﻿लूका.
2.
हो बेलाक तछा रोमी माहाराजा अगस्‍तसए रोमी राज्या भरिलाव जनसंख्‍या सर्न्‍या हुकुम याएक्‍यो। 
नो उस॰कताव यासरो जनसंख्‍या सिरिया खन्‍दलाव हाकिम कुरेनियसए ओपालाक ओल्‍यो। 
यामिन सर्सिना प़ाइँ ज़ सु सु यासाखा पुर्खार याजर्मिउ सहर सहरदा ज़ बाकेर। 
है जैद योसेफ पाला उलिज़्‍याव गालील खन्‍दलाव नासरतनी यहूदिया खन्‍दलाव बेथलेहेम यादोज़्याव दाऊद राजाए ओनाखारल उमिन सर्सिना बाके, काराव ल्‍यो ताकिन योसेफ दाऊदए ओथोलाव ज़ ओल्‍यो। 
ऩिद यानैज़्‍याव ओज्‍या मरियमलाई ब ओलस ज़ लाँक्‍यो। नो बेलाक मरियम गिसो क्‍याँस उलिज़्‍याव। 
बेथलेहेमल निलिज़्‍याक ज़ सुत्‍क्‍याल्‍नी तान्‍या बेला ताद, 
जेथा ज़ा दैक्‍यो। नो उजर्मिउ प़ाइँना ज़ दालए दाल्द बाछाराए छी ज़्‍यान्‍या पोल नैक्‍यो। भत्तील लिन्‍या पो निमादैवए गोथल निलिज़्‍याव। 
हो छ्याम रील नो नाखारकिन पाखाङ तोबो बाँल गावलाराए बेधार तबगाल खर्कैद यारानैज़्‍याव। 
हाः बेलाक ज़ परमेस्‍वरए तोबो ओचाकर्‍या उमँःजानी गावलाराए याल्‍योक सरैंःसिहुद परमेस्‍वरए ओज़गै ब प़ाइँदा ज़ ज़गै जैक्‍यो। नो रँःद बनै छे·केर। 
हाःत ज़ नो चाकर्‍याए, “जे ताछे·च्‍यो, ङा जेलाई बनै चाव था रैद नैद ङायाचिए। नो थात मिँ भरी बनै रेंन्‍या लेर। 
आछिम दाऊदए ओनाखारल इस्राएलीरालाई बाँचैन्‍या तोबो जर्मिद ले। नो जर्मिउ प्रभु ख्रीस ज़। 
जे नोलाई सरेस्‍न्‍या सरेस, नो भाउज़ालाई बाछाराए छी ज़्‍यान्‍या पोल दालए दाल्‍सिउ सेप्‍सिउ दैन्‍या जेले,” है यादोक्‍यो। 
हाःत ज़ नो चाकर्‍याए ओनैंर बनै माहोल्‍या हुद परमेस्‍वरए ल्‍योदा बनै खुसी ताद है लिकेर, 
“स्‍वर्गताव परमेस्‍वरलाई ज़गै मगै ओताक, मानुवाताव उयुँलाव मिताव मिँराए यायुँ ब होलाँ ओताक।” 
नो परमेस्‍वरए ओचाकर्‍यार स्‍वर्गदा याबाव छींनी नो बेधा गावलाराए या याल, “दे, गे बेथलेहेमदा गेबा, प्रभुए है ओदासिउ गेचिऊना,” है लिद, 
लाला लुलु नाखारल धोंःनाद मरियम स़ोनो योसेफनिलाई यारादैकेर। नो भाउज़ालाई ब बाछाराए छी ज़्‍यान्‍या पोल सेप्‍सिउ दैकेर। 
है जैद आव रँःद नो भाउज़ाए उजूँनी परमेस्‍वरए ओचाकर्‍याए है ओरादोव भरी है यारादोकेर। 
नो गावलाराए यापाँ थैव भरी प़ाइँ ज़ अचम्‍ब ताकेर। 
मरियम ते नो पाँ भरी उयुँल नैद खामिक्‍यो। 
