﻿लूका.
1.
प़ाइँए गेखार्लाव ताव भरी कुधुए कागतत चरैःन्‍या उदिम दाद नैर। 
नोराए यासरो भरी ङ़ादाकिन ज़ येसुस लिद ओय़ेन रँःवर ओपाँ सथैज़्‍यावराए ल्‍योनी ज़ सर्द नैर। 
गेङ़ैताव थियोफिलस, ङा ब ङ़ादाकिन ज़ बनै चावस तहकैद प़ाइँ पाँ भरी खिम्‍द ङानै, स़ोनो नजूँनी तोबो ओमेलास ताव पाँ सर्न्या युँ ङादोके। 
हो ताकिन नँलाई है दासिउ पाँर साचो ज़ ओल्‍यो लिन्‍या सैंन्‍या नले। 
यहूदियालाव राजा हेरोदए ओपालाक अबिया थरलाव तोबो पुजारी जकरिया यादोज़्‍याव उलिज़्‍याव। नोए ओज्‍या ब हारून पुजारीए ओखलकलाव ज़, उमिन एलीसिबा ओल्‍यो। 
नोनी ज्‍या-री ज़ परमेस्‍वरए ओङ़ाक धर्मलाव य़ेन दाद निजुनी निझाःज़्‍याव, परमेस्‍वरए ओकानुन ब माबिरैद ज़ निदोज़्‍याव। 
खाली एलीसिबा जर्मननी ज़ थारी ओल्‍योए नोनी निज़ार तोबो ब यामालिज़्‍याव। नोनी ऩेब्‍लो ज़ निबेला बाद सेर्द जूचास्‍द निलिज़्‍याव। 
तछा जकरिया परमेस्‍वरए ओङ़ाक पुजारी य़ेन ओदोज़्‍याव। हो साता भरिल ध्‍यान झ़िमलाव सेवा दान्‍या नोए ओखलकराए यापाला ओल्‍यो। 
पुजारीराए याचलन मिताव परमेस्‍वरए ओध्‍यान झ़िमल धुप झाःन्‍याए जूँनी गोला याझाःक जकरिया परिके। 
नो उजींल पसिद धुप ओझाःज़्‍याक उपुर्काव मिँ भरिए लाँःक पोंखारिउ ज़ यानैज़्‍याव। 
नल उलिज़्‍याक परमेस्‍वरए ओचाकर्‍यालाई धुप ओझाःज़्‍याव पोए ओवोर्दा च्‍याँःसिद उलिज़्‍याव रँःक्‍यो। 
नोलाई रँःद जकरियाए उयुँ स्‍यासे सतेद बनै छे·के। 
नाःत ज़ परमेस्‍वरए ओचाकर्‍याए, “नँ ताछे·नी जकरिया, नपोंखारिज़्‍याव परमेस्‍वरए थैक्‍यो। है जैद नज्‍या एलीसिबाए ज़ा तोबो दैरिज़्‍याव। नँ नोए उमिन यूहन्‍ना नैदियो। 
नो उजर्मिक नयुँ बनै होलाँ ताद रेंन्‍या नले। छुतर ब रेंन्‍या लेर, 
काराव ल्‍यो ताकिन नो परमेस्‍वरए ओङ़ाक घेप्‍पा मिँ थ॰रिन्‍या ले। नोए ज़िम्‍ज़ाकिन ज़ मद छोकोरा जात्त ज़ ओन्‍या माले। नो ओआमाए उफूल ज़ छैंव पुरूस दैरिज़्‍याव। 
नोए इस्राएलीरालाई याप्रभु परमेस्‍वरए ल्‍योदा कुधुलाई ज़ यायुँ फर्कैद याएरिज़्‍याव। 
नोए एलियाए ओसक्ती ओगेर रैद हुरिज़्‍याव ख्रीसए ओङ़ादा बाद होए उजूँनी मिँरालाई तयार याजैरिज़्‍याव। बाबुरालाई याज़ारास यासखैरिज़्‍याव, पापीरालाई ब धर्मलाव येमल याझाःरिज़्‍याव,” है दोक्‍यो। 
हाःत ज़ जकरियाए परमेस्‍वरए ओचाकर्‍यालाई, “आव भरी ङा कै जैद पतिन्‍या? ङा ङासेरधुके, ङाज्‍या ब जूचास्‍धुके,” है ओदोक ते, 
