेजूँनी ब ‘ख्रीसए कप्‍सिउ ओपाँ सथैन्‍या येम परमेस्‍वरए फैद ओरायोक’ लिद पोंखारिद्यासिच्‍यो। नो पाँ ङारासथैवनी ज़ झ्‍यालखानाल ङालिज़्‍या।
COL 4:4 जे ङाजूँनी ‘नो पाँ चावस पलासो ओदैवक’ लिद पोंखारिद्याँच्‍यो।
COL 4:5 परमेस्‍वरए ओपाँत मालिज़्‍यावराए याङ़ाक गहकस दोच्‍यो। नोरास पाँन्‍या मौका उहुकिन खेर ताझाःच्‍यो।
COL 4:6 सापीए ज़्यावलाई ङमो ओजैज़्याव मिताव जेपाँ मोहोन्‍यालो जैद यारासथैच्‍यो। जो मिताव यापाँए ओजवाप यान्‍या ब सैंच्‍यो।
COL 4:7 आङाव ङाथा भरी तुखिकसए ओल्‍योनी जेथैरिज़्‍या। नो मिँ गेस प्रभुए ओय़ेन दाज़्‍याव बनै युँ हुबो गेयुँलाव गेभाइ ज़।
COL 4:8 ङा नो मिँलाई गेथार है दाद जेयुँर सझेंःद्यान्‍याए जूँनी जेल्‍योदा ङापरींज़्‍या।
COL 4:9 जेल्‍योनी हुव ओनेसिमसलाई ब नोस ज़ ङापरींज़्‍या। नो मिँ मनी युँ हुबो गेयुँलाव गेभाइ ज़। नोनी आङाव पाँ भरी है दाचिरिज़्‍यार।
COL 4:10 ङास झ्‍यालखानाल लिज़्‍याव अरिस्‍तार्खसए जेरो है दाचिज़्‍याव। बारनाबासए ओभाइ मर्कूसए मनी जेरो है दाचिज़्‍याव। नो मर्कूसए उजूँनी ते ङ़ादा ज़ है दाद ङानैचिए, नो जेल्‍योक उहुकिन चावस नैच्‍यो।
COL 4:11 युस्‍तस यादोज़्‍याव येसुए मनी जेलाई जेरो है दाचिज़्‍याव। ङास परमेस्‍वरए ओराज्‍यालाव य़ेन दोज़्‍याव यहूदीर आवर वाज़ लिज़्‍यार। ङायुँ ब कुधु ज़ होलाँ जैद्याँकेर।
COL 4:12 येसु ख्रीसए ओनोकोर जेल्‍योनी हुव इपाफ्रासए मनी जेरो है दाचिज़्‍याव। नोए जेजूँनी ‘परमेस्‍वरए उयुँलाव मिताव य़ेनत उघुरिउर थ॰रिउर ओतारक’ लिद बनै धामास पोंखारिउ ज़ नैज़्‍याव।
COL 4:13 ङा जेलाई साचो है ङादाचिज़्‍या, नो मिँए जे कलस्‍सी, लाउदिकिया स़ोनो हिरापोलिसलावराए जेजूँनी उयुँ थू जैद परमेस्‍वरए ओसेवा दोव ज़ नैज़्‍याव।
COL 4:14 गेयुँलाव मिताव दाक्‍दर लूका स़ोनो देमासनी निल्‍योनी ब जेरो है दाचिज़्‍यार।
COL 4:15 गे गेल्‍योनी लाउदिकियालाव गेदाज्‍यु भाइरालाई, नुम्‍फासलाई स़ोनो उझ़िमलाव दुप्‍सिज़्‍याव मन्‍दलीलाई ब जेरो लिज़्‍या।
COL 4:16 आव चिथी जेप़रिउत लाउदिकियालाव मन्‍दलीलाई मनी प़रिउ याराएच्‍यो। होराए ल्‍योङाव ङापरींव चिथी ब जे रैद प़रिच्‍यो।
COL 4:17 अर्खिप्‍पसलाई, ‘प्रभुए ओल्‍योनिकाव नदैव य़ेनलाई सयो·न्‍याए जूँनी नयुँ थू जैद लिनी दी’ है दोच्‍यो।
COL 4:18 ङा पावलए ङाल्‍योनी ब जेरो है ङादाचिज़्‍या। आव जेरो ङा ज़ ङासरो सरेस्‍च्‍यो। ङा झ्‍यालखानाल लिज़्‍यावलाई तामेंःनाच्‍यो। जेल्‍योदा परमेस्‍वरए उयुँ ओगराँक।
1TH 1:1 गे पावल, सिलास स़ोनो तिमोथीराए गेल्‍योनी गेबाबु परमेस्‍वर स़ोनो गेप्रभु येसु ख्रीसनी निमिनताव थेसलोनिके सहरल लिज़्याव मन्‍दलीलाई आव चिथी परींद गेयाचिज़्‍या। जेल्‍योदा परमेस्‍वरए उयुँ गराँद जेयुँ होलाँ जैद ओयाचिउक।
1TH 1:2 गे गेपोंखारिक जे प़ाइँलाई एकम्‍न्‍या य़ाका दाद जेजूँनी परमेस्‍वरलाई धन्‍याबाद चरैःव ज़ गेनैज़्‍या।
1TH 1:3 जे गेबाबु परमेस्‍वरए ओङ़ाक जेयुँ हुप्‍द जेदोज़्‍याव य़ेन, नैं मेंए ल्‍योदा युँ थू जैद जेरासमारिज़्‍याव, स़ोनो गेप्रभु येसु ख्रीसए ओल्‍योदा आस दाद जेयुँ हुबोलाई माऱास्‍द थ॰रिद जेलिज़्‍याव रँःद गे जेलाई चेतैव ज़ गेनैचिज़्‍या।
1TH 1:4 जे परमेस्‍वरए उयुँलाव मिताव गेभाइर, जेलाई परमेस्‍वरए ओछाँतिचिउर ज़ जेल्‍यो लिन्‍या गेसैंज़्‍या।
1TH 1:5 जेलाई परमेस्‍वरए ओपाँ गेसथैचिक नो पाँ जेल्‍योङ पाँनी वाज़ उहुव माःक, छैंव पुरूसए ओसक्तीनी हुद जेयुँल साचो ज़ थ॰रिके। है जैद जेल्‍योङ गे जेजूँनी किताव मिँर गेल्‍यो जे ज़ जेसैंज़्‍या।
1TH 1:6 हुनी ज़ गे गेदोज़्‍याव मिताव स़ोनो गेप्रभुए ओदोज़्‍याव मिताव जे मनी दान्‍याकावर ज़ जेल्‍यो। हो बेलाक जेखिरी पसिद दुखर यायाचिज़्‍यावत ब छैंव पुरूसनी परमेस्‍वरए ओपाँर रेंद ज़ जेथैके।
1TH 1:7 जे माकेदोनिया स़ोनो अखैयालाव परमेस्‍वरए ओपाँत बाज़्‍यावराए याङ़ाक सतैंद नैसिउ मितावर जेलिज़्‍या।
1TH 1:8 जे जेल्‍योनी ज़ परमेस्‍वरए ओपाँ प़ाइँदा ज़ थास्‍नाके, माकेदोनिया स़ोनो अखैयाल वाज़ माःक, जोङ जोङ जेलाई ‘परमेस्‍वरए ओपाँत बाज़्‍यार दी’ लिन्‍या थैज़्‍यार होङ होङ ब परमेस्‍वरए उमिन थासो ज़ लिज़्‍या। है जैद गे जेजूँनी छुतङ पाँव ज़ मापरिके।
1TH 1:9 जेजूँनी याज़ अइ लिद पाँज़्‍यार, ‘थेसलोनिकेलाव मिँराए पावललाई ओनैंरास बनै चावस रैद अङग्‍या पुजा भरी ऱास्‍द जींदो साचो परमेस्‍वरए ल्‍योदा ओल्‍द होए ओसेवा वाज़ दोज़्‍यार दी,
1TH 1:10 स़ोनो गेलाई पापए सजानी पले·ज़्‍याव, नो सिउनी ओसोचोइव ओज़ा येसुलाई स्‍वर्गनी ओमाहुवा पै यायुँ थू जैद कींव ज़ नैज़्‍यार दी’ लिन्‍या याज़ सथैव ज़ यारानैज़्‍यार।
1TH 2:1 गेनैं गेमेंर, गे जेल्‍योक गेहुव अऩाकलाव माताके लिन्‍या जे ज़ जेसैंज़्‍या।
1TH 2:2 गे ङ़ादा फिलिप्‍पील दुखर दैद बीज्‍यात ब गेताके। आव ब जेसैंज़्या। जेल्‍योक गेहुवत फरी ब गेखिरी यापसिज़्‍यावत ब परमेस्‍वरए ल्‍योनी घ्योःव युँ दैद माछे·द ज़ चाव था गेसथैचिके।
1TH 2:3 गे गेसथैचिउ भरी गेलाई तान्‍यानी ब माःक, बिप्‍या युँनी ब माःक, कप्‍तैंनी ब माःक।
1TH 2:4 बुरू परमेस्‍वरए गेलाई छाँतिद चाव था सथैन्‍या गेपासल झाःद ओयासिउनी ज़ गेसथैचिज़्‍या। नो, अइज़ मिँरालाई खुसी जैन्‍याए जूँनी माःक, गेयुँलाव पाँ सैंज़्‍याव परमेस्‍वरलाई खुसी जैन्‍याए जूँनी गेसथैचिज़्‍या।
1TH 2:5 जे ज़ जेसैंज़्‍या, गे जेल्‍योङ ‘गेलाई कातार यासिर सैं’ लिद खर्क ज़ जेस रग रग जैद गेमापाँए। परमेस्‍वर साची लिज़्‍या।
1TH 2:6 फरी जे जेल्‍योनी तादी ब छुतराए ल्‍योनी तादी ब घेप्‍पा मिन ब गेमाखिमे।
1TH 2:7 गे ख्रीसए ओखतैसिउ ओसाचीर गेलिदी ब गेमान ब गेमाहाइए। बुरू नुइँ सवैज़्‍याव आमाए ओज़ालाई पाथस ओनैज़्‍याव मिताव गे ब जेल्‍योङ मुइलिउर ताद गेलिके।
1TH 2:8 जे गेयुँलाव मितावर जेतावए जेलाई बनै मया दाद परमेस्‍वरए चाव ओथा यान्‍या वाज़ माःक, गेजिउ यान्‍या ब खुसी ज़ गेताके।
1TH 2:9 गेनैं गेमेंर, गेय़ेनर जे ब जेचेतैज़्याखेहो। गे जेल्‍योङ गेलिक सुलाई ज़ घच ताताक लिद गे ज़ लाकनी रील दुखस य़ेन दाद परमेस्‍वरए चाव ओथा ब गेसथैचिके।
1TH 2:10 जे ओपाँत बाज़्‍यावराए जेल्‍योदा गे कैफत मादाद बनै सोजो छैंव युँस ज़ गेदोके। नोए ओसाची परमेस्‍वर स़ोनो जे ज़ जेलिज़्‍या।
1TH 2:11 याबाबुए ओज़ारालाई है ओरादोज़्‍याव मिताव गे ब जेलाई तोबो तोबोनी जेर्सार हाइद्याद,
1TH 2:12 जेलाई ओल ओराज्‍यालाव ज़गै मगैवल खुल्‍ज़्‍याव परमेस्‍वरए उमिनत ताव परिन्‍या मितावर घतारक लिद घलैद काचाबुल दाव गेपरींचिके।
1TH 2:13 गेल्‍योनी परमेस्‍वरए ओपाँ जेथैक, ‘आव ते मिँराए यासिर्जैव पाँ ते माःक, परमेस्‍वरए ओपाँ ज़ ची’ लिद जेथ·रैवए गे जेजूँनी परमेस्‍वरलाई धन्‍याबाद चरैःव ज़ गेनैज़्‍या। नो पाँए जेयुँ हुप्‍ज़्यावराए जेयुँल ओय़ेन ब दाव ज़ नैज़्‍याव।
1TH 2:14 नो पाँ जेथ·रैवए, जे गेनैं गेमेंर, येसु ख्रीसलाई यायुँ हुबो यहूदिया खन्‍दल लिज़्याव परमेस्‍वरए ओमन्‍दली स्‍यासोर जे ब जेताके। नोराए यहूदीराए ल्‍योनी कुधु दुखर सहिकेर। हिताव ज़ जे मनी जेदेसलावराए ल्‍योनी कुधु दुखर जेसहिके।
1TH 2:15 नो यहूदीराए ज़ गेप्रभु येसु ख्रीसलाई ब सैःकेर, ङ़ादा अगमबक्ता भरिलाई ब यारासैःकेर। गेलाई ब यादेसनी खेपैसिकेर। है जैद नोर सुरास ज़ माखैद परमेस्‍वरकिन ब तँदा ज़ लिज़्‍यार।
1TH 2:16 गे छुत जातलावरालाई परमेस्‍वरए ल्‍योदा घुहुरक लिद परमेस्‍वरए ओपाँ गेरासथैक मनी वैंसिज़्‍यार। इतावनी ज़ पापए तर्त पाप दाद यापापए गोइँ सयो·नाज़्‍यार। है जैद नोराए याक्‍याँत परमेस्‍वरए उरिस परिद ले।
1TH 2:17 गेनैं गेमेंर, गे जाँवा पै जेल्‍योदा हुव गेमादैके। हैदी ब गेमामेंःचिए, गेयुँ ते जेस ज़ लिज़्‍या। जेस फरी ब दैसिद गेङाः गेङाः जोरैन्‍या बनै युँ गेदोज़्‍या।
1TH 2:18 खाली ङ़ादा जेल्‍योदा हुव गेपैंज़्‍याक सैतानए वैंसिक्‍यो। ङा पावल झन जेल्‍योदा कुधु पाला ज़ हुव ङापैंके।
1TH 2:19 गेप्रभु येसु फरी उहुक ओङ़ाक गेआस, गेयुँ होलाँ जैद्यान्‍या, गेसिङार नैद्यान्या ब जेकिन सुर ची यातारिज़्‍याव?
1TH 2:20 हो बेलाक गेइज्‍यात नैद्याद गेलाई सरेंन्‍यार ब जे ज़।
1TH 3:1 गे जेल्‍योदा हुव गेमादैवए ‘किताव लिज़्‍यार’ लिद आतिद ‘एथेन्‍सल गेबातङ ज़ गेल्‍या ब’ लिद,
1TH 3:2 जेल्‍योदा तिमोथीलाई हतप्‍त ज़ गेपरींके। नो मिँ गेभाइ ज़, परमेस्‍वरसकाव येसु ख्रीसए चाव ओथा सथैज़्‍याव मिँ ज़। परमेस्‍वरए ओपाँत जेर्सार हाइद्याद जेयुँर सझेंःद्यान्‍याए जूँनी नोलाई गेपरींके।
1TH 3:3 हो ताकिन जेदैज़्‍याव दुखरानी जेयुँर सतेन्‍या जेमाले। जे ब जेसैंज़्‍या, आव दुखर सहिन्‍या गेजुँ ज़ लिज़्‍या।
1TH 3:4 गे जेस गेलिज़्‍याक ‘जुनी ब दुखर दैन्‍या ज़ जेले’ लिद ङ़ादाकिन ज़ है दाव ज़ गेनैचिज़्‍याव। है गेदाचिज़्‍याव मिताव ज़ नो दुखर हुके, नो ब जेसैंज़्या।
1TH 3:5 आव भरी ङाचेतैक कैताराक सैतानए झुकैद याबले·वादा, गेय़ेन भरी अऩाकलाव ताया लिद परमेस्‍वरए ओपाँत किताव यालिज़्‍याव लिद बनै आतिद मासहिधुद हतप्‍त ज़ ङापरींके।
1TH 3:6 जेल्‍योनी तिमोथी ब भर्ज़ा ज़ हुद ‘नलावर परमेस्‍वरए ओपाँत यायुँ हुप्‍द या याल बनै खैवर लिज़्‍यार’ है उलिहुक ते चाव जेथा गेथैके। गेलाई मया दाद जेचेतैसिज़्‍याव स़ोनो गेस फरी दैसिन्‍या युँ जेदोज़्‍याव ब तिमोथीए ओयाःनी गेथैके।
1TH 3:7 है जैद गेनैं गेमेंर, परमेस्‍वरए ओसतत ज़ जेलिज़्‍यावए गे गेदुखराल ब गेयुँर बनै होलाँ ताके।
1TH 3:8 जे प्रभुए ओपाँत थ॰रिद जेलिज़्‍यावए गे ब अब ते जो तादी ब गेसहिधुया ज़।
1TH 3:9 परमेस्‍वरए जेल्‍योङाव ओदोव य़ेननी बनै रेंद ज़ परमेस्‍वरलाई गेपोंखारिक जेजूँनी जतिकाव धन्‍याबाद गेचरैःदी ब ओभार खर्क ज़ गेमाख्याधुइ।
1TH 3:10 गे परमेस्‍वरलाई गेपोंखारिक खर्क गेङाः गेङाः जोरैद्यासिउके स़ोनो परमेस्‍वरए ओपाँ तोबो ऩेब्‍लो मासैंद यामासुदुम्‍धुज़्‍यावलाई सुदुम्‍द्याव गेदैक लिद लाकनी रील पोंखारिउ ज़ गेनैज़्‍या।
1TH 3:11 ओल गेबाबु परमेस्‍वर स़ोनो गेप्रभु येसुनी जेल्‍योदा हुन्‍या येम फैद ओयासिरक,
1TH 3:12 स़ोनो गे किताव जेलाई मया गेदाचिज़्‍याव हिताव ज़ गेप्रभुए जेलाई मनी जे जेल स़ोनो छुतरास खैन्‍या युँ झन ज़ धोल पोगोल जैद ओयाचिउक,
1TH 3:13 स़ोनो ओल्‍योदा बनै थ॰रिउर ओजैचिउक। हो ताकिन ची गेप्रभु येसु फरी ओचाकर्‍यारास उहुक जे गेबाबु परमेस्‍वरए ओङ़ाक जेखत माल्‍यो छैंवर जेथ॰रिरिज़्‍या।
1TH 4:1 गेनैं गेमेंर, जेलाई गेप्रभु येसुए उमिननी बिन्‍ती दाद गेअर्थैचिज़्‍या, परमेस्‍वरए ओयेमल बाद उयुँलाव मिताव य़ेनर दान्‍या गेल्‍योनी किताव जेथैव हिताव ज़ झन ज़ दोनाच्‍यो। आःपै ते नो पाँर दाहुव ज़ जेनैज़्‍या दी।
1TH 4:2 प्रभु येसुनिकाव गेदैव दान्‍या मादान्‍या य़ेनर जेलाई गेयाचिउ जे ज़ जेसैंज़्‍या।
1TH 4:3 जे परमेस्‍वरए उयुँलाव मिताव य़ेन दान्‍या आव ब लिज़्‍या, छैंवस लिद पातर्‍या पातर्नी जैसिन्‍यानी अछतङ ल्‍यो ताके।
1TH 4:4 बुरू सु सु क्याँलाई सतस चोखोस नैव ताके।
1TH 4:5 है जैद जे परमेस्‍वरलाई मासरेस्‍ज़्‍यावराए यादोज़्‍याव मिताव क्‍याँए ओपैंज़्याव माचावदा युँ खोतोरो जैन्‍या माःक।
1TH 4:6 निताव पातर्‍या य़ेन दाज़्यावर ख्वा ख्वाराए अर्काए ओज्‍यालाई रैद यानैं मेंरालाई ब याराबले·ज़्‍यार। ‘नितावरालाई खिस फेरैद्यान्‍या ते प्रभु ज़ लिज़्‍या’ लिद ङ़ादाकिन है दाव ज़ गेनैचिज़्‍याव।
1TH 4:7 परमेस्‍वरए गेलाई युँ माजामो य़ेन दान्‍याए जूँनी उखुल्‍सिउ माःक, छैंव य़ेन दान्‍याए जूँनी उखुल्‍सिउ ची।
1TH 4:8 है जैद इताव गेपाँर जोए माभैंःए, होए गेलाई माःक, झन छैंव पुरूस याज़्‍याव परमेस्‍वरलाई भैंःद मायो।
1TH 4:9 जेलाई ‘परमेस्‍वरए ओपाँत बाज़्‍यावराए ल्‍योदा जेयुँ थू जैद खैच्‍यो’ है दान्‍या ओमेला ते माले। जे जेल ते तयुँ जैद खैन्‍या परमेस्‍वरए ल्‍योनी ज़ जेपैसिके।
1TH 4:10 जे माकेदोनियालाव दाज्‍यु भाइरास खैद समारिसिउ ज़ जेलिज़्‍या। हितावत ब नो य़ेन माऱास्‍द झन ज़ दोनाच्‍यो है गेलिज़्‍या।
1TH 4:11 स़ोनो गे ङ़ादाकिनकाव है गेदाचिज़्‍याव मिताव, जे सु सु जेय़ेन जेकुइए ज़ सुरू सुरू दाद थान मानस लिन्‍यादा कलँ लिच्‍यो।
1TH 4:12 हो ताकिन ची सुलाई ज़ माप़ेरैद परमेस्‍वरए ओपाँत माहुवराए याङ़ाक जे महिमानोर जेरैंःरिज़्‍या।
1TH 4:13 अ गेनैं गेमेंर, सिउराए जूँनी ब तोबो पाँ है गेदाचिज़्‍या। नो पाँ जेसैंकिन अजम्‍बरी जुनीए आस मादोज़्‍यावराए माँःती सिउराए सोगो दाव मापरिए।
1TH 4:14 गे ते येसु सिद ओसैंसिउ गेपतिज़्या। हिताव ज़ येसुए उमिनताव सिउरालाई परमेस्‍वरए ओलस ज़ यालाँरिज़्‍याव लिद गेयुँ हुबो ज़ लिज़्या।
1TH 4:15 आव पाँ गेप्रभुए ओपाँनी ज़ है गेदाचिज़्‍या, गेप्रभु फरी ओमाहुवा पै गे मासिद जींदो ज़ लिज़्‍याव भरी सिउराकिन ङ़ात तान्‍या गेमाले।
1TH 4:16 हो छ्याम परमेस्‍वरए प़ाइँरानी घेप्‍पा ओचाकर्‍याए बनै चोइस ओर्गा सघ्योःद ओभोंकर ओतबोत गेप्रभु येसु स्‍वर्गतिन झरिहुरिज़्‍या। उझरिउ प़ाइँना ज़ उमिनताव सिउ भरिरालाई ङ़ात यासोचोइरिज़्‍याव।
1TH 4:17 नकिन गे मासिद रहिद लिज़्‍यावरालाई मनी गेप्रभुए नो ओरासोचोइवरास बादल जींल स्‍वर्गत ओल्‍योक लाँसिरिज़्‍याव। हाःकिन गेप्रभुस एकतार सिप ज़ लिन्‍या गेले।
1TH 4:18 है जैद जे जेल आव पाँरानी जेयुँ होलाँ जैसिचिके।
1TH 5:1 गेनैं गेमेंर, आव भरी आव बेलाक आव छ्याम तारिज़्‍या लिन्‍या जेलाई सर्द्याव मापरिए।
1TH 5:2 जे ज़ चावस जेसैंज़्‍या, गेप्रभु हुन्‍या छ्याम रील कुना हुज़्‍याव मिँ स्‍यासो ज़ हुरिज़्‍या।
1TH 5:3 मिँराए, ‘गेलाई काता ओछ्यास ब माले, थाँतस ज़ गेलिज़्‍या’ है यालिज़्‍यावत ज़ किताव ज़ा दैन्‍या मेंमाए ज़ा दैन्‍या ओबेथा उमँःजानी हुज़्‍या, हिताव ज़ नोराए याक्‍याँत मनी परमेस्‍वरए ल्‍योनी नास हुरिज़्‍या। सु ज़ उस्‍किउ दैन्‍या मालेर।
1TH 5:4 खाली जे, गेनैं गेमेंर, चुम चुमोल लिज़्‍याव स्‍यासोर ते जेमाले। जेलाई ते ख्रीस फरी उहुन्‍या छ्याम नो कुना हुज़्‍याव मिँ उहुज़्‍याव स्‍यासो तान्‍या माले।
1TH 5:5 जे ते लाकाव पलाँए ओज़ार ची, रीलाव चुम चुमोए ओज़ार माःक।
1TH 5:6 गे उपुर्कावराए माँःती ङ़ल्‍द लिन्‍या माःक, गे ते सैंसिद झाःसिद ल्‍यो ताके।
1TH 5:7 माझाःसिद ङ़ल्‍द लिन्‍या स़ोनो मँःद काता ज़ मासैंव तान्‍या ते चुम चुमोलाव रीलाव य़ेन ची।
1TH 5:8 है जैद पलाँवल य़ेन दाज़्यावर गेतावए गे मामँःव मितावर ताव परिके। किताव लरैंदा बाज़्याव मिँ ओछाती जोगोइन्‍याए जूँनी झँए पाता ओजासिज़्याव हिताव ज़ जे ब परमेस्‍वरलाई मया दाद ओललाई वाज़ जेयुँ सुहुबो ताके। फरी नो मिँए ओङ़ैत झँए तुपी ओजासिज़्याव मिताव जे ब ‘अजम्‍बरी जुनी यान्‍या ज़ ले’ लिद आस दोव ताके।
1TH 5:9 परमेस्‍वरए गेलाई उरिस चोवर ओजैसिउ माःक, गेलाई ते उजिउ झाःद्याज़्‍याव गेप्रभु येसु ख्रीसनी बाँचिन्‍यार ओजैसिउ ची।
1TH 5:10 गेजूँनी उसिउए ओल ओमाहुवा पै गेसिदी ब, गेलिदी ब, गे प़ाइँ तछा ओलस ज़ सिप तान्‍या गेले।
1TH 5:11 है जैद आव पाँरानी जे जेल जेयुँर होलाँ जैद जेयुँर सझेंःसिच्‍यो। नो आःपै ते दोव ज़ जेनैज़्‍या।
1TH 5:12 अ गेनैं गेमेंर, जेस गेबिन्‍ती तोबो लिज़्‍या, जेजूँनी ध्‍यावना दाद प्रभुए ओपाँ पैज़्‍याव जेलोम्‍बारालाई यामान नैद याराएच्‍यो।
1TH 5:13 नोरालाई, ‘गेजूँनी आः चाव य़ेन दोज़्‍यार’ लिद यागुन मामेंःद प़ाइँल यामान नैद याराएच्‍यो। जे जे ब खैद लिच्‍यो।
1TH 5:14 अ गेनैं गेमेंर, आव ब य़ाका दोच्‍यो, है दासिउ मातीद मामुइलिउरालाई यारासिङार्च्‍यो, छेपोवारालाई यायुँ सघ्योःद याराएच्‍यो, माथ॰रिउरालाई पाथ यारापारैच्‍यो, प़ाइँलाई सहिद यारासुम्‍च्‍यो।
1TH 5:15 जे जेल सुए ज़ खिस ताफेरैसिच्‍यो, बुरू जे जेल स़ोनो छुतलाई मनी तान्‍या खिम्‍च्‍यो।
1TH 5:16 एकतार रेंद ज़ लिच्‍यो।
1TH 5:17 पोंखारिउ ज़ नैच्‍यो।
1TH 5:18 प़ाइँत ज़ धन्‍याबाद चरैःच्‍यो। जे येसु ख्रीसस लिज़्‍यावराए निताव दान्‍या परमेस्‍वरए उयुँलाव मिताव ज़ ताज़्‍या।
1TH 5:19 छैंव पुरूसलाई तावैंच्‍यो।
1TH 5:20 छैंव पुरूसनी पाँज़्‍यावए ओपाँ ब तासोच्‍यो।
1TH 5:21 बुरू पाँ भरी बनै चावस थ·रैद चाव भरी जेयुँल नैच्यो।
1TH 5:22 बले·ज़्‍याव भरिरानी अछतङ लिच्‍यो।
1TH 5:23 अब प़ाइँलाई सखैज़्‍याव परमेस्‍वरए ओल ज़ जेलाई जेखत माल्‍यो छैंवर ओजैचिउक। स़ोनो गेप्रभु येसु ख्रीस फरी उहुन्‍या छ्याम पै जेलाई जेपुरूस, जेयुँ, जेक्‍याँ ओपो·स ज़ ओखत माल्‍यो नैद ओयाचिउक।
1TH 5:24 जेलाई खुल्‍ज़्‍याव परमेस्‍वर युँ हुबो ज़ लिज़्‍या, जुनी ब सयो·द्याचिरिज़्‍याव।
1TH 5:25 अ गेनैं गेमेंर, गेजूँनी ब पोंखारिद्यासिच्‍यो।
1TH 5:26 नलाव लिज़्‍याव दाज्‍यु भाइरालाई मयास जेरो है यारादोच्‍यो।
1TH 5:27 जेलाई प्रभुए उमिननी ङाअर्थैचिज़्‍या, आव चिथी परमेस्‍वरए उमिनत लिज़्‍याव प़ाइँलाई चावस यारासथैच्‍यो।
1TH 5:28 गेप्रभु येसु ख्रीसए उयुँ जेल्‍योदा ओगराँक।
2TH 1:1 गे पावल, सिलास स़ोनो तिमोथीराए गेल्‍योनी थेसलोनिके सहरल लिज़्याव मन्‍दलीलाई गेबाबु परमेस्‍वर स़ोनो गेप्रभु येसु ख्रीसनी निमिननी आव चिथी परींद गेयाचिज़्‍या।
2TH 1:2 परमेस्‍वर गेबाबु स़ोनो गेप्रभु येसु ख्रीसनी जेल्‍योदा नियुँ गराँद जेयुँ होलाँ जैद ओयाचिरक।
2TH 1:3 गेनैं गेमेंर, जे परमेस्‍वरए ओपाँत जेयुँ झन ज़ उहुप्‍नाज़्‍याव, स़ोनो जे जेल मया दासिद झन ज़ जेखैनाज़्‍यावए, गे जेजूँनी परमेस्‍वरलाई एकतार धन्‍याबाद चरैःन्‍या ज़्‍यासो ज़ ताद ले।
2TH 1:4 स़ोनो जे प़ाइँ खिरीर दुखर सहिद परमेस्‍वरए ओपाँत थ॰रिद जेलिज़्‍यावए गे परमेस्‍वरए ओमन्‍दलीराए ङ़ाक जेजूँनी ‘आः चावर लिज़्‍यार’ लिद प़ाइँलाई ज़ है गेरादोज़्‍या।
2TH 1:5 नो जेदैज़्‍याव दुखराल परमेस्‍वरए ओन्‍याय चाव ज़ रैंःज़्‍या। परमेस्‍वरए ओराज्‍यालाव दुखर जेसहिज़्‍यावए, जे ओराज्‍या दैन्‍याकावर जेथ॰रिरिज़्‍या।
2TH 1:6 नो जेखिरी पसिज़्‍यावरालाई ते नो जेदैज़्‍याव दुखरानी परमेस्‍वरए ओन्‍यायनी ज़ जेखिस फेरैद्यान्‍या ले।
2TH 1:7 जे दुख दैज़्‍यावर ते गेस सिप ताद जेयुँ होलाँ तारिज़्‍या। हो बेलाक गेप्रभु येसु बनै यासक्ती ल्‍यो ओचाकर्‍यारास स्‍वर्गनी हुद वीं वीं चाँःज़्‍याव मेंःल सरैंःसिद,
2TH 1:8 परमेस्‍वरस माखैवर स़ोनो गेप्रभु येसुए चाव ओथा माभैंःज़्‍यावरालाई सजा याएरिज़्‍याव।
2TH 1:9 नोर प्रभुए ओङ़ाकिन स़ोनो ओसक्तीलाव ओज़गैकिन तँदा ताद खर्क ज़ मापुलुस्‍धुन्‍या सजाल परिरिज़्‍यार।
2TH 1:10 हो छ्याम फरी परमेस्‍वरए छैंव उमींराए याक्‍याँत ओल उमिन ब झन ज़ ज़गैव रैंःरिज़्‍या। स़ोनो ओललाई यायुँ हुप्‍ज़्‍यावराए याखार्ल उगुनर झन अचम्‍बलाव थ॰रिरिज़्‍या। आव गेरासथैज़्‍याव परमेस्‍वरए ओपाँत जे ब जेयुँ जेसुहुबोए नोराए याखार्ल जे ब जेतारिज़्‍या।
2TH 1:11 है जैद परमेस्‍वरए जेलाई उखुल्‍चिउल उयुँलाव मितावर ओजैचिउक, स़ोनो परमेस्‍वरए ओपाँत जेयुँ हुप्‍द चाव य़ेन दाव जेपैंज़्‍याव भरिल ओल ओसक्तीनी ज़ सयो·द ओयाचिउक लिद जे जेजूँनी परमेस्‍वरलाई एकतार ज़ गेपोंखारिज़्‍या।
2TH 1:12 हो ताकिन ची गेप्रभु येसु ख्रीसए उमिन जे जेल्‍योनी ब चाव रैंःरिज़्‍या, जे ब ओल उमिननी चाव जेरैंःरिज़्‍या। आव भरी गेपरमेस्‍वर स़ोनो गेप्रभु येसु ख्रीसनी नियुँ ओगराँवनी ज़ ओताक।
2TH 2:1 अ गेनैं गेमेंर, गेप्रभु येसु ख्रीस फरी उहुक गे ओलस दुप्‍सिद सिप गेतारिज़्‍यावए जूँनी तोबो पाँ है गेदाचिज़्‍या।
2TH 2:2 ख्वा ख्वाराए, ‘गेप्रभु येसु ख्रीस उहुन्‍या छ्याम ताधुके’ है लिज़्‍यार। नितावराए गे गेमिन कुद इताव चिथीर यापरींकिन स़ोनो जेल्‍योक हुद, ‘इताव पाँर परमेस्‍वरए उपुरूसनी ज़ गेदैके,’ है यालिदी ब नोराए यापाँ पतिद जेयुँ आँचा पाँचा ताजैच्‍यो।
2TH 2:3 सुवाराए ल्‍योनी ब ताझुकिच्यो। मानुवा भरी परमेस्‍वरकिन तँदा जैसिद परमेस्‍वरए ओकानुन माभैंःज़्याव ऩुल्‍या मिँ ओमासरैंःसिवा पै नोकिन ङ़ादा गेप्रभु हुन्‍या माले।
2TH 2:4 नो तँदा जैसिज़्यावए मानुवाताव मिँराए यामानिज़्‍याव देवताराकिन ओल ज़ सघ्योःसिद, परमेस्‍वरकिन ब स॰द ध्‍यान झ़िमल च़ुसिद, ‘परमेस्‍वर ङा ज़’ है लिन्‍या ले।
2TH 2:5 जे जेमामेंःज़्‍याखेहो, आव पाँ भरी जेस ङालिज़्‍याक है दाव ज़ ङानैचिज़्‍याव।
2TH 2:6 नो मिँ ओसरैंःसिन्‍या बेला ओमातावा पै नोलाई वैंद नैज़्‍याव ‘आवए ज़’ लिन्‍या ब जेसैंज़्‍या।
2TH 2:7 खाली नो वैंज़्‍यावए येम ओमाऱासा पै नो मिँ माहुधुइ। परमेस्‍वरकिन तँदाङाव य़ेन ते आज्‍याल ब उजींल उजींल ताव ज़ लिज़्‍या।
2TH 2:8 येम ओऱासोत वाज़ बल्‍ल नो परमेस्‍वरए ओकानुन माभैंःद तँदा जैसिज़्याव मिँ रैंःन्‍या ले। नोलाई गेप्रभु येसु ओज़गैस ओसरैंःसिहुक उस॰ ह्‍वास ओजैव प़ाइँना ज़ नो मिँ होक ज़ सिद उमिन ज़ म़ान्‍या ले।
2TH 2:9 नो मिँए ओय़ेन भरी सैताननिकाव ओतावए सैतानए ओसक्ती रैद अचम्‍बलाव य़ेनर चेतकर ब सतैंहुरिज़्‍याव।
2TH 2:10 नर्गलाव येमदा बाज़्‍यावराए परमेस्‍वरए साचो ओपाँलाई माभैंःद बाँचैन्‍या येमलाई यासोवए नो मिँए ओछलनी प़ाइँ किसिमलाव धुतर पले·द याझुकैरिज़्‍याव।
2TH 2:11 है जैद परमेस्‍वरए मनी ‘निताव धुत पाँलाई ज़ घपतिज़्‍यारक ते’ लिद मुन्‍दुक्‍यासो तान्‍या सराप ब याएरिज़्‍याव।
2TH 2:12 साचो पाँलाई यायुँ माहुप्‍द मादान्‍या य़ेनदा यायुँ थू जैज़्‍याव भरी ननी ज़ परमेस्‍वरए ओसजाल परिन्‍या लेर।
2TH 2:13 अ प्रभुए उयुँलाव मिताव गेनैं गेमेंर, जेजूँनी गे एकतार परमेस्‍वरलाई धन्‍याबाद चरैःव परिज़्या, काराव ल्‍यो ताकिन परमेस्‍वरए साचो ओपाँत जेयुँ जेसुहुप्‍ज़्याव स़ोनो छैंव पुरूसए जेलाई छैंवर ओजैचिउनी जेलाई ङ़ादाकिन ज़ अजम्‍बरी जुनी ओलस ज़ दैन्‍या छाँतिद नैचिउ।
2TH 2:14 हो येमल बान्‍याए जूँनी ज़ गे गेसथैचिज़्‍याव चाव थानी परमेस्‍वरए जेलाई खुल्‍द नैचिउ। ननी ज़ गेप्रभु येसु ख्रीसए ओज़गै जे ब जेदैरिज़्‍या।
2TH 2:15 है जैद गेनैं गेमेंर, जे गेल्‍योनी जेपैसिउ भरी, गेयाःनी तादी ब, सर्सिउ चिथीनी तादी ब जात्त ज़ माऱास्‍द नत ज़ थ॰रिद लिच्‍यो।
2TH 2:16 गेप्रभु येसु ख्रीस स़ोनो गेबाबु परमेस्‍वरए जेलाई चाव जेय़ेन, चाव जेपाँ भरिल जेयुँर होलाँ जैद्याद थ॰रिउ युँ ब जैद ओयाचिउक। गेबाबुए गेल्‍योदा उयुँ थू जैद उयुँ ओगराँवनी ज़ गेलाई अजम्‍बरी जुनीए आस याद गेयुँ सझेंःद्यासिक्‍यो।
2TH 3:1 अ गेनैं गेमेंर, फरी ब गेपाँ तोबो लिज़्‍या, गेजूँनी पोंखारिद्यासिच्‍यो। जेयुँ हुप्‍द जेयुँल जेरैव मिताव, प्रभुए ओपाँ प़ाइँदा चाँदो ज़ घरा·सिक, उमिन ब प़ाइँदा ओघ्योःनाक।
2TH 3:2 परमेस्‍वरकिन तँदाङावर स़ोनो ओपाँ सोज़्‍यावराए ल्‍योनी पाथस पुलुसो गेदैक। परमेस्‍वरए ओपाँत यायुँ माहुबोर कुधु ज़ लिज़्‍यार।
2TH 3:3 हितावत ब प्रभु युँ हुबो ज़ लिज़्या। है जैद जेलाई मनी प़ाइँत ज़ थ॰रिउ जैद माचाव भरिरानी जोगोइद पाथस नैचिरिज़्‍याव।
2TH 3:4 ‘है गेदाचिज़्याव भरी माऱास्‍द दाव ज़ जेनैज़्‍याखेहो’ लिद जेजूँनी गेप्रभुए ल्‍योदा गेयुँर हुबो ज़ लिज़्या।
2TH 3:5 परमेस्‍वरए जेयुँ ओल्‍योदा झन ज़ जैद ओयाचिउक, स़ोनो ख्रीस उथ॰रिउ मिताव जेलाई ब थ॰रिउर ओजैचिउक।
2TH 3:6 अ गेनैं गेमेंर, जेलाई गेप्रभु येसु ख्रीसए उमिननी गेअर्थैचिज़्‍या, आव गेपैचिज़्‍याव पाँर मातीज़्याव अल्सी जेनैंरानी जोगोइसिद अछतङ लिच्‍यो।
2TH 3:7 बुरू गे जेल्‍योङ गेलिकाव गेदोव मिताव य़ेन जे ब दोचिके। जे ज़ जेसैंज़्‍या, गे जेस गेलिज़्‍याक य़ेन दान्‍या अल्‍सैं गेमादोए।
2TH 3:8 सुए ल्‍योनी ब अइज़ गेमाज़्‍युए। बुरू सुलाई ज़ प़ेरैव तापरिक लिद बनै दुखस लाकनी रील य़ेन दाद गेजिउ गेङाके।
2TH 3:9 गेलाई चाहिज़्‍याव भरी जेल्‍योनी दैन्‍या हक ओमाल्‍योए ते माःक। खाली गे स्‍यासो घदोरक लिद गेदोव य़ेन भरी जेङ़ाक सतैंद गेयाचिके।
2TH 3:10 जेस गेलिज़्‍याक ब, ‘जोए य़ेन मादोव, होए ज़्‍यान्‍या ब ताज़्‍युवक,’ है दाव ज़ गेनैचिज़्‍याव।
2TH 3:11 हितावत ब जेनी ख्वा ख्वाराए य़ेनत यामी सैःद अइज़ च़ुसिद यानैंरालाई यारातोबोलैज़्‍यार दी लिन्‍या गेथैज़्‍या।
2TH 3:12 निताव मिँरालाई गेप्रभु येसु ख्रीसनी गेराअर्थैज़्‍या, याय़ेन सुरू सुरू दाद याभूँदी याज़ ओङारक।
2TH 3:13 जे भन्‍या गेनैं गेमेंर, चाव य़ेन दान्‍यात जेर्सा तासैःच्‍यो।
2TH 3:14 सुवाराए आव गेपरींज़्‍याव चिथीलाव पाँर यामाभैंःकिन जे नो मिँलाई सरेस्‍द ओय़ेनए ओल ज़ लाज मोर्नो घताक लिद ओलस खदेप तालिच्‍यो।
2TH 3:15 खाली नोलाई सुतुर स्‍यासो जैन्‍या ते माःक, बुरू क्‍याँए भाइ स्‍यासो जैद नोलाई सिङारो ताके।
2TH 3:16 अब प़ाइँ युँ होलाँ जैज़्‍याव गेप्रभुए जेलाई प़ाइँनी प़ाइँनी एकम्‍न्‍या जेयुँ होलाँ जैद ओयाचिउक। स़ोनो परमेस्‍वरए जेस ज़ बास ओदोवक।
2TH 3:17 ङा पावलए ङाचिथी भरित ङासही छाप ङाझाःज़्‍याव मिताव आव चिथीत ब ङासही छाप झाःद ङानै। ननी ज़ ‘ओल ज़ उपरींव ओल्‍यो’ लिन्‍या सैंन्‍या जेले।
2TH 3:18 जेल्‍योदा गेप्रभु येसु ख्रीसए उयुँ ओगराँक।
1TI 1:1 ङा पावल गेलाई बाँचैज़्याव परमेस्‍वर स़ोनो आस दाद गेनैज़्‍याव येसु ख्रीसनी है निदाँवनी ज़ येसु ख्रीसए ओसाची खतैसिउ ङालिज़्‍या।
1TI 1:2 आव ङासरो चिथी नँ तिमोथीलाई परींद ङाईंज़्‍या। परमेस्‍वरए ओपाँत गिन साचो ज़ा बाबु मिताव गिन्लिज़्‍या। नल्‍योदा गेबाबु परमेस्‍वर स़ोनो गेप्रभु येसु ख्रीसनी नियुँ ओय़ाल्‍क, नियुँ ओगराँक, नँ नयुँ ब होलाँ जैद उईंनिक।
1TI 1:3 माकेदोनियादा ङाबाऱिज़्‍याकाव है ङादींज़्‍याव मिताव नँ एफिससल ज़ लिद परमेस्‍वरए ओपाँ धुतनी पैज़्‍यावरालाई, ‘निताव माःक’ है दाद वैंव ताके।
1TI 1:4 नोराए ओअर्थ माल्‍यो घर्ती बिन्‍तीर झाःद अऩाकल ज़ खरङाव मरङावराए मिनर यारापैज़्‍यार। ननी माथ॰रिउ ओर्घांताव पाँर वाज़ पुलुस्‍ज़्‍या। परमेस्‍वरए उयुँलाव मिताव ते युँ हुप्‍न्‍यानी वाज़ ताज़्या।
1TI 1:5 ङा है ल्‍यो ङापैंज़्‍याव ते, या याल साचो युँस ओखैरक, स़ोनो परमेस्‍वरए ओपाँत यायुँ हुप्‍द छैंव युँस ज़ उलिरक।
1TI 1:6 खाली ख्‍वा मिँर ते आव चाव पाँलाई माथ·रैधुद अऩाकलाव पाँ जील ज़ ङोइद लेर।
1TI 1:7 नोराए, ‘परमेस्‍वरए ओकानुनलाव यागुर्बार गे ज़,’ है लिज़्‍यार। खाली ‘आव ज़’ है यारादोदी ब यापाँव पाँ याज़ माबुझिधुर।
1TI 1:8 गे ज़ गेसैंज़्‍या, चावस चलैकिन परमेस्‍वरए ओकानुन चाव ज़ लिज़्‍या।
1TI 1:9 परमेस्‍वरए ओकानुन परमेस्‍वरस खैव मिँए जूँनी माःक। नो कानुन ते कानुन तैःज़्यावर स़ोनो माभैंःज़्यावर, परमेस्वरए ओपाँलाई सोज़्याव पापीर, चाव पाँत ल़॰द परमेस्वर माले है लिज़्‍यावर, याबाबु याआमार सैःज़्यावर, मिँ सैःज़्‍यावर,
1TI 1:10 पातर्‍या पातर्नी जैसिज़्यावर, खेपा-खेपाल पातर्‍या जैसिज़्यावर, मिँर यो·ज़्‍यावर, धुत पाँज़्‍यावर, धुत गोहाई याज़्‍यावर स़ोनो परमेस्‍वरए साचो थ॰रिउ ओपाँकिन तँदा बाज़्‍यावराए जूँनी जैसिउ लिज़्‍या।
1TI 1:11 नो थ॰रिउ पाँ उयुँ य़ाल्‍ज़्याव माहान परमेस्‍वरए ङालाई सथैव उपरींनाव चाव था मिताव ज़ लिज़्या।
1TI 1:12 ङालाई सघैज़्‍याव गेप्रभु येसु ख्रीसलाई बनै धन्‍याबाद लिज़्‍या। ओल ज़ ङालाई उयुँ हुबो थ·रैद ओय़ेनत खतैनाक्‍यो।
1TI 1:13 ङा ङ़ादाकिन उमिन बले·द्याद उमिनत बाज़्‍यावराए याखिरी पसिद बनै हाप हाप ङाख्‍याज़्याव। खाली आव भरी ओललाई मासरेस्‍द मासैंद ङादोवए उयुँ नाद ङालाई ऱास्‍नाक्‍यो।
1TI 1:14 ङाल्‍योदा उयुँ य़ाल्‍द ङाक्‍याँताव ओयाँव असिक झन धोल पोगोल ताके। हिताव ज़ येसु ख्रीसनी ङादैव युँ हुप्‍न्‍या स़ोनो ओमया ओल ज़ ङालाई याँक्‍यो।
1TI 1:15 आव पाँ बनै थ॰रिउ युँ हुप्‍न्‍याकाव पाँ ज़ लिज़्‍या — येसु ख्रीसए आव मानुवाताव पापीरालाई बाँचैन्‍याए जूँनी हुके। नो भरिरानी प़ाइँरानी पापी ङा ज़।
1TI 1:16 हितावत ब येसु ख्रीसए पापीरालाई कुधु ओरासहिज़्‍याव प़ाइँलाई सतैंद्यान्‍याए जूँनी ङा पापीराकिन ब पापीलाई परमेस्वरए उयुँ गराँके। हिताव ज़ छींनीकाव ओललाई यायुँ हुप्ज़्यावराए अजम्‍बरी जुनी दैन्‍याए जूँनी ङा ङाक्‍याँताव ओदोव दया याङ़ाक सतैंसिउ मिताव लिज़्या।
1TI 1:17 है जैद छींङ पै रहिज़्‍याव सुए ज़ यामारँःधुज़्‍याव खर्क ज़ मासिज़्याव गेराजा, तोबोका तोबो परमेस्वरलाई ओमान ब ओताक, ज़गैवलाव उमिन ब छींङ पै उरहिक। आमेन।
1TI 1:18 परमेस्वरनिकाव ङाज़ा तिमोथी, ङ़ादा नजूँनी परमेस्वरए उपुरूसनी यापाँव पाँलाई य़ाका दाद परमेस्वरए ओय़ेनत नँ सिपाईं मिताव जैसिद नो पाँदा ध्‍यावना दाव ताके।
1TI 1:19 ख्रीसताव नयुँ नसुहुबोलाई जात्त ज़ माऱास्‍द छैंव युँस दाव ज़ नैयो। ख्वाराए ते छैंव युँस दान्‍या यामाभैंःवए यायुँ यासुहुबोलाई ब झन ज़ नोक्‍सान जैकेर।
1TI 1:20 हुमेनियस स़ोनो अलेक्‍जेन्‍दरनी ब निताव ज़ ताकिनी। है जैद ख्रीसए उमिन बले·न्‍या ओमाताज़्‍याव ओल्‍यो लिन्‍या घदार्सिनिक लिद नोनिलाई सैतानए उकुइत ज़ झाःद ङानिनै।
1TI 2:1 ङा प़ाइँरानी ङ़ात जेलाई बिन्‍ती दाद है ङादाचिज़्‍या — प़ाइँ मिँराए जूँनी पोंखारिच्‍यो, परमेस्वरए ओअसिक ब ऩिद याराएच्‍यो। नोराए जूँनी धन्‍याबाद ब चरैःच्‍यो।
1TI 2:2 स़ोनो गे परमेस्वरए उमिनतावराए युँ होलाँ जैद रान छानस ‘गेजिउ भरी परमेस्‍वरए उमिनलाई सघ्योःद ओमान नैद्याव गेदैक’ लिद राजार स़ोनो घेप्‍पा हक दैवराए जूँनी ब पोंखारिउ ताके।
1TI 2:3 नितावरालाई पोंखारिद्यान्‍या गेलाई बाँचैज़्याव परमेस्वरए उयुँलाव मिताव य़ेन ब लिज़्‍या।
1TI 2:4 होए, प़ाइँए ज़ साचो पाँलाई सरेस्‍द अजम्‍बरी जुनी ओदैरक लिन्‍या युँ दोज़्‍याव।
1TI 2:5 परमेस्वर तोबोका तोबो वाज़ लिज़्‍या। गे मिँरालाई परमेस्वरस सखैन्‍या गेत्‍याला ब तोबो वाज़ लिज़्‍या — हो मिँ मिन्‍सिद हुव येसु ख्रीस ज़।
1TI 2:6 होए प़ाइँए यापापए सजा फो·द्यान्‍याए जूँनी उजिउ ब झाःद याएक्‍यो। ननी ज़ परमेस्वरए ओगोइँव बेलाक ओसाची सरैंःद्यासिक्‍यो।
1TI 2:7 ङा परमेस्वरए साचो ओपाँत ओकत्‍वाल्‍या जैसिद छुत जातलाव मिँरालाई नो पाँत सिऊद यायुँ सुहुप्‍द्यान्‍या ओसाची खतैसिउ ङालिज़्‍या। आव ङापाँ ससैसिउ माःक, ओअर्थ ज़ लिज़्‍या।
1TI 2:8 फरी ब है ङालिज़्‍या, प़ाइँ पोङाव यायुँ हुबो खेपाराए छैंव युँस ओपोंखारिरक। या याल यायुँल माखैव तानैरक।
1TI 2:9 परमेस्वरए ओपाँत बाज़्‍याव मेंमाराए थिककाव पैरन ओदोरक। बनै ओएः ल्‍यो गहनार जासिद ओएः ल्‍यो क्‍वार क्‍वाइसिद स़ोनो याचेमर छन्‍दनी भाँती जैद तासिङारैसिरक।
1TI 2:10 बुरू चाव य़ेननी ज़ परमेस्‍वरए ओमान नैद्याज़्याव मेंमारालाई यासहिज़्‍याव।
1TI 2:11 मेंमार याथकानस लिद झ्याउँ झ्याउँ मालिद ओपैसिरक।
1TI 2:12 ङा मेंमारालाई खेपाराए ङ़ैत हक चलैन्‍या स़ोनो पैन्‍या ङामाराजैए। बुरू नोर च़िम दाद उलिरक।
1TI 2:13 काराव ल्‍यो ताकिन परमेस्वरए ङ़ात आदमलाई जैक्‍यो, नकिन हब्बालाई जैक्‍यो।
1TI 2:14 झुकिउ आदम माःक, झुकिद पापल परिउ हब्बा ची।
1TI 2:15 हैदी ब मेंमार परमेस्वरलाई यायुँ हुप्‍द ओमयाल छैंवस लिद परमेस्वरए उयुँलाव मिताव य़ेनर यादोकिन ज़ा यादैक परमेस्वरए नोरालाई जोगोइन्‍या ले।
1TI 3:1 आव साचो पाँ लिज़्‍या, जो मिँ मन्‍दलीलाव लोम्‍बा जैसिउ पैंज़्‍याव, होए चाव य़ेन ज़ खिम्‍ज़्‍याव।
1TI 3:2 खाली नो मिँ प़ाइँत ज़ ओखत माल्‍यो ताव परिके। नोए ओज्‍या ब तोबो वाज़ ओताक, स़ोनो प़ाइँल थ॰रिउ, ओतहस ओमानस ल्‍यो, पाहुनार समारिन्‍या, परमेस्वरए ओपाँ पैन्‍यात ओगहक ल्‍यो ओताक।
1TI 3:3 फरी नो मिँ मद छोकोरा ओन्‍यात माङ़मो, पैसाए लोभदा ब माबाव, इ़सिन्‍या रसिन्‍या ओयाःनी मापले·द ओमानस ल्‍यो ओताक।
1TI 3:4 उझ़िम चावस चलैधुन्‍या, ओज़ारालाई ब चावस ज़ दईद मुइलिउर जैधुन्‍या ओताक।
1TI 3:5 जोए उझ़िमलावरालाई चावस माराचलैधुव होए परमेस्‍वरए ओमन्‍दलीलाई झन कै जैद ओचलैधुरिज़्‍याव?
