﻿मत्ती.
22.
येसुए नोर यारसिउ रँःद अइ लिद घर्ती तोबो झाःद याएक्‍यो, 
“स्‍वर्गताव राज्‍या ते तोबो राजा स्‍यासो लिज़्या। नोए खेपा ओज़ाए उबिह्‍याए जूँनी भत्‍यार जैद, 
ओनोकोररालाई नो भत्‍यारल हुन्‍या सोर ओरायोरालाई खुल्‍नाव यापरींक्यो दी। नो सोर दैवर झन हुव माभैंःकेर दी। 
है जैद फरी ब छुत ओनोकोररालाई खुल्‍द, ‘जे नो सोर दैवराए ल्‍योक फरी ब बाद, ‘राजाए जेजूँनी सोइव सोइव मारर सैःद ज़्‍याव भरी जैधुक्यो दी, जे काचाबुल ज़ बान्‍या दी,’ है यारादोनाचिके,’ लिद यापरींक्‍यो दी। 
नोर झन सोर माथैव मिताव जैसिद याय़ेन माऱास्‍द ख्‍वार याएँःदा, ख्‍वार बेपार दाना बाकेर दी। 
ख्‍वाराए झन नो क़िना बाव ओनोकोररालाई क्‍योःद बीज्‍यात जैद यारासैःकेर दी। 
“छींनी नो राजाए नो भरी थैद उरिस चोद उसिपाईंर परींद नो सैःज़्‍यावरालाई खदम जैद यानाखारलाई ब मेंः लैद याराएकेर दी। 
नकिन नो राजाए ओनोकोररालाई खुल्‍द, ‘भत्‍यार भरी जैसिधुके, नो सोर दैवर भत्‍यार ज़्‍यान्‍या स्‍यासोर माताकेर। 
है जैद जे येम जीदा बाद जो जोर जेरादैज़्‍या, हो होर ज़ भत्‍यारल यारारैच्‍यो,’ है दाद यापरींक्‍यो दी। 
है जैद नो ओनोकोरर येम जीदा बाद चाव माचाव यारादैव भरी दुप्‍द भत्‍यारल यारारैकेर दी। नोर राजाए उझ़िमल तसी ज़ ब्‍याल्‍केर दी। 
“नकिन राजा ओपाहुनारास दैसिना हुके दी। नल तोबोलाई बिह्‍यालाव क्‍वा माक्‍वाइसिउ रँःद, 
राजाए नोलाई, ‘ङानैं, बिह्‍यालाव क्‍वा माक्‍वाइसिद कै जैद आल नपसिहुव?’ है ओदोक ते, नो मिँ लोलोतोःव ज़ ताके दी। 
हाःत ज़ नो राजाए ओनोकोररालाई खुल्‍द, ‘आवलाई उखँ उकुइ किद लाँःकाव चुम चुमोल ख्‍यानाचिके। नल ओहार ङर ङर कैद चिर चिर क़िद गघर्क।’ ” 
येसुए नो घर्ती नत ज़ तुपैद, “हिताव ज़ खुल्‍सिउर कुधु ज़ लिज़्‍यार, छाँतिसिउर ते छ्या ज़ लिज़्‍यार,” है यादोक्‍यो। 
नो पाँर थैद फरिसीराए, “येसुए ओपाँ कान्‍नी क्‍योःद गेएके?” लिद गुमुस्‍ता दाद, 
यासिसर स़ोनो हेरोद राजासकावरालाई येसुए ल्‍योक यारापरींकेर। नोर ओल्‍योक बाद, “गुर्बा, नँ गेस नपाँज़्याव भरी साचो वाज़ लिज़्‍या। परमेस्‍वरए ल्‍योदा बान्‍या येम ब साचोस नपैसिज़्या। मिँ रँःद ब नमादोए, सुए ल्‍योदा ब नमाजैसिए। 
है जैद गेलाई तोबो पाँ है दाव ताके, माहाराजालाई गे सिर्मा यान्‍या सैं मायान्‍या?” है यादोक ते, 
येसुए नोराए याचाल सैंद, “ए कैफतीर, ङालाई काराव जेजाँचिनाज़्‍याव? 