परमेस्‍वरए ओचाकर्‍याए, “ङा एकतार परमेस्‍वरए ओङ़ाकाव च्‍याँःसिज़्‍याव गब्रिएल ज़। नल्‍योदा आव चाव था सथैना परींद नैनाव। 
ङालाई नमापतिनाव प़ाइँना आव है ङादींव य़ाका भरी ओमातावा पै नँ लाता ताद मापाँधुन्‍या तान्‍या नले। ङा है ङादींव पाँ थिक हो बेलाक ज़ यो·न्‍या ले,” है दोक्‍यो। 
हाः बेलाक नो लाँःकाव लिज़्‍यावराए ‘काता ओदोव?’ लिद जकरियालाई कींद यानैज़्‍याव। 
बल्‍ल बल्‍लङ नोराए ल्‍योङ पुलुस्‍द नोरास काता ज़ मापाँधुद उकुइए सान दाद ओरायोए नोराए, “आवए ते ध्‍यान झ़िमल परमेस्‍वरए ओदर्सन ओदैव ची ओल्‍यो,” है लिकेर। 
जकरिया ध्‍यान झ़िमलाव सेवा दान्‍या ओपाला ओयो·वत उझ़िमदा बाके। 
नाःकिन ज़ ओज्‍या एलीसिबा ज़ा दैन्‍या ताद पाँच मैना भरी आदा होदा माबाद उझ़िमल ज़ लिद, 
“मिँराए ङालाई अइज़ फ्या·के है यादाँदी ब परमेस्‍वरए ङालाई उयुँ नाद ज़ा दैन्‍या जैनाक्‍यो,” है उलिज़्‍याव। 
एलीसिबा छ मैना ओतावत परमेस्‍वरए फरी ओचाकर्‍या गब्रिएललाई ज़ गालील खन्‍दलाव नासरत सहरल 
तोबो कन्‍या ल़ुज़ाए ल्‍योक परींक्‍यो। नो ल़ुज़ालाई भर्ज़ा दाऊदए ओथोलाव योसेफ यादोज़्‍यावत ऩिद यानैज़्‍याव। नोए उमिन मरियम ओल्यो। 
परमेस्‍वरए ओचाकर्‍या ओल्‍योक बाद, “जेरो प़ाइँरानी असिक दैव मेंमा, परमेस्‍वर नँस ज़ लिज़्‍या,” है ओदोक ते, 
‘आव काता ओपाँव ओताव?’ लिद उयुँ काता माँःती जैक्‍यो। 
नो चाकर्‍याए फरी, “ताछे·नी मरियम, परमेस्‍वरए उयुँ नल्‍योदा गराँद ले। 
नँ गर्बवती ताद खेपा ज़ा तोबो नदैरिज़्‍या। नोए उमिन येसु नैदियो। 
नो बनै घ्‍योःव मिँ ताद माहान परमेस्‍वरए ओज़ा ज़ लिद थ·रैरिज़्‍यार। नोलाई परमेस्‍वरए, ओल उपुर्खा दाऊदए ओराज्‍या चलैन्‍या जैरिज़्‍याव। 
है जैद याकूबए ओथोलावराए याङ़ैताव ज़ ताद नोए ओराज्‍या खर्क ज़ खेम्‍न्‍या माले,” है दोक्‍यो। 
हाःत ज़ मरियमए, “आव भरी कै जैद तान्‍या? ङा आःपै कन्‍या ज़ ङालिज़्या,” है ओदोक ते, 
नो चाकर्‍याए, “नँ नक्‍याँत परमेस्‍वरए छैंव उपुरूस हुद माहान परमेस्‍वरए ओसक्तीनी ज़ा नदैरिज़्‍या। है जैद नो छैंव पुरूसनिकाव भाउज़ालाई परमेस्‍वरए ओज़ा ज़ है दान्‍या लेर। 
अछादी नँ नक्‍याँदाङाव एलीसिबाए पाला जूचास्‍द ब ज़ा दैन्‍या ताद ले। नो खर्क ज़ ज़ा मादैव है यादोज़्‍याव एलीसिबाए उफूलाव ओज़ा छ मैना ताधुके। 