1TI 3:6 स़ोनो नो लोम्‍बा जैसिज़्‍याव मिँ भर्ज़ा परमेस्वरए ओपाँत हुव ताताक, म़ानी कैताराक स॰द सैतान उपरिउल ओल मनी परिन्‍या ओछ्यास लिज़्‍या।
1TI 3:7 फरी परमेस्वरए ओपाँत माहुव मिँराए याङ़ाक ब चाव उमिन ल्‍यो ओताक, म़ानी नोराए नोए ओपाँःच्‍यार हाइद याएक सैतानए ओजालल परिन्‍या ले।
1TI 3:8 हिताव ज़ मन्‍दलीलाव य़ेनत सघैज़्‍याव स़ेरर ब यामानस ल्‍योर, यापाँ ऩेपाँ माल्‍योर, मद छोकोरा ओन्‍यात माङ़मोर, पैसाए लोभदा माबाज़्‍यावर ओतारक।
1TI 3:9 बुरू यादैव युँ हुबो फैसिउ पाँलाई चावस तीद नत ज़ छैंव युँस धिद उलिरक।
1TI 3:10 नोरालाई ङ़ादा जाँचिद याखत माल्‍योर याथ॰रिकिन वाज़ मन्‍दलीलाव सेवात सघैन्‍या य़ेन ओदोरक।
1TI 3:11 सेवात सघैन्‍या मेंमार ब यासुबास ल्‍योर, अर्काए उछींनी मापाँन्‍यार, यातहस ल्‍योर, प़ाइँत सतस ल्‍योर ओतारक।
1TI 3:12 सेवात सघैन्‍या खेपार फरी याज्‍या तोबो वाज़ ओताक। याज़ार स़ोनो याझ़िमलावरालाई ब चावस ओराचलैरक।
1TI 3:13 निताव सेवात सघैन्‍या य़ेन दाज़्‍यावराए यामिन स्‍यासो चाव य़ेन यादोकिन नोराए यामान ब रहिन्‍या ले, येसु ख्रीसए ओपाँत ब यायुँर झन ज़ हुप्‍न्‍या ले।
1TI 3:14 ङा नल्‍योदा चाँदो ज़ हुन्‍या युँ ङादोज़्‍या। खाली ‘कैताराक धिलो ताए सैं’ लिद आव चिथी ङ़ादा ज़ सर्द ङापरींज़्‍या। आव चिथीनी ज़, ‘गे परमेस्वरए उझ़िमलावराए इतावनी दोव ताके’ लिन्‍या प़ाइँए ज़ सैंन्‍या जेले। परमेस्‍वरए उझ़िमलावर जींदो परमेस्‍वरए ओमन्‍दली ज़, साचो ओपाँलाई थ·रैद्याज़्याव गज तर्ताव खाँबा ज़।
1TI 3:16 साचो ज़ आव गेमानिज़्‍याव परमेस्वरए कप्‍सिउ ओपाँ ते बनै अचम्‍बलाव लिज़्‍या, परमेस्वर मिँए क्‍याँ जैसिद सरैंःसिके। छैंव पुरूसनी साचो ज़ थ॰रिके। ओचाकर्‍याराए याङ़ाक ब सरैंःसिके। उमिन प़ाइँ जातलावराए याखार्ल थास्‍के। संसारलाव काना कुनीङ ब यायुँ हुप्‍के। छींनी स्‍वर्गताव ओज़गैदा ज़ छींसिके।
1TI 4:1 परमेस्वरए उपुरूसए छर्लङ्ग ज़ है लिज़्‍या, छींनीकाव हुन्‍या बेलाक ख्‍वा मिँराए परमेस्वरए ओपाँ ऱास्‍द सैतान स़ोनो झुकैज़्‍याव पुरूसराए यारापैज़्‍याव पाँदा ज़ बान्‍या लेर।
1TI 4:2 निताव पाँर पाजीराए याछलनी ज़ रा·सिन्‍या ले। नोराए, ‘धुतनी गेरापैज़्‍या’ लिन्‍या सैंज़्‍यावत ब यायुँ ऱाव झँए दामिसिउ मिताव लातासो तान्‍या ले।
1TI 4:3 नोराए, ‘बिह्‍या ब दान्‍या माताए, ख्वा ख्वा ज़्‍यावर ब ज़्‍यान्‍या माताए’ है लिद यारापैरिज़्‍यार। जे ते जेसैंज़्‍या, नो भरी परमेस्वरए गे साचो ओपाँर सैंद गेयुँ हुबोरालाई खुसीस ज़्‍यान्‍या जैद नैद्यासिउ।
1TI 4:4 परमेस्वरए ओजैव भरी चाव ज़ लिज़्‍या। जो ज़्‍याव ब, ‘आव परमेस्वरनी हुव ज़’ लिद धन्‍याबाद चरैःद खुसीस गेज़्‍युकिन माज़्‍यान्‍या काता ज़ माले।
1TI 4:5 परमेस्वरए ओपाँत युँ हुप्‍द पोंखारिकिन प़ाइँ चोखो ज़ ताज़्‍या।
1TI 4:6 आव पाँ भरी परमेस्वरए ओपाँत हुवरालाई चावस नरासम्‍जैकिन येसु ख्रीसए चाव ओनोकोर थ॰रिन्‍या नले, स़ोनो ङ़ादाकिन ज़ नदोहुज़्‍याव नयुँ हुबो साचो परमेस्वरए ओपाँनी नबुद्धी ब झन ज़ छिप्‍नान्‍या ले।
1TI 4:7 नलाव मिँराए याझाःज़्‍याव उर्ती माल्‍यो घर्ती बिन्‍तीर ताथैयो। बुरू नँ परमेस्वरए उयुँलाव मिताव छैंव युँ जैन्‍यादा उहिल हाइके।
1TI 4:8 क्‍याँए जूँनी उहिल हाइज़्‍याव देखा युँल परमेस्वरए उयुँलाव मितावदा उहिल हाइन्‍या बनै ओचाहित ल्‍यो लिज़्‍या। नोए ओफाइदा आव जुनील ब ताज़्‍या, अजम्‍बरी जुनील ब ताज़्‍या।
1TI 4:9 आव पाँ थ॰रिउ, युँ हुप्‍न्‍याकाव पाँ ज़ लिज़्‍या।
1TI 4:10 नो फाइदाए जूँनी ज़ परमेस्वरए ओय़ेनत कलँ लिद धामा गेदोज़्‍या, काराव ल्‍यो ताकिन गेआस जींदो परमेस्वरए ल्‍योदा ज़ लिज़्‍या। नोए ज़ प़ाइँ मिँरालाई, खास ते यायुँ हुबोरालाई याबाँचैज़्याव।
1TI 4:11 है जैद नँ आव पाँरानी ज़ पैद याअऱैयो।
1TI 4:12 नरापैक सुवाराए, ‘इताव भर्ज़ाकावए ओपाँ काता थैन्‍या’ लिद हेला रँःन्‍या स्‍यासो तातानी। बुरू नँ नपाँ, नचाल चलन, नमया स़ोनो नयुँ हुप्‍द छैंव युँस नदोज़्‍यावनी यायुँ हुबो प़ाइँराए उसिऊसिरक।
1TI 4:13 ङा ङामाहुवा पै मन्‍दलीलावरालाई धर्मसास्‍त्र प़रिद्याद यायुँ सझेंःद्याद यापैयो।
1TI 4:14 ङ़ादा मन्‍दलीलाव स़ेरराए नक्‍याँत याकुइ नैद परमेस्वरए उपुरूसनी यापाँज़्याक नदैव बरदानलाई माऱास्‍द दाव य़ेन ज़ दोयो।
1TI 4:15 आव प़ाइँ पाँत नयुँ थू जैद दाव ज़ नैयो। हो ताकिन ची नँ खा ङ़ादा नबाज़्‍याव नक्‍याँत झन ज़ रैंःन्‍या ले।
1TI 4:16 नक्‍याँए जूँनी स़ोनो नरापैज़्‍याव पाँलाई ब जाँचिद जोगोइसिद दोयो। इतावदा धामा नदोकिन अजम्‍बरी जुनील नँ ब नतारिज़्‍या, नपाँ थैज़्‍यावर मनी नल ज़ तारिज़्‍यार।
1TI 5:1 नँकिन स़ेरए ओगल्‍ती उलिकिन नोलाई खोरोनी है दान्‍या माःक, बुरू क्‍याँए बाबु स्‍यासो जैद सम्‍जैव ताके। नँकिन नधूँदाङाव ताकिन क्याँए भाइ स्‍यासो जैद सम्‍जैव ताके।
1TI 5:2 हो मिताव ज़ मेंमारालाई मनी तर्दाङाव ताकिन आमा स्‍यासो, धूँदाङाव ताकिन बैंनी स्‍यासो जैद छैंव युँस सम्‍जैव ताके।
1TI 5:3 चिऊन्‍या मिँ माल्‍यो राँदी मेंमारालाई चावस समारिद याराचिऊच्‍यो।
1TI 5:4 फरी नो राँदी मेंमाए ओज़ार ओनातीर यालिकिन नोराए ज़ समारिद पाथस ओनैरक। ङ़ादा याक्‍याँदाङावराए ल्‍योदा धर्मलाव य़ेन दान्‍या ओपैसिरक। ननी ज़ याबाबु याआमाराए याभार क्‍याल्‍सिद परमेस्वरए उयुँलाव मिताव ब ताज़्‍या।
1TI 5:5 चिऊन्‍या मिँ माल्‍यो राँदी मेंमाए परमेस्वरए ल्‍योदा उयुँ थू जैद लाकनी रील पोंखारिज़्याव।
1TI 5:6 नो फरी, ओमन लागिउ माचाहिउ जीदा दुलिरिज़्‍याव उलिकिन नो मासिद ज़ सिउ स्‍यासो ताके।
1TI 5:7 है जैद नोर मनी याखत माल्‍यो छैंवर घतारक लिद नँ आव तोबो ऩेब्‍लो पाँ ब यासथैयो।
1TI 5:8 खाली जोए ओक्‍याँदाङावरालाई ब मारासमारिउ, होकिन झन उझ़िमलावरालाई ओमारासमारिकिन, नो मिँ परमेस्वरए ओपाँ ऱासोल गनिसिज़्‍या। परमेस्वरए ओपाँत खर्क ज़ माहुव मिँकिन ब माचाव ताज़्‍या।
1TI 5:9 स़ोनो जे परमेस्वरए उमिनत दुप्‍सिज़्‍याव राँदी मेंमारालाई जेरासघैक साथी बर्सकिन यादाङावए उमिन वाज़ सर्द नैच्‍यो। नो मेंमा ओरेए ओसतत ल्‍यो,
1TI 5:10 चाव य़ेनत उमिन थासो, ओज़ारालाई उघुरिउर जैव, उझ़िमक हुज़्‍यावरालाई चावस नैज़्‍याव, परमेस्वरए छैंव उमींराए यासेवा दाव, दुखल लिज़्‍यावरालाई सुम्‍द समारिज़्‍याव, जो य़ेनत ब चाव य़ेन दाज़्याव ओताक।
1TI 5:11 धामें राँदी मेंमाराए यामिन ते तासर्च्‍यो। नोर कसाराक ख्रीसए ओसेवा दान्‍या य़ाका मादाद रे दान्‍यादा वाज़ यायुँ थू याजैकिन,
1TI 5:12 याझाःव किर्‍याल बुदिद नोर याखत ल्‍योर थ॰रिन्‍या ओछ्यास लिज़्या।
1TI 5:13 ख्वा ख्वार फरी य़ेन मादाद झ़िम झ़िमक दुलिद माचाहिउ पाँर आदा होदा जैद माथैन्‍या पाँर थैद वै वै जैन्‍या ब लेर।
1TI 5:14 हो देखा बुरू धामें राँदी मेंमाराए रेर दाद ज़ार दैद झ़िमकाव य़ेन ओदोरक। हो ताकिन गेसुतुरराए गेमिन बले·द्यान्‍या येम दैन्‍या मालेर।
1TI 5:15 हितावत ब ख्वा ख्वा राँदी मेंमार ते सैतानए ल्‍योदा धल्‍किधुकेर।
1TI 5:16 है जैद ख्‍वा यायुँ हुबो मेंमारास राँदी मेंमार यालिकिन होराए ज़ ओराचिऊरक, मन्‍दलीलाई घचैन्‍या माःक। मन्‍दलीए बुरू याक्‍याँदाङाव सु ज़ माल्‍यो राँदी मेंमारालाई माथैंव मायो·वल ओराचिऊरक।
1TI 5:17 मन्‍दलीलाई चावनी चलैज़्‍याव परमेस्वरए ओपाँ बनै धामास पैज़्‍याव लोम्‍बारालाई सघैन्‍या स़ोनो मान दैन्‍याकावर ज़ गनिउ परिके।
1TI 5:18 काराव ल्‍यो ताकिन धर्मसास्‍त्रल इताव सर्सिउ लिज़्‍या, “दाइ झाःज़्‍याव घेंलाई ओयाःत महला झाःद्यान्‍या माताए,” स़ोनो, “य़ेन दाज़्‍याव मिँए ब ओजेला दैन्‍या हक लिज़्‍या।”
1TI 5:19 सुवाराए मन्‍दलीलाव लोम्‍बालाई ओपाहा झाःद्याव यापैंकिन ऩेब्‍लो स़ोम्‍लोराए यापाँ ओमाखैवा पै थै ज़ ताथैच्‍यो।
1TI 5:20 नोए ओगल्‍ती उथ॰रिकिन प़ाइँए ङ़ाक सिङारो ताके। हो ताकिन उपुर्कावर मनी माचाव य़ेन दान्‍या छे·न्‍या लेर।
1TI 5:21 ङा नँलाई परमेस्वरए ओङ़ाक, येसु ख्रीसए ओङ़ाक स़ोनो ओराखतैव चाकर्‍याराए याङ़ाक ङाअऱैनिज़्‍या, जो मिँलाई तादी ब आव पाँ भरी मिँ रँःद तादोयो।
1TI 5:22 मन्‍दलीलाव लोम्‍बार नराजैक चावस माथ·रैद ताराजैयो। छींनी नोराए यागल्‍ती उपुलुस्‍किन नोरास नँ नपाहा ब बान्‍या ले। नितावनी नपाँःच्‍या तापुलुस्‍क।
1TI 5:23 नँ फरी ङ़ादाकिनकाव मिताव ऱी वाज़ ताओयो। नो कैताक कैताक हुज़्याव नजोरो स़ोनो नफूलाव बेथाए जूँनी तुपुरू तुपुरू दाखमद्य ओयो।
1TI 5:24 ख्वा ख्वाराए यागल्‍ती ते छुतराए है यामारादोदी ब ओलनी ज़ छर्लङ्ग रैंःज़्‍या। ख्वा ख्वाराए यागल्‍ती फरी ङ़ादा मापुलुस्‍द छींनी वाज़ रैंःज़्‍या।
1TI 5:25 हो मिताव ज़ ख्वा ख्वा मिँराए चाव याय़ेन ब ङ़ादा ज़ रैंःज़्‍या। कितर याय़ेन आछिम ओम़ोंसिदी ब तछा जुनी ब चावनी ज़ रैंःन्‍या ले।
1TI 6:1 परमेस्वरए ओपाँत हुव बाँदाराए फरी यासाहुराए याधूँल लिद यामान नैद ओराएरक। हो ताकिन ची छुतराए परमेस्‍वरए उमिन ब बले·व दैन्‍या मालेर, गेपाँए उगुस्‍ती ब दाधुन्‍या मालेर।
1TI 6:2 ख्वा ख्वा बाँदाराए यासाहुर यायुँ हुबोर यालिकिन, ‘परमेस्वरनी ते दाज्‍यु भाइ ज़ ची गिन्ल्‍यो, काराव ओमान नैद्यान्‍या?’ है तालिरक। बुरू, ‘उयुँ हुबो गेयुँलाव मिँए ओय़ेन गेदोज़्‍या’ लिद झन ज़ चावस सेवा ओदोरक। है जैद नँ आव पाँर पैद यासम्‍जैयो।
1TI 6:3 जोए गेप्रभु येसु ख्रीसए साचो ओपाँलाई माभैंःद परमेस्वरस खैन्‍या येमकिन तँनी ओरापैकिन,
1TI 6:4 नो मिँ काता ज़ ओमासैंज़्‍यावत ब स॰द सघ्योःसिज़्‍या। निताव मिँर तके पाँत ब खर्लेसिन्‍या इ़सिन्‍या वाज़ खिम्‍ज़्यार। ननी ज़ खिस्‍न्‍या, माखैन्‍या, थल्‍न्‍या स़ोनो साँन्‍या वाज़ ताज़्‍या।
1TI 6:5 नितावराए यायुँ बिप्‍यादा ता·सिउ ताद यायुँल परमेस्वरए साचो ओपाँ वैंसिउ उलिज़्‍यावए या याल ब माखैर। नोराए यादोज़्‍याव धर्मनी यालाई तान्‍या यातिर वाज़ दोज़्‍यार।
1TI 6:6 साचो ज़ परमेस्वरए ओपाँ दान्‍या ते सोन्‍तोकोस लिन्‍या ज़, नो ज़ गेलाई घेप्‍पा फाइदा लिज़्या।
1TI 6:7 गे आव मानुवात गेहुक काता ज़ रैद गेमाहुइ। गेबाक ब काता ज़ मालाँद बान्‍या गेले।
1TI 6:8 गेलाई ज़्‍यान्‍या क्‍वाइसिन्‍या उलिकिन नाःत ज़ सोन्‍तोकोस ल्‍यो ताके।
1TI 6:9 नो कोसै पैंज़्‍यावर ते पापल पारैज़्‍याव छे छे ङम्‍सिउ झिबला मितावल परिज़्‍यार। नो कोसै यापैंज़्‍यावनी ज़ माचाहिउ बलेस्‍न्‍या य़ेन दाद यानी ज़ नास तान्‍याल बाज़्‍यार।
1TI 6:10 रूप्या पैसादा युँ थू जैन्‍या ज़ माचाव भरिए ओजरा। ख्वा ख्वाराए यायुँ नदा ज़ झाःद परमेस्वरए ओपाँनी तँदा यातर्किउए यायुँलाई याज़ घोइज़्यार।
1TI 6:11 खाली नँ परमेस्वरए उयुँलाव मिँ, आव पाँरानी अछतङ लिनी। बुरू नँ सोजोनी दान्‍या, परमेस्वरस खैन्‍या, परमेस्वरलाई युँ हुप्‍न्‍या, मुइलिउ ताद नैं मेंए ल्‍योदा युँ थू जैद खैन्‍या, थ॰रिद तहस लिन्‍यादा कलँ लिनी।
1TI 6:12 परमेस्वरए ओपाँनी माचाव पाँलाई हारैद वैंन्‍यात नर्सा झाःयो। स़ोनो परमेस्वरए खुल्‍द याद ओनैनिज़्‍याव अजम्‍बरी जुनीलाई ताऱास्‍यो। नँ ङ़ादा ज़ ‘हो येम ज़ ङाबारिज़्‍या’ लिद कुधुराए ङ़ाक नथाँसिके।
1TI 6:13 ङा नँलाई, प़ाइँलाई यास॰ झाःद्याज़्‍याव परमेस्वर स़ोनो पन्‍तियस पिलातसए ओङ़ाकाव साचो पाँलाई थ·रैद्याज़्‍याव येसु ख्रीसनी निमिननी ङाअर्थैनिज़्‍या,
1TI 6:14 गेप्रभु येसु ख्रीस फरी ओमासरैंःसिवा पै नँ आव पाँ भरित नपाँःच्‍या मापले·द बनै सतस दोयो।
1TI 6:15 नोलाई ओल परमेस्वरए ओगोइँव बेलाक ज़ सरैंःरिज़्‍याव। नो सरैंःज़्‍याव गेपरमेस्वर बनै असिक ल्‍यो तोबोका तोबो नाम नमलावराए याङ़ैताव, राजाराए याराजा, प्रभुराए याप्रभु,
1TI 6:16 खर्क ज़ मासिज़्‍याव, सु ज़ यामालिधुज़्‍याव ज़गैल लिज़्‍याव, सुए ब यामारँःधुज़्‍याव परमेस्वर ज़। नोलाई बनै घेप्‍पा मान स़ोनो खर्क ज़ माखेम्‍न्‍या राज काज ब ओताक। आमेन।
1TI 6:17 नँ आव जुकलाव धनीरालाई ब है यादोयो — नोर स॰द तासघ्योःसिरक, स़ोनो याआस खेम्‍न्‍या धन सम्‍पतीत तानैरक। बुरू गेयुँर होलाँ जैद्यान्‍याए जूँनी प़ाइँ जोरैद्याज़्‍याव परमेस्वरए ल्‍योदा यायुँ थू ओजैरक।
1TI 6:18 नोर धन कमैन्‍याए ओपोल चाव य़ेनर दाद युँ गराँव ताद छुतलाई याधुन्‍यार ओतारक।
1TI 6:19 इतावनी ज़ अजम्‍बरी जुनीए सामा यादोकिन साचो जुनीए थालन याझाःज़्‍याव मिताव ज़ ताज़्या।
1TI 6:20 अ तिमोथी, नँलाई परमेस्वरए नकुइत याद ओनैनिज़्‍याव भरी पाथस नैयो। आव मानुवाताव अऩाकलाव माचाहिउ पाँरानी स़ोनो सैंन्‍या जैसिज़्‍यावराए ‘आव ज़ ग्‍यान’ लिद याथ·रैवनी अछतङ लिनी।
1TI 6:21 ख्वा ख्वार ते झन नो येम ज़ बाद परमेस्वरए ओपाँकिन तँदा ज़ बाद लेर। परमेस्वरए उयुँ जेल्‍योदा ओय़ाल्‍क।
2TI 1:1 ङा पावल, येसु ख्रीसए ओक्‍याँत अजम्‍बरी जुनीलाव य़ाका लिज़्‍या है लिन्‍या पाँत ओसाची ङालिज़्‍या। नो य़ेनत ओल परमेस्‍वरए ज़ खतैद नैनाव।
2TI 1:2 ङा ङाल्‍योनी आव चिथी नँ ङायुँलाव ङाज़ा तिमोथीलाई परींद ङाईंज़्‍या। परमेस्‍वर गेबाबु स़ोनो गेप्रभु येसु ख्रीसनी निल्‍योनी नियुँ ओय़ाल्‍क, नियुँ ओगराँक, नँ नयुँ ब होलाँ जैद उईंनिक।
2TI 1:3 ङासाखा पुर्खाराकिन ज़ ओसेवा यादोहुज़्‍याव परमेस्‍वरलाई ङा ब छैंव युँस ज़ ओसेवा दाद नँलाई चेतैद नजूँनी लाकनी रील परमेस्वरलाई पोंखारिद धन्‍याबाद चरैःव ज़ ङानैज़्‍या।
2TI 1:4 गिन्‍भाःसिज़्‍याकाव नऱास्‍ज़्‍याव प़िलर ङाचेतैक नँस खर्क दैसिद गिनयुँ होलाँ गिन्‍जैके लिद ङायुँ थू दोज़्‍याव।
2TI 1:5 हाः बेलाक परमेस्‍वरए ओपाँत साचो युँस ज़ नलिज़्‍याव ङाचेतैज़्या। निताव युँ ङ़ादाकिन नबुज्‍यु लोइसस ब उलिज़्‍याव, नआमा युनिसस ब उलिज़्‍याव। आःपै नँस मनी लिज़्‍याखेहो लिद ङायुँ हुबो ज़ लिज़्‍या।
2TI 1:6 है जैद ङा नँलाई तोबो पाँत ङासम्‍जैनिज़्‍या, नो नक्‍याँत ङाकुइ नैद असिक ङाईंज़्‍याकाव परमेस्‍वरनिकाव नदैव बरदानलाई पाथस जोगोइद नैयो।
2TI 1:7 परमेस्वरए गेलाई छे·न्‍या युँ ओयासिउ माःक, नोए ओयासिउ युँ ते घ्योःव, अर्काए ल्‍योदा य़ालो, तहस लिन्‍या लिज़्‍या।
2TI 1:8 है जैद गेप्रभुए ओसाची यान्‍यात नलाज ताहुक। परमेस्वरए ओय़ेनत कैतल लिज़्‍यावए ङाजूँनी ब नलाज ताहुक। बुरू परमेस्‍वरए चाव ओथा सथैन्‍यात ओल ओसक्तीनी ज़ दुखर ङासहिज़्‍याव मिताव नँ ब सहियो।
2TI 1:9 ओल परमेस्वरए ज़ गेलाई अजम्‍बरी जुनी दैन्‍या असिक याद उमिनत छैंव य़ेन दान्‍या खतैसिक्‍यो। नो भरी गेनी गेदोव य़ेननी ओयासिउ ते माःक, ओल उयुँ गराँद उयुँ स्‍यानी ज़ ओयासिउ ची। है जैद आव नाम नम ओमाजैद ङ़ादाकिन ज़ येसु ख्रीसनी गेलाई यान्‍या थ·रैद ओनैज़्याव।
2TI 1:10 नो असिक आज्‍याल गेलाई बाँचैज़्याव येसु ख्रीस उहुवनी ज़ गेल्‍योदा परमेस्वरए उयुँ ओय़ालो छर्लङ्ग ज़ रैंःज़्‍या। नोए गेजूँनी सिन्‍याए उमिन ज़ सम़ैद्याद खर्क ज़ मासिन्‍या जुनी दैन्‍या येम चाव थानी ज़ सतैंद्यासिक्‍यो।
2TI 1:11 ङा पावल नो चाव था सथैद मिँरालाई पैन्‍यात ओसाची खतैसिउ ङालिज़्‍या।
2TI 1:12 नो य़ेननी ज़ इताव दुखर ब दैद ङानै। हैदी ब ङालाज माहुइ, ङायुँ हुबोलाई ङासरेस्‍ज़्‍या। है जैद ओल उहुन्‍या छ्यामए जूँनी ओपासल ङानैव भरी ओल ज़ पाथस नैद्यान्‍या ले लिद ङायुँ हुप्‍द ले।
2TI 1:13 नँ ब येसु ख्रीसलाई नयुँ हुप्‍द ओल्‍योदा नयुँ थू जैद ङाल्‍योनी नपैसिउ साचो पाँ भरी नङ़ाक थाँसिउ मिताव ज़ नैयो।
2TI 1:14 गेयुँलाव बास दाद नैज़्‍याव छैंव पुरूसए ओसक्तीनी नपासल नैसिउ परमेस्वरए ओपाँलाई बनै पाथस नैयो।
2TI 1:15 नँ ज़ नसैंज़्‍याखेहो, एसियालाव गेसकाव लिज़्‍यावराए ङालाई प़ाइँए ज़ ऱास्‍नाकेर। नोरानी फुगेलस स़ोनो हर्मोगेनसनी ब निल्‍यो।
2TI 1:16 नो बेलाक ङा झ्‍यालखानाल लिज़्‍यावलाई रँःद ओलाज माहुद समारिज़्‍याव ओनेसिफरस वाज़ ओल्‍यो। है जैद नोए उझ़िमलावराए ल्‍योदा प्रभु बनै ज़ दाइनो ओताक।
2TI 1:17 नो मिँ रोमल उहुत ङालाई बनै धामास खिम्‍द दैनाक्‍यो।
2TI 1:18 नो मिँए एफिससल ङालिज़्याक बनै चावस ङासेवा दाद ओसघैनाज़्‍याव नँ ब नसैंज़्‍या। है जैद गेप्रभु फरी उहुन्‍या छ्याम नोए ल्‍योदा परमेस्‍वरए उयुँ ओय़ाल्‍क।
2TI 2:1 है जैद नँ ङाज़ा तिमोथी, येसु ख्रीसए उयुँ नल्‍योदा ओय़ालोए बनै थ॰रिद ज़ लिनी।
2TI 2:2 परमेस्‍वरए उमिनतावराए याङ़ाक ङा नँलाई आव य़ेनत ङाखतैनिउ बेलाक ङाल्‍योनिकाव नथैव भरी नँ मनी छुत नयुँ हुबो मिँरालाई नो पाँर सथैद याखतैयो। नोराए मनी हितावनी ज़ छुतरालाई ब ओरापैरक।
2TI 2:3 येसु ख्रीसए ओसेवा दान्‍यात चाव सिपाईं मिताव जैसिद ङा ङासहिज़्‍याव मिताव दुखर नँ ब सहियो।
2TI 2:4 फौजीलाव सिपाईंए मनी कमान्‍दरलाई सरेंन्‍याए जूँनी ओल ओय़ेन दान्‍यादा लन्‍था ज़ मादोव।
2TI 2:5 हो मिताव ज़ खेलल दाँजिसिज़्‍याव मिँए मनी रैःसिउ परिन्‍यानी ओरैःसिकिन वाज़ बाजी दैन्‍याकाव ताज़्‍या।
2TI 2:6 स़ोनो, एँःलाव य़ेन दोज़्‍यावरानी जोए कोसै धामा दोज़्‍याव, होए ज़ प़ाइँरानी ङ़ाताव सै दैज़्‍याव।
2TI 2:7 आव है ङादींज़्‍याव पाँरालाई नयुँल खामिद य़ाका नदोकिन परमेस्‍वरए नँलाई प़ाइँल ज़ तीधुन्‍या जैन्‍या ले।
2TI 2:8 ङा ङारासथैज़्‍याव दाऊद राजाए ओथोलाव, सिउनी सोव येसु ख्रीसलाई नयुँल नैयो।
2TI 2:9 नो चाव था सथैन्‍यानी ज़ दुखर दैद ङानै। अपराधी मिताव साँगलए किद झ्यालखानाल थुनैद नैनार। हैदी ब परमेस्‍वरए ओपाँलाई ते सुर्द मानैधुर।
2TI 2:10 है जैद परमेस्‍वरए ओराछाँतिउराए येसु ख्रीसनिकाव ज़गै मगैवलाव अजम्‍बरी जुनी यादैकिन ताखेहो लिद नोराए जूँनी प़ाइँ दुखर ङासहिज़्‍या।
2TI 2:11 आव बनै थ॰रिउ युँ हुबो पाँ ज़ लिज़्‍या — ख्रीसस गेसिउ मिताव गेताकिन, साःरो जुनील मनी ओलस ज़ तान्‍या गेले।
2TI 2:12 उमिनताव दुखर गेसहिकिन, ओलस ज़ राज्‍या चलैन्‍या गेले। ओललाई, ‘गेमासरेसे’ है गेदोकिन, ओल मनी ‘ङामासरेस्‍चिए’ है दान्‍या ले।
2TI 2:13 खाली गे ओसतत गेमालिदी ब ओल ते गेसतत ज़ लिज़्‍या। ओल ते असत खर्क ज़ मादोव।
2TI 2:14 आव पाँ भरी प़ाइँलाई ज़ सम्‍जैव ताके, स़ोनो ‘अऩाकलाव पाँत ताखर्लेसिच्‍यो’ लिद परमेस्‍वरए उमिननी अर्थैव ताके। निताव पाँ थैज़्‍यावर बलेस्‍ज़्‍यार।
2TI 2:15 नँ परमेस्‍वरए साचो ओपाँलाई चावस पलास्‍द यापैयो। किताव बाहोर्‍याए ओघरपतीए ओय़ेन चावस ओदोकिन ओलाज हुन्‍या माले, हिताव ज़ नँ मनी परमेस्‍वरए उयुँलाव मिताव ताद, ओय़ेनत कलँ ल्‍यो ताके।
2TI 2:16 ओअर्थ माल्‍यो अऩाकलाव पाँकिन तँङ ल्‍यो ताके। निताव पाँए परमेस्‍वरकिन झन तँदा ज़ लाँव दोज़्‍याव।
2TI 2:17 बिसिउ घाइए स्‍यालाई ओक्‍वाज़्‍याव मिताव नो पाँए ब झन ज़ माचाव जैज़्‍याव। निताव माचाहिउ पाँ ससैज़्‍यावरानी हुमेनियस स़ोनो फिलेतसनी ब लिज़्‍यानी।
2TI 2:18 नोनी साचो पाँकिन तँदा बाद, ‘परमेस्‍वरए उमींरालाई सिउनी सोचोइन्‍या ओय़ेन ते ताधुके,’ है दाद ख्वारालाई यायुँ काता माँःती जैद याराएज़्‍यार।
2TI 2:19 हैदी ब परमेस्‍वरए ओपाँ ते घेप्‍पा गजलाव लुँ स्‍यासो थ॰रिउ लिज़्‍या। नो लुँत इताव ऩेब्‍लो पाँ ब आनी हुनी सर्सिउ लिज़्‍या — ‘परमेस्‍वरए उमींरालाई यासरेस्‍ज़्‍याव,’ स़ोनो, ‘परमेस्‍वरए उमिन हाइज़्‍याव भरी पापल झाःज़्‍याव पाँनी अछतङ उलिरक।’
2TI 2:20 यो·व मिँए उझ़िमल सुन चाँदीए जार वाज़ मालेर। गमे जार, सींए जार ब लिज़्‍यार। ख्वार बनै याएः ल्‍योर लिज़्‍यार, ख्वार याएः माल्‍योर मनी लिज़्‍यार।
2TI 2:21 है जैद जोए इताव माचाहिउ पाँरानी छेसिद उलिकिन नो मिँ चाव ओय़ेन भरित ओसाहुए ओङ़ाक बनै ओमान ल्‍यो, उगुन ल्‍यो चोखो जा स्‍यासो ज़ तान्‍या ले।
2TI 2:22 भर्ज़ाकावरालाई माचावल पारैज़्‍याव भरिनी नँ ते जोगोइसिद लिनी। बुरू छैंव युँनी परमेस्‍वरए उमिनतावरास नँ परमेस्‍वरए ओसतत लिद, ओपाँत नयुँ सुहुप्‍द, नैं मेंए ल्‍योदा नयुँ थू जैद, प़ाइँस खैन्‍यादा कलँ ल्‍यो ताके।
2TI 2:23 अऩाकलाव ओर्घांताव पाँर ताथैयो। ननी ते इ़सिन्‍या वाज़ ताज़्‍या।
2TI 2:24 प्रभुए ओय़ेन दाज़्‍याव मिँ ते इताव इ़सिन्‍या स्‍यासो ताताक। बुरू नो मिँ ओदया ल्‍यो, परमेस्‍वरए ओपाँ पैधुन्‍या, माचाव पाँलाई गाल्‍द नैन्‍या,
2TI 2:25 स़ोनो परमेस्‍वरए ओपाँकिन तँदाङावरालाई तहस सुधारैन्‍या ब ओताक। कसा परमेस्‍वरए यायुँ फर्कैद्याद साचो पाँत मारारैव।
2TI 2:26 इतावनी नोर याचेतर फर्किद सैतानए ओजालनी कसा पुलुस्‍द माहुर। नल सैतानए ओय़ेन दान्‍याए जूँनी क्‍योःद यानैव।
2TI 3:1 आव ब सैंद नैयो, छींनीकाव बेलाक धो सहिउ दुखर हुरिज़्‍या।
2TI 3:2 नो बेलाक मिँर यालाई तान्‍या वाज़ चेतैरिज़्‍यार, धनए लोभत बाऱिज़्‍यार, सघ्योःसिद पाँरिज़्‍यार, स॰द छुतरालाई याराथल्‍रिज़्‍यार, याबाबु याआमाए पाँ ब दान्‍या मालेर, गुन ब चेतैन्‍या मालेर, यायुँनी कुबातैं वाज़ हुरिज़्‍या,
2TI 3:3 सुलाई ज़ मया दान्‍या मालेर, सुरास ब खैन्‍या मालेर, अर्काए उछींनी पाँद यामिन बले·द याराएरिज़्‍यार, माचाव य़ेनत यायुँ नैधुन्‍या मालेर, याछ्यास ल्‍योर तारिज़्‍यार, चाव पाँलाई सोरिज़्‍यार,
2TI 3:4 छुतरालाई धोका याराएरिज़्‍यार, याङ़ादा याछींदा माभाल्‍सिद माचावदा ज़ यार्सा झाःरिज़्‍यार, स॰रिज़्‍यार, परमेस्‍वरकिन झन बोंन्‍यादा यायुँ थू जैरिज़्‍यार।
2TI 3:5 पाखाङ ते धर्म यामानिज़्‍याव मिताव ते जैसिज़्‍यार, खाली यायुँल ते नो पाँए ओसक्ती भरी वैंज़्‍यार। निताव मिँरानी नँ अछतङ लिनी।
2TI 3:6 नितावराए झ़िम झ़िमक दुलिद पापल गदिद लिज़्‍याव यार्ती माल्‍यो मेंमारालाई याल्‍योदा याराजैज़्‍यार। नो मेंमार माचाव याचेतैज़्याव भरिदा यायुँ थू जैद याकिला माल्‍यो मितावर लिज़्‍यार।
2TI 3:7 कोभाराए पाँर थैद होत ज़ बाद साचो पाँलाई खर्क ज़ माथ·रैधुर।
2TI 3:8 यान्‍नेस स़ोनो याम्‍ब्रेसनी मोसाकिन तँदा निजैसिज़्‍याव मिताव आव छुत पाँ पैज़्‍यावर ब साचो पाँकिन तँदा लिज़्‍यार। नोर याबुद्धी बलेस्‍द परमेस्‍वरए ओपाँनी काम मालागिउ खेर बावर ताद लेर।
2TI 3:9 खाली आवराए यापाँ ते माफाबिए। ङ़ादाङाव यान्‍नेस स़ोनो याम्‍ब्रेसनी निपाँ ओमाथ॰रिउ मिताव आवराए यापाँ ब प़ाइँए ज़ ओअर्थ माल्‍यो थ·रैन्‍या लेर।
2TI 3:10 नँ ते ङा ङापैनिउ येमदा ज़ नबाज़्‍या। ङा ङादोज़्‍यावनी नँ ब नदोज़्‍या, ङाताकिज़्‍यावदा नँ ब नताकिज़्‍या। ङा किताव ङायुँ ङासुहुप्‍ज़्‍याव, हिताव ज़ नँ नयुँ ब नसुहुप्‍ज़्‍या। ङा ङासहिज़्याव मिताव नँ ब नसहिज़्या। छुतलाई मया दाद ङादोज़्‍याव मिताव नँ ब नदोज़्‍या। ङा ङाथ॰रिज़्याव मिताव नँ ब नथ॰रिज़्या।
2TI 3:11 ङाखिरी पसिद यायाँज़्‍याव दुखर ङासहिज़्‍याव मिताव नँ ब नसहिज़्‍या। ओहो! एन्‍तिओखिया, आइकोनियन स़ोनो लुस्‍त्राल किताव किताव दुखर ङादैके। हितावरानी ब प्रभुए जोगोइनाक्‍यो।
2TI 3:12 साचो ज़ लिज़्‍या, येसु ख्रीसए ओसतत लिद ओयेमल बाज़्‍यावरालाई जुनी ब खिरी ते पसिज़्‍या ज़।
2TI 3:13 खाली धुतैज़्‍याव स़ोनो माचाव मिँर झन ज़ बलेस्‍नान्‍या लेर। या छुतरालाई याराधुतैज़्‍यार, यालाई ब छुतराए याराधुतैज़्‍यार।
2TI 3:14 नँ भन्‍या नपैसिउ पाँलाई साचो थ·रैद, ‘युँ हुबो मिँए ल्‍योनी ज़ ङापैसिके’ लिद मामेंःद होत ज़ लिनी।
2TI 3:15 स़ोनो ‘धर्मसास्‍त्रलाव छैंव पाँ ज़िम्‍ज़ाकिन ज़ ङादैके’ लिद य़ाका दोयो। नो पाँए युँ हुप्‍दकाव येसु ख्रीसनी ताज़्‍याव अजम्‍बरी जुनी दैन्‍या येम थ·रैव परींव दोज़्‍याव।
2TI 3:16 धर्मसास्‍त्रलाव पाँ भरी परमेस्‍वरए ओयाःनी हुव पाँ ज़। नो पाँ परमेस्‍वरए ओयेम पैन्‍यात, याखत ल्‍योरालाई सम्‍जैन्‍यात, मादाँवलाई सदाँन्‍यात, धर्मलाव य़ेन सिऊन्‍यात बनै ओचाहित ल्‍यो लिज़्‍या।
2TI 3:17 ननी ज़ परमेस्‍वरए उमींलाई चाव य़ेन भरिल उहिल हाइन्‍यात प़ाइँ सरजाम जोरैसिउ लिज़्‍या।
2TI 4:1 ङा नँलाई परमेस्‍वरए ओङ़ाक स़ोनो सिउ मासिउराए यान्‍याय फाल्‍द ओराज्‍या चलैहुरिज़्‍याव येसु ख्रीसए ओङ़ाक है ङादींज़्‍या —
2TI 4:2 परमेस्‍वरए ओपाँ सथैन्‍यात जो बेलाक तादी ब झाःसिद ज़ लिनी। नरापैक नर्च्‍या मासैःद नोरालाई सिङार्द तादी ब, सम्‍जैद तादी ब, चाव येमदा ज़ याघलैयो।
2TI 4:3 छींनी मिँराए साचो पाँलाई मासहिधुन्‍या बेला ब हुरिज़्या। नोराए यामन लागिउ पाँ सथैन्‍या मिँर जोतोरो ज़ रैद होराए यापाँ वाज़ थैन्‍या लहर दान्‍या लेर।
2TI 4:4 है जैद साचो पाँदा यार्ना सूइद, माचाहिउ घर्ती बिन्‍ती मिताव पाँरादा यायुँ जैन्‍या लेर।
2TI 4:5 नँ भन्‍या प़ाइँल नतहस लिद, दुख सहिद, चाव था फींजैद, नखतिउ य़ेनलाई सयो·के।
2TI 4:6 ङा ते आव संसारनी बान्‍या बेला हुके। ङा ङापोहोन झाःद्यान्‍या सुरू ज़ ताद ले।
2TI 4:7 सिपाईं मिताव लऱिद ङार्सा भरी झाःद, दाँजिसिन्‍या भरी खेम्‍द, ङायुँ हुबोलाई जोगोइद ङानैके।
2TI 4:8 धर्मीराए यादैज़्‍याव इनाम ङा ङाजुँ ब स्‍वर्गत नैसिउ लिज़्‍या। मिँरालाई ओराफाल्‍रिज़्‍याव छ्याम न्‍यायस फाल्‍ज़्‍याव गेप्रभुए ज़ ङालाई याँरिज़्‍याव। खाली ङालाई वाज़ माःक, ‘ख्रीस खर्क हुके’ लिद यायुँ थू जैद कींद नैज़्‍यावराए जूँनी ब लिज़्‍या।
2TI 4:9 नँ ङाल्‍योदा चाँदो हुद ङास दैसिन्‍या धामा दोके।
2TI 4:10 देमासए आव मानुवाताव पाँरादा उयुँ झाःद ङालाई ऱास्‍द थेसलोनिकेल बाके। क्रेसेन्‍स गलातियाल बाके, तीतस ब दलमातियाल बाके।
2TI 4:11 ङास लूका वाज़ लिज़्‍या। नँ नहुकिन मर्कूसलाई मनी रैद हुनी। नो मिँ ङालाई सघैन्‍या ओचाहित ल्‍यो लिज़्‍या।
2TI 4:12 तुखिकसलाई एफिससदा परींद ङानै।
2TI 4:13 नँ नहुक त्रोआसल कार्पसए उझ़िमकाव ङाख्यानैव क्‍वा ब रैद याँयो। नधुकिन नलाव पोस्‍तोको भरी ब यारैयो। नमाधुकिन ङा ङासरो कागतर भन्‍या काचाबुल यारैयो।
2TI 4:14 तोम्‍ता य़ेन दोज़्‍याव अलेक्‍जेन्‍दरए ङाय़ेन बनै बले·द्याँक्‍यो। नोलाई गेप्रभुए नो ओबले·ज़्‍याव य़ेननी ज़ सजा यान्‍या ले।
2TI 4:15 नो मिँनी नँ ब जोगोइसिद लिनी। नोए आव गेरासथैज़्‍याव पाँलाई वैंन्‍यात बनै ओर्सा झाःज़्‍याव।
2TI 4:16 उस॰कताव ङामुद्दाल सुए ज़ धुरिद मायाँकेर, प़ाइँए ज़ ऱास्‍नाकेर। परमेस्‍वरए नोरालाई नो यादोव गल्‍ती नैद तारायोक।
2TI 4:17 नोराए याख्यानैनादी ब, परमेस्‍वरए ओपाँ माथैव छुत जातलाव मिँराए ङायाःनी घथैरक लिद प्रभुए हो छ्याम ङालाई धुरिद्याँक्‍यो। है जैद हो छ्यामकाव सिन्‍या मितावनी ब ङापुलुस्‍के।
2TI 4:18 ओल प्रभुए ज़ ङालाई माचाव भरिनी जोगोइद स्‍वर्गताव ओराज्‍याल पाथस ज़ सकेस्‍न्‍या ले। नोए उमिन जुक जुक पै खर्क ज़ माखेम्‍न्‍या ज़गै मगैव ओताक। आमेन।
2TI 4:19 प्रिस्‍किला, अकिलास स़ोनो ओनेसिफरसए उझ़िमलावरालाई जेरो है यादोयो।
2TI 4:20 इरास्‍तस कोरिन्‍थल ज़ रहिके। त्रोफिमसलाई ते मिलेतसल ओजोरो उहुज़्‍याव ङाख्यानैके।
2TI 4:21 नँ य़ुँदा ओमाहुद ङ़ादा ज़ हुन्‍या जोर दोयो। नँलाई युबुलसए जेरो है दींज़्‍याव। पुदेस, लिनस, क्‍लौदिया स़ोनो उपुर्काव दाज्‍यु भाइराए ब हैज़ दींज़्‍यार।
2TI 4:22 प्रभु नँस बास ओदोवक, उयुँ नल्‍योदा ओय़ाल्‍क।
TIT 1:1 ङा पावल, परमेस्‍वरए ओबाँदा, परमेस्‍वरए ओराछाँतिउरालाई साचो पाँलाई थ·रैद्याद ओल उयुँलाव मितावर जैन्‍याए जूँनी येसु ख्रीसए ओसाची खतैसिउ ङालिज़्‍या।
TIT 1:2 ननी ज़ परमेस्‍वरए ङ़ादाकिन ज़ ‘अजम्‍बरी जुनी ङाराएरिज़्‍या’ है ओरादोवदा यायुँ थू जैरिज़्‍यार। है जैद खर्क ज़ धुत मापाँज़्याव परमेस्‍वरए,
TIT 1:3 ओल ओगोइँव बेलाक ज़ नो ओपाँ भरी सतैंक्‍यो। ङा फरी नो पाँ सथैन्‍यात ओल गेलाई बाँचैज़्याव परमेस्‍वरए है ओदाँवनी ज़ ङाताके।
TIT 1:4 नँ ङास सिप परमेस्‍वरए ओपाँत नयुँ हुबो साचो ङाज़ा तीतसलाई आव चिथी परींद ङाईंज़्‍या। नल्‍योदा परमेस्‍वर गेबाबु स़ोनो गेलाई बाँचैज़्याव येसु ख्रीसनी नियुँ ओगराँक, नयुँ ब होलाँ जैद उईंनिक।
TIT 1:5 ङा नँलाई क्रेत तापुताव माखेमो गिनय़ेनर खेम्‍न्‍याए जूँनी स़ोनो नाखार नाखारल मन्‍दलीलाव लोम्‍बार खतैन्‍याए जूँनी ङाख्यानैनिके। हो बेलाकाव है ङादींव मिताव,
TIT 1:6 नो लोम्‍बार नराजैक याखत माल्‍योर, याज्‍या ब ऩेज्‍या माल्‍योर, याज़ार ब परमेस्‍वरए ओपाँत हुव यामन लागिउदा माबाद याबाबुलाई खिउर ओतारक।
TIT 1:7 नो लोम्‍बा ताव मिँ परमेस्‍वरए ओय़ेन दान्‍या ओतावए कान्‍त ज़ ओपाँःच्‍या माल्‍यो ताव परिके। है जैद नो मिँ एकोहोर्‍यासो, हतप्‍त उरिस चोन्‍या, मद छोकोरात ङ़मो, इ़सिन्‍या, प़ाइँत लोभ दान्‍या, निताव ओपाँःच्‍या ल्‍यो ताताक।
TIT 1:8 बुरू नो मिँ पाहुनार समारिन्‍या, चाव बानी खिम्‍न्‍या, ओतहस ल्‍यो, प़ाइँत ज़ सतस दाज़्‍याव, थ॰रिउ युँ ल्‍यो, परमेस्‍वरए उयुँलाव मिताव ओताक।
TIT 1:9 नो मिँए ओपैसिउ मिताव युँ हुबो परमेस्‍वरए ओपाँ माबिरैद, नो पाँनी ज़ छुतरालाई यार्सा हाइद्याधुन्‍या, धुतनी पैज़्‍यावरालाई यागल्‍ती थ·रैद्याद यापाँ वैंधुन्‍या ब ओताक।
TIT 1:10 नल साचो पाँकिन तँदा जैसिज़्‍यावर कुधु ज़ लिज़्‍यार। नोराए यापाँ अऩाकलाव ससैसिउ ओतावए मिँरालाई फातैन्‍या वाज़ लिज़्‍या। झन प़ाइँरानी फातैज़्‍यावर नो क्‍याल्‍न्‍या सरेस ‘माजैसिद माताए’ है लिज़्‍यावर ज़ लिज़्‍यार।
TIT 1:11 नितावराए यापाँ वैंद्याव ताके। नोराए पैसाए लोभए माचाहिउ पाँर वै वै जैद तोबो झ़िमलावरालाई ब याराफातैज़्‍यार।
TIT 1:12 नो क्रेतलाव उमिन थासो जैंसीए ब, “आव गेपोलाव मिँर छुलैं पुलैं दाज़्‍यावर, छे छे ङम्‍सिउ धुइर्‍यासोर, य़ेन मादाद ज़्‍यान्‍या हाम्‍पातीर वाज़ लिज़्‍यार,” है लिद ले।
TIT 1:13 नोए है उलिज़्‍याव मिताव साचो ज़ लिज़्या। है जैद नँ तीतस नलाव मिँरालाई बनै ज़ हप्‍कैद परमेस्‍वरए ओपाँत थ॰रिउ जैव ताके।
TIT 1:14 परमेस्‍वरए साचो ओपाँकिन तँदाङावराए याससैव अऩाकलाव यापाँ स़ोनो यहूदीराए यासिर्जैज़्याव आगल्‍या पाँदा यायुँ ताझाःरक।
TIT 1:15 परमेस्‍वरए ल्‍योनी यायुँ छैंव मिँरालाई प़ाइँ चोखो ज़ लिज़्‍या। परमेस्‍वरए ओपाँत यायुँ माहुबो यायुँ माछैंवरालाई ते चोखो काता ज़ माले। याबुद्धी भरी ब छैंव काता ज़ माताद कप्‍तैं वाज़ लिज़्‍या।
TIT 1:16 यायाःए ते ‘परमेस्‍वरलाई गेसरेस्‍ज़्‍या’ है ल्‍यो जैसिज़्‍यार, याय़ेननी ते परमेस्‍वरलाई यामासरेस्‍ज़्‍याव ज़ रैंःज़्‍या। नोर परमेस्‍वरए ओपाँ माभैंःद युँ माजामो काम मालागिउर ज़ ताज़्यार।
TIT 2:1 नँ भन्‍या थ॰रिउ पाँलाई ओज़्‍यास्‍ज़्‍याव मितावनी पैव ताके।
TIT 2:2 सेरो मिँर माचावदा माङ़मोर, यामान नैद्यान्‍या स्‍यासोर, यातहस ल्‍योर, परमेस्‍वरए ओपाँत थ॰रिउर, नैं मेंए ल्‍योदा युँ थू जैद प़ाइँ सहिन्‍या ताव परिके लिद यासम्जैयो।
TIT 2:3 हो मिताव ज़ जूचासोर ब यादोज़्‍याव य़ेन भरित याधर्म रैंःवर ओतारक। अर्काए उछींनी मापाँन्‍यार, मद छोकोरात माङ़मोर, छुतलाई चाव य़ेन सिऊधुन्‍यार ओतारक।
TIT 2:4 नोराए भर्ज़ाकाव मेंमारालाई ब यारेरास खैन्‍या, याज़ारालाई पाथस नैन्‍या ओरासिऊरक।
TIT 2:5 हो वाज़ माःक, नो धामें मेंमार यातहस ल्‍योर, यारेराए सतत ल्‍योर, याझ़िम चावस चलैन्‍यार, यायुँ गराँवर, यारेराए पाँ धूँल ल्‍योर ओतारक। हो ताकिन ची परमेस्‍वरए ओपाँत पाँःच्‍या हुन्‍या माले।
TIT 2:6 हिताव ज़ भर्ज़ाकाव खेपार ब प़ाइँत ज़ यातहस ल्‍योर ओतारक।
TIT 2:7 नँ फरी नोराए याङ़ाक चाव य़ेन दान्‍यात सतैंद नैसिउ मिताव तानी। परमेस्‍वरए ओपाँलाई बरे·सी ऩिन्‍या माजैद, माबिरैद ज़ लाँव ताके।
TIT 2:8 नपाँ भरी थ॰रिउ, कान्‍त ज़ ओखत माल्‍यो ओताक। हो ताकिन ची गेकिन तँदाङावराए गेक्‍याँत काता खत ज़ मादैद याज़ थाम थुम तान्‍या लेर।
TIT 2:9 फरी नँ नो बाँदा लिज़्‍यावरालाई है यादोयो, नोर यासाहुराए पाँ धूँल लिद मारूम्‍रूमैद यासाहुराए युँलाव मिताव य़ेन दान्‍या ओतारक।
TIT 2:10 यासाहुराए मीं काता ज़ माछाप्‍द यादोज़्याव भरित सतस दान्‍यार ओरैंःरक। निताव याय़ेनए गेलाई बाँचैज़्याव परमेस्‍वरए ओपाँए ओसोभा हाइद्यान्‍या लेर।
TIT 2:11 परमेस्‍वरए गेल्‍योदा उयुँ गराँद अजम्‍बरी जुनील बान्‍या प़ाइँ मिँराए गेजूँनी रैंःद ले।
TIT 2:12 परमेस्‍वरए निताव ओअसिक गेक्‍याँत उहुवए गे परमेस्‍वरकिन तँदाङाव गेमन लागिउ य़ेन भरी ऱास्‍द, आव पापी जुकल तहस लिद परमेस्‍वरए उयुँलाव मिताव चाव य़ेन दान्‍यादा गेयुँ थू जैद गेसिऊसिज़्‍या।
TIT 2:13 स़ोनो माहान गेपरमेस्‍वर, गेलाई बाँचैज़्याव येसु ख्रीसए ओज़गै मगैस ओमाहुवा पै आस दाद ओयेम चिऊव ज़ गेनैज़्‍या।
TIT 2:14 नो गेप्रभु येसु ख्रीसए गेलाई पापनी हाइद ओल छैंव उमींर स़ोनो ओय़ेनत युँ थू जैन्‍यार जैन्‍याए जूँनी उजिउ झाःद्यासिक्यो।
TIT 2:15 नँ आव है ङादींव पाँर पैद परमेस्‍वरए ल्‍योनी नदैव हकनी ख्वारालाई यासम्‍जैयो, ख्वारालाई यासिङार्‍यो। सुए ज़ नपाँ सज़िम्‍द ताईंरक।
TIT 3:1 है जैद नलावर सरकारए ओकानुन चलैन्‍या हक दैवराए याधूँल लिद मुइलिउर ताद प़ाइँलाई तान्‍या य़ेन ओदोरक लिद यासम्‍जैयो।
TIT 3:2 सुए ज़ अर्काए उमिन बले·द ताएरक। सुस ज़ माइ़सिद प़ाइँस सहिसिद यायुँ झ्यासोर ओतारक।
TIT 3:3 गे ब ङ़ादा काता ज़ मासैंन्‍यार परमेस्‍वरए ओपाँ माभैंःद तँदा बावर गेल्‍यो। गे जोत ब गेयुँ मानैधुद गेमन लागिउ य़ेनर दाद गेजिउ भरी अर्काए उमीं चाव रँःद मी तून्‍या, सोसिन्‍या, हेला रँःसिन्‍या वाज़ गेदोज़्‍याव।
TIT 3:4 हैदी ब गेलाई बाँचैज़्याव परमेस्‍वरए गेलाई उयुँ ओनाव उयुँ ओगराँव सतैंद ओयासिउ बेलाक ज़,
TIT 3:5 अजम्‍बरी जुनील बान्‍या जैसिक्‍यो। निताव ओजैसिउ गे गेकमैव धर्मए माःक। ओल परमेस्‍वरए उयुँ गराँद छैंव उपुरूसए गेलाई सछैंद साःरोल ओजर्मैसिउनी वाज़ गेताके।
TIT 3:6 नो उपुरूस गेलाई बाँचैज़्याव येसु ख्रीसए ल्‍योनी परींद्यासिक्‍यो। ननी ज़ गेक्‍याँत ओअसिकर ब धोल पोगोल ज़ ताज़्‍या।
TIT 3:7 है जैद गेल्‍योदा परमेस्‍वरए उयुँ ओगराँवनी ओङ़ाक उयुँलाव मितावर गेतावए अजम्‍बरी जुनीदा गेयुँ थू गेजैज़्या।
TIT 3:8 आव ङासरो भरी साचो पाँ ज़ लिज़्‍या। है जैद नँ नोरालाई पुर्थस सम्‍जैव ताके। हो ताकिन ची परमेस्‍वरए ओपाँत हुवर चाव य़ेनत कलँ लिन्‍या लेर। आव पाँर गेजूँनी थ॰रिउ चाव ज़ लिज़्‍या।
TIT 3:9 गे अऩाकलाव पाँर, खरङाव मरङाव काता काताराए मिनर स़ोनो मोसाए ओकानुनलाव पाँरानी खर्लेसिन्‍यारानी अछतङ ल्‍यो ताके। आव भरी अऩाकलाव याचाहित माल्‍योर वाज़ लिज़्‍यार।
TIT 3:10 निताव पाँरानी फातैज़्‍याव मिँलाई तखेप ऩेखेप पै सम्‍जैव ताके। है जैद ब ओमाताकिन नोलाई ऱास्‍द नैव ताके।
TIT 3:11 निताव मिँए उयुँ बिप्‍यानी ता·सिउ ओतावए मादान्‍या वाज़ दाद ओलनी ज़ पापी थ॰रिज़्‍या।
TIT 3:12 ङास लिज़्‍यावनी अर्तिमास स़ोनो तुखिकसनिलाई नल्‍योदा तोबो ङानिपरींरिज़्‍या। नो मिँ उहुव प़ाइँना नधुकिन ङास निकोपोलिसल दैसिहुव ताके। ङा य़ुँदा भरी नल ज़ ङालिरिज़्‍या।
TIT 3:13 सरकारी वकिल जेनास स़ोनो अपोल्‍लोसनिलाई माथैंव मायो·वल सघैद चावस निपरींयो।
TIT 3:14 नलाव गेसकाव मिँराए ब निताव माथैंव मायो·वलाई सघैन्‍या चाव य़ेन ओपैसिरक। परमेस्‍वरए ओय़ेनत काम मालागिउर तातारक।
TIT 3:15 ङास लिज़्‍यावराए प़ाइँए जेरो है दींज़्‍यार। नल्‍योङाव लिज़्‍याव गेलाई मया दाज़्‍याव यायुँ हुबोरालाई जेरो है यादोयो। जे प़ाइँए ल्‍योदा परमेस्‍वरए उयुँ ओय़ाल्‍क।
PHM 1:1 ङा पावल, येसु ख्रीसए ओय़ेनए जूँनी झ्यालखानाल लिज़्‍याव स़ोनो ङास लिज़्‍याव तिमोथीस गिन्‍ल्‍योनी नँ गिनस परमेस्‍वरए ओय़ेनताव खतैसिउ गिनयुँलाव गिनभाइ फिलेमोनलाई आव चिथी परींद गिन्‍ईंज़्या।
PHM 1:2 आव चिथी परमेस्‍वरए ओपाँताव गेबैंनी अप्‍फिया, गेस सिप सिप परमेस्‍वरए ओय़ेन दाज़्‍याव अर्खिप्‍पस, स़ोनो नझ़िमक दुप्‍सिज़्‍याव मन्‍दलीए जूँनी पाला ज़।
PHM 1:3 परमेस्‍वर गेबाबु स़ोनो गेप्रभु येसु ख्रीसनी नियुँ जेल्‍योदा ओगराँक, जेयुँ होलाँ जैद ओयाचिरक।
PHM 1:4 नँ फिलेमोनए नजूँनी परमेस्‍वरलाई ङापोंखारिक एकम्न्‍या नमिन हाइद धन्‍याबाद चरैःव ज़ ङानैज़्या,
PHM 1:5 काराव ल्‍यो ताकिन नँ गेप्रभु येसु ख्रीसलाई नयुँ हुप्‍द परमेस्‍वरए छैंव उमींरालाई मया दाद नरासमारिज़्याव ङाथैज़्या।
PHM 1:6 नो परमेस्‍वरए उमिनत नयुँ हुप्‍द नदोज़्‍याव य़ेननी ख्रीसए ओयासिउ चाव पाँर बुझिन्‍या युँ झन ज़ उईंवक लिद ङापोंखारिज़्या।
PHM 1:7 अ ङाभाइ, नँ परमेस्‍वरए छैंव उमींरालाई समारिद यायुँ होलाँ जैद नराएज़्‍यावनी ङा ब ङायुँ होलाँ ताद रेंव ज़ ङालिज़्‍या।
PHM 1:8 ङा नँलाई ‘आव दोयो’ है दान्‍या ख्रीसनी ङाहक उलिदी ब नँलाई कर मालैद,
PHM 1:9 ङाल्‍योदा नस॰ तरा नचींज़्यावनी ज़ नदोकिन ताखेहो लिद ङाबिन्‍ती लिज़्‍या। ङा पावल इताव सेरो मिँ येसु ख्रीसए उमिनत कैदी तावए,
PHM 1:10 नँस ओनेसिमसए उजूँनी तोबो बिन्‍ती ङादोज़्‍या। नो मिँ आव झ्‍यालखानाल परमेस्‍वरए ओपाँत ङाजर्मैव ङाज़ा ज़।
PHM 1:11 नो मिँ ङ़ादा नजूँनी कान्‍ल ज़ काम मालागिउ ओल्‍यो। अब ते नजूँनी स़ोनो ङाजूँनी ओचाहित ल्‍यो ताद ले।
PHM 1:12 है जैद नो ङायुँ स्‍याताव मिँलाई नल्‍योदा ङापरींज़्‍या।
PHM 1:13 ङा चाव था ङारासथैवए झ्यालखानाल ङालिज़्‍याक नो मिँए नँ नपोल ङासेवा घदोवक लिद ङास नैव ते ङापैंव।
PHM 1:14 खाली नँ ‘ताए’ है नमाल्‍योवा पै ङामानैके। नँ ङाल्‍योदा जो मिताव नदोदी ब करनी माःक, नयुँ स्‍यानी वाज़ ओताक है ङालिज़्‍या।
PHM 1:15 नो मिँ आल धोंःद उहुव तोबो ओअर्थ ल्‍यो लिज़्‍या। जाँवाए जूँनी नल्‍योनी ओधोंःदी ब, आकिन ते सग्‍याको नँस ज़ एकम्‍न्‍या लिन्‍या ले।
PHM 1:16 आकिनी आव नबाँदा वाज़ माःक, साचो नयुँलाव नभाइ स्‍यासो ब तारिज़्‍या। ङा ङाभाइ ते ताधुके। नँलाई ते झन नबाँदा ब ताके, प्रभुए उमिनताव नभाइ ब ताके।
PHM 1:17 नँ ङालाई ननैं मिताव नसम्‍जिनाकिन ङाङाः रँःद नोलाई नैव ताके।
PHM 1:18 नोए नउपर्त मादान्‍या य़ेनर ओदोव ताकिन, स़ोनो कातार हाइद उईंव ताकिन, ङा ज़ नँलाई ओलोइ ङाईंया।
PHM 1:19 ङा पावलए ज़ ‘ङाफो·या’ लिद ङासही छाप ब झाःद ङाईंके। खाली नँलाई ङाबाँचैनिउ ङागुन उलिदी ब ङागुन लिज़्‍या है ङामादींए।
PHM 1:20 है जैद नँ ङाभाइ, प्रभुए उमिननी ङाबिन्‍तीर थैद, ख्रीसलाई य़ाका दाद ङायुँ होलाँ जैद्याव ताके।
PHM 1:21 आव ङासरोलाव है ङादींवकिन झन कुधु ज़ नदोया लिद ङायुँ हुबो ज़ लिज़्‍या।
PHM 1:22 फरी ब नँस तोबो ङाबिन्‍ती लिज़्‍या, नझ़िमक जाँवा पै लिन्‍याए जूँनी पो तोबो जैद्याव ताके। ङाजूँनी जेपोंखारिज़्‍याव मिताव आनी पुलुस्‍द ङाहुइ सैं लिन्‍या मिताव ब लिज़्‍या।
PHM 1:23 येसु ख्रीसए उमिननी ङास झ्यालखानाल लिज़्‍याव इपाफ्रासए ल्‍योनी जेरो है दींज़्‍याव।
PHM 1:24 ङास सिप य़ेन दाज़्याव ङानैंर, मर्कूस, अरिस्‍तार्खस, देमास स़ोनो लूकाराए ल्‍योनी ब जेरो है दींज़्‍यार।
PHM 1:25 गेप्रभु येसु ख्रीसए उयुँ गराँद जेयुँल बास ओदोवक।
HEB 1:1 भाःङ परमेस्‍वरए अगमबक्ताराए यायाःनी गेसाखा पुर्खारास घरी पाला ज़ प़ाइँ किसिमनी पाँव ज़ उलिज़्‍याव।
HEB 1:2 आज्‍याल ते फरी परमेस्‍वर गेस ओल ओज़ानी ज़ पाँज़्‍या। परमेस्‍वरए नाम नम ब नो ओज़ानी ज़ जैक्‍यो, स़ोनो नलाव ताव भरी ब ओज़ाए उकुइत यान्‍या ङ़ादाकिन ज़ थ·रैद ओनैज़्याव।
HEB 1:3 नाम नम स़ोनो नलाव ताव भरी ओज़ाए ओसक्तीलाव पाँनी वाज़ रहिज़्‍यार। परमेस्‍वरए अचम्‍बलाव ओसक्ती स़ोनो ओज़गै ओज़ाए ओक्‍याँत ज़ रैंःज़्‍या। ओगे ब होए ओक्‍याँत ज़ चबनै सतैंसिउ लिज़्‍या। मिँराए यादोव पापए सजा ब ओल ज़ घुर्सिद फो·द ओरायोए स्‍वर्गत माहान परमेस्‍वरए ओवोर्दा च़ुसिद ले।
HEB 1:4 है जैद ख्रीस परमेस्‍वरए ओचाकर्‍याराकिन ब घेप्‍पा ज़ थ॰रिके। हिताव ज़ नोराकिन घेप्‍पा मिन ब दैक्‍यो।
HEB 1:5 ङ़ादा धर्मसास्‍त्रल ओज़ाए उजूँनी इताव सर्सिउ लिज़्‍या, “नँ ङाज़ा ज़, आछिम ज़ नँलाई ङाजर्मैनिके।” फरी तोथोल, “ङा ओबाबु तान्‍या ङाले, नो ङाज़ा तान्‍या ले।” निताव पाँर ओचाकर्‍यारालाई ते खर्क ज़ है मारादोव।
HEB 1:6 परमेस्‍वरए उस॰कताव जर्मिउ ओज़ालाई आव मानुवाल उपरींक, “ङाचाकर्‍या भरिए आवए ओसेवा ओदोरक,” है लिके।
HEB 1:7 परमेस्‍वरए ओचाकर्‍यारालाई ते, “जे ङाय़ेन दान्‍यात कैताक बतास स्‍यासो जेलिज़्‍या, कैताक मेंः स्‍यासो जेलिज़्‍या,” है वाज़ यादोज़्‍याव।
HEB 1:8 ओज़ाए उजूँनी भन्‍या धर्मसास्‍त्रल इताव सर्सिउ लिज़्‍या, “अ परमेस्‍वर, नँ नराज्‍या खर्क ज़ म़ान्‍या खेम्‍न्‍या माले। नराज्‍या ब न्‍यायस ज़ नचलैज़्‍या।
HEB 1:9 नयुँ छैंव स़ोनो सोजो य़ेनत वाज़ लिज़्‍या, मादान्‍या य़ेन भरिलाई नसोज़्‍या। है जैद नपरमेस्‍वरए ननैंराकिन बनै कुधु ज़ नयुँ होलाँ जैदिंक्‍यो।”
HEB 1:10 फरी तोथोल ओज़ाए उजूँनी इताव ब सर्सिउ लिज़्‍या, “अ प्रभु, भाःङ आव नाम नँ ज़ नजैके। स़ोनो नमलाई ब नँ नकुइए ज़ नजैके।
HEB 1:11 नजैव भरी ते खेम्‍न्‍या लेर, खाली नँ ते एकम्‍न्‍या लिन्‍या नले। पुराँदो क्‍वा उचिस्‍ज़्याव मिताव नजैव भरी ब तछा चिस्‍न्‍या ले।
HEB 1:12 नाम नमलाई बर्की माँःती रूल्‍न्‍या नले। मिँए ओक्‍वा ओत़ोज़्‍याव मिताव तछा नोनिलाई त़ोन्‍या नले। खाली नँ ते खर्क ज़ त़ोसिन्‍या नमाले। नजुनी ब खर्क ज़ खेम्‍न्‍या माले।”
HEB 1:13 फरी तोथोल इताव ब लिज़्‍या, “नसुतुररालाई नखँ धूँल झाःद ङामाईंवा पै, ङावोर्दा च़ुसिद लिन्‍के।” निताव पाँ ओचाकर्‍यारालाई ते खर्क ज़ है मारादोव।
HEB 1:14 नोर ते ओय़ेन दाज़्‍याव पुरूसर वाज़ ची। नोरालाई परमेस्‍वरए अजम्‍बरी जुनी दैन्‍या थ·रैद ओरानैज़्‍यावरालाई सघैन्‍याए जूँनी आदा होदा यापरींज़्‍याव।
HEB 2:1 है जैद गे गेथैज़्याव परमेस्‍वरए ओपाँत झन ज़ धिद ल्‍यो ताके, म़ानी तँदा बान्‍या ओछ्यास लिज़्‍या।
HEB 2:2 परमेस्‍वरए मिँरालाई ओचाकर्‍यारानी ओरायो कानुन थ॰रिउ ओतावए नो कानुनलाव पाँ मादाद याख्यावनी सजा ब दैकेर।
HEB 2:3 गे झन प्रभुनिकाव नाःल्‍दिउ बाँचैन्‍या पाँ गेमाभैंःकिन कातानी ची नो ओसजानी उस्‍किउ गेदैरिज़्‍याव? नो पाँ ङ़ादा गेप्रभुए ओल ज़ ओरासथैज़्‍याव। हाःकिन गे फरी नो पाँ भरी ओलसकाव लिज़्‍यावराए ल्‍योनी गेदैके।
HEB 2:4 परमेस्‍वरए फरी नोराए यापाँ थ·रैद्यान्‍याए जूँनी अचम्‍बलाव ओय़ेनर दाव परींद ओसरेसर सतैंद याएक्‍यो। स़ोनो छैंव पुरूसनिकाव बरदानर ब ओल ओपैंज़्याव मितावनी भाःद याएक्‍यो।
HEB 2:5 गे नो हुरिज़्या है गेलिज़्याव परमेस्‍वरए ओराज्‍या ओल ओचाकर्‍याराए याकुइत ते नैद मारायो।
HEB 2:6 धर्मसास्‍त्रल ब तोबोए अइ लिद सर्द नैव, “अ परमेस्‍वर, मिँ काता ची उलिज़्‍यावदा? मिँलाई काराव नमामेंःधुज़्‍याव? नोलाई काराव नचेतैज़्‍याव?
