﻿हिब्रू.
9.
ङ़ादाङाव चलनल परमेस्‍वरए ओसेवा दान्‍या कानुनर ब यालिज़्‍याव, ओसेवा दान्‍या पो ब जैसिउ उलिज़्‍याव। 
नो पो, पालल ऩेखन्‍द जैसिउ ओताज़्‍याव। ङ़ाताव खन्‍दल दिउ बाल्‍न्‍या स़ोनो चोखो भरेस नैन्‍या तेबल नैसिउ उलिज़्‍याव। नो ङ़ाताव खन्‍दए उमिन ‘चोखो पो’ है यादोज़्‍याव। 
नो पाल जींलाव तोबो बारिसिउ क्‍वाकिन उछींनीकाव खन्‍दए उमिन ‘प़ाइँरानी चोखो पो’ है यादोज़्‍याव। 
नल सुनए मुरिसिउ धुप झाःन्‍या थान स़ोनो सुनए मुरिसिउ मुधुस ब यानैज़्‍याव। नो मुधुसल हारूनए पलिउ उझुइ, लुँ फल्‍यात सर्सिउ कानुन, स़ोनो तोबो सुनए जा ब यानैज़्‍याव। नो जाल फरी मन्‍न ब यानैज़्याव। 
नो मुधुसए ओकत परमेस्‍वरए ज़गै मगैव ओचाकर्‍यानी निकर निकर जोरैद जैसिउ उलिज़्‍याव। नोनी निकरए परमेस्‍वरए उमींरालाई यापापनी ओराऱास्‍ज़्‍याव पो थोर्सिउ उलिज़्‍याव। आव पाँ भरी ओलेखा ल्‍यो ज़ लिज़्‍या, खाली तोबो तोबोनी आख है मालिसिधुइ। 
नो सेवा दान्‍या पो प़ाइँ ओतावत, पुजारीर दिनकाव ज़ ङ़ाताव खन्‍दल पसिद परमेस्‍वरए ओसेवा यादोज़्‍याव। 
नो बारिसिउ क्‍वाए उछींनीकाव खन्‍दल प्रधान पुजारी वाज़ सालकाव तखेप उपसिज़्‍याव। खाली बिनु झी माःक, झी लाँद वाज़ ओबाज़्‍याव। नो झी ओल स़ोनो मिँराए मासैंदकाव यादोव पापए जूँनी ओचरैःज़्‍याव। 
आव भरिनी परमेस्‍वरए उपुरूसए, नो पाललाव य़ेन ओलेवा भरी परमेस्‍वरए ओङ़ाकाव प़ाइँरानी चोखो पोल बान्‍या येम आःपै माफैसिताव लिज़्‍या लिन्‍या सतैंद ओराएज़्‍याव। 
नो सतैंसिउ भरी आज्‍याल मनी खैज़्या। नो भरिए ओअर्थ आव ज़, परमेस्‍वरलाई पुजा दाद याचरैःज़्‍यावए युँलाई खर्क ज़ छैंव माजैव। 
नो यादोव भरी ते पाखाताव ज़्‍यान्‍या ओन्‍यार, बारिन्‍या स़ोनो हुर्सिद चोखोइसिन्‍या वाज़ उलिज़्‍याव। नो भरी परमेस्‍वरए साःरो ओमाजैवा पै वाज़ ओल्‍यो। 
खाली ख्रीस हुद नो साःरोल प्रधान पुजारी ताद आव नामलाव कुइए जैसिउ सेवा दान्‍या पालल माःक, स्‍वर्गताव परमेस्‍वरए ओङ़ाक ज़ पसिके। 
नो प़ाइँरानी चोखो पोल ओबाक बोकाए उझीनी ब माःक, बाछाए उझीनी ब माःक, ओल उझीनी ज़ पसिके। भाःकाव प्रधान पुजारीराए माँःती घरी पाला बाव ब मापरिए। ओल ते तखेप ज़ पसिद अजम्‍बरी जुनी दैन्‍या येम फैद्यासिक्‍यो। 
नो पुजारीराए मिँरालाई चोखोइन्‍याए जूँनी बोकाए उझीए, बहरए उझीए, कैताक मार सघासिउ धुलीए नोरालाई छरैद पाखाताव याक्‍याँ चोखोइद याराएज़्‍याव। 
