﻿VITOUULA.
5.
Baisa yagasi matausina Adam tubula. (Avai tuta Yaubada eibubuli mina watanawa ibubuli makawala kala gigisa titoulela. 
Matauna ibubuli matausina tau deli vivila, ikabwaili matausina e idoki yagasi “Tomota.”) 
Avai tuta Adam kala taitu iboda 130, matauna iuni guditala latula tau magudina kala gigisa makawala titoulela, e ivabu yagala Seti. 
E igau Adam isisu tuvaila 800 taitu. E matauna tuvaila iunai litula, 
e kala taitu komwaidona iboda 930 matauna ikaliga. 
Avai tuta Seti kala taitu iboda 105, matauna iuni guditala latula tau, yagala Inosi, 
e igau isisu tuvaila 807 taitu. E matauna tuvaila iunai litula, 
e kala taitu komwaidona iboda 912 matauna ikaliga. 
Avai tuta Inosi kala taitu iboda 90, matauna iuni guditala latula tau, yagala Kenani, 
e isisu tuvaila 815 taitu. E matauna tuvaila iunai litula, 
e kala taitu komwaidona iboda 905, matauna ikaliga. 
Avai tuta Kenani kala taitu iboda 70, matauna iuni guditala latula tau, yagala Maalaleli, 
e isisu tuvaila 840 taitu. E matauna tuvaila iunai litula, 
e kala taitu komwaidona iboda 910 matauna ikaliga. 
Avai tuta Maalaleli kala taitu iboda 65, e matauna iuni guditala latula tau, yagala Yaredi. 
E isisu tuvaila 830 taitu. E matauna tuvaila iunai litula, 
e kala taitu komwaidona iboda 895 matauna ikaliga. 
Avai tuta Yaredi kala taitu iboda 162 matauna iuni guditala latula tau, yagala Inoki, 
e isisu tuvaila 800 taitu. E matauna tuvaila iunai litula, 
e kala taitu komwaidona iboda 962 matauna ikaliga. 
Avai tuta Inoki kala taitu iboda 65 matauna iuni guditala latula tau, yagala Metusela. 
E Inoki isisu tuvaila 300 taitu, e iveyawa deli Yaubada. E matauna tuvaila iunai litula; 
matauna kala taitu komwaidona iboda 365. 
Matauna itugwali la tuta komwaidona deli wala Yaubada, e oluvi matauna itamwaumakava wala, paila Yaubada bogwa leikau matauna leilau. 
Avai tuta Metusela kala taitu iboda 187, matauna iuni guditala latula tau, yagala Lameki, 
e isisu tuvaila 782 taitu. E matauna tuvaila iunai litula 
e kala taitu komwaidona iboda 969 matauna ikaliga. 
Avai tuta Lameki kala taitu iboda 182, matauna iuni guditala latula tau, 
e ikaibiga kawala, “Metoya pwaipwaia makwaina, makwaina goli Guyau eibuloti e gwadi magudina igau bikiminum komwaidona kada mmayuyusi metoya komwaidona da pwaitukulasi,” mapaila ivabu yagala Nowa. 
Lameki isisu tuvaila 595 taitu. Matauna tuvaila iunai litula 
e kala taitu komwaidona iboda 777 matauna ikaliga. 
Avai tuta Nowa kala taitu iboda 500, matauna iunai litula taitolu, yagasi Sem, Am, deli Yapeta. 