HEB 2:7 नँ जाँवा पै नमताव नचाकर्‍याराकिन मिँलाई ज़िम्‍ज़ा नजैके। फरी नो मिँलाई ज़ सघ्योःद बनै ओमान ल्‍यो नजैके।
HEB 2:8 ताव भरी ब होए उधूँल ज़ जैद नएके।” परमेस्‍वरए नो मिँलाई प़ाइँ उकुइत ओयोए ओल उधूँल माल्‍यो काता ज़ माले। खाली गे ज़ गेसैंज़्‍या, नाम नमलाव तावर मिँराए धूँल मातातावर कुधु ज़ लिज़्‍यार।
HEB 2:9 नो धर्मसास्‍त्रलाव पाँ भरी येसुए ओक्‍याँत वाज़ थ॰रिउ लिज़्‍या। आव मानुवाताव मिँराए जूँनी परमेस्‍वरए उयुँ ओनावए नो सिन्‍याक पै सज़िम्‍सिद हुके। परमेस्‍वरए ओचाकर्‍याराकिन जाँवा पै सज़िम्‍सिउ नो ज़ लिज़्‍या। मिँराए जूँनी उजिउ झाःद ओरायोनी परमेस्‍वरए सघ्‍योःद बनै ओमान ल्‍यो ओजैव ब नोलाई ज़।
HEB 2:10 ताव भरी ओल उजूँनी ओल ज़ जैज़्‍याव परमेस्‍वरए गे मिँरालाई ओज़ार जैद ओज़गैल रैन्‍या पैंक्‍यो। है जैद गे प़ाइँलाई बाँचैन्‍याए जूँनी ओज़ा येसुलाई मिँराए यादैज़्‍याव मिताव दुखर सहिउ परींन्‍या ज़्‍यासो लिज़्या लिन्‍या थ·रैक्‍यो।
HEB 2:11 गेलाई परमेस्‍वरए उयुँलाव मिताव छैंवर जैद ओबाबुस सखैज़्‍याव येसुस तोबोए ओथोर ज़ गेताज़्‍या। है जैद गेलाई ‘ङाभाइर’ है दान्‍या ओलाज माहुइ।
HEB 2:12 नोए उजूँनी धर्मसास्‍त्रल इताव सर्सिउ लिज़्‍या, “अ परमेस्‍वर, ङा ङाभाइरालाई नमिन सथैन्‍या ङाले। नोराए याखार्ल नमिन सघ्योःद्यान्‍या गितर गैन्‍या ङाले।”
HEB 2:13 फरी तोथोल, “ङा परमेस्‍वरए ओक्‍याँत ख्यासिद लिन्‍या ङाले” स़ोनो, “परमेस्‍वरए ङापासल झाःद ओयाँव ओज़ारास ज़ ङालिज़्‍या।”
HEB 2:14 परमेस्‍वरए ओज़ार मिँर तान्‍या ओतावए ओल ओज़ा येसु मनी नोराए जूँनी मिँ ज़ मिन्सिद सिके। नितावनी ज़ सिन्‍या सजाल झाःज़्याव सैतानए ओहक ख्यादिक्‍यो।
HEB 2:15 स़ोनो, सिन्‍या ताया लिद छे·द याजिउ भरी दुखस लिज़्‍यावरालाई ब यापले·क्‍यो।
HEB 2:16 येसु परमेस्‍वरए ओचाकर्‍यारालाई माःक, अब्राहामए ओथोरालाई सघैना उहुव ची।
HEB 2:17 है जैद उयुँ य़ाल्‍द गे मिँराए गेपापए सजा फो·द्याद परमेस्‍वरस सखैन्‍याए जूँनी प्रधान पुजारी जैसिद गेजूँनी परमेस्‍वरस पाँद्यान्‍याए जूँनी ओल येसु प़ाइँल ज़ गे मिँ स्‍यासो ताव ज़ उपरिज़्याव।
HEB 2:18 ओल ब प़ाइँ दुखर दार्द जाँचिसिद उथ॰रिउनी वाज़ गे मिँरालाई गेयुँए बले·द माचावल ओपारैसिज़्याव भरिल जोगोइव धुव।
HEB 3:1 है जैद परमेस्‍वरए उमिनताव खुल्‍सिउ गेनैं गेमेंर, परमेस्‍वरए परींद ओयासिउ प्रधान पुजारी येसुलाई चिऊव ताके।
HEB 3:2 किताव मोसाए उजिउ भरी परमेस्‍वरए उझ़िमल सतस ओदोव, हिताव ज़ येसुए ब परमेस्‍वरए दोव उपरींव य़ेनलाई सतस ज़ दाद सयो·क्‍यो।
HEB 3:3 किताव जैसिउ झ़िमकिन जैज़्‍याव मिँ घेप्‍पा ताज़्‍या, हिताव ज़ मोसाकिन येसुए उमिन घेप्‍पाल गनिसिउ लिज़्‍या।
HEB 3:4 तोबोमा तोबोए ते झ़िम जैज़्याव। हैदी ब प़ाइँ जैज़्याव ते परमेस्‍वर ज़।
HEB 3:5 मोसाए परमेस्‍वरए उझ़िमलाव य़ेन सतस ओदोदी ब होए ओय़ेन नोकोर य़ेन वाज़ ओल्‍यो। होए ओपाँज़्‍याव ओदोज़्‍याव भरी ब जाँकोसै छींनीकाव तान्‍या पाँए ओसाची वाज़ ओल्‍यो।
HEB 3:6 ख्रीस ते ओबाबु परमेस्‍वरए ओबताहा दैन्‍या झ़िमए ओर्गे मिताव ज़ लिज़्‍या। गे मनी होए उझ़िमलावर ज़ गेलिज़्‍या। खाली गेयुँ गेसुहुबोलाई माऱास्‍द आस दाद गेनैज़्‍याव ओमायो·वा पै थ॰रिद गेलिकिन वाज़ गेताज़्‍या।
HEB 3:7 है जैद छैंव पुरूसए ओपाँव पाँ आव ज़, “आछिम परमेस्‍वरए ओपाँ जेथैकिन,
HEB 3:8 जेजिज्‍यु बाज्‍युर बनल परमेस्‍वरकिन तँदा याजैसिउ मिताव, जे जेयुँ खाव ताजैच्‍यो।
HEB 3:9 हो बेलाक चालीस बर्स पै अचम्‍ब अचम्‍बलाव ङाय़ेनर यारँःज़्यावत ब ङानाल केःद्याँकेर।
HEB 3:10 है जैद ङा नोरास ङारिस चोद अइ ब ङालिके, ‘आवराए यायुँ ते एकतार तँदा वाज़ लिज़्‍या। ङाल्‍योदा हुन्‍या युँ दो ज़ मादोर।’
HEB 3:11 है जैद ङारिसए इताव किर्‍या ब ङाझाःके, ‘स॰ होलाँ तान्‍या पोल खर्क ज़ केसो दैन्‍या मालेर।’ ”
HEB 3:12 है जैद गेनैं गेमेंर, जोगोइसिद लिच्‍यो, म़ानी जेनी ख्‍वा ख्‍वार जेयुँ माहुप्‍द जेयुँए बले·द जींदो परमेस्‍वरए ल्‍योनी पुलुस्‍द बान्‍या ओछ्यास लिज़्‍या।
HEB 3:13 बेला उलिज़्याक ज़ जे जेल सुए जेयुँ ब पापए झुकैद बलेसो ताताक लिद एकम्‍न्‍या ज़ अर्थैसिच्‍यो।
HEB 3:14 गेयुँ हुप्‍द गेथूसिउलाई माऱास्‍द छींङ पै थ॰रिद गेलिकिन परमेस्‍वरए ओराज्‍यालाव बताहा ख्रीसस सिप ज़ दैन्‍या गेले।
HEB 3:15 नो धर्मसास्‍त्रलाव है लिसिउ पाँ तामेंःच्‍यो। नो पाँ आव ज़, “आछिम परमेस्‍वरए ओपाँ जेथैकिन, जेजिज्‍यु बाज्‍युर परमेस्‍वरकिन तँदा याजैसिउ मिताव, जे जेयुँ खाव ताजैच्‍यो।”
HEB 3:16 नो ङ़ादा परमेस्‍वरए ओपाँ थैद मनी ओलकिन तँदा जैसिज़्यावर मोसाए इजिप देसनी ओरापले·वर ज़।
HEB 3:17 नो चालीस बर्स भरिलाव परमेस्‍वरए उरिस चोवर ब नोर ज़। है जैद यादोव पापए चालीस बर्स भरिल नो बनल ज़ सोतोर्‍यान ताकेर।
HEB 3:18 ‘नो स॰ होलाँ दाव पोङ बाव दैन्‍या जेमाले’ है ओरादोव ब नो ओपाँ मादोज़्‍यावरालाई ज़।
HEB 3:19 है जैद ननी ज़ गेसैंज़्‍या, ओललाई यायुँ ओमाहुबोए चाव पोल बाव मादैकेर।
HEB 4:1 है जैद जोगोइसिद ल्‍यो ताके, नो स॰ होलाँ तान्‍या पोल पसिन्‍या मौका गेलाई परमेस्‍वरए याद नैसिउ। नो मौका छुपिउ ताके, म़ानी गे ब पसिधुन्‍या गेमाले।
HEB 4:2 मोसाए ओपालाकाव मिँराए परमेस्‍वरए ओपाँ याथैव मिताव गे ब थैव ज़ गेनैज़्‍या। खाली नोराए ओपाँ थैद ब यायुँ ओमाहुबोए नो पाँ नोरालाई अऩाकलाव ज़ ताके।
HEB 4:3 ओललाई यायुँ हुबोर वाज़ नो स॰ होलाँ तान्‍या पोल पसिज़्‍यार। यायुँ माहुबोराए जूँनी ते ओल परमेस्‍वरए ज़ है लिद ले, “ङारिसए इताव किर्‍या ब ङाझाःके, ‘स॰ होलाँ तान्‍या पोल खर्क ज़ केसो दैन्‍या मालेर।’ ” हैदी ब गे मिँरालाई तोबो स॰ होलाँ तान्‍या पो नाम नमलाव ओय़ेन ओखेमो छ्यामकिन ज़ उलिज़्याव।
HEB 4:4 धर्मसास्‍त्रल ब ऩासिन्‍या छ्यामए जूँनी तोथोल अइ लिद सर्सिउ लिज़्‍या, “परमेस्‍वरए नाम नमलाव ओय़ेन भरी ओखेमोत सात दिनलाव छ्याम ऩासिके।”
HEB 4:5 खाली ङ़ादाङाव है गेलिज़्याव मिताव धर्मसास्‍त्रल इताव सर्सिउ लिज़्या, “स॰ होलाँ तान्‍या पोल खर्क ज़ केसो दैन्‍या मालेर।”
HEB 4:6 हैदी ब नो पोल पसिन्‍यार लिज़्‍यार ज़। खाली नो भाःकाव मिँराए ओपाँ थैद ब यामादोवए पसिउ मादैकेर।
HEB 4:7 है जैद नोराकिन कुधु छींङ परमेस्‍वरए दाऊद राजाए ओयाःनी गेलाई ब तोबो मौका जैद्यासिक्‍यो। नोए ओपाँ आव ज़, “आछिम परमेस्‍वरए ओपाँ जेथैकिन, जे जेयुँ खाव ताजैच्‍यो।”
HEB 4:8 यहोसूए इस्राएलीरालाई परमेस्‍वरए य़ाका ओरायो देसल ओरासकेस्‍क नो स॰ होलाँ तान्‍या पोल पसिन्‍या मौका भरी ओखेमो ताकिन परमेस्‍वरए छींनी गेलाई निताव पाँ है दान्या ओमाल्‍यो।
HEB 4:9 है जैद परमेस्‍वरए उमीं ताज़्‍याव भरिरालाई स॰ होलाँ तान्‍या पो नैसिउ ज़ लिज़्‍या।
HEB 4:10 जो मिँ नो पोल केस्‍ज़्‍या, किताव परमेस्‍वरए ओय़ेन भरी खेम्‍द ओऩासिउ, हिताव ज़ नो मिँ ब ओय़ेनरानी ओर्सार नैज़्याव।
HEB 4:11 है जैद गे नो स॰ होलाँ तान्‍या पोल बान्‍यादा युँ थू जैव ताके। ङ़ादाङाव ओपाँ मादोज़्‍यावर यामापसिधुज़्‍याव मिताव ताताक।
HEB 4:12 परमेस्‍वरए ओपाँ बनै ओसक्ती ल्‍यो स़ोनो य़ेन दावका दाव ज़ लिज़्या। नो पाँ आनी हुनी ओधार ल्‍यो तरवालीकिन ब छाव ओतावए मिँए युँल पसिद क्‍याँ भरिल सरालिसिद युँलाव पाँ स़ोनो बुद्धी भरी ब सरसाप खिम्‍द जाँचिज़्‍याव।
HEB 4:13 स़ोनो परमेस्‍वरए ओराजैव भरिल ओल ओमारँःव म़ोंसिउ काता ज़ माले। परमेस्‍वरए ओङ़ाक प़ाइँ ज़ फैसिउ लिज़्‍या। गेय़ेन भरी ब तछा ओललाई है दाव ज़ परिज़्‍या।
HEB 4:14 है जैद परमेस्‍वरए ओज़ा प़ाइँरानी घेप्‍पा गेप्रधान पुजारी येसु आव नामनी गेजूँनी स्‍वर्गत परमेस्‍वरए ओङ़ाक ओबावए नो गेयुँ हुबो पाँलाई माऱास्‍द ज़ थ॰रिद ल्‍यो ताके।
HEB 4:15 गे गेप्रधान पुजारीए गेदुखर रँःद उयुँ ओमानाज़्‍याव ते माःक। ओल ब गे गेदैज़्‍याव मिताव दुखरानी जाँचिसिके। खाली ओजाँचिसिदी ब पाप ते मादोव।
HEB 4:16 हो मिताव ज़ गे ब उयुँ य़ालो परमेस्‍वरए ल्‍योक माछे·द ज़ बाव ताके। हो ताकिन ची ङ़ादाङाव गेबले·व य़ेनर ब उयुँ नाद ऱास्‍न्‍या ले। फरी खाँचो ओताव बेलाक ब सघैन्‍या ले।
HEB 5:1 प्रधान पुजारीर ब परमेस्‍वरए ओङ़ाक मिँराए खार्नी त्‍याला य़ेन दान्‍यात खतैसिउर ताज़्‍यार। नोराए मिँराए यादोव पापए जूँनी पुजार दाद्याद परमेस्‍वरस यारासखैज़्‍यार।
HEB 5:2 मिँनिकाव पुजारीराए मिँराए यादैज़्‍याव दुखर या ब यादैवए, छुत बिरैज़्‍याव मिँलाई परमेस्‍वरस सखैन्‍या खोरोनी माःक, चावनी ज़ दोज़्‍यार।
HEB 5:3 है जैद नो पुजारीराए छुत मिँराए जूँनी परमेस्‍वरस सखैन्‍या पुजा यादोक या याजूँनी ब दाव ज़ परिके।
HEB 5:4 फरी नोर यानी प्रधान पुजारी याजैसिउ ते माःक। किताव हारूनए उस॰कताव पुजारी य़ेन परमेस्‍वरनी ओदैव, हिताव ज़ पुजारी य़ेन दैव भरिए परमेस्‍वरनी ज़ दैहुकेर।
HEB 5:5 हिताव ज़ ख्रीस ब प्रधान पुजारी ओलनी सघ्योःसिद ओताव ते माःक। नोलाई, “नँ ङाज़ा ज़, आछिम ज़ नँलाई ङाजर्मैनिके,” है दाज़्‍याव परमेस्‍वरए ज़ जैक्‍यो।
HEB 5:6 फरी होए उजूँनी तोथोल अइ लिद ब सर्सिउ लिज़्‍या, “नँ मल्‍कीसेदेकए ओदैव मिताव पुजारी य़ेन नदैरिज़्‍या। नँ खर्क ज़ माखेम्‍न्‍या पुजारी नतारिज़्‍या।”
HEB 5:7 येसु ख्रीस मानुवात उलिज़्‍याव बेलाक ओललाई सिउनी जागैधुज़्‍याव परमेस्‍वरलाई उयुँर स्‍यासे सतेद धो थाइव ताद घरे घरे पोंखारिक्‍यो। उजिउ भरी परमेस्‍वरए उयुँलाव मिताव भरी सयो·द ओयोए परमेस्‍वरए ओपाँ भरी थैदिक्‍यो।
HEB 5:8 येसु परमेस्‍वरए ओज़ा ओतादी ब ओल ब उसहिउ दुखरानी ज़ परमेस्‍वरए उयुँलाव मिताव य़ेनर माबिरैद ज़ दान्‍या सिऊसिके।
HEB 5:9 हो भरिल प़ाइँनी उथ॰रिउए परमेस्‍वरए गे ओपाँत बाज़्‍याव भरिरालाई अजम्‍बरी जुनी दैन्‍या ओज़ा येसुनी ज़ जैद्यासिक्‍यो।
HEB 5:10 मल्‍कीसेदेकए ओदोज़्याव मिताव य़ेन दान्‍याए जूँनी परमेस्‍वरए नोलाई प्रधान पुजारी ब जैद्यासिक्‍यो।
HEB 5:11 नोए उजूँनी जेलाई है दान्‍या पाँर कुधु ज़ लिज़्‍या। खाली जे चावस थैन्‍या युँ जेमादोवए नो भरी जेलाई धो पलासो ताज़्‍या।
HEB 5:12 आः झरी जे ते छुतरालाई पैन्‍याकावर ताव परिन्‍या। कै जैद जेलाई झन आःपै परमेस्‍वरए ओपाँताव ओथालन पैन्‍या मिँर ओचाहिज़्‍याव? जे आःपै नुइँ ओन्‍या भाउज़ा स्‍यासोर ज़ जेलिज़्‍या। जे ज़्‍याव ज़्‍यान्‍या स्‍यासोर खर्क तान्‍या?
HEB 5:13 नुइँए ओङाज़्‍याव मिँ ते धर्मलाव पाँ चावस माथ·रैधुज़्‍याव भाउज़ा स्‍यासो ज़ लिज़्‍या।
HEB 5:14 त़नो ज़्‍याव ते परमेस्‍वरए ओपाँत ओगहक ल्‍योलाई ज़। नोए ओक्‍याँत परिउ भरित परमेस्‍वरए ओपाँदा उयुँ थू जैद पाखो ओतावए ओल दान्‍या मादान्‍या य़ेन छुतैज़्‍याव।
HEB 6:1 है जैद गे ख्रीसए ओपाँताव ओथालनलाव पाँराकिन जाँ ङ़ाकसै बाद पाखो ताव ताके। नो थालनलाव पाँर आवर ज़ — सिन्‍या सजादा लाँज़्याव य़ेनलाई ऱास्‍द परमेस्‍वरलाई युँ सुहुप्‍न्‍या,
HEB 6:2 सछैंसिन्‍या, सुवाराए क्‍याँत कुइ नैद पोंखारिन्‍या, सिउनी सोवत ख्वाराए खर्क ज़ माखेम्‍न्‍या सजा दैन्‍या, ख्वाराए अजम्‍बरी जुनी दैन्‍या।
HEB 6:3 परमेस्‍वरए ओसघैसिकिन नो पाँराकिन जाँ ङ़ादा बान्‍या गेले।
HEB 6:4 ङ़ादा परमेस्‍वरए ओपाँत तखेप बनै सैंन्‍या ताव मिँ स्‍वर्गताव असिकर स़ोनो छैंव पुरूस ब दैद,
HEB 6:5 उयुँल परमेस्‍वरए ओपाँ चाव ज़ ओल्‍यो लिन्‍या थ·रैद परमेस्‍वरए ओराज्‍यालाव अचम्‍बलाव सक्तीर ओदार्दी ब,
HEB 6:6 छींनी नो मिँ परमेस्‍वरए ओपाँलाई सोद ओऱास्‍किन नो मिँलाई फरी सोवोल्‍द मारैसिधुइ। नो मिँए फरी ब परमेस्‍वरए ओज़ालाई क्रुसत तङ्गैद बीज्‍यात ओजैव मिताव ज़ लिज़्‍या।
HEB 6:7 हिताव ज़ एँःए ब परमेस्‍वरए ओसवाज़्‍याव ऱी दैद नलाव य़ेन दाज़्‍यावलाई चाव चाव सैर सपरीद ओएकिन नो एँः परमेस्‍वरए ओअसिक धूँल उलिज़्‍याव मिताव ज़ लिज़्‍या।
HEB 6:8 खाली नो एँःए ज़ुर ऱमर ओसपरीकिन नो एँः काम मालागिउ ताद परमेस्‍वरए ओसराप धूँलाव मिताव ज़ लिज़्‍या। निताव एँः मेंःए ओज़्‍यास वाज़ ताज़्‍या।
HEB 6:9 अ गेयुँलाव गेनैं गेमेंर, जेलाई इताव ख्यो·न्‍या मिताव पाँर है गेदाचिदी ब, जे अजम्‍बरी जुनी दैन्‍यावाकावर ताद जेलिज़्‍याव मिताव गेङम्‍सिज़्‍या।
HEB 6:10 जे ङ़ादाकिन ज़ परमेस्‍वरए उमिनत लिज़्‍यावरालाई जेरासमारिहुज़्‍यावए परमेस्‍वरए ल्‍योदा जेयुँ थू जैद जेनैज़्‍याव ननी ज़ रैंःज़्‍या। परमेस्‍वर अन्‍याय मादान्‍या ओतावए नो जेय़ेनलाई मामेंःव।
HEB 6:11 जेल्‍योदा गेयुँ इताव लिज़्‍या, ‘नो जेआसलाई फिस्‍को मातान्‍या जैन्‍याए जूँनी नो य़ेनत छींङ पै ब कलँ लिद जेलिकिन ताखेहो’ है गेलिज़्‍या।
HEB 6:12 है जैद जे मातेन्‍सिद किताव भाःकाव मिँराए परमेस्‍वरए ल्‍योदा यायुँ हुप्‍द थ॰रिद यादोवनी परमेस्‍वरए ओरायो य़ाकालाव पाँर दैकेर, जे ब हिताव ज़ दोव ताके।
HEB 6:13 परमेस्‍वरए अब्राहामलाई य़ाका ओएक ओलकिन घेप्‍पा छुन्‍या ओमादैवए ओल उमिननी ज़ अइ लिद किर्‍या झाःक्‍यो,
HEB 6:14 “आछिमकिन नँलाई बनै घ्योःव असिक ङाईंरिज़्‍या, नथोर बनै सबा·द ङाईंरिज़्‍या,” है दोक्‍यो।
HEB 6:15 हुनी ज़ परमेस्‍वरनी ओदैव य़ाकालाई कुधु बर्स पै कींद बल्‍ल दैक्‍यो।
HEB 6:16 मिँराए ते याकिन घेप्‍पालाई छुद किर्‍या झाःज़्‍यार। किर्‍यानी वाज़ यापाँ थ॰रिद ‘आव ताखेहो, हो ताखेहो’ लिन्‍या पाँ भरी ब खेम्‍ज़्‍या।
HEB 6:17 हो मिताव ज़ परमेस्‍वरए ब, “ङा ङापाँ खर्क ज़ मात़ोसिउ थ॰रिउ लिज़्‍या,” लिद छींनीकाव ओय़ाका दैवरालाई सतैंद्यान्‍याए जूँनी अब्राहामलाई किर्‍या झाःदिक्‍यो।
HEB 6:18 नो खर्क ज़ मात़ोसिज़्‍याव ओपाँ अब्राहामए ओक्‍याँत ऩेथोनी ज़ रैंःके। ङ़ादा ओयो य़ाकानी रैंःके, छींनी ओझाःव किर्‍यानी ब रैंःके। है जैद गे आज्‍यालकाव मिँराए ब परमेस्‍वरए ओपाँ फिस्‍को ओमाताज़्‍याव ओल्‍यो लिद परमेस्‍वरए ओयासिरिज़्‍याव बरदान दैन्‍याए जूँनी येसुए ओक्‍याँत ख्‍यासिद लिन्‍यात गेयुँ झेंःव ज़ लिज़्या।
HEB 6:19 नो ओक्‍याँत ख्यासिद गेलिज़्‍याव येसु बनै थ॰रिउ काताए ब मापल्‍तैधुन्‍या पहर स्‍यासो लिज़्‍या। होत ज़ गेलिकिन गे ब ग्‍याल गिल ज़ तान्‍या गेमाले। नोए ज़ मल्‍कीसेदेक मिताव खर्क ज़ माखेम्‍न्‍या प्रधान पुजारी ताद प़ाइँरानी चोखो पोल लिज़्‍याव परमेस्‍वरए ओङ़ाक बाद गेलाई ब बान्‍या येम फैद्यासिक्‍यो।
HEB 7:1 आव मल्‍कीसेदेक सालेम सहरलाव राजा ओल्‍यो, माहान परमेस्‍वरए उपुजारी ब ओल्‍यो। हो बेलाक अब्राहामए राजारालाई हारैद उहुज़्‍याक मल्‍कीसेदेकस निदैसिक मल्‍कीसेदेकनी असिक दैक्‍यो।
HEB 7:2 अब्राहामए नैंद ओरारैव भरिनी दस भा जैद तभा मल्‍कीसेदेकलाई एक्‍यो। मल्‍कीसेदेकए ओअर्थ ‘सतस दाज़्‍याव राजा’। ओराज्‍या सालेमए ओअर्थ फरी ‘सन्‍च’ ज़।
HEB 7:3 होए उजूँनीकाव सर्सिउ भरिल कान्‍ल ज़ ओबाबु ओआमा, ओसाखा पुर्खा स़ोनो उजर्मिउ, उसिउ छ्याम ब मारैंःए। इतावनी ज़ नो परमेस्‍वरए ओज़ा मिताव खर्क ज़ माखेम्‍न्‍या परमेस्‍वरए ओङ़ाकाव पुजारी य़ेन ओदोज़्‍याव रैंःज़्‍या।
HEB 7:4 आव ब सैंच्‍यो, गेपुर्खा अब्राहामए नैंद ओरारैवनी दस भा जैद तभा भरी नोलाई ज़ एक्‍यो। ननी ज़ मल्‍कीसेदेक घेप्‍पा रैंःज़्‍या।
HEB 7:5 कुधु छींङ अब्राहामए ओथोलाव लेबी थरलाव पुजारीरालाई उपुर्काव यादाज्‍यु भाइराए, प़ाइँ ज़ तोबोए ओथोर यातादी ब, मोसाए ओकानुननी दस भानी तभा पुजारीरालाई याव ज़ उपरिज़्‍याव।
HEB 7:6 खाली मल्‍कीसेदेक ते लेबी थरलाव माःक। हैदी ब अब्राहामए ल्‍योनी मल्‍कीसेदेकए दस भानी तभा दैक्‍यो। नो मल्‍कीसेदेकए परमेस्‍वरए ओय़ाका दैव मिँलाई ज़ असिक एक्‍यो।
HEB 7:7 गे ब गेसैंज़्‍या, असिक दैज़्‍यावकिन असिक याज़्‍याव मिँ घेप्‍पा ताज़्‍या।
HEB 7:8 फरी, नो लेबी थरलाव पुजारीराकिन ब मल्‍कीसेदेक घेप्‍पा ज़ रैंःज़्‍या। नोर सिउ ज़ लिज़्‍यार, मल्‍कीसेदेक ते उसिउ मारैंःए।
HEB 7:9 ख्‍वाराए अइ ब ल्‍यो धुर, दस भानी तभा दैव परिन्‍या लेबीराए ज़ अब्राहामनी मल्‍कीसेदेकलाई दस भानी तभा एकेर,
HEB 7:10 काराव ल्‍यो ताकिन अब्राहाम स़ोनो मल्‍कीसेदेकनी निदैसिक लेबी थरलाव पुजारीर यापुर्खा अब्राहामए ओक्‍याँत याल्‍यो।
HEB 7:11 नो कानुननिकाव लेबी थरलाव पुजारीराए यादोव य़ेननी गे मिँराए जूँनी परमेस्‍वरए ओय़ेन भरी उतुपैव ताकिन काताए जूँनी धर्मसास्‍त्रल छुत किसिमलाव पुजारी तारिज़्‍या है उलिरिज़्‍याव? हारूनए ओथरनी मातान्‍या ओतावए परमेस्‍वरए ङ़ादाकिन ज़ मल्‍कीसेदेकए ओय़ेन मितावनी तान्‍या थ·रैक्‍यो।
HEB 7:12 नो कानुननिकाव पुजारी य़ेन साःरोनी तान्‍या ओतावए नो कानुन ब साःरो ज़ ताव परिके।
HEB 7:13 नो है गेलिज़्याव मिँ ते पुजारी थरलाव माःक लिन्‍या प़ाइँए ज़ गेसैंज़्‍या। होए ओथरल पुजारी य़ेन दावर ब सु ज़ मालेर।
HEB 7:14 नो मिँ गेप्रभु ज़। ओथर ते यहूदा थर ची। यहूदा थरलावरालाई मोसाए पुजारी य़ेन ते हैज़ मारादोव।
HEB 7:15 येसु उहुवत प़ाइँनी ज़ मल्‍कीसेदेक मिताव ओरैंःवए नो कानुननिकाव य़ेन झन ज़ उतुपिउ रैंःके।
HEB 7:16 येसु पुजारी थरलाव कानुननी पुजारी ओताव माःक। खर्क ज़ मासिन्‍या जुनी ओदैवनी ओताव ची।
HEB 7:17 किताव धर्मसास्‍त्रल सर्सिउ उलिज़्‍याव, हिताव ज़ ताके। नलाव सर्सिउ आव ज़, “नँ मल्‍कीसेदेकए ओदैव मिताव पुजारी य़ेन नदैरिज़्‍या। नँ खर्क ज़ माखेम्‍न्‍या पुजारी नतारिज़्‍या।”
HEB 7:18 नो ङ़ादाङाव कानुनए काता ज़ माजैधुन्‍या अऩाकलाव ओतावए नो कानुन ख्‍यासिके।
HEB 7:19 काराव ल्‍यो ताकिन कानुनए सुलाई ज़ परमेस्‍वरए उयुँलाव मिताव माराजैधुक्‍यो। है जैद होए ओपोल होकिन चाव आस याद नैसिउ। ननी ज़ गे परमेस्‍वरए ल्‍योङ गेकेस्‍ज़्‍या।
HEB 7:20 येसुए परमेस्‍वरए ल्‍योनिकाव पुजारी य़ेन किर्‍यानी ज़ दैक्‍यो।
HEB 7:21 नो कानुननिकाव पुजारीराए ते किर्‍यानी यादैव माःक। येसुए किर्‍यानिकाव ओदैव पुजारी य़ेन ते धर्मसास्‍त्रल ब इतावनी सर्सिउ लिज़्‍या, “ङा परमेस्‍वरए किर्‍या झाःद ङानै, ङायुँ ब खर्क ज़ ङामात़ोए, ‘नँ खर्क ज़ माखेम्‍न्‍या पुजारी नतारिज़्‍या।’ ”
HEB 7:22 है जैद नो परमेस्‍वरए ओझाःव किर्‍यानी नो कानुननिकाव बाचाकिन येसुनी ओयासिउ बाचा बनै चाव सतैंसिउ लिज़्‍या।
HEB 7:23 नो कानुननिकाव पुजारीर याय़ेनत अजम्‍बरी मातार। यासिउनी यासिउनी यात़ोसिज़्‍याव।
HEB 7:24 गेत्‍याला येसु ते खर्क ज़ मासिन्‍या ओतावए ओय़ेन ब खर्क ज़ माखेमे।
HEB 7:25 है जैद येसुए परमेस्‍वरए ओङ़ाक एकतार ज़ पोंखारिद ओयासिज़्‍यावए ओल ओल्‍योनी परमेस्‍वरए ल्‍योक बाज़्‍यावरालाई एकम्‍न्‍याकावए जूँनी बाँचैसिज़्याव।
HEB 7:26 गेलाई निताव प्रधान पुजारी ज़ बनै ओचाहित ल्‍यो लिज़्‍या। नो बनै छैंव, सोजो, ओखत माल्‍यो, पापीराए ल्‍योनी पुलुस्‍द, स्‍वर्गत बाद प़ाइँरानी ओमान ल्‍यो पोल च़ुसिद ले।
HEB 7:27 नोए ते ङ़ादाकिनकाव प्रधान पुजारीराए मिताव दिनकाव पुजार दाव मापरिए। ङ़ादाङाव प्रधान पुजारीराए ते उस॰कत या यापापए जूँनी, हुकिन मिँराए यापापए जूँनी पुजा यादोज़्‍याव। ओल येसुए ते उजिउ ज़ चरैःद पुजा भरी तखेप्‍त ज़ खेम्‍क्‍यो।
HEB 7:28 कानुननिकाव खतैसिउ प्रधान पुजारीर नो कानुन यामासयो·धुवए याखत ल्‍योर ताकेर। खाली कानुनकिन छींनी परमेस्‍वरए उकिर्‍यानिकाव ताव प्रधान पुजारी ते परमेस्‍वरए एकम्‍न्‍याकावए जूँनी ओखत माल्‍यो ओथ·रैव ओज़ा ज़।
HEB 8:1 आव है गेदाचिज़्‍यावए ओअर्थ आव ज़, गे गेप्रधान पुजारी येसु स्‍वर्गत बाद माहान परमेस्‍वरए उसिंहासनए ओवोर्दा च़ुसिद ले।
HEB 8:2 नल परमेस्‍वरए ओङ़ाकाव चोखो पोल गेलाई परमेस्‍वरस सखैन्‍याए जूँनी ओय़ेन दाव ज़ नैज़्‍याव। नो चोखो पो मिँए जैसिउ मिताव माःक, आव ते परमेस्‍वरए ओजैव साचो पो ज़।
HEB 8:3 कानुननिकाव प्रधान पुजारीर मिँराए परमेस्‍वरस खैन्‍या यादोव पुजा चरैःद्यान्‍याए जूँनी खतैसिउर यालिज़्‍याव। है जैद गेप्रधान पुजारीए ब गेजूँनी कातार चरैःद्याव ज़ परिके।
HEB 8:4 खाली गेप्रधान पुजारी आःपै आव मानुवात ओल्‍यो ताकिन निताव पुजारी य़ेन मादैखेहो। निताव य़ेन दैन्‍यार ते कानुननिकाव पुजारीर ज़ लिज़्‍यार।
HEB 8:5 नोराए याय़ेन स्‍वर्गत छींनीकाव तान्‍याए ओसाँ सतैंसिउ मिताव वाज़ लिज़्‍या। काराव ल्‍यो ताकिन मोसाए नो चोखो पाल जैव ओपैंज़्‍याक परमेस्‍वरए है दोक्‍यो, “नो पाल नजैक खागरताव सतैंद ङाईंव गोइँनी वाज़ जैयो।”
HEB 8:6 खाली ङ़ादाकिनकाव पुजारीराए यादैव य़ेनकिन येसुए ओदैव य़ेन घेप्‍पा लिज़्‍या। नोए ओय़ेन कातानी ओघ्योःव लिक ते, परमेस्‍वरए मोसालाई ओयो य़ाकाराकिन येसुए ल्‍योनी ओयासिउ य़ाका घेप्‍पा ओतावए येसुए मिँर स़ोनो परमेस्‍वरसकाव याखार्लाव ओसखैज़्याव बाचा घेप्‍पा लिज़्या।
HEB 8:7 नो मोसानी परमेस्‍वरए मिँरालाई उस॰कताव ओरायो बाचा नत ज़ उतुपैव ताकिन छुत जैन्‍या ओमेला ज़ मालिखेहो।
HEB 8:8 खाली परमेस्‍वरए नो उमींरालाई याखत ल्‍योर थ·रैद अइ लिद पाँके, “छींनी तछा इस्राएल स़ोनो यहूदा कुललाव ङामींरास साःरो बाचा ङानैरिज़्‍या।
HEB 8:9 नो बाचा यासाखा पुर्खारासकाव ङानैव मिताव ते तान्‍या माले। हो बेलाक ङामींरालाई इजिपनी याकुइनी दोरैद पले·द, बाचा ङाराएके। खाली नोर ङाबाचाल यामाल्‍योए ङामाराचिऊके।
HEB 8:10 छींनी तछा इस्राएलीरास इताव साःरो बाचा ङानैरिज़्‍या, ङाकानुन यायुँल झाःद्याद, ङापाँर यायुँल सर्द ङाराएरिज़्‍या। हुनी ज़ ङा यापरमेस्‍वर तान्‍या ङाले, या ङामींर तान्‍या लेर।
HEB 8:11 हो बेलाक छुतलाई ङापाँ पैव परिन्‍या ब तान्‍या माले, ओभाइलाई, ‘परमेस्‍वर सरेस्‍के’ है दाव ब परिन्‍या माले। काराव ल्‍यो ताकिन घेप्‍पा ज़िम्‍ज़ाराए प़ाइँए ङालाई सरेस्‍न्‍या लेर।
HEB 8:12 नोरालाई ङायुँ नाद यादोव पापर ऱास्‍द्याद फरी य़ाका ज़ दान्‍या ङामाले।”
HEB 8:13 नो सर्सिउल परमेस्‍वरए “साःरो बाचा ङानैरिज़्‍या” है ओल्‍योए ङ़ादाङाव बाचा भरी पुराँदो थ·रैक्‍यो। है जैद पुराँदोए ओपोल साःरो ओताव प़ाइँना पुराँदो भरी म़ाके।
HEB 9:1 ङ़ादाङाव चलनल परमेस्‍वरए ओसेवा दान्‍या कानुनर ब यालिज़्‍याव, ओसेवा दान्‍या पो ब जैसिउ उलिज़्‍याव।
HEB 9:2 नो पो, पालल ऩेखन्‍द जैसिउ ओताज़्‍याव। ङ़ाताव खन्‍दल दिउ बाल्‍न्‍या स़ोनो चोखो भरेस नैन्‍या तेबल नैसिउ उलिज़्‍याव। नो ङ़ाताव खन्‍दए उमिन ‘चोखो पो’ है यादोज़्‍याव।
HEB 9:3 नो पाल जींलाव तोबो बारिसिउ क्‍वाकिन उछींनीकाव खन्‍दए उमिन ‘प़ाइँरानी चोखो पो’ है यादोज़्‍याव।
HEB 9:4 नल सुनए मुरिसिउ धुप झाःन्‍या थान स़ोनो सुनए मुरिसिउ मुधुस ब यानैज़्‍याव। नो मुधुसल हारूनए पलिउ उझुइ, लुँ फल्‍यात सर्सिउ कानुन, स़ोनो तोबो सुनए जा ब यानैज़्‍याव। नो जाल फरी मन्‍न ब यानैज़्याव।
HEB 9:5 नो मुधुसए ओकत परमेस्‍वरए ज़गै मगैव ओचाकर्‍यानी निकर निकर जोरैद जैसिउ उलिज़्‍याव। नोनी निकरए परमेस्‍वरए उमींरालाई यापापनी ओराऱास्‍ज़्‍याव पो थोर्सिउ उलिज़्‍याव। आव पाँ भरी ओलेखा ल्‍यो ज़ लिज़्‍या, खाली तोबो तोबोनी आख है मालिसिधुइ।
HEB 9:6 नो सेवा दान्‍या पो प़ाइँ ओतावत, पुजारीर दिनकाव ज़ ङ़ाताव खन्‍दल पसिद परमेस्‍वरए ओसेवा यादोज़्‍याव।
HEB 9:7 नो बारिसिउ क्‍वाए उछींनीकाव खन्‍दल प्रधान पुजारी वाज़ सालकाव तखेप उपसिज़्‍याव। खाली बिनु झी माःक, झी लाँद वाज़ ओबाज़्‍याव। नो झी ओल स़ोनो मिँराए मासैंदकाव यादोव पापए जूँनी ओचरैःज़्‍याव।
HEB 9:8 आव भरिनी परमेस्‍वरए उपुरूसए, नो पाललाव य़ेन ओलेवा भरी परमेस्‍वरए ओङ़ाकाव प़ाइँरानी चोखो पोल बान्‍या येम आःपै माफैसिताव लिज़्‍या लिन्‍या सतैंद ओराएज़्‍याव।
HEB 9:9 नो सतैंसिउ भरी आज्‍याल मनी खैज़्या। नो भरिए ओअर्थ आव ज़, परमेस्‍वरलाई पुजा दाद याचरैःज़्‍यावए युँलाई खर्क ज़ छैंव माजैव।
HEB 9:10 नो यादोव भरी ते पाखाताव ज़्‍यान्‍या ओन्‍यार, बारिन्‍या स़ोनो हुर्सिद चोखोइसिन्‍या वाज़ उलिज़्‍याव। नो भरी परमेस्‍वरए साःरो ओमाजैवा पै वाज़ ओल्‍यो।
HEB 9:11 खाली ख्रीस हुद नो साःरोल प्रधान पुजारी ताद आव नामलाव कुइए जैसिउ सेवा दान्‍या पालल माःक, स्‍वर्गताव परमेस्‍वरए ओङ़ाक ज़ पसिके।
HEB 9:12 नो प़ाइँरानी चोखो पोल ओबाक बोकाए उझीनी ब माःक, बाछाए उझीनी ब माःक, ओल उझीनी ज़ पसिके। भाःकाव प्रधान पुजारीराए माँःती घरी पाला बाव ब मापरिए। ओल ते तखेप ज़ पसिद अजम्‍बरी जुनी दैन्‍या येम फैद्यासिक्‍यो।
HEB 9:13 नो पुजारीराए मिँरालाई चोखोइन्‍याए जूँनी बोकाए उझीए, बहरए उझीए, कैताक मार सघासिउ धुलीए नोरालाई छरैद पाखाताव याक्‍याँ चोखोइद याराएज़्‍याव।
HEB 9:14 होकिन झन ख्रीसए दाद ओयासिउ य़ेनए ते युँलाई ज़ चोखो जैज़्‍याव। ओल ख्रीस ज़ एकम्‍न्‍या लिज़्याव परमेस्‍वरए उपुरूसनी ओखत माल्‍यो मार जैसिद गेदोव पापए जूँनी परमेस्‍वरलाई उजिउ ज़ चरैःद्यासिक्‍यो। हुनी ज़ गेदोज़्‍याव माचाव य़ेननी चोखोइद जींदो परमेस्‍वरए उयुँलाव मिताव सेवा दान्‍यार जैसिज़्याव।
HEB 9:15 है जैद ख्रीसए ङ़ादाङाव बाचानी बिरैवराए यासजा फो·द्यान्‍याए जूँनी उजिउ झाःद ओरायोए परमेस्‍वरए ओङ़ाकाव साःरो बाचानिकाव त्‍याला ताद ले। ननी ज़ परमेस्‍वरए थ·रैद ओराखुलोरालाई ओय़ाकालाव माखेम्‍न्‍या बताहा दैन्‍यार ताज़्‍यार।
HEB 9:16 किताव तोबो मिँए ओलसकाव लिज़्‍याव भरी ओमासिद ज़ तोबोए उमिनत सर्द ओएकिन, नो ओसरो बाचा ओल ओमासिवा पै नो दैन्‍या मिँए ओहक माले। उसिउ प्रमान सतैंकिन वाज़ नो बाचा पक्‍का ताज़्‍या।
HEB 9:18 हो मिताव ज़ परमेस्‍वरए मिँरास मोसानिकाव ओनैव बाचा ब मारए उझीनी वाज़ ओताज़्‍याव।
HEB 9:19 हो बेलाक मोसाए नलाव मिँरालाई परमेस्‍वरए ओकानुननिकाव पाँ भरी सथैद बोकाए उझी स़ोनो बाछाए उझील ऱी झाःद भाताए उतुपात घ्यामो सन पो·द नो झील छिम्‍द कानुनलाव पोस्‍तोको स़ोनो मिँरालाई अइ लिद याछरैक्‍यो,
HEB 9:20 “आव ङाछरैचिज़्‍याव झी परमेस्‍वरए जेसकाव ओनैव बाचात आछिमकिन उथूसिउ सरेस ज़,” है यादोक्‍यो।
HEB 9:21 हो स्‍यासो ज़ परमेस्‍वरए ओसेवा दान्‍या पाल स़ोनो नलाव जा भरी ब झीए याछरैक्‍यो।
HEB 9:22 नो कानुननिकाव चलननी चोखो याजैज़्‍याव भरी जाँकोसै झीनी ज़ याचोखोइज़्‍याव। है जैद पापनी चोखोइसिन्‍याए जूँनी मार मासैःद ज़ ओमाताज़्‍याव।
HEB 9:23 है जैद नो पाललाव भरी स्‍वर्गताव नकलनी जैसिउ ओतावए नलाव चोखो याजैज़्‍याव भरी जन्‍तुराए झीनी चोखो ओताज़्‍याव। साचो स्‍वर्गत ते होकिन झन चाव चाहिज़्‍या।
HEB 9:24 ख्रीस ते स्‍वर्गताव नकलनी कुइए जैसिउ पोल माःक, गेलाई सखैन्‍याए जूँनी परमेस्‍वरए ओङ़ाकाव साचो चोखो पोल उपसिउ ची।
HEB 9:25 नो प्रधान पुजारी ते पाललाव प़ाइँरानी चोखो पोल सालकाव तखेप उपसिक मारए झी लाँद वाज़ उपसिज़्‍याव। ख्रीसए ते घरी पाला चरैःव मापरिए।
HEB 9:26 घरी पाला ज़ पसिन्‍या ताकिन आव मानुवा उसिर्जिउ छ्यामकिन घरी पाला सिउ ब परिखेहो। खाली परमेस्‍वरए ओगोइँव बेलाक ज़ तखेप्‍त ज़ पाप भरी खेम्‍न्‍याए जूँनी ओक्‍याँलाई चरैःन्‍यात थाँसिहुके।
HEB 9:27 मिँ भरी तखेप सिउ परिज़्‍या। नकिन परमेस्‍वरए ओङ़ाक फाल्‍सिउ परिरिज़्‍या।
HEB 9:28 हिताव ज़ ख्रीसए मनी कुधुराए यापाप घुर्द्यान्‍याए जूँनी तखेप ज़ उजिउलाई चरैःक्‍यो। फरी ब तखेप आव मानुवात सतैंसिहुरिज़्‍या, खाली हो पालाक पाप घुर्द्यान्‍या ते माःक, ओललाई यायुँ थू जैद कींद नैज़्‍यावरालाई ओलस लाँन्‍याए जूँनी ज़।
HEB 10:1 मोसाए ओकानुननिकाव चलन भरी साचो ओक्‍याँ माताद छींनीकाव हुन्‍या पाँए ओसाँ वाज़ ओतावए नो सालकाव एकम्‍न्‍या याराचरैःज़्‍याव माररानी नो चरैःज़्यावरालाई छैंव माराजैव।
HEB 10:2 ननी ज़ परमेस्‍वरए ओङ़ाक छैंवर याताव ताकिन ङ़ादाङाव यादोव पापत उथुपुल माताद पापनी सछैंसिन्‍या मार सैःन्‍या ब ऱास्‍खेरहो।
HEB 10:3 खाली नो मारर सालकाव याराचरैःज़्‍यावनी झन ज़ यापापए य़ाका दोज़्‍यार।
HEB 10:4 काराव ल्‍यो ताकिन नो बहरर स़ोनो बोकाराए याझीनी खर्क ज़ मिँलाई पापनी छैंव माजैधुव।
HEB 10:5 है जैद ख्रीस आव संसारल मिँ मिन्‍सिद उहुक ओल उजूँनी धर्मसास्‍त्रलाव सर्सिउ पाँ ज़ पाँके। नो पाँ आव ज़, “अ ङाबाबु परमेस्‍वर, नँलाई मारर सैःद चरैःन्‍यानी नयुँ होलाँ माताए। बुरू ङालाई मिँ ज़ नजैनाके।
HEB 10:6 मेंःनी सघान्‍या पुजानी स़ोनो पाप क्‍याल्‍न्‍या पुजानी नयुँ होलाँ माताए।
HEB 10:7 है जैद अ परमेस्‍वर, किताव ङाजूँनी ङ़ादा ज़ धर्मसास्‍त्रल सर्द ननैज़्‍याव हिताव ज़ नयुँलाव मिताव य़ेन दाना ङा हुद ङाले।”
HEB 10:8 कानुन मितावनी चरैःन्यार उलिदी ब, ख्रीसए उस॰कत, “चरैःन्‍या माररानी, मेंःनी सघान्‍या पुजानी स़ोनो पाप क्‍याल्‍न्‍या पुजानी नयुँ होलाँ माताए,” है लिद,
HEB 10:9 फरी, “नयुँलाव मिताव य़ेन दाना ङा हुद ङाले,” है ब दोक्यो। ननी ज़ परमेस्‍वरए ङ़ादाङावलाई तुपैद छींनीकावलाई थ·रैक्‍यो।
HEB 10:10 परमेस्‍वरए उयुँ छींनीकावनी ओतावए गेजूँनी येसु ख्रीसए तखेप्‍त ज़ उजिउ चरैःद ओयासिउनी ज़ गे परमेस्‍वरए ओङ़ाक उयुँलाव मिताव छैंवर ताद गेले।
HEB 10:11 नो कानुननिकाव पुजारीर परमेस्‍वरए ओसेवा यादोक एकम्‍न्‍या तोबो नास्‍याकाव पुजार वाज़ यादोज़्‍याव। ननी सुलाई ज़ पापनी छैंव माराजैर।
HEB 10:12 ख्रीसए ते मिँराए यापापए जूँनी ओक्‍याँलाई तखेप्‍त ज़ एकम्‍न्‍याकावए जूँनी चरैःद, परमेस्‍वरए ओवोर्दा च़ुसिनाके।
HEB 10:13 हाःकिन उसुतुर भरिलाई परमेस्‍वरए उखँ धूँल झाःद ओमाएवा पै नक ज़ कींद नैव,
HEB 10:14 काराव ल्‍यो ताकिन ख्रीसए तोबो मारनी ज़ छैंव तानाज़्‍यावरालाई एकम्‍न्‍याकावए जूँनी याखत माल्योर याजैक्‍यो।
HEB 10:15 ख्रीसए निताव य़ेन ओदोव गेलाई छैंव पुरूसनी धर्मसास्‍त्रल ब सतैंसिउ लिज़्‍या। नलाव सर्सिउ आव ज़,
HEB 10:16 परमेस्‍वरए है लिज़्‍या, “छींनी तछा नोरास इताव साःरो बाचा ङानैरिज़्‍या, ङाकानुन यायुँल झाःद्याद, ङापाँर यायुँल सर्द ङाराएरिज़्‍या।”
HEB 10:17 स़ोनो, “यादोव पापर फरी य़ाका ज़ दान्‍या ङामाले।”
HEB 10:18 है जैद गेपाप भरी परमेस्‍वरए तोबो मारत ज़ खेम्‍द ओयासिउ प़ाइँना फरी छुत मार काराव ओचाहिउ?
HEB 10:19 गेनैं गेमेंर, येसुए उजिउ झाःद उझी सोभोद ओयासिउनी परमेस्‍वरए ओङ़ाकाव प़ाइँरानी चोखो पोल पसिन्‍या गेलाई काताए ओछ्यास ब माले।
HEB 10:20 नो ङ़ादाङाव बारिसिउ पोल पसिन्‍या साःरो येम फैसिउ लिज़्‍या। नो येम येसु उसिउनी ज़ फैद नैद्यासिउ।
HEB 10:21 परमेस्‍वरए उझ़िम चलैन्‍या नाःल्‍दिउ गेपुजारी उलिज़्यावए,
HEB 10:22 गेयुँ सुहुप्‍द माचाव य़ेनर ऱास्‍द गेयुँ चोखो जैद उमिनत ऱील सछैंसिद धुक्‍कस परमेस्‍वरए ल्‍योदा गेबाया।
HEB 10:23 गेयुँ हुप्‍द कींद गेनैज़्‍याव आस ओमायो·वा पै ग्‍याल गिल माताद थ॰रिद ल्‍यो ताके। गेलाई ओय़ाका याज़्‍यावए सत माहारिउ।
HEB 10:24 बुरू कातानी गे गेल खैद समारिसिन्‍या स़ोनो चाव य़ेन दान्‍यात जाँगर हाइसिन्‍या खिमो ताके।
HEB 10:25 गेनी ख्वाराए परमेस्‍वरए उमिनत दुप्‍सिन्‍या याऱासो मिताव गे ते दुप्‍सिन्‍या खर्क ज़ माऱासो ताके। बुरू ख्रीस उहुन्‍या छ्याम नजिक नजिक उहुनावए झन ज़ गे गेल सा हाइसिउ ताके।
HEB 10:26 गे परमेस्‍वरए ओपाँ थ·रैद मनी सैंज़्‍यावत सैंज़्यावत पाप गेदोकिन परमेस्‍वरस खैन्‍या येम कातानी गेदैरिज़्‍याव?
