﻿मत्ती.
11.
येसुए बाह्र जना उसिसरालाई आव पाँ भरी है दाद ओरापरींवत ओल मनी नलाव सहर सहर, नाखार नाखार जीदा परमेस्‍वरए ओपाँ यासथैनाक्‍यो। 
ऱील सछैंज़्‍याव यूहन्‍ना झ्यालखानाल उलिज़्‍याक ज़ ख्रीसए ओय़ेन भरी थैद तोबो ऩेब्‍लो उसिसरालाई येसुए ल्‍योक, 
“नो धर्मसास्‍त्रलाव सर्सिउ ‘हुरिज़्‍या’ है यालिज़्‍याव नँ ज़ रो, सैं छुतलाई कींन्‍या?” है दोनाव यापरींक्‍यो। 
येसुए नो है यादोव थैद नोरालाई, “आव ङादोव जेरँःव जेथैव भरी यूहन्‍नालाई है दोच्‍यो। 
‘यामी मारैंःवरालाई सरैंःद याएज़्‍याव, माबाधुन्‍यारालाई बाधुन्‍या याजैज़्‍याव, कुऱीरालाई यासगराँज़्‍याव, यार्ना माथासोरालाई थैधुन्‍या याजैज़्‍याव, सिउरालाई याजागैज़्‍याव, गरीबरालाई ब परमेस्‍वरए ओपाँ यासथैज़्‍याव,’ है दोनाच्यो। 
ङालाई रँःद यायुँ माकेःज़्‍यावर असिक दैवर लिज़्‍यार,” है दाद यापरींक्‍यो। 
नोर याबाव छींनी येसुए माहोल्‍यारालाई यूहन्‍नाए उजूँनी अइ यादोक्‍यो, “जे यूहन्‍नाए ल्‍योक बनल जेबाक नोलाई किताव जेरँःया? बतासए आदा फुलुपनी होदा फुलुप ओजैज़्‍याव छी स्‍यासो ते जेमारँःखेहो। 
हिताव ओमालिकिन किताव जेरँःया? सैं बनै चाव चाव क्‍वा क्‍वाइसिउ मिँलाई जेरँःव? निताव क्‍वा क्‍वाइसिज़्‍यावर ते दरबारल वाज़ लिज़्‍यार सानी। 
है जैद ओल्‍योक जेबाक नोलाई किताव जेरँःया? अगमबक्ता ज़ जेरँःखेहो सानी। ङा फरी है ङादाचिज़्‍या, अगमबक्ताकिन झन घेप्‍पालाई ज़ जेरँःके। 
नो यूहन्‍ना धर्मसास्‍त्रलाव सर्सिउ मिँ ज़। नोए उजूँनी सर्सिउ आव ज़, ‘ङाकत्‍वाल्‍यालाई नङ़ा नङ़ा परींद ङाईंज़्‍या। नजूँनी नोए नङ़ादा ज़ नयेम तयार जैदींरिज़्‍याव।’ 
है जैद ङा जेलाई है ङादाचिज़्‍या, मिँनी जर्मिउ भरिरानी ऱील सछैंज़्‍याव यूहन्‍नाकिन घेप्‍पा सु ज़ माले। हैदी ब स्‍वर्गताव राज्‍यालाव गोइँनी ताकिन ते प़ाइँरानी ज़िम्‍ज़ा नोकिन घेप्‍पा लिज़्‍या। 
है जैद ऱील सछैंज़्‍याव यूहन्‍नाए ओरासथैहुवकिन आक पै ज़ मिँर स्‍वर्गताव राज्‍याल पसिन्‍याए जूँनी याजिउ च्‍यो च्‍यो झाःद काला मुलु छुइसिनाज़्‍यार। फरी तँदा जैसिज़्‍यावर नोलाई हारैद वैंन्‍या बनै धामा दोज़्‍यार। 
मोसाए ओसरो कानुनलाव स़ोनो अगमबक्ताराए यापालाकिन यूहन्‍नाए ओपाला पैकाव यापाँव भरी ब हुज़्‍याव ख्रीसए उजूँनी ज़ ओल्‍यो। 
स़ोनो आव ब जेमातीधुरिज़्‍या, नो ख्रीसकिन ङ़ादा हुरिज़्‍या है यालिज़्‍याव एलिया ते नो यूहन्‍ना ज़। 
आव पाँ जोए थैन्‍या उयुँ लिज़्‍या, चावस ओथैवक।” 
