﻿यूहन्‍ना.
2.
गालीलल याहुव स़ोंलात काना यादोज़्‍याव नाखारल तोबो बिह्‍या ओल्‍यो। येसुए ओआमा ब नक ज़ उलिज़्‍याव। 
येसुलाई ब उसिसरास नो बिह्‍यालाव भत्‍यारल याराखुल्‍केर। 
नो बिह्‍याल याओज़्‍याव दाखमद्य ओखेमोत येसुए ओआमाए येसुलाई, “नलाव याओज़्‍याव दाखमद्य खेम्‍द ले,” है ओदोक ते, 
येसुए ओआमालाई, “अ माँ, आव य़ेनत ङालाई है तादाँयो, ङाबेला माताताए,” है दोक्‍यो। 
नकिन येसुए ओआमाए नक लिज़्‍याव नोकोररालाई, “येसुए जो है दाचिज़्‍याव, हो ज़ दोच्‍यो,” है यादोक्‍यो। 
हाः बेलाक नल यहूदीराए याचलन मिताव चोखोइसिन्‍या ऱी नैन्‍या दस पन्‍ध्र सेमे बाज़्‍याव लुँए घागरीर छ गोता यारानैज़्‍याव। 
येसुए नलाव य़ेन दाज़्‍यावरालाई, “आव घागरी भरिल ऱी तसी तसी जैचिके,” है ओरादोव प़ाइँना नोराए घागरी भरी यारासब्‍याल्‍केर। 
हाःत ज़, “आव ऱी आनी तुपुरू क्‍यो·द भत्‍यारलाव य़ेन चलैज़्‍यावलाई लाँदिचिके,” है ओरादोक ते, नोराए लाँदिकेर। 
नो य़ेन चलैज़्‍यावए नो दाखमद्य जैसिउ ऱी ओदारक, आः ङमो दाखमद्य कातानी ओताव लिन्‍या मासैंक्‍यो। नो ताव ऱी गप्‍ज़्‍यावराए वाज़ यासैंज़्‍याव। है जैद नो य़ेन चलैज़्‍यावए ब्‍याहोल्‍यालाई खुल्‍द, 
“उपुर्कावराए ते चाव दाखमद्य भरी ङ़ादा ज़ भाःज़्‍यार, ओपाहुनाराए कुधु याओवत वाज़ जाँ छ्यावाकाव याराएज़्‍यार। नँ ते प़ाइँरानी चाव छींङ पै साँचिद ननैज़्‍याव ओल्‍यो,” है दोक्‍यो। 
येसुए आव प़ाइँरानी उस॰कताव ओसरेस गालीललाव काना नाखारल सतैंक्‍यो। निताव अचम्‍बलाव ओसक्तीर रँःद उसिसराए येसुलाई यायुँ हुप्‍के। 
नकिन येसु ओआमा, ओभाइ स़ोनो उसिसरास कफर्नहुम सहरल बाद जाँवा पै लिकेर। 
नाः बेलाक यहूदीराए निस्‍तार पर्ब हुनाद उलिज़्‍याव। नोए उजूँनी येसु यरूसलेमदा बाके। 
यरूसलेमलाव ध्‍यान झ़िमल मिँराए घेंर, बेधार, परिवार यो·व ज़ यारानैज़्‍याव स़ोनो पैसा त़ोज़्‍यावर ब नल च़ुसिद यालिज़्‍याव रँःद, 
येसुए उकुइत तोबो च़ें रैद कोर्रा जैद नो ध्‍यान झ़िमलाव लँःज़्‍यावर यो·ज़्‍यावरालाई रीःद याबेधा याघेंरास यापले·क्‍यो। पैसा त़ोज़्‍यावराए यातेबलर पल्‍तैद्याद यापैसार सोभोद याएक्‍यो। 
परिवा यो·ज़्‍यावरालाई, “जे जेसमानरास आनी पुलुस्‍द बाचिके। आव ङाबाबुए उझ़िमलाई काराव जे पसल जेजैज़्‍याव?” है यादोक्‍यो। 
हाःत ज़ उसिसराए नो धर्मसास्‍त्रलाव सर्सिउ पाँलाई चेतैकेर। नलाव सर्सिउ आव ज़, “अ परमेस्‍वर, नझ़िमए जूँनी ङादोज़्‍याव ध्‍यावनाए ङायुँल मेंः माँःती चाँःज़्‍या।” 
नाःत ज़ यहूदीराए यास़ेरराए येसुलाई, “नँ इताव य़ेन दान्‍या परमेस्‍वरनी नदैव ताकिन गेलाई तोबो सरेस सतैंद्याव ताके,” है यादोक ते, 
येसुए, “जे आव ध्‍यान झ़िमलाई तैःचिकेदा, ङा स़ोंलात सोचोइन्‍या ङाले,” है ओरादोक ते, 
नोराए, “आव ध्‍यान झ़िमलाई छयालीस बर्सत गेजैके, कै जैद नँ स़ोंलात नसोचोइधुरिज़्‍याव?” है दोकेर। 
खाली नो ध्‍यान झ़िम ते येसुए ओल ओक्‍याँए उजूँनी है ओरादोव ची। 
येसु सिउनी ओसोवत वाज़ उसिसराए नो है ओरादोव भरी य़ाका दोकेर। ननी ज़ नो धर्मसास्‍त्रलाव सर्सिउ पाँ स़ोनो येसुए ओपाँव पाँ भरी थ·रैद पतिकेर। 
निस्‍तार पर्ब उहुवत येसु यरूसलेमल उलिज़्‍याक, अचम्‍बलाव ओदोव य़ेनर रँःद नलाव मिँर कुधुए येसुलाई यायुँ हुप्‍के। 
हैदी ब ओल येसुए मिँराए यायुँलाव पाँ भरी ओसैंज़्‍यावए नोराए याभर मादोक्‍यो। 
सुए ज़ येसुलाई ‘आव मिँ इताव लिज़्‍या’ है दाव ओमापरिज़्‍याव, ओल ज़ प़ाइँए युँलाव पाँ ओसैंज़्‍याव। 
