﻿ओसाचीर.
11.
छींनी येसुए ओसाचीर स़ोनो यहूदिया खन्‍दलाव येसुए ओपाँत बाज़्‍यावराए, ‘छुत जातलावर मनी परमेस्‍वरए ओपाँत हुकेर दी’ लिन्‍या थैकेर। 
है जैद पत्रुस यरूसलेमल ओल्‍द ओबाक नलाव येसुए ओपाँत हुव यहूदीराए ओदोव य़ेनर माभैंःद, 
“नँ काराव छुत जातलावराए ल्‍योक बाद नोरास सिप नज़्‍यु?” है यादोक ते, 
पत्रुसए नोराए यापाँए ओअर्थ ओजरानी ज़ अइ लिद पलास्‍द याएक्‍यो, 
“ङा योप्‍पाल ङालिज़्‍याक तछा परमेस्‍वरलाई ङापोंखारिज़्याक, झजल्‍किद तोबो फेरवा स्‍यासो चार चोंच्‍यानी क्‍योःसिउ, नमतिन ङाल्‍योक उझरिहुज़्‍याव ङारँःके। 
नोलाई लँ लँ चिऊद ङानैज़्‍याक नल जै जन्‍तुर, ऱूइज़ा वान्‍ज़ार स़ोनो स्‍यार बाज़ार ङारारँःके। 
हाःत ज़ कातानी तोबो गाए, ‘अ पत्रुस, नँ सोद आवरालाई सैःद याकैके,’ है ओदाँज़्‍याव ङाथैके। 
ङा फरी, ‘माता प्रभु, निताव कैन्‍या माताज़्‍यावर ङासेत खर्क ज़ ङामाझाःए,’ है ङादोक ते, 
नो गा फरी ब नमतिन हुद, ‘जोलाई परमेस्‍वरए चोखो थ·रैद नैव, होलाई नँ माछैंव थ·रैन्‍या माताए,’ है दाँक्‍यो। 
निताव पाँर स़ोंखेप ओतावत नो फेरवा नमदा स़ेल्‍सिद मारैंःके। 
“हाःत ज़ ङालिज़्‍याव झ़िम ङ़ाकाव साँबिलाक स़ोम्‍लो मिँर हुद यालिज़्‍याव। नोर ङाल्‍योक कैसरियानी परींसिउर याल्‍यो। 
परमेस्‍वरए उपुरूसए फरी, ‘आवरास माअन्‍कनिद घबानी,’ है दाँक्‍यो। है जैद आव ङास लिज़्‍याव छ जना ङानैंर लाँद नो परींज़्‍याव मिँए उझ़िमल गेपसिके। 
हो प़ाइँना ज़ ङ़ादा उरँःव भरी गेलाई है दासिक्‍यो — नो मिँए उझ़िमल परमेस्‍वरए ओचाकर्‍या च्‍याँःसिद उलिज़्‍याव रँःक्‍यो दी। नो चाकर्‍याए फरी, ‘योप्‍पाल लिज़्‍याव सिमोन पत्रुसलाई च़ानाव यापरींके। 
नो सिमोन आल हुद नझ़िमलावरास जेलाई अजम्‍बरी जुनी दैन्‍या पाँर सथैचिरिज़्‍याव,’ है दोक्‍यो दी। 
“है जैद ङा नोरालाई परमेस्‍वरए ओपाँ ङारासथैज़्‍याक ज़ किताव ङ़ादा छैंव पुरूस गे गेक्‍याँत उहुव, हिताव ज़ नोराए याक्‍याँत मनी हुके। 
हाःत ज़ गेप्रभु येसुए ङ़ादा गे उसिसरालाई है ओदासिउ पाँर य़ाका ङादोके — ‘यूहन्‍नाए किताव जेलाई ऱीनी ओसछैंचिउ, हिताव ज़ छींनी तछा छैंव पुरूसनी जेछैंरिज़्‍या।’ 
