﻿मत्ती.
26.
येसुए आव पाँ भरी ओखेमोत उसिसरालाई है यादोक्‍यो, 
“आछिमकिन ऩेलात निस्‍तार पर्ब हुरिज़्‍या। नो बेलाक ज़ ङा मिँ मिन्‍सिउलाई क्रुसत तङ्गैद सैःनारिज़्‍यार,” है यादोक्‍यो। 
येसुए है ओल्‍यो मिताव ज़ मुख्‍या पुजारीर स़ोनो यहूदीराए यास़ेरर तोबो कैयाफा यादोज़्‍याव प्रधान पुजारीए उझ़िमक दुप्‍सिद, 
येसुलाई झुकैद क्‍योःद सैःन्‍या गुमुस्‍ता दोकेर। 
खाली, “पर्ब बेलाक माता, मिँर मचिन्‍या ओछ्यास लिज़्‍या,” है लिकेर। 
हाः बेलाक येसु बेथानिया नाखारल तोबो सिमोन यादोज़्‍याव कुऱीए उझ़िमक उलिज़्‍याव। 
येसुए नो झ़िमक काँ उज़्‍युज़्‍याक तोबो मेंमाए बनै चाव ज़िम्‍ज़ा लुँ जाल उसी ङरो बनै ओएः ल्‍यो म़ास रैद येसुए ओङ़ैत ओपो·स ज़ थीदिक्‍यो। 
येसुए उसिसराए निताव रँःद जाँ यारिस चोद, “आव मेंमाए काराव नाः ओएः ल्‍यो म़ास खेर ओझाःज़्‍याव? 
बुरू नोलाई यो·द नो पैसाए काता ज़ माल्‍योरालाई भाःद ओराएकिन तान्‍या ओल्‍यो,” है यालिज़्‍याव। 
येसुए थैद, “काराव आव मेंमाए उयुँ केःद जेएज़्याव? नोए ते ङाजूँनी बनै चाव य़ेन दोक्‍यो। 
काता ज़ माल्‍योर ते जेस एकतार ज़ लिज़्‍यार, ङा ते जेस एकतार लिन्‍या ङामाले। 
आवए ङाक्‍याँताव थीद ओयाँव म़ास, ङा मासिद ज़ गादैन्‍या छ्यामकावए जूँनी ङामोरोलाई थीद ओयाँव मिताव ज़ ताके। 
है जैद ङा जेलाई साचो है ङादाचिज़्‍या, संसार भरिल जोङ जोङ आव चाव था यारासथैज़्यार, होङ होङ आव मेंमाए ओदोव य़ेन थास्‍द उमिन ब रहिन्‍या ले।” 
नकिन बाह्र जना उसिसरानी यहूदा इस्‍करियोत मुख्‍या पुजारीराए ल्‍योक बाद, 
“ङा येसुलाई जेकुइत पारैद ङायाचिकिन ङालाई काता जेयाँके?” है ओरादोक ते, नोर खुसी ताद चाँदीए पैसा तीस गोता एकेर। 
हाःकिन नोए येसुलाई धोका यान्‍या मौका खिम्‍क्‍यो। 
हाःत ज़ माँदा भरेस ज़्‍यान्‍या पर्ब सुरू ओतावत उस॰कताव छ्याम येसुए उसिसर ओल्‍योक हुद, “नँ कै नलिज़्या, आव पर्ब मानिन्‍याए जूँनी ज़्‍यावर काङ्क जैनान्‍या?” है यादोक ते, 
येसुए, “नो सहरल बाचिकेदा, नक तोबो मिँस दैसिन्‍या जेले। नोलाई, ‘गेगुर्बाए है दींज़्‍याव, ओल बान्‍या बेला ताद ले दी। है जैद गे उसिसरास आव पर्ब नझ़िमक मानिउ पैंज़्‍याव,’ है दोच्‍यो,” है दाद यापरींक्‍यो। 
येसुए है ओरादोव मिताव ज़ उसिसराए पर्बताव ज़्‍याव भरी जैकेर। 
हो छ्याम ऱिमक येसु बाह्र जना उसिसरास नो झ़िमल दुप्‍सिद ज़्‍यान्‍याए जूँनी च़ुसिकेर। 
ज़्‍यावर याज़्‍युज़्‍याक येसुए, “ङा जेलाई साचो है ङादाचिज़्‍या, जेनी तोबोए ङालाई धोका यान्‍या ले,” है ओरादोक ते, 
उसिसर यागहरास, “ङा ते माताखेहो सा, प्रभु,” है लिद पालास है दोकेर। 
