﻿लूका.
20.
हाः बेलाक तछा यरूसलेमलाव ध्‍यान झ़िमल येसुए चाव था ओरासथैज़्‍याक नलाव मुख्‍या पुजारीर, सास्‍त्रीर स़ोनो यहूदीराए यास़ेरर ओल्‍योक हुद, 
“गेलाई है दासिके, आव नदोज़्‍याव य़ेनर नँलाई सुए है उदींव, सुए हक उईंव?” है यादोक ते, 
येसुए, “ङा ब जेलाई तोबो है ङादाचिज़्या, नो पाँ है दाँचिके। 
ऱील सछैंज़्‍याव यूहन्‍नाए ओय़ेन परमेस्‍वरए ल्‍योनी ओताव सैं मिँराए ल्‍योनी ओताव?” है ओरादोक ते, 
या याल, “ ‘परमेस्‍वरए ल्‍योनी ओताव’ है गेद्या गेलिकिन, ‘हुकी काराव यूहन्‍नाए ओपाँ जेमाभैंःव?’ है दान्‍या ले। 
फरी ‘मिँनी’ है गेद्या गेलिकिन, मिँ भरिए यूहन्‍नालाई अगमबक्ता ज़ याथ·रैवए गेलाई झेःद सैःन्‍या ओछ्यास ब लिज़्‍या,” है लिकेर। 
है जैद नोराए येसुलाई, “यूहन्‍नाए ओय़ेन कान्‍नी ओताव गेमासैंए,” है यादोक ते, 
येसुए, “हो ची ताकिन्दा ङालाई आव य़ेन दान्‍या हक सुए ओयाँव ङा ब है ङामादाच्‍यो,” है यादोक्‍यो। 
नकिन नलाव मिँरालाई घर्ती तोबो झाःद अइ लिद यासथैक्‍यो, “तोबो मिँए ओएँः भरिल जोम्‍परसै झाःद मिँरालाई अधियाल याद, ओल जाँवा पै तोबो तादा देसङ लिनाके दी। 
नो जोम्‍परसै किन्‍या बेलाक तोबो ओनोकोरलाई उजुँ च़ानाव परींक्‍यो। खाली नो अधिया कमैज़्‍यावराए झन नोलाई प़ोद रितो ज़ खेपैकेर दी। 
फरी छींनी छुत ओनोकोरलाई उपरींक नोलाई ब प़ोद बीज्‍यात जैद रितो ज़ खेपैकेर दी। 
छींनी फरी ब तोबोलाई उपरींक हिताव ज़ नोलाई ब प़ोद लल्‍यातोरो जैद ख्‍याकेर दी। 
“नकिन छींनी नो एँःए ओर्गेए, ‘कै जैन्‍या ओताव? ङायुँलाव ङाज़ालाई ज़ परींव ताके। नोलाई ताकिन ओमान नैदिर सैं’ लिद नो ओज़ालाई परींक्‍यो दी। 
खाली नो ओज़ा उहुज़्‍याव रँःद नो अधिया कमैज़्‍यावर झन या या पाँसिद, ‘आव ते एँः दैन्‍या मिँ ची, आवलाई गेसैःकिन आव एँः गेमीं ज़ तान्या ले,’ लिद, 
नो मिँलाई एँःनी पाखाङ लाँद सैःकेर दी।” नकिन येसुए, “नो एँःए ओर्गेए अधिया कमैज़्‍यावरालाई कै याजैवके लिक ते, 
नोर प़ाइँलाई ज़ सैःद नो एँः छुतरालाई अधियाल यान्‍या ले,” है ओरादोक ते, नो पाँ थैज़्‍यावराए यायुँ कैद, “निताव ते खर्क ज़ ताताक,” है लिकेर। 
नकिन येसुए, “हिताव ताकिन आव धर्मसास्‍त्रलाव पाँए ओअर्थ किताव जेङम्‍सिज़्‍या? ‘भुलीराए कान्‍ल ज़ माज़्‍यासे लिद याख्‍याव लुँ नो ज़ झन भुयाँरलाव लुँ ताके।’ 
नो लुँत पाज़्याव भरी कुतु कुतु ज़ तान्‍या लेर। नो लुँ फरी यातर्त उहुकिन झन नप नप ज़ तान्‍या लेर।” 
नाःत ज़ सास्‍त्रीर स़ोनो मुख्‍या पुजारीराए ‘आव घर्ती ते गेङ़ैत ज़ झाःद्यासिक्‍यो’ लिन्‍या सैंद येसुलाई हो प़ाइँना ज़ क्‍योःव पैंकेर। खाली मिँर रँःद छे·केर। 
है जैद नोराए, ‘आवलाई ओपाँ क्‍योःद्याद हाकिमए उकुइत सूँपिउ ताके’ लिद मौका चिऊद, यासकावर ऩेबरेंवा येसुस खैव मिताव जैसिउ परींद येसुए ओय़ेन साँना यारापरींकेर। 
नो साँना बावराए येसुलाई, “गुर्बा, नँ गेस नपाँज़्याव भरी साचो वाज़ लिज़्‍या। परमेस्‍वरए ल्‍योदा बान्‍या येम नपैसिक ब मिँ रँःद नमादोए, सोजोनी ज़ नदोज़्‍या। 