नो गावलाराए नो चाकर्‍याए है ओरादोव मिताव याथैव यारँःवए परमेस्‍वरए उमिन सघ्‍योःद्याद ओल्‍योदा बनै खुसी ताद रेंए रेंए ओल्‍द बाकेर। 
नो भाउज़ा उजर्मिउ आथ दिनत क्‍याल्‍न्‍या सरेस जैन्‍या छ्याम उमिन ब येसु नैदिकेर। नो मिन ओआमाए उफूल ओमासिर्जिद ज़ परमेस्‍वरए ओचाकर्‍याए नैद ओयो मिन ज़। 
मोसाए ओकानुनलाव मिताव मरियम सुत्‍क्‍याल्‍नी चोखोइसिन्‍या बेला ओयो·वत यरूसलेमलाव ध्‍यान झ़िमल बाद येसुलाई परमेस्‍वरए उमिनत नैकिनी। 
परमेस्‍वरए ओकानुनलाव सर्सिउ मिताव, “ङ़ाताव जर्मिउ खेपा भरी परमेस्‍वरए उमिनत नैव ज़ परिए।” 
हो छ्याम ज़ फरी ओआमा चोखोइसिन्‍याए जूँनी परमेस्‍वरए ओकानुन मिताव, कुइतम तादी ब परिवा तादी ब तोजोर लाँद चरैःव उपरिज़्‍याव। हो मिताव ज़ नोनी लाँद चरैःकिनी। 
हो बेलाक यरूसलेमल तोबो सिमियोन यादोज़्‍याव उलिज़्‍याव। नो मिँ चाव धर्मी मिँ ओल्‍यो। इस्राएलीरालाई बाँचैना हुन्‍यालाई कींव ज़ ओनैज़्‍याव। नोस परमेस्‍वरए छैंव उपुरूसए बास दाद ओनैज़्‍याव। 
नोए ‘परमेस्‍वरए ओज़ा ख्रीसलाई ङामारँःवा पै सिन्‍या ङामाले’ लिद परमेस्‍वरए छैंव उपुरूसनी सैंद ओनैज़्‍याव। 
है जैद तछा नोलाई परमेस्‍वरए उपुरूसए ध्‍यान झ़िमल लाँक्‍यो। हो बेलाक ज़ येसुलाई ब ओबाबु स़ोनो ओआमानी कानुन मितावनी परमेस्‍वरए उमिनत नैन्‍याए जूँनी ध्‍यान झ़िमल हुद यालिज़्‍याव। 
सिमियोनए नो भाउज़ालाई उरँःव प़ाइँना ज़ नोलाई ओघोइँल छींद अइ लिद परमेस्‍वरलाई धन्‍याबाद चरैःक्‍यो, 
“अ परमेस्‍वर, अब ते है नदाँव मिताव ताके। अब ते आव संसारनी ङा ननोकोरलाई खुसीस बिदा नयाँदी ब ताए। 
संसारलाई बाँचैन्‍याए जूँनी नपरींव मिँलाई आव ङामीए ज़ ङारँःके। 
नोलाई प़ाइँ मिँराए याङ़ाक तयार जैद नराएके। 
छुत जातलावरालाई आवए ओक्‍याँनी ज़ नय़ेन सतैंद नराएरिज़्‍या। स़ोनो नमीं इस्राएलीरालाई ब आवए ओक्‍याँनी ज़ याइज्‍यात नैद नराएरिज़्‍या।” 
येसुए ओबाबु ओआमानी सिमियोनए ओपाँ भरी थैद बनै ज़ अचम्ब ताकिनी। 
नकिन सिमियोनए नोरालाई असिक याद ओआमा मरियमलाई, “इस्राएलीराए याखार्ल आव भाउज़ाए ओपाँत कुधुए यायुँ त़ोल्‍रिज़्‍या, कुधुए यायुँ थ॰रिरिज़्‍या। परमेस्‍वरए आव भाउज़ालाई ओल ओसरेस मिताव जैद नैव। नोलाई कुधुए यामाभैंःज़्‍यावए, 