नाःत ज़ येसुए, “जोए ङास भरेस चिपल छोइद ज़्‍युज़्‍याव, हो ज़। 
ङा मिँ मिन्‍सिउए ते धर्मसास्‍त्रलाव सर्सिउ दुखर जुनी ब सयो·व ज़ परिए, खाली ङालाई धोका याज़्याव मिँलाई ते थैए माँतकन ज़ लिज़्‍या। निताव मिँ बुरू ओमाजर्मिकिन तान्‍या ओल्‍यो,” है ओरादोक ते, 
नो धोका याव पैंज़्‍याव यहूदा ओल ज़ पर्सिद, “सैं ङा ओताव, गुर्बा?” है ओदोक ते, येसुए, “हैज़, नँ ज़ है नलिके,” है दोक्‍यो। 
नकिन नो याज़्‍युज़्‍यावत ज़ येसुए उकुइत भरेस तोबो रैद, असिक ऩिद नो भरेसलाई केःद, “हाँ, आव ज़्‍युचिके। आव ङाक्‍याँ ज़,” है दाद भाःद याएक्‍यो। 
हो मिताव ज़ फरी खुरी उकुइत रैद धन्‍याबाद चरैःद, “जे प़ाइँए आव खुरीनी ज़ ओचिके,” है लिद नोरालाई याद, 
“आव जेओज़्‍याव कुधु मिँराए पाप क्‍याल्‍द्यान्‍याए जूँनी ङासोभोरिज़्‍याव ङाझी ज़। आनी ज़ परमेस्‍वरए जेस साःरो बाचा नैद्याचिरिज़्‍याव। 
ङा जेलाई है ङादाचिज़्या, ङा स्‍वर्गताव ङाबाबुए ओराज्‍याल जेस सिप गेमातावा पै आव भत्‍यारलाव दाखमद्य आछिमकिन ओन्‍या ङामाले,” है यादोक्‍यो। 
नकिन भजन तोबो गैद ननी पुलुस्‍द जैतून दाँदादा बाकेर। 
नक याकेसोत येसुए उसिसरालाई, “जे आछिम रील ज़ ङालाई प़ाइँए ऱास्‍न्‍या जेले। धर्मसास्‍त्रल इताव सर्सिउ लिज़्‍या, ‘बेधाराए यार्गे गावलालाई प़ोद ङासैःवत, बेधार चितराँ पुतराँ तारिज़्‍यार।’ 
हैदी ब सिउनी सैंसिद जेङ़ादा ज़ गालीलल ङाबारिज़्‍या,” है यादोक्‍यो। 
हाःत ज़ पत्रुसए, “उपुर्कावराए प़ाइँए याऱास्‍निदी ब ङा ते नँलाई खर्क ज़ ऱास्‍न्‍या ङामाले,” है ओदोक ते, 
येसुए, “ङा नँलाई साचो है ङादींज़्‍या, आछिम रील ज़ भाल्‍या ओमाकोद ङालाई स़ोंखेप ‘ङामासरेसे’ है दान्‍या नले,” है ओदोक ते, 
पत्रुसए फरी, “माःक, ङा नँस सिन्‍या ओतादी ब ङा नँलाई ङामासरेसे है लिन्‍या ङामाले,” है दोक्‍यो। उपुर्कावराए मनी हैज़ लिकेर। 
नकिन येसु उसिसरास गेतसमनी यादोज़्‍याव बगैचाल बाद उसिसरालाई, “ङा जाँ होकसैकावक बाद ङापोंखारिवा पै जे आक ज़ लिच्‍यो,” है दाद, 
पत्रुस स़ोनो जब्‍दियाए ओज़ानी याकूब स़ोनो यूहन्‍नारालाई ओलस यालाँक्‍यो। हाःत ज़ येसु उयुँर स्‍यासे सतेद धो थाइव तानाद, 
नो स़ोम्‍लोरालाई, “ङायुँर स्‍यासे तेद सिवा सिवा ताद ङाले। जे आक ज़ लिद ङास सैंसिद लिचिके,” है दाद, 
नोराकिन छ्यावा होकसै बाद नामक फुलुप्‍सिद अइ लिद पोंखारिक्‍यो, “अ बाबु, आव ङाक्‍याँत हुरिज़्‍याव धो सहिउ दुखर भर्सकी वैंद्याँके। खाली ङा ङायुँ माःक, नँ नयुँ ओताकिन वाज़,” है लिद, 
नो स़ोम्‍लोराए ल्‍योक उहुवत नोर ङ़ल्‍द यालिज़्‍याव दैहुद पत्रुसलाई, “जे कै जैद ङास तघन्‍ता पै ब जेमालिधुज़्‍याव? 