HEB 10:27 बुरू परमेस्‍वरए उसुतुररालाई जैद ओरायो छे छे ङम्‍सिउ उरिसलाव मेंःल बान्‍या आस वाज़ लिज़्‍या।
HEB 10:28 भाःकाव मिँर ब मोसाए ओकानुन ऱास्‍द तँदा याबाकिन नोराए याउपर्त ऩेब्‍लो स़ोम्‍लो साचीर यापुलुस्‍किन नोरालाई मासैःद यामाराऱास्‍ज़्‍याव।
HEB 10:29 नोकिन झन जोए परमेस्‍वरए ओज़ालाई उखँ धूँलाव हिला तकल जैज़्‍याव, होए झन किताव सजा दैवके? नितावए उजिउ झाःद उझी सोभोद परमेस्‍वरए ओङ़ाक छैंव जैज़्‍यावलाई माछैंव जैक्‍यो। उयुँ य़ाल्‍ज़्याव छैंव पुरूसलाई मनी बीज्‍यात ज़ जैक्‍यो।
HEB 10:30 गे ज़ गेसैंज़्‍या, परमेस्‍वरए, “निताव पोल खिस फेरैज़्‍याव ङा ज़,” है लिद ले। स़ोनो उमींरालाई फाल्‍ज़्‍याव ओल ज़ लिज़्‍या लिन्‍या ब गेसैंज़्‍या।
HEB 10:31 इताव सजारानी जींदो परमेस्‍वरए उकुइत परिन्‍या बनै छे छे ङम्‍सिउ लिज़्‍या।
HEB 10:32 परमेस्‍वरए ओपाँ उस॰कताव जेदैव बेला चेतैच्‍यो। हो बेलाक परमेस्‍वरए ओपाँ चावस थ·रैद कुधु दुखर जेसहिके।
HEB 10:33 ख्वार प़ाइँराए ङ़ाक हसैद बरे·सी ऩिन्‍या ब जेताके। ख्वार प़ोसी ऩिन्‍या ब जेताके। ख्वाराए फरी माछे·द नितावरालाई धुरिद्यान्‍या ब जेताके।
HEB 10:34 झ्‍यालखानाल परिउरालाई ब चावस ज़ जेराचिऊके। कैताक यालुतिचिक ब ‘आवकिन झन चाव खर्क ज़ माखेम्‍न्‍या गेधन सम्‍पती स्‍वर्गत लिज़्‍या’ लिद रेंद ज़ जेसहिके।
HEB 10:35 है जैद जेयुँ तासज़िम्‍च्‍यो। नो य़ेननी घ्योःव बाजी जेदैरिज़्‍या।
HEB 10:36 जेलाई सहिद थ॰रिन्‍या युँए ओचाहित लिज़्‍या। निताव युँ जेस उलिकिन परमेस्‍वरए उयुँलाव मिताव सयो·द ओय़ाकालाव पाँर जेदैरिज़्‍या।
HEB 10:37 धर्मसास्‍त्रल इताव सर्सिउ लिज़्‍या, “चाँदो ज़ ङाहुरिज़्‍या है लिज़्‍याव परमेस्‍वर धिलो मादाद हतप्‍त ज़ हुरिज़्‍या।
HEB 10:38 हो छ्याम उयुँ हुप्‍द परमेस्‍वरस खैव मिँ वाज़ बाँचिन्‍या ले। ओल्‍योनी याछींदा ओल्‍द बाज़्‍यावर ते उयुँलाव मितावर मातार।”
HEB 10:39 खाली गे ते नो ओल्‍योनी ओल्‍द नास तान्‍याल बाज़्‍याव स्‍यासोर ते गेमाले, गे ते गेयुँ सुहुप्‍द परमेस्‍वरए ल्‍योङाव अजम्‍बरी जुनील बाज़्‍यावर ची।
HEB 11:1 उयुँ हुबो मिँए परमेस्‍वरए ओय़ाकार साचो ज़ थ·रैद ओमारँःवलाई ब उरँःधुव मिताव ज़ जैज़्‍याव।
HEB 11:2 भाःकाव मिँर ब यायुँ उहुबोनी ज़ परमेस्‍वरए उयुँलावर ताकेर।
HEB 11:3 परमेस्‍वरए ओपाँत गेयुँ उहुबोनी ज़ ‘परमेस्‍वरए ओयाःनी नाम नम ओजैव’ लिन्‍या गेथ·रैज़्‍या। है जैद ताव भरी गेमारँःवनी ज़ ताकेर।
HEB 11:4 युँ हुबोनी ज़ हाबिलए ओदाज्‍यु कयिनकिन परमेस्‍वरलाई चाव चरैःक्‍यो। उयुँ उहुबोनी ज़ धर्मी थ॰रिके। ओसाची परमेस्‍वरलाई ओचरैःव रैद ओयोनी ज़ रैंःज़्‍या। नो ओल उसिदी ब ओय़ेन ते मासिए, पाँव ज़ लिज़्‍या।
HEB 11:5 फरी युँ हुबोनी ज़ हनोक पाला मासिद ज़ स्‍वर्गत छींसिके। नोलाई परमेस्‍वरए ओलस ज़ ओलाँवए साप्‍द ब मादैकेर। नो मिँ परमेस्‍वरए ओलस ओमालाँद ज़ उयुँलाव मिताव थ॰रिउ उलिज़्‍याव धर्मसास्‍त्रल ब रैंःज़्‍या।
HEB 11:6 उयुँ माहुप्‍ज़्‍याव मिँए खर्क ज़ परमेस्‍वरए उयुँ होलाँ जैद माएधुव। जो परमेस्‍वरए ल्‍योदा हुज़्‍या, होए ङ़ादा ‘परमेस्‍वर लिज़्‍या ज़’ लिद पतिउ ताके, नकिन ‘ओललाई खिम्‍ज़्‍याव मिँए ल्‍योदा उयुँ य़ालो ज़ लिज़्‍या’ लिन्‍या ब पतिउ ताके।
HEB 11:7 युँ हुबोनी ज़ नोआए पाला हुन्‍या पाँर ओमाहुद ज़ परमेस्‍वरए है ओदोव उयुँ हुप्‍द उझ़िमलावरालाई बाँचैन्‍याए जूँनी ङ़ादाकिन ज़ ऱी जहाज जैक्‍यो। ननी ज़ मानुवाताव मिँ भरी ओपो·स ज़ अधर्मीर रैंःकेर। ओल ते उयुँ उहुबोनी ज़ परमेस्‍वरए उयुँलाव मितावल गनिसिके।
HEB 11:8 परमेस्‍वरए अब्राहामलाई याव ओपैंज़्‍याव पोदा उखुल्‍क उयुँ उहुबोनी ज़ नो पो मासैंद ज़ परमेस्‍वरए ओपाँ भैंःद पुलुस्‍द बाके।
HEB 11:9 नो पो ओल उजिउ भरिल ओमादैदी ब परमेस्‍वरए ओपाँत उयुँ उहुबोए नल ज़ खासिद लिके। ओज़ा इसहाक, ओनाती याकूबए ओपालाक पै नो पोल ज़ पालल खासिद लिकेर। नोनी ब अब्राहामए ओदैव य़ाका दैवनी निल्‍यो।
HEB 11:10 ओल अब्राहामए उखिम्‍ज़्‍याव ते आव मानुवाताव सहररालाई माःक, परमेस्‍वरए ओजैव खर्क ज़ माखेम्‍न्‍या सहरलाई ची।
HEB 11:11 ओज्‍या साराए मनी उयुँ उहुबोनी ज़ जूचास्‍द ब परमेस्‍वरए ओसक्ती दैद ज़ा तोबो दैक्‍यो। नो ज़ा दैन्‍या य़ाका याज़्‍याव परमेस्‍वरलाई ङ़ादा ज़ थ·रैद ओनैज़्‍याव।
HEB 11:12 है जैद अब्राहाम बनै सेर्द फ्या·न्‍याल गनिसिउ उलिदी ब ओथोर नमताव सोरोर, स़ोनो समुन्‍द्रलाव बालुवा स्‍यासो मागनिसिधुन्‍यार ताकेर।
HEB 11:13 आवर परमेस्‍वरए ओरायो य़ाका याजिउत यामादैदी ब यायुँ हुप्‍द ज़ सिकेर। नो य़ाका तादानी ज़ यारँःव मिताव जैद यायुँ नदा ज़ झाःकेर। नोर आव जुनील याझ़िम मालिद खासिद यालिज़्‍याव मिताव जैसिकेर।
HEB 11:14 निताव जैसिज़्‍यावर साचो यादेस याखिम्‍ज़्‍याव रैंःज़्‍या।
HEB 11:15 निताव यामाताकिन याख्यानैव देसलाई मामेंःद ओल्‍द बाखेरहो।
HEB 11:16 खाली आवराए ते या याख्यानैव देसकिन झन स्‍वर्गताव चाव देस खिमो ज़ यानैज़्‍याव। है जैद परमेस्‍वरए, “ङा आवराए यापरमेस्‍वर ज़” है लिन्‍यात ओलाज माहुइ, काराव ल्‍यो ताकिन नोराए जूँनी परमेस्‍वरए स्‍वर्गत तोबो सहर जैद नैद यायो।
HEB 11:17 युँ हुबोनी ज़ अब्राहामए ब परमेस्‍वरनी ओजाँचिसिक ओज़ा इसहाकलाई चरैःन्‍यात उयुँ माकैक्‍यो। परमेस्‍वरए ओय़ाकार दैद ओनैज़्‍यावत ब तोबोका तोबो ओज़ालाई परमेस्‍वरलाई चरैःन्‍या तयार ज़ ताके।
HEB 11:18 नो ओज़ालाई ज़ परमेस्‍वरए, “इसहाकनिकावर वाज़ नथोल गनिसिन्‍या लेर,” है ओदोव।
HEB 11:19 है जैद अब्राहामए उयुँल उयुँल, ‘इसहाक उसिदी ब परमेस्‍वरए जुनी ब सोचोइवा ज़’ है उलिज़्‍याव। है जैद हो छ्याम ओचरैःक ओमासिउए परमेस्‍वरए सोचोइद ओयो मिताव ज़ ताके।
HEB 11:20 युँ हुबोनी ज़ इसहाकए छींनीकाव तान्‍या पाँराए जूँनी ओज़ा याकूब स़ोनो एसावनिलाई असिक निएक्‍यो।
HEB 11:21 युँ हुबोनी ज़ याकूबए ब उसिन्‍या बेलाक उझुइ तिकिसिद परमेस्‍वरलाई पोंखारिद योसेफए ओज़ानिलाई असिक निएक्‍यो।
HEB 11:22 युँ हुबोनी ज़ योसेफए ब उसिन्‍या बेलाक इस्राएलीर इजिपनी पुलुस्‍न्‍याए जूँनी पाँद, “आनी जेपुलुस्‍क आव पोल ङाऱूस ब ख्यानैद तायाँच्‍यो,” लिद किर्‍या झाःव यापरींक्‍यो।
HEB 11:23 युँ हुबोनी ज़ मोसा उजर्मिक ओबाबु ओआमानी ‘आव परमेस्‍वरए उयुँलाव मिताव तारिज़्‍या’ लिद राजाए ओकानुन रँःद माछे·द ज़ स़ोंमैना पै म़ोंद नैकिनी।
HEB 11:24 युँ हुबोनी ज़ मोसा स़ेर ओतावत राजा फारोए मेंमा ओज़ाए ओज़ाल उगनिसिदी ब नल ल्‍यो माभैंःके।
HEB 11:25 नोए थाँतस लिद पाप दाज़्याव देखा बुरू परमेस्‍वरए उमींरास दुख सहिन्‍या रूजिक्‍यो।
HEB 11:26 इजिप भरिलाव धन सम्‍पती उकुइत उलिज़्‍यावत ब नोकिन झन ख्रीसए उमिनताव हेलारी तान्‍या घेप्‍पा रँःक्‍यो। परमेस्‍वरए ल्‍योङाव ओबताहादा वाज़ उयुँ थू जैक्‍यो।
HEB 11:27 युँ हुबोनी ज़ नलाव राजाए उरिसनी माछे·द इजिपलाई ऱास्‍द इस्राएलीराए याङ़ात बाके। सुए ज़ यामारँःधुज़्‍याव परमेस्‍वरलाई उरँःव मिताव जैद उयुँ थू जैद नो ओय़ेनलाई माऱास्‍क्‍यो।
HEB 11:28 परमेस्‍वरए इजिपलाव जेथा जेथा भरी ओरासैःज़्‍याक मोसाए उयुँ उहुबोनी ज़ इस्राएलीराए याज़ार छुव मायान्‍याए जूँनी पाथा सैःद य़ामत उझी थीन्‍या निस्‍तार पर्ब मानिउ यापरींक्‍यो।
HEB 11:29 युँ हुबोनी ज़ इस्राएलीर लाल समुन्‍द्र यातरिज़्‍याक ऱी सा·द बगर ताके। नोरालाई खेपैहुव इजिपीर ते नो सा·व बगरल याहुव प़ाइँना ऱी हुद यागदैक्‍यो।
HEB 11:30 युँ हुबोनी ज़ इस्राएलीराए यरीहो सहरलाई बारिसिउ भार्नालाई सात दिन पै दिनकाव तखेप याघुमैक नो भार्नार यानी ज़ त़ाकेर।
HEB 11:31 युँ हुबोनी ज़ नो राहाब बेस्‍याए ब नो इस्राएलीराए यारापरींव देस जाँचिना हुवनिलाई पाथस उनिनैवए नो सहरलाव मिँ भरी यारासैःक ओल सिउ मापरिके।
HEB 11:32 इताव यायुँ हुबोराए जूँनी खा ची ङापाँके? नोरानी गिदोन, बाराक, सिमसोन, यिप्‍ता, दाऊद राजा, समूएल स़ोनो अगमबक्तार ब लिज़्‍यार। नोराए जूँनी सर्न्‍या समय ज़ माले।
HEB 11:33 युँ हुबोनी ज़ नोराए छुत राज्‍यार ब झेंःद यारारैकेर, परमेस्‍वरए उयुँलाव मिताव य़ेन ब दोकेर, परमेस्‍वरए ओय़ाकालाव पाँर ब दैकेर, लाराए यायाःर ब सूइद याराएकेर,
HEB 11:34 वीं वीं चाँःज़्‍याव मेंःए मुल्‍कालाई ब सैःकेर, तरवालीनी सिन्‍यानी ब पुलुस्‍केर, यार्सा ओमालिदी ब ओचाहिउ बेलाक घ्योःव सक्ती ब दैकेर, लरैंल यार्सा ल्‍यो ताद छुत फौजीरालाई याराखेपैकेर,
HEB 11:35 मेंमाराए ब सिउनी सैंसिउ यामींरालाई यारादैकेर। युँ हुबोनी ज़ फरी ख्वाराए झ्यालखानाल यालिज़्‍याक ‘परमेस्‍वरलाई जेऱास्‍किन आनी पुलुसो जेदैया’ है यारादोक परमेस्‍वरए ल्‍योङाव अजम्‍बरी जुनी दैन्‍याए जूँनी ननी पुलुसो माभैंःद बुरू दुखस सिन्‍या सहिकेर।
HEB 11:36 ख्वार फरी हसैसी ऩिन्‍या, रीःसी ऩिन्‍या ब ताकेर, ख्वार किसी ऩिन्‍या ब ताकेर।
HEB 11:37 ख्वारालाई लुँराए झेःद यारासैःकेर, ख्वारालाई करौंतीए चिरा·द यारासैःकेर, ख्वारालाई तरवालीए यारासैःकेर। इतावनी ज़ प़ाइँनी जाँचिसिकेर। याखिरी पसिद दुखर दैकेर। नोर काता ज़ माल्‍योर ताद बेधा बाकराराए स्‍यालोर क्‍वाइसिद दुलिरिन्‍या ब ताकेर।
HEB 11:38 सु ज़ यामालिज़्‍याव हाँ जीदा दुलिद कुँ जील पुप जील यालिज़्‍याव। आव मानुवाताव मिँराए कान्‍ल ज़ यामारागनिदी ब नोर झन प़ाइँरानी घेप्‍पाल गनिसिउर यालिज़्‍याव।
HEB 11:39 आव भरी यायुँ उहुबोनी ज़ परमेस्‍वरए उयुँलाव मितावर ताकेर। खाली आव याजिउत परमेस्‍वरए ओय़ाकार रँःव मादैकेर।
HEB 11:40 काराव ल्‍यो ताकिन परमेस्‍वरए गेजूँनी झन चाव पाँ तोबो थ·रैद, ‘प़ाइँ मिँर तखेप्‍त ज़ छैंवर घतारक’ लिद गेलाई ब कींद ओनैसिज़्याव।
HEB 12:1 है जैद यायुँ हुप्‍ज़्‍यावर नाः माहोल्‍या गेङ़ाताव साचीर यातावए गे ब तन्‍धरे जैज़्‍याव पाँर स़ोनो झुकैद पापल पारैज़्‍याव पाँर ऱास्‍द थ॰रिद आव जिउत ज़ दुखर सहिद परमेस्‍वरए ल्‍योदा बान्‍या येमदा आस दाद गेधोंःना।
HEB 12:2 गेयुँ सुहुप्‍द्याद अजम्‍बरी जुनी दैन्‍या जैज़्‍याव येसुलाई चिऊद नैव ताके। नोए बीज्‍यातर तादी ब, क्रुसत तङ्गैसिद सिन्‍या तादी ब, स्‍वर्गताव युँ होलाँ तान्‍या पोलाई उरँःवए नो भरी सहिक्‍यो। आख ते परमेस्‍वरए उसिंहासनए ओवोर्दा च़ुसिद ले।
HEB 12:3 जे जेर्सा सैःद जेयुँ मासतेन्‍याए जूँनी निताव पापीराए ल्‍योनी मासहिसिधुन्‍या दुखर सहिउ येसुलाई य़ाका दोच्‍यो।
HEB 12:4 जे आःपै पापीराए ल्‍योनिकाव सिन्‍या मिताव दुखर जेमादैताए।
HEB 12:5 परमेस्‍वरए जेलाई ओज़ा मितावर जैद ओसम्‍जैचिउ पाँर तामेंःच्‍यो। नो पाँ आव ज़, “अ ङाज़ा, ‘परमेस्‍वरए ओदईनिक दुख ताके’ लिद राँता ब ताजैसिनी, नयुँ ब ताकेःयो।
HEB 12:6 जोए ल्‍योदा परमेस्‍वरए उयुँ ताज़्‍या, होलाई मुइलिउ जैज़्‍याव। जोलाई ओज़ा जैज़्‍याव, होलाई कैताक रीःज़्‍याव।”
HEB 12:7 जेलाई मुइलिउ जैन्‍याए जूँनी दुखर ब जेदैज़्‍या। परमेस्‍वरए किताव ओबाबुए ओज़ालाई ओजैज़्‍याव, हिताव ज़ जैचिज़्‍याव। ओबाबुए ओमाम·लैव ज़ा सु ची उलिज़्‍यावदा?
HEB 12:8 परमेस्‍वरए जेलाई ओज़ाराए माँःती जैद ओमाम·लैचिउ ताकिन ओज़ाल मागनिसिद नामर्‍याल गनिसिन्‍या जेल्‍यो।
HEB 12:9 फरी आव मानुवाताव गेबाबुराए मुइलिउ याजैसिउए यामान नैद गेराएज़्‍या। होकिन झन स्‍वर्गताव गेबाबुए उधूँल ल्‍यो ताके। ननी ज़ मासिन्‍या जुनी दैन्‍या गेले।
HEB 12:10 आव मानुवाताव गेबाबुराए ते छ्यावाए जूँनी जो पैंज़्‍यार, हो य़ेनत मुइलिउ जैसिज़्‍यार। परमेस्‍वर गेबाबुए ते गे गेजूँनी ज़ छैंव ओगेर यान्‍याए जूँनी मुइलिउ जैसिज़्‍याव।
HEB 12:11 आव मुइलिउ जैज़्‍याव भरिए उस॰कत सुख माताए दुख ज़ ताज़्‍या। खाली छींनी नोर सहिद मुइलिउ ताव मिँरालाई परमेस्‍वरए युँ होलाँ ब जैद्याव दोज़्‍याव, उयुँलाव मिताव ब जैव दोज़्‍याव।
HEB 12:12 है जैद सेलोलो सिउ जेखँ जेकुइर थ॰रिउ जैचिके।
HEB 12:13 प़ाइँए थ॰रिउ युँ जैद साचो येमनी वाज़ बाच्‍यो। हो ताकिन ची धो धो बाज़्‍यावर ब मापर्दप्‍द चावस बान्‍या लेर।
HEB 12:14 प़ाइँस खैन्‍या खिम्‍च्‍यो। परमेस्‍वरए उयुँलाव मिताव छैंव तान्‍या खिम्‍च्‍यो। माछैंवराए सुए ज़ परमेस्‍वरलाई रँःधुन्‍या मालेर।
HEB 12:15 जेनी परमेस्‍वरनिकाव असिक सुए ज़ ताचुकैच्‍यो। जेखार्ल युँल दाद नैन्‍या सु ज़ ताताक, म़ानी खादरलाव चिउ भतान्‍जी मिताव ताद कुधुलाई बले·न्‍या जेले।
HEB 12:16 एसाव युँ मानैधुन्‍यानी अधर्मी ओताव मिताव ब सु ज़ तातारक। नोए तकेज़ा ज़्‍यावए जूँनी परमेस्‍वरनिकाव ओदैव ओजेथाक ब यो·क्‍यो।
HEB 12:17 जे ज़ जेसैंज़्या, छींनी ओबाबु उसिन्‍या बेलाक जेथाकलाव असिक फरी उऩिक मादैक्‍यो। बनै घर्द धामा दाद ब मासोवोल्‍धुक्‍यो।
HEB 12:18 जे जेहुव पो इस्राएलीर सीनै खागरताव याहुव पो स्‍यासो ते माःक। नोराए नत घेप्‍पा मेंःए मुल्‍का, अन्‍धनी दुन्‍ध चुम चुमो, बनै घ्योःव लापा रँःकेर।
HEB 12:19 हाःत ज़ नमत भोंकरए ओर्गा थैद नमतिन हुव अचम्‍बलाव पाँ याथैक नोर बनै छे·द “परमेस्‍वर फरी गेस तापाँक,” लिद मोसास बिन्‍ती दोकेर।
HEB 12:20 परमेस्‍वरए नोरालाई, “आव खागरत सुए ज़ छाप्‍न्‍या माताए। छाप्‍किन, जै जन्‍तु तादी ब, लुँए झेःद सैःव ज़ परिके,” है ओरादोक नोर याछ्याचेए मासहिधुकेर।
HEB 12:21 बनै छे छे ङम्‍सिउ ओतावए मोसाए पाला, “ङा ब ङाछ्याचेए ङागूज़्‍या,” है लिके।
HEB 12:22 खाली जे ते निताव पोत जेहुव माःक। जे जेहुव पो ते झन स्‍वर्गताव सियोन दाँदाताव जींदो परमेस्‍वर उलिज़्‍याव यरूसलेम सहरल हुद जेले। नल मागनिसिधुन्‍या परमेस्‍वरए ओचाकर्‍यार बनै रेंद ओसेवा दोज़्‍यावर लिज़्‍यार।
HEB 12:23 परमेस्‍वरए ओज़ाल गनिसिउ, स्‍वर्गत यामिन सर्सिउ भरी ब लिज़्‍यार, परमेस्‍वरए उयुँलाव मिताव धर्मी मिँराए यापुरूसर ब लिज़्‍यार, प़ाइँलाई फाल्‍ज़्‍याव परमेस्‍वर ब लिज़्‍या।
HEB 12:24 साःरो बाचानिकाव गेत्‍याला येसु ब लिज़्‍या। नोए उजिउ झाःद ओयासिउनी गेलाई परमेस्‍वरस सखैसिज़्‍याव। ओल उसिउ ते हाबिल उसिउ मितावनी माःक। हाबिल मितावनी सिन्‍या ते खिस फेरिन्‍या वाज़, येसु उसिउनी ते सखैन्‍या दोज़्‍याव।
HEB 12:25 जे जोगोइसिद लिच्‍यो, म़ानी नो सखैज़्‍यावए ओपाँ माभैंःज़्‍याव मितावर जे ब तान्‍या ओछ्यास लिज़्‍या। आव मानुवात परमेस्‍वरए ओपाँ थैव यामाभैंःवनी उस्‍किउ यामादैकिन, गे झन स्‍वर्गनी पाँज़्‍यावए ओपाँ गेमाभैंःकिन कातानी उस्‍किउ गेदैरिज़्‍याव?
HEB 12:26 ङ़ादा सीनै खागरत परमेस्‍वरए ओर्गाए आव नामलाई थोनो·क्‍यो। होए उछींनी फरी अइ लिद य़ाका नैक्‍यो, “फरी तछा तखेप ङाथोनो·रिज़्‍या, आव नामलाई वाज़ माःक, नमलाई ब ङाथोनो·रिज़्‍या।”
HEB 12:27 नो ‘फरी तखेप ङाथोनो·रिज़्‍या’ है उलिज़्‍यावए ओअर्थ आव ज़ — ओराजैव भरी ओपो·स ज़ तछा याखेम्‍रिज़्‍याव। हो ताकिन ची माथोनो·सिधुन्‍यार वाज़ रहिरिज़्‍यार।
HEB 12:28 है जैद खर्क ज़ माथोनो·सिधुन्‍या थ॰रिउ ओराज्‍या ओयासिरिज़्‍यावए गे परमेस्‍वरए उगुन मानिद ओललाई ओज़्‍यास्‍ज़्‍याव मिताव ओमानर नैद्याद छैंव युँस ओसेवा दाव ताके।
HEB 12:29 काराव ल्‍यो ताकिन गे गेपरमेस्‍वर चुयाप ख्याज़्‍याव मेंः स्‍यासो लिज़्‍या।
HEB 13:1 जे नैं मेंस खैन्‍या य़ेन माऱास्‍द दाव ज़ नैच्‍यो।
HEB 13:2 जेझ़िमक हुवलाई खर्क ज़ मासरेस्‍सिउ तादी ब चावस नैच्‍यो। ख्वा ख्वाराए नितावनी ज़ परमेस्‍वरए ओचाकर्‍यारालाई ब मासरेस्‍द ज़ यारानैकेर।
HEB 13:3 झ्यालखानाल लिज़्‍यावरालाई जे ब नोरास सिप जेलिज़्‍याव मिताव चेतैद याराचिऊच्‍यो। दुख दैज़्‍यावरालाई ब हितावनी ज़ याराचिऊच्‍यो।
HEB 13:4 ज्‍या जेरैक, रे जेदोक, ज्‍या-री सतत लिन्‍या ओताक, असत दान्‍या ताताक। छुतए ओज्‍यास बाज़्‍यावर छुतए ओरेस बाज़्‍यावर स़ोनो पातर्‍या पातर्नी जैसिज़्यावर परमेस्‍वरए ओसजाल परिन्‍या लेर।
HEB 13:5 धन सम्‍पतीए लोभनी अछतङ लिच्‍यो। जेस खा उलिज़्‍याव हाःत ज़ सोन्‍तोकोस लिच्‍यो। परमेस्‍वरए ओल ज़ है लिज़्‍या, “ङा जेलाई खर्क ज़ ऱास्‍न्‍या ङामाले, ख्‍यानैन्‍या ब ङामाले।”
HEB 13:6 है जैद गे धुक्‍क ताद ज़ है गेलिज़्‍या, “गेप्रभुए प़ाइँल ज़ ओसघैसिज़्‍यावए कातानी ब छे·न्‍या गेमाले। मिँराए गेलाई कै ची याजैसिधुरिज़्‍याव?”
HEB 13:7 जेलाई परमेस्‍वरए ओपाँ सथैद जेङ़ात बाज़्‍यावरालाई याराचिऊचिके। नोराए याय़ेननी आः चाव ओताज़्‍याव ओल्‍यो लिन्‍या चेतैद जे ब नोराए माँःती जेयुँ सुहुप्‍च्‍यो।
HEB 13:8 येसु ख्रीस खर्क ज़ मात़ोसिए, ङ़ादा किताव ओल्‍यो आज्‍याल ब हिताव ज़ लिज़्‍या।
HEB 13:9 है जैद भाँती भाँतिलाव छुतनी यारापैज़्‍याव पाँरादा ताबाच्‍यो। परमेस्‍वरलाई चरैःद ज़्‍यान्‍या ज़्‍यावए गेयुँलाई छैंव माजैव, ननी ओफाइदा ज़ माले। युँलाई छैंव जैज़्‍याव ते परमेस्‍वरए उयुँ गराँद दाद ओयासिउनी वाज़ ताज़्‍या।
HEB 13:10 गेस तोबो थान लिज़्या। नो थानताव चरैःसिउ पाथा परमेस्‍वरए ओसेवा दोज़्याव पुजारीराए ब कैन्‍या माताए।
HEB 13:11 कानुननी ब प्रधान पुजारीए पाथाए उझी लाँद पाललाव प़ाइँरानी चोखो पोल पसिद मिँराए यापापए जूँनी नो झी चरैःद ओराएज़्‍याव। नो पाथाए ओक्‍याँलाई ते सहरकिन पाखाङ लाँद यासघाज़्‍याव।
HEB 13:12 हिताव ज़ येसुए मनी उझी सोभोद गे मिँरालाई गेपापनी ऱास्‍द परमेस्‍वरस सखैन्‍याए जूँनी सहरकिन पाखाङ उजिउ चरैःद्यासिक्यो।
HEB 13:13 है जैद गे मनी सहरकिन पाखाङ ओल्‍योदा बाद ओल ओदैव मिताव बीज्यात सहिउ ताके,
HEB 13:14 काराव ल्‍यो ताकिन गे आव मानुवाताव जाँवा पै वाज़ खासिद गेलिज़्‍याव पोकिन एकतार लिन्‍या पो खिम्‍न्‍या लिज़्‍या।
HEB 13:15 है जैद येसुए दाद ओयासिउए परमेस्‍वरए उमिन सघ्योःद्याद एकम्‍न्‍या धन्‍याबाद गेचरैःया। नो चरैःन्‍या आव ज़ — उगुन मामेंःद उमिन हाइन्‍या।
HEB 13:16 स़ोनो छुतलाई समारिन्‍या, छुतलाई यान्‍या ब तामेंःच्‍यो। नितावनी ब परमेस्‍वरलाई चरैःज़्‍याव मिताव ज़ ताज़्‍या। ननी ज़ परमेस्‍वर खुसी ताज़्‍या।
HEB 13:17 जेलोम्‍बाराए याधूँल लिद होराए यापाँ भैंःच्‍यो। किताव हिसाप दाज़्‍याव मिँए हिसाप सुदुमो परिज़्‍या, हिताव ज़ नोराए ब परमेस्‍वरए ओबगालरानी ‘तोबो ब ताम़ारक’ लिद जेलाई बनै धामास चिऊचिज़्‍यार। है जैद नोरालाई यानाल केःद्यान्‍या य़ेन ताताक, खुसी जैन्‍या य़ेन ओताक। यानाल केःद जेराएकिन जेलाई काता फाइदा ज़ तान्‍या माले।
HEB 13:18 गे गेजूँनी ब पोंखारिद्यासिच्‍यो। गे प़ाइँनी ज़ साचो छैंव य़ेन वाज़ दोव गेपैंज़्‍या। आःपै ते गेदोव भरित परमेस्‍वरए ओङ़ाक गेयुँ छैंव ज़ लिज़्‍या लिद गेयुँ हुबो ज़ लिज़्‍या।
HEB 13:19 खाली ङा जेल्‍योदा चाँदो ज़ हुव ङापैंज़्‍या। होए जूँनी जे काचाबुल पोंखारिउ ताके।
HEB 13:20 युँ होलाँ जैद्याज़्‍याव परमेस्‍वरए ज़ बेधाराए चाव यार्गे गावला गेप्रभु येसुलाई सिउनी सोचोइद्यासिक्‍यो। नो ओज़ाए उजिउ झाःद उझी सोभोद ओयासिउनी खर्क ज़ माखेम्‍न्‍या गेत्‍याला ब जैद्यासिक्‍यो।
HEB 13:21 अब ते ओल ओपैंज़्‍याव मिताव य़ेन दान्‍यात सरजाम जोरैद ओयाचिउक। ओज़ा येसु ख्रीसए ओसक्तीनी उयुँलाव मिताव ब ओजैचिउक। ओललाई खर्क ज़ माखेम्‍न्‍या ज़गै मगैव ज़ ओताक। आमेन।
HEB 13:22 अ ङानैं ङामेंर, जेलाई सा हाइन्‍या पाँ छ्या वाज़ सर्द नैद ङायाचिए। जे आव पाँत ज़ धिद लिच्‍यो लिद ङाबिन्‍ती लिज़्‍या।
HEB 13:23 आःपै जेमासैंताखेहो, गेभाइ तिमोथीलाई झ्यालखानानी ऱास्‍द नैर। नो आल चाँदो उहुकिन, ङा नोस तखेप ङाहुरिज़्‍या।
HEB 13:24 जेलोम्‍बार स़ोनो परमेस्‍वरए छैंव उमीं भरिरालाई जेरो है यारादोच्‍यो। स़ोनो इतालियालाव गेनैं गेमेंराए ब जेरो है दाचिज़्‍यार।
HEB 13:25 जेल्‍योदा परमेस्‍वरए उयुँ ओगराँक। आमेन।
JAM 1:1 ङा, गेपरमेस्‍वर स़ोनो गेप्रभु येसु ख्रीसनी निसेवा दोज़्‍याव याकूबए ङाल्‍योनी जे चितराँ पुतराँ ताद लिज़्‍याव इस्राएली बाह्र थरलाव परमेस्‍वरए उमिनत लिज़्‍यावरालाई जेरो लिज़्‍या।
JAM 1:2 अ ङानैं ङामेंर, भाँती भाँतिलाव दुखर जेदैक ‘चाव ज़ लिज़्‍या’ लिद थ·रैच्‍यो,
JAM 1:3 काराव ल्‍यो ताकिन युँ हुप्न्‍यात जाँचर उहुकिन वाज़ थ॰रिउ युँ ताज़्‍या।
JAM 1:4 निताव थ॰रिउ युँ दैन्‍याए जूँनी नो दुखर उहुकिन घुहुज़्याक। ननी ज़ जे परमेस्‍वरए ओपाँत थ॰रिउर, छिबोर, कान्‍त ज़ जेखत माल्‍योर तान्‍या जेले।
JAM 1:5 जो य़ेन जेमासैंए, होए उजूँनी परमेस्‍वरलाई पोंखारिद ऩिउ ताके। हो ताकिन ची प़ाइँलाई उयुँ य़ाल्‍द उयुँ माकैद याज़्‍याव परमेस्‍वरए ओल ज़ पैन्‍या ले।
JAM 1:6 खाली नो मिँए, “जुनी ब याँवा ज़,” लिद उयुँ सुहुप्‍द ओपोंखारिउक। उयुँ माहुप्‍द पोंखारिज़्‍याव मिँ ते बतासए आदानी होदा ओख्याज़्‍याव समुन्‍द्र स्‍यासो ज़ ताज़्‍या।
JAM 1:7 है जैद निताव मिँए ते, “परमेस्‍वरनी ङाऩिउ भरी ङादैया ज़,” है ओमालिदी ब ताए।
JAM 1:8 नोए उयुँ खर्क ज़ तोबो पोक माथ॰रिए।
JAM 1:9 परमेस्‍वरए ओपाँत बाज़्‍याव मिँ आव मानुवात कान्‍ल ज़ मागनिसिउ ज़िम्‍ज़ा उलिदी ब ‘परमेस्‍वरनी ते घेप्‍पाल गनिसिउ ङालिज़्‍या’ लिन्‍या ओसम्‍जिउक।
JAM 1:10 धनी मिँए फरी ‘ङास लिज़्‍याव भरी परमेस्‍वरनी ते काता ज़ माले’ है लिन्‍या ओसम्‍जिउक। नो धनी मिँ ते वास वैद उथँज़्‍याव मिताव ज़ तान्‍या ले।
JAM 1:11 ख्यो·व नमल निमी बनै य़ेप य़ेप ऱाव बतासस उहुक छी भरी थँद वासराए यावैर ब गलिद याजोबन ज़ म़ाज़्‍या। हो मिताव ज़ मिँ ब धनी उलिदी ब ओल उसिक ओधन ब खेम्‍ज़्‍या, उमिन ब म़ाज़्‍या।
JAM 1:12 धो सहिउ दुखर सहिज़्‍याव मिँ असिक दैव मिँ ज़। निताव जाँचरानी उथ॰रिकिन नोए परमेस्‍वरनिकाव अजम्‍बरी जुनी दैरिज़्‍याव। परमेस्‍वरए ओल्‍योदा यायुँ थू जैज़्‍यावरालाई नो जुनी यान्‍या य़ाका ङ़ादाकिन ज़ नैद ओराएज़्‍याव।
JAM 1:13 खाली सुवारालाई यायुँए बिप्‍यादा लाँवा लाँवा ओराजैकिन आव जाँच परमेस्‍वरनी हुव ज़ है तालिरक। यायुँए ज़ है याजैज़्‍याव। परमेस्‍वरए उयुँ माचावदा खर्क ज़ माबाए, छुतरालाई ब माचावदा बान्‍या युँ जैद मारायो।
JAM 1:14 बुरू मिँर या यालोभए ज़ यायुँलाई माचावल पारैज़्‍यार।
JAM 1:15 ननी ज़ यायुँलाव माचाव पाँए माचाव य़ेन ब जर्मैज़्‍याव। नकिन नो माचाव य़ेन ओयो·वत सिन्‍या सजाल झाःव दोज़्‍याव।
JAM 1:16 ङायुँलाव ङानैं ङामेंर, जे ताझुकिच्‍यो।
JAM 1:17 गेलाई जुरिद हुज़्‍याव चाव स़ोनो छैंव भरी खर्क ज़ मात़ोसिज़्याव चुम चुमोलाई पलाँव जैज़्‍याव स्‍वर्गताव गेबाबु परमेस्‍वरए ल्‍योनी ज़ हुज़्‍या।
JAM 1:18 ओरासिर्जैव भरिरानी गेलाई ‘साःरोल ङ़ाताव सै मिताव घतारक’ लिन्‍या उयुँ ओतावए ज़ साचो ओपाँनी ओल ओथोल जर्मैसिक्‍यो।
JAM 1:19 ङायुँलाव ङानैं ङामेंर, आव ब सैंच्‍यो, चाव पाँ थैन्‍यात झाःसिद लिच्‍यो, पाँन्‍यात तहस पाँच्‍यो, जेरिस हतप्‍त ताचोक।
JAM 1:20 काराव ल्‍यो ताकिन मिँए उरिसनी परमेस्‍वरए ओपैंज़्‍याव मिताव धर्मलाव य़ेन खर्क ज़ मासयो·धुव।
JAM 1:21 है जैद जेसकाव लिज़्‍याव कुबानी बानीर स़ोनो बले·न्‍या पाँर ऱास्‍द उघुरिउर ताद जेलाई बाँचैधुज़्‍याव जेयुँलाव वास्‍सिउ परमेस्‍वरए ओपाँ चावस सपरीव ताके।
JAM 1:22 खाली जे परमेस्‍वरए ओपाँ थैज़्‍यावर वाज़ माःक, दाज़्‍यावर ब जैसिउ ताके, म़ानी जेक्‍याँलाई जे ज़ धोका यान्‍या जेले।
JAM 1:23 जोए परमेस्‍वरए ओपाँ थैद ओमादोकिन, नो मिँ धर्पनल अइज़ उचिऊसिउ मिताव लिज़्‍या।
JAM 1:24 नो मिँ नल चिऊसिद ननी ओबाव प़ाइँना ‘ङा इताव ङाल्‍यो’ लिन्‍या ब मेंःज़्‍याव।
JAM 1:25 खाली जोए पापनी पले·ज़्‍याव ओखत माल्‍यो परमेस्‍वरए ओकानुनलाई बनै चावस चिऊद मामेंःद थैद ओदोकिन, ननी ज़ परमेस्‍वरए ओअसिक दैन्‍या ले।
JAM 1:26 जोए, “ङा ते धर्मी ची,” है लिज़्‍या, खाली ओसेलाई ओमाजोगोइधुकिन, नो मिँ ओलनी ज़ झुकिज़्‍या, स़ोनो ओधर्म ब अऩाकलाव ज़ ताज़्‍या।
JAM 1:27 गेबाबु परमेस्‍वरए ओङ़ाक साचो ओकप्‍तैं माल्‍यो धर्म इतावनी ज़ ताज़्‍या — तुहुरा तुहुरीर स़ोनो राँदी मेंमारालाई यादुखल चिऊन्‍या, स़ोनो आव मानुवाताव पापरानी अछतङ लिद छैंवस लिन्‍या लिज़्‍या।
JAM 2:1 अ ङानैं ङामेंर, ज़गै मगैव गेप्रभु येसु ख्रीसए ओपाँत जेयुँ हुबोर जेतावए जे मिँ रँःद तादोच्‍यो।
JAM 2:2 परमेस्‍वरए ओपाँत जेदुप्‍सिक तोबो उकुइत सुने कुइची ल्‍यो स़ोनो ओक्‍वार ब बनै चाव चाव ल्‍यो उहुकिन, फरी तोबो ओक्‍वार थाकना बुरूमो गरीब उहुकिन,
JAM 2:3 जे नो चाव क्‍वा क्‍वाइसिद हुवलाई वाज़, “तैंत च़ुसिन्‍के,” है जेदोकिन, फरी नो माचाव क्‍वा क्‍वाइसिद हुवलाई, “नँ नक ज़ च्याँःसिद लिन्के, की जाँ मेकसै लिन्‍के,” है जेदोकिन,
JAM 2:4 जे जेखार्ल निताव मिँ रँःद जेदोज़्यावए, तँनी ज़ जेदोव रैंःके।
JAM 2:5 ङायुँलाव ङानैं ङामेंर, आव तामेंःच्‍यो, परमेस्‍वरए ते झन मानुवाताव गरीबरालाई ज़ युँ हुप्‍न्‍याल धनी थ·रैद यानैव। परमेस्‍वरए ल्‍योदा यायुँ जैज़्यावरालाई ओराज्‍या यान्‍या य़ाका ओरायो ब नोरालाई ज़।
JAM 2:6 है जैद जे निताव गरीबरालाई सोन्‍या माःक। जे ज़ जेसैंज़्‍या, जेखिरी पसिद अदालतदा स़ेल्‍द लाँज़्‍यावर धनीर ज़ ताज़्‍यार सानी।
JAM 2:7 जे जेक्‍याँत लिज़्‍याव ख्रीसए चाव उमिन बले·द ल़॰ज़्‍यावर ब नोर ज़ ताज़्‍यार सानी।
JAM 2:8 जे धर्मसास्‍त्रलाव प़ाइँरानी ओचाहित ल्‍यो परमेस्‍वरए ओराज्‍यालाव कानुन जेसयो·किन नो ज़्‍यासो लिज़्‍या। नो कानुन आव ज़ — जेक्‍याँलाई किताव जेसमारिज़्‍या, छुतलाई ब हिताव ज़ समारिउ ताके।
JAM 2:9 खाली जे आव कानुन मादाद मिँ रँःद जेदोकिन पाप दाद परमेस्‍वरए ओकानुननी जेखत ल्‍योर जेथ॰रिज़्‍या।
JAM 2:10 जोए परमेस्‍वरए ओकानुन भरी माबिरैद ओदोदी ब फरी तोबो ओमासयो·धुकिन नो कानुन भरी ओपो·स ज़ ओमादोव मिताव ज़ थ॰रिके।
JAM 2:11 जे ज़ जेसैंज़्‍या, अर्काए ओज्‍याए ल्‍योदा माबान्‍या कानुन स़ोनो मिँ मासैःन्‍या कानुन ब तोबोए ओयाःनी ज़ हुके। है जैद जो अर्काए ओज्‍याए ल्‍योदा ओमाबादी ब मिँ ओसैःकिन, नो मिँए परमेस्‍वरए ओकानुन मासयो·द ओगल्‍ती ल्‍यो ज़ थ॰रिज़्‍या।
JAM 2:12 जे तछा पापनी पले·ज़्याव परमेस्‍वरए ओकानुननी जेफाल्‍सिरिज़्‍या लिन्‍या य़ाका दाद दाव ब ताके, पाँव ब ताके।
JAM 2:13 छुतलाई उयुँ मानाज़्‍याव मिँ ओललाई ब परमेस्‍वरए ओफालो छ्याम उयुँ नान्‍या माले। फरी छुतलाई उयुँ नाज़्‍याव मिँ हो छ्याम परमेस्‍वरए ओसजानी पुलुस्‍न्‍या ले।
JAM 2:14 ङानैं ङामेंर, जो मिँए ओयाःए वाज़ ‘परमेस्‍वरए ओपाँत ङायुँ हुप्‍ज़्‍या’ है लिद य़ेन ओमादोकिन, नोए ओपाँ अऩाकलाव ज़ ताके। निताव युँ हुप्‍न्‍यानी कै जैद ओबाँचिधुरिज़्याव?
JAM 2:15 जेस परमेस्‍वरए ओपाँत बाज़्‍याव तोबो मिँ ओक्‍वार ब माल्‍यो, ज़्‍यावए ब माथैंज़्‍याव उलिकिन,
JAM 2:16 जेनी जोए नोलाई ‘चावस बानी, नफू तसी ज़्‍याद मुइँवल स्‍याँनी’ लिद ओयाःए वाज़ है दाद चाहिज़्‍याव भरी काता ज़ ओमाएकिन, नो काता ची तायादा?
JAM 2:17 हो मिताव ज़ परमेस्‍वरए ल्‍योदा युँ हुप्‍न्‍या ब याःए वाज़ ताकिन अऩाकलाव ज़ ताज़्‍या। साचो युँ हुबो मिँनी ते ओय़ेन ब रैंःज़्‍या।
JAM 2:18 खाली सुवाराए, “परमेस्‍वरए उमिनतावर ते ख्वार अइज़ यायुँ वाज़ हुप्न्‍यार याताज़्‍याव ओल्‍यो, ख्वार बनै य़ेन दान्‍यार याताज़्‍याव ओल्‍यो,” है लिज़्‍याखेरहो। ङा नो है लिज़्‍यावराए जूँनी है ङालिज़्‍या, “हिताव ताकिन य़ेन मादाद जेयुँ जेसुहुबो ङालाई सतैंद्याँचिके। ङा फरी जेलाई ङाय़ेननी ज़ ङायुँ ङासुहुबो सतैंद ङायाच्‍या।”
JAM 2:19 नँ, “परमेस्‍वर तोबो वाज़ लिज़्‍या,” लिन्‍याक पै नयुँ नसुहुप्‍ज़्‍याव ते चाव ज़। खाली नाःपै ते माचाव पुरूसराए ब भुम भुम गूद यायुँ सुहुप्‍ज़्‍यार।
JAM 2:20 खाली नँ निताव माचाहिउ पाँज़्‍याव मिँ, य़ेन मादाद युँ सुहुप्‍न्‍या भरी अऩाकलाव ज़ लिज़्‍या लिन्‍या खर्क नसैंरिज़्‍याव?
JAM 2:21 गेपुर्खा अब्राहामए परमेस्‍वरए है ओदोव मिताव ओज़ा इसहाकलाई थानत चरैःन्‍या उयुँ ओमाकैवए नो ओदोव ओय़ेननी ज़ परमेस्‍वरए ओङ़ाक धर्मी थ॰रिके।
JAM 2:22 उयुँ उसुहुबो मिताव ज़ ओय़ेन ब दोक्‍यो, ओय़ेन ओदोवनी फरी उयुँ उसुहुबो ब सयो·क्‍यो।
JAM 2:23 ननी ज़ धर्मसास्‍त्रलाव सर्सिउ पाँ यो·के। नलाव सर्सिउ आव ज़, “अब्राहामए परमेस्‍वरलाई उयुँ उसुहुबोनी ज़ परमेस्‍वरए नोलाई धर्मी ज़ थ·रैक्‍यो।” है जैद अब्राहामलाई परमेस्‍वरए ओनैं ज़ है मनी दोकेर।
JAM 2:24 ननी ज़ गेसैंज़्‍या, युँ सुहुप्‍न्‍यानी वाज़ माःक, युँ सुहुप्‍द य़ेन ब दोकिन वाज़ मिँर परमेस्‍वरए ओङ़ाक उयुँलाव मिताव थ॰रिज़्‍यार।
JAM 2:25 हो मिताव ज़ धर्मसास्‍त्रलाव राहाब पातर्नी ब नो इस्राएलीराए यारापरींव देस जाँचिना हुवनिलाई चावस समारिद म़ोंद छुत येमनी उनिपरींवए नो मेंमा ब ओदोव य़ेननी ज़ परमेस्‍वरए ओङ़ाक धर्मी थ॰रिके।
JAM 2:26 किताव उस॰ माल्‍यो क्‍याँ सिउ ताज़्‍या, हिताव ज़ य़ेन मादाद ओयाःए वाज़ ‘ङायुँ हुप्‍ज़्‍या’ है लिज़्‍याव मिँ ब हिताव ज़ ताज़्‍या।
JAM 3:1 अ ङानैं ङामेंर, परमेस्‍वरए ओपाँ पैन्‍यात कोभा मिँ केर्घे ताजैसिच्‍यो। अर्कालाई है दाज़्‍यावए नो य़ेनत उबिरैकिन परमेस्‍वरए नोलाई उपुर्कावराकिन कर्रास फाल्‍रिज़्‍याव लिन्‍या जे ज़ जेसैंज़्या।
JAM 3:2 गे प़ाइँए कुधु पाँ बिरैद गेदोज़्या। खाली जो मिँए ओसेलाई जोगोइद पाँज़्‍या, हो वाज़ ओखत माल्‍यो पैधुन्‍याकाव ताज़्‍या। निताव मिँए ओक्‍याँ भरिलाई ब काबु जैधुज़्याव।
JAM 3:3 नाःल्‍दिउ घोरालाई ब काबु जैन्‍याए जूँनी ओयाःल लगाम झाःद गेएकिन जोदा गेयुँ लिज़्या होदा ज़ गेलाँधुज़्या।
JAM 3:4 घेप्‍पा ऱी जहाज चलैज़्‍याव मिँए ब जती घ्योःव बतास उहुदी ब जहाजलाई दल्‍कैज़्याव तकेज़ा दाबीए जोदा उयुँ लिज़्‍या होदा ज़ लाँज़्‍याव।
JAM 3:5 हो मिताव ज़ गेक्‍याँताव तकेज़ा गेसेए ब ‘अइ ङाजैरिज़्‍या, है ङाजैरिज़्‍या’ लिद छे छे ङम्‍सिउर पाँज़्‍या। तकेज़ा मेंःए उझिलिङ्गाए ब नाःल्‍द्यालु बनर चुयाप याख्याज़्‍याव।
JAM 3:6 हो मिताव ज़ गेसे ब तोबो मेंः स्‍यासो ज़ लिज़्‍या, आव गेक्‍याँताव भरिरानी बनै अपराधी लिज़्‍या। नाःल्‍दिउ गेक्‍याँलाई ब नोए ज़ बले·ज़्‍याव। नर्गलाव मेंः रैद गेजुनीलाई ब हिप्‍द्यासिज़्‍याव।
JAM 3:7 प़ाइँ किसिमलाव जै जन्‍तुर, नमताव भुर्ज़्यावर, नामलाव गोल्ज़्‍यावर, ऱीलाव लिज़्यावर, प़ाइँलाई मिँराए ज़ याराउगुनैज़्‍यार।
JAM 3:8 खाली आःपै सेलाई ते सुए ज़ माउगुनैधुव। नो बनै ओधास ल्‍यो खर्क ज़ च़िम दाद मालिन्‍या छे छे ङम्‍सिउ लिज़्‍या।
JAM 3:9 नो सेए ज़ गेबाबु परमेस्‍वरए उमिन ब सघ्योःद गेएज़्‍या, नो सेए ज़ परमेस्‍वरए उसुरूपनी जैसिउ मिँलाई सराप ब गेएज़्‍या।
JAM 3:10 तोबो याःनी ज़ असिक ब पुलुस्‍ज़्‍या, थल्‍न्‍या ब पुलुस्‍ज़्‍या। अ ङानैं ङामेंर, इताव ते माताव परिन्‍या।
JAM 3:11 तोबो ऱीमुलनी ज़ ङमो ऱी स़ोनो काव ऱी उहुज़्‍याव रो?
JAM 3:12 काता नेभारा सींत जैतून ओसैज़्‍याव रो? सैं जोम्‍परसैत नेभारा ओसैज़्‍याव? हो मिताव ज़ काव ऱीमुलनी खर्क ज़ ङमो ऱी माहुए।
JAM 3:13 जेनी सुवार परमेस्‍वरए ओपाँ सैंन्‍यार जेलिकिन नोए मासघ्योःसिद तहस ओदोज़्‍यावनी वाज़ सैंन्‍या गराँन्‍या ओरैंःक।
JAM 3:14 फरी जो मिँए खिस्‍द स॰द ओदोकिन नो मिँ सघ्योःसिद परमेस्‍वरए ओपाँलाई ब बले·ज़्‍याव।
JAM 3:15 नो खिस्‍ज़्‍याव मिँए उयुँ परमेस्‍वरए ल्‍योनी हुव माःक, नोए उयुँ मानुवानी स़ोनो सैतानए ल्‍योनी हुव ची।
JAM 3:16 काराव ल्‍यो ताकिन जोक क्‍याँलाई तान्‍या स़ोनो खिस्‍न्‍या ताज़्या, होक माखैन्‍या स़ोनो इ़सिन्‍या वाज़ ताज़्‍या।
JAM 3:17 परमेस्‍वरनी हुज़्‍याव युँ ते छैंव ब ताज़्‍या, सखैव ब दोज़्‍याव, उघुरिउ बोमो युँ ब जैद्याव दोज़्‍याव, गराँव युँ ताद चाव य़ेन दाव परींव दोज़्‍याव, ओकप्‍तैं माल्‍यो, मिँ रँःद मादान्‍या जैव ब दोज़्‍याव।
JAM 3:18 परमेस्‍वरनिकाव युँ दैव मिँए ओपाँ बनै चाव धुर स्‍यासो ताज़्‍या। जोक वास्‍ज़्‍याव होक ज़ प़ाइँलाई सखैद परमेस्‍वरए उयुँलाव मिताव जैव दोज़्‍याव।
JAM 4:1 कै जैद जे जेखार्ल इ़सिन्‍या, जगरा दान्‍या उपुलुस्‍ज़्‍याव? नो भरी जोत ब युँ मानैधुद क्‍याँलाई तान्‍या वाज़ खिम्‍न्‍यानी ज़ ताज़्‍या।
JAM 4:2 लोभ दाद जेयुँए ओपैंज़्‍यावलाई जेमादैकिन जेङ़ालाव परिउ भरिलाई खेमो जेपैंज़्‍या, स़ोनो जोत जेमी तूज़्‍या होत इ़सिद जगरा ब जेदोज़्या। नो जेपैंज़्‍याव भरी परमेस्‍वरस जेऩिकिन जेदैखेहो ज़।
JAM 4:3 खाली माचाव युँस क्‍याँलाई तान्‍यानी वाज़ जेऩिकिन ते परमेस्‍वरनी ब जेमादैए।
JAM 4:4 ए निताव सतत मालिज़्याव मिँर, काता आव मानुवाताव पाँ खिम्‍ज़्‍याव मिँर परमेस्‍वरकिन तँदा लिज़्‍यार लिन्‍या जेमासैंए रो? जो आव मानुवाताव ताज़्‍याव पाँए ओनैं जैसिज़्‍या, नो मिँ परमेस्‍वरनी तँदा ज़ ताज़्‍या।
JAM 4:5 गेजूँनी धर्मसास्‍त्रलाव सर्सिउ पाँ अऩाकलाव माले। नल, “गेयुँलाव बास दाज़्‍याव परमेस्‍वरए उपुरूसए ते ‘ङाल्‍योदा वाज़ यायुँ थू याजैकिन ताखेहो’ लिद उस॰ तरा चींज़्‍याव।”
JAM 4:6 खाली नो पुरूसए उयुँ गेल्‍योदा झन ज़ य़ाल्‍ज़्या। है जैद धर्मसास्‍त्रल, “स॰द सघ्योःसिज़्‍यावरानी परमेस्‍वर तँदा ज़ लिज़्‍या, सज़िम्‍सिज़्‍यावराए ल्‍योदा ते उयुँ य़ाल्‍ज़्‍या।”
JAM 4:7 है जैद जे परमेस्‍वरए उधूँल लिद सैतानए ओपाँलाई भैंःद जेमाएकिन ओल ज़ धोंःद बान्‍या ले।
JAM 4:8 फरी परमेस्‍वरए ओल्‍योकसै बाकिन ओल ब ल्‍योकसै हुज़्‍या। जे पापीर, मादान्‍या दाव परींज़्‍याव जेकुइलाई फरी दाव ताएच्‍यो। ऩेयुँ दाज़्‍यावर जेयुँ छैंव जैचिके, पाप दान्‍यादा जेझाःज़्‍याव जेयुँ फरी नदा ताझाःच्‍यो।
JAM 4:9 सोगो दाद जेयुँ ओघरक। मानुवाताव पाँत थाँतस रेंद जेलिज़्‍याव ब ओत़ोसिक। ल़॰द जेस़ासोत ब जेयुँ माचाव ओदोवक।
JAM 4:10 परमेस्‍वरए ओङ़ाक सज़िम्‍सिद फुलुप्‍सिकिन ओल ज़ सोचोइद सघ्योःन्‍या ले।
JAM 4:11 ङानैं ङामेंर, जे जेल सुलाई ज़ सतेद पाँन्‍या माःक। जोए नैं मेंलाई सतेद ओखत पले·दिज़्‍याव, निताव मिँए परमेस्‍वरए ओकानुनकिन तँदा जैसिद ओपाँलाई ओखत ल्‍यो जैज़्‍याव। निताव ओखत ल्‍यो जैज़्‍याव मिँए परमेस्‍वरए ओकानुन मादाद झन परमेस्‍वरए ओकानुनलाई ओफाल्‍ज़्याव मिताव ज़ रैंःज़्या।
JAM 4:12 कानुन जैद कानुननी फाल्‍ज़्‍याव ओल परमेस्‍वर वाज़ लिज़्‍या। नोए बाँचैव ब दोज़्‍याव, खेमो ब दोज़्‍याव। है जैद जे नैं मेंलाई कै जैद ‘इताव हिताव’ है दाद सतेन्‍या ओताज़्‍याव?
