﻿हिब्रू.
3.
है जैद परमेस्‍वरए उमिनताव खुल्‍सिउ गेनैं गेमेंर, परमेस्‍वरए परींद ओयासिउ प्रधान पुजारी येसुलाई चिऊव ताके। 
किताव मोसाए उजिउ भरी परमेस्‍वरए उझ़िमल सतस ओदोव, हिताव ज़ येसुए ब परमेस्‍वरए दोव उपरींव य़ेनलाई सतस ज़ दाद सयो·क्‍यो। 
किताव जैसिउ झ़िमकिन जैज़्‍याव मिँ घेप्‍पा ताज़्‍या, हिताव ज़ मोसाकिन येसुए उमिन घेप्‍पाल गनिसिउ लिज़्‍या। 
तोबोमा तोबोए ते झ़िम जैज़्याव। हैदी ब प़ाइँ जैज़्याव ते परमेस्‍वर ज़। 
मोसाए परमेस्‍वरए उझ़िमलाव य़ेन सतस ओदोदी ब होए ओय़ेन नोकोर य़ेन वाज़ ओल्‍यो। होए ओपाँज़्‍याव ओदोज़्‍याव भरी ब जाँकोसै छींनीकाव तान्‍या पाँए ओसाची वाज़ ओल्‍यो। 
ख्रीस ते ओबाबु परमेस्‍वरए ओबताहा दैन्‍या झ़िमए ओर्गे मिताव ज़ लिज़्‍या। गे मनी होए उझ़िमलावर ज़ गेलिज़्‍या। खाली गेयुँ गेसुहुबोलाई माऱास्‍द आस दाद गेनैज़्‍याव ओमायो·वा पै थ॰रिद गेलिकिन वाज़ गेताज़्‍या। 
है जैद छैंव पुरूसए ओपाँव पाँ आव ज़, “आछिम परमेस्‍वरए ओपाँ जेथैकिन, 
जेजिज्‍यु बाज्‍युर बनल परमेस्‍वरकिन तँदा याजैसिउ मिताव, जे जेयुँ खाव ताजैच्‍यो। 
हो बेलाक चालीस बर्स पै अचम्‍ब अचम्‍बलाव ङाय़ेनर यारँःज़्यावत ब ङानाल केःद्याँकेर। 
है जैद ङा नोरास ङारिस चोद अइ ब ङालिके, ‘आवराए यायुँ ते एकतार तँदा वाज़ लिज़्‍या। ङाल्‍योदा हुन्‍या युँ दो ज़ मादोर।’ 
है जैद ङारिसए इताव किर्‍या ब ङाझाःके, ‘स॰ होलाँ तान्‍या पोल खर्क ज़ केसो दैन्‍या मालेर।’ ” 
है जैद गेनैं गेमेंर, जोगोइसिद लिच्‍यो, म़ानी जेनी ख्‍वा ख्‍वार जेयुँ माहुप्‍द जेयुँए बले·द जींदो परमेस्‍वरए ल्‍योनी पुलुस्‍द बान्‍या ओछ्यास लिज़्‍या। 
बेला उलिज़्याक ज़ जे जेल सुए जेयुँ ब पापए झुकैद बलेसो ताताक लिद एकम्‍न्‍या ज़ अर्थैसिच्‍यो। 
गेयुँ हुप्‍द गेथूसिउलाई माऱास्‍द छींङ पै थ॰रिद गेलिकिन परमेस्‍वरए ओराज्‍यालाव बताहा ख्रीसस सिप ज़ दैन्‍या गेले। 
नो धर्मसास्‍त्रलाव है लिसिउ पाँ तामेंःच्‍यो। नो पाँ आव ज़, “आछिम परमेस्‍वरए ओपाँ जेथैकिन, जेजिज्‍यु बाज्‍युर परमेस्‍वरकिन तँदा याजैसिउ मिताव, जे जेयुँ खाव ताजैच्‍यो।” 
नो ङ़ादा परमेस्‍वरए ओपाँ थैद मनी ओलकिन तँदा जैसिज़्यावर मोसाए इजिप देसनी ओरापले·वर ज़। 
नो चालीस बर्स भरिलाव परमेस्‍वरए उरिस चोवर ब नोर ज़। है जैद यादोव पापए चालीस बर्स भरिल नो बनल ज़ सोतोर्‍यान ताकेर। 
‘नो स॰ होलाँ दाव पोङ बाव दैन्‍या जेमाले’ है ओरादोव ब नो ओपाँ मादोज़्‍यावरालाई ज़। 
है जैद ननी ज़ गेसैंज़्‍या, ओललाई यायुँ ओमाहुबोए चाव पोल बाव मादैकेर। 
