﻿दर्सन.
3.
“सार्दिस मन्‍दलीलाव लोम्‍बालाई अइ लिद सर्दिके — ओलस परमेस्‍वरए सात गोता उपुरूसर लिज़्‍याव, उकुइत सात गोता सोरो लिज़्‍यावए है दाचिज़्‍याव, जेय़ेन भरी रँःद ङानै। जे जेमिन चाव ओतादी ब जेय़ेननी ते काम मालागिउ सिउ स्‍यासो ताद जेले। 
है जैद जे सैंसिद म़ाव पैंज़्‍याव रहिउ जेय़ेनरालाई याराजागैचिके। जेय़ेन भरी परमेस्‍वर ङाबाबुए ओङ़ाक काता ज़ यो·व ङामारँःताए। 
है जैद परमेस्‍वरए ओपाँ कितावनी जेदैव, कितावनी जेथैव हो चेतैद, जेयुँर त़ोद हितावनी ज़ दोचिके। जे फरी सैंसिद जेमालिकिन ङा कुना हुज़्‍याव मिँ स्‍यासो सुए ज़ यामासैंद जेल्‍योक उमँःजानी ङाहुरिज़्‍या। 
हैदी ब नो सार्दिसल लिज़्‍यावरानी ख्वा ख्वाराए ते आःपै याक्‍वात हिला मासगाल्‍तार। नोर ङास पालो क्‍वा क्‍वाइसिद बाऱिन्‍या लेर। नोर वाज़ निताव दैन्‍याकावर लिज़्‍यार। 
है जैद आव पाँत जो झेंःस्‍या ताज़्‍या, होए पाल पालो क्‍वा क्‍वाइसिरिज़्‍या। ङा नोलाई अजम्‍बरी जुनीलाव पोस्‍तोकोल सर्सिउ उमिन क्‍याल्‍द्यान्‍या ङामाले, बुरू ङाबाबु स़ोनो ओचाकर्‍याराए याङ़ाक उमिन ज़ सथास्द्यान्‍या ङाले। 
आव पाँर जोए थैन्‍या उयुँ लिज़्‍या, होए छैंव पुरूसए मन्‍दलीरालाई है ओरादोव पाँर ओथैवक।” 
“फिलादेल्‍फिया मन्‍दलीलाव लोम्‍बालाई अइ लिद सर्दिके — ओखत माल्‍यो छैंव, सतस लिज़्‍याव, दाऊदए ओराज्‍यालाव साँचा नैज़्‍यावए स्‍वर्गताव य़ाम फैन्‍या स़ोनो गल्न्‍या ओल उकुइत ज़ लिज़्‍या। ओफैक सुए ज़ मागल्धुर, ओगल्क सुए ज़ माफैधुर। निताव उकुइत नैज़्यावए है दाचिज़्याव, 
जेय़ेन भरी ङासैंज़्‍या। जेसक्ती छ्या उलिदी ब ङापाँ दाद ङामिनत जेलाज ओमाहुवए जेङ़ाक तोबो य़ाम फैद नैद ङायाचिए। नो य़ाम सुए ज़ मागल्धुर। 
नो सैतानए ल्‍योदाङाव ‘गे यहूदीर ज़’ है लिद धुतैज़्‍यावरालाई तछा जेखँत फुलुप्‍सिउ ङारापरींरिज़्‍या। हो ताकिन ङा ङायुँ जेस उलिज़्‍याव ओल्‍यो लिन्‍या याज़ सैंन्‍या लेर। 
जे बनै थ॰रिद ङापाँ भरी धिद जेदोवए आव मानुवाताव मिँ भरिरालाई जाँचिन्‍याए जूँनी बनै धो सहिउ दुखर झाःद ङाराएक जेलाई ते नो दुखरानी पाथस ज़ ङापले·चिरिज़्‍या। 