JAM 4:13 जेनी ख्वाराए अइ जेलिज़्‍याखेहो, “आछिम ताव, पराःती ताव तोबो सहरल बाद नल तबर्सवा लिद पसलर थाँद पैसार ङाकमैया ब,” है जेलिज़्‍याखेहो। निताव मिँराए आव ङापाँ थैचिके।
JAM 4:14 ‘पराःती अइ ङातारिज़्‍या’ लिन्‍या जे जेमासैंए। जे कोहो स्‍यासो वाज़ जेलिज़्‍या। नो कोहो होक ज़ ताज़्‍या, होक ज़ म़ाज़्‍या।
JAM 4:15 जे बुरू, “परमेस्‍वरए उयुँ ओताकिन गे बाँचिद अइ गेजैरिज़्‍या, है गेजैरिज़्‍या,” है ल्‍यो परिन्‍या।
JAM 4:16 है जेमालिकिन जे ज़ सघ्योःसिद ओर्घांत ज़ जेपाँव रैंःज़्‍या। निताव सघ्योःसिद पाँन्‍या बनै माचाव लिज़्‍या।
JAM 4:17 है जैद जोए चाव य़ेन दाव परिए लिन्‍या सैंज़्‍यावत ब मादोव, होलाई पाप लागिस्‍ज़्‍या।
JAM 5:1 ए धनी तावर, आव ङापाँ थैचिके। जेक्‍याँत हुरिज़्‍याव छे छे ङम्‍सिउ दुखए जूँनी जेयुँ माचाव जैद घर्चिके।
JAM 5:2 जेधन भरी ब उपुव मिताव ज़ ताद ले, जेक्‍वा भरी ब ओनाँःव मिताव ज़ ताद ले।
JAM 5:3 जेसुन चाँदीर ब पींज्‍यासो मिताव ज़ ताद ले। नो पींज्‍यासो ज़ जेसाची ताद फाल्‍न्‍या छ्याम मेंःए माँःती जेक्याँलाई ज़्यान्‍या ले। है जैद नो जेदुप्‍ज़्‍याव धन भरी आछिमकावए जूँनी माःक, फाल्‍न्‍या छ्यामकावए उजूँनी ची।
JAM 5:4 नो जेएँःलाव य़ेन दाज़्‍याव बाहोर्‍यारालाई याःथन प़ाइँ मायाद य़ेन वाज़ दाव जेरापरींकिन नो जेमारायो भरी जेङ़ैत ज़ तान्‍या ले। नो बाहोर्‍यार याक़िज़्‍याव माहान परमेस्‍वरए थैरिज़्‍याव।
JAM 5:5 जे आव मानुवात जेयुँनी हुव भरी दाद थाँतस लिद पल्‍सिन्‍या छयामकावए उजूँनी बनै जेसोसोइसिज़्‍या।
JAM 5:6 झन जेकिन तँदा माजैसिद काता ज़ मापाँज़्‍याव धर्मीलाई मनी खत लैद जेसैःके।
JAM 5:7 जे ङानैं ङामेंर, गेप्रभु फरी ओमाहुवा पै जेयुँ थू जैद कींद नैच्‍यो। एँःलाव य़ेन दाज़्‍यावए ब ओवासो धुरलाई ओमामींःवा पै कींद नैज़्‍याव। स़ोनो ‘नम मावारिज़्‍या’ लिद नमलाई ब उँध्‍याली उभ्याली चिऊव ज़ नैज़्‍याव।
JAM 5:8 हिताव ज़ जे पाला ख्रीसलाई ओमाहुवा पै ‘जुनी ब हुया ज़’ लिद जेयुँ सुहुप्‍द कींद नैचिके। ओल हुन्‍या तादाङ माले, लापक ज़ लिज़्‍या।
JAM 5:9 ङानैं ङामेंर, जे छुतए ओङ़ैत तागन्‍गनैच्‍यो। जे अर्काए ओगल्‍ती अऩाकल ज़ पले·द जेएकिन नोकिन जे जेगल्‍ती झन ज़ रैंःज़्‍या। नो जेय़ेन फाल्‍न्‍या जेय़ामक ज़ च्‍याँःसिद ले।
JAM 5:10 ङानैं ङामेंर, परमेस्‍वरए उमिन हाइज़्याव अगमबक्ताराए किताव दुखर सहिद थ॰रिद लिकेर, हिताव ज़ जे मनी थ॰रिद लिच्‍यो।
JAM 5:11 नो थ॰रिद लिज़्यावरालाई गे धन्‍याकावर ज़ है गेरादोज़्‍या। अय्यूबए मनी बनै धो सहिउ दुखर दैद उसहिउत परमेस्‍वरए हाः चाव ओजैव जे ज़ जेसैंज़्‍या। है जैद परमेस्‍वरए उयुँ ओनाज़्‍याव उयुँ ओय़ाल्‍ज़्‍याव ननी ज़ रैंःज़्‍या।
JAM 5:12 ङानैं ङामेंर, प़ाइँरानी घेप्‍पा पाँ आव ज़ — नाम नम अथबा जोराए मिनर तादी ब हाइद किर्‍या ताझाःच्‍यो। बुरू जेपाँक हैज़लाई हैज़ लिच्‍यो, माःकलाई माःक ज़ लिच्‍यो। आगल्‍या जेपाँकिन गल्‍ती थ॰रिन्या ओछ्यास लिज़्‍या।
JAM 5:13 जेस सुवार दुखल यालिकिन नोए परमेस्‍वरलाई ओपोंखारिउक। फरी सुवार रेंवर यालिकिन नोए परमेस्‍वरए उमिनत भजन ओगैवक।
JAM 5:14 जेस सुवार याजोरो उहुकिन होए मन्‍दलीलाव स़ेररालाई ओराखुलोक। नो स़ेरराए ओजोरो हुवए ओङ़ैत परमेस्‍वरए उमिननी म़ास थीद्याद पोंखारिद ओएरक।
JAM 5:15 परमेस्‍वरलाई युँ सुहुप्‍द पोंखारिकिन ओजोरो हुज़्‍याव गराँन्‍या ले। ओजोरो हुवलाई ओल परमेस्‍वरए ज़ सोचोइज़्‍याव। फरी नो मिँए पाप ओदोव ताकिन, ओपाप ब क्‍याल्‍सिज़्‍या।
JAM 5:16 सगराँसिन्‍याए जूँनी जेदोव पाप जे जेल माम़ोंद भैंःद जे जे पोंखारिसिच्‍यो। धर्मी मिँए परमेस्‍वरलाई ओपोंखारिउ पाँए बनै घ्योःव य़ेन दोज़्‍याव।
JAM 5:17 एलिया ब गे स्‍यासो मिँ ज़ ओल्‍यो। होए ‘नम तावाक’ लिद ध्‍यानस ओपोंखारिक आव नामल स़ोंरिम छ मैना भरी नम वा ज़ मावाके।
JAM 5:18 फरी ‘नम ओवाक’ लिद ओपोंखारिक नम वाद आव नामल अनर बनै ज़ ताके।
JAM 5:19 अ ङानैं ङामेंर, आव ब सैंच्‍यो, जेनी सुवार परमेस्‍वरए ओयेमनी ओल्‍द ओबाकिन जोए नोलाई सोवोल्‍द रैज़्‍याव,
JAM 5:20 होए नो मिँलाई नर्गनी सोवोल्‍द ओरैव मिताव ज़ लिज़्‍या। कुधु ओपाप ब कप्‍द ओयो मिताव ज़ लिज़्‍या।
1PE 1:1 ङा पत्रुस, येसु ख्रीसए ओसाचीए ङाल्‍योनी, जे परमेस्‍वरनी छाँतिसिउर पोन्‍तस, गलातिया, कापादोकिया, एसिया स़ोनो बिथिनियाल चितराँ पुतराँ ताद खासिद लिज़्‍यावरालाई आव चिथी परींद ङायाचिज़्‍या।
1PE 1:2 परमेस्‍वर गेबाबुए जेलाई ओज़ा येसु ख्रीसए ओपाँ भैंःन्‍यार जैन्‍याए जूँनी जेलाई ङ़ादाकिन ज़ थ·रैद, छैंव उपुरूसए चोखोइद, ओज़ाए उझीए ब छरैचिक्‍यो। जेल्‍योदा परमेस्‍वरए उयुँ झन ज़ गराँद जेयुँ होलाँ जैद ओयाचिउक।
1PE 1:3 गेप्रभु येसु ख्रीसए ओबाबु परमेस्‍वरए उमिन बनै ओघ्‍योःक। गेल्‍योदा उयुँ नाद साःरो जुनील जर्मैसिक्‍यो। है जैद ओज़ा येसु ख्रीसलाई सिउनी ओसोचोइवए गेलाई मनी अजम्‍बरी जुनील बान्‍या आस याद नैसिउ।
1PE 1:4 नो आस स्‍वर्गत नैसिउ जेजुँ ज़। नो जुँ चिन्‍या ब माले, खेम्‍न्‍या ब माले, म़ान्‍या ब माले।
1PE 1:5 परमेस्‍वरए नो अजम्‍बरी जुनीलाव जेआस छींनीकाव बेलाक सयो·द्याचिरिज़्याव। नो सयो·द ओमायाचिवा पै जे नत जेयुँ सुहुप्‍द जेनैज़्‍यावए जेलाई ओल ओसक्तीनी जोगोइद पाथस नैचिज़्‍याव।
1PE 1:6 है जैद आज्‍यालकाव जाँवा पै जेदैज़्‍याव दुखर जो मितावर याहुदी ब प़ाइँ सहिद रेंव ज़ जेलिज़्या।
1PE 1:7 किताव सुनलाई मेंःल खारिज़्‍यार, हिताव ज़ आव जेदुखए ओअर्थ मनी ‘जेयुँर साचो उहुप्‍ज़्‍याव सैं ओमाहुप्‍ज़्‍याव?’ जाँचिन्‍याए जूँनी ची। जेयुँ हुबो ते खेम्‍द बाज़्याव सुनकिन झन ज़ ओएः ल्‍यो लिज़्या। है जैद दुखर उहुक जेसहिधुकिन येसु ख्रीस ओसरैंःसिहुव बेलाक जेलाई थ॰रिउ, महिमानोर, जेगुन ल्‍योर दैहुन्‍या ले।
1PE 1:8 नोलाई ङ़ादाकिन जेमारँःधुदी ब मया जेदोज़्‍या। आज्‍याल जेमारँःधुदी ब ओल्‍योदा जेयुँ हुप्‍ज़्या। स़ोनो जेरेंतए ज़ो·वा ज़ो·वा जेताज़्या,
1PE 1:9 काराव ल्‍यो ताकिन नो जेयुँ जेसुहुबोनी अजम्‍बरी जुनी जेदैरिज़्‍या।
1PE 1:10 जेल्‍योदा इताव जुनी हुरिज़्‍या लिद अगमबक्ताराए नो असिकए जूँनी ङ़ादा ज़ सर्द नैर। ख्रीसए उपुरूसनी ओल ख्रीसए उजूँनी ‘दुखर दैद उसिउत ज़गै मगैव तारिज़्‍या’ लिन्‍या ङ़ादा ज़ पाँद लेर। खाली नो पुरूसनी यादैव पाँए ओअर्थ माबुझिद, ‘आव खा बेलाक, सु ओतारिज़्‍याव?’ लिद खिमो ज़ यानैज़्‍याव।
1PE 1:12 छींनी नो पाँए ओअर्थ प़ाल्‍द होराए यापालाकावए जूँनी माःक, जे जेपालाकावए जूँनी ची ओल्‍यो लिन्‍या थ·रैकेर। आज्‍याल नो पाँ ज़ जेलाई परमेस्‍वरए ओपाँ सथैज़्‍यावराए स्‍वर्गतिन परींसिउ छैंव पुरूसए ओसक्तीनी सथैचिज़्‍यार। नो पाँ परमेस्‍वरए ओचाकर्‍याराए मनी बनै थैन्‍या युँ यादोज़्याव।
1PE 1:13 है जैद जेतहस लिद, प़ाइँत ज़ सैंसिद झाःसिद लिचिके। येसु ख्रीस फरिकाव ओरैंःहुक जेलाई यान्‍या असिकदा जेयुँ थू जैद नैचिके।
1PE 1:14 किताव ल़ुज़ाराए है दासिउ याभैंःज़्‍याव, हिताव ज़ जे मनी परमेस्‍वरए ओपाँर भैंःद, नो ङ़ादाङाव ओपाँ मासैंदकाव जेयुँ स्‍यासो फरी ताजैच्‍यो।
1PE 1:15 जेलाई खुल्‍ज़्‍याव छैंव लिज़्‍या। है जैद जे मनी हिताव ज़ प़ाइँल छैंवस लिचिके।
1PE 1:16 धर्मसास्‍त्रल मनी इताव सर्सिउ लिज़्‍या, “ङा छैंव ङालिज़्‍या, जे मनी हिताव ज़ लिच्‍यो।”
1PE 1:17 होए मिँ रँःद मादोव, य़ेन रँःद वाज़ दोज़्‍याव। नितावलाई ‘बाबु’ है जेदोज़्‍याव ताकिन आव मानुवात खासिद जेलेवा भरी ओल्‍योदा जेयुँ खोतोरो जैद छे·द लिच्‍यो।
1PE 1:18 जे ज़ जेसैंज़्‍या, ङ़ादाङाव जेजिज्‍यु बाज्‍युकिनकाव जेदोहुज़्‍याव अऩाकलाव रितिथितीरानी खेम्‍द बान्‍या सुन चाँदीए फुर्सुल ओजैचिउ माःक।
1PE 1:19 कान्‍त ज़ ओखत माल्‍यो हाँस्‍या पाथा स्‍यासो लँःद मालँःसिधुन्‍या ख्रीसए उझीए ज़ फुर्सुल ओजैचिउ ची।
1PE 1:20 नोलाई आव नाम नम ओमाजैद ङ़ादाकिन ज़ उथैद ओनैज़्‍याव। आव छींनीकाव बेलाक बल्‍ल जे जेजूँनी ज़ सरैंःद्याचिक्‍यो।
1PE 1:21 जे नोलाई रँःद परमेस्‍वरए ल्‍योदा जेयुँ हुप्‍ज़्‍या। नोलाई ज़ परमेस्‍वरए सिउनी सोचोइद ज़गै मगैव जैक्‍यो। है जैद जेयुँ जेआस परमेस्‍वरए ल्‍योदा ज़ लिज़्‍या।
1PE 1:22 जे आव सतलाव पाँ भैंःद, छैंव ताद नैं मेंलाई मया दान्‍या जेतावए, नो जेमया पक्‍कास जेयुँ स्‍यानी ज़ ताव ओताक।
1PE 1:23 काराव ल्‍यो ताकिन जे साःरो जुनी दैद जेनै। नो जेदैव जुनी ते फ्या·न्‍या धुरनी जेदैव माःक, परमेस्‍वरए खर्क ज़ माफ्या·न्‍या एकतार रहिज़्‍याव जींदो ओपाँनी ज़ जेदैव ची।
1PE 1:24 धर्मसास्‍त्रल मनी इताव सर्सिउ लिज़्‍या, “मिँ भरी छी स्‍यासोर ज़, यासोभा ल्‍योर ब वास स्‍यासोर ज़। छीर ब थँज़्‍यार, वासर ब गलिज़्‍यार।
1PE 1:25 प्रभुए ओपाँ ते खर्क ज़ माम़ाए, माखेमे।” नो माखेम्‍न्‍या पाँ यासथैचिज़्‍याव चाव था ज़।
1PE 2:1 है जैद मादान्‍या य़ेन भरी ऱासो ताके — धुतैन्‍या, कप्‍तैं दान्‍या, मी तून्‍या, छुलैं पुलैं दान्‍या — आव भरी ऱास्‍च्‍यो।
1PE 2:2 साःरो जुनील पाखो तानान्‍याए जूँनी भाउज़ाए नुइँ उखिम्‍ज़्‍याव मिताव जे ब परमेस्‍वरए छैंव ओपाँए ओअर्थ खिम्‍च्‍यो।
1PE 2:3 काराव ल्‍यो ताकिन जे गेप्रभुए उगुनर दार्द जेनै।
1PE 2:4 गेप्रभु येसुए ल्‍योदा हुचिके, हो गजलाव जींदो लुँ ज़। नोलाई झन मिँराए ‘माचाहिए’ लिद ख्याकेर। खाली परमेस्‍वरए ते नोलाई छाँतिद बनै ओएः ल्‍यो थ·रैक्‍यो।
1PE 2:5 जे ब जींदो लुँ स्‍यासो जैसिद परमेस्‍वरनिकाव ताज़्‍याव झ़िमत ऱीम्‍सिहुचिके। जे नल छैंव पुजारीर ताद परमेस्‍वरए ओपैंज़्याव युँनिकाव पुजार येसु ख्रीसनी चरैःचिके।
1PE 2:6 धर्मसास्‍त्रल मनी इताव सर्सिउ लिज़्‍या, “चिऊचिके, सियोनलाव ङाराज्‍याल छाँतिसिउ बनै ओएः ल्‍यो लुँ भुयाँरलाव गजल थाँद ङानै। नो लुँत यायुँ हुप्‍ज़्‍यावर लाज मोर्नो तान्‍या मालेर।”
1PE 2:7 जे नत जेयुँ हुप्‍ज़्‍यावरालाई आव बनै ओएः ल्‍यो लुँ लिज़्‍या। यायुँ माहुप्‍ज़्‍यावराए जूँनी ते इताव सर्सिउ लिज़्‍या, “भुलीराए कान्‍ल ज़ माज़्‍यासे लिद याख्याव लुँ नो ज़ झन भुयाँरलाव लुँ ताके।”
1PE 2:8 फरी तोथोल इताव ब लिज़्‍या, “नो ज़ मिँराए यायुँ केःद्यान्‍या सुत़ुम्‍न्‍या लुँ।” नोर परमेस्‍वरए ओपाँ यामाभैंःवए नो लुँत त़ुम्‍ज़्‍यार। नोरालाई परमेस्‍वरए निताव ज़ याजैक्‍यो।
1PE 2:9 जेलाई ते हिताव माःक। जे छाँतिसिउ ओथोर, राजाराए याराजाए ओसेवा दान्‍या पुजारीर, ओल उमिनताव छैंव जात, परमेस्‍वरए ओथामिचिउ उमींर ज़। है जैद जे गेप्रभुए उगुनर प़ाइँदा सथास्‍न्‍याए जूँनी जेलाई चुम चुमोनी पले·द अचम्‍बलाव ओज़गैल झाःचिक्‍यो।
1PE 2:10 जे ङ़ादा कान्‍ल ज़ मागनिसिउर जेल्‍यो। आज्‍याल ते परमेस्‍वरए उमींर ताद जेले। ङ़ादाकिन य़ालो उयुँ मादैवर जेल्‍यो, आज्‍याल ते य़ालो उयुँ दैद जेनै।
1PE 2:11 आव मानुवात खासिद लिज़्‍याव ङायुँलाव ङानैं ङामेंर, जेस ङाबिन्‍ती लिज़्या — जेयुँ जेमानैधुज़्‍याव माचाहिउ य़ेनरालाई वैंव ताके। नो पाँराए युँस लरैं दोज़्‍यार।
1PE 2:12 यायुँ माहुप्‍ज़्‍यावराए ङ़ाक चाव य़ेन सतैंचिके। हो ताकिन ची सुवाराए जेमिन बले·द यायाचिदी ब परमेस्‍वर फरी उहुन्‍या छ्याम जेय़ेन रँःद ‘आवराए याय़ेन ते चाव ची ओल्‍यो’ लिद परमेस्‍वरए उमिन ब सघ्योःन्‍या लेर।
1PE 2:13 राज्‍या चलैज़्‍यावराए याथ·रैव कानुन धूँल लिद ‘प्रभुए उजूँनी ज़ ङादोज़्‍या’ लिद सम्‍जिच्‍यो। नोर राजा तादी ब, होए उधूँलावर तादी ब, यापाँ भैंःच्‍यो। नोरालाई, माचाव य़ेन दाज़्‍यावरालाई सजा यान्‍या, स़ोनो चाव य़ेन दाज़्‍यावरालाई स्‍याबास यान्‍या हक यासिउ लिज़्‍या।
1PE 2:15 यायुँ माहुबोराए अऩाकलाव माचाहिउ यापाँर चाव जेय़ेनए थाम थुम जैन्‍या परमेस्‍वरए उयुँ लिज़्‍या।
1PE 2:16 जे फुर्सुल जेतावए हितावनी ज़ दोच्‍यो। खाली, ‘सुए उधूँल ज़ गेमाले’ लिद कोभादा बान्‍या माःक, बुरू परमेस्‍वरए उधूँल लिद ओय़ेन दोच्‍यो।
1PE 2:17 प़ाइँए यामान नैद याराएच्‍यो। यायुँ हुबो नैं मेंरालाई मया यारादोच्यो। परमेस्‍वरलाई रँःद छे·च्‍यो। राजाए ओमान ब नैदिच्‍यो।
1PE 2:18 जो बाँदा जेलिज़्‍या, जेसाहुराए यामान नैद्याद याधूँल लिचिके। यायुँ य़ालो स़ोनो चावरालाई वाज़ माःक, अखत्‍यासोरालाई ब यामान नैद याराएच्‍यो।
1PE 2:19 जे अऩाकल ज़ मादैन्‍या दुखर जेदैक परमेस्‍वरलाई सम्‍जिद जेसहिकिन नो परमेस्‍वरए ओपैंज़्‍याव मिताव य़ेन ज़।
1PE 2:20 माचाव य़ेनत सजा दैद जेसहिकिन नो काता ची ओतारिज़्‍याव? चाव य़ेनत दुखर दैद जेसहिकिन ते परमेस्‍वरए ल्‍योनी असिक जेदैरिज़्‍या।
1PE 2:21 आव य़ेनए जूँनी ज़ परमेस्‍वरए जेलाई खुल्‍द नैचिउ। ख्रीसए मनी जे जेजूँनी दुखर सहिद्याचिक्‍यो। है जैद उसिलत बान्‍या येम सतैंद नैसिउ लिज़्‍या।
1PE 2:22 “होए माचाव य़ेन खर्क ज़ मादोव, धुत ब खर्क ज़ मापाँए।”
1PE 2:23 याथल्‍क ब फर्कैद मारायो। दुख याएक ब ‘रँःद नैच्‍यो’ है मारादोव। बुरू, ‘जो तादी ब चावस फाल्‍न्‍या ओल परमेस्‍वर ज़ लिज़्‍या’ लिद ओक्‍याँत ख्यासिद लिके।
1PE 2:24 गेलाई ‘पाप दान्‍यात सिधुव मिताव जैसिद परमेस्‍वरए उयुँलाव मिताव य़ेन दान्‍या घतारक’ लिद क्रुसत तङ्गैसिद गेदोव पाप भरी ओल ज़ घुर्द्यासिक्‍यो। है जैद नोए ओघाइनी ज़ जे जेगराँके।
1PE 2:25 जे ङ़ादाकिन ङोइव बेधा स्‍यासोर जेल्‍यो, अब ते पाथस नैज़्‍याव जेर्गे गावलाए ओल्‍योदा ओल्‍द हुद जेले।
1PE 3:1 जे रे दाव मेंमार, जेरेराए यापाँ धूँल लिच्‍यो। हो ताकिन ची परमेस्‍वरए ओपाँ माभैंःज़्याव जेरेर जे है जेमारादोदी ब चाव य़ेन जेदोज़्यावए परमेस्‍वरए ल्‍योदा हुन्‍या लेर।
1PE 3:2 छैंव जेय़ेन स़ोनो परमेस्‍वरए ओमान नैद जेएज़्‍याव रँःद यायुँ परमेस्‍वरए ल्‍योदा जैव ब धुर।
1PE 3:3 जेक्‍याँ जेबनैसिक जेचेम परीद, सुन चाँदी जासिद, चाव चाव क्‍वा क्‍वाइसिद, पाखाताव सतैंन्‍या वाज़ ताताक।
1PE 3:4 हो देखा बुरू जेयुँल बनैसिचिके। युँलाव खर्क ज़ मालिसिन्‍या सोभा आव ज़ — थकानस, तहस लिन्‍या। नोलाई ज़ परमेस्‍वरए चाव रँःज़्‍याव।
1PE 3:5 परमेस्‍वरए ओक्‍याँत ख्‍यासिउ भाःङाव छैंव मेंमाराए ब हिताव य़ेन ज़ दोकेर। यारेराए यापाँ धूँल लिद यायुँल बनैसिकेर।
1PE 3:6 साराए मनी ओरे अब्राहामलाई ‘प्रभु’ लिद ओपाँ भरी भैंःके। जे ब माछे·द साचो छैंव य़ेन जेदोकिन साराए ओज़ार ज़ तान्‍या जेले।
1PE 3:7 जे ज्‍या दाव खेपाराए मनी, ‘ङाज्‍याए ओर्सा ङार्सा स्‍यासो माले’ लिद अखत्‍यासो माजैसिद लिच्‍यो। स़ोनो, ‘आव साःरो जुनी सिप ज़ गिन्‍दैके’ लिद ज्‍याए ओमान ब नैदिच्‍यो। जिन जिन्‍माखैकिन जिन्पोंखारिज़्याव परमेस्‍वरए ल्‍योङ कातानी ओकेस्‍रिज़्‍याव?
1PE 3:8 है ङादाचिउ भरिए ओअर्थ आव ज़ — जे जेल खैद तोबो फूलाव मिताव जैसिद हुनी होदा सम्‍जैसिच्यो। मासघ्योःसिद नैं मेंए ल्‍योदा जेयुँ ब ओगराँक।
1PE 3:9 माचावलाई माचाव फर्कैद ताएच्‍यो। याथल्‍चिदी ब जे ताराथल्‍च्‍यो। बुरू असिक याराएच्‍यो। काराव ल्‍यो ताकिन आवए जूँनी ज़ खुल्‍सिउर जेलिज़्या। निताव जेदोकिन जे परमेस्‍वरए ल्‍योनिकाव असिक दैन्‍या जेले।
1PE 3:10 धर्मसास्‍त्रल ब इताव सर्सिउ लिज़्‍या, “जोए फाबिन्‍या चाव जुनी पैंज़्‍याव, होए ओसेलाई माचाव पाँनी जोगोइद, ओयाःनी धुत पाँ तापले·वक।
1PE 3:11 बुरू माचावनी ओल्‍द चावदा बाद, प़ाइँस खैन्‍या उखिमोक।
1PE 3:12 काराव ल्‍यो ताकिन प्रभुए उमी धर्मी मिँराए याक्‍याँत वाज़ लिज़्‍या। ओर्ना ब यापोंखारिज़्यावदा घ्याँ जैद याएज़्‍याव। माचाव य़ेन दोज़्‍यावरालाई ते क़ुरनी याचिऊज़्‍याव।”
1PE 3:13 चाव य़ेनत कलँ जेलिकिन सुए ज़ मावैंचिर।
1PE 3:14 खाली कैताराक चाव जेय़ेनत दुख जेदैकिन धन्‍याकावर जेताज़्‍या। जेखिरी पसिज़्‍यावर रँःद ताछे·च्‍यो, हार तामानिच्‍यो।
1PE 3:15 बुरू ख्रीसलाई जेयुँलाव जेर्गे जैच्‍यो। सुवाराए नो आस दाद जेनैज़्‍यावए जूँनी यासुधिचिकिन नोरालाई मास॰द चावस पलास्‍द्यान्‍यात झाःसिद लिच्‍यो।
1PE 3:16 जो य़ेन जेदोदी ब छैंव युँस दोच्‍यो। हो ताकिन ची जेमिन बले·द यायाचिदी ब, ख्रीसनिकाव चाव जेय़ेनए लाज मोर्नो ताद थाम थुम तान्‍या लेर।
1PE 3:17 परमेस्‍वरए जेजुँ दुख दैन्‍या जैद ओयाचिकिन माचाव य़ेनत दुख दैज़्‍याव देखा चाव य़ेनत दैन्‍या चाव लिज़्‍या।
1PE 3:18 काराव ल्‍यो ताकिन ओल ख्रीसए ब जेलाई परमेस्‍वरस सखैन्‍याए जूँनी जे अधर्मीराए जेपोल ओल धर्मी मिँ थाँसिद जेपाप भरी तखेप्‍त ज़ ख्याद्याचिक्‍यो। उजिउ झाःद ब पुरूसनी सोके।
1PE 3:19 नो पुरूसनी ज़ नर्गल लिज़्‍यावरालाई मनी ओपाँ यासथैनाक्‍यो।
1PE 3:20 नो नर्गल लिज़्‍यावर भाःङाव नोआए ओपालाकिनकाव परमेस्‍वरए ओपाँ माभैंःज़्‍यावर ज़। नोआए नो ऱी जहाज जैन्‍या ओमाखेमा पै ‘कसा यायुँ माफर्कैर’ लिद परमेस्‍वरए कींद ओरानैज़्‍याव। खाली नो ऱीनी जम्‍मा आथ जना वाज़ बाँचिकेर।
1PE 3:21 नो ऱीनी बाँचिन्‍याए ओअर्थ ऱील सछैंसिन्‍या मिताव ज़ लिज़्‍या। नल मनी ऱीनी जेबाँचिज़्‍या। खाली हुर्सिद पाखाताव जेक्‍याँताव रीः जेख्यावनी ते माःक, परमेस्‍वरए ओङ़ाक जेयुँलाई सछैंद परमेस्‍वरस य़ाका जेनैज़्‍याव ची। येसु ख्रीस सिउनी ओसैंसिउनी जे ब जेबाँचिज़्‍या।
1PE 3:22 ओल स्‍वर्गत बाद परमेस्‍वरए ओवोर्दा च़ुसिद ले। नल स्‍वर्गताव चाकर्‍यार, याहक ल्‍योर, यासक्ती ल्‍योर प़ाइँ उधूँल ज़ लिज़्यार।
1PE 4:1 है जैद ख्रीसए मनी उजिउत दुखर उसहिउए जे मनी निताव य़ेनत झाःसिद लिचिके। जोए दुखर दैद सहिज़्‍याव, होए ज़ पाप दान्‍या ब ऱास्‍ज़्‍याव।
1PE 4:2 नोए ज़ आव मानुवात ओलेवा भरी युँ मानैधुन्‍या भरी ऱास्‍द परमेस्‍वरए उयुँलाव मितावदा वाज़ उयुँ थू जैज़्‍याव।
1PE 4:3 ङ़ादा जे मनी परमेस्‍वरलाई मासरेस्‍ज़्यावराए यादोज़्‍याव मिताव पातर्‍या पातर्नी जैसिन्‍या, जोत ब युँ मानैधुन्‍या, मँःए मँःए बाऱिन्‍या, तुबुरी दुलिन्‍या, मद छोकोरा वाज़ खेपैन्‍या स़ोनो युँ माजामो अङग्‍या पुजा दान्‍यात कुधु समय जेझाःके।
1PE 4:4 अबकिन ते नो ङ़ादाकिनकाव जेनैंरास जेजिउ च्‍यो च्‍यो जेझाःज़्‍याव माचाव य़ेनदा जेमाबाज़्‍यावए, नोर अचम्‍ब ताद जेलाई गिल्‍लैन्‍या लेर।
1PE 4:5 हैदी ब तछा सिउ मासिउराए यान्‍याय फाल्‍ज़्‍यावए ओङ़ाक च्‍याँःसिद नोर पाँव परिरिज़्‍या।
1PE 4:6 है जैद सिउरालाई मनी चाव था सथैसिउ लिज़्या। हो ताकिन ची नोर प़ाइँ मिँराए माँःती यासिदी ब परमेस्‍वरए उपुरूसनी एकम्‍न्‍याकावए जूँनी बाँचिन्‍या लेर।
1PE 4:7 खेम्‍न्‍या बेला नजिकक ज़ हुद ले। है जैद जेतहस लिद पोंखारिन्‍यात झाःसिद लिचिके।
1PE 4:8 प़ाइँरानी दान्‍या जे जेल युँ जींनी मया दासिन्‍या ज़। मयानी कुधु पापर कप्‍सिज़्‍या।
1PE 4:9 जेझ़िमक हुज़्‍यावरालाई मारूम्‍रूमैद चावस यारासुम्‍च्‍यो।
1PE 4:10 किताव प़ाइँए तोबो तोबो भाँती भाँतिलाव परमेस्‍वरए ओबरदानर दैद जेनै, हिताव ज़ नो बरदानर चावस चलैद जे जेल समारिसिच्‍यो।
1PE 4:11 पाँज़्‍यावए परमेस्‍वरए ओपाँनी ज़ ओपाँक। सघैज़्‍यावए परमेस्‍वरए ओसक्तीनी ज़ ओसघैवक। हो ताकिन ची जेदोव भरित येसु ख्रीसनी परमेस्‍वरए उमिन रैंःन्‍या ले। नोलाई खर्क ज़ माखेम्‍न्‍या ज़गै मगै स़ोनो सक्ती उकुइत ज़ ओताक। आमेन।
1PE 4:12 अ ङायुँलाव ङानैं ङामेंर, जेखार्ल हुद लिज़्‍याव दुखर रँःद ‘काता इताव’ लिद जेयुँर स्‍यासे तासतेच्‍यो।
1PE 4:13 बुरू नो दुखर जेदैक रेंद लिच्‍यो। काराव ल्‍यो ताकिन जे ख्रीसस सिप दुख जेदैज़्याव मिताव ज़ लिज़्या। तछा ज़गै मगैवस उहुक जेयुँर होलाँ ताद रेंन्‍या जेले।
1PE 4:14 ख्रीसए उमिनत हेला यारँःचिकिन धन्‍याकावर जेताज़्‍या। ननी ज़ परमेस्‍वरए ज़गै मगैव उपुरूस जेक्‍याँत च़ुसिहुज़्‍या।
1PE 4:15 खाली जेनी मिँ सैःन्‍या, कुन्‍या, छुतए ओय़ेनत कुइ झाःन्‍या, निताव माचाव य़ेनरानी सुलाई ज़ सजा ताताक।
1PE 4:16 ख्रीस्‍त्‍यान जेतावनी ते दुखर जेदैकिन जेलाज ताहुक। बुरू नो मिन जेदैवनी परमेस्‍वरलाई धन्‍याबाद चरैःच्‍यो।
1PE 4:17 परमेस्‍वरए जाँचिन्‍या बेला हुद ले। उस॰कत ओल उमींराए ल्‍योनी थूसिरिज़्‍या। गेनी उथूसिकिन चाव ओथा माभैंःज़्‍यावरालाई झन किताव ताके?
1PE 4:18 धर्मसास्‍त्रल मनी इताव सर्सिउ लिज़्‍या, “नो बेलाक धर्मीर धो धो याबाँचिकिन, पापीर स़ोनो अधर्मीर कातानी याबाँचिरिज़्‍याव?”
1PE 4:19 है जैद परमेस्‍वरए ओयाचिउ जेजुँ दुखर दैन्‍या ताकिन, नो चाव जेय़ेनलाई माऱास्‍द जेलाई जैज़्यावए ओक्‍याँत ख्यासिद लिच्‍यो। होए जेलाई खर्क ज़ ऱास्‍न्‍या माले।
1PE 5:1 जे मन्‍दलीलाव स़ेरर, ङा मनी जेसकाव स़ेर मिताव जैसिद ङापाँज़्‍या। ख्रीसए ओदैव दुखर आव ङामीए ज़ ङारँःके। ङा मनी छींनी ओसतैंरिज़्‍याव ओज़गै मगै जेस सिप ज़ ङादैरिज़्या। है जैद ङा जेलाई है ङादाचिज़्‍या,
1PE 5:2 जेपासल लिज़्‍याव परमेस्‍वरए ओबगाललावरालाई पाथस यारानैच्‍यो। सुवाराए करकापनी माःक, परमेस्‍वरए ओपैंज़्‍याव मिताव जेयुँ स्‍यानी ज़ दोच्‍यो। धनए लोभनी ब माःक, सेवा दान्‍या युँस दोच्‍यो।
1PE 5:3 जेधूँलावराए याङ़ैत अखत्‍यासो ब ताजैसिच्‍यो। बुरू बगालए ओङ़ाक चाव य़ेनत सतैंद नैसिउ मिताव ताच्‍यो।
1PE 5:4 हो ताकिन ची जेर्गे गावला फरी ओसरैंःसिहुक जेलाई घ्योःव मान याद एकम्‍न्‍या ज़ तह महौ नैचिरिज़्‍याव।
1PE 5:5 जे धापाज़ाकावर, सेरोराए यापाँ धूँल लिच्‍यो। स़ोनो जे प़ाइँ मास॰द सज़िम्‍सिद जे जेल चिऊसिचिके। काराव ल्‍यो ताकिन धर्मसास्‍त्रल मनी इताव सर्सिउ लिज़्‍या, “स॰द सघ्योःसिज़्‍यावरानी परमेस्‍वर तँदा ज़ लिज़्‍या, सज़िम्‍सिज़्‍यावराए ल्‍योदा ते उयुँ य़ाल्‍ज़्‍या।”
1PE 5:6 है जैद परमेस्‍वरए उधूँल लिद मास॰द जेसज़िम्‍सिकिन तछा सघ्योःचिरिज़्‍याव।
1PE 5:7 व़ीनी फुइ मालिद, परमेस्‍वरए ओक्‍याँत ख्यासिद लिचिके। होए ज़ जेलाई चिऊचिज़्‍याव।
1PE 5:8 जेतहस लिद सैंसिद लिच्‍यो। जेसुतुर सैतान गर्जिज़्‍याव ला माँःती ‘सुलाई ङाकैके’ लिद पेमे पेमे खिम्‍चिज़्‍याव।
1PE 5:9 जे परमेस्‍वरए ओपाँत जेयुँ सुहुप्‍द जेर्सा ल्‍यो ताद सैतानए ओङ़ाक थाँसिचिके। ‘गेलाई वाज़ माःक, संसार भरिलाव गेदाज्‍यु भाइराए मनी आव दुखर दैव ज़ नैज़्‍यार’ लिद य़ाका दोच्‍यो।
1PE 5:10 जे जाँवा पै आव दुखर जेसहिउत नो दुखरानी प़ाइँल गराँव गोव परमेस्‍वरए जेलाई जेयुँर होलाँ जैद्याद, जेर्सार हाइद्याद, ग्‍याल गिल माताद थ॰रिउर जैचिरिज़्‍याव। होए ज़ जेलाई ख्रीससकाव खर्क ज़ माखेम्‍न्‍या ओज़गै मगैवल सिप ज़ लिन्‍या खुल्‍द नैचिउ।
1PE 5:11 होलाई खर्क ज़ माखेम्‍न्‍या राज्‍या उकुइत ओताक। आमेन।
1PE 5:12 परमेस्‍वरए ओपाँताव उयुँ हुबो गेभाइ सिलासए उकुइत आव तूइँज़ा चिथी सर्द परींद ङानै। आव चिथील ‘परमेस्‍वरए उयुँ गेल्‍योदा इताव ज़ लिज़्‍या’ लिद जेयुँ सझेंःद्याद सर्द ङानै। नत ज़ जेयुँर थ·रैद लिच्‍यो।
1PE 5:13 बेबिलोनल लिज़्‍याव जेस सिप छाँतिसिउ परमेस्‍वरए उमिनतावराए याल्‍योनी जेरो है दाचिज़्‍यार। ङाज़ा मिताव मर्कूसए मनी जेरो है दाचिज़्‍याव।
1PE 5:14 जे जेल मयास जेरो दासिच्‍यो। ख्रीसए उमिनत लिज़्‍याव भरिरालाई जेयुँ होलाँ ओताक।
2PE 1:1 ङा सिमोन पत्रुस येसु ख्रीसए ओनोकोर स़ोनो ओसाचीए ङाल्‍योनी आव चिथी जे, गे माँःती, उगुन ल्‍यो युँ हुबो पाँ दैवराए जूँनी परींद ङायाचिज़्‍या। आव पाँ गेपरमेस्‍वर स़ोनो गेलाई बाँचैज़्याव येसु ख्रीसए गेजूँनी सतस ओदोज़्‍यावनी ज़ गेदैके।
2PE 1:2 जे गेप्रभु येसु ख्रीसए ओपाँ सैंद परमेस्‍वरए ल्‍योदा जेखैज़्‍यावए ओल मनी जेल्‍योदा उयुँ गराँद जेयुँ होलाँ जैद ओयाचिउक।
2PE 1:3 गेलाई परमेस्‍वरए ओल उगुन स़ोनो ज़गै मगैव ओगेनी खुल्‍द नैसिउ। गे ओललाई चावस गेसरेसोए परमेस्‍वरए गेलाई ओल ओसक्तीनी साःरो ताद ओगे रैन्‍याए जूँनी प़ाइँ जोरैद नैद्यासिउ।
2PE 1:4 निताव जोरैद ओयासिउनी फरी गेलाई बनै घेप्‍पा ओचाहित ल्‍यो य़ाकार याद नैसिउ। नो परमेस्‍वरए ओयासिउ य़ाकारानी गे आव जुकलाव माचाव चेतैन्‍यानी हुज़्‍याव फ्या·न्‍या म़ान्‍यानी पुलुस्‍द परमेस्‍वरए ओगे रैन्‍यार गेताज़्‍या।
2PE 1:5 है जैद जे ओल ओगे रैन्‍या ताकिन परमेस्‍वरए ओपाँत जेयुँ सुहुप्‍द धर्मदा कलँ लिच्‍यो। धर्मर दाद ओपाँर झन ज़ प़ाल्‍च्‍यो।
2PE 1:6 ओपाँर थ·रैद, तहस लिद, झन ज़ थ॰रिद, परमेस्‍वरए उयुँलाव मिताव जैसिच्‍यो।
2PE 1:7 ओल उयुँलाव मिताव जैसिद नैं मेंए ल्‍योदा युँ गराँव जैद, तोबोए तोबोलाई मया दासिच्‍यो।
2PE 1:8 आव गुनर चावस रैद जेयुँल जेसबा·किन जे कान्‍ल ज़ काम मालागिउ अऩाकलावर तान्‍या जेमाले। बुरू गेप्रभु येसु ख्रीसए साचो उबुद्धी भरी जे ज़ रैन्‍या जेले।
2PE 1:9 खाली जोस आव मिताव गुनर माले, नो मिँ तादाङ मारँःधुन्‍या मुन्‍दुक्‍यासो मिताव ताज़्‍या। ङ़ादाङाव ओपापर परमेस्‍वरए क्‍याल्‍द ओयो ब माचेतैव।
2PE 1:10 है जैद जे ङानैं ङामेंर, परमेस्‍वरए ङ़ादा ज़ थ·रैद थामिद ओरानैज़्‍यावल ‘गे ब नल ज़ गेताक’ लिद जोर दोच्‍यो। इताव जेदोकिन जेयुँ हुबो पाँलाई खर्क ज़ माऱास्‍द,
2PE 1:11 गेलाई बाँचैज़्‍याव गेप्रभु येसु ख्रीसए ओराज्‍याल त़ाल त़ोल माताद ज़ पसिउ दैन्‍या जेले। नो राज्‍या खर्क ज़ खेम्‍न्‍या माले।
2PE 1:12 जे इताव पाँर ङ़ादाकिन ज़ दैद जेसैंवए ओसतत थ॰रिद जेले लिन्‍या ङासैंज़्‍या। हैदी ब ङा जेलाई सम्‍जैन्‍यात एकम्‍न्‍या झाःसिद ङाले।
2PE 1:13 ङा आव मानुवात ङालेवा भरी इताव पाँरानी परमेस्‍वरए ओय़ेनत जेर्सा हाइद्यान्‍या ङाय़ेन ज़ लिज़्‍या।
2PE 1:14 काराव ल्‍यो ताकिन ङा आव मानुवानी बान्‍या बेला हुद ले लिन्‍या ङासैंज़्‍या। नो ङ़ादा गेप्रभु येसु ख्रीसए ज़ है ओदाँव।
2PE 1:15 है जैद आव पाँर ङा ङासिउ छींनी घमामेंःरक लिद य़ाका जैद नैद ङायाचिए।
2PE 1:16 गे गेप्रभु येसु ख्रीस बनै सक्तीस फरी ब हुरिज़्‍या लिन्‍या पाँर जेलाई गेसथैचिक गेनी ससैद माचाहिउ घर्ती बिन्‍तीरानी गेसथैचिज़्‍याव ते माःक, ओल ओसक्तीर ओज़गैर आव गेमीए ज़ रँःद गेनै।
2PE 1:17 हो गेरँःव छ्याम ज़ ओबाबु परमेस्‍वरए येसुलाई ओमानर याद ज़गैव ब जैक्‍यो। हो बेलाक ज़ फरी स्‍वर्गताव माहान परमेस्‍वरए ल्‍योनी तोबो गा अइ लिद हुके, “आव ङायुँलाव ङाज़ा ज़, आवलाई रँःद ङायुँ होलाँ ताज़्‍या।”
2PE 1:18 आव स्‍वर्गतिन हुव पाँ भरी गे ओलस लिज़्‍यावराए नो चोखो दाँदात गेलिज़्‍याक आव गेर्नाए ज़ गेथैके।
2PE 1:19 है जैद ङ़ादा ख्रीसए उजूँनी अगमबक्ताराए यापाँ भरित गेयुँ झन ज़ हुप्‍ज़्या। जे मनी नो पाँत बनै धिद ज़ लिच्‍यो। ख्रीस फरी ओमाहुवा पै नो पाँ चुम चुमोल मेंः तैंःसिउ मिताव ज़ लिज़्‍या। ओल उहुवत फरी छकाल्‍न्‍याकाव सोम्‍पा जेयुँल ज़गै ओताव मिताव ज़ तारिज़्या।
2PE 1:20 आव ब सैंच्‍यो, धर्मसास्‍त्रलाव पाँ मिँए सिर्जैद सर्सिउ ब माःक,
2PE 1:21 नो पाँ मिँए युँ स्‍यानी हुव ब माःक। छैंव पुरूस मिँराए यायाःत च़ुसिद परमेस्‍वरनी ज़ पाँकेर।
2PE 2:1 हो बेलाक इस्राएलीराए याखार्ल ख्वा ख्वार परमेस्‍वरए उमिन हाइद धुतनी पैज़्यावर ब यालिज़्‍याव। जे जेखार्ल ब हितावर तोबो ऩेब्‍लो तान्‍या लेर। नितावराए याबाथैंनी बले·न्‍या धुत पाँर पैद यालाई फुर्सुल जैज़्याव यार्गेलाई मनी ऱास्‍न्‍या लेर। ननी ज़ यालाई खेम्‍न्‍या सजा यानी ज़ रैरिज़्यार।
2PE 2:2 हितावत ब लाज हुव य़ेन यारापैज़्‍यावदा कुधु ज़ बान्‍या लेर। ननी ज़ साचो येम ब बलेस्‍न्‍या ले।
2PE 2:3 नो पैज़्‍यावराए लोभ वाज़ दाद, ‘कसा मिँर गेल्‍योदा गेमाराजैए’ लिद जो थैव पैंज़्‍यार हो ज़ यारासथैज़्‍यार। नितावरालाई यासजाए याछीं याछीं खेपैहुद जप जप ओराजैहुव मिताव ज़ लिज़्‍या।
2PE 2:4 परमेस्‍वरए ओचाकर्‍यार ब ओलकिन तँदा याजैसिक नोरालाई बाँखी मानैद नर्गल याख्याक्‍यो। नल सजा यान्‍या छ्यामकावए जूँनी तल्‍ना नामलाव चुम चुमोल थुनैद यानैव।
2PE 2:5 नोआए ओपालाक ब पापीराए जूँनी परमेस्‍वरए संसारल बनै घ्योःव भल झाःद सुलाई ज़ बाँखी मारानैक्‍यो। नो धर्मलाव पाँ सथैज़्‍याव नोआलाई वाज़ उझ़िमलाव सात जनारास यानैक्‍यो।
2PE 2:6 सदोम स़ोनो गमोरा सहरलावरालाई सफ्या·न्‍या सजा परींद ओराएक नलाव लिज़्याव भरिलाई चुयाप याजैक्‍यो। ननी ज़ अधर्म दाज़्‍यावरालाई किताव ओताज़्याव लिन्‍या सतैंसिउ मिताव लिज़्‍या।
2PE 2:7 परमेस्‍वरए नलावरानी तोबो धर्मी लोतलाई वाज़ बाँचैक्‍यो। लोत नो यार्ती माल्‍यो लाज मोर्नो य़ेन दोज़्‍यावर रँःद ओसोगो ओलागिज़्‍याव।
2PE 2:8 नो धर्मी नितावरास उलिज़्‍याक दिनकाव ज़ माचाव याय़ेन रँःद थैद उयुँ घरो ज़ उलिज़्‍याव।
2PE 2:9 है जैद परमेस्‍वरए ओल उमिनत लिज़्‍यावरालाई धो सहिउनी ओरापले·धुज़्याव ननी ज़ रैंःज़्‍या। अधर्मीरालाई फरी फाल्‍न्‍या छ्याम ओमाहुवा पै सजा धूँल यानैज़्‍याव।
2PE 2:10 नो सजा धूँल लिज़्‍यावर यायुँनी हुज़्‍याव भरित यायुँ मानैधुद मादान्‍या य़ेन दाद परमेस्‍वरए ओहक धूँल मालिज़्‍यावर ज़। नोर झन बनै स॰द स्‍वर्गताव यासक्ती ल्‍योरालाई रँःद माछे·द झन हसैद ल़॰ज़्यार।
2PE 2:11 स्‍वर्गताव परमेस्‍वरए ओचाकर्‍यार ते आव मिँराकिन झन यासक्ती ल्‍योर यामान ल्‍योर लिज़्‍यार। हितावत ब परमेस्‍वरए ओङ़ाक स्‍वर्गताव यासक्ती ल्‍योरालाई यापाहा ब झाःद माराएर, यामिन ब बले·द माराएर।
2PE 2:12 खाली आव मिँराए ते स्‍वर्गतावर इतावर ची याल्‍यो लिन्‍या ब मासैंद यामिन बले·द्याद ल़॰ज़्यार। है जैद आवर च़ेंल सगैद सैःन्‍या याग्‍यान माल्‍यो पुसु स्‍यासोर ताद फ्या·न्‍या म़ान्‍यादा बाद,
2PE 2:13 मादान्‍या यादोव भरी याज़ भुगिरिज़्‍यार। इतावर लाक ब दुलिद यायुँनी जो हुज़्‍या हो ज़ दाद रेंव ज़ लिज़्‍यार। इताव माछाँवर प्रभु-भोजल जेस ज़्‍यान्‍या ते युँ माजामो ज़ लिज़्‍या।
2PE 2:14 नोर मेंमाराए ल्‍योदा यामी कुँ खर्क ज़ मावाँःद पाप दाव ज़ नैज़्‍यार। यायुँ तोबो पोक माल्‍योरालाई पापल यारापारैज़्‍यार। निताव याफ्या·हुवराए लोभ दान्‍या ते बनै सैंज़्‍यार।
2PE 2:15 साचो येमलाई ऱास्‍द झन बिप्‍यादा बाद लेर। नोर मादान्‍या य़ेनर दाद रूप्‍या कमैव पैंज़्याव बओरए ओज़ा बालामए ओयेमल ज़ बाकेर।
2PE 2:16 नो बालामए माचाव य़ेन दोव ओपैंज़्‍यावए गाल तोबो दैक्‍यो। ओगधाहाए ज़ मिँए ओर्गानी पाँद मादान्‍या दाव ओपैंज़्‍याव य़ेनलाई वैंदिक्‍यो।
2PE 2:17 निताव मिँर ऱी माल्‍यो सा·व ऱीमुल मिताव रितो ज़ लिज़्‍यार, स़ोनो बतासए उसुभुर्ज़्‍याव कोहो मितावर ब लिज़्‍यार। नितावराए याजुँ चुम चुमोल नैसिउ लिज़्‍या।
2PE 2:18 अऩाकलाव पाँर वै वै जैद, मिँरालाई याल्‍योदा जैन्‍याए जूँनी, ‘जेयुँनी जो हुज़्‍या हो ज़ घदोच्‍यो’ है दाद यारामोहोनैज़्‍यार। ख्वार ते भर यापापलाई ऱास्‍द परमेस्‍वरए ल्‍योदा बाज़्‍यावरालाई ब फरी निताव माचावल यारापारैज़्‍यार।
2PE 2:19 नोराए, ‘गे परमेस्‍वरए ओकानुननी पुलुसोर गेलिज़्‍या, जो गेदोदी ब ताए’ है यालिदी ब माचाव याय़ेनए उधूँल ते किसिउ लिज़्‍यार। जोलाई उयुँए ओपैंज़्‍याव भरिए उस्‍किउ मायो, नो मिँ नल ज़ बाँदा ताज़्‍या।
2PE 2:20 जो गेलाई बाँचैज़्याव गेप्रभु येसु ख्रीसए उजूँनीकाव पाँ सैंद आव मानुवाताव मादान्‍या य़ेननी पुलुस्‍द ब फरी ओल्‍द होल ज़ ओबाकिन, नोलाई ङ़ादाङावकिन झन छींनीकाव माचाव ताज़्‍या।
2PE 2:21 नितावर परमेस्‍वरए छैंव ओपाँ दैद ब फरी याछींदा याओलोए नोराए बुरू परमेस्‍वरए ल्‍योदा बान्‍या येम सैं ज़ यामासैंकिन तान्‍या ओल्‍यो।
2PE 2:22 नितावरालाई घर्तीलाव सर्सिउ स्‍यासो ज़ ताद ले। नल, “काःए ओवैः ओल ज़ ओल्‍द ज़्‍युहुज़्‍याव,” स़ोनो, “ऊलाई छेद ब हिलाल ज़ लुइसिनाज़्‍या।”
2PE 3:1 अ ङायुँलाव ङानैं ङामेंर, आव चिथी ङ़ादाङाव ङापरींवस ऩेब्‍लो ताकिनी। आव ऩेब्‍लो चिथील ज़ जेलाई सम्‍जैद छैंव जेयुँलाई झन ज़ सझेंःद ङायाचिज़्‍या।
2PE 3:2 भाःकाव छैंव अगमबक्ताराए यापाँ स़ोनो गेलाई बाँचैज़्याव गेप्रभु येसु ख्रीसए ओराअर्थैव भरी ओसाचीराए यायाःनी जेथैव पाँ ब मामेंःद चेतैच्‍यो लिद ङासर्ज़्‍या।
2PE 3:3 प़ाइँरानी ङ़ात आव सैंच्‍यो, ख्रीस फरी उहुन्‍या बेलाक मिँराए परमेस्‍वरए ओपाँलाई हसैद जो यायुँनी हुज़्‍या हो ज़ दाद ल़॰व ज़ लिन्‍या लेर।
2PE 3:4 नोराए अइ लिन्‍या लेर, ‘खै, ख्रीस फरी हुरिज़्‍या लिन्‍या ओयाचिउ य़ाका काराव ओमायो·ज़्‍याव? गेसाखा पुर्खाराए पालाकिन आःपै परमेस्‍वरए आव संसार किताव उसिर्जैव, हिताव ज़ लिज़्‍या,’ है दान्‍या लेर।
2PE 3:5 निताव यापाँए तोबो पाँ ते मेंःद नैर — परमेस्‍वरए ओल ओपाँनी आव नाम स़ोनो नम ओजैज़्‍याक ऱी भरिलाई ऩेभा जैद तभा नमत झाःक्‍यो, तभा नामल नैक्‍यो।
2PE 3:6 तछा नो ऱीर ओराथोम्‍क बनै घ्योःव भल हुद आव नामलाव लिज़्‍याव भरी यासफ्या·क्‍यो।
2PE 3:7 फरी ओल ओपाँनी ज़ आज्‍यालकाव नाम नमलाई ब मेंःए खेम्‍न्‍याए जूँनी नैसिउ लिज़्‍या। हो छ्याम ज़ पापीरालाई ब सजा याद यासफ्या·रिज़्‍याव।
2PE 3:8 अ ङायुँलाव ङानैं ङामेंर, आव पाँ ब तामेंःच्‍यो, परमेस्‍वरनी ते तछा हजार बर्स स्‍यासो ब लिज़्‍या, हजार बर्स तछा स्‍यासो ब लिज़्‍या।
2PE 3:9 प्रभु फरी हुरिज़्‍या लिन्‍या ओयाचिउ य़ाका ख्‍वा ख्‍वाराए याबिचारनी धिलो ओरैंःदी ब ओल ते धिलो मादोव। ओल ते झन प़ाइँए जेय़ेन सहिद, ‘सु ज़ नर्गल माबाद ङाल्‍योदा याहुकिन ताखेहो’ लिद कींद नैचिउ।
2PE 3:10 खाली प्रभु हुन्‍या छ्याम कुना हुज़्याव मिँ स्‍यासो सुए ज़ यामासैंद उमँःजानी हुरिज़्‍या। हो बेलाक नम बनै स़्यो स़्यो क़िद खेम्‍द, नताव लिज़्‍याव सोरोर स़्यावैर यानी ज़ चाँःद चुयाप तान्‍या लेर। आव नाम स़ोनो नलाव लिज़्‍याव भरी ब चक चक खेम्‍न्‍या ले।
2PE 3:11 आव संसार नितावनी ओखेम्‍रिज़्‍यावए जे प्रभु उहुरिज़्‍याव छ्यामकावए जूँनी खर्क हुके लिद कींद जेनैक परमेस्‍वरए ओसतत लिद बनै छैंवस लिच्‍यो। हो बेलाक नम बनै चाँःद चुयाप तान्‍या ले। नताव लिज़्‍याव सोरोर स़्यावैर ब प़ाइँ ज़ य़ेप य़ेप ऱावए बिलैन्‍या लेर।
2PE 3:13 हैदी ब गे ओयासिउ य़ाकानी सत वाज़ लिन्या साःरो नाम नम ओजैरिज़्‍याव ओयेम चिऊद ज़ गेनै।
2PE 3:14 है जैद ङायुँलाव ङानैं ङामेंर, जे नो ओयेम चिऊन्‍यार जेतावए, ‘ओल उहुक गेलाई गे गेल खैवर, थ॰रिउर, गेखत माल्‍योर ओदैहुसिउक’ लिद धिद लिच्‍यो।
2PE 3:15 आव ब सैंच्‍यो, परमेस्‍वरए गेलाई प़ाइँ सहिद्याद कींद ओनैसिज़्‍यावनी अजम्‍बरी जुनील बान्‍या मौका यासिज़्‍याव। गेयुँलाव मिताव गेदाज्‍यु पावलए मनी परमेस्‍वरनी ओदैव बुद्धीनी हिताव ज़ सर्द नैद्याचिउ।
2PE 3:16 इताव ङापाँर पावलए छुत छुत ओचिथील ब कुधु ज़ सर्द यानैव। ख्वा ख्वा ओसरोर जाँ धो बुझिउ ताद यार्ती माल्‍यो माथ॰रिउराए तँदा ज़ लाँज़्‍यार। धर्मसास्‍त्रलाव पाँर ब नदा ज़ जोरैनाज़्‍यार। नितावराए यानोक्‍सान याज़ जैज़्‍यार।
2PE 3:17 है जैद ङायुँलाव ङानैं ङामेंर, जे इताव पाँरानी ङ़ादा ज़ सैंद जेतहस लिच्‍यो, म़ानी माचाव मिँराए गल्‍ती यापाँल अलमलिद, थ॰रिद जेलिज़्‍यावलाई सम़ैन्‍या जेले।
2PE 3:18 बुरू गेलाई बाँचैज़्याव गेप्रभु येसु ख्रीसए ओदयाल थ॰रिद ओललाई झन ज़ सरेस्‍नाच्‍यो। ओललाई आख ब, छींङ पै ब बनै ज़गै मगैव ज़ ओताक। आमेन।
1JO 1:1 नो ङ़ादाकिन ज़ लिज़्‍याव, आव गेर्नाए गे ज़ गेथैव, गेमीए ज़ गेरँःव, गेचिऊव, गेकुइए गेछापो अजम्‍बरी जुनीलाव पाँए जूँनी ज़ है गेदाचिज़्या।
1JO 1:2 नो अजम्‍बरी जुनी ओरैंःवए गे नोलाई गेरँःके स़ोनो गे गोहाई गेएज़्‍या। है जैद जेलाई नो अजम्‍बरी जुनीए था गेसथैचिज़्‍या। नो ङ़ादा परमेस्‍वर बाबुए ल्‍योङ ओल्‍यो, हो ज़ गेल्‍योक रैंःके।
1JO 1:3 जेस सिप गेताया लिद गेथैव गेरँःव पाँ ज़ जेलाई गेसथैचिज़्‍या। हो ताकिन ची परमेस्‍वर बाबु स़ोनो ओज़ा येसु ख्रीसस मनी सिप गेताज़्‍या।
1JO 1:4 आव चिथी गेयुँ होलाँ घताक लिद सर्द गेनै।
1JO 1:5 ओल ओल्‍योनी जो थैद गेनै, हो ज़ जेलाई गेसथैचिज़्‍या। हो पाँ आव ज़ — परमेस्‍वर ज़गैव लिज़्‍या, नोस चुम चुमो जात्त ज़ माले।
1JO 1:6 गे ओलस सिप गेलिज़्‍या है गेलिज़्यावत ब चुम चुमोलाव येमदा गेबाकिन ते साचो पाँ मादाद धुत गेपाँव ज़ थ॰रिके।
1JO 1:7 खाली ओल ज़गैवल उलिज़्‍याव मिताव गे ब ज़गैवल गेबाकिन परमेस्‍वरए उमिनताव भरिरास खैद तोबो नैं में ब गेताज़्‍या। परमेस्‍वरए ओज़ा येसु ख्रीसए गेदोव पापए जूँनी उझी सोभोद उजिउ झाःद ओयासिउए छैंवर गेताज़्‍या।
1JO 1:8 गे सुवाराए ‘ङास काता पाप ज़ माले’ है गेलिकिन ते गेक्‍याँलाई गे ज़ धोका याद साचो पाँ गेस माताए।
1JO 1:9 फरी, ‘ङा पापी ज़ ङालिज़्‍या’ लिद गेमाम़ोंसिकिन ते परमेस्‍वरए गेदोव पापर प़ाइँ ऱास्‍द्याद मादान्‍या गेदोव य़ेनरानी छैंवर जैसिज़्‍याव। नो य़ेनत परमेस्‍वरए अधर्म मादोव, युँ हुबो ज़ लिज़्‍या।