होकिन झन ख्रीसए दाद ओयासिउ य़ेनए ते युँलाई ज़ चोखो जैज़्‍याव। ओल ख्रीस ज़ एकम्‍न्‍या लिज़्याव परमेस्‍वरए उपुरूसनी ओखत माल्‍यो मार जैसिद गेदोव पापए जूँनी परमेस्‍वरलाई उजिउ ज़ चरैःद्यासिक्‍यो। हुनी ज़ गेदोज़्‍याव माचाव य़ेननी चोखोइद जींदो परमेस्‍वरए उयुँलाव मिताव सेवा दान्‍यार जैसिज़्याव। 
है जैद ख्रीसए ङ़ादाङाव बाचानी बिरैवराए यासजा फो·द्यान्‍याए जूँनी उजिउ झाःद ओरायोए परमेस्‍वरए ओङ़ाकाव साःरो बाचानिकाव त्‍याला ताद ले। ननी ज़ परमेस्‍वरए थ·रैद ओराखुलोरालाई ओय़ाकालाव माखेम्‍न्‍या बताहा दैन्‍यार ताज़्‍यार। 
किताव तोबो मिँए ओलसकाव लिज़्‍याव भरी ओमासिद ज़ तोबोए उमिनत सर्द ओएकिन, नो ओसरो बाचा ओल ओमासिवा पै नो दैन्‍या मिँए ओहक माले। उसिउ प्रमान सतैंकिन वाज़ नो बाचा पक्‍का ताज़्‍या। 
हो मिताव ज़ परमेस्‍वरए मिँरास मोसानिकाव ओनैव बाचा ब मारए उझीनी वाज़ ओताज़्‍याव। 
हो बेलाक मोसाए नलाव मिँरालाई परमेस्‍वरए ओकानुननिकाव पाँ भरी सथैद बोकाए उझी स़ोनो बाछाए उझील ऱी झाःद भाताए उतुपात घ्यामो सन पो·द नो झील छिम्‍द कानुनलाव पोस्‍तोको स़ोनो मिँरालाई अइ लिद याछरैक्‍यो, 
“आव ङाछरैचिज़्‍याव झी परमेस्‍वरए जेसकाव ओनैव बाचात आछिमकिन उथूसिउ सरेस ज़,” है यादोक्‍यो। 
हो स्‍यासो ज़ परमेस्‍वरए ओसेवा दान्‍या पाल स़ोनो नलाव जा भरी ब झीए याछरैक्‍यो। 
नो कानुननिकाव चलननी चोखो याजैज़्‍याव भरी जाँकोसै झीनी ज़ याचोखोइज़्‍याव। है जैद पापनी चोखोइसिन्‍याए जूँनी मार मासैःद ज़ ओमाताज़्‍याव। 
है जैद नो पाललाव भरी स्‍वर्गताव नकलनी जैसिउ ओतावए नलाव चोखो याजैज़्‍याव भरी जन्‍तुराए झीनी चोखो ओताज़्‍याव। साचो स्‍वर्गत ते होकिन झन चाव चाहिज़्‍या। 
ख्रीस ते स्‍वर्गताव नकलनी कुइए जैसिउ पोल माःक, गेलाई सखैन्‍याए जूँनी परमेस्‍वरए ओङ़ाकाव साचो चोखो पोल उपसिउ ची। 
नो प्रधान पुजारी ते पाललाव प़ाइँरानी चोखो पोल सालकाव तखेप उपसिक मारए झी लाँद वाज़ उपसिज़्‍याव। ख्रीसए ते घरी पाला चरैःव मापरिए। 
घरी पाला ज़ पसिन्‍या ताकिन आव मानुवा उसिर्जिउ छ्यामकिन घरी पाला सिउ ब परिखेहो। खाली परमेस्‍वरए ओगोइँव बेलाक ज़ तखेप्‍त ज़ पाप भरी खेम्‍न्‍याए जूँनी ओक्‍याँलाई चरैःन्‍यात थाँसिहुके। 
मिँ भरी तखेप सिउ परिज़्‍या। नकिन परमेस्‍वरए ओङ़ाक फाल्‍सिउ परिरिज़्‍या। 
हिताव ज़ ख्रीसए मनी कुधुराए यापाप घुर्द्यान्‍याए जूँनी तखेप ज़ उजिउलाई चरैःक्‍यो। फरी ब तखेप आव मानुवात सतैंसिहुरिज़्‍या, खाली हो पालाक पाप घुर्द्यान्‍या ते माःक, ओललाई यायुँ थू जैद कींद नैज़्‍यावरालाई ओलस लाँन्‍याए जूँनी ज़। 