है जैद गेलाई है दाव ताके, माहाराजालाई गे सिर्मा यान्‍या सैं मायान्‍या?” है यादोक ते, 
येसुए नोराए याचाल सैंद, 
“तोबो पैसा सतैंचिसाँकी। नत सुए उसुरूप, सुए उमिन उलिज़्‍याव?” है ओरादोक ते, “माहाराजाए उमीं ज़,” है दोकेर। 
“हो ची ताकिन्‍दा माहाराजाए उमीं भरी माहाराजालाई ज़ एच्‍यो, परमेस्‍वरए उमीं भरी परमेस्‍वरलाई ज़ एच्‍यो,” है यादोक्‍यो। 
है जैद नोराए मिँराए ङ़ाक येसुए ओपाँ क्‍योःव मादैद, झन अचम्‍ब ताद च़िम दाद लिकेर। 
नकिन सदुकीराए ब येसुलाई पजैना हुकेर। सदुकी है यारादोज़्‍यावराए ‘सिउकिन सैंसिन्‍या माताए’ है यालिज़्‍याव। 
है जैद नोर हुद, “गुर्बा, मोसाए ओकानुनल इताव सर्सिउ लिज़्‍या, ‘तोबोए ज्‍या दाद ज़ार मादैद उसिकिन, ओभाइए ओदाज्‍युए ओथोर माफ्या·न्‍याए जूँनी ओमारूमलाई ओरैवक।’ 
है जैद तोबोए ओज़ार सात भाइ याल्‍यो। यादाज्युए ज्‍या दाद ज़ार मादैद ज़ सिके। 
होए उधूँलावए ओमारूमलाई रैद, नो ब ज़ार मादैद ज़ सिके। 
नकिन साइँला मनी हिताव ज़ ताके। नितावनी ज़ सात भाइ भरिए ज़ नोलाई रैद ज़ार मादैद ज़ सिकेर। 
प़ाइँरानी छींनी नो मेंमा ब सिके। 
है जैद नो मेंमा सात भाइए याज्‍या ओतावए अजम्‍बरी जुनील काताकावए याज्‍या तान्‍या?” है लिकेर। 
हाःत ज़ येसुए, “आव मानुवाताव मिँराए ज्‍या ब दोज़्‍यार, रे ब दोज़्‍यार। 
अजम्‍बरी जुनी दैन्‍या तावराए ते स्‍वर्गत ज्‍या ब मादोर, रे ब मादोर। 
नोर सिउनी यासैंसिउत परमेस्‍वरए ओज़ार ताद ओचाकर्‍या स्‍यासोर यातावए फरी खर्क ज़ सिन्‍या मालेर। 
है जैद सिउकिन सैंसिन्‍या ओताज़्याव सैं ओमाताज़्याव मोसाए ओसरोनी ब सैंच्‍यो। नोए झोपोरा ओचाँःज़्‍यावनी परमेस्‍वरए ओर्गा थैद अइ लिद सर्क्‍यो, ‘ङा अब्राहामए ओपरमेस्‍वर, इसहाकए ओपरमेस्‍वर स़ोनो याकूबए ओपरमेस्‍वर ज़।’ 
ओल ते मोरोराए यापरमेस्‍वर माःक, जींदोराए यापरमेस्‍वर ची। है जैद ओलस लिज़्‍याव भरी जींदो ज़ ताज़्‍यार।” 
नो पाँ थैद नलाव सास्‍त्रीराए येसुलाई, “थिक ज़ है नरादोके, गुर्बा,” है दोकेर। 
हाःकिन सुए ज़ येसुस पाँन्‍या आँत मादोकेर। 
नकिन येसुए है यादोक्‍यो, “मिँराए कै जैद ख्रीसलाई दाऊदए ओथोलाव है यादोज़्‍याव? 
ओल दाऊदए ज़ ख्रीसए उजूँनी भजन पोस्‍तोकोल अइ लिद सर्द नैव, ‘परमेस्‍वरए ङाप्रभुलाई, ‘नसुतुररालाई नखँ धूँल झाःद ङामाईंवा पै, ङावोर्दा च़ुसिद लिन्‍के,’ है दोक्‍यो।’ 
है जैद ओल दाऊदए मनी ख्रीसलाई ‘ङाप्रभु ज़’ है ओदोकिन नो कै जैद ओल ओथोलाव ओताज़्‍याव?” है यादोक्‍यो। 
मिँ भरिए येसुए ओपाँ याथैज़्‍याक उसिसरालाई, 
“जे ते सास्‍त्रीराए यादोज़्‍याव मिताव य़ेन दान्‍या माःक। नोर रेरे बेन्बेनो क्‍वा क्‍वाइसिद ‘प़ाइँए धो घदासिरक’ लिद बजार जीदा दुलिरिज़्‍यार, स़ोनो धर्मसास्‍त्र झ़िमराल, घ्योःव घ्योःव भत्‍यारल प़ाइँए रँःन्‍याक ओमान ल्‍यो पोल वाज़ च़ुसिउ पैंज़्‍यार। 
नो सास्‍त्रीराए झन राँदी मेंमारालाई तँनी छाम छुम याराख्‍याज़्‍यार, मिँराए ङ़ाक वाज़ बनै चाव चाव पोंखारिउ जैसिज़्‍यार। नोराए ते प़ाइँरानी घ्‍योःव सजा ज़ दैरिज़्‍यार,” है लिद यासथैक्‍यो। 
