﻿लूका.
23.
नलाव दुप्‍सिउ भरिए येसुलाई पिलातसए ल्‍योक लाँकेर। 
नक लाँद येसुलाई खत लैद नोराए, “आव मिँ ख्रीस जैसिद, गेराजा ब जैसिउ पैंद, रोमी सरकारलाई सिर्मा यान्‍या माःक लिद गेदेसलाव मिँरालाई यामचैज़्‍याव,” है दोकेर। 
पिलातसए नोराए यापाँ थैद येसुलाई, “नँ साचो यहूदीराए याराजा ज़ रो?” है ओदोक ते, “नँ ज़ नथ·रैनाके,” है दोक्‍यो। 
नकिन पिलातसए मुख्‍या पुजारीर स़ोनो नो माहोल्‍यारालाई, “आवए ओखत ते काता ज़ ङामारँःए,” है ओरादोक ते, 
नोराए झन, “यहूदिया खन्‍द भरिल गालीलकिन आङ पै ज़ ओपाँर सथैद मिँरालाई यामचैज़्‍याव,” है दोकेर। 
पिलातसए नोराए यापाँ थैद आव गालीललाव सैं माःक लिद सुधिद, 
‘आव ते हेरोदए उकुइताव ज़ ची ओल्‍यो’ लिन्‍या थ·रैद हेरोदए ल्‍योदा परींक्‍यो। हेरोद ब हाः बेलाक यरूसलेमल हुद उलिज़्‍याव। 
हेरोदए येसुलाई रँःद बनै खुसी ताके। नोए ङ़ादाकिन ज़ येसुए उजूँनी थैद ‘ओदोज़्‍याव सरेसर ब रँःव ङादैकिन ताखेहो’ लिद दैसिउ ओपैंज़्‍याव। 
है जैद हेरोदए येसुलाई बनै ज़ खोले·क्‍यो। खाली येसुए घाइ ज़ मादोक्‍यो। 
हो बेलाक मुख्‍या पुजारीर स़ोनो सास्‍त्रीराए नक च्‍याँःसिद येसुलाई खत लैव ज़ यालिज़्‍याव। 
हाःत ज़ हेरोदए उसिपाईंरास येसुलाई बनै हेलारी मिताव जैद बरे·न्‍याए जूँनी राजाए जासिन्‍या मिताव क्‍वा जास्‍द फरी पिलातसए ल्‍योदा ज़ लाँव यापरींक्‍यो। 
हो छ्यामकिन ज़ हेरोद स़ोनो पिलातसनी नी नील खैद नैं नैं ब ताकिनी। नोनी ङ़ादाकिन निमाखैज़्‍याव। 
पिलातसए मुख्‍या पुजारीर, मिँराए याघेप्‍पार स़ोनो माहोल्‍यारालाई फरी ब दुप्‍द, 
“जे ते आव मिँलाई ‘मिँरालाई यामचैज़्‍याव’ लिद ङाल्‍योक जेरैके। नोलाई जेङ़ाक ङाफाल्‍क जे है जेलिज़्‍याव मिताव ओखतर ते काता ज़ ङामादैके। 
हेरोदए मनी ओखत काता ज़ मादैद ङाल्‍योदा सोवोल्‍द्याँक्‍यो। है जैद आव मिँए सिन्‍या मिताव य़ेन ओदोव कान्‍नी ज़ मारैंःए। 
है जैद ङा आवलाई तखेप सजा याद ङाऱास्‍रिज़्‍या,” है यादोक्‍यो। 
नोराए याचलनल पर्बत सालकाव तखेप तोबो कैदीलाई याऱास्‍ज़्‍याव। 
हाःत ज़ नलावराए, “आवलाई सैःद बारब्‍बालाई ऱास्‍द्यासिके,” है लिद बनै क़िकेर। 
नो बारब्‍बा सरकारकिन तँदा जैसिद मिँरालाई मचैद तोबो ऩेब्‍लोलाई ओरासैःवनी झ्यालखानाल उलिज़्‍याव। 
पिलातसए फरी येसुलाई ऱासो ओपैंज़्‍यावए माहोल्‍यारालाई फरी तखेप यासम्‍जैक्‍यो। 
हितावत ब, “आवलाई क्रुसत तङ्गैद सैःन्‍या ज़,” लिद बनै क़िकेर। 