है जैद परमेस्‍वरए गेलाई गेप्रभु येसु ख्रीसलाई गेयुँ सुहुप्‍दकाव ओयासिउ असिकर नोरालाई मनी ओरायोए ङा परमेस्‍वरए ओय़ेनलाई कै जैद ङावैंधुरिज़्‍याव?” है लिद पत्रुसए है ओरादोक ते, 
नोर सुए ज़ काता ज़ मापाँधुद परमेस्‍वरए उमिन सघ्योःद्याद, “परमेस्‍वरए छुत जातलाव मिँरालाई मनी यायुँ याफर्कैवनी अजम्‍बरी जुनी दैन्‍या असिक ओरायो ओल्‍यो,” है लिकेर। 
स्‍तिफनसए ओपालाकिनकाव यरूसलेमलाव येसुए ओपाँत हुवरालाई याखिरी यापसिक ख्वार फोनिके खन्‍ददा, ख्वार साइप्रस तापुदा, ख्वार एन्‍तिओखिया सहरदा धोंःद खासिद लिनाकेर। नोराए नङ मनी येसुए ओपाँ यारासथैक यहूदीरालाई वाज़ यारासथैज़्‍याव। 
खाली नोराए याखार्नी साइप्रस तापु स़ोनो कुरेनी देसनी हुवर तोबो ऩेब्‍लोए एन्‍तिओखियाल बाद छुत जातलाव मिँरालाई मनी प्रभु येसुए ओपाँ यारासथैकेर। 
परमेस्‍वर नोरास उलिज़्‍यावए बनै कुधुए यायुँ हुप्‍द प्रभु येसुए ओपाँत हुकेर। 
नो पाँर छींनी यरूसलेमलाव मन्‍दलील मनी थास्‍द बारनाबासलाई एन्‍तिओखियादा परींकेर। 
बारनाबास होङ ओकेस्‍क परमेस्‍वरए नोराए याखार्ल ओदोव असिकर रँःद बनै खुसी ताके। नोरालाई, “प्रभुए ल्‍योदा जेयुँ थ·रैद ओसत ताऱास्‍च्‍यो,” लिद यायुँ सझेंःद याएक्‍यो। 
बारनाबास धर्मी, उयुँ हुबो, छैंव पुरूसए ब्यालो मिँ ओल्‍यो। नोए ओपाँ थैद मिँर सर्बा माहोल्‍या ज़ येसुए ओपाँत चा·सिहुकेर। 
नकिन जाँवाक बारनाबास तार्सस सहरल बाद साऊललाई खिम्‍नाक्‍यो। 
ओदैवत नोलाई मनी एन्‍तिओखियाल रैक्‍यो। नोनी ऩेब्‍लो बर्सदिन पै नल ज़ लिद मन्‍दलीलाव मिँरास खैद परमेस्‍वरए ओयेम कुधुलाई यारापैकिनी। नो एन्‍तिओखियाल येसुए ओपाँत बाज़्‍यावरालाई हाःकिन यामिन ख्रीस्त्‍यान जैद याराएकेर। 
हाः बेलाक यरूसलेमनी अगमबक्तार तोबो ऩेब्‍लो एन्‍तिओखियाल हुकेर। 
नोरानी तोबो अगाबस यादोज़्‍यावए छैंव पुरूसनी, “संसार भरिल बनै घ्‍योःव अनिकाल हुरिज़्‍या,” है लिद ङ़ादा ज़ पाँके। थिक है ओल्‍यो मिताव ज़ नो पाँ रोमी माहाराजा क्‍लौदियसए ओपालाक यो·के। 
है जैद एन्‍तिओखियालाव यायुँ हुबोराए यहूदिया खन्‍दल लिज़्‍याव यादाज्‍यु भाइरालाई सघैन्‍या युँ दाद याधुवा भरी सु सु यापैसार स्‍यो·द, 
नो पैसा बारनाबास स़ोनो साऊलनी निकुइत यरूसलेम मन्‍दलीलाव स़ेररालाई परींद याराएकेर। 