परमेस्‍वरए ओमादोधुव काता ज़ माले,” है ओदोक ते, 
मरियमए, “ङा परमेस्‍वरए ओबाँदानी ज़। है नलिज़्‍याव मिताव ज़ ओताक,” है ओदोव प़ाइँना ज़ परमेस्‍वरए ओचाकर्‍या पुलुस्‍द बाके। 
तछा छींनी मरियम झाःसिद लाला लुलु यहूदियालाव गोंल जकरियाए ओनाखारल बाके। 
जकरियाए उझ़िमल पसिद मरियमए एलीसिबालाई जेरो है ओदोज़्याव 
ओथैव प़ाइँना एलीसिबाए उफूलाव ओज़ा ज़ो·के। हाःत ज़ एलीसिबा छैंव पुरूसए ब्याल्‍द, 
बनै रेंद, “मेंमा भरिरानी नँ असिक दैव ज़ नलिज़्‍या। नफूलाव नज़ा ब असिक दैव ज़ तारिज़्‍या। 
काता ङालाई आः परमेस्‍वर दाइनो ओताव, ङाप्रभुए ओआमा ङाल्‍योक नहुव। 
नँ नयाःनी जेरो है नल्‍यो प़ाइँना ज़ ङाफूलाव ङाज़ा रेंद ज़ो·के। 
नँ परमेस्‍वरए है उलिज़्‍याव भरी सयो·द्यान्‍या ज़ ले लिद नयुँ हुबो मेंमा धन्‍याकाव नलिज़्‍या,” है लिद पाँके। 
मरियम नो भरी थैद है लिके, “ङा ङाप्रभु परमेस्‍वरए उमिन बनै सघ्‍योःद ङाएज़्‍या। 
ङालाई बाँचैज़्‍याव परमेस्‍वरस बनै रेंद ज़ ङापाँज़्‍या। 
नोए ङा इताव ज़िम्‍ज़ा ओबाँदानीलाई मामेंःद ङाल्‍योदा उयुँ य़ाल्‍के। ननी ज़ मिँराए ङालाई प़िरी प़िरी पै असिक दैव थ·रैनारिज़्‍यार। 
ङाजूँनी आःल्‍दिउ य़ेन दाद्याज़्‍याव माहान परमेस्‍वरए उमिन बनै छैंव लिज़्‍या। 
परमेस्‍वरलाई रँःद छे·ज़्‍यावरालाई ओल प़िरी प़िरी पै उयुँ नाज़्‍या। 
नोराए जूँनी उकुइए बनै सक्तीलाव य़ेन दाद्याव ज़ नैज़्‍याव। यायुँल सघ्‍योःसिज़्‍यावरालाई ते चितराँ पुतराँ जैद यामिन सम़ैद याएज़्‍याव। 
घेप्‍पारालाई यासिंहासनतिन स़ेल्‍द नल ज़िम्‍ज़ारालाई याझाःज़्‍याव। 
करेज़्‍यावरालाई चाव चाव याद याकरे सैःद याएज़्‍याव। साहुरालाई ते रितो ज़ याजैज़्‍याव। 
ओय़ाकार मामेंःद ओसेवा दोज़्याव इस्राएली उमींरालाई सघैव ज़ यानैज़्‍याव। 
है जैद अब्राहाम स़ोनो ओथोरालाई है ओरादोव मिताव याल्‍योदा एकम्‍न्‍या उयुँ गराँव ज़ लिज़्‍या।” 
मरियम एलीसिबाए उझ़िमक ओल्‍यो स़ोंमैना ओतावत उझ़िमदा ओल्‍द बाके। 
एलीसिबाए ज़ा दैन्‍या ओमास ओयो·वत खेपा ज़ा दैक्‍यो। 
‘परमेस्‍वरए उयुँ य़ाल्‍द अचम्‍बलाव य़ेन दोदिक्‍यो दी’ लिन्‍या थैद ओलापजीकावर स़ोनो ओक्‍याँदाङावर बनै रेंकेर। 
नो भाउज़ा उजर्मिउ आथ दिनत याचलन मिताव क्‍याल्‍न्‍या सरेस जैन्‍याए जूँनी प़ाइँ दुप्‍सिद उमिन ब ओबाबुए उमिन स्‍यासो ‘जकरिया’ नैद्याव पैंकेर। 