यायुँलाव पाँ भरी ननी ज़ रैंःरिज़्‍या। नयुँलाई पाला तरवालीए आनी हुनी सफेर्सिउ मिताव जैदींरिज़्‍याव,” है दोक्‍यो। 
हो बेलाक ज़ ध्‍यान झ़िमल आसेरए ओथोलाव फनुएलए ओज़ा बनै जूचासो तोबो हन्‍ना यादोज़्‍याव मनी उलिज़्‍याव। नो ब अगमबादिनी ज़ ओल्‍यो। नोए रे ओदोव सात बर्सत ज़ ओरे सिद, 
चौरासी बर्स पै बिनु रे ज़ ध्‍यान झ़िमल लिद उपासिद लाकनी रील परमेस्‍वरलाई पोंखारिउ ज़ ओनैज़्‍याव। 
नोए ब येसुलाई उरँःव प़ाइँना परमेस्‍वरलाई धन्‍याबाद चरैःद यरूसलेम सहरलाव ‘गेलाई बाँचैज़्याव हुरिज़्‍या’ लिद कींद नैज़्‍यावरालाई येसुए उजूँनी हो छ्यामकिन सथैव ज़ यानैक्‍यो। 
योसेफ स़ोनो मरियमनी परमेस्‍वरए ओकानुनलाव ध्‍यान झ़िमलाव याय़ेन भरी ओखेमोत निझ़िम गालीललाव नासरतदा निज़ा लाँद बाकिनी। 
नो भाउज़ा घ्‍योःनाद ओर्सा ब ज़्‍यास्‍नाके, उबुद्धी ब छिप्‍नाके। परमेस्‍वरए ओअसिक ब ओक्‍याँत ज़ उलिज़्‍याव। 
येसुए ओबाबु ओआमानी यरूसलेमलाव निस्‍तार पर्ब मानिन्‍याए जूँनी सालकाव तखेप निबाज़्‍याव। 
तछा येसु बाह्र बर्स ओतावत सालकाव याबाज़्‍याव मिताव ज़ फरी ब बाकेर। 
नो पर्ब भरी ओखेमोत याझ़िमदा याबाज़्‍याक येसु यरूसलेमल ज़ उरहिउ ओल्‍यो। ओबाबु ओआमानी मासैंकिनी। 
नोनी ‘गेनैंरास हुज़्‍याखेहो’ लिद तछाकाव येम भरी ज़ बाकिनी। छींनी यानैंराए ल्‍यो जीदा साप्‍द, 
निमादैक ते सापे सापे यरूसलेमदा ज़ ओल्‍द बाकिनी। 
स़ोंलात ध्‍यान झ़िमल घेप्‍पा घेप्‍पा धर्मगुरूराए खार्ल च़ुसिद यापाँ थैद ओअर्थ ल्‍यो पाँ तीद पलासो ओरापरींज़्‍याव रँःकिनी। 
नलाव थैज़्‍याव भरी येसुए उबुद्धीसकाव ओपाँर थैद प़ाइँ ज़ अचम्ब ताकेर। 
ओबाबु ओआमानी ब निताव रँःद अचम्ब ताद ओआमाए, “काराव ङाज़ा आः दुख नयासिनो? गिन नँलाई साप्‍द गिन्‍च्‍या सिके,” है ओदोक ते, 
येसुए, “जिन काराव ङालाई जिन्‍साप्‍नाज़्‍याव? ङा ङाबाबुए उझ़िमल ल्‍यो परिए लिन्‍या जिन्‍मासैंए रो?” है निदोक्‍यो। 
नोनी है उनिदोव पाँए ओअर्थ मातीधुकिनी। 
येसु ओबाबु ओआमानिस नासरतल बाद नोनी निपाँल ज़ लिके। ओआमाए आव पाँ भरी उयुँल खामिउ ज़ नैक्‍यो। 
येसुए ओर्सा ब छिप्‍नाके, उबुद्धी ब झन ज़ पुलुस्‍नाके। परमेस्‍वरए स़ोनो मिँराए बनै चाव ज़ रँःकेर। 
