﻿मर्कूस.
15.
छकाल्न्या घग ज़ मुख्‍या पुजारीर, यहूदीराए यास़ेरर, सास्‍त्रीर स़ोनो घ्‍योःव कचरीलाव भरी यासल्‍ला खैद येसुलाई किद पिलातसए ल्‍योक लाँद सूँपिकेर। 
है जैद पिलातसए येसुलाई, “नँ साचो यहूदीराए याराजा ज़ रो?” है ओदोक ते, येसुए, “नँ ज़ नथ·रैनाके सानी,” है दोक्‍यो। 
नाःत ज़ मुख्‍या पुजारीराए येसुलाई कुधु ज़ खतर लैकेर। 
पिलातसए, “काराव घाइ नमालिज़्‍याव? नाः कुधु पाँर नङ़ैत झाःद याईंज़्‍याव नमाथैए रो?” है ओदोक ब, 
येसु झन ज़ तोबो ब मापाँके। निताव रँःद पिलातस अचम्‍ब ताके। 
पिलातसए ओपालाक सालकाव तखेप निस्‍तार पर्बत यहूदीराए जो कैदीलाई ‘ऱास्‍द्यासिके’ है लिज़्‍यार, होलाई ज़ ऱास्‍द ओराएज़्‍याव। 
हो बेलाक तोबो बारब्‍बा यादोज़्‍याव ओनैंरास झ्यालखानाल यालिज़्‍याव। नोर सरकारकिन तँदा जैसिद मिँरालाई मचैद तोबो ऩेब्‍लोलाई सैःद यारानैज़्‍याव। 
है जैद माहोल्‍याराए पिलातसए ल्‍योक बाद, “सालकाव तखेप तोबो कैदीलाई ऱास्‍द नयासिज़्‍याव मिताव आथ पाला ब तोबोलाई ऱास्‍द्याव ताके,” है यादोक ते, 
पिलातसए, “हुकी यहूदीराए याराजालाई ऱास्‍द ङायाच्‍यो रो?” है यादोक्‍यो। 
ओल पिलातसए ते ‘आवराए येसुलाई अऩाकल ज़ यामी तूद सूँपिद नैनार’ लिन्‍या सैंद ओनैज़्‍याव। 
मुख्‍या पुजारीराए झन मिँरालाई मचैद, “माःक, नो बारब्‍बालाई ऱास्‍द्यासिके,” है दाव यारापरींकेर। 
नो पाँ थैद पिलातसए फरी, “हुकी नो यहूदीराए याराजा जेदोज़्‍यावलाई ङा कै जैन्‍या की?” है ओरादोक ते, 
नोर, “क्रुसत तङ्गैद सैःन्‍या,” है लिद क़िकेर। 
पिलातसए फरी, “काराव? आवए मादान्‍या काता दाद ओनैज़्‍याव?” है ओरादोक ते, नोर झन ज़ मचिद, “क्रुसत तङ्गैद सैःन्‍या,” है लिद बनै ज़ क़िकेर। 
है जैद पिलातसए माहोल्‍यारालाई सभैंःन्‍याए जूँनी बारब्‍बालाई ऱास्‍द्याद येसुलाई रीःद, क्रुसत तङ्गैद सैःन्‍याए जूँनी सिपाईंरालाई ज़ यासूँपिक्‍यो। 
हाःत ज़ सिपाईंराए येसुलाई प्रेतोरियन यादोज़्याव दरबार जींल लाँद रोमी पल्‍तन भरी यारादुप्‍केर। 
नोराए येसुलाई घ्यामर्‍यासो क्‍वा जास्‍द, ज़ुए मुकुत ऱ॰द ओङ़ैत जास्‍द, 
“ए यहूदीराए याराजा, जय जय ओताक,” है लिद बरे·द, 
ओङ़ैत भाताए प़ोद्याद, त़िल्‍द, ओङ़ाक याघूँदानी फुलुप्‍सिद धो दाद ओमान नैद्याव मिताव जैसिकेर। 
गिल्‍लैद गिल्‍लैद च़िम यादोवत नो घ्यामर्‍यासो क्‍वा सिउःद्याद, ङ़ादाङाव ओक्‍वार जास्‍द क्रुसत तङ्गैना लाँकेर। 
यालाँज़्‍याक तोबो नाखारनी हुज़्‍याव कुरेनीलाव सिमोनलाई येसुए ओलाँज़्‍याव क्रुस सुघुर्केर। नो मिँ अलेक्‍जेन्‍दर स़ोनो रूफसनी निबाबु ओल्‍यो। 
येसुलाई गलगथा यादोज़्‍यावक सकेस्‍केर। नो पोए उमिन ‘खप्‍पर्‍या पो’ है ब यादोज़्‍याव। 
नक येसुलाई वासः झाःसिउ दाखमद्य यासवैक ते येसुए ओव माभैंःके। 
हाःत ज़ येसुलाई क्रुसत तङ्गैकेर। यातङ्गैवत ओक्‍वारात गोला झाःद भाःकेर। 
क्रुसत यातङ्गैव बेलाक नौ बजिद उलिज़्‍याव। 
ओललाई तङ्गैद यानैज़्‍याव क्रुसए ओङ़ैत, “आव यहूदीराए याराजा ज़” है लिद तोबो फल्‍यात ओखत सर्द चकेर। 
नो छ्याम ऩेब्‍लो चोरनिलाई मनी तोबोलाई ओवोर्दा तोबोलाई ओदाबर्‍यादा जैद क्रुसत तङ्गैद यारानैज़्‍याव। 
है जैद धर्मसास्‍त्रलाव सर्सिउ पाँ ब नत ज़ यो·के। नलाव सर्सिउ आव ज़, “नो अपराधीरास गनिसिरिज़्‍या।” 
आनी हुनी भाल्‍सिना हुवराए याङ़ैर ङ़त ङ़त जैद थल्‍द, “हाइ! हाइ! नँ ‘ध्‍यान झ़िमलाई तैःद स़ोंलात ङाजैरिज़्‍या’ है लिज़्‍याव मिँ, 
नँ क्रुसतिन झरिद हुद नक्‍याँलाई बाँचैके,” है दोकेर। 
हिताव ज़ मुख्‍या पुजारीर स़ोनो सास्‍त्रीराए या याल येसुलाई गिल्‍लैद, “आवए छुतरालाई ताकितर याबाँचैज़्‍याव, ओल ओक्‍याँलाई कै जैद ओमाबाँचैधुज़्‍याव? 