1JO 1:10 फरी, ‘ङा पाप ज़ ङामादोए’ है गेलिकिन परमेस्‍वरए ओपाँ गेस माताद ओपाँ पल्‍तैद गेयो मिताव ज़ ताके।
1JO 2:1 अ परमेस्‍वरए उमिनताव ङाबाबुज़ार, जे पाप मादान्‍याए जूँनी आव पाँर सर्द ङायाचिज़्‍या। खाली सुवाराए कैताराक पाप जेदोकिन परमेस्‍वर गेबाबुस पाँद्याज़्‍याव गेत्‍याला तोबो लिज़्‍या — नो ओखत माल्‍यो छैंव येसु ख्रीस ज़।
1JO 2:2 नोए गेपापए सजा ओल ज़ फो·द्याद परमेस्‍वरस सखैसिज़्‍याव। नो गेलाई वाज़ माःक, मानुवाताव मिँ भरिरालाई मनी ज़।
1JO 2:3 परमेस्‍वरए ओपाँ गेदोकिन वाज़ ‘परमेस्‍वरलाई ङासरेस्‍के’ लिन्‍या गेसैंज़्‍या।
1JO 2:4 ओयाःए वाज़ ‘परमेस्‍वरलाई ङासरेस्‍ज़्‍या’ है लिज़्‍याव मिँए परमेस्‍वरए ओपाँ ओमादोकिन नोस साचो पाँ माले, धुत वाज़ लिज़्‍या।
1JO 2:5 खाली परमेस्‍वरए ओपाँ दाज़्‍याव मिँए ते परमेस्‍वरए ल्‍योदाङाव ओमया ओसयो·धुव मिताव ज़ लिज़्‍या। है जैद परमेस्‍वरस गेखैव गेमाखैव ननी ज़ रैंःज़्‍या।
1JO 2:6 है जैद जोए ‘ङा परमेस्‍वरस खैव ङालिज़्‍या’ है उलिकिन नो मिँए ख्रीसए ओदोज़्‍याव मिताव ब दाव परिके।
1JO 2:7 ङायुँलाव ङानैं ङामेंर, आव सर्द ङायाचिज़्‍याव, जेमाथैताव साःरो पाँ माःक। ङ़ादाकिनकाव जेस लिज़्‍याव एकतार जेथैज़्‍याव पाँ ज़।
1JO 2:8 हैदी ब ङा ङासर्ज़्याव पाँ ते साःरो लिज़्या। आव ख्रीसए ओक्‍याँत रैंःद ले, जेक्‍याँत मनी रैंःज़्या, काराव ल्‍यो ताकिन नो पाँए ज़ चुम चुमोलाई सम़ैद पलाँ जैहुक्‍यो।
1JO 2:9 है जैद जोए ‘ङा नो पलाँवल ङालिज़्‍या’ है लिद परमेस्‍वरए उमिनताव ओनैंलाई ओसोकिन, नो मिँ आःपै चुम चुमोल ज़ लिज़्‍या।
1JO 2:10 जोए परमेस्‍वरए उमिनताव मिँलाई मया दोज़्याव, हो पलाँवल ओतावए नोलाई कान्‍त ज़ पर्दप्‍न्‍या ओछ्यास माले।
1JO 2:11 नैंलाई सोज़्‍याव मिँ चुम चुमोल परिद ‘आदा ङाबाज़्‍या’ लिन्‍या ब मासैंव। नोलाई माचाव ओय़ेनए मुन्‍दुक्‍यासो जैद नैव।
1JO 2:12 जे बाबुज़ारालाई सर्द ङायाचिज़्‍या। ख्रीसए उमिनए जूँनी परमेस्‍वरए जेपाप क्‍याल्‍द्याचिक्यो।
1JO 2:13 जे बाबुरालाई सर्द ङायाचिज़्‍या। जे भाःकिन ज़ लिज़्‍यावलाई जेसरेस्‍ज़्‍या। जे धापाज़ाकावरालाई सर्द ङायाचिज़्‍या। जे सैतानलाई हारैद जेनै। जे ज़िम्‍ज़ा ल़ुज़ारालाई सर्द ङायाचिज़्‍या। जे स्‍वर्गताव जेबाबुलाई जेसरेस्‍ज़्या।
1JO 2:14 जे बाबुरालाई सर्द ङायाचिज़्‍या। जे भाःकिन ज़ लिज़्‍यावलाई जेसरेस्‍ज़्‍या। जे धापाज़ाकावरालाई सर्द ङायाचिज़्‍या। परमेस्‍वरए ओपाँ जेयुँल बास ओदोवए जे थ॰रिद सैतानलाई हारैद जेनै।
1JO 2:15 जे आव मानुवाताव पाँरादा जेयुँ ताझाःच्‍यो। नितावदा उयुँ झाःज़्‍याव मिँए ओमया परमेस्‍वरए ल्‍योदा माले।
1JO 2:16 आव मानुवाताव पाँर आवर ज़ — जोत ब युँ मानैधुन्‍या, प़ाइँत ज़ मी तून्‍या, नैं मेंकिन कातानी ङाघ्योःके लिद युँ थू जैन्‍या। आव स़ोम्‍लो पाँ परमेस्‍वरनी हुव माःक, मानुवाताव पाँ ची।
1JO 2:17 आव मानुवा ते तछा ओपाँरास ज़ खेम्‍रिज़्‍या। परमेस्‍वरए उयुँलाव मिताव य़ेन दोज़्‍याव मिँ ते खर्क ज़ खेम्‍न्‍या माले।
1JO 2:18 जे परमेस्‍वरए उमिनताव ङाबाबुज़ार, खेम्‍न्‍या बेला यो·नाद ले। हो बेला ओमाहुद ज़ ख्रीसकिन तँदाङाव हुरिज़्‍या लिन्‍या ब जेसैंज़्‍याखेहो। आज्‍याल ब नितावर कुधु ज़ ताधुकेर। है जैद आव बेला ओखेम्‍नाव ननी ब रैंःज़्‍या।
1JO 2:19 नो ख्रीसकिन तँदा जैसिज़्‍यावर गेनी हाइसिद बावर ज़। खाली नोर गेस साचो लिज़्‍यावर माःक ओल्‍यो। गेस साचो ल्‍योर ताकिन हाइसिद माबाखेरहो। है जैद याबावए नोर गेसकावर माःक ओल्‍यो लिन्‍या रैंःके।
1JO 2:20 जे ते नितावर माःक। जे ते ख्रीसनी छैंव पुरूस दैद साचो पाँ जेसैंज़्‍या।
1JO 2:21 आव पाँ जेमासैंए लिद ङासर्ज़्‍याव ते माःक, जेसैंज़्‍या लिद ज़ ङासरो ची। साचो पाँनी धुत मापुलुसे लिन्‍या ब तामेंःच्‍यो।
1JO 2:22 ‘येसु परमेस्‍वरए खतैद उपरींव ख्रीस माःक’ है लिद धुत पाँज़्याव सु? नो ‘येसु स़ोनो परमेस्‍वरनी ज़ा बाबुनी माःक’ है लिज़्‍याव ख्रीसकिन तँदाङाव मिँ ज़ सानी।
1JO 2:23 जोए ‘येसु परमेस्‍वरए ओज़ा माःक’ है लिज़्‍या, नोस ओबाबु परमेस्‍वर ब माले। जोए ‘येसु परमेस्‍वरए ओज़ा ज़’ है लिज़्‍या, नोस ओबाबु परमेस्‍वर ब लिज़्‍या।
1JO 2:24 जे ते ङ़ादाकिन ज़ जेथैव पाँलाई जेयुँल नैच्‍यो। नो पाँर जेयुँल जेनैकिन परमेस्‍वरए ओज़ा स़ोनो गेबाबु परमेस्‍वरसकावर तान्‍या जेले।
1JO 2:25 नो ओज़ा ख्रीसए ओल ज़ ‘अजम्‍बरी जुनी ङायाचिरिज़्‍या’ लिद य़ाका याद नैसिउ।
1JO 2:26 जेलाई बले·व पैंज़्‍यावराए ल्‍योनी कसाराक झुकिर्‍या लिद आव पाँर सर्द नैद ङायाचिए।
1JO 2:27 निताव उलिदी ब नो जेदैव परमेस्‍वरए उपुरूसए जेयुँल बास ओदोवए सुए ज़ जेलाई पैव मापरिए। होए साचो पाँ भरी ओल ज़ पैचिज़्याव, धुत पाँ मापैचिउ। है जैद होए ओपैचिउ मिताव ज़ जे ख्रीसए ओपाँत लिच्‍यो।
1JO 2:28 है जैद बाबुज़ार, जे ख्रीसए ओक्‍याँत ज़ धिद ल्‍यो ताके। हो ताकिन ची फरी उहुव बेलाक होए ओङ़ाक लाज मोर्नो तान्‍या गेमाले।
1JO 2:29 ख्रीस छैंव लिज़्या लिन्‍या जे ज़ जेसैंज़्या। है जैद परमेस्वरए ओङ़ाक चाव य़ेन दोज़्यावर परमेस्‍वरनी जर्मिउ ओज़ार ताज़्यार लिन्‍या ब सैंव ताके।
1JO 3:1 गेबाबु परमेस्‍वरए गेलाई बनै मया दाद ओज़ार जैसिक्‍यो। हैज़ गे ओज़ार ज़! खाली आव मानुवाताव मिँराए ओज़ालाई यामासरेस्‍ज़्‍यावए गेलाई ब मासरेस्‍सिर।
1JO 3:2 ङायुँलाव ङानैं ङामेंर, आखकिन ज़ परमेस्‍वरए ओज़ार ताद गेले। खाली अजम्‍बरी जुनील इताव गेतारिज़्‍या लिन्‍या ते गेमासैंए। आव वाज़ गेसैंज़्‍या, ख्रीस फरी उहुक ओल किताव उलिज़्‍याव गे ब हिताव ज़ तान्‍या गेले। हो छ्याम वाज़ ख्रीसलाई चबनै रँःन्‍या गेले।
1JO 3:3 है जैद जोए आव पाँत आस दोज़्‍याव, नो मिँए ख्रीस किताव छैंव उलिज़्‍याव, हिताव ज़ ओल ब उयुँलाई छैंव जैज़्‍याव।
1JO 3:4 कानुन माभैंःन्‍या ज़ पाप। है जैद पाप दोज़्‍याव भरिए ते परमेस्‍वरए ओकानुन माभैंःर।
1JO 3:5 ख्रीसस ते पाप काता ज़ माले। ओल ज़ नो गेदोव पाप सम़ैद्यान्‍याए जूँनी मिँ मिन्‍सिद हुके।
1JO 3:6 है जैद ख्रीसस लिज़्‍यावराए पाप दावका दाव मालेर। पाप दाव ज़ नैज़्‍यावराए ते ओललाई ब मारँःधुर, सरेस्न्‍या ब मासरेस्‍धुर।
1JO 3:7 अ ङाबाबुज़ार, जे नो बले·ज़्‍यावराए यापाँत ताझुकिच्‍यो। जो मिँए साचो य़ेन दोज़्‍याव, नो ख्रीस मिताव छैंव लिज़्‍या।
1JO 3:8 फरी जो मिँए असत दोज़्‍याव हो सैतानसकाव ज़ लिज़्‍या। सैतानए ओय़ेन भरी भाःकिन ज़ असतलाव वाज़ लिज़्‍या। है जैद नोए ओय़ेन सम़ैद्यान्‍याए जूँनी परमेस्‍वरए ओज़ा मिँ मिन्‍सिद हुके।
1JO 3:9 परमेस्‍वरए ओराजर्मैवराए याक्‍याँत ओल ओगेर यारैंःवए पाप दावका दाव ज़ मालेर। नोर परमेस्‍वरनिकावर यातावए असत दो ज़ मादोधुर।
1JO 3:10 है जैद परमेस्‍वरए ओथोर स़ोनो सैतानए ओथोर आनी ज़ छुतिज़्‍यार — जोए असतलाव य़ेन दोज़्‍याव हो परमेस्‍वरसकाव माःक। नैं मेंलाई मया मादाज़्‍याव ब हो मिताव ज़।
1JO 3:11 ङ़ादाकिन ज़ जेथैज़्‍याव परमेस्‍वरए ओपाँ आव ज़ — तोबोए तोबोलाई मया दासिन्‍या।
1JO 3:12 सैताननिकाव कयिनए ओभाइ हाबिललाई ओसैःव मिताव ते दान्‍या माःक। नो कयिनए ओल ओय़ेन माचाव, ओभाइए ओय़ेन चाव ओतावए ओभाइलाई सैःक्‍यो।
1JO 3:13 ङानैं ङामेंर, आव मानुवाताव मिँराए जेलाई यासोचिक हार तामानिच्‍यो।
1JO 3:14 गे नैं मेंलाई मया गेदोज़्यावए सिन्‍यानी पुलुस्‍द अजम्‍बरी जुनी दैन्‍याल हुद गेले लिन्‍या गेसैंज़्‍या। नैं मेंए ल्‍योदा ओमया माल्‍यो मिँ ते सिन्‍या सजाल ज़ लिज़्‍या।
1JO 3:15 नैं मेंलाई सोज़्‍याव मिँए उयुँल ओसैःधुव मिताव ज़ लिज़्‍या। जे ब जेसैंज़्‍या, मिँ सैःज़्‍यावए ओक्‍याँत अजम्‍बरी जुनी माले।
1JO 3:16 ख्रीसए गेलाई मया ओदासिउ आनी ज़ रैंःज़्‍या, गेजूँनी उजिउ ज़ झाःद्यासिक्‍यो। है जैद गे ब नैं मेंए जूँनी जिउ झाःन्‍या ब तयार ताव परिके।
1JO 3:17 यो·व मिँए माथैंव मायो·वलाई उयुँ मानाद ओमाचिऊकिन परमेस्‍वरलाई ब मया मादोव।
1JO 3:18 जे ङाबाबुज़ार, नैं मेंलाई मया दान्‍या याःए वाज़ माःक, साचो य़ेननी ब दाव ताके।
1JO 3:19 गे साचो पाँल गेलिज़्‍याव सैं गेमालिज़्‍याव लिन्‍या ब ननी ज़ रैंःज़्‍या। साचो पाँल गेलिकिन परमेस्‍वरए ओङ़ाक धुक्‍क तान्‍या गेले।
1JO 3:20 खाली गेयुँए ज़ गेलाई गेखत ल्‍यो ओथ·रैसिकिन परमेस्‍वर ते गेयुँकिन झन घ्योःव लिज़्‍या। ओल ज़ प़ाइँ युँलाव पाँ सैंज़्‍याव।
1JO 3:21 ङायुँलाव ङानैं ङामेंर, गेयुँए गेलाई गेखत ल्‍यो ओमाथ·रैसिकिन परमेस्‍वरए ओङ़ाक च्‍याँःसिन्‍या गेयुँ झेंःज़्‍या।
1JO 3:22 फरी गे परमेस्‍वरए है ओल्‍यो भरी दाद उयुँलाव मिताव य़ेनर गेदोकिन ओलस गेऩिज़्‍याव भरी ब सयो·द्यान्‍या ले।
1JO 3:23 प़ाइँरानी गे दाव परिन्‍या य़ेन आव ज़ — ओल है ओदासिउ मिताव ज़ ओज़ा येसु ख्रीसए उमिनत गेयुँ हुप्‍द गे गेल मया दासिन्‍या।
1JO 3:24 इतावनी परमेस्‍वरए ओपाँ भैंःज़्‍याव मिँ परमेस्‍वरस लिज़्‍या, परमेस्‍वर ब ओलस लिज़्‍या। है जैद गेयुँल बास दाद नैज़्‍याव परमेस्‍वरए उपुरूसनी ज़ परमेस्‍वर गेस ज़ उलिज़्‍याव गेसैंज़्‍या।
1JO 4:1 ङायुँलाव ङानैं ङामेंर, ‘परमेस्‍वरए उपुरूसनी ङापाँज़्‍या’ है लिज़्‍यावरालाई प़ाइँलाई तारापतिच्‍यो। ङ़ादा ‘परमेस्‍वरनी हुव पुरूस सैं माःक’ लिद थ·रैद वाज़ यारापतिच्‍यो। परमेस्‍वरए उमिन कुद तँनी पैज़्‍यावर कुधु ज़ ताद लेर।
1JO 4:2 जे ते परमेस्‍वरए उपुरूसनी पाँज़्‍यावलाई आनी ज़ सरेस्‍न्‍या जेले — जोए ‘येसु ख्रीस परमेस्‍वरनी मिँ मिन्‍सिद हुव ज़’ है लिज़्‍या, नो परमेस्‍वरए उपुरूसनी ज़ पाँज़्‍या।
1JO 4:3 जोए ‘येसु परमेस्‍वरए ओज़ा ख्रीस माःक’ है लिज़्‍या, नो मिँ परमेस्‍वरए उपुरूसनी पाँज़्‍याव माःक। नो ते ख्रीसकिन तँदाङाव पुरूस ची। नो हुरिज़्‍यावए उजूँनी ङ़ादाकिन ज़ जेथैज़्‍याव, होए ओपाँ आज्‍याल ब रैंःधुके।
1JO 4:4 खाली जे ते, ङाबाबुज़ार, परमेस्‍वरनिकावर ताद निताव पाँज़्‍यावरालाई हारैद जेरानै, काराव ल्‍यो ताकिन जेस लिज़्‍याव परमेस्‍वर मानुवात लिज़्‍यावकिन घेप्‍पा लिज़्‍या।
1JO 4:5 नोर आव मानुवातावर यातावए मानुवाताव पाँ ज़ पाँज़्यार। मानुवाताव मिँराए नोराए यापाँ भैंःज़्यार।
1JO 4:6 गे ते परमेस्‍वरसकावर गेलिज़्‍या। परमेस्‍वरलाई सरेस्‍ज़्‍याव भरी गेपाँत हुज़्‍यार। फरी जोर परमेस्‍वरए उमींर माःक, होराए आव गेपाँ माथैर। ननी ब परमेस्‍वरए उपुरूसनी साचो पाँज़्‍याव स़ोनो धुतनी पाँज़्‍यावनी छुतिज़्‍यानी।
1JO 4:7 अ ङायुँलाव ङानैं ङामेंर, जे जेल मया दासिच्‍यो। निताव य़ेन दान्‍या परमेस्‍वरए ल्‍योनी ज़ हुज़्‍या। है जैद नैं नैंल मया दासिज़्‍यावर परमेस्‍वरनी जर्मिउर, परमेस्‍वरलाई सरेस्‍ज़्‍यावर ताज़्‍यार।
1JO 4:8 परमेस्‍वर ओमया ल्‍यो लिज़्या। है जैद ओमया माल्‍योए परमेस्‍वरलाई मासरेसो।
1JO 4:9 परमेस्‍वरए गेलाई मया ओदासिज़्‍याव आनी ज़ रैंःज़्‍या — गेलाई बाँचैन्‍याए जूँनी तोबोका तोबो ओज़ा आव मानुवात परींद्यासिक्‍यो।
1JO 4:10 छुतलाई मया दान्‍याए ओअर्थ आनी ज़ रैंःज़्‍या — गे परमेस्‍वरलाई मया गेदोव माःक, ओल परमेस्‍वरए ज़ गेलाई मया दाद गेपापए सजा फो·द्यान्‍याए जूँनी ओज़ालाई परींद्यासिक्‍यो।
1JO 4:11 ङायुँलाव ङानैं ङामेंर, परमेस्‍वरए गेलाई निताव मया ओदासिउए गे मनी गे गेल मया दासिउ ताके।
1JO 4:12 परमेस्‍वरलाई सुए ज़ खर्क ज़ मारँःतार। हैदी ब गे गेल मया गेदासिकिन, परमेस्‍वर गेस उलिज़्‍याव रैंःज़्‍या, स़ोनो ओमया गेक्‍याँत यो·ज़्या।
1JO 4:13 परमेस्‍वरए गेलाई उपुरूस याद ओनैसिज़्‍यावए गे ओलस गेलिज़्‍या, ओल गेस उलिज़्‍याव गेसैंज़्‍या।
1JO 4:14 स़ोनो गे ओलस ल्‍यो उसिसर ब ‘परमेस्‍वरए आव मानुवातावरालाई बाँचैन्‍याए जूँनी ओज़ा परींद ओयासिउ साचो ज़’ लिन्‍या ओसाचीर गे ज़ गेलिज़्‍या।
1JO 4:15 जोए ‘येसु परमेस्‍वरए ओज़ा ज़’ है लिज़्‍या, नोस परमेस्‍वर लिज़्‍या, ओल मनी परमेस्‍वरस ज़ लिज़्‍या।
1JO 4:16 परमेस्‍वरए गेलाई मया ओदासिज़्‍याव गेसैंज़्या, स़ोनो नत ज़ गेयुँ हुप्‍ज़्‍या। परमेस्‍वर ओमया ल्‍यो लिज़्‍या। गे ब ओल माँःती छुतलाई मया गेदोकिन गे परमेस्वरस गेताज़्या, परमेस्‍वर ब गेस ताज़्‍या।
1JO 4:17 तोबोए तोबोलाई मया दान्‍यात परमेस्‍वरए ओमया चबनै रैंःज़्या। है जैद गे आज्‍याल ब ओल स्‍यासो गेलिज़्‍यावए परमेस्‍वरए ओराफाल्‍रिज़्‍याव छ्याम ओङ़ाक माछे·द ज़ गेयुँ होलाँ जैद बान्‍या गेले।
1JO 4:18 परमेस्‍वरए ल्‍योक रेंद बाज़्‍याव मिँ माछे·ए। नो ओमया ल्‍यो ओतावए ओछ्याचे भरी म़ाज़्‍या। ‘सजा ङादैया’ है लिज़्‍याव वाज़ छे·ज़्‍या। छे·ज़्‍याव मिँए परमेस्‍वरए ओमया मासैंव।
1JO 4:19 परमेस्‍वरए ङ़ादा गेलाई मया ओदासिउए गे ब तोबोए तोबोलाई मया गेदोज़्‍या।
1JO 4:20 जोए ओयाःए वाज़ ‘परमेस्‍वरलाई मया ङादोज़्‍या’ है लिद परमेस्‍वरए उमिनताव ओनैंलाई ओसोकिन, नोए ओपाँ धुत ज़ रैंःज़्‍या। ओल ज़ उरँःव नो ओनैंलाई मया ओमादोकिन, ओमारँःज़्‍याव परमेस्‍वरलाई झन कै जैद मया ओदोधुरिज़्‍याव?
1JO 4:21 परमेस्‍वरए ल्‍योनी गेदैव दान्‍या पाँ आव ज़ — जोए परमेस्‍वरलाई मया दोज़्‍याव, होए नैं मेंलाई ब मया ओदोवक।
1JO 5:1 जोए ‘येसु परमेस्‍वरए खतैद उपरींव ख्रीस ज़’ है लिद पतिज़्‍याव, नो परमेस्‍वरनी जर्मिउ लिज़्‍या। स़ोनो जोए गेलाई जर्मैज़्‍याव गेबाबुलाई मया दोज़्‍याव, होए परमेस्‍वरए ओराजर्मैव ओज़ारालाई ब मया यादोज़्याव।
1JO 5:2 गे परमेस्‍वरलाई मया दाद ओपाँ गेदोकिन ननी ज़ परमेस्‍वरए ओराजर्मैव ओज़ारालाई मया गेरादोज़्याव गेसैंज़्‍या।
1JO 5:3 परमेस्‍वरए ओपाँ गेदोकिन वाज़ परमेस्‍वरलाई मया गेदोज़्‍याव थ॰रिज़्‍या। ओल ओज़ारालाई ओपाँर दान्‍या खाव माले, झ्यासो लिज़्‍या।
1JO 5:4 काराव ल्‍यो ताकिन परमेस्‍वरए ओज़ार ओलनी जर्मिउर यातावए आव मानुवाताव यालाई बले·व पैंज़्याव पाँरालाई याराहारैज़्‍यार। नो गेराहारैज़्‍याव ओललाई गेयुँ हुप्‍द गेलिज़्‍यावनी ज़।
1JO 5:5 ‘येसु परमेस्‍वरए ओज़ा ज़’ लिद पतिज़्‍यावराए वाज़ मानुवाताव यालाई बले·व पैंज़्‍यावरालाई याराहारैधुज़्‍यार।
1JO 5:6 नो परमेस्‍वरए ओज़ा येसु ख्रीस मिँ मिन्‍सिद उहुव, ऱील ओसछैंसिउ छ्याम ब रैंःके, उझी सोभोद उजिउ ओझाःव छ्याम ब रैंःके।
1JO 5:7 आज्‍याल गेयुँल बास दाद नैज़्‍याव परमेस्‍वरए उपुरूसए ब होए ओसाची ज़ यासिज़्‍याव। नो पुरूसए साचो थ॰रिउ पाँ वाज़ दोज़्‍याव।
1JO 5:8 येसु परमेस्‍वरए ओज़ा ज़ लिद साची याज़्‍यावर स़ोम्‍लो लिज़्‍यार। तोबो परमेस्‍वरए उपुरूस, तोबो ऱील ओसछैंसिउनी, तोबो उझी सोभोद उजिउ ओझाःवनी ज़। है जैद नो स़ोम्‍लोराए यासाची खैज़्‍या।
1JO 5:9 गे मिँराए यासाची गेपतिज़्‍या, परमेस्‍वरए ओसाची ते झन थ॰रिउ लिज़्‍या। परमेस्‍वरए मिँरालाई साची ओराएज़्‍याव ओज़ाए उजूँनी ज़ लिज़्‍या।
1JO 5:10 जोए ओज़ालाई उयुँ हुप्‍ज़्‍या, होए परमेस्‍वरए ओसाची उयुँल रैद नैव। फरी जोए परमेस्‍वरए ओसाचीत उयुँ माहुबे, होए नो साचीलाई धुत थ·रैज़्याव, काराव ल्‍यो ताकिन परमेस्‍वरए ओज़ाए जूँनी ओयो साची मापतिउ।
1JO 5:11 गेलाई परमेस्‍वरए ओयासिज़्‍याव साची आव ज़ — गे मिँर अजम्‍बरी जुनी दैन्‍यार गेताज़्‍या, नो जुनी ओज़ाए ओक्‍याँत वाज़ लिज़्‍या।
1JO 5:12 जोए परमेस्‍वरए ओज़ालाई उयुँल रैज़्‍याव, होए ज़ अजम्‍बरी जुनी दैज़्‍याव। जोए ओज़ालाई उयुँल मारैव, होस अजम्‍बरी जुनी माले।
1JO 5:13 आव ङासरो चिथी जे परमेस्‍वरए ओज़ालाई जेयुँ हुप्‍ज़्‍यावराए जूँनी सर्द ङानै। आव चिथीनी ज़ अजम्‍बरी जुनी जेस उलिज़्याव सैंन्‍या जेले।
1JO 5:14 परमेस्‍वरए ओपैंज़्‍याव मितावनी गेऩिकिन ‘गेऩिउ भरित थैद्यान्‍या ले’ लिद ओङ़ाक माछे·द ज़ बान्‍या गेयुँ हुप्‍न्‍या ले।
1JO 5:15 नो गेऩिउ भरित ओथैकिन नो भरी गेदैधुके लिन्‍या गेसैंज़्या।
1JO 5:16 जेनी तोबो जेनैंए पाप ओदोज़्‍याव जेसैंकिन, नोए उजूँनी पोंखारिद जेएकिन, नोलाई परमेस्‍वरए बाँचैन्‍या ले। नोए ओदोज़्याव पापनी माओल्‍द सिन्‍या सजादा ज़ ओबाकिन पोंखारिद जेमाएदी ब ताए।
1JO 5:17 असतलाव य़ेन भरी पाप ज़ लिज़्‍या। हैदी ब नो जेनैं पापनी ओल्‍धुन्‍या स्‍यासो उलिकिनी, नोए जूँनी पोंखारिउ ज़ ताके।
1JO 5:18 परमेस्‍वरनी जर्मिउ मिँए ते पाप दावका दाव माले लिन्‍या गेसैंज़्‍या। परमेस्‍वरए ओज़ा ख्रीसए ज़ नोलाई पाथस नैद सैतानलाई बले·व मायो।
1JO 5:19 गे परमेस्‍वरनिकावर ज़ लिन्‍या गेसैंज़्‍या। मानुवाताव भरी ते सैतानए उधूँल ज़ लिज़्‍यार।
1JO 5:20 गे आव ब गेसैंज़्‍या, परमेस्‍वरए ओज़ाए साचो परमेस्‍वरलाई सरेसो परींन्‍याए जूँनी ओल ओक्‍याँत ज़ सरेसो परींसिक्‍यो। ओज़ा येसु ख्रीसनी साचो परमेस्‍वरस सिप गेलिज़्‍या। साचो परमेस्‍वर ब ओल ज़, अजम्‍बरी जुनी ब ओल ज़।
1JO 5:21 ङाबाबुज़ार, जे मिँराए याजैव अङग्‍यालाई ‘आव ज़ ईस्‍वर’ है लिज़्‍यावराए ल्‍योनी जोगोइसिद लिच्‍यो।
2JO 1:1 ङा इताव सेर्द लिज़्‍याव लोम्‍बा यूहन्‍नाए ल्‍योनी नँ परमेस्‍वरए उमिनत छाँतिसिउ मेंमालाई नज़ारास आव चिथी परींद ङायाचिज़्या। ङा जेलाई साचो मया ङादाचिज़्‍या। खाली ङा वाज़ माःक, परमेस्‍वरए साचो ओपाँत बाज़्‍याव भरिए प़ाइँए ज़ मया दाचिज़्‍यार।
2JO 1:2 परमेस्‍वरए ओपाँ गेयुँल बास दाद ओनैज़्‍यावए जेलाई गे मया गेदाचिज़्‍या। आव मया एकम्‍न्‍या लिन्‍या ले।
2JO 1:3 गे साचो पाँल थ॰रिद गे गेल मया दासिद गेचिऊसिज़्‍यावनी परमेस्‍वर गेबाबु स़ोनो ओज़ा येसु ख्रीसनी नियुँ नाद, नियुँ गराँद गेयुँ ब होलाँ जैद्यान्‍या लिनी।
2JO 1:4 ख्वा ख्वा नज़ार परमेस्‍वर गेबाबुए गेलाई ओअर्थैसिउ मिताव साचो थ॰रिउ पाँत बाज़्‍यार दी लिन्‍या ङाथैक बनै ज़ रेंद ङायुँ ब होलाँ ताके।
2JO 1:5 अ माँज़ा, नँस ङापाँ तोबो लिज़्‍या। नो पाँ नमाथैताव साःरो पाँ माःक, ङ़ादाकिन ज़ गेस लिज़्‍याव पाँ ज़। नो पाँ आव ज़ — नैं नैंल युँ थू जैद चिऊसिन्‍या।
2JO 1:6 निताव मिँए परमेस्‍वरए ल्‍योदा मनी उयुँ थू जैद ओपाँल थ॰रिद हो येमल बाज़्‍या। ङ़ादाकिनकाव जेथैव पाँ ब हो ज़। है जैद हो पाँत बाच्‍यो।
2JO 1:7 खाली नो पाँलाई बले·द धुत पैज़्‍यावर कुधु ज़ ताद लेर। नोराए ‘येसु ख्रीस मिँ मिन्‍सिद हुव माःक’ लिद यारासथैज़्‍यार। नोर ख्रीसकिन तँदाङाव कैफतीर ज़।
2JO 1:8 है जैद जे जोगोइसिद लिच्‍यो, म़ानी जेदैरिज़्‍याव इनाम मादैद जेपाकैधुव ब प़ाइँ ज़ सम़ैन्‍या जेले।
2JO 1:9 जो ख्रीसए ओपाँकिन पाखानिकाव पाँरादा बाज़्या, होस परमेस्‍वर माले। जो ख्रीसए ओपाँत धिद लिज़्‍या, नोस वाज़ ओबाबु परमेस्‍वर ब लिज़्‍या, ओज़ा ख्रीस ब लिज़्‍या।
2JO 1:10 परमेस्‍वरए ओपाँलाई बले·द पैज़्‍याव मिँए जेल्‍योक निताव पाँर रैद उहुकिन जेझ़िमक ब तानैच्‍यो, ओबाक ब घाइ ज़ तादोच्‍यो।
2JO 1:11 निताव मिँलाई सघैज़्‍याव मिँ नोस माचाव ओय़ेनत सिप ज़ ओदोज़्‍याव मिताव ज़ लिज़्‍या।
2JO 1:12 जेलाई सर्द्यान्‍या पाँर कुधु ज़ लिज़्‍या। खाली नो पाँर आव चिथील मासर्द बुरू जेस गेदैसिक ज़ गेङाः गेङाः जोरैद गेपाँया। हो बेलाक ज़ गेयुँर ब होलाँ तान्‍या ले।
2JO 1:13 आलाव छाँतिसिउ नबैंनीए ओज़ाराए याल्‍योनी ब जेरो है दाचिज़्‍यार।
3JO 1:1 ङा इताव सेर्द लिज़्‍याव लोम्‍बा यूहन्‍नाए ल्‍योनी नँ ङायुँलाव गायसलाई आव चिथी परींद ङाईंज़्‍या। ङा नँलाई साचो मया ङादींज़्‍या।
3JO 1:2 ङायुँलाव ङानैं, परमेस्‍वरए ल्‍योदा किताव नयुँ चाव उलिज़्‍याव, हिताव ज़ नक्‍याँर गराँव ओताक, प़ाइँनी ज़ धोल पोगोल ओजैनिउक लिद परमेस्‍वरलाई पोंखारिउ ज़ ङानैज़्‍या।
3JO 1:3 दाज्‍यु भाइर ननी याहुक परमेस्‍वरए ओपाँत नँ थ॰रिद सतस नदोज़्‍याव ङाथैक बनै खुसी ङाताके।
3JO 1:4 परमेस्‍वरए ओपाँताव ङाराजर्मैव नँ स्‍यासो ङाज़ार परमेस्‍वरए ओपाँत याबाज़्‍याव ङाथैक ङासुनी च्‍याँःसिउ ज़ लिज़्‍या।
3JO 1:5 नँ ङायुँलाव ङानैं, यायुँ हुबोरालाई नरासमारिक युँ हुबो य़ेन नदोज़्‍या। परमेस्‍वरए ओपाँताव आदा होदा बाऱिज़्‍याव मासरेस्‍सिउराए जूँनी नदोज़्‍याव य़ेन झन ज़ चाव लिज़्‍या।
3JO 1:6 नोराए मन्‍दलीए ओङ़ाक नमिन हाइद ‘चाव य़ेन दोज़्‍याव’ लिद गोहाई एज़्‍यार। निताव आदा होदा बाऱिज़्‍यावरालाई परमेस्‍वरए ओपैंज़्‍याव मिताव माथैंव मायो·वल सयो·द्याद येमत चावस नरापरींकिन ताखेहो है ङालिज़्या।
3JO 1:7 निताव मिँराए यायुँ माहुबोरास काता ज़ माऩिद ख्रीसए उमिन सथैन्‍याए जूँनी आदा होदा लिज़्‍यार।
3JO 1:8 है जैद गे नितावरालाई चिऊव ज़ परिज़्‍या। हो ताकिन ची गे ब नोरास साचो पाँ सथैन्‍यात सिप ज़ गेताज़्‍या।
3JO 1:9 आवकिन ङ़ादा नङाव मन्‍दलीलाई तोबो चिथी परींद ङायो। खाली जेङ़ैताव जैसिउ पैंज़्‍याव दियोत्रिफसए ङापाँ माभैंःके।
3JO 1:10 ङा जेल्‍योक हुव ङादैकिन नोए ओय़ेन भरी प़ाइँराए ङ़ाक सतैंद्यान्‍या ङाले। नोए माचाव पाँर गेङ़ैत झाःद्यासिज़्‍याव। ओल झन निताव य़ेनत उयुँ सोन्‍तोको माताद, ओल ब छुतरालाई माराचिऊव, चिऊज़्‍यावरालाई ब चिऊव मारायो। झन निताव चिऊज़्‍याव मिँलाई मन्‍दलीनी ब पले·ज़्‍याव।
3JO 1:11 नँ ङायुँलाव ङानैं, निताव माचाव य़ेन मादाद, नदोज़्‍याव मिताव चाव य़ेन दाव ज़ नैव ताके। चाव य़ेन दाज़्‍याव मिँ परमेस्‍वरनिकाव ज़ ताज़्‍या। माचाव य़ेन दाज़्‍यावए ते परमेस्‍वरलाई ब मारँःव।
3JO 1:12 देमेत्रियसए उजूँनी ते प़ाइँए ज़ चाव वाज़ पाँज़्‍यार, स़ोनो साचो पाँत उलिज़्याव ओक्याँनी ब रैंःज़्‍या। गे ब नो मिँलाई चाव ज़ थ·रैद होए उजूँनी गेपाँज़्‍या। गे गेपाँ साचो ज़ लिज़्‍या लिन्‍या नँ ब नसैंज़्‍या।
3JO 1:13 नँलाई है दान्‍या पाँर कुधु ज़ लिज़्‍या। उलिदी ब आव चिथील ङामासर।
3JO 1:14 बुरू जाँवाक नँस दैसिद गिनङाः गिनङाः जोरैद गिन्‍पाँया है ङालिज़्‍या।
3JO 1:15 परमेस्‍वरए नयुँ होलाँ जैद उईंवक। आलाव ननैंराए जेरो है दींज़्‍यार। नलाव प़ाइँ ङानैंरालाई तोबो तोबोनी जेरो है यादोयो।
JUD 1:1 ङा याकूबए ओभाइ यहूदा, येसु ख्रीसए ओनोकोरए ङाल्‍योनी, जे परमेस्‍वरए ओछाँतिचिउर, परमेस्‍वर गेबाबुए उयुँल लिज़्‍यावर, येसु ख्रीसए उमिनत नैसिउरालाई आव चिथी परींद ङायाचिज़्‍या।
JUD 1:2 जेल्‍योदा परमेस्‍वरए उयुँ झन ज़ ओगराँनाक, जेयुँ ब झन ज़ होलाँ ओतानाक, जे जेल युँ थू जैसिन्‍या ब झन ज़ ओतानाक।
JUD 1:3 ङायुँलाव ङानैं ङामेंर, परमेस्‍वरए ल्‍योनी सिप गेदैव जुनी इताव लिज़्‍या लिद जेलाई सर्द ङायाच्‍या है ङाल्‍यो। खाली परमेस्‍वरए छैंव उमींरालाई एकम्‍न्‍याकावए जूँनी ओयासिउ युँ हुप्‍न्‍या ओपाँलाई जात्त ज़ माऱास्‍द जोर्द्याव ताके है लिद जेलाई सर्द्यान्‍या ओचाहित ची ताके।
JUD 1:4 काराव ल्‍यो ताकिन धुतनी पैज़्‍यावर तोबो ऩेब्‍लो म़ोंसिद जेखार्ल ख्वास पसिद लेर। नो धुतनी पैज़्‍यावर परमेस्‍वरकिन तँदा जैसिद उयुँ य़ाल्‍ज़्याव परमेस्‍वरलाई रँःद, “जो गेदोदी ब ऱास्‍सिज़्याव,” लिद तोबोका तोबो गेर्गे प्रभु येसु ख्रीसलाई याभीःव मिताव ज़ ताके। है जैद नितावराए यासजा भाःकिन ज़ नैसिउ लिज़्या।
JUD 1:5 आव ङासर्ज़्‍याव पाँर प़ाइँ ज़ जेसैंज़्‍या। हैदी ब तोबो ऩेब्‍लो ङासम्‍जैचिज़्‍या। परमेस्‍वरए उमींरालाई इजिपनी पाथस ओरापले·व छींनी ओललाई ऱासोर सोतोर्‍यान ज़ याख्याक्‍यो।
JUD 1:6 स्‍वर्गताव परमेस्‍वरए ओचाकर्‍यार ब परमेस्‍वरए ओरायो पोल मालिद ओलकिन स॰द तँदा बावरालाई परमेस्‍वरए सजा यान्‍या छ्याम ओमाहुवा पै चुम चुमोल थुनैद यानैव।
JUD 1:7 हिताव ज़ सदोम, गमोरा स़ोनो निलापजीकाव सहरलाव मिँराए ब युँ माजामो पातर्‍या पातर्नी य़ेनर यादोवए खर्क ज़ माजिप्‍तिन्‍या मेंःए ज़्‍यास ताकेर। नो आज्‍याल पै सतैंद नैसिउ लिज़्‍या।
JUD 1:8 परमेस्‍वरए ओपाँकिन नो धुतनी पैज़्‍यावर मँलाव स्‍यासो पाँर पैद याक्‍याँलाई ब माछैंव जैज़्‍यार। नोराए सुए पाँ ब माभैंःर। स॰द स्‍वर्गताव घेप्‍पाराए यामिन ब बले·द याराएज़्‍यार।
JUD 1:9 खाली परमेस्‍वरए प़ाइँरानी घेप्‍पा ओचाकर्‍या मिखाएलए ब निताव सैतानए उमिन बले·द मायो। नो चाकर्‍या मोसाए ओमोरोए उजूँनी सैतानस निइ़सिक सैतानलाई थल्‍द ओपाहा झाःद्यान्‍या युँ ब मादोक्‍यो। बुरू, “नँलाई परमेस्‍वरए ज़ ओफाल्‍निउक,” है दोक्‍यो।
JUD 1:10 हैदी ब निताव तँनी पैज़्‍यावराए ते झन यामाथ·रैधुव पाँत ल़॰ज़्यार। नितावर पुसुराए माँःती यायुँनी जो हुज़्‍या हो ज़ दाद यानी ज़ चुयाप जैसिज़्‍यार।
JUD 1:11 नितावरालाई थैए माँतकन लिज़्‍या। नोर ओभाइलाई सैःज़्‍याव कयिनए ओयेमदा ज़ बाकेर। स़ोनो लोभए जूँनी बालामए ओदोव य़ेनदा ज़ हिउ झाःकेर। है जैद किताव तँदा जैसिज़्याव कोरहलाई परमेस्‍वरए खदम ओख्याव, नोर ब हिताव ज़ तारिज़्यार।
JUD 1:12 नितावर प्रभु-भोजल यालाज माहुद जेस सिप ज़्‍यान्‍या ते ओमासहिउ पाँ ज़। नोर याफू सव़ाँन्‍याए जूँनी वाज़ हुज़्‍यार। नितावर उऱी माल्‍यो बादललाई बतासए आदा होदा ओख्याज़्‍याव मितावर ज़ लिज़्‍यार। ओसै माझाःज़्याव ओजरानी ज़ थँव सीं स्‍यासोर ब लिज़्यार, ओजरानी ज़ भोसो स्‍यासोर ब लिज़्यार।
JUD 1:13 नितावराए लाज मोर्नो माचाव याय़ेन भरी भलए ओख्‍याव फुइ स्‍यासोर ज़ लिज़्‍यार। तोबो पोक मालिज़्‍याव आदा फ्योंनी होदा फ्यों बाज़्‍याव सोरो स्‍यासोर ब लिज़्‍यार। नोराए याजुँ खर्क ज़ माखेम्‍न्‍या सुन्‍द मुन्‍दौ चुम चुमोल नैसिउ लिज़्या।
JUD 1:14 नितावराए जूँनी आदमए ओपालाकिन सात प़िरीङ जर्मिउ हनोकए छींनीकावए जूँनी अइ लिद पाँके, “परमेस्‍वरए हजारका हजार ओचाकर्‍यारास हुद,
JUD 1:15 आव नामलाव मिँर ओलकिन तँदा जैसिद मादान्‍या यादोव भरी, स़ोनो उउपर्त माचाव यापाँव भरी ब सतैंद्याद सजा यान्‍या ले।”
JUD 1:16 निताव मिँर एकतार ज़ व़ीनी फुइ लिद रूम्‍रूमैव ज़ लिज़्‍यार। जो यायुँनी हुज़्‍या हो ज़ दोज़्‍यार। स॰द सघ्योःसिद मिँरालाई याल्‍योदा जैन्‍याए जूँनी रलक ब यारापारैज़्‍यार।
JUD 1:17 खाली जे ते ङायुँलाव ङानैं ङामेंर, गेप्रभु येसु ख्रीसए ओसाचीराए ङ़ादाकिन ज़ यासथैचिज़्‍याव पाँर तामेंःच्‍यो।
JUD 1:18 नोराए यापाँ तोबो आव ज़, “खेम्‍न्‍या बेलाक परमेस्‍वरए ओपाँलाई हसैद ल़॰द यायुँनी जो हुज़्‍या हो ज़ दोरिज़्‍यार।”
JUD 1:19 नो परमेस्‍वरए उमिनत लिज़्‍यावरालाई फातैव पैंज़्‍यावर ब नोर ज़। नोरास परमेस्‍वरए उपुरूस ओमाल्‍योए नोराए मानुवाताव बिचारनी वाज़ दोज़्यार।
JUD 1:20 खाली जे ते ङायुँलाव ङानैं ङामेंर, परमेस्‍वरए ओपाँत जे जे सपारैसिन्‍याए जूँनी जे जेल छैंव पुरूसनी पोंखारिसिच्‍यो।
JUD 1:21 स़ोनो गेप्रभु येसु ख्रीसए ओदयानी जेदैरिज़्‍याव अजम्‍बरी जुनीलाई जेयुँ थू जैद जेकींक गेलाई मया दाज़्‍याव परमेस्‍वरए ओक्‍याँत ख्यासिद लिच्‍यो।
JUD 1:22 परमेस्‍वरए ओपाँत यायुँ चबनै माथ॰रिद ऩेथोदा लिज़्‍यावरालाई ब परमेस्‍वरए ओपाँत मयास यायुँ सुहुप्‍द्याद,
JUD 1:23 मेंःए ओज़्‍यासनी याराजोगोइच्‍यो। फरी ख्वारालाई जेरासमारिक नोराए याय़ेन माचाव बेथा मिताव ओतावए नोरास जोगोइसिद दोच्‍यो।
JUD 1:24 गेलाई मादान्‍या य़ेनराल परिन्‍या मितावरानी पाथस जोगोइद, गेखत माल्‍योर जैद, ज़गै मगैव ओङ़ाक ब माछे·द रेंद ज़ बान्‍या जैज़्‍याव परमेस्‍वरए उमिन ओघ्‍योःक।
JUD 1:25 गेप्रभु येसु ख्रीसनी गेलाई बाँचैज़्याव नो तोबोका तोबो परमेस्‍वरलाई खर्क ज़ माखेम्‍न्‍या ज़गै मगैव स़ोनो नाम नमलाव ओराज्‍या ओचलैज़्‍याव ओसक्ती ङ़ादाकिन छींङ पै ज़ ओताक। आमेन।
REV 1:1 आलाव पाँर येसु ख्रीसनी ‘छींनी इताव तारिज़्‍या’ लिद हुन्‍या पाँर सर्सिउ लिज़्‍या। नो पाँर उमींरालाई सतैंद्यान्‍याए जूँनी परमेस्‍वरए ओल ओज़ालाई जैक्‍यो। नो ओज़ाए स्‍वर्गताव ओचाकर्‍यालाई ङा ओनोकोर यूहन्‍नाए ङाल्‍योक परींद नो पाँर सतैंद्याँक्‍यो।
REV 1:2 ङा यूहन्‍नाए परमेस्वरए ओपाँ येसु ख्रीसए सतैंद ओयाँव ङारँःव भरी साची ङाएज़्‍या।
REV 1:3 आलाव सर्सिउ हुन्‍या पाँर जोए प़रिद थैद दोज़्‍याव, नो मिँ असिक दैव लिज़्‍या। आव पाँर यो·न्‍या नजिकक ज़ लिज़्‍या।
REV 1:4 ङा यूहन्‍नाए जे एसिया खन्‍दलाव सात पोकाव मन्‍दलीरालाई है ङादाचिज़्‍या — ङ़ादाकिन ज़ लिज़्‍याव, आख ब लिज़्‍याव, छींङ पै ब लिज़्‍याव परमेस्वरए जेल्‍योदा उयुँ गराँद जेयुँर होलाँ जैद ओयाचिउक। नो असिक उसिंहासन ङ़ाकाव लिज़्‍याव सात गोता पुरूसनी
REV 1:5 स़ोनो येसु ख्रीसनी ब ओताक। येसु ख्रीस ज़ सतलाव ओसाची, सिउनी सोज़्‍यावराए याङ़ाताव, आव मानुवाताव राजाराए याराजा। गेल्‍योदा उयुँ नाद उजिउ झाःद्याद उझीए गेपापरानी सछैंद पले·द,
REV 1:6 गेलाई ओराज्‍याल लाँद, ओबाबु परमेस्वरए ओसेवा दान्‍या पुजारीर जैसिक्‍यो। नोलाई बनै ज़गै मगै ब ओताक, नाम नम ओचलैज़्‍याव ओहक ब खर्क ज़ माखेम्‍न्‍या ओताक। आमेन।
REV 1:7 चिऊच्‍यो, येसु नमतिन बादलरास उहुक प़ाइँ मीए ज़ ओललाई रँःन्‍या लेर। ओललाई घोइद सैःज़्‍यावराए मनी रँःन्‍या लेर। आव मानुवाताव प़ाइँ जातलाव मिँराए नोलाई यारँःक चिर्लनी बिर्ल घर्न्‍या लेर। हैज़ ओताक। आमेन।
REV 1:8 गेप्रभु परमेस्वरए है लिज़्‍या, “ङा अल्‍फा स़ोनो ओमेगा ज़। ङा माहान परमेस्‍वर ज़, ङ़ादाकिन ज़ लिज़्‍याव, आख ब लिज़्‍याव, छींङ पै ब लिज़्‍याव ज़।”
REV 1:9 ङा यूहन्‍ना जेस परमेस्वरए ओराज्‍याल सिप ताद येसु ख्रीसए उमिनताव दुखर ब जेस सिप सहिज़्‍याव जेदाज्‍युलाई परमेस्वरए ओपाँत येसु ख्रीसए ओसाची ङातावए पत्मोस यादोज़्याव तापुत सगर्नाकेर।
REV 1:10 नक प्रभुए उदिन छ्याम छैंव पुरूसए ब्याल्‍द ङाछींक तोबो भोंकरए बनै घ्योःव ओर्गा मिताव ङाथैके।
REV 1:11 नो गाए, “नँ नरँःज़्‍याव भरी तोबो पोस्‍तोकोल सर्द एसियालाव सात पोकाव मन्‍दलीरालाई परींद याएके — तोबो एफिससल, तोबो स्‍मुर्नाल, तोबो पर्गाममल, तोबो थिआतीराल, तोबो सार्दिसल, तोबो फिलादेल्‍फियाल, तोबो लाउदिकियाल।”
REV 1:12 हाःत ज़ नो ङास पाँज़्‍याव गा काता ओताव लिद ङाछींदा ङाभाल्‍सिक सात गोता सुनए दिउ बाल्‍न्‍यार ङारारँःके।
REV 1:13 नो दिउ बाल्‍न्‍याराए खार्ल तोबो मिँ मिन्‍सिउ स्‍यासोलाई ङारँःके। नो उखँत पै बाव रेरे बेन्बेनो क्‍वा क्‍वाइसिद उलिज़्‍याव, ओछातीत सुनए पाता पो·सिउ उलिज़्‍याव।
REV 1:14 नोए ओङ़ैताव ओचेम सन मिताव स़ोनो पोम स्‍यासो पालो उलिज़्याव। उमी मेंःए मुल्‍का स्‍यासो उलिज़्याव।
REV 1:15 उखँर मेंःल उजालैसिउ पितल स्‍यासो तिलिक तिलिको उलिज़्‍याव। ओर्गा भैए ओर्गा मिताव ज़ ओथास्‍ज़्‍याव।
REV 1:16 वोर्फताव उकुइत सात गोता सोरोर यालिज़्‍याव। ओयाःत आनी हुनी ओधार ल्‍यो छाव तरवाली मिताव पले·द ओनैज़्‍याव। ओङाः भरी झ़ार झ़ारो निमी स्‍यासो उलिज़्‍याव।
REV 1:17 ङा नोलाई ङारँःव प़ाइँना सिउ मिताव ताद उखँत ङापछारिसिके। नोए वोर्फताव उकुइ ङाक्‍याँत नैद, “नँ ताछे·नी, ङा प़ाइँरानी ङ़ाताव, प़ाइँरानी छींताव ज़ ङालिज़्या।
REV 1:18 ङा जींदो ज़ ङालिज़्‍या। ङा तखेप सिद फरी खर्क ज़ मासिन्‍या ताद ङाले। मिँरालाई नर्गल झाःद सैःन्‍या, नर्गनी पले·द बाँचैन्‍या साँचा ङाकुइत लिज़्‍या।
REV 1:19 है जैद नँ आव नरँःव भरी, आख ताज़्‍याव पाँर स़ोनो छींनी हुन्‍या पाँर सर्द नैके।
REV 1:20 नो वोर्फताव ङाकुइताव नरँःव सात गोता सोरोर स़ोनो नो सात गोता सुनए दिउ बाल्‍न्‍याराए याअर्थ आव ज़ — नो सात गोता सोरोर सात पोकाव मन्‍दलीराए यालोम्‍बार ज़, नो सात गोता सुनए दिउ बाल्‍न्‍यार सात पोकाव मन्‍दलीर ज़।”
REV 2:1 “एफिसस मन्‍दलीलाव लोम्‍बालाई अइ लिद सर्दिके — नो सात गोता सोरोर वोर्फताव उकुइत दाद, सात गोता सुनए दिउ बाल्‍न्‍या खार्ल दुलिज़्‍यावए है दाचिज़्‍याव,
REV 2:2 जे बनै चावस थ॰रिद धामास जेदोज़्‍याव य़ेन ङा ङासैंज़्‍या। बले·ज़्‍याव मिँरालाई ब जेखार्ल जेमारासहिए। यानी ज़ येसुए ओसाची मिताव जैसिद बाऱिज़्‍यावरालाई मनी जाँचिद यापाँ धुत थ·रैद जेराएज़्‍या।
REV 2:3 जे बनै थ॰रिद ङामिनताव दुखर सहिन्‍या जेर्च्‍या मासिए लिन्‍या ब ङासैंज़्‍या।
REV 2:4 खाली जेङ़ैत आव पाँ वाज़ लिज़्‍या — जे उस॰कताव ङाल्‍योदा जेयुँ थू जेजैज़्‍याव मिताव आज्‍याल ते माले।
REV 2:5 है जैद जे कान्किन मेदा जेतेव हो चेतैद जेयुँर त़ोद फरी ङ़ादाङाव जेदोज़्‍याव मिताव ज़ दोचिके। जेमादोकिन जेल्‍योक हुद जेदिउ बाल्‍न्‍या ओपोतिन ङाहाइरिज़्या।
REV 2:6 हैदी ब आःपै जेस तोबो गुन ते लिज़्‍या — निकोलाइतस यारादोज़्‍यावराए याय़ेनलाई जेसोज़्‍या। नोरालाई ङा मनी ङारासोज़्‍या।
REV 2:7 आव पाँर जोए थैन्‍या उयुँ लिज़्‍या, होए छैंव पुरूसए मन्‍दलीरालाई है ओरादोव पाँर ओथैवक। आव पाँत जो झेंःस्‍या ताज़्‍या, होलाई परमेस्‍वरए ओबगैचाल लिज़्‍याव अजम्‍बरी जुनी याज़्‍याव सै ज़्‍याव ङाएरिज़्‍या।”
REV 2:8 “स्‍मुर्ना मन्‍दलीलाव लोम्‍बालाई अइ लिद सर्दिके — आव पाँ प़ाइँरानी ङ़ाताव, प़ाइँरानी छींताव, सिद सैंसिउए है दाचिज़्‍याव,
REV 2:9 जे जेदुखर ब ङारँःज़्‍या, जेस काता ज़ ओमालिज़्‍याव ब ङासैंज़्‍या। हैदी ब प़ाइँनी यो·व ज़ जेलिज़्‍या। नो सैतानए ल्‍योदाङाव ‘गे यहूदीर ज़’ है लिज़्‍यावराए जेङ़ैत माचाव पाँर झाःद यायाचिज़्‍याव ब ङासैंज़्‍या।
REV 2:10 नो जेदैरिज़्‍याव दुखरानी ताछे·च्‍यो। सैतानए जेलाई जाँचिन्‍याए जूँनी ख्वा ख्वारालाई झ्यालखानाल ब झाःचिरिज़्‍याव। निताव दुखर दस दिन पै वाज़ तारिज़्‍या। जेजिउ ओबादी ब सिन्‍याक पै ङासतत जेलिकिन, ङा जेलाई अजम्‍बरी जुनीए इनाम यान्‍या ङाले।
REV 2:11 आव पाँर जोए थैन्‍या उयुँ लिज़्‍या, होए छैंव पुरूसए मन्‍दलीरालाई है ओरादोव पाँर ओथैवक। आव पाँत जो झेंःस्‍या ताज़्‍या, नो मिँ नर्गल बाव मापरिए।”
REV 2:12 “पर्गामम मन्‍दलीलाव लोम्‍बालाई अइ लिद सर्दिके — आनी हुनी ओधार ल्‍यो छाव तरवालीस लिज़्‍यावए है दाचिज़्‍याव,
REV 2:13 जे जेपोल सैतानए ओराज्‍या लिज़्‍या लिन्‍या ङासैंज़्‍या। हितावत मनी ङामिनत थ॰रिद ङापाँ जेमाऱास्‍ज़्‍याव ब ङासैंज़्‍या। निताव सैतानए ओराज्‍याल ङासतत लिज़्‍याव ङासाची एन्‍तिपासलाई जेखार्ल यासैःक मनी जेय़ेन जेमाऱास्‍के।
REV 2:14 खाली जेङ़ैताव पाँर तोबो ऩेब्‍लो लिज़्‍यार। जेखार्नी ख्वा ख्वाराए बालामए ओदोव मिताव य़ेन दोज़्‍यावर लिज़्‍यार। नो बालामए इस्राएलीरालाई पापल पारैन्‍याए जूँनी तोबो बालाक यादोज़्‍यावलाई च़ें थाँव उपरींव मिताव ज़ ताके। ननी ज़ नो इस्राएलीराए अङग्‍यालाई चरैःसिउ ज़्‍यावर ज़्याद, पातर्‍या पातर्नी जैसिद या मनी झुथो ज़ तानाकेर।
REV 2:15 हिताव ज़ फरी जेखार्नी ख्वा ख्वार निकोलाइतस यारादोज़्‍यावराए यापाँ दान्‍यार ब ताकेर।
REV 2:16 है जैद जे हतप्‍त ज़ जेयुँर त़ोचिके, म़ानी नो ङायाःताव आनी हुनी ओधार ल्‍यो तरवालीस जेल्‍योक हुद नोरास लरैं दान्‍या ङाले।
REV 2:17 आव पाँर जोए थैन्‍या उयुँ लिज़्‍या, होए छैंव पुरूसए मन्‍दलीरालाई है ओरादोव पाँर ओथैवक। आव पाँत जो झेंःस्‍या ताज़्‍या, होलाई म़ोंसिउलाव मन्‍न ङाएरिज़्‍या, स़ोनो तोबो साःरो मिन सर्सिउ पाल पालो लुँ ब ङाएरिज़्या। नो मिन नोए वाज़ सैंन्‍या ले।”
REV 2:18 “थिआतीरा मन्‍दलीलाव लोम्‍बालाई अइ लिद सर्दिके — उमी मेंःए मुल्‍का मिताव, उखँ उजालैसिउ पितल स्‍यासो लिज़्‍याव परमेस्‍वरए ओज़ाए है दाचिज़्‍याव,
REV 2:19 जे बनै थ॰रिद परमेस्‍वरए ओसतत लिद नैं मेंलाई समारिद परमेस्‍वरए ओसेवा जेदोज़्‍याव ङारँःज़्‍या। नो जेय़ेनर ङ़ादाङावकिन यादा ज़ ताद ले।
REV 2:20 खाली जेङ़ैत तोबो पाँ वाज़ लिज़्‍या। नो परमेस्‍वरए उपुरूस च़रिद पाँव जैसिज़्‍याव ईजेबेल मेंमालाई जेखार्ल जेसुम्‍ज़्‍या। नोए ङासेवा दोज़्याव ङामींरालाई तँदा लाँद पातर्‍या पातर्नी य़ेनर दाव परींद, अङग्‍यालाई चरैःसिउ ज़्‍यावर ज़्‍याव यापरींज़्‍याव।
REV 2:21 ङा नो मेंमालाई उयुँर त़ोन्‍या मौका ङाएके, खाली नोए ओय़ेनर ऱासो ज़ माभैंःए।
REV 2:22 है जैद ङा नोलाई आकिनी ओस्‍याँज़्‍याव तैंलाई ओजोरो हुव स्‍याँन्‍या तैं जैद ङाएरिज़्‍या। ओल्‍योदा बाज़्‍यावरालाई मनी यायुँर यामात़ोकिन बनै छे छे ङम्‍सिउ दुखर ङाराएरिज़्‍या।
REV 2:23 नोए ओज़ारालाई ऩुल्‍पा ऩुल्‍मा जैद ङाराखेम्‍रिज़्‍या। हाःकिन मिँराए यायुँ याकलर ज़र्लाप्‍द ङाराएज़्‍याव प़ाइँ मन्‍दलीराए सैंन्‍या लेर। ङा जेलाई सु सु जेय़ेनए ओजेला ङायाचिरिज़्‍या।
REV 2:24 जे उपुर्काव थिआतीराल लिज़्‍यावर ते निताव सैताननिकाव हुव ‘बनै ओअर्थ ल्‍यो ओलेखा ल्‍यो पाँ’ है यादोज़्‍याव पाँत माबाद साचो येमदा ज़ जेबाज़्‍या। है जैद ङा जेलाई उपुर काता ज़ है ङामादाचिए,
REV 2:25 खाली जेस लिज़्‍यावलाई माऱास्‍द ङा ङामाहुवा पै थ॰रिद लिच्‍यो।
REV 2:26 आव पाँत जो झेंःस्‍या ताद छींङ पै ङाय़ेनत थ॰रिज़्‍या, ङा होलाई प़ाइँ राज्‍याराए याङ़ैताव जैन्‍या ङाले।