सिर्मा फो·न्‍या पैसा ङालाई तोबो सतैंद्याँचिके,” है ओरादोक ते, पैसा रैदिकेर। 
येसुए फरी, “आत सुए उसुरूप, सुए उमिन उलिज़्‍याव?” है ओरादोक ते, 
“माहाराजाए उमीं ज़,” है दोकेर। नकिन येसुए, “हो ची ताकिन्‍दा माहाराजाए उमीं भरी माहाराजालाई ज़ एच्‍यो, परमेस्‍वरए उमीं भरी परमेस्‍वरलाई ज़ एच्‍यो,” है ओरादोक ते, 
नोर अचम्‍ब ताद नोलाई ऱास्‍द बाकेर। 
नकिन हो छ्याम ज़ सदुकीर ब येसुए ल्‍योक तोबो पाँ है दोहुकेर। सदुकी है यारादोज़्‍यावराए ‘सिउकिन सैंसिन्‍या माताए’ है यालिज़्‍याव। 
है जैद नोराए, “गुर्बा, मोसाए ओकानुनल तोबो अइ लिद सर्सिउ लिज़्‍या, ‘तोबोए ज्‍या दाद ज़ार मादैद उसिकिन, ओभाइए ओदाज्‍युए ओथोर माफ्या·न्‍याए जूँनी ओमारूमलाई ओरैवक।’ 
किताव गेस तोबोए ओज़ार सात भाइ याल्‍यो। यादाज्‍युए ज्‍या दाद ज़ार मादैद ज़ सिके। ओज़ार यामाल्‍योए ओज्‍या ओभाइलाई ख्‍यानैदिक्‍यो। 
फरी होए उधूँलावए नो ओमारूमलाई रैद नो मनी ज़ार मादैद ज़ सिके। नकिन साइँला मनी हिताव ज़ ताके। नितावनी ज़ नो मेंमालाई सात भाइए ज़ रैकेर। नोर प़ाइँ ज़ार मादैद ज़ सिकेर। 
प़ाइँरानी छींनी नो मेंमा ब सिके। 
है जैद नो मेंमा सात भाइए याज्‍या ओतावए अजम्‍बरी जुनील काताकावए याज्‍या तान्‍या?” है लिकेर। 
हाःत ज़ येसुए, “जे धर्मसास्‍त्रलाव पाँ मातीद परमेस्‍वरए ओसक्ती ब जेमाथ·रैधुवए ज़ चबनै बिरैद जेनै। 
अजम्‍बरी जुनील सुए ज़ ज्‍या ब मादोर, रे ब मादोर। प़ाइँ ज़ स्‍वर्गताव चाकर्‍या स्‍यासोर ताज़्‍यार। 
है जैद जे ‘सिउकिन सैंसिन्‍या माताए’ है ल्‍यो पैंज़्‍यावर आव धर्मसास्‍त्रलाव परमेस्‍वरए ओपाँव पाँ थैचिके, 
‘ङा अब्राहामए ओपरमेस्‍वर, इसहाकए ओपरमेस्‍वर स़ोनो याकूबए ओपरमेस्‍वर ज़।’ है जैद मोरोराए यापरमेस्‍वर माःक, जींदो तावराए यापरमेस्‍वर ची,” है लिद यासथैक्‍यो। 
नक लिज़्‍याव माहोल्‍यार येसुए ओपाँ थैद अचम्‍ब ताकेर। 
येसुए सदुकीरालाई थाम थुम ओराख्‍याव थैद नक लिज़्‍याव फरिसीर दुप्‍सिद, 
कानुनलाव तोबो यागुर्बालाई येसुलाई जाँचिना परींकेर। नोए येसुलाई, 
“गुर्बा, कानुन भरिरानी प़ाइँरानी दान्‍या काताकाव उलिज़्‍याव?” है ओदोक ते, 
येसुए, “ ‘जेयुँलाई आदा होदा मादुलैद, जेर्सा माम़ोंद, जेप्रभु परमेस्‍वरए ल्‍योदा युँ थू जैद ओललाई वाज़ मया दान्‍या।’ 
प़ाइँरानी ङ़ात दान्‍या य़ेन नो ज़। 
होए उधूँलाव य़ेन ब हो मिताव ज़, ‘जेक्‍याँलाई किताव जेसमारिज़्‍या, छुतलाई ब हिताव ज़ समारिन्‍या।’ 
मोसाए ओकानुन भरी स़ोनो अगमबक्ताराए यासरो भरी ब आव ऩेब्‍लोत थोम्‍सिज़्‍या,” है दोक्‍यो। 
नकिन नो दुप्‍सिद लिज़्‍याव फरिसीरालाई येसुए, “जे ङालाई है दाँचिके, 
ख्रीस सुए ओथोलाव ओताज़्याव है जेलिज़्‍या?” है ओरादोक ते, “दाऊदए ओथोलाव ज़,” है दोकेर। 
येसुए फरी, “दाऊदए ओथोलाव वाज़ ओताकिन कै जैद धर्मसास्‍त्रल ओल दाऊदए मनी परमेस्‍वरए उपुरूसनी ओपाँक ख्रीसलाई ‘ङाप्रभु ज़’ है ओदोज़्‍याव? नो धर्मसास्‍त्रलाव ओपाँव आव ज़, 
‘परमेस्‍वरए ङाप्रभुलाई, ‘नसुतुररालाई नखँ धूँल झाःद ङामाईंवा पै, ङावोर्दा च़ुसिद लिन्‍के,’ है दोक्‍यो।’ 
है जैद ओल दाऊदए ब ख्रीसलाई ‘ङाप्रभु ज़’ है ओदोकिन नो कै जैद दाऊदए ओथोल वाज़ उगनिसिज़्‍याव?” है ओरादोक ते, 
येसुस सु ज़ मापाँधुकेर। हो छ्यामकिन ज़ सुए ज़ येसुस पाँन्‍या आँत मादोकेर। 
