﻿गलाती.
5.
ख्रीसए गेलाई फुर्सुल तावर जैन्‍याए जूँनी कानुनए उधूँनी पले·सिक्‍यो। है जैद जे फुर्सुल ताद जेलिज़्‍यावल थ॰रिद ल्‍यो ताके। फरी ब बाँदा मिताव जैसिन्‍या माःक। 
ङा पावल जेलाई है ङादाचिज़्‍या, क्‍याल्‍न्‍या सरेस जेजैसिकिन, जेजूँनी ख्रीसए ओय़ेन ज़ माले। 
फरी ब प़ाइँलाई है ङादाचिज़्‍या, जोए क्‍याल्‍न्‍या सरेस ओजैसिकिन नो मिँलाई मोसाए ओकानुन भरी सयो·न्‍या कर लिज़्‍या। 
कानुननी परमेस्‍वरए उयुँलाव मिताव जैसिन्‍या ताकिन नो मिँ ख्रीसनी हाइसिद परमेस्‍वरए ओदयानी ब पुलुस्‍ज़्‍या। 
गे ते ख्रीसलाई गेयुँ हुप्‍द छैंव पुरूस गेदैवनी परमेस्‍वरए ओङ़ाक उयुँलाव मिताव थ॰रिन्‍या गेकींज़्या। 
है जैद क्‍याल्‍न्‍या सरेस जैसिउ तादी ब, माजैसिउ तादी ब, येसु ख्रीसनी ओलेखा ज़ माले। बुरू युँ थू जैद युँ सुहुप्‍न्‍या वाज़ लिज़्‍या। 
जे ङ़ादा निताव येमल थिकस जेबाज़्‍याव, नो साचो येमनी सुए ओवैंचिउ? 
निताव तँदाङाव येम बान्‍या, जेलाई ओल्‍योदा खुलो परमेस्‍वरए ओझाःचिउ ते माःक। 
नो एकतारकाव गेझाःज़्‍याव आहातीनी सैंच्‍यो, “मुछिसिउ कनेल तकेज़ा सोगोइन्‍या वासः झाःकिन कने भरी सरालिज़्‍याव।” 
आव है ङादाचिउ भरी जेभैंःया ज़ लिद प्रभुए ल्‍योदा ङायुँ हुबो ज़ लिज़्‍या। जोए जेलाई गरबर जैचिज़्‍याव, होए ओय़ेन भरी ओङ़ैत ज़ हुरिज़्‍या। 
आव ब सैंच्‍यो, ङानैं ङामेंर, नोराए ङालाई है यादाँज़्‍याव मिताव, क्‍याल्‍न्‍या सरेस माजैसिद माताए लिद यास खैव पाँ ङारासथैज़्‍याव ताकिन नोर ङाखिरी कातानी यापसिरिज़्‍याव, मापसिखेरहो। खाली येसु ख्रीसए क्रुसत उजिउ झाःद ओयासिउनी परमेस्‍वरस गेखैज़्या है ङारादोज़्यावनी यायुँ कोला कोला ताद ङाखिरी पसिज़्यार। 
जेलाई निताव क्‍याल्‍न्‍या सरेस जैसिउ परींज़्‍यावर बुरू याज़ याक्‍याँलाई ओजरानी याक्‍याल्‍दी ब तान्‍या ले। 
अ ङानैं ङामेंर, जेलाई परमेस्‍वरए सुए उधूँल ब मानैद फुर्सुल तावर जैन्‍याए जूँनी उखुल्‍चिउ ची। खाली नो फुर्सुल ताद जेमन लागिउदा बान्‍या माःक, बुरू छुतए ल्‍योदा युँ थू जैद समारिसिउ ताके। 
मोसाए ओकानुनलाव पाँ भरी तोबो पाँत थोम्‍सिज़्‍या। नो पाँ आव ज़, “जेक्‍याँलाई किताव जेसमारिज़्‍या, छुतलाई ब हिताव ज़ समारिउ ताके।” 
जे इ़सिद हुनी होदा कैसिवा कैसिवा जेजैसिकिन परमेस्‍वरसकाव जेसर्‍यो फ्या·न्‍या ओछ्यास लिज़्‍या। 
है जैद ङा है ङादाचिज़्‍या, जे छैंव पुरूसनी जेदोकिन मिँनिकाव माछैंव युँ स्‍यानी दान्‍या जेमाले। 
मिँनिकाव माछैंव युँ स़ोनो छैंव पुरूसनिकाव युँ छुत छुत ज़ ताज़्‍यानी। नोनी निमाखैवए कैताक दोव जेपैंज़्‍याव य़ेन ब जेमादोधुइ। 
खाली छैंव पुरूसनिकाव युँनी जेदोकिन जे कानुनए उधूँल जेमाले। 
फरी मिँए माछैंव उयुँनी इताव हुज़्‍या — पातर्‍या पातर्नी जैसिन्‍या, युँ माजामो य़ेन दान्‍या, जोत ब युँ मानैधुन्‍या, 
अङग्‍या पुजा दान्‍या, मन्‍तर तन्‍तर दान्‍या, माखैव तान्‍या, इ़सिन्‍या, मी तून्‍या, रिस चोन्‍या, क्‍याँलाई तान्‍या वाज़ खिम्‍न्‍या, फातैन्‍या, अर्काए उउपर्त तँदा जैसिन्‍या, 
लोभ दान्‍या, मँःए मँःए रलामातल बाऱिन्‍या, नो स्‍यासो छुत माचाव य़ेनर ब हुज़्‍या। ङ़ादाकिन है दाद ङासम्‍जैचिज़्‍याव मिताव फरी ब है ङादाचिज़्‍या, निताव य़ेन दाज़्‍याव भरी परमेस्‍वरए ओराज्‍याल पसिधुन्‍या मालेर। 
फरी परमेस्‍वरए उपुरूस ल्‍यो मिँए उयुँनी ते इताव य़ेनर हुज़्‍या — प़ाइँए ल्‍योदा युँ थू जैन्‍या, रेंद लिन्‍या, युँ होलाँ तान्‍या, सहिधुन्‍या, युँ नान्‍या, युँ य़ाल्‍न्‍या, सतस लिन्‍या, 
प़ाइँत मुइलिउ तान्‍या स़ोनो थ॰रिउ युँ जैन्‍या। आव य़ेन भरी जो कानुननी तादी ब तँदा माले। 
येसु ख्रीसए उमींर ते ङ़ादाङाव माछैंव यायुँलाई मादान्‍या यादोव याय़ेनरास ज़ क्रुसत तङ्गैद याख्यानैव मिताव ज़ लिज़्‍या। 
गे छैंव पुरूसनिकावर गेतावए, दान्‍या भरी छैंव पुरूसनी ज़ दाव ताके। 
गेखार्ल सघ्योःसिन्‍या, झेंःस्‍या जैसिन्‍या, छुतलाई सोन्‍या सु ज़ ताताक। 