ङा हतप्‍त ज़ ङाहुरिज़्‍या। जेदैरिज़्‍याव इनाम सुए ज़ माछकैधुन्‍याए जूँनी जेस लिज़्‍याव ङापाँर ङासतर माऱास्‍द दोच्‍यो। 
आव पाँत जो झेंःस्‍या ताज़्‍या, होलाई परमेस्‍वर ङाबाबुए उझ़िमलाव खाँबा मिताव ङाजैरिज़्‍या। नो ननी खर्क ज़ भोस्‍न्‍या माले। ङा नत स़ोम्‍लो मिन ङासर्रिज़्‍या, तोबो परमेस्‍वर ङाबाबुए उमिन, तोबो स्‍वर्गतिन हुज़्‍याव परमेस्‍वरए ओसहर साःरो यरूसलेमए उमिन, तोबो साःरो ङामिन। 
आव पाँर जोए थैन्‍या उयुँ लिज़्‍या, होए छैंव पुरूसए मन्‍दलीरालाई है ओरादोव पाँर ओथैवक।” 
“लाउदिकिया मन्‍दलीलाव लोम्‍बालाई अइ लिद सर्दिके — उमिन ‘आमेन’ लिज़्‍याव, ओबाबुए ओसतत लिद थ॰रिउ साची याज़्‍याव, परमेस्‍वरए ओस्रिस्‍तीलाई थालिद्याज़्‍यावए है दाचिज़्‍याव, 
जे जेय़ेन भरी ङारँःज़्‍या, जे ङाय़ेनत ऱाव ब जेमाले, छेरो ब जेमाले। की ऱाव वाज़, की छेरो वाज़ जेताकिन तान्‍या ओल्‍यो। 
खाली जे की ऱाव की छेरो माताद नोल नोलो वाज़ जेतावए ङायाःनी ङावैःचिरिज़्‍या। 
जे है जेलिज़्‍या, ‘गे यादा ताद प़ाइँनी यो·द धनी ताद गेले, गेलाई काताए खाँचो ज़ माले,’ है जेलिज़्‍या। जे ते झन काता ज़ माल्‍यो, नाङग्‍या, युँ नाव, छाम छामो ताद जेलिज़्‍यावदा जेमासैंए। 
ङा जेलाई तोबो पाँ ङायाचिज़्‍या, जे साचो धनी तान्‍या ताकिन ङा ङाल्‍योनिकाव मेंःल उजालैसिउ सुन लँःचिके। नो नाङग्‍या पात्‍या ताद जेलिज़्‍यावनी जेलाजर कप्‍न्‍या ताकिन ङाल्‍योनी पालो क्‍वार लँःद क्‍वाइसिचिके। नो छाम छामो ताद जेलिज़्‍यावनी जेमी सरैंःन्‍या ताकिन ङाल्‍योनी मील झाःन्‍या मलम लँःद थीचिके। 
जोलाई ङा मया ङादोज़्‍या, होलाई हप्‍कैद ङाम·लैज़्‍या। है जैद जेयुँर मासतेद जेयुँर त़ोद ङाय़ेनत कलँ लिचिके। 
ङा य़ामक च्‍याँःसिद कोतो कोतो ङाजैक जोए ङार्गा थैद ओय़ाम फैज़्‍याव, ङा होए उझ़िमल पसिद होस नैं नैं ताद ज़्‍यावर ब सिप ज़ ज़्‍यान्‍या गिन्‍ले। 
आव पाँत जो झेंःज़्‍या, होलाई ङासिंहासनत ङास सिप च़ुसिउ यान्‍या ङाले। ङा मनी ङ़ादा ङाझेंःवए परमेस्‍वर ङाबाबुए उसिंहासनत ओलस सिप च़ुसिद गिन्ले। 
आव पाँर जोए थैन्‍या उयुँ लिज़्‍या, होए छैंव पुरूसए मन्‍दलीरालाई है ओरादोव पाँर ओथैवक।” 
