﻿मत्ती.
18.
हो बेलाक ज़ येसुए उसिसर ओल्‍योक हुद, “स्‍वर्गताव राज्‍याल प़ाइँरानी घेप्‍पा सु गेलिज़्‍याव?” है यादोक ते, 
येसुए तोबो ज़िम्‍ज़ा ल़ुज़ालाई रैद याङ़ाक सच्‍याँद, 
“जेलाई साचो है ङादाचिज़्‍या, जे जेयुँर त़ोद ल़ुज़ा मिताव जेमातावा पै स्‍वर्गताव राज्‍याल पसिउ दैन्‍या जेमाले। 
जो आव ल़ुज़ा मिताव मासघ्‍योःसिद सज़िम्‍सिज़्‍या, हो ज़ स्‍वर्गताव राज्‍याल घेप्‍पा ताज़्‍या। 
फरी जोए ङामिनत आव मिताव ज़िम्ज़ारालाई यासुम्‍ज़्‍याव, होए ङालाई ब सुम्‍नाज़्‍याव। 
फरी जोए आव मिताव ङालाई यायुँ हुबो ज़िम्‍ज़ारालाई पापल ओरापारैकिन, नितावलाई ते बुरू ओधेंल राँथै सुर्द्याद समुन्‍द्रल ख्‍यान्‍या पाथ लिज़्‍या। 
पापल पारैज़्‍याव पाँराए जूँनी आव मानुवालाई थैए माँतकन ज़ लिज़्‍या। निताव पाँर ते जुनी ब हुन्‍या ज़ लेर, खाली निताव पाँर पले·ज़्यावलाई थैए माँतकन ज़ लिज़्‍या।” 
“नखँए तादी ब नकुइए तादी ब माचावल ओपारैनिकिन च़म्‍द ख्‍याके। नो नखँ नकुइए माजिप्‍तिन्‍या मेंःल ख्‍याव ओदोज़्‍याव देखा बुरू अजम्‍बरी जुनील थूँद्यासो पसिन्‍या पाथ लिज़्‍या। 
हो मिताव ज़ नमीए माचावल ओपारैनिकिन, नो नमीलाई कोला·द ख्‍याके। नो नमीए नर्गलाव मेंःल ख्‍याव ओदोज़्‍याव देखा बुरू परमेस्‍वरए ओराज्‍याल काना ताद पसिन्‍या पाथ लिज़्‍या। 
है जैद जे आव मिताव ज़िम्‍ज़ारालाई सुए ज़ तारासोच्‍यो। नोरालाई समारिज़्‍याव परमेस्‍वरए ओचाकर्‍यार एकतार ज़ स्‍वर्गताव परमेस्‍वर ङाबाबुए ओङ़ाक ज़ लिज़्‍यार,” है यादोक्‍यो। 
“है जैद ङा मिँ मिन्‍सिद हुवए म़ाव ङोइवरालाई साप्‍द परमेस्‍वरए ल्‍योदा लाँन्‍याए जूँनी ङाहुव ज़। 
जे कै जेलिज़्‍या? तोबोए ओबेधार तसय यालिकिन ननी तोबो फातिद ओङोइकिन नो उनान्‍सयरालाई बनल ज़ ख्‍यानैद नो ङोइवलाई खिम्‍नाज़्‍याखेहो सानी। 
ङा साचो है ङादाचिज़्‍या, नोलाई ओदैकिन नो माङोइव उनान्‍सयराकिन नो तोबोए ल्‍योदा झन उयुँ होलाँ ताद रेंज़्‍या। 
हो मिताव ज़ स्‍वर्गताव जेबाबुए ब इताव ज़िम्‍ज़ा तादी ब ‘तँदा बाद ताङोइक’ लिद उयुँ थू जैज़्‍याव।” 
“तोबो ननैंए मादान्‍या ओदोज़्‍याव नरँःकिन ङ़ादा नोलाई अलगज़ा ओखत सतैंदियो। नोए नपाँ थैद ओभैंःकिन नोलाई नबाँचैव मिताव ज़ ताके। 
फरी नोए नपाँ थैव ओमाभैंःकिन छुतर ब तोबो ऩेब्‍लो बाद सम्‍जैव ताके। धर्मसास्‍त्रल ब नोए उजूँनी इताव सर्सिउ लिज़्‍या, ‘छुतए ओङ़ैताव पाँ ऩेब्‍लो स़ोम्‍लोए यासाची ओखैकिन नो पाँ ज़ थ॰रिउ ताज़्‍या।’ 
नोए नोराए यापाँ ब ओमाभैंःकिन नोलाई परमेस्‍वरए उमिनताव भरिराए ङ़ाक ज़ है दाव ताके। नोराए यापाँ ब ओमाभैंःकिन नो मिँलाई परमेस्‍वरकिन तँदाङावरासकाव स़ोनो सिर्मा स्‍यो·ज़्यावरासकाव गनिउ ताके। 