येसुए फरी, “आव बेलाकाव मिँर कितावर यालिज़्‍याव लिक ते, बजार खार्ल रैःसिज़्‍याव ल़ुज़ा स्‍यासोर लिज़्‍यार। 
नोर यानैंरास गन्गनैद, ‘बाँसुली तप्‍द गेयाचिक ब जेमास़्‍याके, लँसिद गेयाचिक ब जेमाघर्के।’ 
हो मिताव ज़ ऱील सछैंज़्‍याव यूहन्‍नाए ज़्यान्‍यार ओमाज़्युक, ओन्‍यार ओमाओक नोलाई ‘दैनी परिद ले’ है दोज़्‍यार। 
ङा मिँ मिन्‍सिद हुवए फरी ज़्‍यान्‍यार ङाज़्‍युक, ओन्‍यार ङाओक, ‘चिऊचिके, काता ज़ मानैज़्‍याव ज़्‍यास्‍ती, दाखमद्य ओए ओए बाऱिज़्‍याव, सिर्मा स्‍यो·ज़्‍याव पापीराए यानैं’ है दाँज़्‍यार। हैदी ब ङा ङागहक थ॰रिउ लिज़्‍या लिन्‍या ङाय़ेनए ज़ थ·रैज़्‍याव।” 
नकिन येसुए अचम्‍बलाव ओय़ेन सतैंद ओरायो सहरलाव मिँराए यायुँ यामाफर्कैवनी नोरालाई अइ लिद यासिङार्क्‍यो, 
“जे खोराजीन स़ोनो बेथसेदालावरालाई थैए माँतकन ज़ लिज़्‍या। जे जेरँःव परमेस्‍वरए ओसक्तीलाव य़ेनर तुरोस स़ोनो सीदोनलावराए यारँःव ताकिन आः झरी यापापए जूँनी यायुँ माचाव दाद बर्ला सुर्सिद धुलील च़ुसिद यायुँ फर्कैद यापापर ऱास्‍धुखेरहो। 
है जैद परमेस्‍वरए फाल्‍न्‍या छ्याम जेकिन बुरू तुरोस स़ोनो सीदोनलावरालाई सहिधुन्‍या तारिज़्‍या। 
“हिताव ज़ फरी जे कफर्नहुमलाव मिँर, स्‍वर्गत केसो मितावर जेङम्सिज़्‍या, झन नर्गल ज़ बान्‍या जेले। जेल्‍योङाव अचम्‍बलाव य़ेनर सदोम सहरल सतैंद ङारायो ताकिन नो सहर आःपै रहिन्‍या ओल्‍यो। 
है जैद जेलाई है ङादाचिज़्‍या, परमेस्‍वरए फाल्‍न्‍या छ्याम जेकिन बुरू सदोमलावरालाई सहिधुन्‍या तारिज़्‍या।” 
नाःत ज़ येसुए परमेस्‍वरलाई, “अ बाबु, नाम नमलावराए याङ़ैताव, नँलाई धन्‍याबाद ङाचरैःनिज़्‍या। नँ नपाँर सैंन्‍या जैसिज़्‍यावर, याबुद्धी ल्‍यो जैसिज़्‍यावरालाई सतैंद मायाद, भाउज़ा मितावरालाई सतैंद नराएके। 
हैज़ बाबु, नल्‍योदा बान्‍या येम नो ज़ चाव नथ·रैके,” है लिद पोंखारिक्‍यो। 
नकिन येसुए, “ताव भरी ङाबाबुए ङाकुइत ज़ याद नैनाव। किताव परमेस्‍वरए वाज़ ओज़ालाई सरेस्‍ज़्‍याव, हिताव ज़ ओज़ाए वाज़ परमेस्‍वरलाई सरेस्‍ज़्‍याव। है जैद ङा छुतलाई सतैंद ङाएकिन वाज़ होए परमेस्‍वर ङाबाबुलाई सरेस्‍धुज़्‍याव। 
जे व़ीनी फुइ ताद थलिद लिज़्‍यावर, ङाल्‍योक हुद जेर्सा नैचिके, ङा जेयुँर होलाँ जैद्यान्‍या ङाले। 
ङाकुम नधेंल झाःद ङास सिऊसिन्‍के। ङा ङायुँ य़ालो स़ोनो ङायुँ नाज़्‍याव ङालिज़्‍या। है जैद जे ङाल्‍योक जेहुकिन जेस॰ होलाँ तान्‍या ले। 
ङाकुम ब सजालो लिज़्‍या, ङागुर ब बोमो लिज़्‍या,” है यादोक्‍यो। 