सैंसिद पोंखारिचिके, म़ानी दुखराल जेमाथ॰रिधुया। जेयुँए ते दान्‍या ज़ पैंज़्‍याव, खाली पाखाताव जेक्‍याँए ते मासहिधुन्‍या ओछ्यास लिज़्‍या,” है दोक्‍यो। 
नकिन येसु फरी ब ङ़ादाङाव ओपोंखारिज़्‍याव पोक बाद अइ लिद पोंखारिक्‍यो, “ङाबाबु, आव ङाक्‍याँत हुरिज़्‍याव धो सहिउ दुखर ङा मासहिद ज़ मातान्‍या ओल्‍यो ताकिन, है नलिज़्‍याव मिताव ज़ ओताक,” है लिद, 
नो स़ोम्‍लोराए ल्‍योक उहुक फरी ङ़ल्‍द यालिज़्‍याव ज़ यादैक्‍यो। नोराए यामीर बनै पातिद मासहिधुकेर। 
है जैद नोरालाई ख्‍यानैद फरी ब ङ़ादाङाव पोक बाद ङ़ादाकिनकाव मिताव ज़ पोंखारिक्‍यो। 
नकिन फरी नो स़ोम्‍लोराए याल्‍योक हुद, “आःपै जेमीर मायो·ताए रो? अब ते ङा मिँ मिन्‍सिउ पापीराए कुइत सूँपिसिन्‍या बेला हुके। 
च्‍याँःसिचिके, गेबा। ङालाई धोका याज़्‍याव मिँ नक ज़ हुद ले,” है यादोक्‍यो। 
येसु ओपाँज़्याक ज़ नो बाह्र जना उसिसरानिकाव यहूदा इस्‍करियोत बनै माहोल्‍या मिँरास तरवालीर खोंतार रैद हुकेर। नोर मुख्‍या पुजारीर स़ोनो यहूदीराए यास़ेरराए ल्‍योनी हुवर याल्‍यो। 
नो इस्‍करियोतए ङ़ादा ज़ नो क्‍योःना हुज़्‍यावरालाई, “ङा जोलाई माइँ ङादोए, होलाई ज़ क्‍योःच्‍यो,” लिद सरेस याद ओरानैज़्‍याव। 
है जैद बगैचाल याकेसो प़ाइँना इस्‍करियोत येसुए ल्‍योक बाद, “जेरो गुर्बा,” लिद माइँ दोक्‍यो। 
हाःत ज़ येसुए, “अ ङानैं, ङाक्‍याँत नदान्‍या दोके,” है ओदोव प़ाइँना ज़ नो माहोल्‍यार हुद येसुलाई ताप तप क्‍योःकेर। 
हाःत ज़ येसुसकाव तोबोए ओतरवाली हाइद प्रधान पुजारीए ओनोकोरलाई तँनिकाव ओर्ना पल्‍द सतेदिक्‍यो। 
येसुए निताव रँःद, “नतरवाली उसिपल झाःके। तरवाली चलैज़्‍यावर तरवालीनी ज़ सिरिज़्‍यार। 
ङा ङाबाबु परमेस्‍वरस ङाऩिकिन बाह्र पल्‍तन ओचाकर्‍यार तादी ब ङालाई परींद्यान्‍या ले, नो जेमासैंए रो? 
खाली निताव ङाऩिकिन आव ङाक्‍याँत ताव परिन्‍या धर्मसास्‍त्रलाव सर्सिउ पाँर कातानी ओयो·रिज़्‍याव?” 
