﻿१ तिमोथी.
5.
नँकिन स़ेरए ओगल्‍ती उलिकिन नोलाई खोरोनी है दान्‍या माःक, बुरू क्‍याँए बाबु स्‍यासो जैद सम्‍जैव ताके। नँकिन नधूँदाङाव ताकिन क्याँए भाइ स्‍यासो जैद सम्‍जैव ताके। 
हो मिताव ज़ मेंमारालाई मनी तर्दाङाव ताकिन आमा स्‍यासो, धूँदाङाव ताकिन बैंनी स्‍यासो जैद छैंव युँस सम्‍जैव ताके। 
चिऊन्‍या मिँ माल्‍यो राँदी मेंमारालाई चावस समारिद याराचिऊच्‍यो। 
फरी नो राँदी मेंमाए ओज़ार ओनातीर यालिकिन नोराए ज़ समारिद पाथस ओनैरक। ङ़ादा याक्‍याँदाङावराए ल्‍योदा धर्मलाव य़ेन दान्‍या ओपैसिरक। ननी ज़ याबाबु याआमाराए याभार क्‍याल्‍सिद परमेस्वरए उयुँलाव मिताव ब ताज़्‍या। 
चिऊन्‍या मिँ माल्‍यो राँदी मेंमाए परमेस्वरए ल्‍योदा उयुँ थू जैद लाकनी रील पोंखारिज़्याव। 
नो फरी, ओमन लागिउ माचाहिउ जीदा दुलिरिज़्‍याव उलिकिन नो मासिद ज़ सिउ स्‍यासो ताके। 
है जैद नोर मनी याखत माल्‍यो छैंवर घतारक लिद नँ आव तोबो ऩेब्‍लो पाँ ब यासथैयो। 
खाली जोए ओक्‍याँदाङावरालाई ब मारासमारिउ, होकिन झन उझ़िमलावरालाई ओमारासमारिकिन, नो मिँ परमेस्वरए ओपाँ ऱासोल गनिसिज़्‍या। परमेस्वरए ओपाँत खर्क ज़ माहुव मिँकिन ब माचाव ताज़्‍या। 
स़ोनो जे परमेस्वरए उमिनत दुप्‍सिज़्‍याव राँदी मेंमारालाई जेरासघैक साथी बर्सकिन यादाङावए उमिन वाज़ सर्द नैच्‍यो। नो मेंमा ओरेए ओसतत ल्‍यो, 
चाव य़ेनत उमिन थासो, ओज़ारालाई उघुरिउर जैव, उझ़िमक हुज़्‍यावरालाई चावस नैज़्‍याव, परमेस्वरए छैंव उमींराए यासेवा दाव, दुखल लिज़्‍यावरालाई सुम्‍द समारिज़्‍याव, जो य़ेनत ब चाव य़ेन दाज़्याव ओताक। 
धामें राँदी मेंमाराए यामिन ते तासर्च्‍यो। नोर कसाराक ख्रीसए ओसेवा दान्‍या य़ाका मादाद रे दान्‍यादा वाज़ यायुँ थू याजैकिन, 
याझाःव किर्‍याल बुदिद नोर याखत ल्‍योर थ॰रिन्‍या ओछ्यास लिज़्या। 
ख्वा ख्वार फरी य़ेन मादाद झ़िम झ़िमक दुलिद माचाहिउ पाँर आदा होदा जैद माथैन्‍या पाँर थैद वै वै जैन्‍या ब लेर। 
हो देखा बुरू धामें राँदी मेंमाराए रेर दाद ज़ार दैद झ़िमकाव य़ेन ओदोरक। हो ताकिन गेसुतुरराए गेमिन बले·द्यान्‍या येम दैन्‍या मालेर। 
हितावत ब ख्वा ख्वा राँदी मेंमार ते सैतानए ल्‍योदा धल्‍किधुकेर। 
है जैद ख्‍वा यायुँ हुबो मेंमारास राँदी मेंमार यालिकिन होराए ज़ ओराचिऊरक, मन्‍दलीलाई घचैन्‍या माःक। मन्‍दलीए बुरू याक्‍याँदाङाव सु ज़ माल्‍यो राँदी मेंमारालाई माथैंव मायो·वल ओराचिऊरक। 
मन्‍दलीलाई चावनी चलैज़्‍याव परमेस्वरए ओपाँ बनै धामास पैज़्‍याव लोम्‍बारालाई सघैन्‍या स़ोनो मान दैन्‍याकावर ज़ गनिउ परिके। 
काराव ल्‍यो ताकिन धर्मसास्‍त्रल इताव सर्सिउ लिज़्‍या, “दाइ झाःज़्‍याव घेंलाई ओयाःत महला झाःद्यान्‍या माताए,” स़ोनो, “य़ेन दाज़्‍याव मिँए ब ओजेला दैन्‍या हक लिज़्‍या।” 
सुवाराए मन्‍दलीलाव लोम्‍बालाई ओपाहा झाःद्याव यापैंकिन ऩेब्‍लो स़ोम्‍लोराए यापाँ ओमाखैवा पै थै ज़ ताथैच्‍यो। 
नोए ओगल्‍ती उथ॰रिकिन प़ाइँए ङ़ाक सिङारो ताके। हो ताकिन उपुर्कावर मनी माचाव य़ेन दान्‍या छे·न्‍या लेर। 
ङा नँलाई परमेस्वरए ओङ़ाक, येसु ख्रीसए ओङ़ाक स़ोनो ओराखतैव चाकर्‍याराए याङ़ाक ङाअऱैनिज़्‍या, जो मिँलाई तादी ब आव पाँ भरी मिँ रँःद तादोयो। 
मन्‍दलीलाव लोम्‍बार नराजैक चावस माथ·रैद ताराजैयो। छींनी नोराए यागल्‍ती उपुलुस्‍किन नोरास नँ नपाहा ब बान्‍या ले। नितावनी नपाँःच्‍या तापुलुस्‍क। 
नँ फरी ङ़ादाकिनकाव मिताव ऱी वाज़ ताओयो। नो कैताक कैताक हुज़्याव नजोरो स़ोनो नफूलाव बेथाए जूँनी तुपुरू तुपुरू दाखमद्य ओयो। 
ख्वा ख्वाराए यागल्‍ती ते छुतराए है यामारादोदी ब ओलनी ज़ छर्लङ्ग रैंःज़्‍या। ख्वा ख्वाराए यागल्‍ती फरी ङ़ादा मापुलुस्‍द छींनी वाज़ रैंःज़्‍या। 
हो मिताव ज़ ख्वा ख्वा मिँराए चाव याय़ेन ब ङ़ादा ज़ रैंःज़्‍या। कितर याय़ेन आछिम ओम़ोंसिदी ब तछा जुनी ब चावनी ज़ रैंःन्‍या ले। 
