﻿१ यूहन्‍ना.
3.
गेबाबु परमेस्‍वरए गेलाई बनै मया दाद ओज़ार जैसिक्‍यो। हैज़ गे ओज़ार ज़! खाली आव मानुवाताव मिँराए ओज़ालाई यामासरेस्‍ज़्‍यावए गेलाई ब मासरेस्‍सिर। 
ङायुँलाव ङानैं ङामेंर, आखकिन ज़ परमेस्‍वरए ओज़ार ताद गेले। खाली अजम्‍बरी जुनील इताव गेतारिज़्‍या लिन्‍या ते गेमासैंए। आव वाज़ गेसैंज़्‍या, ख्रीस फरी उहुक ओल किताव उलिज़्‍याव गे ब हिताव ज़ तान्‍या गेले। हो छ्याम वाज़ ख्रीसलाई चबनै रँःन्‍या गेले। 
है जैद जोए आव पाँत आस दोज़्‍याव, नो मिँए ख्रीस किताव छैंव उलिज़्‍याव, हिताव ज़ ओल ब उयुँलाई छैंव जैज़्‍याव। 
कानुन माभैंःन्‍या ज़ पाप। है जैद पाप दोज़्‍याव भरिए ते परमेस्‍वरए ओकानुन माभैंःर। 
ख्रीसस ते पाप काता ज़ माले। ओल ज़ नो गेदोव पाप सम़ैद्यान्‍याए जूँनी मिँ मिन्‍सिद हुके। 
है जैद ख्रीसस लिज़्‍यावराए पाप दावका दाव मालेर। पाप दाव ज़ नैज़्‍यावराए ते ओललाई ब मारँःधुर, सरेस्न्‍या ब मासरेस्‍धुर। 
अ ङाबाबुज़ार, जे नो बले·ज़्‍यावराए यापाँत ताझुकिच्‍यो। जो मिँए साचो य़ेन दोज़्‍याव, नो ख्रीस मिताव छैंव लिज़्‍या। 
फरी जो मिँए असत दोज़्‍याव हो सैतानसकाव ज़ लिज़्‍या। सैतानए ओय़ेन भरी भाःकिन ज़ असतलाव वाज़ लिज़्‍या। है जैद नोए ओय़ेन सम़ैद्यान्‍याए जूँनी परमेस्‍वरए ओज़ा मिँ मिन्‍सिद हुके। 
परमेस्‍वरए ओराजर्मैवराए याक्‍याँत ओल ओगेर यारैंःवए पाप दावका दाव ज़ मालेर। नोर परमेस्‍वरनिकावर यातावए असत दो ज़ मादोधुर। 
है जैद परमेस्‍वरए ओथोर स़ोनो सैतानए ओथोर आनी ज़ छुतिज़्‍यार — जोए असतलाव य़ेन दोज़्‍याव हो परमेस्‍वरसकाव माःक। नैं मेंलाई मया मादाज़्‍याव ब हो मिताव ज़। 
ङ़ादाकिन ज़ जेथैज़्‍याव परमेस्‍वरए ओपाँ आव ज़ — तोबोए तोबोलाई मया दासिन्‍या। 
सैताननिकाव कयिनए ओभाइ हाबिललाई ओसैःव मिताव ते दान्‍या माःक। नो कयिनए ओल ओय़ेन माचाव, ओभाइए ओय़ेन चाव ओतावए ओभाइलाई सैःक्‍यो। 
ङानैं ङामेंर, आव मानुवाताव मिँराए जेलाई यासोचिक हार तामानिच्‍यो। 
गे नैं मेंलाई मया गेदोज़्यावए सिन्‍यानी पुलुस्‍द अजम्‍बरी जुनी दैन्‍याल हुद गेले लिन्‍या गेसैंज़्‍या। नैं मेंए ल्‍योदा ओमया माल्‍यो मिँ ते सिन्‍या सजाल ज़ लिज़्‍या। 
नैं मेंलाई सोज़्‍याव मिँए उयुँल ओसैःधुव मिताव ज़ लिज़्‍या। जे ब जेसैंज़्‍या, मिँ सैःज़्‍यावए ओक्‍याँत अजम्‍बरी जुनी माले। 
ख्रीसए गेलाई मया ओदासिउ आनी ज़ रैंःज़्‍या, गेजूँनी उजिउ ज़ झाःद्यासिक्‍यो। है जैद गे ब नैं मेंए जूँनी जिउ झाःन्‍या ब तयार ताव परिके। 
यो·व मिँए माथैंव मायो·वलाई उयुँ मानाद ओमाचिऊकिन परमेस्‍वरलाई ब मया मादोव। 
जे ङाबाबुज़ार, नैं मेंलाई मया दान्‍या याःए वाज़ माःक, साचो य़ेननी ब दाव ताके। 
गे साचो पाँल गेलिज़्‍याव सैं गेमालिज़्‍याव लिन्‍या ब ननी ज़ रैंःज़्‍या। साचो पाँल गेलिकिन परमेस्‍वरए ओङ़ाक धुक्‍क तान्‍या गेले। 
खाली गेयुँए ज़ गेलाई गेखत ल्‍यो ओथ·रैसिकिन परमेस्‍वर ते गेयुँकिन झन घ्योःव लिज़्‍या। ओल ज़ प़ाइँ युँलाव पाँ सैंज़्‍याव। 
ङायुँलाव ङानैं ङामेंर, गेयुँए गेलाई गेखत ल्‍यो ओमाथ·रैसिकिन परमेस्‍वरए ओङ़ाक च्‍याँःसिन्‍या गेयुँ झेंःज़्‍या। 
फरी गे परमेस्‍वरए है ओल्‍यो भरी दाद उयुँलाव मिताव य़ेनर गेदोकिन ओलस गेऩिज़्‍याव भरी ब सयो·द्यान्‍या ले। 
प़ाइँरानी गे दाव परिन्‍या य़ेन आव ज़ — ओल है ओदासिउ मिताव ज़ ओज़ा येसु ख्रीसए उमिनत गेयुँ हुप्‍द गे गेल मया दासिन्‍या। 
इतावनी परमेस्‍वरए ओपाँ भैंःज़्‍याव मिँ परमेस्‍वरस लिज़्‍या, परमेस्‍वर ब ओलस लिज़्‍या। है जैद गेयुँल बास दाद नैज़्‍याव परमेस्‍वरए उपुरूसनी ज़ परमेस्‍वर गेस ज़ उलिज़्‍याव गेसैंज़्‍या। 
