﻿हिब्रू.
1.
भाःङ परमेस्‍वरए अगमबक्ताराए यायाःनी गेसाखा पुर्खारास घरी पाला ज़ प़ाइँ किसिमनी पाँव ज़ उलिज़्‍याव। 
आज्‍याल ते फरी परमेस्‍वर गेस ओल ओज़ानी ज़ पाँज़्‍या। परमेस्‍वरए नाम नम ब नो ओज़ानी ज़ जैक्‍यो, स़ोनो नलाव ताव भरी ब ओज़ाए उकुइत यान्‍या ङ़ादाकिन ज़ थ·रैद ओनैज़्याव। 
नाम नम स़ोनो नलाव ताव भरी ओज़ाए ओसक्तीलाव पाँनी वाज़ रहिज़्‍यार। परमेस्‍वरए अचम्‍बलाव ओसक्ती स़ोनो ओज़गै ओज़ाए ओक्‍याँत ज़ रैंःज़्‍या। ओगे ब होए ओक्‍याँत ज़ चबनै सतैंसिउ लिज़्‍या। मिँराए यादोव पापए सजा ब ओल ज़ घुर्सिद फो·द ओरायोए स्‍वर्गत माहान परमेस्‍वरए ओवोर्दा च़ुसिद ले। 
है जैद ख्रीस परमेस्‍वरए ओचाकर्‍याराकिन ब घेप्‍पा ज़ थ॰रिके। हिताव ज़ नोराकिन घेप्‍पा मिन ब दैक्‍यो। 
ङ़ादा धर्मसास्‍त्रल ओज़ाए उजूँनी इताव सर्सिउ लिज़्‍या, “नँ ङाज़ा ज़, आछिम ज़ नँलाई ङाजर्मैनिके।” फरी तोथोल, “ङा ओबाबु तान्‍या ङाले, नो ङाज़ा तान्‍या ले।” निताव पाँर ओचाकर्‍यारालाई ते खर्क ज़ है मारादोव। 
परमेस्‍वरए उस॰कताव जर्मिउ ओज़ालाई आव मानुवाल उपरींक, “ङाचाकर्‍या भरिए आवए ओसेवा ओदोरक,” है लिके। 
परमेस्‍वरए ओचाकर्‍यारालाई ते, “जे ङाय़ेन दान्‍यात कैताक बतास स्‍यासो जेलिज़्‍या, कैताक मेंः स्‍यासो जेलिज़्‍या,” है वाज़ यादोज़्‍याव। 
ओज़ाए उजूँनी भन्‍या धर्मसास्‍त्रल इताव सर्सिउ लिज़्‍या, “अ परमेस्‍वर, नँ नराज्‍या खर्क ज़ म़ान्‍या खेम्‍न्‍या माले। नराज्‍या ब न्‍यायस ज़ नचलैज़्‍या। 
नयुँ छैंव स़ोनो सोजो य़ेनत वाज़ लिज़्‍या, मादान्‍या य़ेन भरिलाई नसोज़्‍या। है जैद नपरमेस्‍वरए ननैंराकिन बनै कुधु ज़ नयुँ होलाँ जैदिंक्‍यो।” 
फरी तोथोल ओज़ाए उजूँनी इताव ब सर्सिउ लिज़्‍या, “अ प्रभु, भाःङ आव नाम नँ ज़ नजैके। स़ोनो नमलाई ब नँ नकुइए ज़ नजैके। 
नजैव भरी ते खेम्‍न्‍या लेर, खाली नँ ते एकम्‍न्‍या लिन्‍या नले। पुराँदो क्‍वा उचिस्‍ज़्याव मिताव नजैव भरी ब तछा चिस्‍न्‍या ले। 
नाम नमलाई बर्की माँःती रूल्‍न्‍या नले। मिँए ओक्‍वा ओत़ोज़्‍याव मिताव तछा नोनिलाई त़ोन्‍या नले। खाली नँ ते खर्क ज़ त़ोसिन्‍या नमाले। नजुनी ब खर्क ज़ खेम्‍न्‍या माले।” 
फरी तोथोल इताव ब लिज़्‍या, “नसुतुररालाई नखँ धूँल झाःद ङामाईंवा पै, ङावोर्दा च़ुसिद लिन्‍के।” निताव पाँ ओचाकर्‍यारालाई ते खर्क ज़ है मारादोव। 
नोर ते ओय़ेन दाज़्‍याव पुरूसर वाज़ ची। नोरालाई परमेस्‍वरए अजम्‍बरी जुनी दैन्‍या थ·रैद ओरानैज़्‍यावरालाई सघैन्‍याए जूँनी आदा होदा यापरींज़्‍याव। 