इस्राएलीराए याराजा ख्रीस जैसिज़्‍याव नो क्रुसतिन झरिद उहुकदा, गे नो रँःद ओपाँ पतिन्‍या गेले,” है लिकेर। ओलस तङ्गैसिउ चोरनी मनी हैज़ लिकिनी। 
नकिन बाह्र बजेकिन तीन बजे पै देस भरी काल्‍या कले झ्याके। 
तीन बजेवाक येसु बनै चोइस, “इलोई, इलोई, लामा सबखथनी?” है लिद क़िके। नोए ओसै, “अ ङापरमेस्‍वर, अ ङापरमेस्‍वर, ङालाई काराव नऱास्‍नाव?” 
नक च्‍याँःसिद लिज़्‍यावराए नो पाँ थैद ख्‍वाराए, “थैचिसाँ, आवए ते एलियालाई ची उखुल्‍ज़्‍याव सा,” है लिद, 
तोबोए धोंःनाद भाताए उतुपात थाकना पो·द सिरो दाखमद्यल छिम्‍द येसुए ओयाःत झाःद्याद पिउ परींद, “अब ते चिऊद गेनैया, एलिया कातारानी हुद माहाइज़्‍याव?” है लिके। 
नाःत ज़ येसु बनै चोइस क़िद उस॰ सफ्या·क्‍यो। 
हो प़ाइँना ज़ ध्‍यान झ़िमलाव बारिसिउ क्‍वा ब उतुपानी ओजराङ पै ओलनी ज़ ऩेपरा ताद चिस्‍के। 
येसुए ओङ़ाक च्‍याँःसिद लिज़्‍याव कप्‍तानए निताव उस॰ ओफ्या·व रँःद, “आव ते साचो ज़ परमेस्‍वरए ओज़ा ची ओल्‍यो,” है लिके। 
हो बेलाक ख्‍वा मेंमाराए ब जाँ तादानी येसुलाई चिऊद यानैज़्‍याव। नोरानी मरियम मग्‍दलिनी, ज़िम्‍ज़ा याकूब स़ोनो योसीनी निआमा मरियम, स़ोनो नोनिस सलोमी ब ओल्‍यो। 
येसु गालीलल उलिज़्‍याव बेलाक नोर ओलस ओलस बाऱिद ओसेवा यादोज़्‍याव। यरूसलेम पै ओलस हुव छुत मेंमार ब कुधु ज़ याल्‍यो। 
ऩासिन्‍या छ्यामए ओङ़ालाव तयारीलाव दिन ओल्‍यो। हो छ्याम र्‍याम्‍या रिमी ओझ्यानाक, 
तोबो अरिमाथियालाव योसेफए घ्‍योःव युँस पिलातसए ल्‍योक बाद येसुए ओमोरो ऩिक्‍यो। नो घ्‍योःव कचरीलाव घेप्‍पा मिँ ओल्‍यो। ओल मनी परमेस्‍वरए ओराज्‍यालाव येम खिम्‍ज़्‍याव मिँ ज़ ओल्‍यो। 
पिलातसए येसु ङ़ादा ज़ उसिधुव पाँ थैद अचम्‍ब ताद कप्‍तानलाई ओल्‍योक खुल्‍द, “येसु साचो उसिधुव रो?” है लिद सुधिक्‍यो। 
है जैद नोए ओल्‍योनी येसु सिके लिन्‍या ओथैवत ओमोरो योसेफलाई लाँव एक्‍यो। 
योसेफए फरी पालो क्‍वा लँःद येसुए ओमोरोलाई क्रुसतिन हाइद, नो क्‍वाए लुम्‍बैद दावन खुपिद पुप जैद ओनैज़्याव खादरल झाःद ओय़ामक घ्‍योःव लुँए कक्‍यो। 
मरियम मग्‍दलिनी स़ोनो योसीए ओआमा मरियमनी नो ओझाःज़्‍याव पो चिऊद निनैज़्‍याव। 