REV 2:27 किताव ङा मनी ङाबाबुए ल्‍योनी निताव हक रैद ङानै, हिताव ज़ ङा नोलाई ब यान्‍या ङाले। नो याङ़ैताव ताद उकुइत झँए झुइ रैद गम जा मितावरालाई छिलिङ्गा छिलिङ्गा ख्यान्‍या ले।
REV 2:28 ङा नोलाई छकाल्‍न्‍याकाव सोम्‍पा ब यान्‍या ङाले।
REV 2:29 आव पाँर जोए थैन्‍या उयुँ लिज़्‍या, होए छैंव पुरूसए मन्‍दलीरालाई है ओरादोव पाँर ओथैवक।”
REV 3:1 “सार्दिस मन्‍दलीलाव लोम्‍बालाई अइ लिद सर्दिके — ओलस परमेस्‍वरए सात गोता उपुरूसर लिज़्‍याव, उकुइत सात गोता सोरो लिज़्‍यावए है दाचिज़्‍याव, जेय़ेन भरी रँःद ङानै। जे जेमिन चाव ओतादी ब जेय़ेननी ते काम मालागिउ सिउ स्‍यासो ताद जेले।
REV 3:2 है जैद जे सैंसिद म़ाव पैंज़्‍याव रहिउ जेय़ेनरालाई याराजागैचिके। जेय़ेन भरी परमेस्‍वर ङाबाबुए ओङ़ाक काता ज़ यो·व ङामारँःताए।
REV 3:3 है जैद परमेस्‍वरए ओपाँ कितावनी जेदैव, कितावनी जेथैव हो चेतैद, जेयुँर त़ोद हितावनी ज़ दोचिके। जे फरी सैंसिद जेमालिकिन ङा कुना हुज़्‍याव मिँ स्‍यासो सुए ज़ यामासैंद जेल्‍योक उमँःजानी ङाहुरिज़्‍या।
REV 3:4 हैदी ब नो सार्दिसल लिज़्‍यावरानी ख्वा ख्वाराए ते आःपै याक्‍वात हिला मासगाल्‍तार। नोर ङास पालो क्‍वा क्‍वाइसिद बाऱिन्‍या लेर। नोर वाज़ निताव दैन्‍याकावर लिज़्‍यार।
REV 3:5 है जैद आव पाँत जो झेंःस्‍या ताज़्‍या, होए पाल पालो क्‍वा क्‍वाइसिरिज़्‍या। ङा नोलाई अजम्‍बरी जुनीलाव पोस्‍तोकोल सर्सिउ उमिन क्‍याल्‍द्यान्‍या ङामाले, बुरू ङाबाबु स़ोनो ओचाकर्‍याराए याङ़ाक उमिन ज़ सथास्द्यान्‍या ङाले।
REV 3:6 आव पाँर जोए थैन्‍या उयुँ लिज़्‍या, होए छैंव पुरूसए मन्‍दलीरालाई है ओरादोव पाँर ओथैवक।”
REV 3:7 “फिलादेल्‍फिया मन्‍दलीलाव लोम्‍बालाई अइ लिद सर्दिके — ओखत माल्‍यो छैंव, सतस लिज़्‍याव, दाऊदए ओराज्‍यालाव साँचा नैज़्‍यावए स्‍वर्गताव य़ाम फैन्‍या स़ोनो गल्न्‍या ओल उकुइत ज़ लिज़्‍या। ओफैक सुए ज़ मागल्धुर, ओगल्क सुए ज़ माफैधुर। निताव उकुइत नैज़्यावए है दाचिज़्याव,
REV 3:8 जेय़ेन भरी ङासैंज़्‍या। जेसक्ती छ्या उलिदी ब ङापाँ दाद ङामिनत जेलाज ओमाहुवए जेङ़ाक तोबो य़ाम फैद नैद ङायाचिए। नो य़ाम सुए ज़ मागल्धुर।
REV 3:9 नो सैतानए ल्‍योदाङाव ‘गे यहूदीर ज़’ है लिद धुतैज़्‍यावरालाई तछा जेखँत फुलुप्‍सिउ ङारापरींरिज़्‍या। हो ताकिन ङा ङायुँ जेस उलिज़्‍याव ओल्‍यो लिन्‍या याज़ सैंन्‍या लेर।
REV 3:10 जे बनै थ॰रिद ङापाँ भरी धिद जेदोवए आव मानुवाताव मिँ भरिरालाई जाँचिन्‍याए जूँनी बनै धो सहिउ दुखर झाःद ङाराएक जेलाई ते नो दुखरानी पाथस ज़ ङापले·चिरिज़्‍या।
REV 3:11 ङा हतप्‍त ज़ ङाहुरिज़्‍या। जेदैरिज़्‍याव इनाम सुए ज़ माछकैधुन्‍याए जूँनी जेस लिज़्‍याव ङापाँर ङासतर माऱास्‍द दोच्‍यो।
REV 3:12 आव पाँत जो झेंःस्‍या ताज़्‍या, होलाई परमेस्‍वर ङाबाबुए उझ़िमलाव खाँबा मिताव ङाजैरिज़्‍या। नो ननी खर्क ज़ भोस्‍न्‍या माले। ङा नत स़ोम्‍लो मिन ङासर्रिज़्‍या, तोबो परमेस्‍वर ङाबाबुए उमिन, तोबो स्‍वर्गतिन हुज़्‍याव परमेस्‍वरए ओसहर साःरो यरूसलेमए उमिन, तोबो साःरो ङामिन।
REV 3:13 आव पाँर जोए थैन्‍या उयुँ लिज़्‍या, होए छैंव पुरूसए मन्‍दलीरालाई है ओरादोव पाँर ओथैवक।”
REV 3:14 “लाउदिकिया मन्‍दलीलाव लोम्‍बालाई अइ लिद सर्दिके — उमिन ‘आमेन’ लिज़्‍याव, ओबाबुए ओसतत लिद थ॰रिउ साची याज़्‍याव, परमेस्‍वरए ओस्रिस्‍तीलाई थालिद्याज़्‍यावए है दाचिज़्‍याव,
REV 3:15 जे जेय़ेन भरी ङारँःज़्‍या, जे ङाय़ेनत ऱाव ब जेमाले, छेरो ब जेमाले। की ऱाव वाज़, की छेरो वाज़ जेताकिन तान्‍या ओल्‍यो।
REV 3:16 खाली जे की ऱाव की छेरो माताद नोल नोलो वाज़ जेतावए ङायाःनी ङावैःचिरिज़्‍या।
REV 3:17 जे है जेलिज़्‍या, ‘गे यादा ताद प़ाइँनी यो·द धनी ताद गेले, गेलाई काताए खाँचो ज़ माले,’ है जेलिज़्‍या। जे ते झन काता ज़ माल्‍यो, नाङग्‍या, युँ नाव, छाम छामो ताद जेलिज़्‍यावदा जेमासैंए।
REV 3:18 ङा जेलाई तोबो पाँ ङायाचिज़्‍या, जे साचो धनी तान्‍या ताकिन ङा ङाल्‍योनिकाव मेंःल उजालैसिउ सुन लँःचिके। नो नाङग्‍या पात्‍या ताद जेलिज़्‍यावनी जेलाजर कप्‍न्‍या ताकिन ङाल्‍योनी पालो क्‍वार लँःद क्‍वाइसिचिके। नो छाम छामो ताद जेलिज़्‍यावनी जेमी सरैंःन्‍या ताकिन ङाल्‍योनी मील झाःन्‍या मलम लँःद थीचिके।
REV 3:19 जोलाई ङा मया ङादोज़्‍या, होलाई हप्‍कैद ङाम·लैज़्‍या। है जैद जेयुँर मासतेद जेयुँर त़ोद ङाय़ेनत कलँ लिचिके।
REV 3:20 ङा य़ामक च्‍याँःसिद कोतो कोतो ङाजैक जोए ङार्गा थैद ओय़ाम फैज़्‍याव, ङा होए उझ़िमल पसिद होस नैं नैं ताद ज़्‍यावर ब सिप ज़ ज़्‍यान्‍या गिन्‍ले।
REV 3:21 आव पाँत जो झेंःज़्‍या, होलाई ङासिंहासनत ङास सिप च़ुसिउ यान्‍या ङाले। ङा मनी ङ़ादा ङाझेंःवए परमेस्‍वर ङाबाबुए उसिंहासनत ओलस सिप च़ुसिद गिन्ले।
REV 3:22 आव पाँर जोए थैन्‍या उयुँ लिज़्‍या, होए छैंव पुरूसए मन्‍दलीरालाई है ओरादोव पाँर ओथैवक।”
REV 4:1 आव भरी ङारँःवत फरी स्‍वर्गत तोबो य़ाम फैसिउ ङारँःके। हाःत ज़ नो ङ़ादाङाव ङाथैव भोंकरए ओर्गा मितावए फरी ब ङास अइ लिद पाँके, “आत ङाल्‍योत हुन्‍के, नँलाई छींनी हुन्‍या पाँर सतैंद ङाईंरिज़्‍या,”
REV 4:2 है ओदाँव प़ाइँना ज़ ङाक्‍याँत परमेस्‍वरए उपुरूस हुद झजल्‍किद स्‍वर्गत तोबो सिंहासन ङारँःके। नत तोबो राजा च़ुसिद उलिज़्‍याव।
REV 4:3 नो राजाए ओज़गै ज़्‍वाँङ ज़्‍वाँङो यूँखार स्‍यासो ओरैंःज़्‍याव। ज़गै ज़गैव मुगा स्‍यासो ब ओरैंःज़्‍याव। सिंहासन घ्वाँगिल झिली मिलिउ रिगाउँ स्‍यासो ओरैंःज़्‍याव।
REV 4:4 नो सिंहासन घ्वाँगिल छुत चौबीस गोता सिंहासनर यालिज़्‍याव। नल च़ुसिद लिज़्‍याव चौबीस जना स़ेरर, पालो क्‍वा क्‍वाइसिउर, सुने मुकुत जासिसिउर यालिज़्‍याव।
REV 4:5 नो सिंहासननी बिजुली उमिल्‍किज़्‍याव, गर्जिज़्‍याव गार ब याहुज़्‍याव। सिंहासन ङ़ाक सात गोता दिउ बाल्‍न्‍यात मेंः तैंःसिउ उलिज़्‍याव। नो मेंःर परमेस्‍वरए सात गोता उपुरूसर ज़।
REV 4:6 नो सिंहासन ङ़ाक छैं छैंव समुन्‍द्र स्‍यासो यूँखार मिताव मैरा ब उलिज़्‍याव। नो सिंहासनलाव चार कोन्‍याक याङ़ानी याछींनी यामी ल्‍योर चारता जन्‍तुर यालिज़्‍याव।
REV 4:7 नो चारतार तोबो ला स्‍यासो उलिज़्‍याव, तोबो बाछा स्‍यासो उलिज़्‍याव, तोबोए ओङाः मिँए ओङाः स्‍यासो उलिज़्‍याव, फरी तोबो भुर्ज़्याव काप्‍च्‍यागा स्‍यासो उलिज़्‍याव।
REV 4:8 नो चारता जन्‍तुर छ छ गोता याकर ल्‍योर, याक्‍याँ भरी ब यामी ल्‍योर यालिज़्‍याव। नोराए लाकनी रील च़िम मादाद, “अ परमप्रभु बनै नसक्ती ल्‍यो गेपरमेस्‍वर, नँ नखत माल्‍यो छैंव, छैंव, छैंव नलिज़्‍या। ङ़ादाकिन ज़ नलिज़्‍याव, आख ब नलिज़्‍या, छींङ पै ब लिन्‍या नले,” है ल्‍यो ज़ यालिज़्याव।
REV 4:9 नोराए नो याङ़ाकाव सिंहासनत च़ुसिद लिज़्याव, एकम्‍न्‍या जिउँव ज़ लिज़्‍याव राजालाई ओमान नैद्याद, उमिन सघ्योःद्याद, धन्‍याबाद याचरैःज़्‍याक,
REV 4:10 नो चौबीस जना स़ेरर सिंहासनत च़ुसिद लिज़्यावए ओङ़ाक फुलुप्‍सिद, नो एकम्‍न्‍या लिज़्‍यावलाई धो दाद, याङ़ैताव मुकुतर हाइद उखँक झाःद अइ ल्‍यो ज़ यालिज़्‍याव,
REV 4:11 “अ गेप्रभु परमेस्‍वर, प़ाइँरानी घेप्‍पा मिन, प़ाइँराए ल्‍योनिकाव मान, प़ाइँरानी घ्योःव सक्ती दैन्‍याकाव ब नँ ज़ नलिज़्‍या। ताव भरी नँ ज़ नजैके, नयुँ स्‍यानी ज़ ताकेर।”
REV 5:1 नो सिंहासनत च़ुसिद लिज़्‍याव राजाए वोर्फताव उकुइत तोबो आनी हुनी सर्सिउ पोस्‍तोको ङारँःके। नो पोस्‍तोकोत सात गोता छाप झाःद पो·सिउ उलिज़्‍याव।
REV 5:2 हाःत ज़ परमेस्‍वरए तोबो बनै ओर्सा ल्‍यो ओचाकर्‍याए, “नो पोस्‍तोकोताव झाःसिउ छाप हाइद पोस्‍तोको फैधुन्‍या सुवार मालिज़्‍यार?” है लिद उक़िज़्‍याव ङाथैके।
REV 5:3 खाली नो फैद चिऊधुन्‍यार स्‍वर्गत, मानुवात, तल्‍ना नामल ब यामालिज़्याव।
REV 5:4 हाःत ज़ नो पोस्‍तोको फैधुन्‍यार चिऊधुन्‍यार सु ज़ यामारादैवए बनै ङाघर्के।
REV 5:5 हाःत ज़ नो चौबीस जना स़ेररानी तोबोए, “ताघर्नी, यहूदाए ओथोलाव ‘ला’ यादोज़्‍याव, दाऊद राजाए ओजरानी परीव, झेंःस्‍या तावए नो पोस्‍तोकोलाव सात गोता छापर हाइद फैधुन्‍याकाव लिज़्‍या,” है दाँक्‍यो।
REV 5:6 हाःत ज़ नो चार कोन्‍याल लिज़्‍याव जन्‍तु मितावर स़ोनो चौबीस जना स़ेरराए याखार्ल तोबो सिद सैंसिउ पाथा स्‍यासो सिंहासन ङ़ाक च्‍याँःसिद उलिज़्‍याव ङारँःके। नोए उरँःर ब सात गोता, उमीर ब सात गोता यालिज़्‍याव। नो सात गोता उमीर परमेस्‍वरए आव मानुवात आदा होदा ओरापरींव सात गोता उपुरूसर ज़।
REV 5:7 हाःत ज़ नो पाथा सिंहासनत लिज़्याव राजाए ल्‍योक बाद वोर्फताव उकुइताव पोस्‍तोकोलाई रैक्‍यो।
REV 5:8 ओरैव प़ाइँना नो चार कोन्‍यालाव जन्‍तु स्‍यासोर स़ोनो चौबीस जना स़ेरर पाथाए ओङ़ाक फुलुप्‍सिकेर। नोरास सारङ्गर स़ोनो सुने खुरील झाःसिउ धुपर ब उलिज़्‍याव। नो धुप परमेस्‍वरए छैंव उमींराए पोंखारिद याचरैःव यापाँर ज़।
REV 5:9 नक याबाक साःरो गित ब तोबो अइ लिद गैकेर, “नो पोस्‍तोको लाँद ओछापर फैधुन्‍याकाव नँ वाज़ नलिज़्‍या। नँ मिँराए कुइनी सैःसिद, परमेस्‍वरए उजूँनी प़ाइँ राज्‍यालाव मिँर, प़ाइँ जातलाव मिँर, प़ाइँ थोलाव मिँर, प़ाइँ खामनिकाव पाँज़्‍याव मिँरालाई नजिउ झाःद नझीए नरानिखनैके।
REV 5:10 नोरालाई परमेस्‍वरए ओराज्‍यालावर जैद ओसेवा दान्‍यार नराजैके। नोराए ज़ आव मानुवात नँ नराज्‍या चलैन्‍या लेर।”
REV 5:11 हाःत ज़ फरी ङाभाल्‍सिक सिंहासनत च़ुसिउ राजा, ओङ़ाकाव जन्‍तु मितावर स़ोनो चौबीस जना स़ेरर यालिज़्याव घ्वाँगिल परमेस्‍वरए बनै कुधु ओचाकर्‍याराए यार्गा ज़ ङाथैके। नोर हजारका हजार, लाखका लाख यालिज़्‍याव।
REV 5:12 नो चाकर्‍यार प़ाइँए यार्गा तोबो जैद अइ लिद यागैज़्याव, “प़ाइँनिकाव सक्ती, प़ाइँनिकाव धन, प़ाइँनिकाव बुद्धी, प़ाइँनिकाव सा, प़ाइँनिकाव मान, प़ाइँनिकाव असिक, प़ाइँनिकाव घेप्‍पा मिन दैन्‍याकाव नो यासैःव पाथा वाज़ लिज़्‍या।”
REV 5:13 नकिन परमेस्‍वरए ओरासिर्जैवर, स्‍वर्गतावर, मानुवातावर, तल्‍ना नामलावर, समुन्‍द्रल लिज़्‍यावर प़ाइँए ज़ तोबो गा जैद अइ लिद यागैज़्‍याव ङाथैके, “सिंहासनत च़ुसिज़्‍याव राजा स़ोनो यासैःव पाथानिलाई असिक, मान, घेप्‍पा मिन स़ोनो सक्ती ब एकम्‍न्‍या ज़ ओताक।”
REV 5:14 नाः भरिल नो चारता जन्‍तु स्‍यासोराए, “आमेन,” है ल्‍यो ज़ यालिज़्‍याव। नो चौबीस जना स़ेरर ब ओङ़ाक फुलुप्‍सिद ओसेवा दोव ज़ यानैज़्‍याव।
REV 6:1 हाःत ज़ नो पाथाए नो सात गोता छापरानी प़ाइँरानी ङ़ाताव छाप ओफैव ङारँःके। नो छाप ओफैव प़ाइँना नो चार जन्‍तु स्‍यासोरानी तोबोए ओर्गा नम ओगर्जिज़्‍याव मिताव गर्जिद, “आदा हुन्‍के,” है ओदाँज़्‍याव ङाथैके।
REV 6:2 होदा ङाभाल्‍सिक तोबो पालो घोरालाई चेप्‍सिउ उकुइत ली ल्‍योलाई ङारँःके। नोलाई तोबो मुकुत एकेर। नोए ननी बाद ओङ़ालाव परिउ भरी याहारैनाक्‍यो।
REV 6:3 नकिन फरी नो पाथाए, होए उछींताव पोस्‍तोकोताव छाप ओफैवत नो चारता जन्‍तु स्‍यासोरानी तोबोए, “आदा हुन्‍के,” है ओदाँज़्‍याव ङाथैके।
REV 6:4 हाःत ज़ होदा ङाभाल्‍सिक तोबो घ्यामो घोरा पुलुस्‍द उहुज़्‍याव ङारँःके। नो घोरा चेप्‍सिउलाई आव मानुवाताव मिँरालाई माखैन्‍या जैद या याल सैःसिउ परींन्‍या हक यासिउ उलिज़्‍याव। नोलाई तोबो घ्योःव तरवाली ब यासिउ उलिज़्याव।
REV 6:5 नकिन फरी नो पाथाए नोनी निछींताव पोस्‍तोकोताव छाप ओफैवत नो चारता जन्‍तु स्‍यासोरानी तोबोए, “आदा हुन्‍के,” है ओदाँज़्‍याव ङाथैके। होदा ङाभाल्‍सिक तोबो मोलो घोरा चेप्‍सिउ उकुइत तौला ल्‍यो ङारँःके।
REV 6:6 नो चारता जन्‍तुराए खार्नी तोबो गा अइ लिद ओपाँज़्‍याव ङाथैके, “तछाकाव जेलाए जम्‍मा तमानु ताम, की स़ोंमानु चिका तान्‍या ले। म़ास स़ोनो दाखमद्यलाई ते चलैन्‍या माःक।”
REV 6:7 नकिन पाथाए नो स़ोम्‍लोराए याछींताव पोस्‍तोकोताव छाप ओफैक नो चारता जन्‍तुरानी प़ाइँरानी छींतावए, “आदा हुन्‍के,” है ओदाँज़्‍याव ङाथैके।
REV 6:8 होदा ङाभाल्‍सिक तोबो पींल्‍यासो घोरा चेप्‍सिउ ङारँःके। नोए उमिन ‘सैःन्‍या’ उलिज़्‍याव। नोए उछीं उछीं नर्ग ब उहुज़्‍याव। नोनिलाई आव मानुवातावरालाई चार भानी तभालाई तरवालीनी, अनिकालनी, बेथारानी, ला निमरानी सैःन्‍या हक यासिउ उलिज़्‍याव।
REV 6:9 नकिन पाथाए नो चारता छापराए याछींताव छाप ओफैक परमेस्‍वरए ओपाँत साची यावर यारासैःवराए यापुरूसर स्‍वर्गताव थान धूँल ङारारँःके।
REV 6:10 नो पुरूसर बनै चोइस अइ लिद याक़िज़्‍याव, “अ सतलाव छैंव माहान गेप्रभु, नँ न्‍याय दाद मानुवातावराए गेलाई सैःद गेझी सोभोद यायासिउ गेखिस खर्क फेरैद नयासिरिज़्याव?” है यालिज़्‍याव।
REV 6:11 हाःत ज़ नो पुरूसरालाई पालो क्‍वा तोबो तोबो याद, “जे मिताव परमेस्‍वरए उमिनताव यारासैःरिज़्‍याव जेनैंर यामादुमा पै जे जाँवा सहिद कींव ताके,” है यारादोव ङाथैके।
REV 6:12 नकिन नो पाथाए नो पाँच गोता छापराए याछींताव छाप ओफैव प़ाइँना नाम भरी थोनो·सिके, निमी ब मोलो फेरवा स्‍यासो मोल मोलो ज़ ताके, स़्यावै ब झी मिताव घ्याम घ्यामो ताके।
REV 6:13 घ्योःव बतासए सींर ओराहर्लैक सीं सैर ओरासतेज़्‍याव मिताव नमताव सोरोर ब नामल तेकेर।
REV 6:14 नम लो माँःती रूल्‍सिके, हाँर तापुर यापोनी ज़ भोस्‍द बाकेर।
REV 6:15 मानुवाताव राजार, मिँराए याघेप्‍पार, यासेनापतीर, धनीर, हक दैवर स़ोनो बाँदार माबाँदार हाँ खँ जीदा, पुप जीदा म़ोंसिनाद,
REV 6:16 नोराए, “आव हाँर पहरर गेतर्त तेद गेलाई कप्‍द सिंहासनत च़ुसिद लिज़्याव राजा स़ोनो पाथाए उरिसनी याम़ोंसिकिन ताखेहो।
REV 6:17 नोनी निरिस सोभोन्‍या छ्याम हुद ले, नोनी निङ़ाक सु ची उरहिधुरिज़्‍याव?” है यालिज़्‍याव।
REV 7:1 आव भरी ओतावत आव मानुवाताव चार कोन्‍याल परमेस्‍वरए ओचाकर्‍यार चार जना च्‍याँःसिद यालिज़्‍याव ङारारँःके। नोराए नामल तादी ब, समुन्‍द्र तर्त तादी ब, सींत तादी ब, बतास ताचलिक लिद नोलाई वैंद यानैज़्‍याव।
REV 7:2 हाःत ज़ फरी तोबो चाकर्‍या पुर्ब त॰नी उहुज़्‍याव ङारँःके। नोए उकुइत जींदो परमेस्‍वरए ओछाप रैद नो चार कोन्‍याल लिज़्‍याव नाम स़ोनो समुन्‍द्र बले·ना हुव चार जना चाकर्‍यारालाई बनै चोइस है यादोक्‍यो,
REV 7:3 “गे परमेस्‍वरए उमिनताव ओबाँदाराए याचाँदीत छाप झाःद गेमाराएवा पै जे नामलाई ब ताबले·च्‍यो, समुन्‍द्रलाई ब ताबले·च्‍यो, सींलाई ब ताबले·च्‍यो।”
REV 7:4 हाःत ज़ इस्राएली बाह्र थरनी नो छाप दैवर तलाख चवालीस हजार ताकेर है याल्‍यो ङाथैके।
REV 7:5 नोर यहूदाए ओथोनी बाह्र हजार,
REV 7:6 आसेरए ओथोनी बाह्र हजार,
REV 7:7 सिमियोनए ओथोनी बाह्र हजार,
REV 7:8 जबूलूनए ओथोनी बाह्र हजार,
REV 7:9 आव भरी ओतावत फरी ब ङाभाल्‍सिक सुए ज़ मागनिसिधुन्‍या प़ाइँ राज्यालावर, प़ाइँ जातलावर, प़ाइँ थोलावर, प़ाइँ खामनी पाँज़्‍याव मिँर बनै माहोल्‍या यालिज़्‍याव ङारारँःके। सिंहासनत च़ुसिद लिज़्याव राजाए ओङ़ाक स़ोनो पाथाए ओङ़ाक च्‍याँःसिद नोर प़ाइँए ज़ पाल पालो क्‍वा क्‍वाइसिद याकुइत खजुरए ओस्‍यावलार रैद,
REV 7:10 प़ाइँए तोबो गा जैद, “सिंहासनत च़ुसिज़्‍याव गेपरमेस्‍वर स़ोनो पाथानी निल्‍योनी अजम्‍बरी जुनी दैन्‍या ताद गेले,” है लिद क़िउ ज़ यालिज़्‍याव।
REV 7:11 हाःत ज़ सिंहासन, चौबीस जना स़ेरर स़ोनो चारता जन्‍तु स्‍यासोर यालिज़्याव घ्वाँगिल च्‍याँःसिद लिज़्‍याव चाकर्‍याराए परमेस्‍वरए ओङ़ाक फुलुप्‍सिद धो दाद है लिकेर,
REV 7:12 “आमेन। गेपरमेस्‍वरलाई खर्क ज़ माखेम्‍न्‍या असिक, ज़गै मगै, बुद्धी, धन्‍याबाद, मान, सक्ती, ओर्सा ल्‍यो ब ओताक। आमेन।”
REV 7:13 हाःत ज़ नो चौबीस जना स़ेररानी तोबोए ङालाई, “आव पालो क्‍वा क्‍वाइसिउर सुर, कातानी हुवर, नँ नमासैंज़्‍या?” है ओदाँक ते,
REV 7:14 “प्रभु, ङा ते ङामासैंए। नँ ते नसैंज़्‍याखेहो,” है ङादोक ते, नोए ङालाई, “आवर मानुवाताव घेप्‍पा जाँचरानी पुलुस्‍द हुवर ज़। नोराए याक्‍वार पाथाए छैंव उझीए छेद सपाल्‍द नैर।
REV 7:15 है जैद ज़ नोर परमेस्‍वरए उसिंहासन ङ़ाक ल्‍यो दैद ओल उलिज़्‍याव छैंव पोल लाकनी रील ओसेवा दाव ज़ नैज़्‍यार। नो सिंहासनत च़ुसिज़्‍यावए फरी नोरालाई कप्‍द पाथस नैन्‍या ले।
REV 7:16 नोर खर्क ज़ करेन्‍या मालेर, ऱी ब छोस्‍न्‍या मालेर, निमीए ओदारए हिप्‍द घाम सोता सोता ब तान्‍या मालेर।
REV 7:17 नो सिंहासन ङ़ाक लिज़्‍याव पाथा नोराए यार्गे गावला ताद पाथस नैद, अजम्‍बरी जुनी याज़्‍याव ऱीमुलदा लाँद ऱी सवैन्‍या ले। ओल परमेस्‍वरए ज़ प़ाइँराए याप़िलर सीद्यान्‍या ले।”
REV 8:1 नकिन नो पाथाए प़ाइँरानी छींताव छाप ओफैक स्‍वर्गत आधा घन्‍ता पै साइँसुइँ ताके।
REV 8:2 नकिन परमेस्‍वरए ओङ़ाकाव सात जना ओचाकर्‍यार ङारारँःके। नोरालाई सात गोता भोंकर याद ओरानैज़्‍याव।
REV 8:3 हाःत ज़ परमेस्‍वरए छुत तोबो ओचाकर्‍या हुद धुप झाःन्‍या सुने जा उकुइत रैद सिंहासन ङ़ाकाव सुने थानक च्‍याँःसिहुके। नोलाई नो थानत परमेस्‍वरए छैंव उमींराए यापोंखारिउ पाँत चा·द्यान्‍याए जूँनी कुधु धुपर याद यानैज़्‍याव।
REV 8:4 नो धुपए उम़िकुइ परमेस्‍वरए छैंव उमींराए यापोंखारिउ पाँस थोम्‍सिद नो चाकर्‍याए उकुइनी ज़ परमेस्‍वरए ओङ़ाक केस्‍के।
REV 8:5 हाःत ज़ फरी नो चाकर्‍याए नो थानताव मेरैः ओजाल झाःद मानुवात ख्याक्‍यो। ओख्याव प़ाइँना ज़ नम बनै गर्जिद म्‍याल्‍याकनी मिलिक ताद भोंचालो बाके।
REV 8:6 हाःत ज़ नो याकुइत भोंकर ल्‍यो सात जना परमेस्‍वरए ओचाकर्‍यार याभोंकर तप्‍न्‍यात थूसिकेर।
REV 8:7 उस॰कताव चाकर्‍याए ओभोंकर ओतबो प़ाइँना झी बरे·सिउ तिसरै स़ोनो मेंः बनै ज़ वाके। नोए मानुवाताव सींर स़ोंभानी तभा भरी नामस ज़ सघाद चुयाप याजैक्‍यो। छी भरी ब ओपो·स ज़ सघाद याखेम्‍क्‍यो।
REV 8:8 नकिन नोए उछींताव चाकर्‍याए ओभोंकर ओतबोत बनै घ्योःव हाँ स्‍यासो मेंःए सुम्‍ला समुन्‍द्रल तेद नो समुन्‍द्र स़ोंभानी तभा भरी झी ज़ ताके।
REV 8:9 फरी नो समुन्‍द्रलाव यास॰ ल्‍यो भरी स़ोंभानी तभा भरी सिकेर। समुन्‍द्रलाव जहाजर मनी स़ोंभानी तभा भरी खेम्‍केर।
REV 8:10 नकिन फरी नोनी निछींताव चाकर्‍याए ओभोंकर ओतबोत नमतिन तोबो बनै घ्योःव चाँःज़्‍याव मेंः स्‍यासो सोरो तेद ऱीमुलर स़ोनो खोलार स़ोंभानी तभा भरिल परिके।
REV 8:11 नो सोरोए उमिन ‘अइरालु’। नो परिउ भरिलाव ऱी भरी बनै काव अइरालु मिताव ज़ ओतावए नो ऱी ओज़्‍याव मिँर कुधु ज़ सिकेर।
REV 8:12 नकिन नो स़ोम्‍लोराए याछींताव चाकर्‍याए ओभोंकर ओतबोत निमी, स़्‍यावै स़ोनो सोरोर स़ोंभानी तभा भरी चुम चुमो ताकेर। है जैद ला मनी स़ोंभानी तभा भरी चुम चुमो ज़ ताके। हिताव ज़ री मनी स़ोंभानी तभा भरी छाम छामो ज़ ताके।
REV 8:13 नकिन फरी ङाभाल्‍सिक नमत तोबो काप्‍च्‍यागा उभुर्ज़्‍याव ङारँःके। नो बनै चोइस अइ लिद उक़िज़्‍याव, “नो आःपै यामातप्‍ताव स़ोम्‍लो भोंकर परमेस्‍वरए ओचाकर्‍याराए यातबोत आव मानुवाताव मिँरालाई स़ोंखेप थैए माँतकन तारिज़्‍या,” है उलिज़्‍याव ङाथैके।
REV 9:1 नकिन नो चारताराए याछींताव चाकर्‍याए ओभोंकर ओतबोत नमतिन तोबो सोरो नामल ओतेव ङारँःके। नो सोरोए उकुइत फरी सुन्‍द मुन्‍दौ भल्‍खादालाव साँचा यासिउ उलिज़्‍याव।
REV 9:2 नोए नो भल्‍खादालाई ओफैक बनै घ्योःव मेंःनी पुलुस्‍ज़्याव म़िकुइए सुम्‍ला स्‍यासो पुलुस्‍द नमत बाद निमीलाई लाम लुम कप्‍द चुम चुमो जैक्‍यो।
REV 9:3 नो म़िकुइनी नाम भरिल स॰ल॰र पुलुस्‍केर। नोरालाई बिछी मिताव दा·न्‍या सक्ती यासिउ उलिज़्‍याव।
REV 9:4 नोरालाई आव मानुवाताव छीर सींर स़ोनो पींव भरिलाई कैज़ माजैद, याचाँदीत परमेस्‍वरए ओछाप माल्‍यो मिँरालाई वाज़ दुख यान्‍या हक यासिउ उलिज़्‍याव।
REV 9:5 नोरालाई सैःन्‍या हक ते यासिउ ओमालिज़्‍याव, अइज़ पाँच मैना पै दुख याद थलैन्‍या वाज़ उलिज़्‍याव। नोराए याराएज़्‍याव दुख बिछीए ओराकैकाव उहुर्ज़्याव मिताव दुख ओताज़्‍याव।
REV 9:6 नो बेलाक मिँराए ‘इताव दुखर ओताज़्‍याव देखा बुरू सिन्‍या ओताकिन ताखेहो’ है लिन्‍या लेर। खाली नोर सिन्‍या बेला ओमाहुवा पै सिउ दैन्‍या मालेर।
REV 9:7 रँःक ते नो स॰ल॰र लरैंदा बान्‍या झाःसिद लिज़्याव घोरा स्‍यासोर यालिज़्‍याव। नोराए याङ़ैत सुने मुकुत मिताव जासिसिउ, याङाः मिँराए याङाः मिताव उलिज़्‍याव।
REV 9:8 नोराए याचेम मेंमाराए याचेम स्‍यासो उलिज़्‍याव, याहा लाराए हा स्‍यासो उलिज़्‍याव।
REV 9:9 नोराए याछातीत झँए पाता मिताव जासिसिउ उलिज़्‍याव। नोराए याकरर याचलैक घोरार लरैंदा गद्दी स़ेल्‍द याधोंःनाज़्‍याव मिताव गा ओथास्‍ज़्‍याव।
REV 9:10 नोराए यार्मेः बिछीए ओर्मेः मिताव ओधास ल्‍यो उलिज़्‍याव। नत ज़ मिँरालाई पाँच मैना पै दुख यान्‍या सक्ती उलिज़्‍याव।
REV 9:11 नोराए याङ़ैताव राजा भल्‍खादाल लिज़्‍याव चाकर्‍या ज़। नोए उमिन हिब्रू खामनी ‘एबाद्दोन’, ग्रीक खामनी ‘अपोल्‍लियोन’।
REV 9:12 नो भोंकरए ओर्गाए ओरैव उस॰कताव थैए माँतकन नो ज़ ओल्‍यो। फरी थैए माँतकन रैन्‍यानी अझ ऩेब्‍लो भोंकरनी लिज़्‍यानी।
REV 9:13 नकिन नो पाँच जनाराए याछींताव चाकर्‍याए ओभोंकर ओतबोत परमेस्‍वरए ओङ़ाकाव सुने थानकाव चार चोंच्‍याकाव स्‍यारँःराए खार्नी तोबो गाए
REV 9:14 नो भोंकर तप्‍ज़्‍यावलाई अइ ओदोज़्‍याव ङाथैके, “नो घ्योःव यूफ्रेतिस भैलाव सुर्सिउ चार जना चाकर्‍यारालाई यापला·नाके,” है ओदोक ते,
REV 9:15 यापला·नाक्‍यो। नोर मिँ भरिरानी स़ोंभानी तभा भरिलाई सैःन्‍याए जूँनी नो साल, नो मैना, नो छ्याम, नो घन्‍ताक पै नक ज़ झाःसिसिउ यालिज़्‍याव।
REV 9:16 नोराए घोरा चेप्‍न्‍या याफौजीर बीस करोद लिज़्‍यार है यालिज़्‍याव ङाथैके।
REV 9:17 नो झजल्‍किद ङारारँःव घोरार स़ोनो नोराए यातर्त बान्‍यार ङारारँःक नो घोरा चेप्‍ज़्यावराए याछातीताव याजासिज़्‍याव पाता गन्‍धकए ओमेंः स्‍यासो घ्याम घ्यामो स़ोनो पीं पींव उलिज़्‍याव। याघोराराए याङ़ै लाराए ङ़ै स्‍यासो उलिज़्‍याव। यायाःनी मेंः, म़िकुइ स़ोनो गन्‍धक उपुलुस्‍ज़्याव।
REV 9:18 नो यायाःनी पुलुसो मेंः, म़िकुइ स़ोनो गन्‍धकनी मिँ भरिरानी स़ोंभानी तभा भरिलाई याराखेम्‍केर।
REV 9:19 नो घोराराए यासक्ती यायाःत ब उलिज़्‍याव, यार्मेःत ब उलिज़्‍याव। नोराए यार्मेःत घुलए ओङ़ै स्‍यासो उलिज़्‍याव। ननी ज़ मिँरालाई खदम याराख्याकेर।
REV 9:20 हितावत मनी नो ऩुल्‍पा ऩुल्‍मानी बाँचिउ मिँराए ङ़ादाङाव यादोज़्‍याव माचाव याय़ेन माऱास्‍केर। नोराए दै देवताराए यासेवा दान्‍या ब माऱास्‍केर। कुइए जैसिउ सुन चाँदी, पितल, सीं लुँ, आरा उरू मालिज़्‍याव, माथैज़्याव स़ोनो मारँःज़्याव अङग्‍या सेवा दान्‍या ब माऱास्‍केर।
REV 9:21 मन्‍तर तन्‍तर दान्‍या, मिँर सैःन्‍या, कुन्‍या, पातर्‍या पातर्नी जैसिन्‍या ब माऱास्‍केर।
REV 10:1 नकिन तोबो बनै ओर्सा ल्‍यो चाकर्‍या बादल क्‍वाइसिद स्‍वर्गतिन उहुज़्‍याव ङारँःके। नोए ओङ़ैत रिगाउँ जासिद उलिज़्‍याव, ओङाः निमी स्‍यासो उलिज़्‍याव, उखँर मेंःए मुल्‍का स्‍यासो उलिज़्‍याव।
REV 10:2 नोए उकुइत तोबो ज़िम्‍ज़ा पोस्‍तोको फैसिउ उलिज़्‍याव। नोए वोर्फताव उखँ समुन्‍द्र तर्त ओनैज़्‍याव, दाबर्‍याफताव उखँ नाम तर्त ओनैज़्‍याव।
REV 10:3 नोए लाए ओर्गा मिताव जैद बनै चोइस उक़िक सात गोता गर्जिन्‍याराए मनी यार्गा सथास्‍द पाँकेर।
REV 10:4 नो गर्जिज़्‍यावराए यापाँ सर्न्‍यात ङाथूसिक, स्‍वर्गतिन फरी छुत तोबो गा अइ लिद हुके, “नो सात गोता गर्जिज़्‍यावराए यापाँ मासर्द छाप झाःद म़ोंके।”
REV 10:5 हाःत ज़ नो तँफताव उखँ समुन्‍द्र तर्त, तँफताव उखँ नाम तर्त लिज़्‍याव चाकर्‍याए वोर्फताव उकुइ स्‍वर्गदा छींद,
REV 10:6 नाम नम, समुन्‍द्र स़ोनो नलाव ताव भरी जैज़्‍याव एकम्‍न्‍या जिउँव ज़ लिज़्‍याव परमेस्‍वरए उमिन छुद अइ लिद पाँके, “अब ते धिलो तान्‍या माले।
REV 10:7 प़ाइँरानी छींताव चाकर्‍याए ओभोंकर ओतबोत परमेस्‍वरए ओसेवा दोज़्‍याव अगमबक्तारालाई है ओरादोव म़ोंसिउ पाँर यो·न्‍या ले।”
REV 10:8 हाःत ज़ नो ङ़ादा स्‍वर्गनी हुव गा फरी ब तखेप ङास अइ लिद पाँके, “नँ आनी बान्‍केदा, नो तोबो उखँ समुन्‍द्र तर्त, तोबो उखँ नाम तर्त लिज़्‍यावए उकुइताव पोस्‍तोको हाइद रैके,” है ओदाँक ते,
REV 10:9 ङा नो चाकर्‍याए ल्‍योक बाद, “नो नकुइताव ज़िम्‍ज़ा पोस्‍तोको ङालाई याव ताके,” है ङादोक ते, “ताए, लाँकेदा, आव भरी ज़्‍युयो। आवए नफूलाई सकाद्यान्‍या ले, नयाःलाई ते राप मिताव सत़ाद्यान्‍या ले,” है ओदाँव प़ाइँना,
REV 10:10 उकुइताव ज़िम्‍ज़ा पोस्‍तोको रैद ङाज़्‍युक ङायाःत राप मिताव त़ा त़ा ताके। ङागालो छींनी ङाफू बनै काके।
REV 10:11 हाःत ज़ फरी तोबो गा अइ लिद ओपाँज़्‍याव ङाथैके, “नँ फरी ब प़ाइँ राज्‍यालावर, प़ाइँ जातलावर, प़ाइँ खामनी पाँज़्‍यावर स़ोनो राजाराए याक्‍याँत हुन्‍या पाँर पाँव परिरिज़्‍या।”
REV 11:1 हाःत ज़ ङालाई तोबो भाता स्‍यासो गोइँन्‍या ताङ्गा याँकेर। नकिन तोबोए है दाँक्‍यो, “नँ आनी बाद परमेस्‍वरए ओध्‍यान झ़िम ओथानस ज़ गोइँयो। नल हुज़्‍याव ओसेवा दोज़्‍यावरालाई मनी यागनियो।
REV 11:2 नो ध्‍यान झ़िमलाई नगोइँक, पाखाताव मैरा भरी ऱास्‍यो। नो भरी परमेस्‍वरकिन तँदाङावरालाई यासिउ लिज़्‍या। नोराए परमेस्‍वरए उमिनताव सहरलाई बयालीस मैना भरी याखँए छिल्न्‍या लेर।
REV 11:3 नो बेलाक ज़ ऩेब्‍लो ङासाचीनिलाई बाह्र सय साथी दिन भरी बर्ला क्‍वा क्‍वाइसिद परमेस्‍वरए ओपाँ सथैन्‍या हक यान्‍या ङाले।”
REV 11:4 नो ऩेब्‍लो साचीनी ऩेब्‍लो जैतून सींनी ज़। नो नाम नमलाव परमेस्‍वरए ओङ़ाकाव ऩेब्‍लो दिउ बाल्‍न्‍यानी मनी नोनी ज़।
REV 11:5 सुवाराए नोनिलाई कैवार जैव यापैंकिन नोनी नियाःनी मेंः पुलुस्‍द नोरालाई चुयाप ख्यान्‍या लिनी। फरी नोनिलाई कितावनी सैःव यापैंज़्‍याव, या मनी हितावनी ज़ सिरिज़्‍यार।
REV 11:6 नोनी परमेस्‍वरए ओपाँर निरासथैव बेलाक पै, नम घमावाक लिद नम सूइन्‍या, ऱीरालाई झी पल्‍तैन्‍या स़ोनो निपैंज़्याव मिताव मानुवात ऩुल्‍पा ऩुल्‍मा रैन्‍या सक्तीर ब नोनी निकुइत ज़ तान्‍या ले।
REV 11:7 नोनी साची यान्‍या निय़ेन ओखेमोत भल्‍खादानी तोबो बनै छे छे ङम्‍सिउ जन्‍तु पुलुस्‍द नोनिलाई खप्‍द हारैद निसैःरिज़्‍याव।
REV 11:8 नोनी निमोरोर यरूसलेम सहरलाव दोहाक अइज़ ख्यासिउनी तान्‍या लिनी। नो सहरल ज़ निप्रभुलाई मनी क्रुसत तङ्गैद यासैःव। है जैद नो सहरए उमिन सदोम है दादी ब ताके, इजिप है दादी ब ताके।
REV 11:9 नोनी निमोरोलाई आधास चार दिन पै खादरल माझाःद पाखाक ज़ यारानैज़्‍याव। प़ाइँ राज्‍यालावर, प़ाइँ जातलावर, प़ाइँ थोलावर स़ोनो प़ाइँ खामनी पाँज़्‍याव मिँराए नो मोरोनिलाई रँःद,
REV 11:10 बनै खुसी ताद यारेंतए याकुइताव सरेसर ब या याल भाःसिन्‍या लेर। नो ऩेब्‍लो अगमबक्तानी मानुवात निलिक मिँरालाई यापापत उथुपुल निराजैवए निसिउत बनै रेंकेर।
REV 11:11 नोनी निसिउ आधास चार दिन ओतावत परमेस्‍वरए ल्‍योनी बाँचैन्‍या स॰ फरी निक्‍याँत हुद नोनी सोद च्‍याँःसिकिनी। निताव रँःद नो रँःज़्‍यावर याछ्याचेए बनै भुम भुम गूकेर।
REV 11:12 हाःत ज़ नोनी स्‍वर्गनी ‘आदा हुचिन्‍के’ है लिन्‍या गा तोबो थैद बादल जींल स्‍वर्गदा बाकिनी। नोनी निबाज़्‍याव निसुतुर भरिराए ब यारारँःकेर।
REV 11:13 हाःत ज़ बनै घ्योःव भोंचालो हुद सहरलाव झ़िम भरी दस भानी तभा भरी धलिकेर। मिँर मनी सात हजार सिकेर। उपुर्कावर बनै छे·द स्‍वर्गताव परमेस्‍वरए उमिन बनै सघ्योःदिकेर।
REV 11:14 दोस्रो थैए माँतकन नो ज़ ओल्‍यो। अझ थैए माँतकन रैन्‍या तोबो लिज़्‍या। नो हतप्‍त ज़ हुरिज़्‍या।
REV 11:15 हाःत ज़ प़ाइँरानी छींताव चाकर्‍याए ओभोंकर ओतबोत स्‍वर्गतिन बनै घ्योःव घ्योःव गार अइ लिद थास्‍केर, “आव मानुवाताव राज्‍यार गेपरमेस्‍वर स़ोनो ओखतैव ख्रीसनी निराज्‍या ज़ ताद ले। नोए नो राज्‍यालाई एकम्‍न्‍या ओल ज़ चलैन्‍या ले।”
REV 11:16 हाःत ज़ नो परमेस्‍वरए ओङ़ाकाव सु सु यासिंहासनत च़ुसिज़्‍याव चौबीस जना स़ेरर परमेस्‍वरए ओङ़ाक फुलुप्‍सिद धो दाद,
REV 11:17 अइ लिद पाँकेर, “अ परमप्रभु, भाःकिन लिज़्‍याव, छींङ पै लिज़्‍याव बनै नसक्ती ल्‍यो गेपरमेस्‍वर, नँलाई धन्‍याबाद गेचरैःनिज़्‍या। बनै घ्योःव सक्ती नकुइत रैद, नराज्‍या चलैन्‍यात नथूसिके।
REV 11:18 प़ाइँ जातलाव मिँर ङ़ादाकिन नँलाई रँःद यारिस चोद बनै यामचिज़्‍याव। अब ते नोराए ङ़ैत नरिस थुद्यान्‍या बेला हुके, सिधुवरालाई नराफाल्‍रिज़्‍याव बेला ब हुके। फरी छैंव नमींरालाई, नसेवा दोज़्‍याव अगमबक्तार, नमान नैद्याज़्‍यावर, घेप्‍पा ज़िम्‍ज़ारालाई इनाम नराएरिज़्याव बेला ब हुके। हाःत ज़ आव मानुवा बले·ज़्यावरालाई यामिन सम़ैद्यान्‍या नले।”
REV 11:19 हाःत ज़ स्‍वर्गताव परमेस्‍वर उलिज़्‍याव ध्‍यान झ़िम फैसिद नो बाचा नैसिउ मुधुस ब रैंःके। नो ध्‍यान झ़िमनी म्‍याल्‍याकनी मिलिक ताद गर्जिन्‍या गार पुलुस्‍केर। नाम ब थोनो·सिद घ्योःव घ्योःव तिसरै ब तेके।
REV 12:1 हाःत ज़ नमत तोबो बनै अचम्‍बलाव सरेस रैंःके। नत तोबो मेंमा निमी स्‍यासो झ़ार झ़ारो क्‍वाइसिसिउ, उखँ धूँल स़्यावै, ओङ़ैत बाह्र गोता सोरोए मुकुत जासिसिउ उलिज़्‍याव।
REV 12:2 नो मेंमा ज़ा दैन्‍या ताद बनै घर्लिद ओघर्ज़्‍याव।
REV 12:3 नकिन फरी ब नमत तोबो सरेस रैंःके। नत तोबो बनै घ्योःव घ्यामो अजिङ्गर पुलुस्‍द उलिज़्‍याव। नोए ओङ़ैर सात गोता, उरँःर दस गोता यालिज़्‍याव। सात गोता ओङ़ैत मुकुत जासिसिउ उलिज़्‍याव।
REV 12:4 नोए ओर्मेःए नमताव सोरोर स़ोंभानी तभा भरी स़ेल्‍द नामल याख्याक्‍यो। नो अजिङ्गर फरी, “नो ज़ा दैन्‍या घर्लिज़्‍याव मेंमाए ज़ा ओदैवत ङाकैया,” लिद ओङ़ाक वैंसिद उलिज़्‍याव।
REV 12:5 नो मेंमाए खेपा ज़ा दैक्‍यो। नो ज़ प़ाइँ राज्‍यालाव मिँरालाई उकुइत झँए झुइ रैद राज्‍या चलैहुरिज़्‍याव मिँ। नोलाई परमेस्‍वरए स्‍वर्गताव ओपोल ज़ छींद लाँक्‍यो।
REV 12:6 नो मेंमा फरी परमेस्‍वरए म़ोंसिन्‍या पो जैद ओयोए धोंःद बनङ म़ोंसिनाके। नङ ज़ बाह्र सय साथी दिन ङासिके।
REV 12:7 हाःत ज़ स्‍वर्गत घ्योःव लरैं ताके। मिखाएल ओचाकर्‍यारास नो अजिङ्गरस लऱिनाकेर। नो अजिङ्गर मनी ओचाकर्‍यार रैद मिखाएलस लऱिद,
REV 12:8 यार्सार खेम्‍द स्‍वर्गताव यालिन्‍या पोनी हारिद पुलुस्‍केर।
REV 12:9 नो अजिङ्गर स्‍वर्गतिन नामल ख्यासिके। नो दियाबलस यादोज़्याव भाःकिनकाव घुल, मानुवाताव मिँरालाई झुकैज़्‍याव सैतान ज़। नो मेल ओख्यासिक ओचाकर्‍या भरी ब ओलस ज़ तेकेर।
REV 12:10 फरी स्‍वर्गत तोबो बनै घ्योःव गा अइ लिद ओपाँज़्‍याव ङाथैके, “अब ते गेपरमेस्‍वर प़ाइँनी झेंःस्‍या ताद, ओसक्तीरास ओराज्‍या ब तयार जैद नैव। नो राज्‍या चलैन्‍या हक ओज़ा येसु ख्रीसए ओल उकुइत ज़ रैद नैव। अब ते गेदाज्‍यु भाइरालाई लाकनी रील परमेस्‍वरए ओङ़ाक छ्याप लैज़्याव सैतान स्‍वर्गतिन नामल ख्यासिके।
REV 12:11 परमेस्‍वरए उमिनतावर ते नो पाथाए उझीनी परमेस्‍वरस खैवर यातावए, स़ोनो याजिउए मया मादाद परमेस्‍वरए ओपाँत साची यान्‍यात जात्त ज़ यामाऱासोए, सैतानलाई हारैद याज़ झेंःस्‍या ताकेर।
REV 12:12 है जैद जे स्‍वर्गत लिज़्‍यावर प़ाइँ रेंचिके। जे मानुवात स़ोनो समुन्‍द्रल लिज़्‍यावरालाई ते थैए माँतकन ज़ लिज़्‍या। काराव ल्‍यो ताकिन सैतान जेल्‍योल ख्यासिद, ‘ङाबेला छ्या ज़ लिज़्‍या’ लिद बनै ज़ रसिद ले।”
REV 12:13 नो अजिङ्गर नामल ओख्यासिउत नो खेपा ज़ा दैव मेंमाए उखिरी पसिनाके।
REV 12:14 हाःत ज़ नो अजिङ्गरए ओङ़ाकिन भुर्द बनङाव उलिन्‍या पो जैसिउङ केस्‍न्‍याए जूँनी नो मेंमालाई घेप्‍पा काप्‍च्‍यागाए ओकर ऩेब्‍लो यासिउ उलिज़्‍याव। नो बनल आधास चार बर्स ङासिके।
REV 12:15 नो अजिङ्गरए फरी नो मेंमालाई ऱीए गबगैवक लिद ओयाःनी बनै घ्योःव भल ख्यादिक्‍यो।
REV 12:16 नामए नो मेंमालाई सघैन्‍याए जूँनी नो अजिङ्गरए ओयाःनिकाव ऱी भरी नाम फैसिद होल ज़ सझ़ाल्‍दिक्‍यो।
REV 12:17 निताव रँःद नो अजिङ्गर नो मेंमास झन ज़ उरिस चोद ओज़ा भरिरास ज़ लरैं दोनाक्‍यो। नोए ओज़ार परमेस्‍वरए ओपाँर दाद येसुए ओसाचीत लिज़्‍यावर ज़।
REV 12:18 हो बेलाक नो अजिङ्गर समुन्‍द्र छ्योकाव बालुवाल च्‍याँःसिद उलिज़्‍याव।
REV 13:1 हाःत ज़ समुन्‍द्रनी तोबो बनै छे छे ङम्‍सिउ राछ्यास मिताव पुलुस्‍द उहुज़्याव ङारँःके। नोए उरँःर दस गोता, ओङ़ैर सात गोता यालिज़्‍याव। दस गोता उरँःत तोबो तोबो मुकुत जासिसिउ उलिज़्‍याव। सात गोता ओङ़ैत फरी तोबो तोबो परमेस्‍वरकिन स॰द युँ माजामो मिनर सर्सिउ उलिज़्याव।
REV 13:2 नो ङारँःव राछ्यास च्‍याँकुला स्‍यासो उलिज़्‍याव, उखँर निमए उखँ स्‍यासो उलिज़्‍याव, ओयाः घ्योःव लाए ओयाः स्‍यासो उलिज़्‍याव। नोए ओसक्ती, ओराज्‍या, ओहक भरी नो अजिङ्गरए ल्‍योनी दैद ओनैज़्‍याव।
REV 13:3 नोए ओङ़ै भरिनी तोबो ओङ़ैत सिवा जप जैद पल्‍सिउ घाइनी गराँव मिताव ज़ ङारँःके। मानुवाताव मिँ भरिए नोलाई रँःद अचम्‍ब ताद उछीं उछीं ज़ याबाज़्‍याव।
REV 13:4 नोए उछींत बाज़्‍यावराए, “आव राछ्यासए ओहक भरी अजिङ्गरए ल्‍योनी ज़ उहुव ओल्‍यो,” लिन्‍या सैंद, नो अजिङ्गरए ओसेवा दोकेर, स़ोनो, “आव राछ्यासकिन घेप्‍पा सु ची उलिज़्‍याव? आवस लरैं दाधुन्‍या ब सु ची उलिज़्‍याव?” लिद नोए ओसेवा मनी दोकेर।
REV 13:5 नो राछ्यासलाई फरी परमेस्‍वरकिन स॰द परमेस्‍वरस याः दान्‍या, स़ोनो ओमन लागिउ य़ेन दान्‍या बयालीस मैना पै हक यासिउ उलिज़्‍याव।
REV 13:6 है जैद ज़ नोए परमेस्‍वरए उउपर्त माचाहिउ पाँर झाःद, उमिनर बले·द्याद, परमेस्‍वर उलिज़्‍याव पो स़ोनो स्‍वर्गताव परमेस्‍वरए उमींराए याङ़ैत ब माचाहिउ पाँर झाःद पाँके।
REV 13:7 नोलाई परमेस्‍वरए छैंव उमींरास लरैं दाद नोरालाई हारैधुन्‍या हक यासिउ उलिज़्‍याव। नोए ओहक भरी प़ाइँ राज्‍यालावर, प़ाइँ जातलावर, प़ाइँ थोलावर, प़ाइँ खामनिकाव पाँज़्‍यावराए याङ़ैताव ज़ ओल्‍यो।
REV 13:8 है जैद आव नाम नम ओमातादकिनकाव अजम्‍बरी जुनीलाव पोस्‍तोकोल यामिन माल्‍यो भरिए नोए ओसेवा दान्‍या लेर। नो पोस्‍तोको सैःसिउ पाथाए उकुइत लिज़्‍या।
REV 13:9 है जैद जोए थैन्‍या उयुँ लिज़्‍या, नोए चावस ओथैवक।
REV 13:10 हो बेलाक जोलाई झ्यालखानाल बान्‍या जैसिउ लिज़्‍या, हो झ्यालखानाल ज़ बान्‍या ले। जोलाई तरवालीए सैःन्‍या जैसिउ लिज़्‍या, हो तरवालीनी ज़ सिन्‍या ले। आनी ज़ परमेस्‍वरए छैंव उमींर थ॰रिद युँ हुबो ताव परिके।
REV 13:11 नकिन फरी ब नाम जींनी पुलुसो छुत तोबो राछ्यास ङारँःके। नोए उरँः पाथाए उरँः स्‍यासो ऩेब्‍लो उलिज़्‍याव, ओर्गा अजिङ्गरए ओर्गा स्‍यासो उलिज़्‍याव।
REV 13:12 नोए नो ङ़ादाङाव राछ्यासए ओहक भरी ओचलैज़्‍याव, आव मानुवाताव मिँरालाई नो ङ़ादा ओङ़ै पल्‍सिउ घाइ गराँव स्‍यासो राछ्यासए ओसेवा दाव ओरापरींज़्‍याव।
REV 13:13 नोए अचम्‍बलाव सरेसर जैद नमतिन मानुवात मेंः मुल्‍कार ब मिँराए याङ़ाक सतेद ओराएज़्‍याव।
REV 13:14 नोए नो ङ़ादाङाव राछ्यासए ल्‍योनिकाव ओरैव हकरानी अचम्‍बलाव सरेसर जैद आव मानुवाताव मिँरालाई झुकैद नो ङ़ादा ओङ़ै तरवालीए पल्‍सिउ गराँव राछ्यासए अङग्‍या तोबो जैव यापरींक्‍यो।
REV 13:15 नोए नो अङग्‍यालाई उस॰ झाःद्यान्‍या सक्तीर दैद नोलाई पाँधुन्‍या जैक्‍यो। हाःकिन नो अङग्‍याए ओसेवा दाव माभैंःज़्‍याव भरिरालाई सैःव यापरींक्‍यो।
REV 13:16 नकिन नोए मिँ भरिरालाई घेप्‍पा ज़िम्‍ज़ा, धनीर गरीबर, बाँदा माबाँदार प़ाइँलाई ज़ वोर्फताव याकुइत तादी ब, याचाँदीत तादी ब, तोबो सरेस झाःव यापरींक्‍यो।
REV 13:17 नो सरेसत नो राछ्यासए उमिन कितर ओनमर झाःसिउ उलिज़्‍याव। नो सरेस माल्‍योराए सुए ज़ काता ज़ लँःव यामादैज़्‍याव, काता ज़ यो·व ब यामादैज़्‍याव।
REV 13:18 आव बुझिन्‍याए जूँनी गहक चाहिज़्‍या। जोए ओगहक लिज़्‍या, होए नो राछ्यासए ओनमर ओसैंवक। नो नमरए तोबो मिँए उमिन सतैंज़्‍याव। नोए ओनमर छ सय छयसथी ज़।
REV 14:1 हाःत ज़ फरी तखेप ङाभाल्‍सिक परमेस्‍वरए ओपाथा स्‍वर्गताव सियोन दाँदात च्‍याँःसिद उलिज़्‍याव ङारँःके। नोस याचाँदीत ओल उमिन स़ोनो ओबाबुए उमिन सर्सिउ तलाख चवालीस हजार मिँर यालिज़्‍याव।
REV 14:2 हाःत ज़ स्‍वर्गतिन बनै घ्योःव ऱीए ओर्गा स़ोनो नम गर्जिज़्‍याव मिताव गा उहुज़्‍याव ङाथैके। नो ङाथैव गा मिँराए सारङ्ग यातप्‍ज़्‍याव मिताव ज़ ओथास्‍ज़्‍याव।
REV 14:3 नोराए परमेस्‍वरए उसिंहासन ङ़ाक, चारता जन्‍तु मितावराए याङ़ाक स़ोनो चौबीस जना स़ेरराए याङ़ाक साःरो गित तोबो यागैज़्‍याव। नो गित सैंज़्‍यावर परमेस्‍वरए आव मानुवानी फुर्सुल ओराजैव तलाख चवालीस हजार उमींराकिन सुए ज़ यामासैंज़्‍याव।
