﻿ओसाचीर.
3.
तछा पोंखारिन्‍या बेलाक तीन बजेवाक पत्रुस स़ोनो यूहन्‍नानी ध्‍यान झ़िमदा निबाज़्‍याव। 
हो बेलाक तोबो जर्मननी ज़ घ्‍याँस्‍या ताव मिँलाई ओनैंराए ध्‍यान झ़िमदा घुर्द यालाँज़्‍याव। नो मिँ दिनकाव ज़ ‘चाव’ यादोज़्‍याव य़ामक च़ुसिद ध्‍यान झ़िमल पसिज़्‍यावरास पैसा उऩिज़्‍याव। 
पत्रुस स़ोनो यूहन्‍नानी ध्‍यान झ़िमल निहुज़्‍याव रँःद नो मिँए नोनिस ब ऩिक्‍यो। 
हाःत ज़ पत्रुसए, ओनैं यूहन्‍नास, नोलाई चिऊद, “आदा भाल्‍सिन्‍के,” है ओदोक ते, 
नोए, ‘कातार याँनी सैं’ लिद उयुँ नदा ज़ झाःक्‍यो। 
पत्रुसए फरी, “ङास सुन चाँदी ते माले, खाली जो लिज़्‍या, हो ज़ ङाईंरिज़्‍या। नासरतलाव येसु ख्रीसए उमिननी च्‍याँःसिद बान्‍के,” है दाद, 
नोलाई वोर्फताव उकुइनी क्‍योःद ओसोचोइव प़ाइँना ज़ उखँर पलास्‍सिद, 
नो फुतु ज़ो·द च्‍याँःसिद आदा होदा लिके। पत्रुस स़ोनो यूहन्‍नानिस ध्‍यान झ़िमल पसिद बनै ज़ो·द परमेस्‍वरए उमिन सघ्‍योःद ‘धन्‍या धन्‍या’ है ल्‍यो ज़ लिके। 
परमेस्‍वरए उमिन निताव सघ्योःद ओबाऱिज़्याव रँःद ध्‍यान झ़िमल लिज़्‍याव मिँ भरिए नोलाई सरेस्‍द, 
“ओहो! आव ते नो ‘चाव य़ामक’ च़ुसिद ऩिज़्‍याव घ्याँस्‍या ची सानी। कै जैद बाधुन्‍या ओताव?” लिद अचम्‍ब ताकेर। 
हाःत ज़ मिँ भरी बनै अचम्‍ब ताद नो ध्‍यान झ़िमलाव सोलोमन मैरा यादोज़्‍यावल पत्रुस स़ोनो यूहन्‍नानी निल्‍योक धोंःहुकेर। हाःपै नो गराँव घ्याँस्‍या ओरेंतए नोनिलाई लाप्‍द उनिनैज़्‍याव। 
पत्रुसए मिँर याहुज़्‍याव रँःद नोरालाई, “अ इस्राएली ङादाज्‍यु भाइर, काराव आवलाई रँःद अचम्‍ब ताद जेलिज़्‍याव? सैं गिनलाई, ‘नी निसक्ती नितपसनी ज़ सोजोकाव निजैव ताखेहो,’ है लिद जेचिऊसिज़्‍याव रो? 
गेपुर्खा अब्राहाम, इसहाक स़ोनो याकूबराए यापरमेस्‍वर, ओल ज़ आज्‍याल ओज़ा येसुलाई ज़गै मगै जैक्‍यो। नो येसुलाई जे ते झन सूँपिद सैःन्‍या जेथ·रैके। पिलातसए नोलाई ऱासो ओपैंज़्‍यावत ब जे भैंःद जेमाएके। 
है जैद ओखत माल्‍यो छैंव मिँलाई अऩाकल ज़ भीःद झन होए ओपोल मिँ सैःज़्‍यावलाई ऱासो परींद, 
प़ाइँए गेस॰ झाःद्याज़्‍याव गेधर्मीलाई जेसैःके। नोलाई फरी परमेस्‍वरए सिउनी ओसोचोइव गे गेमीए ज़ गेरँःके। 
नो है ङालिज़्‍याव येसुए उमिननिकाव सक्तीए ज़ आव जेरँःज़्‍याव जेसरेस्‍ज़्‍याव मिँ सोजोकाव ताद ले। नो येसुए उमिनत गिनयुँ गिन्सुहुबोनी ज़ आल जेङ़ाक ओक्‍याँर हालाँ होलों गराँद ले। 
“आव ब ङासैंज़्‍या ङानैं ङामेंर, जेघेप्‍पाराए यादोव मिताव ज़ जे मनी येसुए ओक्‍याँताव जेदोव भरी मासैंद ज़ जेदोके। 
हुनी ज़ अगमबक्ताराए यायाःनी ङ़ादा ज़ ‘ख्रीसए दुखर दैन्‍या ले’ लिद ओपाँव पाँर यो·के। 
है जैद जेपापलाई क्‍याल्‍न्‍याए जूँनी जेयुँर त़ोद परमेस्‍वरए ल्‍योदा सखैसिचिके। हो ताकिन ची परमेस्‍वरए युँलाई होलाँ जैद्यान्‍या असिकर जेक्‍याँत जैद्याद, 
जेजूँनी ङ़ादाकिन ज़ खतैद नैद ओयाचिउ येसु ख्रीसलाई फरी तछा परींद्यान्‍या ले। 
खाली नोकिन ङ़ादा आव नाम नमलाव परमेस्‍वरए ओय़ेन भरी दाद ओमातुपैवा पै येसु स्‍वर्गत ज़ लिन्‍या ले। नो बेलाए जूँनी परमेस्‍वरए भाःकिन ज़ छैंव अगमबक्ताराए यायाःनी है ल्‍यो ज़ उलिज़्‍याव। 
मोसाए मनी अइ लिद पाँके, ‘जेजातलाव मिँराए याखार्नी ज़ परमेस्‍वरए जेजूँनी तोबो ङा मिताव अगमबक्ता उथैद्याचिरिज़्‍याव। जे नोए ओपाँ भरित बनै धिद ल्‍यो ताके। 
जोराए नोए ओपाँ माभैंःर होराए यामिन ओपो·स ज़ परमेस्‍वरए ओथोनी क्‍याल्‍सिन्‍या ले।’ 
“हो मिताव ज़ अगमबक्ता भरी, समूएलए ओपालाकिन छींनीकाव पाला पैकावर प़ाइँए आव बेलाए जूँनी ज़ पाँकेर। 
नो अगमबक्ताराए याथोर जे ज़ जेतावए नो जेजिज्‍यु बाज्‍युरास परमेस्‍वरए ओनैव बाचालाव पाँ भरी जे जेक्‍याँत ज़ हुके। नो पाँ ङ़ादा परमेस्‍वरए अब्राहामलाई अइ लिद एक्‍यो, ‘नँ नथोरानी ज़ मानुवाताव प़ाइँ जातलाव मिँराए असिक दैन्‍या लेर।’ 
है जैद जेदोज़्‍याव पापरानी फर्कैद असिकर यान्‍याए जूँनी परमेस्‍वरए ओसेवा दान्‍या उथैद ओनैज़्‍याव येसुलाई उस॰कत जे जेल्‍योक ज़ परींद्याचिक्‍यो,” है यादोक्‍यो। 
