﻿ओसाचीर.
2.
पेन्‍तिकोस पर्ब हुद उलिज़्‍याव। हो छ्याम पोंखारिन्‍याए जूँनी येसुए उमिनतावर प़ाइँ दुप्‍सिद यालिज़्‍याक, 
उमँःजानी नमतिन बुर बुर फर्लेसिहुज़्‍याव बनै घ्‍योःव बतासए ओर्गा मिताव थास्द नो दुप्‍सिद यालिज़्‍याव झ़िमल ज़ तसी ताके। 
हाःत ज़ मेंःए मुल्‍का स्‍यासोर रैंःहुद नो मुल्‍कार आदा होदा रा·सिनाद प़ाइँए याक्‍याँत ज़ तोबो तोबो च़ुसिके। 
नाःत ज़ नोर छैंव पुरूसए ब्याल्‍द नो पुरूसए ओरायो मिताव प़ाइँ ज़ छुत छुत खामनी पाँकेर। 
नो बेलाक पर्बए जूँनी प़ाइँ राज्‍यानिकाव यहूदीर यरूसलेमल हुद यालिज़्‍याव। नोर परमेस्‍वरलाई रँःद छे·ज़्यावर याल्‍यो। 
नो घ्योःव गा थैद मिँर बनै माहोल्‍या प़ाइँनी ज़ धोंःहुद नो झ़िमलाव दुप्‍सिउराए यापाँज़्‍याव सु सु याखामनी ज़ थैद अचम्‍ब ताकेर। 
नोर बनै अचम्‍ब ताद, “आव पाँज़्‍यावर ते प़ाइँ गालीललाव मिँर ची सानी। 
कै जैद आवराए यापाँ सु सु गेखामनी गेथैज़्‍याव? 
गे ख्वार पार्थीया, मादी स़ोनो एलामीनी हुवर गेलिज़्‍या। ख्वार फरी मेसोपोतामियालावर, यहूदियालावर, कापादोकियालावर, पोन्‍तसलावर, एसियालावर, 
फ्रिगियालावर, पामफिलियालावर, इजिपलावर स़ोनो लिबिया देसलाव कुरेनी जीदाङावर गेलिज़्‍या। ख्वार फरी रोमनी हुवर ब लिज़्‍यार। 
(नोर ख्वार यहूदी जातलावर लिज़्‍यार, ख्वार यहूदी धर्म मानिज़्याव छुत जातलावर ब लिज़्‍यार।) ख्वार फरी क्रेत तापु स़ोनो अरब देसनी हुवर गेलिज़्‍या। कै जैद परमेस्‍वरए ओसक्तीलाव ओदोव य़ेनर सु सु गेखामनी ज़ यापाँज़्‍याव गेथैज़्‍याव?” है लिकेर। 
है जैद नोर बनै अचम्‍ब ताद ‘आवए ओअर्थ काता ओताव?’ लिद या याल सुधिसिकेर। 
ख्वाराए फरी ल़॰द, “आवर ते मँःवर ची सा,” है ब लिकेर। 
हाःत ज़ पत्रुस स़ोनो एघार जना येसुए उसिसर च्‍याँःसिद पत्रुसए ओर्गा बनै सघ्‍योःद नो माहोल्‍यारालाई है यादोक्‍यो, “अ यहूदियालाव मिँर स़ोनो यरूसलेमल लिज़्‍यावर, आदा थैचिके। आव जेरँःव भरी पलास्‍द ङायाचिरिज़्‍या। 
जे है जेलिज़्‍याव मिताव आवर मँःवर माःक। भर्ज़ा ज़ छकाल्‍न्‍याकाव नौ बजिद ले सानी। 
आव जेरँःज़्‍याव भरी ते योएल अगमबक्ताए सर्द ओनैज़्‍याव पाँ ची। नोए ओसरो आव ज़, 
‘परमेस्‍वरए है लिज़्‍या, जुक खेम्‍न्‍या बेलाक ङा मिँ भरिराए क्‍याँत ङापुरूस थुद ङाराएरिज़्‍या। जे खेपा मेंमा जेज़ाराए ङापुरूसनी पाँन्‍या लेर। जेसकाव धापाज़ाकावराए दर्सनर रँःन्‍या लेर। जेसकाव सेरोराए मनी अचम्‍बलाव मँर मँन्‍या लेर। 