REV 14:4 नोर पातर्‍या पातर्नी माजैसिउ बनै छैंवर परमेस्‍वरए ओपाथाए उछीं उछीं बाज़्‍यावर ज़। नोर आव मानुवाताव मिँ भरिरानी लँःसिउ, परमेस्‍वर स़ोनो ओपाथानी निजूँनी उस॰कताव उथैसिउर ज़।
REV 14:5 आवराए यायाःत धुत पाँ ब काता ज़ माहुइ, कान्‍त ज़ याखत माल्‍योर लिज़्‍यार।
REV 14:6 हाःत ज़ फरी ब तोबो चाकर्‍यालाई नमत उभुर्ज़्‍याव ङारँःके। नोलाई आव मानुवाताव प़ाइँ राज्‍यालावर, प़ाइँ जातलावर, प़ाइँ थोलावर, प़ाइँ खामनी पाँज़्‍याव मिँरालाई खर्क ज़ माखेम्‍न्‍या चाव था सथैन्‍या यासिउ उलिज़्‍याव।
REV 14:7 नो बनै चोइस अइ लिद क़िके, “परमेस्‍वरलाई रँःद छे·द ओमान नैदिचिके, मिँ भरिरालाई ओराफाल्‍रिज़्‍याव छ्याम हुद ले। है जैद नाम नम स़ोनो समुन्‍द्रर ऱीमुलर जैज़्‍यावए ओङ़ाक फुलुप्‍सिद ओसेवा दोचिके।”
REV 14:8 हाःत ज़ फरी नोए उछीं उछीं छुत तोबो चाकर्‍या हुद अइ लिके, “खदम ताके! नो बनै उमिन थासो बेबिलोन सहर खदम ज़ ताके। नोए प़ाइँ जातलाव मिँरालाई ओदोज़्याव पातर्नी य़ेननी समँःद याफसङ्गैक्‍यो।”
REV 14:9 नकिन फरी नो ऩेब्‍लो चाकर्‍यानी निछीं निछीं छुत तोबो चाकर्‍या हुद अइ लिद क़िके, “सुवाराए नो राछ्यास स़ोनो नोए उसुरूप जैसिउ अङग्‍यानी निसेवा दाद राछ्यासए ओछाप याकुइत तादी ब, याचाँदीत तादी ब, याझाःकिनी,
REV 14:10 नोरालाई मनी परमेस्‍वरए उरिसलाव मासचिरिसिउ चर्कासो दाखमद्य मिताव उखुरीनी सवैन्‍या ले। नोर पाथाए ओङ़ाक स़ोनो परमेस्‍वरए छैंव ओचाकर्‍याराए याङ़ाक गन्‍धक स़ोनो मेंःल मासहिसिधुन्‍या दुख दैन्‍या लेर।
REV 14:11 नलाव दुख याज़्याव म़िकुइ खर्क ज़ खेम्‍न्‍या माले। जोराए नो राछ्यास स़ोनो उसुरूप जैसिउ अङग्‍यानी निसेवा दाद राछ्यासए उमिनताव छाप रैज़्‍यार होराए लाकनी रील खर्क ज़ सन्‍च दैन्‍या मालेर।
REV 14:12 परमेस्‍वरए ओपाँर भैंःद येसुलाई यायुँ हुप्‍ज़्‍याव छैंव उमींर आव पाँत थ॰रिद ल्‍यो परिके।”
REV 14:13 हाःत ज़ फरी स्‍वर्गनी तोबो गाए अइ उलिज़्‍याव ङाथैके, “आव सर्के, आकिनी प्रभुए उमिनत सिज़्‍यावर असिक दैवर तान्‍या लेर।” छैंव पुरूसए ब, “हैज़, नोर याय़ेननी यार्सा नैन्‍या लेर, याजेला ब याछींत ज़ हुन्‍या ले।”
REV 14:14 हाःत ज़ फरी तोबो बनै पाल पालो बादल तर्त मिँ मिन्‍सिउ मिताव च़ुसिद उलिज़्‍याव ङारँःके। नोए ओङ़ैत सुने मुकुत जासिउ, उकुइत बनै छाव राँकासी क्‍योःद ओनैज़्‍याव।
REV 14:15 फरी स्‍वर्गताव ध्‍यान झ़िमनी परमेस्‍वरए ओचाकर्‍या तोबो पुलुस्‍द नो बादलत च़ुसिद लिज़्‍यावलाई बनै चोइस क़िद अइ दोक्‍यो, “मानुवाताव नबाली मींःद सिम्‍न्‍या बेला ओतावए नराँकासी हाइद एन्‍के।”
REV 14:16 नकिन नो बादलत च़ुसिद लिज़्‍यावए मानुवा तर्त ओराँकासी चलैद मानुवाताव बाली एन्‍क्‍यो।
REV 14:17 नकिन फरी छुत तोबो चाकर्‍या स्‍वर्गताव ध्‍यान झ़िमनी पुलुस्‍के। नोए उकुइत मनी तोबो बनै छाव राँकासी उलिज़्‍याव।
REV 14:18 नकिन फरी ब मेंःए मुल्‍का ङ़ैताव तोबो चाकर्‍या थाननी हुद नो उकुइताव छाव राँकासी ल्‍यो चाकर्‍यालाई बनै चोइस क़िद अइ दोक्‍यो, “मानुवाताव जोम्‍परसैर मींःद लेर। छाव नराँकासी चलैद ओजोम्‍पा भरी सतेद यासिम्‍के,” है ओदोक ते,
REV 14:19 नो चाकर्‍याए मानुवात ओराँकासी चलैद जोम्‍पा भरी सतेद सिम्‍द परमेस्‍वरए उरिसलाव पीन्‍या ओकोलोल याख्याक्‍यो।
REV 14:20 नो जोम्‍परसैर सहरकिन पाखाङ यापीक झी बनै पुलुस्‍द स़ोंसय किलोमितर भरिवाल घोरा गदैन्‍यावाकाव भल बाके।
REV 15:1 फरी ङाभाल्‍सिक नमत तोबो बनै अचम्‍बलाव सरेस ङारँःके। याकुइत ऩुल्‍पा ऩुल्‍मा ल्‍यो सात जना चाकर्‍यार ङारारँःके। आवर ज़ प़ाइँरानी छींताव ऩुल्‍पा ऩुल्‍मार, परमेस्‍वरए उरिस नत ज़ खेम्‍न्‍या ले।
REV 15:2 नकिन तोबो मेंःस बरे·सिउ धर्पन स्‍यासो बनै घ्योःव समुन्‍द्र मिताव ङारँःके। नोए ओतर्त परमेस्‍वरए नोरालाई ओरायो सारङ्गर याकुइत ल्‍योर कुधु ज़ च्‍याँःसिद यालिज़्‍याव ब ङारारँःके। नो च्‍याँःसिद लिज़्‍यावर नो ङ़ादाङाव राछ्यास स़ोनो नोए उसुरूप जैसिउ अङग्‍याए ओछाप मारैवर, ओलकिन झेंःस्‍या तावर ज़।
REV 15:3 नोराए परमेस्‍वरए ओनोकोर मोसा स़ोनो परमेस्‍वरए ओपाथाए ओभजन अइ लिद यागैज़्‍याव, “अ परमप्रभु, बनै नसक्ती ल्‍यो गेपरमेस्‍वर, नँ नय़ेन भरी बनै घ्योःव स़ोनो अचम्‍बलाव ज़ लिज़्‍या। नँ प़ाइँ जातलावराए याराजा, नदोज़्‍याव भरी ब बनै सतलाव साचो वाज़ लिज़्‍या।
REV 15:4 है जैद अ प्रभु, नँलाई रँःद माछे·न्‍या सु ची उलिज़्‍याव? नमिन सघ्योःद मायान्‍या ब सु ची उलिज़्‍याव? नँ वाज़ सतलाव छैंव नलिज़्‍या। प़ाइँ जातलाव मिँर नखँत फुलुप्‍सिद धो दान्‍या लेर। न्‍यायस नदोज़्‍याव य़ेन भरी छर्लङ्ग ज़ रैंःद ले।”
REV 15:5 आव भरी ओतावत फरी ब ङाभाल्‍सिक स्‍वर्गताव ध्‍यान झ़िम फैसिद परमेस्‍वर उलिज़्‍याव प़ाइँरानी चोखो पो ङारँःके।
REV 15:6 हाःत ज़ नो ङ़ादाङाव याकुइत ऩुल्‍पा ऩुल्‍मा ल्‍यो सात जना चाकर्‍यार ध्‍यान झ़िमनी पुलुस्‍हुकेर। नोर बनै तक तकौ क्‍वा जासिउर, याछातीत सुने पाता पो·सिउर यालिज़्‍याव।
REV 15:7 नकिन नो चारता जन्‍तु स्‍यासोरानी तोबोए नो सात जना चाकर्‍यारालाई एकतार जींदो ज़ लिज़्‍याव परमेस्‍वरए उरिस सब्‍याल्‍सिउ सात गोता सुने खुरी याएक्‍यो।
REV 15:8 हाःत ज़ नो स्‍वर्गताव ध्‍यान झ़िम भरिल परमेस्‍वरए ओज़गै स़ोनो ओसक्तीनिकाव म़िकुइए सब्‍याल्‍क्‍यो। नो सात जना चाकर्‍याराए याकुइताव ऩुल्‍पा ऩुल्‍मा ओमाखेमा पै नो ध्‍यान झ़िमल सु ज़ मापसिधुकेर।
REV 16:1 नो सात जना चाकर्‍यारालाई ध्‍यान झ़िमनी तोबो गाए अइ ओरादोज़्‍याव ङाथैके, “जे बाचिकेदा, नो परमेस्‍वरए उरिसलाव सात गोता खुरीर मानुवात याराथुचिके,” है ओरादोक ते,
REV 16:2 उस॰कतावए उखुरी मानुवात उथुव प़ाइँना नो राछ्यासए ओछाप रैवर स़ोनो नोए उसुरूप जैसिउ अङग्‍यालाई धो दाज़्‍याव मिँ भरिराए याक्‍याँत धो सहिउ युँ माजामो घाइर ताकेर।
REV 16:3 नकिन फरी होए उछींताव चाकर्‍याए उखुरी समुन्‍द्र तर्त उथुव प़ाइँना सिउ मिँए उझी स्‍यासो ताद समुन्‍द्रलाव ताज़्‍याव भरी ओपो·स ज़ सिकेर।
REV 16:4 नकिन फरी नोनी निछींताव चाकर्‍याए उखुरी ऱीमुल जीदा, भै जीदा उथुक नलाव ऱी भरी झी ज़ ताके।
REV 16:5 नै ओताव प़ाइँना ऱीराए ङ़ैताव चाकर्‍याए अइ लिद ओपाँज़्‍याव ङाथैके, “अ सतलाव छैंव प्रभु, ङ़ादाकिन ब लिज़्‍याव, एकम्‍न्‍या ब लिज़्‍याव, आव नरायो सजा न्‍यायस ज़ नदोके।
REV 16:6 आव सजा दैवराए भाःकिन ज़ नअगमबक्तारालाई, छैंव नमींरालाई याझी सोभोद्याद सैःव ज़ यारानैज़्‍याव। अब ते नोरालाई झी ज़ नरासवैके। नोर नो दैन्‍याकावर ज़ याल्‍यो।”
REV 16:7 हाःत ज़ नो थाननी मनी तोबो गा अइ लिद हुके, “हैज़ परमप्रभु बनै नसक्ती ल्‍यो गेपरमेस्‍वर, आव नफालो भरी साचो न्‍यायस ज़ नफाल्‍के।”
REV 16:8 नकिन नो स़ोम्‍लोराए याछींताव चाकर्‍याए उखुरी निमी तर्त उथुक घामए मिँरालाई हिप्‍न्‍या जैद ओरायोए,
REV 16:9 नोरालाई य़ेप य़ेप ऱावए यासघाक्‍यो। हितावत मनी नोराए यायुँ माफर्कैर, परमेस्‍वरए ओमान ब नैद माएकेर, झन नो ऩुल्‍पा ऩुल्‍मा जैन्‍या ओहक लिज़्‍याव परमेस्‍वरलाई उमिन हाइद थलो ज़ नैकेर।
REV 16:10 नकिन नो चारताराए याछींताव चाकर्‍याए उखुरी नो राछ्यासए उसिंहासनत उथुक ओराज्‍या भरी चुम चुमो ज़ ताके। नलाव लिज़्‍याव भरिराए यादुखए यासे कर्‍याप कैकेर।
REV 16:11 नोराए मनी यायुँलाई माफर्कैकेर, बुरू याय़ेनलाई ब माऱास्‍द नो याघाइरानी यादैव दुखए झन स्‍वर्गताव परमेस्‍वरलाई थलो ज़ नैकेर।
REV 16:12 नकिन नो पाँच जनाराए याछींताव चाकर्‍याए उखुरी घ्योःव यूफ्रेतिस भैल उथुक नलाव ऱी भरी ओपो·स ज़ सा·के। नो बगरल पुर्बनी हुरिज़्‍याव राजाराए यायेम ब तयार ताके।
REV 16:13 हाःत ज़ नो अजिङ्गरए ओयाःनी तोबो, राछ्यासए ओयाःनी तोबो, नोए ओपाँ सथैज़्‍याव ओनैंए ओयाःनी तोबो, नोर स़ोम्‍लोए यायाःनी ज़ बोकोरो स्‍यासो माचाव पुरूसर पुलुस्‍केर।
REV 16:14 नोर अचम्‍बलाव सरेसर सतैंज़्याव माचाव पुरूसर ज़। नोर आव मानुवाताव राजा भरिरालाई बनै ओसक्ती ल्‍यो परमेस्‍वरए जैद ओरायो खेम्‍न्‍या छ्यामकाव लरैंए उजूँनी दुप्‍नाज़्‍यावर ज़।
REV 16:15 “है जैद जे सैंसिद लिच्‍यो। ङा कुना हुज़्‍याव मिँ मिताव सुए ज़ यामासैंद ङाहुरिज़्‍या। जो सैंसिद झाःसिद लिज़्‍या, हो ओक्‍वार सामा दाद ओनैकिन नाङग्‍या ताद लाज मोर्नो माताद धन्‍याकाव ज़ लिज़्या।”
REV 16:16 नकिन नो बोकोरो स्‍यासो पुरूसराए मानुवाताव राजा भरिरालाई हिब्रू खामनी तोबो आर-मागेद्दोन यादोज़्‍याव पोल यारादुप्‍केर।
REV 16:17 नकिन नो सात जना चाकर्‍यारानी प़ाइँरानी छींताव चाकर्‍याए उखुरी बतासत उथुक स्‍वर्गताव ध्‍यान झ़िमलाव सिंहासनतिन तोबो गा, “अब ते खेम्‍के,” है लिद हुके।
REV 16:18 हाःत ज़ म्‍याल्‍याकनी मिलिक ताद नमर गर्जिद नामर ब थोनो·सिके। नो भोंचालो बनै घ्योःव ओतावए आव मानुवात मिँर यातावकिन खर्क ज़ नाःल्‍दिउ ओमाहुताव।
REV 16:19 नो भोंचालोनी आव मानुवाताव बनै उमिन थासो सहर स़ोंभा ताद प़ाइँ राज्‍यालाव सहरर धलिकेर। है जैद नो उमिन थासो बेबिलोन सहरलाई उजुँ यान्‍या मामेंःद परमेस्‍वरए उरिस सब्याल्सिउ खुरीनी दाखमद्य सवैक्‍यो।
REV 16:20 समुन्‍द्र खार्लाव तापु भरी ब ओपो·स ज़ गदिकेर, हाँर ब आदा बाकेर लिन्‍या ज़ माताके।
REV 16:21 तिसरैर ब बनै घ्योःव घ्योःव तुगुर दँकावर नमतिन मिँराए यातर्त तेकेर। नो तिसरैनिकाव ऩुल बनै माचाव ओतावए मिँराए परमेस्‍वरए उमिन हाइद बनै ज़ थल्‍केर।
REV 17:1 हाःत ज़ नो याकुइत खुरी ल्‍यो सात जना चाकर्‍यारानी तोबोए ङालाई है दाँक्‍यो, “आत हुन्‍के, ङा नँलाई ऱीराए तर्त च़ुसिद लिज़्‍याव पातर्नी मेंमाए ओदैरिज़्‍याव सजा सतैंद ङाईंरिज़्‍या।
REV 17:2 नोस आव मानुवाताव राजा भरिराए पातर्‍या जैसिद, याधूँलाव मिँ भरिए ब नोस निताव यादोव य़ेनए मँःव मितावर ताद बनै महकिकेर।”
REV 17:3 हाःत ज़ परमेस्‍वरए उपुरूसए ङालाई झजल्‍कैद नो चाकर्‍याए ङालाई तोबो बनल ओलाँनाव मिताव ताके। नङ नो मेंमालाई घ्यामो राछ्यासए ओतर्त च़ुसिद उलिज़्‍याव ङारँःके। नो राछ्यासए ओङ़ै सात गोता, उरँः दस गोता उलिज़्‍याव। ओक्‍याँ भरी परमेस्‍वरकिन स॰द युँ माजामो मिनर सर्सिउ उलिज़्याव।
REV 17:4 नो मेंमा फरी घ्यामो स़ोनो पींव क्‍वा क्‍वाइसिउ उलिज़्‍याव। ओक्‍याँ भरी सुन चाँदी, हिरामुतीए झलैसिउ उलिज़्‍याव। उकुइत फरी सुने खुरील ओदोव युँ माजामो य़ेनर, ओदोव असतर नल सब्‍याल्‍सिउ उलिज़्‍याव।
REV 17:5 नोए ओचाँदीत तोबो बिन्‍ज़ा बिन मिताव मिन सर्सिउ उलिज़्‍याव। नो सर्सिउ आव ज़, “माहान बेबिलोन, मानुवाताव पातर्नीर स़ोनो युँ माजामो पाँराए याआमा ज़।”
REV 17:6 नो मेंमालाई परमेस्‍वरए छैंव उमींराए याझी स़ोनो येसुए ओसाची याज़्‍यावराए याझीए मँःद उलिज़्‍याव ङारँःके। है जैद नोलाई रँःद अचम्‍ब ज़ ङाताके।
REV 17:7 हाःत ज़ नो चाकर्‍याए ङालाई, “नँ काराव अचम्‍ब ताद नलिज़्‍याव? नो मेंमाए ओअर्थ स़ोनो नोलाई घुर्द नैज़्‍याव ओङ़ै सात गोता उरँः दस गोता ल्‍यो राछ्यासए ओअर्थ ब पलास्‍द ङाईंरिज़्‍या।
REV 17:8 नो नरँःव राछ्यास ङ़ादा ते ओल्‍यो, आख ते माले। हैदी ब नो सुन्‍द मुन्‍दौ भल्‍खादानी तखेप पुलुस्‍द हाःकिन नासदा ज़ बान्‍या ले। है जैद आव नाम नम ओमातादकिनकाव अजम्‍बरी जुनील बान्‍या पोस्‍तोकोल यामिन माल्‍यो भरी नो तखेप सिद जनो राछ्यासलाई रँःद अचम्‍ब ज़ तान्‍या लेर।
REV 17:9 “आवए ओअर्थ भरी यागहक ल्‍योराए उतीरक। नो राछ्यासए सात गोता ओङ़ैए ओअर्थ नो मेंमा च़ुसिद उलिज़्‍याव सात गोता पोक्‍यार ज़।
REV 17:10 नोर सात राजार ज़। नो सात राजारानी पाँच राजार खदम ताधुकेर, तोबो आज्‍यालकाव लिज़्‍याव ज़, तोबो आःपै माहुताए। नो उहुवत जाँवा पै वाज़ लिरिज़्‍या।
REV 17:11 नो ङ़ादा ल्‍यो छींनी सिउ राछ्यास मनी नो सात राजारासकावनी तोबो ओल्‍यो। नो फरी उहुवत नो सात राजात चा·सिद आथौं राजा ब तारिज़्‍या। हाःत ज़ नो ब नास तारिज़्‍या।
REV 17:12 “फरी नो नरँःव राछ्यासए दस गोता उरँःर दस राजार ज़। नोराए आःपै याराज्‍या मादैतार। हितावत ब नोर नो राछ्यासस तघन्‍ताए उजूँनी राज्‍या चलैन्‍या हक दैन्‍या लेर।
REV 17:13 नोर प़ाइँए यायुँ तोबो युँ ज़ लिज़्‍या। है जैद नोराए यासक्तीर याहकर प़ाइँए नो राछ्यासए उकुइत ज़ सूँपिन्‍या लेर।
REV 17:14 नोराए परमेस्‍वरए ओपाथास लरैं दान्‍या लेर। निताव यादोवत नो पाथा प्रभुराए याप्रभु, राजाराए याराजा ओल ज़ ओतावए नोरालाई हारैन्‍या ले। ओलसकाव लिज़्‍याव भरी ओल ओराछाँतिउर, ओराखुलोर स़ोनो ओसतत लिज़्‍यावर ज़।”
REV 17:15 नकिन नो चाकर्‍याए फरी ब है दाँक्‍यो, “नो पातर्नी मेंमा च़ुसिद उलिज़्‍याव नरँःव ऱीर प़ाइँ राज्‍यालावर, प़ाइँ जातलावर, प़ाइँ खामनी पाँज़्‍याव माहोल्‍या मिँर ज़।
REV 17:16 नो नरँःव दस गोता राजार फरी नो राछ्यासस खैद नो पातर्नी मेंमालाई सोद भोरो·सिद नाङग्‍या पात्‍या जैद ओस्‍याकरीर कैद मेंःल ख्यान्‍या लेर।
REV 17:17 है जैद परमेस्‍वरए ओपाँ भरी ओमायो·वा पै ओल उयुँलाव मिताव य़ेन दाव परींन्‍याए जूँनी नो दस राजारालाई तयुँ ज़ जैद्याद याहक भरी नो राछ्यासलाई यान्‍या याजैक्‍यो।
REV 17:18 नो नरँःव पातर्नी मेंमा फरी मानुवाताव राजा भरिराए याङ़ैताव बनै उमिन थासो सहर ज़।”
REV 18:1 आव भरी ओतावत फरी स्‍वर्गतिन छुत तोबो चाकर्‍या उहुज़्‍याव ङारँःके। नोए ओहक बनै घेप्‍पा उलिज़्‍याव, ओज़गैए आव मानुवालाई ज़गैव ज़ जैक्‍यो।
REV 18:2 नो बनै चोइस अइ लिद क़िके, “माहान बेबिलोन उमिन ज़ म़ाके, उमिन ज़ म़ाके। नोए ओपो भरी झ़्यार, माछैंव पुरूसर स़ोनो युँ माजामो बाज़ार लिन्‍या पो ज़ ताके।
REV 18:3 प़ाइँ राज्‍यालाव मिँर नोए ओदोज़्‍याव युँ माजामो य़ेनत फसङ्गिद मँःव मिताव ताकेर। मानुवाताव राजा भरी ब नोस ज़ पातर्‍या जैसिकेर। मानुवाताव बेपारीरास नो मेंमाए उयुँ मानैधुद उरँःव भरी लँःद ओराएज़्यावए नोर बनै धनी ताकेर।”
REV 18:4 हाःत ज़ स्‍वर्गत फरी ब छुत तोबो गा अइ लिद ओपाँज़्‍याव ङाथैके, “अ ङामिनताव ङामींर, नो मेंमाए ल्‍योनी पुलुस्‍द ओपापत लन्‍था मादाद तँङ लिच्‍यो, म़ानी नोए ओक्‍याँताव सजार जे जेक्‍याँत मनी हुन्‍या ले।
REV 18:5 नोए ओपापर नम सुइँःत पै बोर्सिनाद लेर। नो भरी परमेस्‍वरए मामेंःव।
REV 18:6 है जैद प्रभु, नोलाई ओदोव मितावनी ज़ ओसजा एके, ओदोव य़ेनकिन दोबोर ज़ एयो। मिँरालाई उखुरीनी ओरासवैव भरी ब ओललाई दोबोर ज़ सवैयो।
REV 18:7 ओल खा सघ्योःसिद थाँतस ओल्‍यो, हाःज़ ओबकम मिलैद्याद धो खासिद लिन्‍या जैयो। नोए ङ़ादा उयुँल उयुँल है लिज़्‍या, ‘ङा रानी ज़ ङालिज़्‍या। राँदी मेंमा मिताव ङामाले, सोगो ब खर्क ज़ दान्‍या ङामाले।’
REV 18:8 है जैद नितावए ओक्‍याँत तछात ज़ ऩुल्‍पा ऩुल्‍मार हुद, नोलाई बेथार अनिकालर ताद उयुँर स्‍यासे तेद मेंःए ओज़्‍यास तान्‍या ले, काराव ल्‍यो ताकिन नोलाई फाल्‍ज़्‍याव परमेस्‍वर बनै ओसक्ती ल्‍यो लिज़्‍या।
REV 18:9 “है जैद आव मानुवाताव राजार, स़ोनो नो मेंमास थाँतस लिद युँ माजामो य़ेन दोवराए नो मेंमालाई याख्याव मेंःए उम़िकुइ नमदा ज़ ओबाज़्‍याव रँःद नोराए यायुँर पा·वा पा·वा घर्न्‍या लेर।
REV 18:10 नोए उदुखलाई मारँःधुद याछ्याचेए तादाङ ज़ च्‍याँःसिद अइ लिन्‍या लेर, ‘हाइ! हाइ! नाःल्‍दिउ सहर, बनै नसक्ती ल्‍यो बेबिलोन, तघन्‍तात ज़ नसजा हुके।’
REV 18:11 “मानुवाताव बेपारीर मनी यासमानर लँःज़्‍यावर खदम ज़ यातावए पाँकी पाँ घर्न्‍या लेर।
REV 18:12 नो बेपारीराए यासमानर आवर ज़ — सुन चाँदीर, हिरामुतीर, नप नबो कपासे क्‍वार, रेसम क्‍वार, घ्यामो स़ोनो घ्यामर्‍यासो क्‍वार, चाव सी ङरो सीं, हातीए ओधारार, प़ाइँ किसिमलाव ओएः ल्‍यो सीं जार, लुँए जार, पितले जार, झँए जार,
REV 18:13 दालचिनीर, मसलार, धुपर, अतरर, ओएः ल्‍यो म़ासर, दाखमद्यर, मनमर, तामर, हारर, बेधार, घोरार, घोराराए यास़ेल्‍ज़्‍याव गद्दीर, बाँदार स़ोनो मिँर।
REV 18:14 है जैद नो बेपारीर, ‘अब ते नयुँए ओपैंज़्‍याव भरी उमिन ज़ म़ाके। नखिम्‍ज़्‍याव मिताव जिली मिलीर, चाचा नानार कातानी ची नदैरिज़्‍याव?’
REV 18:15 “है जैद ननी धनी ताव बेपारीर नो मेंमाए ओदैव दुखर रँःद नोर याछ्याचेए तादाङ ज़ च्‍याँःसिद बनै ज़ लँसिद अइ लिन्‍या लेर,
REV 18:16 ‘हाइ! हाइ! नाःल्‍दिउ सहर बेबिलोन मेंमा नप नबो घ्यामो कपासे क्‍वार क्‍वाइसिद लिज़्‍याव, हिरामुती सुन चाँदीए झलैसिद लिज़्‍याव,
REV 18:17 कै जैद तघन्‍तात ज़ नाःकाव नधन सम्‍पती चुयाप ओताव?’ “नकिन फरी ऱी जहाज चलैज़्याव कप्‍तानर, होराए याधूँलावर स़ोनो ऱी जहाजत आदा होदा लिद बेपार दाद ङासिज़्यावर तादाङ च्‍याँःसिद,
REV 18:18 नो सहरनिकाव चाँःद पुलुस्‍ज़्‍याव म़िकुइ नमदा ज़ ओबाज़्‍याव रँःद नोर यासोगोए अइ लिद क़िकेर, ‘हाइ! हाइ! आव अचम्‍बलाव नाःल्‍दिउ सहर मिताव उपुर काङ्ङ ची उलिज़्‍याव?’ है लिद,
REV 18:19 याङ़ैनी धुली राल्‍सिद बनै पाँकी पाँ लँसिद है लिकेर, ‘हाइ! हाइ! नाःल्‍दिउ सहर ओल्‍यो। नो सहरनी ज़ ऱी जहाजत बाज़्‍याव भरी ब प़ाइँ धनी ताद याल्‍यो। कै जैद तघन्‍तात ज़ चुयाप ओताव?’ है लिकेर।
REV 18:20 ‘खाली जे स्‍वर्गत लिज़्‍यावर, परमेस्‍वरए छैंव उमींर, ओसाचीर स़ोनो अगमबक्तार ते, परमेस्‍वरए नो मेंमाए ओक्‍याँताव ओसोभोव रिसलाई रँःद रेंचिके। काराव ल्‍यो ताकिन नो मेंमाए जेउपर्त ओदोव अन्‍याय ओसजा परमेस्‍वरए याद नैव।’ ”
REV 18:21 हाःत ज़ तोबो बनै ओर्सा ल्‍यो चाकर्‍याए तोबो बनै घ्योःव राँथै लुँ मिताव छींद अइ लिद समुन्‍द्रल ख्याक्‍यो, “नो घेप्‍पा बेबिलोन सहर मनी इतावनी ज़ घेप्‍पा रिसस ख्यासिद आदा बाके लिन्‍या ज़ तान्‍या माले।
REV 18:22 हाःकिन नल सारङ्गए गा ब थास्‍न्‍या माले, बाँसुलीए गा ब थास्‍न्‍या माले, भोंकरए गा ब थास्‍न्‍या माले, काता गाजा बाजाए गा ज़ माथास्‍द साइँसुइँ ज़ तान्‍या ले। य़ेन दाज़्‍यावराए याय़ेन ब रैंःन्‍या माले, तोबो राँथैए गा ब थास्‍न्‍या माले।
REV 18:23 बत्तीए ओपलाँ ब खर्क ज़ रैंःन्‍या माले, ज्‍यार रेर दाद यारेंज़्‍याव गा ब थास्‍न्‍या माले। नो सहरलाव बेपारीर आव मानुवाताव प़ाइँरानी घेप्‍पार याल्‍यो। प़ाइँ राज्‍यालाव मिँर नोए ओमोहोननी ज़ झुकिकेर।
REV 18:24 नो सहरल ज़ फरी अगमबक्तार, छैंव उमींर स़ोनो मानुवात यारासैःव भरिराए याझी ब नल ज़ रैंःके।”
REV 19:1 आव भरी ओतावत स्‍वर्गत बनै घ्योःव माहोल्‍याराए गा अइ यालिज़्‍याव ङाथैके, “हालेलुया! प़ाइँनिकाव मानर, प़ाइँनिकाव सक्तीर गेपरमेस्‍वरए उमींर ज़। गेलाई बाँचैन्‍या ब उकुइत ज़ लिज़्‍या।
REV 19:2 नोए ओफाल्‍ज़्‍याव भरी ब साचो न्‍यायस ज़ फाल्‍ज़्‍याव। नो मानुवाताव मिँरालाई युँ माजामो ओय़ेननी बले·ज़्‍याव पातर्नी मेंमालाई ब थिक सजा ज़ याद नैव। परमेस्‍वरए ओसेवा दोज़्याव यारासैःव भरिराए याझी नो मेंमाए ओक्‍याँत ज़ लागिस्‍द, याखिस ब नत ज़ सयो·द नैर।”
REV 19:3 हाःत ज़ फरी ब नो माहोल्‍याराए, “हालेलुया, नो पातर्नी मेंमाए ओसजानिकाव म़िकुइ नमदा ओबाज़्‍याव खर्क ज़ खेम्‍न्‍या माले।”
REV 19:4 फरी नो स्‍वर्गताव राजाए ओङ़ाकाव चौबीस जना स़ेरर स़ोनो चारता जन्‍तु स्‍यासोर नो सिंहासनत च़ुसिद लिज़्‍याव परमेस्‍वरए ओङ़ाक फुलुप्‍सिद, “आमेन, हालेलुया,” लिद ओसेवा दोकेर।
REV 19:5 हाःत ज़ फरी नो सिंहासनतिन तोबो गा अइ लिद हुके, “अ परमेस्‍वरए उमिनताव घेप्‍पा ज़िम्‍ज़ार, ओय़ेन दाज़्‍यावर, ओमान नैद्याज़्‍यावर, परमेस्‍वरए उमिनर सघ्योःदिचिके।”
REV 19:6 नकिन फरी ब बनै घेप्‍पा ऱीए ओर्गा मिताव, स़ोनो नम गर्जिज़्‍याव मिताव बनै घ्योःव माहोल्‍याराए यार्गा अइ लिद यापाँज़्‍याव मिताव ङाथैके, “हालेलुया, परमप्रभु, बनै ओसक्ती ल्‍यो गेपरमेस्‍वरए अब ते ओराज्‍या चलैन्‍यात थूसिके।
REV 19:7 है जैद गे रेंद गेयुँर होलाँ जैद, उमिनर सघ्योःद्याव ताके। अब ते परमेस्‍वरए ओपाथाए उबिह्‍या तान्‍या बेला ब हुद ले। ओब्याहोल्‍यानी मनी बिह्‍याए जूँनी झाःसिद ले।
REV 19:8 नोलाई बनै माँत्‍या तक तकौ चोखो नप नबो कपासे क्‍वार क्‍वाइसिन्‍या याद यानैज़्‍याव।” नो क्‍वाए ओअर्थ परमेस्‍वरए छैंव उमींराए ओल ओसतत लिद यादोव धर्मलाव य़ेनर ज़।
REV 19:9 हाःत ज़ नो चाकर्‍याए ङालाई है दाँक्‍यो, “आव ब सर्के, नो पाथाए उबिह्‍यालाव भत्‍यारल खुल्सिउर असिक दैवर ज़।” नकिन फरी ब नोए, “आव भरी परमेस्‍वरनी हुव थ॰रिउ पाँ ज़ लिज़्‍या।”
REV 19:10 हाःत ज़ ङा नो चाकर्‍याए उखँत फुलुप्‍सिद धो ङादोक, नोए, “नँ ङालाई धो दान्‍या माःक, ङा मनी नँ नदोज़्‍याव मिताव स़ोनो येसुए ओपाँत साची याज़्‍याव ननैंराए यादोज़्‍याव मिताव परमेस्‍वरए ओसेवा दाज़्‍याव ची। है जैद नँ ओल परमेस्‍वरलाई ज़ धो दोके। गे येसुए ओपाँत साची याज़्याव भरी परमेस्‍वरए उपुरूसनी हुव थ॰रिउ पाँ याज़्यावर गेलिज़्या।”
REV 19:11 हाःत ज़ फरी ब ङाभाल्‍सिक नम फैसिउ ङारँःके। नत तोबो पालो घोरालाई चेप्‍द नैज़्‍यावलाई ब ङारँःके। नोए उमिन ‘थ॰रिउ सतस दोज़्‍याव’ उलिज़्‍याव। नोए न्‍यायस ज़ मिँरालाई ओराफाल्‍ज़्याव स़ोनो लरैं ओदोज़्याव।
REV 19:12 नोए उमी मेंःए मुल्‍का मिताव उलिज़्‍याव, ओङ़ैत मुकुतर कुधु ज़ जासिसिउ उलिज़्‍याव। नोए ओक्‍याँत तोबो मिन सर्सिउ उलिज़्‍याव। नो मिन ओल वाज़ ओसैंज़्‍याव, उपुर्कावराए सुए ज़ यामासैंज़्‍याव।
REV 19:13 ओक्‍याँताव ओक्‍वाइसिज़्‍याव ओक्‍वा भरी झील छिम्सिउ उलिज़्‍याव। नोए उमिन “परमेस्‍वरए ओपाँ ज़” नैसिउ उलिज़्‍याव।
REV 19:14 नोए उछींत स्‍वर्गताव परमेस्‍वरए ओफौजी भरी बनै माँत्‍या पाल पालो चोखो कपासे क्‍वार क्‍वाइसिसिउर, पालो घोरार चेप्‍द याहुज़्‍याव।
REV 19:15 नोए आव मानुवाताव राज्‍यारालाई फूइँन्‍याए जूँनी ओयाःत बनै छाव तरवाली पुलुस्‍द उलिज़्‍याव। नोरालाई चलैन्‍या फरी उकुइत झँए झुइ ब रैद नैव। नोए ओराफूइँव भरी बनै ओसक्ती ल्‍यो परमेस्‍वरए नोरालाई उरिसलाव कोलोल झाःद पीन्‍या ले।
REV 19:16 नोए ओक्‍वात स़ोनो ओर्‍यात इताव मिन सर्सिउ उलिज़्‍याव, “आव प्रभुराए याप्रभु ज़, राजाराए याराजा ज़।”
REV 19:17 हाःत ज़ फरी निमीत तोबो चाकर्‍या च्‍याँःसिद उलिज़्‍याव ङारँःके। नो बनै चोइस अइ लिद उक़िज़्‍याव, “अ नमताव भुर्ज़्‍याव बाज़ा भरी, परमेस्‍वरए जैद ओयाचिउ भत्‍यारल दुप्‍सिहुचिके।
REV 19:18 नो भत्‍यारल जे आव मानुवाताव राजाराए यास्‍यार, यासेनापतीर स़ोनो याघेप्‍पाराए यास्‍यार, याघोरार स़ोनो नो घोरा चेप्‍ज़्‍यावराए यास्‍यार, बाँदा माबाँदा, घेप्‍पा ज़िम्‍ज़ार, प़ाइँए यास्‍यार कैव दैन्‍या जेले।”
REV 19:19 नकिन नो उस॰कताव राछ्यास, मानुवाताव राजार, याफौजीरास दुप्‍सिद यालिज़्‍याव ङारँःके। नोर नो पालो घोरा चेप्‍द नैज़्‍याव, ओल परमेस्‍वरए ओफौजीरास लरैं दाना हुद यालिज़्‍याव।
REV 19:20 हाःत ज़ नो राछ्यास नक ज़ क्‍योःसिके। ओल ओसक्ती दैद अचम्‍बलाव य़ेनर दाद ओपाँ सथैज़्‍याव ओनैं ब क्‍योःसिके। नो ओनैं नो ङ़ादाङाव मानुवाताव मिँरालाई राछ्यासए ओछाप झाःद्याद राछ्यासए उसुरूप जैसिउ अङग्‍यालाई सेवा दाव परींद मिँरालाई झुकैज़्याव ज़। है जैद परमेस्‍वरए नोनी ऩेब्‍लोलाई ज़ गन्‍धकनी चाँःज़्‍याव मेंःल जींदो ज़ निख्‍याक्यो।
REV 19:21 उपुर्काव नीस हुव याफौजीर ते नो पालो घोरा चेप्‍सिउए ओयाःताव तरवालीनी ज़ सिकेर। नोराए यास्‍यार कैद नमताव बाज़ा भरी ब वाँःकेर।
REV 20:1 हाःत ज़ फरी तोबो चाकर्‍या स्‍वर्गतिन उहुज़्‍याव ङारँःके। नोए उकुइत नो सुन्‍द मुन्‍दौ भल्‍खादालाव साँचा ब उलिज़्‍याव, बनै घेप्‍पा झँए साँगल ब उलिज़्‍याव।
REV 20:2 नोए नो ङ़ादाङाव अजिङ्गरलाई क्‍योःद तहजार बर्स पै किद नैक्‍यो। नो अजिङ्गर भाःकाव झुकैज़्‍याव घुल, दियाबलस यादोज़्याव सैतान ज़।
REV 20:3 है जैद नोलाई भल्‍खादाल ख्याद नो भल्‍खादालाई क·द तालकुची ब झाःक्‍यो। हाःकिन नो हजार बर्स ओमायो·वा पै सैतानए मानुवाताव मिँरालाई सुलाई ज़ झुकैव दैन्‍या माले। नो ओयो·वत वाज़ छ्यावाए जूँनी तखेप ऱास्‍सिन्‍या ले।
REV 20:4 हाःत ज़ फरी स्‍वर्गत सिंहासन मितावर कुधु ज़ ङारारँःके। नत च़ुसिद लिज़्‍यावरालाई फाल्‍न्‍या हक यासिउ उलिज़्‍याव। फरी ब ङाभाल्‍सिक परमेस्‍वरए ओपाँत स़ोनो येसुए ओसाची यान्‍यात याङ़ै च़म्द यारासैःवराए यापुरूसर ब ङारारँःके। नोर नो राछ्यास स़ोनो राछ्यासए उसुरूप जैसिउ अङग्‍यानी निसेवा ब दाव माभैंःकेर, स़ोनो याचाँदीत याकुइत राछ्यासए ओछाप ब झाःव माभैंःकेर। है जैद नोर सिउनी सैंसिद ओल ख्रीसस तहजार बर्स पै राज्‍या दोकेर।
REV 20:5 प़ाइँरानी उस॰कताव सिद सैंसिउर नोर ज़ तान्‍या लेर। उपुर्काव सिउ भरिर ते नो तहजार बर्स ओयो·वत वाज़ तखेप सैंसिन्‍या लेर।
REV 20:6 है जैद नो उस॰कताव पालाकाव सिउनी सैंसिज़्‍यावर बनै असिक दैवर परमेस्‍वरए उयुँलाव मिताव छैंवर लिज़्‍यार। नोर ऩेखेप सिन्‍या मालेर। नोर परमेस्‍वर स़ोनो ख्रीसनी निसेवा दान्‍यार ताद ओल ख्रीसस तहजार बर्स भरी राज्‍या चलैन्‍या लेर।
REV 20:7 नो हजार बर्स ओयो·वत सैतान किसिद उलिज़्‍यावनी ऱास्‍सिन्‍या ले।
REV 20:8 ननी ऱास्‍सिद नोए आव मानुवाताव चार कोन्‍याङाव राज्‍यारालाई, अथबा गोग मागोगरालाई फसङ्गैद लरैं दाना दुप्‍द यारैरिज़्‍याव। नोराए याफौजीर समुन्‍द्रलाव बालुवा स्‍यासो सुए ज़ मागनिधुन्‍या तारिज़्‍यार।
REV 20:9 नोर आव नामलाव तोबो बनै घ्योःव बाँल हुद परमेस्‍वरए मया ओदोज़्याव यरूसलेमल ज़ उमिनतावरालाई याराघिरिहुरिज़्‍यार। हाःत ज़ स्‍वर्गतिन मेंःए मुल्‍का हुद सैतानए ओरारैव फौजीर चुयाप तारिज़्‍यार।
REV 20:10 नोरालाई झुकैज़्‍याव सैतान मनी गन्‍धकनी चाँःज़्‍याव मेंःल ख्यासिरिज़्‍या। नो मेंःल ज़ नो ङ़ादाङाव राछ्यास ब उलिज़्‍याव, नोए उपुरूसनी पाँद झुकैज़्‍याव ओनैं ब नल ज़ उलिज़्‍याव। नोर स़ोम्‍लो खर्क ज़ माजिप्‍तिन्‍या मेंःल लाकनी रील गाप गाप तान्‍या लेर।
REV 20:11 नकिन फरी ङाभाल्‍सिक तोबो बनै घ्योःव पाल पालो सिंहासनत च़ुसिद लिज़्‍यावलाई ङारँःके। नोए ओङ़ाकिन नाम ब धोंःके, नम ब धोंःके। खाली नोनी म़ोंसिन्‍या पो ज़ मादैकिनी।
REV 20:12 हाःत ज़ सिउ भरी घेप्‍पा ज़िम्‍ज़ार सिंहासन ङ़ाक च्‍याँःसिद यालिज़्‍याव ङारारँःके। नक फैसिउ पोस्‍तोकोर ब यालिज़्‍याव। नोरानी तोबो पोस्‍तोको ते अजम्‍बरी जुनीलाव पोस्‍तोको उलिज़्‍याव। हाःत ज़ नो सिउर नो पोस्‍तोको भरिल यादोव य़ेन सर्सिउनी ज़ फाल्‍सिकेर।
REV 20:13 नो फाल्‍न्‍या बेलाए उजूँनी ज़ समुन्‍द्रल स़ुद सिउर ब पुलुस्‍केर, खादरल झाःसिउर ब पुलुस्‍केर, प़ाइँङाव सिउ भरी ज़ पुलुस्‍केर। नोर ओपो·स ज़ सु सु याय़ेननी ज़ फाल्‍सिकेर।
REV 20:14 हाःत ज़ सिन्‍या स़ोनो नर्गनी चुयाप जैज़्‍याव मेंःल ज़ ख्यासिकिनी। नो मेंःल ख्‍यासिन्‍या ज़ ऩेखेप सिन्‍या।
REV 20:15 है जैद जोए उमिन नो अजम्‍बरी जुनीलाव पोस्‍तोकोल ओमासर्सिकिन नो मेंःल ज़ ख्यासिउ परिरिज़्‍या।
REV 21:1 हाःत ज़ फरी ङाभाल्‍सिक साःरो नाम नम ङारँःके। ङ़ादाङाव नाम नम समुन्‍द्रस ज़ खेम्‍के।
REV 21:2 नकिन तोबो भर रे दाव मेंमा ओरेए जूँनी झलैसिउ मिताव छैंव सहर, साःरो यरूसलेम परमेस्‍वरए ल्‍योनी स्‍वर्गतिन उझरिहुज़्‍याव ङारँःके।
REV 21:3 हाःत ज़ स्‍वर्गताव राजाए ल्‍योनी तोबो गा बनै चोइस अइ उलिज़्‍याव ङाथैके, “अबकिन परमेस्‍वरए ओबास मिँरास तारिज़्‍या। है जैद ओल मिँरास लिद नोरालाई उमींर ज़ जैद ओल यापरमेस्‍वर ज़ तान्‍या ले।
REV 21:4 नोरास ज़ लिद याप़िलर सीद्याद खर्क ज़ मासिन्‍या याजैरिज़्‍याव। ङ़ादाङाव माचाव भरी नाम नमरास ज़ ओखेमोए अबकिन सोगो दाद घर्न्‍या ब तान्‍या माले, काताए दुख ब तान्‍या माले,” है लिद पाँके।
REV 21:5 नकिन नो सिंहासनत च़ुसिद लिज़्‍यावए है लिके, “अबकिन प़ाइँ साःरो ज़ ङाजैरिज़्‍या।” फरी ब ङालाई है दाँक्‍यो, “है जैद आव ङापाँ ब सर्के, साचो थ॰रिउ ज़ लिज़्‍या।
REV 21:6 नो ङापाँ आव ज़ — अब ते प़ाइँ यो·के। ङा अल्‍फा स़ोनो ओमेगा ज़। ङा प़ाइँरानी ङ़ाताव, प़ाइँरानी छींताव ङालिज़्या। ङापाँत ऱी छोस्‍ज़्‍याव मिँलाई अजम्‍बरी जुनीलाव ऱी अइज़ याद उऱीछो सैःद्यान्‍या ङाले।
REV 21:7 है जैद ङा ङापाँत जो झेंःस्‍या ताज़्‍या, होए नो असिकर दैरिज़्याव। ङा होए ओपरमेस्‍वर ज़ ङातारिज़्‍या, नो ङाज़ा ज़ तारिज़्‍या।
REV 21:8 फरी ङापाँत छेपोवा ताज़्‍यावर, यायुँ माहुप्‍ज़्‍यावर, युँ माजामो य़ेन दोज़्‍यावर, मिँ सैःज़्‍यावर, पातर्‍या पातर्नीर, मन्‍तर तन्‍तर दाज़्‍यावर, अङग्‍या पुजा दाज़्‍यावर, धुत पाँज़्‍यावर, नो भरिराए याजुँ गन्‍धकनी चाँःज़्‍याव मेंःल लिज़्‍या। है जैद ऩेखेप सिज़्यावर आवर ज़।”
REV 21:9 हाःत ज़ नो याकुइताव खुरील ऩुल्‍पा ऩुल्‍मा लिज़्‍याव सात जना चाकर्‍यारानी तोबोए ङाल्‍योक हुद, “आत हुन्‍के, ङा नँलाई पाथाए ओब्‍याहोल्‍यानी सतैंद ङाईंरिज़्‍या,” है दाद,
REV 21:10 ङालाई परमेस्‍वरए उपुरूसनी झेंःव गोंत लाँद छैंव यरूसलेम सहर स्‍वर्गतिन उझरिहुज़्‍याव सतैंद्याँक्‍यो।
REV 21:11 नो सहरत परमेस्‍वरए ओज़गै उलिज़्‍याव। नो ज़गै बनै ओएः ल्‍यो छैंव यूँखार स्‍यासो झिलिक झिलिक ओताज़्‍याव।
REV 21:12 नो सहर घ्वाँगिल बनै झेंःव भार्ना उलिज़्‍याव। नो भार्नात बाह्र गोता य़ामर यालिज़्‍याव। नलाव पाल्‍यार बाह्र जना चाकर्‍यार यालिज़्‍याव। तोबो तोबो य़ामत इस्राएली बाह्र थरराए यामिनर सर्सिउ उलिज़्‍याव।
REV 21:13 नो य़ामर पुर्ब त॰दा स़ोम्‍लो, पछ्युँ त॰दा स़ोम्‍लो, उत्तर त॰दा स़ोम्‍लो, दखिन त॰दा स़ोम्‍लो यालिज़्‍याव।
REV 21:14 नो सहरए ओभार्ना अदैज़्‍याव गजलाव लुँर ब बाह्र गोता यालिज़्‍याव। नत तोबो तोबो लुँत पाथाए बाह्र जना ओसाचीराए यामिन सर्सिउ उलिज़्‍याव।
REV 21:15 नकिन नो ङास पाँज़्‍याव चाकर्‍याए नो सहरलाई ओय़ामर ओभार्नारास ज़ गोइँन्‍याए जूँनी उकुइत सुने ताङ्गा तोबो रैद ओनैज़्‍याव।
REV 21:16 नो सहरलाई ओगोइँक ओर्ख्‍यो, ओराँ प़ाइँदा ज़ सम सम ताद चार पात्‍या ताके। नो ताङ्गाए ओगोइँनी ओर्ख्‍यो ब ऩेहजार चार सय किलोमितर, ओराँ स़ोनो ओर्झें ब हाःज़ ताके।
REV 21:17 नो सहरलाव भार्नाए ओपाता ओगोइँक नो मनी मिँए ओगोइँनी तादी ब, चाकर्‍याए ओगोइँनी तादी ब, पैंसथी मितर ताके।
REV 21:18 नो भार्नाए उलुँर बनै चाव घ्यामो लुँर यालिज़्‍याव। सहर भरी ते बनै चाव सुन स्‍यासो छैं छैंव यूँखार स्‍यासो उलिज़्‍याव।
REV 21:19 नो गजलाव झाःसिउ लुँ भरी बनै याएः ल्‍यो चाव चावर वाज़ यालिज़्‍याव। उस॰कताव लुँए उमिन स्‍फतीक ताके। हुकिनकाव लुँ नीर, हुकिनकाव लाल, हुकिनकाव पन्‍ना,
REV 21:20 हुकिनकाव गोमेद, हुकिनकाव सारदियस, हुकिनकाव पित्‍मनी, हुकिनकाव पिरोजा, हुकिनकाव पुस्‍पराज, हुकिनकाव लसुने, हुकिनकाव धुम्‍रकान्‍त, हुकिनकाव मार्तीस।
REV 21:21 नो बाह्र गोता य़ाम भरी मुतीनी जैसिउ उलिज़्‍याव। तोबो तोबो य़ाम तोबो तोबो मुतीए ज़ जैसिउ उलिज़्‍याव। सहरलाव दोहार फरी छैंव सिसा मिताव बनै चाव सुन लैसिउ उलिज़्‍याव।
REV 21:22 नो सहर भरिल ते ध्‍यान झ़िम ते काङ्क ज़ ङामारँःके। नलाव ध्‍यान झ़िम ते परमप्रभु बनै ओसक्ती ल्‍यो परमेस्‍वर स़ोनो पाथानी ज़ ची निल्‍यो।
REV 21:23 नो सहरलाई पलाँव जैन्‍या निमीए ओचाहित ब ओमालिज़्‍याव, स़्यावैए ओचाहित ब ओमालिज़्‍याव। नो सहरलाई पलाँव जैज़्‍याव परमेस्‍वरए ओज़गै ज़, सहरलाव बत्ती फरी पाथा ज़।
REV 21:24 हाः बेलाक प़ाइँ राज्‍यालाव मिँर नो ज़गैत ज़ आदा होदा लिन्‍या लेर। मानुवाताव राजा भरिराए ब यासकाव लिज़्‍याव चाव चाव भरी ब नल ज़ रैन्‍या लेर।
REV 21:25 नो सहरल फरी री खर्क ज़ मातान्‍या, ला वाज़ ओतावए नलाव य़ामर ब खर्क ज़ गल्सिन्‍या मालेर।
REV 21:26 है जैद प़ाइँ राज्‍यानिकाव यामिन थासो चाव भरी प़ाइँ नल ज़ हुन्‍या लेर।
REV 21:27 माचाव, युँ माजामो, असत दोज़्‍यावर ते सु ज़ पसिउ दैन्‍या मालेर। पाथाए अजम्‍बरी जुनीलाव ओपोस्‍तोकोल यामिन सर्सिउर वाज़ पसिन्‍या लेर।
REV 22:1 हाःत ज़ नो चाकर्‍याए ङालाई अजम्‍बरी जुनी याज़्‍याव बनै छैं छैंव ऱी हुज़्‍याव तोबो खोला सतैंद्याँक्‍यो। नो खोला परमेस्‍वर स़ोनो पाथानी निल्‍योनी पुलुस्‍द,
REV 22:2 सहर खार्लाव दोहालाव घ्याँ उहुज़्‍याव। नो खोला आफी हुफी अजम्‍बरी जुनी याज़्‍याव सींर ब यालिज़्‍याव। नो सींर बाह्र मास ज़ यासैज़्‍याव, मैनाए पती छुत छुत सै ज़ ओसैज़्‍याव। नो सींराए याख्यार फरी प़ाइँ जातलाव मिँरालाई सगराँन्‍या वासः ओल्‍यो।
REV 22:3 अब ते नल काताए सराप ज़ तान्‍या माले। परमेस्‍वर स़ोनो पाथानी निसिंहासन नल ज़ ताद परमेस्‍वरए उमींराए नल ज़ ओसेवा दोरिज़्‍यार।
REV 22:4 नोराए ओङाः ब रँःधुन्‍या लेर, उमिन ब याचाँदीत ज़ सर्सिन्‍या ले।
REV 22:5 नल री ब खर्क ज़ तान्‍या माले, नोरालाई बत्ती ब चाहिन्‍या माले, निमी ब चाहिन्‍या माले। काराव ल्‍यो ताकिन ओल माहान परमेस्‍वरए ज़ ज़गैव जैद याएरिज़्‍याव। है जैद नोराए ओलस खर्क ज़ माखेम्‍न्‍या ओराज्‍या ब चलैव ज़ नैन्‍या लेर।
REV 22:6 हाःत ज़ नो चाकर्‍याए ङालाई फरी ब है दाँक्‍यो, “आव पाँ भरी युँ हुबो साचो पाँ ज़ लिज़्‍या। नो भाःकिनकाव ओल ओसक्तीर याद पाँव परींज़्‍याव परमेस्‍वरए ज़ ङा ओचाकर्‍यालाई मनी नो चाँदो हुन्‍या पाँर ओसेवा दोज़्याव उमींरालाई सतैंद्यान्‍याए जूँनी ज़ परींद नैनाव।”
REV 22:7 येसुए, “हतप्‍त ज़ ङाहुरिज़्‍या। है जैद आव पोस्‍तोकोलाव सर्सिउ पाँर धिद दोज़्‍याव असिक दैव ज़ तारिज़्‍या,” है लिज़्‍या।
REV 22:8 आलाव सर्सिउ पाँ भरी थैज़्‍याव रँःज़्‍याव ङा यूहन्‍ना ज़। आव पाँ भरी ङाथैवत ङारँःवत नो ङालाई सतैंद्याज़्‍याव चाकर्‍याए उखँत फुलुप्‍सिद धो ङादोनाक ते,
REV 22:9 नोए ङालाई भैंःद मायाद, “नँ ङालाई धो दान्‍या माःक, ङा मनी नँ नदोज़्याव मिताव, परमेस्‍वरए उपुरूसनी पाँज़्याव ननैंर स़ोनो आव पोस्‍तोकोलाव पाँर भैंःद दोज़्यावराए मिताव परमेस्‍वरए ओसेवा दाज़्‍याव ची। है जैद बुरू ओल परमेस्‍वरलाई ज़ धो दोके,” है दाँक्‍यो।
REV 22:10 नकिन नोए ज़ फरी ब है दाँक्‍यो, “आव पोस्‍तोकोलाव सर्सिउ हुन्‍या पाँर छाप झाःद ताम़ोंयो, काराव ल्यो ताकिन नो यो·न्‍या बेला नजिकक ज़ हुद ले।
REV 22:11 है जैद माचाव य़ेन दाज़्‍यावराए माचाव याय़ेन ज़ घदोज़्‍यारक, फुरी लिज़्‍यावर ब फुरी ज़ घलिज़्‍यारक। हो मिताव ज़ धर्मलाव य़ेन दोज़्‍यावराए धर्म ज़ घदोरक, छैंव लिज़्‍यावर ब छैंव ज़ घलिरक।”
REV 22:12 ओल येसुए है लिज़्‍या, “ङा हतप्‍त ज़ ङाहुरिज़्‍या, प़ाइँ मिँरालाई सु सु याय़ेनए ओजेला यान्‍या ङास लिज़्‍या।
REV 22:13 ङा अल्‍फा स़ोनो ओमेगा ज़, प़ाइँरानी ङ़ाताव, प़ाइँरानी छींताव, ओजरा स़ोनो उतुपा ज़।”
REV 22:14 है जैद याक्‍वार छेद छैंवस लिज़्‍यावर असिक दैवर ज़। नोरालाई स्‍वर्गताव परमेस्‍वरए ओसहरल पसिद अजम्‍बरी जुनी याज़्‍याव सींए ओसै ज़्‍यान्‍या यासिउ लिज़्‍या।
REV 22:15 नो सहरकिन पाखाङ ते काः मितावर, मन्‍तर तन्‍तर दाज़्‍यावर, पातर्‍या पातर्नी जैसिज़्‍यावर, मिँ सैःज़्‍यावर, अङग्‍या पुजा दाज़्‍यावर, माचाहिउ य़ेनत यायुँ थू जैद असतलाव य़ेनत लिज़्‍यावर लिज़्‍यार।
REV 22:16 “ङा येसुए, जे पो पोङाव मन्‍दलीराए जूँनी आव पाँर सथैन्‍याए जूँनी ङाचाकर्‍यालाई परींद नैद ङायाचिए। दाऊद राजाए ओजरा ब ङा ज़, ननी परीव ओखार ब ङा ज़, छकाल्‍न्‍याकाव ज़गैव सोम्‍पा ब ङा ज़।”
REV 22:17 परमेस्‍वरए उपुरूस स़ोनो पाथाए ओब्‍याहोल्‍यानी मानुवाताव मिँरालाई, “हुचिके,” है यारादोज़्‍यानी। नो पाँ थैज़्‍यावराए मनी, “हुचिके,” ज़ है उलिरक। है जैद जो ऱी छोस्‍ज़्‍या, हो अजम्‍बरी जुनी याज़्‍याव ऱी ओपैंवा भरी अइज़ ओना उहुक।
REV 22:18 ङा यूहन्‍नाए आव पोस्‍तोकोलाव सर्सिउ पाँ थैज़्‍यावरालाई है ङादाचिज़्‍या — जोए आव सर्सिउकिन छुत आगल्‍या पाँ चा·ज़्‍याव, होलाई परमेस्‍वरए आव पोस्‍तोकोलाव सर्सिउ ऩुल्‍पा ऩुल्‍मार होए ओक्‍याँत ज़ चा·दिरिज़्‍याव।
REV 22:19 जोए फरी आव सर्सिउलाई ओघतैकिन, परमेस्‍वरए होलाई ज़ आव पोस्‍तोकोलाव सर्सिउ नो स्‍वर्गत लिज़्‍याव नोए ओपो स़ोनो अजम्‍बरी जुनी यान्‍या सींए ओसैनी उजुँ मादैन्‍या जैरिज़्‍याव।
REV 22:20 आव ङासरो पाँत ओल ओसाची याज़्‍यावए है लिज़्‍या, “ङा हतप्‍त ज़ ङाहुरिज़्‍या।” है जैद ङा यूहन्‍नाए मनी है ङालिज़्‍या, “हैज़ ओताक, प्रभु येसु, चाँदो ज़ घुहुनी।”
REV 22:21 जे परमेस्‍वरए उमींरास गेप्रभु येसुए उयुँ प़ाइँए जेल्‍योदा ओगराँक। आमेन।