नकिन येसुए नो क्‍योःना हुव माहोल्‍यारालाई, “काराव ङालाई दाँकालाई मिताव तरवालीर खोंतार दाद जेक्‍योःहुनाव? ङा जेलाई दिनकाव ज़ ध्‍यान झ़िमल परमेस्‍वरए ओपाँ ङासथैचिक जेमाक्‍योःनाके। 
खाली अगमबक्ताराए धर्मसास्‍त्रल यासरो मिताव सयो·न्‍याए जूँनी ची इताव ताके,” है ओरादोव प़ाइँना उसिस भरी येसुलाई ऱास्‍द चितराँ पुतराँ धोंःकेर। 
नकिन नो क्‍योःना हुवराए येसुलाई प्रधान पुजारी कैयाफाए ल्‍योक लाँकेर। नक सास्‍त्रीर स़ोनो यहूदीराए यास़ेरर दुप्‍सिद यालिज़्‍याव। 
नो बेलाक पत्रुस जाँ तादाङ याछीं याछीं हुद नो प्रधान पुजारीए ओचतराक ज़ हुद ‘येसुलाई कै याजैज़्‍याव ब्‍याँ?’ लिद पाल्‍याराए छ्योक ज़ च़ुसिके। 
नो झ़िमल मुख्‍या पुजारीर स़ोनो घ्‍योःव कचरीलाव स़ेर भरिए येसुए ओङ़ैत माचाहिउ पाँर झाःद सैःन्‍या कर याखिम्‍ज़्‍याव। 
धुत गोहाई पाँन्‍यार कुधु ज़ ताकेर, खाली कर ते कान्‍त ज़ मादैकेर। बल्‍ल प़ाइँरानी छींनी ऩेब्‍लो हुद, 
“आवए, ‘परमेस्‍वरए ओध्‍यान झ़िमलाई तैःद फरी स़ोंलात हिताव ज़ ङाजैरिज़्‍या,’ है ओल्‍यो गिन ज़ गिन्‍थैके,” है निरादोव प़ाइँना ज़, 
प्रधान पुजारी च्‍याँःसिद येसुलाई, “नँ नपाँ काता ज़ ओमालिज़्‍याव रो? आवनी नङ़ैत झाःद निईंव पाँ किताव उलिज़्‍याव?” है ओदोक ते, 
येसुए घाइ ज़ मादोक्‍यो। फरी प्रधान पुजारीए, “जींदो परमेस्‍वरए उमिननी है ङादींज़्‍या, नँ गेलाई है दासिके, नँ परमेस्‍वरए ओज़ा ख्रीस सैं माःक?” है ओदोक ते, 
येसुए, “नँ है नलिज़्‍याव मिताव ङा साचो हो ज़। तछा ङा मिँ मिन्‍सिउलाई माहान परमेस्‍वरए ओवोर्दा च़ुसिद ङालिज़्‍याव ब रँःन्‍या जेले, स़ोनो स्‍वर्गतिन बादलरास ङाहुज़्‍याव ब रँःन्‍या जेले,” है यादोक्यो। 
हो प़ाइँना ज़ प्रधान पुजारीए उरिसए ओक्‍वार चीए चीए, “जे ज़ जेथैके, आवए परमेस्‍वरए उमिन ओबले·ज़्याव। छुत गोहाई काता ओचाहिउ? 
जे कै जेलिज़्‍या?” है ओरादोक ते, नोराए प़ाइँए, “आवलाई सैःन्‍या ज़,” है लिद, 
ख्‍वाराए मुत्‍काए प़ोकेर, ख्‍वाराए लप्‍ताए प़ोकेर, ख्‍वाराए त़िल्‍केर। 
नै जैज़्‍यावराए फरी, “नँ साचो ख्रीस ताकिन, गेलाई है दासिके, नँलाई प़ोज़्‍याव सु?” है लिद बरे·केर। 
येसुलाई नै याजैज़्‍याक पत्रुस चतराक ज़ च़ुसिद उलिज़्‍याव। नो बेलाक ज़ तोबो नलाव य़ेन दाज़्‍याव मेंमा हुद पत्रुसलाई, “नँ मनी गालीललाव येसुस नल्‍यो सानी,” है ओदोक ते, 
पत्रुसए प़ाइँए याङ़ाक, “नँ काता नपाँज़्‍याव इताव, ङा ते ङामासैंए,” है दाद, 
साँबिलाक उच़ुसिनाक फरी छुत तोबो य़ेन दाज़्याव मेंमा हुद नक लिज़्‍यावरालाई है यादोक्‍यो, “आव मिँ ते नासरतलाव येसुसकाव ज़,” है ओरादोक ते, 
पत्रुसए किर्‍या झाःद, “ङा नो है नलिज़्‍यावलाई सरेस ज़ ङामासरेसे,” है दोक्यो। 
फरी छ्यावाक नक लिज़्‍यावर पत्रुसए ल्‍योक हुद, “नँ साचो उसिसरासकाव ज़, नपाँनी ज़ गेसरेस्‍निज़्‍या,” है यादोक ते, 
पत्रुस बनै थल्‍सिद किर्‍या झाःद, “ङा नो मिँलाई सरेस ज़ ङामासरेसे,” है ओरादोव प़ाइँना ज़ भाल्‍या कोके। 
नाःत ज़ ङ़ादा येसुए पत्रुसलाई, “भाल्‍या ओमाकोद ज़ ङालाई स़ोंखेप ‘ङामासरेसे’ है लिन्‍या नले,” है ओदोव पाँ ब चेतैक्‍यो। नो चेतैद पत्रुस लाँःक पुलुस्‍द धस धस घर्के। 
