﻿१ तिमोथी.
6.
परमेस्वरए ओपाँत हुव बाँदाराए फरी यासाहुराए याधूँल लिद यामान नैद ओराएरक। हो ताकिन ची छुतराए परमेस्‍वरए उमिन ब बले·व दैन्‍या मालेर, गेपाँए उगुस्‍ती ब दाधुन्‍या मालेर। 
ख्वा ख्वा बाँदाराए यासाहुर यायुँ हुबोर यालिकिन, ‘परमेस्वरनी ते दाज्‍यु भाइ ज़ ची गिन्ल्‍यो, काराव ओमान नैद्यान्‍या?’ है तालिरक। बुरू, ‘उयुँ हुबो गेयुँलाव मिँए ओय़ेन गेदोज़्‍या’ लिद झन ज़ चावस सेवा ओदोरक। है जैद नँ आव पाँर पैद यासम्‍जैयो। 
जोए गेप्रभु येसु ख्रीसए साचो ओपाँलाई माभैंःद परमेस्वरस खैन्‍या येमकिन तँनी ओरापैकिन, 
नो मिँ काता ज़ ओमासैंज़्‍यावत ब स॰द सघ्योःसिज़्‍या। निताव मिँर तके पाँत ब खर्लेसिन्‍या इ़सिन्‍या वाज़ खिम्‍ज़्यार। ननी ज़ खिस्‍न्‍या, माखैन्‍या, थल्‍न्‍या स़ोनो साँन्‍या वाज़ ताज़्‍या। 
नितावराए यायुँ बिप्‍यादा ता·सिउ ताद यायुँल परमेस्वरए साचो ओपाँ वैंसिउ उलिज़्‍यावए या याल ब माखैर। नोराए यादोज़्‍याव धर्मनी यालाई तान्‍या यातिर वाज़ दोज़्‍यार। 
साचो ज़ परमेस्वरए ओपाँ दान्‍या ते सोन्‍तोकोस लिन्‍या ज़, नो ज़ गेलाई घेप्‍पा फाइदा लिज़्या। 
गे आव मानुवात गेहुक काता ज़ रैद गेमाहुइ। गेबाक ब काता ज़ मालाँद बान्‍या गेले। 
गेलाई ज़्‍यान्‍या क्‍वाइसिन्‍या उलिकिन नाःत ज़ सोन्‍तोकोस ल्‍यो ताके। 
नो कोसै पैंज़्‍यावर ते पापल पारैज़्‍याव छे छे ङम्‍सिउ झिबला मितावल परिज़्‍यार। नो कोसै यापैंज़्‍यावनी ज़ माचाहिउ बलेस्‍न्‍या य़ेन दाद यानी ज़ नास तान्‍याल बाज़्‍यार। 
रूप्या पैसादा युँ थू जैन्‍या ज़ माचाव भरिए ओजरा। ख्वा ख्वाराए यायुँ नदा ज़ झाःद परमेस्वरए ओपाँनी तँदा यातर्किउए यायुँलाई याज़ घोइज़्यार। 
खाली नँ परमेस्वरए उयुँलाव मिँ, आव पाँरानी अछतङ लिनी। बुरू नँ सोजोनी दान्‍या, परमेस्वरस खैन्‍या, परमेस्वरलाई युँ हुप्‍न्‍या, मुइलिउ ताद नैं मेंए ल्‍योदा युँ थू जैद खैन्‍या, थ॰रिद तहस लिन्‍यादा कलँ लिनी। 
परमेस्वरए ओपाँनी माचाव पाँलाई हारैद वैंन्‍यात नर्सा झाःयो। स़ोनो परमेस्वरए खुल्‍द याद ओनैनिज़्‍याव अजम्‍बरी जुनीलाई ताऱास्‍यो। नँ ङ़ादा ज़ ‘हो येम ज़ ङाबारिज़्‍या’ लिद कुधुराए ङ़ाक नथाँसिके। 
ङा नँलाई, प़ाइँलाई यास॰ झाःद्याज़्‍याव परमेस्वर स़ोनो पन्‍तियस पिलातसए ओङ़ाकाव साचो पाँलाई थ·रैद्याज़्‍याव येसु ख्रीसनी निमिननी ङाअर्थैनिज़्‍या, 
गेप्रभु येसु ख्रीस फरी ओमासरैंःसिवा पै नँ आव पाँ भरित नपाँःच्‍या मापले·द बनै सतस दोयो। 
नोलाई ओल परमेस्वरए ओगोइँव बेलाक ज़ सरैंःरिज़्‍याव। नो सरैंःज़्‍याव गेपरमेस्वर बनै असिक ल्‍यो तोबोका तोबो नाम नमलावराए याङ़ैताव, राजाराए याराजा, प्रभुराए याप्रभु, 
खर्क ज़ मासिज़्‍याव, सु ज़ यामालिधुज़्‍याव ज़गैल लिज़्‍याव, सुए ब यामारँःधुज़्‍याव परमेस्वर ज़। नोलाई बनै घेप्‍पा मान स़ोनो खर्क ज़ माखेम्‍न्‍या राज काज ब ओताक। आमेन। 
नँ आव जुकलाव धनीरालाई ब है यादोयो — नोर स॰द तासघ्योःसिरक, स़ोनो याआस खेम्‍न्‍या धन सम्‍पतीत तानैरक। बुरू गेयुँर होलाँ जैद्यान्‍याए जूँनी प़ाइँ जोरैद्याज़्‍याव परमेस्वरए ल्‍योदा यायुँ थू ओजैरक। 
नोर धन कमैन्‍याए ओपोल चाव य़ेनर दाद युँ गराँव ताद छुतलाई याधुन्‍यार ओतारक। 
इतावनी ज़ अजम्‍बरी जुनीए सामा यादोकिन साचो जुनीए थालन याझाःज़्‍याव मिताव ज़ ताज़्या। 
अ तिमोथी, नँलाई परमेस्वरए नकुइत याद ओनैनिज़्‍याव भरी पाथस नैयो। आव मानुवाताव अऩाकलाव माचाहिउ पाँरानी स़ोनो सैंन्‍या जैसिज़्‍यावराए ‘आव ज़ ग्‍यान’ लिद याथ·रैवनी अछतङ लिनी। 
ख्वा ख्वार ते झन नो येम ज़ बाद परमेस्वरए ओपाँकिन तँदा ज़ बाद लेर। परमेस्वरए उयुँ जेल्‍योदा ओय़ाल्‍क।