है जैद ङा जेलाई साचो है ङादाचिज़्‍या, जे आव मानुवात जो जेथ·रैज़्‍या, स्‍वर्गत ब हो ज़ थ॰रिन्‍या ले। फरी, आव मानुवात जो य़ेन मादान्‍या जेथ·रैज़्‍या, स्‍वर्गत मनी हिताव ज़ थ॰रिन्‍या ले। 
फरी ङा जेलाई है ङादाचिज़्या, आव मानुवात ऩेब्‍लोए वाज़ तयुँ जैद काताराए जूँनी जेपोंखारिकिन, नो जेपाँ स्‍वर्गताव ङाबाबुए सयो·द्यान्‍या ले। 
है जैद जोक तादी ब ङामिनत ऩेब्‍लोकिन यादा जेदुप्‍सिकिन ङा ब जेस ज़ ङातारिज़्‍या।” 
नकिन पत्रुस येसुए ल्‍योक बाद, “प्रभु, तोबोए ङाउपर्त मादान्‍या ओदोकिन, नोलाई ङा खापाला ऱास्‍न्‍या, सात पाला सैं खापाला?” है ओदोक ते, 
येसुए, “ङा नँलाई सात पाला वाज़ है ङामादींए। नोकिन झन सत्तरी दोबोर सात पाला ऱासो ताके है ङादींज़्‍या। 
“है जैद स्‍वर्गताव राज्‍या तोबो राजाए ओनोकोररास हिसाप ओसखैज़्‍याव मिताव लिज़्‍या। 
नो राजाए निताव हिसाप ओसखैज़्‍याक तोबोए ओलाँव दस हजार सुनए सिक्‍कालाव तुम्‍सुक पुलुस्‍के दी। नोए उरिन ओमाफो·धुवए राजाए ओय़ेन दाज़्‍यावराए ओललाई ज़ राजाए ल्‍योक रैकेर दी। 
राजाए नोरालाई, ‘आवलाई ओज्‍या ओज़ारास स़ोनो ओलसकाव लिज़्‍याव भरी यो·द तादी ब जुनी ब सयो·द रैचिके,’ है यादोक्‍यो दी। 
नो नोकोरए आव थैद राजाए उखँत फुलुप्‍सिद, ‘जेरो प्रभु, ङालाई नयुँ ओनाक, छ्यावा पै कींनाके। तछा जुनी ब ङाफो·या ज़,’ है ओदोक ते, 
नो राजाए उयुँ नाद उतुम्‍सुक चीद्याद अइज़ ऱास्‍क्‍यो दी। 
नो नोकोर ते झन ननी पुलुस्‍द बाद, ओलस य़ेन दाज़्याव तोबो ओनैंए ल्‍योक तसय चाँदीए सिक्‍का ओकाछ थाँनाक्‍यो दी। नोलाई ओधेंनी क्‍योःद, ‘ङाकाछ नमाफो·रिज़्‍या?’ है ओदोक ते, 
नो ओनैं उखँत फुलुप्‍सिद, ‘जेरो ङानैं, ङालाई नयुँ ओनाक। छ्यावा पै कींनाके, तछा प़ाइँ ज़ ङायाँ,’ है ओदोक ते, 
माभैंःद, ‘हुकी नमासयो·वा पै झ्यालखानाल ल्‍यो ताके’ लिद झ्यालखानाल झाःक्‍यो दी। 
“ओनैंलाई नै ओजैव राजाए ओय़ेन दाज़्‍यावराए रँःद यायुँ बनै नाद राजाए ल्‍योक पैंनाकेर दी। 
नो पाँ थैद राजाए नो ओऱासो नोकोरलाई खुल्‍द, ‘ए हरामी, नँ ङास बिन्‍ती नदोक नङ़ैताव रिन भरी ख्‍याद ङाईंके। 
ङा किताव नँलाई ङायुँ नाद ङाऱास्‍निउ, नँ कै जैद नो नँस य़ेन दोज़्याव ननैंलाई नयुँ नाद नमाऱासो?’ है दाद, 
नो राजा रसिद ओऱासो रिन भरी फरी ब सुघुर्द प़ाइँ ओमाफो·वा पै झ्यालखानालाव हाकिमए उकुइत सूँपिक्‍यो दी। 
है जैद ङा जेलाई साचो है ङादाचिज़्‍या, हो मिताव ज़ स्‍वर्गताव ङाबाबुए मनी जे जेउपर्त मादान्‍या दोज़्‍यावलाई जेयुँल नैद जेमाऱास्‍किन जेलाई मनी हिताव ज़ जैचिरिज़्‍याव।” 