हाःत ज़ पिलातसए फरी, “काराव? आवए मादान्‍या काता दाद ओनैज़्‍याव? ङा ते आवलाई सैःन्‍या मिताव ओय़ेन कान्‍त ज़ ङामादैए। है जैद ङा आवलाई तखेप सजा याद ङाऱास्‍रिज़्‍या,” है ओरादोक ते, 
नोर झन बनै ज़ मचिद, ‘क्रुसत तङ्गैन्‍या ज़’ है लिद याक़िक पिलातसए ओपाँ ज़ सोङोइदिकेर। 
है जैद पिलातसए यापाँ ज़ थ·रैद्याद, 
नो याऩिउ झ्यालखानाल लिज़्‍याव मिँ सैःद मिँरालाई मचैव बारब्‍बालाई ऱास्‍द्याद येसुलाई ‘जेजैन्‍या जैचिके’ लिद यालाई ज़ यासूँपिक्‍यो। 
येसुलाई सैःना यालाँज़्‍याक नाखारनी हुज़्‍याव कुरेनीलाव तोबो सिमोनलाई येसुए ओलाँज़्‍याव क्रुस सुघुर्द येसुए उछीं उछीं बाव परींकेर। 
येसुए उछीं उछीं बाज़्‍यावर कुधु माहोल्‍या ज़ यालिज़्‍याव। नोरास मेंमार ब घरे घरे याबाज़्‍याव। 
नोराए ल्योदा येसु उछींदा भाल्‍सिद, “अ यरूसलेमलाव मेंमार, ङाजूँनी ताघर्च्‍यो। बुरू जेजूँनी स़ोनो जेज़ाराए जूँनी घर्चिके। 
तछा परमेस्‍वरए ओसजा उहुक आलाव मिँराए, ‘ज़ा मादैज़्‍याव थारी मेंमार, नुइँ सोवैन्‍या याज़ा माल्‍योर याभागी ल्‍योर ज़ लिज़्‍यार,’ है लिन्‍या लेर। 
स़ोनो, ‘हाँरालाई ब ‘गेतर्त तेचिके’, गोंरालाई ब ‘गेलाई राल्‍सिके’ है दान्‍या लेर।’ 
ङा काचो सीं स्‍यासोलाई अइ याजैनाकिन, या थँव सीं स्‍यासोरालाई परमेस्‍वरए कै याजैवके?” है यादोक्‍यो। 
येसुस तखेप्‍त सैःन्‍याए जूँनी ऩेब्‍लो अपराधीनिलाई ब यारालाँज़्‍याव। 
नोर खप्‍पर्‍या पो यादोज़्‍यावक याकेसोत क्रुसत यारातङ्गैकेर। नो अपराधीनिलाई तोबोलाई ओवोर्दा, तोबोलाई ओदाबर्‍यादा याराजैकेर। 
येसुए अइ लिद पोंखारिक्‍यो, “परमेस्‍वर बाबु, आवरालाई कैज़ ताराजैयो, यादोज़्‍याव य़ेन मासैंर।” नोराए फरी येसुए ओक्‍वारात गोला झाःद भाःकेर। 
मिँर नक च्‍याँःसिद याभाल्‍सिज़्‍याव। याघेप्‍पाराए फरी, “आवए छुतरालाई ते याबाँचैक्‍यो, परमेस्‍वरए साचो ओछाँतिउ ख्रीस ज़ ताकिन ओक्‍याँलाई ब ओबाँचैवक,” है लिद बरे·केर। 
सिपाईंराए ब गिल्‍लैद ओल्‍योक बाद सिरो दाखमद्य याद, 
“नँ यहूदीराए याराजा ताकिन नक्‍याँलाई बाँचैके,” है दोकेर। 
ओललाई तङ्गैद यानैज़्‍याव क्रुसए ओङ़ैत फरी, ‘आव यहूदीराए याराजा ज़’ है लिद तोबो फल्‍यात सर्द चकेर। 
येसुस तङ्गैसिउ अपराधीनी ब तोबोए येसुलाई गिल्‍लैद, “नँ ख्रीस माःक रो? ख्रीस नताकिन नक्‍याँलाई मनी गिनलाई मनी बाँचैसिन्‍के,” है ओदोक ते, 
ओनैंए नोलाई सिङार्द, “नँ सिन्‍या सजा दैद नैज़्‍यावत ब परमेस्‍वरलाई रँःद नमाछे·ए रो? 