खाली ओआमाए भैंःद मायाद, “माःक, आवए उमिन यूहन्‍ना तारिज़्‍या,” है ओरादोक ते, 
नोराए, “नथोल इताव मिन ते माले सानी,” है दोकेर। 
फरी नोराए ओबाबु जकरियालाई सान दाद्याद, “नो नज़ाए उमिन काता नैद्याव नपैंज़्‍याव?” है यादोक ते, 
जकरियाए फल्‍या तोबो रैव परींद नत, ‘आवए उमिन यूहन्‍ना’ लिद सर्द याएक्‍यो। नोराए निताव रँःद प़ाइँ ज़ अचम्ब ताकेर। 
हो प़ाइँना ज़ जकरियाए ओसेर पलास्‍सिद पाँधुन्‍या ताद परमेस्‍वरलाई धन्‍या धन्‍या है ल्‍यो ज़ लिके। 
नो हुद लिज़्‍यावर नो भरी रँःद अचम्ब ताद छे·द नो पाँ भरी यहूदिया गों जीदा प़ाइँदा ज़ थास्‍के। 
‘नो भाउज़ा ओघ्‍योःक किताव तान्‍या ओताव?’ लिद थैज़्‍याव भरिए यायुँल है लिकेर। नोए ओक्‍याँत परमेस्‍वरए बास दाद ओनैज़्‍याव ओल्‍यो लिन्‍या थ·रैकेर। 
ओबाबु जकरिया छैंव पुरूसए ब्याल्‍द अइ लिद पाँके, 
“इस्राएलीराए याप्रभु परमेस्‍वरए उमिन बनै ओघ्‍योःक। गे उमींराए गेल्‍योक हुद बाँचैसिक्‍यो। 
ओनोकोर दाऊद राजाए ओथोल गेलाई जोगोइद बाँचैन्‍या तोबो झेंःस्‍या उथैद नैद्यासिउ। 
नोए उजूँनी परमेस्‍वरए भाःकिन ज़ छैंव उमीं अगमबक्ताराए यायाःनी पाँव ज़ उलिज़्‍याव। 
नोराए यापाँ आव ब लिज़्‍या — ‘गेसुतुरराए ल्‍योनी जोगोइद, गेलाई सोज़्‍यावराए याकुइनी ब पाथस पले·न्‍या ले।’ 
है जैद गेसाखा पुर्खाराए ल्‍योदा उयुँ गराँद, नोरालाई ओरायो छैंव बाचालाई सयो·द्याव ज़ नैज़्‍याव। 
नो बाचा गेपुर्खा अब्राहामलाई तोबो किर्‍या झाःद — 
‘गेलाई गेसुतुरराए ल्‍योनी पले·न्‍या, स़ोनो गेजिउ भरी ओलस लिद उयुँलाव मिताव छैंव य़ेन सुलाई रँःद ब माछे·द ज़ दान्‍या जैद नैद्यासिउ।’ 
अब ते नँ ङाज़ा यूहन्‍ना, नँलाई माहान परमेस्‍वरए अगमबक्ता थ·रैनिरिज़्‍यार। नँ हुरिज़्‍याव प्रभुए ओङ़ा ओङ़ा बाद ओयेम बनैद्यान्‍या नले। 
स़ोनो परमेस्‍वरए उमीं इस्राएलीरालाई ‘जेपाप क्‍याल्‍द याचिरिज़्‍याव’ लिद अजम्‍बरी जुनील बान्‍या येम सतैंद्यान्‍या नले। 
गेल्‍योदा परमेस्‍वरए उयुँ ओगराँवनी स्‍वर्गताव झ़ार झ़ारो ज़गै ब गेल्‍योक ज़ हुरिज़्‍या। 
नो उहुवत सिन्‍या सजालाव चुम चुमोल लिज़्‍यावराए याक्‍याँत पलाँव जैद्याद गेलाई मनी परमेस्‍वरए ल्‍योदा खैन्‍या येम सरैंःद्यासिरिज़्‍याव।” 
नो भाउज़ा यूहन्‍ना ओघ्‍योःनावत ओसक्ती ल्‍यो तानाके। इस्राएलीराए याङ़ाक ओमासतैंसिवा पै बनङ ज़ लिके। 
