﻿याकूब.
4.
कै जैद जे जेखार्ल इ़सिन्‍या, जगरा दान्‍या उपुलुस्‍ज़्‍याव? नो भरी जोत ब युँ मानैधुद क्‍याँलाई तान्‍या वाज़ खिम्‍न्‍यानी ज़ ताज़्‍या। 
लोभ दाद जेयुँए ओपैंज़्‍यावलाई जेमादैकिन जेङ़ालाव परिउ भरिलाई खेमो जेपैंज़्‍या, स़ोनो जोत जेमी तूज़्‍या होत इ़सिद जगरा ब जेदोज़्या। नो जेपैंज़्‍याव भरी परमेस्‍वरस जेऩिकिन जेदैखेहो ज़। 
खाली माचाव युँस क्‍याँलाई तान्‍यानी वाज़ जेऩिकिन ते परमेस्‍वरनी ब जेमादैए। 
ए निताव सतत मालिज़्याव मिँर, काता आव मानुवाताव पाँ खिम्‍ज़्‍याव मिँर परमेस्‍वरकिन तँदा लिज़्‍यार लिन्‍या जेमासैंए रो? जो आव मानुवाताव ताज़्‍याव पाँए ओनैं जैसिज़्‍या, नो मिँ परमेस्‍वरनी तँदा ज़ ताज़्‍या। 
गेजूँनी धर्मसास्‍त्रलाव सर्सिउ पाँ अऩाकलाव माले। नल, “गेयुँलाव बास दाज़्‍याव परमेस्‍वरए उपुरूसए ते ‘ङाल्‍योदा वाज़ यायुँ थू याजैकिन ताखेहो’ लिद उस॰ तरा चींज़्‍याव।” 
खाली नो पुरूसए उयुँ गेल्‍योदा झन ज़ य़ाल्‍ज़्या। है जैद धर्मसास्‍त्रल, “स॰द सघ्योःसिज़्‍यावरानी परमेस्‍वर तँदा ज़ लिज़्‍या, सज़िम्‍सिज़्‍यावराए ल्‍योदा ते उयुँ य़ाल्‍ज़्‍या।” 
है जैद जे परमेस्‍वरए उधूँल लिद सैतानए ओपाँलाई भैंःद जेमाएकिन ओल ज़ धोंःद बान्‍या ले। 
फरी परमेस्‍वरए ओल्‍योकसै बाकिन ओल ब ल्‍योकसै हुज़्‍या। जे पापीर, मादान्‍या दाव परींज़्‍याव जेकुइलाई फरी दाव ताएच्‍यो। ऩेयुँ दाज़्‍यावर जेयुँ छैंव जैचिके, पाप दान्‍यादा जेझाःज़्‍याव जेयुँ फरी नदा ताझाःच्‍यो। 
सोगो दाद जेयुँ ओघरक। मानुवाताव पाँत थाँतस रेंद जेलिज़्‍याव ब ओत़ोसिक। ल़॰द जेस़ासोत ब जेयुँ माचाव ओदोवक। 
परमेस्‍वरए ओङ़ाक सज़िम्‍सिद फुलुप्‍सिकिन ओल ज़ सोचोइद सघ्योःन्‍या ले। 
ङानैं ङामेंर, जे जेल सुलाई ज़ सतेद पाँन्‍या माःक। जोए नैं मेंलाई सतेद ओखत पले·दिज़्‍याव, निताव मिँए परमेस्‍वरए ओकानुनकिन तँदा जैसिद ओपाँलाई ओखत ल्‍यो जैज़्‍याव। निताव ओखत ल्‍यो जैज़्‍याव मिँए परमेस्‍वरए ओकानुन मादाद झन परमेस्‍वरए ओकानुनलाई ओफाल्‍ज़्याव मिताव ज़ रैंःज़्या। 
कानुन जैद कानुननी फाल्‍ज़्‍याव ओल परमेस्‍वर वाज़ लिज़्‍या। नोए बाँचैव ब दोज़्‍याव, खेमो ब दोज़्‍याव। है जैद जे नैं मेंलाई कै जैद ‘इताव हिताव’ है दाद सतेन्‍या ओताज़्‍याव? 
जेनी ख्वाराए अइ जेलिज़्‍याखेहो, “आछिम ताव, पराःती ताव तोबो सहरल बाद नल तबर्सवा लिद पसलर थाँद पैसार ङाकमैया ब,” है जेलिज़्‍याखेहो। निताव मिँराए आव ङापाँ थैचिके। 
‘पराःती अइ ङातारिज़्‍या’ लिन्‍या जे जेमासैंए। जे कोहो स्‍यासो वाज़ जेलिज़्‍या। नो कोहो होक ज़ ताज़्‍या, होक ज़ म़ाज़्‍या। 
जे बुरू, “परमेस्‍वरए उयुँ ओताकिन गे बाँचिद अइ गेजैरिज़्‍या, है गेजैरिज़्‍या,” है ल्‍यो परिन्‍या। 
है जेमालिकिन जे ज़ सघ्योःसिद ओर्घांत ज़ जेपाँव रैंःज़्‍या। निताव सघ्योःसिद पाँन्‍या बनै माचाव लिज़्‍या। 
है जैद जोए चाव य़ेन दाव परिए लिन्‍या सैंज़्‍यावत ब मादोव, होलाई पाप लागिस्‍ज़्‍या। 
