﻿दर्सन.
14.
हाःत ज़ फरी तखेप ङाभाल्‍सिक परमेस्‍वरए ओपाथा स्‍वर्गताव सियोन दाँदात च्‍याँःसिद उलिज़्‍याव ङारँःके। नोस याचाँदीत ओल उमिन स़ोनो ओबाबुए उमिन सर्सिउ तलाख चवालीस हजार मिँर यालिज़्‍याव। 
हाःत ज़ स्‍वर्गतिन बनै घ्योःव ऱीए ओर्गा स़ोनो नम गर्जिज़्‍याव मिताव गा उहुज़्‍याव ङाथैके। नो ङाथैव गा मिँराए सारङ्ग यातप्‍ज़्‍याव मिताव ज़ ओथास्‍ज़्‍याव। 
नोराए परमेस्‍वरए उसिंहासन ङ़ाक, चारता जन्‍तु मितावराए याङ़ाक स़ोनो चौबीस जना स़ेरराए याङ़ाक साःरो गित तोबो यागैज़्‍याव। नो गित सैंज़्‍यावर परमेस्‍वरए आव मानुवानी फुर्सुल ओराजैव तलाख चवालीस हजार उमींराकिन सुए ज़ यामासैंज़्‍याव। 
नोर पातर्‍या पातर्नी माजैसिउ बनै छैंवर परमेस्‍वरए ओपाथाए उछीं उछीं बाज़्‍यावर ज़। नोर आव मानुवाताव मिँ भरिरानी लँःसिउ, परमेस्‍वर स़ोनो ओपाथानी निजूँनी उस॰कताव उथैसिउर ज़। 
आवराए यायाःत धुत पाँ ब काता ज़ माहुइ, कान्‍त ज़ याखत माल्‍योर लिज़्‍यार। 
हाःत ज़ फरी ब तोबो चाकर्‍यालाई नमत उभुर्ज़्‍याव ङारँःके। नोलाई आव मानुवाताव प़ाइँ राज्‍यालावर, प़ाइँ जातलावर, प़ाइँ थोलावर, प़ाइँ खामनी पाँज़्‍याव मिँरालाई खर्क ज़ माखेम्‍न्‍या चाव था सथैन्‍या यासिउ उलिज़्‍याव। 
नो बनै चोइस अइ लिद क़िके, “परमेस्‍वरलाई रँःद छे·द ओमान नैदिचिके, मिँ भरिरालाई ओराफाल्‍रिज़्‍याव छ्याम हुद ले। है जैद नाम नम स़ोनो समुन्‍द्रर ऱीमुलर जैज़्‍यावए ओङ़ाक फुलुप्‍सिद ओसेवा दोचिके।” 
हाःत ज़ फरी नोए उछीं उछीं छुत तोबो चाकर्‍या हुद अइ लिके, “खदम ताके! नो बनै उमिन थासो बेबिलोन सहर खदम ज़ ताके। नोए प़ाइँ जातलाव मिँरालाई ओदोज़्याव पातर्नी य़ेननी समँःद याफसङ्गैक्‍यो।” 
नकिन फरी नो ऩेब्‍लो चाकर्‍यानी निछीं निछीं छुत तोबो चाकर्‍या हुद अइ लिद क़िके, “सुवाराए नो राछ्यास स़ोनो नोए उसुरूप जैसिउ अङग्‍यानी निसेवा दाद राछ्यासए ओछाप याकुइत तादी ब, याचाँदीत तादी ब, याझाःकिनी, 
नोरालाई मनी परमेस्‍वरए उरिसलाव मासचिरिसिउ चर्कासो दाखमद्य मिताव उखुरीनी सवैन्‍या ले। नोर पाथाए ओङ़ाक स़ोनो परमेस्‍वरए छैंव ओचाकर्‍याराए याङ़ाक गन्‍धक स़ोनो मेंःल मासहिसिधुन्‍या दुख दैन्‍या लेर। 
नलाव दुख याज़्याव म़िकुइ खर्क ज़ खेम्‍न्‍या माले। जोराए नो राछ्यास स़ोनो उसुरूप जैसिउ अङग्‍यानी निसेवा दाद राछ्यासए उमिनताव छाप रैज़्‍यार होराए लाकनी रील खर्क ज़ सन्‍च दैन्‍या मालेर। 
परमेस्‍वरए ओपाँर भैंःद येसुलाई यायुँ हुप्‍ज़्‍याव छैंव उमींर आव पाँत थ॰रिद ल्‍यो परिके।” 
हाःत ज़ फरी स्‍वर्गनी तोबो गाए अइ उलिज़्‍याव ङाथैके, “आव सर्के, आकिनी प्रभुए उमिनत सिज़्‍यावर असिक दैवर तान्‍या लेर।” छैंव पुरूसए ब, “हैज़, नोर याय़ेननी यार्सा नैन्‍या लेर, याजेला ब याछींत ज़ हुन्‍या ले।” 
हाःत ज़ फरी तोबो बनै पाल पालो बादल तर्त मिँ मिन्‍सिउ मिताव च़ुसिद उलिज़्‍याव ङारँःके। नोए ओङ़ैत सुने मुकुत जासिउ, उकुइत बनै छाव राँकासी क्‍योःद ओनैज़्‍याव। 
फरी स्‍वर्गताव ध्‍यान झ़िमनी परमेस्‍वरए ओचाकर्‍या तोबो पुलुस्‍द नो बादलत च़ुसिद लिज़्‍यावलाई बनै चोइस क़िद अइ दोक्‍यो, “मानुवाताव नबाली मींःद सिम्‍न्‍या बेला ओतावए नराँकासी हाइद एन्‍के।” 
नकिन नो बादलत च़ुसिद लिज़्‍यावए मानुवा तर्त ओराँकासी चलैद मानुवाताव बाली एन्‍क्‍यो। 
नकिन फरी छुत तोबो चाकर्‍या स्‍वर्गताव ध्‍यान झ़िमनी पुलुस्‍के। नोए उकुइत मनी तोबो बनै छाव राँकासी उलिज़्‍याव। 
नकिन फरी ब मेंःए मुल्‍का ङ़ैताव तोबो चाकर्‍या थाननी हुद नो उकुइताव छाव राँकासी ल्‍यो चाकर्‍यालाई बनै चोइस क़िद अइ दोक्‍यो, “मानुवाताव जोम्‍परसैर मींःद लेर। छाव नराँकासी चलैद ओजोम्‍पा भरी सतेद यासिम्‍के,” है ओदोक ते, 
नो चाकर्‍याए मानुवात ओराँकासी चलैद जोम्‍पा भरी सतेद सिम्‍द परमेस्‍वरए उरिसलाव पीन्‍या ओकोलोल याख्याक्‍यो। 
नो जोम्‍परसैर सहरकिन पाखाङ यापीक झी बनै पुलुस्‍द स़ोंसय किलोमितर भरिवाल घोरा गदैन्‍यावाकाव भल बाके। 
