﻿हिब्रू.
4.
है जैद जोगोइसिद ल्‍यो ताके, नो स॰ होलाँ तान्‍या पोल पसिन्‍या मौका गेलाई परमेस्‍वरए याद नैसिउ। नो मौका छुपिउ ताके, म़ानी गे ब पसिधुन्‍या गेमाले। 
मोसाए ओपालाकाव मिँराए परमेस्‍वरए ओपाँ याथैव मिताव गे ब थैव ज़ गेनैज़्‍या। खाली नोराए ओपाँ थैद ब यायुँ ओमाहुबोए नो पाँ नोरालाई अऩाकलाव ज़ ताके। 
ओललाई यायुँ हुबोर वाज़ नो स॰ होलाँ तान्‍या पोल पसिज़्‍यार। यायुँ माहुबोराए जूँनी ते ओल परमेस्‍वरए ज़ है लिद ले, “ङारिसए इताव किर्‍या ब ङाझाःके, ‘स॰ होलाँ तान्‍या पोल खर्क ज़ केसो दैन्‍या मालेर।’ ” हैदी ब गे मिँरालाई तोबो स॰ होलाँ तान्‍या पो नाम नमलाव ओय़ेन ओखेमो छ्यामकिन ज़ उलिज़्याव। 
धर्मसास्‍त्रल ब ऩासिन्‍या छ्यामए जूँनी तोथोल अइ लिद सर्सिउ लिज़्‍या, “परमेस्‍वरए नाम नमलाव ओय़ेन भरी ओखेमोत सात दिनलाव छ्याम ऩासिके।” 
खाली ङ़ादाङाव है गेलिज़्याव मिताव धर्मसास्‍त्रल इताव सर्सिउ लिज़्या, “स॰ होलाँ तान्‍या पोल खर्क ज़ केसो दैन्‍या मालेर।” 
हैदी ब नो पोल पसिन्‍यार लिज़्‍यार ज़। खाली नो भाःकाव मिँराए ओपाँ थैद ब यामादोवए पसिउ मादैकेर। 
है जैद नोराकिन कुधु छींङ परमेस्‍वरए दाऊद राजाए ओयाःनी गेलाई ब तोबो मौका जैद्यासिक्‍यो। नोए ओपाँ आव ज़, “आछिम परमेस्‍वरए ओपाँ जेथैकिन, जे जेयुँ खाव ताजैच्‍यो।” 
यहोसूए इस्राएलीरालाई परमेस्‍वरए य़ाका ओरायो देसल ओरासकेस्‍क नो स॰ होलाँ तान्‍या पोल पसिन्‍या मौका भरी ओखेमो ताकिन परमेस्‍वरए छींनी गेलाई निताव पाँ है दान्या ओमाल्‍यो। 
है जैद परमेस्‍वरए उमीं ताज़्‍याव भरिरालाई स॰ होलाँ तान्‍या पो नैसिउ ज़ लिज़्‍या। 
जो मिँ नो पोल केस्‍ज़्‍या, किताव परमेस्‍वरए ओय़ेन भरी खेम्‍द ओऩासिउ, हिताव ज़ नो मिँ ब ओय़ेनरानी ओर्सार नैज़्याव। 
है जैद गे नो स॰ होलाँ तान्‍या पोल बान्‍यादा युँ थू जैव ताके। ङ़ादाङाव ओपाँ मादोज़्‍यावर यामापसिधुज़्‍याव मिताव ताताक। 
परमेस्‍वरए ओपाँ बनै ओसक्ती ल्‍यो स़ोनो य़ेन दावका दाव ज़ लिज़्या। नो पाँ आनी हुनी ओधार ल्‍यो तरवालीकिन ब छाव ओतावए मिँए युँल पसिद क्‍याँ भरिल सरालिसिद युँलाव पाँ स़ोनो बुद्धी भरी ब सरसाप खिम्‍द जाँचिज़्‍याव। 
स़ोनो परमेस्‍वरए ओराजैव भरिल ओल ओमारँःव म़ोंसिउ काता ज़ माले। परमेस्‍वरए ओङ़ाक प़ाइँ ज़ फैसिउ लिज़्‍या। गेय़ेन भरी ब तछा ओललाई है दाव ज़ परिज़्‍या। 
है जैद परमेस्‍वरए ओज़ा प़ाइँरानी घेप्‍पा गेप्रधान पुजारी येसु आव नामनी गेजूँनी स्‍वर्गत परमेस्‍वरए ओङ़ाक ओबावए नो गेयुँ हुबो पाँलाई माऱास्‍द ज़ थ॰रिद ल्‍यो ताके। 
गे गेप्रधान पुजारीए गेदुखर रँःद उयुँ ओमानाज़्‍याव ते माःक। ओल ब गे गेदैज़्‍याव मिताव दुखरानी जाँचिसिके। खाली ओजाँचिसिदी ब पाप ते मादोव। 
हो मिताव ज़ गे ब उयुँ य़ालो परमेस्‍वरए ल्‍योक माछे·द ज़ बाव ताके। हो ताकिन ची ङ़ादाङाव गेबले·व य़ेनर ब उयुँ नाद ऱास्‍न्‍या ले। फरी खाँचो ओताव बेलाक ब सघैन्‍या ले। 
