﻿दर्सन.
1.
आलाव पाँर येसु ख्रीसनी ‘छींनी इताव तारिज़्‍या’ लिद हुन्‍या पाँर सर्सिउ लिज़्‍या। नो पाँर उमींरालाई सतैंद्यान्‍याए जूँनी परमेस्‍वरए ओल ओज़ालाई जैक्‍यो। नो ओज़ाए स्‍वर्गताव ओचाकर्‍यालाई ङा ओनोकोर यूहन्‍नाए ङाल्‍योक परींद नो पाँर सतैंद्याँक्‍यो। 
ङा यूहन्‍नाए परमेस्वरए ओपाँ येसु ख्रीसए सतैंद ओयाँव ङारँःव भरी साची ङाएज़्‍या। 
आलाव सर्सिउ हुन्‍या पाँर जोए प़रिद थैद दोज़्‍याव, नो मिँ असिक दैव लिज़्‍या। आव पाँर यो·न्‍या नजिकक ज़ लिज़्‍या। 
ङा यूहन्‍नाए जे एसिया खन्‍दलाव सात पोकाव मन्‍दलीरालाई है ङादाचिज़्‍या — ङ़ादाकिन ज़ लिज़्‍याव, आख ब लिज़्‍याव, छींङ पै ब लिज़्‍याव परमेस्वरए जेल्‍योदा उयुँ गराँद जेयुँर होलाँ जैद ओयाचिउक। नो असिक उसिंहासन ङ़ाकाव लिज़्‍याव सात गोता पुरूसनी 
स़ोनो येसु ख्रीसनी ब ओताक। येसु ख्रीस ज़ सतलाव ओसाची, सिउनी सोज़्‍यावराए याङ़ाताव, आव मानुवाताव राजाराए याराजा। गेल्‍योदा उयुँ नाद उजिउ झाःद्याद उझीए गेपापरानी सछैंद पले·द, 
गेलाई ओराज्‍याल लाँद, ओबाबु परमेस्वरए ओसेवा दान्‍या पुजारीर जैसिक्‍यो। नोलाई बनै ज़गै मगै ब ओताक, नाम नम ओचलैज़्‍याव ओहक ब खर्क ज़ माखेम्‍न्‍या ओताक। आमेन। 
चिऊच्‍यो, येसु नमतिन बादलरास उहुक प़ाइँ मीए ज़ ओललाई रँःन्‍या लेर। ओललाई घोइद सैःज़्‍यावराए मनी रँःन्‍या लेर। आव मानुवाताव प़ाइँ जातलाव मिँराए नोलाई यारँःक चिर्लनी बिर्ल घर्न्‍या लेर। हैज़ ओताक। आमेन। 
गेप्रभु परमेस्वरए है लिज़्‍या, “ङा अल्‍फा स़ोनो ओमेगा ज़। ङा माहान परमेस्‍वर ज़, ङ़ादाकिन ज़ लिज़्‍याव, आख ब लिज़्‍याव, छींङ पै ब लिज़्‍याव ज़।” 
ङा यूहन्‍ना जेस परमेस्वरए ओराज्‍याल सिप ताद येसु ख्रीसए उमिनताव दुखर ब जेस सिप सहिज़्‍याव जेदाज्‍युलाई परमेस्वरए ओपाँत येसु ख्रीसए ओसाची ङातावए पत्मोस यादोज़्याव तापुत सगर्नाकेर। 
नक प्रभुए उदिन छ्याम छैंव पुरूसए ब्याल्‍द ङाछींक तोबो भोंकरए बनै घ्योःव ओर्गा मिताव ङाथैके। 
नो गाए, “नँ नरँःज़्‍याव भरी तोबो पोस्‍तोकोल सर्द एसियालाव सात पोकाव मन्‍दलीरालाई परींद याएके — तोबो एफिससल, तोबो स्‍मुर्नाल, तोबो पर्गाममल, तोबो थिआतीराल, तोबो सार्दिसल, तोबो फिलादेल्‍फियाल, तोबो लाउदिकियाल।” 
हाःत ज़ नो ङास पाँज़्‍याव गा काता ओताव लिद ङाछींदा ङाभाल्‍सिक सात गोता सुनए दिउ बाल्‍न्‍यार ङारारँःके। 
नो दिउ बाल्‍न्‍याराए खार्ल तोबो मिँ मिन्‍सिउ स्‍यासोलाई ङारँःके। नो उखँत पै बाव रेरे बेन्बेनो क्‍वा क्‍वाइसिद उलिज़्‍याव, ओछातीत सुनए पाता पो·सिउ उलिज़्‍याव। 
नोए ओङ़ैताव ओचेम सन मिताव स़ोनो पोम स्‍यासो पालो उलिज़्याव। उमी मेंःए मुल्‍का स्‍यासो उलिज़्याव। 
उखँर मेंःल उजालैसिउ पितल स्‍यासो तिलिक तिलिको उलिज़्‍याव। ओर्गा भैए ओर्गा मिताव ज़ ओथास्‍ज़्‍याव। 
वोर्फताव उकुइत सात गोता सोरोर यालिज़्‍याव। ओयाःत आनी हुनी ओधार ल्‍यो छाव तरवाली मिताव पले·द ओनैज़्‍याव। ओङाः भरी झ़ार झ़ारो निमी स्‍यासो उलिज़्‍याव। 
ङा नोलाई ङारँःव प़ाइँना सिउ मिताव ताद उखँत ङापछारिसिके। नोए वोर्फताव उकुइ ङाक्‍याँत नैद, “नँ ताछे·नी, ङा प़ाइँरानी ङ़ाताव, प़ाइँरानी छींताव ज़ ङालिज़्या। 
ङा जींदो ज़ ङालिज़्‍या। ङा तखेप सिद फरी खर्क ज़ मासिन्‍या ताद ङाले। मिँरालाई नर्गल झाःद सैःन्‍या, नर्गनी पले·द बाँचैन्‍या साँचा ङाकुइत लिज़्‍या। 
है जैद नँ आव नरँःव भरी, आख ताज़्‍याव पाँर स़ोनो छींनी हुन्‍या पाँर सर्द नैके। 
नो वोर्फताव ङाकुइताव नरँःव सात गोता सोरोर स़ोनो नो सात गोता सुनए दिउ बाल्‍न्‍याराए याअर्थ आव ज़ — नो सात गोता सोरोर सात पोकाव मन्‍दलीराए यालोम्‍बार ज़, नो सात गोता सुनए दिउ बाल्‍न्‍यार सात पोकाव मन्‍दलीर ज़।” 