गिन ते गिनय़ेननी ज़ इताव सजा दैन्‍या गिन्ताके। आव मिँए ते मादान्‍या काता ज़ मादोव,” है दाद, 
येसुलाई, “अ येसु, नँ नराज्‍याल नपसिक ङालाई ब तामेंःनायो,” है ओदोक ते, 
येसुए, “नँलाई साचो है ङादींज़्‍या, आछिमकिन ज़ नँ ङास स्‍वर्गत नतारिज़्‍या,” है दोक्‍यो। 
हो बेलाक बाह्र बजेवाकिन तीन बजे पै देस भरी काल्‍या कले झ्याद, 
निमीए ओज़गै ज़ मारैंःके। थिक हो बेलाक ज़ ध्‍यान झ़िमलाव बारिसिउ क्‍वा ब ओलनी ज़ ऩेपरा ताद चिस्‍के। 
हाःत ज़ येसु ब बनै चोइस अइ लिद क़िके, “अ परमेस्‍वर बाबु, आव ङापुरूस नपिछाल ज़ ङाईंज़्‍या,” है लिद उस॰ सफ्या·क्‍यो। 
नक च्‍याँःसिद लिज़्‍याव कप्‍तानए नो भरी रँःद, “आव ते साचो धर्मी मिँ ज़ ची ओल्‍यो,” लिद परमेस्‍वरए उमिन सघ्‍योःक्‍यो। 
नो भाल्‍सिना हुव माहोल्‍याराए नो भरी रँःद घरे घरे याझ़िमदा बाकेर। 
ओल येसुस बाऱिज़्‍याव मिँर स़ोनो गालीलनी ओलस हुव मेंमार जाँ तादाङ च्‍याँःसिद याभाल्‍सिज़्‍याव। 
यहूदिया खन्‍दलाव अरिमाथिया नाखारलाव तोबो योसेफ यादोज़्‍याव घ्‍योःव कचरीलाव मिँ ओल्‍यो। नो धर्मी, परमेस्‍वरए ओराज्‍या खिम्‍ज़्‍याव मिँ ओतावए येसुलाई सैःन्‍या यासल्‍लाल माखैद भैंःद ओमाराएज़्‍याव। 
नोए पिलातसए ल्‍योक येसुए ओमोरो ऩिक्‍यो। 
नो मोरोलाई क्रुसतिन हाइद, पालो क्‍वाए लुम्‍बैद सुलाई ज़ यामाराझाःताव दावन खुपिद पुप जैद ओनैज़्याव खादरल झाःक्‍यो। 
हो छ्याम तयारीलाव दिन ओल्‍यो। ऩासिन्‍या छ्याम सुरू तानाद उलिज़्‍याव। 
येसुए उछींताव हुव गालीललाव मेंमार योसेफए उछीं उछीं बाद नो मोरो ओझाःव खादर चिऊकेर। 
नो मेंमार ओल्‍द बाद येसुए ओमोरोलाई थीन्‍याए जूँनी चाव सी ङरो म़ासर, अतरर सरजाम जैद हो पराःती ऩासिन्‍या छ्याम ओतावए कानुनलाई भैंःद ऩासिकेर। 