हो बेलाक ङाय़ेन दाज़्‍याव ङाबाँदा ङाबाँदानीराए याक्‍याँत ङापुरूस थुद ङाराएक नोर ङापुरूसनी पाँन्‍या लेर। 
रोताव नमत छे छे ङम्‍सिउर रैंःन्‍यार ङाराजैरिज़्‍या, उधूँलाव नामल मनी अचम्‍बलाव सरेसर ङासतैंरिज़्‍या — झी स्‍यासोर, मेंःए मुल्‍कार, सुम्‍ला सुम्‍ला म़िकुइर। 
परमेस्‍वर बनै ज़गै मगैवस उहुरिज़्‍याव छ्याम ओमाताद ङ़ादा निमीए ओझ़ार ब चुम चुमो तारिज़्‍या, स़्यावै मनी झी स्‍यासो घ्याम घ्यामो तारिज़्‍या। 
हो बेलाक जोए परमेस्‍वरए उमिन हाइद ओललाई खिम्‍ज़्‍याव, नो सजानी पुलुस्‍द बाँचिन्‍या ले।’ 
“जे इस्राएली ङानैं ङामें भरिए, आव ब सैंच्‍यो। नासरतलाव येसुए परमेस्‍वरए ओसक्ती दैद जे जेखार्ल ज़ अचम्‍बलाव य़ेनर स़ोनो सरेसर ओदोव जे ज़ जेरँःके। नो ओदोव ओय़ेननी ज़ परमेस्‍वरए, ‘ङा ज़ ङापरींव’ लिद जेलाई ज़ थ·रैव परींचिक्‍यो। 
जे ते झन नो मिँलाई परमेस्‍वरए ङ़ादाकिन ज़ गोइँद ओनैज़्‍याव मितावनी ज़ नोलाई परमेस्‍वरए ओपाँ मासैंज़्‍यावराए कुइत सूँपिद क्रुसत तङ्गैद सैःव जेरापरींके। 
परमेस्‍वरए फरी नोलाई सिउनी सोचोइद सिउका सिउ तान्‍यानी उस्‍कैक्‍यो। है जैद नोलाई खादरल काताए ब मानैधुक्‍यो। 
नोए उजूँनी दाऊद राजाए मनी ङ़ादा ज़ धर्मसास्‍त्रल अइ लिद सर्द नैव, ‘ङाप्रभुलाई एकतार ङास ज़ उलिज़्‍याव ङारँःज़्‍या। ङावोर्दा च्‍याँःसिद धुरिद ओयाँज़्‍यावए, काताए ब ङायुँलाई काता माँःती माजैधुव। 
है जैद ङायुँर बनै होलाँ ताद, ङायाःए ब रेंद ङापाँज़्‍या। ‘ङापुरूसलाई सिउराए याल्‍योल ख्यानैद्यान्‍या नमाले’ लिद, आव ङाजिउत ङायुँ हुबो ज़ लिज़्‍या। ङा, छैंव नमींलाई खादरल चिउ यान्‍या नमाले। 
अजम्‍बरी जुनील बान्‍या येम ङालाई नपैनाके। है जैद नँ ङालाई नँस ज़ नैद, ङायुँर होलाँ जैद्यान्‍या नले।’ ” 
हाःत ज़ पत्रुसए फरी ब है यादोक्‍यो, “अ ङानैं ङामेंर, साचो ज़ है ङालिज़्या — गेपुर्खा दाऊद ते ङ़ाङ ज़ सिद गमल बाके। ओखादर आःपै गेस ज़ लिज़्‍या। 
खाली नो मिँ अगमबक्ता ओतावए छींनी हुन्‍या पाँर ब सैंद ओनैज़्‍याव। परमेस्‍वरए नोलाई ङ़ादा ज़ किर्‍या झाःद, ‘नँ नथोरानी ज़ ङाराज्‍या चलैन्‍या मिँ ङाउथैरिज़्‍या,’ है दाद ओनैज़्‍याव। 
है जैद दाऊदए छींनी तान्‍या पाँर उरँःव मिताव ज़ ताद ख्रीस सिउनी ओसैंसिरिज़्‍यावए जूँनी ज़ ओपाँव। है जैद ङ़ादा है उलिज़्‍याव मिताव ज़ ख्रीस सिउराए ल्‍योल ब मारहिए, ओक्‍याँ ब खादरल माचिए। 
नोलाई ओल परमेस्‍वरए ज़ सोचोइक्‍यो। नो पाँ रँःज़्‍यावर गे प़ाइँ गेलिज़्‍या। 
ओबाबु परमेस्‍वरए येसुलाई मान याद ओवोर्दा च़ुसिउ परींद ओय़ाकालाव छैंव पुरूस एक्‍यो। येसुए नो पुरूसलाई ज़ आछिम गेक्‍याँत थुद्यासिक्‍यो। नो जेरँःज़्‍याव जेथैज़्‍याव भरी हो ज़। 
स्‍वर्गत पुलुस्‍द परमेस्‍वरए ओल्‍योङ बाव दाऊद माःक। नोए उजूँनी ब ओल दाऊदए अइ लिद पाँके, ‘परमेस्‍वरए ङाप्रभुलाई, ‘नसुतुररालाई नखँ धूँल झाःद ङामाईंवा पै, ङावोर्दा च़ुसिद लिन्‍के,’ है दोक्‍यो।’ 
है जैद जे इस्राएली जातलाव प़ाइँ मिँराए आव सैंच्‍यो, नो क्रुसत जेसैःव येसुलाई ओल परमेस्‍वरए ज़ अजम्‍बरी जुनी यान्‍या ख्रीस ब थ·रैद्यासिक्‍यो, नाम स़ोनो नमतावराए गेप्रभु ब जैद्यासिक्‍यो।” 
नो माहोल्‍याराए पत्रुसए ओपाँ थैद यायुँ माचाव दाद पत्रुस स़ोनो येसुए छुत ओसाचीरालाई, “ओहो! ङादाज्‍यु भाइर, हिताव ताकिन ते गे कै लिन्‍या ओताव?” है यारादोक ते, 
पत्रुसए फरी, “जेपापलाई ऱास्‍द परमेस्‍वरस सखैसिन्‍याए जूँनी जेयुँर त़ोद येसु ख्रीसए उमिनत ऱील सछैंसिचिके। हो ताकिन ची छैंव पुरूस परमेस्‍वरए ल्‍योनी बरदान मिताव दैन्‍या जेले। 
नो पुरूस दैन्‍या य़ाका जेलाई, जेज़ारालाई स़ोनो तादा तादा लिज़्यावर, जो जोलाई गेप्रभु परमेस्‍वरए ओल्‍योदा खुल्‍सिउर लिज़्यार, होराए जूँनी ज़ लिज़्‍या,” है यादोक्‍यो। 
पत्रुसए कुधु पाँर सथैद, “आव जुकलाव पापी मिँराए ल्‍योनी पुलुस्‍द बाँचैसिचिके,” लिद यासम्‍जैक्‍यो। 
हो छ्याम पत्रुसए ओपाँ भैंःद परमेस्‍वरए उमिनत चा·सिहुवर स़ोंहजारा याल्‍यो। नोर प़ाइँ ज़ ऱील सछैंसिकेर। 
नोर हाःकिन येसुए ओसाचीरास प़ाइँ तोबो झ़िमलाव मिताव ताद, नोराए यापाँ पैसिद, प्रभु-भोजल दुप्‍सिद पोंखारिउ ज़ यानैज़्‍याव। 
मिँ भरी प़ाइँ छे·वर यालिज़्‍याव। येसुए ओसाचीराए अचम्‍बलाव य़ेनर, अचम्‍बलाव सरेसर दाव ज़ यानैज़्‍याव। 
येसुए ओपाँत हुव भरी ते प़ाइँ तोबो झ़िमलाव मिताव ताद यासकाव लिज़्‍याव भरी दुप्‍द याखार्त ज़ जैद यानैज़्‍याव। 
याधन सम्‍पतीर यो·द या या माथैंव मायो·वल सघैसिउ ज़ यानैसिज़्‍याव। 
दिनकाव ज़ ध्‍यान झ़िमल दुप्‍सिद ननी भाःसिद याबावत झ़िम झ़िमक यानैंरास दैसिद या याल बनै खैद रेंद काँर ब सिप याज़्‍युज़्‍याव। 
परमेस्‍वरए ल्‍योदा खुसी ताद परमेस्‍वरए उमिन ब सघ्‍योःद याएज़्‍याव। मिँराए ब नोरालाई चाव ज़ यारारँःज़्‍याव। है जैद यायुँ हुप्‍ज़्यावर परमेस्‍वरए दिनकाव ज़ याबगालल चा·द ओराएज़्‍याव। 
